Quiche /1 Are c'u ri Dios cuk'alajisaj chkawach chi cujulok'ok'ej; Aretak c'a uj ajmaquib, ri Cristo xcam rumal kech. C'a maja' ri nimak'ij re ri pascua, ri Jesus retam chi cape na ri k'ij aretak quel bic cho we uwachulew ri', cabe ruc' ri Tataxel; Ri Jesus e u lok'ok'em c'u ri winak ri e rech ri e c'o cho ri uwachulew, xebulok'ok'ej c'a pa ri q'uistajic. Xukuje' ri Jesucristo chuban ta tok'ob chiwe; Are ri jicalaj k'alajisanel, ri nabe ri xc'astaj chquixol ri caminakib, ri qui nimal ri ajawinelab re ri uwachulew; Ri are' cujulok'ok'ej, xujuch'aj ruc' ri u quiq'uel, xresaj ri ka mac. Ri Jehova ojer xuc'ut rib chnuwach, xubij chwe: Tzpa ri ojer tak k'ij catinlok'ok'ej, man caq'uis taj ri lok'ok'ebal nu c'ux chawe; Rumal wa' quel na nu c'ux chawe, pune in a xutum canok, xcha ri Jehova. Chi' cakil wi chi ri Dios sibalaj quebulok'ok'ej ri winak cho ri uwachulew, rumal rech chi xuya ri u C'ojol, ri xa jun, rech conojel ri quecojon che, man casach ta qui wach, xane cac'oji junalic qui c'aslemal. /2 K'alaj chquiwach conojel chi nim qui banic ri jastak re ri ka k'ijilanic che ri Dios ri man etamatal ta can nabe: Ri Dios xux winak, xul cho ri uwachulew, xk'alajisaxic chi suc' rumal ri Uxlabaxel, xilitaj cumal ri angelib, xtzijox chque ri gentiles, xecojon ri winak che, ri e c'o cho ri uwachulew, c'amom bi chicaj, xnimarisax u k'ij.