The New Testament of our Lord and Saviour Jesus Christ
1 Ju ani yuchi ixtapakaʼutʼan ju makʼaniya ixlacpaʼitni ju Jesucristo acsni tavanan quitsucuchilh ju ani tachi lapanac. Pus ju yuchi makʼaniya ixpapanti ixjunita ju David chai ju Abraham. 2 Pus ju Abraham alilh ju istsʼalh chai lhimapakaʼulh Isaac. Chai ju Isaac alilh ju istsʼalh chai lhimapakaʼulh Jacob. Chai ju Jacob alilh ju istsʼalh chai lhimapakaʼulh Judá. Vachuʼ alilh ju aliʼin isʼapʼisekʼen. 3 Chai ju Judá tʼaʼamaskʼatʼanalh ju Tamar. Alhimapakaʼulh ju istsʼalan Fares chai ju Zara. Pus ju Fares alilh ju istsʼalh chai lhimapakaʼulh Esrom. Chai ju Esrom alilh ju istsʼalh chai lhimapakaʼulh Aram. 4 Chai ju Aram alilh ju istsʼalh chai lhimapakaʼulh Aminadab. Chai ju Aminadab alilh ju istsʼalh chai lhimapakaʼulh Naasón. Chai ju Naasón alilh ju istsʼalh chai lhimapakaʼulh Salmón. 5 Chai ju Salmón tʼaʼamaskʼatʼanalh ju Rahab. Chai lhimapakaʼulh ju istsʼalh Booz. Pus ju Booz tʼaʼamaskʼatʼanalh ju Rut. Lhimapakaʼulh ju istsʼalh Obed. Chai ju Obed alilh ju istsʼalh chai lhimapakaʼulh Isaí. 6 Pus ju Isaí alilh ju istsʼalh chai lhimapakaʼulh David ju valh kʼai ucxtin. Pus ju kʼai ucxtin David tʼaʼalilh istsʼalh ju ixʼamachakaʼ ixjunita ju lijunto Urías. Chai talhimapakaʼulh istsʼalh Salomón. 7 Chai ju Salomón alilh ju istsʼalh chai lhimapakaʼulh Roboam. Chai ju Roboam alilh ju istsʼalh chai lhimapakaʼulh Abías. Chai ju Abías alilh ju istsʼalh chai lhimapakaʼulh Asa. 8 Chai ju Asa alilh ju istsʼalh chai lhimapakaʼulh Josafat. Chai ju Josafat alilh ju istsʼalh chai lhimapakaʼulh Joram. Chai ju Joram alilh ju istsʼalh chai lhimapakaʼulh Uzías. 9 Chai ju Uzías alilh ju istsʼalh chai lhimapakaʼulh Jotam. Chai ju Jotam alilh ju istsʼalh chai lhimapakaʼulh Acaz. Chai ju Acaz alilh ju istsʼalh chai lhimapakaʼulh Ezequías. 10 Chai ju Ezequías alilh ju istsʼalh chai lhimapakaʼulh Manasés. Chai ju Manasés alilh ju istsʼalh chai lhimapakaʼulh Amón. Chai ju Amón alilh ju istsʼalh chai lhimapakaʼulh Josías. 11 Chai ju Josías alilh ju istsʼalh chai lhimapakaʼulh Jeconías. Vachuʼ alilh ju isʼapʼisekʼen. Pus acsnich ju tatsuculh ju Jeconías chai isʼapʼisekʼen acsni tachʼin alhiʼancalh ju israelitanin ju xalacatʼun Babilonia. 12 Chai ju anch pus ju Jeconías alilh ju istsʼalh chai lhimapakaʼulh Salatiel. Chai ju Salatiel alilh ju istsʼalh chai lhimapakaʼulh Zorobabel. 13 Chai ju Zorobabel alilh ju istsʼalh chai lhimapakaʼulh Abiud. Chai ju Abiud alilh ju istsʼalh chai lhimapakaʼulh Eliaquim. Chai ju Eliaquim alilh ju istsʼalh chai lhimapakaʼulh Azor. 14 Chai ju Azor alilh ju istsʼalh chai lhimapakaʼulh Sadoc. Chai ju Sadoc alilh ju istsʼalh chai lhimapakaʼulh Aquim. Chai ju Aquim alilh ju istsʼalh chai lhimapakaʼulh Eliud. 15 Chai ju Eliud alilh ju istsʼalh chai lhimapakaʼulh Eleazar. Chai ju Eleazar alilh ju istsʼalh chai lhimapakaʼulh Matán. Chai ju Matán alilh ju istsʼalh chai lhimapakaʼulh Jacob. 16 Chai ju Jacob alilh ju istsʼalh chai lhimapakaʼulh José. Chai yuchach ju valhch ixpapa ju Malia ixnati ju Jesús ju Cristo juncan. Yuchi ju ixnoncan camalakachatachilh ju Dios. 17 Pus tus acsni tsuculh ju Abraham tus acsni tsuculh ju David quilhmaccautʼatʼi va ju tatsuculh ju lapanacni. Chai aquilhmaccautʼatʼi va ju tatsuculh tus acsni tsuculh ju David tus acsni alhiʼancalh ju israelitanin tachʼin ju xalacatʼun Babilonia. Chai aquilhmaccautʼatʼi va ju tatsuculh tus acsni alhiʼancalh tachʼin ju israelitanin ju xalacatʼun Babilonia tus acsni tavanan tsuculh ju Cristo. 18 Acsni tavanan lakʼaulhch ju Jesucristo pus chanich va. Pus yuchi ju Malia ju ixnati cajunaʼ va isʼasqʼuininticaʼ ixjunita ju José. Para acsni jantucaʼ ixtalatʼatsucui acsnich ju cʼatsacalh ni ixpacxanta ju isʼaskʼatʼa laʼixtachaput ju Spiritu Santu. 19 Pus ju José na ixnavi tachi ixnajun laʼixlhamapʼaksin ju Moisés chai ju anch ixlhikʼalhtsajui ni xamatiʼ va kʼaya calalh. Pus ixlhiyuchi ju José jantu ixtʼatamakʼaxtokputun ju Malia acsni cʼatsa ta yu ixjunita. Para jantu ixmamaxaniputun ju Malia lacatalhavat ni va cachivimakʼalh. Alai va sekch ixmacoʼulaputun. 20 Para acsni pastaclich ju chunch pus lana talacasunilh pumatam anquilh laʼilhtatat chai chani juni: ―José. Ju uxintʼi makʼaniya ixpapanti David unitʼa. Jantu atʼalhan. Jantu anauch ni jantu navipʼutʼun miʼamachakaʼ ju Malia. Pus ju tuchi pacxanta ixʼanuch ju Spiritu Santu. 21 Chai ju yuchi camaklokʼonach pumatam tsʼalh chai alhimapʼakʼaʼuyaʼich Jesús ni yuchach ju camakʼalhtaxtuyaʼ ixlapanacni laʼixʼalactuʼuntiʼan. ―Chunch ju junicalh ju José. 22 Pus tachi chun ju ani chunch ju tapasalh ni chunch ju puʼuctaxtulh ju tuchi ixnajunta ju makʼaniya lapanac ju ixnajun ixchivinti Dios. Pus chani ixnajun: 23 Ju pumatam atsiʼ ju va isʼakstucaʼ ma capacxanaʼ ju askʼatʼa chai camaklokʼonaʼ pumatam tsʼalh chai calhimapakaʼuyach Emanuel. Pus ju Emanuel va nomputun ni quintatʼavilanch ju Dios. 24 Pus ju tunculh acsni cujlh ju José pus navilh tachi ju junilh ju anuʼ anquilh chai lhiʼalh ju Malia laʼixchakaʼ. 25 Para jantu tʼatsuculh tus acsni tsuculh istʼasastʼi isʼaskʼatʼa. Chai ju yuchi lhimapakaʼulh Jesús.
1 Ju Herodes gobernador ixjunita ju xaʼestado Judea acsni tavanan tsucuchalh ju Jesús ju lakʼachakʼan Belén lhiJudea. Chai ju acsnich tachincha lakʼachakʼan Jerusalén aliʼin lapanacni ju ixtalhatalanininta ju stʼacu. Tamincha lhichʼatoʼanta. 2 Chai taʼasacminilh. Tanaulh: ―Tas anchach ju vi ju ixʼucxtinʼan ju israelitanin ju va tsuculhcaʼ. Pus laquintʼun quincʼan iclaktsʼiuch ju stʼacu ju tasu chai ju nomputun ni tsuculh ju yuchi. Chai ju quijnan icmintau ni va iclakʼayaputunau. 3 Para acsni kʼasmatlh ju gobernador Herodes ju ani chivinti pus na talhanalh. Chai vachuʼ chunch talalh tachi chun ju amachakʼan ju lakʼachakʼan Jerusalén. 4 Pus ju acsnich ju gobernador alactʼasanikʼo chux ju xalackʼajin palijni chai ju yuʼunch ju ixtalhatalanininta ju ixlhamapʼaksinʼan ju istʼaʼisraelitanin chai asacmi ta ixnajunch ju ixchivinti Dios ju istsʼokcanta makʼanchich. Ma tas anchach ju catsucuyanta ju Cristo ju anuʼ ju ixnoncan ni camalakachatachilh ju Dios. 5 Chai ju yuʼunch tajunilh: ―Pus ju yuchi catsucuyanta ju lakʼachakʼan Belén laxaʼestado Judea. Icpunonau chunch ni chanich ju xanajun pumatam makʼaniya ixlapanac Dios laʼisʼatsʼoknut: 6 Jantu lai actinaulh ni va palai jantu tuʼuʼ ju ixtapalhni ju lakʼachakʼan Belén laxaʼestado Judea. Palai tuʼuʼ ju aliʼin lakʼachakʼan ju ani lacatʼun. Jantu lai chun actinaulh ni anchach ju catsucuyanta pumatam kʼai ucxtin. Chai yuchi ju calhistʼacʼaʼ ju israelitanin ju ixlapanacni Dios tajunita. Chunch ma naulh ju ixlapanac Dios. 7 Pus ju acsnich ju Herodes sekch alactʼasanilh ju anuch lapanacni ju ixtalhatalaninin ju stʼacu. Va iscʼatsaputun ju ixtavasalanti tavananch ju tasulh ju anuʼ stʼacu. 8 Chai acsni cʼatsa pus amalakachalh ju lakʼachakʼan Belén chai ajuni: ―Inchitʼit puxconin anch ju askʼatʼa. Chai acsni alhitʼaʼuyaʼitʼit pus aquiminau lajuninin. Acʼananta vachuʼ lakʼayanaʼ. 9 Pus ju yuʼunch takʼasmatnilh ju gobernador chai taʼalh. Chai acsni taʼalh ju lacati pus apʼulhnilh ju anuʼ stʼacu ju ixtalaktsʼintacha laʼixtʼunʼan. Apʼulanalh tus acsni chaʼalh junta ixtanun ju askʼatʼa Jesús. Chai anchach ju astacnalh. 10 Pus ju anuch lapanacni ni talaktsʼilh ju stʼacu pus na takʼachalh. 11 Chai acsni tatanu lacachakaʼ talaktsʼilh ju askʼatʼa chai ixnati ju Malia ixjuncan. Pus tataʼaktsokotanilh chai talakʼayalh. Chai tapaxkʼotlh ju ixtalhiminta chai taxtaknilh ju lhakʼailaktsʼin ju oro chai ju pum chai ju xakʼalhchʼat lakatam qʼuiu ju na cʼus acamin. 12 Chai acsni taʼanchokolh laʼixtʼunʼan kʼankʼatam ti tapuʼanchokolh. Chunch ju talalh ni Dios xaʼajuni laʼixʼaklakʼavantiʼan ni jantu catalakʼanchokolh ju Herodes. 13 Astan acsni ixtaʼanchokota laʼixtʼunʼan ju anuch lapanacni pus pumatam anquilh talacasunilh ju José laʼilhtatat chai juni: ―Akʼostʼaʼulh. Alhipʼinchich ju askʼatʼa chai ixnati ju xalacatʼun Egipto. Chai anchach ju atʼolhchitʼit tus va acxakʼalachokoyan. Apʼinchitʼit anch ni calhinonaʼ ixpuxcajuca ju askʼatʼa ju Herodes ni va makniputunch. 14 Pus ju José lana kʼostavilh. Lhiʼalh ju askʼatʼa Jesús chai ixnati ju anuch atatsʼisni. Taʼalh ju xalacatʼun Egipto. 15 Chai tatolhcha anch tus acsni va nilh ju Herodes. Chai ni chunch ju talalh pus uctaxtulh tuchi ixnajuntach ju makʼanch ju ixlapanac Dios junta ma chani xanajun: “Laxalacatʼun Egipto ictʼasanilh ju quintsʼalh”. 16 Pus ju Herodes acsni machakxa ni va taʼokxchokʼolh ju anuch lapanacni pus slivasalh na talhkʼamalh. Chai lhinaulh ixmaknica tachi chun ju tsʼalan ju ixʼalin ju lakʼachakʼan Belén chai chux ju aliʼ lakʼachakʼanixni junta vanin ixjunita. Amaknikʼo tachi chun ju ixtapacxanta lakatʼiyun cʼata chai ju palaicaʼ lactʼicstʼin. Ixnajun ni caʼamaknich ju aliʼin pus tapʼastu vachuʼ camakniyaʼ ju Jesús. 17 Chai ni chunch ju lalh ju Herodes pus uctaxtulh tuchi ixnajunta makʼanchich ju ixlapanac Dios ju Jeremías ixjuncan. Ju yuchi ma chani naulh: 18 Ma kʼasmatcancha ju lakʼachakʼan Ramá ju na talactʼasai. Ma na lackʼalhuncan chai slivasalh lactʼasacan. Ma tachi ju vasalh yuchi ju Raquel ju kʼalhun. Ma va alhikʼalhun ju istsʼalan. Chai ma jantu xamatiʼ lai amatanʼulani ixʼalhunutʼan ni amaknikʼocalh ju istsʼalan. Chunch ju ma naulh ju Jeremías. 19 Pus acsni nilh ju Herodes pus talacasunichokolh ju anquilh ju José laʼilhtatat acsni ixvilhchacaʼ ju lakʼachakʼan Egipto chai chani juni: 20 ―Alacʼatʼayatʼich. Alhipʼinchʼokʼochich ju askʼatʼa chai ixnati ju laʼixtʼunʼan ju mintʼaʼisraelitanin. Laich apʼinchʼokʼoyaʼitʼit ju chavai ni tanitach ju ixtamakniputun ju askʼatʼa. 21 Pus ju José lacataya chai lhiʼalh ju askʼatʼa chai ixnati ju laʼixtʼunʼan ju istʼaʼisraelitanin. 22 Para na talhanalh acsni kʼasmatlh ni Arquelao gobernador va laxaʼestado Judea acsni nilh ju ixpai ju Herodes ixjuncan. Pus jantu ixʼamputun ju anch. Chai ni junilh ju Dios laʼilhtatat ni caʼalh ju xaʼestado Galilea pus anch ju alaclhiʼalh ju askʼatʼa chai ixnati. 23 Chai acsni tachaʼalh pus tatsucucha ju lakʼachakʼan Nazaret. Chai ni anch ju taʼalh pus uctaxtulh tuchi ixtanajunta ju makʼaniya ixlapanacni Dios acsni tanaulh ni amachakaʼ Nazaret cajunaʼ ju Cristo.
1 Chai ju acsnich ju Xivan ju amakpaxanaʼ chincha ju xaʼestado Judea. Chai lacamacni amalanilh ju lapanacni. 2 Chai chani ixʼajuni: ―Amacʼaʼuntʼit ju miʼalactuʼuntiʼan ni vaninch minta ju avilhchan acsni calhinonaʼ ju Dios. ―Chunch ixʼajuni ju lapanacni ju Xivan. 3 Pus ju makʼaniya ixlapanac Dios ju ixjuncan Isaías ixnajunta ta yu canonaʼ ju Xivan mas tucaʼ istsucui ju yuchi. Pus chani ixnajun ju Isaías: Kʼasmatcan ixchivinti ju pumatam ju na pʼas chivinin lacamacni. Chai ju yuchi ma chani najun: Alakʼoxitʼit ju miʼatalacpastʼacʼatʼan ni caminaʼ ju miʼucxtinʼan. Chach salaka va ju miʼalhunutʼan. Ma chunch ju ixnajun ju Isaías. 4 Pus ju ixlakchʼita ju Xivan apaksivinti ixʼapamat camello ixjunita. Chai lakatam axtʼakʼan ixtankʼaijucalh. Chai ixʼui ju tuʼuʼ tachi silek ixlaktsʼinca. Vachuʼ ixʼui ju xatʼaxcat lacaqʼuivin. 5 Pus ju amachakʼan lakʼachakʼan Jerusalén chai chux ju amachakʼan ju xaʼestado Judea chai chux ju lapanacni ju ixtatʼajun ixtalakachoko ju kʼai xcan Jordán ixtalakʼan ju Xivan ni ixtakʼasmatniputun ju ixchivinti. 6 Chai ju Xivan ixʼamakpaxai ju laxakʼai xcan Jordán acsni ixtanajun ni catamaconaʼ ju ixʼalactuʼuntiʼan. 7 Para ju Xivan acsni alaktsʼilh ni na lhu ju ixtaʼakpaxputun ju ixtalhilaksi ju ixlhamapʼaksin ju fariseonin chai ju ixtalhilaksi ju ixlhamapʼaksin ju saduceonin pus chani ajuni: ―Chunch ju lapʼutʼunatʼit tachi ju tuʼuʼ lu. Ju yuchi va acsnich ju atsʼalai acsni xavacan ju achʼitin junta tʼajun. Pus vachuʼ chun ju lapʼutʼunatʼit ju uxijnan. Va acsnich ju tamch pʼastʼacpʼutʼunatʼit ni xakʼasmatʼatʼit ni catamamakʼalhkʼajniyan ju Dios. Tis chavaich ju xatajunan ni anaviyaʼitʼit tuʼuʼ ni jantu catamamakʼalhkʼajniyan ju Dios acsni cachinaʼ ju anuʼ avilhchan. 8 Pus ni vasalh tʼakʼalhtʼaxtʼupʼutʼunatʼit amalacʼasutʼit lamiʼatsucuntiʼan ni macʼontʼatʼit ju miʼalactuʼuntiʼan. 9 Chai jantu va kʼaya anaʼuntʼit ni lai apʼutʼakʼalhtʼaxtʼuyaʼitʼit va ixlacaʼatalh ni makʼaniya ixʼapapanatnich ju Abraham untʼatʼit. Pus ju Dios ni va ixlacasqʼuilh ni lhu caʼixʼalilh ixʼapapanatnich ju Abraham pus laich caʼixʼamalokʼoni ju ani lacma chiux ni caʼixtavalh ixʼapapanatnich ju Abraham. 10 Chai mas chavai va lacatsʼunin ticʼacx tus caʼamamakʼalhkʼajniyaʼ ju lapanacni ju Dios. Chai tachi chun ju lapanacni ju jantu tasui laʼisʼatsucuntiʼan ni vasalh tamacajunta ju ixʼalactuʼuntiʼan pus caʼamamakʼalhkʼajnikʼalhicanaʼ. 11 Ju quitʼin vasalh iclamakpaxayau lacaxcan ni catacʼatsayaʼ ju lapanacni ni vasalh macʼompʼutʼunatʼit ju miʼalactuʼuntiʼan. Para caminaʼ apumatam astan ju palai xakʼai. Palai jantu ju quitʼin. Ju quitʼin jantu tuʼuʼ quintapalhni. Jantu lai actichʼanxkʼotlh nin mas va yuchi ju samusni ju ixchʼanxtʼakʼan. Pus ju anuʼ ju caminaʼ astan cataxtakniyan ju aliʼin milhiʼuxijnan ju Spiritu Santu. Para ju aliʼin ju jantu lai talacaʼi pus caʼamamakʼalhkʼajniyach. 12 Ju yuchi caʼulhtuyaʼ ju lapanacni tachi ju tam lapanac ju lacsunui ju ixcapen. Ju yuchi lacsacxtui ju xacapen chai makʼani ju xaʼamacxtalh. Pus chunchach vachuʼ caʼaʼulhtuyaʼ ju lapanacni ju Jesús. Ju vasalh tamacajunta ixʼalactuʼuntiʼan casacxtucanaʼ chai camakʼalhtaxtucanaʼ. Para ju jantu macajunta ixʼalactuʼunti camacaʼancanaʼ junta jonkʼalhita makʼalhkʼajnat. 13 Ju acsnich ju Jesús mincha ju xaʼestado Galilea. Lakmilh ju Xivan ju laxakʼai xcan Jordán ni laich caʼakpaxlh vachuʼ. 14 Para ju Xivan jantu ixmakpaxaputun. Chai chani juni ju Jesús: ―Tajuch ni laich qʼuilaktʼantʼa ju quitʼin ni acmakpaxayan ju uxintʼi. Alai tasqʼuini ni quitʼin ju aqʼuimakpʼaxatʼi. 15 Para ju Jesús chani ju lhikʼalhtailh: ―Lamapainin aqʼuimakpʼaxatʼi ni tasqʼuini ni canavikʼoyau chux tachi ju kʼachani ju Dios. Pus ju acsnich makpaxa ju Xivan. 16 Chai acsni akpaxkʼo ju Jesús pus tacutlh ju lacxcan chai lana talhtekʼa ju lactʼiyan chai ju Jesús laktsʼilh ju iSpiritu Santu ju Dios ni milh tachi ju tuʼuʼ lakʼaxkʼavan. Chai lakmilh ju Jesús. 17 Chai chivincancha ju lactʼiyan chai kʼasmatcalh ju lacatʼun junta ixya ju Jesús. Chai chani naulh: ―Ju ani ya yuchi ju quintsʼalh. Ju yuchi na icmapaini. Na iclhikʼachanch ju yuchi.
1 Pus ju acsnich ju Spiritu Santu lhiʼalh ju Jesús ju lacamacni ni laich canavi talacmaskʼatinti ju lhacaticuru ni tsʼa ma laich caʼixmalactuʼuni ju Jesús. 2 Pus tʼupʼuxam avilhchan chai tʼupʼuxam atatsʼisni jantu vailh ju Jesús chai astan na chavanilh. 3 Chai ju acsnich lana chincha ju lhacaticuru chai ixmalactuʼuniputun ju Jesús. Chai chani juni: ―Ni sala vasalh istsʼalh Diosʼat pus aʼunch ni chach junlh xkapavati junima chiux. 4 Para ju Jesús kʼalhtailh. Juni: ―Jantu lai chun actinavi ni najun ju ixchivinti Dios ju tsʼokcanta ni jantu va yuchi ju xkapavati ju canaviyaʼ cuenta ju tam lapanac. Alai canaviyaʼ cuenta tachi chun ju ixchivinti Dios. 5 Ju acsnich ju lhacaticuru alhiʼananalh. Lhiʼalh ju Jesús ju lakʼachakʼan Jerusalén. Chai anch ju yocalh junta palai aksti putankʼai ixjunita ju ixpujitatʼan ju israelitanin. 6 Chai chani juni: ―Ni sala vasalh istsʼalhʼat Dios pus amakʼanlhtʼujnuch. Lai chunch alatʼi ni chani ju tsʼokcanta laʼixchivinti Dios: Ju Dios ma caʼalhimapʼaksiyaʼ ju ixʼanquilhnin ni catalhistʼacʼan. Ma laʼixmacaʼan catachʼixan ni jantu cachʼanʼuyan tuʼuʼ chiux. 7 Para ju Jesús chani lhiʼakʼalhtayanalh: ―Vachuʼ tsʼokcanta ju anch ni jantu alaktsʼintʼanutʼi ju Dios ni camuctaxtuyaʼ ju ixchivinti u jantu. 8 Astan ju lhacaticuru alhiʼanananchokolh laʼixʼucxni lakatam talhpa ju na putankʼai ixjunita. Chai ju anch malacasunikʼo tachi chun ju xalacpuʼucxtin ju ani lacamunutpaʼ chai tachi chun ju ixpuxakʼaiʼan. 9 Chai chani juncan ju Jesús: ―Uxintʼi ju acxtaknikʼoyan chux ju ani ni aqʼuintʼaʼaktsʼokʼotʼaniyaʼich chai aqʼuilakʼayatʼich. 10 Para ju Jesús chani akʼalhtayanalh: ―Apʼinchich ji Satanás ni najun laʼixchivinti Dios ju tsʼokcanta ni yuchi ju ucxtin Dios ju calakʼayacalh chai va yuchi ju caquiclacaʼicalh. 11 Pus ju acsnich ju lhacaticuru lana macoyaulh ju Jesús chai talakmilh ju anquilhnin chai talhiminilh ju ixvaiti. 12 Pus ju Jesús acsni cʼatsa ni tachʼin navicalh ju Xivan pus anchokolh laʼixtʼun lhiGalilea. 13 Para jantu makʼan tolhcha laʼixlakʼachakʼan junta Nazaret ixjuncan. Alai alh tsucunuʼ ju Capernaum ju vi laʼixquilhtuʼ atantsʼin junta Galilea juncan. Chai vanin ixvi ju xalacatʼun Zabulón chai ju xalacatʼun Neftalí. 14 Pus ni alh ju anch pus uctaxtulh ju ixchivinti ju makʼaniya ixlapanac Dios ju Isaías ixjuncan acsni chani xanajun laʼisʼatsʼoknut. 15 Ju xalacatʼun Zabulón chai ju xalacatʼun Neftalí tavilanancha laʼixquilhtuʼ ju atantsʼin ju ma lakʼantacutni ju kʼai xcan Jordán laxaʼestado Galilea junta na lhu tatʼajun ju jantu israelitanin tajunita. 16 Chai ju amachakʼan anch tachi ju va ixtatʼajun lacaʼatatsʼisni ni jantu ixtamispai ju ixtavasalanti ixlacata ju Dios. Para ju chavai tachi ju va talaktsʼilh ju atuncunuʼ ni ajunicalh ju stavasalanti. Ju amachakʼan anch ixʼalacmucʼanicanta ju ixʼanintiʼan junta jonkʼalhita makʼalhkʼajnat. Para ju chavai talaktsʼinta ju atuncunuʼ ni ajunicalh ju stavasalanti. Chunch ju naulh ju Isaías. 17 Pus acsni ixvilhcha ju lakʼachakʼan Capernaum ju Jesús acsnich ju taiʼula ixʼamalanica ju lapanacni. Chani ixʼajuni: ―Amacʼaʼuntʼit ju miʼalactuʼuntiʼan ni vanin minta ju avilhchan acsni calhinonaʼ ju Dios. 18 Pus ju Jesús ixʼalhtanan laʼixquilhtuʼ ju xaʼatantsʼin Galilea acsni alaktsʼilh ixtʼiyunʼan lhiʼalakʼavin. Ju pumatam yuchi ju Simón ju vachuʼ Pitaluʼ ixjuncan. Chai ju pumatam Tilix ixjuncan. Ju yuʼunch ixtatʼajun munin ixchʼokxniʼan lacaʼatantsʼin ni ixchʼapanin pamata ixtajunita. 19 Pus ju acsnich ju Jesús chani ajuni: ―Aquilachʼakʼokʼau chai tachi ju ixmakʼaixtʼokʼatʼit ju pamata pus vana va chun aclaxtakniyau ju lhichʼalhcat ni amakʼaixtʼokʼaʼitʼit ju lapanacni ju aquintalhilacaʼanaʼ. ―Chunch ju alacjuni. 20 Pus ju yuʼunch lana tamacaulich ju ixchʼokxniʼan chai tachʼakʼokʼalh ju yuchi. 21 Chai ni alhtanampa alacatsʼunin ju Jesús pus alaktsʼimpa ju aliʼin ixtʼiyunʼan lhiʼalakʼavin. Yuchi ju Jacobo chai ju Xivan istsʼalan ju Zebedeo. Ju yuʼunch ixtatʼatajun ju ixpaiʼan laʼixbarcoʼan. Va ixtatʼajun lakyonin ixchʼokxniʼan. Pus ju Jesús alactʼasanilh ixtʼiyunʼan lhiʼalakʼavin. 22 Chai lana tatacutcha lacabarco. Tamacaulh ju ixpaiʼan. Chai tachʼakʼokʼalh ju Jesús. 23 Pus ju Jesús ixlacaputocʼatʼajun ixlhilacaputsʼun ju xaʼestado Galilea. Ixʼamalaninin laʼixlacpujitatʼan ju lakatamin lakʼachakʼan. Ixʼajuni ju lapanacni ni lhinomputun ju Dios laʼixʼalhunutʼan ju yuʼunch. Vachuʼ palaich ixʼanavi ju lapanacni ju ixtachʼapata mas va tuchi takʼankʼat. 24 Pus mas tus xalacatʼun Siria laccʼatsakʼocalh ixlacata ju Jesús. Chai alhiminikʼocalh ju lapanacni ju ixtatʼajun lhimakʼalhkʼajnin tijpachux makʼalhkʼajnat. Alaclhimini ju ixtalactakʼankʼai chai ju yuʼunch ju ixʼachʼapanita isʼaktsulhʼan ju lhacaticuru chai ju va ixtalhtucuni chai ju va ixtalacalhtuculuntach. Chai ju Jesús si palai anavikʼo. 25 Pus na lhu lapanacni tachʼakʼokʼalh ju Jesús. Amachakʼan xaʼestado Galilea chai ju amachakʼan ju anuʼ lakacau lakʼachakʼanixni chai ju amachakʼan lakʼachakʼan Jerusalén chai chux ju lacatʼun ju xaʼestado Judea chai ju xalacatʼun ju lakʼantacutni kʼai xcan Jordán.
1 Pus ju Jesús acsni alaktsʼilh ni na lhu tatakʼaixtoklh ju lapanacni pus alh junta ixvi lakatam akstijun chai tolhcha ju anch. Chai talakmilh ju ixtamamakaʼun. 2 Chai ju Jesús tsuculh amalaniniʼ. Chani ixʼajuni: 3 ―Va paxcatch ju lapanacni ju tacʼatsai ni na tamaktasqʼuini ju Dios. Pus catachaʼanaʼ ju lactʼiyan junta lhinajun ju Dios. 4 Va paxcatch ju yuʼunch ju na taʼamakʼaninin. Pus ju Dios caʼamakʼankʼachayach ju yuʼunch. 5 Va paxcatch ju yuʼunch ju lana jantu tuʼuʼ talhitakʼayai. Pus caʼaxtaknicanaʼ ju lacatʼun ju akʼalhtasunita ju Dios. 6 Va paxcatch ju na talacasqʼuin ju soknicʼa atsucunti. Pus chunch cajunaʼ isʼatsucuntiʼan. 7 Va paxcatch ju na taʼamapaininin. Pus vachuʼ caʼamapainicanaʼ ju yuʼunch. 8 Va paxcatch ju jantu tuʼuʼ tapastʼacʼa macxcai laʼixʼalhunutʼan. Ju yuʼunch catalaktsʼinaʼ ju Dios. 9 Va paxcatch ju yuʼunch ju talamakʼoxamixich junta alin ju tuʼuʼ axcayanti. Yuʼunch ju cajuncanaʼ isʼaskʼatʼan Dios. 10 Va paxcatch ju yuʼunch ju na amamakʼalhkʼajnican va ixlacaʼatalh ni soknicʼa ju isʼatsucuntiʼan. Ju yuʼunch catachaʼanaʼ ju lactʼiyan junta lhinajun ju Dios. 11 Va paxcatch untʼatʼit ju uxijnan acsni tajunan macxcai chivinti ju lapanacni chai acsni alhimakchʼapʼucʼanatʼit chai acsni mucʼanicʼanatʼit tachi chun ju macxcai mas jantu slivasalh. Tachi chun ju ani taʼulhtuyan va ixlacata ni quilalhilacaʼanauch ju quitʼin. 12 Pus alhikʼachʼantʼit chai na kʼox alhiulatʼit acsni chunch aʼulhtʼucʼanaʼitʼit. Chunch alatʼit ni slivasalh na kʼox ju axtʼaknicʼanaʼitʼit ju lactʼiyan. Chai apʼastʼactʼit ni vana va chunch ju anavicalh ju ixlapanacni Dios ju makʼanchich ixtatʼajun acsni tucaʼ ixtʼonatʼit ju uxijnan. 13 Na kʼox ju matsat. Para ju matsat ni jantu skʼokʼo cava pus jantu lhitapalai. Jantu lai tuʼuʼ punavican. Alai va makʼancanch chai va taputayalhavananch ju lapanacni. Pus vana va chun ju uxijnan. Lhitapalai ju miʼatsucuntiʼan acsni vasalh tasui ni quilalhilacaʼanau. Para ni jantu chun tasui lamiʼatsucuntiʼan pus jantu lhitapalai ju miʼatsucuntiʼan. 14 Mas va lakatam maclhcu makat mapulhcui. Pus vana va chun ju uxijnan. Na lhu talaktsʼinan chai tacʼatsai ni quilapanacni untʼatʼit. Tachi ju tuʼuʼ lakʼachakʼan ju laʼixʼucxni talhpa jantu lai xamatiʼ catiʼakxtakma. 15 Chai ju tuʼuʼ maclhcu jantiyuʼ lhixavacan ni va caʼakxtakʼulacalh lacatuʼuʼ caja. Alai mucʼacan talaclhman ni laich mapulhcuni tachi chun ju tatanumanalh lacachakaʼ. 16 Pus vana va chun ju uxijnan. Ju Dios taʼulatan ju ani lacamunutpaʼ ni laich catacʼatsayaʼ ju lapanacni lamiʼatsucuntiʼan ni vasalh quilalhilacaʼanau ju quitʼin. Pus jantu tuʼuʼ anavitʼit ju va caʼasastucnulh. Ju chunch acsni talaktsʼinan ni na kʼox ju naviyatʼit pus catalakʼayayach ju quimpaiʼan Dios ju vilhcha lactʼiyan. 17 Ju Jesús tailhiʼalh ju ixchivinti chai chani ju ajuni ju ixtamamakaʼun: ―Jantu va anaʼuntʼit ni va icminta samakʼanaʼ ju lhamapʼaksin ju tsʼokʼula ju Moisés nin ixchivintiʼan ixlapanacni Dios ju makʼanchich ixtatʼajun. Jantu icminta samakʼanaʼ ju yuchi. Alai icminta muctaxtunuʼ. 18 Slivasalh ju iclajunau. Acsni tiʼalincaʼ ju lactʼiyan chai ju lacatʼun pus nin lacatsʼunin ju najun lacalhamapʼaksin lai catixacaxtulh xamatiʼ. Chux lana caʼuctaxtukʼoyaʼ. 19 Pus va tichi chavaich ju jantu camuctaxtukʼoyaʼ tachi chun junima lhamapʼaksin mas yuchi ju tanajun ju aliʼin ni jantu lhitapalai ni canavicalh chai ni va chunch ju caʼalhimalani ju lapanacni pus va lacatʼicstʼi calaktsʼincananta ju lactʼiyan junta lhinajun ju Dios. Para va tichi chavaich ju camuctaxtuyaʼ chux tachi ju najun laʼixlhamapʼaksin Dios chai ni chunch ju caʼalhimalaniyaʼ ju aliʼin lapanacni pus ju yuchi calhimispacanach ni xakʼai ju lactʼiyan junta lhinajun ju Dios. 20 Para chani iclajunau. Ni atʼanuyaʼitʼit ju lactʼiyan junta lhinajun ju Dios pus tasqʼuini ni palai soknicʼa cava ju miʼatsucuntiʼan ju uxijnan. Jantu chun tachi ju fariseonin nin tachi ju yuʼunch ju talhatalaninintach ju milhamapʼaksinʼan. 21 Ju Jesús tailhiʼalh ju ixchivinti chai chani ju ajuni ju lapanacni: ―Ju uxijnan kʼasmatʼatʼit ni ixʼajuncan ju makʼaniya lapanacni ni jantu catalamakni. Chai va tichi chavaich ju caʼamaknininaʼ pus camucʼanicanaʼ ixtalakʼalhin. 22 Para ju quitʼin iclajunau ni camucʼanicanaʼ ixtalakʼalhin va tichi chavaich ju va catʼalatalhkʼamniyaʼ ju tam ixlakʼau. Chai va tichi chavaich ju cajunach macxcai chivinti ju tam ixlakʼau camamakʼalhkʼajnicanaʼ laʼixmacaʼan ju xalackʼajin ucxtinin. Chai va tichi chavaich ju cajunilh tam ixlakʼau ni jantu kʼox ju isʼaktsulh pus camamakʼalhkʼajnicanaʼ ni camacaʼancanaʼ ju lacajipi. 23 Pus ni lhipʼintʼach ju milhakʼailaktsʼin junta xtaknican ju Dios pus jantu xcai ni apʼastʼactʼi ni va ixtʼalakʼaʼitʼa ju milakʼau. 24 Pus ni pʼastʼactʼa ju chunch pus amacʼauch ju milhakʼailaktsʼin ju anch junta xtakcan. Aʼinchʼokʼochich. Pʼulhnan atʼapʼaininich ju milakʼau. Acsnicaʼ ju laich apʼinaʼ xtaknaʼ ju milhakʼailaktsʼin. 25 Ni catachivimakʼanan tam xamatiʼ chai catakʼailhiʼanan lacapuʼucxtin pus vatsʼalhti atʼatʼakʼoxitʼit acsni tʼapʼintʼatʼitcaʼ ju lacati. Ni jantu pus ju mintʼalaxcaiʼan laich catalhichaʼanan lacapuʼucxtin. Chai ju ucxtin catamakʼaxtakniyanch ju pulasiyajni chai catatʼalhnuyanch. 26 Chai slivasalh ju iclajunau. Jantu atʼitʼaxtʼutʼit ju anch tus acsni amapʼalaʼitʼit chux ju mimulhtaʼan. 27 Ju uxijnan kʼasmatʼatʼit ni ixʼajuncan ju makʼaniya lapanacni ni jantu catatʼatsuculh ju jantu ixʼamachakaʼ u jantu ixpapa. 28 Para ju quitʼin iclajunau ni alactuʼununtach laʼixʼalhunut va tichi chavaich ju laktsʼin tam chakoʼulh ju lana tʼatsucuputunch. 29 Pus ni yuchi ju laktsʼimpʼutʼunatʼit lamilakchulhʼan ju lamilhicanaʼan ju catamapastʼacʼaniyan ju alactuʼunti pus jantu alaktsʼintʼit. Alai alatʼit tachi ju va maxtʼutʼatʼit ju milakchulhʼan chai makʼantʼatʼit. Pus palai kʼox cava ni catsʼankʼa lacatsʼunin ju milacatunaʼan. Jantu chux ju milacatunaʼan ju caʼalh ju lacajipi. 30 Chai ni pʼuʼalactʼuʼunumpʼutʼunatʼit ju mimacaʼan lamilhicanaʼan pus alatʼit tachi ju va chʼakxpʼuxtʼatʼit chai makʼantʼatʼit. Pus palai kʼox cava ni catsʼankʼa lacatsʼunin ju milacatunaʼan. Jantu chux ju milacatunaʼan ju caʼalh ju lacajipi. 31 Vachuʼ ixnoncan ni caxtaknilh ixʼalhiqui ju lapumaconcan va tichi chavaich ju camacaulh ju ixʼamachakaʼ. 32 Para ju quitʼin iclajunau ni va acsnich ju lai macʼonatʼit ju miʼamachakaʼan ni va tʼatʼajun apumatam jokʼat. Para ni va kʼaya amacʼonaʼitʼit ju miʼamachakaʼan pus uxijnan ju malactʼuʼunitʼit ju miʼamachakaʼan ni astan catʼatsuculh apumatam jokʼat ju yuchi. Chai va tichi chavaich ju catʼatsucuyaʼ ju va maconcanta vachuʼ navi ju alactuʼunti. 33 Vachuʼ kʼasmatʼatʼit ni ixʼajuncan ju makʼaniya lapanacni ni catamuctaxtulh ni talhipastacta ju Dios ixpumavasalaca ju ixchivintiʼan. 34 Para ju quitʼin iclajunau ni jantu tuʼuʼ alhipʼastʼactʼit ju ixpumavasalaca ju minchivintiʼan mas va tuchʼi anaviyaʼitʼit. Nin yuchi ni lai alhipʼastʼactʼit ju lactʼiyan ni anchach ju lhinajun ju Dios. 35 Nin yuchi ni lai alhipʼastʼactʼit ju lacatʼun ni anchach ju chʼantai ju Dios. Nin yuchi ju lakʼachakʼan Jerusalén ni yuchach ixlakʼachakʼan ju kʼai ucxtin Dios. 36 Nin yuchi ni lai alhipʼastʼactʼit ju miʼaktsulhʼan ju ixpumavasalaca ju minchivintiʼan. Jantu lai alhipʼastʼactʼit ju yuchi ni jantu lai xnapapa atʼinavitʼit ju miʼaiʼan nin smalaka. 37 Alai chach tacʼatsayaʼ ju lapanacni ni vasalh a ju nompʼutʼunatʼit acsni nonatʼit a. Chai vasalh jantu ju nompʼutʼunatʼit acsni nonatʼit ni jantu. Para ni maktʼasqʼuiniyatʼit tuʼuʼ atumpa va nomputun ni na va alactʼuʼununatʼit chai ixlhiyuchi jantu lai lalhiqʼuiclacʼaʼiyatʼit ni jantuch tuʼuʼ lhipʼastʼacʼatʼit ju ixpumavasalaca ju minchivintiʼan. 38 Ju Jesús tailhiʼalh ju ixchivinti chai chani ju ajuni ju lapanacni: ―Ju uxijnan kʼasmatʼatʼit ni ixtanajun ju makʼaniya milacpaʼitniʼan ni xamatiʼ canavinilh tuʼuʼ talakʼalhin ju apumatam pus vana va chunch canavinicalh ju anuʼ ju alactuʼunulh. 39 Chunch ju ixnoncan. Para ju quitʼin iclajunau ni jantu atʼalasatʼit ju alactuʼunuʼ va ixlacaʼatalh ni amamapʼalanipʼutʼutʼit. Alai ni xamatiʼ cataʼulaniyan ju lamilakxtanʼan pus axtʼaknichʼokʼotʼit ju mintalakxtantamʼan. 40 Chai ni xamatiʼ catachivimakʼanan chai catataiʼiniputunan ju mimpumpuʼan pus jantu alhikʼaʼitʼit vachuʼ ju mincutunʼan. 41 Chai ni xamatiʼ taropa tapʼastu tamacʼucʼayan ju ixtacʼucʼat ni alhipʼiniyaʼitʼit ixlhimakat tachi ju lhcacanta lacalhamapʼaksin pus palai kʼox cava ni palai makat ju alhipʼitʼit. Palai jantu kʼox cava ni va alhitʼalhkʼamtʼit. 42 Chai va tichi chavaich ju catasqʼuiniyan tuʼuʼ jantiyuʼ ju jantu alhixtʼaknipʼutʼutʼit ni va makʼapʼutʼunatʼit miʼakstuʼan. Chai va tichi chavaich ju catamatsʼisqʼuiniyan tuʼuʼ jantu aʼunaʼitʼit ni jantu va ixlacata ni makʼapʼutʼunatʼit miʼakstuʼan. 43 Vachuʼ kʼasmatʼatʼit ni ixtanajun ju makʼaniya milacpaʼitniʼan ni amapʼainitʼit ju tamapainiyan chai alhitʼalaxcʼaʼitʼit ju tanaviyan macxcai. 44 Chunch ju ixnoncan. Para ju quitʼin iclajunau ni amapʼainitʼit ju mintʼalaxcaiʼan chai asqʼuintʼit ju kʼox isʼatsucuntiʼan ju macxcai tajunan. Chai anavinitʼit kʼox ju na taxcayan. Chai atʼapʼaininitʼit ju Dios ixlacataʼan ju talhimakchapuyan. 45 Chai ni chunch ju aʼulhtʼutʼit pus anaviyaʼitʼit tachi ju navi ju quimpaiʼan Dios ju vilhcha lactʼiyan. Pus ju yuchi amacamini ju ascʼunuʼ chai ju xcan ju kʼai tajunita chai ju lackʼoxin lapanacni. 46 Pus ni va yuʼunch ju amapʼainiyaʼitʼit ju tamapainiyan pus ja kʼoxich ju chunch. Mas yuʼunch ju taʼokxchokʼomaxtui ju tumin tanavi ju chunch. 47 Chai ni va yuʼunch ju miʼalakʼavin ju atʼalaxakʼalayatʼit pus vana va chunch ju naviyatʼit tachi ju tanavi ju lapanacni ju jantucaʼ tamispai ju Dios. 48 Pus sok atsʼucʼutʼit ju uxijnan tachi ju quimpaichʼan ju vilhcha lactʼiyan ni sok navi ju yuchi.
1 Ju Jesús tailhiʼalh ju ixchivinti chai chani ju ajuni ju lapanacni: ―Alaktsʼintʼit. Tun tʼinavitʼit ju tuʼuʼ kʼox laʼixʼucxlacapuʼan ju lapanacni va ixlacaʼatalh ni na kʼoxich catapulhiulayan. Ni chunch ju alatʼit pus jantu tuʼuʼ apʼulhaʼayaʼitʼit laʼixmacni ju quimpaiʼan ju vilhcha lactʼiyan. 2 Chai acsni aʼaktʼaiʼuyaʼitʼit ju quilhpatinin jantu chunch aʼulhtʼutʼit ta yu laich catacʼatsayaʼ tachi chun ju lapanacni. Pus chunch ju talai ju yuʼunch ju tanajun ni tanavini ixlhamapʼaksin Dios mas jantu. Ju yuʼunch taxtʼakʼa ju ixtuminʼan laʼixpujitatʼan chai lacati ni laich catacʼatsayaʼ ju lapanacni chai catanaulh ni lackʼoxin lapanacni tajunita. Pus slivasalh ju iclajunau. Ju yuʼunch taʼamaklhtayanankʼota ju ixtalhajaʼan ju ani lacamunutpaʼ ni alakʼayacan laʼixmacni ju ixtʼalapanacniʼan. 3 Para ju uxijnan acsni axtʼakʼaʼitʼit ju tuʼuʼ pus va sek axtʼaktʼit. 4 Chai ni va sek ju axtʼakʼaʼitʼit pus ju quimpaiʼan Dios cataxtakniyan ju mintalhajaʼan. Pus ju yuchi laktsʼin tuchi sek navican. 5 Chai acsni tʼachʼivinintʼit ju Dios jantu chun ju alatʼit tachi ju talai ju yuʼunch ju tanajun ni tanavini ixlhamapʼaksin Dios mas jantu. Ju yuʼunch na kʼoxich talhiulai acsni tatayai lacpujitat u lacatalhavat acsni tatʼachivinin ju Dios. Vachuʼ tatʼachivinin ju Dios mas lacati ni laich catalaktsʼilh ju lapanacni. Para slivasalh ju iclajunau. Ju yuʼunch taʼamaklhtayananta ju ixtalhajaʼan ju chavai ni na alakʼayacanta. 6 Para ju uxijnan acsni tʼachʼivinintʼit ju Dios atʼanutʼit ju laminchakaʼan. Chai atʼolaʼitʼit va miʼakstuʼan. Chai atʼachʼivinintʼit ju quimpaiʼan Dios ju vachuʼ vi junta aseknicʼa. Chai ju quimpaiʼan Dios ju laktsʼin tuchi navican junta aseknicʼa yuchach ju cataxtakniyan ju mintalhajaʼan. 7 Chai acsni tʼonatʼit tʼachivinin ju Dios jantu na paklhu anaʼuntʼit ju tijtam chivinti tachi ju talai ju aliʼin lapanacni ju jantucaʼ tamispai ju Dios. Pus ju yuʼunch tanajun ni va acsnich ju laich cakʼasmatnicalh ni na lhu chivinti catanaulhch. 8 Pus jantu chun ju anavitʼit tachi ju talai ju yuʼunch. Pus ju quimpaiʼan Dios cʼatsai tuchʼi maktʼasqʼuiniyatʼit mas tucaʼ sqʼuiniyatʼit. 9 Pus ju uxijnan chanich anonaʼitʼit acsni atʼachʼivininaʼitʼit ju Dios: Quimpai ju vilhchiʼ lactʼiyan chach tacʼatsa ju lapanacni ni na salakaʼat ju uxintʼi. 10 Chach chilh ju avilhchan acsni alhinonaʼ ju uxintʼi. Chach navicalh ju minkʼachat ju ani lacatʼun tachi ju navicantacha ju lactʼiyan. 11 Aquilaxtakniuch ju chavai ju vaiti ju icmaktasqʼuiniyau. 12 Aquilamacʼacxaniuch ju quintalakʼalhin quincʼan ni vachuʼ icʼamacʼacxanitauch ju quintanavitan tuʼuʼ macxcai. 13 Jantu aquilalhiʼau junta acmapastʼacʼanicau tuʼuʼ macxcai. Alai aquilamakʼosuniuch ju macxcai. Pus uxintʼi ju lhinaʼun chai uxintʼi ju alin ju mintachaput chai uxintʼi ju lakʼayacʼan tus va tavananch. Slivasalh chunch ju unitʼa. Chunch ju anonaʼitʼit acsni atʼachʼivininaʼitʼit ju Dios. 14 Ju Jesús tailhiʼalh ju ixchivinti chai chani ju ajuni ju lapanacni: ―Chai ni amacʼacxaniyaʼitʼit ju lapanacni ju ixʼalactuʼuntiʼan ju tanavinitan pus vachuʼ catamacʼacxaniyan ju uxijnan ju quimpaiʼan ju vilhcha lactʼiyan. 15 Para ni jantu amacʼacxaniyaʼitʼit ju lapanacni ju ixʼalactuʼuntiʼan pus nin yuchi ju quimpaiʼan Dios jantu catitamacʼacxanin ju mintalakʼalhinʼan ju uxijnan. 16 Acsni atʼascʼaʼayaʼitʼit jantu chun alayaʼitʼit tachi ju talai ju quintʼaʼisraelitaninʼan ju tanajun ni tanavi ju ixlhamapʼaksin Dios mas jantu. Pus ju yuʼunch tamalacasui ju amakʼanit laʼixʼucxpuʼan chai tamucʼai ju lhcʼacʼa laʼixʼucxpuʼan ni catasulh ni tatascajaich. Pus slivasalh ju iclajunau. Ju yuʼunch taʼamaklhtayananta ju ixtalhajaʼan ju ani lacamunutpaʼ ni na alakʼayacan. 17 Para ju uxijnan acsni atʼascʼaʼayaʼitʼit atʼuʼuyaʼitʼit ju miʼaiʼan chai alakpʼuchʼakʼayaʼitʼitch. 18 Ju chunch jantu catacʼatsayaʼ ju lapanacni ni tʼascʼaʼayatʼit. Va yuchi ju quimpaiʼan Dios ju cacʼatsayaʼ ni laktsʼin ju yuchi tuchi navican junta aseknicʼa. Chai yuchi ju cataxtakniyan ju mintalhajaʼan. 19 Jantu alalhavatʼit ju mimakʼalitʼan ju ani lacatʼun junta na alin ju saʼatsʼacanaʼ chai junta va cajoksaʼ chai junta alin ju akʼalhonin ju takʼalhotanui lacachakaʼ. 20 Alai anch ju lactʼiyan ju apʼulhavayaʼitʼit ju mimakʼalitʼan va ixlacata ni naviyatʼit ju kʼox ju ani lacatʼun. Pus ju anch matiʼ ju saʼatsʼacanaʼ cativa chai jantu lai joks ju tuʼuʼ nin cataʼalilh ju akʼalhonin ju lai catakʼalhotanu. 21 Pus chunch ju alatʼit ni va tsa tsa pastaccan ju xataxtokni ju lacamunutpaʼ acsni ani ju makʼacan ju mimakʼalitʼan. Para ju tamakʼai ju ixmakʼalitʼan ju lactʼiyan pus anchach ju tapastactʼajun. 22 Ju milakchulhʼan chunch junita tachi ju tuʼuʼ maclhcu ni yuchach ju puʼalacʼavanancan. Pus ju milakchulhʼan ni na lackʼox pus laich alacʼavananatʼit. Para ju milakchulhʼan ni jantu kʼox pus tachi ju va tʼonatʼit lacaʼatatsʼisni. Pus vana va chun ju miʼatalacpastʼacʼatʼan. Ni alacpʼastʼacnantʼit ju kʼox pus laich amachʼakxayaʼitʼit ixchivinti Dios. Para ni asamakʼanaʼitʼit ixchivinti Dios pus jantu kʼox ju miʼatalacpastʼacʼatʼan chai va ixtʼachunch jun ju miʼatsucuntiʼan tachi ju va tʼonatʼitcaʼ lacaʼatatsʼisni. 24 Jantu xamatiʼ lai pumatʼui catinavi ixʼucxtin ju vaktam. Pus aktsʼiya jantu tuʼuʼ calhiulayaʼ ju pumatam chai na camapainiyaʼ ju apumatam. U ni jantu para aktsʼiya calhilaksiyaʼ ju pumatam chai ju apumatam lana jantu tuʼuʼ canaviyaʼ cuenta. Pus vana va chun ju uxijnan. Jantu lai atʼimapʼainitʼit ju Dios chai vachuʼ ju tumin. 25 Iclajunau ni jantu alhamakʼaninintʼit ixlacata ju miʼatsucuntiʼan ju tuchʼi aʼuyaʼitʼit u tuchʼi akʼotʼaʼitʼit nin yuchi ixlacata tuchʼi ju amalakchʼininaʼitʼit. Pus palai tuʼuʼ ju miʼatsucuntiʼan. Palai jantu ju va tuʼuʼ vaiti. Chai palai tuʼuʼ ju milacatunaʼan. Palai jantu ju va mimpumpuʼan. 26 Alaktsʼintʼit ju tsʼoknin. Ju yuʼunch jantu taʼachʼananan. Chai jantu taxkʼaʼi ju catamakʼayaʼ ju xatocʼat. Chai jantu tamakʼai ju ixvaitiʼan lacatuʼuʼ pacʼatsa. Para ju mimpaiʼan ju vilhcha lactʼiyan yuchi ju amavai. Pus ju Dios palai tuʼuʼ talhiulayan ju uxijnan. Palai jantu ju va tuʼuʼ tsʼokʼo. 27 Chai jantu xamatiʼ ju milhiʼuxijnan ju lai palai putankʼai catijunlh mas na lhu capastaclh. 28 Chai tajuch ni na va lhamakʼanininatʼit ixlacata ju mimalakchʼintichʼan. Alaktsʼintʼit ta yu takʼayaich ju xaxanti lacaqʼuivin. Ju yuʼunch jantu tachʼalhcatnan nin cataʼasiunilh. 29 Para iclajunau nin yuchi ju kʼai ucxtin Salomón mas na makʼaliʼ ixjunita jantu malakchʼinilh tachi ju tuʼuʼ xanti. 30 Pus ju Dios na cʼus malakchʼini ju achʼitin ju alin mas va lacaqʼuivin. Chai ju yuchi jantu jonkʼalhi. Ju chavai stakʼaucaʼ. Para ju lhi calacxavacanaʼ. Pus ja va a ti uxijnan jantu cataxtakniyan ju Dios ju mimpumpuʼan. Para ju uxijnan na lacatsʼunin lhilaksiyatʼit ju Dios ni lai cataxtaknin ju tuchʼi maktʼasqʼuiniyatʼit. 31 Pus ni cataxtakniyan ju Dios tuchʼi amaktʼasqʼuiniyaʼitʼit pus jantu alhamakʼaninintʼit. Jantu anaʼuntʼit: “Tijuch nuʼ ju caʼuyau ju chavai”. U “tijuch nuʼ ju cakʼotʼau ju chavai”. U “tijuch nuʼ ju calakchʼiyau ju chavai”. 32 Jantu alhamakʼaninintʼit ju ani taxtokni ni chunch ju talai ju yuʼunch ju jantucaʼ tamispai ju Dios. Para alin ju quimpaiʼan ju vilhcha lactʼiyan chai ju yuchi cʼatsai ni maktʼasqʼuiniyatʼit tachi chun ju ani taxtokni. 33 Para yuchi ju pʼulhnan anavitʼit cuenta ta yu palai lai calhinonaʼ ju Dios lamiʼatsucuntiʼan. Vachuʼ yuchi ju anavitʼit cuenta ta yu laich soknicʼa cava ju miʼatsucuntiʼan tachi ju kʼachani ju Dios. Chai ni chunch ju alatʼit pus ju yuchi cataxtakniyan tachi chun ju ani taxtokni. 34 Pus jantu alhamakʼaninintʼit ju catapasayach ju lhi. Pus chux avilhchan na alin ju ixlhamakʼan. Chai jantu lhijun ni na alhamakʼaninintʼit ju tuchi laich camilh ju alhi.
1 Ju Jesús tailhiʼalh ju ixchivinti chai chani ju ajuni ju lapanacni: ―Jantu anaʼuntʼit ni talakʼalhin ju xanavi ju akʼantam. Ni chunch ju alatʼit pus ju Dios canonaʼ ni vachuʼ navitʼatʼit talakʼalhin ju uxijnan. 2 Pus tachi ju ulaniyatʼit ixtalakʼalhin ju akʼantam pus vana va chun ju aʼulanicʼanaʼitʼit ju uxijnan. Chai ju tuchʼi anaviniyaʼitʼit ju akʼantam pus vana va chun ju anavicʼanaʼitʼit ju uxijnan. 3 Tajuch ni na naviyatʼit cuenta ju tuʼuʼ lacatʼicstʼi talakʼalhin ju navi tam milhilakʼau para lana jantu naviyatʼit cuenta ju kʼai talakʼalhin ju naviyatʼit miʼakstuʼan. Ni chunch ju layatʼit pus ixtʼachunch untʼatʼit tachi tam lapanac ju cajunilh akʼantam ni tanun ju lacatʼicstʼi amacxtalh laʼixlakchulh mas tanun ju palai kʼai amacxtalh laʼixlakchulh isʼakstu. 4 Chai tas laich aʼunitʼit ju tam milhilakʼau: “Alakʼaʼitʼich ni acʼaktaijuyan ni amaconaʼ ju talakʼalhin ju navi”. Tas laich chunch aʼunitʼit ni jantu naviyatʼit cuenta ju kʼai talakʼalhin ju naviyatʼit ju uxijnan. Pus acsni chunch ju layatʼit pus ixtʼachunch untʼatʼit tachi tam lapanac ju cajunilh akʼantam: “Acmaxtuniyanch ju lacatʼicstʼi amacxtalh ju tanun lamilakchulh”. Laich chunch juni mas palai kʼai amacxtalh ju tanun laʼixlakchulh isʼakstu. 5 Para ju uxijnan acsni chunch ju layatʼit pus va acxpʼutʼiyununatʼit. Pus pʼulhnan amacʼaʼuntʼit ju kʼai talakʼalhin ju naviyatʼit. Chai ju chunch lai aʼaktʼaiʼuyaʼitʼit ju milakʼauʼan ni camacaulh ju lacatʼicstʼi talakʼalhin ju navi ju yuchi. 6 Jantu aʼunchʼokʼotʼit ju ixchivinti Dios ju lapanacni ju tamispai para va tasamakʼanta. Jantu xcai ni catalhitalhkʼamalh u catalhitsʼiʼilh ju ixchivinti Dios. Pus ni aʼunchʼokʼoyaʼitʼit ixchivinti Dios ju chunch talai pus va ixtʼachun tapasai tachi acsni xtaknican ju can ixvaitiʼan ju tuʼuʼ xkʼoyun chai ju yuʼunch catatalhkʼamalh chai catatsʼacayan. U tachi ju tuʼuʼ pʼaxnin ni axtʼakniyaʼitʼit ju tuʼuʼ chiux ju na laklhu ixtapalh para ju yuʼunch va taputayalhavanan ni jantu tacʼatsai ni laklhu ixtapalh. 7 Asqʼuinitʼit ju Dios chai ju yuchi cataxtakniyan. Apʼuxcʼaʼutʼit laʼixmacni Dios ju tuchʼi maktʼasqʼuiniyatʼit chai alhitʼaʼuyaʼitʼit. Va tsa tsa asqʼuinitʼit ju Dios tachi acsni va tsa tsa sacan laca tuʼuʼ malhtich chai ju Dios cataxtakniyan. 8 Pus va tichi chavaich ju casqʼuiniyaʼ ju Dios ju tuʼuʼ pus caxtaknicanaʼ. Chai va tichi chavaich ju puxcajui tuʼuʼ laʼixmacni Dios calhitajuyaʼ. Chai va tichi chavaich ju va tsa tsa sai ju malhtich pus camalhtekʼanicanaʼ. 9 Jantu xamatiʼ ju milhiʼuxijnan ju lai caxtaknilh tam isʼaskʼatʼa lakatam chiux acsni casqʼuinilh ju vati. 10 U ni casqʼuinilh ju pamata jantu xamatiʼ milhiʼuxijnan ju laich caxtaknilh lakatam lu. 11 Pus ju uxijnan mas na kʼai untʼatʼit lai xtʼakniyatʼit ju kʼox ju miʼaskʼatʼanʼan. Pus ja va a ti yuchach ju quimpaiʼan Dios ju vilhcha lactʼiyan jantu catiʼaxtaknilh ju kʼox ju yuʼunch ju tasqʼuini. 12 Pus ni lacʼasqʼuinatʼit ni kʼox catatʼalalhiʼan ju lapanacni pus vachuʼ kʼox atʼalalhiʼitʼit ju yuʼunch. Pus chunch ju najun laʼixlhamapʼaksin ju Moisés chai chunch ixtanajun ju makʼaniya lapanacni ju ixtanajun ixchivinti Dios. 13 Anch ju apʼupʼitʼit junta va putʼicstʼi ju ti. Pus junta na pokʼai ti chai junta na akʼox anchach ju puʼancan junta jonkʼalhita makʼalhkʼajnat. Chai na lhu ju tapuʼanch ju anch. 14 Para na putʼicstʼi chai na axcai ju xati ju puʼancan ju lactʼiyan junta alin ju atsucunti jonkʼalhita. Chai na lacatsʼunin ju tapuʼan ju anch. 15 Alhistʼaccʼantʼit ni jantu cataʼokxchokʼoyan ju lapanacni ju talacasui tachi ju lapanacni ju tanajun ixchivinti Dios mas jantu. Ju yuʼunch tamalacasuniyan tachi ju vasalh lackʼoxin lapanacni tajunita. Para laʼixʼalhunutʼan chunch tajunita tachi ju tuʼuʼ maktilin. Ju yuʼunch va talakʼalhiniputunan ju miʼatsucuntiʼan. 16 Para laʼisʼatsucuntiʼan apʼumispʼayaʼitʼit tichi chavaʼitnich ju yuʼunch. Pus ju uxijnan cʼatsʼayatʼit ni jantu tocʼai ju uvas lacaʼalhtucunan. Nin yuchi ju capen lai catocʼalh lacachatai. 17 Pus tachi chun ju kʼoxi qʼuiu caxtʼakʼaʼ ju kʼox xalhiʼut. Chai ju tuʼuʼ qʼuiu ju jantu kʼox pus caxtʼakʼaʼ ju lhiʼut ju jantu kʼox. 18 Pus ju tuʼuʼ kʼoxi qʼuiu jantu lai catixtaklh ju xalhiʼut ju jantu kʼox. Chai ju tuʼuʼ qʼuiu ju jantu kʼox jantu lai catixtaklh ju xalhiʼut ju kʼox. 19 Pus tachi chun ju qʼuiu ju jantu xtʼakʼa ju xalhiʼut ju kʼox pus chakxmakʼancan chai lakxavacanch. 20 Pus vana va chun ju lamiʼatsucuntiʼan. Laich apʼumispʼayaʼitʼit tichi lapanacnich ju laʼisʼatsucuntiʼan. 21 Tachi chun ju lapanacni ju quintajuni ni ixʼucxtin icjunita jantu si catatanuyanta ju lactʼiyan junta lhinajun ju Dios. Va yuʼunch ju catatanuyanta ju tanavini ju ixkʼachat ju quimpai ju vilhcha lactʼiyan. 22 Pus ju anuʼ avilhchan acsni camakʼosaspitcanaʼ ju lapanacni na lhu chanich aquintajunach: “Quiʼucxtin ju quijnan xacʼajunau ju lapanacni ju minchivinti lamintapakaʼut. Chai lamintapakaʼut icxcoxtuch ju lhacaticuru laʼixlacatunaʼan ju lapanacni. Chai lamintapakaʼut na lhu xacnaviyau ju lhamakʼan”. Chunch ju aquintajunach. 23 Para ju acsnich chani acʼajunach: “Jantu tavanan xaclamispayau. Akʼostʼit ju laquimacni ju uxijnan ju naviyatʼit ju alactuʼunti”. 24 Va tichi chavaich ju quinkʼasmatni ju quinchivinti chai canaviyaʼ tachi ju icnajun pus ixtʼachunch junita tachi tam lapanac ju na acʼatsananta. Pus ju yuchi na talhman lana ju pucutulh tus lhitajulh ju chiux. Chai laʼixʼucxni ju anuʼ chiux ju yaulh ju xatantun ixchakaʼ. 25 Chai astan lalh ju xcan. Alilh ju akmuxtutu. Chai na pʼas lalh ju un. Para jantu taʼaktalh ju anuʼ chakaʼ ni laʼixʼucxni chiux ju ixchʼantai. 26 Para va tichi chavaich ju quinkʼasmatni ju quinchivinti para jantu canaviyaʼ tachi ju icnajun pus ju yuchi ixtʼachunch junita tachi ju apumatam lapanac ju na tonto ixjunita. Pus ju yuchi yaulh ixchakaʼ lacacucujni. 27 Chai astan lalh ju xcan. Alilh ju akmuxtutu. Chai na pʼas lalh ju un. Pus taʼaktalh ju anuʼ chakaʼ chai lana takʼalhikʼo. 28 Chai acsni chivinkʼolhch ju Jesús pus ju lapanacni va talhamakʼaninilh ta yu xaʼamalanininch. 29 Ixtalhamakʼanininch ni ixʼamalaninin tachi ju tam xakʼai. Jantu chun ixlai tachi ju ixtaʼamalaninin ju na ixtalhatalanininta ju ixlhamapʼaksinʼan.
1 Acsni mincha ju Jesús ju lactalhpa na lhu lapanacni ju tachʼakʼokʼalh. 2 Chai lakmilh pumatam ju ixpacxanta ju macxcai tsʼitsʼi ju ixpuchʼiʼan. Chai ju yuchi taʼaktsokotanilh ju Jesús chai juni: ―Quiʼucxtin ni va xaqʼuincʼuchʼupʼutʼuch cava pus laich xaqʼuincʼuchʼutʼi. 3 Pus ju acsnich ju Jesús mokslanilh ixmacaʼ laʼixlacatuna. Chai junich: ―Iclacasqʼuinch. Palaichʼat ju chavai. Chai acsni naulh ju chunch ju Jesús pus lana vatsʼalhti lacamacaxnilh istsʼitsʼi ju anuʼ lapanac. 4 Chai ju Jesús juni: ―Akʼasmatʼich ju icjunan. Tun xamatiʼ tʼiʼun tuʼuʼ. Va aʼinchich tʼalacʼasuniniʼ ju pali chai axtʼakchich ju milhakʼailaktsʼin tachi ju ixnajun ju Moisés lacalhamapʼaksin. Chai ju chunch ju lapanacni catacʼatsayaʼ ni salaka ju milacatuna. 5 Acsni chaʼalh ju Jesús ju lakʼachakʼan Capernaum pus lakmilh pumatam capitán chai sqʼuinilh lamapainin. Pus ju anuʼ capitán jantu israelita ixjunita. Romano ixjunita. 6 Chanich ju juni ju Jesús: ―Quiʼucxtin ju quilapanac macha laquinchakaʼ. Va lacalhtuculunta chai slivasalh na makʼalhkʼajnan. 7 Chai ju Jesús juni: ―Acʼanach cʼuchʼunuʼ. 8 Para ju capitán chani kʼalhtailh: ―Quiʼucxtin ju quitʼin jantu tuʼuʼ quintapalhni ni laich atʼanutʼi laquinchakaʼ. Para mas va anauch ju chivinti chai palaich cajunaʼ ju quilapanac. 9 Iccʼatsai ni laich chunch catapasalh ni alin vachuʼ ju quintalhijuni. Chai ju quitʼin vachuʼ alin ju quintaropajni ju icʼalhijuni. Acsni icjuni ju pumatam ni caʼalh pus an. Chai acsni icjuni apumatam ni camilh pus min. Chai ni icjuni ju quilapanac ni canavi tuʼuʼ pus navi. ―Chunch ju junilh ju anuʼ capitán. 10 Chai ju Jesús acsni kʼasmatlh ju ixchivinti na lhamakʼaninilh. Chai ajuni ju ixtatʼaʼanta: ―Slivasalh ju iclajunau. Jantu iclhitajuta nin pumatam israelita ju aquilhilaksilh tachi ju quilhilaksi ju ani ya lapanac. 11 Chai iclajunau ni na lhu cataminanta ju ixlhilacaputsʼun ju lacamunutpaʼ ju jantu israelitanin tajunita tachi ju ani ya lapanac. Chai catatʼatolach ju Abraham chai ju Isaac chai ju Jacob ju lactʼiyan junta lhinajun ju Dios. 12 Para ju aliʼin uxijnan ju ixlhijun ni ixtʼanutʼit ju lactʼiyan junta lhinajun ju Dios jantu lai atʼanuyaʼitʼit. Alai amacʼapʼincʼanaʼitʼit lacaʼatatsʼisni. Chai ju anch alackʼalhununaʼitʼit chai xvek xvek alacqʼuictʼaʼunaʼitʼit ni na amakʼalhkʼajnanaʼitʼit. ―Chunch ju ajuni ju lapanacni ju Jesús. 13 Astan chani ju juni ju capitán: ―Aʼinchʼokʼochich laminchakaʼ. Tachi ju xaqʼuilhilaksich ni laich acʼacʼuchʼunulh va laquinchivinti pus chunchach ju icnavilh. ―Chunch ju xajuni ju anuʼ capitán. Chai vasalh lana palaich va ju ixlapanac ju acs pantsʼiquis. 14 Ju aktam ju Jesús alh laʼixchakaʼ ju Pitaluʼ chai acsni chilh pus laktsʼilh ju ixputʼichakoʼulh ju Pitaluʼ ni ixma laʼixputaman. Na ixchʼapata ju iscacat. 15 Pus ju Jesús quimacchʼapalh chai lana macaulh ju iscacat ju takʼankʼan. Chai ju yuchi kʼostavi chai lana tsuculh alacmavanaʼ ju Jesús chai ju ixʼamamakaʼui. 16 Chai acsni tokʼoxa na lhu alhiminicalh ju Jesús ju lapanacni ju ixtanun ju lhacaticuru laʼixtanquilhacniʼan. Pus ju Jesús va lakatam chivinti ju ajuni ju lhacaticurulhni chai lana tataxtulh laʼixlacatunaʼan ju lapanacni. Vachuʼ palai anavikʼo ju takʼankʼanin ju ixʼalhiminicanta. 17 Chai ni chunch ju navilhch ju Jesús pus uctaxtulh ju chivinti ju ixnajunta ju makʼaniya ixlapanac Dios ju Isaías ixjuncan. Pus ju yuchi ma chani naulh: “Yuchach ju makʼosulh ju quintakʼankʼatʼan”. 18 Ju Jesús acsni laktsʼilh ni na lhu lapanacni ixtavilanalh ixtalakachoko junta ixvi ju yuchi pus ajunilh ju ixtamamakaʼun ni caʼalactʼaʼalh lhimakʼantacutni atantsʼin. 19 Para acsni tucaʼ ixtaʼanta pus lakmilh ju Jesús pumatam ju na ixlhatalanininta ju ixlhamapʼaksinʼan ju istʼaʼisraelitanin chai juni: ―Amamakaʼunuʼ acchʼakʼokʼayanch vanta anchach ju apʼinaʼ. 20 Para ju Jesús junich: ―Ju zorra alin junta tanui. Chai ju tsʼokʼo alin junta tatocʼai. Para ju quitʼin matiʼ ju quinchakaʼ junta lai acʼastacnalh. Quitʼin ju quimalakachatachilh ju Dios ni lapanac actsucuyaʼ ju ani. 21 Chai lana xakʼala ju Jesús apumatam ixtamamakaʼun. Juncanch ju Jesús: ―Quiʼucxtin yauch aqʼuiʼun ni actʼatolacaʼ ju quimpai. Ni caniyaʼ ju yuchi pus acmacnuyaʼ chai acsnich ju acchʼakʼokʼayan. 22 Para ju Jesús chani kʼalhtailh: ―Palai tuʼuʼ aqʼuilhiulatʼi ju quitʼin. Palai jantu ju mimpai. Chai aqʼuinchʼakʼokʼach junta acʼuctsuntsucuyaʼ. Chach tamacnu ju mimpai ju taʼamacnunun ju tanita. 23 Pus ju acsnich ju Jesús tajulh lacabarco chai ju ixtamamakaʼun vachuʼ tatʼataju. 24 Chai acsni taʼalhtanalh lacatsʼunin pus kʼostaya ju kʼai un chai na pʼas tanekʼalh ju xcan. Chai na ixquitanui ju lacabarco. Pus ju barco ixquiʼakpaxputunch. Para ju Jesús na ilhtatai. 25 Pus ju acsnich talakʼalh ju ixtamamakaʼun chai tamacuju. Tajunich: ―Quiʼucxtin aquilamakʼalhtaxtuch ni na muxtuputunauch. 26 Para ju Jesús chani akʼalhtailh: ―Tajuch ni va tʼalhananatʼit. Ju uxijnan na lacatsʼunin quilalhilaksiyau. Chai acsni nonkʼo chunch pus ju Jesús kʼostavi chai kʼailh ju un chai ju xcan. Chai lana sek avanalh chai jantu lucunulh ju xcan. 27 Chai ju ixlapanacni lana na talhamakʼaninilh. Talaclajuni: ―Tis lapanac nuʼ ju ani ni lai xataquiclacaʼi ju un chai ju xcan. 28 Pus ju Jesús chai ixʼamamakaʼui tachaʼalh ju lhimakʼantacutni atantsʼin junta ixtʼunʼan ixjunita ju amachakʼan Gadara. Chai acsni tatacutcha pus taquipakxtokchilh ixtʼiyunʼan ju ixtapacxanta ju lhacaticurulhni laʼixlacatunaʼan. Ixtamintacha campusantu chai slivasalh lakachapunin ixtajunita. Jantu xamatiʼ lai ixtamapasai ju anuʼ lacati. 29 Chai lana tatsuculh tʼasanin. Chai ju lhacaticurulhni na pʼas tamachivina ju anuʼ lapanacni acsni chani tajuni ju Jesús: ―Tijuch ju quilamintau lhilaktsʼinin ju uxintʼi ji Jesús istsʼalhʼat Dios. Ja va quilamintau mamakʼalhkʼajninin mas tucaʼ chin ju avilhchan. ―Chunch ju tajuni ju anuch lhacaticurulhni ju Jesús. 30 Pus ju lhiʼavinti lacatsʼunin na lhu ixtayanancha ju pʼaxnin. Ju yuʼunch va ixtatʼajun kʼexvenin. 31 Pus ju lhacaticurulhni talhitapaininilh ju Jesús. Tajunich: ―Ni aquilatixcoxtuyau laʼixlacatunaʼan ju ani tayanalh lapanacni pus aquilalacasqʼuiniuch ni acʼanau laʼixlacatunaʼan ju pʼaxnin. 32 Chai ju Jesús ajuni: ―Apʼinchitʼit. Pus ju anuʼ lhacaticurulhni tataxtulh laʼixlacatunaʼan ju ixtʼiyunʼan lapanacni chai lana taʼalh tanunin laʼixlacatunaʼan ju pʼaxnin. Chai acsni tatanu laʼixlacatunaʼan ju pʼaxnin pus ju pʼaxnin taʼatsʼalalh. Tin taʼalh junta vac anta. Tatajucha lacaʼatantsʼin chai tanitajukʼo lacxcan. 33 Pus ju yuʼunch ju ixtalhistʼacʼa ju pʼaxnin na tatalhanalh chai taʼatsʼalalh. Taʼalh ju lakʼachakʼan chai taquinonkʼo chux tuchi ixtapasata laʼisʼatsucuntiʼan ju anuʼ lapanacni ju ixtapacxanta ju lhacaticurulhni. 34 Pus ju acsnich chux ju lapanacni amachakʼan anch tataxtulh. Talakmilh ju Jesús. Chai acsni talakchilh tatapaininilh ni cataxtulh ju laʼixtʼunʼan.
1 Ju Jesús tanuchokolh lacabarco chai anchokolh lhimakʼantacutni atantsʼin. Chai chinchokolh laʼixtʼun. 2 Chai lhichaʼanicalh pumatam lapanac ju va ixlacalhtuculunta. Pulhichaʼancalh ju lona. Chai ju Jesús acsni alaktsʼilh ni na ixtalhilaksi ju yuchi ju anuch lapanacni pus chani juni ju takʼankʼan: ―Jantu atʼalhan ji quintsʼalh. Ju miʼalactuʼunti macʼacxanicanta. 3 Para ju aliʼin ju ixtalhatalanininta ju ixlhamapʼaksinʼan ju istʼaʼisraelitanin takʼasmatlh ixchivinti ju Jesús chai tanaulh laʼixʼalhunutʼan ni ma na macxcai chivinti xanajun ju Jesús ni ma tachi Dios ixjumputun. 4 Para ju Jesús cʼatsa tuchi ixtapastʼacʼa chai chani ajuni: ―Tajuch ni va chunch ju pʼastʼacʼatʼit lamiʼalhunutʼan. 5 Ni va acjunilh ni macʼacxanicalh ju ixʼalactuʼunti pus jantu lai pʼucʼatsʼayatʼit ni vasalh alin ju quintachaput u jantu. Para ni acjunilh ni cakʼostavi chai caʼalhtanalh pus ju chunch lai apʼucʼatsʼayaʼitʼit ni alin ju quintachaput u jantu. 6 Pus ju chavai aclamasuniyau ni vasalh alin ju quintachaput ju ani lacamunutpaʼ ni lai icmacʼacxai ju alactuʼunti. Quitʼin ju quimalakachatachilh ju Dios ni lapanac actsucuyaʼ ju ani. Pus ju acsnich ju Jesús chani juni ju takʼankʼan: ―Akʼostʼaʼulh. Asactʼich ju mimputaman chai aʼinchich laminchakaʼ. 7 Pus ju acsnich ju anuʼ takʼankʼan ixjunita taya. Alh laʼixchakaʼ. 8 Chai ju lapanacni acsni talaktsʼilh na tatalhanalh chai talakʼayalh ju Dios ni xtaknilh ju chunch tachaput ju Jesús ni laich caʼaʼaktaijuyaʼ ju lapanacni. 9 Chai ju Jesús taxtulh ju anch chai acsni ixʼanta ju lacati pus laktsʼilh pumatam achʼiniʼ ju ixvi junta amapalanancan. Ju yuchi Mateo ixjuncan. Chai ju Jesús chani juni: ―Aqʼuinchʼakʼokʼach. Pus ju Mateo lana taya chai chʼakʼokʼalh. 10 Pus ju aktam ju Jesús ixtʼajun venaʼ laʼixchakaʼ ju Mateo. Chai na lhu tachaʼalh ju achʼinin chai vachuʼ ju aliʼin alactuʼunin. Chai kʼaixtam tatʼatavi ju Jesús lacamixa. Chaich ju ixʼamamakaʼui vachuʼ anch ixtavilanalh. 11 Para ju fariseonin acsni talaktsʼilh ni anch ixvi ju Jesús chanich tajuni ju ixʼalacmamakaʼui ju Jesús: ―Ju miʼamamakaʼunuʼan tajuch ni va kʼaixtam alactʼavajin ju achʼinin chai ju alactuʼunin. 12 Para ju Jesús acsni kʼasmatlh ju ixchivintiʼan chani alacjuni: ―Ju kʼox tatʼajun jantu tamaktasqʼuini ju acʼuchʼunuʼ. Va yuʼunch ju talactakʼankʼai ju tamaktasqʼuini ju acʼuchʼunuʼ. 13 Alanichitʼit tuchi ju nomputun ju chivinti ju tsʼokcanta laʼixchivinti Dios junta chani najun: “Ju quitʼin iclacasqʼuin ni aʼaktʼaiʼuyatʼit lacaʼamapaininti ju mintʼalapanacniʼan. Jantu va yuchi ni aquilalhikʼailaktsʼinau ju tuʼuʼ atapacxat”. Chunch ju najun laʼixchivinti Dios chai chun ju icnavi. Pus ju quitʼin jantiyuʼ iclhiminta ni acʼalactʼasanilh ju lapanacni ju tanajun ni na soknicʼa ju isʼatsucuntiʼan. Alai icminta alactʼasaniniʼ ju alactuʼunin ni catamacaulh ixʼalactuʼuntiʼan. 14 Ju acsnich ju ixʼamamakaʼui ju Xivan talakmilh ju Jesús chai tasacmi: ―Ju quijnan chai ju fariseonin na paklhu ju ictascajayau. Para ju mintamamakaʼun jantu tatascajai. Tajuch. 15 Ju acsnich ju Jesús chani ajuni: ―Ja laich cataʼamakʼaninilh ju tamakʼanta junta alin ju tamakʼaxtʼokʼat acsni makvilhcaʼ ju anuʼ tsʼalh ju catamakʼaxtʼokʼaʼ. Pus vana va chunch ju quintamamakaʼun. Jantu tatascajai ni icʼalactʼavilhcaʼ. Para cachinaʼ avilhchan acsni acmakʼosucanaʼ ju ani lacamunutpaʼ. Chai acsnich ju catatascajayaʼ ni na aquintalhamakʼanininach. 16 Jantu xamatiʼ lai lhalakyavanan ju pumpuʼ ju jantu amakpanti chai lai va chunch camucʼalh ju lacakʼatʼili pumpuʼ. Ni chunch calacalh pus va palai makat cakʼexlh acsni talakatumi ju sastʼi pumpuʼ. 17 Chai nin yuchi ni lai acpumuju ju sastʼi vino lacakʼatʼili axtʼakʼan ni na kʼalhpʼasnicaʼ. Ni chunch ju canavicalh pus va cakʼexlh ju axtʼakʼan chai ju vino capuʼankʼolh. Chai ju axtʼakʼan catsʼankʼalh. Alai pumucan ju sastʼi vino lacasastʼi axtʼakʼan. Ju chunch laich pumakʼacan ju vino ju axtʼakʼan. Chunch ju ajuni ju lapanacni ju Jesús. Va ixʼamamachakxaniputun ni jantu lai catilhiyaulh ju makʼaniya ixlhamapʼaksin ju Moisés ju sastʼi ixlhamapʼaksin ju yuchi. 18 Acsni ixtʼajun ajuniniʼ ju lapanacni ju ani chivinti pus lakchilh pumatam xakʼai sia yuʼunch ju ixtachʼalhcatnan laʼixpujitatʼan ju israelitanin. Chai ju yuchi taʼaktsokotanilh ju Jesús chai juni: ―Ju quintsiʼ va pantsʼiquiscaʼ xani. Para caʼauch chai amokslanitʼachiʼ ju mimacaʼ laʼixlacatuna chai catsucuchokoyaʼ. 19 Pus ju Jesús lacataya chai tʼaʼalh. Vachuʼ tatʼaʼalh ju ixʼamamakaʼui. 20 Chai acsni ixtaʼanta ju lacati pus chincha pumatam chakoʼulh laʼixlhipulacan ju Jesús. Chai ju yuchi va tachi ixʼalinta ixtakʼankʼat. Lakacautʼui cʼata ixpacxanta ju anuʼ takʼankʼat. Pus ju yuchi lakchaʼanilh ju ixquilhtuʼ ixpumpuʼ ju Jesús. 21 Chunch ju lalh ni ixnajun laʼixʼalhunut ni mas va yuchi ni calakchaʼanilh lacatsʼunin ju ixpumpuʼ ju Jesús pus palai cajunaʼ. 22 Chai ju Jesús talakaspʼitlh. Laktsʼilh chai juni: ―Quintsiʼ jantu atʼalhan. Ni xaquilhilaksi pus yuchi palai xalhiʼun. Pus ju anuʼ chakoʼulh palai va ju anuʼ pantsʼiquis. 23 Pus ju Jesús acsni chaʼalh laʼixchakaʼ ju anuʼ xakʼai pus alaktsʼilh ju asanin chai ju lapanacni ni na ixtalackʼalhun. 24 Chai ajuni: ―Apʼinchitʼit ju uxijnan. Ju atsiʼ jantu nita. Va lhtatai. ―Chunch ju ajuni. Para ju lapanacni va talhitsʼiʼilh. 25 Para ju Jesús acsni alacxcoxtukʼo ju lapanacni pus tanulh chai macchʼapalh ju anuʼ atsiʼ chai ju yuchi lana kʼostavi. 26 Pus lana laccʼatsakʼocalh tachi ixlhilacaputsʼun ju lacatʼun ju vanin vi ju anuʼ lakʼachakʼan. 27 Chai acsni taxtuchokolh ju Jesús ju anch pus tachʼakʼokʼalh ixtʼiyunʼan alakʼachʼixnin. Pʼas ixtachivinin. Ixtalactʼasai. Va tsa tsa ixtajuni ju Jesús: ―Aquilaʼaktaijuch ji istsʼalh ju kʼai ucxtin David. 28 Pus acsni chinchalh ju Jesús laʼixchakaʼ pus vachuʼ tachaʼalh ju alakʼachʼixnin. Chai ju Jesús chani ajuni: ―Ja lacʼaʼiyatʼit ni laich aclamalacʼavaniu ju uxijnan. Chai ju yuʼunch takʼalhtayanalh. Tajuni: ―Iclacaʼiyau ji ucxtin. 29 Pus ju acsnich ju Jesús achʼapanilh ixlakchulhʼan ju anuʼ alakʼachʼixnin chai ajuni: ―Ni xaquilalhilaksiyau ju quitʼin pus chunchach ju aclanaviniyau. 30 Chai lana taʼalacʼavanalh. Para ju Jesús slivasalh alhimapʼaksi. Chai ajuni: ―Alaktsʼintʼit. Tun xamatiʼ aʼunitʼit tuchʼi xatʼapʼasayatʼit. 31 Para ju yuʼunch acsni tataxtuchalh lana talacquilhuntsuculh tachi ixlhilacaputsʼun ju anuʼ lacatʼun tuchi ixtapasata laʼisʼatsucuntiʼan. 32 Chai acsni tataxtulh ju yuʼunch pus lana lhichaʼanipalacalh pumatam lapanac ju va nunuʼ ixjunita ni ixtanun ju lhacaticuru laʼixlacatuna. 33 Para acsni xcoxtulh ju Jesús ju lhacaticuru pus ju anuʼ nunuʼ chivinilh. Chai ju lapanacni slivasalh na talhamakʼaninilh. Ixtanajun: ―Jantu tavanan laktsʼincanta tuʼuʼ ju chunch ju ani laquilacatʼunʼan. 34 Para ju fariseonin chani ixtanajun: ―Ju ani ya lapanac xcoxtui ju lhacaticuru laʼixlacatunaʼan ju lapanacni laʼixtachaput ju xakʼai lhacaticuru. 35 Pus ju Jesús talacaputocʼalh tachi chun ju kʼai lakʼachakʼanixni chai tachi chun ju lactʼicstʼi lakʼachakʼanixni. Ixʼamalanininch laʼixlacpujitatʼan ju yuʼunch. Ixʼajuni ju lapanacni ni lhinomputun ju Dios laʼisʼatsucuntiʼan. Vachuʼ palai anavi ju lapanacni mas va tuchi takʼankʼat ju ixtapacxanta. 36 Para acsni alaktsʼilh ju lapanacni slivasalh na amapaini ni jantu xamatiʼ ixʼamasuni ju soknicʼa ti. Chunch ixtajunita tachi ju tuʼuʼ borregojni ju va matiʼ ixʼalhistacnaʼan. 37 Pus ju acsnich ju Jesús chani ajuni ju ixʼamamakaʼui: ―Slivasalh na lhu ju xatocʼat ju achʼananti chai na cʼatata para na lacatsʼunin ju chʼalhcatnin. 38 Pus yuchi alhitʼapʼaininitʼit ju xaʼucxtin ju lhichʼalhcat ni camacamilh aliʼ ju chʼalhcatnin laʼixlhichʼalhcat. Ju Jesús chunch ajuni ju ixʼamamakaʼui ni va ixʼamamachakxaniputun ni na lhu alin ju lapanacni ju laich caʼamalacaʼinicalh ixchivinti Dios para na lacatsʼunin ju taʼamalaninimputun.
1 Ju acsnich ju Jesús atʼasanilh ju ixpumacautʼuiʼan ixʼamamakaʼui chai axtaknilh ixtachaputʼan ni laich cataxcoxtuniyaʼ ju lhacaticurulhni laʼixlacatunaʼan ju lapanacni chai ni laich palai catanavi ju lapanacni ju ixtachʼapata tachi chun ju takʼankʼat. 2 Chani ixʼajuncan ju ixpumacautʼuiʼan ixtamalakachan ju Jesús. Pʼulhnan yuchi ju Simón ju vachuʼ juncan Pitaluʼ. Chai ixlakʼau ju Tilix ixjuncan. Chai ju Jacobo chai ju Xivan. Pus ju Xivan ispʼisekʼe ixjunita ju Jacobo chai ju yuʼunch istsʼalan Zebedeo ixtajunita. 3 Chai ju Pilipe chai ju Bartolomé chai ju Tumax chai ju Mateo ju achʼiniʼ ixjunita. Chai apumatam Jacobo ju istsʼalh Alfeo ixjunita. Chai ju Lebeo ju vachuʼ Tadeo ixjuncan. 4 Chai apumatam Simón ju makyuʼunch ixjunita ju cananistanin. Chai ju Judas Iscariote. Yuchi ju tucan makʼaxtaklh ju Jesús astan. 5 Pus ju Jesús amalakacha ju ani ixpumacautʼuiʼan chai chani alhimapʼaksi: ―Jantu apʼitʼit junta tavilanancha ju yuʼunch ju jantu quintʼaʼisraelitanin tajunita. Nin yuchi ni apʼitʼit laʼixlakʼachakʼanʼan ju samaritanonin. 6 Alai anchach ju apʼitʼit junta tavilanancha ju quintʼaʼisraelitanin. Ju yuʼunch chunch tajunita tachi ju tuʼuʼ borregojni ju va tatsʼankʼatach. 7 Chai vanta anchach ju achʼipʼinaʼitʼit aʼunaʼitʼit ju lapanacni ni vaninch minta ju avilhchan acsni calhinonaʼ ju Dios. 8 Palaich anavitʼit ju tapacxanta ju macxcai tsʼitsʼi ju va puchʼiʼan. Chai palaich anavitʼit ju tapacxanta ju tuʼuʼ atumpa takʼankʼat. Amalokʼonitʼit ju va tanita. Chai axcʼoxtʼutʼit ju lhacaticuru laʼixlacatunaʼan ju lapanacni. Ju uxijnan jantu va xatamoyatʼit ju ani tachaput. Pus vana va chun jantu achʼinintʼit acsni aʼaktʼaiʼuyaʼitʼit ju lapanacni. 9 Jantu alhipʼitʼit tuʼuʼ tumin lamimpuxaʼan. 10 Nin yuchi ni alhipʼitʼit ju mimpastiʼan ixlacata ju lacati. Nin yuchi ni alhipʼitʼit kʼalhtʼui ju mimpumpuʼan nin lakatʼui ju minchʼanxtʼakʼanʼan. Nin tuʼuʼ mimpalicʼan. Pus tachi ju lapanacni ju tamakchʼalhcatnan ni anch ju tasukʼojui ju ixvaitiʼan pus vana va chun ju uxijnan. Lhijunch ni catamavayan ju lapanacni ju aʼunaʼitʼit ixchivinti Dios. 11 Chai vanta anchach ju atʼanuyaʼitʼit u lacakʼai lakʼachakʼan u lacalacatʼicstʼi lakʼachakʼan apʼuxcʼaʼutʼit pumatam ju na kʼox lapanac lhiulacan. Chai anchach laʼixchakaʼ ju atʼolaʼitʼit tus acsni atʼaxtʼuchʼokʼoyaʼitʼit ju anuʼ lakʼachakʼan. 12 Chai acsni atʼanuyaʼitʼit ju anch junta atʼolaʼitʼit pus amacʼamitʼit ju tatanumanalh anch. Chai aʼunaʼitʼit ni Dios ju caʼaxtakniyaʼ ju kʼox isʼatsucuntiʼan. 13 Chai ju yuʼunch ju tatanumanalh anch ni kʼoxich cataʼamaklhtayananan pus ju Dios vasalh caʼaxtakniyaʼ ju kʼox isʼatsucuntiʼan tachi ju sqʼuintʼit. Para ni jantu kʼox cataʼamaklhtayananan pus ju Dios jantu catiʼaxtaknilh ju kʼox isʼatsucuntiʼan tachi ju sqʼuintʼit. 14 Chai ju amachakʼan ju anuʼ chakaʼ u ju anuʼ lakʼachakʼan ni lana jantu taʼamaklhtayanamputunan nin catakʼasmatniputunan pus acsni atʼaxtʼuyaʼitʼit ju anch achʼancʼalhapʼuxcʼantʼitch ju pokxni laminchʼanxtʼakʼanʼan ni catacʼatsayaʼ ni jantu kʼox tachi ju xatalai. 15 Slivasalh iclajunau. Acsni cachinach ju avilhchan acsni camakʼosaspitcanaʼ ju lapanacni palai macxcai caʼalinaʼ ju ixmakʼalhkʼajnatʼan ju amachakʼan ju anuʼ lakʼachakʼan. Palai jantu ju amachakʼan ju makʼaniya lakʼachakʼanixni Sodoma chai Gomorra. 16 Pus iclamalakachayau tachi ju tuʼuʼ borregojni junta na alin ju maktilin. Acʼatsʼanantʼit. Chai salaka atsʼucʼutʼit. 17 Alhistʼaccʼantʼit laʼixmacniʼan ju lapanacni. Pus ju yuʼunch catalhiʼanan lacapuʼucxtin. Chai catalakanekmayan laʼixpujitatʼan ju mintʼaʼisraelitanin. 18 Chai alhipʼincʼanaʼitʼit laʼixʼucxlacapuʼan ju gobernadornin chai ju xakʼai tucan junita va ixlacaʼatalh ni quilatʼaʼalhtananau ju quitʼin. Para ju chunch laich aʼunaʼitʼit ju quilacata ju xalackʼajin chai ju yuʼunch ju jantu quintʼaʼisraelitanin tajunita. 19 Para acsni amakʼaxtʼakcʼanaʼitʼit laʼixmacaʼan ju xalackʼajin tun tʼiʼamakʼaninintʼit ni jantu cʼatsʼayatʼit tuchʼi anonaʼitʼit nin ta yu alhakʼalhtʼayananaʼitʼit. Jantu alhamakʼaninintʼit ni Dios ju cataxtakniyan ju acs pantsʼiquis ju tuchʼi anonaʼitʼit. 20 Pus jantu uxijnan ju achʼivinaʼitʼit. Alai yuchi ju iSpiritu Santu ju quimpaiʼan Dios ju cataxtakniyan ju chivinti ju anonaʼitʼit. 21 Na lhu caʼalinaʼ ju laxcaiti ju va quilacata. Ju ixlakʼau ju tam xamatiʼ laich calhimakʼaxtʼakʼaʼ laʼixʼaninti. Ju xapai tam xamatiʼ laich calhimakʼaxtʼakʼaʼ ju isʼaskʼatʼa laʼixʼaninti. Chai ju saʼaskʼatʼan laich catatʼalasayaʼ mas ixpaichʼan chai catatʼalalhinonaʼ ixmaknicaʼan. 22 Chai tachi chun ju lapanacni cataxcayan va ixlacaʼatalh ni quilachʼakʼokʼayau. Para va tichi chavaich ju cachʼixach ju makʼalhkʼajnat tus catapasayaʼ pus ju yuchi camakʼalhtaxtucanaʼ. 23 Chai acsni axcʼaicʼanaʼitʼit ju lakatam lakʼachakʼan pus apʼitʼit ju alacatam. Pus slivasalh ju iclajunau. Jantu atʼilhilacʼapʼutʼocʼakʼotʼit tachi chun ju ixlakʼachakʼanʼan ju quintʼaʼisraelitaninʼan acsni acminchokoyaʼ ju quitʼin ju quimalakachatachilh ju Dios ni lapanac actsucuyaʼ ju ani. 24 Ju amamakaʼucanta jantiyuʼ ju xalackʼajin. Alai yuchi ju xakʼai ju amamakaʼunuʼ. Chai ju xalapanac jantiyuʼ ju xakʼai. Alai yuchi ju xakʼai ju ixʼucxtin. 25 Pus lhijunch ni vana va chunch caʼaʼulhtucanaʼ ju xaʼamamakaʼunin tachi ju ulhtucalh ju ixʼamamakaʼunuʼan. Chai lhijunch ni vana va chun caʼaʼulhtucanaʼ ju xalapanacni tachi ju ulhtucalh ju ixʼucxtinʼan. Pus ju quitʼin miʼucxtinʼan icjunita. Chai ju lapanacni ni quintajuni ni icpuchʼalhcatnan ixtachaput ju lhacaticuru pus ja va a ti uxijnan jantu vana va chun aʼuncʼanaʼitʼit. 26 Ju Jesús tailhiʼalh ju ixchivinti chai chani ju ajuni ju ixtamamakaʼun: ―Chai ni cʼatsʼayatʼit ni chunch ju aʼulhtʼucʼanaʼitʼit pus yuchi iclalhijunau ni jantu atʼalhonitʼit ju mintʼalapanacniʼan. Acʼatsʼatʼit ni jantu tuʼuʼ ju va sek navicanta ju jantu catasuyaʼ. Chai jantu tuʼuʼ ju lai matankʼanucan ju jantu cacʼatsakʼocanaʼ. 27 Pus ju tuchi iclajunau acsni va quiʼakstuʼan vilau pus yuchach ju aʼunitʼit ju lapanacni. 28 Jantu atʼalhonitʼit ju mintʼalapanacniʼan ju lai catamaknin para astan jantu lai tuʼuʼ aliʼ catanaviyan. Alai yuchi ju atʼalhonitʼit ju Dios ni yuchach ju lai macaʼan ju milacatunaʼan chai ju mintacuvinʼan ju lacajipi. 29 Jantu tasqʼuini ni atʼalhonitʼit ju tam mintʼalapanacʼan. Alaktsʼintʼit ju lacatʼicstʼi tsʼokʼo ni lhistʼacan ju lakatʼui tsʼokʼo lakatam sentau. Pus mas va chunch ixtapalh ju yuʼunch para jantu lai catipataju lakatam ju yuʼunch ju lacatʼun ni jantu calacasqʼuinaʼ ju mimpaiʼan Dios. 30 Chai mas va miʼaiʼan ju uxijnan si putʼekʼekʼocanta. 31 Pus yuchi iclalhijunau ni jantu atʼalhanantʼit. Pus palai laklhu ju mintapalhniʼan ju uxijnan. Palai jantu ju va tuʼuʼ tsʼokʼo mas na lhuch catava ju yuʼunch. 32 Va tichi chavaich ju canonaʼ laʼixʼucxlacapuʼan ju lapanacni ni quinchʼakʼokʼai pus vachuʼ acnonaʼ laʼixʼucxlacapuʼ ju quimpai ju vilhcha lactʼiyan ni quilapanac junita. 33 Para va tichi chavaich ju canonaʼ laʼixʼucxlacapuʼan ju lapanacni ni jantu quilhilaksich pus vachuʼ quitʼin acnonaʼ laʼixʼucxlacapuʼ quimpai ju vilhcha lactʼiyan ni jantu quilapanac junita. 34 Jantu anaʼuntʼit ni va icminta naviniʼ ju akʼoxamixnit ju ani lacatʼun. Jantu va icminta lakʼoxiniʼ ju lacamunutpaʼ. Alai va ixlacaʼatalh ni icminta caʼalinaʼ ju lakʼaiti. Caxcaicanaʼ ju yuʼunch ju quintalhilaksi. 35 Pus va ixlacaʼatalh ni icminta ju tam lapanac catʼalaxcayaʼ ju ixpai. Chai ju tam atsiʼ catʼalaxcayaʼ ju ixnati. Chai ju tam xaputʼi catʼalaxcayaʼ ju ixputʼichakoʼulh. 36 Ju tatanumanalh laʼixchakaʼan ju quilapanacni yuʼunch ju ixtʼalaxcaiʼan catajunaʼ. 37 Pus ju palai camapaini ixpai u ixnati palai jantu ju quitʼin pus jantu lhijun ni quilapanac cava. Chai ju palai camapaini tam istsʼalh u tam istsiʼ palai jantu ju quitʼin pus jantu lhijun ni quilapanac cava. 38 Chai va tichi chavaich ju jantu quinchʼakʼokʼaputun va ixlacaʼatalh ni va lai mamakʼalhkʼajnicalh pus jantu lhijun ni quilapanac cava. 39 Chai va tichi chavaich ju najun ni jantu quinchʼakʼokʼaputun va ixlacaʼatalh ni jantu lacasqʼuin ni camaknicalh pus ju yuchi camakʼatsʼankʼayaʼ ju saʼatsucunti ju lactʼiyan. Para va tichi chavaich ju camakʼatsʼankʼayaʼ ju isʼatsucunti va ixlacaʼatalh ni quinchʼakʼokʼai ju quitʼin pus caʼalinaʼ isʼatsucunti ju lactʼiyan. 40 Pus ju cataʼamaklhtayananan ju uxijnan pus tachi ju va jun quitʼin ju quiʼamaklhtayanan. Chai ju quiʼamaklhtayanan pus tachi ju va jun Dios ju amaklhtayanan. Yuchi ju quimacaminta. 41 Pus va tichi chavaich ju caʼamaklhtayananach tam xamatiʼ ju najun quinchivinti va ixlacaʼatalh ni quilapanac junita pus vachuʼ caʼamaklhtayananaʼ tuchi caxtaknicananta ju quilapanac ju lactʼiyan. Chai va tichi chavaich ju caʼamaklhtayananach tam xamatiʼ ju soknicʼa isʼatsucunti va ixlacaʼatalh ni soknicʼa ju isʼatsucunti pus vachuʼ caʼamaklhtayananaʼ tuchi caxtaknicananta ju lactʼiyan ju lapanac ju soknicʼa isʼatsucunti. 42 Chai slivasalh ju iclajunau. Vachuʼ caxtaknicananta ju lactʼiyan ju ixtalhaja va tichi chavaich ju caxtakniyaʼ mas va tam vaso ju tsʼucʼuncʼu xcan ju quinchʼakʼokʼai. Caxtaknicananta va ixlacaʼatalh ni kʼeu xalaktsʼin mas jantu tuʼuʼ ixlhiulacan laʼixmacniʼan ju aliʼin ixtʼalapanacni.
1 Ju Jesús acsni amapʼaksikʼo ju ixpumacautʼuiʼan ixʼamamakaʼui pus taxtulh ju anch. Alh amalaniniʼ ju lapanacni. Chai alh nonaʼ ni lhinomputun ju Dios laʼisʼatsucuntiʼan. Ixʼalhtanatʼajun tachi chun ju lakʼachakʼanixni ju vanin ixtavilanalh. 2 Pus ju Xivan ixtʼalhnucanta para cʼatsa tuchi ixnavich ju Cristo. Chai amalakachanilh ju Jesús ixtʼiyunʼan ju ixʼamamakaʼui. 3 Ajunich ni catasacmi ju Jesús ni ma yuchach cava ju Cristo ju ixnoncan camalakachatachilh ju Dios u ma tasqʼuini ni catipacxanchokolh apumatam. 4 Pus acsni tachaʼalh chai tasacmi pus ju Jesús chani akʼalhtayanalh: ―Aʼinchʼokʼochitʼit. Amacʼatsʼanichitʼit ju Xivan tuchʼi xalaktsʼinatʼit chai tuchʼi xakʼasmatʼatʼit. 5 Aʼunitʼit ni lai taʼalacʼavanan ju alakʼachʼixnin ixtajunita. Chai laich taʼalhtanan ju ixtalacchʼantakʼalhita. Chai talaclacamacaxlich ju ixtapacxanta ju macxcai tsʼitsʼi ju puchʼiʼan. Chai laich takʼasmatʼa ju va kʼatapa ixtajunita. Chai ju ixtanita malokʼonichokocalh. Chai ju quilhpatinin ajunicalh ta yu laich cataputakʼalhtaxtulh. 6 Vachuʼ aʼunitʼit ni na kʼachan ju tam lapanac ju jantu astan najun ni jantu quinchʼakʼokʼaputun. ―Chunch ju ajunicalh ju ixʼamamakaʼui ju Xivan. 7 Chai acsni taʼanchokolh ju yuʼunch pus ju Jesús lana tsuculh alacsacminiʼ ju lapanacni ixlacata ju Xivan. Chani ajuni: ―Acsni qʼuilaktsʼintʼit ju Xivan ju lacamacni tis chavaich ju ixlaktsʼimpʼutʼunatʼit. Cʼatsʼayatʼit ni jantiyuʼ ju lhiqʼuilatʼit ju anch ni va alaktsʼimpʼutʼutʼit tam lapanac ju va tam tam najun tachi ju lai ju tuʼuʼ xaxkʼoi actiyac acsni lacatam lacatam sun lhiʼan ju un. 8 Pus tis chavaich ju ixlaktsʼimpʼutʼunatʼit. Cʼatsʼayatʼit ni jantiyuʼ ju lhiqʼuilatʼit ju anch ni va alaktsʼimpʼutʼutʼit tam lapanac ju na va kʼox camalakchʼinilh. Jantiyuʼ ju lhiqʼuilatʼit ju anch ni va laʼixchakaʼan ju xalackʼajin ucxtinin tavilanancha ju na kʼox tamalakchʼininta. 9 Pus tis chavaich ju ixlaktsʼimpʼutʼunatʼit. Cʼatsʼayatʼit ni va ixlaktsʼimpʼutʼunatʼit ju lapanac ju najun ixchivinti Dios. Chai vasalh chunch junita ju Xivan. Para palai kʼai lhichʼalhcat ju xtaknicanta ju yuchi. Palai jantu va tichi lapanac ju najun ixchivinti Dios. 10 Pus yuchi ju Xivan ju ispastaccan acsni chani ju tsʼokʼulacalh laʼixchivinti Dios: Acmalakachayaʼ ju quilapanac ju pʼulhnan caʼanaʼ. Astan ju uxintʼi. Chai yuchach ju caʼalakʼoxiniyaʼ ju ixʼalhunutʼan ju lapanacni ni cataʼamaklhtayananan acsni achʼipʼinaʼ. Chunch ju tsʼokcanta laʼixchivinti Dios. 11 Slivasalh ju iclajunau. Tus chavai jantu tavanan alinta tam xamatiʼ ju palai kʼai cava. Va yuchi ju Xivan ju amakpaxanaʼ. Para va tichi chavaich ju palai jantu tuʼuʼ lhiulacan laʼixmacni ixtʼalapanacni sia yuʼunch ju quintalhilaksi yuchach ju palai kʼai cajunaʼ ju lactʼiyan junta lhinajun ju Dios. Palai jantu chun junita ju Xivan ju chavai. 12 Tus acsni tsuculh amalaniniʼ ju Xivan tus chavai pus ju lapanacni slivasalh laʼixlhichux ixʼalhunutʼan taʼamputun ju lactʼiyan junta lhinajun ju Dios. 13 Pus acsni tucaʼ ixmin ju Xivan pus ju Moisés chai ju aliʼin makʼaniya ixlapanacni Dios si tanonkʼo ni ma calhinonaʼ ju Dios ju ani lacamunutpaʼ. Chai acsni milh ju Xivan pus tsuculh uctaxtunuʼ ju ixchivintiʼan. 14 Chai ni va cʼatsʼapʼutʼunatʼit ixlacata ju Elías ju ixnoncan ni caminaʼ pus yuchach ju Xivan. 15 Pus ju alin ixpakʼasmatni cakʼasmatlich ju iclajunau. 16 Ju uxijnan ju chavai tʼonatʼit ca laich acnaulh ni ixtʼachunch untʼatʼit tachi ju askʼatʼan ju takʼamanan laclhitamau. Chai ju quilhmactam chani talajuni ju aquilhmactam: 17 “Ju quijnan xacskʼolau para ju uxijnan jantu xaʼatʼininatʼit. Chai icmilhpauch ju amakʼanit para sin chunch jantu xakʼachʼaniyatʼit ni jantu xalackʼalhunatʼit”. 18 Laich acnaulh ni vana va chunch untʼatʼit ju uxijnan ni vachuʼ jantu tuʼuʼ kʼox lhiulayatʼit. Ju uxijnan ixnonatʼit ni va ixpacxanta lhacaticuru ju Xivan ni va isʼakstu ju ixʼucxuntʼajun chai jantu ixʼalactʼavemputun ju lapanacni chai jantu ixkʼotputun ju vino. 19 Chai astan icmilh ju quitʼin ju quimalakachatachilh Dios ni lapanac actsucuyaʼ ju ani. Chai ju uxijnan nonatʼit ni va chavani lapanac icjunita chai icʼakʼotnu lapanac chai ixʼamigoʼan icjunita ju achʼinin chai ju aliʼin alactuʼunin. Chunch ju nonatʼit ni icʼalactʼaʼucxuntʼajun ju lapanacni chai icʼalactʼavajin chai ickʼotʼa ju vino. Para ni alin ju lapanacni ju talacaʼinilh ixchivinti ju Xivan chai quintalacaʼinilh ju quinchivinti pus putasui ni slivasalh na acʼatsananta ju Dios ni chunch ju xaquintalhilhcayan ju laquiʼatsucunti quincʼan. 20 Pus ju acsnich ju Jesús tsuculh alakʼakʼaimanaʼ ju amachakʼan ju lakʼachakʼanixni junta palai lhu ixnavita ju lhamakʼan. Alakʼakʼaima ni jantu tavanan ixtamacomputun ixʼalactuʼuntiʼan. Pus chani ajuni: 21 ―Painiʼitnich untʼatʼit ju uxijnan ji amachakʼan Corazín. Painiʼitnich untʼatʼit ju uxijnan ji amachakʼan Betsaida. Pus ni caʼixʼanavinicancha ju amachakʼan Tiro chai ju amachakʼan Sidón ju lhamakʼan ju malacʼasunicʼantʼatʼit ju uxijnan pus makʼanchich ixtamacaulh ixʼalactuʼuntiʼan ju yuʼunch. Chai ixtalakchʼilh ixlacpumpuʼan ju na tsʼiti chai ixtatavi lacalhcʼacʼa ni cacʼatsacalh ni vasalh na ixtamacomputun ixʼalactuʼuntiʼan. 22 Pus ixlhiyuchach acsni camucʼanicanaʼ ju ixtalakʼalhinʼan ju lapanacni pus ju amachakʼan Tiro chai ju amachakʼan Sidón palai jantu lhu caʼalinaʼ ju ixmakʼalhkʼajnatʼan. Palai lhu ju amamakʼalhkʼajnicʼanaʼitʼit ju uxijnan. 23 Chai ju uxijnan ji quintʼaʼamachakʼan ju lakʼachakʼan Capernaum na va takʼayayatʼit. Para amamaxanicʼanaʼitʼit. Pus ni caʼixnavicancha ju lakʼachakʼan Sodoma ju lhamakʼan ju masunicʼantʼatʼit ju uxijnan caʼixʼalinkʼalhilhch tus chavai. 24 Chai iclajunau ni palai jantu lhu caʼalinaʼ ju ixmakʼalhkʼajnatʼan ju amachakʼan Sodoma acsni camucʼanicanaʼ ju ixtalakʼalhinʼan ju lapanacni. Palai lhu caʼalinaʼ ju mimakʼalhkʼajnatʼan ju uxijnan. 25 Pus ju acsnich ju Jesús chani naulh: ―Ju uxintʼi ji quimpai xaʼucxtinʼat ju lactʼiyan chai ju lacatʼun. Pus icjunan lakʼailaktsʼiuch ni jantu amavasalanitʼa ju ani taxtokni ju na talhilaksi ixʼatalanintiʼan chai ixtacʼatsanʼan isʼakstuʼan. Alai amavasalanitʼa ju yuʼunch ju talhilaksiyan tachi ju lai tam askʼatʼa acsni lhilaksi ixʼamamakaʼunuʼ ni yuchi ju camalaniyaʼ tuʼuʼ. 26 Pus chunchach ji quimpai. Chunchach ju kʼox xalhiulai ju uxintʼi. 27 Chai ju acsnich ju Jesús chani ajuni ju lapanacni: ―Ju quimpai quixtaknikʼota tachi chun ju taxtokni. Para jantu xamatiʼ vasalh quimispai. Va yuchi ju quimpai. Chai jantu xamatiʼ vasalh mispai ju quimpai. Va quitʼin ju istsʼalh icjunita. Chai vachuʼ tamispai tachi chun ju iclacasqʼuin ni catamispa. 28 Atʼatʼit ju laquimacni tachi chun ju uxijnan ju na xkʼoptʼatʼit ni jantu lai naviyatʼit ju kʼox chai ju uxijnan ju alin tuʼuʼ ju na tsʼinqʼui lamiʼatsucuntiʼan. Pus laquimacni ju quitʼin astʼacnanaʼitʼit. 29 Alacʼaʼitʼit ju quilhamapʼaksin chai alakʼaʼitʼit ni miʼamamakaʼunuʼan acva. Pus ju quitʼin jantu jeks icʼui chai jantu tuʼuʼ iclhitakʼayai. Pus ni chunch ju alatʼit pus cakʼachanach ju miʼalhunutʼan. 30 Pus jantu na lhixcai ixnavica ju quilhamapʼaksin. Chai jantu axkʼopʼaʼitʼit ixnavica.
1 Pus lakatam avilhchan paʼastacni ju Jesús ixtʼajun tapasanaʼ junta ixchʼancanta ju trigo. Vachuʼ ixtatʼaʼanta ju ixʼamamakaʼui. Chai ju yuʼunch na ixtachavanita chai ixtapʼuxlhiʼanta ju xatocʼat ju trigo chai ixtaʼui. 2 Para acsni taʼalaktsʼinilh ju fariseonin tajunilh ju Jesús: ―Alaktsʼich. Ju mintamamakaʼun va tanavich ju lhichʼalhcat. Para jantu lhijun ni chunch ju catalalh ni va avilhchan paʼastacni junita. 3 Para ju Jesús chani alacjuni: ―Ja lana jantu pʼastʼacʼatʼit tuchi navilh ju David acsni chavanilh ju yuchi chai chux ju ixtatʼaʼanta. 4 Ja lana jantu pʼastʼacʼatʼit ni lai tanu junta ixlakʼayacan ju Dios chai ulh ju xkapavati ju ismokslanicanta ju Dios. Chai ju anuʼ xkapavati jantu lai va kʼaya ixʼucan. Va yuʼunch ju palijni ju lai ixtaʼui. 5 Chai ja lana jantu pʼastʼacʼatʼit tachi ju najun lacalhamapʼaksin ju tsʼoklh ju Moisés. Ju anch ma najun ni matiʼ ixtalakʼalhinʼan ju palijni mas tachʼalhcatnan junta lakʼayacan ju Dios ju avilhchan paʼastacni. 6 Pus ni alin ju lhamapʼaksin ni lai tachʼalhcatnan ju palijni junta lakʼayacan ju Dios mas avilhchan paʼastacni junita pus iclajunau ni vana jantu talakʼalhin tuchi xatanavi ju quiʼamamakaʼunti ni palai tuʼuʼ ju quilhamapʼaksin ju quitʼin. Palai jantu ju anuʼ makʼaniya lhamapʼaksin. 7 Para ca jantu xamachʼakxayatʼit ju ixchivinti Dios ju tsʼokcanta junta ma chani najun ju Dios: “Ju quitʼin iclacasqʼuin ni alaʼaktʼaiʼutʼit lacaʼamapaininti. Jantu va yuchi ni aquilalhikʼailaktsʼiu ju tuʼuʼ atapacxat”. Ni ca ixmachʼakxatʼit ju tuchi nomputun ju chunch pus jantu caʼixʼamucʼanitʼit ixtalakʼalhinʼan ju lapanacni ju jantu tuʼuʼ macxcai tanavita. 8 Pus quitʼin ju lai icnajun tuchi lai navican ju avilhchan paʼastacni. Quitʼin ju quimalakachatachilh Dios ni lapanac actsucuyaʼ ju ani. 9 Pus ju Jesús taxtucha ju anch. Milh laʼixpujitatʼan ju istʼaʼisraelitanin. 10 Chai ju anch ixtanumacha pumatam lapanac ju va ixixnita ju ixmacaʼ. Chai ju aliʼin ju vachuʼ anch ixtatanumanalh va ixtapuxconiputun ixtalakʼalhin ju Jesús. Chai yuchi chani talhijuni: ―Ja lai acʼuchʼununcan ju avilhchan paʼastacni. 11 Chai ju Jesús chani alhikʼalhtayanalh: ―Ju tam xamatiʼ ju milhiʼuxijnan ni capacxalh lakatam ixborrego chai ju yuchi cataju junta puculhucnicʼa ju avilhchan paʼastacni ja jantu caʼalh macutunuʼ. 12 Chai aktsʼiya palai tapalai ju isʼatsucunti ju tam lapanac. Palai jantu ju va tuʼuʼ borrego. Pus yuchi lai lhinavican ju kʼox ju avilhchan paʼastacni. 13 Pus ju acsnich ju Jesús chani juni ju anuʼ lapanac: ―Alhitʼach ju mimacaʼ. Chai acsni xtaknilh ju ixmacaʼ pus lana takʼoxilh. Lana ixtʼachunch va tachi ju ixjunita ju ixtamactam. 14 Para ju fariseonin lana tataxtulh chai talacchivinilh sia yuʼunch ixlacata ju Jesús ta yu laich catapumakni. 15 Pus ju Jesús acsni cʼatsa tuchi ixtapastʼacʼa ju fariseonin pus taxtuchokolh ju anch. Chai lhu lapanacni tachʼakʼokʼalh. Chai ju Jesús palaich anavikʼo tachi chun ju takʼankʼanin. 16 Chai slivasalh alhimapʼaksi ni jantu catanaulh tichi lapanac ju yuchi. 17 Chai ni chunch ju xachʼalhcatnan ju Jesús pus uctaxtulh ju tuchi naulh ju makʼaniya ixlapanac Dios ju Isaías ixjuncan. Ju yuchi ma naulh ni ma chani naulh ju Dios ixlacata ju Jesús: 18 Yuchi ju ani ju quilapanac ju icsacxtuta. Chai na icmapaini ju yuchi. Na iclhikʼachan ju yuchi. Acxtakniyaʼ ju quiSpiritu Santu. Chai ju yuchi caʼajunaʼ ju lapanacni ju jantu israelitanin tajunita ta yu laich catatakʼalhtaxtulh. 19 Ju yuchi jantu calasayaʼ nin pʼas cachivinaʼ. Chai jantu xamatiʼ cakʼasmatniyaʼ ni na pʼas cachivinilh lacatijixni. 20 Ju yuchi jantu lana camucʼaniyaʼ ixtalakʼalhin tam xamatiʼ ju na xcai macajun ju amacxcai. Chai ju yuchi jantu casamakʼanaʼ xamatiʼ mas va lacatsʼunin ju lhilaksi ju Dios. Chunch ju canaviyaʼ tus acsni caʼalinaʼ ju ixpuʼucxtin junta si soknicʼa cajunaʼ. 21 Chai yuʼunch ju jantu israelitanin catalhilaksiyaʼ ju yuchi. 22 Pus ju acsnich lhiminicalh ju Jesús pumatam lapanac ju ixtanun ju lhacaticuru laʼixlacatuna. Chai ju yuchi alakʼachʼix ixjunita chai va ixnunulata. Pus ju Jesús cʼuchʼu. Chai ju acsnich ju anuʼ lapanac chivinilh chai alacʼavanalh. 23 Chai tachi chun ju lapanacni va talhamakʼaninilh. Chai chani ixtanajun: ―Ju ani ja laich nuʼ yuchi cava ju istsʼalh David. Ju ixnoncan ni camalakachatachilh ju Dios. 24 Para ju fariseonin acsni takʼasmatlh ni chunch ixtanajun ju lapanacni tanaulh: ―Ju ani ya lapanac va tixcoxtui ju lhacaticuru laʼixlacatuna tam lapanac laʼixtachaput ju Satanás. 25 Pus ju Jesús mas jantu kʼasmatnilh ixchivintiʼan ju fariseonin para cʼatsa tuchi ixtapastʼacʼa chai chani ajuni: ―Tachi chun ju kʼai lacatʼun junta lhinajun ju tam kʼai ucxtin ni quilhmaclhu cajuncalh chai catalaclasa ju sia isʼakstuʼan pus va caʼaclalh. Chai ju amachakʼan va tuchi lakʼachakʼan u tuchi chakaʼ ju va catalaclakʼailh ju sia ixlhiʼakstuʼan pus jantu lai va lakputam catitatsucukʼalhi. 26 Pus vana va chun ju lhacaticuru. Ju yuchi ni caʼatixcoxtulh ju aliʼin ixtʼalhacaticurulhni pus tachi ju va atʼalasai ju ixlapanacni. Chai ju chunch jantu lai catilhinonkʼalhi laʼixpuʼucxtin. 27 Ju uxijnan nonatʼit ni laʼixtachaput ju Satanás ju ictixcoxtui ju lhacaticurulhni. Para ju mintamamakaʼun vachuʼ tamaktasqʼuini ni xamatiʼ caʼaxtaknilh ixtachaputʼan ni laich catatixcoxtuyaʼ ju lhacaticurulhni laʼixlacatunaʼan ju lapanacni. Chai yuʼunchach ju catajunan ni jantu slivasalh ni laʼixtachaput ju Satanás ju apuxcoxtucan ju lhacaticurulhni tachi ju nonatʼit ju uxijnan. 28 Alai laʼixtachaput ju iSpiritu Santu Dios ju icʼaxcoxtui ju lhacaticurulhni laʼixlacatunaʼan ju lapanacni chai yuchi lhitasui ni lhinajun ju Dios lamilhiʼuxijnan. 29 Tas laich calhitanuyach tam xamatiʼ laʼixchakaʼ apumatam ju na tachapun junita chai laich camaxtunilh ixtaxtokni ni jantu pʼulhnan camacchʼimalh. Acsnicaʼ ju laich camaxtunicalh ju ixtaxtokni ni va jantu lai tamacyajui. Pus ju Jesús naulh ju chunch ni va ixʼamamachakxaniputun ju lapanacni ni yuchi ju tʼalalhajalh ju lhacaticuru chai yuchi lai alhixcoxtui ju lhacaticurulhni laʼixlacatunaʼan ju lapanacni. 30 Chai tailhiʼalh ixchivinti ju Jesús. Naulh: ―Pus ju jantu quintʼaʼanta yuchi ju quintʼalaxcai junita. Chai ju jantu quiʼaktaijui ixmakʼaixtʼokʼa ju lapanacni ju aquintalhilacaʼanach pus va asastucnun. 31 Pus ni xaquilajunau ni laʼixtachaput ju Satanás ju icxcoxtui ju lhacaticurulhni laʼixlacatunaʼan ju lapanacni pus yuchi iclalhijunau ni laich caʼamacʼacxanicanaʼ ju lapanacni tachi chun ju alactuʼunti ju tanavi chai tachi chun ju macxcai chivinti ju tanajun. Para ni catanaulh macxcai chivinti ixlacata ju Spiritu Santu pus jantu lai tavanan catiʼamacʼacxanicalh. 32 Chai va tichi chavaich ju canonaʼ macxcai chivinti ju quilacata pus camacʼacxanicanaʼ. Quitʼin ju quimalakachatachilh Dios ni lapanac actsucuyaʼ ju ani. Para va tichi chavaich ju canonaʼ macxcai chivinti ixlacata ju Spiritu Santu jantu lai tavanan catimacʼacxanicalh nin ani lacamunutpaʼ nin astan. 33 Ni kʼox ju xatocʼat ju tuʼuʼ qʼuiu pus pucʼatsacan ni na kʼox ju xaqʼuiu. U ni jantu kʼox ju xatocʼat pus pucʼatsacan ni jantu kʼox ju xaqʼuiu. Pus laxatocʼat ju pucʼatsacan ju tuʼuʼ qʼuiu. Tamalhch ju kʼox chai tamalhch ju jantu. 34 Pus vana va chun ju uxijnan. Ju uxijnan ni slivasalh na kʼai untʼatʼit pus tas laich alhinonaʼitʼit ju tuʼuʼ kʼox. Pus tuchi alin lamiʼalhunutʼan yuchach ju nonatʼit. 35 Ju kʼox lapanac maxtui laʼixʼalhunut ju kʼoxi chivinti ni yuchach ju makʼata laʼixʼalhunut. Para ju tam lapanac ju kʼai junita pus laʼixpulacni ixʼalhunut ju maxtui ju chivinti ju jantu kʼox ni yuchach ju makʼata laʼixʼalhunut. 36 Pus chani iclajunau. Acsni cachinaʼ ju avilhchan acsni camakʼosaspitcanaʼ ju lapanacni pus ju Dios caʼulaniyaʼ ixtalakʼalhinʼan tachi chun ju lapanacni ju ixtanajunta macxcai chivinti. 37 Pus va ixlacaʼatalh ju macxcai minchivintiʼan capucʼatsacanaʼ ni na kʼai untʼatʼit chai ixlhiyuchi aʼulanicʼanaʼitʼit ju mintalakʼalhinʼan. Para va tichi chavaich ju najun ju kʼoxi chivinti pus capucʼatsacanaʼ ni soknicʼa isʼatsucunti laʼixmacni Dios chai ixlhiyuchi jantu catiʼulanicalh ixtalakʼalhin. 38 Pus ju acsnich chani tajuni ju Jesús ju aliʼin sia yuʼunch ju fariseonin chai aliʼin sia yuʼunch ju na ixtalhatalanininta ixlhamapʼaksinʼan ju istʼaʼisraelitanin. ―Amamakaʼunuʼ iclaktsʼimputunau tuʼuʼ lhamakʼan ju apʼumavasalaʼ ni vasalh Cristoʼat ju ixnoncan ni camalakachatachilh ju Dios. 39 Para ju Jesús chani akʼalhtayanalh: ―Ju lapanacni ju na kʼai tajunita chai ju tamacajunta ju Dios yuʼunchach ju tasqʼuin tuʼuʼ lhamakʼan ju catapumispayaʼ ju Cristo. Para jantu catiʼaxtaknicalh tuʼuʼ atumpa. Va yuchi ju caʼamapastʼacʼanicanaʼ tuchi ju tapasalh laʼisʼatsucunti ju makʼaniya lapanacni ju Jonás ixjuncan. Yuchi ju ixnajun ixchivinti Dios. 40 Pus ju Jonás lakatʼutu avilhchan chai lakatʼutu atatsʼisni ixtajun laʼixpajan ju kʼai pamata. Chai vana va chun ju quitʼin. Lakatʼutu avilhchan chai lakatʼutu atatsʼisni actaʼacnuyaʼ lacatʼun ju quitʼin ju quimalakachatachilh ju Dios ni lapanac actsucuyaʼ ju ani. 41 Chai acsni cachinaʼ ju avilhchan acsni camakʼosaspitcanaʼ ju lapanacni pus ju amachakʼan Nínive catatayayaʼ. Chai va ixlacataʼan ju yuʼunch pus aʼulanicʼanaʼitʼit ju mintalakʼalhinʼan. Pus ju yuʼunch tamacaulh ixʼalactuʼuntiʼan acsni ajuni ixchivinti Dios ju Jonás. Para ju uxijnan jantu xamacʼonatʼit ju miʼalactuʼuntiʼan mas ani icya ju palai xakʼai icjunita. Palai jantu ju Jonás. 42 Vachuʼ ju acsni avilhchan acsni camakʼosaspitcanaʼ ju lapanacni pus ju anuʼ chakoʼulh ju xaʼucxtin ixjunita ju lhisur catayayaʼ. Chai va ixlacata yuchi pus ju uxijnan amucʼanicʼanaʼitʼit ju mintalakʼalhinʼan. Pus ju yuchi slivasalh na makat ju xaminacha ni va iskʼasmatniputun ju ixʼatalaninti ju kʼai ucxtin Salomón. Chai ani icya ju palai xakʼai icjunita ju quitʼin. Palai jantu ju Salomón. Para ju uxijnan jantu kʼasmatpʼutʼunatʼit ju quinchivinti. 43 Ju lhacaticuru acsni taxtui laʼixlacatuna tam lapanac pus vaclhun ucxuntʼajun junta axixninta. Va puxcolhitʼajun ta anchach ju lai catavi. Para jantu lai lhitajui. 44 Chai ju acsnich chani najun: “Alai acʼanchokoyaʼ laquinchakaʼ junta xactaxtuyacha”. Chai acsni chinchokoi pus lana tanuchokoi laʼixlacatuna ju anuʼ lapanac ni tachi lakatam chakaʼ junita junta jantu xamatiʼ tanun para na pulacpʼalhcanta chai na cʼus maxantilacanta. 45 Pus ju acsnich ju anuʼ lhacaticuru taxtuchokoi. An iniʼ apumatujun lhacaticurulhni chai akʼailhiminkʼojui laʼixlacatuna ju anuʼ lapanac. Chai ju anuʼ ixpumatujunʼan lhacaticurulhni palai kʼai tajunita. Palai jantu na chun ixjunita ju pʼulhnan ixtanun va isʼakstu. Pus palai takʼalhilh ju isʼatsucunti ju anuʼ lapanac ju acsni. Palai jantu na chun ixjunita ju pʼulhnan. Pus vana va chun cajunaʼ ju miʼatsucuntiʼan ju uxijnan ju tʼonatʼit ju chavai ju na kʼai untʼatʼit. 46 Acsni ixtʼajuncaʼ xakʼalanaʼ ju lapanacni ju Jesús pus tachincha ju ixnati chai isʼapʼisekʼen. Chai tataya makspaʼ ni va ixtatʼachivimputun ju Jesús. 47 Chai pumatam lapanac chani xajuni ju Jesús: ―Ju minati chai ju miʼapʼisekʼen tayanancha makspaʼ chai tatʼachivimputunan. 48 Para ju Jesús chani juni ju anuʼ lapanac ju ixmalakachacanta: ―Tis chavaich ju quinati chai tis chavaʼitnich ju quiʼapʼisekʼen. 49 Pus ju acsnich ju Jesús amacʼanilh junta ixtavilanalh ixʼamamakaʼui chai naulh: ―Ani tavilanalh ju quinati chai ju quiʼapʼisekʼen. 50 Pus va tichi chavaich ju canaviniyaʼ ixkʼachat ju quimpai ju vilhcha lactʼiyan yuchach ju vasalh quimpʼisekʼe tsʼalh chai vasalh quimpʼisekʼe atsiʼ chai vasalh quinati.
1 Pus ju acsni avilhchan ju Jesús taxtulh ju lacachakaʼ. Chai tolhcha vanin laʼixquilhtuʼ ju atantsʼin. 2 Chai ni na lhu talakchaʼalh ju lapanacni pus ju yuchi taju lacabarco ni laich caʼamalanikʼolh ixchuxʼan. Anch ju tavi chai tachi chun ju lapanacni lacatʼun tataya laʼixquilhtuʼ atantsʼin. 3 Pus ju acsnich ju Jesús na lhu taxtokni ju xaʼamalani ju lapanacni. Para si lacatuʼuʼ chivinti ju ixtʼalaktsʼipaxcavaich ju tuʼuʼ. Chani xaʼajuni: ―Pumatam achʼananaʼ alh lhavanaʼ ju ixʼachʼananti. 4 Chai acsni ixtʼajun lhavanaʼ pus lacatsʼunin ju xatʼin tamacha va lacati. Chai tamilh ju tsʼokʼo chai tasacʼulh. 5 Chai ju aliʼ ju xatʼin tamacha laʼixʼucxni chiux junta matiʼ lhu ixjunita ju tʼun. Pus ju yuchi va tsʼalhti pʼunlh ni matiʼ lhu ixjunita ju tʼun. 6 Para acsni xajchilh ju avilhchan lana macchalh chai lana xixlh ni jantu makat ixtinui istisivic. 7 Chai ju aliʼ ju xatʼin tamacha junta vachuʼ ixma ju xatʼin alhtucunuʼ. Pus ju alhtucunuʼ palai vatsʼalhti takʼaya chai akxtakmalh ju anuʼ achʼananti. 8 Para ju aliʼ xatʼin tamacha junta na kʼox ixjunita ju tʼun. Chai ju yuchi pʼunlh. Takʼaya. Chai tocʼalh ju xalhiʼut. Pus talhava ju akatamin achʼananti. Ju aliʼ tocʼalh tam cientos xalhiʼut. Ju aliʼ tocʼalh sesenta xalhiʼut. Chai ju aliʼ tocʼalh va lakapʼuxamcau ju xalhiʼut. 9 Pus va tichi chavaich ju alin ixpakʼasmatni pus cakʼasmatlich ju tuchi iclajunau. 10 Pus ju acsnich ju ixʼamamakaʼui ju Jesús talakmilh chai chani tajuni: ―Tajuch ni va alacmalani ju lapanacni lacatuʼuʼ chivinti ju ixtʼalaktsʼipaxcavaich ju tuʼuʼ. 11 Chai ju Jesús alacjuni: ―Ju uxijnan lacʼasqʼuinicʼantʼatʼit ni amachʼakxayaʼitʼit ju chivinti ju najun ni lhinomputun ju Dios laʼisʼatsucuntiʼan ju lapanacni. Para ju aliʼin lapanacni jantu alakʼaʼinican ni catamachakxa. 12 Pus ju lacaʼi ju juncan pus aliʼ cajuncanaʼ chai lhu camachakxayaʼ. Para ju jantu lacaʼiputun ju tuchi juncan pus camacʼapʼanicanaʼ ju tuchi ixlacaʼita. 13 Pus ju lapanacni ni lana jantu tamispai tuchi nomputun mas talaktsʼin tuchi icnavi chai lana jantu talacaʼi nin catamachakxa ju quinchivinti mas takʼasmatʼa pus yuchi icʼalhilhixakʼalai ju lapanacni lacatuʼuʼ chivinti ju ixtʼalaktsʼipaxcavaca ju tuʼuʼ. 14 Chai laʼisʼatsucuntiʼan ju yuʼunch uctaxtui ixchivinti ju makʼaniya ixlapanac Dios ju Isaías ixjuncan. Pus ju yuchi chani naulh: Ju uxijnan slivasalh akʼasmatʼaʼitʼit para jantu lana amachʼakxayaʼitʼit. Chai slivasalh alacʼavananaʼitʼit para jantu anaviyaʼitʼit cuenta tuchʼi ju laktsʼinatʼit. 15 Chunch ju catapasayaʼ lamiʼatsucuntiʼan ni na pʼas xajun ju miʼalhunutʼan. Chai lana jantu kʼasmatʼatʼit tuʼuʼ. Chai tachi ju va lakpustʼoktʼit ni va jantu tuʼuʼ laktsʼimpʼutʼunatʼit. Chai jantu tuʼuʼ kʼasmatpʼutʼunatʼit. Chai jantu tuʼuʼ machʼakxapʼutʼunatʼit. Chunch ju layatʼit ni jantu macʼompʼutʼunatʼit ju miʼalactuʼuntiʼan ni laich aclamakʼalhtaxtuch. Chunch ju naulh ju Isaías. 16 Para na paxcat untʼatʼit ju uxijnan ji quintsʼalan ni vasalh pʼuʼalacʼavananatʼit ju milakchulhʼan chai pʼakʼasmatnanatʼit ju miʼakʼaxkʼolhʼan. 17 Pus slivasalh ju iclajunau. Na lhu ixʼalin ju makʼaniya ixlapanacni Dios chai ju aliʼin makʼaniya lapanacni ju soknicʼa ixjunita ju isʼatsucuntiʼan ju na ixtalaktsʼimputun ju tuchʼi laktsʼinatʼit ju uxijnan. Para jantu tavanan talaktsʼilh. Chai na ixtakʼasmatputun ju tuchʼi kʼasmatʼatʼit para jantu tavanan takʼasmatlh. 18 Ju Jesús tailhiʼalh ju ixchivinti chai chani ju ajuni ju ixtamamakaʼun: ―Pus akʼasmatʼit ju uxijnan tuchi nomputun ju chivinti ixlacata ju achʼananaʼ. 19 Pus ju tʼin ju tamacha vanin laʼixquilhtuʼ ti yuʼunch ju takʼasmatʼa ju chivinti junta najun ni lhinomputun ju Dios laʼisʼatsucuntiʼan ju lapanacni. Para ju yuʼunch jantu tamachakxai. Chai lana min ju lhacaticuru chai amacʼapʼani ju chivinti ju ixʼachʼananicanta laʼixʼalhunutʼan. 20 Chai ju tʼin ju tamacha laʼixʼucxni chiux yuʼunch ju takʼasmatʼa ixchivinti Dios chai lana soko takʼachani. 21 Para chunch tajunita tachi ju anuʼ xapʼun laʼixʼucxni chiux. Jantu vasalh laʼixlhichux ixʼalhunutʼan ju takʼachani. Va pantsʼiquis ju talacaʼi. Para acsni min ju tuʼuʼ makʼalhkʼajnat u tuʼuʼ axcayanti va ixlacata ni talacaʼi ju ixchivinti Dios pus lana tamacajun ixti ju Dios. 22 Chai ju tʼin ju tamacha junta ixʼalin ju xatʼin alhtucunuʼ pus yuʼunch ju takʼasmatʼa ixchivinti Dios para va tachi talhamakʼaninin ju xataxtokni ju ani lacamunutpaʼ chai va taputaʼokxchokʼoi ju tumin. Pus tachi chun ju ani taxtokni va amacʼapʼani ju chivinti ju ixchʼananicanta laʼixʼalhunutʼan chai jantu tavanan vasalh tasui ixtachaput ju Dios laʼisʼatsucuntiʼan. 23 Para ju tʼin ju tamacha lacakʼoxi tʼun yuʼunch ju takʼasmatʼa ju ixchivinti Dios chai tamachakxai. Chai lana tasui laʼisʼatsucuntiʼan ixtachaput ju Dios. Ju aliʼin slivasalh lhu tasui ixtachaput Dios laʼisʼatsucuntiʼan. Ju aliʼin palai na lacatsʼunin chai ju aliʼin palai tucan na lacatsʼunin. 24 Chai ju Jesús ajunilh ju lapanacni ju ani alakatam chivinti ju ixtʼalaktsʼipaxcavaich ju tuʼuʼ. ―Junta lhinajun ju Dios chunch tapasai tachi ju tapasalh laʼisʼatsucunti pumatam lapanac. Ju yuchi chʼanlh ju kʼoxi xatʼin trigo laʼixcuxtu. 25 Para ju tsʼis acsni ilhtatacan pus milh ju ixtʼalaxcai ju anuʼ lapanac chai alhavanalh ju xatʼin achʼitin. Va lhitayalh ju kʼoxi tʼin. Chai acsni chʼankʼo pus lana taxtucha. Alh. 26 Pus pʼunlich ju kʼoxi tʼin chai vachuʼ pʼunlich ju xatʼin achʼitin. Tatakʼaya. Para acsni tsuculh aliniʼ ju xatocʼat ju trigo acsnicaʼ ju tasu ju achʼitin ju ixchʼancanta. 27 Pus ju acsnich ixlapanacni ju amatʼun talakmilh chai tajuni: “Ja jantu xachʼan ju kʼoxi tʼin lamincuxtu. Pus tas anchach ju xaminacha ju va achʼitin”. 28 Chai ju amatʼun ajunich: “Yuchi ju quintʼalaxcai ju xachʼan ju xatʼin ju va achʼitin”. Chai ju acsnich ju ixlapanacni tasacmich. Tajunich: “Ja lacʼasqʼuin ni acʼauch laxtunin”. 29 Para ju yuchi chani ajuni: “Jantu ni va lai tʼapʼulhutʼit ju kʼox achʼananti acsni tʼipʼulhuyatʼit ju achʼitin. 30 Amacʼaʼuntʼit. Chach takʼaya kʼaixtam tus acsni caʼalinach ju xatocʼat. Ju acsnich chani acʼajunaʼ ju catapʼuxaʼ: Pʼulhnan apʼulhutʼitch ju achʼitin. Chai apʼachʼimayaʼitʼit makxapatamin ni laich caxavacanaʼ. Chai astan apʼulhutʼit ju trigo chai amakʼatʼit laquimpacʼatsʼa”. 31 Ju Jesús alacjuni ju lapanacni alakatam chivinti ju ixʼapumavasalaniputun ni lhu catalhilaksiyaʼ ju Dios acsni talaktsʼin ni lhinajun ju yuchi laʼisʼatsucuntiʼan ju aliʼin ixtʼalapanacni. Pus chani ju ajuni: ―Acsni lhinajun ju Dios laʼisʼatsucuntiʼan ju lapanacni pus chunch ju tapasai tachi ju tapasai acsni chʼancan ju xatʼin mostaza. 32 Ju anuʼ xatʼin yuchi ju palai lacatʼicstʼi tachi chun ju tʼin. Para acsni takʼayai na kʼalhapakʼai jun. Tasui tachi ju lacatʼicstʼi qʼuiu. Chai ju tsʼokʼo tamin chai tamucʼai ixpamalhiquiʼan laʼixʼacatan. 33 Ju Jesús vachuʼ alacjuni ju lapanacni alakatam chivinti ju ixʼapumavasalaniputun tuchi tapasai acsni lhinajun ju Dios laʼisʼatsucuntiʼan ju lapanacni. Pus chani ju ajuni: ―Acsni lhinajun ju Dios laʼisʼatsucuntiʼan ju lapanacni chunch ju tajunita tachi ju tuʼuʼ xatʼin xkapavati ju calhiyaulh tam chakoʼulh ju lakatʼutu achʼapanta ju harina. Pus lana lhitayakʼojui chux. 34 Tachi chun ju ani taxtokni ju Jesús ajunkʼo ju lapanacni lacatuʼuʼ chivinti ju ixtʼalaktsʼipaxcavaich ju tuʼuʼ. Jantu lana tuʼuʼ ju vas ajunilh. 35 Chai ni chunch ju navilh ju Jesús pus uctaxtulh tuchi ju naulh ju makʼaniya lapanac ju ixnajun ixchivinti Dios. Chani ma xanajun ju yuchi: Acʼalhixakʼalayaʼ ju lapanacni lacachivinti ju tʼalaktsʼipaxcavacan ju tuʼuʼ. Acʼajunaʼ ju taxtokni ju jantu ixtamachakxai ju lapanacni tus laʼixputaiʼulacan lacamunutpaʼ. 36 Pus ju acsnich ju Jesús amacʼamilh ju lapanacni chai milh laʼixchakaʼ. Pus lana talakmilh ju ixʼamamakaʼui chai tajunich: ―Aquilamavasalaniu ju chivinti ixlacata ju tʼin ju jantu kʼox ju ixchʼancanta laʼixtʼun ju anuʼ lapanac. 37 Pus ju acsnich chani alacjuni ju Jesús: ―Pus quitʼin ju icchʼan ju kʼoxi xatʼin. Quitʼin ju quimalakachatachilh ju Dios ni lapanac actsucuyaʼ ju ani. 38 Chai ju lacacuxtu yuchi ju lacamunutpaʼ. Chai ju kʼoxi tʼin yuʼunch ju alhcanicanta ni laich catatanu ju lactʼiyan junta lhinajun ju Dios. Chai ju tʼin ju jantu kʼox ixjunita yuʼunch ju na kʼai tajunita. 39 Chai ju anuʼ ixtʼalaxcai ju amatʼun ju chʼanlh ju tʼin ju jantu kʼox yuchi ju lhacaticuru. Chai acsni ixchakxʼican ju xatocʼat yuchi ixʼaclanti ju lacamunutpaʼ. Chai ju taʼi ju xatocʼat yuʼunch ju anquilhnin. 40 Chai tachi ju tatipʼulhulh ju achʼitin ju jantu kʼox ixjunita chai talacxava pus chunchach vachuʼ catapasayaʼ laʼixʼaclanti ju lacamunutpaʼ. 41 Pus ju quitʼin acmalakachatachilh ju quiʼanquilhnin. Ju quitʼin ju quimalakachatachilh ju Dios ni lapanac actsucuyaʼ ju ani. Chai ju quiʼanquilhnin catamakʼaixtʼokʼach chai catatamacxtuyaʼ laquimpuʼucxtin tachi chun ju lapanacni ju taʼalactuʼunun chai tachi chun ju amakʼalhkʼosui ju aliʼin lapanacni. 42 Chai caʼamacaʼancanach lacajipi. Pus ju anch catakʼalhunanta chai catalamatantsʼacayach istatsalatʼan ni na catamakʼalhkʼajnanaʼ. 43 Pus ju acsnich ju alaktsʼincan ni soknicʼa laʼixmacni Dios slapʼapʼa catasuyach tachi ju tasui ju avilhchan. Chunch catajunaʼ junta lhinajun ju quimpaiʼan. Pus ju alin ju ixpakʼasmatni chach kʼasmatlh ju iclajunau. 44 Junta lhinajun ju Dios chunch junita tachi ju tuʼuʼ tumin ju ixmacnucanta ju lacatʼun. Pus pumatam lapanac lhitajulh ju anuʼ tumin para lana macnuchokolh. Chai ni na ixlhikʼachanta pus lana stʼakʼo tachi chun ju ixʼalinta chai lhitamaulh ju anuʼ lacatʼun. 45 Junta lhinajun ju Dios vachuʼ chunch junita tachi ju tam lapanac ju ixmalakxtui ju chiux ju laklhu ixtapalh. 46 Pus acsni lhitajulh lakatam chiux ju slivasalh na kʼox ixjunita pus ju anuʼ lapanac alh chai stʼakʼo tachi chun ju ixʼalinta chai lhitamaulh ju anuʼ chiux. 47 Junta lhinajun ju Dios vachuʼ chunch junita tachi lakatam chʼokxni ju macaʼancalh lacaʼalama chai anch ju tanulh tijpachux ju pamata. 48 Chai acsni aktsamalh ju chʼokxni pus ju ixchʼapanin pamata taxakʼalhiʼalh lakʼakxixni. Chai anch tatʼatavilhch chai tatsuculh maxtunin ju pamata ju kʼox. Tatsuculh munin laʼispastiʼan. Chai tamakʼalh ju jantu kʼox. 49 Pus chunchach vachuʼ catapasayaʼ laʼixʼaclanti ju lacamunutpaʼ. Cataminach ju anquilhnin chai catasacxtuyaʼ ju alactuʼunin. Catamaconach ju laktsʼincan ni soknicʼa laʼixmacni Dios. 50 Chai camacaʼancanach ju alactuʼunin lacajipi. Chai ju anch catakʼalhunanta chai catalamatantsʼacayach istatsalatʼan ni na catamakʼalhkʼajnanaʼ. 51 Pus ju acsni ju Jesús chani asacmilh ju ixʼamamakaʼui: ―Ja machʼakxayatʼit tachi chun ju ani ju iclajuntau. Chai ju yuʼunch tajunilh ni tamachakxa. 52 Pus ju acsnich ju Jesús chani alacjuni: ―Tachi chun ju lapanacni ju talhatalanininta ju ixchivinti Dios chai talakʼaʼita ni calhinaulh ju Dios laʼisʼatsucuntiʼan pus chunch tajunita tachi tam makʼaliʼ. Ju yuchi lai maxtui laʼixmakʼalit ju taxtokni acsni maktasqʼuinican. Lai maxtui ju va ancaʼ makʼata u yuchi ju makʼaniya makʼatach. Pus vana va chun ju anuʼ lapanacni. Ju yuʼunch vachuʼ lai tamaxtui ju chivinti ju tamakʼata laʼixʼalhunutʼan ni laich catapuʼaktaiju tam xamatiʼ. Lai catamaxtulh ju chivinti ju makʼanch tacʼatsata u yuchi ju va ancaʼ xatalani. 53 Pus ju Jesús acsni nonkʼo tachi chun ju ani chivinti ju ixtʼalaktsʼipaxcavaich ju tuʼuʼ pus taxtulh ju anch. 54 Milh laʼixtʼun. Chai tsuculh amalaniniʼ laʼixpujitatʼan ju istʼaʼisraelitanin. Chai ixtʼaʼamachakʼan na talhamakʼaninilh chai chani tanaulh: ―Tas anchach nuʼ ju xalani ju ani chivinti. Tas laich lhinavi ju kʼai lhamakʼan. 55 Ni yuchi jumpalat ju istsʼalh ju axpitniʼ. Chai ixnati yuchi ju Malia. Chai ju isʼapʼisekʼen yuʼunch ju Jacobo chai José chai Simón chai Judas. 56 Chai isʼapʼisekʼen atsiʼin ni ani tatʼajun vachuʼ. Pus tas anchach ju xalani ju ani taxtokni. 57 Pus talhixcailich. Para ju Jesús chani ajuni: ―Ju lapanac ju najun ixchivinti Dios kʼox lhiulacan vanta anchach ju an. Va ixtʼaʼamachakʼan chai ju tatanumanalh laʼixchakaʼ ju jantu kʼox talhiulai. 58 Pus ju anch jantu lhu xanavi ju kʼai lhamakʼan va ixlacaʼatalh ni jantu ixtalhilaksi ju yuchi.
1 Pus acsni ixtʼajun tapasanaʼ ju ani taxtokni pus ju Herodes kʼasmatlh ixlacata ju Jesús. Pus ju Herodes gobernador ixjunita. 2 Chai ju yuchi chani ajuni ju ixlapanacni: ―Ju anuʼ ju Jesús talhixakʼalai yuchach ju Xivan ju amakpaxanaʼ. Ju yuchi ca va lokʼonchokolh junta quimacnucalh chai yuchi na kʼai lhamakʼan lhinavi. ―Chunch ju ajuni ju ixlapanacni. 3 Pus acsni ixtʼajuncaʼ ju Xivan pus ju Herodes ixlhinajunta ixchʼapaca. Chai lhinaulh ixmakchʼica chai ixtʼalhnuca. Chunch ju ulhtucalh va ixlacaʼatalh ju Herodías ju ixʼamachakaʼ ixjunita ju ispʼisekʼe ju Pilipe ixjuncan. Para ju acsnich yuchi ju Herodes ixtʼatʼajun. 4 Pus ju Xivan acsni tucaʼ ixtʼalhnucanta chani ixjunita ju Herodes: ―Jantu lhijun ju lhamapʼaksin ni va atʼatsʼucʼuchʼokʼoch ju ixʼamachakaʼ ixjunita ju mimpʼisekʼe. 5 Pus ju Herodes lana ixlhinomputun ixmaknica ju Xivan para va ixʼatalhoni ju lapanacni. Pus ju yuʼunch ixtanajun ni ixlapanac Dios ixjunita ju Xivan. 6 Para acsni chilh ju avilhchan acsni cʼatanilh ju Herodes pus istsiʼ ju Herodías tanucha junta ixtavilanalh ju lapanacni chai tsuculh atʼiniʼ. Pus ju Herodes slivasalh na kʼachanilh ju atʼinti. 7 Pus lhipastacnilh Dios chai junilh ju atsiʼ ni caxtakniyaʼ va tuchi casqʼuiniyach. 8 Pus ju anuʼ atsiʼ junilh ju Herodes tachi ju ixjunita ju ixnati. Naulh: ―Aqʼuixtʼakninch laca tuʼuʼ kʼai casavila ju isʼaktsulh ju Xivan ju amakpaxanaʼ. 9 Pus ju gobernador lana na amakʼaninilh acsni kʼasmatnilh ixchivinti ju anuʼ atsiʼ. Para ni ixlhipastacta ju Dios acsni junilh ju atsiʼ ni caxtakniyach va tuchi casqʼuiniyach chai ni ixtakʼasmatʼa ju ixtavilanalh anch pus jantu lai junilh ni jantu. Aktsʼiya lhinaulh ixtaknica ju tuchi xasqʼuinch ju atsiʼ. 10 Pus malakachalh ju ixtaropa chai ju yuchi alh. Maknilh ju Xivan lacapulachʼin. 11 Chai lhiminicalh ju isʼaktsulh lacakʼai casavila. Chai xtaknilh ju atsiʼ. Chai ju yuchi lana lhiʼanilh ju ixnati. 12 Pus ju acsnich tachincha ju ixʼamamakaʼui ju Xivan. Taquiʼi ju ixlacatuna chai taquimacnu. Astan taquimacʼatsanilh ju Jesús. 13 Pus ju Jesús acsni cʼatsa ni ixmaknicanta ju Xivan pus lana taxtulh. Taju lacabarco chai alh ju lacatam junta va aseknicʼa ixjunita. Para ju lapanacni tacʼatsapa chai tataxtulh lakʼachakʼanixni. Tachʼajaxʼalh junta ixtanajun ni cachaʼanaʼ ju Jesús. 14 Pus ju Jesús acsni tacutcha lacabarco laktsʼilh ni na lhu ixtatakʼaixtokta ju lapanacni. Pus na amapaini ju yuʼunch chai acʼuchʼulh ju ixtalactakʼankʼai sia lhiyuʼunch. 15 Para acsni tokʼoxalh pus talakʼalh ju ixʼamamakaʼui chai tajuni: ―Ju ani slivasalh ni na aseknicʼa chai tapasalh ju hora acsni vencan. Amalakʼachʼatʼi ju lapanacni. Chach taʼancha ju lakʼachakʼanixni tamonin ixvaitiʼan. 16 Para ju Jesús chani alacjuni: ―Jantu tasqʼuini ni cataʼalh. Axtʼaknitʼit ju uxijnan ju vaiti. 17 Chai ju yuʼunch tajuni: ―Para va xaman akxquis vati chai lakatʼui pamata ju icmamatau ju ani. 18 Chai ju Jesús alacjuni: ―Aquilalhiminiuch. 19 Pus ju acsnich ju Jesús ajuni ju lapanacni ni catatavi lacaʼatsʼinan. Chai ju yuchi chʼapalh ju anuʼ akxquis vati chai ju lakatʼui pamata. Chai talakstʼalh ju lactʼiyan chai xtaklh lakʼailaktsʼiuch ixlacata ju vaiti. Astan chʼekʼelh ju vati chai ju pamata. Chai axtaknilh ju ixʼamamakaʼui. Chai ju yuʼunch tatsuculh lhilaksakʼonin ju lapanacni. 20 Pus taʼokʼolh ixchuxʼan chai talhilalh. Chai tasacchokolh ju xajcha ju jantu xataʼokʼojui chai talaktsama lakacautʼui tankʼalin. 21 Pus ju anuch ju tavailh ixtachaʼanta lakaquis milh jokʼatni. Jantu aputʼekʼecalh ju chakolun nin ju askʼatʼan. 22 Pus ju acsnich ju Jesús lana pʼas alacjuni ju ixʼamamakaʼui ni catataju lacabarco chai catapʼulhʼanchalh ju lhimakʼantacutni ju atantsʼin. Pus ju yuchi tavilhcaʼ ni laich caʼamalakachachokoyaʼ ju lapanacni laʼixchakaʼan. 23 Chai acsni taʼankʼo ju lapanacni pus ju Jesús alh junta akstijun ixjunita. Alh tʼachiviniʼ ju Dios va isʼakstu. Chai acsni tokʼoxalh pus va isʼakstu ixvi ju Jesús ju anch. 24 Pus ju barco laʼixlacaitat ju atantsʼin ixchaʼanta. Para ni na pʼas ixlai ju un chai na ixnekʼespʼit ju xcan pus jantu lai ixtamalhtanai ju barco. 25 Para acsni ixtʼajun tuncuntilanaʼ pus alakʼalh ju Jesús. Alhtanaʼalh laʼixʼucxni xcan. 26 Para ju ixʼamamakaʼui acsni talaktsʼilh ni alhtanaʼantachalh laʼixʼucxni xcan lana na tatalhanalh. Talaclajunich: ―Ca yuchi ju macxcai un. Chai na talactʼasalh ni na ixtatalhanan. 27 Para ju Jesús lana axakʼala. Chani alacjuni: ―Quitʼin. Jantu atʼalhanantʼit. Akʼachʼantʼit. 28 Pus ju acsnich ju Pitaluʼ xakʼala ju Jesús chai juni: ―Quiʼucxtin ni vasalh uxintʼiʼat pus yauch aqʼuiʼun ni acʼanchan pakxtoknun. Acʼalhtanaʼanchalh laʼixʼucxni xcan. 29 Chai ju Jesús juni: ―Asokʼoch. Pus ju Pitaluʼ lana tacutlh ju lacabarco. Alhtanalh laʼixʼucxni xcan ni ixʼamputun pakxtoknuʼ ju Jesús. 30 Para acsni laktsʼilh ni na pʼas ixtʼajun ju un pus lana talhanalh chai ixnitajuputun lacxcan. Pus pʼas tʼasalh. Naulh: ―Quiʼucxtin aqʼuimakʼalhtʼaxtʼuch. 31 Pus ju Jesús lana xtaknilh ixmacaʼ. Macchʼapacha chai chani juni: ―Tis va yuchach ji lapanac ni jantuch quilhilacʼapʼin. Tas ni va xaqʼuincʼapʼach. 32 Chai acsni tatajuchokolh ju yuʼunch ju lacabarco pus lana sek va ju un. 33 Pus ju acsnich ju ixtatanumanalh lacabarco talakʼayalh. Tajunich: ―Slivasalh ni istsʼalhʼat Dios. 34 Acsni tachaʼalh ju lhimakʼantacutni ju atantsʼin ju Jesús chai ju ixʼamamakaʼui pus tachaʼalh ju xalacatʼun Genesaret. 35 Chai ju amachakʼan anch acsni tamispa ju Jesús pus lana tamalakachalh chivinti tachi chun ju lakʼachakʼanixni ju vanin ixvi. Pus ju lapanacni talhiminilh ju Jesús tachi chun ju takʼankʼanin. 36 Chai tatapaininilh ni laich catalakchaʼanilh mas va lacatsʼunin ixquilhtuʼ ixpumpuʼ. Pus ju Jesús alakʼaʼinilh. Chai tachi chun ju talakchaʼanilh ju ixpumpuʼ palaich tava.
1 Ju acsnich talakmilh ju Jesús ju aliʼin fariseonin chai ju lapanacni ju na ixtalhatalanininta ju ixlhamapʼaksinʼan ju istʼaʼisraelitanin amachakʼan Jerusalén. Chai tasacmilh ju Jesús. Tajuni: 2 ―Ju mintamamakaʼun tajuch ni jantu tuʼuʼ talhiulai ju ixlhamapʼaksinʼan ju papaninch ni jantu chunch tamakchʼakʼai acsni tavajin tachi ju iclhilanitau ju quijnan. 3 Para ju Jesús chani akʼalhtailh: ―Pus ju uxijnan tajuch ni jantu navipʼalatʼit tachi ju najun laʼixlhamapʼaksin ju Dios. Alai va naviyatʼit ju miʼatalanintiʼan miʼakstuʼan. 4 Pus ju Dios chani naulh: “Atʼalhonitʼit ju mimpaiʼan chai ju minatiʼan”. Vachuʼ naulh ni camaknicalh va tichi chavaich ju cajunaʼ macxcai chivinti ju ixpai u ixnati. 5 Para ju uxijnan lakʼaʼinitʼit ni chani cajunilh ju ixpai u ixnati ju tam lapanac: “Ju quitʼin jantu lai actilaʼaktaiju va ixlacaʼatalh ni iclhikʼailaktsʼilh ju Dios ju tumin ju xaclapuʼaktaiju ju uxijnan”. 6 Pus ju uxijnan lakʼaʼiyatʼit ni jantu caʼaktaiju ju ixpai u ixnati va tichi chavaich ju chunch canaulh. Chai ni chunch ju layatʼit pus samakʼantʼatʼit ju ixlhamapʼaksin Dios va ixlacaʼatalh ni navipʼutʼunatʼit ju miʼatalanintiʼan miʼakstuʼan. 7 Ju uxijnan va aʼokxchokʼonin untʼatʼit acsni chunch ju layatʼit. Pus slivasalh tachi ju naulh ju Isaías ju milacataʼan acsni chani xatsʼokʼulai laʼixchivinti Dios: 8 Ju ani lapanacni va laʼixquilhniʼan quintalakʼayai. Para ju laʼixʼalhunutʼan tam tapastʼacʼa ju quilacata quitʼin. 9 Jantu lhitapalai ni quintalakʼayai ni taʼamalanininch va ixlhamapʼaksinʼan ju ixtʼalapanacniʼan. 10 Acsni nonkʼolh ju chunch ju Jesús pus atʼasanilh ju ixtalhavat lapanacni chai chani alacjuni: ―Aquilakʼasmatniu chai amachʼakxatʼit ju aclajunau. 11 Jantiyuʼ ju ui tam lapanac ju malhquiliquini ju isʼatsucunti. Alai yuchi ju chivinti ju taxtui laʼixquilhni. Yuchach ju malhquiliquini isʼatsucunti ju tam lapanac. 12 Pus ju acsnich talakmilh ju Jesús ju ixʼamamakaʼui chai chani tajuni: ―Ja cʼatsʼaich ni talhitalhkʼamalh ju fariseonin ju tuchʼi xaʼaʼuni. 13 Para ju Jesús chani alacjuni: ―Tachi chun ju lapanacni ju jantu talacaʼiputun ixchivinti ju quimpai ju vilhcha lactʼiyan cataʼaclayaʼ. Chunch ju caʼaʼulhtucanaʼ tachi acsni tipulhucan ju tuʼuʼ qʼuiu. 14 Pus amacʼaʼuntʼit ju yuʼunch ni chunch tajunita tachi ju tuʼuʼ alakʼachʼixnin chai taʼapʼulhniputun ju ixtʼaʼalakʼachʼixnin. Pus ju tam alakʼachʼix ni capʼulhnilh ju ixtʼaʼalakʼachʼix pus ixtʼiyunʼan catintaʼanaʼ junta puculhucnicʼa. 15 Pus ju acsnich ju Pitaluʼ chani juni ju Jesús: ―Aquilamavasalaniuch ju chivinti ju xaʼaʼuni ju ixtalhavat lapanacni. 16 Chai ju Jesús ajuni: ―Ja vachuʼ jantu lai amachʼakxanantʼit ju uxijnan. 17 Ja va jantu machʼakxayatʼit ni va lamimpajanʼan ju tajui tachi chun ju qʼuilhtʼanuyatʼit. Chai astan va makʼancanch. 18 Para tachi chun ju macxcai chivinti ju qʼuilhtʼaxtʼuyatʼit pus lamiʼalhunutʼan ju minacha. Chai yuchach ju tamalhquiliquiniyan ju miʼatsucuntiʼan. 19 Pus lacaʼalhunut ju taxtui ju macxcai atalacpastʼacʼat chai ju amakninti chai ju ixpuxcajuca apumatam chakoʼulh u apumatam jokʼat. Vachuʼ lacaʼalhunut ju taxtui ju ixkʼachanica ni va lacati tsucucan chai ju akʼalhaʼunti chai ju taʼaklhtamat chai ju macxcai chivinti. 20 Yuchach ju ani ju malhquiliquini isʼatsucunti ju tam lapanac. Jantiyuʼ ni va jantu chun camakchʼakʼalh acsni cavenaʼ tachi ju talhilanita ju aliʼin. 21 Pus ju acsnich ju Jesús taxtucha ju anch. Alh ju xalacatʼun junta ixʼalin ju lakʼachakʼanixni Tiro chai Sidón. 22 Chai pumatam chakoʼulh amachakaʼ Canaán lakʼalh ju Jesús chai va tsa tsa tapaininilh. Chai na pʼas ixchivinin acsni chani ixjuni: ―Quiʼucxtin. Istsʼalhʼat David. Lamapainin aqʼuiʼaktʼaiʼutʼich. Alin ju lhacaticuru laʼixlacatuna ju quintsiʼ chai slivasalh na makʼalhkʼajnan. 23 Chunch ju ixjuni ju Jesús para ju yuchi jantu tsʼi junilh. Pus ju acsnich talakmilh ju Jesús ju ixʼamamakaʼui chai tatapaininilh. Tajunich: ―Anavininch ju tuchi sqʼuiniyan ni laich caʼanchokolh laʼixchakaʼ ni na jeks quintamavayan. 24 Pus ju acsnich ju Jesús chani naulh: ―Ju Dios quimalakachatachilh ni va yuʼunch acʼaʼaktaijuyaʼ ju quintʼaʼisraelitanin ju catamakʼalhkʼajnankʼalhi ni catatailhiʼalh ixʼalactuʼuntiʼan. 25 Para ju anuʼ chakoʼulh palai vanin milh junta ixya ju Jesús. Taʼaktsokotanilh. Chai chani juni: ―Quiʼucxtin aqʼuiʼaktʼaiʼutʼich. 26 Para ju Jesús juni: ―Jantu lhijun ni acʼaktaijun ju uxintʼi. Ni chunch aclalh pus va ixtʼachun cava tachi ju va acʼaquictaiʼi ju ixvaitiʼan ju quintʼaʼamachivinti chai acʼaxtaknilh ju scʼuyun. 27 Para ju anuʼ chakoʼulh chani juni: ―Vasalh ji quiʼucxtin. Para mas yuʼunch ju scʼuyun tasacʼui ju xataquicpuchin ju patajui lacamixa junta tavajin ju ixʼucxtinʼan. 28 Pus ju acsnich ju Jesús juni: ―Chakoʼulh slivasalh na qʼuilhilaksich. Anavinicʼanaʼich ju tuchʼi xaqʼuisqʼuinich. Pus lana palai va ju istsiʼ ju anuʼ pantsʼiquis. 29 Chai ju Jesús taxtucha chai milh vanin laxaʼatantsʼin Galilea. Chai astan alh lakatam akstijun chai tolhcha ju anch. 30 Chai na lhu talakchaʼalh ju lapanacni. Alaclhichaʼanicalh ju jantu lai ixtaʼalhtanan chai ju alakʼachʼixnin chai ju nunuʼ chai ju macmututu chai ju alich na lhu takʼankʼanin. Vaninch amamacalh junta ixchʼantai ju Jesús chai ju yuchi palai anavikʼo. 31 Pus ju lapanacni na talhamakʼaninilh acsni talaktsʼilh ni ixtachivinin ju nunuʼ ixtajunita. Chai ju macmututu ixjunita palai tajunlh. Chai ju va chʼanlhkʼavilh ixtajunita laich sok ixtaʼalhtanan. Chai ju alakʼachʼixnin ixtajunita laich ixtaʼalacʼavanan. Pus chux ju lapanacni na talhamakʼaninilh. Chai na talakʼayalh ju isDiosʼan ju israelitanin. 32 Ju acsnich ju Jesús alactʼasanilh ju ixʼamamakaʼui chai chani ajuni: ―Painiʼitnich ju ani tavilanalh lapanacni ni lakatʼutu avilhchan xaquintatʼatolan chai ju chavai matich ju tuchi cataʼulh. Chai jantu icʼamalakachaputun laʼixchakaʼan ni va catachavaʼalh. Jantu xcai ni va catataʼaktalh ju lacati ixchavanʼan. 33 Pus ju ixʼamamakaʼui tajuni: ―Para ju ani jantu xamatiʼ tʼajun. Tas anchach ju lai acʼiyau ju quijnan ju lhu vaiti ni laich acʼamalhilanikʼoju ju ixtalhavat lapanacni. 34 Chai ju Jesús asacmilh. Alacjuni: ―Tas akxchux vati ju chʼapʼatʼatʼit. Chai ju yuʼunch tajuni: ―Va akxtujun vati chai lacatsʼunin lactʼicstʼi pamata. 35 Pus ju acsnich ju Jesús ajuni ixtalhavat lapanacni ni catatavilhcaʼ lacaʼatsʼinan. 36 Chai ju yuchi chʼapalh ju akxtujun vati chai ju pamata. Xtaknilh lhakʼailaktsʼin ju Dios. Chai astan lacchʼekʼelh chai axtaknilh ju ixʼamamakaʼui. Chai ju yuʼunch taʼalhilaktsakʼo tachi chun ju lapanacni. 37 Pus tavenkʼo ixchuxʼan chai talhilalh. Chai astan tasacchokolh ju jantu taʼokʼo. Chaʼalh lakatujun tankʼalin. 38 Pus ju anuch ju tavailh ixchaʼanta lakatʼatʼi milh jokʼatni. Ju chakolun chai ju askʼatʼan jantu aputekʼecalh. 39 Pus ju Jesús amacʼami ju lapanacni. Taju lacabarco chai alh vanin ju lakʼachakʼan Magdala.
1 Ju fariseonin chai ju saduceonin talakmilh ju Jesús. Chai ni va ixtapuxconiputun ixtalakʼalhin pus tatapaininilh ni canavilh lakatam lhamakʼan ta yu laich catapucʼatsayaʼ ni vasalh Dios ju camalakachachilh. 2 Para ju yuchi chani alhikʼalhtailh: ―Ju tokʼoxai acsni slapulh tasui ju lactʼiyan pus ju uxijnan nonatʼit ni kʼoxich caʼavananaʼ ju ani laquintʼunʼan. 3 Chai ju vatsʼisin acsni na slapulh tasui ju ataputsʼi pus ju uxijnan nonatʼit ni calayach ju xcan ju ani laquintʼunʼan. Pus ju uxijnan lai machʼakxayatʼit ta yu avanan ju lactʼiyan. Para va acxpʼutʼiyununatʼit ni nonatʼit ni jantu lai machʼakxayatʼit tuchi nomputun ju lhamakʼan ju icnavitʼajun ju chavai. 4 Pus ju lapanacni ju tatʼajun ju chavai na kʼai tajunita chai tamacajunta ju Dios. Chai yuʼunchach ju tasqʼuin tuʼuʼ lhamakʼan. Para jantu catiʼaxtaknicalh tuʼuʼ atumpa. Va yuchi tachi ju tapasalh laʼisʼatsucunti ju Jonás. Chai acsni naulh ju chunch ju Jesús pus lana amacaulh. Alh. 5 Pus ju ixʼamamakaʼui ju Jesús tatapasalh ju lhimakʼantacutni ju atantsʼin chai acsnicaʼ ju tapastacli ni va ixtacapta ju ixkapavatiʼan. 6 Pus ju acsnich ju Jesús alacjuni: ―Alaccʼatsʼanantʼit ixlacata ju ixlevaduraʼan ju fariseonin chai ju saduceonin. 7 Pus ju ixʼamamakaʼui talaclajuni sia yuʼunch: ―Quintajunan chunch ni jantu lhimintau ju tuʼuʼ xkapavati. 8 Para ju Jesús cʼatsa ni chunch ixtalajuni isʼakstuʼan chai alacjuni: ―Tajuch ni va lhamakʼanininatʼit ni jantu lhitʼantʼatʼit ju tuʼuʼ xkapavati. Na lacatsʼunin ju quilalhilaksiyau. 9 Ja va jantucaʼ machʼakxayatʼit tuchi nomputun ju lhamakʼan ju icnavita. Ja va jantu pʼastʼactʼit ju anuʼ akxquis vati ju taʼulh ju lakaquis milh jokʼatni. Ja va jantu pʼastʼactʼit ta lakachux tankʼalin ju sacchʼokʼotʼit. 10 Chai ja va jantu pʼastʼactʼit ju akxtujun vati ju taʼulh ju lakatʼatʼi milh jokʼatni. Chai ja va jantu pʼastʼactʼit ta lakachux tankʼalin ju sacchʼokʼotʼit. 11 Tajuch ni jantu lai machʼakxayatʼit ni jantu xaclhichivinin ju tuʼuʼ xkapavati acsni iclajunau ni alhicʼatsʼanantʼit ixlacata ju ixlevaduraʼan ju fariseonin chai ju saduceonin. 12 Pus acsnicaʼ ju tamachakxa ni jantu va xalevadura ju xkapavati ju lhichivincalh. Alai ajuni ni calaccʼatsanalh ixlacata ju ixʼamalaninti ju fariseonin chai ju saduceonin. 13 Ju Jesús acsni milh vanin ju lakʼachakʼan Cesarea Filipo pus asacmilh ju ixʼamamakaʼui. Alacjuni: ―Tas tanajun ju lapanacni. Tis chavaich quintalhiulai ju quitʼin ju quimalakachatachilh Dios ni lapanac actsucuyaʼ ju ani. 14 Chai ju yuʼunch tajuni: ―Pus ju aliʼin tanajun ni ma Xivanʼat ju ixʼamakpaxanan. Chai ju aliʼin tanajun ni ma Elíasʼat. Chai ju aliʼin tanajun ni ma Jeremíasʼat u akʼantam makʼaniya lapanac unitʼa ju ixnajun ixchivinti Dios. 15 Pus ju acsnich ju Jesús ajunchokopa: ―Chai ju uxijnan tʼas nonatʼit. Tis chavaich ju quilalhiulayau ju quitʼin. 16 Pus ju Simón Pitaluʼ naulh: ―Uxintʼich ju Cristoʼat ju ixnoncan camalakachatachilh ju Dios. Istsʼalhʼat ju Dios ju lakʼajunta. 17 Chai ju Jesús juni: ―Va paxcatchʼat ji Simón istsʼalh Jonás. Jantu va xamatiʼ mintʼalapanac ju xamasuniyan ju chunch. Va isʼakstu quimpai ju vilhcha lactʼiyan ju xamavasalaniyan chunch. 18 Chai ju quitʼin icjunan ni lhijunch ni Pitaluʼ uncʼan ni vasalh chunch unitʼa tachi ju tuʼuʼ chiux chai chunch ju nomputun ju mintapakaʼut. Pus jantu va tam tam naʼun ju uxintʼi. Chai vachuʼ chux ju quilapanacni catalacaʼiyaʼ ju chivinti ju xanaʼun ju quilacata. Chai nin yuchi ju Satanás jantu lai catiʼamacʼapʼani ju quilacata quitʼin mas na tachapun junita ju yuchi. 19 Chai acxtakniyan ju uxintʼi ju mintachaput ni xakʼai aʼunaʼ sia yuʼunch ju talakʼaʼita ni calhinaulh ju Dios laʼisʼatsucuntiʼan. Chai tachi chun ju jantu alakʼaʼiyaʼ ju uxintʼi ni catanavi ju yuʼunch pus vachuʼ jantu calakʼaʼiyaʼ ju Dios ju vilhcha lactʼiyan. Chai tachi chun ju alakʼaʼiyaʼ ni catanavi pus vachuʼ chunch calakʼaʼiyaʼ ju Dios ju vilhcha lactʼiyan. 20 Pus ju acsnich ju Jesús alhimapʼaksilh ju ixʼamamakaʼui ni jantu xamatiʼ catamacʼatsani ni yuchach ju Cristo junita. Yuchi ju ixnoncan camalakachatachilh ju Dios. 21 Pus tus acsni ju Jesús taiʼula ixʼajunica ju ixʼamamakaʼui ni tasqʼuini ni caʼalh ju lakʼachakʼan Jerusalén. Chai ju anch ma slivasalh na catamamakʼalhkʼajniyaʼ ju papaninch chai ju xalackʼajin palijni chai ju na talhatalanininta ju ixlhamapʼaksinʼan ju istʼaʼisraelitanin. Chai ju anch ma camaknicanaʼ. Para ma calokʼonchokoyaʼ ixlhilakatʼutu avilhchan. 22 Pus ju acsnich ju Pitaluʼ tʼasanilh va isʼakstu ju Jesús. Lhiʼalh alacatam chai tsuculh mapʼaksiniʼ. Chani ju juncan ju Jesús: ―Ju Dios caʼaktaijuyan lacaʼamapaininti chai jantu tavanan chunch atʼapʼasayaʼ ju uxintʼi. 23 Para ju Jesús talakaspʼitlh chai chani ju junilh ju Pitaluʼ: ―Akʼostʼich ju laquiʼucxlacapuʼ ji lhacaticuru. Ju uxintʼi va quimakʼalhkʼosupʼutʼun. Ju uxintʼi jantu chun alacpʼastʼacnan tachi ju Dios. Ju uxintʼi va alacpʼastʼacnan tachi ju mintʼalapanacni. 24 Ju acsnich ju Jesús alacjuni ixchuxʼan ixʼamamakaʼui: ―Ni xamatiʼ quinchʼakʼokʼaputun pus jantu lai canavilh ixkʼachat isʼakstu. Chai cachʼixaʼ ju makʼalhkʼajnat ju caʼalinaʼ va ixlacaʼatalh ni quinchʼakʼokʼai ju quitʼin. Chai aquinchʼakʼokʼakʼalhi. 25 Pus va tichi chavaich ju najun ni jantu quinchʼakʼokʼaputun va ixlacaʼatalh ni va lai maknicalh pus ju yuchi camakʼatsʼankʼayaʼ ju xaʼatsucunti ju lactʼiyan. Para va tichi chavaich ju camakʼatsʼankʼayaʼ ju isʼatsucunti va ixlacaʼatalh ni quinchʼakʼokʼai ju quitʼin pus caʼalinaʼ ju isʼatsucunti ju lactʼiyan. 26 Pus jantu tuʼuʼ lhajai tam lapanac mas calhajakʼo chux ju xataxtokni ju alin ju ani lacamunutpaʼ para ni va calhimakʼatsʼankʼa ju isʼatsucunti ju caʼixʼalilh ju lactʼiyan. Pus ni va chunch ju calalh pus jantu lai catiʼalh ju anch mas camapalalh lacatumin. 27 Pus vasalh chani ju catapasayaʼ ni acminchokoyaʼ ju quitʼin ju quimalakachatachilh Dios ni lapanac actsucuyaʼ ju ani. Acminaʼ laʼixtachaput ju quimpai. Chai acʼalactʼaminaʼ ju quiʼanquilhnin. Chai ju acsnich acʼaxtakniyaʼ ju pumatamin tachi ju lhijunch ixlacata tuchi tanavita laʼisʼatsucuntiʼan. 28 Slivasalh ju iclajunau. Alin ju lamilhiʼuxijnan ju ani vilatʼit ju jantu cataniyaʼ tus acsni aquilalaktsʼinau ju quitʼin acsni acminchokoyaʼ chai aclhinonaʼ. Quitʼin ju quimalakachatachilh Dios ni lapanac actsucuyaʼ ju ani.
1 Pus ixlhilakachaxan avilhchan astan pus ju Jesús atʼasanilh ju Pitaluʼ chai ju Jacobo chai ju Xivan. Ispʼisekʼe ju Jacobo. Alhiʼalh va isʼakstuʼan ju lactalhpa junta na putankʼai ixjunita. 2 Chai ju anch na tamch ju atalacasunilh ju yuʼunch. Pus ju ixʼucxpuʼ slapʼapʼa ixmaktaji tachi ju avilhchan. Chai ju ixpumpuʼ lana na xnapapa va tachi ju tuʼuʼ atuncunuʼ. 3 Chai vachuʼ talacasucha ju Moisés chai ju Elías ju makʼanchich ixtatʼajun. Ixtatʼachivininch ju Jesús. 4 Pus ju acsnich chani juni ju Pitaluʼ ju Jesús: ―Quiʼucxtin slivasalh na kʼox ni ani vilau. Ni lacʼasqʼuinch acyoyau akʼatʼutu pacʼatsʼa. Akʼatam ju miʼanuʼ. Akʼatam ixʼanu ju Moisés. Chai ju akʼatam ixʼanuʼ ju Elías. 5 Pus acsni ixtʼajuncaʼ chiviniʼ ju Pitaluʼ lana tamacatalh ju ataputsʼi ju kʼai slamnicʼa ixjunita. Aʼakxtakmakʼo ju yuʼunch. Chai takʼasmatlh lakatam chivinti ju xaminacha lacaʼataputsʼi chai chani xanajun: ―Ju ani ya yuchi ju quintsʼalh chai na icmapaini. Slivasalh na iclhikʼachan ju yuchi. Yuchach ju akʼasmatnitʼit. 6 Pus acsni takʼasmatlich ju ixʼamamakaʼui ju Jesús pus lana tataquilhputalh ni na ixtatalhanan. 7 Pus ju acsnich ju Jesús lana alakʼalh. Apicla chai chani alacjuni: ―Akʼostʼolatʼit. Jantu atʼalhanantʼit. 8 Pus ju yuʼunch acsni taʼalacʼavanalh jantu xamatiʼ talaktsʼilh. Va isʼakstu ju Jesús. 9 Chai acsni ixtatʼajun takʼalhtajunin ju anuʼ lactalhpa pus ju Jesús alhimapʼaksilh ju ixʼamamakaʼui. Chani ajuni: ―Tun xamatiʼ tʼiʼunitʼit ju tuchʼi xalaktsʼinatʼit. Va acsnich ju lai anonaʼitʼit acsni aclokʼonchokoyaʼ junta acmacnucanaʼ. Quitʼin ju quimalakachatachilh ju Dios ni lapanac actsucuyaʼ ju ani. 10 Pus ju acsnich ju ixʼamamakaʼui tasacmi ju Jesús. Tajuni: ―Ju yuʼunch ju na talhatalanininta ju quilhamapʼaksinʼan tajuch ni va tanajun ni tasqʼuini ni pʼulhnan camilh ju Elías. Astan ju yuchi ju camalakachayachilh ju Dios. 11 Chai ju Jesús alacjuni: ―Slivasalh tachi ju tanajun ni pʼulhnan caminaʼ ju Elías chai calakʼoxikʼoyaʼ tachi chun ju taxtokni. 12 Para iclajunau ni quilachilh ju Elías chai ju lapanacni jantu ixtamispai. Alai va tanavilh tachi ju talacasqʼuilh. Chai vachuʼ ju quitʼin aquintamamakʼalhkʼajniyaʼ ju yuʼunch. Quitʼin ju quimalakachatachilh ju Dios ni lapanac actsucuyaʼ ju ani. 13 Pus ju acsnich ju ixʼamamakaʼui tamachakxalh ni yuchi ju Xivan ju amakpaxanaʼ ju ixʼalhixakʼalai tachi ju va Elías ixjunita. 14 Pus acsni tachaʼalh ju Jesús chai ixpumatʼutuʼan ixʼamamakaʼui junta ixtayanancha ixtalhavat lapanacni pus lana lakmilh ju Jesús pumatam lapanac. Taʼaktsokotanilh chai junich: 15 ―Ji quiʼucxtin lamapainin aʼaktʼaiʼutʼich ju quintsʼalh. Ju yuchi va lhtucuni chai na makʼalhkʼajnan. Na paklhu ju xataʼaktai ju lacajipi chai lacxcan. 16 Icʼalhiminita ju mintamamakaʼun para ju yuʼunch jantu lai palai tanavi. 17 Chai ju Jesús akʼalhtayanalh. Ajunich: ―Tis va yuchach ji lapanacni ni lana jantu lai lacʼaʼiyatʼit. Lana jantu sok pʼinatʼit. Ja tasqʼuini ni lana na makʼan aclatʼatolau tus acsni amachʼakxayaʼitʼit. Ja tasqʼuini ni lana na makʼan aclachʼixniu tus acsni alacʼaʼiyaʼitʼit. Aquilalhiminiuch ju anuʼ tsʼalh. 18 Chai acsni talhiminilh pus ju Jesús kʼailh ju lhacaticuru ju ixtanun laʼixlacatuna ju tsʼalh chai lana taxtulh. Pus ju tsʼalh palai va ju acs pantsʼiquis. 19 Ju astan ju ixtamamakaʼun talakʼalh ju Jesús va isʼakstuʼan chai tajuni: ―Tajuch ni jantu lai xacxcoxtuyau ju lhacaticuru laʼixlacatuna ju anuʼ tsʼalh. 20 Chai ju Jesús alacjuni: ―Ju uxijnan jantu lai xaxcʼoxtʼuyatʼit ju lhacaticuru laʼixlacatuna ni jantu vasalh quilalhilaksiyau. Slivasalh ju iclajunau. Ni aquilalhilaksiyau mas va lacatsʼunin pus laich aʼunaʼitʼit ju ani talhpa ni cakʼoslh. Caʼalh alacatam. Chai chunch ju catapasayaʼ. Ni vasalh aquilalhilaksiyau pus va tuchi ixtalakxtuch ju aquilasqʼuiniyau pus anavinicʼanaʼitʼit. 21 Para ju lhacaticurulhni tachi ju ixtanun laʼixlacatuna ju anuʼ tsʼalh va acsni ju catataxtuyaʼ acsni atʼapʼaininiyaʼitʼit ju Dios ju ixlacata chai atʼascʼaʼayaʼitʼit. 22 Acsni ixʼalactʼaʼucxuntʼajun ju Jesús ju ixʼamamakaʼui ju xaʼestado Galilea pus ju Jesús ajunchokopa ni camakʼaxtakcanaʼ laʼixmacaʼan ju lapanacni. Yuchi ju malakachatachilh Dios ni lapanac catsucuyaʼ ju ani. 23 Vachuʼ ajunilh ni catamakniyaʼ para ixlhilakatʼutu avilhchan calokʼonchokoyaʼ. Pus ju ixʼamamakaʼui slivasalh na taʼamakʼaninilh acsni takʼasmatnilh ixchivinti ju Jesús. 24 Acsni alactʼachaʼalh ju Jesús ju ixʼamamakaʼui ju lakʼachakʼan Capernaum pus talakʼalh ju Pitaluʼ ju lapanacni ju ixtapusacʼa ju tumin ixlacata ju ixpujitatʼan ju istʼaʼisraelitanin. Tajuni: ―Ju miʼamamakaʼunuʼ ja amapalanan ju tamin cʼata ixlacata ju quimpujitatʼan. 25 Pus ju Pitaluʼ junilh ni aktsʼiya amapalanan. Pus ju yuchi tanulh lacachakaʼ chai ju Jesús lana xakʼala. Juni: ―Tʼas naʼunch ju uxintʼi ji Simón. Ju xalackʼajin ju ani lacamunutpaʼ tis chavaich ju tachʼi junta astʼanancan. Ja amachakʼan anch u yuʼunch ju alacatam tamintacha. 26 Chai ju Pitaluʼ juni: ―Pus yuʼunch ju alacatam tamintacha. Pus ju acsnich ju Jesús juni: ―Pus ju chunch jantu tasqʼuini ni catiʼamapalanalh ju amachakʼan anch. 27 Para chani alatʼi ni jantu catatalhkʼamalh ju lapanacni chai catanaulh ni jantu tuʼuʼ lhiulayau ju quimpujitatʼan. Inchich lacaʼatantsʼin. Amuyaʼich ju mimpaklavaʼin. Chai amacʼutʼuch ju pamata ju pʼulhnan caquilhtanuyaʼ ju mimpaklavaʼin. Amakʼalhkʼayaʼich chai alhitʼaʼuyaʼich ju tumin. Achʼapʼach. Alhimapʼalaʼich ju quilacata chai ju milacata.
1 Ju acs avilhchan talakchaʼalh ju Jesús ixchuxʼan ju ixʼamamakaʼui chai tajuni: ―Tis chavaich ju palai xakʼai cajunaʼ acsni calhinonaʼ ju Dios. 2 Pus ju acsnich ju Jesús tʼasanilh pumatam askʼatʼa. Yaulh laʼixlacaitatʼan. 3 Chai alacjuni: ―Slivasalh ju iclajunau. Ni jantu amapʼaxayaʼitʼit ju miʼatsucuntiʼan chai ni jantu ixlhichux ju miʼalhunutʼan aʼuntʼit tachi ju tam askʼatʼa ju jantu lhitakʼayai ju tuʼuʼ pus jantu tavanan lai atʼitʼanutʼit junta lhinajun ju Dios. 4 Pus va tichi chavaich ju jantu tuʼuʼ calhitakʼayayaʼ tachi ju lai ju ani ya askʼatʼa pus yuchach ju palai xakʼai cajunaʼ junta lhinajun ju Dios ju lactʼiyan. 5 Chai va tichi chavaich ju lhikʼach caʼamaklhtayananaʼ ju tam quilapanac ju jantu tuʼuʼ lhitakʼayai tachi ju lai ju ani ya askʼatʼa pus tachi ju va jun quitʼin ju quiʼamaklhtayanan. 6 Va tichi chavaich ju camakʼalhkʼosuyaʼ tam xamatiʼ ju jantucaʼ kʼox quilhilaksi pus palai kʼox caʼixva ni caʼixpixtuchʼimucʼacalh ju tsasnatpuchʼipi chai caʼixmacaʼancalh junta palai talhman lacaʼalama acsni tucaʼ ixmakʼalhkʼosui tam xamatiʼ. 7 Painiʼitnich ju lapanacni ju tatʼajun ju ani lacamunutpaʼ ni aktsʼiya na alin ju pukʼalhkʼoscan. Para painich ju anuʼ lapanac ju camakʼalhkʼosu apumatam. 8 Pus ni pʼalactʼuʼunumpʼutʼunatʼit ju mimacaʼan pus jantu anavitʼit. U ni anch ju pʼimpʼutʼunatʼit junta akʼalhkʼosaʼitʼit pus jantu apʼitʼit ju anch. Alai alatʼit tachi ju va chʼakxpʼuxtʼatʼit chai makʼantʼatʼit ju mimacaʼan u minchʼajaʼan. Pus palai kʼox cava ni atʼanuyaʼitʼit ju lactʼiyan mas va lakatamch ju mimacaʼan u minchʼajaʼan. Palai jantu kʼox cava ni apʼacxantʼit chux lakatʼui mimacaʼan u minchʼajaʼan para va apʼumacʼapʼincʼantʼit ju lacajipi. 9 U ni yuchi ju laktsʼimpʼutʼunatʼit ju tamalactuʼuniyan pus jantu alaktsʼintʼit. Alai alatʼit tachi ju va maxtʼutʼatʼit chai makʼantʼatʼit ju milakchulhʼan. Pus palai kʼox cava ni atʼanuyaʼitʼit ju lactʼiyan mas va lakatamch ju milakchulhʼan. Palai jantu kʼox cava ni caʼalilh chux lakatʼui ju milakchulhʼan para va apʼumacʼapʼincʼantʼit ju lacajipi. 10 Jantu tavanan ju va jantu tuʼuʼ alhiulatʼit ju uxijnan tam xamatiʼ ju jantu tuʼuʼ lhiulacan ju ani lacamunutpaʼ. Iclajunau chunch ni va tachi tayanancha lactʼiyan ju anquilhnin ju taʼalhistʼacʼa ju yuʼunch. Vanin tayanalh junta vi ju quimpai. 11 Chai ju quitʼin yuchi iclhimilh ju ani ni laich acʼamakʼalhtaxtuyaʼ ju istatsʼankʼata. Quitʼin ju quimalakachatachilh ju Dios ni lapanac actsucuyaʼ ju ani. 12 Pus tʼas nonatʼit. Ju tam xamatiʼ ni capacxalh tachi tam cientos ixborregojni chai ni camakʼatsʼankʼa lactalhpa lakatam ja jantu camacaulh ju noventa y nueve chai caʼalh puxconaʼ ju istsʼankʼata. 13 Pus slivasalh ju iclajunau. Acsni calhitajuyach ju yuchi ju istsʼankʼata pus palai na calhikʼachanaʼ ju yuchi. Palai jantu ju noventa y nueve ju jantu istatsʼankʼata. 14 Pus vana va chun ju mimpaiʼan ju vilhcha lactʼiyan. Ju yuchi jantu lacasqʼuin ni catsʼankʼa nin tachi pumatam ju sia yuʼunch ju jantu tuʼuʼ lhiulacan ju ani lacamunutpaʼ. 15 Ju tam milhilakʼau ni calactuʼuyan pus inchich juniniʼ va isʼakstu. Chai ni calhilatolaʼ chai catapaininiyan ni amacʼacxaniyaʼ pus aktʼaiʼutʼach ju milakʼau chai jantu camamakʼalhkʼajnicanaʼ ixlacata ju anuʼ xanavi. 16 Para ni jantu lhilatolai pus akʼailhipʼi tachi pumatam u pumatʼui. Ju chunch caʼalinaʼ pumatʼui u pumatʼutu ju catakʼasmatniyaʼ ju ixchivinti. 17 Para ni jantu calhilatolaʼ laʼixʼucxlacapuʼan ju yuʼunch pus aʼunch chux ju tatakʼaixtʼokʼa ni talakʼayai ju Dios. Para ni jantu calhilatolaʼ laʼixʼucxlacapuʼan ju yuʼunch pus alhimispʼatʼich tachi tam xamatiʼ ju jantu mispai ju Dios. 18 Slivasalh ju iclajunau ju uxijnan ju quilapanacni untʼatʼit. Tachi chun ju jantu alakʼaʼiyaʼitʼit ni catanavi ju yuʼunch ju quintalhilaksi pus vachuʼ jantu calakʼaʼiyaʼ ju Dios. Chai tachi chun ju alakʼaʼiyaʼitʼit ni catanavi ju yuʼunch ju quintalhilaksi pus vachuʼ calakʼaʼiyaʼ ju Dios. 19 Vachuʼ iclajunau ju ani. Ni alin ixtʼiyunʼan ju milhiʼuxijnan ju va lakatam catanaviyaʼ ixʼatalacpastʼacʼatʼan ixlacata ju tuchi tasqʼuiniputun ju Dios pus caʼanaviniyaʼ ju quimpai ju vilhcha lactʼiyan. 20 Pus caʼanavinicanaʼ ni quitʼin ju icʼalactʼavi ixpumatʼui u ixpumatʼutuʼan ju tatakʼaixtokta ni quintalakʼayai. 21 Pus ju acsnich ju Pitaluʼ lakʼalh ju Jesús chai juni: ―Ta pakchux ju acmacʼacxaniyaʼ tam quilakʼau ju quinavinitʼajun tuʼuʼ macxcai. Ja paktujun. 22 Para ju Jesús junich: ―Jantu icjunan ni va paktujun. Para tus va ta pakchux. 23 Iclajunau ni alamacʼacxayaʼitʼit ni tamacʼacxanitan ju Dios. Pus chani tapasai junta lhinajun ju Dios tachi ju tapasalh laʼisʼatsucunti pumatam kʼai ucxtin ju atʼanavilh ju aputʼekʼenti ju ixtalhiʼanich. 24 Pus acsni taiʼulalh ju aputʼekʼenti pus lhiminicalh pumatam ju ixlhiʼanich lakacau milh oro tumin. 25 Para ju yuchi ni jantu lai jintaʼ ixʼi ju ixlhimapalhcan pus ju ixʼucxtin lhinaulh istʼaca ju yuchi chai ju ixʼamachakaʼ chai isʼaskʼatʼan chai tachi chun ju ixtaxtokni. Chai caxtaknicanaʼ ju ucxtin mas va yuchi ixtapalh tachi chun ju yuʼunch. 26 Pus ju acsnich ju anuʼ lapanac taʼaktsokotanilh ju ixʼucxtin chai tapaininilh. Junich: “Quiʼucxtin aqʼuimpʼacxacaʼ lacatsʼunin chai acmapalhnikʼoyan chux”. 27 Pus ju anuʼ ucxtin mapainilh ju anuʼ ixlapanac chai xacanilh ju ixʼalhiʼaninti chai junilh ni laich caʼanchokolh laʼixchakaʼ. 28 Para ju yuchi acsni taxtulh lana tʼalapakxtoklh apumatam ju vachuʼ ixlapanac ixjunita ju kʼai ucxtin. Chai ju yuchi ixlhiʼani ixtʼaxalapanac tam cientos oro tumin. Pus lana chʼapalh chai tsuculh pixtupalhitni. Juni: “Aqʼuixtʼaknin ju qʼuilhipʼini”. 29 Pus ju acsnich ju ixtʼaxalapanac taʼaktsokotanilh vanin laʼixchʼajaʼ chai tapaininilh. Junich: “Aqʼuimpʼacxacaʼ lacatsʼunin chai acmapalhnikʼoyan chux”. 30 Para ju yuchi jantu ixpacxamputun. Alai alh chivimakʼanaʼ chai lhinaulh ixtʼalhnuca tus camapalach ixʼalhiʼaninti. 31 Pus ju ixtʼaxalapanacni talaktsʼilh tuchi ixnavican chai lana na taʼamakʼaninilh. Pus taʼalh juninin ju ixʼucxtinʼan tachi chun ju ixtalaktsʼinta. 32 Pus ju acsnich ju ixʼucxtin tʼasanilh chai junilh: “Tis va yuchach ji lapanac ni na va kʼai unitʼa. Tachi chun ju anuʼ ju xaqʼuilhipʼini icxacakʼo acsni qʼuintʼapʼainininch. 33 Ja jantu vachuʼ ixlhijun ni ixʼamapʼainitʼi ju mintʼaxalapanac tachi ju icmapainin ju uxintʼi ju quitʼin”. 34 Pus ju acsnich ju ixʼucxtin slivasalh na talhkʼamalh. Chai makʼaxtaknilh ju lapanacni ju tamamakʼalhkʼajni tus acsni jantu mapalhkʼojui ju ixʼalhiʼaninti. 35 Chai ju Jesús tailhiʼalh ixchivinti. Alacjuni ju lapanacni: ―Pus chunchach vachuʼ ju uxijnan. Ju quimpai ju vilhcha lactʼiyan vana va chunch catanaviyan ju uxijnan ni jantu amacʼacxaniyaʼ ixlhichux miʼalhunutʼan ju tam milhilakʼau ni tuʼuʼ catanaviniyan.
1 Pus ju Jesús acsni nonkʼo junima chivinti pus taxtulh ju xaʼestado Galilea. Alh ju xaʼestado Judea lhimakʼantacutni ju kʼai xcan Jordán. 2 Chai na lhu lapanacni tachʼakʼokʼalh chai ju Jesús palai anavicha ju takʼankʼanin. 3 Chai vachuʼ talakchincha ju aliʼin fariseonin. Va ixtapuxconiputun ixtalakʼalhin chai yuchi chani talhisacmilh: ―Ja lhijun ju lhamapʼaksin ni calhimacaulh ju ixʼamachakaʼ tam lapanac va ixlacaʼatalh tuʼuʼ lacatsʼunin ju jantu kʼox lhiulai. 4 Chai ju Jesús chani akʼalhtailh: ―Ja va jantu laktsʼintʼatʼit laʼixchivinti Dios ju tsʼokcanta junta najun ni yuchi ju Dios ju anavilh ju pʼulhnan lapanacni. Chai navilh pumatam tsʼalh chai pumatam atsiʼ. 5 Chai ju Jesús vachuʼ alacjuni ni alacatam laʼixchivinti Dios ju tsʼokcanta najun ni yuchi calhimaconach ju tam lapanac ju ixpai chai ixnati chai catʼatsucuyach ju ixʼamachakaʼ. Chai ju anuʼ ixpumatʼuiʼan tachi ju va pumatam catajunaʼ. 6 Chai tailhiʼalh ixchivinti ju Jesús. Alacjuni: ―Pus jantuch vana pumatʼui lapanacni tajunita. Alai tachi va pumatam lapanac tajunita. Pus ju malakxtokta ju Dios jantu catitalaclhvaklh ju lapanacni. 7 Pus ju acsnich chani tajuni ju fariseonin: ―Pus ni chunch ju lhilhcata ju Dios tajuch ni va naulh ju Moisés ni caxtaknicalh pumatam chakoʼulh lakatam alhiqui ju pulamacau chai camacaulh. 8 Chai ju Jesús alacjuni: ―Va ixlacata ni na pʼas ju miʼalhunutʼan yuchi lhinaulh ju Moisés ni laich amacʼaʼuntʼit ju miʼamachakaʼan. Para ju laʼixputaiʼulacan ju lacamunutpaʼ jantu chun ixjunita. 9 Chai iclajunau ni va acsnich ju lai macʼonatʼit ju miʼamachakaʼan ni va tʼatʼajun apumatam jokʼat. Para ni va kʼaya macʼonatʼit ju miʼamachakaʼan chai tʼatsʼucʼuchʼokʼoyaʼitʼit apumatam pus alactuʼunti ju naviyatʼit. Chai va tichi chavaich ju catʼatsucuchokolh ju va maconcanta vachuʼ alactuʼununch. 10 Pus ju acsnich ju ixʼamamakaʼui tajuni: ―Pus ni chunchach lhiʼucxʼanta ixlacata ju jokʼat chai ixʼamachakaʼ pus ca palai kʼox ni jantu tavanan catamakʼaxtoklh ju jokʼat. 11 Para ju Jesús alacjuni: ―Para jantu si lai catitamuctaxtulh tachi ju xanonatʼit. Va yuʼunch ju axtaknita ixtachaputʼan ju Dios ni lai catamuctaxtulh. 12 Pus alin lapanacni ju takʼalhinita ixlacatunaʼan tus laʼixpulakʼauʼan chai yuchi jantu lai catalhitamakʼaxtʼokʼaʼ. Chai alin lapanacni ju alakʼalhinita ixlacatunaʼan ixtʼalapanac ni jantu lai catitamakʼaxtoklh. Chai alin lapanacni ju va isʼakstuʼan tanajun ni jantu catamakʼaxtʼokʼaʼ ni va jantu talacasqʼuin ni tuʼuʼ caʼasastuclh acsni taʼajuni ju lapanacni ixlacata ju Jesús. Pus ju laich camuctaxtulh ju chunch pus chach navi. 13 Ju acsnich alhiminicalh ju Jesús ju askʼatʼan ni caʼamokslanilh ixmacaʼ laʼixlacatunaʼan chai catapaininilh ju Dios ixlacataʼan ni laich kʼox catatsucuyaʼ. Para ju ixʼamamakaʼui ju Jesús taʼalackʼaima ju ixtalhichaʼan isʼaskʼatʼan. 14 Para ju Jesús alacjuni: ―Amacʼaʼuntʼit ju askʼatʼan. Chach quintalakmilh. Jantu asaspʼitʼit ni quintalhilaksich ju yuʼunch. Chai va tichi chavaich ju aquilhilaksiyaʼ tachi ju quintalhilaksi ju ani tayanalh askʼatʼan yuchi ju laich catanuyanta ju lactʼiyan. 15 Pus ju acsnich ju Jesús amokslanilh ixmacaʼ laʼixlacatunaʼan ju askʼatʼan. Astan taxtuchokolh ju anch. 16 Chai chincha pumatam tsʼalh chai chani juni ju Jesús: ―Amamakaʼunuʼ ju uxintʼi na kʼox lapanacʼat. Aqʼuiʼunch. Tamalhch ju kʼoxich ju acnavi ni caʼalilh ju quiʼatsucunti ju conkʼalhiyanta ju lactʼiyan. 17 Chai ju Jesús juni: ―Ju uxintʼi ni naʼun ni va iclapanac pus tajuch ni qʼuiʼunich ni ickʼox. Jantu xamatiʼ ju kʼox cava. Va yuchi ju Dios. Para ni pʼacxampʼutʼun ju miʼatsucunti ju conkʼalhiyanta lactʼiyan pus amuctʼaxtʼutʼi tachi ju najun lacalhamapʼaksin. 18 Chai ju anuʼ tsʼalh juni: ―Tamalhch. Chai ju Jesús juni: ―Jantu amaknitʼi xamatiʼ. Jantu atʼatsʼucʼu ju jantu miʼamachakaʼ. Jantu akʼalhaun. Jantu anauch taʼaklhtamat chivinti ixlacata apumatam. 19 Atʼalhonin ju mimpai chai minatich. Chai amapʼainitʼi ju mintʼalapanac tachi ju va jun miʼakstu ju mapʼainichʼokʼocʼan. 20 Chai ju tsʼalh juni: ―Tachi chun ju ani icmuctaxtukʼota tus quilhitalacatʼicstʼin. Tijuch aliʼ ju quincʼacxni. 21 Chai ju Jesús juni: ―Pus ni vasalh lacʼasqʼuin ni jantu tuʼuʼ camakʼancʼacxniyan ni laich amaklhtʼayananaʼ ju atsucunti ju jonkʼalhita pus aʼinchich. Astʼachich ju miʼalinta chai axtʼakniyaʼich ju quilhpatinin tachi chun ju amakʼaixtʼokʼaʼ. Ju chunch caʼalinach ju mimakʼalit ju lactʼiyan. Chai acsni anavikʼoyaʼ ju chunch pus atʼatʼich. Aqʼuinchʼakʼokʼayaʼich. 22 Para ju anuʼ tsʼalh acsni kʼasmatlh ju ani chivinti lana amakʼaniniʼalh ni na lhu ixʼalin ju ixmakʼalit. 23 Ju acsnich ju Jesús chani alacjuni ju ixʼamamakaʼui: ―Slivasalh ju iclajunau. Na kʼox lhixcai ni lai catanu ju lactʼiyan junta lhinajun ju Dios tam makʼaliʼ. 24 Aktam iclajunchokopalau ni na xcai ni lai catanu lactʼiyan tam makʼaliʼ. Tachi ju tuʼuʼ camello ni jantu lai catitapasalh junta tilhucucu ju macscat pus vana va chun ju tam makʼaliʼ. Ju yuchi jantu lai catiʼalh ju lactʼiyan. 25 Pus ju ixʼamamakaʼui acsni takʼasmatlh ju ani chivinti slivasalh na talhamakʼaninilh. Chai tanaulh: ―Pus tis chavaich ju lai catakʼalhtaxtulh. 26 Para ju Jesús alaktsʼilh chai alacjuni: ―Pus ju va lapanac aktsʼiya palai tuʼuʼ lhiulai ju ixmakʼalit. Palai jantu ixtaxtokni ju Dios. Para ju Dios jantu tuʼuʼ xcai lhiulai. Ju yuchi lai mapaxani ixʼatalacpastʼacʼat tam lapanac. 27 Pus ju acsnich ju Pitaluʼ chani juni ju Jesús: ―Pus ju quijnan icmaconkʼotauch chux quintaxtokni quincʼan chai iclachʼakʼokʼatauch. Ju chavai tijuch ju aclhajayau ju quijnan. 28 Chai ju Jesús juni: ―Pus acsni catasastʼichokoyaʼ chux ju lacamunutpaʼ pus actolaʼ laquimpuʼucxtin ju slivasalh na kʼox cajunaʼ. Quitʼin ju quimalakachatachilh Dios ni lapanac actsucuyaʼ ju ani. Chai ju uxijnan ni quilachʼakʼokʼayauch ju chavai pus ju acsnich vachuʼ atʼolaʼitʼit lacalakacautʼui puʼucxtin. Chai alhiʼunaʼitʼit ju ixquilhmaccautʼuiʼan ju mintʼaʼisraelitanin. 29 Pus va tichi chavaich ju calhimacaulh ju ixchakaʼ u tam ixlakʼau tsʼalh u tam ixlakʼau atsiʼ u tam ixpai u tam ixnati u tam ixʼamachakaʼ u isʼaskʼatʼan u ixlacatʼun va ixlacata ni quinchʼakʼokʼai pus palai lhu caxtaknicanaʼ. Jantu chun tachi ju macaulh ju quilacata. Chai vachuʼ caʼalinaʼ isʼatsucunti ju conkʼalhiyanta ju lactʼiyan. 30 Para ju lactʼiyan caʼalinaʼ lapanacni ju makʼanch xaquintalhilaksi. Para jantu lai actinaulh ni va ixlhiyuchi palai kʼox caʼalhilhiulacalh. Palai jantu ju aliʼin. Chai vachuʼ cataʼalinaʼ lapanacni ju jantucaʼ makʼan xaquintalhilaksi. Para jantu lai actinaulh ni va ixlhiyuchi palai jantu kʼox caʼalhilhiulacalh. Palai kʼox caʼalhiulacalh ju aliʼin.
1 Ju Jesús vachuʼ chani alacjuni ju lapanacni: ―Junta lhinajun ju Dios chunch ju tapasai tachi ju tapasalh laʼisʼatsucunti pumatam lapanac ju ixʼalin ixpuʼuvas. Pus ju yuchi vatsʼisin alh apuxconaʼ ju catapʼuxnilh ju ixʼuvas. 2 Chai acsni atʼatakʼoxilh ju makchʼalhcatnin ni caʼamapalhniyaʼ tachi ju aktsʼiya talhajai ju tamin avilhchan pus amalakachalh laʼixlhichʼalhcat. 3 Pus ju amatʼun taxtuchokolh tachi lakanajatsi hora vatsʼisin chai alaktsʼinchokolh ju aliʼin ju va ixtavilanancha laclhitamau. Matiʼ ixjunita ixlhichʼalhcatʼan. 4 Chai alacjuni: “Apʼitʼit vachuʼ ju uxijnan laquilhichʼalhcat. Chai aclamapalauch tachi ju kʼoxich cava”. Pus ju yuʼunch taʼalh. 5 Chai ju anuʼ amatʼun aktam taxtuchokolh tachi ju kʼatuncuj chai aktam tachi ju lakatʼutu hora atokʼoxanaʼ. Chai vana va chun amalakachalh ju lapanacni laʼixlhichʼalhcat. 6 Chai acsni taxtuchokopa tachi ju lakaquis hora atokʼoxanaʼ pus alhitajuchokopa ju aliʼin ju matiʼ ixjunita ju ixlhichʼalhcatʼan. Chai alacjuni: “Tajuch ni va anich ju vilatʼit ju tontacuj ni jantu tuʼuʼ ju naviyatʼit”. 7 Chai ju yuʼunch tajuni: “Pus jantu xamatiʼ quintaxtaknitan ju lhichʼalhcat”. Pus ju acsnich ju anuʼ amatʼun alacjuni: “Apʼitʼit vachuʼ ju uxijnan laquilhichʼalhcat. Chai aclamapalau tachi ju kʼox cava”. 8 Pus taʼalh. Chai astan acsni tokʼoxalh pus ju amanavin lhichʼalhcat chani junilh ju ixlapanac ju ixʼamapalai ju ixtachʼalhcatnan: “Atʼasaninch ju makchʼalhcatni lapanacni. Amapʼalhtʼich ixʼavilhchanʼan. Apʼutʼaiʼulatʼi ju astan tachaʼalh. Apʼumaclayaʼich ju pʼulhnan xatachaʼan”. 9 Pus ju acsnich tachincha ju ixtachaʼanta ju lakaquis hora atokʼoxanaʼ chai axtaknicalh tachi ju aktsʼiya lhajacan acsni chʼalhcatnancan tam avilhchan. 10 Chai astan acsni tamilh ju pʼulhnan ixtachaʼanta pus ju yuʼunch ixtanajun ni ca palai laklhu camapalhcanaʼ. Para vana va chun axtaknicalh tachi ju aktsʼiya lhajacan ju tamin avilhchan. 11 Pus acsni taʼamaklhtayanalh ixtalhajaʼan pus tatalhkʼamnilh ju anuʼ amanavin lhichʼalhcat. 12 Tajuni: “Ju ani ju astan xatachinacha va tam hora xatachʼalhcatnan para ni vana va chun ju xaʼamapʼalhpʼalai tachi ju xaquilamapalau ju quijnan ju tontacuj xacchʼalhcatnanau chai xaquitanekʼan ju ascʼunuʼ”. 13 Para ju amanavin lhichʼalhcat chani junilh pumatam sia lhiyuʼunchach. “Amigo. Jantu talakʼalhin ju icnaviyan. Ja jantu chun iclalhitʼakʼoxiu ni alhaʼayaʼ tachi ju aktsʼiya lhajacan ju tamin avilhchan. 14 Achʼapʼach ju mintalhaja chai apʼinchich. Vachuʼ chun icmapalhputun ju astan xatachinacha tachi ju xacmapalanch ju uxintʼi. 15 Ja jantu lai acpunavi ju quiʼanuʼ tachi ju iclacasqʼuinch. Pus ju uxintʼi ca va lhacchʼipʼin ju aliʼin ni kʼox xacʼamapalai”. Chunch ju junilh ju amatʼun. 16 Pus vana va chunch cajunaʼ ju lactʼiyan. Caʼalinaʼ lapanacni ju makʼanch quintalhilaksita. Para jantu lai actinaulh ni ixlhiyuchi palai kʼox caʼalhilhiulacanaʼ. Chai caʼalinaʼ lapanacni ju jantucaʼ makʼan quintalhilaksita. Para jantu lai actinaulh ni ixlhiyuchi palai jantu kʼox caʼalhilhiulacanaʼ. Pus tachi chun ju atʼasanilh ju Dios ni laich catatakʼalhtaxtuyaʼ na lacatsʼunin sia yuʼunch ju asacxtucalh ni xalackʼajin catajunaʼ ju anch. 17 Ju Jesús acsni ixʼanta ju xati ju lakʼachakʼan Jerusalén pus na lhu lapanacni ju ixtatʼaʼanta. Para ju Jesús atʼasanilh ixpumacautʼuiʼan ju ixʼamamakaʼui chai akʼailhiʼalh alacatam. Chai chani ju ajuni: 18 ―Alaktsʼintʼit. Ju chavai cachaʼanau ju Jerusalén. Chai ju anch acmakʼaxtakcanaʼ laʼixmacaʼan ju xalackʼajin palijni chai ju yuʼunch ju na talhatalanininta ju milhamapʼaksinʼan. Quitʼin ju quimalakachatachilh Dios ni lapanac actsucuyaʼ ju ani. Chai ju yuʼunch aquintalhinonaʼ quimaknica. 19 Chai ju yuʼunch aquintamakʼaxtʼakʼaʼ laʼixmacaʼan ju jantu quintʼaʼisraelitanin tajunita. Chai ju yuʼunch aquintalhitsʼiʼinaʼ. Chai aquintalakanekmayaʼ. Chai aquintamaquilhtayaʼ. Para ju ixlhilakatʼutu avilhchan aclokʼonchokoyaʼ. 20 Ju acsnich lakchincha ju Jesús ixnatiʼan ju istsʼalan ju Zebedeo. Yuʼunch ju Jacobo chai ju Xivan. Alactʼachaʼalh ju istsʼalan. Chai ju ixnatiʼan taʼaktsokotanilh ju Jesús chai tapaininilh. 21 Chai ju Jesús junich: ―Tijuch ju lacʼasqʼuin. Chai ju yuchi juni: ―Acsni alhinonaʼ ju uxintʼi anauch ni catatavi vachuʼ anch ju ani ixtʼiyunʼan quiʼaskʼatʼan. Ju pumatam catolaʼ lamilhicana chai ju pumatam lamilhimacx. Ju chunch ni cacʼatsacanaʼ ni xalackʼajin tajunita. 22 Para ju Jesús alacjuni: ―Ju uxijnan jantu cʼatsʼayatʼit tuchʼi quilasqʼuiniyau. Ja lai amakʼalhkʼajnanaʼitʼit tachi ju acmakʼalhkʼajnanaʼ ju quitʼin. Pus ju yuʼunch tajuni ni calayach. 23 Chai ju Jesús alacjuni: ―Slivasalh chunch ju amakʼalhkʼajnanaʼitʼit tachi ju acmakʼalhkʼajnanaʼ ju quitʼin. Para jantu quitʼin ju acnonaʼ tichi chavaich ju catolaʼ laquilhicana chai laquilhimacx. Yuʼunch ju catatolaʼ anch ju asacxtuta ju quimpai. 24 Pus ju ixpumacauʼan ixʼamamakaʼui ju Jesús acsni takʼasmatlh tuchi ixtajunita ju Jesús ju ixtʼiyunʼan alakʼavin pus na talhitalhkʼamalh. 25 Para ju Jesús alactʼasanilh chai alacjuni: ―Ju uxijnan cʼatsʼayatʼit ni slivasalh na pʼas talhinajun ju xaʼucxtin lakatamin kʼai lacatʼun. Chai vachuʼ na alhimakchapui ju lapanacni ju salactʼicstʼi ucxtinin ju amalakachacan. 26 Para jantu chun ju alatʼit ju uxijnan. Alai yuchi ju palai xakʼai jumputun lamilhiʼuxijnan tasqʼuini ni calhitalacasu tachi ju tam xalapanac. 28 Chunch ju alatʼit tachi ju iclai ju quitʼin ju quimalakachatachilh Dios ni lapanac actsucuyaʼ ju ani. Ju quitʼin jantiyuʼ iclhiminta ni va aquintachʼalhcatnanilh ju lapanacni. Alai iclhiminta ni laich acʼalacchʼalhcatnaniyaʼ ju lapanacni chai laich acxtʼakʼaʼ ju quiʼatsucunti ixʼamalakxtuca lhu ju lapanacni. 29 Acsni alactʼataxtucha ju Jesús ju lakʼachakʼan Jericó ju ixʼamamakaʼui pus na lhu lapanacni tachʼakʼokʼalh vachuʼ. 30 Chai ixtavilanalh laʼixquilhtuʼ ti ixtʼiyunʼan alakʼachʼixnin. Chai ju yuʼunch acsni takʼasmatlich ni antachalh ju Jesús pus lana pʼas tachivinilh. Tajuni: ―Jesús. Istsʼalhʼat ju kʼai ucxtin David. Aquilaʼaktaijuch lamapainin. 31 Para ju lapanacni ju ixtatʼaminta ju Jesús ju lacati takʼailh. Tajunilh ni va sek catatavi. Para va apalai pʼas ixtalacchivinin ju yuʼunch. Tajuni ju Jesús: ―Jesús. Istsʼalhʼat ju kʼai ucxtin David. Aquilaʼaktaijuch lamapainin. 32 Pus ju acsnich ju Jesús taya chai alactʼasanilh ju anuʼ ixtʼiyunʼan alakʼachʼixnin chai alacjuni: ―Tijuch ju lacʼasqʼuinatʼit ju aclanaviniu ju uxijnan. 33 Chai ju yuʼunch tajuni: ―Quiʼucxtin chach icʼalacʼavanau. 34 Pus ju acsnich ju Jesús amapaini ju yuʼunch. Chai alacchʼapanilh ixlakchulhʼan. Pus lana tapuʼalacʼavanalh chai tachʼakʼokʼalh ju Jesús.
1 Vanin ju lakʼachakʼan Jerusalén ixʼalin lakatam lakʼachakʼan ju Betfagé ixjuncan. Chai ju anch ixvi ju akstijun junta na lhu ixlacya ju xaqʼuiu olivos. Pus ju Jesús acsni alactʼachaʼalh ju anch ju ixtalhavat lapanacni amalakachalh ixtʼiyunʼan ixʼamamakaʼui. 2 Chai alacjuni: ―Aʼinchitʼit ju anuʼ tasui lakʼachakʼan. Chai acsni atʼanutʼachitʼit pus alhitʼaʼuyaʼitʼit lakatam xanati puru chʼiyocanta. Chai vachuʼ anch ya ju isʼaskʼatʼa. Axkʼotʼayaʼitʼit chai alhitʼanaʼitʼit. 3 Chai ni xamatiʼ catalhikʼaiputunan va aʼunaʼitʼit ni ma maktasqʼuini ju miʼucxtinʼan chai ma vatsʼalhti camalakachachokotachilh. 4 Pus chunch ju navilh ju Jesús ni lai caʼuctaxtuyaʼ ju chivinti ju xanajun ju makʼaniya lapanac ju ixnajun ixchivinti Dios. Ju yuchi ma chani xanajun: 5 Chani aʼunaʼitʼit ju amachakʼan Jerusalén: “Alaktsʼintʼit. Talakmintan ju miʼucxtinʼan. Ju yuchi jantu makʼaliʼ junita. Va puminta lakatam puru”. Chunch ju ixnajunta ju makʼaniya lapanac. 6 Pus ju ixʼamamakaʼui ju Jesús taʼalh. Chai chunch ju tanavilh tachi ju ixʼajunita ju Jesús. 7 Talhimilh ju xanati puru chai ju saʼaskʼatʼa chai taʼakxchʼamucʼalh ixcutunʼan. Chai lana putocʼalh ju Jesús ju saʼaskʼatʼa. Chai alh. 8 Chai ju ixtamakachʼakʼokʼananta na ilhuʼan ixtajunita. Pus ixtamamalhiʼanta ixpumpuʼan ju lacati junta capuminaʼ ju Jesús. Chai ju aliʼin ixtatʼekʼeʼich ju ixʼacatan qʼuiu chai ixtamamalhiʼanta ju lacati. 9 Chai ju lapanacni ju ixtapʼulanan chai ju ixtakʼaixunun na pʼas ixtalacchivinin. Ixtanajun: ―Chach lakʼayacalh ju ani istsʼalh ju kʼai ucxtin David. Paxcat ju ani minta ju malakachatachilh ju Dios. Chach lakʼayacalh ju Dios ju vilhcha talaclhman. ―Chunch ixtanajun ixtalhavat lapanacni. 10 Chai acsni tanucha ju Jesús ju lakʼachakʼan Jerusalén pus chux ju lapanacni tʼilhi tʼilhi ixtalaich. Chai ixtalaclajuni: ―Tis nuʼ chavaich ju xachin. 11 Chai ju lapanacni ju ixtatʼaʼanta ju Jesús alacjuni: ―Ju ani yuchi ju Jesús ju najun ixchivinti Dios. Yuchi ju amachakaʼ Nazaret laxaʼestado Galilea. 12 Chai astan ju Jesús tanucha lacakʼai ixpujitatʼan ju istʼaʼisraelitanin. Chai atixcoxtukʼo tachi chun ju ixtaʼulata ixlhistʼatʼan chai ju ixtaʼatamonan ju anch. Chai amatistanilh ju ixmixaʼan ju ixmapaxanin tumin chai ju ixputolanʼan ju istastʼai ju lakʼaxkʼavan. 13 Chai alacjuni: ―Ju laʼixchivinti Dios chani ju tsʼokcanta: “Ju quinchakaʼ calhimispacanaʼ ni anch ju tʼachivincan ju Dios”. Chunch ju najun laʼixchivinti Dios. Para ju uxijnan va tachi ixchakaʼ ju akʼalhaunin lhimalacxtʼutʼatʼit. 14 Chai ju anch lacpujitat tachincha ju alakʼachʼixnin chai ju jantu lai ixtaʼalhtanan. Chai ju Jesús palai anavikʼo. 15 Para na tatalhkʼamalh ju xalackʼajin palijni chai ju yuʼunch ju na ixtalhatalanininta ju ixlhamapʼaksinʼan ju istʼaʼisraelitanin acsni talaktsʼilh ju lhamakʼan ju ixnavi ju Jesús chai acsni takʼasmatlh ni na pʼas ixtachivinin ju tsʼalan ju anch lacpujitat chai ixtalakʼayai ju Jesús istsʼalh ju kʼai ucxtin David. 16 Chai tajunilh ju Jesús: ―Ja va jantu kʼasmatʼa tuchi tanajun ju yuʼunch. Chai ju Jesús alacjuni: ―Ickʼasmatʼa. Para ju uxijnan chunch ju layatʼit tachi ju jantu tavanan laktsʼintʼatʼit ixchivinti Dios junta chani juncan ju Dios: Ju uxintʼi lacʼasqʼuin ji Dios ni lakʼayacʼan laʼixchivintiʼan ju askʼatʼan chai ju va tatsʼiquicaʼ. Chai ju yuʼunch talakʼayayan tachi ju lhijun ni alakʼayacʼa ju uxintʼi. 17 Chai acsni nonkʼo ju chunch ju Jesús pus lana alacmacaulh. Taxtulh ju lakʼachakʼan Jerusalén. Alh ju lakʼachakʼan Betania chai anch ju lakacujcha. 18 Chai ju vatsʼisin acsni anchokolh ju Jesús ju lakʼachakʼan Jerusalén pus na chavanilh. 19 Chai laktsʼilh akʼatam higo ju ixya vanin lacati. Pus ju Jesús lakʼalh para jantu tuʼuʼ lhitajunilh xalhiʼut. Va si xaxkʼoi ixʼalinta. Pus chani juni: ―Jantu tavanan lai atʼixtʼakchʼokʼo ju milhiʼut. Pus lana xixlh ju anuʼ higo. 20 Pus ju ixʼamamakaʼui ju Jesús acsni talaktsʼilh na talhamakʼaninilh. Chai tajuni: ―Tas laich va tsʼalhti xalhixix ju higo. 21 Chai ju Jesús alackʼalhtailh. Alacjuni: ―Slivasalh ju iclajunau. Ni vasalh quilalhilaksiyau chai ni jantu va tam tam nonatʼit pus laich anaviyaʼitʼit vachuʼ tachi ju xacʼulhtui ju anuʼ xaqʼuiu higo. Para jantu va yuchi. Vachuʼ lai aʼunitʼit ju ani talhpa: “Akʼostʼich. Apʼinchich lacaʼalama”. Chai ni chunch ju aʼunitʼit pus chunch ju calalh. 22 Pus tachi chun ju asqʼuiniyaʼitʼit ju Dios acsni atʼachʼivininaʼitʼit pus amaklhtʼayananaʼitʼit. Va yuchi ni slivasalh alhilacʼapʼitʼit ju yuchi. 23 Chai astan ju Jesús tanucha lacakʼai ixpujitatʼan ju istʼaʼisraelitanin chai tsuculh amalaniniʼ ju lapanacni. Pus ju acsnich talakmilh ju xalackʼajin palijni chai ju papaninch chai tajuni: ―Tis chavaich ju xajunan ni laich anaviyaʼ ju ani taxtokni. 24 Chai ju Jesús chani alhikʼalhtailh: ―Ju quitʼin vachuʼ aclasacmiyau lakatam chivinti. Chai ni aquilajunau pus ju acsnich vachuʼ aclajunau tichi chavaich ju xaquijuni ni acnaviyaʼ ju ani taxtokni. 25 Pus tis chavaich ju xamalakachayachilh ju Xivan amakpaxanaʼ. Ja yuchi ju Dios u yuʼunch ju lapanacni. Pus ju acsnich ju anuch lapanacni talaclajuni ixlhiʼakstuʼan: ―Pus ni canaju ni Dios ju xamalakachayachilh pus laich aquintajunin tajuch ni jantu xalacaʼiniyau. 26 Chai jantu lai catinaju ni yuʼunch ju lapanacni ju xatamalakachayachilh ni na atalhoniyau ju lapanacni ni ixchuxʼan talhimispai ju Xivan ni ixnajun ixchivinti Dios. 27 Pus yuchi chani talhijuni ju Jesús: ―Jantu iccʼatsayau. Pus ju acsnich ju Jesús alacjuni: ―Pus nin quitʼin jantu actilajuniu tichi chavaich ju xaquijuni ni acnavi tachi chun ju ani taxtokni. 28 Chai ju Jesús vachuʼ alacjuni: ―Tʼas nonatʼit. Ju pumatam lapanac ixʼalin ixtʼiyunʼan istsʼalan. Pus ju yuchi lakʼalh ju xakʼai istsʼalh chai juni: “Quintsʼalh. Apʼinchich ju chavai chʼalhcatnaʼ laquimpuʼuvas”. 29 Para ju anuʼ tsʼalh juni ni jantu catiʼalh. Para astan tamch xapastʼacʼa chai alh. 30 Chai astan ju xapai lakʼalh ju salacatʼicstʼi chai vana va chun ju juni ju yuchi. Chai ju yuchi junilh ju ixpai ni canach. Para jantu alh. 31 Pus aquilajunau. Ju anuʼ ixtʼiyunʼan tsʼalan tis chavaich ju xanavini ixkʼachat ju ixpai. Pus ju xalackʼajin palijni chai ju papanin tajuni: ―Yuchi ju xakʼai. Pus ju acsnich ju Jesús alacjuni: ―Slivasalh ju iclajunau. Ju achʼinin chai ju tʼacunin ju va lacati ixtatʼajun palai lai catatanuyaʼ junta lhinajun ju Dios. Palai jantu ju uxijnan. 32 Iclajunau chunch ni quilachilh ju Xivan amakpaxanaʼ. Chai ju yuchi naulh ta yu laich sok catatsuculh ju lapanacni para jantu xaqʼuiclacʼaʼiyatʼit ju uxijnan. Alai yuʼunch ju talacaʼinilh ju achʼinin chai ju tʼacunin ju va lacati ixtatʼajun. Chai ju uxijnan laktsʼintʼatʼit ni tam xajun isʼatsucuntiʼan para ixlaquilhtu jantu xamacʼonatʼit ju miʼalactuʼuntiʼan ni laich ixlacʼaʼitʼit vachuʼ. 33 Akʼasmatʼit vachuʼ ju ani chivinti ju iclajumputunau. Ixʼalin pumatam lapanac ju ixʼalin ixlacatʼun. Chai ju yuchi chʼanlh ju xaqʼuiu uvas. Chai coralhnu lacakʼex. Chai pokʼajʼula junta camaxtunicanaʼ ju xaxcan uvas. Chai yaulh lakatam chakaʼ ju na putankʼai ni laich capulhistaccalh ju ixpuʼuvas. Chai acsni navikʼolh pus amachʼixtaknilh ju makchʼalhcatnin. Chai ju yuchi alh makat. 34 Chai acsni chaʼalh ju avilhchan ni chalh ju uvas pus ju anuʼ amatʼun amalakachanilh ju ixlapanacni ju anuʼ makchʼalhcatnin ni cataʼalh amaklhtayanin ju xalhiʼut tachi ju ixʼalhitʼatakʼoxitach. 35 Para ju anuch makchʼalhcatnin tachʼapalh ju xalapanacni. Ju pumatam talakanekma. Ju apumatam tamakni. Chai ju apumatam talacatʼalhma. 36 Chai aktam ju amatʼun amalakachachokopa ju aliʼin. Palai ilhuʼan. Para vana va chun ju tatʼalapa. 37 Chai ju ixpuʼaclanch malakachalhch ju istsʼalh. Va ixnajun ni catatalhoniyaʼ ju istsʼalh. 38 Para ju anuch makchʼalhcatnin acsni talaktsʼilh ju istsʼalh ju amatʼun talaclajuni sia yuʼunch: “Yuchach ju ani ju amanavin cajunaʼ acsni caniyaʼ ju ixpai. Atʼatʼitch. Camakniuch chai quiʼanuchʼan cajunaʼ ju ani puʼachʼananti”. 39 Pus tachʼapalh. Tatantamacxtulh lacapuʼuvas. Chai tamaknilh. 40 Chai ju Jesús acsni nonkʼo ju ani chivinti chani ajuni ju xalackʼajin palijni chai ju papanin: ―Tʼas nonatʼit. Acsni caminchokoyaʼ isʼakstu ju amatʼun tas catʼalayach ju anuch makchʼalhcatnin. 41 Chai ju yuʼunch tajuni ju Jesús: ―Pus nin lacatsʼunin jantu catiʼamapaini. Alai caʼamaknikʼoyaʼ chai aliʼin ju caʼamachʼixtaknichokoyaʼ ju anuʼ puʼuvas. Caʼamachʼixtakniyaʼ ju lapanacni ju cataxtakniyaʼ ju xalhiʼut tachi ju caʼalhitʼatakʼoxiyach. 42 Pus ju acsnich ju Jesús alacjuni: ―Ja va jantu tavanan laktsʼintʼatʼit ixchivinti Dios ju tsʼokcanta junta ma chani najun: Ju anuʼ chiux ju tasacmakʼalh ju ixyonin chakaʼ yuchach ju valhch ju chiux ju makʼastumucʼacanta chakaʼ junta tsʼokcanta tuchi cʼatach ju yocanta. Yuchi ju Dios ju navilh ju chunch. Chai acsni iclaktsʼinau pus na kʼai lhamakʼan iclhiulayau. Chun ju najun laʼixchivinti Dios. 43 Chai ju uxijnan ni quilasamakʼantauch tachi ju talalh ju anuʼ akʼexinin pus yuchi jantu lai vana catilhilhinaulh ju Dios lamilhiʼuxijnan. Alai caʼalhijunaʼ ju aliʼin lapanacni ju vasalh catasuyaʼ laʼisʼatsucuntiʼan ni talhilaksi ju Dios. 44 Acsni quintasamakʼan ju lapanacni pus va ixtʼachunch junita tachi acsni pukʼalhkʼoscan ju tuʼuʼ chiux chai tacʼatsanican. Chai acsni icʼaʼulani ju lapanacni ju ixtalakʼalhinʼan pus va ixtʼachunch junita tachi acsni catantʼalhma ju tuʼuʼ kʼai chiux chai jantu tavanan lai kʼostolai. 45 Pus ju xalackʼajin palijni chai ju fariseonin acsni takʼasmatlh ju ani ixchivinti ju Jesús pus lana tamachakxalh ni yuʼunch ju alhichivincanch. 46 Chai lana ixtachʼapaputun. Para va tatalhonilh ju ixtalhavatʼan lapanacni ni ixtalhimispai ju Jesús ju lapanac ju ixnajun ixchivinti Dios.
1 Ju Jesús aktam puxcaulh ta yu laich caʼapumavasalanilh ju lapanacni ju tuchi ixʼamalaniputun. Pus chani alacjuni: 2 ―Junta lhinajun ju Dios lai chunch tapasai tachi ju tapasalh laʼisʼatsucunti pumatam kʼai ucxtin. Ju yuchi ixlhicʼataniputun pumatam istsʼalh ni catamakʼaxtʼokʼaʼ. 3 Pus amalakachalh ixlapanacni ni cataʼalh alactʼasaninin ju ixʼamacʼatsanicanta ni caʼalinaʼ ju lacvaiti. Para jantu xamatiʼ mimputulh. 4 Pus amalakachachokopa ju aliʼin ixlapanacni chai alacjuni: “Aʼinchitʼit ajuninin ju catalacvenach ni ma alin ju vaiti ni iclhinaulh ixmaknica ju quivacax chai ju aliʼ atapacxat ju na ixtalackʼonta. Chai takʼoxikʼotach ju chavai. Ma atʼatʼit makvenin”. Chunch ju xaʼajuni ju ixlapanacni. 5 Pus taʼalh. Para ju lapanacni mas chunch ixʼajuncan jantu tuʼuʼ talhiula. Alai alh pumatam laʼixcuxtu. Apumatam alh astʼanaʼ. 6 Chai ju aliʼin tachʼapalh ju anuʼ alhtanin. Tamamakʼalhkʼajni tus tamakni. 7 Pus ju anuʼ kʼai ucxtin acsni kʼasmatlich ta ixtalai ju anuch lapanacni pus na talhkʼamalh. Lana amalakacha ju ixtaropajni. Amaknikʼo ju anuʼ amakninin. Chai ju laʼixlakʼachakʼanʼan manulh jipi. 8 Chai astan alacjuni ju ixlapanacni: “Takʼoxikʼota ju vaiti para jantu ixlhijun ni lai ixtamilh venin ju pʼulhnan ixʼaquitʼasanican ni va kʼai ixtajunita. 9 Palai kʼox cajunaʼ ni va apʼitʼit lacatijixni junta tapumin ju lapanacni ju lakʼachakʼan chai akʼailhitʼanaʼitʼit ju lacvaiti va tichi alhitʼaʼuyaʼitʼit”. 10 Pus tataxtulh ju anuʼ xalapanacni. Taʼalhtanatsuculh ju lacatijixni. Chai tachi chun ju talhitajulh takʼailhiminkʼolh. Chux ju lackʼoxin lapanacni chai ju kʼai tajunita. Chai ju chunch na aktsamcalh ju anuʼ lacvaiti. 11 Pus ju acsnich tanucha ju kʼai ucxtin. Va ixlaktsʼimputun ju makvenin. Pus laktsʼilh pumatam lapanac ju jantu ixlhimalakchʼinin ixlacata ju lacvaiti. Jantu ixlakchʼita ju pumpuʼ ju ixtaknicanta. 12 Pus juni: “Quiʼamigo. Tʼas xalhitʼanch ju ani ni jantu lhimalakchʼininta ixlacata ju lacvaiti”. Pus ju yuchi jantu tuʼuʼ lai kʼalhtailh. 13 Pus ju acsnich ju kʼai ucxtin ajunich ju ixlapanacni ju ixtaxtʼakʼa vaiti: “Achʼanchʼitʼit chai amakchʼitʼit chai amacʼapʼitʼit junta putsʼis lhimakspaʼ. Ju anch lackʼalhuncan chai laclamatantsacacan ju istatsalatʼan ni na tamakʼalhkʼajnan”. 14 Pus ju acsnich ju Jesús tailhiʼalh ixchivinti. Alacjuni ju lapanacni: ―Na lhu atʼasanicanta ni cataʼalh ju lactʼiyan. Para na lacatsʼunin ju vasalh catachaʼanaʼ. 15 Pus ju acsnich taʼalh ju fariseonin. Tapastaclh ta yu laich catapuxcolakxtunilh ju tuʼuʼ chivinti ju Jesús ni laich catapumucʼanilh ixtalakʼalhin. 16 Pus ni tanaulh ta yu catalayaʼ pus tamalakachalh ju aliʼin ixʼamamakaʼui ju fariseonin. Alactʼaʼalh ju aliʼin ju ixtachʼakʼokʼai ju gobernador Herodes. Talakʼalh ju Jesús chai tajuni: ―Amamakaʼunuʼ iccʼatsayau ni naʼun ju stavasalanti ju uxintʼi. Chai sok masui ju ixti ju Dios. Chai jantu xamatiʼ tʼalhoni ni vaklhtam chun ju alaktsʼin ju lapanacni. 17 Pus aquilajuniuch. Tʼas naʼunch ju uxintʼi. Ja lhijun ni acʼamapalanau laʼixmacni ju xaʼucxtin ju romanonin u jantu. 18 Para ju Jesús lana amachakxanilh ni va ixtaʼokxchokʼoputun. Chai chani alacjuni: ―Tajuch ni va quilapuxconiyau ju talakʼalhin. Ju uxijnan va acxpʼutʼiyununatʼit. 19 Aquilamasuniu ju tumin ju lhiʼamapʼalananatʼit. Pus ju yuʼunch tamalacasunilh ju anuʼ sentau. 20 Pus ju Jesús acsni laktsʼilh alacsacmi: ―Tis ixʼucxpuʼ ju ani okslai. Tis ixtapakaʼut ju tsʼokcanta ju ani. 21 Pus ju yuʼunch tajuni ni ixʼanuch ju César. Yuchi ju xakʼai tucan ju ixlhinonkʼojui chux ju xalacatʼun Roma. Pus ju acsnich ju Jesús alacjuni: ―Pus axtʼaknitʼit ju César ju ixʼanuch. Chai axtʼaknitʼit ju Dios ju ixʼanuch Dios. 22 Pus ju yuʼunch acsni takʼasmatlh ju ixchivinti ju Jesús na talhamakʼaninilh ni na kʼox xalhakʼalhtayanan. Pus tamacaulich chai taʼalh. 23 Pus vana ju acs avilhchan talakchimpalhcha ju saduceonin junta ixvi ju Jesús. Pus ju yuʼunch tanajun ni jantu lai lokʼonchokocan acsni va nicanch. Pus yuchi chani talhijuni ju Jesús: 24 ―Amamakaʼunuʼ ju Moisés naulh ni canilh tam lapanac chai camacontilalh ixʼamachakaʼ para ni jantu catʼamacontilalh tam isʼaskʼatʼa pus ju ispʼisekʼe ju anuʼ xani ma catʼatsucuchokolh ju ixʼamachakaʼ ixjunita ju xani. Chai acsni caʼalilh tam istsʼalh pus ju yuchi ma casacnilh ixtapakaʼut ju anuʼ xani. 25 Pus sia lhiquijnan ixʼalin pumatujun lhiʼalakʼavin. Chai ju xakʼai tamakʼaxtoklich para astan nilh. Chai ni jantu tuʼuʼ macontilalh isʼaskʼatʼa pus maconilh ju ispʼisekʼe ju ixʼamachakaʼ ixjunita. Para vachuʼ nipa chai vana jantu tuʼuʼ macontilalh isʼaskʼatʼa. 26 Pus vana va chun tapasapa ju ixlhipumatʼuich chai ju ixlhipumatʼutuch. Tus talaktsa ixlhipumatujunʼan lhiʼalakʼavin. 27 Chai astanch pus nilh vachuʼ ju anuʼ chakoʼulh. 28 Pus acsni catalokʼonchokoyanta ju tanita pus tis chavaich ju ixpumatujunʼan lhiʼalakʼavin ju lai canaulh ni yuchi ixʼamachakach junita ni ixpumatujunʼan atʼatsucukʼo ju anuʼ chakoʼulh. 29 Chai ju Jesús alacjuni: ―Ju uxijnan jantu sok alacpʼastʼacnanatʼit. Ju uxijnan jantu machʼakxayatʼit ni na lacalhu ju tsʼokcanta laʼixchivinti Dios junta najun ni calokʼonchokoyaʼ ju tanita. Vachuʼ jantu cʼatsʼayatʼit tuchi lai navi ju Dios. 30 Pus acsni calokʼonchokoyaʼ jantu catamakʼaxtokcanaʼ nin calaʼicalh. Va ixtʼachunch catatsucuyaʼ tachi ju anquilhnin ju tavilanancha lactʼiyan. 31 Chai ni va asacmininatʼit ni laich catalokʼonchokoyaʼ ju tanita pus ja lana jantu pʼastʼacʼatʼit tuchi naulh ju Dios ixlacata ju tanita ni catalokʼonchokoyaʼ. Pus ju yuchi ma chani naulh: 32 Ju yuchi ma isDiosʼan junita ju Abraham chai ju Isaac chai ju Jacob. Chunch ma naulh ju Dios. Pus ju yuchi ni isDios junita ju lapanacni ju tatʼajun pus nomputun ni tatʼajun ju anuch lapanacni mas noncan ni makʼanch tanita. 33 Pus ixtalhavat lapanacni acsni takʼasmatli ixchivinti ju Jesús slivasalh na talhamakʼaninilh ju ixʼatalaninti ni na kʼox xachivinin. 34 Ju saduceonin ni jantu lai tuʼuʼ talhikʼalhtailh ju Jesús pus tacʼatsa ju fariseonin. Pus a yuʼunch talakmimpa ju Jesús. 35 Chai sia yuʼunch ixʼalin pumatam ju na ixlhatalanininta ju ixlhamapʼaksinʼan ju istʼaʼisraelitanin. Chai ju yuchi sacmilh ju Jesús lakatam chivinti. Va ixpupuxconiputun ixtalakʼalhin. Chai chani ju junilh: 36 ―Amamakaʼunuʼ tachi chun ju ixlhamapʼaksin ju Moisés tas malhch ju palai tasqʼuini ni canavicalh. 37 Chai ju Jesús juni: ―Amapʼainitʼich ju miʼucxtin Dios laʼixlhichux miʼalhunut chai laʼixlhichux ju miʼatsucunti chai laʼixlhichux ju mintacʼatsan. 38 Yuchach ju lhamapʼaksin ju palai tasqʼuini ni canavicalh. 39 Chai ju ixlhilakatʼui va ixtʼachunch junita. Ju yuchi najun ni amapʼainitʼi ju vanin alactʼavilhtʼi tachi ju va jun miʼakstu ju mapʼainichʼokʼocʼan. 40 Pus tachi chun ju tsʼoklh ju Moisés chai tachi chun ju tatsʼoklh ju makʼaniya ixlapanacni Dios vaklhtam chun tanomputun. Tanajun ta yu acpumapainilh ju Dios chai ta yu acpumapaini ju quintʼalapanac. 41 Acsni ixtavilanalhcaʼ ju fariseonin pus ju Jesús alacsacmi: 42 ―Tʼas nonatʼit ju uxijnan. Tis istsʼalh lhiulayatʼit ju Cristo ju ixnoncan camalakachatachilh ju Dios. Chai ju yuʼunch tajuni: ―Pus istsʼalh ju kʼai ucxtin David. 43 Pus ju acsnich ju Jesús asacmichokolh. Alacjuni: ―Pus ju David yuchi ju Spiritu Santu ju mapastʼacʼani ni lhixakʼala ixʼucxtin ju Cristo. Pus tʼas lhimachʼakxayatʼit ni lai chunch lalh. Pus ju yuchi ju David ma chani naulh: 44 Ju ucxtin Dios junilh ju quiʼucxtin ni vanin catavi tus acsni catʼalalhajayaʼ ju ixtʼalaxcai. Chunch ma naulh ju David. 45 Chai ni isʼakstu ju naulh ju David ni ixʼucxtin junita pus ju chunch va nomputun ni jantu va istsʼalh junita. 46 Pus ju acsnich jantu lai xamatiʼ tuʼuʼ ixlhikʼalhtaji. Chai tus acsnich avilhchan jantu lana xamatiʼ isacmiputun tuʼuʼ ju Jesús.
1 Pus ju acsnich ju Jesús axakʼala ju ixtalhavat lapanacni chai ju ixʼamamakaʼui. Chai chani ajuni: 2 ―Ju fariseonin chai ju lapanacni ju na talhatalanininta ju milhamapʼaksinʼan tanajun ni va yuʼunch ju lai tamavasalai ixlhamapʼaksin ju Moisés. 3 Pus aqʼuiclacʼaʼitʼit tachi chun ju tajunan. Para tun tʼinavitʼit tachi ju tanavi ju yuʼunch. Pus ju yuʼunch sok taʼamalaninin para jantu tamuctaxtui ju taʼamalaninin. 4 Pus ju yuʼunch na talalhavata ju ixlhamapʼaksin ju Moisés tus chunch junita tachi ju tuʼuʼ tacʼucʼat ju na tsʼinqʼui. Ju jantu lai lana malhtanacan. Chai ju yuʼunch chunch ju tamucʼanita ju lapanacni para isʼakstuʼan nin lacatsʼunin jantu tamuctaxtui. 5 Pus ju yuʼunch acsni tanavi tuʼuʼ pus yuchi talhinavi ni laich catalaktsʼinaʼ ju lapanacni chai catanaulh ni slivasalh tamuctaxtui laʼixlhamapʼaksin ju Dios. Pus palai akxakʼai tanavi ju pumpuʼ ju tachʼimucʼai laʼismuntsanʼan chai laʼixmacaʼan junta tamakʼai lacatsʼunin ixchivinti Dios ju tsʼokcanta. Chai palai lhman tanavi ju islistonʼan ju taquilhtumucʼai laʼixtuchʼitʼan. Palai jantu na chun talai ju aliʼin quintʼalapanacniʼan. 6 Chai na takʼachani ju putolan lacapuvai chai lacpujitat junta tatolai ju xalackʼajin. 7 Chai na talacasqʼuin ni caxakʼalacalh laclhitamau tachi tam xakʼai chai caʼajunicalh ni amamakaʼunin tajunita. 8 Para ju uxijnan tun alacʼasqʼuintʼit ni aʼuncʼantʼit amamakaʼunuʼ ni va pumatam ju miʼamamakaʼunuʼan. Va quitʼin. Chai minchuxʼan ju uxijnan va lhiʼalakʼavin untʼatʼit. 9 Chai jantu alhixakʼalatʼit mimpaiʼan tam xakʼai ju ani lacamunutpaʼ ni va pumatam mimpaiʼan. Yuchi ju Dios ju vilhcha lactʼiyan. 10 Chai tun tʼilakʼaʼitʼit ni xamatiʼ catalhilaksiyan ni va uxijnan ju cataquiclacaʼiyan. Jantu chun alatʼit ni va pumatam ju lhinajun. Va quitʼin. 11 Chai ju lamilhiʼuxijnan yuchach ju xakʼai ju achʼalhcatnani ju aliʼin. 12 Pus va tichi chavaich ju calakʼayachokocalh isʼakstu camalacatʼicstʼicanaʼ. Para va tichi chavaich ju va lacatʼicstʼi cacʼatsa pus yuchi ju calakʼayacanaʼ. 13 Painiʼitnich ju uxijnan ji lapanacni ju na lhatʼalaninintʼatʼit ju milhamapʼaksinʼan ju israelitanin untʼatʼit chai ju uxijnan ju fariseonin untʼatʼit. Ju uxijnan na va acxpʼutʼiyununatʼit. Pus ju uxijnan apʼusastʼucʼatʼit lamilhamapʼaksinʼan ju lapanacni ju tatanuputun ju lactʼiyan junta lhinajun ju Dios. Pus ju uxijnan jantu tʼanupʼutʼunatʼit chai jantu alacʼasqʼuiniyatʼit ni catatanu ju tatanuputunch. 14 Painiʼitnich ju uxijnan ji lapanacni ju na lhatʼalaninintʼatʼit ju milhamapʼaksinʼan ju israelitanin untʼatʼit chai ju uxijnan ju fariseonin untʼatʼit. Ju uxijnan na va acxpʼutʼiyununatʼit. Pus ju uxijnan alactʼaiʼiniyatʼit ju ixlacchakaʼan ju chakolun ju animacontilacanta. Chai astan lapʼalatʼit tachi ju na va kʼox panicni ju tʼachʼivinatʼit ju Dios ni lai apʼuʼokxchʼokʼoyaʼitʼit ju lapanacni ni catanaulh ni na tʼalhoniyatʼit ju Dios. Pus ixlhiyuchi palai kʼai cajunaʼ ju mimakʼalhkʼajnatʼan. Palai jantu ju aliʼin lapanacni. 15 Painiʼitnich ju uxijnan ji lapanacni ju na lhatʼalaninintʼatʼit ju milhamapʼaksinʼan ju israelitanin untʼatʼit chai ju uxijnan ju fariseonin untʼatʼit. Ju uxijnan na va acxpʼutʼiyununatʼit. Slivasalh malacʼaʼinipʼutʼunatʼit mas anicʼach va pumatam ju miʼatalanintiʼan. Chai acsni malacʼaʼiniyatʼit pus aktʼaiʼuyatʼit ni palaich na caʼalactuʼunulh tus slivasalh na takʼalhinita ju isʼatsucunti. Chai palai lhijun ni camamakʼalhkʼajnicalh ju yuchi ju lacajipi. Palai jantu na chun ju uxijnan. 16 Painiʼitnich ju uxijnan. Chunch untʼatʼit tachi ju tam xamatiʼ ju apʼulanan para va alakʼachʼix junita. Pus ju uxijnan nonatʼit ni jantu tuʼuʼ nomputun acsni lhipastaccan ju lacpujitat ju ixpumavasalaca tuʼuʼ chivinti. Para va tichi chavaich ju calhipastʼacʼaʼ ju xaʼoro ju alin lacpujitat ni capumavasalaputunaʼ ju ixchivinti pus ma tapʼastu camuctaxtuyaʼ ixchivinti. 17 Ju uxijnan na tontojni untʼatʼit. Va alakʼachʼixnin untʼatʼit. Jantiyuʼ ju oro ju palai tuʼuʼ junita. Alai yuchi ju pujitat ju palai tuʼuʼ junita ni ixchakaʼ Dios junita. Chai ixlhiyuchi vachuʼ ixʼanuʼ Dios junita ju oro ju tanun ju anch. 18 Chai vachuʼ nonatʼit ni jantu tuʼuʼ nomputun acsni xamatiʼ lhipastʼacʼa junta makninican ju Dios ju tuʼuʼ atapacxat va ixpumavasalaca ju ixchivinti. Para va tichi chavaich ju calhipastʼacʼaʼ ju anuʼ atapacxat ju mokslacanta anch pus ma tapʼastu camuctaxtuyaʼ ju ixchivinti. 19 Na tontojni untʼatʼit. Va alakʼachʼixnin untʼatʼit. Jantiyuʼ ju atapacxat ju mokslacanta anch ju palai tuʼuʼ junita. Alai anch junta mokslacanta. Yuchach ju palai tuʼuʼ junita. Pus tachi chun ju mokslacanta anch ixʼanuʼ Dios junita va ixlacaʼatalh ni okslai ju anch. 20 Pus va tichi chavaich ju lhipastʼacʼa junta makninican ju Dios ju atapacxat pus tapʼastu lhipastʼacʼa vachuʼ tachi chun ju okslai laʼixʼucxni. 21 Chai va tichi chavaich ju lhipastʼacʼa ju pujitat pus tapʼastu lhipastʼacʼa vachuʼ ju Dios ju tʼajun ju anch. 22 Chai ju lhipastʼacʼa ju lactʼiyan va ixpumavasalaca ju ixchivinti pus tapʼastu lhipastʼacʼa ju Dios ni yuchach ju lhinajun ju anch. 23 Ju Jesús tailhiʼalh ju ixchivinti chai naulh: ―Painiʼitnich ju uxijnan ji lapanacni ju na lhatʼalaninintʼatʼit ju milhamapʼaksinʼan ju israelitanin untʼatʼit chai ju uxijnan ju fariseonin untʼatʼit. Ju uxijnan na va acxpʼutʼiyununatʼit. Ju uxijnan vasalh muctʼaxtʼuyatʼit ju lhamapʼaksin acsni xtʼakniyatʼit ju palijni lactsʼunin ju miʼalhmujinuʼan ju chʼantʼatʼit chai lactsʼunin ju miʼanisʼan chai lactsʼunin ju mincominoʼan ju chʼantʼatʼit. Para jantu sok ju tsʼucʼuyatʼit. Jantu aktʼaiʼuyatʼit xamatiʼ lacaʼamapaininti. Chai jantu lhilacʼapʼinatʼit ju Dios. Jantu chun ju layatʼit mas yuchi ju palai tasqʼuini ni anavitʼit tachi chun ju najun laʼixlhamapʼaksin ju Moisés mas vachuʼ atʼailhipʼitʼit ixtaknica ju lactsʼunin ju tuʼuʼ achʼitin. 24 Ju uxijnan chunch untʼatʼit tachi tam xamatiʼ ju apʼulanan para va alakʼachʼix junita. Ju uxijnan slivasalh muctʼaxtʼupʼutʼunatʼit ju lhamapʼaksin ju palai jantu tuʼuʼ lhitapalai. Para ju lhamapʼaksin ju na tasqʼuini ni anavitʼit alai jantu naviyatʼit cuenta. 25 Painiʼitnich ju uxijnan ju na lhatʼalaninintʼatʼit ju milhamapʼaksinʼan ju israelitanin untʼatʼit chai ju uxijnan ju fariseonin untʼatʼit. Ju uxijnan va acxpʼutʼiyununatʼit. Ju uxijnan jantu vasalh lackʼoxin lapanacni untʼatʼit. Va lhitʼalacʼasuyatʼit tachi ju na kʼox lapanacni untʼatʼit para ju lamiʼalhunutʼan va pʼastʼactʼonatʼit ju miʼakʼalhajuntiʼan. Chai va lhimucʼuntʼonatʼit ju miʼalhacchaʼantiʼan. 26 Ju uxijnan ji fariseonin va alakʼachʼixnin untʼatʼit. Pʼulhnan salaka atsʼucʼutʼit. Jantu vana alackʼalhaʼutʼit tuʼuʼ u alhacchʼipʼitʼit tuʼuʼ. Chai ju chunch vasalh ni salaka cajunaʼ ju miʼatsucuntiʼan. 27 Painiʼitnich ju uxijnan ju na lhatʼalaninintʼatʼit ju milhamapʼaksinʼan ju israelitanin untʼatʼit chai ju uxijnan ju fariseonin untʼatʼit. Ju uxijnan va acxpʼutʼiyununatʼit. Ju uxijnan chunch untʼatʼit tachi ju tuʼuʼ panteon ju na xnapapa lakʼoxicanta. Ju laʼixmacan islivasalh na cʼusich tasui. Para laʼixpulacni na lhuch tanun ju xapʼuchʼin alucutni chai na lhquiliqui. 28 Pus vana va chun ju uxijnan. Na soknicʼa ju lhitʼalacʼasuniyatʼit ju mintʼalapanacniʼan para ju lamiʼalhunutʼan na aktsamanta ju miʼaʼokxchokʼontiʼan chai aliʼ miʼalactuʼuntiʼan. 29 Painiʼitnich ju uxijnan ju na lhatʼalaninintʼatʼit ju milhamapʼaksinʼan ju israelitanin untʼatʼit chai ju uxijnan ju fariseonin untʼatʼit. Ju uxijnan na va acxpʼutʼiyununatʼit. Ju uxijnan naviyatʼit ju ixpanteonʼan ju makʼaniya lapanacni ju ixtanajun ixchivinti Dios. Chai na maxantʼilayatʼit ju ixpanteonʼan ju anuʼ soknicʼa lapanacni ju makʼanch ixtatʼajun. 30 Chai nonatʼit ni laich acs cava istsʼucʼuchitʼit acsni ixtatʼajun ju makʼaniya milacpaʼitniʼan pus jantu ixmaktʼanutʼit ju ixʼamaknicaʼan ju ixlapanacni Dios. 31 Pus ni nonatʼit ni mimpaiʼan ixtajunita pus va nomputun ni vana va chun ju miʼalhunutʼan tachi ju yuʼunch ju tamaknilh ju lapanacni ju ixtanajun ixchivinti Dios. 32 Pus alaktsʼamatʼit ju uxijnan ixtalakʼalhinʼan ju makʼaniya milacpaʼitniʼan. 33 Ju uxijnan chunch untʼatʼit tachi ju tuʼuʼ lu ju makni ju tam lapanac. Ju uxijnan amalaniyatʼit ju lapanacni ju chivinti ju jantu soknicʼa. Chai ni talacaʼiniyan pus cataʼanaʼ junta jonkʼalhita makʼalhkʼajnat. Chai ju uxijnan vachuʼ jantu lai atʼitʼakʼalhtʼaxtʼutʼit lacamakʼalhkʼajnat ju jonkʼalhita. 34 Pus ju quitʼin aclamalakachanitachiu ju lapanacni ju tanajun ixchivinti Dios chai ju lapanacni ju na taʼacʼatsananta chai ju lapanacni ju na lai taʼamalaninin ixchivinti Dios. Pus ju aliʼin sia yuʼunch amakniyaʼitʼit chai amaqʼuilhtʼayaʼitʼit lacacurus. Ju aliʼin alakʼanekmayaʼitʼit lamilacpujitatʼan chai achʼakʼokʼaxmayaʼitʼit acsni cataʼatsʼalhniyan ju lakatamin lakʼachakʼan. 35 Pus ju chunch caʼalinach ju mintalakʼalhinʼan ju uxijnan ixlacata ixʼacʼalhniʼan tachi chun ju lackʼoxin lapanacni ju amaknicalh tus acsni maknicanchalh ju Abel tus acsni maknicanchalh ju Zacarías istsʼalh ju Berequías. Pus ju Abel na soknicʼa lapanac ixjunita chai yuchi ju pʼulhnan tucan maknicalh. Chai ju Zacarías xaʼastan va tachi chun ju lhitsʼokcanta laʼixchivinti Dios. Ju yuchi maknicalh laʼixputsin pujitat junta ixtʼalakxtokya junta ixmaknican ju atapacxat ju ixlhikʼailaktsʼincan ju Dios. 36 Slivasalh ju iclajunau. Tachi chun ju ani taxtokni si yuʼ ju alhimakʼalhkʼajnanaʼitʼit ju uxijnan ju chavai tʼonatʼit. 37 Ji amachakʼan Jerusalén. Ju uxijnan makniyatʼit ju lapanacni ju tajunan ixchivinti Dios chai lacʼatʼalhmatʼit ju tamalakachanichin ju Dios. Na paklhu xaclanaviputunau ju uxijnan tachi ju navi isʼaskʼatʼan ju tuʼuʼ chilaʼ acsni amakʼatai laʼixpakʼachu ni laich caʼalhistʼacʼaʼ. Vachuʼ xaclamakʼaixtokputunau ju uxijnan tachi ju quiʼaskʼatʼan ni laich xaclalhistacvi vachuʼ. Para ju uxijnan jantu xalacʼasqʼuinatʼit. 38 Pus ju chavai ju Dios macoʼulata ju milakʼachakʼan. 39 Chai iclajunau ni jantu lai aquintilalaktsʼinchoko ju chavai. Va acsni ju aquilalaktsʼinchokoyau acsni cachinaʼ ju avilhchan ni acminchokoyaʼ chai chani aquilajunau: “Paxcat ju ani minta laʼixtapakaʼut ju Dios”.
1 Pus ju Jesús taxtulh ju lacpujitat. Chai acsni ixʼamputun ju lacati pus ju ixʼamamakaʼui talakmilh chai tamalacasunilh ju kʼai pujitat ni na cʼus ixjunita. 2 Para ju Jesús ajunich: ―Alaktsʼintʼit ju ani ya kʼexi chakaʼ. Slivasalh ju iclajunau. Jantu tuʼuʼ catilaʼucxtavi ju chiux ju ixtʼachiux. Si calakʼalhikʼocanaʼ. 3 Astan ju Jesús chai ixʼamamakaʼui taʼalh ju xaʼakstijun junta ixlacya ju xaqʼuiu olivos. Chai acsni tolhcha ju Jesús pus vanin talakchilh ju ixʼamamakaʼui junta va isʼakstuʼan laich catalacchivinilh. Chai tajuni ju Jesús: ―Aquilajuniuch. Tas vananch ju catapasayaʼ tachi ju xanaʼun. Chai tijuch ju catapasayaʼ ju lai acpucʼatsayau ni vanin atʼampʼutʼunaʼ chai caʼaclayaʼ ju lacamunutpaʼ. 4 Pus ju acsnich ju Jesús chani alacjuni: ―Alaktsʼintʼit ni jantu xamatiʼ cataʼokxchokʼon. 5 Pus na lhu cataminaʼ chai catanonach ni yuʼunch ju Cristo ju ixnoncan camalakachatachilh ju Dios. Chai na pumalhu ju cataʼokxchokʼoyaʼ. 6 Chai akʼasmatʼaʼitʼit ni alin ju lhilucut chai ni cakʼostayachokochalh aliʼ lhilucut alacatam. Para tun tʼilactʼalhanantʼit. Pus aktsʼiya tasqʼuini ni catapasayaʼ tachi chun ju ani taxtokni. Para jantiyuʼ ju ixʼaclanti ju lacamunutpaʼ. 7 Pus ju amachakʼan lakatam kʼai lacatʼun catʼalasachokoyaʼ ju amachakʼan alakatam kʼai lacatʼun. Chai ju lapanacni ju tachʼakʼokʼai tam kʼai ucxtin catatʼalasayaʼ ju ixlapanacni ju apumatam kʼai ucxtin. Chai caʼalinaʼ ju kʼai chavanti chai na lacalhu catataclhaʼ ju tʼun. 8 Para chux ju ani taxtokni va ixputaiʼulacan ju makʼalhkʼajnat. 9 Ju acsnich amakʼaxtʼakcʼanaʼitʼit ni amamakʼalhkʼajnicʼanaʼitʼit. Chai catamakniyan ju aliʼin lamilhiʼuxijnan. Chai ju amachakʼan tachi chun ju lacatʼun cataxcayan va ixlacaʼatalh ni quilachʼakʼokʼayau. 10 Chai na lhu ju quintalhilaksita catacʼapʼach. Chai catalaxcayaʼ. Chai ju yuʼunch catamakʼaxtʼakʼach ju vanach quintalhilaksi. 11 Chai na lhu caʼalinaʼ ju lapanacni ju aʼokxchokʼonin. Ju yuʼunch catalhitalacasuyach tachi ju lapanacni ju tanajun ixchivinti Dios mas jantu. Chai na lhu cataʼokxchokʼoyaʼ. 12 Chai ni na lhu catalhavayaʼ ju alactuʼunti pus na lhu lapanacni jantu vasalh catalamapainiyaʼ. 13 Para va tichi chavaich ju aquilhilaksiyach tus laʼixʼaninti mas mamakʼalhkʼajnican pus ju yuchi catakʼalhtaxtuyaʼ chai laich caʼanaʼ ju lactʼiyan. 14 Chai ju chivinti junta najun ni lhinomputun ju Dios laʼixʼalhunutʼan ju lapanacni canonkʼocanaʼ ixlhilacaputsʼun ju lacamunutpaʼ ni laich catacʼatsayaʼ tachi chun ju lapanacni. Chai acsnich ju caminach ixʼaclanti ju lacamunutpaʼ. 15 Pus ju makʼaniya lapanac ju Daniel ixjuncan tsʼokʼula junta naulh ni caʼalinaʼ lamimpujitatʼan ju tuʼuʼ ju na tsʼisi ju Dios. Chai ixlhiyuchi jantu xamatiʼ ju milhiʼuxijnan catanuyaʼ ju anch. Pus ju laktsʼin ju ani chivinti chach machakxa tuchi nomputun. 16 Pus ju uxijnan acsni alaktsʼinaʼitʼit ni uctaxtulh ju anuʼ ju lhichivinilh ju Daniel pus tachi chun ju tavilanancha ju laxaʼestado Judea chach taʼatsʼalalh. Cataʼalh ju lactalhpa. 17 Chai ju caʼakstitavi lacasotea chakaʼ va tsʼalhti catakʼalhtaju chai caʼatsʼalalh. Para jantu catiʼalilh ju ispantsʼiquis ni lai catanu laʼixchakaʼ ni camaxtulh ju tuʼuʼ. 18 Chai ju chʼalhcatnan laʼixcuxtu vachuʼ caʼatsʼalalh chai jantu catiʼalilh ju ispantsʼiquis ni lai catanuchokolh ju lakʼachakʼan va ixʼica ju ixpumpuʼ. 19 Chai painiʼitnich catajunaʼ ju yuʼunch ju va takʼakʼainanta chai ju taʼamatsʼiquinin ju acsnich avilhchan. 20 Atʼapʼaininitʼit ju Dios ni jantu chunch catapasayaʼ va lacalhicʼasnin nin lacaʼavilhchan paʼastacni acsni lhikʼalhtsajui ju ixlhamapʼaksin ju Moisés ni makat caʼalhtanalh xamatiʼ. 21 Iclajunau ni chunch ju alayaʼitʼit ni palai kʼai caʼalinaʼ ju acsni ju makʼalhkʼajnat tachi ju jantu tavanan alinta tus laʼixputaiʼulacan ju lacamunutpaʼ tus chavai. Chai jantu tavanan caʼalinchokoyaʼ ju chunch. 22 Pus ju Dios ni jantu caʼixnaulh ni palai va lacatsʼunin caʼixnavi ju anuch avilhchan pus jantu xamatiʼ caʼixtakʼalhtaxtulh. Para ni na amapaini ju lapanacni ju ixʼalacsacxtuta ju Dios pus yuchi va lacatsʼunin lhinavilh ju anuʼ avilhchan. 23 Pus ju acsni avilhchan ni xamatiʼ catajunan ni anich vi ju yuchi ju ixnoncan camalakachatachilh ju Dios u anuʼ vilhcha pus jantu alacʼaʼitʼit. 24 Pus ju acsnich na lhu cataʼalinaʼ ju okxchokʼoni lapanacni ju catanonaʼ ni yuʼunch ju Cristo ju ixnoncan camalakachatachilh ju Dios. Chai vachuʼ cataʼalinaʼ ju aʼokxchokʼonin ju catalhitalacasuyaʼ tachi ju lapanacni ju tanajun ixchivinti Dios. Chai ju yuʼunch catanaviyaʼ ju kʼai lhamakʼan chai ju tuʼuʼ ju catapumavasalaniputunaʼ ju lapanacni ni vasalh ixlapanacni Dios tajunita mas jantu. Chunch catanaviyaʼ ni va laich calalh catapuʼokxchokʼolh ju asacxtuta ju Dios. 25 Pus iclajuntau ni chunch ju catapasayaʼ mas jantucaʼ tapasai. 26 Pus ni xamatiʼ catajunan ni anuʼ vilhcha ju Cristo junta aseknicʼa pus jantu apʼitʼit. U ni catajunan ni anuʼ sek tanun lacachakaʼ pus jantu alacʼaʼitʼit. 27 Pus ju uxijnan cʼatsʼayatʼit ni vanta anchach tasui ju makʼalipniʼ. Pus vana va chunch cajunaʼ acsni acminchokoyaʼ ju quitʼin ju quimalakachatachilh Dios ni lapanac actsucuyaʼ ju ani. Pus lana va tam pantsʼiquis acminaʼ chai lana aquintalaktsʼinkʼoyaʼ tachi chun ju lapanacni. 28 Pus acsni na lhu caʼalinaʼ ju alactuʼunti pus acsnich ju caʼalinaʼ ju ixmakʼalhkʼajnatʼan ju lapanacni. 29 Ju Jesús tailhiʼalh ju ixchivinti chai naulh: ―Pus acsni catapasayach ju anuʼ avilhchan acsni na lhu caʼalinaʼ ju makʼalhkʼajnat pus ju avilhchan chai ju malhquiyuʼ jantu catamapulhcuyaʼ chai ju stʼacu catapatajuyaʼ ju lactʼiyan. Chai tachi chun ju ani taxtokni catalaclucununach. 30 Chai ju acsnich catalacasuyach ju tuʼuʼ ju lactʼiyan ju catapucʼatsayaʼ ju lapanacni ni acminaʼ ju quitʼin ju quimalakachatachilh ju Dios ni lapanac actsucuyaʼ ju ani lacamunutpaʼ. Chai catalackʼalhunach ju lapanacni ju ani lacatʼun. Chai aquintalaktsʼinach ju quitʼin ju quimalakachatachilh ju Dios ni lapanac actsucuyaʼ ju ani. Acminaʼ laxaʼataputsʼi ju lactʼiyan chai catacʼatsayaʼ ju lapanacni ni na alin ju quintachaput chai ni icxakʼai. 31 Chai na pʼas catʼasayaʼ ju skʼolh. Chai ju quitʼin acmalakachayach ju quiʼanquilhnin chai ju yuʼunch catamakʼaixtʼokʼach ju icsacxtuta ixlhilacaputsʼun ju lacamunutpaʼ mas palai makat amachakʼan catava. 32 Alaktsʼintʼit tachi ju takʼayai ju tuʼuʼ xaqʼuiu higuera. Acsni catsucutachilh xajnichiniʼ ju sastʼi xaxkʼoi pus pʼucʼatsʼayatʼit ni vaninch minta ju lacapʼasni. 33 Pus vana va chun acsni alaktsʼinaʼitʼit ni tʼajun tapasanaʼ tachi chun ju ani ju iclajuntau pus apʼucʼatsʼayaʼitʼit ni vaninch minta ju ixʼaclanti ju lacamunutpaʼ. 34 Slivasalh ju iclajunau. Jantucaʼ catitanikʼo ju chavai tatʼajun lapanacni acsni tucaʼ tapasakʼojui chux ju ani taxtokni. 35 Pus ju lactʼiyan chai ju lacatʼun catalaclakʼoyaʼ. Para ju quinchivinti aktsʼiya caʼuctaxtuyaʼ. 36 Para jantu xamatiʼ cʼatsai tavanan cachinaʼ ju anuʼ avilhchan chai ju anuʼ hora. Nin yuʼunch ju anquilhnin ju tavilanancha ju lactʼiyan nin quitʼin ju istsʼalh Dios icjunita. Va yuchi ju quimpai. Va isʼakstu cʼatsai. 37 Pus tachi ju ixjunita ju isʼatsucuntiʼan ju lapanacni acsni ixtʼajun ju Noé pus vana va chun ju cajunaʼ isʼatsucuntiʼan ju lapanacni ju catatsucuyaʼ acsni acminchokoyaʼ ju quitʼin ju quimalakachatachilh ju Dios ni lapanac actsucuyaʼ ju ani. 38 Pus ju anuʼ avilhchan acsni tucaʼ ixʼakmuxtucan pus ju lapanacni ixtavajin chai ixtaʼakʼotnun chai ixtatamakʼaxtʼokʼach chai ixlaʼican. Va chunch ju tatailhiʼalh tachi ju aktsʼiya ixtalai tus ju anuʼ avilhchan acsni tanulh ju Noé lacabarco. 39 Chai lana jantu talacaʼilh tus acsni milh ju akmuxtut chai tamuxtukʼo ixchuxʼan. Pus vana va chun cajunaʼ acsni acminchokoyaʼ ju quitʼin ju quimalakachatachilh ju Dios ni lapanac actsucuyaʼ ju ani. 40 Ju acsnich caʼalinach ixtʼiyunʼan ju kʼaixtam catachʼalhcatnanaʼ lacacuxtu. Chai ju pumatam calhiʼancanaʼ ju lactʼiyan. Chai ju pumatam catamaconach ju ani lacamunutpaʼ. 41 Caʼalinaʼ ixtʼiyunʼan chakolun ju kʼaixtam catasquitiyach. Ju pumatam calhiʼancanaʼ ju lactʼiyan. Chai ju pumatam catamaconach ju ani lacamunutpaʼ. 42 Pus skʼala atsʼucʼutʼit ni jantu cʼatsʼayatʼit tavanan ju acminchokoyaʼ. Quitʼin ju miʼucxtinʼan icjunita. 43 Pus acʼatsʼatʼit ju ani. Ju tam lapanac ni va cacʼatsa cava tavanan ju caminaʼ ju akʼalhonaʼ pus calhistaclh ju ixchakaʼ. Jantu catilacasqʼuinilh ni catanu ni cakʼalhaunilh tuʼuʼ. 44 Pus chunchach vachuʼ ju uxijnan. Alhistʼaccʼantʼit. Chunch ju alayaʼitʼit ni acsnich ju acminaʼ acsni jantu pʼastʼacʼatʼit ni laich acmilh ju acs pantsʼiquis. Quitʼin ju quimalakachatachilh Dios ni lapanac actsucuyaʼ ju ani. 45 Akʼasmatʼit ju ani chivinti. Ixʼalin pumatam xalapanac ju lai ixlhilaksican chai ju na ixʼacʼatsananta. Chai ju ixʼucxtin ula ju laʼixchakaʼ ni caʼaxtakniyach ixvaitiʼan ju aliʼin acsni chaʼan ju hora. 46 Pus acsni caminchokoyaʼ ju ixʼucxtin pus na cakʼachanach ju anuʼ xalapanac ni calhitajucanaʼ ni chunch ju tʼajun naviniʼ. 47 Pus slivasalh ju iclajunau. Ni camuctaxtuyaʼ ju anuʼ xalapanac pus ju ixʼucxtin lana calhilaksiyaʼ ni laich calhistacniyaʼ tachi chun ju ixʼalinta. 48 Para ju anuʼ xalapanac ni va kʼai junita cajunlh pus laich canaulh laʼixʼalhunut ni ca jantu sai catiminchokolh ju ixʼucxtin. 49 Chai catsucuyach lhimakchapunuʼ ju ixtʼaxalapanacni chai va catʼavenaʼ chai catʼakʼotʼach ju tʼakʼapʼanin. 50 Chai ni chunch ju calalh pus ju ixʼucxtin ju anuʼ xalapanac laich acs cachilh acsni jantu pacxantaji ju yuchi. Cachilh acsni ixnajunta ni jantu catimilh ju acs pantsʼiquis. 51 Pus ju ixʼucxtin lana camamakʼalhkʼajniyaʼ. Caxtakniyaʼ ju makʼalhkʼajnat ju caʼaxtaknicanaʼ ju aʼokxchokʼonin. Chai ju anch junta camacaʼancanaʼ na lackʼalhuncan chai na mapakʼatsican ju istatsalatʼan ni na tamakʼalhkʼajnan.
1 Ju Jesús tailhiʼalh ju ixchivinti chai naulh: ―Junta lhinajun ju Dios chunch ju tapasai tachi ju tapasalh laʼisʼatsucuntiʼan ixpumacauʼan atsiʼin. Ju yuʼunch tachʼapalh ju ixmaclhcuʼan chai taʼalh pakxtoknin ju tsʼalh ju catamakʼaxtʼokʼaʼ ni vachuʼ va ixtamakʼamputun. 2 Pus ixpumaquisʼan ju yuʼunch na ixtanavi cuenta tuchi ixtanavi. Chai ju ixpumaquisʼan jantu. 3 Pus ju yuʼunch ju jantu ixtanavi cuenta ju tuchi ixtanavi pus tamujulh ju ixmaclhcuʼan para jantu talhiʼalh aliʼ ju xapumaclhcu. 4 Para ju na ixtanavi cuenta tuchi ixtanavi pus talhiʼalh ixmaclhcuʼan para vachuʼ talhiʼalh aliʼ ixpumaclhcuʼan laʼixlumetiʼan. 5 Pus ni jantu sai ixchinacha ju tsʼalh ju catamakʼaxtʼokʼaʼ pus na ixtalaclhtataputun ixchuxʼan ixpumacauʼan chai talaclhtatatavilh. 6 Para acsni chaʼalh paitat tsʼis takʼasmatnilh ixchivinti ju pumatam ju pʼas naulh: “Mintach ju tsʼalh ju catamakʼaxtʼokʼaʼ. Aʼinchitʼit pakxtoknin”. 7 Pus ju acsnich tachi chun ju anuʼ atsiʼin tataya. Tatsuculh lakʼoxinin ju ixmaclhcuʼan. 8 Chai ju yuʼunch ju jantu ixtanavi cuenta tuchi ixtanavi chani tajuni ju yuʼunch ju ixtalhiminta ju ixpumaclhcuʼan: “Aquilamachʼixtakniucaʼ lacatsʼunin ju mimpumaclhcuʼan. Ju quimaclhcu quincʼan ni va mixputun”. 9 Para ju yuʼunch ju ixtanavi cuenta tuchi ixtanavi taʼakʼalhtayanalh. Tajunich: “Jantu. Ca jantu catilhiva ju quilhichuxʼan. Alai inchitʼit tamonin junta stʼacan. Atʼamaʼutʼit vachuʼ ju miʼanuʼan ju uxijnan”. 10 Para acsni ixtaʼanta tamonin ju ixpumaclhcuʼan ju anuʼ ixpumaquisʼan atsiʼin pus lana chincha ju tsʼalh ju catamakʼaxtʼokʼaʼ. Pus ju ixpumaquisʼan ju na ixtalakasivilanalh vachuʼ maktanulh junta xatanui ju tsʼalh ju calhimacʼatanicanaʼ ni catamakʼaxtʼokʼaʼ. Chai lana malacchaucalh. 11 Astan tachinchalh vachuʼ ju aliʼin atsiʼin. Chai tajuni: “Quiʼamigo aquilamalhtekʼaniuch”. 12 Para ju anuʼ tsʼalh akʼalhtayanalh. Alacjuni: “Slivasalh ju iclajunau. Jantu iclamispayau ju uxijnan”. 13 Pus acsni nonkʼolh ju Jesús ju ani chivinti astan alacjuni ju anch ixtavilanalh: ―Vachuʼ chunch alatʼit tachi ju talalh ju anuch atsiʼin ju ixtalakasivilanalh. Vachuʼ alakʼasitsʼucʼutʼit ni jantu cʼatsʼayatʼit tuchi avilhchan u tuchi hora ju acminchokoyaʼ. Quitʼin ju quimalakachatachilh Dios ni lapanac actsucuyaʼ ju ani. 14 Alakʼasitsʼucʼutʼit ni chunch ju tapasai junta lhinajun ju Dios tachi ju tapasalh laʼisʼatsucuntiʼan ixlapanacni pumatam makʼaliʼ. Pus ju anuʼ lapanac ixʼamputun makat. Chai acsni jantucaʼ an pus atʼasanilh ju ixlapanacni chai amachʼixtaknilh tachi chun ju ixʼalinta. 15 Pus ju pumatam xtaknilh lakaquis milh. Ju apumatam lakatʼui milh. Chai ju apumatam tam milh. Xtaknilh pumatamin tachi ju laich catapuchʼalhcatnalh. Chai astan ju yuchi alh makat. 16 Pus ju anuʼ xalapanac ju ixmachʼixtaknita lakaquis milh alh puchʼalhcatnaʼ chai lhajachokolh alakaquis milh. 17 Vachuʼ chunch lalh ju ixmachʼixtaknita lakatʼui milh. Ju yuchi puchʼalhcatnalh ju lakatʼui chai lhajachokolh alakatʼui milh. 18 Para ju anuʼ xalapanac ju machʼixtaknicalh va tam milh lhiʼalh ju tumin chai quimacnulh ju lacatʼun ni jantu catsʼankʼalh. 19 Chai acsni na makʼanch va pus minchokolh ju ixʼucxtinʼan ju anuʼ xalapanacni. Chai ju yuchi tsuculh alactʼaputʼekʼeniʼ. 20 Pus ju anuʼ ju ixmachʼixtaknicanta lakaquis milh lakmilh ju ixʼucxtin. Vachuʼ lhiminilh ju alakaquis milh ju ixlhajatach. Chai juni: “Quiʼucxtin ju uxintʼi qʼuimachʼixtʼaknitʼa lakaquis milh. Pus ju chavai acxtakniyan ju alakaquis milh ju icpulhajalh”. 21 Chai ju ixʼucxtin juni: “Na kʼox xanavi. Ju uxintʼi na kʼox lapanac unitʼa chai na lai lhilaksicʼan. Laich xalhistʼacʼa lacatsʼunin. Pus ju chavai palai lhu acxtakniyan ju alhistʼacʼaʼ. Atʼanutʼich junta icvi ni laich kʼaixtam cakʼachanau”. 22 Chai astan chinchalh ju ixmachʼixtaknicanta ju lakatʼui milh. Chai ju yuchi junilh ju ixʼucxtin: “Ju uxintʼi lakatʼui milh xaqʼuimachʼixtʼaknitʼa. Pus ju chavai iclhiminitan vachuʼ alakatʼui milh ju iclhajata”. 23 Chai ju ixʼucxtin juni: “Na kʼox xanavi. Ju uxintʼi na kʼox lapanac unitʼa chai na lai lhilaksicʼan. Laich xalhistʼacʼa lacatsʼunin. Pus ju chavai palai lhu acxtakniyan ju alhistʼacʼaʼ. Atʼanutʼich junta icvi ni laich kʼaixtam cakʼachanau”. 24 Chai vachuʼ chinchalh ju ixmachʼixtaknicanta ju tam milh. Chai ju yuchi junilh ju ixʼucxtin: “Xaccʼatsai ni na pʼas ju miʼalhunut ju uxintʼi. Pus alaktsʼich. Yuʼunch ju milapanacni ju tachʼalhcatnan ni laich na lhu cajunaʼ ju micebada. Chai yuʼunch ju talacsununiyan ju micebada ni laich lhu amakʼaixtʼokʼaʼ ju uxintʼi mas jantuch tuʼuʼ talhajai ju yuʼunch. 25 Pus yuchi na xaclhitalhoniyan chai jantu xacpuchʼalhcatnamputun ju mintumin. Pus icʼalh. Icmacnulh ju mintumin lacatʼun. Anich iclhiminichokotan ju miʼanuch”. 26 Pus ju acsnich ju ixʼucxtin chani juni: “Ju uxintʼi na alactʼuʼunun chai na malheknin. Naʼunch ni cʼatsʼaich ni aliʼin ju tachʼalhcatnan ni laich lhu caʼalilh ju quicebada. Chai aliʼin ju quintalacsununi ju quicebada ni laich lhu acmakʼaixtʼokʼaʼ. Chai jantu tuʼuʼ icʼaxtakni ju yuʼunch. 27 Pus ni vasalh chunch qʼuilaktsʼin pus palai kʼox ixva ni ixtʼaknin ju quintumin ju lai tapuchʼalhcatnan tumin. Ju chunch acsni xacmilh xacʼamaklhtayananchokolh ju quintumin chai chux ju isʼaskʼatʼa”. 28 Pus ju acsnich ju yuchi ajunilh ju aliʼin ju ixtayanancha: “Atʼaiʼinitʼit ju tam milh. Chai axtʼaknitʼit ju pacxanta lakacau milh. 29 Chunch ju alatʼit ni palai lhu caxtaknicanaʼ ju pacxanta tuʼuʼ. Chai ju chunch palai lhu caʼalinaʼ ju ixʼalinta. Para ju matiʼ tuʼuʼ pus cataiʼinicanaʼ ju tuchi najun ni pacxanta. 30 Chai ju ani lapanac ju jantu tuʼuʼ ixtapalhni junita amacʼapʼitʼit lacaʼatatsʼisni lhimakspaʼ. Ju anch na lackʼalhuncan chai na malatankʼatsican ju istatsalatʼan ni na tamakʼalhkʼajnan”. 31 Ju Jesús tailhiʼalh ju ixchivinti chai naulh: ―Ju quitʼin quimalakachatachilh ju Dios ni lapanac actsucuyaʼ ju ani. Chai acsni acminchokoyaʼ laquintachaput acʼalactʼaminaʼ tachi chun ju quiʼanquilhnin chai ju acsnich acʼamaklhtayananaʼ ju quimpuʼucxtin chai slivasalh xakʼai acjunaʼ. 32 Chai catakʼaixtʼokʼach laquiʼucxlacapuʼ tachi chun ju amachakʼan ixlhilacaputsʼun ju ani lacatʼun. Chai ju quitʼin acʼalhvakpitsiyaʼ ju yuʼunch tachi ju navi tam alhistacnaʼ acsni alhvakpitsi ju ixborregojni chai ju ixchivojni. 33 Pus ju lapanacni ju soknicʼa alaktsʼin ju Dios catatayayaʼ laquilhicana. Chai ju lapanacni ju alactuʼunun catatayayaʼ laquilhimacx. 34 Chai ju acsnich ni kʼai ucxtin acjunaʼ pus acʼalacjunaʼ ju yuʼunch ju tayanalh laquilhicana: “Atʼatʼit ju uxijnan ju taxtaknitan ju kʼox miʼatsucuntiʼan ju quimpai. Atʼanutʼit ju lactʼiyan junta lhinajun ju yuchi ni anch ju talakʼoxinitan tus acsni tavanan navicantacha ju lacamunutpaʼ. 35 Pus iclajunau ni apʼinaʼitʼit ju anch ni quilaxtakniu ju quivaiti acsni na xacchavanita. Chai quilaxtakniu ju ickʼotlh acsni na xacquicxixta. Chai quilaxtakniu junta ictavi acsni makat xacmintacha. 36 Chai acsni matiʼ ixjunita ju quimpumpuʼ pus quilaxtakniu. Chai acsni na xactakʼankʼai pus quilaquilaktsʼiu. Chai acsni xactʼalhnucanta quilaquilaktsʼiu”. 37 Pus ju acsnich ju yuʼunch ju alaktsʼincan ni soknicʼa isʼatsucuntiʼan catajunach: “Para ji quiʼucxtin tas vananch ju iclalaktsʼiu ni va ixchʼavanitʼa chai iclaxtakniu ju mivaiti. U ni ixqʼuicxixtʼa chai iclaxtakniu ju xakʼotʼa. 38 Tas vananch ju makat ixtʼantʼachiʼ chai iclaxtakniu junta xatolai. U va matiʼ ixjunita ju mimpumpuʼ chai iclaxtakniu. 39 Tas vananch ju icquilalaktsʼiu acsni va ixtʼakʼankʼai u ixtʼalhnucʼantʼa”. 40 Pus ju acsnich ju quitʼin ju kʼai ucxtin acjunaʼ chani acʼalacjunach: “Slivasalh ju iclajunau. Ni chunch ju xanaviniyatʼit ju tam quilhilakʼau mas yuchi ju noncan ni jantu tuʼuʼ ixtapalhni pus va jun quitʼinch ju chunch xaquilanaviyau”. 41 Chai ju acsnich ni kʼai ucxtin acjunaʼ pus acʼalacjunaʼ ju yuʼunch ju tayanalh laquilhimacx: “Akʼostʼit laquimacni ju uxijnan ju ulanicʼantʼatʼit ju mintalakʼalhinʼan. Aʼinchitʼit ju lacajipi ju jantu tavanan mix. Anch junta lakʼoxinicanta ju lhacaticuru chai ju ixʼanquilhnin. 42 Pus ju quitʼin acsni na xacchavanita jantu xaquilaxtakniyau ju quivaiti. Chai acsni na xacquicxixta jantu xaquilaxtakniyau ju ackʼotlh. 43 Chai acsni na makat ju xacminacha jantu xaquilaxtakniyau junta lai actavi. Chai acsni matiʼ ixjunita ju quimpumpuʼ jantu xaquilaxtakniyau. Chai acsni na xactakʼankʼai chai acsni xactʼalhnucanta jantu xaquilaquilaktsʼinau”. 44 Pus ju acsnich ju yuʼunch chani aquintajunaʼ: “Ucxtin tas vananch iclalaktsʼiu ni na ixchʼavanitʼa u ixqʼuicxixtʼa u makat ixtʼantʼachiʼ u matiʼ ixjunita ju mimpumpuʼ u va ixtʼakʼankʼai u ixtʼalhnucʼantʼa chai jantu tuʼuʼ xaclanaviniyau”. 45 Chai ju quitʼin ju kʼai ucxtin acjunaʼ pus chani acʼajunaʼ: “Slivasalh ju iclajunau. Ni jantu xanaviniyatʼit tuʼuʼ lamapainin ju ani ju quintalhilaksi ni va ixnonatʼit ni jantu tuʼuʼ ixtapalhniʼan ju yuʼunch pus tachi ju va jun quitʼin ju jantu tuʼuʼ xaquilanaviniyau”. 46 Pus ju acsnich ju yuʼunch cataʼanach lacamakʼalhkʼajnat ju jonkʼalhita. Para ju alaktsʼincan ni soknicʼa ju isʼatsucuntiʼan cataʼanaʼ junta alin ju atsucunti ju jonkʼalhita.
1 Pus ju Jesús acsni nonkʼo chux ju ani chivinti pus chani ajuni ju ixʼamamakaʼui: 2 ―Ju uxijnan cʼatsʼayatʼit ni va lakatʼui avilhchan ticʼacx tus caʼalinach ju cʼatan ju ixpupastaccan ju anuʼ atatsʼisni acsni tatakʼalhtaxtulh laʼixʼanintiʼan ju istsʼalan ju makʼaniya milacpaʼitniʼan. Pus ju acsni cʼatan acmakʼaxtakcanaʼ ni laich acmaquilhtacanaʼ ju lacacurus. Quitʼin ju quimalakachatachilh Dios ni lapanac actsucuyaʼ ju ani. 3 Pus lana acsni avilhchan vachuʼ tatakʼaixtoklich ju xalackʼajin palijni chai ju xapapaninch ju anuʼ lakʼachakʼan chai ju yuʼunch ju na ixtalhatalanininta ju ixlhamapʼaksinʼan ju istʼaʼisraelitanin. Tatakʼaixtoklich ixpulacni kʼex junta ixlakachakʼaxnucanta ju ixchakaʼ ju xakʼai pali ju Caifás ixjuncan. 4 Tatsuculh lhilacchivinin ta yu laich catapuʼokxchokʼochʼapayaʼ ju Jesús chai catamakniyach. 5 Para ixtalaclajuni: ―Para jantu cachʼapayau ju lacacʼatan ni va lai tatalhkʼamalh ju lapanacni. 6 Ju Jesús ixvilhcha lakʼachakʼan Betania laʼixchakaʼ ju Simón ju ixlacatsʼitsʼita para palaich ixnavita ju Jesús. 7 Chai pumatam chakoʼulh lakmilh ju Jesús. Ixlhiminta lakatam lumeti ju ixpumujuta ju perfume ju na laklhu ixtapalh ixjunita. Chai ju yuchi tsuculh lacpaxtʼekʼemucʼanaʼ ju Jesús acsni ixvi lacamixa. 8 Para ju ixʼamamakaʼui ju Jesús acsni talaktsʼilh na tatalhkʼamalh. Talaclajunich: ―Tajuch ni va xalhakʼamanan ju ani. 9 Ju ani perfume lai laklhu ixlhistʼacalh chai ju ixtapalh laich ixlhikʼailaktsʼilh ju quilhpatinin. 10 Para ju Jesús acsni machakxa tuchi ixtalaclajuni pus chani alacjuni: ―Tajuch ni va lhixcʼayatʼit ju ani ya chakoʼulh. Slivasalh na kʼox ju xaquinavi ju yuchi. 11 Pus ju quilhpatinin aktsʼiya caʼalinach junta vilatʼit. Para ju quitʼin jantu actilatʼaʼalhtanankʼalhiu. 12 Chai ju ani perfume ju xaquixtʼekʼemucʼani laquilacatuna quixtʼekʼemucʼanilh ni chunch ju lhilanicantau ni xamatiʼ taʼacnui. 13 Slivasalh ju iclajunau. Vanta lhiʼanchach ju ani lacamunutpaʼ junta canoncanaʼ ju chivinti ju quilacata pus vachuʼ canoncanaʼ tuchi xanavich ju ani chakoʼulh. Ju chunch jantu tavanan cacapcanach ju yuchi. 14 Ju acsnich pumatam ju ixlhipumacautʼuiʼan ju ixʼamamakaʼui ju Jesús alakʼalh ju xalackʼajin palijni. Pus ju yuchi Judas Iscariote ixjuncan. 15 Chai chani alacjuni: ―Tas chunchach ju aquilaxtakniyau ni aclamakʼaxtakniyau ju Jesús. Pus ju yuʼunch talhitʼatakʼoxilh lakpʼuxamcau plata tumin. Chai amaklhtayanalh ju Judas. 16 Chai tus acsni ju Judas puxcaulh ta yu laich capumakʼaxtʼakʼaʼ ju Jesús. 17 Ju xapʼulhnan avilhchan ju anuʼ cʼatan acsni jantu ixtalhiyajui ju xatʼin ju ixkapavatiʼan pus talakmilh ju Jesús ju ixʼamamakaʼui. Chai tajuni: ―Tas anchach ju lacʼasqʼuin ni aclakʼoxiu junta caʼuyau ju borrego. 18 Pus ju Jesús alacjuni: ―Aʼinchitʼit ju lakʼachakʼan laʼixchakaʼ ju pumatam quiʼamigo. Chai chani aʼunaʼitʼit: “Ju amamakaʼunuʼ najun ni ma chinta ju ixʼavilhchan chai ma laminchakach ju catʼaʼuyaʼ ju borrego ju ixʼamamakaʼui”. Chunch ju aʼunaʼitʼit. 19 Pus ju ixʼamamakaʼui ju Jesús taʼalh chai tanavilh tachi ju ixʼajunita ju Jesús. Chai talakʼoxilh ju ixpucʼatanitʼan. 20 Chai ju anuʼ avilhchan acsni tokʼoxalh pus ju Jesús alactʼatavilh lacamixa ixpumacautʼuiʼan ju ixʼamamakaʼui. 21 Chai acsni ixtatʼajun venin pus ju Jesús chani alacjuni: ―Slivasalh ju iclajunau. Pumatam ju milhiʼuxijnan aquimakʼaxtʼakʼach. 22 Pus ju acsnich na taʼamakʼaninilh ju yuʼunch. Chai kʼantam kʼantam tasacmich. Tajunich: ―Para ja quitʼin ji quiʼucxtin. 23 Chai ju Jesús akʼalhtailh. Alacjuni: ―Yuchi ju va kʼaixtam quintʼatamackʼoi laquincʼaʼulh. Yuchi ju aquimakʼaxtʼakʼach. 24 Pus aktsʼiya acniyaʼ tachi ju tsʼokcanta laʼixchivinti Dios ju quilacata. Quitʼin ju quimalakachatachilh Dios ni lapanac actsucuyaʼ ju ani. Para painich ju anuʼ lapanac ju aquimakʼaxtʼakʼaʼ. Palai kʼox caʼixva ni jantu caʼistsuculh ju anuʼ jokʼat. 25 Pus ju acsnich chivinilh ju Judas. Yuchi ju camakʼaxtʼakʼaʼ. Junich: ―Para ja quitʼin ji amamakaʼunuʼ. Chai ju Jesús juni: ―Uxintʼi. 26 Chai acsni ixtatʼajun venin pus ju Jesús chʼapalh ju xkapavati chai xtaknilh lakʼailaktsʼiuch ju Dios. Chai astan lacchʼekʼelh. Chai axtaknilh ju ixʼamamakaʼui. Chai ajuni: ―Aʼutʼitch. Ju ani yuchach ju quilacatuna. 27 Chai astan chʼapalh tam vaso ju vino. Xtaknilh lakʼailaktsʼiuch ju Dios. Chai axtaknilh ju yuʼunch. Chai ajuni: ―Akʼotʼit minchuxʼan. 28 Ju yuchi quiʼacʼalhni. Chai acsni cataxtuyaʼ ju yuchi pus capumavasalayaʼ ju sastʼi chivinti ju caʼalactʼatakʼoxiyaʼ ju Dios ju lapanacni ni laich caʼamacʼacxaniyaʼ ixʼalactuʼuntiʼan na lhu lapanacni. 29 Para iclajunau ni jantu actikʼotchokolh ju vino tus acsni cachinaʼ ju avilhchan acsni aclatʼakʼotchokoyau ju uxijnan ju sasastʼi vino junta lhinajun ju quimpai. 30 Acsni nonkʼo ju chunch ju Jesús pus tamilhpa lakatam milhpat. Tataxtulh. Taʼalh laxaʼakstijun junta ixya ju xaqʼuiu olivos. 31 Chai acsni ixtaʼanta ju lacati pus ju Jesús alacjuni ju ixʼamamakaʼui: ―Chux ju uxijnan aquilamacoʼulayau ju chavai atatsʼisni. Iccʼatsai ni chunch ju catapasayaʼ ni chunch ju tsʼokcanta laʼixchivinti Dios junta chani najun ju yuchi: “Acmakniyaʼ ju xaʼalhistacnaʼ chai ju ixborregojni catataʼakpitsiyach”. Chunch ju najun laʼixchivinti Dios. 32 Para aclokʼonchokoyach chai quitʼin ju pʼulhnan acchaʼanaʼ ju laxaʼestado Galilea. Astan achʼipʼinaʼitʼit ju uxijnan. 33 Pus ju acsnich ju Pitaluʼ chani juni ju Jesús: ―Mas chux ju aliʼin catatalhananaʼ ju milacata para ju quitʼin jantu tavanan actitalhanalh. 34 Para ju Jesús juni: ―Slivasalh ju icjunan. Acsni tucaʼ tʼasai ju puyux acsni tʼajunch tuncuntilanaʼ pus ju uxintʼi paktʼutu naʼuntʼa ni jantu qʼuimispʼaich. 35 Para ju Pitaluʼ naulh: ―Mas tus actʼaninch jantu lai tavanan actinaulh ni jantu icmispayan. Chai vana va chun tanaulh chux ju aliʼin ixʼamamakaʼui. 36 Pus ju acsnich ju Jesús alactʼachaʼalh ju ixʼamamakaʼui junta Getsemaní juncan. Chai alacjuni ju yuʼunch: ―Atʼolatʼitcaʼ ju ani. Chactiquitʼachivinin ju Dios. 37 Chai akʼailhiʼalh ju Pitaluʼ chai ixtʼiyunʼan istsʼalan Zebedeo. Chai tsuculh amakʼaniniʼ chai na xcanilh ju ixʼalhunut. 38 Pus ju acsnich alacjuni ju ixpumatʼutuʼan: ―Slivasalh na icʼamakʼaninin. Tachi ju va ictʼajun niniʼ ju chavai. Atʼolatʼitcaʼ ju ani. Aquilatʼakʼalhcujvich lacatsʼunin. 39 Pus ju acsnich ju Jesús alhtanampa lacatsʼunin. Chai lana taquilhputalh chai tsuculh tʼachiviniʼ ju Dios. Junich: ―Quimpai chach jantu alilh ju makʼalhkʼajnat ju qʼuilhcʼanitʼa. Para jantu anavitʼi tachi ju iclacasqʼuinch ju quitʼin. Alai anavitʼi chunch tachi ju lacʼasqʼuinch ju uxintʼi. 40 Pus acsni nonkʼo ju chunch ju Jesús pus alakchinchokolh ju ixpumatʼutuʼan ixʼamamakaʼui. Chai alhitajulh ni na ixtalhtatanan. Pus ju Jesús junilh ju Pitaluʼ: ―Ja va jantu lai quilatʼakʼalhcujau mas va pantsʼiquis. 41 Akʼalhcʼujtʼit chai atʼachʼivinintʼit ju Dios. Ju chunch jantu cataʼokxchokʼoyan ju lhacaticuru. Pus ju lamiʼalhunutʼan vasalh navipʼutʼunatʼit ju kʼox. Para ju va lamiʼakstuʼan jantu lai naviyatʼit. 42 Pus aktam anchokopa ju ixlhipaktʼuich tʼachiviniʼ ju Dios. Chai chani juni ju ixpai: ―Quimpai ni jantu lai aqʼuintʼimakʼosunin ju ani kʼai makʼalhkʼajnat pus anavitʼich tuchʼi lacʼasqʼuin ju uxintʼi. 43 Pus acsni nonkʼo ju ani chivinti pus taspʼitchokocha chai aktam alhitajuchokopa ju ixpumatʼutuʼan ni aktam na ixtalhtatananchokopalai ni slivasalh na ixtalhtataputunch. 44 Pus amaconchokolh chai anchokopa aktam tʼachiviniʼ ju ixpai ixlhipaktʼutuch. Chai vana va yuʼ ju junchokopa. 45 Ju acsnich alakminchokopa ju ixpumatʼutuʼan chai alacjuni: ―Ja lana va alhtʼatʼakʼalhiyaʼitʼit chai astʼacnankʼalhiyaʼitʼit. Chilh ju hora chai acmakʼaxtakcanaʼ laʼixmacaʼan ju alactuʼunin. Quitʼin ju quimalakachatachilh Dios ni lapanac actsucuyaʼ ju ani. 46 Akʼostʼolatʼit. Caʼauch apakxtoknin. Anich minta ju aquimakʼaxtʼakʼach. 47 Ju Jesús tucaʼ ixchivinkʼojui acsni chincha ju Judas ju ixlhipumacautʼuiʼan ixjunita. Chai alactʼamilh ixtalhavat lapanacni ju ixʼamalakachata ju xalackʼajin palijni chai ju xapapaninch ju anuch lakʼachakʼan. Ixtalhiminta ixmachitaʼan chai ixqʼuiuʼan. 48 Pus ju Judas ju amakʼaxtaknaʼ ixʼajunita ju aliʼin ta yu catapumispayach. Ixʼajunita: ―Ju acmacchʼuchʼuyach yuchach. Achʼapʼayaʼitʼit. 49 Pus ju acsnich ju Judas lana lakchaʼalh ju Jesús chai juni: ―Xanchi quiʼamamakaʼunuʼ. Chai lana macchʼuchʼulh. 50 Pus ju Jesús juni: ―Quiʼamigo tijuch ju laktʼantʼa. Pus ju acsnich lana tachincha ju aliʼin. Tachʼapalh ju Jesús chai tachʼin tanavi. 51 Para ju pumatam ixʼamamakaʼui ju Jesús maxtulh ju ixmachita chai chakxpʼuxnilh ju ixʼakʼaxkʼolh ixlapanac ju xakʼai pali. 52 Pus ju acsnich ju Jesús juni: ―Amakʼachʼokʼoch ju mimachita laxapajina. Icjunan chunch ni tachi chun ju catapulasayaʼ lacamachita pus lacamachita caʼamaknicanach. 53 Ja va jantu cʼatsʼai ni lai actitapaininilh ju quimpai chai ju yuchi lai aquixtaknilh ixtalhavatʼan ju anquilhnin. 54 Para ni chunch ju aclalh tas laich calhiʼuctaxtulh tachi chun ju tsʼokcanta laʼixchivinti Dios ju quilacata. 55 Pus ju acsnich ju Jesús alacjuni ju ixtalhavatʼan lapanacni: ―Tajuch ni va quilanaviyau tachi ju tam akʼalhonaʼ ju chʼapʼapʼutʼunatʼit ni lhitʼantʼatʼit ju mimachitaʼan chai ju minqʼuiuʼan. Pus chux avilhchan xaclatʼavilau ju uxijnan acsni xacʼamalaninin ju lacpujitat chai jantu xaquilachʼapayau ju acsnich. 56 Para chunch ju tʼajun tapasanaʼ ni laich capuʼuctaxtuyaʼ tachi chun ju tatsʼoklh laʼixchivinti Dios ju ixlapanacni ju quilacata. Pus acsni nonkʼo ju chunch ju Jesús pus tachi chun ju ixʼamamakaʼui taʼatsʼalalh. Tamacoyaulh isʼakstu ju Jesús. 57 Pus ju yuʼunch ju taquichʼapalh ju Jesús talhiʼanilh ju Caifás ju xakʼai pali ixjunita. Chai vachuʼ anch tatakʼaixtoklh ju papaninch chai ju na ixtalhatalanininta ju ixlhamapʼaksinʼan ju istʼaʼisraelitanin. 58 Pus ju Pitaluʼ va ixlhimakat ixʼachʼakʼokʼata ju yuʼunch. Jantu va kʼaixtam xaʼalactʼatanui acsni talhichaʼalh ju Jesús laʼixpulacni ta ixlakachakʼaxnucanta ju ixchakaʼ ju xakʼai pali. Tus astan tanulh vachuʼ ju Pitaluʼ pulacni chai alactʼatavi ju xapulasiyajni. Va ixlaktsʼimputun tuchi catapasayach. 59 Pus ju xalackʼajin palijni chai ju papaninch chai chux ju xalackʼajin na ixtapuxcajui tichi chavaich ju laich canaulh tuʼuʼ taʼaklhtamat ta yu laich catapulhinaulh ixmaknica ju Jesús. 60 Para jantu tavanan talhitajunilh tuʼuʼ talakʼalhin mas na lhuch lapanacni ixtanajun taʼaklhtamat chivinti. Para astan xcayama talhitajulh ixtʼiyunʼan ju vaklhtam chun ixtanajun lakatam taʼaklhtamat chivinti. 61 Tanaulh: ―Ju ani ya lapanac naulh ni ma lai calakʼalhiyaʼ ju ixpujitat Dios chai ma va lakatʼutu avilhchan ma capunavichokoyaʼ. 62 Pus tayalh ju xakʼai pali chai junilh ju Jesús: ―Ja jantu tuʼuʼ akʼalhtʼayananaʼ. Tijuch ju talhichivimakʼanan ju ani. 63 Para ju Jesús jantu tuʼuʼ lhikʼalhtailh. Pus ju acsnich ju xakʼai pali juni: ―Alhipʼastʼactʼi ju Dios ju tʼajun chai aquilajuniu ni vasalh Cristoʼat ju ixnoncan camalakachatachilh ju Dios. Ja vasalh istsʼalhʼat. 64 Chai ju Jesús juni: ―Vasalh tachi ju naʼun. Chai vachuʼ aclajunau ni astan aquilalaktsʼinau acsni actolaʼ vanin junta vi ju Dios chai acminaʼ laxaʼataputsʼi lactʼiyan. Quitʼin ju quimalakachatachilh Dios ni lapanac actsucuyaʼ ju ani. 65 Pus ju acsnich ju xakʼai pali lana lhtʼit kʼexlh ju ixpumpuʼ ju va ixtalhkʼamtich. Chai ajuni ju aliʼin: ―Na macxcai chivinti xanajun ni tachi ju Dios ju jumputun. Tis aliʼ asacminti tasqʼuini ni canaviu ju chavai ni kʼasmatniyatʼit ju macxcai ixchivinti. 66 Tʼas nonatʼit ju uxijnan. Pus ju yuʼunch tanaulh: ―Na kaʼi ixtalakʼalhin. Tasqʼuini ni canilh. 67 Chai ju acsnich talacpuchujva. Chai talacpusama. Chai talakpuchʼi. Chai ju aliʼin taquincatisamalh. 68 Tajuni: ―Ju uxintʼi ni sala Cristoʼat pus aquilajuniuch tichi chavaich ju xaʼulaniyan. 69 Pus ju Pitaluʼ lhimakspaʼ ixvilhcha. Laʼixpulacni kʼex. Chai lakmilh pumatam atsiʼ chai juni: ―Ju uxintʼi vachuʼ ixtʼaʼucxuntʼaʼun ju Jesús amachakaʼ xaʼestado Galilea. 70 Para ju Pitaluʼ naulh laʼixʼucxlacapuʼan ju ixtavilanalh anch ni jantu mispai ju Jesús. Junich ju atsiʼ: ―Jantu iccʼatsai tuchʼi naʼun. 71 Pus ju Pitaluʼ taxtulh. Chai acsni talacxtutaya pus apumatam atsiʼ laktsʼimpa chai ajuni ju ixtavilanalh: ―Ju ani vachuʼ ixtʼaʼucxuntʼajun ju Jesús amachakaʼ Nazaret. 72 Chai ju Pitaluʼ nonchokopa aktam ni jantu mispai. Tus lhipastackʼo ju Dios acsni chani alacjuni: ―Jantu lana icmispai ju anuʼ lapanac. 73 Chai ni pantsʼiquis jumpa pus talakʼampa ju Pitaluʼ ju lapanacni ju ixtavilanalh anch. Chai tajuni: ―Slivasalh vachuʼ makʼuxintʼi ni vachuʼ chunch ju chʼivinin. 74 Pus ju acsnich ju Pitaluʼ tsuculh nonaʼ macxcai chivinti chai lhipastacchokolh ju Dios chai alacjuni: ―Jantu icmispai ju anuʼ lapanac. Pus lana tʼasalh ju puyux ju acs pantsʼiquis. 75 Chai lana pastaclh ju Pitaluʼ ju chivinti ju ixjunita ju Jesús acsni junilh ni ma paktʼutu canonaʼ ni jantu mispai ju yuchi. Chai ma chunch canonaʼ acsni tucaʼ tʼasai ju puyux acsni tʼajun tuncuntilanaʼ. Chai acsni pastaclich ju chunch ju Pitaluʼ pus lana taxtulh makspaʼ. Chai slivasalh na kʼalhulh.
1 Pus acsni tunculh chux ju xalackʼajin palijni chai ju xapapaninch ju israelitanin va kʼaixtam tanaulh ni aktsʼiya catalhinonaʼ ixmaknica ju Jesús. 2 Pus tachʼilhiʼalh chai taquimakʼaxtaknilh ju Pilato. Pus ju yuchi ixgobernadorʼan ixjunita ju romanonin. 3 Pus ju Judas ju ixʼamakʼaxtaknanta acsni cʼatsalh ni tanaulh ju xalackʼajin ni camaknicanaʼ ju Jesús pus tam xapastacchokoi. Chai alhiminichokolh ju lakpʼuxamcau tumin ju xalackʼajin palijni chai ju xapapaninch. 4 Chai alacjuni: ―Icnavilh alactuʼunti ni iclamakʼaxtaknitau ju lapanac ju matiʼ ixtalakʼalhin. Para ju yuʼunch tajuni: ―Ju yuchi jantu quincuenta quincʼan. Mincuenta miʼakstu ju uxintʼi. 5 Pus ju Judas makʼalh ju anuʼ tumin laʼixpulacni lacpujitat chai taxtulh. Alh. Chai pixtuchʼimaknichokocalh isʼakstu. 6 Pus ju xalackʼajin palijni tasaclh ju anuʼ tumin chai talaclajuni: ―Jantu lhijun ni laich va calalhiyochoko ju ani tumin junta makʼatau ju ixtalhavat tumin ju xtakcan lacpujitat. Jantu lai chunch catilau ni ixtapalhch lapanac ju ani tumin. 7 Pus ixchuxʼan tanaulh ni catalhitamoyaʼ ju anuʼ tumin lakatam lacatʼun. Chai anchach ju catataʼacnuyach ju amachakʼan makat ju tani ju anch lakʼachakʼan. 8 Pus yuchi lhijunicalh ju anuʼ lacatʼun ni xalacatʼun ixtapalh lapanac. Chai jonkʼalhitach chun tus chavai. 9 Chai ni chunch ju talalh pus uctaxtulh tachi ju ixnajunta ju makʼaniya ixlapanac Dios ju Jeremías ixjuncan. Ju yuchi ma chani naulh: “Ju israelitanin ma tachʼapalh ju lakpʼuxamcau tumin tachi ju ixtalhcaich ixtapalhch cava ju anuʼ lapanac. 10 Chai ma talhitamaulh ju lacatʼun junta catataʼacnuyach ju amachakʼan makat. Ma tanavilh ju yuʼunch tachi ju xaquijuni ju Dios ni catanaviyaʼ”. Chunch ju naulh ju makʼaniya ixlapanac Dios. 11 Pus ju Jesús ixya laʼixʼucxlacapuʼ ju ixgobernadorʼan ju romanonin. Chai ju yuchi sacmilh ju Jesús. Junich: ―Ju uxintʼi ja ixʼucxtinʼat ju israelitanin. Chai ju Jesús juni: ―Chunch tachi ju naʼun. 12 Chai acsni ixtachivimakʼan ju yuchi ju xalackʼajin palijni chai ju papaninch pus ju Jesús jantu tuʼuʼ akʼalhtayanalh. 13 Pus ju acsnich ju gobernador Pilato junilh: ―Ja va jantu kʼasmatʼi tachi chun ju tachivimakʼanan ju uxintʼi. 14 Para ju Jesús jantu tuʼuʼ lhikʼalhtailh nin tachi lakatam chivinti. Pus ixlhiyuchi na lhamakʼaninilh ju gobernador. 15 Pus ju israelitanin ixtalhismanita ni chux cʼata ixʼamaconi tam tachʼin ju gobernador acsni ixchin ju ani cʼatan. Ixʼamaconican va tichi chavaich ixtalacasqʼuin. 16 Pus ju acsnich ixtʼalhnucanta pumatam tachʼin ju ismispakʼocanta ni na kʼai ixjunita. Chai ju yuchi Barrabás ixjuncan. 17 Pus ju Pilato acsni amakʼaixtoklh ju xalackʼajin sia yuʼunch ju israelitanin pus ajuni: ―Tis chavaich ju lacʼasqʼuinatʼit ni aclamaconiyau. Ja yuchi ju Barrabás u yuchi ju Jesús ju vachuʼ Cristo juncan. 18 Pus ju Pilato ajuni chunch ni iscʼatsai ni va ixtalhacchaʼani ju Jesús. Yuchi talhimakʼaxtaklh. 19 Pus acsni ixvi ju Pilato lacapuʼucxtin pus ixʼamachakaʼ malakachanilh chivinti. Juni: “Tun tuʼuʼ anavitʼi ju ani soknicʼa lapanac ni na lhu xacmakʼalhkʼajnan ju lhiyaxch tsʼis ni icmacʼatsanicalh ni kʼai talakʼalhin cava ni tuʼuʼ anaviyaʼ ju yuchi”. 20 Para ju xalackʼajin palijni chai ju papaninch tamalacaʼini ju ixtalhavat lapanacni ni catasqʼuinlich ni Barrabás ju camacajuncalh. Chai yuchach ju camaknicalh ju Jesús. 21 Pus ju gobernador ajunchokopalai aktam ju lapanacni: ―Ju anuʼ ixtʼiyunʼan tis chavaich ju lacʼasqʼuinatʼit ni aclamacaulh. Chai ju yuʼunch tajuni ni yuchi ju Barrabás. 22 Pus ju Pilato ajuni: ―Pus tas actʼalayach ju Jesús ju vachuʼ Cristo juncan. Chai ju ixtalhavat lapanacni tanaulh: ―Alhinauch ixmaquilhtaca ju lacacurus. 23 Pus ju acsnich ju Pilato alacjuni: ―Para tajuch ni jantu tuʼuʼ talakʼalhin ju xanavi. Para va apalai talhilactʼasalh. Ixtanajun: ―Alhinauch ixmaquilhtaca ju lacacurus. 24 Pus ju Pilato laktsʼilh ni jantu lai tuʼuʼ xanavi. Alai va palai ixtalhilactʼasai. Pus lhinaulh ixʼica ju xcan. Chai tsuculh makchʼakʼanaʼ laʼixʼucxlacapuʼan ju lapanacni. Chai alacjuni: ―Ju quitʼin jantu actimaktanu laʼixmaknica ju ani lapanac ju vasalh soknicʼa junita. Ni alhinonaʼitʼit ixmaknica pus mincuentaʼan ju uxijnan. 25 Pus chux ju lapanacni tanaulh: ―Kʼoxich. Ju quijnan chai ju quiʼaskʼatʼan accʼucʼayau ju talakʼalhin ixlacata ju ixmaknica. 26 Pus ju acsnich ju Pilato lhinaulh ixmaxtuca ju Barrabás. Astan lhinaulh ixkʼainekmaca ju Jesús. Chai makʼaxtaknilh ju taropajni ni catamaquilhta lacacurus. 27 Pus ju acsnich ju ixtaropajni ju gobernador talhiʼalh ju Jesús junta lakachakʼaxnucanta lacapuʼucxtin. Chai amakʼaixtokkʼo chux ju aliʼin ixtʼataropajni. 28 Chai tamalakaxtuni ju Jesús. Tamalakchʼinilh slapulh pumpuʼ tachi ju ixtamalakchʼinin ju lackʼai ucxtinin. 29 Chai tanavilh lakatam corona si alhtucunuʼ chai tamaktanulh. Vachuʼ machʼapacalh ju snivenkʼe qʼuiu laʼixlhicana ni catasu tachi tam xakʼai. Chai ju acsni tataʼaktsokotani. Para va ixtalhitsʼiʼin. Ixtajunich: ―Atsʼucʼukʼalhitʼi ji xaʼucxtin ju israelitanin. 30 Vachuʼ talakachujva. Chai tataiʼinilh ju snivenkʼe qʼuiu chai tatsuculh pulakpaneknin. 31 Astan acsni talhitsʼiʼinkʼo pus tamaxtunichokolh ju slapulh pumpuʼ. Chai tamalakchʼinichokolh ju aktsʼiya ixpumpuʼ. Chai talhiʼalh. Taʼalh maquilhtanin lacacurus. 32 Chai acsni ixtatʼajun taxtunin ju lakʼachakʼan pus tapakxtoklh pumatam lapanac amachakaʼ Cirene. Ju yuchi Simón ixjuncan. Pus ju taropajni tapʼastu tamakxkʼokʼalh ju yuchi ju iscurus ju Jesús. 33 Chai tachaʼalh junta Gólgota juncan. Pus ju chunch va nomputun ni chunch istasui tachi lakatam aktsulh. 34 Acsni tachaʼalh ju anch ixtaxtakniputun ju Jesús ju pinquin ju ixlhiya ju tuʼuʼ ju na sun ni va catalhimatontolanilh ju ixlacatuna. Para ju Jesús acsni quilhcʼatsa jantu kʼotlh. 35 Chai acsni tamaquilhtakʼo ju Jesús pus ju taropajni talhilaslajlh ju ixpumpuʼ ju Jesús ni laich catacʼatsa tamalhch ju calhiʼalh kʼantam kʼantam. Chai acsni chunch ju talalh pus puʼuctaxtulh tuchi ixnajunta ju makʼaniya ixlapanac Dios. Pus ju yuchi ma chani naulh: “Catalhilaslajaʼ ju quimpumpuʼ ni catasuyaʼ tichi chavaich ju catalhiʼanaʼ”. Chunch ju naulh ju makʼaniya ixlapanac Dios. 36 Chai astan tatavi ju anch ju taropajni ni laich catalhistʼacʼaʼ. 37 Pus ju laʼisʼaktsulh ju iscurus ju Jesús taʼulanilh lakatam atsʼoknut junta ixnajun tuchi talakʼalhin ixtamucʼanita. Pus chani ixnajun: “Ju ani yuchi ju Jesús. Ixʼucxtinʼan ju israelitanin”. 38 Vachuʼ atʼamaquilhtacalh ixtʼiyunʼan akʼalhonin. Ju pumatam maquilhtacalh laʼiscurus laʼixlhicana iscurus ju Jesús. Ju apumatam laʼixlhimacx. 39 Chai tachi chun ju ixtatapasai ixtajuni macxcai chivinti. Chai ixtamamaxani. 40 Ixtajuni: ―Uxintʼi ju lai maktʼai ju pujitat chai va ixlhilakatʼutu avilhchan yochʼokʼoi. Amakʼalhtʼaxtʼucʼach miʼakstu. Pus ni vasalh istsʼalhʼat Dios pus atʼakʼalhtʼaʼutʼich ju lacacurus. 41 Chai vana va chun ixtalhitsʼiʼin ju xalackʼajin palijni chai ju papaninch chai ju na ixtalhatalanininta ju ixlhamapʼaksinʼan ju istʼaʼisraelitanin. Ixtanajun: 42 ―Ju yuchi ixʼamakʼalhtaxtui ju aliʼin para jantu lai makʼalhtaxtuchokocan isʼakstu. Ni vasalh ixʼucxtin ju israelitanin junita pus chach takʼalhtaju lacacurus chai acsnich ju aclhilacaʼanauch ju quijnan. 43 Ju yuchi lhilaksi ju Dios. Pus ni vasalh tuʼuʼ lhiulai pus chach makʼalhtaxtulh ju chavai. Ju yuchi ni naulh ni istsʼalh Dios junita. 44 Chai mas yuʼunch ju akʼalhonin ju ixʼatʼamaquilhtacanta vachuʼ macxcai chivinti tajunilh ju Jesús. 45 Pus acsni kʼatunculh pus lana tsʼislh tachi ixlhilacaputsʼun ju lacamunutpaʼ. Tus lakatʼutu hora atokʼoxanaʼ na istsʼista. 46 Chai tachi ju lakatʼutu hora atokʼoxanaʼ pus ju Jesús tsʼau tʼasalh. Naulh: ―Elí, Elí, lama sabactani. Ju chunch va nomputun: QuiDios tajuch ni va xaqʼuimacʼaʼun. 47 Pus ju aliʼin ju anch ixtayanalh acsni takʼasmatlh tuchi ixnajun ju Jesús talaclajuni: ―Elías ju tʼasani. Yuchi ju ixlapanac Dios ixjunita ju makʼanchich. 48 Pus lana atsʼalaʼalh pumatam sia lhiyuʼunch ju taropajni. Chʼapalh ju tuʼuʼ pʼuchʼulh tachi panimac. Chai malaktanunilh ju suniya pinquin. Mucʼanilh ixʼacatan qʼuiu. Chai lhiʼanilh ju laʼixquilhni ju Jesús. Va ixmavaputun. 49 Para ju aliʼin tajuni: ―Amacʼauch. Calaktsʼinauch ni vasalh camilh ju Elías pʼuxnuʼ. 50 Pus ju Jesús aktam tsʼau tʼasachokopa chai lana nilh. 51 Pus ju acsni pantsʼiquis ju xapumpuʼ lacpujitat lana pumakatʼui va. Yuchi ju pumpuʼ ju ixpulhvakpitsicanta ju ixlhipulactʼui junta ixlhiʼanican ju Dios ju acʼalhni paktamin tamin cʼata. Pus takʼexcha tus talaclhman tus lacatʼun. Chai vachuʼ tataclh ju lacatʼun. Chai ju aliʼ kʼai chiux tapʼakxlh. 52 Chai tapʼakxlh ju aliʼ panteonin. Chai na lhu ju ixtalhilacaʼanta ju Dios acsni ixtatʼajuncaʼ pus talokʼonchokolh. 53 Pus tataxtulh junta ixtaʼacnunun. Chai astan acsni lokʼonchokolh ju Jesús pus tatanulh ju lakʼachakʼan Jerusalén. Chai ju anch na lhu ju atalacʼasunilh. 54 Pus ju xacapitán taropajni chai ju aliʼin ixtʼataropajni ju ixtatʼajun lhistacnin ju Jesús acsni talaktsʼilh ni tataclh ju lacatʼun chai ju aliʼ taxtokni ju tapasalh pus na tatalhanalh chai talaclajuni: ―Ju ani lapanac islivasalh istsʼalh Dios ixjunita. 55 Vachuʼ na lhu ixtayanalh ju chakolun. Va ixtalaktsʼin ju Jesús ixlhimakat. Ju yuʼunch aktsʼiya ixtatʼaʼucxuntʼajun ju Jesús acsni ixvilhcha ju xaʼestado Galilea chai tatʼamilh acsni milh ju yuchi ju Jerusalén. Chai ju yuʼunch ixtaʼaktaijui ju Jesús lacatumin. 56 Ju aliʼin sia yuʼunch yuchi ju Malia amachakaʼ Magdala. Chai ju Malia ixnatiʼan ju Jacobo chai ju José. Chai ixnati ju istsʼalan ju Zebedeo. 57 Acsni tokʼoxalh pus milh pumatam makʼaliʼ amachakaʼ Arimatea. Ju yuchi José ixjuncan. Chai vachuʼ ixlhilaksi ju Jesús. 58 Pus ju yuchi lakʼalh ju Pilato chai sqʼuinilh ixlacatuna ju lijunto Jesús. Chai ju Pilato lhinaulh ixtaknica. 59 Chai ju José lhiʼalh ixlacatuna ju lijunto. Pachʼi lacasnakʼankʼa pumpuʼ. 60 Chai quimacnulh junta ixlhucucunicanta lactalhpa junta jantucaʼ tavanan xamatiʼ ixtaʼacnui. Astan lhimalacchonilh kʼai chiux ju laxamalhtich junta tamacnu. Chai lana anchokolh ju José. 61 Vachuʼ taquilalh anch ju Malia amachakaʼ Magdala chai ju akʼantam Malia. Tatavilh pantsʼiquis vanin junta macnucalh. 62 Ni viernes ixjunita pus ju lapanacni ixtalakʼoxikʼota ju ixvaitiʼan ixlacata ju kʼai cʼatan. Chunch ixtalai ni jantu lai catitachʼalhcatnalh ni catuncunaʼ. Pus ni tuncunchokolh mas na kʼai cʼatan ixjunita para tatakʼaixtokli ju xalackʼajin palijni chai ju fariseonin. Talakʼalh ju Pilato. 63 Chai tajuni: ―Ji quiʼucxtin icpastacvi ni ixnajun ju anuʼ aʼokxchokʼonuʼ acsni ixtʼajuncaʼ ni ixlhilakatʼutu avilhchan ma calokʼonchokoyaʼ. 64 Pus lamapainin alhinauch ixlhistʼacʼa tachi lakatʼutu avilhchan junta acnui. Jantu xcai ni va catamilh tsʼis ju ixʼamamakaʼui chai catakʼalhaulh ju ixlacatuna chai catajunilh ju lapanacni ni lokʼonchokolh laʼixʼaninti ju ixʼamamakaʼunuʼan. Chai ni chunch ju catalalh pus palai cataʼokxchokʼolh ju lapanacni. Palai jantu na chun tachi acsni ixtʼajuncaʼ ju yuchi. 65 Chai ju Pilato alacjuni: ―Alhipʼinchitʼit ju taropajni. Kʼoxich alakʼoxitʼit junta acnuich tachi ju anicʼach lai catilalh ni jantu lai cataxtulh. 66 Pus taʼalh ju yuʼunch. Chai talakʼoxilh junta acnuich ju Jesús. Tachʼilh ju chiux ju xamalhtich ixnavicanta chai tatʼalamlakxtoklh ju talhpa. Vachuʼ taʼula ju taropajni ju catalhistaclich ju malhtich.
1 Pus acsni tapasalh ju anuʼ avilhchan paʼastacni chai ixtʼajun tuncuntilanaʼ ju lhitumincu pus ju Malia amachakaʼ Magdala chai ju kʼantam Malia taʼalh laktsʼinin junta ixmacnucanta ju Jesús. 2 Pus na pʼas tataclh ju lacatʼun. Chai ixʼanquilh ju Dios mincha lactʼiyan chai makʼosulh ju chiux ju xamalhtich ixjunita junta ixʼacnui ju Jesús. Chai ucxtavilh ju chiux. 3 Pus chunch istasui tachi ju tuʼuʼ makʼalipniʼ. Chai ju ixpumpuʼ slivasalh xnapapa ixjunita tachi ju tuʼuʼ miqui. 4 Chai ju taropajni acsni talaktsʼilh slivasalh na tatalhanalh tus taʼaxqʼuipʼipʼitnikʼo. Chai lana tatatistʼalh tachi ju va tanilh. 5 Pus ju acsnich ju anquilh axakʼala ju chakolun chai alacjuni: ―Jantu atʼalhanantʼit ju uxijnan. Iccʼatsai ni Jesús ju pʼuxcʼoyatʼit ju maquilhtacalh lacacurus. 6 Para jantu ani vi. Lokʼonchokotach tachi ju ixnajun. Atʼatʼit. Alaktsʼintʼit junta ixmacnucanta ju ixlacatuna. 7 Chai ju chavai ni cʼatsʼayatʼit ni vasalh lokʼonchokota pus vatsʼalhti aʼinchitʼit ajuninin ju ixʼamamakaʼui ni lokʼonchokotach ju yuchi mas ixnita. Vachuʼ aʼunaʼitʼit ni pʼulhnan caʼananta ju xaʼestado Galilea ju Jesús. Anchach ju catapacxantachan tus achʼipʼinaʼitʼit vachuʼ. Anchach ju alaktsʼintʼachitʼit. Yuchach ju iclajunau. 8 Pus ju acsnich ju anuʼ chakolun tataspʼitchokocha junta ixmacnucanta ju Jesús. Na ixtatalhananta ni ixtalaktsʼinta ju anquilhnin. Para na ixtakʼachanch ni tacʼatsa ni lokʼonchokotach ju Jesús. Pus taʼatsʼalaʼalh ajuninin ixʼamamakaʼui ju Jesús ni lokʼonchokota ju yuchi. 9 Para acsni ixtaʼantacaʼ ju lacati pus ju Jesús alacpakxtoklh. Amacʼami. Pus ju yuʼunch lana talakʼalh chai tachʼanlakatanu. Talakʼaya. 10 Chai ju Jesús alacjuni: ―Jantu atʼalhanantʼit. Aʼinchitʼit ajuninin ju quiʼalakʼavin ni chach taʼancha ju xaʼestado Galilea chai anchach ju aquintalaktsʼinanta. 11 Chai acsni ixtaʼanchokota ju lakʼachakʼan ju chakolun pus ju aliʼin sia yuʼunch ju taropajni ju ixtalhistacni junta ixʼacnui ju Jesús taʼalh vachuʼ ju lakʼachakʼan. Lana taquimacʼatsani ju xalackʼajin palijni tachi chun ju taxtokni ju ixtalaktsʼinta. 12 Pus ju yuʼunch lana tamakʼaixtokli chux ju xapapanin israelitanin. Chai yuʼunchach ju tatʼatakʼoxilh ju chivinti ju taropajni. Chai na laklhu ju axtaknicalh ju taropajni. 13 Chai chani ajunicalh: ―Anaʼuntʼit ni va taquilalh ju tsʼis ju ixʼamamakaʼui ju Jesús chai taquikʼalhaulh ju ixlacatuna acsni na ilhtʼatʼayatʼit ju uxijnan. 14 Chai ni va catamucʼaniputunan ju mintalakʼalhinʼan ju gobernador ni va ilhtʼatʼayatʼit pus ju quijnan actʼachivinau ju yuchi chai jantu tuʼuʼ catanaviyan. 15 Pus ju taropajni taʼamaklhtayanalh ju tumin chai chunch ju tajunilh ju lapanacni tachi ju ixʼalhimapʼaksicanta. Chai tus chavai ju israelitanin tanajun ni vasalh chunch ju tapasalh. 16 Pus ju ixpumacautamʼan ixʼamamakaʼui ju Jesús taʼalh ju xaʼestado Galilea. Taʼalh ju anuʼ akstijun junta ixʼalhimapʼaksita ju Jesús ni catachaʼalh. 17 Chai anchach ju atalacʼasunilh ju Jesús. Chai ju yuʼunch acsni talaktsʼilh talakʼaya. Para ju aliʼin jantu lai ixtalacaʼi ni vasalh yuchi cava. 18 Pus ju acsnich ju Jesús alakmilh chai axakʼala. Alacjuni: ―Iclhinajun ju quitʼin ju lactʼiyan chai ju ani lacatʼun. 19 Pus yuchi iclalhijunau ni apʼitʼit ajuninin tachi chun ju lapanacni ixlhilacaputsʼun ju lacamunutpaʼ ju chivinti ju quilacata. Chach vachuʼ quintachʼakʼokʼalh ju yuʼunch. Chai amakpʼaxayaʼitʼit laʼixtapakaʼut ju quimpai chai laquintapakaʼut ju istsʼalh icjunita chai laʼixtapakaʼut ju Spiritu Santu. 20 Chai amasuniyaʼitʼit ni catamuctaxtuyaʼ tachi chun ju chivinti ju iclajuntau ju uxijnan. Chai ju quitʼin iclatʼavilau ju uxijnan chux avilhchan tus laʼixʼaclanti ju lacamunutpaʼ. Slivasalh chun tachi ju iclajunau.
1 Chani ju xataiʼulai ju amalaninti ixlacata ju Jesucristo istsʼalh Dios. 2 Pus ju Isaías ju anuʼ makʼaniya lapanac ju ixnajun ixchivinti Dios chani ju tsʼoklh ixlacata ju Jesús: Ju Dios ma najun ni acsni tucaʼ min ju yuchi ju ani lacamunutpaʼ pus isʼakstu ju Dios ma camalakachatachilh ju ixlapanac. Chai ju yuchi ma caʼalacjunach ju lapanacni ni catalakʼoxilh ju ixʼatalacpastʼacʼatʼan ni caminaʼ ju ixʼucxtinʼan. 3 Chai ju anuʼ ixlapanac ma pʼas cachivinaʼ ju makat lacamacni. Ma caʼalacjunaʼ ju lapanacni ni catalakʼoxilh ju ixʼatalacpastʼacʼatʼan ni caminaʼ ju ixʼucxtinʼan. Ma chach salaka va ju ixʼalhunutʼan. 4 Pus yuchi lhimilh ju Xivan. Yuchi ju anuʼ ixlapanac Dios ju lhichivinilh ju Isaías. Chai ju yuchi ixʼamakpaxanan ju lacamacni chai ixʼalacjuni ju lapanacni: ―Amacʼaʼuntʼit ju miʼalactuʼuntiʼan chai aʼakpʼaxtʼit. Ju chunch catamacʼacxaniyan ju miʼalactuʼuntiʼan ju Dios. ―Chunch ixʼajuni ju lapanacni. 5 Pus ju amachakʼan ju xaʼestado Judea chai ju amachakʼan ju lakʼachakʼan Jerusalén ixtalakʼan ju Xivan ni ixtakʼasmatniputun ju ixchivinti. Chai ju Xivan amakpaxakʼo ju anuch kʼai xcan Jordán acsni ixtanajun ni catamaconaʼ ju ixʼalactuʼuntiʼan. 6 Ju ixpumpuʼ ju Xivan ispaksiucanta ixʼapamat camello. Chai lakatam takʼaixtʼakʼan ixtankʼaijucalh. Chai ixʼui ju tuʼuʼ tachi ju silek chai ju xatʼaxcat lacaqʼuivin. 7 Ju yuchi chani ixʼalacjuni ju lapanacni: ―Mintacha astan ju palai xakʼai. Palai jantu ju quitʼin. Ju quitʼin jantu tuʼuʼ ju quintapalhni. Jantu laich actichʼanxkʼotlh nin mas va yuchi ju samusni ixchʼanxtʼakʼan. 8 Pus ju quitʼin lacaxcan ju iclamakpaxau. Para ju yuchi cataxtakniyan ju Spiritu Santu ju catsucuyach lamiʼalhunutʼan. 9 Pus ju acsnich ju Jesús mincha lakʼachakʼan Nazaret laxaʼestado Galilea chai ju Xivan vachuʼ makpaxa ju yuchi lacakʼai xcan Jordán. 10 Chai ju Jesús acsni tacutlh ju lacxcan lana laktsʼilh ju lactʼiyan ni talhtekʼa. Chai laktsʼilh ni milh ju Spiritu Santu tachi ju tuʼuʼ lakʼaxkʼavan. Chai lakmilh ju yuchi. 11 Chai lana chivincancha ju lactʼiyan chai kʼasmatcalh ju lacatʼun junta ixya ju Jesús. Chai chani junicalh ju Jesús: ―Ju uxintʼi quintsʼalhʼat. Slivasalh na icmapainiyan. Na iclhikʼachananch. 12 Pus ju Spiritu Santu lana kʼai lhiʼalh ju Jesús lacamacni. 13 Tʼupʼuxam avilhchan tolhcha lacamacni ju Jesús. Chai ju anch na ixʼalin ju maktilin. Chai ju lhacaticuru navilh ju talacmaskʼatinti ni tsʼa ma laich caʼixmalactuʼuni ju Jesús. Chai ju astan ju anquilhnin talhiminilh ju ixvaiti ju Jesús. 14 Acsni tʼalhnucalh ju Xivan pus astan ju Jesús alh ju xaʼestado Galilea. Ixʼalacjuni ju lapanacni ni lhinomputun ju Dios laʼisʼatsucuntiʼan. 15 Chani ixʼalacjuni: ―Vaninch minta ju avilhchan acsni calhinonaʼ ju Dios. Tamch alacpʼastʼactʼit lamiʼalhunutʼan chai alacʼaʼitʼit ju chivinti junta najun ta yu laich apʼutʼakʼalhtʼaxtʼuyaʼitʼit. ―Chunch ixʼalacjuni. 16 Chai ju Jesús ixʼalhtanan laʼixquilhtuʼ ju xaʼatantsʼin Galilea acsni alaktsʼilh ju Simón ju vachuʼ ixjuncan Pitaluʼ chai ispʼisekʼe ju Tilix ixjuncan. Va ixtatʼajun munin ixchʼokxniʼan lacaʼatantsʼin ni ixchʼapanin pamata ixtajunita. 17 Chai ju Jesús alacjuni: ―Aquilachʼakʼokʼauch. Chai tachi ju ixmakʼaixtʼokʼatʼit ju pamata pus vana va chun aclaxtakniyau ju lhichʼalhcat ni amakʼaixtʼokʼaʼitʼit ju lapanacni ju aquintalhilacaʼanaʼ. ―Chunch ju alacjuni. 18 Pus lana tamacaulh ixchʼokxniʼan chai tachʼakʼokʼalh ju yuchi. 19 Chai ni alhtanampa alacatsʼunin ju Jesús pus alaktsʼilh ju Jacobo chai ispʼisekʼe ju Xivan ixjuncan. Istsʼalan ju Zebedeo. Ju yuʼunch ixtatajumanalh laʼixbarcoʼan. Va ixtatʼajun lacyonin ixchʼokxniʼan. 20 Pus lana alactʼasanilh ju Jesús. Chai ju yuʼunch tamacaulh ju ixpaiʼan ju Zebedeo ixjuncan. Tatʼamacaulh ju ixlapanacni ju lacabarco. Chai ju Jacobo chai ju Xivan tachʼakʼokʼalh ju Jesús. 21 Astan ju Jesús chai ju ixlapanacni tatanucha ju lakʼachakʼan Capernaum. Chai chaʼalh ju avilhchan paʼastacni acsni lhikʼalhtsʼaulh ju lhamapʼaksin ni catachʼalhcatnalh ju lapanacni. Pus ju acsnich ju Jesús alh laʼixpujitatʼan ju istʼaʼisraelitanin. Alh amamakaʼunuʼ. 22 Pus ju lapanacni ju ixtavilanalh va talhamakʼaninilh ta yu xaʼamalaninin ni ixʼalacmapʼaksinin tachi tam xakʼai. Jantu chun tachi ju ixtaʼamalaninin ju yuʼunch ju na ixtalhatalanininta ju ixlhamapʼaksinʼan. 23 Pus ju anuʼ laʼixpujitatʼan ixʼalin pumatam lapanac ju ixtanun ju lhacaticuru laʼixlacatuna. Pus ju anuʼ lapanac lana tsʼau tʼasalh acsni laktsʼilh ju Jesús. 24 Chai ju lhacaticuru puchivinilh ixquilhni ju lapanac acsni chani naulh: ―Tijuch ju quilamintau lhilaktsʼinin ji Jesús amachakaʼ Nazaret. Ja va quilamintauch macaʼanin lacajipi. Iccʼatsai tichi chavaichʼat. Ju uxintʼi salaka istsʼalh Diosʼat chai yuchi ju malakachachan ju ani. 25 Pus ju Jesús kʼailh ju lhacaticuru. Junich: ―Va sekch ju uxintʼi. Atʼaxtʼuch ju laʼixlacatuna ju lapanac. ―Chunch ju juni. 26 Chai ju anuʼ lhacaticuru lana tin lhineklh ju lapanac. Lhtucu lhtucu ucxuntama. Tsʼau tʼasalh chai taxtulh lana. 27 Pus tachi chun ju lapanacni va talhamakʼaninilh chai talasacmilh sia yuʼunch. Talaclajunich: ―Tijuch nuʼ ju ani. Tis sastʼi atalaninti nuʼ ju ani. Ju ani ya lapanac alin ixtachaput ni lai lhijuni ju lhacaticurulhni chai taquiclacaʼi. ―Chunch ju talaclajuni. 28 Pus lana cʼatsakʼocalh ixlacata ju Jesús tachi chun ju lakʼachakʼanixni ju alin ju xaʼestado Galilea. 29 Pus ju Jesús chai ju ixʼamamakaʼui tataxtucha ju laʼixpujitatʼan ju istʼaʼisraelitanin. Tachaʼalh laʼixchakaʼan ju Simón chai Tilix. Ixtaʼankʼota vachuʼ ju Tiyacu chai ju Xivan. 30 Pus ixputʼichakoʼulh ju Simón ixma laʼixputaman. Na ixchʼapata ju iscacat. Pus lana tajunilh ju Jesús ni na ixtakʼankʼai. 31 Pus ju Jesús lana lakʼalh junta ixma ju takʼankʼan. Chʼapanilh ju ixmacaʼ chai makʼostola. Lana macaulh ju iscacat chai lana taya chai tsuculh alacmavanaʼ ju Jesús chai ixʼamamakaʼui. 32 Chai acsni tokʼoxalhch lacatsʼunin acsni ancha ju avilhchan pus tachi chun ju takʼankʼanin alhimincalh junta ixvi ju Jesús. Vachuʼ alhiminicalh tachi chun ju ixtanun ju lhacaticuru laʼixlacatunaʼan. 33 Pus tachi chun ju lapanacni tatakʼaixtoktayakʼo laxamalhtich ju ixchakaʼ ju Simón. 34 Chai ju Jesús na lhu palaich anavi ju takʼankʼanin mas na tijlhu takʼankʼat ixtapacxanta. Vachuʼ akʼailh ju lhacaticurulhni. Ajunilh ni catataxtulh laʼixlacatunaʼan lhu ju lapanacni. Chai tataxtulh. Para ju Jesús jantu xaʼalacasqʼuini ni catachivinilh ju lhacaticurulhni va ixlacata ni istamispai ju Jesús. Chai ju yuchi va jantu ixlacasqʼuin ni catajunilh ju lapanacni tichi chavaich ju yuchi. 35 Na vatsʼisin kʼostavi ju Jesús. Istsʼistacaʼ acsni taxtulh va isʼakstu. Alh ju lacamacni. Anch ju tʼachivincha ju Dios. 36 Pus ni tunculh ju Simón chaich ju aliʼin taʼalh puxconin. 37 Chai acsni talhitajucha ju Jesús tajuni: ―Chux ju lapanacni tapuxcoyan. 38 Para ju Jesús alacjuni: ―Caʼauch ju lakʼachakʼanixni ju vanin vi ni laich camasunitachau vachuʼ ixchivinti Dios ni yuchi ju iclhiminta ju quitʼin. 39 Pus ju Jesús ixlacʼaktanutʼajun ixlhilakapokʼai ju xaʼestado Galilea. Ixʼamalaninin laʼixlacpujitatʼan ju xalapanacni anch. Chai ixʼalacxcoxtuni ju lhacaticurulhni laʼixlacatunaʼan lhu ju lapanacni. 40 Pus pumatam lapanac ixpacxanta ju macxcai tsʼitsʼi ju ixpuchʼiʼan. Chai ju yuchi lakmilh ju Jesús. Taʼaktsokotanilh. Juni: ―Ni va xaqʼuincʼuchʼupʼutʼuch cava pus laich xaqʼuincʼuchʼutʼi. 41 Pus ju Jesús na mapainilh ju takʼankʼan. Lana mokslanilh ixmacaʼ laʼixlacatuna ju takʼankʼan chai junilh: ―Iclacasqʼuinch. Palaichʼat ju chavai. 42 Chai acsni naulh ju chunch ju Jesús pus lana vatsʼalhti lacmacaxnilh ju istsʼitsʼi ju anuʼ lapanac. 43 Chai ju Jesús na mapʼaksi chai malakachalhch laʼixlacpujitatʼan ju istʼaʼisraelitanin. Junich: 44 ―Akʼasmatʼich ju icjunan. Tun xamatiʼ tʼiʼun tuʼuʼ. Inchich talacasuniniʼ ju pali. Chai axtʼakchich ju milhakʼailaktsʼin tachi ju najunta ju Moisés lacalhamapʼaksin. Ju chunch catacʼatsayach ju lapanacni ni salaka ju milacatuna. ―Chunch ju junicalh ju takʼankʼan ixjunita. 45 Para ju anuʼ takʼankʼan ixjunita acsni taxtucha ju laʼixʼucxlacapuʼ ju Jesús lana lacquilhuntsuculh tuchi ixtapasata. Chai ni xatacʼatsakʼojui ju lapanacni pus ju Jesús jantu lai ixtanui ju tuʼuʼ lakʼachakʼan va laʼixʼucxlacapuʼan ju lapanacni. Va lacamacni ixtolacha. Chai ju anch na lhu lapanacni ixtalakchaʼan ju vaklhun ixtamintacha.
1 Astan acsni tapasalh lakatam lakatʼui avilhchan pus ju Jesús anchokopa ju lakʼachakʼan Capernaum. Chai tacʼatsapa ju lapanacni ni anch vilhchokochalhch ju Jesús laʼixchakaʼ. 2 Pus lana talhitakʼaixtokpa ju lapanacni ju laʼixchakaʼ ju Jesús. Chai ni na va ilhuʼan ixtajunita pus jantuch lai ixtalhijun ju lacachakaʼ. Pus ixchaʼantach ju lapanacni lacamalhtich acsni ixʼalacmasuni ju ixchivinti Dios ju Jesús. 3 Pus lhimincancha pumatam takʼankʼan ju va ixlacalhtuculunta. Ixlhipumatʼatʼiʼan lapanacni tachʼixlhichaʼalh ju lacachakaʼ junta ixvi ju Jesús. 4 Para jantu jintaʼ talhitaju junta laich catapumanu lacachakaʼ junta ixvi ju Jesús ni na isʼaktsamcanta. Pus tatocʼalh laʼixʼucxni chakaʼ chai taʼucxmakʼalh junta ixlhivi ju Jesús. Chai anch ju tapumakʼalhtaju lacalona ju anuʼ takʼankʼan. 5 Chai ju Jesús ni cʼatsa ni na ixtalhilacaʼanta ju yuchi ju anuch ixpumatʼatʼiʼan lapanacni pus junich ju takʼankʼan: ―Quintsʼalh macʼacxanikʼocantach ju mintalakʼalhin. 6 Pus ixtavilanalh vachuʼ ju na ixtalhatalanininta ju ixlhamapʼaksinʼan ju istʼaʼisraelitanin. Chai ju yuʼunch chani istapastacta laʼixʼalhunutʼan: 7 “Tas ni va ta chivimpalai ju ani ya lapanac. Na macxcai chivinti ju najun ni tachi ju va Dios ju jumputun. Jantu xamatiʼ lai macʼacxai ju talakʼalhin. Va yuchi ju Dios”. 8 Para ju Jesús lana cʼatsa tuchi istapastʼacʼa ju anuch lapanacni. Chai alacjuni: ―Tajuch ni va chunch ju pʼastʼacʼatʼit lamiʼalhunutʼan. 9 Ni acjunilh ni macʼacxanicalh ju ixʼalactuʼunti pus jantu lai apʼucʼatsʼayaʼitʼit ni vasalh alin ju quintachaput u jantu. Para ni acjunilh ni cakʼostavi chai caʼalhtanalh pus ju chunch lai apʼucʼatsʼayaʼitʼit ni alin ju quintachaput. 10 Pus alaktsʼintʼit ju ani ju acnaviyaʼ chai laich apʼucʼatsʼayaʼitʼit ni alinch ju quintachaput ju ani lacamunutpaʼ ni lai icmacʼacxani ju talakʼalhin. Quitʼin ju quimalakachatachilh Dios ni lapanac actsucuyaʼ ju ani. Chai ju acsnich ju Jesús junich ju takʼankʼan: 11 ―Uxintʼi ju icjunan. Akʼostʼaʼulh. Asactʼich ju mimputaman. Aʼinchich ju laminchakaʼ. 12 Pus ju anuʼ takʼankʼan ixjunita taya. Saclh ju ixputaman. Chai taxtulh laʼixʼalacʼavantiʼan chux ju lapanacni. Chai ju yuʼunch na talhamakʼaninilh. Talakʼaya ju Dios. Chai talaclajuni: ―Jantu tavanan laktsʼintau tuʼuʼ ju chunch. 13 Pus aktam taxtuchokopa ju Jesús. Alh laʼixquilhtuʼ ju atantsʼin. Pus chux ju lapanacni talakchaʼankʼochokopa chai ju yuchi ixʼalacmalani. 14 Chai acsni tavanan anchokolh ju Jesús ju lakʼachakʼan pus laktsʼilh pumatam achʼiniʼ ju Leví ixjuncan. Istsʼalh ju Alfeo. Ju yuchi ixvi junta amapalanancan. Chai ju Jesús juni: ―Aqʼuinchʼakʼokʼach. Pus lana taya ju Leví. Chʼakʼokʼalh ju Jesús. 15 Pus ju aktam ju Jesús ixtʼajun venaʼ laʼixchakaʼ ju Leví. Chai vachuʼ na lhu tachaʼalh ju achʼinin chai vachuʼ ju aliʼin alactuʼunu lapanacni. Chai va kʼaixtam tatʼatavi ju Jesús chai ju ixʼalacmamakaʼuich lacamixa ni na lhu ixtachʼakʼokʼai ju Jesús. 16 Pus ju na ixtalhatalaninintach ju ixlhamapʼaksin ju istʼaʼisraelitanin chaich ju ixtalhilacaʼan ju ixlhamapʼaksinʼan ju fariseonin talaktsʼilh ju Jesús ni ixʼalactʼavajin ju taʼachʼinin chai ju alactuʼunin. Pus ju yuʼunch tajunilh ju ixʼalacmamakaʼui ju Jesús: ―Ju miʼamamakaʼunuʼan tajuch ni va kʼaixtam alactʼavajin ju achʼinin chai ju alactuʼunin. 17 Pus ju Jesús acsni kʼasmatlh ju tuchi ixtanajun chani alacjuni: ―Ju kʼox tatʼajun jantu tamaktasqʼuini ju acʼuchʼunuʼ. Va yuʼunch ju talactakʼankʼai ju tamaktasqʼuini ju acʼuchʼunuʼ. Pus ju quitʼin jantiyuʼ iclhiminta ni acʼalactʼasanilh ju laquimacni ju tanajun ni na soknicʼa ju isʼatsucuntiʼan. Alai icminta alactʼasaniniʼ ju alactuʼunin. 18 Pus ju ixʼalacmamakaʼui ju Xivan chai ju fariseonin jantu ixtavajin ju anuʼ avilhchan ni chunch ju ixtalhilanita. Pus ju acsnich ju aliʼin lapanacni talakmilh ju Jesús chai tajuni: ―Tajuch ni va tatascajai ju ixʼalacmamakaʼui ju Xivan chai ixʼalacmamakaʼui ju fariseonin. Para ju mintamamakaʼun ju uxintʼi jantu tatascajai. 19 Pus ju Jesús alackʼalhtailh. Alacjuni: ―Tachi chun ju tamakʼachʼakʼokʼanan junta alin ju tamakʼaxtʼokʼat ja lai jantu catavailh ni alinch ju kʼachat ni vilhcaʼ ju anuʼ tsʼalh ju catamakʼaxtʼokʼaʼ. Acsni vilhcaʼ ju anuʼ tsʼalh ju catamakʼaxtʼokʼaʼ pus jantu lai tatascajai ju ixʼamigojni. 20 Pus vana va chun ju quintamamakaʼun. Jantu tatascajai ju chavai ni icʼalactʼavi. Para cachinaʼ avilhchan acsni acmakʼosucanaʼ ju ani lacamunutpaʼ. Chai acsnich ju catatascajayaʼ ni na aquintalhamakʼanininach. 21 Jantu xamatiʼ lai lhalakyavanan ju pumpuʼ ju jantu amakpanti chai lai va chunch camucʼalh ju lacakʼatʼili pumpuʼ. Pus ni chunch ju calalh pus va palai makat cakʼexlh acsni talakatumi ju sastʼi pumpuʼ. 22 Nin yuchi ni lai acpumuju ju sastʼi vino lacakʼatʼili axtʼakʼan ni na kʼalhpʼasnicaʼ. Ni chunch ju acnavi pus va cakʼexlh ju axtʼakʼan chai capuʼankʼo ju vino chai ju axtʼakʼan catsʼankʼalh. Alai pumucan ju sastʼi vino lacasastʼi axtʼakʼan. Chunch ju ajuni ju Jesús ju lapanacni ni va ixʼamamachakxaniputun ni jantu lai catilhiyaulh ju makʼaniya ixlhamapʼaksin ju Moisés ju ixlhamapʼaksin ju yuchi. 23 Lakatam avilhchan paʼastacni ju Jesús tapasalh junta ixchʼancanta ju trigo. Chai ixʼalacmamakaʼui ixtapʼuxlhiʼanta ju trigo chai ixtaʼuich. 24 Pus ju acsnich ju fariseonin tajunich ju Jesús: ―Alaktsʼich. Tajuch ni va chunch tanavi ju miʼamamakaʼui ni jantu lai chʼalhcatnancan ju chavai ni avilhchan paʼastacni. 25 Para ju Jesús alacjuni: ―Ja lana jantu pʼastʼacʼatʼit tuchi navilh ju David acsni ixʼalin ixmaktasqʼuinit chai acsni chavanilh ju yuchi chai ju ixtatʼaʼanta. 26 Ja lana jantu pʼastʼacʼatʼit ni tanulh ju yuchi junta ixlakʼayacan ju Dios acsni xakʼai pali ixjunita ju Abiatar. Chai ulh ju xkapavati ju ismokslanicanta ju Dios. Pus ju anuʼ xkapavati jantu lai va kʼaya ixʼucan. Va yuʼunch ju palijnin ju lai ixtaʼui. Para ju David ni upa chai vachuʼ alacxtaknipa ju ixʼalactʼaʼanta. 27 Ju Jesús vachuʼ alacjuni: ―Ju Dios lhcaʼula ju avilhchan paʼastacni ixlacata ju lapanacni. Jantiyuʼ lhinavilh ju lapanacni ni va catamuctaxtulh ju lhamapʼaksin ju navilh ju Dios ixlacata ju anuʼ avilhchan. 28 Pus quitʼin ju lai icnajun tuchi lai navican ju avilhchan paʼastacni. Quitʼin ju quimalakachatachilh Dios ni lapanac actsucuyaʼ ju ani.
1 Ju Jesús aktam tanuchokopa laʼixpujitatʼan ju istʼaʼisraelitanin. Chai ixtanumacha pumatam lapanac ju va ixixnita lakatam ixmacaʼ. 2 Chai vachuʼ ixʼalin ju anch ju lapanacni ju ixtalhistactʼajun ju Jesús. Va ixtalaktsʼimputun ni caʼacʼuchʼunulh ju avilhchan paʼastacni u jantu. Va ixtapuxconi ta yu laich catapumucʼani ixtalakʼalhin. 3 Pus ju Jesús junilh ju anuʼ lapanac ju va ixixnita ju ixmacaʼ: ―Akʼostʼaʼulh. Atʼaich ju ani junta laich catalaktsʼinan ju lapanacni. 4 Chai alacjunich ju lapanacni: ―Tʼas nonatʼit. Ja lhijun ni acnavi ju kʼox ju avilhchan paʼastacni u acnavi ju talakʼalhin ni jantu acʼaktaiju tam xamatiʼ. Ja lhijun ni acmakʼalhtaxtulh ju atsucunti ju avilhchan paʼastacni u aclaktsʼimakni. Pus ju lapanacni va sekch tataya. 5 Pus ju acsnich ju Jesús alaktsʼilh ju lapanacni ju ixtalakachoko. Talhkʼamalh. Chai na amakʼaninilh ni na pʼas ixjunita ixʼalhunutʼan. Pus junich ju takʼankʼan: ―Alhitʼach ju mimacaʼ. Pus ju anuʼ lapanac xtaknilh ju ixmacaʼ. Chai lana tachapunch va. 6 Pus lana tataxtucha ju fariseonin. Taʼalh junta ixtavilanancha ju ixtachʼakʼokʼai ju gobernador Herodes. Taʼalh machʼanxtaminin ju chivinti ixlacata ju Jesús ta yu laich catapumakniyaʼ. 7 Pus ju Jesús alh laʼixquilhtuʼ atantsʼin. Alactʼaʼalh ju ixʼalacmamakaʼui. Chai na lhu tachʼakʼokʼalh ju amachakʼan xaʼestado Galilea chai ju amachakʼan ju xaʼestado Judea. 8 Vachuʼ ju amachakʼan lakʼachakʼan Jerusalén chai ju amachakʼan ju xalacatʼun Idumea. Chai ju lapanacni ju ixtatʼajun lhimakʼantacutni lacxcan Jordán chai ixtalakachoko ju lakʼachakʼanixni Tiro chai Sidón. Na lhu lapanacni takʼasmatlh ni na kʼai lhamakʼan xanavi ju Jesús chai talakmilh ju yuchi. 9 Pus ju Jesús alacjuni ju ixʼalacmamakaʼui ni catalakasipuxcaulh lacatʼicstʼi barco ni laich cataju anch ni na ixtatankʼasi ju lapanacni ni na ilhuʼan. 10 Pus ni na lhu ixʼacʼuchʼui ju lapanacni ju Jesús pus ju aliʼin ju ixtapacxanta ixtakʼankʼatʼan va kʼasi kʼasi ixtalakʼan ju Jesús. 11 Chai vachuʼ ixʼalin ju lapanacni ju ixtanun ju lhacaticurulhni laʼixlacatunaʼan. Chai ju anuʼ lhacaticurulhni ixtamispai ju Jesús. Pus ju lapanacni ju ixtapacxanta ju lhacaticurulhni taʼaktsokotanilh laʼixʼucxlacapuʼ ju Jesús chai ju lhacaticurulhni tapuchivinilh ixquilhniʼan ju anuch lapanacni. Na pʼas tachivinilh. Tajunich ju Jesús: ―Ju uxintʼi istsʼalhʼat Dios. 12 Para ju Jesús pʼas alhimapʼaksi ni jantu catajunilh ju lapanacni tichi lapanac ju yuchi. 13 Chai ju Jesús ampa junta ixvilhcha lakatam akstijun chai alactʼasanilh ju isʼasacxtuputun. Chai ju yuʼunch talakmilh. 14 Pus asacxtulh pumacautʼui ixʼalacmamakaʼui ni laich caʼalactʼaʼalhtanatsuculh ju yuchi chai ni laich caʼalacmalakachayaʼ ixnajunca ju ixchivinti Dios. 15 Vachuʼ axtaknilh ixtachaputʼan ni laich palai catanavi ju lapanacni ju ixtachʼapata ixtakʼankʼatʼan. Chai laich vachuʼ cataxcoxtuniyaʼ ju lhacaticurulhni laʼixlacatunaʼan ju lapanacni. 16 Pus sacxtucalh ju Simón. Chai ju yuchi xtaknichokocalh alakatam ixtapakaʼut. Lhimapakaʼucalh Pitaluʼ. 17 Chai sacxtucalh ju Jacobo chai ju Xivan. Pus ju Xivan ispʼisekʼe ixjunita ju Jacobo. Chai ju yuʼunch istsʼalan ju Zebedeo ixtajunita. Axtaknilh ixlhilakatʼui ixtapakaʼutʼan. Alaclhixakʼalacalh Boanerges. Ju chunch va nomputun ni na pʼas ixtachivinin tachi acsni tʼasai ju tʼajin. 18 Chai sacxtucalh ju Tilix chai ju Pilipe chai ju Bartolomé chai ju Mateo chai ju Tumax chai apumatam Jacobo ju istsʼalh Alfeo ixjunita. Chai sacxtulh ju Tadeo chai apumatam Simón ju makyuʼunch ixjunita ju cananistanin. 19 Vachuʼ sacxtucalh ju Judas Iscariote ju astan makʼaxtaklh ju Jesús. Astan ju Jesús alactʼaʼalh ju ixʼamamakaʼui lacachakaʼ. 20 Chai aktam tatakʼaixtokpa ju lapanacni. Chai ixlhiyuchi matiʼ ixjunita ju ispantsʼiquisʼan ju Jesús chai ixʼamamakaʼui ni laich catavailh. 21 Pus acsni takʼalhakʼasmatlh ju ixlhiʼalakʼavin ju Jesús ni chunch ixlai pus tamilh inin. Va ixtanajun ni jantu isʼacʼatsananta ju Jesús. 22 Vachuʼ ixtaʼalin ju lapanacni ju ixtalhatalanininta ju ixlhamapʼaksin ju istʼaʼisraelitanin. Ju yuʼunch ixtamintacha ju lakʼachakʼan Jerusalén. Pus ju yuʼunch ixtanajun ni va ixtanun ju Satanás laʼixlacatuna ju Jesús. Chai laʼixtachaput yuchi ju ixtixcoxtui ju lhacaticurulhni laʼixlacatunaʼan ju lapanacni. 23 Pus ju acsnich ju Jesús alactʼasanilh ju anuch lapanacni chai alacjuni ju chivinti ju ixʼapumavasalaniputun tuʼuʼ. Chani ju ajuni: ―Ju Satanás jantu lai catixcoxtulh ixtʼalhacaticurulhni. 24 Tachi chun ju kʼai lacatʼun junta lhinajun ju tam kʼai ucxtin ni quilhmaclhu cajuncalh chai catalaclasayaʼ ju sia isʼakstuʼan pus va caʼaclayaʼ. 25 Chai ju tatanumanalh lacachakaʼ ni va catalasachokolh ixlhiʼakstuʼan pus jantu lai vana lakputam catatsuculh. 26 Chai vana va chun ju lhacaticuru. Ni caʼatixcoxtulh ju aliʼin ixtʼalhacaticurulhni pus tulai tailhiʼan laʼixpuʼucxtin. Alin ixʼaclanti ju ixtachaput. 27 Ni xamatiʼ catanuputulh laʼixchakaʼ pumatam jokʼat ju na tachapun chai camaxtuniputulh ju ixtaxtokni tasqʼuini ni pʼulhnan camakchʼimalh ju anuʼ jokʼat. Acsnicaʼ ju lai camaxtunilh ju ixtaxtokni ni va jantu lai tamacyajui. Pus chunch ju ajuni ju lapanacni ju Jesús ni ixʼamamachakxaniputun ni yuchi ju tʼalalhajalh ju lhacaticuru. Yuchi lai lhixcoxtui ju lhacaticurulhni laʼixlacatunaʼan ju lapanacni. Chai tailhiʼalh ixchivinti. Ajuni: 28 ―Slivasalh ju iclajunau. Tachi chun ju talakʼalhin chai va tuchi macxcai chivinti ju tanajun ju lapanacni laich camacʼacxanicanaʼ. 29 Para va tichi chavaich ju macxcai chivinti calhichivinilh ju Spiritu Santu jantu tavanan lai catimacʼacxanicalh ju anuʼ alactuʼunti. Va camucʼanikʼalhicanaʼ ju ixtalakʼalhin. 30 Ju Jesús chunch ju ajuni ju lapanacni va ixlacaʼatalh ni ixtanajunta ni lhacaticuru ju ixpuchʼalhcatnan ju Jesús. 31 Astan tachincha ju isʼapʼisekʼen ju Jesús chaich ju ixnati. Tataya makspaʼ chai talhinaulh istʼasanica ju Jesús. 32 Pus ju lapanacni ju ixtalakavilanalh ixtalakachokoch ju Jesús tajuni: ―Ju minati chai ju miʼapʼisekʼen tapuxcoyan makspaʼ. 33 Para ju Jesús alackʼalhtailh. Alacjuni: ―Tis chavaich ju quinati chai quiʼapʼisekʼen. 34 Chai acsni naulh ju chunch pus ju Jesús alaktsʼilh ju ixtalakavilanalh ixtalakachoko ju yuchi chai naulh: ―Ju anich tavilanalh yuʼunch ju quinati chai quiʼapʼisekʼench. 35 Va tichi chavaich ju canaviniyaʼ ju ixkʼachat ju Dios yuchi ju vasalh quimpʼisekʼe chai vasalh quinati.
1 Ju Jesús aktam taiʼulachokopa ixʼamalaninti laʼixquilhtuʼ atantsʼin. Chai ni na lhu tatakʼaixtokpa ju lapanacni junta ixvi pus ju Jesús taju lacabarco ju ixvi laʼixquilhtuʼ atantsʼin chai tavi ni laich caʼamalanikʼolh ixchuxʼan. Chai tachi chun ju lapanacni lacatʼun ixtayanalh laʼixquilhtuʼ atantsʼin. 2 Chai ju Jesús na lhu taxtokni xaʼamalani ju lapanacni lacachivinti ju ixtʼalaktsʼipaxcavaich ju tuʼuʼ. Chai acsni xaʼalacmalani chani alacjuni: 3 ―Akʼasmatʼitch ju aclajunau. Pumatam achʼananaʼ alh lhavanaʼ ju ixʼachʼananti. 4 Chai acsni ixtʼajun lhavanaʼ ju ixʼachʼananti pus ju aliʼ xatʼin tama laʼixquilhtuʼ ti. Chai lana tamilh ju tsʼokʼo chai tasacʼulh. 5 Chai ju alacatsʼunin ju xatʼin tamacha junta va lacatsʼunin ixʼalin ju tʼun laʼixʼucxni ju chiux. Pus vatsʼalhti pʼunlh ju tʼin ni jantu lhu ixʼalin ju tʼun. 6 Para acsni na lhiʼichich va pus lana lacxixlh ni va jantu makat ixtinui istisivic. 7 Chai ju alacatsʼunin ju xatʼin tamacha junta vachuʼ ixma ju xatʼin alhtucunuʼ. Pus pʼulhnan takʼaya ju alhtucunuʼ chai akxtakma ju anuʼ achʼananti chai jantu tuʼuʼ xtaklh ju xatocʼat. 8 Ju alacatsʼunin xatʼin tamacha lacakʼoxi tʼun. Pʼunlh. Takʼaya. Chai tocʼalh ju xalhiʼut. Pus talhava ju akatamin achʼananti. Ju aliʼ tocʼalh lakapʼuxamcau ju xalhiʼut. Ju aliʼ achʼananti tocʼalh sesenta ju xalhiʼut. Ju aliʼ achʼananti tocʼalh tam cientos ju xalhiʼut. 9 Ju acsnich ju Jesús alacjuni ju lapanacni: ―Va tichi chavaich ju alin ixpakʼasmatni pus cakʼasmatlh. 10 Astan acsni taʼanchokolh laʼixchakaʼan ju ixtalhavat lapanacni pus ju ixpumacautʼuiʼan chai ju aliʼin ixʼalacmamakaʼui ju ixtatʼavilanalhcaʼ ju Jesús tatsuculh sacminin tuchi ixnomputun ju chivinti ju xanajun. 11 Chai ju Jesús alacjuni: ―Ju uxijnan lacʼasqʼuinicʼantʼatʼit ni amachʼakxayatʼit ju chivinti ju najun ni lhinomputun ju Dios laʼisʼatsucuntiʼan ju lapanacni. Para ju aliʼin lapanacni ju jantu quintalhilaksiputun va amasunican ixtaxtokni Dios laca tuʼuʼ chivinti ju ixtʼalaktsʼipaxcavaich ju tuʼuʼ. 12 Ju chunch ju yuʼunch mas va tachi talaktsʼin tuchi icnavi para jantu catitamispa tuchi nomputun. Chai mas va tachi tatʼajun kʼasmatnin ju quinchivinti para jantu tavanan catitamachakxa. Ju chunch jantu lai tam cativa ju isʼatsucuntiʼan. Chai jantu tavanan camacʼacxanicanaʼ ju ixʼalactuʼuntiʼan. 13 Chai ju Jesús chani alacjuni ju ixʼamamakaʼui: ―Ni jantu lai machʼakxayatʼit ixlacata ju achʼananaʼ ju ixtʼalaktsʼipaxcavaich ju tuʼuʼ pus tʼas alhimachʼakxayaʼitʼit ju aliʼ chivinti ju tʼalaktsʼipaxcavaich tuʼuʼ. 14 Pus chani ju nomputun. Ju achʼananaʼ yuchi ju najun ixchivinti Dios. Tachi ju va chʼan ju chivinti laʼixʼalhunutʼan ju lapanacni. 15 Chai ju xatʼin ju tamacha vanin laʼixquilhtuʼ ti yuʼunch ju takʼasmatʼa ixchivinti Dios para astan min ju lhacaticuru chai macʼapʼani ju chivinti ju ixʼachʼananicanta laʼixʼalhunutʼan. 16 Chai ju xatʼin ju tamacha laʼixʼucxni chiux yuʼunch ju takʼasmatlh ixchivinti Dios chai lana lhikʼach talacaʼi. 17 Para chunch tajunita tachi ju anuʼ xapʼun laʼixʼucxni chiux. Ju yuʼunch jantu vasalh laʼixlhichux ixʼalhunutʼan ju takʼachani. Va pantsʼiquis kʼox talhiulai. Para acsni min ju tuʼuʼ makʼalhkʼajnat u tuʼuʼ axcayanti va ixlacata ni talacaʼinita ju ixchivinti Dios pus lana tamacajun ixti Dios. 18 Chai ju xatʼin ju tamacha junta ixʼalin ju xatʼin alhtucunuʼ pus yuʼunch ju takʼasmatʼa ixchivinti Dios. 19 Para va tachi talhamakʼaninin ju xataxtokni ju alin ju ani lacamunutpaʼ. Chai va taputaʼokxchokʼoi ju tumin. Chai na lhu taxtokni ju tatamoputun. Pus tachi chun ju ani taxtokni va amacʼapʼani ju ixchivinti Dios ju ixʼachʼananicanta laʼixʼalhunutʼan. Chai jantu tavanan tasui ixtachaput Dios laʼisʼatsucuntiʼan. 20 Para ju xatʼin ju tamacha lacakʼoxi tʼun yuʼunch ju takʼasmatʼa ju ixchivinti Dios chai lana talacaʼi. Chai lana tasui ixtachaput ju Dios laʼisʼatsucuntiʼan. Ju aliʼin va lacatsʼunin tasui ju ixtachaput ju Dios laʼisʼatsucuntiʼan. Ju aliʼin lapanacni palai lhu tasui ixtachaput Dios laʼisʼatsucuntiʼan. Chai ju aliʼin lapanacni na lhu lana tasui ixtachaput Dios laʼisʼatsucuntiʼan. 21 Ju Jesús vachuʼ alacjuni ju lapanacni: ―Acsni lhimincan ju tuʼuʼ maclhcu ju lacachakaʼ jantu va akxtakʼulacan laca tuʼuʼ valhtila nin laxtankʼapuʼ acapuʼ caʼula. Alai va mucʼacan talaclhman junta mucʼacan ju maclhcu. 22 Chai vana va chun ju quinchivinti. Mas va miʼakstuʼan xaclamavasalaniyau ju chivinti para astan amacʼatsʼaniyaʼitʼit ju lapanacni. Chai tuchi chivinti ju jantu amamachakxanican ju ixtalhavatʼan lapanacni pus uxijnan ju amacʼatsʼaniyaʼitʼit. 23 Pus ju alin ixpakʼasmatni pus cakʼasmatlh. 24 Vachuʼ chani alacjuni ju lapanacni: ―Anavitʼit cuenta ju tuchʼi kʼasmatʼatʼit. Ni anaviyaʼitʼit cuenta ju tuchi iclajunau pus palai lhu catamakʼasmatniyan ju Dios. Chai palai lhu amachʼakxayaʼitʼit ju uxijnan ni vasalh anaviyaʼitʼit cuenta ju quinchivinti. 25 Pus ju navi cuenta ju tuchi kʼasmatʼa pus palai lhu camakʼasmatnicanaʼ. Para ju jantu tuʼuʼ navi cuenta ju tuchi kʼasmatʼa pus camacʼapʼanicanaʼ ju lacatsʼunin ju makʼata laʼixʼalhunut. 26 Ju Jesús vachuʼ chani alacjuni ju lapanacni: ―Acsni lhinajun ju Dios laʼixʼalhunutʼan ju lapanacni chunch ju tapasai tachi ju tapasai acsni achʼananan tam jokʼat. 27 Pus ju yuchi lhtatai ju tsʼis. Chai vatsʼisin kʼostolai. Para va isʼakstu pʼun ju ixʼachʼananti. Takʼayai. Para ju anuʼ achʼananaʼ jantu machakxai tas lhipʼunch. 28 Pus va lacatʼun ju pʼun. Pʼulhnan ju xaxkʼoi ju pʼun. Astan alinch ju xaxivic. Chai ju astan xacuxich ju tocʼai. 29 Chai acsni cʼatʼatach ju xatocʼat pus lana caʼaxkʼanancanach ni kʼoxich cʼatʼatach. 30 Ju Jesús vachuʼ chani alacjuni ju lapanacni: ―Tijuch nuʼ ju ixtʼachunch jumputun tachi acsni lhinajun ju Dios laʼisʼatsucuntiʼan ju lapanacni. 31 Pus acsni lhinajun ju Dios laʼisʼatsucuntiʼan ju lapanacni pus na lhu talhilacaʼan ju Dios. Chunch ju tapasai tachi ju tapasai acsni chʼancan ju xatʼin mostaza ju lacatʼun. Pus ju anuʼ tʼin yuchi ju palai lactʼicstʼi tachi chun ju tʼin ju alin ju ani lacamunutpaʼ. 32 Para acsni chʼancan takʼayai. Chai palai katakʼaich jun tachi chun aliʼ achʼitin. Chai ju tsʼokʼo lai taʼastacnan laʼixmakpu ju anuʼ achʼananti. 33 Ju Jesús na tijlhu chivinti ju ixʼajuni ju lapanacni ju ixtʼalaktsʼipaxcavai ju tuʼuʼ. Para va yuchi ixʼajuni ju laich ixtamachakxai. 34 Chai va tapakchux ju ixʼamalani ju lapanacni aktsʼiya ixpuxcajui ju chivinti ju lai ixtʼalaktsʼipaxcavai ju tuʼuʼ. Para acsni va isʼakstu ixʼalactʼatolai ju ixʼalacmamakaʼui pus lana vas ixʼalacmavasalanikʼojui chux ju chivinti ju ixʼajunita ixtalhavat lapanacni. 35 Chai ju anuʼ avilhchan acsni tokʼoxalhch pus ju Jesús alacjuni ju ixʼalacmamakaʼui: ―Catapasauch ju lhimakʼantacutni atantsʼin. 36 Pus talacmacaulh ju ixtalhavat lapanacni chai talhiʼalh ju Jesús lacabarco junta ixvi acsni ixʼamalani ju lapanacni. Chai ixʼalin vachuʼ ju aliʼin lapanacni ju ixtatʼaʼan lacalacatʼicstʼi ixbarcoʼan vachuʼ. 37 Pus kʼostaya ju kʼai un chai na pʼas tanekʼelh ju xcan. Chai ixquitanuich lacabarco. Pus ju barco va isʼaktsamputun ju xcan. 38 Para ju Jesús va ilhtatai laʼixtimusni ju barco. Laʼisʼaktsʼi ixlacpatai. Pus ju ixʼalacmamakaʼui tamaklokʼo ju Jesús chai tajuni: ―Amamakaʼunuʼ ju uxintʼi ja jantu tuʼuʼ xcaniyan ni tʼonau ninin lacxcan. 39 Pus ju Jesús kʼostavi. Kʼailh ju un. Chai juni ju xcan: ―Va sekch atʼaʼulh. Pus lana va sek avanalh chai jantu lucunulh ju xcan. 40 Chai ju Jesús alacsacmi ju ixʼamamakaʼui: ―Tajuch ni va tʼalhananatʼit. Ja jantu lana quilalhilacaʼanau. 41 Pus ju ixʼalacmamakaʼui lana na talhamakʼaninilh. Talaclajunich sia yuʼunch: ―Tis chavaich nuʼ ju ani ni laich taquiclacaʼi ju un chai ju xcan.
1 Pus ju Jesús chai ixʼamamakaʼui tachaʼalh ju lhimakʼantacutni atantsʼin junta ixtʼunʼan ixjunita ju amachakʼan Gadara. 2 Chai acsni tacutlh ju lacabarco ju Jesús pus lana xajchilh ju campusantu pumatam lapanac ju ixpacxanta ju lhacaticurulhni. Chai ju yuchi lana lakʼalh ju Jesús. 3 Pus ju anuch lapanac ixʼamachakʼananta ju campusantu. Chai nin lacacadena jantu xamatiʼ lai ixmakchʼi. 4 Va ta pakchux ixtachʼanchʼi chai ixtamakchʼi lacacadena pus ju yuchi va ixʼalackʼexkʼojui ju cadena. Pus jantu xamatiʼ lai ta ixnavi. 5 Chai ju tuncuj chai ju tsʼis va tachi istʼasatʼajun lacatalhpan chai ju campusantu. Ixlacamacʼatsanikʼocantach isʼakstu ju lacachiux. 6 Pus ju anuch lapanac acsni laktsʼilh ju Jesús ixlhimakat lana atsʼalalakʼalh. Taʼaktsokotanilh. 7 Chai ju lhacaticurulhni tapuchivinilh ixquilhni ju anuʼ lapanac. Chai na pʼas ju tachivinilh acsni taxakʼala ju Jesús. Tajunich: ―Tijuch ju quilamintau lhilaktsʼinin ju uxintʼi. Pus ju uxintʼi istsʼalhʼat Dios ju vilhcha lactʼiyan. Laʼixtapakaʼut ju Dios iclatapaininiyau. Jantu aquilamamakʼalhkʼajniu. 8 Pus ju lhacaticurulhni tapunaulh chunch ni Jesús ixʼajunita ni catataxtulh laʼixlacatuna ju anuʼ lapanac. 9 Chai ju Jesús sacmilh ju lapanac tuchi juncan. Chai ju yuchi akʼalhtayanalh: ―Legión icjuncan ni na quilhu quincʼan. Pus ju Legión ixtapakaʼut junita lhu taropajni. 10 Chai ju anuʼ lhacaticurulhni na pʼas tasqʼuinilh lamapainin ju Jesús ni jantu caʼaxcoxtulh ju anch lacatʼun. 11 Pus vanin ju anuʼ akstijun na lhu ixtatʼajun ju pʼaxnin. Va ixtatʼajun kʼexvenin. 12 Chai ixchuxʼan ju anuʼ lhacaticurulhni kʼasi tasqʼuinilh lamapainin ju Jesús. Tajunich: ―Aquilamacaʼauch laʼixlacatunaʼan ju pʼaxnin. Chach ictanuyau ju anch. 13 Pus ju Jesús alakʼaʼinilh. Chai ju anuch lhacaticurulhni acsni tataxtulh laʼixlacatuna ju anuʼ lapanac pus lana tatanu laʼixlacatunaʼan ju pʼaxnin. Chai ju ixtalhavat pʼaxnin lana tin taʼalh junta vak anta. Tatajucha lacaʼatantsʼin chai anch ju tanitajukʼo lacxcan. Pus ju anuch pʼaxnin ixtachaʼanta lakatʼui milh. 14 Pus ju ixtalhistʼacʼa ju pʼaxnin na tatalhanalh chai taʼatsʼalalh. Taʼalh nonin ju lakʼachakʼan chai ju lacacuxtun tuchi ixtapasata. Chai tataxtulh ju lapanacni amachakʼan anch. Taʼalh laktsʼinin tuchi ixtapasata. 15 Talakmilh ju Jesús. Chai talaktsʼilh ju anuʼ lapanac ju ixpacxanta lhu ju lhacaticurulhni. Para ju chavai ixmalakchʼininta junta ixvi. Chai ixtakʼoxinita ju isʼaktsulh. Pus na tatalhanalh ju lapanacni. 16 Chai ju lapanacni ju talaktsʼilh ju tuchi ixtapasata ixlacata ju anuʼ lapanac chai ixlacata ju pʼaxnin tanonkʼo. 17 Pus tachi chun ju lapanacni tatapaininilh ju Jesús ni cataxtulh laʼixtʼunʼan. 18 Chai acsni tanulh ju Jesús lacabarco pus ju anuʼ lapanac ju ixtaxtunita ju lhacaticurulhni laʼixlacatuna tapʼastu ixchʼakʼokʼaputun. 19 Para ju Jesús jantu lacasqʼuinilh. Va junich: ―Alai apʼinchich ju laminchakaʼ. Aʼunchich ju mintʼaʼamachakʼan ni na kʼai lhamakʼan ju xanaviniyan ju Dios lamilacatuna chai ni na xaʼaktaijuyan lacaʼamapaininti. 20 Pus ju anuʼ lapanac alh. Lacquilhuntsuculh ixlhilacaputsʼun ju lacatʼun junta ixʼalin lakacau lakʼachakʼanixni. Ajuni ju lapanacni ni na kʼai lhamakʼan ju navilh ju Jesús laʼixlacata. Pus va talhamakʼaninilh chux ju lapanacni. 21 Pus ju Jesús putapasachokopa aktam lacabarco laʼixlhimakʼantacutni ju atantsʼin. Pus talhitakʼaixtokpa lhu ju lapanacni. Chai ju Jesús taya laʼixquilhtuʼ ju atantsʼin. 22 Pus ju acsnich chincha pumatam lapanac ju Jairo ixjuncan. Ju yuchi pumatam xakʼai ixjunita sia yuʼunch ju ixtachʼalhcatnan laʼixpujitatʼan ju istʼaʼisraelitanin. Chai acsni lakchilh ju Jesús pus lana taquilhputanilh ju lacatʼun vanin laʼixchʼajaʼ. 23 Tapaininilh ju Jesús chai juni: ―Ju quintsiʼ tʼajun niniʼ. Aqʼuintʼapʼitʼi kʼai lamapainin. Amokslanitʼachiʼ ju mimacaʼ laʼixlacatuna ju yuchi ni palaich cajunaʼ. Jantu caniyaʼ. 24 Pus ju Jesús tʼaʼalh ju Jairo. Chai ixtalhavat lapanacni tachʼakʼokʼalh. Na ixtalatankʼasiʼanta. 25 Chai pumatam chakoʼulh ixmakʼanta. Chai ju yuchi lakacautʼui cʼata jantu ixlakxixta. 26 Na lhu ixmakʼalhkʼajnanta acsni ixtacʼuchʼui ju acʼuchʼunin. Chai ixmacaʼankʼotach tachi chun ju ixʼalinta para jantu tuʼuʼ ixlhitapalai. Va apalai ixlhitapʼasni. 27 Pus ju anuʼ chakoʼulh acsni kʼasmatlh ni na lai ixʼacʼuchʼunun ju Jesús pus lana puchincha laʼixpulacan ju Jesús junta ixʼalactʼaʼanta ixtalhavat lapanacni. Chai lakchaʼanilh ixpumpuʼ ju Jesús. 28 Va ixnajun laʼixʼalhunut ni mas va yuchi ni calakchaʼanilh lacatsʼunin ixpumpuʼ pus palaich cajunaʼ. 29 Pus vasalh. Acsni lakchaʼanilh ixpumpuʼ ju Jesús pus lana vatsʼalhti vak tamactalh ju ixtakʼankʼat. Chai lana ucsacʼatsa laʼixlacatuna ni palaich xajun. 30 Pus ju Jesús lana cʼatsa ni ixcʼuchʼuta xamatiʼ. Chai talakaspʼitlh junta ixʼanta laʼixtalhavat lapanacni chai alacjuni: ―Tis chavaich ju xaquilakchaʼani ju quimpumpuʼ. 31 Para ju ixʼalacmamakaʼui tajunich: ―Laktsʼinch ni na lhu lapanacni ju tatankʼasiyan ni tʼisacminimpʼalai tis chavaich ju xalakchaʼaniyan ju mimpumpuʼ. 32 Para ju Jesús alacʼavanalh laʼixtalhavat lapanacni ni va ixlaktsʼimputun tichi chavaich ju ixlakchaʼanita ju ixpumpuʼ. 33 Pus ju anuʼ chakoʼulh na ixʼaxqʼuipʼipʼitninta ni na ixtalhananta. Para ni cʼatsa tuchi ixtapasata laʼixlacatuna pus lakʼalh ju Jesús chai taʼaktsokotalh laʼixʼucxlacapuʼ chai jonkʼo tuchi ixlacaʼatalh ju lhilakchaʼalh chai ni palaich va. 34 Chai ju Jesús juni: ―Quintsiʼ ni xaqʼuilhilacʼapʼinch pus yuchi palai xalhiʼun. Lhikʼach apʼitʼi. Jantuch aktam apʼacxanaʼ ju ani mintakʼankʼat. 35 Pus acsni ixtʼajuncaʼ tʼachiviniʼ ju chakoʼulh ju Jesús pus tachincha ju lapanacni ju ixtataxtutachalh ju ixchakaʼ ju anuʼ xakʼai. Tajunich ju yuchi: ―Ju mintsiʼ nitach. Tajuch ni va jeks amavapʼalaʼ ju amamakaʼunuʼ. 36 Para ju Jesús acsni kʼasmatlh ju ixchivintiʼan lana junilh ju anuʼ xakʼai: ―Jantu atʼalhan. Va aqʼuilhilacʼapʼich. 37 Pus ju Jesús jantu lacasqʼuilh ni xamatiʼ cachʼakʼokʼalh. Va yuʼunch ju Pitaluʼ chai ju Jacobo chai ju Xivan ispʼisekʼe ju Jacobo. 38 Tamilh laʼixchakaʼ ju anuʼ xakʼai chai ju Jesús alaktsʼilh ixtalhavat lapanacni ni na ixtalackʼalhun. Na pʼas ixtalactʼasai. 39 Chai acsni tanucha ju Jesús lacachakaʼ pus alacjuni ju lapanacni: ―Tajuch ni na va lhilactʼasayapʼalatʼit chai na lhikʼalhumpʼalatʼit. Ju ani atsiʼ jantu nita. Va lhtatai. 40 Para ju lapanacni va talhitsʼiʼilh ju Jesús. Pus ju acsnich ju Jesús alacxcoxtokʼo ixchuxʼan. Va yuchi ixpaich ju anuʼ atsiʼ ju lhiʼalh chai ixnatich chai ju ixʼalactʼaminta. Va yuʼunch ju tatʼatanu junta ixma ju atsiʼ. 41 Chai ju Jesús chʼapanilh ixmacaʼ ju atsiʼ chai juni: ―Talita, cumi. Ju chunch va nomputun: Atsiʼ uxintʼi ju icjunan. Akʼostʼaʼulhch. 42 Pus ju atsiʼ lana kʼostavi. Alhtanalh. Ju yuchi lakacautʼui cʼata ixpacxanta. Pus slivasalh na talhamakʼaninilh ju lapanacni ju anch ixtavilanalh. 43 Para ju Jesús slivasalh alaclhimapʼaksi ju ixnati chai ixpai ju atsiʼ ni jantu xamatiʼ catamacʼatsani ju tuchi ixtapasata. Chai lana lhinaulh ixmavaca ju atsiʼ.
1 Ju Jesús taxtuchokopalhcha ju anch. Milh laʼixtʼun. Chai vachuʼ tatʼamilh ju ixʼalacmamakaʼui. 2 Chai acsni chaʼalh ju avilhchan paʼastacni pus ju Jesús alh laʼixpujitatʼan ju istʼaʼisraelitanin chai tsuculh amalaninin. Pus na lhu ju takʼasmatlh na talhamakʼaninilh ixʼatalaninti. Ixtalaclajuni: ―Tas anchach nuʼ ju xalani ju ani chivinti ju ani ya lapanac. Tis atalaninti ju najun ju yuchi. Chai tas lai lhinavipalai ju kʼai lhamakʼan. 3 Ni yuchi jumpalata ju axpitniʼ. Istsʼalh ju Malia. Ixlakʼau ju Jacobo chai ju José chai ju Judas chai ju Simón. Chai vachuʼ ani tatʼajun ju ixʼapʼisekʼench atsiʼin. Pus na taxcailich ju Jesús. 4 Para ju Jesús alacjuni: ―Ju lapanac ju najun ixchivinti Dios aktsʼiya tuʼuʼ lhiulacan vanta anchach ju an. Va ixtʼaʼamachakʼan chai ju ixtʼaʼamachivinti chai ixlhiʼalakʼavin ju jantu tuʼuʼ talhiulai. 5 Pus ju Jesús jantu lai tuʼuʼ xanavi kʼai lhamakʼan ju anch laʼixtʼun. Va yuchi ni mama ixmacaʼ laʼixlacatunaʼan ju takʼankʼanin chai acʼuchʼu. Para jantu ilhuʼan. 6 Pus ju Jesús na ixʼalaklhamakʼaninin ju lapanacni ni jantu ixtalhilaksi ju yuchi. Pus astan ixʼucxuʼan lakʼachakʼanixni ju vanin ixlacvi. Ixʼamasuni ju lapanacni ixchivinti Dios. 7 Pus alactʼasanilh ju ixpumacautʼuiʼan chai tsuculh alaclhcaʼulanaʼ pumatʼiyun. Alacmalakacha ni cataʼalh nonin ju ixchivinti Dios. Chai axtaknilh ixtachaputʼan ni laich cataxcomakʼalh ju lhacaticurulhni laʼixlacatunaʼan ju lapanacni. 8 Chai alacjuni ni jantu tuʼuʼ catalhiʼalh ju ixlacata ju lacati. Va yuchi ixpalicʼan. Jantu catalhiʼalh ispastiʼan nin ixniʼan nin ixtuminʼan. 9 Catachʼantanu ju ixchʼanxtʼakʼanʼan para jantu kʼalhtʼui catalhiʼalh ju ixpumpuʼan. 10 Alacjuni: ―Ni xamatiʼ catajunan ni lai alakʼacʼujtʼit chai lai avenatʼit laʼixchakaʼ pus anchach ju atʼolhtʼachitʼit tus acsni atʼaxtʼuchʼokʼoyaʼitʼit ju anuʼ lakʼachakʼan. 11 Para tachi chun ju jantu kʼox cataʼamaklhtayananan nin yuchi ni catakʼasmatniputunan ju minchivintiʼan pus acsni atʼaxtʼuyaʼitʼit ju anuʼ lakʼachakʼan achʼancʼalhapʼuxcʼantʼit ju pokxni laminchʼanxtʼakʼan. Ju chunch catapucʼatsayaʼ ni talakʼalhin ju tanavita. Slivasalh ju iclajunau. Ju anuʼ avilhchan acsni caʼamakʼosaspitcanaʼ ju lapanacni palai macxcai catamakʼalhkʼajnanaʼ ju anuʼ amachakʼan ju jantu catakʼasmatʼaʼ ju minchivintiʼan. Palai jantu ju amachakʼanixni ju makʼaniya lakʼachakʼanixni Sodoma chai Gomorra. ―Chunch ju ajuni ju ixpumacautʼuiʼan ju Jesús. 12 Pus ju yuʼunch tataxtucha chai ajuni ju lapanacni ni catamacaulh ixʼalactuʼuntiʼan. 13 Vachuʼ ixtaxcoxtui lhu ju lhacaticurulhni laʼixlacatunaʼan ju lapanacni. Chai ixtalacamucʼai ju aceite lhu ju takʼankʼanin chai palaich ixtajun. 14 Pus ju gobernador Herodes kʼasmatlh tuchi ixnavi ju Jesús ni vanta anchach ispastaccanta. Chai naulh: ―Ju anuʼ ju Jesús tajuni ca yuchi ju Xivan ju amakpaxanaʼ. Ca va taʼacxtuchokolh laʼixʼaninti. Yuchi kʼai lhamakʼan lhinavi. 15 Para ju aliʼin lapanacni ixtanajun: ―Jantiyuʼ. Alai ca yuchi ju Elías ju caminaʼ acsni tucaʼ min ju najunta Dios ni camalakachatachilh. Chai ju aliʼin ixtanajun: ―Jantiyuʼ. Alai ca yuchi ju lapanac ju najun ixchivinti Dios tachi ju ixtalai ju makʼaniya lapanacni. 16 Para ju gobernador Herodes acsni kʼasmatlh tuchi ixnavi ju Jesús naulh: ―Ju ani yuchi ju Xivan ju iclhinaulh ixʼacchʼucʼuca. Ca va taʼacxtuchokolh junta ixmacnucanta. 17 Pus acsni tucaʼ ixmaknicanta ju Xivan pus ju Herodes ixlhinajunta ixchʼapʼaca ju yuchi. Chai lhinaulh ixmakchʼica acsni tʼalhnucalh. Chunch ju navilh ju gobernador ni ixnaviniputun ixkʼachat ju Herodías. Pus ju Herodías ixʼamachakaʼ ixjunita ju Pilipe. Ispʼisekʼe ju Herodes. Para ixmacajunta ju Pilipe chai ju Herodes ixtʼatʼajun. 18 Chai ju Xivan chani ixjunita ju Herodes: ―Jantuch lhijun ju lhamapʼaksin ni va miʼamachakaʼ xanavi ju ixʼamachakaʼ ixjunita ju mimpʼisekʼe. 19 Pus ju Herodías lhitʼalaxcailh ju Xivan ixlacata ju ixchivinti. Chai ixlhinomputun ixmaknica. Para jantu lai ixnavi. 20 Pus ju Herodes na ixtalhoni ju Xivan ni iscʼatsai ni soknicʼa ixjunita isʼatsucunti chai ixlapanac Dios ixjunita. Pus yuchi jantu xalhilakʼaʼini ju Herodías ni tuʼuʼ macxcai canavi. Para ju Herodes mas va tam tam ixnajun acsni ixkʼasmatni ju ixchivinti para ixlaquilhtu na ixkʼasmatniputun ju Xivan. 21 Pus lakatam avilhchan chilh ju pantsʼiquis ju ixpacxan ju Herodías. Pus ixcʼatan ixjunita ju Herodes. Chai ju yuchi anavinilh kʼai lacvaiti ixtʼaxalackʼajin chai ju comandantenin chai ju xamakʼalinin ju xaʼestado Galilea. 22 Chai tanucha ju istsiʼ ju Herodías junta ixtatʼajun venin chai tsuculh atʼiniʼ. Pus lana kʼachanilh ju ixʼatʼinti ju Herodes chai ju ixʼalactʼavi lacamixa. Chai ju Herodes junilh ju atsiʼ: ―Aqʼuisqʼuininch va tuchi ixtalakxtuch ju lacʼasqʼuinch. Ju quitʼin acxtakniyan. 23 Pus ju Herodes lhipastacnilh Dios chai junilh ju atsiʼ: ―Va tuchi ixtalakxtuch ju aqʼuisqʼuiniyaʼ acxtakniyan mas aqʼuisqʼuiniyaʼ ni alhinonaʼ ju aliʼ lakʼachakʼan junta iclhinajun ju chavai. 24 Pus ju atsiʼ lana taxtucha. Alh sacminiʼ ju ixnati. Junich: ―Tijuch ju acsqʼuiniyaʼ. Pus ju ixnati junilh ni casqʼuinilh ju isʼaktsulh ju Xivan ju amakpaxanaʼ. 25 Pus ju atsiʼ lana tanuchokocha junta ixvi ju Herodes chai junilh: ―Iclacasqʼuin ni chavai lana aqʼuixtʼaknin lacatuʼuʼ casavila isʼaktsulh ju Xivan ju amakpaxanaʼ. 26 Pus ju acsnich ju gobernador lana na amakʼaninilh. Para va ixlacaʼatalh ni ixlhipastactach ju Dios acsni junilh ju atsiʼ ni caxtakniyach va tuchi casqʼuiniyach chai ni takʼasmatlh ju ixʼalactʼavi lacamixa pus jantu lai naulh ni jantu. 27 Pus ju gobernador lana malakachalh pumatam ixtaropa. Junilhch: ―Aqʼuilhitʼanin ju isʼaktsulh ju Xivan. 28 Pus ju taropa alh acchʼucʼunuʼ ju Xivan lacapulachʼin. Chai lhiminilh ju aktsulh lacatuʼuʼ casavila chai xtaknilh ju atsiʼ. Pus ju atsiʼ quixtaknilh ju ixnati. 29 Chai acsni tacʼatsa ju ixʼalacmamakaʼui ju Xivan pus taʼalh. Tasaclh ju ixlacatuna. Taquimacnu. 30 Pus tataspʼitchokocha ju ixʼalacmalakachata ju Jesús ni cataʼalh pumatʼiyun amalaninin ju lapanacni. Chai talakminchokolh ju Jesús chai tajunkʼo chux tuchi ixtanavi chai tuchi ixtamasunita ju lapanacni. 31 Pus ju Jesús alacjuni: ―Atʼatʼitch ju uxijnan lacamacni junta lai catolauch va quiʼakstuʼan. Junta lai caʼastacnanau pantsʼiquis. Ju Jesús alhijunilh chunch ni na lhu lapanacni ixtamin ixtaʼan junta ixʼalactʼavi ju Jesús ju ixʼamamakaʼui. Pus lana matiʼ ixjunita ispantsʼiquisʼan ni lai catavailh. 32 Pus tatajulh isʼakstuʼan lacabarco. Taʼalh lhimakʼantacutni atantsʼin junta jantu xamatiʼ ixtʼajun. 33 Para na pumalhu lapanacni talaktsʼilh ju Jesús acsni alh. Chai tamispa. Chai ju amachakʼan lakatamin lakʼachakʼan taʼatsʼalaʼalh junta ixtaʼamputun ju Jesús chai ixʼamamakaʼui. Va tachʼajaxʼalh. Chai pʼulhnan tachaʼalh ju va ixtachʼajaxʼanta. Astan tachaʼalh ju Jesús chai ixʼamamakaʼui. 34 Pus acsni tacutlh ju Jesús ju lacabarco pus alaktsʼilh ju lapanacni ni na lhu ixtatakʼaixtokta. Pus na alacmapaini ju yuʼunch ni tachi ju tuʼuʼ borregojni ixtajunita ju matiʼ ixʼalhistacnaʼ. Pus ju yuʼunch vachuʼ matiʼ ixjunita xamatiʼ ju ixʼamasuni ju soknicʼa ti. Pus lana tsuculh alacmasuniniʼ chai na tijlhu chivinti ju xaʼajuni. 35 Para acsni tokʼoxalh pus ju ixʼalacmamakaʼui talakʼalh ju Jesús chai tajuni: ―Jantu xamatiʼ tʼajun ju ani chai ju chavai na tokʼoxatach. 36 Amalakʼachʼatʼich ju lapanacni ni cataʼalh lacacuxtu junta lacyacha chakaʼ chai ju lakʼachakʼanixni ju vanin lacvi. Chach taʼancha tamonin ju tuchi cataʼuyach ni matiʼ tuchi cataʼulh ju ani. 37 Para ju Jesús akʼalhtayanalh. Alacjuni: ―Amavatʼit ju uxijnan. Para ju ixʼamamakaʼui taʼakʼalhtayanalh: ―Pus ja lai acʼanauch tamonin lakatʼui cientos tumin ju vati ni camavayauch. 38 Para ju Jesús alacjuni: ―Tas akxchux vati ju alin. Inchitʼit laktsʼinin. Chai acsni tacʼatsa tajuni: ―Alin akxquis vati chai lakatʼui pamata. 39 Chai ju Jesús alacjuni: ―Alaclhcʼaʼulachitʼit ju lapanacni ju quilhmactamin quilhmactamin. Chach tatavi lacaʼatsʼinan. 40 Pus alhvakpitsicalh chai tatavi ju lapanacni. Ju quilhmactamin tamin cientos alhcaʼulacalh. Chai ju aquilhmactamin cincuenta alhcaʼulacalh. 41 Ju acsnich ju Jesús chʼapalh ju akxquis vati chai ju lakatʼuich pamata. Talakstʼalh ju lactʼiyan chai xtaknilh lhakʼailaktsʼinti ju Dios. Chʼekʼelh ju vati. Chai axtaknilh ju ixʼalacmamakaʼui ni cataʼaxtakniyach ju ixtalhavat lapanacni. Vachuʼ lhvakpitsikʼo ju lakatʼui pamata. 42 Pus chux ju lapanacni tavailh chai talhilakʼo. 43 Chai ju ixʼamamakaʼui ju Jesús tasacchokolh ju vati chai ju pamata ju tamaxajnicha ju jantu taʼokʼo. Lakacautʼui tankʼalin aktsamkʼo. 44 Pus sia yuʼunch ju tavailh ixchaʼanta lakaquis milh jokʼatni. 45 Pus ju Jesús lana pʼas ajuni ju ixʼalacmamakaʼui ni catatajuchokolh laʼixbarcoʼan. Catapʼulhʼalh ju lakʼantacutni atantsʼin junta vilhcha ju lakʼachakʼan Betsaida. Ju yuchi tavilhcaʼ ju anch ni laich caʼalacmalakachachokoyaʼ laʼixchakaʼan ju ixtalhavat lapanacni. 46 Chai ju Jesús acsni alacmalakachakʼo ju lapanacni pus alh ju akstijun. Alh tʼachiviniʼ ju Dios. 47 Chai acsni tatsʼisi pus ju ixʼamamakaʼui va laʼixlacaitatcaʼ atantsʼin ixtaʼanta lacabarco. Para ju Jesús va isʼakstu ixvilhchacaʼ ju lacatʼun. 48 Chai ju yuchi alaktsʼilh ju ixʼamamakaʼui ni na ixtaxkʼoptach ni ixtaxakataiʼanta ju ixbarcoʼan. Para ni na pʼas ixlai ju un chai na ixnekʼespʼitʼa ju xcan pus jantu lai ixtamalhtanai ju barco. Pus tachi lakatʼutu hora vatsʼisin alakmilh ju ixʼamamakaʼui ju Jesús. Ixtachʼantaʼanta laʼismusan ju xcan chai va ixʼapuʼiniputun ju yuʼunch. 49 Para ju yuʼunch acsni talaktsʼilh ni va alhtanaminta laʼismusan xcan pus tapastaclh ni ca yuchi ju macxcai un ju minta. Chai lana tsʼau talactʼasalh. 50 Pus ixchuxʼan talaktsʼilh chai slivasalh na tatalhanalh. Para ju Jesús lana soko axakʼala. Ajuni: ―Kʼai anavitʼit ju miʼalhunutʼan. Quitʼin. Jantu atʼalhanantʼit. 51 Chai ju Jesús alactʼataju ju lacabarco. Chai lana sek va ju un. Chai ju yuʼunch na tatalhanalh chai na talhamakʼaninilh. 52 Pus ju yuʼunch lana jantu ixtamachakxai tichi lapanac ixlhitalacasui acsni amava ju akxquis vati ju lapanacni. Na va pʼas ixjunita ju ixʼalhunutʼan. 53 Acsni tachaʼalh ju lhimakʼantacutni ju atantsʼin ju Jesús chai ixʼamamakaʼui pus tachaʼalh ju xalacatʼun Genesaret. Anch ju tachʼiʼula ju ixbarcoʼan. 54 Chai acsni tatacutlh ju yuʼunch ju lacabarco pus lana tamispalhch ju Jesús ju lapanacni. 55 Va ani ani taʼatsʼalaʼalh tachi chun ju lakʼachakʼanixni ju vanin ixlacvi. Tatsuculh lhiminin lacalona ju takʼankʼanin junta ixnoncan ixvi ju Jesús. 56 Chai vanta anch ixʼan ju Jesús u lacatʼicstʼi lakʼachakʼan u lackʼai lakʼachakʼan u lacacuxtu pus ixʼamamacan ju takʼankʼanin ju lacati. Ixtatapaininich ju Jesús ni laich catalakchaʼanilh mas va lacatsʼunin ixquilhtuʼ ixpumpuʼ. Pus ju Jesús alakʼaʼinilh chai tachi chun ju ixtalakchaʼani ixpumpuʼ palaich tava.
1 Lakatam avilhchan ju fariseonin chai ju aliʼin ju na ixtalhatalanininta ixlhamapʼaksinʼan ju istʼaʼisraelitanin ju ixtamintacha ju Jerusalén tatakʼaixtoklh junta ixvi ju Jesús. 2 Chai ju yuʼunch talaktsʼilh ju aliʼin ixʼamamakaʼui ju Jesús ni jantu chun ixtamakchʼakʼai acsni ixtavajin tachi ju ixtalhilanita ju istʼaʼisraelitanin. Pus ixlhiyuchach tanaulh ni jantu kʼox tachi ju ixtalai ju ixʼamamakaʼui ju Jesús. 3 Pus ju fariseonin chai ixchuxʼan ju aliʼin israelitanin jantu ixtavajin ni jantu pʼulhnan na paklhu catamakchʼakʼa. Pus chunch ixjunita ju iscostumbreʼan ju ixʼamacontilanita ju makʼaniya ixlacpaʼitniʼan. 4 Chai acsni ixtataspʼittacha ju laclhitamau pus jantu catavenaʼ ni jantu catapaxaʼ pʼulhnan tachi ju ixtalhilanita. Chai na lhu aliʼ costumbre ju ixtanavi tachi ju ixtanavi ju makʼaniya ixlacpaʼitniʼan. Tachi acsni talakʼataxtʼumakʼan chai na paklhu ju talakchʼakʼai ju vaso chai ju xalu chai ju tsasnat xalu tachi ju aktsʼiya ixtalhilanita. 5 Pus ju fariseonin chai ju ixtalhatalanininta ju lhamapʼaksin tasacmilh ju Jesús. Tajunich: ―Ju mintamamakaʼun tajuch ni jantu tanavi tachi ju aktsʼiya iclhilanitauch ju quijnan. Ju yuʼunch ni lai tavajin mas jantu tamakchʼakʼata tachi ju iclhilanitauch ju quijnan. 6 Pus ju Jesús alacmapuspitnilh ju chivinti chai alacjuni: ―Ju uxijnan na acxpʼutʼiyununatʼit. Slivasalh uctaxtulh tachi ju naulh ju makʼaniya lapanac ju Isaías ixjuncan. Ju yuchi naulh ni caʼalinaʼ ju lapanacni ju chunch catalayaʼ tachi ju layatʼit ju uxijnan. Ju yuchi tsʼokʼula ni ma chani naulh ju Dios: Ma yuchi ju Dios. Para ju ani lapanacni ma va laʼixquilhniʼan ju tapunajun ni xakʼai ju yuchi. Para ju laʼixʼalhunutʼan ma lana jantu tuʼuʼ talhiulai. 7 Ma jantu tuʼuʼ nomputun ni tanajun ni yuchi ju xakʼai ju Dios. Ju yuʼunch ma taʼamalaninin ju tuʼuʼ tachi ju vasalh ixlhamapʼaksin Dios mas va ixlhamapʼaksin ixtʼalapanacʼan. Ju Isaías naulh ni ma chunch ju naulh ju Dios. 8 Chai ju quitʼin iclajunauch ni vasalh chunch ju layatʼit tachi ixnajun ju Isaías ni vachuʼ macʼaʼuntʼit ju uxijnan ju ixlhamapʼaksin Dios. Va yuchi ju lacʼaʼiyatʼit ixlhamapʼaksinʼan ju mintʼalapanacniʼan. Tachi acsni lakʼatʼaxtʼumakʼanatʼit chai na paklhu ju chʼakʼayatʼit ju tuʼuʼ xalu chai ju tuʼuʼ vaso. Chai vachuʼ alin palai lhu taxtokni va ixtʼachun ju naviyatʼit. 9 Chai ju Jesús ixʼalacjuni vachuʼ: ―Ju uxijnan samakʼantʼatʼit ju ixlhamapʼaksin Dios va ixlacaʼatalh ni navipʼutʼunatʼit ju miʼatalanintiʼan miʼakstuʼan. 10 Pus ju makʼaniya lapanac ju Moisés ixjuncan chani naulh: “Atʼalhonin ju mimpai chai ju minatich. Chai amakniyaʼitʼit va tichi chavaich ju va taxtokni cajunilh ju tam ixpai u tam ixnati”. 11 Pus mas chunch ju nonatʼit para lakʼaʼiyatʼit ni chani cajunilh ju ixpai u ixnati ju tam lapanac: “Ju quitʼin jantu lai actilaʼaktaiju va ixlacaʼatalh ni iclhikʼailaktsʼilh Dios ju anuʼ tumin ju xaclapuʼaktaiju”. 12 Chai ju uxijnan nonatʼit ni ma jantu tasqʼuini ni caʼaktaiju ju ixpai u ixnati ni va chunch ju canaulh tam lapanac. 13 Para ni chunch ju layatʼit pus va samakʼanatʼit ixchivinti Dios ni va navipʼutʼunatʼit ju makʼaniya miʼatalanintiʼan miʼakstuʼan. Chai palai lhu taxtokni ju naviyatʼit ju va ixtʼachunch. Chai vachuʼ chun ju lacmasuniyatʼit ju miʼaskʼatʼanʼan. ―Chunch ju alacjuni ju lapanacni ju Jesús. 14 Chai aktam ju Jesús alactʼasanilh ju ixtalhavat lapanacni chai alacjuni: ―Aquilakʼasmatniuch minchuxʼan chai amachʼakxatʼit ju tuchi aclajunau. 15 Jantiyuʼ ju ui tam lapanac ju lai malhquiliquini isʼatsucunti. Alai yuchi ju chivinti ju taxtui laʼixʼalhunut. Yuchi ju malhquiliquini isʼatsucunti tam lapanac. 16 Ju uxijnan ju alin ju mimpakʼasmatniʼan pus akʼasmatʼit. 17 Pus ju acsnich ju Jesús taxtulh lacatalhavat. Alhtanalh. Chai acsni tanucha ju lacachakaʼ pus ju ixʼalacmamakaʼui tasacmi tuchi ixnomputun ju anuʼ chivinti ju ixʼajunita ju lapanacni. 18 Chai ju Jesús alacjuni: ―Ja vachuʼ jantu lai amachʼakxananatʼit ju uxijnan. Ja va jantu machʼakxayatʼit ni jantu lai malhquiliquini isʼatsucunti tam lapanac ju tuchi ui. 19 Ju tuchi ui jantu tanun laʼixʼalhunut ju tam lapanac. Alai va laʼixpajan ju tajui chai astan va makʼancanch. Pus ni catacʼatsa ni si lai okʼocan yuchi xaʼalaclhijuni chunch ju Jesús. 20 Chai vachuʼ alacjuni: ―Tachi chun ju macxcai chivinti ju quilhtaxtui tam lapanac yuchi ju malhquiliquini ju isʼatsucunti. 21 Pus laʼixʼalhunutʼan ju lapanacni minacha ju jantu kʼox atalacpastʼacʼat. Chai ixpuxcajuca apumatam chakoʼulh u apumatam jokʼat. Vachuʼ lacaʼalhunut minacha ju ixkʼachanica ni va lacati tsucucan. Chai ju amakninti. 22 Chai ju akʼalhaʼunti. Chai ju ixmakkʼachanica ju jantu ixʼanuʼ. Chai ixnavicach tachi chun ju aliʼ alactuʼuntich. Chai ju aʼokxchokʼonti. Chai acsni matiʼ ju maxanti. Chai ju alhacchaʼanti. Chai ixnajunca ju macxcai ixlacata apumatam. Chai ju alhitakʼayanti. Chai ixkʼachanica ju va lhilakachaput. 23 Pus tachi chun ju ani alactuʼunti pulacni ixʼalhunut ju lapanac ju minacha. Chai yuchach ju malhquiliquini isʼatsucunti. 24 Ju Jesús taxtulh ju anuʼ lakʼachakʼan chai chaʼalh ju xalacatʼun junta ixʼalin ju lakʼachakʼanixni Tiro chai Sidón. Chai ju Jesús anch ixtʼajun laʼixchakaʼ pumatam amachakʼan anch. Para jantu ixlacasqʼuin ni xamatiʼ cacʼatsa. Para jantu lai tatankʼanu. 25 Pus pumatam chakoʼulh ixʼalin istsiʼ ju ixtanun ju lhacaticuru laʼixlacatuna. Chai acsni kʼalhakʼasmatlh ni ixvi ju Jesús pus lana lakmilh. Taʼaktsokotanilh vanin laʼixchʼajaʼ. 26 Pus ju anuʼ chakoʼulh ixchivinin ju lhigriego chai amachakaʼ Sirofenicia ixjunita. Pus ju yuchi tapaininilh ju Jesús ni caxcoxtunilh ju lhacaticuru laʼixlacatuna ju istsiʼ. 27 Para ju Jesús chani juni: ―Chach pʼulhnan actiʼaktaiju ju quintʼaʼamachivinti. Ni jantu chun aclalh pus ixtʼachunch cava tachi ju va acʼaquictaiʼinilh ixniʼan ju askʼatʼan chai acxtaknilh ju scʼuyun. 28 Para ju anuʼ chakoʼulh akʼalhtayanalh. Junich: ―Vasalh ji quiʼucxtin. Para mas yuʼunch ju scʼuyun ju tavilanalh ixtankʼapuʼ mixa talacsacʼui ju xataquicpuchin ju talacamacajun ju askʼatʼan. 29 Pus ju acsnich ju Jesús junich: ―Slivasalh na kʼox xaquinkʼalhtʼaʼi. Pus apʼinchʼokʼochitʼich ju laminchakaʼ. Ju lhacaticuru taxtuta laʼixlacatuna ju mintsiʼ. 30 Pus ju chakoʼulh alh. Chai acsni chaʼalh laʼixchakaʼ pus laktsʼilh ju istsiʼ ni ixtaxtutach ju lhacaticuru laʼixlacatuna chai va ixmalhch laʼixputaman. 31 Ju Jesús taxtuchokocha junta ixvi vanin ju lakʼachakʼan Tiro. Pumilh ju lakʼachakʼan Sidón chai ju lacatʼun junta ixʼalin lakacau lakʼachakʼanixni. Chaʼalh tus ju xaʼatantsʼin Galilea. 32 Pus lhiminicalh ju Jesús pumatam lapanac ju kʼatapa ixjunita chai ju jantu lai kʼox ixchivinin. Chai ju lapanacni tatapaininilh ju Jesús ni camamanilh ixmacaʼ laʼixlacatuna ju anuʼ takʼankʼan ni palaich cajunaʼ. 33 Pus ju Jesús malakxtinu ju takʼankʼan. Lhiʼalh alacatam. Chai manunilh ixmacaʼ laʼixʼakʼaxkʼolh. Quicchujva. Tsamalh ju isimakʼat ju anuʼ takʼankʼan. 34 Chai ju Jesús talakstʼalh ju lactʼiyan. Amakʼaninilh. Chai junilh ju takʼankʼan: ―Epata. Ju chunch va nomputun: Akʼasmatʼich. 35 Pus lana laich akʼasmatnalh. Chai na kʼoxich ixchivinin. 36 Pus ju Jesús alaclhimapʼaksilh ju lapanacni ni jantu xamatiʼ catamacʼatsani tuchi ixnavita. Para mas va ta pakchux ixʼajuni ju lapanacni va xaʼapalaich ixtanajun tuchi ixnavich. 37 Slivasalh ixtalhamakʼaninin. Ixtanajun: ―Tachi chun si kʼox ju navikʼojui. Ju kʼatapa lai lakʼoxini ixʼakʼaxkʼolh. Chai laich makʼasmatʼai. Chai ju jantu lai tachivinin lai machivini kʼox.
1 Ju acsnich na lhu ixtatakʼaixtokta ju lapanacni. Chai matiʼ ixjunita tuchi cataʼulh. Pus ju Jesús alactʼasanilh ju ixʼalacmamakaʼui chai alacjuni: 2 ―Painiʼitnich ju ani tayanalh lapanacni ni lakatʼutu avilhchan xaquintatʼatolan chai ju chavai matiʼ tuchi cataʼulh. 3 Ni aclacmalakachachokolh laʼixlacchakaʼan nin tucaʼ tavajin jantu xcai ni catataʼaktalh ju lacati ixchavanʼan. Ju aliʼin na makat tamintacha. 4 Pus ju ixʼalacmamakaʼui takʼalhtailh ju Jesús. Tajuni: ―Para tas anchach ju lai camalhilaniyau tachi tantsʼun ju lapanacni ju ani junta jantu xamatiʼ tʼajun. 5 Chai ju Jesús asacmipa: ―Tas akxchux vati ju chʼapʼatʼatʼit. Chai ju yuʼunch tajunilh ni akxtujun. 6 Pus ju Jesús alacjuni ju ixtalhavat lapanacni ni catatavi lacaʼatsʼinan. Chai ju yuchi chʼapalh ju akxtujun vati. Pʼulhnan xtaknilh lhakʼailaktsʼinti ju Dios chai astan chʼekʼelh ju vati. Xtaknilh ju ixʼalacmamakaʼui. Chai ju yuʼunch taʼalhilaktsakʼo ju ixtalhavat. 7 Vachuʼ ixtachʼapata lacatsʼunin pamata. Pus ju Jesús xtaknilh lhakʼailaktsʼinti ju Dios chai ajunich ju ixʼamamakaʼui ni cataʼaxtaknilh vachuʼ ju ixtalhavat lapanacni. 8 Pus taxtaknilh. Taʼulh chai talhilalhch. Chai astan ju ixʼamamakaʼui ju Jesús tasacchokolh ju tamaxajnicha. Talaktsama lakatujun tankʼalin. 9 Pus ju lapanacni ju tavailh ixchaʼanta lakatʼatʼi milh jokʼatni. Pus ju Jesús alacmacʼami. 10 Chai lana alactʼatajuchokolh lacabarco ju ixʼalacmamakaʼui. Taʼalh ju xalacatʼun Dalmanuta. 11 Pus ju acsnich talakmilh ju Jesús ju fariseonin. Tatsuculh tʼalakʼainin ju yuchi. Pʼas istasqʼuini ni canavilh ju tuʼuʼ ju catapucʼatsayaʼ ni vasalh yuchi ju ixnoncan camalakachatachilh ju Dios. Para va ixtalaktsʼintanuputun. 12 Pus ju Jesús amakʼaninilh chai alacjuni: ―Ju uxijnan ju chavai tʼonatʼit tajuch ni va quilamakpuxcoyau tuchi laich icnavi ni nonatʼit ni chunch laich apʼucʼatsʼayaʼitʼit ni vasalh icCristo. Slivasalh ju iclajunau. Jantu tuʼuʼ amasunicʼanaʼitʼit ju uxijnan ju chavai tʼonatʼit. 13 Chai ju acsnich ju Jesús lana alacmacoyaulh ju fariseonin. Tajuchokolh lacabarco. Anchokolh makʼantacutni ju atantsʼin. 14 Pus ju ixʼamamakaʼui ju Jesús ixtacaptach ixlhiʼanca ju tuʼuʼ xkapavati. Lacanix va lakatam xkapavati ixlhiʼanta pumatam lacabarco. 15 Pus ju Jesús alacjuni: ―Alaccʼatsʼanantʼit ixlacata ixlevaduraʼan ju fariseonin chai ju ixlevadura ju Herodes. 16 Chai ju ixʼalacmamakaʼui ju Jesús talaclajunich sia yuʼunch: ―Ni jantu iclhimintau tuʼuʼ xkapavati ca yuchi quintalhijunan chunch. 17 Pus ju Jesús lana cʼatsa tuchi ixtalaclajuni sia yuʼunch. Chai alacjuni: ―Tajuch ni va lhamakʼanininatʼit ni jantu lhitʼantʼatʼit tuʼuʼ xkapavati. Ja va jantucaʼ machʼakxayatʼit ju uxijnan tuchi ju nomputun ju lhamakʼan ju icnavita. Ja lana na va oktanpʼas untʼatʼit. 18 Alinch ju milakchulhʼan. Ja va jantu laktsʼinatʼit tuʼuʼ. Alin ju miʼakʼaxkʼolhʼan. Ja jantu lai pʼakʼasmatnanatʼit. Ja jantu lai pʼastʼacʼatʼit tuʼuʼ. 19 Ja lana jantu pʼastʼacʼatʼit acsni tavanan icchʼekʼelh akxquis vati chai talhilakʼo lakaquis milh jokʼatni. Apʼastʼactʼit. Tas lakachux tankʼalin ju xalaktsʼamayatʼit ju xasacchʼokʼoyatʼit ju vati. Pus ju yuʼunch tajunilh ni lakacautʼui. 20 Chai aktam ajunichokopa ju Jesús: ―Chai acsni icchʼekʼelh ju akxtujun vati chai tavailh lakatʼatʼi milh lapanacni tas lakachux tankʼalin ju xalaktsʼamayatʼit ju xasacchʼokʼoyatʼit ju xajcha. Chai takʼalhtayanalh ni lakatujun. 21 Chai ju Jesús alacjunich ju chavai: ―Ja ixlaquilhtu jantu lai machʼakxayatʼit. 22 Ju astan ju Jesús chai ixʼamamakaʼui tamilh ju lakʼachakʼan Betsaida. Chai ju lapanacni talhiminilh ju yuchi pumatam alakʼachʼix. Chai tatapaininilh ni calaktsʼilh. 23 Pus ju Jesús lana makchʼapalh ju anuʼ alakʼachʼix. Maxtulh ju takʼankʼan. Lhiʼalh tus lacamacni. Chai lakpuchujva laʼixlakchulh. Chai mokslanilh ixmacaʼ laʼixʼucxni ixlakchulh chai sacmi: ―Ja laich alacʼavanan lacatsʼunin. 24 Chai ju anuʼ alakʼachʼix ixjunita ni alacʼavanalh naulh: ―Pus ju lapanacni icʼalaktsʼin ni taʼalhtanan. Para jantu kʼox icʼalaktsʼin. Tachi ju va qʼuiu icʼalaktsʼin. 25 Pus ju Jesús lana mokslanichokolh ixmacaʼ laʼixʼucxni ixlakchulh ju anuʼ alakʼachʼix chai ju yuchi alacʼavananchokolh. Pus takʼoxinikʼo ixlakchulh. Kʼox alacʼavanalh. 26 Pus ju acsnich ju Jesús malakachachokolh laʼixchakaʼ ju va lacamacni ixyacha. Chai juni: ―Tun tʼitʼanutʼicaʼ ju lakʼachakʼan. Chai tun tʼiʼaʼun tuʼuʼ ju amachakʼan anch. 27 Astan ju Jesús alactʼataxtulh ju ixʼalacmamakaʼui. Va ixtaʼamputun ju lakʼachakʼanixni ju ixtalhilacaʼanita ju lakʼachakʼan Cesarea Filipo. Chai ju lacati ju Jesús asacmilh ju ixʼalacmamakaʼui. Alacjuni: ―Tis chavaich ju quintalhiulai ju quitʼin ju lapanacni. 28 Pus ju yuʼunch takʼalhtayanalh. Tajuni: ―Pus ju aliʼin lapanacni tanajun ni ma uxintʼich ju Xivanʼat ju ixʼamakpaxanan. Ju aliʼin tanajun ni ma Elíasʼat. Ju aliʼin tanajun ni ma uxintʼich pumatam makʼaniya lapanac ju ixnajun ixchivinti Dios. 29 Pus ju acsnich ju Jesús alacsacmipa ju yuʼunch. Ajuni: ―Para ju uxijnan tis chavaich ju quilalhiulayau ju quitʼin. Chai akʼalhtayanalh ju Pitaluʼ. Juni: ―Uxintʼi ju Cristoʼat ju ixnoncan camalakachatachilh ju Dios. 30 Pus ju Jesús lana alaclhimapʼaksi ni jantu xamatiʼ catamacʼatsani tichi chavaich ju yuchi. 31 Ju acsnich ju Jesús tsuculh alacmalaniniʼ ju ixʼalacmamakaʼui. Ajuni: ―Aktsʼiya tasqʼuini ni na lhu acmakʼalhkʼajnanaʼ ju quitʼin ju quimalakachatachilh Dios ni lapanac actsucuyaʼ ju ani. Chai ju xalackʼajin lapanacni chai ju xalackʼajin palijni chai ju na talhatalanininta ju milhamapʼaksinʼan jantu tuʼuʼ aquintalhiulayaʼ. Chai aquintamakniyaʼ. Para actaʼacxtuchokoyaʼ junta acmacnucanaʼ ixlhilakatʼutu avilhchan. 32 Ju Jesús lana vas ajuni ju ani chivinti. Chai ju acsnich ju Pitaluʼ lhiʼalh alacatam ju Jesús chai tsuculh amapʼaksiniʼ. 33 Para ju Jesús talakaspʼitlh. Alaktsʼilh ju aliʼin ixʼalacmamakaʼui. Chai kʼailh ju Pitaluʼ. Junich: ―Akʼostʼi ju laquiʼucxlacapuʼ ji Satanás. Ju uxintʼi jantu alacpʼastʼacnan tachi ju alacpastacnan ju Dios. Ju uxintʼi va alacpʼastʼacnan tachi ju taʼalacpastacnan ju lapanacni. 34 Ju acsnich ju Jesús alactʼasanikʼo ju ixʼalacmamakaʼui chai chux ju lapanacni. Alacjuni: ―Va tichi chavaich ju aquinchʼakʼokʼaputulh ju quitʼin pus jantu lai catinavi ixkʼachat isʼakstu. Chai cachʼixaʼ ju ixmakʼalhkʼajnat ju caʼalinaʼ va ixlacaʼatalh ni quinchʼakʼokʼai ju quitʼin. Chai aquinchʼakʼokʼakʼalhi. 35 Pus va tichi chavaich ju najun ni jantu quinchʼakʼokʼaputun va ixlacaʼatalh ni va lai maknicalh pus camakʼatsʼankʼayaʼ ju isʼatsucunti ju caʼixʼalilh ju lactʼiyan. Para va tichi chavaich ju camakʼatsʼankʼayaʼ ju isʼatsucunti va ixlacaʼatalh ni quinchʼakʼokʼai ju quitʼin chai va ixlacata ni lacaʼita ju chivinti ju najun ta yu lai takʼalhtaxtucan pus caʼalinaʼ isʼatsucunti ju lactʼiyan. 36 Pus jantu tuʼuʼ lhajai tam lapanac mas calhajakʼo chux ju xataxtokni ju alin ju ani lacamunutpaʼ ni va calhimakʼatsʼankʼa ju isʼatsucunti ju caʼixʼalilh ju lactʼiyan. 37 Chai ni va chunch ju calalh pus jantu laich catiʼalh ju anch mas camapalalh lacatumin. 38 Ju lapanacni ju tatʼajun ju chavai na tamacajunta ju Dios chai na taʼalactuʼunun. Pus ni xamatiʼ aquintʼamaxanalh chai catʼamaxanalh ju quinchivinti laʼixʼucxlacapuʼan ju yuʼunch pus vachuʼ actʼamaxananaʼ ju yuchi acsni acminchokoyaʼ laʼixtachaput ju quimpai acsni acʼalactʼaminaʼ ju ixʼanquilhnin.
1 Vachuʼ ajunilh ju lapanacni ju Jesús: ―Slivasalh ju iclajunau. Alin ju lamilhiʼuxijnan ju ani vilatʼit ju jantu cataniyaʼ tus acsni catalaktsʼinaʼ ta yu tasui acsni vi ju Dios laʼixpuʼucxtin. Chai catasuyaʼ ni vasalh na tachapun ju yuchi. 2 Pus ju ixlhilakachaxan avilhchan astan ju Jesús alactʼasanilh ju Pitaluʼ chai ju Jacobo chai ju Xivan. Alhiʼalh va isʼakstuʼan ju lactalhpa junta na putankʼai ixjunita. Chai ju Jesús na tamch ju atalacasunilh ju yuʼunch. 3 Ju ixpumpuʼ ju Jesús lana va lamnicʼa va. Lana na xnapapa va tachi ju tuʼuʼ miqui. Pus tachi chun ju amakpanin ju ani lacatʼun jantu lai xamatiʼ chunch snakʼankʼa catinavi. 4 Chai vachuʼ talacasuch ju Elías chai ju Moisés ju makʼanchich ixtatʼajun. Va ixtatʼachivinin ju Jesús. 5 Pus ju acsnich ju Pitaluʼ junilh ju Jesús: ―Quiʼamamakaʼunuʼ na kʼoxich ni ani vilau. Acyoyau akʼatʼutu pacʼatsʼa. Akʼatamch ju miʼanuʼ. Akʼatam ixʼanuʼ ju Moisés. Chai ju akʼatamch ixʼanuʼ ju Elías. 6 Pus ju Pitaluʼ jantu iscʼatsai tuchi ixnajun ni na ixtalhanan. Ixchuxʼan na ixtatalhanan. 7 Pus lana tamacatalh ju ataputsʼi. Aʼakxtakmakʼo ju yuʼunch. Chai takʼasmatlh lakatam chivinti ju xaminacha lacaʼataputsʼi. Chai chani ixnajun: ―Ju ani ya yuchi ju quintsʼalh chai na icmapaini. Yuchach ju akʼasmatnitʼit. 8 Chai lana taʼalacʼavanalh para jantu xamatiʼ talaktsʼilh. Va yuchi ju Jesús. 9 Chai acsni ixtatʼajun takʼalhtajunin ju anuʼ lactalhpa pus ju Jesús alaclhimapʼaksi ju ixpumatʼutuʼan ixʼamamakaʼui. Ajuni: ―Tun xamatiʼ tʼiʼunitʼit ju tuchʼi xalaktsʼinatʼit. Va acsnich ju lai anonaʼitʼit acsni va actaʼacxtuchokotachilh junta acmacnucanaʼ ju quitʼin ju quimalakachatachilh Dios ni lapanac actsucuyaʼ ju ani. 10 Pus jantu xamatiʼ tajunilh. Para ixtalasacmi sia yuʼunch. Ixtanajun: ―Tijuch nuʼ ju nomputun ju yuchi ni va nompalai ni cataʼacxtuchokoyaʼ junta camacnucanaʼ. 11 Pus ju acsnich tasacmilh ju Jesús. Tajunich: ―Tajuch ni va tanajun ju na talhatalanininta ju quilhamapʼaksinʼan ni tasqʼuini ni pʼulhnan camilh ju Elías. Astan ju yuchi ju noncan camalakachatachilh ju Dios. 12 Chai ju Jesús akʼalhtailh. Ajuni: ―Slivasalh ni pʼulhnan caminaʼ ju Elías. Chai calakʼoxikʼoyaʼ tachi chun ju taxtokni. Chai vachuʼ laʼixchivinti Dios ju tsʼokcanta najun tuchi actapasayach ju quitʼin ju quimalakachatachilh Dios ni lapanac actsucuyaʼ ju ani. Ju anch najun ni na lhu acmakʼalhkʼajnanaʼ chai jantu tuʼuʼ aclhiulacanaʼ. 13 Para iclajunau ni quilachilh ju Elías chai ju lapanacni tanavilh chux tachi ju talacasqʼuilh. Chai ni chunch ju talalh pus uctaxtulh tachi ju lhitsʼokcanta ju yuchi. 14 Ju astan ju Jesús atʼaminchokolh ju ixpumatʼutuʼan junta ixtayanalh ju aliʼin ixʼalacmamakaʼui. Chai alaktsʼilh ni na lhu lapanacni ixkʼaixtokcan ixtalakachokoʼan ju yuʼunch. Chai ju lapanacni ju na ixtalhatalanininta ju ixlhamapʼaksin ju istʼaʼisraelitanin ixtatʼajun tʼalakʼainin ju ixʼamamakaʼui ju Jesús. 15 Para ju lapanacni acsni talaktsʼistuclh ju Jesús pus ixchuxʼan lana na talhamakʼaninilh. Taʼatsʼalaʼalh pakxtoknin. Tamacʼami. 16 Chai ju Jesús asacmi: ―Tijuch ju laʼunatʼit. 17 Pus akʼalhtayanalh pumatam ju ixmakminta. Junich: ―Amamakaʼunuʼ. Iclhiminin ju quintsʼalh. Va tanun ju lhacaticuru laʼixlacatuna chai ixlhiyuchi jantu lai chivinin. 18 Chai vanta anchach ju chʼapai ju lhacaticuru pus tin lhinek. Akpupuich. Va latantsʼacai ju istatsalat. Pus va tʼajun xixniʼ. Chai icʼatapaininilh ju miʼamamakaʼui ni cataxcoxtulh ju lhacaticuru laʼixlacatuna para jantu lai tanavi. 19 Chai akʼalhtayanalh ju Jesús. Alacjuni: ―Tis va yuchach ji lapanacni ni lana jantu lai lacʼaʼiyatʼit. Ja tasqʼuini ni lana na makʼan aclatʼatolau tus acsni laich amachʼakxayaʼitʼit. Ja tasqʼuini ni lana na makʼan aclachʼixniu tus acsni alacʼaʼiyaʼitʼit. Aquilalhiminiuch ju anuʼ tsʼalh. 20 Pus lhiminicalh ju Jesús chai ju lhacaticuru acsni laktsʼilh ju Jesús pus lana tin lhineklh ju anuʼ tsʼalh. Tin taʼaktalh. Pʼiliclh pʼiliclh ucxuntama lacatʼun. Akpuputamalhch. 21 Pus ju acsnich ju Jesús sacmi ju ixpai ju anuʼ takʼankʼan. Junich: ―Ja makʼanch xaʼaktaji ju ixtakʼankʼat. Chai ju xapai junilh ju Jesús: ―Tus ixlhitalacatʼicstʼin. 22 Chai ju lhacaticuru na paklhu ju macaʼanta ju lacajipi chai lacxcan ni va makniputun. Pus ni laich navi tuʼuʼ ju uxintʼi aquilaʼaktaijuch. Aquilamapainiuch ju quijnan. 23 Chai ju Jesús junich: ―Ni laich lhilacʼapʼin ju Dios pus sich lai canavinikʼocanaʼ ju lhilacaʼan yuchi. 24 Pus ju acsnich ju ixpai ju tsʼalh lana pʼas chivinilh acsni chani ju junilh ju Jesús: ―Iclhilacaʼan ju Dios. Para ni quincʼacxni lacatsʼunin pus aqʼuiʼaktʼaiʼutʼich. 25 Pus ju Jesús acsni alaktsʼilh ju ixtalhavat lapanacni ni ixtalacʼatsʼalaminta pus kʼailh ju lhacaticuru. Junich: ―Ji lhacaticuru ju jantu lakʼaʼi ni cachivinilh nin cakʼasmatlh ju ani ya tsʼalh quitʼin ju icjunan ni atʼaxtʼuch laʼixlacatuna chai jantuch tavanan atʼanuchʼokʼoyaʼ. 26 Pus ju acsnich ju lhacaticuru tsʼau tʼasalh. Aktam tin lhineklh ju tsʼalh. Chai lana taxtulh laʼixlacatuna. Pus ju tsʼalh lhtucu tama tachi ju va xaninch. Chai aktsʼiya na lhu lapanacni ixtanajun ni va nitach. 27 Para ju Jesús lana chʼapanilh ixmacaʼ ju tsʼalh. Saʼula. Chai ju yuchi taya. 28 Pus ju acsnich ju Jesús tanucha lacachakaʼ. Chai ju ixʼamamakaʼui acsni va isʼakstuʼan ixtatʼavilanalh ju Jesús tasacmilh: ―Tajuch ni jantu lai xacxcoxtuyau ju lhacaticuru laʼixlacatuna ju anuʼ tsʼalh. 29 Pus ju Jesús alacjuni: ―Ju lhacaticurulhni tachi ju anuʼ ixtanun laʼixlacatuna ju anuʼ tsʼalh va acsnich ju catataxtuyaʼ acsni atʼapʼaininiyaʼitʼit ju Dios ju ixlacata chai atʼascʼaʼayaʼitʼit. 30 Ju Jesús chai ju ixʼamamakaʼui acsni tataxtucha ju anch taputapasalh ju xaʼestado Galilea. Chai ju Jesús jantu ixlacasqʼuin ni xamatiʼ cacʼatsa ni anch ixvi. 31 Va isʼakstu ixʼatʼatolhputun ju ixʼalacmamakaʼui ni ixʼalacmalaniputun tuʼuʼ. Ixʼalacjuni: ―Ju quitʼin acmakʼaxtakcanach laʼixmacaʼan ju lapanacni chai aquintamakniyach. Quitʼin ju quimalakachatachilh Dios ni lapanac actsucuyaʼ ju ani. Para mas acniyach actaʼacxtuchokoyaʼ junta acmacnucanaʼ ixlhilakatʼutu avilhchan. 32 Para mas chunch ixʼajuni ixlaquilhtu jantu lai ixtamachakxai ju yuʼunch tuchi ixʼajumputun. Chai na ixtatalhoni. Jantu istasacmiputun. 33 Pus ju Jesús chai ju ixʼalacmamakaʼui tachaʼalh ju lakʼachakʼan Capernaum. Chai acsni ixtavilanalh lacachakaʼ pus ju Jesús alacsacmi ju ixʼamamakaʼui. Ajunich: ―Tijuch ju ixlacqʼuilhuntʼonatʼit ju uxijnan acsni xaminauch ju lacati. 34 Pus ju yuʼunch va sek tatavi ni vasalh va ixtalaklakʼaiminta ju lacati tichi chavaich ju palai xakʼai. 35 Pus ju Jesús tavi chai alactʼasanilh ixpumacautʼuiʼan. Alacjuni: ―Ni alin pumatam ju jumputun xakʼai tasqʼuini ni yuchi ju palai salacatʼicstʼi catalacasu tachi chun. Chai caʼalacchʼalhcatnanilh tachi chun ju aliʼin. 36 Chai ju Jesús macchʼapaxakʼatailh pumatam askʼatʼa. Yaulh laʼixlacaitat ju ixlacmamakaʼui. Astan chʼixlh ju askʼatʼa chai chani alacjunich ju yuʼunch: 37 ―Ju caʼamaklhtayananaʼ tam quilapanac ju jantu tuʼuʼ lhitʼakʼayai tachi ju lai ju ani vi askʼatʼa pus tachi ju va jun quitʼin ju quiʼamaklhtayanan. Chai ju quiʼamaklhtayanan ju quitʼin pus jantu quiʼakstu ju quiʼamaklhtayanan. Para tachi ju va jun amaklhtayanan vachuʼ ju Dios ju quimacaminta. 38 Ju acsnich ju Xivan chani junilh ju Jesús: ―Quiʼamamakaʼunuʼ iclaktsʼiuch pumatam ju lamintapakaʼut ixʼalacxcoxtui ju lhacaticuru laʼixlacatunaʼan ju lapanacni. Para ickʼajiuch ni jantu lhiquijnanʼan. 39 Para ju Jesús junich: ―Jantu ixkʼaʼitʼit ni jantu quintʼalaxcaiʼan junita ju yuchi. Pus ju lai navi ju kʼai lhamakʼan laquintapakaʼut pus quiʼamigoch junita. Chai ju yuchi jantu lai astan macxcai aquilhichivinaʼ. 40 Ju jantu quintʼalaxcaichʼan pus quijnanchʼan. 41 Slivasalh ju iclajunau. Va tichi chavaich ju cataxtakniyan mas va tam vaso ju xcan va ixlacaʼatalh ni quilapanacni untʼatʼit pus Dios ju camapalhniyaʼ. Ju Jesús tailhiʼalh ju ixchivinti chai chani naulh: 42 ―Va tichi chavaich ju camakʼalhkʼosuyaʼ tam xamatiʼ ju jantucaʼ kʼox quilhilacaʼanta quitʼin pus palai kʼox caʼixva ni caʼixpixtuchʼimucʼacalh ju xvati chai caʼixmacaʼancalh lacaʼalama acsni tucaʼ ixmakʼalhkʼosui tam xamatiʼ. 43 Pus ni pʼuʼalactʼuʼununatʼit ju mimacaʼan pus jantu anavitʼit. Alai alatʼit tachi ju va chʼakxpʼuxcantach ju mimacaʼan. Palai kʼox cava ni atʼanuyaʼitʼit ju lactʼiyan mas va lakatamch ju mimacaʼan. Palai jantu kʼox cava ni apʼacxantʼit chux lakatʼui ju mimacaʼan para va apʼumacʼapʼincʼantʼit ju lacajipi junta jantu tavanan mixta. 44 Junta alin ju tsapu ju jantu tavanan ni chai junta alin ju jipi ju jantu tavanan mixa. 45 Pus ni pʼimpʼutʼunatʼit junta akʼalhkʼosaʼitʼit pus jantu apʼitʼit ju anch. Alai alatʼit tachi ju va chʼakxpʼuxcantach ju minchʼajaʼan. Pus palai kʼox cava ni atʼanuyaʼitʼit ju lactʼiyan mas va lakatamch ju minchʼajaʼan. Palai jantu kʼox cava ni apʼacxantʼit chux lakatʼui ju minchʼajaʼan para va apʼumacʼapʼincʼantʼit ju lacajipi junta jantu tavanan mixta. 46 Junta alin ju tsapu ju jantu tavanan ni. Chai junta alin ju jipi ju jantu tavanan mixa. 47 Chai ni yuchi ju laktsʼimpʼutʼunatʼit ju tamalactuʼuniyan pus jantu alaktsʼintʼit. Alai alatʼit tachi ju va maxtʼutʼatʼit chai makʼantʼatʼit ju milakchulhʼan. Pus palai kʼox cava ni atʼanuyaʼitʼit junta lhinajun ju Dios. Palai jantu kʼox ni apʼacxantʼit chux lakatʼui ju milakchulhʼan para va apʼumacʼapʼincʼantʼit ju lacajipi junta jantu tavanan mixta. 48 Junta alin ju tsapu ju jantu tavanan ni. Chai junta alin ju jipi ju jantu tavanan mixa. 49 Ju tuʼuʼ jipi lhcukʼojui ju amacxtalh. Chai ni acmucʼalh ju matsat lacatuʼuʼ lhivai pus jantu catitakʼalhi. Pus vana va chun lamiʼatsucuntiʼan. Acsni makʼalhkʼajnanatʼit pus palai macʼonatʼit ju amacxcai ju alin lamiʼatsucuntiʼan chai palai tʼailhipʼinatʼit ju kʼox ju aktsʼiya naviyatʼit. 50 Na kʼox ju matsat. Para ni jantu skʼokʼo cava pus jantu lhitapalai. Pus vana va chun ju uxijnan. Lhitapalai ju miʼatsucuntiʼan acsni vasalh tasui ni quilalhilaksiyau. Chai vachuʼ iclajunau ni jantu atʼalasatʼit ju uxijnan.
1 Ju Jesús taxtulh ju lakʼachakʼan Capernaum. Milh ju xaʼestado Judea lhimakʼantacutni ju kʼai xcan Jordán. Chai aktam takʼaixtokchokopa ju lapanacni junta ixvi ju Jesús. Chai aktam alacmalani tachi ju aktsʼiya ixlai. 2 Chai tachincha ju aliʼin fariseonin. Va ixtapuxconiputun ixtalakʼalhin ju Jesús. Chai tajuni: ―Ja lhijun ju lhamapʼaksin ni camacaulh ju ixʼamachakaʼ ju tam jokʼat. 3 Pus ju Jesús akʼalhtayanalh. Alacjuni: ―Tijuch ju naulh ju Moisés laʼixlhamapʼaksin. 4 Chai ju yuʼunch taʼakʼalhtayanalh. Tajuni: ―Pus ju Moisés ixlakʼaʼi ni actsʼoklh lakatam alhiqui ju pulamacau chai acmacaulh. 5 Para ju Jesús alackʼalhtailh. Alacjuni: ―Va ixlacaʼatalh ni na pʼas ju miʼalhunutʼan yuchi xalhiʼatsʼoknun junima lhamapʼaksin ju Moisés. 6 Para acsni tavanan navitacha ju Dios ju lacamunutpaʼ ju yuchi navilh pumatam tsʼalh chai pumatam atsiʼ. 7 Pus ixlhiyuchi ju tam tsʼalh camaconach ju ixpai chai ixnati chai catʼatsucuyaʼ ju ixʼamachakaʼ. 8 Pus ju anuʼ ixpumatʼuiʼan tachi ju va pumatam catajunaʼ. Pus ju chunch jantuch vana pumatʼui tajunita. Alai tachi va pumatam lapanac tajunita. 9 Pus ju malakxtokta ju Dios jantu catitalhvaklh ju lapanacni. 10 Chai acsni tanuchokolh lacachakaʼ ju Jesús pus ju ixʼamamakaʼui aktam tasacmichokopa ixlacata ju anuʼ chivinti ju ixʼajunita ju lapanacni. 11 Pus ju Jesús alacjuni: ―Va tichi chavaich ju camaconaʼ ju ixʼamachakaʼ chai catʼatsucuchokolh apumatam navi talakʼalhin laʼixmacni ixʼamachakaʼ ixjunita. 12 Chai ju chakoʼulh ni camacaulh ju ixpapa chai catʼatsucuchokolh akʼantam pus talakʼalhin ju navi vachuʼ. 13 Ju acsnich alhichaʼanicalh ju Jesús ju askʼatʼan ni caʼamokslanilh ixmacaʼ laʼixlacatunaʼan ju yuʼunch chai catapaininilh ju Dios ni kʼox catatsuculh. Para ju ixʼalacmamakaʼui taʼalackʼaima ju ixtalhichaʼan ju isʼaskʼatʼan. 14 Para acsni laktsʼilh ju Jesús tuchi ixtanavi ju ixʼalacmamakaʼui pus talhkʼamalh. Alacjuni: ―Amacʼaʼuntʼit ju askʼatʼan. Chach quintalakmilh. Jantu asaspʼitʼit ni quintalhilaksich ju yuʼunch. Chai va tichi chavaich ju aquilhilaksiyaʼ tachi ju quintalhilaksi ju ani tayanalh askʼatʼan yuchi ju laich catanuyanta ju lactʼiyan. 15 Slivasalh ju iclajunau. Tachi chun ju lapanacni ju jantu quilhilaksi ju quitʼin tachi ju tam askʼatʼa lhilaksi ju ixpai pus jantu tavanan lai catitanu junta lhinajun ju Dios. 16 Pus ju acsnich ju Jesús alacchʼixlh ju askʼatʼan. Alacmucʼanilh ixmacaʼ laʼixʼucxni ixlacatunaʼan chai sqʼuinlh ju kʼox isʼatsucuntiʼan. 17 Ju Jesús taxtuchokopa ju anch. Chai acsni ixʼamputun ju lacati pus atsʼalamilh pumatam tsʼalh chai taʼaktsokotanilh ju yuchi. Chai sacmilh: ―Amamakaʼunuʼ ju uxintʼi na kʼox lapanacʼat. Tijuch ju acnaviyaʼ ni caʼalilh ju quiʼatsucunti ju conkʼalhiyanta ju lactʼiyan. 18 Pus ju Jesús juni: ―Ju uxintʼi ni naʼun ni va iclapanac pus tajuch ni va qʼuiʼunich ni ickʼox. Jantu xamatiʼ ju kʼox. Va pumatam. Yuchi ju Dios. 19 Ju uxintʼi mispʼaich junta chani najun lamilhamapʼaksinʼan: “Jantu atʼatsʼucʼu ju jantu miʼamachakaʼ. Jantu amaknitʼi xamatiʼ. Jantu akʼalhaun. Jantu anau taʼaklhtamat chivinti ixlacata apumatam. Jantu aʼokxchʼokʼotʼaiʼinitʼi tuʼuʼ xamatiʼ. Atʼalhonin ju mimpai chai ju minatich”. 20 Pus ju anuʼ tsʼalh akʼalhtayanalh. Junich ju Jesús: ―Amamakaʼunuʼ. Chux ju ani icmuctaxtukʼota tus quilhitalacatʼicstʼin. 21 Ju acsnich ju Jesús laktsʼilh ju anuʼ tsʼalh chai na mapaini. Junich: ―Tiʼalin lakatam taxtokni ju tasqʼuini ni anavitʼi. Inchich. Astʼachich tachi chun ju miʼalinta chai axtʼaknin ju tumin ju amakʼaixtʼokʼaʼ ju quilhpatinin. Ju chunch caʼalinaʼ ju mimakʼalit ju lactʼiyan. Chai astan aqʼuinchʼakʼokʼach. Chai achʼixtʼich ju makʼalhkʼajnat ju caʼalinaʼ va ixlacaʼatalh ni aquilhilaksiyaʼ ju quitʼin. 22 Para ju anuʼ tsʼalh acsni kʼasmatlh junima chivinti lana na amakʼaninilh. Na amakʼaniniʼalh ni na makʼaliʼ ixjunita. 23 Ju acsnich ju Jesús alaktsʼilh ju lapanacni ju ixtayanalh ixtalakachoko chai alacjuni ju ixʼalacmamakaʼui: ―Na lhixcai ni lai catanu ju lactʼiyan junta lhinajun ju Dios tam makʼaliʼ. 24 Pus ju ixʼalacmamakaʼui Jesús na talhamakʼaninilh ju ixchivinti. Para ju Jesús alacjunchokopa: ―Quintsʼalan na lhixcai ni lai catatanu ju lactʼiyan junta lhinajun ju Dios ju yuʼunch ju na talhilaksi ju ixmakʼalitʼan. 25 Ju tuʼuʼ camello jantu lai catitapasalh junta tilhucucu ju macscat. Pus vana va chun tam makʼaliʼ. Ju yuchi jantu lai catitanun ju lactʼiyan junta lhinajun ju Dios. 26 Pus ju ixʼamamakaʼui acsni takʼasmatlh ju ani chivinti va palai talhamakʼaninilh. Chai talaclajuni sia yuʼunch. ―Pus tis chavaich ju lai camakʼalhtaxtucanaʼ. 27 Para ju Jesús alaktsʼilh. Ajuni: ―Ju va lapanac aktsʼiya palai tuʼuʼ lhiulai ju ixmakʼalit. Palai jantu ixtaxtokni Dios. Para ju Dios lai amapaxani ixʼatalacpastʼacʼat tam lapanac. Pus tachi chun ju taxtokni si lai navikʼojui ju Dios. 28 Ju acsnich ju Pitaluʼ junich: ―Ju quijnan icmaconkʼotauch chux quintaxtokni quincʼan chai iclachʼakʼokʼatauch. 29 Chai ju Jesús akʼalhtayanalh. Junich: ―Slivasalh ju iclajunau. Va tichi chavaich ju calhimacaulh ju ixchakaʼ u tam ixlakʼau tsʼalh u tam ixlakʼau atsiʼ u ixpai u ixnati u ixʼamachakaʼ u isʼaskʼatʼan u ixlacatʼun va ixlacaʼatalh ni quinchʼakʼokʼai ju quitʼin chai va ixlacata ni laich caʼajunilh ju lapanacni ta yu laich catatakʼalhtaxtulh pus palai lhu caxtaknicanaʼ. 30 Ju chunch calalh pus caʼalinaʼ lhu chakaʼ junta laich cachaʼanaʼ tachi ju va laʼixchakaʼ junita. Chai caʼalinaʼ lhu lapanacni ju tachi vasalh ixʼalakʼavin catajunaʼ mas jantu. Chai caʼalinaʼ ju tachi vasalh ixlacnatiʼan tajunita chai tachi ixlacʼaskʼatʼan catajunaʼ. Chai caʼalinaʼ lhu ju lacatʼun junta lai camachʼixtaknicanaʼ ni laich cachʼalhcatnanaʼ tachi ju va ixʼanuʼ. Caʼalinaʼ tachi chun ju ani para vachuʼ catamakʼalhkʼajnanaʼ ni vachuʼ caʼaxcaicanaʼ. Chai astan caʼalinaʼ isʼatsucuntiʼan ju conkʼalhiyanta lactʼiyan. 31 Para ju lactʼiyan caʼalinaʼ lapanacni ju makʼanch xaquintalhilaksi. Para jantu lai actinaulh ni va ixlhiyuchi palai kʼox caʼalhilhiulacalh. Palai jantu ju aliʼin. Chai cataʼalinaʼ lapanacni ju jantucaʼ makʼan xaquintalhilaksi. Para jantu lai actinaulh ni ixlhiyuchi palai jantu kʼox caʼalhilhiulacalh. Palai kʼox caʼalhiulacalh ju aliʼin. 32 Pus ju Jesús chai ju aliʼin ixtaʼalhtanaʼanta laxati ju Jerusalén. Chai ju Jesús ixʼapʼulhnita ju aliʼin. Chai ju ixʼamamakaʼui ni va ixtalhamakʼaninin ju Jesús pus ixtatakʼaixui. Chai na ixtatalhanan. Pus ju acsnich ju Jesús alactʼasanilh ixpumacautʼuiʼan chai va isʼakstuʼan alactʼaʼalhtanalh ju lacati. Chai ju yuchi tsuculh ajuniniʼ ju taxtokni ju catapasayaʼ laʼisʼatsucunti ju yuchi. 33 Alacjuni: ―Alaktsʼintʼit. Ju chavai cachaʼanau ju Jerusalén. Chai ju quitʼin acmakʼaxtakcanaʼ laʼixmacaʼan ju xalackʼajin palijni chai ju na talhatalanininta ju milhamapʼaksinʼan. Quitʼin ju quimalakachatachilh Dios ni lapanac actsucuyaʼ ju ani. Chai ju yuʼunch aquintalhinonaʼ ju quimaknica. Chai aquintamakʼaxtʼakʼaʼ laʼixmacaʼan ju jantu quintʼaʼisraelitaninʼan. 34 Chai ju yuʼunch aquintalhitsʼiʼinaʼ. Chai aquintakʼainekmayaʼ. Chai aquintaʼacxpuchujvayaʼ. Chai aquintamakniyaʼ. Para ju ixlhilakatʼutu avilhchan actaʼacxtuchokoyaʼ junta acmacnucanaʼ. 35 Ju acsnich ju Jacobo chai ju Xivan istsʼalan ju Zebedeo talakʼalh ju Jesús chai tajunich: ―Amamakaʼunuʼ iclacasqʼuinau ni aquilanaviniu ju tuchi aclasqʼuiniyau. 36 Chai ju Jesús alacjuni: ―Tijuch ju lacʼasqʼuinatʼit ju aclanaviniu. 37 Chai ju yuʼunch tajunich: ―Va iclacasqʼuinau ni alakʼaʼiyaʼ ju uxintʼi ni anch actolauch ju pumatam lamilhicana chai ju pumatam lamilhimacx acsni xakʼai aʼunaʼ. 38 Pus ju acsnich ju Jesús alacjuni: ―Ju uxijnan jantu cʼatsʼayatʼit tuchʼi sqʼuinatʼit. Ja lai amakʼalhkʼajnanaʼitʼit tachi ju acmakʼalhkʼajnanaʼ ju quitʼin. 39 Ju yuʼunch taʼakʼalhtayanalh. Tajunich ni calayach. Chai ju Jesús alacjuni: ―Slivasalh chunch ju amakʼalhkʼajnanaʼitʼit tachi ju acmakʼalhkʼajnanaʼ ju quitʼin. 40 Para jantu quitʼin ju acnonaʼ tichi chavaich ju catolaʼ laquilhicana chai laquilhimacx. Yuʼunch ju catatolach anch ju asacxtuta. 41 Pus ju ixpumacauʼan ixʼamamakaʼui ju Jesús acsni takʼasmatlh tuchi ixtanajunta ju Jacobo chai ju Xivan na talhitalhkʼamalh. 42 Para ju Jesús alactʼasanilh ixchuxʼan chai alacjunich: ―Ju uxijnan cʼatsʼayatʼit ni slivasalh na pʼas talhinajun ju xaʼucxtin lakatam kʼai lacatʼun. Chai na alhimacchapui ju lapanacni ju salactʼicstʼi ucxtinin ju amalakachacan. 43 Para jantu chun ju alatʼit ju uxijnan. Alai va tichi chavaich ju lamilhiʼuxijnan ju palai xakʼai jumputun tasqʼuini ni calhitalacasu tachi ju tam xalapanac. 44 Chai va tichi chavaich ju milhiʼuxijnan ju xakʼai jumputun tasqʼuini ni cacaplich ju chunch. Alai va cajunlh tachi ju va tam xalapanac. 45 Chunch ju alatʼit tachi ju iclai ju quitʼin ju quimalakachatachilh ju Dios ni lapanac actsucuyaʼ ju ani. Pus ju quitʼin jantiyuʼ iclhiminta ni va aquintachʼalhcatnanilh ju lapanacni. Alai iclhiminta ni acʼalacchʼalhcatnaniyaʼ ju lapanacni chai acxtʼakʼaʼ ju quiʼatsucunti va ixʼamalakxtuca lhu ju lapanacni. 46 Ju Jesús chai ju ixʼamamakaʼui chai lhu lapanacni tamilh ju lakʼachakʼan Jericó. Chai acsni tataxtuchokolh ju anch pus ixvi laʼixquilhtuʼ ti ju Bartimeo. Istsʼalh ju Timeo. Ju yuchi va alakʼachʼix ixjunita chai ispusacʼa ju tumin. 47 Chai ju yuchi acsni kʼasmatlh ni minta ju Jesús amachakaʼ Nazaret pus tsuculh tʼasaniniʼ. Junich: ―Jesús. Istsʼalhʼat ju kʼai ucxtin David. Aqʼuinavininch lamapainin. 48 Para na lhu lapanacni ju ixtatʼaminta ju Jesús ju lacati ixtalakʼakʼaimai. Tajuni ni va sekch catavi. Para ju yuchi va apalai pʼas ixchivinin. Ixnajun: ―Ji istsʼalh ju kʼai ucxtin David aqʼuinavinin lamapainin ju quitʼin. 49 Pus ju acsnich ju Jesús lana taya. Lhinaulh istʼasanica ju Bartimeo. Pus taʼalh tʼasaninin ju alakʼachʼix chai tajunich: ―Akʼachʼach. Atʼaich. Tʼasaniyan ju yuchi. 50 Pus ju yuchi macoma ju ixcutun. Alhtujnutaya chai lakʼalh ju Jesús. 51 Chai ju Jesús junich: ―Tijuch ju acnaviniyan. Chai ju alakʼachʼix juni: ―Amamakaʼunuʼ icʼalacʼavamputun. 52 Pus ju Jesús juni: ―Pus laich apʼinaʼ. Ni xaqʼuilhilacʼapʼinch pus laich alacʼavananaʼ. Pus lana alacʼavanalh ju anuʼ alakʼachʼix ixjunita. Chai tʼaʼalh ju Jesús ju lacati.
1 Ju vanin ju lakʼachakʼan Jerusalén ixtaʼalin lakatʼui lactʼicstʼi lakʼachakʼanixni. Ju lakatam ixjuncan Betfagé chai ju lakatam ixjuncan Betania. Chai vanin ju anuʼ lakʼachakʼanixni ixʼalin ju akstijun junta ixchʼancanta ju xaqʼuiu ju olivos ixjuncan. Pus ju Jesús acsni alactʼachaʼalh ju anch ju ixtalhavat lapanacni pus amalakacha pumatʼui ixʼalacmamakaʼui. 2 Alacjunich: ―Aʼinchitʼit ju anuʼ tasui lakʼachakʼan. Chai acsni atʼanutʼachitʼit alhitʼaʼuyaʼitʼit lakatam sastʼi puru chʼiyocanta. Tucaʼ xamatiʼ putocʼai. Axkʼotʼayaʼitʼit. Alhitʼanaʼitʼit. 3 Chai ni xamatiʼ catajunan: “Tajuch ni va chun ju lapʼalatʼit”, pus va aʼunaʼitʼit ni ma maktasqʼuini ju miʼucxtinʼan chai ma vatsʼalhti camalakachachokotachilh. 4 Pus taʼalh. Chai talhitajucha ju puru junta ixchʼiyocanta lacati vanin lacamalhtich. Chai taxkʼotailh. 5 Pus ju ixtayanalh anch tajuni: ―Tijuch ju naviyatʼit ni va xkʼotʼayatʼit ju puru. 6 Chai ju ixʼamalakachan ju Jesús tajunilh tachi ixʼajuncanta. Chai ju acsnich yau ajunicalh ni catalhiʼalh ju puru. 7 Chai talhimilh ju puru junta ixvi ju Jesús. Taʼakxchʼamucʼalh ixcutunʼan chai ju Jesús putocʼalh. 8 Pus na lhu lapanacni ixtamamalhiʼanta ixcutunʼan ju lacati junta capuminaʼ ju Jesús. Ju aliʼin ixtachakxʼi ju ixʼacatan qʼuiu chai ixtamamalhiʼanta ju lacati. 9 Chai ju ixtaʼapʼulanan chai ju ixtakʼaixunun ixtalactʼasaʼanta ju lacati. Ixtanajun: ―Chach lakʼayacalh ju ani minta. Paxcat ju ani ju minta ju malakachatachilh ju Dios. 10 Na kʼox cajunaʼ ju ixpuʼucxtin ju caʼalinaʼ. Chunch ju cajunaʼ tachi ixjunita ixpuʼucxtin ju makʼaniya quimpaiʼan David. Chach lakʼayacalh ju Dios. 11 Pus ju Jesús acsni tanu ju lakʼachakʼan Jerusalén alh ju lacakʼai ixpujitatʼan ju istʼaʼisraelitanin. Chai acsni islaktsʼinkʼotach tachi chun ju taxtokni ju anch pus alactʼataxtuchokolh ju ixpumacautʼuiʼan. Chai ni na ixtokʼoxatach pus alactʼaʼalh ju lakʼachakʼan Betania. 12 Chai acsni tuncunchokopa pus ju Jesús chai ju ixʼamamakaʼui tataxtuchokocha ju Betania chai ju Jesús chavanilh. 13 Chai acsni laktsʼilh ju ixlhimakat akʼatam xaqʼuiu higo ju na xkʼoyu ixlatach pus lakʼalh. Tsʼa ma laich calhitaju tuʼuʼ xalhiʼut. Para acsni quilaktsʼilh jantu tuʼuʼ lhitaju. Va si xaxkʼoi. Va tsʼalhti ixlakapʼunta mas tucaʼ ixchaʼanta ju avilhchan acsni caʼalilh ju xatocʼat. 14 Pus ju acsnich ju Jesús junilh ju anuʼ xaqʼuiu higo: ―Jantu tavanan catiʼalinchokolh ju miʼatocʼat ju lai cataʼulh ju lapanacni. Pus takʼasmatlh ju ixʼalacmamakaʼui tuchi juni ju Jesús ju anuʼ xaqʼuiu higo. 15 Astan ju Jesús chai ju ixʼalacmamakaʼui tamilh ju Jerusalén. Chai acsni tanulh ju Jesús ju lacakʼai ixpujitatʼan ju istʼaʼisraelitanin pus tsuculh alactixcoxtunuʼ ju lapanacni ju ixtaʼastʼanan chai ju ixtaʼatamonan ju anch. Alakmakspuspʼitnikʼo ju ixmixaʼan ju ixmapaxanin tumin chai ixputolanʼan ju istʼanin lakʼaxkʼavan. 16 Chai jantu xalacasqʼuin ni xamatiʼ cacʼucʼalhiʼalh tuʼuʼ ju laʼismakspaʼ kʼai ixpujitatʼan ju istʼaʼisraelitanin ni tachi ju va lacati cataʼulhtulh. 17 Chai ixʼalacmasuni ju lapanacni chai alacjuni: ―Tsʼokcanta laʼixchivinti Dios junta najun ni ixchakaʼ ma calhimispacanaʼ ni anch ju lai catʼachivinaʼ ju Dios va tichi chavaich. Chunch ju tsʼokcanta para ju uxijnan ni va lhimalacxtʼutʼatʼit ju tuʼuʼ lhucucu talhpa junta tatankʼanui ju akʼalhonin. 18 Pus ju na ixtalhatalanininta ju ixlhamapʼaksinʼan ju istʼaʼisraelitanin chai ju xalackʼajin palijni takʼasmatlh ju tuchi ixnajunta ju Jesús. Chai ju acsnich tatsuculh puxconin ta yu laich catapumakniyaʼ. Para va ixtatalhoni ju Jesús ni chux ju lapanacni na ixtalhamakʼaninin ju ixʼatalaninti. 19 Para acsni tokʼoxapa pus ju Jesús taxtuchokolh ju anch lakʼachakʼan. 20 Chai acsni tuncunchokolh pus ju Jesús chai ixʼalacmamakaʼui taʼalhtanampa ju lacati. Chai talaktsʼilh ju xaqʼuiu higo ni ixixtach tus laʼistisivic. 21 Ju acsnich ju Pitaluʼ pastaclich tuchi ixtapasata chai junich ju Jesús: ―Amamakaʼunuʼ alaktsʼich ju xaqʼuiu higo ju lakʼakʼaimatʼi. Na xixtach ju chavai. 22 Chai ju Jesús akʼalhtayanalh. Alacjuni: ―Alhilaksitʼit ju Dios. 23 Slivasalh ju iclajunau. Va tichi chavaich ju cajunilh ju ani talhpa: “Akʼostʼich. Atʼaʼuchich ju lacaʼalama”, pus canavinicanaʼ. Para tasqʼuini ni jantu va tam tam canonaʼ laʼixʼalhunut. Alai calacaʼiyaʼ ni calhixajanta tuchi canonaʼ. 24 Yuchi iclalhijunau ni tachi chun ju asqʼuinaʼitʼit acsni atʼachʼivininaʼitʼit ju Dios alacʼaʼitʼit ni amaklhtʼayananaʼitʼit chai axtʼaknicʼanaʼitʼit. 25 Chai acsni atsʼucʼuyaʼitʼit tʼachʼivinin ju Dios amacʼacxanin ni alin xamatiʼ ju tʼalakʼaitan. Ju chunch ju mimpaiʼan ju vilhcha lactʼiyan catamacʼacxaniyanch vachuʼ ju uxijnan ju mintalakʼalhinʼan. 26 Para ju uxijnan ni jantu amacʼacxaniyaʼitʼit ju mintʼalaxcaiʼan pus nin yuchi ju mimpaiʼan ju vilhcha lactʼiyan jantu catitamacʼacxanin ju mintalakʼalhinʼan. 27 Ju acsnich ju Jesús chai ju ixʼamamakaʼui taʼanchokopa ju lakʼachakʼan Jerusalén. Chai ju Jesús ixʼalhtanatʼajun lacakʼai ixpujitatʼan ju istʼaʼisraelitanin. Pus talakmilh ju yuchi ju xalackʼajin palijni chai ju papaninch chai ju na ixtalhatalaninintach ju ixlhamapʼaksinʼan ju istʼaʼisraelitanin. 28 Tajunich: ―Tis chavaich ju xajunan ni laich anaviyaʼ ju ani taxtokni. 29 Pus ju Jesús alackʼalhtailh. Alacjunich: ―Vachuʼ aclasacmiyau ju uxijnan lakatam chivinti. Ni aquilajuniuch pus vachuʼ aclajunau tichi chavaich ju xaquijuni ni acnavi junima taxtokni. 30 Pus tis chavaich ju xamalakachayachilh ju Xivan amakpaxanaʼ. Ja yuchi ju Dios u yuʼunch ju lapanacni. Aquilajuniuch. 31 Pus ju acsnich ju yuʼunch talaclajunilh ixlhiʼakstuʼan: ―Ni canaju ni Dios xamalakachayachilh pus ju yuchi laich aquintajunan tajuch ni jantu xalacaʼiniyau. 32 Chai vana jantu lai catinaju ni ixtʼalapanac ju xamalakachayachilh amakpaxanaʼ. Chunch ixtalaclajuni ni na ixtatalhoni ju lapanacni. Ju lapanacni si ixtanonkʼojui ni slivasalh ni ixnajun ixchivinti Dios ju Xivan. 33 Pus taʼakʼalhtayanalh chai tajunilh ju Jesús: ―Jantu iccʼatsayau. Pus ju acsnich ju Jesús alackʼalhtailh. Alacjuni: ―Nin quitʼin jantu actilajuniu tichi chavaich ju xaquijuni ni acnaviyaʼ junima taxtokni.
1 Ju acsnich ju Jesús tsuculh ajuniniʼ ju lapanacni ju chivinti ju ixtʼalaktsʼipaxcavaich ju tuʼuʼ. Alacjuni: ―Pumatam lapanac chakxchʼanlh ju xaqʼuiu uvas laʼixlacatʼun. Coralhnu lacakʼex. Pokʼajʼula junta catamaxtuyaʼ ju xaxcan uvas. Yaulh ju chakaʼ ju na putankʼai ni laich capulhistaccalh ju ixpuʼuvas. Chai acsni navikʼo pus amachʼixtaknilh ixpuʼuvas ju lapanacni ju makchʼalhcatnin. Chai ju amatʼun alh makat. 2 Chai acsni chaʼalh ju avilhchan ni chalh ju uvas pus ju amatʼun malakachanilh pumatam ixlapanac ju anuʼ makchʼalhcatnin ni caʼalh amaklhtayanaʼ ju xalhiʼut tachi ju ixʼalhitʼatakʼoxitach. 3 Para ju anuch makchʼalhcatnin tachʼapalh ju ixlapanac ju amatʼun. Talakʼanekma. Talhixcavatsʼala chai va chunch tamalakachachokolh. 4 Pus ju amatʼun amalakachanichokolh apumatam ixlapanac. Para ju anuʼ lapanacni va talacatʼalhma. Tamacʼatsani laʼisʼaktsulh. Chai tanavi tachi ju jantu chun. 5 Pus ju amatʼun aktam amalakachanichokolh apumatam. Chai ju yuchi tamakni. Ju astan na lhu amalakachanicalh. Ju aliʼ tamacʼatsani. Ju aliʼ talamakni. 6 Pus ixtiʼalin pumatam ju ixtʼavi ju anuʼ amatʼun. Yuchi ju istsʼalh ju na ixmapaini. Pus malakacha ju yuchi vachuʼ ju saʼastan. Ixnajun: “Catatalhoniyaʼ ju quintsʼalh”. 7 Para ju anuch makchʼalhcatnin talaclajunich sia yuʼunch: “Yuchi ju ani ju amanavin cajunaʼ acsni caniyaʼ ju ixpai. Asokʼotʼitch. Camakniuch. Ju chunch ju ani lacatʼun ju xtakniputuncan ju yuchi quiʼanuchʼan cajunaʼ”. 8 Pus lana tachʼapalh. Tamaknilh. Chai tatantamacxtunilh ixlacatuna lacapuʼuvas. 9 Pus tas canaviyach ju chavai ju amanavin puʼuvas. Pus caminach isʼakstu ju yuchi chai camaknikʼoyaʼ ju ixchuxʼan ju ixtachʼalhcatnan ju anch. Chai aliʼin ju caʼamachʼixtakniyaʼ ju ixpuʼuvas. 10 Ja va jantu tavanan laktsʼintʼatʼit ixchivinti Dios ju tsʼokcanta junta ma chani najun: Ju chiux ju tasacmackʼalh ju ixyonin chakaʼ yuchach ju valhch ju chiux ju makʼastumucʼacanta chakaʼ junta tsʼokcanta tuchi cʼata ju yocanta. 11 Yuchi ju Dios ju navilh ju ani. Chai acsni iclaktsʼinau pus na kʼai lhamakʼan iclhiulayau. 12 Pus ju acsnich ju ixtatʼajun kʼasmatnin ju ixchivinti ju Jesús na ixtachʼapaputun ni ixtamachakxai ni yuʼunch ju ixʼalhichivinin ju Jesús acsni xanajun ju anuʼ chivinti ixlacata ju puʼuvas. Para aktsʼiya va ixtatalhoni ju ixtalhavat lapanacni. Pus tamacaulh. Taʼalh. 13 Ju astan amalakachacalh ju aliʼin fariseonin chai ju aliʼin ju ixtachʼakʼokʼai ju gobernador Herodes. Pus ju yuʼunch talakmilh ju Jesús para va ixtapuxcolakxtuniputun ju tuʼuʼ chivinti ju laich catalhimucʼanilh ixtalakʼalhin. 14 Pus talakʼalh chai tajunich: ―Amamakaʼunuʼ iccʼatsayau ni naʼun ju stavasalanti ju uxintʼi. Chai jantu xamatiʼ ju tʼalhoni ni vaklhtam chun ju alaktsʼin ju lapanacni. Chai ju uxintʼi aktsʼiya sok masui ju ixti ju Dios. Pus ja lhijun ni acʼamapalanau laʼixmacni ju xaʼucxtin ju romanonin u jantu. 15 Para ju Jesús ixmachakxani ni va ixtaʼacxputʼiyunun ju yuʼunch chai alacjuni: ―Tajuch ni va quilapuxconiputunau ju quintalakʼalhin. Aquilalhiminiuch ju tumin ju lhiʼamapʼalananatʼit ni aclaktsʼinach. 16 Pus ju yuʼunch talhiminilh ju tumin. Chai ju Jesús acsni laktsʼilh alacjunich: ―Tis ixʼucxpuʼ ju ani okslai. Tis ixtapakaʼut ju tsʼokcanta ju ani. Pus ju yuʼunch tajuni ni ixʼanuʼ ju César ixʼucxtinʼan ju romanonin. 17 Chai alackʼalhtailh ju Jesús. Alacjuni: ―Pus axtʼaknitʼit ju César ju ixʼanuch. Chai axtʼaknitʼit ju Dios ju ixʼanuch. Pus ju lapanacni acsni takʼasmatlh tachi ju lhikʼalhtayanalh ju Jesús na talhamakʼaninilh ni na kʼox xanajun. 18 Pus ju saduceonin ixtanajun ni jantu lai lokʼonchokocan acsni va nicanch. Pus ju aliʼin sia yuʼunch talakmilh ju Jesús chai tajuni: 19 ―Amamakaʼunuʼ ju makʼaniya ixlapanac Dios ju Moisés ixjuncan chani quintaʼatsʼoknunilh: “Ju tam lapanac ni canilh chai ma camacontilalh ixʼamachakaʼ para ma jantu tuʼuʼ catʼamacontilalh isʼaskʼatʼa pus ju ispʼisekʼe ma calhitsucuchokolh ju ixʼamachakach ixjunita ju xani ni laich caʼalilh ju istsʼalh. Chai ju anuʼ tsʼalh ma casacnilh ju ixtapakaʼut ju lijunto ixlakʼau”. 20 Pus ixʼalin pumatujun lhiʼalakʼavin. Chai ju xakʼai tamakʼaxtoklh. Chai acsni nilh jantu tuʼuʼ macontilalh ju isʼaskʼatʼa. 21 Pus ju ixlhipumatʼuich lhiʼalakʼavin tʼatsucuchokolh ju ixʼamachakach ixjunita ju lijunto ixlakʼau. Chai astan nipa ju yuchi sin tuʼuʼ camacontilalh ju isʼaskʼatʼa. Chai ju ixlhipumatʼutu lhiʼalakʼavin vana va chun tapasapa. 22 Pus ju anuʼ chakoʼulh tʼatsucukʼo ju ixpumatujunʼan lhiʼalakʼavin chai pumatam pumatam tani. Para jantu xamatiʼ macontilanilh isʼaskʼatʼa. Chai acsni ixtanikʼota ju yuʼunch pus astan vachuʼ nilh ju anuʼ chakoʼulh. 23 Pus acsni cataʼacxtuchokoyaʼ ju tanita tis ixʼamachakaʼ cajunaʼ ni ixpumatujunʼan atʼatsucukʼo ju anuʼ chakoʼulh. 24 Pus ju acsnich ju Jesús akʼalhtailh. Alacjuni: ―Ju uxijnan jantu sok alacpʼastʼacnanatʼit ni jantu machʼakxayatʼit ni na lacalhu ju tsʼokcanta laʼixchivinti Dios junta najun ni catalokʼonchokoyaʼ ju tanita. Vachuʼ jantu mispʼayatʼit tuchi lai navi ju Dios. 25 Pus acsni cataʼacxtuchokoyaʼ ju tanita jantu catamakʼaxtokcanaʼ nin calaʼicalh. Va ixtʼachunchach catatsucuyaʼ tachi ju anquilhnin ju tavilanancha lactʼiyan. 26 Chai ni va asacmininatʼit ni lai cataʼacxtuchokoyaʼ ju tanita u jantu pus ja lana jantu laktsʼintʼatʼit junta tsʼoklh ju Moisés junta najun ni laktsʼilh ju achʼitin ju ixmaktajita. Chai ni lakʼalh pus ju Dios xakʼala chai juni ni isDiosʼan junita ju Abraham chai ju Isaac chai ju Jacob. 27 Pus ju Dios ni isDios junita ju lapanacni ju tatʼajun pus nomputun ni tatʼajun ju anuch lapanacni mas noncan ni makʼanch tanita. Pus ju uxijnan na lhu makʼatsʼankʼayatʼit ju miʼatalacpastʼacʼatʼan. 28 Chai pumatam ju na ixlhatalanininta ju ixlhamapʼaksinʼan ju istʼaʼisraelitanin vachuʼ lakmilh ju Jesús. Ju yuchi iskʼasmatach tachi ju ixtajuni ju Jesús ju saduceonin. Chai ju yuchi machakxa ni na kʼoxich ju xalhakʼalhtayanan ju Jesús. Pus vachuʼ sacmilh ju Jesús. Junich: ―Tachi chun ju ixlhamapʼaksin ju Moisés tasmalhch ju palai tasqʼuini ni canavicalh. 29 Pus ju Jesús kʼalhtailh. Junich: ―Ju lhamapʼaksin ju palai tasqʼuini ni anavitʼi yuchi ju ani: “Akʼasmatʼit ji israelitanin. Ju miʼucxtinʼan Dios va pumatam. 30 Pus amapʼainitʼit ju miʼucxtinʼan Dios laʼixlhichux miʼalhunutʼan chai laʼixlhichux miʼatsucuntiʼan chai laʼixlhichux mintacʼatsanʼan. Amapʼainitʼit istavasalanti”. Yuchach ju ani ju lhamapʼaksin ju palai tasqʼuini ni anavitʼi. 31 Chai ju ixlhilakatʼui va ixtʼachunch junita. Ju yuchi najun ni amapʼainitʼi ju vanin alactʼavilhtʼi tachi ju va jun miʼakstu ju mapʼainichʼokʼocʼan. Matiʼ alakatam lhamapʼaksin ju va palai tasqʼuini ni anavitʼi. 32 Pus ju acsnich ju anuʼ lapanac ju na ixlhatalanininta ju ixlhamapʼaksinʼan ju istʼaʼisraelitanin junilh ju Jesús: ―Vasalh ji amamakaʼunuʼ. Stavasalanti tachi ju naʼun ni va pumatam ju Dios. Matiʼ akʼantam. 33 Chai vasalh tasqʼuini ni acmapaini ju Dios laʼixlhichux ju quiʼalhunut chai laʼixlhichux ju quintacʼatsan chai laʼixlhichux ju quiʼatsucunti. Acmapaini istavasalanti. Chai tasqʼuini ni acmapaini ju vanin quintʼavi tachi ju va jun quiʼakstu ju icmapainichokocan. Vasalh palai lhitapalai ni acnavi chux ju ani. Palai jantu ni va tuʼuch acmakninilh ju Dios u ni acxavanilh ju Dios tuʼuʼ lhakʼailaktsʼinti. 34 Pus ju Jesús acsni kʼasmatlh ni aktsʼiya na kʼox ju xalhikʼalhtaji ju anuʼ lapanac pus junich: ―Ju uxintʼi vasalh machʼakxai tuchi lacasqʼuin ju Dios. Ju chavai va yuchi ju cʼacxniyan ni alakʼaʼitʼi ni calhinonkʼo ju Dios lamiʼatsucunti. Pus ju acsnich tachi chun ju lapanacni na ixtatalhoni ju Jesús. Jantu ixtaquilhasacmiputun tuʼuʼ aliʼ. 35 Ju Jesús ixʼalacmasuni ju lapanacni ju lacakʼai ixpujitatʼan ju istʼaʼisraelitanin. Chai ajuni: ―Ju na talhatalanininta ju milhamapʼaksinʼan tas laich talhinajun ni istsʼalh David ju Cristo ju ixnoncan camalakachatachilh ju Dios. 36 Tas laich tanajun ju chunch ni mapastʼacʼani ju Spiritu Santu ni chani canaulh ju David: Ju ucxtin Dios junilh ju quiʼucxtin: “Vanin atʼaʼulh junta icvi tus acsni actʼalalhajayaʼ ju mintʼalaxcai”. 37 Pus ni isʼakstu ju naulh ju David ni ixʼucxtin junita pus ju chunch va nomputun ni jantu va istsʼalh junita. Pus ixtalhavat lapanacni va lhikʼach ixtakʼasmatni ju ixchivinti ju Jesús. 38 Chai ju Jesús chani alacjuni ju lapanacni acsni ixʼamalaninin: ―Jantu alacʼaʼinikʼotʼit tuchi tanajun ju yuʼunch ju na talhatalanininta ju milhamapʼaksinʼan. Ju yuʼunch na tapuʼalhtanamputun lacalhman ixpumpuʼan ni xalackʼajinch tatalacasuputun. Chai na kʼoxich talhiulai acsni tamacʼami ju lapanacni ju laclhitamau junta chux catakʼasmatʼaʼ. 39 Chai na tatolhputun junta tatolai ju xalackʼajin ju lacpujitat chai lacapuvai. 40 Va tataiʼini ixlacchakaʼan ju chakolun ju va animacontilacanta. Chai ni va talacasuputun tachi ju na va soknicʼa ju isʼatsucuntiʼan pus talapalai tachi ju na panicni ju tatʼachivinin ju Dios. Pus ni chunch ju talai palai camamakʼalhkʼajnicanaʼ ju yuʼunch. Palai jantu ju aliʼin lapanacni. 41 Ju aktam ju Jesús ixvi laʼixpujitatʼan ju istʼaʼisraelitanin. Anch ixvi laʼixʼucxlacapuʼ ju lacatʼicstʼi pʼaklat junta ixtamujui ju tumin ju ixtalhakʼailaktsʼin ju Dios ju lapanacni. Pus ju yuchi ixʼalaktsʼin ju lapanacni acsni ixtamujui ju ixtuminʼan ju lacapʼaklat. Pus na lhu makʼalinin na laklhu ixtamujui. 42 Chai milh pumatam chakoʼulh ju va ixnimacontilacanta. Na quilhpatiniʼ ixjunita. Pus ju yuchi muju lakatʼui lactʼicstʼi tumin ju lana jantu laklhu ixtapalh ixjunita. 43 Pus ju acsnich ju Jesús alactʼasanilh ju ixʼamamakaʼui chai alacjuni: ―Slivasalh ju iclajunau. Na kʼox xalhiulai ju Dios ju tuchi xamujui ju ani ya chakoʼulh ju va nimacontilacanta chai ju na quilhpatiniʼ. Palai jantu chun ju aliʼin ju tamujui ju ixtuminʼan ju lacapʼaklat. 44 Ju yuʼunch va tamujui ju va xatanxajni ixtuminʼan. Para ju ani quilhpatiniʼ mukʼo tachi chun ju ixpacxanta. Chux ju caʼixlhitamaʼuta ju ixvaiti.
1 Ju Jesús taxtulh ju lacakʼai ixpujitatʼan ju istʼaʼisraelitanin. Chai pumatam ixʼamamakaʼui junich: ―Quiʼamamakaʼunuʼ alaktsʼich ju ani chiux ni na laccʼus chai ju lacchakaʼ ni na lackʼox. 2 Para akʼalhtayanalh ju Jesús. Junich: ―Alaktsʼintʼit ju ani lackʼai kʼexichakaʼ. Pus caminaʼ avilhchan acsni jantu tuʼuʼ catilaʼucxtavi ju chiux ju ixtʼachiux. Chux lana calakʼalhikʼocanaʼ. 3 Pus ju Jesús chai ju ixʼamamakaʼui taʼalh ju akstijun junta ixchʼancanta ju xaqʼuiu ju olivos juncan. Chai ju anch ixtʼalalacaʼanita lacakʼai ixpujitatʼan ju israelitanin. Chai acsni tavi ju Jesús pus ju Pitaluʼ chai ju Jacobo chai ju Xivan chai ju Tilix va isʼakstuʼan taquilhasacmi. Tajuni: 4 ―Aquilajuniuch. Tas vananch ju catapasayaʼ ju anuʼ taxtokni ju xaquilajunau. Tas acpucʼatsayau ni chinta ju avilhchan acsni cataʼuctaxtuyaʼ chux ju ani taxtokni. 5 Pus ju Jesús alackʼalhtailh. Ajuni: ―Alhistʼaccʼantʼit ni jantu xamatiʼ cataʼokxchokʼon. 6 Pus na lhu cataminaʼ chai catanonach ni yuʼunchach ju Cristo ju ixnoncan camalakachatachilh ju Dios. Chai na lhu cataʼokxchokʼoyaʼ. 7 Para acsni akʼasmatʼaʼitʼit ni alin ju lhilucut chai ni cakʼostayachokochalh aliʼ lhilucut alacatam pus jantu atʼalhananaʼitʼit. Aktsʼiya tasqʼuini ni chunch ju catapasayaʼ. Para jantiyuʼ ju ixpuʼaclanti ju lacamunutpaʼ. 8 Pus ju amachakʼan ju kʼai lakʼachakʼan catʼalasayaʼ ju amachakʼan alakatam kʼai lakʼachakʼan. Chai ju lapanacni ju tachʼakʼokʼai tam kʼai ucxtin catatʼalasayaʼ ju ixlapanacni ju apumatam kʼai ucxtin. Catataclhaʼ ju lacatʼun ju vaklhun. Chai caʼalinaʼ ju kʼai chavan chai makʼalhkʼajnat. Pus ju ani va ixputaiʼulacan ju makʼalhkʼajnat. 9 Para ju uxijnan alhistʼaccʼantʼit miʼakstuʼan ni alhipʼincʼanaʼitʼit lacapuʼucxtin. Chai ju laʼixpujitatʼan ju mintʼaʼisraelitanin akʼainekmacʼanaʼitʼit. Chai alhipʼincʼanaʼitʼit laʼixʼucxlacapuʼan ju ucxtinin chai ju lacalackʼai ucxtinin va ixlacata ni quilalhilacaʼanau ju quitʼin. Pus ju chunch laich aʼunaʼitʼit ju yuʼunch ju quilacata. 10 Chai ni tucaʼ chin ju ixʼaclanti ju lacamunutpaʼ pus tasqʼuini ni pʼulhnan caʼalacjunkʼocanaʼ chux ju lapanacni ta yu lai puʼancan ju lactʼiyan. 11 Chai acsni alhipʼincʼanaʼitʼit junta makʼaxtʼakcʼanaʼitʼit lacapuʼucxtin pus jantu alhamakʼanininaʼitʼit tuchʼi ju anonaʼitʼit ni jantucaʼ chʼipʼinatʼit. Nin yuchi ni apʼastʼactʼit tuchʼi anonaʼitʼit. Para va tuchi cataxtakniyan ju Dios ju lamiʼalhunutʼan ju acsnich pantsʼiquis pus yuchach ju anonaʼitʼit. Chunch ju anonaʼitʼit ni jantu uxijnan ju achʼivinaʼitʼit para isʼakstu ju Spiritu Santu. 12 Chai ju lapanacni catalamakʼaxtʼakʼaʼ va ixlacaʼatalh ni axcaican ju quintalhilacaʼanta quitʼin. Pus ju lapanacni catamakʼaxtʼakʼaʼ ju tam ixlakʼauʼan laʼixʼaninti. Chai ju xalacpaʼitni catamakʼaxtʼakʼaʼ ju isʼaskʼatʼan laʼixʼanintiʼan. Chai ju saʼaskʼatʼan catatʼalasayaʼ ju ixpaiʼan chai ixnatichʼan chai catalhinonaʼ ixmaknicaʼan. 13 Pus chux ju lapanacni slivasalh catalhixcayan va ixlacata ni quilalhilacaʼanau. Para ju aquilhilaksiyaʼ tus laʼixʼaclanti ju isʼatsucunti yuchi ju catakʼalhtaxtuyaʼ chai laich caʼanaʼ ju lactʼiyan. 14 Ju makʼaniya lapanac ju Daniel ixjuncan ixnajun ixchivinti Dios. Chai ju yuchi tsʼokʼula junta naulh ni ma caʼalinaʼ lamimpujitatʼan ju tuʼuʼ ju na lhitsʼisi ju Dios. Chai ixlhiyuchi jantu xamatiʼ ju milhiʼuxijnan catanuyaʼ ju anch. Pus ju laktsʼin ju ani chivinti chach machakxa tuchi ju nomputun. Chai acsni alaktsʼinaʼitʼit ni uctaxtulh ju anuʼ ju lhichivinilh ju Daniel pus tachi chun ju tavilanalh laxaʼestado Judea chach taʼatsʼalalh. Cataʼalh ju lactalhpa. 15 Chai ju caʼakstitavi lacasotea chakaʼ va tsʼalhti catakʼalhtaju chai caʼatsʼalalh. Para jantu catiʼalilh ispantsʼiquis ni lai catanu ju laʼixchakaʼ ni va caʼalh maxtunuʼ tuʼuʼ ju ixtaxtokni. 16 Chai ju chʼalhcatnan laʼixcuxtu vachuʼ caʼatsʼalalh. Chai jantu cataspʼitchokolh laʼixchakaʼ ni va caʼalh iniʼ ju ixcutun. 17 Painiʼitnich ju yuʼunch ju jantu lacakʼox chai ju va tatʼajun matsʼiquinin isʼaskʼatʼan ju acsnich avilhchan. 18 Atʼapʼaininitʼit ju Dios ni jantu tasqʼuini ni atsʼalayaʼitʼit lacalhicʼasnin. 19 Chunch alhisqʼuinitʼit ni na lhu catamakʼalhkʼajnanaʼ ju lapanacni ju acs avilhchan. Catamakʼalhkʼajnanaʼ tachi ju jantu tavanan makʼalhkʼajnancanta tus acsni tavanan navicantacha ju Dios ju lacamunutpaʼ. Chai jantu aktam chun catamakʼalhkʼajnanchokoyaʼ tavanan. 20 Pus ju quiʼucxtinʼan Dios ni jantu caʼixnaulh ni palai va lacatsʼunin caʼixnavi ju anuch avilhchan pus jantu xamatiʼ caʼixtakʼalhtaxtulh. Ixtanikʼota. Para ni na amapaini ju lapanacni ju ixʼalacsacxtuta pus yuchi va lacatsʼunin lhinavilh ju anuʼ avilhchan. 21 Pus ju acsnich jantu xcai ni xamatiʼ chani catajunan: “Alaktsʼich. Ani ya ju Cristo ju ixnoncan camalakachatachilh ju Dios”. U chani catajunan: “Alaktsʼich anuʼ ya”. Pus ni chunch ju catajunan xamatiʼ jantu alacʼaʼitʼit. 22 Pus ju acsnich caʼalinaʼ ju lapanacni ju catanonaʼ ni yuʼunch ju Cristo ju ixnoncan camalakachatachilh ju Dios mas jantu. Chai caʼalinaʼ ju lapanacni ju catanonaʼ ju taʼaklhtamat chivinti. Para chunch catachivinaʼ tachi ju vasalh tatʼajun nonin ju ixchivinti Dios. Chai na lhu catanaviyaʼ ju taxtokni ju catapumavasalaputunach ni vasalh ixlapanacni Dios tajunita mas jantu. Chai catanaviyaʼ ju lhamakʼan ni va laich catapuʼokxchokʼolh ju lapanacni ju asacxtuta ju Dios. 23 Para ju uxijnan alhistʼaccʼantʼit. Iclajuntauch chux ju ani mas tucaʼ tapasai ni laich acʼatsʼayaʼitʼit ni chunch ju catapasayaʼ. Ju Jesús tailhiʼalh ixchivinti chai ajuni ju ixʼamamakaʼui: 24 ―Ju acsni avilhchan acsni catapasayaʼ ju anuʼ makʼalhkʼajnat pus catsʼisaʼ ju avilhchan. Chai ju malhquiyuʼ jantu camapulhcuyaʼ. 25 Chai catapatajuyaʼ ju stʼacu. Chai tachi chun ju ani catataclhaʼ. 26 Pus ju acsnich ju lapanacni aquintalaktsʼinach ju quitʼin ju quimalakachatachilh Dios ni lapanac actsucuyaʼ ju ani. Aquintalaktsʼinach acsni acminach lacaʼataputsʼi. Chai catacʼatsayaʼ ni na alin ju quintachaput chai xakʼai icjunita. 27 Chai ju acsnich acmalakachatachilh ju quiʼanquilhnin. Chai ju yuʼunch catamakʼaixtʼokʼach ju lapanacni ju icʼasacxtuta. Chai ju anuʼ lapanacni cataminanta ju ixlhilacaputsʼun ju lacamunutpaʼ mas palai makat cava ju ani lacatʼun u ju lactʼiyan. 28 Alaktsʼintʼit tachi ju takʼayai ju tuʼuʼ xaqʼuiu higo. Acsni catsucuyaʼ xajchiniʼ ju sastʼi xaxkʼoi pus pʼucʼatsʼayatʼit ni vaninch minta ju lacapʼasni. 29 Pus vana va chun ju ani. Acsni alaktsʼinaʼitʼit ni catapasayaʼ ju ani taxtokni pus apʼucʼatsʼayaʼitʼit ni slivasalh jantu makʼan ticʼacx tus caʼaclayaʼ ju lacamunutpaʼ. 30 Slivasalh ju iclajunau. Jantu catanikʼoyaʼ ju lapanacni ju chavai tatʼajun tus cataʼaktsakʼoyaʼ tachi chun junima taxtokni. 31 Ju tʼiyan chai ju lacatʼun catsʼankʼakʼoyaʼ. Para ju quinchivinti aktsʼiya caʼuctaxtuyaʼ. 32 Para jantu xamatiʼ cʼatsai tis avilhchan chai tuchi hora ju acminaʼ ju quitʼin. Nin yuʼunch ju anquilhnin ju tavilanancha lactʼiyan nin quitʼin mas istsʼalh Dios icjunita. Va isʼakstu ju quimpai ju cʼatsai. 33 Pus skʼalalhch atsʼucʼutʼit. Alhistʼaccʼantʼit. Atʼachʼivinintʼit ju Dios ni jantu cʼatsʼayatʼit tavananch ju acminaʼ. 34 Pus ju acsnich chunch cajunaʼ tachi acsni an makat tam jokʼat. Ni tucaʼ an pus ajuni ju ixlapanacni ni catalhistaclh ju ixchakaʼ. Chai pumatamin axtakni ixlhichʼalhcat ju catanaviyaʼ. Chai juncanch ju ixlhistʼacʼa malhtich ni calhistaclich. 35 Pus vana va chun ju uxijnan. Alhistʼaccʼantʼit ni vachuʼ jantu cʼatsʼayatʼit tavananch ju acminaʼ quitʼin ju miʼucxtinʼan icjunita. U tokʼoxai. U paitat tsʼis. U acsni paktʼutu tʼasata ju chilaʼ. U acsni catuncuntilayach. 36 Jantu xcai ni va tam pantsʼiquis acmilh chai aclalhitajuyau ni tachi ju va lhtʼatʼayatʼit lamiʼatsucuntiʼan. 37 Ju tuchi iclajunau ju uxijnan icʼalacjuni tachi chun ju lapanacni. Alhistʼaccʼantʼit.
1 Pus va lakatʼui avilhchan ixcʼacx tus caʼalinaʼ ju cʼatan ixpupastaccan ju anuʼ atatsʼisni acsni tatakʼalhtaxtulh laʼixʼanintiʼan ju xalackʼajin istsʼalan ju makʼaniya israelitanin. Chai vachuʼ acs ixʼalin alakatam cʼatan acsni ixtaʼui ju xkapavati ju jantu ixtamacaʼanita ju xatʼin. Pus ju xalackʼajin palijni chai ju lapanacni ju na ixtalhatalanininta ju ixlhamapʼaksinʼan ju istʼaʼisraelitanin tapuxcaulh ta yu laich caʼixtapuʼokxchokʼochʼapalh laʼixchivinti ju Jesús ni laich catalhinonaʼ ixmaknica. 2 Para ixtanajun: ―Jantu cachʼapayau acsni va alin ju cʼatan ni na aktsamcanta ju acsnich. Va laich catatalhkʼamalh ju lapanacni. 3 Pus ju Jesús ixvilhcha lakʼachakʼan Betania laʼixchakaʼ ju Simón ju na ixpacxanta istsʼitsʼi para palaich ixnavita ju Jesús. Chai acsni ixvi ju lacamixa pus milh pumatam chakoʼulh ju ixlhiminta lakatam lumeti ju chiux ixlhinavicanta. Para na stacʼacʼa ixjunita. Chai ju anuʼ chiux alabastro juncan. Pus ju anuʼ lumeti ixputajun ju tuʼuʼ ju na saksi ixʼacamin. Chai ju yuchi nardo ixjuncan chai na laklhu ixtapalh ixjunita. Pus ju anuʼ chakoʼulh kekpʼakxlh ju lumeti chai tsuculh lakxtixtʼekʼemucʼanaʼ ju Jesús ju ixtajun. 4 Pus ju aliʼin ju ixtavilanalh ju anch talhitalhkʼamalh. Chai talaclajunilh sia isʼakstuʼan: ―Tajuch ni va xalhakʼamanan ju ani saksi acamin. 5 Ju yuchi jantu va lakatʼutu cientos tumin ixtapalh junita. Ni caʼistʼacalh pus lai caʼixtaknicalh ju quilhpatinin ju ixtapalh. Pus lana jantu kʼox xatalhiulai tuchi navilh ju anuʼ chakoʼulh. 6 Para ju Jesús alacjuni: ―Amacʼaʼuntʼit. Tajuch ni va lhixcʼayatʼit. Na kʼox ju tuchi xaquinavinich. 7 Aktsʼiya alin ju quilhpatinin junta vilatʼit. Chai acsni alacʼasqʼuinaʼitʼit laich anaviniyaʼitʼit ju kʼox. Para ju quitʼin jantu actilatʼaʼalhtanankʼalhiu. 8 Ju ani ya chakoʼulh navilh tachi ju lai xanavi. Mas tucaʼ icmacnucanta para ju yuchi acsni quilacamucʼalh ju cʼuchʼu pus tachi ju va jun quimucʼalh ixlacata quiʼaninti ni chunch ju lhilanicantauch ni xamatiʼ taʼacnui. 9 Slivasalh ju iclajunau. Vanta anchach ju lacamunutpaʼ junta canoncanaʼ ta yu lai takʼalhtaxtucan pus vachuʼ canoncanaʼ tuchi ju xanavi ju ani ya chakoʼulh. Ju chunch jantuch cacapcanaʼ ju yuchi. 10 Ju Judas Iscariote pumatam ixlhipumacautʼuiʼan ixjunita. Pus ju acsnich ju yuchi alakʼalh ju xalackʼajin palijni. Alh atʼatakʼoxiniʼ ta yu laich capumakʼaxtʼakʼaʼ ju Jesús. 11 Chai ju yuʼunch acsni takʼasmatlh ju ixchivinti ju Judas na talackʼachalh. Tamachʼanulh. Tajunilh ju Judas ni cataxtakniyaʼ ju tumin. Pus ju Judas tus acsnich na ixpuxcajui ta yu laich capumakʼaxtʼakʼaʼ ju Jesús. 12 Pus ju xapʼulhnan avilhchan ixjunita ju anuʼ cʼatan acsni ixtaʼui ju xkapavati ju jantu ixtamacaʼanita ju xatʼin chai acsni ixtamakni ixborregoʼan ju ixpupastaccan ju anuʼ atatsʼisni acsni tatakʼalhtaxtulh laʼixʼanintiʼan ju xalackʼajin istsʼalan ju makʼaniya israelitanin. Pus ju acsnich ju ixʼalacmamakaʼui ju Jesús tajunich: ―Tas anchach ju kʼoxich lhiulai ju uxintʼi ju acʼanau lakʼoxinin junta laich caʼu ju borrego. 13 Pus ju Jesús amalakachalh ixtʼiyunʼan ixʼalacmamakaʼui. Chai alacjunich: ―Apʼinchitʼit ju lakʼachakʼan. Chai ju anch apʼakxtʼokʼaʼitʼit pumatam jokʼat ju lhiʼanta xcan lacaxalu. Pus atʼaimalhipʼinaʼitʼit ju yuchi. 14 Chai junta catanuyaʼ ju yuchi pus vachuʼ atʼanuyaʼitʼit. Chai chani ju aʼunaʼitʼit ju amachakaʼ: “Ju amamakaʼunuʼ ma najun ni ta ma anchach ju alin ju cuarto junta lai catʼaʼuyaʼ ju borrego ju ixʼalacmamakaʼui”. 15 Chai ju anuʼ amachakaʼ catamasuniyanch ixlhitantalaktʼui junta kʼaich ixchakaʼ. Ju anch lakasilakʼoxinincantach. Pus anchach ju alakʼoxiniyaʼitʼit ju vaiti quilacatachʼan quijnanʼan. 16 Pus ju ixʼamamakaʼui taʼalh ju lakʼachakʼan chai vasalh talhitajulh tachi ju ixʼajuncantach. Chai anchach ju talakʼoxinilh ju vaiti ixlacata ju cʼatan. 17 Chai acsni tokʼoxa pus ju Jesús anch ju alactʼaʼalh ju ixpumacautʼuiʼan ixʼamamakaʼui. 18 Chai acsni tatavilh lacamixa chai tatsuculh venin pus ju Jesús alacjuni: ―Slivasalh ju iclajunau. Pumatam ju milhiʼuxijnan ju quilatʼavenau aquimakʼaxtʼakʼaʼ. 19 Pus ju acsnich ju yuʼunch na taʼamakʼaninilh. Kʼantam kʼantam tajunich: ―Para ja quitʼin. Chai apumatam ixnajun: ―Para ja quitʼin. 20 Chai ju Jesús alackʼalhtailh. Alacjunich: ―Yuchi ju pumatam ju sia uxijnan ju mimpumacautʼuiʼan ju lakputam quintʼatamajkʼoi laquincʼaʼulh. 21 Slivasalh ni acʼanaʼ laquiʼaninti tachi ju iclhitsʼokcanta. Quitʼin ju quimalakachatachilh Dios ni lapanac actsucuyaʼ ju ani. Para painich ju anuʼ lapanac ju aquimakʼaxtʼakʼaʼ. Palai kʼox ixva ni jantu tavanan istsuculh ju anuʼ lapanac. 22 Chai acsni ixtatʼajun venin pus ju Jesús chʼapalh ju xkapavati. Xtaknilh lhakʼailaktsʼiuch ju Dios. Acsnicaʼ ju chʼekʼelh. Alacxtaknilh ju ixʼamamakaʼui chai alacjunich: ―Aʼutʼitch. Ju ani quilacatuna junita. 23 Vachuʼ xakatailh ju tasa ju ixputajun ju vino. Xtaknilh lhakʼailaktsʼiuch ju Dios chai axtaknilh ju ixʼamamakaʼui. Chai ju yuʼunch takʼotkʼo ixchuxʼan. 24 Ju acsnich ju Jesús alacjunich: ―Ju yuchi quiʼacʼalhni. Chai acsni cataxtuyaʼ ju yuchi pus camavasalayaʼ ju sastʼi chivinti ju caʼalaclhitʼatakʼoxiyaʼ ju Dios ju lapanacni ni laich caʼamacʼacxaniyaʼ ixʼalactuʼuntiʼan lhu lapanacni. 25 Slivasalh ju iclajunau. Jantuch tavanan actikʼotchokolh ju vino tus acsnich avilhchan acsni ackʼotʼach ju sastʼi vino junta lhinonacha ju Dios. 26 Pus acsni talakʼaya ju Dios lacamilhpat pus tataxtulh ju lacachakaʼ. Taʼalh ju anuʼ akstijun junta chʼancanta ju xaqʼuiu olivos. 27 Chai acsni tachaʼalh ju anch pus ju Jesús alacjunich: ―Minchuxʼan aquilamacoyokʼoyau ju chavai atatsʼisni. Iccʼatsai ni chunch ju alayaʼitʼit ni chani najun ju Dios laʼixchivinti ju tsʼokcanta: “Acmakniyaʼ ju xaʼalhistacnaʼ. Chai ju ixborregojni catataʼakpitsiyaʼ”. Chunch ma naulh ju Dios. 28 Para ju astanch acsni actaʼacxtuchokoyaʼ junta acmacnucanaʼ pus acpʼulhʼanaʼ ju xaʼestado Galilea. Astan achʼipʼinaʼitʼit ju anch ju uxijnan. 29 Pus ju acsnich ju Pitaluʼ junilh: ―Mas cataʼatsʼalhkʼo ju aliʼin para ju quitʼin jantu tavanan actimacoyaʼun. 30 Para ju Jesús junilh ju Pitaluʼ: ―Slivasalh ju icjunan. Ju chavai atatsʼisni acsni tucaʼ tʼasai paktʼui ju chilaʼ ju uxintʼi paktʼutu naʼuntʼa ni jantu qʼuimispʼai. 31 Para ju Pitaluʼ na pʼas ixnajun ni jantu tavanan catinaulh ni jantu mispai mas tus catʼamaknicalh. Chai si chun ixtanajun ju aliʼin ixʼalacmamakaʼui ju Jesús. 32 Pus ju astan ju Jesús chai ju ixʼalacmamakaʼui tachaʼalh junta ixjuncan Getsemaní. Chai acsni tachaʼalh ju anch pus ju Jesús alacjuni ju ixʼalacmamakaʼui: ―Anich atʼolatʼitcaʼ pantsʼiquis. Chactiquitʼachiviniʼ ju Dios. 33 Pus ju Jesús alackʼailhiʼalh ju Pitaluʼ chai ju Jacobo chai ju Xivan. Taʼalh palai avinti lacatsʼunin chai ju Jesús na talhanalh. Chai tsuculh amakʼaninin. 34 Chai alacjunich: ―Slivasalh na icʼamakʼaninin. Tachi ju va aquimakniyaʼ ju quiʼamakʼanit. Aquilapacxauch ju ani. Jantu alhtʼatʼatʼit. 35 Ju acsnich ju Jesús palai makat alh lacatsʼunin chai taʼaktsokotavi chai taquilhputalh ju lacatʼun. Tʼachivinilh ju Dios. Sqʼuinilh ni va laich cava jantu vana canaulh ju ixpai ni tasqʼuini ni camaknicalh tachi ju aktsʼiya ilhcata. 36 Chanich ju juni: ―Quimpai ju uxintʼi lai navikʼoʼui tachi chun ju taxtokni. Aqʼuimakʼosunin ju ani makʼalhkʼajnat ju slivasalh na tsʼinqʼui. Para jantu anavitʼi tachi ju iclacasqʼuin ju quitʼin. Va yuchi ju anavitʼi tachi ju anonaʼ ju uxintʼi. 37 Chai acsni taspʼitcha ju Jesús alaclhitajulh ju ixtʼutunʼan ni va ixtalhtatavilanalh. Chai ju yuchi junilh ju Pitaluʼ: ―Simón ja va lhtʼatʼaich. Ja lana jantu lai ixkʼalhcʼujtʼi va pantsʼiquis. 38 Akʼalhcʼujtʼit. Atʼachʼivinintʼit ju Dios. Ju chunch jantu cataʼokxchokʼoyan ju lhacaticuru. Pus ju lamiʼalhunutʼan vasalh navipʼutʼunatʼit ju kʼox. Para ju va lamiʼakstuʼan jantu lai naviyatʼit. 39 Pus aktam anchokopa ju Jesús tʼachiviniʼ ju Dios. Chai vana va chun ju nonchokopa. 40 Chai acsni taspʼitcha aktam alaclhitajuchokopa ixpumatʼutuʼan ixʼalacmamakaʼui ni aktam ixtalhtatananchokopalai. Pus na tsʼinqʼui ixjunita ixlakchulhʼan ni na ixtalaclhtataputun. Chai ju yuʼunch jantu ixtacʼatsai tuchi lai catajunilh ju Jesús. 41 Pus ampa tʼachiviniʼ ju Dios chai acsni minchokolh ixlhipaktʼutuch pus alacjunich: ―Ja lana va alhtʼatʼakʼalhiyaʼitʼit chai astʼacnankʼalhiyaʼitʼit. Kʼoxich ju chavai. Chilh ju hora acsni acmakʼaxtakcanach laʼixmacaʼan ju alactuʼunin. Quitʼin ju quimalakachatachilh Dios ni lapanac actsucuyaʼ ju ani. 42 Akʼostʼolatʼit. Caʼauch apakxtoknin. Va anich minta ju aquimakʼaxtʼakʼach. 43 Pus lana chincha ju Judas acsni ixtʼajuncaʼ chiviniʼ ju Jesús. Yuchi ju Judas ju ixlhipumacautʼui ixjunita ixʼalacmamakaʼui. Ju yuchi ixʼakʼailhiminta lhu ju lapanacni. Ixlapanacnich ixtajunita ju xalackʼajin palijni chai ju papanin chai ju na ixtalhatalanininta ju ixlhamapʼaksinʼan ju istʼaʼisraelitanin. Ju aliʼin ixtalhiminta ju ixmachitaʼan chai aliʼin ixtalhiminta ju tuʼuʼ qʼuiu. 44 Pus ju anuʼ ju camakʼaxtaknanach ixʼalaclhijunitach ju ixtalhavat lapanacni ta yu capumakʼaxtʼakʼach. Chani ixʼalacjunita: ―Ju acmacchʼuchʼuyaʼ yuchach. Achʼapʼayaʼitʼit. Alhipʼinaʼitʼit. Kʼox alhistʼacʼaʼitʼit. 45 Pus acsni chaʼalh ju Judas lana lakʼalh junta ixya ju Jesús. Junich: ―Amamakaʼunuʼ. Chai lana macchʼuchʼulh. 46 Pus lana soko tachʼapalh ju aliʼin. Tachʼin tanavi. 47 Para ju pumatam ju ixtʼavi ju Jesús lana soko maxtulh ixmachita. Chai ulanilh ixlapanac ju xakʼai pali. Lana chakxpʼuxnilh ju ixʼakʼaxkʼolh. 48 Pus ju Jesús alacjuni ju ixtalhavat lapanacni: ―Tajuch ni va quilanaviyau tachi ju tam akʼalhonaʼ ju chʼapʼapʼutʼunatʼit ni va lhitʼantʼatʼit ju mimachitaʼan chai ju qʼuiu. 49 Chux avilhchan xaclatʼatanuyau lacakʼai mimpujitatʼan ju uxijnan. Chai xaclamalaniyau. Para jantu xaquilachʼapayauch ju acsnich. Para chunchach ju tʼajun tapasanaʼ ni caʼuctaxtuyaʼ tachi chun ju tsʼokcanta laʼixchivinti Dios ju quilacata. 50 Ju acsnich tachi chun ju ixʼalacmamakaʼui ju Jesús tamacoyaulh. Taʼatsʼalhkʼo ixchuxʼan. 51 Chai pumatam tsʼalh ixchʼakʼokʼai ju Jesús. Chai ju yuchi va ixmacajucalh lakatam kʼai pumpuʼ. Va yuchach ju ixlakchʼita. Pus ju ixtalhavat lapanacni tachʼapalh vachuʼ ju yuchi. 52 Para ju yuchi macontilalh ju kʼai ixpumpuʼ. Va kʼai tsasau atsʼalaʼalh. 53 Pus ixtalhavat lapanacni talhiʼalh ju Jesús laʼixchakaʼ ju xakʼai pali. Chai ju anch talhitakʼaixtoklh chux ju xalackʼajin palijni chai ju papaninch chai ju na ixtalhatalanininta ju ixlhamapʼaksin ju istʼaʼisraelitanin. 54 Pus ju Pitaluʼ va ixlhimakat ixchʼakʼokʼata ju Jesús tus tanu vachuʼ pulacni ta ixlakachakʼaxnucanta ju ixchakaʼ ju xakʼai pali. Chai ju anch alactʼatavi ju pulasiyajni. Ju yuʼunch ixtalacskʼonvilanalh. 55 Pus ju xalackʼajinch palijni chai ixchuxʼan ju ucxtinin ixtapuxconich tichi chavaich ju lai catanaulh tuʼuʼ taʼaklhtamat chivinti ni laich catalhinaulh ixmaknica ju Jesús. Para jantu tavanan talhitajunilh tuʼuʼ talakʼalhin. 56 Na lhu lapanacni ixtanajun taʼaklhtamat chivinti ixlacata ju Jesús. Para jantu va lakatam ixtanavi ixchivintiʼan. 57 Ju aliʼin lapanacni tataya. Tanaulh taʼaklhtamat chivinti ixlacata ju yuchi. Ixtanajun: 58 ―Ju quijnan ickʼasmatnitau acsni naulh ni ma calaclhmokaʼ ju kʼai pujitat ju yocanta laʼixmacaʼ lapanacni. Chai ixlhilakatʼutu avilhchan ma cayochokoyaʼ alakatam. Para ma jantu lapanacni ju catayoyaʼ. 59 Para nin chunch jantu lai va lakatam ixtanavi ixchivintiʼan. 60 Pus ju acsnich ju xakʼai pali taya laʼixʼucxlacapuʼan ixtalhavat lapanacni. Sacmilh ju Jesús. Junich: ―Ja jantu tuʼuʼ akʼalhtʼayananaʼ. Tijuch ju talhichivimakʼanan ju ani tayanalh. 61 Para ju Jesús va sek taya. Jantu tuʼuʼ xaʼakʼalhtayanan. Chai ju xakʼai pali aktam sacmichokopa. Junich: ―Ja uxintʼi ju Cristoʼat ju ixnoncan camalakachatachilh ju Dios. Ja istsʼalhʼat ju Dios ju lakʼayacan. 62 Chai ju acsnich ju Jesús akʼalhtayanalh: ―Quitʼinch. Chai astan aquilalaktsʼinau acsni actolaʼ vanin junta vi ju Dios ju na tachapun. Chai aquilalaktsʼinau acsni acminaʼ laxaʼataputsʼi ju lactʼiyan. Quitʼin ju quimalakachatachilh Dios ni lapanac actsucuyaʼ ju ani. 63 Pus ju acsnich ju xakʼai pali lana lhtʼit kʼexlh ju ixpumpuʼ ju va ixtalhkʼamtich. Chai naulh: ―Tis aliʼ chivinti maktasqʼuiniyau. 64 Kʼasmatʼatʼit ju macxcai chivinti ju xanajun ni tachi ju Dios ju jumputun. Tas nonatʼit ju chavai. Pus ju yuʼunch tsʼan tanonkʼo ni lhijunch ni camaknicalh. 65 Pus ju acsnich ju aliʼin tatsuculh lakpuchujvanin ju Jesús. Talakpuchʼilh chai taʼulanilh chai tajunich: ―Anauch tichi chavaich ju xaʼulaniyan. Chai astan ju pulasiyajni taquincatisamalh. 66 Pus ju Pitaluʼ makspaʼ ixvi laʼixpulacni kʼex. Chai xajchilh pumatam isquitiʼ ju xakʼai pali. 67 Chai acsni laktsʼilh ju Pitaluʼ junta ismakskʼonvi skotutu. Junich: ―Ju uxintʼi vachuʼ ixtʼaʼucxuntʼaʼun ju Jesús amachakaʼ Nazaret. 68 Para ju Pitaluʼ junilh: ―Jantu icmispai chai jantu icmachakxai tuchʼi qʼuiʼumpʼutʼun. Chai lana taxtulh ju Pitaluʼ. Talacxtutaya. Chai lana tʼasalh ju puyux. 69 Pus ju anuch squitiʼ ni laktsʼinchokopa aktam ju Pitaluʼ pus alacjunchokopa ju anuch ixtavilanalh: ―Ju ani vachuʼ makyuchi. 70 Para aktam nonchokopa ju Pitaluʼ ni jantu slivasalh. Chai ni pantsʼiquis jumpa pus yuʼunch ju ixtavilanalh tajunchokopa ju Pitaluʼ: ―Slivasalh ni vachuʼ makyuchʼat ni vachuʼ amachakaʼat Galilea ni vachuch chun ju chʼivinin tachi ju tachivinin ju yuʼunch. 71 Para ju Pitaluʼ naulh: ―Chach quimamakʼalhkʼajni ju Dios ni jantu slivasalh ju tuchi iclajunau. Dios cʼatsai ni jantu icmispai ju anuʼ lapanac tichi lhasacmininatʼit. 72 Chai ju puyux lana tʼasalh ixlhipaktʼuich. Chai ju Pitaluʼ lana pastaclh ju ixchivinti ju Jesús ju ixjunita acsni junich ni paktʼutu canonaʼ ni jantu mispai acsni tucaʼ paktʼui tʼasata ju puyux. Pus ju Pitaluʼ acsni pastaclh ju chunch lana tsuculh kʼalhunuʼ.
1 Acsni tunculh talacchivinilh ju xalackʼajin palijni chai ju papanin chai ju na ixtalhatalanininta ju ixlhamapʼaksinʼan ju istʼaʼisraelitanin chai ju aliʼin ixʼucxtinin ju israelitanin. Chai talhiʼalh ju Jesús tachʼin. Taquimakʼaxtaknilh ju ixgobernadorʼan ju romanonin. Yuchi ju Pilato ixjuncan. 2 Chai ju Pilato sacmilh ju Jesús. Junich: ―Ja vasalh uxintʼi ju xaʼucxtinʼat ju israelitanin. Chai ju Jesús akʼalhtayanalh. Junich: ―Chunch tachi ju naʼun. 3 Pus ju xalackʼajin palijni na lhu talakʼalhin tamucʼanilh ju Jesús para ju Jesús jantu tuʼuʼ akʼalhtayanalh. 4 Chai ju Pilato aktam sacmichokopa ju Jesús. Junich: ―Ja jantu tuʼuʼ akʼalhtʼayananaʼ. Na lhu talakʼalhin tamucʼaniyan. 5 Para ju Jesús jantu tavanan akʼalhtayanalh tuʼuʼ. Chai ju Pilato na lhamakʼaninilh ni jantu tuʼuʼ xanajun ju Jesús. 6 Chux cʼata ju gobernador Pilato ixʼamasmanita ju lapanacni ni ixmaxtui lacapulachʼin pumatam tachʼin ju acs cʼatan. Ixmaxtui va tichi chavaich ju tasqʼuinlich ju lapanacni. 7 Chai ju acsnich cʼata ixʼalin pumatam tachʼin ju ixjuncan Barrabás. Ju yuchi ixʼalactʼatʼalhnucanta ju ixtʼaʼamakninin. Ju yuʼunch ixtamaknita ju lapanacni acsni tatʼalasalh ju kʼai ucxtin. 8 Pus ju ixtalhavat lapanacni talakʼalh ju Pilato. Tatsuculh tapaininin ni chunchach caʼanavinicalh tachi akchux ixtacʼatanich. 9 Pus ju Pilato ixʼanaviniputun ixkʼachatʼan ju yuʼunch chai yuchi chani alaclhijunich ju israelitanin: ―Ja lacʼasqʼuinatʼit ni acmacaulh ju ani ya miʼucxtinʼan ji israelitanin. 10 Ju Pilato yuchi chunch alaclhijuni ni ixmachakxai ni va ixʼaxcayantichʼan ju ixtapumakʼaxtakta ju Jesús ju xalackʼajin palijni. 11 Chai ju xalackʼajin palijni talacmalacaʼinilh ixtalhavat lapanacni ni catasqʼuinlh ni alai camacajuncalh ju Barrabás. 12 Pus ju acsnich ju Pilato akʼalhtayanalh chai alacjunchokopa ju israelitanin: ―Para tijuch ju lacʼasqʼuinatʼit ju acnavi ju unatʼit miʼucxtinʼan. 13 Pus ju ixtalhavat lapanacni pʼas tanaulh ni lacacurus camaquilhtacalh. 14 Para ju Pilato alacjuni: ―Tajuch. Tis talakʼalhin ju navita. Para ju ixtalhavat lapanacni palai pʼas ixtalacnajun: ―Amaqʼuilhtʼatʼich ju lacacurus. 15 Pus ju acsnich ju Pilato anavinilh ju ixkʼachatʼan ju lapanacni. Pus maxtulh lacapulachʼin ju Barrabás. Chai lhinaulh ixlakanekmaca ju Jesús. Astan makʼaxtaknilh ju taropajni ni camaquilhtacalh ju lacacurus. 16 Pus ju acsnich ju ixtaropajni ju Pilato talhiʼalh ju Jesús ixpulacni junta lakachakʼaxnucanta lacapuʼucxtin. Chai acsni tachaʼalh alactʼasanikʼocalh chux ju ixtʼataropajni. 17 Tamalakchʼinilh ju Jesús smumu pumpuʼ tachi ixtalakchʼi ju xalackʼajin. Chai tanavinilh ju corona si alhtucunuʼ chai tamalacpatanulh. 18 Chai kʼantam kʼantam ixtamacʼami tachi ju macʼamican tam xakʼai. Na ixtamamaxani acsni ixtajuni: ―Atsʼucʼukʼalhitʼi ji ixʼucxtin ju israelitanin. 19 Chai lacasnivenkʼe qʼuiu tatsuculh lakpanekmanin. Chai talakachujva ju Jesús. Chai tamalacasunilh tachi ju vasalh va ixtalakʼayaputun mas jantu. 20 Chai acsni tamamaxanikʼo pus tamaxtunilh ju smumu pumpuʼ chai tamalakchʼinichokolh ju aktsʼiya ixpumpuch. Tamaxtulh ju anch. Talhiʼalh junta catamaquilhtayaʼ ju lacacurus. 21 Pus ixtʼajun tapasanaʼ pumatam lapanac ju Simón ixjuncan. Ju yuchi amachakaʼ Cirene ixjunita. Ixpai ju Alejandro chai Rufo. Ju yuchi va ixmintacha lacacuxtu. Pus ju taropajni tamakxkʼokʼa ju Simón ju iscurus ju Jesús. 22 Takʼailhiʼalh ju Jesús junta Gólgota ixjuncan. Ju anch va lhitapacutui chunch ni tachi ju va aktsulh istasui ju anuʼ talhpa. 23 Ixtamakʼotʼuputun ju vino ju ixlhiya ju achʼitin ju mirra juncan ni va catalhimatontolanilh ju ixlacatuna. Para ju Jesús jantu kʼotlh. 24 Pus taxtucmucʼalh ju lacacurus. Chai ju taropajni talhilaslajlh ixpumpuʼ ju Jesús tamalhch ju calhiʼanaʼ kʼantam kʼantam. Chunch ju talalhvakpitsilh ju ixpumpuʼ ju Jesús. 25 Acsni tavanan tamaquilhta lacacurus ju Jesús pus lakanajatsi hora vatsʼisin ixjunita. 26 Chai taʼulanilh ju chivinti ju laʼisʼaktsulh iscurus ju Jesús junta naulh tuchi talakʼalhin ixmucʼanicanta. Pus ju anuʼ chivinti chani naulh: “Ixʼucxtinʼan ju israelitanin”. 27 Chai tatʼamaquilhta pumatʼui akʼalhonin. Ju pumatam laʼixlhicana ju Jesús ju taquilhta. Ju pumatam laʼixlhimacx. 28 Pus ni chunch ju ulhtucalh ju Jesús va uctaxtulh tachi ju istsʼokcanta junta najun: “Ju yuchi mispacalh ni tachi ju vachuʼ va alactuʼunuʼ ixjunita”. 29 Chai tachi chun ju ixtatapasai ju anch ixtamamaxani ju Jesús. Ixtalhitsʼiʼin chai ixtajunich: ―Ju uxintʼi naʼun ni lai lakʼalhi ju kʼai pujitat chai ixlhilakatʼutu avilhchan laich anavichʼokʼoyaʼ. 30 Pus ni vasalh tachapunʼat amakʼalhtʼaxtʼuchʼokʼocʼach miʼakstu. Atʼakʼalhtʼaʼutʼich ju lacacurus. ―Chunch ju tajuni. 31 Chai vana va chun ixtamamaxani ju xalackʼajin palijni chai ju na ixtalhatalanininta ju ixlhamapʼaksinʼan ju istʼaʼisraelitanin. Ixtalajunich sia yuʼunch: ―Ju yuchi lai ixmakʼalhtaxtui ju akʼantam. Para ju va isʼakstu jantu lai makʼalhtaxtuchokocan. 32 Ju yuchi ni vasalh Cristo junita ju noncan camalakachatachilh ju Dios chai ni vasalh ixʼucxtinʼan ju israelitanin pus chach takʼalhtaju ju lacacurus ju chavai. Ju chunch aclaktsʼinau quiʼakstuʼan chai acsnich ju aclhilacaʼanauch vachuʼ. Chunch ixtanajun sia isʼakstuʼan. Para va ixtalhitsʼiʼin. Chai mas yuʼunch ju ixʼalactʼajucalh lacacurus ixtajuni macxcai chivinti. 33 Acsni kʼatunculh pus tsʼislich ju ixlhilacaputsʼun ju lacamunutpaʼ tus lakatʼutu hora atokʼoxanaʼ. 34 Chai acsni chaʼalh ju lakatʼutu hora pus ju Jesús tsʼau tʼasalh. Naulh: ―Eloi, Eloi, lama sabactani. Ju chunch va nomputun: QuiDios. Tajuch ni va quiʼakstu xaqʼuimacʼaʼun. 35 Chai takʼasmatlh ju aliʼin ju ixtayanalh anch. Chai talaclajunilh: ―Akʼasmatʼit. Tʼasani Elías ju makʼaniya ixlapanac Dios. 36 Pus atsʼalalh pumatam. Quikʼavanilh ju tuʼuʼ tachi kʼai pulhulh panimac laca tuʼuʼ tachi ju axvicnit. Lhiʼanilh laʼixquilhni ju Jesús lacalhman snivenkʼa qʼuiu. Va ixmakʼotʼuputunch. Chai alacjuni ju aliʼin lapanacni ju anch ixtayanalh: ―Capacxauch. Calaktsʼinauch ni va camilh ju Elías pʼuxnuʼ ju lacacurus. 37 Pus ju acsnich tsʼau tʼasachokopa ju Jesús. Chai lana nilh. 38 Ju acsnich lana lhtʼit kʼexlh laʼixlacaitat ju kʼai pumpuʼ ju ixyocanta lacpujitat ni pulactʼui ixpunavicanta. Tsuculh kʼexniʼ ju talaclhman tus lacatʼun. 39 Pus ju xacapitán taropajni ju ixya laʼixʼucxlacapuʼ ju Jesús laktsʼilh acsni tʼasalh ju yuchi chai nilhch. Chai ju acsnich ju anuʼ capitán naulh: ―Ju ani lapanac slivasalh istsʼalh Dios ixjunita. 40 Pus vachuʼ ixtayanalh ju anch ju chakolun. Va ixtalaktsʼinch ju Jesús ixlhimakat. Vachuʼ ixtamakyanalh ju Malia amachakaʼ Magdala chai ju Salomé chaich ju Malia ixnatiʼan ju José chai ju putantʼicstʼi Jacobo. 41 Ju anuch chakolun aktsʼiya ixtachʼakʼokʼata ju Jesús. Chai ixtalhichʼalhcatnani acsni ixvilhcha ju xaʼestado Galilea. Vachuʼ ixtamakyanalh ju aliʼin na ilhuʼan chakolun ju ixtatʼaminta kʼaixtam ju Jesús ju lakʼachakʼan Jerusalén. 42 Ju acsnich va xavísperas cʼatan ixjunita. Chai acsni tokʼoxalh pus ju lapanacni talaklakasilackʼoxilh ju ixvaitiʼan ju cataʼuyaʼ ni catuncunchokoyaʼ ni avilhchan paʼastacni cajunaʼ ju acsni. 43 Chai acsni tatsʼisi pus ju José amachakaʼ Arimatea caplich ju ixtalhanti chai lakʼalh ju Pilato chai sqʼuinlh ju ixlacatuna ju lijunto Jesús. Pus ju José makyuʼunch ixjunita ju xalackʼajin sia yuʼunch ju israelitanin. Chai chux ju lapanacni ixtalhilaksi ju yuchi. Vachuʼ ixpacxan ju anuʼ avilhchan acsni calhinonkʼoyaʼ ju Dios ju ani lacatʼun. 44 Pus ju Pilato va lhamakʼaninilh ni laich vatsʼalhti canilh ju Jesús. Chai tʼasanilh ju xacapitán chai sacmilh ni vasalh nita ju Jesús. 45 Pus ju xacapitán ni naulh ni vasalh nita ju Jesús pus ju acsnich ju Pilato yau junilh ju José ni laich calhiʼalh ixlacatuna ju lijunto. 46 Pus ju José tamaulh lakatam lhman pumpuʼ ju na kʼox ixjunita. Chai acsni pʼuxcalh ju ixlacatuna ju Jesús pus pupachʼicalh lacalhman pumpuʼ. Quimacnulh junta ixpulhucucucanta ju lactalhpa. Lhimalacchʼaulh lacalakatam kʼai lhkʼajana chiux junta tamacnu. 47 Pus ju Malia amachakaʼ Magdala chai ju Malia ixnatich ju José talaktsʼilh junta macnucalh ju lijunto Jesús.
1 Acsni tapasalh ju avilhchan paʼastacni pus ju Malia amachakaʼ Magdala chai ju Salomé chai ju Malia ixnati ju Jacobo tatamaulh ju tuʼuʼ achʼitin ju na cʼus acamin. Va ixtalacamucʼaputun ju ixlacatuna ju lijunto Jesús ni chunch ixtalhilanita. 2 Pus vatsʼisin ju lhitumincu acsni ixtʼonachilh xajchiniʼ ju avilhchan ju yuʼunch tachaʼalh junta ixmacnucanta ju lijunto Jesús. 3 Ixtalaclajuni ixlhiʼakstuʼan acsni ixtaminta ju lacati: ―Tis chavaich ju aquintamakʼosunin ju kʼai chiux ju quicyocanta junta acnui ju lijunto. 4 Para acsni talacaʼalh talaktsʼilh ju chiux ni makʼosucanta. Chai ju anuʼ chiux na kʼai ixjunita. 5 Chai acsni tatanu junta ixmacnucanta ju ixlacatuna ju Jesús pus talaktsʼilh pumatam tsʼalh. Ju yuchi ixvi laʼixlhicanaʼan junta ixtayanalh ju chakolun. Chai ixmakʼanchʼita lhman pumpuʼ ju na xnapapa ixjunita. Pus ju chakolun na tatalhonilh. 6 Para ju yuchi alacjuni: ―Jantu atʼalhanantʼit. Ju uxijnan pʼuxcʼoyatʼit ju Jesús amachakaʼ Nazaret ju maquilhtacalh lacacurus. Pus taʼacxtuchokolh. Jantu ani vi. Alaktsʼintʼit junta ixmamacanta ju ixlacatuna. 7 Pus aʼinchʼokʼochitʼit. Aʼunaʼitʼit ju Pitaluʼ chai ju aliʼin ixʼalacmamakaʼui ju Jesús ni capʼulhʼanach ju Jesús ju laxaʼestado Galilea. Astan apʼinaʼitʼit ju uxijnan chai anchach ju alaktsʼintʼachitʼit tachi ju xatajunan acsni tucaʼ ixmaknican. 8 Pus ju yuʼunch taʼatsʼalataxtulh junta ixmacnucanta ixlacatuna ju Jesús acsni tucaʼ ixlokʼonchokota. Na ixtaʼaxqʼuipʼipʼitnintach ni na ixtatalhanan. Chai jantu tuʼuʼ xatajuni xamatiʼ ni va ixtatalhananch. 9 Pus ju Jesús na vatsʼisin lhitumincu ju taʼacxtuchokolh junta ixmakʼacanta. Pus talacasunilh pʼulhnan ju Malia amachakaʼ Magdala. Yuchi ju ixmaxtunicanta pumatujun lhacaticurulhni laʼixlacatuna. 10 Chai ju yuchi alh amacʼatsaniniʼ ju ixʼalactʼaʼucxuntʼajun ju Jesús acsni tucaʼ ixmaknican. Pus ju yuʼunch na va ixtalacʼamakʼaninin chai na ixtalackʼalhuvilanalh. 11 Para mas takʼasmatlh ni taʼacxtuchokolh ju Jesús chai tʼajun ju chavai chai ni ixlaktsʼintach ju yuchi ju Malia para jantu lai ixtalacaʼi. 12 Ju astanch ju Jesús atalacasunilh ixtʼiyunʼan lapanacni acsni ixtaʼalhtanaʼanta ju lacati. Para jantu chun ju atalacasunilh ju yuʼunch tachi ju talacasunilh ju Malia. 13 Pus ju yuʼunch taʼanchokolh amacʼatsaninin ju aliʼin ixtʼatamakaʼui ju Jesús. Para nin yuʼunch jantu aquiclacaʼicalh. 14 Astan ju Jesús alactalacasunilh ixpumacautamʼan acsni ixtatʼajun venin. Pus alhilakʼakʼaima ni na pʼas ixjunita ixʼalhunutʼan chai lana jantu lai ixtalhilaksita ju ixchivinti ju ixʼajunita acsni tucaʼ ixmaknicanta. Vachuʼ alhilakʼakʼaima ni jantu tavanan ixtaquiclacaʼita ju yuʼunch ju ixtalaktsʼinta ju Jesús acsni ixtaʼacxtuchokota junta ixmacnucanta. 15 Vachuʼ alacjunich: ―Apʼinchitʼit ixlhilacaputsʼun ju lacamunutpaʼ. Aʼunaʼitʼit chux ju lapanacni ta yu lai putakʼalhtaxtucan ni jantu ancan ju lacajipi. 16 Ju calacaʼiyaʼ chai caʼakpaxach catakʼalhtaxtuyaʼ. Para ju jantu calacaʼiyaʼ camucʼanikʼalhicanaʼ ju ixtalakʼalhin. 17 Chai ju catalacaʼiyaʼ laich catanaviyaʼ ju ani taxtokni ju capucʼatsacanaʼ ni vasalh quilapanacni tajunita. Laquintapakaʼut cataxcomaxtuyach ju lhacaticuru laʼixlacatunaʼan ju lapanacni. Chai catachivinaʼ ju tumpa chivinti ju jantu aktam tachivininta. 18 Chai ni cataʼokspʼalalacachʼapalh ju lu u ni catakʼotʼaʼ ju taxtokni ju va lhinican jantu tuʼuʼ catitapasayaʼ. Chai catamucʼayaʼ ixmacaʼan laʼixlacatunaʼan ju takʼankʼanin chai palaich catanaviyaʼ. 19 Astan acsni alactʼachivinkʼo ju ixʼalacmamakaʼui pus ju kʼai ixʼucxtinʼan Jesús lana lhiʼancalh tus lactʼiyan chai tavi vanin junta vi ju Dios. 20 Pus ju ixʼalacmamakaʼui taʼalh vanta anchach nonin ta yu laich putakʼalhtaxtucan. Chai isʼakstu ixʼucxtinʼan Jesús ixʼalactʼachʼalhcatnan. Ju yuchi ixmavasalai ju chivinti ju ixtanajun ju ixʼalacmamakaʼui. Ixpumavasalai lacakʼai lhamakʼan ju ixtanavi ju ixʼalacmamakaʼui. Chunch vasalh ixlai.
1 Na lhu lapanacni tatsʼokʼulata tijtamin taxtokni ju cʼatsacan ni vasalh tapasata junta tʼonau ju quijnanʼan ju lhilacaʼantauch ju Jesús. 2 Chai ju yuʼunch chai ju quitʼin ictsʼokʼulatauch tachi ju quintajunin ju yuʼunch ju talaktsʼilh tuchi tapasalh chai ju yuʼunch ju tamasulh ju chivinti ixlacata ju Jesús. 3 Pus vachuʼ na kʼox iclhiula ju quitʼin ni acʼatsʼoknunin ju uxintʼi ji xakʼai Teófilo chai sok acjunin ta yu xalhiʼucxʼanch. Para pʼulan kʼox icmachakxa tachi chun ju taxtokni ju tapasalh tus laʼixputaiʼulacan. 4 Ju chunch lai palai apʼumispʼayaʼ ni stavasalanti ju chivinti ju masunicʼantʼa. 5 Acsni gobernador ixjunita ju Herodes ju laxaʼestado Judea pus ixtʼajun pumatam pali ju Zacarías ixjuncan. Ju yuchi makyuʼunch ixjunita ju ixlapanacni ju Abías. Chai quilhmaktamin ju yuʼunch ixtachʼalhcatnan lacpujitat tachi ixʼalhcanican. Chai ixʼalin ju ixʼamachakaʼ ju ixpapanti ixjunita ju pʼulhnan xakʼai pali ju Aarón ixjuncan. Chai ju yuchi Elisabet ixjuncan. 6 Chai ixtʼiyunʼan na lackʼoxin lapanacni ixtajunita laʼixmacni Dios. Si ixtaquiclacaʼikʼojui tachi ju najun laʼixlhamapʼaksin chai laʼixchivinti Dios chai jantu xamatiʼ lai ixʼamucʼani tuʼuʼ ixtalakʼalhinʼan. 7 Para matiʼ ixjunita ju isʼaskʼatʼaʼan ni va jantu lai ixʼalin ju isʼaskʼatʼa ju Elisabet chai ju acsnich na papanin ixtajunita. 8 Para lakatam avilhchan acsni ixtachʼalhcatnan ixlapanacni ju Abías junta ixlakʼayacan ju Dios pus vachuʼ ixchʼalhcatnan ju Zacarías. 9 Chai tachi ju aktsʼiya ixtalhilanita ju ixlhipaliʼan pus istasacxtui pumatam pali ju catanuyaʼ pulacni laʼixpujitatʼan ju istʼaʼisraelitanin chai anch ju caxavayach ju pum. Pus ju acsnich avilhchan yuchi ju Zacarías ju isacxtucanta ni caxavayach ju pum. Pus ju yuchi tanulh laʼixpujitatʼan. 10 Chai acsni ixtʼajun xavanaʼ ju pum ju Zacarías pus ixtalhavatʼan lapanacni ixtatʼajun tʼachivinin ju Dios makspaʼ. 11 Pus talacasunilh ixʼanquilh Dios ju Zacarías. Tayachilh laʼixlhicana ju mixa junta xavacan ju pum. 12 Pus ju Zacarías acsni laktsʼilh ju anquilh lana na lhamakʼaninilh chai na talhanalh. 13 Para ju anquilh chani junilh: ―Jantu atʼalhan ji Zacarías. Ju Dios kʼasmatnin ju tuchʼi sasqʼuini chai ju miʼamachakaʼ camaklokʼoniyan lakatam istsʼalh chai alhimapʼakʼaʼuyaʼich Xivan. 14 Chai alhikʼachʼanaʼitʼit chai na kʼox alhiulayaʼitʼit. Chai vachuʼ na lhu ju aliʼin lapanacni catalhikʼachanaʼ acsni calokʼonaʼ. 15 Chai ju yuchi xakʼai cajunaʼ laʼixmacni Dios. Chai jantu cakʼotʼaʼ ju vino nin tuʼuʼ atumpa pinquin. Chai ju Spiritu Santu calhinonkʼoyaʼ laʼisʼatsucunti tus acsni camaklokʼoncanach. 16 Chai ju yuchi caʼamalhilacaʼanichokoyaʼ ju ixʼucxtinʼan Dios na lhu ju istʼaʼisraelitanin. 17 Chai ju mintsʼalh capʼulhniyaʼ ju Dios ju astan catalacasuyaʼ. Chai chunch cajunaʼ ju isʼatsucunti chai ixtachaput tachi ju ixjunita ju makʼaniya ixlapanac Dios ju Elías ixjuncan. Chai ju yuchi tamch caʼamalacaʼiniyaʼ ixʼalhunutʼan ju xalacpaʼitnich ni catamapainiyaʼ ju isʼaskʼatʼanʼan. Chai ju israelitanin ju jantu lai talacaʼini ixchivinti Dios pus ju yuchi tamch caʼamalacaʼiniyaʼ ju ixʼalhunutʼan ni kʼox cajunaʼ ixtacʼatsanʼan tachi ju ixjunita ixtacʼatsanʼan ju makʼaniya lapanacni ju soknicʼa ixtajunita. Chai ni chunch ju canaviyaʼ ju mintsʼalh pus kʼox cajunaʼ ixʼalhunutʼan ju lapanacni chai cataʼamaklhtayananaʼ ju Dios acsni tavanan caminaʼ. ―Chunch ju junilh ju anquilh. 18 Chai ju Zacarías chani akʼalhtayanalh. ―Tas acpucʼatsayaʼ ni vasalh chunch catapasayaʼ tachi ju xaqʼuiʼuni. Pus ju quitʼin ni na icpapach chai ju quiʼamachakaʼ na tʼacuch. 19 Chai ju anquilh akʼalhtayanalh. Junich: ―Ju quitʼin icGabriel chai icnavini ixlhichʼalhcat ju Dios. Chai yuchi ju quimalakachachilh ni actʼachivininch chai acjunin ju ani kʼox chivinti. 20 Para ju uxintʼi anunulayaʼ. Jantu lai atʼichʼivin tus acsni jantu chin ju avilhchan acsni caʼuctaxtuyaʼ ju ani taxtokni. Chunch aʼunaʼ ni va jantu xalacʼaʼi ju quinchivinti mas caʼuctaxtuyaʼ ju tuchi xacjunan acsni cachinaʼ ju avilhchan ju lhilhcata ju Dios. ―Chunch ju junilh ju anquilh. 21 Pus ju ixtalhavat lapanacni ju ixtayanancha makspaʼ ixtapacxan ju Zacarías chai na ixtalhamakʼanininch ni jantu sai ixtaxtui lacpujitat. 22 Para acsni tavanan taxtulh ju Zacarías pus jantuch lai axakʼala ju lapanacni tachi ju aktsʼiya ixtalai ju palijni. Alai va atamacyonilh ni jantu lai lana ixchivinin. Pus ju lapanacni tapumachakxa ni ca va tuʼuʼ xalaktsʼin ju lacpujitat. 23 Pus acsni muctaxtukʼo tachi chun ju avilhchan ju ilhcaʼulanicanta ni cachʼalhcatnalh lacpujitat pus ju Zacarías anchokolh laʼixchakaʼ. 24 Chai acsni tapasalh lakatam lakatʼui avilhchan pus ju Elisabet ju ixʼamachakaʼ ixjunita ju Zacarías pacxalh ju isʼaskʼatʼa. Chai ju yuchi tatankʼanu laʼixchakaʼ lakaquis malhquiyuʼ. Va ixnajun: 25 “Chunchach ju xaquinavini ju Dios ju chavai avilhchan ni xaquilaktsʼin ta yu xacjunita. Va quimakʼosunilh ju quimaxanti laʼixʼucxlacapuʼan ju lapanacni ni jantu lai ixʼalin ju quiʼaskʼatʼa”. ―Chunch ju ixnajun ju Elisabet. 26 Pus ju ixlhilakachaxan malhquiyuʼ ju Dios malakachachokopa ju anuʼ anquilh ju Gabriel juncan alakatam lakʼachakʼan junta Nazaret juncan. Ju yuchi anch vi ju xaʼestado Galilea. 27 Pus ju anquilh lakʼalh pumatam atsiʼ ju Malia ixjuncan. Ju yuchi isʼasqʼuininti ixjunita pumatam tsʼalh ju José ixjuncan. Chai ju yuchi makʼaniya ixpapanti ixjunita ju kʼai ucxtin David. 28 Chai acsni tanucha ju anquilh junta ixvi ju Malia pus chanich xajuni: ―Xanchi. Slivasalh na kʼai lamapainin ju xanaviniyan ju Dios ju tʼavilan. ―Chunch xajuni ju anquilh. 29 Para ju Malia acsni laktsʼilh pus na lhamakʼaninilh ju ixchivinti chai pastaclich tuchi canomputulh ju chunch amacʼaminti. 30 Pus ju acsnich ju anquilh chani juni: ―Jantu atʼalhan ji Malia ni na kʼai lamapainin ju tanavinitan ju Dios. 31 Pus ju uxintʼi apʼacxanaʼ ju miʼaskʼatʼa. Chai amaklokʼonaʼ pumatam mintsʼalh. Chai alhimapʼakʼaʼuyaʼich Jesús. 32 Chai ju yuchi xakʼai cajunaʼ. Chai calhimispacanach ni istsʼalh Dios junita. Chai ju Dios caxtakniyaʼ ju ixpuʼucxtin ixjunita ju makʼaniya kʼai ucxtin ju David ixjuncan. Caxtaknicanaʼ ju miʼaskʼatʼa ni ixpapanti cajunaʼ ju yuchi. 33 Chai ju yuchi kʼai miʼucxtinʼan cajunaʼ ju uxijnan ju israelitanin untʼatʼit. Jantu tavanan caʼaclayaʼ ju ixpuʼucxtin ju yuchi. ―Chunch ju junilh ju anquilh. 34 Pus ju acsnich ju Malia chani junilh ju anquilh: ―Pus tas calhiʼalinach ju quiʼaskʼatʼa ni matiʼcaʼ ju quimpapa. 35 Chai ju anquilh junich: ―Yuchi ju Spiritu Santu ju calakminan chai laʼixtachaput Dios ju anavicʼanaʼ chunch. Pus ixlhiyuchi ju askʼatʼa ju calokʼonaʼ salaka cajunaʼ. Chai ni chunch junita pus jantu catinavilh ju alactuʼunti. Chai calhimispacanaʼ ni istsʼalh Dios. 36 Chai vachuʼ ju milhilakʼau Elisabet pacxanta ju isʼaskʼatʼa mas na tʼacuch. Chai mas ixlhimispacan ni jantu lai ixʼalin isʼaskʼatʼa para ju chavai lakachaxan malhquiyuʼ junita ju xapacxanta ju isʼaskʼatʼa. 37 Pus matiʼ tuʼuʼ ju xcai calhiula ju Dios. ―Chunch ju junilh ju anquilh. 38 Pus ju acsnich ju Malia chani junilh: ―Pus ixlapanac Dios icjunita. Chach quinavi tachi ju ani xaqʼuiʼuni. ―Chunch ju naulh ju Malia. Chai ju acsnich lana taxtulh ju anquilh junta ixvi ju Malia. 39 Pus acsni tapasalh lacatsʼunin avilhchan pus ju Malia taxtulh. Lana soko alh ju xalacatalhpan laxaʼestado Judea tus chaʼalh junta ixvi lakatam lakʼachakʼan. 40 Chai tanucha laʼixchakaʼ ju Zacarías chai macʼamilh ju Elisabet. 41 Chai acsni tavanan kʼasmatlh ju Elisabet ju ixʼamacʼaminti ju Malia pus lana na lucunulh ju askʼatʼa laʼixpajan. Chai ju Spiritu Santu lana lhinonkʼo laʼisʼatsucunti ju Elisabet chai mapastʼacʼani tuchi canaulh. 42 Pus na pʼas ju chivinilh chai chani ju junilh ju Malia: ―Palai kʼox atsucunti ju xaxtakniyan ju uxintʼi ju Dios. Palai jantu tachi chun ju mintʼaʼatsiʼin. Chai vana na kʼox atsucunti ju xaxtakni ju miʼaskʼatʼa. 43 Chai tis quintalakxtu ni laich xaquilakmin ju quitʼin ju ixnati ju quiʼucxtin. 44 Pus acsni tavanan ickʼasmatnin ju miʼamacʼaminti pus lana lucunulh ju askʼatʼa laquimpajan ni na ixkʼachanch. 45 Chai na paxcatʼat ju uxintʼi ni xalacʼaʼi ju chivinti ju ixʼuncʼan. Chai caʼuctaxtuyach ju tuchi xajunan ju Dios. ―Chunch ju naulh ju Elisabet. 46 Chai ju acsnich ju Malia chani naulh: ―Slivasalh na iclakʼayai ju Dios laquintacʼatsan. 47 Chai na iclhikʼachanch ju Dios ju quiʼamakʼalhtaxtunuʼ junita. 48 Quimapainilh mas jantu tuʼuʼ quintapalhni ixjunita. Quitʼin ju ixlapanac icjunita. Chai tus chavai tachi chun ju lapanacni aquintajunach ni slivasalh na paxcat ju quitʼin. 49 Pus ju Dios na tachapun chai yuchi ju xaquinavini na kʼai lhamakʼan. Chai ju yuchi na salaka. 50 Chai ju yuchi aʼaktaijunun lacaʼamapaininti tachi chun ju tatalhoni ju yuchi mas va tavananch ju catatsuculh. 51 Chai ju tuchi navi ju yuchi putasui ni na tachapun ju yuchi. Jantu tuʼuʼ ixtapalhni anavi ju yuʼunch ju na ixtalhitakʼayai ixʼatalanintiʼan laʼixʼalhunutʼan. 52 Amakʼosu ju laʼixpuʼucxtinʼan ju xalackʼajin. Chai alakʼayalh ju jantu tuʼuʼ ixtapalhniʼan ixʼalaktsʼincan. 53 Chai ju na tacʼatsai ni alin ixmaktasqʼuinitʼan ni salaka catava pus ju Dios axtaknilh. Chai ju na va kʼai tacʼatsai ju laʼisʼatsucuntiʼan pus ju Dios jantu tuʼuʼ axtaknilh ju yuʼunch. 54 Ju yuchi quintaʼaktaijun ju quijnanʼan ju israelitanin juntau ju ixlapanacni juntau. Chai lhinavilh chunch ni cacʼatsayau ni jantu ixcapta ju anuʼ lamapainin ju ixnajunta ni canaviyaʼ. 55 Chunch tachi ju ajuni ju makʼaniya quilacpaiʼan acsni ajuni ni capastʼacʼaʼ ju lamapainin ju kʼalhtasunilh ju Abraham chai ixʼamaskʼatʼanti. Chai ju anuʼ lamapainin ju aquintanaviniyan aquintapuʼaktaijukʼalhiyan. ―Chunch ju naulh ju Malia. 56 Pus ju Malia tʼatolhcha ju Elisabet tachi lakatʼutu malhquiyuʼ. Astan anchokolh laʼixchakaʼ. 57 Pus ju Elisabet acsni chaʼalh ju ixpulakʼauch pus maklakʼaulh pumatam istsʼalh. 58 Pus acsni takʼasmatlh ju ixtʼatolhnin chai ju ixlhiʼalakʼavin ni Dios ju xaʼaktaijui lacakʼai amapaininti pus na tatʼakʼachalh ju yuchi. 59 Chai acsni chaʼalh ju ixlhilakatsajin avilhchan pus tamilh chʼucʼunin ju ixʼaxtʼakʼa ju anuʼ tsʼalh tachi ju ixtalhilanita ju israelitanin. Chai ixtalhixakʼalaputun Zacarías ni va ixtucai ixtaʼulaniputun ju ixpai. 60 Para ju ixnati ju askʼatʼa lana ajuni: ―Jantu chun cajuncanaʼ. Ma Xivan cajuncanaʼ. 61 Chai ju yuʼunch tajuni: ―Tajuch. Jantu xamatiʼ ju milhiʼalakʼavin ju chunch juncan. 62 Pus ju acsnich taxakʼala ju ixpai. Va ixtatamacyonich acsni istasacmiputun tis cajuncanach ju istsʼalh. 63 Chai ju yuchi sqʼuinlh ju tuʼuʼ junta lai caʼatsʼoknulh tuchi cajuncanaʼ ju istsʼalh. Chai tsʼokʼulalh ni Xivan cajuncanaʼ. Pus ixchuxʼan ju anch ixtavilanalh va talhamakʼaninilh. 64 Pus lana takʼoxinilh ju ixquilhni ju Zacarías chai ju yuchi tsuculh chiviniʼ chai lakʼayalh ju Dios. 65 Pus na tatalhanalh ju ixtʼatolhnin. Chai tachi chun ju lapanacni ju ixtatʼajun ju xalacatalhpan ju xaʼestado Judea tacʼatsakʼo tachi chun ju ani taxtokni. 66 Chai tachi chun ju takʼasmatlh ju ani taxtokni va tachi ixtapastactʼajun laʼixʼalhunutʼan. Chai ixtalaclajuni: ―Tis atsucunti nuʼ ju capacxanaʼ ju anuʼ askʼatʼa. Chunch ju ixtalaclajuni ju lapanacni ni na ixʼaktaijui ju anuʼ askʼatʼa ju Dios. 67 Pus ju Spiritu Santu lhinaulh laʼisʼatsucunti ju Zacarías ju ixpai Xivan ixjunita. Chai ju yuchi tsuculh nonaʼ ixchivinti Dios. Pus chani naulh: 68 ―Chach lakʼayacalh ju quiDiosʼan ju israelitanin juntau ni quintaquilaktsʼinchinch chai quintaquimalakxtuchinch ju quijnanʼan ju ixlapanacni juntau. 69 Ju yuchi quintaxtaknitan pumatam amakʼalhtaxtunuʼ ju na tachapun junita. Chai ju yuchi ixpapanti junita ju David ju ixlapanac Dios ixjunita. 70 Ju Dios naulh ni chunch ju catapasayaʼ. Naulich laʼixchivintiʼan ju ixlapanacni ju isʼasacxtuta ni catanonaʼ ixchivinti tus makʼanchich. 71 Ju yuchi naulh ni aquintamakʼalhtaxtuyan laʼixmacaʼan ju quintʼalaxcaiʼan chai tachi chun ju jantu quintalaktsʼimputunan. 72 Ju chunch ju Dios amuctaxtuni ju anuʼ chivinti ju akʼalhtasunilh ju makʼaniya quilacpaiʼan acsni ajuni ni caʼaʼaktaijuyach lacaʼamapaininti. Chai putasui ni jantu xacʼapʼa ju chivinti ju xaʼatʼatakʼoxi ju yuʼunch. 73 Yuchach ju anuʼ chivinti ju ixjunita ju makʼaniya quimpaiʼan Abraham chai mavasalanilh ni vasalh canaviyaʼ. 74 Ju yuchi naulh ni aquintamakʼalhtaxtuyan laʼixmacaʼan ju quintʼalaxcaiʼan. Ju chunch ni laich cachʼalhcatnaniyau ju yuchi chai jantu catalhananau. 75 Chai jantu caʼalactuʼununau para va tachi canaviyau ju soknicʼa. Chai va tachi chunch ju catsucuyau chux avilhchan acsni tʼonau ju ani. 76 Chai ju uxintʼi ji quintsʼalh alhimispʼacʼanaʼ ni ixlapanac Dios unitʼa chai anonaʼ ixchivinti. Chunch ju alhimispʼacʼanaʼ ni uxintʼi ju aʼunaʼ ju lapanacni ni catalakʼoxilh ixʼatalacpastʼacʼatʼan ni caminaʼ ju ixʼucxtinʼan. Chunch ju alayaʼ acsni tucaʼ min ju yuchi. 77 Chai uxintʼi ju amamachʼakxaniyaʼ ju lapanacni ni catatakʼalhtaxtuyaʼ acsni caʼamacʼacxanicanaʼ ju ixʼalactuʼuntiʼan. 78 Chai chunchach ju lai caʼanavicanaʼ ni quintanavinitan lamapainin ju Dios ni quintamacaminin ju aktsʼiya ixnoncan ni camalakachatachilh. 79 Chai ju yuchi camapulhcuniyaʼ laʼixʼatalacpastʼacʼatʼan ju yuʼunch ju tatʼajuncaʼ tachi ju va lacaʼatatsʼisni chai na taʼamakʼaninin ni na tatalhoni ju aninti. Chai ju yuchi vachuʼ aquintamalhtanayan ju laxati junta alin ju akʼoxamixnit laʼixmacni Dios. ―Pus chunch ju naulh ju Zacarías. 80 Pus ju askʼatʼa Xivan takʼaya. Chai ixlhichux ixʼalhunut ixlhilaksi ju Dios. Chai anch ju ixtʼajun junta jantu xamatiʼ ixtʼajun tus acsni atalacasunilh ju istʼaʼisraelitanin ni ixlapanac Dios ixjunita.
1 Pus ju acsnich ju kʼai ucxtin Augusto lhinaulh isʼatsʼokʼulaca chux ju lapanacni ixlhilacaputsʼun ju lacamunutpaʼ. 2 Chai ju ani yuchi ju xapʼulhnan atsʼokʼulanti ixjunita ju ixtalhavat lapanacni. Chai ju acsnich Cirenio xagobernador ixjunita ju xaʼestado Siria. 3 Chai chux ju lapanacni anch ju ixtaʼanchokoi istsʼokʼulacaʼan junta aktsʼiya ixtʼunchʼan ixjunita ju pumatamin. 4 Pus ju José vachuʼ taxtulh ju lakʼachakʼan Nazaret laxaʼestado Galilea. Alh ju lakʼachakʼan Belén laxaʼestado Judea. Pus ju Belén ixtʼun ixjunita ju makʼaniya lapanac ju David ixjuncan. Chai ju José makʼaniya ixpapanti ixjunita ju David chai yuchi lhiʼalh ju anch. 5 Chai acsni alh tatsʼoknuʼ ju José pus tʼaʼalh ju Malia ju ixʼamachakaʼ ixjunita. Para tachi ju va isʼasqʼuininticaʼ ju ixlaktsʼin. Pus tʼaʼalh ju Malia chai ju yuchi ixʼakʼainanta. 6 Chai acsni ixtavilanancha anch pus chaʼalh ju avilhchan acsni ixlokʼomputunch. 7 Chai maklakʼaulich lakatami istsʼalh. Chai pachʼilh lacapumpuʼ chai mujulh junta ixtavajin ju caballo. Anchach ju satsucui ju Jesús ni va jantuch lai ixtalhijun ju lacachakaʼ junta laich catatavi. 8 Chai ixtaʼalin ju ixlhistacnin borregojni vanin ju lakʼachakʼan Belén. Chai ju yuʼunch ixtatʼajun lhistacnin ju ixborregoʼan ju anuʼ atatsʼisni acsni tsuculh ju Jesús. 9 Chai acsni talhicʼatsanalh chincha ju ixʼanquilh Dios junta ixtavilanalh. Chai na xlapʼapʼa ixmaktajita junta ixtavilanalh ju ixlhistacnin borregojni. Pus lana na tatalhanalh. 10 Para ju anquilh chani ajuni: ―Jantu atʼalhanantʼit ni va iclajumputunau lakatam chivinti ju kʼox alhiulayaʼitʼit. Chai ixlacata yuchi slivasalh akʼachʼanaʼitʼit ju uxijnan chai tachi chun ju lapanacni. 11 Pus chavai tsuculh ju miʼamakʼalhtaxtunuʼan ju ani laʼixlakʼachakʼan David. Yuchi ju ixnoncan camalakachatachilh ju Dios. Yuchi ju miʼucxtinʼan. 12 Chai chani ju apʼumispʼayaʼitʼit. Pus alhitʼaʼuyaʼitʼit ju askʼatʼa ni pachʼicanta lacapumpuʼ chai mucanta junta vajin ju caballo. ―Chunch ju ajunilh ju anquilh. 13 Chai lana va tam pantsʼiquis na lhu xatatʼatalacasui ju ixtʼaʼanquilhnin. Chai ixtalakʼayai ju Dios chai chani ixtanajun: 14 ―Chach lakʼayacalh ju Dios ju vilhcha talaclhman. Chai ju ani lacatʼun caʼalinaʼ ju akʼoxamixnit ixlacataʼan ju xaʼanavini lamapainin ju Dios ―chunch ju tanaulh ju ixtalhavat anquilhnin. 15 Chai astan ju anquilhnin taʼanchokolh ju lactʼiyan. Pus ju acsnich ju ixlhistacnin borregojni talaclajunich ju sia yuʼunch: ―Caʼauch ju chavai ju lakʼachakʼan Belén. Caʼau laktsʼinin ju tuchi alinch. Ju tuchi xaquintamacʼatsaniyan ju Dios. 16 Pus lana vatsʼalhti taʼalh. Chai talhitajulh ju Malia chai ju José chai ju askʼatʼa ni ixtʼajunch junta vajin ju caballo. 17 Chai acsni talaktsʼilh pus tamacʼatsanilh ju lapanacni ju tuchi ixʼajuncanta ixlacata ju anuʼ askʼatʼa. 18 Chai tachi chun ju ixtakʼasmatʼa va talhamakʼaninilh tuchi ixtanajunch ju ixlhistacnin borregojni. 19 Para ju Malia va ixmakʼakʼojuich tachi chun ju ani taxtokni laʼixʼalhunut. Va laʼisʼakstu ispastactʼajun. 20 Chai ju ixlhistacnin borregojni taʼanchokolh laʼixlhichʼalhcatʼan. Chai ixtalakʼayai ju Dios chai ixtajuni lakʼailaktsʼiuch ixlacata tachi chun ju ani taxtokni ju ixtakʼasmatʼa chai ju ixtalaktsʼinta. Pus chunch lana uctaxtukʼo tachi ju ixʼajuncanta. 21 Chai acsni chaʼalh ju ixlhilakatsajin avilhchan pus tachʼucʼunilh ju ixʼaxtʼakʼa ju askʼatʼa chai lhimapakaʼucalh Jesús ni chunchach ju ixnajunta ju anquilh mas tucaʼ ixpacxan ju ixnati. 22 Ju laʼixlhamapʼaksin ju Moisés ilhcaʼulani tam chakoʼulh ju avilhchan acsni calaktsʼincalh ni tachi ju va lhquiliqui acsni istsucui tam isʼaskʼatʼa. Pus acsni tavanan taʼaktsa ju anuʼ avilhchan ixlacata ju Malia pus talhiʼalh ju askʼatʼa Jesús lacakʼai ixpujitatʼan ju istʼaʼisraelitanin ju lakʼachakʼan Jerusalén. Anch ju tamakʼaxtaknilh ju Dios ju askʼatʼa Jesús. 23 Pus chunchach ju tanavi ni chunchach ju najun laʼixlhamapʼaksin ju Moisés. Pus chani najun: “Tachi chun ju xapʼulhnan askʼatʼa ju catsucuyaʼ ni tsʼalh pus camispacanach ni ixʼanuʼ ju Dios”. Chunch ju najun laʼixlhamapʼaksin Moisés. 24 Chai vachuʼ najun laʼixlhamapʼaksin Moisés ni caxtakniyaʼ tuʼuʼ atapacxat ju Dios ni salaka calaktsʼinchokocalh tam chakoʼulh. Pus ju va quilhpatinin laich cataxtʼakʼaʼ lakatʼui lakʼaxkʼavan. U ni jantu pus lakatʼui palumax. Chai yuchach ju taxtaklh ju Malia chai ju José. 25 Chai ju lakʼachakʼan Jerusalén ixʼalin pumatam lapanac ju Simeón ixjuncan. Chai ju yuchi na soknicʼa ixjunita laʼixmacni Dios chai na ixtalhoni ju Dios. Chai ju yuchi ixpacxantajich ju anuʼ ju ixnoncan camalakachatachilh ju Dios ni caʼamakʼalhtaxtuyaʼ ju israelitanin. Chai ju Spiritu Santu ixlhinajun laʼisʼatsucunti. 26 Chai ju Spiritu Santu ixmacʼatsanita ju Simeón ni jantu catini tus acsni jantucaʼ laktsʼin ju yuchi ju camalakachatachilh ju Dios. 27 Chai ju Spiritu Santu macʼatsani ni caʼalh ju acsnich ju lacpujitat. Chai lana acsnich ju tatʼaquilalh lacpujitat ju askʼatʼa Jesús ju José chai ju Malia. Va ixtamakʼaxtakniputun ju askʼatʼa ju Dios tachi ju talhilanita lacalhamapʼaksin. 28 Pus ju Simeón cʼatsalh ni yuchi junita ju Jesús ju anuʼ ju ixnoncan camalakachatachilh ju Dios. Chai ju Simeón lana chʼixlh ju askʼatʼa. Chai lakʼaya ju Dios. Chai chani naulh: 29 ―Ju chavai ji Dios laich alakʼaʼitʼi ni acniyaʼ ju quitʼin ju milapanac icjunita ni matiʼ tuʼuʼ ju chavai ju aclhamakʼanininaʼ. Laich acniyaʼ ju chavai ni iclaktsʼinta ju yuchi ju qʼuinkʼalhtʼasunitʼa ni aclaktsʼinaʼ acsni tucaʼ icni. 30 Pus lai lhikʼach acnilh ju chavai ni iclaktsʼinta ju yuchi ju xamalakʼachʼayachʼitʼa ni amakʼalhtaxtunuʼ junita. 31 Chai macʼatʼantʼa ju yuchi ni laich catamispayaʼ tachi chun ju lapanacni. 32 Ju yuchi chunch cajunaʼ tachi ju tuʼuʼ maclhcu ni camapulhcuniyaʼ ju ixtacʼatsanʼan ju jantu israelitanin tajunita. Chai ixlacata yuchi aclakʼayacanau ju quijnan ju israelitanin icjuntau ju milapanacni icjuntau ―chunch ju naulh ju Simeón. 33 Chai ju José chai ju ixnati ju Jesús na talhamakʼaninilh ju taxtokni ju ixnoncan ixlacata ju askʼatʼa Jesús. 34 Chai ju Simeón sqʼuinilh ju Dios ni kʼox catatsucuyaʼ chai chani ju junilh ju Malia ixnati ju askʼatʼa: ―Ju ani askʼatʼa lhcaʼulacanta ni catapukʼalhkʼosaʼ na lhu ju quintʼaʼisraelitaninʼan chai vachuʼ na lhu catapukʼostayayaʼ. Chai ixlacata yuchi ju lapanacni catapucʼatsayaʼ ni laich catakʼalhtaxtucanaʼ. Para na lhu ju jantu kʼox catalhiulayaʼ. 35 Chai ni chunch ju catalayaʼ ju lapanacni pus camalacasucanach ju ixʼatalacpastʼacʼatʼan ju alin laʼixʼalhunutʼan na lhu lapanacni. Chai ju uxintʼi ji ixnati slivasalh na amakʼalhkʼajnanaʼ ixlacata tachi chun ju ani taxtokni ju catapasayaʼ. ―Chunch ju naulh ju Simeón. 36 Chai vachuʼ ixtʼajun ju acsnich pumatam chakoʼulh ju ixnajun ixchivinti Dios. Ju yuchi Ana ixjuncan. Istsiʼ ixjunita ju Fanuel chai ixpapanti ju Aser. Chai ju yuchi na tʼacuch ixjunita. Pus acsni tavanan ixʼicanta pus va lakatujun cʼata ju tʼatsuculh ju ixpapa. 37 Chai acsni tavanan nimacontilacalh pus va isʼakstu ju tsuculh ochenta y cuatro cʼata. Pus ju yuchi jantu tavanan ixtaxtui ju lacpujitat. Para chux tokʼoxai chai chux tuncujun ixlakʼayai ju Dios. Istascajai chai ixtʼachivinin ju Dios. 38 Pus ju yuchi vachuʼ acsnich ju alakmilh ju José chai ju Malia. Chai vachuʼ junilh lakʼailaktsʼiuch ju Dios ixlacata ju askʼatʼa. Chai astan ixʼalacjuni ixlacata ju Jesús tachi chun ju amachakʼan Jerusalén ju ixtapacxantaji ju ixputakʼalhtaxtunʼan. 39 Chai acsni tamuctaxtukʼo tachi chun ju taxtokni tachi ju ixnajun laʼixlhamapʼaksin ju Dios pus taʼanchokolh laxaʼestado Galilea. Laʼixlakʼachakʼanʼan junta Nazaret ixjuncan. 40 Pus ju askʼatʼa Jesús takʼaya chai palai tachapun va. Chai palai acʼatsanalh. Chai va tachi ixnavini lamapainin ju Dios. 41 Ju José chai ju Malia ixtaʼanch chux cʼata ju lakʼachakʼan Jerusalén acsni ixʼalinacha ju anuʼ cʼatan ixpupastaccan ju anuʼ atatsʼisni acsni tatakʼalhtaxtulh laʼixʼanintiʼan ju xalackʼajin istsʼalan ju makʼaniya israelitanin. 42 Chai ju Jesús acsni pacxalh lakacautʼui cʼata pus vachuʼ alactʼaʼalh ju yuʼunch ju lakʼachakʼan Jerusalén tachi ju aktsʼiya ixtalai acsni ixʼalinacha ju cʼatan. 43 Chai acsni lakʼolh ju cʼatan pus ju José chai ju Malia tataxtuchokolh ju lakʼachakʼan. Ixtaʼanchokoputun laʼixchakaʼan. Para ju askʼatʼa Jesús ixtamacontacha ju lakʼachakʼan Jerusalén para jantu istacʼatsai ju José nin ixnati. 44 Va ixtanajun ni ca anch ixmakʼanta lacatalhavat. Pus taʼalhtanalh tam vilhchan. Chai astan tasacmi ju ixlhiʼalakʼavin chai ju ixtʼalamispanchʼan ni ixtalaktsʼinta ju Jesús. 45 Chai acsni jantu talhitaju pus taʼanchokopa ju lakʼachakʼan Jerusalén. Va tapuxcolhiʼalh. 46 Pus lhitajucalh ixlhilakatʼutuch avilhchan ju laʼixpujitatʼan ju istʼaʼisraelitanin. Anch ixmakvi junta ixtavilanalh ju yuʼunch ju ixtamasui tuchi ixnomputun ju lhamapʼaksin. Pus ju Jesús ixtʼajun akʼasmatniniʼ tuchi ixtanajun chai isʼasacmininch vachuʼ. 47 Chai tachi chun ju ixtakʼasmatnich va ixtalhamakʼaninin ju ixʼacʼatsanti ju anuʼ askʼatʼa ni na sok ixʼakʼalhtayanan. 48 Para ju José chai ixnati ni talaktsʼilh na talhamakʼaninilh. Chai ju ixnati chani juni: ―Tajuch ji quintsʼalh ni va chunch xaquilaʼulhtuyau. Ju ani mimpai chai ju quitʼin na iclalhamakʼanininau ni iclapuxcolhitʼonauch. 49 Para ju Jesús chani ajuni: ―Tajuch ni jantu iscʼatsʼayatʼit taʼanchach ju icvi. Ja va jantu cʼatsʼayatʼit ni tasqʼuini ni acnavinilh ju ixlhichʼalhcat ju quimpai. 50 Para ju yuʼunch jantu lai tamachakxanilh ixchivinti tuchi ju lhakʼalhtayanalh. 51 Pus ju Jesús lana alactʼamincha. Taminchokolh laʼixchakaʼan ju lakʼachakʼan Nazaret. Chai ju yuchi aquiclacaʼinilh ju José chai ju Malia. Pus ju ixnati va ixmakʼai tachi chun ju ani taxtokni laʼixʼalhunut. 52 Chai ju Jesús palai ixtʼajun lhitaʼokslanaʼ ju ixtacʼatsanti chai ju ixtakʼayanti. Chai ju Dios ismasuni ixʼamapaininti ju askʼatʼa Jesús. Chai ju lapanacni vachuʼ na kʼox talhiula ju askʼatʼa.
1 Acsni ixtailhiʼanta ju lakacauquisi cʼata laʼixpuʼucxtin ju Tiberio ju xakʼai tucan ixjunita pus Poncio Pilato gobernador ixjuntacha ju xaʼestado Judea. Chai ju Herodes ixlhinajun ju xaʼestado Galilea. Chai ixlakʼau ju Herodes ju Pilipe ixjuncan yuchi ju gobernador ixjuntacha ju xalacatʼun Iturea chai ju lacatʼun Traconite. Chai ju Lisanias gobernador ixjuntacha ju xalacatʼun Abilinia. 2 Chai ju Anás chai ju Caifás yuʼunch ju xalackʼajin palijni ixtajunita. Pus acsni ixtatʼajun ju ani xalackʼajin chai ju ani palijni pus acsnich ju xakʼala ju Dios ju Xivan junta ixvilhcha junta va aseknicʼa. Yuchi ju Xivan ju istsʼalh Zacarías ixjunita. 3 Pus ju yuchi ucsuntsuculh chux ju xalacatʼun laʼixquilhtuʼ ju kʼai xcan Jordán. Ixʼajuni ju lapanacni ni catamacaulh ju ixʼalactuʼuntiʼan chai cataʼakpaxlh. Chai ju chunch ju Dios caʼamacʼacxaniyaʼ ixʼalactuʼuntiʼan. 4 Chai acsni chunch ju lalh ju Xivan pus uctaxtulh ju ixchivinti ju Isaías ju makʼaniya lapanacni ixjunita. Pus ju yuchi ixnajun ixchivinti Dios chai chani ju xatsʼokʼulai: Pʼas chivinin pumatam junta aseknicʼa junita. Chai chani najun: “Alakʼoxitʼit ju miʼalhunutʼan ni caminaʼ ju ucxtin. Alasoknicʼatʼit ju miʼatsucuntiʼan junta jantu sok junita. 5 Tachi chun ju tacʼacxniyan laʼixmacni Dios ma axtʼaknicʼanaʼitʼit. Chai tachi chun ju tuʼuʼ kʼai u ju tuʼuʼ mas va lacatʼicstʼi ju tasastucniyan lamiʼatsucuntiʼan ma amakʼosunicʼanaʼitʼit. Chai tachi chun ju jantu soknicʼa lamiʼatsucuntiʼan ma alasoknicʼanaʼitʼit. Chai tachi chun ju macxcai ju alincaʼ laʼisʼatsucuntiʼan ju talhilacaʼanta ju Jesús ma camakʼosunicanaʼ. 6 Chai tachi chun ju lapanacni ma catalaktsʼinaʼ ju macaminta ju Dios ni laich catatakʼalhtaxtuyaʼ ju yuʼunch”. Chunch ju naulh ju makʼaniya lapanac ju Isaías ixjuncan. 7 Pus ju Xivan chani ixʼajuni ju lapanacni ju ixtalakmin ni va ixtaʼakpaxputun laʼixmacni ju yuchi: ―Chunch ju lapʼutʼunatʼit tachi ju tuʼuʼ lu. Ju yuchi va acsnich ju atsʼalai acsni xavacan ju achʼitin junta tʼajun. Pus vachuʼ chun ju lapʼutʼunatʼit ju uxijnan. Va acsnich ju tamch pʼastʼacpʼutʼunatʼit ni xakʼasmatʼatʼit ni catamamakʼalhkʼajniyan ju Dios. Tis chavaich ju xatajunan ni anaviyaʼitʼit tuʼuʼ ni jantu catamamakʼalhkʼajniyan ju Dios acsni cachinaʼ ju anuʼ avilhchan. 8 Pus ni vasalh tʼakʼalhtʼaxtʼupʼutʼunatʼit pus amalacʼasutʼit lamiʼatsucuntiʼan ni macʼontʼatʼit ju miʼalactuʼuntiʼan. Chai jantuch va kʼaya anaʼuntʼit ju lamiʼalhunutʼan ni laich atʼakʼalhtʼaxtʼuyaʼitʼit va ixlacaʼatalh ni makʼaniya ixʼapapanatnich Abraham untʼatʼit. Jantu chun anaʼuntʼit ni iclajunau ni va ixlacasqʼuilh ju Dios ni lhu caʼalilh ixʼapapanatnich ju Abraham pus laich caʼixmalokʼoni ju ani ma chiux ni caʼixtava ixʼapapanatnich ju Abraham. 9 Chai mas chavai va lacatsʼunin ticʼacx tus caʼamamakʼalhkʼajniyaʼ ju lapanacni ju Dios. Chai tachi chun ju lapanacni ju jantu tasui laʼisʼatsucuntiʼan ni vasalh tamacajunta ju ixʼalactuʼuntiʼan pus caʼamamakʼalhkʼajnicanaʼ. 10 Pus ju acsnich ju lapanacni tasacmi. Chani tajuni: ―Ni vasalh tachi ju quilajunau pus tijuch ju acnaviyau. 11 Chai ju Xivan akʼalhtailh. Chani ajuni: ―Pus ju alin kʼalhtʼui ixpumpuʼ chach xtaknilh ju matiʼ ixpumpuʼ. Chai ju alin ixvaiti pus vana caxtaknilh lacatsʼunin ju matiʼ tuʼuʼ ju caʼulh. 12 Pus vachuʼ talakmilh ju Xivan ju achʼinin. Vachuʼ va ixtaʼakpaxputun. Chai tajuni: ―Amamakaʼunuʼ tijuch ju acnaviyau ju quijnan ni jantu acmamakʼalhkʼajnicanau. 13 Chai ju Xivan ajuni: ―Jantu na laklhu achʼinintʼit tachi ju jantu lhijun ju lacalhamapʼaksin. 14 Chai taʼasacminin vachuʼ ju taropajni. Tajuni: ―Chai ju quijnan tijuch ju acnaviyau. Chai ju Xivan ajuni: ―Jantu xamatiʼ alhimacchʼapʼutʼit va ixmaxtunica ju ixtumin. Nin yuchi ni va kʼaya amucʼanitʼit ixtalakʼalhin tam xamatiʼ ni va maxtʼupʼutʼunatʼit ixtumin. Alhikʼachʼantʼit tachi ju mapʼalhcʼantʼit. 15 Pus ju lapanacni na ixtamakpacxan ju ixnoncan camalakachatachilh ju Dios. Chai ixtanajun laʼixʼalhunutʼan: “Tsʼa ma yuchi ju Cristo ju Xivan. Yuchach ju caminaʼ noncan”. 16 Para ju Xivan ajuni: ―Ju quitʼin islivasalh ni va lacaxcan ju iclamakpaxayau ni catacʼatsayaʼ ju lapanacni ni macʼontʼatʼit ju macxcai. Para mintachalhcaʼ ju palai xakʼai. Palai jantu ju quitʼin. Pus ju quitʼin jantu tuʼuʼ ju quintapalhni. Jantu lai actichʼanxkʼotlh nin mas va yuchi ju samusni ixchʼanxtʼakʼan. Pus ju yuchi acsni cachinaʼ cataxtakniyan ju stavasalanti amakpaxanti. Yuchi ju Spiritu Santu ju catanuyaʼ lamiʼalhunutʼan chai cataxacaniyan chux ju macxcai chai salaka catanaviyan tachi ju lai ju tuʼuʼ jipi ni xavakʼojui tachi chun ju amacxtalh. 17 Chai ju anuʼ ju caminaʼ chunch ju caʼulhtuyaʼ ju lapanacni tachi ju lai tam lapanac ju lacsunui ju iscebada. Ju yuchi chʼapai ju ixpalacsunun laʼixmacaʼ chai acsni patajui ju cebada pus ju xaʼamacxtalh lacatamch tamai. Chai astan ju amanavin makʼai ju xacebada laʼixpacʼatsʼa para alacxavai ju xaʼamacxtalh. Chai ju chunch salaka jun ju ixchakaʼ. Pus vana va chun calayaʼ ju anuʼ ju caminaʼ. Camakʼalhtaxtuyaʼ ju lapanacni ju vasalh talhilacaʼanta ju yuchi. Para ju jantu pus camacaʼancanaʼ lacajipi junta jantu tavanan lai mamixican. 18 Para jantu va yuchi ni xalakʼakʼaimai ju lapanacni ju Xivan. Para vachuʼ na tijlhu amapʼaksinti ju xaʼaxtakni ju lapanacni chai alacjuni ju yuʼunch ta yu laich cataputakʼalhtaxtuyaʼ. 19 Chai vachuʼ lakʼakʼaima ju gobernador ju Herodes ixjuncan. Kʼailh ni ixʼamachakach navichokolh ju ixʼamachakaʼ ixjunita ju ispʼisekʼe ju Pilipe ixjuncan. Pus ju anuʼ chakoʼulh Herodías ixjuncan. Vachuʼ lhikʼailh ixlacata tachi chun aliʼ talakʼalhin ju ixnavita ju Herodes. 20 Chai ju Herodes palai lalhava ju ixtalakʼalhin acsni tʼalhnu ju Xivan. 21 Pus acsni ixʼamakpaxai ju lapanacni ju Xivan pus vachuʼ ju Jesús akpaxlh. Chai acsni ixtʼachivinin ju Dios ju Jesús pus lana talhtʼekʼa ju lactʼiyan. 22 Chai lana lakmilh ju Spiritu Santu tachi ju tuʼuʼ lakʼaxkʼavan. Chai lana chivincancha ju lactʼiyan chai kʼasmatcalh ju lacatʼun junta chani junicalh ju Jesús: ―Ju uxintʼi quintsʼalhʼat. Chai na icmapainiyan. Na iclhikʼachan ju uxintʼi. 23 Ju Jesús acsni tavanan taiʼula ju ixlhichʼalhcat ixpacxanta tachi lakapʼuxamcau cʼata. Chai ixtalhimispaich tachi ju va istsʼalh ixjunita ju José. Pus ju José istsʼalh ixjunita ju Elí. 24 Chai ju ixpai ju Elí ixjuncan Matat. Chai ju ixpai Matat ixjuncan Leví. Chai ixpai ju Leví ixjuncan Melqui. Chai ju ixpai ju Melqui ixjuncan Jana. Chai ju ixpai ju Jana ixjuncan José. 25 Chai ixpai ju José ixjuncan Matatías. Chai ixpai ju Matatías ixjuncan Amós. Chai ixpai ju Amós ixjuncan Nahum. Chai ixpai ju Nahun ixjuncan Esli. Chai ixpai ju Esli ixjuncan Nagai. 26 Chai ixpai ju Nagai ixjuncan Maat. Chai ixpai ju Maat ixjuncan Matatías. Chai ixpai ju Matatías ixjuncan Semei. Chai ixpai ju Semei ixjuncan José. Chai ixpai ju José ixjuncan Judá. 27 Chai ixpai ju Judá ixjuncan Joana. Chai ixpai ju Joana ixjuncan Resa. Chai ixpai ju Resa ixjuncan Zorobabel. Chai ixpai ju Zorobabel ixjuncan Salatiel. Chai ju ixpai ju Salatiel ixjuncan Neri. 28 Chai ixpai ju Neri ixjuncan Melqui. Chai ixpai ju Melqui ixjuncan Adi. Chai ixpai ju Adi ixjuncan Cosam. Chai ju ixpai ju Cosam ixjuncan Elmodam. Chai ixpai ju Elmodam ixjuncan Er. 29 Chai ixpai ju Er ixjuncan Josué. Chai ixpai ju Josué ixjuncan Eliezer. Chai ixpai ju Eliezer ixjuncan Jorim. Chai ixpai ju Jorim ixjuncan Matat. 30 Chai ixpai ju Matat ixjuncan Leví. Chai ixpai ju Leví ixjuncan Simeón. Chai ixpai ju Simeón ixjuncan Judá. Chai ixpai ju Judá ixjuncan José. Chai ixpai ju José ixjuncan Jonán. Chai ixpai ju Jonán ixjuncan Eliaquim. 31 Chai ixpai ju Eliaquim ixjuncan Melea. Chai ixpai ju Melea ixjuncan Mainán. Chai ixpai ju Mainán ixjuncan Matata. Chai ixpai ju Matata ixjuncan Natán. 32 Chai ixpai ju Natán ixjuncan David. Chai ixpai ju David ixjuncan Isaí. Chai ixpai ju Isaí ixjuncan Obed. Chai ixpai ju Obed ixjuncan Booz. Chai ixpai ju Booz ixjuncan Salmón. Chai ixpai ju Salmón ixjuncan Naasón. 33 Chai ixpai ju Naasón ixjuncan Aminadab. Chai ixpai ju Aminadab ixjuncan Aram. Chai ixpai ju Aram ixjuncan Esrom. Chai ixpai ju Esrom ixjuncan Fares. Chai ixpai ju Fares ixjuncan Judá. 34 Chai ixpai ju Judá ixjuncan Jacob. Chai ju ixpai ju Jacob ixjuncan Isaac. Chai ixpai ju Isaac ixjuncan Abraham. Chai ixpai ju Abraham ixjuncan Taré. Chai ju ixpai ju Taré ixjuncan Nacor. 35 Chai ixpai ju Nacor ixjuncan Serug. Chai ixpai ju Serug ixjuncan Ragau. Chai ixpai ju Ragau ixjuncan Peleg. Chai ixpai ju Peleg ixjuncan Heber. Chai ixpai ju Heber ixjuncan Sala. 36 Chai ixpai ju Sala ixjuncan Cainán. Chai ixpai ju Cainán ixjuncan Arfaxad. Chai ixpai ju Arfaxad ixjuncan Sem. Chai ixpai ju Sem ixjuncan Noé. Chai ixpai ju Noé ixjuncan Lamec. 37 Chai ixpai ju Lamec ixjuncan Matusalén. Chai ixpai ju Matusalén ixjuncan Enoc. Chai ixpai ju Enoc ixjuncan Jared. Chai ixpai ju Jared ixjuncan Mahalaleel. Chai ixpai ju Mahalaleel ixjuncan Cainán. 38 Chai ixpai ju Cainán ixjuncan Enós. Chai ixpai ju Enós ixjuncan Set. Chai ixpai ju Set ixjuncan Adán. Chai ju Adán yuchi ju Dios ixpai junita.
1 Ju Spiritu Santu ixlhinonkʼojui laʼisʼatsucunti ju Jesús. Chai acsni mincha ju xakʼai xcan Jordán ju Jesús pus ju Spiritu Santu juni ta anchach ju caʼalhtanaʼalh junta va aseknicʼa. 2 Pus tʼupʼuxam avilhchan ju ixvilhcha junta aseknicʼa chai ju lhacaticuru navilh talacmaskʼatʼinti ni tsʼa ma laich caʼixmalactuʼuni ju Jesús. Chai ju Jesús jantu vailh ju acs avilhchan tus acsni uctaxtulh ju tʼupʼuxam avilhchan. Chai astan na ixchavanita. 3 Pus ju acsnich ju lhacaticuru junilh: ―Ni sala vasalh istsʼalh Diosʼat pus anauch ni chach junch xkapavati junima chiux. 4 Para ju Jesús kʼalhtailh. Junich: ―Jantu lai chun actinavi ni tsʼokcanta laʼixchivinti Dios ni jantu va yuchi ju xkapavati ju canaviyaʼ cuenta ju tam lapanac. Alai canaviyaʼ cuenta tachi chun ju ixchivinti Dios. 5 Chai astan ju lhacaticuru alhiʼananalh laʼixʼucxni lakatam talhpa ju na putankʼai ixjunita. Lhiʼancalh ju Jesús. Chai anch ju malacasunikʼo va tam pantsʼiquis tachi chun ju xalacpuʼucxtin ju ani lacamunutpaʼ. 6 Chai ju lhacaticuru chani ju junilh ju Jesús: ―Uxintʼich ju acxtaknikʼoyan chux ju ani tachaput chai vasalh xakʼai aʼunaʼ. Lai acxtakniyan ni quitʼin ju icmakʼaxtaknikʼocanta chai va tichi chavaich ju icxtakniputun lai icxtaknich. 7 Pus sich miʼanuʼ cajunaʼ va yuchi ni aqʼuintʼaʼaktsʼokʼotʼaniyaʼich ju laquiʼucxlacapuʼ. 8 Para ju Jesús akʼalhtayanalh. Junich: ―Apʼinchich ji Satanás ni tsʼokcanta laʼixchivinti Dios ni yuchi ju Dios ju calakʼayacalh chai va yuchi ju caquiclacaʼicalh. 9 Chai astan ju lhacaticuru alhiʼanananchokolh. Lhiʼalh ju Jesús ju lakʼachakʼan Jerusalén chai anch ju yajucalh ju Jesús junta palai akstiʼ putankʼai junita ju ixpujitatʼan ju israelitanin. Chai junich: ―Ni sala vasalh istsʼalhʼat Dios pus amakʼanlhtʼujnuch ju ani. 10 Lai chunch alatʼi ni chani ju tsʼokcanta laʼixchivinti Dios: Ju Dios ma camapʼaksiyaʼ ju ixʼanquilhnin ni catalhistʼacʼan. 11 Chai laʼixmacaʼan ju catachʼixanch ni jantu cachʼanʼuyan ju tuʼuʼ chiux. 12 Para ju Jesús chani lhikʼalhtayanalh: ―Vachuʼ tsʼokcanta ju anch ni jantu alaktsʼintʼanutʼi ju Dios ni camuctaxtuyaʼ ju ixchivinti u jantu. 13 Pus acsni maskʼatikʼo tijpachux alactuʼunti ju ixmanaviniputun ju Jesús pus ju lhacaticuru macoyaulh tus alakatam avilhchan. 14 Pus ju Jesús anchokopa ju xaʼestado Galilea chai laʼixtachaput ju Spiritu Santu ju xachʼalhcatnan. Chai laccʼatsakʼocalh ixlacata yuchi tachi ixlhilacaputsʼun ju lacatʼun anch. 15 Chai ixʼamalanininch laʼixlacpujitatʼan ju istʼaʼisraelitanin ju anch. Chai ixchuxʼan na ixtalakʼayai ju yuchi. 16 Ju Jesús minchokopa ju lakʼachakʼan Nazaret junta ixtakʼayata. Chai acsni chaʼalh ju avilhchan paʼastacni pus ju yuchi tanucha laʼixpujitatʼan ju istʼaʼisraelitanin tachi ju ixlhilanitach. Chai taya ni catacʼatsayaʼ ju lapanacni ni ixʼamakʼasmatniputun ju ixchivinti Dios. 17 Chai xtaknicalh ju alhiqui ju istsʼokta ju makʼaniya lapanac ju ixnajun ixchivinti Dios. Yuchi ju Isaías ixjuncan. Pus ju Jesús acsni puxkʼotlh ju alhiqui lhitajulh junta chani istsʼokcanta: 18 Ju Spiritu Santu tʼajun laquiʼalhunut ni quilhisacxtuta ni acʼajunach ju quilhpatinin ta yu laich cataputakʼalhtaxtuyaʼ. Chai quimacaminta ni acʼamakʼankʼacha ju na taʼamakʼaninin. Chai ni acʼajunach ju tachʼinin ni laich catataxtulh junta atʼalhnucanta. Chai ni acʼamalacʼavaniyaʼ ju alakʼachʼixnin. Chai ni acʼaxkʼotʼach ju va alhimakchapucan. 19 Chai ni acnonaʼ ni chilh ju avilhchan acsni caʼanaviniyaʼ lamapainin ju Dios ju lapanacni. Pus chunch ju ajuni ju lapanacni ju Jesús. 20 Chai astan mapuxtokchokolh ju alhiqui. Chai xtaknichokolh ju alhistacnaʼ chai tavi ni caʼamalanininaʼ. Chai tachi chun ju ixtavilanalh ju lacpujitat va taskʼotutulh. 21 Pus ju yuchi tsuculh ajuniniʼ: ―Chavai avilhchan uctaxtulh junima chivinti tachi ju tsʼokcanta laʼixchivinti Dios. Uctaxtulh acsni xaquilakʼasmatniyau ju chivinti ju xaclajunau. ―Chunch ju ajunilh ju lapanacni ju Jesús. 22 Chai ixchuxʼan tanaulh ni vasalh na lai ixʼamalaninin. Chai na ixtalhamakʼaninin ni na kʼox ixjunita ju ixchivinti ju tuchi ixʼajuni. Para ixtanajun: ―Ja jantiyuʼ ju ani istsʼalh ju José. 23 Chai ju Jesús ajunchokopa: ―Ju uxijnan ca va quilajumputunau ju chivinti ju noncan: “Acʼuchʼunuʼ acʼuchʼuchʼokʼocʼach miʼakstu. Ju chunch pucʼatsacan ni vasalh lai acʼuchʼunun”. Chai ca va quilajumputunau ni vasalh Cristo icjunita pus tasqʼuini ni pʼulhnan acnaviyaʼ ju ani laquintʼunʼan ju tuchi ixnoncan ni xacnaviyacha ju lakʼachakʼan Capernaum chai ju chunch laich apʼucʼatsʼayaʼitʼit ta yu aquilapulhilaksiyau. 24 Chai tailhiʼalh ixchivinti. Ajuni: ―Slivasalh ju iclajunau. Jantu xamatiʼ ju najun ixchivinti Dios ju lai tuʼuʼ calhiulacalh ju laʼixtʼun. 25 Alaktsʼintʼit ta yu tapasalh laʼisʼatsucunti ju Elías. Acsni ixtʼajuncaʼ ju yuchi pus jantu lalh ju xcan lakatʼutu cʼata a lakachaxan malhquiyuʼ. Chai alilh ju kʼai chavan ixlhilacaputsʼun ju lacamunutpaʼ. Chai slivasalh ni na lhu ixtaʼalin ju chakolun ju va ixʼanimacontilacanta ju sia istʼaʼisraelitanin. 26 Para jantu xamatiʼ ju sia yuʼunch ju malakachanicalh ju Elías. Alai malakachanicalh pumatam chakoʼulh ju ixnimacontilacanta amachakaʼ Sarepta laxatʼun Sidón. 27 Chai acsni ixtʼajun ju Eliseo ju ixnajun ixchivinti Dios pus na pumalhu istʼaʼisraelitanin ixtapacxanta ju na macxcai tsʼitsʼi ju puchʼiʼan. Para jantu xamatiʼ ju sia lhiyuʼunch ju lai palai canavicalh. Va yuchi ju ixjuncan Naamán amachakaʼ xalacatʼun Siria. Chunch ju ajuni ju lapanacni ju Jesús. Chai yuchi alhijunilh chunch ni va ixʼamamachakxaniputun ni jantu tuʼuʼ ixtalhiulai ju ixtʼaʼamachakʼan ju makʼaniya lapanacni vachuʼ. Para ju amachakʼan alacatam yuʼunch ju talhilaksilh. 28 Pus ju acsnich tachi chun ju ixtavilanancha lacpujitat lana na tatalhkʼamalh acsni takʼasmatnilh ju ixchivinti. 29 Chai tataya. Tatixcoxtulh ju Jesús ju lakʼachakʼan. Chai talhiʼalh akstijun junta va kʼankʼapukʼaitajunta junta vanin ixtʼavi ju ixlakʼachakʼanʼan. Anchach ju ixtamacaʼamputun ju Jesús. 30 Para ju Jesús tapasalh laʼixlacaitat junta ixtayanalh ju yuʼunch. Chai alh. 31 Ju Jesús alh ju lakʼachakʼan Capernaum laxaʼestado Galilea. Chai ju savat tsuculh amalaninin ju lapanacni ju lacpujitat. 32 Pus chux ju lapanacni na ixtalhamakʼaninin ta yu ixʼamalaninin ni istasui laʼixchivinti ni vasalh ismispai ju atalaninti. 33 Chai ixtanumacha lacpujitat pumatam lapanac ju ixpacxanta ju lhacaticuru laʼixtanquilhacni. Chai ju anuʼ lhacaticuru lana tsʼau tʼasalh. Puchivinilh ixquilhni ju anuʼ lapanac. Junich ju Jesús: 34 ―Ai. Tijuch ju quilamintau lhilaktsʼinin ji Jesús amachakaʼ Nazaret. Ja va quilamintau mamakʼalhkʼajninin ju quijnan. Pus iclamispayau tichi chavaichʼat. Pus ju uxintʼi salaka ixlapanac Diosʼat. 35 Para ju Jesús kʼailh ju lhacaticuru. Junich: ―Va sekch. Atʼaxtʼuch ju laʼixlacatuna ju ani lapanac. Pus ju acsnich ju lhacaticuru tin samakʼalh ju lapanac junta ixtayanalh ixtalhavat lapanacni. Chai lana taxtulh laʼixlacatuna. Para jantu xamacʼatsani. 36 Chai lana na talhamakʼaninilh ju lapanacni. Chai ixtalaclajuni ju sia lhiyuʼunch: ―Tis chivinti nuʼ ju ani. Pus ju yuchi slivasalh lai lhinajun chai lacatachaput ju ajuni ju lhacaticurulhni ni catataxtulh chai tataxtui. 37 Pus ixtacʼatsakʼojui ju ixlacata yuchi vanta lhiʼanchach junta vanin ixlhiʼalin ju lakʼachakʼan. 38 Pus ju Jesús taxtulh ju lacpujitat chai alh laʼixchakaʼ ju Simón. Pus ju ixputʼichakoʼulh ju Simón na ixchʼapata ju iscacat. Pus tapaininicalh ju Jesús ixlacata ju anuʼ takʼankʼan. 39 Pus ju yuchi taya vanin junta ixma ju takʼankʼan. Chai kʼailh ju scacat. Pus lana macaulh ju iscacat ju takʼankʼan. Chai kʼostavi chai tsuculh alacmavanaʼ ju Jesús chai ixʼamamakaʼui. 40 Chai acsni anchalh ju avilhchan pus ixʼalhiminicanch ju Jesús tachi chun ju takʼankʼanin ju na tijlhu takʼankʼat ixtachʼapata. Chai ju Jesús ixʼamokslanich ju ixmacaʼ laʼixlacatunaʼan ju pumatamin takʼankʼanin chai palaich ixʼanavi. 41 Chai vachuʼ na lhu lhacaticurulhni ixtataxtui laʼixlacatunaʼan ju lapanacni. Chai pʼas ixtajuni ju Jesús: ―Vasalh istsʼalh Diosʼat. Para ju Jesús ixʼalackʼaji. Chai jantu ixʼalacasqʼuini ni catachivinilh ni ixtacʼatsai ni yuchach ju Cristo ju ixnoncan camalakachatachilh ju Dios. 42 Chai acsni tuncunchokolh pus ju Jesús lana taxtuchokochalhch. Alh junta va aseknicʼa. Para ju lapanacni na ixtapuxcajui. Chai tachincha junta ixvilhcha. Chai na ixtachʼapaʼulaputun ni jantu caʼalacmacaulh ju yuʼunch. 43 Para ju yuchi ajuni: ―Para tasqʼuini ni vachuʼ acʼalh ju aliʼ lakʼachakʼanixni. Acʼalh ajuniniʼ ju lapanacni ni Dios lhinomputun laʼisʼatsucuntiʼan. Tasqʼuini ni chunch aclayaʼ ni yuchi iclhimalakachacantachilh. 44 Pus ju Jesús ixʼamalani ju lapanacni laxalacpujitat ju laxaʼestado Judea.
1 Pus ju Jesús ixyacha vanin laʼixquilhtuʼ ju atantsʼin Genesaret. Chai ju lapanacni ni na ilhuʼan ixtajunita pus na istasamakʼamputun ju Jesús ni vanin ixtatayaputun ni laich catakʼasmatnilh ixchivinti Dios ju ixʼajuni. 2 Pus ju Jesús laktsʼilh lakatʼui barco ju vanin ixlacvi laʼixquilhtuʼ atantsʼin. Para ju ixchʼapanin pamata ixtatacutʼach ni ixtatʼajun chakʼanin ixchʼokxniʼan. 3 Chai ju Jesús putaju lakatam barco ju anchach ixlacvi. Chai ju yuchi ixʼanuʼ Simón ixjunita. Chai ju Jesús tapaininilh ju Simón ni cha taju lacatsʼunin ju lacxcan ju ixbarco. Chai acsni chunch ju navilh ju Simón pus ju Jesús tsuculh amalaniniʼ ju lapanacni. 4 Chai acsni chivinkʼolh pus junich ju Simón: ―Alhipʼich ju mimbarco junta palai talaclhman chai amuʼutʼich ju minchʼokxniʼan ni lai achʼapʼayaʼitʼit ju pamata. 5 Para ju Simón akʼalhtayanalh chai juni: ―Amamakaʼunuʼ tonta tsʼisni ju xacmujuyau ju quinchʼokxni quincʼan. Para jantu tuʼuʼ icchʼapatau. Para ni chunch ju naʼun pus acmujuchokoyach ju quinchʼokxni. 6 Pus acsni tamujulh ju ixchʼokxniʼan ju Simón chai ixtʼachʼalhcatnaʼ pus na lhuch lana tanucha ju pamata. Chai ixtakʼexputun ju ixchʼokxniʼan. 7 Pus tatamacyonilh ju ixtʼachʼalhcatnin ju ixtatajumanalh lacalakatam barco. Tajuni ni catamilh aʼaktaijunin. Pus tamilh chai talaktsama chux lakatʼui barco. Chai ixtaquitaʼacnuputun ju lakatʼui barco. 8 Pus ju Simón Pitaluʼ acsni laktsʼilh ni na lhu ixjunita ju pamata pus lana taʼaktsokotanilh laʼixʼucxlacapuʼ ju Jesús chai juni: ―Akʼostʼich ju laquiʼucxlacapuʼ ji quiʼucxtin ni na icʼalactuʼunuʼ lapanac ju quitʼin. 9 Chunch ju naulh ju Pitaluʼ ni na ixlhamakʼaninin ju yuchi chai tachi chun ju ixʼalactʼatajun lacabarco. Talhamakʼaninilh ni na lhu ixtachʼapata ju pamata. 10 Chai vachuʼ na ixtalhamakʼaninin ju Jacobo chai ju Xivan istsʼalan ju Zebedeo. Pus ju yuʼunch ixtʼalamaktainin ju Simón ixtajunita. Pus ju Jesús junilh ju Simón: ―Jantu atʼalhan. Tus chavai amakʼaixtʼokʼaʼitʼit ju lapanacni ju aquintalhilacaʼanaʼ tachi acsni ixmakʼaixtʼokʼatʼit ju pamata. 11 Pus ju acsnich tamacutulh ju ixbarcoʼan. Tamaconkʼolh chux chai tachʼakʼokʼalh ju Jesús. 12 Acsni ixvi ju Jesús lacalakatam lakʼachakʼan pus lakmilh pumatam lapanac ju ixpacxanta ju macxcai istsʼitsʼi ju ixpuchʼiʼan. Chai ju yuchi lana taquilhputanilh ju lacatʼun laʼixʼucxlacapuʼ ju Jesús. Chai tapaininilh. Junich: ―Quiʼucxtin ni va xaqʼuincʼuchʼupʼutʼuch cava pus laich xaqʼuincʼuchʼutʼi. 13 Pus ju acsnich ju Jesús mokslanilh ixmacaʼ laʼixlacatuna chai juni: ―Iclacasqʼuin. Palaichʼat. Chai acsni naulh ju chunch ju Jesús pus lana macaxnilh ju istsʼitsʼi ju anuʼ lapanac. 14 Chai ju Jesús lhimapʼaksilh ju anuʼ lapanac ni jantu xamatiʼ cajunilh tuʼuʼ. Chani ju juni: ―Aʼinchich tʼalacʼasuniniʼ ju pali. Axtʼakchich ju milhakʼailaktsʼin ni cacʼatsacanaʼ ni salaka ju milacatuna tachi ju najun laʼixlhamapʼaksin ju Moisés. 15 Para jantu sek va ju anuʼ lapanac chai palai lhu tacʼatsa ixlacata ju Jesús. Chai na lhu ju ixtalhitakʼaixtʼokʼa ni va ixtakʼasmatniputun ju ixchivinti ju Jesús chai palaich ixtajumputun ju va ixtalactakʼankʼaich. 16 Para ju Jesús ixʼan junta aseknicʼa. Ixʼan tʼachiviniʼ ju Dios. 17 Chai milh avilhchan acsni ixtʼajun amalaniniʼ ju Jesús lacachakaʼ. Chai vachuʼ anch ixtavilanalh ju fariseonin chai ju na ixtalhatalanininta ju ixlhamapʼaksinʼan ju istʼaʼisraelitanin. Ju yuʼunch ixtamintacha ixlhilacaputsʼun ju xalakʼachakʼanixni ju xaʼestado Galilea chai ju xaʼestado Judea chai ju lakʼachakʼan Jerusalén. Chai ju Dios ixtaknita ju Jesús ixtachaput ni laich palai caʼanavi ju takʼankʼanin. 18 Chai ju aliʼin lapanacni talhimincha pumatam lapanac lacalona. Ju yuchi va ixlacalhtuculunta. Chai ju yuʼunch ixtapuxcajui ta anchach ju laich catapumanu lacachakaʼ ni laich catamamanilh laʼixʼucxlacapuʼ ju Jesús. 19 Para jantu jintaʼ talhitaju junta laich catapumanu ni na isʼaktsamcanta lacachakaʼ. Pus tamucʼalh laʼixʼucxni chakaʼ. Taʼucxmakʼalh chai anch ju tapumakʼalhtaju lacalona ju anuʼ takʼankʼan. Tamama vanin junta ixvi ju Jesús. 20 Chai ju Jesús acsni alaktsʼilh ni na ixtalhilacaʼan ju yuchi pus junich ju takʼankʼan: ―Ji lapanac ju miʼalactuʼunti macʼacxanicanta. 21 Pus ju acsnich ju fariseonin chai ju yuʼunch ju na ixtalhatalanininta ju ixlhamapʼaksinʼan ju istʼaʼisraelitanin tanaulh laʼixʼalhunutʼan: “Tis chavaich nuʼ ju ani lapanac ni va macxcai ju najun ni tachi ju Dios ju jumputun. Tis chavaich apumatam ju lai macʼacxai ju alactuʼunti. Ni va yuchi jumpalaʼ ju Dios”. 22 Para ju acsnich ju Jesús amachakxanilh tuchi ixtapastʼacʼach ju yuʼunch chai axakʼala. Ajunich: ―Tajuch ni va chunch ju pʼastʼacʼatʼit ju lamiʼalhunutʼan. 23 Ni acjunilh ni macʼacxanicalh ju ixʼalactuʼunti pus jantu lai pʼucʼatsʼayatʼit ni vasalh alin ju quintachaput u jantu. Para ni acjunilh ni cakʼostavi chai caʼalhtanalh pus ju chunch lai apʼucʼatsʼayaʼitʼit ni alin ju quintachaput u jantu. 24 Pus ju chavai aclamasuniyau ni alin ju quintachaput ju ani lacamunutpaʼ ni lai icmacʼacxai ju alactuʼunti. Quitʼin ju quimalakachatachilh ju Dios ni lapanac actsucuyaʼ ju ani. Pus ju acsnich ju Jesús junilh ju anuʼ ju ixlacalhtuculunta: ―Uxintʼi ju icjunan. Akʼostʼaʼulhch. Asactʼich ju mimputaman. Aʼinchich ju laminchakaʼ. 25 Chai lana taya ju anuʼ lapanac laʼixʼalacʼavantiʼan ju yuʼunch. Chai saclh ju ixputaman. Chai alh laʼixchakaʼ. Chai na ixlakʼayaʼanta ju Dios ju lacati. 26 Chai lana na talhamakʼaninilh ixchuxʼan. Chai talakʼaya ju Dios. Chai na tatalhanalh. Tanaulh: ―Iclaktsʼiu lakatam lhamakʼan ju chavai. 27 Chai astan acsni tapasalh ju ani taxtokni pus ju Jesús taxtulh. Chai laktsʼilh pumatam achʼiniʼ ju Leví ixjuncan. Ju yuchi ixvi junta ixʼachʼinin ixlacata ju tuʼuʼ ju ixlhimincanta ju anuʼ lakʼachakʼan. Pus ju Jesús juni: ―Aqʼuinchʼakʼokʼach. 28 Pus ju anuʼ achʼiniʼ lana taya chai macaulh ju ixlhichʼalhcat chai tʼaʼalh ju Jesús. 29 Chai astan ju Leví navinilh ju Jesús lakatam lacvaiti ju laʼixchakaʼ. Chai na lhu ixtamakvilanalh lacamixa ju ixtʼaʼachʼinin ju Leví chai vachuʼ na lhu aliʼin lapanacni. 30 Para ju fariseonin chai ju na ixtalhatalanininta ju lhamapʼaksin ju vachuʼ fariseonin ixtajunita va ixtaʼalhichivinin ju ixʼamamakaʼui ju Jesús. Talacjuni: ―Tʼas ni va alactʼavainatʼit chai alactʼakʼotʼatʼit ju vino ju achʼinin chai ju alactuʼunin. 31 Chai akʼalhtayanalh ju Jesús. Ajunich: ―Ju lactachapunin jantu tamaktasqʼuini ju acʼuchʼunuʼ. Va yuʼunch ju takʼankʼanin. 32 Jantiyuʼ iclhiminta ni acʼalactʼasanilh ju tanajun ni na lackʼoxin lapanacni tajunita. Alai icminta alactʼasaniniʼ ju alactuʼunin ni catamacaulh ju ixʼalactuʼuntiʼan. 33 Pus ju fariseonin chai ju na ixtalhatalanininta ju lhamapʼaksin ju vachuʼ fariseonin ixtajunita tajunilh ju Jesús: ―Tajuch ni na paklhu ju tatascajai chai tatʼachivinin ju Dios ju ixtamamakaʼun ju Xivan. Chai ju quilapanacni quincʼan ju fariseonin icjuntau vachuʼ chunch talai. Para ju mintamamakaʼun ju uxintʼi jantu chunch talai. Ju yuʼunch tavajin chai takʼotʼa ju vino. 34 Chai ju Jesús ajunich: ―Jantu lai amatʼascʼaʼayaʼitʼit ju tamakvilanalh junta catamakʼaxtokcanaʼ acsni makvilhcaʼ ju anuʼ tsʼalh ju catamakʼaxtʼokʼaʼ. 35 Pus vana va chunch ju quintamamakaʼun. Ju chavai jantu tatascajai ni icʼalactʼavilhcaʼ. Para cachinaʼ avilhchan acsni acmakʼosucanaʼ ju ani lacamunutpaʼ. Chai acsnich ju catatascajayaʼ ni aquintalhamakʼanininach. 36 Chai vachuʼ ajunilh lakatam chivinti ju ixʼapumavasalaniputun tuʼuʼ. Ajuni: ―Jantu lai xamatiʼ kʼexʼi ju lacasastʼi ixcujuʼ chai calhilakyaulh ju lacakʼatʼili ixcujuʼ. Ni va chunch calalh pus lakʼalhi ju sastʼi ixcujuʼ chai va na jantu kʼox jun ju kʼatʼilh ni jantu ixtʼachunch junita ju pumpuʼ ju xalhilakyajui. 37 Chai jantu lai xamatiʼ pumujui ju sastʼi vino lacakʼatʼili axtʼakʼan ni na kʼalhpʼasnicaʼ. Ni chunch canavi pus ju sastʼi vino cakʼexlh ju axtʼakʼan chai ju vino capukʼankʼolh. Chai ju axtʼakʼan catsʼankʼalh. 38 Alai pumucan ju sastʼi vino lacasastʼi axtʼakʼan. Ju chunch lai pumakʼacan ju sastʼi vino ju axtʼakʼan. 39 Chai jantu xamatiʼ ju kʼotʼa ju makʼaniya vino ju lai cakʼotputulh ju sastʼi. Va najun ni palai can ju makʼaniya vino. Chunch ju ajuni ju lapanacni ju Jesús. Va ixʼamamachakxaniputun ni jantu lai catilhiyaulh ju makʼaniya ixlhamapʼaksin ju Moisés ju sastʼi ixlhamapʼaksin ju yuchi. Chai ju na lanita ju makʼaniya lhamapʼaksin na xcai macomputun ni laich caʼamaklhtayanalh ju sastʼi lhamapʼaksin.
1 Lakatam avilhchan paʼastacni ju Jesús ixtʼajun tapasanaʼ junta ixchʼancanta ju trigo. Chai ju ixʼamamakaʼui ju ixtatʼaʼanta ixtaʼich ju xatrigo chai ixtaʼui. Va ixtakʼaipʼasʼulhiʼanta ju laʼixmacaʼan. 2 Para ju aliʼin fariseonin chani tajuni: ―Tajuch ni va naviyatʼit ju chunch ni jantu lai chʼalhcatnancan ju chavai ni avilhchan paʼastacni. 3 Chai ju Jesús akʼalhtayanalh. Ajunich: ―Ja lana jantu pʼastʼacʼatʼit tuchi navilh ju David acsni chavanilh ju yuchi chai ju ixtatʼaʼanta. 4 Ja jantu pʼastʼacʼatʼit ni lai tanu junta ixlakʼayacan ju Dios chai chʼapalh ju xkapavati ju ismokslanicanta ju Dios. Chai ulh chai axtaknilh vachuʼ ju ixtatʼaʼanta. Chai ju anuʼ xkapavati jantu lai va kʼaya ixʼucan. Va yuʼunch ju palijni ju lai ixtaʼui. 5 Chai vachuʼ chani ajuni: ―Ju Dios quimalakachatachilh ni lapanac actsucuyaʼ ju ani. Chai quitʼin ju lai icnajun tuchi lai navican ju avilhchan paʼastacni. 6 Chai alakatam avilhchan paʼastacni ju Jesús tanulh laʼixpujitatʼan ju istʼaʼisraelitanin chai tsuculh amalaniniʼ. Chai ju anch ixtanumacha pumatam lapanac ju va ixixnita ju ixmacaʼ laʼixlhicana. 7 Chai ju fariseonin chai ju yuʼunch ju na ixtalhatalanininta ju ixlhamapʼaksinʼan ju istʼaʼisraelitanin va ixtalhistactʼajun ju Jesús. Va ixtalaktsʼimputun ni lai caʼacʼuchʼunulh ju avilhchan paʼastacni. Va ixtapuxconi ta yu laich catapumucʼanilh ixtalakʼalhin. 8 Para ju Jesús iscʼatsai tuchi ixtapastʼacʼa. Chai junich ju anuʼ lapanac ju ixixnita ju ixmacaʼ: ―Akʼostʼaʼulh. Atʼaich ju ani junta laich catalaktsʼinan ju lapanacni. Pus ju yuchi kʼostaya chai tayalh ju anch. 9 Pus ju acsnich ju Jesús ajunich ju lapanacni: ―Tʼas nonatʼit. Ja lhijun ju lhamapʼaksin ni canavicalh ju kʼox ju avilhchan paʼastacni u canavicalh ju talakʼalhin ni jantu caʼaktaiju tam xamatiʼ. Ja lhijun ni acmakʼalhtaxtulh ju atsucunti ju avilhchan paʼastacni u aclaktsʼimakni. 10 Pus ju acsnich ju Jesús alaktsʼinkʼo ju ixtayanalh ixlhitalakachoko chai chani ju juni ju anuʼ lapanac: ―Alhitʼach ju mimacaʼ. Chai chunch ju navilh ju lapanac chai lana tachapun va ju ixmacaʼ. 11 Para ju fariseonin chai ju aliʼin na kʼox talakachapulh laʼixtalhkʼamtiʼan. Chai ixtalaclajunich ju sia lhiyuʼunch ta yu catatʼalayaʼ ju Jesús. 12 Pus ju acsnich ju Jesús alh junta ixvilhcha lakatam akstijun. Alh tʼachiviniʼ ju Dios. Chai tontatsʼis ju tʼachivinilh ju Dios. 13 Chai acsni tuncunchokolh atʼasanilh ju ixʼamamakaʼui chai asacxtulh ixpumacautʼuiʼan. Chai alaclhilhcaʼula ixtamalakachan. 14 Pus sacxtulh ju Simón ju lhimapakaʼulh vachuʼ Pitaluʼ chai ju Tilix ixlakʼau. Chai ju Jacobo. Chai ju Xivan. Chai ju Pilipe. Chai ju Bartolomé. 15 Chai ju Mateo. Chai ju Tumax. Chai apumatam Jacobo ju istsʼalh Alfeo ixjunita. Chai apumatam Simón ju makyuʼunch ixjunita ju cananistanin. 16 Chai ju Judas ixlakʼau ju Jacobo. Chai ju Judas Iscariote ju astan amakʼaxtaknalh. 17 Chai ju Jesús alactʼamilh ixpumacautʼuiʼan chai alactʼataya junta na acpujun. Chai vachuʼ ixtayanalh anch na lhu aliʼin ixʼamamakaʼui chai na lhu amachakʼan ju xaʼestado Judea chai ju amachakʼan lakʼachakʼan Jerusalén chai ju lakʼachakʼanixni Tiro chai Sidón ju ixvilhcha laʼixquilhtuʼ alama. Ju yuʼunch va ixtaminta kʼasmatnin ixchivinti ju Jesús. Vachuʼ palai ixtajumputun ju ixtalactakʼankʼai. 18 Chai ju na ixtamakʼalhkʼajnan ni ixtapacxanta ju lhacaticuru vachuʼ palai anavi ju Jesús. 19 Pus na lhu lana ixjunita ju takʼankʼanin chai tachi chun ju yuʼunch ixtalacachʼapaputun ju Jesús ni ixʼalin ju ixtachaput chai palai ixtapujun ju chunch. 20 Pus ju acsnich ju Jesús laktsʼilh ju ixʼamamakaʼui chai ajuni: ―Va paxcat untʼatʼit ju uxijnan acsni cʼatsʼayatʼit ni na maktʼasqʼuiniyatʼit ju Dios. Pus apʼinaʼitʼit ju lactʼiyan junta lhinajun ju Dios. 21 Va paxcat untʼatʼit ju uxijnan ju na lacʼasqʼuinatʼit ju soknicʼa atsucunti. Pus chunch cajunaʼ ju miʼatsucuntiʼan. Va paxcat untʼatʼit ju uxijnan ju na taʼamakʼaninin. Pus ju Dios catamakʼankʼachayan. 22 Va paxcat untʼatʼit ju uxijnan acsni cataxcayan ju lapanacni chai acsni jantu catatʼaʼalhtanamputunan chai acsni catajunan macxcai chivinti chai acsni catanonaʼ ni jantu lackʼoxin lapanacni untʼatʼit va ixlacaʼatalh ni quilalhilaksiyau ju quitʼin ju quimalakachatachilh ju Dios ni lapanac actsucuyaʼ ju ani. 23 Pus alhikʼachʼantʼit acsni chunch cataʼulhtuyan. Slivasalh na kʼox alhiulatʼit. Pus chunch alatʼit ni slivasalh na kʼox ju axtʼaknicʼanaʼitʼit ju lactʼiyan. Pus ju makʼaniya ixlacpaʼitniʼan ju lapanacni ju chunch taʼulhtuyan vana va chun ixtaʼulhtui ju makʼaniya ixlapanacni Dios. 24 Para painiʼitnich ju uxijnan ju nonatʼit ni jantu maktʼasqʼuiniyatʼit ju Dios. Pus va ani lacamunutpaʼ ju caʼalinaʼ ju minkʼachatʼan. Ju astan jantu. 25 Painiʼitnich ju uxijnan ju nonatʼit ni na kʼox ju chavai ju miʼatsucuntiʼan. Pus ju astan acʼatsʼayaʼitʼit ni makʼancʼacxnitan ju ixtakʼoxinti ju miʼatsucuntiʼan. Painiʼitnich ju uxijnan ju na kʼachʼanatʼit ju chavai. Ju astan na akʼalhunaʼitʼit chai amakʼanininaʼitʼit. 26 Painiʼitnich ju uxijnan acsni chux ju lapanacni catanonaʼ ni na lackʼoxin lapanacni untʼatʼit. Pus ju makʼaniya ixlacpaʼitniʼan ju lapanacni ju chunch tajunan vana va chun ixtajuni ju makʼaniya lapanacni ju ixtalhitalacasui tachi ju ixlapanacni Dios mas jantu. Pus ni vana va chun tajunan ju uxijnan pus tasui ni jantu slivasalh ixlapanacni Dios untʼatʼit vachuʼ. 27 Para ju uxijnan ju quilakʼasmatniyau iclajunau ni amapʼainitʼit ju mintʼalaxcaiʼan. Chai anavinitʼit kʼox ju na taxcayan. 28 Asqʼuintʼit ju kʼox isʼatsucuntiʼan ju macxcai tajunan. Chai atʼapʼaininitʼit ju Dios ixlacataʼan ju talhimacchapuyan. 29 Acsni xamatiʼ cataʼulaniyan ju lamilakxtanʼan axtʼaknichʼokʼotʼit ju mintalakxtantamʼan. Chai ni xamatiʼ catachivimakʼanan chai catataiʼiniyan ju mincutunʼan pus vachuʼ jantu alhikʼaʼitʼit ju mimpumpuʼan. 30 Ni xamatiʼ catasqʼuiniyan ju tuʼuʼ pus jantiyuʼ ju jantu axtʼaknipʼutʼutʼit ni va makʼapʼutʼunatʼit miʼakstuʼan. Chai ju catalhiʼaniyan ju tuʼuʼ ju miʼanuʼan junita pus jantu va tachi asqʼuinichʼokʼotʼit. 31 Pus ni lacʼasqʼuinatʼit ni kʼox cataʼulhtuyan ju mintʼalapanacni pus vachuʼ kʼox aʼulhtʼutʼit ju yuʼunch. 32 Pus ni va yuʼunch ju amapʼainiyaʼitʼit ju tamapainiyan pus ja navitʼatʼit tuʼuʼ ju kʼox. Pus mas yuʼunch ju na taʼalactuʼunun vachuʼ tamapaini ixʼamigojniʼan. 33 Chai ni va yuʼunch ju anavinitʼit kʼox ju tanaviniyan kʼox pus ja navitʼatʼit tuʼuʼ kʼox. Pus mas yuʼunch ju alactuʼunin vana va chun tanavi. 34 Chai ni va yuchi ju alhimachʼixtʼaktʼit ju mintuminʼan ni va apʼulhaʼatʼit pus ja kʼox calhiulayaʼ ju Dios ju chunch. Pus mas yuʼunch ju alactuʼunin tamachʼixtakni ju ixtuminʼan ju ixtʼaʼalactuʼunin ni va tapulhajaputun. 35 Alai amapʼainitʼit ju mintʼalaxcaiʼan. Anavinitʼit ju kʼox chai amachʼixtʼaknitʼit ju mintuminʼan chai jantu alhamakʼaninintʼit u ni axtʼaknichʼokʼocʼanaʼitʼit u jantu. Chai ni chunch ju anaviyaʼitʼit pus na lhu cajunaʼ ju mintalhajaʼan chai catasuyaʼ ni vasalh isʼaskʼatʼan Dios untʼatʼit. Pus ju yuchi anavini ju kʼox ju jantu tavanan tajuni lakʼailaktsʼiuch chai ju na kʼai tajunita. 36 Pus anavitʼit ju lamapainin tachi ju mimpaiʼan Dios ni vachuʼ navi ju lamapainin. 37 Jantu anaʼuntʼit ni talakʼalhin ju xanavi ju akʼantam. Ni chunch ju alatʼit pus ju Dios canonaʼ ni vachuʼ navitʼatʼit talakʼalhin ju uxijnan. Jantu aʼulanitʼit ixtalakʼalhin ju akʼantam chai ju chunch jantu vachuʼ aʼulanicʼanaʼitʼit ju mintalakʼalhinʼan. Amacʼacxanitʼit ju akʼantam chai vachuʼ ju Dios catamacʼacxaniyan ju uxijnan. 38 Axtʼaknitʼit ju tamaktasqʼuini ju tuʼuʼ chai ju Dios vachuʼ cataxtakniyan ju uxijnan. Chai lacakʼox alhcanti ju axtʼaknicʼanaʼitʼit chai kʼox casajucanaʼ chai cacʼalhajucanaʼ chai caʼalhpaxach. Pus tuchʼi anaviyaʼitʼit ju akʼantam pus vana va chun ju anavicʼanaʼitʼit. 39 Chai ju Jesús ajuni alakatam chivinti ju ixtʼalaktsʼipaxcavaich ju tuʼuʼ. Chani ju ajuni: ―Ju tam alakʼachʼix jantu lai catipʼulhni ju ixtʼaʼalakʼachʼix. Ni chunch canavi pus va kʼaixtam catintʼaʼalh junta puculhucnicʼa. 40 Ju tam amamakaʼunti jantiyuʼ ju palai kʼai. Yuchi ju palai kʼai ju tam amamakaʼunuʼ. Para va tichi chavaich ju na kʼox masunicanta pus va ixtʼachunchach cajunaʼ tachi ju ixʼamamakaʼunuʼ. 41 Tajuch ni na naviyatʼit cuenta ju tuʼuʼ lacatʼicstʼi talakʼalhin ju navi pumatam milhilakʼau para lana jantu naviyatʼit cuenta ju kʼai talakʼalhin ju naviyatʼit miʼakstuʼan. Ni chunch ju layatʼit pus ixtʼachunch untʼatʼit tachi tam lapanac ju cajunilh akʼantam ni tanun ju lacatʼicstʼi amacxtalh laʼixlakchulh mas tanun ju palai kʼai amacxtalh laʼixlakchulh isʼakstu. 42 Chai tas laich aʼunitʼit ju tam milhilakʼau: “Alakʼaʼitʼich ni acʼaktaijuyan ni amaconaʼ ju talakʼalhin ju navi”. Tas laich chunch aʼunitʼit ni jantu naviyatʼit cuenta ju kʼai talakʼalhin ju naviyatʼit ju uxijnan. Pus acsni chunch ju layatʼit pus ixtʼachunch untʼatʼit tachi tam lapanac ju cajunilh akʼantam: “Acmaxtuniyanch ju lacatʼicstʼi amacxtalh ju tanun lamilakchulh”. Laich chunch juni mas palai kʼai amacxtalh ju tanun laʼixlakchulh isʼakstu. Para ju uxijnan acsni chunch ju layatʼit pus va acxpʼutʼiyununatʼit. Pus pʼulhnan amacʼaʼuntʼit ju kʼai talakʼalhin ju naviyatʼit. Chai ju chunch lai aʼaktʼaiʼuyaʼitʼit ju milakʼauʼan ni camacaulh ju lacatʼicstʼi talakʼalhin ju navi ju yuchi. 43 Ju tuʼuʼ kʼoxi qʼuiu jantu lai catixtaklh ju xalhiʼut ju jantu kʼox. Chai ju tuʼuʼ qʼuiu ju jantu kʼox jantu lai catixtaklh ju kʼoxi xalhiʼut. 44 Pus tachi chun ju qʼuiu lhimispacan ju xalhiʼut. Jantu lai tocʼai ju capen lacaʼalhtucunan. Nin lai catitocʼalh ju uvas lacaʼachʼitinan. 45 Pus vana va chun tam lapanac. Laʼixchivinti putasui tichi lapanac junita. Pus tam xamatiʼ ju na kʼox lapanac junita na kʼox cachivinaʼ ni yuchi ju kʼox ju alin laʼixʼalhunut. Para tam lapanac ju na kʼai junita pus na macxcai cachivinaʼ ni va yuchi ju jantu kʼox ju alin laʼixʼalhunut. Pus tuchi alin laʼixʼalhunut ju pumatamin pus chunchach ju chivinin. 46 Tajuch ni va quilalhixakʼalayau ucxtin para jantu naviyatʼit tuchi iclalhijunau. 47 Pus tachi chun ju quintalakmin chai quintakʼasmatni ju quinchivinti chai tanavi tachi ju icnajun pus chani tajunita. 48 Pus va ixtʼachunchach tajunita tachi ju tam lapanac ju yaulh ixchakaʼ. Pus talhman lana ju pucutulh tus lhitajulh ju chiux chai laʼixʼucxni ju anuʼ chiux ju yaulh ju xatantun ixchakaʼ. Chai acsni navikʼolh ju ixchakaʼ pus astan milh lakatam akmuxtut. Chai na pʼas ju neklh ju ani chakaʼ. Para jantu lai lacchiquixlh ni laʼixʼucxni chiux ixchʼantai. 49 Para va tichi chavaich ju kʼasmatʼa ju quinchivinti para jantu muctaxtui pus ju yuchi chunch junita tachi ju apumatam lapanac ju vachuʼ yaulh ixchakaʼ. Para ju yuchi jantu talhman pucutulh junta xayajui ju xatantun ixchakaʼ. Pus acsni na pʼas neklh ju xcan pus lana maktalh. Lana takʼalhikʼo ju anuʼ chakaʼ.
1 Chai acsni ajunkʼo ju ixchivinti ju lapanacni pus ju Jesús tanulh ju lakʼachakʼan Capernaum. 2 Chai ju anch ixvi pumatam capitán ju romano ixjunita. Chai ju yuchi ixʼalin pumatam ixlapanac ju na ixmapaini. Para na ixtakʼankʼai chai na ixniputun. 3 Pus ju anuʼ capitán acsni kʼasmatli ixlacata ju Jesús pus amalakachalh ju xapapanin israelitanin ni cataʼalh tapaininin ju Jesús ni camilh cʼuchʼunuʼ ju ixlapanac. 4 Pus ju yuʼunch talakʼalh ju Jesús chai slivasalh tatapaininilh. Tajunich: ―Ju yuchi na kʼox lapanac junita. Lhijunch ni anaviniyaʼ ju ani lamapainin. 5 Ju yuchi na tuʼuʼ quintalhiulayan ju quijnanʼan ju israelitanin juntau. Chai vachuʼ isʼakstu lhinaulh ixyajuca quimpujitat quincʼan. 6 Pus ju Jesús alactʼaʼalh ju yuʼunch. Para acsni vanin ixʼalactʼachaʼamputun laʼixchakaʼ ju anuʼ capitán pus ju yuchi amalakachalh ju ixʼamigojni. Chai acsni talakchilh ju Jesús chani tajuni: ―Ji ucxtin ma va jantu jeks mavaputunan ju yuchi ju quintamalakachatachin. Pus ju yuchi ma jantu tuʼuʼ ixtapalhni ni ma laich atʼitʼanuchiʼ laʼixchakaʼ. 7 Pus ma yuchi jantu xalhimimputunan tʼasaninin isʼakstu ni ma va jantu tuʼuʼ lhiulachokocan isʼakstu. Para ma mas va anauch ju chivinti chai palai cajunaʼ ju ixlapanac. 8 Pus ju yuchi ma cʼatsai ni lai chunch catapasayaʼ ni vachuʼ alin ju talhijuni. Chai ma vachuʼ na lhu alin ju ixtaropajni ju alhijuni ju yuchi. Chai acsni ma junich ju pumatam: Aʼinchich. Pus ma an. Chai ni ma juni apumatam: Atʼatʼi. Pus ma minch. Chai acsni ma juni ju ixlapanac: Anavitʼich ju ani. Pus ma navich. Pus ju anuʼ capitán ixʼalhijunita ju ixʼamigojni ni chunch ju catanaulh ni iscʼatsai ni taquiclacaʼini ju Jesús tachi chun ju taxtokni ni yuchi ju xakʼai tucan junita. 9 Chai ju Jesús acsni akʼasmatnilh ju ixchivintiʼan na lhamakʼaninilh. Chai alaktsʼilh ju lapanacni ju ixtachʼakʼokʼata chai ajuni: ―Slivasalh ju iclajunau. Jantu iclhitajuta nin pumatam quintʼaʼisraelita ju aquilhilaktsʼilh tachi ju lai ju ani lapanac. 10 Pus ju yuʼunch ju ixʼamalakachacanta taʼanchokolh laʼixchakaʼ ju capitán. Chai acsni tachaʼanchokolh talaktsʼilh ju takʼankʼan ni tachapunch junchokota. 11 Chai acsni tapasalh lakatam lakatʼui avilhchan pus ju Jesús ixʼamputun ju lakʼachakʼan Naín. Ixtatʼaʼanta na lhu ixʼamamakaʼui chai na lhu aliʼin lapanacni. 12 Chai acsni ixchaʼamputun vanin junta putanucanacha ju lakʼachakʼan pus apakxtoklh lhu lapanacni. Va ixlhiʼancanta campusantu pumatam alasanin. Yuchi ju lakatami istsʼalh ixjunita ju ixnati chai ju yuchi ixnimacontilacanta. Pus na lhu ixtatʼaʼanta ju chakoʼulh ju ixtʼaʼamachakʼanch. 13 Pus ju ucxtin Jesús acsni laktsʼilh ju anuʼ chakoʼulh na mapaini chai junich: ―Jantu akʼalhu. 14 Chai ju Jesús stalh lakʼalh ju ixpʼaklat ju tsʼalh chai ucxchʼapalh. Pus tamastʼacʼa ju ixʼakxkʼokʼanin. Chai ju Jesús junilh ju alasanin: ―Tsʼalh uxintʼi ju icjunan. Akʼostʼaʼulh. 15 Chai lana kʼostavilh ju anuʼ ixnita. Chai tsuculh chiviniʼ. Pus ju Jesús xtaknichokolh ju ixnati. 16 Pus slivasalh na tatalhanalh ixchuxʼan ju lapanacni. Chai talakʼayalh ju Dios. Chai ixtanajun: ―Talacasulh laquilhiquijnanʼan pumatam kʼai lapanac ju najun ixchivinti Dios. Vachuʼ ixtanajun ni Dios xalakmin ju ixlapanacni. 17 Pus laccʼatsakʼocalh ixlhilacaputsʼun ju xaʼestado Judea chai ixlhilacaputsʼun ju xalacatʼun ju ixtʼalachʼapata. 18 Chai junta ixtʼalhnucanta ju Xivan pus ixtamamakaʼun talhichaʼanilh chivinti ixlacata tachi chun ju ani taxtokni ju ixnavi ju Jesús. Pus ju Xivan atʼasanilh pumatʼui ixtamamakaʼunti. 19 Chai amalakachanilh ju Jesús. Chai ajuni: ―Chanich aʼunaʼitʼit: Ja ma uxintʼi ju noncan ni caminaʼ. U ma acpacxanchokoyau apumatam. 20 Pus ju anuʼ lapanacni talakmilh ju Jesús chai tajunilh tachi ju ixʼajuncan. Tajunilh ju Jesús: ―Quintamalakachachin ju Xivan ju amakpaxanaʼ ni ma aclamiu sacminin ju uxintʼi. Ja ma uxintʼi ju caminach noncan u ma acpacxanchokoyau apumatam. 21 Pus ju anuch pantsʼiquis na lhu ju palai anavi ju Jesús ju ixtalactakʼankʼai chai ju na ixtamakʼalhkʼajnan. Chai axcoxtulh ju lhacaticurulhni ju ixtatanun laʼixlacatunaʼan ju aliʼin lapanacni. Chai alacmalacʼavani na lhu ju alakʼachʼixnin ixtajunita. 22 Tus acsnicaʼ ju akʼalhtayanalh ju Jesús. Ajunilh ju ixtamalakachan ju Xivan: ―Aʼinchʼokʼochitʼitch juninin ju Xivan tuchʼi ju xalaktsʼinatʼit chai ju tuchʼi xakʼasmatʼatʼit. Aʼunaʼitʼit ni taʼalacʼavanan ju alakʼachʼixnin ixtajunita. Chai ju va ixtakʼalhinita ixchʼajaʼan sok taʼalhtanan. Chai ju va ixtapacxanta ju tsʼitsʼi ju na puchʼiʼan talaclacamacaxlich. Chai ju kʼatapa ixtajunita laich takʼasmatʼa. Chai ju tanita amalokʼonichokocalh. Chai ju quilhpatinin ajunicalh ta yu laich cataputakʼalhtaxtulh. 23 Vachuʼ aʼunitʼit ni lhikʼach tʼajun ju tam lapanac ju jantu astan najun ni jantu quinchʼakʼokʼaputun. ―Chunch ju ajunicalh ju ixʼamamakaʼui ju Xivan. 24 Chai acsni taʼanchokolh ju ixʼalhtanin ju Xivan pus ju Jesús lana tsuculh alacsacminiʼ ju lapanacni ixlacata ju Xivan. Ajunich: ―Tis chavaich ju ixlaktsʼimpʼutʼunatʼit junta qʼuilatʼit lacamacni. Cʼatsʼayatʼit ni jantiyuʼ qʼuilatʼit ju anch ni va alaktsʼimpʼutʼutʼit tam lapanac ju va tam tam najun tachi ju lai ju tuʼuʼ xaxkʼoi actiyac acsni lacatam lacatam sun lhiʼan ju un. 25 Pus tis chavaich ju ixlaktsʼimpʼutʼunatʼit junta qʼuilatʼit. Cʼatsʼayatʼit ni jantiyuʼ ju lhiqʼuilatʼit ju anch ni va alaktsʼimpʼutʼutʼit tam lapanac ju na va kʼox camalakchʼinilh. Pus ju na kʼox tamalakchʼininta chai ju jantu tuʼuʼ cʼacxni tatanumanalh laʼixchakaʼan ju xalackʼajin ucxtinin. 26 Pus tis chavaich ju ixlaktsʼimpʼutʼunatʼit junta qʼuilatʼit. Cʼatsʼayatʼit ni va ixlaktsʼimpʼutʼunatʼit ju lapanac ju najun ixchivinti Dios. Chai iclajunau ni vasalh chunch junita ju Xivan. Para palai kʼai lhichʼalhcat ju xtaknicanta ju yuchi. Palai jantu va tichi lapanac ju najun ixchivinti Dios. 27 Ju Xivan yuchi ju pastaccan acsni chani xatsʼokʼulacan laʼixchivinti Dios junta chani najun: Acmalakachayaʼ ju quilapanac ju pʼulhnan caʼanaʼ. Astan ju uxintʼi. Yuchach ju caʼalakʼoxiniyaʼ ixʼalhunutʼan ju lapanacni ni cataʼamaklhtayananan acsni achʼipʼinaʼ. 28 Para iclajunau ni tus chavai jantu alinta tam xamatiʼ ju palai xakʼai cava. Va yuchi ju Xivan ju amakpaxanaʼ. Para va tichi chavaich ju jantu tuʼuʼ lhiulacan laʼixmacniʼan ixtʼalapanacni yuchach ju palai kʼai cajunaʼ ju lactʼiyan junta lhinajun ju Dios. Palai jantu na chun junita ju Xivan ju chavai. 29 Pus tachi chun ju lapanacni chai ju achʼinin acsni takʼasmatnilh ixchivinti ju Xivan taʼakpaxlh. Pus chunch ju taputalacasulh ni sok ixtalhiulai tachi ju ixnavi ju Dios acsni ixnajun ni catamacaulh ixʼalactuʼuntiʼan chai cataʼakpaxlh. 30 Para ju fariseonin chai ju na ixtalhatalaninin ju ixlhamapʼaksinʼan ju istʼaʼisraelitanin jantu ixtalacasqʼuin ni caʼamakpaxalh ju Xivan. Pus ju chunch tasamakʼalh tuchi ispastacta ju Dios ixlacata ju yuʼunch. 31 Pus ju Jesús ajuni ju lapanacni: ―Tis chavaich nuʼ ju va ixtʼachunch lai aclanaviniyau ju uxijnan ju tʼonatʼit ju chavai. Tijuch nuʼ ju va mintʼachunch cava. 32 Pus ca laich acnaulh ni ixtʼachunch untʼatʼit tachi ju askʼatʼan ju takʼamanan laclhitamau. Pus ju quilhmactam chani talajuni ju aquilhmactam: “Ju quijnan xacskʼolau para jantu xaʼatʼininatʼit ju uxijnan. Chai icmilhpauch ju amakʼaniti para sin chunch jantu xakʼachʼaniyatʼit ni jantu xalackʼalhunatʼit”. Chunch talaclajuni ju askʼatʼan. Chai vana va chun ju layatʼit ju uxijnan ju tʼonatʼit ju chavai. 33 Pus acsni tavanan milh ju Xivan ju amakpaxanaʼ pus ju yuchi jantu ixvajin tachi ju venatʼit chai jantu ixkʼotʼa ju vino. Chai ju uxijnan ixnonatʼit ni va ixpacxanta ju lhacaticuru. 34 Chai icminta ju quitʼin ju quimalakachatachilh ju Dios ni lapanac actsucuyaʼ ju ani. Chai ju quitʼin icvajin tachi ju venatʼit chai ickʼotʼa ju vino chai ju uxijnan nonatʼit ni va chavani lapanac chai va akʼotnu lapanac icjunita. Nonatʼit ni va ixʼamigo ju achʼinin chai ju alactuʼunin icjunita. 35 Para ju vasalh taʼacʼatsananta tanajun ni aktsʼiya kʼox tuchi navi ju Dios. 36 Pus pumatam fariseo tapaininilh ju Jesús ni catʼavailh. Chai ju Jesús tʼatanulh laʼixchakaʼ chai tʼatapakstitama ni chunch ju ixtalhilanitach acsni ixtavajin. 37 Chai ixʼalin ju anuʼ lakʼachakʼan pumatam chakoʼulh ju na ixʼalactuʼunun. Pus ju yuchi acsni cʼatsa ni anchach ixtapakstitamai ju Jesús laʼixchakaʼ ju anuʼ fariseo pus vachuʼ tanucha lacachakaʼ. Chai lhimilh lakatam lumeti ju ixlhinavicanta chiux ju ixputajun ju cʼuchʼu ju na cʼus acamin. 38 Chai taya laʼixpulacan ju Jesús junta ixchʼanʼanta. Chai tsuculh kʼalhunuʼ. Chai ju ixlakpukʼalhut ixtocʼaniyacha laʼixchʼajaʼ ju Jesús. Chai ixpuchʼanxacai ju ixʼai. Chai ixchʼanchʼuchʼui chai ixchʼanmucʼai ju ixcʼuchʼu ju na cʼus acamin. 39 Para acsni laktsʼilh ju anuʼ fariseo ju ixkʼailhiminta ju Jesús laʼixchakaʼ pus chani ju pastaclh laʼixʼalhunut: “Ju ani ni vasalh cava ju lapanac ju najun ixchivinti Dios pus caʼismispa tichi chavaich chai ta junita ju isʼatsucunti ju anuʼ chakoʼulh ju tʼajun lacachʼapanaʼ. Caʼiscʼatsa ni va alactuʼunuʼ junita”. 40 Pus ju acsnich ju Jesús chani junilh ju anuʼ fariseo: ―Simón va icjumputunan lakatam chivinti. Chai ju anuʼ fariseo junich: ―Aqʼuinʼunch ji amamakaʼunuʼ. 41 Chai ju Jesús juni: ―Pumatam lapanac ju ixmachʼixtʼakʼa tumin ixʼamachʼixtaknita pumatʼui lapanacni. Ju pumatam ixlhiʼani lakaquis cientos. Chai ju pumatam ixlhiʼani cincuenta pexu. 42 Para ni jantu tuʼuʼ ixtamakʼata ju lai catalhimapalhnichokolh pus ju ixʼamachʼixtaknita ju tumin va amacʼacxanilh ju ixtʼiyunʼan. Pus aqʼuinʼunch. Tis chavaich ju palai camapainiyaʼ ju ixtʼiyunʼan ju anuʼ xamachʼixtakni ixtumin. 43 Chai ju Simón juni: ―Pus ca yuchi ju palai laklhu ixlhiʼani. Chai ju Jesús juni: ―Stavasalanti ju xakʼalhtʼayanan. 44 Ju acsnich ju Jesús laktsʼilh ju chakoʼulh chai junich ju Simón: ―Alaktsʼich ju ani chakoʼulh. Uxintʼi ju xaqʼuinkʼailhitʼantʼa ju ani laminchakaʼ para jantu xaqʼuixtʼakni ju xcan ju xaclhichʼanchakʼalh. Para ju ani chakoʼulh quinchʼanchakʼalh laʼixlakpukʼalhut chai quinchʼanxacalh ju laʼixʼai. 45 Chai ju uxintʼi jantu xaqʼuimacchʼuchʼui. Para ju yuchi tus acsni xactanuyacha laminchakaʼ va tachi quinchʼanchʼuchʼuich. 46 Ju uxintʼi jantu xaqʼuilacpamucʼai ju aceite. Para ju yuchi quinchʼanmucʼalh ju cʼuchʼu ju na cʼus acamin. 47 Pus yuchi iclhijunan ni slivasalh na quimapaini ju yuchi ni icmacʼacxanilh ju ixʼalactuʼunti mas na lhu ixjunita. Para na lacatsʼunin amapaininin ju va lacatsʼunin macʼacxanicanta. 48 Pus ju acsnich ju Jesús chani junilh ju chakoʼulh: ―Icmacʼacxanin ju miʼalactuʼunti ju ixnavitʼa. 49 Pus ju acsnich ju va kʼaixtam ixʼalactʼavajin ju Jesús tanaulh laʼixʼalhunutʼan: ―Tis chavaich nuʼ ju ani ni vachuʼ lai macʼacxai ju alactuʼunti. 50 Para ju Jesús junilh ju chakoʼulh: ―Ni xaqʼuilhilaksi pus chavai tʼakʼalhtʼaxtʼutʼach. Inchich chai lhikʼach atsʼucʼu.
1 Chai astan ju Jesús ucsuntsuculh chux ju kʼai lakʼachakʼanixni chai ju lactʼicstʼi lakʼachakʼanixni. Ixʼamalaninin chai ixʼajuni ju lapanacni ni ixlhinomputun ju Dios laʼixʼalhunutʼan. Chai ju ixpumacautʼuiʼan ixʼamamakaʼui ixtatʼaʼanta. 2 Chai vachuʼ ixʼalactʼaʼanta ju aliʼin chakolun ju ixʼacʼuchʼuta acsni ixtalactakʼankʼai chai ju aliʼin axcoxtunicalh ju lhacaticurulhni ju ixtatanun laʼixlacatunaʼan. Pus sia yuʼunch ju ixtatʼaʼan ju Jesús yuchi ju Malia amachakaʼ Magdala. Yuchi ju maxtunicalh pumatujun lhacaticurulhni laʼixlacatuna. 3 Vachuʼ ixtʼaʼanta ju Juana ixʼamachakaʼ ju Chuza ju ixlapanac ixjunita ju Herodes ju gobernador ixjunita. Vachuʼ tʼaʼalh ju Susana chai na pumalhu aliʼin chakolun ju ixtalhiʼaktaijui ixʼalintaʼan laʼixmaktasqʼuinitʼan ju Jesús chai ixʼamamakaʼui. 4 Pus na lhu lapanacni ixtalakmin ju Jesús ju ixtamintacha lakatamin lakʼachakʼan. Chai acsni na lhu ixtatakʼaixtokta pus ju Jesús ajuni lakatam chivinti ju ixʼalaktsʼipaxcavaich ju tuʼuʼ. Pus chani ju ajuni: 5 ―Pumatam achʼananaʼ alh lhavanaʼ ju ixʼachʼananti. Chai acsni lhavanalh ju ixʼachʼananti pus ju aliʼ ju xatʼin va laʼixquilhtuʼ ti tama. Chai ju aliʼ putayacalh chai ju aliʼ tasacʼulh ju tsʼokʼo. 6 Chai ju aliʼ ju xatʼin tamacha laʼixʼucxni chiux junta va lacatsʼunin ixʼalin ju tʼun. Pus acsni pʼunlh pus lana xixlh ni jantu ixkʼajuta ju tʼun ju anch. 7 Chai ju aliʼ ju xatʼin tamacha junta vachuʼ ixma ju xatʼin alhtucunuʼ. Pus pʼulhnan takʼaya ju alhtucunuʼ chai akxtakma ju anuʼ achʼananti. 8 Chai ju aliʼ ju xatʼin tamacha lacakʼoxi tʼun. Pʼunlh. Chai acsni takʼaya pus na kʼoxich xtaklh ju xatocʼat. Chai tachi ju chʼancalh pus talhava tam cientos. Pus acsni nonkʼo ju ani chivinti pus ju Jesús na pʼas chivinilh. Ajuni ju lapanacni: ―Tichi chavaich ju alin ixpakʼasmatni cakʼasmatlh. 9 Pus ju acsnich ju ixʼamamakaʼui tasacmilh ju Jesús. Tajuni: ―Tijuch ju nomputun ju chivinti ju xanaʼun. 10 Chai ju Jesús alacjuni: ―Ju Dios lakʼaʼi ni amachʼakxayaʼitʼit ju chivinti ju najun ni lhinomputun ju Dios laʼisʼatsucuntiʼan ju lapanacni. Para ju aliʼin icʼalhixakʼalai lacatuʼuʼ chivinti ju ixtʼalaktsʼipaxcavaich ju tuʼuʼ. Chunch iclai ni jantu catitamispa tuchi nomputun mas talaktsʼin tuchi icnavi. Chai jantu catitamachakxa mas takʼasmatʼa ju quinchivinti. 11 Pus ju chivinti ju xacnajun chani ju nomputun. Ju xatʼin yuchi ju ixchivinti Dios. 12 Chai ju tʼin ju tamacha lacati yuʼunch ju takʼasmatʼa ju ixchivinti Dios para lana min ju lhacaticuru chai amacʼapʼani ju chivinti ju ixʼachʼananicanta laʼixʼalhunutʼan ni jantu catalacaʼiyaʼ chai jantu catatakʼalhtaxtuyaʼ. 13 Chai ju tʼin ju tamacha laʼixʼucxni chiux yuʼunch ju takʼasmatʼa ixchivinti Dios chai lana soko takʼachani. Para chunch tajunita tachi ju anuʼ xapʼun laʼixʼucxni chiux. Jantu laʼixlhichux ixʼalhunutʼan ju taʼamaklhtayanan. Va pantsʼiquis ju talacaʼi. Para acsni tamakʼalhkʼajnan ixlacata ju chivinti pus lana tamacajun ixti Dios. 14 Chai ju tʼin ju tamacha junta ixʼalin ju xatʼin alhtucunuʼ pus yuʼunch ju takʼasmatʼa ju ixchivinti Dios. Para lacsni lacsni tacʼapʼa va ixlacaʼatalh ni na lhu alin ju xataxtokni ju ani lacamunutpaʼ ju talhamakʼaninin. Chai na takʼachani ju ixmakʼalitʼan chai na kʼox talhiulai ju ixkʼachat ju ani lacamunutpaʼ. Pus jantu tavanan vasalh tasui ixtachaput ju Dios laʼisʼatsucuntiʼan. 15 Para ju tʼin ju tamacha lacakʼoxi tʼun yuʼunch ju takʼasmatʼa ju ixchivinti Dios chai ixlhichux ixʼalhunutʼan talacaʼikʼalhi. Chunch talai ni na kʼox ju ixʼalhunutʼan tachi ju kʼachani ju Dios. Chai tachʼixa va tuchi min laʼisʼatsucuntiʼan chai slivasalh tasui ixtachaput ju Dios laʼisʼatsucuntiʼan. 16 Acsni xamatiʼ xavai ju ixmaclhcu jantu va puʼakxtakʼulai tuʼuʼ xalu. Nin yuchi ni lai caʼula laʼixtankʼapuʼ putaman. Alai anch ju mucʼai junta aktsʼiya mucʼacan ju maclhcu. Chai ju chunch tachi chun ju catatanuyach cataʼalacʼavananaʼ. 17 Pus chunchach vachuʼ ju quinchivinti. Mas va miʼakstuʼan xaclamavasalaniyau ju chivinti para astan amacʼatsʼaniyaʼitʼit ju lapanacni. Chai ju tuchi chivinti ju jantu amamachakxanican ju ixtalhavatʼan lapanacni pus uxijnan ju amacʼatsʼaniyaʼitʼit chai catamachakxayaʼ. Chai ni chunch ju alayaʼitʼit pus tachi ju va calhcuyaʼ ju maclhcu laʼixʼalhunutʼan ni laich catamachakxayaʼ ixchivinti Dios. 18 Para ni lai chunch ju alayaʼitʼit astan pus tasqʼuini ni pʼulhnan kʼoxich akʼasmatʼaʼitʼit. Pus va tichi chavaich ju kʼasmatʼa chai navi tachi ju najun laʼixchivinti Dios pus palai lhu camamachakxanicanaʼ. Para va tichi chavaich ju cakʼasmattsuculh para ni jantu canaviyaʼ ju tuchi najun laʼixchivinti Dios pus camacʼapʼanikʼoyach tuchi na mispaich najun. 19 Pus astan talakmilh ju Jesús ju ixnati chai ixʼapʼisekʼen. Para jantu lai stalh ixtalakʼan ni na lhu ixjunita ju lapanacni. 20 Chai pumatam chani juni ju Jesús: ―Ju minati chai ju miʼapʼisekʼen tayanancha makspaʼ. Va talaktsʼimputunan. 21 Para ju Jesús alacjuni: ―Ju vasalh quinati tajunita chai vasalh quiʼapʼisekʼen tajunita yuʼunch ju takʼasmatʼa ju ixchivinti Dios chai tamuctaxtui tachi ju najun ju anch. 22 Chai milh avilhchan acsni tatʼataju ju Jesús ju ixʼamamakaʼui lacabarco. Chai ju yuchi ajuni: ―Catapasauch ju lhimakʼantacutni atantsʼin. Chai taʼalh. 23 Para acsni ixtaʼantacaʼ ju lacxcan pus ju Jesús lana lhtatalh. Chai kʼostaya ju kʼai un chai na pʼas tanekʼalh ju xcan chai ixquiʼakpaxputun ju barco. Chai na ixtamuxtuputunch. 24 Pus ju ixʼamamakaʼui talakʼalh ju Jesús chai tamaklokʼo. Tajunich: ―Amamakaʼunuʼ na muxtuputunauch. Pus ju Jesús kʼostavi. Kʼailh ju un chai ju xcan. Chai lana va sek tavi ju xcan chai na sekch avanalh. 25 Chai ju Jesús ajunich ju ixʼamamakaʼui: ―Tajuch ni jantu quilalhilacaʼanau. Para ju yuʼunch na ixtatalhanan chai na ixtalhamakʼaninin. Chai talaclajunich ju sia yuʼunch: ―Tis chavaich nuʼ ju ani. Mas yuchi ju un chai ju xcan ni akʼaji si taquiclacaʼi. 26 Ju Jesús chai ixʼamamakaʼui tatacutcha laʼixtʼunʼan ju amachakʼan Gadara. Ju anch ixtʼalalacaʼanita ju xaʼestado Galilea ju lhilakʼantacutni lacaʼatantsʼin. 27 Chai acsni tayacha ju lacatʼun ju Jesús pus lana quipakxtokchilh pumatam amachakaʼ ju anuʼ lakʼachakʼan. Ju yuchi ixpacxanta ju lhacaticurulhni. Chai na makʼan jantu ixmalakchʼininta. Chai jantu ixvi laʼixchakaʼ. Va campusantu ixʼucxuntʼajun. 28 Pus ju yuchi acsni laktsʼilh ju Jesús tsʼau tʼasalh. Chai lana taquilhputanilh ju laʼixʼucxlacapuʼ. Chai ju lhacaticurulhni na pʼas tachivinilh laʼixquilhni ju anuʼ lapanac acsni chani tajuni ju Jesús: ―Tijuch ju quilamintau lhilaktsʼinin ju uxintʼi ji Jesús. Ju uxintʼi istsʼalhʼat Dios ju vilhcha lactʼiyan. Iclatapaininiyau ni jantu aquilamamakʼalhkʼajniu. 29 Pus chunch ju tanaulh ju lhacaticurulhni ni ixʼalackʼaimatach ju Jesús. Ixʼajunita ju yuʼunch ni catataxtulh laʼixlacatuna ju lapanac. Pus acsni tucaʼ ixʼakʼajita ju Jesús ju lhacaticurulhni pus na paklhu ixtachʼapata ju anuʼ lapanac. Chai mas ixlacachʼimacanta lacacadena chai ixchʼantʼalhmacanta para acsni ixtatanui ju lhacaticurulhni laʼixlacatuna pus ixlackʼexʼulakʼojui ju ixpulacachʼimacan. Chai ju lhacaticurulhni ixtakʼailhiʼan junta va aseknicʼa junita. 30 Pus ju Jesús sacmilh ju anuʼ lapanac. Junich: ―Tʼis uncʼanch. Chai ju yuchi juni: ―Legión icjuncan. Pus lhinaulh chunch ni na lhu ixpacxanta ju lhacaticurulhni chai ju Legión ixtapakaʼut junita lhu ju taropajni. 31 Pus ju lhacaticurulhni tatapaininilh ju Jesús ni jantu caʼamacaʼalh ju lacajipi. 32 Pus ju anuch akstijun ixtayanalh ixtalhavat pʼaxnin ju ixtatʼajun kʼexvenin. Chai ju lhacaticurulhni talhitapaininilh ju Jesús ni laich catatanu laʼixlacatunaʼan ju pʼaxnin. Chai ju yuchi yauch ajunilh. 33 Pus ju lhacaticurulhni tataxtulh laʼixlacatuna ju anuʼ lapanac chai lana tatanu laʼixlacatunaʼan ju pʼaxnin. Chai ixtalhavat pʼaxnin pʼas taʼatsʼalaʼalh junta vak anta. Chai tatajucha lacaʼatantsʼin. Chai anch ju tanitajukʼo. 34 Pus ju xaʼalhistacnin pʼaxnin acsni talaktsʼilh tuchi tapasalh pus tatalhanalh chai taʼatsʼalaʼalh. Taʼalh nonin ju anuʼ lakʼachakʼan chai ju lacacuxtun tuchi ixtapasata. 35 Pus ju lapanacni lana taʼatsʼalamilh laktsʼinin tuchi ixtapasata. Chai talakmilh ju Jesús chai talhitajulh ju anuʼ lapanac ju ixtaxtunitach ju lhacaticurulhni laʼixlacatuna. Pus ju yuchi vanin ixvi junta ixya ju Jesús chai ixmalakchʼininta chai ixtakʼoxita ju isʼaktsulh. Pus ju yuʼunch acsni talaktsʼilh na tatalhanalh. 36 Chai tachi chun ju lapanacni ju ixtalaktsʼinta tuchi tapasalh tanonkʼo ta yu palaich puva ju anuʼ lapanac ju ixpacxanta ju lhacaticurulhni. 37 Pus ju acsnich tachi chun ju ixtalhavat lapanacni ju amachakʼan xalacatʼun ju ixtalakachoko ju lakʼachakʼan Gadara tatapaininilh ju Jesús ni cataxtulh laʼixtʼunʼan. Chunch ju tanavi ni na va ixtatalhananch. Pus ju Jesús tajuchokopa lacabarco. Chai minchokocha. 38 Para acsni tucaʼ ixtaxtui ju Jesús pus ju anuʼ lapanac ju ixʼamaxtunicanta ju lhacaticurulhni tapaininilh ju Jesús ni caʼixtʼaʼalh ju yuchi. Para ju Jesús va malakacha laʼixchakaʼ. Junich: 39 ―Apʼinchʼokʼochich ju laminchakaʼ chai aʼunch ju lapanacni tuchi kʼai lhamakʼan ju xanaviniyan ju Dios. Pus ju anuʼ lapanac alh chai quilhuntsuculh ixlhilacaputsʼun ju lakʼachakʼan tuchi kʼai lhamakʼan ju ixnavinita ju Jesús ju ixlacata. 40 Pus acsni minchokolh ju Jesús junta ixtaxtutacha pus ju ixtalhavat lapanacni lhikʼach taʼamaklhtayanalh ni ixchuxʼan ixtapacxantaji. 41 Chai lakmilh pumatam lapanac ju ixjuncan Jairo. Pus ju yuchi pumatam xakʼai ixjunita sia yuʼunch ju ixtachʼalhcatnan laʼixpujitatʼan ju istʼaʼisraelitanin. Pus ju yuchi taquilhputanilh ju lacatʼun vanin laʼixchʼajaʼ ju Jesús. Tapaininilh ni catʼaʼalh laʼixchakaʼ. 42 Pus ixʼalin lakatami istsiʼ ju ixpacxanta tachi lakacautʼui cʼata. Chai ju yuchi ixtʼajun niniʼ. Pus ju Jesús tʼaʼalh. Para acsni ixʼanta ju lacati pus va ixtalatankʼasiʼanta ju ixtalhavat lapanacni. 43 Chai vachuʼ ixmakʼanta pumatam chakoʼulh ju na makʼanch jantu ixlakxixta. Pus lakacautʼui cʼata ju ixpacxanta ju ixtakʼankʼat chai ixʼaxtaknikʼojutach ju acʼuchʼunin chux ju ixʼalinta para nin chun jantu xamatiʼ lai palai xanavi. 44 Pus ju yuchi chincha laʼixlhipulacan ju Jesús chai lakchaʼanilh ixquilhtuʼ ixpumpuʼ. Chai lana astacnanilh ju ixtakʼankʼat. 45 Pus ju acsnich ju Jesús naulh: ―Tis chavaich ju xaquilakchaʼan. Chai vaklhtam chun ixtanajun ju ixtalhavatʼan ni jantu yuʼunch. Pus ju acsnich ju Pitaluʼ chai ju ixʼalactʼaʼanta tajunilh ju Jesús: ―Amamakaʼunuʼ tʼas laich sacmitʼi tis chavaich ju xalakchaʼanan ni na tatankʼasiyan chai tapalhitʼanch ju lapanacni. 46 Para ju Jesús naulh: ―Aktsʼiya quilakchaʼalh xamatiʼ ni iccʼatsalh ni iccʼuchʼulh pumatam. 47 Pus ju anuʼ chakoʼulh acsni cʼatsalh ni jantu lai va sek xanavi pus vanin lakʼanchokolh ju Jesús. Na ixʼaxqʼuipʼipʼitninta. Chai taquilhputanilh ju lacatʼun laʼixʼucxlacapuʼ chai junilh ju stavasalanti laʼixʼucxlacapuʼan ju lapanacni tuchi ixlacaʼatalh ju lhilakchaʼalh chai ni vatsʼalhti palaich va. 48 Pus ju Jesús junich: ―Quintsiʼ ni qʼuilhilacʼapʼinch pus yuchi palaich xalhiʼun. Aʼinchich. Cakʼachanach ju miʼalhunut. 49 Chai acsni ixtʼajuncaʼ tʼachiviniʼ ju chakoʼulh ju Jesús ju lacati pus minchalh pumatam lapanac ju ixtaxtutacha laʼixchakaʼ ju anuʼ xakʼai chai junicalh ju Jairo: ―Ju mintsiʼ nitach. Jantu palai jeks amavatʼi ju amamakaʼunuʼ. 50 Para acsni kʼasmatlh ju Jesús pus junilh ju lapanac: ―Jantu atʼalhan. Va aqʼuilhilacʼapʼich. Chai palaich cajunaʼ ju mintsiʼ. 51 Chai acsni tanucha lacachakaʼ ju Jesús pus jantu lacasqʼuinilh ni xamatiʼ catʼatanu ju pulactam junta ixma ju lijunto askʼatʼa. Va yuchi ju Pitaluʼ ju tʼatanu chai ju Jacobo chai ju Xivan chai ju ixpaich chai ixnatich ju anuʼ atsiʼ. 52 Pus chux ju lapanacni na ixtalackʼalhun chai na pʼas ixtalactʼasai. Para ju Jesús alacjunich: ―Jantu akʼalhuntʼit. Jantu nita ju atsiʼ. Va lhtataich. 53 Para ju yuʼunch va talhitsʼiʼilh ju Jesús ni ixtacʼatsaich ni vasalh ixnita ju atsiʼ. 54 Para ju Jesús chʼapanilh ixmacaʼ ju atsiʼ chai pʼas xakʼalalh. Junich: ―Akʼostʼaʼulhch ji atsiʼ. 55 Pus lana minchokolh ixtacuvin laʼixlacatuna chai lana kʼostavi. Chai ju Jesús naulh ni caxtaknicalh ju ixvaiti. 56 Pus ju ixpai chai ixnati ju atsiʼ na talhamakʼaninilh. Para ju Jesús alaclhimapʼaksi ni jantu xamatiʼ catajunilh tuchi ixtapasata.
1 Ju Jesús amakʼaixtoklich ju ixpumacautʼuiʼan ixʼamamakaʼui chai axtaknilh ixtachaputʼan chai ju ixpukʼaiʼan ni laich cataxcoxtuyaʼ ju lhacaticurulhni laʼixlacatunaʼan ju lapanacni chai lai palaich catanaviyaʼ tachi chun ju takʼankʼanin. 2 Chai amalakacha ni cataʼalh ajuninin ju lapanacni ni lhinomputun ju Dios laʼisʼatsucuntiʼan chai ni palaich catanaviyaʼ ju takʼankʼanin. 3 Chai ajuni: ―Jantu tuʼuʼ alhipʼitʼit ju ixlacata ju lacati. Nin mimpalicʼan nin mimpastiʼan nin miniʼan nin tumin nin yuchi ni lai alhipʼitʼit kʼalhtʼui ju mimpumpuʼan. 4 Chai va tuchi chakach junta astʼacnanaʼitʼit pus anch ju atʼolhkʼalhiyaʼitʼit tus acsni atʼaxtʼuchʼokʼoyaʼitʼit ju anuʼ lakʼachakʼan. 5 Chai va tuchi lakʼachakʼan ju jantu cataʼamaklhtayananan pus acsni atʼaxtʼuchʼokʼoyaʼitʼit ju anch achʼancʼalhapʼuxcʼantʼit ju pokxni laminchʼanxtʼakʼanʼan ni catapucʼatsayaʼ ni jantu kʼox tanavita. 6 Pus tataxtulh ju yuʼunch chai taʼalh chux ju lakʼachakʼanixni. Chai ixlhilacaputsʼun ju anuʼ lacatʼun ixtajuni ju lapanacni ta yu laich catatakʼalhtaxtulh. Chai palaich ixtanavi ju takʼankʼanin. 7 Pus ju gobernador Herodes kʼasmatlh tachi chun ju taxtokni ju ixnavi ju Jesús. Chai ju yuchi na ixlhamakʼaninin ni ixtanajun ju aliʼin ni va lokʼonchokolh ju Xivan laʼixʼaninti. 8 Chai ju aliʼ ixtanajun ni va minchokolh ju makʼaniya ixlapanac Dios ju Elías ixjuncan. Chai ju aliʼin ixtanajun ni va lokʼonchokolh apumatam makʼaniya lapanac ju ixnajun ixchivinti Dios. 9 Para ju Herodes naulh: ―Quitʼin quiʼakstu iclhinaulh ixʼacchʼucʼuca ju Xivan. Pus ju ani tis chavaich nuʼ ju lhichivinincan na lhu taxtokni. Chai ju Herodes na ixlaktsʼimputun ju Jesús. 10 Pus acsni tataspʼitchokocha ju ixʼalacmalakachata ju Jesús ni cataʼalh pumatʼiyun pumatʼiyun amalaninin ju lapanacni pus talakminchokolh ju Jesús chai tajunkʼo tachi chun ju taxtokni ju tanavichalhch. Chai ju Jesús akʼailhiʼalh alacatam junta aseknicʼa ixjunita. Junta vanin ixjunita ju lakʼachakʼan Betsaida. 11 Para acsni tacʼatsa ju lapanacni pus lana taʼachʼakʼokʼanalh. Chai ju Jesús lhikʼach amaklhtayanalh. Chai tsuculh alacjuniniʼ ni lhinomputun ju Dios laʼisʼatsucuntiʼan. Vachuʼ acʼuchʼu ju takʼankʼanin. 12 Chai acsni ixtokʼoxaputun pus ju ixpumacautʼuiʼan talakʼalh ju Jesús chai tajuni: ―Amalakʼachʼatʼi ju lapanacni. Chach taʼancha lakʼachakʼanixni junta vanin tasui chai chux ju lacchakaʼ ju lacacuxtu tasui. Chach taʼancha sqʼuininin ju chakaʼ junta laich catalakacujlh chai junta laich catavailh. Pus junta vilau ni matiʼ tuʼuʼ. 13 Para ju Jesús alacjuni: ―Amavatʼitch ju uxijnan. Chai ju yuʼunch tajuni: ―Para va akxquisich vati ju xaclhitajuyau chai lakatʼui lactʼicstʼi pamata. U ni jantu pus ca acʼanauch tamonin ju vaiti ixlacata chux ju ani lapanacni. 14 Pus ixchaʼanta tachi lakaquis milh jokʼatni. Pus ju acsnich ju Jesús alacjunilh ju ixʼamamakaʼui: ―Chach tatolhcha chai alhcʼaʼulachich cincuenta ju quilhmaktamin. 15 Pus chunch ju tanavi. Chai tatolhcha ixchuxʼan. 16 Pus ju acsnich ju Jesús chʼapalh ju akxquis vati chai ju lakatʼui pamata chai talakstʼalh ju lactʼiyan. Xtaklh lhakʼailaktsʼin chai chʼekʼelh chai axtaknilh ju ixʼamamakaʼui ni cataxtaknilh ju ixtalhavat lapanacni. 17 Pus taʼokʼo ixchuxʼan chai talhilalh. Chai tasacchokolh ju tamaxajnicha chai talaktsama lakacautʼui tankʼalin. 18 Lakatam avilhchan acsni va isʼakstu ixvi ju Jesús pus tsuculh tʼachiviniʼ ju Dios. Va yuʼunch ju ixʼamamakaʼunti ju ixʼalactʼavi. Chai acsni tʼachivinkʼo pus alacsacmilh ju ixʼamamakaʼui. Ajunich: ―Tas tanajun ju lapanacni. Tis chavaich quintalhiulai ju quitʼin. 19 Chai ju yuʼunch takʼalhtayanalh. Tajuni: ―Ju aliʼin tanajun ni ma Xivanʼat ju amakpaxanaʼ. Chai ju aliʼin tanajun ni ma Elíasʼat. Chai ju aliʼin tanajun ni ma uxintʼich pumatam makʼaniya lapanac ju ixnajun ixchivinti Dios. Ma va lokʼonchʼokʼoch. 20 Chai ju Jesús ajuni: ―Chai ju uxijnan tis chavaich quilalhiulayau ju quitʼin. Chai ju Pitaluʼ junich: ―Uxintʼich ju Cristoʼat ju ixnoncan camalakachatachilh ju Dios. 21 Pus ju Jesús slivasalh alhimapʼaksi ju ixʼamamakaʼui ni jantu xamatiʼ catajunilh ni Cristo junita. 22 Chai ajuni: ―Aktsʼiya tasqʼuini ni aclhimakʼalhkʼajnalh na lhu taxtokni ju quitʼin ju quimalakachatachilh ju Dios ni lapanac actsucuyaʼ ju ani. Chai jantu tuʼuʼ aquintalhiulayaʼ ju xapapanin ju quintʼaʼisraelitaninʼan chai ju xalackʼajin palijni chai ju yuʼunch ju na talhatalanininta ju milhamapʼaksinʼan. Chai aquintamakniyaʼ. Para aclokʼonchokoyaʼ ju ixlhilakatʼutu avilhchan. 23 Chai astan ju Jesús ajuni ixchuxʼan ju anch ixtavilanalh: ―Ni xamatiʼ quilapanac jumputun pus jantu lai catinavi ixkʼachat isʼakstu. Chai chux tuncujun cachʼixlh ju makʼalhkʼajnat ju caʼalinaʼ va ixlacaʼatalh ni quilhilacaʼanta ju quitʼin. Chai va tachi aquinchʼakʼokʼalh. 24 Pus va tichi chavaich ju najun ni jantu quinchʼakʼokʼaputun va ixlacaʼatalh ni va lai maknicalh pus ju yuchi camakʼatsʼankʼayaʼ ju saʼatsucunti ju lactʼiyan. Para va tichi chavaich ju camakʼatsʼankʼayaʼ ju isʼatsucunti va ixlacaʼatalh ni quinchʼakʼokʼai ju quitʼin pus caʼalinaʼ ju isʼatsucunti ju lactʼiyan. 25 Pus jantu tuʼuʼ lhajai tam lapanac mas calhajakʼo chux ju xataxtokni ju ani lacamunutpaʼ ni va calhimakʼatsʼankʼa ju isʼatsucunti chai jantu lai catiʼalh ju lactʼiyan. 26 Pus va tichi chavaich ju aquintʼamaxananaʼ ju quitʼin chai catʼamaxananaʼ ju quinchivinti pus vachuʼ ju quitʼin actʼamaxananaʼ ju yuchi. Quitʼin ju quimalakachatachilh ju Dios ni lapanac actsucuyaʼ ju ani. Actʼamaxananaʼ ju yuchi acsni acminchokoyaʼ chai kʼai ucxtin acjunaʼ. Acminaʼ laʼixtachaput ju quimpai chai laʼixtachaputʼan ju anquilhnin ju tavilanancha lactʼiyan. 27 Chai iclajunau ju stavasalanti. Alin ju lamilhiʼuxijnan ju vilatʼit ju ani ju jantu cataniyaʼ tus acsni catalaktsʼinaʼ ta yu tasui acsni vi ju Dios laʼixpuʼucxtin. 28 Pus tachi ixlhilakatsajin avilhchan ixtapasata acsni ixʼajunita ju lapanacni ju ani chivinti. Pus ju acsnich ju Jesús alactʼasanilh ju Pitaluʼ chai ju Xivan chai ju Jacobo. Chai alactʼaʼalhʼ ju lakatam kʼai talhpa. Alh tʼachiviniʼ ju Dios. 29 Chai acsni ixtʼajun tʼachiviniʼ ju Dios pus lana tapaxalh ju ixʼucxpuʼ ju Jesús. Chai ju ixpumpuʼ lana na xlapʼapʼa ixmaktajita chai na xnapapa ixjunita. 30 Chai vachuʼ tatalacasucha ixpumatʼuiʼan lapanacni ju ixtatʼachivinin ju Jesús. Yuʼunch ju Moisés chai ju Elías ju makʼanch ixtatʼajun. 31 Chai ju yuʼunch vachuʼ tatalacasulh laʼixʼamatuncunit ju Dios. Chai ixtalhichivinin ju ixʼaninti ju Jesús ju catapasayaʼ ju lakʼachakʼan Jerusalén. 32 Para ju Pitaluʼ chai ju ixʼalactʼavi slivasalh na ixtalaclhtatai. Chai acsni xcaya tacujlh pus talaktsʼilh ni xlapʼapʼa ixmaktajita ju anch. Vachuʼ talaktsʼilh ju ixtʼiyunʼan lapanacni ju ixʼalactʼaya ju Jesús. 33 Chai acsni tatsʼankʼa laʼixʼalacʼavantiʼan ju anuʼ ixtʼiyunʼan pus ju Pitaluʼ junich ju Jesús: ―Amamakaʼunuʼ na kʼoxich iclhiulayau ni anich icvilau. Acnaviyauch akʼatʼutu pacʼatsʼa. Akʼatamch ju miʼanuʼ. Chai akʼatamch ju ixʼanuʼ ju Moisés. Chai ju akʼatamch ixʼanuʼ ju Elías. Chunch ju naulh ju Pitaluʼ para jantu iscʼatsai tuchi ixnajunch. 34 Pus acsni ixtʼajun nonaʼ ju ani pus milh lakatam ataputsʼi chai aʼakxtakmakʼo. Chai ju yuʼunch lana na tatalhanalh acsni tatanulh ju lacaʼataputsʼi. 35 Chai takʼasmatlh lakatam chivinti ju xaminacha lacaʼataputsʼi chai ixnajun: ―Ju ani yuchi ju quintsʼalh chai na icmapaini. Yuchach ju akʼasmatnitʼit. 36 Chai acsni chivinkʼo pus ju ixtamamakaʼun ju Jesús talaktsʼilh ni va isʼakstu ixya ju Jesús. Para astan jantu xamatiʼ tuʼuʼ tajuni tuchi ju ixtalaktsʼinta. 37 Acsni tuncunchokopa pus ju Jesús chai ixpumatʼutuʼan ixtamamakaʼui taminchokocha ju anuʼ lactalhpa. Chai na lhu lapanacni ju taquiʼapakxtoknulh. 38 Chai pumatam lapanac ju ixmakminta lana xakʼala ju Jesús. Chai na pʼas ju chivinilh acsni chani juni: ―Amamakaʼunuʼ ictapaininiyan ni aʼaktʼaiʼutʼich ju quintsʼalh ni va lakatamch. 39 Pus va tanui ju lhacaticuru laʼixlacatuna chai lana va tam pantsʼiquis tsʼau tʼasai. Chai tin lhinek chai na akpupui. Chai acsni xcaya macajunch pus na talacacʼatsanita ju yuchi. 40 Chai ictapaininilh ju mintamamakaʼun ni cataxcoxtulh ju lhacaticuru para jantu lai ixtaxcoxtui. 41 Pus ju acsnich ju Jesús ajunich: ―Tis va yuchach ji lapanacni ni lana jantu lai lacʼaʼiyatʼit. Ja tasqʼuini ni lana na makʼan aclatʼatolau chai aclachʼixniu tus acsni alacʼaʼiyaʼitʼit. Alhitʼach ju mintsʼalh. 42 Para acsni ixminta ju anuʼ askʼatʼa pus ju lhacaticuru lana tin lhinekchokolh chai lhtucu lhtucu ucxuntama. Para ju Jesús kʼailh ju lhacaticuru chai junilh ni cataxtulh laʼixlacatuna ju anuʼ askʼatʼa. Chai lana palaich va ju anuʼ tsʼalh. Chai makʼaxtaknichokolh ju ixpai. 43 Chai chux ju lapanacni na ixtalhamakʼanininch ixtachaput ju Dios. Chai acsni ixtalhamakʼaninin ixchuxʼan tachi chun ju taxtokni ju ixnavich ju Jesús pus ju yuchi ajunilh ju ixʼamamakaʼui: 44 ―Anavitʼit cuenta ju ani ju iclajunau chai jantu tavanan acʼapʼaʼitʼit. Ju quitʼin acmakʼaxtakcanaʼ laʼixmacaʼan ju lapanacni. Quitʼin ju quimalakachatachilh ju Dios ni lapanac actsucuyaʼ ju ani. ―Chunch ju ajunilh ju Jesús. 45 Para ju ixʼamamakaʼui jantu lai ixtamachakxai tuchi ixnomputun junima chivinti chai jantu ixʼalakʼaʼinican ni laich catamachakxa ju acsnich. Chai ju yuʼunch ni va ixtatalhoni ju Jesús pus jantu istasacmiputun tuchi ixnomputun. 46 Pus ju ixʼamamakaʼui ju Jesús tatsuculh lhilakʼainin tichi chavaich ju palai xakʼai ixjunita. 47 Para ju Jesús acsni cʼatsalh tuchi ixtapastʼacʼa laʼixʼalhunutʼan pus xakʼatailh pumatam askʼatʼa chai yaulh vanin junta ixvi ju yuchi. 48 Chai ajuni ju ixʼamamakaʼui: ―Va tichi chavaich ju caʼamaklhtayananaʼ tam askʼatʼa tachi ju ani ya va ixlacata ni quilhilacaʼanta ju quitʼin pus tachi ju va jun quitʼin ju quiʼamaklhtayanan. Chai va tichi chavaich ju quiʼamaklhtayanan ju quitʼin pus vachuʼ amaklhtayanan ju quimpai ju quimacaminta. Pus va tichi chavaich ju lamilhiʼuxijnan ju jantu tuʼuʼ calhitakʼaya yuchach ju palai xakʼai. 49 Pus ju acsnich ju Xivan junilh ju Jesús: ―Amamakaʼunuʼ iclaktsʼiu pumatam ju ixcoxtui ju lhacaticuru laʼixlacatunaʼan ju lapanacni lamintapakaʼut. Chai ickʼajiuch ni jantu chʼakʼokʼayan tachi ju quijnan. 50 Para ju Jesús ajunilhch: ―Jantu akʼaʼitʼit. Pus ju jantu quintʼalaxcaiʼan quilakʼauchʼan. 51 Chai acsni ixchimputun ju avilhchan acsni caʼamaklhtayananchokocanaʼ ju Jesús ju lactʼiyan pus ju yuchi naulh ni jantu tuʼuʼ catisastuclh ni caʼanaʼ ju Jerusalén. 52 Pus acsni tucaʼ ixchaʼan pus ju Jesús amalakacha ju ixlapanacni ni cataʼalh ju alakatam lakʼachakʼan puxconin ju vaiti chai ju chakaʼ junta lai cataʼastacnalh. Pus ju yuʼunch taʼalh chai tatanuchalh laʼixlakʼachakʼanʼan ju samaritanonin. 53 Para ju amachakʼan anch jantu taʼamaklhtayanamputulh ju Jesús ni ixtacʼatsai ni ixʼamputun ju lakʼachakʼan Jerusalén chai ju yuʼunch lana jantu ixtalaktsʼimputun ju amachakʼan Jerusalén. 54 Pus ixtʼiyunʼan ju ixʼamamakaʼui ju Jesús yuʼunch ju Jacobo chai ju Xivan acsni talaktsʼilh ju ani pus tajunilh ju Jesús: ―Quiʼucxtin ja lacʼasqʼuin ni acsqʼuinvich ju jipi ju camilh lactʼiyan tachi ju navilh ju makʼaniya milapanac ju Elías ixjuncan. Chach lacxavakʼo ju ani amachakʼan. 55 Para ju Jesús talakaspʼitlh chai akʼailh. Ajunich: ―Ju uxijnan lana jantu machʼakxayatʼit ta yu junita ju ixlhamapʼaksin ju Spiritu Santu ju tʼajun lamiʼalhunutʼan. 56 Pus ju quitʼin jantiyuʼ ju iclhiminta ni va acmilh makʼatsʼankʼanaʼ ju isʼatsucuntiʼan ju lapanacni. Va icminta amakʼalhtaxtunuʼ. Pus ju acsnich taʼalh alakatam lakʼachakʼan. 57 Chai acsni ixtaʼanta ju lacati pus pumatam lapanac junilh ju Jesús: ―Quiʼucxtin acchʼakʼokʼayan vanta anchach ju apʼinaʼ. 58 Para ju Jesús junich: ―Ju zorra alin junta tanui. Chai ju tsʼokʼo alin junta tatocʼai. Para ju quitʼin matiʼ ju quinchakaʼ junta lai acʼastacnalh. Quitʼin ju quimalakachatachilh ju Dios ni lapanac actsucuyaʼ ju ani. 59 Chai ju Jesús junilh apumatam: ―Aqʼuinchʼakʼokʼach. Para ju yuchi juni: ―Quiʼucxtin yauch aqʼuiʼun ni actʼatʼolacaʼ ju quimpai. Ni caniyaʼ ju yuchi pus acmacnuyaʼ chai acsnich ju acchʼakʼokʼayan. 60 Para ju Jesús junich: ―Chach tamacnu ju mimpai ju yuʼunch ju taʼamacnunun ju tanita. Para ju uxintʼi aʼinchich ajuniniʼ ju lapanacni ni Dios lhinomputun laʼisʼatsucuntiʼan. 61 Pus ju acsnich apumatam xakʼalachokopa ju Jesús. Juni: ―Acchʼakʼokʼayan para chach ictiquiʼamacʼami ju tavilanancha laquinchakaʼ. 62 Para ju Jesús junich: ―Tachi chun ju lapanacni ju catachʼapayaʼ ju ixtiqʼuiu ju pucuxtu para jantu vasalh catanaviyaʼ cuenta para catalacaʼanchokoyaʼ laʼixlhipulacanʼan pus jantu sok catalhoknunaʼ. Pus vana va chun ju lakatʼui junita ju ixʼatalacpastʼacʼat. Ju yuchi jantu lai kʼox caʼamalaniyaʼ ju lapanacni ixlacata ju Dios ni jantu va yuchi ju navi cuenta.
1 Astan ju Jesús asacxtulh setenta ixʼamamakaʼui chai amalakachalh pumatʼiyun pumatʼiyun. Chai ju yuʼunch taʼalh tachi chun ju lakʼachakʼanixni junta caʼanach isʼakstu ju Jesús astan. 2 Chai ajunich ju ixʼamamakaʼui: ―Acsni na cʼatʼata ju tuʼuʼ xatocʼat slivasalh na lhu chʼalhcatnin ju maktasqʼuinican ni laich soko camakʼaixtokcalh. Pus vana va chun ju lapanacni. Slivasalh na lhu ju aquintalhilaksi ni xamatiʼ caʼajunilh. Para jantu lhu alin ju taʼamputun ajuninin. Pus yuchi alhitʼapʼaininitʼit ju Dios ju lhinajun laʼixlhichʼalhcat ni camacaʼalh aliʼ ju ixlapanacni laʼixlhichʼalhcat. 3 Pus aʼinchitʼit. Iclamalakachayau tachi ju va borregojni junta na alin ju maktilin. 4 Jantu alhiʼitʼit ju mintuminʼan nin mimpastiʼan nin alakatam ju minchʼanxtakʼanʼan. Chai jantu xamatiʼ panicni atʼachʼivinintʼit acsni amacʼamiyaʼitʼit ju lacati. 5 Chai va tuchi chakaʼ junta astʼacnanaʼitʼit pus acsni atʼanuyaʼitʼit pʼulhnan ma chani anaʼuntʼit: “Lhikʼach atsʼucʼuyaʼitʼit ju uxijnan ju tʼanuyatʼit ju ani lacachakaʼ”. 6 Chai ni tʼajun ju anch pumatam ju caʼamaklhtayanamputulh ju kʼox atsucunti ju xtʼakʼa ju Dios pus vasalh chunch cajunaʼ tachi ju xasqʼuin ixlacata. Para ni matiʼ xamatiʼ ju chunch ju anch lacachakaʼ pus jantu tuʼuʼ ixtapalhni cajunaʼ ju minchivintiʼan. 7 Chai va lakatam chakaʼ ju atʼolaʼitʼit. Chai aʼuyaʼitʼit va tuchi cataxtakniyanch. Chunch ju alatʼit ni lhijunch ni caxtaknicalh ju ixtalhaja ju makchʼalhcatnaʼ. Jantu lakatam lakatam chakaʼ atʼanuyaʼitʼit. 8 Chai va tuchi lakʼachakʼan junta apʼinaʼitʼit chai ni cataʼamaklhtayananan pus aʼuyaʼitʼit va tuchi ju cataxtakniyan. 9 Acʼuchʼutʼit ju takʼankʼanin ju anch tatʼajun. Chai aʼunaʼitʼit ni chavaich laich calhinaulh ju Dios laʼisʼatsucuntiʼan ni va catalacasqʼuilh ju yuʼunch. 10 Para vanta lhiʼanchach lakʼachakʼan junta atʼanuyaʼitʼit chai ni jantu cataʼamaklhtayananan pus atʼayatʼit ju lacati chai chanich anaʼuntʼit: 11 “Mas yuchi ju xapokxni ju milakʼachakʼanʼan ju quintachʼanjucan laquinchʼajaʼ quincʼan icchʼancʼalhapʼuxcanau ni jantu xaquilaʼamaklhtayananau. Chai ju chunch apʼucʼatsʼayaʼitʼit ni talakʼalhin ju xanaviyatʼit. Chai mas jantu xaquilaʼamaklhtayananau para acʼatsʼatʼit ni chavai avilhchan laich ixlhinaulh ju Dios lamiʼatsucuntiʼan ni va ixlacʼasqʼuintʼit cava”. Chunch ju aʼunaʼitʼit ju amachakʼan anch. 12 Pus iclajunau ni palai na caʼalinaʼ ju ixmakʼalhkʼajnatʼan ju amachakʼan ju anuʼ lakʼachakʼan ju anuʼ avilhchan acsni camakʼosaspitcanach ju lapanacni. Palai jantu ju amachakʼan Sodoma mas na alactuʼunin ixtajunita ju yuʼunch. Ju Jesús tailhiʼalh ju ixchivinti chai chani ju ajuni ju lapanacni: 13 ―Painiʼitnich ju uxijnan ji amachakʼan Corazín. Painiʼitnich ju uxijnan ji amachakʼan Betsaida. Pus ni caʼixnavicancha ju lakʼachakʼan Tiro chai ju lakʼachakʼan Sidón ju lhamakʼan ju ixnavinicʼantʼatʼit pus makʼanch ixtamacaulh ixʼalactuʼuntiʼan chai ixtalakchʼilh ju smalaka ixpumpuʼan chai ixtatavi lacalhcʼacʼa ni cacʼatsacalh ni vasalh ixtamacomputun ixʼalactuʼuntiʼan. 14 Pus ixlhiyuchach acsni camucʼanicanaʼ ju ixtalakʼalhinʼan ju lapanacni pus ju amachakʼan Tiro chai ju amachakʼan Sidón palai jantu lhu caʼalinaʼ ju ixmakʼalhkʼajnatʼan. Palai lhu ju amamakʼalhkʼajnicʼanaʼitʼit ju uxijnan. 15 Chai ju uxijnan ji quintʼaʼamachakʼan ju lakʼachakʼan Capernaum na va tʼakʼayayatʼit. Para amamaxanicʼanaʼitʼit. 16 Chai tailhiʼalh ju chivinti ju ixtʼajun ajuniniʼ ju ixʼamamakaʼunti. Ajuni: ―Ju catakʼasmatniyan ju uxijnan pus tachi ju va jun quitʼin ju quintakʼasmatni. Chai ju jantu tuʼuʼ catalhiulayan ju uxijnan pus tachi ju va jun quitʼin ju jantu tuʼuʼ quintalhiulai. Chai ju jantu tuʼuʼ quilhiulai pus va nomputun ni jantu tuʼuʼ talhiulai ju quimpai ju quimacaminta. 17 Acsni tataspʼitcha ju isetentaʼan ixʼamamakaʼui ju Jesús pus na ixtakʼachan. Tajunilh ju Jesús: ―Quiʼucxtin mas yuʼunch ju lhacaticurulhni xaquintaquiclacaʼiyan acsni xackʼayau lamintapakaʼut. 18 Chai ju Jesús ajuni: ―Chunchach ni iclaktsʼilh ju Satanás ni xacaxtucalh ju lactʼiyan chai vatsʼalhti patajulh tus lacatʼun tachi ju tuʼuʼ makʼalipniʼ. 19 Chai iclaxtaknitau ju tachaput ni laich apʼutʼayayaʼitʼit ju lu chai ju statsucu chai laich atʼalalhaʼayaʼitʼit tachi chun ju ixtachaput ju lhacaticuru chai jantu tuʼuʼ catanaviniyan macxcai. 20 Para jantiyuʼ ju alhikʼachʼantʼit ni laich taquiclacaʼiyan ju lhacaticuru. Alai yuchi ju alhikʼachʼantʼit ni tsʼokʼulacantacha lactʼiyan ju mintapakaʼutʼan. 21 Pus ju acsni pantsʼiquis ju Spiritu Santu xtaknilh ju Jesús lhu ju ixkʼachat. Chai ju Jesús chani junilh ju ixpai: ―Ju uxintʼi ji quimpai xaʼucxtinʼat ju lactʼiyan chai ju lacatʼun. Chai icjunan lakʼailaktsʼiuch ni jantu amavasalanitʼa ju ani taxtokni ju na talhilaksi ixtacʼatsanʼan chai ixʼatalanintiʼan isʼakstuʼan. Alai amavasalanitʼa ju yuʼunch ju talhilaksiyan tachi ju lai tam askʼatʼa ju lhilaksi ixʼamamakaʼunuʼ ni yuchi ju camalaniyaʼ tuʼuʼ. Pus chunchach ji quimpai. Chunchach ju kʼox xalhiulai ju uxintʼi. Chai ju acsnich ju Jesús chani ajuni ju lapanacni: 22 ―Ju quimpai quixtaknikʼota tachi chun ju taxtokni. Chai jantu xamatiʼ vasalh quimispai. Va yuchi ju quimpai. Chai jantu xamatiʼ vasalh mispai ju quimpai. Va quitʼin ju istsʼalh icjunita chai tachi chun ju iclacasqʼuin ni catamispa. 23 Chai ju acsnich ju Jesús lacaʼanchokopa junta ixtavilanancha ju ixʼamamakaʼunti chai va yuʼunchach ju axakʼala. Ajuni: ―Slivasalh na lhikʼach ju miʼatsucuntiʼan ju uxijnan ni laktsʼinatʼit tachi chun ju ani taxtokni ju tʼajun tapasanaʼ. 24 Pus iclapujunau chunch ni na lhu ju lapanacni ju ixtanajun ixchivinti Dios chai ju ucxtinin ju makʼanchich ixtatʼajun na ixtalaktsʼimputun ju tuchʼi laktsʼinatʼit ju uxijnan. Para jantu talaktsʼilh. Chai na ixtakʼasmatputun tuchʼi kʼasmatʼatʼit. Para jantu tavanan takʼasmatlh. 25 Chai pumatam ju na ixlhatalanininta ju ixlhamapʼaksinʼan ju istʼaʼisraelitanin taya. Va ixlaktsʼintanuputun ju Jesús. Chai chani ju junilh: ―Amamakaʼunuʼ tijuch ju acnavilh ni laich caʼalilh ju quiʼatsucunti ju cajonkʼalhi. 26 Chai ju Jesús juni: ―Pus tas tsʼokcanta ju lamilhamapʼaksin. Tas lhimachʼakxaich. 27 Chai ju yuchi akʼalhtayanalh. Junich: ―Pus ju lhamapʼaksin najun ni ma acmapaini ju quiʼucxtin Dios ixlhichux quiʼalhunut chai ixlhichux ju quintacʼatsan chai ixlhichux ju quintachaput chai ixlhichux ju quiʼatalacpastʼacʼat. Chai vachuʼ najun ni ma acmapaini ju quintʼalapanac tachi ju va jun quiʼakstu. 28 Pus ju acsnich ju Jesús junich: ―Kʼoxich ju xaqʼuilhikʼalhtʼaich. Anavitʼi ju chunch chai caʼalinaʼ ju miʼatsucunti ju conkʼalhiyaʼ. 29 Para ju yuchi ni jantu ixlacasqʼuin ni camucʼanicalh ixtalakʼalhin pus junilh ju Jesús: ―Para tis quintʼalapanac ju acmapainiyaʼ. 30 Pus ju acsnich ju Jesús chani juni: ―Pumatam israelita ixtaxtutacha ju lakʼachakʼan Jerusalén. Ixʼamputun ju lakʼachakʼan Jericó. Para tachʼapayaulh ju akʼalhonin. Chai ju yuʼunch talhiʼanilh ju ixpumpuʼ chai talakanekma. Chai paitat xanin tamacoma. Chai taʼalh. 31 Chai chanich ju tapasalh. Pus pumatam quimpaliʼan ju israelitanin juntau ixʼanta ju anuʼ lacati. Chai acsni laktsʼilh ju anuʼ probe lapanac pus na makat puʼinilh. 32 Chai vachuʼ pumatam lapanac ju ixchʼalhcatnan lacpujitat ixʼanta ju anuʼ lacati. Chai acsni ixchaʼamputun vanin junta ixma ju anuʼ lapanac pus laktsʼilh para vachuʼ na makat ju puʼinilh. 33 Para pumatam amachakaʼ ju xaʼestado Samaria vachuʼ ixʼanta ju lacati. Chai vanin milh junta ixma ju anuʼ lapanac. Chai acsni laktsʼilh pus na mapaini. 34 Chai lakʼalh. Chai tsuculh lacchʼininiʼ junta ixlacacʼatsani. Mucʼanilh ju aceite chai ju vino. Chai chʼixmucʼalh laʼixpuru. Chai lhiʼalh junta machʼixtakcan chakaʼ. Chai lhistaclh ju yuchi. 35 Chai acsni tuncunchokopa chai ixʼanchokoputun ju lacati ju anuʼ amachakaʼ Samaria pus maxtulh lakatʼui denarius tumin. Chai xtaknilh ju amachakaʼ chai junilh: “Alhistʼactʼi ju anuʼ lapanac. Chai ni tuʼuʼ aliʼ ju amacʼapʼinaʼ ju mintumin pus acmapalhniyanch acsni actaspʼitchokoyanta”. 36 Pus tʼas naʼunch. Tis chavaich ju ixpumatʼutuʼan ju talacasulh ni vasalh mapainilh ju anuʼ tachʼapayaulh ju akʼalhonin. 37 Chai ju anuʼ ju na ixlhatalanininta ju ixlhamapʼaksinʼan ju istʼaʼisraelitanin naulh: ―Pus yuchi ju navilh lamapainin. Pus ju acsnich ju Jesús junilh: ―Aʼinchich chai chunchach vachuʼ ju anavitʼi. 38 Pus ju Jesús alhtanampa ju lacati chai tanuchalh lakatam lakʼachakʼan. Chai pumatam chakoʼulh ju Marta ixjuncan amaklhtayanalh laʼixchakaʼ. 39 Chai ixʼalin pumatam ispʼisekʼe ju Marta ju Malia ixjuncan. Pus ju yuchi tavi vanin laʼixchʼajaʼ ju Jesús ni va ixkʼasmatniputun ju ixchivinti. 40 Para ju Marta na ixlhamakʼaninin ju ixlhichʼalhcat ni ixtʼajun lakʼoxiniʼ ju vaiti. Pus lakʼalh ju Jesús chai juni: ―Amamakaʼunuʼ ja va jantu qʼuilaktsʼin ni va quiʼakstu quimacaunuta ju quimpʼisekʼe ju lacalhichʼalhcat. Aʼunch ni chach quimilh aktaijunuʼ. 41 Para ju Jesús juni: ―Marta slivasalh na lhu alin ju miʼatalacpastʼacʼat ju navipʼutʼun. 42 Para va lakatam taxtokni ju maktasqʼuinican. Chai ju Malia sacxtuta ju taxtokni ju palai kʼox chai jantu lai xamatiʼ catitaiʼinilh.
1 Pus ju aktam ju Jesús ixtʼajun tʼachiviniʼ ju Dios. Chai acsni tʼachivinkʼo pus pumatam ju ixtamamakaʼun junich: ―Quiʼucxtin aquilamasuniuch ju ixtʼachivininca ju Dios tachi ju lalh ju Xivan ni amasunilh ju ixʼamamakaʼui: 2 Chai ju Jesús ajuni: ―Pus acsni atʼachʼivinaʼitʼit ju Dios chanich anonaʼitʼit: Quimpai ju vilhchiʼ lactʼiyan Chach tacʼatsa ju lapanacni ni na salakaʼat. Chach chilh ju avilhchan acsni alhinonaʼ ju uxintʼi. Chach navicalh ju minkʼachat ju ani lacatʼun tachi ju navicantacha ju lactʼiyan. 3 Tuncujun tuncujun aquilaxtakniu ju quivaiti quincʼan. 4 Aquilamacʼacxaniuch ju quiʼalactuʼunti quincʼan. Pus vachuʼ ju quijnan icʼamacʼacxaniyau ju quintanavitan tuʼuʼ macxcai. Jantu aquilalhiʼau junta acmapastʼacʼanicau ju tuʼuʼ macxcai. Alai aquilamakʼosuniu ju macxcai. 5 Pus ju Jesús tailhiʼalh ixchivinti chai ajuni: ―Jantu xcai ni chani ju catapasalh laʼisʼatsucunti ju pumatam ju milhiʼuxijnan. Jantu xcai ni caʼalilh ju miʼamigo ju alakpʼitʼi ju paitat tsʼis chai aʼunaʼ: “Quiʼamigo qʼuimachʼixtʼaknin akxtʼutu ju miniʼ. 6 Pus chilh pumatam quiʼamigo ju makat xaminacha para matich tuʼuʼ ju lai acxtaknilh”. 7 Chai jantu xcai ni tus pulacni caʼakʼalhtayanancha ju anuʼ amachakaʼ chai chani cajunin: “Jantu jeks aqʼuimavatʼi. Pus icmalacchajuta ju quimalhtich chai icʼalactʼalhtataich ju quiʼaskʼatʼan. Jantu lai actikʼostavi ni laich tuʼuʼ acxtaknin”. 8 Pus mas jantu cakʼostolaʼ chai caxtakniyaʼ tuʼuʼ va ixlacaʼatalh ni ixʼamigo junita para iclajunau ni aktsʼiya cakʼostolaʼ chai caxtakniyach tachi tantsʼun ju maktasqʼuini va ixlacaʼatalh ni jantu lai maxanan ju anuʼ ju tʼajun jeks mavanaʼ. 9 Chai ju quitʼin iclajunau: Asqʼuinitʼit ju Dios chai ju yuchi cataxtakniyan. Apʼuxcʼaʼutʼit laʼixmacni Dios ju tuchʼi maktʼasqʼuiniyatʼit chai alhitʼaʼuyaʼitʼit. Va tsa tsa asqʼuinitʼit ju Dios tachi acsni va tsa tsa sacan lacatuʼuʼ malhtich. Chai ju Dios cataxtakniyan. 10 Chunch ju alatʼit ni amaklhtayanan ju lapanac ju sqʼuin. Chai ju puxcajui tuʼuʼ lhitajui. Chai ju sai ju malhtich malhtekʼanican. 11 Jantu xamatiʼ ju milhiʼuxijnan ju laich caxtaknilh tam isʼaskʼatʼa lakatam chiux acsni casqʼuinilh ju xkapavati. U ni casqʼuinilh ju pamata jantu xamatiʼ milhiʼuxijnan ju laich caxtaknilh lakatam lu. 12 U ni casqʼuinilh tuʼuʼ akʼaxvati jantu xamatiʼ milhiʼuxijnan ju laich caxtaknilh lakatam statsucu. 13 Pus ju uxijnan mas na kʼai untʼatʼit lai xtʼakniyatʼit ju kʼox ju miʼaskʼatʼanʼan. Pus ja va a ti yuchach ju quimpaiʼan Dios ju vilhcha lactʼiyan jantu catiʼaxtaknilh ju Spiritu Santu ju yuʼunch ju catasqʼuiniyach. 14 Pus ju Jesús xcoxtulh ju lhacaticuru laʼixlacatuna pumatam lapanac. Pus ju anuʼ lapanac jantu lai ixchivinin acsni ixtanun ju lhacaticuru laʼixlacatuna. Para acsni taxtulh ju anuʼ lhacaticuru pus ju anuʼ ju va nunuʼ ixjunita chivinilh. Pus na talhamakʼaninilh ju ixtalhavat lapanacni. 15 Para ju aliʼin ju sia lhiyuʼunch tanaulh: ―Ju ani ya lapanac va xcoxtui ju lhacaticuru laʼixlacatunaʼan ju lapanacni laʼixtachaput ju Satanás. 16 Chai ju aliʼin ni va ixtalaktsʼintanuputun ju Jesús pus tasqʼuinilh ni canavi tuʼuʼ lhamakʼan ju camincha lactʼiyan ta yu laich catapucʼatsayaʼ ni vasalh Cristo junita. 17 Para ju Jesús ni amispanilh ixʼatalacpastʼacʼatʼan ju yuʼunch pus ajunich: ―Tachi chun ju kʼai lacatʼun junta lhinajun ju tam kʼai ucxtin ni quilhmaclhu cajuncalh chai catalaclasayaʼ ju sia isʼakstuʼan pus va caʼaclayaʼ. Chai ju tatanumanalh lacachakaʼ ni catalaclakʼailh ju sia isʼakstuʼan pus catatalhvakaʼ. 18 Pus vana va chun ju lhacaticuru. Ni catʼalasachokolh ju ixtʼalhacaticuru pus tas laich calhilhinonkʼalhi laʼixpuʼucxtin. Pus iclajunau chunch ni va nonatʼit ni laʼixtachaput ju Satanás ju ictixcoxtui ju lhacaticurulhni. 19 Ju uxijnan nonatʼit ni ictixcoxtui ju lhacaticurulhni laʼixtachaput ju Satanás. Para ju miʼamamakaʼunin vachuʼ tamaktasqʼuini ni xamatiʼ caʼaxtaknilh ixtachaputʼan ni laich catatixcoxtuyaʼ ju lhacaticurulhni laʼixlacatunaʼan ju lapanacni. Pus yuʼunch ju catajunan ni jantiyuʼ ixtachaput ju Satanás ju pumaxtucan ju lhacaticuru laʼixlacatuna tam xamatiʼ tachi ju nonatʼit ju uxijnan. 20 Alai laʼixtachaput ju Dios ju ictixcoxtui ju lhacaticurulhni chai yuchi lana lhitasui ni yuchi ju Dios ju lhinajun lamilhiʼuxijnan ju chavai. 21 Ju tam jokʼat ju na tachapun chai ju alin ju ixpatʼalan chai lhistʼacʼa ju laʼismakspaʼ ju ixchakaʼ pus jantu tuʼuʼ lai tsʼankʼai ju ixtaxtokni. 22 Para acsni va camilh apumatam ju palai tachapun palai jantu ju yuchi pus catʼalalhajayaʼ. Cataiʼinikʼoyaʼ ju ixpatʼalan ju na jokʼat ixpunajun chai camakpitsikʼoyaʼ chux ju ixtaxtokni. Ju Jesús chunch ju ajuni ju lapanacni ni va ixʼamamachakxaniputun ni yuchi ju tʼalalhajalh ju lhacaticuru. Yuchi lai alhixcoxtui ju lhacaticurulhni laʼixlacatunaʼan ju lapanacni. Pus tailhiʼalh ixchivinti chai ajunilh ju lapanacni: 23 ―Pus ju jantu quintʼaʼanta yuchi ju quintʼalaxcai junita. Chai ju jantu quintʼamakʼaixtʼokʼa ju lapanacni ju aquintalhilacaʼanach pus va asastucnun. Ju Jesús tailhiʼalh ixchivinti chai ajuni ju lapanacni: 24 ―Ju lhacaticuru acsni taxtui laʼixlacatuna tam lapanac pus vaclhun ucxuntʼajun junta na axixnita. Va puxcolhitʼajun ta anchach ju lai catavi. Chai ni jantu lhitajui pus najun: “Acʼanchokoyaʼ alai laquinchakaʼ junta xactaxtuyacha”. 25 Chai acsni minchokoi pus lana tanuchokoi laʼixlacatuna ju anuʼ lapanac ni tachi lakatam chakaʼ junita ju pulacpʼalhcanta chai maxantilacanta. 26 Pus ju acsnich ju yuchi taxtuchokoi chai an iniʼ aliʼin chai akʼailhimin apumatujun lhacaticurulhni ju palai kʼai tajunita. Palai jantu na chun ixjunita ju yuchi ju pʼulhnan ixtanun. Pus ixchuxʼan tatanui laʼixlacatuna ju anuʼ lapanac chai tatsucui ju anch. Pus ju isʼatsucunti ju anuʼ lapanac palai takʼalhilh ju acsni. Palai jantu na chun ixjunita ju pʼulhnan. 27 Pus acsni ixtʼajun nonaʼ ju ani chivinti ju Jesús pus pumatam chakoʼulh ju ixmakya lacatalhavat lana chivincha. Junilh ju Jesús: ―Na lhikʼach ju isʼatsucunti ju xamaklokʼoyan chai ju xamatsʼiquiyan. 28 Para ju Jesús juni: ―Alai palai takʼachan ju takʼasmatʼa ju ixchivinti Dios chai tamuctaxtui. 29 Pus slivasalh na lhu ju tatakʼaixtoklh ju lapanacni junta ixvi ju Jesús. Chai ju yuchi tsuculh ajuniniʼ: ―Ju uxijnan ju chavai tʼonatʼit na kʼai untʼatʼit. Va lacʼasqʼuinatʼit ju tuʼuʼ lhamakʼan ju apʼucʼatsʼayaʼitʼit ni vasalh Cristo icjunita. Yuchi ju ixnoncan camalakachatachilh ju Dios. Para jantu tuʼuʼ atumpa ju amasunicʼanaʼitʼit. Va yuchi ni amapʼastʼacʼanicʼanaʼitʼit tuchi ju tapasalh laʼisʼatsucunti ju makʼaniya lapanac ju Jonás ixjuncan. Yuchi ju ixnajun ixchivinti Dios. 30 Pus alin tuchi tapasalh laʼisʼatsucunti chai ixlhiyuchi tacʼatsa ju amachakʼan Nínive ni vasalh Dios ju xamalakachai ju Jonás ju anch. Chai vana va chun ju quitʼin. Caʼalinaʼ ju tuchi catapasayaʼ laquiʼatsucunti chai ixlhiyuchi laich apʼucʼatsʼayaʼitʼit ju uxijnan ju chavai tʼonatʼit tichi chavaich ju quitʼin ju quimalakachatachilh ju Dios ni lapanac actsucuyaʼ ju ani. 31 Acsni camakʼosaspitcanaʼ ju lapanacni pus ju anuʼ makʼaniya chakoʼulh ju xaʼucxtin ixjunita ju ixlhisur ju lacamunutpaʼ catayayaʼ chai va ixlacata yuchi pus aʼulanicʼanaʼitʼit ju miʼalactuʼuntiʼan ju uxijnan ju chavai tʼonatʼit. Pus chunch ju aʼulhtʼunicʼanaʼitʼit ju uxijnan ni slivasalh na makat ju xaminacha ju yuchi ni ixkʼasmatniputun ju ixʼatalaninti ju Salomón. Chai ju ani icya ju palai xakʼai icjunita. Palai jantu ju Salomón. Para ju uxijnan jantu quilakʼasmatniputunau ju quinchivinti. 32 Chai ju amachakʼan ixtajunita ju Nínive catatayayaʼ acsni camakʼosaspitcanaʼ ju lapanacni. Chai ixlacata tuchi tanavilh ju yuʼunch pus amucʼanicʼanaʼitʼit ju mintalakʼalhinʼan ju uxijnan. Chai chunch ju aʼulhtʼunicʼanaʼitʼit va ixlacata ni tamacaulh ixʼalactuʼuntiʼan ju yuʼunch acsni takʼasmatnilh ixchivinti ju Jonás. Chai ani icya ju palai xakʼai icjunita. Palai jantu ju Jonás. Para ju uxijnan jantu macʼompʼutʼunatʼit ju miʼalactuʼuntiʼan mas kʼasmatʼatʼit ju quinchivinti. Ju Jesús tailhiʼalh ju ixchivinti chai chani ju ajuni ju lapanacni: 33 ―Jantu xamatiʼ caxava ju ixmaclhcu chai astan va camatankʼanu u caʼakxtakʼula lacacajon. Alai aktsʼiya ulai junta mucʼacan ju maclhcu. Ju chunch va tichi chavaich ju catanuyach laich cataʼalacʼavananaʼ. 34 Pus vana va chun ju milakchulhʼan. Pus ni na kʼox ju milakchulhʼan pus laich alacʼavananatʼit. Para ni jantu kʼox ju milakchulhʼan pus tachi ju va tʼonatʼit lacaʼatatsʼisni. Chai vana va chun ju miʼatalacpastʼacʼatʼan. Ni alacpʼastʼacnantʼit kʼox pus laich amachʼakxayaʼitʼit ixchivinti Dios. Para ni asamakʼanaʼitʼit ixchivinti Dios pus jantu kʼox ju miʼatalacpastʼacʼatʼan. Chai va ixtʼachunch jun ju miʼatsucuntiʼan tachi ju va tʼonatʼit lacaʼatatsʼisni. 35 Pus alaktsʼintʼit ta yu alacpʼastʼacnantʼit. Jantu xcai ni tachi ju va tsʼista cava lamiʼatsucuntiʼan ni va asamakʼanaʼitʼit ju ixchivinti Dios. 36 Pus ni alacʼaʼiyaʼitʼit chux ixchivinti Dios chai jantu tuʼuʼ asamakʼanatʼit pus na kʼoxich lai amachʼakxayaʼitʼit tachi acsni tamapulhcuniyan ju lamintiʼan ju tuʼuʼ maclhcu. 37 Pus acsni chivinkʼo ju Jesús pus pumatam fariseo kʼailhiʼalh ju Jesús laʼixchakaʼ ni caʼalh tʼavenaʼ. Pus ju Jesús tʼaʼalh. Tanulh laʼixchakaʼ chai tapakstitama lacamixa ni chunch ju ixtalai. 38 Para ju anuʼ fariseo na lhamakʼaninilh acsni laktsʼilh ju Jesús ni jantu pʼulhnan na paklhu xamakchakʼai tachi ju aktsʼiya ixtalhilanita ju israelitanin. 39 Para ju Jesús junich: ―Ju uxijnan ju fariseonin untʼatʼit slivasalh na kʼox chʼakʼayatʼit mas va ixmacan ju tuʼuʼ tasa chai ju tuʼuʼ cʼaʼulh tachi ju lhilanitʼatʼit. Para jantu navipʼalatʼit cuenta ixpulacni miʼalhunutʼan junta na alin ju akʼalhaʼunti chai ju amacxcai. 40 Va tontojni untʼatʼit. Ju Dios ni navilh ixmacan ju tuʼuʼ ja jantu yuchi ju vachuʼ navilh ju ixpulacni. 41 Pus alhiʼaktʼaiʼutʼit ju quilhpatinin ju tuchʼi pʼacxantʼatʼit. Ju chunch salaka cajunaʼ ju miʼalhunutʼan. 42 Painiʼitnich ju uxijnan ju fariseonin untʼatʼit. Ju uxijnan vasalh muctʼaxtʼuyatʼit ju lhamapʼaksin acsni xtʼakniyatʼit ju palijni lactsʼunin ju alhmujinu chai tachi chun ju aliʼ achʼitin ju pulakʼoxiyatʼit ju mivaitiʼan chai ju ruda. Para jantu naviyatʼit cuenta ni sok ju tsʼucʼuyatʼit u jantu. Chai jantu naviyatʼit cuenta ni mapʼainiyatʼit ju Dios u jantu. Para palai tasqʼuini ni anavitʼit ju ani taxtokni mas atʼailhipʼitʼit ju ixtaknica lactsʼunin ju achʼitin vachuʼ. 43 Painiʼitnich ju uxijnan ju fariseonin untʼatʼit. Ju uxijnan kʼachʼaniyatʼit ju putolan ju alin ju lacpujitat junta tatolai ju xalackʼajin. Chai kʼachʼaniyatʼit ni catamacʼamin ju lapanacni ju lacati tachi ju tamacʼami tam xakʼai. 44 Painiʼitnich ju uxijnan ju fariseonin untʼatʼit. Ju uxijnan na acxpʼutʼiyununatʼit. Pus ju uxijnan chunch untʼatʼit tachi ju tuʼuʼ panteon ju jantu manicanta chai jantu lai cʼatsacan ni yuchi cava. Chai ixlhiyuchi ju lapanacni taputayai ju anch. Pus vana va chun ju uxijnan. Ju lapanacni mas tatʼaʼucxuntʼonan chai talaktsʼinan ni tachi ju na va lackʼoxin untʼatʼit para jantu tacʼatsai ni na lhquiliqui ju lamimpulacniʼan. 45 Pus ju acsnich pumatam ju na ixlhatalanininta ju ixlhamapʼaksinʼan ju istʼaʼisraelitanin xakʼala ju Jesús chai juni: ―Amamakaʼunuʼ acsni naʼun ju chunch pus vachuʼ macxcai quilalhichivinau ju quijnan. 46 Para ju Jesús junich: ―Painiʼitnich vachuʼ ju uxijnan ju mavasalayatʼit ju lhamapʼaksin. Ju uxijnan naviyatʼit tachi ju tam lapanac ju na tsʼinqʼui macʼucʼai ju ixpuru. Ju uxijnan na lhu chai na tsʼinqʼui lhamapʼaksin ju amucʼaniyatʼit ju lapanacni tachi ju jantu lai catanavi. Para ju uxijnan nin lacatsʼunin jantu muctʼaxtʼupʼalatʼit tachi ju najun ju anch. 47 Painiʼitnich ju uxijnan. Pus ju makʼaniya milacpaʼitniʼan tamaknilh ju lapanacni ju ixtanajun ixchivinti Dios. Chai ju uxijnan ju isʼaskʼatʼan untʼatʼit lakʼoxiniyatʼit ju ixpanteonʼan ju xatamakni ju mimpaiʼan. 48 Chai ni chunch ju naviyatʼit pus va putasui ni cʼatsʼayatʼit tuchi tanavilh ju milacpaʼitniʼan chai kʼoxich lhiulayatʼit. Pus ju yuʼunch taʼamakninilh chai ju uxijnan lakʼoxiniyatʼit ju ixpanteonʼan ju amaknicanta. 49 Chai ni chunch ju navipʼalatʼit pus yuchi chani lhinaulh ju Dios ju na kʼox acʼatsananta: “Acʼamalakachaniyaʼ ju quilapanacni ju catanonaʼ ju quinchivinti. Vachuʼ acʼamalakachaniyaʼ ju quiʼalhtanin. Chai sia yuʼunch ju acʼamalakachayaʼ ju aliʼin caʼamaknicanaʼ. Chai ju aliʼin caʼamamakʼalhkʼajniyaʼ ju anuʼ lapanacni”. Chunch ju ma naulh ju Dios. 50 Pus uxijnan ju tʼonatʼit ju chavai ju amapʼalaʼitʼit ixʼacʼalhniʼan tachi chun ju lapanacni ju ixtanajun ixchivinti Dios ju amaknicalh tus laʼixputaiʼulacan ju lacamunutpaʼ. 51 Chux ju yuʼunch ju amaknicalh tus acsni tavanan maknicancha ju Abel ju pʼulhnan tucan ju maknicalh tus acsni maknicanchalh ju Zacarías ju tamakni laʼixputsin pujitat junta ixtʼalakxtokya junta ixmaknican ju atapacxat ju ixlhakʼailaktsʼincan ju Dios. Yuchi ju saʼastan va tachi chun ju lhitsʼokcanta laʼixchivinti Dios mas na lhu aliʼin ju amaknicalh ju palai astan. Pus uxijnan ju amapʼalaʼitʼit ixʼacʼalhniʼan chux ju yuʼunch. 52 Painiʼitnich ju uxijnan ju mavasalayatʼit ju milhamapʼaksinʼan ju israelitanin untʼatʼit. Ju uxijnan jantu sok xaʼamavasalaniyatʼit ju lapanacni ixchivinti Dios ni laich catacʼatsayaʼ ta yu laich catatakʼalhtaxtulh. Ju uxijnan miʼakstuʼan jantu lacʼaʼiyatʼit ju stavasalanti chai asastʼucʼatʼit ju talacaʼiputun. 53 Pus acsni ixʼajuni ju ani taxtokni ju Jesús pus ju yuʼunch ju na ixtalhatalanininta ju ixlhamapʼaksinʼan ju istʼaʼisraelitanin chai ju fariseonin slivasalh na tatalhkʼamalh chai tatsuculh jeks amavanin. Chai ixtaquilhasacmich na lhu taxtokni. 54 Va ixtalhistʼacʼa chai ixtapuxconi tuʼuʼ chivinti ju canaulh ta yu laich catapuchivimakʼalh.
1 Pus na lhu lana ixtatakʼaixtokta ju lapanacni chai va ixtalaputayaich. Pus ju Jesús tsuculh ajuniniʼ ju ixʼamamakaʼui mas catakʼasmatlh ju aliʼin. Ajunich: ―Jantu alacʼaʼinitʼit ju ixchivintiʼan ju fariseonin ni va taʼaʼokxchokʼonun ju yuʼunch. 2 Para matiʼ tuʼuʼ ju matankʼanucanta ju jantu cacʼatsacalh. Nin yuchi ni lai sek acnavi ju tuʼuʼ ju jantu cacʼatsacanaʼ. 3 Pus tachi chun ju xanonatʼit lacaʼatatsʼisni cakʼasmatcanaʼ lacaʼatuncunuʼ. Chai ju tuchi va sekch xanonatʼit laminchakaʼan pus sich calaccʼatsakʼocanaʼ. Ju Jesús tailhiʼalh ju ixchivinti chai chani ju ajuni ju ixʼamamakaʼui: 4 ―Pus chani iclajunau ji quiʼamigojni. Jantu atʼalhonitʼit ju mintʼalapanacniʼan ju lai catamaknin para astan jantuch lai tuʼuʼ aliʼ catanaviyan. 5 Para aclajunau tichi chavaich ju atʼalhonitʼit. Yuchi ju atʼalhonitʼit ju Dios ni yuchi ju lai catamakniyan chai alin ixtachaput ni lai catamacaʼanan astan ju lacajipi. Pus iclajunau ni yuchach ju atʼalhonitʼit. 6 Jantu tasqʼuini ni atʼalhonitʼit ju tam mintʼalapanacʼan. Alaktsʼintʼit ju lakaquis lactʼicstʼi tsʼokʼo ni lhistʼacan lakatʼui sentau. Para ju Dios jantu lai cʼapʼa nin lakatam ju yuʼunch. 7 Chai mas va miʼaiʼan ju uxijnan si putekʼekʼocanta. Pus yuchi iclalhijunau ni jantu atʼalhanantʼit. Palai laklhu ju mintapalhniʼan ju uxijnan. Palai jantu ju va tuʼuʼ tsʼokʼo mas na lhuch catava ju yuʼunch. Ju Jesús tailhiʼalh ju ixchivinti chai ajuni ju ixʼamamakaʼui: 8 ―Va tichi chavaich ju canonaʼ laʼixʼucxlacapuʼan ju lapanacni ni quilhilaksi ju quitʼin ju quimalakachatachilh ju Dios ni lapanac actsucuyaʼ ju ani pus vachuʼ ju quitʼin acnonaʼ laʼixʼucxlacapuʼan ju ixʼanquilhnin ju Dios ni quilapanac junita ju yuchi. 9 Para va tichi chavaich ju canonaʼ laʼixʼucxlacapuʼan ju lapanacni ni jantu quilhilaksich pus vachuʼ acnonaʼ laʼixʼucxlacapuʼan ju ixʼanquilhnin Dios ni jantu quilapanac junita. 10 Chai tachi chun ju macxcai aquintalhichivinaʼ ju quitʼin ju quimalakachatachilh ju Dios ni lapanac actsucuyaʼ ju ani pus caʼamacʼacxanicanaʼ. Para va tichi chavaich ju macxcai calhichivinaʼ ju Spiritu Santu pus ju yuchi jantu catimacʼacxanicalh. 11 Acsni alhipʼincʼanaʼitʼit laʼixʼucxlacapuʼan ju xalackʼajin lacpujitat chai laʼixʼucxlacapuʼan ju ucxtinin chai ju aliʼin ju alin ixtachaputʼan pus jantu alhamakʼaninintʼit ta yu laich alhakʼalhtʼayananaʼitʼit nin yuchi ju tuchʼi laich anonaʼitʼit. 12 Pus isʼakstu ju Spiritu Santu ju catamapastʼacʼaniyan ju acs pantsʼiquis tuchʼi laich anonaʼitʼit. 13 Chai pumatam lapanac ju ixmakminta lacatalhavat junilh ju Jesús: ―Aʼunch ju quilakʼau ni chach quilhvaknilh ju icmacontilanicantauch. 14 Para ju Jesús junich: ―Ji lapanac jantu xamatiʼ quiʼulata lacatʼicstʼi miʼucxtinʼan. Nin caʼalilh ju quintachaput ni lai aclaclhvakaʼ ju tuʼuʼ. 15 Vachuʼ ajunilh ju lapanacni: ―Alaktsʼintʼit chai jantu va yuchi ju anavitʼit cuenta ju ixmakʼaixtʼokʼa lhu ju miʼalintaʼan. Pus mas na lhu caʼalilh ju ixʼalinta tam xamatiʼ para jantu anch ju i ju isʼatsucunti. 16 Chai ajunilh ju lapanacni lakatam chivinti ju laich capumavasalaniyaʼ tuchi ixʼajumputun. Ajunich: ―Ju ixlacatʼun ju pumatam makʼaliʼ lapanac na lhu lana xaxtʼakʼa ju xatocʼat. 17 Chai ju yuchi naulh laʼixʼalhunut: “Tas aclayach ju chavai ni jantu jintaʼ alin junta lai acmakʼa ju xatocʼat ju quilacatʼun”. 18 Chai astan naulh: “Iccʼatsai tuchi acnaviyaʼ. Aclaclhvakach ju quimpacʼatsʼa chai acyochokoyaʼ ju palai kʼai. Chai anchach ju acmakʼayaʼ ju xatocʼat ju quilacatʼun chai ju quintaxtokni. 19 Chai chani acjunchokocanaʼ quiʼakstu: Ju uxintʼi lapanac na lhuch makʼata ju miʼalinta. Cachʼixach lakalhu cʼata. Pus astʼacnach. Avaich. Akʼotnuch. Akʼachʼach”. Chunch ju naulh ju anuʼ makʼaliʼ. 20 Para ju Dios ma junich: “Ju uxintʼi va tontoʼat. Lana chavai atatsʼisni aniyaʼ. Chai tis ixʼanuch cʼuʼu cajunaʼ ju anuʼ xamakʼai”. 21 Pus chunch ju tapasai laʼisʼatsucunti tam lapanac ju lhilaksi ju ixtaxtokni ju makʼaixtokta ixlacata isʼakstu para jantu lhilaksi ju makʼalit ju xtʼakʼa ju Dios chai ju jonkʼalhita lactʼiyan. 22 Astan ju Jesús axakʼalachokopa ju ixʼamamakaʼui chai ajuni: ―Jantu alhamakʼaninintʼit ixlacata ju miʼatsucuntiʼan ju tuchʼi aʼuyaʼitʼit. Nin ixlacata ju milacatunaʼan ju tuchʼi amalakchʼininaʼitʼit. 23 Pus palai tuʼuʼ ju miʼatsucuntiʼan ju uxijnan. Palai jantu ju va tuʼuʼ vaiti. Chai palai tuʼuʼ ju milacatunaʼan. Palai jantu ju va tuʼuʼ malakchʼinti. 24 Alaktsʼintʼit ju tuʼuʼ chʼekni. Ju yuʼunch jantu taʼachʼananan chai jantu taxkʼaʼi ju catamakʼayaʼ ju xatocʼat. Chai matiʼ junta lai catamakʼa ju tuʼuʼ nin caʼalilh ju ixpacʼatsʼaʼan. Para Dios ju amavai. Chai ju yuchi palai tuʼuʼ talhiulayan ju uxijnan. Palai jantu ju va tuʼuʼ tsʼokʼo. 25 Chai jantu xamatiʼ ju milhiʼuxijnan ju lai palai putankʼai catijunlh mas na lhu capastaclh. 26 Pus ni jantu lai naviyatʼit mas va yuchach ju anuʼ pus tajuch ni na va lhamakʼanininatʼit ju tuʼuʼ aliʼ. 27 Pus alaktsʼintʼit ju xanti. Ju yuchi takʼayai para jantu chʼalhcatnan nin caʼasiunilh. Para iclajunau nin yuchi ju kʼai ucxtin Salomón jantu xamalakchʼinin tachi ju tuʼuʼ xanti mas na ixʼalin ju ixmakʼalit. 28 Pus Dios ju na cʼus malakchʼini ju achʼitin ju alin mas va lacaqʼuivin. Chai ju yuchi jantu jonkʼalhi. Ju chavai na stakʼaucaʼ. Para ju lhi calacxavacanaʼ. Pus ja va a ti uxijnan jantu cataxtakniyan ju mimpumpuʼan. Para ju uxijnan na lacatsʼunin lhilaksiyatʼit ju Dios ni vasalh cataxtakniyan ju tuchʼi maktʼasqʼuiniyatʼit. 29 Pus ni yuchi ju Dios ju cataxtakniyan ju tuchʼi maktʼasqʼuiniyatʼit pus jantu alhamakʼaninintʼit tuchʼi aʼuyaʼitʼit u tuchʼi akʼotʼaʼitʼit. 30 Jantu chun alatʼit ju uxijnan ni yuchach ju talhamakʼaninin ju lapanacni ju jantucaʼ talhilaksita ju Dios. Para alin ju mimpaiʼan Dios ju cʼatsai ni maktʼasqʼuiniyatʼit ju ani taxtokni. 31 Alai yuchi ju anavitʼit cuenta ta yu palai lai calhinonaʼ ju Dios lamiʼatsucuntiʼan chai amaklhtʼayananaʼitʼit tachi chun ju ani taxtokni ju maktʼasqʼuiniyatʼit. Ju Jesús tailhiʼalh ixchivinti chai chani ju ajuni ju ixʼamamakaʼui: 32 ―Jantu atʼalhanantʼit ju uxijnan ju tachi quimborregojni untʼatʼit mas jantu milhuʼan. Pus ju quimpai na kʼox lhiulai ni atʼatʼaʼucxtʼiniyaʼitʼit ju yuchi astan. 33 Jantu na va amakʼatʼit ju miʼalintaʼan. Alai apʼuʼaktʼaiʼutʼit ju quilhpatinin. Jantu amakʼatʼit ju mimakʼalitʼan ju ani lacatʼun junta jantu jonkʼalhi. Alai anch ju lactʼiyan ju amakʼayaʼitʼit. Pus ju anch ju mimakʼalitʼan jantu tavanan caʼankʼoyaʼ. Chai jantu lai catichaʼalh ju akʼalhonaʼ. Chai matiʼ tuʼuʼ ju saʼatsʼacanaʼ ju lai calakʼalhiniyan. 34 Iclajunau chunch ni tapastactʼajun ju ixtaxtokni ju lacamunutpaʼ ju tamakʼata ju ixmakʼalitʼan ju ani lacatʼun. Para ju tamakʼai ju ixmakʼalitʼan ju lactʼiyan pus anchach ju tapastactʼajun. Ju Jesús tailhiʼalh ju ixchivinti chai chani ju ajuni ju ixʼamamakaʼui: 35 ―Alakʼasitsʼucʼutʼit chai chunch ju alatʼit tachi ju lacan acsni pacxantaican xamatiʼ ju tsʼis. Va xavacan ju maclhcu ni lai lhikʼach caʼamaklhtayanancanaʼ ju cachinaʼ. 36 Chai chunchach ju apʼacxantʼayaʼitʼit ju miʼucxtinʼan Dios tachi ju talai ju ixlapanacni tam xakʼai ju ani lacamunutpaʼ. Pus ju yuʼunch talakasivilanalh ni lana soko catamalhtekʼaniyaʼ ju malhtich acsni cataspʼitchokoyanta ju ixʼucxtinʼan junta tamakʼaxtokcan chai casayach ju malhtich. 37 Pus lhikʼach cajunaʼ ju isʼatsucuntiʼan ju anuʼ xalapanacni ju caʼalhitajucanaʼ ni talakʼasitʼajun acsni caminaʼ ju ixʼucxtinʼan. Pus islivasalh ju iclajunau. Ju ixʼucxtinʼan ni lakchʼita ju ixcutun pus calhichʼicanaʼ iscinturon chai caʼalacjunach ni catatavi lacamixa chai isʼakstu ju caʼalacxtakniyach ju ixvaitiʼan. 38 Pus na lhikʼach ju isʼatsucuntiʼan ju anuch xalapanacni ju caʼalhitajucanaʼ ni talakʼasitʼajun mas camilh ju ixʼucxtinʼan ju paitat tsʼis u mas camilh acsni paktʼutu tʼasata ju chilaʼ. 39 Pus acʼatsʼatʼitch ju ani. Ju amachakaʼ ni iscʼatsa cava tuchi hora ixmilh ju akʼalhonaʼ pus ixlhistaclh chai jantu ixlacasqʼuinilh ni ixtamalhtekʼa chai ixtanu laʼixchakaʼ. 40 Pus vachuʼ alakʼasitsʼucʼutʼit ju uxijnan ni acsnich ju acminchokoyaʼ ju quitʼin acsni nonatʼit ni ca jantu lai actimilh ju acs pantsʼiquis. Quitʼin ju quimalakachatachilh ju Dios ni lapanac actsucuyaʼ ju ani. 41 Pus ju acsnich ju Pitaluʼ junilh ju Jesús: ―Quiʼucxtin ja va quijnan ju quilajunau ju ani chivinti ju ixpʼumavasalapʼutʼun ju minchivinti u vachuʼ ixlacataʼan chux ju lapanacni. 42 Chai ju Jesús juni: ―Alin ju xakʼai xalapanac ju lai lhilaksican chai ju na acʼatsananta chai lai caʼamalhistacni ju ixʼucxtin ju aliʼin ixtʼaxalapanacni ni laich caʼalhcaniyaʼ ju ixvaitiʼan acsni cachinaʼ ju hora ni catavenaʼ. 43 Pus slivasalh lhikʼach ju isʼatsucunti ju anuʼ xalapanac ju calhitajucanaʼ ni chunchach ju tʼajun naviniʼ acsni caminchokoyaʼ ju ixʼucxtin. 44 Pus slivasalh ju iclajunau. Ju ixʼucxtin camalhistacnikʼoyaʼ tachi chun ju ixʼalinta. 45 Para ju anuʼ xalapanac jantu xcai ni canaulh laʼixʼalhunut ni ca jantu sai catiminchokolh ju ixʼucxtin chai catsucuyaʼ aʼulaniniʼ ju ixtʼaxalapanacni chai ju maksquitininch. Chai cavenach chai caʼakʼotnanach chai catʼakʼapʼayach. 46 Pus ni chunch ju canaviyaʼ ju anuʼ xalapanac pus acsnich ju cachinaʼ ju ixʼucxtin acsni jantu pacxantajita. Cachinaʼ ju acs pantsʼiquis acsni jantu iscʼatsai ni lai cachilh. Chai slivasalh camamakʼalhkʼajniyaʼ ju anuʼ xalapanac. Chunch caʼulhtunicanaʼ tachi ju caʼulhtunicanaʼ ju yuʼunch ju jantu lai lhilaksican. 47 Pus ju anuʼ xalapanac ju machakxanilh ixkʼachat ju ixʼucxtin para jantu ixlakasivi ni xaminchokoi ju ixʼucxtin nin canavi ju ixkʼachat pus ju yuchi na paklhu canekcanaʼ. 48 Para ju anuʼ xalapanac ju jantu xamachakxai ju ixkʼachat ju ixʼucxtin chai navilh ju tuʼuʼ ju lhijunch ni calhinekcalh pus na lacatsʼunin calakanekmacanaʼ. Pus va tichi chavaich ju na lhu xtaknicanta pus na lhu casqʼuinichokocanaʼ. Chai ju na lhu xtaknicanta ni calhistaclh pus palai lhu casqʼuinichokocanaʼ. Palai jantu na chun ju jantu lhu ixtaknicanta ni calhistaclh. Ju Jesús tailhiʼalh ju ixchivinti chai chani ju ajuni ju ixʼamamakaʼui: 49 ―Tachi ju va icminta maquilhnunuʼ ju jipi ju ani lacatʼun. Chai slivasalh na kʼox cava ni lana chavai ju cataiʼulayaʼ. 50 Na lhu lana acmakʼalhkʼajnanaʼ chai slivasalh na icʼamakʼaninin tus acsni caʼuctaxtuyach. 51 Jantu anaʼuntʼit ni va icminta naviniʼ ju akʼoxamixnit ju ani lacatʼun. Iclajunau ni jantu. Alai va ixlacaʼatalh ni icminta caʼalinaʼ ju lakʼaiti. Caxcaicanaʼ ju yuʼunch ju quintalhilaksi. 52 Pus ju chavai atipuʼanta junta tatʼajun pumaquis lapanacni lacalakatam chakaʼ pus jantu kʼox catalalhiʼanaʼ. Pus ixtʼutunʼan cataxcayaʼ ju pumatʼuiʼan. Chai ju ixtʼiyunʼan cataxcayaʼ ju ixtʼutunʼan va ixlacata ni quintalhilaksi ju quitʼin ju aliʼin chai ju aliʼin jantu. 53 Ju tam xapai catʼalaxcayaʼ ju istsʼalh. Chai ju tam istsʼalh catʼalaxcayaʼ ju ixpai. Ju tam xanati catʼalaxcayaʼ ju istsiʼ. Chai ju tam istsiʼ catʼalaxcayaʼ ju ixnati. Chai ju tam xaputʼichakoʼulh catʼalaxcayaʼ ju ixputʼi. Chai ju tam xaputʼi catʼalaxcayaʼ ju ixputʼichakoʼulh ni quilhilaksi ju quitʼin. 54 Ju Jesús vachuʼ chani ajuni ju lapanacni: ―Ju uxijnan acsni laktsʼinatʼit ju ataputsʼi acsni min ju lhitsʼastʼai pus lana nonatʼit ni caminach ju xcan ju ani laquintʼunʼan. Chai vasalh chunch ju tapasai. 55 Chai acsni min ju un ju lhisur pus nonatʼit ni lhiʼich cajunaʼ ju ani laquintʼunʼan. Chai vasalh chunch ju tapasai. 56 Pus ju uxijnan lai machʼakxayatʼit ta yu avanan ju lactʼiyan chai ju lacatʼun. Para va acxpʼutʼiyununatʼit acsni nonatʼit ni jantu lai machʼakxayatʼit tuchi tʼajun tapasanaʼ ju chavai acsni tʼonatʼit. 57 Tajuch ni jantu lai sacxtʼuyatʼit miʼakstuʼan ju kʼox. 58 Ni catachivimakʼanan tam xamatiʼ chai catakʼailhiʼanan lacapuʼucxtin pus amaskʼatʼitʼitch ju lacati ixtʼatakʼoxica ju yuchi. U ni jantu pus jantu xcai ni catalhichaʼanan lacaʼucxtin. Chai ju ucxtin catamakʼaxtakʼan laʼixmacaʼan ju pulasiyajni. Chai ju pulasiyajni cataʼanan tʼalhnunun. 59 Chai iclajunau ni jantu atʼitʼaxtʼutʼit ju anch tus acsni amapʼalaʼitʼit chux lana ju mimulhtaʼan.
1 Pus ju acs pantsʼiquis tachinchalh ju aliʼin ju tamacʼatsani ju Jesús ixlacataʼan ju amachakʼan ju xaʼestado Galilea ju alhinaulh ixʼamaknicaʼan ju gobernador Pilato. Tajuni ni anch ju amakni junta makninican ju atapacxat ju Dios. Pus ju ixʼacʼalhniʼan lhitayalh ju ixʼacʼalhni ju atapacxat. 2 Chai ju Jesús ajunich: ―Ja va nonatʼit ni palai na alactuʼunin ixtajunita ju anuʼ amachakʼan Galilea. Palai jantu ju aliʼin ixtʼaʼamachakʼan. Chai yuchi alhimaknicalh. 3 Iclajunau ni jantu. Para ni jantu amacʼonaʼitʼit ju miʼalactuʼuntiʼan ju uxijnan pus vachuʼ atsʼankʼayaʼitʼit. 4 Chai ju anuʼ pumacautsajin amachakaʼan Jerusalén ju atantʼalhma ju putankʼai chakaʼ ju lacSiloé chai tanikʼo ja va nonatʼit ni palai na alactuʼunin ixtajunita ju yuʼunch. Palai jantu ju aliʼin ixtʼaʼamachakʼan. Chai yuchi alhimaknicalh. 5 Iclajunau ni jantu. Para ni jantu amacʼonaʼitʼit ju miʼalactuʼuntiʼan ju uxijnan pus vachuʼ atsʼankʼayaʼitʼit. 6 Ju Jesús ajuni ju lapanacni ju ani chivinti ju ixtʼalaktsʼipaxcavaich ju tuʼuʼ: ―Pumatam lapanac chʼanlh lakatam qʼuiu ju higuera juncan. Anch ju xachʼan laʼixpuʼuvas. Chai astan ju yuchi milh puxconiniʼ ju xalhiʼut. Para jantu lhitajunilh. 7 Chai junilh ju ixlhistacnaʼ ju puʼuvas: “Ju chavai ixlhilakatʼutu cʼata icminta puxconaʼ ju xalhiʼut ju ani ya higuera chai jantu tuʼuʼ iclhitajunita. Atʼichʼakxtʼatʼi. Va lakʼaich atankʼasinin ju ani lacatʼun”. 8 Para ju anuʼ alhistacnaʼ junich ju ixʼucxtin: “Quiʼucxtin va yuchi ju chavai cʼata ju amacʼoninch. Aclacpujniyaʼ ju tʼun ju ixtalakachoko chai acmamayaʼ ju ixʼilhtʼi borrego. 9 Chai ni caʼalinach ju xalhiʼut pus kʼoxich. Para ni jantu pus acsnich ju laich atʼichʼakxtʼayaʼich”. 10 Lakatam savat ju Jesús ixʼamalanininch laʼixpujitatʼan ju istʼaʼisraelitanin. 11 Chai ju anch ixtanun pumatam chakoʼulh ju ixpacxanta ju lhacaticuru laʼixlacatuna chai ixlhiyuchi va ixtakʼankʼai. Va ixlakatumich. Jantu tavanan lai sok ixtayai. Lakacautsajin cʼata ju ixtakʼankʼai. 12 Chai ju Jesús acsni laktsʼilh tʼasanilh chai junich: ―Chakoʼulh macaxnitan ju mintakʼankʼat. 13 Chai mokslanilh ju ixmacaʼ laʼixlacatuna chai lana tasoknicʼa ju ixlacatuna. Chai ju yuchi lakʼayalh ju Dios. 14 Para ju xaʼucxtin lacpujitat na lhitalhkʼamalh ni ixʼacʼuchʼununta ju Jesús ju avilhchan paʼastacni. Chai ajunich ju ixtalhavat lapanacni ju ixtamakvilanalh: ―Alin lakachaxan avilhchan acsni lai chʼalhcatnancan. Pus acsnich ju atʼatʼit tʼacʼuchʼunin. Para jantu ju avilhchan paʼastacni. 15 Pus ju acsnich ju Jesús junilh ju anuʼ xaʼucxtin lacpujitat: ―Ju uxintʼi va acxpʼutʼiyunun. Ju pumatamin ju milhiʼuxijnan ja jantu xkʼotʼatʼit ju mivacaxʼan u mimpuruʼan ju laʼixchakaʼ ju avilhchan paʼastacni chai pʼinatʼit makʼotʼunin ju xcan. 16 Pus ju ani chakoʼulh ixpapanti Abraham junita. Chai lakacautsajin cʼata ju ixchʼita ju Satanás. Chai ja jantu lhijun ni acxkʼotnilh ju yuchi ju avilhchan paʼastacni. 17 Chai acsni naulh ju ani chivinti ju Jesús pus na tamaxanalh chux ju ixtʼalaxcai. Chai tachi chun ju lapanacni na ixtalhikʼachanch tachi chun ju kʼoxi taxtokni ju ixtʼajun naviniʼ ju Jesús. 18 Pus ju acsnich ju Jesús ajuni ju lapanacni: ―Tamalhch nuʼ ju ixtʼachunch jumputun tachi acsni lhinajun ju Dios laʼisʼatsucuntiʼan ju lapanacni. 19 Acsni lhinajun ju Dios laʼixʼalhunutʼan ju lapanacni pus na lhu talhilacaʼan ju Dios. Chunch ju tapasai tachi ju tapasai acsni chʼancan ju xatʼin mostaza. Pus tam lapanac ni cachʼanlh ju yuchi laʼixlacatʼun pus ju anuʼ achʼananti takʼayai chai tasui tachi ju lacatʼicstʼi qʼuiu. Chai ju tsʼokʼo tamucʼai ixpamalhiquiʼan laʼixʼacatan. 20 Ju Jesús vachuʼ chani ajuni ju lapanacni: ―Tas malhch nuʼ ju va ixtʼachunch acnaviyaʼ tachi acsni lhinajun ju Dios laʼisʼatsucuntiʼan ju lapanacni. 21 Pus ju anuʼ lapanacni chunch tajunita tachi ju tuʼuʼ xatʼin xkapavati ju calhiyaulh tam chakoʼulh ju lakatʼutu achʼapanta harina. Pus lhitayakʼojui chux. 22 Ju Jesús aktam chʼapachokopa ju xati ju Jerusalén. Chai acsni ixtapasatilai ju kʼai lakʼachakʼanixni u ju lactʼicstʼi lakʼachakʼanixni pus ixʼamalani ju lapanacni. 23 Chai pumatam junilh: ―Quiʼucxtin ja na lacatsʼunin ju tatakʼalhtaxtui. Chai ju Jesús junich: 24 ―Laʼixlhichux miʼalhunutʼan anavitʼit cuenta ni atʼanuyaʼitʼit ju lactʼiyan ni na acsatʼicstʼi ju xamalhtich. Iclajunauch chunch ni astan na pumalhu ju catatanuputunach ju anch para jantu lai catitanu. 25 Jantu lai ni cakʼostolaʼ ju amachakaʼ chai camalacchoyach ju malhtich. Chai astan ju uxijnan atʼayayaʼitʼit makspaʼ chai atsʼucʼuyaʼitʼit sanin ju malhtich chai anonaʼitʼit: “Ucxtin aquilamalhtekʼaniuch”. Para ju yuchi catakʼalhtayan chai catajunanch: “Jantu iclamispayau. Jantu iccʼatsai ta anchach ju xatʼanachitʼit”. 26 Chai ju acsnich ju uxijnan atsʼucʼuyaʼitʼit nonin: “Pus xaclatʼavenau ju uxintʼi chai xaclatʼakʼotʼau. Chai laxalacti ju quilakʼachakʼan quincʼan ju ixʼamalaninin ju uxintʼi”. 27 Para ju yuchi catajunanch: “Iclajunau ni jantu iclamispayau. Jantu iccʼatsai ta anchach ju xatʼanachitʼit. Akʼostʼit ju laquimacni tachi chun ju uxijnan ju va alactuʼunin untʼatʼit”. 28 Chai ju uxijnan akʼalhununaʼitʼit chai alamatsʼacʼayaʼitʼit ju mintatsalatʼan acsni alaktsʼinaʼitʼit ju Abraham chai ju Isaac chai ju Jacob chai tachi chun ju lapanacni ju ixtanajun ixchivinti Dios ni tavilanalh junta lhinonkʼojui ju Dios ju lactʼiyan. Para ju uxijnan va xcʼoxtʼucʼantʼatʼit. 29 Pus cataminanta ju lapanacni ju lhichʼatoʼanta chai ju lhitsʼastʼai chai ju lhisur chai ju lhinorte chai catatolanta lacamixa junta lhinajun ju Dios. 30 Chai ju acsnich cataʼalinanta ju lapanacni ju makʼanch xaquintalhilaksi. Para jantu lai actinaulh ni va ixlhiyuchi palai kʼox caʼalhiulacanaʼ. Chai vachuʼ cataʼalinanta ju lapanacni ju jantucaʼ makʼan xaquintalhilaksi. Para jantu lai actinaulh ni va ixlhiyuchi palai jantu kʼox caʼalhiulacanaʼ. 31 Pus ju acsnich avilhchan tachincha ju aliʼin fariseonin chai tajunich ju Jesús: ―Atʼaxtʼuch ju ani. Aʼinchich. Pus ju Herodes najun ni camakniyan. 32 Para ju Jesús ajunich: ―Aʼinchʼokʼochitʼit juninin ju anuʼ aʼokxchokʼonu lapanac ni actixcoxtuyaʼ ju lhacaticuru laʼixlacatunaʼan ju lapanacni chai palaich acʼanaviyaʼ ju takʼankʼanin ju chavai chai ju lhi. Chai ju ixlhilakatʼutu avilhchan acnavikʼoyach ju quilhichʼalhcat. Chunchach ju aʼunaʼitʼit. 33 Para mas jantu ictalhoni ju Herodes aktsʼiya tasqʼuini ni acʼalhtanatsucuyaʼ ju chavai chai ju lhi chai ju tʼuxam. Tasqʼuini ni chunch aclalh ni jantu lhijun ni jantu canichalh ju lakʼachakʼan Jerusalén tam lapanac ju najun ixchivinti Dios. 34 Ji amachakʼan Jerusalén ju uxijnan makniyatʼit ju lapanacni ju tajunan ixchivinti Dios. Chai alacʼatʼalhmatʼit ju yuʼunch ju amalakʼachʼanicʼantʼachitʼit. Pus na paklhu xaclamakʼaixtokputunau ju uxijnan tachi ju navi isʼaskʼatʼan ju tuʼuʼ chilaʼ acsni amakatai laʼixpakʼachu ni laich caʼalhistʼacʼaʼ. Vachuʼ xaclamakʼaixtokputunau ju uxijnan tachi ju quiʼaskʼatʼan ni laich xaclalhistacvi. Para ju uxijnan jantu xalacʼasqʼuinatʼit. 35 Pus ju chavai Dios macoʼulata ju milakʼachakʼanʼan. Chai iclajunau ni jantu lai aquintilalaktsʼinchoko ju chavai. Va acsni ju aquilalaktsʼinchokoyau acsni cachinaʼ ju avilhchan ni acminchokoyaʼ chai chani anonaʼitʼit ju quilacata: “Paxcat ju ani ju minta laʼixtapakaʼut ju Dios”.
1 Pus lakatam avilhchan paʼastacni ju Jesús alh venaʼ laʼixchakaʼ pumatam xakʼai fariseo. Chai ju aliʼin fariseonin na ixtalhistactʼajun ju Jesús. 2 Chai vachuʼ anch ixya pumatam lapanac laʼixʼucxlacapuʼ ju Jesús. Chai ju yuchi va ixlacacʼunta. 3 Pus ju acsnich ju Jesús axakʼala ju fariseonin chai ju ixtalhatalanininta ju ixlhamapʼaksinʼan ju istʼaʼisraelitanin. Ajunich: ―Ja lhijunch ni acʼacʼuchʼunulh ju avilhchan paʼastacni u jantu. 4 Para ju yuʼunch jantu tuʼuʼ taʼakʼalhtayanalh. Pus ju acsnich ju Jesús macchʼapalh ju anuʼ lapanac chai lana palaich va. Chai astan malakachachokolh laʼixchakaʼ. 5 Chai alacjuni ju fariseonin: ―Tis chavaich ju milhiʼuxijnan ju jantu vatsʼalhti camacutulh mas avilhchan paʼastacni ju mimpuru u mivacax ni catinʼalh junta puculhucnicʼa. 6 Pus ju yuʼunch jantu lai tuʼuʼ ixtamapuspʼitni ju ani chivinti. 7 Pus ju aktam acsni tatsuculh tolhnin lacamixa pus ju Jesús alaktsʼilh ni ixchuxʼan ixtatolhputun lacatantsʼi junta ixtatolai ju xalackʼajin. Pus yuchi alhijunilh lakatam chivinti ju ixʼapumavasalaniputun ta yu catalalh. Ajunich ju ixtamakvajin vachuʼ ju yuchi: 8 ―Acsni xamatiʼ ju catakʼailhiʼanan junta alin ju tamakʼaxtoknut pus jantu anch ju atʼolatʼit junta tatolai ju xalackʼajin. Pus jantu xcai ni cakʼailhimincalh pumatam ju palai xakʼai. Palai jantu ju uxintʼi. 9 Chai ju xakʼailhiminan ju uxintʼi catʼalakminan ju akʼantam chai cajunan: “Axtʼakninch ju mimputolan ju ani ya lapanac”. Pus ju acsnich na amaxananaʼich chai apʼinaʼ tolhnaʼ junta tatolai ju yuʼunch ju palai jantu tuʼuʼ ixtapalhniʼan. 10 Alai chani alatʼit acsni jintaʼ kʼailhipʼincʼanaʼitʼit. Pus anchach ju atʼolatʼit junta tatolai ju jantu tuʼuʼ ixtapalhniʼan. Chai ju chunch acsni catalaktsʼinan ju takʼailhiʼantan laich catajunan: “Quiʼamigo anchach ju atʼolaʼ junta tatolai ju xalackʼajin”. Pus ju acsnich na alakʼayacʼanaʼ laʼixʼucxlacapuʼan ju va kʼaixtam tatʼatolan lacamixa. 11 Pus chunchach ju alatʼit ni calalacatʼicstʼicanaʼ va tichi chavaich ju lakʼayachokocan isʼakstu. Para ju tichi tʼalacatʼicstʼi pus calakʼayacanaʼ. 12 Vachuʼ chani juni ju Jesús ju anuʼ ju xakʼailhiʼan laʼixchakaʼ: ―Ju uxintʼi acsni anaviyaʼ ju tuʼuʼ kʼai lacvaiti pus jantu va yuʼunch ju atʼasani ju miʼamigojni u miʼalakʼavin u yuʼunch ju milhiʼalakʼavin u yuʼunch ju na makʼalinin ju vanin alactʼavilhtʼi. Pus ni chunch ju alatʼi pus jantu xcai ni catakʼailhiʼanchokoyan vachuʼ ju yuʼunch chai ju chunch va catamapalhnichokoyan. 13 Para acsni anaviyaʼ ju tuʼuʼ cʼatan pus alai yuʼunch ju atʼasanitʼi ju quilhpatinin chai ju macmututu chai ju chʼantakʼalhita chai ju alakʼachʼixnin. 14 Chai ju chunch lhikʼach atsʼucʼuyaʼ ni jantu lai catamapalhnichokoyan ju yuʼunch. Para amapʼalhcʼanaʼ acsni catalokʼonchokoyach ju yuʼunch ju soknicʼa alaktsʼin ju Dios. 15 Pus acsni kʼasmatlh ju ani chivinti pumatam ju ixmakvi lacamixa pus junilh ju Jesús: ―Slivasalh lhikʼach ju isʼatsucunti ju camakvenaʼ acsni cataiʼulayaʼ ixpuʼucxtin ju Dios. 16 Pus ju acsnich ju Jesús juni: ―Pumatam lapanac navilh lakatam kʼai tokʼoxayavaiti. Chai na pumalhu ju alactʼasanilh. 17 Chai acsni tucanch cavencanaʼ pus malakachalh pumatam ixlapanac ni caʼalh atʼasaniniʼ ju catamakvenaʼ. Cajunilh: “Ma inchitʼit. Ma alinch ju chavai ju vaiti”. 18 Para ixchuxʼan tatsuculh nonin ni jantu lai catitaʼalh. Pus ju xapʼulhnan junilh: “Ictamaulh lakatam kʼai lacatʼun chai tasqʼuini ni acʼalh laktsʼiniʼ. Icsqʼuiniyan lamapainin. Aqʼuimacʼacxanin ni jantu lai actiʼancha”. 19 Chai ju apumatam junich: “Ictamaulh lakacau vacax chai acʼanaʼ alaktsʼintanunuʼ. Icsqʼuiniyan lamapainin. Aqʼuimacʼacxaninch ni jantu lai actiʼancha”. 20 Chai ju apumatam junich: “Ju quitʼin va ictamakʼaxtoklicaʼ chai yuchi jantu lai actilhiʼalh”. 21 Pus anchokolh ju anuʼ xalapanac. Alh juniniʼ ju ixʼucxtin tuchi ixtanajunch ju lapanacni. Pus ju acsnich na talhkʼamalh ju amachakaʼ. Chai junchokolh ju ixlapanac: “Vatsʼalhti aʼinchich ju lacakʼai ti chai lacalactʼicstʼi ti ju lakʼachakʼan. Akʼailhitʼanaʼich ju quilhpatinin chai ju macmututu chai ju chʼantakʼalhita chai ju alakʼachʼixnin”. 22 Chai acsni navikʼolh ju chunch ju xalapanac pus junchokopa ju ixʼucxtin: “Quiʼucxtin icnavita tachi ju xaqʼuiʼuni para tiʼalincaʼ ju tantsʼi ju lacamixa”. 23 Chai ixʼucxtin juni ju ixlapanac: “Apʼinchich ju kʼai ti ju lacamacni chai ju macatʼicstʼi ti ju lacacuxtu. Kʼasi ajuni ju lapanacni ni catamilh. Chach aktsamalh ju quinchakaʼ. 24 Chunch ju anaviyaʼ ni icjunan ni jantu xamatiʼ ju pʼulhnan icʼatʼasanilh ju caquilhcʼatsayaʼ ju quivaiti”. 25 Pus na lhu lapanacni ixtatʼaʼanta ju Jesús. Chai ju yuchi talakaspʼitlh chai ajunich: 26 ―Ni xamatiʼ quilakmin chai ni cajumputulh quintamamakaʼun tasqʼuini ni palai tuʼuʼ aquilhiulayaʼ ju quitʼin. Palai jantu ju ixpai, ixnati, chai ixʼamachakaʼ chai isʼaskʼatʼan chai ixʼalakʼavin tsʼalan chai ixʼalakʼavin atsiʼin chai mas isʼatsucunti isʼakstu. Para ni jantu quimapaini ju chunch pus jantu lai cativa ju quintamamakaʼun. 27 Chai va tichi chavaich ju najun ni jantu quinchʼakʼokʼaputun va ixlacaʼatalh ni va lai mamakʼalhkʼajnicalh pus jantu lai cativa ju quintamamakaʼun. 28 Pus pumatam ju milhiʼuxijnan ni cayoputulh lakatam putankʼai chakaʼ aktsʼiya pʼulhnan calacalhcaxtulh tas chunchach calhiʼanaʼ ju ixtapalh. U ni laich chaʼan tachi ju maktasqʼuinich ju capunavikʼoyach u jantu. 29 Pus ni jantu chun calalh pus jantu xcai ju astan ni taiʼulata jantu lai navikʼojui. Camakʼancʼacxlh tuʼuʼ chai jantu calhiva ju capunavikʼo. Pus ju acsnich tachi chun ju lapanacni ju catalaktsʼinach catalhitsʼiʼinach. 30 Chai catanaulh: “Ju ani lapanac taiʼulalh ixnavica ixchakaʼ para jantu lai xanavikʼojui”. 31 Chai ju tam kʼai ucxtin ni caʼamputunach tʼalasanaʼ ju ixtʼakʼai ucxtin aktsʼiya pʼulhnan capastʼacʼaʼ u ni laich caputʼalalhajalh ju lhiminta lakapʼuxam milh taropajni u jantu. Ju yuchi ni va lakacau milh ju ixtaropajni. 32 Chai ni najun ni jantu lai catitʼalalhajalh pus camalakachanilh pumatam ixlapanac chai casacmiyach tas laich catʼatakʼoxi ni jantu catalaclasa. Chunch ju canaviyaʼ acsni na makatcaʼ ju mintacha ju ixtʼakʼai ucxtin. 33 Pus vana va chun ju uxijnan. Kʼoxich apʼastʼactʼit u ni lai aʼunaʼitʼit ju quintamamakaʼun u jantu. Pus va tichi chavaich ju milhiʼuxijnan ju jantu lacasqʼuin ni quitʼin ju aclhinonkʼoyaʼ tachi chun ju ixtaxtokni ju pacxanta pus jantu lai cativa ju quintamamakaʼun. 34 Na kʼox ju matsat. Para ju matsat ni jantu skʼokʼo cava pus jantu lhitapalai. 35 Pus jantu kʼox junita ixlacata ju lacatʼun nin lai abono acpuʼulhtulh. Alai va camakʼancanach. Pus ju alin ju ixpakʼasmatni cakʼasmatlich.
1 Pus tachi chun ju achʼinin chai ju alactuʼunin talakmilh ju Jesús ni va ixtakʼasmatniputun ju ixchivinti. 2 Para ju fariseonin chai ju na ixtalhatalanininta ju ixlhamapʼaksinʼan ju istʼaʼisraelitanin ixtalhichivinin ju Jesús. Ixtanajun: ―Ju yuchi kʼox alactʼalalhiʼan ju alactuʼunin chai alactʼavajin ju yuʼunch. 3 Pus ju acsnich ju Jesús ajunich ju ani chivinti ju ixʼapumavasalaniputun tuchi ixʼamalaniputun. Ajunich: 4 ―Ju pumatam milhiʼuxijnan ni capacxalh tam cientos ixborregojni chai ni camakʼatsʼankʼa lakatam ja jantu calacmacoyoyaʼ ju noventa y nueve junta tatʼajun venin chai caʼalh puxconaʼ ju istsʼankʼata tus calhitajuyaʼ. 5 Chai acsni calhitajuyach pus camucʼayaʼ laʼixʼakxpʼun chai calhiminaʼ chai na cakʼachanach. 6 Chai acsni cachinach laʼixchakaʼ pus caʼalactʼasaniyaʼ ju ixʼamigojni chai ixtʼatolhnin chai caʼalacjunach: “Quilatʼakʼachauch ni iclhitajulh ju quimborrego ju xacmakʼatsʼankʼata”. 7 Pus iclajunau ni vana va chun ju lactʼiyan. Palai calhikʼachancanaʼ ju tam alactuʼunuʼ acsni macajun ju ixʼalactuʼunti. Palai jantu calhikʼachancanaʼ ju noventa y nueve lapanacni ju tanajun ni na soknicʼa junita ju isʼatsucuntiʼan chai ixlhiyuchi jantu tasqʼuini ni catamacaulh ju ixʼalactuʼuntiʼan. 8 Ju tam chakoʼulh ju capacxalh lakacau tumin ni camakʼatsʼankʼa ju lakatam ja jantu caxavayaʼ ju ixmaclhcu chai caʼapʼalhnanach laʼixchakaʼ. Lacsni lacsni capuxcoyaʼ tus calhitajuyaʼ. 9 Chai acsni calhitajuyach caʼalactʼasaniyaʼ ju ixʼamigojni chai ju vanin alactʼavi chai caʼalacjunach: “Aquilatʼakʼachauch ni iclhitajulh ju quintumin ju xacmakʼatsʼankʼata”. 10 Pus iclajunau ni vana va chun talhikʼachan ju ixʼanquilhnin ju Dios acsni camaconach ixʼalactuʼunti ju tam alactuʼunuʼ. 11 Chai ju Jesús axakʼalachokopa ju lapanacni. Ajunich: ―Pumatam lapanac ixʼalin ixtʼiyunʼan istsʼalan. 12 Chai ju salacatʼicstʼi istsʼalh junilh ju ixpai: “Quimpai aqʼuilhvakninch ju miʼalinta ju quiʼanuch cajunach”. Pus ju ixpai alaclhvaknilh. 13 Chai jantu makʼan va ju salacatʼicstʼi istsʼalh makʼaixtoklich ju ixʼalinta. Alh makat alacatam lacatʼun. Chai ju anch quilhakʼamanankʼo lacaʼalactuʼunti tachi chun ju ixtaknicanta. 14 Chai acsni lhakʼamanankʼo pus milh lakatam kʼai chavan ju anuʼ lakʼachakʼan chai ju yuchi tsuculh makʼalhkʼajnaʼ. 15 Chai lakxcavatailich pumatam amachakaʼ anch. Chai ju yuchi malakacha laʼixpotrero ni va caʼalh alhistacnaʼ ju ixpʼaxnin. 16 Chai ju yuchi na ixʼuputun mas yuchi ju ixtaʼui ju pʼaxnin. Yuchi ju xatocʼat lakatam qʼuiu. Para jantu xamatiʼ xaxtakni tuʼuʼ nin yuchi ju anuʼ xalhiʼut. 17 Para acsni takʼoxinilh ju ixʼatalacpastʼacʼat pus naulh: “Na lhu alin ju makchʼalhcatnin ju laʼixchakaʼ ju quimpai chai ju yuʼunch slivasalh na kʼox tavajin. Chai ju quitʼin na icmakʼalhkʼajnan ju quinchavanti ju ani. 18 Alai actaxtuyach ju ani. Aclakʼanchokoyach ju quimpai chai acjunach: Quimpai iclactuʼu ju Dios chai iclactuʼun ju uxintʼi. 19 Pus jantu lhijun ni vanach aqʼuilhimispʼatʼi ni mintsʼalh. Va aqʼuilaktsʼich tachi ju va milapanac”. 20 Pus taxtucha chai lakʼalh ju ixpai. Para acsni laktsʼistucli ixlhimakat ju ixpai pus lana na mapaini. Pus atsʼalalakʼalh. Lakatanu chai puquilhchʼuchʼulh. 21 Para ju istsʼalh junich: “Quimpai iclactuʼu ju Dios chai iclactuʼun ju uxintʼi. Chai jantu lhijun ni vanach aqʼuilhimispʼatʼi ni mintsʼalh ju quitʼin”. 22 Para ju ixpai ajunilh ju ixlapanacni: “Vatsʼalhti amacʼutʼuchitʼit ju palai kʼoxi pumpuʼ chai amalakchʼinitʼit. Chai amamactʼanutʼit lakatam mactanut. Chai amachʼantʼanutʼit ju ixchʼanxtʼakʼan. 23 Chai aʼinchitʼit inin ju askʼatʼa vacax ju na kʼonta. Amaknitʼitch chai calacʼuyau chai canaviyau ju cʼatan. 24 Chunch canaviyau ni tachi ju va ixnita ju ani quintsʼalh para ju chavai tachi ju va lokʼonchokolh. Istsʼankʼata para ju chavai lhitajuchokocalh”. Pus tatsuculh lhicʼataninin. 25 Para ju xakʼai istsʼalh ixtʼonachalhcaʼ chʼalhcatnaʼ lacacuxtu. Chai acsni taspʼitcha chai chincha vanin laʼixchakaʼ pus kʼasmatlich ni na asanancanch chai ni tʼoncan lacatʼininca. 26 Chai tʼasanilh pumatam ixlapanac chai sacmi tuchi ju alin. 27 Chai ju yuchi junich: “Pus minchokolhch ju mimpʼisekʼe chai ju mimpai lhinaulh ixmaknica ju askʼatʼa vacax ju na ixkʼonta. Chunch ju navilh ni xaminchokoi ju istsʼalh chai jantu tuʼuʼ xatapasayacha chai ni kʼox tʼajun”. 28 Pus ju acsnich lana na talhkʼamalh ju xakʼai istsʼalh chai jantu ixtanuputun laʼixchakaʼ. Pus taxtulh ju ixpai chai tapaininilh ni catanu. 29 Para ju yuchi akʼalhtayanalh. Junich ju ixpai: “Ju quitʼin va ta lakachux cʼata ictʼonan aktaijunun. Chai jantu tavanan ju jantu acnavi tuchʼi qʼuiʼuni. Para jantu tavanan qʼuixtʼaknitʼa mas va minchivoch ni laich acʼatʼacʼatanilh ju quiʼamigojni. 30 Para acsni xaminchokoich ju ani mintsʼalh ju xaquimacaʼankʼojui tuchi ju ixtʼaknitʼa va ixlacata ni ixtʼaʼucxuntʼajun ju alactuʼunin chakolun pus lana lhimakninin miʼaskʼatʼa vacax ju na ixkʼonta”. 31 Para ju ixpai junich: “Quintsʼalh ju uxintʼi aktsʼiya tʼaʼun laquimacni chai tachi chun ju quiʼalinta sich miʼanuʼ. 32 Para aktsʼiya istasqʼuini ni acmacʼatanilh chai caʼalilh lackʼachat. Pus ju ani mimpʼisekʼe tachi ju va ixnita chai tachi ju va lokʼonchokolh. Va istsʼankʼata para lhitajuchokocalh”.
1 Chai ju Jesús vachuʼ chani ajuni ju ixʼamamakaʼui: ―Ixʼalin pumatam lapanac ju na makʼaliʼ ixjunita. Chai ju yuchi ixʼalin pumatam ju ixlhistacni ju ixʼalinta ju ixʼucxtin. Chai ju ani chivimakʼancalh laʼixʼucxlacapuʼ ju ixʼucxtin. Va juni ni va ixlhakʼamanani ju ixtumin ju ixʼucxtin. 2 Pus ju yuchi tʼasanilh ju ixlapanac chai junich: “Tijuch ju ani ju ickʼasmatʼa ju milacata. Aqʼuiʼunch tas junitach ju chavai ju quiʼalinta ni jantu vana lai atʼilhistʼactʼi”. 3 Pus ju anuʼ alhistacnaʼ chani pastaclh laʼixʼalhunut. “Tas aclayach ju chavai ni va quintaiʼini ju ixlhistʼacʼa ju ixchakaʼ ju quiʼucxtin. Pus matiʼ ju quintachaput ni lai actiʼalacpucutunulh. Chai na lhimaxan ni acʼalacapusacnalh. 4 Iccʼatsai tuchi aclayaʼ ni aquintaʼamaklhtayananaʼ pantsʼiquis laʼixchakaʼan ju lapanacni acsni actaiʼinicanaʼ ju quilhichʼalhcat”. 5 Pus tʼasanilh pumatamin ju ixtalhiʼani ju ixʼucxtin chai junilh ju xapʼulhnan: “Tas chunchach ju lhipʼini ju quiʼucxtin”. 6 Chai ju yuchi junich: “Tam cientos alhcanti ju aceite”. Pus ju anuʼ alhistacnaʼ ixjunita junilh: “Anich ma ju xaʼalhiqui. Va tsʼalhti atʼaʼulhch chai atsʼokʼulatʼi ju sastʼi junta najun ni va tʼupʼuxamcau alhcanti ju lhipʼini”. 7 Astan ju anuʼ alhistacnaʼ junilh ju akʼantam: “Ju uxintʼi tas chunchach ju lhipʼini”. Chai ju yuchi junilh: “Tam cientos alhcanti ju trigo iclhiʼani”. Chai ju xalapanac juni: “Anich ma ju xaʼalhiqui. Anavitʼi ju sastʼi junta najun ni va ochenta alhcanti ju lhipʼini”. 8 Pus ju xaʼucxtin naulh ni aktsʼiya na ixʼacʼatsananta ju anuʼ aʼokxchokʼonuʼ xalapanac ni cʼatsalh ta yu capuʼaktaijucanaʼ astan mas jantu sok tachi ju xanavi. Pus chunch ju xaʼajuni ju lapanacni ju Jesús chai astan nonchokopa: ―Ju lapanacni ju jantu quilhilaksi aktsʼiya palai tacʼatsai ta yu lai tatʼanavi tuʼuʼ ju ixtʼalapanacni. Palai jantu na chun talai ju yuʼunch ju tamispai ixchivinti Dios. 9 Pus ju quitʼin iclajunau ni apʼuʼaktʼaiʼutʼit ju aliʼin ju mintuminʼan. Pus ju chunch caʼalinaʼ ju miʼamigojniʼan va ixlacata ju xatumin ju ani lacamunutpaʼ ju xapʼuchʼalhcʼatnanatʼit ju uxijnan mas na tapuʼalactuʼunun ju aliʼin. Ju chunch acsni tavanan aniyaʼitʼit pus ju yuʼunch lhikʼach cataʼamaklhtayanananch lacachakaʼ lactʼiyan junta jonkʼalhita. 10 Pus ju jantu aʼokxchokʼonun ixlacata ju tuʼuʼ mas va lacatsʼunin pus vachuʼ jantu aʼokxchokʼonun ixlacata ju tuʼuʼ lhu. Chai ju aʼokxchokʼonun ixlacata ju tuʼuʼ lacatsʼunin pus vachuʼ aʼokxchokʼonun ixlacata ju na lhu. 11 Pus ni na ixʼaʼokxchʼokʼonun ixlacata ju xamakʼalit ju ani lacamunutpaʼ pus tis chavaich ju catalhilaksiyan chai cataxtakniyan ju vasalh makʼalit. Yuchi ni lai anaviyaʼitʼit ju ixlhichʼalhcat ju Dios. 12 Pus ju mintuminʼan ju ani lacamunutpaʼ va tamachʼixtaknitan ju Dios. Jantu miʼanuʼan. Chai ni ixpʼuʼaʼokxchʼokʼonunatʼit ju anuʼ tumin mas jantu miʼanuʼan pus ju Dios jantu catitaxtaknin ju palai kʼai ixmakʼalit ju miʼanuʼan caʼixva ju ixjonkʼalhi lactʼiyan. 13 Ju tam xalapanac jantu lai pumatʼui cativa ju ixʼucxtin ju vaktam. Pus aktsʼiya camapainiyaʼ ju pumatam chai jantu tuʼuʼ calhiulayaʼ ju akʼantam. U ni jantu para aktsʼiya calhilaksiyaʼ ju pumatam chai jantu tuʼuʼ canaviyaʼ cuenta ju apumatam. Pus vana va chun ju uxijnan. Jantu lai atʼimapʼainitʼit ju Dios chai vana amapʼainitʼit ju tumin. 14 Pus ju fariseonin na ixtamapaini ju tumin. Chai acsni takʼasmatlh tachi chun ju ani chivinti pus va ixtalhitsʼiʼinch ju Jesús. 15 Para ju yuchi ajunich: ―Ju uxijnan tʼalacʼasuyatʼit laʼixʼucxlacapuʼan ju lapanacni tachi ju na va soknicʼa untʼatʼit. Para ju tuʼuʼ lamiʼatsucuntiʼan ju kʼox talhiulai ju mintʼalapanacniʼan ju Dios va lhitsʼisi ni tamispaniyan ju miʼalhunutʼan ju yuchi. 16 Acsni tucaʼ ixtʼajun ju Xivan ju ixʼamakpaxanaʼ pus ju lapanacni ixtaquiclacaʼi ju ixlhamapʼaksin ju Moisés chai ixchivintiʼan ju lapanacni ju ixtanajun ixchivinti Dios. Para tus acsni milh ju Xivan tus chavai pus ju lapanacni ajuncan ni jantu anch lacalhamapʼaksin ju alin ju atsucunti jonkʼalhita. Alai va lhinomputun ju Dios laʼisʼatsucuntiʼan ju lapanacni. Chai ni takʼasmatʼa ju chunch chivinti pus pumalhu slivasalh tanavi cuenta ixlhichux ixʼalhunutʼan ni calhinaulh ju Dios laʼisʼatsucuntiʼan. 17 Para mas tamch ju ajuncan ju lapanacni ju chavai para aktsʼiya jonkʼalhita ju makʼaniya ixchivinti Dios. Pus palai jantu xcai ni catsʼankʼa ju lactʼiyan chai ju lacatʼun. Palai xcai ni jantu lhitapalai cava ju tuʼuʼ laʼixlhamapʼaksin Dios mas va lacatsʼunin cava. 18 Va tichi chavaich ju camaconaʼ ju ixʼamachakaʼ chai catʼatsucuchokoyaʼ akʼantam pus alactuʼununta. Chai ju catʼatsucuchokoyaʼ ju va maconcanta pus vachuʼ alactuʼununta. 19 Pus ixʼalin pumatam jokʼat ju na makʼaliʼ ixjunita. Chai ju yuchi ixlakchʼi ju smumu ixpumpuʼ tachi ixtalakchʼi ju ucxtinin. Vachuʼ ixlakchʼi ju lackʼox ixpumpuʼ ju lino ixjuncan. Chai chux avilhchan ixnavi ju kʼai lacvaiti. 20 Chai vachuʼ ixʼalin pumatam quilhpatiniʼ ju Lázaro ixjuncan. Chai ju yuchi na ixlacatsʼitsʼita. Pus ixmamacan vanin laʼixquilhtalacxtutu ju anuʼ makʼaliʼ. 21 Chai na ixʼuputun mas va yuchi ju xaʼatanxajnaʼ ju ixniʼ ju anuʼ makʼaliʼ. Chai vachuʼ ju xkʼoyun ixtalakmin chai istasnaunich ju ixlacatsʼitsʼi. 22 Pus chilh avilhchan acsni nilh ju anuʼ quilhpatiniʼ chai talhiʼalh ju anquilhnin ju lactʼiyan junta vachuʼ vilhcha ju Abraham. Chai vachuʼ nilh ju anuʼ makʼaliʼ. Chai macnucalh. 23 Pus ju anuʼ makʼaliʼ na ixmakʼalhkʼajnan junta taʼan ju tanita ju jantu talhilacaʼanta ju Jesús. Chai alacʼavanalh chai laktsʼilh ju Abraham ixlhimakat chai ju Lázaro ni anch ixvi vachuʼ. 24 Pus ju acsnich ju yuchi pʼas chivinilh. Junich ju Abraham: “Quimpai Abraham lamapainin aqʼuiʼaktʼaiʼutʼich ju quitʼin. Amalakʼachʼachitʼich ju Lázaro. Chach quimilh kʼavaniniʼ lacaxcan ju quisimakʼat mas va laʼixkʼelili ixmacaʼ ni aquimatsʼucʼuncʼulhch ni na ictʼajun makʼalhkʼajnanch ju ani lacajipi”. 25 Para ju Abraham junich: “Quintsʼalh apʼastʼactʼich ni amaklhtʼayanantʼa chux ju kʼox mintaxtokni acsni ixtʼaʼuncaʼ. Para ju Lázaro na ixmakʼalhkʼajnan. Para ju chavai ju yuchi alin ju ixkʼachat ju ani chai ju uxintʼi makʼalhkʼajnan. 26 Chai jantu va yuchi. Para vachuʼ junta vilatʼit ju uxijnan quilhpamacatutam junta pucutucanta. Ju chunch ju tataxtuputun ju ani ni va cataʼamputulh ju anch jantu lai. Nin lai cataxtucha xamatiʼ ju camimputunach ju ani”. 27 Pus ju acsnich ju anuʼ makʼaliʼ junich: “Pus na ictapaininiyan ji quimpai. Amalakʼachʼatʼich ju Lázaro laʼixchakaʼ ju quimpai. 28 Tatʼajuncaʼ ixpumaquisiʼan ju quiʼalakʼavin. Chach ancha ju yuchi ajuniniʼ ju ixchivinti Dios ni jantu catamilh ju yuʼunch vachuʼ ju ani junta icmakʼalhkʼajnan”. 29 Para ju Abraham junich: “Ju yuʼunch tapacxanta ju ixchivinti ju Moisés chai ixchivintiʼan ju lapanacni ju ixtanajun ixchivinti Dios. Chach takʼasmatniyanta ju yuʼunch”. 30 Para ju makʼaliʼ junich: “Janti quimpai Abraham. Para ni xamatiʼ ju nita calokʼonchokolh chai caʼalakʼalh pus catamaconaʼ ju ixʼalactuʼuntiʼan”. 31 Para ju Abraham junich: “Ni jantu takʼasmatputun ixchivinti ju Moisés chai ju lapanacni ju ixtanajun ixchivinti Dios pus vana jantu camalacaʼinicalh mas va calokʼonchokolh tam xamatiʼ ju nita chai calakʼalh”.
1 Ju Jesús ajunich ju ixʼamamakaʼui: ―Jantu tavanan ju jantu caʼalilh ju pukʼalhkʼoscan. Para painich ju anuʼ lapanac ju amakʼalhkʼosnun. 2 Palai kʼox caʼixva ju ixlacata ni caʼixpixtuchʼimucʼacalh ju tsasnatpuchʼipi chai caʼixmacaʼancalh lacaʼalama acsni tucaʼ ixmakʼalhkʼosui tam xamatiʼ. Palai na macxcai cava ni camakʼalhkʼosu tam xamatiʼ ju jantucaʼ kʼox quilhilacaʼanta. 3 Alhistʼacchʼokʼocʼantʼit miʼakstuʼan. Chai ni calactuʼuyan tam milakʼau pus akʼaich. Chai ni lhilatolai ni alactuʼunulh chai najun ni jantu catailhiʼanaʼ pus amacʼacxaninch. 4 Mas paktujun calactuʼun ju tam vilhchan chai paktujun ju calakmin ju tam vilhchan chai cajunin ni alactuʼun chai catapaininiyan ni amacʼacxaninch chai najun ni jantu canavichokoyaʼ pus amacʼacxaninch. 5 Chai ju ixtamalakachan ju Jesús tajuni: ―Aquilaʼaktaijuyau ni lai palai aclalhilaksiyau. 6 Para ju Jesús ajuni: ―Ju satalhtsʼi mostaza na lacatʼicstʼi para lakʼajunta chai astan kʼai qʼuiu jun. Pus vana va chun ju uxijnan. Mas va lacatsʼunincaʼ ju quilalhilaksiyau para ni vasalh quilalhilaksiyau pus laich aʼunaʼitʼit ju ani makakʼai qʼuiu ni catatipʼulhulhch. Caʼalh lacaʼalama. Chai catalacaʼiniyanch. 7 Ju pumatam milhiʼuxijnan laich caʼalilh ju ixlapanac ju caʼalhoknulh u camalhistacni ju ixborregojni. Pus ju yuchi acsni caminchalh laʼixlhichʼalhcat ja laich aʼun ni soko catavi lacamixa chai cavailh. 8 Ca jantu. Alai aʼunaʼich ni calakʼoxiniyan ju mivaiti. Pus ju yuchi calakʼoxiyaʼ ju ixpumpuʼ chai caʼiniyanch ju mivaiti tus acsni alhilayaʼich. Tus acsnich aʼunaʼich ni cavenaʼ ju yuchi. 9 Chai astan acsni navikʼota chux tuchi ixlhiʼunich pus ju uxintʼi jantu uni lakʼailaktsʼiuch. 10 Pus vana va chun lamiʼatsucuntiʼan ju uxijnan. Acsni navikʼotʼatʼit tachi chun ju ixtalhijuntan ju Dios pus va anaʼuntʼit ni jantu kʼox xalapanacni untʼatʼit ni jantu tuʼuʼ atumpa ju xanaviyatʼit. Va yuchi ju ixlhiʼuncʼantʼatʼit ixnavica. 11 Pus ju Jesús acsni ixʼanta ju lakʼachakʼan Jerusalén pus puʼalh junta mactai ju xaʼestado Samaria chai ju xaʼestado Galilea. 12 Pus acsni tanucha lakatam lakʼachakʼan pus tamilh pakxtoknin pumacau lapanacni ju na ixtalacatsʼitsʼita chai ju istsʼitsʼiʼan va ixtapuchʼiʼan. Para ju yuʼunch ixlhimakat tataya. 13 Chai pʼas tachivinilh. Tajuni ju Jesús: ―Jesús amamakaʼunuʼ. Lamapainin aquilaʼaktaiju ju quijnan. 14 Chai ju Jesús acsni alaktsʼilh pus ajunich: ―Apʼinchitʼit talacasuninin ju palijni. Pus chunch ixtalhilanita ju lapanacni acsni ixtalacatsʼitsʼita chai astan palaich ixtajun. Pus ju anuʼ ixpumacauʼan taʼalh. Chai acsni ixtaʼanta pus lana palaich tava. 15 Pus ju pumatam sia lhiyuʼunch acsni laktsʼilh ni palaich ixjunita pus taspʼitchokolh. Minchokolh junta ixya ju Jesús. Chai na pʼas ixchivinin acsni lakʼayalh ju Dios. 16 Chai lana taquilhputanilh ju lacatʼun junta ixchʼantaiti ju Jesús chai junilh lakʼailaktsʼiuch. Chai ju yuchi amachakaʼ ju xaʼestado Samaria ixjunita. 17 Pus ju acsnich ju Jesús naulh: ―Ja jantu pumacau ju palai xatajun. Tas anchach ju xataʼan ju ixpumanajatsiʼan. 18 Ja jantu xamatiʼ ju xataspʼitacha ni laich catalakʼaya ju Dios. Ja va yuchi ju ani ju jantu quintʼaʼamachakʼan junita. 19 Pus ju acsnich ju Jesús chani xajuni ju anuʼ ju palaich xajun: ―Atʼaich. Aʼinchich. Palaich xaʼun ni vasalh xaqʼuilhilaksi. 20 Chai ju fariseonin tasacmi tavananch ju cachinaʼ ju avilhchan acsni calhinonaʼ ju Dios. Chai ju Jesús ajunich: ―Jantu lai laktsʼincan acsni chin ju avilhchan acsni calhinonaʼ ju Dios. 21 Nin yuchi ni lai catanaulh: “Alaktsʼich. Ani ya”. U “Alaktsʼich. Anuʼ vilhcha”. Jantu lai chun canoncalh ni laʼisʼatsucuntiʼan ju lapanacni ju lhinajun ju Dios. 22 Chai ajuni ju ixʼamamakaʼui: ―Caminaʼ avilhchan acsni alaktsʼimpʼutʼunaʼitʼit ju anuʼ pantsʼiquis acsni acminchokoyaʼ ju quitʼin ju quimalakachatachilh ju Dios ni lapanac actsucuyaʼ ju ani. Para jantu acs ju alaktsʼinaʼitʼit. 23 Pus ju aliʼin catajunan: “Alaktsʼintʼit ju ani. Ca va nomputun ni caminchokoyaʼ”. U catajunan: “Alaktsʼintʼit ju anuʼ ju tʼajun tapasanaʼ”. Para jantu apʼitʼit nin yuchi ni lai achʼakʼokʼatʼit. 24 Pus ju tuʼuʼ makʼalipniʼ va tam pantsʼiquis mapulhcukʼojui ju ixlhilacaputsʼun ju lactʼiyan chai makat laktsʼincan. Pus vana va chun cajunaʼ acsni acminchokoyaʼ ju quitʼin ju quimalakachatachilh ju Dios ni lapanac actsucuyaʼ ju ani. Va tam pantsʼiquis acchinaʼ chai chux aquintalaktsʼinaʼ. 25 Para jantu chavai lana ju catapasayaʼ ju chunch. Alai tasqʼuini ni pʼulhnan aclhimakʼalhkʼajnanaʼ lhu taxtokni. Chai ju lapanacni ju tatʼajun ju chavai jantu aquintalhilaksiyaʼ. 26 Tachi ju ixtatʼajun ju lapanacni acsni ixtʼajun ju Noé pus vana va chunch catajunaʼ acsni acminchokoyaʼ ju quitʼin ju quimalakachatachilh Dios ni lapanac actsucuyaʼ ju ani. 27 Pus va chunch ju tatailhiʼalh tachi aktsʼiya ixtalai. Ixtalacvajin. Ixtaʼakʼotnun. Ixtatamakʼaxtʼokʼach chai ju chakolun ixʼaʼican. Chai chunch ju talalh tus acsni chilh ju avilhchan ni tanu ju Noé ju laʼixbarco. Chai milh ju akmuxtut chai amamuxtukʼo tachi chun ju yuʼunch. 28 Chai chunch vachuʼ talalh ju lapanacni ju ixtatʼajun acsni ixtʼajun ju Lot. Tatailhiʼalh isʼatsucuntiʼan tachi aktsʼiya ixtalai. Ixtavajin chai ixtaʼakʼotnun chai ixʼatamonan chai istaʼastʼanan chai ixtaʼachʼananan chai ixtayajui ixchakaʼan. 29 Para ju avilhchan acsni taxtucha ju Lot ju lakʼachakʼan Sodoma pus lana mintacha lactʼiyan ju jipi chai ju azufre. Chai lana amaknikʼo ixchuxʼan ju amachakʼan anch. 30 Pus vana va chun catapasayaʼ acsni actalacasuchokoyach ju quitʼin ju quimalakachatachilh Dios ni lapanac actsucuyaʼ ju ani. 31 Pus ju acsnich ju vilhcha laʼisʼakstiʼ ixchakaʼ jantu catitakʼalhtaju chai catanu laʼixchakaʼ ni va caʼiputulh ju ixtaxtokni. Vana va chun ju tʼajun chʼalhcatnaʼ lacacuxtu. Jantu catiminchokolh laʼixchakaʼ iniʼ tuʼuʼ. 32 Apʼastʼactʼit ni matsat xatapalai ixʼamachakaʼ ju Lot acsni talakʼaspʼitlh. 33 Pus va tichi chavaich ju va yuchi canavi cuenta ju ixmaktasqʼuinit ju isʼatsucunti pus jantu catiʼalilh ju isʼatsucunti jonkʼalhita ju lactʼiyan. Para va tichi chavaich ju jantu va yuchi canaviyaʼ cuenta ju tuchi maktasqʼuini laʼisʼatsucunti para alai canaviyaʼ cuenta ixtaxtokni Dios pus ju yuchi caʼalinaʼ isʼatsucunti ju jonkʼalhita ju lactʼiyan. 34 Acsni acminchokoyaʼ ju quitʼin pus cataʼalinaʼ ixtʼiyunʼan ju kʼaixtam tamanalh lacaputaman ju anuʼ atatsʼisni. Ju pumatam calhiʼancanaʼ ju lactʼiyan chai ju pumatam catamaconach. 35 Chai ixtʼiyunʼan tʼacunin ixlhiʼacsni catatʼonaʼ squitinin. Ju pumatam calhiʼancanaʼ. Ju pumatam catamaconach. 36 Ixtʼiyunʼan lapanacni catachʼalhcatnanaʼ ju lacacuxtu. Ju pumatam calhiʼancanaʼ. Chai ju pumatam catamaconach. 37 Pus ju ixʼamamakaʼui tajunich: ―Tas anchach ji ucxtin ju catapasayaʼ ju chunch. Chai ju yuchi ajuni lakatam chivinti ju ixnoncan ju acsni: ―Vanta anchach ju catamayach ju lacatuna pus anchach ju catatakʼaixtʼokʼaʼ ju chʼunin. Ju chunch va nomputun ni aktsʼiya caʼamamakʼalhkʼajnicanaʼ ju tachi ju va tanita tajunita laʼixmacni Dios ni jantu talhilaksi ju yuchi.
1 Ju Jesús alacjuni ju ixʼamamakaʼui lakatam chivinti ju apumavasalanilh ni va tachi catatʼachivinilh ju Dios chai jantu tavanan catanaulh ni jantu lhitapalai ni catatʼachivinilh ju yuchi. 2 Pus ajunich: ―Ju lakatam lakʼachakʼan ixʼalin pumatam lacatʼicstʼi ucxtin. Chai ju yuchi jantu ixtalhoni ju Dios chai jantu ixʼatalhoni ju ixtʼalapanacni. 3 Chai vachuʼ ixʼalin ju anch pumatam chakoʼulh ju va ixnimacontilacanta. Pus ju yuchi va tsa ixlakʼan ju anuʼ ucxtin. Ixjuni: “Aqʼuilakʼoxininch ju quilhamakʼan ixlacata ju quintʼalasan”. 4 Pus ju anuʼ ucxtin na lakalhu avilhchan jantu ixnavini ju tuchi isqʼuini ju anuʼ chakoʼulh. Para astan pus naulh laʼixʼalhunut: “Ju quitʼin jantu ictalhoni ju Dios nin tuʼuʼ iclhiulai ju quintʼalapanacni. 5 Para va ixlacaʼatalh ni na jeks quimavai ju ani chakoʼulh yuchi aclhilakʼoxiniyaʼ ju ixlhamakʼan. Ni jantu pus ca na jeks aquimavakʼalhiyaʼ”. 6 Chai ju Jesús ajunich ju ixʼamamakaʼui: ―Anavitʼit cuenta tuchi naulh ju anuʼ lacatʼicstʼi ucxtin ju jantu sok ixlakʼoxi ju tuʼuʼ lhamakʼan. 7 Chai ja va a ti yuchach ju Dios jantu caʼalakʼoxiniyaʼ ju ixlhamakʼanʼan ju ixlapanacni ju asacxtuta ju yuchi acsni tatapainini chux tuncujun chai chux atatsʼisni. Tʼas anonaʼitʼit. Ja jantu sai catiʼalakʼoxinilh ju ixlhamakʼanʼan. 8 Iclajunau ni vatsʼalhti caʼaʼaktaijuyaʼ. Pus mas chunch ju canaviyaʼ ju Dios para ja acʼalhitajuyaʼ ju yuʼunch ju vasalh quintalhilaksi acsni acminchokoyaʼ ju quitʼin ju quimalakachatachilh ju Dios ni lapanac actsucuyaʼ ju ani. 9 Ju Jesús ajuni ju ani chivinti ixlacata ju yuʼunch ju ixtanajun ni lackʼoxin lapanacni ixtajunita chai jantu tuʼu ixtalhiulai ju aliʼin. Naulhch: 10 ―Pumatʼuiʼan lapanacni taʼalh lacpujitat tʼachivinin ju Dios. Ju pumatam fariseo ixjunita chai ju pumatam achʼiniʼ ixjunita. 11 Pus ju anuʼ fariseo taya chai tsuculh juniniʼ ju Dios ta yu ixjunita. Naulh: “Icjunan lakʼailaktsʼiuch ji Dios ni jantu chun icjunita tachi ju aliʼin lapanacni. Pus ju yuʼunch va akʼalhonin tajunita chai aʼokxchokʼonin chai va tatʼatsucui ju jantu ixʼamachakaʼan. Nin chunch icjunita tachi ju ani ya achʼiniʼ. 12 Ju quitʼin ictascajai paktʼui ju tamin semana. Chai icxtʼakʼa ju lacpujitat lactsʼunin tachi chun ju iclhajai”. 13 Chunch ju naulh ju anuʼ fariseo. Para ju achʼiniʼ makat ixyacha. Chai ju yuchi jantu lana ixlacaʼamputun ju lactʼiyan. Va ixtanquilhacsacan ni chunch ju ixlacan ju acsni ni tuʼuʼ ixlhixcani ixʼalhunutʼan. Chai ju yuchi ixnajun: “Ji Dios lamapainin aqʼuiʼaktʼaiʼutʼich ni na icʼalactuʼunuʼ”. 14 Pus iclajunau ni Dios laktsʼilh ni soknicʼa ju anuʼ achʼiniʼ acsni anchokolh laʼixchakaʼ. Ju fariseo jantu. Pus chunch ju pulaktsʼincalh ju anuʼ achʼiniʼ ni calalacatʼicstʼicanaʼ va tichi chavaich ju lakʼayachokocan isʼakstu. Para va tichi chavaich ju calalacatʼicstʼichokocalh isʼakstu pus ju yuchi calakʼayacanaʼ. 15 Chai alhiminicalh ju askʼatʼan ju Jesús ni caʼamokslanilh ixmacaʼ laʼixlacatunaʼan chai catapaininilh ju Dios ixlacataʼan ni kʼox catatsuculh. Para acsni taʼalaktsʼinilh ju ixʼamamakaʼui pus taʼalackʼaima ju ixtalhichaʼan ju isʼaskʼatʼan. 16 Para ju Jesús atʼasanilh ju askʼatʼan chai chani ajuni ju ixʼamamakaʼui: ―Amacʼaʼuntʼit ju askʼatʼan. Chach quintalakmilh. Jantu asaspʼitʼit ni quintalhilaksich juyuʼunch. Chai va tichi chavaich ju aquilhilaksiyaʼ tachi ju quintalhilaksi ju ani tayanalh askʼatʼan yuchi ju lai catanuyanta ju lactʼiyan. 17 Pus slivasalh ju iclajunau. Tachi chun ju lapanacni ju jantu quilhilaksi ju quitʼin tachi ju tam askʼatʼa lhilaksi ju ixpai pus jantu tavanan lai catitanu junta lhinajun ju Dios ju lactʼiyan. 18 Chai pumatam xakʼai sacmilh ju Jesús. Junich: ―Amamakaʼunuʼ ju uxintʼi na kʼox lapanacʼat. Tijuch ju lai acnavi ni caʼalilh ju quiʼatsucunti ju jonkʼalhita. 19 Chai ju Jesús junich: ―Ju uxintʼi ni naʼun ni va iclapanac pus tajuch ni va qʼuiʼuni ni ickʼox. Jantu xamatiʼ ju kʼox. Va yuchi ju Dios. 20 Ju uxintʼi cʼatsʼaich tuchi najun lamilhamapʼaksinʼan. Najun ni jantu atʼatsʼucʼu ju jantu miʼamachakaʼ. Jantu amaknitʼi xamatiʼ. Jantu akʼalhonan. Jantu anauch taʼaklhtamat chivinti ixlacata akʼantam. Atʼalhoninch ju mimpai chai ju minatich. 21 Pus ju anuʼ xakʼai junich: ―Tachi chun ju ani taxtokni icmuctaxtukʼota tus quilhitalacatʼicstʼin. 22 Pus ju Jesús acsni kʼasmatnilh ju ixchivinti junich: ―Va lakatam taxtokni ju tʼimakʼancʼacxniyan. Astʼakʼochiʼ chux ju miʼalinta chai ju tumin ju amaxtʼuyaʼ axtʼaknin ju quilhpatinin. Ju chunch ni caʼalinach ju mimakʼalit ju lactʼiyan. Chai acsni anavikʼoyaʼ chux ju ani pus atʼatʼich. Aqʼuinchʼakʼokʼach. 23 Para ju yuchi acsni kʼasmatnilh ixchivinti Jesús pus slivasalh na amakʼaninilh ni na kʼox makʼaliʼ ixjunita. 24 Chai acsni laktsʼilh ju Jesús ni na ixʼamakʼanininta pus naulh: ―Slivasalh na lhixcai ni lai catanu lactʼiyan tam makʼaliʼ. 25 Tachi ju tuʼuʼ camello ni jantu lai catitapasalh junta tilhucucu ju macscat pus vana va chun tam makʼaliʼ. Ju yuchi jantu lai catiʼalh tus lactʼiyan. 26 Pus ju ixtakʼasmatʼa ju ixchivinti tajunich: ―Ni na xcai tatakʼalhtaxtui ju makʼalinin pus tis chavaich ju lai catakʼalhtaxtulh. 27 Para ju Jesús ajunich: ―Ju va lapanac aktsʼiya palai tuʼuʼ lhiulai ju tuʼuʼ makʼalit. Palai jantu ixtaxtokni Dios. Para ju Dios lai mapaxani ixʼatalacpastʼacʼat. 28 Pus ju acsnich ju Pitaluʼ junilh ju Jesús: ―Pus ju quijnan icmaconkʼotauch chux quintaxtokni quincʼan chai iclachʼakʼokʼatauch ju uxintʼi. 29 Chai ju Jesús ajuni: ―Pus slivasalh ju iclajunau. Va tichi chavaich ju tamacajunta ixchakaʼ u ixpai u ixnati u ixʼalakʼavin u ixʼamachakaʼ u isʼaskʼatʼan va ixlacaʼatalh ni lhinajun ju Dios laʼisʼatsucunti chai chunch ju xalacasqʼuin ju yuchi pus palai na lhu ju caʼamaklhtayananaʼ ju chavai acsni tʼajuncaʼ ju ani chai ju astan caʼamaklhtayananaʼ ju isʼatsucunti jonkʼalhita. 31 Ju Jesús alacatam alhiʼalh ju ixpumacautʼuiʼan chai ajunich: ―Ju chavai caʼanauch ju lakʼachakʼan Jerusalén. Chai caʼuctaxtuyanta tachi chun ju taxtokni ju tatsʼokʼula ju makʼaniya lapanacni ju ixtanajun ixchivinti Dios. Caʼuctaxtuyaʼ tachi chun ju taʼatsʼoknulh ju quilacata quitʼin ju quimalakachatachilh ju Dios ni lapanac actsucuyaʼ ju ani. 32 Pus acmakʼaxtakcananta laʼixmacaʼan ju yuʼunch ju jantu quintʼaʼisraelitanin tajunita. Chai aquintalhitsʼiʼinach. Chai aquintajunach macxcai chivinti. Chai aquintalakachujvayach. 33 Chai astan acsni aquintalakanekmakʼoyach pus aquintamakniyach. Para ju ixlhilakatʼutu avilhchan aclokʼonchokoyaʼ. 34 Para ju ixʼamamakaʼui ju Jesús lana jantu ixtamachakxai ju ani chivinti. Lana jantu ixtacʼatsai tuchi ixnajun ju Jesús. Jantu lai ixtapastʼacʼa tuchi canomputulh ju chivinti ju xaʼalacjuni ju Jesús. 35 Pus acsni vanin ixchaʼamputun ju Jesús ju lakʼachakʼan Jericó pus pumatam alakʼachʼix ixvi laʼixquilhtuʼ ti. Isqʼuinch ju tumin. 36 Chai ju yuchi acsni kʼasmatlich ni ixtatʼajun tapasanin na lhu lapanacni pus asacminilh tichi chavaich. 37 Pus tajuni ni ixtʼajun tapasanaʼ ju Jesús amachakaʼ Nazaret. 38 Pus ju acsnich na pʼas ju chivinilh ju anuʼ alakʼachʼix chai junilh ju Jesús: ―Jesús istsʼalhʼat ju kʼai ucxtin David. Lamapainin aqʼuiʼaktʼaiʼutʼich. 39 Para ju ixtaʼapʼulananta takʼailich. Tajuni ni va sek catavi. Para va apalai pʼas ju ixchivinin. Ixnajun: ―Ji istsʼalh David lamapainin aqʼuiʼaktʼaiʼutʼich. 40 Pus ju acsnich ju Jesús lana taya. Chai lhinaulh ixʼica. Chai acsni lakchaʼalh pus sacmilh. Junich: 41 ―Tijuch ju acnaviniyan. Chai ju yuchi junich: ―Quiʼucxtin va icʼalacʼavamputun. 42 Chai ju Jesús junich: ―Alacʼavanch. Pus laich alacʼavanan va ixlacaʼatalh ni xaqʼuilhilaksich. 43 Pus lana alacʼavanalh chai chʼakʼokʼalh ju Jesús. Ixlakʼayaʼanta ju Dios ju lacati. Chai chux ju lapanacni vachuʼ talakʼayalh ju Dios acsni talaktsʼilh.
1 Ju Jesús tanucha ju lakʼachakʼan Jericó chai ixtapasatilaputun. 2 Para ixvi ju anch pumatam lapanac ju Zaqueo ixjuncan. Ju yuchi xakʼai achʼiniʼ ixjunita chai slivasalh na makʼaliʼ ixjunita. 3 Chai ju yuchi ismispaputun ju Jesús tichi chavaich. Para jantu lai islaktsʼin va ixlacaʼatalh ixtalhavat lapanacni ju ixtalakʼanta ju Jesús chai na putantʼicstʼi ixjunita ju Zaqueo. 4 Pus atsʼalaʼalh junta capuʼanach ju Jesús. Chai tocʼacha laʼixʼacatan lakatam kʼai qʼuiu ni laich calaktsʼinaʼ ju Jesús acsni catapasayach ju anch. 5 Pus acsni chaʼalh ju Jesús ju anch pus talakstʼalh chai laktsʼilh chai junich: ―Zaqueo vatsʼalhtich atʼakʼalhtʼaʼutʼich. Tasqʼuini ni acʼastacnalh lacatsʼunin ju laminchakaʼ ju chavai. 6 Pus ju Zaqueo vatsʼalhti takʼalhtajulh lacaqʼuiu chai lhikʼach amaklhtayanalh ju Jesús laʼixchakaʼ. 7 Para acsni talaktsʼilh ju lapanacni pus ixchuxʼan talhichivinilh ju Jesús. Tanaulh ni laich xatanuyacha laʼixchakaʼ ju anuʼ lapanac ju na alactuʼunuʼ ixjunita. 8 Pus ju acsnich ju Zaqueo taya chai junilh ju Jesús: ―Ju chavai ji quiʼucxtin aclhtam ju quimakʼalit acʼaxtakniyach ju quilhpatinin. Chai ju iclhiʼokxchokʼomaxtulh tuʼuʼ pus paktʼatʼi acʼaxtaknichokoyach ju ixtumin. 9 Chai ju Jesús junich: ―Chavai xatʼakʼalhtʼaxtʼuyatʼit ju uxintʼi chai tachi chun ju tatanumanalh laminchakaʼ. Ju chavai vasalh ixpapanti Abraham untʼatʼit ni quilalhilaksiyauch tachi ju lalh ju Abraham. 10 Pus yuchi iclhiminta ju quitʼin ju quimalakachatachilh ju Dios ni lapanac actsucuyaʼ ju ani. Icmilh puxconaʼ ju tsʼankʼata ni laich acʼamakʼalhtaxtuyaʼ. 11 Ni ixtatʼajun kʼasmatnin ju Jesús pus ju yuchi tailhiʼalh ixchivinti chai ajunilh alakatam chivinti ju caʼapumavasalaniyaʼ tuchi nomputun acsni najun ni calhinonaʼ ju Dios. Chai apujunilh chunch ni vanin ixchaʼamputun ju Jerusalén chai ju ixtatʼaʼanta lacati ixtalhiulai ni lana ucxtin cajunaʼ ju Jesús. 12 Pus chani ajuni: ―Pumatam xakʼai lapanac taxtulh laʼixlakʼachakʼan chai alh makat. Va alh amaklhtayanaʼ ju ixpuʼucxtin chai naulh ni caminchokoyach acsni caʼamaklhtayananach. 13 Para acsni tucaʼ ixʼan pus atʼasanilh pumacau ixlapanacni chai axtaknilh lakcavin tumin chai ajunich: “Apʼuchʼalhcʼatnantʼit tus acsni actaspʼitʼanta”. 14 Para ju ixtʼaʼamachakʼan talhixcailich chai amalakachacha ju alhtanin ni cataʼalh taimayonin ju anuʼ lapanac. Chai acsni talakchilh tajunich: “Jantu iclacasqʼuinau ni uxintʼi ju quiʼucxtin quincʼan aʼuntʼi”. 15 Para ju yuchi aktsʼiya amaklhtayanalh ju ixpuʼucxtin. Chai acsni taspʼitchokocha pus lhinaulh ixʼatʼasanica ju anuʼ ixlapanacni ju ixʼaxtaknita ixtumin. Va iscʼatsaputun tijuch ju punavilh kʼantam kʼantam. 16 Chai milh ju xapʼulhnan chai junich: “Quiʼucxtin ju mintumin lhajachokolh alakcau”. 17 Chai ju ucxtin junich: “Kʼoxich. Na kʼox xalapanacʼat. Pus ni laich xamuctʼaxtʼui ixlacata ju va lacatsʼunin pus alhinonaʼich ju lakacau lakʼachakʼan”. 18 Chai milh ju apumatam. Junich: “Quiʼucxtin ju mintumin lhajachokolh alakquis”. 19 Chai vana va chunch ju junilh ju ixʼucxtin tachi ju junilh ju xapʼulhnan. Junich: “Ju uxintʼi laich alhinonaʼ lakaquis lakʼachakʼan”. 20 Chai astan mimpa apumatam chai ju yuchi juni: “Quiʼucxtin anich iclhiminitan ju mintumin. Va xacpachʼimakʼata lacapayu. 21 Pus va xactalhoniyan ju uxintʼi ni iccʼatsaich ni na pʼas ju miʼalhunut ju uxintʼi. Pus alakʼach. Yuʼunch ju milapanacni ju talacsununiyan ju micebada ni laich lhu amakʼaixtʼokʼaʼ ju uxintʼi mas jantu tuʼuʼ tapulhajai ju yuʼunch. Pus yuʼunch ju tachʼalhcatnan ni laich na lhu cajunaʼ ju micebada ju uxintʼi”. 22 Pus ju acsnich ju ixʼucxtin junich: “Na kʼai unitʼa ji xalapanac. Pus va ixlacata ju minchivinti miʼakstu ju acmucʼaniyan ju mintalakʼalhin. Pus ju uxintʼi nauch ni cʼatsʼaich ni na pʼas ju quiʼalhunut. Chai yuʼunch ju quilapanacni ju tachʼalhcatnan chai talacsunui ju quicebada ni lai na lhu acmakʼaixtʼokʼaʼ ju quitʼin. 23 Pus ni sala chunch icjunita pus tajuch ni jantu xamakʼai ju quintumin junta makʼacan ju tumin. Ju chunch acsni xacminchokota pus xacʼamaklhtayananchokolh ju quintumin chai chux ju isʼaskʼatʼa”. 24 Pus ju acsnich ju xaʼucxtin ajunich ju vanin ixtayanalh: “Atʼaiʼinitʼit ju tumin chai axtʼaknitʼit ju ixpacxanta ju lakcau”. 25 Para ju yuʼunch tajuni: “Para ji quiʼucxtin ju yuchi alin lakcau”. 26 Para ju xaʼucxtin ajuni: “Pus islivasalh ju iclajunau. Va tichi chavaich ju pacxanta tuʼuʼ pus palai lhu caxtaknicanaʼ. Para ju matich tuʼuʼ pus cataiʼinicanaʼ ju tuchi lacatsʼunin ixʼalinta. 27 Chai ju anuʼ quintʼalaxcainin ju jantu ixtalacasqʼuin ni laich acʼalhijunilh pus aquilalhiminiuch ju ani chai amaknitʼit laquiʼucxlacapuʼ”. 28 Acsni nonkʼo ju ani ju Jesús pus alhtananchokopa laxati ju Jerusalén. 29 Chai chaʼalh ju akstijun junta na lhu ixya ju xaqʼuiu ju olivo juncan. Vanin ju lakʼachakʼanixni Betfagé chai Betania. Pus ju acsnich ju Jesús amalakacha ixtʼiyunʼan ixtamamakaʼun. 30 Ajunich: ―Aʼinchitʼit ju anuʼ tasui lakʼachakʼan chai acsni atʼanutʼachitʼit pus alhitʼaʼuyaʼitʼit lakatam sastʼi puru chʼiyocanta. Tucaʼ xamatiʼ putocʼata tavanan. Pus axkʼotʼayaʼitʼit chai aquilalhiminiyau. 31 Chai ni xamatiʼ catasacmiyan tajuch ni va xkʼotʼayatʼit pus va aʼunaʼitʼit ni maktasqʼuini ju miʼucxtinʼan. 32 Pus taʼalh ju anuch ixʼamalakachacan chai chunch ju talhitajulh tachi ixʼajuncanta. 33 Chai acsni ixtatʼajun xkʼotainin ju puru pus ju amanavinin tajunich: ―Tajuch ni va xkʼotʼayatʼit ju quimpuru quincʼan. 34 Chai ju yuʼunch tajunich: ―Ni va maktasqʼuini ju quiʼucxtin quincʼan. 35 Pus yau ajunilh chai talhiminilh ju Jesús. Chai taʼakxchʼamucʼalh ixcutunʼan ju puru. Chai tamucʼalh ju Jesús. 36 Chai acsni alhtanalh ju Jesús ju laxati Jerusalén pus ju ixtalhavat lapanacni ixtamamalhiʼanta ixcutunʼan ju lacati. 37 Chai acsni vanin ixtachaʼamputun junta lhiʼatajuntinicʼach ju anuʼ akstijun junta lacya ju xaqʼuiu olivo pus chux ju ixtalhavat ju ixʼamamakaʼui na ixtakʼachanch. Na pʼas ixtachivinin acsni tatsuculh lakʼayanin ju Dios. Ixtalakʼayai ixlacata tachi chun ju lhamakʼan ju ixtalaktsʼinta. 38 Ixtanajun: ―Paxcat ju ani xakʼai ucxtin ju minta laʼixtapakaʼut ju Dios. Ju chavai alin ju akʼoxamixnit ju lactʼiyan. Chach lakʼayacalh ju Dios. 39 Para ju acsnich ju aliʼin fariseonin ju ixtamakminta tajunich ju Jesús: ―Amamakaʼunuʼ akʼaich ju miʼamamakaʼunin. 40 Para ju Jesús ajunich: ―Iclajunau ni va sek catalactavi ju ani minta lapanacni pus catalactʼasalh ju chiux chai aquintalakʼaya. 41 Chai acsni vanin chaʼalh ju Jesús chai laktsʼilh ju lakʼachakʼan Jerusalén pus na lhikʼalhulh. 42 Naulh: ―Na kʼox ixva ni ixmachʼakxatʼit ju chavai acsni iclatʼavilau ni quilacata lai aʼunchʼokʼotʼit ixʼamigojni ju Dios. Para ni jantu chun xalayatʼit pus ju chavai jantu alakʼaʼinicʼanaʼitʼit ni laich amachʼakxayaʼitʼit. 43 Na kʼox ixva ni ixmachʼakxatʼit ni cachinaʼ ju avilhchan acsni kʼalhtankʼai catamucʼayaʼ ju tʼun ju mintʼalaxcaiʼan laʼixtalakachoko ju milakʼachakʼanʼan chai catalakʼaxkʼavitnuyan chai jantu jintaʼ lai atʼipʼutʼaxtʼutʼit. 44 Chai catamaktakʼoyach ju milakʼachakʼanʼan. Chai catamaknikʼoyan chux ju uxijnan ju tʼonatʼit anch. Jantu catamaconaʼ ju tuʼuʼ chiux ju va calaʼucxtocʼalh ju ixtʼachiux ju lakʼachakʼan. Pus chunch catanaviniyan ni jantu quilamispayau ju quitʼin ju icDios ju chavai avilhchan acsni iclalakmintauch. 45 Ju acsnich ju Jesús tanuchalh laʼixpujitatʼan ju istʼaʼisraelitanin chai tsuculh alactixcoxtunuʼ tachi chun ju ixtaʼulata ixlhistʼatʼan chai ju ixtaʼatamonanch ju anch. 46 Ixʼajuni: ―Laʼixchivinti Dios tsʼokcanta junta chani najun: “Ju quinchakaʼ xachakaʼ junita junta tʼachivincan ju Dios”. Chunch ju najun lacaʼatsʼoknut. Para ju uxijnan va tachi ixchakaʼ ju akʼalhaunin lhimalacxtʼuyatʼit. 47 Pus chux avilhchan ixʼamalaninin ju Jesús ju lacpujitat. Para ju xalackʼajin palijni chai ju yuʼunch ju na ixtalhatalanininta ju ixlhamapʼaksinʼan ju istʼaʼisraelitanin chai ju xalackʼajin ju lakʼachakʼan Jerusalén va ixtamakniputun. 48 Para jantu lai ixtalhitajuni ta yu laich tuʼuʼ catanavi ni chux ju lapanacni va tachi ixtalakmin ni ixtakʼasmatniputun ixchivinti.
1 Lakatam avilhchan ixtʼajun amalaniniʼ ju lapanacni ju Jesús lacakʼai ixpujitatʼan ju istʼaʼisraelitanin chai ajuni ta yu laich cataputakʼalhtaxtulh. Pus tachincha ju xalackʼajin palijni chai ju papaninch chai ju yuʼunch ju na ixtalhatalanininta ju ixlhamapʼaksinʼan ju istʼaʼisraelitanin. 2 Chai taxakʼala ju Jesús. Tajunich: ―Tis chavaich ju xajunan ni laich anaviyaʼ tachi chun ju ani taxtokni. 3 Chai ju Jesús ajunich: ―Vachuʼ aclasacmiyau lakatam chivinti. Aquilajunauch. 4 Tis chavaich ju xamalakachayachilh ju Xivan ni caʼamakpaxanalh. Ja yuchi ju Dios u va lapanacni. 5 Pus ju yuʼunch talacchivinilh ixlhiʼakstuʼan. Ixtalaclajuni: ―Ni calhiquilhʼaniu ni Dios ju xamalakachayachilh pus aquintajunin tajuch ni jantu xalacaʼiniyau. 6 Chai ni canaju ni va lapanacni ju xatamalakachayachilh pus chux ju lapanacni aquintalacatʼalhman ni na talacaʼita ni ixlapanac Dios ixjunita ju Xivan. 7 Pus taʼakʼalhtayanalh ni jantu ixtacʼatsai tichi chavaich ju xamalakachayachilh ju Xivan. 8 Pus ju acsnich ju Jesús ajunich: ―Pus nin quitʼin jantu actilajuniu tichi chavaich ju xaquimalakachayachilh ni acnaviyaʼ ju ani taxtokni. 9 Pus ju acsnich ju Jesús tsuculh ajuniniʼ ju lapanacni ju chivinti ju ixtʼalaktsʼipaxcavaich ju tuʼuʼ. Ajuni: ―Pumatam lapanac chʼanlh ju xaqʼuiu uvas laʼixlacatʼun chai amachʼixtaknilh ju makchʼalhcatnin. Chai ju yuchi na makʼan alh alacatam lacatʼun. 10 Chai acsni chilh ju avilhchan acsni alilh ju xaʼuvas pus amalakachanichilh pumatam ixlapanac ju anuʼ chʼalhcatnin ni caʼixtaxtaknilh ju xalhiʼut tachi ixʼalhitʼatakʼoxitach. Para ju anuʼ makchʼalhcatnin talhilakanekma. Va talhixcavatsʼala. Chai jantu tuʼuʼ taxtaknilh. 11 Chai malakachachokochilh apumatam ixlapanac. Chai vana va chun tanavipa. Talhilakanekma chai tamamaxanilh. Va chunch taxcavatsʼalachokolh. Chai jantu tuʼuʼ taxtaknilh. 12 Chai ju amatʼun malakachachokopa ixlhipumatʼutu ixlapanac. Pus ju yuʼunch vana va chun tanavichokopa. Tamacʼatsani chai tamaxtulh lacapuʼuvas. 13 Pus ju acsnich ju amanavin ju anuʼ puʼuvas naulh: “Tas nuʼ aclayach ju chavai. Acmalakachayach ju quintsʼalh ju na icmapaini. Ca laich cava ni catatalhonilh ju yuchi acsni catalaktsʼinaʼ”. 14 Chai chunch ju navi. Para ju anuʼ makchʼalhcatnin acsni talaktsʼilh talaclajunilh sia yuʼunch: “Yuchach ju anuʼ ju amanavinch cajunaʼ acsni caniyaʼ ju ixpai. Pus asokʼotʼitch. Camakniuch. Chai quiʼanuchʼan cajunaʼ ju ani puʼachʼananti”. 15 Pus chunchach ju tanavi. Tatamacxtulh lacapuʼuvas chai tamakni. Pus acsni nonkʼo ju ani chivinti ju Jesús pus asacmilh ju lapanacni. Ajunich: ―Tʼas nonatʼit. Tas caʼulhtuyach ju amatʼun ju anuch chʼalhcatnin. 16 Pus caminach chai camaknikʼoyach ju anuʼ chʼalhcatnin chai aliʼin ju caʼamachʼixtaknichokoyach ju ixpuʼuvas. Pus ju lapanacni acsni takʼasmatlh tuchi ixnajun ju Jesús tanaulh: ―Jantu calacasqʼuinaʼ ju Dios ni chunch ju catapasalh. 17 Para ju Jesús alaktsʼilh ju lapanacni chai alhikʼalhtailh: ―Pus ni jantu chunch ju catapasayaʼ pus tijuch ju nomputun ju chivinti ju tsʼokcanta laʼixchivinti Dios junta chani najun: Ju chiux ju tasacmakʼalh ju anuʼ ixyonin chakaʼ yuchach ju valhch ju chiux ju makʼastumucʼacanta chakaʼ junta tsʼokcanta tuchi cʼata ju yocanta. 18 Pus acsni quintasamakʼan ju lapanacni pus va ixtʼachunch junita tachi acsni pukʼalhkʼoscan ju tuʼuʼ chiux chai tacʼatsanican. Chai acsni icʼaʼulani ju lapanacni ju ixtalakʼalhinʼan pus va ixtʼachunch junita tachi acsni catantʼalhma ju tuʼuʼ kʼai chiux chai jantu tavanan lai kʼostolai. 19 Pus ju xalackʼajin palijni chai ju yuʼunch ju na ixtalhatalanininta ju ixlhamapʼaksinʼan ju istʼaʼisraelitanin na ixtapuxcajui ta yu laich catapuchʼapalh ju Jesús ju anuʼ pantsʼiquis. Para na ixtatalhonita ju lapanacni. Pus ni ixtamachakxata ixchivinti ju Jesús chai ixtacʼatsai ni ixlhichivinin ju yuʼunch acsni tavanan naulh ju chivinti ixlacata ju puʼuvas pus yuchi ixtalhichʼapaputun. 20 Pus talhistacli chai amalakachacalh ju lapanacni ju catatankʼajlaktsʼilh. Chai ju yuʼunch talhitalacasulh tachi ju lapanacni ju soknicʼa ixjunita ju ixʼatalacpastʼacʼatʼan. Va ixtapuxcolakxtuniputun ju chivinti ni laich catalhimakʼaxtaknilh ju gobernador. 21 Pus yuchi taquilhisacmi: ―Amamakaʼunuʼ iccʼatsayau ni naʼun chai amalanininch ju stavasalanti. Chai vaklhtam chun alaktsʼin ju lapanacni. Chai sok amalaninin ixlhamapʼaksin ju Dios. 22 Pus tʼas naʼunch. Ja lhijun ni acʼamapalanauch ju laʼixpuʼucxtin ju romanonin u jantu. 23 Para ju Jesús lana amachakxanilh ni va ixtaʼokxchokʼoputun chai ajuni: ―Tajuch ni va quilapuxconiputunau ju quintalakʼalhin. 24 Aquilamasuniuch ju tumin ju lhiʼamapʼalananatʼit. Tis ixʼucxpuʼ ju ani okslai. Tis ixtapakaʼut ju tsʼokcanta ju ani. Pus taʼakʼalhtayanalh. Tajunich: ―Ixʼanuʼ ju César ixʼucxtinʼan ju romanonin. 25 Pus ju acsnich ju Jesús ajunich: ―Pus axtʼaknitʼit ju César ju ixʼanuch. Chai axtʼaknitʼit ju Dios ju ixʼanuch. 26 Pus jantu lai talhitajunilh tuʼuʼ talakʼalhin laʼixchivinti ju xanajun laʼixʼucxlacapuʼ ju lapanacni. Alai va talhamakʼaninilh ni na kʼox xalhakʼalhtayanan. Chai va sek tataya. 27 Ju acsnich tachincha ju aliʼin saduceonin ju jantu ixtalacaʼi ni laich calokʼonchokolh tam xamatiʼ ju ixnita. Talakmilh ju Jesús chai tasacmi: 28 ―Amamakaʼunuʼ ju Moisés quintaʼatsʼoknunin laʼixlhamapʼaksin ni canilh tam lapanac chai ma camacontilalh ixʼamachakaʼ para jantu tuʼuʼ catʼamacontilalh ju isʼaskʼatʼan pus ju ispʼisekʼe calhitsucuchokolh ju ixʼamachakach ixjunita ju xani. Chai camaʼalini ju isʼaskʼatʼa chai ju yuchi ni tsʼalh pus ma casacnilh ixtapakaʼut ju lijunto ixlakʼau. 29 Pus ixʼalin pumatujun lhiʼalakʼavin. Chai ju xakʼai alilh ixʼamachakaʼ. Para astan nilh chai jantu tuʼuʼ macontilanilh ju isʼaskʼatʼa. 30 Chai ju ixlhipumatʼui tʼatsucuchokopa ju ixʼamachakach ixjunita. Chai astan vachuʼ nipa. Jantu tuʼuʼ macontilalh ju isʼaskʼatʼa. 31 Chai ju ixlhipumatʼutu tʼatsucuchokopa. Chai vana va chun talakʼo ixchuxʼan ixpumatujunʼan. Tus tanikʼo. Chai jantu xamatiʼ macontilanilh ju isʼaskʼatʼa. 32 Chai ju astan pus vachuʼ nilh ju anuʼ chakoʼulh. 33 Pus acsni calokʼonchokocanaʼ pus tis ixʼamachakach cajunaʼ ni tatʼatsucukʼo ixpumatujunʼan lhiʼalakʼavin. 34 Ju acsnich ju Jesús akʼalhtayanalh. Ajunich: ―Ju lapanacni ju ani lacamunutpaʼ tatamakʼaxtʼokʼa chai talaʼi. 35 Para alin lapanacni ju kʼox alhiulai ju Dios ni catalokʼonchokoyach chai cataʼanach ju lactʼiyan. Chai ju anch jantu tamakʼaxtokcan chai jantu laʼican. 36 Jantu tasqʼuini ni catamakʼaxtokcha ju anch ni jantu catitanichokolh ju anch. Alai va ixtʼachunchach catatsucuyanta tachi ju anquilhnin. Chai isʼaskʼatʼan Dios tajunita ni talokʼonchokota. 37 Mas isʼakstu ju Moisés mavasala ni catalokʼonchokoyach ju tanita acsni atalacasunilh ju Dios ju lacaʼachʼitin ju jantu tavanan lai lhcukʼo. Pus ju Moisés acsni tsʼokʼula tuchi tapasalh ju anch pus naulh ni Dios juni ni isDiosʼan junita ju makʼaniya lapanacni ju Abraham chai ju Isaac chai ju Jacob ixʼajuncan. 38 Pus ju Dios ni najun ni isDios junita ju anuch lapanacni pus va pumavasalai ni tatʼajun ju yuʼunch. Pus mas nonau ni va nita tam xamatiʼ para ju Dios alhilaktsʼin tachi ju tatʼajun. 39 Pus ju acsnich ju aliʼin sia yuʼunch ju na ixtalhatalanininta ju ixlhamapʼaksinʼan ju istʼaʼisraelitanin tajunich ju Jesús: ―Amamakaʼunuʼ na kʼox xanaʼun. 40 Pus tus acsnich jantu lai tuʼuʼ aliʼ talhisacmichokoputulh. 41 Ju Jesús ajunich ju aliʼin fariseonin: ―Tʼas nonatʼit. Tas laich talhinajun ju lapanacni ni istsʼalh David ju Cristo ju ixnoncan camalakachatachilh ju Dios. 42 Pus isʼakstu ju David chani naulh ju laxaʼalhiqui ju Salmos juncan: Ju ucxtin Dios junilh ju quiʼucxtin: “Vanin atʼaʼulh junta icvi. 43 Tus acsni actʼalalhajayaʼ ju mintʼalaxcai”. 44 Pus ni isʼakstu David naulh ni ixʼucxtin junita pus ju chunch va nomputun ni jantu va istsʼalh junita. 45 Pus tachi chun ju lapanacni takʼasmatlh acsni chani ajuni ixʼamamakaʼui ju Jesús: 46 ―Alhistʼaccʼantʼit ni jantu cataʼokxchokʼon ju yuʼunch ju na talhatalanininta ju milhamapʼaksinʼan. Pus ju yuʼunch na takʼachani ju laclhman ixpumpuʼan tachi ju tam xakʼai. Chai na kʼox talhiulai acsni amacʼamican ju laʼixtalhavat lapanacni. Chai na takʼachani ni tatolai laʼixputolanʼan ju xalackʼajin ju lacpujitat chai lacapuvai. 47 Va taʼokxchokʼotaiʼini ixlacchakaʼan ju chakolun ju va animacontilacanta. Chai astan talapalai tachi ju na va kʼox panicni ju tatʼachivinin ju Dios ni lai catapuʼokxchokʼolh ju lapanacni ni catanaulh ni na tatalhoni ju Dios. Para ju yuʼunch cataʼamaklhtayananaʼ palai lhu ju ixmakʼalhkʼajnatʼan. Palai jantu ju aliʼin lapanacni.
1 Junta ixvi ju Jesús ju laʼixpujitatʼan ju istʼaʼisraelitanin pus tasoknicʼa taya chai alaktsʼilh ju makʼalinin ni ixtamujui ixlhakʼailaktsʼinʼan lacalactʼicstʼi pʼaklat junta ixpumucan tumin ju laʼixpujitatʼan. 2 Chai vachuʼ laktsʼilh pumatam chakoʼulh ju va ixnimacontilacanta chai na quilhpatiniʼ ixjunita. Chai ju yuchi mujulh lakatʼui lactʼicstʼi tumin. 3 Pus ju Jesús naulh: ―Slivasalh ju iclajunau. Palai lhu xaxtʼakʼa ju ani quilhpatiniʼ chakoʼulh ju va nimacontilacanta. Palai jantu tachi chun ju aliʼin. 4 Pus tachi chun ju yuʼunch talhikʼailaktsʼinch ju Dios ju va xajnichokotachalhch. Para ju ani mas va quilhpatiniʼ para xtakkʼolh chux ju ixtimakʼata. 5 Chai ju aliʼin ju ixtavilanalh anch talhichivinilh ju pujitat. Ixtanajun ni na kʼoxich ixmaxantilacanta lacacʼusi chiux chai ju lapanacni ixtaxtakta na lhu taxtokni ju na laccʼus ixjunita ni na kʼox catasu ju pujitat. Para ju Jesús ajuni: 6 ―Aclajunau ixlacata ju ani taxtokni ju laktsʼinatʼit ju chavai. Pus caminaʼ avilhchan acsni jantu tuʼuʼ catilaʼucxtavi ju chiux ju ixtʼachiux. Chux lana calakʼalhikʼocanaʼ. 7 Chai tasacmich. Tajuni: ―Amamakaʼunuʼ tas vananch ju caʼuctaxtuyaʼ ju ani minchivinti. Tijuch ju catasuyach ju lai acpucʼatsayau ni jantu makʼan cativa tus catapasayaʼ ju ani taxtokni. 8 Chai ju Jesús ajuni: ―Alaktsʼintʼit ni jantu xamatiʼ cataʼokxchokʼon. Pus na lhu lapanacni cataminaʼ laquintapakaʼut. Chai chanich catanonach: “Quitʼin ju icCristo”. Chai vachuʼ catanonaʼ ni vaninch minta ju avilhchan acsni acminchokoyaʼ. Para tun tʼichʼakʼokʼatʼit ju yuʼunch. 9 Chai acsni akʼasmatʼaʼitʼit ni alin ju lhilucut chai ni tamacxtuputun ju ixʼucxtinʼan ju aliʼin lapanacni pus tun tʼitʼalhanantʼit. Pus tasqʼuini ni pʼulhnan catapasayaʼ ju ani taxtokni. Para jantu lana acsnich ju ixʼaclanti ju lacamunutpaʼ. 10 Pus tailhiʼalh ixchivinti ju Jesús. Ajuni: ―Ju amachakʼan ju lakatam kʼai lacatʼun catatʼalasayaʼ ju amachakʼan alakatam kʼai lacatʼun. Chai ju lapanacni ju tachʼakʼokʼai tam ucxtin catatʼalasayaʼ ju ixlapanacni ju apumatam ucxtin. 11 Chai na lacalhu caʼalinach junta catataclhaʼ ju lacatʼun chai junta caʼalinach ju chavanti chai junta lhu alin ju takʼankʼat. Chai catalacasuyaʼ ju kʼai lhitalhan ju lactʼiyan. Chai ju lapanacni acsni catalaktsʼinaʼ na catatalhananaʼ chai catapucʼatsayaʼ ni vanin ixʼaclanti ju lacamunutpaʼ. 12 Para pʼulhnan acsni tucaʼ tapasai ju ani taxtokni pus catachʼapayan chai catamamakʼalhkʼajniyan. Chai amakʼaxtʼakcʼanaʼitʼit laʼixmacaʼan ju xalackʼajin lacpujitatnin. Chai atʼalhnucʼanaʼitʼit. Chai alhipʼinicʼanaʼitʼit ju xalackʼajin chai ju aliʼin ucxtinin. Chai chux ju ani cataʼulhtuyan va ixlacaʼatalh ni quilachʼakʼokʼayau ju quitʼin. 13 Para ni chunch ju cataʼulhtuyan pus laich aʼunaʼitʼit ju yuʼunch ju quilacata. 14 Pus pʼas anaʼuntʼit lamiʼalhunutʼan ni jantu apʼastʼacʼaʼitʼit pʼulhnan ta yu laich akʼalhtʼayananaʼitʼit acsni catamucʼaniyan ju mintalakʼalhinʼan. 15 Chunch ju alatʼit ni quitʼin quiʼakstu ju aclaxtakniyau ju chivinti chai ju acʼatsanti. Chai tachi chun ju mintʼalaxcaiʼan jantu lai ta catapukʼalhtayanananch nin lai catanaulh ni jantu slivasalh tuchʼi nonatʼit. 16 Chai mas mimpaiʼan u minatiʼan catamakʼaxtʼakʼan. Chai ju miʼalakʼavinʼan chai ju milhiʼalakʼavinʼan chai ju miʼamigojniʼan catamakʼaxtʼakʼan. Chai ju aliʼin lamilhiʼuxijnan catamakniyan. 17 Chai chux ju lapanacni catalhixcayan va ixlacata ni quilachʼakʼokʼayau ju quitʼin. 18 Para mas va tuchi catapasayaʼ aktsʼiya talhistʼacʼan ju Dios chai jantu catitsʼankʼa ju miʼatsucuntiʼan jonkʼalhita. 19 Pus ni va tachi aquilalhilacaʼanau pus caʼalinaʼ ju miʼatsucuntiʼan jonkʼalhita. 20 Acsni alaktsʼinaʼitʼit ju lakʼachakʼan Jerusalén ni catalakachokoputunach ju taropajni pus ju acsnich apʼucʼatsʼayaʼitʼit ni chaʼalh ju ixpumaclacan. 21 Ju acsnich ju tatʼonacha ju xaʼestado Judea chach taʼatsʼalaʼalh ju xalacatalhpan. Chai ju tavilanancha ju lakʼachakʼan Jerusalén chach tataxtulh. Chai ju va tatʼonacha laʼixcuxtuʼan chach taʼatsʼalalh. Jantu catatanu ju lakʼachakʼan. 22 Pus ju anuch avilhchan va ixpumapalhcan ju talakʼalhin cajunaʼ. Chai acsni catapasayaʼ ju chunch pus capuʼuctaxtuyach tachi chun ju taxtokni ju tsʼokcanta laʼixchivinti Dios ixlacata yuchi. 23 Para painiʼitnich ju taʼakʼainanta chai ju alin lacatʼicstʼi isʼaskʼatʼa ju acsni avilhchan. Pus slivasalh kʼai makʼalhkʼajnat ju caʼalinaʼ laʼixlacatʼunʼan ju quintʼaʼisraelitanin chai ju yuʼunch catalaktsʼinaʼ ixtalhkʼamti ju Dios. 24 Pus ju aliʼin camaknicanaʼ lacalhilucut. Chai ju aliʼin tachʼinin canavicanaʼ chai calhiʼancanach vanta lhiʼanchach ju alin ju lakʼachakʼanixni. Chai ju jantu israelitanin tajunita yuʼunch ju catatsucuyaʼ ju lakʼachakʼan Jerusalén tus acsni cataʼaktsayach ju avilhchan ju alhcanicanta ju yuʼunch. 25 Chai tamch catasuyaʼ ju avilhchan chai ju malhquiyuʼ chai ju stʼacu. Chai ju ani lacatʼun na catamakʼalhkʼajnanaʼ ju lapanacni. Chai lana jantu catacʼatsayaʼ tuchi catalayaʼ ni na catʼasayaʼ ju alama chai na calucununach ju xcan. 26 Pus vak caʼanaʼ ju ixʼalacʼavantiʼan ju lapanacni va ixlacata ixtalhantichʼan acsni tapastʼacʼa tuchi catapasayaʼ ju ani lacatʼun. Pus mas yuchi ju avilhchan chai ju malhquiyuʼ chai ju stʼacu catalucununach. 27 Pus acsnich ju aquintalaktsʼinaʼ ju quitʼin ju quimalakachatachilh ju Dios ni lapanac actsucuyaʼ ju ani. Acminaʼ lacaʼataputsʼi chai catacʼatsayaʼ ju lapanacni ni na alin ju quintachaput chai ni icxakʼai. 28 Pus acsni cataiʼulayach ju ani taxtokni pus asaʼulatʼit ju miʼaktsulhʼan chai akʼachʼanaʼitʼit ni vaninch minta ju avilhchan acsni amakʼalhtʼaxtʼucʼanaʼitʼit. 29 Vachuʼ ajunilh lakatam chivinti ju ixʼapumavasalaniputun ju tuchi ixʼamalaniputun. Pus ajuni: ―Alaktsʼintʼit ju xaqʼuiu higuera chai tachi chun ju aliʼ qʼuiu. 30 Acsni catsucutachilh xajnichiniʼ ju sastʼi xaxkʼoi pus ju uxijnan pʼucʼatsʼayatʼit ni vaninch minta ju lacapʼasni. 31 Pus vana va chun ju ani. Acsni alaktsʼinaʼitʼit ni tʼajun uctaxtunuʼ ju ani taxtokni pus acʼatsʼayaʼitʼit ni vaninch minta ju avilhchan acsni calhinonkʼoyaʼ ju Dios. 32 Slivasalh ju iclajunau. Jantu catitani ju chavai tatʼajun lapanacni tus acsni jantu uctaxtukʼojui chux ju ani. 33 Ju lactʼiyan chai ju lacatʼun calaclayaʼ. Para aktsʼiya caʼuctaxtuyaʼ ju quinchivinti. 34 Pus alaktsʼinchʼokʼocʼantʼit miʼakstuʼan ju uxijnan. Jantu xcai ni na lhu caʼalilh ju macxcai lamiʼalhunutʼan chai atʼakʼapʼayaʼitʼit u na lhu ju alhamakʼaninitʼit ju xataxtokni ju saʼatsucunti ju ani lacamunutpaʼ. Chai ni chunch ju alatʼit pus laich cachilh ju anuʼ avilhchan acsni jantu cʼatsʼayaʼitʼit ni laich camilh. 35 Pus ju anuʼ avilhchan acsni cachinaʼ chunch catapasayaʼ tachi ju tapasai acsni tuʼuʼ chʼapacanta lacaskʼapa. Pus va tam pantsʼiquis cachinaʼ chai astan jantu xamatiʼ ixlhilacaputsʼun ju ani lacamunutpaʼ laich tamch catapastʼacʼaʼ. 36 Pus va tachi skʼala atsʼucʼutʼit. Chai va tachi asqʼuinitʼit ju Dios ni kʼox catalhiulayan chai ixlhiyuchi lai apʼutʼakʼalhtʼaxtʼuyaʼitʼit tachi chun ju ani taxtokni ju caminaʼ. Chai vachuʼ lai atʼayayaʼitʼit laquiʼucxlacapuʼ ju quitʼin ju quimalakachatachilh ju Dios ni lapanac actsucuyaʼ ju ani. Laich atʼayayaʼitʼit laquiʼucxlacapuʼ ni matiʼ ju miʼalactuʼuntiʼan. 37 Pus ju Jesús ixʼamalaninin ju laʼixpujitatʼan ju istʼaʼisraelitanin ju tuncuj. Para ju tsʼis ixtaxtui ju lakʼachakʼan. Ixʼan ju anuʼ akstijun junta puʼolivonin ixjuncan. 38 Chai tachi chun ju lapanacni na vatsʼisin ixtalakʼan ju lacpujitat ni va ixtakʼasmatniputun ixchivinti.
1 Pus vanin ixchimputun ju anuʼ cʼatan acsni ixtanavi ju xkapavati ju jantu ixlhiyocan ju xatʼin. Chai ju cʼatan ju ixpupastaccan ju anuʼ atatsʼisni acsni tatakʼalhtaxtulh laʼixʼanintiʼan ju xalackʼajin istsʼalan ju makʼaniya israelitanin. 2 Chai ju xalackʼajin palijni chai ju yuʼunch ju na ixtalhatalanininta ju ixlhamapʼaksinʼan ju istʼaʼisraelitanin ixtapuxconi ta yu laich catapumakniyaʼ ju Jesús. Para na xcai talhiula ni na ixtatalhoni ju lapanacni. 3 Pus pumatam ju ixpumacautʼuiʼan Judas Iscariote ixjuncan. Pus ju lhacaticuru chʼapanilh ixʼatalacpastʼacʼat. 4 Chai ju yuchi alh alactʼachiviniʼ ju xalackʼajin palijni chai ju xaʼucxtinin ju taropajnich ju ixtavilanancha lacpujitat. Ju Judas va alh ajuniniʼ ni laich caʼamakʼaxtakniyach ju Jesús. 5 Pus ju yuʼunch na talhikʼachalh chai tajunilh ni catamapalaʼ. 6 Pus ju Judas amachʼanu chai puxcaulich ta yu laich capumakʼaxtakniyach ju yuʼunch acsni matiʼ lhu cava ju lapanacni. 7 Pus chilh ju avilhchan acsni cataʼuyaʼ ju xkapavati ju jantu lhiyalh ju xatʼin. Vachuʼ acsni istasqʼuini ni catamakniyaʼ ju ixborregoʼan ixlacata ju anuʼ cʼatan. 8 Pus ju Jesús amalakachalh ju Pitaluʼ chai ju Xivan. Ajunich: ―Inchitʼit lakʼoxinin ju vaiti ixlacata ju chavai cʼatan ni laich caʼuyau. 9 Chai ju yuʼunch tajunich: ―Tas anchach ju lacʼasqʼuin ju aclakʼoxiyau. 10 Chai ju yuchi ajuni: ―Acsni achʼipʼinaʼitʼit ju lakʼachakʼan pus apʼakxtʼokʼaʼitʼit pumatam lapanac ju lhiʼanta xcan laʼixalu. Pus atʼaimayaʼitʼit ju yuchi tus catanuyanta ju lacachakaʼ. 11 Chai aʼunaʼitʼit ju amachakaʼ: “Ju amamakaʼunuʼ macaminiyan chivinti. Tas ma anchach ju lai catʼavenaʼ ju ixʼamamakaʼunin ju chavai cʼatan”. 12 Chunchach ju aʼunaʼitʼit. Chai ju yuchi catalhiʼanan ju lhitantalactʼui ixchakaʼ. Chai catamasuniyan ju kʼai chakaʼ junta kʼox lakʼoxicanta. Anchach ju alakʼoxiyaʼitʼit ju vaiti. 13 Pus taʼalh chai talhitajulh tachi ju ajunicalh. Chai anch ju talakʼoxilh ju vaiti. 14 Pus astan tamilh ju Jesús chai ju aliʼin. Chai acsni chaʼalh ju hora pus ju Jesús tapakstitʼatama ju ixpumacautʼuiʼan ixtamalakachanʼan. 15 Chai ju Jesús ajuni: ―Slivasalh ixlhichux quiʼalhunut na xaclacasqʼuin ni laich aclatʼavenau ju uxijnan ju xavaiti ju chavai cʼatan acsni tucaʼ icmaknican. 16 Pus jantu aktam actiʼuchokolh ju xavaiti ju ani cʼatan tus acsni caʼuctaxtukʼoyaʼ chux tuchi nomputun ju ani cʼatan. Tus caʼuctaxtuyanta ju lactʼiyan junta lhinajun ju Dios. Tus acsnich ju lai acʼuchokoyaʼ chai yuchi xaclhilacasqʼuin ni aclatʼaʼuyau ju chavai. 17 Pus ju acsnich ju Jesús chʼapalh ju vaso chai junilh lakʼailaktsʼiuch ju Dios chai naulh: ―Achʼapʼatʼit ju ani vaso. Alatʼakʼotʼit ju milhiʼuxijnan. 18 Akʼotʼit ju uxijnan ni iclajunau ni jantuch actikʼotchokolh ju vino tus acsni vasalh calhinonkʼoyaʼ ju Dios. 19 Astan ju Jesús chʼapalh ju xkapavati chai junilh lakʼailaktsʼiuch ju Dios. Chai chʼekʼelh. Chai axtaknilh ju yuʼunch. Ajunich: ―Yuchach ju ani ju quilacatuna ju xtakcanta ju milacataʼan. Va tsa chani alatʼit ni laich apʼupʼastʼacʼaʼitʼit ju quiʼaninti ju milacataʼan. 20 Chai acsni ixtavenkʼota pus vana va chun navichokopa. Chʼapachokolh ju vaso chai naulh: ―Ju ani lhikʼotʼat yuchi ju pumavasalacan ju sastʼi chivinti ju iclatʼatakʼoxitauch. Chai acpumavasalayaʼ ju anuʼ chivinti ju quiʼacʼalhni ju cataxtuyaʼ ju milacataʼan. 21 Para ju aquimakʼaxtʼakʼach quintʼavi ju chavai lacamixa. 22 Pus aktsʼiya acniyaʼ tachi ju iclhilhcanicanta. Quitʼin ju quimalakachatachilh ju Dios ni lapanac actsucuyaʼ ju ani. Para painich ju anuʼ lapanac ju aquimakʼaxtʼakʼaʼ. 23 Pus ju acsnich ju ixʼamamakaʼui tatsuculh lasacminin sia lhiyuʼunch tis nuʼ chavaich ju sia lhiyuʼunch ju canaviyaʼ ju chunch. 24 Pus ju acsnich alilh lakatam laklakʼaiti ju sia lhiyuʼunch ju ixʼamamakaʼui ju Jesús. Va ixtalhilakʼaji tichi chavaich ju sia yuʼunch ju kʼox calhiulacalh ni yuchi ju xakʼai canavicalh. 25 Para ju Jesús ajuni: ―Ju lapanacni ju jantu quintʼaʼisraelitanin tajunita alin ixʼucxtinʼan ju talhinajun. Chai yuʼunch ju talhinajun na va talhitakʼayachokocan isʼakstuʼan tus talacasqʼuin ni calhimispacalh ni yuʼunch ju palai aʼaktaijunun. Mas jantu. 26 Para jantu chun anavitʼit ju uxijnan. Alai yuchi ju takʼayaputun lamilhiʼuxijnan capumavasalayaʼ ni vasalh xakʼai acsni va lacatʼicstʼi catalacasu chai ni jantu lacasqʼuin ni calakʼayacalh. Chai yuchi ju lhinajun lamilhiʼuxijnan capumalacasuyaʼ ni vasalh xakʼai acsni cachʼalhcatnaniyaʼ ju aliʼin. Jantiyuʼ ni va cachʼalhcatnanicalh. 27 Pus tʼas nonatʼit ju uxijnan. Tis chavaich ju palai xakʼai. Ja yuchi ju tolai lacamixa chai vajin. U yuchi ju ini ju ixvaiti. Ja jantiyuʼ ju tolai lacamixa. Para ju quitʼin chun icjunita tachi ju va milapanacʼan. 28 Uxijnan ju jantu quilamacaju acsni na xacmakʼalhkʼajnan chai ixlacata ju quimakʼalhkʼajnat chilh ju quiʼatalacpastʼacʼat ni xacmacaulh ju quilhichʼalhcat. 29 Chai ni jantu xaquilamaconau ju acsnich pus yuchi iclalhilhcaʼulatau ni ucxtinin aʼunaʼitʼit tachi ju quimpai ni quilhcaʼulanilh ju quitʼin. 30 Ju chunch lai aʼuyaʼitʼit chai akʼotʼaʼitʼit laquimixa acsni kʼai ucxtin acjunach. Chai alhinonaʼitʼit chux ju ixʼapapanatnich ju ixpumacautʼuiʼan istsʼalan ju Israel. 31 Chai ju Jesús vachuʼ chani junilh ju Pitaluʼ: ―Simón ju lhacaticuru tasqʼuinitanch ni laich cataʼulhtuyan tachi ju ulhtucan ju tuʼuʼ trigo acsni cʼalhacan. Pus va yuchi ju xaʼamacxtalh ju sun lhiʼan ju un. Para ju xatrigo jantu. Pus ju lhacaticuru talaktsʼintanuputunan ni aquilacʼapʼauch u aquilalhilaksikʼalhiyau. 32 Para ju quitʼin ictapaininita ju Dios ju milacataʼan ni jantu lana aquilacʼapʼauch. Chai acsni aqʼuinchʼakʼokʼachʼokʼoyaʼich ju uxintʼi pus aʼaktʼaiʼutʼich ju milhiʼalakʼavin ni vachuʼ ixlhichux ixʼalhunutʼan aquintalhilaksichokoyaʼ. 33 Para ju Pitaluʼ junich: ―Quiʼucxtin ju quitʼin aclhilakʼaʼiyach mas actʼatʼalhnucanch. U mas actʼaniyanch. 34 Para ju Jesús junich: ―Pitaluʼ icjunan ni chavai atatsʼisni acsni tucaʼ tʼasai ju puyux pus paktʼutu ju naʼuntʼa ni jantu qʼuimispʼai. 35 Chai ju Jesús ajunich ju ixʼamamakaʼui: ―Acsni tavanan iclamalakachau chai jantu ixlhipʼintʼatʼit ju mintuminʼan nin mimpastiʼan nin lakatʼui minchʼanxtʼakʼanʼan ja tuʼuʼ xatacʼacxniyan. Chai ju yuʼunch tajunilh ni jantu. 36 Pus ju acsnich ju Jesús ajuni: ―Kʼoxich. Para ju chavai tasqʼuini ni atsʼucʼuyaʼitʼit tachi tam taropa ju an junta alin ju ixtʼalaxcai. Ju chavai ju alin ju ixtumin calhiʼalh. Vachuʼ ju ispasti. Chai ju matiʼ ixmachita pus castʼalh ju ixpumpuʼ chai calhitamaulh lakatam. 37 Pus chunch ju aʼulhtʼutʼit ni iclajunau ni tasqʼuini ni caʼuctaxtuyaʼ ju quilacata ju anuʼ ju tsʼokcanta laʼixchivinti Dios junta chani najun: “Ju yuchi laktsʼincalh tachi ju va alactuʼunuʼ”. Chunch ju najun chai tʼajun uctaxtunuʼ ju chavai. 38 Chai ju ixʼamamakaʼui tajunich: ―Quiʼucxtin alin lakatʼui quimachitaʼan. Chai ju yuchi ajunich: ―Chach va anch lhitamactalh. Pus va naulh ju chunch ni jantu ixtamachakxani tuchi ju ixʼajumputun. 39 Ju Jesús taxtulh lacachakaʼ chai alh ju anuʼ akstijun junta puʼolivonin ixjuncan tachi ju aktsʼiya ixlai. Chai ju ixʼamamakaʼui vachuʼ tachʼakʼokʼalh. 40 Chai acsni tachaʼalh junta aktsʼiya ixtaʼastacnan pus ju Jesús ajuni ju ixʼamamakaʼui: ―Atʼachʼivinintʼit ju Dios ni jantu cataʼokxchokʼoyan ju lhacaticuru. 41 Chai ju yuchi alh ixlhimakat tachi ju laich macaʼancan ju chiux. Chai ju anch ju yuchi taʼaktsokotalh chai tʼachivinilh ju Dios. 42 Junich: ―Quimpai ni lacʼasqʼuinch aqʼuimakʼosunin ju ani makʼalhkʼajnat. Para jantu iclacasqʼuin ni anavitʼi ju quinkʼachat quitʼin. Alai yuchi ju anavitʼi ju minkʼachat ju uxintʼi. 43 Chai talacasunilh pumatam anquilh ju mincha lactʼiyan chai xtaknilh ju ixtachaput. 44 Chai ni na ixmakʼalhkʼajnan pus lana ixlhichux ixʼalhunut ju tapaininilh ju Dios. Chai ju ixtalhtʼajat valhch tachi ju tuʼuʼ acʼalhni ju kʼalhtankʼai lachʼapata chai ixtamayacha ju lacatʼun. 45 Pus acsni tʼachivinkʼo ju Dios pus taya chai alakminchokolh ju ixʼamamakaʼui. Chai alhitajulh ni va ixtalhtatanan ni na ixtaʼamakʼaninin. 46 Chai ajunich: ―Tʼas ni va lhtʼatʼapʼalatʼit. Akʼostʼolatʼit. Atʼachʼivinintʼit ju Dios ni jantu cataʼokxchokʼoyan ju lhacaticuru. 47 Chai acsni ixtʼajuncaʼ alactʼachiviniʼ ju ixʼamamakaʼui ju Jesús pus tachincha ju ixtalhavat lapanacni. Chai ixʼapʼulhnita ju anuʼ ixlhipumacautʼuiʼan ju Judas ixjuncan. Chai lakmilh ju Jesús ni camacchʼuchʼuyach. 48 Para ju Jesús junich: ―Judas ja lacaʼamacchʼuchʼunti ju aqʼuimakʼaxtʼakʼaʼ ju quitʼin ju quimalakachatachilh ju Dios ni lapanac actsucuyaʼ ju ani. 49 Pus ju ixʼamamakaʼui acsni talaktsʼilh tuchi catapasayach pus tajunich: ―Quiʼucxtin ja acmakniyauch lacamachita. 50 Chai pumatam sia lhiyuʼunchach macʼatsani ju ixlapanac ju xakʼai pali. Chakxpʼuxnilh ju ixʼakʼaxkʼolh ju ixcatucana. 51 Para ju Jesús juni: ―Chach va anch lhitamactalh. Chai ju Jesús chʼapalh ju ixʼakʼaxkʼolh ju anuʼ lapanac chai lana catumucʼachokolh. 52 Pus ju xalackʼajin palijni chai ju xataropajni lacpujitat chai ju papanin yuʼunch ju ixtaminta inin ju Jesús. Chai ju Jesús ajunich: ―Tajuch ni va quilanaviyau tachi tam akʼalhonaʼ ju chʼapʼapʼutʼunatʼit ni lhitʼantʼatʼit ju mimachitaʼan chai ju minqʼuiuʼan. 53 Pus chux tuncujun xaclatʼavilhchau lamilacpujitatʼan chai ju anch jantu quilachʼapauch. Para ju chavai ju Dios talakʼaʼiniyan ni chunch ju aquilaʼulhtuyau. Vachuʼ lakʼaʼinilh ju lhacaticuru ni chunch ju aquiʼulhtulh. 54 Pus tachʼapalh ju Jesús. Talhiʼalh chai tamanucha laʼixchakaʼ ju xakʼai pali. Pus ju Pitaluʼ va ixlhimakat chʼakʼokʼalh. 55 Pus ju aliʼin ixtamalhculatach ixpulacni ta ixlakachakʼaxnucanta ju ixchakaʼ ju xakʼai pali. Chai ixtalacskʼonvilanalh. Chai vachuʼ ixmakvi ju Pitaluʼ. 56 Pus pumatam atsiʼ acsni laktsʼilh ni anchach vachuʼ ixmakskʼonvi ju Pitaluʼ pus lana skʼotutu chai naulh: ―Ju ani vachuʼ ixmakʼanta ju yuchi. 57 Para ju yuchi naulh ni jantu. Junich: ―Chakoʼulh jantu icmispai ju yuchi. 58 Chai ni pantsʼiquis jumpa pus laktsʼinchokopa apumatam chai junich: ―Ju uxintʼi vachuʼ makyuʼunch. Para ju Pitaluʼ junich: ―Jantu quitʼin. 59 Chai ni tapasalh tachi tam hora pus apumatam pʼas naulh: ―Slivasalh ni vachuʼ ixtʼavilhcha ju yuchi ju ani ya ni vachuch amachakaʼ xaʼestado Galilea. 60 Para ju Pitaluʼ junich: ―Jantu icmachakxai tuchʼi qʼuiʼuni. Chai acsni ixtʼajuncaʼ chiviniʼ pus lana tʼasalh ju puyux. 61 Pus ju Jesús talakaspʼitlh chai laktsʼilh ju Pitaluʼ. Chai ju Pitaluʼ lana pastaclh ju ixchivinti tachi ju ixjunita ni paktʼutu canonaʼ ni jantu mispai acsni tucaʼ tʼasata ju puyux. 62 Pus taxtulh ju Pitaluʼ chai na pʼas tsuculh kʼalhunuʼ. 63 Pus ju anuch lapanacni ju ixtalhistʼacʼach ju Jesús va ixtalhitsʼiʼinch ju yuchi chai ixtalakanekmai. 64 Chai acsni talakpuchʼilh pus talacpasa chai tajunilhch: ―Anauch tichi chavaich ju xaʼulaniyan. 65 Chai ixtajuni na lhu macxcai chivinti. 66 Chai acsni tunculh pus tatakʼaixtoklh ju xapapanin sia yuʼunch ju israelitanin chai ju xalackʼajin ixpalijniʼan chai ju yuʼunch ju na ixtalhatalanininta ixlhamapʼaksinʼan ju istʼaʼisraelitanin. Pus yuʼunch ju ixtalhinajun sia yuʼunch ju israelitanin chai anch ju lhimincalh ju Jesús. Chai tajunich: 67 ―Ja uxintʼich ju Cristoʼat. Yuchi ju ixnoncan camalakachatachilh ju Dios. Aquilajuniuch. Para ju Jesús ajunich: ―Mas aclajuniu jantu atʼilacʼaʼitʼit. 68 Chai mas aclasacmiu tuʼuʼ ixlacata yuchi jantu tuʼuʼ aquintilalhikʼalhtajiu nin yuchi ni lai aquintilamacaju. 69 Para tus chavai actolach vanin junta vi ju Dios ju na tachapun. Quitʼin ju quimalakachatachilh ju Dios ni lapanac actsucuyaʼ ju ani. 70 Pus ju acsnich ixchuxʼan tajuni: ―Pus ja uxintʼiʼas ju istsʼalh Dios. Chai ju yuchi ajunilh: ―Chunch tachi ju nonatʼit. 71 Pus ju acsnich ju yuʼunch talaclajunilh: ―Pus tis alich chivinti ju maktasqʼuiniyau ni quiʼakstuchʼan ju xakʼasmatniyau tuchi xanajun.
1 Pus ju acsnich ixchuxʼan ju xalackʼajin sia yuʼunch ju israelitanin talhiʼalh ju Jesús laʼixpuʼucxtin ju Pilato. Pus ju yuchi ixʼucxtinʼan ixjunita ju romanonin. 2 Chai ju lapanacni tatsuculh ulaninin ixtalakʼalhin ju Jesús. Tajunich ju Pilato: ―Ju ani ya lapanac iclhitaju ni va lakʼalhiputun ju lakʼachakʼan chai kʼalhtsajui ni amapalanancan laʼixmacni ju César. Chai ixnajun ni isʼakstu ju Cristo junita chai kʼai ucxtin junita. 3 Pus ju acsnich ju Pilato sacmilh ju Jesús. Junich: ―Ja uxintʼich ju ixʼucxtinʼan ju israelitanin. Chai ju Jesús junich: ―Chunch tachi ju naʼun. 4 Pus ju acsnich ju Pilato ajuni ju xalackʼajin palijni chai ju ixtalhavat lapanacni: ―Jantu tuʼuʼ talakʼalhin iclhitajuni ju ani lapanac. 5 Para ju yuʼunch va apalai pʼas tajuni: ―Para ju yuchi va amalasani ju lapanacni chai amalani ju lapanacni ju ixlhamapʼaksin tachi ixlhilacaputsʼun ju xaʼestado Judea. Pus taiʼulachalh tus ju xaʼestado Galilea chai tailhiʼalh tus chilh ju ani. 6 Pus ju Pilato acsni kʼasmatlh ju ixchivintiʼan pus sacmilh ni amachakaʼ junita ju xaʼestado Galilea. 7 Chai acsni cʼatsa ju Pilato ni amachakaʼ anch ixjunita ju Jesús junta ixlhinajun ju gobernador Herodes pus lana malakachanilh ju yuchi. Chai ni cʼatan ixjunita ju acsnich pus ju Herodes vachuʼ anch ixvilhcha ju lakʼachakʼan Jerusalén. 8 Chai ju Herodes acsni laktsʼilh ju Jesús pus na kʼachalh ni na makʼan ju ixlaktsʼimputun. Pus na lhu taxtokni iskʼasmatʼa ixlacata yuchi chai na ixlaktsʼimputun ni tuʼuch lhamakʼan canavi. 9 Pus na lhu chivinti ju xasacmi. Para ju Jesús jantu tuʼuʼ xalhikʼalhtaji. 10 Chai vachuʼ ixtavilanalh ju xalackʼajin palijni chai ju ixtalhatalanininta ju ixlhamapʼaksinʼan ju istʼaʼisraelitanin. Chai ju yuʼunch tapʼastu ixtachivimakʼan ju Jesús. 11 Pus ju acsnich ju Herodes chai ju ixtaropajni tatalacasunilh ni jantu tuʼuʼ ixtalhiulai ju Jesús. Chai talhimakʼakʼamanalh. Tamalakchʼinilh ju cʼusi pumpuʼ tachi ju talakchʼi ju xalackʼajin. Chai acsni talhimakʼakʼamanankʼo pus malakachanichokopa ju Pilato. 12 Pus ju acsnich avilhchan talamaʼamigoxla ju Pilato chai ju Herodes. Pus ju pʼulhnan va ixtalaxcajich. 13 Pus ju acsnich ju Pilato atʼasanichokolh ju xalackʼajin palijni chai ju xalackʼajin sia yuʼunch ju israelitanin chai ixtalhavat lapanacni. 14 Chai ajunich: ―Ju uxijnan quilalhiminitauch ju ani lapanac ni va nonatʼit ni amalasani lapanac junita. Para ju quitʼin icquilhasacmita ju yuchi ju lamiʼucxlacapuʼan chai jantu tuʼuʼ iclhitajuni talakʼalhin tuchʼi lhichʼivimakʼanatʼit ju uxijnan. 15 Chai nin yuchi ju Herodes jantu xalhitajuni ju ixtalakʼalhin. Yuchi quilhimalakachanichokochilh. Pus ju ani lapanac jantu tuʼuʼ talakʼalhin navita ju lai calhimakni. 16 Pus yuchi aclhinonaʼ ju ixʼulanica chai acmaconach. 17 Pus ju anuʼ cʼatan ju lapanacni aktsʼiya istasqʼuini ju gobernador ni caʼamaconicalh pumatam tachʼin ni chunch ixtalhilanita. 18 Pus ju ixtalhavatʼan lapanacni va kʼaixtam pʼas tanaulh: ―Jantu amacʼau ju ani ya lapanac. Alai yuchi ju alhinauch ixlhiʼanca. Yuchi ju Barrabás ju iclacasqʼuinau ni aquilamaconiuch. 19 Pus ju anuʼ Barrabás ixlhitʼalhnucanta ni va ixʼamalasani ju amachakʼan anch chai va ixʼamakninin. 20 Para ju Pilato ni va ixmacomputun ju Jesús pus aktam axakʼalachokopa ju ixtalhavatʼan lapanacni. 21 Para ju yuʼunch na pʼas ixtanonchokopalai: ―Amaqʼuilhtʼatʼich ju lacacurus. 22 Chai ajunchokopa ju ixlhipaktʼutu: ―Para tajuch. Tis talakʼalhin ju navita ju yuchi. Ju quitʼin jantu tuʼuʼ talakʼalhin ju iclhitajuni ju lai aclhinaulh ixmaknica. Alai va aclhinonach ixʼulanica chai acmaconach. 23 Para ju yuʼunch na pʼas ixtanajun acsni istasqʼuinch ni camaquilhtacalh ju lacacurus. Pus ju laʼixchivintiʼan ju yuʼunch chai laʼixchivintiʼan ju xalackʼajin palijni tatʼalalhajalh. 24 Chai ju Pilato lhinaulh ni chach navicalh tachi istasqʼuinta ju ixtalhavatʼan lapanacni. 25 Chai amaconilh ju anuʼ lapanac ju ixlhitʼalhnucanta ni va ixʼamalasani ju lapanacni chai ni va amakniniʼ ixjunita. Yuchach ju istasqʼuinita ju lapanacni. Chai makʼaxtaklich ju Jesús ju laʼixkʼachatʼan ju yuʼunch. 26 Chai acsni talhiʼalh ju Jesús pus tachʼapayaulh pumatam lapanac ju Simón ixjuncan. Amachakaʼ xalacatʼun Cirene. Ju yuchi va ixmintacha lacacuxtu. Pus tamakxkʼokʼalh ju curus chai ju yuchi tamalhiʼanilh junta ixpʼulai ju Jesús. 27 Chai na lhu lapanacni ixtachʼakʼokʼata ju Jesús. Chai na lhu chakolun ixtamakʼanta vachuʼ chai na ixtalackʼalhun chai na pʼas ixtalactʼasai. 28 Para ju Jesús atalakaspʼitnilh chai alacjunich: ―Chakolun amachakʼan Jerusalén jantu aquilalhikʼalhu ju quitʼin. Alai miʼakstuʼan alhikʼalhunchʼokʼocʼantʼit. Chai alhikʼalhuntʼit ju miʼaskʼatʼan. 29 Chunch ju alatʼit ni caminaʼ ju avilhchan acsni chani catanonach ju lapanacni: “Na kʼox ju isʼatsucuntiʼan ju chakolun ju jantu lai ixʼalin ju isʼaskʼatʼa chai ju jantu tavanan taʼakʼainalh chai ju jantu tavanan taʼamatsʼiquinilh ju tam askʼatʼa”. 30 Pus ju acsnich avilhchan ju lapanacni catanonaʼ ni palai kʼox cava ni va capukʼaitajunulh ju tuʼuʼ talhpa chai caʼamakni. U ni va caʼakxtakma ju tuʼuʼ lacatʼicstʼi talhpa. 31 Chunch catanonaʼ ni caʼalinaʼ ju kʼai makʼalhkʼajnat ju acsni. Pus ju tuʼuʼ lhtacni qʼuiu jantu xavacan. Pus vana va chun ju quitʼin. Jantu lhijun ni acmaknicalh ni matiʼ ju quintalakʼalhin ju quitʼin. Para ju uxijnan chunch untʼatʼit tachi ju tuʼuʼ xaxixni qʼuiu ju xavacan. Pus ju alin ixtalakʼalhin mamakʼalhkʼajnican. Chai ixlhiyuchi amamakʼalhkʼajnicʼanaʼitʼit ju uxijnan. 32 Chai talhiʼalh vachuʼ apumatʼui tachʼinin ju catʼamaknicananta ju Jesús. Para ju yuʼunch aktsʼiya ixtanavita tuʼuʼ talakʼalhin. 33 Chai acsni tachaʼalh ju anuʼ akstijun junta saʼaktsulh juncan pus anchach ju tamaquilhta ju Jesús chai ixtʼiyunʼan alactuʼunin. Ju pumatam tamaquilhta laʼixlhicana iscurus ju Jesús. Chai ju akʼantam laʼixlhimacx. 34 Chai ju Jesús naulh: ―Quimpai amacʼacxaninch ju ani tayanalh lapanacni ni jantu tacʼatsai tuchi tanavi. Chai talalhvaknilh ixpumpuʼ ju Jesús. Chai talhilaslajlich ni catacʼatsayaʼ tis ixʼanuch cajunaʼ ju lakatam cʼus ixpumpuʼ. 35 Chai ju ixtalhavat lapanacni va taskʼotutulh. Chai mas yuʼunch ju xalackʼajin ixtalhitsʼiʼinch ju Jesús. Ixtanajun: ―Ju yuchi amakʼalhtaxtulh ju aliʼin. Pus chach makʼalhtaxtucalh isʼakstu ni sala yuchi ju Cristo ju sacxtuta ju Dios. 36 Chai vachuʼ ju taropajni talhitsʼiʼilh. Talakchaʼalh ni va ixtaxtakniputun ju pinquin ju jantu can ixjunita. 37 Chai tajunich: ―Ni sala ixʼucxtinʼat ju mintʼaʼisraelitanin pus amakʼalhtʼaxtʼucʼach miʼakstu. 38 Chai istsʼokcanta laʼisʼaktsulh iscurus ju chivinti ju chani ixnajun: “Ju ani yuchach ju ixʼucxtinʼan ju israelitanin”. Chai istsʼokcanta lacalhigriego chai lacalhilatin chai lacalhihebreo. 39 Chai pumatam ju anuʼ alactuʼunin ju ixʼatʼamaquilhtacanta ju Jesús ixlhitsʼiʼin vachuʼ. Chai juni: ―Ju uxintʼi ni sala Cristoʼat pus amakʼalhtʼaxtʼuchʼokʼocʼach ju miʼakstu chai vachuʼ ju quijnan. 40 Para kʼailh ju akʼantam. Junich: ―Ja jantu lana tʼalhoni ju Dios ni vana va chun ju makʼalhkʼajnan ju uxintʼi tachi ju yuchi. 41 Chai ju quijnanʼan islivasalh lhijun ni camakʼalhkʼajnanauch ni navitauch ju alactuʼunti. Para ju ani jantu tuʼuʼ alactuʼunti ju navita. 42 Pus ju acsnich ju yuchi junilh ju Jesús: ―Aqʼuimpʼastʼacʼaʼich ju quitʼin acsni ucxtin atʼanchʼokʼoyaʼ. 43 Chai ju Jesús junich: ―Slivasalh ju icjunan. Chavai avilhchan ju aqʼuintʼatʼolaʼ ju lactʼiyan. 44 Acsni chaʼalh tachi kʼatuncu pus na tsʼis va ixlhilacaputsʼun ju anuʼ lacatʼun. Chai chunchach va tus lakatʼutu hora atokʼoxanaʼ. 45 Va tsʼankʼalh ju avilhchan. Chai ju lacpujitat ixʼalin lakatam kʼai pumpuʼ ju ixyocanta ni pulactʼui ixpunavicanta. Pus ju acs pantsʼiquis pus lana lhtʼit takʼexlh ju anuʼ pumpuʼ laʼixlacaitat. 46 Chai ju Jesús tsʼau tʼasalh. Chai naulh: ―Quimpai lamimacaʼ icmakʼaxtakniyan ju quintacuvin. Chai acsni naulh ju chunch pus lana nilh. 47 Chai ju xacapitán ixtaropajni ju romanonin acsni laktsʼilh tuchi tapasalh pus lakʼaya ju Dios acsni naulh: ―Ju ani lapanac slivasalh na soknicʼa ixjunita. 48 Pus na lhu lapanacni ixtayanalh ni va ixtalaktsʼimputun ju ani lhamakʼan. Chai ixchuxʼan acsni talaktsʼilh tuchi tapasalh pus alactanquilhacsacalh ni chunch ixtanavi ju acsnich ni na ixtaʼamakʼaninin. Chai taʼanchokolh laʼixchakaʼan. 49 Para chux ju ixtʼalamispan ju Jesús chai ju chakolun ju ixtachʼakʼokʼata ju ixtatʼamintacha ju xaʼestado Galilea pus va makat ixtayanalh. Ixtalaktsʼin tuchi tapasalh. 50 Chai ixʼalin pumatam lapanac ju José ixjuncan. Amachakaʼ Arimatea. Chai ju yuchi makyuʼunch ixjunita ju xalackʼajin sia yuʼunch ju israelitanin. Chai ju yuchi na kʼox lapanac ixjunita chai na soknicʼa. 51 Ju yuchi vachuʼ ixpacxantaji ju avilhchan acsni kʼai ucxtin cajunaʼ ju Dios. Chai jantu kʼox xalhiulai ju yuchi tachi ixtalhichivinin ju Jesús ju ixtʼaxalackʼajin nin tachi ju xatanavi. 52 Pus ju yuchi lakʼalh ju Pilato chai quisqʼuinilh ju ixlacatuna ju lijunto Jesús. 53 Chai ni lakʼaʼinilh ju Pilato pus ju yuchi alh chai pʼuxlich. Chai pachʼi lacalhman pumpuʼ. Chai quimacnucalh ju lacalhucucu talhpa. Chai ju anch jantucaʼ xamatiʼ ixmacnucanta. 54 Chai ju acsnich xamisparas ixjunita ju avilhchan paʼastacni acsni jantu lai ixtachʼalhcatnan. 55 Chai ju chakolun ju ixtatʼamintacha ju Jesús ju xaʼestado Galilea tachʼakʼokʼalh ju José. Talaktsʼilh junta macnucalh ju lijunto Jesús chai ta yu xamamacan ju ixlacatuna. 56 Chai ju chakolun taʼanchokolh laʼixchakaʼan. Talakʼoxilh ju achʼitin chai ju cʼuchʼu ju na cʼus acamin. Chai taʼastacnalh ju avilhchan paʼastacni tachi ju ixnajun lacalhamapʼaksin.
1 Pus va spalala tsuculh atuncunuʼ ju lhitumincu acsni taʼalh ju chakolun junta ixmacnucanta ju lijunto Jesús. Talhiʼalh ju achʼitin ju na cʼus acamin ju ixtalakʼoxita. Chai vachuʼ ixtamakʼanta ju aliʼin tʼacunin. 2 Chai talhitajulh ju chiux ni makʼosucanta. Yuchi ju xamalhtich ixjunita junta ixmacnucanta ju Jesús. 3 Chai acsni tatanu pus jantu talhitaju ju ixlacatuna ju Jesús. 4 Para acsni na ixtalhamakʼaninin ni matiʼ tuʼuʼ ixma ju anch pus lana anch tatayacha ixpumatʼuiʼan lapanacni ju ixtalakchʼita lakslipnicʼa ixpumpuʼan. 5 Pus lana na tatalhanalh ju chakolun chai tatakʼentalh. Para ju anuch lapanacni tajunich: ―Tajuch ni va pʼuxcʼoyatʼit ju tʼajun junta amacnucan ju tanita. 6 Ju yuchi jantu ani ma. Lokʼonchokota. Apʼastʼactʼit tuchi xatajunan acsni ixvilhchalhcaʼ ju xaʼestado Galilea. 7 Xatajunan ni aktsʼiya istasqʼuini ni camakʼaxtakcanaʼ laʼixmacaʼan ju lapanacni ju na alactuʼunin tajunita. Yuchi ju malakachatachilh ju Dios ni lapanac catsucuyaʼ ju ani. Chai camaquilhtacanaʼ para calokʼonchokoyach ju ixlhilakatʼutu avilhchan. 8 Pus acsnicaʼ ju tapastaclich ju ixchivinti ju Jesús. 9 Pus tataspʼitchokocha junta ixmacnucanta ju Jesús acsni tucaʼ ixlokʼonchokota chai taʼamacʼatsani tachi chun ju ani taxtokni ju ixpumacautamʼan chaich ju aliʼin. 10 Pus yuʼunch ju Malia amachakaʼ Magdala chai ju Xivana chai ju Malia ixnati ju Jacobo chai ju aliʼin chakolun ju tajunilh ju ixtamalakachan ju Jesús tachi chun ju ani taxtokni. 11 Para ju yuʼunch ixtanajun ni va kʼaya ixtanajun ju tʼacunin. Lana jantu taʼalacaʼinilh. 12 Para ju Pitaluʼ lana taya. Atsʼalaʼalh junta ixmacnucanta ju Jesús acsni tucaʼ ixlokʼonchokota. Chai acsni lhan quitalacnu pus laktsʼilh ni va yuchi ju ixma ju pumpuʼ. Pus anchokolh laʼixchakaʼ. Alhamakʼaniniʼalh tuchi xatapasai. 13 Pus ju acsnich avilhchan pumatʼui sia yuʼunch ixtaʼanta ju lakʼachakʼan Emaús. Vanin ixtʼavi ju lakʼachakʼan Jerusalén. Tachi ju xaʼalhtanta lakatʼui hora. 14 Chai ixtalhichiviʼanta tachi chun ju taxtokni ju ixtapasata. 15 Chai acsni ixtalacchiviʼanta pus lana chincha isʼakstu ju Jesús chai kʼaixtam atʼaʼalh. 16 Para ju ixʼalacʼavantiʼan va lataminicalh ni jantuch catamispa ju Jesús. 17 Pus ju yuchi ajunich: ―Tijuch ju lacnonatʼit ju uxijnan junta alhtʼananatʼit. Chai tajuch ni na va amakʼanininatʼit. 18 Chai akʼalhtayanalh pumatam ju ixtʼiyunʼan ju Cleofas ixjuncan. Junich: ―Tachi chun ju lapanacni ju ixtatʼonacha ju lakʼachakʼan Jerusalén ca va uxintʼi ju jantu cʼatsʼai tuchi xatapasai ju anch ju chavai. 19 Chai ju yuchi ajunich: ―Tis talakxtuch. Chai ju yuʼunch tajunich: ―Ixlacata ju Jesús amachakaʼ Nazaret. Pus laʼixʼucxlacapuʼ ju Dios chai laʼixʼucxlacapuʼan ju lapanacni ju yuchi malacasulh ni vasalh ixlapanac Dios ixjunita. Chai na lai ixnavi ju tuʼuʼ lhamakʼan chai na lai ixʼamalaninin ixchivinti Dios. 20 Para ju xalackʼajin palijni chai ju xalackʼajin quiʼucxtin quincʼan tamakʼaxtaklh ju Jesús chai tamaknilh ju lacacurus. 21 Para ju quijnan xacnonau ni yuchi ixjunita ju xaquintamakʼalhtaxtun ju quijnanʼan ju israelitanin juntau. Chai jantu va yuchi. Para chavai ixlhilakatʼutu avilhchan ju xatapasai ju ani taxtokni. 22 Chai vachuʼ na iclhamakʼanininau tuchi talaktsʼilh ju aliʼin chakolun ju sia quijnan. Ju yuʼunch ma na vatsʼisin taquilacaʼalh junta ixʼacnui ju Jesús. 23 Para ma jantu talhitajunilh ju ixlacatuna. Alai tataspʼitcha chai tanaulh ni ma ixtalaktsʼinta vachuʼ ju anquilhnin. Chai ju yuʼunch ma tanaulh ni ma tʼajun ju Jesús. 24 Chai ju aliʼinch sia quijnan vachuʼ taquilalh junta ixʼacnui chai chunch ju talhitajulh tachi ju ixtanajunta ju chakolun. Para ju Jesús ma jantu talaktsʼilh. 25 Pus ju acsnich ju Jesús ajunich: ―Na tsʼinqʼui ju mintacʼatsanʼan ju uxijnan. Na xcaich lacʼaʼiyatʼit tachi chun ixchivinti ju lapanacni ju ixtanajun ixchivinti Dios. 26 Na istasqʼuini ni calhimakʼalhkʼajnalh ju ani taxtokni ju Cristo. Ju chunch ni laich calakʼayacalh. 27 Pus ju acsnich ju Jesús tsuculh amavasalaniniʼ tachi chun ju chivinti ju istsʼokʼulacanta laʼixchivinti Dios junta ixlhichivinin ju yuchi. Pus taiʼula ta istsʼokta ju Moisés chai tailhiʼalh tus chaʼalh ta istatsʼokta tachi chun ju makʼaniya lapanacni ju ixtanajun ixchivinti Dios. 28 Pus acsni tachaʼalh ju anuʼ lakʼachakʼan junta ixtaʼanta pus ju Jesús lalh tachi ju va ixʼamputun palai makat. 29 Para ju yuʼunch tapʼastu tachʼapayaulh. Tajunich: ―Aquilatʼatolauch ni na tokʼoxalh. Anchalh ju avilhchan. Pus alactʼatanu ju yuʼunch ni ixnajun ni caʼalactʼatolaʼ. 30 Chai acsni alactʼatavi ju lacamixa pus chʼapalh ju xkapavati. Junilh lakʼailaktsʼiuch ju Dios chai chʼekʼelh chai axtaknilh. 31 Pus lana takʼoxichokolh ju ixlakchulhʼan ju yuʼunch chai tamispalh. Para ju yuchi lana lakmixlh. Jantu talaktsʼilh. 32 Chai talajunilh sia yuʼunch: ―Slivasalh na xackʼachanau acsni xaquintatʼachivimintan ju lacati. Chai acsni xaquintamavasalanitan tuchi nomputun ixchivinti Dios ju tsʼokcanta. 33 Pus lana talakasitaya ju acs pantsʼiquis. Taʼanchokolh ju lakʼachakʼan Jerusalén. Chai talhitajucha ju ixpumacautamʼan chai ju aliʼin ju ixʼalactʼavi. Va lakputam ixtavilanalh. 34 Chai ju ixchuxʼan ju yuʼunch tajunilh ixtʼiyunʼan: ―Slivasalh ni lokʼonchokolh ju quiʼucxtinʼan. Pus talacasunilh ju Simón. 35 Chai vachuʼ ixtʼiyunʼan tajunilh ju ixtalhavatʼan tuchi tapasalh ju lacati chai ni tamispalh ni yuchach acsni chʼekʼelh ju xkapavati. 36 Chai acsni ixtatʼajun nonin ju ani taxtokni pus ju Jesús lana tayacha laʼixlacaitatʼan chai ajunich: ―Akʼachʼantʼit ju uxijnan. 37 Para ju yuʼunch na tatalhanalh. Na amakʼesvacalh. Va ixtanajun ni ca ixtalaktsʼin ju alasanin. 38 Para ju yuchi ajunich: ―Tajuch ni va tʼalhanantʼit. Tajuch ni va chunch ju pʼastʼacʼatʼit lamiʼalhunutʼan. 39 Alaktsʼintʼit ju quimacaʼ chai ju quinchʼajaʼ ni quitʼinch. Aquilalacachʼapauch chai aquilalakalaktsʼiuch. Ni va alasanin xacva pus jantu ixʼalilh ju quiʼacanit nin quiʼalucutni. Para ju uxijnan laktsʼinatʼit ni alin ju quiʼacanit chai quiʼalucutni. 40 Chai acsni naulh ju chunch pus alacmalacasunilh ju ixmacaʼ chai ixchʼajaʼ. 41 Para ju yuʼunch jantucaʼ lai ixtalacaʼi ni va ixtalhikʼachanch ni aktsʼiya talaktsʼinchokolh chai ni va ixtalhamakʼanininta. Pus yuchi alhijunich: ―Ja alin lacatsʼunin ju mivaitiʼan. 42 Pus taxtaknilh lacatsʼunin axpʼupʼunti pamata chai lacatsʼunin tʼaxcat. 43 Chai ju Jesús amaklhtayanalh chai tsuculh unaʼ laʼixʼalacʼavantiʼan ju yuʼunch. 44 Chai ajuni: ―Yuchach ju chivinti ju xaclajunau acsni xaclatʼavilaucaʼ ju uxijnan. Iclajuniu ni istasqʼuini ni caʼuctaxtulh tachi chun ju istsʼokcanta ju quilacata laʼixlhamapʼaksin ju Moisés chai laʼixchivintiʼan ju lapanacni ju ixtanajun ixchivinti Dios chai lacasalmos. 45 Pus ju acsnich ju Jesús alakʼoxinilh ixtacʼatsanʼan ni laich catamachakxayaʼ tuchi nomputun ixchivinti Dios ju tsʼokcanta. 46 Chai ajunich: ―Tsʼokcanta laʼixchivinti Dios ni istasqʼuini ni camakʼalhkʼajnalh ju Cristo chai calokʼonchokolh laʼixʼaninti ixlhilakatʼutu avilhchan. 47 Vachuʼ tsʼokcanta ni caʼajunicalh ju lapanacni ni laich caʼamacʼacxanicanach ju ixʼalactuʼuntiʼan va tichi chavaich ju calacaʼilh ni Cristo yuchi ju ixnoncan camalakachatachilh ju Dios chai camacaulich ixʼalactuʼuntiʼan. Caʼajunicalh ju ani chivinti tachi chun ju amachakʼan ju kʼai lakʼachakʼanixni. Chai cataiʼulacanach ju ani lakʼachakʼan Jerusalén. 48 Chai uxijnan ju anonaʼitʼit ni laktsʼintʼatʼit ju ani taxtokni. 49 Chai aclamalakachanitachauch ju tuchi kʼalhtasuta ju quimpai ni cataxtakniyan. Para atʼolatʼitcaʼ ju ani lakʼachakʼan Jerusalén tus acsni axtʼaknicʼanaʼitʼit ju tachaput ju caminanta talaclhman. 50 Ju Jesús atʼataxtulh ju ixʼamamakaʼui ju lakʼachakʼan Jerusalén. Chai akʼailhiʼalh ju lakʼachakʼan Betania. Chai chʼixlh ju ixmacaʼ chai asqʼuininilh ju Dios ju kʼox isʼatsucuntiʼan ju yuʼunch. 51 Chai acsni ixtʼajuncaʼ sqʼuinininiʼ ju Dios ju kʼox isʼatsucuntiʼan pus lana alacmacaulich. Lhiʼancalh ju lactʼiyan. 52 Chai ju ixʼamamakaʼui talakʼayalh. Chai astan taʼanchokolh ju lakʼachakʼan Jerusalén chai slivasalh na ixtakʼachanch. 53 Chai va tachi ixtatanumanalh ju lacpujitat. Ixtajuni lakʼailaktsʼiuch ju Dios chai ixtalakʼayai ju yuchi.
1 Ju yuchi ju Chivinti juncan ixtʼajunch acsni maticaʼ tuʼuʼ ixjunita. Chai ju yuchi va lakputam ixtʼatʼajun ju Dios. Chai isʼakstu ju Dios ixjunita. 2 Ju Dios va lakputam ixtʼatʼajun ju yuchi tus acsni maticaʼ tuʼuʼ ixjunita. 3 Tachi chun ju taxtokni si laʼixmacni ju navikʼojuta. Ni jantu cava ju yuchi pus matiʼ cava ju lacamunutpaʼ nin yuchi ju taxtokni. 4 Ju atsucunti laʼixmacni yuchi ju ixtʼajun. Chai yuchi ju malacpucujui ju laʼixtacʼatsanʼan ju lapanacni. 5 Ju yuchi ju malacpucujui laʼixtacʼatsanʼan ju lapanacni chunch junita tachi ju tuʼuʼ maclhcu ju mapulhcui junta na tsʼista. Para ju anuʼ ju alhtanan junta putsʼista jantu lai alhajanalh. 6 Pus alilh pumatam lapanac ju malakachachilh ju Dios. Ju yuchi ixjuncan Xivan. 7 Yuchi lhimilh ni canonach ju tuchi cʼatsaich. Yuchi ju calhichivinach ju yuchi ju lai malacpucujui ju laʼixtacʼatsanʼan ju lapanacni. Ju chunch chux ju lapanacni laich catalhilacaʼanaʼ tichi chavaich ju lhichivinin ju Xivan. 8 Para jantiyuʼ ixjunita ju Xivan ju anuʼ ju lai malacpucujui ju laʼixtacʼatsanʼan ju lapanacni. Ju yuchi va ixmalakachacantachilh ni caxtʼakʼach ju chivinti ixlacata ju anuʼ ju lai malacpucujui ju laʼixtacʼatsanʼan ju lapanacni. 9 Ju anuʼ ju istavasalanti amalacpucujunun quilachilh ju ani lacamunutpaʼ. Ju yuchi amalacpucujuni laʼixtacʼatsanʼan tachi chun ju lapanacni. 10 Ju yuchi ixtʼajun ju ani lacamunutpaʼ. Chai ju lacamunutpaʼ laʼixmacni ju alinta. Para ju amachakʼan ju ani lacamunutpaʼ jantu tamispa. 11 Quilakquilachilh ju ixlacatʼun. Para ju ixtʼaʼamachivinti ixtajunita acsni ixtʼajun ju ani lacamunutpaʼ jantu tuʼuʼ talhiula. 12 Para ju yuchi axtaknilh ixtachaputʼan ni catavalhch isʼaskʼatʼan Dios tachi chun ju lhikʼach taʼamaklhtayanalh chai talhilaksi. 13 Ju isʼaskʼatʼan Dios jantu tapujunita chun tachi ju tapujunita ju isʼaskʼatʼan tam xamatiʼ ju ani lacamunutpaʼ. Alai va si laʼixkʼachat Dios tapujunita isʼaskʼatʼan. 14 Chai ju anuʼ ju Chivinti juncan lapanac quitsucuchilh ju ani. Chai quintaquitʼaʼalhtananchin pantsʼiquis. Chai ju yuchi na lhu ixnavi ju lamapainin. Chai stavasalanti ju ixnajun. Chai iclaktsʼiuch ni vasalh xakʼai junita tachi ju junita ju ixpai Dios. Chai ni lakatami istsʼalh Dios junita pus yuchi xakʼai lhijunita. 15 Ju Xivan naulh tuchi iscʼatsai ixlacata ju anuʼ ju chivinti juncan. Chai acsni tavanan ixlhaktʼasajunun pus pʼas ju ixchivinin. Chanich ixnajun: ―Ju mintacha astan yuchi ju xakʼai. Jantu quitʼin. Yuchach ju xaclalhaktʼasajuyau ju uxijnan. 16 Chai ni na lhu ju ixʼamapaininti pus yuchi ju puʼamaklhtayananauch quinchuxʼan na lhu lamapainin ju quintanavinitan. 17 Ju lhamapʼaksin ixlacata ixtaxtokni Dios yuchi ju ixtakta ju ixjuncan Moisés. Para ju lamapainin ju quintanavinitan chai ju stavasalanti laʼixmacni Jesucristo ju tasukʼo. 18 Ju Dios jantu xamatiʼ laktsʼinta tavanan. Ju lakatami istsʼalh Dios slivasalh ixmapaini. Yuchach ju putalacasulh ta junitach ju Dios. 19 Ju xalackʼajin israelitanin tamalakachalh ju xapalijni. Chai alactʼamalakachacalh ju levitanin junta ixvilhcha ju Xivan. Lakʼachakʼan Jerusalén ju ixtamintacha. Chai kʼalhtayanalh ju Xivan acsni sacmicalh tichi chavaich ju yuchi. 20 Pus ju yuchi lhilatavi ju stavasalanti. Lana amavasalanilh ni jantiyuʼ ju Cristo ju noncan camalakachatachilh ju Dios. 21 Chai aktam tasacmichokopa: ―Pus tis chavaichʼat. Ja uxintʼi ju Elíasʼat. Pus naulh ju yuchi ni jantiyuʼ. ―Ja uxintʼi ju anuʼ lapanacʼat ju canonach ixchivinti Dios. Pus akʼalhtayanalh. Naulh ni jantiyuʼ. 22 Pus aktam tasacmichokopa: ―Pus tis chavaichʼat. Aquilajuniuch ni lai acmacʼatsanitachau ju xaquintamalakachayachin tichi chavaichʼat ju uxintʼi. 23 Pus naulh ju Xivan: ―Ju quitʼin va yuchi ni na pʼas ju icchivinin junta aseknicʼa. Va iclajunau ni alakʼoxinitʼit ju miʼalhunutʼan ju miʼucxtinʼan Cristo ni caminach. Tachi ju naulh ju anuʼ lapanac ju Isaías ixjuncan ju ixchivinin ixchivinti Dios. 24 Pus ju anuʼ lapanacni ju ixʼamalakachacanta sia lhifariseonin ixtajunita. 25 Chai tajunich ni tasacmi ju Xivan: ―Tajuch ni amakpʼaxananch ni jantu uxintʼi ju Cristoʼat nin Elíasʼat nin uxintʼi ju lapanacʼat ju canonach ixchivinti Dios. 26 Pus ju Xivan acsni alackʼalhtailh alacjunich: ―Ju quitʼin va lacaxcan ju icʼamakpaxanan. Para junta tʼonatʼit tʼajun pumatam ju jantu mispʼayatʼit. 27 Ju yuchi astan caminaʼ. Para yuchi ju xakʼai. Jantu quitʼin. Pus ju quitʼin jantu tuʼuʼ ju quintapalhni. Jantu lai actichʼanxkʼotlh nin mas va yuchi ju samusni ixchʼanxtʼakʼan. 28 Lhimakʼantacutni xakʼai xcan Jordán ixʼalin ju lakʼachakʼan ju ixjuncan Betábara. Anchach ju tapasacha ju ani taxtokni. Anch ju ixʼamakpaxanan ju Xivan. 29 Ni tuncunchokopa acsnich ju laktsʼilhch ju Xivan ju Jesús ni ixlakmintach. Chai ajunich ju lapanacni: ―Alaktsʼintʼitch ju anuʼ mintacha lapanac. Tachi ixborrego Dios cajunaʼ. Yuchach ju camapalaʼ ju alactuʼunti lhichux. 30 Yuchach ju xaclhichivinin acsni xaclajunau ni astan caminaʼ pumatam lapanac. Yuchach ju xakʼai. Jantu quitʼin ni yuchi ju pʼulhnan ixtʼajun. Jantu quitʼin. 31 Nin quitʼin jantu xacmispai. Para yuchi iclhimilhch amakpaxanaʼ ju lacaxcan ni chunchach ju catapumispayach ju quintʼaʼisraelitanin ju yuchi. 32 Xivan ju xtaklh ju chivinti. Chanich ixnajun: ―Iclaktsʼilh ju Spiritu Santu acsni mincha ju lactʼiyan tachi ju tuʼuʼ lakʼaxkʼavan acsni tavi laʼixlacatuna ju Jesús. 33 Pus ju quitʼin jantu xacmispai. Para xaquijunitach ju anuʼ quimalakachachilh ni acʼamakpaxananaʼ lacaxcan ni ma xamatiʼ aclaktsʼinaʼ ni calakʼanaʼ ju Spiritu Santu chai ni ma catocʼaniyach laʼixlacatuna ma yuchach ju caʼamakpaxananaʼ lacaSpiritu Santu. 34 Chai quitʼin ju iclaktsʼilh ju tuchi tapasalh. Chai iclajunauch ni yuchach ju ani ju istsʼalh ju Dios. 35 Acsni tuncunchokopa pus aktamch ixʼalactʼayapa ju ixtʼiyunʼan ixlapanacni ju Xivan. 36 Chai ju yuchi laktsʼimpa ju Jesús junta ixʼanta. Chai ajunich ju ixlapanacni: ―Alaktsʼintʼitch ju anuʼ lapanac ju tachi ixborrego Dios cajunaʼ. 37 Chai ju anuʼ ixtʼiyunʼan ixlapanacni ju Xivan acsni takʼasmatlh ju tuchi ixnajunch pus lana tachʼakʼokʼalh ju Jesús. 38 Chai acsni talakaspʼitlh ju Jesús alaktsʼilh ju ixtachʼakʼokʼata. Ajunich: ―Tijuch ju pʼuxcʼoyatʼit. Chai tajunilh: ―Amamakaʼunuʼ tas anchach ju tʼaʼun. 39 Pus ajunich: ―Asokʼotʼitch. Alaktsʼinaʼitʼitch junta ictʼajun. Chai tatʼaʼalh. Talaktsʼilh junta ixtʼajun. Pus ju acsni avilhchan tatʼatolhcha ni tachi lakatʼatʼi hora atokʼoxanaʼ ixjunita. 40 Chai ju anuʼ ixtʼiyunʼan ju ixtakʼasmatʼach ixchivinti ju Xivan ju tachʼakʼokʼalh ju Jesús pus pumatam ixjuncan Tilix. Yuchi ju ispʼisekʼe Pitaluʼ Simón ixjunita. 41 Pus ju Tilix lana lhitaju ju ixlakʼau tucan ju ixjuncan Simón. Chai junich ju ixlakʼau: ―Iclhitajuch ju Mesías. Ju chunch va nomputun: “Iclhitajuch ju Cristo ju noncan ni camalakachatachilh ju Dios”. 42 Chai ju Tilix lana lhiʼalh ju Simón junta ixvi ju Jesús. Acsni alaktsʼilh ju Jesús junich ju Simón: ―Ju uxintʼi Simónʼat. Istsʼalhʼat ju Jonás. Ju uxintʼi aʼuncʼanaʼ Cefas. Pus ju alhimapakaʼucan Cefas va Pitaluʼ nomputun laʼixchivintiʼan ju anuch lapanacni. 43 Chai ni tuncunchokopa ju Jesús naulicaʼ ni caʼanach ju xaʼestado Galilea. Chai anch ju lhitajucha ju ixjuncan Pilipe. Chai junich ni cachʼakʼokʼalh. 44 Ju Pilipe amachakaʼ Betsaida ixjunita. Laʼixtʼunʼan ju Tilix chaich ju Pitaluʼ. 45 Ju Pilipe acsni lhitaju ju ixjuncan Natanael chanich juni: ―Iclhitajuch ju Jesús. Istsʼalh ju José. Amachakaʼ Nazaret. Yuchach ju ixlhatsʼoknunta ju Moisés acsni atsʼoknulh ixchivinti Dios. Chai vana chun ixtalhatsʼoknunta ju anuʼ lapanacni ju ixtanajun ixchivinti Dios. 46 Chai chani naulh ju Natanael ni akʼalhtayanalh: ―Ja laich cataxtucha ju lakʼachakʼan Nazaret tuʼuʼ kʼox. Pus ju Pilipe junich: ―Pus asokʼoch. Anchach ju alaktsʼintʼachich. 47 Chai ju Jesús chanich naulh acsni laktsʼistuclh ju Natanael junta ixmintacha. Ajunich ju lapanacni: ―Alaktsʼintʼitch. Ani minta pumatam ju vasalh israelita. Ju yuchi jantu lai aʼokxchokʼonun. 48 Chai ju Natanael lana akʼalhtayanalh. Naulh: ―Tʼas qʼuilhimispʼaich. Pus ju Jesús chani lhikʼalhtailh. Junich: ―Iclaktsʼinch acsni ixyachiʼ ixtankʼapuʼ kʼai qʼuiu ju higuera juncan. Acsni tucaʼ istʼasaniyan ju Pilipe. 49 Chai akʼalhtayanalh ju Natanael. Junich: ―Amamakaʼunuʼ ju uxintʼi istsʼalh Diosʼat. Uxintʼi ju quiʼucxtin quincʼan aʼunaʼ ju quijnanʼan ju israelitanin juntau. 50 Chai acsni akʼalhtayanalh ju Jesús chanich juni: ―Ja yuchi xaqʼuilhilhilaksich ni va xacjunanch ni iclaktsʼintanch acsni ixyachiʼ ixtankʼapuʼ kʼai qʼuiu ju higuera juncan. Pus palai kʼai lhamakʼan ju alaktsʼinaʼ astan. 51 Pus chanich ajuncan ju lapanacni: ―Slivasalh ju iclajunau. Ju caʼanach avilhchan alaktsʼinaʼitʼitch ju lactʼiyan ni catalhtekʼayach. Chai alaktsʼinaʼitʼitch ju ixʼanquilhnin Dios ni catataʼakstʼayaʼ chai catatakʼalhtajuyach acsni aquintalakminach ju quitʼin ju quimalakachatachilh ju Dios ni lapanac actsucuyaʼ ju ani.
1 Chai ixlhilakatʼutu avilhchan ixtailhiʼanta. Acsnich ju alilhch tamakʼaxtʼokʼat ju lakʼachakʼan Caná laxaʼestado Galilea. Anchach ju ixvilhcha ju ixnati ju Jesús. 2 Chai vachuʼ alactʼatʼasanicalh ju Jesús ju ixʼamamakaʼui junta tamakʼaxtokcalhch. 3 Acsni cʼacxtaya ju vino pus ju ixnati ju Jesús chanich juni ju istsʼalh: ―Matich ju vino. 4 Chai ju Jesús chani lhikʼalhtailh. Junich: ―Apʼacxacaʼ ji quinati. Iccʼatsaich tuchi acnaviyaʼ. Tucaʼ chin ju pantsʼiquis ni lai tuʼuʼ acnavi. 5 Pus ju ixnati chanich ajuni ju ixtamakchʼalhcatnan anch: ―Anaviniyaʼitʼitch tachi chun ju catajunanch ju yuchi. 6 Chai ixlacvi lakachaxan lackʼai akchoko lhinavicanta chiux. Anchach ju ixtamujuich ju xcan ju ixtalhilacchʼakʼai ixlaccʼaʼulhʼan chai ju ixtalhimacchʼakʼaich ju israelitanin ni chunch ixtalhilanitach. Va ixtanajun ni salaka catajunlh ju chunch. Chai ju lakatamin akchoko ixmujui tam cientos litros. 7 Ju Jesús chanich alacjuni: ―Alaktsʼamatʼitch ju xcan ju ani lacvi akchoko. Chai ju xalapanacni tanavilh ju alhijunicalh. 8 Pus lana ajunchokolh ju Jesús: ―Amacʼutʼuchʼokʼotʼitch ju xcan. Alhipʼinichitʼitch ju tʼajun xtaknaʼ ju vaiti. Chai taquixtaknilh. 9 Pus ju anuch ixtʼajun xtaknaʼ ju vaiti acsni quilhcʼatsalh ju anuʼ xcan ju tapala vino canch lhiula. Para jantu iscʼatsai taʼanchach ju lhimincancha. Va yuʼunch ju ixtacʼatsai ju ixtamakchʼalhcatnanch anch ni yuʼunchach ju ixtamacutui ju xcan. Pus ju anuʼ ixtʼajun xtaknaʼ ju vaiti lhinaulh istʼasanica ju anuʼ tsʼalh ju tamakʼaxtoklh. 10 Chanich juni: ―Tachi chun ju jokʼatni pʼulhnan cataxtʼakʼaʼ ju kʼox vino. Chai acsni lhilacanch cataxtʼakʼach ju palai jantuch can. Para ju uxintʼi makʼatʼa ju kʼox vino tus chavai. 11 Ju ani lhamakʼan navilh ju Jesús ju lakʼachakʼan Caná ju laxaʼestado Galilea. Yuchach ju pʼulhnan lhamakʼan ju navilh ju Jesús. Chunchach ju apumalacasunilh ju lapanacni ju ixtachaput. Pus acsnich ju palai talhilacaʼalh ju Jesús ju anuch ixʼamamakaʼui. 12 Chai ju Jesús astan alhch ju lakʼachakʼan Capernaum. Yuchach chai ju ixnati chai ju isʼapʼisekʼen chai ju ixʼamamakaʼui. Chai ju anch tatolhcha lakatam lakatʼui avilhchan. 13 Chai vanin ixjunita ju ixcʼatanʼan ju israelitanin acsni alh ju Jesús ju lakʼachakʼan Jerusalén. Yuchach ju anuʼ cʼatan ixpupastaccan ju anuʼ atatsʼisni acsni tatakʼalhtaxtulh laʼixʼanintiʼan ju xalackʼajin istsʼalan ju makʼaniya israelitanin. 14 Chai anchach ju ixya ju kʼai ixpujitatʼan ju israelitanin. Chai anchach ju alhitajulhch ju Jesús ju lapanacni ju istastʼai vacax borrego chai lakʼaxkʼavan. Chai ixtavilanalh vachuʼ ju ixmapaxanin tumin. 15 Chai ju acsnich ju Jesús navilh lakatam ixpanekni lasu. Pus lana tsuculh alactixcoxtunuʼ tachi chun ju istaʼastʼananch ju anuʼ laʼixpujitatʼan ju israelitanin. Chai tachi chun ju borregojni chai vacax atixcoxtukʼo. Vachuʼ alacpumakʼanikʼo ju ixtuminʼan ju amapaxanin. Chai alacmaktakʼo ju ixmixaʼan. 16 Chai alacjunich ju istastʼaich lakʼaxkʼavan: ―Alhipʼinchitʼitch ju ani lacvi. Ju ixchakaʼ quimpai jantu anavitʼit va xachakaʼ paʼastʼan. 17 Pus ju anuch ixʼamamakaʼui acsnicaʼ ju tapastacli ni chunchach vasalh ju tsʼokcanta junta najun: “Lana na quixcani ji quimpai ni jantu kʼox tachi ju talai ni ani ju lakʼayacʼan”. 18 Pus ju acsnich ju israelitanin chanich tanaulh ni tasacmich ju Jesús: ―Tijuch ju aquilamasuniyau ju acpucʼatsayauch ni xakʼaichʼat ju uxintʼi ni laich xanavi ju ani taxtokni. 19 Pus ju Jesús chanich alaclhikʼalhtailh. Ajunich: ―Amaktʼatʼit ju ani ya kʼai pujitat. Chai ju quitʼin va lakatʼutu avilhchan ju acpulakʼoxichokoyaʼ. 20 Ju acsnich taʼakʼalhtayanalh ju israelitanin. Chani tanaulh: ―Ju ani kʼai pujitat tʼupʼuxamchaxan cʼata ju punavikʼocalh. Chai ju uxintʼi ja va lakatʼutu avilhchan ju lai apʼunavichʼokʼo. 21 Para ju Cristo ixlhichivinchokoi ju ixlacatuna isʼakstu ni pujitat ixjunita. 22 Chai acsni tavanan taʼacxtuchokolh ju Jesús junta ixmacnucanta pus acsnich ju tapastaclich ju ixʼamamakaʼui ni ixnajuntach ju ani chivinti. Pus acsnich ju talacaʼinilh ju anuʼ atsʼoknut chaich ju ixchivintich ju Jesús tuchi ixnajuntach. 23 Na lhu ju talhilacaʼalh laʼixtapakaʼut ju Jesús acsni ixvilhchalhch ju lakʼachakʼan Jerusalén ju anuch cʼatan ixpupastaccan ju anuʼ atatsʼisni acsni tatakʼalhtaxtulh laʼixʼanintiʼan ju xalackʼajin istsʼalan ju makʼaniya israelitanin. Talhilacaʼalh ju Jesús ni ixtalaktsʼinch ju lhamakʼan ju ixnavich. 24 Para ju Jesús jantu ixʼalhilaksi ju lapanacni ni ixʼamispanich ju ixʼatalacpastʼacʼatʼan ju va lapanacni. 25 Ju va ixlacata apumatam jantu ixmaktasqʼuini ni xamatiʼ caʼalh chivintanuniniʼ tuʼuʼ ni isʼakstu iscʼatsai ta yu junita ixʼalhunutʼan ju pumatamin lapanacni.
1 Ju pumatam lapanac Nicodemo ixjuncan. Chai ju yuchi xaʼucxtin israelitanin ixjunita. Chai na ixlacaʼi vachuʼ ju ixlhamapʼaksinʼan ju fariseonin. 2 Ju yuchi tsʼis ju quilaktsʼilh ju Jesús. Chaich chani juni acsni lakchaʼalh: ―Amamakaʼunuʼ iccʼatsayauch ni laʼixmacni Dios ju tʼantʼa amamakaʼunuʼ. Va icpucʼatsayauch chunch ni jantu xamatiʼ ju lai canavi ju ani lhamakʼan ju tuchʼi navich ju uxintʼi ni jantu cava Dios ju aktaijuyan. 3 Chai akʼalhtayanalh ju Jesús. Junich: ―Slivasalh ju icjunan. Ju jantu catsucuchokoyaʼ aktam jantu lai catiʼalh junta lhinajun ju Dios. 4 Ju Nicodemo naulh: ―Tas calhitalacatʼicstʼichokolh ju na papach chai catsucuchokolh. Ja laich catanuchokolh ju laʼixpulacni ixnati chai calokʼonchokolhch. 5 Pus akʼalhtayanalh ju Jesús. Junich: ―Slivasalh ju icjunan. Ju tam lapanac ju akpaxta va ixlacaʼatalh ni tam xajun ju isʼatsucunti pus tachi ju va tsucuchokolhcaʼ. Chai acsni tanui ju Spiritu Santu laʼisʼatsucunti tam xamatiʼ pus vana tachi ju va tsucuchokolhcaʼ. Para ju lapanacni ju jantu tam junita ju isʼatsucuntiʼan chai ju jantu tapacxanta ju Spiritu Santu laʼixʼalhunutʼan pus jantu lai catitatanu junta lhinajun ju Dios. 6 Ju uxijnan maklokʼoncʼantʼatʼit ju ani laʼixtachaput ju mimpaiʼan minatiʼan. Para puʼamaklhtayanancan ju sastʼi miʼatsucuntiʼan laʼixtachaput ju Spiritu Santu. 7 Jantu alhamakʼanin ni xacjunan ni aktsʼiya tasqʼuini ni atsʼucʼuchʼokʼoyaʼ. 8 Ju un vanta anchach ju lai. Chai kʼasmatcan ju istʼasat. Para jantu cʼatsacan ta anchach ju minacha nin lai cacʼatsacalh ta anchach ju anta. Vana va chun ju tam lapanac ju alin sastʼi isʼatsucunti ju xaxtakni ju Spiritu Santu. Ju akʼantam ju jantucaʼ lhilaksi ju Dios jantucaʼ cʼatsai tuchi ju xapuʼalinch ju chunch sastʼi atsucunti. 9 Ju Nicodemo chanich juni: ―Pus tas lhiʼucxʼantach ju ani. 10 Chai chanich lhikʼalhtailh ju Jesús ju Nicodemo. Junich: ―Ja jantu uxintʼich pumatam ju amamakaʼui ju mintʼaʼisraelitanin chai ixlaquilhtu jantu lai machʼakxai ju ani. 11 Slivasalh ju icjunan. Ju tuchi icmispayauch icnonauch. Ju tuchi iclaktsʼintau icmavasalayauch. Para ju uxijnan jantu lai quilalacaʼiniyau ju tuchi icnonauch. 12 Ni icjuntan ju va ixlacata saʼatsucunti ju ani lacamunutpaʼ chai jantu lacʼaʼi ju quinchivinti tas alhilacʼaʼiyaʼich ni acjunin ixlacata ju atsucunti ju xtʼakʼa ju Dios ju vilhcha lactʼiyan. 13 Jantu xamatiʼ ju quilata ju lactʼiyan ni laich cacʼatsa ta yu junitach ju anch. Va quitʼin ju iccʼatsai ta yu junitach ju anch ni anch ju xacminacha ju lactʼiyan. Chai anch ictʼajun ju lactʼiyan. Quitʼin ju quimalakachatachilh ju Dios ni lapanac actsucuyaʼ ju ani. 14 Tachi ju Moisés ni maquilhta ju lu junta aseknicʼa pus chunchach vachuʼ tasqʼuini ni aquimaquilhtacalh ju quitʼin ju quimalakachatachilh ju Dios ni lapanac actsucuyaʼ ju ani. 15 Acsni chunch acnavicanach pus tachi chun ju aquilhilacaʼanach jantu catsʼankʼayaʼ. Alinch isʼatsucunti ju conkʼalhiyanta ju lactʼiyan. Ju Jesús tailhiʼalh ju ixchivinti chai juni ju Nicodemo: 16 ―Ju Dios chunchach ju apumapaini ju lapanacni ju ani lacamunutpaʼ ni quilhitapʼuxlh ju quitʼin ju lakatami istsʼalh icjunita. Ju chunch tachi chun ju aquintalhilacaʼanach jantu catsʼankʼayaʼ. Alin isʼatsucuntiʼan ju conkʼalhiyanta lactʼiyan. 17 Ju Dios jantiyuʼ quilhimacamilh ju ani lacamunutpaʼ ni va acʼulanilh ixtalakʼalhinʼan ju lapanacni. Para alai va quilhimacamilh ni laquimacni cataputakʼalhtaxtuyach ju lapanacni. 18 Ju quilhilacaʼan pus tus ani jantuch mucʼanican ju ixtalakʼalhin. Para ju jantu quilhilacaʼan pus tus ani mucʼanicanta ju ixtalakʼalhin va ixlacata ni jantu quilhilacaʼanta ju laquintapakaʼut ju lakatami istsʼalh Dios icjunita. 19 Icminta ju ani lacamunutpaʼ ju quitʼin ju tachi maclhcu icjunita ni icʼamalacpucujunuʼ. Para ju lapanacni jantu tuʼuʼ quintalhiula. Va palai kʼox talhiula ni tachi ju va lacaʼatatsʼisni catatsuculh mas tuncujuntach. Tachi ju va lacaʼatatsʼisni ju tatʼajun ni va tanaviputun ju macxcai. Chai yuchi alhimucʼanicanta ixtalakʼalhinʼan. 20 Chai tachi chun ju tanavitʼajun ju jantu kʼox pus jantu kʼox quintalhiulai ju quitʼin ju tachi maclhcu icjunita ni icʼamalacpucujunuʼ. Chai jantu quintalakmin ju laquimacni va ixlacata ni jantu catasu tuchi tanavich. 21 Para ju navi ju stavasalanti quilakmin ju quitʼin ju tachi maclhcu icjunita ni icʼamalacpucujunuʼ. Ju chunch laich calaktsʼincanaʼ tuchi navich ni laʼixtachaput Dios ju navi. 22 Acsni tapasakʼolhch ju ani taxtokni pus astan ju Jesús alactʼamilh ju ixʼamamakaʼui laxaʼestado Judea. Chai acsni ixʼalactʼavilhcha ju anch pus ixtaʼamakpaxananch ju ixʼamamakaʼui. 23 Ju Xivan vachuʼ ixʼamakpaxanan ju lakʼachakʼan Enón ju vanin ixtʼavi ju lakʼachakʼan Salim. Chai ju ixtachʼakʼokʼaich ju yuchi anch ju ixʼamakpaxaich ni na lhu ixʼalin ju xcan ju anch. 24 Ju Xivan tucaʼ ixtʼalhnucanta. 25 Pus ju israelitanin ixtalhilanita ni na paklhu ixtalacchʼakʼai ixlaccʼaʼulhʼan chai na paklhu ixtakʼaichʼakʼai ni ma chunch salaka caʼalaktsʼilh ju Dios. Pus ju ixʼamamakaʼui ju Xivan ni jantu chun ixtanavi tachi ju ixtalhilanitach ju istʼaʼisraelitanin pus atʼalakʼajicalh ju ixlapanacni ju Xivan. 26 Chai ju ixʼamamakaʼui ju Xivan talakmilh ju ixʼamamakaʼunuʼan. Tajunich: ―Amamakaʼunuʼ ju anuʼ lapanac ju ixtʼavilhchan lhimakʼantacutni xaxcan Jordán ju chavai amakpaxananch chai na lhu ju talakxcavataji ju yuchi. Yuchi ju anuʼ ju lhichʼivin. 27 Chai akʼalhtayanalh ju Xivan. Ajunich: ―Jantu lai xamatiʼ amaklhtayanan tuʼuʼ tachaput ni jantu lactʼiyan ju caxtaknicancha. 28 Miʼakstuʼan uxijnan ju kʼasmatʼatʼit acsni icnaulhch ni jantu quitʼin ju icCristo ju noncan camalakachatachilh ju Dios. Ju quitʼin va pʼulhnan icmalakachacantachilh. Astan mintacha ju yuchi. 29 Junta tamakʼaxtʼokʼa tam tsʼalh pus anchach vachuʼ ya ju ixʼamigo chai ni kʼasmatʼa ixchivinti ju anuʼ ixʼamigo acsni tʼachivinin ju isʼasqʼuininti pus na kʼachanch. Pus vana va chun ju quitʼin. Na ickʼachan acsni takʼasmatni ixchivinti ju Cristo ju lapanacni. 30 Tasqʼuini ni cacʼatsacalh ni yuchi ju xakʼai. Para tasqʼuini ni jantu tuʼuʼ quintapalhni cava ju quitʼin. 31 Ju lactʼiyan mintachalh yuchach ju palai xakʼai. Ju va lhilapanac tsucuta pus va lhilapanac tʼajun chai va ixtaxtokni lacamunutpaʼ ju lhichivinin. Para ju lactʼiyan mintacha yuchi ju palai xakʼai. 32 Ju tuchi laktsʼinta ju yuchi chai kʼasmatʼach pus yuchach ju najun. Para jantu xamatiʼ lacaʼini ju ixchivinti. 33 Ju lacaʼini ju ixchivinti mavasalai ni vas najun ju Dios. 34 Ju macaminta ju Dios pus chivinin ixchivinti Dios. Chunchach chivinin ni jantu va lhcaxtʼakʼa ju Dios ju Spiritu Santu. 35 Ju xapai Dios mapaini ju istsʼalh. Chai xtaknikʼota ixtachaput ju istsʼalh. 36 Ju lhilacaʼanch ju istsʼalh Dios alin isʼatsucunti ju conkʼalhiyanta tus lactʼiyan. Ju jantu tuʼuʼ lhiulani ju istsʼalh Dios jantu catiʼalilh ju isʼatsucunti ju conkʼalhiyanta lactʼiyan ni va ulanich ixtalhkʼamti ju Dios ju anuʼ lapanac.
1 Ju Jesús machakxa ni ixtamackʼalhakʼasmatnantach ju fariseonin ni ixlacnoncanch ni palai lhu ixlapanacni ju Jesús chai palai lhu ixʼamakpaxanan ju yuchi. Palai jantu ju Xivan. 2 Mas jantu xaʼamakpaxanan ju Jesús. Va yuʼunch ju ixtaʼamakpaxanan ju ixʼamamakaʼui. 3 Pus ju Jesús acsni cʼatsalh ni chunch ixtakʼasmatʼa ju fariseonin pus taxtulh ju xaʼestado Judea. Va ixʼanchokoputun ju xaʼestado Galilea. 4 Chai yuchi lhitapasatilalh ju xaʼestado Samaria. 5 Ju yuchi milh ju lakʼachakʼan junta ixjuncan Sicar laxaʼestado Samaria. Vanin tʼalachʼapata ju ixtʼun ju anuʼ makʼaniya israelita ju ixjuncan Jacob. Anch junta lhikʼailaktsʼinta ju istsʼalh ju ixjuncan José. 6 Chai ju anch ixvi ju pos ju ixʼanuch ixjunita ju Jacob ju makʼanchich. Pus anchach ju astacnalh ju Jesús ni na ixkʼoptach ni na makat ju ixʼalhtananta. Chai ixtʼajunch kʼatuncunuʼ. 7 Chai chaʼalh pumatam chakoʼulh amachakaʼ Samaria. Va ixʼiputun ju xcan. Pus ju Jesús junich: ―Aqʼuintʼakʼotʼich lacatsʼunin ju mixcan. 8 Pus ju ixʼamamakaʼui ju Jesús ixtaʼanta ju lakʼachakʼan tamonin ju vaiti. 9 Pus ju anuʼ chakoʼulh ju amachakaʼ Samaria ixjunita chanich lhikʼalhtayanalh: ―Ju uxintʼi ni va israelitaʼat tajuch ni va qʼuisqʼuinipʼalai ju xcan. Ju quitʼin ni icʼamachakaʼ Samaria. Ju israelitanin jantu lai tatʼalaxakʼalai ju amachakʼan Samaria. 10 Chai akʼalhtayanalh ju Jesús. Junich: ―Ju uxintʼi jantu mispʼai ju ixlhakʼailaktsʼin Dios. Chai jantu qʼuimispʼai tichi chavaich ju quitʼin ju icjunan ni aqʼuintʼakʼotʼich ju mixcan. Ni xaqʼuimispʼatʼi cava pus alai uxintʼi xaqʼuisqʼuinin chai xacxtaknin ju xcan ju xtʼakʼa ju atsucunti. 11 Pus ju chakoʼulh chani lhikʼalhtayanalh: ―Ji compari matiʼ ju apʼuʼitʼi ju xcan. Ju pos ni na putalhman. Tas anchach ju lai aʼiyaʼ ju mixcan ju xtʼakʼa ju atsucunti. 12 Ju uxintʼi ja xakʼaiʼat. Ja palai jantu ju makʼaniya quimpaiʼan Jacob ju quintaxtaknitan ju ani pos. Anich ju kʼotlh ju yuchi chai ju isʼaskʼatʼan chaich ju ixʼatapacxat. 13 Ju Jesús chani lhikʼalhtayanalh: ―Va tichi chavaich ju cakʼotʼaʼ junima xcan caquicxixchokoyaʼ. 14 Para va tichi chavaich ju cakʼotʼaʼ ju xcan ju acxtakniyaʼ quitʼin jantu tavanan catiquicxixchokolh. Ju anuʼ xcan ju acxtakniyaʼ quitʼin tachi kʼai pos cajunaʼ laʼixʼalhunut ju jantu tavanan caxixaʼ. Chai yuchi ju capuʼalinach isʼatsucunti ju conkʼalhiyanta tus lactʼiyan. 15 Pus ju chakoʼulh chanich juni: ―Pus ji compari aqʼuixtʼakninch ju anuʼ xcan. Ju chunch jantuch acquicxixchokoyaʼ. Chai jantu acminaʼ iniʼ ju ani. 16 Chai ju Jesús chanich juni ju anuʼ chakoʼulh: ―Aʼinchich tʼasaniniʼ ju mimpapa. Kʼaixtamch atʼatʼanaʼ. 17 Chai ju chakoʼulh chani lhikʼalhtayanalh: ―Matiʼ ju quimpapa ju quitʼin. Chai ju Jesús chani juni: ―Stavasalantich ju naʼun ni matiʼ ju mimpapa. 18 Pumaquisich lapanacni ju tʼatsʼucʼumakʼantʼa. Chai ju chavai tʼatʼaʼun jantuch yuʼ ju mimpapa. Stavasalantich ju naʼun. 19 Pus ju chakoʼulh chani lhikʼalhtailh: ―Compari iccʼatsaich ni laich vachuʼ naʼun ixchivinti Dios. 20 Ju quilacpai quincʼan anch ju anuʼ lactalhpa ju ixtaʼan lakʼayanin ju Dios. Para ju uxijnan ju israelitanin untʼatʼit nonatʼit ni va anch ju lakʼachakʼan Jerusalén ju lai acʼalh lakʼayanaʼ ju Dios. 21 Pus ju Jesús chani lhikʼalhtailh: ―Chakoʼulh aqʼuilacʼaʼininch ju acjunan. Caminaʼ avilhchan ni jantu atʼilakʼayatʼit ju xapai Dios nin yuchi ju ani lactalhpa nin anch ju lakʼachakʼan Jerusalén. 22 Ju uxijnan jantu cʼatsʼayatʼit tuchʼi ju lakʼayayatʼit. Ju quijnan iccʼatsayau tuchi ju iclakʼayayau ni laquilhiquijnan ju israelitanin icjuntau ju caʼalinaʼ ju amakʼalhtaxtunuʼ. 23 Cachinach ju avilhchan ju vasalh nomputun ni xakʼai ju xapai Dios catanonach laʼixlhichux ixʼalhunutʼan chai calakʼayayaʼ tachi ju kʼachani ju yuchi. Chai mas chavaich chunch catalalh. Pus ju xapai Dios lacasqʼuin ni cataʼalilh ju lapanacni ju chunch catalakʼaya. 24 Ju Dios matiʼ ixlacatuna. Ju talakʼayaich ju yuchi tasqʼuini ni catalakʼaya laʼixʼalhunutʼan chai tachi ju kʼachani ju yuchi. 25 Ju chakoʼulh chani juni: ―Iccʼatsaich ni caminaʼ ju noncan camalakachatachilh ju Dios. Yuchi ju talhimapakaʼui Cristo. Chai acsni caminaʼ ju yuchi aquintamavasalanikʼoyan chux ju taxtokni. 26 Akʼalhtayanalh ju Jesús: ―Quitʼinch ju icCristo ju ictʼachivinan. 27 Acsnich ju tachincha ju ixʼamamakaʼui ju Jesús. Pus na talhamakʼaninilh ni va ixtʼajunch tʼachiviniʼ ju anuʼ chakoʼulh ju Jesús. Para jantu xamatiʼ ju lai casacminilh ju laich cajunilh: “Tijuch ju sasacmi” U “Tijuch ju xalhitʼachʼivinin ju chakoʼulh”. 28 Pus ju chakoʼulh macauʼula ju ixʼakxau chai anchokolh ju lakʼachakʼan. Alh alacjuniniʼ ju amachakʼan anch. Ajunich: 29 ―Caʼauch laktsʼinin ju anuʼ lapanac ju xaquijuni tachi chun ju icnavitach. Ja jantiyuʼ nuʼ ju Cristo ju noncan camalakachatachilh ju Dios. 30 Pus ju acsnich lana tataxtucha ju lapanacni ju lakʼachakʼan chai talakmilh ju Jesús. 31 Acsni tucaʼ ixtachaʼan ju lapanacni pus ju ixʼamamakaʼui ju Jesús takʼasilhijunich ju vaiti. Tajuni: ―Amamakaʼunuʼ avaich. 32 Para ju yuchi chani alhikʼalhtailh: ―Ju quitʼin alin ju tuchi icʼui. Para ju uxijnan jantu cʼatsʼayatʼit tis talakxtuch. 33 Ju acsnich ju ixʼamamakaʼui ju Jesús talaxakʼalalh ju ixlhiʼakstuʼan. Talajunich: ―Ja xamatiʼ nuʼ ju xalhimini ju ixvaiti. 34 Ju Jesús ajunich: ―Tachi ju uxijnan ni tachapun jun ju milacatunaʼan acsni venatʼit pus vana va chun ju quitʼin. Tachapun jun ju quintacʼatsan acsni icnavini ju ixkʼachat ju quimacaminta chai ni acnavinikʼo ju ixlhichʼalhcat. 35 Chai jantu anaʼuntʼit ju uxijnan ni ticʼacxacaʼ lakatʼatʼi malhquiyuʼ tus acsni cachinaʼ ju paʼaxkʼan. Iclajunau: Alacʼavanantʼit. Alacʼapʼitʼit ju lacacuxtun. Na lacxixtach. Laich acʼaxkʼanalh. Pus vana va chun ju ani taminta lapanacni. Na lhu ju takʼasmatputun ixchivinti Dios chai catalacaʼiyach. 36 Pus ju camavasalayach ju quilacata alin ju ixtalhaja chai aʼaktaijui lhu lapanacni ni laich catalacaʼiyach chai caʼalinaʼ isʼatsucuntiʼan ju conkʼalhiyaʼ tus lactʼiyan. Ju pʼulhnan canonaʼ ju chivinti cakʼachanach. Chai ju xamavasalanaʼ ju tuchi catalacaʼiyaʼ vachuʼ cakʼachanaʼ. 37 Ju ani chivinti mavasalai ni stavasalanti tachi ju noncan: “Pumatam ju achʼananan. Chai apumatam ju caʼaxkʼananaʼ”. 38 Quitʼin ju xaclamalakachayau ju axkʼanti junta jantu uxijnan chʼantʼatʼit. Ju chunch nomputun ni aliʼin ju pʼulhnan tanajunta ju chivinti ju quilacata chai uxijnan ju xaʼamavasalanin ju chivinti untʼatʼit chai quintalhilaksilh lhu ju lapanacni. 39 Na lhu ju amachakʼan Samaria talhilacaʼalh ju Jesús va ixlacaʼatalh ju ixchivinti ju anuʼ chakoʼulh acsni ajunilh: “Ju yuchi quijonkʼoch chux tuchi icnavitach”. 40 Pus ju amachakʼan Samaria acsni talakʼalh junta ixvilhcha ju Jesús tatapaininilh ni caʼalh tsucunuʼ pantsʼiquis ju laʼixlakʼachakʼanʼan. Pus ju Jesús anch tolhcha lakatʼui avilhchan. 41 Pus acsnich ju palai lhu talhilacaʼalh ju Jesús ni takʼasmatnilh isʼakstuʼan ju ixchivinti. 42 Chanich tajuni ju chakoʼulh: ―Ju chavai jantuch va laminchivinti ju iclacaʼiyauch. Ju chavai quiʼakstu quincʼan xackʼasmatʼau ju ixchivinti ju ani ya lapanac chai iccʼatsayau ni slivasalh ni yuchach ju Cristo ju ani ya ju noncan ni camalakachatachilh ju Dios. Yuchi ju caʼamakʼalhtaxtuyaʼ ju lapanacni ju ani lacamunutpaʼ. 43 Ju ixlhilakatʼutu avilhchan taxtulh ju Jesús ju anch lakʼachakʼan. Alhch ju laxaʼestado Galilea. 44 Va isʼakstu ju Jesús chani ixnajunta: ―Ju tam lapanac ju najun ixchivinti Dios jantu tuʼuʼ lhiulacan ju laʼixtʼun. 45 Acsni chaʼalh ju xaʼestado Galilea pus ju amachakʼan anch va lhikʼachach taʼamaklhtayanalh ju Jesús ni ixtalaktsʼintach tachi chun ju lhamakʼan ju ixnavitacha ju lakʼachakʼan Jerusalén acsni cʼatanicanchalh ju anch. Ju amachakʼan Galilea vachuch ixtamakquilata junta alilh cʼatan. 46 Chai aktam anchokopa ju Jesús ju lakʼachakʼan Caná lhiGalilea junta ixlakʼoxitacha ju xcan ju lapala vino. Chai ju istsʼalh ju pumatam xakʼai ixmacha lakʼachakʼan Capernaum. Va ixtakʼankʼai. 47 Pus ju anuʼ lapanac kʼasmatlh ni taxtutachalh ju Jesús ju xaʼestado Judea. Chai cʼatsalh ni cachinach ju xaʼestado Galilea. Pus ju anuʼ lapanac lakʼalh ju Jesús. Tapaininilh ni caʼalh chai palaich canavi ju istsʼalh ni va ixtʼajunch niniʼ. 48 Ju acsnich ju Jesús juni: ―Jantu tavanan lai lacʼaʼiyatʼit ni jantu laktsʼinatʼit tuʼuʼ ixpulacaʼican chai ju tuʼuʼ lhamakʼan. 49 Chai ju anuʼ xakʼai junich ju Jesús: ―Quiʼamigo apʼitʼich laktsʼiniʼ ju quintsʼalh ni tucaʼ ni. 50 Pus ju Jesús junich: ―Aʼinchich. Palaich junita ju mintsʼalh. Pus ju anuʼ lapanac lacaʼinilh ju ixchivinti ju Jesús ju tuchi junilh chai anchokolh laʼixchakaʼ. 51 Chai acsni ixʼanta ju lacati pus taquipakxtokchilh ju ixlapanacni. Taquimacʼatsanichilhch ni palaich ju istsʼalh. 52 Chai ju anuʼ xapai takʼankʼan asacmich ju ixlapanacni tuchi horach ju palai xajun ju istsʼalh. Chai ju xalapanacni tajunich: ―Cutanch. Lakatam hora atokʼoxanaʼ ju macaulh ju scacat. 53 Pus ju xapai takʼankʼan lana machakxa ni acsnich hora ju naulh ju Jesús ni palaich ju isʼaskʼatʼa. Pus ju anuʼ lapanac chai chux ju ixtatanumanalh laʼixchakaʼ lana talhilacaʼalh ju Jesús. 54 Acsni taxtucha ju laxaʼestado Judea ju Jesús pus chaʼanchokolh ju laxaʼestado Galilea. Chai yuchach ju ani ju ixlhilakatʼuich ixpulacaʼican ju navi ju Jesús ju laxaʼestado Galilea.
1 Acsni tapasalh ju ani taxtokni pus ju Jesús alh ju lakʼachakʼan Jerusalén chai ju acsni ixcʼatanʼan ixjunita ju israelitanin. 2 Ju lakʼachakʼan Jerusalén ixʼalin lakatam malhtich junta ixʼapumanucan ju borregojni. Chai anch ixvi lakatam tanque ju ixjuncan lacalhihebreo Betesda. Chai ixʼalin lakaquis samakspaʼ. 3 Ju anch na lhu ixʼamamacanta ju takʼankʼanin. Ju aliʼin va alakʼachʼix ixtajunita. Ju aliʼin va ixchʼantakʼalhita. Ju aliʼ va ixtaxixta laʼixlacatunaʼan. Sich yuʼunch ju ixtapacxanch ni calucunulh ju xcan. 4 Aktamixnin pumatam anquilh ixmalucuni ju anuʼ xcan. Chai ju pʼulhnan catajuyaʼ ju lacatanque acsni lucununtach ju xcan pus palai ixjun mas va tuchi takʼankʼat cachʼapalh. 5 Chai ixma pumatam lapanac ju ixpacxanta ixtakʼankʼat lakapʼuxamcautsajin cʼata. 6 Ju Jesús laktsʼilh junta ixma. Chai cʼatsalh ni na makʼaniya takʼankʼat ju ixchʼapata. Pus junich: ―Ja lacʼasqʼuin ni palai aʼuntʼi. 7 Pus akʼalhtayanalh ju anuʼ takʼankʼan. Junich: ―Quiʼamigo matiʼ xamatiʼ ju lai aquimuju ju lacxcan acsni tʼajun lucunuʼ. Acsni ictajuputun ju quitʼin akʼantamch tajumapa. 8 Ju Jesús junich: ―Akʼostʼaʼulhch. Asactʼich ju mimputaman chai alhtʼanch. 9 Ju acsnich lana palai va ju lapanac. Saclh ju ixputaman chai alhtanalh. Ju acsnich avilhchan paʼastacni ixjunita. 10 Ju acsnich ju xalackʼajin israelitanin chani tajuni ju anuʼ takʼankʼan ixjunita: ―Ju chavai avilhchan paʼastacni junita. Jantu lhijun lacalhamapʼaksin ni lai acʼucʼa ju mimputaman. 11 Pus ju takʼankʼan ixjunita alackʼalhtailich. Ajunich: ―Ju palai xaquinavi isʼakstu ju xaquijuni ni acsaclh ju quimputaman chai acʼalhtanalh. 12 Pus palai taquilhasacmi. Tajuni: ―Tis chavaich ju xajunan ni asactʼich ju mimputaman chai alhtʼanch. 13 Pus ju anuʼ ju palai ixnavicanta jantu ismispai tichi chavaich ju palai ixnavita. Ju Jesús ixmakpulacnatʼajun laʼixtalhavat lapanacni ju ixtayanalh anch. 14 Chai ju astan lacpujitat ju tʼalapakxtoklh ju Jesús ju anuʼ ixcʼuchʼuta. Chai junich: ―Alaktsʼich. Palaich unitʼa. Tun alactʼuʼunumpʼalh. Tun palai macxcai camilh ju mimakʼalhkʼajnat. 15 Ju anuʼ lapanac alh ajuniniʼ ju xalackʼajin israelitanin ni yuchach ju Jesús ju palai ixnavita. 16 Pus ixlhiyuchach talhixcailich ju Jesús ju xalackʼajin israelitanin. Chai ixtalhimakniputunch ni ixnavich ju ani taxtokni ju va avilhchan paʼastacni. 17 Ju Jesús akʼalhtayanalh: ―Ju quimpai tus chavai ju chʼalhcatnan. Chai vachuʼ ju quitʼin icchʼalhcatnan. 18 Pus acsnich ju palai ixtalhimakniputun ju israelitanin ju Jesús. Para jantu va yuchi ju ixtalhimakniputun ni va chʼalhcatnalh ju anuʼ avilhchan paʼastacni para vachuʼ ixlacaʼatalh ni va ixnajunch ni Dios ju ixpai. Ju chunch ixnomputun ni va ixtʼachunchach ixjunita ju Dios. 19 Chai akʼalhtayanalh ju Jesús. Ajunich: ―Slivasalh ju iclajunau. Ju quitʼin ni va icsaʼaskʼatʼa pus jantu lai icnavi tuʼuʼ ju va laquiʼakstu. Yuchi ju icnavich ju icmaklaktsʼinch ju quimpai. Ju chunch tachi chun ju navi ju quimpai vachuch yuchi ju icnavi ni istsʼalh ju quitʼin. 20 Ju quimpai na quimapaini ni istsʼalh ju quitʼin. Chai quimalacasunikʼojuta tachi chun ju taxtokni ju navi ju yuchi. Chai aquimalacasuniyaʼ palai kʼai lhamakʼan ni laich alhamakʼanininaʼitʼit. 21 Tachi ju quimpai ni lai malokʼoni ju nitach chai xtaknichokoi ju isʼatsucunti pus chunchach vachuʼ ju quitʼin ni istsʼalh icjunita. Vachuʼ lai acxtakniyaʼ ju isʼatsucunti va tichi chavaich ju acxtakniputunach. 22 Ju quimpai jantu laktsʼintanui xamatiʼ. Para quixtaknita quimpuxakʼai ni lai acʼalaktsʼintanu ju lapanacni. 23 Pus yuchi aquintalhilakʼayayach tachi chun ju lapanacni tachi ju talakʼayaich ju quimpai. Ju jantu quilakʼayai ju quitʼin ni istsʼalh icjunita pus sin quimpai jantu lakʼayai ni yuchi ju quimalakachatachilh. 24 Slivasalh ju iclajunau. Ju cakʼasmatʼaʼ ju quinchivinti chai ju calhilacaʼanach tichi chavaich ju quimalakachatachilh pus alinch isʼatsucunti jonkʼalhita lactʼiyan. Ju yuchi jantuch calaktsʼintanucanaʼ ixlacata ixtalakʼalhin. Chai jantu catiʼalh junta jonkʼalhita makʼalhkʼajnat. Alai tus chavai lana alinch isʼatsucunti ju conkʼalhiyanta tus lactʼiyan. 25 Slivasalh ju iclajunau. Ju atipuʼanta u mas chavai ju jantucaʼ talhilaksi ju Dios aquintakʼasmatniyach ju quinchivinti ni istsʼalh ju Dios ju quitʼin. Chai tachi chun ju aquintakʼasmatniyach catatsucuchokoyach. 26 Tachi ju quimpai ni lai axtakni ju isʼatsucuntiʼan ju lapanacni pus chunchach vachuʼ ju quitʼin ni istsʼalh icjunita. Ju yuchi quixtaknita ju quintachaput ni lai acʼaxtakniyaʼ isʼatsucuntiʼan ju lapanacni. 27 Pus vachuch quixtaknilh ju quimpokʼai ni laich icʼalaktsʼintanui ju lapanacni ni quitʼinch ju quimalakachatachilh ju Dios ni lapanac actsucuyaʼ ju ani. 28 Jantu alhamakʼaninintʼit ju ani. Caminaʼ ju avilhchan acsni catakʼasmatʼach ju quinchivinti tachi chun ju taʼacnununta. 29 Chai catataʼacxtuyach. Ju tanavita kʼox caʼaxtaknicanach isʼatsucuntiʼan jonkʼalhita lactʼiyan. Ju tanavita ju talakʼalhin caʼaxtaknicanach ixmakʼalhkʼajnatʼan junta jonkʼalhita. Ju Jesús tailhiʼalh ju ixchivinti chai chani ajunilh ju istʼaʼisraelitanin: 30 ―Jantu lai icnavi tuʼuʼ ju va quiʼakstu. Tachi ju icjuncanch chunchach ju icmucʼai ju talakʼalhin. Chai mas icmucʼai ju talakʼalhin ju quitʼin para soknicʼa ju icnavi ni jantu va quinkʼachat quiʼakstu icpuxcajui. Va yuchi ju quimpai icnaviniputun ju ixkʼachat ni yuchi ju quimacaminta. 31 Pus ni va quiʼakstu cava ju icnajun ni icxakʼai pus ju quinchivinti jantu caʼixlhitapalalh. 32 Para alin pumatam ju xtʼakʼa ju chivinti ju quilacata. Chai iccʼatsai ni stavasalanti ju tuchi najun. 33 Chai uxijnan miʼakstuʼan ju malakʼachʼanitʼit pumatam ju Xivan ju amakpaxanaʼ ni caquilhasacmi ta lhijunitach. Chai ju yuchi tajunin ju istavasalanti. 34 Pus ju quitʼin jantu tuʼuʼ iclhiulai ju va ixchivinti lapanac. Ju iclapujunauch ju ani tsʼa ma laich atʼakʼalhtʼaxtʼutʼit ju uxijnan. 35 Ju Xivan tachi maclhcu ixjunita ju maktaji chai mapulhcui. Ju uxijnan lhikʼachʼantʼit pantsʼiquis ni ixtamapulhcuniyan lamintacʼatsanʼan. 36 Para ju lhamakʼan ju icnavi putasui tichi chavaich ju quitʼin. Ju yuchi palai lhitapalai. Palai jantu ju tuchi quilhichivinilh ju Xivan. Ju quimpai quixtaknilh ju ixlhichʼalhcat ni acnavinikʼo. Chai ju anuʼ lhichʼalhcat ju icnavi yuchach ju putasui tichi chavaich ju quitʼin ni quimpai ju quimalakachatachilh. 37 Chai quimpai ju xaquimalakachayachilh yuchi ju xtakta ju chivinti ju quilacata. Ju uxijnan jantu tavanan kʼasmatʼatʼit ju ixchivinti nin alaktsʼintʼit ta yu junitach. 38 Ju uxijnan jantu pʼacxantʼatʼit ju ixchivinti lamiʼalhunutʼan va ixlacata ni jantu quilaquiclacaʼiyau mas yuchi ju quimalakachatachilh. 39 Tasqʼuini ni alhitʼamakʼaʼutʼit kʼox ju ixchivinti Dios ni nonatʼitch ni anch ju alhitʼaʼuyaʼitʼit ju atsucunti ju conkʼalhiyanta tus lactʼiyan. Chai alhitʼaʼuyaʼitʼit ni vana anch quilhichivinin quilacata. 40 Para ju uxijnan jantu tʼampʼutʼunatʼit ju laquimacni ni laich apʼacxantʼit ju miʼatsucuntiʼan ju jonkʼalhita. 41 Ju quitʼin jantu iclacasqʼuin ni canaulh ju va tam lapanac ni icxakʼai. 42 Iccʼatsai ni jantu mapʼainiyatʼit ju Dios lamiʼalhunutʼan ju uxijnan. 43 Ju quitʼin laʼixtapakaʼut ju quimpai icminta. Chai jantu tuʼuʼ quilalhiulayau. Para ni apumatam camilh laʼixtapakaʼut isʼakstu pus ju yuchi na tuʼuʼ alhiulayaʼitʼit. 44 Tas laich aquilalhilacaʼiniyau ju quitʼin ni va lamilhiʼakstuʼan ju laʼunatʼit ni na xalackʼajin untʼatʼit. Jantu lacʼasqʼuinatʼit ni Dios ju canaulh ni xalackʼajin untʼatʼit. 45 Tun va anaʼuntʼit ni quitʼin ju iclachivimakʼanau ju laʼixʼucxlacapuʼ ju quimpai. Alin tichi chavaich ju tachivimakʼanan. Yuchi ju ixjuncan Moisés mas yuchi ju lhilacʼapʼinatʼit ju uxijnan. 46 Ju uxijnan ni vasalh cava ixlacʼaʼinitʼit ju Moisés pus vachuʼ xaquilalacaʼiniuch ju quitʼin ni quilhiʼatsʼoknunta quilacata ju yuchi. 47 Para ni jantu lacʼaʼiyatʼit ju isʼatsʼoknut ju Moisés tas alhilacʼaʼiyaʼitʼitch ju quinchivinti.
1 Astan ju Jesús alh ju lhimakʼantacutni ju atantsʼin Galilea junta vachuʼ juncan Tiberias. 2 Na lhu lapanacni tachʼakʼokʼalh ju Jesús ni ixtalaktsʼinch ju lhamakʼan ju ixʼanavini ju takʼankʼanin. 3 Pus ju Jesús alh ju lactalhpa chai anch alactʼatolhcha ju ixʼamamakaʼui. 4 Quilhpaminta ixcʼatanʼan ixjunita ju istʼaʼisraelitanin acsni ixpupastaccan ju anuʼ atatsʼisni acsni tatakʼalhtaxtulh laʼixʼanintiʼan ju xalackʼajin istsʼalan ju makʼaniya israelitanin. 5 Acsni lacaʼanchokolh ju Jesús junta pumilh pus laktsʼilh ni na lhu ixtaminta ju lapanacni. Pus ju Jesús junich ju Pilipe: ―Tas anchach ju lai catamaʼu ju vaiti ni camavauch ju lapanacni. 6 Para ju chunch punaulh ju Jesús va ixpulaktsʼintanuputun ju Pilipe. Ju Jesús isʼakstu iscʼatsai tuchi ju canaviyaʼ. 7 Pus akʼalhtayanalh ju Pilipe. Najunch: ―Mas aclhitamaulh ju vaiti xatalhaja lakatʼui cientos avilhchan ca jantu catitalhilalh mas va lactsʼunin ju acʼaxtaknilh ju lapanacni. 8 Pus ju pumatam ixtamamakaʼun ispʼisekʼe ju Simón Pitaluʼ ixjunita. Ju yuchi ixjuncan Tilix. Ju yuchi junilh ju Jesús: 9 ―Ani ya pumatam tsʼalh ju chʼapata aksquis xavati cebada chai lakatʼui pamata. Va yuchi ni va lacatsʼunin. Ju lapanacni na ilhuʼan. 10 Ju acsnich ju Jesús ajunich ju ixʼamamakaʼui: ―Aʼunitʼitch ju lapanacni ni catatavilhch. Pus na ixma atsʼin junta tatavilhch ju lapanacni. Ixtachaʼanta lakaquis milh jokʼatni. 11 Ju Jesús acsni chʼapalh ju anuʼ vati pus xtaknilh lhakʼailaktsʼiuch ju Dios. Astan ju axtaknilh ju ixʼamamakaʼui. Pus ju anuch ixʼamamakaʼui tamakpitsilh laʼixtalhavat lapanacni ju ixtavilanalhch lacatsʼinan. Vana va chun navicalh ju pamata. Chai taʼulhch tachi ju talacasqʼuilhch. 12 Acsni talhilalhch pus ju Jesús ajunich ju ixʼamamakaʼui: ―Asactʼitch ju vaiti ju xajacha. Ju chunch jantu tuʼuʼ catsʼankʼayaʼ. 13 Pus acsni tasaclh chaʼalh lakacautʼui tankʼalin ju xajchalh ju anuʼ aksquis xavati cebada. Yuchi ju tamaxajnichalh ju taʼulh ju ixtalhavat lapanacni. 14 Ju anuch lapanacni acsni talaktsʼilh ju anuʼ lhamakʼan ju navilh ju Jesús pus tanaulh: ―Ju ani slivasalh ca yuchach ju anuʼ lapanac ju caminach nonaʼ ixchivinti Dios ju ani lacamunutpaʼ. 15 Ju Jesús acsni machakxalh ni va tapʼastu ixtanaviputun kʼai ucxtin pus alackʼosmakʼalh ju lapanacni. Alh tolhnaʼ lactalhpa. 16 Acsni ixtʼajunch tokʼoxanaʼ pus taʼalh ju lacaʼatantsʼin ju ixʼamamakaʼui ju Jesús. 17 Chai tataju ju lacabarco. Va ixtaʼamputunch lhimakʼantacutni ju atantsʼin junta ixvilhcha ju lakʼachakʼan Capernaum. Pus tamaklhtatsʼislich ju lacaʼatantsʼin chai ju Jesús ju acsni tucaʼ sip ixlai. 18 Pus ju xcan na pʼas ixtʼajun lucunuʼ ni na pʼas ixlai ju kʼai un. 19 Acsni taʼalhtanalh tachi lakaquis u lakachaxan kilometro pus talaktsʼistuclich ju Jesús ni ixʼalhtanamintach laʼixʼucxni xcan. Vaninch ixminta ju lacabarco. Pus lana na tatalhanalh. 20 Para ju Jesús ajunich: ―Quitʼin. Jantu aquilatalhoniu. 21 Ju acsnich va lhikʼach taʼamaklhtayanalh ju lacabarco. Pus lana va tsʼalhti tacutcha ju barco. Tachaʼalh ju anuʼ lacatʼun junta ixtaʼanta. 22 Ni tuncunchokopa ju anuʼ lapanacni ju tatamacontolhcha ixlhilakʼantacutni ju atantsʼin tapastaclich ni va lakatam ixjunita ju barco. Chai ixtalaktsʼinch ju Jesús ni jantu alactʼaʼalh ju ixʼamamakaʼui acsni taʼalh ju lacabarco. Para va isʼakstuʼan ju taʼalh. 23 Para ju aliʼ barco tamincha ju lakʼachakʼan Tiberias. Taʼastacnalh vanin junta ixtakta lakʼailaktsʼiuch ju Dios ju Jesús junta amavalh ju lapanacni. 24 Pus ju lapanacni acsni talaktsʼilh ni jantu anch ixvi ju Jesús nin yuʼunch ju ixʼamamakaʼui pus vachuʼ tatajulh ju yuʼunch ju lacabarco. Taminchokolh ju lakʼachakʼan Capernaum. Va ixtapuxcajui ju Jesús. 25 Acsni talhitaju ju Jesús ju lhimakʼantacutni ju atantsʼin tajuni: ―Amamakaʼunuʼ tas vananch ju xachʼitʼan ju ani. 26 Chai akʼalhtayanalh ju Jesús. Ajunich: ―Slivasalh ju iclajunau. Ju uxijnan quilalhipuxcoyau ni utʼit ju vati chai lhilatʼit. Jantiyuʼ quilalhichʼakʼokʼayau ni laktsʼintʼatʼit ju lhamakʼan. 27 Tun tʼichʼalhcʼatnantʼit va ixlacata ju vaiti ju va takʼalhi. Para achʼalhcʼatnantʼit ixlacata ju tumpa vaiti ju xtʼakʼa ju atsucunti jonkʼalhi. Yuchach ju aclaxtakniyau ju quitʼin ju quimalakachatachilh ju Dios ni lapanac actsucuyaʼ ju ani. Chai quimpai Dios ju xaquixtakni ju quintachaput ni laich acxtaklh ju anuʼ vaiti. 28 Pus tajunich ju Jesús: ―Tijuch ju acnaviyau ni laich acnaviu ju ixlhichʼalhcat ju Dios. 29 Akʼalhtayanalh ju Jesús. Ajunich: ―Yuchach ju ani ju ixlhichʼalhcat ju Dios ni aquilalhilacaʼau ju quitʼin ju quimacaminta ju Dios. 30 Ju acsnich tajunich: ―Pus tijuch ju lai aquilamalacasuniyau chai laich aclaktsʼinau chai laich aclapulacaʼiniyauch ju uxintʼi. Tijuch ju lai navi ju uxintʼi. 31 Ju quilacpaiʼan ju makʼanch ixtatʼajun taʼulh ju anuʼ ju ixjuncan mana junta aseknicʼa. Chunch ju tapasalh tachi ju tsʼokcanta junta najun: “Lactʼiyan ju amacaminicancha ju vati. Chai taʼulh”. 32 Pus ju Jesús ajunich: ―Slivasalh ju iclajunau. Jantiyuʼ ju Moisés ju xataxtakniyan ju xavati ju lactʼiyan. Va yuchi ju quimpai ju taxtakniyan ju anuʼ tachi vati ju xaminacha lactʼiyan ju xtʼakʼa ju stavasalanti atsucunti. 33 Ju vati ju xtʼakʼa ju Dios yuchi ju anuʼ ju mincha lactʼiyan chai axtakni isʼatsucuntiʼan ju lapanacni. 34 Tajunich: ―Quiʼamigo pus va tachi aquilaxtakniyauch ju ani vati. 35 Pus ju Jesús ajunich: ―Quitʼinch ju xavati ju xtʼakʼa atsucunti jonkʼalhi. Ju minta laquimacni jantuch tavanan cachavanaʼ laʼixtacʼatsan. Ju quilhilacaʼantach quitʼin jantuch tavanan caquicxixchokoyaʼ ju laʼisʼatsucunti. 36 Pus anich iclajunau. Mas quilalaktsʼinauch jantu lacʼaʼiyatʼit. 37 Tachi chun ju lapanacni ju quixtaknita ju quimpai aquilakminach ju quitʼin. Chai ju minta laquimacni jantu tavanan actixcomakʼalh. 38 Yuchi iclhitaxtucha ju lactʼiyan ni acnaviniyach ixkʼachat ju quimacaminta. Jantiyuʼ ni acnavilh ju quinkʼachat quiʼakstu. 39 Yuchach ju ani ju ixkʼachat ju quimacaminta. Tachi chun ju lapanacni ju quixtaknita ju yuchi jantu actimakʼatsʼankʼa xamatiʼ. Para acʼamalokʼonichokoyaʼ ju laʼixʼaclanti ju lacamunutpaʼ. 40 Yuchach ju ani ju ixkʼachat ju quimpai. Tachi chun ju quilaktsʼin ni istsʼalh Dios ju quitʼin chai quilhilacaʼanch pus caʼalinaʼ ju isʼatsucunti jonkʼalhita. Chai quitʼinch ju acmacxtuchokoyaʼ laʼixʼaninti ju laʼixʼaclanti ju lacamunutpaʼ. 41 Ju acsnich ju israelitanin macxcai chivinti talhichivinilh ju Jesús ixlacata tuchi ixnajun acsni tavanan naulh ni yuchach ju xavati ju xamincha lactʼiyan. 42 Ixtanajunch: ―Ju ani ja jantiyuʼ ju Jesús ju istsʼalh José. Ju ixpai chai ixnati mispayau ju quijnanʼan. Tas laich lhinajun: “Ju quitʼin lactʼiyan xacminacha”. 43 Pus ju Jesús akʼalhtayanalh. Ajunich: ―Jantu anaʼuntʼit macxcai chivinti ju uxijnan. 44 Jantu xamatiʼ lai quilakmin ju quitʼin ni jantu cakʼailhimilh laquimacni ju quimpai ju quimacaminta. Chai acmalokʼonichokoyaʼ laʼixʼaclanti ju lacamunutpaʼ. 45 Chani tatsʼokʼula ju makʼaniya lapanacni ju ixtanajun ju ixchivinti Dios. Tanaulh: “Dios ju camalanikʼoyaʼ tachi chun ju lapanacni”. Pus ju quitʼin icnajun ni tachi chun ju takʼasmatni ixchivinti ju quimpai chai talani tuchi malani ju yuchi pus cataminach laquimacni. 46 Jantu icnomputun ni xamatiʼ laktsʼinta ju quimpai. Va quitʼin ju iclaktsʼinta ni laʼixmacni yuchi ju xactaxtuyacha. Quitʼinch ju iclaktsʼinta ju quimpai. 47 Slivasalh ju iclajunau. Ju quilhilacaʼanch quitʼin alinch isʼatsucunti jonkʼalhita lactʼiyan. 48 Quitʼinch ju xavati ju xtʼakʼa ju atsucunti jonkʼalhita. 49 Ju makʼaniya milacpaiʼan mas taʼulh ju anuʼ ju mana ixjuncan junta aseknicʼa para tanilh. 50 Quitʼinch ju icxavati ju xacminacha lactʼiyan. Chai ni xamatiʼ caʼamaklhtayananaʼ ju quiʼacanit tachi acsni amaklhtayanancan ju tuʼuʼ vaiti pus jantu catiʼalh junta maktaikʼalhita ju jipi. Yuchi iclhimilh ju quitʼin ju ani. 51 Quitʼin ju icxavati ju xtʼakʼa atsucunti chai xacminacha lactʼiyan. Ni xamatiʼ caʼamaklhtayananaʼ ju quiʼacanit tachi acsni amaklhtayanancan ju tuʼuʼ vaiti pus caʼalinanta isʼatsucunti jonkʼalhita lactʼiyan. Chai ju anuʼ vati ju acxtʼakʼaʼ yuchi ju quilacatuna ju acxtʼakʼaʼ. Yuchi ju laich capuʼalinaʼ isʼatsucuntiʼan ju lapanacni ju lactʼiyan. 52 Pus ju acsni ju israelitanin ixtalaclakʼaji ju sia yuʼunch. Ixtanajun: ―Tas laich aquintalhixtakniyan ju ixʼacanit tachi acsni xtakcan tuʼuʼ vaiti. 53 Pus ju Jesús ajunich: ―Slivasalh ju iclajunau. Ni jantu amaklhtʼayananaʼitʼit ju quiʼacanit tachi acsni amaklhtayanancan tuʼuʼ vaiti chai ni jantu amaklhtʼayananaʼitʼit ju quiʼacʼalhni tachi acsni amaklhtayanancan tuʼuʼ xcan pus jantu pʼacxanatʼit miʼatsucuntiʼan jonkʼalhita ju lactʼiyan. 54 Pus ju amaklhtayanan ju quiʼacanit tachi tuʼuʼ vaiti chai ju amaklhtayanan ju quiʼacʼalhni tachi ju tuʼuʼ xcan pus alinch ju isʼatsucunti jonkʼalhita. Chai quitʼinch ju acmacxtuchokoyaʼ laʼixʼaninti acsni caʼaclayach ju lacamunutpaʼ. 55 Ju caʼamaklhtayananaʼ ju quiʼacanit tachi ju tuʼuʼ vaiti chai caʼamaklhtayananaʼ ju quiʼacʼalhni tachi ju tuʼuʼ xcan pus capuʼalinach ju istavasalanti isʼatsucunti. 56 Pus ju caʼamaklhtayananaʼ ju quiʼacanit tachi ju tuʼuʼ vaiti chai caʼamaklhtayananaʼ ju quiʼacʼalhni tachi ju tuʼuʼ xcan pus tʼajunch ju laquimacni. Chai ju quitʼin laʼixʼalhunut yuchi ju ictʼajunch. 57 Tachi ju quimpai ju lakʼajunta ni quimacamilh chai yuchi ju quixtaknita ju quiʼatsucunti pus vanach va ixtʼachunch ju ani. Ju aquiʼamaklhtayananaʼ tachi ju tuʼuʼ vaiti pus puʼamaklhtayanan ju isʼatsucunti ju jonkʼalhita. 58 Quitʼin ju icxavati ju xacmincha lactʼiyan. Jantu chun tachi ju anuʼ ju taʼulh ju makʼaniya milacpaiʼan. Ju yuʼunch mas taʼulh ju anuʼ vati ju mana ixjuncan jantu anch ju tapulhitaju isʼatsucuntiʼan ju jonkʼalhita tus lactʼiyan. Para ju aquiʼamaklhtayananaʼ tachi ju amaklhtayanancan tuʼuʼ vaiti pus caʼalinaʼ isʼatsucunti jonkʼalhita. 59 Ju Jesús noncha ju ani taxtokni laxapujitat lakʼachakʼan Capernaum acsni ixtʼajun amalaniniʼ ixlacata Dios. 60 Pus ju aliʼin ixʼamamakaʼui ju Jesús acsni takʼasmatlh ju ani chivinti tanaulh: ―Na tsʼinqʼui ju ani chivinti. Tis chavaich ju laich camuctaxtu ju chunch chivinti. 61 Pus ju Jesús ni cʼatsa ju laʼixʼalhunut ni jantu kʼox ixtalhiulai ju ani chivinti ju ixʼamamakaʼui pus ajunich: ―Ja jantu lai chʼixatʼit ju ani chivinti. 62 Tʼas anonaʼitʼit ni aquilalaktsʼinau ni actaʼakstʼachokoyaʼ junta xacvilhcha pʼulhnan. 63 Pus ju Spiritu Santu yuchi ju xtʼakʼa ju atsucunti jonkʼalhita. Ju tuʼuʼ ixlacata ju quilacatunaʼan jantu lai xtʼakʼa ju atsucunti jonkʼalhi tus lactʼiyan. Ju chivinti ju iclamavasalaniyau pus ixlacata ju miʼalhunutʼan junita chai yuchach ju xtʼakʼa ju atsucunti jonkʼalhita. 64 Para alin ju milhiʼuxijnanʼan ju jantu talacaʼi. Pus ju Jesús iscʼatsai tus laʼixputaiʼulacan tichi chavaich ju jantu catalacaʼiyaʼ chai tichi chavaich ju camakʼaxtaknanaʼ. 65 Pus najunch: ―Yuchi iclalhijunau ni jantu lai xamatiʼ quilakmin ni jantu xtaknita ju chun atalacpastʼacʼat ju quimpai. 66 Ju acsnich na lhu ju ixʼamamakaʼui ju Jesús jantu tachʼakʼokʼakʼalhiputulh. Lana tamacoyaulh ju yuchi. 67 Ju acsnich ju Jesús alacjunich ju ixpumacautʼuiʼan: ―Ja vachuʼ pʼimpʼutʼunatʼit ju uxijnan. 68 Akʼalhtayanalh ju Pitaluʼ ju ixjuncan Simón. Junich: ―Quiʼucxtin tis chavaich ju lai aclakʼanauch ni uxintʼi ju pʼacxantʼa ju chivinti ju xtʼakʼa ju atsucunti jonkʼalhita. 69 Ju quijnan iclacaʼiyauch chai iclamispayauch ni uxintʼich ju Cristoʼat. Istsʼalhʼat Dios ju lakʼajunta. 70 Pus ju Jesús alackʼalhtailh: ―Ja jantu quitʼin ju iclalhcaʼulatau ju mimpumacautʼuiʼan. Chai pumatam ju milhiʼuxijnanʼan valhch ixlapanac ju lhacaticuru. 71 Yuchach ju ixlhichivincan ju Judas istsʼalh ju Simón Iscariote ni yuchach ju camakʼaxtaknanaʼ. Yuchi ju pumatam ju ixlhipumacautʼuiʼan ixjunita.
1 Acsni tapasalhch ju ani taxtokni pus ju Jesús lacʼantsuculhch junta lacvi lakʼachakʼanixni ju laxaʼestado Galilea. Jantu ixʼamputun amalaniniʼ ju laxaʼestado Judea ni va ixtamakniputun ju istʼaʼisraelitanin. 2 Chai vaninch ixjunita ju ixcʼatanʼan ju israelitanin acsni ixtatʼajun va laʼixpacʼatsʼaʼan. 3 Pus ju isʼapʼisekʼen ju Jesús chanich tajuni: ―Atʼaxtʼuch ju ani. Apʼinchich ju laxaʼestado Judea. Ju chunch ni laich catalaktsʼinanta ju miʼamamakaʼunti amachakʼan anch ju tuchʼi laich navi. 4 Ju tam lapanac ni jumputunch tachi tam xakʼai pus jantu va catatankʼanu. Pus ni laich navi ju ani taxtokni amalacʼasunikʼoch tachi chun ju lakʼachakʼanixni. 5 Nin yuʼunch ju isʼapʼisekʼen jantu ixtalhilacaʼan ju Jesús. 6 Pus ajunich ju Jesús: ―Tucaʼ chin ju avilhchan ju iclhcanicanta. Para ju uxijnan va tuchi horach lai naviyatʼit ju pʼastʼacʼatʼit. 7 Ju lapanacni ju ani lacamunutpaʼ jantu lai talhitsʼiʼinan ju uxijnan. Para ju quitʼin yuchi jantu quintalhilaktsʼimputun ni icʼajuni ni na macxcai ju tanavi. 8 Ju uxijnan apʼinchitʼitch junta lai cʼatan. Ju quitʼin tucaʼ lai actiʼalh ju anch ni jantucaʼ chin ju avilhchan ju iclhcanicanta. 9 Acsni ajunilh ju ani chivinti pus tavilhcaʼ ju Jesús ju xaʼestado Galilea. 10 Acsni taʼalh ju isʼapʼisekʼen pus astan alh ju Jesús junta lai cʼatan. Jantu lacatalhavat ju alh. Tachi ju va jantu ixlacasqʼuin ni xamatiʼ cacʼatsa. 11 Pus ju israelitanin ixtapuxcajuich ju Jesús junta lai cʼatan. Ixtanajunch: ―Ta xaʼanch nuʼ ju anuʼ lapanac. 12 Ju ixlacata ju Jesús na lhu ixʼalin ju chivinti ju va sek ixtanajun ju lapanacni. Ju aliʼin ixtanajunch ni na kʼox lapanac ju yuchi. Ju aliʼin ixtanajun: ―Jantu vasalh kʼox lapanac. Va aʼokxchokʼoi ju lapanacni. 13 Pus ju anuch lapanacni ni va ixtatalhonich ju xaʼucxtinin ju israelitanin pus va sek ixtalhichivinin ixlacata ju Jesús. 14 Acsni chaʼalh paitat cʼatan ju Jesús alh ju laʼixpujitatʼan ju istʼaʼisraelitanin chai tsuculh amalaniniʼ. 15 Pus va ixtalhamakʼaninin ju istʼaʼisraelitanin. Ixtanajunch: ―Ju ani tas lhimispaich ju atalaninti ni jantu xamatiʼ xamalani. 16 Chai akʼalhtayanalh ju Jesús. Alacjuni: ―Ju tuchi icʼamalaninin jantu quiʼanuʼ. Ixʼanuʼ ju xaquimacamin. 17 Ni xamatiʼ naviputun ixkʼachat ju Dios pus cacʼatsayach ta anchach ju xaminacha ju ani atalaninti. U Dios ju xaquixtakni u va laquiʼakstu ju icnajun. 18 Ju va laʼisʼakstu najun ju tuʼuʼ va lacasqʼuin ni catanaulh ju lapanacni ni xakʼai ju yuchi. Para ju lacasqʼuin ni catanaulh ju lapanacni ni yuchi ju xakʼai ju tichi macaminta pus yuchi ju najun ju stavasalanti. Matich ju aʼokxchokʼonti laʼixmacni ju yuchi. 19 Vasalh ni taxtaknitan ju lhamapʼaksin ju Moisés. Para nin tachi pumatam ju milhiʼuxijnan ju lai stunin camuctaxtukʼo ju anuʼ lhamapʼaksin. Tajuch ni va quilamakniputunauch ju quitʼin. 20 Chai taʼakʼalhtayanalh ju lapanacni. Tajunich: ―Va pʼacxantʼa lhacaticuru. Tis chavaich ju makniputunan. 21 Pus ju Jesús akʼalhtailh: ―Va lakatam lhamakʼan xacnavi. Chai minchuxʼan va lhamakʼanininatʼit. 22 Slivasalh ni Moisés ju xtakta ju lhamapʼaksin ixlacata ju achʼucʼunti. Chai ju avilhchan paʼastacni vana acsni ju chʼucʼuniyatʼit ixʼaxtʼakʼa ju tam tsʼalh. Jantiyuʼ ju Moisés ju pʼulhnan naulh ni cachʼucʼucalh ju tam tsʼalh. Yuʼunch ju makʼaniya lapanacni ju pʼulhnanch tanavilh ju chunch. 23 Mas avilhchan paʼastacni chʼucʼucanch ju tam tsʼalh va ixlacata ni acsni ju uctaxtui tachi ju lhcaʼulai ju laʼixlhamapʼaksin ju Moisés. Ni naviyatʼit chunch tajuch ni va quilalhixcayauch ni palaich xacnavi ju anuʼ lapanac ju acs avilhchan paʼastacni. 24 Jantu aʼulanitʼit ixtalakʼalhin tam xamatiʼ ni jantu pʼulhnan kʼox cʼatsʼayatʼit tuchi navita. 25 Ju aliʼin amachakʼan Jerusalén ixtanajunch: ―Ja jantiyuʼ ju ani ju puxcocan ju tamakniputun. 26 Ju chavai ni tʼompalai chiviniʼ laʼixʼucxlacapuʼan ju lapanacni. Chai ju yuʼunch ni jantu tuʼuʼ tajumpalai. Ju ucxtinin ja tacʼatsai nuʼ ni yuchi ju Cristo. 27 Para ju ani mispayauch tas amachakʼach. Acsni caminaʼ ju Cristo jantu xamatiʼ catimispa ta anchach ju caminanta. 28 Pus ju Jesús pʼas chivinilh acsni ixtʼajun amalaniniʼ laʼixpujitatʼan ju istʼaʼisraelitanin. Ixʼajunich: ―Quilamispayau ju quitʼin. Chai cʼatsʼayatʼit ta anchach ju icmintacha. Para jantu va laquiʼakstu icminta. Ju quimacaminta yuchi ju najun ju stavasalanti chai ju yuchi jantu mispʼayatʼit ju uxijnan. 29 Ju quitʼin icmispai ju yuchi ni anch ju xacminacha. Chai yuchi ju xaquimacamin. 30 Ju acsnich lana tapastaclich ixchʼapaca. Para jantu xamatiʼ lai chʼapalh ni tucaʼ ixchin ju ixʼavilhchan. 31 Na lhu lapanacni talhilacaʼalh ju yuchi. Ixtanajunch: ―Ju Cristo acsni caminaʼ ja palai lhu ixpulacaʼican canaviyaʼ. Ja palai jantu ju ani. 32 Ju fariseonin ixtakʼasmatʼach ni na ixtalhilacchivininch ju Jesús ju lapanacni. Pus ju xalackʼajin palijni chai ju fariseonin tamalakachalh ju pulasiyajni ni cataʼalh chʼapanin ju Jesús. 33 Ju Jesús naulh: ―Va pantsʼiquis ju ictilatʼaʼucxuntʼonau. Ju astan aclakʼanchokoyach ju quimalakachatachilh. 34 Ju uxijnan aquilapuxcoyau. Para jantu lai aquilalhitajuyau. Junta acʼanaʼ ju uxijnan jantu lai aquintilachʼakʼokʼau. 35 Pus ju istʼaʼisraelitanin tanaulh va laʼisʼakstuʼan: ―Tas anchach ju cachaʼanaʼ ju yuchi junta jantuch lai calhitajuyau. Ja va calakʼanach ju istʼaʼisraelitanin ju amakpitsicanta laʼixtʼunʼan ju griegonin. Ja va caʼanaʼ amalaniniʼ ju griegonin. 36 Tijuch ju nomputun ju ixchivinti ni najun: “Ju uxijnan aquilapuxcoyau para jantu aquilalhitajuyau”. Ni va nompalai. Chai ni najun: “Junta acʼanaʼ ju uxijnan jantu lai aquintilachʼakʼokʼau”. 37 Acsni ixlakʼoputunch ju cʼatan chai acsni na kʼai cʼatan ixjunita pus ju Jesús taya chai na pʼas chivinilh. Naulh: ―Ni alin xamatiʼ ju quicxixa laʼixʼalhunut chach quilakmilh ju quitʼin. Chach kʼotlh ju xcan ju icxtʼakʼa. 38 Ju quilhilacaʼanta quitʼin pus cataxtuyaʼ ju laʼixʼalhunut tachi kʼai xcan ju lakʼajunta. Tachi ju najunch lacaʼatsʼoknut. 39 Ju Jesús ixlhichivinin ju Spiritu Santu. Yuchi ju cataʼamaklhtayananach ju talhilacaʼanta ju Jesús. Tucaʼ lai ixmin ju Spiritu Santu ni tucaʼ ixʼanchokota ju lactʼiyan ju Jesús. 40 Acsni takʼasmatlh ju ani chivinti pus ju aliʼin laʼixtalhavat lapanacni ixtanajunch: ―Slivasalh ni yuchi ju ani ju lapanac ju najun ixchivinti Dios. 41 Ju aliʼin ixtanajun: ―Ju ani yuchi ju Cristo ju noncan camalakachatachilh Dios. Ju aliʼin ixtanajun: ―Para ja laxaʼestado Galilea ju caminanta ju Cristo. 42 Ja jantu najun lacaʼatsʼoknut ni makʼaniya isʼaskʼatʼa David cajunaʼ ju Cristo. Chai anch catsucuyanta ju lakʼachakʼan Belén laʼixtʼun ju makʼaniya quimpaiʼan David. 43 Pus chunchach quilhmactʼui va ixtalhavat lapanacni va ixlacata ju Jesús. 44 Ju aliʼin ixtachʼapaputunch. Para jantu xamatiʼ lai chʼapalh. 45 Pus ju pulasiyajni taʼanchokolh juninin ju xalackʼajin palijni chai ju fariseonin. Chai ju yuʼunch taʼasacminilh: ―Tajuch ni jantu xalhitʼanatʼit. 46 Pus ju pulasiyajni taʼakʼalhtayanalh: ―Jantu xamatiʼ ju chunch chivinin tachi ju ani lapanac. 47 Ju acsnich ju fariseonin taʼakʼalhtayanalh: ―Ja vachuʼ va okxchʼokʼocʼantʼatʼit ju uxijnan. 48 Ju sia yuʼunch ju xalackʼajin ja xamatiʼ cʼuʼu lacaʼita. U sia yuʼunch ju fariseonin ja xamatiʼ cʼuʼu ju lacaʼita. 49 Para ju ani tontojni lapanacni ju jantu tamispai ju ixlhamapʼaksin ju Moisés catamakʼalhkʼajnanaʼ. 50 Pus ju Nicodemo ju quilalh tsʼis junta ixvi ju Jesús vachuʼ makfariseo ixjunita. Ju yuchi ajunich: 51 ―Ja lhijun ju quilhamapʼaksinʼan ni acʼulanilh ju ixtalakʼalhin tam xamatiʼ ju jantucaʼ tuʼuʼ kʼasmatnican chai ju jantucaʼ cʼatsanican ni caʼalilh ju ixtalakʼalhin. 52 Taʼakʼalhtayanalh. Tajuni ju Nicodemo: ―Ja vachuʼas amachakaʼat Galilea. Alacʼavanch. Alaktsʼinaʼ ni jantu xamatiʼ tʼajun kʼostayanaʼ ju laxaʼestado Galilea ju najun ixchivinti Dios. 53 Pus tataxtulh ju lacapuʼucxtin chai pumatamin taʼalhch ju laʼixlacchakaʼan.
1 Ju Jesús alh ju akstijun junta ixmacha ju lacapuʼolivos. 2 Chai acsni tuncunchokopa vatsʼisin anchokolh ju Jesús ju laʼixpujitatʼan ju istʼaʼisraelitanin. Chai chux ju lapanacni talakʼalh ju Jesús. Chai ju yuchi tavi chai tsuculh amalaniniʼ. 3 Ju acsnich ju ixtalhatalanininta ju ixlhamapʼaksinʼan ju istʼaʼisraelitanin chaich ju fariseonin talhiminilh pumatam chakoʼulh ju lhitajucalh ni ixtʼaʼalactuʼunun pumatam jokʼat. Taʼulalh laʼixlacaitat junta ixvi ju Jesús. 4 Tajunich: ―Amamakaʼunuʼ ju ani chakoʼulh lhitajucalh ni ixtʼajun tʼaʼalactuʼunuʼ pumatam jokʼat. 5 Pus ju Moisés ju laʼixlhamapʼaksin quintajunan ni aclacatʼalhmauch ju chunchach talai. Para ju uxintʼi tʼas naʼunch. 6 Ju tapusacmi chunch va ixtalaktsʼintanuputunch ju Jesús. Tsʼa ma laich ixtalhitajunilh tuʼuʼ ju laich catalhichivimakʼalh. Para ju Jesús lana takʼentalh. Tsuculh atsʼoknuʼ laʼixkʼelilimacaʼ ju lacatʼun. 7 Para ni va kʼasi kʼasi tasacmich pus takʼoxitolhchokolh chai ajunich: ―Pus ni alin xamatiʼ milhiʼuxijnan ju jantu caʼalactuʼunulh yuchach ju pʼulhnanch caʼalacatʼalhmanalh. 8 Aktam takʼentachokopa chai tsucuchokopa atsʼoknuʼ ju lacatʼun laʼixkʼelilimacaʼ. 9 Acsni takʼasmatlh ju naulh ju Jesús pus ju achivimakʼanin taxcanilh ju ixʼalhunutʼan. Pumatamin pumatamin tatsuculh taxtunin. Pʼulhnan tataxtulh ju xapapanin. Chai astan taʼalh ju paitat lapanacni. Pus va isʼakstuch tavilh ju Jesús. Tʼatamacaulh ju chakoʼulh ju ixya laʼixlacaitat junta ixvi ju Jesús. 10 Acsni takʼoxitolhchokolh ju Jesús jantu xamatiʼ laktsʼilh ju achivimakʼanin. Va isʼakstu ju ixya ju chakoʼulh. Pus junich: ―Chakoʼulh tas xataʼanch ju ixtachivimakʼanan. Ja jantu xamatiʼ xaʼulaniyan ju mintalakʼalhin. 11 Pus ju chakoʼulh akʼalhtayanalh. Naulh: ―Jantu xamatiʼ ji quiʼucxtin. Pus ju Jesús junich: ―Nin quitʼin jantu actiʼulanin ju mintalakʼalhin. Aʼinchich chai jantuch aliʼ alactʼuʼunchʼokʼo. 12 Ju Jesús aktam chivinchokopa. Chai ajunich ju lapanacni: ―Quitʼin icjunita tachi ju tuʼuʼ maclhcu ni icmalacpucujui laʼixtacʼatsanʼan ju lapanacni. Ju aquinchʼakʼokʼayaʼ jantu tsʼis cajunaʼ ixtacʼatsan. Acmalacpucujuniyaʼ ju ixtacʼatsan ni laich caʼalilh ju isʼatsucunti jonkʼalhita. 13 Pus ju acsnich ju fariseonin tajunich: ―Va laminchivinti miʼakstu naʼun ni xakʼaiʼat. Ju minchivinti jantu slivasalh. 14 Akʼalhtayanalh ju Jesús. Ajunich: ―Mas ca va laquinchivinti ju icnajun ni icxakʼai para ju quinchivinti stavasalanti ni iccʼatsai ta anchach ju icmintacha chai ta anchach ju acʼanchokoyaʼ. Para ju uxijnan jantu cʼatsʼayatʼit ta anchach ju icmintacha nin ta anchach ju acʼanchokoyaʼ. 15 Ju uxijnan quilaʼulaniyau ju quintalakʼalhin tachi ju talai ju va lhilapanac. Ju quitʼin jantu xamatiʼ icʼulani ixtalakʼalhin. 16 Chai mas icʼulani ju ixtalakʼalhin apumatam para stavasalanti ju tuchi acnonaʼ ni jantu va quiʼakstu quitʼin ju icʼulai talakʼalhin. Yuchi ju ictʼamucʼai talakʼalhin ju quimpai ju quimacaminta. 17 Ju lamilhamapʼaksinʼan najun acsni va lakatamch chivinti catanaulh ixpumatʼuiʼan lapanacni pus soknicʼach ju tuchi tanajun. 18 Pus quitʼin quiʼakstu icnajun tichi chavaich ju quitʼin. Chai ju quimpai ju quimacaminta vachuʼ najun tichi chavaich ju quitʼin. 19 Tajunich chavai: ―Tas anchach ju ya ju mimpai. Akʼalhtayanalh ju Jesús: ―Nin quitʼin jantu quilamispayau. Ja va a ti quimpaich lai amispʼatʼit. Pus ni xaquilamispau ju quitʼin pus vachuch ju quimpai caʼismispʼatʼit. 20 Ju ani chivinti ju Jesús naulh acsni ixtʼajun amalaniniʼ ju laʼixlacpujitatʼan ju istʼaʼisraelitanin junta ixtaxtʼakʼa ixtuminʼan. Para jantu xamatiʼ lai lacachʼapalh ju acsnich ni jantucaʼ ixchin ju ixʼavilhchan. 21 Ju Jesús ajunchokopa: ―Ju quitʼin acʼanach. Chai aquilapuxcoyauch. Para junta acʼanaʼ ju uxijnan jantu lai atʼipʼitʼit. Ju uxijnan acsni aniyaʼitʼit jantu makʼotʼinicʼantʼatʼit ju miʼalactuʼuntiʼan. 22 Ju acsnich talaclajunich ju istʼaʼisraelitanin: ―Ja va isʼakstu nuʼ ju maknichokoputuncan ni najunch ni jantu lai caʼanau junta caʼanaʼ. 23 Ju Jesús ajunich: ―Ju uxijnan xanavin untʼatʼit ju ani lacamunutpaʼ. Ju quitʼin lactʼiyan icmintacha. Ju uxijnan va amachakʼan lacamunutpaʼ untʼatʼit. Ju quitʼin jantu icʼamachakaʼ ju ani lacamunutpaʼ. 24 Pus iclajunauch ni aniyaʼitʼit ju lamiʼalactuʼuntiʼan. Pus ni jantu lacʼaʼiyatʼit ni chun icjunita tachi ju iclajunau pus aniyaʼitʼit ju lamiʼalactuʼuntiʼan. 25 Tajunich: ―Tis chavaichʼat ju uxintʼi. Pus ju acsnich ajunich ju Jesús: ―Acsni ictaiʼula ju quiʼamalaninti va tachi iclajuntauch tichi chavaich ju quitʼin. 26 Na lhu taxtokni ju iclhichivimputun ju milacataʼan chai lai aclaʼulaniyau ju mintalakʼalhinʼan. Para ju quimalakachatachilh yuchi ju najun ju stavasalanti. Chai tuchi ju ickʼasmatnita laʼixmacni pus yuchach ju icnajun ju ani lacamunutpaʼ. 27 Para ju yuʼunch jantu tamachakxanilh ni ixpai Dios ju ixlhichivinin. 28 Ajunich chavai ju Jesús: ―Acsni tavanan aquilaxtucmucʼayau talaclhman ju quitʼin ju quimalakachatachilh ju Dios ni lapanac actsucuyaʼ ju ani pus acsnich ju amachʼakxayaʼitʼit tichi chavaich ju quitʼin. Vachuʼ amachʼakxayaʼitʼit ni jantu tuʼuʼ icnavi ju va laquiʼakstu. Yuchi ju icchivinin tachi ju quimasunitach ju quimpai Dios. 29 Chai ju quimacaminta quintʼaʼalhtanan. Chai ni aktsʼiya icnavich tuchi ju kʼoxich lhiulai ju yuchi pus yuchi jantu tavanan quilhimacajun. 30 Acsni naulh ju chunch ju Jesús pus na lhu talhilacaʼalh ju yuchi. 31 Ju Jesús ajunich ju anuch istʼaʼisraelitanin ju ixtalhilacaʼantach ju yuchi: ―Pus ju uxijnan ni va tachi alacʼaʼitʼit ju quinchivinti pus slivasalh ni quiʼamamakaʼunti aʼunaʼitʼit. 32 Chai amispʼayaʼitʼitch ju istavasalanti. Chai acsni amispʼayaʼitʼit ju istavasalanti pus amaxtʼucʼanaʼitʼit ju mimpuxalapanacniʼan. 33 Ju acsni taʼakʼalhtayanalhch ju aliʼin lapanacni: ―Ju quijnan makʼaniya ixʼapapanatnich Abraham icjuntau. Chai jantu tavanan ju va xalapanacni quintanavitan xamatiʼ. Tajuch ni va naʼunch ju uxintʼi ni acmaxtucanau ju quimpuxalapanacni quincʼan. 34 Ju Jesús akʼalhtailh: ―Slivasalh ju iclajunau. Tachi chun ju tanavi alactuʼunti pus yuchi ju ixʼucxtinʼan tanavita ju alactuʼunti. 35 Ju va xalapanac jantu lai tsucukʼalhi ju laʼixchakaʼ ju tam ixʼucxtin. Para ju aktsʼiya istsʼalh ju amachakaʼ catsucukʼalhiyaʼ anch. 36 Pus ju quitʼin ju istsʼalh Dios icjunita ni aclamaxtuyau ju lamimpuxalapanacniʼan pus slivasalhch jantu va xalapanacni aʼunaʼitʼit. 37 Iccʼatsai ni isʼaskʼatʼan ju makʼaniya Abraham untʼatʼit. Para ni va quilamakniputumpalau ni jantu lacʼaʼipʼutʼunatʼit ju quinchivinti ju iclajuntau. 38 Ju quitʼin yuchi ju icnajun ju iclaktsʼintach laʼixmacni ju quimpai. Tachi ju uxijnan ni naviyatʼitch ju kʼasmatʼatʼit laʼixmacni ju mimpaiʼan. 39 Chai ju lapanacni taʼakʼalhtayanalh. Tajunich: ―Pus ju makʼaniya quimpai quincʼan yuchi ju Abraham. Chai ajunich ju Jesús: ―Ni vasalh ixʼapapanatnich caʼixʼuntʼit ju Abraham ju makʼanch ixtʼajun pus ixnavitʼit tachi ju navilh ju Abraham. 40 Para ju chavai ni va quilamakniputumpalau. Ju quitʼin ni va iclajumpalau ju stavasalanti ju ickʼasmatʼach laʼixmacni ju quimpai Dios. Ju Abraham jantu chunch ixnavi. 41 Ju uxijnan va ixlhichʼalhcat ju mimpaiʼan ju naviyatʼit. Pus tajunich: ―Jantu akchunan icjuntau. Va pumatam ju quimpai quincʼan. Yuchi ju Dios. 42 Pus ju Jesús ajunich: ―Ni mimpaiʼan cava ju Dios ca xaquilamapainiu ju quitʼin ni laʼixmacni Dios ju icminta ju ani. Chai mas icminta ju ani jantu va laquiʼakstu ju icminta. Isʼakstu ju Dios ju xaquimacaminchokoi. 43 Tajuch ni jantu lai machʼakxayatʼit ju tuchi iclajunau. Ca ixlhiyuchi ni jantu quilakʼasmatniputunau ju tuchi iclajunau. 44 Ju mimpaiʼan ju uxijnan yuchi ju lhacaticuru. Chai va ixkʼachat yuchi ju navipʼutʼunatʼit. Ju yuchi amakniniʼ junita tus laʼixputaiʼulacan ju lacamunutpaʼ. Jantu tavanan najunta ju stavasalanti ni lana jantu mispai tuchi ixtalakxtuch ju stavasalanti. Acsni najun ju taʼaklhtamat va najun tuchi alin ju laʼixʼalhunut ni va taʼaklhtaman junita. Chai xapai ju taʼaklhtamat junita. 45 Yuchi jantu quilalhilacaʼiniyau ju quitʼin ni icnajun ju istavasalanti. 46 Tis chavaich ju milhiʼuxijnan ju lai aquiʼulanilh ju quintalakʼalhin. Ni icnajun ju stavasalanti pus tajuch ni jantu quilalacaʼiniyau ju uxijnan. 47 Ju isʼaskʼatʼa Dios kʼasmatni ju ixchivinti. Ju uxijnan jantu kʼasmatpʼutʼunatʼit ni jantu isʼaskʼatʼan Dios untʼatʼit. 48 Ju acsnich ju istʼaʼisraelitanin taʼakʼalhtayanalh. Tajuni ju Jesús: ―Ja jantu cʼuʼu slivasalh tachi ju iclajunau ni va amachakaʼat Samaria chai va pʼacxantʼa ju lhacaticuru. 49 Chai akʼalhtayanalh ju Jesús. Ajuni ju lapanacni: ―Ju quitʼin jantu icpacxanta ju lhacaticuru. Alai va iclajumputunau ni yuchi ju xakʼai ju quimpai Dios. Chai ju uxijnan jantu tuʼuʼ quilalhiulayau. 50 Jantu va quiʼakstu ju iclacasqʼuin ni catanaulh ju lapanacni ni icxakʼai. Alin tichi chavaich ju lacasqʼuin ni catanaulh ju lapanacni ni icxakʼai. Chai yuchi ju alaktsʼintanunuʼ. 51 Slivasalh ju iclajunau. Ju camuctaxtuyaʼ ju quinchivinti jantu catini. 52 Ju acsnich ju istʼaʼisraelitanin tajunich: ―Ju chavai iccʼatsayauch ni va pʼacxantʼa ju lhacaticuru. Ju Abraham ni nipa. Chai ju lapanacni ju ixtanajun ju ixchivinti Dios vachuʼ tani. Chai ju uxintʼi ni va nompʼalai ni jantu catini ju camuctaxtuyaʼ ju minchivinti. 53 Ju uxintʼi ja palai xakʼaiʼat. Ja palai jantu ju makʼaniya quimpai quincʼan Abraham. Ju yuchi ni nipa. Chai vachuʼ tanita ju lapanacni ju ixtanajunch ixchivinti Dios. Pus ju uxintʼi tis chavaichʼat navichʼokʼocʼan miʼakstu. 54 Chai akʼalhtayanalh ju Jesús. Ajunich ju lapanacni: ―Ni va quiʼakstu cava ju iclacasqʼuin ni catanaulh ju lapanacni ni icxakʼai pus jantu catilhitapalalh mas chunch catanaulh. Yuchi ju quimpai ju najun ni icxakʼai. Chai ju uxijnan ni va nompʼalatʼit ni yuchi ju miDiosʼan. 55 Ju uxijnan jantu mispʼayatʼit ju yuchi. Para ju quitʼin icmispai ju yuchi. Ni acnaulh ni jantu icmispai ju yuchi pus vachuʼ va ixnonaʼ taʼaklhtamat acva tachi ju uxijnan. Para ju quitʼin icmispai ju yuchi. Chai icmuctaxtuich tuchi najuntach ju yuchi. 56 Ju makʼaniya mimpaiʼan Abraham lhikʼachalh ni ixlacaʼita ni calaktsʼinaʼ ni acminaʼ. Chai laktsʼilh. Chai lhikʼachalh. 57 Pus ju acsnich ju istʼaʼisraelitanin tajunich: ―Ju uxintʼi jantucaʼ pʼacxantʼa cincuenta cʼata. Tʼas laich lhinaʼun ni laktsʼinch ju Abraham. 58 Ajunich chavai ju lapanacni ju Jesús: ―Slivasalh ju iclajunau. Acsni tucaʼ istsucui ju Abraham xactʼajunch. 59 Chai tasaclich chavai ju chiux ju ixtaputʼalhputunch. Para ju Jesús lana apakʼosnulh ju lapanacni chai taxtulh ju laʼixpujitatʼan ju istʼaʼisraelitanin. Laʼixlacaitat ixtalhavat lapanacni ju putapasatilalh acsni tavanan alh.
1 Ju Jesús acsni tapasalh ju lacati laktsʼilh pumatam lapanac. Alakʼachʼix ixjunita tus acsni tsuculh. 2 Pus ju ixʼamamakaʼui tasacmilh ju Jesús. Tajunich: ―Amamakaʼunuʼ tis chavaich ju alactuʼunulh ni laich xalakʼajun ju va alakʼachʼix. Ja yuchi isʼakstu u ixpai u ixnati. 3 Chai akʼalhtayanalh ju Jesús: ―Jantu alakʼachʼix xalakʼajun va ixlacaʼatalh ni caʼalactuʼunulh ju yuchi nin ixpai nin ixnati. Va alakʼachʼix xalakʼajun ni laich caputalacasuyaʼ ju ixlhichʼalhcat ju Dios laʼisʼatsucunti ju yuchi. 4 Tasqʼuini ni acnavi ju ixlhichʼalhcat ju quimacaminta ni ictitʼajuncaʼ tachi acsni vilhcaʼ ju avilhchan. Cachinaʼ avilhchan acsni acniyaʼ. Ju acsnich tachi ju na va tsʼista cajunaʼ acsni jantu lai xamatiʼ chʼalhcatnan. 5 Ni ictitʼajuncaʼ ju ani lacamunutpaʼ pus tachi maclhcu icjunita ni icmapulhcui laʼixtacʼatsanʼan ju lapanacni. 6 Ju Jesús acsni naulh ju chunch pus akchujlh ju lacatʼun. Navilh ju pulhkʼom laʼixchuʼut. Pus lhquilin lacpumucʼalh ju laʼixlakchulh ju anuʼ alakʼachʼix. 7 Junich: ―Aʼinchich lakpʼuchʼakʼanaʼ laxapos ju Siloé. Ju ixtapakaʼut ju anuʼ pos nomputun Malakachacanta. Pus ju anuʼ lapanac alh lakpuchʼakʼanaʼ. Chai acsni taspʼitcha lai ixʼalacʼavanan. 8 Ju ixtʼatolhnin chai ju aliʼinch lapanacni aktsʼiya ixtalaktsʼintach ni va isqʼuin tumin ju anuʼ lapanac. Pus acsni cʼuchʼucalh tanaulich: ―Ja jantiyuʼ ju ani ju ixtolai lacati chai va isqʼuin tumin. 9 Ju aliʼin lapanacni ixtanajunch ni yuchi. Ju aliʼin ixtanajun: ―Jantiyuʼ. Va ixtʼachunch. Para ju alakʼachʼix ixjunita ixmavasalai ni yuchi. 10 Tajunich chavai: ―Pus tʼas xalhiʼalacʼavananch. 11 Ju alakʼachʼix ixjunita akʼalhtayanalh. Ajunich: ―Yuchi ju anuʼ jokʼat ju juncan Jesús navilh pulhkʼom. Quilacpumucʼalh laquilakchulh chai quijunilh: “Apʼinchich lakpʼuchʼakʼanaʼ ju lacaSiloé”. Pus icʼalh. Iclakpuchʼakʼalh. Chai icʼalacʼavanalh. 12 Chai ju alakʼachʼix ixjunita talhisacmichokopa ju Jesús. Tajunich: ―Tas anchach ju xaʼan ju anuʼ lapanac. Chai ju alakʼachʼix ixjunita lhakʼalhtayanalh. Ajunich: ―Jantu iccʼatsai. 13 Chai alhiʼanicalh ju fariseonin ju anuʼ alakʼachʼix ixjunita. 14 Pus avilhchan paʼastacni ixjunita acsni tavanan navilh ju pulhkʼom ju Jesús chai acsni amalacʼavanilh ju alakʼachʼix. 15 Pus ju fariseonin aktam tasacmichokopa ju alakʼachʼix ixjunita. Tajunich: ―Tʼas xalhiʼalacʼavananch. Ju anuʼ alakʼachʼix ixjunita chani ajuni: ―Va quimucʼanilh pulhkʼom ju laquilakchulh chai iclakpuchʼakʼalh. Chai icʼalacʼavanalhch. 16 Pus ju acsnich ju aliʼin fariseonin tanaulh: ―Ju ani lapanac jantu laʼixmacni Dios ju xaminacha ni jantu maklacaʼani ju avilhchan paʼastacni. Ju aliʼin ixtanajunch: ―Para tas calhinavilhch ju ani lhamakʼan ju va alactuʼunu lapanac. Pus ju fariseonin jantu va lakatam ixtanavi ixchivintiʼan. 17 Tasacmichokopa aktam ju anuʼ alakʼachʼix ixjunita. Tajunich: ―Ju uxintʼi tis chavaich lhiulai ju xalakpulakʼoxiyan lamilakchulh. Pus ju anuʼ alakʼachʼix ixjunita naulh: ―Yuchi ju lapanac ju najun ixchivinti Dios. 18 Pus ju xalackʼajin israelitanin jantuch ixtalacaʼi ni yuchi cava ju alakʼachʼix ixjunita. Chai jantu ixtalacaʼi ni va calakʼoxinicalh ju ixlakchulh. Tus acsni ju talacaʼi acsni atʼasanicalh ju ixpai ixnati ju anuʼ alakʼachʼix ixjunita. 19 Chai asacmicalh ju xapai xanati. Ajuncanch: ―Ju ani ja yuchi ju mintsʼalhʼan ju nonatʼit ni va alakʼachʼix ixjunita acsni lakʼaulh. Pus ju chavai tas xalhiʼalacʼavananch. 20 Taʼakʼalhtayanalh ju ixpai chai ixnati. Tanaulh: ―Iccʼatsayau ni yuchi ju ani ju quintsʼalh quincʼan. Yuchi ju alakʼachʼix ixjunita acsni tavanan tsuculh. 21 Para jantu iccʼatsayau ta xalhiʼalacʼavananch ju chavai. Chai jantu iccʼatsayau tichi chavaich ju xalakpulakʼoxi. Pus ju yuchi kʼaich. Yuchi ju asacmitʼitch. Isʼakstuch canonaʼ. 22 Chunchach ju talhakʼalhtayanalh ju ixpai chai ixnati ni va ixtatalhonich ju xalackʼajin istʼaʼisraelitanin. Ju yuʼunch ixtanajuntach ni xamatiʼ canonaʼ ni yuchi ju Cristo ju Jesús ju anuʼ noncanch camalakachatachilh ju Dios pus jantu calacasqʼuinicanaʼ ni lai catanu ju laʼixpujitatʼan ju israelitanin. 23 Pus yuchach talhinaulh chunch ju ixpai chai ixnati acsni tavanan tanaulh ni kʼaich ju istsʼalhʼan. Yuchach ju casacmicalh. 24 Pus lhinonchokocalh istʼasanica ju anuʼ lapanac ju va alakʼachʼix ixjunita. Tajunich: ―Anauch ni va yuchi ju xakʼai ju Dios. Ju quijnan iccʼatsayau ni va alactuʼunuʼ ju anuʼ lapanac ju xalakpulakʼoxiyan. 25 Ju acsnich ju anuʼ alakʼachʼix ixjunita akʼalhtayanalh. Najunch: ―Ni alactuʼunuʼ u jantu ju quitʼin jantu iccʼatsai. Va lakatam taxtokni ju iccʼatsai. Va alakʼachʼix xacjunita. Para ju chavai laich icʼalacʼavanan. 26 Chai tasacmichokopa ju anuʼ alakʼachʼix ixjunita. Tajunich: ―Tas xanaviyanch. Tas xalhimalacʼavaniyanch. 27 Chai akʼalhtayanalh ju anuʼ alakʼachʼix ixjunita. Ajuni: ―Ni iclajumpalauch chai jantu xaquilakʼasmatnipalau. Tajuch ni va kʼasmatchʼokʼopʼutʼunatʼitch aktam. Ja vachuʼ va umpʼutʼunatʼit ju uxijnan ixtamamakaʼunti. 28 Pus talhitalhkʼamalh ju xalackʼajin israelitanin. Tajunich ju anuʼ alakʼachʼix ixjunita: ―Ju uxintʼi ixtamamakaʼunchʼat. Para ju quijnan ixtamamakaʼunti Moisés icjuntau. 29 Ju quijnan iccʼatsayau ni Dios ju xakʼala ju Moisés. Para ju ani lapanac jantu iccʼatsayau ta anchach ju xaminacha. 30 Chai akʼalhtayanalh ju anuʼ alakʼachʼix ixjunita. Ajunich ju xalackʼajin istʼaʼisraelitanin: ―Slivasalh kʼai lhamakʼan ju ani. Ju uxijnan jantu cʼatsʼayatʼit ta anchach ju mintacha ju yuchi para ju quitʼin quimalacʼavanilh. 31 Cʼatsayauch ni jantu kʼasmatni ju va alactuʼunuʼ ju Dios. Para ni alin xamatiʼ ju talhoni ju Dios chai navini ju ixkʼachat pus yuchi ju kʼasmatni. 32 Tus laʼixputaiʼulacan ju lacamunutpaʼ jantu tavanan kʼasmatcanta ni caʼalilh xamatiʼ ju lai camalacʼavani ju va alakʼachʼix lakʼajunta. 33 Pus ju anuʼ lapanac ni jantu cava laʼixmacni Dios ju minta ca jantu lai tuʼuʼ catinavi. 34 Chai taʼakʼalhtayanalh ju xalackʼajin israelitanin. Tajunich ju anuʼ alakʼachʼix ixjunita: ―Ju uxintʼi istsʼalhʼat ju va alactuʼunu lapanacni. Ja va quilamalaniputunauch ju quijnan. Pus lana xcoxtucalh junta ixtanun. 35 Chai kʼasmatlh ju Jesús ni tixcoxtucalh ju anuʼ alakʼachʼix ixjunita. Chai acsni pakxtokchokolh junich: ―Ju uxintʼi ja lhilaksi ju istsʼalh Dios. ―Juncanch ju alakʼachʼix ixjunita. 36 Chai ju alakʼachʼix ixjunita kʼalhtailh ju Jesús. Junich: ―Tis chavaich ju anuʼ lhichʼivinin ji quiʼamigo. Aqʼuiʼunch ni laich aclhilaksi ju yuchi. 37 Chai ju Jesús acsni kʼalhtailh ju anuʼ alakʼachʼix ixjunita junich: ―Laktsʼintʼach. Chai yuchach ju tʼonan tʼachivinin. 38 Chai ju anuʼ alakʼachʼix ixjunita junich ju Jesús: ―Iclhilaksiyanch ji quiʼucxtin. Chai lana taʼaktsokotanilh. Tsuculh nonaʼ ni yuchach ju Dios. 39 Chai naulh ju Jesús: ―Ju quitʼin iclhiminta ju ani lacamunutpaʼ ni laich caputasuyaʼ ixtalakʼalhinʼan ju lapanacni. Ju chunch ju tachi ju va alakʼachʼixnin tajunita ni va jantu amachakxanan catamachakxayaʼ ju stavasalanti. Chai ju tanajun ni tamachakxai ju stavasalanti pus tachi alakʼachʼixnin catajunaʼ ni jantu cataʼamachakxananaʼ. 40 Ju aliʼin fariseonin ju ixtamakvilanalh junta ixvi ju Jesús acsni takʼasmatnilh ju ani chivinti tajunich ju Jesús: ―Ja vachuʼas tachi ju va alakʼachʼixnin icjuntau ni jantu lai icʼamachakxananau. 41 Pus ju Jesús ajunich ju fariseonin: ―Ni tachi ju va alakʼachʼixnin cava untʼatʼit ni va jantu amachʼakxananatʼit cava pus jantu ixʼulanicʼantʼatʼit ju miʼalactuʼuntiʼan. Para ni nonatʼit ni machʼakxayatʼit ju stavasalanti pus yuchi na lhiʼalin ju miʼalactuʼuntiʼan ni jantu naviyatʼit.
1 Ju Jesús tailhiʼalh ju chivinti ju ixtʼajun ajuniniʼ ju fariseonin chai naulh: ―Slivasalh ju iclajunau. Ju jantu caputanuyaʼ laxamalhtich ju laʼixcorral ju borregojni ni va alacatam ju capuʼanaʼ pus ju yuchi va akʼalhonaʼ chai va lacatapʼastu ju taiʼi ju jantu ixʼanuʼ. 2 Para ju caputanuyaʼ laxamalhtich yuchach ju ixlhistacnaʼ borregojni. 3 Ju ixlhistacnaʼ malhtich malhtekʼani ju vasalh ixlhitacnaʼ borregojni. Ju ixborregojni takʼasmatni ju ixchivinti. Chai ju yuchi atʼasani ju ixborregojni laʼixtapakaʼutʼan chai alacmaxtui. 4 Acsni amaxtukʼojui ju ixʼanuch pus apʼulhnich. Chai ju ixborregojni tachʼakʼokʼaich ni tamispanich ju ixchivinti ju ixʼucxtinʼan. 5 Para ju va akʼantam ni jantu tamispai pus jantu tachʼakʼokʼai. Alai va taʼatsʼalhni va ixlacata ni tamispanich ju ixchivinti ni jantuch ixʼucxtinʼan. 6 Pus ju Jesús acsni naulh ju chunch chivinti va ixʼapumavasalaniputun tuʼuʼ ju fariseonin. Para ju yuʼunch jantu lai tamachakxa tuchi ju ixʼamalanicanch. 7 Pus aktam ajunchokopa ju Jesús ju fariseonin: ―Slivasalh ju iclajunau. Ju quitʼin chunch icjunita tachi ju xamalhtich ju ixcorral ju borregojni. 8 Tachi chun ju alhistacnin ju pʼulhnan ixtatʼajun acsni tucaʼ xacmin va akʼalhonin ixtajunita. Chai va lacatapʼastu ixtataiʼiputun ju jantu ixʼanuʼan. Para ju lapanacni ju tachi borregojni tajunita jantu takʼasmatnilh ju ixchivintiʼan. 9 Ju quitʼin chunch icjunita tachi ju xamalhtich ju corral. Ju laquimacni catanuyaʼ catakʼalhtaxtuyaʼ. Chai ju laquimacni caʼamaklhtayanankʼoyaʼ tachi chun ju ixmaktasqʼuinit. 10 Ju akʼalhonaʼ yuchi lhiminch ni va akʼalhonamputun chai lakmakniputun chai lakʼalhiputun. Ju quitʼin iclhiminta ni caʼalilh ju isʼatsucuntiʼan ju lapanacni ju conkʼalhiyanta lactʼiyan. Chai slivasalh kʼox cajunaʼ ju anuʼ atsucunti. 11 Quitʼin ju kʼox xaʼalhistacnaʼ ju lapanacni ju tachi borregojni tajunita. Ju kʼox xaʼalhistacnaʼ borregojni lhitapʼux ju isʼatsucunti va ixlacaʼatalh ixborregojni. 12 Ju va xalapanac junita jantu chun navi ni jantiyuʼ ju amanavin. Pus ju yuchi acsni laktsʼin ju maktiliʼ ni mintach pus va lacmacoyojuich ju borregojni. Chai atsʼalaich. Pus ju maktiliʼ tapʼastu alacchʼapai chai amakpitsich ju borregojni. 13 Pus ju jantu tucan yuʼ ju xaʼalhistacnaʼ yuchach lhiʼatsʼalai ni va xalapanac junita. Jantu tuʼuʼ lhiulai ju borregojni. 14 Quitʼin ju kʼox ixlhistacnaʼ ju lapanacni ju tachi borregojni tajunita. Ju quitʼin icʼamispakʼojui ju quilapanacni. Chai ju quiʼanuʼ quintamispai. 15 Chunch vachuʼ ju quimpai quimispai. Pus vachuʼ ju quitʼin icmispai ju quimpai. Chai ju quitʼin acxtʼakʼaʼ ju quiʼatsucunti ni catatsuculh ju quilapanacni. Chun tachi tam alhistacnaʼ ni lhixtʼakʼa ju isʼatsucunti ixlacata ixborregojni. 16 Vachuʼ icpacxanta aliʼ lapanacni ju tachi borregojni tajunita ju jantucaʼ quintachʼakʼokʼai. Tasqʼuini ni acʼalhimilh. Chai ju yuʼunch catakʼasmatʼaʼ ju quinchivinti. Va chʼanxtamch catajunaʼ. Chai va pumatamch cajunaʼ ju alhistacnaʼ. 17 Ju quitʼin mas acxtʼakʼach ju quiʼatsucunti laich acʼamaklhtayananchokoyaʼ. Yuchi quilhimapaini ju quimpai. 18 Jantu lai xamatiʼ aquintitaiʼinilh ju quiʼatsucunti ju va laʼixkʼachat isʼakstu. Quiʼakstu ju acxtʼakʼaʼ. Alin ju quintachaput ni lai acxtʼakʼaʼ. Chai alin ju quintachaput ta yu lai acpuʼamaklhtayananchokoyaʼ. Junima lhamapʼaksin quimpai ju quixtaknita. 19 Aktam alinchokopa ju ixlaklakʼaitiʼan ju israelitanin va ixlacaʼatalh junima chivinti. 20 Na lhu ju israelitanin ju ixtanajun: ―Ju yuchi va pacxanta lhacaticuru. Jantu acʼatsananta. Tajuch ni kʼasmatniyatʼit ju ixchivinti. 21 Ju aliʼin ixtanajun: ―Junima chivinti jantu ixchivinti ju tam xamatiʼ ju va pacxanta lhacaticuru. Ju lhacaticuru ja lai camalacʼavani ju tam alakʼachʼix. 22 Ju amachakʼan Jerusalén ixtatʼajun macʼataninin ju ixpujitatʼan. Lacalhicʼasnin ixjunita. 23 Ju Jesús ixʼalhtanatʼajun laʼismakspaʼ laʼixpujitatʼan ju istʼaʼisraelitanin junta juncan ixʼanuʼ ju Salomón. 24 Pus ju istʼaʼisraelitanin lana talacaxcʼavitnu ju Jesús. Chai tajunich: ―Tas vananch ju aquilamavasalaniyau ju stavasalanti. Ni uxintʼich ju Cristoʼat pus vasch aquilajuniu. 25 Chai akʼalhtayanalh ju Jesús. Ajunich: ―Ni iclajumpalauch. Ni va jantu lacʼaʼipʼalatʼit. Ju tuchi icnavi laʼixtapakaʼut ju quimpai Dios yuchach ju capucʼatsacanaʼ tichi chavaich ju quitʼin. 26 Para ju uxijnan jantu lacʼaʼiyatʼit ni jantu quimborregojni untʼatʼit tachi ju iclajuntauch. 27 Ju lapanacni ju tachi quimborregojni tajunita quintakʼasmatnich ju quinchivinti. Chai icʼamispaich. Chai quintachʼakʼokʼaich. 28 Quitʼin ju icʼaxtakni ju isʼatsucuntiʼan jonkʼalhita. Chai jantu tavanan catanikʼalhiyaʼ. Nin xamatiʼ lai caʼamakʼosu ju laquimacni. 29 Yuchi ju quimpai ju xaquiʼaxtakni. Chai yuchi ju palai xakʼai tachi chun ju lapanacni. Jantu lai xamatiʼ catiʼamakʼosu ju laʼixmacni ju quimpai. 30 Ju quitʼin chai ju quimpai va lakatamch icjuntau. 31 Aktam tasacchokopa ju chiux ju istʼaʼisraelitanin. Va ixtaputʼalhputunch ju Jesús. 32 Pus ju Jesús ajunich: ―Na lhu lhamakʼan ju xaclamalacasuniyau laʼixmacni ju quimpai. Tasmalhch ju quilalhilacatʼalhmaputunau. 33 Taʼakʼalhtayanalh ju istʼaʼisraelitanin. Tajunich: ―Jantu iclalacatʼalhmaputunau ixlacata ju kʼoxi lhichʼalhcat ju navitʼa. Para va ixlacaʼatalh ju macxcai chivinti ju naʼun ni naʼun ni Diosʼat. Para ni va lapanac umpʼalatʼa. 34 Akʼalhtayanalh ju Jesús: ―Ja jantu pʼastʼacʼatʼit ni tsʼokcanta ju lamilhamapʼaksinʼan ni ma chani naulh ju Dios: “Icnaulh ni diosnin untʼatʼit ju uxijnan”. 35 Pus diosnin alhixakʼalacalh ju yuʼunch ju axtaknicalh ixlhichʼalhcat ju Dios. Chai ju tuchi tsʼokcanta lacalhamapʼaksin jantu lai catimapaxacalh. 36 Ja jantu vana va chun ju quitʼin ni quisacxtutach ju quimpai Dios chai quimalakachachilh ju ani lacamunutpaʼ. Tajuch ni va quilajunau ni macxcai ju icchivinin acsni icnajun ni istsʼalh Dios ju icjunita. 37 Pus ni jantu ixlhichʼalhcat ju quimpai ju icnavi pus jantu aquilalacaʼiniu. 38 Para ni icnavi ju ixlhichʼalhcat ju Dios pus apʼulacʼaʼitʼitch ju icnavi mas jantu lai lacʼaʼiyatʼit ju tuchi iclajunau. Ju chunch lai amispʼayaʼitʼitch ni va lakatam Dios icjuntau ju quimpai chai ju quitʼin. 39 Aktam ixtachʼapaputumpalai ju Jesús. Para lana taxtulh ju yuchi junta ixtavilanalhch ju fariseonin. 40 Aktam anchokopa ju makʼantacutni lacxcan Jordán junta pʼulhnan ixʼamakpaxanan ju Xivan. Anchach ju tolhcha. 41 Na lhu lapanacni ju ixtalakminch ju Jesús chai chani ixtanajunch: ―Ju Xivan jantu tuʼuʼ lhamakʼan navita. Para tachi chun ju naulh ju Xivan ixlacata ju ani lapanac islivasalh. 42 Chai na lhu talhilacaʼalh ju Jesús.
1 Ju acsnich ixtakʼankʼai pumatam lapanac ju ixjuncan Lázaro. Chai ju yuchi ixʼalin ju ixʼalakʼavin. Ju pumatam ixjuncan Malia. Chai ju pumatam ixjuncan Marta. Va lakputam ixtatʼajun junta juncan Betania. 2 Ju Malia ispʼisekʼe ixjunita ju Lázaro ju anuʼ ixtakʼankʼai. Yuchach ju Malia ju lacamucʼalh ju ixcʼuchʼu ju quiʼucxtinʼan Jesús. Chai ju anuʼ cʼuchʼu na saksi ixʼacamin. Chai ju Malia achʼanxacʼanalh laʼixʼai. 3 Pus ju anuʼ atsiʼin ju ixʼalakʼavin ixtajunita ju Lázaro tamalakacha ju ixlapanacniʼan junta ixvilhcha ju Jesús. Chai ju yuʼunch tajunilh ju Jesús: ―Ucxtin ju lapanac ju na mapʼaini na takʼankʼai. 4 Acsni kʼasmatlh ju Jesús ju chunch pus ajunilh ju anuʼ lapanacni: ―Jantiyuʼ xalhixtaknican ju ani takʼankʼat ni va caniyaʼ. Yuchi xalhixtaknican ju ani takʼankʼat ni catanonaʼ ju lapanacni ni na tachapun ju Dios. Chunch ju acpumispacanaʼ ni icxakʼaich ju quitʼin ju istsʼalh Dios icjunita. 5 Ju Jesús na ixtʼalamapaini ju Marta chaich ju ispʼisekʼe chaich ju Lázaro. 6 Para ju Jesús acsni kʼasmatlh ni ixtakʼankʼai ju Lázaro pus titolhcha lakatʼui vilhchan junta ixvilhcha. 7 Ju astan ajunilh ju ixʼamamakaʼui: ―Caʼanchokoch ju xaʼestado Judea. 8 Ju ixʼamamakaʼui tajunich: ―Amamakaʼunuʼ tucaʼ makʼan ixtalacatʼalhmapu- tumpalachan ju quintʼaʼisraelitaninʼan. Chai ja va pʼinchʼokʼopʼutʼunch ju anch. 9 Akʼalhtayanalh ju Jesús: ―Ja jantu pacxanta lakacautʼui hora ju tam avilhchan. Pus ju caʼalhtananaʼ ju tuncu jantu tuʼuʼ pukʼalhkʼosa ni laktsʼin ju xaʼatuncunuʼ ju ani lacamunutpaʼ. 10 Para ju va tsʼista laʼixtacʼatsan cakʼalhkʼosaʼ ni matiʼ ju atuncunuʼ ju laʼixʼalhunut. 11 Acsni naulh ju ani pus astan ajunich: ―Ju quiʼamigoʼan Lázaro lhtataich. Para acʼanaʼ macujunuʼ ju laʼilhtatat. 12 Ju acsnich ju ixʼamamakaʼui tanaulhch: ―Quiʼucxtin ni va lhtatai pus palai cajunaʼ. 13 Ju Jesús va ixʼajumputunch ni nitach vasalh. Para ju yuʼunch va ixtalhimachakxai ni ca vasalh va lhtatai ju Lázaro. 14 Lana acsnich ju vas ajunilh ju Jesús ni nilhch ju Lázaro. 15 Chai ajunich: ―Na iclhikʼachan ju milacataʼan ni jantu anch xacvilhcha acsni tavanan xani ju Lázaro. Ju chunch ni laich palai aquilapulhilaksiyau. Para ju chavai caʼauch laktsʼinin. 16 Ju acsnich ju Tumax ju ixjuncan Cuate ajunich ju ixʼalactʼatamakaʼui: ―Caʼauch vachuʼ ju quijnanʼan ni laich kʼaixtam catʼanitachau ju Jesús. 17 Acsni chaʼalh ju Jesús ju laʼixchakaʼ ju lijunto macʼatsanicalh ni lakatʼatʼich avilhchan ixʼacnui ju Lázaro. 18 Ju lakʼachakʼan Betania vanin ixtʼalachʼapata ju lakʼachakʼan Jerusalén. Tachi lakatʼutu kilómetro ixlhimakat. 19 Pus yuchi lai ixtalhilakminta ju Marta chaich ju Maliach na lhu ju istʼaʼisraelitanin. Va ixtamatankʼoxaxkʼayai ni jantu na cataʼamakʼaninilh ju ixlacata ju lijunto ispʼisekʼeʼan Lázaro. 20 Ju Marta acsni kʼasmatlh ni vaninch minta ju Jesús pus alh pakxtoknuʼ. Para ju Malia tavilhcaʼ lacachakaʼ. 21 Pus ju Marta junich ju Jesús: ―Quiʼucxtin ni cʼaʼixvilhtʼi ju ani pus jantu ixtini ju quimpʼisekʼe. 22 Para iccʼatsai mas chavai tachi chun ju asqʼuiniyaʼ ju Dios caxtakniyan. ―Najunch ju Marta. 23 Ju Jesús junich ju Marta ni kʼalhtailh: ―Calokʼonchokoyaʼ ju mimpʼisekʼe. 24 Chai ju Marta junich ju Jesús: ―Iccʼatsai ni calokʼonchokoyaʼ ju quimpʼisekʼe laʼixʼaclanti ju lacamunutpaʼ acsni catalokʼonchokoyaʼ ju tanitach. 25 Chai ju Jesús junich: ―Quitʼin ju icʼamalokʼonininchokoi. Chai quitʼinch ju icxtʼakʼa ju atsucunti jonkʼalhita. Ju quilhilacaʼanch mas caniyaʼ ju ixlacatuna para catsucuyanta ju ixtacuvin ju lactʼiyan. 26 Chai tachi chun ju alin isʼatsucuntiʼan ju jonkʼalhita va ixlacaʼatalh ni quintalhilacaʼanch pus catatsucukʼalhiyanta ju lactʼiyan. Ja lacʼaʼi ju ani. 27 Ju Marta junich: ―Chunch ji quiʼucxtin. Iclacaʼich ni uxintʼi ju Cristoʼat. Istsʼalhʼat Dios ju noncanch ni caminaʼ ju ani lacamunutpaʼ. 28 Acsni naulh ju chunch ju Marta pus lana anchokolh laʼixchakaʼ. Chai lana va sek tʼasanilh ju ispʼisekʼe ju Malia ixjuncan. Junich: ―Ju amamakaʼunuʼ anuʼ yacha chai tʼasaniyanch. 29 Chai ju Malia acsni kʼasmatlh ju anuʼ chivinti pus lana vatsʼalhti taya. Lakʼalh junta ixvilhcha ju Jesús. 30 Pus tucaʼ ixchaʼan ju Jesús ju lakʼachakʼan Betania. Va anchcaʼ ixvi junta tʼalapakxtoklh ju Marta. 31 Pus ju Malia vatsʼalhti taya junta ixvi chai taxtulh. Pus ju ixtavilanalh laʼixchakaʼ ju Malia acsni talaktsʼilh ni taxtulh pus tachʼakʼokʼalh. Talaclajunich: ―Ca anch ju xaʼan kʼalhutolhnaʼ junta makʼacanta ju ixlacatuna ju lijunto ispʼisekʼe. 32 Ju Malia acsni chaʼalh junta ixvi ju Jesús pus lana taʼaktsokotalh vanin junta ixya. Junich: ―Quiʼucxtin ni cʼaʼixvilhtʼi ju ani pus jantu ixtini ju quimpʼisekʼe. 33 Ju Jesús acsni laktsʼilh ju Malia ni na ixkʼalhunch chaich ju istʼaʼisraelitanin ju ixʼalactʼamintach kʼaixtam ni vachuʼ ixtalackʼalhun pus xcanilhch ju ixʼalhunut ju Jesús. Amakʼaninilh. 34 Ajunich ju Malia chai Marta: ―Tas anchach ju makʼatʼatʼit ju ixlacatuna ju lijunto Lázaro. Tanajunch ju Malia chai ju Marta: ―Asokʼoch ji quiʼucxtin. Alaktsʼintʼachich. 35 Ju Jesús lana tsuculh kʼalhunuʼ. 36 Ju acsnich ju istʼaʼisraelitanin tanaulhch: ―Alaktsʼintʼitch. Slivasalh na ixtʼalamapaini ju Lázaro. 37 Para ju aliʼin tanaulh: ―Ju ani lapanac lai malacʼavani ju alakʼachʼix. Tajuch ni jantu lai xacʼuchʼupalai ni jantu cʼaʼixnilh ju Lázaro. 38 Ju Jesús aktam xcanichokopa ju ixʼalhunut. Alh junta ixmakʼacanta ju ixlacatuna ju lijunto Lázaro. Anch junta pulhucucu talhpa ixjunita. Chai ixyonicanta lhtʼakʼalh chiux ju laxamalhtich. 39 Ajunich ju Jesús ju lapanacni: ―Amakʼosutʼit ju chiux. Para ju Marta ju ixlakʼauch ju lijunto naulhch: ―Quiʼucxtin para na ca acaminch ju chavai ni lakatʼatʼich avilhchan ju xatamai ju ani. 40 Ju Jesús junich: ―Ja jantu icjunan ni chavai ju alaktsʼinaʼ ju ixtachaput ju Dios ni vasalh alacʼaʼitʼi. 41 Ju acsnich tamakʼosulhch ju chiux. Chai ju Jesús talakstʼalh ju lactʼiyan. Naulh: ―Quimpai icxtakniyan lhakʼailaktsʼin ni quinkʼasmatnitach ju tuchi xacsqʼuiniyan. 42 Ju quitʼin iccʼatsai ni aktsʼiya quinkʼasmatnich. Para va ixlacaʼatalhʼan ju ixtalhavat lapanacni ju ani tavilanalh icsqʼuiniyanch chunch ni laich catalacaʼiyaʼ ni uxintʼi ju qʼuimacʼatʼantʼa ju ani lacamunutpaʼ. 43 Acsni nonkʼo junima chivinti ju Jesús pus lana pʼas chivinilh acsni junilh ju lijunto Lázaro: ―Lázaro atʼaxtʼuch makspaʼ. 44 Pus ju Lázaro taxtulh junta ixmacnucanta. Ixchʼanchʼicantacaʼ chai ixmakchʼicantacaʼ lacapumpuʼ acsni taxtulh. Chai ju ixʼucxpuʼ ixlacapachʼicantacaʼ lacapayu. Ajunich ju Jesús ju lapanacni: ―Alacxkʼotnitʼitch junta lacchʼinicanta. Chach ancha laʼixchakaʼ. 45 Ju acsnich na lhu ju istʼaʼisraelitanin ju ixtalakminta ju Malia talhilacaʼalh ju Jesús ni talaktsʼilh tuchi navilhch ju yuchi. 46 Para ju aliʼin taʼalh laktsʼinin ju fariseonin. Taʼalh juninin tuchi navilhch ju Jesús. 47 Ju acsnich ju xalackʼajin palijni chaich ju fariseonin tamakʼaixtoklh ju ixtʼaxalackʼajin. Ixtalajunich: ―Tas calayauch ju chavai. Ju ani lapanac na lhu lhamakʼan ju malacasui. 48 Ni va calhilakʼaʼiyau pus chux ju quintʼaʼisraelitaninʼan catalhilacaʼankʼoyach ni ixʼucxtinʼan junita. Chai cataminach ju romanonin ju talhinajun ju ani lacatʼun chai catalakʼalhiyaʼ ju quimpujitatʼan chai aquintamaknikʼoyan. 49 Para pumatam lhiyuʼunch ixjuncan Caifás. Ju yuchi xakʼai pali ixjunita ju anuʼ cʼata. Ju yuchi ajunich ju ixtʼaxalackʼajin: ―Ju uxijnan jantu tuʼuʼ mispʼayatʼit. 50 Jantu machʼakxayatʼit ni palai kʼox ju quilacataʼan ni canilh pumatam lapanac. Jantu camaknikʼocau ju quijnanʼan ju israelitanin juntau. 51 Ju Caifás jantu va laʼisʼakstu pastaclh ju ani chivinti. Para ni xakʼai pali ixjunita ju anuch cʼata pus yuchi lhinaulh ni caniyaʼ ju Jesús ixʼokxtapalhni ju istʼaʼisraelitanin. 52 Chai jantu va yuchi ni canilh ixʼokxtapalhni ju istʼaʼisraelitanin. Para vachuʼ laʼixʼaninti va lakatam ixʼanavikʼoputun ju isʼaskʼatʼan Dios ju tatʼajun ixlhilacaputsʼun ju lacamunutpaʼ. 53 Pus tus acsnich avilhchan ju tapastaclh ta yu laich catapumakniyaʼ ju Jesús. 54 Ixlhiyuchach ju Jesús jantu ixʼalhtanamputun laʼixʼucxlacapuʼan ju istʼaʼisraelitanin. Va alh laxalacatʼun junta vanin ixtʼalachʼapata ju anuʼ xalacatʼun junta matiʼ tuʼuʼ ixjunita. Alh ju lakʼachakʼan ju ixjuncan Efraín. Anch ju alactʼatolhcha ju ixʼamamakaʼui. 55 Ju ixcʼatanʼan ju israelitanin vanin ixjunita. Ju cʼatan ju ixpupastaccan ju anuʼ atatsʼisni acsni tatakʼalhtaxtulh laʼixʼanintiʼan ju xalackʼajin istsʼalan ju makʼaniya israelitanin. Pus acsni tucaʼ ixchin ju anuʼ cʼatan pus na lhu lapanacni ixtachaʼanta ju lakʼachakʼan Jerusalén. Ixtataxtutacha laʼixtʼunʼan. Va ixtaʼan navinin tachi ju ixnajunch laʼixlhamapʼaksin ju Moisés ni laich cataʼulh ju ixborregoʼan. 56 Chai ixtapuxcajuich ju Jesús. Chai ixtalajunich ju sia yuʼunch acsni ixtayanalh lacakʼai ixpujitatʼan: ―Tʼas nonatʼit ju uxijnan. Ja caminaʼ nuʼ ju chavai cʼatan ju anuch ju juncan Cristo u jantu. 57 Ju xalackʼajin palijni chaich ju fariseonin ixtaxtaktach ju lhamapʼaksin ni tam xamatiʼ cacʼatsayaʼ ta anchach ju catsucucha ju anuch Jesús pus lana canonach. Ju chunch laich cataʼanaʼ chʼapanin.
1 Acsni chinchokocha ju Jesús ju lakʼachakʼan Betania pus lakachaxancaʼ avilhchan ixticʼacxacaʼ acsni cajunach ju anuʼ cʼatan ju lakʼachakʼan Jerusalén. Ju Betania ixlakʼachakʼan ixjunita ju anuʼ Lázaro ju ixnita chai ixlokʼonchokota laʼixtachaput ju Jesús. 2 Anch ju tanavinilh lakatam lacvaiti ju Jesús. Chai ju Marta ixtʼakʼa vaiti. Chai ju Lázaro ixmaktapakstitama junta ixtaʼakstitamanalh ju Jesús junta ixtatʼajun venin ni chunchach ixtalhilanita. 3 Ju acsnich ju Malia chʼapalh paitat kilo ju na saksi cʼuchʼu ju va achʼitin ixnavicanta chai na laklhu ixtapalh ixjunita. Chai ju yuchi chʼanmucʼalh laʼixchʼanchʼajaʼ ju Jesús chai lhichʼanxaca laʼixʼai. Pus ju chakaʼ na cʼus pulacʼacamilh ju lacacʼuchʼu. 4 Para pumatam ixtamamakaʼun ju Jesús jantu kʼox lhiula. Ju yuchi Judas Iscariote ixjuncan. Istsʼalh Simón. Yuchi ju anuʼ camakʼaxtʼakʼaʼ ju Jesús. Pus ju yuchi naulh: 5 ―Tajuch ni jantu lakatʼutu cientos xalhistʼai ju ixcʼuchʼu chai caʼixʼaxtaknilh ju quilhpatinin. 6 Mas chunch ju naulich para jantu slivasalh ni va camapaini ju quilhpatinin. Alai punaulh ni va akʼalhonaʼ ixjunita. Chai yuchi ju ixmakʼatach ju ixtumin ju Jesús chaich ixtuminʼan ju ixʼatʼamamakaʼuich. Chai anch ju ixkʼalhomacutuich ju tumin. 7 Ju acsnich ju Jesús junich: ―Amacʼauch. Ju yuchi ixmakʼata ju ani cʼuchʼu. Chai ju chavai quixtʼekʼemucʼanilh ni camakʼacanaʼ ju quilacatuna. Chunch ju xanavich tachi ju lhilanitauch ni nican. 8 Ju quilhpatinin aktsʼiya catatʼaʼalhtananan. Para ju quitʼin jantu lai actilatʼaʼalhtanankʼalhiu. 9 Na lhu ju israelitanin tacʼatsa ni anch ixvi ju Jesús laʼixchakaʼ ju Malia. Para jantu va yuchi ixtalhiminta ni va caʼixtalaktsʼimputulh ju Jesús. Para vachuʼ ixtalaktsʼimputunch ju Lázaro ju ixlokʼonchokotach laʼixtachaput ju Cristo acsni ixnita. 10 Ju xalackʼajin palijni ixtalajunich ju sia yuʼunch ni camaknicanach vachuʼ ju Lázaro. 11 Pus va ixlacaʼatalh ni malokʼonichokocalh ju Lázaro na lhu ju israelitanin tapumacaulh ju ixpalijniʼan chai talhilacaʼalh ju Jesús. Yuchi ixtalhipastʼacʼach ni camaknicalh ju Lázaro. 12 Acsni tuncunchokopa ju ixtalhavat lapanacni ju ixtachinta junta ixlai ju anuʼ cʼatan takʼasmatlh ni mintach ju Jesús ju lakʼachakʼan Jerusalén. 13 Pus tachakxʼilh ju ixʼaxtacnaʼan chai tachʼapalhch chai taʼalh pakxtoknin ju Jesús. Ixtanajunch: ―Calakʼayacalh ju Dios. Paxcat ju ixʼucxtinʼan ju israelitanin ju minta laʼixtapakaʼut ju Dios. 14 Ju Jesús lhitaju lakatam puru chai putocʼalh. Tachi ju tsʼokcanta junta najun: 15 Jantu atʼalhan ji amachakʼan Jerusalén. Anich minta ju miʼucxtinʼan. Pujucalh ju puru. 16 Ju acsni jantu tamachakxa ju ani taxtokni ju ixʼamamakaʼui ju Jesús. Para acsni anchokolh lactʼiyan ju Jesús acsnicaʼ ju tapastaclh ju ani taxtokni ni chunchach istsʼokcanta ixlacata yuchi chai ni chunchach ju tamuctaxtulh ju lapanacni. 17 Tachi chun ju lapanacni ju ixtalaktsʼinch ju Jesús acsni malokʼonichokolh ju Lázaro acsni junilh ni cataxtulh junta ixmacnucanta pus yuʼunch ju ixtanajunch ni vasalh chunch ju navilh ju Jesús. 18 Ju lapanacni ni ixtakʼasmatʼach tuchi lhamakʼan ixnavita pus yuchi taquilhipakxtoklh ju Jesús. 19 Pus ju fariseonin ixtalaclajunich ju sia yuʼunch: ―Alaktsʼintʼit. Ju quijnanʼan jantu quiclacaʼicanau. Chux ju lapanacni catachʼakʼokʼayach ju anuʼ lapanac ju Jesús juncan. 20 Vachu na lhu ixtamakʼanta ju griegonin junta ixtaʼanta ju israelitanin ju ixtamaknajun ni Cristo yuchi ju xakʼai. Chunch ixtanajun junta lai cʼatan. 21 Ju yuʼunch talakʼalh ju Pilipe ju amachakaʼ Betsaida lhiGalilea. Tatapaininilh. Tajunich: ―Quiʼamigo. Iclaktsʼimputunau ju Jesús. 22 Pus ju Pilipe alhch juniniʼ ju Tilix. Chai ju Tilix tʼaʼalhch ju Pilipe. Taʼalhch juninin ju Jesús. 23 Ju acsnich ju Jesús alackʼalhtailh. Ajunich: ―Vaninch chinch ju avilhchan acsni catacʼatsayach ju lapanacni ni icxakʼai. Quitʼinch ju quimalakachatachilh ju Dios ni lapanac actsucuyaʼ ju ani. 24 Slivasalh ju iclajunau. Ju satalhtsʼi trigo ni jantu capuchʼilh ju ixʼaxtʼakʼa junta chʼancanta lacatʼun pus jantu lai tuʼuʼ catixtaklh ju xalhiʼut. Para ni capuchʼiyaʼ pus capʼunaʼ chai caxajtachilh chai na lhu caxtʼakʼaʼ ju xalhiʼut. Pus tachi ju tapasai lasatalhtsʼi trigo pus chunchach vachuʼ ju catapasayaʼ ju laquiʼatsucuntiʼan. 25 Ju na mapaini isʼatsucunti ju ani lacamunutpaʼ catsʼankʼayanta ju saʼatsucunti ju lactʼiyan. Para ju jantu tuʼuʼ lhiulai ju isʼatsucunti ju ani lacamunutpaʼ pus pulhajai ju isʼatsucunti jonkʼalhita lactʼiyan. 26 Ni xamatiʼ quinchʼalhcatnaniputun pus aquinchʼakʼokʼalh. Chai vanta anchach ju actsucuyaʼ ju quitʼin pus anchach vachuʼ catsucuyaʼ ju quilapanac. Ni xamatiʼ quinchʼalhcatnaniputun pus camispacanaʼ ni xakʼai laʼixmacni ju quimpai. Ju Jesús tailhiʼalh ju ixchivinti chai chani naulh: 27 ―Ju chavai quixcani ju quiʼalhunut. Tijuch ju acnonaʼ. Ja acnonach: “Quimpai aquimakʼalhtʼaxtʼuch ju anuʼ minta pantsʼiquis”. Jantu lai actinaulh ju chunch ni yuchi iclhitsucuta ju ani lacamunutpaʼ. 28 Alai acnonaʼ: “Quimpai chach tacʼatsa ju lapanacni ni xakʼaichʼat”. Chai acsni naulh ju chunch ju Jesús pus lana mincha lakatam chivinti ju lactʼiyan ju naulh: ―Tacʼatsalh ju lapanacni ni icxakʼai chai aktam camasunichokocanaʼ. 29 Ju anuʼ lapanacni ju vanin ixtayanalh takʼasmatlich ju anuʼ chivinti. Chai ixtanajunch ni va tʼasalh tʼajin. Chai ju aliʼinch ixtanajunch ni anquilh ju xaxakʼalai. 30 Akʼalhtayanalh ju Jesús. Ajunich: ―Jantu quilacata ju xalhimin junima chivinti. Para milacataʼan. 31 Ju chavai amucʼanicalhch ixtalakʼalhinʼan ju lapanacni. Chai ju xaʼucxtin ju aʼokxchokʼoi chux ju lacamunutpaʼ jantuch lai catilhinonkʼo. 32 Ju quitʼin ni acxtucmucʼacanaʼ ju lacacurus pus acʼatʼasanikʼoyach ju laquimacni tachi chun ju lapanacni. 33 Ju punaulich ju chunch ju Jesús va ixʼamamachakxaninimputunch ta yu capuniyach. 34 Taʼakʼalhtayanalh ju ixtalhavat lapanacni: ―Ju quijnan ickʼasmatʼauch ni najun ju lacalhamapʼaksin ni catsucukʼalhiyaʼ ju Cristo ju noncan camalakachatachilh ju Dios. Para ju uxintʼi naʼun ni tasqʼuini ni caxtucmucʼacalh lacacurus ju malakachatachilh ju Dios ni lapanac catsucuyaʼ ju ani. Tis chavaich ju ani ju malakachatachilh ju Dios ni lapanac catsucuyaʼ ju ani. Ja yuchi ju Cristo juncan. 35 Ju acsnich ju Jesús ajunich: ―Pus va pantsʼiquisch ju tiʼalin ju atuncunuʼ ju lamilhiʼuxijnan. Alacʼasqʼuintʼit ni chach tamapulhcunin ju lamiʼalhunutʼan ni alincaʼ ju tachi atuncunuʼ lamilhiʼuxijnan. Ni jantu lakʼaʼiyatʼit pus jantu xcai ni catakʼalhi ju miʼatsucuntiʼan. Chunch aʼunaʼitʼit tachi tam xamatiʼ ju alhtanan lacaʼatatsʼisni. Ju yuchi jantu cʼatsai taʼanchach ju puʼan. 36 Ju quitʼin tachi ju atuncunuʼ icjunita. Pus ni ictilatʼavilau pus tus chavai aquilalhilacaʼau. Ju chunch atsʼucʼuyaʼitʼit tachi ju lapanacni ju tatʼajun laquiʼatuncunuʼ. Ju ani chivinti acsni naulh ju Jesús pus lana alh. Alackʼosmakʼalh ju lapanacni. 37 Ju Jesús mas navilhch ju laʼixʼucxlacapuʼan ju lapanacni na lhu lhamakʼan nin chunch jantu ixtalhilacaʼan. 38 Ni chunchach talalh pus uctaxtulh ju ixchivinti ju makʼaniya lapanac ju Isaías ixjuncan. Ju yuchi ixnajun ixchivinti Dios chai chani ju junilh ju Dios: Tis chavaich ji quiʼucxtin ju lacaʼita ju quinchivintiʼan. Tis chavaich ju ismasunicanta ni na tachapunʼat ji quiʼucxtin Dios. 39 Chunch ju naulh ju Isaías. Chai ni jantu lai ixtalacaʼi pus uctaxtulh ixchivinti ju Isaías junta chani nonchokoi lacaʼalacatam atsʼoknut: 40 Dios ju anavilh ni alakʼachʼixnin catava laʼixtacʼatsanʼan ju lapanacni. Chai na pʼas anavinilh ixʼalhunutʼan. Ju chunch jantuch lai catapamachakxananaʼ ju ixtacʼatsanʼan. Chai jantu lai catalacaʼiyaʼ tuʼuʼ laʼixʼalhunutʼan. Chai jantu lai tam catapastʼacʼaʼ laʼixʼalhunutʼan ni laich tam acʼanavinilh ixʼalhunutʼan. 41 Yuchach ju ani ju naulh ju Isaías acsni masunilh ju Dios ni yuchach ju Dios ju xakʼai tucan. Chai chunch ju lhichivinilh. 42 Aktsʼiya na lhu ju xalackʼajin talhilacaʼalh ju Jesús. Para va ixlacaʼatalhʼan ju fariseonin jantu ixtapunomputun ju anuch xalackʼajin ni ixtalhilacaʼanta ju Jesús. Va ixtanajunch ni jantu caʼaxcoxtucalh laʼixpujitatʼan ju istʼaʼisraelitanin ni jantu xamatiʼ cacʼatsa ni talhilacaʼanta ju Jesús. 43 Chunch ju talalh ni va palai kʼox ixtalhiulai ni catanaulhch ju ixtʼalapanacni ni xalackʼajin tajunita. Palai jantu tuʼuʼ talhiula ni Dios ju canaulh ni xalackʼajinch catava. 44 Ju Jesús pʼas naulh: ―Ju quilhilacaʼantach jantu va quitʼin ju quilhilacaʼanta. Para vachuʼ yuchi ju lhilacaʼan ju quimacaminta. 45 Chai va tichi chavaich ju quilaktsʼin pus tachi ju va laktsʼin ju quimacaminta. 46 Ju quitʼin icminta ju ani lacamunutpaʼ tachi ju tuʼuʼ maclhcu ni laich acʼamalacpucujuyaʼ ju lapanacni. Ju chunch tachi chun ju quintalhilacaʼanch quitʼin jantu va tachi tsʼista cajunaʼ ju laʼixtacʼatsanʼan. 47 Ju cakʼasmatʼaʼ ju quinchivinti para ni jantu tuʼuʼ calhiulayaʼ pus jantu quitʼin ju icʼulani ixtalakʼalhin. Jantiyuʼ iclhiminta ju quitʼin ni va acʼaʼulanilh ixtalakʼalhinʼan ju lapanacni. Va icminta amakʼalhtaxtunuʼ ju lapanacni. 48 Alin tuchi ixtalakxtuch ju ulani ixtalakʼalhin ju jantu tuʼuʼ quilhiulai chai ju jantu lacaʼi ju quinchivinti. Ju chivinti ju icnajunta anch ju caputasuyach ixtalakʼalhinʼan acsni cachinaʼ ju avilhchan ju ixʼaclanti lacamunutpaʼ. 49 Chai jantu va quiʼakstu ju icchivinin. Para yuchi ju icnajun tuchi quijuni ju quimpai ju quimacaminta. Chai yuchi ju quimavasalanilh ta yu laich acnonaʼ. 50 Chai iccʼatsaich ni alin ju atsucunti jonkʼalhita acsni muctaxtucan ju laʼixlhamapʼaksin ju quimpai Dios. Pus yuchi ju icnajunch tachi ju quijunitach ju quimpai Dios.
1 Tucaʼ cʼatan ixjun. Ju anuʼ cʼatan acsni ixpupastaccan ju anuʼ atatsʼisni acsni tatakʼalhtaxtulh laʼixʼanintiʼan ju xalackʼajin istsʼalan ju makʼaniya israelitanin. Pus ju Jesús cʼatsalh ni chintach ju ixʼavilhchan ni camaconach ju ani lacamunutpaʼ. Canach lactʼiyan junta vi ju ixpai. Pus ju yuchi aktsʼiya ixʼamapainich ju ixlapanacni acsni ixʼalactʼavi ju ani lacamunutpaʼ. Para ju chavai ni caʼanach pus amasunilh ni vasalh na amapaini. 2 Acsni tapakstitama ju lacamixa pus ju lhacaticuru ixlhitanunch laʼixʼalhunut ju Judas Iscariote ju istsʼalh Simón. Yuchach ju mapastʼacʼani ni laich camakʼaxtaklh ju Jesús. 3 Ju Jesús aktsʼiya iscʼatsaich ni ixtaknikʼojutach ju ixpai tachi chun ju taxtokni laʼixmacaʼ. Chai iscʼatsaich ni laʼixmacni Dios ju taxtutacha chai laʼixmacni Dios ju caʼanchokoyaʼ. 4 Pus acsni tavenkʼolh pus ju Jesús taya lacamixa. Chai maxtulh lakatam ixpumpuʼ. Chʼapalh alakatam pumpuʼ chai musatocʼalh. 5 Ju acsnich ju yuchi mujulh ju xcan lacakʼax chai tsuculh alakchʼakʼaniniʼ ixchʼajaʼan ju ixʼamamakaʼui. Chai ixʼachʼanxacaich lacapumpuʼ ju ismusajucʼalh. 6 Para acsni lakʼalh ju Simón Pitaluʼ pus ju yuchi junich: ―Quiʼucxtin ja aqʼuinchʼakʼaniyaʼiʼan vachuʼ ju laquinchʼajaʼ ju quitʼin. 7 Chai ju Jesús junich: ―Ju tuchi icnavi ju uxintʼi jantu machʼakxai ju chavai. Para amachʼakxayaʼ astan. 8 Pus ju Pitaluʼ juni: ―Jantu tavanan aqʼuintʼichʼanchʼakʼatʼi. Chai ju Jesús junich: ―Ni jantu acchʼanchʼakʼayan pus jantu quilakʼauʼat. 9 Chai junich ju Simón Pitaluʼ ju Jesús: ―Quiʼucxtin pus jantu va yuchi ju quinchʼajaʼ ju aqʼuinchʼakʼanin. Para vachuʼ ju quimacaʼ chaich ju quiʼaktsulhch. 10 Chai junich ju Jesús: ―Ni lhiyaxch ju xapʼax pus jantu tasqʼuini ni acchʼakʼanikʼojun ju milacatuna. Va minchʼajaʼ ju acchʼakʼaniyan. Ju aliʼ milacatuna chʼakʼakʼocantach. Chai ju uxijnan chʼakʼanicʼantʼatʼitch ju lamiʼalhunutʼan vachuʼ. Para jantu minchuxʼan. 11 Ju Jesús iscʼatsaich tichi chavaich ju camakʼaxtʼakʼaʼ. Yuchi lhinaulh ni jantu si achʼakʼanikʼocanta ju ixʼalhunutʼan. 12 Ju astan acsni achʼanchʼakʼakʼolhch pus lakchʼichokolh ju ixpumpuʼ. Tapakstitamachokolh ju lacamixa. Ajunich ju ixʼamamakaʼui: ―Ja machʼakxayatʼit ju tuchi xaclanaviniyau. 13 Ju uxijnan acsni quilalhichivinau nonatʼit ni icʼamamakaʼunuʼ chai icʼucxtin. Vas nonatʼit ni chunch icjunita ju quitʼin. 14 Pus ju quitʼin ni miʼucxtinʼan chai miʼamamakaʼunuʼan icjunita ni iclachʼakʼaniuch ju minchʼajaʼan pus tasqʼuini ni alachʼanchʼakʼayaʼitʼitch vachuʼ ju milhiʼuxijnan. 15 Iclaxtakniuch ju lhilaktsʼintaiti. Ju uxijnan vachuʼ chunch anaviyaʼitʼit tachi ju xaclanaviyauch. 16 Slivasalh ju iclajunau. Ju va xalapanac jantiyuʼ ju xakʼai. Yuchi ju xakʼai ju xaʼucxtin. Nin yuchi ju va malakachacanta jantiyuʼ ju xakʼai. Yuchi ju xakʼai ju amalakachanan. Pus chunch ju quilatʼajuntau ju uxijnan. 17 Ni mispʼayatʼit ju ani taxtokni lhikʼach ju atsʼucʼuyaʼitʼit acsni anaviyaʼitʼit ju chunch. 18 Jantu iclhichivinin ju milhichuxʼan. Iccʼatsai tichi chavaich ju icsacxtutach. Para chunchach ju capuʼuctaxtuyach ju atsʼoknut junta chani najun: “Ju kʼaixtam xaquintʼavajin va quintʼalaxcai xajun”. 19 Chavai ju iclajunau ni tucaʼ tapasai ju anuʼ lhamakʼan ju iclajuntau. Ju chunch acsni caʼuctaxtuyach alacʼaʼiyaʼitʼit ni chunch icjunita tachi ju iclajuntauch. 20 Slivasalh ju iclajunau. Ju amaklhtayanan ju icmalakachatachilhch pus tachi ju va jun quitʼin ju quiʼamaklhtayanan. Chai ju quiʼamaklhtayanan pus tachi ju va jun amaklhtayanan ju quimacaminta. 21 Acsni naulh ju Jesús ju chunch lana amakʼaninilh laʼixʼalhunut. Chai naulich: ―Slivasalh ju iclajunau. Pumatam milhiʼuxijnan ju aquimakʼaxtʼakʼaʼ. 22 Ju acsnich ju ixʼamamakaʼui va kʼantam kʼantam talalaktsʼilh. Jantu ixtacʼatsai tichi chavaich ju ixlhichivincan. 23 Pus vanin ixtʼatapakstitama ju Jesús pumatam ixtamamakaʼun ju na ixmapaini. 24 Pus ju Simón Pitaluʼ tamacyonilh ju yuchi ni casacmilh tichi chavaich ju lhichivincan. 25 Pus ju yuchi vanin cʼatuʼanilh ju Jesús. Chai junilh: ―Quiʼucxtin tis chavaich ju camakʼaxtʼakʼan. 26 Ju Jesús akʼalhtayanalh: ―Yuchach ju anuʼ ju acmatajuniyaʼ ju ixniʼ laxaxcan quivaiti chai acxtakniyach. Chai acsni matajunilh pus xtaknicalh ju Judas Iscariote. Istsʼalh ixjunita ju Simón. 27 Pus ju Judas acsni amaklhtayanalh ju vati aktsʼiya ixlhipastactach laʼixʼalhunut tuchi ixnaviputunch. Pus ju acsnich pantsʼiquis lana tanulh ju lhacaticuru laʼixʼalhunut ju Judas. Chai ju Jesús junich: ―Ju tuchʼi navipʼutʼun vatsʼalhch anavitʼi. 28 Para tachi chun ju aliʼin ju ixtapakstitamai lacamixa jantu xamatiʼ xamachakxai tajuch ni va chunch xajuncan ju Judas. 29 Ju Judas ni ixmamakʼanicanta ju tumin pus ju aliʼin va tamachakxa tachi ju va cajunilh ju Jesús: “Atʼamochich ju tuchi camaktasqʼuiniyau ixlacata ju cʼatan”. U tachi ju va cajunilhch: “Axtʼakninch lacatsʼunin ju quilhpatinin”. 30 Acsni amaklhtayanalh ju vati ju Judas ju xtaknilh ju Jesús pus lana taxtulh. Chai na istsʼistach. 31 Acsni taxtulh ju yuchi pus najunch ju Jesús: ―Ju chavai chinta ju avilhchan acsni aclakʼayacanaʼ. Quitʼin ju quimalakachatachilh ju Dios ni lapanac actsucuyaʼ ju ani. Chai vachuʼ calakʼayacanaʼ ju Dios ju quilacata quitʼin. 32 Chai ni catacʼatsayaʼ ju lapanacni ni yuchi ju xakʼai ju Dios ju va quilacata pus ju Dios camacʼatsaniyaʼ ju lapanacni ni icxakʼai vachuʼ. Chai vatsʼalhti canaviyaʼ chunch. 33 Quiʼaskʼatʼan va pantsʼiquis ju iclatʼavilau ju uxijnan. Aquilapuxcoyauch. Chai tachi ju icʼajunilh ju quintʼaʼisraelitaninʼan pus vachuʼ chunch iclajunau ju uxijnan. Junta acʼanaʼ ju uxijnan jantu lai atʼipʼitʼit. 34 Lakatam sastʼi lhamapʼaksin ju iclaxtakniyau. Yuchi ni alamapʼainitʼit ju milhiʼuxijnanʼan. Tachi ju iclamapainiyauch pus vachuʼ chunch alamapʼainitʼit ju milhiʼuxijnanʼan. 35 Ju chunch tachi chun ju lapanacni catapucʼatsayaʼ ni quiʼamamakaʼunti untʼatʼit ni alamapʼainitʼitch ju milhiʼuxijnanʼan. 36 Ju Simón Pitaluʼ junich: ―Quiʼucxtin ta anchach ju apʼinaʼ. Akʼalhtayanalh ju Jesús: ―Junta acʼanaʼ ju quitʼin jantu lai aqʼuintʼichʼakʼokʼa ju chavai. Para astan aqʼuinchʼakʼokʼayaʼ. 37 Ju Pitaluʼ junich: ―Quiʼucxtin tajuch ni jantu lai actichʼakʼokʼan ju chavai. Acxtʼakʼach ju quiʼatsucunti ju milacata. 38 Akʼalhtayanalh ju Jesús: ―Ja vasalh lai axtʼaktʼi ju miʼatsucunti ju quilacata. Slivasalh ju icjunan. Acsni jantucaʼ tʼasai ju puyux pus paktʼutuch ju naʼuntʼa ni jantu qʼuimispʼai.
1 Ju Jesús tailhiʼalh ju ixchivinti ju ixtʼajun ajuniniʼ ju ixʼamamakaʼui chai naulh: ―Jantu caʼamakʼaninilh ju miʼalhunutʼan. Ju uxijnan ni lhilacʼapʼinatʼit ju Dios pus vachuch aquilalhilacaʼanau ju quitʼin. 2 Junta vilhcha ju quimpai na lhu alin ju chakaʼ. Ni jantu cava chunch ju lactʼiyan pus xaclajuniuch ni jantu chun junita. Acʼanach lakʼoxiniʼ ju milacchakaʼan cunaʼ ju uxijnan. 3 Chai ni acʼanaʼ lakʼoxiniʼ ju anuʼ lakʼachakʼan ju milacataʼan pus acminchokopalaʼ aktam. Chai quitʼinch ju aclalhiʼanau ju lactʼiyan. Ju chunch junta actsucuyanta pus vachuch anch ju atsʼucʼuyaʼitʼit ju uxijnan. 4 Cʼatsʼayatʼitch ta anchach ju acʼanaʼ chai mispʼayatʼitch junta puʼancan. 5 Ju Tumax junich ju Jesús: ―Quiʼucxtin jantu iccʼatsayau ta anchach ju apʼinaʼ. Tas aclhimispayauch ju ti. 6 Ju Jesús junich ju Tumax: ―Quitʼin ju icxati. Laquimacni ju pucʼatsacan ju stavasalanti. Chai quitʼin ju icxtʼakʼa ju atsucunti jonkʼalhi. Jantu lai xamatiʼ lakʼan ju quimpai ju jantu quilhilaksich. 7 Ni xaquilamispau tichi chavaich ju quitʼin pus vachuʼ ismispʼatʼit ju quimpai. Pus ju chavai ni quilamispayauch tichi chavaich ju quitʼin pus tachi ju va mispʼayatʼitch ju quimpai. Chai tachi ju va laktsʼinatʼit ju quimpai. 8 Chai ju Pilipe junich: ―Quiʼucxtin aquilamalacasuniuch ju mimpai. Aclhikʼachanauch. 9 Pus ju Jesús alackʼalhtailh: ―Na makʼanchich ju xaclatʼaʼalhtanatsucuyau ju uxijnan. Ja vanach jantu qʼuimispʼai ji Pilipe. Ju quilaktsʼintach quitʼin tachi ju va laktsʼintach ju quimpai. Tʼas ni va nompʼalai ju uxintʼi ni acmalacasuniyan ju quimpai. 10 Ja jantu lacʼaʼi ni va lakatam Dios icjuntau ju quitʼin chai ju quimpai. Ju chivinti ju tuchi iclajunau jantu va laquiʼakstu ju icchivinin. Para ju quimpai ni va lakatam Dios quintʼajunita pus yuchach ju navi ju lhichʼalhcat ju laquimacni. 11 Alacʼaʼitʼitch ni va lakatamch Dios ictʼajunita ju quimpai. U ni jantu lai pʼulacʼaʼiyatʼit ju va quinchivinti pus aquilapulhilacaʼauch ju tuchi icnavita. 12 Slivasalh ju iclajunau. Ju lhichʼalhcat ju icnavi quitʼin pus vachuʼ chunch canaviyaʼ ju quilhilacaʼantach ju quitʼin. Chai palai kʼai lhichʼalhcat ju canaviyaʼ ju yuchi va ixlacaʼatalh ni aclakʼanach ju quimpai junta vilhcha. 13 Tachi chun ju asqʼuiniyaʼitʼit ju quimpai ju laquintapakaʼut pus aclanaviniyauch. Chunch ju catapucʼatsayach ju lapanacni ni xakʼai ju quimpai ju va quilacata ni istsʼalh icjunita. 14 Ni tuʼuʼ asqʼuinaʼitʼit ju laquintapakaʼut pus quitʼin ju aclanaviniyau. 15 Ni quilamapainiyau ju quitʼin pus amuctʼaxtʼutʼit ju quilhamapʼaksin. 16 Quitʼinch ju actapaininiyaʼ ju quimpai chai cataxtakniyanch apumatam ju cataʼaktaijuyan. Ju yuchi catatʼatolhkʼalhiyanch. 17 Yuchi ju Spiritu Santu ju najun ju stavasalanti. Ju jantu quintalhilacaʼan pus jantu lai cataʼamaklhtayananaʼ ni va jantu talaktsʼin nin catamispa ju yuchi. Para ju uxijnan mispʼayatʼit ni tatʼavilanch. Chai catanuyaʼ lamiʼalhunutʼan. 18 Jantu va miʼakstuʼan ju actilamacaju. Aclalakminchokoyau ju uxijnan. 19 Jantuch makʼan aquintitalaktsʼilh ju jantu quintalhilacaʼanta. Ju yuʼunch jantu aquintitalaktsʼinchokolh tavanan. Para ju uxijnan aquilalaktsʼinchokoyau. Chai ni ictʼajun ju quitʼin pus vachuʼ atsʼucʼutʼachitʼit ju uxijnan ju lactʼiyan. 20 Acsnich avilhchan ju acʼatsʼayaʼitʼit ni va lakatamch Dios ictʼajunita ju quimpai. Chai acʼatsʼayaʼitʼit ni laquimacni ju tʼonatʼit ju uxijnan chai ju quitʼin ictʼajun lamiʼalhunutʼan. 21 Ju quilacaʼinich ju quilhamapʼaksin chai muctaxtuich tachi ju najunch ju laquilhamapʼaksin pus yuchach ju quimapaini. Chai ju quimapaini pus vachuʼ camapainicanaʼ. Yuchi ju quimpai ju camapainiyaʼ. Chai ju quitʼin vachuʼ acmapainiyaʼ ju quilapanac. Chai cacʼatsayach ni laʼixʼalhunutch ju ictʼajun. ―Chunch ju ajunilh ju ixʼamamakaʼui ju Jesús. 22 Pus pumatam ju ixʼamamakaʼui ju Jesús ixjuncan Judas. Jantiyuʼ ju Judas Iscariote. Pus ju yuchi chani juni ju Jesús: ―Quiʼucxtin tas aquilapumalacasuniyau ju quijnan chai jantuch atʼalacʼasuniyaʼ ju jantu talhilacaʼantan. 23 Akʼalhtayanalh ju Jesús. Junich: ―Ni xamatiʼ quimapaini pus camuctaxtuyaʼ ju laquinchivinti. Chai ju quimpai camapainiyaʼ. Chai ju quimpai chai ju quitʼin aclakminauch ju quilacaʼinich ju quinchivinti. Chai actsucuyauch laʼixʼalhunut ju yuchi. 24 Ju jantu quimapaini pus jantu tuʼuʼ lhiulai ju quinchivinti. Ju chivinti ju kʼasmatʼatʼit jantu quiʼanuʼ para ixʼanuʼ ju quimpai ju quimacaminta. 25 Pus iclajunau ju ani taxtokni ni iclatʼavilaucaʼ ju uxijnan. 26 Yuchi ju Spiritu Santu ju aʼaktaijunuʼ. Chai yuchi ju camacaminiyaʼ ju quimpai laquintapakaʼut. Yuchi ju catamasuniyan tachi chun ju taxtokni ju iclajuntau. 27 Ju quitʼin aclaʼaktaijuyau ni jantu calacʼanaʼ ju miʼalhunutʼan. Tachi ju quitʼin ni jantu lacʼan ju quiʼalhunut. Para ju aʼaktaijunti ju aclanaviniyau jantu chun tachi ju va ixʼaʼaktaijunti tam lapanac. Jantu calacʼalh ju miʼalhunutʼan nin yuchi ni atʼalhanantʼit. 28 Kʼasmatʼatʼitch acsni xaclajunau ni acʼanach junta vilhcha ju quimpai chai aclalakminchokoyauch ju uxijnan. Pus ni xaquilamapainiu cava pus ixkʼachʼantʼitch acsni iclajuniu ni aclakʼanach ju quimpai ni yuchi ju palai xakʼai. Jantu quitʼin. 29 Ju chavai ictilajunau ni jantucaʼ icʼan ju lactʼiyan. Ju chunch acsni acʼanach pus acsnich ju alacʼaʼiyaʼitʼitch ju tuchi iclajuntauch. 30 Ju chavai jantuch makʼan ju actilatʼachiviniu ju uxijnan ni caminach ju xakʼai ju okxchokʼoi chux ju lacamunutpaʼ. Ju yuchi matiʼ ju ixtachaput ni lai tuʼuʼ aquinavi. 31 Para icnavi tachi ju quijuni ju quimpai ni laich catapumispayaʼ ju lapanacni ni icmapaini ju quimpai chai icnavi tachi ju quijuni ju yuchi. Akʼostʼolatʼitch. Caʼauch.
1 Vachuʼ chani ju ajuni ju ixʼamamakaʼui ju Jesús: ―Ju quitʼin chunch icjunita tachi ju tuʼuʼ xaqʼuiu uvas. Chai ju quimpai chunch junita tachi ju xaʼalaxtunuʼ. 2 Tachi chun ju lapanacni ju quintalhilacaʼanta pus chunch tajunita tachi ju xamackʼatapʼu. Pus ju jantu tasui ju quintachaput laʼisʼatsucunti tachi ju va jantu xtʼakʼa ju xatocʼat. Pus amakʼosucan ju yuchi tachi acsni achakxmakʼan ju tuʼuʼ xamackʼatapʼu ju jantuch xtʼakʼa ju xatocʼat. Chai tachi chun ju lapanacni ju tasui ju quintachaput laʼisʼatsucunti pus tachi ju va taxtʼakʼa ju xatocʼat. Pus tachi ju tuʼuʼ qʼuiu ni calakachakxtucanch ni laich palai lhu catocʼayaʼ ju xatocʼat pus vana va chun navican laʼisʼatsucunti ju anuʼ lapanac. Makʼosunikʼocan tachi chun ju alin laʼisʼatsucunti ju sastʼucʼa ni jantu tasui ixtachaput ju Dios laʼisʼatsucunti. 3 Ju uxijnan chʼakʼanicʼantʼatʼitch ju lamiʼalhunutʼan lacachivinti ju xaclajunau. 4 Atsʼucʼutʼit ju laquimacni. Chai ju quitʼin actsucuyaʼ ju lamiʼalhunutʼan. Ju tuʼuʼ ixmakpʼu ju xaqʼuiu uvas jantu lai catitocʼalh ju xatocʼat ju va laʼisʼakstu. Tasqʼuini ni anch ju camackʼatʼapʼunchokolh ju laʼistisivic. Pus chunchach vachuʼ ju uxijnan. Jantu lai catitasu ixtachaput ju Dios ju lamiʼatsucuntiʼan ni jantu laquimacni ju tsʼucʼuyatʼit. 5 Ju quitʼin icjunita tachi ju tuʼuʼ xaqʼuiu uvas. Ju uxijnan tachi ju xamackʼatapʼu untʼatʼit. Chai ju tʼajunch laquimacni chai ni laʼixʼalhunut ju ictʼajun pus yuchach ju xtʼakʼa lhu xatocʼat ju laʼisʼatsucunti. Pus ni jantu tʼonatʼit ju laquimacni pus jantu tuʼuʼ lai naviyatʼit ju kʼox calhiula ju quimpai Dios. 6 Ju jantu laquimacni tʼajun camakʼancanaʼ tachi ju tuʼuʼ xamackʼatapʼu ju jantu kʼox. Ni chakxmakʼancanta pus caxixach. Chai camakʼaixtokcanaʼ. Chai lacxavacanch. 7 Ni tʼonatʼitch ju laquimacni chai ni lacʼaʼitʼatʼitch ju lamiʼalhunutʼan ju quinchivinti pus laich aquilasqʼuiniyau va tuchʼi ju lacʼasqʼuinatʼitch chai sich axtʼaknikʼocʼanaʼitʼit. 8 Chai putasui ni yuchi ju xakʼai ju quimpai acsni salaka ju atsʼucʼuyaʼitʼit. Chai acsnich ju atʼalacʼasuyaʼitʼit ni vasalhch quilapanacni untʼatʼit. 9 Tachi ju quimpai ni na quimapaini pus chunchach vachuʼ ju quitʼin iclamapainiyau ju uxijnan. Pus va tachi atsʼucʼutʼit ta yu laich aclapumasuniyau ni iclamapainiyau. 10 Tachi ju quitʼin ni icmuctaxtunilh ju ixlhamapʼaksin ju quimpai chai quimapaini pus chunchach vachuʼ ju uxijnan. Va tachi aclamapainiyau ni amuctʼaxtʼuyaʼitʼit ju quilhamapʼaksin. 11 Iclapujunau ju ani taxtokni va ixlacata ni chach alilh ju quinkʼachat ju lamiʼalhunutʼan. Chai chach vasalh akʼachʼanaʼitʼit. 12 Yuchi ju ani ju quilhamapʼaksin ni alamapʼainitʼit ju milhiʼuxijnanʼan tachi ju quitʼin ni iclamapainiyau. 13 Ju palai kʼai amapaininti yuchi ju ani. Acsni tam xamatiʼ ju calhitapʼuxlh ju isʼatsucunti ixlacata tam ixʼamigo. 14 Ju uxijnan quiʼamigojni aʼunaʼitʼit ni anaviyaʼitʼit tuchi ju iclalhijunauch. 15 Ju chavai jantu va na va xalapanacni aclalhimispayau. Ju va xalapanac jantu lai mispakʼojui tuchi navich ju tam ixʼucxtin. Para ju quitʼin iclamacʼatsanikʼotau ju uxijnan tachi chun ju ickʼasmatʼach ju laʼixmacni ju quimpai. Yuchi iclalhijunau ju chavai ni quiʼamigojni untʼatʼit. 16 Jantu uxijnan ju quilasacxtu. Para quitʼin ju iclasacxtu ju uxijnan. Chai iclalhilhcaʼulatau ni laich alhipʼitʼit ju ani chivinti chai catasu ju quintachaput ju lamiʼatsucuntiʼan chai lai va tachi chunchach catasu ju lamiʼatsucuntiʼan. Ju chunch tachi chun ju asqʼuiniyaʼitʼit ju quimpai ni laquintapakaʼutch pus ju yuchi cataxtakniyan. 17 Iclalhimapʼaksiyau ni alamapʼainitʼitch pumatamin ju milhiʼuxijnan. Ju Jesús tailhiʼalh ju ixchivinti chai chani ju ajuni ju ixʼamamakaʼui: 18 ―Ni va taxcayan ju jantu quintalhilacaʼan pus acʼatsʼatʼit ni quitʼin ju pʼulhnan xaquintaxcaji. 19 Ni ixtʼatʼui cava untʼatʼit ju jantu quintalhilacaʼan pus ju jantu quintalhilacaʼan ca catamapainin. Para ni quitʼin ju iclasacxtutauch ju laʼixlhiyuʼunchʼan ju jantu quintalhilacaʼan pus ixlhiyuchach jantu talhilaktsʼinan ni ixtʼatʼui untʼatʼit. Yuchi va talhixcayanch ju jantu quintalhilacaʼanta. 20 Apʼastʼactʼitch ni iclajuntau ni jantiyuʼ ju xakʼai ju va tam xalapanac. Para yuchi ju palai xakʼai ju ixʼucxtin. Pus ju quitʼin ni quintamamakʼalhkʼajni pus vachuʼ catamamakʼalhkʼajniyan ju uxijnan. Ni quintalacaʼinilhch ju quinchivinti pus vachuʼ catalacaʼiniyan ju minchivintiʼan. 21 Chunch ju catapunaviyan va ixlacaʼatalh ni quilalhilacaʼanauch ju quitʼin chai ju yuʼunch jantu tamispai ju quimacaminta. 22 Ni jantu xacmilh chai jantu xacʼamalani pus jantu ixʼaʼulanicalh ju ixtalakʼalhinʼan. Para ju chavai jantu lai tanajun ni matiʼ ju ixtalakʼalhinʼan. 23 Ju quixcaji pus quimpai ju quintʼaxcaji. 24 Ni jantu cava xacnavi tuʼuʼ lhichʼalhcat ju laʼixlhiyuʼunchʼan tachi ju jantuch lai navi ju va tam xamatiʼ pus jantu ixʼaʼulanicalh ju ixtalakʼalhinʼan. Para ju chavai quintalaktsʼintach ju quitʼin chai ju quimpai chai quintalhixcailich ju quitʼin chai ju quimpai. Yuchi alhiʼulanicanta ju ixtalakʼalhinʼan. 25 Ni chunch talai pus uctaxtui ju chivinti ju tsʼokcanta laʼixlhamapʼaksinʼan junta najun: “Quintalhixcailh mas jantu tuʼuʼ talakʼalhin xacnavi”. Chunch najun laʼixlhamapʼaksinʼan. 26 Pus ju quitʼin aclamacaminiyauch ju cataʼaktaijuyan. Ju yuchi cataxtuyanta laʼixmacni ju quimpai. Yuchi ju Spiritu Santu ju najun ju stavasalanti. Yuchach ju cataxtuyanta laʼixmacni ju quimpai. Chai acsni caminaʼ ju yuchi pus caxtʼakʼaʼ ju chivinti ju quilacata. 27 Chai vachuch ju uxijnan anonaʼitʼit ju tuchʼi laktsʼintʼatʼit ju icnavita ni quilachʼakʼokʼatauch tus acsni ictaiʼulacha ju amalaninti.
1 Iclajuntauch junima taxtokni ni jantuch lai tam atʼinompʼalatʼit astan. 2 Cataxcoxtuyan ju laʼixpujitatʼan ju quintʼaʼisraelitaninʼan. Cachinaʼ avilhchan va tichi chavaich ju catamakniyan catanonach ni chunchach ju na kʼox lhiulai ju Dios. 3 Chux ju ani taxtokni chunch catanaviyaʼ ni va jantu tamispai ju quimpai nin quitʼin. 4 Yuchi iclalhijunauch ju ani taxtokni ni laich apʼastʼacʼaʼitʼit acsni tavanan chunch atʼapʼasayaʼitʼit. Laich anonaʼitʼit ni chunchach ju xaclajunau. Jantu xaclajuntau ju ani taxtokni ju pʼulhnan ni xaclatʼavilaucaʼ. Chai jantucaʼ lai tuʼuʼ ixtapasai ju lamiʼatsucuntiʼan. 5 Para ju chavai aclakʼanchokoyach ju quimalakachatachilh. Para jantu xamatiʼ ju milhiʼuxijnan ju laich aquisacmiputulhch tas anchach ju acʼanaʼ. 6 Va yuchi ni na alakʼamakʼanininatʼitch ju ixlacata junima taxtokni ju iclajuntau. 7 Para ju quitʼin iclajunau ju stavasalanti. Aktsʼiya palai kʼox ju milacataʼan ni acʼanchokolh ju lactʼiyan. Acsni va jantu acʼanchokolh pus ju aʼaktaijunuʼ jantu catitalakmin ju uxijnan. Para ni acʼanaʼ pus acmalakachatachilhch. 8 Chai ju yuchi acsni caminaʼ caʼamalacasuniyaʼ ju lapanacni ixtalakʼalhinʼan. Chai caʼamalacasuniyaʼ ju soknicʼa atsucunti. Chai caʼamalacasuniyaʼ ixʼulanica ixtalakʼalhinʼan ju lapanacni. 9 Ju yuchi caʼamalacasuniyach ju lapanacni ni alin ixtalakʼalhinʼan ni jantu quintalhilacaʼan ju quitʼin. 10 Ju yuchi camalacasuyaʼ ju soknicʼa atsucunti. Chai putasui ni soknicʼa ju quiʼatsucunti ni aclakʼanchokoyach ju quimpai chai jantuch vana aquintilalaktsʼiu. 11 Ju yuchi camalacasuniyaʼ ju lapanacni ni ulai talakʼalhin ju Dios ni mucʼanicantach ju ixtalakʼalhin ju anuʼ xakʼai ju aʼokxchokʼoi tachi chun ju lapanacni ju ani lacamunutpaʼ. 12 Na lhu taxtokni ju iclajumputunau. Para ju chavai jantuch lai atʼitʼastʼucnitʼit. 13 Para acsni cachinaʼ ju Spiritu Santu ju najun ju stavasalanti pus yuchi ju catamasuniyan tachi chun ju stavasalanti. Chunch ju canaviyaʼ ni jantu va ixchivinti isʼakstu ju canonaʼ. Para tachi chun ju kʼasmatni ju Dios yuchach ju canonaʼ. Chai catamacʼatsanikʼoyanch tachi chun ju taxtokni ju caminaʼ. 14 Ju yuchi ni caʼamalanininaʼ ju quinchivinti chai catamamachakxaniyanch ju lamintacʼatsanʼan pus capumalacasuyaʼ ni icxakʼai. 15 Tachi chun ju ixʼanuʼ junita ju quimpai sich quiʼanuʼ vachuʼ. Yuchi iclhinajunch ju chavai ni caʼamalanininaʼ ju Spiritu Santu ju quinchivinti chai catamamachakxaniyan lamintacʼatsanʼan. Vachuʼ chani ju ajuni ju ixʼamamakaʼun ju Jesús: 16 ―Vaninch minta ju avilhchan acsni jantuch aquilalaktsʼinau. Chai acsni catapasayaʼ lakatam lakatʼui avilhchanch aquilalaktsʼinchokoyauch. Chai astan aclakʼanach ju quimpai. 17 Ju acsnich ju aliʼin ju ixʼamamakaʼui ixtalajunich ju sia yuʼunch: ―Tijuch nuʼ ju ani ju quintajumputunan ni najun: “Vaninch minta ju avilhchan acsni jantu aquilalaktsʼinau”. Chai ni nompalai: “Acsni catapasayaʼ lakatam lakatʼui avilhchan aquilalaktsʼinchokoyauch”. Chai ni najun: “Aclakʼanach ju quimpai”. 18 Ixtanajunch: ―Tijuch nuʼ ju nomputun ni va najun ni vanin minta ju avilhchan. Jantu machakxayau tuchi ju najunch. 19 Pus ju Jesús amachakxanilh ni va istasacmiputunch. Pus ajunich: ―Ja lasacmiyatʼit ju va milhiʼakstuʼan ju tuchi xaclajunau acsni xacnajun ni vaninch minta ju avilhchan acsni jantu aquilalaktsʼinau. Chai ni xacnajun ni acsni catapasayaʼ lakatam lakatʼui avilhchan aquilalaktsʼinchokoyau. 20 Slivasalh ju iclajunau. Ju uxijnan akʼalhununaʼitʼit. Chai amakʼanininaʼitʼit. Para ju lapanacni ju jantu quintalhilacaʼan catakʼachanach. Ju uxijnan mas amakʼanininaʼitʼit para ju astan acʼapkʼoyaʼitʼit ju miʼamakʼanitʼan. Akʼachʼanaʼitʼit. 21 Ju tam chakoʼulh acsni calokʼomputunach na makʼalhkʼajnan ni chintach ju ixʼavilhchan. Para acsni catapasaniyach ju ixʼamaklakʼavanti pus jantuch pastacpalai ju ixmakʼalhkʼajnat. Va lhikʼachanch ni maklakʼajuntach pumatam lapanac. 22 Pus chunchach vachuʼ ju uxijnan. Ju chavai slivasalh ni na amakʼanininatʼit. Para acsni aclalaktsʼinchokoyauch pus na akʼachʼanchʼokʼoyaʼitʼit ju lamiʼalhunutʼan. Chai jantu lai xamatiʼ catitataiʼinin ju minkʼachatʼan. 23 Ju acsni avilhchan jantuch tuʼuʼ aquilasqʼuiniyau ju quitʼin. Slivasalh ju iclajunau. Tachi chun ju asqʼuiniyaʼitʼit ju quimpai ju laquintapakaʼutch cataxtakniyan. 24 Tus chavai jantu tuʼuʼ sqʼuintʼatʼit ju laquintapakaʼut. Asqʼuintʼit chai amaklhtʼayananaʼitʼit. Ju chunch slivasalh alhikʼachʼanaʼitʼit ju lamiʼalhunutʼan. 25 Junima taxtokni iclalhixakʼalatau ju ispʼumispʼatʼit ju stavasalanti. Para jantu lai xaquilamachakxaniyau. Para cachinaʼ ju avilhchan acsni jantuch aclalhixakʼalayau ju va apʼumispʼayaʼitʼit ju stavasalanti. Ju acsnich lana vas aclajunau ixlacata ju quimpai. 26 Ju acsni avilhchan asqʼuinaʼitʼit ju laquintapakaʼut chai jantu iclajunau ni quitʼinch ju actapaininiyaʼ ju quimpai ju milacataʼan. 27 Jantu tasqʼuini ni chun aclalh ni isʼakstu ju quimpai ju tamapainiyan va ixlacaʼatalh ni quilamapainiyauch ju uxijnan chai lacʼaʼitʼatʼitch ni laʼixmacni Dios ju icmintacha. 28 Laʼixmacni quimpai ju xactaxtuyacha. Icminta ju ani lacamunutpaʼ. Aktam acmaconchokopalaʼ ju lacamunutpaʼ chai aclakʼanchokoyach ju quimpai. 29 Ju ixʼamamakaʼui ju Jesús tajunich: ―Ju chavai vasch quilajunau. Jantu va lacatuʼuʼ ju quilapumamachakxaniyau ju stavasalanti. 30 Ju chavai iccʼatsayauch ni mispʼaich tachi chun ju taxtokni. Jantu tasqʼuini ni xamatiʼ casacmin tuʼuʼ ni mispʼakʼoʼui ju quiʼatalacpastʼacʼat quincʼan. Yuchi ju icpulacaʼiyauch ni laʼixmacni Dios ju tʼantʼa. 31 Ajunich ju Jesús: ―Ja lacʼaʼiyatʼitch ju chavai. 32 Cachinach ju avilhchan chai mas chavaich acsni amakpʼitsʼicʼanaʼitʼit. Ju pumatamin caʼanaʼ laʼixlakchakaʼan. Aquilamacoyoyauch. Para jantu va quiʼakstu ju actitamacaulh ni quimpai ju quintʼavi. 33 Chai iclajunauch ju ani taxtokni ni jantu calacʼalh ju miʼalhunutʼan. Jantu catilacʼalh ju miʼalhunutʼan ni quilalhilacaʼanau ju quitʼin. Ju ani lacamunutpaʼ na amakʼalhkʼajnanaʼitʼit. Para jantu atʼalhanantʼit. Ju quitʼin ictaiʼinitach ju ixtachaput ju lhinajun ju ani lacamunutpaʼ.
1 Acsni nonkʼolhch ju Jesús ju ani taxtokni pus lacaʼalh ju lactʼiyan chai naulh: ―Quimpai chilhch ju quiʼavilhchan. Amalacʼasuninch ju lapanacni ni icxakʼaich ju quitʼin ni mintsʼalh. Ju chunch laich vachuʼ acʼamalacasuniyach ju lapanacni ni xakʼaichʼat ju uxintʼi. 2 Chai uxintʼi ju qʼuixtʼaknitʼa ju quimpuxaʼucxtin ni laich acʼalhijunaʼ tachi chun ju lapanacni. Ju chunch lai acʼaxtakniyaʼ ju isʼatsucuntiʼan jonkʼalhita tachi chun ju qʼuimakʼaxtʼaknitʼach ju uxintʼi. 3 Caʼalinach ju isʼatsucuntiʼan jonkʼalhita acsni catalhilaksiyanch ni va uxintʼi ju istavasalanti Diosʼat. Chai aquintalhilaksiyach ju quitʼin ni icJesucristo chai ni uxintʼi ju xaqʼuimalakʼachʼayachitʼa. 4 Ju quitʼin icʼamalacasunilhch ju lapanacni ni xakʼaichʼat. Icnavikʼolhch ju lhichʼalhcat ju xaqʼuilhiʼunich ixnavica. 5 Pus ju chavai ji quimpai aqʼuixtʼaknichʼokʼoch ju quimpuxakʼai ju lamimacni tachi ju xacjunita acsni vanincaʼ xactʼavilhchan. Acsni tucaʼ ixʼalin ju lacamunutpaʼ. 6 Uxintʼi ju saʼasacxtʼui ju ani tavilanalh lapanacni ju quintatʼaʼalhtanan. Asacxtʼuch laʼixlhiyuʼunch ju jantucaʼ quintalhilaksi chai qʼuiʼamakʼaxtʼaknitʼach. Pus ju quitʼin icʼamamachakxanilh ta yu unitʼa. Ju yuʼunch miʼanuʼ ixtajunita chai qʼuiʼamakʼaxtʼaknitʼa. Chai ju yuʼunch tamuctaxtulh ju ixlhinaʼuntʼa ixnavica. 7 Ju chavai tamispaich ni sich miʼanuʼ junita tachi chun ju taxtokni ju xaqʼuixtʼakni. 8 Ju tuchʼi xaqʼuiʼunich icʼajunilh ju yuʼunch. Chai taʼamaklhtayanalh. Talacaʼilhch ni vasalh lamimacni ju ictaxtuta. Chai talacaʼitach ni uxintʼi ju xaqʼuimalakʼachʼayachitʼa. 9 Iclhitapaininiyan ji quimpai ju ixlacataʼan ju yuʼunch. Jantiyuʼ ji quimpai ju iclhitapaininiyan ju ixlacataʼan ju aliʼin lapanacni ju jantu quintalhilacaʼan. Para va yuʼunch ju iclhitapaininiyan ju ani tavilanalh ju xaqʼuiʼaxtʼaknich ni miʼanuʼ tajunita vachuʼ. 10 Tachi chun ju quilapanacni sich miʼanuʼ. Chai ju milapanacni sich quiʼanuʼ. Chai laʼisʼatsucuntiʼan ju yuʼunch putasui ni icxakʼai. 11 Ju quitʼin va lacatsʼunin cʼacx tus actaxtuyach ju ani lacamunutpaʼ. Aclakʼanchokoyan ji quimpai ju na salakaʼat. Para ju yuʼunch catitatsucuyaʼ ju ani lacamunutpaʼ. Pus alhistʼactʼich ji quimpai ju yuʼunch ju xaqʼuixtʼakni ni na tachapunʼat ju uxintʼi. Alhistʼactʼich ni va lakatamch catava tachi ju quijnanchʼan ni va lakatamch juntau. 12 Acsni xacʼalactʼavilhcaʼ ju yuʼunch ju ani lacamunutpaʼ pus quitʼin ju xacʼalhistʼacʼa lamintachaput. Yuʼunch ju xaqʼuiʼaxtʼakni quitʼin ju xacʼalhistʼacʼa. Jantu xamatiʼ xatsʼankʼai sia yuʼunch. Va yuchi ju anuʼ lapanac ju aktsʼiya ixlhilhcaʼulacanta ni catsʼankʼayach. Yuchi ju xatsʼankʼakʼalhich. Va puʼuctaxtulh tachi ju tsʼokcantach. 13 Pus ju chavai ji quimpai iclakmintan ju uxintʼi. Icnajun ju ani chivinti acsni icvilhcaʼ ju ani lacamunutpaʼ. Ju chunch ju quilapanacni catakʼasmatʼaʼ ju tuchi ictapaininiyan ju ixlacataʼan chai slivasalh capuʼalinaʼ ju ixkʼachatʼan laʼixʼalhunutʼan tachi ju ickʼachanch ju quitʼin. 14 Ju quitʼin icʼajunita ju minchivinti ju quilapanacni. Chai ju ixtʼalapanacniʼan ju ani lacamunutpaʼ talhixcailh ju quilapanacni ni jantu amachakʼan lacamunutpaʼ tajunita ju chavai. Tachi ju quitʼin ni vachuʼ jantu icʼamachakaʼ ju ani lacamunutpaʼ. 15 Jantu iclhitapaininiyan ni va amakʼosutʼi ju ani lacamunutpaʼ ju quilapanacni. Va iclhitapaininiyan ni alhistʼacʼaʼ ni jantuch caʼokxchokʼoyaʼ ju ixnavini macxcai. 16 Ju yuʼunch jantu amachakʼan lacamunutpaʼ tajunita ju chavai. Tachi ju quitʼin ni vachuʼ jantu icʼamachakaʼ ju ani lacamunutpaʼ. 17 Ju minchivinti stavasalanti. Pus salaka anavitʼi ju yuʼunch acsni catalhitamakaʼuyaʼ ju minchivinti. 18 Tachi ju uxintʼi ni qʼuimalakʼachʼachitʼa ni acmilh nonaʼ ju minchivinti ju ani lacamunutpaʼ pus vachuʼ ju quitʼin icʼamalakachalh ju ani quilapanacni ni cataʼalh nonin ju minchivinti ju ani lacamunutpaʼ. 19 Chai ixlacaʼatalhʼan yuʼunch ju icpumakʼaxtakchokocan quiʼakstu. Ju chunch vachuch ju yuʼunch aquintamakʼaxtakniyach ju isʼatsucuntiʼan ni tamispai ju minchivinti. Chai yuchach ju stavasalanti. 20 Jantu iclhitapaininiyan ju va ixlacaʼatalhʼan ju aktsʼiya quilapanacnich. Para vachuʼ iclhitapaininiyan ixlacataʼan ju catalacaʼiyach ixchivintiʼan ju quilacata. 21 Ictapaininiyan ni va lakatamch catava ixchuxʼan. Tachi ju uxintʼi chai ju quitʼin ni va lakatam Dios juntau ji quimpai. Pus vachuʼ chunch ju yuʼunch va lakatamch aquintatʼajunan ju laquimacniʼan. Chai ju lapanacni ju jantu quintalhilacaʼan acsni catalaktsʼinaʼ ni va lakatam junkʼotauch pus catalacaʼiyach ni uxintʼich ju qʼuimalakʼachʼatʼachitʼa. 22 Ju quitʼin icʼalakʼayata ju yuʼunch tachi ju uxintʼi ni qʼuilakʼayatʼa. Chai ni vaklhtam chun alakʼayacanta pus va lakatamch catajunaʼ ju yuʼunch tachi ju quijnanʼan ni va lakatamch juntau. 23 Ju quitʼin laʼixʼalhunutʼan ju yuʼunch actsucuyaʼ. Chai ju uxintʼi ni va lakatam qʼuintʼaʼunitʼa pus va lakatamch cajunkʼoyauch. Chai ju lapanacni ju jantu quintalhilacaʼan acsni catalaktsʼinaʼ ni va lakatamch jonkʼotauch pus catalacaʼiyaʼ ni uxintʼi ju xaqʼuimalakʼachʼayachitʼa. Chai chunch ju catapucʼatsayach ni amapʼainitʼach ju quilapanacni tachi ju qʼuimapʼaini ju quitʼin. 24 Quimpai ju yuʼunch ju quiʼaxtʼaknitʼa iclacasqʼuinch ni vachuch anch catatsucuyanta junta actsucuyaʼ ju quitʼin. Ju chunch ni laich catalaktsʼinaʼ ju quimpuxakʼaich ju xaqʼuixtʼaknich. Tus acsni maticaʼ ixjunita ju lacamunutpaʼ xaqʼuixtʼaknitʼach ju quimpuxakʼai ni na qʼuimapʼaini. 25 Ji quimpai soknicʼa ju navi ju uxintʼi. Ju lapanacni ju jantu quintalhilacaʼanta jantu tamispayan. Para ju quitʼin icmispayan. Chai ju quilapanacni tamispaich ni uxintʼi ju xaqʼuimalakʼachʼayachitʼa. 26 Icʼamamispanilhch ta yu unitʼa. Chai acʼamamispanichokoyach ni iclacasqʼuin ni catalamapaini tachi ju uxintʼi ni qʼuimapʼainich ju quitʼin. Chai ju quitʼin actsucuyach laʼixʼalhunutʼan ju quilapanacni.
1 Ju Jesús acsni nonkʼo ju ani chivinti alactʼataxtulh ju ixʼamamakaʼui. Alactʼaʼalh ju lhimakʼantacutni ju xaxkʼati Cedrón junta ixchʼancan xaqʼuiu ju olivo. Anch ju alactʼatanuchalhch ju Jesús ju ixʼamamakaʼui. 2 Chai vachuʼ ju anuʼ lapanac ju Judas ixjuncan ismispaich ju anuʼ puʼolivos. Yuchi ju Judas ju camakʼaxtʼakʼach ju ixʼucxtin. Pus ni na paklhu ju ixʼalactʼaquilata ju anch ju Jesús ju ixʼamamakaʼui pus yuchi ixlhimispaich ju Judas ju anuʼ puʼolivos. 3 Judas ju apʼulhnilh ju ixtaropajni ju kʼai ucxtin chai ixtaropajni ju xalackʼajinch palijnich chai ju fariseonin. Pus ju yuʼunch ixtalhiʼanta ixlacmaclhcuʼan chai ixkʼaʼichiʼan chai ixmachitaʼan. 4 Ju Jesús ni iscʼatsakʼojuich tachi chun ju taxtokni ju catapasayach laʼisʼatsucunti pus va kʼoxiya quiʼapakxtoklh. Ajunich: ―Tis chavaich ju pʼuxcʼoyatʼit. 5 Chai tajunich: ―Yuchi icpuxcoyau ju Jesús ju amachakaʼ Nazaret. Chai ju Jesús ajunich: ―Pus quitʼinch ju quilapuxcoyau. Ju Judas ju xaʼamakʼaxtaknaʼ ixʼalactʼamintach. 6 Chai acsni naulh ju Jesús ni yuchach pus lana tin tapuʼalh ixpulacanʼan chai lana tatamakʼocha. 7 Aktam asacmichokopa ju Jesús. Ajunich: ―Tis chavaich ju pʼuxcʼoyatʼit. Tanonchokopa ju taropajni: ―Yuchi ju Jesús amachakaʼ Nazaret. 8 Chai aktam ajunchokopa ju Jesús: ―Ni iclajumpalauch ni quitʼinch. Pus ni quitʼinch ju quilapuxcoyau pus chach taʼancha ju ani tayanalh. 9 Chunch ju puʼuctaxtulh ju chivinti ju ixnajunta ju Jesús acsni chani naulh: “Ju yuʼunch ju qʼuixtʼaknitʼach jantu xamatiʼ icmakʼatsʼankʼata”. 10 Ju acsnich ju Simón Pitaluʼ ni ixchʼapata ju ixmachita pus lana xakʼaxtulh laxaʼaxtʼakʼan. Lana catuchakxlh ju ixlapanac ju xakʼai pali. Pʼuxnilh ju ixʼakʼaxkʼolh laʼixcatucana. Chai ju yuchi ixlapanac ixjunita ju xakʼai pali ju Malco ixjuncan. 11 Ju acsnich ju Jesús junilhch ju Pitaluʼ: ―Amakʼachʼokʼoch ju mimachita laxaʼaxtʼakʼan. Ju anuʼ na tsʼinqʼui makʼalhkʼajnat ju quilhilhcatach ju quimpai ja va naʼun ni jantu acmuctaxtuyaʼ. 12 Ju acsnich ju taropajni chai ju xacomandante chai ju xataropajnich ju israelitanin lana tachʼapalh ju Jesús. Tachʼin tanavi. 13 Pʼulhnan talhiʼanilh laʼixpuʼucxtin ju Anás. Ju yuchi ixputʼijokʼat ixjunita ju Caifás. Yuchi ju xakʼai pali ixjunita ju acsni cʼata. 14 Ju ixjuncan Caifás yuchi ju ixʼamapʼaksi ju istʼaʼisraelitanin. Ixʼajunich ni aktsʼiya istasqʼuini ni canilh pumatam jokʼat ixlacataʼan ju lapanacni. 15 Ju Simón Pitaluʼ chai ju apumatamch ixtʼatamakaʼun yuʼunchach ju ixtachʼakʼokʼata ju Jesús acsni lhiʼancalh tachʼin. Chai ju xakʼai pali na ixtʼalamispaich ju anuʼ pumatam chai yuchi lhitʼamapasacalh ju Jesús ju yuchi laʼixpulacni junta ixlakachakʼaxnucanta ju ixchakaʼ ju xakʼai pali. 16 Para ju Pitaluʼ va makspaʼ taya laxamalhtich. Pus taxtuchilh ju anuʼ ixtʼatamamakaʼun. Ju yuchi ni na ixtʼalamispaich ju xakʼai pali pus tapaininilh ju anuʼ atsiʼ ju ixlhistacnaʼ ju malhtich. Chai acsnicaʼ ju tanulh ju Pitaluʼ. 17 Ju acsnich ju anuʼ atsiʼ ju ixlhistacnaʼ ju malhtich junich ju Pitaluʼ: ―Ju uxintʼi ja jantu vachuʼ ixlapanacʼat ju anuʼ jokʼat. Pus ju Pitaluʼ naulh ni jantu. 18 Chai ixtayanalh ju xalapanacnich anch chai ju ixtaropajni ju xalackʼajin palijni. Chai ixtamalhculata ni na lhicʼasnin ixjunita. Va ixtalacskʼonvilanalh. Chai ju Pitaluʼ vachuch anch maktaya ni va iskʼomputunch. 19 Ju xakʼai pali sacmilh ju Jesús ixlacata ju ixʼamamakaʼui chai tuchi ju ixʼalhimalanich ju lapanacni. 20 Ju Jesús akʼalhtayanalh: ―Ju quitʼin xacchivinin laʼixʼucxlacapuʼan ju ixtalhavat lapanacni. Chai lamilacpujitatʼan chai lacakʼai mimpujitatʼan xacʼamalani ju ixchivinti Dios junta aktsʼiya ixtatakʼaixtʼokʼach ju quintʼaʼisraelitaninʼan. Jantu tuʼuʼ ju va sek xacnajun. 21 Tajuch ni va qʼuisacmipʼalai. Asacmitʼich ju lapanacni ju takʼasmatʼach ju tuchi xacʼajunich. Ju yuʼunch tacʼatsaich tuchi ju xacʼajunich. 22 Acsni naulh ju chunch ju Jesús pus ju pumatam taropa ju ixmakyalh anch lanach paknisalh ju Jesús. Junich: ―Ja chunchach ju alhikʼalhtʼayaʼ ju xakʼai pali. 23 Chai akʼalhtayanalh ju Jesús: ―Ni jantu sok ju xacnajun pus anauch tas anchach ju jantu soknicʼa. Para ni soknicʼa ju xacnajun tʼas ni va xaqʼuiʼulanich. 24 Ju acsnich ju Anás tachʼin malakachachokopa ju Jesús junta ixvilhcha ju Caifás ju xakʼai pali. 25 Pus ju Simón Pitaluʼ anch ixyakʼalhi junta ixtʼajun skʼonuʼ. Tajunich: ―Ja jantu vachuʼ uxintʼi ju ixtamamakaʼunʼat ju anuʼ lapanac. Para ju Pitaluʼ naulh ni jantu. 26 Chai ju pumatam ixlapanac ju xakʼai pali ixlhilakʼau ixjunita ju anuch ju catuchakxpʼuxlh ju Pitaluʼ. Yuchach ju sacmichokopa ju Pitaluʼ. Junich: ―Ja jantu iclaktsʼinchan ju lacapuʼolivos junta ixvilhcha ju anuʼ lapanac. 27 Pus ju Pitaluʼ aktam nonchokopa ni jantu mispai. Chai lanach tʼasalh ju puyux. 28 Chai lana maxtucalh ju Jesús ju laʼixchakaʼ ju Caifás. Talhiʼalhch laʼixpuʼucxtin ju xagobernador Roma. Vatsʼisincaʼ ixjunita. Para ju israelitanin jantu tatanulh ju lacapuʼucxtin ni jantu ixlhijun ju laʼixlhamapʼaksinʼan ni lai catatanu ni jantu ixlakʼoxicanta ju anuʼ puʼucxtin. Ni jantu catatanuyaʼ ju lacapuʼucxtin pus laich catalhicʼataniyaʼ ju ixborregoʼan ni catuncunchokoyaʼ chai laich cataʼuyach. 29 Pus ju gobernador Pilato acsni taxtuchilh ju laʼixpuʼucxtin ajunich ju lapanacni: ―Tijuch ju lhichʼivimakʼanatʼit ju ani ya jokʼat. 30 Chai taʼakʼalhtayanalh ju lapanacni. Tanajunch: ―Ni jantu cava alin ixtalakʼalhin pus jantu cava xaclamakʼaxtakniu. 31 Pus ju Pilato chanich ajunich acsni akʼalhtailh ju lapanacni: ―Alaich alhipʼinchitʼit miʼakstuʼan. Alaktsʼintʼitch ta yu najunch lamilhamapʼaksinʼan. Para ju israelitanin tanaulh: ―Jantu lhijun ju lhamapʼaksin ni acmakniu tam xamatiʼ ju quijnan ju israelitanin icjuntau. 32 Acsni naulh ju chunch pus uctaxtulh ju tuchi ixnajuntach ju Jesús ixlacata tuchi anintich ju capuniyaʼ. 33 Ju acsnich ju gobernador Pilato tanuchokopa ju laʼixpuʼucxtin. Tʼasanilh ju Jesús. Junich: ―Ja uxintʼich ju xaʼucxtinʼat ju israelitanin. 34 Ju acsnich ju Jesús kʼalhtailh. Junilh ju Pilato: ―Ja va miʼakstu xapʼastʼacʼa ju ani xaqʼuiʼuni u va xamatiʼ juntan. 35 Ju Pilato lhikʼalhtailh: ―Ja icʼisraelita ni laich acnaulh ni xakʼaichʼat. Yuʼunch ju mintʼaʼamachakʼan chai ju xalackʼajin palijni ju xatamakʼaxtʼakʼan ju laquimacni. Tijuch ju xaʼanavini. 36 Akʼalhtayanalh ju Jesús: ―Ju quimpuʼucxtin jantu xanavin ju ani lacamunutpaʼ. Ni ani lacamunutpaʼ cava ju quimpuʼucxtin pus caʼixtalasa ju quilapanacni. Ju chunch jantu lai caʼixquintitachʼapalh ju quintʼaʼisraelitanin. Para jantu ani ju quimpuʼucxtin. 37 Ju acsnich ju Pilato junich: ―Ja vasalhʼas ni ucxtinʼat. Chai akʼalhtayanalh ju Jesús: ―Vas ju naʼun ni icʼucxtin. Yuchi xaclhilakʼajunch ju ani lacamunutpaʼ. Chai iclhimilhch ju ani lacamunutpaʼ ni laich acʼajunaʼ ju lapanacni ju stavasalanti. Tachi chun ju takʼachani ju stavasalanti takʼasmatʼa ju quinchivinti. 38 Chai ju Pilato asacmininch: ―Tijuch ju stavasalanti. ―Juncanch ju Jesús. Acsni naulh ju ani pus alakʼanchokopa ju israelitanin ju gobernador Pilato. Ajunich ju yuʼunch: ―Jantu tuʼuʼ iclhitajuni ixtalakʼalhin ju ani lapanac. 39 Pus aquilajuniuch tichi tachʼinch ju aclhinonaʼ ixmaxtuca ju lacapulachʼin tachi ju aktsʼiya lhilanitʼatʼit acsni uyatʼit ju mimborregoʼan tachi ju chavaich cʼatan. Ja lacʼasqʼuinatʼit ni yuchi ju acmaxtulh ju miʼucxtinʼan ju uxijnan ji israelitanin. 40 Ju acsnich ixchuxʼan pʼas talacchivinchokopa. Tajunich ju kʼai ucxtin: ―Jantiyuʼ ju iclacasqʼuinau. Yuchi ju calacamaconcanaʼ ju Barrabás. Pus ju Barrabás va akʼalhonaʼ ixjunita.
1 Ju acsnich ju gobernador Pilato lana lhinaulh ixmaxtuca ju Jesús chai lhinaulh ixlakanekmaca. 2 Ju ixtaropajni ju gobernador tanavinilh ixcorona ju Jesús si alhtucunuʼ. Chai tamalacpatanulhch. Chai tamalakchʼinilhch smumu pumpuʼ tachi ixtalakchʼi ju xalackʼajin ucxtinin. 3 Lacatsʼiʼit ixtajunich ju Jesús: ―Atsʼucʼukʼalhitʼi ji xaʼucxtin israelitanin. Chai slivasalh ixtalacasamai. 4 Ju acsnich ju gobernador Pilato taxtuchokopa ju makspaʼ. Ajunich ju lapanacni: ―Anich iclalhiminitau ni laich apʼucʼatsʼayaʼitʼit ni jantu tuʼuʼ talakʼalhin xaclhitajuni ju ani ya lapanac. 5 Pus ju Jesús lana taxtulh ju makspaʼ. Ixlacpatanunch ju ixcorona ju si alhtucunuʼ. Chai ixlakchʼitach ju smumu pumpuʼ. Chai ju gobernador Pilato ajunich: ―Alaktsʼintʼitch ju ani ya lapanac. 6 Acsni talaktsʼilh ju xalackʼajin palijni chai ju ixtaropajni pus pʼas talacnaulh: ―Amaqʼuilhtʼatʼich ju lacacurus ju anuʼ lapanac. Para ju Pilato ajuni: ―Alai uxijnan alhipʼinchitʼitch. Amaqʼuilhtʼachitʼitch uxijnan. Ju quitʼin jantu tuʼuʼ xaclhitajuni ju ixtalakʼalhin. 7 Chai taʼakʼalhtayanalh ju israelitanin: ―Ju quijnan alin ju quilhamapʼaksin quincʼan. Chai ju laquilhamapʼaksin quincʼan najun ni tasqʼuini ni canilh ju ani ya ni va ixnajun ni istsʼalh Dios junita. 8 Pus ju Pilato acsni kʼasmatlh ju ani chivinti palai na talhanalh. 9 Tanuchokopa aktam ju laʼixpuʼucxtin chai sacmichokopa ju Jesús ni ixtanumachokolhch ju yuchi: ―Tʼas anchach ju xatʼanachiʼ. Para ju Jesús jantu tuʼuʼ lhakʼalhtayanalh. 10 Ju acsnich ju gobernador Pilato junich: ―Ja jantu tuʼuʼ aqʼuinlhikʼalhtʼayaʼ. Ja jantu cʼatsʼai ni alin ju quintachaput ni lai aclhinaulh ju mimaquilhtaca ju lacacurus. Chai alin ju quintachaput ni laich acmakʼalhtaxtun. 11 Chai akʼalhtayanalh ju Jesús: ―Jantu lai tuʼuʼ xaqʼuintʼinavitʼi ni jantu cava Dios ju xalakʼaʼi ni aqʼuimamakʼalhkʼajniyaʼich. Chai ju quitʼin yuchi iclhijunan ni palai kʼai talakʼalhin ju lhiʼan ju xaquimakʼaxtʼakʼa ju lamimacni. Palai jantu ju uxintʼi. 12 Pus ju acsnich ixnajunch ju gobernador Pilato ni lai caʼixmakʼalhtaxtulh ju Jesús. Para ju israelitanin pʼas ixtajuni ju Pilato: ―Ni amakʼalhtʼaxtʼuyaʼ ju ani ya lapanac pus jantu ixʼamigoʼat ju César ju xakʼai tucan lamilhiʼuxijnan ju romanonin untʼatʼit. Ju va kʼaya kʼostayai chai cajumputulh kʼai ucxtin chux ju lacatʼun pus ixtʼalaxcaich junita ju César. 13 Chai ju gobernador Pilato acsni kʼasmatlh junima chivinti pus maxtuchokopa makspaʼ ju Jesús. Tavi lacapuʼucxtin junta ixmamacanta cemento. Lacalhihebreo ju anch ixjuncan Gabata. 14 Pus ju ixlhicutanch ixtapasata ju ixlaccʼatanitʼan ju israelitanin acsni taʼulh ju ixborregoʼan. Chai acsni tuncunchokolh acsnich ju makʼosaspitlh ju Jesús ju Pilato. Chai ju israelitanin vachuʼ acsnich ju ixtalakasilakʼoxiʼulai ju ixvaitiʼan ni paʼastacni cajunaʼ ni catuncunchokoyaʼ. Pus vatsʼisin tsucucalh makʼosaspitca ju Jesús. Chai ju Pilato chani ajuni ju israelitanin: ―Alaktsʼintʼitch ju xakʼai miʼucxtinʼan. 15 Para ju yuʼunch pʼas tanaulh: ―Amakʼosutʼich. Amaqʼuilhtʼatʼich ju lacacurus. Chai ju Pilato ajunich ju lapanacni: ―Ja acmaquilhtayaʼ ju miʼucxtinʼan ju lacacurus. Taʼakʼalhtayanalh ju xalackʼajin palijni: ―Matiʼ apumatam quiʼucxtin quincʼan. Va yuchi ju César. 16 Pus ju Pilato acsnich ju makʼaxtaklh ju Jesús laʼixmacaʼan ju lapanacni ni catamaknilh ju Jesús. Taʼamaklhtayanalh ju Jesús. Talhiʼalhch. 17 Chai tamakxkʼokʼalh ju iscurus ju Jesús. Talhiʼalhch junta ixjuncan Aktsulh. Ju lacalhihebreo ixjuncan Gólgota. 18 Anchach ju tamaquilhtachalhch ju Jesús chai ju aliʼinch ixtʼiyunʼan. Ju pumatam laʼixlhicana ju maquilhtacalh laʼiscurus chai ju apumatam laʼixlhimacx ju maquilhtacalh ju laʼiscurus. Chai ju Jesús tamaquilhta laʼixlacaitati. 19 Ju gobernador Pilato tsʼoklh lakatam chivinti. Lhinaulh ixmucʼanica laʼisʼaktsulh ju iscurus ju Jesús. Ju anuʼ atsʼoknut ixnajun: “Yuchi ju Jesús amachakaʼ Nazaret. Yuchi ju kʼai ixʼucxtinʼan ju israelitanin”. 20 Na lhu israelitanin ju ixtalaktsʼin junima chivinti ni vanin ixvi ju lakʼachakʼan junta ixquilhtai ju Jesús. Ju anuʼ chivinti istsʼokcanta lacalhihebreo chai lacalhigriego chai lacalhilatin. 21 Ju xalackʼajin ixpalijni ju israelitanin tajunich ju gobernador Pilato: ―Jantu atsʼoktʼi ni yuchi ju ixʼucxtinʼan ju israelitanin. Palai kʼox ni canaulh: “Ju ani ya ixnajun ni xaʼucxtin israelitanin ixjunita”. 22 Chai akʼalhtayanalh ju Pilato. Ajunich: ―Ju tuchi xacʼatsʼoknun yuchach. 23 Ju taropajni acsni tamaquilhta ju laʼiscurus ju Jesús tasacnilh ju ixlacpumpuʼ ju Jesús junta ixmamanicanta. Chai ni lakatʼatʼi ixjunita ju ixpumpuʼ pus lakatamin talhiʼalh ju pumatamin taropajni. Chai vachuʼ ixʼalin lakatam ju ixpumpuʼ ju Jesús ju jantu isputsʼapancanta. Lana va chunch ixlhinavicanta. Tachi ju va ixmakʼanchʼich. 24 Chai talaclajunich ju sia yuʼunch ju anuch taropajni: ―Jantu catipukʼexvi ju ani pumpuʼ. Alai va calhilaslajvi. Catasuyach tichi chavaich ixʼanuch cajunaʼ. Ni chunch ju tanaulh pus uctaxtulh ju atsʼoknut junta chani najun: “Pumatamin lhiʼalh ju quimpumpuʼ. Chai ju lakatam quimpumpuʼ talhilaslajlh”. Pus chunchach talalh ju taropajni. 25 Ju ixnatich ju Jesús chai ju ixlakʼauch ju ixnati ju ixtalakasilakʼoxiʼulai ju ixvaitiʼan ni paʼastacni cajunaʼ ni Cleofas chai ju Malia amachakaʼ Magdala vanin ixtayanalh junta ixmucʼacanta laʼiscurus ju Jesús. 26 Ju Jesús acsni laktsʼilh ju ixnati chai ju ixtamamakaʼun ju na ixmapaini ni vanin ixtayanalh pus junich ju ixnati: ―Quinati yuchach ju ani ju mintsʼalh ju chavai. 27 Astan junich ju ixtamamakaʼun: ―Yuchach ju ani ju minati ju chavai. Pus tus acsni avilhchan ju anuʼ ixtamamakaʼun ju Jesús malhistacnilh ju ixnati ju Jesús. 28 Chai acsnich ju cʼatsalhch ju Jesús ni ixnavikʼota tachi chun ju lhichʼalhcat ju ilhcanita ju ixpai pus naulh: ―Na icquicxixtach. Chunchach ju naulh ni capuʼuctaxtulhch ju atsʼoknut. 29 Pus ju taropajni ixtaʼulata tam xalu ju tuʼuʼ tachi ju axvicnit. Pus ju acsnich lana tacatanchʼimucalh laʼixquincatiʼ achʼitin ju hisopo juncan ju tuʼuʼ tachi pʼulhulh panimac. Chai tamalaktanunilh ju axvicnit. Chai talhiʼanilh laʼixquilhni ju Jesús. 30 Ju Jesús acsni quilhcʼatsalhch ju anuʼ tachi axvicnit naulh: ―Uctaxtukʼolh ju chavai. Lana lilek navilh ju isʼaktsulh chai acsnich ju nilh. 31 Ju acsnich ixlakasiʼulacan ju ixtaxtokniʼan ju israelitanin ixlacata ju avilhchan paʼastacni. Pus ju yuʼunch jantu talacasqʼuilh ni va catamakatunculh ju lacacurus ju ixpumatʼutuʼan ni paʼastacni cajunaʼ ni catuncunaʼ. Chai ju anuʼ avilhchan paʼastacni kʼai cʼatan cajunaʼ. Pus talhitapaininilh ju gobernador Pilato ni calaktekʼenicalh ju ixchʼajaʼan ju anuʼ ixpumatʼutuʼan lapanacni ju ixtaquilhtananch ju lacacurus. Ju chunch lai palai vatsʼalhti kʼox cataniyaʼ chai ni lai caʼapʼuxcalh. 32 Pus ju taropajni acsni tachaʼalh junta taquilhtananch ju anuʼ lapanacni pus pʼulhnan tatekʼenilh ju ixchʼajaʼ ju pumatam. Vana chunch tanavipa ju apumatam ju anuʼ ju ixʼatʼamaquilhtacanta ju Jesús. 33 Para acsni talakʼalh ju Jesús junta ixquilhtai talaktsʼilh ni ixnitach ju yuchi. Pus jantu tachʼantekʼelh ju yuchi. 34 Para ju pumatam taropa lana lhtokʼonilh laʼixpakʼaxtiʼ ju Jesús laʼislansa. Pus lana taxtunilh ju ixʼacʼalhni. Va lhiya ju xcan. 35 Pus ju quitʼin iclaktsʼilhch chai quitʼin icnajun tuchi tapasalhch. Chai ju tuchi icnajun stavasalanti. Chai ju quitʼin kʼoxich iccʼatsai. Chai iclajunau ju stavasalanti ni lai apʼulacʼaʼiyaʼitʼit vachuʼ ju uxijnan. 36 Junima taxtokni chunchach ju navicalh ni chunchach ju capuʼuctaxtuyaʼ ju atsʼoknut junta chani najun: “Ju yuchi jantu catitekʼenicalh ju ixʼalucutni”. 37 Vachuʼ chani najun ju alakatam atsʼoknut: “Catalaktsʼinach ju xatalhtokʼoich”. 38 Pus ju José amachakaʼ Arimatea ixtamamakaʼun ixjunita ju Jesús. Para va jantu ixlacasqʼuin ni cacʼatsacalh ni va ixʼatalhoni ju xalackʼajin istʼaʼisraelitanin. Para acsni tapasakʼolhch ju ani taxtokni pus ju yuchi alh tapainininiʼ ju gobernador Pilato ni laich capʼuxlh ju ixlacatuna ju lijunto Jesús. Chai ju Pilato lacasqʼuinilh. Chai ju José lana alh pʼuxnuʼ ju ixlacatuna ju lijunto Jesús. 39 Chai vachuʼ makachʼakʼokʼanalh ju Nicodemo. Yuchi ju quitʼachivinilh tsʼis ju Jesús. Ixlhiʼantach ju pokxni ju na cʼus ixʼacamin. Ixlhinavicanta ju xaqʼuiu mira chai ixlhiya ixkʼalhchat ju xaqʼuiu aloes. Tachi lakapʼuxamcau kilo istatsʼinqʼuita. 40 Pus tapʼuxlich ixlacatuna ju lijunto Jesús. Chai acsni ixtatʼajun lakapachʼinin ju lacalhman pumpuʼ pus ixtalacamucʼaʼantach ju anuʼ alakʼoxinti pokxni ni chunchach ju ixtalhilanitach ju israelitanin acsni ixtalamacnuich. 41 Junta ixmaquilhtacantach ju Jesús ixʼalin lakatam puʼolivos. Chai ju anch lacapuʼolivos ixʼalin junta va lhucucu ixjunita lactalhpa. Ju anch jantucaʼ tavanan ixmamacanta ixlacatuna xamatiʼ. 42 Pus anch ju makʼacalh ixlacatuna ju lijunto Jesús ni vanin ixvi ju anuʼ junta lhucucu lactalhpa ixjunita. Va istasokʼoi ni ixchimputun ju hora acsni jantu lai ixtachʼalhcatnan ju israelitanin ni paʼastacni cajunaʼ.
1 Pus ju lacalhitumincu ju Malia amachakaʼ Magdala taxtulh ju lakʼachakʼan. Na vatsʼisin ixjunita. Istsʼistacaʼ lacatsʼunin acsni chaʼalh junta ixmamacanta ixlacatuna ju lijunto Jesús. Pus laktsʼilh ju chiux ni ixmakʼosucantach. 2 Pus ju yuchi lana atsʼalaminchokolh lakʼachakʼan. Quilaktsʼilh ju Simón Pitaluʼ chai ju akʼantam ixtamamakaʼun ju Jesús ju na ixmapaini. Chai ajunich: ―Makʼosucantach ju ixlacatuna ju lijunto quiʼucxtinʼan junta ixmakʼacanta. Jantu iccʼatsayau ta anchach ju xalhiʼancan. 3 Chai lana tʼataxtulhch ju Pitaluʼ ju ixtʼatamakaʼun. Taʼalh laktsʼinin junta ixmakʼacanta ju ixlacatuna ju lijunto Jesús. 4 Chai lana pʼas ixtaʼatsʼalaʼanta. Para ju anuʼ pumatam ixtamamakaʼun ju Jesús palai vatsʼalhti chaʼalh. Astan chaʼalh ju Pitaluʼ. 5 Pus ju pʼulhnan chaʼalh ni lhan tantama talacnu pus va yuchi ju laktsʼilhch ju ixpulakapachʼicanta ju Jesús ni va yuchi ju ixma. Para ju yuchi jantu tanulh. 6 Chai chinchalh chavai ju Simón Pitaluʼ ni yuchi ju ixtʼalataimatach ju pʼulhnan chaʼalh. Pus ju yuchi lana tanu junta ixmamacanta ju ixlacatuna ju lijunto Jesús. Vana va yuʼ ju laktsʼimpa ju ixpulakapachʼicanta ju Jesús ni va yuchi ju ixma. 7 Vachuʼ laktsʼilh ju pumpuʼ ju ixpulakapachʼinicanta isʼaktsulh ju Jesús. Ju yuchi jantu vanin ixtʼama ju lhman pumpuʼ. Lacatam ixpachʼiʼulacanta. 8 Acsnicaʼ ju tanulh ju anuʼ pumatam ixtamamakaʼun ju Jesús ju pʼulhnan ixchaʼanta. Chai acsni laktsʼilhch ju yuchi pus lana lacaʼi ni vasalh ixlokʼonchokota ju Jesús. 9 Va jantucaʼ kʼox ixtamachakxai ju atsʼoknut junta najunch ni tasqʼuini ni cataʼacxtuchokoyaʼ ju Jesús junta ixmakʼacanta ixlacatuna. 10 Ju acsnich ju ixʼalacmamakaʼui ju Jesús lana taʼanchokolh laʼixlacchakaʼan. 11 Pus ju yuchi ju Malia va makspaʼ ixya. Vanin junta ixmakʼacanta ju ixlacatuna ju lijunto Jesús. Va ixkʼalhuyalhch. Chai acsni ixtʼajun kʼalhunuʼ pus talacnu ju pulacni junta lhucucu lactalhpa. 12 Chai laktsʼilh pumatʼui anquilhnin ju ixtavilanalh. Ixtalakchʼita lacxnapapa ixpumpuʼan. Ju pumatam ixvi junta ixlacpatai ju lijunto Jesús. Chai ju pumatam ixvi junta ixchʼanʼanta ju Jesús. 13 Tajunich ju Malia: ―Chakoʼulh tʼas ni va kʼalhumpʼalai. Ju Malia ajunich acsni akʼalhtailh ju anquilhnin: ―Pus va talhiʼalhch ju lijunto quiʼucxtin chai jantu iccʼatsai ta anchach ju xatalhiʼan. 14 Acsni alactʼachivinkʼolh ju anuch anquilhnin ju Malia pus talakaspʼitlich chai laktsʼilh ni vanin ixya ju Jesús. Para jantu ismispai ni yuchi cava. 15 Ju Jesús junich ju Malia: ―Chakoʼulh tʼas ni va kʼalhumpʼalai. Tis chavaich ju pʼuxcʼaʼui. Pus ju Malia va naulh laʼixʼalhunut ni ca va islhistacnaʼ ju anuʼ puʼolivos. Chai junich: ―Cumpari ni uxintʼi ju xalhipʼin aqʼuiʼunch tas anchach ju xalhichʼipʼin ju ixlacatuna ju lijunto Jesús. Aclhiʼanach. 16 Ju Jesús junich: ―Malia. Pus ju Malia ni talakaspʼitchokolh xakʼala lacalhihebreo chai juni: ―Raboni. Ju chunch nomputunch: “Quiʼamamakaʼunuʼ”. 17 Ju Jesús junich: ―Tun aqʼuilacʼachʼapʼa ni jantucaʼ icʼan laktsʼiniʼ ju quimpai. Para apʼinchich alaktsʼiniʼ ju quilhiʼalakʼavin. Aʼunchich ni acʼanaʼ laktsʼiniʼ ju quimpai chai ju mimpaiʼan Dios. Acʼanaʼ laktsʼiniʼ ju quiDios chaich ju miDiosʼan. 18 Pus lana anchokolh ju lakʼachakʼan ju Malia amachakaʼ Magdala. Chai acsni chaʼalh chani alacjunich ju ixʼalactʼatamakaʼui: ―Iclaktsʼilhch ju quiʼucxtinʼan. Chai yuchi ju xaquijuni ni aclajunau ju ani chivinti. 19 Ju acsnich lhitumincu ixjunita. Chai acsni tokʼoxalhch ju anuʼ avilhchan pus ixtamalacchokʼotach junta ixtatanumanalh ju ixʼamamakaʼui ju Jesús ni va ixtatalhonich ju xalackʼajin istʼaʼisraelitanin. Chai acsni chincha ju Jesús jantu maklhtʼekʼa ju lacamalhtich. Para ni talhicʼatsanalh yalhch laʼixlacaitat junta ixtavilanalhch ju ixʼamamakaʼui. Chai ajunich: ―Jantu calacʼalh ju miʼalhunutʼan ju uxijnan. 20 Acsni naulh ju ani pus alacmalacasunilh ju ixmacaʼ chai laʼixpakʼaxtiʼ junta ixlaccʼatsanich. Chai ju ixʼamamakaʼui na talackʼachalhch acsni talaktsʼinchokolh ju ixʼucxtinʼan Jesús. 21 Aktam ajunchokopa ju Jesús: ―Jantuch calacʼalh ju miʼalhunutʼan. Tachi ni quimalakachachilh ju quimpai pus vachuʼ chunch ju quitʼin iclamalakachayauch ju uxijnan ju laquilhichʼalhcat. 22 Acsni naulh ju chunch pus lana asunulh. Ajunich: ―Amaklhtʼayanantʼitch ju Spiritu Santu. 23 Ni xamatiʼ amacʼacxaniyaʼitʼit ju ixtalakʼalhin pus macʼacxanicantach. Ju jantu amacʼacxaniyaʼitʼit uxijnan pus jonkʼalhitach ju ixtalakʼalhin. 24 Para ju Tumax ju ixjuncan Cuate ju ixlhipumacautʼuich ixjunita jantu ixmakvi acsni quilalh ju Jesús. 25 Ju aliʼin ixtamamakaʼunti ju Jesús tajunich ju Tumax: ―Iclaktsʼiuch ju quiʼucxtinʼan. Para ju yuchi alhikʼalhtailh: ―Ni jantu iclaktsʼini ju laʼixlacmacaʼ junta ixlactanumanilh ju cravos chai ni jantu icmanuni ju quinkʼelilimacaʼ junta ixlactanumanilh ju cravos chai ni jantu laquimacaʼ quiʼakstu ju acchʼapanichokolh junta ilhtokʼonicanta ju laʼixpakʼaxtiʼ pus jantu iclacaʼi. 26 Ju ixlhimixtujunch junchokolh aktam va lakputam ixtavilanampa ju lacachakaʼ ju ixʼamamakaʼuich ju Jesús. Chai ju Tumax ixvilhch vachuʼ anch. Chai ixtamalacchajuta. Chai chinchokopa ju Jesús chai vana va chun navichokopa. Jantu maklhteka ju lacamalhtich. Para ni talhicʼatsanalh yachokopalhch laʼixlacaitat junta ixtavilanalh. Ajunich: ―Jantuch calacʼalh ju miʼalhunutʼan. 27 Chai lanach juncan ju Tumax: ―Amanutʼich ju minkʼelilimacaʼ ju laquilacmacaʼ junta ixtanun ju cravos. Alaktsʼinaʼich. Chai amakpʼitʼich ju lhiʼani. Atʼamacnutʼich ju lhilaquimpakʼaxtiʼ junta iclhtokʼonicanta. Jantu na pʼas anavitʼi ju miʼalhunut. Alacʼaʼitʼi ju tuchʼi uncʼan. 28 Ju acsnich ju Tumax akʼalhtayanalh. Junich ju Jesús: ―Quiʼucxtinʼat chai quiDiosʼat. 29 Ju Jesús junich: ―Ju uxintʼi ji Tumax va acsnicaʼ ju lai lacʼaʼi ni xaqʼuilakʼalaktsʼinch. Para palai takʼachan ju yuʼunch mas jantu quintalakʼalaktsʼinta para talacaʼich. ―Juncanch ju Tumax. 30 Pus slivasalh na lhu ixpulacaʼican navilh ju Jesús laʼixʼucxlacapuʼan ju ixʼamamakaʼui. Para jantu si tsʼokkʼocanta ju ani lacaʼalhiqui. 31 Para ictsʼokʼulata ju ani ni apʼulacʼaʼiyaʼitʼitch ni Jesús yuchi ju Cristo ju ixnoncan camalakachatachilh ju Dios. Chai apʼulacʼaʼiyaʼitʼit ni yuchi istsʼalh Dios junita. Chai caʼalinach ju miʼatsucuntiʼan jonkʼalhita ni alhilacʼapʼinaʼitʼit ju yuchi.
1 Astan acsni atalacasunichokolh ju Jesús ju ixʼamamakaʼui ju laxaʼatantsʼin Tiberias pus chanich lhiʼucxʼalh. 2 Kʼaixtam ixtavilanankʼo ju Simón Pitaluʼ chaich ju Tumax ju ixjuncan Cuate chaich ju Natanael amachakaʼ Caná lhiGalilea chai ixtʼiyunʼan istsʼalan ju Zebedeo chaich ju aliʼin ixtʼiyunʼan ixʼamamakaʼui ju Jesús. 3 Ju Simón ajunich: ―Acʼanaʼ chʼapanaʼ ju pamata. Chai ju aliʼin tanaulhch: ―Aclatʼaʼanau vachuʼ ju quijnan. Pus talatʼaʼankʼo. Tatajulh lacabarco. Para ju anuʼ atatsʼisni jantu tuʼuʼ tachʼapalh. 4 Acsni ixtʼajun tuncuntilanaʼ pus ju Jesús tayacha laʼixquilhtuʼ ju atantsʼin. Para ju ixʼamamakaʼui jantu ixtamispai ni yuchi cava ju Jesús. 5 Ju Jesús ajunich: ―Tsʼalan ja chʼapʼatʼitch lacatsʼunin ju pamata. Taʼakʼalhtayanalh ni matiʼ. 6 Pus ju yuchi ajunilh: ―Amacʼapʼitʼitch ju minchʼokxniʼan laxalhicana ju mimbarcoʼan. Anch ju lai alhitʼaʼuyaʼitʼit ju pamata. Pus tamacaʼalh ju ixchʼokxniʼan chai jantu lana lai ixtamacutui ju chʼokxni ju lacxcan ni na va ixtatsʼinqʼuitach ju pamata. 7 Ju acsnich ju anuʼ ixtamamakaʼun ju Jesús ju na ixmapaini junich ju Pitaluʼ: ―Yuchi ju quiʼucxtinʼan. Pus ju Simón Pitaluʼ acsni kʼasmatlh ni najuncalh ni ixʼucxtinʼan pus lana lakchʼichokolh ju ixpumpuʼ ni va ixmaxtutach ju lakatam ixpumpuʼ. Lana taju lacxcan. Makʼanxqʼuivitnitacutlh. 8 Junta mactai amacontilalh ju ixtʼaʼalhtanin jantuch makat ixjunita ju lakʼakxixni. Va tachi tam cientos metro. Pus ju aliʼin ixtʼaʼalhtanin ju Pitaluʼ tapumilh ju ixbarcoʼan ni va ixtapuxakʼamalhimintach ju ixchʼokxniʼan ni na lhuch ixtanun ju pamata. 9 Chai acsni tavanan tatacutcha ju laʼixquilhtuʼ atantsʼin pus talaktsʼilhch ju lacaʼayakʼanaʼ ni tampʼutʼach kʼantam pamata. Vachuʼ talaktsʼilh ju vati. 10 Chai ju Jesús ajunich: ―Alhitʼatʼitch ju aliʼ pamata ju xachʼapʼayatʼit chavai. 11 Pus lana taju ju Simón Pitaluʼ ju lacabarco chai taxakʼamacutulh ju ixchʼokxniʼan. Na lhu ixtanun ju lackʼai pamata. Ixchaʼanta tam cientos a cincuenta y tres pamata. Para mas na lhu ju ixtanun ju pamata jantu talackʼexlh ju chʼokxni. 12 Ju Jesús ajunich ju ixʼamamakaʼui: ―Asokʼotʼitch. Caʼuch. Pus jantu xamatiʼ ju laich cajunilh: “Tis chavaichʼat” ni ixtacʼatsaich ni ixʼucxtinʼan ixjunita. 13 Chai ju Jesús milh junta tʼampʼucanta ju pamata. Macutulh ju vati chai axtaknilh. Vachuʼ axtaknilh ju pamata. 14 Pus ju ani ixlhikʼalhpaktʼutuch ju atalacasunilh ju Jesús ju ixʼamamakaʼui acsni ixtaʼacxtuchokotach junta ixmacnucanta. 15 Acsni tavailh pus ju Jesús junich ju Simón Pitaluʼ: ―Simón istsʼalh Jonás ja palai qʼuimapʼaini ju uxintʼi. Ja palai jantu ju ani tavilanalh. Ju Pitaluʼ junich ju ixʼucxtin: ―A. Kʼoxich cʼatsʼai ni icmapainiyan ji quiʼucxtin. Chai juncanch ju Pitaluʼ: ―Amalanitʼich ju quinchivinti ju lapanacni ju quintalhilacaʼan. Ju yuʼunch chunch tajunita tachi ju tuʼuʼ askʼatʼa borregojni. Na tamaktasqʼuini ni xamatiʼ caʼamasunilh ju kʼox atsucunti. 16 Junchokopa ju ixlhipaktʼuich: ―Simón istsʼalh Jonás ja qʼuimapʼaini. Pus ju Pitaluʼ jumpa ju ixʼucxtin: ―Ju uxintʼi kʼoxich cʼatsʼai ni icmapainiyan ji quiʼucxtin. Junchokopa: ―Pus alhistʼactʼich ju lapanacni ju quintalhilacaʼan. Ju yuʼunch chunch tajunita tachi ju tuʼuʼ borregojni ju tamaktasqʼuini ni xamatiʼ caʼalhistaclh. 17 Junchokopa ju ixlhipaktʼutu: ―Simón istsʼalh Jonás ja qʼuimapʼaini. Pus ju acsnich na amakʼaninilh ju Pitaluʼ ju ixlhipaktʼutuch acsni quilhasacmi ju Jesús ni ixmapaini. Chai junich: ―Ju uxintʼi ji quiʼucxtin cʼatsʼakʼoʼui tachi chun ju taxtokni. Kʼoxich cʼatsʼai ni icmapainiyan. Pus junich ju Jesús: ―Amalanitʼich ju quinchivinti ju lapanacni ju quintalhilacaʼan. Ju yuʼunch tachi quimborregojni tajunita. 18 Slivasalh ju icjunan. Acsni palaicaʼ askʼatʼa ixʼunitʼa pus va miʼakstu ixlakchʼi ju mimpumpuʼ. Chai mas vanta anch ju ixpʼimpʼutʼunch ixpʼinch. Para acsni papaʼ aʼunaʼ achʼixaʼ ju mimacaʼ chai akʼantam camalakchʼiniyan chai calhiʼanan junta jantu pʼimpʼutʼun. 19 Pujunicalh chunch ju Pitaluʼ ni va ixmamachakxanicanch tuchi aninti ju capumalacasuyaʼ ju Pitaluʼ ni Dios ju xakʼai. Chai acsni nonkʼo ju Jesús ju ani pus junich ju Pitaluʼ: ―Aqʼuinchʼakʼokʼach. 20 Ni talakaspʼitlh ju Pitaluʼ laktsʼilhch ju ixtʼatamamakaʼun ju na ixmapainich ju Jesús ni ixʼachʼakʼokʼanantach vachuʼ. Yuchi ju anuʼ ju vanin ixtʼatapakstitama ju Jesús acsni tavailh. Chai yuchi ju quilhasacmi acsni tavanan junilh: “Quiʼucxtin tis chavaich ju camakʼaxtʼakʼan”. 21 Ju Pitaluʼ acsni laktsʼilh ju ixʼachʼakʼokʼanan pus junich ju Jesús: ―Quiʼucxtin ju ani minta tijuch ju canaviyaʼ. 22 Ju Jesús lhakʼalhtayanalh: ―Pus ni va aclacasqʼuilh ni catamacaulh ju yuchi tus acsni acminchokoyaʼ pus ju anch jantu mincuenta. Ju uxintʼi va aqʼuinchʼakʼokʼach. 23 Yuchi lhiʼalilh ju chivinti ju sia lhiʼalakʼavin ni ca jantu catini ju anuʼ pumatam ixtʼatamamakaʼunʼan. Para ju Jesús jantu chun naulh ni va jantu catini. Va naulh: “Ni va aclacasqʼuilh ni catamacaulh ju yuchi tus acsni acminchokoyach pus ju anch jantu mincuenta”. 24 Quitʼinch ju anuʼ amamakaʼunti ju ixnoncanch tachi ju va jantu actini. Chai quitʼin ju icnajun ni stavasalanti junima taxtokni. Chai quitʼin ju icʼatsʼoknunkʼo tachi chun ju ani taxtokni. Chai iccʼatsayauch ni stavasalanti tachi chun ju icnajunta. 25 Na lhu alin ju aliʼ taxtokni ju navilh ju Jesús. Ni stunin xactsʼokʼulakʼota tachi chun ju taxtokni pus ca jantu lai ixtilhiva ju ani lacamunutpaʼ ju atsʼoknut junta ixlhaʼatsʼoknuncalhch ju tuchi navitach ju Jesús.
1 Ju anuʼ alhiqui ju pʼulhnan icʼatsʼoknulh ji Teófilo anch ju icnaulh tachi chun ju taxtokni ju ixnavich chai ju ixʼamalaninin ju Jesús tus acsni taiʼulatacha ju ixlhichʼalhcat. 2 Chai chunch ju tailhiʼalh tus acsnich avilhchan ju anchokolh ju lactʼiyan. Ni tucaʼ ixʼanchokoi ju lactʼiyan axtaknilh ju ixlhamapʼaksin laʼixtachaput ju Spiritu Santu ju ixtamalakachan ju ixʼalacsacxtutach. 3 Acsni nilh ju Jesús pus ju astan ju yuchi atalacasunichokolh xalakʼajun ju ixtamalakachan. Tʼupʼuxam avilhchan na paklhu ju talaktsʼilh. Chai chun ju aputalacasunilh ta yu laich catacʼatsayaʼ istavasalanti ni ixtʼajun ju yuchi. Chai ixʼajunich ta yu lhinomputun ju Dios laʼisʼatsucuntiʼan ju lapanacni. 4 Pus acsni va kʼaixtam ixʼalactʼatavilhcaʼ alacmapʼaksi ni jantuch catataxtulh ju lakʼachakʼan Jerusalén para catapacxalh ju Spiritu Santu ju xanajun ju xapai ni caʼamacaminiyach. Chai vachuʼ isʼakstu ju Jesús ixʼalacjuni ni caʼaxtaknicanaʼ ju anuʼ Spiritu Santu. 5 Amapʼastʼacʼani ju Jesús ni va lacaxcan xaʼamakpaxanan ju Xivan. Chai ajuni ni jantu lhu avilhchan ju ixticʼacx tus cataʼamaklhtayananaʼ ju yuʼunch ju Spiritu Santu tachi ju aliʼin lapanacni ixtaʼamaklhtayanan ju xcan acsni ixtaʼakpax. 6 Pus ju yuʼunch ju ixʼalactʼatakʼaixtokta ju Jesús taquilhasacmich. Chanich tajuni: ―Quiʼucxtin ja aquilaʼaktaijuyau ju chavai ni laich calhinonchokopalau quiʼakstuʼan ju laquilacatʼunʼan ju quijnanʼan ju israelitanin juntau. 7 Pus chanich alacjuni ju Jesús: ―Pus ju uxijnan jantu milhicʼatsatʼan tuchi ju catapasayaʼ ju tamin cʼata u tamin malhquiyuʼ. Va yuchi ju quimpaiʼan Dios ju canonaʼ tavananch ju catapasayaʼ ju tuʼuʼ. 8 Para acʼatsʼatʼit ju ani. Catanuyaʼ ju lamiʼalhunutʼan ju uxijnan ju Spiritu Santu chai ju yuchi cataʼaktaijuyan ni jantu atʼalhananaʼitʼit. Chai uxijnan ju anonaʼitʼit ju quilacata ju lakʼachakʼan Jerusalén chai chux ju xaʼestado Judea chai ju xaʼestado Samaria chai chux ju lacamunutpaʼ. 9 Acsni nonkʼo junima chivinti ju Jesús pus talaktsʼilh ju ixtamalakachan ni lhiʼancalh lactʼiyan. Chai acsni tanulh ju lacaʼataputsʼi pus jantuch lai talaktsʼilh aliʼ. 10 Acsni istaskotutui ju lactʼiyan ni ixʼantacaʼ ju Jesús pus pumatʼui anquilhnin alactʼatayalhch ju yuʼunch. Chai ju anuch ixpumatʼuiʼan ixtalakchʼita xnapapa ixpumpuʼan. 11 Chai chani tajuni ju ixtamalakachan ju Jesús: ―Ju uxijnan ji lapanacni amachakʼan Galilea va kʼaya skʼotʼutʼuyatʼitch ju lactʼiyan. Ju Jesús anchokolh junta vilhcha ju ixpai. Para ju ani Jesús ju xaʼanchokoi lactʼiyan lamiʼalacʼavantiʼan vana va chunch caminchokopalaʼ tachi ju xalaktsʼinatʼit ni xaʼan ju lactʼiyan. ―Chunch ju ajunicalh ju ixtamalakachan ju Jesús. 12 Pus ju yuʼunch lana tatakʼalhtajulh ju anuʼ akstijun junta ixchʼancanta ju qʼuiu ju olivo juncan. Taʼanchokolh ju lakʼachakʼan Jerusalén. Pus ju anuʼ akstijun vanin ixlhilaklacaʼanita ju lakʼachakʼan Jerusalén. Ixlhimakat tachi xaʼalhtanti va tam pantsʼiquis. 13 Acsni tatanucha ju lakʼachakʼan Jerusalén taʼalh ju lacachakaʼ chai tatocʼalh ju ixlhitantalactʼui junta ixtamatsʼisqʼuinta. Ju taʼalh yuchi ju Pitaluʼ chai ju Jacobo chai Xivan, Tilix, Pilipe, Tumax, Bartolomé, Mateo, Jacobo istsʼalh ju Alfeo, Simón ju makyuʼunch ixjunita ju cananistanin, chai ju Judas ispʼisekʼe ju Jacobo. 14 Ixchuxʼan va lakatam ixjunita ixʼatalacpastʼacʼatʼan chai va tachi ixtatʼachivinin ju Dios. Vachuʼ ixʼalactʼavi aliʼin chakolun chai ju Malia ixnati ju Jesús chai ixʼapʼisekʼen ju Jesús. 15 Ju ixtatakʼaixtokta ixtachaʼanta tam cientos a pumapʼuxam lapanacni. Chai ju aktam acsni ixtatakʼaixtokta pus ju Pitaluʼ taya laʼixlacaitat junta ixtavilanalh ju lhiʼalakʼavin chai chani ajuni: 16 ―Quiʼalakʼavin aktsʼiya istasqʼuini ni caʼuctaxtulh tachi ju naulh ju Spiritu Santu laʼixchivinti Dios ju tsʼokcanta. Ju yuchi juni ju David tuchi cajunaʼ ixlacata ju Judas. Yuchi ju apʼulhnilh ju lapanacni ju taquichʼapalh ju Jesús. 17 Ju Judas ixlhiputekʼecantau ju quijnan chai kʼaixtam ixtʼachʼalhcatnanau. 18 Para ju yuchi alactuʼunulh chai laʼixtalhaja ju ixʼalactuʼunti tamocalh lakatam lacatʼun. Pus ju Judas ankʼapatajulh. Lana pupaklh ju laʼixpajan chai tachi chun ixpalu taxtunikʼo. 19 Pus tacʼatsakʼo tachi chun ju amachakʼan Jerusalén. Chai ju anuch lacatʼun tamapakaʼulh laʼixchivintiʼan. Tajunich Acéldama ni lhitamaʼucalh laʼixtapalh ixʼacʼalhni ju Jesús. 20 Pus chanich ju tsʼokcanta laxaʼalhiqui ju Salmos junta ma lhichivinincalh ju Judas: Chach va isʼakstu taya ju ixchakaʼ chai jantu xamatiʼ catsuculh ju anch. Chunch ma najun. Chai alacatam ma chani najun: Chach tanuchokolh apumatam laʼixlhichʼalhcat. Chunch ma najun junta tsʼokcanta. 21 Pus ixlhiyuchi tasqʼuini ni casacxtuyau pumatam ju ixʼokxtapalh cajunaʼ. Casacxtuyau sia yuʼunch ju kʼaixtam xaquintatʼaʼalhtananan acsni ixtʼajuncaʼ ju quiʼucxtinʼan Jesús laquilhiquijnanʼan. 22 Casacxtuyau sia yuʼunch ju quintatʼaʼalhtanantan tus acsni ixʼamakpaxanan ju Xivan tus acsnich avilhchan acsni amaklhtayananchokocalh ju Jesús ju lactʼiyan laquiʼalacʼavantiʼan. Ju chunch ju yuchi vachuʼ aquintatʼanonan ni lokʼonchokolh ju Jesús. ―Chunch ju naulh ju Pitaluʼ. 23 Pus tasacxtulh pumatʼui. Pumatam ixjuncan José. Ju yuchi vachuʼ ixjuncan Barsabás chai Justo. Ju apumatam ixjuncan Matías. 24 Chai tatʼachivinilh ju Dios. Chani tajunich: ―Quiʼucxtin ju uxintʼi ni lai laktsʼinkʼoʼui ju lakatamin alhunut pus aquilamasuniuch tamalhch ju sacxtʼutʼach ju ani tayanalh pumatʼui lapanacni. 25 Aquilamasuniuch tamalhch ju sacxtʼutʼach ju uxintʼi ni mintamalakachan cava chai caʼamaklhtayanalh ju laʼixlhitai ixjunita ju Judas. Ju Judas ni taxtulh ni va alactuʼunulh chai ankʼalhi ju lacajipi junta aktsʼiya istasqʼuini ni caʼalh. ―Chunch ju tajuni ju Dios. 26 Pus taʼulalh ixtapakaʼutʼan lacaʼalhiqui chai tasacxtulh ju ixtapakaʼut ju Matías. Pus lhilaktsacalh pumacautʼui ju ixtamalakachan ju Jesús.
1 Alin ixcʼatanʼan ju israelitanin ju Pentecostés juncan. Pus acsni chilh ju anuch cʼatan va chʼanxtam ixtavilanalh ixchuxʼan ju ixtalhilacaʼanta ju Jesús. 2 Chai acsni talhicʼatsanalh takʼasmatlh tachi ju va pʼas ixminta ju un. Mincha lactʼiyan chai kʼasmatcalh chux ju lacachakaʼ junta ixtavilanalh ju yuʼunch. 3 Ju acsnich talaktsʼilh lhu tuʼuʼ tachi ju jipi chai lhvakpitsilh chai tavilh laʼixʼucxni ixlacatunaʼan ju pumatamin ixtavilanalh anch. 4 Chunch ju putanulh ju Spiritu Santu laʼixʼalhunutʼan ni calhinonkʼoyaʼ laʼisʼatsucuntiʼan. Chai lana laich ixtachivinin ju chivinti tachi ju tachivinin aliʼin lapanacni. Chunch ju tachivinilh tachi ju ajuni ju Spiritu Santu. 5 Pus ju acsnich ju lakʼachakʼan Jerusalén ixtavilanalh ju israelitanin. Ju yuʼunch na ixtalhilacaʼanta ju Dios. Ixtataxtutacha tachi chun ju lacatʼun ju alin ju ani lacamunutpaʼ. 6 Chai acsni takʼasmatlich ni na ixlacchivincanch pus tatakʼaixtoklh lhu ju lapanacni chai na ixtalhamakʼanininch ni ixtakʼasmatʼa ixchivinti pumatamin ju anch ixtavilanalh. 7 Chai va sekch tatavi. Na ixtalhamakʼaninin. Ixtalaclajuni: ―Ja jantu si amachakʼan Galilea ju yuʼunch ju tatʼajun chivinin. 8 Pus tas laich tanompalai tachi iclanitauch ju quilhitalactʼicstʼin quincʼan. 9 Ju aliʼin quijnan ni amachakʼan Partia juntau chaich ju aliʼin amachakʼan Media, amachakʼan Elam, amachakʼan Mesopotamia, amachakʼan Judea, amachakʼan Capadocia, amachakʼan Ponto, chai amachakʼan Asia, 10 amachakʼan Frigia chai amachakʼan Panfilia chai amachakʼan Egipto chai amachakʼan ju xalacatʼun Africa ju lhiʼavinti vilhcha ju lakʼachakʼan Cirene. Ju aliʼin quijnan amachakʼan Roma juntau chai sia quijnanʼan alin ju quintʼaʼisraelitaninʼan chaich vachuʼ alin ju talhilacaʼanta ju Dios tachi ju layau ju quijnanʼan ju israelitanin juntau mas jantu israelitanin tajunita ju yuʼunch. 11 Ju aliʼin amachakʼan Creta juntau chai amachakʼan Arabia. Ickʼasmatʼauch laquinchivinti quincʼan ni navita ju Dios ju kʼai lhamakʼan. ―Chunch ju talaclajunich. 12 Chai ixchuxʼan va sekch tatavi. Jantu lai ixtamachakxai tis ixtalakxtuch ixtʼajun tapasanaʼ. Ixtalaclajuni sia yuʼunch: ―Tijuch nuʼ ju nomputun ju ani. 13 Para ju aliʼin lapanacni va ixtalhitsʼiʼinch. Ixtanajun: ―Ju ani tayanalh lapanacni va talactʼakʼapʼan. 14 Pus ju acsnich ju Pitaluʼ alactʼataya ju ixpumacautamʼan ixtamalakachan ju Jesús. Chivinilh ju Pitaluʼ chai chani alacjunich: ―Quintʼaʼisraelitanin chai tachi chun ju tʼonatʼit ju ani lakʼachakʼan Jerusalén aquilakʼasmatniuch tuchi aclajunau chai amachʼakxatʼit. 15 Ju quijnan jantu ni va ictʼakʼapʼatauch tachi ju nonatʼit ju uxijnan ni va lakanajatsicaʼ hora ju vatsʼisin. 16 Para tachi ju tʼajun tapasanaʼ ju chavai va uctaxtui tachi ju naulh ju Joel ju makʼaniya ixlapanac Dios ju ixnajun ju ixchivinti. Ju yuchi ma chani naulh: 17 Ju Dios ma najun ni ma chanich cajunaʼ ju avilhchan acsni caʼaclayach ju lacamunutpaʼ. Ma caʼaxtakniyaʼ ju iSpiritu Santu tachi chun ju lapanacni chai ju mintsʼalan chai ju miʼatsiʼin ma catanonach ixchivinti. Chaich ju paitat lapanacnich ma tachi ju va laʼixʼaklakʼavantiʼan catalaktsʼinaʼ ju tuchi catapasayaʼ. Chai ju lackʼajin jokʼatni ma caʼaxakʼalacanaʼ laʼixʼaklakʼavantiʼan. 18 Chai ju ixlapanacni ju Dios chai ju atsiʼin ju tachʼalhcatnan laʼixmacni pus ju anuʼ avilhchan ma caʼaxtakniyaʼ ju iSpiritu Santu chai ma catanonach ju ixchivinti. 19 Chai ju yuchi ju Dios ma camalacasuyach kʼai lhamakʼan ju lactʼiyan. Chai ju ani lacatʼun ma caʼalinaʼ ju tuʼuʼ ju lai catapuʼalacpastacnalh ju lapanacni. Ma caʼalinaʼ ju lasat chai na lhu cataxtuyaʼ ju acʼalhni. Chai ma caʼalinaʼ ju kʼai jipi. Chai ma caʼalinaʼ ju jin ju na kʼalhtankʼai cajunaʼ tachi ju va ataputsʼi. 20 Chai ju avilhchan ma va smalaka cajunaʼ. Chai ju malhquiyuʼ ma catasuyach tachi ju va acʼalhni ni na lapulh cajunaʼ. Ma chunch cajunaʼ acsni cachaʼamputunach ju anuʼ avilhchan ju lhcaʼulata ni caminchokoyaʼ ju kʼai ucxtin Dios. Chai ju acsnich ma na kʼai avilhchan cajunaʼ. Chai ma catasuyaʼ ni yuchach ju avilhchan ju lhcata ju Dios. 21 Chai ma tachi chun ju catapaininiyaʼ ju kʼai ucxtin Dios ma catatakʼalhtaxtuyach chai ma jantu catitaʼalh ju lacajipi. Ju Joel ma na makʼanch ixnajun ni ma chunch ixnajun ju Dios. 22 Chai acsni nonkʼo ju chunch ju Pitaluʼ pus tailhiʼalh ju ixchivinti. Naulh: ―Pus aquilakʼasmatniuch ji quintʼaʼisraelitanin. Ju Dios tamalacasunitan ni laʼixmacni yuchi xaminacha ju Jesús amachakaʼ Nazaret. Talhitalacasuninch ni anch ju xaminacha ni isʼakstu Dios ju xtaknilh ixtachaput ju Jesús ni laich xanavi lamiʼucxlacapuʼan ju kʼai lhamakʼan chai ju taxtokni ju jantu xamatiʼ apumatam lai navi chai ixnavi tuʼuʼ ju caʼixtapucʼatsa ju lapanacni ni vasalh Dios ju xamalakachayachilh. Chai ju uxijnan kʼoxich cʼatsʼayatʼit tuchi ixnavich. 23 Para ju Dios aktsʼiya ixlacasqʼuin chai iscʼatsai ta yu caʼulhtucanaʼ ju Jesús. Pus ju yuchi lakʼaʼilh ni makʼaxtakcalh ju Jesús lamimacaʼan ju uxijnan. Chai acsni tachʼin tanavilh ju alactuʼunin lapanacni pus uxijnan ju xanonatʼit ni catamakni acsni tamaquilhta ju lacacurus. 24 Para ju Dios macxtuchokolh ju Jesús junta ixmacnucanta. Makʼostolachokolh acsni xani ni jantu lai catinikʼalhi ju yuchi. 25 Pus jantu lai xanikʼalhi ju Jesús ni tsʼokʼulacanta tuchi ixnajun ju yuchi. Yuchi ju makʼaniya ixlapanac Dios ju David ixjuncan ju xatsʼokʼulai ixchivinti ju Jesús. Pus ju Jesús ma naulh: Iccʼatsai ni aktsʼiya quintʼavi ju quiʼucxtin Dios. Chai ni va tachi quiʼaktaijui pus jantu tavanan actitalhanalh. 26 Pus ixlhiyuchi na ickʼachan. Chai laquinquilhni iclakʼayai ju Dios. Chai ju quilacatuna acsni camacnucanaʼ lhikʼach caʼastacnanaʼ ni iclhilaksich ju ixchivinti Dios. 27 Iclhilaksi ju Dios ni jantu tavanan camaconaʼ ju quintacuvin junta taʼan ju alasanin nin calacʼasqʼuinaʼ ni capuchʼilh ju quilacatuna ju quitʼin ju quimalakachatachilh ju Dios. 28 Yuchi ju Dios ju aquixtaknichokoyaʼ ju quiʼatsucunti. Chai slivasalh ackʼachanaʼ acsni laʼixʼucxlacapuʼ actʼatolaʼ. Chunch ju tsʼokʼula ju David ni ma chunch ju xanajun ju Jesús. 29 Pus ji quintʼalapanacni aktsʼiya cʼatsacan ni nilh ju makʼaniya quimpaiʼan David chai macnucalh. Chai tus chavai lai laktsʼinau junta taʼacnu. 30 Pus ju David ixnajun ixchivinti Dios chai iscʼatsaich ni Dios ixmavasalanita ixchivinti ni laʼixʼamaskʼatʼanti caputasuyanta ju anuʼ ju ixnoncan camalakachatachilh ju Dios. Chai ju yuchi catolaʼ laʼixpuʼucxtin ixjunita ju David. 31 Pus ju David acsni ixtʼajuncaʼ ixmacʼatsanican ni cataʼacxtuchokotachilh ju anuʼ ju ixnoncan camalakachatachilh ju Dios. Yuchi lhinaulh ni jantu tavanan camaconaʼ ju ixtacuvin junta taʼan ju alasanin nin capuchʼiyaʼ ju ixʼacanit. 32 Pus ju lhichivinilh ju David yuchi ju Jesús ju malokʼonichokolh ju Dios. Chai chux ju quijnan iclaktsʼiuch acsni ixmalokʼonichokocantach. 33 Pus ju Dios lakʼaya acsni ulalh vanin junta vi yuchi. Chai ju Jesús amaklhtayanalh ju Spiritu Santu tachi ixjunitach ju Dios. Chai quintamalakachanichin ju quijnan. Chai tachi chun ju ani ju laktsʼinatʼit ju uxijnan chai tuchʼi kʼasmatʼatʼit si laʼixtachaput ju anuʼ Spiritu Santu ju navicanta. 34 Pus jantiyuʼ ju David ju alh ju lactʼiyan laʼixlacatuna. Para isʼakstu ju David ma chani naulh: Ju ucxtin Dios junilh ju quiʼucxtin ni catavi vanin junta vi ju yuchi. 35 Anch ju catavi tus acsni catʼalalhajayaʼ ju ixtʼalaxcai. Ma chunch ju naulh ju David. 36 Pus acʼatsʼatʼit ju ani tachi chun ju uxijnan ju quintʼaʼisraelitanin untʼatʼit. Ju anuʼ Jesús ju maknitʼatʼit lacacurus ju Dios kʼai ucxtin xanavi. Chai yuchach ju ixnoncan camalakachatachilh ju Dios. ―Pus chunch ju ajuni ju lapanacni ju Pitaluʼ. 37 Pus ju lapanacni acsni takʼasmatlh ju ixchivinti ju Pitaluʼ na xcanilh ixʼalhunutʼan. Chani tajuni ju Pitaluʼ chaich ju aliʼin ixtamalakachan ju Jesús: ―Quintʼalapanacni tas calayauch ju chavai. 38 Pus ju Pitaluʼ chani alacjuni: ―Amacʼaʼuntʼit ju miʼalactuʼuntiʼan pumatamin ju uxijnan chai aʼakpʼaxtʼit laʼixtapakaʼut ju Jesús ju ixnoncan camalakachatachilh ju Dios. Ju chunch ju Dios ma catamacʼacxaniyan ju mintalakʼalhinʼan chai ma amaklhtʼayananaʼitʼit ju Spiritu Santu ju cataxtakniyan ju Dios. 39 Pus ni chunch alatʼit pus aktsʼiya axtʼaknicʼanaʼitʼit ju Spiritu Santu. Ju Dios xtakta ju ixchivinti ni ma cataxtakniyan ju uxijnan ju Spiritu Santu. Ma vachuʼ caʼaxtakniyaʼ ju miʼaskʼatʼan chai tachi chun ju lapanacni mas vanta anchach catatsuculh. Ma caʼaxtakniyaʼ tachi chun ju caʼalactʼasaniyaʼ ju kʼai ucxtin Dios. ―Pus ju Pitaluʼ ajunich ju lapanacni ni ma chunch ju naulh ju Dios. 40 Chai na lhu chivinti ixʼajuni chai ixʼalhimapʼaksich. Chai ixʼalacjuni: ―Chach tamakʼalhtaxtuyan ju Dios lacamakʼalhkʼajnat ju caʼaxtaknicanaʼ ju lapanacni ju tatʼajun ju chavai ju lana jantu sok ju isʼatsucuntiʼan. ―Chunch ju ajuni ju lapanacni ju Pitaluʼ. 41 Pus tachi chun ju talacaʼinilh ju ixchivinti ju Pitaluʼ taʼakpaxkʼo. Pus na tatalhavachokolh ju ixtalhilacaʼanta ju Jesús. Ju acsnich avilhchan tachi lakatʼutu milh lapanacni talhilacaʼalh ju Jesús. 42 Pus ju yuʼunch talacaʼikʼo tuchi ixʼajuni ju ixtamalakachan ju Jesús. Chai sich lhilakʼau ixtajunita. Chai kʼaixtam ixtaʼui ju xkapavati ixpupastaccan ixʼaninti ju Jesús. Chai ixtatʼachivinin ju Dios. 43 Chai ni na lhu lhamakʼan ju ixtanavi laʼixtachaput ju Dios ju ixtamalakachan ju Jesús chai ni ixtanavi ju tuʼuʼ ju catapuʼalacpastacnalh ju lapanacni pus na tatalhanalh tachi chun ju lapanacni. 44 Chai tachi chun ju ixtalhilacaʼanta ju Jesús slivasalh lhiʼalakʼavin ixtajunita. Chai ju ixʼalintaʼan ixtamakpitsi sia yuʼunchach tachi ixmaktasqʼuini ju kʼantam kʼantam. 45 Istastʼaich ju ixlacatʼunʼan chai ixʼalintaʼan. Chai ju tumin ju ixtaʼamaklhtayanan ixtalalhvakʼach tachi ju ixmaktasqʼuinich pumatam pumatam. 46 Chai tuncujun tuncujun va chʼanxtam ixtaʼan lacakʼai ixpujitatʼan ju israelitanin. Chai laʼixchakaʼan lhikʼach ixtaʼui ju xkapavati ju pupastaccan ju ixʼaninti ju Jesús. Chai va lakatam ixjunita ixʼalhunutʼan. 47 Ixtalakʼayai ju Dios chai chux ju lapanacni ixtanajunch ni na lackʼoxin lapanacni ixtajunita ju yuʼunch. Chai tuncujun tuncujun ju kʼai ucxtin Dios na lhu ixʼalalhavai ju ixlapanacni ju vachuʼ ixtalhilacaʼanta Jesús.
1 Pus ju lakatam avilhchan ju Pitaluʼ chai ju Xivan ixtaʼanta lacakʼai ixpujitatʼan ju istʼaʼisraelitanin. Lakatʼutu hora atokʼoxanaʼ ixjunita. Acsnich ju ixtaʼan ju lapanacni tʼachivinin ju Dios. 2 Chai ixʼalin pumatam lapanac ju va ixchʼantakʼalhita. Chunch ixjunita tus laʼixpulakʼau. Chai chux avilhchan ixchʼixlhiʼancanta chai ixʼulacanta laxamalhtich ju anuʼ pujitat. Pus ju anuʼ malhtich ju lapanacni ixtanajun ni yuchach ju na cʼus. Pus taʼulalh ju takʼankʼan anch ni laich casqʼuiniyach ju tumin tachi chun ju ixtatanuich lacpujitat. 3 Chai ju anuʼ lapanac acsni alaktsʼilh ju Pitaluʼ chai ju Xivan ni ixtatanuputun lacpujitat pus lana asqʼuinilh lamapainin ni tuʼuʼ cataxtaknilh lacatsʼunin. 4 Pus ju acsnich ju Pitaluʼ chai ju Xivan lana taskotutulh. Chai ju Pitaluʼ juni: ―Aquilalaktsʼiuch. 5 Ju acsnich ju anuch lapanac lana pacxantavi tuchi caxtaknicanach. 6 Para ju Pitaluʼ chani junich: ―Matich ju quintumin. Para ju tuchi icpacxanta yuchach ju acxtakniyan. Laʼixtachaput ju Jesucristo amachakaʼ Nazaret atʼaich. Alhtʼanch. 7 Pus ju acsnich ju Pitaluʼ makchʼapalh ju anuʼ lapanac laʼixlhicana. Makʼostola. Chai lana takʼoxinilh ixchʼajaʼ chai ixpixtuʼ ixchʼajaʼ. 8 Pus ju yuchi alhtujnutayalhch. Alhtanalhch chai kʼaixtam alactʼatanu lacpujitat. Alhtanaʼanta. Alhtujnuʼanta. Chai ixlakʼayai ju Dios. 9 Pus chux ju lapanacni talaktsʼilh ni alhtanaʼanta chai takʼasmatlh ni ixlakʼayai ju Dios. 10 Chai tamispalh ni yuchi ju ixtolai laxamalhtich ju kʼai pujitat junta na cʼus ixjuncan chai isqʼuin tumin. Pus lana va talhamakʼaninilh ni talaktsʼilh tuchi tapasalh ju anuʼ lapanac. 11 Pus ju anuʼ lapanac ju palaich navicalh lana jantu maconiputulh ixmacaʼan ju Pitaluʼ chaich ju Xivan. Pus tachi chun ju lapanacni taʼatsʼalalakmilh ju yuʼunch junta ixtayanalh laʼismakspaʼ pujitat junta ixʼanuʼ Salomón ixjuncan. Va talhamakʼaninilh. 12 Pus ju Pitaluʼ ni laktsʼilh ni ixtaʼatsʼalaminta ju lapanacni pus lana chani alacjuni: ―Quintʼaʼisraelitanin tajuch ni va lhamakʼanininatʼit ju ani. Tajuch ni va quilaskotutuyau ju quijnan. Tachi ju va nonatʼit ni laquintachaput quincʼan ju xacmalhtanayau ju ani ya lapanac. U tachi ju va nonatʼit ni va ixlacaʼatalh ni ixlhichux ju quiʼalhunut quincʼan icchʼakʼokʼayauch ju Dios palaich xacpunaviyau ju ani ya lapanac. Para jantu. 13 Alai Dios ju palai xanavi. Yuchi ju vachuʼ isDios ixjunita ju makʼaniya quimpaiʼan Abraham chaich ju Isaac chai ju Jacob. Chai yuchi ju xakʼai xanavi ju istsʼalh ju Jesús juncan. Para ju uxijnan makʼaxtʼaknitʼit ju ucxtinin. Chai ju Pilato mas ixkʼotputun para ju uxijnan jantu lacʼasqʼuintʼit. 14 Ju Jesús na salaka ixjunita ixʼalhunut chai na soknicʼa ixjunita ju isʼatsucunti. Para ju uxijnan jantu lacʼasqʼuintʼit ju yuchi. Alai yuchi ju sqʼuintʼit ni camacajuncalh ju amakniniʼ. 15 Pus ju uxijnan maknitʼit ju anuʼ ju lai xtʼakʼa ju atsucunti ju conkʼalhiyanta lactʼiyan. Para ju Dios malokʼonichokolh laʼixʼaninti. Chai ju quijnan iclaktsʼiuch acsni ixmalokʼonichokotach. 16 Pus ju ani ya lapanac ju laktsʼinatʼit chai mispʼayatʼit tachapuchokolh va ixlacata ni iclhilaksiyau ju ixtachaput ju Jesús. Ni iclhilacaʼanau ju Jesús yuchi lhitakʼoxinilh ixchʼajaʼ ju ani ya lapanac lamiʼalacʼavantiʼan minchuxʼan ju uxijnan. 17 Pus ji quintʼalapanacni iccʼatsai ni lana jantu ixmachʼakxayatʼit tuchʼi ixnaviyatʼit ju uxijnan acsni maknitʼit ju Jesús. Nin yuʼunch ju miʼucxtinin jantu tamachakxa. 18 Para chunch ju uctaxtulh tachi ju ixnajunta ju Dios ju makʼanch. Ju yuchi ixʼajuni tachi chun ixlapanacni ju ixtanajun ixchivinti ni catanaulh ni aktsʼiya camakʼalhkʼajnanach ju yuchi ju camalakachacanachilh ju ani lacamunutpaʼ. 19 Pus ju chavai amacʼaʼuntʼit ju miʼalactuʼuntiʼan. Alhilacʼapʼitʼit ju Dios. Ju chunch ju Dios cataxacaniyanch ju mintalakʼalhinʼan chai kʼox atsucunti cataxtakniyan ju quiʼucxtin Jesús. 20 Chai ju chunch laich camalakachachokotachilh ju Jesús aktam. Yuchach ju makʼanchich ixnoncan camalakachatachilh ju ani lacamunutpaʼ ju quilacataʼan. 21 Para ju chavai aktsʼiya tasqʼuini ni catolhchacaʼ lactʼiyan ju Jesús tus acsni cachinaʼ ju avilhchan acsni catasastʼikʼoyaʼ tachi chun ju taxtokni. Chunch ju naulh ju Dios ju makʼanchich chai ju ixlapanacni ju na salaka ixjunita ixʼalhunutʼan chai ju ixtachivinin ju ixchivinti ajunicalh ni vachuʼ chunch catanaulh. 22 Chunch ju tanaulh tachi ju naulh ju makʼaniya lapanac ju Moisés ixjuncan. Ju yuchi ma chani ajuni ju lapanacni ju ixtatʼajun ju acsnich: “Ju kʼai ucxtin Dios ma catamalakachanichin pumatam lamilhiʼuxijnan ju canonach ixchivinti. Ju Dios ma camalakachayach ju yuchi tachi ju quimalakachalh ju quitʼin. Pus ma akʼasmatnitʼit ju yuchi tachi chun ju catajunan. 23 Chai ma tachi chun ju lapanacni ju ma jantu cakʼasmatniyaʼ ju tuchi canonaʼ ju anuʼ lapanac ju canonaʼ ixchivinti Dios pus ma jantu ixmakxalapanac Dios cajunaʼ chai ma camacaʼancanaʼ lacamakʼalhkʼajnat junta jonkʼalhita”. Ma chunch ju ajunilh ju lapanacni ju Moisés. 24 Pus iclajunau ni Samuel chai tachi chun ju aliʼin lapanacni ju ixtanajun ixchivinti Dios ju ixtatʼajun ju acsnich tus chavai si talhichivinilh ju chavai avilhchan acsni tʼonau ju quijnanʼan. 25 Chai tachi chun ju tanaulh ju anuch makʼaniya lapanacni si milacataʼan ju chavai. Chai ju anuʼ chivinti ju alaclhitʼatakʼoxilh ju Dios ju makʼaniya quimpaiʼan pus ju chavai milacataʼan junita. Chai ju chavai uxijnan ju amaklhtʼayananaʼitʼit ju tuchi juni ju Dios ju Abraham acsni lhitʼatakʼoxilh ju ixchivinti. Ju yuchi ixjunita ju Abraham ni ma kʼoxich catatsucuyaʼ tachi chun ju lapanacni ju ani lacamunutpaʼ ma va ixlacaʼatalh pumatam ixʼapapanatnich. 26 Ju Dios acsni malakachachilh ju istsʼalh ju ani pus quijnanʼan ju pʼulhnan quintamalakachanichin. Chai quintamalakachanichin ju quijnanʼan ni lai lhikʼach catsucuyau acsni aquintamamaconiyan ju macxcai quiʼatsucuntiʼan. ―Chunch ju ajunilh ju lapanacni ju Pitaluʼ.
1 Acsni ixtatʼachivinin ju lapanacni ju Pitaluʼ chai ju Xivan pus lana tsʼanan taminkʼo ju ixpalijniʼan ju istʼaʼisraelitaninʼan chai ju saduceonin chai ju ixʼucxtinʼan ju taropajni ju ixtachʼalhcatnan lacakʼai ixpujitatʼan. 2 Na ixtatalhkʼaman ju yuʼunch ni ixʼamalanican ju lapanacni chai ixʼajuncan ni taʼacxtuchokolh ju Jesús junta ixmacnucanta chai ixlhiyuchi cʼatsacan ni aktsʼiya catataʼacxtuchokotachilh ju tanitach. 3 Pus lana tachʼapalh ju Pitaluʼ chai ju Xivan. Chai ni na ixtokʼoxatach chai jantu lai tuʼuʼ tanavilh ju acsnich pus alactʼalhnucalh. Ixtanajun ni catalhiʼanaʼ lacapuʼucxtin ni catuncunach. 4 Para aktsʼiya na lhu ju takʼasmatlh ju chivinti talacaʼilh. Chai chux ju ixtalhilacaʼanta ju Jesús chaʼalh tachi lakaquis milh jokʼatni. Jantu aputekʼecalh ju chakolun chai ju askʼatʼan. 5 Acsni tuncunchokolh tatakʼaixtoklh ju lakʼachakʼan Jerusalén ixʼucxtinʼan ju israelitanin chai ju xalacpaʼitnich ju israelitanin chai ju na ixtalhitamakaʼutach ju ixlhamapʼaksinʼan ju istʼaʼisraelitanin. 6 Vachuʼ ixvi ju Anás ju xakʼai pali ixjunita. Chaich ju Caifás, Xivan, Alejandro chai ju aliʼin ixlhiʼalakʼavin ju xakʼai pali. 7 Chai ju acsnich talhinaulh ixmaxtuca lacapulachʼin ju Pitaluʼ chai ju Xivan. Alacyajucalh laʼixlacaitat ju lapanacni ju anch ixtavilanalh chai alacsacmicalh tichi chavaich ju xaʼaxtakni ju ixtachaputʼan ni laich palai xatanavi ju anuʼ lapanac. Vachuʼ asacmicalh tichi chavaich ju xaʼajuni ni chunch catalalh. 8 Pus ju acsnich ju Spiritu Santu lana soko xtaknilh ju Pitaluʼ ju chivinti ju canonaʼ. Chai chani ju ajuni ju yuchi: ―Xalackʼajin ju ani lakʼachakʼan chai ju lhinonatʼit sia quijnanʼan ju israelitanin juntau ju chavai icchivimakʼancantau va ixlacaʼatalh ju kʼox amapaininti ju icnavinitau pumatam takʼankʼan. Chai ju uxijnan va cʼatsʼapʼutʼunatʼit tijuch ju palai xapujun ju takʼankʼan. 10 Pus acʼatsʼatʼitch chux ju uxijnan chai chux ju aliʼin israelitanin ni laʼixtachaput ju Jesucristo amachakaʼ Nazaret palaich xapujun ju ani lapanac ju ya lamiʼucxlacapuʼan. Yuchach ju anuʼ Jesucristo ju maqʼuilhtʼatʼit lacacurus para ju Dios malokʼoni laʼixʼaninti. 11 Ju uxijnan chun untʼatʼit tachi ju ixyonin chakaʼ ju tamakʼalh ju anuʼ chiux ju astan valh ju chiux ju makʼastumucʼacanta chakaʼ junta tsʼokcanta tuchi cʼatach ju yocanta. Ju uxijnan makʼantʼatʼit ju Jesús mas yuchi ju palai maktasqʼuinican laquiʼatsucuntiʼan. 12 Pus matich apumatam ju lai aquintamakʼalhtaxtun. Tachi chun ju lapanacni ju ani lacamunutpaʼ va yuchach ju quintaxtaknitan ju Dios ni lai aquintamakʼalhtaxtun. ―Chunch ju ajuni ju xalackʼajin ju Pitaluʼ. 13 Pus ju xalackʼajin acsni talaktsʼilh ju Pitaluʼ chai ju Xivan ni jantu lana ixtatalhanan chai ixtacʼatsai ni jantu tuʼuʼ ixtapalhniʼan ixjunita chai jantu tavanan ixtaquilata lacascuela pus na talhamakʼaninilh. Acsnicaʼ ju tapastaclh ni ixtatʼaʼucxuntʼajun ju Jesús. 14 Chai ni talaktsʼilh ni anch ixya ju anuʼ lapanac ju palaich ixnavicanta pus jantu lai xatamucʼani tuʼuʼ ixtalakʼalhinʼan ju Pitaluʼ chai Xivan. 15 Pus lana alactixcoxtucalh pantsʼiquis lacapuʼucxtin. Chai va isʼakstuʼan ju xalackʼajin tatsuculh lacchivinin. 16 Chani ixtalaclajunich: ―Tas catʼalayauch ju ani lapanacni ni slivasalh kʼai lhamakʼan ju tamalacasuta ju yuʼunch chai jantu lai catinompalau ni jantu tanavita. Tacʼatsakʼo ju amachakʼan ju lakʼachakʼan Jerusalén. 17 Para ni jantu palai lhu catacʼatsayaʼ ju tuchi xatanavi caʼajuniu ni jantu xamatiʼ catajunilh tuʼuʼ ixlacata ju Jesús. Chai ni tuʼuʼ catajunilh xamatiʼ pus isʼakstuʼan tacʼatsai. 18 Pus atʼasanichokocalh. Ajunicalh ni jantuch lai vana catajunilh tam xamatiʼ nin cataʼamasuninilh ixlacata ju Jesús. 19 Pus ju acsnich ju Pitaluʼ chai ju Xivan takʼalhtailh ju ucxtinin. Chanich tajuni: ―Anaʼuntʼitch. Tasmalhch ju palai kʼox calhiulayaʼ ju Dios. Ni aclaquiclacaʼiu ju uxijnan u yuchi ju Dios ju acquiclacaʼiu. 20 Para ju quijnan jantu tavanan actimacaju ju va jantuch acnaju ju tuchi iclaktsʼintauch ju navilh ju Jesús chai ju tuchi ickʼasmatʼauch ju naulh ju Jesús. ―Chunch tajuni ju Pitaluʼ chai ju Xivan. 21 Pus ju ucxtinin chani ajuni: ―Va yuchi ni amasunipʼalatʼit laʼixtapakaʼut ju Jesús. Chai acsni tajuni ju chunch lana amacaulh. Pus ju ucxtinin lana jantu lai xatalhitajui ta yu laich caʼamamakʼalhkʼajni va ixlacaʼatalh ju lapanacni. Tachi chun ju lapanacni ixtanajun ni yuchach ju xakʼai ju Dios ni lai palai xanavi ju anuʼ lapanac. 22 Pus ju anuch lapanac ju navinicanta lhamakʼan ni palaich ixnavicanta ixtapasatach tʼupʼuxam cʼata. 23 Pus ju Pitaluʼ chai ju Xivan acsni amacajuncalh lana talakʼanchokolh ju aliʼin ju ixtalhilacaʼanta ju Jesús. Chai tanonkʼo tuchi ixʼajuni ju xalackʼajin palijni chai ju ucxtinin. 24 Chai ju yuʼunch acsni takʼasmatlh ju ixchivintiʼan pus va chʼanxtam tatʼachivinilh ju Dios. Chani tajuni: ―Quiʼucxtin uxintʼi ju Diosʼat. Uxintʼi ju navitʼa ju lactʼiyan chai ju lacatʼun chai ju alama chai tachi chun ju taxtokni ju alin. 25 Ju David makʼaniya milapanac ixjunita. Pus ju miSpiritu Santu juni ni ma chani catsʼokʼulalh lacaʼalhiqui: Ma va kʼaya talucununch ju lapanacni ju jantu israelitanin tajunita. Chai ju israelitanin ma va kʼaya tapastʼacʼa ju taxtokni ju jantu lai tanavi. 26 Ju xaʼucxtinin ju ani lacamunutpaʼ ma va lakatam tava. Chai ju xalackʼajinch ma tatakʼaixtokta. Ma va tatʼalaxcayan ju uxintʼi ji ucxtin Dios chai ju noncan amalakʼachʼatʼachʼitʼa. Ma chunch ju naulh ju David. 27 Chai ji quimpai Dios slivasalh ni tatakʼaixtoklh ju ani lakʼachakʼan ju Herodes chaich ju Poncio Pilato chaich ju yuʼunch ju jantu israelitanin chai ju aliʼin quintʼaʼisraelitanin quincʼan. Va tatʼalaxcailh ju mintsʼalh Jesús ju na salaka ixʼalhunut. Chai yuchi ju sacxtʼutʼach ju uxintʼi. 28 Chai ni chunch ju talalh pus uctaxtulh tachi ju aktsʼiya ixnaʼuntʼa ju uxintʼi chai tachi ju ispʼastʼactʼa ni catapasayaʼ. 29 Pus ju chavai ji quiʼucxtin alaktsʼich ju tuchi quintajunan ju aquintaʼulhtuyan. Para ju quijnan ni milapanacni icjuntau pus aquilaʼaktaijuch ni laich acʼajunau ju lapanacni ju minchivinti chai jantu actalhananau. 30 Chai aquilaxtakniuch ju mintachaput ni laich palai acnaviyau ju takʼankʼanin chai lai acnaviyau ju lhamakʼan chai ju tuʼuʼ ju lai catapucʼatsayaʼ ju lapanacni ni vasalh milapanacni icjuntau. Chux ju ani acnaviyau laʼixtachaput ju mintsʼalh Jesús ju na salaka ixʼalhunut. ―Pus chunch ju tatapaininilh ju Dios. 31 Chai acsni tatʼachivinkʼolh ju Dios pus tataclh ju anuʼ chakaʼ junta ixkʼaixtokcan chai ixchuxʼan ju anch ixtavilanalh axtaknikʼo palai lhu ixtachaput ju Spiritu Santu chai tatailhiʼalh ixnajunca ixchivinti Dios chai jantu ixtatalhanan. 32 Chai tachi chun ju ixtalhilacaʼanta Jesús va lakatam ixjunita ixʼalhunutʼan chai va lakatam ixjunita ixtacʼatsanʼan. Chai jantu xamatiʼ ixnajun: ―Ju quiʼalinta va quiʼanuʼ quiʼakstu. Para tachi chun ju taxtokni ixtalaxtakni tachi ju ixmaktasqʼuini pumatam pumatam. 33 Pus ju ixtamalakachan ju Jesús lacakʼai tachaput tatailhiʼalh ixʼajunica ju lapanacni ni vasalh lokʼonchokolh ju ucxtin Jesús junta ixmacnucanta. Chai ju Dios axtaknilh kʼox isʼatsucuntiʼan ixchuxʼan. 34 Pus jantu xamatiʼ ju sia yuʼunch ju ixmaktasqʼuini tuʼuʼ. Para tachi chun ju ixpacxanta ju ixlacatʼunʼan u ixchakaʼan tastʼalh chai talhiminkʼo ju ixtapalh ju isʼastʼantiʼan. 35 Pus yuʼunch ju ixtamalakachan ju Jesús ju axtaknicalh ju anuʼ tumin chai ju yuʼunch taxtaknilh ju ixʼalin ixmaktasqʼuinitʼan. 36 Chunch ixtalai ju lapanacni tachi ju lalh ju José. Ju yuchi vachuʼ ixlhilacaʼanta ju Jesús chai ju ixtamalakachan ju Jesús Bernabé ixtalhimapakaʼuta. Ju chunch va nomputan ni na lai ixmakʼankʼachai xamatiʼ. Pus ju yuchi ixʼapapanatnich ixjunita ju makʼaniya lapanac ju Leví ixjuncan. Chai amachakaʼ Chipre ixjunita. 37 Pus ju yuchi stʼalh ju ixlacatʼun chai lhimilh ju ixtapalh. Alacxtaknilh ju ixtamalakachan ju Jesús.
1 Para ixʼalin vachuʼ apumatam lapanac ju Ananías ixjuncan. Chai ju ixʼamachakaʼ Safira ixjuncan. Pus ju yuʼunch tastʼalh ju ixlacatʼunʼan. 2 Chai ju Ananías chʼapalh lacatsʼunin ju anuʼ tumin. Jantu axtaknikʼo ju ixtamalakachan ju Jesús mas ixmalacasui tachi ju vasalh ixtakkʼota. Vachuʼ cʼatsalh ju ixʼamachakaʼ tuchi ixnavich ju ixpapa. 3 Para ju Pitaluʼ chanich juni ju Ananías: ―Ananías tajuch ni va xalacʼaʼitʼi ni catanu lamintanquilhacni ju lhacaticuru. Yuchach ju xamapastʼacʼaniyan ni laich xalhitʼaʼaklhtʼamai ju Spiritu Santu ni laich xamakʼai lacatsʼunin ixtapalh ju milacatʼun. 4 Acsni tucaʼ istʼai ju milacatʼun ja jantu miʼanuʼ ixjunita. Ju astan ja jantu lamimacaʼ ixmamatʼa ju tumin. Pus tajuch ni va xapʼastʼacʼa lamiʼalhunut ni laich xanavi ju chunch. Jantu anau ni lapanacni ju xalhitʼaʼaklhtʼamai. Alai Dios ju xalhitʼaʼaklhtʼamai. 5 Pus ju Ananías acsni kʼasmatlh junima chivinti taʼaktalh. Lana lhtucu nilh. Chai tachi chun ju takʼasmatlh ju tuchi ixtapasata na kʼox talactalhanalh. 6 Pus ju va paitat lapanacni ju anch ixtavilanalh tataya. Tapachʼilh lacapumpuʼ ju lijunto. Tamaxtulh lacachakaʼ. Taquimacnu. 7 Pus ni tapasalh tachi lakatʼutu hora lana tanucha ixʼamachakaʼ ixjunita. Ju yuchi jantucaʼ iscʼatsai tuchi ixtapasatach. 8 Pus ju acsnich ju Pitaluʼ chani juni: ―Aqʼuiʼunch. Ja chunch xalhistʼayatʼit ju milacatʼunʼan. Chai ju anuʼ chakoʼulh naulh: ―A. Chunch. 9 Chai ju Pitaluʼ chani jumpa: ―Jantu kʼox xalayatʼit ni va chʼanxtam ju xapʼinatʼit ni va islaktsʼimpʼutʼunatʼit ni tuʼuʼ catanaviyan ju iSpiritu Santu ju kʼai ucxtin Dios. Vanin lacamalhtich taminchokota ju xataquimacnui ju mimpapa. Chai catamaxtuyanch vachuʼ ju uxintʼi. 10 Pus lana tin tamacha junta ixya ju Pitaluʼ ju anuʼ chakoʼulh chai nilh. Chai acsni tatanuchokocha ju ixtaquimacnuta ju ixpapa pus talaktsʼilh ni nitach chai tamaxtulh. Taquimacnu vanin junta tamama ju ixpapa. 11 Pus tachi chun ju ixtalhilacaʼanta ju Jesús chai tachi chun ju aliʼin ju takʼasmatlh ju tuchi xatapasai lana na talactalhanalh. 12 Chai ju ixtamalakachan ju Jesús na lhu ixtanavi ju lhamakʼan chai ju tuʼuʼ ju laich caʼixtapucʼatsalh ju lapanacni ni vasalh ixlapanacni Jesús ixtajunita. Laʼixʼucxlacapuʼan ju lapanacni ju tanavi. Chai tachi chun ju ixtalhilacaʼanta Jesús va chʼanxtam ixtatakʼaixtʼokʼa laʼixquilhtalacxtuch ju kʼai ixpujitatʼan ju israelitanin. Ju anuch ixquilhtalacxtuch ixʼanuʼ Salomón ixjuncan. 13 Para ju aliʼin lapanacni jantu xamatiʼ ju ixtatalacasuputun ni makyuʼunch cava ni na ixtatalhoni. Chunch ixtalai mas na kʼox ixʼalhichivincan ju yuʼunch ju ixtalhilacaʼanta ju Jesús. 14 Para aktsʼiya na lhu ju chakolun chai ju jokʼatni talhilacaʼalh ju ucxtin Jesús. 15 Chai ixtamamai ju takʼankʼanin lacatijixni. Laʼixputamanʼan u laʼixtʼakʼatʼan ju ixʼapumacan. Ixtanajun ju lapanacni ni mas va ixmakʼantsastʼilit ju Pitaluʼ calakchaʼanilh acsni catapasayach pus palaich catapujunaʼ. 16 Vachuʼ tamilh ju amachakʼan lakʼachakʼanixni junta va lhivaninch ju lakʼachakʼan Jerusalén. Ixtalhiminch ju takʼankʼanin chai ju ixtanun ju lhacaticuru laʼixtanquilhacniʼan. Chai tachi chun ju yuʼunch pektu palai anavicalh. 17 Pus ju acsnich talhacchaʼanilh ixtachaputʼan ju xakʼai pali chai ju lapanacni ju xaʼalactʼavi ju ixtalhilacaʼanta ju ixlhamapʼaksinʼan ju saduceonin. 18 Pus lana lhinaulh ixʼachʼapaca ju ixtamalakachan ju Jesús chai lhinaulh ixʼalactʼalhnucalh lacapulachʼin. 19 Para ju anuʼ atatsʼisni pumatam ixʼanquilh ju kʼai ucxtin Dios malhtekʼa ju xamalhtich lacapulachʼin. Amaxtulh ju Pitaluʼ chai ju Xivan chai chani ajuni: 20 ―Aʼinchitʼitch lacakʼai ixpujitatʼan ju mintʼaʼisraelitaninʼan. Aʼunaʼitʼitch ju lapanacni chux ju chivinti ixlacata ju ani sastʼi atsucunti. 21 Pus ju Pitaluʼ chai ju Xivan acsni takʼasmatnilh ju ixchivinti ju anquilh talacaʼi. Na vatsʼisincaʼ tatanucha lacpujitat chai tatsuculh amalaninin. Pus vachuʼ ju acsnich ju xakʼai pali chai ju ixtamakʼanta yuchi tamakʼaixtoklh ju xalacpaʼitni ju israelitanin. Yuʼunch ju ixtalhinajun ju anch. Lhinaulh ixʼatʼasanica ju ixtamalakachan Jesús lacapulachʼin. 22 Para ju pulasiyajni acsni tachaʼalh lacapulachʼin jantu xamatiʼ talhitaju. Va chunch tataspʼitchokocha. Taquijunilh ju ucxtinin. 23 Chani tajuni: ―Acsni icchaʼauch ju lacapulachʼin kʼox ixvilhnilh ju xacandado. Chai ju xaʼalhistacnin anchach ixtayanankʼo laxamalhtich. Para acsni tavanan icmalhtekʼau jantu xamatiʼ iclhitaju ju pulacni. ―Chunch tajuni ju ucxtinin. 24 Pus acsni takʼasmatlh ju ani chivinti ju xakʼai tucan pali chai ju xaʼucxtin taropajni ju ixtachʼalhcatnan lacakʼai ixpujitatʼan ju israelitanin chai ju aliʼinch xalackʼajin palijni va talhamakʼaninilh. Talaclajuni ju sia yuʼunch: ―Tijuch nuʼ ju nomputun ju ani. 25 Pus ju acsnich lana chincha pumatam ju quiʼamacʼatsanininchilh tuchi alinch. Chani ajuni ju ucxtinin: ―Ju anuch lapanacni ju xatʼalhnutʼatʼit pus ju chavai tatanumanalh lacakʼai quimpujitatʼan. Tatʼompalai alacmasuninin ju lapanacni. 26 Pus ju acsnich ju xaʼucxtin taropajni ju ixtachʼalhcatnan lacakʼai pujitat alactʼaʼalh ju pulasiyajni. Para va lhikʼox talhimilh ju Pitaluʼ chaich ju Xivan ni va ixʼatalhonican ju lapanacni. Ju taropajni ixtanajunta ni jantu va kʼox ju caʼixʼalhimilh pus jantu xcai ni ixtaʼalacatʼalhmanalh ju lapanacni. 27 Pus acsni alhimincalh aʼulacalh junta ixtavilanalh ju ucxtinin. Chai ju acsnich ju xakʼai pali chani ajuni: 28 ―Ja jantu xaclajunau ni jantuch vana laich amasutʼitch ixlacata ju Jesús. Para ixlaquilhtu malaniyatʼit chux ju amachakʼan Jerusalén ju miʼatalanintiʼan ju uxijnan. Chai vachuʼ quilamucʼaniputunau ju quijnan quintalakʼalhin quincʼan ixlacata ixʼacʼalhni ju anuʼ lapanac. 29 Pus ju acsnich ju Pitaluʼ chai ju aliʼin ixtamalakachan Jesús taʼakʼalhtayanalh. Chani tajuni: ―Aktsʼiya tasqʼuini ni pʼulhnan acquiclacaʼiu ju Dios. Jantiyuʼ ju va quintʼalapanac. 30 Ju uxijnan maknitʼit ju Jesús acsni maquilhtʼatʼit lacacurus. Para ju Dios ju ixtalhilacaʼan ju makʼaniya quilacpaʼitniʼan macxtuchokolh junta ixmacnucanta. 31 Chai ju chavai ju yuchi laʼixtachaput ulalh ju Jesús kʼai ucxtin chai yuchi ju lai aquintamakʼalhtaxtuyan laquiʼalactuʼuntiʼan. Ju chunch tachi chun ju quintʼaʼisraelitaninʼan ni catamacaulh ju ixʼalactuʼuntiʼan tachi ju icmacontauch ju quijnan pus vachuʼ camacʼacxanicanaʼ ju ixtalakʼalhinʼan ju yuʼunch. 32 Pus ju quijnan kʼoxich iclaktsʼiuch acsni tapasalh ju ani taxtokni chai ju Spiritu Santu ju axtaknican tachi chun ju taquiclacaʼini ju Dios vachuʼ amavasalani laʼixʼalhunutʼan ni vasalh chunch ju tapasalh. ―Chunch ju ajunicalh ju ucxtinin. 33 Pus ju ucxtinin acsni takʼasmatlh ju ani chivinti lana na tatalhkʼamalh. Na ixʼamakniputun. 34 Para ixʼalin sia yuʼunch ju ucxtinin pumatam lapanac ju Gamaliel ixjuncan. Ju yuchi ixlhilacaʼani ju ixlhamapʼaksinʼan ju fariseonin chai ismasui ju ixlhamapʼaksin ju Moisés. Chai chux ju lapanacni ixtanajun ni na kʼox lapanac ixjunita ju yuchi. Pus ju yuchi taya chai naulh ni caʼamaxtucalh makspaʼ lacatsʼunin ju ixtamalakachan ju Jesús. 35 Chai chani alacjuni ju ixtʼaʼucxtinin: ―Quintʼaʼisraelitanin alaktsʼintʼitch ju uxijnan tuchʼi anavipʼutʼunatʼit ju ani ya lapanacni. 36 Apʼastʼactʼit ni ixʼalin ju makʼanchich pumatam lapanac ju Teudas ixjuncan. Ju yuchi ixnajun ni xakʼai ixjunita. Chai ixtʼalasaputun ju kʼai ucxtin. Chai na lhu tava ju ixlapanacni. Tachi lakatʼatʼi cientos. Para ju taropajni tamakni ju yuchi. Chai tachi chun ju ixtachʼakʼokʼata ju yuchi chux amakpitsikʼocalh. Chai anchach ju tamactalh. 37 Chai astan ixʼalin pumatam amachakaʼ Galilea ju Judas ixjuncan. Acsni ixtʼajun ju yuchi pus ixtʼoncan atsʼokʼulanaʼ ju lapanacni. Pus na lhu lapanacni tachʼakʼokʼalh ju yuchi. Para vachuʼ maknicalh chai tachi chun ju ixtachʼakʼokʼai amakpitsikʼocalh. 38 Pus yuchi iclalhijunau ju chavai ni amacʼaʼuntʼit ju ani ya lapanacni. Jantu xtuʼuʼ aʼulhtʼutʼit. Pus ju ani ixlhichʼalhcatʼan ni va xanavin lapanacni junita pus jantu tuʼuʼ calhitapalaʼ. 39 Para ni ixʼanuʼ ju Dios pus jantu lai atʼilakʼalhitʼit. Pus ni va amamactʼapʼutʼunatʼit jantu xcai ni Dios ju atʼalasatʼit. ―Chunch ju ajunicalh ju ucxtinin. 40 Pus ju ixtʼaʼucxtinin taquiclacaʼinilh ju ixchivinti. Alactʼasanicalh ju ixtamalakachan ju Jesús. Chai talhinaulh ixlakanekmaca. Alhimapʼaksicalh ni jantu catatailhiʼalh ixʼamalanintiʼan ixlacata ju Jesús. Chai astan amacajuncalh. 41 Pus ju ixtamalakachan ju Jesús acsni tataxtucha lacapuʼucxtin na talhikʼachalh ni tuʼuʼ xaʼalhiulai ju Dios ni xalacasqʼuin ni caʼamamaxanicalh ixlacata ju Jesús. 42 Chai chux avilhchan lacakʼai ixpujitatʼan ju istʼaʼisraelitaninʼan chai lakʼachakʼanixni va tachi ixtaʼamalani ju lapanacni ni Jesús yuchi ju ixnoncan camalakachatachilh ju Dios.
1 Ju acsnich avilhchan na ixtatalhavata ju lapanacni ju ixtalhilacaʼanta ju Jesús. Pus alilh lakatam laklakʼaiti ju sia yuʼunch. Pus ju israelitanin ju ixtachivinin ju lhigriego tatʼalakʼailich ju israelitanin ju ixtachivinin ju lhihebreo. Ju yuʼunch ju ixtachivinin ju lhigriego talhitalhkʼamalh ta yu aʼulhtucalh ju tʼacunin sia yuʼunch ju ixʼanimacontilacanta. Ixtanajun ni ma va lacatsʼunin ixʼaxtaknican ju vaiti ju ixmakpitsican chux tuncujun. 2 Pus ju acsnich ju ixpumacautʼuiʼan ixtamalakachan ju Jesús tamakʼaixtoklh ju aliʼin ju ixtalhilacaʼanta ju Jesús chai chani tajuni: ―Ca jantu kʼox cativa ni va acmacaju ismasuca ju ixchivinti Dios ju quijnan chai acmakpitsiyau ju vaiti. 3 Pus ji quiʼalakʼavin yuchi iclalhijunau ni apʼuxcʼaʼutʼit pumatujun jokʼatni ju milhiʼuxijnan ju kʼox lapanacni alhiulacanta chai ju makʼaxtaknikʼota isʼatsucuntiʼan ju Spiritu Santu chai ju na taʼacʼatsananta. Yuʼunchach ju laich catanaviyaʼ ju anuʼ lhichʼalhcat. 4 Chai ju quijnan va tachi actʼachivininauch ju Dios chai acʼamalaniniyau ju ixchivinti. ―Chunch ajunicalh ju ixtalhavat lapanacni. 5 Pus ju ixtalhavat lapanacni na kʼox talhiula ju anuʼ chivinti chai tasacxtulh ju Stipan. Ju yuchi ixlhilacaʼanta ju Jesús ixlhichux ixʼalhunut chai ixmakʼaxtaknikʼota ju isʼatsucunti ju Spiritu Santu. Vachuʼ tasacxtulh ju Pilipe chaich ju Prócoro chaich ju Nicanor chai ju Timón chai ju Parmenas chai ju Nicolás amachakaʼ Antioquía. Ju yuchi jantu israelita ixjunita para acsni tucaʼ ixlhilacaʼanta ju Jesús ixlhilacaʼanta ju Dios tachi ju ixtalai ju israelitanin. 6 Pus ju anuʼ ixpumatujunʼan akʼailhiminicalh ju ixtamalakachan ju Jesús. Chai ju yuʼunch tasqʼuinilh ju Dios ixlacataʼan chai tamamanilh ixmacaʼan laʼixlacatunaʼan ju ixpumatujunʼan. 7 Pus palai ixmakpitsican ju ixchivinti Dios chai na lhu lana va ju ixtalhilacaʼanta ju Jesús ju lakʼachakʼan Jerusalén. Vachuʼ na ilhuʼan ju ixpalijni ju israelitanin ju talhilacaʼalh ju Jesús. 8 Pus ju Dios na lhu ixʼaktaijui ju Stipan chai ixtaknita ju ixtachaput. Pus ju yuchi ixnavi kʼai lhamakʼan chai ju tuʼuʼ ju lai catapuʼalacpastacnalh ju lapanacni. Ixʼanavi laʼixʼucxlacapuʼan ju lapanacni. 9 Pus ju acsnich ixʼalin ju lapanacni ju ixtataxtutach laʼixpuxalapanacʼan chai ixtayajuta ixpujitatʼan. Chai sia yuʼunch vachuʼ ixʼalin ju amachakʼan Cirene chai amachakʼan Alejandría. Pus ju yuʼunch chai ju amachakʼan xalacatʼun Cilicia chai ju amachakʼan ju xalacatʼun Asia tatʼalakʼailh ju Stipan. 10 Para jantu lai tavanan tatʼalalhajalh ni yuchi ju Spiritu Santu ju xaxtakni ju Stipan ju kʼox ixtacʼatsan. 11 Ju acsnich axtaknicalh tumin ju aliʼin lapanacni ni va catapunaulh taʼaklhtamat. Catanaulh ni takʼasmatlh ju Stipan ni ma canaulh macxcai chivinti ixlacata ju Moisés chai ixlacata ju Dios. 12 Pus chunch tapumaktalhkʼamalh chux ju lapanacni chaich ju xalacpaʼitni ju israelitanin chai ju yuʼunch ju na ixtalhatalanininta ju ixlhamapʼaksinʼan ju istʼaʼisraelitanin. Chai ju yuʼunch talakʼalh ju Stipan. Tachʼapalh chai talhiʼalh lacapuʼucxtin. 13 Chai talhiʼalh vachuʼ ju lapanacni ju catanonach taʼaklhtamat. Chanich ixtanajun: ―Ju ani lapanac jantu mamactai ju ixnajunca ju macxcai chivinti ixlacata ju ani ixpujitat Dios chai ixlacata ju quilhamapʼaksinʼan. 14 Ickʼalhakʼasmatʼauch ni ixnajun ni ma yuchi ju Jesús amachakaʼ Nazaret ju ma camaktayaʼ ju ani kʼai quimpujitatʼan chai ma camapaxayaʼ ju tuchi ixʼajuni ju Moisés ju makʼaniya quilacpaʼitniʼan ni catanavi chai tus chavai naviyau. ―Chunch ixtanajun ju taʼaklhtamanin lapanacni. 15 Chai ju acsnich chux ju ucxtinin chai chux ju ixtavilanalh lacapuʼucxtin va taskotutulh ju Stipan. Talaktsʼilh ju ixʼucxpuʼ ni na ixʼalin ju atuncunuʼ tachi ju junita ixʼucxpuʼ ju tam anquilh.
1 Pus ju acsnich ju xakʼai ixpali ju israelitanin chani juni ju Stipan: ―Ja vasalh chunch tachi ju tanajun. 2 Chai ju Stipan chani akʼalhtayanalh: ―Quintʼalapanacni. Quiʼalakʼavin. Xalacpaʼitnich ju ani lakʼachakʼan. Aquilakʼasmatniuch. Na kʼaich ju Dios. Chai yuchach ju talacasunilh ju makʼaniya quimpaiʼan Abraham acsni ixvilhchacaʼ ju xalacatʼun Mesopotamia acsni tucaʼ ixʼan tsucunuʼ ju lakʼachakʼan Harán. 3 Chai ma chani junicalh ju Abraham: “Atʼaxtʼuch ju lamintʼun. Amacʼoʼulatʼi ju milhiʼalakʼavin. Apʼinchich ju lacatʼun junta acmasuniyan ju quitʼin”. Ma chunch ju juni ju Dios ju Abraham. 4 Pus ju Abraham taxtulh ju xalacatʼun Caldea. Alh tsucunuʼ ju lakʼachakʼan Harán. Chai acsni nichalh ju ixpai pus ju Abraham taxtuchokolh chai ju Dios kʼailhimilh ju ani lacatʼun junta tʼonau ju chavai. 5 Para ju Dios jantu xtaknilh ju Abraham ju ani lacatʼun ju acsni. Nin lacatsʼunin tachi ju lai calhijunlh ixchʼajaʼ. Para ju Dios ixjunita ni ma ixʼanuʼ cajunaʼ ju ani lacatʼun chai ma ixʼanuchʼan cajunaʼ ju isʼaskʼatʼan astan. Ma chunch ju juni ju Dios mas maticaʼ ixjunita isʼaskʼatʼa ju acsnich. 6 Ju Dios juni ni ma alacatam lacatʼun catatsucuyanta ju ixʼapapanatnich chai ma va xalapanacni catajunaʼ ju yuʼunch. Chai ma calaclhimakchapucanaʼ tachi lakatʼatʼi cientos cʼata. 7 Chai ju Dios juni ni ma isʼakstu ju camamakʼalhkʼajniyaʼ ju amachakʼan ju anuʼ lakʼachakʼan junta va xalapanacni catajunaʼ. Chai ju astanch ma catataxtuyaʼ ju ixʼapapanatnich ju Abraham chai ma catalakʼayayaʼ ju Dios ju ani. Ma chunch ju juni ju Dios ju Abraham. 8 Pus ju Dios lhitʼatakʼoxilh lakatam chivinti ju Abraham chai juni ni ma cachʼucʼunicalh ju ixʼaxtʼakʼa isʼakstu ju Abraham chai ixʼaxtʼakʼa tachi chun ju istsʼalan. Ma va ispupastaccan ni ixlhitʼatakʼoxita ju chivinti ju Dios ju Abraham. Pus acsni tavanan tsuculh ju istsʼalh ju Isaac ixjuncan pus ju Abraham chʼucʼunilh ju ixʼaxtʼakʼa ixlhilakatsajin avilhchan. Chai ju Isaac acsni alilh ju istsʼalh ju Jacob ixjuncan vana chʼucʼunilh ixʼaxtʼakʼa ju yuchi. Chai ju Jacob acsni alilh ju isʼaskʼatʼa vachuʼ chunch anavikʼo ju ixpumacautʼuiʼan istsʼalan. Pus ju anuʼ ixpumacautʼuiʼan xapaʼitnich tava ju quilhmaccautʼui ju quintʼaʼisraelitaninʼan. 9 Pus ju pumatam ixlhipumacautʼuiʼan istsʼalan Jacob José ixjuncan. Chai ju ixʼalakʼavin ju José na taxcailich ju yuchi. Tastʼanilh ju aliʼin lapanacni ju talhiʼalh alacatam lacatʼun junta Egipto juncan. Para Dios ju ixtʼaʼanta ju yuchi. 10 Chai astan ju Dios makʼosunikʼo tachi chun ju ixmakʼalhkʼajnat. Chai ju Dios ni na aktaijulh ju José pus ju xakʼai ucxtin Egipto ju Faraón ixjuncan na kʼoxich lapanac lhiula. Chai ni laktsʼilh ni na kʼox ixjunita ixʼatalacpastʼacʼat pus ulalh ju José lacatʼicstʼi ucxtin ju lakʼachakʼan Egipto. Vachuʼ junilh ni ixʼucxtinʼan cajunaʼ tachi chun ju ixtachʼalhcatnan laʼixchakaʼ. 11 Chai ju acsnich alilh kʼai chavan chai kʼai makʼalhkʼajnat tachi ixlhilacaputsʼun ju xatʼun Egipto chai ju xatʼun Canaán. Pus ju quilacpaʼitniʼan jantuch lai ixtalhitajui ju tuchi cataʼulh. 12 Para ju Jacob ni kʼasmatlh ni ixʼalin ju vaiti ju anch ju Egipto pus alacmalakachalh ju istsʼalan. Pus ju yuʼunch makʼaniya quilacpaʼitniʼan tajunita. 13 Chai ju yuʼunch acsni taquiʼilh ju vaiti ju ixlhipaktʼuich pus ju José ajunilh ni ixlakʼauchʼan ixjunita. Vachuʼ ju Faraón alacmispalh ju ixʼalakʼavin ju José. 14 Chai ju acsnich ju José alacmalakachachokolh ixʼalakʼavin laʼixtʼunʼan. Lhinaulh istʼasanica ju ixpaiʼan ju Jacob ixjuncan. Vachuʼ ajuni ni catalhimilh tachi chun ju ixtatanumanalh laʼixchakaʼan. Pus ixtachaʼanta setenta y cinco lapanacni. 15 Pus yuchi lhiʼalh tsucunuʼ ju Jacob ju xalacatʼun Egipto. Chai anch ju nichalh ju yuchi chai lhu ju makʼaniya quilacpaʼitniʼan. 16 Chai acsni tani alhiʼancalh lakʼachakʼan Siquem. Anch ju amakʼacalh ju ixlacatunaʼan junta lhucucu talhpa ixjunita. Anch junta tamaulh ju Abraham. Ju yuchi ixʼaxtaknita tumin ju istsʼalan ju Hamor amachakʼan Siquem ni yuʼunchach ju tastʼalh. 17 Para acsni vaninch ixchimputunch ju avilhchan ni caʼuctaxtuyach ixchivinti Dios ju ixmavasalanicanta ju Abraham pus ju ixʼapapanatnich ju Israel slivasalh tatalhavalhch ju xalacatʼun Egipto. 18 Chai astan apumatam tavilh lacapuʼucxtin ju xalacatʼun Egipto. Pus ju yuchi jantu iskʼasmatʼa ixlacata ju José ni makʼanchich ixnita ju yuchi. 19 Pus ju anuʼ kʼai ucxtin aʼokxchokʼolh ju quintʼaʼisraelitaninʼan chai alaclhimakchapulh ju makʼaniya quilacpaʼitniʼan. Amapʼaksi ni catamacaʼalh makspaʼ ju istsʼalan acsni tavanan catatsuculh. Ju chunch ixnajun ni caʼixtanikʼo ju tsʼalan. 20 Pus ju acsnich lakʼaulh ju Moisés chai na kʼoxich lhiula ju Dios. Pus lakatʼutu malhquiyuʼ xatakʼayai laʼixchakaʼ ju ixpai. 21 Para astan acsni ixmakʼancanta ju anuʼ tsʼalh pus istsiʼ ju Faraón ju saclh. Lakʼayalhch. Laktsʼilh tachi ju va istsʼalh. 22 Pus ju Moisés lhaʼatalaninilh tachi chun ju ixtalhaʼatalaninintach ju amachakʼan Egipto. Chai na lai ixchivinin chai na lai ixnavi ju tuʼuʼ. 23 Acsni laktsa tʼupʼuxam cʼata ju Moisés pus ju yuchi pastaclich laʼixʼalhunut ni caʼalh laktsʼiniʼ ju ixtʼaʼamachivinti. 24 Chai ju anch ju yuchi laktsʼilh pumatam amachakaʼ Egipto ju ixtʼajun lhimakchapunuʼ pumatam istʼaʼisraelita. Pus ju Moisés lhikʼalhtsaulh. Maknilh ju amachakaʼ Egipto. Ixnajunch ni chunch camalacchoyaʼ tachi ixʼulhtui ju anuʼ lapanac. 25 Pus ju Moisés ixnajunch ni caʼixtamachakxa ju istʼaʼisraelitanin ni Dios ju xamalakachai ni caʼamaxtuyaʼ laʼixmakʼalhkʼajnatʼan. Para ju yuʼunch jantu tamachakxa. 26 Ni tuncunchokopa aktam anchokopa ju Moisés chai ju acsnich laktsʼilh ixtʼiyunʼan istʼaʼisraelitanin ju ixtatʼajun lasanin. Pus ju Moisés ixʼalhvakputun chai chani alacjuni: “Quintʼalapanacni ju uxijnan ni va lhiʼalakʼavin umpʼalhtʼatʼit. Tas ni va lalhimakchʼapʼupʼalatʼit milhiʼuxijnan”. 27 Pus ju acsnich ju ixtʼajun tʼalakʼainaʼ ixtʼatolhnaʼ pʼok samakʼalh ju Moisés chai juni: “Tis chavaich ju xaʼulatan quiʼucxtin quincʼan chai ixlakʼoxiniʼ quilhamakʼan quincʼan. 28 Ja vachuch va qʼuimaknipʼutʼun tachi ju navitʼi cutanch ju amachakaʼ Egipto”. 29 Pus acsni kʼasmatlich ju ani chivinti ju Moisés atsʼalalh. Alh tsucunuʼ alacatam lacatʼun junta Madián ixjuncan. Chai ju anch tamakʼaxtokchalhch chai alilh pumatʼui istsʼalan. 30 Acsni tapasalh tʼupʼuxam cʼata pus ju Moisés ixvi junta va aseknicʼa. Anch ixvi vanin ju anuʼ talhpa ju Sinaí juncan. Chai anchach ju talacasunilh pumatam ixʼanquilh ju kʼai ucxtin Dios. Ixtʼajun lhcunuʼ lakatam achʼitin chai anch lacaʼalapnaʼ talacasunilh ju anquilh. 31 Pus ju Moisés ni laktsʼilh va lhamakʼaninilh chai lakʼalh. Va islaktsʼimputun tuchi ixtalakxtuch. Para lana kʼasmatnilh ju ixchivinti ju kʼai ucxtin Dios. 32 Chai ju yuchi ma juni ni ma yuchach ju Dios. Ma yuchi ju talhilaksilh ju makʼaniya ixlacpaʼitni Moisés ju Abraham chai Isaac chai Jacob ixʼajuncan. Chunch ma juni ju Dios. Pus ju acsnich ju Moisés lana na alhqʼuipʼipʼitnilh acsni laktsʼilh. Jantuch lacaʼamputulhch. 33 Chai ju kʼai ucxtin Dios ma junchokopa ni ma cachʼanmaxtulh ju ixchʼanxtʼakʼan ni ma ixya laʼixʼucxlacapuʼ ju Dios chai ma yuchach ju tucan Dios. 34 Ju yuchi ma laktsʼilh ju ixmakʼalhkʼajnat ju ixlapanacni ju ixtavilanancha Egipto. Chai ma kʼasmatlh ni na ixtalactʼasai. Ma yuchi ixlhiminta amakʼalhtaxtunuʼ. Chai ma juni ni ixmalakachaputun ju Moisés ju Egipto. Ma chunch ju juni ju Dios. 35 Pus ju Dios malakachalh ju Moisés chai ju anuʼ anquilh ju talacasunilh lacaʼachʼitin aktaijulh ni lai xajun ucxtin chai lai xaʼamakʼalhtaxtui ju istʼaʼisraelitanin ju xalacatʼun Egipto. Ju Dios amalakachanilh ju Moisés ju istʼaʼisraelitanin mas jantu kʼox ixtalhiulai ju pʼulhnan. Ma va chani ixtajunich: “Tis chavaich ulatan quiʼucxtin quincʼan chai ixlakʼoxiniʼ ju quilhamakʼan quincʼan”. Ma chun ixtajuni. 36 Pus ju Moisés navilh lhu kʼai lhamakʼan chai lhu tuʼuʼ ju lai catapucʼatsalh ju lapanacni ni vasalh Dios ju xamalakachayachilh. Anchach ju laxalacatʼun Egipto ju xanavi ju lhamakʼan chai anch ju laxaʼalama junta slapulh juncan. Vachuʼ lhu xanavi ju kʼai lhamakʼan junta va aseknicʼa junita. Anch junta ixtalacʼucxuntʼajun ju quintʼaʼisraelitaninʼan tʼupʼuxam cʼata. 37 Yuchach ju Moisés ju alacjuni ju quintʼaʼisraelitaninʼan ni ma casacxtuyaʼ ju kʼai ucxtin Dios pumatam ju sia yuʼunch tachi ju sacxtucanta ju yuchi. Chai ju yuchi ni ma canonaʼ ixchivinti Dios pus ma catakʼasmatnilh. 38 Yuchach ju Moisés ju ixʼalactʼavi ju quintʼaʼisraelitaninʼan junta aseknicʼa. Chai yuchach ju tʼachivinilh ju anquilh ju laxatalhpa Sinaí chai astan alacjuni ju makʼaniya quilacpaʼitniʼan ju ixchivinti Dios. Yuchach vachuʼ ju xtaknicalh ju chivinti ixlacata ju atsucunti lactʼiyan ni laich vachuʼ cacʼatsayau ju quijnanʼan. 39 Para ju makʼaniya quilacpaʼitniʼan jantu ixtakʼasmatniputun ju Moisés. Jantu ixtalacasqʼuin ni ixʼucxtinʼan cava ju yuchi. Va ixtaʼanchokoputun ju xalacatʼun Egipto. 40 Pus ju Moisés ixvilhchacaʼ ju laxatalhpa Sinaí acsni tajuni ju Aarón ju quintʼaʼisraelitaninʼan ni ma caʼanavinilh tuʼuʼ ju ma isdiosʼan cajunaʼ chai ju ma caʼapʼulhniyach ju lacati. Ma jantu ixtacʼatsai tuchi ixtapasata ju anuʼ Moisés ju amaxtulh laxalacatʼun Egipto. Ma chunch tajuni ju Aarón. 41 Pus ju acsnich taxapalaxtulh lakatam askʼatʼa vacax chai tamakninilh ju borregojni. Na talhikʼachalh ju anuʼ ixtalaktsʼinta tachi isdiosʼan ju ixtanavita laʼixmacaʼan. 42 Pus yuchi alhimacaulh ju Dios chai lakʼaʼilh ni chach talhilacaʼalh ju xataxtokni ju lactʼiyan tachi ju avilhchan chai ju malhquiyuʼ chai ju stʼacu. Pus tachi ju talalh tsʼokcanta laʼixʼalhiquiʼan ju lapanacni ju ixtanajun ixchivinti Dios. Ju anch najun ni ma chani naulh ju Dios: Ju israelitanin acsni ixtaʼucxuntʼajun tʼupʼuxam cʼata junta aseknicʼa ja ma yuchach cava ju tamakninilh ixborregojniʼan chai talakxavanilh ju ixvacaxʼan. Ma jantu. 43 Alai ma va ixtachʼixlhiʼan ju lona chakaʼ junta ixtamakʼata ju isdiosʼan ju Moloc ixjuncan. Chai ma ixtalhilacaʼan ju anuʼ tachi stʼacu ju ixtaxapalaxtuta chai ju talhimapakaʼulh Renfán. Ma va yuchi ju talhilacaʼalh ju ixtanavita isʼakstuʼan. Pus ixlhiyuchi ma camamakʼalhkʼajniyaʼ ju Dios. Ma isʼakstu Dios ju ma caʼamalakachatachilh ju amachakʼan alacatam lacatʼun lhiʼavinti ju xalacatʼun Babilonia. Chai ma catalhiʼanaʼ ju anuch lapanacni chai ma xalapanacni catanaviyanta. Ma chunch ju xaʼatsʼoknuncan laʼixʼalhiquiʼan ju ixlapanacni Dios. 44 Pus ju makʼaniya quilacpaʼitniʼan acsni ixtaʼucxuntʼajun junta aseknicʼa ixtanavita lakatam lona chakaʼ junta ixtamakʼata ju chiux junta istsʼokcanta ixlhamapʼaksin ju Dios. Chunch ju tanavilh ju anuʼ chakaʼ tachi ju lhinaulh ju Dios. Chun tachi ju masunicalh ju Moisés. 45 Chai astan ju makʼaniya quilacpaʼitniʼan ju ixtatʼajun acsni kʼai ucxtin ixjunita ju Josué vachuʼ tachʼixlhiʼalh ju anuʼ lona chakaʼ acsni taquitaiʼinilh ixlacatʼunʼan ju jantu istʼaʼisraelitaninʼan ixtajunita. Dios ju axcoxtulh ju amachakʼan anch. Chai ju anuʼ lona chakaʼ ixpujitatʼan ixtanavita ju makʼaniya quintʼaʼisraelitaninʼan tus acsni tsuculh ju David. 46 Pus ju Dios na kʼox xalhiulai ju David chai ju David sqʼuinilh lamapainin ni laich canavi lakatam kʼai pujitat. Canavinilh isDios ju vachuʼ isDios ixjunita ju makʼaniya lapanac ju Jacob ixjuncan. 47 Para jantu lacasqʼuinilh ju Dios. Alai yuchi ju istsʼalh David ju Salomón ixjuncan ju lhinaulh ixyajuca ju kʼai pujitat. 48 Para ju vilhcha talaclhman jantu anch ju tʼajun junta va yocantach lacamacaʼ. Vachuʼ chunch naulh ju makʼaniya lapanac ju ixnajun ixchivinti Dios. Ju yuchi chani naulh: 49 Ju kʼai ucxtin Dios ma najun ni lactʼiyan ju lhinajun chai ma vachuʼ ju ani lacamunutpaʼ. Pus tis ma chakach ju lai catayoniyaʼ ju va lapanacni. Ju yuchi ma jantu jintaʼ astacnan. 50 Ma ja jantu yuchi jumpalata ju navikʼota tachi chun ju taxtokni. Ma chunch ju najun ju Dios. 51 Para iclajunau ni na kʼox pʼas ju miʼalhunutʼan ju uxijnan. Ju uxijnan mas malacʼasupʼalatʼit tachi ixlapanacni Dios para lana jantu kʼasmatpʼutʼunatʼit ju ixchivinti. Lana jantu lacʼaʼipʼutʼunatʼit. Ju uxijnan aktsʼiya sastʼucʼatʼit acsni taxakʼalayan ju Spiritu Santu. Tachi ju ixtalai ju makʼaniya milacpaʼitniʼan chunchach vachuʼ ju layatʼit ju uxijnan. 52 Ju makʼaniya lapanacni ju ixtanajun ixchivinti Dios si alacmamakʼalhkʼajnikʼocalh. Tamamakʼalhkʼajnilh ju milacpaʼitniʼan. Chai vachuʼ alacmaknikʼo ju pʼulhnan taquinonchilh ni ma caminach pumatam ju soknicʼa ju isʼatsucunti. Chai ju chavai ni quilachilh ju yuchi pus ju uxijnan makʼaxtʼaknitʼit ju ucxtinin chai maknitʼitch. 53 Mas yuʼunch ju anquilhnin ju xataxtakniyan ju ixlhamapʼaksin Dios para ixlaquilhtu jantu navitʼatʼit. ―Chunch ju ajuni ju ucxtinin ju Stipan. 54 Chai ju ixtavilanalh acsni takʼasmatlh ju ixchivinti ju Stipan pus lana na tatalhkʼamalh. Tamalatantsʼacakʼo ju istatsalatʼan ixtalhkʼamtiʼan. 55 Para ju Stipan ni ixlhinonkʼojui ju Spiritu Santu laʼixʼalhunut pus skotutulacaʼalh ju lactʼiyan. Laktsʼilh ju Dios chai cʼatsalh ni yuchach ju lhinonkʼojui chux. Chai vachuʼ laktsʼilh ju Jesús ju ixya laʼixlhicana ju Dios. 56 Chai chani naulh ju Stipan: ―Alaktsʼintʼitch. Talhtekʼa ju lactʼiyan chai iclaktsʼin ju yuchi ju malakachatachilh ju Dios ni lapanac catsucuyaʼ ju ani. Chai ju yuchi ya vanin junta vi ju Dios. 57 Pus ju acsnich ju ucxtinin tsʼau tsʼau talactʼasalh. Lana alaccʼatuchʼapacalh. Chai talakʼalh ixchuxʼan. 58 Tatixcauxtulh ju anuʼ lakʼachakʼan. Chai acsni tamaxtulh ixcujuʼan taxtaknilh pumatam tsʼalh ju Saulo ixjuncan. Astan talacatʼalhmalhch ju Stipan. 59 Pus acsni ixtatʼajun lacatʼalhmanin ju Stipan pus ju yuchi chani juni ju Dios: ―Quiʼucxtin Jesús aqʼuimaklhtʼaich ju quintacuvin. 60 Acsni nonkʼo ju chunch pus lana taʼaktsokotalh. Na pʼas chivinilh. Chani naulh: ―Quiʼucxtin Dios tun alhimamakʼalhkʼajnitʼi ju ani ya lapanacni ixlacata ju tuchi quintanavi. Chai acsni naulh ju chunch lana nilh.
1 Ju Saulo na lhikʼachalh acsni maknicalh ju Stipan. Chai ju acs avilhchan vachuʼ na amamakʼalhkʼajnicalh ju amachakʼan Jerusalén ju ixtalhilacaʼanta ju Jesús. Pus ixlhiyuchi taʼakpitsikʼo. Taʼalh ju xaʼestado Judea chai ju Samaria. Va yuʼunch ju ixtamalakachan ju Jesús ju jantu xatataxtui. 2 Pus ju aliʼin lapanacni ju ixlhichux ixʼalhunutʼan ixtalhilacaʼanta ju Dios taquimacnulh ju Stipan. Chai slivasalh na ixtalhikʼalhun. 3 Para ju Saulo tailhiʼalh ixmamakʼalhkʼajnica ju ixtalhilacaʼanta ju Jesús. Ju yuchi ixtanui lakʼachakʼanixni chai ixʼaxakʼamaxtui ju jokʼatni chai tʼacunin chai alacquimakʼaxtakcalh lacapulachʼin. 4 Para tachi chun ju taʼakpitsilh ixtalacquilhuntʼajun ixchivinti Dios vanta anchach ixtachaʼan. 5 Pus pumatam sia yuʼunch Pilipe ixjuncan. Ju yuchi alh lakatam lakʼachakʼan laxaʼestado Samaria chai alacjunich ju amachakʼan anch ixlacata ju yuchi ju ixnoncan camalakachatachilh Dios. 6 Pus tatakʼaixtoklh ju lapanacni chai ixlhichux ixʼalhunutʼan takʼasmatnilh ju tuchi ixnajunch ju Pilipe. Vachuʼ ixtalaktsʼinch ju lhamakʼan ju ixnavi. 7 Ju anch na lhu ixʼalin ju lapanacni ju ixtanun ju lhacaticurulhni laʼixʼalhunutʼan. Chai acsni alackʼajicalh pus ju lhacaticurulhni tsʼau ixtalactʼasai chai ixtataxtui laʼixlacatunaʼan ju lapanacni. Chai na lhu palai ixʼanavicanta ju va ixtalaclhtuculunta chai ju aliʼin ju jantu lai ixtaʼalhtanan. 8 Pus yuchi na ixtalhikʼachan ju amachakʼan Samaria. 9 Para ixtʼajun ju anch pumatam lapanac ju ixjuncan Simón. Ju yuchi alhicujnuʼ ixjunita ju anuch lakʼachakʼan tus makʼanchich. Chai na ixʼaʼokxchokʼoi ju amachakʼan anch. Ju yuchi ixtalacasui tachi ju tam xakʼai. 10 Pus tachi chun ju lapanacni na ixtaquiclacaʼini ju ixchivinti. Mas yuʼunch ju askʼatʼan chai ju palai lackʼajin. Va ixtanajunch ni Dios ju xaxtakni ju kʼai ixtachaput. 11 Na ixtaquiclacaʼitach ni na makʼanch ju xaʼalacʼokxchokʼolhitʼajun laʼixʼalhicujnut. 12 Para acsni quilacha ju Pilipe chai ajuni ni Dios lhinomputun laʼisʼatsucuntiʼan ju lapanacni chai ajuni ixlacata ju Jesús ju ixnoncan camalakachatachilh ju Dios pus taquiclacaʼilh ju jokʼatni chai ju tʼacunin chai taʼakpaxlich. 13 Chai vachuʼ lacaʼilh ju Simón chai akpaxlh. Chai tʼaʼalhtanatsuculh ju Pilipe. Chai na ixlhamakʼaninin acsni ixlaktsʼin ju kʼai lhamakʼan ju ixnavi ju Pilipe chai acsni ixnavi ju tuʼuʼ ju lai catapucʼatsalh ju lapanacni ni vasalh Dios ju xamalakachayachilh. 14 Pus ju ixtamalakachan ju Jesús ju ixtavilanancha Jerusalén acsni takʼasmatlh ni ixtaʼamaklhtayananta ju ixchivinti Dios ju amachakʼan Samaria pus alacmalakachacancha ju Pitaluʼ chai ju Xivan. 15 Chai ju yuʼunch acsni tachaʼalh tatapaininilh ju Dios ixlacaʼatalhʼan ju amachakʼan anch ni laich catanu vachuʼ laʼixʼalhunutʼan ju yuʼunch ju Spiritu Santu. 16 Pus tucaʼ ixtanui ju Spiritu Santu laʼixʼalhunutʼan ju yuʼunch. Va yuchi ni ixtaʼakpaxtach ni ixtanajun ni ixtalhilacaʼamputun ju ixʼucxtinʼan Jesús. 17 Pus ju acsnich ju Pitaluʼ chai ju Xivan tamokslanilhch ixmacaʼan laʼixlacatunaʼan ju yuʼunch chai lanach tanu laʼixʼalhunutʼan ju Spiritu Santu. 18 Pus ju Simón acsni amaklaktsʼilh ju ixtamalakachan ju Jesús ni ixtamokslai ixmacaʼan laʼixlacatuna apumatam chai lana tanulh ju Spiritu Santu laʼixʼalhunut pus akʼalhtasunilh ju tumin. 19 Chai chani ajuni: ―Aqʼuixtʼakninch vachuʼ junima tachaput. Ju chunch va tichi chavaich ju acmokslaniyaʼ ju quimacaʼ laʼixlacatuna catanuyaʼ ju Spiritu Santu laʼixʼalhunut. 20 Para ju Pitaluʼ chanich juni: ―Ju uxintʼi chai ju mintumin apʼinaʼitʼit lacajipi ni laich naʼun ni laich tamocan lacatumin ju tuʼuʼ ju xtʼakʼa ju Dios. 21 Ju uxintʼi jantu lai atʼimaknavitʼi ju ani ixlhichʼalhcat ju Dios. Chai jantu lhijun ni anavitʼi ni jantu salaka ju miʼalhunut laʼixmacni Dios. 22 Pus ju chavai amacʼauch ju macxcai miʼatalacpastʼacʼat. Atʼapʼaininin ju ucxtin Dios ni camacʼacxanin ju macxcai miʼatalacpastʼacʼat ju alin lamiʼalhunut. 23 Ju quitʼin iccʼatsai ni na tʼalasai ju ixtaxtokni Dios ju uxintʼi. Chai ju miʼalactuʼunti tachi ju va tachʼin navitan. ―Chunch ju junicalh ju Simón. 24 Pus ju acsnich akʼalhtayanalh ju Simón. Chanich ajuni: ―Asqʼuinitʼit ju uxijnan ju quiʼucxtinʼan Dios ju quilacata ni jantu chun actapasalh tachi ju quilajunau. 25 Pus ju Pitaluʼ chai ju Xivan alacjuni ju lapanacni tuchi ixtalaktsʼin ju ixnavi ju Jesús chai alacjuni ixlacata ju kʼai ixʼucxtinʼan Jesús. Chai acsni tataxtulh ju anch tatapasatilalh lakatamin lakatamin lakʼachakʼan tus tachaʼalh ju lakʼachakʼan Jerusalén. Para acsni ixtapasatilai ju lakatamin lakʼachakʼan ju alin ju xalacatʼun Samaria ixʼajuni ju amachakʼan anch ta yu laich putakʼalhtaxtucan ni jantu ancan ju lacajipi. 26 Chai acsni tapasalh ju ani taxtokni pus pumatam ixʼanquilh ju kʼai ucxtin Dios xakʼala ju Pilipe chai chani juni: ―Ju chavai apʼinchich ju lhisur. Apʼupʼitʼi ju xati lakʼachakʼan Gaza ju tachʼapai ju lapanacni acsni taminacha ju lakʼachakʼan Jerusalén. ―Chunch ju juni. Pus ju anuʼ ti yuchach ju tapasata junta jantu xamatiʼ tʼajun. 27 Pus ju Pilipe taxtulh. Alh. Chai anch ju lacati ixtaimai pumatam lapanac amachakaʼ Etiopía. Pus ju yuchi xakʼai ixjunita laxalacatʼun Etiopía junta xaʼucxtin ixjunita ju chakoʼulh ju Candace ixjuncan. Chai ju anuʼ lapanac yuchi ju ixmalhistacni ju ixtumin ju anuʼ kʼai ucxtin. Ju yuchi ixquilakʼayata ju Dios ju lakʼachakʼan Jerusalén. 28 Chai ju chavai va ixʼanchokoputun laʼixchakaʼ. Chai acsni ixʼanta laʼixcarro ju ixakʼamai ju caballo pus ixtʼajun laktsʼiniʼ ju alhiqui ju istsʼokta ju Isaías ju makʼaniya lapanac ju ixnajun ixchivinti Dios. 29 Pus ju Spiritu Santu chani junilh ju Pilipe: ―Pʼas apʼitʼi. Vanin atʼaimatʼi ju anuʼ carro. 30 Chai ju Pilipe acsni vanin lakʼalh ju carro pus kʼasmatlh ni ixtʼajun nonaʼ tachi ju istsʼokta ju Isaías. Chai chani juni: ―Ja machʼakxaich tuchʼi laktsʼin. 31 Pus ju acsnich ju yuchi chani juni: ―Tas aclhimachakxalh ni matiʼ xamatiʼ ju aquimavasalanilh. Chai ju acsni tapaininilh ju Pilipe ni catʼatajulh ju laʼixcarro. 32 Pus ju lacaʼatsʼoknut junta ixtʼajun laktsʼiniʼ chani ixnajun: Tachi ju tuʼuʼ borrego ni lhiʼancan junta camaknicanaʼ pus chunch vachuʼ caʼulhtucanaʼ ju yuchi. Chai tachi ju tuʼuʼ saʼaskʼatʼa borrego ni jantu tʼasai mas sitcanch pus chunchach vachuʼ ju yuchi. Lana jantu tuʼuʼ canonaʼ. 33 Na catamamaxaniyaʼ chai catamakniyaʼ mas matiʼ ju ixtalakʼalhin. Chai tis chavaich ju lai canonaʼ ni caʼalinaʼ ju catachʼakʼokʼayaʼ ni camakʼosunicanaʼ ju isʼatsucunti ju ani lacatʼun. Chunch ju najun junta ixtʼajun laktsʼiniʼ ju anuʼ lapanac. 34 Pus ju anuʼ xakʼai sacmilh ju Pilipe: ―Lamapainin aqʼuiʼunch. Tis chavaich ju lhichivinin ju lapanac ju ixnajun ixchivinti Dios. Ja isʼakstu ju lhichivininchokoi u apumatam. 35 Pus ju acsnich ju Pilipe tsuculh amavasalaniniʼ. Pʼulhnan amavasalanilh tuchi ixnomputun ju chivinti ju ixtʼajun laktsʼiniʼ chai astan junilh aliʼ ixlacata ju Jesús. 36 Chai acsni taʼalh ju lacati pus tachaʼalh junta ixma ju xcan. Chai ju anuʼ xakʼai chani juni ju Pilipe: ―Alaktsʼich ju xcan. Ja jantu lai acʼakpaxlh. 37 Pus ju Pilipe chanich juni: ―Ni lacʼaʼich ju ixlhichux ju miʼalhunut pus laich calayaʼ. Chai akʼalhtayanalh ju anuʼ xakʼai. Chanich juni: ―Iclacaʼich ni istsʼalh Dios ju Jesús ju ixnoncan camalakachatachilh Dios. 38 Pus ju acsnich ju anuʼ xakʼai lhinaulh ixchʼapayajuca ju ixcarro. Chai ju yuchi chai ju Pilipe kʼaixtamch tʼataju lacxcan chai ju Pilipe makpaxa ju anuʼ lapanac. 39 Chai acsni tatacutchokolh ju lacxcan pus ju iSpiritu Santu ju quiʼucxtinʼan Dios lana lacatam sokʼo lhiʼalh ju Pilipe. Chai ju anuʼ xakʼai jantu laktsʼinchokolh tavanan. Para acsni xaʼanchokoi ju lacati pus na ixkʼachan. 40 Pus ju Pilipe lhitajucancha ju lakʼachakʼan Azoto. Chai acsni taxtulh ju anch tapasatilalh lakatamin lakatamin lakʼachakʼan tus chaʼalh ju lakʼachakʼan Cesarea. Para acsni ixtapasatilai ju lakatamin lakʼachakʼan pus ixʼajuni ju lapanacni ta yu laich cataputakʼalhtaxtulh ni jantu cataʼalh ju lacajipi.
1 Chai ju acsnich ju Saulo va tachi ispastactʼajun ixʼamaknica ju ixtalhilacaʼanta ju kʼai ucxtin Jesús. Pus yuchi lhilakʼalh ju xakʼai ixpalijni ju istʼaʼisraelitanin. 2 Sqʼuinilh lakatam alhiqui ju laich calhiʼalh laʼixpujitatʼan ju istʼaʼisraelitanin ju amachakʼan Damasco. Ju chunch ni calhitajulh tam jokʼat u tam chakoʼulh ju chʼakʼokʼata ju Jesús pus laich calhimilh tachʼin ju lakʼachakʼan Jerusalén. 3 Para acsni ixʼanta ju lacati chai vanin ixchaʼamputun ju lakʼachakʼan Damasco pus lana mapulhcu junta ixʼanta ju Saulo. Lactʼiyan ju xatapulhcuyacha ju anuʼ maclhcu. Tapulhcukʼo chux ju lacatʼun. 4 Pus ju Saulo lana tin taʼaktalh ju lacatʼun. Chai kʼasmatlh lakatam chivinti ju chani juni: ―Saulo. Saulo. Jantu alhimakchʼapʼu ju quilapanacni. Acsni chun ju lai tachi ju va jun quitʼin ju qʼuilhimakchʼapʼui. 5 Chai ju Saulo kʼalhtailh. Chai juni: ―Tis chavaichʼat ji ucxtin. Chai ju anuʼ ixtʼajun chiviniʼ kʼalhtayanalh. Chani juni: ―Quitʼin ju icJesús ju na qʼuimamakʼalhkʼajni. Para acsni sastʼucʼa ju ixtaxtokni Dios alai miʼakstu ju mamakʼalhkʼajnichʼokʼocʼan. ―Chunch ju junilh ju Jesús. 6 Pus ju Saulo lana na alhqʼuipʼipʼitnilh. Na ixtalhanantach. Chai chani juni: ―Quiʼucxtin tijuch ju lacʼasqʼuin ju acnavi. Chai ju ucxtin Jesús chani juni: ―Atʼaich. Aʼinchich ju lakʼachakʼan. Aʼuncʼantʼachich tuchʼi ju anaviyaʼich. 7 Pus ju jokʼatni ju ixtatʼaʼanta ju Saulo va sek talactaya. Takʼasmatlich vasalh ju chivinti para jantu xamatiʼ ixtalaktsʼin. 8 Pus ju Saulo lana kʼostavi ju lacatʼun. Para acsni talacpokʼa jantu lai ixlaktsʼin tuʼuʼ. Pus va macchʼapalhiʼancalh ju lakʼachakʼan Damasco. 9 Chai lakatʼutu avilhchan jantu lai ixʼalacʼavanan. Chai jantu vailh nin tuʼuʼ cakʼotlh. 10 Pus ju anuch lakʼachakʼan Damasco ixtʼajun pumatam lapanac ju Ananías ixjuncan. Ju yuchi ixlhilacaʼanta ju Jesús. Pus ju ucxtin Jesús atalacasunilh tachi ju va laʼixʼaklakʼavanti. Chai xakʼala. Chai ju Ananías akʼalhtayanalh. Juni: ―Tijuch ji quiʼucxtin. 11 Pus ju acsnich ju kʼai ucxtin Jesús chani juni: ―Apʼinchich ju lacati ju Soknicʼa juncan. Apʼuxcʼochiʼ laʼixchakaʼ Judas pumatam ju Saulo juncan. Ju yuchi amachakaʼ Tarso junita. Ju yuchi va quintʼachivinin. 12 Chai ju yuchi laktsʼintan tachi ju va laʼixʼaklakʼavanti. Laktsʼinan ni tachi ju va xatʼanui ju anch chai tachi ju va mucʼanitʼa ju mimacaʼ laʼixlakchulh ni laich caʼalacʼavananaʼ. ―Chunch ju junicalh ju Ananías. 13 Para ju Ananías acsni kʼasmatlh ju chunch pus chani juni ju Jesús: ―Para ji quiʼucxtin na lhu quintajuni ixlacata ju anuʼ lapanac. Tanajun ni na ixʼamamakʼalhkʼajni ju milapanacni ju tavilanancha ju lakʼachakʼan Jerusalén. 14 Chai ju chavai minta ju ani chai ju xalackʼajin palijni tajuni ni laich aquintachʼapakʼoyan chux ju quijnan ju iclalhilacaʼanau ju uxintʼi. 15 Para ju kʼai ucxtin Jesús chani juni: ―Aʼinchich ni icsacxtutach ju yuchi ni canaviyaʼ ju quilhichʼalhcat. Ju yuchi caʼalacjunaʼ ju lapanacni ju quilacata. Caʼalacjunaʼ ju istʼaʼisraelitanin chai ju jantu israelitanin chai ju xalackʼajin ucxtinin. 16 Chai quitʼin ju acmalacasuniyaʼ ni tasqʼuini ni camakʼalhkʼajnanaʼ ni aquinaviniyaʼ ju quilhichʼalhcat. ―Chunch ju junicalh ju Ananías. 17 Pus ju Ananías alh laʼixchakaʼ ju Judas junta ixtanun ju Saulo. Chai acsni tanucha mucʼanilh ixlacmacaʼ laʼixʼucxni ixlakchulh ju Saulo chai chani juni: ―Quilakʼau Saulo yuchi ju kʼai quiʼucxtinʼan Jesús ju talacasunin ju lacati junta ixtʼantʼa. Chai yuchi ju xaquimalakachanitachin ni laich alacʼavananchʼokʼoyaʼ chai laich calhinonaʼ ju Spiritu Santu lamiʼatsucunti. 18 Chai ju acsnich lana makʼosucalh ju snapapa ataputsʼi ju ixjucʼalh laʼixlakchulh. Acsnich ju lai xaʼalacʼavanan. Pus ju acsnich ju Saulo taxtulh. Quimakpaxacalh. 19 Chai astan ju Saulo vailh chai kʼachanchokolh ju ixlacatuna. Pus lakatʼui lakatʼutu avilhchan alactʼatavi ju amachakʼan Damasco ju vachuʼ ixtalhilacaʼanta ju Jesús. 20 Chai lana antsuculh ju Saulo laʼixpujitatʼan ju istʼaʼisraelitanin. Ixʼajuni ju lapanacni ni vasalh istsʼalh Dios ju Jesús. 21 Pus tachi chun ju takʼasmatlh va ixtalhamakʼaninin. Ixtalaclajuni: ―Ja jantu yuchi ju ani ju na ixʼalacmamakʼalhkʼajni ju amachakʼan Jerusalén ju talhilacaʼanta ju Jesús. Chai ja jantu vachuʼ yuchi xalhiminch ju ani ni calhiʼaniyach tachʼinin ju xalackʼajin palijni ju amachakʼan ani ju talhilacaʼanta ju Jesús. 22 Pus ju Saulo lacsni lacsni palai jantu ixtalhanan acsni ixnajun ixchivinti Dios. Chai acsni lana vas amavasalanilh ju istʼaʼisraelitanin amachakʼan Damasco ni Jesús yuchach ju ixnoncan camalakachatachilh ju Dios pus jantu lai tuʼuʼ xatamapuspitni ju chivinti. 23 Para acsni tapasalh na lhu avilhchan pus ju israelitanin tanavilh lakatam chivinti sia yuʼunch junta ixtanajun ni catamakniyaʼ ju Saulo. 24 Para mamachakxanicalh ju Saulo ni ixlhiʼokxchivincan. Pus ju anuch lapanacni tontacuj chai tontatsʼisni ixtalhistʼacʼa ju xamalhtich junta putaxtucan ju anuch lakʼachakʼan. Va ixtamakniputunch ju Saulo. 25 Para ju aliʼin ju ixtalhilacaʼanta ju Jesús tamakʼalhtaxtulh ju Saulo. Ixʼalin ju lacchakaʼ ju ixtʼalachʼapata ju kʼex ju ixvi ixtalakachoko ju anuʼ lakʼachakʼan. Pus tsʼis ju taquimujulh ju Saulo lacakʼai tankʼalin chai lacaventana tapumaxtulh lhiʼavinti lacakʼex. Chai ju yuchi atsʼalalh. 26 Acsni tavanan chaʼanchokolh ju Jerusalén ju Saulo pus va kʼaixtam ixʼalactʼaʼamputun ju aliʼin ju ixtalhilacaʼanta ju Jesús. Para ixchuxʼan ju yuʼunch na ixtatalhoni. Jantu ixtalacaʼi ni vachuʼ calhilacaʼalh ju Jesús ju yuchi. 27 Para ju Bernabé alhiʼanilh ixtamalakachan ju Jesús. Chai ajunchalh ta yu pulaktsʼilh ju kʼai ucxtin Jesús ju Saulo ju lacati chai tʼachivinilh. Vachuʼ ajuni ni lana jantu ixtalhanan ju Saulo acsni ixʼajuni ju amachakʼan Damasco ixlacata ju Jesús. 28 Pus ju acsnich ju Saulo lai ixʼalactʼaʼalhtanan ju ixtamalakachan ju Jesús. Chai tavilh ju lakʼachakʼan Jerusalén. 29 Chai ixʼajuni ju amachakʼan anch ixlacata ju kʼai ucxtin Jesús. Chai ixʼalactʼachivinin chai ixʼalactʼalalhajai lacachivinti ju istʼaʼisraelitanin ju ixtachivinin ju lhigriego. Para ju yuʼunch va ixtapastʼacʼa ixmaknica. 30 Para acsni tacʼatsa ju ixlhiʼalakʼavin laʼixmacni Jesús pus takʼailhiʼalh ju Saulo ju lakʼachakʼan Cesarea. Tamalakacha ju lakʼachakʼan Tarso. 31 Pus ju acsnich tamamacta ju ixʼalhixcajicaʼan tachi chun ju ixtalhilacaʼanta ju kʼai ixʼucxtinʼan Jesús ju amachakʼan ju xaʼestado Judea chai ju xaʼestado Galilea chai ju xaʼestado Samaria. Chai ju yuʼunch lana ixlhichux ixʼalhunutʼan talhilacaʼalh ju kʼai ixʼucxtinʼan Jesús. Na ixtaquiclacaʼitach ju tuchi ixnajunta ju Dios chai na ixtatalhavai. Yuchach ju Spiritu Santu ju ixʼaʼaktaijui. 32 Pus ju Pitaluʼ lacaputocʼakʼo junta ixʼalin ju ixtalhilacaʼanta Jesús. Pus vachuʼ alh alaktsʼiniʼ ju ixtalhilacaʼanta Jesús amachakʼan Lida. 33 Chai ju anch ju Pitaluʼ lhitajulh pumatam lapanac ju Eneas ixjuncan. Ju yuchi lakatsajin cʼata ixma laʼixputaman. Va ilhtuculuntach. 34 Chai chani junich ju Pitaluʼ: ―Eneas Jesucristo ju palai canaviyan. Akʼostʼaʼulh. Asactʼich ju mimputaman. Pus ju Eneas lana kʼostavi. 35 Pus chux ju amachakʼan Lida chaich ju amachakʼan Sarón talaktsʼilh ju anuʼ lapanac ni palaich ixnavicanta chai tamacaulh tachi ju aktsʼiya ixtalhilanita chai talhilacaʼalh ju kʼai ucxtin Jesús. 36 Pus ju acsnich ixtʼajun ju lakʼachakʼan Jope pumatam chakoʼulh ju vachuʼ ixlhilacaʼanta Jesús. Ju yuchi Tabita ixjuncan. Ju lacalhigriego va Dorcas ixjuncan. Pus ju anuʼ chakoʼulh va tachi ixnavich ju kʼox chai ixʼaʼaktaijui ju quilhpatinin. 37 Chai acsni ixvilhchacaʼ ju Lida ju Pitaluʼ pus ju anuʼ chakoʼulh takʼankʼa chai nilh. Pus ju lapanacni tapaxa chai talhiʼalh ixlhitantalaktʼui lacachakaʼ. Anchach ju tamama. 38 Chai ju amachakʼan Jope ju ixtalhilacaʼanta Jesús ni tacʼatsa ni ixvilhcha ju Lida ju Pitaluʼ pus tamalakachanilh pumatʼui lapanacni. Pus ju lakʼachakʼan Lida vanin ixtʼalajunita ju lakʼachakʼan Jope. Pus ju anuch lapanacni tatapaininilh ju Pitaluʼ ni vatsʼalhti caʼalactʼamilh. 39 Pus ju Pitaluʼ lana lacataya chai alactʼaʼalh ju yuʼunch. Chai acsni tachaʼalh ju lacachakaʼ talhiʼalh ixlhitantalaktʼui lacachakaʼ junta ixma ju lijunto. Pus lhmalanch ixtalhitakʼaixtokta ju chakolun ju va alacnimacontilacantach. Na ixtalackʼalhun. Ixtatʼajun masuninin ju ixlacvestidoʼan chai ixlacxcujuʼan ju ixʼanavinita ju Dorcas acsni ixtʼajuncaʼ. 40 Para ju Pitaluʼ alactixcoxtukʼo. Chai ju yuchi taʼaktsokotalh. Tsuculh tʼachiviniʼ ju Dios. Chai acsni lhilacaʼanilh junta ixma ju lijunto chani juni: ―Tabita akʼostʼaich. Pus ju yuchi lana talacpokʼa chai acsni laktsʼilh ju Pitaluʼ kʼostavi. 41 Pus ju Pitaluʼ xtaknilh ixmacaʼ. Sayaulh. Ju acsnich alactʼasanilh ju vachuʼ ixtalhilacaʼanta Jesús chai ju anuch chakolun ju ixʼalacnimacontilacantach. Alacmasunilh ju chakoʼulh ni ixlokʼonchokotach. 42 Pus ju ani laccʼatsakʼocalh ixlhilacaputsʼun ju lakʼachakʼan Jope. Chai na lhu ju talhilacaʼalh ju kʼai ucxtin Jesús. 43 Pus ju Pitaluʼ na lakalhu avilhchan ixvilhcha ju lakʼachakʼan Jope laʼixchakaʼ pumatam lapanac ju Simón ixjuncan. Ju yuchi va ixlakʼoxiniʼ axtʼakʼan ixjunita.
1 Pus ixʼalin pumatam lapanac amachakaʼ Cesarea ju Cornelio ixjuncan. Ju yuchi xaʼucxtin tam cientos taropajni ixjunita chai ju anuch taropajni Italiano ixʼajuncan. 2 Pus ju yuchi chai chux ju ixtatanumanalh laʼixchakaʼ ixtalhilacaʼanta ju Dios chai ixtalakʼayai. Chai ju yuchi na lhu ixʼaxtakni ju tumin ju quilhpatinin sia yuʼunch ju israelitanin mas jantu israelita ixjunita ju yuchi. Chai va tachi ixtʼachivinin ju Dios. 3 Pus lakatam avilhchan tachi lakatʼutu hora atokʼoxanaʼ ju Cornelio laktsʼilh pumatam ixʼanquilh ju Dios. Para tachi ju va laʼixʼaklakʼavanti ju laktsʼilh. Chai ju anuʼ anquilh mapakaʼulh ju Cornelio. 4 Pus ju Cornelio lana va skotutukʼalhi chai talhanakʼalhtailh: ―Tijuch ji quiʼucxtin. Chai chani juncanch ju Cornelio: ―Ju Dios pastacnikʼo acsni ixtʼachʼivinin ju yuchi chai ixlacata ju tumin ju pʼuʼaktʼaiʼui ju quilhpatinin. 5 Pus ju chavai amalakʼachʼatʼich ju lapanacni lakʼachakʼan Jope. Chach taʼalh tʼasaniniʼ pumatam lapanac ju Simón juncan. Ju yuchi vachuʼ Pitaluʼ juncan. 6 Ju yuchi tʼajun laʼixchakaʼ pumatam ju vachuʼ Simón juncan. Yuchi ju alakʼoxiniʼ axtʼakʼan. Ju yuchi amachakʼananta vanin laʼixquilhtuʼ alama. Pus yuchi ju cajunanch tuchi ju anaviyaʼich. 7 Pus acsni anchokolh lactʼiyan ju anuʼ anquilh ju quitʼachivininchilh ju Cornelio pus ju yuchi tʼasanilh pumatʼui ixlapanacni chai pumatam ixtaropa ju ixnavini ixlhichʼalhcat. Pus ju anuʼ taropa vachuʼ ixlhilacaʼanta ju Dios. 8 Pus ju Cornelio ajunkʼo tuchi ixtapasata chai amalakachalh ju lakʼachakʼan Jope. 9 Ni tuncunchokopa ixtaʼanta ju lacati chai acsni ixkʼatuncumputun pus vanin ixtachaʼamputun ju lakʼachakʼan Jope. Pus lana acsnich ju tocʼalh lacasotea ju Pitaluʼ. Va ixtʼachivimputun ju Dios. 10 Para slivasalh na ixchavanita chai na ixvemputunch. Chai acsni ixtʼoncan lakʼoxinica ju ixvaiti pus ju yuchi lana laktsʼilh tuʼuʼ tachi ju va laʼixʼaklakʼavanti. 11 Laktsʼilh ju lactʼiyan ni talhtekʼa chai takʼalhtajulh tuʼuʼ tachi lakatam kʼai pumpuʼ. Makʼastutʼatʼi ixchʼinicanta. Takʼalhtaju tus lacatʼun junta ixvi ju Pitaluʼ. 12 Chai laktsʼilh ni anch ju ixtatanumanankʼo tachi chun ju atapacxat ju alhtanan ju ani lacamunutpaʼ. Vachuʼ ixtatanumanalh ju lu chaich ju tsʼokʼo. 13 Chai ju acsnich ju Pitaluʼ kʼasmatlh ixchivinti pumatam ju chani juni: ―Akʼostʼaʼulhch ji Pitaluʼ. Amaknitʼich ju ani tayanalh atapacxat. Aʼuyaʼich. 14 Para ju Pitaluʼ chani akʼalhtayanalh: ―Jantu ji quiʼucxtin. Ju quitʼin jantu tavanan icʼuta tuʼuʼ ju jantu lai ucan tachi ju iclhilanitau ju quijnan ju israelitanin icjuntau. 15 Pus xakʼalachokocalh ju Pitaluʼ ixlhipaktʼuich. Chanich ju juni: ―Ju najuntach ju Dios ni lai ucan tun va anau ni jantu lai ucan. 16 Pus paktʼutu ju junicalh chunch chai astan ju kʼai pumpuʼ lhiʼanchokocalh ju lactʼiyan. 17 Pus ju Pitaluʼ ispastacvi laʼixʼalhunut tuchi ju canomputulh ju anuʼ ju laktsʼilh tachi ju va laʼixʼaklakʼavanti. Pus lana acsnich ju talhasacminilh ju ixchakaʼ ju Simón ju lapanacni ju ixʼamalakachanicantachilh ju Cornelio. Ixtachaʼanta ju laʼixquilhtalacxtutu ju ixchakaʼ ju Simón. 18 Tachivinilh. Taʼasacminilh ni anch catavi ju Simón ju vachuʼ juncan Pitaluʼ. 19 Pus ju Pitaluʼ vana ixtʼajun pastacnaʼ ju tuchi ixlaktsʼinta tachi ju va laʼixʼaklakʼavanti. Pus ju acsnich lana chani junilh ju Spiritu Santu: ―Ixpumatʼutuʼan lapanacni tapuxcoyan. 20 Akʼostʼaʼulh. Atʼakʼalhtʼaʼutʼich. Atʼapʼinchich chai tun va atʼilhamakʼanin ni quitʼin ju icʼamalakachanitachin. 21 Pus ju acsnich ju Pitaluʼ alakʼalh ju ixtamalakachan ju Cornelio chai chani ajuni: ―Quitʼinch ju quilapuxcoyau. Tijuch ju quilhilalakmintauch. 22 Chai ju yuʼunch chani tajuni: ―Yuchi ju Cornelio ju quintamalakachanitachin. Ju yuchi xaʼucxtin tam cientos taropajni junita. Chai ju yuchi na kʼox lapanac junita chai na lhilacaʼanta ju Dios. Chai tachi chun ju israelitanin na kʼox lapanac talhiulai. Pus ju yuchi ma malakachanicanchilh ju ixʼanquilh Dios chai ju yuchi ma juni ni ma catʼasaniyan ni ma laich cakʼasmatnin ju tuchʼi aʼunaʼich. ―Chunch tajuni ju Pitaluʼ ju anuch lapanacni. 23 Pus ju acsnich ju Pitaluʼ ajunich ni catatanu pulacni. Chai anch ju talakacujlich. Chai acsni tuncunchokopa pus alactʼaʼalh. Vachuʼ tamakʼalh aliʼin amachakʼan Jope ju vachuʼ ixtalhilacaʼanta Jesús. 24 Acsni alakatamch avilhchan jumpa tatanucha ju lakʼachakʼan Cesarea. Pus ju Cornelio na ixʼalacpacxanvi. Ixʼalactʼasanitach ju ixlhiʼalakʼavin chai ju aliʼin ju palai kʼox ixʼamigojni ixtajunita. 25 Chai acsni chaʼalh ju Pitaluʼ pus taxtuchilh ju Cornelio ni camacʼamiyaʼ. Taʼaktsokotanilh vanin laʼixchʼajaʼ. Va ixlakʼayaputun. 26 Para ju Pitaluʼ makchʼapayaulh. Chanich juni: ―Atʼaich. Ju quitʼin vachuʼ va iclapanac. 27 Pus tsuculh tʼachiviniʼ chai tʼatanu laʼixchakaʼ. Chai ju anch alhitaju na lhu lapanacni ju ixtatakʼaixtokta. 28 Chai chani alacjuni: ―Ju uxijnan cʼatsʼayatʼit ni iclhilanitau ju quijnan ju israelitanin icjuntau ni talakʼalhin cava ni actʼalaktanu pumatam ju jantu israelita. U mas va actanu laʼixchakaʼ. Para ju Dios quimasunita ni jantu xamatiʼ ju va jantu tuʼuʼ ixtapalhni cava. Chai jantu kʼox ni acnaulh ni jantu ictʼaʼalhtanamputun xamatiʼ. 29 Pus yuchi iclhimilh acsni qʼuintʼasanich chai jantu tuʼuʼ xacʼajuni ju xamalakʼachʼayachiʼ. Chai ju chavai iclasacmiyau tuchi ju quilalhitʼasaniyauch. 30 Pus ju Cornelio junich: ―Lakatʼatʼich avilhchan xajun acsni xacvi laquinchakaʼ. Tachi chavai hora ixjunita. Jantu tuʼu xacʼuta chai xactʼajun tʼachiviniʼ ju Dios. Chai iclaktsʼilh pumatam anquilh ju taya laquiʼucxlacapuʼ. Na slamnica ixjunita ju ixpumpuʼ. 31 Chai quijuni ni ma quinkʼasmatnitach ju Dios acsni ictʼachivinilh. Chai ma pastackʼojui ju lamapainin ju xacʼanavinita ju quilhpatinin. 32 Chai quijuni ni ma acmalakachalh ju quilapanacni ju cataʼalh ju lakʼachakʼan Jope. Ma chach takʼailhiminan ju uxintʼi. Ma anch ju tʼaʼun ju laʼixchakaʼ akʼantam Simón ju ixlakʼoxiniʼ axtʼakʼan. Ju yuchi ma anch amachakʼananta vanin laʼixquilhtuʼ alama. Chai ma acsni atʼanaʼ pus ma aqʼuiʼunaʼ ju ixchivinti Dios. Chunch ju quijuni. 33 Pus yuchi vatsʼalhti iclhimalakachanichan ju quilapanacni. Chai na kʼoxich ni xatʼan. Pus ju chavai ju Dios quintalaktsʼinan tachi chun ju quijnan ju anich icvilau chai ickʼasmatputunau tachi chun ju chivinti ju xajunan ju Dios. 34 Pus ju acsnich ju Pitaluʼ chani ajuni: ―Ju chavai icmachakxai ni vasalh vaklhtam chun ju alaktsʼin ju lapanacni ju Dios. 35 Va tichi lapanac cava ju lakʼayai chai canavi ju soknicʼa pus yuchi ju kʼox lhiulai ju Dios. U ni quintʼaʼisraelita junita u ni jantu. 36 Ju Dios quintamalakachanichin ju ixchivinti ju quijnan ju israelitanin icjuntau. Quintajunan ni makʼoxamixican laʼixʼalhunut ju Dios acsni lhilacaʼancan ju Jesús ni yuchach ju ixnoncan camalakachatachilh ju Dios. Yuchi ju xaʼucxtin lhichux. 37 Ju uxijnan cʼatsʼayatʼitch ni ixʼamalaninin ju Xivan chai ixʼamakpaxanan. Chai cʼatsʼayatʼit ni astan tsuculh amalaninin ju Jesús. Ju yuchi taiʼulacha ju ixʼamalaninti ju xaʼestado Galilea chai lacaputocʼakʼo chux ju lakʼachakʼan junta ixtatʼajun ju quintʼaʼisraelitanin. 38 Ju uxijnan cʼatsʼayatʼit ni Dios ju xtaknilh ju Jesús amachakaʼ Nazaret ju Spiritu Santu ju xatanui laʼixʼalhunut chai ixlhiyuchi na ixʼalin ju ixtachaput. Cʼatsʼayatʼit ni va tachi ixnavitʼajun ju kʼox ju Jesús chai ixʼacʼuchʼukʼojui chux ju ixmamakʼalhkʼajni ju lhacaticuru. Lai chunch xanavi ni yuchi ju Dios ju ixtʼaʼalhtanan. 39 Ju quijnan iclaktsʼiuch tachi chun ju ixnavi ju Jesús ju xalacatʼun Judea chai ju lakʼachakʼan Jerusalén. Para astan ju lapanacni tamakni. Tamaquilhta ju lacacurus. 40 Para ju Dios malokʼoni ixlhilakatʼutu avilhchan chai quintamalacasunin ju quijnan. 41 Para jantu chux ju lapanacni ju talaktsʼilh. Va quijnan ju makʼanch quintasacxtutanch ju Dios ni acnonauch ju tuchi iclaktsʼintauch. Pus ju quijnan ictʼavajiuch ju yuchi acsni tavanan lokʼonchokolh laʼixʼaninti. 42 Chai yuchi ju pʼas quintajunan ni acʼajunau tachi chun ju lapanacni ni Dios ju ulata ju Jesús ni yuchi ju calaktsʼintanuyach ju lapanacni ju titʼajuncaʼ chai ju tanitach. 43 Yuchi ju ixtalhichivinin chux ju makʼaniya lapanacni ju ixtanajun ixchivinti Dios. Ju yuʼunch ixtanajun ni ma camacʼacxanicanaʼ ixtalakʼalhin va tichi chavaich ju calhilacaʼanaʼ ju Jesús. Ju Dios ma camacʼacxaniyaʼ va ixlacata ni nilh ju Jesús. ―Chunch ju ajuni ju Pitaluʼ. 44 Chai acsni ixtʼajuncaʼ chiviniʼ ju Pitaluʼ pus lana alakmilh ju Spiritu Santu tachi chun ju ixtatʼajun kʼasmatnin ju ixchivinti. 45 Pus ju israelitanin ju ixtalhilacaʼanta ju Jesús ju ixʼalactʼamintach ju Pitaluʼ na talhamakʼaninilh ni axtaknicalh vachuʼ ju Spiritu Santu ju yuʼunch ju jantu israelitanin ixtajunita. 46 Pus ni ixtachivinin atumpa chivinti ju jantu ixtamispai chai ixtanajun ni yuchach ju xakʼai ju Dios yuchi ixtalhinajun ju ixʼalactʼaminta ju Pitaluʼ ni taʼamaklhtayanalh ju Spiritu Santu ju anuch lapanacni. 47 Ju acsnich ju Pitaluʼ ajunich ju ixʼalactʼaminta: ―Jantu lai xamatiʼ catilhikʼalhtsʼaulh ju xcan ni jantu cataʼakpaxlh ju anich tavilanalh ni vachuʼ taʼamaklhtayanalh ju Spiritu Santu tachi ju quijnanʼan. 48 Pus ju acsnich ju Pitaluʼ alhinaulh ixʼamakpaxaca ni ixtalhilacaʼanta ju kʼai ucxtin Jesús. Chai astan ju yuʼunch tatapaininilh ju Pitaluʼ ni catolhcha lakatʼui lakatʼutu avilhchan.
1 Pus ju ixtamalakachan ju Jesús chai ju aliʼin ju vachuʼ ixtalhilacaʼanta Jesús ju ixtavilanancha ju xaʼestado Judea takʼasmatlh ni vachuʼ talacaʼinilh ixchivinti Dios ju yuʼunch ju jantu israelitanin ixtajunita. 2 Chai acsni tavanan anchokolh ju Jerusalén ju Pitaluʼ pus ju aliʼin istʼaʼisraelitanin ju vachuʼ ixtalhilacaʼanta Jesús tatʼalakʼailh. 3 Tajunich: ―Tajuch ni va xalakpʼinch ju lapanacni ju jantu quintʼaʼisraelitaninʼan tajunita chai laich va lakputam xaʼalactʼavaʼin. 4 Pus ju Pitaluʼ lana ajunkʼo tachi chun ju ixtapasatach. Alacjuni: 5 ―Ju quitʼin xacvilhcha ju lakʼachakʼan Jope. Xactʼajun tʼachiviniʼ ju Dios. Chai iclaktsʼilh tuʼuʼ tachi ju va kʼai pumpuʼ. Makʼastutʼatʼi ixchʼinicanta. Chai makʼalhtajucalh ju lactʼiyan. 6 Pus ju quitʼin na icskotutulh chai iclaktsʼilh ni anch ixtatajumanalh ju atapacxat chai ju maktilin chai ju lu chai ju tsʼokʼo. 7 Chai ickʼasmatlh lakatam chivinti junta quijuni ni ma ackʼostavi. Ma acʼamaknilh ju anuʼ ixtayanalh atapacxat chai ma acʼulh. 8 Para ju quitʼin icjunich: “Jantuch ji quiʼucxtin. Ju quitʼin jantu tavanan icquilhcʼatsata ju tuʼuʼ ju jantu lai ucan tachi ju iclhilanitauch ju quijnan ju israelitanin icjuntau”. Chunch icjuni. 9 Para aktam quinkʼalhtaichokocalh tus lactʼiyan. Chai quijuni ni ma jantu acnaulh ni jantu lai ucan tuʼu acsni najuntach ju Dios ni lai ucan. 10 Paktʼutuch xaquijuni ju Dios ju chunch chai astan lhiʼanchokocalh ju anuʼ kʼai pumpuʼ ju lactʼiyan. 11 Pus ju acsnich lana tachilh ixpumatʼutuʼan lapanacni ju lacachakaʼ junta xacvi. Amachakʼan Cesarea ixtajunita. Quiʼamalakachanicanchilh. 12 Pus ju Spiritu Santu quijunilh ni acʼalactʼaʼalh chai jantu actilhamakʼaninilh. Pus icʼalactʼaʼalh chai ju ani ixpumachaxanʼan quiʼalakʼavinʼan quintatʼaquilalh. Pus ictanuchauch laʼixchakaʼ ju anuch lapanac ju xaquintʼasanita. 13 Chai ju yuchi quintajunin ni ma ixlaktsʼinta pumatam anquilh laʼixchakaʼ. Ma anch ixya chai ma juni ni ma camalakachalh ju ixlapanacni ni ma cataʼalh ju lakʼachakʼan Jope. Ma calhinaulh quintʼasanica ju quitʼin. 14 Ma quitʼin ju acʼajunach ju chivinti ju lai cataputakʼalhtaxtuyaʼ ju yuchi chai chux ju tatanun laʼixchakaʼ. 15 Chai acsni ictsuculh chiviniʼ pus vachuʼ alakmilh ju Spiritu Santu ju yuʼunch tachi ju quintalakminch ju quijnanchʼan ju makʼanch. 16 Pus ju acsnich icpastaclich ju ixchivinti ju quiʼucxtinʼan Jesús acsni quintajunin ni ma slivasalh amakpaxanalh lacaxcan ju Xivan. Para ju quijnan ma acʼamaklhtayananau ju Spiritu Santu tachi ju aliʼin taʼamaklhtayanalh ju xcan acsni taʼakpaxlh. Ma chunch quintajunin ju Jesús. 17 Pus Dios ju alacxtaknilh vachuʼ ju Spiritu Santu ju yuʼunch tachi ju quintaxtaknitan ju quijnanʼan acsni lhilacaʼantauch ju quiʼucxtinʼan Jesucristo. Chai ni chunch ju xalai pus tis chavaich ju quitʼin ni lai acsaspitlh ju Dios. ―Chunch ajuni ju lapanacni ju Pitaluʼ. 18 Pus acsni takʼasmatlh junima chivinti lana sek tatavi ju ixtamalakachan ju Jesús chaich ju aliʼin. Tatsuculh lakʼayanin ju Dios. Chai tanaulh: ―Ni sala chunch ju xatapasai pus ju Dios aktsʼiya lacasqʼuin ni vachuʼ caʼalilh ju isʼatsucuntiʼan ju lactʼiyan ju yuʼunch ju jantu israelitanin tajunita acsni va catamacaulh ju ixʼalactuʼuntiʼan. 19 Acsni tavanan maknicalh ju Stipan pus tsucucalh mamakʼalhkʼajninin ju aliʼin ju vachuʼ ixtalhilacaʼanta ju Cristo chai taʼatsʼalalh ju yuʼunch. Ju aliʼin sia yuʼunch taʼalh tus laxalacatʼun Fenicia chai ju xalacatʼun Chipre chai ju lakʼachakʼan Antioquía. Pus ju anch jantu xamatiʼ ixtajuni ju ixchivinti Dios. Va yuʼunch ju istʼaʼisraelitanin. 20 Para ju sia lhiyuʼunch ixtamakminta vachuʼ amachakʼan Chipre chai Cirene. Pus ju yuʼunch acsni tatanucha ju lakʼachakʼan Antioquía vachuʼ alacjuni ju jantu israelitanin ni laich catatakʼalhtaxtulh chai jantu cataʼalh ju lacajipi ni catalhilacaʼalh ju kʼai ucxtin Jesús. 21 Pus ju kʼai ucxtin Jesús na alacʼaktaijulh chai ixlhiyuchi na pumalhu tamacaulh tachi aktsʼiya ixtalhilanitach chai talhilacaʼalh ju kʼai ixʼucxtinʼan Jesús. 22 Pus acsni takʼasmatcha ju amachakʼan Jerusalén ju vachuʼ ixtalhilacaʼanta Jesús ju tuchi ixtʼajun tapasanaʼ ju lakʼachakʼan Antioquía pus lana tamalakachalh ju Bernabé ni caʼalh ju anch. 23 Chai acsni chaʼalh ju yuchi pus laktsʼilh ni na lhu ixʼaʼaktaijuta ju Dios laʼixʼamapaininti chai na lhikʼachalh. Chai alakmapʼaksilh ixchuxʼan ni ixlhichux ixʼalhunutʼan catachʼakʼokʼakʼalhilh ju kʼai ixʼucxtinʼan Jesús. 24 Ju Bernabé na kʼox lapanac ixjunita chai ju Spiritu Santu ixlhinonkʼojui laʼisʼatsucunti chai ixlhichux ixʼalhunut ixlhilacaʼanta ju Jesús. Pus ju lapanacni acsni takʼasmatnilh ju ixchivinti na lhu talhilacaʼalh ju kʼai ucxtin Jesús. 25 Pus ju astanch ju Bernabé taxtulh. Alhch ju lakʼachakʼan Tarso. Alh puxconaʼ ju Saulo. Chai acsni lhitajucha tʼamilh ju yuchi ju lakʼachakʼan Antioquía. 26 Chai tam cʼata tatʼatolhcha ju amachakʼan anch ju ixtalhilacaʼanta ju Jesús. Chai na lhu lapanacni amalanicalh ixchivinti Dios. Pus ju lakʼachakʼan Antioquía anchach ju pʼulhnan alhimapakaʼucanchalhch ju ixtalhilacaʼanta Jesús laʼixtapakaʼut ju Cristo. 27 Chai acsni ixvilhcha ju Bernabé ju Antioquía pus tataxtucha ju Jerusalén ju lapanacni ju ixtanajun ixchivinti Dios. Tamilh ju lakʼachakʼan Antioquía. 28 Pus ju pumatam sia yuʼunch Agabo ixjuncan. Chai lakatam avilhchan acsni ixtatakʼaixtokta ju ixtalhilacaʼanta Jesús pus ju yuchi taya chai ju Spiritu Santu juni ni caʼajunilh ju lapanacni ni caʼalinaʼ ju kʼai chavan ixlhilacaputsʼun ju lacamunutpaʼ. Chai vasalh chunch ju tapasalh acsni kʼai ucxtin ixjunita ju Claudio. 29 Pus ju ixtalhilacaʼanta Jesús ju amachakʼan Antioquía tanaulh ni catamakʼaixtʼokʼaʼ ju tumin ju laich caʼaxtaknicanaʼ ju amachakʼan Judea ju vachuʼ ixtalhilacaʼanta Jesús. Ixtanajun ni pumatamin pumatamin caxtʼakʼaʼ tachi ju ixmaktasuich. 30 Pus chunch ju tanavi. Chai tamalakachalh ju Bernabé chai ju Saulo ni catalhiʼalh ju tumin chai cataxtaknilh ju xalackʼajin ju ixtalhinajun sia yuʼunch ju ixtalhilacaʼanta Jesús.
1 Ju acsnich avilhchan ju kʼai ucxtin Herodes tsuculh amamakʼalhkʼajniniʼ ju aliʼin ju ixtalhilacaʼanta Jesús. 2 Ju yuchi lhinaulh ixmaknica ju Jacobo ixlakʼau ju Xivan. Maknicalh lacaspada. 3 Chai acsni laktsʼilh ni na kʼoxich talhiula ju israelitanin pus vachuʼ lhinaulh ixchʼapaca ju Pitaluʼ. Pus ju acsnich xacʼatan ixjunita acsni ixtaʼui ju xkapavati ju jantu ixtalhiyajuta ju xatʼin. 4 Pus acsni tachʼin navicalh ju Pitaluʼ lana tʼalhnucalh. Chai quilhmaktʼatʼi taropajni ju ixtalhistʼacʼa. Pumatʼatʼin ju xalhcayocanta. Ju kʼai ucxtin ixnajunta ni astan caʼixmaxtulh chai laʼixʼucxlacapuʼan ju lapanacni caʼixmakʼosaspitlh chai caʼixlhinaulh ixmaknica. Ixnajunta ni acsnich ju chunch ixlalh acsni ixtapasata ju anuʼ cʼatan acsni ixtaʼui ixborregoʼan ju israelitanin ixpupastaccan ju anuʼ atatsʼisni acsni tatakʼalhtaxtulh laʼixʼanintiʼan ju xalackʼajin istsʼalan ju makʼaniya ixlacpaʼitniʼan. 5 Pus ju taropajni na kʼox ixtalhistʼacʼa ju Pitaluʼ junta ixtʼalhnucanta. Para ju lapanacni ju ixtalhilacaʼanta Jesús va tachi ixtatapainini ju Dios ixlacata ju yuchi. 6 Pus ju anuʼ atatsʼisni acsni ixnajunta ju Herodes ni camaxtuyaʼ ju Pitaluʼ ni catuncunach pus ju Pitaluʼ ilhtatai. Pictutamin ixtamanalh ju taropajni. Chai ju Pitaluʼ ixmakchʼicanta lacalakatʼui cadena. Chai ju aliʼin ju ixtalhistʼacʼa ixtayanalh laʼixquilhtalacxtut ju pulachʼin. 7 Pus lana chincha pumatam ixʼanquilh ju kʼai ucxtin Dios chai na putuncujun va ju lacapulachʼin. Pus ju anquilh piclalh ju Pitaluʼ laʼixpakʼaxtiʼ. Macuju chai chanich juni: ―Akʼostʼaʼulhch vatsʼalhti. Pus ju cadena ju ixpumakchʼicanta lacpatajunilh laʼixmacaʼ ju Pitaluʼ. 8 Chai ju anquilh chani junich ju Pitaluʼ: ―Alakʼoxitʼich ju micinturón. Achʼantʼanutʼich ju minchʼanxtʼakʼan. Chai chunch ju navilh ju Pitaluʼ. Chai junichokocalh ju Pitaluʼ: ―Amakʼanchʼitʼich ju mimakatanut. Aqʼuinchʼakʼokʼach. 9 Pus ju Pitaluʼ tʼataxtulh ju anquilh. Chʼakʼokʼalh. Para ju yuchi jantu iscʼatsai ni vasalh cava ju tuchi ixnavi ju anquilh. Ju yuchi va ixnajunch ni ca va aklakʼavanalh. 10 Pus tatapasalh junta ixtayanalh ju taropajni ju alhistacnin chaich ju alacatam junta ixtayanalh ju alhistacnin. Chai tachaʼalh laxamalhtich si tsasnat junta putaxtucan lacapulachʼin. Puʼancan ju lakʼachakʼan. Chai ju anuʼ malhtich va isʼakstu talhtekʼa chai ju yuʼunch tataxtulh. Taʼalhtanalh tus tachaʼalh junta kʼankʼatʼiyui ti chai ju acsnich ju anquilh lana macaulh ju Pitaluʼ. 11 Ju acsnich chilh ju ixʼatalacpastʼacʼat ju Pitaluʼ chai ju yuchi chani naulh: ―Ju chavai icmachakxai ni slivasalhch ni xamalakachayachilh ju ixʼanquilh ju quiʼucxtin Dios chai quimakʼalhtaxtulh laʼixmacaʼ ju Herodes chai jantu chunch actitapasayaʼ ju chavai tachi ju ixtalacasqʼuin ju aliʼin quintʼaʼisraelitanin. 12 Acsni pastaclh ju chunch ju Pitaluʼ pus alh laʼixchakaʼ ju Malia ixnati ju Xivan ju vachuʼ ixjuncan Marcos. Ju anch na lhu ixtatakʼaixtokta. Ixtatʼajun tʼachivinin ju Dios. 13 Chai acsni salh ju xamalhtich lacakʼex ju ixvi lacati pus taxtuchilh pumatam atsiʼ ju Rode ixjuncan. Va ismispaputun tichi chavaich ju ixya. 14 Chai ju yuchi ni kʼasmatnilh ixchivinti ju Pitaluʼ pus lana mispalh ni yuchi. Para ni na ixkʼachan pus jantu lhimalhtekʼakʼo ju malhtich. Lana atsʼalatanuchokolh lacachakaʼ. Quixtaklh ju chivinti ni Pitaluʼ ixya lacamalhtich. 15 Para ju yuʼunch va ixtajunich: ―Va lakʼachʼapʼui ju uxintʼi. Para ju yuchi pʼas ixnajun ni vasalh yuchi. Pus ju acsnich ju yuʼunch ixtanajunch: ―Ca va yuchi ju anquilh ju lhistʼacʼa ju Pitaluʼ. 16 Pus ju Pitaluʼ tailhiʼalh isaca ju malhtich. Chai acsni xcayama tamalhtekʼanilh talaktsʼilh chai talhamakʼaninilh. 17 Para ju yuchi atamacyonilh ni va sekch catataya. Chai tsuculh ajuniniʼ tachi ju navilh ju kʼai ixʼucxtinʼan Dios acsni maxtulh lacapulachʼin. Chai alacjuni ni catamacʼatsanilh ju Jacobo chaich ju aliʼin ju ixtalhilacaʼanta Jesús. Chai acsni nonkʼo ju ani ju Pitaluʼ pus taxtulh. Ampa lhilacatam. 18 Acsni tunculhch jantuch va ti lacatsʼunin alilh ju ixtalhantiʼan sia yuʼunch ju taropajni tuchi amapasalh ju Pitaluʼ. 19 Pus ju Herodes lhinaulh ixpuxcajuca ju Pitaluʼ para jantu talhitaju. Ju acsnich ju Herodes makʼosaspitlh ju alhistacnin chai ni jantu lai xatajuni tuchi xatapasai pus lhinaulh ixʼamaknica. Chai astan ju Herodes taxtulh ju xaʼestado Judea. Alhch ju lakʼachakʼan Cesarea. Anch ju tolhcha. 20 Pus ju amachakʼan Tiro chai Sidón anch ixtaʼi ju ixvaitiʼan laʼixtʼun ju kʼai ucxtin Herodes. Para ju acsnich ju Herodes na ixʼaxcajich. Pus ju yuʼunch talakmilh ju Herodes chai tanavilh ixʼamigoʼan ju Blasto. Ju yuchi xakʼai ixjunita ju anch laʼixpuʼucxtin Herodes. Pus tatʼatakʼoxilh ju chivinti ju yuchi ni yuchach ju catapaininilh ju kʼai ucxtin ni cacaplich ju ixtalhkʼamti. 21 Pus ju Herodes lhcaʼula lakatam avilhchan acsni caʼalactʼachivinaʼ. Chai acsni chilh ju anuʼ avilhchan pus ju Herodes lakchʼi ju pumpuʼ tachi ixtalakchʼi ju ucxtinin. Chai tavi lacakʼai chakaʼ. Tsuculh aktʼasajunuʼ. 22 Pus ju ixtalhavatʼan lapanacni pʼas tachivinilh. Tanajunch: ―Yuchi ju Dios ju chivinin. Jantiyuʼ va quintʼalapanacʼan. 23 Pus ju acsnich pantsʼiquis pumatam ixʼanquilh ju kʼai ucxtin Dios lana xtaknilh ju ixtakʼankʼat ju Herodes ni lai xalakʼaʼi ni tajunilh ju lapanacni ni Dios ixjunita. Jantu xalakʼayai ju tucan Dios. Pus na lhu xatanui ju tsapu laʼixpajan chai yuchach ju xamakni. 24 Para ixchivinti Dios ixmakpitsikʼocanta chai na lhu ju taquiclacaʼilh. 25 Pus ju Bernabé chaich ju Saulo tataspʼitcha ju lakʼachakʼan Jerusalén acsni tamakʼaxtaklh ju tumin ju ixʼamalhiʼanican. Tatʼamilh ju Xivan ju vachuʼ ixjuncan Marcos.
1 Sia yuʼunch amachakʼan Antioquía ju ixtalhilacaʼanta Jesús ixʼalin ju lapanacni ju ixtanajun ixchivinti Dios chai ju aliʼin amamakaʼunin ixtajunita. Yuʼunch ju Bernabé chai ju Simón ju ixjuncan Niger chai ju Lucio amachakaʼ Cirene chai ju Saulo chai ju Manaén ju ixtʼatakʼayanaʼ ju kʼai ucxtin Herodes ixjunita. 2 Pus ju lakatam avilhchan acsni ixtatʼajun lakʼayanin ju kʼai ixʼucxtinʼan Dios chai ixtatascajai pus ju Spiritu Santu chani alacjuni: ―Amalakʼachʼatʼit ju Bernabé chai ju Saulo lacalhichʼalhcat ju tuchi icʼalhitʼasanitach. 3 Pus ju acsnich tatascajalh aliʼ chai tatʼachivinichokolh ju Dios. Chai astan tamokslanilh ixmacaʼan laʼisʼaktsulhʼan chai amalakachalh lacalhichʼalhcat. 4 Pus ju Spiritu Santu alacmalakachalh ju Bernabé chai ju Saulo ju lakʼachakʼan Seleucia. Chai ju anch tatajulh lacabarco. Taʼalh ju xalacatʼun Chipre. Ju Chipre va lacatʼicstʼi lacatʼun junita lacaʼalama. 5 Pus acsni tachaʼalh ju xalacatʼun Chipre anch ju tatacutlh ju lakʼachakʼan Salamina. Chai tatsuculh nonin ixchivinti Dios laʼixlacpujitatʼan ju istʼaʼisraelitanin. Pus ju Xivan ixʼalactʼaʼanta ju Bernabé chai ju Saulo ni ixʼaʼaktaijui ju yuʼunch. 6 Talacaputocʼakʼo ju lakʼachakʼan ju alin ixlhilacaputsʼun ju anuʼ lacatʼun tus tachaʼalh ju lakʼachakʼan Pafos. Ju anch talhitaju pumatam lapanac ju alhicujnuʼ ixjunita. Ju yuchi israelita ixjunita chai ixjuncan Barjesús. Pus ju yuchi va taʼaklhtamani lapanac ixjunita. Ixʼajuni ju lapanacni ni yuchach ixchivinti Dios ju ixnajun mas jantu. 7 Pus ju yuchi ixlapanac ixjunita ju kʼai ucxtin Sergio Paulo. Pus ju anuʼ kʼai ucxtin na ixʼacʼatsananta. Chai ju yuchi alactʼasanilh ju Bernabé chaich ju Saulo. Va ixʼalackʼasmatniputun ju ixchivinti Dios. 8 Pus ju anuʼ alhicujnuʼ ju vachuʼ Elimas ixjuncan alactʼalakʼailh ju Bernabé chaich ju Saulo. Va jantu ixlacasqʼuin ni calacaʼilh ixchivinti Dios ju kʼai ucxtin. 9 Pus ju Saulo vachuʼ Pablo ixjuncan chai ju Spiritu Santu ixlhinonkʼojui laʼisʼatsucunti ju yuchi. Pus ju Pablo skotutulh ju anuʼ alhicujnuʼ. 10 Chai chani juni: ―Tʼis tʼiʼaʼokxchʼokʼonankʼoʼuich ju uxintʼi. Chai navitʼi tachi chun ju macxcai. Istsʼalhʼat ju lhacaticuru. Ixtʼalaxcaiʼat tachi chun ju soknicʼa. Ja jantu amamactʼayaʼ ju ixnajunca ni jantu kʼox ni chʼakʼokʼacan ju kʼai ucxtin Jesús. 11 Pus ju chavai ju kʼai quiʼucxtin Dios camamakʼalhkʼajniyan. Jantu lai atʼilaktsʼi ju atuncunuʼ tachi lakatʼui lakatʼutu avilhchan. Pus lana soko maklakatsʼislh chai jantu lai laktsʼilh tuʼuʼ. Chai alhtanatsuculh ixpuxcajuca tichi chavaich ju camakchʼapalhiʼalh laʼixmacaʼ. 12 Pus ju acsnich ju kʼai ucxtin acsni laktsʼilh tuchi tapasalh lhilacaʼalh ju Jesús. Na lhamakʼaninilh acsni tajuni ju Bernabé chai ju Pablo ixlacata ju kʼai ixʼucxtinʼan Jesús. 13 Pus ju astan ju Pablo chai ju ixtʼaʼalhtanin tataxtucha ju lakʼachakʼan Pafos. Tatajuchokolh lacabarco. Taʼalh ju lakʼachakʼan Perge laxatʼun Panfilia. Para ju Xivan alactʼalamacaulh. Ju yuchi anchokolh ju Jerusalén. 14 Ju Pablo chai ju Bernabé tataxtuchokolh ju Perge. Tachaʼalh tus Antioquía laxalacatʼun Pisidia. Chai acsni chaʼalh ju avilhchan paʼastacni pus ju yuʼunch tatanucha laʼixpujitatʼan ju istʼaʼisraelitanin chai tatavi. 15 Chai acsni laktsʼinkʼocalh ju ixlhamapʼaksin Dios chai ju ixchivinti ju makʼaniya lapanacni ju ixtanajun ixchivinti Dios pus ju xaʼucxtinin lacpujitat tamalakachalh chivinti junta chani tajuni ju Pablo chaich ju Bernabé: ―Quintʼalapanacni ni pʼacxantʼatʼit tuʼuʼ chivinti ju alhimapʼaksipʼutʼunatʼit ju lapanacni laich anaʼuntʼit ju chavai. 16 Pus ju acsnich ju Pablo taya. Chʼixlh ixmacaʼ ni va sek catatavi ju lapanacni chai ajunich: ―Quintʼaʼisraelitanin chai tachi chun ju uxijnan ju vachuʼ tʼalhoniyatʼit ju Dios aquilakʼasmatniuch. 17 Ju quiDiosʼan ju lakʼayayau ju quijnanʼan ju israelitanin juntau yuchach ju sacxtulh ju makʼaniya quilacpaʼitniʼan chai na alalhava tus na lhu tava acsni ixtavilananchacaʼ ju laxalacatʼun Egipto mas jantu anch laʼixtʼunʼan ixjunita. Chai astan yuchi ju amaxtulh ju anuch lacatʼun laʼixtachaput. 18 Ju Dios va tastucnikʼo tachi chun ju ixtanavi ju makʼaniya quintʼaʼisraelitaninʼan acsni ixtaʼucxuntʼajun tʼupʼuxam cʼata junta va aseknicʼa ixjunita. 19 Chai astan malaccʼacxa ju lapanacni amachakʼan lakatujun lacatʼun ju lhiCanaán. Chai ju ixlacatʼunʼan ju yuʼunch axtaknikʼo ju makʼaniya quilacpaʼitniʼan. 20 Astan tachi lakatʼatʼi cientos a tʼupʼuxam cʼata ju Dios axtaknilh ju makʼaniya quilacpaʼitniʼan ju xalactʼicstʼi ixʼucxtinin ju talhinaulh ju sia yuʼunch. Chunch ju tailhiʼalh tus acsni ixtʼajun ju Samuel ju ixnajun ixchivinti Dios. 21 Ju astan tasqʼuinlh ju kʼai ixʼucxtinʼan. Pus ju Dios axtaknilh ju Saul istsʼalh Cis. Ju yuchi ixtamaskʼatʼanti Benjamín ixjunita. Pus ju Saul tanulh laʼixpuʼucxtin tʼupʼuxam cʼata. 22 Chai acsni tavanan makʼosucalh ju yuchi pus ju Dios axtaknilh ju David ju kʼai ixʼucxtinʼan. Chai isʼakstu ju Dios ju lhichivinilh ju David istsʼalh ju Isaí. Ma naulh ni ma chunch ixjunita ju ixʼatalacpastʼacʼat ju David tachi ju ixʼanuch ju Dios. Chai ju yuchi ma canavikʼoyach tachi chun ju calacasqʼuinach ju Dios. 23 Pus ju Dios ixʼajunita ju makʼaniya quilacpaʼitniʼan ni aquintaxtakniyan ju aquintamakʼalhtaxtuyan ni jantu caʼanau ju lacajipi. Yuchach ju Jesús. Chai ju yuchi acsni tavanan quitsucuchilh ju ani pus makʼaniya ixʼapapanatnich David va. 24 Para acsni tucaʼ ixtaiʼulata ixlhichʼalhcat ju Jesús pus ju Xivan ixʼajuni ju quintʼaʼisraelitaninʼan ni catamacaulh ju ixʼalactuʼuntiʼan chai cataʼakpaxlich. 25 Chai acsni ixnavikʼoputun ju ixlhichʼalhcat ju Xivan ma chani alacjuni ju lapanacni: “Ju uxijnan nonatʼit ni quitʼinch ju quilapacxanau. Para jantu. Ju astan caminaʼ pumatam ju xakʼai chai ju quitʼin jantu tuʼuʼ quintapalhni. Jantu lai actichʼanxkʼotlh nin mas va yuchi ju samusni ju ixchʼanxtʼakʼan”. Ma chunch ju naulh ju Xivan. 26 Pus ji quiʼalakʼavin ju vachuʼ ixʼapapanatnich Abraham untʼatʼit chai tachi chun ju uxijnan ju lakʼayayatʼit ju Dios pus quijnanʼan ju xtaknicantauch ju ani chivinti junta najun ta yu lai takʼalhtaxtucan ni jantu ancan ju lacajipi. 27 Pus ju ixtatʼonachalhch ju Jerusalén chaich ju xalackʼajinch jantu istamispaich ju Jesús tichi chavaich ixjunita. Sin catamachakxa ju ixchivintiʼan ju makʼaniya lapanacni ju ixtanajun ixchivinti Dios mas takʼasmatlh acsni ixlaktsʼincan chux avilhchan paʼastacni. Para acsni tavanan tasqʼuinlh ixʼaninti ju Jesús pus isʼakstuʼan tamuctaxtulh tachi ixtanajun ju anuʼ makʼaniya lapanacni. 28 Mas jantu tuʼuʼ talhitajunilh ixtalakʼalhin ju tuchi lai catalhimakni para ju lapanacni tasqʼuinilh ju Pilato ni camaknicalh ju Jesús. 29 Chai acsni tamaknilh pus ju chunch uctaxtukʼo tachi chun ju taxtokni ju ixʼalhitsʼokcanta ju Jesús ju makʼanchich. Pus ju acsnich tapʼuxlh ju lacacurus chai taquimacnu. 30 Para ju Dios malokʼonichokolh laʼixʼaninti. 31 Chai na lakalhu avilhchan ju Jesús atalacasunilh ju yuʼunch ju kʼaixtam ixʼalactʼataxtuta ju laxaʼestado Galilea chai ixʼalactʼaminta ju Jerusalén. Chai ju chavai yuʼunch ju tajuni ju lapanacni ixlacata ju Jesús. 32 Chai ju quijnan vachuʼ iclajunau ni muctaxtuta ju Dios ju tuchi ixʼajunita ju makʼaniya quilacpaʼitniʼan. 33 Pus ju quijnanʼan isʼaskʼatʼan quilacpaʼitniʼan juntau chai laktsʼiuch ni muctaxtulh ixchivinti Dios acsni malokʼonichokolh ju Jesús laʼixʼaninti. Ju makʼanchich ju Dios ixlhichivinin ju Jesús. Chai junta tsʼokcanta lacasalmos capitaluʼ lakatʼui ma chani juni: “Quintsʼalhʼat ju uxintʼi chai ju chavai icʼamasunita ju lapanacni ni vasalh quintsʼalhʼat”. Ma juni. 34 Vachuʼ ju makʼanchich ju Dios ixnajunta ni camalokʼonichokoyaʼ ju Jesús laʼixʼaninti chai jantu tavanan catinichokolh. Chunch ju ixnomputun junta ma chani juni ju Jesús ju lacaʼatsʼoknut: “Acxtaknikʼoyan ju uxintʼi tachi chun ju kʼox. Acmuctaxtuyaʼ tachi ju xacjunita ju David”. Ma juni. 35 Vachuʼ chunch ju nomputun lacaʼalakatam atsʼoknut lacasalmos junta va jun isʼakstu ju Jesús ju chivinin. Ma chanich ju juni ju ixpai: “Ju uxintʼi jantu alacʼasqʼuinaʼ ni capuchʼilh ju quilacatuna ju quitʼin ni mintsʼalh icjunita chai qʼuimalakʼachʼatʼachiʼ ju ani”. Ma juni. 36 Pus ju David chʼalhcatnanilh ju lapanacni tachi ju junilh ju Dios. Chai astan nilh chai macnucalh tachi ju ixʼalacmacnucanta ju ixlacpaiʼan chai puchʼilh ju ixlacatuna. 37 Para ju ixlacatuna ju Jesús jantu puchʼilh ni malokʼonichokolh ju Dios. 38 Pus ji quiʼalakʼavin tasqʼuini ni acʼatsʼatʼit ni va ixlacata ju Jesús lai macʼacxanican ju quintalakʼalhinʼan. Yuchi ju iclajumputunau ju uxijnan. 39 Pus tachi chun ju talhilacaʼan ju yuchi macʼacxanican ju ixtalakʼalhinʼan. Para ju talhilacaʼan ju ixlhamapʼaksin ju Moisés jantu tavanan catimacʼacxanicalh ju ixtalakʼalhinʼan. 40 Pus alaktsʼintʼit ju uxijnan. Tun chun atʼapʼasatʼit tachi ju ixtanajuntach ju makʼaniya lapanacni ju ixtanajun ixchivinti Dios. Ju yuʼunch chani tanaulh: 41 Ju Dios ma naulh ni ma canaviyaʼ lakatam lhamakʼan acsni tʼonatʼit. Chai ju uxijnan ma jantu lana alacʼaʼiyaʼitʼit mas xamatiʼ catajunin. Pus ma alaktsʼintʼit ju uxijnan ju jantu tuʼuʼ alhiulananatʼit. Ma alhamakʼanintʼit chai anitʼit. Ju Pablo ajuni ju lapanacni ni ma chunch ju naulh ju Dios ju makʼanchich. 42 Chai acsni tataxtucha ju lacpujitat pus ju yuʼunch ju jantu israelitanin ixtajunita pʼas tasqʼuinlh lamapainin ni laich catakʼasmatlh ju anuʼ chivinti alakatam avilhchan paʼastacni. 43 Chai acsni taʼakpitsilh ju ixtaquilata ju lacpujitat pus na lhu ju israelitanin tachʼakʼokʼalh ju Pablo chaich ju Bernabé. Vachuʼ tamakʼalh ju aliʼin ju ixtalakʼayai ju Dios chai ixtalacaʼi tachi ju israelitanin mas jantu israelitanin ixtajunita. Pus ju Pablo chaich ju Bernabé ajunich ju yuʼunch ni ixlhichux ixʼalhunutʼan catachʼakʼokʼalh ju Dios. 44 Acsni paʼastacni xajunchokoi tatakʼaixtokkʼo tachi chun ju lapanacni. Ixtakʼasmatniputun ixchivinti Dios. 45 Para ju israelitanin ju jantu talacaʼilh na talhacchaʼanilh ju Pablo acsni talaktsʼilh ixtalhavat lapanacni ju ixtakʼasmatniputun ixchivinti. Chai ixtanajunch ni jantu slivasalh tuchi ixnajunch ju Pablo chai ixtajunich macxcai chivinti. 46 Pus ju acsnich ju Pablo chaich ju Bernabé lana jantu tatalhanalh. Alacjuni: ―Aktsʼiya istasqʼuini ni pʼulhnan aʼuncʼanaʼitʼit ju ixchivinti Dios ju uxijnan ju quintʼaʼisraelitanin untʼatʼit. Para ni jantu lacʼaʼipʼutʼunatʼit chai nonatʼit ni jantu lacʼasqʼuinatʼit ju miʼatsucuntiʼan ju jonkʼalhita lactʼiyan pus ju chavai acʼajunau ixchivinti Dios ju yuʼunch ju jantu israelitanin tajunita. 47 Chunch ju aclayau ni chunch ju quintamapʼaksitan ju kʼai quiʼucxtin quincʼan Dios. Ju yuchi ma chani quintajunan: Ju quitʼin icʼulatan uxintʼi tachi ju maclhcu ni laich alacmamachʼakxanitʼi ju lapanacni ju jantu israelitanin tajunita ixchivinti Dios. Chai laich aʼunaʼ ju lapanacni ju tatʼajun ixlhilacaputsʼun ju lacamunutpaʼ ta yu laich cataputakʼalhtaxtulh ni jantu cataʼalh ju lacajipi. Pus ju Pablo ajuni ju lapanacni ni ma chunch ju juni ju Dios. 48 Pus ju yuʼunch ju jantu israelitanin ixtajunita acsni takʼasmatlh ju ixchivinti Pablo na talhikʼachalh. Ixtanajun ni na kʼox ju chivinti ixlacata ju kʼai ucxtin Jesús. Chai talacaʼi tachi chun ju isacxtuta ju Dios ni laich caʼalilh ju isʼatsucuntiʼan ju lactiyan. 49 Chai ni na lhu ju talacaʼilh pus ju chivinti ixlacata ju kʼai ucxtin Jesús ixmakpitsikʼocanta ixlhilacaputsʼun ju xalacatʼun anch. 50 Para ju israelitanin ju jantu talacaʼilh ixchivinti Dios taʼamaktalhkʼamanalh ju aliʼin chakolun ju na ixtalakʼayai ju Dios chai ju na lackʼoxin lapanacni ixtajunita. Vachuʼ tamaktalhkʼamalh ju xalackʼajin ju anuch lakʼachakʼan. Pus axcaicalh ju Pablo chai ju Bernabé chai alacxcauxtucalh ju anuch lacatʼun. 51 Pus ju acsnich ju Pablo chaich ju Bernabé alacchʼancʼalhapʼuxlh ju pokxni laʼixchʼajaʼan. Chai ni chunch ju xatanavi pus va ixʼajumputun ju lapanacni ni isʼakstuʼan catacʼucʼayaʼ ixtalakʼalhinʼan. Jantu ixcuentaʼan ju Pablo chai ju Bernabé. Chai astan ju yuʼunch taʼalh ju lakʼachakʼan Iconio. 52 Para ju amachakʼan Antioquía ju ixtalhilacaʼanta ju Jesús na ixtalackʼachan chai ju Spiritu Santu ixlhinonkʼojui laʼisʼatsucuntiʼan.
1 Pus ju Pablo chaich ju Bernabé acsni tachaʼalh ju lakʼachakʼan Iconio pus kʼaixtam tatanucha laʼixpujitatʼan ju istʼaʼisraelitanin. Chai ni na kʼox ju xaʼamavasalani ju lapanacni ju chivinti ixlacata ju Jesús pus na lhu talhilacaʼalh ju yuchi. Na lhu ju israelitanin chai ju jantu israelitanin. 2 Pus ju acsnich ju israelitanin ju jantu ixtalacaʼi taʼamaktalhkʼamanalh ju yuʼunch ju jantu israelitanin ixtajunita. Tatʼalaxcailich ju ixtalhilacaʼanta Jesús. 3 Pus ni na lhu xatalhilacaʼan ju Jesús pus ju Pablo chaich ju Bernabé makʼanch tatavi ju anch chai ixtamasui ju chivinti ixlacata ju kʼai ixʼucxtinʼan Jesús chai lana jantu ixtatalhanan. Va ixtalhilaksi ju Dios ni yuchi ju caʼaʼaktaijuyach. Chai ju Dios axtaknilh ju Pablo chai ju Bernabé ixtachaputʼan ni lai xatanavi ju tuʼuʼ ju laich catapucʼatsalh ju lapanacni ni vasalh Dios ju xaʼalacmalakachayachilh chai ixtanavi ju lhamakʼan. Ju chunch laich catacʼatsayaʼ ju lapanacni ni slivasalh tachi ju ixtanajun ju Pablo chaich ju Bernabé acsni alacjuni ni na alacmapaini ju lapanacni ju Dios. 4 Para ju amachakʼan anch quilhmactʼui ixtajunita. Ju aliʼin ixtachʼakʼokʼai ju israelitanin ju jantu ixtalhilacaʼanta Jesús. Chaich ju aliʼin ixtachʼakʼokʼai ju ixtamalakachan ju Jesús. 5 Pus ju israelitanin chaich ju yuʼunch ju jantu israelitanin ixtajunita chaich ju xalackʼajin ucxtinin kʼaixtam tataiʼula ixlacchivintiʼan ni catamamaxanilh ju Pablo chai Bernabé. Ixtanajun ni caʼalacatʼalhmayach. 6 Para acsni tacʼatsa ju Pablo chaich ju Bernabé pus lana taʼatsʼalalh. Taʼalh ju lakʼachakʼan Listra chai ju lakʼachakʼan Derbe ju xalacatʼun Licaonia. Vachuʼ talacaputocʼalh ju aliʼ lakʼachakʼanixni ju vanin ixvi. 7 Ju anchach vachuʼ alacjuni ju lapanacni ni laich catatakʼalhtaxtulh chai jantu catitaʼalh ju lacajipi. 8 Pus anch ju lakʼachakʼan Listra ixvi pumatam lapanac ju va ixchʼantakʼalhita tus laʼixpulakʼau. Jantu tavanan lai ixʼalhtanan. 9 Pus ju yuchi kʼasmatnilh ixchivinti ju Pablo chai ju Pablo machakxalh ni ixlacaʼi ju anuʼ lapanac ni lai palaich canavi ju Dios. 10 Pus yuchi pʼas lhixakʼala. Chanich juni: ―Sokch atʼai ju laminchʼajaʼ. Pus ju anuʼ lapanac alhtujnutaya chai tsuculh alhtanan. 11 Pus ju acsnich ixtalhavat lapanacni talaktsʼilh ju tuchi ixnavita ju Pablo chai talactʼasalh. Pus ju yuʼunch ixtachivinin ju lhilicaonia. Chai laʼixchivintiʼan chani ixtanajun: ―Ju diosnin quintalakmintanch para tatalacasuta tachi ju va lapanacni. 12 Ixtanajun ni ma yuchi ju isdiosʼan Júpiter ju Bernabé chai ju Pablo ma yuchi ju isdiosʼan Mercurio ni yuchach ju palai lhu ixchivinin ju Pablo. 13 Pus ju amachakʼan anch ixtayajuta ju ixpujitatʼan lacamacni chai anch ixtalakʼayai ju isdiosʼan ju Júpiter ixjuncan. Pus ju xapali anch alakmilh ju Pablo chaich ju Bernabé chai lhimilh ju vacax ju ixpixtumucʼacanta ju xanti. Ju yuchi chaich ju lapanacni va ixtanajunch ni catamakniniyaʼ ju Pablo chaich ju Bernabé ni ixtanajun ni diosnin ixtajunita. 14 Para acsni tacʼatsa ju ixtamalakachan ju Jesús yuʼunch ju Pablo chaich ju Bernabé tuchi ixtanaviputun ju lapanacni pus lana takʼexlh ixpumpuʼan. Chunch ixtalai ju israelitanin acsni na macxcai ixtalhiulai ju tuʼuʼ. Chai ju Pablo chai ju Bernabé talakʼalh ju lapanacni chai pʼas ixʼaxakʼalai. Chai chani alacjuni: 15 ―Quintʼalapanacni tʼas ni va naviyatʼit ju ani. Ju quijnan vachuʼ va lapanacni icjuntau tachi ju uxijnan. Chai yuchi iclhimintau ju ani ni va iclajumputunau ni amacʼaʼuntʼit ju ani taxtokni ju jantu tuʼuʼ ixtapalhni chai alhilacʼapʼitʼitch ju Dios ju lakʼajunta. Yuchi ju navilh ju lactʼiyan chai ju lacatʼun chai ju alama chai tachi chun ju alin ju anch. 16 Ju makʼanchich ju Dios alacaʼinilh chux ju lapanacni ni catatsuculh tachi ju kʼachanich kʼantam kʼantam. 17 Para aktsʼiya ixmacamin ju tuʼuʼ ju catalhimispalh ju lapanacni ni tʼajun ju yuchi. Ju yuchi ixʼanavini kʼox ju lapanacni. Ju yuchi macamin ju xcan ju minacha lactʼiyan. Chai quintalalhavaniyan ju quiʼachʼanantiʼan chai va tachi quintaxtakniyan quivaitiʼan chai quinkʼachatʼan laquiʼalhunutʼan. ―Chunch ju ajuni ju lapanacni ju Pablo. 18 Para mas ixʼajuni chunch ju Pablo chaich ju Bernabé na xcayama tamalacaʼinilh ju lapanacni ni jantuch caʼamakninicalh ju vacax. 19 Para ju acsnich tamilh ju israelitanin ju jantu ixtalhilacaʼanta Jesús. Ju yuʼunch ixtamintacha ju lakʼachakʼanixni Antioquía chai ju Iconio. Chai ju yuʼunch tamaktalhkʼamalh ju ixtalhavat lapanacni chai talacatʼalhma ju Pablo. Chai ni ixtanajunta ni nitach pus taxakʼamaxtulh lacamacni lakʼachakʼan. 20 Para ju aliʼin ju vachuʼ ixtalhilacaʼanta Jesús acsni talacaxcʼavitnu ju Pablo pus ju yuchi kʼostavi. Chai alactʼatanuchokolh ju lakʼachakʼan. Chai acsni tuncunchokolh pus ju Pablo tʼaʼalh ju Bernabé ju lakʼachakʼan Derbe. 21 Chai ju anch tajunilh ju lapanacni ni laich catatakʼalhtaxtulh chai jantu cataʼalh ju lacajipi ni catalhilacaʼalh ju Jesús. Chai na pumalhu talhilacaʼalh ju yuchi. Chai astan ju Pablo chai ju Bernabé taminchokolh ju lakʼachakʼan Listra chai ju lakʼachakʼan Iconio chai ju Antioquía. 22 Chai ju lakatamin lakatamin lakʼachakʼan junta xatatapasatilai ixtaʼaʼaktaijui ju lapanacni ni palai lai catalhilacaʼalh ju Cristo. Chai vachuʼ ajuni ni jantu tavanan catamacaulh ju ixti Dios. Chai ajuni ni aktsʼiya tasqʼuini ni camakʼalhkʼajnanau ni tanuputunau junta lhinajun ju Dios. 23 Chai tasacxtulh ju lapanacni ju catalhinonaʼ laʼixtalhavat ju talhilacaʼanta ju Jesús. Chai acsni tatʼachivinilh ju Dios chai tatascajalh pus tajunilh ju lapanacni ni ixʼucxtinʼan Dios ju caʼalaclhistʼacʼaʼ ni talhilacaʼanta ju yuchi. 24 Pus tataxtulh ju anch ju Pablo chai ju Bernabé chai tatapasatilalh ju xalacatʼun Pisidia chai taʼalh ju xalacatʼun Panfilia. 25 Chai tajunilh ixchivinti Dios ju amachakʼan Perge chai astan taʼampa tus tachaʼalh ju lakʼachakʼan Atalia. 26 Anchach ju tajucha lacabarco chai taʼanchokolh ju lakʼachakʼan Antioquía junta ixtataxtuta acsni tataiʼula ju ixlhichʼalhcatʼan. Chai acsni tucaʼ ixtataiʼulata pus ju lapanacni ju ixtalhinajun laʼixpujitatʼan ju amachakʼan anch tatapaininilh ju Dios ju na amapaininin ni yuchi ju caʼaʼaktaiju laʼixlhichʼalhcatʼan. Pus ju chavai ju Pablo chai ju Bernabé ixtanavikʼota chai ixtaminchokota. 27 Chai acsni tachaʼalh ju anch pus tamakʼaixtokkʼo chux ju yuʼunch ju ixtalhilacaʼanta Jesús chai ju Pablo chaich ju Bernabé alacjuni tachi chun ju taxtokni ju xaʼalactʼanavi ju Dios ju yuʼunch. Vachuʼ ajuni ni xalakʼaʼini ju Dios ni vachuʼ catalhilacaʼanilh ju Jesús ju jantu israelitanin tajunita. 28 Pus ju Pablo chaich ju Bernabé na lhu avilhchan alactʼatavi ju vachuʼ ixtalhilacaʼanta Jesús ju amachakʼan anch.
1 Pus ju acsnich ju aliʼin lapanacni taminchalh ju xaʼestado Judea. Tachilh ju Antioquía. Chai ju yuʼunch tajuni ju ixtalhilacaʼanta Jesús amachakʼan Antioquía ni jantu lai catatitakʼalhtaxtulh ni jantu caʼachʼucʼunicalh ixʼaxtʼakʼaʼan ju papanin tachi ju ixʼamalaninin ju Moisés ju makʼanchich. 2 Pus ju Pablo chaich ju Bernabé ajuni ni jantu tasqʼuini ni chunch catalalh. Para jantu lai xaʼamalacaʼini ju anuch lapanacni. Chai ni jantu lai xatalakʼoxi ju kʼai lhamakʼan ju anch pus asacxtucalh ju Pablo chaich ju Bernabé chaich ju aliʼin ni cataʼalh ju lakʼachakʼan Jerusalén chai catatʼachivinchalh ju ixtamalakachan ju Jesús chai ju lapanacni ju anch. 3 Pus ju ixtalhilacaʼanta Jesús yuʼunch ju taʼalacmalakachalh ju lapanacni ju Jerusalén. Chai ju yuʼunch tapasatilalh ju xaʼestado Fenicia chai ju Samaria. Chai lakatamin lakatamin lakʼachakʼan junta ixtatapasai pus alacjuni ju ixtalhilacaʼanta Jesús ni vachuʼ tamacaulh tachi ju aktsʼiya ixtalhilanitach ju yuʼunch ju jantu israelitanin ixtajunita chai talhilacaʼalh ju Jesús. Pus tachi chun ju ixtalhilacaʼanta Jesús na ixtalhikʼachan acsni takʼasmatlh ju chunch. 4 Chai ju Pablo chai ju Bernabé chaich ju aliʼin ju ixʼalactʼaʼanta acsni tachaʼalh ju Jerusalén pus lhikʼach amaklhtayanancalh. Na talhikʼachalh ju ixtamalakachan ju Jesús chaich ju aliʼin ju vachuʼ ixtalhilacaʼanta Jesús chaich ju ixtalhinajun laʼixpujitatʼan. Chai ju Pablo chaich ju Bernabé alacjuni tachi chun ju taxtokni ju xaʼalactʼanavi ju Dios ju yuʼunch. 5 Para ju aliʼin fariseonin ju ixtalhilacaʼanta ju Jesús tataya chai chani tajuni ju lapanacni: ―Ju lapanacni mas jantu quintʼaʼisraelitaninʼan tajunita para ni talhilacaʼanta Jesús pus aktsʼiya tasqʼuini ni vachuʼ cachʼucʼunicalh ju ixʼaxtʼakʼaʼan ju jokʼatni chai catanavilh tachi ju najun laʼixlhamapʼaksin ju Moisés. ―Chunch ju tanaulh ju fariseonin. 6 Pus ju acsnich tatakʼaixtoklh ju ixtamalakachan ju Jesús chaich ju ixtalhinajun laʼixpujitatʼan. Va ixtacʼatsaputun ta yu laich catalakʼoxi ju ani lhamakʼan. 7 Chai acsni na lhu talacchivinilh pus ju Pitaluʼ kʼostaya chai alacjuni: ―Quiʼalakʼavin ju uxijnan cʼatsʼayatʼit ni quisacxtulh ju Dios ju makʼanch ni laich acʼajuni ju yuʼunch ju jantu quintʼaʼisraelitaninʼan tajunita ta yu lai cataputakʼalhtaxtulh chai jantu catitaʼalh ju lacajipi. Chai ni acʼajunilh pus vachuʼ laich catalhilacaʼalh ju Jesús ju yuʼunch. 8 Chai Dios ju lai laktsʼin lakatamin alhunut. Chai yuchach ju mavasalalh ni vachuʼ ixtalhilacaʼanta Jesús ju yuʼunch. Pumavasala ni vachuʼ axtaknilh ju yuʼunch ju Spiritu Santu tachi ju quintaxtaknitan ju quijnanʼan. 9 Ju Dios vachuʼ amapaini ju yuʼunch tachi ju quintamapainiyan ju quijnanʼan. Chai vachuʼ achʼakʼanilh ixʼalhunutʼan ju yuʼunch acsni talhilacaʼalh ju Jesús. 10 Pus ju chavai tajuch ni jantu kʼox lhiulayatʼit tuchi navita ju Dios. Tajuch ni va axtʼaknipʼutʼunatʼit ju yuʼunch ju tsʼinqʼui lhamapʼaksin. Ju makʼaniya quilacpaʼitniʼan nin quijnanʼan jantu lai xanavipalau. 11 Jantu kʼox cava ni va chunch calau. Ju quijnanʼan cʼatsayau ni takʼalhtaxtuyau acsni lhilacaʼanau ju quiʼucxtinʼan Jesús ju ixnoncan camalakachatachilh Dios. Takʼalhtaxtuyau ni na kʼai ju ixʼamapaininti ju yuchi. Chai ni chunch ju putakʼalhtaxtuyau ju quijnanʼan pus vachuʼ chunch cataputakʼalhtaxtuyaʼ ju aliʼin lapanacni ju jantu israelitanin tajunita. ―Chunch ju ajuni ju Pitaluʼ. 12 Pus ju acsnich chux ixtalhavat lapanacni va sek taquicva. Takʼasmatnilh ixchivintiʼan ju Bernabé chaich ju Pablo acsni tatsuculh nonin ni Dios ju ixʼaxtaknita ju ixtachaput ni laich xatanavi ju tuʼuʼ ju lai catapuʼalacpastacnalh ju lapanacni chai laich xatanavi ju lhamakʼan laʼixʼucxlacapuʼan ju yuʼunch ju jantu israelitanin ixtajunita. 13 Pus acsni tachivinkʼo ju Bernabé chaich ju Pablo pus ju Jacobo chanich alacjuni ju lapanacni: ―Quiʼalakʼavin aquilakʼasmatniuch. 14 Ju Simón quintajuntan ta yu pʼulhnan anavinilh lamapainin ju Dios ju yuʼunch ju jantu quintʼaʼisraelitaninʼan tajunita chai asacxtulh ju aliʼin sia yuʼunch ni laich vachuʼ ixlapanacni catava. 15 Chai ni chunch ju lai ju Dios ju chavai pus va uctaxtui ju ixchivinti ju makʼaniya lapanac ju ixnajun ixchivinti Dios. Ju yuchi chani ju tsʼokta: 16 Ju Dios ma najun ni ma caminchokopalaʼ astan chai ma calakʼoxichokoyaʼ ju ixpuʼucxtin David ju aclatach. Ma chunch calayaʼ tachi ju lai pumatam lapanac ni lakʼoxichokoi ixchakaʼ ju taʼaktalh. Chai ma caʼalinchokoyaʼ ju catolaʼ laʼixpuʼucxtin David. Ma chunch cajunaʼ tachi acsni sayochokocan ju tuʼuʼ chakaʼ ju taʼaktalh. 17 Ma ju chunch ju yuʼunch ju jantu israelitanin tajunita ma laich catalhilacaʼanaʼ ju yuchi ju kʼai ixʼucxtinʼan junita. Ma lacasqʼuin ju kʼai ucxtin Dios ni vachuʼ ixlapanacni catava. 18 Ma chunch ju ixnajunta ju Dios ju makʼanchich ni laich camachakxayau ju ani taxtokni ju tʼajun tapasanaʼ ju chavai. 19 Pus ni chunch ju najunta ju Dios pus yuchi iclhinajun ju quitʼin ni jantu calhimakchapu ju yuʼunch ju jantu quintʼaʼisraelitaninʼan tajunita ju tamacaulh tachi ju aktsʼiya ixtalhilanita chai tachʼakʼokʼata ju Dios. 20 Va yuchi ni caʼatsʼoknuniyau ni jantu cataʼulh ju tuʼuʼ ju lhakʼailaktsʼinicanta ju tuʼuʼ ju laktsʼincan tachi dios. Chai jantu catalhitsuculh apumatam ju jantu ixʼamachakaʼ u jantu ixpapa. Jantu cataʼulh ju lhivai ju va pixtuchʼimaknicanta chai jantu cataʼulh ju acʼalhni. 21 Chunch ju calayau ni tus makʼanchich va tachi alin ju lapanacni ju lakatamin lakatamin lakʼachakʼan ju tamalani ixlhamapʼaksin ju Moisés. Chux avilhchan paʼastacni laktsʼincan ju yuchi laʼixpujitatʼan ju quintʼaʼisraelitaninʼan. ―Chunch ju ajuni ju lapanacni ju Jacobo. 22 Pus ju acsnich ju ixtamalakachan ju Jesús chai ju ixtalhinajun laʼixpujitatʼan chai chux ju aliʼin ju ixtalhilacaʼanta Jesús na kʼoxich talhiula ju ixchivinti. Chai tasacxtulh ju lapanacni sia yuʼunch ju laich caʼalactʼaʼalh ju Pablo chai ju Bernabé ju lakʼachakʼan Antioquía. Pus tasacxtulh ju Silas chai ju Judas ju vachuʼ ixjuncan Barsabás. Yuʼunch ju xalackʼajinch ixtajunita sia yuʼunch ju ixtalhilacaʼanta ju Jesús. 23 Chai taʼatsʼoknunilh lakatam alhiqui junta chani tajuni ju yuʼunch ju jantu israelitanin ixtajunita: “Ju quijnan ju ixtamalakachan Jesús icjuntau chai ju quijnan ju iclhinonau laquimpujitat quincʼan chai chux ju quijnan ju iclhilacaʼantau ju Jesús iclamacʼamiyau ju uxijnan ju jantu israelitanin untʼatʼit ju vilhchitʼit ju Antioquía chai ju xalacatʼun Siria chai Cilicia. 24 Pus ju quijnan icʼalakʼalhakʼasmatʼauch ni ma tataxtulh ju aliʼin ju sia quijnan chai ma taquilacha chai ma tamakʼatsʼankʼaniyan ju miʼatalacpastʼacʼatʼan. Ma va tajunan ni ma tasqʼuini ni achʼucʼunicʼanatʼit ju miʼaxtʼakʼaʼan chai ma anaviyaʼitʼit ju ixlhamapʼaksin ju Moisés. Para jantu quijnan ju xacʼamalakachayau. 25 Pus yuchi na kʼoxich xaclhilhiulayau junta xactakʼaixtʼokʼau ni acsacxtuyauch ju lapanacni ju sia quijnan ju caʼalactʼaʼalh ju quilakʼauʼan Pablo chaich ju Bernabé ju na amapainiyau. Cataʼanchan lalaktsʼinin ju uxijnan. 26 Pus ju Pablo chai ju Bernabé na paklhu taquilata junta ixʼamakniputuncan va ixlacata ni ixʼajumputun ju lapanacni ixlacata ju kʼai quiʼucxtinʼan Jesús ju ixnoncan camalakachatachilh ju Dios. 27 Pus icʼatʼamalakachatauch ju Judas chai ju Silas. Chai ju yuʼunch catamavasalaniyan tachi chun ju ani taxtokni. 28 Pus ju Spiritu Santu quintamapastʼacʼaniyan ju quijnan ni palai kʼox cava ni jantu tuʼuʼ tsʼinqʼui lhamapʼaksin aclaxtakniyau ju uxijnan. Va yuchi ju ani taxtokni ju aktsʼiya tasqʼuini ni anavitʼit. 29 Va yuchi ni jantu aʼutʼit ju tuʼuʼ ju va ixlhikʼailaktsʼinicanta ju tuʼuʼ ju laktsʼincan tachi dios. Chai jantu aʼutʼit ju acʼalhni nin tuʼuʼ ju va pixtuchʼimaknicalh. Vachuʼ jantu atʼatsʼucʼutʼit ju jantu miʼamachakaʼan u mimpapaʼan. Ni amacʼaʼuntʼit ju ani taxtokni pus naviyatʼit ju kʼox. Va yuchach”. Chunch ju tatsʼoklh ju lacaʼalhiqui. 30 Pus ju anuch lapanacni acsni amalakachacalh pus taʼalh ju lakʼachakʼan Antioquía. Chai acsni tachaʼalh tamakʼaixtoklh ju ixtalhavat lapanacni ju ixtalhilacaʼanta Jesús chai axtaknilh ju anuʼ alhiqui. 31 Chai acsni talaktsʼilh ju alhiqui pus na talhikʼachalh ju anuʼ chivinti junta ixnajun ni jantu tasqʼuini ni tuʼuʼ atumpa catanavilh. 32 Pus ju Judas chaich ju Silas vachuʼ laich ixtanajun ixchivinti Dios. Pus na lhu xaʼalacmapʼaksi. Chai xaʼalacjuni ni va lakatamch catanavilh ju ixʼalhunutʼan. 33 Pus ju Judas chaich ju Silas tatolhcha lakatʼui lakatʼutu avilhchan. Astan tanaulh ni catalakʼanchokolh ju ixtaʼamalakachananta. Pus ju ixtalhilacaʼanta Jesús amachakʼan anch tamacʼami chai tajuni ni Dios ju caʼalhistaclh ju lacati. 34 Para ju Silas tam xanonchokopalai chai jantu xaʼanchokoi ju Jerusalén. Ju yuchi tolhkʼalhi ju Antioquía. 35 Vachuʼ ju Pablo chaich ju Bernabé tatavilh ju Antioquía. Chai ju yuʼunch chai ju aliʼin va tachi taʼalacmalanilh ju lapanacni chai taʼalacjuni ixlacata ju kʼai ixʼucxtinʼan Jesús. 36 Ju astan acsni tapasalh lakatʼui lakatʼutu avilhchan pus ju Pablo juni ju Bernabé: ―Caʼanchokoch alaktsʼinin ju quilhiʼalakʼavinʼan laʼixmacni Jesús ju tavilanancha chux ju lakʼachakʼanixni junta quijuntau ixlacata ju quiʼucxtinʼan Jesús. Ta tsʼa vanach talhilacaʼanta ju yuchi. 37 Pus ju Bernabé ixlacasqʼuinta ni ixʼalactʼaʼalh ju Xivan ju vachuʼ Marcos ixjuncan. 38 Para ju Pablo jantu kʼox lhiula ni laich caʼalactʼaʼalh ju yuchi ni va alacmacoʼulacha lakʼachakʼan Panfilia. Jantu xaʼalacʼaktaijui aliʼ laʼixlhichʼalhcat Dios. 39 Pus talaclakʼailh chai talamacaulh. Pus ju Bernabé tʼaʼalh ju Marcos. Tataju lacabarco chai taʼalh ju xalacatʼun Chipre. 40 Chai ju Pablo sacxtulh ju Silas ni yuchi ju catʼaʼalh. Pus ju ixlhiʼalakʼavin laʼixmacni Jesús tatapaininilh ju kʼai ixʼucxtinʼan Dios ju na amapaininin ni yuchi ju caʼalhistaclh. Chai ju yuʼunch tataxtulh. 41 Taʼalh ju xalacatʼun Siria chai ju Cicilia chai tajuni ju ixlhiʼalakʼavin laʼixmacni Jesús ni jantu tavanan catacaplh ju ixtaxtokni Dios.
1 Astan ju Pablo chai ju Silas tachaʼalh ju lakʼachakʼan Derbe chai astan taʼalh ju lakʼachakʼan Listra. Ju anch talhitajulh pumatam lapanac ju vachuʼ ixlhilacaʼanta Jesús chai ju yuchi Timoteo ixjuncan. Istsʼalh ixjunita pumatam chakoʼulh israelita ju ixlhilacaʼanta ju Jesús. Para ju ixpai ixchivinin ju lhigriego. 2 Pus ju lhiʼalakʼavin laʼixmacni Jesús ju ixtavilanalh ju lakʼachakʼan Listra chai ju lakʼachakʼan Iconio ixtanajun ni na kʼox lapanac ixjunita ju Timoteo. 3 Pus ju Pablo ixlacasqʼuin ni caʼalactʼaʼalh ju Timoteo junta cataʼanaʼ. Para pʼulhnan lhinaulh ixchʼucʼuca ju ixʼaxtʼakʼa. Pus ju israelitanin amachakʼan anch ixtacʼatsakʼojui ni griego ixjunita ju ixpai chai ixlhiyuchi jantu ixchʼucʼucanta. Ju chunch ni jantuch lai ta catitanaulh. 4 Chai acsni ixtachaʼan ju lakatamin lakatamin lakʼachakʼan ixtajuni ju lhiʼalakʼavin laʼixmacni Jesús ju jantu israelitanin ixtajunita ni chunch catalalh tachi ju ixtanajuntach ju ixtamalakachan Jesús chai ju ixtalhinajun laʼixpujitatʼan ju ixtavilanancha ju Jerusalén. 5 Pus ju ixtalhilacaʼanta ju Jesús lana ixlhichux ixʼalhunut ju ixtalhilacaʼanta ju yuchi. Chai tuncujun tuncujun ixtatalhavai ju vachuʼ ixtalhilacaʼanta Jesús. 6 Pus ju Spiritu Santu jantu xaʼalacasqʼuini ju Pablo chai ju ixʼalactʼaʼanta ni cataʼalh nonin ju ixchivinti Dios ju xalacatʼun Asia. Pus ixlhiyuchi tatapasacha ju xalacatʼun Frigia chai ju xalacatʼun Galacia. 7 Chai acsni tamilh ju xalacatʼun Misia ixtanajun ni cataʼanaʼ ju xalacatʼun Bitinia. Para ju Spiritu Santu jantu alacasqʼuinilh. 8 Pus tapasatilalh laxalacatʼun Misia tus tachaʼalh ju lakʼachakʼan Troas. 9 Pus ju acsnich atatsʼisni ju Pablo laktsʼilh tuʼuʼ tachi ju va laʼixʼaklakʼavanti. Laktsʼilh pumatam lapanac amachakaʼ Macedonia ni anch ixya chai ixtapainini. Ixjuni: “Atʼatʼich ju ani Macedonia. Aquilaʼaktaijuyauch ju quijnan”. 10 Pus ni xalaktsʼin ju anuʼ lapanac ju Pablo tachi ju va laʼixʼaklakʼavanti pus lana tapuxcaulh ta yu laich catapuʼalh ju xalacatʼun Macedonia. Chai ju quitʼin icLucas. Icʼalactʼaʼalh. Icʼauch ju anch ni icmachakxauch ni yuchi ju quiʼucxtinʼan Dios ju xaquintatʼasaniyan ni acʼauch ajuninin ju amachakʼan anch ta yu laich cataputakʼalhtaxtulh chai jantu cataʼalh ju lacajipi. 11 Pus ictajutauch lacabarco ju lakʼachakʼan Troas chai sok icpuʼau tus icchaʼauch ju lacatʼicstʼi lacatʼun ju vi lacaʼalama junta Samotracia juncan. Chai ni tuncunchokolh ictaxtuch chai icchaʼauch ju lakʼachakʼan Neápolis. 12 Ju anch ictacutʼauch ju lacabarco chai icʼauch ju lakʼachakʼan Filipos junta ixlhinajun ju Roma. Pus ju anuʼ lakʼachakʼan saʼaktsulh ixjunita tachi chun ju lakʼachakʼanixni ju lhiʼanch xalacatʼun Macedonia. Pus ju anch ictolhtilau lakatʼui lakatʼutu avilhchan. 13 Chai ju lakatam avilhchan paʼastacni ictaxtuchau ju lakʼachakʼan. Icʼauch ju lacxcan. Anch ixtaʼanch tʼachivinin ju Dios ju lapanacni. Pus ictolauch anch chai ni ixtatakʼaixtokta ju aliʼin chakolun pus icʼajuniu ixchivinti Dios. 14 Pus pumatam chakoʼulh ju quintakʼasmatnin Lidia ixjuncan. Ju yuchi istʼai lakslapulh pumpuʼ chai amachakaʼ Tiatira ixjunita. Chai ju yuchi na ixlakʼayai ju Dios. Chai ju kʼai ucxtin Dios aktaijulh ju Lidia ni laich xamachakxai tuchi ixtʼajun nonaʼ ju Pablo. 15 Chai ju yuchi makpaxacalh chai chux ju ixtatanumanalh laʼixchakaʼ. Chai astan quintatapaininin. Quintajunanch: ―Ni nonatʼit ni vasalh iclhilacaʼan ju quiʼucxtinʼan Jesús pus caʼauch tolhnin laquinchakaʼ. Chunch ju xaquintajunan chai tapʼastu xaquintalhiʼanan. 16 Pus ju aktam acsni icʼauch junta ixtatʼachivinin ju Dios ju lapanacni pus icpakxtokvi pumatam atsiʼ ju ixtanun ju lhacaticuru laʼixʼalhunut. Chai ju anuʼ lhacaticuru ixnajun tuchi catapasayaʼ mas tucaʼ tapasai. Chai ixʼalin ju ixʼucxtinin ju anuʼ atsiʼ chai ju yuʼunch na lhu ixtapulhajaich laʼixchivinti ju anuʼ atsiʼ. 17 Pus ju yuchi ixchʼakʼokʼai ju Pablo chai ju quijnanch. Na pʼas ixchivinin chai chani ixnajunch: ―Ju ani lapanacni ixlapanacni tajunita ju Dios ju vilhcha talaclhman. Ju yuʼunch tajunan ta yu laich apʼutʼakʼalhtʼaxtʼuyaʼitʼit ni jantu apʼitʼit ju lacajipi. 18 Pus na lakalhu avilhchan ju ixquilhuntʼajun ju chunch. Pus ju Pablo jeks ulh chai talakaspʼitlh chai juni ju lhacaticuru ju ixtanun laʼixtanquilhacni ju anuʼ atsiʼ: ―Icjunan laʼixtapakaʼut ju Jesucristo ni atʼaxtʼu laʼixlacatuna ju atsiʼ. Pus lana taxtulh ju anuʼ pantsʼiquis ju lhacaticuru. 19 Para ju ixʼucxtinin ju anuʼ atsiʼ acsni talaktsʼilh ni ixtaxtuta ju lhacaticuru chai jantu lai ixtapulhajai aliʼ laʼixchivinti ju atsiʼ pus lana tachʼapalh ju Pablo chai ju Silas. Alhiʼancalh lacapuʼucxtin junta ixtavilanancha ju xalackʼajin ucxtinin. 20 Chai acsni alacmalacasunicalh ju lackʼajin ucxtinin pus ju anuʼ lapanacni chani tajunich: ―Ju ani tayanalh jokʼatni va israelitanin tajunita chai na tamaktalhkʼaman ju quintʼaʼamachakʼanʼan. 21 Ju yuʼunch tamasui ju ixʼatalanintiʼan. Para ju quijnanʼan ju romanonin juntau jantu lai naviyau tachi ju tanajun ni jantu chun najun laquilhamapʼaksinʼan. 22 Pus ju acsnich ju amachakʼan anch tatʼalasalh ju Pablo chai ju Silas. Chai astan ju xalackʼajin ucxtinin talhinaulh ixmaxtunica ixpumpuʼan ju Pablo chai ju Silas chai talhinaulh ixʼakʼainekmacaʼan lacaqʼuiu. 23 Chai acsni na paklhu ju xaʼalackʼainekmai pus alactʼalhnucalh lacapulachʼin. Chai junicalh ju alhistacnan lacapulachʼin ni kʼoxich caʼalhistaclh. 24 Chai ju yuchi ni chunch juncan pus alacmanulh palai pulacni lacapulachʼin. Chai alacchʼantʼalhma. 25 Pus acsni chaʼalh paitat tsʼis ju Pablo chai ju Silas ixtatʼajun tʼachivinin ju Dios chai ixtatʼajun milhpanin ju Dios chai ju ixʼalactʼatʼalhnucanta vachuʼ takʼasmatnilh. 26 Pus ju acsnich lana na tataclh ju lacatʼun chai ju xalactantun ju lacapulachʼin ixtalacchiqʼuixkʼojui. Chai ju xamalhtich ju pulachʼin lana talhtekʼakʼo. Chai ju cadena ju ixpuchʼican ju tachʼin lana talaklhvakkʼo. 27 Chai acsni cujcha ju alhistacnan lacapulachʼin chai laktsʼilh ni ilhtekʼakʼojuich ju pulachʼin pus maxtulh ju ispada. Ixmaknichokoputuncan isʼakstu ni ixnajun ni caʼixtaʼatsʼalhkʼolhch ju tachʼinin. 28 Para ju Pablo pʼas xakʼala. Juni: ―Tun va amaknichʼokʼocʼa. Anich icvilhkʼoju. 29 Ju acsnich ju anuʼ alhistacnan lacapulachʼin sqʼuinlh ju maclhcu chai vatsʼalhti tanu pulacni lacapulachʼin. Na ixʼaxqʼuipʼipʼitnintach ni na ixtalhananta. Chai va lhikʼox axakʼala ju Pablo chai ju Silas. 30 Chai acsni amaxtulh makspaʼ asacmich. Ajunich: ―Quintʼalapanacni tijuch ju lai acnavi ni laich actakʼalhtaxtuyaʼ chai jantu acʼalh ju lacajipi. 31 Chai ju yuʼunch tajunich: ―Alhilacʼapʼich ju kʼai ucxtin Jesús ju ixnoncan camalakachatachilh ju Dios chai amakʼalhtʼaxtʼucʼanaʼ ju uxintʼi chai chux ju tavilanalh laminchakaʼ. 32 Ju acsnich ju Pablo ajunich ixlacata ju kʼai ixʼucxtin Jesús. Ajuni ju alhistacnan lacapulachʼin chai chux ju ixʼalactʼatanui laʼixchakaʼ. 33 Chai mas na istsʼistacaʼ para ju anuʼ alhistacnan lacapulachʼin alacchʼakʼanilh ju Pablo chai ju Silas junta ixlacmacʼatsanicanta. Chai ju yuchi chai chux ju ixʼalactʼatanui lacachakaʼ taʼakpaxkʼo. 34 Chai astan alackʼailhiʼalh laʼixchakaʼ chai amavalh. Pus ju yuchi chai tachi chun ju ixtatanumanalh laʼixchakaʼ na ixtalhikʼachanch ni ixtalhilacaʼanta ju Jesús. 35 Chai acsni tunculh pus ju ucxtinin amalakachachilh ju ixpulasiyajni. Tajunich ju alhistacnanch lacapulachʼin ni caʼalacmaxtulh ju Pablo chai ju Silas. Chach taʼancha laʼixchakaʼan. 36 Pus ju alhistacnan lacapulachʼin quijunilh ju Pablo ju anuʼ chivinti. Junich: ―Ju ucxtinin quintajuni ni ma aclamaconauch. Pus ju chavai atʼaxtʼutʼitch. Aʼinchitʼitch. Jantu tuʼuʼ alhamakʼaninintʼit. 37 Para ju Pablo ajunich ju pulasiyajni: ―Ju quijnan ictʼaputekʼecantauch ju romanonin. Para ju uxijnan quintalakanekmanch laʼixʼucxlacapuʼan ju lapanacni mas jantucaʼ xaquintakʼasmatnin ju ucxtinin u alin ju quintalakʼalhin quincʼan u jantu. Va yuchi ni quintatʼalhnunch lacapulachʼin. Pus ju chavai ja tanajun ni va sekch aquintamaxtuyan. Ca jantu. Chach taminchokolh isʼakstuʼan chai aquintamaxtun. 38 Pus ju pulasiyajni taʼanchokolh juninin ju xalackʼajin ucxtinin ju ani chivinti. Pus ju yuʼunch na tatalhanalhch acsni tacʼatsalh ni ixʼalactʼaputekʼecanta ju romanonin ju Pablo chaich ju Silas chai ni jantu tuʼuʼ alhitajunicalh talakʼalhin ju alhilakanekmacalh. 39 Pus ju xalackʼajin ucxtinin tamilh lacapulachʼin. Tatapaininilh ju Pablo chai ju Silas ni catamacʼacxanilh. Chai astan tamaxtulh lacapulachʼin chai ajuni ni catataxtulh ju anuch lakʼachakʼan. 40 Pus ju Pablo chai ju Silas tataxtulh lacapulachʼin. Taʼalh laʼixchakaʼ ju Lidia. Chai ju anch ajuni ju ixlhiʼalakʼavinʼan ni jantu catamacaulh ju Jesús. Chai astan tataxtulh ju anuch lakʼachakʼan.
1 Pus ju Pablo chai ju Silas tatapasacha ju lakʼachakʼan Anfípolis chai ju lakʼachakʼan Apolonia. Astan tachaʼalh ju lakʼachakʼan Tesalónica. Chai ju anch ixʼalin ixpujitatʼan ju istʼaʼisraelitanin. 2 Pus ju Pablo tavilh ju anch ju lakʼachakʼan lakatʼutu semana. Chai tachi ju aktsʼiya ixlai acsni jintaʼ ixchaʼan ju yuchi pus alh laʼixpujitatʼan chai lakatʼutu avilhchan paʼastacni amasunilh ju lapanacni ixchivinti Dios. 3 Chai laʼixchivinti Dios ju tsʼokcanta anch ju ixʼapumavasalanich ju lapanacni ni aktsʼiya istasqʼuinich ni camakʼalhkʼajnalh ju anuʼ ju ixnoncan camalakachatachilh Dios. Chai canilh chai astan cataʼacxtuchokolh junta ixmacnucanta. Chai ixʼalacjuni: ―Ju anuʼ Jesús ju iclajunau ju uxijnan yuchach ju ixnoncan camalakachatachilh ju Dios. 4 Pus ju aliʼin israelitanin talhilacaʼalh ju Jesús chai tachʼakʼokʼalh ju Pablo chai ju Silas. Vachuʼ na lhu griegonin ju na ixtalakʼayai ju Dios talhilacaʼalh ju Jesús. Chai vachuʼ na lhu chakolun ju xalackʼajin ixtajunita talhilacaʼalh ju yuchi. 5 Para ju israelitanin ju jantu ixtalhilacaʼanta Jesús talhacchaʼanilh ju Pablo chai ju Silas ni na lhu ixtachʼakʼokʼai. Chai tamakʼaixtoklh ju lapanacni ju kʼai ixtajunita ju jantu ixtachʼalhcatnan ni va ixtamalhekninch. Pus na lhu tatakʼaixtoklh chai na ixtalactʼasai. Pus taʼalh laʼixchakaʼ ju Jasón chai tapʼastu ixtatanuputun ni va ixtapuxcajui ju Pablo chai ju Silas. Va ixʼamaxtuputun ni laich ixʼamakʼaxtaknilh laʼixtalhavat lapanacni. 6 Para jantu alhitajucalh ju anch. Pus taxakʼamalhiʼalh ju Jasón chai ju aliʼin ju ixtalhilacaʼanta Jesús lacapuʼucxtin. Pʼas ixtalhichivinin ju Pablo chai ju Silas. Ixtanajun: ―Vanta anchach ju taʼan ju anuʼ lapanacni tatʼajun juninin ju lapanacni ni jantu catachʼakʼokʼalh ju kʼai quiʼucxtinʼan César. Chai ju chavai tamilh ju ani. 7 Chai ju ani Jasón aʼulata ju yuʼunch laʼixchakaʼ. Pus ju yuʼunch lana jantu tuʼuʼ talhiulai ju ixlhamapʼaksin ju César ju lhinajun laquilakʼachakʼanʼan. Ju yuʼunch tanajun ni alai yuchi ju kʼai ucxtin pumatam ju Jesús juncan. 8 Pus acsni takʼasmatlh junima chivinti pus ju lapanacni chai ju xalackʼajin ucxtinin ju anuʼ lakʼachakʼan na tatalhkʼamalh. 9 Pus ju Jasón chai ju aliʼin taxtaknilh tumin ju ucxtinin. Chai ju ucxtinin alacjuni ni caʼaxtaknichokocanaʼ ju ixtuminʼan acsni tavanan catataxtulh ju anuʼ lakʼachakʼan ju Pablo chai ju Silas. Pus acsnicaʼ ju amacajuncalh ju Jasón chai ju aliʼin. 10 Pus ju acsnich atatsʼisni ju lhiʼalakʼavin laʼixmacni Jesús lana tamalakachalh ju Pablo chai ju Silas ni cataʼalh ju lakʼachakʼan Berea. Chai acsni tavanan tachaʼalh ju anch taʼalh laʼixlacpujitatʼan ju istʼaʼisraelitanin. 11 Pus palai kʼox ixjunita ju ixʼalhunutʼan ju amachakʼan Berea. Palai jantu ju amachakʼan Tesalónica. Pus ju amachakʼan Berea na ixtakʼasmatputun ju ixchivinti Dios chai chux avilhchan ixtalaktsʼin ixchivinti Dios ju tsʼokcanta. Va istacʼatsaputun u vasalh tachi ju ixtanajun ju Pablo chai ju Silas u jantu. 12 Pus na lhu israelitanin talhilacaʼalh ju Jesús. Vachuʼ na lhu ju griegonin talhilacaʼalh chai sia yuʼunch ixʼalin ju chakolun chai ju papanin ju xalackʼajin ixtajunita ju anuʼ lakʼachakʼan. 13 Para acsni tamachakxalh ju israelitanin amachakʼan Tesalónica ni ixtʼonacha vachuʼ ju lakʼachakʼan Berea amalaniniʼ ixchivinti Dios ju Pablo pus taʼalh ju anch chai tamaktalhkʼamalh ju lapanacni. 14 Pus ju acsnich ju ixlhiʼalakʼavin laʼixmacni Jesús lana tamalakachalh ju Pablo ni caʼalh laʼixquilhtuʼ alama. Para ju Silas chai ju Timoteo tatavilhcaʼ ju lakʼachakʼan Berea. 15 Chai ju yuʼunch ju tatʼaʼalh ju Pablo ni catamacuvilayaʼ ju lacati talhichaʼalh ju lakʼachakʼan Atenas. Chai acsni ixtaminchokoputun ju yuʼunch pus ju Pablo alacjuni ni catajunantach ju Silas chai ju Timoteo ni vatsʼalhti catalakʼalh ju Pablo. Pus taminchalh ju ixtʼaʼalhtanin ju Pablo. 16 Pus ju Pablo acsni ixʼalacpacxan ju Silas chai ju Timoteo ju lakʼachakʼan Atenas na amakʼaninilh acsni laktsʼilh ni na lhu taxtokni ixʼalin ju ixtalaktsʼin tachi ju isdiosnin ju amachakʼan anch. 17 Pus yuchi va tsa ixlhiʼan laʼixpujitatʼan ju istʼaʼisraelitanin chai ixʼalactʼachivinin ju yuʼunch chai ju aliʼin lapanacni ju vachuʼ ixtalakʼayai ju Dios. Vachuʼ chux tuncujun ixʼalactʼachivinin ju lapanacni ju ixʼalacpakxtʼokʼa ju laclhitamau. 18 Chai ju aliʼin ixʼamamakaʼun ju Epicúreo chai ju ixʼamamakaʼun ju Estoico ixtatʼachivinin ju Pablo. Pus ju aliʼin sia yuʼunch ixtalaclajuni: ―Va kʼaya najun ju anuʼ lapanac ju na lhu chivinin. Chai ju aliʼin ixtanajun: ―Ju yuchi tachi ju va ixnonach ni alin atumpa dios. Chunch ixtanajun ni va ixʼajuni ju Pablo ixlacata ju Jesús chai ixʼajuni ni lai lokʼonchokocan mas nitach. 19 Pus takʼailhiʼalh ju Pablo junta ixtatakʼaixtʼokʼa ju xalackʼajin junta Areópago ixjuncan. Chai tajuni: ―Iccʼatsaputunau tis talakxtuch ju ani sastʼi atalaninti ju naʼun. 20 Pus ju tuchi quilamakʼasmatniuch tachi ju va sastʼi atalaninti iclhiulayau. Chai iccʼatsaputunau tuchi ju nomputunch ju ani. ―Chunch ju tajuni ju Pablo. 21 Pus tachi chun ju amachakʼan Atenas chai ju amachakʼan alacatam lacatʼun ju anch ixtatʼajun jantu tuʼuʼ atumpa ixtanavi. Va yuchi ni ixtanajun u ixtakʼasmatʼa ju tuʼuʼ sastʼi atalaninti. 22 Pus ju acsnich ju Pablo taya laʼixlacaitat junta ixtatakʼaixtokta ju xalackʼajin junta Areópago ixjuncan chai chani ajuni: ―Quintʼalapanacni amachakʼan Atenas iclalaktsʼinau ni slivasalh na tʼalhoniyatʼit ju midiosʼan. 23 Pus ju quitʼin icquipixiyalhnalh junta alin ju midiosnin chai iclhitajulh lacatam junta mokslayatʼit ju ixlhakʼailaktsʼin ju midiosʼan chai ju anch chani ju tsʼokcanta: “Ixʼanuch ju anuʼ dios ju jantu icmispayau”. Pus ju anuʼ ju tʼalhoniyatʼit ju uxijnan mas jantu mispʼayatʼit yuchach ju iclajunau ju quitʼin. 24 Yuchach ju navilh ju lacamunutpaʼ chai tachi chun ju taxtokni ju alinch. Chai yuchach ju xaʼucxtin lactʼiyan chai ju ani lacatʼun. Pus ju yuchi jantu lai tanui ju lacpujitat ju va yajutach lapanac. 25 Ju yuchi jantu tasqʼuini ni va cachʼalhcatnanilh ju va tam lapanac tachi ju va camaktasqʼuinilh tuʼuʼ ni yuchach tucan ju quintaxtaknikʼojun ju quiʼatsucuntiʼan chai quiʼaxanitʼan chai tachi chun ju taxtokni ju maktasqʼuiniyau. 26 Ju Dios navilh ju pʼulhnan lapanac chai si ixʼapapanatnich juntau tachi chun ju quijnanʼan ju tʼonau ju ani lacamunutpaʼ. Chai Dios ju quintaʼulatan ju ani lacamunutpaʼ. Chai yuchi ju quintalhcanitan ju quiʼatsucuntiʼan chai yuchach ju najun taʼanchach ju catsucuyaʼ pumatamin pumatamin. 27 Chunch ju navilh ju kʼai ucxtin Dios ni laich catacʼatsa ju lapanacni ixlacata ju yuchi chai catamispalh. Catalhitaju ni jantu vasalh makat tʼajun ju yuchi laquiʼalhunutʼan. 28 Laʼixmacni yuchi ju tʼonau chai alin ju quintacʼatsanʼan. Tachi ju tanaulh ju aliʼin makʼaniya atalaninin ju mintʼachivintiʼan ixtajunita. Ju yuʼunch tanaulh ni isʼaskʼatʼan Dios juntau. 29 Chai ni isʼaskʼatʼan Dios juntau pus jantu kʼox ni canonau ni chunch junita ju Dios tachi ju tuʼuʼ lhinavicanta oro u plata u chiux tachi ju talacxuclakʼoxi ju lapanacni laʼixmacaʼan chai tachi ju kʼoxich talhiulai. 30 Pus ju makʼanchich ju Dios va chʼixlh ju ixlhitontoʼan ju lapanacni. Para ju chavai kʼasi alacjuni tachi chun ju lapanacni ixlhilacaputsʼun ju lacamunutpaʼ ni catamacaulh ju ixʼalactuʼuntiʼan. 31 Ni lhcaʼulata ju yuchi ju avilhchan acsni sok calaktsʼintanuyach tachi chun ju lapanacni pus yuchi lhinajun ju Dios ni catamacaulh ju ixʼalactuʼuntiʼan. Chai ju yuchi sacxtutach pumatam ju canonaʼ tichi chavaich ju catakʼalhtaxtuyaʼ chai tichi chavaich ju camamakʼalhkʼajnicanaʼ. Chai apumavasalanilh tachi chun ju lapanacni ni chunch ju catapasayaʼ ni macxtuchokolh ju anuʼ lapanac junta ixmacnucanta. ―Chunch ju ajuni ju lapanacni ju Pablo. 32 Pus acsni takʼasmatlh ni lai macxtuchokocan junta macnucan pus ju aliʼin va talhitsʼiʼilh. Chaich ju aliʼin ixtanajun: ―Aclakʼasmatnichokopalauch aktam ixlacata ju ani ju naʼun. 33 Pus ju acsnich ju Pablo taxtulh junta ixtatakʼaixtokta ju lapanacni. 34 Pus ju aliʼin ju takʼasmatnilh ixchivinti ju Pablo talhilacaʼalh ju Jesús chai tachʼakʼokʼalh ju Pablo. Ju sia yuʼunch yuchi ju Dionisio ixjuncan. Ju yuchi pumatam xakʼai ixjunita sia yuʼunch ju ucxtinin ju ixtatakʼaixtʼokʼa junta Areópago ixjuncan. Vachuʼ ixʼalin pumatam chakoʼulh ju Dámaris ixjuncan chaich ju aliʼin lapanacni.
1 Ju astan ju Pablo taxtulh ju lakʼachakʼan Atenas. Alh ju lakʼachakʼan Corinto. 2 Pus ju anch ju Pablo lhitajulh pumatam israelita ju Aquila ixjuncan. Amachakaʼ Ponto ixjunita. Jantucaʼ makʼan ixminacha ju laxalacatʼun Italia. Anchach ixtʼamintacha ju ixʼamachakaʼ ju Priscila ixjuncan. Pus ju kʼai ucxtin anch ju Claudio ixjuncan ixtakta ju lhamapʼaksin ni catataxtuchalhch ju lakʼachakʼan Roma laxalacatʼun Italia tachi chun ju israelitanin. Yuchi talhitaxtulh ju yuʼunch. Pus ju Pablo alakʼalh ju yuʼunch. 3 Chai ni vana va chunch ju ixtalhichʼalhcatnan tachi ju ixlhichʼalhcatnan ju Pablo pus alactʼatavi. Alactʼachʼalhcatnalh. Pus ju yuʼunch va ixtanavi ju kʼai lona chakaʼ chai istastʼai. 4 Chai chux avilhchan paʼastacni ju Pablo ixʼan laʼixpujitatʼan ju istʼaʼisraelitanin chai ixmakchivinin ju anch. Ixʼamalacaʼiniputun ixchivinti Dios ju istʼaʼisraelitanin chai ju yuʼunch ju jantu israelitanin ixtajunita. 5 Para acsni tavanan tamincha ju lakʼachakʼan Macedonia ju Silas chai ju Timoteo pus ju Pablo macaulicaʼ ju ixlhichʼalhcat ju ixnavica ju anuʼ lona chakaʼ. Jantu tuʼuʼ atumpa ixnavi. Va ixʼalacmalani ju lapanacni ixchivinti Dios. Chai ixʼalacmavasalani ju istʼaʼisraelitanin ni Jesús yuchach ju Cristo ju ixnoncan camalakachatachilh ju Dios. 6 Para ju yuʼunch talhitalhkʼamalh chai tajuni macxcai chivinti. Pus ju Pablo alaccʼalhanilh ixpumpuʼ ni catapumachakxayaʼ ni camaconach ni jantu talacaʼiputun. Chai chani ajuni: ―Jantu quintalakʼalhin quitʼin ni apʼinaʼitʼit ju lacajipi. Mintalakʼalhin miʼakstuʼan. Ju chavai aclakʼanaʼ ju yuʼunch ju jantu israelitanin tajunita. 7 Pus lana taxtulh ju lacpujitat chai tanucha laʼixchakaʼ pumatam lapanac ju Justo ixjuncan. Ju ixchakaʼ vanin ixtʼaya ju pujitat. Pus ju yuchi na ixlakʼayai ju Dios. 8 Pus vachuʼ lhilacaʼalh ju kʼai ucxtin Jesús ju xaʼucxtin pujitat ju Crispo ixjuncan. Yuchach chai tachi chun ju ixtatanumanalh laʼixchakaʼ. Vachuʼ na lhu amachakʼan Corinto acsni takʼasmatlh ju chivinti talhilacaʼalh ju Jesús chai amakpaxakʼo. 9 Pus ju acsnich ju Pablo laktsʼilh ju kʼai ixʼucxtin Jesús tachi ju va laʼixʼaklakʼavanti. Chai chani junicalh ju Pablo: ―Jantu atʼalhan. Va tachi aʼun ju lapanacni ju quinchivinti. Jantu va sek aʼuntʼi. 10 Quitʼin ju ictʼavilan chai jantu xamatiʼ lai tuʼuʼ canaviyan. Atʼailhipʼich ju ixnajunca ju quinchivinti ni na lhu alin ju lapanacni ju aquintalhilacaʼanaʼ ju ani lakʼachakʼan. 11 Pus tam cʼata a lakachaxan malhquiyuʼ ixvilhcha ju anch ju Pablo. Chai ixʼalacmasuni ixchivinti Dios ju lapanacni. 12 Para acsni kʼai ucxtin ixjunita ju Galión laxalacatʼun Acaya pus ju israelitanin tatakʼaixtoklh. Tachʼapalh ju Pablo. Talhiʼalh lacapuʼucxtin. 13 Chai chani tajuni ju kʼai ucxtin: ―Ju ani ya lapanac va amalacaʼini ju lapanacni ni catalakʼaya ju Dios para jantu lhijun ju quilhamapʼaksin quincʼan tachi ju najun ju yuchi. 14 Pus ju Pablo ixchivimputun para ju Galión lana ajuni ju israelitanin: ―Ji israelitanin ni tuʼuʼ cava navitʼa kʼai talakʼalhin u tuʼuʼ macxcai ju canavi ca aktsʼiya xaclakʼasmatniu. 15 Para ni va jantu kʼox lhiulayatʼit ju tuchi masui ju ani ya lapanac chai jantu kʼox lhiulayatʼit tachi ju lhichivinin pumatam lapanac chai tachi ju lhichivinin ju milhamapʼaksinʼan pus alaktsʼintʼitch miʼakstuʼan ju uxijnan. Ju quitʼin jantu icmaktanuputun ju anch. 16 Chai lana alactixcoxtucalh lacapuʼucxtin. 17 Pus ju acsnich tachi chun ju griegonin tachʼapalh ju Sóstenes ju xaʼucxtin lacpujitat. Tatsuculh lakanekmanin laʼismakspaʼ lacapuʼucxtin. Para ju Galión jantu xanavi cuenta. 18 Ju Pablo na lhu avilhchan titavilhcaʼ ju anch. Astan alacmacʼami ixlhiʼalakʼavin laʼixmacni Jesús chai taxtulh. Vachuʼ tatʼaʼalh ju Priscila chaich ju Aquila. Chai acsni tachaʼalh ju lakʼachakʼan Cencrea pus ju Pablo sitcalh ni ixmuctaxtutach ju tuchi ixlhitʼatakʼoxitach ju Dios. Astan tataju ju lacabarco ni ixtaʼamputun ju xalacatʼun Siria. 19 Chai acsni tachaʼalh ju lakʼachakʼan Efeso pus amacoʼulacha ju Priscila chaich ju Aquila. Chai ju Pablo alh laʼixpujitatʼan ju istʼaʼisraelitanin chai alactʼachivinilh ju yuʼunch ju ixtatakʼaixtokta ju anch. 20 Pus ju yuʼunch tapʼastu ixtajuni ni ixʼalactʼatolhcha makʼanch para ju Pablo jantu tolhputulh. 21 Ju yuchi alacmacʼami chai chani alacjuni: ―Aktsʼiya tasqʼuini ni aclaktsʼinanta ju cʼatan ju caʼalinanta ju Jerusalén. Para aclalakminchokopalau ni Dios calacasqʼuinaʼ. Chai acsni ajuni ju chunch lana taxtulh ju Efeso. Tajulh lacabarco. 22 Chai acsni chaʼalh ju lakʼachakʼan Cesarea tacutlh lacabarco chai alh lakʼachakʼan Jerusalén. Alh alacmacʼaminiʼ ju yuʼunch ju vachuʼ ixtalhilacaʼanta Jesús amachakʼan anch. Chai astan alhch ju lakʼachakʼan Antioquía. 23 Ju anch tolhcha lakatʼui lakatʼutu malhquiyuʼ. Astan taxtulh chai lacaputocʼalh junta pumilh ju lakʼachakʼanixni ju alin ju laxalacatʼun Galacia chai ju lakʼachakʼanixni ju alin ju xalacatʼun Frigia. Ixʼalacjuni ju lapanacni ju ixtalhilacaʼanta Jesús ni jantu tavanan catacaplh. 24 Pus ju acsnich chaʼalh ju lakʼachakʼan Efeso pumatam israelita ju Apolos ixjuncan. Amachakaʼ Alejandría. Ju yuchi na lai ixchivinin chai na ismispai ju ixchivinti Dios ju tsʼokcanta. 25 Ju yuchi ismasunicanta ixlacata ju kʼai ixʼucxtin Jesús chai ixlhichux ixʼalhunut ixʼamalaninin ixlacata ju yuchi. Chai ju tuchi ismispai lana vas ixnajun. Va yuchi ni jantu tuʼuʼ atumpa ismispai. Va yuchi ju ismispai tachi ju ixnajun ju Xivan acsni ixʼamakpaxanan. 26 Pus ju yuchi alh laʼixpujitatʼan ju istʼaʼisraelitanin chai lana jantu ixtalhanan. Chai ajuni ju lapanacni ixchivinti Dios. Para ju Priscila chai Aquila acsni takʼasmatlh ju ixchivinti pus takʼailhiʼalh laʼixchakaʼan. Tamavasalanilh ju aliʼ taxtokni ixlacata ju Jesús ju jantucaʼ iscʼatsai ju Apolos. 27 Chai ju Apolos acsni ixʼamputun ju xalacatʼun Acaya pus ju ixlhiʼalakʼavin laʼixmacni Jesús taʼaktaijulh. Tatsʼoklh lakatam alhiqui ju laich caʼalhiʼanilh ju ixtalhilacaʼanta Jesús amachakʼan anch. Va alacjuncan ni kʼox cataʼamaklhtayanalh ju Apolos acsni cachaʼanach ju anch. Pus ju yuchi acsni tavanan chaʼalh na aʼaktaijulh tachi chun ju ixtalhilacaʼanta Jesús. Pus ju yuʼunch talhilacaʼalh ju Jesús va ixlacaʼatalh ni anavinilh lamapainin ju Dios. 28 Pus ju Apolos laʼixtalhavat lapanacni ixnajun ni jantu kʼox tachi ju ixtalacaʼi ju istʼaʼisraelitanin. Chai ni na vas ixnajun pus ju yuʼunch jantu lai ixtamapuspʼitni ju chivinti. Chai laʼixchivinti Dios ju tsʼokcanta ixʼamavasalani ni Jesús yuchach ju Cristo ju ixnoncan camalakachatachilh ju Dios.
1 Pus acsni ixvi ju Apolos ju lakʼachakʼan Corinto pus ju Pablo puʼalh lacatalhpan tus chaʼalh ju lakʼachakʼan Efeso. Pus ju anch alhitaju ju aliʼin ju vachuʼ ixtalhilacaʼanta Jesús. 2 Pus ju yuchi alacjuni: ―Ja tanulh ju Spiritu Santu lamiʼalhunutʼan acsni xalhilacʼapʼinatʼit ju Jesús. Pus ju yuʼunch taʼakʼalhtayanalh. Tajuni: ―Jantu ickʼasmatʼau ni caʼalilh ju Spiritu Santu. 3 Pus ju acsnich ju Pablo ajunich: ―Pus ja jantu laʼixlhitapakaʼut ju Jesús ju akpʼaxtʼatʼit. Chai ju yuʼunch tajuni: ―Pus tachi ju xaʼamakpaxanan ju Xivan chunch ju icʼamakpaxanantauch. 4 Chai ju Pablo ajunich: ―Pus ju Xivan ixmakpaxai tam xamatiʼ acsni ixmacajun ju macxcai isʼatsucunti. Para vachuʼ ixʼajuni ni catalhilacaʼalh ju yuchi ju caminaʼ astan. Ju chunch va nomputun ni catalhilacaʼalh ju Jesucristo ju ixnoncan camalakachatachilh ju Dios. 5 Pus acsni takʼasmatlh ju chunch taʼakpaxchokolh laʼixtapakaʼut ju kʼai ixʼucxtinʼan Jesús. 6 Chai acsni alacmucʼanilh ixmacaʼ ju Pablo pus tanulh ju Spiritu Santu laʼixʼalhunutʼan chai tachivinilh ju chivinti ju jantu aktam ixtachivininta chai vachuʼ tanaulh ixchivinti Dios. 7 Pus ixchuxʼan ixtachaʼantach pumacautʼui lapanacni. 8 Pus ju Pablo tachi lakatʼutu malhquiyuʼ ju antsuculh laʼixpujitatʼan ju istʼaʼisraelitanin. Ixʼamasuni ju lapanacni ixchivinti Dios chai lana jantu ixtalhanan. Ixʼalacjuni ju lapanacni ni lhinomputun ju Dios laʼisʼatsucuntiʼan. Chai ixʼamalacaʼiniputun ju ixchivinti Dios. 9 Para ju aliʼin na pʼas ixjunita ju ixʼalhunutʼan chai jantu ixtalacaʼiputun chai na macxcai ixtalhichivinin ju ixti Dios laʼixʼucxlacapuʼ ixtalhavat lapanacni. Pus ju Pablo alacmacoyaulh ju yuʼunch chai lacatam alackʼailhiʼalh ju yuʼunch ju ixtalhilacaʼanta Jesús. Alhiʼalh laʼixpamamakaʼun pumatam ju Tiranno ixjuncan. Chai anch ixʼalacmalani ju lapanacni tuncujun tuncujun. 10 Pus tachi lakatʼui cʼata ju ixʼamalaninin ju chunch. Chai ju chunch tachi chun ju amachakʼan Asia takʼasmatlh ju chivinti ixlacata ju kʼai ucxtin Jesús. Chux ju israelitanin chai ju jantu israelitanin. 11 Chai ju Dios ixtakni ixtachaput ju Pablo ni lai xanavi ju vasalh kʼai lhamakʼan. 12 Mas va ixpayu ju Pablo u tuʼuʼ pumpuʼ ju ismusatocʼai acsni ixchʼalhcatnan ni ixʼalhiʼanicanch ju takʼankʼanin pus lana palai xaʼalacnavi. Chai ju lhacaticurulhni ixtataxtui laʼixlacatunaʼan ju lapanacni. 13 Pus ju acsnich ixtaʼalin ju israelitanin alhicujnin. Ju yuʼunch va lacatam lacatam ixtaʼucxuntʼajun. Chai ju yuʼunch ixtanajun ni laich vachuʼ ixmaxtui ju lhacaticurulhni laʼixlacatunaʼan ju lapanacni laʼixʼalhicujnutʼan. Para astan ixtanajun ni laich vachuʼ catamaxtulh ju lhacaticurulhni laʼixlacatunaʼan ju lapanacni laʼixtapakaʼut ju kʼai ucxtin Jesús. Chai chani ixʼajuni ju lhacaticurulhni: ―Iclajunau laʼixtapakaʼut ju anuʼ Jesús ju najun ju Pablo ni catalhilacaʼalh ju lapanacni. Iclajunau ni atʼaxtʼuch laʼixlacatuna ju lapanac. ―Chunch ixtanajun. 14 Pus ixʼalin pumatam israelita ju Esceva ixjuncan. Ju yuchi xakʼai pali ixjunita chai ixʼalin pumatujun istsʼalan. Pus ju yuʼunch vachuʼ chunch ixtanaviputun. 15 Para acsni chunch tajuni ju lhacaticuru pus ju anuʼ lhacaticuru chani akʼalhtayanalh. Ajunich: ―Icmispaich ju Jesús chai iccʼatsai tichi chavaich ju Pablo juncan. Para ju uxijnan jantu alakʼamispʼacʼanatʼit. 16 Pus ju acsnich ju anuʼ lapanac ju ixpacxanta ju lhacaticuru lana alactʼalasa ju anuʼ tsʼalan chai alaclhajakʼo. Alaclhimakchʼapulh tus alacmaʼatsʼala ju anuch lacachakaʼ. Va lackʼaitsasaʼunch ixtajunita acsni taʼatsʼalalh chai slivasalh na alacmacʼatsanita. 17 Pus ju ani tacʼatsakʼo ju israelitanin chai ju jantu israelitanin ju ixtavilanancha ju lakʼachakʼan Efeso. Pus lana na tatalhanalh ixchuxʼan chai na ixtalakʼayai ju kʼai ucxtin Jesús. 18 Pus ju acsnich na lhu ju ixtalhilacaʼanta Jesús tamilh nonin ju talakʼalhin ju ixtanavita ni na ixtalhilacaʼantacaʼ ju alacnavinti. 19 Vachuʼ na lhu ju ixtaʼalhicujnun tamakʼaxtakkʼo ju ixlacʼalhiquiʼan chai alacxavakʼo laʼixʼalacʼavantiʼan ixchuxʼan. Chai acsni aputekʼecalh ixtapalh ju anuʼ alhiqui ju alacxavacalh pus chaʼalh cincuenta milh tumin ju plata ixjunita. 20 Pus ju chunch palai lhu xatalhilacaʼan ju Jesús. Lana ixlhichux ixʼalhunutʼan ju talhilacaʼalh ju yuchi. 21 Pus acsni tapasakʼo ju ani taxtokni pus ju Pablo ixnajun ni caʼanaʼ alaktsʼiniʼ ju ixtalhilacaʼanta Jesús amachakʼan Macedonia chai amachakʼan Acaya chai cachaʼanaʼ tus Jerusalén. Vachuʼ ixnajun ni aktsʼiya caʼanaʼ ju lakʼachakʼan Roma acsni cataxtuyanta ju Jerusalén. 22 Pus amalakacha ju Macedonia pumatʼui ju ixʼalactʼachʼalhcatnan. Yuchi ju Timoteo chaich ju Erasto. Para ju yuchi tolhchacaʼ lakatʼui lakatʼutu malhquiyuʼ ju xalacatʼun Asia. 23 Pus ju acsnich alilh lakatam kʼai laklakʼaiti va ixlacaʼatalh ni ixʼajuncan ju lapanacni ixlacata ju Jesús. 24 Yuchi ju Demetrio ju taiʼulalh ju lakʼaiti. Ju yuchi ixmaxtajanaʼ plata ixjunita chai lacaplata ixlacxapalaxtui lactʼicstʼi pujitat tachi ixpujitat isdiosʼan ju Diana ixjuncan. Pus na lhu lapanacni ju ixtatʼachʼalhcatnan chai na lhu ixtapulhajai. 25 Pus ju Demetrio alacmakʼaixtoklh ju ixlapanacni chai ju aliʼin lapanacni ju vachuʼ ixtalacxapalaxtui isdiosnin chai chani alacjuni: ―Quintʼalapanacni ju uxijnan cʼatsʼayatʼit ni na laklhu pulhajayau ju ani lhichʼalhcat. 26 Para ju uxijnan laktsʼintʼit ju anuʼ Pablo chai kʼasmatʼatʼit tachi ju chivinin ju yuchi. Ju yuchi va najun ni jantu vasalh dios ju tuchi navicanta lacamacaʼ. Chai na pumalhu ju xamalacaʼini. Chai jantu va yuchi ju amachakʼan ani laquilakʼachakʼanʼan Efeso para vachuʼ ju amachakʼan na lakalhu lakʼachakʼan laxatʼun Asia ju xaquimalacaʼini ju chivinti. 27 Pus ca na lhixcai ni caʼalinaʼ ju quivaitiʼan ni lhu catalacaʼiyaʼ tachi ju najun ju Pablo. Chai vachuʼ jantu xtuʼuʼ calhiulacanaʼ ju kʼai ixpujitat quidiosʼan Diana. Ju chavai ni si talhilacaʼan ju yuchi. Chux ju amachakʼan Asia chai chux ju lacamunutpaʼ. Para astan ca jantu catilakʼayacalh ju yuchi. ―Chunch ajuni ju lapanacni. 28 Chai acsni takʼasmatlh junima chivinti pus lana tatalhkʼamalh. Na talactʼasakʼo. Ixtanajunch: ―Na kʼai ju Diana quidiosʼan ju quijnanʼan ju amachakʼan Efeso juntau. 29 Pus ju amachakʼan anch lana va tʼilhi tʼilhi ixtalaich. Pus ixtavilanancha ju Gayo chai ju Aristarco amachakʼan Macedonia. Ju yuʼunch ixtatʼaʼalhtanan ju Pablo. Pus ju lapanacni tachʼapalh ju yuʼunch chai taxakʼamalhiʼalh lacakʼai chakaʼ junta ixtatakʼaixtʼokʼa ju lapanacni acsni ixʼalin ju ixjuntaʼan. 30 Pus ju Pablo ixʼamputun tanunuʼ lacatalhavat ni laich ixʼaxakʼala ni jantuch va lhu ixtatalhkʼamalh para ju ixtalhilacaʼanta Jesús jantu talacasqʼuinilh. 31 Vachuʼ ju aliʼin xalackʼajin amachakʼan Asia ni ixʼamigojni ixtajunita ju Pablo tamalakachanilh chivinti ni jantu caʼalh talacasunuʼ laʼixtalhavat lapanacni. 32 Pus ju ixtalhavat lapanacni va tʼilhi tʼilhi ixtalaich. Ju aliʼin tam ixtanajun. Ju aliʼin tumpa ixtanajun. Pus na lhu ju lapanacni jantu istacʼatsai tuchi ixtalhitakʼaixtʼokʼach. 33 Pus ju aliʼin laʼixtalhavat lapanacni tamavasalanilh ju lhamakʼan ju pumatam lapanac ju Alejandro ixjuncan. Chai ju istʼaʼisraelitanin tatisalhiʼalh junta lai caʼaxakʼala ju lapanacni. Pus ju yuchi tamacyaulh ni va sekch catava. Va ixʼajumputun ju lapanacni ni jantu cataxcailich ju israelitanin. 34 Para acsni tamispa ni israelita ixjunita ju Alejandro pus talactʼasachokopa. Tachi lakatʼui hora ixtalactʼasai. Ixtanajun: ―Na kʼai ju Diana quidiosʼan ju quijnanʼan ju amachakʼan Efeso juntau. 35 Pus ju acsnich ju atsʼoknuʼ ju anch lakʼachakʼan alacjuni ni va sekch catatava chai chani alacjuni: ―Quintʼalapanacni amachakʼan Efeso tis chavaich ju jantu cacʼatsa ni lhistʼacʼau ju ixpujitat ju kʼai quidiosʼan Diana. Vachuʼ lhistʼacʼau ju Diana ju patajuta ju lactʼiyan. 36 Chai ni cʼatsʼayatʼit ni slivasalh ju tuchi xaclajunau pus tasqʼuini ni va sekch atʼayatʼit. Jantu xtuʼuʼ anavitʼit ni jantu pʼulhnan kʼox cʼatsʼayatʼit tuchi ju alin. 37 Va kʼai tachʼin naviyatʼit ju ani tayanalh lapanacni. Ju yuʼunch jantu tuʼuʼ takʼalhaʼuta ju laquimpujitatʼan nin macxcai catalhichivinilh ju quidiosʼan ju quijnanʼan. 38 Pus ju Demetrio chaich ju ixlapanacni ju tatʼachʼalhcatnan ni catatʼalaxcailh xamatiʼ yuchi lhitavilanalh ju ucxtinin lacakʼai chakaʼ. Laich cataʼachivimakʼanalh. 39 Para ni tuʼuʼ atumpa ju alhichʼivimakʼanatʼit pus laich anonaʼitʼit acsni va catamakʼaixtʼokʼaʼ ju lapanacni ju ucxtinin. 40 Jantu xcai ni calhichivimakʼancau ixlacata ju ani lakʼaiti. Catanaulh ni va tʼalasayau ju ucxtinin. Ni chunch caʼulhtucau matich tuʼuʼ talakʼalhin ju laich calhiquilhʼau ixlacata ju ani lakʼaiti. 41 Chai acsni naulh ju ani chivinti ajuni ju ixtalhavat lapanacni ni cataʼalh laʼixchakaʼan. Chai taʼalh.
1 Pus ju astan acsni sekch va ju lakʼaiti pus ju Pablo alactʼasanilh ju lapanacni ju vachuʼ ixtalhilacaʼanta Jesús chai alacmapʼaksilh. Astan talamaklhtantailh. Talamacʼamilh. Chai ju Pablo taxtulh. Va ixʼamputun ju xalacatʼun Macedonia. 2 Ju yuchi alhtanatsuculh chux ju anuʼ lacatʼun chai ajuni ju amachakʼan anch ju vachuʼ ixtalhilacaʼanta Jesús ni jantu tavanan catacaplh. Astan ju yuchi alh ju xalacatʼun Grecia. 3 Ju anch tolhcha lakatʼutu malhquiyuʼ. Astan ixtajuputun lacabarco. Ixʼamputun ju xalacatʼun Siria. Para acsni cʼatsalh ni ixtapacxantajitach ju istʼaʼisraelitanin pus naulh ni alai alacatamch capuʼanaʼ. Chai minchokolh ju Macedonia. 4 Ju tatʼaʼalh ju Pablo tus ju xalacatʼun Asia yuchi ju Sópater amachakaʼ Berea chai ju Aristarco chai ju Segundo amachakaʼ Tesalónica chai ju Gayo amachakaʼ Derbe chai ju Tíquico chai ju Trófimo amachakʼan Asia chai ju Timoteo. 5 Ju yuʼunch pʼulhnan taʼalh chai tapacxancha ju Pablo ju lakʼachakʼan Troas. 6 Pus ju quitʼin icLucas chai xacvi ju lakʼachakʼan Filipos. Chai ju Pablo quilakmilh ju anch. Chai acsni tapasalh ju anuʼ cʼatan acsni taʼui ju xkapavati ju jantu macaʼanican ju xatʼin pus ictaxtuchau ju anch. Ictajuch ju lacabarco chai icʼalhtanantauch lakaquis avilhchan tus icchaʼauch ju lakʼachakʼan Troas junta icʼalakmiu ju aliʼin ju pʼulhnan tachaʼalh. Chai ju anch ictolhchau lakatujun avilhchan. 7 Chai acsni chaʼalh ju lhitumincu pus tatakʼaixtoklh ju ixtalhilacaʼanta Jesús ni va ixtaʼui ju anuʼ xkapavati ju ixpupastaccan ixʼaninti ju Jesús. Pus ju Pablo alacmapʼaksi. Chai ni ixnajunch ni cataxtuyach ni catuncunchokoyach pus na panicni ju xachivinin. Ixʼamalaninin tus paitat tsʼis. 8 Pus junta tatakʼaixtoklh ixlhitantalactʼutu chakaʼ ixjunita. Chai na lhu ixʼalin ju maclhcu. 9 Chai pumatam tsʼalh ju Eutico ixjuncan ixvi lacaventana. Chai ni na panicnich ixchivinin ju Pablo pus ju anuʼ tsʼalh lhtatalh. Chai acsni na ilhtatavi pus tatistʼalh ju laʼilhtatat. Tin pataju ixlhitantalactʼutu chakaʼ. Quisaccalh xanin. 10 Pus ju Pablo soko takʼalhtaju. Putamalhch ju anuʼ tsʼalh chai lakatanu. Astan alacjuni ju lapanacni: ―Tuntʼi na va amakʼaninintʼit. Ju Dios xtaknichokolh ju isʼatsucunti. 11 Astan ju Pablo tocʼachokolh ju talaclhman chai vailh. Chai na panicni alactʼachivintolhchokolh tus ixtʼajun tuncuntilanaʼ. Acsnich ju alhch. 12 Pus ju anuʼ tsʼalh ju ixmalokʼonichokocanta laʼixʼaninti lhiʼancalh laʼixchakaʼ chai jantu va tilacatsʼunin takʼachalh ju lapanacni. 13 Pus ju quijnan pʼulhnan ictaxtuch. Ictajuch ju lacabarco. Icʼauch ju lakʼachakʼan Asón. Ju Pablo xaquintajuntanch ni anchach aquintapakxtʼokʼanch. Ju yuchi va chʼajaxʼalh. 14 Pus acsni ictʼalapakxtokchau ju Pablo ju lakʼachakʼan Asón pus ju yuchi quintatʼatajunch ju lacabarco. Icʼauch ju lakʼachakʼan Mitilene. 15 Chai acsni ictaxtuch ju anch ictajuchoko ju lacabarco. Icʼauch. Chai acsni alakatam avilhchan jumpa icchaʼauch vanin ju xalacatʼun Quío. Chai acsni tuncunchokopa icchaʼauch ju lakʼachakʼan Samos. Chai ictapasauch tus icchaʼauch ju lakʼachakʼan Trogilio junta icʼastacnauch lacatsʼunin. Chai ictaxtuchokoch. Chai acsni alakatam avilhchan jumpa icchaʼauch ju lakʼachakʼan Mileto. 16 Chunch ju iclauch ni jantu ixʼamputun ju lakʼachakʼan Efeso ju Pablo ni jantu panicni ixtolhputun ju xalacatʼun Asia. Ju yuchi va isokʼoi ni ixnajun ni va laich calalh ixmapasaputunacha ju lakʼachakʼan Jerusalén ju ixcʼatanʼan ju istʼaʼisraelitanin ju Pentecostés ixjuncan. 17 Chai acsni ixvi ju Pablo ju lakʼachakʼan Mileto pus malakachalh chivinti ju lakʼachakʼan Efeso. Lhinaulh ixʼatʼasanica ju yuʼunch ju ixtalhinajun laʼixpujitatʼan ju anch. 18 Chai acsni talakchincha pus chani alacjuni: ―Ju uxijnan cʼatsʼayatʼit ta yu xaclai acsni xaclatʼavilau tus acsni tucan icchilh ju xalacatʼun Asia tus chavai. 19 Quilalaktsʼintauch ni na xacchʼalhcatnani ju quiʼucxtinʼan Jesús ixlhichux quiʼalhunut chai jantu xaclhitakʼayai. Chai cʼatsʼayatʼit ni na xackʼalhun acsni jantu xatalacaʼiputun ju aliʼin. Chai cʼatsʼayatʼit ni na xacmakʼalhkʼajnan va ixlacaʼatalh ni na xaquintamamakʼalhkʼajniputun ju quintʼaʼisraelitaninʼan. 20 Chai cʼatsʼayatʼit ni iclajunkʼoju chux tachi ju maktʼasqʼuiniyatʼit ni laich kʼox atsʼucʼuyaʼitʼit. Lacatalhavat lapanacni xaclamasuniyau chai lacalakatamin ju minchakaʼan. 21 Xaclajunau ju uxijnan ju vachuʼ quintʼaʼisraelitanin untʼatʼit chai ju yuʼunch ju jantu israelitanin tajunita ni amacʼaʼuntʼit ju macxcai miʼatsucuntiʼan tachi ju lacasqʼuin ju Dios chai alhilacʼapʼitʼitch ju Jesús. 22 Chai ju chavai ju Spiritu Santu quijunita ni acʼalh ju lakʼachakʼan Jerusalén mas jantu iccʼatsai tuchi ju actapasayantach ju anch. 23 Va yuchi iccʼatsai ni actʼalhnucananta chai acmakʼalhkʼajnanantach. Chunch ju quimavasalani ju Spiritu Santu acsni ictapasai ju lakatamin lakatamin lakʼachakʼan. 24 Para ju ani taxtokni jantu icnavi cuenta. Nin quiʼatsucunti jantu tuʼuʼ iclhiulai mas aquintamakni. Va yuchi iclacasqʼuin ni lai acnavikʼoyach ju quilhichʼalhcat. Laich acmuctaxtuyach ju lhichʼalhcat ju quixtaknita ju quiʼucxtin Jesús. Yuchi ni acʼajunilh ju lapanacni ni laʼixʼamapaininti Dios laich catatakʼalhtaxtulh chai jantu cataʼalh ju lacajipi. 25 Ju uxijnan iclajuntau ni lhinomputun ju Dios laquiʼatsucuntiʼan. Para ju chavai iccʼatsai ni jantu xamatiʼ ju minchuxʼan ju uxijnan ju aquintilalaktsʼinchoko tavanan ju ani lacamunutpaʼ. 26 Pus ju chavai iclajumputunau ni caʼalilh xamatiʼ ju jantu lhilacaʼanta ju Jesús pus jantu quintalakʼalhin. 27 Jantu tavanan ju va jantu iclajuniu chux ixlhamapʼaksin Dios. 28 Pus alhistʼacchʼokʼocʼantʼit miʼakstuʼan. Vachuʼ alaclhistʼactʼit ju vachuʼ talhilacaʼanta Jesús. Chunch alatʼit ni yuchi ju Spiritu Santu ju taʼulatan ni alhinonaʼitʼit sia yuʼunch. Pus tachi chun ju talhilacaʼanta Jesús alhitamocanta laʼixʼacʼalhni. 29 Para astan acsni actaxtuyach iccʼatsaich ni catalakminan ju lapanacni ju catajunan ni jantu kʼox ni lhilacʼapʼinatʼit ju Jesús. Ju yuʼunch va tamakpitsiputunan ju uxijnan ju lhilacʼapʼinatʼit ju Jesús. Ju yuʼunch va talaputun tachi ju tam maktiliʼ ju na makpitsi ju borregojni acsni alakmin. 30 Chai vachuʼ lamilhiʼakstuʼan catakʼostayayaʼ ju lapanacni ju catanonach ju chivinti ju jantu slivasalh. Va cataʼokxchokʼoputunan ju uxijnan ju lhilacʼapʼinatʼit ju Jesús ta yu laich apʼuchʼakʼokʼapʼutʼunaʼitʼit ju yuʼunch. 31 Pus alacpʼucʼujtʼitch. Chai apʼastʼactʼitch ni lakatʼutu cʼata tsʼis chai tuncuj va tachi xaclamalaniyau. Chai na xackʼalhun acsni xaclamapʼaksiyau. 32 Pus ju chavai ji quiʼalakʼavin iclamakʼaxtakniyau ju Dios. Chai ju laʼixchivinti najun ni na amapaininin ju yuchi. Pus ju anuʼ ixchivinti na tachapun chai lai taʼaktaijuyan ni jantu tavanan acʼaptʼit ju ixti ju Dios. Chai ixlacata ju anuʼ ixchivinti Dios vachuʼ atʼakʼalhtʼaxtʼuyaʼitʼit tachi ju catatakʼalhtaxtuyaʼ tachi chun ju ixlapanacni. 33 Ju quitʼin jantu iclhacchaʼanilh ixtumin nin ixpumpuʼ tam xamatiʼ. 34 Para ju uxijnan cʼatsʼayatʼit ni laquimacaʼ quiʼakstu xacpulhajai ju tuchi xacmaktasqʼuini ju quitʼin chai ju ixtamaktasqʼuinita ju xaquintatʼaʼalhtananta. 35 Chunch xaclai ni laich aclaxtakniyau lakatam lhilaktsʼintaiti ixlacata ju miʼatsucuntiʼan. Ju chunch acʼatsʼayaʼitʼit ni tasqʼuini ni achʼalhcʼatnantʼit ni laich aʼaktʼaiʼuyaʼitʼit ju alin ixmaktasqʼuinitʼan. Chai ju chunch lai apʼastʼacʼaʼitʼit ixchivinti ju quiʼucxtinʼan Jesús acsni ma naulh: “Palai kʼachan ju tam xamatiʼ ju caxtakniyaʼ tuʼuʼ apumatam lapanac. Palai jantu ju va amaklhtayanan tuʼuʼ”. ―Pus chunch ju ajuni ju lapanacni ju Pablo. 36 Chai acsni nonkʼo ju ani ju Pablo pus lana taʼaktsokotalh. Tʼachivinilh ju Dios ju yuchi chai ixchuxʼan ju ixtalhinajun laʼixpujitatʼan ju amachakʼan Efeso. 37 Pus ju yuʼunch slivasalh na takʼalhulh. Ixtapixtulakatanui ju Pablo. Tamacchʼuchʼulh. 38 Slivasalh lhixcanilh ixʼalhunutʼan ju anuʼ chivinti ju naulh ju Pablo acsni ajuni ni jantu tavanan catalaktsʼinichokoyaʼ ju ixʼucxpuʼ. Pus ju astan taquilaktsʼimuju ju lacabarco.
1 Chai acsni icʼalacmacaju ju quilhiʼalakʼavin laʼixmacni Jesús pus ictaju lacabarco. Va sok icʼau tus icchaʼau ju xalacatʼun Cos. Ni alakatam avilhchan jumpa icchaʼau ju xalacatʼun Rodas. Ictaxtu ju Rodas. Icchaʼau ju lakʼachakʼan Pátara. 2 Ju anch iclhitaju alakatam barco chai ju yuchi ixʼamputun ju xalacatʼun Fenicia. Pus ictaju. Icʼauch. 3 Acsni icchaʼauch vanin laxalacatʼun Chipre pus iclhitapasau laʼixlhicana. Icchaʼauch ju xalacatʼun Siria chai anch ju astacnalh ju barco ju lakʼachakʼan Tiro ni ixpʼuxniputuncan ju ixtacʼucʼat. Pus ju quijnan ictacutchauch ju anch. 4 Chai ni icʼalhitaju ju vachuʼ ixtalhilacaʼanta Jesús amachakʼan anch pus icʼalactʼatolhchau lakatujun avilhchan. Pus ju Spiritu Santu ixʼalacmavasalanilh tuchi catapasayaʼ laʼisʼatsucunti ju Pablo acsni tavanan acʼanau ju lakʼachakʼan Jerusalén. Pus yuchi talhitapaininilh ni jantu caʼalh. 5 Para acsni laktsalh ju lakatujun avilhchan ictaxtuch ju anch. Chai chux ju amachakʼan anch ju vachuʼ ixtalhilacaʼanta Jesús quintaquilaktsʼimacajun laʼixquilhtuʼ alama. Chux ju jokʼatni chai ixʼamachakaʼan chai ju isʼaskʼatʼan. Chai ju anch ictaʼaktsokotachauch chai ictʼachiviniuch ju Dios. 6 Iclamacʼamiuch chai iclalakapujuch chai ictajuch ju lacabarco. Chai ju yuʼunch taʼanchokolh laʼixlakchakaʼan. 7 Chai ictaxtuch ju Tiro chai icʼauch ju lakʼachakʼan Tolemaida. Tus anch xacpuʼanau ju barco. Ju anch icʼamacʼamichau ju quilhiʼalakʼavin laʼixmacni Jesús chai icʼatʼatolhchau ju yuʼunch tam avilhchan. 8 Ni alakatam avilhchan jumpa ju Pablo chai ju quijnan ju xactʼaʼalhtanantauch ictaxtuch chai icmiuch ju lakʼachakʼan Cesarea. Chai icchaʼauch laʼixchakaʼ ju Pilipe ju ixnajun ixchivinti Dios. Vachuʼ ixlhipumatujunch ixjunita ju ixtaʼaʼaktaijunun laʼixtalhavat ju ixtalhilacaʼanta Jesús. Pus laʼixchakaʼ ju yuchi ictolhchauch. 9 Ju yuchi ixʼalin pumatʼatʼi isʼatsiʼin. Va isʼakstucaʼan ixtajunita. Chai ju yuʼunch ixtanajun va tuchi chivinti ju ixʼamamachakxani ju Dios. 10 Chai acsni lakalhu avilhchan icʼatʼatolhchau pus mincha laxaʼestado Judea pumatam lapanac ju Agabo ixjuncan. Ju Dios va tsa ixmamachakxani ju tuchi catapasayaʼ. 11 Chai acsni quintalakminch ju quijnan pus chʼapanilh ju iscinturón ju Pablo. Chʼanchʼichokocalh laʼixchʼajaʼ isʼakstu chai makchʼichokocalh. Chai ajunich ju lapanacni: ―Chani ma najun ju Spiritu Santu. Ju quintʼaʼisraelitaninʼan amachakʼan Jerusalén ma chunch ju cataʼulhtuyaʼ ju amanavin junima cinturón chai ma catamakʼaxtakniyaʼ ju yuʼunch ju jantu israelitanin tajunita. 12 Pus acsni ickʼasmatvich ju ani chivinti ju quijnan chai ju amachakʼan anch pus kʼasi icjuniuch ju Pablo ni jantuch caʼalh ju lakʼachakʼan Jerusalén. 13 Para ju acsnich ju Pablo quintajunan: ―Tajuch ni va lackʼalhunatʼitch chai quilamaxcaniniyau ju quiʼalhunut. Ju quitʼin jantu tuʼuʼ iclhiulai mas tachʼin aquintanaviyanta ju lakʼachakʼan Jerusalén. U mas aquintamakniyanta va ixlacata ni iclhilaksita ju quiʼucxtinʼan Jesús. ―Chunch ju quintajunan. 14 Chai ni jantu lai icmalacaʼiniu pus va sek ictayau. Va xacnonau: ―Chach navi ju quiʼucxtinʼan Dios tachi ju lacasqʼuinch ju yuchi. 15 Chai acsni tapasalh ju anuʼ avilhchan pus iclacatayauch ixʼanca ju lakʼachakʼan Jerusalén. Chai icʼauch. 16 Chai quintatʼaʼan vachuʼ ju aliʼin ju vachuʼ ixtalhilacaʼanta Jesús amachakʼan Cesarea. Pus ju yuʼunch ixtanajun ni anch actolauch laʼixchakaʼ pumatam lapanac ju Mnasón ixjuncan acsni acchaʼanau ju Jerusalén. Ju yuchi ixmintacha ju xalacatʼun Chipre. Chai ju yuchi makʼanch ixlhilacaʼanta Jesús. 17 Chai acsni icchaʼauch ju lakʼachakʼan Jerusalén pus ju quilhiʼalakʼavinʼan laʼixmacni Jesús va lhikʼach quintaʼamaklhtayanantanch. 18 Chai ni alakatam avilhchan jumpa pus ju Pablo quintatʼaʼanch laʼixchakaʼ ju Jacobo. Chai chux ju yuʼunch ju ixtalhinajun laʼixpujitatʼan vachuʼ ixtatakʼaixtokta ju anch. 19 Pus ju Pablo alacmacʼami chai astan ajunkʼo tuchi ixʼanavinita ju Dios ju yuʼunch ju jantu israelitanin tajunita acsni tavanan ixʼajuni ixchivinti Dios ju Pablo. 20 Pus ju yuʼunch acsni takʼasmatnilh ixchivinti ju Pablo talakʼayalh ju Dios. Para astan tajuni: ―Kʼoxich ji quilakʼau. Para ju uxintʼi laktsʼintʼa ni na lhu lana ju quintʼaʼisraelitaninʼan ju talhilacaʼanta Jesús ju chavai. Para ju yuʼunch tanajuntacaʼ ni aktsʼiya tasqʼuini ni canaviyau tachi ju ixnajun ju Moisés laʼixlhamapʼaksin. 21 Pus ju yuʼunch va taquikʼalhakʼasmatninch ju uxintʼi ni ma va alacmalaninin ju quintʼaʼisraelitaninʼan ju tamakvilanalh junta tatʼajun ju yuʼunch ju jantu israelitanin. Chai ma alhamalanininch ni jantuch vana catanavi tachi ju ixnajun ju Moisés. Chai ma va aʼunich ni ma jantu catiʼachʼucʼucalh ju istsʼalanʼan nin yuchi ni ma lai catanavi tachi ju aktsʼiya lanitau ju quijnanʼan ju israelitanin juntau. 22 Pus tas calayau. Ju anuch quintʼaʼisraelitaninʼan ju talhilacaʼanta Jesús catatakʼaixtʼokʼaʼ acsni catakʼasmatʼaʼ ni tʼantʼach ju uxintʼi. 23 Pus aclajunau tuchʼi anaviyaʼ. Alin pumatʼatʼi lapanacni ju sia lhiquijnanchʼan ju tatʼatakʼoxita ju chivinti ju Dios. 24 Pus alactʼapʼitʼich ju yuʼunch. Chai chunch vachuʼ alatʼi tachi ju catalayaʼ ju yuʼunch ni aktam salaka cajunaʼ ixʼalhunutʼan laʼixmacni Dios. Chai amapʼalaʼ ju uxintʼi ixtapalh ju tuʼuʼ ju catamakniniyaʼ ju Dios. Chai ju chunch laich caʼasitcanach. Pus ju chunch catamachakxayach ixchuxʼan ni jantu slivasalh tuchi takʼasmatʼach ju milacata. Chai catalaktsʼinan ni vachuʼ muctʼaxtʼui laʼixlhamapʼaksin Moisés ju uxintʼi. 25 Pus ju quijnan icʼatsʼoknunitauch ju yuʼunch ju tamaklacaʼanita ju Jesús ju jantu israelitanin tajunita. Icʼajuniuch ni jantu tasqʼuini ni catanavi tachi ju ixnajun ju Moisés. Va yuchi ni jantu cataʼulh ju taxtokni ju lhikʼailaktsʼincanta ju tuʼuʼ ju laktsʼincanta tachi ju dios. Nin yuchi ni cataʼulh ju acʼalhni. Nin yuchi ni cataʼulh ju va pixtuchʼimaknicanta. Nin yuchi ni va catatʼatsuculh ju jantu ixpapaʼan u ixʼamachakaʼan. 26 Pus ju acsnich ju Pablo alactʼaʼalh ju anuch pumatʼatʼi lapanacni chai ni alakatam avilhchan jumpa alactʼanavi tachi ju talai ju israelitanin ni salaka cava ju ixʼalhunutʼan laʼixmacni Dios. Chai astan ju Pablo tanu lacakʼai ixpujitatʼan ju istʼaʼisraelitanin. Va alh ajuniniʼ ju palijni tavanan calaktsayaʼ ju avilhchan acsni lai catalhiminaʼ ju atapacxat ju catamakniniyaʼ ju Dios. 27 Pus talhcalh lakatujun avilhchan. Chai acsni ixchaʼamputunch ju ixlhilakatujun avilhchan pus ju aliʼin israelitanin amachakʼan Asia talaktsʼilh ju Pablo lacakʼai ixpujitatʼan ju istʼaʼisraelitanin. Pus lana tamaktalhkʼamalh chux ju lapanacni chai tachʼapalh ju Pablo. 28 Pʼas ixtalaclatʼasani ju istʼaʼisraelitanin. Ixtanajun: ―Quintʼaʼisraelitanin aquilaʼaktaijuch. Ju ani ya lapanac yuchi ju amasuni ju lapanacni ixlhilacaputsʼun ju lacamunutpaʼ. Na macxcai quintalhichivinan ju quijnanʼan ju israelitanin juntau chai macxcai lhichivinin ju ixlhamapʼaksin ju Moisés chai ju ani kʼai quimpujitatʼan. Chai ixlhitijtʼui ju yuchi va kʼaya amanulh ju yuʼunch ju jantu israelitanin lacpujitat chai va lakʼalhilh ju ani kʼai ixpujitat Dios. 29 Va talhinaulh chunch ni ixtalaktsʼinta ju Trófimo amachakaʼ Efeso ni ixtʼaʼalhtanan ju Pablo chai ju yuchi jantu israelita ixjunita. Chai va ixtanajun ni ca ixtʼatanun ju Pablo ju lacpujitat mas jantu. 30 Pus tachi chun ju amachakʼan anch lana tatalhkʼamalh. Taʼatsʼalaminkʼo chai tachʼapalh ju Pablo. Tamaxtulh makspaʼ lacakʼai pujitat. Chai lana tamalacchaulh ju xamalhtich. 31 Ju yuʼunch ixtamakniputun ju Pablo para quimacʼatsanicalh ju comandante ni chux ju lapanacni amachakʼan anch na ixtalaktalhkʼamantach. 32 Pus ju anuʼ comandante lana kʼailhimilh ju xacapitán chaich ju ixtaropajni. Taʼatsʼalalakmilh ju lapanacni. Chai ixtalhavat lapanacni acsni talaktsʼilh ju comandante chaich ju ixtaropajni pus tamamacta ixkʼainekmaca ju Pablo. 33 Pus ju comandante lakʼalh ju Pablo. Lhinaulh ixchʼapaca chai ixmakchʼica lacakʼantʼui cadena. Chai astan asacmilh ju lapanacni tichi chavaich ju Pablo chai tis talakʼalhinch ju xanavi. 34 Para ju lapanacni na ixtalactʼasai chai ju aliʼin tumpa talakʼalhin ixtanajun chai ju aliʼin atumpa. Pus ju comandante jantu lai ixmachakxai ju stavasalanti. Pus alai va lhinaulh ixlhiʼanca lacacuartel. 35 Para acsni tachaʼalh junta talactsa talactsa junita lacacuartel pus lana tachʼixlhiʼalh ju taropajni va ixlacaʼatalh ni na kʼox ixtatalhkʼamanta ju lapanacni. 36 Pus ju ixtalhavat lapanacni ju ixtachʼakʼokʼata va pʼas ixtachivinin. Ixtanajun: ―Amaknitʼitch. 37 Chai acsni ixtamanuputunachalh ju Pablo lacacuartel pus ju yuchi xakʼala ju comandante lacalhigriego. Junich: ―Lamapainin ictʼachivimputunan lacatsʼunin. Chai ju yuchi juni: ―Laiʼas chʼivinin ju lhigriego. 38 Ja jantaʼas uxintʼi ju anuʼ lapanac amachakaʼ Egipto ju ixtʼalasaputun ju ucxtin. Chai jantucaʼ makʼan amakʼaixtoklh lakatʼatʼi milh lapanacni amaknininch chai alhiʼalh makat junta matiʼ xamatiʼ tʼajun. Ja jantaʼas uxintʼi. 39 Pus ju Pablo junich: ―Ju quitʼin jantiyuʼ ju anuʼ lapanac. Ju quitʼin icʼisraelita. Icʼamachakaʼ Tarso. Lakatam kʼai lakʼachakʼan laxalacatʼun Cilicia. Va ictapaininiyan ni alacʼasqʼuich ni actʼachivinilh ju ixtalhavat lapanacni. 40 Pus ju anuʼ comandante lacasqʼuinilh. Chai ju Pablo taya junta talactsa junita lacacuartel. Chʼixnilh ju ixmacaʼ ju ixtalhavat lapanacni ni sekch catataya. Chai acsni sekch tataya pus ju Pablo tsuculh axakʼalanaʼ lacalhihebreo. Chani ajuni:
1 ―Quiʼalakʼavin chai ju uxijnan ju lhinonatʼit sia quijnanʼan ju israelitanin juntau. Aquilakʼasmatniuch. Va iclajumputunau tuchi icnavita. 2 Chai acsni takʼasmatlh ni ixʼaxakʼalacan laʼixchivintiʼan lacalhihebreo pus palai sek tatava ju lapanacni. Chai ju Pablo chani alacjuni: 3 ―Ju quitʼin vachuʼ icʼisraelita. Iclokʼontacha lakʼachakʼan Tarso laxatʼun Cilicia. Para icquitakʼayachilh ju ani Jerusalén. Ju Gamaliel yuchi ju quiʼamamakaʼunuʼ ixjunita. Chai ju yuchi kʼox quimalani chux ju ixlhamapʼaksinʼan ju makʼaniya quilacpaʼitniʼan. Chai ju quitʼin ixlhichux quiʼalhunut xacnavi tachi ju xacmachakxani ju ixkʼachat ju Dios. Chunch ju xaclai tachi ju uxijnan navipʼutʼunatʼit ju chavai. 4 Ju quitʼin vachuʼ na xacʼalhixcaji ju talhilacaʼanta Jesús. Chai xacʼachʼapai chai xacʼatʼalhnui ju jokʼatni chai ju chakolun chai xaclhinajun ixmaknicaʼan. 5 Ju xakʼai pali chai chux ju yuʼunch ju talhinajun laquilhiquijnanʼan ju israelitanin juntau laich catajunin ni yuʼunch ju quintaxtaknilh ju alhiqui ju xacʼalhiʼani ju quintʼaʼisraelitanin amachakʼan Damasco. Va xacʼamputun puxconaʼ ju talhilacaʼanta Jesús ni laich tachʼin acʼalhimilh ju ani Jerusalén ni laich caʼamamakʼalhkʼajnicalh. 6 Pus ju quitʼin icʼalh. Chai acsni xacʼanta ju lacati chai xacchaʼamputun vanin ju lakʼachakʼan Damasco pus kʼatuncu ixjumputun. Chai acsni iclhicʼatsanalh lactʼiyan ju xatapulhcuyacha. Tapulhculh junta xacʼantau. Chai na pʼas ju xamapulhcui. 7 Chai lana tin ictama lacatʼun chai ickʼasmatlh lakatam chivinti junta chani quijuni: “Saulo. Saulo. Jantu alhimakchʼapʼu ju quilapanacni. Acsni chʼun u lai tachi ju va jun quitʼin ju qʼuilhimakchʼapʼui”. 8 Pus ju quitʼin ickʼalhtailh. Icjuni: “Tis chavaichʼat ji ucxtin”. Chai quijuni: “Ju quitʼin icJesús amachakaʼ Nazaret. Quitʼinch ju qʼuilhimakchʼapʼui”. 9 Pus ju xaquintatʼaʼanta ju lacati talaktsʼilh ju maclhcu chai na kʼox tatalhanalh. Para jantu xatamachakxai ju ixchivinti tichi chavaich ju xaquintʼachivinin. 10 Chai icjuni: “Pus tijuch ju acnaviyaʼ ji quiʼucxtin”. Chai ju yuchi quijuni: “Akʼostʼaʼulh. Aʼinchich ju lakʼachakʼan Damasco. Anch ju aʼuncʼantʼachich chux tuchi ju iclacasqʼuin ni anaviyaʼ”. 11 Pus ju quitʼin jantu lai xacʼalacʼavanan ni va quilakpuchʼapalh ju anuʼ maclhcu. Pus ju xaquintatʼaʼanta va quintamakchʼapalhiʼalh. Quintalhiʼalh ju lakʼachakʼan Damasco. 12 Ju anch ixtʼajun pumatam lapanac ju Ananías ixjuncan. Ju yuchi ixnavikʼojui chux tachi ju najun laʼixlhamapʼaksin Moisés. Chai chux ju istʼaʼisraelitanin amachakʼan anch na kʼox lapanac ixtalhiulai. 13 Pus ju yuchi quilakmilh. Chai acsni taya vanin junta xacvi pus chani quijuni: “Quilakʼau Saulo alacʼavanch”. Pus ju anuch pantsʼiquis lana laich icʼalacʼavanalh chai iclaktsʼilh ju yuchi. 14 Chai ju yuchi quijunich ni ma Dios ju quisacxtulh. Ma yuchach ju Dios ju ixtalakʼayai ju makʼaniya quilacpaʼitniʼan. Chai ju yuchi ma quisacxtulh ni laich acmispanilh tuchi lacasqʼuin ni acnaviyaʼ. Chai ma quisacxtulh ni aclaktsʼinaʼ ju istsʼalh ju na salaka ixʼalhunut. Chai ma ackʼasmatniyaʼ ju ixchivinti. Pus iclaktsʼilh chai ickʼasmatnilh. 15 Chunch ju xaquinavi ni ma lacasqʼuin ju yuchi ni acʼalacjunaʼ chux ju lapanacni tuchi ju xaclaktsʼin chai tuchi xackʼasmatʼa. 16 Chai astan va quisacmilh tijuch ju icpacxan. Quijuni ni ackʼostavi chai acʼakpaxlh. Chai aclhilacaʼalh ju quiʼucxtin Jesús. Pus ju chunch ju yuchi aquixacaniyaʼ ju quiʼalactuʼunti. Chunch ju quijuni ju Ananías chai chunch ju icnavilh. Ju Pablo tailhiʼalh ju ixchivinti chai chani ajuni ju lapanacni: 17 ―Pus acsni icminchokolh ju ani Jerusalén pus icʼalh tʼachiviniʼ ju Dios lacakʼai pujitat. Pus ju anch iclaktsʼilh tuʼuʼ tachi ju va laquiʼaklakʼavanti. 18 Iclaktsʼilh ju Jesús chai ju yuchi quijuni ni va tsʼalhti actaxtulh ju ani Jerusalén. Jantu aquintitalacaʼiniyach ju quinchivinti ju amachakʼan ani. 19 Para icjuni: “Quiʼucxtin ju yuʼunch tacʼatsai ni xacʼan lakatamin lakatamin pujitat chai tachʼin xacʼalhiʼan ju lapanacni ju ixtalhilacaʼantan ju uxintʼi chai xacʼalakanekmai. 20 Chai acsni tamaknilh ju Stipan ju milapanac ixjunita pus vachuʼ quitʼin anch xacmakya chai na kʼoxich xaclhiulai ni tamaknilh. Chai quitʼin ju iclakmakʼa ju ixpumpuʼan ju taʼamakninilh”. Chunch icjuni ju Jesús. 21 Para ju yuchi quijuni ni acʼalh. Aquimalakachayach na makat ni laich acʼalacjunaʼ ju ixchivinti ju yuʼunch ju jantu israelitanin tajunita. Chunch ju quijuni ju Jesús. 22 Pus ju ixtalhavat lapanacni tus acsnich na kʼox takʼasmatnilh ixchivinti ju Pablo. Para acsni naulh ju chunch pus ju yuʼunch na pʼas ixtalactʼasai. Ixtanajun: ―Amaknitʼich ju ani ya jokʼat. Jantuch lhijun ni vanach catsuculh. 23 Pus va tachi tsʼau ixtalactʼasai. Tamaxtulh ju ixcujuʼan tachi ju va catamakniyach lana chai kʼom tatantamacstʼalh ju tʼun. 24 Pus ju comandante acsni laktsʼilh ni chunch ixtalai ju lapanacni pus lana ajuni ju ixtaropajni ni catalhiʼalh ju Pablo pulacni lacacuartel chai cataʼulanilh. Ju chunch tsʼa ma cachivinilh. Canaulh tuchi ixtalhixcajich ju lapanacni. 25 Pus talhiʼalh. Tamakchʼilh lacaʼaxtʼakʼan ni ixtanajun ni cataʼulaniyaʼ. Pus ju acsnich ju Pablo juni ju xacapitán ju vanin ixya: ―Ca jantu lhijun ju lhamapʼaksin ni lai quilalakanekmau ni vachuʼ iclatʼaputekʼecantauch ju uxijnan ju romanonin untʼatʼit chai jantucaʼ quilaktsʼinicanta ju quilhamakʼan u alin ju quintalakʼalhin u jantu. 26 Pus acsni kʼasmatlh ju ani ju xacapitán pus ju yuchi alh juniniʼ ju comandante. Junich: ―Kʼox apʼastʼactʼi ju tuchʼi aʼulhtʼuyaʼ ju anuʼ lapanac. Ju yuchi vachuʼ quintatʼaputekʼecantan ju quijnanʼan ju romanonin juntau. 27 Pus ju acsnich ju comandante lakʼalh ju Pablo chai junich: ―Aqʼuiʼunch. Ja quilatʼaputekʼecantau ju quijnan ju romanonin icjuntau. Chai ju Pablo naulh: ―A. 28 Pus ju comandante kʼalhtailh. Junich: ―Ju quitʼin na laklhu icmapalalh ni laich actʼaputekʼecalh ju romanonin. Para ju Pablo juni: ―Ju quitʼin tus acsni tavanan ictsuculh ictʼaputekʼecanta ju romanonin ni vachuʼ chunch ixjunita ju quimpai. 29 Pus ju acsnich lana tamacoʼulalh ju yuʼunch ju ixtaʼulaniputun. Vachuʼ ju comandante na talhanalh ni machakxalh ni vachuʼ ixtʼaputekʼecanta ju romanonin ju Pablo chai ju yuchi ixlhinajunta ixmakchʼica ni laich caʼulanicalh. 30 Pus ju comandante va iscʼatsaputun istavasalanti tuchi talakʼalhin ju ixtalhichivimakʼan ju israelitanin. Pus ni tuncunchokolh ju yuchi alactʼasanilh ju xalackʼajin palijni chai ixchuxʼan ju ixʼucxtinin ju israelitanin. Chai lhinaulh ixmakxkʼotca ju Pablo chai astan takʼailhimilh junta ixtatakʼaixtokta ju yuʼunch.
1 Pus ju Pablo alaktsʼilh ju ucxtinin chai alacjuni: ―Quiʼalakʼavin ju quitʼin jantu icnavita tuʼuʼ talakʼalhin ju laich aclhitalhanalh laʼixmacni Dios tus chavai. 2 Pus ju acsnich ju xakʼai pali ju Ananías ixjuncan alacjunich ju lapanacni ju vanin ixʼalactʼaya ni catapuquicsalhch. 3 Pus ju acsnich ju Pablo juni: ―Dios ju caʼulaniyan ju uxintʼi ni va acxpʼutʼiyunun. Ju uxintʼi yuchi lhivilhtʼi ni aqʼuimpʼuxcʼonin ju quintalakʼalhin tachi ju lhijun lacalhamapʼaksin. Pus tajuch ni va navipʼalai tachi ju jantu lhijun lacalhamapʼaksin ni qʼuilhinauch ju quimpuquicsaca. 4 Pus ju ixʼalactʼayalh tajunich: ―Tajuch ni laich uni macxcai chivinti ju xakʼai ixpali Dios. 5 Pus ju Pablo naulhch: ―Jantu xaccʼatsai ji quiʼalakʼavin ni yuchi cava ju xakʼai pali. Ni xaccʼatsa cava pus jantu chun xacjunilh ni laʼixchivinti Dios ju tsʼokcanta najun ni jantu macxcai aclhichivinilh tam xakʼai laquilakʼachakʼan. 6 Pus ju Pablo acsni cʼatsa ni quilhmactam ju ucxtinin ixtalhilacaʼan ju ixlhamapʼaksinʼan ju fariseonin chai ju quilhmactam ixtalhilacaʼan ju ixlhamapʼaksinʼan ju saduceonin pus pʼas chivinilh lacapuʼucxtin. Alacjuni: ―Quintʼalapanacni ju quitʼin icfariseo. Ju quimpai vachuʼ fariseo ixjunita. Chai iclhichivimakʼancanta ni iclacaʼi ni catataʼacxtuchokoyaʼ ju tanitach. 7 Chai acsni naulh ju chunch ju Pablo pus lana tatsuculh laklakʼainin ju fariseonin chai ju saduceonin. Chai jantu va lakatam tava ju ixʼatalacpastʼacʼatʼan. 8 Ju saduceonin ixtanajun ni jantu lai taʼacxtuchokoi ju tanitach chai matiʼ ju anquilh nin yuchi ju macxcai un. Para ju fariseonin tanajun ni lai taʼacxtuchokoi ju tanitach chai alin ju anquilhnin chai ju macxcai un. 9 Pus na pʼas talaxakʼala. Pus tataya ju aliʼin ju na ixtalhaʼatalanininta ju ixlhamapʼaksinʼan ju istʼaʼisraelitanin ju vachuʼ fariseonin ixtajunita. Ju yuʼunch tanaulh: ―Jantu tuʼuʼ talakʼalhin iclhitajuniyau ju ani ya lapanac. Ni tuʼuʼ xalaktsʼin tachi ju va laʼixʼaklakʼavanti u ni caxakʼala ju tuʼuʼ anquilh pus kʼoxich. Ju quijnan jantu ictʼalasaputunau ju Dios. 10 Chai ni slivasalh ixtalaclakʼaji ju sia yuʼunch pus ju comandante na ixlhimaktalhananch ju Pablo. Ixnajunch ni jantu xcai ni catamacʼatsani ju Pablo. Pus alacjunich ju ixtaropajni ni cataʼalh chai catataiʼi ju Pablo laʼixtalhavatʼan chai catalhiʼalh lacacuartel. 11 Pus acsni tatsʼisi pus ju kʼai ucxtin Jesús talacasunilh ju Pablo chai junich: ―Jantu atʼalhan ji Pablo. Tachi ju xaʼaʼuni ju amachakʼan ani Jerusalén ju quilacata pus tasqʼuini ni aʼunaʼich ju amachakʼan Roma vachuʼ. 12 Pus acsni tuncunchokolh ju aliʼin israelitanin talatʼatakʼoxilh ju chivinti ju sia yuʼunch ta yu laich catamakniyaʼ ju Pablo. Talaclajuni: ―Jantu cativajiu nin yuchi ni cakʼotʼau tuʼuʼ tus ni jantu calaktsʼimakniyau ju Pablo. Chai ni jantu camuctaxtuyau pus chach quintamamakʼalhkʼajniyan ju Dios. 13 Istapasata tʼupʼuxam lapanacni ju ixtanavita junima lhiʼokxchivinti. 14 Pus ju yuʼunch taʼalh laktsʼinin ju xalackʼajin palijni chai ju xalacpaʼitnich ju sia istʼaʼisraelitanin chai tajunich: ―Ju quijnan icnavitauch lakatam lacchivinti. Chai ni jantu acmuctaxtuyau pus chach quintamamakʼalhkʼajniyan ju Dios. Pus ju quijnan jantu tavanan tuʼuʼ actiʼu tus ni jantu iclaktsʼimakniyau ju Pablo. 15 Pus ju uxijnan chai ju xalacpaʼitnich ju ani lakʼachakʼan aʼunaʼitʼit ju comandante ni vatsʼisin camaxtuyaʼ ju Pablo. Calhimilh lacapuʼucxtin. Ju uxijnan chunch alatʼit tachi ju va kʼasmatnipʼutʼunatʼit ju tuʼuʼ chivinti ju palai stavasalanti cava ixlacata ixlhamakʼan. Pus ju quijnan iclakasivilauch ni laich acmakniyauch acsni tucaʼ chaʼan lacapuʼucxtin. 16 Pus ju Pablo ixʼalin pumatam ispʼisekʼe atsiʼ. Chai ju yuchi ixʼalin ju istsʼalh. Pus ju anuʼ tsʼalh kʼasmatlh ni apacxantaicanta ju Pablo. Pus alh juniniʼ. Tanu lacacuartel chai quimacʼatsanicalh ju Pablo. 17 Chai ju Pablo tʼasanilh pumatam xacapitán chai juni: ―Lamapainin alhiʼinchich juniya tsʼalh junta vilhcha ju miʼucxtinʼan ju uxijnan. Ma va alin tuchi ju jumputun. 18 Pus ju capitán kʼailhiʼalh ju tsʼalh junta ixvilhcha ju ixʼucxtin chai junich: ―Ju anuʼ tachʼin ju Pablo juncan quintʼasanilh chai quintapaininilh ni ma aclhiminin juniya tsʼalh ni ma va tʼachivimputunan. 19 Pus ju comandante makchʼapalh ju anuʼ tsʼalh chai tʼaʼalh alacatam chai sacmilh. Junich: ―Tijuch ju qʼuiʼumpʼutʼun. 20 Pus ju yuchi junich: ―Ju quintʼaʼisraelitanin talakʼoxita ju chivinti junta tanajun ni ma catatapaininiyan ju uxintʼi ni amaxtʼuyaʼich ju lhi ju Pablo chai ma alhipʼinaʼ lacapuʼucxtin. Ju yuʼunch ma va catalayach tachi ju ma va takʼasmatniputunch tuʼuʼ chivinti ju palai stavasalanti cava ixlacata ju ixlhamakʼan. 21 Para tun aqʼuiclacʼaʼitʼi. Pus tapasatach tʼupʼuxam lapanacni ju tapacxantaji ju Pablo. Ju yuʼunch tanavita lakatam lacchivinti junta tanajun ni ma jantu catavainaʼ nin ma catakʼotʼaʼ tuʼuʼ tus ni jantu catalaktsʼimakniyaʼ ju Pablo. Chai ni jantu catamuctaxtuyaʼ pus ma chach amamakʼalhkʼajni ju Dios. Pus ju chavai ma talakasivilanalh. Ma va tapacxanvilanalh ju minchivinti tuchʼi anaviyaʼ. 22 Pus ju acsnich ju comandante junich ju tsʼalh: ―Tun xamatiʼ tʼiʼun ni uxintʼi ju xaqʼuinqʼuimacʼatsʼaniyachiʼ ju ani chivinti. Pus acsni juni ju chunch pus malakachachokolh laʼixchakaʼ. 23 Chai astan ju yuchi atʼasanilh pumatʼui capitán chai ajunich: ―Amakʼaixtʼoktʼit ju taropajni ju laich alactʼapʼitʼit ju lakʼachakʼan Cesarea tachi lakanajatsi hora chavai tokʼoxai. Lakatʼui cientos catachʼajaxʼanaʼ chai setenta lacacaballo cataʼanaʼ chai lakatʼui cientos ju catalhiʼanaʼ ju ispadaʼan. 24 Chai alakʼasilhipʼinitʼit ju caballo ju capuʼanach ju Pablo chai kʼox alhipʼiniyaʼitʼit ju gobernador Félix. ―Chunch ju ajuni ju ixlaccapitán. 25 Chai ju comandante atsʼoknunilh ju Félix lakatam alhiqui ju catalhiʼaniyaʼ ju ixcapitán. Chani juni: 26 “Quitʼin ju icClaudio Lisias chai va icmacʼamiyan ji señor gobernador Félix. 27 Ju israelitanin ixtachʼapata ju ani lapanac chai ixtamakniputun. Para ju quitʼin acsni icmachakxalh ni vachuʼ quilatʼaputekʼecantauch ju quijnanʼan ju romanonin juntau pus icʼalactʼaʼalh ju quintaropajni chai icmakʼalhtaxtulh laʼixmacaʼan. 28 Chai ju quitʼin ni va xaccʼatsaputun tuchi talakʼalhin ju talhichivimakʼanch pus iclhimilh junta ixtatakʼaixtokta ju xalacpaʼitni ju istʼaʼisraelitanin. 29 Pus icmachakxalh ni va jantu kʼox talhiulai ju yuʼunch tachi ju lhichivinin ju ixlhamapʼaksinʼan ju ani lapanac. Para jantu tuʼuʼ talakʼalhin navita ni laich calhimapalalh ju laʼixʼaninti nin yuchi ni lai calhitʼalhnucalh. 30 Pus icmacʼatsanicanta ni ixtaʼapacxantayananch ju istʼaʼisraelitanin. Pus yuchi vatsʼalhti iclhimalakachanichin ju Pablo. Vachuʼ icʼajunilh ju yuʼunch ju taʼachivimakʼanan ni catanonantach ju lamiʼucxlacapuʼ ju uxintʼi tuchi talakʼalhin ju tamucʼani ju Pablo. Ca va yuchach”. 31 Pus ju taropajni talhiʼalh ju Pablo tachi ju ixʼajuncantach. Tsʼis ju lhiʼancalh ju lakʼachakʼan Antípatris. 32 Chai acsni tuncunchokopa pus va yuʼunch ju ixtapuʼanta ju caballo ju tatʼaʼalh ju Pablo. Ju aliʼin taminchokolh laʼixchakaʼan. 33 Pus ju yuʼunch ju ixtatʼaʼanta ju Pablo acsni tachaʼalh ju lakʼachakʼan Cesarea taxtaknilh ju alhiqui ju gobernador chai vachuʼ tamakʼaxtaknilh ju Pablo. 34 Chai ju gobernador acsni laktsʼinkʼo ju alhiqui sacmilh ju Pablo tas amachakach. Tis estado. Pus ju Pablo juni ni amachakaʼ Cilicia ixjunita. 35 Ju acsnich ju yuchi juni: ―Ackʼasmatniyanch acsni va cataminach ju tachivimakʼananch. Pus acsni juni ju chunch lhinaulh ixlhiʼanca laʼixchakaʼ ju kʼai ucxtin Herodes chai ajuni ju taropajni ni catalhistaclh.
1 Acsni tapasalh lakaquis avilhchan pus ju xakʼai pali ju Ananías ixjuncan chinchalh ju lakʼachakʼan Cesarea. Alactʼamilh ju aliʼin xalacpaʼitnich ju israelitanin chai pumatam lapanac ju cachivinaʼ lacapuʼucxtin ixlacataʼan. Ju yuchi Tértulo ixjuncan. Pus ju yuʼunch talakʼalh ju gobernador Félix ni va ixtachivimakʼanch ju Pablo. 2 Chai acsni lhimincalh ju Pablo pus ju Tértulo tsuculh chivimakʼanaʼ ju yuchi. Junich ju gobernador: ―Ju lamilacata ju uxintʼi ji gobernador jantu alin ju lasat ju chavai chai lamiʼatalacpastʼacʼat na lhu taxtokni ju kʼox navitʼa ju ani laquilacatʼunʼan. 3 Pus quinchux quincʼan iclajunau lakʼailaktsʼiuch ji gobernador ixlacata tachi chun ju ani taxtokni ju quilanavinitauch. 4 Pus ju quitʼin jantu panicni icmamaktilaputunan. Va ictapaininiyan ni aqʼuinkʼasmatninch lacatsʼunin ju tuchi icjumputunan. 5 Pus ju ani ya lapanac lana kʼox kʼai junita. Chai va alakmaktalhkʼaman ju quintʼaʼisraelitanin quincʼan ixlhilacaputsʼun ju lacamunutpaʼ. Ju yuchi vachuʼ chʼakʼokʼai ju anuʼ Jesús amachakaʼ Nazaret. 6 Ju yuchi malacasulh tachi ju va jantu tuʼuʼ lhiulai ju kʼai quimpujitat quincʼan ni laich tucan xamanui pumatam ju jantu israelita junita. Chai jantu lhijun ni catanu ju yuchi. Pus ju quijnan icquichʼapauch. Chai xacmamakʼalhkʼajniputunau tachi ju lhijun laquilhamapʼaksin quincʼan. 7 Para ju comandante ju Lisias juncan quintalakmin chai quintataiʼinin ju Pablo va lacatapʼastu. 8 Chai alacjuni ju yuʼunch ju ixtaʼachivimakʼanan ni catalakminanch ju uxintʼi. Pus miʼakstu lai amakʼosaspʼitʼaʼ chai acʼatsʼayaʼ ni slivasalh tachi ju iclajunau. ―Chunch ju junilh ju gobernador ju Tértulo. 9 Chai chux ju istʼaʼisraelitanin ju vachuʼ anch ixtavilanalh ixtanajun ni slivasalh chunch tachi ju ixnajunta ju Tértulo. 10 Pus ju acsnich ju gobernador tamacyonilh ju Pablo ni laich cachivinilh. Chai ju yuchi juni: ―Ju quitʼin iccʼatsai ni na lhu cʼata ju unitʼa gobernador ju ani laquintʼun quincʼan. Pus yuchi lhikʼach ju aclhijunan ju stavasalanti tuchi icnavita. 11 Alin lapanacni ju laich catajunin ni va lakacautʼuicaʼ avilhchan xajun acsni icʼalh lakʼayanaʼ ju Dios ju lakʼachakʼan Jerusalén. 12 Ju quitʼin jantu xactʼalakʼaitʼajun tam xamatiʼ sin acʼamaktalhkʼamalh ju lapanacni lacakʼai pujitat nin lacalacatʼicstʼi pujitat nin lacati. 13 Ju anich tavilanalh jantu tavanan lai catamavasalaniyan tuchi quintalhichivimakʼanch ni jantu tuʼuʼ icnavita. 14 Para acjunan ni vasalh iclhilacaʼan ju Dios ju vachuʼ ixtalhilacaʼan ju makʼaniya quilacpaʼitni quincʼan. Para ju chavai chunch icnavi tachi ju najun lacasastʼi atalaninti chai ju yuʼunch tanajun ni jantu sok ju chunch. Para aktsʼiya sok ni vachuʼ iclacaʼi tachi chun ju tsʼokcanta laʼixlhamapʼaksin ju Moisés chai tachi chun ju tatsʼokta ju makʼaniya lapanacni ju ixtanajun ixchivinti Dios. 15 Ju quintʼaʼisraelitanin talacaʼi ni catataʼacxtuchokotachilh ju tanitach. Catataʼacxtuchokotachilh ju soknicʼa isʼatsucuntiʼan chai ju jantu soknicʼa isʼatsucuntiʼan. Pus vachuʼ chunch ju iclacaʼi ju quitʼin. 16 Chai ni iclacaʼi ju chunch pus laʼixlhichux quiʼalhunut iclacasqʼuin ni jantu tavanan tuʼuʼ acnavi talakʼalhin ju laich aclhitalhanalh laʼixmacni Dios u laʼixmacni ju quintʼalapanacni. 17 Na lakalhu cʼata xacʼalhtanatʼajun alakatam lacatʼun. Para ju chavai icminchokota laquintʼun. Va xacʼalhiminita ju tumin ju quintʼaʼamachakʼan ju ixlhikʼailaktsʼincanta. Chai vachuʼ xacxtakniputun lakatam lhakʼailaktsʼin ju Dios. 18 Acsni salaka xacnavita ju quiʼalhunut laʼixmacni Dios tachi ju iclhilanitauch ju quijnan pus ictanulh lacakʼai quimpujitat quincʼan. Va xacxtakniputun ju Dios ju quilhakʼailaktsʼin. Chai anchach quintalhitajulh ju quintʼaʼisraelitanin amachakʼan xalacatʼun Asia. Para jantu xacmakvi laʼixtalhavat lapanacni nin actʼalakʼailh xamatiʼ. 19 Tasqʼuini ni yuʼunchach ixtamilh ju ani lamiʼucxlacapuʼ chai ixquintachivimakʼalh ni tuʼuʼ quintalhixcaji. 20 U mas yuʼunch ju ani tavilanalh chach tanaulh ni quintalhitajunita tuʼuʼ quintalakʼalhin acsni xacmanucancha laʼixpuʼucxtinʼan ju yuʼunch. 21 Va yuchi ca laich catanaulh ni talakʼalhin xacnavi acsni xacya laʼixʼucxlacapuʼan ju yuʼunch chai na pʼas icchivinilh chai icʼajuni ni yuchi iclhichivimakʼancanta ni iclacaʼi ni catataʼacxtuchokotachilh ju tanitach. 22 Pus ju Félix aktsʼiya ismispai tuchi talacaʼi ju tachʼakʼokʼai ju Jesús chai ajuni ju lapanacni ni jantu lai catilakʼoxilh ju ixlhamakʼanʼan ju acs avilhchan. Va ajuni: ―Acsni va camilh ju comandante ju Lisias juncan pus acsnich ju aclalakʼoxiniyau ju milhamakʼanʼan. 23 Chai junicalh ju xacapitán ni calhiʼanchokolh ju Pablo laʼixchakaʼ ju kʼai ucxtin Herodes chai calhistaclh para chach navilh va tuchi ixnaviputun ju Pablo. Chai chach talakmilh ju ixʼamigojni chai chach taxtakni tuʼuʼ ju camaktasqʼuiniyaʼ ju Pablo. 24 Pus acsni tapasalh lakatʼui lakatʼutu avilhchan ju Félix chinchokocha ju lakʼachakʼan Cesarea. Tʼamilh ju ixʼamachakaʼ ju Drusila ixjuncan. Ju yuchi israelita ixjunita. Pus ju Félix lhinaulh istʼasanica ju Pablo ni va ixtakʼasmatniputun aliʼ chivinti ta yu lai lhilacaʼancan ju Jesucristo. 25 Pus ju Pablo ajuni ni lacasqʼuin ju Dios ni salaka cava ju quiʼatsucuntiʼan laʼixmacni ju yuchi. Chai tasqʼuini ni cakʼaichokocau quiʼakstuʼan. Vachuʼ ajuni ni cachinaʼ avilhchan acsni canonaʼ ju Dios tichi chavaʼitnich ju soknicʼa laʼixmacni yuchi chai tichi chavaʼitnich ju jantu. Chai ju Félix acsni kʼasmatnilh ju ixchivinti ju Pablo na talhanalh chai juni: ―Ju chavai apʼinchich. Acsni caʼalinach ju quimpantsʼiquis aclhinonchokoyach mintʼasanica. 26 Ju Félix ixnajun ni ca cakʼalhtasuniyaʼ tumin ju Pablo ni laich caʼanchokolh laʼixchakaʼ. Pus yuchi va tsa ixlhilhinajunta istʼasanica chai va tsa ixtʼachivinin. 27 Acsni tapasalh lakatʼui cʼata pus ju Félix taxtulh laʼixpuʼucxtin chai tanulh ju Porcio Festo. Pus ju Félix ni ixlacasqʼuin ni vana ixʼamigojni catava ju israelitanin pus yuchi lhimacaulh tachʼin ju Pablo.
1 Ju ixlhilakatʼutu avilhchan acsni tanulh laʼixpuʼucxtin ju Festo pus ju yuchi taxtulh ju lakʼachakʼan Cesarea. Alh ju lakʼachakʼan Jerusalén. 2 Chai ju anch talakmilh ju xalackʼajin palijni chai ju xalackʼajin israelitanin. Va tachivimakʼalh ju Pablo. 3 Tasqʼuinilh lamapainin ju gobernador ni calhinaulh istʼasanica ju Pablo ju lakʼachakʼan Jerusalén. Para ju yuʼunch va ixtalhipuxconi ta yu laich catapukʼalhaumakni ju lacati. 4 Para ju Festo alacjuni: ―Chach tolhcha ju Pablo junta vilhcha. Ju quitʼin acʼananta ju anch ni catapasayaʼ lakatʼui lakatʼutu avilhchan. 5 Vachuʼ alacjunich: ―Ju aliʼin ju lamilhiʼuxijnan ju laich cataʼanaʼ chach quintatʼaʼalh. Anch ju laich catachivimakʼanach ju anuʼ lapanac ni alin tuʼuʼ ixtalakʼalhin. 6 Pus tachi lakatsajin lakacau avilhchan tavilhcaʼ ju lakʼachakʼan Jerusalén ju Festo. Chai ni tuncunchokopa pus lana alhch ju lakʼachakʼan Cesarea. Chai acsni alakatam avilhchan jumpa pus alh lacakʼai chakaʼ chai lhinaulh ixʼica ju Pablo. 7 Chai acsni lhichincancha ju Pablo pus lana talactayalh ju israelitanin ju ixtamintachalh ju Jerusalén. Tachivimakʼalh ju Pablo. Na lhu chai na kʼai talakʼalhin ju ixtaʼulani mas jantu lai ixtamavasalai ni vasalh chunch ju canavi. 8 Pus ju acsnich ju Pablo chivinilh. Junich ju gobernador: ―Ju quitʼin jantu tuʼuʼ icnavita ju jantu lhijun ju quilhamapʼaksin quincʼan ju israelitanin icjuntau. Jantu tuʼuʼ icnavita ju lacakʼai quimpujitat quincʼan ju jantu lhijun ni acnavi. Chai jantu tuʼuʼ icnavita ju lhikʼalhtsʼajui ju César ju xakʼai tucan ju ani lacatʼun Roma. 9 Para ju Festo ni ixʼamigojni ixʼanaviputun ju israelitanin pus junich ju Pablo: ―Ja pʼimpʼutʼun ju lakʼachakʼan Jerusalén. Anchach ju aclakʼoxiniyanta ju milhamakʼan. 10 Para ju Pablo kʼalhtailh. Junich: ―Icya lamiʼucxlacapuʼ ju uxintʼi ju ixlapanac unitʼa ju César ju xakʼai tucan ju ani lacatʼun Roma. Chai tasqʼuini ni anich aclakʼoxinicalh ju quilhamakʼan. Ju uxintʼi kʼoxich cʼatsʼai ni jantu icʼanavinita tuʼuʼ talakʼalhin ju quintʼaʼisraelitanin. 11 Pus ni tuʼuch icnavita ju lai aclhimapalalh ju quiʼaninti pus jantu icnajun ni jantu actini. Para ni jantu slivasalh tuchi quintalhichivimakʼan pus jantu xamatiʼ lai aquintimakʼaxtaklh laʼixmacniʼan ju yuʼunch. Iclacasqʼuin ni yuchi ju aquilakʼoxinilh ju quilhamakʼan ju César ju xakʼai tucan ju ani lacatʼun Roma. 12 Pus ju acsnich ju Festo alactʼachivinilh ju ixtʼaʼucxtinin chai astan junich ju Pablo: ―Ju uxintʼi naʼuntʼa ni lacʼasqʼuin ni yuchi ju César ju calakʼoxiniyan ju milhamakʼan. Pus kʼoxich. Acmalakachaniyan ju yuchi. 13 Pus acsni tapasalh lakatʼui lakatʼutu avilhchan apumatam xakʼai ucxtin ju Agripa ixjuncan tʼamilh ju ixʼamachakaʼ ju Berenice ixjuncan. Tamilh ju lakʼachakʼan Cesarea ni va ixtamacʼamiputun ju Festo. 14 Chai tatolhcha lakatʼui lakatʼutu avilhchan. Pus ju Festo chivintanunilh ju ixtʼaxakʼai ucxtin ixlacata ju Pablo. Chanich juni: ―Ju Félix acsni tavanan taxtulh laʼixpuʼucxtin maconulh lacapulachʼin pumatam lapanac. 15 Chai acsni icquilalh ju lakʼachakʼan Jerusalén pus ju xalackʼajin ixpalijniʼan chai ju xalacpaʼitniʼan ju israelitanin quintalakchaʼalh. Tachivimakʼalh ju anuʼ lapanac chai va ixtalacasqʼuin ni aclhinaulh ixmaknica. 16 Para ju quitʼin icʼajunilh ni jantu chun ju lacan ju ani xalacatʼun Roma. Jantu lai makʼaxtakcan laʼixʼaninti pumatam acsni tucaʼ tʼalalaktsʼinta ju taʼachivimakʼanan chai acsni tucaʼ najun ni stavasalanti u jantu ju tuchi lhichivimakʼancanch. 17 Pus ixlhiyuchi jantu lana icpacxalh acsni tavanan taminchalh ju ixtachivimakʼan ju anuʼ lapanac. Ni tuncunchokolh pus lana icmilh lacakʼai chakaʼ chai iclhinaulh ixʼica ju anuʼ lapanac. 18 Pus ju quitʼin xacnajunta ni ca na kʼai talakʼalhin ju xanavi ju anuʼ lapanac. Para jantu. Acsni tavanan tatsuculh chivinin ju taʼachivimakʼanin jantu tuʼuʼ kʼai talakʼalhin ju tamucʼanilh. 19 Va jantu kʼox talhiulai tachi ju lhichivinilh ju tuchi talhilanitach ju yuʼunch. Vachuʼ jantu kʼox talhiulai ni va najun ju Pablo ni ma va taʼacxtuchokolh pumatam lapanac ju Jesús ixjuncan acsni ixmaknicanta. 20 Pus ju quitʼin jantu xaccʼatsai ta yu laich aclakʼoxi ju tuʼuʼ lhamakʼan ju chunch. Pus icsacmilh ju Pablo ni jantu caʼamputulh ju lakʼachakʼan Jerusalén. Anch aclakʼoxinilh ju ixlhamakʼan. 21 Para ju Pablo sqʼuinlh ni yuchi ju xakʼai tucan César ju calakʼoxinilh ju ixlhamakʼan. Pus ni chunch ju sasqʼuin pus iclhinaulh ixlhistʼacʼa tus acsni laich acmacaʼanilh ju yuchi. 22 Pus ju acsnich ju Agripa junich ju Festo: ―Ju quitʼin vachuʼ ickʼasmatniputun ju ixchivinti ju anuʼ lapanac. Pus ju Festo junich: ―Lhich akʼasmatniyach. 23 Pus acsni alakatam avilhchan jumpa ju Agripa chai ju Berenice tamilh lacapuʼucxtin. Salh kʼox ixtamalakchʼininta ju yuʼunch. Chai alactʼatanucha ju ixʼucxtinʼan ju taropajni chai ju xalackʼajin ju anuch lakʼachakʼan. Pus ju Festo lana lhinaulh ixʼica ju Pablo. 24 Chai acsni chincha ju Pablo pus ju Festo chani ajunilh ju ixtavilanancha: ―Ji kʼai ucxtin Agripa chai chux ju uxijnan ju quilatʼavilau ju ani. Anich ya ju lapanac ju iclalhijuniuch. Pus acsni xacvilhcha ju lakʼachakʼan Jerusalén chai acsni icminchokolh ju ani na lhu israelitanin quintachivitanunita ixlacata ju yuchi. Pʼas quintajuni ni jantu lhijun ni vanach catsuculh. 25 Para ju quitʼin jantu tuʼuʼ iclhitajunita ju ixtalakʼalhin ju lai calhimapalalh laʼixʼaninti. Chai ni isʼakstu ju Pablo ju sqʼuinlh ni laich calakʼalh ju César pus yuchi iclhimalakachaniputun. 26 Para jantu tuʼuʼ iclhitajunita ju lai aclhiʼatsʼoknunilh ju xakʼai tucan. Yuchi xaclalhimaxtuniyau ju uxijnan. Va iclacasqʼuin ni uxintʼi ji kʼai ucxtin Agripa aqʼuilhasacmiyaʼich. Ta tsʼa jantu catasu ju tuʼuʼ ju laich acʼatsʼoknunilh ju César. 27 Jantu kʼox iclhiulai ni lai acmalakacha pumatam tachʼin chai jantu acjuni ta lhijunitach ixtalakʼalhin.
1 Ju acsnich ju kʼai ucxtin Agripa junilh ju Pablo: ―Laich achʼivin miʼakstu. Pus ju Pablo chʼixlh ju ixmacaʼ chai tsuculh chiviniʼ. Junich: 2 ―Na iclhikʼachan ji ucxtin Agripa ni laich acjunan ju uxintʼi ju stavasalanti ixlacata ju talakʼalhin ju quintasamucʼani ju quintʼaʼisraelitanin. 3 Yuchi iclhikʼachan ni iccʼatsai ni machʼakxakʼoʼui chux tachi ju iclhilanitauch ju quijnan ju israelitanin icjuntau. Chai vachuʼ machʼakxaich tuchi iclalhilakʼayauch. Pus yuchi iclhitapaininiyan ni va lacsni aqʼuinkʼasmatninch. 4 Chux ju quintʼaʼisraelitanin tamispai ju quiʼatsucunti tus quilhitalacatʼicstʼinti acsni ictakʼayacha laquilakʼachakʼan chai acsni xacvi ju lakʼachakʼan Jerusalén. 5 Ju yuʼunch makʼanch quintamispaich chai laich catanaulh ni va catanomputulh ni tus quilhitalacatʼicstʼinti makfariseo xacjunita. Chai ju quilhamapʼaksin quincʼan ju fariseonin icjuntau yuchi ju palai tsʼinqʼui tachi chun ju quilhamapʼaksin quincʼan ju israelitanin icjuntau. 6 Chai ju chavai iclhichivimakʼancantach va ixlacaʼatalh ni iclacaʼi ni caʼamacxtuchokoyaʼ ju Dios ju tanita ni chunch ju alaclhitʼatakʼoxita ju makʼaniya quilacpaʼitni quincʼan. 7 Chux ju quilhmaccautʼui ju quintʼaʼisraelitanin talacaʼi ni camuctaxtuyaʼ ju Dios ju tuchi xanajun chai caʼamacxtuchokoyaʼ ju tanitach. Chai yuchi iclhilakʼayayau chai iclhichʼalhcatnaniyau ju Dios tuncuj chai tsʼis. Para ji kʼai ucxtin Agripa yuchi jumpalat ju quintalhichivimakʼanan ni vachuʼ chun ju iclacaʼi ju quitʼin. 8 Ju uxijnan tajuch ni na va xcaich lhiulayatʼit ni laich camaxtuchokolh ju Dios ju tanitach. 9 Pus ju makʼanch ju quitʼin vachuʼ xacnajun ni na istasqʼuini ni na acmamakʼalhkʼajni ju ixtachʼakʼokʼai ju Jesús amachakaʼ Nazaret. 10 Chai chunch xacnaviyacha ju lakʼachakʼan Jerusalén. Chai ju xalackʼajin palijni xaquintaxtaknita ju alhiqui junta najun ni laich acʼatʼalhnu ju talhilacaʼanta Jesús. Chai na lhu ju icʼatʼalhnu. Chai acsni ixʼamakniputun pus vachuʼ quitʼin xacmaknajun ni lhijun ni chunch caʼulhtucalh. 11 Chai na paklhu icʼamamakʼalhkʼajni ju ixtatanui laʼixpujitatʼan. Tapʼastu xacʼajuni ni catalhitsʼiʼilh ju Jesús chai catanaulh ni jantu vana catachʼakʼokʼalh. Chunch xacnavi acsni xacʼan lakatamin lakatamin lakʼachakʼan laʼixpujitatʼan. Chai ni slivasalh na xacʼaxcaji pus xacʼalacchʼakʼokʼaxmai tus alakatam lacatʼun ni laich acʼamamakʼalhkʼajni. 12 Chai ni xacʼamamakʼalhkʼajniputun ju aliʼin pus yuchi xaclhiʼamputun ju lakʼachakʼan Damasco. Chai yuʼunch ju xalackʼajin palijni ju xaquintamalakachai chai xaquintaxtaknita ju alhiqui junta najun ni laich tachʼin acʼanavi ju talhilacaʼanta Jesús. 13 Para ji kʼai ucxtin acsni xacʼanta ju lacati iclaktsʼilh lakatam maclhcu ju xatapulhcuyacha ju lactʼiyan. Kʼatuncuj ixjunita para palai tachapun ixjunita ju anuʼ maclhcu. Palai jantu ju avilhchan. Tapulhcuchilh junta xacʼanta lacati ju quitʼin chai ju xaquintatʼaʼanta. 14 Pus lana tin iclactaʼaktau ju lacatʼun quinchux quincʼan. Chai ickʼasmatlh lakatam chivinti ju xaminacha lactʼiyan. Chai ju yuchi xaquijuni laquilhihebreo: “Saulo. Saulo. Jantu alhimakchʼapʼu ju quilapanacni. Acsni chʼun ju lai pus tachi ju va jun quitʼin ju qʼuilhimakchʼapʼui. Para alai miʼakstu ju mamakʼalhkʼajnichʼokʼocʼan acsni sastʼucʼa ju ixtaxtokni Dios”. Chunch xaquijuni. 15 Chai icjunich: “Tis chavaichʼat ji ucxtin”. Chai ju yuchi quijuni: “Quitʼin icJesús ju qʼuilhimakchʼapʼuich. 16 Para akʼostʼaʼulh. Atʼaich. Ju quitʼin iclhitalacasuniyan ni anaviyaʼ ju quilhichʼalhcat chai ni anonaʼich ni qʼuilaktsʼintʼach ju lacati. Chai vachuʼ anonaʼich ju tuchi acmalacasuniyanch astanch. 17 Pus ju chavai acmalakachayan ni alakpʼinaʼich ju yuʼunch ju jantu israelitanin tajunita. Chai acʼaktaijuyan ni jantu lai catamakniyan ju yuʼunch nin yuʼunch ju mintʼaʼisraelitanin. 18 Acmalakachayan ni amalakpʼucʼuʼuyaʼ. Ju chunch acsni catamaconaʼ ju macxcai ju tamaputsʼisini ju ixʼalhunutʼan chai catalacaʼiniyaʼ ixchivinti Dios pus tachi ju va catuncunach laʼistacʼatsanʼan. Chai vachuʼ laich catatakʼalhtaxtuyaʼ laʼixtachaput ju lhacaticuru chai catachʼakʼokʼayaʼ ju Dios. Vachuʼ aquintalhilacaʼanch ju quitʼin chai ju chunch camacʼacxanicanaʼ ju ixtalakʼalhinʼan chai vachuʼ quilapanacni catajunaʼ tachi ju aliʼin ju quintalhilacaʼanta”. Chunch xaquijuni. 19 Pus ji ucxtin Agripa iclacaʼinikʼo chux tachi ju quijuni ju Jesús acsni quixakʼalacha tus lactʼiyan. 20 Pus pʼulhnan icʼajunilh ixchivinti Dios ju amachakʼan Damasco chai astan ju amachakʼan Jerusalén. Chai astan icʼajunilh ju lapanacni ju ixtatʼajun ixlhilacaputsʼun ju xaʼestado Judea. Vachuʼ icʼajunilh ixchivinti Dios ju yuʼunch ju jantu israelitanin tajunita. Icʼajunkʼo ni catamacaulh ju macxcai isʼatsucuntiʼan chai catachʼakʼokʼalh ju Dios chai catanavilh ju kʼox. Ju chunch caputasuyach ni vasalh tamacaulh ju macxcai chai tachʼakʼokʼata ju Dios. 21 Chai va ixlacaʼatalh ni chunch xacʼajuni ju lapanacni quintaquilhichʼapalh ju quintʼaʼisraelitanin lacakʼai pujitat chai xaquintamakniputun. 22 Para tus chavai quiʼaktaijuta ju Dios. Yuchi iclhitailhiʼanta ixʼajunica ixchivinti Dios ju xalackʼajin chai ju yuʼunch ju jantu tuʼuʼ ixtapalhniʼan. Chai jantu tuʼuʼ icnajun. Va yuchi icnajun tachi ju ixnajun ju Moisés chai tachi ju ixtanajun ju makʼaniya lapanacni ju ixtanajun ixchivinti Dios acsni ixtanajun tuchi ju catapasayaʼ. 23 Pus ju yuʼunch ixtanajun chai ju quitʼin vachuʼ icnajun ni aktsʼiya istasqʼuini ni camakʼalhkʼajnalh ju anuʼ ju ixnoncan ni camalakachayachilh ju Dios. Chai canilh chai yuchi ju pʼulhnan calokʼonchokolh laʼixʼaninti. Ju chunch catacʼatsayaʼ ju quintʼaʼamachivinti chai ju aliʼin lapanacni ni catatakʼalhtaxtuyaʼ chai jantu catitaʼalh ju lacajipi ju catalhilacaʼanach ju yuchi. 24 Pus acsni ixtʼajun nonaʼ junima chivinti ju Pablo pus ju Festo pʼas chivinilh. Juncanch ju Pablo: ―Va lakʼachʼapʼuich ju uxintʼi. Na takʼalhinitach ju miʼaktsulh ni na lhu xalhitʼamakʼaʼui. 25 Para ju Pablo junich: ―Jantu va iclakachapui ji ucxtin Festo. Laquintakʼoxiti ju icchivinin chai stavasalanti ju tuchi icnajun. 26 Ju ani vi kʼai ucxtin Agripa cʼatsakʼojui junima taxtokni. Yuchi jantu iclhitalhanan acsni icnajun ju chunch laʼixʼucxlacapuʼ ju yuchi. Iccʼatsai ni cʼatsakʼojui junima taxtokni ni jantu va sek xanavi tuʼuʼ ju Jesús. 27 Ju uxintʼi ji ucxtin Agripa ja lacʼaʼich ju ixchivintiʼan ju makʼaniya lapanacni ju ixtanajun ixchivinti Dios. Iccʼatsai ni lacʼaʼich. 28 Pus ju acsnich ju Agripa juni: ―Ju uxintʼi ca va naʼunch ni vatsʼalhti aqʼuimalacʼaʼiniyaʼ chai aclhilacaʼanach ju Jesús. 29 Chai ju Pablo junich: ―Kʼoxich ni vatsʼalhti ju alacʼaʼiyaʼ. Chai vana kʼox mas va lacsnich ju alacʼaʼiyaʼ. Va yuchi ni calacasqʼuinach ju Dios ni vachuʼ alacʼaʼitʼi ju uxintʼi tachi ju iclacaʼich ju quitʼin. Chai vachuʼ catalacaʼilh chux ju quintatʼajun kʼasmatninin. Va yuchi ni jantu iclacasqʼuin ni tachʼin aʼuntʼit tachi ju icjunita. 30 Pus acsni nonkʼo junima chivinti ju Pablo pus lana tataya ju tucan xakʼai Agripa chai ju ucxtin Festo chai ju Berenice chai chux ju anch ixtavilanalh. 31 Chai acsni tataxtulh talaclajunich: ―Ju ani ya lapanac jantu tuʼuʼ navita talakʼalhin ju lai calhimapalalh laʼixʼaninti nin lai calhitʼalhnucalh. 32 Chai ju Agripa chani juni ju Festo: ―Laich ixmacaju ju ani ya lapanac ni jantu cava sqʼuinlh ni yuchi ju César ju calakʼoxinilh ju ixlhamakʼan.
1 Pus astan tanaulh ni catamalakachayanta ju xalacatʼun Italia ju Pablo. Pus amakʼaxtaknilh ju yuchi chai ju aliʼin tachʼinin laʼixmacaʼ ju xacapitán ixtaropajni ju kʼai ucxtin Augusto. Pus ju anuʼ capitán Julio ixjuncan. Chai ju quitʼin vachuʼ ictʼaʼalh ju Pablo. Ju quitʼin icLucas. 2 Vachuʼ xaquintatʼaʼantan pumatam ju Aristarco ixjuncan. Ju yuchi amachakaʼ Tesalónica ixjunita laxalacatʼun Macedonia. Pus ictajuch ju lacabarco ju ixmintacha ju lakʼachakʼan Adramitio chai ixʼamputun ju lakatamin lakʼachakʼan ju vi laʼixquilhtuʼ ju xalacatʼun Asia. Chai ictaxtuchauch. 3 Chai acsni alakatam avilhchan jumpa pus icchaʼauch ju lakʼachakʼan Sidón. Pus ju Julio na kʼox ixtʼalalhiʼanta ju Pablo chai yau junilh ni caʼalh alaktsʼiniʼ ixʼamigojni chai laich cataʼaktaiju laʼixmaktasqʼuinit. 4 Pus ictajuchokoch lacabarco. Ictaxtuch. Para na pʼas ixlai ju un chai jantu lai pʼas ixʼan ju barco. Pus acsni icchaʼauch junta ixvi ju lacatʼicstʼi lacatʼun lacaʼalama junta Chipre juncan pus ictapasauch ixlhiʼaclackʼoi junta palai jantu pʼas ixlai ju un. 5 Va xacquilhtuʼantauch ju lacxcan lacabarco. Vanin xacʼanau ju xalacatʼun Cilicia chai ju xalacatʼun Panfilia chai icchaʼauch ju lakʼachakʼan Mira xalacatʼun Licia. 6 Pus ju anch ju capitán lhitajulh alakatam barco. Ju yuchi ixmintacha ju lakʼachakʼan Alejandría chai ixʼamputun ju xalacatʼun Italia. Pus ju capitán quintajunin ni actajuch ju anch. Chai ictʼatajuch. Icʼauch. 7 Pus na lakalhu avilhchan va lacsni xacʼalhtananau chai xcayama icchaʼauch vanin ju lakʼachakʼan Gnido. Para ni na pʼas ixlai ju un pus icpuʼauch vanin ju xalacatʼun Salmón ju vanin ixtʼavi ju lacatʼicstʼi lacatʼun ju vachuʼ lacaʼalama ixvi. Ju anch Creta juncan. Ju anch jantu na pʼas ixlai ju un. 8 Pus xacquilhtuʼantauch lacxcan lacabarco tus xcayama icxajchauch ju lakʼachakʼan junta Buenos Puertos juncan. Ju yuchi vanin ixtʼavi ju lakʼachakʼan Lasea. 9 Pus ni na lhu xaquintamamaktilatan ju un pus na ixtapasaputun ju avilhchan acsni laicaʼ alhtanan ju barco ni va catsucuyach ju un. Pus yuchi chani alhijuni ju lapanacni ju Pablo: 10 ―Quintʼalapanacni ni caʼalhtananchokopalau ju lacabarco jantu xcai ni tuʼuʼ catapasalh. Laich catsʼankʼa ju tacʼucʼat chai ju barco chai jantu xcai ni vachuʼ ju quijnanʼan canitajuyau ju lacxcan. 11 Para ju capitán jantu xalacaʼini ixchivinti ju Pablo. Alai yuʼunch ju alacaʼinilh ju ixmalhtanai ju barco chaich ju amanavin barco. 12 Chai ni va tachi ixlai ju un ju anch ju lacalhicʼasnin pus na lacatsʼunin lapanacni ju jantu ixtataxtuputun ju anch. Tachi chun ju ixtatajumanalh lacabarco ixtanajun ni palai kʼox ni cataxtuch. Tsʼa ma laich capuxajchau ju lakʼachakʼan Fenice ju vachuʼ vi ju xalacatʼun Creta. Ju anch vachuʼ lai astacnancan ju barco. Chai ju un ju minacha ju lhitsʼastai chai ju lhichʼatoʼanta jantu lai ixtanui ju anch. Ixtanajun ni laich cataʼastacnalh ju anch tus catapasayaʼ ju avilhchan acsni na lai ju un ju lacaʼalama. 13 Pus acsni va lacsni ixlai ju un ju ixminacha ju lhichʼatoʼanta pus ju lapanacni ixtanajun ni ca laich cataʼalhtanampa. Pus ictaxtuch chai xacquilhtuʼantauch ju lacxcan. 14 Para ni pantsʼiquis va na pʼas lana xalai ju un ju xaminacha lacatʼun. Chai slivasalh na neklh ju barco. 15 Pus ju un chʼapaʼula ju barco. Jantu lai isastʼucʼa ju un. Pus ni jantu lai ixmalhtanacan ju barco pus lana macaulh ni chach sun lhiʼalh ju un vanta anchach ju casunlhiʼalh. 16 Chai acsni ictapasauch vanin lacalacatʼicstʼi lacatʼun junta Clauda ixjuncan pus ju un jantu pʼas ixlai ju anch. Ju anchach xcayama icxakʼamacutuch ju lacatʼicstʼi barco ju ixakʼamalhiʼanta ju kʼai barco. 17 Icmujuch lacakʼai barco chai ju astan ju lapanacni talakachʼilh ju kʼai barco lacalasu ni va ixtanajun ni jantu xcai ni calaclhvakaʼ ni na pʼas ixnekʼa ju xcan. Chai na va ixtatalhanan ni va laich casunlhiʼalh lacacucu junta Sirte juncan. Pus yuchi talhipʼuxnilh ju kʼai pumpuʼ ju ixpuʼalhtananch ju barco acsni ixtanui ju un. Ixtanajun ni jantu makat casunlhiʼalh ju barco ju chunch. 18 Chai acsni tuncunchokolh ni vana va chun ixlai ju un pus tamamuxtulh ju lacxcan ju xatacʼucʼat. 19 Chai ju ixlhilakatʼutu avilhchan ju quijnan laquimacach quincʼan icmamuxtu ju ixpuchʼalhcat ju barco. 20 Na lhu avilhchan jantu lai xaclaktsʼinau ju avilhchan nin yuchi ju stʼacu. Va tachi ixtʼajun ju kʼai un. Jantuch va tilacatsʼunin xacnonauch ni ca jantuch catitacutchauch. 21 Na lhu avilhchan jantu xacventauch. Pus astan ju Pablo taya laʼixlacaitat ju lapanacni chai alacjuni: ―Quintʼalapanacni na kʼox ca ixva ni xaquilakʼasmatniu ju quinchivinti. Jantu caʼixtaxtuchauch ju lakʼachakʼan Creta. Jantu caʼixmiuch makʼalhkʼajnin ju ani. Chai jantu caʼixmiu makʼatsʼankʼanin ju ani taxtokni. 22 Para jantu amakʼaninintʼit. Mas catsʼankʼayaʼ ju barco para jantu xamatiʼ ju quilhiquijnan ju canitajuyau ju lacxcan. 23 Pus ju quitʼin ixlapanac Dios icjunita chai yuchach ju icchʼalhcatnani. Pus ju lhiyaxch tsʼis ju yuchi quimalakachanitachilh ju ixʼanquilh. 24 Ju yuchi quijuni: “Jantu atʼalhan ji Pablo. Tasqʼuini ni atʼalacʼasunitʼachiʼ ju César. Chai ju va milacata ju uxintʼi ju Dios jantu calacasqʼuinaʼ ni xamatiʼ catini tachi chun ju tatʼaʼantan ju lacabarco”. Chunch quijuni ju Dios. 25 Pus ju chavai ji quintʼalapanacni jantuch amakʼaninintʼit. Ju quitʼin icquiclacaʼi ju Dios ni chunch ju catapasayaʼ tachi ju xaquijunich. 26 Para ju un sun aquintalhiʼanan lacalakatam lacatʼicstʼi lacatʼun ju vi lacaʼalama. ―Chunch ju ajuni ju lapanacni ju Pablo. 27 Pus lakatʼui semana xacʼucxuntʼonau lacabarco ju lacaʼalama. Astan icchaʼauch ju xaʼalama Adria para ju un va tachi ixnekta ju barco. Pus acsni chaʼalh paitat tsʼis ju ixmalhtananin barco ixtalhiulai ni vanin xacchaʼamputunau ju lacatʼun. 28 Pus talhcalh ju ixlhiputankʼai ju xcan chai chaʼalh lakapʼuxamcauchaxan metro. Acsni taʼalhtanampa alacatsʼunin aktam talhcachokopa chai ju acsnich chaʼalh lakapʼuxamtujun metro. 29 Na ixtatalhananch ni va laich casunlhiʼancalh ju barco lakʼakchiuxin chai calaclalh. Pus laʼixlhipulacan ju barco tamujulh lacxcan lakatʼatʼi tsasnat ju ixʼachʼicanta lacalasu. Ju chunch chʼapayaulh ju barco. Na ixtalhamakʼaninin. Ixtanajun ni sokʼo catunculh. 30 Ju ixmalhtananin barco ixtaʼatsʼalhputunch. Va ixtalaich tachi ju va catamuju ju tsasnat ju cachʼapayaulh ju barco laʼixlhiʼaktsulh ju barco. Para va ixtatʼajun munin ju lacatʼicstʼi barco ju lacxcan ni ixtanajun ni catapuʼanach. 31 Para ju Pablo alacjunich ju xacapitán chai ju taropajni: ―Ni catataxtuyach lacabarco ju yuʼunch pus ju uxijnan jantu lai atʼitʼakʼalhtʼaxtʼutʼit. 32 Pus ju acsnich ju taropajni tachakxlh ju xalaso ju lacatʼicstʼi barco chai tamamuxtulh. 33 Chai acsni tsuculh tuncunuʼ pus ju Pablo alacjunich ni chach tavailh. Ajunich: ―Ju chavai lakatʼui semana xajun ju lhistʼactʼit ju barco. Jantu lhtʼatʼatʼatʼit sin tuʼuʼ utʼatʼit. 34 Pus iclatapaininiyau ni avaʼintʼitch. Ju chunch caʼalinaʼ ju mintachaputʼan ni laich atʼakʼalhtʼaxtʼuyaʼitʼit. Jantu xamatiʼ catini chai nin lacatsʼunin jantu catacʼatsaniyaʼ. 35 Chai acsni nonkʼo ju chunch ju Pablo pus chʼapalh lakatam xkapavati. Xtaknilh lakʼailaktsʼiuch ju Dios laʼixʼucxlacapuʼan ixchuxʼan. Astan chʼekʼeʼilh lacatsʼunin chai tsuculh vainaʼ. 36 Pus acsnicaʼ ju takʼachalh ixchuxʼan chai vachuch tavailh. 37 Xacjuntau tachi lakatʼui cientos a setenta y seis lapanacni ju lacabarco. 38 Chai acsni talhilakʼo pus tatsuculh munin lacxcan ju trigo ju ixlhiʼanta ju barco. Ju chunch palai chapakʼa cava ju barco. 39 Chai acsni tunculh talaktsʼilh ju tʼun para jantu istamispai taʼanchach. Para talaktsʼilh laʼixquilhtuʼ tʼun ni jantu na ixlucunun ju xcan chai na ixʼalin ju cucu. Pus anchach ju ixtalhiʼamputun ju barco ni va laich caʼixlalh. 40 Pus ju anuʼ tsasnat ju ixtajuya lacxcan ni cachʼapayaulh ju barco tachakxnilh. Anch ju tajukʼalhi ju lacxcan. Chai taxkʼotlh ju anuʼ lacqʼuiu ju sok ixtapumalhtanai ju barco. Va ixtanajun ni sok ixtalhiʼalh ju barco ju lacacucu. Chai ju anuʼ kʼai pumpuʼ tamamakʼastʼanilh lasaʼaktsulh ju barco ni laich catanu ju un. Chai ju barco tsuculh anaʼ junta jantu na pʼas ixlucunun ju xcan. 41 Para anchach talapakxtoklh lakatʼui xcan chai na kʼalhtankʼai ixjunita ju cucu. Pus ju barco taquincaʼacnulh lacacucu. Chai ju laʼixlhiʼaktsulh na pʼas tavi chai laʼixtampʼin ixtalaklhvak laʼixtachaput ju alama. 42 Pus ju taropajni ixtanajunch ni caʼamaknicalh ju tachʼinin. Ju chunch jantuch xamatiʼ camakʼanxqʼuivitnitacutlh chai caʼatsʼalalh. 43 Para ju xacapitán ixmakʼalhtaxtuputun ju Pablo. Yuchi jantu alhilakaʼinilh ni caʼalakmaknicalh. Va ajunich ni pʼulhnan catajuyaʼ lacxcan tachi chun ju lai camakʼanxqʼuivitnilhch. Chach tacutcha lacatʼun. 44 Pus ju jantu lai xamakʼanxqʼuivitnin tapuʼalh ju tuʼuʼ lhtʼakʼalaqʼuiu. Ju aliʼin tachʼapalh ju xalacqʼuiu barco chai tapuʼalh yuchi. Pus chunch icputakʼalhtaxtukʼojuch chai ictacutchauch quinchux quincʼan ju lacatʼun.
1 Acsni ictacutchauch ju lacaʼalama ju amachakʼan anch quintajunan ni Malta ixjuncan ju anuʼ lacatʼun. 2 Pus ju lapanacni amachakʼan anch jantu va ti lacatsʼunin quintamapainin. Tamalhcula ni na ixlai ju xcan chai na lhicʼasnin ixjunita. Chai quintajunan ni acskʼonvi. 3 Pus ju Pablo vachuʼ ixtʼajun makmakxtoknuʼ ju qʼuiu. Chai tʼampʼulhch. Pus lacaqʼuiu ju xatʼampʼui ixʼalin lakatam lu. Chai ni na ichilh lacajipi pus taxtulh chai livik mactaquilhnu ju Pablo. 4 Pus ju lapanacni ju amachakʼan anch talaktsʼilh ju lu ni macquilhtaich laʼixmacaʼ ju Pablo chai talaclajunich sia yuʼunch: ―Ju ani lapanac ca va amakniniʼ junita. Chai mas takʼalhtaxtulh ju lacaʼalama para ju Dios jantu lacasqʼuin ni vanach catsuculh. 5 Para ju Pablo cʼalhapʼuxlh ju lu chai macaʼalh lacajipi. Chai jantu tuʼuʼ tapasalh. 6 Pus tachi chun ju anch ixtayanalh ixtanajunch ni ca cacʼununiyaʼ ju ixmacaʼ u cataʼaktayaʼ xanin va tam pantsʼiquis. Para na panicni ixtapacxan. Chai acsni talaktsʼilh ni jantu tuʼuʼ tapasalh pus tam tapastaclh. Ixtanajun ni ca va dios ju yuchi. 7 Pus ju xaʼucxtin ju anuʼ lacatʼun Publio ixjuncan. Chai vanin junta ictacutchauch lacaʼalama na lhu ixʼalin ju ixlacatʼun. Pus ju yuchi quintajunan ni acʼauch lacachakaʼ ju anch. Chai lakatʼutu avilhchan va lacalhikʼach xaquintamavayan. 8 Pus ju ixpai ju Publio ixma laʼixputaman. Na ixtakʼankʼai. Va ixchʼapata ascacanaʼ chai istipus. Pus ju Pablo lakʼalh. Tʼachivinilh ju Dios chai mokslanilh ixmacaʼ laʼixʼucxni ixlacatuna chai lana palai va. 9 Chai ni talaktsʼilh ni palaich va ju ixpai ju Publio pus vachuʼ ju aliʼin amachakʼan anch ju va ixtalactakʼankʼai talakmilh ju Pablo chai palaich anavikʼocalh. 10 Chai ju yuʼunch na lhu lhakʼailaktsʼin xaquintaxtakniyan. Chai acsni ictajuchokochauch laca alakatam barco quintaxtaknin chux tachi chun ju xacmaktasqʼuiniyauch. 11 Acsni tapasalh lakatʼutu malhquiyuʼ ictaju laca alakatam barco ju ixmintacha Alejandría. Vachuʼ va isʼastacnanta ju anch lacalhicʼasnin junta xacvilau. Istsʼokʼulanicanta laʼisʼaktsulh ju barco lakatʼui isʼaktsulh isdiosʼan. Ju pumatam Cástor ixjuncan chai ju pumatam Pólux ixjuncan. 12 Pus ictaxtuch chai icchaʼauch lakʼachakʼan Siracusa. Chai ju anch ictolhchau lakatʼutu avilhchan. 13 Chai ictajuchokoch lacabarco. Ictaxtuch ju anch chai xacquilhtuʼantauch ju lacxcan tus icchaʼauch ju lakʼachakʼan Regio. Acsni tuncunchokolh lalh ju un ju minachalh ju lhisur. Pus ictaxtuchokoch chai ixlhilakatʼui avilhchan icpuchaʼauch ju lakʼachakʼan Puteoli. Chai anchach ju ictacutchauch ju lacabarco chai astan va lacatʼun ju icpuʼau. 14 Ju anch iclhitajuchau ju quilhiʼalakʼavin laʼixmacni Jesús. Chai ju yuʼunch kʼasi quintajuninch ni acʼalactʼatolhchau tachi tam semana. Chai ictolhchau. Astan ictaxtuchokopalau chai icchʼapachokopalau ju xati Roma. 15 Pus ju quilhiʼalakʼavinʼan laʼixmacni Jesús ju ixtavilanancha lakʼachakʼan Roma takʼasmatlh ni icmintauch ju lacati. Pus ju aliʼin quintaquipakxtokchin tus ju lakʼachakʼan junta Tres Tabernas ixjuncan. Ju aliʼin palai makat quintaquipakxtokchin. Pus ju Pablo acsni alaktsʼilh ju yuʼunch lana xtaknilh lakʼailaktsʼiuch ju Dios chai na kʼachalh. 16 Pus acsni icchaʼauch ju Roma ju xacapitán amakʼaxtaklh ju tachʼinin. Axtaknilh ju xaʼucxtin ixtaropajni ju kʼai ucxtin. Para ju Pablo yau junicalh ni va isʼakstu catanu lacachakaʼ ju ismatsʼisqʼuinlh. Va pumatam taropa tʼaʼalh ni calhistaclh. 17 Chai acsni tapasalh lakatʼutu avilhchan pus ju Pablo alactʼasanilh ju xalackʼajin istʼaʼisraelitanin. Chai acsni tatakʼaixtoklh chani alacjuni: ―Ju quitʼin ji quintʼalapanacni jantu tuʼuʼ iclanavinitau talakʼalhin ju uxijnan ju quintʼaʼisraelitanin untʼatʼit. Nin yuchi ni acsamakʼalh tachi ju quintamalanitan ju makʼaniya quilacpaʼitniʼan. Para mas jantu tuʼuʼ icnavita para tachʼin xacnavicantacha ju lakʼachakʼan Jerusalén chai xacmakʼaxtaknicanta laʼixmacaʼan ju romanonin. 18 Pus ju yuʼunch acsni quintamakʼosaspitlh xaquintamacomputunch ni jantu tuʼuʼ talakʼalhin ju xaquintalhitajuni ju lai aclhimapalalh ju quiʼaninti. 19 Para ju quintʼaʼisraelitaninʼan jantu ixtalakʼaʼi ni acmacajuncalh. Pus tapʼastu icsqʼuinlh ni yuchi ju César ju aquilakʼoxinilh ju quilhamakʼan para jantu va icʼamucʼaniputun tuʼuʼ talakʼalhin ju quintʼaʼamachakʼan. 20 Pus yuchi iclhilatʼasaniyau ni xaclalaktsʼimputunau chai xaclatʼachivimputunau. Va xaclajumputunau ni tachʼin icnavicanta lacacadena va ixlacaʼatalh ni iclhilacaʼanta ju yuchi ju xaquintajuntan ju Dios ni aquintamalakachanitachan ju quijnanʼan ju israelitanin juntau ni aquintamakʼalhtaxtuyan. 21 Chai ju lapanacni tajunich: ―Pus ju quijnan jantu icʼamaklhtayanantauch tuʼuʼ alhiqui ju milacata ju tuʼuch caminchalh ju Judea. Chai jantu xamatiʼ ju quiʼalakʼavin ju laich camilh xtaknaʼ tuʼuʼ chivinti ni lai catanaulh tuʼuʼ macxcai ju milacata ju uxintʼi. 22 Para iccʼatsayauch ni ixlhilacaputsʼun ju lacamunutpaʼ va tatʼalaxcaji ju talacaʼi tachi ju lacʼaʼich ju uxintʼi. Pus yuchi iclhilakʼasmatniputunauch tuchʼi lacʼaʼich ju uxintʼi. 23 Pus talhcaʼulanilh lakatam avilhchan chai ju acsnich na lhu talakmilh ju Pablo junta ixtanun. Chai vatsʼisin tus tokʼoxai ju yuchi ixʼalacjuni ixlacata ju Dios ni lhinomputun laʼisʼatsucuntiʼan ju lapanacni. Ixʼamavasalani tuchi ixnajun ju Moisés laʼixlhamapʼaksin. Chai ixʼamavasalani ju tuchi ixtanajun ju makʼaniya lapanacni ju ixtanajun ixchivinti Dios. Va ixʼalacmalacaʼiniputun ni Jesús vasalh yuchi ju anuch ju ixnoncan camalakachatachilh ju Dios. 24 Pus ju aliʼinch talacaʼilh tuchi ixʼajuni ju Pablo. Para ju aliʼin jantu talacaʼilh. 25 Chai acsni jantu lai va lakatam ixtanavi ixʼatalacpastʼacʼatʼan pus va ixtataxtuputun ju yuʼunch ju jantu kʼox ixtalhiulai ixchivinti ju Pablo. Para ju Pablo chani ajuni: ―Ju Spiritu Santu xtaknilh ju chivinti ju ixnajun ju makʼaniya lapanac ju Isaías ixjuncan. Ju yuchi ixnajun ixchivinti Dios. Chai vas ju ajuni ju makʼaniya quilacpaʼitniʼan. 26 Ju Isaías junicalh ni calakʼalh ju anuʼ lapanacni chai caʼalacjunach ni ma slivasalh catakʼasmatʼaʼ para ma jantu catitamachakxayaʼ. Ma slivasalh catalaktsʼinaʼ tuʼuʼ para ma jantu tavanan catanavini cuenta ju tuchi talaktsʼinta. 27 Ma na pʼas tanavita ju ixʼalhunutʼan ni jantu tamachakxaputun. Ma jantu takʼasmatputun ni jantu tanaviputun. Ma jantu talaktsʼimputun tuʼuʼ ni jantu talacaʼiputun ju tuchi catalaktsʼilh. Ma jantu tamacomputun ju macxcai isʼatsucuntiʼan ni laich caʼamacʼacxanilh ju Dios ixtalakʼalhinʼan. Ma chunch ju naulh ju Dios. 28 Pus ju chavai acʼatsʼatʼit ni chavai chai atipuʼanta acʼajunau ju jantu quintʼaʼisraelitaninʼan ta yu laich caʼamakʼalhtaxtuyaʼ ju Dios ni jantu catitaʼalh ju lacajipi. Chai ju yuʼunch catalacaʼiyaʼ. 29 Pus acsni naulh junima chivinti ju Pablo pus ju istʼaʼisraelitanin tataxtulh chai na lhu chivinti ixtalaclajuni ju sia ixlhiʼakstuʼan. 30 Pus ju Pablo tolhcha ju lakʼachakʼan Roma lakatʼui cʼata lacachakaʼ ju ismatsʼisquinta. Chai kʼox alactʼachivinilh tachi chun ju ixtalakminch ju anch. 31 Va lhikʼach ixʼajuni ju lapanacni ni lhinomputun ju Dios laʼisʼatsucuntiʼan. Chai ixʼajuni ixlacata ju kʼai ixʼucxtin ju Jesucristo juncan. Chai jantu xamatiʼ xajuni ni jantu chunch catilalh.
1 Ju quitʼin icPablo. Ixlapanac icjunita ju Jesucristo. Yuchach ju quisacxtulh ni ixtamalakachan acva. Chai Dios ju quilhcalh ni acnonach ixchivinti junta najun tichi chavaich ju Jesús. 2 Aktsʼiya makʼanchich ixnajunta ju Dios ni caʼalinaʼ ju chunch chivinti. Chai ju makʼaniya ixlapanacni Dios vachuʼ ixtanajun tichi chavaich ju Jesús acsni amaʼatsʼoknuni ju Dios ju ixchivinti. 3 Pus ju anuʼ atsʼoknut ixnajun ixlacata ju quiʼucxtinʼan Jesucristo. Istsʼalh Dios. Ju yuchi quitsucuchilh tachi tam lapanac ju ani lacamunutpaʼ. Chai mas na makʼanch istsucuta ju David acsni tavanan tsuculh ju Jesucristo para ju yuchi makʼaniya ixpapanti ixjunita ju David. 4 Para vachuʼ istsʼalh Dios junita. Chai na salaka ju istacʼatsan. Chai ju putasulh ni vasalh chunch junita yuchi ni lacakʼai tachaput ju taʼacxtuchokolh junta ixʼacnui. 5 Pus yuchi ju Jesús ju quinavinilh lamapainin ni quimakʼalhtaxtulh chai quimalakachalh ni acʼajunilh ju lapanacni ju jantu israelitanin ixlacata ju Jesús. Ju chunch ixlhilacaputsʼun ju lacamunutpaʼ caʼalinaʼ ju jantu israelitanin ju catalhilacaʼanach ju Jesús chai catalacaʼiyach ju ixchivinti. 6 Pus ju uxijnan ju vilhchitʼit ju lakʼachakʼan Roma vachuʼ makyuʼunch untʼatʼit. Vachuʼ lhisacxtʼucʼantʼatʼit ni ixlapanacnich Jesucristo aʼunaʼitʼit. 7 Pus iclamacʼamiyau tachi chun ju uxijnan ju vilhchitʼit ju lakʼachakʼan Roma ju tamapainiyan ju Dios chai ju lhisacxtʼucʼantʼatʼit ni ixlapanacni Dios aʼunaʼitʼit. Va iclacasqʼuin ni catanaviniyanch lamapainin ju quimpaiʼan Dios chai ju quiʼucxtinʼan Jesucristo. Chai cataʼaktaijuyanch ni jantu calacʼalh ju miʼalhunutʼan. 8 Pʼulhnan iclajumputunau ni icxtakni lakʼailaktsʼiuch ju quiDiosʼan ju milacataʼan minchuxʼan. Para yuchi ju Cristo ju tucan juni ju Dios ju tuchi xacjumputun. Pus icxtakni lakʼailaktsʼiuch ju Dios ni cʼatsakʼocanch vanta anchach cava ni lhilacʼapʼintʼatʼitch ju Jesús. 9 Ju quitʼin icchʼalhcatnani ju Dios ixlhichux quiʼalhunut acsni icʼajuni ju lapanacni ixlacata ju istsʼalh ju Jesucristo juncan. Chai ju yuchi kʼoxich cʼatsai ni jantu tavanan ju jantu aclapastacvi ju uxijnan acsni ictʼachivininch ju Dios. 10 Ictapainini ju Dios tsʼa ma kʼoxich calhiula ju yuchi ni aclaʼanchau laktsʼinin ju chavai. Na makʼanchich ju icpastacta ni aclalakʼantachauch. 11 Va laich soko acʼancha junta vilhchitʼit ni laich aclajunau ju tuchi quimasunita ju Spiritu Santu. Ju chunch laich palai alhilacʼapʼinaʼitʼit ju Jesús. 12 Pus acsni icnajun ju chunch va iclajumputunau ni aktsʼiya calaʼaktaijuyau. Pus ju uxijnan palai alhilacʼapʼinaʼitʼit ju Jesús acsni alaktsʼinaʼitʼit ni iclhilacaʼanch ju Jesucristo ixlhichux ju quiʼalhunut. Chai ju quitʼin vachuʼ palai aclhilacaʼanaʼ ju Jesús acsni aclaktsʼinach ni lhilacʼapʼinatʼit ju Jesucristo ixlhichux miʼalhunutʼan vachuʼ. 13 Pus iclacasqʼuin ji quiʼalakʼavin ni acʼatsʼatʼit ni na paklhu ju xaclalakʼamputunachau ju uxijnan. Para tus chavai jantucaʼ lai iclalakʼantachau. Pus va icʼamputunacha junta vilhchitʼit ni lai acʼamalacaʼini ixchivinti Dios ju aliʼin mintʼaʼamachakʼan. Ju yuʼunch vachuʼ catalacaʼiyaʼ ixchivinti Dios tachi ju talacaʼita ju aliʼin ju vachuʼ jantu israelitanin tajunita. 14 Aktsʼiya tasqʼuini ni acʼajunilh ixchivinti Dios ju amachakʼan lackʼai lakʼachakʼanixni chaich ju amachakʼan lactʼicstʼi lakʼachakʼanixni. Acʼajunilh ixchivinti Dios ju atalanininch chai ju jantu atalaninin. 15 Pus yuchi ixlhichux quiʼalhunut iclhiʼamputunacha ni laich acʼajunilh ju mintʼaʼamachakʼan tichi chavaich ju Jesús. 16 Ju quitʼin jantu ictʼamaxanan ju chivinti junta najun tichi chavaich ju Jesús. Pus va tichi chavaich ju lacaʼini ju ixchivinti Dios pus ju Dios malacasuni ju ixtachaput acsni makʼalhtaxtui ni jantu catiʼalh ju lacajipi. Pus ju tucan amakʼalhtaxtuputun ju Dios quijnanʼan ju israelitanin juntau. Para vachuʼ amakʼalhtaxtuputun ju jantu israelitanin. 17 Pus laʼixchivinti Dios najun tichi chavaich ju Jesús. Chai anchach ju machakxacan ni salaka alaktsʼin ixʼalhunutʼan ju lapanacni ju Dios va acsni ixlhichux ixʼalhunutʼan ju talhilacaʼanta ju Jesús. Tachi ju tsʼokcanta junta chani najun: “Ju Dios ma najun ni ma yuchi ju caʼalinaʼ ju isʼatsucunti ju conkʼalhiyanta lactʼiyan ju lhilacaʼanta ju Jesús chai ixlhiyuchi salaka laktsʼin ixʼalhunut ju Dios”. Ma chunch ju najun ju Dios. 18 Pus ju Dios vilhcha talaclhman para cʼatsayau ni caʼamamakʼalhkʼajniyaʼ tachi chun ju jantuch tuʼuʼ talhiulai ju Dios chai tachi chun ju na taʼalactuʼunun chai va ixlacata ixʼalactuʼuntiʼan tasastʼucʼa ju aliʼin ju tamispaputun ju ixchivinti Dios. Chai ju yuchi stavasalanti. 19 Pus caʼamamakʼalhkʼajnicanaʼ ni chunch talai mas lana vas amalacasunicanta ju lapanacni ju tuchi laich mispacan ixlacata ju Dios. Vas amalacasunicanta ni isʼakstu ju Dios ju amalacasunilh. 20 Tus laʼixputaiʼulacan ju lacamunutpaʼ cʼatsacan ta yu junita ju Dios mas jantu lai laktsʼincan. Pucʼatsacan ta yu junita ju Dios ju tuchi navita. Tasui ju ixtachaput ni jonkʼalhitach. Chai tasuich ju ixlhiDios. Pus ixlhiyuchi ju lapanacni jantu lai tanajun ni jantu tamispai ta yu junita ju Dios. 21 Para mas tacʼatsai ni chunch junita ju Dios para ixlaquilhtu jantu tavanan tajuni ni yuchi ju xakʼai. Nin catajunilh lakʼailaktsʼiuch. Alai va yuchi ju talhipastʼacʼa ju taxtokni ju jantu lhitapalai. Chai ni na va pʼas ju ixʼalhunutʼan pus jantu lai tamachakxai ju ixtaxtokni Dios. 22 Ju yuʼunch tanajunch ni na taʼamispanan. Para alai va tontojni talhixajtacha. 23 Jantu tanajun ni yuchi ju xakʼai ju Dios ju jantu lai ni. Alai va isʼakstuʼan taxapalaxtuchokoi ju isdiosʼan tachi ju va tam ixtʼalapanacʼan ju lai ni. Chai tachi ju tuʼuʼ tsʼokʼo. Chai tachi ju tuʼuʼ atapacxat. Chai tachi ju tuʼuʼ lu. 24 Chai ni chunch ju tanavi ju lapanacni pus yuchi alhimaconilh ju Dios ni catanavilhch ju macxcai. Catanavi va tuchi macxcai ju catapastʼacʼaʼ laʼixʼalhunutʼan. Pus yuchi na kʼai talakʼalhin talalhinavinich laʼixlacatunaʼan isʼakstuʼan ju lapanacni. 25 Ju yuʼunch lana tamacajun ju istavasalanti Dios. Talacaʼi ju taʼaklhtamat. Pus ju tucan Dios yuchi ju anavikʼo tachi chun ju taxtokni. Para jantiyuʼ ju talakʼayai. Alai va yuchach ju talakʼayai chai tachʼalhcatnani ju taxtokni ju navita ju Dios. Para ju stavasalanti tasqʼuini ni Dios ju cajunicalh ni yuchi ju xakʼai tus va tavananch. Chai iclacasqʼuin ni vasalh chunchach canavicalh. 26 Pus ju lapanacni ni jantu talakʼayai ju tucan Dios pus yuchi alhimaconilh ju Dios ni catanavi ju macxcai laʼisʼatsucuntiʼan. Mas yuʼunch ju chakolun na macxcai tanavi. Ju aliʼin tamapaxai ju isʼatsucuntiʼan. Jantu tatʼatsucui ju tam jokʼat. Va laʼixlhiʼakstuʼan talalactuʼuchokoi. 27 Chai vana va chunch talai ju aliʼin jokʼatni. Jantu tatʼatsucuputun ju tam atsiʼ. Va ixtʼajokʼat ju tʼalalactuʼui chai lana jantu tamaxanan. Chai laʼixlacatunaʼan isʼakstuchʼan tamakʼalhkʼajnanchokoi. Pus lhijunch ni tamakʼalhkʼajnan ni na kʼai alactuʼunti ju tanavi. 28 Pus ju anuch lapanacni lana jantu tuʼuʼ talhiulai ju Dios. Pus yuchi alaclhimaconilh ju Dios ni catapastaclich ju taxtokni ju jantu kʼox chai vachuʼ laich catanavi ju taxtokni ju jantu lhijun ni catanavi. 29 Na ixtalhavatach laʼixʼalhunutʼan ju jantu soknicʼa atsucunti. Va tatʼatʼajun va tichi chavaich. Chai na taʼalhacchaʼananch. Chai na kʼai tajunita. Na taʼalhaxcayanan. Na taʼamakninin. Na alin ju ixlaklakʼaitiʼan. Chai na taʼaʼokxchokʼonun. Chai lana va si tam talhimachakxai ju tuʼu. Na tapuquilhchivinin. 30 Na macxcai talhichivinin ixtʼalapanacʼan. Taxcaji ju Dios. Jantu tuʼuʼ talhiulai ju ixtʼalapanacʼan. Na talhitakʼayai ju tuʼuʼ. Tanajun ni va yuʼunch ju na taʼacʼatsananta. Tanavi ju sastʼi alactuʼunti. Chai jantu taquiclacaʼi ju ixlacpaiʼan. 31 Jantu taʼacʼatsananta. Jantu lai tamuctaxtui ju laʼixchivintiʼan. Jantu lai taʼamapaininin tachi ju lhilapanac. Jantu lai taʼaʼaktaijunun lacaʼamapaininti. 32 Ju anuʼ lapanacni kʼoxich tacʼatsai ixlhamapʼaksin ju Dios junta najun ni lhijunch ni cataʼalh junta jonkʼalhita ixmakʼalhkʼajnatʼan tachi chun ju tanavi ju ani taxtokni. Para mas tamispaich tuchi najunta ju Dios para ixlaquilhtu tatailhiʼanta ju ixʼalactuʼuntiʼan. Chai na takʼachan acsni vachuʼ chunch taʼalactuʼunun ju aliʼin.
1 Pus ju uxijnan ji lapanacni ju amucʼaniyatʼit ixtalakʼalhinʼan ju mintʼalapanacʼan jantu tuʼuʼ lai atʼinaʼuntʼit mas va tichi chavaich untʼatʼit. Ju Dios catamucʼaniyan ju mintalakʼalhinʼan vachuʼ. Pus ni laich amucʼaniyatʼit ixtalakʼalhinʼan ju mintʼalapanacʼan pus lana tasui ni catamucʼaniyan ju Dios ju mintalakʼalhinʼan vachuʼ ni vana va chun ju malacʼasupʼalatʼit ju lamiʼatsucuntiʼan tachi ju junitach ju akʼantam. 2 Para cʼatsayau ju ani. Ju Dios sok caʼalacmucʼaniyaʼ ixtalakʼalhinʼan ju lapanacni ju chunch taʼalactuʼunun tachi ju iclajuntau. 3 Chai ju uxijnan ji lapanacni ni lai mucʼaniyatʼit ixʼalactuʼunti ju akʼantam para ni vana va chun navipʼalatʼit ju uxijnan ja va nonatʼit ni lai catajunin ju Dios ni matiʼ ju mintalakʼalhinʼan. 4 Tachi ju va jantu tuʼuʼ lhiulayatʼit ju uxijnan ni na taʼaktaijuputunan lacaʼamapaininti ju Dios. Tachi ju va jantu tuʼuʼ lhiulayatʼit ni tachʼixnikʼotan ju Dios mas na alactʼuʼununatʼit. Tachi ju va jantu tuʼuʼ lhiulayatʼit ni va jantu lana tamamakʼalhkʼajniyan ju Dios. Tachi ju va jantuch cʼatsʼayatʼit ni yuchi talhiʼaktaijuputunan lacaʼamapaininti ju Dios ni tsʼa ma amacʼaʼuntʼit ju miʼalactuʼuntiʼan. 5 Para ju uxijnan na va pʼasnich ju miʼalhunutʼan chai lana jantu macʼompʼutʼunatʼit ju miʼalactuʼuntiʼan. Chai ni chunch ju layatʼit pus miʼakstuʼan lalhavachʼokʼoyatʼit ju mimakʼalhkʼajnatʼan ju anuʼ avilhchan acsni camalacasuyach ju ixtalhkʼamti ju Dios. Chai acsnich ju catasuyach ni sok navi ju Dios acsni ulani ixtalakʼalhin xamatiʼ. 6 Pus ju acsnich ju Dios caxtakniyaʼ ju pumatam pumatam tachi ju lhijunch ixlacata ju tuchi navita. 7 Ju aliʼin lapanacni va tachi tanavi ju kʼox ni tapuxcajui ta yu laich capunaulh ju Dios ni xalackʼajin tajunita laʼixmacni yuchi chai ta yu laich kʼox calhiulacanaʼ laʼixmacni yuchi. Chai tapuxcajui ju atsucunti ju jonkʼalhita lactʼiyan. Pus ju yuʼunch caʼaxtaknicanaʼ isʼatsucuntiʼan ju conkʼalhiyanta ju lactʼiyan. 8 Para ju aliʼin lapanacni va yuchi ni talaclasai chai jantu lana talacaʼiputun ju stavasalanti. Va yuchi ju talacaʼich ju jantu soknicʼa. Pus ju Dios caʼamalacasuniyach ju ixtalhkʼamti ju yuʼunch. Chai caʼaxtakniyach ju kʼai ixmakʼalhkʼajnatʼan. 9 Tachi chun ju lapanacni ju tanavich ju jantu kʼox pus slivasalh catamakʼalhkʼajnanaʼ chai cataʼamakʼanininaʼ. Pus ju tucan chunch caʼaʼulhtucanaʼ yuʼunch ju aliʼin sia lhiquijnanʼan ju israelitanin juntau. Para vachuʼ ju yuʼunch ju jantu israelitanin. 10 Para va tichi chavaich ju canaviyaʼ ju kʼox pus ju Dios calaktsʼinaʼ tachi ju tam xakʼai chai kʼox calhiulayaʼ chai jantu calacʼalh ixʼalhunut. Pus ju tucan chunch caʼaʼulhtucanaʼ yuʼunch ju aliʼin sia lhiquijnanʼan ju israelitanin juntau. Para vachuʼ ju yuʼunch ju jantu israelitanin tajunita. 11 Ju Dios chunch ju canaviyaʼ ni vaklhtam chun ju alaktsʼin ju lapanacni. 12 Ju makʼaniya ixlapanac Dios ju Moisés ixjuncan atsʼoknulh ixlhamapʼaksin ju Dios. Pus tachi chun ju lapanacni ju jantu tamispai ju anuʼ lhamapʼaksin chai taʼalactuʼunun aktsʼiya caʼamamakʼalhkʼajnikʼalhicanaʼ. Va yuchi ni jantiyuʼ caʼalhimamakʼalhkʼajnicanaʼ ni jantu tanavita tachi ju najun lacalhamapʼaksin. Alai yuchi caʼalhimamakʼalhkʼajnicanaʼ ni va taʼalactuʼununta. Para tachi chun ju tamispai ju anuʼ lhamapʼaksin para ixlaquilhtu taʼalactuʼunun pus camucʼanicanaʼ ixtatsʼinqʼuit ju anuʼ lhamapʼaksin. 13 Ju Dios najun ni jantu salaka ixʼalhunutʼan ju lapanacni ju va takʼasmatʼa ju lhamapʼaksin ju atsʼoknulh ju Moisés. Ju Dios najun ni va yuʼunch ju salaka ixʼalhunutʼan ju catamuctaxtuyach tachi ju najun lacalhamapʼaksin. 14 Ju lapanacni ju jantu israelitanin tajunita jantu tamispai tuchi najun laʼixlhamapʼaksin Dios ju atsʼoknulh ju Moisés. Para mas jantu tamispai tuchi najun ju anuʼ lhamapʼaksin para aktamixnin isʼakstuʼan tanavi tachi ju najun laʼixlhamapʼaksin Dios. Chai ni chunch ju talai pus tasui ni alin ju ixlhamapʼaksinʼan laʼixʼalhunutʼan mas jantu tamispai ju lhamapʼaksin ju atsʼoknulh ju Moisés. 15 Chai ju laʼisʼatsucuntiʼan lana tasui ni tsʼoknicanta ju lhamapʼaksin laʼixʼalhunutʼan. Pus laʼixʼatalacpastʼacʼatʼan putasui ni vasalh alin ju ixlhamapʼaksinʼan ni isʼakstuʼan tacʼatsai u kʼox ju tanavi u jantu. 16 Chai tacʼatsai u kʼox calhiulayaʼ ju Dios u jantu ju anuʼ avilhchan acsni ucxtin cajunaʼ ju Jesucristo. Chai ju Jesús caʼulaniyaʼ ixtalakʼalhinʼan tachi chun ju lapanacni ixlacata tuchi sek tanavita chai sek tapastacta. Pus chunchach caʼulhtucanaʼ tachi chun ju lapanacni ju jantu talhilacaʼanta ju Jesucristo. Chai chunch ju icʼajuni ju lapanacni. 17 Pus ju uxijnan vachuʼ lhitʼapʼakʼaʼuyatʼit ni israelitanin untʼatʼit ni Dios makʼanch asacxtulh ju quilacpaiʼan. Chai nonatʼit ni atʼakʼalhtʼaxtʼuyaʼitʼit ni pʼacxantʼatʼit ju ixlhamapʼaksin Dios ju atsʼoknulh ju Moisés. Chai na lhitʼakʼayayatʼit ni nonatʼit ni mispʼayatʼit ju Dios. 18 Chai nonatʼit ni mispʼayatʼit ixkʼachat ju Dios. Chai nonatʼit ni lai sacxtʼuyatʼit ju kʼox ni va tachi malanicʼantʼatʼit laʼixlhamapʼaksin Dios. 19 Chai nonatʼit ni uxijnan ju palai mispʼayatʼit ju ixtaxtokni Dios. Chai ixlhiyuchi laich apʼulhniyaʼitʼit ju tachi va alakʼachʼixnin tajunita laʼistacʼatsanʼan. Chai nonatʼit ni laich amalacpʼucʼuʼuyaʼitʼit ju tatʼajun tachi ju va lacaʼatatsʼisni ni jantucaʼ tamispai ixti ju Dios. 20 Chai nonatʼit ni xaʼamalaninin untʼatʼit ju jantucaʼ tuʼuʼ tamispai ixtaxtokni Dios. Chai nonatʼit ni ixʼamamakaʼunin untʼatʼit ju va tatʼajuncaʼ laninin ixtaxtokni Dios. Chai nonatʼit ni lai chun naviyatʼit ni lacalhamapʼaksin ju tsʼokta ju Moisés ju lhitʼaʼutʼatʼit ju soknicʼa atalaninti chai ju stavasalanti. 21 Pus ju uxijnan ni malaniyatʼit ju apumatam tachi ju va jantu machʼakxayatʼit tuchʼi nonatʼit. Ju uxijnan alhamapʼaksininatʼit ni jantu kʼox ni akʼalhaunancanch. Para ja jantu vachuʼ taʼakʼalhaunan ju aliʼin lamilhiʼuxijnanʼan. 22 Ju uxijnan lhamapʼaksininatʼit ni jantu lai tʼatsucucan ju jantu quiʼamachakaʼ u jantu quimpapa. Para ja jantu vachuʼ chunch talai ju aliʼin ju lamilhiʼuxijnan. Ju uxijnan lhamapʼaksininatʼit ni jantu kʼox lhiulayatʼit ju tuʼuʼ santo. Para ju aliʼin lamilhiʼuxijnanʼan ca jantu vasalh ni jantu kʼox talhiulai ni laich taʼan ju lacpujitat junta ya ju anuʼ santo ju tanajun ni jantu kʼox talhiulai. Taʼan ni va takʼalhauputun ju tumin ju anch. 23 Ju uxijnan na lhitʼakʼayayatʼit ni pʼacxantʼatʼit ju ixlhamapʼaksin Dios. Para ni jantu muctʼaxtʼuyatʼit tachi ju najun ju anch pus yuchi macxcai talhilhichivinin ju lapanacni ixtaxtokni Dios. 24 Tachi ju tsʼokcanta laʼixchivinti Dios junta chani najun: “Ju aliʼin ju jantu israelitanin tajunita ma va macxcai talhichivinin ju Dios ma va ixlacata ni jantu muctʼaxtʼuyatʼit ju uxijnan tachi ju najun lacalhamapʼaksin. Ju uxijnan ma chunch ju layatʼit mas israelitanin untʼatʼit”. Chunch najun laʼixchivinti Dios. 25 Ju makʼanch ju Dios ajunilh ju makʼaniya quintʼaʼisraelitaninʼan ni catachʼucʼunilh ju ixʼaxtʼakʼa tachi chun ju tsʼalan ju catatsuculh. Ju chunch va ixpumispacanch va ni ixlapanacni Dios tajunita. Chai slivasalh ni lhitapalai ni chʼucʼucʼantʼatʼitch ni quintʼaʼisraelitanin untʼatʼit. Para va acsnich ju lhitapalai acsni muctʼaxtʼuyatʼit tachi ju najun laʼixlhamapʼaksin Dios. Para ni lakʼalhiyatʼit ju ixlhamapʼaksin Dios pus jantu lhitapalai mas chʼucʼucʼantʼatʼit. 26 Chai ju tam lapanac mas jantu chʼucʼucanta para ni camuctaxtulh tachi ju najun laʼixlhamapʼaksin Dios pus va ixtʼachunch laktsʼin ju Dios tachi ju va chʼucʼucanta ni muctaxtuich. 27 Pus ju jantu chʼucʼucanta laʼixlacatuna para ni muctaxtui tachi ju najun laʼixlhamapʼaksin Dios pus anchach ju apʼuʼulanicʼanaʼitʼit ju mintalakʼalhinʼan ju uxijnan ni jantu muctʼaxtʼuyatʼit mas alinch ju milhamapʼaksinʼan ju tsʼokta ju Moisés chai mas chʼucʼucʼantʼatʼit. 28 Pus ju va israelita tsucuta jantiyuʼ ju lai lhilakamispacan ni isʼaskʼatʼa Dios cava. Chai jantiyuʼ ju lhitapalai laʼixmacni Dios ni va cachʼucʼunicalh ju ixlacatuna tam lapanac. 29 Para ju vasalh isʼaskʼatʼa Dios yuchi ju chunchach junita laʼixʼalhunut. Chai tachi ju va achʼucʼunti laktsʼin ju Dios. Chai yuchach ju Spiritu Santu ju aquintachʼakʼaniyan ju quiʼalhunutʼan. Jantiyuʼ ni va acchʼucʼucalh ju quilacatuna tachi ju najun lacalhamapʼaksin. Chai ju salaka ixʼalhunut pus isʼakstu Dios ju canonaʼ ni na kʼox tachi ju junita. Jantiyuʼ ju tam ixtʼalapanac ju canonaʼ ni kʼox junita u jantu.
1 Pus laich aquilasacmiuch ni palai kʼox junita ju quiʼatsucuntiʼan ju israelitanin tsucutauch. Chai ja tuʼuʼ xtaknicantauch va ixlacata ni chʼucʼucantauch. 2 Pus aktsʼiya. Pus yuʼunch ju quintʼaʼisraelitanin ju pʼulhnan axtaknicalh ixchivinti Dios. 3 Para aktsʼiya ixʼalin ju sia yuʼunch ju jantu lai ixtalacaʼi. Para mas chunch talalh ju aliʼin ja laich acnaulh ni ixlhiyuchach jantu camuctaxtuyaʼ ju Dios tuchi najuntach ju yuchi. 4 Jantu lai actinaulh ju chunch. Chach tacʼatsa ju lapanacni ni aktsʼiya muctaxtui ju ixchivinti ju Dios mas va taʼaklhtamanin catalhixajcha tachi chun ju lapanacni. Tachi junta tsʼokcanta laʼixchivinti Dios junta chani najun: Aktsʼiya sok ju naʼun ji Dios. Chai mas tamucʼaniputunan ju mintalakʼalhin ju lapanacni ni tanajun ni jantu muctʼaxtʼutʼa tachi ju ixnaʼuntʼa para vasalh tasui ni muctʼaxtʼui tachi ju naʼun. Chunch najun laʼixchivinti Dios ju tsʼokcanta. 5 Pus ju aliʼin laich catanaulh ni ma acsnich ju palai tasui ni vasalh soknicʼa ju Dios acsni jantu sok anau ju quijnanʼan. Chai ju chunch pus ja ma sok navi ju Dios acsni caʼamamakʼalhkʼajniyaʼ ju lapanacni ixlacata ixʼalactuʼuntiʼan. Chunch ju tachivinin ju aliʼin lapanacni. 6 Para jantu lai actinaulh ni jantu sok navi ju Dios acsni amamakʼalhkʼajni ju lapanacni. Ni jantu cava sok navi tuʼuʼ ju Dios pus jantu lhijun ni camucʼanilh ixtalakʼalhin tam xamatiʼ. 7 Chai ju aliʼin lapanacni tanajun ni ma acsnich ju tasui ni vas najun ju Dios acsni acnaulh tuʼuʼ taʼaklhtamat. Ju chunch ma palai pulakʼayacan ju Dios. Chai ni chunch cava vasalh pus ma jantu lai vanach aquintilhimispa ju Dios ni icʼalactuʼunuʼ. 8 Chai vana lai catanaulh ni canaviuch ju amacxcai ni laich capuʼalilh ju kʼox. Pus ju aliʼin lapanacni ju macxcai quintalhichivinan tanajun ni ma chunch icnonau ju quijnan. Pus ju va kʼaya tanajun camamakʼalhkʼajnicanaʼ tachi ju lhijun ni caʼulhtucalh. 9 Para jantu lai actinaulh ni palai salaka junita ju quiʼalhunutʼan ju quijnanʼan ju israelitanin juntau. Palai jantu ju jantu israelitanin. Iclamasunitauch ni sich alactuʼunin juntau mas israelitanin juntau u jantu. 10 Laʼixchivinti Dios tsʼokcanta ta yu junita ju quiʼatsucuntiʼan. Chani najun: Ma matiʼ ju lapanac ju soknicʼa cava. Nin tachi pumatam. 11 Ma jantu xamatiʼ ju lai kʼox camachakxanilh ixtaxtokni ju Dios. Ma jantu xamatiʼ ju va laʼisʼakstu lai capuxcaulh ju Dios. 12 Ma tamaconkʼo ju ixti Dios. Chai tachi ixchuxʼan ma si takʼalhikʼo ju isʼatsucuntiʼan. Ma jantu xamatiʼ ju navi ju kʼox. Nin tachi pumatam. 13 Ju yuʼunch ma va tachi na macxcai tachivinin. Chai ju laʼixquilhniʼan ma tapuʼokxchokʼoi ju aliʼin ixtʼalapanacniʼan. Chai laʼixchivintiʼan ma tamaxcayani ixʼalhunutʼan ju ixtʼalapanacniʼan. 14 Ma si macxcai chivinti chai lacatalhkʼamti ju tachivinin. 15 Ma va yuchi ju talhimakʼancujtach ju va ixʼamaknintichʼan. 16 Junta tatʼajun ju yuʼunch ma na talakʼalhini ju isʼatsucuntiʼan ju aliʼin lapanacni chai na tamamakʼalhkʼajni ju ixtʼalapanacniʼan. 17 Ju yuʼunch ma jantu tavanan lai va lhikʼachach tatʼatolai ju aliʼin lapanacni. 18 Nin lacatsʼunin ma jantu tatalhoni ju Dios. Chunch najun laʼixchivinti Dios ju tsʼokcanta. 19 Pus matiʼ xamatiʼ ju lai canaulh ni jantu alactuʼununta. Mas quijnanʼan ju israelitanin juntau. Pus ju Dios quintaxtaknitan ju ixlhamapʼaksin para jantu lai xamuctaxtuyau. Pus ixlhiyuchi quintamucʼanitan ju quintalakʼalhinʼan ju quijnanʼan chai vachuʼ chux ju aliʼin lapanacni ni jantu xamatiʼ ju soknicʼa cava ju isʼatsucunti. 20 Pus jantu lai xamatiʼ catilhimispacalh ni salaka laʼixmacni Dios va ixlacaʼatalh ni canavi cava tachi ju najun laʼixlhamapʼaksin ni jantu xamatiʼ lai muctaxtui. Pus ju laʼixlhamapʼaksin Dios va pumispacan ni alactuʼunin juntau. 21 Pus ju laʼixlhamapʼaksin Dios najun ta yu apulaktsʼinch ju Dios ju lapanacni ni na salaka ixʼalhunutʼan. Chai vana va chun ixtanajun ju makʼaniya lapanacni ju ixtanajun ixchivinti Dios. Chai ju chavai malacasucanta tuchi ixtalhichivinin ju yuʼunch. Malacasucanta ni jantu apulaktsʼin ju Dios ju lapanacni ni salaka ixʼalhunutʼan va ixlacaʼatalh ni muctaxtucan tachi ju najun laʼixlhamapʼaksin. 22 Para ju chavai ju Dios alaktsʼin ju lapanacni ni na salaka ju ixʼalhunutʼan acsni talhilacaʼan ju Jesucristo. Chunch alaktsʼinkʼocan tachi chun ju talhilacaʼanta ju yuchi mas va tichi cavalhch u quintʼaʼisraelita u jantu. Chunch navi ju Dios ni vaklhtam chun alaktsʼin ju lapanacni ju yuchi. 23 Chux ju quijnanʼan ju lapanacni juntau alactuʼununtauch. Jantu xamatiʼ ju vasalh soknicʼa cava tachi ju lhcatach ju Dios. 24 Para ju Dios quintanavinitan lamapainin ni soknicʼa quintalaktsʼinan acsni lhilacaʼanauch ju Jesús. Chai jantu tuʼuʼ quintasqʼuiniyan ju ixtapalh cava ju anuʼ amapaininti. Salaka alaktsʼincantach ju quiʼalhunutʼan va ixlacata ju Jesucristo ni yuchi ju quintamalakxtutan. 25 Pus ju Dios yuchi lhimalakachachilh ju Jesús ni caʼalhimalakxtuyaʼ ju lapanacni laʼixʼacʼalhni. Chai ni lhilacaʼanauch ju Cristo ni taxtulh ju ixʼacʼalhni ju quilacataʼan pus ju Dios jantu aquintamamakʼalhkʼajniyan ixtapalh quiʼalactuʼuntiʼan ni mapalhkʼotach ju Jesús. Chai ju chunch vachuʼ putasui ni soknicʼa navi ju Dios mas ixchʼixkʼojui ju ixʼalactuʼuntiʼan ju makʼaniya lapanacni. Chunch ju lalh ni iscʼatsai ni astan caniyaʼ ju Cristo ixlacata ixʼalactuʼuntiʼan ju makʼaniya lapanacni vachuʼ. 26 Chai vachuʼ chunch ju punavita ju Dios ni laich camalacasuyaʼ ni na sok ju navi ju yuchi ixlacata ju alactuʼunti ju navican ju chavai avilhchan. Chai vachuʼ caputasuyach ni sok navi ju Dios acsni ajuncan ju alactuʼuni lapanacni ni salaka ixʼalhunutʼan acsni talhilacaʼan ju Jesús. Lai chunch ajuni ni yuchi ju mapalalh ixtapalh ixʼalactuʼuntiʼan. 27 Chai ni chunch quintaʼulhtuyan ju Dios pus jantu lai xamatiʼ catilhitakʼaya ni navita ju tuʼuʼ kʼox. Jantu lai chun caticʼatsa ni jantu lai aquintitalaktsʼin ju Dios ni salaka ju quiʼalhunutʼan mas lai cava canaviu tachi ju najun laʼixlhamapʼaksin ju yuchi. Va acsnich ju laich aquintalaktsʼinan ni salaka ju quiʼalhunutʼan acsni calhilacaʼanau ju Jesús. 28 Pus lana tasui ni alaktsʼin ju lapanacni ni salaka ixʼalhunutʼan acsni tamaklacaʼani ju Jesús. Jantu ixlhiyuchi ni lai cava catamuctaxtulhch tachi ju najun laʼixlhamapʼaksin ju Moisés. 29 Pus ju quijnanʼan ju israelitanin juntau jantu lai catinaju ni va quiDios quiʼakstuʼan junita ni vachuʼ isDiosʼan ju jantu israelitanin tajunita. 30 Ju Dios isDiosʼan junita tachi chun ju lapanacni ni va pumatam ju Dios. Chai ju yuchi alaktsʼin ni salaka ixʼalhunutʼan ju lapanacni ju talhilacaʼanta ju Cristo mas quintʼaʼisraelitanin u jantu quintʼaʼisraelitanin catava. 31 Para mas lhitajuyau ju salaka quiʼatsucuntiʼan acsni lhilacaʼanauch ju Jesús para jantu nomputun ni jantu xtuʼuʼ ixtapalh navican ju ixlhamapʼaksin Dios. Alai va acsni ju lai quiclacaʼiyau ju ixlhamapʼaksin Dios acsni lhilacaʼanau ju Cristo.
1 Pus tas anonaʼitʼit ju uxijnan. Ju makʼaniya quimpaiʼan Abraham ja ixlacata tuʼuʼ kʼox ju navilhch ju punaulh ju Dios ni salaka ixjunita ju ixʼalhunut. 2 Pus ni va ixlacata cava ju tuchi ixnavich ju Abraham ju punaulich ju Dios ni salaka ixjunita ju ixʼalhunut pus ca laich ixlhitakʼayalh laʼixmacni ju ixtʼaʼlapanacni. Para jantu lai ixtilhitakʼaya ju laʼixmacni Dios ixlacatach tuchi laich xanavi. 3 Aktsʼiya chunch ixjunita laʼisʼatsucunti tachi ju najun laʼixchivinti Dios ju tsʼokcanta. Pus chani najun: “Ju Abraham ma quiclacaʼilh ju Dios chai ma ixlhiyuchach lhilaktsʼincalh ju Abraham ni salaka ixjunita ju ixʼalhunut”. Chunch najun laʼixchivinti Dios. 4 Pus ju laquiʼatsucuntiʼan jantu lai actinaulh ni va lhikʼailaktsʼincan ju ixtalhaja ju tam lapanac ju quichʼalhcatnalh. Alai va lhiʼanican ni quichʼalhcatnantach. 5 Para jantu lai tapʼastu actijunilh ju Dios ni na salakach aquilaktsʼilh ni acnavilh ju tuʼuʼ ju kʼox. Ju yuchi va lacaʼamapaininti laktsʼin ixʼalhunut ju tam lapanac ni salaka acsni lhilacaʼanta ju Cristo. Chai ni chunch lai ju Dios pus ju yuchi lai laktsʼin tam lapanac ni salaka ixʼalhunut mas lana jantu ixtalhoni ju Dios ju pʼulhnan. 6 Chunch ju ixnomputun ju makʼaniya lapanac ju David ixjuncan acsni naulh ni na kʼachan tam lapanac acsni laktsʼin ju Dios ni salaka ju ixʼalhunut. Para jantu va ixlacata ju tuchi navitach. 7 Ju David chani ixnajun: Ma na takʼachanch ju lapanacni ju amacʼacxanicanta ixtalakʼalhinʼan chai xacanicanta ju ixʼalactuʼuntiʼan. 8 Ma na kʼachanch tam lapanac ju jantuch ulani ixtalakʼalhin ju quiʼucxtinʼan Dios. Chunch ju naulh ju David. 9 Pus ju ani kʼachat quilacataʼan quinchuxʼan junita mas israelitanin juntau chai vachuʼ ixlacataʼan ju yuʼunch ju jantu israelitanin tajunita. Pus iclajuntau ni Dios laktsʼilh ju Abraham ni salaka ixʼalhunut acsni lhilacaʼalh ju yuchi. 10 Para anavitʼit cuenta tavananch ju laktsʼilh ju Abraham ju Dios ni salaka ixʼalhunut. Pus ixlhilaktsʼincantach ni salaka ixʼalhunut mas tucaʼ ixchʼucʼucanta. 11 Ju Abraham pʼulhnan lhilacaʼalh ju Dios chai astan chʼucʼunicalh ju ixʼaxtʼakʼa. Chai acsni chʼucʼucalh pus ixpumispacanch va ni salaka ixjunita ju ixʼalhunut laʼixmacni Dios va ixlacaʼatalh ni lhilacaʼalh ju Dios mas tucaʼ ixchʼucʼucanta. Pus vana va chun tachi chun ju uxijnan ju vachuʼ lhilacʼapʼinatʼit ju Cristo ju jantu israelitanin untʼatʼit. Ju Dios vachuʼ talaktsʼinan ni salaka ju miʼalhunutʼan chai ixlhiyuchi lai laktsʼinatʼit ju Abraham tachi ju va mimpaichʼan mas jantu chʼucʼucʼantʼatʼit ju uxijnan. 12 Vachuʼ xapaich lhitalacxtulh ju Abraham tachi chun ju quijnanʼan ju chʼucʼucantauch. Para jantu va yuchi ni calacchʼucʼucauch. Para vachuʼ ni maklacaʼaniu ju Dios tachi ju lalhch ju makʼaniya quimpaiʼan Abraham acsni tucaʼ ixchʼucʼucanta. 13 Pus ju Dios ajunilh ju Abraham chai ju isʼaskʼatʼan ni ixʼanuchʼan cajunaʼ ju ani lacamunutpaʼ. Para jantiyuʼ apujunicalh chunch va ixlacaʼatalh ni tamuctaxtulh tachi ju najun laʼixlhamapʼaksin yuchi. Alai va apujunicalh chunch ni taquiclacaʼilh ju yuchi. Chai ixlhiyuchi ju Dios alaktsʼilh ni salaka ju ixʼalhunutʼan. 14 Pus ni yuʼunch cava ju ixtaʼamaklhtayanalh ju ani lacamunutpaʼ ju ixtamuctaxtuta tachi ju najun laʼixlhamapʼaksin Moisés pus jantu tuʼuʼ ixtapalh ixva ni lhilacaʼanau ju Dios. Chai jantu tuʼuʼ ixtapalh ixva ju tuchi ixnajuntach ju Dios. 15 Acsni icnajun ni laich quilaktsʼin ju Dios ni salaka ju quiʼalhunut va ixlacaʼatalh ni acmuctaxtulh tachi ju najun laʼixlhamapʼaksin pus alai va icpulhitajui quimakʼalhkʼajnat ni va iclakʼalhi. Pus va acsnich ju lai acjunicalh ni jantu iclakʼalhita ju tuʼuʼ lhamapʼaksin acsni va matich cava ju lhamapʼaksin. 16 Ju Dios junilh ju Abraham ni caxtakniyaʼ ju lacamunutpaʼ va ixlacata ni quiclacaʼinilh ju ixchivinti. Ju chunch va lamapainin ju xanavi. Chai ni va lamapainin ju xanavi pus yuchi lhicʼatsacan ni ixlacataʼan junita tachi chun ju isʼaskʼatʼan ju Abraham tuchi naulh ju Dios. Chai jantu va yuʼunch ju talhilaksi ju ixlhamapʼaksin ju ajunilh chunch ju Dios. Para vachuʼ ju uxijnan ju qʼuiclacʼaʼitʼatʼit ju Dios tachi ju lalh ju Abraham. Pus ju chunch ju Abraham xapai lhixajcha tachi chun ju quijnanʼan ju lhilacaʼantauch ju Dios. 17 Chai ju Dios chunch ju xalaktsʼin ju Abraham tachi ju atsʼoknuncanta laʼixchivinti Dios junta chani juncan ju Abraham: “Uxintʼi ju iclhilhcatan ni unaʼ xapai na lhu lapanacni”. Chunch najun laʼixchivinti Dios. Chai ju Abraham quiclacaʼilh ju Dios. Pus ju Dios lai axtaknichokoi ju isʼatsucuntiʼan ju lapanacni mas tanitach. Chai ju yuchi lhichivininch ju taxtokni ju jantucaʼ tapasai tachi ju va uctaxtutach. 18 Pus ju Abraham aktsʼiya ixlacaʼi mas istasui tachi ju va jantu lai catimuctaxtunicalh. Ju yuchi lacaʼilh ni cajunaʼ xapai na lhu lapanacni tachi ju junilh ju Dios acsni tavanan junilh ni na lhu cajunaʼ ju ixʼapapanatnich. 19 Ju Abraham va tachi lhilaksilh ixchivinti Dios ju ixjunita mas iscʼatsai ni lana jantu lai catiʼalilh ju isʼaskʼatʼaʼan ju va laʼisʼakstuʼan ixtʼiyunʼan. Ju yuchi ju Abraham ixpacxanta tachi tam cientos cʼata chai ju ixʼamachakaʼ ju Sara ixjuncan lana jantu lai ixʼalin ju isʼaskʼatʼa. 20 Nin yuchi ni lai tam canaulh ju Abraham ixlacata ju tuchi ixjunita ju Dios. Va palai pʼas lhilacaʼalh ju Dios. Ixnajunch ni yuchi ju xakʼai ju Dios. 21 Ixlhichux ixʼalhunut ixlacaʼi ni laich canavi ju tuchi ixkʼalhtasunitach ju Dios. 22 Chai ju Dios ni cʼatsalh ni na ixlacaʼinich ju Abraham pus yuchi lhilaktsʼilh ju Dios ni salaka ixjunita ju ixʼalhunut. 23 Para jantu va ixlacata isʼakstu ju Abraham ju chunch lhitsʼokcanta laʼixchivinti Dios junta chani najun: “Ju Abraham lhilacaʼalh ju Dios. Yuchi lhilaktsʼincalh ni salaka ixʼalhunut”. Chunch ju najun laʼixchivinti Dios. 24 Para ju ani vachuʼ tsʼokcanta ju quilacataʼan. Vachuʼ calaktsʼincanau ni salaka ju quiʼalhunutʼan ni lhilacaʼanauch ju Dios ju macxtuchokolh ju quiʼucxtinʼan Jesús junta ixmacnucanta. 25 Ju Jesús tamakʼaxtakli laʼixʼaninti ixlacata ju quiʼalactuʼuntiʼan. Chai mas nilh macxtuchokocalh junta ixmacnucanta. Pus ixlhiyuchach vachuʼ aquintalaktsʼinan ju Dios ni salaka juntau ni lhilacaʼanau ju Cristo.
1 Ju Dios quintalaktsʼinan ju chavai ni salaka juntau ju laquiʼalhunutʼan ni lhilacaʼantauch ju Cristo. Ju chavai matich ixtalhkʼamti ju Dios ju quilacataʼan va ixlacata ni nilhch ju quilacataʼan ju quiʼucxtinʼan Jesucristo. 2 Chai ju Dios quintanavinin lamapainin va ixlacata ju Cristo acsni quintalaktsʼinan ni salaka junita ju quiʼalhunutʼan. Pus chunch ju quintalaktsʼinan acsni lhilacaʼanauch ju Cristo. Chai va tachi aquintanaviniyanch ju ani lamapainin. Chai lhilackʼachanauch ni cʼatsayauch ni cachaʼanau ju anch junta vilhcha ju Dios junta slivasalh cʼus junita. 3 Chai jantu va yuʼ ju anuʼ ju lhikʼachanau. Para vachuʼ kʼachanau mas makʼalhkʼajnanauch ju ani. Cʼatsayauch ni anchach puʼalin ju quintachaputʼan ni lai chʼixau va tuchi camilh ju laquiʼatsucuntiʼan. 4 Chai acsni palai lai chʼixau mas va tuchi tapasai laquiʼatsucuntiʼan pus tasui ni vasalh ixlhichux quiʼalhunutʼan ju lhilacaʼanau ju Dios. Chai ni tasui laquiʼatsucuntiʼan ni vasalh lhilacaʼanau ju Dios pus palai pʼas lhilacaʼanau ju Dios ni vasalh cachaʼanau ju lactʼiyan. 5 Chai ni lhilaksiyau ju Dios ni aktsʼiya aquintamuctaxtuniyan ju ixchivinti acsni quintajunan ni cachaʼanau ju lactʼiyan pus cʼatsayau ni jantu aquintamamaxaniyan astan. Chai ni quintamapainiyan ju Dios pus pucʼatsayau ni aktsʼiya aquintamuctaxtuniyan ju ixchivinti. Chai ju Dios quintamalakachanitachan ju Spiritu Santu ju tʼajun laquiʼalhunutʼan chai yuchi ju quintajunan ni na quintamapainiyan ju Dios. 6 Acsni jantu lai ixʼaktaijucanau ju va quiʼakstuʼan chai jantucaʼ ixtalhoniyau ju Dios pus nilh ju Cristo ju quilacataʼan. Nilh acsni chilh ju ixʼavilhchan ju ilhcanitach ju Dios. 7 Mas matiʼ cava ixtalakʼalhin ju tam lapanac ju yocanta junta camaknicanach na lhixcai ni caʼalilh tam xamatiʼ ju caniputulh ixlacata yuchi. Ca laich cava ni caʼalilh pumatam ju laich caniputulh ixlacata apumatam va ixlacata ni na kʼoxich lapanac laktsʼin ju tam ixʼamigo. 8 Para ju Dios quintamasuninch ni na quintamapainiyan ni malakachachilh ju Jesús ju quinichilh ju quilacataʼan mas alactuʼunin ixjuntaucaʼ. 9 Para ju chavai laktsʼincantauch ni salaka junita ju quiʼalhunutʼan va ixlacaʼatalh ni quinichilh ju Cristo. Chai cʼatsayau ni jantuch aquintamamakʼalhkʼajniyan ju Dios ixlacata ju quiʼalactuʼuntiʼan. 10 Acsni tavanan ixtʼalaxcayau ju Dios pus yuchi ju quintapunavichokon ixʼamigojni acsni nilh ju istsʼalh ju lacacurus. Chai ni quintamalakʼavichokon ju Dios laʼixʼaninti ju istsʼalh pus istavasalanti lai cʼatsayau ni catakʼalhtaxtuyauch va ixlacaʼatalh ni taʼacxtuchokolh ju Cristo junta ixmacnucanta chai tʼajunch ju chavai. 11 Chai jantu va yuchi ni aquintamakʼalhtaxtuyan. Para vachuʼ lhikʼachanauch ju Dios ixlacata ju quiʼucxtinʼan Jesucristo ni laʼixlacata yuchi ju xaquintanavichokoyan lhiʼamigo ju Dios. 12 Pus ixlacata va pumatam lapanac ju putasuta ju alactuʼunti ju ani lacamunutpaʼ. Yuchi ju ixjuncan Adán. Chai ixlacata ni alactuʼunulh ju yuchi chai ni ixʼapapanatnich juntau pus yuchi lhiniyau ju chavai. Niyau ni vachuʼ alactuʼunin lhixajchau ju quijnanʼan. 13 Pus mas tucaʼ ixmatsʼokʼulanican ju lhamapʼaksin ju Moisés para aktsʼiya ixtaʼalactuʼununch ju lapanacni ju ani lacamunutpaʼ. Para jantucaʼ ixʼalaktsʼin ju lapanacni ni alactuʼunin ixtajunita ni va jantucaʼ ixmatsʼokʼulanican ju Moisés ju lhamapʼaksin junta naulh tuchi ixtalakxtuch ju alactuʼunti. 14 Para mas jantucaʼ istsʼokʼulacanta ju ixlhamapʼaksin Dios para aktsʼiya tani tachi chun ju lapanacni ju ixtatʼajun tus acsni ixtʼajun ju Adán tus acsni ixtʼajun ju Moisés. Yuchi talhini ni va taʼalactuʼunulh mas jantu tucan chun talalh tachi ju lalhch ju Adán. Pus va ixlacata ni alactuʼunulh ju Adán si alactuʼunin juntau ju chavai. Para va ixlacata ni quinichilh ju Cristo yuchi lai quintalhilaktsʼinan ju Dios ni salaka junita ju quiʼalhunutʼan. 15 Na kʼai ju lhakʼailaktsʼin ju quintaxtaknitan ju Dios. Jantu chun tachi ju alactuʼunti ju quintamacontilanitan ju Adán. Pus va ixlacata ni alactuʼunulh pumatam jokʼat ju Adán ixjuncan yuchi na lhu talhini ju chavai. Para palai na lhu ju ixʼamapaininti ju Dios ju navilh lhichux. Pus quintalhikʼailaktsʼin ju sastʼi quiʼatsucuntiʼan ju Dios va ixlacata ju lamapainin ju quintanavinitan pumatam jokʼat. Yuchi ju Jesucristo. 16 Ju lhakʼailaktsʼin ju quintaxtaknitan ju Dios jantu ixtʼachunch lai cativa tachi ju alactuʼunti ju quintamacontilanitanch ju pumatam lapanac ju Adán ixjuncan. Ju Adán navilh lakatam alactuʼunti chai yuchi alhimucʼanikʼocantau ju quintalakʼalhinʼan tachi chun ju quijnanʼan. Para ju Dios quintanavinin lamapainin chai quintalaktsʼin ni salaka ju quiʼalhunutʼan mas lhu alactuʼunti ju xanaviyau. Chai chunch quintalaktsʼinan va yuchi ni lhilaksiyauch ju Jesucristo. 17 Pus va ixlacata ni alactuʼunulh pumatam ju Adán ixjuncan yuchi lhinican ju chavai. Para va ixlacata apumatam ju Jesucristo juncan yuchi lai quintalhinaviniyan kʼai lamapainin ju Dios acsni quintalaktsʼinanch ni salaka ju quiʼalhunutʼan va ixlacaʼatalh ni lhilaksiyauch ju Jesucristo. Chai tachi chun ju quijnanʼan ju amaklhtayanantauch ju anuʼ lamapainin ju quintanavinitan ju Dios pus catsucutachau ju lactʼiyan chai catʼataʼucxtinitachau ju Cristo. 18 Pus ju Adán alactuʼunulh. Chai ixlhiyuchi mucʼanikʼocantauch quintalakʼalhinʼan tachi chun ju quijnanʼan. Pus vana va chun ju ani. Ju Cristo navi ju stavasalanti. Chai yuchi lai quintalhilaktsʼinan ni salaka ju quiʼalhunutʼan tachi chun ju quijnanʼan. Chai yuchi lhiʼalinch ju quiʼatsucuntiʼan ju conkʼalhiyanta ju lactʼiyan. 19 Ju Adán jantu lai lacaʼi. Chai ixlacata ni va jantuch lai lacaʼi ju yuchi pus si alactuʼunin juntau ni ixʼapapanatnich juntau. Chai ju Cristo lacaʼi. Chai ixlhiyuchach na lhu caʼalhilaktsʼincanaʼ ni salaka junita ju ixʼalhunutʼan laʼixmacni Dios. 20 Pus ju Dios lhinaulh istsʼokʼulaca ju lhamapʼaksin chai ju acsnich palai lhu tasu ju alactuʼunti ni ixtalakʼalhi ju lhamapʼaksin ju lapanacni. Para acsni tavanan na lhu tasu ju alactuʼunti pus acsnich ju palai lhu quintanavinin lamapainin ju Dios ni laich quintamacʼacxanin va ixlacata ni quinichilh ju Cristo. 21 Pus jantu lai tsucukʼalhican va ixlacaʼatalh ni alactuʼunulh ju Adán. Para vachuʼ va ixlacata ju kʼai lamapainin ju quintanavinitan ju Dios quintapulaktsʼinan ju Dios ni salaka ju quiʼalhunutʼan. Chai ju chunch puʼalinch ju quiʼatsucuntiʼan ju conkʼalhiyanta ju lactʼiyan ni lhilacaʼanauch ju quiʼucxtinʼan Jesucristo.
1 Pus tas anonaʼitʼit ju chavai. Ja lai catailhiʼanau ju alactuʼunti ni chach palai paklhu quintanaviniyan lamapainin ju Dios ni aquintamacʼacxaniyanch ju quintalakʼalhinʼan ju va tachi naviyau. 2 Ca jantu tavanan. Ju quijnanʼan ni lhilacaʼantauch ju Cristo pus tachi ju va nitauch quintalhilhcatan ju Dios. Pus jantu lai vana va quiʼalactuʼuntiʼan canaviyau cuenta. 3 Ja va jantu cʼatsʼayatʼit ni chani ju nomputun ju akpaxat. Pus acsni akpaxtauch va nomputun ni va lakatam tʼajuntauch ju Cristo. Chai nomputun ni cʼatsayau ni tachi ju va nitauch quintalhilhcatan ju Dios acsni tavanan nilh ju Cristo. 4 Pus acsni akpaxtauch va nomputun ni macontauch ju makʼaniya quiʼatsucuntiʼan tachi ju ixlayau acsni tucaʼ ixlhilacaʼanauch ju Cristo. Chunch tachi ju Cristo ni macaulh ju ixlacatuna ju va lhilapanac acsni nilh chai macnucalh. Pus ju yuchi macxtuchokocalh lacakʼai ixtachaput ju Dios junta ixmacnucanta. Pus vana va chun ju quijnanʼan. Acsni akpaxtauch va nomputun ni sastʼi catasuyaʼ ju quiʼatsucuntiʼan. 5 Chai ni va lakatam tʼajuntauch ju Cristo pus tachi ju va nitauch quintalhilhcatan ju Dios acsni tavanan nilh ju yuchi. Pus vachuʼ alin ju sastʼi quiʼatsucuntiʼan tachi ju yuchi ni alilh ju sastʼi ixlacatuna acsni tavanan taʼacxtuchokolh laʼixʼaninti. 6 Cʼatsayauch ju ani. Acsni tavanan xtujcalh ju Cristo ju lacacurus pus tachi ju va nitauch ju quijnanʼan quintalhilhcatan ju Dios. Pus ju chunch jantu vana na tachapun jun ju makʼaniya quiʼatsucuntiʼan ni laich va tachi caʼalactuʼununau. Jantuch lai vana quintamanaviniyan ju macxcai ju makʼaniya quiʼatsucuntiʼan. 7 Tachi ju tam lapanac ni nitach pus jantuch vana alactuʼunun. Pus vana va chun ju quijnanʼan. Jantuch lai catitailhiʼau ju quiʼalactuʼuntiʼan. 8 Pus ni tachi ju va nitauch quintalhilhcatan ju Dios acsni tavanan xtujcalh ju Cristo ju lacacurus pus lacaʼiyauch ni vachuʼ alin ju sastʼi quiʼatsucuntiʼan tachi ju yuchi ni alilh ju sastʼi ixlacatuna acsni taʼacxtuchokolh laʼixʼaninti. 9 Ju Cristo taʼacxtuchokolh acsni ixmacnucanta chai cʼatsayau ni jantuch catinichokolh ju yuchi. 10 Pus ju Cristo ni quinichilh ixlacata ju quiʼalactuʼuntiʼan quinchuxʼan pus jantu aktam catinichokolh. Chai ju chavai tʼajun ju Cristo chai navinitʼajun ju ixkʼachat ju Dios tachi ju aktsʼiya ixlaich. 11 Pus chunchach vachuʼ ju chavai ju quijnanʼan. Acʼatsʼatʼit ni tachi ju va nimakʼantau ixlacata ju alactuʼunti. Chai ju chavai catsucuyau tachi ju kʼachani ju Dios ni va lakatam tʼajuntau ju quiʼucxtinʼan Cristo Jesús. 12 Chai ni chunch untʼatʼit pus jantu anavinitʼit ju macxcai ixkʼachat ju milacatunaʼan ju caniyaʼ. Jantu alacʼasqʼuinitʼit ni catamanaviniyan macxcai ju miʼatalacpastʼacʼatʼan. 13 Jantu alacʼasqʼuinitʼit ni canavilh tuʼuʼ alactuʼunti ju milacatunaʼan. Alai amakʼaxtʼaknitʼit ju Dios ju miʼatsucuntiʼan. Chunch ju alatʼit ni tamapaxanitan ju makʼaniya miʼatsucuntiʼan chai xtʼaknichʼokʼocʼantʼatʼit ju sastʼi miʼatsucuntiʼan. Pus amakʼaxtʼaknitʼit ju Dios ju miʼatsucuntiʼan ni laich amalacʼasutʼit ju tuʼuʼ kʼox. 14 Acsni ixlhilacʼapʼinatʼit ju lhamapʼaksin pus na lhu alactuʼunti ju ixnaviyatʼit ni jantu lai ixmuctʼaxtʼuyatʼit. Para ju chavai ju Dios tanavinitan lamapainin acsni taxtaknitan ju sastʼi miʼatsucuntiʼan. Chai ju chavai jantu lai catamanaviniyan macxcai ju alactuʼunti ju alin lamiʼalhunutʼan. 15 Pus tas alayaʼitʼit. Ja vanach alactʼuʼununtsʼucʼuyaʼitʼit va ixlacata ni tamacʼacxanitan ju Dios va laʼixʼamapaininti chai jantuch vana lhilacʼapʼinatʼit ju lhamapʼaksin. Jantu tavanan. 16 Ju uxijnan cʼatsʼayatʼit ni ixlapanacni untʼatʼit va tichi chavaich ju sacxtʼutʼatʼit ni miʼucxtinʼan cajunaʼ. Pus vana va chun ju ani. Ni va yuchi ju icnavi cuenta ju alactuʼunti pus tachi ju va quiʼucxtin icnavita ju alactuʼunti chai acxtaknicanaʼ ju quimakʼalhkʼajnat junta conkʼalhiyanta. Para ni va yuchach ju canaviyau cuenta ju ixnavica ju ixkʼachat ju Dios pus quiʼucxtinʼan navitauch ju Dios chai salaka cajunaʼ ju quiʼalhunutʼan. 17 Pus ju pʼulhnan aktsʼiya va yuchi ju ixnaviyatʼit cuenta ju miʼalactuʼuntiʼan. Para icxtakni lakʼailaktsʼiuch ju Dios ni qʼuiclacʼaʼiyatʼit ju chavai ixlhichux miʼalhunutʼan ju ixchivinti Dios ju masunicʼantʼatʼit. 18 Chai ju chavai jantu va yuʼ ju naviyatʼit cuenta ju alactuʼunti. Para ju chavai yuchach ju naviyatʼit cuenta ju soknicʼa. 19 Pus chani aclajunau. Tsʼa ma palai lai amachʼakxayaʼitʼit ju tuchi iclajumputunau. Pus ju chavai taʼalin ju lapanacni ju talhinajun. Chai taʼalin ju lapanacni ju va alhijuncan. Pus ju pʼulhnan ju uxijnan miʼakstuʼan ixlhinonatʼit lamiʼatsucuntiʼan chai ixnaviyatʼit tachi chun ju macxcai ju ixnavipʼutʼunatʼit. Chai palai palai lhu alactuʼunti ju ixnaviyatʼit. Pus ju chavai alakʼaʼitʼit ni Dios ju calhinaulh lamiʼatsucuntiʼan ni laich anaviyaʼitʼit ju soknicʼa. Chai ju chunch slivasalh ni ixlapanacni Dios aʼunaʼitʼit. 20 Ju uxijnan acsni miʼakstuʼan ixlhinonatʼitcaʼ lamiʼatsucuntiʼan chai ixnaviyatʼit ju macxcai pus jantu ixnaviyatʼit ju soknicʼa. 21 Para jantu lai xapʼulhaʼayatʼit ju kʼox atsucunti acsni ixnaviyatʼit ju anuʼ taxtokni ju tuchʼi tʼamaxananatʼit ju chavai. Pus ju tanavich ju chunch va catamakʼalhkʼajnankʼalhiyaʼ. 22 Para ju uxijnan taʼaktaijutan ju Dios ni jantu vana va chun ju alactʼuʼununatʼit. Chai ju chavai Dios ju navitʼatʼit miʼucxtinʼan. Chai ni Dios ju navitʼatʼit miʼucxtinʼan pus yuchach ju lhinonkʼojui lamiʼatsucuntiʼan. Chai ju laʼixʼaclantich atʼanuyaʼitʼitch junta conkʼalhiyanta ju miʼatsucuntiʼan ju lactʼiyan. 23 Ju ixlhimapalhcan ju alactuʼunti yuchi ni ancan junta jonkʼalhita makʼalhkʼajnat. Para ju ixlhakʼailaktsʼinch ju Dios yuchi ni alinch ju quiʼatsucuntiʼan ju conkʼalhiyanta ju lactʼiyan va ixlacata ni va lakatam tʼajuntau ju quiʼucxtinʼan Jesucristo.
1 Iclaxakʼalayau ju uxijnan ju mispʼayatʼit ju lhamapʼaksin. Ja va jantu machʼakxayatʼit ji quiʼalakʼavin. Ju tam lapanac va acsnich ju lai mucʼanican ixtalakʼalhin acsni titʼajuncaʼ. 2 Tachi ju tam chakoʼulh ju alin ju ixpapa. Ju lacalhamapʼaksin najun ni catʼatsuculh ju ixpapa acsni titʼajuncaʼ. Para acsni caniyach ju ixpapa pus ju lhamapʼaksin jantu lai catiʼulanilh ixtalakʼalhin ju anuʼ chakoʼulh mas catamakʼaxtokchokolh. 3 Para acsni tʼajuncaʼ ju ixpapa ni va catʼatsuculh apumatam pus calhimispacanach ni alactuʼunuʼ. Para ni nitach ju ixpapa pus ju lhamapʼaksin jantu lai catiʼulanilh ixtalakʼalhin mas catamakʼaxtokchokolh. 4 Pus vana va chun ju quijnanʼan ji quiʼalakʼavin. Ju makʼanchich ju quijnanʼan ixlhilaksiyau ju lhamapʼaksin ni ixnonau ni anchach ju caʼixlhitajuyau ju salaka quiʼatsucuntiʼan. Para acsni tavanan nilh ju Cristo pus ju Dios lhilhcata ni tachi ju va nilh ju makʼaniya quiʼatsucuntiʼan ju na ixkʼachani ju alactuʼunti acsni tucaʼ ismispayau ju Cristo. Pus ju chavai jantuch vana yuʼ ju lhamapʼaksin ju lhilaksiyau. Chai ni lhilhcata ju Dios ni tachi ju va nilh ju makʼaniya quiʼatsucuntiʼan pus laich cajunau ixʼanuʼ ju Cristo ju taʼacxtuchokolh acsni ixmacnucanta. Pus chunch ju ulhtucantauch ni laich canaviyau ju soknicʼa tachi ju kʼachani ju Dios. 5 Acsni tucaʼ ixlhilacaʼanau ju Cristo pus na lhu ixnaviyau ju alactuʼunti. Chai ni ismispayauch ta yu najunch lacalhamapʼaksin pus va apalai ixnaviputunau ju jantu kʼox. Pus ju chunch va puʼalin ju makʼalhkʼajnat junta jonkʼalhita. 6 Para ju chavai jantu lai vana quintamapastʼacʼaniyan ixnavica macxcai ju lhamapʼaksin. Icpunajun chunch ni lhilhcata ju Dios ni tachi ju va nitach ju makʼaniya quiʼatsucuntiʼan. Chai ju chavai lai naviniyau ixkʼachat ju Dios laʼixtachaput ju Spiritu Santu. Jantu va yuchi ni anicʼa acnavi tachi ju tsʼokcanta lakatuʼuʼ lhamapʼaksin. 7 Tʼas anonaʼitʼit ju chavai. Ja va anonaʼitʼit ni jantu kʼox ju lhamapʼaksin. Ca jantu lai actinaulh ju chunch. Pus ni va matiʼ caʼixva ju lhamapʼaksin pus ju quitʼin jantu xacticʼatsa ni va icʼalactuʼunuʼ. Jantu xaccʼatsa ni xacʼalactuʼunun acsni xaclhacchaʼan tuʼuʼ ni jantu cava xaquijunilh ju lhamapʼaksin ni jantu aclhacchaʼanilh tuʼuʼ. 8 Acsni icmispalh ju lhamapʼaksin pus tachi ju va quimapastʼacʼani ju alactuʼunti. Tachi ju va quijuni ju makʼaniya quiʼatalacpastʼacʼat ni acnavi ju jantu kʼox acsni quimapastʼacʼanilh ni acʼalhacchaʼanalh. Pus acsni matiʼ ju lhamapʼaksin pus jantuch na chun aquijunilh ju makʼaniya quiʼatalacpastʼacʼat ni acʼalactuʼunulh. 9 Ju makʼanchich acsni tucaʼ xacmispata ju kʼox lhamapʼaksin pus va lhikʼach xactʼajun. Para acsni icmispalhch ju kʼox lhamapʼaksin va apalai xacʼalactuʼunumputun. Chai ju Dios quimucʼanilh ju quiʼaninti ni va iclakʼalhilh ju ixlhamapʼaksin. 10 Pus xacnajun ni xacxtaknicalh ju quiʼatsucunti jonkʼalhita ni xacmuctaxtulh tachi ju najun lacamakʼaniya ixlhamapʼaksin Dios. Para alai anch icpulhitajulh ju quiʼaninti ni iclakʼalhi. 11 Pus ju makʼaniya quiʼatalacpastʼacʼat va icputaʼokxchokʼolh ju laʼixlhamapʼaksin Dios. Pus acsni icmispalh ju ixlhamapʼaksin Dios pus tachi ju va quimapastʼacʼani ju alactuʼunti chai icmucʼanicalh ju quiʼaninti acsni iclakʼalhilh. 12 Pus ju makʼaniya lhamapʼaksin slivasalh ni ixʼanuʼ Dios. Chai tachi chun ju najun lacalhamapʼaksin si ixchivinti Dios chai soknicʼa chai si na kʼox. 13 Para ju anich kʼoxi lhamapʼaksin jantu lai actinaulh ni yuchi ju puʼalinch ju quiʼaninti. Alai icmucʼanicalh ju quiʼaninti ni icʼalactuʼunulh. Chai lacakʼoxi lhamapʼaksin tasui ni vasalh alactuʼunti ju xacnavi. Pus ju ixlhamapʼaksin Dios slivasalh na kʼox. Chai ni iclakʼalhilh pus tasui ni slivasalh na macxcai ju xacnavi. 14 Cʼatsayauch ni isʼakstu ju Spiritu Santu ju xtaklh ju makʼaniya ixlhamapʼaksin Dios. Para ju quitʼin va iclapanac chai slivasalh na tachapun ju alactuʼunti ju alin laquiʼalhunut. 15 Jantu icmachakxai ta yu junita ju quiʼatsucunti. Ju kʼox icnaviputun jantiyuʼ ju icnavi. Alai yuchi icnavi ju jantu kʼox iclhiulai. 16 Chai quitʼin quiʼakstu jantu ickʼachani ju tuchi icnavi. Pus yuchi iclhimachakxai ni aktsʼiya kʼox ju najun laʼixlhamapʼaksin Dios. 17 Para jantiyuʼ ju sastʼi quiʼatsucunti ju navi ju jantu kʼox iclhiulai. Yuchach ju makʼaniya quiʼatalacpastʼacʼat ju tʼajuncaʼ laquiʼalhunut ju navi ju chunch. 18 Iccʼatsai ni jantu lai navi tuʼuʼ ju kʼox ju makʼaniya quiʼatsucunti. Ju chunch va nomputun ni jantu lai icnavi tuʼuʼ ju kʼox ju va laquiʼakstu. Mas icnaviputun ju kʼox para matiʼ ju quintachaput ni lai acnavi. 19 Jantu lai va tsa icnavi ju kʼox mas icnaviputun. Va yuchi icnavi ju amacxcai ju jantu icnaviputun. 20 Para acsni icnavi ju jantu ickʼachani pus jantiyuʼ ju sastʼi quiʼatsucunti ju navi ju chunch. Para yuchi ju navich ju vanach makʼaniya quiʼatsucunti ju ictipastʼacʼa ju laquiʼalhunut. 21 Va tsa chani tapasai ju laquiʼatsucunti. Acsni icnaviputun ju kʼox pus lana quisastʼucʼa ju amacxcai. 22 Ju lacasastʼi quiʼatsucunti ickʼachani ju ixlhamapʼaksin Dios. 23 Para iccʼatsai ni alin atumpa ju quisastʼucʼa ju laquiʼatsucunti. Pus ju tuchi icnaviputun ju chavai ni quilasastʼinilh ju quiʼatalacpastʼacʼat ju Dios pus jantu lai icnavi. Pus na tachapun ju alactuʼunti ju alin laquiʼalhunut. 24 Painich ju quitʼin. Tis chavaich ju lai aquiʼaktaiju ni jantu acnavi ju alactuʼunti ju alin laquiʼalhunut ju puʼalin ju quiʼaninti junta jonkʼalhita quimakʼalhkʼajnat. 25 Icxtaknich lakʼailaktsʼiuch ju Dios ni laich aquiʼaktaijuyaʼ ju yuchi ni iclhilaksi ju quiʼucxtinʼan Jesucristo. Para ni jantu cava aquiʼaktaijulh ju Dios pus ju va laquiʼakstu chani ju catapasalh ju laquiʼatsucunti. Ju sastʼi quiʼatsucunti vasalh canaviputulh ju ixlhamapʼaksin ju Dios. Para ju makʼaniya quiʼatalacpastʼacʼat catinaviputulh ju macxcai. Para jantu catitapasalh ju chunch ni Dios ju quiʼaktaijui.
1 Ju chavai jantuch mucʼanicanta ixtalakʼalhinʼan ju va lakatam tatʼajunita ju Cristo Jesús chai ju jantuch vana ixkʼachat ju makʼaniya ixʼatalacpastʼacʼatʼan tanavi. Va yuchi ju tanavinich ixkʼachat ju Spiritu Santu. 2 Ni iclhilacaʼanta ju Cristo Jesús pus ju Spiritu Santu tʼajun laquiʼalhunut. Chai ju yuchi quixtaknita ju sastʼi quiʼatsucunti. Pus acsni lhinajun ju Spiritu Santu ju laquiʼalhunut pus jantu va yuchi ju icnavi cuenta ju quiʼalactuʼunti. Pus ni va yuchi ju xactailhiʼalh ju quiʼalactuʼunti pus ixʼalilh ju quiʼaninti junta jonkʼalhita makʼalhkʼajnat. 3 Ju makʼaniya ixlhamapʼaksin Dios jantu lai xaquintaxtakniyan ju soknicʼa quiʼatsucuntiʼan ni va jantu lai xamuctaxtuyau ni va lapanacni juntau. Para ju Dios quintaʼaktaijun. Ju yuchi malakachachilh ju istsʼalh. Quitalacasuchilh ju ani lacamunutpaʼ tachi ju tam lapanac. Chai ixpacxanta ixlacatuna tachi ixlacatuna ju alactuʼuni lapanac mas jantu alactuʼunulh ju yuchi. Yuchi ju mapalalh ixtapalh ju quiʼalactuʼuntiʼan. Chai ni quimapalachilh ju Cristo ixtapalh ju quiʼalactuʼuntiʼan pus jantu vana na tachapun jun ju alactuʼunti ju laquiʼatsucuntiʼan. 4 Chai ni taiʼinita ju ixtachaput ju alactuʼunti acsni nilh ju Cristo pus ju chavai lai naviyau ju soknicʼa tachi ju najun laʼixlhamapʼaksin Dios. Ju chavai jantu vana ixkʼachat quiʼalhunutʼan ju canaviyau. Para yuchach ju canaviyauch ju ixkʼachat ju Spiritu Santu. 5 Pus ju tanavi ixkʼachat isʼakstuʼan pus va yuchi ju tapastactʼajun ju ixkʼachat ju isʼatsucuntiʼan. Para ju tanavini ixkʼachat ju Spiritu Santu tapastactʼajun ju ixtaxtokni Dios. 6 Ni va yuchi ju capastʼacʼau ju quinkʼachat quiʼakstuʼan pus capuʼalinaʼ ju aninti junta makʼalhkʼajnankʼalhican. Para ni va yuchi ju capastʼacʼau ju ixkʼachat ju Spiritu Santu pus puʼalin ju sastʼi quiʼatsucuntiʼan chai jantu lacʼan ju quiʼalhunutʼan. 7 Pus ju tapastactʼajun ju ixkʼachat isʼakstuʼan pus ixtʼalaxcai Dios tajunita. Chai ju chunch talai jantu tamuctaxtuputun tachi ju najun laʼixlhamapʼaksin Dios nin caʼalilh ixtachaputʼan ni lai catamuctaxtulh. 8 Pus ju va tanavi ixkʼachat isʼakstuʼan pus jantu lai tanavi tuʼuʼ ju kʼox calhiula ju Dios. 9 Para ju uxijnan jantuch vana naviyatʼit ju va minkʼachatʼan miʼakstuʼan. Yuchi ju naviniyatʼit ju ixkʼachat ju Spiritu Santu ni vasalh tʼajun ju Spiritu Santu lamiʼalhunutʼan. Pus ni alin xamatiʼ ju jantucaʼ pacxanta ju Spiritu Santu ju malakachachilh ju Cristo pus ju yuchi jantucaʼ ixlapanac Cristo. 10 Pus mas caniyaʼ ju milacatunaʼan va ixlacaʼatalh ni alactuʼununau para ni tʼajun ju Cristo ju lamiʼalhunutʼan pus ju mintacuvinʼan catatsucukʼalhiyanta ju lactʼiyan ni talaktsʼinan ju Dios ni salaka junita ju miʼalhunutʼan. 11 Pus ju Dios macxtuchokolh ju Jesús acsni ixmacnucanta. Chai vana yuʼ ju catamacxtunichokoyan ju milacatunaʼan ju lai ni chai cataxtakniyan sastʼi milacatunaʼan. Pus laʼixtachaput ju Spiritu Santu ju capunaviyaʼ ju chunch. Chai chunch ju aʼulhtʼucʼanaʼitʼit tachi chun ju uxijnan ju pʼacxantʼatʼit ju Spiritu Santu lamiʼalhunutʼan. 12 Chai ni chunch ju aquintaʼulhtuyan ju Dios pus aktsʼiya jantu lhijun ni vana canaviyau ju makʼaniya quiʼatalacpastʼacʼatʼan. 13 Pus ni vanach atʼailhipʼinaʼitʼit ju makʼaniya miʼatalacpastʼacʼatʼan pus amakʼalhkʼajnankʼalhiyaʼitʼit. Para ni amakʼosuyaʼitʼit ju ixkʼachat ju makʼaniya miʼatsucuntiʼan laʼixtachaput ju Spiritu Santu pus ju chunch alinch ju miʼatsucuntiʼan ju lactʼiyan. 14 Chai tachi chun ju tanavitʼajun tuchi canonach ju Spiritu Santu pus yuʼunchach ju isʼaskʼatʼan Dios ju stavasalanti. 15 Chai ju Spiritu Santu ni tʼajun laquiʼalhunutʼan pus jantu tasqʼuini ni vana catalhoniyau ju quimakʼalhkʼajnatʼan ixlacata quiʼalactuʼuntiʼan. Para ju Spiritu Santu yuchi ju quintanaviyan isʼaskʼatʼan Dios. Chai ni pacxantau ju Spiritu Santu laquiʼalhunutʼan pus yuchi lhijunauch ju Dios ni quimpaiʼan. 16 Chai isʼakstu ju Spiritu Santu ju quintamamachakxaniyan laquintacʼatsanʼan ni isʼaskʼatʼan Dios juntau. 17 Chai ni isʼaskʼatʼan juntau pus vachuʼ caʼamaklhtayananauch ju kʼox atsucunti ju aquintaxtakniyan ju Dios. Catʼaʼamaklhtayananauch ju Cristo. Chai ni camakʼalhkʼajnanau ju chavai va ixlacaʼatalh ni lhilacaʼantauch ju Cristo pus ju Dios aquintalakʼayayan tachi ju ulhtucalh ju Cristo. 18 Chai mas makʼalhkʼajnanauch ju ani lacamunutpaʼ para jantuch canaviniu cuenta. Cʼatsayau ni astan tachi ju va jantu tuʼuʼ ixjunita ju quimakʼalhkʼajnatʼan calhiulayau acsni calakʼayacanau ju lactʼiyan. 19 Chai tachi chun ju taxtokni ju navita ju Dios na talaktsʼimputun acsni tavanan calakʼayacanaʼ ju isʼaskʼatʼan Dios. 20 Pus tachi chun ju taxtokni ju ani lacamunutpaʼ jantu chun ju talai tachi ju ixlhilhcata pʼulhnan ju Dios acsni tavanan navicanchalh ju lacamunutpaʼ. Para jantu va laʼixkʼachatʼan isʼasktuʼan ju tatakʼalhita. Va chunchach ju lacasqʼuinchokolh ju Dios acsni alactuʼunulh ju Adán. Para ju Dios jantu calacasqʼuinach ni catatakʼalhikʼalhi. Aktsʼiya calakʼoxichokocanach. 21 Pus isʼakstu ju Dios ju calakʼoxichokoyaʼ tachi chun ju taxtokni ju ani lacamunutpaʼ chai jantu catatsʼankʼayaʼ. Chai acsni tavanan cataiʼinikʼocanaʼ ju ixtachaput ju alactuʼunti pus va lhikʼach cajunaʼ ju quiʼatsucuntiʼan tachi chun ju isʼaskʼatʼan Dios juntau. Chai vana va chun tachi chun ju taxtokni ju ani lacamunutpaʼ. Si catasastʼikʼoyaʼ ju acsnich. 22 Chai cʼatsayau ni tus chavai tatʼajun makʼalhkʼajnin tachi chun ju taxtokni ju ani lacamunutpaʼ ni tucaʼ tasastʼichokoi. 23 Chai jantu va yuʼunch ju tamakʼalhkʼajnan. Para vachuʼ chunch ju makʼalhkʼajnanau mas cʼatsayau ni caxtaknicanau ju sastʼi quilacatunaʼan tachi ju najunta ju Dios. Chai ni quintaxtaknitan ju Spiritu Santu ju tʼajun laquiʼalhunutʼan ju chavai pus ixpucʼatsacan junita ni aquintamuctaxtuniyan ju Dios ju ixchivinti. Pus ju quijnanʼan mas makʼalhkʼajnanau para pacxanauch tus caxtaknicanau ju sastʼi quilacatunaʼan. Chai chunchach ju capumispacanau ni vasalh isʼaskʼatʼan Dios juntau. 24 Acsni takʼalhtaxtutauch juncantau ni caxtaknicanau ju sastʼi quilacatunaʼan chai yuchi ju tipacxanaucaʼ. Pus ni icxtaknicanta ju tuchi xacjuncanta pus ca jantuch vana actipastactsuculh. Ja lai vana actipastactsuculh ju tuʼu ni icxtaknicantach. 25 Para ni jantucaʼ laktsʼinau ju tuchi aquintaxtakniyan ju Dios pus pacxanaucaʼ chai jantu jeks uyau. 26 Pus vachuʼ ju Spiritu Santu quintaʼaktaijuyan acsni jantu sok cʼatsayau tuʼuʼ. Ju quijnanʼan jantu cʼatsayau ta yu laich caputʼachiviniu ju Dios ta yu kʼoxich calhiula ju yuchi. Para isʼakstu ju Spiritu Santu sqʼuin ju quilacataʼan acsni jantu lai nonau ta yu cʼatsanau ju laquiʼalhunutʼan. 27 Chai ju Dios lai laktsʼin ju laquiʼalhunutʼan. Chai ju yuchi cʼatsai tuchi ju nomputun ju Spiritu Santu ju tʼajun laquiʼalhunutʼan. Chai ju Spiritu Santu acsni sqʼuin ixlacataʼan ju ixlapanacni Dios pus va yuchi ju sqʼuin tachi ju lhijunch laʼixkʼachat ju Dios. 28 Chai mas va tuchi tapasai ju laquiʼatsucuntiʼan cʼatsayau ni Dios ju calakʼoxiyaʼ ni si kʼox cajunaʼ ju quilacataʼan ju mapainiyau ju Dios chai ju sacxtucantau ni isʼaskʼatʼan cajumvi tachi ju ispastacta ju Dios ju makʼanchich. 29 Pus ju quijnanʼan quintamispatanch ju Dios tus acsni navicantacha ju lacamunutpaʼ. Chai vachuʼ quintalhilhcaʼulatan ni laich cajumvi ixtʼachunch tachi ju istsʼalh. Yuchi ju Jesús. Ju chunch ju istsʼalh Dios xakʼai cajunaʼ lhilhu. Chai ju quijnanʼan ju lhilacaʼantau ju Cristo tachi ju va isʼapʼisekʼen juntau. 30 Chai ju quijnanʼan ju aktsʼiya quintalhcaʼulatachan tus acsni navicantacha ju lacamunutpaʼ pus quintasacxtutan ni isʼaskʼatʼan cajumvi. Chai ju quijnanʼan ju quintasacxtutan ni isʼaskʼatʼan cajumvi pus vachuʼ quintalaktsʼinanch ni na salaka ju quiʼalhunutʼan. Chai ju quijnanʼan ju quintalaktsʼinanch ni na salaka ju quiʼalhunutʼan pus vachuʼ quintajuntan ni aquintalakʼayayan. 31 Pus tas anonaʼitʼitch ju chavai. Pus ni Dios ju quintaʼaktaijuyan jantu catalhananau mas lhu caʼalilh ju quintʼalaxcaiʼan. 32 Ju Dios jantu lacasqʼuilh ni catakʼalhtaxtulh laʼixʼaninti ju istsʼalh. Alai va makʼaxtaklh ju quilacataʼan quijnanʼan. Chai ni lai makʼaxtaklh ju istsʼalh ju laʼixʼaninti ju va quilacataʼan ja va a ti yuchach jantu lai aquintaxtaknikʼojun tachi chun ju maktasqʼuiniyau. 33 Tis chavaich ju lai quintamucʼaniyan ju quintalakʼalhinʼan laʼixmacni Dios ju quijnanʼan ju quintasacxtutan ju Dios ni isʼaskʼatʼan cajumvi. Jantu xamatiʼ ni isʼakstu ju Dios ju nonchokoi ni salaka ju quiʼalhunutʼan ju quijnanʼan. 34 Tis chavaich ju lai aquintamacaʼan ju lacajipi ju quijnanʼan. Jantu xamatiʼ ni nilh ju Cristo ju quilacataʼan. Ju yuchi vachuʼ taʼacxtuchokolh junta ixmacnucanta chai yuchi ju vi ju chavai laʼixlhicana ju Dios. Chai yuchi ju tapaininich ju Dios ju quilacataʼan. 35 Mas va tuchi tapasaich ju laquiʼatsucuntiʼan para cʼatsayauch ni va tachi quintamapainiyanch ju Cristo. Tachi acsni alin tuʼuʼ ju makʼalhkʼajnat u tuʼuʼ axcayanti u tuʼuʼ aclhiʼakchʼakʼokʼaxmacalh u acchavanilh u acsni matiʼ ju quimpumpuʼ u acsni alin tuʼuʼ talhanti u acsni va icmaknican. Acsni alin ju tuʼuʼ ju chunch ju laquiʼatsucuntiʼan jantu lai actinaulh ni acsnich ju jantu aquintamapainin ju Cristo. 36 Chunch ju tapasai ju laquiʼatsucunti ju quitʼin tachi ju tsʼokcanta junta ma chani juncan ju Dios: Va ixlacata ni iclalhilacaʼanau ju uxintʼi ji Dios va tachi icmaknipututʼoncanauch. Iclaktsʼincanauch tachi ju va tuʼuʼ atapacxat. Tachi ju tuʼuʼ borrego ju lhiʼancan junta camaknicanaʼ. Ma chunch ju junicalh ju Dios. 37 Para mas makʼalhkʼajnanau jantu tuʼuʼ lai aquintamacʼapʼaniyan ju ixti Dios. Aktsʼiya lhikʼach cachʼixkʼoyau laʼixtachaput ju Cristo ju quintamapainiyan. 38 Pus ju quitʼin iccʼatsai ni matiʼ tuʼuʼ ju lai aquintalhicʼapʼan ju Dios ni jantu aquintamapainiyan. Nin acsni caniyau. Nin acsni tʼonaucaʼ ju ani. Nin yuʼunch ju anquilhnin. Nin yuʼunch ju xalackʼajin sia yuʼunch ju anquilhnin. Nin yuʼunch ju alin ixtachaputʼan sia yuʼunch ju anquilhnin. Nin yuchi ju tʼonau tapasanin ju chavai laquiʼatsucuntiʼan. Nin yuchi ju catapasayaʼ laquiʼatsucuntiʼan astan. 39 Nin yuchi ju camincha ju talaclhman. Nin yuchi ju camincha ju ixtankʼajni lacatʼun. Nin yuchi ju tuʼuʼ atumpa ju navita ju Dios. Jantu tuʼuʼ lai catimacʼapʼani ju Dios ni jantu aquintamapainiyan. Chai ju yuchi quintamasunitan ni vasalh quintamapainiyan ni makʼaxtaklh ju Cristo Jesús ju quilacataʼan. Chai ju chavai ju yuchi quiʼucxtinʼan junita.
1 Ju quitʼin iclhilacaʼanta ju Cristo chai iclajumputunau ju stavasalanti. Jantu ictaʼaklhtamai. Vachuʼ ju Spiritu Santu ju tʼajun laquiʼalhunut cʼatsai ni stavasalanti ju iclajumputunau. 2 Slivasalh na lhu ju quiʼamakʼanit chai va tachi quixcanich ju quiʼalhunut. 3 Ni accʼatsa ni laich cava cataputakʼalhtaxtulh ju chunch ju quiʼalakʼavin quintʼaʼamachivinti pus aclacasqʼuilhch ni chach quimacaulh ju Cristo. Chach quimacaʼalh ju lacajipi junta jonkʼalhita makʼalhkʼajnat. 4 Ju quintʼaʼamachivinti makʼaniya ixʼapapanatnich Israel tajunita. Ju yuʼunch Dios asacxtulh ni isʼaskʼatʼan catava. Ju yuʼunch talaktsʼinta ixtachaput ju Dios. Chai ju yuʼunch tatachʼanulh ni taʼamaklhtayanalh ju makʼaniya ixlhamapʼaksin ju tsʼoklh ju Moisés. Ju yuʼunch amasunicanta ta yu laich catapulakʼaya ju Dios. Chai ju Dios ajunich ni pumatam israelita cajunaʼ ixnati ju amakʼalhtaxtunuʼ acsni tavanan catsucuyaʼ ju ani lacamunutpaʼ. 5 Ju quintʼaʼisraelitanin ixʼapapanatnich tajunita ju makʼaniya quilacpaiʼan Abraham chai ju Isaac chai ju Jacob. Chai ju Malia israelita ixjunita chai yuchach ju ixnatich va acsni tavanan quitsucuchilh ju Cristo tachi lapanac ju ani lacamunutpaʼ. Pus ju Cristo yuchi ju Dios junita ju lhinonkʼojui tachi chun ju taxtokni. Va tachi kʼoxich calhichivinincalh ju yuchi mas va tavananch. Iclacasqʼuin ni vasalh chunch ju canavicalh. 6 Pus ju Dios asacxtulh ju quintʼaʼisraelitanin ni isʼaskʼatʼan catava. Para jantu lai actinaulh ni jantu muctaxtuta ju ixchivinti ju Dios va ixlacaʼatalh ni jantu talhilacaʼalh ju yuchi ju aliʼin quintʼaʼisraelitanin. Pus tachi chun ju isʼaskʼatʼan ju makʼaniya lapanac ju Israel ixjuncan jantu si quintʼaʼisraelitanin istavasalanti tajunita. Ju chunch nomputun ni jantu si isʼaskʼatʼan Dios tajunita. 7 Chai ju ixʼapapanatnich ju Abraham jantu si alhimispakʼocan ni vasalh ixʼapapanatnich catava. Para chani ma juni ju Dios ju Abraham: “Va yuʼunch ju ixʼamaskʼatʼanti ju mintsʼalh Isaac ju caʼalhimispacanach ni miʼapapanatnich vasalh”. Ma chunch ju junicalh ju Abraham. 8 Pus ju chunch chani ju nomputun. Ju aliʼ isʼaskʼatʼan ju Abraham ju va laʼixkʼachat isʼakstu ju tasu jantu yuʼunch ju alhimispacan ni isʼaskʼatʼan Dios catava. Para ju istsʼalh ju Abraham ju Isaac ixjuncan acsnich ju tsuculh acsni uctaxtulh ju ixchivinti Dios ju ixjunita ju Abraham. Chai va ixʼamaskʼatʼanti yuchi ju alhimispacanch ni isʼaskʼatʼanch Dios tajunita. 9 Pus acsni tucaʼ istsucuta ju Isaac pus ju Dios kʼalhtasunilh ju Abraham ju istsʼalh. Ma chani ju juni: “Ju acʼata tachi ju chavai acsni actaspʼitchokoyanta alinch ju istsʼalh ju Sara. Yuchi ju Isaac”. Ma chunch ju junicalh ju Abraham. 10 Chai jantu va yuchi. Para acsni kʼaich va ju Isaac chai tʼatamakʼaxtoklh ju Rebeca pus vachuʼ xakʼalacalh ju Rebeca acsni ixpacxantacaʼ ju ixtʼiyunʼan isʼaskʼatʼan. 11 Ju Dios xakʼalalh ju Rebeca acsni tucaʼ istatsucui ixtʼiyunʼan isʼaskʼatʼan chai jantucaʼ ixtanavita nin macxcai nin kʼox. Ju Dios ixlacasqʼuin ni vana va chunch catailhiʼalh tachi ju aktsʼiya ispastacta ju yuchi. Ixlacasqʼuin ni va laʼixkʼachat isʼakstu caʼasacxtucanach ju isʼaskʼatʼan catajunaʼ. Jantu va ixlacata ni va tuʼuʼ kʼox ju catanavi. 12 Pus ma yuchi chani lhijunicalh ju Rebeca: “Ju salacatʼicstʼi mintsʼalh yuchi ju calhinonaʼ. Va calhijuncanaʼ ju xakʼai mintsʼalh”. Ma chunch ju junilh ju Dios. 13 Chai vasalh chunch ju uctaxtulh tachi ju tsʼokcanta junta ma chani najun ju Dios ixlacataʼan ju ixtʼiyunʼan istsʼalan ju Rebeca: “Ju Jacob na icmapaini. Para ju Esaú jantu tuʼuʼ iclhiulai”. Ma chunch ju naulh ju Dios. 14 Pus tas anonaʼitʼit. Ja lai acnaulh ni jantu kʼox tachi ju asacxtunun ju Dios. Jantu tavanan lai actinaulh ju chunch. 15 Pus ju Dios ma chani junilh ju makʼaniya ixlapanac ju Moisés ixjuncan: “Ju quitʼin acʼaktaijuyach lacaʼamapaininti va tichi chavaich ju icmapainiputunch”. Ma chunch ju naulh ju Dios. 16 Pus yuchi lhicʼatsacanch ni jantu va laʼixkʼachat ju tam lapanac ju amaklhtayanancan ju ixʼamapaininti Dios. Nin ixlacaʼatalh ju tuchi kʼox ju canavi. Para va ixlacaʼatalh ni Dios anaviniputun ju lamapainin. 17 Pus chanich lhitsʼokcanta ixlacata ju makʼaniya kʼai ucxtin ju Faraón ixjuncan. Ju Dios ma chani juni: “Yuchi iclhixtakninch ju mimpuʼucxtin ni laich caputasuyaʼ ju quintachaput ju lamiʼatsucunti ju uxintʼi. Chai ju chunch vachuʼ camispakʼocanach ju quintapakaʼut ixlhilacaputsʼun ju lacamunutpaʼ”. Ma chunch ju juni ju Dios. 18 Pus yuchi lhimachakxacan ju chavai ni aktaijui ju Dios lacaʼamapaininti va tichi chavaich ju aktaijuputunch. Chai pʼas navini ixʼalhunut va tichi chavaich ju pʼas naviniputunch. 19 Pus jantu xcai ni xamatiʼ aquisacmilh. Laich chani aquijunilh: “Pus ni chunch navi ju Dios tajuch ni vana quintamucʼaniyan ju quintalakʼalhinʼan ju Dios. Tis chavaich ju jantu canavi tachi ju lhilhcata ju Dios”. 20 Pus ni chunch aquijunilh tam xamatiʼ pus acjunilh: “Jantu ji lapanac chunch anau. Tis chavaichʼat ju uxintʼi ni laich kʼalhtʼaʼi ju Dios. Ju tuʼuʼ tʼuni xalu ni laich cava cachivinilh ja lhijun ni casacmi ju tam xanaviniʼ tajuch ni va chunch ju xanavi”. 21 Ju lai lhichʼalhcatnan tʼun lai navi tachi ju lacasqʼuin. Laich navi lakatam xalu ju laklhu ixtapalh junita. Chai laich navi alakatam ju jantu laklhu. Tijtʼui ixtapalh ju lai lhcani mas va lakatamch ju xatʼun junita. 22 Pus ju Dios ja jantu vana lai navi tachi ju kʼoxich lhiulai. Ju yuchi mas amalacasuniputun ju lapanacni ni camamakʼalhkʼajni ju taʼalactuʼunun chai mas ixʼamalacasuniputun ju ixtachaput para jantu jeks alacʼuni acsni ixtaʼalactuʼunun. Alai va achʼixnilh mas ixlhijun ni ixʼamucʼanicalh ixtalakʼalhinʼan chai ixʼamamakʼalhkʼajnikʼalhicalh. 23 Pus chunchach ju lalh ju Dios ni laich capumalacasuyaʼ ni slivasalh kʼox lapanac ju quilacataʼan ju quijnanʼan ju quintaʼaktaijutan laʼixʼamapaininti. Chai ju quijnanʼan aktsʼiya quintalhcaʼulatan ni calakʼayacanau. 24 Pus chunchach ju lalh ju Dios ju quilacataʼan. Vachuʼ quintatʼasanitan. Ju aliʼin israelitanin juntau chai ju aliʼin jantu israelitanin tajunita. Para Dios ju quintatʼasanikʼotan. 25 Tachi ju najun junta atsʼoknunta ju Oseas ju makʼaniya ixlapanac Dios ixjunita. Ju anch ma chani naulh ju Dios: Acʼalhimispayach ni quilapanacni tajunita ju jantu quilapanacni ixtajunita. Chai acʼamapainiyach ju jantu ixʼamapainicanta. 26 Chai ma vana chani najun ju Dios: “Ju uxijnan jantu quilapanacni untʼatʼit”. Para mas chunch ju ixnajun ju Dios para astan ju amachakʼan anch caʼalhimispacanaʼ ni istsʼalan tajunita ju Dios ju lakʼajunta. 27 Chai vachuʼ ju makʼaniya ixlapanac Dios ju Isaías ixjuncan chani naulh ju quilacataʼan ju israelitanin juntau: “Ju ixʼapapanatnich ju Israel mas tantsʼunin tajunita tachi ju xacucu alama para ma va lacatsʼunin ju catatakʼalhtaxtuyaʼ. 28 Pus ju quiʼucxtinʼan Dios ma va tam pantsʼiquis camuctaxtuyaʼ tuchi ju najunta ju quilacataʼan ju israelitanin juntau. Chai ma jantu tam canonaʼ. Chai ju tuchi canaviyaʼ ma soknicʼa canaviyaʼ”. Chunch ju naulh ju Isaías. 29 Chai ju alacatam vana yuʼ ju Isaías ju ma chani naulh: Ju quiʼucxtinʼan Dios ma xaʼucxtin junita ixtalhavat taropajni ju si anquilhnin tajunita. Pus ju yuchi ni jantu xaquintamacontilanin ju aliʼin ju xalackʼajin ju quilacpaʼitniʼan ixtajunita tus makʼanchich pus ca xaquintamaclakʼojun tachi ju aʼulhtucalh ju amachakʼan Sodoma chai ju amachakʼan Gomorra ni alacxavakʼo. Chunch ju naulh ju Isaías. 30 Pus tas anonaʼitʼit. Pus cacʼatsayauch ni yuʼunch ju jantu israelitanin tajunita ju talhitajulh ju soknicʼa atsucunti laʼixmacni Dios mas jantu ixtapuxcajui. Talhitajulh ju soknicʼa atsucunti ni talhilacaʼalh ju Cristo. 31 Para ju aliʼin quintʼaʼisraelitanin tanajun ni laich salaka catava ju ixʼalhunutʼan ni catamuctaxtulh tuchi najun lacamakʼaniya ixlhamapʼaksin Dios. Para jantu tavanan lai talhitajui ju salaka ixʼalhunutʼan ni va jantu lai tanavi tachi ju najun lacalhamapʼaksin. 32 Chai jantu lai talhitajui ju salaka ixʼalhunutʼan ni va jantu talhilacaʼamputun ju Cristo ju ixnoncan camalakachatachilh astan ju Dios. Va yuchi ju talhilaksich ju tuchi tanavi isʼakstuʼan. Ju chunch tachi ju va taputsʼantilai ju Cristo ni jantu talhilacaʼamputun ju yuchi ni jantu talacaʼi ni yuchi cava ju ixnoncan camalakachatachilh ju Dios. Pus ju Cristo valhch tachi ju tuʼuʼ lhkajanichiux ju pukʼalhkʼoscan. 33 Tachi ju najun laʼixchivinti Dios junta lhitsʼokcanta ju Cristo. Chani najun: Ju lakʼachakʼan Sion ju Dios ma caʼulayaʼ ju ixlapanac. Ju yuchi ma chunch junita tachi ju tuʼuʼ chiux ju putsʼantilacan. Chai ju yuchi ma acsnich ju putsʼantilacan ni jantu lhilacaʼamputuncan. Chai acsni putsʼantilacan pus ma lana tsʼankʼakʼalhican. Tachi ju ma va cataʼakkʼaju junta vacʼanta. Para ma va tichi chavaich ju lhilacaʼan ju Cristo ma jantu tavanan camaxananaʼ ni laich canaulh astan ni jantu lai xamuctaxtuni ju ixchivinti ju Dios.
1 Ji quiʼalakʼavin slivasalh ixlhichux quiʼalhunut ju iclacasqʼuin ni catatakʼalhtaxtulh ju quintʼaʼisraelitanin chai jantu cataʼalh junta jonkʼalhita makʼalhkʼajnat. Chai chunch ju iclhisqʼuini ju Dios. 2 Ju quitʼin iccʼatsai ni slivasalh na tachʼalhcatnaniputun ju Dios. Para va jantu tamispai ta yu navican ni laich salaka caʼalaktsʼinilh ixʼalhunutʼan ju Dios. 3 Va laʼisʼakstuʼan salaka tanaviputun ju ixʼalhunutʼan va ixlacata ni tanavich ju kʼox. Pus ju Dios salaka caʼanavinilh ixʼalhunutʼan ni va catalhilacaʼalh cava ju Cristo. 4 Ju Cristo nilh ju quilacataʼan. Chai acsni lhilacaʼanau ju yuchi pus ju Dios quintalaktsʼinan ni na salaka ju quiʼalhunutʼan. Jantu tasqʼuini ni vana acnaulh ni va acsnich ju aquilaktsʼinaʼ ju Dios ni salaka ju quiʼalhunut ni lai cava acmuctaxtulh laʼixlhamapʼaksin. 5 Ju Moisés makʼaniya ixlapanac Dios ixjunita. Chai chanich naulh ju yuchi ixlacata ju lapanacni ju tanaviputun tachi ju najun lacalhamapʼaksin ni tanajun ni chunchach caʼapulaktsʼinaʼ ju Dios ni salaka ju ixʼalhunutʼan. Ma chani naulh: “Ni ma xamatiʼ lai camuctaxtukʼo chux tachi ju najun lacalhamapʼaksin pus ju chunch ju Dios ma calaktsʼinaʼ ni na salaka ju ixʼalhunut”. Ma chunch ju naulh ju Moisés. 6 Para chani najun ixchivinti Dios ju tsʼokcanta ixlacata ju lapanac ju lhilacaʼanta ju Cristo chai ixlhiyuchi laktsʼincanta ni salaka ju ixʼalhunut laʼixmacni Dios. Najun: “Ma jantu apʼastʼactʼit ju lamiʼalhunutʼan ni tasqʼuini ni apʼitʼit ju lactʼiyan ni lai alhitʼaʼutʼachitʼit ju cataʼaktaijuyan. 7 Nin ma laich apʼastʼactʼit ni tasqʼuini ni apʼitʼit junta taʼan ju alasanin ni laich alhitʼaʼutʼachitʼit ju cataʼaktaijuyan. Ma jantu tasqʼuini ni chunch ju alatʼit ni ma taxtucha ju lactʼiyan ju Cristo chai ma quinichilh ju ani. Chai ju yuchi ma taʼacxtuchokolh junta ixmacnucanta”. Chunch ju najun laʼixchivinti Dios. 8 Jantu tasqʼuini ni chunch aclalh ni najun ju Dios laʼixchivinti ni ma chanich ju lhitajucan ju salaka quiʼalhunutʼan laʼixmacni yuchi. “Ma jantu xcai lhitajucan ju chivinti junta najun ta yu lai lhitajucan ju salaka quiʼalhunutʼan. Ma va yuchi ni anauch ni lhilaksitʼi ju ixchivinti Dios. Chai ma alacʼaʼitʼi ju lamiʼalhunut”. Chunch ju najun laʼixchivinti Dios. Chai yuchach ju chivinti ju iclajunau acsni iclajunau ni tasqʼuini ni alhilacʼapʼitʼit ju Cristo. 9 Pus ni anonaʼ ni yuchi ju miʼucxtin ju Jesús chai ni alacʼaʼiyaʼ ju lamiʼalhunut ni Dios ju macxtuchokolh ju Jesús acsni ixmacnucanta pus atʼakʼalhtʼaxtʼuyaʼ chai jantu atʼipʼitʼi ju lacajipi. 10 Ni xamatiʼ lhilacaʼan ju Cristo laʼixʼalhunut pus laktsʼincan ni salaka ju ixʼalhunut laʼixmacni Dios. Chai ni najun ni lhilacaʼanch ju Cristo pus takʼalhtaxtutach chai jantu catiʼalh ju lacajipi. 11 Ju ixchivinti Dios ju tsʼokcanta chani najun: “Ma chux ju talhilacaʼanta ju Jesucristo laʼixlhichux ixʼalhunutʼan ma jantu xamatiʼ ju lai astan camamaxanicalh ni laich cajunicalh ni jantu laktsʼin ju Dios ni salaka ju ixʼalhunut”. Chunch ju najun laʼixchivinti Dios. 12 Pus ju quiʼucxtinʼan Dios ixʼucxtin junita tachi chun ju talhilacaʼan ju yuchi. Ju yuchi vaklhtam chun quintalaktsʼinan ju quijnanʼan ju israelitanin juntau chai ju yuʼunch ju jantu israelitanin. Chai na kʼai ju ixʼamapaininti ixlacata va tichi chavaich ju tapainini ni camakʼalhtaxtulh. 13 Aktsʼiya chunch tachi ju najun laʼixchivinti Dios junta tsʼokcanta. Chani najun: “Ma tachi chun ju tatapainini ju quiʼucxtinʼan Jesús ma catatakʼalhtaxtuyach chai jantu catitaʼalh ju lacajipi”. Chunch ju najun laʼixchivinti Dios junta tsʼokcanta. 14 Para jantu lai talhitapainini tuʼuʼ ni jantu talhilaksi ju yuchi. Chai jantu lai talhilaksi ju Jesús ni jantu tavanan takʼasmatʼa ni quinichilh ju ixlacataʼan. Chai jantu lai tacʼatsai ni quinichilh ju Jesús ni matiʼ xamatiʼ ju caʼajunilh. 15 Chai jantu lai catiʼalh xamatiʼ nonaʼ ixchivinti Dios ni jantu malakachata ju Dios. Tachi ju tsʼokcanta junta chani najun laʼixchivinti Dios: “Ma va lhikʼach aʼamaklhtayanancan ju taʼalhtanatʼajun ixnajunca ju kʼoxi chivinti junta najun ni jantu vana talhkʼaman ju Dios ixlacata ju quiʼalactuʼuntiʼan”. Chunch ju najun laʼixchivinti Dios ju tsʼokcanta. 16 Para tachi chun ju takʼasmatlh jantu si talacaʼita ju ixchivinti Dios ixlacata ju Cristo. Aktsʼiya chun tachi ju naulh ju makʼaniya ixlapanac Dios ju Isaías ixjuncan. Ju yuchi ma chani naulh acsni xakʼalalh ju Dios: “Ji quiʼucxtin na lacatsʼunin ju talacaʼita ju tuchi icnonauch”. Ma chunch ju junilh ju Dios. 17 Pus va acsnich ju lai lhilacaʼancan ju Cristo acsni kʼasmatcan ju chivinti ixlacata yuchi. Chai va acsnich ju lai kʼasmatcan acsni va xamatiʼ aquijunilh. 18 Para jantu lai actinaulh ni jantu takʼasmatʼach ju chivinti ju quintʼaʼisraelitanin chai ixlhiyuchi jantu talhilacaʼamputun ju Cristo. Aktsʼiya takʼasmatʼach. Pus laʼixchivinti Dios ju tsʼokcanta najun ni ixlapanacni Dios ma ajunkʼota ju lapanacni vanta anchach cava. Chai ju ixchivintiʼan ma makpitsikʼocanta tus ixlhilacaputsʼun ju lacamunutpaʼ. 19 Chai vana jantu lai actinaulh ni va jantu ixtamachakxai ju anuʼ chivinti ixlacata ju Cristo. Aktsʼiya tamachakxa ni ma chani naulh ju makʼaniya ixlapanac Dios ju Moisés ixjuncan: Ma chani najun ju Dios: Ma yuchach ju Dios. Chai ju yuchi ma caʼaʼaktaijuyaʼ ju aliʼin lapanacni ju ma jantu ixʼanuʼ ixtajunita. Chai ju uxijnan ju israelitanin untʼatʼit ma alhacchʼipʼinaʼitʼit. Chai ju yuchi ma caʼaʼaktaijuyaʼ ju aliʼin lapanacni ju ma jantu taʼacʼatsananta chai ju uxijnan ma alhitʼalhkʼamnaʼitʼit. Ju Moisés ma naulh ni ma chunch ju najun ju Dios. 20 Chai ju makʼaniya ixlapanac Dios ju Isaías ixjuncan lana jantu ixtalhanan. Ju yuchi ma chani naulh: Ju Dios ma chani najun: Ju lapanacni ju jantu catapuxcoyaʼ ju yuchi ma yuʼunch ju catalhitajuyaʼ. Chai ju yuʼunch ju jantu catalhasacmininaʼ ju yuchi pus ma yuʼunchach ju caʼatalacasuniyaʼ. Pus ju Isaías ma naulh ni ma chunch ixnajun ju Dios. 21 Para ixlacataʼan ju quintʼaʼisraelitanin chani ixnajun ju Isaías: “Ju Dios ma chani najun: Ma chux avilhchan ma xaʼatʼasani ju lapanacni ju ma jantu takʼasmatnilh chai ju ma jantu lai talacaʼi. Ma va ixtatakʼalhtaxtulh ixnajun”. Pus ju Isaías ma ixnajun ni ma chunch ju naulh ju Dios.
1 Pus mas chun xanajun ju Dios jantu lai actinaulh ni va quintalacmackʼantan ju Dios ju quijnanʼan ju israelitanin juntau. Ju quijnanʼan ni va ixlapanacni jumpalhtau. Pus ju quitʼin vachuʼ israelita icjunita. Ju quitʼin makʼaniya ixpapanti quimpaiʼan Benjamín icjunita. Chai ju Benjamín makʼaniya ixpapanti ixjunita ju quimpaiʼan ju Abraham ixjuncan. Pus ju chunch ju quitʼin xapapanti icjunita ju Abraham vachuʼ. 2 Ju Dios tus makʼanchich quintasacxtutan ju quijnanʼan ju israelitanin juntau ni ixlapanacni cajumvi. Chai mas chavai jantu quintalacmackʼantan. Ja jantu pʼastʼacʼatʼit tuchi ju najun laʼixchivinti Dios junta lhaʼatsʼoknuncanta ju isʼatsucunti ju makʼaniya ixlapanac Dios ju Elías ixjuncan. Ju anch ni nompalai ni tʼachivinilh ju Dios ju Elías chai alacchivimakʼalh ju istʼaʼisraelitanin. Ju Elías ma chani junilh ju Dios: 3 “Quiʼucxtin Dios ju lapanacni tamaknilh ju milapanacni ju amalakʼachʼatʼi ni catanonaʼ ju minchivinti. Chai talactʼilhiʼulakʼolh junta ixtalakʼayayan ju lapanacni. Va quitʼin ju ictilakʼayayan chai vachuʼ quintamakniputun”. Ma chunch ju junilh ju Dios ju Elías. 4 Para ja jantu pʼastʼacʼatʼit ta yu alhikʼalhtayanalh ju Dios. Ja jantu chani alhikʼalhtayanalh. “Ju quitʼin iclhilhcata ni tiʼalin lakatujun milh quilapanacni ju jantu tataʼaktsokotanilh ju Baal. Ju anuʼ ju ixtanajunch ni Dios mas jantu”. Ma chunch ju junilh ju Dios ju Elías. 5 Pus vana va chun ju chavai. Aktsʼiya alin lacatsʼunin ju quintʼaʼisraelitanin ju talhilacaʼanta ju Cristo ni Dios asacxtulh ni ixʼanaviniputun lamapainin. 6 Ju Dios asacxtulh ju lapanacni ni va ixʼanaviniputun lamapainin. Jantu ixlacata ni va catanavilh ju tuʼuʼ ju kʼox. Pus ni ixlacata cava ni tanavilh tuʼuʼ ju kʼox ju apusacxtulh ju Dios pus jantu lai actinaulh ni va lamapainin caʼixtiva ju anavinilh ju Dios. 7 Pus acsni iclajunau ju chunch va iclamavasalaniputunau ixlacata ju quintʼaʼisraelitanin. Ju yuʼunch jantu talhitajuta ju salaka ixʼalhunutʼan ju ixtapuxcajui. Va lacatsʼunin ju quintʼaʼisraelitanin ju talhitajuta. Va yuʼunch ju asacxtutach ju Dios. Chai ju aliʼin alapʼasninicalh ju ixʼalhunutʼan. 8 Chai ni chunch ju aʼulhtucalh pus va uctaxtulh tachi ju tsʼokcanta junta chani najun: “Ma Dios ju amatontolanilh ju ixʼalhunutʼan. Ju chunch mas na talaktsʼin ju ixchivinti Dios ma jantu tamachakxai. Chai mas na takʼasmatʼa ju stavasalanti chivinti ma jantu lai talacaʼi. Chai ma chunch ju jonkʼalhita tus chavai”. Ma chunch ju najun. 9 Vachuʼ ma chani naulh ju makʼaniya kʼai ucxtin ju David ixjuncan: Ju anuʼ ju na kʼox talhiulai ma cataputaʼokxchokʼoyaʼ. Ma chun cajunaʼ tachi ju tuʼuʼ ju lakʼalhi ju atsucunti. Ma va catapukʼalhkʼosaʼ chai ju yuchi caʼalacmamakʼalhkʼajni ixlacata ju macxcai ju tanavita. 10 Ma jantu catamachakxayaʼ ju ixchivinti Dios. Ma catamakʼalhkʼajnankʼalhiyaʼ tachi ju talai ju yuʼunch ju tatʼatakʼentaʼalhtananch ju ixtacʼucʼatʼan ju na tsʼinqʼui. Ma chunch ju naulh ju David. 11 Para jantu lai actinaulh ni jantu tavanan catalacaʼiyaʼ ju quintʼaʼisraelitanin mas tasui ju chavai tachi ju va takʼalhkʼostach ju aliʼin ni jantu talhilacaʼanta ju Jesucristo. Pus ju astan aktsʼiya caʼamapainichokocanaʼ. Para ni takʼalhkʼoslh ju yuʼunch ni jantu lai xatalacaʼi pus ju chavai ju uxijnan ju jantu israelitanin untʼatʼit lai tʼakʼalhtʼaxtʼuyatʼit chai jantu atʼipʼitʼit ju lacajipi. Chai ju chunch ju quintʼaʼisraelitanin catalacasqʼuinaʼ ni vachuch chunch ju caʼalacnavi ju Dios tachi ju tanavitan ju uxijnan. 12 Pus ju quintʼaʼisraelitanin taʼalactuʼunulh ni tasastuclh ju ixʼamapaininti ju Dios. Pus yuchi kʼox lhiva ju chavai ixlacataʼan tachi chun ju aliʼin lapanacni ju ani lacamunutpaʼ. Pus va ixlacaʼatalh ni jantu lai ixtalhitajui ta yu laich catatakʼalhtaxtulh ju quintʼaʼisraelitanin pus yuchi lai lhitʼakʼalhtʼaxtʼuyatʼit ju chavai ju uxijnan ju jantu quintʼaʼisraelitanin untʼatʼit. Pus ni chunch ju tapasalh acsni taʼalactuʼunulh ju quintʼaʼisraelitanin pus palai kʼox cajunaʼ ju miʼatsucuntiʼan ju uxijnan ju jantu israelitanin untʼatʼit acsni tavanan catalhilacaʼanach ju Cristo ju quintʼaʼisraelitanin astan. 13 Uxijnan ju iclaxakʼalayau ju jantu israelitanin untʼatʼit. Pus ju quitʼin ixtamalakachan Cristo icjunita ju milacataʼan. Pus na kʼox lhichʼalhcat iclhiulai ju quixtaknita ju Dios. 14 Chai ni icmalacasui ni na kʼox lhichʼalhcat iclhiulai ju quixtaknita ju Dios ja jantu nuʼ catalacasqʼuinaʼ ju quintʼaʼisraelitanin ni chunch caʼaʼulhtucanach tachi ju taʼulhtutan ju Dios ju uxijnan ju jantu israelitanin untʼatʼit. Ju chunch tsʼa ma laich catatakʼalhtaxtulh ju aliʼin sia yuʼunch chai jantu cataʼalh ju lacajipi. 15 Ju Dios yuchi alhimacaʼula pantsʼiquis ju quintʼaʼisraelitanin ni laich ixʼamigojni aʼunaʼitʼit ju Dios ju uxijnan ju jantu israelitanin untʼatʼit. Pus ni chunch ju anavicalh ju quintʼaʼisraelitanin ju chavai pus ca aktsʼiya na lhikʼach cajunaʼ astan acsni catalhilacaʼanaʼ ju Cristo ju aliʼin quintʼaʼisraelitanin. Pus ju chavai ju yuʼunch tachi ju va tanitach laʼixʼalactuʼuntiʼan ni jantucaʼ talhilacaʼanta ju Jesús. Para acsni tavanan catalhilacaʼanach ju Cristo pus tachi ju va caʼaxtaknichokocanaʼ ju isʼatsucuntiʼan. Va yuchi ni sastʼi cajunaʼ ju acsnich ju isʼatsucuntiʼan. 16 Ju makʼanch ju Dios ixʼajuni ju quintʼaʼisraelitanin ni va tapakchux ju ixʼalin ju sastʼi cebada chai acsni ixtapunaviputun ju xkapavati pus catakʼextayaʼ lacatsʼunin ju sasquitit chai catamacchaniyaʼ lakatam xkapavati ju yuchi. Chai ni ixʼanuʼ Dios junita ju pʼulhnan macchacan pus ju aliʼ sasquitit si ixʼanuʼ vachuʼ. Pus chunchach vachuʼ lhixajcha ixlacata ju makʼaniya ixlapanac Dios ju Abraham ixjuncan. Ju yuchi ni ixlapanac Dios ixjunita pus tachi chun ju quijnan ju ixʼapapanatnich icjuntau si ixlapanacni Dios icjuntau vachuʼ. Chai ju tuʼuʼ makʼakʼai qʼuiu ni ixʼanuʼ Dios cava pus sich ixʼanuʼ cava vachuʼ ju ixacatan. Pus vana va chun ju Abraham. Ju yuchi ni ixlapanac Dios ixjunita pus tachi chun ju quijnan ju ixʼapapanatnich icjuntau si ixlapanacni Dios icjuntau vachuʼ. 17 Pus ju quintʼaʼisraelitanin chunch tajunita tachi ju tuʼuʼ ixmakpʼu qʼuiu ju olivo juncan. Pus ju aliʼin sia yuʼunch tachi ju va chakxmakʼancanta ni jantu ixtalacaʼi. Chai ju uxijnan ju jantu israelitanin untʼatʼit chunch untʼatʼit tachi ju tuʼuʼ xaʼolivo lacaqʼuivin. Pus ju chavai ni lhilacʼapʼintʼatʼitch ju Cristo pus tachi ju va anchach laxaqʼuiu ju kʼoxiya olivo ju lokʼonʼucʼatʼit junta ixtapʼuntach ju yuʼunch ju achakxmakʼancantach. Chai ni anch ju lokʼonʼucʼatʼit pus tachi ju va mak alin vachuʼ ju kʼox miʼatsucuntiʼan laxaqʼuiu olivo ni vachuʼ amaklhtʼayananaʼitʼit ju kʼox ju ixʼaxtakniputun ju quintʼaʼisraelitanin ni ixtalacaʼilhch cava. 18 Para mas chunch ju untʼatʼit jantu alhitʼakʼayatʼit. Jantu anaʼuntʼit ni palai kʼox ju uxijnan. Palai jantu ju israelitanin ju tachi istavasalanti ixmakpʼu qʼuiu tajunita. Ni va lhitʼakʼayapʼutʼunatʼit apʼastʼactʼitch ni jantu milacataʼan ju lai catitapulhitaju ju kʼox isʼatsucuntiʼan ju lapanacni. Alai ixlacata ju Abraham ju lhitʼaʼutʼatʼit ju kʼox miʼatsucuntiʼan laʼixmacni Dios. 19 Para ca lai chani anaʼuntʼit ju uxijnan ju jantu israelitanin untʼatʼit: “Ju israelitanin chunch tajunita tachi ju istavasalanti ixmakpʼu ju xaqʼuiu olivo. Para ca aktsʼiya tuʼuʼ ju quintapalhni quincʼan vachuʼ ni yuchi lhilakachakxtucalh ju yuʼunch ni laich anch acmaklokʼontocʼayau ju quijnan”. Ca laich chunch anaʼuntʼit. 20 Pus kʼoxich. Para ju yuʼunch tachi ju va achakxmakʼancalh va ixlacata ni jantu ixtalhilacaʼamputun ju Jesús. Chai ju uxijnan tachi ju va laich xalokʼontʼocʼayatʼit ju anch va ixlacaʼatalh ni lhilacʼapʼintʼatʼitch ju Jesús. Para jantu alhitʼakʼayatʼit. Alaich atʼalhonitʼit ju Dios. 21 Ju Dios ni tachi ju va achakxmakʼalh ju aliʼ lapanacni ju tachi istavasalanti ixmakpʼu qʼuiu tajunita pus vana ju uxijnan catachakxmakʼananch ni vana va chun ju alapʼalaʼitʼit. 22 Alaktsʼintʼitch ni na kʼai ju ixʼamapaininti ju Dios. Para vachuʼ acʼatsʼatʼit ni na lai amamakʼalhkʼajninin. Pus ju anuch quintʼaʼisraelitanin ju takʼalhkʼoslh amamakʼalhkʼajni ju Dios. Para ju uxijnan tamalacasuniyan ni na kʼai ju ixʼamapaininti ju yuchi. Chai va tachi chunchach ju catamalacasuniyanch ni va tachi alhilacʼapʼitʼit ju Cristo. Para ni jantu va tachi alhilacʼapʼinaʼitʼit ju Cristo pus vachuʼ ju uxijnan tachi ju va achʼakxmakʼancʼanaʼitʼit. 23 Chai vachuʼ ju anuch quintʼaʼisraelitanin ju tachi ju va achakxmakʼancantach ni va tamch catapastacchokoyaʼ chai catalhilacaʼanaʼ ju Cristo pus tachi ju va catalokʼontocʼachokoyaʼ junta ixʼachakxmakʼancanta. Chai va lakatamch catatʼajunaʼ ju aliʼin ju talhilacaʼanta ju Cristo. Alin ixtachaput ju Dios. Yuchach ju canavichokoyaʼ ni laich catajunchokolh tachi ju va catalokʼontocʼachokoyaʼ junta ixʼachakxmakʼancantach. 24 Pus ju uxijnan ni jantu israelitanin untʼatʼit pus tachi ju va qʼuichʼakxʼicʼantʼatʼit ju laxaqʼuiu xaʼolivo lacaqʼuivin. Chai ju chavai tachi ju va anch ju xalokʼontʼocʼayatʼit junta jantu ixmakpʼu ixʼuntʼatʼit ju kʼoxiya olivo ni jantu ixʼapapanatnich Abraham untʼatʼit. Pus ni chunch ju xaʼulhtʼucʼanatʼit ju uxijnan ja va a ti yuchach jantu lai pʼas catitʼalachʼapachokolh ju quintʼaʼisraelitanin ju aktsʼiya ixmakpʼu tajunita ni ixʼapapanatnich Abraham tajunita. 25 Pus iclacasqʼuin ji quiʼalakʼavin ni amachʼakxatʼit ju ani ju jantu lai ixmachakxacan ju pʼulhnan. Ju chunch jantu lai alhitʼakʼayayaʼitʼit ni lai xalokʼontʼocʼayatʼit junta jantu xamakpʼu ixʼuntʼatʼit. Pus ju chavai tapʼasnilh ju ixʼalhunutʼan ju aliʼin quintʼaʼisraelitanin tus acsni calaktsayach tachi chun ju jantu israelitanin ju alhilhcata ju Dios ni catalhilacaʼanach ju Cristo. 26 Chai ju acsnich chux ju quintʼaʼisraelitanin catatakʼalhtaxtuyaʼ chai jantu cataʼanaʼ ju lacajipi. Tachi ju tsʼokcanta laʼixchivinti Dios junta najun ni ma lakʼachakʼan Sion cataxtuyanta ju amakʼalhtaxtunuʼ. Chai ju yuchi ma caxacaniyaʼ ju macxcai ixʼatalacpastʼacʼatʼan ju alin laʼixʼalhunutʼan ju ixʼapapanatnich ju makʼaniya xapai Jacob. Chai ju acsnich ma catatalhoniyach ju Dios. 27 Chai acsni caʼamacʼacxaniyaʼ ju ixʼalactuʼuntiʼan pus ma acsnich ju caʼamuctaxtuniyaʼ ju chivinti ju ixʼalactʼatakʼoxita ju Dios ju makʼaniya ixlapanacni. Chunch ju tsʼokcanta laʼixchivinti Dios. 28 Pus ju aliʼin quintʼaʼisraelitanin ixtʼalaxcai Dios tajunita ju chavai ni jantu talhilacaʼanta ju chivinti ixlacata ju Cristo. Para ixlhiyuchach lai lhilacʼapʼinatʼit ju Cristo ju uxijnan ju jantu israelitanin untʼatʼit. Para aktsʼiya yuʼunch ju quintʼaʼisraelitanin ju pʼulhnan asacxtulh ju Dios. Chai aktsʼiya alacmapaini va ixlacata ju chivinti ju atʼatakʼoxita ju makʼaniya quilacpai quincʼan Abraham chai Isaac chai ju Jacob. 29 Ju Dios ni xtakni tuʼuʼ lhakʼailaktsʼin ju tam xamatiʼ pus jantu lai tam catinonchokopa astan. Chai ni tam xamatiʼ ju sacxtutach ju Dios pus jantu lai tam catinonchokopa astan. 30 Ju uxijnan vachuʼ ixʼalin avilhchan acsni jantucaʼ ixlacʼaʼiniyatʼit ju Dios. Para ju chavai ju Dios taʼaktaijutan lacaʼamapaininti va ixlacaʼatalh ni jantuch talacaʼita ju quintʼaʼisraelitanin. 31 Pus chunchach vachuʼ ju quintʼaʼisraelitanin. Ju chavai ju yuʼunch jantu talhilacaʼanta ju Cristo. Para tachi ju uxijnan ni taʼaktaijutan ju Dios lacaʼamapaininti pus vachuʼ ju quintʼaʼisraelitanin caʼalacʼaktaijucanaʼ lacaʼamapaininti astan. 32 Ju Dios aʼulanikʼota ixʼalactuʼuntiʼan tachi chun ju lapanacni. Ju chunch lai caʼaktaijuyaʼ ixchuxʼan va lacaʼamapaininti. 33 Slivasalh na kʼox ju ixʼatalaninti chai ixʼatalacpastʼacʼat ju Dios. Jantu lai machakxayau tajuch ni va chunch ju navi ju tuʼuʼ. Nin yuchi ni lai camachakxau tuchi ju naviputun ju yuchi. 34 Tis chavaich ju lai camachakxanilh ju ixʼatalacpastʼacʼat ju Dios. Tis chavaich ju lai camapʼaksi ju yuchi. 35 Pus jantu xamatiʼ caxtaknilh tuʼuʼ ju Dios va ixlacaʼatalh ni canaulh ni tuʼuch capuxtaknicalh. 36 Pus Dios ju navikʼota tachi chun ju taxtokni. Chai yuchi ju lhinonkʼojui chux. Chai va ixlacata ni capulakʼayacalh ju yuchi pus yuchi lhiʼalinkʼojui tachi chun ju taxtokni. Chach tanaulh ju lapanacni ni yuchi ju xakʼai ju Dios tus va tavananch. Vasalh iclacasqʼuin ni chunch catanavi ju lapanacni.
1 Pus ji quiʼalakʼavin na lhu xaquintaʼaktaijuyan ju Dios laʼixʼamapaininti. Yuchi iclalhitapaininiyau ni amakʼaxtʼaknitʼit ju Dios ju miʼatsucuntiʼan. Chai tachi ju talai ju vana tamaknini ju Dios ju tuʼuʼ atapacxat ni taxtakni ju na salaka pus vana va chunch ju uxijnan. Amakʼaxtʼaknitʼit ju Dios ju miʼatsucuntiʼan chai salaka aʼuntʼit. Ju chunch kʼoxich calhiulayaʼ ju Dios. Chai tasqʼuini ni chunch ju alakʼayayaʼitʼit ju Dios ixlhichux ju miʼalhunutʼan. 2 Jantuch vana anavitʼit ju ixkʼachat ju ani lacamunutpaʼ tachi ju talai ju jantucaʼ talhilacaʼanta ju Cristo. Tamch aʼuntʼit ni talasastʼinitan ju mintacʼatsanʼan ju Spiritu Santu. Ju chunch laich apʼumispʼayaʼitʼit ju tucan ixkʼachat ju Dios ju milacataʼan. Acʼatsʼayaʼitʼit tamalhch ju kʼox ju anaviyaʼitʼit chai tamalhch ju kʼox calhiulayaʼ ju Dios. 3 Ju Dios quinavinilh lamapainin ni xaquixtaknich ju ani quilhichʼalhcat ni ixlapanac acva ju milacataʼan. Yuchi iclalhijunau ju ani. Jantu xamatiʼ ju milhiʼuxijnan calhitakʼaya tuʼuʼ tachi ju jantuch lhijun. Palai kʼox ni vas anaʼuntʼit tuchi lhakʼailaktsʼin ju taxtaknitan ju Dios ju pumatamin ju uxijnan acsni lhilacʼapʼitʼit ju Jesucristo. 4 Pus ju quilacatunaʼan va lakatamch junita. Para na lakalhu ju ixtaxtokni ju quilacatunaʼan. Chai jantu va tijtam lhichʼalhcat ju tanavi. 5 Pus vana va chun ju quijnanʼan. Mas na lhu juntau para tachi ju va lakatam lacatuna juntau tachi chun ju lhilacaʼanau ju Cristo. Chai lamaktasqʼuiniyau ju pumatamin quijnanʼan. 6 Ju Dios xtaknita ju pumatamin ta yu laich capunavi ju tuʼuʼ lhichʼalhcat. Chai chunch ju xtaknita pumatamin tachi ju kʼoxich lhiulai isʼakstu ju Dios. Pus ni xamatiʼ xtaknicanta ju lhichʼalhcat ni canonaʼ ju ixchivinti Dios pus chach cʼatsa ni yuchi ju Dios ju xaxtakni ju chun atalacpastʼacʼat. Jantu va isʼakstu lai xanajun ju chunch. 7 U ni xamatiʼ xtaknicanta ju lhichʼalhcat ni caʼaktaijulh ju aliʼin pus chach aktaiju ixlhichux ixʼalhunut. Chai ju amalaniniʼ chach amalaninilh ixlhichux ixʼalhunut. 8 Ni xamatiʼ xtaknicanta ixlhichʼalhcat ni caʼamapʼaksinilh pus chach amapʼaksinilh ixlhichux ixʼalhunut. Chai ju Dios ni xtaknita tam xamatiʼ ju ixtumin ni laich caʼaxtaknilh ju tamaktasqʼuini pus lhikʼach caxtaklh. Chai ju xtaknicanta ixlhichʼalhcat ni calhinonaʼ lacatalhavat ju talhilacaʼanta ju Cristo pus chach muctaxtu lacakʼox ixtacʼatsan. Chai ju Dios ni xtaknita apumatam ixtacʼatsan ni cʼatsai ta yu laich cachʼalhcatnanilh ju tatʼajun makʼalhkʼajnin pus chach navi lacalhikʼach. 9 Amapʼainitʼit ju mintʼalapanacniʼan ixlhichux ju miʼalhunutʼan. Atsʼisitʼitch ju amacxcai. Va yuchi ju anavitʼit cuenta ixnavica ju kʼox. 10 Alamapʼainitʼit sia milhiʼuxijnan tachi ju vasalh lhiʼalakʼavin untʼatʼit. Alakʼayatʼit apumatam ni tuʼuʼ ju navita ju kʼox. Jantu va uxijnan ju alacʼasqʼuintʼit ni xalackʼajin aʼuncʼantʼit. 11 Jantu alhimalheknintʼit ju ixlhichʼalhcat ju Dios. Ixlhichux miʼalhunutʼan anavitʼit ju ixlhichʼalhcat. Acʼatsʼatʼit ni yuchi ju Dios ju chʼalhcʼatnaniyatʼit. 12 Akʼachʼantʼit ni cʼatsʼayatʼit ni aktsʼiya apʼinaʼitʼit ju lactʼiyan. Jantu jeks aʼutʼit acsni makʼalhkʼajnanatʼit. Jantu tavanan acʼaptʼit ju ixtʼachivininca ju Dios. 13 Aʼaktʼaiʼutʼit ju laʼixmaktasqʼuinitʼan ju vachuʼ talhilacaʼanta ju Cristo. Amalakʼavitʼitch ju tatolhputun pantsʼiquis laminchakaʼan. 14 Asqʼuinitʼit ju Dios ju kʼox ixlacataʼan ju tatʼalaxcayan. Asqʼuinitʼit ju kʼox. Jantu tuʼuʼ asqʼuinitʼit ju macxcai ju ixlacataʼan. 15 Alactʼakʼachʼantʼit ju takʼachan. Atʼakʼalhuntʼit ju na talackʼalhunch. 16 Va lakatamch aʼuntʼit ju milhiʼuxijnan. Jantu alhitʼakʼayatʼit tuʼuʼ. Va lakatamch atʼatʼalacʼasutʼit ju quilhpatinin. Jantu anaʼuntʼit lamiʼalhunutʼan ni va uxijnan ju palai acʼatsʼanantʼatʼit. 17 Ni xamatiʼ cataʼulhtuniyan ju macxcai jantu alhimapʼuspʼitnitʼit ju macxcai. Anavitʼit ju kʼox ju laʼixʼucxlacapuʼan ju lapanacni. 18 Ixlhichux miʼalhunutʼan anavitʼit talacmaskʼatʼin ni jantu atʼalasatʼit xamatiʼ. 19 Ji quiʼalakʼavin jantu amamakʼalhkʼajnitʼit ju tanaviniyan macxcai. Alai chach amamakʼalhkʼajni isʼakstu ju Dios. Chunch ju alatʼit ni ma najun ju quiʼucxtinʼan Dios laʼixchivinti ju tsʼokcanta ni ma yuchi ju amamakʼalhkʼajniniʼ. Ma yuchi ju camamapalaniyaʼ ju alactuʼunin. Chunch ma najun ju Dios. 20 Jantu amamakʼalhkʼajnitʼit ju tanaviniyan macxcai. Alai chani aʼulhtʼutʼit. Ju mintʼalaxcaiʼan acsni chavani axtʼaknitʼit ju ixvaiti. Ni quicxixa axtʼaknitʼitch ju xcan. Ni chunch ju anaviniyaʼitʼit pus astan caxcaniyaʼ ju ixʼalhunut ni xanaviniyatʼit ju kʼox. 21 Jantu alakʼaʼitʼit ni catamanavinin ju macxcai ju tanaviniyan macxcai. Alai kʼox ju anaviniyaʼitʼit. Ju chunch atʼalalhaʼayaʼitʼit.
1 Tachi chun ju quijnanʼan ju lapanacni juntau tasqʼuini ni caʼaquiclacaʼiu ju ucxtinin. Pus Dios ju ulata tachi chun ju puʼucxtin chai Dios ju asacxtuta tachi chun ju ucxtinin. 2 Pus ju lapanac ju jantu quiclacaʼiputun ju ucxtin pus va jantu tuʼuʼ lhiulai ju lhcaʼulata ju Dios. Pus ju jantu quiclacaʼi ju ucxtin talakʼalhin ju navi chai camamakʼalhkʼajnicanaʼ. 3 Jantiyuʼ alhiʼulacanta ju ucxtinin ni va caʼamakʼesva ju tanavi ju kʼox. Para alhiʼulacanta ju ucxtinin ni caʼamakʼesva ju va taʼalactuʼunun. Ju uxintʼi ja cʼatsʼapʼutʼun ta yu alatʼi ni jantu va atʼalhoniyaʼ ju ucxtinin. Pus anavitʼich ju kʼox chai ju yuʼunch catanonaʼ ni na kʼox ju tuchʼi navitʼi. 4 Ju ucxtinin ixlapanacni Dios tajunita ni cataʼaktaijuyan. Para ni anaviyaʼ ju macxcai pus yuchi alhitʼalhoniyaʼ ju ucxtin. Yuchi alhixtaknicanta ixpuxakʼaiʼan ni catamamakʼalhkʼajniyach ju tanavi ju macxcai. Chai ju Dios yuchi alhixtakni ju ixpuxakʼai ni sok caʼamamapalanilh ju tanavich ju alactuʼunti. 5 Para jantu va yuʼ ju alhitʼalhonitʼit ju ucxtinin va ixlacaʼatalh ni Dios ju alhcaʼulata ni laich catamamakʼalhkʼajniyan ni anaviyaʼitʼit tuʼuʼ talakʼalhin. Alai yuchi alhitʼalhonitʼit ni cʼatsʼayatʼit lamiʼalhunutʼan ni lhijun ni atʼalhonitʼit ju tam xakʼai. 6 Vachuʼ yuchi alhiʼamapʼalanantʼit ju lacaʼamapalanti. Ju achʼinin Dios ju aʼulata chai va tanavich ju ixlhichʼalhcatʼan. 7 Ju tam xakʼai anavinitʼitch tachi ju lhijunch ni canavinicalh. Ni alinch ju miʼamapalantiʼan laʼixmacni tam xakʼai pus amapʼalanantʼitch. Ni alhipʼitʼit tuʼuʼ alakatam lakʼachakʼan chai ni achʼicʼantʼit pus amapʼalanantʼit. Pus ni lhijunch ni atʼalhonitʼit tam xakʼai pus atʼalhonitʼit. Pus ni lhijunch ni alakʼayatʼit tam xakʼai pus alakʼayatʼitch. 8 Jantu xamatiʼ alhipʼinitʼit tuʼuʼ. Jantu catacʼacxnin ju miʼamapainintiʼan. Va tachi alamapʼainitʼit. Ju camapainiyaʼ ju ixtʼalapanac muctaxtui tachi ju najun laʼixlhamapʼaksin Dios. 9 Ju makʼaniya ixlhamapʼaksin Dios ju tsʼokʼula ju Moisés chani najun: “Ma jantu va kʼaya atʼatsʼucʼutʼit ju jantu miʼamachakaʼan u jantu mimpapaʼan. Ma jantu amakninintʼit. Ma jantu akʼalhaunantʼit. Ma jantu anaʼuntʼit taʼaklhtamat chivinti ixlacata akʼantam. Ma jantu alhacchʼipʼitʼit tuʼuʼ”. Chunch najun lacalhamapʼaksin. Pus ju ani chivinti chai va tuchi aliʼ lhamapʼaksin ju caʼalilh vaklhtam chun ju tanajun. Va tanajun ni atʼalamapʼainitʼit ju mintʼalapanacniʼan tachi ju va jun uxijnan ju mapʼainichʼokʼocʼanatʼit. 10 Ju lai tʼalamapaini ju ixtʼalapanac jantu catinavinilh tuʼuʼ macxcai ju ixtʼalapanac. Pus ju tʼalamapaini ju ixtʼalapanac muctaxtukʼojui chux tachi ju najun laʼixlhamapʼaksin Dios. 11 Chunch ju alatʼit ni cʼatsʼayatʼit ni ca vaninch minta ju avilhchan acsni caminchokoyaʼ ju Cristo. Pus tasqʼuini ni calhilacpucujvich ju ixnavica ju soknicʼa ni tachi ju va lhtatayauch ju laquiʼatsucuntiʼan. Calhilacpucujvich ixnavica ju soknicʼa ni palaich vanin minta ju avilhchan acsni aquintalaktsaniyan ju sastʼi quiʼatsucuntiʼan ju Cristo chai aquintalhiʼanan ju lactʼiyan. Palai jantucaʼ chun ixjunita acsni pʼulhnan lacaʼichauch ju ixchivinti Dios. 12 Ju ani lacamunutpaʼ junta tʼonau tachi ju va tsʼistach junita ni na alin ju alactuʼunti. Para ju chavai tachi ju va tʼajun talakpitsiniʼ ju atatsʼisni ni mintach ju Cristo chai ju yuchi camakʼosuyaʼ ju alactuʼunti chai tachi ju va catuncunach. Pus ixlhiyuchach camacajuch ju ixnavica ju taxtokni ju tanavi ju taʼalhtanantacaʼ lacaʼatatsʼisni ni jantucaʼ tamispai ju Cristo. Pʼas calhilaksiyau ju ixtachaput ju Dios ni lai casastʼucʼau ju macxcai. Lacaʼatuncunuʼ ju caʼalhtananau. 13 Catsucuyauch tachi ju tatsucui ju tatʼajun lacaʼatuncunuʼ junta cʼatsakʼocanta tuchi navican. Jantu calactʼakʼapʼau. Jantu vanach camakʼanau junta va kʼaya talai lacatuʼuʼ cʼatan. Jantu va lacati catsucu. Jantu va lakachapunin cajumvi. Jantu calaclasau. Jantu calhacchaʼau tuʼuʼ. 14 Chunch ju atsʼucʼutʼit tachi ju istsucui ju quiʼucxtinʼan Jesucristo acsni ixvi ju ani lacamunutpaʼ. Jantu vana yuʼ ju anavitʼit cuenta ju ixkʼachat ju miʼatalacpastʼacʼatʼan tachi ju ixlayatʼit acsni tucaʼ ixlhilacʼapʼinatʼit ju Cristo.
1 Amalakʼavitʼit ju jantucaʼ kʼox tamachakxai ju ixchivinti Dios. Para jantu alhimalakʼavitʼit ni va alhitʼalasapʼutʼutʼit ju tuchi lacaʼitach ju yuchi. 2 Ju aliʼin lapanacni talacaʼich ni laich taʼokʼojui tachi chun ju taxtokni. Ju aliʼin ju jantucaʼ kʼox tamachakxai ju ixchivinti Dios jantu taʼui ju lhivai. 3 Pus ju okʼojui chux jantu calacmackʼalh ju tam ixlakʼau ju jantuch okʼojui chux. Chai ju jantu okʼojui chux jantu lai catijunilh ju anuʼ ixlakʼau ju okʼojui chux ni jantu kʼox tachi ju lai. Jantu lai actijunilh ju chunch ni salaka laktsʼin ju Dios ju ixʼalhunut ju anuʼ lapanac. 4 Chai ju uxijnan tis chavaʼitnich untʼatʼit ni laich aʼunitʼit ju jantuch milapanacʼan ni jantu kʼox tachi ju lai. Va ixʼucxtin ju lai canaulh u kʼox ju navi ju ixlapanac u jantu. Chai ni Dios ju ixʼucxtin junita pus aktsʼiya sok canaviyaʼ ni na tachapun ju yuchi. Yuchach ju caʼaktaijuyaʼ ni lai sok canaviyaʼ. 5 Ju pumatam alin avilhchan ju lai talhoni. Ju apumatam jantu tuʼuʼ talhoni. Va sich kʼox lhiulai chux avilhchan. Pus ju pumatamin chach sacxtulh laʼixlhichux ixʼalhunut ju avilhchan ju machakxai ni kʼox calhiula ju Dios ni catalhonilh. 6 Ju lapanac ju sacxtui ju avilhchan ju talhoni pus lhisacxtui ni lai pulakʼayai ju quiʼucxtinʼan Dios. Chai ju lapanac ju jantu tuʼuʼ talhoni chai va najunch ni sich kʼox chux avilhchan pus vachuʼ va lakʼayaputun ju quiʼucxtinʼan Dios. Yuchi ju punavi chunch. Chai ju lai okʼojui tachi chun ju taxtokni pus vachuʼ va pulakʼayaputun ju quiʼucxtinʼan Dios acsni vajin ni xtakni lakʼailaktsʼiuch ju Dios ixlacata tachi chun ju uich. Chai ju jantu lai okʼojui tachi chun ju taxtokni pus vachuʼ pulakʼayaputun ju quiʼucxtinʼan Dios ni jantu okʼojui chux. Chai vachuʼ xtakni lakʼailaktsʼiuch ju Dios ixlacata tuchi laich ui. 7 Ju quiʼatsucuntiʼan tachi chun ju quijnanʼan ju lhilacaʼantauch ju Cristo jantu quiʼanuʼan quiʼakstuʼan. Nin acsni tʼonaucaʼ ju ani lacamunutpaʼ nin acsni caniyau. 8 Acsni tʼonaucaʼ pus ixlapanacni juntau ju quiʼucxtinʼan Dios. Chai acsni caniyau pus vana ixlapanacni juntau ju quiʼucxtinʼan Dios. Pus mas laquiʼatsucuntiʼan u mas laquiʼanintiʼan va tachi ixlapanacni quiʼucxtinʼan Dios juntau. 9 Pus ju Cristo yuchi lhinilh chai yuchi lhitaʼacxtuchokolh junta ixmacnucanta ni ixʼucxtinʼan cajunaʼ tachi chun ju tanitach ju ixtalhilacaʼanta ju Cristo chai tachi chun ju titatʼajuncaʼ ju talhilacaʼanta yuchi. 10 Pus ju uxijnan tas ni va mucʼaniyatʼit ju ixtalakʼalhin ju tam milakʼauʼan. Chai ju uxijnan tajuch ni jantu tuʼuʼ lhiulayatʼit ju tam milakʼauʼan. Jantu chun alatʼit ni sich cachaʼankʼoyau junta vilhcha ju Dios ni laich aquintajunan u kʼox navitau u jantu. 11 Chunchach vachuʼ najun laʼixchivinti Dios ju tsʼokcanta junta ma chani najun ju Dios: Ma yuchi ju Dios. Chai ju yuchi ma lakʼajunta. Chai ma slivasalh caʼuctaxtuyaʼ tachi ju najunta. Chai ju yuchi najun ni ma yuchi ju catatalhonikʼoyach tachi chun ju lapanacni. Chai tachi chun ju lapanacni ma catajunaʼ ni yuchi ju xakʼaich. Ma chunch ju najun ju Dios. 12 Pus ju pumatamin ju quijnanʼan aktsʼiya cajunau ju Dios tuchi navitauch ju ani lacamunutpaʼ. 13 Chai ni aktsʼiya cajunkʼoyau ju Dios tuchi navitauch pus yuchi jantuch calhimucʼaniu ixtalakʼalhin ju tam quilakʼauʼan. Alai va yuchi ju canaviyau cuenta ta yu laich kʼox caputʼalalhiʼanau ju quiʼalakʼavinʼan. Jantu tuʼuʼ canaviu ju capumakʼalhkʼosu ju tam quilakʼauʼan u tuʼuʼ ju capulakʼalhiniu ju isʼatsucunti. 14 Ju quitʼin iclhilacaʼan ju quiʼucxtinʼan Jesús. Chai ju yuchi quimamachakxanilh ni laich acʼulh tachi chun ju taxtokni. Para ju tam xamatiʼ ni najun laʼixʼalhunut ni jantu lai catiʼokʼo tachi chun ju taxtokni pus talakʼalhin cava ni caʼulh. 15 Para ju uxijnan ni lhamamakʼaniniyatʼit ju tam milakʼauʼan ju tuchʼi uyatʼit pus ju chunch nomputun ni jantuch vasalh tʼalamapʼainiyatʼit ju tam milakʼauʼan. Pus ju tuchʼi uyatʼit ju uxijnan ni capuʼalh lacajipi ju tam milakʼauʼan pus jantu aʼutʼit. Ju Cristo vachuʼ nilh ixlacata ju anuʼ milakʼauʼan. 16 Pus ni alin tuʼuʼ ju jantu alactuʼunti lhiulayatʼit ju uxijnan para ni na macxcai catalhichivininan apumatam ni anaviyaʼitʼit pus jantu anavitʼit. 17 Pus ju quijnanʼan Dios ju navitau quiʼucxtinʼan. Chai ni yuchi ju lhinajun laquiʼatsucuntiʼan pus cʼatsayau ni jantiyuʼ ju palai tuʼuʼ lhiulai ju Dios ni jantu acʼulh tuʼuʼ u jantu ackʼotlh tuʼuʼ. Pus ju palai tuʼuʼ lhiulai ju Dios yuchi ni salaka cava ju quiʼalhunutʼan laʼixmacni yuchi chai jantu va actʼalakʼailh tam quilakʼau chai caʼalilh ju kʼachat laquiʼatsucuntiʼan. Pus yuchi ju Spiritu Santu ju tʼajun laquiʼalhunutʼan chai yuchach ju aquintamakʼankʼachayan. 18 Chai ju chunchach tsucui pus tasui ni vasalh ixlapanac Cristo junita. Chai ju Dios kʼoxich lhiulai. Chai ju chunch vachuʼ ju ixtʼalapanacni catanonaʼ ni kʼox lapanac junita. 19 Pus yuchi calhinaviu cuenta ta yu kʼox caputʼalalhiʼanau ju quilhiʼalakʼavinʼan chai ta yu laich calapuʼaktaijuyau ni palai lai calhilacaʼanau ju Cristo ju quijnanʼan ju lhiʼalakʼavin juntau laʼixmacni yuchi. 20 Jantu alhilakʼalhitʼit ju ixlhichʼalhcat Dios ju tuchʼi upʼutʼunatʼit ju uxijnan. Pus lai ucan tachi chun ju taxtokni. Para ju tam lapanac ni caʼuyaʼ tuʼuʼ ju va capumakʼalhkʼosu ju tam ixlakʼau pus talakʼalhin ju navi. 21 Palai kʼox cava ni jantu aʼutʼit ju tuʼuʼ lhivai nin akʼotʼit ju tuʼuʼ vino nin anavitʼit tuʼuʼ ju laich capukʼalhkʼoslh u calhamakʼaninilh ju tam milakʼau u capucapputulh ju Dios. 22 Ni vasalh ixlhichux miʼalhunutʼan ju lacʼaʼitʼatʼit ni jantu talakʼalhin ju tuchi laich naviyatʼit ju uxijnan pus anavitʼit. Va yuchi ni jantu anavitʼit laʼixʼucxlacapuʼan ju lapanacni ju jantu chun talacaʼi. Chunch ju alatʼit ni cʼatsʼayatʼit ni Dios mispai ta yu junitach ju miʼalhunutʼan. Lhikʼach tʼajun ju lapanac ju jantu lhixcani ixʼalhunut ju tuchi navita. 23 Para ju jantucaʼ machakxai u kʼox cava u jantu ju tuchi uputun para ni ixlaquilhtu caʼulh pus talakʼalhin cava ixlacata yuchi ni jantucaʼ cʼatsai u kʼox ni caʼulh u jantu. Pus talakʼalhin ni acnavi tuʼuʼ acsni jantucaʼ icmachakxai ni talakʼalhin cava u jantu.
1 Pus ju quijnanʼan ju palai machakxayau ju ixchivinti Dios tasqʼuini ni lacsni lacsni caʼalhiʼau ju va jantucaʼ kʼox tamachakxai. Jantu va yuchi ju canaviu ju va quinkʼachatʼan quiʼakstuʼan. 2 Pus ju tam quilakʼauʼan ni palai kʼox catsuculh chai palai capulhilacaʼalh ju Cristo ni canaviniyau ju ixkʼachat pus canaviniu. 3 Pus nin yuchi ju Cristo jantu va ixkʼachat isʼakstu ju ixnavi. Alai va uctaxtulh laʼisʼatsucunti tachi ju najun lacaʼatsʼoknut junta najun ixlacata ju Jesucristo. Pus ju yuchi ma junilh ju ixpai ni ma yuchach ju macxcai chivinti ju tajunilh ju ixtajumputun ju ixpai. Ma chunch ju naulh ju Cristo. 4 Pus tachi chun ju ixchivinti Dios ju tsʼokcanta makʼanchich lhitsʼokcalh va quilacataʼan ni capulaniyauch ju kʼox. Chai laʼixchivinti Dios pumapʼaksicanau. Ju chunch lai chʼixau va tuchi makʼalhkʼajnat ju xtaknicanauch laquiʼatsucuntiʼan. Chai pucʼatsayau ni aktsʼiya caʼalinaʼ ju quiʼatsucuntiʼan ju conkʼalhiyanta lactʼiyan. 5 Dios ju quintaxtakniyan ju quintachaputʼan ni laich chʼixauch va tuchi makʼalhkʼajnat ju quintaxtakniyan. Chai isʼakstu Dios ju quintamapʼaksiyan. Chai ictapainini ju yuchi ni va lakatamch catanaviniyan ju miʼatalacpastʼacʼatʼan chai ni chun cajunaʼ tachi ju kʼoxich lhiulai ju Cristo Jesús. 6 Chai ju chunch va lakatamch cajunaʼ ju miʼatalacpastʼacʼatʼan chai minchuxʼan alacnonaʼitʼit ni xakʼaich ju isDios ju quiʼucxtinʼan Jesucristo. Yuchach ju ixpai. 7 Ju Cristo ni tamalakʼavitan ju uxijnan pus vachuʼ ju uxijnan alamalakʼavitʼit ju pumatamin milhiʼuxijnan. Chai ni chunch ju alatʼit pus ju lapanacni catanonaʼ ni xakʼaich ju Dios. 8 Pus ju Jesucristo yuchi lhiquilachilh ju ani lacamunutpaʼ ni va ixʼaʼaktaijuputun ju quintʼaʼisraelitanin. Ju chunch catapucʼatsayaʼ ni vas najun ju Dios chai aktsʼiya muctaxtui tachi ju ixʼakʼalhtasunitach ju makʼaniya quilacpaʼitni quincʼan. 9 Chai vachuʼ yuchi lhiquilachilh ju Cristo ni cataʼaktaijuyan ju Dios laʼixʼamapaininti ju uxijnan ju jantu israelitanin untʼatʼit. Chai ju chunch vachuʼ anonaʼitʼit ni Dios ju xakʼai. Chai ni chun ju anonaʼitʼit pus va uctaxtui tachi ju tsʼokcanta junta ma chani juncan ju Dios: Ni quilanavinitauch lamapainin ji Dios pus yuchi aclhilakʼayayan. Acʼalactʼalakʼayayan ju yuʼunch ju jantu israelitanin tajunita. Chai lacamilhpat acʼalactʼanonaʼ ni xakʼaichʼat ju uxintʼi. 10 Chai ju alacatam chanich ju tsʼokcanta: Ju uxijnan ju jantu israelitanin untʼatʼit ma atʼakʼachʼantʼit ju aktsʼiya ixlapanacni Dios tajunita. 11 Chai ju alacatam chanich vachuʼ nonchokopalai: Tachi chun ju uxijnan ju jantu israelitanin untʼatʼit ma alakʼayatʼit ju Dios. Chai tachi chun ju uxijnan ji lapanacni ma anaʼuntʼit ni va yuchi ju palai xakʼai ju Dios. 12 Vachuʼ ju makʼaniya ixlapanac Dios ju Isaías ixjuncan tsʼoklh ixchivinti Dios. Chai ju yuchi naulh ni ma caʼalinaʼ ju ixpapanti ju makʼaniya ixlapanac Dios ju Isaí ixjuncan. Chai ma yuchi calhitalacasuyach ju ani lacamunutpaʼ ni ma cajunaʼ ixʼucxtinʼan ju yuʼunch ju jantu israelitanin tajunita. Chai ju yuʼunch ma catalhilaksiyach ju yuchi. Ma chunch ju naulh ju Isaías ixlacata ju Cristo. 13 Pus Dios ju quintaʼaktaijuyan ni laich lacaʼikʼalhiyau ni aktsʼiya aquintamakʼalhtaxtuyan. Pus ictapainini ju yuchi ni lhu cataxtakniyan ju minkʼachatʼan chai cataʼaktaijuyan va ixlacaʼatalh ni lhilacʼapʼinatʼit ju Cristo. Cataʼaktaijuyan ni jantu calacʼalh ju miʼalhunutʼan. Pus ju Spiritu Santu na tachapun chai yuchi ju laich catamalacaʼiniyan ixlhichux miʼalhunutʼan ni atʼakʼalhtʼaxtʼuyaʼitʼit. 14 Chai slivasalh iclacaʼi ji quiʼalakʼavin ni lackʼoxin lapanacni untʼatʼit. Chai na lhu mispʼayatʼit ju stavasalanti. Chai yuchi laich lhilamapʼaksiyatʼit ju pumatamin ju uxijnan. 15 Pus mas iccʼatsai ni chunch untʼatʼit para iclaʼatsʼoknuniu ju ani chivinti. Chai jantu xacnajun ni jantu lai actilajuniu tuchi iclajumputunau ni va lai lhitʼalhkʼamantʼit. Pus iclalhiʼatsʼoknunitau ju chunch ji quiʼalakʼavin ni laich aclapumapastʼacʼaniyau ju tuchi iclajuntauch. Laich iclapujunau chunch ni Dios ju xaquixtakni ju ani lhichʼalhcat acsni quinavinilh lamapainin. 16 Dios ju xaquixtakni ju ani lhichʼalhcat ni ixlapanac Jesucristo acva ju milacataʼan ju jantu israelitanin untʼatʼit. Chai ju lhichʼalhcat ju icnavi yuchi ni aclamavasalaniyau ju ixchivinti Dios ixlacata ju Cristo. Pus ju chunch cataʼalinaʼ ju lapanacni ju catalhilacaʼanaʼ ju Jesús sia uxijnan ju jantu israelitanin untʼatʼit. Chai laich aclamakʼaxtʼakʼauch laʼixmacaʼ Dios tachi ju tuʼuʼ lhakʼailaktsʼin. Chai ju Dios na kʼoxich calhiulayaʼ va ixlacata ni talasastʼinitan ju miʼalhunutʼan laʼixtachaput ju Spiritu Santu. 17 Pus ju quitʼin ni ixlapanac Cristo Jesús icjunita pus aktsʼiya lai iclhitakʼayai lacatsʼunin ju tuchi lai xacnavi ni yuchi ju Cristo ju xaquiʼaktaijui. 18 Jantu lai va kʼaya actinaulh ju jantu vasalh icnavita. Va yuchi ju lai acnonaʼ ju quinavinilh ju Cristo. Ju yuchi quiʼaktaijulh ni laich xaclamalacaʼiniyauch ju uxijnan ju jantu israelitanin untʼatʼit. Pus ju uxijnan lhilacʼapʼintʼatʼit ju Cristo acsni kʼasmatʼatʼit ju quinchivinti ju xaclajunau chai acsni laktsʼintʼatʼit ju tuchi xacnavi. 19 Chai laʼixtachaput ju Spiritu Santu lai xacnavi ju kʼai lhamakʼan chai tuʼuʼ ju laich xapʼucʼatsʼayatʼit ni stavasalanti ju tuchi xaclajunau. Pus ixlhilacaputsʼun ju xalacatʼun lakʼachakʼan Jerusalén tus ixlhilacaputsʼun ju xalacatʼun ju lakʼachakʼan Ilírico icʼajunkʼota ju lapanacni ni laich amakʼalhtaxtunun ju Cristo ni jantu cataʼalh ju lacajipi. 20 Aktsʼiya chani xacnaviputun. Xacmasuputun ju ixchivinti Dios ixlacata ju Cristo junta tucaʼ ismispacan ju ixtapakaʼut. Jantu xactailhiʼamputun junta ixtaiʼulata ju apumatam ixlhichʼalhcat ju Dios. 21 Xacnaviputun tachi ju tsʼokcantach laʼixchivinti Dios junta chani najun: Ju jantu tavanan ajuncanta ixlacata ju yuchi ma cajuncanach. Chai ju jantu tavanan takʼasmatʼa ju ixchivinti ma catamachakxayach. Chunch ju tsʼokcanta laʼixchivinti Dios. 22 Pus ni na lhucaʼ alin ju jantucaʼ tamispai ju ixchivinti Dios pus yuchi jantu lai xaclhiʼanacha lalaktsʼinin ju uxijnan mas na paklhu xacʼamputunacha. 23 Para ju chavai icnavikʼota ju quilhichʼalhcat ju ani lacatʼun. Chai na lakalhu cʼata ju xacpastactʼajun ni xacʼamputunacha lalaktsʼinin. 24 Pus ju chavai acsni acʼanaʼ ju xalacatʼun España acsnich ju lai aclalaktsʼintilayau ju lamilakʼachakʼanʼan. Va iclhikʼachamputun lacatsʼunin ni calalaktsʼinkʼoyauch tachi chun ju lhiʼalakʼavin ju lamilakʼachakʼanʼan. Chai iclacasqʼuin ni aquilaʼaktaijuyauch lacatsʼunin acsni acʼananta ju xalacatʼun España. 25 Para pʼulhnan icʼamputun ju lakʼachakʼan Jerusalén. Va icʼalhiʼaniputun lacatsʼunin tumin ju quilhiʼalakʼavinʼan ju amachakʼan anch. 26 Pus ju talhilacaʼanta Cristo ju tatʼajun ju xalacatʼun Macedonia chai ju tatʼajun ju xalacatʼun Acaya na kʼoxich talhiula ni catapusacʼaʼ ju tumin. Va tapuʼaktaijuputun ju sia quilhpatinin ju talhilacaʼanta ju Cristo ju tavilananchalhch ju lakʼachakʼan Jerusalén. 27 Pus ju amachakʼan Macedonia chai ju amachakʼan Acaya vachuʼ jantu israelitanin tajunita. Para na kʼoxich talhiula ni caʼaʼaktaiju ju israelitanin ju tavilanancha lakʼachakʼan Jerusalén ni tanajun ni tachi ju va taʼalhiʼani ju israelitanin ni yuʼunch ju pʼulhnan tajunilh ixchivinti Dios. Chai ni yuʼunchach ju taxtaknilh ixchivinti Dios pus lhijunch ni cataʼaʼaktaijunulhch vachuʼ ju jantu israelitanin. Caʼaʼaktaijucalh ju israelitanin laʼixmaktasqʼuinitʼan ni na quilhpatinin tajunita. 28 Pus acsni acmakʼaxtʼakʼaʼ ju tumin ju lakʼachakʼan Jerusalén pus lanach acʼanach ju xalacatʼun España. Chai acsnich ju actapasatilayanta ju lamilakʼachakʼanʼan. 29 Chai acsni acchaʼananta ju lamilakʼachakʼanʼan iccʼatsai ni cataʼaktaijuyan ju Cristo ni lai palai kʼox atsʼucʼuyaʼitʼit va ixlacata ni aclajunchokoyauch aliʼ ju ixchivinti Dios. 30 Pus ji quiʼalakʼavin iclatapaininiyau. Aquilaʼaktaijuch. Ixlhichux miʼalhunutʼan asqʼuinitʼit ju Dios ju quilacata. Chunch ju alatʼit ni lhilacaʼanau ju Cristo chai ju Spiritu Santu quintaʼaktaijuyan ni lai lamapainiyau. 31 Pus asqʼuinitʼitch ju Dios ni jantu aquintanavinilh tuʼuʼ macxcai ju amachakʼan Judea ju jantucaʼ talhilacaʼanta ju Cristo. Vachuʼ alhitʼapʼaininitʼit ju Dios ixlacataʼan ju yuʼunch ju talhilacaʼanta ju Cristo ju amachakʼan Jerusalén ni catalhikʼachalhch junima tumin ju icʼalhiʼaniputunch. 32 Ju chunch ni calacasqʼuinaʼ ju Dios pus laich lhikʼach aclalakʼantachau. Chai laich acʼastacnananta pantsʼiquis acsni aclalakʼantachau ju uxijnan. 33 Pus Dios ju xtʼakʼa ju kʼox atsucunti. Chai ictapainini ju yuchi ni catatʼatolan ju uxijnan. Vasalh chunch ju iclacasqʼuinch.
1 Iclacasqʼuin ni amispʼatʼit ju Febe ni vachuch quilakʼauʼan junita. Ju yuchi chʼalhcatnan sia yuʼunch ju talhilacaʼanta ju Cristo ju amachakʼan Cencrea. 2 Kʼoxich amaklhtʼaʼitʼit ju yuchi tachi ju lhijun ni vachuʼ lhilacaʼanta ju quiʼucxtinʼan Cristo tachi ju vachuʼ layatʼit ju uxijnan. Chai alhiʼaktʼaiʼutʼitch va tuchi taxtoknich ju camaktasqʼuinilh. Chunch ju alatʼit ni na lhu lapanacni ju aʼaktaijutach vachuʼ ju yuchi chai quiʼaktaijutach vachuʼ ju quitʼin. 3 Amacʼamitʼitch ju Priscila chai ju Aquila. Ju yuʼunch sich quintʼachʼalhcatnin tajunita laʼixlhichʼalhcat ju Cristo Jesús. 4 Ju yuʼunch va lacatsʼuninch ixʼamakniputuncan va ixlacaʼatalh ni xaquintaʼaktaijui. Chai lakʼailaktsʼiuch icʼajuni. Chai jantu va quitʼin ju xacʼajuni lakʼailaktsʼiuch. Para vachuʼ chux ju talhilacaʼantach ju Cristo ju jantu israelitanin tajunita. 5 Vachuʼ amacʼamitʼit ju talhilacaʼanta ju Cristo ju tatakʼaixtʼokʼa ju laʼixchakaʼan ju Priscila chai ju Aquila. Amacʼamitʼitch ju quiʼamigo Epeneto. Yuchi ju pʼulhnan lhilacaʼalh ju Cristo tachi chun ju amachakʼan Acaya. 6 Amacʼamitʼitch ju Malia ju na lhu tachʼalhcatnanitan. 7 Amacʼamitʼitch ju Andrónico chai ju Junias. Ju yuʼunch quintʼaʼamachakʼan tajunita. Chai xacʼalactʼatʼalhnucanta ju yuʼunch. Pus ju aliʼin lapanacni ju amalakachata Dios laʼixlhichʼalhcat vachuʼ tanajun ni na lackʼoxin lapanacni tajunita ju Andrónico chai ju Junias. Pus ju yuʼunch pʼulhnan talhilacaʼalh ju Cristo. Astan ju quitʼin. 8 Amacʼamitʼit ju Amplias ju na icmapaini ni vachuʼ lhilacaʼanta ju quiʼucxtinʼan Jesús. 9 Amacʼamitʼitch ju Urbano. Yuchi ju quintʼachʼalhcatnaʼan laʼixlhichʼalhcat ju Jesús. Vachuʼ amacʼamitʼitch ju Estaquis ju na icmapaini. 10 Amacʼamitʼitch ju Apeles. Ju yuchi vasalh talacasuta ni ixlhichux ixʼalhunut ju lhilacaʼanta ju Cristo. Amacʼamitʼitch ju tatanumanalh laʼixchakaʼ ju Aristóbulo. 11 Amacʼamitʼitch ju Herodión. Ju yuchi quintʼaʼamachivinti junita. Amacʼamitʼitch ju tatanumanalh laʼixchakaʼ ju Narciso ju vachuʼ talhilacaʼanta ju quiʼucxtinʼan Jesús. 12 Amacʼamitʼit ju Trifena chai ju Trifosa ju tachʼalhcatnan laʼixlhichʼalhcat ju quiʼucxtinʼan Jesús. Amacʼamitʼitch ju quilhilakʼauʼan Pérsida ju na mapainiyau. Ju yuchi na lhu chʼalhcatnanta ixlacata ju quiʼucxtinʼan Jesús. 13 Amacʼamitʼitch ju Rufo. Slivasalh cʼatsacan ni lhilacaʼanta ju quiʼucxtinʼan Jesús ju yuchi. Vachuʼ amacʼamitʼitch ju ixnati. Ju yuchi tachi ju va quinati junita vachuʼ. 14 Amacʼamitʼitch ju Asíncrito chai ju Flegonte chai ju Hermas chai ju Patrobas chai ju Hermes chai tachi chun ju aliʼinch ju quiʼalakʼavinʼan laʼixmacni Cristo ju alactʼavi ju yuʼunch. 15 Amacʼamitʼit ju Filólogo chai ju Julia chai ju Nereo chaich ju ixlakʼauch atsiʼ chaich ju Olimpas chai tachi chun ju aliʼin ju talhilacaʼanta ju Cristo ju alactʼavi ju yuʼunch. 16 Alamacʼamitʼit ju pumatamin milhiʼuxijnan lacaʼamapaininti. Tamacʼamiyanch tachi chun ju talhilacaʼanta ju Cristo ju lacatam lacatam tavilanancha. 17 Chai iclatapaininiyau ji quiʼalakʼavin. Alaccʼatsʼanantʼit ju ixlacata ju va taʼamaktalhkʼamanan chai va ixlacata ni jantu kʼox ju isʼatsucuntiʼan va tasastucputun ju ixlhichʼalhcat ju Dios. Ju yuʼunch jantu chun talai tachi ju najun lacaʼatalaninti ju lanitʼatʼit ju uxijnan. Pus amacʼaʼuntʼit ju yuʼunch. 18 Ju yuʼunch jantu slivasalh ni catanaviniputulh ju ixkʼachat ju quiʼucxtinʼan Jesucristo. Va ixkʼachat isʼakstuʼan ju tanavi. Chai ju ixchivintiʼan tachi ju na va kʼoxich ju tanajun chai tachi ju va vasalh ju tanajun. Para va tapuʼokxchokʼoi ju jantucaʼ kʼox tamispai ju stavasalanti. 19 Para tachi chun ju lapanacni tacʼatsai ni qʼuiclacʼaʼiyatʼitch ju ixchivinti Dios ju uxijnan. Pus na iclhikʼachanch ni chun ju tacʼatsai ju lapanacni. Chai iclacasqʼuinch ni yuchi ju alhalaccʼatsʼanantʼit ju kʼox chai atʼalhonitʼit ju macxcai atsucunti. 20 Pus Dios ju lai xtʼakʼa ju kʼox atsucunti. Chai ju yuchi vatsʼalhti catʼalalhajayaʼ ju Satanás ju milacataʼan. Chai ictapainini ju Dios ni catanaviniyan lamapainin ju quiʼucxtinʼan Jesucristo. 21 Tamacʼamiyan ju Timoteo ju quintʼachʼalhcatnaʼ. Vachuʼ tamacʼamiyan ju Lucio chai ju Jasón chai ju Sosípater. Ju yuʼunch quintʼaʼamachivinti tajunita. 22 Pus ju quitʼin icTercio. Quitʼin ju icʼatsʼoknunilh ju Pablo ju ani alhiqui. Vachuʼ iclamacʼamiyau laʼixtapakaʼut ju quiʼucxtinʼan Jesús. 23 Tamacʼamiyan ju Gayo. Laʼixchakaʼ ictʼajun ju chavai chai anich ju tatakʼaixtʼokʼa ju talhilacaʼanta ju Cristo. Vachuʼ tamacʼamiyan ju Erasto ju ixlhistacnaʼ tumin ju lakʼachakʼan Corinto. Vachuʼ tamacʼamiyan ju Cuarto ju quilhilakʼauʼan. 24 Ictapainini ju quiʼucxtinʼan Jesucristo ni catanaviniyan lamapainin minchuxʼan ju uxijnan. Vasalh chunch iclacasqʼuin ni catanaviniyan. 25 Chach lakʼayacalh ju Dios. Yuchach ju lai taʼaktaijuyan ni ixlhichux miʼalhunutʼan ju alhilacʼapʼitʼitch ju Jesucristo tachi ju najun lacachivinti junta najun ixlacata yuchi. Yuchach ju iclajuntauch ju uxijnan. Chai ju ani chivinti ixlacata ju Jesucristo malacasucantach ju chavai mas jantu lai ixtamachakxai ju lapanacni ju ixtatʼajun makʼanch. 26 Pus ju Dios jonkʼalhitach. Chai yuchach ju lacasqʼuilh ni camasucalh ju chavai ju chivinti ixlacata ju Cristo. Chai yuchach ju ixtalhaʼatsʼoknunta ju makʼaniya ixlapanacni Dios. Chai ju chavai ju chivinti ixlacata Cristo ajunkʼota tachi chun ju lapanacni. Ju chunch va tichi chavaich laich cataquiclacaʼinilh ixchivinti Dios chai catalhilacaʼalh ju Jesucristo. 27 Va yuchi ju Dios ju mispakʼojui tachi chun ju taxtokni. Chach lakʼayacalh ju yuchi tus va tavananch va ixlacata ju quiʼucxtinʼan Jesucristo. Vasalh chunch iclacasqʼuin ni canavicalh.
1 Ju quitʼin icPablo. Pus ju Dios naulh ni ixtamalakachan acva ju Jesucristo. Chai yuchi ju quilhitʼasanilh laʼixlhichʼalhcat. Pus ju quitʼin chai pumatam ju quilhilakʼau ju Sóstenes juncan iclaʼatsʼoknuniyau ju ani alhiqui. 2 Va iclamacʼamiyau ju uxijnan ju vilhchitʼit ju lakʼachakʼan Corinto ju lhilacʼapʼinatʼit ju Cristo. Pus ju Cristo Jesús taxacanitan ju miʼalhunutʼan acsni lhilacʼapʼitʼit ju yuchi. Chai Dios ju tasacxtun ni ixlapanacni aʼunaʼitʼit. Vachuʼ icʼamacʼamiyau tachi chun ju talhilacaʼantach ju Jesucristo mas vanta anchach catatolhcha. Ju Jesucristo vachuʼ kʼai ixʼucxtinʼan junita ju yuʼunch tachi ju quijnanʼan. 3 Ictapainini ju quimpaiʼan Dios chai ju quiʼucxtinʼan Jesucristo ni catanaviniyan lamapainin chai cataʼaktaijuyan ni jantu calacʼalh ju miʼalhunutʼan. 4 Va tachi icjuni lakʼailaktsʼiuch ju quimpaiʼan Dios ju milacataʼan ni xatanaviniyan lamapainin acsni tavanan lhilacʼapʼitʼit ju Jesucristo. 5 Chai ni lhilacʼapʼinatʼit ju Cristo pus Dios taxtaknitan ju miʼatsucuntiʼan ju palai kʼox. Ju chavai na lai mavasalayatʼit ju ixchivinti Dios. Chai na lai machʼakxayatʼit. 6 Chai ni tam xajun ju miʼatsucuntiʼan pus putasui ni stavasalanti ju chivinti ju icnonau ixlacata ju Jesús. 7 Chai ni xatanaviniyan lamapainin ju Dios pus jantu tuʼuʼ tamakʼancʼacxniyan tachi chun ju lhakʼailaktsʼin ju xtʼakʼa ju Dios. Chai pʼacxantʼayatʼitcaʼ ju quiʼucxtinʼan Jesucristo tus acsni caminaʼ. 8 Pus Dios ju cataxtakniyan vachuʼ ju mintachaputʼan ni laich alhilacʼapʼinkʼalhiyaʼitʼit ju Cristo tus laʼixʼaclanti ju miʼatsucuntiʼan. Ju chunch jantuch lai aʼulanicʼanaʼitʼit ju mintalakʼalhinʼan acsni tavanan caminchokoyaʼ ju Jesucristo. 9 Ju Dios muctaxtui ju ixchivinti. Chai yuchach ju tatʼasanitan ni kʼox ixʼamigojnich aʼunaʼitʼit ju Jesucristo. Ju yuchi istsʼalh Dios junita chai vachuʼ quiʼucxtinʼan junita. 10 Pus iclatapaininiyau ji quiʼalakʼavin ni vachuʼ lhilacʼapʼinatʼit ju quiʼucxtinʼan Jesucristo. Pus tachi minchuxʼan va lakatamch aʼuntʼit. Jantu quilhmactʼui quilhmactʼutu aʼuntʼit. Va chʼanxtam aʼuntʼit ju lamintacʼatsanʼan. Chai va lakatamch taxtokni ju alhilaksitʼit. 11 Iclapujunau chunch ji quiʼalakʼavin ni quintajunilh ju tavilanancha laʼixchakaʼ ju Cloé ni va laclakʼaʼitʼit ju uxijnan. 12 Ju aliʼin lamilhiʼuxijnan ma tanajun ni quintachʼakʼokʼai ju quitʼin. Chai ju aliʼin ma tanajun ni yuchi ju Apolos ju tachʼakʼokʼai. Chai ju aliʼin ma tanajun ni ma yuchi ju Pitaluʼ ju tachʼakʼokʼai. Chai ju aliʼin ma tanajun ni yuchi ju Cristo ju tachʼakʼokʼai. 13 Para ja na va pumalhu alin ju Cristo. Ja quitʼin ju xacmaquilhtacanta ju lacacurus ixlacata ju mintalakʼalhinʼan. Ja laquintapakaʼut ju lhimakpʼaxacʼantʼatʼit. 14 Icxtakni lakʼailaktsʼiuch ju Dios ni jantu xamatiʼ ju uxijnan ju icmakpaxata. Va yuchi ju juncan Crispo chai ju juncan Gayo. 15 Ju chunch jantu lai xamatiʼ canonaʼ ni makpʼaxacʼantʼatʼit laquintapakaʼut. 16 Chai vachuʼ icʼamakpaxata ju yuʼunch ju ixtatanumanalh laʼixchakaʼ ju Estéfanas. Para jantu icpastʼacʼa ni caʼalilh apumatam ju acmakpaxa. 17 Jantiyuʼ ju quilhimalakachatachilh ju Cristo ni va acʼamakpaxanalh. Ju yuchi quimalakachatachilh ni acmasu ju chivinti junta najun ta yu laich takʼalhtaxtucan. Para ma jantu acnaulh laca tuʼuʼ cʼusi chivinti tachi ju tachivinin ju atalaninin. Ma va vas acnaulh ni nilh ju Cristo ju quilacataʼan. Ju chunch cacʼatsacanach ni na tachapun ju ani chivinti chai va yuchi ju lai amakʼalhtaxtunun. 18 Pus ju quijnan icʼajuniu ju lapanacni ni quinichilh ju Cristo ju quilacataʼan. Para ju lapanacni ju aktsʼiya catatsʼankʼakʼalhiyaʼ ni jantu talhilacaʼamputun ju Cristo pus tanajun ni va lhilakachapuʼ ju anuʼ chivinti. Para ju quijnanʼan ju takʼalhtaxtutauch cʼatsayau ni va yuchach ju chivinti ju tachapun ni va yuchi ju lai aquintamakʼalhtaxtuyan. 19 Chunch iclapujunau ni jantu lhitapalai ni va kʼaya aclhilaksi ju va ixʼatalaninti ju va lapanac ni chani ma najun ju Dios junta tsʼokcanta ju ixchivinti: Ju yuchi ma calakʼalhiniyaʼ ju ixchivintiʼan ju lapanacni ju tanajun ni na atalaninin tajunita. Chai ma jantu tuʼuʼ ixtapalhni canaviniyaʼ ixʼatalacpastʼacʼatʼan ju yuʼunch. Chunch ma najun junta tsʼokcanta ju ixchivinti. 20 Pus ju chavai tas anchach ju alin ju lapanacni ju laich tanajun ni na taʼacʼatsananta. Tas anchach ju alin ju laich tanajun ni na tamispaich ju ixlhamapʼaksin ju Moisés. Tas anchach ju alin ju laich tanajun ni tacʼatsai tamalhch ju stavasalanti chai tamalhch ju jantu. Pus matiʼ ju lapanacni ju vasalh chunch tajunita ni Dios ju malacasuta ni jantu lhitapalai ju xaʼatalaninti ju va lhilapanac. 21 Ju Dios cʼatsai tuchi ju navi. Chai ju yuchi jantu lacasqʼuilh ni va laʼixʼatalanintiʼan isʼakstuʼan lai catalhilacaʼalh ju yuchi ju lapanacni. Alai na kʼox xalhiulai ju Dios ni catatakʼalhtaxtulh tachi chun ju takʼasmatʼa ju ixchivinti chai talhilacaʼanta ju Cristo. Ju yuʼunch talacaʼich ju anuʼ chivinti mas tanajun ju aliʼin ni va lakachapu chivinti. 22 Ju quintʼaʼisraelitanin tanajun ni va lakachapu chivinti ju chunch. Chai chunch tapunajun ni na pʼas tasqʼuini ju Dios ju tuʼuʼ ju laich catalaktsʼilh chai catapucʼatsa ju stavasalanti. Chai vana va chun nonatʼit ju uxijnan ju jantu israelitanin untʼatʼit. Chai ju uxijnan pʼunonatʼit chunch ni jantu lai lacʼaʼiyatʼit tuʼuʼ ju jantu lai machʼakxayatʼit. 23 Para ju quijnan icʼajunau ju lapanacni ni ixmaquilhtacanta ju Cristo ixlacataʼan. Pus ju quintʼaʼisraelitanin tanajun ni lana jantu kʼox ju ani chivinti. Chai ju uxijnan ju jantu israelitanin untʼatʼit va lhitsʼiʼinatʼit. 24 Para tachi chun ju asacxtuta ju Dios u quintʼaʼisraelitanin u jantu si tamachakxakʼojui ni yuchach ju Cristo ju pacxanta ixtachaput ju Dios chai ixtacʼatsan. 25 Pus ju tasui tachi ju va ixlakachaput Dios yuchi ju palai kʼox atalaninti. Palai jantu ju va xaʼatalaninti lhilapanac. Chai junta tasui tachi ju va jantu tachapun ju Dios anchach ju palai alin ixtachaput. Jantu chun tachi ju ixtachaput ju va lhilapanac. 26 Pus alaktsʼintʼitch ji quiʼalakʼavin. Tachi chun ju uxijnan ju tasacxtutan ju Dios na lacatsʼunin ju lamilhiʼuxijnan ju lai catanaulh ju lapanacni ni atalaninin untʼatʼit. Na lacatsʼunin ju lamilhiʼuxijnan ju lai cajunicalh ni xalackʼajin untʼatʼit laʼixʼucxlacapuʼan ju mintʼalapanacni. Na lacatsʼunin ju lamilhiʼuxijnan ju laich calhimispacalh ni jantu va xamatiʼ ju mimpaiʼan. 27 Alai yuʼunch ju asacxtulh ju Dios ju alhimispacan tachi ju va tonto lapanacni. Yuchi alhisacxtulh ju yuʼunch ni va apumamaxani ju xaʼatalaninin ju ani lacamunutpaʼ. Chai yuʼunch ju asacxtulh ju Dios ju jantu tuʼuʼ ixtapalhniʼan ixʼalhiulacan laʼixmacniʼan ju ixtʼalapanacni. Chunch ju lalh ni camamaxanilh ju na xalackʼajin tajunita. 28 Chai ju Dios asacxtulh ju yuʼunch ju jantu xalackʼajin ju ani lacamunutpaʼ chai ju jantu tuʼuʼ alhiulacanta chai ju lana jantu ixʼalaktsʼimputuncan. Chai alhisacxtulh ju yuʼunch ni caputasuyaʼ ni jantu lhitapalai ni na kʼai accʼatsa. 29 Chai ju chunch jantu lai xamatiʼ kʼai cacʼatsa laʼixmacni Dios. 30 Isʼakstu ju Dios xatanaviyan ni va lakatam tʼaʼuntʼatʼit ju Cristo Jesús. Chai ni va xaquintamasuniputunan ju kʼai ixtacʼatsan ju Dios pus yuchi lhimalakachatachilh ju Jesús ju ani. Ju chunch lai salaka jun ju quiʼatsucuntiʼan laʼixmacni yuchi chai lai aquintachakʼaniyan ju quiʼalhunutʼan chai lai quintamalakxtuyan laʼixʼacʼalhni. 31 Chunch ju navilh ju Dios ni caʼuctaxtulh tachi ju najun junta tsʼokcanta junta chani najun: “Ni xamatiʼ lhitakʼayaputun tuʼuʼ pus ma alai chach lakʼaya ju Dios”.
1 Pus ji quiʼalakʼavin acsni iclaquilakquilachau ju uxijnan xaclajunau ju ixchivinti Dios. Para jantu xaclajunau laca tuʼuʼ cʼusi chivinti nin laʼixʼatalaninti ju va lhilapanac. 2 Chunch xaclai ni xacnajunta ni lana jantu tuʼuʼ atumpa ju aclajunau ju uxijnan. Va yuchi ni aclajunau ni tamaquilhtalh lacacurus ju Jesucristo ju quilacataʼan. 3 Chai acsni xaclatʼavilau ju uxijnan lana jantu xaclhilaksichokocan quiʼakstu. Alai na xactalhanan chai na xacʼaxqʼuipʼipʼitnin. 4 Chai acsni xaclajunau tuʼuʼ chai acsni xaclamasuniyau tuʼuʼ jantu tavanan xaclamalacaʼiniputunau laca tuʼuʼ cʼus chivinti tachi ju ixchivinti tam atalaniniʼ. Alai istasui ixtachaput ju Dios laquinchivinti chai yuchi ju Spiritu Santu ju xaquiʼaktaijui. 5 Ju chunch jantu va ixlacata ixʼatalaninti tam lapanac ju alacʼaʼiyaʼitʼit. Alai alacʼaʼiyaʼitʼit ixchivinti Dios ni alaktsʼinaʼitʼit ixtachaput ju Dios. 6 Pus ju vasalh talhilacaʼanta ju Cristo icʼajunau ju vasalh atalaninti. Para jantiyuʼ ju ixʼatalaninti ju va lhilapanac. Nin ixʼanuʼan cava ju xalackʼajin ju ani lacamunutpaʼ. Pus cachinaʼ avilhchan acsni jantu vana xalackʼajin catajunaʼ chai cacapcanaʼ ju ixchivintiʼan ju ixtanajun. 7 Pus ju chivinti ju icnajun yuchi ju kʼox ixʼatalacpastʼacʼat ju Dios junta najun ni aquintaxtakniyan ju quiʼatsucuntiʼan ju jonkʼalhita. Chunch ispastacta ju Dios mas tucaʼ ixnavican ju lacamunutpaʼ. Para jantu sai amavasalanicalh ju lapanacni. 8 Para ju xalackʼajin ju ani lacamunutpaʼ jantu tamachakxai ju anuʼ ju ispastacta ju Dios. Ni caʼixtamachakxa pus jantu tavanan ixtamaquilhta lacacurus ju slivasalh cʼus lapanac junita. Yuchi ju Jesús. 9 Pus icnajun tachi ju tsʼokcanta junta chani najun: Ju Dios ma lakʼoxita ju tuʼuʼ ju slivasalh kʼox ixlacataʼan ju tamapaini ju yuchi. Ju va tam lapanac ma jantu tavanan laktsʼinta tuʼuʼ ju ixtʼachunch cava nin cakʼasmatlh nin capastaclh ni caʼalilh ju tuʼuʼ ju chunch. Chunch ju najun junta tsʼokcanta. 10 Para ju Dios quintaxtaknitan ju Spiritu Santu chai yuchach ju quintamamachakxaniyan ju ani taxtokni. Pus ju Spiritu Santu mispakʼojui tachi chun ju taxtokni. Mispakʼojui chux ju ixʼatalacpastʼacʼat ju Dios. 11 Jantu xamatiʼ lai cʼatsani tuchi pastʼacʼach ju akʼantam lapanac. Va isʼakstu ju lapanac cʼatsai tuchi ju pastʼacʼa laʼixʼalhunut. Pus vana va chunch jantu lai xamatiʼ cʼatsani ju ixʼatalacpastʼacʼat ju Dios. Va yuchi ju Spiritu Santu. 12 Pus ju quijnanʼan jantiyuʼ ju xaʼatalaninti va lhilapanac ju pumachakxayau ju ixtaxtokni Dios. Para ju Dios quintaxtaknitan ju Spiritu Santu chai yuchach ju quintamamachakxaniyan ju tuchi quintalhikʼailaktsʼintan ju Dios. 13 Chai ju tuchi quintamamachakxaniyan ju Spiritu Santu pus yuchach ju icnonau. Jantiyuʼ ju icnonau ju iclanitau ju va laquiʼakstu quincʼan. Pus acsni iclajunau ju ixtaxtokni Dios ju uxijnan ju pʼacxantʼatʼit ju Spiritu Santu lamiʼalhunutʼan pus va yuchi iclajunau ju quintamamachakxanitanch ju Spiritu Santu. 14 Pus ju tam lapanac ju jantucaʼ lhilacaʼanta ju Jesús jantu lacaʼiputun ju ixchivinti ju Spiritu Santu. Ju yuchi va lakachapu chivinti lhiulai. Chai jantucaʼ lai catimachakxa ju yuchi ni va yuchi ju Spiritu Santu ju amamachakxaninin ju ixtaxtokni Dios. 15 Para ju tam lapanac ju pacxanta ju Spiritu Santu laʼixʼalhunut laich machakxai ixchivinti Dios chai lai sacxtui ju kʼox ju canavi. Chai ju jantucaʼ lhilacaʼanta ju Cristo jantu lai machakxani ju isʼatsucunti ju ixtʼalapanac ju lhilacaʼanta ju Cristo. 16 Pus chani ju tsʼokcanta laʼixchivinti Dios: “Tis chavaich ju lai camachakxanilh ju ixʼatalacpastʼacʼat ju Dios ni laich canaulh ni camalaniyaʼ tuʼuʼ ju yuchi”. Chunch ju najun laʼixchivinti Dios. Para ju quijnanʼan ju pacxantauch ju Spiritu Santu machakxayau ju ixʼatalacpastʼacʼat ju Cristo.
1 Pus ji quiʼalakʼavin acsni xaclatʼavilau jantu lai xaclalhixakʼalayau tachi ju xakʼalacan ju makʼanch talhitamakaʼuta ixchivinti Dios. Va chunch xaclalhixakʼalayau tachi ju yuʼunch ju va ancaʼ talhilacaʼanta ju Cristo. 2 Xaclanaviyau tachi ju tam askʼatʼa ju jantucaʼ lai ui ju lhivai. Va lechecaʼ ju kʼotʼa. Pus vana va chun ju uxijnan. Va xaclajunau ixtaxtokni Dios ju jantu na xcai machakxacan ni jantucaʼ lai ixmachʼakxayatʼit ju palai lhixcai. Chai mas tus chavai jantucaʼ lai machʼakxayatʼit. 3 Tucaʼ lai machʼakxayatʼit ju palai lhixcai ni jantucaʼ kʼox macʼontʼatʼit tachi ju talai ju jantucaʼ talhilacaʼanta ju Jesús. Pus alincaʼ ju lamilhiʼuxijnan ju taʼalhacchaʼanan chai ju talaclakʼaji chai ju jantu va lakatam tanavita ju ixʼatalacpastʼacʼatʼan. Pus ni chunch ju layatʼit pus lana tasui ni vanach tʼonatʼitcaʼ tachi ju tatsucui ju jantucaʼ talhilacaʼanta ju Jesús. 4 Pus ju pumatam lamilhiʼuxijnan najun ni ma quitʼin ju quinchʼakʼokʼai. Chai ju apumatam najun ni ma yuchi ju Apolos ju chʼakʼokʼai. Pus ni chunch ju layatʼit pus va naviyatʼit tachi ju talai ju jantucaʼ talhilacaʼanta ju Jesús. 5 Pus tis quintalakxtuch. Tis ixtalakxtuch ju Apolos. Ju quijnan va ixlapanacni Dios icjuntau. Chai va xaclajunau ixchivinti Dios ni lai xalhilacʼapʼinatʼit ju Cristo. Pus icnaviyau ju lhichʼalhcat ju xaquintaxtakniyan ju Dios ju pumatamin ju quijnan. 6 Quitʼin ju pʼulhnan iclajuniu ju ixchivinti Dios chai ju Apolos taʼaktaijun ni laich palai xamachʼakxayatʼit ju ixchivinti Dios. Pus tachi ju va jun icchʼantach ju chivinti chai tachi ju va jun tikʼavalh ju achʼananti ju Apolos. Para isʼakstu ju Dios ju taʼaktaijutan ni laich xalhilacʼapʼinatʼit ju Cristo chai lai palai palai lhilaksiyatʼit. 7 Pus ju chunch va nomputun ni jantu tuʼuʼ ixtalakxtu ju najun ixchivinti Dios. Nin yuchi ju mavasalai ju ixchivinti. Va yuchi ju Dios ju lai lhilaksican ni yuchi ju quintaʼaktaijuyan ni lai lhilacaʼanau ju Cristo chai lai palai palai lhilaksiyau ju yuchi. 8 Pus ju najun ixchivinti Dios chai ju mavasalai ju ixchivinti vaklhtam chun tajunita. Chai sia sia caʼaxtaknicanaʼ ju ixtalhajaʼan tachi ju tachʼalhcatnanta. 9 Ju quijnan va kʼaixtam icchʼalhcatnanau laʼixlhichʼalhcat Dios. Chai ju uxijnan ju lhilacʼapʼintʼatʼit ju Cristo tachi ju tuʼuʼ puʼachʼananti untʼatʼit junta icchʼalhcatnanau. U vachuʼ lai acnaulh ni chunch untʼatʼit tachi ju tuʼuʼ kʼai chakaʼ ju tʼajun yonaʼ ju Dios. 10 Pus ju quitʼin chunch icjunita tachi ju xaʼucxtin ju na mispai ixyajuca chakaʼ. Pus quitʼin acsni tavanan iclajuniu ixchivinti Dios pus tachi ju va icpokʼajta ju lacatʼun chai icyaulh ju xatantun ni yuchi ju lhichʼalhcat ju xaquixtakni ju Dios. Chai ju astan ni tamilh ju aliʼin ju tamavasalanin ju chivinti pus tachi ju va tatailhiʼan lacatsʼunin junta xacmamactata ixyajuca ju chakaʼ. Para pumatamin pumatamin calaktsʼilh tuchi ju capulaputankʼayayaʼ ju ani chakaʼ. 11 Junta yocan ju tuʼuʼ chakaʼ jantu lai lacatʼui machʼantacan. Pus vana va chun ju quimaklacaʼanitʼan. Jantu lai lakatʼui cativa. Va pumatamch ju lai lhilacaʼanau. Va yuchi ju Jesucristo. 12 Pus yuchi ju Jesucristo ju puchʼantayau ni yuchi ju maklacaʼaniyau. Chai ju aliʼin ju tamavasalai ixchivinti Dios tachi ju va talaputankʼayaputun ixchakaʼ Dios. Para tachi chun ju yuʼunch tasqʼuini ni kʼox catanavi cuenta tuchi catalhilaputankʼayayach. Ju aliʼin ni sok tamavasalai pus tachi ju va talhilaputankʼayai laca tuʼuʼ oro chai laca tuʼuʼ plata chai laca tuʼuʼ chiux ju na laklhu ixtapalh. Para ju aliʼin ju jantu sok tamavasalai pus tachi ju va talhilaputankʼayaputun ju ixchakaʼ Dios laca tuʼuʼ qʼuiu u laca tuʼuʼ achʼitin u laca tuʼuʼ xaxixni atsʼin. 13 Para acsni cachinaʼ ju avilhchan acsni camakʼosaspitcanach ju lapanacni pus acsnich ju catasuyaʼ ju tuchi lhilaputankʼayalhch ju ixchakaʼ Dios ju pumatamin ju mavasalalh ixchivinti Dios. Pus ju ixlhichʼalhcat ju pumatamin calaktsʼintanucanach laca tuʼuʼ jipi. Chai caputasuyach ju ixlhichʼalhcat ju kʼantam kʼantam u kʼox ju navita u jantu. 14 Chai acsni tavanan calaktsʼintanucanaʼ laca tuʼuʼ jipi ixlhichʼalhcat ju kʼantam kʼantam pus ni xamatiʼ kʼox caxajanta pus camaklhtayananaʼ ju ixtalhaja. 15 Para ni va calhcukʼoyach ju tuchi xalhilaputankʼayai ju ixchakaʼ Dios pus matich cajunaʼ ju ixtalhaja. Va yuchi ni catakʼalhtaxtuyach ju yuchi. Para chunch cajunaʼ tachi tam xamatiʼ ju xcayama takʼalhtaxtui acsni tʼajun lhcunuʼ ju ixchakaʼ. 16 Ja va jantu cʼatsʼayatʼit ni tachi ixpujitat Dios untʼatʼit minchuxʼan ju uxijnan. Ja jantu cʼatsʼayatʼit ni tʼajun ju Spiritu Santu lamiʼalhunutʼan ju pumatamin ju uxijnan. 17 Tachi ju iclajuntau. Ju uxijnan tachi ixpujitat Dios untʼatʼit minchuxʼan ju uxijnan. Chai ju ixpujitat Dios na salaka. Pus ni xamatiʼ catalakʼalhiniputunan ju miʼatalacpastʼacʼatʼan ni tajunan ju chivinti ju jantu sok pus Dios ju camamakʼalhkʼajnikʼalhiyaʼ. 18 Tun xamatiʼ ju milhiʼuxijnan cataʼokxchokʼolh isʼakstu. Ni alin ju milhiʼuxijnan ju na atalaniniʼ calhitalacasuputulh ju ani lacamunutpaʼ pus tasqʼuini ni cacʼatsa ni jantu tuʼuʼ lhitapalai ju xaʼatalaninti ju ani lacamunutpaʼ. Ju chunch laich camispayaʼ ju atalaninti ju istavasalanti ju xtʼakʼa ju Dios. 19 Pus ju xaʼatalaninti ju va lhilapanac jantu tuʼuʼ lhiulai ju Dios. Tasui ni chunchach ju lhiulai ju Dios ni chanich ju tsʼokcanta laʼixchivinti junta chani najun: “Ju Dios ma calacasqʼuinach ni catapukʼalhkʼosaʼ ixchivintiʼan isʼakstuʼan ju atalaninin”. Chunch ma najun ju Dios. 20 Chai ju alacatam junta tsʼokcanta ma chani najun ju Dios: “Ju yuchi ma amispanikʼojui ju ixʼatalacpastʼacʼatʼan ju tanajun ni atalaninin tajunita. Chai ma cʼatsai ni jantu lhitapalai ju ixʼatalanintiʼan ju yuʼunch”. Chunch ma najun ju Dios. 21 Tun va alakʼayatʼit ju tam mintʼalapanacʼan ni laich anaʼuntʼit ni yuchach ju achʼakʼokʼatʼit. Jantu chun alatʼit ni taxtaknikʼotan ju Dios tachi chun ju taxtokni. 22 Ju quitʼin chai ju Apolos chai ju Pitaluʼ va milapanacni icjuntau. Chai ju Dios taxtaknitan tachi chun ju taxtokni ju alin ju ani lacamunutpaʼ ni laich cataʼaktaijuyan. Pus ni lakʼaʼi ju Dios ni tʼonatʼitcaʼ u ni aniyaʼitʼit pus ju Dios chunch navi ni va pastʼacʼa ju kʼox ju milacataʼan. Chai vana va chun pastʼacʼa ixlacata ju tuchi tʼajun tapasanaʼ ju chavai lamiʼatsucuntiʼan chai ju tuchi catapasayaʼ astan. 23 Chai ju uxijnan ixʼanuʼ Cristo untʼatʼit. Chai ju Cristo ixʼanuch Dios junita.
1 Tachi chun ju uxijnan acʼatsʼatʼit ni va ixlapanacni Cristo icjuntau. Va icmavasalayau ju ixchivinti Dios ju jantu lai ixmachakxacan ju makʼanchich. 2 Chai tachi chun ju mavasalai ju ixchivinti Dios tasqʼuini ni lai calhilaksicalh. 3 Para ju quitʼin jantu icnavi cuenta tuchʼi nonatʼit ju quilacata u tuchi tanajun ju aliʼin. Nin quiʼakstu quitʼin jantu lai actinaulh ni icnavita ju kʼox u jantu. 4 Mas tachi ju va sok icʼanta iclhiulai para jantu lai vas actinaulh ni chunch ju najun ju Dios u jantu. Va yuchi isʼakstu ju Cristo ju lai canaulh ni icnavi ju kʼox u jantu. 5 Pus ni va yuchi ju Cristo ju lai najun ni kʼox ju navicanta tuʼuʼ u jantu pus jantucaʼ lai xamatiʼ catinaulh ni kʼox u jantu ju tuchi navi ju akʼantam. Jantucaʼ lai chun catinaulh ni jantucaʼ chin ju anuʼ avilhchan acsni caminaʼ ju quiʼucxtinʼan Jesús. Ju acsnich ju yuchi camalacasukʼoyach ta yu cʼatsancan laquiʼalhunutʼan chai tijuch ju xapastʼacʼau laquiʼalhunutʼan. Chai ju acsnich ni cʼatsai ju Dios tuchi xanavi ju kʼantam kʼantam pus calakʼayayaʼ ju pumatamin tachi ju lhijunch. 6 Pus ji quiʼalakʼavin iclhichivininta ju quiʼatsucunti chai isʼatsucunti ju Apolos ni lai apʼumachʼakxatʼit ju tuchi xaclajumputunau. Ju chunch lai atsʼucʼuyaʼitʼit tachi ju najun laʼixchivinti Dios ju tsʼokcanta. Vachuʼ jantu alhitʼakʼayatʼit ni chʼakʼokʼayatʼit ju pumatam chai jantu alhixcʼaʼitʼit ju va akʼantam tachʼakʼokʼai. 7 Pus tajuch ni va nonatʼit ni palai lackʼoxin lapanacni untʼatʼit. Palai jantu ju aliʼin. Pus lana jantuʼ tuʼuʼ alin ju lamiʼatsucuntiʼan ju jantu va axtʼaknicʼantʼatʼit. Chai ni va xtʼaknicʼantʼatʼit tʼas ni va lhitʼakʼayapʼalatʼit. Ju chunch tachi ju va jantu va xtʼaknicʼantʼatʼit. 8 Ju uxijnan nonatʼit ni makʼalinin untʼatʼit ju chavai chai jantu tuʼuʼ tacʼacxniyan. Mas ca jantu vasalh. Chai nonatʼit ni kʼai ucxtinin untʼatʼit. Mas ca jantu vasalh. Chai nonatʼit ni quilapuʼinitauch. Pus vak tachi kʼox ixva ni vasalh kʼai ucxtinin ixʼuntʼit. Ju chunch laich vachuʼ aclatʼataʼucxtiniyauch ju quijnan. 9 Pus ju quitʼin iclhiulai ni quintamalacasutan ju Dios tachi ju va jantu tuʼuʼ quintapalhni quincʼan ju ixtamalakachan icjuntau. Icʼulhtucantauch tachi ju lapanacni ju amucʼanicanta ixʼanintiʼan va ixlacata ni taʼalactuʼununta. Ju lapanacni ju ani lacamunutpaʼ chai ju anquilhnin va quintalhalakastʼananan. 10 Ju lapanacni quintalaktsʼinan tachi ju va tontojni icjuntau va ixlacata ni icnonau ixchivinti ju Cristo. Para ju uxijnan nonatʼit ni palai na machʼakxayatʼit ixchivinti Cristo. Nonatʼit ni palai lhilaksiyatʼit ju Cristo ju uxijnan. Ma palai jantu ju quijnan. Nonatʼit ni tachi ju va xalackʼajin untʼatʼit para ju quijnan ma tachi ju va amacxtalh iclaktsʼincanauch. 11 Tus chavai na iclacchavanau. Chai na icquicxixau. Chai matich ju quimpumpuʼ quincʼan. Chai iclakanekmacanauch ju quijnan. Chai matich junta lai acnaulh ni quinchakaʼ quincʼan junita. 12 Chai ju quijnan na icxkʼopʼauch acsni icchʼalhcatnanchokoyau ju laquimaktasqʼuinit quincʼan. Chai acsni icjuncanau macxcai chivinti pus icsqʼuiniyau ju Dios ju kʼox ju ixlacataʼan. Chai acsni iclhichʼakʼokʼaxmacanau va ixlacata ni iclhilacaʼantauch ju Cristo pus va icchʼixauch. 13 Chai acsni na macxcai chivinti ju iclhichivincanauch pus va si kʼoxi chivinti ju iclhakʼalhtayananauch. Tus chavai iclaktsʼinkʼalhicanauch tachi ju va xaʼamacxtalh ju ani lacamunutpaʼ. Tachi ju tuʼuʼ ju va tamackʼanch ju lapanacni. 14 Jantiyuʼ ju iclalhiʼatsʼoknuniyau ju ani chivinti ni va aclapumamaxaniputu. Alai va iclamapʼaksiputunau ni na iclamapainiyau chai tachi ju va quiʼaskʼatʼan iclalaktsʼinau. 15 Pus mas lakacau milh cava ju tamalaniyan ixchivinti Cristo para va quitʼin ju pʼulhnan iclajuntau ju anuʼ chivinti. Chai ni quitʼin ju pʼulhnan iclajuniu ju ixchivinti Dios chai lhilacʼapʼintʼatʼit ju Cristo pus tachi ju va quiʼaskʼatʼan iclalaktsʼinau. 16 Pus yuchi iclalhitapaininiyau ni chunch ju alatʼit tachi ju iclai ju quitʼin. 17 Chai ni vasalh iclacasqʼuin ni chunch ju alatʼit pus yuchi iclhimalakachacha ju Timoteo. Ju yuchi iclaktsʼin tachi ju va quintsʼalh ni quitʼin ju icjunilh ju ixchivinti Dios chai yuchi lhilhilacaʼalh ju Jesús. Chai ju yuchi vasalh muctaxtui laʼixlhamapʼaksin ju Cristo. Pus yuchi ju catamapastʼacʼanichokoyan ta yu junita ju quiʼatsucunti ni iclhilacaʼanta ju Cristo. Chai catamapastʼacʼaniyan ni jantu icmapaxai ju tuchi icʼamasuni ju lapanacni ju talhilacaʼanta ju Cristo mas vanta anchach catatavi. 18 Pus ju aliʼin lamilhiʼuxijnan na talhitakʼayatach ni tanajun ni na quintamakʼesvata chai ixlhiyuchi jantu lai tavanan actiʼanchokochau lalaktsʼinin. 19 Para aktsʼiyach vatsʼalhti acʼantachau lalaktsʼinin ni calacasqʼuinaʼ ju quiʼucxtinʼan Dios. Chai ju acsnich jantu va ixchivintiʼan ju acʼakʼasmatniyaʼ ju anuch ju na talhitakʼayata ju ixʼatalanintiʼan. Para vachuʼ accʼatsayaʼ tuchi laich tanavi. 20 Pus ni vasalh lhinajun ju Dios laʼixʼalhunut ju tam lapanac pus lana tasui laʼisʼatsucunti. Jantu va yuʼ ni najun ni lhinajun ju Jesús laʼisʼatsucunti. 21 Pus tʼas nonatʼit. Ni atʼailhipʼinaʼitʼit tachi ju aktsʼiya layatʼit pus aclalakakʼaimayau acsni aclalakchaʼanchokoyau. Para ni kʼoxich atsʼucʼuyaʼitʼit pus aclamasuniyau ni vasalh iclamapainiyau chai ni na kʼox ju quiʼalhunut acsni aclalakchaʼanchokoyau. Pus tasmalhch ju lacʼasqʼuinatʼit ju kʼoxich alhiulayaʼitʼit.
1 Noncan ni alin pumatam lamilhiʼuxijnan ju laich xatʼatsucui ju ixtunati. Para mas sia yuʼunch ju jantucaʼ talhilacaʼanta ju Jesús jantu xamatiʼ lai chunch calalh. 2 Para ju uxijnan na lhitʼakʼayayatʼit ni nonatʼit ni na lackʼoxin untʼatʼit. Palai kʼox caʼixva ni na ixlhamakʼaninintʼit ju anuʼ ju xanavi ju chunch alactuʼunti. Pus ju chavai amakʼosutʼitch ju anuʼ alactuʼunuʼ lamilhiʼuxijnan. 3 Pus ju quitʼin laʼixtapakaʼut ju Cristo icmucʼanita ju ixtalakʼalhin ju anuʼ lapanac mas jantu anch iclatʼavilhchau. Para va ixtʼachunch mas ani ju icvi. 4 Pus amakʼaixtʼokʼaʼitʼit ju uxijnan laʼixtapakaʼut ju quiʼucxtinʼan Jesucristo. Chai ju uxijnan cʼatsʼayatʼit tuchi xacnaulh ni anch cava icvilhcha. Chai Cristo ju cataxtakniyan ju ixtachaput ni laich anaviyaʼitʼit tuchi iclajunau. 5 Pus amakʼaxtʼaknitʼit ju anuʼ lapanac ju lhacaticuru. Chach mamakʼalhkʼajni pantsʼiquis. Ju chunch mas camakʼalhkʼajnanaʼ ju laʼixlacatuna para ju ixtacuvin catakʼalhtaxtuyaʼ acsni cachinaʼ ju avilhchan acsni caminchokoyaʼ ju quiʼucxtinʼan Jesús. 6 Lana jantu kʼox ni va lhitʼakʼayayatʼit ni nonatʼit ni lackʼoxin untʼatʼit. Ja jantu cʼatsʼayatʼit ju chivinti ju chani noncan: “Mas va lacatsʼunin tuʼuʼ ju na skʼajtach ni aclhiyaulh ju tuʼuʼ atumpa pus laich lamaskʼajkʼojui chux”. Ju chunch nomputun ni mas va lacatsʼunin caʼalilh ju alactuʼunti sia milhiʼuxijnan para lai talakʼalhinikʼoyan ju mintacʼatsanʼan minchuxʼan. 7 Pus yuchi iclalhijunau ni atʼamacxtʼuyaʼitʼit ju anuʼ alactuʼunuʼ ju lamilhiʼuxijnan. Ju chunch ni salaka aʼunchʼokʼoyaʼitʼit. Pus ju quintʼaʼisraelitanin taʼui ju xkapavati ju jantu lhiyocanta ju xatʼin acsni chin ju anuʼ cʼatan ixpupastaccan ju anuʼ atatsʼisni acsni tatakʼalhtaxtulh laʼixʼanintiʼan ju xalackʼajin istsʼalan ju makʼaniya quintʼaʼisraelitanin. Pus ju uxijnan ni atʼamacxtʼuyaʼitʼit ju anuʼ alactuʼunuʼ lamilhiʼuxijnan pus chunch aʼunaʼitʼit tachi ju anuʼ xkapavati ju jantu lhiyocanta ju xatʼin ni calamaskʼaja. Chai ju acs cʼatan vachuʼ tamakni ixborregoʼan. Chai ju Cristo valh tachi ju quimborregoʼan acsni maknicalh ixlacata ju quiʼalactuʼuntiʼan. 8 Pus tachi ju yuʼunch acsni tavanan chin ju anuʼ cʼatan tamaxtukʼojui chux ju xatʼin xkapavati laʼixchakaʼan pus vana va chun ju quijnanʼan. Camaxtukʼoyau vachuʼ chux ju alactuʼunti ju alin laquiʼatsucuntiʼan. Jantu vana canaviyau tachi ju aktsʼiya ixlayau. Jantu canaviyau ju tuʼuʼ macxcai nin tuʼuʼ alactuʼunti. Alai salaka cava ju quiʼatsucuntiʼan chai soknicʼa. 9 Pus lacaʼalakatam alhiqui ju iclaʼatsʼoknunitau ju uxijnan iclajuniu ni jantu amaʼamigoxlatʼit ju yuʼunch ju tatʼatʼajun ju jantu ixʼamachakaʼan u ju jantu ixpapaʼan. 10 Para jantu xaclajumputunau ni va jantuch lana lai atʼalaxakʼalatʼit ju jantucaʼ talhilacaʼanta ju Cristo ju va lakachapu tatʼajun chai ju va taʼalhacchaʼanan chai ju va taʼakʼalhonan chai ju va talhilacaʼanta ju va tuʼuʼ santo. Pus ni jantuch lana lai ixʼatʼachʼivinintʼit ju yuʼunch pus ca istasqʼuini ni ixtʼaxtʼutʼit ju ani lacamunutpaʼ. 11 Alai yuchi iclajuntau ni jantu atʼaʼalhtʼanantʼit tam milakʼauʼan ju lhilacaʼanta ju Cristo ni va calakachaputsuculh u va caʼalhacchaʼanalh u va calhilacaʼalh ju tuʼuʼ santo u ju va najun macxcai chivinti ixlacata ju akʼantam u ju va catʼakʼapʼa u ju va akʼalhaunaʼ. Pus ni alin xamatiʼ lamilhiʼuxijnan ju chunch lai pus jantu lana atʼavaʼintʼit ju yuchi. 12 Pus jantu lhijun ni lai acʼamucʼanilh ixtalakʼalhinʼan ju jantucaʼ talhilacaʼanta ju Cristo. Isʼakstu Dios ju caʼamucʼaniyaʼ ixtalakʼalhinʼan ju yuʼunch. Para tasqʼuini ni amucʼaniyaʼitʼit ixtalakʼalhinʼan ju talhilacaʼanta ju Cristo para ni va ixlaquilhtu titaʼalactuʼunun. 13 Pus atʼamacxtʼutʼit ju anuʼ alactuʼunuʼ ju vi lamilhiʼuxijnan.
1 Ju uxijnan ni alin tuʼuʼ milhamakʼanʼan na lhimaxan ni va pʼinatʼit chʼivintʼanuninin ju ixtalakʼalhin ju akʼantam laʼixʼucxlacapuʼan ju ucxtinin ju jantucaʼ talhilacaʼanta ju Cristo. Palai kʼox cava ni laʼixʼucxlacapuʼan ju talhilacaʼanta ju Cristo ju alakʼoxitʼit ju milhamakʼanʼan. 2 Ja va jantu cʼatsʼayatʼit ni caʼamucʼaniyau ixtalakʼalhinʼan ju lapanacni tachi chun ju quijnanʼan ju lhilacaʼantauch ju Cristo. Ucxtinin cajunau acsni tavanan caminchokoyaʼ ju Cristo. Pus ni ucxtinin aʼunaʼitʼit ju acsnich ja jantu lai lakʼoxiyatʼit ju tuʼuʼ lhamakʼan ju chavai ju va lacatʼicstʼi. 3 Ja jantu cʼatsʼayatʼit ni camucʼaniyau ju ixtalakʼalhinʼan ju anquilhnin. Pus ja va a ti yuchach ju lhamakʼan ju alin lamiʼatsucuntiʼan jantu lai alakʼoxitʼit sia milhiʼuxijnan ju lhilacʼapʼinatʼit ju Cristo. 4 Ni alin tuʼuʼ lhamakʼan ju lamiʼatsucuntiʼan tajuch ni va laich apʼinaʼitʼit alaktsʼinin ju jantu talhilacaʼanta ju Cristo. Pus ju yuʼunch jantu tacʼatsai ta yu catapulakʼoxilh ju ixlhamakʼanʼan ju talhilacaʼanta ju Cristo. 5 Va iclapujunau chunch ni jantu atʼailhipʼitʼit ju chunch atalacpastʼacʼat. Pus ju lamilhiʼuxijnanʼan ja lana matiʼ xamatiʼ ju atalaniniʼ cava ju lai catalakʼoxinin ju milhamakʼanʼan sia lhiʼalakʼavinch laʼixmacni Cristo. 6 Ju uxijnan ju lhiʼalakʼavin untʼatʼit ja vasalh tasqʼuini ni alachʼivimakʼanaʼitʼit ju laʼixʼucxlacapuʼan ju ucxtinin ju jantu talhilacaʼanta ju Cristo. 7 Para lana tasui ni na alin ju mintalakʼalhinʼan ni va laclakʼayatʼit ju milhiʼakstuʼan. Palai kʼox cava ni va alamacʼacxaniyatʼit ni tuʼuʼ talakʼalhin ju lanaviniyatʼit. Palai kʼox ni va alhilakʼaʼitʼit mas akʼalhaunicʼantʼit ju mintuʼuʼan. 8 Para ju uxijnan jantu chun layatʼit. Alai miʼakstuʼan lanaviniyatʼit tuʼuʼ talakʼalhin chai lakʼalhauniyatʼit ju tuʼuʼ mas ixʼanuʼ ju milhiʼalakʼavinʼan. 9 Ja lana jantu cʼatsʼayatʼit ni jantu lai catitanu junta lhinajun ju Dios ju va jantu sok tatʼaʼanta ju ixtʼalapanac. Jantu aʼokxchʼokʼocʼantʼit ixlacata tachi chun ju ani taxtokni. Jantu lai catitanu junta lhinajun ju Dios ju tapuxcajui ixnavinʼan. Nin yuʼunch ju talhilacaʼanta ju tuʼuʼ santo. Nin yuʼunch ju papanin ju tatʼatsucui ju jantu ixʼamachakaʼan. Nin yuʼunch ju chakolun ju tatʼatsucui ju jantu ixpapaʼan. Nin yuʼunch ju papanin ju tʼalalactuʼui ju ixtʼajokʼat. 10 Jantu lai catitatanu junta lhinajun ju Dios ju va taʼakʼalhaunan. Nin yuʼunch ju talhacchaʼani ju ixʼanuʼ ju apumatam. Nin yuʼunch ju tʼakʼapʼanin. Nin yuʼunch ju tanajun macxcai chivinti ixlacata apumatam. Nin yuʼunch ju va taʼokxchokʼomaxtuni ju ixʼanuʼ ju akʼantam. Ju chun tanavi jantu xamatiʼ sia yuʼunch lai catitanu junta lhinajun ju Dios. 11 Pus chunchach ixʼuntʼatʼit ju aliʼin lamilhiʼuxijnan. Para ju chavai chʼakʼanicʼantʼatʼit ju miʼalhunutʼan. Ju chavai ixʼanuʼ Dios untʼatʼit. Chai ju Dios talaktsʼinan ni soknicʼa untʼatʼit. Chunch untʼatʼit ju chavai laʼixtachaput ju Spiritu Santu va ixlacaʼatalh ni xalhilacʼapʼinatʼit ju Jesús. 12 Ju aliʼin tanajun ni laich navikʼocan tachi chun ju naviputuncan. Pus vasalh. Para jantu si lai caʼaktaijun. Chai mas lai acnavikʼo va tuchi ixtalakxtuch para ju quitʼin jantu icnavikʼoputun tachi chun ju taxtokni ju min laquiʼatalacpastʼacʼat. 13 Ju Dios quintaxtaknitan ju vaiti ixlacata ju quimpajanʼan. Chai quintanavinitan ju quimpajanʼan ni catajulhch ju quivaitiʼan. Para cachinaʼ avilhchan acsni jantu camaktasqʼuiniyau ju tuʼuʼ vaiti. Pus ju Dios jantiyuʼ lhixtaknilh ixlacatuna ju tam jokʼat ni laich va kʼaya catʼatsuculh ju jantu ixʼamachakaʼ. Chai jantu lhixtaknilh ixlacatuna ju tam chakoʼulh ni lai va kʼaya catʼatsuculh ju jantu ixpapa. Alai yuchi quintalhixtaknitan ju quilacatunaʼan ni ixʼanuch ju Cristo cajunlh. Chai yuchach ju lhistʼacʼa. 14 Chai mas caniyau para ju Dios aquintamacxtunichokoyan ju quilacatunaʼan laʼixtachaput. Chunch aquintaʼulhtuyan tachi ju ulhtulh ju Jesús acsni macxtuchokolh ju ixlacatuna junta ixmacnucanta. 15 Pus ja va jantu cʼatsʼayatʼit ta yu tʼajuntau ju Cristo. Pus ju quilacatunaʼan ixʼanuch ju Cristo. Chai ju milacatunaʼan ni ixʼanuch ju Cristo pus ja lai vanach atʼitʼaʼalactʼuʼunumpʼalatʼit ju va xanavinch lacati. Jantu lhijun ni lai acnavi ju chunch. 16 Ja va jantu machʼakxayatʼit. Pus ju tam lapanac acsni tʼatsucui tam chakoʼulh ju xanavin lacati pus va lakatam lacatuna tajunita. Chunch tajunita tachi ju najun laʼixchivinti Dios ju tsʼokcanta junta chani najun: “Ju ixtʼiyunʼan va lakatamch lacatuna catajunaʼ”. Chunch ju najun laʼixchivinti Dios. 17 Para ju ixlhichux ixʼalhunut makʼaxtaknita ju isʼatsucunti ju ixʼucxtin Jesús pus va lakatam tʼajunita laʼixtachaput ju Spiritu Santu. 18 Pus ni chunch tʼaʼuntʼatʼit ju Cristo pus nin lacatsʼunin jantu apʼastʼactʼit ixpuxcajuca ju minavinʼan. Pus tachi chun ju aliʼ alactuʼunti ju canavi ju jokʼat jantu na chun lakʼalhini ju isʼatsucunti. Para ju tʼatsucui ju jantu ixʼamachakaʼ pus va isʼakstu lakʼalhichokoi ju isʼatsucunti. 19 Ja va jantu cʼatsʼayatʼit ni ixʼanuʼ Dios junita ju milacatunaʼan ni taxtaknitan ju Spiritu Santu chai yuchi ju tʼajun lamiʼalhunutʼan. Pus ju milacatunaʼan jantu miʼanuʼan miʼakstuʼan. 20 Ju uxijnan na laklhu lhitʼamocʼantʼatʼit ni nitʼa ju milacataʼan ju Jesús. Pus yuchi iclalhijunau ni chunch ju atsʼucʼutʼit chai chunch ju apʼastʼactʼit tachi ju laich calakʼayacalh ju Dios ju milacataʼan. Chunch alatʼit ni ixʼanuch Dios ju milacatunaʼan chai ju miʼalhunutʼan.
1 Pus ju chavai aclajunau ixlacata ju anuʼ taxtokni ju xaquilasacmiyau acsni quilaʼatsʼoknuniu. Pus tachi ju tʼajun tapasanaʼ ju chavai lamiʼatsucuntiʼan pus na kʼox cava ni jantu catamakʼaxtoklh ju tam tsʼalh. 2 Para va ixlacaʼatalh ni na lhu catalhava ju alactuʼunti ni jantu catamakʼaxtokcalh pus palai kʼox cava ni pumatamin jokʼat capacxalh ixʼamachakaʼ. Chai ju pumatamin chakoʼulh caʼalilh ju istʼatsucunuʼ. 3 Ju jokʼat catʼatsuculh ju ixʼamachakaʼ tachi ju lhilhcata ju Dios. Chai vana va chun ju tam chakoʼulh. Ju yuchi vachuʼ catʼatsuculh ju ixpapa tachi ju lhilhcata ju Dios. 4 Ju tam chakoʼulh jantu lai catilhikʼalhtsʼaulh ju ixlacatuna ni alin ju ixpapa. Chai vana va chun ju tam jokʼat. Jantu lai catilhikʼalhtsʼaulh ju ixlacatuna ni alin ju ixʼamachakaʼ. 5 Ju tam lapanac ju alin ixʼamachakaʼ jantu lhijun ni alacatam canavi ju ixputaman. Para ju mintʼiyunʼan ni va tʼascʼaʼapʼutʼunatʼit lakatʼutu lakatʼatʼi avilhchan ni laich palai atʼachʼivinintʼit ju Dios pus laich. Para acsni atʼachʼivinkʼoyaʼitʼit ju Dios pus va lakatamch anavichʼokʼotʼit ju mimputamanʼan. Ju va makʼan alakʼacʼujtsʼucʼutʼit ju va miʼakstuʼan jantu xcai ni cataʼokxchokʼon ju lhacaticuru chai alactʼuʼununaʼitʼit. 6 Pus jantu iclajunau ni lana atʼamakʼaxtʼoktʼit. Va iclajumputunau ni laich atʼamakʼaxtʼokʼaʼitʼit ni chunch ju lapʼutʼunatʼit. 7 Para ca vak tachi kʼox cava ni chunchach ju catatsuculh ju chavai tachi chun ju jokʼatni tachi ju quitʼin ni va quiʼakstu ictʼajun. Para jantu si axtakninicanta ju chunch atsucunti. Ju pumatamin tam ju axtaknicanta ju isʼatsucuntiʼan. 8 Pus chani icʼajumputun ju va isʼakstucaʼan tatʼajun chai ju chakolun ju va animacontilacantach. Vak tachi kʼox cava ni va isʼakstuʼan catatsucukʼalhi ju chavai tachi ju ictʼajun ju quitʼin ni va quiʼakstu ictʼajun. 9 Para ni jantu lai akʼaichokocan isʼakstuʼan pus palai kʼox ni caʼaʼicalh. Palai jantu kʼox ni na va catamakʼalhkʼajnalh ni lana jantu lai tatsucui ju va isʼakstuʼan. 10 Pus ju tuchi icʼajuni ju tamakʼaxtoknunch jantu va quiʼakstu ju icnajun. Para vana va chun ju naulh ju Cristo. Pus icʼajuni ju chakolun ju aʼicanta ni jantu catamacaulh ju ixpapaʼan. 11 Para ju tam chakoʼulh acsni vaclhun taxtuich laʼixchakaʼ pus tasqʼuini ni vasalh va isʼakstu catsuculh. U ni jantu va isʼakstu ju tsucuputun pus chach lakʼanchokolh ju ixpapa. Chai tam jokʼat jantu lai catixcoxtulh ju ixʼamachakaʼ. 12 Ju chavai aclajunau tuchi kʼox iclhiulai ni anaviyaʼitʼit. Para ju yuchi va quinchivinti quiʼakstu junita. Jantiyuʼ ju Jesús ju naulh ni chunchach ju alatʼit. Pus ju tam quilakʼauʼan ju alin ixʼamachakaʼ ju jantucaʼ lhilacaʼanta ju Jesús chai ni tʼalakʼachanich pus jantuch catʼalamacaulh. 13 Chai ju tam chakoʼulh ni alinch ju ixpapa ju jantucaʼ lhilacaʼanta ju Jesús chai ni tʼalakʼachanich pus jantuch camacaulh. 14 Ju tam lapanac mas jantu lhilacaʼanta ju Cristo para ni lhilacaʼanta ju Cristo ju ixʼamachakaʼ pus ju Dios xtakni ju kʼox isʼatsucunti ju lapanac ni isʼaskʼatʼa Dios junita ju ixʼamachakaʼ. Chai vana va chun ju tam chakoʼulh. Mas jantu lhilacaʼanta ju Cristo ju yuchi para ni lhilacaʼanta ju Cristo ju ixpapa pus xtakni ju Dios ju kʼox isʼatsucunti ni isʼaskʼatʼa Dios junita ju ixpapa. Pus ni jantu chun cava pus jantu kʼox cava ju isʼatsucuntiʼan ju isʼaskʼatʼaʼan. 15 Para ju tam chakoʼulh ju jantu lhilacaʼanta ju Cristo ni amaconananch pus chach ancha. Jantu tapʼastu ni catʼatsuculh ju ixpapa ju lhilacaʼanta ju Cristo. Chai vana va chun ju tam quilakʼauʼan atsiʼ ju lhilacaʼanta ju Cristo. Ni xcoxtucanta laʼixchakaʼ va ixlacaʼatalh ni jantu lhilacaʼanta ju Cristo ju ixpapa pus chach macaulh. Ju Dios lacasqʼuin ni lhikʼach catsucu. Jantu va lacalakʼaiti. 16 Pus ju uxintʼi ji chakoʼulh ni tapʼastu tʼatsʼucʼupʼutʼun ju mimpapa ni lhilacʼapʼinch ju Jesús ja cʼatsʼaich ni aktsʼiya camakʼalhtaxtuyaʼ ju Dios ju mimpapa ju va milacata. Chai ju uxintʼi ji lapanac ni tapʼastu tʼatsʼucʼupʼutʼun ju miʼamachakaʼ va ixlacaʼatalh ni lhilacʼapʼinch ju Jesús ja cʼatsʼaich ni aktsʼiya camakʼalhtaxtuyaʼ ju miʼamachakaʼ ju va milacata. 17 Ju uxijnan acsni tavanan xalhilacʼapʼinatʼit ju Jesús va tuchi lhichʼalhcat ju ixnaviyatʼit ju pumatamin ju milhiʼuxijnan pus chunchach ju atʼailhipʼitʼit. Va tuchi lhichʼalhcat ju ixnavi ju pumatamin pumatamin ju uxijnan. Chai chunch ju iclhamapʼaksinin tachi chun ju talhilacaʼanta ju Cristo. 18 Ni alin xamatiʼ ju ixchʼucʼunicanta ju ixʼaxtʼakʼa acsni tavanan lhilacaʼalh ju Jesús pus chach chunch jonkʼalhi. U ni alin xamatiʼ ju jantu ixchʼucʼunicanta ju ixʼaxtʼakʼa acsni tavanan lhilacaʼalh ju Cristo pus jantu calhinaulh ixchʼucʼuca. 19 Jantu lhitapalai ni chʼucʼucanta u jantu. Va yuchi ju lhitapalai ni canaviu tachi ju najun ju Dios. 20 Ni jantu lhikʼalhtsajui ju Dios ju anuʼ lhichʼalhcat ju ixtʼajun naviniʼ xamatiʼ acsni lhilacaʼalh ju Cristo pus jantu tasqʼuini ni camapaxalh ixlhichʼalhcat va ixlacaʼatalh ni lhilacaʼalh ju yuchi. 21 Ja va ixtʼamocʼantʼa chai va xalapanac ixʼunitʼa acsni tavanan lhilacʼapʼi ju Cristo. Pus jantu alhamakʼanin. Para ni cajunin ju miʼucxtin ni lai atʼaxtʼuyaʼ u laich amapʼuspʼitnin ju ixlhitamotan pus atʼaxtʼu. 22 Pus ju yuchi ju xalapanac ixjunita acsni tavanan lhilacaʼalh ju Cristo pus ju chavai ju Dios laktsʼin ni ixlapanac junita. Jantu va ixlapanac akʼantam ixtʼalapanac. Chai vana va chun ju jantu xalapanac ixjunita acsni tavanan lhilacaʼalh ju Cristo. Pus ju chavai ixlapanac Cristo junita. 23 Ju Dios na laklhu ju talhitamotan. Pus yuchi alhicʼatsʼatʼit ni yuchi ju miʼucxtinʼan junita. Jantu va mintʼalapanacniʼan. 24 Ji quiʼalakʼavin ni jantu lhikʼalhtsajui ju Dios ju lhichʼalhcat ju ixtʼonatʼit navinin acsni tavanan lhilacʼapʼitʼit ju Cristo pus atʼailhipʼitʼit pumatamin ju uxijnan ju milhichʼalhcatʼan. Chai acʼatsʼatʼit ni Dios ju tatʼavilan. 25 Pus ju chavai aclajunau ixlacata ju va isʼakstuʼancaʼ tatʼajun. Pus ju Jesús jantu tuʼuʼ ju quijuni ixlacata ju yuʼunch. Para ju Jesús quiʼaktaijulh laʼixʼamapaininti chai lai lhilaksiyatʼit ju quinchivinti. Pus ju quitʼin aclajunau tuchi kʼox iclhiulai ni catanavi. 26 Pus va ixlacaʼatalh ni na quintamamakʼalhkʼajniyan ju chavai ju lapanacni yuchi iclhinajun ni ca kʼoxich cava ni va isʼakstuʼan catatsuculh ju va isʼakstuʼancaʼ tatʼajun. 27 Para ju alinch ju ixʼamachakaʼ pus jantu capastaclh ni laich camacaulh. Chai ju matich ju ixʼamachakaʼ pus tucaʼ capuxcaulh ju ixʼamachakaʼ. 28 Para ni catamakʼaxtoklh tam xamatiʼ pus jantu alactuʼunti ju navi. Nin yuchi ju tam atsiʼ jantu alactuʼunti ju navi ni xaʼican. Para ni na va alin ju chavai ju quimakʼalhkʼajnatʼan pus palai catamakʼalhkʼajnanaʼ ni ixtʼiyunʼan tajunita. Chai ju quitʼin ni jantu iclacasqʼuin ni na lhuch amakʼalhkʼajnantʼit pus yuchi iclalhijunau ni palai kʼox ni jantucaʼ atʼamakʼaxtʼoktʼit. 29 Pus ji quiʼalakʼavin iclajunau ni jantu lhu avilhchan ju quintaxtaknitan ju Dios ju lai capunaviniyau ju ixlhichʼalhcat. Pus yuchi iclalhijunau ju ani. Pus ju alin ixʼamachakaʼan jantu va yuchi ju catapastaclh. Para vachuʼ catanavilh cuenta ixtaxtokni Dios. 30 Chai ju na talackʼalhun jantu va ixʼamakʼanit ju catapastackʼalhi. Chai ju na talackʼachan jantu va ixkʼachatʼan ju catapastackʼalhi. Chai ju na taʼalactamonan jantu va yuchi ju catapastackʼalhi. Jantu chun alatʼit ni va xanavin lacamunutpaʼ junita tachi chun ju ani taxtokni. 31 Chai jantu na lhuch achʼalhcʼatnantʼit va ixlacaʼatalh ni anaʼuntʼit ni na kʼox atsʼucʼuyaʼitʼit ju ani lacamunutpaʼ. Jantu chunch alatʼit ni jantu tuʼuʼ ju lai cajonkʼalhi ju ani lacamunutpaʼ. 32 Pus ju quitʼin jantu iclacasqʼuin ni tuʼuʼ caʼalilh lamiʼatsucuntiʼan ju alhamakʼaninintʼit. Pus ju tam tsʼalh ju va isʼakstucaʼ tʼajun na navi cuenta ju ixlhichʼalhcat ju Dios. Va puxcajui ta yu laich canavinilh ixkʼachat ju Dios. 33 Para ju alin ixʼamachakaʼ vachuʼ navi cuenta ju xataxtokni ju ani lacamunutpaʼ. Va puxcajui ta yu laich kʼox caputʼalalhiʼalh ju ixʼamachakaʼ. 34 Vachuʼ na tam ju isʼatsucunti ju tam chakoʼulh ju alin ixpapa chai tam atsiʼ ju va isʼakstucaʼ tʼajun. Pus ju va isʼakstucaʼ tʼajun na navi cuenta ju ixtaxtokni ju ixʼucxtin Dios. Va puxcajui ta yu laich salaka capujunlh ju ixlacatuna chai chux ixʼacʼatsanti laʼixmacni Dios. Para ju alin ixpapa vachuʼ navi cuenta ju ixtaxtokni ju ani lacamunutpaʼ ta yu laich kʼox caputʼalalhiʼalh ju ixpapa. 35 Pus iclapujunau chunch ni va iclaʼaktaijuputunauch. Jantiyuʼ ni va aclapumakʼantalhanaputu laquilhamapʼaksin. Va iclajunau ta yu lai kʼox atsʼucʼuyaʼitʼit tachi ju kʼachani ju Dios chai jantu tuʼuʼ catasastʼucʼan. 36 Para ni alin pumatam xapai ju alin ju istsiʼ ju tʼajun takʼayanaʼ chai na tamakʼaxtokputun chai ju xapai cʼatsai ni palai kʼox cava ni catamakʼaxtoklh pus jantu talakʼalhin canavi ni caxtaklh ju istsiʼ. Chach tamakʼaxtoklh. 37 Para na kʼox navi ju tam xapai ju va lakatam navita ju ixʼalhunut chai ixlhichux ixʼalhunut najunta ni jantu catixtaklh ju istsiʼ ju va chavai. Chai ju istsiʼ ni tucaʼ tamakʼaxtokputun pus yuchi jantu lhixtaknicanta ju tam tsʼalh. 38 Pus kʼox navi ju tam xapai ju caxtʼakʼaʼ mas chavai ju istsiʼ. Para palai kʼox navi ju jantu caxtʼakʼaʼ ju va chavai lana ju istsiʼ ni va tʼoncan makʼalhkʼajnanca. 39 Ju lhamapʼaksin najun ni jantu lai catimacaulh ju ixpapa ju tam chakoʼulh acsni tʼajuncaʼ ju istʼatsucunuʼ. Para acsni va caniyach ju istʼatsucunuʼ pus ju acsnich ju anuʼ chakoʼulh lai catʼatamakʼaxtokchokolh va tichi chavaich ju cakʼachanilh. Va yuchi ni vachuʼ calhilacaʼalh ju Jesús ju anuʼ lapanac. 40 Para icnajunch ni palai lhikʼach cajunlh ju isʼatsucunti ni va isʼakstu ju catsuculh ju chavai. Chai iclhiulai ni vachuʼ chun ju najun ju Spiritu Santu.
1 Pus ju chavai aclajunau ixlacata tuchi xaquilalhisacmiyau ixlacata ju lhivai ju lhikʼailaktsʼincanta ju santo. Vasalh ni cʼatsayau ni jantu tuʼuʼ ixtapalhni ju va santo. Para ju lapanac ju najun ni na acʼatsananta pus na lhitakʼayai tuchi cʼatsai. Para ju na amapaininin aktaijui ju ixtʼalapanac ni lai palai catsuculh tachi ju kʼachani ju Dios. 2 Ju tam lapanac ju najun ni na lai amachakxanan jantu slivasalh ni caʼamachakxanalh tachi ju lhijunch ni camachakxa. 3 Para va tichi chavaich ju mapaini ju Dios pus ju Dios mispaich ni isʼaskʼatʼa junita. 4 Pus ju chavai aclamavasalaniyau ixlacata ju lhivai ju lhikʼailaktsʼincanta ju santo. Cʼatsayau ni jantu tuʼuʼ ixtapalhni ju va santo. Chai jantu pumalhu ju Dios. Va pumatam. 5 Para ju lactʼiyan chai ju ani lacamunutpaʼ na tijlhu alin ju talhilaksi ju lapanacni tachi isdiosʼan chai na tijlhu ju tatalhoni. 6 Para ju quijnanʼan va lakatam ju quiDiosʼan. Yuchi ju xapai ju lhinaulh ixnavica tachi chun ju taxtokni. Chai quintanavitan ju quijnanʼan ni laich calakʼayayauch ju yuchi. Chai vachuʼ va pumatam ju quiʼucxtinʼan. Yuchi ju Jesucristo. Chai yuchach ju navikʼolh tachi chun ju taxtokni. Chai yuchach ju quintaxtaknitan ju sastʼi quiʼatsucuntiʼan. 7 Para jantu si tamachakxai ni va pumatam ju Dios. Ju aliʼin ju talhilacaʼanta ju Cristo na tatalhonicaʼ ju santo chai titanajuncaʼ ni ca tachi ju va alin ixtachaput ju anuʼ santo. Pus acsni taʼui ju yuʼunch ju lhivai ju ixlhikʼailaktsʼincanta ju santo pus tachi ju va alactuʼunti talhiulai. 8 Para jantu va ixlacata tuʼuʼ vaiti ju uyau ju kʼox aquintapulhiulayan ju Dios. Jantu lai palai kʼox catipujumvi ni cavajiu u ni jantu. Nin yuchi ni lai palai alactuʼunin catipujumvi. 9 Para alaktsʼintʼitch. Ju uxijnan lai uyatʼit ju anuʼ lhivai ju lhikʼailaktsʼincanta ju santo chai jantu talakʼalhin lhiulayatʼit. Para jantu xcai ni capukʼalhkʼoslh apumatam ju jantucaʼ kʼox machakxai u talakʼalhin cava u jantu ni caʼulh. 10 Ju uxijnan machʼakxayatʼit ni jantu tuʼuʼ ju santo. Para ju apumatam ju titalhonicaʼ ju santo ni catalaktsʼinan acsni makvilatʼit lacamixa laʼixpujitatʼan ju talhilacaʼanta ju santo ja jantu lai caʼokxchokʼomakʼulh ju anuʼ lhivai ju titalhonicaʼ. 11 Pus ju uxijnan machʼakxayatʼit ni jantu tuʼuʼ ju santo chai jantu talakʼalhin ni uyatʼit ju lhivai ju ixlhikʼailaktsʼincanta ju santo. Para jantu xcai ni va milacataʼan caʼalactuʼunulh tam milhiʼalakʼavinʼan. Chai ju Cristo nilh ju ixlacata vachuʼ. Jantu va milacataʼan miʼakstuʼan. 12 Pus ju uxijnan tachi ju va lactʼuʼuyatʼit xajacha ju miʼalakʼavinʼan va ixlacata ni naviyatʼit ju tuʼuʼ ju talakʼalhin talhiulai. Chai ni talaktsʼintayanch pus tanavich vachuʼ. Chai acsni lactʼuʼuyatʼit ju yuʼunch pus yuchi ju Cristo ju tucan lactʼuʼuyatʼit. 13 Pus ni capukʼalhkʼosaʼ tam quilakʼau va ixlacaʼatalh ni acʼulh ju tuʼuʼ lhivai ju ixlhikʼailaktsʼincanta ju santo pus jantu tavanan actiʼulh ju anuʼ lhivai. Ju chunch jantu lai acmalactuʼuni tam quilakʼau.
1 Ju quitʼin ixtamalakachan ju Cristo icjunita. Chai lai icnavikʼojui tachi chun ju lai tanavi ju aliʼin ixtamalakachan ju Jesús. Ju quitʼin vachuʼ iclaktsʼilh ju quiʼucxtinʼan Jesucristo tachi ju talaktsʼinta tachi chun ju aliʼin ixtamalakachan. Chai mavasalata ju Cristo ni ixtamalakachan icjunita ni laich xalhilacʼapʼinatʼit ju yuchi acsni xaclajunau ju ixchivinti. 2 Mas tanajun ju aliʼin ni jantu ixtamalakachan Cristo icjunita para ju uxijnan cʼatsʼayatʼit ni vasalh chunch icjunita. Pus ni xalhilacʼapʼinatʼit ju quiʼucxtinʼan Cristo laquinchivinti pus yuchi lhicʼatsʼayatʼit ni ixtamalakachan Cristo icjunita. 3 Chai chunchach ju iclhakʼalhtayanan va tichi chavaich ju quisacmi ni vasalh ixtamalakachan Cristo icjunita. 4 Acsni quintamavai ju yuʼunch ju icʼajuni ixchivinti Dios pus lai icʼui chai lai ickʼotʼa tachi chun ju quintaxtakni. 5 Ni va caʼixʼalilh ju quiʼamachakaʼ pus lai xactʼaʼalh junta icʼan amasuninin ixchivinti Dios. Pus ni chunch ju talai ju aliʼin ixtamalakachan ju Cristo chai ju Pitaluʼ chai ju ixʼapʼisekʼen ju Jesús pus vachuʼ lai chunch xaclalh. 6 Ja va aquijnanchʼas ju jantu lhijun ni acmacaju ju quilhichʼalhcat quincʼan chai aquilamavauch ni iclajunauch ixchivinti Dios. 7 Tis taropach ju laich calasa ni jantu caxtaknicalh ju ixtalhaja. Chai ju tam achʼananaʼ ja jantu anch taxtuchokoi ju ixvaiti ju laʼixlhichʼalhcat. Chai ju tam lapanac ni alin ju ixborregojni ja jantu cakʼotʼaʼ ju ixleche ju ixborregojni. 8 Pus acsni iclajunau ju chunch jantu va ixchivinti tam quintʼalapanac ju icnajun. Para vachuʼ chunch najun ju lhamapʼaksin ju tsʼoklh ju Moisés. 9 Pus chani najun laʼixlhamapʼaksin ju Moisés: “Ma jantu amakʼenkʼatʼanutʼi ju tuʼuʼ ju mivacax acsni tʼajun putayanaʼ ju cebada acsni papʼakxcan. Chach sacʼulh lacatsʼunin”. Chunch ju najun laʼixlhamapʼaksin ju Moisés. Pus acsni naulh ju Dios ni chunch ju catsʼoklh ju Moisés jantu va yuchi ju vacax ju ispastacta. 10 Alai naulh ju chunch ni laich camachakxayau ta yu lhijunch ni calanaviu laquiʼatsucuntiʼan. Pus ju tanavi ixcuxtuʼan laich catalhilaksich ni anch catasuchokoyaʼ ju ixvaitiʼan. Chai vana va chun ju ixlakneknin cebada. Ju yuʼunch talhilaksich ni anch ju catasuchokoyach ju ixvaitiʼan vachuʼ. 11 Pus ju quijnan acsni iclajunau ju ixchivinti Dios pus tachi ju va icchʼanauch ju anuʼ chivinti lamiʼalhunutʼan. Chai ja jantu lhijun ni aquilaʼaktaijuch lacatsʼunin ju laquimaktasqʼuinit quincʼan. 12 Ju aliʼin amamakaʼunin ni lai aktʼaiʼuyatʼit laʼixmaktasqʼuinitʼan ja va a ti quijnanch ju jantu lai aquintilaʼaktaiju ju laquimaktasqʼuinit quincʼan. Pus mas lhijunch ni chunch aquilaʼulhtu para jantu tavanan tuʼuʼ iclasqʼuinitauch ju uxijnan. Alai va iclhilakʼaʼitauch ju quimakʼalhkʼajnat quincʼan acsni ixʼalin ju quimaktasqʼuinit quincʼan. Ju chunch jantu tuʼuʼ lai catiʼasastucnilh ju lapanacni acsni acnonau ju chivinti ixlacata ju Cristo. 13 Ju uxijnan cʼatsʼayatʼit ni anch ju tasuchokoi ixvaitiʼan tachi chun ju tachʼalhcatnan laquimpujitatʼan ju israelitanin juntau. Chai vana va chun ju tamakchʼalhcatnanch junta maknican ju atapacxat ju lhikʼailaktsʼincan ju Dios. Vachuch anch ju tasuchokoi ju ixvaitiʼan. 14 Pus vana va chun ju lhamapʼaksinilh ju quiʼucxtinʼan Jesús. Ju yuchi najun ni anch ju catasuchokoyach ju ixvaitiʼan tachi chun ju tanajun ju chivinti ixlacata ju Cristo. 15 Para ju quitʼin jantu tavanan icnavita ju chunch mas chunchach ju naulh ju Jesús. Chai jantiyuʼ ju iclalhiʼatsʼoknuniyau ju chavai ni chunchach ju aquilanaviniu ju quitʼin. Lana jantu kʼox iclhiulai ni xamatiʼ aquintaiʼinilh ju quinkʼachat ni laich iclajunau ju ixchivinti Dios chai jantu tuʼuʼ iclasqʼuiniyau. Pus ni va aclasqʼuiniu ju tuʼuʼ pus palai kʼox iclhiulai ni lanach alai va acnilh. 16 Pus acsni icnajun ju chivinti ixlacata ju Jesús jantu lai iclhitakʼayai ni iccʼatsai ni tasqʼuini ni chunch ju aclalh. Pus ni jantu acmuctaxtu ju ismasuca ju anuʼ chivinti ca na aquimamakʼalhkʼajni ju Dios ni yuchach ju xaquixtakni ju ani lhichʼalhcat. 17 Pus ni va quiʼakstu cava ju icsacxtuta ju ani lhichʼalhcat pus ca laich caʼixʼalilh ju quintalhaja. Para jantu va quiʼakstu ju icsacxtuta ju ani quilhichʼalhcat. Alai Dios ju quinavita ixlapanac chai quixtaknita ju lhichʼalhcat ni acʼajunilh ju lapanacni ixlacata ju istsʼalh. Yuchi ju Jesús. Chai tasqʼuini ni acmuctaxtuyaʼ. 18 Pus mas quixtaknita ju ani lhichʼalhcat ju Dios chai mas naulh ju Jesús ni anchach ju lai acvenchokolh para ju quitʼin jantu icpulhajaputun ixchivinti Dios acsni icʼajuni ju lapanacni ixlacata ju Jesús. Chai ju quintalhaja yuchi ni na alin ju quinkʼachat ni lai va chunch icʼajuni ju lapanacni ixchivinti Dios. 19 Pus ju quitʼin jantu ixlapanac icjunita tam xamatiʼ ju va quintʼalapanac junita. Para icchʼalhcatnani tachi chun ju lapanacni ni tsʼa ma lai palai lhu catalhilacaʼalh ju Jesús. 20 Acsni icʼalactʼavi ju quintʼaʼisraelitanin pus chunch iclai tachi ju talai ju yuʼunch. Ju yuʼunch talhilaksi ju makʼaniya ixlhamapʼaksin ju Dios. Pus vachuʼ chunch icnavi tachi ju najun ju anch mas iccʼatsai ni jantu tasqʼuini ni vana chun acnavilh. Para chunch iclai ni tsʼa ma laich palai aquintakʼasmatnilh acsni icʼajuni ixlacata ju Cristo. 21 Chai acsni icʼalactʼavi ju yuʼunch ju jantu tavanan tamispata ju makʼaniya ixlhamapʼaksin Dios pus jantu vachuʼ chunch iclai tachi ju najun ju anch. Para mas chunch iclai jantu icnajun ni jantu ictalhoni ju ixlhamapʼaksin Dios. Aktsʼiya icnaviputun tachi ju najunta ju Cristo. Para va chunch iclai ni tsʼa ma palai lai aquintakʼasmatnilh ju yuʼunch acsni icʼajuni ixlacata ju Jesús. 22 Acsni ictʼaʼucxuntʼajun ju yuʼunch ju jantucaʼ kʼox tamachakxai ixchivinti Dios pus vachuʼ chunch ju iclai tachi ju talai ju yuʼunch junta jantu tʼalasai ixchivinti Dios. Chunch ju iclai ni tsʼa ma laich palai aquintakʼasmatnilh acsni icʼajuni ixlacata ju Jesús. Tachi ju junitach ju kʼantam kʼantam pus chunchach vachuʼ icmaktalacasui ju quitʼin. Tsʼa ma laich catalhilacaʼalh ju Cristo ju aliʼin lapanacni ju chunch. 23 Chai icpunavi chunch ni palai lhu catalacaʼiniyaʼ ju ixchivinti Dios ixlacata ju Cristo. Chai vachuʼ laich acʼaʼaktaijuyaʼ ju aliʼin ixmakpitsica ju ixchivinti Dios. 24 Ju uxijnan cʼatsʼayatʼit ta yu talai ju talalhajai laca tuʼuʼ atsʼalhti. Cʼatsʼayatʼit ni ixchuxʼan ju na taʼatsʼalai para va pumatam ju lhajai. Pus chunchach vachuʼ alatʼit ju pumatamin ju uxijnan. Chunch ju atsʼucʼutʼit tachi ju laich alhaʼayaʼitʼit ju anuʼ ju caxtʼakʼaʼ ju Dios ju lactʼiyan. 25 Tachi chun ju tanaviputun talakmaskʼatin laca tuʼuʼ atsʼalhti slivasalh ni na talhistʼacʼach ju ixlacatunaʼan ni na tachapunin catajunaʼ. Ju yuʼunch chunch talaich ni taʼalhajanamputun ni laich cataʼamaklhtayanalh lakatam corona mas vatsʼalhti catakʼalhiyaʼ ju anuʼ corona. Pus ja va a ti quijnanchʼan jantu catilhistacvi ju quiʼatsucuntiʼan ni calhajayau ju quijnanʼan lakatam corona ju jantu lai tavanan catakʼalhiyaʼ. 26 Pus ju tam tsʼalh ju navi talakmaskʼatin lacaʼatsʼalhti sok an junta lhcanicanta ni laich calhajayaʼ. Pus vachuʼ chunch ju quitʼin. Chunch ju ictsucui tachi ju lhcata ju Jesús ni laich aclhajayaʼ ju kʼox ju alin ju lactʼiyan. Chai ju tam tsʼalh ju navi talakmaskʼatin ta yu laich capulhajayaʼ acsni tʼalasai tam istʼatsʼalh jantu va kʼaya macʼan. Pus vachuʼ chunch ju iclai laquiʼatsucunti. Slivasalh ictʼalasai ju macxcai ju alin laquiʼalhunut. 27 Quitʼin quiʼakstu ickʼaichokoi ju macxcai quiʼatalacpastʼacʼat. Jantu iclakʼaʼi ni aquimalactuʼuni ju macxcai ju alin laquiʼalhunut. Ni jantu chun aclalh pus ju Dios jantu aquintixtakniputulh ju quintalhaja ju lactʼiyan mas xacʼajunich ju lapanacni ju ixchivinti.
1 Iclacasqʼuin ji quiʼalakʼavin ni apʼastʼactʼit tuchi tapasalh laʼisʼatsucuntiʼan ju makʼaniya quilacpaʼitniʼan. Cʼatsʼayatʼit ni Dios ju apʼulhnilh ixchuxʼan lacaʼataputsʼi. Chai acsni tataxtulh ju xalacatʼun Egipto pus ixchuxʼan tatapasakʼolh ju lacalacatʼicstʼi alama acsni maxixilh ju xcan ju Dios. 2 Pus tachi ju quijnanʼan acsni akpaxtauch laʼixmacni ju Jesús va nomputun ni lhilaksiyauch ju yuchi pus vana va chunch ju yuʼunch. Ca laich acnaulh ni ixchuxʼan ju yuʼunch taʼakpaxlh laʼixmacni ju Moisés ni talhilaksilh ju yuchi acsni tavanan tachʼakʼokʼalh ju anuʼ ataputsʼi chai acsni tavanan tatapasalh lacaʼalama. 3 Chai ixchuxʼan taʼulh ju vaiti ju axtaknilh ju Dios. Ju mincha lactʼiyan. 4 Vachuʼ ixchuxʼan takʼotkʼo ju anuʼ xcan ju axtaknilh ju Dios. Pus takʼotlh ju xcan ju taxtulh lacachiux. Cristo ju axtaknilh ju anuʼ xcan chai yuchi ju ixʼalactʼaʼanta. 5 Pus mas chunch ixʼaʼulhtucan para ju Dios jantu kʼox alhiula ni va jantu lai ixtaquiclacaʼi. Pus yuchi alhimakni ju Dios junta matich tuʼuʼ ixjunita. 6 Pus tasqʼuini ni caʼalacpastacnau acsni laktsʼinau ju tuchi tapasalh laʼisʼatsucuntiʼan ju yuʼunch. Ju chunch jantu vana calacasqʼuinau ju taxtokni ju jantu kʼox lhiulai ju Dios tachi ju ixtalai ju yuʼunch. 7 Pus yuchi iclalhijunau ni jantu va kʼaya alhilacʼapʼitʼit ju santo tachi ju ixtalai ju aliʼin sia yuʼunch. Chunch ju talalh tachi ju tsʼokcanta laʼixchivinti Dios junta chani najun: “Ju lapanacni ma tatavi chai tatsuculh lacvenin. Chai tatsuculh lackʼotnin. Chai acsni tavenkʼo tataya chai tatsuculh atʼinin ni tamacʼatani ju isantoʼan ju ixtanavita”. Chunch ju najun laʼixchivinti Dios. 8 Nin yuchi ni lai catʼatsucuch ju jantu quiʼamachakaʼan u jantu quimpapaʼan tachi ju talalh ju aliʼin sia yuʼunch. Pus tanilh lakapʼuxamtʼutu milh ju yuʼunch ju va tam avilhchan ni chunch ju talalh. 9 Nin yuchi ni calaktsʼintanuyau ju Cristo ni vasalh camuctaxtuyaʼ ju ixchivinti u jantu tachi ju talalh ju aliʼin sia yuʼunch. Pus ju Dios na lhu macamilh ju lu chai taʼatsʼacalh ju lapanacni chai na lhu tani. 10 Nin yuchi ni canaju ni jantu kʼox ju tuchi quintaxtaknin ju Dios tachi ju tanaulh ju aliʼin sia yuʼunch. Pus na lhu amaknilh ju anquilh ju malakachalh ju Dios ni chunch ju talalh. 11 Pus ni chunch ju tapasalh laʼisʼatsucuntiʼan ju yuʼunch pus tasqʼuini ni caʼalacpastacnau vachuʼ ju quijnanʼan ju tʼonau ju chavai acsni vanin minta ju avilhchan acsni caminchokoyaʼ ju Cristo. Pus ju Dios lhinaulh istsʼokʼulaca laʼixchivinti tachi ju tanavilh ju yuʼunch ni jantu vana va chun catailhiʼau tachi ju talalh ju yuʼunch. 12 Pus ni chunch ju tatapasalh ju makʼaniya lapanacni pus ju lapanac ju najun ni jantu tavanan lai cakʼalhkʼosaʼ laʼisʼatsucunti tasqʼuini ni kʼox calhistacchokocalh. Jantu xcai ni lhi tʼuxam vachuʼ cakʼalhkʼoslh. 13 Pus mas va tuchi macxcai ju mapʼastʼacʼanicʼanatʼit acʼatsʼatʼit ni na lhu ju mintʼalapanacni tasastucta ju chunch macxcai. Chai ju Dios lai lhilaksican. Chai ju yuchi jantu calacasqʼuinaʼ ni va lhuch amapʼastʼacʼanicʼanaʼitʼit tachi ju jantu lai asastʼucʼaʼitʼit. Para acsni va amapʼastʼacʼanicʼanaʼitʼit ju tuʼuʼ macxcai pus ju Dios catamasuniyan ta yu laich apʼusamakʼanaʼitʼit. Ju chunch jantu tasqʼuini ni anaviyaʼitʼit. 14 Pus iclajunau ji quiʼalakʼavin ni lana nin lacatsʼunin jantu alhilacʼapʼitʼit ju santo. Va yuchi ju Dios ju vilhcha talaclhman ju alhilaksitʼit. 15 Chunch iclalhixakʼalayau ni iccʼatsai ni na lai amachʼakxananatʼit. Pus kʼox apʼastʼactʼit ju tuchi iclajunau. 16 Pus acsni kʼotʼau ju anuʼ vino ju ixpupastaccan ixʼaninti ju Cristo pus pʼulhnan xtakniyau ju Dios lakʼailaktsʼiuch. Chai acsni kʼotʼau va nomputun ni quinchuxʼan lhilaksiyauch ju ixʼacʼalhni ni yuchi ju quintaxacanikʼotan ju quintalakʼalhinʼan. Chai acsni chʼekʼeʼiyau chai uyau ju anuʼ xkapavati ixpupastaccan ixlacatuna ju Cristo va nomputun ni lhilaksiyau ixʼaninti ju Cristo ju quilacataʼan. 17 Pus ju anuʼ xkapavati ju chʼekʼeʼiyau va lakatamch. Pus ju quijnanʼan ni va lakatam xkapavati ju uyau pus tachi ju va lakatam lacatuna juntau mas quilhuʼan juntau. 18 Alaktsʼintʼitch tachi ju talai ju ixpalijniʼan ju quintʼaʼisraelitanin. Acsni kʼaixtam taʼuich lacatsʼunin ju anuʼ atapacxat ju talacxavanich ju Dios pus va nomputun ni va lakatam junita ixʼatalacpastʼacʼatʼan acsni talakʼayai ju Dios. 19 Ju yuʼunch ju jantucaʼ talhilacaʼanta ju Cristo talhikʼailaktsʼin ju lhivai ju isantoʼan. Para jantiyuʼ ju Dios ju stavasalanti ju talhikʼailaktsʼin. Alai lhacaticuru ju talhikʼailaktsʼin. Pus ju anuʼ santo ju talhilaksi jantu tuʼuʼ ixtapalhni ni jantu lakʼajunta. Chai ju lhivai ju talhikʼailaktsʼin jantu ta junita mas acʼulh. Para ju tam lapanac ju jantucaʼ lhilacaʼanta ju Jesús ni caxtakniyan ju anuʼ lhivai chai ni atʼaʼuyaʼ pus catanonaʼ ju aliʼin ni vachuʼ va maklacʼapʼini ju santo. Chai ju chunch talakʼalhin. 21 Jantu lai atʼikʼotʼit ju vino acsni pupastaccan ju ixʼaninti ju Cristo acsni vanach amakkʼotʼaʼitʼit ju alhikʼailaktsʼincanta ju lhacaticuru acsni navinican ixcʼatan. Jantu lai aʼuyaʼitʼit ju anuʼ xkapavati ju pupastaccan ixlacatuna ju Cristo acsni vanach amakʼuyaʼitʼit ju lhivai ju lhikʼailaktsʼincanta ju lhacaticuru. 22 Ni chunch ju layatʼit pus ja va laktsʼintʼanupʼutʼunatʼit ju Dios ni calhitalhkʼamalh. Ja va nonatʼit ni palai tachapunin untʼatʼit ju uxijnan. Palai jantu ju Dios. 23 Ju aliʼin tanajun ni laich navikʼocan tachi chun ju taxtokni ju naviputuncan. Pus vasalh. Para jantu si lai caʼaktaijun. Vasalh ni lai navikʼocan tachi chun ju taxtokni ju naviputuncan. Para jantu si lai caʼaktaijun ni lai palai alhilacʼapʼi ju Cristo. 24 Para jantu kʼox ni va canaviyau tachi ju kʼachaniyau quiʼakstuʼan. Alai tasqʼuini ni vachuʼ capastʼacʼau ta yu laich capuʼaʼaktaijuyau ju aliʼin. 25 Tachi chun ju lhivai ju stʼacan ju laclhitamau laich aʼuyaʼitʼit. Chai jantu tasqʼuini ni asacminintʼit ni ixlhikʼailaktsʼincanta ju santo u jantu. 26 Lai chunch alatʼit ni si ixʼanuʼ Dios junita chux ju lacamunutpaʼ chai tachi chun ju taxtokni ju alin ju anich. Si ixʼanuʼ. 27 Acsni catakʼailhiʼanan vaiti xamatiʼ ju jantucaʼ lhilacaʼanta ju Cristo laich atʼaʼitʼit. Chai tachi chun ju catalakʼaʼulayanch aʼuyaʼitʼit. Nin lai asacmitʼit ni ixlhikʼailaktsʼincanta ju santo u jantu. 28 Para ju vachuʼ anch makvajin ni va catajunin ni ixlhikʼailaktsʼincantach ju santo ju anuʼ lhivai ju xtʼaknicʼantʼatʼit pus jantuch aʼutʼit. Chunch alatʼit ni va talhonicaʼ ju santo ju anuʼ xajunan chai va lai makʼalhkʼosutʼit ni va aʼutʼit ju uxijnan. 29 Mas laich aʼutʼit ni jantu tʼalhoniyatʼit ju uxijnan para jantu lhijun ni chunch alatʼit ni talakʼalhin calhiula apumatam. Para laich aquilasacmiyau chai aquilajunau: “Tajuch ni jantu lai icʼui ju lhivai va ixlacata akʼantam ju jantu lai ui. 30 Pus ni icxtakni lakʼailaktsʼiuch ju Dios ixlacata ju tuchi icʼui pus tajuch ni va talakʼalhin calhiulayaʼ ju apumatam ni acʼulh ni icjunita lakʼailaktsʼiuch ju Dios”. Chunch ju lai aquilajunau. 31 Pus chani iclajunau. Acsni avenaʼitʼit chai acsni akʼotʼaʼitʼit tuʼuʼ u tuʼuʼ atumpa anaviyaʼitʼit pus chunch ju anaviyaʼitʼit tachi ju laich catapunonaʼ ju aliʼin lapanacni ni Dios ju xakʼai. 32 Chunchach ju amalacʼasutʼit ju lamiʼatsucuntiʼan ta yu jantu catapukʼalhkʼosan ju tatalhonicaʼ ju makʼaniya ixlhamapʼaksin Dios. Nin yuʼunch ju jantucaʼ talhilacaʼanta ju Cristo. Nin yuʼunch ju talhilacaʼanta ju Cristo. 33 Pus tachi chun ju icnavi ju quitʼin jantu va quinkʼachat quiʼakstu ju icnavi. Alai junta jantu tʼalasai ixchivinti Dios pus icnavini ixkʼachat ju quintʼalapanac ni tsʼa ma laich catalhilacaʼalh ju Jesús.
1 Pus chunchach ju alatʼit lamiʼatsucuntiʼan tachi ju iclai ju quitʼin. Chai ju quitʼin isʼatsucunti Cristo ju quilhilaktsʼintaiti icnavita. 2 Na kʼox iclhiulai ji quiʼalakʼavin ni pʼastʼackʼoyatʼit tachi chun ju iclajuntauch chai naviyatʼit tachi chun ju iclamalanitauch. 3 Para va iclacasqʼuin ni amispʼatʼit ni yuchi ju Dios ju saʼaktsulh junita laʼisʼatsucunti ju Cristo. Chai yuchi ju Cristo ju saʼaktsulh junita laʼisʼatsucunti tachi chun ju jokʼatni ju talhilacaʼanta ju Cristo. Chai ju jokʼat saʼaktsulh junita laʼisʼatsucunti tam chakoʼulh. 4 Pus na lhimaxan acsni aktanun ju ixʼaktanut tam jokʼat acsni tʼachivinin ju Dios chai acsni najun ixchivinti Dios. 5 Chai vachuʼ na lhimaxan ni jantu lakpaxtakcanta ju tam chakoʼulh acsni tʼachivinin ju Dios chai acsni najun ixchivinti Dios. Pus ni jantu lakpaxtakcanta pus va ixtʼachunchach junita tachi acsni va casitmakʼalh ju ixʼai. 6 Ju tam chakoʼulh ni jantu lakpaxtakputuncan pus chach lana lakpalipipi va. Para ni lhimaxan lhiulai ni va casitlh ju ixʼai u ni va lakpalipipich cava pus yuchi calhilakpaxtakcalh. 7 Ju tam jokʼat jantu catilakpaxtakcalh ni navicalh tachi ju Dios. Chai laʼisʼatsucunti putasui ni vasalh kʼai ju Dios. Chai laʼisʼatsucunti tam chakoʼulh putasui ni na kʼai ju jokʼat. 8 Pus ju Dios acsni tavanan navilh ju pʼulhnan jokʼat jantu laʼixlacatuna ju chakoʼulh ju maxtulh. Alai laʼixlacatuna ju jokʼat ju maxtulh ju pʼulhnan chakoʼulh. 9 Chai ju pʼulhnan jokʼat jantiyuʼ lhinavicalh ni caʼixʼalilh tam chakoʼulh ju va ixmaktasqʼuinich ju ixlakʼau. Alai yuchi lhinavicalh ju chakoʼulh ni na ixmaktasqʼuinich ixlakʼau ju anuʼ jokʼat. 10 Pus ixlhiyuchach ju tam chakoʼulh calhilakpaxtakcalh ni anch ju caputasuyaʼ ni maklacaʼanita ju ixpapa. Vachuʼ yuchi chunch calhilalh va ixlacata ju anquilhnin ju anch tavilanalh. 11 Para ju Dios lhilhcata ju isʼatsucuntiʼan ixtʼiyunʼan ni talamaktasqʼuini. 12 Pus ju pʼulhnan chakoʼulh laʼixlacatuna ju jokʼat ju maxtucalh. Chai ju chavai laʼixmacni ju chakoʼulh ju lakʼajun ju jokʼat. Para Dios ju anavikʼo chux ixtʼiyunʼan. 13 Pus aquilajunau. Ja lhijun ni catʼachivinilh ju Dios ju tam chakoʼulh acsni jantu lakpaxtakcanta. 14 Ju va lamintacʼatsanʼan miʼakstuʼan ja jantu lai machʼakxayatʼit ni lhimaxan catasu ju tam jokʼat ni calakʼaya ju ixʼai. 15 Para ju tam chakoʼulh ni lakʼayanicantach ju ixʼai pus ixmakʼoxinch junita ju chakoʼulh. Tachi ju va ixlhilakpaxtakcanch junita ni laklhman ju ixʼai. 16 Para ni alin tam xamatiʼ ju va lhilasaputun ju ani chivinti pus camachakxa ni va chunch ju iclhilanitauch ju quijnan chai ju aliʼin lapanacni ju talhilacaʼanta ju Cristo. 17 Pus ju chavai iclajumputunau ixlacata tuchʼi layatʼit acsni tʼakʼaixtʼokʼatʼit. Pus lana jantu kʼox iclhiulai tachi ju layatʼit. Pus acsni tʼakʼaixtʼokʼatʼit jantu laʼaktʼaiʼuyatʼit. Alai va lhilakʼalhipʼalatʼit ju miʼatsucuntiʼan. 18 Ickʼasmatʼa ju quitʼin ni jantu va quilhmactam untʼatʼit acsni tʼakʼaixtʼokʼatʼit ju lamimpujitatʼan. Chai paitat iclacaʼi ni chunch ju untʼatʼit. 19 Para ca aktsʼiya tasqʼuini ni jantu va quilhmactam aʼuntʼit. Ju chunch cataputasuyach ju vasalh tanaviniputun ixkʼachat ju Dios chai tichi chavaich ju jantu. 20 Pus ju uxijnan tʼakʼaixtʼokʼatʼit chai nonatʼit ni kʼotpʼutʼunatʼit ju vino chai upʼutʼunatʼit ju xkapavati ju ixpupastaccan ixʼaninti ju Jesús. Para jantu vasalh pʼastʼacʼatʼit ju ixʼaninti ju Jesús ni quilhmaclhu untʼatʼit. 21 Pus ju uxijnan acsni venatʼit pus ju pumatamin pumatamin va isʼakstu uchokoi ju lhiminta mas jantucaʼ tolhkʼocan junta vencan. Pus ju chunch ju aliʼin jantuch lai talhilai. Chai ju aliʼin lhu takʼotʼa ju vino chai talactʼakʼapʼaich. 22 Chunch ju layatʼit tachi ju va matich ju minchakaʼan junta lai avaʼintʼit chai lai akʼotʼit ju vino. Tachi ju va jantu tuʼuʼ lalhiulayatʼit ju uxijnan ju aliʼin ju talhilacaʼanta ju Cristo vachuʼ. Chai va amamaxaniyatʼit ju quilhpatinin ni jantu na lhu talhimin ju ixvaitiʼan. Pus tas aclajunauch. Ju uxijnan ja nonatʼit ni kʼoxich aclhiulayaʼ ju chunch. Pus iclajunau ni lana jantu kʼox iclhiulai tachi ju layatʼit. 23 Pus isʼakstu Jesús ju quijuni tuchi iclamasunitauch ixlacata ju vaiti ju pupastaccan ixʼaninti. Pus ju anuʼ atatsʼisni acsni makʼaxtakcalh ju Jesús pus ju yuchi chʼapalh lakatam xkapavati. 24 Chai acsni xtaknilh lakʼailaktsʼiuch ju Dios pus lana chʼekʼelh ju xkapavati chai ma ajunilh ju ixʼamamakaʼui: “Axakʼatʼaʼitʼit. Aʼutʼitch. Ju ani xkapavati ju iclaxtakniyau yuchi ju quilacatuna ju acxtʼakʼaʼ ju milacataʼan. Va tsa chani alatʼit ni laich apʼupʼastʼacʼaʼitʼit ju quiʼaninti ju milacataʼan”. Ma chunch ju ajuni ju Jesús. 25 Chai ju astan acsni tavenkʼolhch pus ju Jesús chʼapalh ju vaso ju ixputajun ju vino chai ma ajuni ju ixʼamamakaʼui: “Ju ani ma vino yuchi ju quiʼacʼalhni ju mavasalai ju sastʼi chivinti ju iclalhitʼatakʼoxiyauch ju uxijnan. Pus va ta pakchux ju akʼotʼaʼitʼit va aquilapupastʼacʼauch ju quitʼin”. Chunch ju quimavasalanilh isʼakstu ju Jesús. 26 Pus iclajunau ni va ta pakchux ju aʼuyaʼitʼit ju ani xkapavati chai akʼotʼaʼitʼit ju ani vino pus va apʼumalacʼasuyaʼitʼit ni vasalhch nilh ju Jesús ju milacataʼan. Chai chunch ju atʼailhipʼitʼit tus acsni caminchokoyaʼ ju yuchi. 27 Chai ni chunch ju naulh ju Jesús pus na kʼai talakʼalhin canavi va tichi chavaich ju jantu kʼox junita ju isʼatsucunti laʼixmacni Dios acsni caʼuyaʼ ju anuʼ xkapavati chai cakʼotʼaʼ ju anuʼ vino ju ixpupastaccan ixʼaninti ju Jesús. Tachi ju va jantu tuʼuʼ ixtapalhni lhiulai ixlacatuna chai ixʼacʼalhni ju Jesús. 28 Pus va ta pakchux ju cakʼotʼaʼ ju vino chai caʼuyaʼ ju xkapavati pus tasqʼuini ni cacʼatsa ju pumatamin pumatamin ta yu junita ju ixʼalhunut isʼakstu laʼixmacni Dios u alin ixtalakʼalhin ju jantu macʼacxanicanta u jantu. 29 Pus ni xamatiʼ cakʼotʼaʼ ju anuʼ vino chai caʼuyaʼ ju anuʼ xkapavati chai jantu canavi cuenta ni chunchach ju pupastaccan ixʼaninti ju Jesús pus isʼakstu ulanichokocan ixtalakʼalhin. 30 Chai ni alin ju sia milhiʼuxijnan ju chunch ixtalai pus ixlhiyuchi na lhu alin ju lamilhiʼuxijnan ju jantu lactachapunin tajunita chai ju va talactakʼankʼai chai na lhu ju tapunita. 31 Pus ni va cacʼatsauch ta yu junita ju quiʼalhunutʼan laʼixmacni Dios chai jantu va kʼaya calauch pus ju chunch ju Dios jantu aquintamamakʼalhkʼajniyan. 32 Para acsni quintamamakʼalhkʼajniyan ju Dios pus ju yuchi va lacasqʼuin ni camacajuch ju macxcai. Chai ju chunch pus jantu aquintamamakʼalhkʼajniyan ju Dios tachi ju caʼamamakʼalhkʼajnikʼalhiyach ju jantu talhilacaʼanta ju Jesús. 33 Pus ji quiʼalakʼavin acsni tʼakʼaixtʼokʼatʼit acsni upʼutʼunatʼit ju anuʼ ixpupastaccan ixʼaninti ju Jesús pus alapʼacxantʼitch acsni avenaʼitʼit. 34 Chai ni xamatiʼ ju na chavani pus chach venchalh laʼixchakaʼ. Pus ni chunch ju alatʼit pus ju Dios jantu catamamakʼalhkʼajniyan. Pus ju aliʼ taxtokni astan aclajunau acsni aclalakchaʼanchokoyauch.
1 Iclacasqʼuin ji quiʼalakʼavin ni amachʼakxatʼit ixlacata ju lhakʼailaktsʼin ju quintaxtakniyan ju Spiritu Santu. 2 Pus apʼastʼactʼit. Acsni jantucaʼ ixlhilacʼapʼinatʼit ju Jesús ixmalacʼaʼinicʼantʼatʼit ni na tuʼuʼ ju santo mas jantu lai chivinin. 3 Pus iclacasqʼuin ni lai amachʼakxayaʼitʼit ta yu pucʼatsacan ni tʼajun chiviniʼ tam lapanac laʼixtachaput ju Spiritu Santu. Chai yuchi iclalhijunau ju ani. Acsni xamatiʼ chivininch laʼixtachaput ju Spiritu Santu pus jantu lai chani catinaulh: “Chach mamakʼalhkʼajnikʼalhicalh ju Jesús”. Chai jantu lai xamatiʼ catinaulh ni lhilaksich ju Jesús chai yuchach ju ixʼucxtin ni jantu caʼaktaijulh ju Spiritu Santu ni lai chunch canaulh. 4 Na tijlhu alin ju lhakʼailaktsʼin ju xtʼakʼa ju Spiritu Santu ixlacata ixlhichʼalhcat ju Dios. Para va pumatam ju xtʼakʼa. Va yuchi ju Spiritu Santu. 5 Chai na tijlhu alin ju lhichʼalhcat laʼixmacni Dios para va pumatam ju chʼalhcatnanican. Va yuchi ju Jesús. 6 Chai yuchi ju Dios ju axtakni ju pumatamin tijtamin lhichʼalhcat. Chai isʼakstu ju Dios ju quintaxtakniyan ju quintachaputʼan ni lai naviyau ju tuchi lhichʼalhcat ju quintalhcaʼulanitan ju yuchi. 7 Pus laʼisʼatsucuntiʼan ju pumatamin pumatamin tasui ixtachaput ju Spiritu Santu ni laich caʼapuʼaktaiju ju aliʼin. 8 Pus ju pumatam xtaknicanta ju lhakʼailaktsʼin ni na acʼatsananta chai laich sok amalaninin ixchivinti Dios. Chai ju apumatam xtaknicanta ixlhakʼailaktsʼin ni na lai masui ixchivinti Dios junta palai xcai machakxacan. Chai yuchi ju Spiritu Santu ju axtakni ixtʼiyunʼan ju ixlhakʼailaktsʼinʼan. 9 Chai ju apumatam xtaknicanta ju ixlhakʼailaktsʼin ni ixlhichux ixʼalhunut ju lhilaksi ixchivinti Dios ni vasalh camuctaxtuyaʼ tachi ju najun ju yuchi. Chai vana yuʼ ju Spiritu Santu ju xtaknita ju ani lhakʼailaktsʼin. Chai ju apumatam xtaknicanta ju ixlhakʼailaktsʼin ni lai palaich anavi ju takʼankʼanin. Para vana yuʼ ju Spiritu Santu ju xtakni ju chunch lhakʼailaktsʼin. 10 Ju apumatam xtaknicanta ju ixlhakʼailaktsʼin ni laich navi ju tuʼuʼ lhamakʼan. Chai ju apumatam xtaknicanta ju lhakʼailaktsʼin ni laich najun ixchivinti Dios. Chai apumatam xtaknicanta ixlhakʼailaktsʼin ni lai camispa ni yuchi ju Spiritu Santu ju axakʼalai ju lapanacni u jantu. Chai ju apumatam xtaknicanta ixlhakʼailaktsʼin ni laich cachivinaʼ atumpa chivinti mas jantu aktam chivininta ju chunch. Chai ju apumatam xtaknicanta ixlhakʼailaktsʼin ni laich camavasalayaʼ ju anuʼ chivinti. 11 Para tachi chun ju ani lhakʼailaktsʼin isʼakstu ju Spiritu Santu ju xtʼakʼa chai yuchi ju alhvakxtaknikʼojui ju pumatamin tachi ju kʼoxich lhiulai isʼakstu. 12 Ju quilacatunaʼan va lakatam. Para na lhu ju ixpuchʼalhcatna. Para mas na lhu ju ixpuchʼalhcatna va lakatamch lacatuna junita. Pus vana va chun tachi chun ju talhilacaʼanta ju Cristo. 13 Acsni tavanan akpaxtauch pus ju Spiritu Santu quintanavinitan tachi ju va lakatam lacatuna juntau ju quijnanʼan ju lhilacaʼantauch ju Cristo ni si pacxankʼotauch ju anuʼ Spiritu Santu. Va lakatam lacatuna juntau mas israelitanin juntau u jantu israelitanin. Mas xalapanac juntau u tam xamatiʼ ju matiʼ ixʼucxtin. 14 Na lakalhu ju ixpuchʼalhcatna ju quilacatunaʼan. Jantu va lakatam. 15 Pus ni laich cava cachivinilh ju quinchʼajaʼan laich chani canaulh: “Ju quitʼin jantu ixpuchʼalhcatna ju lacatuna ni jantu icmacaʼ”. Para mas chunch ju canaulh jantu nomputun ni jantu vasalh lacalacatuna ju tinui. 16 U ni laich cava cachivinilh ju quiʼakʼaxkʼolhʼan laich chani canaulh: “Ju quitʼin jantu ixpuchʼalhcatna ju lacatuna ni jantu iclakchulh”. Para mas chunch ju canaulh jantu nomputun ni jantu lacalacatuna ju tinui. 17 Pus ni va si lakchulh cava ju quilacatunaʼan tas anchach ju capakʼasmatnau. U ni va si akʼaxkʼolh cava ju quilacatunaʼan tas anchach ju capaxaniu. 18 Para ju Dios lhilhcaʼulata ju lakatamin xataxtokni ju quilacatunaʼan tachi ju kʼoxich lhiula ju yuchi. 19 Ni va lakatam ixpuchʼalhcatna ju lacatuna ixva pus matiʼ ixva ju lacatuna. 20 Pus ju Dios mas quintaxtaknitan na lhu ju ixpuchʼalhcatna ju quilacatunaʼan para va lakatam lacatuna junita. 21 Chai ju quilakchulhʼan ni laich cava cachivinilh jantu lai catijunilh ju quimacaʼan: “Jantu icmaktasqʼuiniyan”. Nin yuchi ju quiʼaktsulhʼan ni laich cava cachivinilh jantu lai catijunilh ju quinchʼajaʼan: “Jantu icmaktasqʼuiniyan ju uxintʼi”. 22 Tachi chun ju pacxantau ju laquilacatunaʼan alin ju tasui tachi ju va jantu na lhu cachʼalhcatnalh. Para yuchach ju palai maktasqʼuiniyau. 23 Chai alin ju pacxantau ju laquilacatunaʼan ju palai jantu tuʼuʼ lhiulayau. Para yuchach ju palai maxantilayau. Chai alin ju ixpuchʼalhcatna ju quilacatunaʼan ju jantu lhijun ni calaktsʼincalh chai ju yuchi kʼox malakchʼiniyau. 24 Para ju ixpuchʼalhcatna ju quilacatunaʼan ju na cʼus pus jantu tasqʼuini ni acmaxantilalh. Chai ju puchʼalhcatna ju palai jantu tuʼuʼ lhiulacan pus yuchi ju palai maxantilayau. 25 Ju chunch ju ixpuchʼalhcatna ju quilacatunaʼan jantu talaclasai. Alai va talalhistʼacʼa. 26 Chai acsni camakʼalhkʼajnanaʼ lakatam ixpuchʼalhcatna ju quilacatunaʼan pus chux quilacatunaʼan vachuʼ makʼalhkʼajnan. Chai acsni cajuncanaʼ lakatam ixpuchʼalhcatna ju quilacatunaʼan ni na kʼox pus chux ju quilacatunaʼan na kʼachan. 27 Pus vana va chun ju uxijnan. Ju uxijnan tachi ixlacatuna Cristo untʼatʼit. Chai pumatamin ju uxijnan tijtamin tijtamin lhichʼalhcat ju canaviyaʼ. 28 Pus junta takʼaixtʼokʼau ju quijnanʼan ju lhilacaʼantauch ju Cristo alin ju tucan ixtamalakachan Jesús tajunita. Chai alin ju laich tanajun ixchivinti Dios mas jantu tucan ixtamalakachan Jesús tajunita. Chai alin ju na lai taʼamalaninin. Chai alin ju na lai tanavi ju tuʼuʼ lhamakʼan. Chai ju aliʼin lai palai tanavi ju takʼankʼanin. Chai ju aliʼin na tacʼatsai ta yu laich apuʼaktaijui ju aliʼin. Chai ju aliʼin laich talhinajun lacatalhavat ju talhilacaʼanta ju Jesús. Chai vachuʼ alin ju lai tachivinin atumpa chivinti mas jantu aktam tachivininta ju chunch. 29 Para alaktsʼintʼit. Jantu si ixtamalakachan ju Jesús tajunita. Jantu si ixnonin ixchivinti Dios tajunita. Jantu si lai taʼamalaninin. Jantu si lai tanavi lhamakʼan. 30 Jantu si lai palai anavi ju takʼankʼanin. Jantu si lai tanajun atumpa chivinti ju jantu aktam tachivininta. Chai jantu si lai tamavasalai ju anuʼ chivinti. 31 Pus ixlhichux ju miʼalhunutʼan anavitʼit cuenta ta yu laich apʼuʼamaklhtʼayananaʼitʼit ju palai lackʼox lhakʼailaktsʼin ju xtʼakʼa ju Spiritu Santu. Para ju quitʼin aclajunau ta yu palai kʼox lana ju alayaʼitʼit.
1 Mas laich acchivinilh tijpachux chivinti ju alin ju ani lacamunutpaʼ chai mas laich acchivinilh tachi ju tachivinin ju anquilhnin para ni matiʼ ju quiʼamapaininti pus jantu tuʼuʼ ju quintapalhni. Va chunch acva tachi ju tuʼuʼ tsasnat ju anicʼach va kʼasmatnicanch ju istʼasat. 2 Chai mas na kʼox lai acnaulh ju ixchivinti Dios chai mas lai acmachakxa ixtaxtokni Dios ju jantu lai ixmachakxacan ju makʼanchich chai mas acmispakʼo tachi chun ju atalaninti chai mas ixlhichux quiʼalhunut aclhilaksi ju Dios chai acsni acsqʼuinilh laich aquimalakxtinunilh ju kʼai talhpa para ni matiʼ ju quiʼamapaininti pus jantu tuʼuʼ quintapalhni. 3 Chai mas acxtakkʼo ju quimakʼalit va ixmavaca ju quilhpatinin chai mas aclhitapʼuxlh ju quilacatuna ni calacxavacalh para ni matiʼ ju quiʼamapaininti pus jantu tuʼuʼ quilhitapalhni. 4 Ju na amapaininin jantu jeks ui. Chai kʼox lapanac junita. Ju na amapaininin jantu tuʼuʼ lhacchaʼan. Chai jantu talacasui tachi ju tam xakʼai chai jantu lhitakʼayai tuʼuʼ. 5 Ju na amapaininin jantu tuʼuʼ navi ju va calhimaxanalh astan. Chai jantu va isʼakstu mapainichokocan. Jantu lana lhitalhkʼaman ju tuʼuʼ chai jantu pastackʼalhi ju tuʼuʼ macxcai ju navicanta. 6 Ju na amapaininin jantiyuʼ ju lhikʼachan ju jantu soknicʼa ju navita akʼantam. Yuchi ju lhikʼachan ju soknicʼa. 7 Ju na amapaininin si chʼixkʼojui. Chai ju yuchi jantu vatsʼalhti mucʼani ixtalakʼalhin ju tam ixtʼalapanac. Chai ju na amapaininin va tachi lacaʼi ni kʼox cajunaʼ astan mas va tuchi tanavich ju lapanacni. Chai ju na amapaininin tastucnikʼojui tachi chun ju min laʼisʼatsucunti. 8 Ju amapaininti jantu tavanan caticʼacxlh. Para cachinaʼ avilhchan acsni jantu camaktasqʼuiniyau ju ixnajunca ixchivinti Dios chai ixnajunca atumpa chivinti mas jantu aktam chivincanta ju chunch. Chai jantu camaktasqʼuiniyau ju atalaninti tachi ju mispayau ju chavai. 9 Ju chavai na va lacatsʼunin ju mispayau chai jantu lai mavasalakʼoyau ju ixtaxtokni Dios ni jantu mispakʼoyau ju chavai. 10 Para acsni caminchokoyaʼ ju Cristo chai camispakʼoyau tachi chun ju taxtokni pus ju atalaninti ju mispayau ju chavai jantu tuʼuʼ ixtapalhni cajunaʼ. 11 Pus ju quiʼatsucuntiʼan tachi ju mispayau ju chavai chai tachi ju cajunaʼ ju astan chunch junita tachi isʼatsucunti ju tam askʼatʼa ni tapaxaʼanta ju ixʼatalacpastʼacʼat. Ju quitʼin acsni va askʼatʼacaʼ xacjunita xacchivinin tachi ju tam askʼatʼa. Xacʼalacpastacnan tachi ju tam askʼatʼa. Chai xacʼamachakxanan tachi ju tam askʼatʼa. Para ju chavai ni kʼaich lapanac icjunita pus icmacontilakʼolhch tachi chun ju va lhiʼaskʼatʼa. Pus vana va chun ju quiʼamachakxantiʼan. Camapaxanicanau acsni cachaʼanau ju lactʼiyan. 12 Ju chavai ju quiʼamachakxantiʼan chunch junita tachi acsni laktsʼinchokocanau laca tuʼuʼ speo ju jantu kʼox. Jantu lai kʼox mispayau ta yu juntau. Para acsni cachaʼanau ju lactʼiyan pus lana vas camispayau ju ixtaxtokni Dios ni lana calaktsʼinau ju Dios laʼixʼucxlacapuʼ. Ju chavai na lacatsʼunin ju machakxayau. Para acsni cachaʼanau ju lactʼiyan pus vas camispayau ju ixtaxtokni Dios tachi ju Dios ni vas quintamispayan ju chavai. 13 Pus va tachi calhilacaʼanauch ju Cristo. Chai va tachi calacaʼiyau ni aquintaxtakniyan ju tuchi quintakʼalhtasunitan ju Dios. Chai va tachi caʼamapainininau. Para va lakatamch ju ani ju palai lhitapalai. Yuchi ni na acʼamapaininilh.
1 Ju tucan anavitʼit cuenta yuchi ni alamapʼainitʼit ju milhiʼuxijnan. Para vachuʼ asqʼuinitʼit ju Dios ju lhakʼailaktsʼin ju xtʼakʼa ju Spiritu Santu. Chai ju palai kʼox lhakʼailaktsʼin ju laich asqʼuinitʼit yuchi ni laich anaʼuntʼit ixchivinti Dios. 2 Pus ju tam lapanac ju xtaknicanta ju lhakʼailaktsʼin ni laich chivinin ju chivinti ju jantu aktam ixchivininta pus jantiyuʼ ju xakʼalai ju ixtʼalapanacni. Alai Dios ju tʼachivinin ni jantu xamatiʼ machakxai tuchi najun. Ju yuchi vasalh chivinin laʼixlhichux ixʼalhunut para va yuchi ju Dios ju machakxai. 3 Para palai kʼox navi ju anuʼ lapanac ju xtaknicanta ju lhakʼailaktsʼin ni lai najun ixchivinti Dios. Pus ju yuchi alactʼachivinin ju ixtʼalapanacni. Chai laʼixchivinti alacʼaktaijui ni laich palai catalhilacaʼalh ju Cristo chai alacmapʼaksi chai amatankʼoxaxkʼayai. 4 Para ju chivinin ju chivinti ju jantu aktam ixchivininta pus va isʼakstu ju aktaijuchokocan. Para ju anuʼ lapanac ju najun ixchivinti Dios aʼaktaijui ju ixtalhavat ju talhilacaʼanta ju Cristo. 5 Na kʼox iclhiulai ni laich caʼixnaʼuntʼit minchuxʼan ju chivinti ju jantu aktam ixchʼivinatʼit. Para palai kʼox iclhiulai ni laich anaʼuntʼit ixchivinti Dios. Pus yuchach ju palai xakʼai ju canaulh ixchivinti Dios. Palai jantu ju va chivinin ju chivinti ju jantu aktam ixchivininta. Para ni camalakpusucalh ju anuʼ chivinti pus ju chunch vaklhtam chun catava ixtʼiyunʼan ni vachuʼ caʼaʼaktaiju ju talhilacaʼanta ju Cristo laʼixchivinti. 6 Pus ji quiʼalakʼavin mas acʼanchalh chai aclalhixakʼalau ju chivinti ju jantu lai machʼakxayatʼit pus tis kʼoxich ju lai aclanaviniu. Jantu lai actilaʼaktaiju ni jantu vas aclamasuniyau tuchi quimasunitach ju Dios. Chai jantu lai actilaʼaktaiju ni jantu aclajuniu ju tuʼuʼ laʼixchivinti Dios ju tasqʼuini ni amachʼakxatʼit. Jantu lai actilaʼaktaiju ni jantu vas aclamalaniyau ta yu kʼox atsʼucʼuyaʼitʼit laʼixmacni Dios. 7 Alaktsʼintʼitch. Mas va tuʼuʼ skʼolh u tuʼuʼ lhisan ni jantu vas catʼasayaʼ pus jantu lai cʼatsacan tuchi ju skʼolhcanch u tuchi ju sacanch. 8 Chai tachi ju tam taropa acsni skʼoli acsni va alin ju lasat. Ni jantu sok camakʼantʼasayaʼ ju iskʼolh pus jantu xamatiʼ lai calakasitsucuyaʼ ixʼanca lacalasat. 9 Pus vana va chun ju uxijnan. Ni jantu nonatʼit ju chivinti ju lai tamachakxai ju aliʼin tas laich catapucʼatsayaʼ ju tuchʼi alacʼunatʼit. Tachi ju va jantu xamatiʼ xakʼalayatʼit. 10 Na tijlhu chivinti alin ju ani lacamunutpaʼ para ju lapanacni ju tachivinin lakatamin lakatamin si tamachakxai tuchi tanajun. 11 Pus ju quitʼin acsni jantu lai icmachakxani ju ixchivinti ju apumatam pus tachi ju va makat amachakach aquilaktsʼinaʼ. Chai ju tʼajun chiviniʼ va amachakach makat iclhiulai vachuʼ. 12 Para ni slivasalh lacʼasqʼuinatʼit ju lhakʼailaktsʼin ju xtʼakʼa ju Spiritu Santu pus yuchi ju asqʼuinitʼit ta yu laich apʼuʼaktʼaiʼuyaʼitʼit ju yuʼunch ju talhilacaʼanta ju Cristo ni palai catalhilaksi ju yuchi. 13 Pus ju chivinin ju chivinti ju jantu aktam ixchivininta pus chach sqʼuinilh ju Dios ni laich vachuʼ camavasala. 14 Pus ju quitʼin ni actʼachivinilh ju Dios laca tuʼuʼ chivinti ju jantu aktam icchivininta pus ju quiʼalhunut tʼajun nonaʼ para jantu iccʼatsai tuchi ictʼajun nonaʼ. 15 Pus tasqʼuini ni chani aclalh. Actʼachivinaʼ ju Dios laʼixlhichux ju quiʼalhunut. Para laquinchivinti. Acmilhpayaʼ laʼixlhichux ju quiʼalhunut. Para laquinchivinti. 16 Pus ni va lakʼayayatʼit ju Dios laʼixlhichux ju miʼalhunutʼan laca tuʼuʼ chivinti ju jantu aktam ixchʼivinatʼit pus ju mintʼalapanac ju jantu machakxai ju anuʼ chivinti tas laich caxtaknilh vachuʼ lakʼailaktsʼiuch ju Dios. Jantu lai ni jantu machakxai tuchʼi naʼun. 17 Pus ju uxintʼi vasalh tʼaʼun xtakniniʼ lakʼailaktsʼiuch ju Dios para ju tatʼajun kʼasmatnin tulai apuʼaktaijucan ni jantu lai tamachakxai tuchʼi naʼun. 18 Pus ju quitʼin icxtakni lakʼailaktsʼiuch ju Dios ni palai lhu icchivinin ju chivinti ju jantu aktam icchivininta. Palai jantu ju uxijnan. 19 Para laʼixtalhavat ju talhilacaʼanta ju Jesús palai kʼox iclhiulai ni acchivinilh mas va lakaquis chivinti ju lai machakxacan ni laich acʼamalaninilh ju aliʼin. Palai jantu kʼox iclhiulai mas lakacau milh cava ju acchivinilh lacatuʼuʼ chivinti ju jantu aktam icchivininta chai ju jantu tamachakxai ju aliʼin. 20 Jantu chun alacpʼastʼacnantʼit ji quiʼalakʼavin tachi ju tam askʼatʼa ju jantucaʼ kʼox alacpastacnan. Alai alacpʼastʼacnantʼit tachi ju tam kʼaya lapanac ju acʼatsanantach. Va ixlacata ju miʼalactuʼuntiʼan chunch atsʼucʼutʼit tachi ju tam askʼatʼa ju va tsʼiquicaʼ ju jantucaʼ pastʼacʼa ju tuʼuʼ macxcai. 21 Pus ju laʼixlhamapʼaksin Dios ju makʼanch istsʼokcanta najunta ni ma chanich ixnajun ju Dios: “Ma caʼalacxakʼalayaʼ ju ani lapanacni laʼixchivintiʼan ju amachakʼan alacatam. Chai ju yuʼunch ma jantu lai catamachakxayaʼ ixchivintiʼan. Para nin chunch ma jantu catakʼasmatniputunaʼ ju Dios”. Chunch ju naulh ju Dios laʼixʼalhiqui. 22 Pus ju chunch lai acmachakxa ni jantu axakʼalai ju Dios ju talhilacaʼanta yuchi lacatuʼuʼ chivinti ju jantu tamachakxai. Alai yuʼunch ju axakʼalacan lacatuʼuʼ atumpa chivinti ju lana jantu lai taʼalacaʼinin. Tsʼa ma catatalhanalh chai cataʼalacpastacnalh. Para acsni noncan ixchivinti Dios laʼixchivintiʼan ju anch tavilanalh pus aʼaktaijucan ju talhilacaʼanta ju Jesús. Jantiyuʼ ni va caʼapumapastʼacʼanicalh ju lana jantu lai talacaʼi. 23 Pus acsni tʼakʼaixtʼokʼatʼit minchuxʼan ju lhilacʼapʼinatʼit ju Cristo chai tsʼucʼuyatʼit chivinin ju chivinti ju jantu tamachakxai ju aliʼin chai ni catatanucha ju jantucaʼ talhilacaʼanta ju Cristo u ju jantucaʼ tamachakxai ixchivinti Dios ja jantu lai catanaulh ni ca va lakachapunin untʼatʼit. 24 Para ni minchuxʼan tʼonatʼit nonin ixchivinti Dios chai catanucha pumatam ju jantucaʼ lhilacaʼanta ju Jesús u tam xamatiʼ ju jantu machakxai ixchivinti Dios pus laminchivintiʼan capumachakxayaʼ ni alactuʼunuʼ junita chai caʼalacpastacnanaʼ. 25 Chai capucʼatsakʼoyaʼ tachi chun ju alactuʼunti ju makʼata laʼixʼalhunut. Chai catakʼentayaʼ ni calakʼayayaʼ vachuʼ ju Dios chai cajunach ni yuchi ju Dios ju xakʼaich. Chai canonach ni slivasalh tʼajun ju Dios lamilhiʼuxijnan. 26 Pus chanich iclajumputunau. Acsni tavanan atʼakʼaixtʼokʼaʼitʼit pus ju pumatamin lamilhiʼuxijnan caʼatʼamilhpaputunach ju aliʼin. Ju apumatam alin tuchi amalaniputun ju aliʼin. Ju apumatam ajumputun ixchivinti Dios. Apumatam chivimputun ju chivinti ju jantu aktam ixchivininta. Chai ju apumatam va malakpusuputun ju anuʼ chivinti. Para tachi chun ju naviyatʼit chunchach ju alayaʼitʼit ta yu laich apʼuʼaktʼaiʼuyaʼitʼit ju aliʼin ni palai catalhilacaʼalh ju Jesús. 27 Acsni alin ju lapanacni ju tachivimputun ju chivinti ju jantu aktam tachivininta pus tasqʼuini ni va pumatʼui u pumatʼutu catachivinilh. Para va pumatamin pumatamin. Chai vachuʼ tasqʼuini ni caʼalilh pumatam ju camalakpusuyach ju anuʼ chivinti. 28 Para lacatalhavat ni matiʼ tichi chavaich ju laich camalakpusu ju anuʼ chivinti pus chach alai va sek tavi ju anuʼ ju chivimputun. Chach tʼachivinilh ju Dios va isʼakstu laʼixʼalhunut. 29 Chai vana va chun ju tanajun ixchivinti Dios. Tasqʼuini ni va pumatʼui u pumatʼutu ju catachivinilh. Para va pumatamin pumatamin. Chai ju aliʼinch catalaktsʼintanu ju ixchivintiʼan u sok u jantu. 30 Chai ni alin apumatam ju tuʼuʼ masunita ju Dios pus chach mamacta ixchivinti ju tʼajun chiviniʼ ni laich cachivinilh ju va acsnicaʼ mapastʼacʼanicanta ju tuchi canonaʼ. 31 Pus tachi chun ju uxijnan ju xtʼaknicʼantʼatʼit ixlhakʼailaktsʼin ju Spiritu Santu ni laich nonatʼit ixchivinti Dios laich achʼivinkʼoyaʼitʼit. Para va pumatamin pumatamin. Chai ju chunch minchuxʼan alaniyaʼitʼit aliʼ ixchivinti Dios chai minchuxʼan palai alhilacʼapʼinaʼitʼit ju Cristo. 32 Pus ju xtaknicanta ixlhakʼailaktsʼin ju Spiritu Santu ni laich najun ixchivinti Dios laich pacxan pantsʼiquis. Jantu tasqʼuini ni lanach cachivinilh acsni mapastʼacʼanican tuʼuʼ. 33 Ju Dios jantu chunch manavini tam xamatiʼ ni jantu kʼachani ju yuchi ni na pumalhu catachivinilh ju vaktam. Ju yuchi kʼachani acsni va pumatamin catachivinilh. Chani talai tachi quilhmacchux ju talhilacaʼanta ju Jesús. 34 Tachi chun ju chakolun lamilhiʼuxijnan va sekch catatavi lacatalhavat. Jantu axtaknicanta lhamapʼaksin ni laich catachivinilh. Ju yuʼunch va calhijuncanaʼ ni chunch ju najun laʼixchivinti Dios ju tsʼokcanta makʼanch. 35 Chai ni tuʼuʼ ju machakxaputun xamatiʼ pus chach sacmicha ju istʼatsucunuʼ laʼixchakaʼ. Na lhimaxan cava ni va cachivinilh ju tam chakoʼulh junta kʼaixtokcan. 36 Tachi ju layatʼit tachi ju va nonatʼit ni uxijnan ju pʼulhnan xanonatʼit ixchivinti Dios. Mas jantu. Chai tachi ju va nonatʼit ni matiʼ aliʼitni ju talhilacaʼanta ju yuchi. Pus ni chunch ju malacʼasuyatʼit tachi ju va nonatʼit ni va uxijnan ju lai nonatʼit ta yu lhijun ni canavicalh lacatalhavat. 37 Pus ju lamilhiʼuxijnan ni taʼalin ju tanajun ni axtaknicanta ju ixlhakʼailaktsʼin ju Spiritu Santu ni laich najun ixchivinti Dios u ni taʼalin ju tanajun ni axtaknicanta ju aliʼ ixlhakʼailaktsʼin ju Spiritu Santu pus chach tacʼatsa ni yuchach ju ani ju stavasalanti ixlhamapʼaksin ju Jesús ju iclaʼatsʼoknuniyau ju ani lacaʼalhiqui. Chai tasqʼuini ni chunch ju catanavi tachi ju iclajunau. 38 Para ni alin xamatiʼ ju jantu lacaʼiputun ni ixlhamapʼaksin Jesús cava ju ani ju iclajuntau pus jantu aqʼuiclacʼaʼitʼit ju yuchi. 39 Pus chunchach ji quiʼalakʼavin. Asqʼuinitʼitch ju Dios ni laich anonaʼitʼit ixchivinti. Chai jantu akʼalhtsʼaʼutʼit ni xamatiʼ cachivimputulh ju chivinti ju jantu aktam ixchivininta. 40 Para tachi chun ju anaviyaʼitʼit lacatalhavat tasqʼuini ni chunch ju anavitʼit tachi ju lhijunch. Chai va pumatamin pumatamin ju cachivinilh.
1 Ju chavai ji quiʼalakʼavin iclamapastʼacʼaniyau ju uxijnan ju chivinti ixlacata ju Cristo ju xaclajuntauch. Chai yuchach ju xalacʼaʼiyatʼit chai tus chavai lacʼaʼikʼalhiyatʼit. 2 Chai ni alacʼaʼikʼalhiyaʼitʼit pus atʼakʼalhtʼaxtʼuyaʼitʼit. Para ni jantu vasalh alacʼaʼiyaʼitʼit pus jantu lai atʼitʼakʼalhtʼaxtʼutʼit. 3 Pus iclajuntau ju palai tasqʼuini ni amispʼatʼit. Yuchi ju icmasunicanta vachuʼ. Iclajuntau ni nilh ju Cristo laquintalakʼalhinʼan. Chunch ju muctaxtulh tachi ju istsʼokcanta makʼanchich laʼixchivinti Dios. 4 Vachuʼ iclajuntauch ni macnucalh ju Jesús. Para acsni ixtapasata lakatʼutu avilhchan pus ju yuchi taʼacxtuchokolh junta ixmacnucanta. Chai vana chunch ju muctaxtulh tachi ju istsʼokcanta laʼixchivinti Dios ju makʼanchich. 5 Chai iclajuntau ni acsni tavanan taʼacxtuchokolh pus yuchi ju Pitaluʼ ju talacasunilh. Chai astan atalacasunilh ju ixtamalakachan. 6 Chai ju astanch acsni talacasuchokolh ju Cristo pus talaktsʼilh aliʼin ju quilhiʼalakʼavinʼan laʼixmacni Cristo ju va kʼaixtamch ixtavilanalh. Pus ju yuʼunch ixtapasatach lakaquis cientos lapanacni. Sich talaktsʼinkʼo ju Cristo. Pus ju chavai ju aliʼin sia yuʼunch titatʼajuncaʼ. Para ju aliʼinch tanitach ju chavai. 7 Chai ju astan va isʼakstu ju talacasunilh ju Jacobo. Chai astan atalacasunikʼolhch ixchuxʼan ju ixtamalakachan. 8 Chai ju laʼixpuʼaclantich quintalacasunilh ju quitʼin mas na kʼox lhitsʼisit xacjunita laquiʼalactuʼunti. 9 Pus quitʼin ju palai jantu tuʼuʼ quintapalhni tachi chun ju aliʼin ixtamalakachan ju Jesús. Lana jantu lhijun ni aclhixakʼalacalh ixtamalakachan Jesús ni va xacʼalaclhimakchapui ju yuʼunch ju ixtalhilacaʼanta ju yuchi. 10 Para ju Dios quinavinilh lamapainin. Yuchi iclhijunita ixtamalakachan ju Jesús. Chai na lhitapalalh ju lamapainin ju xaquinavini ju Dios. Pus palai lhu icchʼalhcatnanta ju quitʼin. Palai jantu ju aliʼin ixtamalakachan ju Jesús. Para jantu va laquiʼakstu ju icnavita. Alai lai lhu ju icchʼalhcatnan va ixlacata ni Dios ju quinavinilh lamapainin chai quiʼaktaiju. 11 Para jantu tuʼuʼ nomputun u ni quitʼin ju palai icchʼalhcatnanta u yuʼunchach ju aliʼin ixtamalakachan ju Jesús. Yuchach ju lhitapalai ni va lakatam chivinti ju icnonau chai yuchach ju lacʼaʼitʼatʼit. 12 Pus ju quitʼin iclajuntau ni taʼacxtuchokolh ju Cristo junta ixmacnucanta. Chai tas talhinajunch ju aliʼin ju milhiʼuxijnan ni jantu lai xamatiʼ taʼacxtuchokoi ju nitach. 13 Pus ni jantu cava lai catataʼacxtuchokolh ju tanita pus ca jantu vasalh ni taʼacxtuchokolh ju Cristo. 14 Chai ju Cristo ni jantu caʼixmacxtuchokolh ju Dios junta ixmacnucanta pus jantu ixlhitapalalh ju tuchi icnonau ni lai takʼalhtaxtucan. Chai jantu ixlhitapalalh ni ixlhilacʼapʼintʼit ju Cristo. 15 Chai ni jantu caʼixtaʼacxtuchokolh ju Cristo pus ca va xaclhitalacasuch tachi ju lapanacni ju tanajun taʼaklhtamat chivinti ixlacata ju Dios acsni icnonau ni Dios ju macxtuchokolh ju Cristo. Para ni sala jantu lai taʼacxtuchokoi ju tanita pus ca jantaʼas slivasalh ni macxtuchokolh ju Cristo ju Dios. 16 Pus ni jantu cava caʼamacxtuchokocanaʼ ju tanitach pus nin ca yuchi ju Cristo jantu ixtitaʼacxtuchokolh. 17 Chai ni jantu caʼixmacxtuchokocalh ju Cristo pus jantu ixlhitapalalh ni lhilacʼapʼintʼatʼit ju yuchi. Jantu caʼixtʼakʼalhtʼaxtʼutʼit. 18 Ni jantu caʼixmacxtuchokocalh ju Cristo pus caʼixtatsʼankʼakʼalhi tachi chun ju ixtalhilacaʼanta ju yuchi chai ju tanita ju chavai. 19 Ni lhilacaʼantauch ju Cristo para ni matiʼ tuʼuʼ caʼixjunlh ju astan acsni caniyau pus painiʼitnich caʼixjumvi. Lana jantu lhitapalai caʼixva ni lhilacaʼantauch ju yuchi. 20 Para ju Cristo vasalh macxtuchokocalh mas ixnita. Chai yuchi ju pʼulhnan taʼacxtuchokolh lacaʼaninti. Chai tachi chun ju quijnanʼan ju lhilacaʼantauch ju yuchi vachuʼ camacxtuchokocanau. 21 Pus va ixlacata ju Adán ju niyau ju chavai. Chai vachuʼ va ixlacata ju Cristo catalhitaʼacxtuchokoyaʼ ju tanita. 22 Pus va ixlacaʼatalh ni ixʼapapanatnich Adán juntau yuchi lhiniyau. Chai vachuʼ va ixlacaʼatalh ni lhilacaʼanau ju Cristo yuchi calhitaʼacxtuchokoyauch mas caniyauch. 23 Para va quilhmactamin ju camacxtuchokocanaʼ. Pʼulhnan macxtucalh ju Cristo. Chai astan aquijnanʼan ju lhilacaʼantauch ju yuchi aquintamacxtuchokoyan acsni caminchokoyach ju yuchi. 24 Chai ju acsnich ixʼaclantich cajunaʼ ju lacamunutpaʼ. Chai ju acsnich ju Cristo camakʼosukʼoyaʼ tachi chun ju xalackʼajin chai tachi chun ju puʼucxtin chai tachi chun ju tachaput ju alinch ju ani lacamunutpaʼ. Chai astanch ju yuchi caxtakniyach ju ixtachaput ju quimpaiʼan Dios chai yuchach ju calhinonkʼoyach chux. 25 Pus tasqʼuini ni yuchi ju Cristo ju calhinonaʼ tus ni caʼatʼalalhajakʼoyaʼ chux ju ixtʼalaxcai. 26 Chai ju va yuchach ixtʼalaxcai ju catʼalalhajayaʼ yuchi ni jantu xamatiʼ catini tavanan. 27 Pus ju Dios naulh ni yuchi ju Cristo ju calhinonkʼoyaʼ tachi chun ju taxtokni. Para acsni naulh ju Dios ju chunch pus jantu nomputun ni va calhijuncanaʼ ju Dios ni yuchach ju xaxtakni ju ixpuxakʼai. 28 Chai ju Cristo acsni catʼalalhajakʼoyaʼ tachi chun ju taxtokni pus ju astan ju yuchi ni istsʼalh Dios junita pus calacasqʼuinach ni calhijunicalh. Calhinonaʼ ju ixpai Dios ni yuchi ju xamatʼalalhajai tachi chun ju taxtokni. Chai ju chunch quimpaiʼan Dios ju xakʼai tucan cajunaʼ. 29 Ni nonatʼit ni jantu lai tataʼacxtuchokoi ju tanitach pus tijuch ju talhiʼakpax ixlacata ju tam xamatiʼ ju va nitach tachi ju talai ju aliʼin sia milhiʼuxijnan. Tajuch ni chunch talai ni sala jantu lai tataʼacxtuchokoi ju tanitach. 30 Pus ni vasalh tachi ju nonatʼit ni jantu lai tataʼacxtuchokoi ju tanitach ca va lakʼaich iclhilakʼaʼi ni va xcaich ictakʼalhtaxtui chux avilhchan va ixnajunca ixchivinti Dios. 31 Para aktsʼiya camacxtuchokocanaʼ ju tanitach. Chai slivasalh na iclalhikʼachanau ni iccʼatsai ni atʼakʼalhtʼaxtʼuyaʼitʼit ni xalhilacʼapʼinatʼit ju Cristo Jesús. Chai vana va chun islivasalh ni quintamaknipututʼajun ju lapanacni chux avilhchan. 32 Pus acsni xacvilhcha ju lakʼachakʼan Efeso chai quintamamakʼalhkʼajni ju lapanacni ca laich acnaulh ni tachi ju va maktilinch ixtalai. Para ni sala jantuch lai tataʼacxtuchokoi ju tanita pus ca jantu tuʼuʼ lhajacan ni lhilakʼaʼican ju chunch. Chai ca laich vachuʼ canaju tachi ju noncan: “Cavenauch. Calacʼakʼotnuch. Ju lhi tʼuxam caniyauch”. Ca laich chunch canaju ni vasalh caʼixva ni jantu lai tataʼacxtuchokoi ju tanita. 33 Tun cataʼokxchokʼon xamatiʼ. Apʼastʼactʼit ju chivinti ju chani noncan: “Ni na kʼox quiʼamigo acnavi ju kʼai junita pus vachuʼ aquimalhquiliquinilh ju quiʼatalacpastʼacʼat”. Chunch ju noncan. 34 Pus acʼatsʼanantʼit lamiʼatsucuntiʼan. Chai jantu anavitʼit ju alactuʼunti. Pus alin ju lapanacni ju lamilhiʼuxijnan ju jantucaʼ tamispai ju Dios. Chunch ju iclajunau ni va iclamamaxaniputunau ni laich xalakʼaʼiyatʼit ni catanu lamilhiʼuxijnan ju va kʼaya tanajun. 35 Pus ju aliʼin laich chani catanaulh: “Tas laich catalhitaʼacxtuchokolh ju tanita. Tis lacatunach ju laich cataputalacasuchokoyaʼ”. 36 Pus va tontojni ju chunch tanajun. Alaktsʼintʼitch ju tuʼuʼ quincuxiʼan. Acsni chʼanau ju xatʼin pus yuchi ju ixʼaxtʼakʼa ju puchʼitaʼacnui. Para ju ixʼalhunut yuchach ju capʼunaʼ. 37 Chai ju tuchi chʼanatʼit jantiyuʼ ju pʼulhuchʼanchʼokʼoyatʼit ju cʼatʼatʼach. Alai yuchi ju xatʼin cebada u tuʼuʼ atumpa xatʼin ju chʼanatʼit. 38 Chai ju tijtamin tʼin Dios ju xtaknita ta yu catalacasuyach. Chai ju tijtamin tijtamin tamch ju tasui acsni pʼun. 39 Pus chunchach vachuʼ tachi chun ju acanit. Jantu va lakatam acanit ju alin. Ju aliʼ acanit ixʼacanitʼan ju lapanacni junita. Ju aliʼ acanit ixʼacanitʼan ju atapacxat. Ju aliʼ acanit ixʼacanitʼan ju tsʼokʼo. Ju aliʼ acanit ixʼacanitʼan ju pamata. 40 Chai alin ju xataxtokni ju lactʼiyan. Chai alin ju xalactaxtokni ju ani lacamunutpaʼ. Para tachi ju cʼusich tasui ju xataxtokni ju lactʼiyan jantu ixtʼachun cʼusi tasui ju xataxtokni ju ani lacatʼun. 41 Pus ju avilhchan tam ju mapulhcui. Chai ju malhquiyuʼ tam ju mapulhcui. Chai ju stʼacun tam ju tamapulhcui. Chai mas sia yuʼunch ju stʼacun si tam tamapulhcui. 42 Pus vana va chun ju quilacatunaʼan. Tam junita ju chavai chai tam cajunaʼ ju astan. Macnucan ju quilacatunaʼan ju catsʼankʼayaʼ. Para acsni cataʼacxtuchokoyach tam cajunaʼ. Ju acsnich jantu tavanan lai catini. 43 Ju quilacatunaʼan acsni macnucanta jantuch tuʼuʼ ixtapalhni. Para acsni camacxtuchokocanaʼ na cʼus cajunaʼ. Ju quilacatunaʼan acsni macnucanta matich ju ixtachaput. Para acsni camacxtuchokocanaʼ tachapun cajunaʼ. 44 Ju quilacatunaʼan ju macnucanta va xalacatuna lacamunutpaʼ. Para acsni camacxtuchokocanach pus xalacatuna lactʼiyan cajunanta. Alin ju xalacatuna lacamunutpaʼ. Chai alin ju xalacatuna ju lactʼiyan. 45 Ju ixchivinti Dios ju tsʼokcanta najun ni xtaknicalh ixlacatuna ju pʼulhnan lapanac. Yuchi ju Adán. Chunch ma najun laʼixchivinti Dios. Chai astan milh apumatam lapanac tachi ju Adán. Yuchi ju Cristo. Para ju yuchi xtʼakʼa ju atsucunti ju conkʼalhiyanta ju lactʼiyan. 46 Pus jantiyuʼ ju pʼulhnan xtaknicantau ju xalacatuna ju lactʼiyan. Alai yuchi ju xalacatuna lacamunutpaʼ ju pʼulhnan xtaknicantau. Astan ju xalacatuna lactʼiyan. 47 Ju pʼulhnan lapanac tʼun ju lhinavicalh ju ixlacatuna chai anich lacatʼun ju ixtʼajun. Para ju astan milh ju Cristo. Chai ju yuchi lactʼiyan ju mincha. 48 Chai tachi chun ju quijnanʼan ju ani vilau lacamunutpaʼ pacxantau ju quilacatunaʼan tachi ixjunita ju ixlacatuna ju Adán ni va tʼun lhinavicalh ju ixlacatuna. Para tachi chun ju catataʼacxtuchokoyaʼ chai cataʼanaʼ ju lactʼiyan pus chunch cajunaʼ ixlacatunaʼan tachi ixlacatuna ju Cristo. 49 Pus ni chunch junita ju quilacatunaʼan ju chavai tachi ju xalacatuna ju ani lacamunutpaʼ pus vana va chun cajunaʼ ju quilacatunaʼan tachi ju xalacatuna ju lactʼiyan astan. 50 Pus chanich iclajumputunau ji quiʼalakʼavin. Ju quilacatunaʼan tachi ju junita ju chavai jantu lai catitanu ju lactʼiyan junta lhinajun ju Dios. Ju quilacatunaʼan ju lai ni jantu lai catitanu junta jantu nican. 51 Aclajunau lakatam chivinti ju jantu ixmachakxacanta ju makʼanchich. Ju aliʼin sia quijnanʼan ju lhilacaʼantauch ju Jesús jantu catitani. Para quinchuxʼan si aquintaxtaknikʼoyan ju Dios ju sastʼi quilacatunaʼan. 52 Va tam pantsʼiquis catapasayaʼ ju ani lhamakʼan. Tachi acsni actsʼimtalacpuyaulh. Acsnich ju tamch cajunau acsni va yuchach casuncanaʼ ju skʼolh. Pus ju skʼolh catʼasayaʼ chai ju acsnich caʼamacxtukʼocanach ju tanita ju ixtalhilacaʼanta ju Cristo. Chai caʼaxtaknicanaʼ ju sastʼi ixlacatunaʼan ju jantu lai capuchʼiyaʼ. Chai ju quijnanʼan ju titʼonaucaʼ vachuʼ aquintamapaxaniyan ju quilacatunaʼan. 53 Pus ju quilacatunaʼan ju lai puchʼi tasqʼuini ni camapaxanicau. Tasqʼuini ni caxtaknicau ju lacatuna ju jantu lai puchʼi. Chai ju quilacatunaʼan ju lai ni tasqʼuini ni camapaxanicau. Tasqʼuini ni caxtaknicauch ju jantu lai ni. 54 Pus aktsʼiya camapaxanikʼocanau ju ani quilacatunaʼan ju lai puchʼi. Caxtaknicanauch ju quilacatunaʼan ju jantu lai puchʼi. Chai ju quilacatunaʼan ju lai ni camapaxanicanau. Caxtaknicanauch ju quilacatunaʼan ju jantu lai ni. Pus acsni chunch aquintaʼulhtuyan ju Dios pus ju acsnich caʼuctaxtuyach ju chivinti ju tsʼokcanta laʼixchivinti Dios junta ma najun ni ma tʼalalhajacanta ju aninti. Chunch ju najun ju anch. 55 Pus ju acsnich matich cajunaʼ ju aninti. Jantu vana lai aquintatʼalalhajayan ju aninti. 56 Pus ju chavai niyau ni alactuʼununau. Chai alactuʼununau ni naviyau ju lhikʼalhtsajui ju ixlhamapʼaksin Dios. 57 Para icjuni lakʼailaktsʼiuch ju Dios ni lai tʼalalhajayau ju alactuʼunti ni nilh ju quiʼucxtinʼan Jesucristo ju quilacataʼan. 58 Pus ni chunch ji quiʼalakʼavin pus va lakatamch anavitʼit ju miʼalhunutʼan. Alhilacʼapʼinkʼalhitʼitch ju Cristo. Chai va tachi anavinitʼit ju ixlhichʼalhcat ju Jesús. Chunch ju alatʼit ni cʼatsʼayatʼit ni jantu tavanan catsʼankʼayaʼ ju tuchʼi naviniyatʼit ju Jesús.
1 Iclajumputunau ixlacata ju anuʼ tumin ju caxtaknicanach ju quilhiʼalakʼavin laʼixmacni ju Cristo ju amachakʼan Jerusalén ju quilhpatinin tajunita. Chunch anavitʼit vachuʼ tachi ju icʼalacjunita ju talhilacaʼanta ju Jesús ju amachakʼan xalacatʼun Galacia. 2 Chux lhitumincu pumatamin ju uxijnan alhitʼanaʼitʼit junta tʼakʼaixtʼokʼatʼit ju tumin tachi ju laich axtʼakʼaʼitʼit. Pus tichi chavaich ju laklhu lhajai ju tamin semana pus palai laklhu caxtʼakʼaʼ. Chai ju palai lacatsʼunin lhajai pus palai lacatsʼunin caxtʼakʼaʼ. Chai ni chunch ju anaviyaʼitʼit pus jantu va acsnich ju apʼusacʼaʼitʼit ju tumin acsni acchaʼananta. 3 Pus ju uxijnan asacxtʼuyaʼitʼit ju lapanacni ju amalhipʼiniyaʼitʼit ju tumin ju alhikʼailaktsʼinaʼitʼit ju amachakʼan Jerusalén. Chai ju quitʼin acsni acchaʼananta laich acʼamachʼapayoyaʼ ju quiʼalhiqui junta acʼajunach ju amachakʼan Jerusalén tichi chavaich ju anuʼ lapanacni ju talhiʼanta ju tumin. 4 Chai ni kʼox cava ni acʼalactʼaʼalh pus laich acʼalactʼaʼanaʼ. 5 Ju quitʼin acʼanaʼ ju xalacatʼun Macedonia. Chai acsni aclacaputocʼakʼoyaʼ ju anch pus astan aclalaktsʼintachauch ju uxijnan. 6 Chai ju acsnich ca laich cava ni aclatʼatolhchau lakatʼui lakatʼutu malhquiyuʼ. U ni jantu pus ca laich cava ni aclatʼatolhchau chux ju lacalhicʼasnin. Ju chunch pus ju uxijnan laich aquilaʼaktaijuyau ixlacata ju lacati mas vanta anchach ju acʼamputunach. 7 Pus jantu iclacasqʼuin ni va actapasatilacha ju chavai ju lamilakʼachakʼanʼan. Iclatʼatolhputunachau lakatʼui lakatʼutu malhquiyuʼ ni chunch ju calacʼasqʼuilh ju quiʼucxtin Jesús. 8 Para ju chavai actolacaʼ ju ani lakʼachakʼan Efeso tus acsni cachinaʼ ju xacʼatan Pentecostés. Acsnich ju actaxtuyach. 9 Tucaʼ ictaxtuputun ju ani ni na lhu alin ju takʼasmatputun ixchivinti Dios chai vachuʼ na lhu ju talhaxcayanan ixchivinti Dios. 10 Chai ni cachaʼananta ju Timoteo pus amalakʼavitʼit. Chunch alatʼit ni vachuʼ navi ju yuchi ixlhichʼalhcat ju Jesús tachi ju quitʼin. 11 Tun xamatiʼ ju va jantu tuʼuʼ calhiula. Alai aʼaktʼaiʼutʼitch ni lai lhikʼach aquilaktsʼinchokolh. Pus ju quitʼin icpacxantajich ju yuchi ni icnajun ni caʼalactʼaminach ju aliʼin quilhiʼalakʼavinʼan. 12 Pus na ictapaininilh ju quilakʼauʼan Apolos ni caʼalactʼaʼalh ju aliʼin quiʼalakʼavinʼan acsni xataʼanacha. Para jantu xaʼamputunacha ju chavai. Najun ni caʼananta acsni va caʼalinach ju ispantsʼiquis. 13 Alhistʼaccʼantʼit ni jantu xamatiʼ cataʼokxchokʼon. Va tachi alhilacʼapʼinaʼitʼit ju Jesús. Aʼuntʼit tachi ju jokʼatni ju jantu tuʼuʼ tatalhoni. Achʼixkʼotʼit mas va tuchi camilh lamiʼatsucuntiʼan. 14 Tachi chun ju naviyatʼit chunch ju anaviyaʼitʼit tachi ju caputasuyach ni vasalh lamapʼainiyatʼit. 15 Chai iclatapaininiyau ji quiʼalakʼavin. Ju uxijnan mispʼayatʼit ju tatanumanalh laʼixchakaʼ ju Estéfanas. Yuʼunchach ju pʼulhnan talhilacaʼalh ju Cristo tachi chun ju amachakʼan laxatʼun Acaya. Chai ju yuʼunch lana tamakʼaxtaknikʼota ju Jesús ju isʼatsucuntiʼan va ixʼaʼaktaijuca ju quilhiʼalakʼavinʼan laʼixmacni Jesús. 16 Pus lamapainin iclasqʼuiniyau. Aqʼuiclacʼaʼitʼit ju anuch lapanacni chai tachi chun ju aliʼin ju taʼaʼaktaijunun chai ju tanavini ixlhichʼalhcat ju Jesús. 17 Na iclhikʼachanch ni tamilh ju Estéfanas chai ju Fortunato chai ju Acaico. Pus ju yuʼunch quintamakʼankʼachalh tachi ju ixlatʼit ni laich cava ixtʼatʼit vachuʼ. 18 Ju yuʼunch quintaʼaktaiju ni lai palai aclhilacaʼalh ju Cristo. Chai vana va chun taʼaktaijuyan ju uxijnan. Pus aktsʼiya tasqʼuini ni alakʼamispʼatʼit ju yuʼunch. 19 Tachi chun ju amachakʼan xalacatʼun Asia ju talhilacaʼanta Jesús tamacʼamiyan. Vachuʼ ju Aquila chai ju Priscila ju ixʼamachakach junita. Ju yuʼunch tamacʼamiyan laʼixtapakaʼut ju Jesús. Chai chux taʼamacʼaminin ju talhilacaʼanta ju Jesús ju tatakʼaixtʼokʼa laʼixchakaʼ ju Aquila. 20 Taʼamacʼaminin chux ju quiʼalakʼavinʼan ju anich tavilanalh. Kʼox alamacʼamitʼit pumatamin pumatamin ju uxijnan tachi ju lhijunch ni lhiʼalakʼavin untʼatʼit. 21 Ju quitʼin icPablo. Pus tus ani icmaʼatsʼokni apumatam. Para ju chavai quiʼakstu aclaʼatsʼoknuniyau lakatam lakatʼui chivinti junta aclamacʼamiyau. 22 Ju jantu mapaini ju quiʼucxtinʼan Jesús chach mamakʼalhkʼajnikʼalhicalh. Chach minchokolh ju Jesús. 23 Ictapainini ju Jesucristo ni cataʼaktaijuyan laʼixʼamapaininti. 24 Na iclamapainiyau ju uxijnan ni vachuʼ lhilacʼapʼintʼatʼit ju Cristo Jesús. Vasalh chunch tachi ju iclajunau.
1 Ju quitʼin icPablo. Ju Dios quisacxtulh ni ixtamalakachan Cristo acva. Pus ju quitʼin chai ju quilhilakʼauʼan Timoteo iclamacʼamiyau ju uxijnan ju vachuʼ lhilacʼapʼintʼatʼit ju Dios ju vilhchitʼit ju lakʼachakʼan Corinto. Vachuʼ icʼamacʼamiyau ju talhilacaʼanta ju Dios ju tavilanancha chux ju xalacatʼun Acaya. 2 Ictapainini ju quimpaiʼan Dios chai ju quiʼucxtinʼan Jesucristo ni catanaviniyan lamapainin chai cataʼaktaijuyan ni jantu calacʼalh ju miʼalhunutʼan. 3 Chach junicalh ni xakʼaich ju Dios ju ixpai ju quiʼucxtinʼan Jesucristo. Yuchach ju quintaʼaktaijuyan lacaʼamapaininti. Chai yuchach ju quintamatankʼoxaxkʼayayan. 4 Yuchach ju quintamatankʼoxaxkʼayayan acsni alin ju quimakʼalhkʼajnatʼan ni laich vachuʼ camatankʼoxaxkʼayayau ju aliʼin ju tatʼajun makʼalhkʼajnin mas va tuchi ixtalakxtuch cava. Laich camatankʼoxaxkʼayayau ju aliʼin ni quintamatankʼoxaxkʼayayan ju Dios. 5 Pus tachi ju Cristo ni ixcaican pus va na va chun ju quijnanʼan. Vachuʼ xcaicanau. Para vachuʼ yuchi ju Cristo ju quintamatankʼoxaxkʼayayan. 6 Pus ni laich amatʼankʼoxaxkʼayacʼanaʼitʼit chai ni laich atʼakʼalhtʼaxtʼuyaʼitʼit yuchi iclhimakʼalhkʼajnanau ju quijnan. Chai ni quintamatankʼoxaxkʼayayan ju quijnan ju Dios pus vachuʼ yuchi lai lhicʼatsʼayaʼitʼit ni catamatankʼoxaxkʼayayan ju uxijnan. Chai ju chunch vachuʼ lai achʼixʼaʼitʼit ju tuʼuʼ makʼalhkʼajnat tachi ju iclhimakʼalhkʼajnanau ju quijnan. 7 Pus ju quijnan slivasalh iclalhilaksiyau ni jantu tam anaʼuntʼit astan. Iclajunau chunch ni iccʼatsayau ni vachuʼ catamatankʼoxaxkʼayayan ju Dios ju uxijnan acsni makʼalhkʼajnanatʼit tachi ju quintamatankʼoxaxkʼayayan ju quijnan acsni icmakʼalhkʼajnanau. 8 Iclacasqʼuinau ji quiʼalakʼavin ni acʼatsʼatʼit ta yu xacmakʼalhkʼajnanau ju quijnan acsni xacvilhchau ju xalacatʼun Asia. Slivasalh na xacmakʼalhkʼajnanau ni tachi ju va jantu lai actastucniyau xaclhiulayau. Chai xacnonau ni ca acniyauch. 9 Vasalh xacnonau ni ca vatsʼalhti acniyau. Para ju Dios lacasqʼuilh ni chunch accʼatsayau ni jantu va quiʼakstu quincʼan ju aclhilaksichokocau. Alai yuchi ju Dios aclhilaksiu. Yuchach ju lai malokʼoni ju tam xamatiʼ mas nitach. 10 Pus Dios ju xaquintamakʼalhtaxtuyan mas xacnonau ni ca vatsʼalhti acniyau. Chai yuchach ju iclhilaksiyau ni va tachi aquintamakʼalhtaxtuyan. 11 Pus ju uxijnan vachuʼ quilaʼaktaijuyauch acsni tʼapʼaininiyatʼit ju Dios ju quilacata quijnan. Chai ni na pumalhu ju catasqʼuiniyaʼ lamapainin ju Dios ju quilacata quijnan pus na pumalhu ju catajunaʼ lakʼailaktsʼiuch ju Dios ju quilacata quijnan ni quintanavinitan lamapainin ju Dios. 12 Yuchi ju ani ju iclhikʼachanau. Laʼixlhichux quiʼalhunut quincʼan iccʼatsayau ni salaka xactʼonau laʼixʼucxlacapuʼan ju yuʼunch ju jantucaʼ talhilacaʼanta ju Cristo. Chai jantu tuʼuʼ atumpa xacpastʼacʼau. Va xacʼaʼaktaijuputunau ju yuʼunch. Chai ju uxijnan kʼoxich cʼatsʼayatʼit ni slivasalh xacnaviyau cuenta ni salaka actsucu acsni xaclatʼavilau ju uxijnan. Para jantu lai salaka xactsucuyau ju va laquintacʼatsan quiʼakstu quincʼan. Alai Dios ju xaquintaʼaktaijuyan laʼixʼamapaininti ni lai chun xactsucuyau. 13 Jantu tuʼuʼ atumpa nomputun ju tuchi iclaʼatsʼoknunitau. Va yuchi tachi ju laktsʼintʼatʼit chai tachi ju machʼakxayatʼit. Chai iclacasqʼuinauch ni va tachi chunch ju amachʼakxayaʼitʼit. 14 Ju uxijnan aktsʼiya aquilalhikʼachanau acsni caminchokoyaʼ ju quiʼucxtinʼan Jesús mas alin ju aliʼin sia milhiʼuxijnan ju tanajun ju chavai ni jantu aquintitalhikʼachalh. Pus ju quitʼin vachuʼ aclalhikʼachanauch ju uxijnan ju acs avilhchan. 15 Chai ni xaccʼatsai ni aktsʼiya tuʼuʼ lalhiulayau pus yuchi paktʼui xaclalhilakʼamputunachau. Chai ju chunch paktʼui ixlackʼachau ni ixlalaktsʼiu. 16 Xacnajunta ni xactapasatilachalh lamilakʼachakʼan acsni icʼalh ju xalacatʼun Macedonia. Chai acsni xactaxtuchokochalh ju xalacatʼun Macedonia pus xaclalaktsʼinchokochauch aktam ju uxijnan. Chai ju chunch laich xaquilaʼaktaiju acsni xacʼalh ju laxaʼestado Judea. 17 Ju uxijnan ca laich nonatʼit ni ca va tam tam xacnajun acsni icpastaclh ju chunch. Para jantu lai chunch xacnavi. Ca laich nonatʼit ni chunch iclai tachi ju talai ju jantucaʼ talhilacaʼanta ju Cristo. Ju yuʼunch ni laich tanajun ni calayaʼ mas jantu. 18 Para jantu chun iclai. Pus ju Dios lai lhilaksican ni camuctaxtuyaʼ tuchi najunta. Chai vana va chun lai quilalhilaksiyau ju quitʼin ni ixlapanac icjunita. Vachuʼ sok ju quinchivinti. Jantu va tam tam xaclajunau. 19 Pus ju quitʼin chai ju Silvano chai ju Timoteo iclajuntau ju uxijnan ixlacata ju Jesucristo istsʼalh Dios. Chai ju yuchi jantu va tam tam najun. Ju yuchi aktsʼiya najun ju stavasalanti. 20 Pus tachi chun ju ixchivinti ju xtakta ju makʼanchich ju Dios si uctaxtuta laʼisʼatsucunti ju Cristo. Chai lai lakʼayayau ju Dios ni lacaʼiniyau ixchivinti ju istsʼalh. 21 Yuchi ju Dios ju quintaʼaktaijuyan ni laich cachʼakʼokʼakʼalhiyau ju Cristo. Quintaʼaktaijuyan ju quijnan chai vachuʼ taʼaktaijuyan ju uxijnan. Chai yuchi ju Dios ju quintasacxtutan ni acnaviniyau ju ixlhichʼalhcat. 22 Chai isʼaskʼatʼan quintanavitan ju quijnan chai ju uxijnan vachuʼ. Chai quintaxtaknitan ju Spiritu Santu ju tʼajun laquiʼalhunutʼan ni laich capucʼatsayauch ni aquintamuctaxtuniyan chux tuchi quintakʼalhtasunitan. 23 Ju Dios kʼox cʼatsai ta yu junita ju quiʼatalacpastʼacʼat. Ju yuchi cʼatsai ni jantu xaclamamaxaniputunau. Yuchi jantu xaclhiʼanacha ju lakʼachakʼan Corinto junta vilatʼit tachi ju pʼulhnan xacpastacta. 24 Para tun va atʼinaʼuntʼit ni va tapʼastu iclajumputunau tuchi lai alacʼaʼiyaʼitʼit. Jantu chun icnaviputun. Iccʼatsaich ni ixlhichux miʼalhunutʼan ju lhilacʼapʼinatʼit ju Jesús. Para va iclaʼaktaijuputunau ni laich palai akʼachʼanaʼitʼit.
1 Ju quitʼin chani xacnajun ju laquiʼalhunut. Xacnajun ni jantuch aktam xaclalakʼanchokoputunachau acsni va xaclhamakʼaninin tuchʼi xanaviyatʼit. 2 Ni iclamamakʼaniniu ju uxijnan pus matiʼ apumatam ju lai aquimakʼankʼachayaʼ. Va uxijnan. 3 Jantucaʼ xacʼamputunacha ni xacnajun ni ca va lai xacʼamakʼaninilh ni xaclaktsʼilh tuchʼi ju layatʼit. Pus yuchi iclalhilakʼakʼaimauch lacatsʼunin acsni iclaʼatsʼoknuniu pʼulhnan. Ju chunch acsni aclalakchaʼanau ju uxijnan pus jantu aclhiʼamakʼanininaʼ tuchʼi layatʼit. Alai va aquilamakʼankʼachayau ju quitʼin. Pus iccʼatsai ni vachuʼ akʼachʼanaʼitʼit ju minchuxʼan acsni iclalhikʼachanauch ju uxijnan. 4 Pus acsni iclaʼatsʼoknunitau ju anuʼ alhiqui slivasalh ni xaclalhamakʼanininau chai slivasalh na xaquixcani ju quiʼalhunut tus na ickʼalhulh. Jantiyuʼ ju iclalhiʼatsʼoknuniu ni va aclamaʼamakʼaniniputu. Alai va xaclacasqʼuin ni apʼucʼatsʼayaʼitʼit ni vasalh na iclamapainiyau ju uxijnan. 5 Ju anuʼ lapanac ju xaʼalactuʼunun jantu quitʼin ju xaquilhimamakʼanini ju tuchi xanavi. Alai uxijnan ju xatamamakʼaniniyan. Para ca palai kʼox ni acnaulh ni va aliʼin lamilhiʼuxijnanʼan ju amamakʼaninicalh. Ju chunch jantu na lhu icmucʼani ixtalakʼalhin ju anuch alactuʼunuʼ. 6 Pus ju uxijnan ni mamakʼalhkʼajnitʼatʼit ju anuʼ alactuʼunuʼ acsni xatʼakʼaixtʼokʼatʼit pus kʼoxich. Pus ju chavai jantu tasqʼuini ni amamakʼalhkʼajnitʼit aliʼ. 7 Pus ju chavai amacʼacxanitʼit chai amatankʼoxaxkʼayatʼit. Jantu xcai ni va camacomputunach ju ixti Dios ni na caʼamakʼaninilh. 8 Yuchi iclalhijunau ni amalacʼasunitʼit ju chavai ni vasalh mapʼainiyatʼit ju anuʼ lapanac. 9 Pus acsni iclaʼatsʼoknunitauch ju anuʼ alhiqui ixlacata ju anuʼ lhamakʼan va xaclalaktsʼimputunau. Va xaccʼatsaputunch ni vasalh lai lacʼaʼiyatʼit tachi chun ju iclajunau u jantu. 10 Pus va tichi chavaich ju macʼacxanitʼatʼit ju uxijnan pus vachuʼ ju quitʼin icmacʼacxanita. Pus ni alinch xamatiʼ lamilhiʼuxijnan ju quilactuʼuta pus icmacʼacxanita ni macʼacxanitʼatʼit ju uxijnan. Icmacʼacxanita ni iccʼatsai ni Cristo ju laktsʼin tuchi icnavi. 11 Calamacʼacxaniu ni tuʼuʼ lanaviyau. Ju chunch jantu lai aquintaʼokxchokʼoyan ju Satanás. Pus kʼoxich cʼatsayau ta yu laich ju yuchi. 12 Pus ju quitʼin xacʼajumputun ju amachakʼan Troas ixlacata ju Cristo. Chai acsni icchaʼalh ju anch pus ju Dios quiʼaktaiju ni laich xacʼajuni lhu lapanacni ju ixchivinti Dios. 13 Para jantu xackʼachan ni tucaʼ xaquilakchinchokoi ju quilakʼauʼan Tito. Pus yuchi iclhiʼalacmacʼami ju amachakʼan anch chai ictaxtucha. Icʼalh ju xalacatʼun Macedonia. 14 Para icjuni lakʼailaktsʼiuch ju Dios ni yuchach ju aktsʼiya quintaʼaktaijuyan ni lai tʼalalhajayau ju macxcai ni va lakatam tʼajuntau ju Cristo. Chai ju Dios vachuʼ quintaʼaktaijuyan ni laich icʼajuniu tachi chun ju lapanacni ixlacata ju Cristo. Chai ju anuʼ chivinti ixlacata ju Cristo chunch junita tachi ju tuʼuʼ ju na saksi acamin ju na makat ujtaican. 15 Pus ju quijnan chunch icjuntau tachi ju tuʼuʼ ju na saksi acamin chai ju Dios na kʼox quintalhiulayan acsni icʼajunau ju lapanacni ixlacata ju Cristo. Pus na saksi ju chivinti ixlacata ju Cristo mas jantu si catatakʼalhtaxtuyaʼ ni jantu cataʼanaʼ ju lacajipi. Va aliʼin ju catatakʼalhtaxtuyaʼ. 16 Pus ju saksi chivinti ixlacata ju Cristo chunch junita tachi ju tuʼuʼ lhinin ixlacata yuʼunch ju catamakʼalhkʼajnankʼalhiyaʼ. Para ixlacataʼan ju tatakʼalhtaxtuta chunch junita tachi ju tuʼuʼ ju na can acamin ju xtʼakʼa ju atsucunti ju conkʼalhiyaʼ. Pus slivasalh na tsʼinqʼui ju ani lhichʼalhcat. 17 Para ju quijnan lai icnaviyau ni jantu chun iclayau tachi ju aliʼin ju jantu sok taʼamalaninin ixchivinti Dios. Pus ju quijnan ni va lakatam ictʼajuntau ju Cristo pus icnonau ixchivinti Dios laʼixlhichux quiʼalhunut quincʼan. Chai ni iccʼatsayau ni Dios ju xaquintamalakachayachin pus tachi ju va jun laʼixʼucxlacapuʼ yuchi ju icchivinau.
1 Acsni iclajunau ni soknicʼa ju icʼamalaninin ca va nonatʼit ni iclajunchokopalau aktam ni va tachi tam xakʼai icjunita. Para ju quitʼin jantu icmaktasqʼuini tuʼuʼ alhiqui ju aclaxtakniyau junta catajunan tichi chavaich ju quitʼin. Nin yuchi ni acmaktasqʼuinilh tuʼuʼ alhiqui ju aquilaxtakniu ixlacata akʼantam junta nonatʼit ni quilamispayauch. Pus mas tamaktasqʼuini ju chunch alhiqui ju aliʼin para ju quitʼin jantu. 2 Jantu icmaktasqʼuini ju tuʼuʼ ju chunch ni chunch junita ju miʼatsucuntiʼan tachi ju tuʼuʼ alhiqui ju najun tichi lapanac ju quitʼin. Chai ju quitʼin lana iccʼatsai ni vasalh ixlapanac Cristo icjunita ni tam untʼatʼit ju chavai. Chai mas va tichi cavalhch vachuʼ lai calaktsʼilh ju miʼatsucuntiʼan chai cacʼatsayaʼ ni tam xaʼunatʼit acsni xalacʼaʼiyatʼit ju ixchivinti Dios ju iclajuntau. 3 Chai tachi ju va jun Cristo ju xatsʼokʼa ju alhiqui junta najun tichi lapanac ju quitʼin ni yuchach ju xatamapaxaniyan ju miʼatsucuntiʼan acsni xalacʼaʼiyatʼit ju chivinti ju xaclajunau. Va yuchi ni jantu xaʼatsʼoknun ju yuchi laca tuʼuʼ tinta. Alai tachi ju va jun xaʼatsʼoknun lamiʼalhunutʼan ju iSpiritu Santu Dios ju lakʼajunta. Chunch xalhixajacha ni yuchi ju xatamapaxaniyan ju miʼatsucuntiʼan. Chai jantu chun xaʼatsʼoknun tachi acsni atsʼoknulh ju ixlhamapʼaksin Dios lacalhtʼakʼalh chiux. Ju chavai ju yuchi atsʼoknulh ixchivinti lamiʼalhunutʼan. 4 Ixlhichux quiʼalhunut iccʼatsai ni Dios ju quisacxtulh ni ixlapanac acva. Chai iclhilaksi ju Cristo ni yuchi ju aquiʼaktaijuyaʼ. 5 Ju quitʼin jantu iclhilaksichokocan quiʼakstu. Pus iccʼatsai ni jantu lai icnavi ju ixlhichʼalhcat ju Dios ju va laquiʼakstu. Alai yuchi ju Dios ju quiʼaktaijui ni lai icnavi ju tuʼuʼ ixlacata yuchi. 6 Chai yuchach ju quiʼaktaijui ni lai kʼox icʼamalani ju lapanacni ju sastʼi chivinti ju quintalhitʼatakʼoxitan ju Dios. Jantiyuʼ ni vana canaviyau tachi ju najun laʼixlhamapʼaksin ju Moisés ju tsʼokcanta. Alai yuchi ju canaviyau tachi ju najun ju Spiritu Santu. Pus ju ixlhamapʼaksin Moisés acsni lhilaksican va puʼalin quimakʼalhkʼajnatʼan junta jonkʼalhita ni lakʼalhiyau. Para ju Spiritu Santu xtʼakʼa ju atsucunti ju jonkʼalhita lactʼiyan. 7 Pus ju anuʼ lhamapʼaksin ju tsʼoklh ju Moisés ju puʼalin quimakʼalhkʼajnatʼan junta jonkʼalhita ixkʼekʼeʼulacanta lacalhtʼakʼalh chiux. Chai acsni tavanan axtaknilh ju lapanacni ju Moisés pus na xlapʼapʼa ixmaktajita ju ixʼucxpuʼ. Chai ju istʼaʼisraelitanin jantu lai ixtalaktsʼini ju ixʼucxpuʼ. Para jantu maktaikʼalhi. 8 Pus ni chunch ju tapasalh ju acsni ja va a ti yuchach jantu lai palai kʼox cajunaʼ ju chavai ju tuchi navi ju Spiritu Santu laquiʼalhunutʼan. 9 Pus ni na cʼusich istasui acsni tavanan xtakcalh ju anuʼ lhamapʼaksin ju puʼalin ju makʼalhkʼajnat junta jonkʼalhita pus palai cʼus junita ju chivinti junta najun ta yu laich aquintalaktsʼinan ju Dios ni soknicʼa juntau laʼixmacni ju yuchi. 10 Pus vasalh. Ju makʼanchich na cʼusich istasui acsni xtaklh ju anuʼ lhamapʼaksin. Para ju chavai jantu chunch junita ni palai kʼox junita ju chivinti junta najun ta yu lai aquintalaktsʼinan ni soknicʼa juntau. 11 Pus na cʼus istasui acsni xtakcalh ju anuʼ lhamapʼaksin ju jantu lhilaksikʼalhican. Chai ni chunch ixjunita ju acsnich pus ja va a ti yuchach jantu palai cʼus junita ju chivinti ju calhilaksikʼalhicanaʼ. 12 Chai ni iclacaʼiyau ni chunch junita ju sastʼi chivinti ju quintalhitʼatakʼoxitan ju Dios pus vas icʼajunau ju lapanacni chai jantu ictalhananau. 13 Jantu chun iclayau tachi ju lalh ju lijunto Moisés. Ju yuchi acsni tavanan taxtucha junta quitʼachivinilh ju Dios va lhilakpuxtakcalh pumpuʼ ni va slapʼapʼa ixmaktajita ju ixʼucxpuʼ. Va jantu ixlacasqʼuin ni catalaktsʼilh ju istʼaʼisraelitanin acsni tavanan camixaʼ ju ixʼucxpuʼ. 14 Para ju israelitanin jantu tavanan lai tamachakxa tuchi ixʼajumputun ju Dios acsni axtaknilh ju anuʼ lhamapʼaksin. Jantu lai tamachakxa ni na va pʼas ixjunita ju ixʼalhunutʼan. Chai tus chavai tachi ju va alakpuchʼicanta ni jantu vas tamachakxai tuchi nomputun ixchivinti Dios ju istsʼokcanta makʼanch. Jantu lai tamachakxai ni jantu talhilacaʼamputun ju Cristo. Para acsni lhilacaʼancan ju yuchi tachi ju va alakpuxkʼotcan chai tamachakxai tuchi ixnomputun ixchivinti Dios. 15 Pus tus chavai tachi ju va alakpuchʼicanta ixtacʼatsanʼan acsni takʼasmatʼa ju ixchivinti Dios ju tsʼoklh ju lijunto Moisés. Lana jantu lai tamachakxai tuchi ju nomputun. 16 Para acsni tavanan talhilacaʼan ju quiʼucxtinʼan Cristo pus tachi ju va alakpuxkʼotnican ju ixtacʼatsanʼan ni laich tamachakxai. 17 Pus ju quiʼucxtinʼan Cristo chai ju Spiritu Santu va lakatam tʼajunita. Chai ju pacxanta ju Spiritu Santu laʼixʼalhunut pus jantu tasqʼuini ni vanach canaulh ni salaka calaktsʼincanaʼ laʼixmacni Dios ni camuctaxtuyaʼ tachi ju najun laʼixlhamapʼaksin ju Moisés. 18 Chai tachi chun ju quijnanʼan lakpuxkʼotnicantauch ju quintacʼatsanʼan chai cʼatsayau ni vasalh xakʼai ju Cristo. Chai lacsni lacsni palai salaka jun ju quiʼatsucuntiʼan tus calaktsʼincanau ni salaka juntau tachi ju Cristo. Pus yuchi ju Spiritu Santu ju quintaʼulhtuyan chunch.
1 Pus ju Dios quintaʼaktaijun laʼixʼamapaininti ni xaquintaxtakniyan ju ani lhichʼalhcat ni acʼajuniu ju lapanacni ixlacata ju Cristo. Pus ixlhiyuchi jantu tavanan lai actinaju ni na tsʼinqʼui chai jantu actitailhiʼau. 2 Ju quijnan jantu va sek icnaviyau tuʼuʼ ju va astan aclhimaxanau. Nin acʼokxchokʼo xamatiʼ. Nin acmapaxau ixchivinti Dios. Para vas icnonau ju ixchivinti Dios. Chai ni chunch iclayau pus tachi chun ju lapanacni tacʼatsai laʼixʼalhunutʼan ni stavasalanti tuchi icnonau. Chai isʼakstu Dios vachuʼ cʼatsai. 3 Para ni alin lapanacni ju tanajun ni jantu lai tamachakxai acsni icʼajunau ta yu lai putakʼalhtaxtucan pus yuʼunchach ju catatsʼankʼakʼalhiyaʼ. 4 Chai jantu lai tamachakxai ni yuchi ju lhacaticuru ju lhinajun ju ani lacamunutpaʼ chai yuchach ju lakʼalhinita ju ixtacʼatsanʼan ju jantu talhilacaʼamputun ju Cristo. Ju chunch jantu lai tamachakxai ju chivinti junta lakʼayacan ju Cristo ju ixtʼachunch junita tachi ju quimpaiʼan Dios. 5 Ju quitʼin acsni iclamalaniyau jantu iclajunau ni xakʼai icjuntau. Alai iclajunau ni tasqʼuini ni anavitʼit ju Cristo Jesús miʼucxtinʼan. Chai ju quitʼin va milapanacʼan icjunita va ixlacata ni icmapaini ju Jesús. 6 Dios ju naulh ni caʼalilh ju atuncunuʼ ju ani lacamunutpaʼ. Chai yuchach ju vachuʼ quintalhimalacpucujutan ni laich camispayau ni vasalh yuchi ju xakʼai ju Dios. 7 Pus ju quijnanʼan aktamixnin makʼayau ju quintuminʼan laca tuʼuʼ xalu ju jantu laklhu ixtapalh. Pus vana va chun ju Dios. Ju yuchi quintaxtaknitan ju ani kʼai lhichʼalhcat mas jantu tuʼuʼ quintapalhni quincʼan laʼixmacni ju yuchi. Ju chunch ju lapanacni catacʼatsayaʼ ni ixtachaput Dios junita ju icpunaviyau ixlhichʼalhcat. Jantiyuʼ quiʼanuʼ quijnan. 8 Na tasui ixtachaput Dios laquiʼatsucunti quincʼan acsni na tijlhu alin ju quilhamakʼan quincʼan para aktsʼiya lai ictakʼalhtaxtuyau. Aktamixnin jantu iccʼatsayau ta yu aclayau para iccʼatsayau ni aktsʼiya kʼox cajunaʼ. 9 Mas quintamamakʼalhkʼajniyan ju lapanacni para ju Dios jantu aquintamacoʼulayan. Mas quintachʼapayan ju lapanacni ni tanajun ni aquintamakniyan para jantu lakʼaʼi ju Dios. 10 Pus tachi ju tamamakʼalhkʼajni ju Cristo tus tamakni pus vana va chunch quintaʼulhtuputunan ju lapanacni. Chai ni chunch ju tapasai laquiʼatsucunti quincʼan pus putasui ni tʼajun ju Jesús. Chai yuchi ju quintaʼaktaijuyan. 11 Ju quijnan acsni ictʼonau pus va tachi quintamaknipututʼonanch va ixlacata ni iclhilacaʼantauch ju Jesús. Ju chunch laquilacatuna quincʼan ju caniyaʼ catasuyaʼ ni tʼajun ju Jesús. 12 Pus ju quijnan va tachi iclhimaknipututʼoncanau ixlacata ju Jesús. Para iclhilakʼaʼiyau ni chunch quintaʼulhtuyan ju lapanacni ni lai caʼalinach ju miʼatsucuntiʼan jonkʼalhita ju lactʼiyan. 13 Para mas chunch ju tapasai laquiʼatsucunti quincʼan para ju quijnan iclhilaksiyau ju Dios tachi ju lalh ju makʼaniya lapanac ju David ixjuncan. Ju yuchi chani tsʼoklh ju lacaʼalhiqui: “Ju quitʼin iclhilaksich ju Dios. Yuchi icʼalhijuni ju lapanacni ixchivinti”. Chunch ju naulh ju yuchi. Pus vachuʼ ju quijnan iclhilaksiyau ju Dios chai yuchi icʼalhijunau ju lapanacni ixchivinti. 14 Pus iccʼatsayau ni Dios ju macxtuchokolh ju quiʼucxtinʼan Jesús acsni ixnita. Chai yuchi ju aquintamacxtuchokoyan vachuʼ ju quijnanʼan va ixlacaʼatalh ni lhilacaʼantauch ju yuchi. Chai aquintalhiʼanan junta vilhcha ju Dios. 15 Pus chunch icmakʼalhkʼajnanauch ju va milacataʼan. Chai ni palai lhu sia uxijnan ju catalhilacaʼanaʼ ju Cristo pus palai lhu catajunilh lakʼailaktsʼiuch ju Dios ni na kʼai ju ixʼamapaininti ju anavinilh ju yuʼunch. Chai ju chunch palai calakʼayacanaʼ ju Dios. 16 Pus yuchi jantu jeks iclhiʼuyau. Mas jantu na tachapun junita ju chavai ju quilacatuna quincʼan para tuncujun tuncujun palai iclhilaksiyau ju Dios laʼixlhichux quiʼalhunut quincʼan. 17 Jantu jeks icʼuyau ju quijnan ni iccʼatsayau ni va pantsʼiquis icmakʼalhkʼajnanau ju ani lacamunutpaʼ. Chai jantu lai actinaju ni vasalh na tsʼinqʼui ixjunita ju quimakʼalhkʼajnat quincʼan. Jantu lai chunch actinaju ni iccʼatsayau ni astan ju lactʼiyan palai na kʼox atsucunti ju aquintaxtakniyan ju Dios ni icmakʼalhkʼajnantauch ju ani. Chai ju anuʼ kʼox atsucunti conkʼalhiyach. 18 Jantu tsʼinqʼui catilhiulau ju quimakʼalhkʼajnatʼan ni lacapastactʼonau ju xataxtokni lactʼiyan ju jantu lai laktsʼincan. Jantiyuʼ ju canaviyau cuenta ju xataxtokni ju ani lacamunutpaʼ ju jantu jonkʼalhita. Pus va pantsʼiquis ju lai laktsʼinau ju xataxtokni ju ani lacamunutpaʼ. Para ju xataxtokni ju lactʼiyan jonkʼalhita.
1 Pus mas icmakʼalhkʼajnanau ju ani jantu jeks icʼuyau ni iccʼatsayau ju ani. Ju quilacatunaʼan chunch junita tachi ju tuʼuʼ pacʼatsʼa junta va pantsʼiquis lai tsucucan. Chai mas capuchʼiyaʼ ju quilacatunaʼan para cʼatsayau ni alin alakatam quilacatunaʼan ju lactʼiyan. Chai jantu va quintʼalapanacʼan ju navita ju yuchi. Alai Dios ju navita. Chai ju yuchi chunch junita tachi ju tuʼuʼ kʼoxi chakaʼ ju jonkʼalhita. 2 Pus ni tʼonaucaʼ ju ani laquilacatunaʼan pus va tachi amakʼanininau ni lacasqʼuinau ni caxtaknicanau ju xalacatuna lactʼiyan. 3 Chai ni caxtaknicanau ju quilacatunaʼan ju xanavin lactʼiyan pus ju chunch jantu va isʼakstu ju catsucuyaʼ ju quintacuvinʼan. 4 Acsni tʼonaucaʼ ju ani laquilacatunaʼan ju tachi tuʼuʼ pacʼatsʼa junita pus slivasalh lhaʼamakʼanininau ni lacasqʼuinau ju quilacatunaʼan ju xanavin lactʼiyan. Para jantu lhamakʼanininau ni va macomputunauch ju ani quilacatunaʼan. Alai va lacasqʼuinau ju sastʼi quilacatunaʼan ju xanavin lactʼiyan. Pus ju chunch ju quilacatunaʼan ju lai ni camapaxanicanauch. Caʼalinaʼ ju quiʼatsucuntiʼan ju conkʼalhiyanta ju lactʼiyan. 5 Pus ju Dios quintaxtakniputunan ju sastʼi quilacatunaʼan ju lactʼiyan chai yuchi ju xaquintalhinaviyan. Chai ni quintaxtaknitan ju Spiritu Santu pus pucʼatsayau ni aktsʼiya aquintamuctaxtuniyan ju ixchivinti. 6 Pus yuchi lhicʼatsayau ni vasalh caʼalinaʼ ju sastʼi quilacatunaʼan ju lactʼiyan. Chai cʼatsayau ni jantucaʼ vilau laʼixʼucxlacapuʼ ju quiʼucxtinʼan Jesús acsni tʼonaucaʼ ju ani laquilacatunaʼan. 7 Pus va lacaʼiniyau ixchivinti Dios junta quintajunan ni chunch cajunaʼ ju astan. Jantucaʼ lai laktsʼinau ju ani taxtokni laquilakchulhʼan. Para aktsʼiya lacaʼiyau ni chunchach cajunaʼ. 8 Chai ni vasalh lacaʼiyau ni chunch cajunaʼ ju lactʼiyan pus yuchi palai kʼox lhilhiulayau ni va caniyau chai anch catsucuyau junta vilhcha ju quiʼucxtinʼan Jesús. 9 Chai ni iccʼatsayau ni vasalh acʼanau junta vilhcha ju Jesús pus ixlhichux quiʼalhunut quincʼan ictsucuputunau tachi ju kʼoxich calhiulayaʼ ju yuchi mas anicaʼ ju icvilau u acsni acchaʼanau junta vilhcha ju yuchi. Chai tasqʼuini ni vana va chun ju atsʼucʼutʼit. 10 Pus chunch ju ictsucuputunau ni aktsʼiya catalacasunikʼoyau quinchuxʼan laʼixpuʼucxtin ju Cristo. Ju chunch ju pumatamin caʼamaklhtayananach tachi ju lhijunch ixlacata ju tuchi xanavi acsni ixtʼajuncaʼ ju ani lacamunutpaʼ u kʼox ju xanavi u jantu. 11 Chai ni ictalhoni ju Dios pus yuchi iclhiʼamalacaʼiniputunau ju lapanacni ju ixchivinti Dios. Chai ju Dios cʼatsakʼojui tis atsucuntich icpacxantau. Chai ca vachuʼ cʼatsʼayatʼit ju uxijnan. 12 Jantu va iclajunchokoyau ni lackʼoxin lapanacni icjuntau. Alai va iclajunau ni ictʼonau navinin ju kʼox chai ju chunch caʼalinaʼ tuchi laich alhikʼalhtʼayaʼitʼit ju lapanacni ju talakʼayai ju ixtʼalapanacni ju tamalacasui tachi lackʼoxin lapanacni tajunita. Talakʼayai ju yuʼunch mas jantu tanavi cuenta ta yu junita ju ixʼalhunutʼan. 13 Pus mas icjuncanauch ni va iclakachapuyau para va tapunajun chunch ni slivasalh ixlhichux quiʼalhunut quincʼan iclakʼayaputunau ju Dios. U ni icjuncanauch ni kʼox ju quinchivinti quincʼan pus chunch iclayau ni lai aclaʼaktaijuyau ju uxijnan. 14 Mas va tuchi icnaviyau yuchi ju Dios ju iclakʼayaputunau ni iccʼatsayau ni slivasalh na quintamapainiyan ju Cristo. Pus acsni tavanan nilh ju Cristo iccʼatsayau ni ixʼokxtapalh va tachi chun ju lapanacni. Chai ju chavai ju Dios quintalhilhcatan ni tachi ju va nitauch tachi chun ju quijnanʼan ju lhilacaʼantauch ju Cristo. 15 Pus ju Cristo nilh ixlacata chux ju lapanacni. Chai ni chunch ju xalai pus ju chavai tasqʼuini ni jantu va ixkʼachat isʼakstuʼan catanavi ju titatʼajuncaʼ ju talhilaksita ju Jesús. Alai catanavinilh ixkʼachat ju Cristo ni yuchi ju nilh ixlacataʼan chai lokʼonchokolh junta ixmacnucanta. 16 Pus ju Jesucristo ni quinichilh lhichux pus yuchi jantu vana lai lhinaviyau cuenta ta yu tamalacasui ju lapanacni ju ani lacamunutpaʼ. Ju makʼanch ju quitʼin vachuʼ xacnajunta ni va lapanac ixjunita ju Jesús. Para ju chavai iccʼatsai ni vasalh Dios junita. 17 Pus ni alin xamatiʼ ju lhilacaʼanta ju Cristo pus sastʼi atsucunti ju pacxanta. Ju makʼaniya ixʼatalacpastʼacʼat mapaxanikʼocanta. Chux tasastʼikʼota. 18 Pus yuchi ju Dios ju quintaʼulhtuyan ju chunch. Chai yuchi ju quintanavichokon ixʼamigojni va ixlacata ni nilh ju Cristo ju quilacataʼan. Vachuʼ yuchi ju Dios ju quintajuntan ju quijnan ni acʼajuniu ju lapanacni ni lai ixʼamigojni catava ju Dios. 19 Ju chunch chani ju nomputun. Acsni tavanan nilh ju Cristo pus chunch ju pulasoknicʼa ju Dios ta yu laich apunavi ixʼamigojni tachi chun ju lapanacni. Chai yuchi pulasoknicʼa ta yu laich caʼapumacʼacxanilh ixtalakʼalhinʼan. Chai ju yuchi quintaxtaknitan ju quijnan ju ani lhichʼalhcat ni acʼajuniu ju lapanacni ni laich ixʼamigojni catava ju Dios. 20 Pus yuchi ju Cristo ju quintamalakachatan. Chai acsni icnonau ixlacata ju Cristo pus tachi ju va jun isʼakstu Dios ju taxakʼalayan. Pus iclatapaininiyau minchuxʼan tachi ju ixnaulh ju Cristo ni vanach tivi cava ju ani lacamunutpaʼ. Icʼatapainini ju lapanacni ni catalhilacaʼalh ju Cristo ni laich Ixʼamigojni catava ju Dios. 21 Pus ju Cristo jantu tavanan alactuʼunulh. Para ju Dios lhilaktsʼilh tachi ju alactuʼunuʼ ju va quilacataʼan. Chai ju chunch acsni lhilacaʼanauch ju Cristo pus ju Dios quintalaktsʼinan ni soknicʼach juntau laʼixmacni.
1 Ju quijnan kʼaixtam ictʼachʼalhcatnanau ju Dios. Chai iclatapaininiyau ni jantu asamakʼantʼit ju lamapainin ju tanaviniputunan ju Dios. 2 Pus chani najun laʼixchivinti Dios junta tsʼokcanta: Ickʼasmatnin acsni xacnaviputun lamapainin. Icʼaktaijun acsni xacʼamakʼalhtaxtunumputunch. Chunch ju najun laʼixchivinti Dios junta tsʼokcanta. Chai iclajunau ni chavaich ju avilhchan acsni anaviniputun lamapainin ju Dios. Chavaich ju avilhchan acsni amakʼalhtaxtunumputun. 3 Pus ju quijnan ixlapanacni Dios icjuntau. Chai jantu tuʼuʼ icnaviyau ju lai capukʼalhkʼoslh apumatam chai ixlhiyuchi jantu calacaʼiputulh ju ixchivinti Dios. Chai ju chunch jantu lai va kʼaya calhichivincanaʼ ju quilhichʼalhcat quincʼan. 4 Alai tachi chun ju icnaviyau ju quijnan chunch icnaviyau ta yu laich catapucʼatsayaʼ ju lapanacni ni vasalh ixlapanacni Dios icjuntau. Lana jantu jeks xacʼuyau acsni na xacmakʼalhkʼajnanau. Nin acsni matiʼ ixjunita ju quintuʼuʼ quincʼan. Nin acsni lana jantu xaccʼatsayau ta yu aclayau. 5 Nin acsni xaclakanekmacanauch. Nin acsni xactʼalhnucantauch. Nin acsni xaquintamakniputunan ixtalhavat lapanacni. Jantu jeks xacʼuyau acsni na lhu ixʼalin ju quilhichʼalhcat quincʼan. Nin acsni jantu lai xaclhilhtatakʼoyau ju quilhichʼalhcat quincʼan. Nin acsni jantu lai xaclhivenkʼoyau ju quilhichʼalhcat quincʼan. 6 Vachuʼ icpumalacasuputunau ni ixlapanacni Dios icjuntau acsni na salaka ju quiʼatsucunti quincʼan chai na icmispayau ju stavasalanti. Chai caputasuyaʼ ni ixlapanacni Dios icjuntau acsni icchʼixau mas va tuchi quintanaviyan ju lapanacni. Chai acsni icmalacasuyau ju quilhikʼox lapanac. Chai acsni tasui laquiʼatsucunti quincʼan ni tʼajun ju Spiritu Santu laquiʼalhunut quincʼan. Chai acsni tasui ni vasalh icmapainiyau ju quintʼalapanacni. 7 Vachuʼ tasui ni vasalh ixlapanacni Dios icjuntau acsni iclajuntau ju ixchivinti Dios chai ju yuchi stavasalanti. Vachuʼ putasui ni ixlapanacni Dios icjuntau acsni tasui ixtachaput ju Dios laquiʼatsucunti quincʼan. Chai va ixlacaʼatalh ni salaka junita ju quiʼatsucunti quincʼan pus yuchi ju icpusastʼucʼau tachi chun ju macxcai ju min laquiʼatsucunti quincʼan. 8 Vachuʼ ictalacasuyau ni ixlapanacni Dios icjuntau acsni iclakʼayacanau chai acsni jantu tuʼuʼ iclhiulacanau. Acsni macxcai quintalhichivinan ju lapanacni chai acsni tanajun ni kʼox lapanacni icjuntau. Ictalacasuyau ni vasalh ixlapanacni Dios icjuntau acsni tanajun ju lapanacni ni va icʼaʼokxchokʼonunau mas jantu. Mas vasalh ixlapanacni Dios icjuntau. 9 Ictalacasuyau ni ixlapanacni Dios icjuntau acsni tanajun ju lapanacni ni jantu tuʼuʼ ju quintapalhni quincʼan mas na lhu quintachʼakʼokʼayan. Vachuʼ acsni va tachi quintamaknipututʼonan ju lapanacni para jantu lai quintamakniyan. Ictalacasuyau ni ixlapanacni Dios icjuntau acsni icmamakʼalhkʼajnicanauch para jantu quintamakniyan. 10 Mas icʼamakʼanininau para va tachi ickʼachanauch. Mas na kʼox icquilhpatiyau para na pumalhu ju icʼaxtaknita ju stavasalanti makʼalit ju alin laʼixmacni Dios. Mas lana matiʼ ju quintuʼuʼ ju ani para laʼixmacni Dios alinkʼojui chux. 11 Ji quiʼalakʼavin amachakʼan Corinto iclajunkʼotauch ta yu iccʼatsanau. Slivasalh iclamapainiyau. 12 Ju quijnan slivasalh tuʼuʼ iclalhiulayau ju uxijnan. Para ju uxijnan jantu tuʼuʼ quilalhiulayau ju quijnan. 13 Pus ju quitʼin iclaxakʼalayau tachi ju va quiʼaskʼatʼan untʼatʼit. Pus tachi ju iclamapainiyau ju uxijnan pus vana va chun aquilamapainiuch ju quijnan. 14 Tun tʼiʼamaʼamigoxlatʼit tam xamatiʼ ju jantu lhilacaʼanta ju Cristo. Jantu lai chun atʼilatʼit ni jantu lai va lakatam catitʼava ixʼatalacpastʼacʼat ju naviputun ju soknicʼa chai ju naviputun ju jantu kʼox. Jantu lai va lakatam catitʼava ju ixʼatalacpastʼacʼat ju alhtanantacaʼ tachi ju va lacaʼatatsʼisni ni jantucaʼ mispai ju Cristo chai ju alhtananta lacaʼatuncunuʼ ni mispaich ju yuchi. 15 Jantu lai va lakatam catitʼava ju ixʼatalacpastʼacʼat ju Cristo ju va ixʼatalacpastʼacʼat ju lhacaticuru. Jantu lai va lakatam catitʼava ju ixʼatalacpastʼacʼat ju lhilacaʼanta ju Cristo ju va jantu lhilacaʼanta. 16 Jantu lai actitʼamanu ju tuʼuʼ santo ju lacpujitat junta lakʼayacan ju Dios. Pus ju quijnanʼan chunch juntau tachi ju tuʼuʼ pujitat junta lakʼayacan ju Dios. Chunch juntau tachi ju naulh isʼakstu ju Dios laʼixchivinti junta tsʼokcanta. Ju anch ma chani naulh: Ju yuchi ma catsucuyaʼ laʼixʼalhunutʼan chai ma caʼalactʼaʼalhtananaʼ. Chai ma isDiosʼan cajunaʼ. Chai ju yuʼunch ma ixlapanacni catajunaʼ. Chunch ma najun ju Dios. 17 Chai yuchi vachuʼ lhinajun ju Dios ju chavai lacaʼalacatam atsʼoknut. Ma chani najun: Ma tamch atsʼucʼutʼit. Ma jantu vana va chun anavitʼit tachi ju tanavi ju jantucaʼ talhilacaʼanta ju yuchi. Ma lana jantu tuʼuʼ anavitʼit ju jantu kʼox. Ju chunch ma cataʼamaklhtayananan. 18 Chai ma mimpaiʼan cajunaʼ. Chai ju uxijnan ma isʼaskʼatʼan aʼunaʼitʼit. Ma chunch ju najun ju Dios ju lai navikʼojui tachi chun ju taxtokni.
1 Pus ji quiʼalakʼavin ju na iclamapainiyau ni quintakʼalhtasunitan ju Dios ni chunch aquintaʼulhtuyan pus camacaju tachi chun ju aquintamalhquiliquin ju quiʼatsucuntiʼan chai tachi chun ju macxcai atalacpastʼacʼat. Pus ni talhoniyau ju Dios pus lana salaka catsucu. 2 Aquilalaktsʼiuch ni miʼamigojniʼan icjuntau. Jantu xamatiʼ tuʼuʼ icnavinitau macxcai. Jantu xamatiʼ icmakʼalhkʼosutau laʼisʼatsucunti. Jantu xamatiʼ icʼokxchokʼomaxtunitau ju ixtumin. 3 Para jantu iclajunau ju ani chivinti ni va aclajumputu ni tachi ju va nontʼatʼit ni chunchach ju iclatau. Jantu lai actilamucʼaniu ju mintalakʼalhinʼan ni iclajuntau ni slivasalh tuʼuʼ iclalhiulayau ju uxijnan. Va lai anch actsucukʼalhi junta vilhchitʼit chai anch acnicha. 4 Ju quitʼin lana iclajunkʼotauch ta yu iccʼatsanau. Icʼajuni ju aliʼin lapanacni ni na kʼox tachi ju layatʼit. Nin lacatsʼunin jantu iclalhamakʼanininau ju chavai. Alai slivasalh na ickʼachanch mas ictʼajun makʼalhkʼajnaʼ ju ani. 5 Pus acsni icmiu ju ani ju xalacatʼun Macedonia pus lana jantu lai lhikʼach xactsucuyau. Pus ju lapanacni na xaquintatʼalakʼayan chai ju quijnan na xactalhananau. 6 Para Dios ju matankʼoxaxkʼayai ju va taʼamakʼaninin. Chai yuchach ju quintamatankʼoxaxkʼayan ni xalakʼaʼi ni xaquintalakminan ju Tito. 7 Chai jantu va yuʼ ju xaclhikʼachanau ni iclaktsʼinchokoch ju Tito. Para iclhikʼachanauch ni xaquintajunan ju yuchi ni na kʼoxich lhiulai ta yu xalayatʼit. Quijuni ni ma slivasalh quilalaktsʼimputunau. Chai ma slivasalh na xamakʼanininatʼit ixlacata ju tuchi xatapasai. Chai ma navipʼutʼunatʼit tachi ju xaclajunau. Pus ni quijuni ju chunch pus palai ickʼachanch. 8 Mas iclamaʼamakʼaniniuch lacaʼalhiqui ju xaclamacaʼaniyachau para ju chavai jantu icnajun ni palai kʼox ixva ni jantu xaclamacaʼanichau ju anuʼ chivinti. Ju pʼulhnan vasalh chunch xacnajunta acsni iclaktsʼilh ni na xalhiʼamakʼanininatʼit ju anuʼ alhiqui. Para va pantsʼiquis ju xaʼamakʼanininatʼit. 9 Pus ju chavai na ickʼachanch. Para jantiyuʼ ju iclhikʼachan ni va iclamaʼamakʼaniniuch. Alai va iclhikʼachan ni xamakʼanininatʼit ixlacata ju miʼalactuʼuntiʼan chai macʼontʼatʼit ju macxcai ju ixnaviyatʼit. Ju uxijnan ixʼamakʼanininatʼit tachi ju kʼoxich lhiulai ju Dios. Pus ju chunch jantu tuʼuʼ macxcai xaclanaviniyau ju quitʼin ni xaclamaʼamakʼaniniuch. 10 Pus tam xamatiʼ ju navi tuʼuʼ alactuʼunti para astan caʼamakʼanininaʼ tachi ju kʼachani ju Dios pus camaconach ju macxcai chai calhilacaʼanach ju Jesús ni camakʼalhtaxtuyach. Chai ju macajunta ju macxcai va ixlacaʼatalh ni ixʼamamakʼaninicanta pus takʼalhtaxtuta chai jantu lai catinaulh astan ni jantu alai chun ixtapasalh laʼisʼatsucunti. Para ju lhamakʼaninin tuchi tapasata laʼisʼatsucunti para ni jantu tam capastʼacʼaʼ ixlacata ju ixʼalactuʼunti pus ju yuchi catsʼankʼakʼalhiyach. 11 Pus ju uxijnan ni xaʼamakʼanininatʼit ixlacata miʼalactuʼuntiʼan tachi ju kʼoxich lhiulai ju Dios pus alaktsʼintʼit ta yu xajun ju miʼatsucuntiʼan ju chavai. Pus ixlhichux miʼalhunutʼan ixlakʼoxipʼutʼunatʼit ju anuʼ alactuʼunti. Lana ixnonatʼit ni jantu kʼox xalhiulayatʼit tachi ju xalai ju anuʼ lapanac ju makvi lamilhiʼuxijnan. Chai na ixlhitʼalhkʼamtʼatʼit ni lai chunch xalai ju anuʼ lapanac. Chai na kʼox xatʼalhanantʼit. Slivasalh ixlakʼoxipʼutʼunatʼit ju anuʼ lhamakʼan. Ixlacʼasqʼuinatʼit ni camapalaʼ ju ixtapalh ixʼalactuʼunti ju anuʼ lapanac chai lana mamakʼalhkʼajnitʼit. Pus ni chunch ju ixlayatʼit pus putasui ni salaka untʼatʼit ju chavai ixlacata ju anuʼ lhamakʼan. 12 Pus acsni tavanan iclaʼatsʼoknunitau ju anuʼ alhiqui jantu va yuʼ ju iclalhiʼatsʼoknunitau ni amamakʼalhkʼajnitʼit ju anuʼ ju xanavi ju alactuʼunti. Nin va yuchi ni alakʼoxiyaʼitʼit ju ixlhamakʼan ju navinicalh alactuʼunti. Ju tucan iclalhiʼatsʼoknunitauch yuchi ni apʼucʼatsʼayaʼitʼit ni vasalh tuʼuʼ quilalhiulayau. Chai cʼatsai ju Dios ni vasalh chunch ju quilalhiulayau. 13 Pus ni xaquilaquiclacaʼiyau ju quinchivinti pus slivasalh na ickʼachan. Para jantu va yuʼ ju iclhikʼachan ju tuchʼi xanaviyatʼit. Para vachuʼ iclhikʼachan ni na kʼachanch ju chavai ju Tito ju milacataʼan ni slivasalh na kʼox xaʼamaklhtʼayananatʼit ju yuchi. 14 Pus ju quitʼin xacjunita ju Tito ni na lackʼoxin lapanacni untʼatʼit chai jantu xaquilamamaxaniyau. Pus tachi chun ju xaclajunau si stavasalanti. Pus chunchach vachuʼ ju tuchi xacjuni ju Tito ju milacataʼan stavasalanti lhixajcha. 15 Chai ju chavai ju yuchi palai tuʼuʼ talhiulayan ni pastʼacʼa ni xalacʼaʼiniyatʼitch chux tuchi xatajunan chai ni kʼox xaʼamaklhtʼayananatʼit chai xatʼalhoniyatʼit chai stunin ixnavikʼopʼutʼunatʼit tachi ju kʼoxich calhiulayaʼ ju yuchi. 16 Pus na iclhikʼachanch ni aktsʼiya lai iclalhilaksiyauch ju uxijnan.
1 Pus ji quiʼalakʼavin iclajumputunau ni va ixlacaʼatalh ni anavinita lamapainin ju Dios ju yuʼunch ju talhilacaʼanta ju Cristo ju tavilanancha ju xalacatʼun Macedonia yuchi talhinaviputun ju aʼaktaijunti. 2 Pus ju yuʼunch mas slivasalh na ixtamakʼalhkʼajnan para ju chavai na takʼachanch. Chai mas na kʼox quilhpatinin tajunita para ixlaquilhtu lhu lana ju taxtaklh ju ixtuminʼan ni taʼaktaijuputun ju aliʼin. 3 Pus quitʼin quiʼakstu iccʼatsai ni chunch ju taxtaklich tachi ju laich ixtachaʼan. Pus palai lhu taxtaklh va laʼixʼalhunutʼan. Palai jantu tachi ju xacmachakxai ni laich cataxtaklh. 4 Quintatapaininilh ni laich cataʼaktaiju ju quilhpatinin amachakʼan Jerusalén ju vachuʼ talhilacaʼanta ju Cristo. 5 Chai jantu va yuchi ni va lacatsʼunin tumin ju xataxtʼakʼa tachi ju xacpastʼacʼa ju quitʼin ni laich catanavi. Para pʼulhnan tamakʼaxtaknikʼolh ju isʼatsucuntiʼan ju quiʼucxtinʼan Jesús chai astan quintalhilaksin ju quijnan. Yuchi ju Dios ju xaʼamapastʼacʼani ni laich chunch catalalh. 6 Pus ju uxijnan cʼatsʼayatʼit ni yuchi ju Tito ju pʼulhnan tajunan ni casaccanaʼ ju tumin ju caʼalhikʼailaktsʼincanaʼ ju quilhpatinin ju amachakʼan Jerusalén. Chai yuchi iclhitapaininilh ju yuchi ni catalakʼanchokoyan ju uxijnan chai camuctaxtulh tuchi xataiʼulai lamilhiʼuxijnan. Ju chunch laich vachuʼ axtʼakʼaʼitʼit tachi ju pʼulhnan ixnonatʼit. 7 Pus ju uxijnan na kʼox junita ju miʼatsucuntiʼan laʼixmacni Dios. Pus ixlhichux ju miʼalhunutʼan ju lhilacʼapʼinatʼit ju Jesús. Chai laich amalanininatʼit ju ixchivinti Dios. Chai kʼox mispʼayatʼit ju stavasalanti. Chai slivasalh navipʼutʼunatʼit tachi ju machʼakxayatʼit ni kʼox calhiula ju Dios. Chai slivasalh ni quilamapainiu ju quijnan. Chai ni kʼox junita ju miʼatsucuntiʼan ixlacata tachi chun ju ani taxtokni pus tasqʼuini ni vachuʼ kʼox anaviyaʼitʼit ixlacata ju anuʼ ju alhiʼaktʼaiʼuyaʼitʼit ju aliʼin. 8 Pus ju quitʼin jantu va tapʼastu iclajunau ni axtʼaktʼit ju anuʼ lhakʼailaktsʼin. Va iclacasqʼuin ni acʼatsʼayaʼitʼit tuchi talalh ju amachakʼan Macedonia. Chai ni vachuʼ axtʼakʼaʼitʼit ju uxijnan pus caputasuyach ni vasalh amapʼainininatʼit. 9 Chai lhijunch ni chunchach ju alatʼit ni cʼatsʼayatʼit ni slivasalh ni kʼai ju amapaininti ju quintanavinitan ju quiʼucxtinʼan Jesucristo. Ju yuchi slivasalh makʼaliʼ ixjunita ju lactʼiyan. Para ju yuchi maconkʼocha chux ju anuʼ makʼalit chai na kʼox lhiquilhpatiniʼ quitsucuchilh ju ani lacamunutpaʼ. Chai yuchi xalhimaconkʼoyacha chux ju ixmakʼalit chai quilhpatiniʼ va ni laich makʼalinin aʼunaʼitʼit laʼixmacni Dios. 10 Pus iclajunau ni aktsʼiya kʼox cajunaʼ ju milacataʼan ni amuctʼaxtʼutʼit ju xatʼaiʼulayatʼit ju cʼatach. Ixnonatʼit ni isacpʼutʼunatʼit ju tumin ixlacata ju quilhpatinin chai ixlhichux ju miʼalhunutʼan ju xatʼaiʼulayatʼit. 11 Pus ju chavai amuctʼaxtʼutʼit. Ni chunch ju xapʼastʼacʼatʼit pus axtʼaktʼit tachi ju laich chaʼan. 12 Pus ni vasalh ixlhichux ju quiʼalhunut ju icxtakputunch ju tuʼuʼ mas va lacatsʼunin ni jantu lhu alin pus ju Dios kʼox calhiulayaʼ. Ju yuchi jantu lhu casqʼuiniyaʼ ju jantu lhu alin. 13 Jantu iclajunau ni va alhimakʼalhkʼajnantʼit ju lamimaktasqʼuinitʼan ju va ixʼaʼaktaijuca ju aliʼin. 14 Iclacasqʼuin ni vaklhtam chun aʼuntʼit. Ju chavai ju uxijnan alin ju mintuminʼan ju lai apʼuʼaktʼaiʼutʼit ju alin ixmaktasqʼuinitʼan. Chai astan jantu xcai ni caʼalilh ju mimaktasqʼuinitʼan chai ju acsnich ju yuʼunch laich cataʼaktaijuyan ju uxijnan. Ju chunch vaklhtam chunch aʼunaʼitʼit. 15 Chai ni vaklhtam chun aʼunaʼitʼit pus chunchach vachuʼ cajunaʼ ju miʼatsucuntiʼan tachi ju isʼatsucuntiʼan ju israelitanin acsni tasaclh ju mana. Pus chani najun laʼixchivinti Dios junta tsʼokcanta: “Ju na lhu saclh ju vaiti jantu tuʼuʼ xamaxajniyacha. Chai ju palai lacatsʼunin saclh pus jantu tuʼuʼ makʼancʼacxlh”. Chunch najun laʼixchivinti Dios. 16 Pus icjuni lakʼailaktsʼiuch ju Dios ni vana va chunch pastʼacʼa ju Tito ju milacataʼan tachi ju quitʼin. Pus ju yuchi vachuʼ lacasqʼuin ni kʼox ju atsʼucʼuyaʼitʼit laʼixmacni Dios. 17 Chai laʼisʼakstu slivasalh na ixʼamputunacha junta vilhchitʼit. Chai acsni icjunilh ni na kʼox cava ni catalakʼantachan pus quinquiclacaʼilh. 18 Chai kʼaixtam actʼamalakachayanta apumatam ju quilakʼauʼan. Pus tachi chun ju lapanacni ju talhilacaʼanta ju Cristo chux tacʼatsakʼo ni na lai amalaninin ixchivinti Dios ju yuchi. 19 Chai jantu va yuchi. Para tachi chun ju talhilacaʼanta ju Cristo yuʼunch ju tasacxtulh ju anuʼ quilakʼauʼan ni laich aquintʼaʼanaʼ acsni acʼanaʼ axtakniniʼ ju ani lhakʼailaktsʼin ju amachakʼan Jerusalén. Chai ni caʼaktaijuyau ju quilhpatinin pus chux ju lapanacni catanonaʼ ni vasalh xakʼai ju quiʼucxtinʼan Jesús chai catapucʼatsayach ni vachuʼ na aʼaktaijunumputunau. 20 Pus va iclacasqʼuin ni camakʼalh vachuʼ ju anuʼ quilakʼauʼan acsni acʼaxtakniyanta ju tumin ju amachakʼan Jerusalén. Ju chunch jantu lai xamatiʼ aquintimucʼanilh ju quintalakʼalhin ixlacata ju anuʼ tumin ni na laklhu. 21 Ju quitʼin si sok icnaviputun. Jantu va yuchi ni cacʼatsayaʼ ju quiʼucxtinʼan Jesús ni sok icnavi para vachuʼ chunch catacʼatsa ju quintʼalapanacni. 22 Vachuʼ caʼalactʼaʼanaʼ apumatam ju quilakʼauʼan. Ju quitʼin na paklhu iclaktsʼintanuta chai iccʼatsai ni slivasalh naviniputun ixlhichʼalhcat ju Dios. Chai ju chavai ni na talhilaksiyan ni amuctʼaxtʼuyaʼitʼit pus palai naviputun ju ani lhichʼalhcat. 23 Ni xamatiʼ lhasacminin ju Tito laich aʼunaʼitʼit ni yuchi ju quintʼachʼalhcatnaʼ. Yuchi ju quiʼaktaijui acsni iclajunau ixchivinti Dios. Chai ni xamatiʼ caʼalhasacmininach ju aliʼin quilhiʼalakʼavinʼan ju alactʼaʼanta ju yuchi pus laich aʼunaʼitʼit ni yuʼunch ju talhilacaʼanta Jesús ju taʼasacxtulh. Chai ixlacaʼatalh ni na salaka ju isʼatsucuntiʼan ju yuʼunch pus ju lapanacni talakʼayai ju Cristo. 24 Pus ju chavai lhuch axtʼakniyaʼitʼit ju tumin. Ju chunch catapucʼatsayach ju yuʼunch chai ju aliʼin lapanacni ju talhilacaʼanta ju Cristo ni vasalh amapʼaininin. Vachuʼ catacʼatsayaʼ ni slivasalh ju xacʼajunich acsni xaclalakʼayayauch.
1 Jantu tasqʼuini ni aclajunchokoyau tuʼuʼ ixlacata ju tumin ju capuʼaktaijucanaʼ ju quilhpatinin ju talhilacaʼanta ju Cristo ju amachakʼan Jerusalén. 2 Pus ju quitʼin iccʼatsai ni ixlhichux ju miʼalhunutʼan ju xtʼakpʼutʼunatʼit ju tumin. Chai icʼalacjunita ju amachakʼan Macedonia ni cʼatach ju ixtʼakpʼutʼunatʼit ju uxijnan ju amachakʼan xalacatʼun Acaya untʼatʼit. Chai ni ixlhichux ju miʼalhunutʼan ju ixtʼakpʼutʼunatʼit pus na lhu ju talaktsʼintan chai vachuʼ tanaulh ni cataxtʼakʼaʼ. 3 Para ixlaquilhtu icʼamalakachanitachan ju quiʼalakʼavin ni laich alakʼasiʼulayaʼitʼit ju tumin. Ju chunch caʼuctaxtuyaʼ tuchi icʼajuni ju aliʼin ni icʼajuni ni lakʼasiʼulatʼatʼit ju tumin. 4 Pus jantu xcai ni aquintatʼaʼancha ju amachakʼan Macedonia. Chai jantu xcai ni catalhitajun ni jantu lakʼasiʼulatʼatʼit ju milhakʼailaktsʼinʼan. Pus ju chunch na aquilamamaxaniu ni icʼajunita ju lapanacni ni chunchach ju aʼulhtʼuyaʼitʼit. Va icnajun ni aquilamamaxaniu ni va jantu icnomputun ni vachuʼ ju uxijnan amaxananaʼitʼit. 5 Pus ni jantu iclacasqʼuin ni xamatiʼ camamaxanicalh yuchi iclhiʼatapaininilh ju quiʼalakʼavinʼan ni pʼulhnan catalakchaʼantachan ju uxijnan. Astanch aclalakʼanchau ju quitʼin. Ju chunch ju yuʼunch cataʼaktaijuyan ni laich alakʼasiʼulayaʼitʼit ju milhakʼailaktsʼinʼan ju nontʼatʼit ni xtʼakpʼutʼunatʼit. Chai ju chunch catasuyach ni jantu va lacatapʼastu ju xtʼakʼatʼit. Para laʼixlhichux ju miʼalhunutʼan ju xtʼakʼatʼit. 6 Para iclajumputunau ju ani. Ju tam lapanac ju va lacatsʼunin chʼan ju xatʼin pus va lacatsʼunin ju makʼaixtʼokʼa ju xatocʼat ju ixʼachʼananti. Chai tam lapanac ju na lhu achʼananan pus na lhu makʼaixtʼokʼa ju xatocʼat ju ixʼachʼananti. Pus vana va chun laquiʼatsucuntiʼan. Ju tam lapanac ni va lacatsʼunin xtʼakʼa ju ixtumin pus ju Dios va lacatsʼunin caxtakniyaʼ ju ixkʼachat. Para ju lapanac ju na lhu xtʼakʼa ju ixtumin pus ju Dios na lhu caxtakniyaʼ ju ixkʼachat. 7 Pus ju pumatamin ju uxijnan chach xtaklh tachi ju kʼoxich lhiulai laʼixʼalhunut. Jantu va lacaʼamakʼanit. Nin yuchi ni tachi ju va lacatapʼastu ju caxtaklh. Ju Dios mapaini ju lapanac ju laʼixʼalhunut xtʼakʼa ju tuʼuʼ. 8 Ju Dios na tachapun. Chai ju yuchi lai catanaviniyan lhu lamapainin. Ju chunch aktsʼiya apʼacxanaʼitʼit tachi chun ju taxtokni ju maktasqʼuiniyatʼit. Chai vachuʼ lhu caʼalinaʼ ju lai apʼunaviyaʼitʼit tachi chun ju kʼox tachi acsni apʼunaviniyaʼitʼit lamapainin ju alin ixmaktasqʼuinitʼan. 9 Pus ju miʼatsucuntiʼan chunch cajunaʼ tachi isʼatsucunti ju lapanac ju lhichivincanta laʼixchivinti Dios junta tsʼokcanta junta chani najun: Ju yuchi ma na lhu xaʼaʼaktaijui ju quilhpatinin. Chai ju tuchi kʼox ju xanavi ma pastackʼalhican. Chunch najun laʼixchivinti Dios junta tsʼokcanta. 10 Pus Dios ju xtakni ju xatʼin ju achʼananaʼ. Chai quintaxtakniyan ju xkapavati ju uyau. Chai yuchach ju cataxtakniyan chux tachi ju maktasqʼuiniyatʼit chai cataxtakniyan aliʼ ni laich aʼaktʼaiʼuyaʼitʼit ju aliʼin ju alin ixmaktasqʼuinitʼan. Ju chunch na lhu laich anaviyaʼitʼit ju kʼox. 11 Chai ju Dios yuchi catalhixtakniyan ju mimakʼalitʼan ni laich apʼuʼaktʼaiʼuyaʼitʼit ju aliʼin. Chai ni lhu ju aquilaxtakniyau ju mintuminʼan ixlacata ju quilhpatinin pus na pumalhu catajunaʼ ju Dios lakʼailaktsʼiuch. 12 Chai acsni axtʼakʼaʼitʼit ju milhakʼailaktsʼinʼan jantu va yuchi ni lai amakʼosuniyaʼitʼit ju ixmaktasqʼuinitʼan ju vachuʼ talhilacaʼanta ju Cristo para vachuʼ ixlacata yuchi na lhu catajunaʼ lakʼailaktsʼiuch ju Dios. 13 Chai ni axtʼakniyaʼitʼit ju quilhpatinin amachakʼan Jerusalén ju milhakʼailaktsʼinʼan pus ju yuʼunch catalakʼayayaʼ ju Dios ni putasui ni vasalh lacʼaʼiniyatʼit ju ixchivinti Cristo tachi ju nonatʼit. Vachuʼ catalakʼayayaʼ ju Dios ni lhu xaʼaktʼaiʼuyatʼit ju yuʼunch chai tachi chun ju aliʼin ju vachuʼ talhilacaʼanta ju Jesús. 14 Chai ju yuʼunch catatapaininiyaʼ ju Dios ju milacataʼan. Chai vachuʼ na catamapainiyan ju uxijnan ni na kʼai amapaininti ju tamanaviniyan ju Dios. 15 Pus vasalh chunch. Para jantu tuʼuʼ ixtʼachunch cava tachi ju anuʼ lamapainin ju quintanavinitan ju Dios acsni makʼaxtaklh ju Jesús ju quilacataʼan. Cajuniu lakʼailaktsʼiuch ju yuchi.
1 Ju quitʼin icPablo chai iclatapaininiyau. Pus ju Cristo jantu jeks ixʼui chai kʼox lapanac ixjunita. Chai vachuʼ chunch icjumputun ju quitʼin. Para ju aliʼin lamilhiʼuxijnan tanajun ni ma na ictalhanan acsni iclatʼavilau. Para ju laquiʼalhiqui ju iclaʼatsʼoknunitau ma na icjokʼat. 2 Iclatapaininiyau ni kʼox atsʼucʼutʼit ni jantu catasqʼuiniyaʼ ni aclatalacasuniyau tachi ju na va icjokʼat acsni aclalaktsʼinchokoyau. Alin ju quintachaput ni laich acʼatalacasuniyaʼ ni na icjokʼat ju yuʼunch ju tanajun ni va quinkʼachat quiʼakstu ju icnavi. 3 Pus vasalh va lapanacni icjuntau para jantu iclasayau tachi ju va lhilapanac. 4 Ju icpulasayau jantiyuʼ tachi ju tapulasai ju va lapanacni. Icpulasayau ju tachaput ju quintaxtakniyan ju Dios. Chai ju chunch lai tʼalalhajayau tachi chun ju tasastʼucʼa ixchivinti Dios. 5 Ju lapanacni ju jantu sok taʼalacpastacnan pus ju quitʼin lai icʼamasuni ni jantu soknicʼa ju chunch. Chai ju aliʼin sia yuʼunch catalacaʼiyach ixchivinti Dios. Chai alin lapanacni ju talhilaksi ju tuʼuʼ ju alin laʼisʼatsucuntiʼan chai ju yuchi va taʼasastucnun ni jantu talhilacaʼamputun ju Dios. Pus ju quitʼin lai icʼamasuni ni jantu kʼox ju chunch. Chai ju aliʼin sia yuʼunch catalacaʼiyaʼ ixchivinti Dios. Pus laʼixtachaput Dios icʼamakʼasmatni ju aliʼin ixchivinti Cristo chai taquiclacaʼi ju yuchi. 6 Icnajun ni acmamakʼalhkʼajniyaʼ va tichi chavaich ju jantu lai lacaʼi. Va yuchi ni cʼacxach ni kʼoxich aquilaquiclacaʼiu ju uxijnan. 7 Alacpʼastʼacnantʼit. Ja va yuchi ju naviyatʼit cuenta tachi ju va anicʼa tatalacasuniyan ju lapanacni. Pus ni xamatiʼ najun ni ixʼanuch ju Cristo junita pus chach pastacchokolh isʼakstu. Chach cʼatsa ni vachuʼ ixʼanuʼ Cristo icjunita tachi ju yuchi ni ixʼanuʼ Cristo junita. 8 Ju quitʼin jantu actimaxanalh mas palai aclajunau ixlacata ju tachaput ju quixtaknita ju quiʼucxtin Jesús. Para jantiyuʼ ju xaquilhixtakni ju quintachaput ni va aclalakʼalhiniyau ju miʼatsucuntiʼan. Alai yuchi ni aclaʼaktaijuyau ni laich palai alhilacʼapʼinaʼitʼit ju yuchi. 9 Aktsʼiya alin ju quintachaput. Para jantu va yuchi tachi ju tanajun ni ma va anicʼa iclamakʼesvayauch ju laquiʼalhiqui ju iclaʼatsʼoknunitauch. 10 Ju yuʼunch tanajun ni ma na tsʼinqʼui ju quinchivinti ju icʼatsʼoknun chai ma na amakʼesvanan. Para acsni anch iclatʼavilau ma tachi ju va jantu tuʼuʼ quintapalhni iclamalacasuniyau chai ma tachi ju va matich ju quintachaput. 11 Pus chach tacʼatsa ju yuʼunch ju chunch tanajun ni aclamuctaxtunikʼoyau chux tachi ju iclajuntau laquiʼatsʼoknut. Pus tuchi xaclajunau acsni jantu anch xaclatʼavilau pus acnaviyaʼ acsni tavanan aclalakʼantachauch. 12 Ju quijnan jantu lai actinaju ni na lackʼoxin icjuntau tachi ju yuʼunch ni sala tanajun ni na lackʼoxin lapanacni tajunita. Para va lhitonto tachi ju talai ni va tanajun ni va yuʼunch ju lackʼoxin lapanacni tajunita chai tuchi tanavi ju yuʼunch ma va yuchi ju soknicʼa. Jantu tuʼuʼ talhiulai tuchi najun ju Dios. 13 Ju quijnan jantu va kʼaya iclhitakʼayayau ju tuʼuʼ lhichʼalhcat ju jantu icnavitau. Va yuchi ju aclhitakʼayayau ju icnavitau lacalhichʼalhcat ju quintaxtaknitan ju Dios. Chai icquilachau junta vilhchitʼit ju uxijnan ni chunch ju xalacasqʼuin ju Dios. 14 Jantu va kʼaya icquilachau junta vilhchitʼit tachi ju va jantuch quintajuntan ju Dios ni anch acchʼalhcatnanchau. Pus acsni lacatam lacatam xacʼantʼonau nonin ixchivinti Dios pus quitʼin ju pʼulhnan xaclajunau ju uxijnan ixchivinti Dios junta vilhchitʼit. 15 Chai jantu iclhitakʼayayau ju lhichʼalhcat ju akʼantam navita ni acnajuch ni quijnan ju icnavitauch. Para chani ju icpastʼacʼau. Acsni palai alhilacʼapʼinaʼitʼit ju Cristo pus laich aquilaʼaktaijuyau ni laich acʼanau alacatam para vana va anch junta aquintamalakachayan ju Dios. 16 Icʼamputunau palai lhiʼavinti junta vilatʼit ni laich acʼajuniu ju lapanacni ju amachakʼan anch ju chivinti ixlacata ju Cristo. Jantu icʼamputunau nonin ixchivinti Dios junta tatʼajun amalaninin ju aliʼin chai astan acnaju ni quijnanch ju xacʼamalanikʼoyau chai na kʼaich aclhicʼatsau. 17 Ni xamatiʼ lhitakʼayaputun tuʼuʼ jantu calhitakʼayalh tuchi ju navita. Alai calakʼaya ju Dios. Calhilakʼaya ju tuchi navita ju yuchi. 18 Pus ju va lakʼayachokocan isʼakstu jantu nomputun ni vasalh tuʼuʼ xanavi. Para acsni canonaʼ ju Dios ni kʼox ju xanavi tam xamatiʼ pus cʼatsacan ni vasalh kʼox.
1 Iccʼatsai ni va lhitonto ni va aclhilakʼayachokocalh quiʼakstu. Para ixlaquilhtu slivasalh iclacasqʼuin ni aquilakʼasmatniuch lacatsʼunin acsni aclakʼayachokocanaʼ quiʼakstu. 2 Aquilachʼixniuch ni na iclalhacchaʼanau ju uxijnan tachi ju Dios talhacchaʼanan. Ju tam lapanac acsni catʼatakʼoxiyaʼ ju tam tsʼalh ni caxtakniyaʼ ju tam istsiʼ pus na lhistʼacʼa ju istsiʼ ni jantu catʼachivinaʼ apumatam. Pus vana va chun ju quitʼin. Quitʼin ju xaclamalhilacaʼaniyau ju uxijnan ju Cristo. Chai iclacasqʼuin ni salaka atsʼucʼutʼit laʼixmacni tachi ju anuʼ atsiʼ ni salaka tsucui laʼixmacni ju anuʼ tsʼalh. 3 Pus ju lhacaticuru okxchokʼolh ju Eva acsni na cʼus atalacasunilh chai na cʼus ju junilh. Chai ju quitʼin na iclalhimaktalhananau. Jantu xcai ni vachuʼ alakʼalhinicʼantʼit ju miʼatalacpastʼacʼatʼan chai jantu vana ixlhichux miʼalhunutʼan ju alhilacʼapʼinaʼitʼit ju Cristo. 4 Pus ju uxijnan kʼasmatʼatʼit ju tamin nonin atumpa chivinti ixlacata ju Cristo. Jantiyuʼ tachi ju iclajuntauch ju quijnan. Chai ju uxijnan lakʼaʼiyatʼit acsni tasui lamiʼatsucuntiʼan ixtachaput akʼantam. Jantiyuʼ ju anuʼ Spiritu Santu ju tanun lamiʼalhunutʼan. Chai kʼasmatʼatʼit acsni tajunan atumpa chivinti. Jantiyuʼ ju chivinti ixlacata ju Cristo ju iclajuntauch ju quijnan. Pus yuchi iclalhijunau ni vachuʼ tasqʼuini ni aquilakʼasmatniuch ju quitʼin. 5 Pus ju anuch lapanacni ju chʼakʼokʼayatʼit tanajun ni yuʼunch ju xalackʼajin ixtamalakachan ju Jesús. Palai jantu ju quitʼin. Para jantu lai actinaulh ni palai xalackʼajin tajunita ju yuʼunch. 6 Mas jantu lai kʼox icchivinin tachi ju yuʼunch para icmachakxai ju ixtaxtokni Dios. Chai ju uxijnan pʼucʼatsʼatʼit ni vasalh icmachakxai ixtaxtokni Dios acsni iclajuntau ixchivinti. 7 Pus tʼas nonatʼit. Ja alactuʼunti ju icnavita ni jantu iclhitakʼaya acsni iclajuniu ixchivinti Dios chai jantu iclajuniu ni aquilaxtakniyau ju tuʼuch ixlacata ju quimaktasqʼuinit. Alai va quiʼakstu icchʼalhcatnalh ixlacata ju quimaktasqʼuinit ni laich palai aclaʼaktaijuyau laʼixchivinti Dios. 8 Icʼamaklhtayanalh ju ixtuminʼan ju aliʼin lapanacni ju vachuʼ talhilacaʼanta Jesús ni laich aclajunau ju ixchivinti Dios ju uxijnan. 9 Chai mas aktamixnin na ixʼalin ju quimaktasqʼuinit para acsni xaclatʼavilau ju uxijnan jantu xamatiʼ ju milhiʼuxijnan ju xacsqʼuini tuʼuʼ. Alai yuʼunchach ju quiʼalakʼavinʼan ju xataminacha ju xalacatʼun Macedonia quintaxtaknilh ju tuchi xacmaktasqʼuini. Jantu tavanan tuʼuʼ xaclasqʼuinitau ju uxijnan chai chunchach ju actailhiʼankʼalhiyaʼ. 10 Ju Cristo cʼatsai ni icnajun ju stavasalanti. Pus ju quitʼin na kʼoxich iclhiulai ni jantu tavanan iclasqʼuiniu tuʼuʼ ju uxijnan amachakʼan xalacatʼun Acaya. Chai jantu tavanan lai xamatiʼ catinaulh ni icʼamaklhtayanalh ju mintuminʼan. 11 Chai jantiyuʼ ni va jantu iclamapainiyau chai yuchi jantu iclhiʼamaklhtayanamputun ju mintuminʼan. Dios kʼox cʼatsai ni na iclamapainiyau. 12 Pus tachi ju icnavi actailhiʼanach. Ju chunch acpuʼachakxmamactaniyaʼ ju ixchivintiʼan ju yuʼunch ju quintapuxconiputun ju quintalakʼalhin. Ju yuʼunch tanajun ni taʼamaklhtayanan ixtalhajaʼan ni ixtamalakachan Jesús tajunita. Para jantu lai aquintitamalani ni vana va chun aclalh va ixlacaʼatalh ni tanajun ni chunch catapucʼatsayaʼ ju lapanacni ni vasalh ixtamalakachan Jesús icjunita. 13 Pus ju yuʼunch jantu vasalh ixtamalakachan Jesús tajunita. Ju yuʼunch va taʼaʼokxchokʼonun chai va tatalacasui tachi ju vasalh ixtamalakachan Jesús mas jantu. 14 Para jantu alhamakʼaninintʼit ni alin ju lapanacni ju chunch talai. Pus mas yuchi ju lhacaticuru talacasui tachi ju ixʼanquilh Dios ju tʼajun lacaʼatuncunuʼ. 15 Chai ni chunchach ju lai ju yuchi pus jantu alhamakʼaninintʼit ni vana va chun talai ju ixlapanacni. Vachuʼ tatalacasui tachi ju ixnavini soknicʼa mas jantu. Para laʼixʼaclanti ju isʼatsucuntiʼan caʼamacaʼancanaʼ junta lhijun ni cataʼalh ni jantu vasalh ixtanavi ju soknicʼa. 16 Aktam iclajunchokopalauch ni jantu iclacasqʼuin ni xamatiʼ canaulh ni va ictonto ni va iclakʼayachokoputuncan lacatsʼunin laquiʼakstu. Para mas chunch quilalaktsʼinau aquilakʼasmatniuch ju tonto quinchivinti. 17 Ju tuchi acnonaʼ jantu chun tachi ju tachivinin ju chʼakʼokʼai ju Jesús. Alai icchivinin tachi ju tam tonto acsni iclajunau ni vachuʼ icxakʼaich. 18 Pus na pumalhu ju talhitakʼayachokoi isʼakstuʼan ni tanajun ni jantu va tam xamatiʼ ju yuʼunch. Pus ni chunch ju talai ju yuʼunch pus vachuʼ aclakʼayachokocanaʼ quiʼakstu. 19 Pus ju uxijnan ni sala na acʼatsʼanantʼatʼit pus alhilakʼaʼitʼit ju quilhitonto. 20 Alaktsʼintʼitch. Ju uxijnan lakʼaʼiyatʼit ni xamatiʼ va xalapanac tanaviyan chai acsni taʼokxchokʼotaiʼiniyan ju mintuminʼan. Lakʼaʼiyatʼit acsni taʼokxchokʼoyan chai acsni xamatiʼ tatalacasuniyan tachi tam xakʼai mas jantu. Chai lakʼaʼiyatʼit acsni xamatiʼ talakxtansayan. 21 Pus ju quitʼin icnajun ni lana jantu lai xaclanaviyau ju chunch. Para ni alin ju tuʼuʼ laʼisʼatsucuntiʼan ju talhitakʼayai pus vachuʼ ju quitʼin. Alin ju tuchi lai aclhitakʼayayaʼ. Ju quitʼin icchivinin tachi ju tam tonto. 22 Ju yuʼunch ja hebreonin tajunita. Pus vachuʼ ju quitʼin. Ju yuʼunch ja israelitanin tajunita. Pus vachuʼ ju quitʼin. Ju yuʼunch ja makʼaniya ixʼapapanatnich ju Abraham tajunita. Pus vachuʼ ju quitʼin. 23 Ju yuʼunch ja ixlapanacni Cristo. Pus ju quitʼin palai lhu icnavita ixlhichʼalhcat ju Cristo. Palai jantu ju yuʼunch. Para acsni icnajun ju chunch va icchivinin tachi ju va iclakachapui. Pus ju quitʼin slivasalh lhu ju icchʼalhcatnanita ju Dios. Na paklhu ju iclakanekmacanta. Chai lana na kʼox paklhu ju ictʼalhnucanta. Chai na paklhu ju xacmakniputuncan. 24 Pakquis quintachʼapalh ju quintʼaʼisraelitanin chai ju paktamin pakpʼuxamcaunajatsan ju xaquintanekʼe lacaʼaxtakʼan. 25 Chai paktʼutu xacʼulanicanta lacasnivenkʼe qʼuiu. Chai paktam xaclacatʼalhmacanta. Paktʼutu takʼalhilh ju barco ju xacpuʼanta chai xcayama ictakʼalhtaxtulh. Chai tam atatsʼisni a tam avilhchan xactʼajun junta talhman lacaʼalama. 26 Na kankalhu ju icʼalhtananta ju lacati. Chai na paklhu xcayama ictapasalh lacatalhavanaxcan. Chai icʼalhtanalh junta na lhitalhan ixjunita ni na ixtaʼalin ju akʼalhonin. Vachuʼ va xcayama ictakʼalhtaxtulh acsni xaquintamakniputun ju quintʼaʼisraelitanin chai acsni xaquintamakniputun ju yuʼunch ju jantu israelitanin tajunita. Chai aktamixnin xacmakniputuncan acsni xacvi ju lakʼachakʼan. Chai aktamixnin va xcayama ictakʼalhtaxtulh junta va apakniu ixjunita chai vachuʼ acsni xacʼanta lacabarco lacaʼalama. Chai aktamixnin va xcayama ictakʼalhtaxtulh acsni xaquintamakniputun ju jantu vasalh quilhiʼalakʼavin laʼixmacni Cristo mas chunch ixtatalacasuputun. 27 Na lhu xacchʼalhcatnan laquimacaʼ chai na xacmakʼalhkʼajnan. Na paklhu xackʼalhcujta chai na paklhu xacchavatʼajun chai xacquicxixtʼajun. Na paklhu matich ixjunita tuchi acʼulh. Icmakʼalhkʼajnalh lacalhicʼasnin chai acsni jantu lhu ixjunita ju quimpumpuʼ. 28 Chai jantu va yuchi ni iclhimakʼalhkʼajnanta laquilacatuna. Para vachuʼ tuncujun tuncujun slivasalh na lhu alin ju quiʼatalacpastʼacʼat acsni icpuxcajui ta yu laich acʼaʼaktaijuyaʼ tachi chun ju talhilacaʼanta ju Cristo. 29 Ni alin xamatiʼ ju jantucaʼ kʼox machakxai ju ixchivinti Dios pus ja jantu vachuʼ icmachakxai ta yu cʼatsan chai na quilhixcani ju quiʼalhunut. Ni alin xamatiʼ ju makʼalhkʼosucan ja jantu quitʼin ju na ictalhkʼamni ju amakʼalhkʼosunuʼ. 30 Pus ni tasqʼuini ni aclhitakʼaya tuʼuʼ pus aclhitakʼayayaʼ ju putasui ni matich ju quintachaput. 31 Calakʼayakʼalhicanaʼ ju isDios chai ixpai ju quiʼucxtinʼan Jesucristo. Chai ju yuchi kʼoxich cʼatsai ni jantu ictaʼaklhtamai acsni icnajun tachi ju iclajuntau. 32 Pus acsni xacvilhcha ju lakʼachakʼan Damasco pus ju ixgobernador ju xakʼai ucxtin Aretas lhinaulh ixlhistʼacʼa ju lakʼachakʼan ni va xaquinchʼapaputunch. 33 Para ixʼalin ju lacchakaʼ ju ixtatʼalachʼapata ju xakʼex ju lakʼachakʼan. Pus ictakʼalhtaxtulh acsni icputaxtulh laxaventana lakatam chakaʼ ju ixtʼalachʼapata ju kʼex chai ictajulh lacakʼai malhavacalh. Chai ju aliʼin quintamakʼalhtaju. Chai chunch ju icputakʼalhtaxtulh acsni xaquimakniputun ju anuʼ gobernador.
1 Jantu tuʼuʼ icpulhajai ni iclakʼayachokocan quiʼakstu. Para ixlaquilhtu aclalhijunau ju chavai ju tuchi iclaktsʼintach tachi ju va laquilhtatat chai ju tuchi quimacʼatsanitach ju quiʼucxtin Jesús. 2 Laʼixtachaput ju Cristo tapasalh ju ani ju aclajunau. Pus ju chavai tapasata lakacautʼatʼi cʼata ju xaclhiʼancanta ju lactʼiyan. Ju quitʼin jantu iccʼatsai u va yuchi ju quintacuvin ju quilalh ju lactʼiyan u chux ju quilacatuna ju quilalh. Va yuchi ju Dios ju cʼatsai. 3 Para ju quitʼin iccʼatsai ni xaclhiʼancanta ju lactʼiyan. Chai acsni iclhiʼancalh ju anch jantu iccʼatsai u va yuchi ju quintacuvin ju quilalh ju lactʼiyan u chux ju quilacatuna ju quilalh. Va yuchi ju Dios ju cʼatsai. 4 Chai acsni iclhiʼancalh ju talaclhman junta paraíso juncan pus anch ickʼasmatcha ju chivinti ju jantu xalacasqʼuin ju Dios ni xamatiʼ acjunilh. 5 Ju quitʼin aclakʼayachokocanaʼ quiʼakstu ixlacata ju tuchi xaquinavi ju Dios. Para ju va tuʼuch ju icnavita quiʼakstu jantu actilhitakʼaya. Va yuchi aclhitakʼayayaʼ ju putasui ni matich ju quintachaput. 6 Mas aclakʼayachokocalh quiʼakstu jantu lai va tonto activa va ixlacaʼatalh ni yuchi ju stavasalanti ju acnaulh. Para jantu chun actilalh ni jantu iclacasqʼuin ni xamatiʼ palai aquilakʼaya va ixlacata ju ani quinchivinti ju iclajunau. Va iclacasqʼuin ni catacʼatsa ni chunch icjunita tachi ju quintalaktsʼin chai tachi ju quintakʼasmatni. 7 Chai ni slivasalh na cʼus ixjunita ju xaquimalacasuni ju Dios ju lactʼiyan pus vachuʼ lakʼaʼi ni acxtaknicalh lakatam makʼalhkʼajnat ju na quixcani tachi acsni tanun tuʼuʼ alhtucunuʼ laquiʼacanitʼan. Ju chunch jantu lai actilhitakʼaya tachi ju jantu lhijun ju tuchi xaquimasuni ju Dios. Chai vachuʼ ju yuchi va tachi aquimapastʼacʼani ni va lapanac icjunita. Lakʼaʼinicalh ju lhacaticuru ni yuchi ju aquixtaknilh ju ani makʼalhkʼajnat. 8 Pus paktʼutu ictapaininilh ju quiʼucxtin Jesús ni aquimakʼosunilh ju ani makʼalhkʼajnat. 9 Para ju yuchi chani quijuni: “Ju quitʼin va tachi acʼaktaijuyan laquiʼamapaininti. Acsni va matich ju mintachaput pus acsnich ju tasui ni na ictachapun ju quitʼin ni icʼaktaijuyan”. Chunch ju xaquijuni. Chai ni chunch pus lhikʼach acmakʼalhkʼajnanaʼ ni laich caputasuyach laquiʼatsucunti ixtachaput ju Dios. 10 Yuchi iclhikʼachan acsni lana matich ju quintachaput ni lai acnavilh ju tuʼuʼ chai acsni macxcai quintalhichivinin ju lapanacni va ixlacaʼatalh ni icchʼakʼokʼai ju Cristo. Vachuʼ iclhikʼachan acsni lana matiʼ ju quintuʼuʼ chai acsni na quintalhixcajich ju lapanacni chai acsni na icmakʼalhkʼajnan va ixlacaʼatalh ni icchʼakʼokʼai ju Cristo. Pus acsni lana matich ju quintachaput pus acsnich ju quixtakni ju ixtachaput ju Dios chai yuchi iclhikʼachan acsni icmakʼalhkʼajnan. 11 Tachi ju va tonto icchivinin ni iclakʼayachokocan quiʼakstu. Para istasqʼuini ni chunch aclalh ni lana tachi ju va jantu tuʼuʼ quilalhiulayau. Palai kʼox ixva ni vas ixnaʼuntʼit ni vachuʼ ixlapanac ju Cristo icjunita. Pus ju quitʼin mas lana jantu tuʼuʼ ju quintapalhni ju va laquiʼakstu para jantu tuʼuʼ quincʼacxni ni lai xamatiʼ canaulh ni jantu vachuʼ ixtamalakachan Cristo icjunita tachi ju yuʼunch ju tatalacasuniyan tachi ju va xalackʼajin ixtamalakachan ju Cristo tajunita. 12 Acsni xaclatʼavilhchau lana istasui ni vasalh ixtamalakachan ju Cristo icjunta. Ju uxijnan laktsʼintʼit ni xacchʼixkʼojui tachi chun ju macxai ju ixʼalin laquiʼatsucunti. Chai xacnavi ju tuʼuʼ ju laich catapucʼatsa ju lapanacni ni vasalh Dios ju xaquimalakachayachilh chai xacnavi ju tuʼuʼ lhamakʼan chai ju tuʼuʼ ju istasui ni laʼixtachaput Dios ju xacchʼalhcatnan. 13 Jantu tuʼuʼ icnavita ju alacatam ju jantu icnavita lamilhiʼuxijnanʼan vachuʼ. Va yuchi ni jantu xaclamaklhtaitauch tuʼuʼ ju uxijnan tachi ju xacʼamaklhtajita ju aliʼin. Lamapainin aquilamacʼacxaniuch junima talakʼalhin. 14 Ju chavai iclakasivi ni icnajun ni ixlaktʼutuch aclalakʼantachauch ju uxijnan. Chai lana icnajun ni jantu tuʼuʼ aclasqʼuiniyau ju uxijnan. Chunch icnaviputun ni jantiyuʼ ju mintuminʼan ju icpuxcajui. Alai va iclacasqʼuin ni atʼakʼalhtʼaxtʼuyaʼitʼit ju uxijnan. Pus tachi ju lacan ju ani lacamunutpaʼ jantiyuʼ ju tam askʼatʼa ju xtakni ju tuchi maktasqʼuini ju tam ixpai. Alai yuchi ju xapai ju xtakni ju tuchi maktasqʼuini ju tam isʼaskʼatʼa. Pus vana va chun ju quitʼin. Iclaʼaktaijuputunau ni tachi ju va quiʼaskʼatʼan iclalhiulayau laʼixmacni Cristo. 15 Ju quitʼin lacalhikʼach acmacaʼanaʼ ju quintumin chai mas chux quiʼatsucunti aclhitapʼuxputunach va ixlacaʼatalh ni iclacasqʼuin ni alhilacʼapʼitʼit ju Cristo. Chunch aclayaʼ mas tasui tachi ju va palai jantu tuʼuʼ quilalhiulayau ju quitʼin acsni slivasalh na tuʼuʼ iclalhiulayau ju uxijnan. 16 Para mas jantu tuʼuʼ xaclasqʼuiniyau ju uxijnan para ju aliʼin lamilhiʼuxijnan tanajun ni va iclaʼokxchokʼomaxtuniu ju mintuminʼan acsni iclamalakachanichau ju aliʼin quiʼalakʼavinʼan. 17 Tachi chun ju iclamalakachanichau jantu xamatiʼ xataʼokxchokʼomaxtuniyan ju mintuminʼan. 18 Ictapaininilh ju Tito ni catalakʼanchan. Chai ictʼamalakachacha apumatam quilhilakʼauʼan. Chai ju uxijnan cʼatsʼayatʼit ni jantu xataʼokxchokʼomaxtuniyan ju mintuminʼan. Cʼatsʼayatʼit ni va ixtʼachunch ju ixʼalhunut ju Tito tachi ju quiʼalhunut. Chai va ixtʼachunch ju chʼalhcatnan ju yuchi tachi ju quitʼin. 19 Ca va nonchʼokʼopʼalatʼit ni va iclacasqʼuin ni anonaʼitʼit ju uxijnan ni matiʼ ju quintalakʼalhin. Para jantu. Ju quitʼin ni iclhilaksita ju Cristo pus va yuchi ju Dios ju iclacasqʼuin ni canaulh ni matiʼ ju quintalakʼalhin. Pus tachi chun ju icnavi ji quiʼalakʼavin si icnavi ni palai lai alhilacʼapʼitʼit ju Jesús. 20 Pus ju quitʼin na iclalhamakʼanininau. Pus acsni tavanan acchaʼananta jantu xcai ni aclalhitaju ju uxijnan tachi ju jantu iclacasqʼuin. Chai ju chun tasqʼuini ni aclalh tachi ju jantu kʼox alhiulayaʼitʼit. Jantu xcai ni vana alaclakʼaʼitʼit chai alaclalhacchipʼinitʼit tuʼuʼ chai alaclamaktʼalhkʼamantʼit. Jantu xcai ni alaclasatʼit chai macxcai chivinti alaclaʼunitʼit chai alapʼuxcʼonitʼit ju talakʼalhin. Jantu xcai ni kʼai acʼatsʼatʼit chai lana jantu alalacʼaʼiniyatʼit. 21 Acsni aclalakʼanchokopalhtachau chai aclalhitajuyau ni chunch ju layatʼit pus na aquimamaxanilh ju Dios ni vanach alactuʼununatʼit ju uxijnan. Slivasalh acʼamakʼanininaʼ ni va caʼalilh ju aliʼin ju taʼalactuʼununta para jantu tavanan tamacajunta ju ixʼalactuʼuntiʼan. Ju aliʼin tatʼatsucui ju jantu ixʼamachakaʼan u jantu ixpapaʼan. Chai ju aliʼin tatailhiʼanta tachi ju aktsʼiyach ixlantichʼan.
1 Ju chavai ixlhipaktʼutuch ju aclalakʼantachauch. Chai ju acsnich acʼamucʼaniyaʼ ixtalakʼalhinʼan ju lapanacni para va acsni alin pumatʼui u pumatʼutu lapanacni ju vasalh talaktsʼinta acsni tavanan taʼalactuʼunulh. 2 Tachi ju iclajuntau ixlacata ju yuʼunch ju na ixtaʼalactuʼunun acsni xaclatʼavilhchau ju ixlhipaktʼui pus vana va chun ju iclajunchokopalau ju chavai mas jantu anch iclatʼavilau. Icʼajunich ju yuʼunch ju vanach na taʼalactuʼunun ni jantu xamatiʼ ju sia yuʼunch catakʼalhtaxtuyaʼ acsni tavanan aclalakʼanchokotachau. 3 Chunch ju acnaviyaʼ ni va quilapuxconiyau ta yu laich apʼucʼatsʼayaʼitʼit ni vasalh ixchivinti Cristo ju iclajunau. Jantu lai atʼinaʼuntʼit ni jantu tamasunitan ju ixtachaput ju Cristo. Ju yuchi na lhu tamasunitan ju ixtachaput lamilhiʼuxijnan. 4 Ju Cristo acsni tavanan maquilhtacalh ju lacacurus va lhilakʼaʼilh ni catasu tachi ju va matich ju ixtachaput ixjunita. Para ju chavai ju yuchi tʼajun laʼixtachaput ju Dios. Pus vana va chun ju quitʼin. Ju uxijnan quilalaktsʼinau tachi ju va matich ju quintachaput ju quitʼin. Para ni iclhilaksita ju yuchi pus alaktsʼinaʼitʼit ni vasalh laʼixtachaput ju Dios ju icchʼalhcatnan acsni tavanan aclalakʼantachau. 5 Alaktsʼintʼanuchʼokʼocʼantʼit miʼakstuʼan. Acʼatsʼatʼit ni vasalh lhilacʼapʼinatʼit ju Cristo u jantu. Ja va jantu cʼatsʼayatʼit ni tʼajun ju Jesucristo lamiʼalhunutʼan ni vasalh lhilacʼapʼinatʼit ju yuchi. Para ni jantu pus jantu tʼajun ju yuchi lamiʼalhunutʼan. 6 Pus mas cʼatsʼayatʼit ni lhilacʼapʼinatʼit ju Cristo u jantu para iclacasqʼuin ni acʼatsʼatʼit ni vasalh ixtamalakachan ju Cristo ju quitʼin. 7 Ju quitʼin ictapainini ju Dios ni jantu anavitʼit tuʼuʼ macxcai. Para jantu icpunajun chunch ni acpulakʼayacalh quiʼakstu. Alinch ju quintachaput ni laich aclalakʼakʼaimayau ni alactʼuʼununatʼit. Para palai kʼox cava ni sok atsʼucʼuyaʼitʼit mas aquilalaktsʼinau ju quitʼin tachi ju va matich ju quintachaput ni matiʼ tuʼuʼ ju lai aclalhilakʼakʼaimau. 8 Pus ju quitʼin va yuchi ju kʼox ju aclanaviniyau ni naviyatʼit tachi ju najun laʼixchivinti Dios. Chai ju yuchi stavasalanti. Va acsnich ju lai aclalakʼakʼaimayau ni va jantu anavitʼit tachi ju najun ju anch. 9 Na iclhikʼachan acsni tasui lamiʼatsucuntiʼan ni ixlhichux ju miʼalhunutʼan ju lhilacʼapʼinatʼit ju Cristo mas lai aquilalaktsʼinau ju chunch tachi ju va matich ju quintachaput laʼixmacni Cristo ni jantu tuʼuʼ alin ju lai aclalhilakʼakʼaimayau. Chai vachuʼ ictapainini ju Dios ni lana soknicʼa cajunaʼ ju miʼatsucuntiʼan. 10 Pus ni jantu anch iclatʼavilau pus va iclaʼatsʼoknuniyau ju ani chivinti. Ju chunch acsni tavanan aclalaktsʼintachau ta tsʼa jantu lakʼoxikʼotʼatʼit ju lhamakʼan chai jantu catasqʼuiniyaʼ ni aclalakʼakʼaimayau. Jantu catasqʼuiniyaʼ ni aclamalacasuniyau ju tachaput ju quixtaknita ju quiʼucxtin Jesús. Para ju yuchi quixtaknilh ju quintachaput ni laich aclaʼaktaijuyau. Jantiyuʼ ni va aclalakʼalhiniyau ju miʼatsucuntiʼan. 11 Pus va yuchi ju ani iclajumputunau ji quiʼalakʼavin. Alakʼoxitʼit ju lhamakʼan ju alin lamilhiʼuxijnanʼan. Alamapʼaksitʼit. Va lakatam aʼuntʼit. Jantu va alaclakʼaʼitʼit. Ju chunch ju Dios catatʼatolanch. Yuchach ju cataʼaktaijuyan ni alamapʼainiyaʼitʼit chai ni jantu alalakʼaʼitʼit. 12 Alamacʼamitʼitch pumatamin pumatamin. Va kʼoxich alamacʼamitʼit tachi ju lhijunch ni lhiʼalakʼavin untʼatʼit. 13 Tachi chun ju lapanacni ju ani tavilanalh ju talhilacaʼanta ju Cristo tamacʼamiyan. 14 Ictapainini ju quiʼucxtinʼan Jesucristo ni va tachi catanaviniyan lamapainin. Chai ictapainini ju quimpaiʼan Dios ni catamasuniyan ju ixʼamapaininti. Chai ictapainini ju Spiritu Santu ni na miʼamigoʼan cajunaʼ. Vasalh chunch ictapainini.
1 Ju quitʼin icPablo. Ixtamalakachan Jesús icjunita. Jantu quintʼalapanacni ju quintamalakachatachilh nin pumatam quintʼalapanac ju quisacxtuta ni ixtamalakachan Jesús acva. Alai yuʼunch ju Jesucristo chai quimpaiʼan Dios ju quintamalakachatachilh. Yuchi ju Dios ju malokʼonichokolh ju Jesús laʼixʼaninti. 2 Pus ju quitʼin chai tachi chun ju lhiʼalakʼavin ju quintatʼavi iclamacʼamiyau tachi chun ju uxijnan ju lhilacʼapʼinatʼit ju Jesús ju vilhchitʼit ju xalacatʼun Galacia. 3 Icʼatapainini ju quimpaiʼan Dios chai ju quiʼucxtinʼan Jesucristo ni catanaviniyan lamapainin chai cataʼaktaijuyan ni jantu calacʼalh ju miʼalhunutʼan. 4 Pus ju Jesucristo tamakʼaxtakchokolh isʼakstu ixlacata quiʼalactuʼuntiʼan. Chai chunch ju lalh ni laich aquintamakʼalhtaxtuyan ju ani lacamunutpaʼ junta na lhu alin ju alactuʼunti. Chai chunch ju lalh ju Jesús ni chunch ju ixlacasqʼuinta ju quimpaiʼan Dios. 5 Chach lakʼayacalhch ju yuchi tus va tavananch. Vasalh iclacasqʼuin ni chunch ju caʼulhtucalh. 6 Na iclhamakʼaninin ni vatsʼalhti xamacʼonatʼit ju Dios. Laich xalacʼaʼiyatʼit atumpa chivinti chai nonatʼit ni amakʼalhtʼaxtʼucʼanaʼitʼit ni alacʼaʼiyaʼitʼit ju chunch. Laich chunch xalayatʼit mas tasacxtutan ju Dios va ixlacaʼatalh ni tanavinitan kʼai lamapainin ju Cristo. 7 Para jantu vasalh ni caʼalilh tuʼuʼ atumpa chivinti ju aquintajunan ta yu laich catakʼalhtaxtu. Va yuchi ni taʼalin ju lapanacni ju talakʼalhiniputunan ju miʼatalacpastʼacʼatʼan. Ju yuʼunch va tamapaxaputun ju ixchivinti Dios ixlacata ju Cristo. 8 Para ju Dios caxcayaʼ va tichi cavalhch ju laich catajunan atumpa chivinti junta tajunan ni alin atumpa ju apʼutʼakʼalhtʼaxtʼuyaʼitʼit. Jantiyuʼ tachi ju iclajuntauch ju quitʼin. Pus ni caʼalilh tam xamatiʼ ju chunch calalh pus ju Dios caxcailh. Mas quitʼin cava u mas camincha lactʼiyan pumatam anquilh ju chunch catajunin. 9 Pus ju chavai aclajunchokoyau aktam tachi ju xaclajunau makʼanchich. Ni xamatiʼ catajunan atumpa chivinti ni jantiyuʼ tachi ju aktsʼiya lacʼaʼitʼatʼit pus ju Dios caxcayaʼ. 10 Pus ni icnajun ju chunch pus lana tasui ni iclacasqʼuin ni yuchi ju Dios ju kʼox aquilhiula. Jantiyuʼ ni va kʼox aquintalhiula ju quintʼalapanacni. Chai putasui ni jantiyuʼ ju quintʼalapanacni ju icʼanaviniputun ixkʼachatʼan. Pus ni va acʼanavinilh cava ju ixkʼachatʼan ju quintʼalapanacni pus jantu ixlapanac ju Cristo acva. 11 Pus ji quiʼalakʼavin iclacasqʼuin ni acʼatsʼatʼit ni jantu va ixchivinti ju va tam lapanac ju iclajuntauch acsni iclajuntau ta yu laich atʼakʼalhtʼaxtʼuyaʼitʼit. 12 Pus jantu xamatiʼ tam quintʼalapanacʼan ju quijunilh ju anuʼ chivinti. Nin yuchi ni va tam lapanac cava ju quimalanilh. Alai isʼakstu ju Jesucristo ju quimavasalanilh ju anuʼ chivinti. 13 Ju uxijnan kʼasmatʼatʼit ta yu ixjunita ju quiʼatsucunti ju makʼanchich acsni xaclacaʼi tachi ju talacaʼi ju quintʼaʼisraelitanin. Cʼatsʼayatʼit ni slivasalh na xacʼalhimakchapui ju ixtalhilacaʼanta ju Cristo. Tus xacnajunta ni xacʼamaknikʼo. 14 Chai palai xacmuctaxtui laʼixʼatalanintiʼan ju quintʼaʼisraelitanin. Palai jantu ju aliʼin tsʼalan ju quintʼatsucunin ixtajunita. Pus palai xacnaviputun tachi ju quintamalanitan ju quilacpaʼitni quincʼan. Palai jantu ju aliʼin. 15 Pus ju Dios quisacxtulh acsni tucaʼ xactsucui. Chai va ixlacata ni na kʼai ju ixʼamapaininti pus yuchi astan quilhilhcaʼula ni ixtamalakachan acva. Pus chilh avilhchan acsni lacasqʼuilh ju Dios ni acmispalh ju istsʼalh ni laich aclajunau ju uxijnan ju jantu israelitanin untʼatʼit ta yu laich atʼakʼalhtʼaxtʼuyaʼitʼit. Pus ju acsnich lana jantu xamatiʼ ju va quintʼalapanac ju icsqʼuinilh lamapainin ni aquijunilh ni kʼox ju acnaviyaʼ u jantu. 17 Nin yuchi ni acʼalh ju lakʼachakʼan Jerusalén alaktsʼiniʼ ju yuʼunch ju ixtamalakachan Jesús ixtajunita. Jantu icʼalactʼachivinilh mas pʼulhnan asacxtucalh ju yuʼunch ni ixtamalakachan catava. Astan ju quitʼin. Alai ictaxtulh ju lakʼachakʼan Damasco. Chai icquitolhcha pantsʼiquis ju xalacatʼun Arabia. Astan icminchokolh ju lakʼachakʼan Damasco. 18 Tus acsni taʼaktsalh lakatʼutu cʼata acsnicaʼ ju icquilalh ju lakʼachakʼan Jerusalén. Va icʼalh laktsʼiniʼ ju Pitaluʼ juncan chai ictʼatolhcha lakacauquis avilhchan. 19 Para jantu iclaktsʼincha xamatiʼ akʼantam ixtamalakachan Jesús. Va yuchi ju Jacobo ispʼisekʼe ju quiʼucxtinʼan Jesús. 20 Pus Dios cʼatsai ni stavasalanti tachi chun ju ani ju iclaʼatsʼoknunitau. Jantu va iclaʼokxchokʼoyau. 21 Pus ju astan icʼampa ju xalacatʼun ju Siria chai ju xalacatʼun ju Cilicia. 22 Pus jantu xaquintamispai ju ixtalhilacaʼanta ju Cristo ju ixtavilanancha ju xaʼestado Judea. 23 Va yuchi ni ixtakʼasmatʼach ni icʼajunilh ju lapanacni ju chavai ni catalhilacaʼalh ju Jesús mas na xacmamactaputunch ju chunch chivinti ju makʼanchich. Mas na xacʼalhimakchapui ju makʼanchich ju ixtalhilacaʼanta ju chunch. 24 Pus ni takʼasmatlh ju chunch pus na ixtalakʼayai ju Dios ni tam xajun ju quiʼatsucunti.
1 Ju astan acsni tapasalh lakacautʼatʼi cʼata icʼanchokopa aktam ju lakʼachakʼan Jerusalén. Ju acsni quintʼaʼalh ju Bernabé. Chai vachuʼ ickʼailhiʼalh ju Tito. 2 Chai yuchi iclhiʼalh ni isʼakstu ju Dios ju xaquijunita ni acʼalh alactʼachiviniʼ ju quintʼaʼisraelitanin. Chai pʼulhnan icʼajunilh va isʼakstuʼan ju xalackʼajin sia yuʼunch ju talhilacaʼanta ju Jesús tuchi iclajunau ju uxijnan ju jantu israelitanin untʼatʼit. Chunch icnavilh ni jantu xaclacasqʼuin ni catalakʼalhi ju tuchi xacnavi nin catasastuclh ju lhichʼalhcat ju xacnaviputun sia milhiʼuxijnan ju jantu israelitanin untʼatʼit. Chai ju astan chunch icʼajunilh vachuʼ ixtalhavatʼan. 3 Pus ju Tito xaquintʼaʼanta chai ju yuchi jantu israelita junita. 4 Pus jantu xaclacasqʼuinau ni cachʼucʼunicalh ju ixʼaxtʼakʼa ju Tito mas chunch ixtanajun ju aliʼin lapanacni ju ixtavilanancha anch ju ixtatalacasui tachi ju lhiʼalakʼavinch mas jantu. Pus ju yuʼunch va xaquintaputankʼajlaktsʼimputunan u ni vasalh jantu naviyau ju makʼaniya ixlhamapʼaksin Moisés ju chavai ni lhilacaʼantauch ju Jesús u jantu. Ju yuʼunch va xaquintajumputunan ni tapʼastu acnaviyau tachi ju najun lacalhamapʼaksin. 5 Para nin lacatsʼunin jantu xacʼanaviniyau ju ixkʼachatʼan ni jantu xaclacasqʼuinau ni camapaxanicalh ju chivinti ixlacata ju Jesús ju iclajuntauch ju uxijnan. 6 Para ju yuʼunch ju ixnoncanch ni xalackʼajin ixtajunita junta ictakʼaixtokvi jantu tuʼuʼ sastʼi lhamapʼaksin quintaxtaknilh. Pus mas noncan ni xalackʼajin tajunita jantu lai actinaulh ni va ixlacataʼan ju yuʼunch tam acpastaclh. Pus ju Dios vaklhtam chun alaktsʼin tachi chun ju lapanacni. 7 Pus ju anuch xalackʼajin jantu tuʼuʼ sastʼi lhamapʼaksin quintaxtaknilh ni tamachakxa ni Dios ju xaquijunita ni aclajuniu ju uxijnan ju jantu israelitanin untʼatʼit ju chivinti ixlacata Jesús. Tamachakxalh ni yuchach ju quilhichʼalhcat junita tachi ju Pitaluʼ ni xtaknilh ixlhichʼalhcat ni caʼajunilh ju istʼaʼisraelitanin ju chivinti ixlacata Jesús. 8 Pus yuchi ju Dios ju malakachalh ju Pitaluʼ ni caʼalh amasuniniʼ ju istʼaʼisraelitanin ixlacata ju Jesús chai vana yuchi ju quimalakachalh ju quitʼin ni aclamasuniu ju uxijnan ju jantu israelitanin untʼatʼit. 9 Pus ju Jacobo chai ju Pitaluʼ chai ju Xivan xalackʼajin ixtajunita sia yuʼunch ju ixtalhilacaʼanta ju Cristo ju anch. Chai ju yuʼunch acsni tamachakxa ni na kʼai lamapainin ju xaquinavinita ju Dios ni xaquixtaknita ju ani lhichʼalhcat pus jantu tuʼuʼ sastʼi lhamapʼaksin ju xaquintajunan. Va yuchi ni quintajunin ju quitʼin chai ju Bernabé ni ixcompañerojni icjuntau. Chai tanajunch ni quijnan ju aclajunauch ju uxijnan ixchivinti Dios. Uxijnan ju jantu israelitanin untʼatʼit. Chai ju yuʼunch ma catalacjunaʼ ju istʼaʼisraelitaninʼan. 10 Va yuchi ni quintajuninch ni acʼaʼaktaijuyauch ju quilhpatinin para aktsʼiya chunchach ju xacnaviputunau. 11 Para ju astan acsni milhch ju Pitaluʼ ju lakʼachakʼan Antioquía pus ickʼailh laʼixʼucxlacapuʼ ni va ixʼalin ju ixtalakʼalhin. 12 Pus ju yuchi va lakputam xaʼalactʼavajin ju jantu israelitanin. Para acsni tachilh ju aliʼin ixlapanacni ju Jacobo ju istʼaʼisraelitanin ixtajunita pus ju Pitaluʼ jantu vana alactʼavailh ju jantu israelitanin ni va ixnajunch ni ca jantu kʼox catalhiula ju anuʼ istʼaʼisraelitanin ni na ixtalhilaksi ixlhamapʼaksin ju Moisés. 13 Ju yuchi lana jantu ixmalacasuputun tuchi vasalhch ixlacaʼich. Pus chunch vachuʼ talalh ju aliʼin istʼaʼisraelitanin amachakʼan anch ni talaktsʼilh ta yu ixlaich ju Pitaluʼ. Tus mas yuchi ju Bernabé vachuʼ chunch navilh ni laktsʼilh ju Pitaluʼ chai ju aliʼin ni chunchach ixtalai. 14 Para acsni iclaktsʼilh ni jantu sok ixtalai tachi ju najun laʼixchivinti Dios pus chani icjuni ju Pitaluʼ laʼixʼucxlacapuʼan ixtalhavat ju talhilacaʼanta Jesús: “Ju uxintʼi ji Pitaluʼ israelitaʼat chai lai xamacʼaʼun tachi ju aktsʼiya lhilanitauch chai laich navi tachi ju talai ju jantu israelitanin tajunita. Pus ni chunch ju lai pus tajuch ni va tapʼastu ju aʼuni ju yuʼunch ju jantu israelitanin ni catanavilh tachi ju lhilanitauch ju quijnanʼan ju israelitanin juntau.” 15 Ju quijnanʼan ji Pitaluʼ israelitanin juntau chai mispayau ixchivinti Dios ju tsʼokcanta. Jantu chun juntau tachi ju yuʼunch ju jantu israelitanin tajunita ju jantu tamispai ixchivinti Dios. 16 Para ju quijnanʼan cʼatsayau ni jantu xamatiʼ lai salaka calhimispacalh laʼixmacni Dios ni va canavilh tachi ju najun lacalhamapʼaksin ju tsʼoklh ju Moisés. Va acsnich ju salaka lai calhimispacalh laʼixmacni Dios tam xamatiʼ acsni lhilaksich ju Jesucristo. Pus ju quijnanʼan mas israelitanin juntau lhilaksitauch ju Jesucristo ni laich salaka calhimispacau laʼixmacni Dios va ixlacaʼatalh ni lhilaksitauch ju Cristo. Jantu ixlhiyuchi ni va navitauch tachi ju najun lacalhamapʼaksin. Pus jantu lai xamatiʼ calhimispacalh ni salaka laʼixmacni Dios va ixlacaʼatalh ni canavi cava tachi ju najun laʼixlhamapʼaksin Dios. 17 Pus ju quijnanʼan nonau ni salaka quintalhimispayan ju Dios acsni lhilaksiyau ju Jesucristo. Jantiyuʼ ni va lai canaviu tachi ju najun laʼixlhamapʼaksin. Para ju chunch jantu nomputun ni laich caʼalactuʼununau va ixlacaʼatalh ni jantu lhilaksiyau ju lhamapʼaksin ju tsʼoklh ju Moisés. Jantu tavanan lai actinaulh ju chunch. 18 Pus ni icʼalacjunita ju lapanacni ni jantu tasqʼuini ni catanavi tachi ju najun laʼixlhamapʼaksin Dios ni laich salaka calhimispacalh laʼixmacni Dios para ni astan aktam acʼajunchokopa ni tasqʼuini ni catanavi pus ju chunch talakʼalhin ni jantu slivasalh. 19 Pus ju quitʼin iccʼatsai ni jantu tavanan lai salaka aquilhimispa ju Dios va laʼixnavica ju ixlhamapʼaksin ni jantu lai icnavi. Pus yuchi jantu vana iclhilhilaksi ju lhamapʼaksin ju chavai. Alai ictsucui tachi ju najun ju Dios ju chavai. 20 Pus tachi ju va icnilh quilhilhcata ju Dios acsni tavanan xtuccalh ju Cristo ju lacacurus. Chai ixlhiyuchi jantu vana lai actinavi ju quinkʼachat quiʼakstu. Pus ju chavai mas ictʼajun para jantu va laquintachaput quiʼakstu ju icnavi ju kʼox. Alai laʼixtachaput ju Cristo ju tʼajun laquiʼalhunut. Chai ju quiʼatsucunti chunch junita ju chavai va ixlacaʼatalh ni iclhilaksich ju istsʼalh Dios. Yuchach ju quimapainita chai makʼaxtaklh isʼatsucunti ju va quimakʼalhtaxtucach. 21 Pus ju quitʼin jantu icmalacasuputun tachi ju va jantu tuʼuʼ aclhiula ju lamapainin ju quinavinita ju Dios. Para chunch acmalacasu ni acnaulh ni tasqʼuini ni acnavilh tachi ju najun lacalhamapʼaksin ni laich salaka aclhimispacalh laʼixmacni Dios. Pus ni chunch aclalh pus jantu lhitapalai ixva ju ixʼaninti ju Cristo. Chunch ju icjunilh ju Pitaluʼ.
1 Na kʼox tontojni untʼatʼit ji amachakʼan Galacia ni laich xalakʼaʼiyatʼit ni xataʼokxchokʼoyan ju aliʼin. Pus ju quitʼin lana vas iclajuntauch ni quinichilh ju Jesucristo ju milacataʼan. 2 Pus va yuchi ju ani ju iccʼatsaputun. Tʼas nonatʼit. Ja yuchi lhiʼamaklhtʼayanantʼatʼit ju Spiritu Santu ni xanaviyatʼit tachi ju najun lacalhamapʼaksin. U yuchi ni xalacʼaʼiyatʼit ju chivinti ixlacata ju Jesús. 3 Ja na va xcai lacʼaʼiyatʼit. Alaktsʼintʼit. Ju uxijnan tʼaiʼulatʼatʼit ju sastʼi miʼatsucuntiʼan laʼixtachaput ju Spiritu Santu. Pus ju chavai ja va nonatʼit ni palai atsʼucʼuyaʼitʼit tachi ju kʼachani ju Cristo ni anaviyaʼitʼit tachi ju najun lacalhamapʼaksin ju tsʼoklh ju Moisés. 4 Pus ja lana jantu xapʼuʼalacpʼastʼacnanatʼit ju tuchi xatapasai lamiʼatsucuntiʼan. Na kʼox cava ni vasalh xapʼuʼalacpʼastʼacnanatʼit. 5 Ju Dios taxtaknitan ju Spiritu Santu chai tanavinitan kʼai lhamakʼan ju lamiʼucxlacapuʼan. Para jantiyuʼ lhinavi ju va ixlacaʼatalh ni va naviyatʼit tachi ju najun lacalhamapʼaksin. Alai yuchi lhinavi chunch va ixlacaʼatalh ni lacʼaʼitʼit ju chivinti ixlacata ju Jesús. 6 Tachi ju lalh ju makʼaniya lapanac ju Abraham ixjuncan. Ju yuchi ni lacaʼinilh ixchivinti Dios pus ju Dios salaka lhilhca. 7 Pus apʼucʼatsʼatʼit ni vachuʼ caʼalaktsʼincanaʼ tachi ju vasalh ixʼapapanatnich ju Abraham tachi chun ju vachuʼ talacaʼi ju ixchivinti Dios. 8 Pus ju Dios makʼanch iscʼatsai ni calaktsʼinaʼ ni salaka laʼixmacni tachi chun ju catalhilacaʼanach ju Jesús mas uxijnan ju jantu israelitanin untʼatʼit. Yuchi lhijunilh ju ani chivinti ju Abraham ta yu cataputakʼalhtaxtuyach ju lapanacni. Ma chani junilh ju Dios: “Va ixlacaʼatalh ni xaqʼuinqʼuiclacʼaʼi ju quinchivinti pus laich capuʼalinaʼ ju kʼox isʼatsucuntiʼan tachi chun ju lapanacni”. Chunch ju junilh ju Dios ju Abraham. 9 Pus lana tasui ni yuʼunchach ju talhilacaʼanta ju Jesús ju axtaknican ju kʼox isʼatsucuntiʼan tachi ju amaklhtayanalh ju Abraham ni vachuʼ lhilacaʼalh ju Dios. 10 Para amucʼanicanta ixtalakʼalhinʼan tachi chun ju tanajun ni salaka calaktsʼincanaʼ ni canaviyaʼ tachi ju najun lacalhamapʼaksin. Chunch ju aʼulhtucanta ni chani najun ixchivinti Dios junta tsʼokcanta: “Amucʼanicanta ixtalakʼalhinʼan tachi chun ju jantu stunin tanavikʼojui tachi ju najun lacalhamapʼaksin”. Chunch ma naulh ju Dios. 11 Pus jantu xamatiʼ lai salaka catilaktsʼincalh laʼixmacni Dios va ixlacata ni canavi cava tachi ju najun lacalhamapʼaksin. Chai tasui ni stavasalanti ju iclajunau ni chani ju tsʼokcanta laʼixchivinti Dios: “Ju lapanac ju lhilaksich ju Dios salaka calaktsʼincanaʼ laʼixmacni chai caʼalinaʼ ju isʼatsucunti ju conkʼalhiyanta lactʼiyan”. Chunch ju najun laʼixchivinti Dios. 12 Pus ju ixlhamapʼaksin Moisés jantu najun ni salaka calaktsʼincanaʼ ju lhilacaʼanta ju Dios. Alai va najun ni caʼalinaʼ isʼatsucunti ju conkʼalhiyanta lactʼiyan ni canavikʼo chux tachi ju najun ju anch. 13 Para ju Cristo quintamalakxtutan junta jonkʼalhita makʼalhkʼajnat. Yuchi ju makʼalhkʼajnalh istatsʼinqʼuit ju quintalakʼalhinʼan ju ixmucʼanicantauch va ixlacata ni jantu lai ixmuctaxtuyau tachi ju najun lacalhamapʼaksin. Chai mavasalacanta ni chunch ju navicalh ni chanich ju najun laʼixchivinti Dios ju tsʼokcanta: “Ju Dios ma alaktsʼin tachi alactuʼunin tachi chun ju lapanacni ju axtucmucʼacan lacacurus”. Chunch najun laʼixchivinti Dios. 14 Pus ju Jesús lakʼaʼilh ni chunch ju caʼulhtucalh ni laich capʼuʼamaklhtʼayananaʼitʼit ju kʼox miʼatsucuntiʼan tachi chun ju uxijnan ju jantu israelitanin untʼatʼit. Yuchi ju kʼox atsucunti ju kʼalhtasunilh ju Abraham. Chai quinchuxʼan laich caʼamaklhtayananauch ju Spiritu Santu ju quintakʼalhtasunitan ju Dios ni lhilacaʼanauch ju Jesús. 15 Alaktsʼintʼit tachi ju layau mas va lapanacni juntau. Ju ixtʼiyunʼan lapanacni ni catalakʼoxiyaʼ tuʼuʼ chivinti lacapuʼucxtin chai cataʼulayach ju ixtapakaʼutʼan pus ju apumatam jantu lai catilakʼalhilh nin lai catilalhava. 16 Pus ju Dios akʼalhtasunilh ju Abraham chai pumatam ju makʼaniya ixpapanti ixjunita ni laʼixlacataʼan ju yuʼunch caʼalinaʼ ju kʼox isʼatsucuntiʼan ju lapanacni. Pus ju Dios jantu juni ni ma va ixlacataʼan ixchuxʼan ju ixʼapapanatnich laich kʼox cajunaʼ ju isʼatsucuntiʼan ju lapanacni. Alai ma va juni ni ixlacata va pumatam ju ixpapanti. Chai ju yuchi Cristo junita. 17 Pus tachi ju tuʼuʼ ixchivinti tam lapanac ni jantu lai catilakʼalhinicalh ni ulanicanta ju ixtapakaʼut pus vana va chunch laʼixmacni Dios. Ju yuchi kʼalhtasunilh ju Abraham ni laʼixlacata yuchi lhikʼach catatsucuyaʼ tachi chun ju lapanacni. Chai astan acsni ixtapasata lakatʼatʼi cientos a lakapʼuxamcau cʼata pus ju yuchi axtaknilh ju ixlapanacni ixlhamapʼaksin. Para ju anuʼ lhamapʼaksin jantu lai taʼaklhtamat catinavi ju anuʼ chivinti ju kʼalhtasunilh ju Dios ju Abraham. 18 Ni laich cava salaka acva laʼixmacni Dios ni acnavikʼo tachi ju najun lacalhamapʼaksin pus ju chunch va taʼaklhtamat lhimalacxtucan ju anuʼ chivinti ju kʼalhtasunilh ju Dios ju Abraham. Pus ju Dios kʼalhtasunilh ju Abraham ni salaka calaktsʼinaʼ ju yuchi mas jantu tuʼuʼ xanavi. 19 Pus ni chunch junita pus laich aquilalhisacmiyau tajuch ni va astaniya xaquintaxtakniyan ju lhamapʼaksin ju quijnan ju israelitanin icjuntau. Pus ju Dios xtaklh ju lhamapʼaksin ni laich catapucʼatsayaʼ ni na alactuʼunin tajunita. Para quintaxtaknitachan ju lhamapʼaksin tus acsni chilh ju makʼaniya ixpapanti Abraham ju Cristo juncan. Yuchi ju ixkʼalhtasunita ni laʼixlacata tachi chun ju lapanacni laich kʼox catatsuculh. Pus ju Dios amalakachachilh ju ixʼanquilhnin ju taxtaknilh ju Moisés ju anuʼ lhamapʼaksin. Chai ju Moisés axtaknilh ju lapanacni. 20 Acsni tavanan xtaklh ju lhamapʼaksin ju Dios pus yuchi ju Moisés ju axakʼalalh ju lapanacni laʼixlacata Dios. Para acsni tavanan kʼalhtasunilh ixchivinti ju Dios ju Abraham pus va isʼakstu ju Dios ju xakʼalalh ju Abraham. 21 Pus ju lhamapʼaksin tachi ju va tʼalaxcaji ju chivinti ju kʼalhtasunilh ju Dios ju Abraham. Para jantu tavanan lai actinaulh ju chunch. Ni ixʼalilh ju lhamapʼaksin ju laich caʼixpulhajau ju sastʼi quiʼatsucuntiʼan ni laich cava ixnaviu pus ca laich xaquintalaktsʼinan ju Dios ni salaka ixjuntau laʼixmacni ni ixnaviuch tachi ju najunch ju anch. 22 Para ni matiʼ tuʼuʼ lhamapʼaksin ju chunch pus yuchi lhinajun ju Dios ni si alactuʼunin juntau quinchuxʼan quijnanʼan. Chunch ju najun laʼixchivinti ju tsʼokcanta. Chai ju Dios chunch ju navilh ni laich caʼaxtakniyaʼ ju sastʼi isʼatsucuntiʼan tachi chun ju lapanacni va yuchi ni catalhilacaʼalh ju Jesucristo. Caʼaxtakniyaʼ tachi ju akʼalhtasunilh. 23 Pus acsni tucaʼ ixnoncan ni takʼalhtaxtucan acsni lhilacaʼancan ju Jesús pus ju lhamapʼaksin va tachi xaquintaʼulaniyan ju quintalakʼalhin quincʼan ju israelitanin icjuntau. Chunch xaquintaʼulhtuyan tus acsni tavanan quilachilh ju Cristo chai juncantauch ni lai takʼalhtaxtuyau ni lhilacaʼanauch ju yuchi. 24 Pus va ixlacaʼatalh ni jantu lai xamuctaxtuyau tachi ju tsʼokcanta lacalhamapʼaksin yuchi jantu lai xaquintalhilaktsʼinan ju Dios ni salaka juntau laʼixmacni. Chai yuchi xalhicʼatsayau ni na maktasqʼuiniyau ju Cristo. Chai ni lhilaksiyau ju yuchi pus ju Dios salaka quintalaktsʼinan. 25 Pus ju chavai ni quilachilh ju Cristo chai lai lhilacaʼancan ju yuchi pus jantu vana maktasqʼuinican ju anuʼ lhamapʼaksin ju xaquintamasuniyan ni na xamaktasqʼuiniyau ju yuchi. 26 Ju chavai quinchuxʼan isʼaskʼatʼan Dios juntau va ixlacaʼatalh ni lhilaksiyauch ju Cristo Jesús. 27 Pus tachi chun ju uxijnan ju lhiʼakpʼaxtʼatʼit va ixlacaʼatalh ni va lakatam ixtʼaʼumpʼutʼunatʼit ju Cristo pus isʼaskʼatʼan Dios untʼatʼit tachi ju Cristo ni istsʼalh Dios junita vachuʼ. 28 Laʼixmacni Dios vaklhtam chun juntau. Ju yuchi jantu navi cuenta u israelitanin juntau u jantu. U va xalapanacni juntau u yuchi ju matiʼ ixʼucxtin. Ju yuchi jantu navi cuenta u jokʼatni juntau u chakolun. Ju Dios vaklhtam chun quintalaktsʼinan ni lhilacaʼantauch ju Cristo. 29 Chai ju uxijnan ni ixʼanuʼ Cristo untʼatʼit pus ju Dios talaktsʼinan tachi ju vasalh ixʼapapanatnich Abraham untʼatʼit. Chai ixlhiyuchi amaklhtʼayananaʼitʼit tuchi kʼalhtasunita ju Dios ju Abraham.
1 Pus chanich iclajumputunau. Acsni va lacatʼicstʼicaʼ junita ju anuʼ tsʼalh ju caʼamaklhtayananaʼ ju ixmakʼalit ju lijunto ixpai pus laktsʼincantacaʼ tachi ju va xalapanac junita ni jantucaʼ lai lhinajun. Chunch ju laktsʼincantacaʼ mas yuchi ju amanavinch chux. 2 Alin ju talhistʼacʼa ju anuʼ tsʼalh. Chai alin ju talhistacni ju ixʼalinta tus acsni cachinach ju avilhchan ju lhcata ju lijunto ixpai. 3 Chai vana va chun ju quijnan ju israelitanin icjuntau. Acsni tucaʼ ixmin ju Cristo pus chunch ixjuntau tachi ju anuʼ tsʼalh. Va ixnaviyau tachi ju xaquintamalanitan ju makʼaniya quilacpai quincʼan. 4 Para acsni chaʼalh ju avilhchan ju ilhcata ju Dios pus malakachachilh ju istsʼalh. Chai ju yuchi pumaktasu pumatam chakoʼulh. Chai ni israelita ixjunita vachuʼ pus ixnavi tachi ju najun lacalhamapʼaksin. 5 Chai chunch ju tsuculh ju yuchi ni lai aquintamakʼalhtaxtun ju quijnan ju xaclhilaksiyauch ju lhamapʼaksin. Chai ju yuchi lakʼoxilh ta yu laich cajumvi isʼaskʼatʼan Dios vachuʼ tachi chun ju quijnan ju israelitanin icjuntau. 6 Chai ni isʼaskʼatʼanch Dios juntau pus yuchi quintalhimalakachanichinch ju iSpiritu Santu ju istsʼalh laquiʼalhunutʼan. Chai ni tʼajun ju yuchi laquiʼalhunutʼan pus yuchi lai quimpai lhixakʼalayau ju Dios. 7 Pus ju chavai jantuch quintalaktsʼinan tachi ju va tam xalapanac. Alai quintalhimispayan ni isʼaskʼatʼan juntau. Chai ni isʼaskʼatʼan juntau pus amaklhtayanantauch tuchi quintakʼalhtasunitan tachi chun ju quijnanʼan ju lhilacaʼantauch ju Cristo. 8 Ju makʼanch acsni jantucaʼ ismispʼayatʼit ju Dios va kʼaya ixlhilacʼapʼinatʼit ju tuʼuʼ ju jantu vasalh diosnin tajunita. 9 Para ju chavai mispʼayatʼitch ju tucan Dios. U ca palai kʼox ni aclajunau ni tamispayan ju Dios. Chai ni tamispayan ju Dios tas tucan untʼatʼit ni laich lhilacʼapʼinchʼokʼopʼutʼunatʼit ju anuʼ lhamapʼaksin ju matich ixtachaput ni laich catamakʼalhtaxtun. Yuchi ju va jantu lai taʼaktaijuyan. Aktam va lacʼasqʼuinatʼit ni yuchi ju catajunan tuchi laich anaviyaʼitʼit. 10 Ju uxijnan vanach tʼalhoniyatʼit ju aliʼ cʼatan chai ju aliʼ avilhchan chai ju aliʼ malhquiyuʼ chai ju aliʼ cʼata tachi ju najun laʼixlhamapʼaksin ju Moisés. Chunchach ju layatʼit ni nonatʼit ni na kʼoxich lhiulai ju Dios ju chunch. 11 Pus ju quitʼin icnajun ni ca jantu tuʼuʼ ixtapalhni cajunaʼ ju milacataʼan ju tuchi xcayama iclamalacaʼiniu ixlacata ju Cristo ni vanach atʼalhoniyaʼitʼit ju makʼaniya lhamapʼaksin. 12 Quiʼalakʼavin ju chavai chunch iclai tachi ju uxijnan ixlayatʼit ju pʼulhnan. Jantu iclhilaksi ju ixlhamapʼaksin ju Moisés. Pus na iclatapaininiyau ni chunch ju alachʼokʼotʼit. Jantuch alhilaksitʼit ju anuʼ lhamapʼaksin. Pus acsni xaclatʼavilhchau pʼulhnan jantu tuʼuʼ macxcai xaquilanaviyau. 13 Pus ju uxijnan cʼatsʼayatʼit ni na xactakʼankʼai acsni pʼulhnan icchaʼalh lamilakʼachakʼanʼan. Chai yuchi iclhitolhcha ju anch chai yuchi lai xaclalhijunau ixchivinti Dios. 14 Chai jantu quilalhilacmackʼau nin yuchi ni aquilalhitsʼisiu ju quintakʼankʼat ju xacpacxanta ju acsnich. Alai quilaʼamaklhtayanau tachi ju va jun ixʼanquilh Dios xacjunita. Chai tachi ju va jun isʼakstu ju Jesucristo. 15 Para ju chavai tijuch ju xatʼapʼasayatʼit ni jantuch vanach kʼox quilalaktsʼinau. Ju pʼulhnan xaccʼatsai ni na xaquilamapainiyau. Yuchi iclhicʼatsalh ni na xaquilamapainiyau ni va laich ixmaxtʼutʼit ju milakchulhʼan chai xaquilaxtakniputunauch ni na xaclacpuxcaich. 16 Pus ju chavai ja va mintʼalaxcaiʼan xacjun ni xaclajunauch ju stavasalanti. 17 Pus ju anuʼ israelitanin va talhacchaʼaniyan. Para jantu kʼox tachi ju tapastʼacʼa ju yuʼunch. Pus ju yuʼunch va talacasqʼuin ni aquilamacoyajuch. Chai achʼakʼokʼatʼit ju yuʼunch. 18 Aktsʼiya kʼox ni talakxcavatayan ixlacata ju kʼox mas va tavananch cava. Para jantu kʼox ni va acsnich ju talakxcavatayan acsni iclatʼavilau. 19 Quiʼaskʼatʼan aktam ictʼompalai makʼalhkʼajnaʼ ju milacataʼan ju uxijnan tus acsni catasuyaʼ lamiʼatsucuntiʼan ni ixlhichux miʼalhunutʼan ju alhilacʼapʼinaʼitʼit ju Cristo. 20 Va laich aclatʼatolhchau ju chavai. Chai acpuxcaulh ta yu laich aclalhixakʼalau ju laich apʼumachʼakxatʼit. Pus jantu icmachakxai tuchʼi ju pʼastʼacʼatʼit. 21 Aquilajuniuch ju uxijnan ju na lhilaksipʼutʼunatʼit ju ixlhamapʼaksin ju Moisés. Ja va jantu kʼasmatʼatʼit tachi ju najun ju anuʼ lhamapʼaksin. 22 Pus chanich ju xatsʼokʼulai ju Moisés. Ju Abraham ma ixʼalin pumatʼui istsʼalan. Ju ixnati ju kʼantam istsʼalh ma va isquitiʼ ixjunita chai ju Abraham va ixtamajuta ju yuchi. Para ju ixnati ju pumatam istsʼalh ma ixʼamachakaʼ Abraham ixjunita. Chai ju yuchi jantu va ixtamajuta. 23 Pus ju istsʼalh ju ismaksquitiʼ ixjunita ma chunch ju putasu tachi ju putasucan ju va lhilapanac. Para ju isʼaskʼatʼa ju ixʼamachakaʼ Abraham ma tasu acsni va uctaxtulh ixchivinti ju ixkʼalhtasunita ju Dios ju Abraham. 24 Pus ju ani chivinti ju xatsʼokʼulai ju Moisés quintamasuniputunan ju tuʼuʼ. Chanich ju nomputun. Pus ixtʼiyunʼan chakolun chunch tajunita tachi ju lakatʼui chivinti ju alactʼatakʼoxilh ju Dios ju makʼaniya lapanacni. Ju lakatam xtakcancha xalactalhpa Sinaí acsni axtaknilh ju lapanacni ju ixlhamapʼaksin. Chai ju yuchi chunch junita tachi ju Agar ni xajonkʼalhi va xalapanac. Chai ju yuʼunch ju talhilaksich ju anuʼ lhamapʼaksin vachuʼ tachi xalapanacni tajunita ni tanavi tachi ju najun ju anch para jantu tavanan lai cataputakʼalhtaxtuyaʼ. 25 Pus ju Agar chunch junita tachi ju anuʼ xalactalhpa Sinaí laxalacatʼun Arabia tachi ju iclajuntau. Chai ju anuʼ xalactalhpa chunch junita tachi ju israelitanin ju talakʼayai ju Dios ju lakʼachakʼan Jerusalén ju chavai. Pus ju yuʼunch vachuʼ tachi xalapanacni tajunita ni tanavi tachi ju najun lacalhamapʼaksin para jantu tavanan lai cataputakʼalhtaxtuyaʼ. 26 Chai ju ixlhilakatʼui chivinti ju alactʼatakʼoxilh ju Dios ju makʼaniya lapanacni yuchi ju tʼatakʼoxilh ju Abraham. Pus ju yuchi chunch junita tachi ju Sara ju jantu xalapanac ixjunita. Jantu va ixtamajuta ju Abraham. Chai ju yuchi chunch junita tachi ju quijnanʼan ju calakʼayatachau ju Dios laxalakʼachakʼan Jerusalén ju vilhcha lactʼiyan ni makʼalhtaxtucantauch. 27 Pus chani ju tsʼokcanta laʼixchivinti Dios: Akʼachʼach ju uxintʼi ju va miʼakstu. Ju jantu amaskʼatʼanan. Pʼas atʼas laminkʼachat ju uxintʼi ju jantu amaklakʼavanan. Pus palai lhu ju isʼaskʼatʼan ju va macoʼulacanta. Palai jantu ju alin ixpapa. Chunch ju tsʼokcanta laʼixchivinti Dios. 28 Pus ji quiʼalakʼavin ju Dios muctaxtulh ixchivinti acsni tavanan tsuculh ju isʼaskʼatʼa ju Sara mas jantu lai ixʼalin ju isʼaskʼatʼa. Chai vana va chun aquintamuctaxtuniyan ixchivinti ni najunta ni isʼaskʼatʼan aquintanaviyan. 29 Pus acsni tatsuculh ixtʼiyunʼan istsʼalan ju Abraham pus pumatam ixmaktasutach tachi ju maktasucan ju va lhilapanac. Chai ju yuchi acsni kʼaich tsʼalh va pus lhimakchapulh ju anuch ju puʼamaklakʼavanalh tachi ju kʼalhtasunilh ju Dios ju Abraham. Pus vana va chun ju chavai. Alin lapanacni ju talhilaksi ju lhamapʼaksin chai ju yuʼunch quintatʼalaxcayan ju quijnanʼan ju lhilaksiyau ixchivinti Dios junta najun ni va laʼixmacni Cristo isʼaskʼatʼan Dios juntau. 30 Para ju uxijnan ja va jantu pʼastʼacʼatʼit tachi ju najun laʼixchivinti Dios ju tsʼokcanta. Ja va jantu pʼastʼacʼatʼit ni chani najun: “Atʼixcʼauxtʼuch ju xalapanac ju va ixtamocanta. Atʼaxcʼauxtʼuch ju istsʼalh. Ju istsʼalh ju va xalapanac jantu lai tuʼuʼ catixtaknicalh. Para ju istsʼalh ju tucan miʼamachakaʼ ju jantu va ixtʼamaʼutʼa yuchach ju laich caxtaknicanaʼ ju miʼalinta”. Chunch ju najun laʼixchivinti Dios. 31 Pus ji quiʼalakʼavin ju ani chivinti ixlacata ju istsʼalan Abraham chanich ju quintamamachakxaniputunan. Pus ju quijnanʼan jantu chun juntau tachi ju istsʼalh ju va xalapanac ixjunita ni laich canaju ni tasqʼuini ni canaviu tachi ju quintajunan ju makʼaniya lhamapʼaksin. Alai chunch juntau tachi istsʼalh ju tucan ixʼamachakach Abraham ixjunita. Chai lhilaksiyau ixchivinti Dios junta najun ni laʼixmacni Cristo isʼaskʼatʼan Dios juntau.
1 Ju Cristo yuchi lhiquinichilh ni jantu tasqʼuini ni vana canaviu tachi ju najun laʼixlhamapʼaksin ju Moisés. Pus pʼas alhilaksitʼit isʼakstu ju Cristo. Jantu alakʼaʼitʼit ni xamatiʼ catamalacaʼiniyan ni tasqʼuini ni anaviyaʼitʼit tachi ju najun lacalhamapʼaksin. 2 Ju quitʼin icPablo chai aquilakʼasmatniu tuchi iclajunau. Acsni va alakʼaʼiyaʼitʼit ni achʼucʼucʼanaʼitʼit tachi ju najun lacalhamapʼaksin pus jantu lhitapalai ni xani ju Cristo ju milacataʼan. 3 Pus aktam iclajunchokopalau. Tachi chun ju lapanacni ju talakʼaʼi ni caʼachʼucʼucalh pus tasqʼuini ni stunin catanavikʼo tachi chun ju najun lacalhamapʼaksin ju tsʼoklh ju Moisés. Jantu va yuchi ni caʼachʼucʼucalh. 4 Pus ju uxijnan ni va lacʼasqʼuinatʼit ni salaka catalaktsʼinan ju Dios va ixlacaʼatalh ni naviyatʼit tachi ju najun lacalhamapʼaksin pus ju chunch ju Cristo jantu lai tuʼuʼ catitalhaʼaktaijun. Nin yuchi ju Dios jantu lai catitanavinin lamapainin. 5 Pus ju quijnan ni iclhilacaʼanau ju Cristo pus iccʼatsayau ni yuchi ju Spiritu Santu ju aquintalasoknicʼayan laʼixmacni Dios. 6 Pus ni lhilacaʼantauch ju Cristo Jesús pus jantuch lhitapalai ni acchʼucʼucalh u jantu. Va yuchi ju lhitapalai ni aclhilacaʼalh ju Jesucristo chai caputasulh laquiʼatsucunti ni vasalh iclhilacaʼanta ju yuchi ni na icʼamapaininin. Va yuchi ju lhitapalai laʼixmacni Dios. 7 Pus ju uxijnan kʼox ixtʼonatʼit. Para va alin ju lapanacni ju xataʼokxchokʼoyan ni jantuch vana lacʼaʼipʼutʼunatʼit ju stavasalanti ixlacata ju Cristo. 8 Ju anuʼ chivinti ju tapuʼokxchokʼoputunan jantu ixʼanuʼ ju Dios ju tasacxtutan. 9 Tun tʼicʼaptʼit ju ani chivinti ju chani noncan: “Ma mas va lacatsʼunin aclakmuju ju saskʼajni pus laktanukʼojui chux ju sasquitit”. 10 Para ju quitʼin iclhilaksi ju quiʼucxtinʼan Jesús ni yuchi ju cataʼaktaijuyan ni jantu tavanan amapʼaxaniyaʼitʼit ju miʼatalacpastʼacʼatʼan. Para ju anuʼ ju talakʼalhiniputunan ju miʼatalacpastʼacʼatʼan camamakʼalhkʼajnicanaʼ mas va tichi chavaich cava. 11 Pus ju quitʼin ji quiʼalakʼavin ni vanach acnaulh ni tasqʼuini ni cachʼucʼucalh tam xamatiʼ pus jantuch aquintalhimakchapulh ju quintʼaʼisraelitanin. Jantu tuʼuʼ cataxcanilh ju quintʼaʼisraelitanin ni acnaulh ju chunch mas vachuʼ acʼajunilh ju lapanacni ni tasqʼuini ni catalhilaksilh ju Cristo ni yuchi ju nilh ixlacataʼan. 12 Ca vak tachi kʼox cava ni lana catalakʼalhinikʼo ju ixlacatunaʼan ju anuʼ lapanacni ju talakʼalhiniputunan ju miʼatalacpastʼacʼatʼan ni tajunan ni tasqʼuini ni achʼucʼucʼanatʼit. 13 Pus ju uxijnan ji quiʼalakʼavin ju Dios talhisacxtutan ni isʼaskʼatʼan aʼunaʼitʼit. Jantu vana tasqʼuini ni anaviyaʼitʼit tachi ju najun lacalhamapʼaksin. Para ju chunch jantu va nomputun ni laich anavitʼit ju macxcai miʼatalacpastʼacʼatʼan va ixlacaʼatalh ni jantu lhilaksiyatʼit ju lhamapʼaksin. Alai tasqʼuini ni lacaʼamapaininti alaʼaktʼaiʼutʼit ju milhiʼuxijnan. 14 Pus laich apʼumuctʼaxtʼuyaʼitʼit tachi chun ju najun lacalhamapʼaksin va yuchi ni anaviyaʼitʼit va lakatam chivinti ju tsʼokcanta ju anch. Yuchi ni amapʼainitʼit ju mintʼalapanac tachi ju va jun miʼakstuchʼan ju mapʼainichʼokʼocʼantʼit. 15 Para acsni laclakʼayatʼit chai va laclasayatʼit ju pumatamin pus alaktsʼintʼitch. Jantu xcai ni va alamacoyokʼotʼit ju pumatamin milhiʼuxijnan. 16 Pus iclajunau ni chunch ju atsʼucʼutʼit tachi ju tamapastʼacʼaniyan ju Spiritu Santu chai ju chunch jantu anaviyaʼitʼit ju macxcai ju alin lamiʼalhunutʼan. 17 Pus ju macxcai ju alin laquiʼalhunutʼan va tʼalasai ju ixkʼachat ju Spiritu Santu. Chai ju ixkʼachat ju Spiritu Santu va tʼalasai ju macxcai ju alin laquiʼalhunutʼan. Chai ni va talaclasai pus yuchi jantu lai lhinaviyatʼit ju kʼox ju navipʼutʼunatʼit. 18 Para ni anaviyaʼitʼit tuchi lacasqʼuin ju Spiritu Santu pus jantuch vana tasqʼuini ni alhilaksitʼit ju lhamapʼaksin ju tsʼoklh ju Moisés. 19 Pus lana tasui tamalh ju macxcai ju alin laquiʼalhunutʼan. Yuchach acsni xamatiʼ jantu lhilacaʼan tam ixʼamachakaʼ u ni jantu lhilacaʼan tam ixpapa. Chai lhu alactuʼunti ju ixtʼachun ju tanavi. 20 U va talhilacaʼan ju tuʼuʼ santo. U ni alhicujnun. U taʼaxcayanan. U talaclakʼaji. U taʼalhacchaʼanan. U talhilakachapui tuʼuʼ. U va ixkʼachat isʼakstuʼan ju tanavi. U na taʼamaktalhkʼamanan ni va talhacchaʼan. 21 U talhacchaʼani ixtaxtokni ju akʼantam. U amakninin. U tatʼakʼapʼai. U aliʼ macxcai ju va ixtʼachunch tachi ju ani. Pus aktam iclajunchokopalau tachi ju xaclajunauch pʼulhnan. Ju yuʼunch ju tanavi ju chunch taxtokni jantu lai catitaʼalh ju lactʼiyan junta lhinajun ju Dios. 22 Para vachuʼ tasui ni tʼajun ju Spiritu Santu laquiʼalhunutʼan acsni amapainininau. Chai acsni kʼachanau. Chai acsni jantu lacʼan ju quiʼalhunutʼan. Chai acsni chʼixkʼoyau ju macxcai. Chai acsni va tachi kʼox lapanacni talacasuyau. Chai acsni naviyau lamapainin. Chai acsni muctaxtuyau ju quinchivintiʼan. 23 Chai acsni palai talacatʼicstʼiyau. Chai acsni lai kʼaichokocanau quiʼakstuʼan. Pus acsni naviyau tachi chun ju ani taxtokni pus matiʼ ju lhamapʼaksin ju lai aquintaʼulanin ju quintalakʼalhinʼan va ixlacaʼatalh ni naviyau ju chunch. 24 Pus ju quijnanʼan ju lhilaksiyauch ju Cristo jantuch vana naviyau ju macxcai quiʼatalacpastʼacʼatʼan. Alai laktsʼinau ju makʼaniya quiʼatsucuntiʼan tachi ju va nita ni nita ju Jesús quiʼokxtapalhʼan. Chai ju chavai jantu tasqʼuini ni vana canaviyau ju ixkʼachaniyau ju pʼulhnan. 25 Chai ni quintaxtaknitan ju sastʼi quiʼatsucuntiʼan ju Spiritu Santu pus tasqʼuini ni yuchach ju calhinonkʼo chux laquiʼatsucuntiʼan. 26 Chai jantu va kʼaya calhitakʼayau tuʼuʼ. Acsni xamatiʼ chunch lai pus ju aliʼin va talhitalhkʼaman ni va si xakʼai tajumputun.
1 Ji quiʼalakʼavin ni cʼatsacan ni vasalh caʼalactuʼunulh pumatam ju vachuʼ lhilacaʼanta ju Cristo pus ju uxijnan ju lhinonkʼojui ju Spiritu Santu lamiʼalhunutʼan asayaʼutʼit tachi ju lhikʼox lapanac canavi ni jantu caxcanilh ixʼalhunut laminchivintiʼan. Para vachuʼ alhistʼacchʼokʼocʼantʼit miʼakstuʼan. Jantu xcai ni vachuʼ anaviyaʼitʼit ju tuʼuʼ macxcai. 2 Alaʼaktʼaiʼutʼit ni alin ixlhamakʼan tam xamatiʼ. Chai ni chunch ju alatʼit pus amuctʼaxtʼuyaʼitʼit tachi ju najun laʼixlhamapʼaksin ju Cristo. 3 Pus ni alin tam xamatiʼ ju na kʼai cʼatsai mas jantu tuʼuʼ ixtapalhni pus va isʼakstu okxchokʼochokocan. 4 Pus ju pumatamin tasqʼuini ni calaktsʼintanucalh laʼisʼakstu tuchi laich navi. Jantu va calaktsʼintailh laʼisʼatsucunti akʼantam. Ju chunch alinch ju ixkʼachat ixlacata tuchi navich isʼakstu. Chai jantu va ixlacata ni palaich kʼox calhiulachokocalh isʼakstu. Palaich jantu ju tam ixtʼalapanac. 5 Pus tasqʼuini ni pumatamin canaviyaʼ ixlhichʼalhcat isʼakstu. 6 Ju amalanicanta ju ixchivinti Dios chach taʼaktaiju ju amamakaʼunuʼ. Chach aktaijucalh ju amamakaʼunuʼ. Chach taxtaknilh tachi chun ju kʼox. 7 Jantu aʼokxchʼokʼocʼantʼit. Jantu xamatiʼ lai catilhitsʼiʼilh ju Dios. Tachi ju tuʼuʼ tʼin ju acchʼanaʼ pus yuchach ju acxkʼaʼiyaʼ. 8 Pus chunchach vachuʼ ju laquiʼatsucuntiʼan. Ju va tachi navitʼajun ju macxcai ju mapastʼacʼani ixʼalhunut pus yuchach ju capuʼamaklhtayananaʼ ju ixʼaninti junta jonkʼalhita makʼalhkʼajnat. Para va tichi chavaich ju navitʼajun ju kʼachani ju Spiritu Santu pus isʼakstu ju Spiritu Santu ju caxtakniyaʼ ju isʼatsucunti ju conkʼalhiyanta lactʼiyan. 9 Pus jantu jeks caʼuniu ixnavica ju kʼox. Pus ni catailhiʼanau ixnavica ju kʼox pus cachinaʼ ju avilhchan ju lhcata ju Dios acsni aquintaxtakniyan ju quintalhajaʼan. 10 Pus yuchi caʼalhinaviniuch ju kʼox tachi chun ju lapanacni va tapakchux ju lai canaviu. Para palai na lhu ju kʼox canaviniuch ju quilhiʼalakʼavinʼan laʼixmacni Jesús. 11 Tus ani akʼantam xaquiʼatsʼoknuni. Para ju chavai quitʼin ju aclaʼatsʼoknuniyau laquimacaʼ. Chai alaktsʼintʼit ni slivasalh na lackʼai ju quiletra. Pus yuchi alhicʼatsʼayaʼitʼit ni vasalh quitʼin ju iclaʼatsʼoknuniyau. 12 Ju yuʼunch ju va tapʼastu tajunan ni achʼucʼucʼantʼit va tapujunan chunch ni kʼox catalhiula ju ixtʼalapanacni chai jantu caʼamamakʼalhkʼajnicanaʼ. Vachuʼ jantu talhimakʼalhkʼajnamputun ni catanaulh ni tasqʼuini ni calhilacaʼancalh ju Cristo ni yuchi ju nilh lacacurus ju quilacataʼan. 13 Para nin yuʼunch ju chunch tajunan jantu tamuctaxtukʼojui chux tachi ju najun lacalhamapʼaksin mas achʼucʼucanta ju yuʼunch. Alai va talacasqʼuin ni achʼucʼucʼantʼit vachuʼ ju uxijnan chai ju chunch laich catalhitakʼayayaʼ ni navitʼatʼit tachi ju xatajunan. 14 Pus ju quitʼin lana jantu tuʼuʼ iclhitakʼayaputun. Va yuchi ju tuʼuʼ iclhiulai ni quinichilh ju quiʼucxtinʼan Cristo ju quilacataʼan. Chai ni iclhilaksich ju Cristo ni nilh ju lacacurus ju quilacata pus jantu tuʼuʼ iclhiulai ju taxtokni ju ani lacamunutpaʼ ju talhitakʼayai ju quintʼalapanacni. Pus ju yuchi jantu lai aquixtakniyaʼ tuʼuʼ kʼox. 15 Pus ni lhilacaʼantauch ju Cristo pus jantu tuʼuʼ quintalhiʼaktaijuyan mas ixchʼucʼucau u jantu. Va yuchi ju lhitapalai ni quixtaknita ju sastʼi quiʼatsucunti ju Jesús. 16 Ictapainini ju Dios ni cataʼaktaijuyan lacaʼamapaininti chai ni jantu calacʼalh ju miʼalhunutʼan tachi chun ju uxijnan ju chunch tsʼucʼuyatʼit tachi ju iclajuntauch ju ani. Vachuʼ chunch ictapaini ixlacata ju aliʼin ju vasalh isʼaskʼatʼan Dios tajunita. 17 Pus ju atipuʼanta jantu iclacasqʼuin ni xamatiʼ casamakʼalh ju quinchivinti. Pus laquilacatuna tasuicaʼ junta xaquintalakanekmai ju aliʼin lapanacni va ixlacata ni icʼajuni ju lapanacni ixchivinti Jesús. 18 Ji quiʼalakʼavin ictapainini ju quiʼucxtinʼan Jesucristo ni catanaviniyan lamapainin minchuxʼan ju uxijnan. Slivasalh chunch ju iclacasqʼuin.
1 Ju quitʼin icPablo chai Dios ju lacasqʼuilh ni ixtamalakachan acva. Iclamacʼamiyau ju uxijnan ju isʼaskʼatʼan Dios untʼatʼit ju vilhchitʼit ju lakʼachakʼan Efeso. Ju uxijnan vachuʼ lhilacʼapʼintʼatʼit ju Cristo. 2 Ictapainini ju quimpaiʼan Dios chai ju quiʼucxtinʼan Jesucristo ni catanaviniyan lamapainin chai cataʼaktaijuyan ni jantu calacʼalh ju miʼalhunutʼan. 3 Chach lakʼayacalh ju Dios ixpai ju quiʼucxtinʼan Jesucristo. Ju yuchi quintaxtaknitan tachi chun ju kʼox va ixlacaʼatalh ni lhilacaʼanauch ju Cristo. Chai ju tuchi quintaxtaknitan ju yuchi pus lactʼiyan ju xaminacha. 4 Pus quintanavitan chunch va ixlacaʼatalh ni Dios ju quintasacxtun makʼanch acsni tucaʼ ixnavican ju lacamunutpaʼ ni va lakatam catʼajumvi ju Cristo. Pus ju yuchi va islacasqʼuin ni laich ixʼanuʼ cajumvi chai laich aquintalaktsʼinan tachi ju va matich ju quiʼalactuʼuntiʼan chai yuchi quintalhisacxtun. 5 Tus makʼanchich ixnajunta ju Dios laʼixʼamapaininti ni aquintanaviyan isʼaskʼatʼan va ixlacata ju Jesucristo. Chai va ixlacata ni chunch ju xakʼachani pus chunch ju lalh. 6 Pus ni laich calakʼayacalh ixlacata ju kʼai ixʼamapaininti ju quintanavinitan yuchi xaquintalhinaviyan isʼaskʼatʼan. Lana lhu quintanavinitan ju lamapainin acsni quintanavin isʼaskʼatʼan va ixlacata ni lhilacaʼantauch ju istsʼalh ju na mapaini. 7 Yuchach ju quintamalakxtun laʼixʼacʼalhni. Chai ni slivasalh na kʼai ju ixʼamapaininti ju quintamasunitan pus quintamacʼacxaninch ju quiʼalactuʼuntiʼan. 8 Chai ju anuʼ kʼai ixʼamapaininti ju quintamasunitan jantu va yuchi ni quintamakʼalhtaxtun. Para vachuʼ lhu xaquintaxtakniyan ju atalaninti chai acʼatsanti. 9 Chai vachuʼ quintamavasalanin ju ixkʼachat ju jantu ixʼamavasalanicanta ju lapanacni ju makʼanchich. Quintamavasalanin tuchi ilhcata ni canaviyaʼ ju Cristo. 10 Pus tus makʼanchich ixnajunta ni caʼulacanach ju Cristo ixpuxaʼucxtin tachi chun ju xataxtokni ju alin lactʼiyan chai ju alinch ju lacatʼun. Chai chux ju ani caʼuctaxtuyaʼ acsni cataʼaktsayaʼ ju avilhchan tachi ju ilhcata ju Dios. 11 Chai va ixlacata ni lhilacaʼantau ju Cristo pus ju Dios aquintaxtakniyan ju ixmakʼalit. Na makʼanch chunch ispastacta ju Dios ju quilacataʼan chai ju yuchi aktsʼiya navikʼojui chux tachi ju kʼachani. 12 Ju Dios yuchi quintalhisacxtutan makʼanch ni laich aclakʼayayau ni yuchi ju tucan xakʼai. Aclakʼayayau ju quijnan ju pʼulhnan iclhilacaʼantauch ju Cristo. 13 Chai vachuʼ ju uxijnan lacʼaʼitʼatʼit acsni kʼasmatʼatʼit ju chivinti ju stavasalanti junta najun ta yu laich putakʼalhtaxtucan junta jonkʼalhita makʼalhkʼajnat. Chai acsni lacʼaʼitʼatʼit pus ju Dios taxtaknin ju anuʼ ju apʼucʼatsʼayaʼitʼit ni vasalh ixʼanuʼ untʼatʼit. Yuchi ju Spiritu Santu ju ixkʼalhtasuta ju Dios. 14 Xtaknicantauch ju Spiritu Santu ju chavai ni laich cacʼatsayau ni vasalh aquintaxtakniyan tachi chun ju kʼalhtasuta ju Dios. Chai acsnich ju aquintaxtakniyan acsni matich lana cajunaʼ ju quiʼalactuʼuntiʼan ni alin ju sastʼi quilacatunaʼan. Chai ju chunch palai calakʼayayau ju Dios ju tucan xakʼai. 15 Pus ju quitʼin ickʼasmatlh ni ixlhichux ju miʼalhunutʼan ju lhilacʼapʼintʼatʼit ju quiʼucxtinʼan Jesús chai na amapʼainiyatʼit tachi chun ju vachuʼ talhilacaʼanta ju yuchi. 16 Pus yuchi va tachi iclhijunich ju Dios lakʼailaktsʼiuch ju milacataʼan chai icsqʼuini ju Dios ju milacataʼan acsni ictʼachivinin ju yuchi. 17 Ictapainini ju Dios ixpai ju quiʼucxtinʼan Jesucristo. Yuchi ju xakʼai tucan. Icsqʼuini ni cataxtakniyan ju kʼox mintacʼatsanʼan ni laich amachʼakxayaʼitʼit ixtaxtokni Dios. Chai ju chunch palai lai amispʼayaʼitʼit ju yuchi ta tucan junita. 18 Icsqʼuini ni catamalacpucujunin ju mintacʼatsanʼan ni laich amachʼakxayaʼitʼit tuchi ixtalakxtuch ju lacʼaʼiyatʼit ni cataxtakniyan ju Dios ju lactʼiyan chai tuchi lhilhcʼacʼantʼatʼit. Vachuʼ icsqʼuini ju Dios ni laich amachʼakxayaʼitʼit ni slivasalh na kʼox ju anuʼ ju caʼaxtaknicanaʼ tachi chun ju isʼaskʼatʼan tajunita. 19 Chai icsqʼuini ni laich acʼatsʼayaʼitʼit ni slivasalh na kʼai ju ixtachaput ju quilacataʼan ju lhilacaʼantauch ju yuchi. Chai ju ixtachaput ju na kʼai ju quilacataʼan vana va yuʼ ju malacasulh ju Dios acsni malokʼonichokolh ju Cristo acsni ixnitach chai acsni ulacha lactʼiyan vanin junta vi ju yuchi. 21 Anch ulacalh ju Cristo ni palai xakʼai navicanta ju yuchi. Palai jantu tachi chun ju xaʼanquilhnin lactʼiyan ju talhinajun. Jantu xamatiʼ ju tʼajun ju chavai ju ixtʼachunch cava nin lai caʼalilh astan xamatiʼ ju ixtʼachunch cajunaʼ. 22 Chai ju Dios yuchi lhiʼula ni yuchi ju calhinonkʼoyach tachi chun ju taxtokni. Chai lhilhcaʼula ju yuchi tachi saʼaktsulh tachi chun ju talhilacaʼanta ju Cristo. 23 Pus tachi chun ju talhilacaʼanta ju Cristo tachi ixlacatuna tajunita ni yuchi ju alhijuni chai laʼixmacni yuchi va lakatam tatʼajunita. Chai ju Cristo vi mas vanta anchach cava.
1 Acsni ixmucʼanicʼantʼatʼit ju miʼanintiʼan ixlacata ju miʼalactuʼuntiʼan chai mintalakʼalhinʼan acsnich ju taxtaknitan ju Dios ju sastʼi miʼatsucuntiʼan. 2 Acsni tucaʼ ismispʼayatʼit ju Cristo pus vachuʼ chunch ixlayatʼit tachi ju talai ju jantucaʼ talhilacaʼanta ju yuchi. Ixnaviniyatʼit ixkʼachat ju xaʼucxtin lhacaticurulhni. Chai yuchach ju vachuʼ chʼalhcatnan laʼixʼalhunutʼan ju jantu taquiclacaʼiputun ju Dios. 3 Pus ju makʼanchich vachuʼ chunch ixlayau ju quijnanʼan. Ixnaviyauch tachi chun ju macxcai ju ixkʼachaniyau. Chai ixnaviyau ju macxcai ixkʼachat ju quilacatunaʼan chai ju quiʼatalacpastʼacʼatʼan. Pus tus acsni istsucutachauch ixlhijunch ni calhitalhkʼamalh ju Dios tachi ju ixlayauch. Chai si lana chun ixjunkʼotauch. 4 Para ju Dios slivasalh na lai aʼaktaijunun lacaʼamapaininti chai slivasalh na quintamapainin. 5 Pus mas ixmucʼanicantauch ju quiʼanintiʼan va ixlacata ju quiʼalactuʼuntiʼan para ju Dios quintaxtaknitan ju sastʼi quiʼatsucuntiʼan ni lhilacaʼantauch ju Cristo. Pus va yuchi ni quintanavinitan lamapainin ju Dios yuchi lai xalhitakʼalhtaxtuyau junta jonkʼalhita makʼalhkʼajnat. 6 Tachi ju Cristo ni xtaknichokocalh isʼatsucunti acsni ixnita pus vana va chun ju quijnanʼan. Quintaxtaknitan ju sastʼi quiʼatsucuntiʼan chai ju chavai ju Dios quintalaktsʼinan tachi ju va anch tʼavilhchau ju Cristo Jesús ju lactʼiyan. 7 Chunch ju quintanavinin ju Dios ni caputalacasukʼalhiyach ni slivasalh quintaʼaktaijutan lacakʼai ixʼamapaininti acsni quintanavinin ju kʼox va ixlacaʼatalh ni lhilacaʼantauch ju Cristo Jesús. 8 Takʼalhtaxtutauch lacamakʼalhkʼajnat junta jonkʼalhita va ixlacaʼatalh ni quintaʼaktaijutanch ju Dios lacaʼamapaininti acsni lhilacaʼantauch ju Cristo. Para jantiyuʼ quintalhinavinitan chunch va ixlacaʼatalh ni navitau tuʼuʼ. Alai va quintalhikʼailaktsʼintan ju Dios ju ixʼamapaininti. 9 Jantu lai putakʼalhtaxtuyau va ixlacaʼatalh ni canaviuch ju kʼox. Ni lai chunch cava ixputakʼalhtaxtu pus ca laich ixtalhitakʼaya ju aliʼin ni ixtacʼatsa ni laich ixtatakʼalhtaxtulh va laʼisʼakstuʼan. 10 Para isʼakstu ju Dios ju quintamakʼalhtaxtuyan. Chai acsni lhilacaʼanau ju Cristo pus quintaxtakniyan sastʼi quiʼatsucuntiʼan ni lai naviyau ju kʼox tachi ju ixlhilhcaʼulata ju Dios ni canaviu. 11 Apʼastʼactʼit ni jantu israelitanin untʼatʼit. Chai ju quintʼaʼisraelitanin ju achʼucʼucanta jantu ixtatʼalaxakʼalaputunan ni jantu chʼucʼucʼantʼatʼit. 12 Apʼastʼactʼit ni jantucaʼ ismispʼayatʼit ju Cristo ju acsnich. Chai ni jantu quintʼaʼisraelitanin untʼatʼit pus jantu ixmaktʼanuyatʼit ju ixlacata tuchi xaquintalhitʼatakʼoxitan ju Dios ju quijnan ju israelitanin icjuntau. Jantucaʼ iscʼatsʼayatʼit ni laich caʼalilh ju miʼatsucuntiʼan ju lactʼiyan. Chai mas ixvilatʼit ju ani lacamunutpaʼ para jantucaʼ ismispʼayatʼit ju tucan Dios. 13 Pus ju makʼanchich ixtʼalaxcai ixʼuntʼatʼit ju Dios. Para ju chavai ni quinichilh ju Cristo pus maʼamigoxlacʼantʼatʼit va ixlacaʼatalh ni lhilacʼapʼintʼatʼit ju Jesús. 14 Pus yuchi ju Cristo ju xtʼakʼa ju atsucunti ju lhikʼach junta matiʼ ju lakʼaiti. Yuchi ju va lakatam quintanavin ju quijnan ju israelitanin icjuntau chai ju uxijnan ju jantu israelitanin untʼatʼit. Chai yuchi ju makʼosulh ju anuʼ ju quilhmaktʼui xaquintanavitan. 15 Acsni quinichilh ju ani ju Cristo pus mamixilh ju laxcaiti ju ixʼalin sia lhiquijnanʼan va ixlacata ju lhamapʼaksin junta ixnajun tuchich ju lai navican chai ta yu canavicalh. Chai ju chunch va lakatam quintanavin ju quijnan ju israelitanin icjuntau chai ju uxijnan ju jantu israelitanin untʼatʼit. Va lakatam juntau ni quintaxtaknikʼojun ju sastʼi quiʼatsucuntiʼan laʼixmacni ju yuchi. Ju chunch matiʼ ju laxcaiti. 16 Chai ni quinichilh ju Cristo pus ju chunch apunavichokolh ixʼamigojni ju Dios ju quintʼaʼisraelitanin chai ju jantu israelitanin. Chai vachuʼ pumamixikʼo ju laxcaiti ju ixʼalin sia quijnanʼan. Chai ju chavai laktsʼincantauch tachi ju va lakatam lacatuna ju quintʼiyunʼan. 17 Pus ju Cristo quilachilh chai quintajunin ni matanʼula ixʼalhunut ju Dios. Quintajunin ju israelitanin icjuntau ju vanin xacvilau laʼixmacni Dios. Vachuʼ tajunin ju uxijnan ju jantu israelitanin untʼatʼit ju na makat ixtʼonatʼit laʼixmacni Dios. 18 Pus laʼixmacni Cristo ju uxijnan ju jantu israelitanin untʼatʼit chai ju quijnan ju israelitanin icjuntau laich xakʼalayau ju Dios tachi ju quimpaiʼan. Chai vana yuʼ ju Spiritu Santu ju taʼaktaijuyan ju uxijnan tachi ju quintaʼaktaijuyan ju quijnan. 19 Ju makʼanch jantu makyuʼunch ixʼuntʼatʼit ju isʼaskʼatʼan Dios. Para ju chavai lhilakʼamispʼacʼanatʼit ni isʼaskʼatʼan untʼatʼit. 20 Chai tachi ju va ixchakaʼ Dios juntau. Ju uxijnan chunch untʼatʼit tachi ju xatantuʼ chakaʼ. Chai ju ixtamalakachan Dios chai ju lapanacni ju tanajun ixchivinti Dios chunch tajunita tachi ju xatantun ni yuʼunch ju tajunin ixchivinti Dios. Chai ju Cristo Jesús chunch junita tachi ju tuʼuʼ chiux ju makʼastumucʼacanta chakaʼ junta tsʼokcanta tuchi cʼatach ju yocanta. 21 Chai va ixlacata ni lhilacʼapʼinatʼit ju Cristo pus chunch untʼatʼit tachi ju tuʼuʼ chakaʼ ju sok yocanta. Chai ni palai amispʼayaʼitʼit ju Dios pus chunch ju aʼunaʼitʼit tachi ju kʼai ixpujitat Dios ni vasalh tʼajun ju yuchi lamiʼalhunutʼan. 22 Chai ixlacata ni lhilacʼapʼinatʼit ju Cristo vachuʼ ju uxijnan pus ju Dios quintanavitan tachi lakatam chakaʼ junta tʼajun ju yuchi. Pus ixchakaʼ Dios juntau ni tʼajun laquiʼalhunutʼan ju Spiritu Santu.
1 Ju quitʼin icPablo. Ixlapanac ju Jesucristo. Chai tachʼin icjunita ju chavai va ixlacaʼatalh ni iclajuniu ni laich lhilacʼapʼinatʼit ju Cristo ju uxijnan ju jantu israelitanin untʼatʼit. 2 Ca aktsʼiya kʼasmatʼatʼit ni quinavinita lamapainin ju Dios chai quixtaknilh ju lhichʼalhcat ni laich aclajunau ni laich atʼakʼalhtʼaxtʼuyaʼitʼit ni alhilacʼapʼinaʼitʼit ju Jesús. 3 Chai cʼatsʼayatʼit ni quintalacasunilh ju Cristo chai quimamachakxanilh ju anuʼ chivinti ixlacata ju yuchi ju jantu lai ixmachakxacanta ju makʼanchich. Pus iclaʼatsʼoknunitau lacatsʼunin ixlacata ju yuchi. 4 Chai acsni alaktsʼinaʼitʼit ju tuchi iclaʼatsʼoknunitau pus amachʼakxayaʼitʼit tuchi iccʼatsai ixlacata ju Cristo ju jantu iscʼatsacanta ju makʼanchich. 5 Pus jantu ixʼamamachakxanicanta ju lapanacni ju ixtatʼajun makʼanchich. Para ju chavai yuchi ju Spiritu Santu ju amavasalani ju ixtamalakachan ju Cristo chai ju lapanacni ju tanajun ixchivinti. 6 Pus ju anuʼ ju jantu lai ixmachakxacan ju makʼanchich yuchach ju ani. Ju uxijnan ju jantu israelitanin untʼatʼit chai ju quijnan ju israelitanin icjuntau va kʼaixtam caʼamaklhtayananau chux ju makʼalit ju xtʼakʼa ju Dios. Chai tachi chun ju quijnanʼan si ixlacatuna Cristo juntau. Chai tachi chun ju chivinti ju quintatʼatakʼoxitan ju Dios ju quijnan ju israelitanin icjuntau vachuʼ milacataʼan ju uxijnan ju jantu israelitanin untʼatʼit acsni kʼasmatʼatʼit ju ixchivinti Dios chai lhilacʼapʼinatʼit ju Cristo. 7 Dios ju quisacxtulh ni ixlapanac acva ni laich acʼajunilh ju lapanacni ju ani chivinti. Chai quinavinilh lamapainin chai quixtaknilh ixtachaput ni laich acnavi. 8 Pus ju Dios quinavinilh lamapainin ni laich iclajunau ju uxijnan ju jantu israelitanin untʼatʼit ju ixchivinti junta najun ni slivasalh na kʼai ju makʼalit ju alin laʼixmacni ju Cristo. Chai quinavinilh ju ani lamapainin mas jantu tuʼuʼ quintapalhni iclaktsʼinchokocan quiʼakstu ni na xacnavi ju alactuʼunti ju pʼulhnan. Palai jantu tuʼuʼ quintapalhni ju quitʼin. Palai xalackʼajin tajunita tachi chun ju aliʼin ju talhilacaʼanta ju Cristo. 9 Para quinavinilh ju Dios lamapainin ni laich acʼamavasalanilh va tichi cavalhch tuchi ju nomputun ju chivinti ixlacata ju Cristo ju jantu ixmachakxacanta ju makʼanchich. Pus ju makʼanchich ju Dios jantu xamatiʼ ixmavasalanita ju anuʼ chivinti. Yuchi ju Dios ju navikʼota tachi chun ju taxtokni. 10 Jantu ixmavasalata ju makʼanchich ni laich catacʼatsayach ju chavai ju anquilhnin chai ju alin ixtachaputʼan ju lactʼiyan ni na tijlhu ju pastʼacʼa ju Dios ni canavi. Catapucʼatsayaʼ ni catalaktsʼinaʼ tachi chun ju anavinita ju lapanacni ju talhilacaʼanta ju Cristo. 11 Pus ju Dios aktsʼiya ispastacta ni chunch cajunaʼ chai ixnajunta ni laʼixmacni quiʼucxtinʼan Cristo Jesús ju caʼuctaxtuyaʼ. 12 Pus va ixlacaʼatalh ni lhilacaʼantauch ju Cristo jantu talhananau acsni tʼachivinau ju Dios chai lai junau va tuchi ixtalakxtuch ju jumputunau. 13 Chai ni vasalh chunch juntau laʼixmacni Cristo pus iclatapaininiyau ni jantu tam anaʼuntʼit va ixlacaʼatalh ni na icmakʼalhkʼajnan va ixlacata ni iclajunau ixchivinti Dios. Alai acʼatsʼatʼit ni lakʼayacʼantʼatʼit ni na tuʼuʼ talhiulayan ju Dios ni xalacasqʼuin ni acmamakʼalhkʼajnicalh ju milacataʼan. 14 Acsni icpastʼacʼa tuchi navita ju Dios pus ictaʼaktsokotani ju yuchi ju ixpai ju quiʼucxtinʼan Jesucristo junita. 15 Pus ju Dios quimpaiʼan junita tachi chun ju vilau ju ani lacamunutpaʼ chai tachi chun ju tavilanancha lactʼiyan. 16 Pus ju Dios slivasalh ni yuchi ju xakʼai. Chai yuchi iclhitapainini ni tachapun catanaviniyan ju miʼalhunutʼan. Chai yuchi ju Spiritu Santu ju cataʼaktaijuyan ni chunch aʼunaʼitʼit. 17 Iclhitapainini ni catsucuyach ju Cristo lamiʼalhunutʼan ni lhilacʼapʼintʼatʼit ju yuchi. Chai icsqʼuini ni caʼalilh ju miʼamapainintiʼan ju jantu tuʼuʼ lai catamacʼapʼanin. 18 Ju chunch ju uxijnan chai tachi chun ju aliʼin ju talhilacaʼanta ju Cristo laich amachʼakxayaʼitʼit ta anchach ju ti chaʼankʼota ju ixʼamapaininti Dios. 19 Iclacasqʼuin ni amachʼakxatʼit ni slivasalh na tamapainiyan ju Cristo mas jantu lai tavanan amachʼakxayaʼitʼit tas va ti chaʼankʼotach ju ixʼamapaininti. Ju chunch ju Dios cataxtaknikʼoyan tachi chun ju kʼox ju axtaknican ju talhilacaʼanta ju Jesús. 20 Ju Dios na tachapun. Chai pucʼatsayau ni na alin ju ixtachaput acsni pastʼacʼau tachi chun ju quintaʼulhtutan laʼixmacni Cristo. Chai yuchi lhicʼatsayau ni Dios palai lai kʼox quintanaviyan. Jantu va chun ju quintaxtakniyan tachi ju sqʼuiniyau u tachi ju pastʼacʼau. 21 Chach talakʼaya ju Dios tachi chun ju talhilacaʼanta ju Jesús. Chach lakʼayacalh tus va tavananch cava. Vasalh iclacasqʼuin ni chunch ju canavicalh.
1 Ju quitʼin tachʼin icjunita ni iclhilacaʼanta ju quiʼucxtinʼan Jesús. Pus iclatapaininiyau ni chunch ju atsʼucʼutʼit tachi ju lhijunch ni catatsuculh ju asacxtuta ju Dios. Pus vachuʼ tasacxtutan ju Dios ju uxijnan. 2 Jantu alhitʼakʼayatʼit tuʼuʼ. Alamalacʼasunitʼit ju milhikʼox lapanacʼan. Alachʼixnitʼit ju macxcai va ixlacaʼatalh ni lamapʼainiyatʼit. 3 Slivasalh ixlhichux miʼalhunutʼan anavitʼit talacmaskʼatʼin ta yu laich va chʼanxtamch apʼulalhipʼitʼit chai jantu alaclasatʼit. Ju chunch vasalh va lakatamch aʼunaʼitʼit laʼixtachaput ju Spiritu Santu. 4 Ju quijnanʼan ju lhilacaʼantauch ju Cristo tachi ju va lakatam lacatuna juntau. Chai va lakatam ju Spiritu Santu. Chai ni quintasacxtutan ju Dios pus va lakatam taxtokni ju pacxanau ni aquintaxtakniyan. Chai cʼatsayau ni vasalh caʼamaklhtayananau ju anuʼ ju quintakʼalhtasunitan ju Dios. 5 Va pumatam ju quiʼucxtinʼan. Va pumatam ju lhilacaʼantauch. Chai va lakatam amakpaxanti ju alin. 6 Va pumatam ju Dios. Yuchi ju quimpaiʼan quilhichuxʼan. Yuchi ju lhinonkʼojui tachi chun ju taxtokni. Chai yuchi ju chʼalhcatnan quilacataʼan ju lhilacaʼantauch ju yuchi. Chai yuchi ju tʼajun laquiʼalhunutʼan. 7 Ju pumatamin quijnanʼan quintaxtaknitan tuchi lhichʼalhcat ju kʼoxich lhiulai ju yuchi. 8 Pus yuchi lhichivincanta ju Cristo laʼixchivinti Dios ju tsʼokcanta junta chani najun: Acsni anchokolh ju lactʼiyan alhiʼalh ju tachi va tachʼinin ixtajunita. Chai axtaknilh lhakʼailaktsʼin ju lapanacni ju ani lacamunutpaʼ. Chunch ju najun laʼixchivinti Dios ju tsʼokcanta. 9 Pus junta najun ni anchokolh ju lactʼiyan ca aktsʼiya nomputun ni pʼulhnan quilachilh ju ani lacatʼun. Chai quinavichilh ju lhichʼalhcat ju ilhcanicanta. 10 Chai ju anuʼ ju quilachilh ju ani lacatʼun vana yuchi ju anchokolh ju lactʼiyan. Chai ju chavai yuchi ju vi mas vanta anchach cava. 11 Chai isʼakstu ju Cristo ju quintaxtaknitan ju ixlhichʼalhcat ju pumatamin pumatamin. Ju aliʼin axtaknican ju lhichʼalhcat ni ixtamalakachan catajunaʼ. Ju aliʼin axtaknican ni catanonaʼ ixchivinti Dios. Ju aliʼin axtaknican ni catamavasalayaʼ ixchivinti Dios ju tsʼokcanta. Chai ju aliʼin axtaknican ni catalhinaulh lacatalhavat ju talhilacaʼanta ju Cristo. Chai ju aliʼin axtaknican ni cataʼamalaninilh ixchivinti Dios. 12 Chai quintaxtaknin ju ani ju pumatamin ni lai palai canaviyau ju ixlhichʼalhcat ju Dios. Ju chunch ju aliʼin ju talhilacaʼanta ju Cristo palai pʼas catalhilacaʼanaʼ. 13 Chai ni laich va lakatam cajumvi tachi chun ju quijnanʼan ju lhilacaʼanauch ju Jesús chai ni vasalh laich catsucuyau tachi ju kʼachani ju istsʼalh Dios yuchi xaquintalhixtakniyan ju ani. Chai ni chunch catsucuyau pus cachaʼanaʼ ju quiʼatalacpastʼacʼatʼan tachi ixʼatalacpastʼacʼat tam lapanac ju vasalh tsucui tachi ju kʼachani ju Cristo. Chai astan cachinaʼ ju avilhchan ni chunch cajunau tachi ju junita ju Cristo. 14 Pus jantu chun calau tachi ju tam askʼatʼa. Pantsʼiquis kʼachaniyau ju ani atalaninti. Chai apantsʼiquis atumpa ju kʼachanipalau. Chai lacaʼiniyau ju ixʼaʼokxchokʼonti ju lapanacni ju na lai tapuʼokxchokʼonun ju jantu stavasalanti. 15 Alai va tachi canonau ju stavasalanti ni lamapainiyau. Ju chunch palai chunch cajunau tachi ju Cristo ju saʼaktsulh junita tachi chun ju talhilacaʼanta ju yuchi. 16 Tachi ju quilacatunaʼan mas na tijlhu alin ju ixtaxtokni para ni alin ju quiʼasivicʼan pus va lakatam junita. Chai ju lakatamin taxtokni aktaijui ixtʼataxtokni tachi ju xtakni ju ixtachaput ju quiʼaktsulhʼan. Pus vana va chun ju quijnanʼan ju ixlacatuna Cristo juntau. Acsni calhilaksiyau ju Cristo ju saʼaktsulh junita pus va lakatam cajunau chai calaʼaktaijuyau lacatachaput ju quintaxtakniyan pumatamin ju Cristo. Chai calamapainiyau chai palai pʼas calhilacaʼanau ju yuchi. 17 Pus ju ani iclajunau laʼixtapakaʼut ju quiʼucxtinʼan Jesús. Jantu vana atsʼucʼutʼit tachi ju aliʼin ju vachuʼ jantu israelitanin tajunita ju jantucaʼ talhilacaʼanta ju Cristo. Jantu lhitapalai tachi ju taʼalacpastacnan ju yuʼunch. 18 Ju yuʼunch jantu lai tamachakxai ixtaxtokni Dios. Jantu tapacxanta ju atsucunti jonkʼalhita ju xtʼakʼa ju Dios ni lana jantu lai tamachakxai va ixlacaʼatalh ni na va pʼas ju ixʼalhunutʼan. 19 Ju yuʼunch ni jantu lana lai tamaxanan pus yuchi va lakachapu talhilhitapʼuxtach isʼatsucuntiʼan. Lana lacalhikʼach tanavi ju va tuchi alactuʼunti ju kʼachani ju ixlacatunaʼan. 20 Para jantu chun xatamasuniyan ju Cristo ju uxijnan. 21 Pus ju uxijnan aktsʼiya kʼasmatʼatʼit ixlacata ju Jesús. Chai malanicʼantʼatʼit ixlacata yuchi. Chai ju tuchi naulh ju yuchi stavasalanti. 22 Pus amacʼonkʼotʼit ju macxcai tachi ju ixtʼailhipʼintʼatʼit ju makʼanch. Tachi ju ixlayatʼit acsni tucaʼ ixlhilacʼapʼintʼatʼit ju Jesucristo. Pus ixʼalilh ju mimakʼalhkʼajnatʼan jonkʼalhita ni ixtʼailhipʼitʼit ju chunch. Pus ju alactuʼunti ju ixnavipʼutʼunatʼit ju acsni va ixtaʼokxchokʼoyan. 23 Pus chach lasastʼikʼocalh ju miʼatalacpastʼacʼatʼan. 24 Chai amalacʼasutʼit ni vasalh sastʼi ju miʼatsucuntiʼan. Slivasalh soknicʼa chai salaka atsʼucʼutʼit tachi ju kʼachani ju Dios. 25 Chai ni chunch cajunaʼ ju miʼatsucuntiʼan pus tasqʼuini ni amacʼaʼuntʼit ju taʼaklhtamat. Alai va yuchi ju stavasalanti ju alaʼunitʼitch ju pumatamin mintʼalapanacni ni tachi ju va lakatam lacatuna juntau. 26 Acsni tʼalhkʼamnatʼit pus alhistʼacchʼokʼocʼantʼit miʼakstuʼan ni jantu alactʼuʼununtʼit. Chai vatsʼalhti acʼaptʼit ni alin ju mintalhkʼamtiʼan. 27 Jantu alacʼasqʼuinitʼit ju lhacaticuru ni catamanavinin alactuʼunti. 28 Ju akʼalhonaʼ jantuch vana caʼakʼalhaunalh. Alai va kʼox lhichʼalhcat ju canavilh laʼixmacaʼ. Ju chunch laich capacxanaʼ ju tuchi caxtakniyaʼ ju tʼajun makʼalhkʼajnaʼ laʼixmaktasqʼuinit. 29 Jantu tuʼuʼ macxcai chivinti anaʼuntʼit. Alai va yuchi ju kʼox chivinti ju anaʼuntʼit tachi ju laich apʼuʼaktʼaiʼuyaʼitʼit ju aliʼin ni laich palai catatsuculh tachi ju kʼachani ju Dios. Ju chunch ju Dios caʼaxtakniyaʼ ju kʼox isʼatsucuntiʼan ju catakʼasmatniyanch. 30 Jantu amamakʼaninitʼit ju iSpiritu Santu Dios. Ju uxijnan xtʼaknicʼantʼatʼit ju yuchi ni alhacʼatsʼanantʼit ni vasalh amalakxtʼucʼanaʼitʼit acsni cachinaʼ ju anuʼ avilhchan. 31 Jantu kʼai aʼuntʼit. Jantu atʼalhkʼamantʼit. Jantu alakʼaʼitʼit nin pʼas alaxakʼalatʼit lacatalhkʼamti. Jantu alaclaʼunitʼit macxcai chivinti. Amacʼaʼuntʼit tachi chun ju macxcai. 32 Alai alaʼaktʼaiʼutʼitch. Pakʼeunicʼa aʼuntʼit. Alamacʼacxanitʼit ju pumatamin milhiʼuxijnan tachi ju Dios ni tamacʼacxanitan ni lhilacʼapʼintʼatʼit ju Cristo.
1 Alaktsʼintʼaʼitʼit ju Dios ni isʼaskʼatʼan untʼatʼit chai ju yuchi na tamapainiyan. 2 Alamapʼainitʼit tachi ju Cristo ni quintamapaininch chai tamakʼaxtakchokolh isʼakstu ju quilacataʼan. Ju yuchi valhch tachi ju tuʼuʼ atapacxat ju ixtamaknini ju Dios ju makʼanch chai tachi ju tuʼuʼ lhakʼailaktsʼin ju na cʼus acamin ju na kʼachani ju Dios. 3 Ju chavai ni isʼaskʼatʼan Dios untʼatʼit pus chunchach ju atsʼucʼutʼit. Pus nin lacatsʼunin jantu catasu lamiʼatsucuntiʼan ju ixpuxcajuca ju minavinʼan. Nin tuʼuʼ atumpa alactuʼunti ju ixtʼachunch cava. Nin yuchi ni alhacchʼiʼitʼit tuʼuʼ. Nin yuchi ni lai alhilhichʼivincʼantʼit ju chunch atsucunti. 4 Vachuʼ jantu lhijun ni anaʼuntʼit ju macxcai chivinti. Nin yuchi ni lai achʼivinintʼit tachi tam xamatiʼ ju jantu acʼatsananta. Nin yuchi ni lai akʼalhkʼamanachʼivin ju tuʼuʼ macxcai. Ju chunch jantu kʼox. Alai aʼunitʼit lakʼailaktsʼiuch ju Dios. 5 Pus ju uxijnan cʼatsʼayatʼit ni laʼixpuʼucxtinʼan Cristo chai Dios jantu tuʼuʼ caʼaxtaknicanaʼ ju lapanacni ju tatʼatsucui ju jantu ixʼamachakaʼan u ju chakolun ju tatʼatsucui ju jantu ixpapaʼan. Nin yuʼunch ju tanavi ju tuʼuʼ atumpa alactuʼunti ju ixtʼachunch cava. Nin yuʼunch ju talhacchaʼan tuʼuʼ. Ju chunch talai pus tachi ju va isdiosʼan tanavita ju chun alactuʼunti. 6 Alaccʼatsʼanantʼit. Jantu xamatiʼ cataʼokxchokʼon lacatuʼuʼ chivinti ju jantu slivasalh. Pus ju Dios amamakʼalhkʼajni ju va jantu lai talacaʼi chai ju tanavi ju alactuʼunti tachi ju iclajuntau. 7 Pus jantu amaʼamigoxlatʼit ju chunch talai. 8 Ju makʼanch acsni tucaʼ ixlhilacʼapʼintʼatʼit ju Cristo pus chunch vachuʼ ixʼuntʼatʼit tachi ju yuʼunch ni vachuʼ tachi ju va istsʼistacaʼ ju lamintacʼatsanʼan. Para ju chavai ni lhilacʼapʼintʼatʼit ju Cristo pus ju yuchi tamalacpucujunitan ju mintacʼatsanʼan. Pus chunch ju atsʼucʼutʼit tachi ju lhijun ni tamalacpucujunitan ju mintacʼatsanʼan. 9 Chai ni tamalacpucujutan ju Cristo pus tasqʼuini ni caʼalilhch lamiʼatsucuntiʼan tachi chun ju kʼox chai ju soknicʼa chai ju stavasalanti. 10 Apʼuxcʼaʼutʼit ta yu laich atsʼucʼutʼit tachi ju kʼachanich ju quiʼucxtinʼan Jesús. 11 Jantu atʼanavitʼit tuʼuʼ alactuʼunti ju jantucaʼ alacmalacpucujunicanta ju ixtacʼatsanʼan. Ju alactuʼunti jantu tavanan xtʼakʼa tuʼuʼ ju kʼox. Alai aʼunitʼit ni jantu kʼox tachi ju talai. 12 Na lhimaxan ni va aclajuniu tuchi sek tanavi ju yuʼunch. 13 Pus lacaʼatuncunuʼ tasukʼojui ta yu junita ju tuʼuʼ. Pus ju ixchivinti Dios chunch junita tachi ju atuncunuʼ ni quintamapulhcuniyan ju laquintacʼatsanʼan. 14 Pus yuchi lhinoncan chani: Alacpʼucʼujtʼitch ju uxijnan ju tachi ju va lhtʼatʼayatʼit lamiʼatsucuntiʼan. Jantu vana chun alatʼit tachi ju talai ju jantucaʼ tamispai ju Jesús. Chai ni chunch ju alatʼit pus ju Cristo catamalacpucujuniyan ju mintacʼatsanʼan. Chunch ju lhinoncan. 15 Pus ixlhichux miʼalhunutʼan anavitʼit cuenta ta yu atsʼucʼuyaʼitʼit. Jantu atsʼucʼutʼit tachi ju va tam tonto. Alai atsʼucʼutʼit tachi tam xamatiʼ ju na acʼatsananta. 16 Chux avilhchan anavitʼit cuenta ta yu laich apʼunaviyaʼitʼit ju kʼox. Chun ju alatʼit ni na alin ju alactuʼunti ju chavai. 17 Pus ixlhiyuchach jantu va lhitonto alatʼit para amachʼakxatʼit tuchi ju lacasqʼuin ju miʼucxtinʼan Jesús ni anavitʼit. 18 Jantu alactʼakʼapʼatʼit. Ju chunch laich caʼalilh lhu ju mintalakʼalhinʼan. Alai chach lhinonkʼo ju Spiritu Santu lamiʼatsucuntiʼan. 19 Chai ni yuchi ju lhinonkʼojui lamiʼatsucuntiʼan pus alaʼunitʼit ju milhiʼuxijnanʼan ju salmos. Chai alakʼayatʼit ju Dios lacamilhpat. Chai amilhpʼanitʼit ju quiʼucxtinʼan Jesús ixlhichux miʼalhunutʼan. 20 Chai aktsʼiya aʼunitʼit lakʼailaktsʼiuch ju quimpaiʼan Dios mas va tuchi catamacaminiyan. Aʼunitʼit lakʼailaktsʼiuch laʼixtapakaʼut ju quiʼucxtinʼan Jesucristo. 21 Ni tʼalhoniyatʼit ju Dios pus alaqʼuiclacʼaʼitʼit ju pumatamin. 22 Ju uxijnan ju icʼantʼatʼit ni qʼuiclacʼaʼiyatʼit ju quiʼucxtinʼan Jesús pus vana va chun aqʼuiclacʼaʼitʼit ju mimpapaʼan. 23 Tachi ju tuʼuʼ quiʼaktsulhʼan ni lhinonkʼojui laquilacatunaʼan pus vana va chun ju tam jokʼat. Yuchi ju lhinajun laʼisʼatsucunti ju ixʼamachakaʼ. Chai vachuʼ chunch ju Cristo. Ju yuchi lhinajun laquiʼatsucuntiʼan tachi chun ju lhilacaʼantauch ju yuchi ni tachi ixlacatuna juntau. Chai yuchi ju quintamakʼalhtaxtutan ni jantu catiʼau junta jonkʼalhita makʼalhkʼajnat. 24 Pus ju quijnanʼan ju lhilacaʼantau ju Cristo ni quiclacaʼiyau ju yuchi pus chunchach vachuʼ catalalh ju aʼicantach. Cataquiclacaʼilh ju ixpapaʼan tachi chun ju canonaʼ. 25 Chai ju uxijnan ju xapapanin untʼatʼit amapʼainitʼit ju miʼamachakaʼan tachi ju Cristo ni quintamapainiyan tachi chun ju lhilacaʼantauch ju yuchi. Chai tamakʼaxtakchokolh isʼakstu ju quilacataʼan. 26 Chai yuchi lhitamakʼaxtaklh ni laich ixʼanuʼ cajumvi ju quijnanʼan ju lhilacaʼantauch ju yuchi. Chai ju yuchi quintachakʼanitan ju quiʼalhunutʼan acsni lacaʼinitau ju ixchivinti. Chai acsni akpaxau pus va pumalacasuputunau ni chunch ju quintaʼulhtutan ju Cristo. 27 Ju chunch ju quijnanʼan ju lhilacaʼantauch ju yuchi pus slivasalh kʼox aquintalhiulayan. Chai aquintalaktsʼinan ni jantu tuʼuʼ ju va lhquiliqui cava ju laquiʼatsucuntiʼan. Chai jantu jintaʼ ju va catakʼalhi u tuʼuʼ atumpa ju ixtʼachunch cava. Alai salaka aquintalaktsʼinan chai matich ju quintalakʼalhinʼan laʼixmacni ju yuchi. 28 Pus ju xapapanin catamapaini ju ixʼamachakaʼan tachi ju va jun ixlacatunaʼan isʼakstuʼan. Pus ju mapaini ixʼamachakaʼ isʼakstu ju mapainichokocan. 29 Jantu xamatiʼ ju va jantu kʼox calhiulachokolh ixlacatuna. Alai kʼoxich mavai chai kʼoxich lhistʼacʼa. Pus ju Cristo vana va chun ju quintanaviyan ju quijnanʼan ju lhilacaʼantauch ju yuchi. 30 Chunch quintaʼulhtuyan ni tachi ixpuchʼalhcatna ixlacatuna juntau. 31 Pus tsʼokcanta laʼixchivinti Dios junta najun ni calhimaconaʼ ju ixpai chai ixnati tam tsʼalh chai catʼatalakxtʼokʼach ju ixʼamachakach chai ju ixtʼiyunʼan va lakatam acanit catajunaʼ. 32 Iclajunau chunch ni tsʼa ma palai lai amachʼakxayaʼitʼit ta yu junita ju quiʼatsucuntiʼan laʼixmacni Cristo tachi chun ju quijnanʼan ju lhilacaʼantauch ju yuchi. Ju ani chivinti aktsʼiya na xcai machakxacan. 33 Para vachuʼ chani iclajumputunau. Ju pumatamin ju uxijnan amapʼainitʼit ju miʼamachakaʼan tachi ju va jun miʼakstuʼan ju mapʼainichʼokʼocʼanatʼit. Chai ju chakolun cataquiclacaʼi ju ixpapaʼan.
1 Ju uxijnan ju askʼatʼan untʼatʼit alacʼaʼinitʼit ju mimpaiʼan minatiʼan tachi ju lhijun ni lhilacʼapʼinatʼit ju Cristo. Aktsʼiya tasqʼuini ni chunch ju alatʼit. 2 Atʼalhonitʼit ju mimpaiʼan chai ju minatichʼan. Ju ani lhamapʼaksin yuchi ju pʼulhnan naulh ju Dios chai ju acsnich vachuʼ kʼalhtasunilh tuʼuʼ va tichi chavaich ju camuctaxtulh. 3 Ju Dios naulh ni lhikʼach catsucuyaʼ chai na makʼanch ju catsucuyaʼ ju ani lacamunutpaʼ va tichi chavaich ju quiclacaʼi ju ixpai ixnati. 4 Chai ju uxijnan ji xalacpaʼitni jantu amaktʼalhkʼamantʼit ju miʼaskʼatʼan. Alai akʼaʼitʼit lacakʼox chivinti acsni tuʼuʼ tanavi. Chai amalanitʼit tachi ju kʼoxich calhiula ju quiʼucxtinʼan Jesús. 5 Chai ju uxijnan ji xalapanacni aqʼuiclacʼaʼitʼit ju miʼucxtinʼan ju ani lacamunutpaʼ. Atʼalhonitʼit chai kʼox anavinitʼit ju ixlhichʼalhcatʼan. Chai ju tuchʼi naviyatʼit ixlhichux miʼalhunutʼan ju anavitʼit tachi ju va jun Cristo ju chʼalhcʼatnaniyatʼit. 6 Jantu va acsnich ju kʼoxich achʼalhcʼatnantʼit acsni talaktsʼinan ju miʼucxtinʼan ni nonatʼit ni kʼox catalhiulayan ju chunch. Alai chunch ju alatʼit tachi ju va jun Cristo ju chʼalhcʼatnaniyatʼit. Ixlhichux miʼalhunutʼan anavinitʼit ju ixkʼachat ju Dios. 7 Lacalhikʼach anavitʼit ju milhichʼalhcatʼan tachi ju va junch Cristo ju chʼalhcʼatnaniyatʼit. Jantu va tam mintʼalapanac. 8 Acʼatsʼatʼit ni camapalhniyaʼ ju quiʼucxtinʼan Jesús va tichi chavaich ju canaviyaʼ ju tuʼuʼ kʼox. Mas xalapanac junita u jantu xalapanac cava. 9 Chai ju uxijnan ju lhinonatʼit lacatuʼuʼ lhichʼalhcat vachuʼ kʼox atʼalalhipʼitʼit ju milapanacni. Jantu amakʼantʼalhanatʼit. Acʼatsʼatʼit ni vachuʼ alin ju miʼucxtinʼan ju vilhcha lactʼiyan. Yuchi ju Cristo. Chai ju yuchi vachuʼ ixʼucxtinʼan junita ju milapanacni. Chai ju yuchi jantu va pumacatami amapaininin. 10 Va yuchi ju ani ju iclajumputunau ji quiʼalakʼavin. Pʼas alhilacʼapʼitʼit ju Cristo. Na alin ixtachaput ju yuchi chai laich cataʼaktaijuyan. 11 Ju taropajni acsni taʼan tʼalasanin xamatiʼ pus stunin tamalakchʼininkʼojui ju tuchi tapusastʼucʼa ju flecha. Pus vachuʼ chunch alatʼit ju uxijnan. Amaklhtʼaʼitʼit chux tachi chun ju quintaxtaknitan ju Dios ju lai capusastʼucʼau ju macxcai. Ju chunch va tachi pʼas alhilacʼapʼinaʼitʼit ju Cristo mas va tuchi catamapastʼacʼaniyan ju lhacaticuru ni va taʼokxchokʼoputunan. 12 Chai ni jantiyuʼ ju tʼalasayau ju va quintʼalapanacniʼan pus yuchi alhiʼamaklhtʼayanantʼit ju apʼusastʼucʼaʼitʼit ju macxcai. Yuchi ju quintaxtaknitan ju Dios. Pus ju tʼalasayau yuʼunch ju talhinajun lacaʼatatsʼisni ju ani lacamunutpaʼ. Chai ju aliʼin sia yuʼunch na alin ixtachaputʼan. Chai vachuʼ sia yuʼunch alin ju xalactʼicstʼi ucxtinin. Chai vachuʼ tʼalasayau ju macxcai un ju tʼajun ju ani lacamunutpaʼ. 13 Ni laich asastʼucʼaʼitʼit ju quintʼalasanʼan acsni catamapastʼacʼaniputunan ju tuʼuʼ macxcai pus yuchi iclalhijunau ni yuchi alhiʼamaklhtʼayanantʼit ju lai apʼusastʼucʼaʼitʼit ju macxcai. Yuchi ju quintaxtaknitan ju Dios. Chai ju chunch acsni atʼalalhaʼayaʼitʼit ju macxcai pus va tachi pʼas lhilaksiyatʼit ju Cristo. 14 Pus pʼas alhilacʼapʼitʼit ju Cristo. Chai ju uxijnan ni mispʼayatʼit ixchivinti Dios pus lakʼasivilatʼit tachi ju tam taropa ju pʼas chʼi ju iscinturón acsni canaʼ lasanaʼ. Chai ni salaka junita ju miʼatsucuntiʼan laʼixmacni Dios pus matiʼ cunaʼ junta lai cataputʼalalhajayan ju lhacaticuru. Ju chunch aʼunaʼitʼit tachi ju tam taropa ju lakchʼi ju tsasnat xcujuʼ ni jantu lai catitanunilh ju flecha. 15 Chai va tachi alakʼasitsʼucʼutʼit ni laich acʼatsʼayaʼitʼit ta yu laich alacpʼumavasalaniyaʼitʼit ju aliʼin ni laich ixʼamigojni catajunaʼ ju Dios. Chai ju chunch aʼunaʼitʼit tachi ju tam taropa ju lakasivi ixlacata ju lasat ni chʼantanui ju iszapato. 16 Para ju palai maktʼasqʼuiniyatʼit yuchi ni pʼas alhilaksitʼit ju Dios. Chai ju chunch aʼunaʼitʼit tachi ju tam taropa ju chʼapata ju quiclhtayai tsasnat ju lai pusastʼucʼa ju flecha. Chai ju uxijnan ni pʼas lhilaksiyatʼit ju Dios pus vachuʼ lai asastʼucʼaʼitʼit mas va tuchi macxcai ju catamacaminiyan ju lhacaticuru. 17 Chai ni cʼatsʼayatʼit ni vasalh tamakʼalhtaxtutan ju Jesús pus lakʼasi atsʼucʼutʼitch chai ju chunch jantu xamatiʼ lai catamacʼapʼaniyan ju tuchʼi lacʼaʼiyatʼit. Chai ju chunch aʼunaʼitʼit tachi ju tam taropa ju aktanui ju tsasnat ixʼaktanut ni jantu lai catitapasanilh ju flecha. Chai alhipʼitʼit ju anuʼ ju lai apʼusastʼucʼaʼitʼit ju macxcai. Yuchi ju quintaxtaknitan ju Spiritu Santu. Yuchi ju ixchivinti Dios. Ju yuchi chunch junita tachi ju lhman isʼespadaʼan ju taropajni. 18 Chai va tachi atʼachʼivinintʼit ju Dios. Atʼachʼivinintʼit chai atʼapʼaininitʼit. Chai ju Spiritu Santu cataʼaktaijuyan ni sok atʼachʼivinaʼitʼit. Skala atsʼucʼutʼit acsni tʼachʼivinatʼit ju Dios. Chai jantu alhokʼontʼit mas jantu sai amaklhtʼayananatʼit ju tuchʼi sqʼuiniyatʼit. Vachuʼ asqʼuinitʼit ju Dios ixlacataʼan tachi chun ju talhilacaʼanta ju Jesús. 19 Vachuʼ atʼapʼaininitʼit ju Dios ju quilacata. Chach quixtaknilh ju acnonach ni laich acmavasalayaʼ ju ixlacata ju Jesucristo. Acmavasalayaʼ ju chivinti ju jantu lai ixmachakxacan ju pʼulhnan. Vachuʼ asqʼuinitʼit ju Dios ni aquiʼaktaijulh ni jantu actalhanalh acsni icchivinin ixlacata ju yuchi. 20 Ju quitʼin mas ixtamalakachan Cristo icjunita para ictʼalhnucanta va ixlacaʼatalh ni xacʼajuni ju lapanacni ixlacata ju Cristo. Asqʼuinitʼit ju Dios ni aquiʼaktaiju ni va tachi acʼajunilh ju lapanacni ixlacata ju yuchi tachi ju lhijunch ni aclalh chai jantu actalhanalh. 21 Ju Tíquico quilakʼauʼan junita ju na mapainiyau. Chai ju yuchi navi ixlhichʼalhcat ju quiʼucxtinʼan Jesús vachuʼ chai lai lhilaksican. Pus ju yuchi catajunan tuchi tʼajun tapasanaʼ ju laquiʼatsucunti chai tuchi ictʼajun naviniʼ. 22 Pus ni laich acʼatsʼatʼit ta yu icjuntau chai laich catamatankʼoxaxkʼayayan ju Tíquico pus yuchi iclalhimalakachaniyachau. 23 Ictapainini ju quimpaiʼan Dios chai ju quiʼucxtinʼan Jesucristo ni cataʼaʼaktaiju ju quiʼalakʼavinʼan laʼixmacni Cristo ni jantu calacʼalh ju ixʼalhunutʼan chai cataʼamapaininilh chai pʼas catalhilaksilh ju Dios. 24 Ictapainini ju Dios ni caʼanavinilh lamapainin tachi chun ju tamapaini ju quiʼucxtinʼan Jesucristo laʼixlhichux ixʼalhunutʼan. Vasalh chunch iclacasqʼuin ni caʼanavinilh ju Dios.
1 Ju quitʼin icPablo chai quintʼavi ju Timoteo. Ixlapanacni ju Jesucristo icjuntau. Chai iclamacʼamiyau ju uxijnan ju lhinonatʼit lacatalhavat chai ju aʼaktʼaiʼununatʼit lacatalhavat ju talhilacaʼanta ju Cristo. Vachuʼ iclamacʼamiyau tachi chun ju aliʼin uxijnan ju vachuʼ lhilacʼapʼinatʼit ju Cristo Jesús ju vilhchitʼit ju lakʼachakʼan Filipos. 2 Ictapainini ju quimpaiʼan Dios chai ju quiʼucxtinʼan Jesucristo ni catanaviniyan lamapainin chai cataʼaktaijuyan ni jantu calacʼalh ju miʼalhunutʼan. 3 Pus va ta pakchux ju iclapastʼacʼau ju uxijnan icxtakni lakʼailaktsʼiuch ju quiDios ju milacataʼan. 4 Chai va ta pakchux ju icsqʼuini ju Dios ju milacataʼan slivasalh na ickʼachan. 5 Icxtakni lakʼailaktsʼiuch ju Dios ju milacataʼan ni na lhu aʼaktaijunti xaquilaxtakniyau ni laich xacpumakpitsi ju chivinti ixlacata ju Cristo tus acsni lacʼaʼichitʼit tus chavai. 6 Yuchi ju Dios ju taiʼulata ju kʼox lhichʼalhcat ju tanaviniyan ni laich palai alhilacʼapʼinaʼitʼit ju Jesús chai lana iccʼatsai ni yuchi ju catailhiʼanaʼ tus acsni cachinaʼ ju avilhchan acsni caminchokoyaʼ ju Jesucristo. 7 Chai lhijunch ni chunchach acpastaclh ju milacataʼan ni laʼixlhichux quiʼalhunut iclamapainiyau. Vachuʼ lhijunch ni aclamapainiu ni va kʼaixtam quintanaviniyan lamapainin ju Dios chai vachuʼ ni quilaʼaktaijuyau acsni ictʼalhnucanta ju chavai. Vachuʼ quilaʼaktaijuch acsni xaclhiʼancanta lacapuʼucxtin chai icʼamavasalanilh ju lapanacni ni stavasalanti ju ixchivinti Dios. 8 Pus ju Dios kʼox cʼatsai ni vasalh iclamapainiyau minchuxʼan ju uxijnan. Chun iclamapainiyau tachi ju tamapainiyan ju Jesucristo. 9 Ju tucan icsqʼuini ju Dios ju milacataʼan yuchi ni amapʼaininintʼit. Para vachuʼ icsqʼuini ni palai lhu caʼalilh ju mintacʼatsanʼan chai ju miʼamachakxantiʼan. 10 Ju chunch aktsʼiya laich asacxtʼuyaʼitʼit ju kʼox. Chai ju chunch salaka aʼunaʼitʼit lamiʼatsucuntiʼan chai jantu amakʼalhkʼosuyaʼitʼit xamatiʼ tus acsni caminchokoyaʼ ju Cristo. 11 Ju chunch ju Jesucristo cataʼaktaijuyan ni lai sok atsʼucʼuyaʼitʼit. Chai ni chunch junita ju miʼatsucuntiʼan pus calakʼayacanaʼ ju Dios chai catanonach ju lapanacni ni slivasalh xakʼai ju yuchi. 12 Iclacasqʼuinch ji quiʼalakʼavin ni acʼatsʼatʼit ni na lhu takʼasmatlh ju chivinti ixlacata ju Cristo va ixlacaʼatalh ni ictʼalhnucanta ju chavai. 13 Pus tachi chun ju ixtaropajni ju ucxtin chai ju aliʼin lapanacni ju ani tavilanalh si tacʼatsakʼojui ni va ixlacaʼatalh ni iclhilacaʼanta ju Cristo yuchi iclhitʼalhnucanta. 14 Chai ju chavai na lacatsʼunin ju quiʼalakʼavin ju titatalhanancaʼ. Ju chavai na lhu alin ju palai jokʼat tacʼatsan chai tanajun ixchivinti Dios chai jantu tatalhanan. Chunch talai va ixlacaʼatalh ni talaktsʼin ni quilhistʼacʼa ju Cristo chai yuchi palai talhilhilaksi ju yuchi. 15 Vasalh alin lapanacni ju tanajun ju chivinti ixlacata ju Cristo va ixlacaʼatalh ni talhacchaʼani ju tuchi lai xacnavi chai va quintaxcaji. Para ju aliʼin na kʼox ju ixʼatalacpastʼacʼatʼan acsni tanajun ju chivinti ixlacata ju Cristo. 16 Ju aliʼin tanajun ju chivinti ixlacata ju Cristo para va ixlacaʼatalh ni va palaich acʼamakʼaninilh tanajun lacapulachʼin ni va yuʼunchach ju palai lhu caʼachʼakʼokʼacalh. Chai aquintamacoyaulh ju quitʼin. Para lana jantu kʼox tachi ju tapastʼacʼa ju yuʼunch. 17 Para ju aliʼin lapanacni tanajun ju chivinti va ixlacaʼatalh ni quintamapaini. Tacʼatsai ni icxtaknicalh ju lhichʼalhcat ni acʼamavasalaniyaʼ ju lapanacni ni stavasalanti ju chivinti ixlacata ju Cristo. 18 Ju quitʼin ickʼachan mas jantu kʼox talai ju aliʼin. Iclhikʼachan ni aktsʼiya tanajun ju chivinti ixlacata ju Cristo. Chai va tachi ackʼachanach. 19 Pus iccʼatsai ni kʼox acxajanta ni sqʼuiniyatʼit ju Dios ju quilacata chai ni quiʼaktaijui ju Spiritu Santu. 20 Slivasalh iclacasqʼuin ni jantu tuʼuʼ acnaviyaʼ ju lai aclhimaxananaʼ astan. Pus tachi ju aktsʼiya xacnajun ju chivinti ixlacata ju Cristo chai jantu xactalhanan pus vana va chun aclayaʼ ju chavai. Chai ju chunch calakʼayacalh ju Cristo ixlacata quiʼatsucunti mas acniyaʼ u actitsuculhcaʼ lacatsʼunin. 21 Pus ni ictʼajuncaʼ pantsʼiquis pus va lakatam taxtokni ju icnaviputun. Va icnaviniputun ju ixkʼachat ju Cristo. Para ni acniyaʼ pus palai kʼox cajunaʼ ju quilacata. 22 Para ni actitsucuyaʼ alacatsʼunin pus laich icʼamalacaʼini ju aliʼin ixlacata ju Cristo. Pus ju chunch jantu iccʼatsai tamalhch ju acsacxtuyaʼ. U acniputunach u jantu. 23 Pus na lhu alin ju quiʼatalacpastʼacʼat. Na icniputun ni laich actʼatolanta ju Cristo. Ju chunch palai kʼox cava ju quilacata. 24 Para palai tasqʼuini ni actitsuculhcaʼ alacatsʼunin ni laich aclaʼaktaijuyau ju uxijnan. 25 Chai ni iccʼatsai ni quilamaktasqʼuiniyaucaʼ pus iccʼatsai ni actsucuyacaʼ alacatsʼunin ni laich aclaʼaktaijuyau ni laich palai alhilacʼapʼinaʼitʼit ju Cristo chai palai alhikʼachʼanaʼitʼit. 26 Chai acsni tavanan calalaktsʼinchokoyau pus laich alhilakʼayayaʼitʼit ju Cristo Jesús ni quimaxtulh lacapulachʼin. 27 Para aktsʼiya atsʼucʼutʼit tachi ju lhijunch ni lhilacʼapʼinatʼit ju Cristo. Ju chunch mas aclaʼantachau laktsʼinin u jantu para ackʼasmatlich ju milacataʼan ni va tachi lhilacʼapʼinatʼit ju Cristo chai va lakatam untʼatʼit. Vachuʼ ackʼasmatlich ni laʼaktʼaiʼuyatʼit ni jantu tuʼuʼ catamacʼapʼaniyan ni jantu alhilacʼapʼitʼit ju chivinti ixlacata ju Cristo. 28 Jantu alakʼaʼitʼit ni catamakʼantalhanayan ju taxcayan. Chai ni taxcayan pus pumachakxacan ni catatsʼankʼakʼalhiyach ju yuʼunch. Chai ju uxijnan ni laich achʼixaʼitʼit tuchi tapumamakʼalhkʼajniyan pus apʼucʼatsʼayaʼitʼit ni yuchi ju Dios ju taʼaktaijuyan chai aktsʼiya catamakʼalhtaxtuyan. 29 Pus ju Dios jantu va yuʼ xatalhisacxtuyan ni laich xalhilacʼapʼinaʼitʼit ju Cristo. Para vachuʼ talhisacxtuyan ni laich amakʼalhkʼajnanaʼitʼit ixlacata yuchi. 30 Pus ju uxijnan chai ju quitʼin vaklhtam chun mamakʼalhkʼajnicanau ixlacata yuchi. Pus ju uxijnan quilalaktsʼiuch acsni xacmamakʼalhkʼajnican. Chai ju chavai kʼasmatʼatʼit ni vana va chun ju icmamakʼalhkʼajnican.
1 Pus ju uxijnan aktsʼiya tamatankʼoxaxkʼayatan ju Cristo. Chai na kʼachʼanatʼit ni tamapainiyan ju yuchi. Chai ju Spiritu Santu tʼajun lamiʼalhunutʼan. Chai ju Dios tanavinitan kʼai lamapainin. 2 Pus ni chunch ju tanavinitan ju Dios pus aquilamakʼankʼachayau ju quitʼin. Va lakatam aʼuntʼit chai alamapʼainitʼit. Chach va lakatam valh ju miʼatalacpastʼacʼatʼan chai chach va lakatamch valh ju tuchʼi navipʼutʼunatʼit. Chai ni anaviyaʼitʼit ju chunch pus slivasalh na ackʼachanach. 3 Jantu anavitʼit ju va minkʼachatʼan miʼakstuʼan nin yuchi ni laich anavitʼit tuʼuʼ va ixlacaʼatalh ni xakʼai atʼalacʼasuyaʼitʼit. Alai va atʼalacʼatʼicstʼitʼit. Chai palai kʼox alhiulatʼit ju mintʼalapanac. Palai jantu miʼakstuʼan. 4 Jantu va yuchi ju anavitʼit cuenta ta yu laich kʼox atsʼucʼuyaʼitʼit miʼakstuʼan. Para vachuʼ anavitʼit cuenta ta yu laich apʼuʼaktʼaiʼutʼit ju aliʼin. 5 Chach chunch va ju miʼatalacpastʼacʼatʼan tachi ju ixjunita ixʼatalacpastʼacʼat ju Cristo Jesús. 6 Ju yuchi mas ixtʼachunchach junita ju Dios para maconchalhcaʼ ju ixpuxakʼai ju lactʼiyan. 7 Chai lakʼaʼilh ni jantu catalacasu pantsʼiquis tachi ju Dios. Talacasuchilh ju ani tachi ju tam xalapanac acsni tavanan lapanac quitsucuchilh ju ani lacamunutpaʼ. 8 Chai acsni lapanac tsucuchilh ju ani pus talacatʼicstʼichokolh aliʼ. Quiclacaʼinilh tachi ju ixnajunta ju Dios chai lakʼaʼilh ni tamakni mas na lhimaxan tamapasalh ni tachi ju tam kʼai alactuʼunuʼ taʼulhtulh ni tamaknilh ju lacacurus. 9 Chai ni chunchach ju xanavi ju Jesús pus ju Dios slivasalh lakʼaya chai lhimapakaʼulh xakʼai. Matiʼ apumatam ju ixtʼachunch junita. 10 Ju chunch tachi chun ju tavilanancha lactʼiyan chai ju quijnanʼan ju tʼonau ju ani lacatʼun chai ju taʼanta lacajipi cataʼaktsokotaniyau ju Jesús acsni calakʼayayauch. 11 Chai tachi chun ju lapanacni catanonaʼ ni yuchach ju ucxtin ju Jesucristo. Chai ju chunch calakʼayacanaʼ ju quimpaiʼan Dios. 12 Pus ji quiʼalakʼavin ju uxijnan aktsʼiya xaquilaquiclacaʼiyauch acsni xaclatʼavilhchaucaʼ. Chai ju chavai ni jantu iclatʼavilhchau pus palai tasqʼuini ni aquilaquiclacaʼiu. Chai ju chavai ni alin ju sastʼi miʼatsucuntiʼan pus chunchach ju atsʼucʼutʼit tachi ju kʼachani ju Dios. Chai atʼalhonitʼit. 13 Pus yuchi ju Dios ju chʼalhcatnan lamiʼalhunutʼan ni anavinipʼutʼunaʼitʼit ju ixkʼachat chai ju yuchi cataʼaktaijuyan ni laich anaviyaʼitʼit. 14 Tachi chun ju najun ju Dios ni anavitʼit pus anavitʼit. Para jantu va lacatalhkʼamti. Chai jantu va lakatʼui anavitʼit ju miʼatalacpastʼacʼatʼan. 15 Ju chunch jantu lai xamatiʼ catitamucʼanin ju mintalakʼalhinʼan. Chai salaka atsʼucʼutʼit ni isʼaskʼatʼan Dios untʼatʼit. Chunch ju atsʼucʼutʼit mas anch ju tʼonatʼit junta taʼalin ju lapanacni ju na taʼalactuʼunun. Pus ju laʼixʼucxlacapuʼan ju yuʼunch ju uxijnan chunch ju untʼatʼit tachi ju tuʼuʼ maclhcu ju mapulhcui junta na putsʼista. 16 Chai lamiʼatsucuntiʼan ju uxijnan amasuniyaʼitʼit ju aliʼin ni lai xtʼakʼa ju Dios ju atsucunti jonkʼalhita. Chai ni chunch ju atsʼucʼuyaʼitʼit pus aclhikʼachanach acsni tavanan caminchokoyaʼ ju Cristo. Accʼatsayaʼ ni jantu tsʼankʼata ju lhichʼalhcat ju xacnavi lamilhiʼuxijnan para aktsʼiya lhitapalata ni xaclajunau ixchivinti Dios. 17 Pus ju uxijnan ni chunch ju atsʼucʼuyaʼitʼit tachi ju iclajuntau pus ju miʼatsucuntiʼan chunch cajunaʼ tachi ju tuʼuʼ lhakʼailaktsʼin laʼixmacni Dios. Chai ju quitʼin mas tasqʼuini ni acmaknicanaʼ para aclhikʼachanach ni chunch cajunlh ju miʼatsucuntiʼan. Chai ju uxijnan vachuʼ akʼachʼanaʼitʼit astan. 18 Pus kʼaixtamch quilatʼakʼachanau ju quitʼin mas chunch ju catapasayaʼ ju laquiʼatsucunti chai ni chunch cajunaʼ ju miʼatsucuntiʼan. 19 Pus chani ju icpastʼacʼa ni va calacasqʼuinaʼ ju quiʼucxtin Jesús. Pus icnajun ni acmalakachayanta ju Timoteo. Ju chunch acsni caquitaspʼitʼanta pus aquijunaʼ ta yu tʼonatʼit chai aclhikʼachanach. Jantu xamatiʼ ju ani tavilanalh ju chunch alacpastacnan tachi ju quitʼin. Va yuchi ju Timoteo. Ju yuchi vachuʼ lacasqʼuin ni kʼox atsʼucʼuyaʼitʼit laʼixmacni Dios. 20 Para matiʼ xamatiʼ akʼantam ju chunch alacpastacnan. 21 Ju aliʼin ju ani tavilanalh va tanaviputun ixkʼachatʼan isʼakstuʼan. Jantu tanaviputun ixlhichʼalhcat ju Cristo Jesús. 22 Para ju uxijnan mispʼayatʼit ju Timoteo chai cʼatsʼayatʼit ni na kʼox lapanac ju yuchi. Pus ju yuchi quintʼachʼalhcatnalh ismasuca ju chivinti ixlacata ju Jesús. Ju yuchi quiʼaktaiju tachi ju aktaijui ixpai ju tam tsʼalh. 23 Pus icnajun ni lana acmalakachayanta ju yuchi acsni accʼatsayach ta yu aquintalakʼoxiniyaʼ ju quilhamakʼan. 24 Chunch aclayaʼ mas iclhilaksi ju quiʼucxtinʼan Jesús ni vachuʼ lai vatsʼalhti acʼancha quitʼin quiʼakstu. 25 Pus iccʼatsai ni aktsʼiya tasqʼuini ni lana acmalakachachokoyanta ju Epafrodito. Ju yuchi quilakʼau junita chai quintʼachʼalhcatnaʼ ixnajunca ixchivinti Dios. Pus ju uxijnan malakʼachʼanichitʼit ju ani ni laich aquixtakniyaʼ ju tumin ju xamakʼaixtʼokʼatʼit ju ixlacata quimaktasqʼuinit chai ni lai aquiʼaktaijuyaʼ. 26 Pus ju yuchi na talaktsʼinchokoputunan minchuxʼan ju uxijnan. Vachuʼ na ixʼamakʼaninin acsni cʼatsalh ni cʼatsʼachitʼit ni na ixtakʼankʼai. 27 Pus vasalh na ixtakʼankʼai. Na ixniputun. Para ju Dios aktaijulh lacaʼamapaininti. Chai jantu va yuchi ju aktaiju para vachuʼ ju quitʼin ni jantu caʼalilh palai lhu ju quiʼamakʼanit. 28 Pus ni na ixlhamakʼanininatʼit pus yuchi palai vatsʼalhti iclhimalakachaputunacha ju Epafrodito. Ju chunch acsni alaktsʼinchʼokʼoyaʼitʼit akʼachʼanaʼitʼit. Chai ju quitʼin palai jantu na lhu acʼamakʼanininaʼ ni accʼatsayaʼ ni lhikʼach amaklhtʼayananchʼokʼoyaʼitʼit. 29 Pus acsni cachaʼananta lhikʼach amaklhtʼaʼitʼit chai axtʼaknitʼit lakʼailaktsʼiuch ju Dios. Alakʼayatʼit ju tam lapanac ju chunch junita. 30 Chunch alhilaktsʼintʼit ni laʼixlhichʼalhcat ju Cristo va lacatsʼunin lana na ixniputun. Jantu tuʼuʼ xalhiulai ju isʼatsucunti ni laich xaquiʼaktaijui. Ju yuchi navilh ju jantu lai xanaviyatʼit ni jantu ani ju vilatʼit.
1 Pus ju chavai ji quiʼalakʼavin alhikʼachʼantʼit ju Jesucristo. Ju quitʼin jantu jeks icʼui mas aktam aclaʼatsʼoknunichokoyau ju tuchi xaclajunau makʼanchich. Pus ni aclajunchokoyau ca laich aktʼaiʼucʼanatʼit ni jantu aʼokxchʼokʼocʼanaʼitʼit. 2 Alhistʼaccʼantʼit ni jantu cataʼokxchokʼoyan ju anuch lapanacni ju na lhquiliqui ju isʼatsucuntiʼan chai ju tanavi ju macxcai chai ju tanajun ni takʼalhtaxtuputuncan ma aktsʼiya tasqʼuini ni acchʼucʼucalh tachi ju talai ju quintʼaʼisraelitanin ni laich cataputasuyaʼ ni ixlapanacni Dios tajunita. 3 Para ju quijnanʼan pumalacasuyau ni ixlapanacni Dios juntau ni lakʼayayau ju yuchi laquiʼalhunutʼan ju salaka junita. Lakʼayayau ju Dios tachi ju quintajunan ju Spiritu Santu. Chai lhikʼachanau ju Cristo Jesús ni yuchach ju quintamakʼalhtaxtuyan. Jantu lhilaksiyau ju tuʼuʼ ju lai canaviu ju va laquiʼakstuʼan ju lai caputakʼalhtaxtu. 4 Ni alin tam xamatiʼ ju laich calhilaksichokocalh isʼakstu chai canaulh ni laich caʼixnavilh tuʼuʼ ju ixlhiyuchi ju Dios caʼixmakʼalhtaxtulh pus ca quitʼinch ju laich acnaulh ju chunch ni na xacmuctaxtui tachi ju najun lacalhamapʼaksin. 5 Pus xacpacxanta lakatsajin avilhchan acsni icchʼucʼucalh. Chai ju quitʼin stavasalanti israelita icjunita. Makʼaniya ixpapanti Benjamín icjunita. Ju quimpai quinati ixtachivinin ju lhihebreo chai vachuʼ chunch ju icchivinin. Chai xaclhilaksi ju ixlhamapʼaksinʼan ju fariseonin. Chai ju yuʼunch lana ixtamuctaxtukʼojui ju ixlhamapʼaksin ju Moisés. 6 Chai ni tapʼastu xaclacasqʼuin ni ixtalhonicalh ju ixlhamapʼaksin ju Moisés yuchi iclhiʼamamakʼalhkʼajni ju ixtalhilacaʼanta ju Cristo ni xacnajun ni jantu chun ixtalai ju yuʼunch. Pus jantu xamatiʼ ju lai xaquijuni ni jantu icmuctaxtukʼota tachi chun ju najun lacalhamapʼaksin. 7 Para tachi chun ju ani taxtokni ju na kʼoxich xaclhiulai pus ju chavai jantu tuʼuʼ iclhiulai va ixlacata ni icmispai ju Cristo. 8 Pus vasalh. Tachi chun ju ani taxtokni jantu tuʼuʼ iclhiulai va ixlacaʼatalh ni icmispai ju chavai ju tuʼuʼ ju palai kʼox. Yuchi ju quiʼucxtin Cristo Jesús. Pus va ixlacata yuchi icmaconkʼota tachi chun ju anuʼ taxtokni ju kʼoxich xaclhiulai. Chai tachi ju va amacxtalh icʼalhiulai ni laich acmispayaʼ alai ju Cristo. 9 Icmaconkʼota ni laich va lakatam actʼava ju yuchi. Chai ju chunch vachuʼ alinch ju soknicʼa quiʼatsucunti ju quixtaknita ju Dios acsni iclhilacaʼalh ju Cristo. Ju chavai jantu icnajun ni lai soknicʼa acva va ixlacata ni icnavi tachi ju najun lacalhamapʼaksin. 10 Slivasalh icmispaputun ju Cristo. Pus ju Cristo lokʼonchokolh acsni ixmacnucanta chai iclacasqʼuin ni catasu laquiʼatsucunti ixtachaput ju yuchi chai ni laich acchʼixlh ju makʼalhkʼajnat tachi ju lalh ju yuchi. Chai iclacasqʼuin ni caʼuctaxtulh laquiʼatsucunti ni tachi ju va icnita ixlacata ju alactuʼunti tachi ju quilhcata ju Dios. 11 Ju quitʼin icnavikʼoputun tachi ju najun ju Dios ni laich aquimalokʼonichokolh ju yuchi laquiʼaninti. 12 Jantu icnajun ni icchaʼanta ju chunch ju laquiʼatsucunti nin yuchi ni lai acnaulh ni na icsoknicʼa. Para ictailhiʼanch ni tsʼa ma laich acmuctaxtu laquiʼatsucunti tachi ju quilhcanita ju Cristo Jesús. 13 Pus ji quiʼalakʼavin ju quitʼin jantu icnajun ni icchaʼanta ju chunch ju laquiʼatsucunti. Para chani ju iclai. Ju tapasata ju laquiʼatsucunti iccapkʼotach. Chai va yuchi ju icnavi cuenta ta yu laich palai soknicʼa actsucuyaʼ. 14 Ixlhichux quiʼalhunut icnavi cuenta ta yu laich acpuchaʼanaʼ ju lhikʼox tachi ju lhcata ju Dios. Chai ju chunch acsni acchaʼananta ju lactʼiyan junta aquintatʼasaniyan ju Dios pus laich acʼamaklhtayananaʼ ju quintalhaja. Yuchi ni actʼatolaʼ ju Cristo ni iclhilaksita ju yuchi. 15 Pus tachi chun ju quijnanʼan ju tsucuyau tachi ju kʼachani ju Cristo tasqʼuini ni chunch ju calau tachi ju iclajuntau. Para ni jantu chun ju machʼakxayatʼit pus ju Dios catamamachakxaniyan ni vasalh chunch junita tachi ju iclajuntau. 16 Va yuchi ni tasqʼuini ni camuctaxtuyau chux tachi ju machakxayau ju chavai. 17 Quiʼalakʼavin chunchach ju atsʼucʼutʼit tachi ju quilalaktsʼinau ju quiʼatsucunti. Chai anavitʼit cuenta ju aliʼin ju chunch tatʼajun vachuʼ. 18 Na paklhu xaclajunau ni na lhu taʼalin ju lapanacni ju ixtʼalaxcai Cristo tajunita. Lana jantu tuʼuʼ talhiulai mas quinichilh ju Cristo ju lacacurus. Chai aktam aclajunchokopalau ju chunch chai na ickʼalhun acsni iclaʼatsʼoknuniyau ju chunch. 19 Pus ju yuʼunch catatsʼankʼakʼalhiyaʼ. Pus va ixkʼachatʼan isʼakstuʼan tanaviputun. Talhitakʼayai ju yuchi ju alai tasqʼuini ni caʼixtalhimaxanalh. Va yuchi ju xataxtokni ju ani lacamunutpaʼ ju tapastactʼajun. 20 Para ju quijnanʼan amachakʼan lactʼiyan juntau. Chai pacxanauch ju quiʼamakʼalhtaxtunuʼan ju cataxtuyanta. Yuchi ju quiʼucxtinʼan Jesucristo. 21 Chai ju yuchi aquintamapaxaniyan ju quilacatunaʼan ju na tsamai. Chai aquintaxtakniyan quilacatunaʼan tachi ixlacatuna ju yuchi. Chai ju yuchi na cʼus junita. Pus ju Jesús alin ju ixtachaput chai yuchi lai aquintalhinaviyan chunch. Chai ni alin ixtachaput pus lai vachuʼ tʼalalhajai tachi chun ju taxtokni.
1 Pus ni chunch cajunaʼ ju quiʼatsucuntiʼan astan yuchi iclalhijunau ni va tachi alhilacʼapʼitʼit ju Jesucristo. Pus ju uxijnan slivasalh tuʼuʼ iclalhiulayau chai na iclalaktsʼimputunauch. Na iclalhikʼachanau chai tachi ju va lhakʼailaktsʼin ju xaqʼuixtakni ju Dios ni laich xalhilacʼapʼinatʼit ju Cristo ju uxijnan. 2 Ictapainini ju Evodia chai ju Síntique ni va lakatamch catanavilh ixʼatalacpastʼacʼatʼan tachi ju lhijunch ni ixtʼiyunʼan talhilacaʼanta ju Jesucristo. 3 Chai ictapaininiyan ju uxintʼi ju vasalh quintʼachʼalhcatnaʼ unitʼa. Ictapaininiyan ni aʼaktʼaiʼutʼich ju anuch chakolun ni laich va lakatam catava. Pus ju yuʼunch quintatʼachʼalhcatnanta kʼaixtam ixnajunca ju chivinti ixlacata ju Cristo. Vachuʼ tatʼachʼalhcatnanta ju Clemente chai ju aliʼinch ju quintatʼachʼalhcatnanta vachuʼ ju quitʼin. Chai ixtapakaʼutʼan ju yuʼunch si taʼokslanankʼojui junta taʼokslanan ju ixtapakaʼutʼan tachi chun ju alin isʼatsucuntiʼan ju conkʼalhiyanta ju lactʼiyan. 4 Va tachi alhikʼachʼantʼit ju Jesús. Aktam iclajunchokopalau ni akʼachʼantʼitch. 5 Chach tacʼatsa tachi chun ju lapanacni ni lackʼoxin lapanacni untʼatʼit. Apʼastʼactʼit ni va tsʼalhti caminaʼ ju quiʼucxtinʼan Cristo. 6 Jantu tavanan tuʼuʼ alhamakʼaninintʼit ju tuchi tapasai lamiʼatsucuntiʼan. Alai aʼunitʼit ju Dios mas va tuchi ixtalakxtuch cava. Atʼapʼaininitʼit chai vachuʼ aʼunitʼit lakʼailaktsʼiuch. 7 Chai ju chunch ju Dios catalhistacniyan ju miʼalhunutʼan ni jantu calacʼanaʼ. Chai ju chunch slivasalh na kʼox acʼatsʼananaʼitʼit. Pus jantu lai machakxacan tas tucan va ti jonkʼota ju ixʼaʼaktaijunti ju Dios ni lai quintaʼaktaijuyan ni jantu tavanan calacʼanaʼ ju quiʼalhunutʼan. Pus ju Dios ni talhistacniyan ju miʼalhunutʼan tachi chun ju uxijnan ju lhilacʼapʼintʼatʼit ju Cristo Jesús pus jantu na va lhu caʼalinaʼ ju miʼatalacpastʼacʼatʼan. 8 Pus va yuchi ju ani ju iclajumputunau ji quiʼalakʼavin. Pus apʼastʼactʼit tachi chun ju stavasalanti chai tachi chun ju kʼox chai tachi chun ju soknicʼa chai tachi chun ju jantu macxcai atalacpastʼacʼat chai tachi chun ju cʼus alhiulacan chai tachi chun ju kʼox ixlacata ju aliʼin. Apʼastʼactʼit tachi chun ju kʼox alhiulacan chai tachi chun ju lai pulakʼayacan ju Dios. 9 Pus anavitʼit ju tuchi iclamasunitauch chai tuchʼi lanitʼatʼit chai tuchi iclajuntau chai tuchʼi laktsʼintʼatʼit ni icnavich. Chai ju chunch ju Dios catatʼatolanch. Yuchi ju quintalhistacniyan ju quiʼalhunutʼan ni jantu calacʼanaʼ. 10 Slivasalh na ickʼachan laʼixmacni ju quiʼucxtin Jesús ni quilapastacchokoyauch ju quitʼin. Ca aktsʼiya xaquilapastʼacʼauch para tus chavai ju lai xaquilaʼaktaijuyau. 11 Jantu icpunajun chunch ni va ixʼalin ju quimaktasqʼuinit. Pus ju quitʼin iclanitach ni laich ackʼachanach acsni alinch ju quintumin chai acsni matich tuʼuʼ. 12 Icmispai ju lhiquilhpatiniʼ chai icmispai ju lhimakʼaliʼ. Icmispakʼota mas va ta cava ju quiʼatsucuntiʼan. Icmispata ju avilhchan acsni xaclhilatach. Chai icmispata ju avilhchan acsni na xacchavanita. Chai icmispata ju avilhchan acsni ixʼalin ju quintuʼuʼ. Chai icmispata ju avilhchan acsni na xacmakʼalhkʼajnan laquimaktasqʼuinit. 13 Pus ju quitʼin sich kʼox iclhiulai mas va tuchi min laquiʼatsucunti va ixlacaʼatalh ni yuchi ju Cristo ju quiʼaktaijui ni chunch accʼatsa. 14 Pus mas icmispata chux para na kʼoxich ju navitʼatʼit ni xaquilaʼaktaijuyau laquimakʼalhkʼajnat ju ixʼalin ju chavai. 15 Chai ju uxijnan ji amachakʼan Filipos cʼatsʼayatʼit ni jantu xamatiʼ sia yuʼunch ju talhilacaʼanta ju Cristo ju quintaʼaktaiju lacatumin acsni ictaxtucha lamintʼunʼan junta Macedonia juncan chai ictaiʼulalh ixnajunca ju chivinti ixlacata ju Jesús. Va uxijnan ju xaquilaʼaktaijuyau. 16 Chai acsni xacvilhchalhcaʼ ju lakʼachakʼan Tesalónica jantu va paktam ju xaquilalhikʼailaktsʼinau tuʼuʼ ixlacata ju quimaktasqʼuinit. 17 Para jantu va yuchi ju iclalhipuxcoyau ni aquilaxtakniyau tuʼuʼ. Alai iclacasqʼuin ni cataxtakniyan ju Dios palai kʼox miʼatsucuntiʼan ni xtʼakʼatʼit ju milhakʼailaktsʼinʼan. 18 Pus ju chavai alinkʼojui chux tuchi icmaktasqʼuini. Na kʼox ictʼajun ju chavai. Pus va ixlacaʼatalh ni icʼamaklhtayanantach ju tuchʼi malhipʼinitʼit ju Epafrodito acsni malakʼachʼatʼit pus lana jantu tuʼuʼ icmaktasqʼuini aliʼ. Ju milhakʼailaktsʼinʼan ju xaquilaxtakniyau ju quitʼin tachi ju va jun Dios ju xalhikʼailaktsʼinatʼit. Chai ju yuchi slivasalh na kʼoxich lhiulai. 19 Chai yuchi ju quiDios ju cataxtakniyan tachi chun ju makʼancʼacxatʼit. Slivasalh na kʼox ju cataxtakniyan ni na lhu alin ju kʼox laʼixmacni ju Cristo Jesús. 20 Chach lakʼayacalh ju quimpaiʼan Dios tus va tavananch cava. Vasalh chunch caʼulhtucalh. 21 Amacʼamitʼit tachi chun ju yuʼunch ju talhilacaʼanta ju Jesucristo ju tavilanancha ju anch. Chai tachi chun ju quiʼalakʼavinʼan ju quintatʼavilanch ani tamacʼamiyan ju uxijnan. 22 Tachi chun ju lapanacni ju amachakʼan ani ju talhilacaʼanta ju Cristo tamacʼamiyan. Chai ju palai taʼapastacnan yuʼunch ju tachʼalhcatnan laʼixchakaʼ ju kʼai ucxtin César. 23 Ictapainini ju quiʼucxtinʼan Jesucristo ni catanaviniyan lamapainin minchuxʼan ju uxijnan.
1 Ju quitʼin icPablo. Ixtamalakachan ju Jesucristo icjunita ni chunch ju xalacasqʼuin ju Dios. Chai vachuʼ ani quintʼavi ju quilakʼauʼan Timoteo. 2 Pus va iclamacʼamiyau ju uxijnan ji quiʼalakʼavin ju vilhchitʼit ju lakʼachakʼan Colosas. Ju uxijnan vachuʼ lhilacʼapʼintʼatʼit ju Cristo. Pus ictapainini ju quimpaiʼan Dios ni cataʼaktaijuyan ju uxijnan lacaʼamapaininti chai catalhistacniyan ju miʼalhunutʼan ni jantu calacʼalh. 3 Acsni ictapaininiyau ju Dios ixpai ju Jesucristo ju milacataʼan pus va tachi icxtakniyau lakʼailaktsʼiuch ni xalhilacʼapʼinatʼit ju yuchi. 4 Va icpunonau chunch ni ickʼasmatʼau ni lhilacʼapʼintʼatʼit ju Cristo Jesús chai ni mapʼainiyatʼit tachi chun ju aliʼin ju vachuʼ talhilacaʼanta ju Dios. 5 Chunch ju layatʼit ni vasalh lacʼaʼiyatʼit ni aktsʼiya aquintaxtakniyan ju Dios tuchi quintakʼalhtasunitan ni aquintaxtaknitachan ju lactʼiyan. Pus makʼanchich kʼasmatʼatʼit ju chivinti ju stavasalanti junta najun ta yu lai putakʼalhtaxtucan. Chai acsnich vachuʼ kʼasmatʼatʼit ixlacata ju anuʼ ju quintakʼalhtasunitan ju Dios. 6 Chai ju anuʼ chivinti ju uncʼantʼatʼit ju uxijnan vachuʼ kʼasmatkʼocanta ixlhilacaputsʼun ju lacamunutpaʼ. Chai yuchach ju chivinti ju amapaxani isʼatsucuntiʼan tachi chun ju talacaʼita. Chai palai lhu ju tatʼajun lacaʼinin ju anuʼ chivinti. Chai vana va chun tamapaxanitan ju Dios ju miʼatsucuntiʼan tus acsni kʼasmatʼatʼit ni tanavinitan lamapainin ju Dios. Chai ju uxijnan lacʼaʼitʼatʼit ni vasalh lamapainin ju xatanaviniyan. 7 Chunchach ju tamasunin ju Epafras. Ju yuchi vachuʼ navini ixlhichʼalhcat ju Dios tachi ju quijnan. Chai na icmapainiyau. Chai ju yuchi na muctaxtui laʼixlhichʼalhcat ju Cristo lamilhiʼuxijnan mas jantu lai xacʼanachau laʼaktaijunin ju quijnan. 8 Yuchi ju quintamavasalanin ni quilamapainiyau. Chai ni tʼajun ju Spiritu Santu lamiʼalhunutʼan vachuʼ pus yuchi lai quilalhimapainiyau ju quijnan. 9 Pus ni icjuncantauch ni lhilacʼapʼinatʼit ju Jesucristo pus yuchi jantu tavanan iclhiʼastacnanau ixtapaininica ju Dios ju milacataʼan. Icsqʼuiniyauch ni vasalh catamamispaniyan tuchi lacasqʼuin ju Dios ni anaviyaʼitʼit. Icsqʼuiniyauch ni yuchi ju Spiritu Santu ju cataxtakniyan ju kʼox mintacʼatsanʼan ni laich amachʼakxayaʼitʼit ixkʼachat ju Dios. 10 Ju chunch laich atsʼucʼuyaʼitʼit tachi ju lhijunch ni lhilacʼapʼintʼatʼit ju quiʼucxtinʼan Jesús. Chai mas va tuchʼi naviyatʼit laich anaviyaʼitʼit tachi ju slivasalh kʼox calhiulayaʼ ju yuchi. Chai ju chunch vachuʼ lai anaviyaʼitʼit tijpachux ju kʼox chai lai palai amispʼayaʼitʼit ju Dios. 11 Vachuʼ icsqʼuinauch ni slivasalh ixlhichux ju miʼalhunutʼan ju alhilacʼapʼitʼit ju Dios. Chai lai chunch alatʼit ni na kʼai ju ixtachaput ju Dios. Chai ni na pʼas lhilaksiyatʼit ju Dios pus lai achʼixkʼoyaʼitʼit mas va tuchi camilh lamiʼatsucuntiʼan chai jantu jeks aʼuyaʼitʼit. Alai va tachi akʼachʼanaʼitʼit. 12 Vachuʼ lai aʼunaʼitʼit lakʼailaktsʼiuch ju quimpaiʼan Dios ni yuchi ju quintalakʼoxinin ju quiʼatsucuntiʼan ni laich vachuʼ camakʼamaklhtayananau ju tuchi najunta ju yuchi ni aquintaxtakniyan tachi chun ju quijnanʼan ju lhilacaʼantauch ju Jesús. Chai ju tuchi aquintaxtakniyan anchach ju makʼatacha junta vilhcha ju Dios junta vasalh atuncunuʼ junita. 13 Pus yuchi ju Dios ju quintamakʼalhtaxtun acsni ixtʼonaucaʼ laʼixtachaput ju lhinajun lacaʼatatsʼisni. Chai ju chavai yuchi ju Jesucristo ju lhinajun laquiʼatsucuntiʼan. Yuchi ju istsʼalh Dios junita. Chai ju Dios na mapaini ju yuchi. 14 Chai ni lhilacaʼanauch ju yuchi pus quintamalakxtutanch laʼixʼacʼalhni. Chai quintamacʼacxanitan ju quiʼalactuʼuntiʼan. 15 Mas jantu lai laktsʼincan ju Dios para ju istsʼalh ju Jesucristo juncan amalacasunilh ju lapanacni ta yu junita ju ixpai ni vana va chunch junita ju yuchi. Pus ju Jesús yuchi ju pʼulh ixtʼajun. Astan anavicalh tachi chun ju taxtokni. 16 Yuchi ju anavikʼo tachi chun ju taxtokni ju alin ju lactʼiyan chai ju alin ju ani lacatʼun. Chux ju lai laktsʼincan chai ju jantu lai laktsʼincan. Yuchi ju anavikʼo ju anquilhnin ju tatolai laʼixpuʼucxtinʼan chai ju aliʼin anquilhnin ju tamaklhinajun chai ju xalactʼicstʼin ucxtinin sia yuʼunch chai tachi chun ju anquilhnin ju alin ixtachaputʼan. Yuchi ju Jesús ju anavikʼo chai va ixlacata isʼakstu ju lhinavilh chunch. 17 Ju Cristo aktsʼiya ixtʼajunch mas tucaʼ ixʼalin ju ani taxtokni. Chai yuchi ju alhistackʼojui tachi chun ju taxtokni ju chavai ni catatailhiʼalh tachi ju ixʼalhcanicantach. 18 Chai tachi ju quiʼaktsulhʼan ni yuchi ju lhinonkʼojui chux quilacatunaʼan pus vana va chun ju Cristo. Laich acnaulh ni ixlacatuna Cristo juntau tachi chun ju quijnanʼan ju lhilacaʼantauch ju yuchi. Chai yuchi ju quiʼaktsulhʼan junita ni yuchi ju quintalhijunkʼoyan laquiʼatsucuntiʼan. Yuchach ju quintaxtakniyan ju sastʼi quiʼatsucuntiʼan. Chai ni yuchi ju pʼulhnan lokʼonchokolh laʼixʼaninti chai jantu tavanan xanichokoi tachi ju talalh ju aliʼin ju ixʼamalokʼonicanta pus yuchi xakʼai lhijunita tachi chun ju taxtokni. 19 Pus ju quimpaiʼan Dios lacasqʼuilh ni lana catalacasu ju Jesús laʼisʼatsucunti ju ani lacamunutpaʼ tachi ju junita isʼakstu ju xapai. 20 Vachuʼ lacasqʼuilh ju Dios ni laʼixlacata ju Cristo laich caʼapunavichokoyaʼ ixʼamigojni tachi chun ju lapanacni. Chai lhikʼoxamixlh acsni taxtunilh ixʼacʼalhni ju Cristo lacacurus. Pus laʼixlacata ju Cristo laich canavikʼoyaʼ ixʼamigojni Dios tachi chun ju tatʼajun ju ani lacamunutpaʼ. Chai vachuʼ laʼixlacata ju Cristo tachi chun ju taxtokni ju ani lacamunutpaʼ laich cajunchokoyaʼ tachi ju ilhcata ju Dios ju pʼulhnan. 21 Pus ju makʼanchich vachuʼ ju uxijnan jantu ismispʼapʼutʼunatʼit ju Dios. Ju lamiʼalhunutʼan va ixtʼalaxcʼayatʼit ju Dios ni ixnaviyatʼit ju macxcai taxtokni. 22 Para ju chavai ju Jesús tanavitan ixʼamigojni ju Dios laʼixʼaninti acsni xtucmucʼacalh ixlacatuna ju lacacurus. Ju chunch ni laich catalhiʼanan laʼixʼucxlacapuʼ chai ju anch alhimispʼacʼanaʼitʼit ni vasalh isʼaskʼatʼan Dios untʼatʼit chai salaka untʼatʼit chai matich ju mintalakʼalhinʼan. 23 Chunch ju catanaviyan ni va tachi alhilacʼapʼinaʼitʼit ju Jesús ixlhichux ju miʼalhunutʼan chai jantu va tam tam anonaʼitʼit chai jantu va amacʼonaʼitʼit ixchivinti Dios ju ixʼuncʼantʼatʼit. Yuchi ju anuʼ chivinti ju najun ni lai amakʼalhtʼaxtʼucʼanaʼitʼit. Chai ju uxijnan kʼasmatʼatʼit ju anuʼ chivinti chai vachuʼ alacjuncanta tachi chun ju lapanacni ju tatʼajun ju ani lacamunutpaʼ. Pus ju quitʼin icPablo. Chai vachuʼ icxtaknicanta ju quilhichʼalhcat ni acʼamalaninilh ju lapanacni ju ani ixchivinti Dios. 24 Na ickʼachan mas ictʼajun makʼalhkʼajnaʼ ju milacataʼan ni laich alhilacʼapʼitʼit ju Cristo. Ictʼajun makʼalhkʼajnaʼ tachi ju Cristo ni makʼalhkʼajnanta ju quilacataʼan quinchuxʼan. Iclhimakʼalhkʼajnan vachuʼ ixlacaʼatalh ju ixlacatuna ju Cristo. Pus ju ixlacatuna ju Cristo nomputun ni yuʼunch ju talhilacaʼanta ju yuchi. 25 Dios ju quisacxtuta ni amamakaʼunuʼ acva ixlacataʼan ju yuʼunch ju tatʼajun lhilacaʼanin ju Jesús. Iclhixtaknicanta ju ani lhichʼalhcat ni aclajunkʼoyauch ju uxijnan tachi chun ju ixchivinti Dios. 26 Aclajunau ju uxijnan ju anuʼ chivinti ju jantu tavanan ixʼamavasalanicanta ju lapanacni ju makʼanch ixtatʼajun. Para ju chavai amavasalanicanta tachi chun ju talhilacaʼantach ju Cristo. 27 Pus ju uxijnan ju jantu israelitanin untʼatʼit ju Dios talacasqʼuinin ni amachʼakxayaʼitʼit ni slivasalh na kʼox ju anuʼ chivinti ju jantu ixmavasalacanta. Chai ju yuchi slivasalh na kʼox junita ju milacataʼan ju uxijnan. Pus ju anuʼ chivinti najun ni tʼajun ju Cristo lamiʼalhunutʼan vachuʼ. Chai ixlhiyuchi cʼatsʼayatʼit istavasalanti ni achʼipʼinaʼitʼit ju lactʼiyan junta slivasalh kʼox junita. 28 Ju quijnan iclajunau ixlacata ju Cristo. Chai icʼalhimapʼaksiyau tachi chun ju lapanacni chai icʼamalaniyau tachi chun ju lapanacni lacakʼox tacʼatsanti. Chunch iclayau ni va iclacasqʼuinau ni chunch lana catatsuculh tachi ju kʼachani ju Cristo. 29 Yuchach ju ictʼajun lhichʼalhcatnaʼ chai slivasalh laʼixlhichux quiʼalhunut icnavi ju yuchi lacatachaput ju quixtakni ju Cristo.
1 Iclacasqʼuin ni acʼatsʼatʼit ni slivasalh na iclhamakʼaninin ju milacataʼan chai ixlacataʼan ju tavilanancha lakʼachakʼan Laodicea chai ixlacataʼan tachi chun ju aliʼin ju jantucaʼ quintamispai. 2 Iclacasqʼuin ni alhilacʼapʼitʼit ju Cristo ixlhichux ju miʼalhunutʼan ju uxijnan. Chai vana va chun catalalh ju aliʼin. Iclacasqʼuin ni va lakatamch aʼuntʼit va ixlacaʼatalh ni vasalh lamapʼainiyatʼit chai slivasalh machʼakxayatʼit ixchivinti Dios ixlacata ju Cristo. Yuchach ju jantu ixʼamavasalanican ju lapanacni ju makʼanchich. 3 Pus laʼixmacni Cristo alinkʼojui tachi chun ju atalaninti chai ju acʼatsanti. 4 Iclajunau chunch ni jantu xamatiʼ cataʼokxchokʼoyan laca tuʼuʼ cʼusi chivinti ju catajunin tachi ju va vasalh mas jantu. 5 Pus mas jantu iclatʼavilhchau para va tachi iclapastʼacʼau. Chai na iclhikʼachanch ni iccʼatsa ni va lakatamch untʼatʼit chai ni ixlhichux miʼalhunutʼan ju lhilacʼapʼintʼatʼit ju Cristo. 6 Acsni pʼulhnan uncʼantʼit ju chivinti ixlacata ju Jesucristo pus lana lacʼaʼitʼit. Pus chach tasu lamiʼatsucuntiʼan ju chavai ni va lakatam tʼaʼuntʼatʼit ju yuchi. 7 Jantu tavanan acʼaptʼit ni va lakatam tʼaʼuntʼatʼit ju Cristo. Chai palai palai atsʼucʼutʼit tachi ju kʼachani ju yuchi. Ju chunch jantu xamatiʼ lai catamacʼapʼaniyan ixchivinti Dios ju masunicʼantʼatʼitch. Chai va tachi aʼunitʼit lakʼailaktsʼiuch ju Dios. 8 Alhistʼaccʼantʼit ni jantu xamatiʼ cataʼokxchokʼoyan ju va laʼixʼatalanintiʼan isʼakstuʼan chai laʼixchivintiʼan ju jantu slivasalh. Ju yuʼunch va tajunan ju ixʼatalaninti ju ixtʼalapanacniʼan ixlacata ju xataxtokni ju ani lacamunutpaʼ ju va kʼaya talakʼayai tachi ju tuʼuʼ mas jantu lhitapalai. Jantu chunch ju tachivinin tachi ju ixnajun ju Cristo. 9 Pus ju Cristo Dios junita. 10 Chai ni tʼajun ju yuchi lamiʼalhunutʼan pus jantu tuʼuʼ makʼancʼacxatʼit. Yuchi ju alhijonkʼojui tachi chun ju anquilhnin chai tachi chun ju tachaput ju alin. 11 Chai ni ixʼanuʼ untʼatʼit ju Cristo pus tachi ju va chʼucʼucʼantʼatʼit. Para jantu va laʼixmacaʼ ju tam lapanac. Pus tachi ju va chʼucʼucʼantʼatʼit ni jantuch vana naviyatʼit ju alactuʼunti tachi ju ixlayatʼit. Chunch ju ulhtʼucʼantʼatʼit va ixlacaʼatalh ni lhilacʼapʼintʼatʼit ju Cristo. 12 Pus acsni akpaxau pus ju Dios quintalhilhcatan ni tachi ju va kʼaixtam tʼaʼacnuyau ju Cristo chai tachi ju va tʼalokʼonchokotauch ju yuchi. Chunch ju quintalhilhcatan ju Dios ni lhilacaʼanauch ju yuchi ni na tachapun chai ni yuchach ju malokʼoni ju Cristo laʼixʼaninti. 13 Pus ju makʼanchich ju Dios ixtalaktsʼinan ni tachi ju va ixnitʼatʼit va ixlacaʼatalh ju miʼalactuʼuntiʼan chai va ixlacaʼatalh ni jantu ismispʼapʼutʼunatʼit ju Dios ni jantu israelitanin untʼatʼit. Para ju chavai ni lhilacʼapʼintʼatʼit ju Cristo pus ju Dios taxtaknitan ju sastʼi miʼatsucuntiʼan chai tamacʼacxanitan ju miʼalactuʼuntiʼan. 14 Pus ju Dios xacakʼo ju anuʼ lhamapʼaksin ju xaquintamucʼaniyan ju quintalakʼalhinʼan ni jantu lai xanaviyau. Makʼosu acsni xtujcalh ju Cristo ju lacacurus. 15 Pus acsni nilh ju Cristo ju lacacurus pus ju Dios taiʼinilh ixtachaput ju xaʼucxtin lhacaticurulhni chai ju salactʼicstʼin lhacaticurulhni. Chai amalacasu ni alhajacalh. Alhajanalh ju Cristo. 16 Chai ni laʼixʼaninti xacakʼo ju Cristo ju anuʼ lhamapʼaksin ju jantu lai xanaviyau pus jantu alacʼasqʼuinitʼit ni xamatiʼ cataʼulaniyan ju mintalakʼalhinʼan ixlacata tuchʼi uyatʼit u ixlacata tuchʼi kʼotʼatʼit u va ixlacaʼatalh ni jantu maklacʼaʼiniyatʼit ju tuʼuʼ cʼatan ju chin lakatamin cʼata u lakatamin malhquiyuʼ u ni jantu lhilaksiyatʼit ju avilhchan paʼastacni tachi ju ixnajun lacalhamapʼaksin ju tsʼokʼula ju Moisés. 17 Pus tachi chun ju ani taxtokni va ixpucʼatsacan tuchi ju caminach astan. Para ju chavai ni quinitachilh ju Cristo pus jantu va na tasqʼuini ni catailhiʼancalh tachi ju ixlacan acsni tucaʼ ixquiniyachilh ju yuchi. 18 Jantu alakʼaʼinitʼit ni xamatiʼ cataʼulaniyan ju mintalakʼalhinʼan ni jantu chun layatʼit tachi ju yuʼunch. Pus ju yuʼunch tanajun ni jantu tuʼuʼ ixtapalhniʼan ni laich catalakʼaya ju tucan Dios. Alai va anquilhnin ju talakʼayai. Chai tanajun ni palai tamispai ixtaxtokni Dios ni amavasalanicanta tachi ju va laʼilhtatatʼan. Va kʼaya talhitakʼayai ju ixtacʼatsanʼan ju va lhilapanac junita. 19 Ju yuʼunch jantu talhilaksi ju Cristo ju tucan saʼaktsulh junita tachi chun ju talhilacaʼanta ju yuchi. Para yuchach ju axtaknikʼojui ixtachaputʼan ju talhilacaʼanta yuchi. Chai yuchi ju va lakatam anavikʼojui ju ixlapanacni. Chai yuchi ju aʼaktaijui ni laich palai palai catamispa ju Dios tachi ju kʼox lhiulai ju yuchi. 20 Pus ju chavai ju Dios talhilhcatan ni tachi ju va nitʼatʼit ni nilh ju Cristo ixtapalh miʼalactuʼuntiʼan. Chai ju chavai jantu tasqʼuini ni vana alakʼayatʼit ju xataxtokni ju ani lacamunutpaʼ. Para tajuch ni vana va chun ju tsʼucʼupʼalatʼit tachi ju aliʼin ju jantucaʼ talhilaksita ju Jesús. Tajuch ni vanach navipʼalatʼit tachi ju tanajun ju yuʼunch. 21 Ju yuʼunch ni va tajumpalan ni alin tuʼuʼ ju jantu lai achʼapʼayaʼitʼit chai alin tuʼuʼ ju jantu lai aʼuyaʼitʼit chai alin ju jantu lai apʼiclayaʼitʼit. 22 Para tachi chun ju ani chivinti ju tajunan va isʼakstuʼan taxapalaxtui. Jantu ixchivinti Dios ju tanajun. Va putasui ni jantu vasalh ju tanajun ni jantiyuʼ ju xavaiti ju lhitapalai ni va tapasai. 23 Pus tachi chun ju tanavi tachi ju tanajun ju anuʼ lapanacni aktsʼiya talhitalacasuich tachi ju vasalh atalaninin tajunita. Ju yuʼunch tanajunch ta yu acpulakʼayau ju Dios. Chai tanajun ni ma va lacatʼicstʼi accʼatsa. Chai tanajun ni ma jantu acnavinilh ju ixkʼachat ju quilacatunaʼan. Para mas chunch ju acnavi jantu lai aquintixacanilh ju amacxcai ju alin laquiʼalhunut.
1 Ju chavai ju Cristo vanin tʼavilhcha ju Dios ju lactʼiyan. Chai ju Dios talhilhcatan ju uxijnan ni tachi ju va tʼalokʼonchʼokʼotʼatʼit ju Cristo. Pus yuchi lhitasqʼuini ni ixtaxtokni Dios ju anavitʼit cuenta ju uxijnan. 2 Yuchi ju palai anavitʼit cuenta ju xataxtokni lactʼiyan. Jantiyuʼ ju va xataxtokni ju ani lacamunutpaʼ. 3 Pus ju Dios talhilhcatan tachi ju va tʼanitʼatʼit ju Cristo. Chai ju chavai alin ju sastʼi miʼatsucuntiʼan ni lhilacʼapʼintʼatʼit ju Cristo chai isʼaskʼatʼan Dios untʼatʼit. 4 Pus yuchi ju Cristo ju quintaxtaknitan ju sastʼi quiʼatsucuntiʼan. Chai acsni tavanan caminchokoyaʼ ju yuchi pus ju uxijnan vachuʼ atʼatʼalacʼasuyaʼitʼit ju yuchi. Chai vachuʼ xalackʼajin aʼunaʼitʼit. 5 Chai ni chunch junita ju quiʼatsucuntiʼan ju chavai pus yuchi alhitsʼucʼutʼit tachi ju vasalh nitʼatʼit ixlacata ju xataxtokni ju ani lacamunutpaʼ. Jantu atʼatsʼucʼutʼit ju jantu miʼamachakaʼan u ju jantu mimpapaʼan. Nin lai anavitʼit ju aliʼ alactuʼunti ju ixtʼachunch cava. Jantu akʼachʼanitʼit tachi chun ju atsiʼin. Nin yuchi ni caʼalilh ju macxcai miʼatalacpastʼacʼatʼan. Chai jantu alhacchʼipʼitʼit tuʼuʼ. Ni va chunch alatʼit pus tachi ju va midiosʼan navitʼatʼit ju miʼalintaʼan. 6 Pus va ixlacata ni chunch ju taʼalactuʼunun ju lapanacni ju jantu taquiclacaʼiputun ju Dios yuchi alhiʼulanicanta ixtalakʼalhinʼan chai caʼamamakʼalhkʼajnicanaʼ. 7 Chai ju uxijnan vachuʼ chunch ju ixlayatʼit ju pʼulhnan. 8 Para ju chavai amacʼaʼuntʼit tachi chun ju ani taxtokni. Jantuch vana atʼalhkʼamantʼit. Jantu alhilakʼachʼapʼutʼit tuʼuʼ. Jantu alaxcʼaʼitʼit. Jantu anaʼuntʼit macxcai chivinti ixlacata akʼantam. Jantu anaʼuntʼit tuʼuʼ macxcai chivinti. 9 Jantu vana alaʼunitʼit taʼaklhtamat ni cʼaptʼatʼit ju miʼatsucuntiʼan tachi ju ixlayatʼit acsni tucaʼ ismispʼayatʼit ju Jesucristo. 10 Para ju chavai sastʼi ju miʼatsucuntiʼan. Chai palai palai mispʼayatʼit ju Dios tus acsni cachinaʼ avilhchan acsni apʼastʼacʼaʼitʼit tachi ju apastacnan ju Dios ju tanavitan. 11 Pus sia quijnanʼan ju sastʼi junita ju quiʼatsucuntiʼan jantu lhitapalai ni israelitanin juntau u ni jantu israelitanin. Jantu lhitapalai ni chʼucʼucantau u ni jantu cachʼucʼucau. Jantu tuʼuʼ nomputun mas atalanininta cava u ni jantu tuʼuʼ mispai. Jantu tuʼuʼ nomputun mas va xalapanac junita. Nin yuchi ju isʼakstu chʼalhcatnan. Va yuchi ju Cristo ju tapalai chai yuchi ju tʼajun laquiʼalhunutʼan quinchuxʼan ju lhilacaʼantauch ju yuchi. 12 Pus Dios ju tasacxtutan ni isʼaskʼatʼan aʼunaʼitʼit chai ju yuchi na tamapainiyan. Pus yuchi lhitasqʼuini ni kʼeu acʼatsʼantʼit. Chai amalacʼasutʼit ju milhikʼox lapanacʼan. Atʼalacʼatʼicstʼitʼit. Kʼoxich atʼalalhipʼitʼit lhichux. Chai achʼixkʼotʼit tachi chun ju macxcai. 13 Achʼixtʼit ni tuʼuʼ tanaviyan tam xamatiʼ. Chai alamacʼacxanitʼit acsni tuʼuʼ lanaviniyatʼit macxcai. Ju Cristo ni quintamacʼacxaninch pus vachuʼ chunch alanavitʼit ju uxijnan. 14 Chai ju tucan tasqʼuini yuchi ni na alamapʼainitʼit. Ju chunch ni kʼoxich atsʼucʼuyaʼitʼit chai va lakatam cajunaʼ ju miʼatalacpastʼacʼatʼan. 15 Pus acsni alin tuʼuʼ lhamakʼan lamilhiʼuxijnanʼan pus apʼuxcʼaʼutʼit tamalhch ju alatʼit ta yu laich kʼox apʼulalhipʼitʼit. Chai ju Cristo cataʼaktaijuyan ni jantu atʼalakʼaʼitʼit ju aliʼin. Pus ju uxijnan lhisacxtʼucʼantʼatʼit ni kʼox alalhipʼitʼit minchuxʼan ni tachi ju va lakatam lacatuna untʼatʼit ni si lhilacʼapʼintʼatʼit ju Cristo. Vachuʼ tasqʼuini ni va tachi aʼunitʼit lakʼailaktsʼiuch ju Dios. 16 Va tachi anavitʼit cuenta tuchi ixnajun ju Cristo. Kʼox amachʼakxatʼit acsni lamalaniyatʼit chai acsni lamapʼaksiyatʼit. Chai alamalanitʼit ixchivinti Dios chai alamapʼaksitʼit acsni milhpʼayatʼit ju salmos chai acsni lakʼayapʼutʼunatʼit ju Dios laca tuʼuʼ milhpat. Laʼixlhichux miʼalhunutʼan amilhpʼanitʼit ju Dios chai aʼunitʼit lakʼailaktsʼiuch ixlacata chux ju taxtaknitan. 17 Chai va tuchi ixtalakxtuch ju naviyatʼit chunch ju anavitʼit tachi ju kʼox calhiulayaʼ ju quiʼucxtinʼan Jesús. Chai va tuchi ixtalakxtuch ju nonatʼit chunch ju achʼivinintʼit tachi ju kʼox calhiulayaʼ ju yuchi. Chai axtʼaknitʼit lakʼailaktsʼiuch ju quimpaiʼan Dios ixlacata tachi chun ju quintaxtakniyan. 18 Ju uxijnan ju icʼantʼatʼit aqʼuiclacʼaʼitʼit ju mimpapaʼan tachi ju lhijunch ni lhilacʼapʼintʼatʼit ju Jesús. 19 Ju uxijnan ji papanin amapʼainitʼitch ju miʼamachakaʼan chai jantu atʼalakʼaʼitʼit ju yuchi. 20 Chai ju uxijnan ji askʼatʼan aqʼuiclacʼaʼitʼit ju mimpaiʼan chai ju minatiʼan tachi chun ju tajunan. Aqʼuiclacʼaʼitʼit ni na kʼox lhiulai ju Jesús acsni chunch ju layatʼit. 21 Ju uxijnan ji xalacpaʼitni jantu na va lhu ju akʼaʼitʼit ju miʼaskʼatʼan. Pus ni chunch ju alatʼit jantu xcai ni va jeks cataʼulh. 22 Chai ju uxijnan ji xalapanacni aqʼuiclacʼaʼitʼit tachi chun ju catalhijunan ju miʼucxtinʼan ju ani lacamunutpaʼ. Va tachi kʼox achʼalhcʼatnantʼit. Jantu va acsnich ju kʼox achʼalhcʼatnantʼit acsni va talaktsʼinan ju miʼucxtinʼan ni laich catanaulh ni lackʼoxin lapanacni untʼatʼit. Alai va tachi kʼox achʼalhcʼatnanitʼit ni tʼalhoniyatʼit ju Dios. 23 Tachi chun ju naviyatʼit pus ixlhichux ju miʼalhunutʼan ju anavitʼitch tachi ju va jun Dios ju chʼalhcʼatnaniyatʼit. Jantu chun tachi ju va mintʼalapanacni ju chʼalhcʼatnaniyatʼit. 24 Pus chunchach ju alatʼit ni cʼatsʼayatʼit ni yuchi ju Cristo ju catamapalhniyan. Yuchi ni apʼinaʼitʼit ju lactʼiyan ni achʼalhcʼatnaniyaʼitʼit ju Cristo ju vasalh miʼucxtinʼan junita. 25 Para ju navi ju macxcai calhimapalhnicanaʼ ixlacata ju macxcai ju xanavi. Chai ju Dios jantu xamatiʼ ju va pumacatami camapaini.
1 Chai ju uxijnan ji lapanacni ju alin ju tanaviniyan ju milhichʼalhcatʼan anavinitʼitch ju soknicʼa chai tachi ju lhijunch. Apʼastʼactʼit ni vachuʼ alin ju miʼucxtinʼan ju lactʼiyan. 2 Va tachi atʼachʼivinitʼit ju Dios chai anavitʼit cuenta tuchʼi unatʼit chai aʼunitʼit lakʼailaktsʼiuch. 3 Atʼapʼaininitʼit ju Dios vachuʼ ju quilacata quijnan ni laich acʼajunau ju lapanacni ixlacata ju Cristo. Laich acmavasalayau ixchivinti Dios ju jantu ixʼamavasalanicanta ju lapanacni ju makʼanchich. Pus va ixlacata ni icnajun ju anuʼ chivinti yuchi tachʼin iclhijunita. 4 Asqʼuintʼit ni laich acʼamavasalaniyaʼ ni laich catamachakxayaʼ. Chunch acchivinaʼ tachi ju lhijun ni acnaulh. 5 Lacakʼox acʼatsanti atʼalalhiʼitʼit ju yuʼunch ju jantucaʼ tamispai ju Jesucristo. Jantu va alhakʼamanantʼit ju mimpantsʼiquisʼan. 6 Va tachi kʼox alalhixakʼalatʼit. Na can achʼivinintʼit. Ju chunch lai acʼatsʼayaʼitʼit ta yu laich apʼuʼakʼalhtʼayananaʼitʼit ju pumatamin ju catasacmiyan tuʼuʼ ixlacata ju Cristo. 7 Yuchi ju Tíquico ju catamacʼatsanikʼoyan ta yu icjunita. Ju yuchi quilakʼauʼan junita ju na mapainicanta chai ju yuchi na quiʼaktaijui chai lai lhilaksican. Chai ju yuchi quintʼanavi ixlhichʼalhcat ju Jesús. 8 Pus icmalakachanitachan ju Tíquico ni lai acʼatsʼatʼit ta yu icjuntau chai ni lai catamatankʼoxaxkʼayayan ju yuchi. 9 Chai ju Onésimo catʼaʼananta ju yuchi. Ju yuchi quilakʼauʼan junita chai ju yuchi muctaxtui laʼixtaxtokni Dios chai na icmapainiyau. Chai ju yuchi mintʼaʼamachakʼanʼan junita. Pus ju yuʼunch catamacʼatsanikʼoyan tachi chun ju tʼajun tapasanaʼ ju ani. 10 Ju Aristarco ju ictʼatʼalhnucanta tamacʼamiyan. Vachuʼ ju Marcos ixlhilakʼau ju Bernabé tamacʼamiyan. Pus iclalhimapʼaksitauch ixlacata ju yuchi. Acsni tavanan catalakchaʼanan pus lhikʼach amaklhtʼayanantʼit. 11 Vachuʼ tamacʼamiyan ju Jesús ju vachuʼ Justo juncan. Ju yuʼunch quintʼaʼisraelitanin quincʼan tajunita chai talhilacaʼanta ju Cristo. Pus va yuʼunchach ju quintatʼachʼalhcatnan ixʼajunica ju lapanacni ixchivinti Dios. Matich apumatam ju sia yuʼunch ju quintatʼachʼalhcatnan. Pus ju anuʼ ixpumatʼutuʼan slivasalh na quintamatankʼoxaxkʼayai. 12 Vachuʼ tamacʼamiyan ju Epafras ju vachuʼ mintʼaʼamachakʼanʼan junita. Chai ju yuchi ixlapanac Cristo junita vachuʼ. Pus ju yuchi va tachi tapaininich ju Dios ju milacataʼan ni atsʼucʼuyaʼitʼit tachi ju kʼachani ju Cristo chai ni anaviyaʼitʼit tachi chun ju lacasqʼuin ju Dios. 13 Chai quitʼin quiʼakstu iclaktsʼinta ju yuchi ni slivasalh na tapainini ju Dios ju milacataʼan ju uxijnan chai ixlacataʼan ju tavilanancha ju lakʼachakʼanixni Laodicea chai Hierápolis. 14 Vachuʼ tamacʼamiyan ju Lucas ju acʼuchʼunuʼ ju na mapainicanta. Chai vachuʼ tamacʼamiyan ju Demas. 15 Amacʼamitʼit ju quiʼalakʼavinʼan ju tavilanancha ju lakʼachakʼan Laodicea. Vachuʼ amacʼamitʼit ju quilakʼauʼan atsiʼ Ninfas chai tachi chun ju talhilacaʼanta ju Cristo ju tatakʼaixtʼokʼach laʼixchakaʼ. 16 Pus ju ani atsʼoknut alhiqui acsni akʼasmatkʼoyaʼitʼit ju uxijnan amalakʼachʼayaʼitʼit ju lakʼachakʼan Laodicea. Chach takʼasmatʼanta vachuʼ ju yuʼunch ju talhilacaʼanta ju Cristo ju tavilanancha ju anch. Chai ju alhiqui ju icʼatsʼoknunita ju amachakʼan Laodicea catamalakachanitachin ju uxijnan. Pus akʼasmatʼaʼitʼit vachuʼ ju yuchi tuchi najunch. 17 Chai aʼunaʼitʼit ju Arquipo ni camuctaxtu ju lhichʼalhcat ju xaxtakni ju ixʼucxtin Jesús. 18 Ju quitʼin icPablo chai tus ani apumatam xaquiʼatsʼoknuni ju ani alhiqui. Para ju chavai quitʼin quiʼakstu aclaʼatsʼoknuniyau chai aclamacʼamiyau. Apʼastʼactʼit ni tachʼin icjunita. Ictapainini ju Dios ni cataxtakniyan ju kʼox miʼatsucuntiʼan. Vasalh chunch iclacasqʼuin.
1 Ju quijnan icPablo chai icSilvano chai icTimoteo ju ani icvilau. Va iclamacʼamiyau ju uxijnan ju vilhchitʼit ju lakʼachakʼan Tesalónica. Pus ju uxijnan va lakatam tʼaʼuntʼatʼit ju quimpaiʼan Dios chai ju quiʼucxtinʼan Jesucristo. Pus icʼatapainini ju yuʼunch ni catanaviniyan lamapainin chai cataʼaktaijuyan ni jantu calacʼalh ju miʼalhunutʼan. 2 Pus va ta pakchux ju ictʼachivinau ju Dios icjunau lakʼailaktsʼiuch ju milacataʼan. Chai ictapaininiyau ju yuchi ju milacataʼan. 3 Icxtakniyau lakʼailaktsʼiuch ju quimpaiʼan Dios ni va tachi icpastʼacʼau ju lhichʼalhcat ju naviyatʼit va ixlacaʼatalh ni lhilacʼapʼintʼatʼit ju Jesús. Vachuʼ va tachi icpastʼacʼauch ju tuchʼi naviyatʼit mas xkʼopʼatʼit va ixlacaʼatalh ni mapʼainiyatʼit ju Jesús. Vachuʼ jantu lai iccʼapʼau ni lana jantu jeks uyatʼit va ixlacaʼatalh ni lhilaksiyatʼit ju quiʼucxtinʼan Jesucristo ni cataxtakniyan ju miʼatsucuntiʼan ju conkʼalhiyanta ju lactʼiyan tachi ju takʼalhtasunitan. 4 Iccʼatsayau ni Dios ju tasacxtutan ji quiʼalakʼavin chai na tamapainiyan. 5 Icpunonau chunch ni istasui ixtachaput ju Spiritu Santu lamiʼatsucuntiʼan acsni xaclajunau ju chivinti ixlacata ju Jesús. Jantu chun xatapasai tachi acsni va noncan va tuʼuch chivinti. Pus ixlhichux quiʼalhunut quincʼan xaccʼatsayau ni yuchi ju Spiritu Santu ju ixtʼajun chʼalhcatnaʼ lamiʼalhunutʼan ju uxijnan. Chai acsni xaclatʼavilau pus lana istasui laquiʼatsucunti quincʼan ni stavasalanti ju xaclajunau. 6 Vachuʼ icpucʼatsayau ni tasacxtutan ju Dios ni vachuʼ chunch ju latʼit tachi ju iclayau ju quijnan chai tachi ju lalh ju quiʼucxtinʼan Jesús. Pus vachuʼ taʼaktaijutan ju Spiritu Santu ni laich xakʼachʼanatʼit mas na tamamakʼalhkʼajniyan ju lapanacni va ixlacata ni lacʼaʼinitʼit ju ixchivinti Dios. 7 Chai ni chunch ju latʼit ju uxijnan pus ju miʼatsucuntiʼan valhch tachi tuʼuʼ xalhilaktsʼintaiti ixlacataʼan tachi chun ju talhilacaʼanta ju Cristo amachakʼan xalacatʼun Macedonia chai amachakʼan xalacatʼun Acaya. 8 Chai uxijnan ju makpʼitsʼitʼit ixchivinti ju quiʼucxtinʼan Jesús. Chai jantu va anch ju xalacatʼun Macedonia chai Acaya para vanta anchach cʼatsacan ni lhilacʼapʼintʼatʼit ju Dios. Chai ju chunch pus jantu tasqʼuini ni tuʼuʼ acʼajunilh ju lapanacni ju milacataʼan. 9 Ju yuʼunch tanajun ta yu xaclayau acsni iclalakchiu ju uxijnan. Vachuʼ tanajun ta yu pʼumacʼaʼuntʼit ju misantoqʼuiuʼan chai lhilacʼapʼitʼit ju Dios chai makʼaxtʼaknikʼotʼit ju miʼatsucuntiʼan ju yuchi. Yuchach ju lakʼajunta chai stavasalanti Dios junita. 10 Vachuʼ ju uxijnan pʼacxanatʼit ju istsʼalh Dios ju caminanta lactʼiyan. Yuchach ju malokʼonilh ju Dios acsni ixnita. Yuchi ju Jesús ju aquintamakʼalhtaxtuyan ni jantu camakʼalhkʼajnanauch tachi ju catamakʼalhkʼajnanaʼ ju aliʼin acsni caʼamalacasuniyaʼ ju ixtalhkʼamti ju Dios.
1 Ju uxijnan ji quiʼalakʼavin miʼakstuʼan cʼatsʼayatʼit ni aktsʼiya ixlhitapalai tuchi xacnaviyachau lamilhiʼuxijnanʼan. 2 Pus miʼakstuʼan cʼatsʼayatʼit ni icmamakʼalhkʼajnicanchauch chai icmamaxanicanchauch ju lakʼachakʼan Filipos acsni tucaʼ xaclalakʼanachau ju uxijnan. Para ju quiDiosʼan quintamakʼosunin ju quintalhanti quincʼan ni laich xaclajunau ju uxijnan ta yu lai putakʼalhtaxtucan. Laich xaclajunau chunch mas quintalhixcajinch ju aliʼin mintʼaʼamachakʼan. 3 Pus ju tuchi iclalhimapʼaksiyau yuchach ju stavasalanti chai jantu va xaclamalacaʼiniputunau ju tuʼuʼ taʼaklhtamat chivinti nin yuchi ni va aclaʼokxchokʼomaxtuniputu ju mintuminʼan. 4 Alai yuchi ju Dios ju quintalaktsʼintanun chai ni kʼoxich quintalhiulan pus quintaxtaknitan ju lhichʼalhcat ni acnaju ju ixchivinti Dios. Pus yuchi lhichivinau tachi ju kʼachanich ju Dios. Jantu chun icnonau tachi ju va kʼoxich catalhiula ju tam quintʼalapanac. 5 Ju Dios cʼatsai chai vachuʼ ju uxijnan cʼatsʼayatʼit ni jantu na va cʼus lapanacni xaclatalacasuniyau ni va xaclapuʼokxchokʼoputu ju chivinti ju xaclajunau. Chai Dios ju cʼatsai chai vachuʼ ju uxijnan cʼatsʼayatʼit ni jantu va xaclaʼokxchokʼosqʼuiniputunau ju mintuminʼan. 6 Jantu xacpuxcoyau ta yu laich aquintapulakʼayan ju lapanacni. Nin uxijnan nin yuchi ju akʼantam lapanac. Jantu chunch xaclayau mas ca laich chunch aclau ni ixtamalakachan Cristo icjuntau. 7 Alai chunch xaclayau tachi ju tam chakoʼulh ju na mapaini ju isʼaskʼatʼan chai na alhistʼacʼa. 8 Chai ni slivasalh na xaclamapainiyau ju uxijnan pus jantu va yuchi ju ixchivinti Dios ju xaclaxtakniputunauch para vachuʼ xaclhitapʼuxputunau mas quiʼatsucunti quincʼan ju va milacataʼan. Chunch xacnaviputunau ni aktsʼiya tuʼuʼ xaclalhiulayau ju uxijnan. 9 Ju uxijnan pʼastʼacʼatʼit ni xaclamasuniyau ixchivinti Dios para vachuʼ xacchʼalhcatnanau ta yu xacpulhajayau ju quivaiti quincʼan. Chai na xacxkʼopau. Tsʼis chai tuncuj xacchʼalhcatnanau. Ju chunch jantu xamatiʼ ju milhiʼuxijnan xacmaxcayaniyau ju ixʼalhunut ju quimavaca quincʼan acsni xaclajunau ixchivinti Dios. 10 Ju uxijnan ju lhilacʼapʼinatʼit ju Cristo cʼatsʼayatʼit chai vachuʼ Dios cʼatsai ni na salaka chai na soknicʼa ixjunita ju quiʼatsucunti quincʼan acsni xaclatʼavilau. Chai lana matich ixjunita ju quintalakʼalhin quincʼan. 11 Cʼatsʼayatʼit ni na xaclamapʼaksiyau chai xaclamatankʼoxaxkʼayayau ju pumatamin ju uxijnan tachi ju lai tam xapai ni na mapaini ju isʼaskʼatʼa. 12 Xaclajunau chunch ni atsʼucʼuyaʼitʼit tachi ju lhijunch ni lhilacʼapʼintʼatʼit ju Dios. Yuchach ju tatʼasanitan ni laich atʼanuyaʼitʼit ju lactʼiyan junta lhinajun ju yuchi chai laich alaktsʼinaʼitʼit ni vasalh xakʼaich ju yuchi. 13 Pus acsni tavanan iclamakʼasmatnitachau ju ixchivinti Dios pus ju uxijnan lana lacʼaʼitʼit ni ixchivinti Dios junita. Chai vasalh chunch junita. Pus jantu xalacʼaʼiyatʼit ni ixchivinti cava ju va tam quintʼalapanacʼan. Chai yuchi va tachi iclhixtakniyau lakʼailaktsʼiuch ju Dios. Chai ju anuʼ ixchivinti Dios va tachi chʼalhcatnan lamiʼalhunutʼan ju uxijnan ju lacʼaʼiniyatʼitch. 14 Pus ju uxijnan ji quiʼalakʼavin vana va chun chʼixatʼit ju makʼalhkʼajnat tachi ju talalh ju yuʼunch ju talhilacaʼanta ju Dios chai ju Cristo Jesús ju tavilanancha ju xaʼestado Judea. Ju uxijnan vana va chun makʼalhkʼajnanatʼit laʼixmacaʼan ju mintʼaʼamachakʼanʼan tachi ju yuʼunch ni tamakʼalhkʼajnalh laʼixmacaʼan ju istʼaʼisraelitanin. 15 Pus yuʼunch ju israelitanin ju tamakni ju quiʼucxtinʼan Jesús chai ju ixlapanacni Dios ju ixtanajun ixchivinti chai vachuʼ quintaxcauxtuyan ju quijnan. Pus ju Dios lana jantu kʼox lhiulai tachi ju talai ju yuʼunch. Chai ju yuʼunch ixtʼalaxcaichʼan tajunita tachi chun ju lapanacni. 16 Pus ju yuʼunch jantu quintalakʼaʼiniyan ni acʼajuniu ixchivinti Dios ju jantu israelitanin acsni icʼajuniu ni laich catatakʼalhtaxtulh. Chai ni chunch ju talalh pus na talhava ju ixtalakʼalhinʼan. Para cachinaʼ avilhchan acsni caʼamalacasuniyaʼ ju yuʼunch ju ixtalhkʼamti ju Dios. 17 Pus ju quijnan ji quiʼalakʼavin mas jantu lalaktsʼinau pantsʼiquis ju laquiʼucxlacapuʼan para jantu tavanan ju iclacaptau. Chai ni pantsʼiquis xajun ju jantu xalalaktsʼinauch pus yuchi slivasalh ixlhichux quiʼalhunut quincʼan iclalaktsʼinchokoputunau ju uxijnan. 18 Pus ju quijnan slivasalh na xaclalakʼamputunachau ju uxijnan. Pus ju quitʼin icPablo chai ju quitʼin na paklhu xacnavi talakmaskʼatinti ni xacʼancha. Para va xaquintanchajnitʼajun ju lhacaticuru. 19 Iccʼatsayau ni milacataʼan ackʼachanau acsni caminchokoyaʼ ju quiʼucxtinʼan Jesús. Chai iccʼatsayau ni va milacataʼan aclaktsʼincanau ni icmuctaxtutauch laʼixlhichʼalhcat ju Dios. 20 Pus na kʼox quintalhichivinan ju quijnan va milacataʼan ju uxijnan. Chai uxijnan ju iclalhikʼachanau.
1 Pus acsni jantuch lai aliʼ icpacxauch ni na sokʼoch xaccʼatsaputunau ta yu untʼatʼit pus icpastacvi ni actolauch va quiʼakstu quincʼan ju lakʼachakʼan Atenas. 2 Chai icmalakachachauch ju Timoteo ju quilhilakʼauʼan junita chai ixlapanac Dios ju vachuʼ najun ju chivinti ixlacata ju Cristo. Ju yuchi catamapʼaksiyan chai cataʼaktaijuyan ni jantu xamatiʼ catamacʼapʼaniyan ju Cristo. 3 Ju chunch jantu xamatiʼ lai catamakʼantalhanayan ixlacata junima makʼalhkʼajnat. Pus uxijnan miʼakstuʼan cʼatsʼayatʼit ni chunch ju lhilhcanicantauch ni camakʼalhkʼajnanau ju quijnanʼan ju lhilacaʼantauch ju Jesús. 4 Pus acsni xaclatʼavilaucaʼ va tsa xaclajunauch ni caʼalinaʼ ju quimakʼalhkʼajnatʼan. Chai cʼatsʼayatʼit ni chunchach ju tapasalh. 5 Pus vachuʼ ju quitʼin jantu lai palai makʼan xacpacxan ni jantu sai iclalaktsʼinau. Pus yuchi iclhimalakachatachalh ju Timoteo ni cacʼatsacha ni vana lhilacʼapʼinatʼit ju Cristo u jantu. Xacnajun ni jantu xcai ni catamacʼapʼanin ju aʼokxchokʼonu lhacaticuru ni jantuch vana alhilacʼapʼitʼit ju Jesús. Chai ni chunch cava ixlatʼit pus jantu tuʼuʼ ixtilhitapalalh ju quilhichʼalhcat quincʼan lamilhiʼuxijnan. 6 Para ju chavai taspʼitchokocha ju Timoteo. Chinchokolh junta icvilau chai slivasalh na ickʼachauch ni quintamacʼatsaninch ni vanach lhilacʼapʼinatʼit ju Jesús chai na amapʼainininatʼit. Pus quintajunan ni aktsʼiya va tachi quilapastʼacʼauch ju quijnan. Ma quilalaktsʼimputunauch ju quijnan tachi ju vachuʼ ju quijnan iclalaktsʼimputunau ju uxijnan. 7 Pus ji quiʼalakʼavin mas na xaquintaʼamamakʼaniniyan ju lapanacni chai xaquintamamakʼalhkʼajniyan para ju chavai na ickʼachanauch. Pus palai lai icchʼixkʼoyau chux ni iccʼatsayau ju chavai ni va tachi lhilacʼapʼinatʼit ju Cristo ju uxijnan. 8 Pus ju chavai lhikʼach ictʼonau ni ixlhichux miʼalhunutʼan ju lhilacʼapʼinatʼit ju quiʼucxtinʼan Jesús. 9 Jantu lai icxtakniyau lakʼailaktsʼiuch ju Dios tachi ju lhijunch ni na kʼai ju xanavi ju milacaʼatalhʼan ju uxijnan. Pus slivasalh na iclhikʼachanau ju milacataʼan ju uxijnan laʼixmacni ju quiDiosʼan. 10 Pus va tachi icsqʼuiniyau ju Dios ni laich calalaktsʼinchoko. Chai laich aclaʼaktaijuch ixlacata ju tuʼuʼ ju tacʼacxnitancaʼ ju lacasastʼi miʼatsucuntiʼan. 11 Pus ictapainini ju quimpaiʼan Dios chai ju quiʼucxtinʼan Jesucristo ni aquintaʼaktaijuyan ni lai aclaʼanchau laktsʼinin. 12 Vachuʼ ictapainini ju quiʼucxtinʼan Jesucristo ni lhuch cataxtakniyan ju miʼamapainintiʼan ni laich vasalh alamapʼainiyaʼitʼit ju uxijnan chai vachuʼ lai amapʼainiyaʼitʼit tachi chun ju lapanacni. Chai iclacasqʼuin ni chunch ju alatʼit tachi ju quijnan ni vachuʼ iclamapainiyau ju uxijnan. 13 Chai ju chunch pus ju Cristo cataʼaktaijuyan ni jantu tavanan amacʼonaʼitʼit ixti ju Dios. Chai ni jantu amacʼonaʼitʼit ju ixti Dios pus salaka aʼunaʼitʼit laʼixʼucxlacapuʼ ju quimpaiʼan Dios acsni caminach ju quiʼucxtinʼan Jesucristo acsni caʼalactʼaminach tachi chun ju tavilanancha ju lactʼiyan.
1 Pus ji quiʼalakʼavin ju quitʼin ixtamalakachan ju quiʼucxtinʼan Jesús icjunita. Chai yuchi iclalhiquilhtapujuyau chai iclalhimapʼaksiyau ni atʼailhipʼitʼitch tachi ju xaclajunau acsni xaclajunau ta yu cavalh ju miʼatsucuntiʼan. Ta yu kʼoxich capulhiula ju Dios. Chai iccʼatsayau ni chunchach ju naviyatʼit. Para va iclacasqʼuinau ni palai atʼailhipʼitʼit. 2 Ju uxijnan mispʼayatʼit ju lhamapʼaksin ju iclaxtaknitau tachi ju quintamamachakxanitan ju quiʼucxtinʼan Jesús. 3 Pus ju ixkʼachat ju Dios yuchi ni salaka cava ju miʼatsucuntiʼan. Ju chunch va nomputun ni jantu apʼuxcʼaʼutʼit ju minavinʼan. 4 Chai ju Dios lacasqʼuin ni cacʼatsa pumatamin ju uxijnan ta yu laich capupuxcaulh ju tam ixʼamachakaʼ tachi ju lhijunch ni taxacanitan ju miʼalhunutʼan ju Dios. Chai cacʼatsa ta yu laich caputasuyaʼ ni vasalh tuʼuʼ lhiulayatʼit ju miʼamachakaʼan. 5 Jantiyuʼ alhipʼuxcʼaʼutʼit laʼixtachaput ju amacxcai atalacpastʼacʼat tachi ju talai ju lapanacni ju jantu tamispai ju Dios. 6 Para ni jantu chunch ju alatʼit tachi ju iclajuntau pus lai alakʼalhiyaʼitʼit ju quinchivinti chai lai alactʼuʼuyaʼitʼit tam milhilakʼauʼan. Pus ju quiʼucxtinʼan Dios yuchi ju amamapalani tachi chun ju tanavi ju chunch alactuʼunti. Chai ju quitʼin chunch xaclajunau chai xaclalhimapʼaksiyauch. 7 Pus tasqʼuini ni salaka catsucu ni yuchi quintalhitʼasanitan ju Dios. Jantiyuʼ ni va caʼalactuʼunuch. 8 Pus ju jantu tuʼuʼ lhiulai ju ani lhamapʼaksin va nomputunch ni jantu tuʼuʼ lhiulai ju Dios mas yuchi ju quintaxtaknitanch ju iSpiritu Santu ju tʼajun laquiʼalhunutʼan. Yuchi ju Dios ju jantu tuʼuʼ lhiulacan. Jantiyuʼ ju va ixtʼalapanac ju xcaji. 9 Pus jantu tasqʼuini ni aclaʼatsʼoknuniu ju uxijnan ixlacata ju amapaininti tachi ju lhilakʼauch ni isʼakstu ju Dios ju xatamalaniyan ju uxijnan ni alamapʼainiyaʼitʼit. 10 Chai chunchach ju naviniyatʼit tachi chun ju miʼalakʼavinʼan ju tavilanancha ju xalacatʼun Macedonia. Para iclatapaininiyau ji quiʼalakʼavin ni palai alamapʼainitʼit. 11 Apʼuxcʼaʼutʼit ju kʼox atsucunti ju jantu va lacalasat. Anavitʼit ju milhichʼalhcatʼan miʼakstuʼan. Jantu va atʼanutʼit junta jantu mincuentaʼan. Apʼuchʼalhcʼatnantʼit ju mimacaʼan tachi ju iclalhimapʼaksitauch. 12 Ju chunch ju yuʼunch ju jantucaʼ talhilacaʼanta ju Cristo catalaktsʼinan ni soknicʼa ju miʼatsucuntiʼan chai jantu tasqʼuini ni apumatam catamavayan ni lhaʼatʼatʼit miʼakstuʼan tuchʼi maktʼasqʼuiniyatʼit. 13 Vachuʼ ji quiʼalakʼavin iclacasqʼuinau ni amachʼakxatʼit ixlacataʼan ju tanita. Ju chunch ni jantu alhamakʼanininaʼitʼit tachi ju talai ju aliʼin ju jantu catitalaktsʼincha ju Cristo ju lactʼiyan. 14 Pus lacaʼiyau ni nilh ju Jesús chai taʼacxtuchokolh junta ixmacnucanta. Chai vachuʼ lacaʼiyau ni Dios ju caʼalactʼalhiminach ju Jesús tachi chun ju ixtalhilacaʼanta ju yuchi acsni ixtitatʼajuncaʼ. 15 Pus iclajunauch ju ani ixchivinti ju quiʼucxtinʼan Jesús. Pus ju quijnanʼan ju tʼonaucaʼ acsni caminchokoyach ju quiʼucxtinʼan Jesús jantu lai catiʼapʼulhniu ju yuʼunch ju tanitach. 16 Pus isʼakstu ju quiʼucxtinʼan Jesús ju aquintatʼasaniyan acsni caminanta ju lactʼiyan. Chai cachivinaʼ ju xakʼai anquilh. Chai caskʼolhcanaʼ laʼiskʼolh ju Dios. Chai ju tanitach ju ixtalhilacaʼanta ju Cristo catalokʼonchokoyach pʼulhnan. 17 Astan ju quijnanʼan ju titʼonaucaʼ va kʼaixtamch catʼalhiʼancanau lacaʼataputsʼi. Caʼanauch pakxtoknin ju quiʼucxtinʼan ju talaclhman. Chai catʼatolhkʼalhitachauch ju quiʼucxtinʼan. 18 Pus alalhimatankʼoxaxkʼayatʼit ju chunch chivinti.
1 Jantu tasqʼuini ji quiʼalakʼavin ni actilalhiʼatsʼoknuniu tavananch tucan ju caminchokoyaʼ ju Cristo u ta yu cajunaʼ ju acsnich avilhchan. 2 Jantu tasqʼuini ni tuʼuʼ aclajunau ni uxijnan miʼakstuʼan kʼoxich cʼatsʼayatʼit ni jantu xamatiʼ cʼatsai tavanan tucan ju lai camilh. Pus ju yuchi vatsʼalhti caminaʼ acsni jantu xamatiʼ najun ni lai camilh. Capuminaʼ tachi ju tam akʼalhonaʼ ju min acsni jantu xamatiʼ najun ni lai camilh. 3 Acsni calacnoncanach ni va lhikʼachach ju ani chai matich ju talhanti pus ju acsnich va tam pantsʼiquis caminach ju ixmakʼalhkʼajnatʼan chai jantu lai xamatiʼ catitakʼalhtaxtulh. Pus chunch catapasayaʼ tachi ju tapasai laʼisʼatsucunti ju tam chakoʼulh ni chin ju ixʼamaklakʼavanti. Va tam pantsʼiquis chin ju ixmakʼalhkʼajnat chai jantu lai catitakʼalhtaxtulh laʼixmakʼalhkʼajnat. 4 Para ju uxijnan ji quiʼalakʼavin jantu tʼonatʼit ju lacaʼatatsʼisni. Ju uxijnan cʼatsʼayatʼit ni caminchokoyaʼ ju Cristo. Chai yuchi jantu lai va sek catilhichilh tachi ju tam akʼalhonaʼ ju min acsni jantu xamatiʼ najun ni lai camilh. 5 Pus ju uxijnan cʼatsʼayatʼit ni caminchokoyaʼ ju Cristo ni lhilacʼapʼintʼatʼit ju yuchi. Chai apʼinaʼitʼit ju lactʼiyan junta si atuncunuʼ junita. Ju quijnanʼan ju lhilacaʼanauch ju Cristo jantu tʼonau lacaʼatatsʼisni nin lai caʼau junta jonkʼalhita putsʼista. 6 Pus tasqʼuini ni calacpucujvich. Chai skala catsucu. Jantu chun calau tachi ju aliʼin ju lana jantu tuʼuʼ tanavi cuenta. 7 Pus chani ju tapasai laquiʼatsucuntiʼan ju ani lacamunutpaʼ. Pus tsʼis ju laclhtatacan chai tsʼis ju lactʼakʼapʼacan. Pus vana va chun laʼixmacni Dios. Ju tatʼajun lacaʼatatsʼisni ni jantucaʼ tamispai ju Cristo pus tachi ju va talhtatanan laʼisʼatsucuntiʼan chai tachi ju va tatʼakʼapʼanita ju ixtacʼatsanʼan. 8 Para ju quijnanʼan ju tʼonau lacaʼatuncunuʼ tasqʼuini ni caʼacʼatsanauch. Pus chani calau ni jantu aquintatʼalalhajayan ju macxcai. Tasqʼuini ni calhistacchokocau. Chai lai chunch calau acsni pʼas calhilaksiyau ju Jesús chai camapainininau. Chai chunch cajunau tachi ju tam taropa ju lakchʼi ju tsasnat ixcujuʼ ni jantu lai catitanunilh ju flecha. Tasqʼuini ni calhistacchokocau. Chai lai chunch calau acsni calhistʼacʼau ju quintacʼatsanʼan acsni calhilaksiyau ixchivinti Dios ni aktsʼiya aquintamakʼalhtaxtuyan. Chai chunch cajunau tachi ju tam taropa ju aktanui ju tsasnat ixʼaktanut ni jantu lai tapasani ju flecha. 9 Pus lai calhilaksiyau ju Dios ni aquintamakʼalhtaxtuyan ni jantu quintalhilhcaʼulanin ju Dios ni va camakʼalhkʼajnankʼalhiyau. Para quintalhilhcaʼulanin ni catakʼalhtaxtuyau va ixlacaʼatalh quiʼucxtinʼan Jesucristo. 10 Pus ju yuchi nilh ju quilacataʼan. Ju chunch mas tʼonaucaʼ ju ani lacamunutpaʼ u mas caniyau para aktsʼiya astan catsucutachauch ju lactʼiyan junta vilhcha ju yuchi. 11 Pus ni cʼatsʼayatʼit ni caminchokoyaʼ ju Cristo chai ni cʼatsʼayatʼit ni apʼinaʼitʼit ju lactʼiyan pus yuchi palai alhitʼailhipʼitʼit tachi ju aktsʼiya layatʼit acsni lamakʼankʼachʼayatʼit chai laʼaktʼaiʼuyatʼit ni lai palai alhilacʼapʼitʼit ju Cristo. 12 Chai iclatapaininiyau ji quiʼalakʼavin ni atʼalhonitʼit ju tachʼalhcatnaniyan ju uxijnan. Pus ju yuʼunch miʼucxtinʼan tajunita laʼixmacni ju quiʼucxtinʼan Jesús chai yuʼunch ju tamapʼaksiyan. 13 Vasalh tuʼuʼ alhiulatʼit ju yuʼunch chai amapʼainitʼit va ixlacaʼatalh ixlhichʼalhcatʼan. Tun tʼilaxcʼaʼitʼit ju pumatamin ju uxijnan. 14 Vachuʼ iclalhimapʼaksiyau ni amapʼaksiyaʼitʼit ju jantu tachʼalhcatnamputun. Chai ju yuʼunch ju va tatalhanan aʼunitʼit ni jantu na va catatalhanalh. Aʼaktʼaiʼutʼit ju na xcai tasastʼucʼa ju macxcai acsni tuʼuʼ mapastʼacʼanican. Jantu jeks aʼunitʼit xamatiʼ. 15 Alaktsʼintʼitch. Tun xamatiʼ camapuspʼitlh ju macxcai. Alai va tachi alanavinitʼit ju kʼox ju milhiʼuxijnanʼan. Chai vachuʼ va tachi anavinitʼit ju kʼox tachi chun ju lapanacni. 16 Va tachi akʼachʼantʼit. 17 Jantu tavanan amamactʼatʼit ju ixtʼachivininca ju Dios. 18 Aʼunitʼit lakʼailaktsʼiuch ju Dios mas va tuchi camilh lamiʼatsucuntiʼan ni lacasqʼuin ju Dios ni chunchach ju anaviyaʼitʼit uxijnan ju lhilacʼapʼinatʼit ju Cristo Jesús. 19 Jantu asastʼuctʼit ju tuchi naviputun ju Spiritu Santu lamiʼalhunutʼan. 20 Jantu alacmajkʼantʼit ju ixchivinti Dios ju catajunan apumatam. 21 Para alaktsʼintʼanutʼit tachi chun ju taxtokni u kʼox u jantu. Chai alacʼaʼitʼit ju kʼox laʼixlhichux miʼalhunutʼan. 22 Para lana amacʼaʼuntʼit tachi chun ju macxcai. 23 Chai yuchi ju Dios ju cataʼaktaijuyan ni jantu calacʼanaʼ ju miʼalhunutʼan. Chai ictapainini ju yuchi ni isʼakstu salaka catanaviniyan chux ju miʼatsucuntiʼan. Chai catalhistacniyan ju mintacʼatsanʼan chai ju mintacuvinʼan chai ju milacatunaʼan. Ju chunch matich cajunaʼ ju mintalakʼalhinʼan acsni tavanan caminchokoyach ju quiʼucxtinʼan Jesucristo. 24 Chai iccʼatsai ni chunch ju caʼuctaxtuyaʼ lamiʼatsucuntiʼan ni lai lhilaksican ju Dios. Yuchach ju tatʼasanin chai yuchach ju catanavinikʼoyan chux tuchi icsqʼuinita. 25 Quiʼalakʼavin va tachi atʼachʼivinintʼit ju Dios ju quilacata quincʼan. 26 Amacʼamitʼit chux ju quiʼalakʼavinʼan lacaʼamapaininti. 27 Iclalhimapʼaksiyau ni amakʼasmatʼayaʼitʼit tachi chun ju quiʼalakʼavinʼan junima alhiqui. Ju quiʼucxtinʼan Jesús cacʼatsayaʼ ni jantu chun alayaʼitʼit. 28 Pus ictapainini ju quiʼucxtinʼan Jesucristo ni catanaviniyan lamapainin ju uxijnan.
1 Ju quijnan icPablo chai icSilvano chai icTimoteo. Va kʼaixtam icvilau ju ani chai va iclamacʼamiyau ju uxijnan ju lhilacʼapʼinatʼit ju Jesús ju vilhchitʼit ju lakʼachakʼan Tesalónica. Ju uxijnan va lakatam tʼaʼuntʼatʼit ju quimpaiʼan Dios chai ju quiʼucxtinʼan Jesucristo. 2 Pus ictapainini ju quimpaiʼan Dios chai ju quiʼucxtinʼan Jesucristo ni catanaviniyan ju lamapainin chai cataʼaktaijuyan ni jantu calacʼalh ju miʼalhunutʼan. 3 Aktsʼiya tasqʼuini ni va tachi acjunau ju Dios lakʼailaktsʼiuch ju milacataʼan ji quiʼalakʼavin. Chai chunchach ju iclayau. Chai lhijunch ni chunch ju acjunau ju yuchi ni palai lhilacʼapʼinatʼit ju Jesucristo ju chavai chai palai na lamapʼainiyatʼit ju pumatamin ju uxijnan. 4 Pus ixlhiyuchi ju quijnan kʼox iclalhichivinau ju uxijnan laʼixʼucxlacapuʼ ju aliʼin ju vachuʼ talhilacaʼanta ju Cristo. Icʼajunau ni chʼixkʼoyatʼit ju mimakʼalhkʼajnatʼan chai va tachi lhilacʼapʼinatʼit ju Cristo mas na lhixcʼaicʼanatʼit chai na lhimamakʼalhkʼajnicʼanatʼit. 5 Ni chunch ju layatʼit pus anchach ju putalacasuich ni sok navi ju Dios acsni najun ni kʼox alhiulacʼanaʼitʼit ni laich atʼanuyaʼitʼit junta lhinajun ju yuchi. Pus ixlacata yuchi ju lhimakʼalhkʼajnanatʼit vachuʼ ju chavai. 6 Chai vachuʼ sok navi ju Dios acsni amamakʼalhkʼajni ju tamamakʼalhkʼajniyanch. 7 Chai ju uxijnan mas mamakʼalhkʼajnicʼanatʼit ju chavai para vaktam caʼastacnankʼoyau acsni catalacasuyach ju quiʼucxtinʼan Jesús. Ju yuchi acsni caminanta ju lactʼiyan lapʼapʼa camaktayaʼ junta catʼaminaʼ ju ixʼanquilhnin. Chai catasuyach ni na tachapun ju yuchi. 8 Ju yuchi caminaʼ amamakʼalhkʼajnikʼalhiniʼ ju jantu tatalhoni ju Dios chai ju jantu lai talacaʼi ju ixchivinti Dios ixlacata ju quiʼucxtinʼan Jesucristo. 9 Ju yuʼunch catamapalaʼ isʼakstuʼan ju ixtapalh ixtalakʼalhinʼan laʼixmakʼalhkʼajnatʼan junta jonkʼalhitach chai jantu lai tavanan catitalaktsʼinilh ju ixʼucxpuʼ ju quiʼucxtinʼan Jesucristo nin lai catalaktsʼilh ni na kʼai ju ixtachaput. 10 Chai ju acsnich avilhchan ju tavilanancha lactʼiyan catalakʼayayach ju Cristo va ixlacaʼatalh isʼatsucuntiʼan ju ixlapanacni. Chai ju acsnich avilhchan vachuʼ catalhamakʼanininaʼ ju Cristo va ixlacaʼatalh isʼatsucuntiʼan tachi chun ju talhilacaʼalh ju yuchi. Chai vachuch ju uxijnan makyuʼunch untʼatʼit ni xalacʼaʼiyatʼit ju quinchivinti ju xaclajunau. 11 Chai iclacasqʼuinau ni catasuyaʼ lamiʼatsucuntiʼan ni vasalh lhilaksiyatʼit ju Cristo. Pus yuchi iclhisqʼuiniyauch ju Dios ju milacataʼan ni chunch catanaviniyan ju miʼatsucuntiʼan tachi ju kʼoxich calhiulayaʼ ju yuchi ni tatʼasanitan ni ixʼanuch aʼunaʼitʼit. Vachuʼ icsqʼuini ni laʼixtachaput yuchi ju catamamuctaxtuniyanch tachi chun ju kʼox ju navipʼutʼunatʼit chai tachi chun ju ixlhichʼalhcat Dios ju navipʼutʼunatʼit va ixlacaʼatalh ni lhilacʼapʼintʼatʼitch ju Jesús. 12 Ju chunch ju quiʼucxtinʼan Jesucristo calhilakʼayacanach ju lamiʼatsucuntiʼan. Chai ju uxijnan laʼixlacata ju yuchi alakʼayacʼanaʼitʼit vachuʼ. Pus chunch ju catapasayaʼ va ixlacaʼatalh ni taʼaktaijuyanch ju quiDiosʼan chai ju quiʼucxtinʼan Jesucristo lacaʼamapaininti.
1 Ji quiʼalakʼavin iclajumputunau ixlacata ju anuʼ avilhchan acsni caminchokoyach ju quiʼucxtinʼan Jesucristo chai kʼaixtam calakʼanau ju yuchi. 2 Pus iclatapaininiyau ni jantu va aʼoktantsʼankʼatʼit ju lamiʼatalacpastʼacʼatʼan. Nin yuchi ni lai alhitʼalhanantʼit ju tuʼuʼ chivinti junta tanajun ni lana chinta ju avilhchan acsni caminchokoyaʼ ju quiʼucxtinʼan Jesús. Jantu chun alatʼit mas tanajun ni ma chunch quijuni ju Spiritu Santu. U ma chunch icʼajuni ju aliʼin. U ma chunch iclaʼatsʼoknunitau. 3 Tun xamatiʼ cataʼokxchokʼon. Pus pucʼatsacan ni vanin minta ju anuʼ avilhchan acsni caminchokoyaʼ ju Jesús acsni na lhu catanonach ni jantuch talhilacaʼamputun ju Cristo. Vachuʼ pʼulhnan catalacasuyach ju anuʼ lapanac ju lana jantu tuʼuʼ calhiulayaʼ ju ixlhamapʼaksin Dios. Yuchach ju anuʼ ju lhilhcacanta ni catsʼankʼakʼalhiyach. 4 Ju yuchi na kʼai cacʼatsayaʼ ju va laʼisʼakstu. Chai ju yuchi calaclhikʼalhtsoyaʼ tachi chun ju dios ajuncan mas jantu vasalh Dios tajunita. Chai calactʼalakʼayach ju talhilaksi ju Dios. Chai catolach laʼixpujitat Dios. Calhitalacasuyach tachi ju vasalh Dios mas jantu. 5 Ja va jantu pʼastʼacʼatʼit ni chunch ju xaclajunau acsni xaclatʼavilaucaʼ ju uxijnan. 6 Chai ju uxijnan cʼatsʼayatʼit ni tucaʼ lakʼaʼinican ni laich catalacasu. Pus acsnich ju calakʼaʼinicanach acsni cachinach ju avilhchan ju alhcanilh ju Dios. 7 Pus mas chavai alin ju jantu tuʼuʼ talhiulai ju ixlhamapʼaksin Dios mas jantucaʼ lai machakxacan tajuch ni va chunch ju talai. Chai jantucaʼ lai talacasui ju anuʼ lapanac ju lana jantu tuʼuʼ calhiulayaʼ ixlhamapʼaksin Dios. Tus acsnich ju lai catapasayaʼ ju chunch acsni camakʼosucanach ju anuch ju asastucnun ju chavai. 8 Chai acsnicaʼ ju catalacasuyach ju anuʼ lapanac. Para ju Jesús laʼixtachaput ju ixchivinti capumakniyaʼ ju anuʼ lapanac. Pus mas va yuchi ni caminchokoyaʼ ju Jesús pus lana caniyaʼ ju anuʼ lapanac. 9 Pus acsni catalacasuyaʼ ju anuʼ lapanac ju lana jantu tuʼuʼ lhiulai ju ixlhamapʼaksin Dios pus lana chunch calayaʼ tachi ju lai ju Satanás. Chai acsni catalacasuyach pus camalacasuyaʼ ju ixtachaput. Chai camalacasuyach ju tuʼuʼ ju caʼapumamachakxaniputunaʼ ju lapanacni ni jantu va lapanac junita ju yuchi. Chai vachuʼ canaviyaʼ ju kʼai lhamakʼan. Para tachi chun ju ani taxtokni chunchach ju canaviyaʼ ni va caʼapuʼokxchokʼoputunach ju lapanacni. 10 Chai ju yuchi canaviyaʼ tachi chun ju aʼokxchokʼonti va ixlacaʼatalhʼan ju lapanacni ju tatʼajun tsʼankʼakʼalhinin. Chai caʼapunavicanaʼ chunch va ixlacaʼatalh ni jantu tavanan tuʼuʼ talhiulata ju stavasalanti ixlacata ju Cristo mas ajunicalh ta yu laich caʼixtaputakʼalhtaxtulh. 11 Chai ni chunch catalayaʼ pus ju Dios calhilakʼaʼiyaʼ ni caʼalilh ju aʼokxchokʼonti ni chach talacaʼi ju va taʼaklhtamat. Catalacaʼiniyaʼ ju anuʼ lapanac acsni canonaʼ ni yuchach ju Dios. 12 Pus ju chunch caʼapuʼulanicanaʼ ixtalakʼalhinʼan tachi chun ju jantuch talacaʼita ju stavasalanti ixlacata ju Cristo. Alai va yuchi ixtakʼachani ju jantu kʼox. 13 Pus ju Dios na tamapainiyan ju uxijnan ji quiʼalakʼavin. Chai ju quijnan lhijun ni va tachi acjuniuch ju Dios lakʼailaktsʼiuch ju milacataʼan ji quiʼalakʼavin ni tasacxtutan ju Dios tus laʼixputaiʼulacan lacamunutpaʼ ni laich atʼakʼalhtʼaxtʼuyaʼitʼit. Vachuʼ tasacxtutan ni laich catalasastʼiniyan ju miʼalhunutʼan ju Spiritu Santu chai laich lhilacʼapʼinatʼit ju stavasalanti ixlacata ju Jesucristo. 14 Pus ju Dios lacasqʼuin ni alaktsʼinaʼitʼit ni vasalh xakʼai junita ju quiʼucxtinʼan Jesucristo chai yuchi xatalhitʼasaniyan laʼixchivinti Dios ju iclajunauch. 15 Pus ji quiʼalakʼavin va tachi alhilacʼapʼitʼitch chai va tachi apʼastʼactʼitch ju anuch amalaninti ju iclamalanitau laquiʼatsʼoknut quincʼan chai laquinchivinti quincʼan. 16 Pus isʼakstu ju quiʼucxtinʼan Jesucristo chai quimpaiʼan Dios ju quintamapainitan. Chai yuʼunch ju quintamatankʼoxaxkʼayakʼalhiyan. Chai quintaʼaktaijuyan ni laich va tachi calhilaksiyauch ju yuchi ni aquintalhiʼanan ju lactʼiyan. Chai chux ju ani quintanaviniyan va ixlacata ni xaquintanaviniyan lamapainin. 17 Pus ictapainini ju yuʼunch ni catamatankʼoxaxkʼayayan chai tachapunch catanaviyan ni laich anaviyaʼitʼit tachi chun ju kʼox chai va yuchi ju kʼox chivinti ju anonaʼitʼit.
1 Vachuʼ iclajumputunau ji quiʼalakʼavin ni asqʼuinitʼit ju Dios ju quilacata quincʼan. Chach makpitsicalh ju ixchivinti ju quiʼucxtinʼan chai chach lakʼayacalh tachi ju navicanta lamilhiʼuxijnanʼan. 2 Vachuʼ asqʼuintʼit ni laich actakʼalhtaxtuyau laʼixmacaʼan ju lapanacni ju na kʼai tajunita. Alin lapanacni ju chunch tajunita ni jantu si lhilacaʼancan ju Jesús. 3 Ju Dios muctaxtui ju najunta. Chai ju yuchi cataʼaktaijuyan chai catalhistʼacʼan ni jantu cataʼokxchokʼoyan ju lhacaticuru. 4 Pus iclhilaksiyauch ju quiʼucxtinʼan Jesucristo ni yuchi ju cataʼaktaijuyan ni laich atʼailhipʼinaʼitʼit ju tuchi iclajuntauch. 5 Pus ictapainini ju quiʼucxtinʼan Jesús ni yuchi ju cataʼaktaijuyan ni laich amapʼainininaʼitʼit tachi ju amapaininin ju Dios chai laich achʼixkʼoyaʼitʼit tachi chun ju macxcai tachi ju lalh ju Cristo. 6 Chai iclajunauch ji quiʼalakʼavin laʼixtapakaʼut ju quiʼucxtinʼan Jesucristo ni jantu amalakʼavitʼit tachi chun ju quiʼalakʼavinʼan ju va tamalheknin. Ju jantu tachʼalhcatnamputun. Jantu chun talai tachi ju xaclalhimapʼaksiyauch ju uxijnan. 7 Pus ju uxijnan miʼakstuʼan cʼatsʼayatʼit ni tasqʼuini ni anavitʼit tachi ju laktsʼintʼatʼit laquiʼatsucunti quincʼan. Pus ju quijnan jantu va kʼaya xaclacʼucxuntʼonau acsni xaclatʼavilau ju uxijnan. 8 Jantu tavanan va lacaʼamapaininti acʼuniu ixvaiti tam xamatiʼ ju lamilhiʼuxijnan. Alai xacchʼalhcatnanauch lacalhichʼalhcat ju tuncuj chai ju tsʼis. Chai na xacxkʼopʼau. Ju chunch ni jantu xamatiʼ xaclhimamakʼalhkʼajniyau ju lamilhiʼuxijnan ju va quimavacach quincʼan. 9 Pus jantu va ixlhiyuchi xacnaviyau chunch ni va jantuch calhiva ju lhamapʼaksin ni acxtaknicauch ju tuʼuʼ vaiti. Alai yuchi xaclhinaviyau chun ni va xacputalacasuputunau ju stavasalanti ni chunchach ju anaviyaʼitʼit vachuʼ. 10 Pus acsni xaclatʼavilaucaʼ ju uxijnan xaclajunau ni jantuch cavailh va tichi chavaich ju jantuch chʼalhcatnamputun. 11 Pus icmacʼatsanicantauch ni taʼalin ju lamilhiʼuxijnan ju jantu tachʼalhcatnamputun. Lana jantu tuʼuʼ tanaviputun. Va kʼaya tatanui junta jantu ixlhicʼatsatʼan. 12 Para vachuʼ tʼajun ju quiʼucxtinʼan Jesucristo laʼixʼalhunutʼan ju yuʼunch. Pus yuʼunch ju icʼamapʼaksiyau laʼixtapakaʼut ju quiʼucxtinʼan Jesucristo. Chai kʼasi icʼajunau ni va seknicʼa lapanacni catava chai catachʼalhcatnalh. Chai yuchi ju cataʼuyach ju va talhajatach laʼisʼakstuʼan. 13 Chai ju uxijnan ji quiʼalakʼavin jantu jeks aʼutʼit ju ixnavica ju kʼox. 14 Para ni caʼalilh xamatiʼ ju jantu calacaʼiyaʼ ju quinchivinti quincʼan ju iclajuntauch ju ani lacaʼatsʼoknut pus amispʼatʼitch tichi chavaich chai jantu amalakʼavitʼit. Chunch ju alatʼit ni tsʼa ma camaxanalh. 15 Para jantu alhixcʼaʼitʼit tachi ju va mintʼalaxcaiʼan cava. Va amapʼaksitʼit tachi ju va milakʼauʼan. 16 Yuchi ju quiʼucxtinʼan Jesús ju aʼaktaijunun ni jantu calacʼalh ju quiʼalhunutʼan. Chai ju quitʼin ictapainini ju yuchi ni isʼakstu va tachi cataʼaktaijuyan ni jantu calacʼanaʼ ju miʼalhunutʼan mas va tuchi camilh lamiʼatsucuntiʼan. Vachuʼ ictapainini ju quiʼucxtinʼan Jesús ni catatʼatolanch ju minchuxʼan ju uxijnan. 17 Pus ju quitʼin icPablo. Chai tus ani apumatam xaquiʼatsʼoknuni ju ani alhiqui. Para ju chavai laquimacaʼ quiʼakstu iclaʼatsʼoknuniyau ju ani chivinti acsni iclamacʼamiyau. Chai laquiʼatsʼoknut putasui ni quiʼanuch tachi chun ju alhiqui ju iclaʼatsʼoknunitau ni chunchach ju iclhaʼatsʼoknun. 18 Ictapainini ju quiʼucxtinʼan Jesucristo ni catanaviniyan lamapainin minchuxʼan ju uxijnan.
1 Ju quitʼin icPablo. Ixlapanac ju Jesucristo icjunita. Chai yuchi ju Dios ju quijuni ni acʼajunilh ju lapanacni ixchivinti. Pus yuchi ju Dios ju quintamakʼalhtaxtun chai yuchi ju Cristo Jesús ju lhilaksiyau ni aquintalhiʼanan ju lactʼiyan. 2 Pus va icmacʼamiyan ji Timoteo lacaʼatsʼoknut. Ju uxintʼi tachi vasalh quintsʼalhʼat unitʼa ni quitʼin ju icmalacaʼinin ju ixchivinti Dios. Pus ictapainini ju quimpaiʼan Dios chai ju quiʼucxtinʼan Cristo Jesús ni catanaviniyan lamapainin chai cataʼaktaijuyan lacaʼamapaininti chai cataʼaktaijuyan ni jantu calacʼalh ju miʼalhunut. 3 Pus tachi ju icjunin acsni icʼalh ju xalacatʼun Macedonia pus aktam acjunchokopalan lacaʼatsʼoknut. Atʼaʼulhcaʼ ju lakʼachakʼan Efeso. Ju chunch laich aʼunaʼ ju aliʼin ni jantu catamasulh ju lhamapʼaksin ju jantu soknicʼa. 4 Nin yuchi ni lai na tuʼuʼ catalhiula ju va chivintich. Nin yuchi ni catalhitakʼaya ju tuchi tanajunch ni tanavita ju makʼaniya ixlacpaiʼan mas jantu. Pus jantu tavanan lai catitamatankʼaxtukʼo ju chunch. Chai ju chunch atalacpastʼacʼat puʼalin va asacminti. Jantiyuʼ ju lai catiʼaʼaktaiju ixmakpitsica ju ixchivinti Dios junta najun ni calhilacaʼau ju Jesús. 5 Para ju Dios quintaxtaknitan ju ani lhichʼalhcat ni laich caʼaʼaktaijuyaʼ ju Dios ju lapanacni ni laich cataʼamapaininilh. Chai laich cataʼamapaininilh acsni na salaka ju ixʼalhunutʼan chai acsni jantu tuʼuʼ tanavita ju laich catalhixcanilh ixʼalhunutʼan chai acsni slivasalh talhilacaʼan ju Jesús. 6 Para ni jantu chun ixjunita ju isʼatsucuntiʼan ju aliʼin lapanacni pus yuchi jantu sok xatalhiʼan. Jantu tamasui ixchivinti Dios. Alai yuchi ju tamasui ju va tuʼuʼ chivinti ju jantu lhitapalai. 7 Ju yuʼunch taʼamalaninimputun ju lhamapʼaksin ju tsʼoklh ju Moisés para nin yuʼunch jantu tamachakxai ju ixchivintiʼan tuchi tanajun nin yuchi ju tuchi pʼas tanajun ni stavasalanti. 8 Pus cʼatsayau ni na lai aquintaʼaktaijuyan ju ixlhamapʼaksin ju Moisés acsni camavasalanicanau. 9 Pus ju vasalh machakxai ju anuʼ lhamapʼaksin cʼatsai ni jantu lhinavicanta ju va ixlacataʼan ju lackʼoxin lapanacni. Alai yuchi lhinavicalh ixlacataʼan ju jantu tuʼuʼ talhiulai ju lhamapʼaksin chai ju jantu lai talacaʼi chai ju jantu tuʼuʼ talhiulai ju Dios chai ju na taʼalactuʼunun chai ju jantu tuʼuʼ alhiulanan chai ju tanajun macxcai chivinti chai ju tamakni ju ixpaiʼan chai ixnatiʼan chai ju tamakni ju ixtʼalapanacʼan. 10 Vachuʼ navicanta ixlacataʼan ju va tapuxcajui ixnavinʼan chai ju talalactuʼui sia papanin u sia chakolun chai ju va taʼokxkʼalhajui ixtʼalapanacʼan chai ju tanajun taʼaklhtamat chai ju va kʼaya tamucʼani ixtalakʼalhin apumatam chai ju tanavi tachi chun atumpa alactuʼunti ju jantu lhijun lacasoknicʼa lhamapʼaksin ni catanavi. 11 Pus ju ixchivinti Dios ixlacata ju Cristo najun ni ixlacataʼan yuʼunch ju puʼalilh ju lhamapʼaksin. Pus laʼixchivinti Dios putasui ni slivasalh xakʼai ju paxcat Dios. Chai yuchach ixchivinti Dios ju icxtaknicanta quitʼin ni laich acʼamasunilh ju lapanacni. 12 Pus ju quitʼin icjuni lakʼailaktsʼiuch ju Jesucristo ju quiʼucxtinʼan ni yuchi ju xaquixtakni ju quintachaput ni laich acnavilh ju ani lhichʼalhcat. Pus ju yuchi cʼatsaich ni lai acmuctaxtuyaʼ. Yuchi quilhixtaknilh ju ixlhichʼalhcat. 13 Chunch quiʼulhtulh ju Jesús mas na macxcai xaclhichivinin ju Dios ju makʼanchich chai xacʼalhimakchapui ju ixtalhilacaʼanta ju Cristo chai na macxcai chivinti xacʼajuni. Para ju Dios quiʼaktaiju lacaʼamapaininti va ixlacaʼatalh ni jantu xacmachakxai tuchi xacnavi acsni tucaʼ xaclhilacaʼanta ju Cristo. 14 Pus na lhu lana xaquinavini lamapainin ju quiʼucxtinʼan Cristo. Chai yuchi iclhilhilacaʼalh ju Jesús chai alilh ju amapaininti laquiʼalhunut. Yuchi ju alin laʼixmacni Cristo Jesús. 15 Pus ju ani chivinti ju aclajunau stavasalanti chai lhijun ni calacaʼiyau ixlhichux quiʼalhunutʼan. Yuchi ni quilachilh ju Cristo Jesús ju ani lacamunutpaʼ ni caʼamakʼalhtaxtulh ju alactuʼunin. Chai tachi chun ju alactuʼunin ju alin pus quitʼin ju palai xacʼalactuʼunun. 16 Pus ju Jesucristo ixʼapumalacasuniputun ju lapanacni laquiʼatsucunti ni jantu tavanan jeks ui ju yuchi. Yuchi xaquilhiʼaktaijui ju quitʼin lacaʼamapaininti mas palai na xacʼalactuʼunun ju quitʼin. Chai astan cataʼalinaʼ ju lapanacni ju vachuʼ catalhilacaʼanaʼ ju Jesucristo chai ixlhiyuchi caʼalinaʼ ju isʼatsucuntiʼan jonkʼalhita lactʼiyan. 17 Tus mas va tavananch catalhonicalh chai calakʼayacalh ju Dios. Pus ju yuchi jonkʼalhita xakʼai ucxtin. Chai ju yuchi jantu lai ni. Chai jantu lai laktsʼincan. Pus va yuchi ju Dios junita. Vasalh chunch junita. 18 Ju ani lhamapʼaksin icxtakniyan ji quintsʼalh Timoteo tachi ju tanaulh ju milacata ju yuʼunch ju tachivinin ixchivinti Dios. Chai ju anuʼ ixchivinti Dios ju tanaulh ju yuʼunch caʼaktaijuyan ni lai apʼusastʼucʼaʼ ju macxcai. Para va tachi alhilacʼapʼich ju Cristo chai jantu tuʼuʼ anavitʼi ju calhixcaniyan ju miʼalhunut. 19 Jantu chun alatʼi tachi ju talalh ju aliʼin. Ju yuʼunch jantu tanavilh ju kʼox mas ixtacʼatsai ni istasqʼuini ni catanavi. Jantu ixlhichux ixʼalhunutʼan talhilaksi ju Dios. Chai yuchi lana talhicapkʼolh ju Dios. 20 Pus pumatʼui sia yuʼunch ju chunch tanavilh yuchi ju Himeneo chai ju Alejandro. Pus ju quitʼin icʼajuni ju ixlapanacni Dios ni jantu catamalakʼavi ju yuʼunch. Chach amamakʼalhkʼajni ju lhacaticuru. Ta tsʼa jantu catapucʼatsayach ni jantu kʼox ni macxcai catalhichivinilh ixchivinti Dios.
1 Pus pʼulhnan iclamapʼaksiyau ni atʼapʼaininitʼit ju Dios chai atʼachʼivinintʼit chai asqʼuinitʼit ju Dios chai aʼunitʼit lakʼailaktsʼiuch. Chunch alatʼit ixlacataʼan tachi chun ju lapanacni. 2 Vachuʼ chunch alatʼit ixlacataʼan ju xalackʼajin chai ixlacataʼan ixchuxʼan ju ucxtinin. Ju chunch ni laich kʼox catsucuyau. Jantu caʼalilh ju laclakʼaiti para lai catalhoniu ju Dios chai lai kʼox catʼalalhiʼau ju quintʼalapanacniʼan. 3 Chai tachi chun ju ani na kʼoxich lhiulai ju quiʼamakʼalhtaxtunuʼan Dios. 4 Ju yuchi lacasqʼuinch ni catatakʼalhtaxtulh tachi chun ju lapanacni chai catamispalh ju stavasalanti chivinti ixlacata ju Cristo. 5 Pus va pumatam ju Dios. Chai va pumatam ju lai apumaʼamigoxla ju lapanacni ju Dios. Yuchi ju malakachacanchilh ju ani ni lapanac catsucuyaʼ. Yuchi ju Jesucristo. 6 Yuchach ju tamakʼaxtaklh isʼakstu ju quilacataʼan quinchuxʼan ni laich aquintalhimalakxtun. Chai chunchach ju ajunilh ju lapanacni acsni chilh ju avilhchan ju ilhcaʼulacanta. 7 Chai ju quitʼin icsacxtucanta ni acnonach ju chivinti ixlacata ju Jesús chai ixtamalakachan acva chai acʼamamakaʼuyach ju yuʼunch ju jantu israelitanin tajunita. Acʼajunach ni catalhilacaʼalh ju Jesús chai catalacaʼilh ju stavasalanti ixlacata ju yuchi. Pus jantu va kʼaya icnajun. Vasalh ixtamalakachan Jesús icjunita ixlacataʼan ju yuʼunch ju jantu israelitanin tajunita. 8 Pus iclacasqʼuinch ni yuʼunch ju jokʼatni catatʼachivinilh ju Dios vanta anchach cava junta tatakʼaixtʼokʼa ju talhilacaʼanta ju Jesús. Para tasqʼuini ni salaka cava ju isʼatsucuntiʼan laʼixmacni Dios chai jantu xamatiʼ catʼalatalhkʼamnilh nin catʼalaxcailh akʼantam. 9 Vachuʼ iclacasqʼuin ni catalakchʼilh ju ixpumpuʼan ju chakolun tachi ju va kʼoxich. Jantiyuʼ ju va capumamaxanicalh u va caputalacasu tachi ju va lakachapui. Chai jantu ixlhiyuchi camaxantila ju ixʼaiʼan ni va catalhitakʼaya ni na cʼusich catasu. Nin yuchi ni catalacatocʼalh oro u plata u catalakchʼi ixpumpuʼan ju na laklhu ixtapalh va ixlacaʼatalh ni tachi tam xakʼai catalacasu. 10 Alai catanavi kʼox lhichʼalhcat tachi ju lhijunch ni catanavi ju chakolun ju tanajun ni tatalhoni ju Dios. Yuchach ju catalhimaxantila isʼatsucuntiʼan. 11 Ju chakolun chach va sek tatavi lacatalhavat acsni tʼoncan chivinca. Chai catatalhonilh ju ixlhamapʼaksinʼan ju jokʼatni. 12 Ju lacatalhavat jantu iclacasqʼuin ni cataʼamalaninilh ixchivinti Dios ju chakolun. Caʼamalanicalh ju jokʼatni. Nin yuchi ni lai xamatiʼ caʼamapʼaksinin. Alai va sek catatavi. 13 Ju chakolun jantu chunch catalalh ni pʼulhnan navicalh ju Adán. Astan ju Eva. 14 Chai jantiyuʼ ju Adán ju ixʼokxchokʼocanta. Alai yuchi ju chakoʼulh ju okxchokʼocalh chai yuchi ju pʼulhnan alactuʼunuʼ va. 15 Pus ixlhiyuchi jantu kʼox ni va cataʼamalaninilh ixchivinti Dios lacatalhavat. Ju ixlhichʼalhcatʼan ju yuʼunch yuchi ni catalakʼayalh ju isʼaskʼatʼan chai catamalanilh ju kʼox chai catalhilacaʼankʼalhilh ju Jesús. Cataʼamapaininilh. Catatsuculh tachi ju kʼox lhiulai ju Dios. Chai jantu va kʼaya catatalacasu. Pus ni catamuctaxtukʼoyaʼ ju chunch pus catatakʼalhtaxtuyaʼ.
1 Slivasalh ju anuʼ chivinti junta najun ni na kʼox lhichʼalhcat ju naviputun ni xamatiʼ lhinomputun lacatalhavat ju talhilacaʼanta ju Jesucristo. 2 Pus tasqʼuini ni jantu tuʼuʼ catamalacasu ju macxcai ju yuʼunch ju talhinomputun lacatalhavat ju talhilacaʼanta ju Cristo. Chai vachuʼ tasqʼuini ni va pumatamch ixʼamachakaʼ cava chai calhistacchokocalh isʼakstu. Chai tasqʼuini ni na acʼatsananta cava chai na seknicʼa lapanac cava chai yau cajunilh xamatiʼ acsni lakacujtilaputun laʼixchakaʼ. Vachuʼ tasqʼuini ni na laich caʼamalaninilh. 3 Chai tasqʼuini ni jantu cakʼachanilh ju tʼakʼapʼat chai jantu vatsʼalhti calhitalhkʼamalh ju tuʼuʼ. Alai cachʼixkʼo ju macxcai. Vachuʼ jantu lasani lapanac cava chai jantu cakʼachanilh ju tumin. 4 Kʼox calhinaulh ju laʼixchakaʼ chai cataquiclacaʼi ju isʼaskʼatʼan chai catatalhonilh. 5 Pus ju jantu lai lhistʼacʼa ju laʼixpulacni ixchakaʼ tas caʼalhimapʼaksiyach ju aliʼin ju vachuʼ talhilacaʼanta ju Cristo. 6 Vachuʼ jantu lai catilhinaulh lacatalhavat ju jantucaʼ makʼan lhilacaʼanta ju Cristo. Jantu xcai ni va calhitakʼaya tachi ju lalh ju lhacaticuru. Chai ju chunch pus vachuʼ caʼulanicalh ixtalakʼalhin tachi ju navicalh ju lhacaticuru. 7 Vachuʼ tasqʼuini ni kʼox lapanac catalhiula ju jantucaʼ talhilacaʼanta ju Cristo. Jantu xcai ni va kʼaya catalhichivinilh chai ju chunch lai camalactuʼuni acsni caʼokxchokʼolh ju lhacaticuru. 8 Pus chunchach vachuʼ ju diácononin ju taʼaktaijui ju taʼamalaninin. Tasqʼuini ni seknicʼa lapanacni catava. Chai jantu cataʼacxputʼiyunulh laʼixchivintiʼan. Jantu catakʼachanilh ju pinquin. Jantu cataʼokxchokʼosqʼuinlh ju tumin. Ju chun slivasalh na lhimaxan. 9 Chai tasqʼuini ni cataquiclacaʼilh ju ixchivinti Dios. Chai ju yuchi jantu lai machakxacan ju va laquiʼakstuʼan. Chai ni tanajun ni taquiclacaʼi ju ixchivinti Dios pus tasqʼuini ni jantu tuʼuʼ catanavilh ju lai catalhixcanilh ixʼalhunutʼan. 10 Para pʼulhnan acsni tucaʼ xtaknican ju ixlhichʼalhcat tasqʼuini ni calaktsʼintanucanach ju taʼaʼaktaijunumputun. Chai ni soknicʼa ju isʼatsucuntiʼan pus laich cataʼaʼaktaijununaʼ. 11 Pus chunchach vachuʼ ju chakolun ju taʼaʼaktaijunumputun. Jantu va lakachapuni chakolun catava. Nin yuchi ni lai catamapuchokolh ju chivinti. Calhistacchokocalh isʼakstuʼan chai tasqʼuini ni lai calhilaksicalh ni catamuctaxtuyaʼ tachi chun ju tanaviputun. 12 Pus ju anuʼ aʼaktaijunin va pumatam ixʼamachakaʼ catapacxalh. Chai tasqʼuini ni cataquiclacaʼi ju isʼaskʼatʼan chai kʼox calhinaulh laʼixchakaʼ. 13 Pus tachi chun ju tachʼalhcatnan lacatalhavat ni kʼoxich catanaviyaʼ ju lhichʼalhcat pus kʼox capulhiulacanaʼ chai jantu catatalhananaʼ acsni catajunaʼ ju lapanacni ni catalhilacaʼalh ju Cristo. 14 Pus xacnajunta ni vatsʼalhti xaclakʼanchan ji Timoteo. Para alai va acʼatsʼoknuniyan ju tuchi xacjumputunan. 15 Ju chunch mas jantu lai vatsʼalhti acʼananta para laich acʼatsʼayaʼ ta yu catalalaktsʼinaʼ ju isʼaskʼatʼan Dios. Pus ju yuʼunch chunch tajunita tachi ixpujitat Dios ju lakʼajunta ni tʼajun ju yuchi laʼixʼalhunutʼan. Chai ju yuʼunch chunch tajunita tachi ju tuʼuʼ xatantun chakaʼ ju na makat machʼanʼacnucanta. Pus laich acnaulh ni chunch tajunita ni pʼas talhilaksi ju ixchivinti Dios chai jantu tuʼuʼ lai catiʼamacʼapʼani. Chai ju chunch pus lai tasui ni slivasalh ju ixchivinti Dios. 16 Pus ju makʼanchich jantu iscʼatsayau ta yu laich takʼalhtaxtucan. Para ju chavai machakxayau. Chai na tasqʼuini ni cacʼatsayau tuchi lacaʼiyauch ixlacata ju Cristo. Pus lacaʼiyau ni talacasu ju Dios ju ani lacamunutpaʼ acsni lapanac quitsucuchilh ju istsʼalh. Yuchi ju Jesucristo. Chai ju Dios masulh ni na soknicʼa junita ju isʼatsucunti ju istsʼalh. Chai ju anquilhnin talaktsʼilh. Chai ajunicalh tachi chun ju lapanacni ixlacata ju yuchi. Chai tachi chun ju yuʼunch va aliʼin ju talhilaksilh ju yuchi. Chai ju yuchi lhiʼanchokocalh ju lactʼiyan junta slivasalh na kʼox.
1 Ju Spiritu Santu vas naulh laʼixchivintiʼan ju lapanacni ju tanajun ixchivinti acsni naulh ni cataʼalinach astanch ju lapanacni ju catacʼapʼaʼ ju chivinti ixlacata ju Cristo. Chai catakʼasmatniyach ju aʼokxchokʼoni amamakaʼunin. Chai catalacaʼiyaʼ ixchivinti ju lhacaticuru. 2 Chai ju anuch lapanacni catamasuyaʼ ju anuʼ chivinti tachi ju va istavasalanti mas va aʼokxchokʼonti. Pus mas taʼokxchokʼoi ixtʼalapanacni nin lacatsʼunin jantu alhixcani ixʼalhunutʼan. 3 Ju yuʼunch va catanonaʼ ni jantu kʼox ni tamakʼaxtokcan chai ma alin vaiti ju jantu lai ucan. Chunch catanonaʼ mas yuchi ju Dios ju navikʼota tachi chun ju quilacatunaʼan chai tachi chun ju vaiti. Chai yuchi lhinavicalh ni laich caʼamaklhtayananauch chai cajunauch lakʼailaktsʼiuch ju Dios tachi chun ju quijnanʼan ju lhilacaʼantauch ju Cristo chai mispayauch ju stavasalanti. 4 Pus tachi chun ju navita ju Dios si kʼox. Chai jantu tasqʼuini ni tuʼuʼ aclacmackʼalh. Va yuchi ni aclhixtaknilh lakʼailaktsʼiuch ju Dios acsni icʼamaklhtayananch tuʼuʼ. 5 Pus isʼakstu Dios ju naulh ni na kʼox tachi chun ju ani taxtokni. Chai acsni icʼamaklhtayanan tuʼuʼ ni icjuni lakʼailaktsʼiuch ju yuchi pus jantu talakʼalhin icnavi acsni icʼui. 6 Ni chunch ju alhimasuni ju quiʼalakʼavinʼan pus na kʼox amalaniniʼ aʼunaʼ laʼixmacni Cristo. Chai palai tachapun capujunaʼ ju mintacʼatsan ju chivinti junta najun tichi chavaich ju lhilaksiyau. Vachuʼ palai tachapun capujunaʼ ju mintacʼatsan ju kʼox lhamapʼaksin ju tʼaʼun muctaxtunuʼ. 7 Nin lacatsʼunin jantu anavitʼi cuenta ju anuʼ chivinti ju tatʼajun nonin ju aʼokxchokʼoni amamakaʼunin. Pus ju ixchivintiʼan jantu lai catiʼaktaiju xamatiʼ ni laich camispa ju Dios ni va chivintich junita. Jantu anavitʼi cuenta. Alai va yuchi ju anavitʼi cuenta ta yu laich atsʼucʼu tachi ju kʼachani ju Dios. 8 Ju quintʼalapanacniʼan acsni talhitalacaxnuj ju tuʼuʼ pus va ixlacatunaʼan ju talhilachapui. Para ju palai tasqʼuini yuchi ni acnavi tachi ju kʼachani ju Dios. Yuchach ju quintaʼaktaijuyan laquiʼatsucuntiʼan ju ani lacamunutpaʼ chai ixlacata ju quiʼatsucuntiʼan ju caʼalinach astan. 9 Pus slivasalh junima chivinti chai lhijunch ni catalacaʼilh tachi chun ju lapanacni. 10 Pus icnaviputunau tachi ju kʼachani ju Dios chai yuchi iclhichʼalhcatnanau chai ixlhichux quintachaput quincʼan icsastʼucʼau ju macxcai. Chai icnaviyau chunch ni iclhilacaʼantauch ju Dios ju lakʼajunta. Pus va yuchi ju lai amakʼalhtaxtunun chai yuchi ju quintamakʼalhtaxtun ni lhilacaʼanauch ju yuchi. 11 Pus chunch ju alhimapʼaksitʼi chai chunchach ju amalanitʼi ju lapanacni. 12 Chai mas va antacaʼ ju mintakʼayanti para jantu tuʼuʼ anavitʼi ta yu laich jantu tuʼuʼ capulhiulayan xamatiʼ. Alai atʼalacʼasutʼich tachi ju kʼox lhilaktsʼintaiti ixlacataʼan ju talhilacaʼanta ju Jesús. Amalacʼasuninch ni na kʼox ju chʼivinin chai ni salaka ju miʼatsucunti chai ni na amapʼaininin chai ni lacʼaʼinikʼoʼui ixchivinti Dios chai ni tʼalhonich ju Dios. 13 Chai ni jantucaʼ lai icʼanacha pus va tsa anavitʼi cuenta ixlaktsʼinca ju ixchivinti Dios junta tatakʼaixtʼokʼa ju talhilacaʼanta ju Cristo. Vachuʼ amapʼaksitʼich ju yuʼunch chai amasunin ju ixchivinti Dios. 14 Jantu alakʼaʼitʼi ni xamatiʼ calakʼalhinin ju kʼox mintacʼatsan ju xalhikʼailaktsʼinan ju Dios laʼixchivintiʼan ju tanajun ixchivinti. Chai ju yuʼunch ju talhinajun lacatalhavat tamokslanin ju ixmacaʼan ni cacʼatsacalh ni xtʼaknicʼantʼa ju milhichʼalhcat ni aʼunaʼ ju lapanacni ixchivinti Dios. 15 Va tachi anavitʼich tachi chun ju ani taxtokni ju icjuntan. Chai anavitʼich ixlhichux ju miʼalhunut. Ju chunch catalaktsʼinan ixchuxʼan ni tʼaʼun palaich mispanaʼ ixchivinti Dios. 16 Alhistʼacchʼokʼocʼach miʼakstu. Chai vachuʼ anavitʼi cuenta tuchʼi amalaniyaʼ ju lapanacni. Ju chunch atʼakʼalhtʼaxtʼuyaʼ ju uxintʼi chai vachuʼ catatakʼalhtaxtuyaʼ ju yuʼunchach ju catakʼasmatniyanch.
1 Jantu tavanan alakʼakʼaimatʼi ju va papach. Alai amasunin tuchi najun laʼixchivinti Dios tachi ju va junch mimpai ju tʼaʼun juniniʼ. Chai ju mintʼachuncaʼ amapʼaksitʼi tachi ju va miʼalakʼavinch. 2 Chai ju na lactʼacuninch chunch ju amasunin tuchi najun laʼixchivinti Dios tachi ju alatʼi ni minati cava. Chai ju va atsiʼincaʼ amapʼaksitʼi tachi ju va miʼalakʼavinch. Para jantu va yuchi ni va tumpa alhipʼastʼactʼi. 3 Atʼalhoninch chai aʼaktʼaiʼutʼich ju animacontilacanta ju vasalh va isʼakstuʼan tatʼajun. 4 Para ju tam chakoʼulh ju nimacontilacanta ni catʼanimacontilacalh isʼaskʼatʼa u tam ixpapanti pus chach yuʼunch ju taʼaktaiju ju laʼixmaktasqʼuinit. Pus lhijunch ni catamapuspʼitnilh ju ixpaiʼan u ixnatiʼan tuchi tamakʼalhkʼajnalh ixlakʼayacaʼan. Chai ju Dios na kʼoxich lhiulai acsni chunch lai ju tam askʼatʼa. 5 Para ju tam chakoʼulh ju va nimacontilacanta chai ju va isʼakstu tʼajun lhilaksi ju Dios chai va tachi tapaininich chai va tachi tʼachivininch tsʼis chai tuncuj. 6 Para ju tam chakoʼulh mas nimacontilacanta ju na kʼachani ixtaxtokni ju ani lacamunutpaʼ pus mas tʼajuncaʼ para ju Dios laktsʼin ni tachi ju va nita. 7 Pus yuchi ju alhimapʼaksitʼi ju lapanacni. Ju chunch ni matich cajunaʼ ixʼalactuʼuntiʼan ixlacata ju ani taxtokni. 8 Pus ju tam xamatiʼ ni jantu caʼaktaiju ju ixpai ixnati u ixlakʼau u ixpuxlimti u ixcucu u ixquin u yuʼunch ju tatanumanalh laʼixchakaʼ laʼixmaktasqʼuinitʼan pus lana putalacasui ni jantu slivasalh ni lhilacaʼanta ju ixchivinti Dios. Va palai lakʼalhini ixlhamapʼaksin ju Dios ju yuchi. Palai jantu ju jantucaʼ lhilacaʼanta ju Cristo. 9 Laich catsʼokʼulanicalh ixtapakaʼut tam chakoʼulh ju nimacontilacanta ni caʼaktaijucalhch ju pacxanta sesenta cʼata chai va pumatam ixpapa ixjunita. 10 Vachuʼ tasqʼuini ni catanaulh chux ju lapanacni ni na ixnavi lamapainin. Chai tasqʼuini ni alakʼayalh ju isʼaskʼatʼan chai yauch ixʼajuni ni xamatiʼ ixlakacujtilaputun laʼixchakaʼ chai ixʼachʼalhcatnani ju ixlapanacni Dios mas va lacatʼicstʼi ixlhicʼatsai chai ixʼaʼaktaijui ju na ixtamakʼalhkʼajnan chai va tachi ixnavich tachi chun ju amapaininti. Pus ni ixnavi tachi chun ju ani pus lai tsʼokʼulanican ixtapakaʼut. 11 Para ju animacontilacanta ju va palaicaʼ atsiʼin jantu atsʼokʼulatʼi. Pus ju aliʼin sia yuʼunch catamacomputunach ju lhichʼalhcat ju tanaulh ni tanaviputun ixlacata ju Cristo chai catatamakʼaxtokchokoputunach. Ni chunch catanavi pus matich cunaʼ ispantsʼiquisʼan ni lai lhu catanavi ju ixlhichʼalhcat Dios. 12 Chai ju chunch caʼulanicanaʼ ixtalakʼalhinʼan ni tamacaulich ju lhichʼalhcat ju ixtakʼalhtasuta ni catanaviyaʼ. 13 Vachuʼ tapusmani ni jantu tuʼuʼ tanaviputun. Va taʼatalacnunun ju lakʼachakʼanixni. Chai jantu va yuchi ni jantu tachʼalhcatnan para va tamapuchokoi ju chivinti chai tatachʼanui junta jantu ixcuentaʼan chai talhichivinin ju taxtokni ju jantu lhijun ni catanaulh. 14 Pus ni chunch ju talai ju va atsiʼincaʼ ju animacontilacanta pus yuchi iclhinajun ni chach aʼicalh. Chach taʼalilh ju isʼaskʼatʼaʼan chai chach kʼox talhistaclh ju laʼixchakaʼan. Ju chunch jantu tuʼuʼ catiʼalilh ju laich aquintapulhichivinin ju jantucaʼ talhilacaʼanta ju Cristo. 15 Icjunan chunch ni aktsʼiya tachʼakʼokʼachokolh ju lhacaticuru ju aliʼin. 16 Pus ju tam lapanac u tam chakoʼulh ju lhilacaʼanta ju Cristo ni alin ixnati u ixlakʼau ju va nimacontilacanta chach aʼaktaiju laʼixmaktasqʼuinit. Ju chunch ju ixtalhavatʼan ju talhilacaʼanta ju Cristo lai cataʼaktaijuyaʼ ju animacontilacanta ju vasalh va quilhpatinin tajunita ni lana va isʼakstuʼan. Jantu tasqʼuini ni cataʼaktaiju ju alin tam xamatiʼ. 17 Tasqʼuini ni slivasalh catalhonicalh ju lapanacni ju tamuctaxtui laʼixlhichʼalhcatʼan acsni talhinajun lacatalhavat ju talhilacaʼanta ju Cristo. Vachuʼ caʼaʼaktaijucalh laʼixmaktasqʼuinitʼan. Chai palai catalhonicalh chai palai caʼaʼaktaijucalh ju yuʼunch ju tanajun ixchivinti Dios vachuʼ chai taʼamalaninin ixlhichux ixʼalhunutʼan. 18 Pus chunch aʼulhtʼutʼi ni chani najun laʼixchivinti Dios: “Jantu amakʼankʼatʼanutʼi tuʼuʼ ju mivacax acsni tʼajun pʼakxnaʼ ju cebada”. Chunch ju najun. Chai ju alacatam chani najun: “Lhijunch ni camapalacalh ixtapalh ixlhichʼalhcat ju lapanac ju chʼalhcatnan”. Chunch ju najun. 19 Pus jantu anavitʼi cuenta ni xamatiʼ lhichivinin pumatam ju lhinajun lacatalhavat. Va acsnich ju lai akʼasmatniyaʼ acsni catanonach tachi pumatʼui u pumatʼutu ni talaktsʼilh acsni xanavi ju anuʼ alactuʼunti. 20 Para ju yuʼunch ju talhinajun para ixlaquilhtu va tsa taʼalactuʼunun akʼaich laʼixʼucxlacapuʼan ju aliʼin ju talhinajun. Ju chunch ju aliʼin catatalhananach vachuʼ. 21 Pus ju Dios chai ju Jesucristo chai ju anquilhnin ju asacxtucanta si quintalaktsʼinan tuchi naviyau. Pus yuchi iclhitapaininiyan ni amuctʼaxtʼutʼich tachi chun ju ani taxtokni ju icjuntan. Vaklhtam chun alaktsʼi ju lapanacni. Jantu va pumacatami amapʼainitʼi. 22 Jantu va sokʼo axtʼaknin ju ixlhichʼalhcat ju tam xamatiʼ ni calhinaulh lacatalhavat. Pus ni vatsʼalhti caxtaknicalh ju ixlhichʼalhcat chai astan jantu sok catailhiʼalh pus aʼulanicʼanaʼ ju mintalakʼalhin ju uxintʼi. Alai salaka aʼuntʼi ju uxintʼi. 23 Ju atipuʼanta jantu va xcan ju akʼotʼi. Para akʼotʼi lacatsʼunin vino vachuʼ ni cacʼuchʼulh ju mimpajan ni va tsa tʼakʼankʼai. 24 Ju ixʼalactuʼunti ju aliʼin lapanacni lana tasui. Chai ju aliʼin mas jantucaʼ lai tasui ju macxcai ju tanavi para astan aktsʼiya catatalacasuyach acsni cachinaʼ ju avilhchan ju lhcata ju Dios. 25 Pus chunchach vachuʼ ju kʼoxi lhichʼalhcat ju tanavi ju aliʼin. Ju aliʼ lana tasui. Chai ju aliʼ tulai vatsʼalhti tasui. Para astan cacʼatsacanaʼ ni tanavita ju kʼox.
1 Tachi chun ju lapanacni ju talhilacaʼanta ju Cristo ju astʼacanta catatalhonilh ju ixʼucxtinʼan. Ju chunch jantu va kʼaya calhichivinincanaʼ ju ixtapakaʼut ju Dios nin yuchi ju ixchivinti. 2 Pus ni vachuʼ lhilacaʼanta ju Cristo ju ixʼucxtinʼan pus ju xalapanacni jantu lai catitanaulh ni jantu tuʼuʼ talhiulai ju ixʼucxtinʼan va ixlacaʼatalh ni vachuʼ talhilacaʼanta ju Cristo ju yuʼunch. Alai va palai kʼox catachʼalhcatnanilh ni taʼaktaijui xamatiʼ ju vachuʼ lhilacaʼanta ju Cristo chai ni tatʼalamapaini. Pus icjunan ni chunchach ju amalanitʼi chai chunchach ju alhimapʼaksitʼi ju lapanacni. 3 Pus jantu xcai ni caʼalilh xamatiʼ ju amalaninin atumpa chivinti chai jantu chun najun tachi ju ixchivinti quiʼucxtinʼan Jesucristo ju sok junita chai jantu najun ta yu laich caputsuculh tachi ju kʼoxich lhiulai ju Dios. 4 Pus ni chunch ju chivinin tam xamatiʼ pus ju yuchi na lhitakʼayatach mas jantu tuʼuʼ mispai. Va lhilakachapui ju lakʼaiti chai lasat ixlacata ju tuʼuʼ lacatsʼunin chivinti. Para ju chunch va puʼalin ju alhacchaʼanti chai lakʼaiti chai tachi chun ju macxcai chivinti ixlacata apumatam chai tamucʼani ixtalakʼalhin mas jantu slivasalh. 5 Chai lana jantu tavanan tamamactai ju laclakʼaiti. Pus na takʼalhinitach ju ixʼatalacpastʼacʼatʼan ju lapanacni ju chunch talai chai va tamacajunta ju stavasalanti. Ju yuʼunch va tapulhajaputun ju tuchi tamalani ju lapanacni ixlacata ju Dios. Para ju uxintʼi amacʼauch ju yuʼunch. 6 Pus ju palai kʼox ju lhajayau yuchi ni kʼox lhiulai ju Dios ju quiʼatsucuntiʼan chai lhikʼach catsucuyau. Jantu va yuchi ju ixmakʼaixtʼokʼach ju tumin ju capastactsucu. 7 Pus tasqʼuini ni jantu va yuchi ju tumin ju canaviyau cuenta ni jantu tuʼuʼ lhimintau ju ani lacamunutpaʼ chai acsni caniyau jantu tuʼuʼ calhiʼanau. 8 Pus ni alinch ju quimpumpuʼan chai quivaitiʼan pus calhikʼachauch. 9 Para ju va makʼaliʼ tajumputun na paklhu amapastʼacʼanican ju macxcai chai aʼokxchokʼocanta. Chai na tijlhu taxtokni ju talacasqʼuin mas jantu lhitapalai chai mas na macxcai. Pus yuchach ju taputakʼalhini ju isʼatsucuntiʼan chai taputsʼankʼakʼalhi ju lapanacni. 10 Pus ni na kʼachaniyau ju tumin pus anchach ju na lhu puʼalin ju quiʼalactuʼuntiʼan. Ju aliʼin ni yuchach ju tumin ju na takʼachani pus jantuch vana talhilacaʼanta ju Jesús. Chai na lhu talhimakʼalhkʼajnanchokoi isʼakstuʼan ju chavai. 11 Para ju uxintʼi ni ixlapanac Diosʼat pus amacʼauch tachi chun ju ani taxtokni. Yuchi ju anavitʼi cuenta ta yu laich soknicʼa aʼuntʼi chai ta yu kʼox calhiula ju Dios ju miʼatsucunti. Chai vachuʼ va tachi alhilacʼapʼich ju Dios. Chai va tachi amapʼainininch chai achʼixkʼoʼ mas va tuchi camilh lamiʼatsucunti. Chai jantu alhitʼakʼayatʼi tuʼuʼ. 12 Chai ni lhilacʼapʼintʼa ju Cristo pus ixlhichux ju miʼalhunut asastʼuctʼi ju macxcai ju va camacʼapʼaniputunan ju Cristo. Chai va tachi anavitʼich cuenta ju miʼatsucunti jonkʼalhita ju lhitʼasanicʼantʼa. Chai miʼakstu nauch laʼixʼucxlacapuʼan ixtalhavat lapanacni ni lhilacʼapʼintʼa ju Cristo. 13 Pus Dios ju axtaknikʼojui isʼatsucuntiʼan tachi chun ju taxtokni. Chai ju Jesucristo naulh tichi lapanac junita laʼixʼucxlacapuʼ ju Poncio Pilato. Pus ju yuʼunch quintalaktsʼinan acsni icmapʼaksiyan. 14 Pus icjunan ni amuctʼaxtʼukʼoch ju ixchivinti Dios. Chai jantu amalhqʼuiliqʼuitʼi nin yuchi ni lai macxcai calhichivinincalh ju va milacata. Chunchach ju alatʼi tus acsni caminchokoyaʼ ju quiʼucxtinʼan Jesucristo. 15 Chai yuchi ju Dios ju lhcata ju anuʼ avilhchan chai yuchi ju camalacasuyach ju Jesucristo acsni cachinach ju anuʼ avilhchan. Pus yuchi ju Dios ju lhinonkʼojui chux. Matich apumatam tachi ju yuchi chai na kʼoxich lhichivincan ju yuchi. Yuchi ju palai kʼai ucxtin tachi chun ju ucxtinin chai yuchi ju palai xakʼai tachi chun ju xalackʼajin. 16 Va yuchach ju jantu lai ni. Chai ju yuchi tʼajun lacaʼatuncunuʼ junta jantu lai xamatiʼ lakchaʼan. Ju yuchi jantu xamatiʼ laktsʼinta nin xamatiʼ lai catalaktsʼilh tachi ju juntau ju chavai. Yuchi ju talhonikʼocan. Chai yuchi ju alin ixtachaput ju jonkʼalhita. Slivasalh chunch ju junita. 17 Pus amapʼaksitʼich ju makʼalinin ju ani lacamunutpaʼ ni jantu catalhitakʼaya ju ixmakʼalitʼan. Nin yuchi ni lai catalhilaksi ju ixmakʼalitʼan ju lai tsʼankʼai lhi tʼuxam. Aʼunitʼich ni alai yuchi ju Dios ju catalhilaksi. Yuchach ju quintaxtaknikʼoyan tachi chun ju taxtokni ju maktasqʼuiniyau ni laich calhikʼachanauch. Chai jantu va quintalhcaxtakniyan. 18 Pus aʼunitʼi ju makʼalinin ni catanavilh ju kʼox. Chai lhu catanavilh ju lamapainin. Chai jantu va lacatapʼastu cataxtaknilh ju ixtuminʼan ju vasalh tamaktasqʼuini. Alai va lacakʼachat ju catapuʼaktaiju ju ixtuminʼan. 19 Chai ju chunch na lhu catamakʼayaʼ ju stavasalanti ixmakʼalitʼan ju lactʼiyan. Chai caʼalinaʼ ju isʼatsucuntiʼan ju lactʼiyan ni jantu talhilaksi ju ixtuminʼan. 20 Ju uxintʼi ji Timoteo kʼoxich alhistʼactʼi ju ixchivinti Dios ju xtʼaknicʼantʼa ni amasuniyaʼ ju aliʼin. Jantu alakʼaʼitʼi ni xamatiʼ camapaxalh. Chai amacʼauch ju chivinti ju jantu lai aktaijui xamatiʼ ni camispa ju Dios chai ixchivintiʼan ju lapanacni ju tanajun ni na kʼox atalaninin tajunita mas jantu. 21 Chai icpujunan chunch ni talhilacaʼalh ju chunch chivinti ju aliʼin chai jantu talhitajuta ixti ju Dios. Pus ictapainini ju Dios ni caʼaktaijuyan lacaʼamapaininti. Vasalh iclacasqʼuin ni chunch caʼulhtuyan.
1 Ju quitʼin icPablo. Ixtamalakachan ju Jesucristo icjunita ni chunch ju xalacasqʼuin ju Dios. Pus ju yuchi lacasqʼuilh ni ixtamalakachan acva ni kʼalhtasu ni caxtakniyaʼ ju isʼatsucunti jonkʼalhi va tichi chavaich ju lhilacaʼanta ju Cristo Jesús. 2 Pus icmacʼamiyan ji Timoteo. Ju uxintʼi tachi ju va quintsʼalhʼat unitʼa chai na icmapainiyan. Pus ictapainini ju quimpaiʼan Dios chai ju quiʼucxtinʼan Jesucristo ni catanaviniyan lamapainin chai cataʼaktaijuyan ni jantu calacʼalh ju miʼalhunut. 3 Ju quitʼin icchʼalhcatnani ju Dios lacasalaka atalacpastʼacʼat tachi ju ixtalai ju quilacpaiʼan ju makʼanchich. Chai icjuni ju Dios lakʼailaktsʼiuch ju milacata. Pus jantu tavanan iccʼapʼan acsni ictʼachivinin ju Dios ju tsʼis chai ju tuncuj. 4 Pus acsni icpastʼacʼa ta yu kʼalhu acsni iclamacaju pus na iclaktsʼimputunan ni lai slivasalh aclhikʼachanaʼ. 5 Pus icpastʼacʼa ni ixlhichux miʼalhunut ju lhilacʼapʼin ju Jesús. Pus ju pʼulhnan xatalacaʼi yuchi ju xakʼai minati Loida chai ju minatich Eunice. Chai ju chavai iccʼatsai ni vachuʼ lhilacʼapʼintʼa ju Jesús ju uxintʼi. 6 Pus yuchi iclhimapastʼacʼaniyan ni atʼailhipʼich ixʼamasunica ju lapanacni ixchivinti Dios ni yuchi ju Dios ju xalhikʼailaktsʼinan ju kʼox miʼaktsulh ni laich anaviyaʼ ju chun lhichʼalhcat. Chai acsnich ju xaxtʼaknicʼan ju anuʼ lhichʼalhcat acsni icmokslanin ju quimacaʼ lamilacatuna ni capucʼatsacalh ni ixlapanac Dios xaʼun. 7 Icpujunan chunch ni jantu quintaxtaknitan ju Dios ju alhunut ju va catalhanalh. Alai quintaxtaknitan ju alhunut ju tachapun. Vachuʼ quintaʼaktaijutan ni lai amapainininau chai lai lhistacchokocanau quiʼakstuʼan. 8 Pus tun tʼitʼamaxan ju ixchivinti ju quiʼucxtinʼan Jesús nin yuchi ju quitʼin mas xalacasqʼuin ju Jesús ni actʼalhnucalh. Para laʼixtachaput ju Dios aqʼuintʼamakʼalhkʼaj ixlacata ju chivinti junta najun tichi chavaich ju Cristo. 9 Pus Dios ju quintamakʼalhtaxtun chai quintatʼasaninch ni salakach cajunau laquiʼatsucuntiʼan. Chai jantiyuʼ ju quintalhiʼulhtutan chunch va ixlacata ni caʼixnaviu tuʼuʼ ju kʼox. Alai chunch quintaʼulhtutan ni chunch ju xalacasqʼuin ju yuchi. Pus mas jantucaʼ ixnavican ju lacamunutpaʼ pus ju yuchi xaquintanavinitan lamapainin ixlacata ju Cristo Jesús. 10 Para va chavaicaʼ ju malacasucanta ju anuʼ lamapainin ju quintanavinitan. Talacasu acsni quilachilh ju quiʼamakʼalhtaxtunuʼan Jesucristo. Pus ixlacata yuchi jantu tasqʼuini ni canikʼalhiu. Para laʼixchivinti Dios quintajuntan ni alin ju quiʼatsucuntiʼan ju jonkʼalhita ni lhilacaʼanau ju Cristo. 11 Pus ju quitʼin iclhcaʼulacanta ni acnonaʼ ju ani ixchivinti Dios ixlacata ju Jesús. Chai yuchi ju quisacxtulh ni ixtamalakachan acva ixlacata ju ani chivinti chai ni acʼamalaniyach ju lapanacni ixlacata yuchi. 12 Chai ni icʼajuni ju lapanacni ju ani chivinti pus yuchi iclhimakʼalhkʼajnan ju chavai. Para jantu icmaxanan ni icmispai tichi chavaich ju iclhilacaʼanta. Chai slivasalh iclacaʼi ni tachapun ju yuchi. Lai aquilhistacniyaʼ ju sastʼi quiʼatsucunti tus acsni caminchokoyaʼ ju yuchi. Pus ju quitʼin iclhilaksich ni chunch ju aquiʼulhtuyaʼ. 13 Tun tʼimapʼaxa ju soknicʼa chivinti ju icjuntan. Va tachi alhilaksitʼich ju Cristo Jesús chai lacaʼamapaininti aʼunch ju aliʼin ju ixchivinti. 14 Jantu alakʼaʼitʼi ni xamatiʼ camapaxalh ju ixchivinti Dios ju xtʼaknicʼantʼa ni aʼunaʼ ju lapanacni. Chai lai chunch alatʼi laʼixtachaput ju Spiritu Santu ju tʼajun laquiʼalhunutʼan. 15 Ju uxintʼi cʼatsʼaich ni ixchuxʼan ju amachakʼan Asia quintamacauʼulalh. Ju sia yuʼunch yuchi ju Figelo chai ju Hermógenes. 16 Pus ictapainini ju quiʼucxtinʼan Jesús ni caʼaʼaktaijuyaʼ lacaʼamapaininti ju tatanumanalh laʼixchakaʼ ju Onesíforo ni na paklhu xaquintamakʼankʼachai. Jantu xatalhimaxanan mas ictʼalhnucanta. 17 Pus ju yuchi acsni chilh ju ani lakʼachakʼan Roma slivasalh quimpuxcaulh chai quilhitajulh. 18 Vachuʼ ictapainini ju quiʼucxtinʼan Jesús ni capastʼacʼaʼ ju lamapainin ju xaquinavini ju Onesíforo ju anuʼ avilhchan acsni camakʼosaspitcanaʼ ju lapanacni. Pus uxintʼi ju kʼox cʼatsʼai ni na quiʼaktaijulh ju yuchi ju lakʼachakʼan Efeso acsni ixvilhchau ju anch.
1 Ju Cristo Jesús navinitan lamapainin ju uxintʼi ji quintsʼalh. Pus apʼutʼachʼapʼutʼich ju yuchi. 2 Pus ju uxintʼi na paklhu xakʼasmatʼa ju quinchivinti chai na pumalhu vachuʼ tacʼatsai ni yuchach ju stavasalanti. Pus yuchach ju amalanichʼokʼoyaʼich ju anuʼ lapanacni ju alaktsʼinch ni laich catamuctaxtuyaʼ. Ju chunch ni laich cataʼamalaniyaʼ vachuʼ ju aliʼin. 3 Pus achʼixtʼich ju makʼalhkʼajnat ju axtʼaknicʼanaʼ va ixlacaʼatalh ni anonaʼ ixchivinti Dios. Achʼixtʼich tachi ju lai tam taropa ju makʼalhkʼajnan lacalhilucut. Pus vachuʼ ixtaropajni juntau ju Dios chai yuchi ju quincapitánʼan junita. 4 Pus ju tam taropa ju tʼonacha lacalhilucut jantu tuʼuʼ navi cuenta ixlacata ju atumpa atsucunti. Va yuchi ju navi cuenta ju tuchi kʼox calhiulayaʼ ju ixʼucxtin. Pus tasqʼuini ni vana va chun calau laʼixmacni ju Dios. Jantu va yuchi ju canaviu cuenta ju xataxtokni ju ani lacamunutpaʼ. 5 Chai vana va chun tachi chun ju takʼamanan. Ni jantu sok takʼamanan tachi ju lhijun ju xalhamapʼaksin pus jantu tuʼuʼ talhajai. Pus tasqʼuini ni vana va chun calau laʼixmacni Dios. Acsni jantu naviyau cuenta tachi ju lhijun laʼixlhamapʼaksin Dios pus jantu lai tuʼuʼ calhajatachau ju lactʼiyan. 6 Chai ju tam lapanac ju na lhixkʼopta ixʼachʼananti pus yuchi ju pʼulhnan caʼamaklhtayananach ju xatocʼat. Pus tasqʼuini ni vana va chun calau laʼixmacni ju Dios. Acsni slivasalh laʼixlhichux quiʼalhunutʼan canaviniyau ju ixlhichʼalhcat pus calaktsʼinau ju xalhiʼut ju quilhichʼalhcatʼan ju ani lacamunutpaʼ. 7 Apʼastʼactʼich ju ani ju icjunan chai yuchi ju miʼucxtin Jesús ju camamachakxaniyan tuchi ju nomputun. 8 Apʼastʼactʼich ni makʼaniya ixpapanti ju kʼai ucxtin David ixjunita ju Jesucristo. Chai ju yuchi lokʼonchokolh junta ixmacnucanta. Chai icʼajuni ju lapanacni ni ixlacata yuchi lai takʼalhtaxtucan. 9 Chai va ixlacata ni chunch icʼajuni ju lapanacni pus na icmamakʼalhkʼajnican. Tus tachʼin quintanavi tachi ju va icʼalactuʼunuch. Para ju ixchivinti Dios makpitsicanta ixlhilacaputsʼun ju lacamunutpaʼ. Jantu lai xamatiʼ tachʼin navi ju yuchi. 10 Chai yuchi chux iclhimakʼalhkʼajnan va ixlacataʼan ju asacxtulh ju Dios. Chai ju chunch ju yuʼunch lai catatakʼalhtaxtuyaʼ ni catalhilacaʼanaʼ ju Cristo Jesús. Chai vachuʼ laich catatʼatolhkʼalhiyanta ju Cristo ju lactʼiyan. 11 Vasalh junima chivinti. Ni quintalhilhcatan ju Dios ni tachi ju va tʼanitauch ju Cristo acsni tavanan xtujcalh ju yuchi ju lacacurus pus vachuch catʼatolhtachau ju yuchi ju lactʼiyan. 12 Ni jantu tavanan cʼapʼau ju Cristo mas va tuchi min laquiʼatsucuntiʼan pus vachuʼ catʼataʼucxtinitachau ju yuchi ju lactʼiyan. Ni canonau ni jantu mispayau ju yuchi pus ju yuchi vachuʼ canonaʼ ni jantu quintamispayan ju quijnanʼan. 13 Mas jantu muctaxtuyau ju quijnanʼan para ju yuchi aktsʼiya camuctaxtuyaʼ tuchi najunta. Ju yuchi jantu tavanan lai tam catinaulh astan. 14 Amapʼastʼacʼanitʼi ju yuʼunch ju talhilacaʼanta ju Jesús tachi chun ju icjuntan ju uxintʼi. Pus ju quiʼucxtinʼan Dios quintalaktsʼinan tachi chun ju naviyau. Chai yuchi iclhijunan ni amapʼaksitʼich ni jantu catalhilasalh ju tuʼuʼ ju va chivinti junita. Ju chunch jantu lhitapalai. Alai va alakʼalhini ixʼatalacpastʼacʼatʼan ju tatʼajun kʼasmatnin. 15 Va yuchi ju anavitʼi cuenta ta yu laich atʼalacʼasunin ju Dios ta yu kʼoxich capulhiulayan. Chunch ju alatʼi tachi ju tam chʼalhcatnaʼ ju jantu lai mamaxanican ixlacata ju tuchi navita. Sok amasunin ju ixchivinti Dios. Yuchach ju stavasalanti. 16 Amacʼauch ju chivinti ju jantu lai xamatiʼ catiʼaktaiju ni laich camispa ju Dios chai ju tuʼuʼ chivinti ju jantu lhitapalai. Pus ju chunch tachivinin va palai palai catacʼapʼaʼ ju Dios. Yuchi iclhijunan ni amacʼauch ju chunch ju uxintʼi. 17 Chai ju ixchivintiʼan ju yuʼunch va palai palai calakʼalhiniyaʼ ju isʼatsucuntiʼan tachi ju tuʼuʼ tsʼitsʼi ju va puchʼiʼan. Chai chunchach ju tachivinin ju Himeneo chai ju Fileto. 18 Ju ixtʼiyunʼan makyuʼunch tajunita ju lapanacni ju jantu sok taʼamalaninin. Pus ju yuʼunch va tanajun ni alokʼonchokocantach ju lapanacni ju chavai chai jantu aktam catilokʼonchokocalh. Chai ni chunch tanajun pus tamalacaʼinita ju aliʼin chai taʼamacʼapʼanita ju ixchivinti Dios. 19 Pus cʼatsacan ni xtakni ixtachaput ju Dios tachi chun ju talhilacaʼan ju yuchi ni chani najun laʼixchivinti ju tsʼokcanta: “Ju Dios mispai ju ixʼanuch tajunita”. Chai alacatam chani najun: “Chach macaulh ju alactuʼunti tachi chun ju tanajun ni talhilacaʼanta ju ixʼucxtinʼan Jesús”. Chunch ju najun chai yuchi pucʼatsayau ni vasalh alin ixtachaput ju Dios. 20 Pus ju lacakʼai chakaʼ jantu va yuchi ju alin ju puchʼalhcatna ju oro lhinavicanta chai ju plata lhinavicanta. Para vachuʼ alin ju puchʼalhcatna ju va qʼuiu lhinavicanta chai ju va tʼun lhinavicanta. Pus ju lhinavicanta oro chai plata vasalh lhitapalai. Para ju lhinavicanta qʼuiu chai ju lhinavicanta tʼun jantu na chun tapalai. 21 Pus ju quijnanʼan chunch juntau tachi ju ani puchʼalhcatna. Pus ni alin xamatiʼ ju lana jantu caʼamalakʼavi ju yuʼunch ju jantu sok masui ju ixchivinti Dios pus calhimispacanaʼ ni lhitapalai ju laʼixmacni Dios. Va ixʼanuʼ isʼakstu Dios cajunaʼ chai laich capunaviyaʼ ju ixlhichʼalhcat. Chai kʼox cajunaʼ ixlacata va tuchi kʼoxi lhichʼalhcat ju xtakniputun ju Dios. 22 Ni jantuch vana navi ju chavai tachi ju va puʼaskʼatʼa pus atʼailhipʼich ju chunch. Vachuʼ atʼailhipʼich ixpuxcajuca ta yu laich soknicʼa capujunlh ju miʼatsucunti laʼixmacni Dios. Chai va tachi alhilacʼapʼi ju Jesucristo. Chai va tachi amapʼainininch. Chai jantu lana atʼalakʼaʼitʼich xamatiʼ. Chunch ju alatʼi ni vachuʼ chunch talai ju yuʼunch ju vasalh talhilaksi ju Dios chai salaka junita ju ixʼalhunutʼan. 23 Jantu anavitʼi cuenta ju va jantu taʼacʼatsananta chai ju va jantu taʼamachakxanan. Jantu anavitʼi cuenta ni cʼatsʼaich ni va puʼalin lhilucut ju chunch chivinti. 24 Chai tasqʼuini ni jantu va lasani lapanacni catava ju ixlapanacni ju quiʼucxtinʼan Jesús. Alai tasqʼuini ni kʼox lapanac cava lhichux chai laich camalaninilh chai laich cachʼixlh ju makʼalhkʼajnat. 25 Chai tasqʼuini ni lacalhikʼox caʼalacjunilh ju yuʼunch ju jantu kʼaixtam tatʼaʼan. Chunch caʼalactʼalalh ni jantu xcai ni Dios caʼalacxtaknilh tumpa ixʼatalacpastʼacʼatʼan ta yu laich catapumispa ju stavasalanti. 26 Ju chunch catamachakxayaʼ ni va aʼokxchokʼolh ju lhacaticuru. Chai catacʼatsayaʼ ni yuchi ju lhacaticuru ju ixlhinajun laʼisʼatsucuntiʼan chai ixtanavini ixkʼachat ju yuchi.
1 Amachʼakxatʼich ju ani. Acsni vanin chimputun ju avilhchan acsni caminchokoyaʼ ju Cristo pus na lhu caʼalinaʼ ju makʼalhkʼajnat. 2 Pus caʼalinaʼ ju lapanacni ju va isʼakstuʼan caʼamapainichokocanach. Chai catakʼachaniyaʼ ju tumin. Chai catanonaʼ ni palai lackʼoxin tajunita. Palai jantu ju aliʼin. Chai jantu tuʼuʼ catalhiulayaʼ ju ixtʼalapanacʼan. Chai macxcai chivinti catanonaʼ. Chai jantu cataquiclacaʼiyaʼ ju ixpaiʼan ixnatiʼan. Chai jantu tuʼuʼ catalhiulayaʼ ju lhakʼailaktsʼinch ju anavinicanta. Chai jantu tuʼuʼ catalhiulayaʼ ju ixtaxtokni Dios. 3 Chai jantu catamapainiyaʼ ju ixtʼalapanacʼan. Chai jantu lai caʼamakʼoxamixicanaʼ. Chai va kʼaya catalhichivinach ju ixtʼalapanacʼan. Chai jantu lai amapʼaksichokocan isʼakstuʼan. Chai kʼai tajunita catajunaʼ. Chai jantu catakʼachaniyach ju kʼox. 4 Catamakʼaxtʼakʼach ju ixtʼalapanacʼan. Chai jantu tuʼuʼ catakʼasmatʼaʼ. Chai na kʼai catacʼatsayaʼ va laʼisʼakstuʼan. Chai palai tuʼuʼ catalhiulayaʼ ju ixkʼachat ju lacamunutpaʼ. Palai jantu ju Dios. 5 Catatalacasuyach tachi ju vasalh talhilacaʼanta ju Dios para lana jantu catasuyaʼ ju ixtachaput Dios laʼisʼatsucuntiʼan. Pus alackʼostʼi ju yuʼunch. 6 Pus sia yuʼunch alin ju taʼaʼokxchokʼonun. Ju yuʼunch tatanui laʼixchakaʼan ju chakolun ju va jantu taʼacʼatsananta chai taʼamalacaʼini ixchivintiʼan. Pus ju anuch chakolun na lhu alactuʼunti ju tanavita. Para tapuxcajui aliʼ taxtokni ju jantu soknicʼa. 7 Pus ju yuʼunch takʼasmatni ixchivinti va tichi chavaich para jantu tavanan lai tamachakxai ju stavasalanti ixlacata ju Cristo. 8 Pus ju makʼanchich ju Janes chai ju Jambres tatʼalakʼailh ju Moisés. Pus chunchach vachuʼ talai ju ani lapanacni. Jantu kʼox talhiulai ju stavasalanti ixlacata ju Cristo. Jantuch kʼox ju ixʼatalacpastʼacʼatʼan ju yuʼunch. Pus lana tasui ni jantu talhilacaʼanta ju Cristo. 9 Para tachi ju tatapasalh ju ixtʼalaxcai ju Moisés acsni tasu ni va aʼokxchokʼonin ixtajunita pus vana va chunch catapasayaʼ ixlacataʼan ju ani aʼokxchokʼonin. Jantu lai catatailhiʼanaʼ ju ixʼaʼokxchokʼontiʼan. Aktsʼiya catasuyach ni va lakachapunin tajunita. 10 Para ju uxintʼi cʼatsʼatʼa ta yu xacʼamalaninin chai ta yu ixjunita ju quiʼatsucunti chai tuchi xacnaviputun chai ni vasalh iclhilacaʼanta ju Jesucristo. Chai cʼatsʼatʼa ni jantu tavanan jeks xacʼui. Cʼatsʼatʼa ni na xacʼamapaininin chai xacchʼixkʼojui tachi chun ju macxcai. 11 Cʼatsʼatʼa ta yu xacxcaicanta chai ta yu xacmakʼalhkʼajnan. Cʼatsʼatʼa tuchi ictapasalh ju lakʼachakʼanixni Antioquía chai Iconio chai Listra. Cʼatsʼatʼa ta yu xaquintamamakʼalhkʼajni. Para lhichux quimakʼalhtaxtulh ju quiʼucxtin Jesús. 12 Pus tachi chun ju tatsucuputun tachi ju kʼachani ju Cristo Jesús camamakʼalhkʼajnicanaʼ. 13 Para ju na taʼalactuʼunun chai ju taʼaʼokxchokʼonun palai kʼai junita catajunaʼ. Ju yuʼunch cataʼaʼokxchokʼonunach ju aliʼin chai caʼokxchokʼocanaʼ isʼakstuʼan. 14 Para ju uxintʼi va tachi alacʼaʼitʼi ju tuchi lanitʼach chai cʼatsʼaich ni stavasalanti chai cʼatsʼaich tichi chavaʼitnich ju tamalanitan. 15 Pus tus milhitalacatʼicstʼin ju mispʼatʼa ju ixchivinti Dios ju tsʼokcanta. Anchach ju pucʼatsacan ni lai takʼalhtaxtucan acsni maklacaʼanican ju Cristo Jesús. 16 Pus tachi chun ju ixchivinti Dios ju tsʼokcanta isʼakstu ju Dios ju amaʼatsʼokʼulani ju lapanacni. Chai ni chunch junita ju ixchivinti Dios pus anchach ju pulanican ju kʼox chai pucʼatsacan junta jantu soknicʼa ju laquiʼatsucuntiʼan. Chai ni laktsʼincan ju ixchivinti Dios pus lai pulakʼoxican ju quiʼatsucuntiʼan. Chai anchach ju pulanican ju atsucunti ju kʼox lhiulai ju Dios. 17 Chai ni chunch junita ixchivinti Dios pus jantu tuʼuʼ cʼacxni laʼisʼatsucunti ju ixlapanac ju Dios ni lai cacʼatsa ju ixkʼachat ju Dios chai lai canaviyaʼ.
1 Ju quiʼucxtinʼan Jesucristo camakʼosaspitaʼ ju lapanacni ju tatʼajun chai ju tanitach. Chai yuchi ju caminchokoyaʼ chai caʼalinach ju ixpuʼucxtin. Pus ju yuchi chai ju Dios quintalaktsʼinan acsni icmapʼaksiyan. 2 Icjunan ni amalanitʼich ju ixchivinti Dios. Amalanitʼich acsni kʼox talhiulai ju lapanacni chai mas jantu kʼox talhiulai. Amalacʼaʼinitʼi ju lapanacni ixchivinti Dios. Chai alakʼakʼaimatʼi ju va tsa taʼalactuʼunun. Chai aqʼuilhtʼapʼuʼutʼich ju jantu taʼalacaʼininan. Para acsni chunch alatʼi pus jantu jeks aʼunin ju lapanacni. 3 Chunch ju alatʼi ni caminaʼ avilhchan acsni jantu lana catakʼasmatputunaʼ ju lapanacni ju ixchivinti Dios ju soknicʼa junita. Alai va catakʼasmatputunach ju tuʼuʼ ju cʼus. Chai catamakʼaixtʼokʼaʼ ju amalaninin ju catanonach tachi ju takʼachani ju yuʼunch. 4 Chai jantu catakʼasmatʼaʼ ju stavasalanti ixlacata ju Cristo para catakʼasmatʼaʼ ju tuʼuʼ ju va chivinti junita. Ju jantu slivasalh. 5 Para ju uxintʼi va tachi kʼoxich alaccʼatsʼan. Achʼixtʼich mas va tuchi makʼalhkʼajnat. Aʼunch ju lapanacni ixlacata ju Jesús. Amuctʼaxtʼutʼich ju laʼixlhichʼalhcat Dios. 6 Chunch ju alatʼi ni chinta ju avilhchan acsni acniyach ju quitʼin ixlacata ju Cristo. Acmaconach ju ani lacamunutpaʼ. 7 Pus ju quitʼin vasalh ictastucnikʼota ju macxcai. Icnavikʼolh chux tuchi xaclhcaʼulanicanta. Ju quitʼin iclacaʼinikʼolhch ju ixchivinti Dios. 8 Pus ju lactʼiyan acxtaknicananta ju quintalhaja ni sok xactsucui ju ani lacamunutpaʼ. Yuchi ju quiʼucxtin Jesús ju aquixtakniyach acsni cachinach ju anuʼ avilhchan laʼixʼaclanti ju lacamunutpaʼ. Chai quiʼucxtinʼan yuchi ju navi ju soknicʼa. Chai jantu va quitʼin ju acxtaknicanaʼ para vachuʼ caʼaxtakniyaʼ ju yuʼunch ju tapacxantajich ju Jesús acsni caminchokoyaʼ. 9 Ni laich cava pus vatsʼalhti aqʼuilaktʼatʼi. 10 Pus ju quilakʼauʼan Demas kʼachanilh ju taxtokni ju alin ju ani lacamunutpaʼ chai quimacaulh. Alh ju lakʼachakʼan Tesalónica. Chai ju Crescente alh ju xalacatʼun Galacia. Chai ju Tito alh ju xalacatʼun Dalmacia. 11 Va yuchi ju Lucas ju quintʼavi. Pus atʼasaninch vachuʼ ju Marcos chai aqʼuintʼalaktʼanaʼich ni na lai quiʼaktaijui ju yuchi lacalhichʼalhcat. 12 Ju Tíquico icmalakachalh ju lakʼachakʼan Efeso. 13 Acsni atʼanaʼ alhitʼanaʼich ju quilakchʼit ju icmacontacha lakʼachakʼan Troas laʼixchakaʼ ju Carpo. Vachuʼ alhitʼanaʼ ju kʼalhtankʼai alhiqui. Para ju palai icmaktasqʼuini yuchi ju alhiqui ju tsʼapscanta. 14 Ju Alejandro ju puchʼalhcatnan cobre slivasalh na xaquisastʼucʼa lacalhichʼalhcat. Para ju quiʼucxtinʼan Dios camamapalaniyaʼ tachi ju lhijunch ixlacata ju tuchi talakʼalhin xaquinavini. 15 Pus vachuʼ ju uxintʼi alaccʼatsʼan ju ixlacata ju yuchi. Ju yuchi slivasalh na tʼalasai ju quinchivintiʼan. 16 Acsni pʼulhnan icchivimakʼancalh jantu xamatiʼ quiʼaktaiju. Ixchuxʼan va quintamacoyokʼo. Para ictapainini ju Dios ni jantu caʼalaclhixcailh mas chunch xaquintanavich. 17 Mas chunch quintanavilh ju aliʼin para ju quiʼucxtin Dios quintʼatayalh chai quixtaknilh ju tachaput ni laich xacnajun ixchivinti. Chai takʼasmatlich tachi chun ju jantu israelitanin tajunita. Chai ju Dios quimakʼalhtaxtulh ni va xaquintamakniputun. 18 Chai ju quiʼucxtin Dios aquimakʼalhtaxtuyaʼ ni jantu aquintanaviyaʼ tuʼuʼ macxcai. Chai aquilhiʼanaʼ junta lhinajun ju yuchi ju lactʼiyan. Chach lakʼayacalh ju yuchi tus va tavanan. Vasalh iclacasqʼuin ni chunch caʼulhtucalh. 19 Amacʼamitʼi ju Aquila chai ju Prisca ju ixʼamachakach junita. Vachuʼ amacʼamitʼi ju yuʼunch ju tatanumanalh laʼixchakaʼ ju Onesíforo. 20 Ju Erasto tolhcha ju lakʼachakʼan Corinto. Chai ju Trófimo icmacontacha ju lakʼachakʼan Mileto ni va ixtakʼankʼai. 21 Atʼatʼich acsni jantucaʼ lhicʼasnin jun ni laich calayaʼ. Ju Eubulo macʼamiyan. Vachuʼ ju Pudente chai ju Lino chai ju Claudia chai tachi chun ju lhiʼalakʼavin ju ani tavilanalh. 22 Pus ictapainini ju quiʼucxtinʼan Jesucristo ni catolach ju yuchi lamiʼalhunut. Vachuʼ ictapainini ju Dios ni catanaviniyan lamapainin minchuxʼan ju uxijnan. Vasalh iclacasqʼuin ni chunch aʼulhtʼucʼanaʼitʼit.
1 Ju quitʼin icPablo. Ixlapanac Dios icjunita chai ixtamalakachan ju Jesucristo ni acʼaʼaktaijuyach ju asacxtuta ju Dios ni catalhilacaʼanach ju yuchi chai catamispayach ju stavasalanti ixlacata ju Cristo. Chai ju chunch pus ju isʼatsucuntiʼan chunch cajunaʼ tachi ju kʼachanich ju Dios. 2 Chai chunch icʼajuni ju lapanacni ni laich vachuʼ caʼalinaʼ ju isʼatsucuntiʼan ju conkʼalhiyanta ju lactʼiyan. Pus ju Dios chunch ju ilhcaʼulata acsni tucaʼ ixnavi ju lacamunutpaʼ. Chai ju yuchi jantu lai aʼokxchokʼonun. 3 Pus mas makʼanchich ju ispastacta ju Dios ni aquintaxtakniyan ju anuʼ atsucunti para va chavaicaʼ chilh ju avilhchan ju ilhcaʼulata ju Dios acsni xalakʼaʼich ni cacʼatsacalh ta yu laich capuʼalilh ju anuʼ atsucunti. Chai Dios ju quiʼamakʼalhtaxtunuʼan junita chai yuchi ju quijunilh ni acʼajunilh ju lapanacni ju ani ixchivinti. 4 Va icmacʼamiyan ji Tito. Ju uxintʼi tachi ju va vasalh quintsʼalhʼat ni quitʼin ju xacjunan ixchivinti Dios chai ni lacʼaʼinich ju yuchi pus ju chavai lhilacʼapʼintʼa ju Cristo tachi ju quitʼin. Ictapainini ju quimpaiʼan Dios chai ju quiʼamakʼalhtaxtunuʼan Jesucristo ni catanaviniyan lamapainin chai cataʼaktaijuyan ni jantu calacʼalh ju miʼalhunut. 5 Acsni ictaxtucha ju xalacatʼun Creta va xaclacasqʼuin ni isʼasacxtʼu ju ixticʼacx ju catalhinaulh laʼixtalhavat lapanacni ju talhilacaʼanta ju Cristo ju lakatamin lakatamin lakʼachakʼan tachi ju iclhimapʼaksitanch. Chai yuchi iclhimacontan ju anch ju xalacatʼun Creta. 6 Pus yuchach ju asacxtʼu ju salaka ju isʼatsucunti chai va pumatam ixʼamachakaʼ. Vachuʼ tasqʼuini ni si catalhilacaʼalh ju Jesús ju isʼaskʼatʼan chai jantu alhimispacan ni va kʼaya catalalh nin alhimispacan ni va jantu catalacaʼi. 7 Pus ju lhinajun lacatalhavat ni navini ixlhichʼalhcat ju Dios pus aktsʼiya tasqʼuini ni jantu tuʼuʼ camalacasu ju macxcai. Chai jantu va ixkʼachat isʼakstu ju capuxcaulh. Jantu lana vatsʼalhti calhitalhkʼamalh ju tuʼuʼ. Jantu catʼakʼapʼa. Chai jantu va lasani lapanac cava. Chai jantu na cakʼachanilh ju tumin. 8 Chai tasqʼuini ni yau cajunilh xamatiʼ acsni lakacujtilaputun laʼixchakaʼ. Vachuʼ na cakʼachanilh ju kʼox. Chai na caʼacʼatsanalh. Chai sok cajunlh ju isʼatsucunti. Chai salaka junita ju isʼatsucunti laʼixmacni Dios. Chai tasqʼuini ni lai cakʼaichokocalh isʼakstu. 9 Vachuʼ tasqʼuini ni vasalh caquiclacaʼi ju ixchivinti Dios tachi ju lhimalanicanta. Ju chunch ni lai sok caʼamalaniyaʼ ju aliʼin chai lai caʼamasuniyaʼ ju stavasalanti ju tanajun ni jantu kʼox ju ixchivinti Dios. 10 Pus tasqʼuini ni chunch cajunlh isʼatsucuntiʼan ju yuʼunch ju talhinajun ni na lhu alin ju lana jantu talacaʼi. Ju jantu talacaʼi tajuni ju aliʼin lapanacni ju chivinti ju jantu lhitapalai chai va taʼaʼokxchokʼonun. Pus yuʼunch ju quintʼaʼisraelitanin quincʼan ju palai chunch tachivinin. 11 Pus tasqʼuini ni jantuch alacʼasqʼuinin ni laich cataʼamalaninilh ju yuʼunch. Pus taʼamalacaʼinikʼojui ixtaʼaklhtamatchivintiʼan tachi chun ju tatanumanalh lacalakatamin chakaʼ. Para jantu lhijun ni caʼamalanicalh ju lapanacni ju ixchivintiʼan ni jantu soknicʼa chai na va takʼachani ju tumin. 12 Pus pumatam atalaniniʼ sia yuʼunch ju amachakʼan xalacatʼun Creta chani naulh: “Ju amachakʼan Creta va tachi tanajunch taʼaklhtamat chivinti. Chai va isʼakstuʼan ju mapainichokocan chai va ixvaitiʼan ju tapastactʼajun para ni va tamalheknin”. Ma chunch ju naulh ju anuʼ lapanac. 13 Chai vas xanajun. Chai ixlhiyuchi tasqʼuini ni pʼas alakʼakʼaimatʼi. Ju chunch pʼas catalhilaksiyaʼ ju stavasalanti ixlacata ju Cristo. 14 Aʼunch ni jantuch cataquiclacaʼilh tuʼuʼ ju va chivintich ju tanajun ju quintʼaʼisraelitanin. Nin yuchi ju ixlhamapʼaksinʼan ju lapanacni ju jantu takʼachani ju stavasalanti ixlacata ju Cristo. 15 Pus ju salaka isʼatsucunti laʼixmacni Dios si kʼox lhiulai tachi chun ju taxtokni ju navita ju Dios. Para ju na taʼalactuʼunun chai ju jantu talhilacaʼanta ju Cristo pus tachi chun ju taxtokni va si macxcai talhipastʼacʼa ni na lhquiliqui junita ju ixtacʼatsanʼan chai lana jantu tuʼuʼ lhixcani ju ixʼalhunutʼan. 16 Ju yuʼunch tanajun ni tamispai ju Dios para laʼisʼatsucuntiʼan lana tasui ni jantu slivasalh ni catamispa ju Dios. Pus ju yuʼunch na kʼai tajunita. Jantu lai talacaʼi chai lana jantu lai tanavi tuʼuʼ ju kʼox calhiula ju Dios.
1 Para ju uxintʼi chunch ju anauch tachi ju najunch lacasoknicʼa lhamapʼaksin. 2 Aʼunaʼich ju na papaninch ni catalhistacchokocalh isʼakstuʼan. Chai seknicʼa lapanacni catava. Chai cataʼacʼatsanalh. Vachuʼ pʼas catalhilaksi ju Cristo chai slivasalh cataʼamapaininilh. Chai laich catachʼixkʼo mas va tuchi camilh laʼisʼatsucuntiʼan. 3 Aʼunaʼich vachuʼ ju tʼacunin ni catamalacasu tachi ju kʼoxich lhiulai ju Dios. Jantu va catapuxcautsuculh ju chivinti. Jantu catatʼakʼapʼa. Chach tajunlh tachi ju tuʼuʼ xalhilaktsʼintaiti. 4 Ju chunch laich catamalaniyaʼ ju va atsiʼincaʼ ni catatʼalamapaini ju ixpapaʼan chai catamapaini ju isʼaskʼatʼanʼan. 5 Vachuʼ lai catamalaniyaʼ ni cataʼacʼatsanalh chai salaka catava. Chai catalhistaclh ju ixchakaʼan. Chai kʼox lapanacni catava. Chai cataquiclacaʼi ju ixpapaʼan. Chai ni chunch ju catatsucuyaʼ ju atsiʼin pus jantu lai xamatiʼ macxcai catalhichivinilh ju ixchivinti Dios. 6 Vachuʼ amapʼaksitʼich ju tsʼalan ni cataʼacʼatsanalh. 7 Chai ju uxintʼi ixlhichux ju miʼatsucunti chunchach ju atsʼucʼu tachi ju tuʼuʼ xalhilaktsʼintaiti ixlacataʼan ju aliʼin. Amalanitʼich ju stavasalanti. Chai acsni axakʼalayaʼ ju lapanacni pus jantu va alhakʼamanaʼaxakʼalatʼi. 8 Chunch ju achʼivinch tachi ju jantu lai xamatiʼ catijunin ni jantu sok ju naʼun. Ju chunch ju jantu lacaʼi ju quinchivintiʼan camaxananach ni jantu lai tuʼuʼ lhitajui macxcai ju laich aquintapulhichivinan quinchuxʼan ju va milacata. 9 Amapʼaksitʼi ju xalapanacni ni cataquiclacaʼi ju ixʼucxtinʼan mas va tuchi caʼalhijunicalhch ni catanavi. Chai laʼixlhichux ixʼalhunutʼan catanavilh ju lhichʼalhcat tachi ju kʼachanich ju ixʼucxtinʼan. Chai jantu catasaspitnilh ju alhijuni. 10 Jantu catakʼalhonilh tuʼuʼ. Alai catamalacasulh ta yu laich caʼapulhilaksicanaʼ. Chai ni chunch ju catatsuculh pus cataputalacasuyach ju laʼisʼatsucuntiʼan ni na kʼoxich ju ixʼamalaninti ju quiDiosʼan quiʼamakʼalhtaxtunuʼan. 11 Pus ju Dios quintamasunitan ju lamapainin ju quintanaviniputunan. Yuchi ni laich catatakʼalhtaxtuyaʼ mas va tichi chavaich cava. 12 Chai ni machakxayau ni na kʼai ju anuʼ lamapainin ju quintanavinitan ju Dios pus yuchi lhimacomputunau ju xakʼachat ju lacamunutpaʼ chai tachi chun ju aliʼ taxtokni ju jantu kʼox lhiulai ju Dios. Chai kʼaichokocanau quiʼakstuʼan chai soknicʼa jun ju quiʼatsucuntiʼan chai tasui ni vasalh talhoniyau ju Dios. 13 Vachuʼ chunch ju catsucu tachi ju caputasuyach ni vasalh pacxanauch ju anuʼ avilhchan acsni caʼuctaxtuyaʼ ju tuchi quintakʼalhtasunitan ju Dios. Yuchi ni caminchokoyaʼ ju quiDiosʼan Jesucristo ju quiʼamakʼalhtaxtunuʼan junita. Chai catasuyaʼ ni yuchi ju xakʼai tucan. 14 Pus ju yuchi tamakʼaxtakchokolh isʼakstu ju quilacataʼan ni laich camacaju ju macxcai atsucunti. Chai aquintachʼakʼaniyan ju quiʼalhunutʼan ni ixʼanuch cajumvi chai ni slivasalh canaviputu ju kʼox. 15 Chai ni alin ju mintachaput ni xakʼaiʼat pus vas anauch tachi chun ju ani chivinti chai yuchi ju alhimapʼaksitʼi ju lapanacni ni catanavi. Chai alakʼakʼaimatʼi ju jantu sok taʼan. Tachi chun ju anaviyaʼ jantu tuʼuʼ anavitʼi tachi ju va jantu tuʼuʼ catapulhiulayan ju lapanacni.
1 Amapʼastʼacʼanitʼich ju yuʼunch ju talhilacaʼanta ju Cristo ni catatalhonilh ju ucxtinin chai ju aliʼin xalackʼajin. Chai catalacaʼinilh chai catanavinilh va tuchi kʼox lhichʼalhcat ju caʼalhijunicalh. 2 Amapʼastʼacʼanitʼich ni jantu catanaulh macxcai ixlacata akʼantam. Nin yuchi ni va lasani lapanacni catava. Alai na kʼox lapanacni catava chai va kʼox caʼatʼalalhiʼalh tachi chun ju lapanacni. 3 Chunch ju calactʼalalhiʼau ju aliʼin ni vachuʼ jantu ixʼacʼatsanantauch ju quijnanʼan ju pʼulhnan. Chai jantu lai ixlacaʼiyau. Na ixʼokxchokʼocantau vachuʼ. Va yuchi ixnaviyau ju macxcai atalacpastʼacʼat chai tachi chun ju xakʼachat ju ani lacamunutpaʼ. Na ixʼalactuʼununau chai na ixlhacchaʼanau ju ixʼanuchʼan ju aliʼin. Jantu kʼox ixlhiulacanau chai jantu tuʼuʼ ixʼalhiulayau ju aliʼin. 4 Para chilh avilhchan acsni quintamalacasunin ni na kʼox lapanac junita ju Dios quiʼamakʼalhtaxtunuʼan chai na quintamapainiyan ju quijnanʼan chai tachi chun ju lapanacni. 5 Pus quintamakʼalhtaxtun. Para jantu va ixlacaʼatalh ni xanaviyau ju tuʼuʼ ju kʼox cava. Alai va ixlacata ni xaquintaʼaktaijuputunan va laʼixʼamapaininti. Pus quintamakʼalhtaxtun acsni quintachʼakʼanin ju quiʼalhunutʼan chai quintaxtaknitan ju sastʼi quiʼatsucuntiʼan. Chai yuchi ju Spiritu Santu ju quintaxtaknitan ju sastʼi quiʼatsucuntiʼan. Chai yuchi ju Spiritu Santu ju quintalasastʼikʼoyan. 6 Pus ju Dios lhu quintaxtaknitan ju ixtachaput ju Spiritu Santu va ixlacata ju quiʼamakʼalhtaxtunuʼan Jesucristo. 7 Pus ni quintanavinitan lamapainin ju Dios chai quintalaktsʼinan ni soknicʼa juntau pus ju chavai cʼatsayau ni vasalh aquintaxtaknitachan ju lactʼiyan ju ixlaktsan ju quiʼatsucuntiʼan ju jonkʼalhita. 8 Pus slivasalh ju ani ju icjuntan. Chai iclacasqʼuin ni lana vas aʼunch ju lapanacni ju talhilacaʼanta ju Cristo tachi chun ju ani taxtokni. Ju chunch ju yuʼunch va tachi catanaviyaʼ cuenta ixnavica ju kʼox. Pus tachi chun ju icjuntan si na kʼox chai na caʼaʼaktaijuyaʼ tachi chun ju lapanacni ni laich catanavi. 9 Para lana jantu atʼalhilacchʼivin ju lapanacni ju tasacmiyan ju tuʼuʼ ju va tonto chivinti. Vachuʼ jantu atʼalhilacchʼivin ju talhilaclakʼaji tuchi tanajun ni tanavita ju makʼaniya ixlacpaiʼan mas jantu. Vachuʼ jantu atʼalhilacchʼivin ju lapanacni acsni talaclakʼaji chai talaclhilasai tuchi ju nomputun ixlhamapʼaksin ju Moisés. Jantu anavitʼi ju chunch ni jantu tuʼuʼ pulanican nin lai caʼaktaiju xamatiʼ laʼisʼatsucunti. 10 Ni alin xamatiʼ ju va puxcajui lakʼaiti lacatalhavat ju talhilacaʼanta ju Cristo ni quilhmactʼui canaviputulh pus paktʼui ju akʼai. Ni jantu xalacaʼi ni xakʼaʼich paktʼui pus jantu atʼalalhipʼi ju anuʼ lapanac. 11 Pus ju uxintʼi miʼakstu cʼatsʼaich ni va lakʼalhinicanta ju istacʼatsan ju anuʼ lapanac chai na alactuʼununch. Pus ju tuchi ixnaviputun ju yuchi lana putasui ni alinch ju ixtalakʼalhin. 12 Acsni acmalakachanitachan ju Artemas u yuchi ju Tíquico pus vatsʼalhti aqʼuilaktʼanaʼ ju uxintʼi ju lakʼachakʼan Nicópolis ni icnajun ni anchach ju actolanta ju lacalhicʼasnin. 13 Acsni catachaʼananta ju Zenas ju lhaʼatalanininta ju ixlhamapʼaksinʼan ju romanonin chai ju Apolos pus aʼunch ju milhiʼalakʼavin laʼixmacni Cristo ni cataʼaʼaktaijuyach ni jantu tuʼuʼ catamakʼancʼacxayaʼ ixlacata ju lacati acsni catataxtuchokoyanta. 14 Chai ju chunch vachuʼ ju yuʼunch ju talhilacaʼanta ju Cristo ju tavilanancha anch catapulaniyaʼ ju ixnavica ju kʼox acsni alin ju ixmaktasqʼuinit tam xamatiʼ. Chai ju chunch cacʼatsacanaʼ ni na kʼox ju isʼatsucuntiʼan ju talhilacaʼanta ju Cristo. 15 Tachi chun ju lapanacni ju quintatʼavi tamacʼamiyan. Vachuʼ amacʼamitʼich ju quilhiʼalakʼavin ju tavilanancha ju anch. Pus ictapainini ju Dios ni catanaviniyan lamapainin minchuxʼan ju uxijnan. Vasalh iclacasqʼuin ni chunch cataʼulhtuyan.
1 Ju quitʼin icPablo. Tachʼin icjunita va ixlacaʼatalh ni icʼajuni ju lapanacni ixlacata ju Cristo Jesús. Pus ju quitʼin chai ju quilakʼauʼan Timoteo iclamacʼamiyau ju uxintʼi ji Filemón. Ju uxintʼi na tuʼuʼ iclalhiulayau chai quintʼachʼalhcatnaʼ unitʼa laʼixlhichʼalhcat ju Dios. 2 Vachuʼ icmacʼamiyau ju quilakʼauʼan atsiʼ Apia chai ju Arquipo ju vachuʼ ajuni ju lapanacni ixchivinti Dios. Vachuʼ icʼamacʼamiyau ixchuxʼan ju talhilacaʼanta ju Cristo ju tatakʼaixtʼokʼa laminchakaʼ. 3 Ictapainini ju Dios ni va tachi catanaviniyan lamapainin chai va tachi cataʼaktaijuyan ni jantu calacʼalh ju miʼalhunutʼan. 4 Pus va tapakchux ictʼachivinin ju Dios pus icjuni lakʼailaktsʼiuch ju milacata. 5 Chunch iclai ni icmacʼatsanicanta ni na lhilacʼapʼinch ju Jesús chai slivasalh na amapʼaini tachi chun ju lapanacni ju talhilacaʼanta ju yuchi vachuʼ. 6 Ictapainini ju Dios ixlacataʼan ju yuʼunch ju xatalhilacaʼan ju Jesús va ixlacaʼatalh ni talaktsʼinan ni lhilacʼapʼin ju uxintʼi. Vachuʼ iclacasqʼuin ni catacʼatsayaʼ ju yuʼunch ni yuchi ju Cristo Jesús ju xataxtakniyan ju kʼox miʼatsucuntiʼan. 7 Pus ji quilakʼau na iclhikʼachanch chai na quimpumatankʼoxaxkʼayai acsni iccʼatsai ni na amapʼaininin ju uxintʼi chai acsni iccʼatsai ni na takʼachan ju aliʼin ju vachuʼ talhilacaʼanta ju Jesús. Talhikʼachan tuchi ju aʼunitʼa ju uxintʼi. 8 Pus alinch ju quintachaput ni ixtamalakachan Jesús icjunita chai laich acjunin tuchi lhijunch ni anaviyaʼ. 9 Para jantu chunch actilalh. Alai va actapaininiyan ni aqʼuinaviniyaʼ lamapainin va ixlacaʼatalh ni tuʼuʼ lalhiulayau. Ju chavai na icpapach chai ictʼalhnucantach va ixlacaʼatalh ni xacʼajuni ju lapanacni ixlacata ju Cristo Jesús. 10 Va ictapaininiputunan ixlacata ju Onésimo. Ju yuchi tachi quintsʼalh junita ni quitʼin ju icjunilh ixchivinti Dios ju ani junta ictʼalhnucanta chai ju yuchi lhilacaʼalh ju Jesús. 11 Iccʼatsai ni jantu xaʼaktaijuyan ju pʼulhnan. Para ju chavai quiʼaktaijui ju quitʼin chai caʼaktaijuyan vachuʼ ju uxintʼi. 12 Pus ju chavai icmalakachanichokoyachan. Amaklhtʼayanch ni slivasalh na icmapaini ju yuchi. 13 Ju quitʼin va laich acchʼapaʼula tachi ju va qʼuimalakʼachʼanitʼachitʼach. Ju chunch tachi ju va junch uxintʼi ju aqʼuinchʼalhcʼatnanilh ju ani junta ictʼalhnucanta va ixlacaʼatalh ni xacʼajuni ju lapanacni ju chivinti ixlacata ju Jesús. 14 Para jantu tuʼuʼ icnaviputun ni jantu tuʼuʼ xaqʼuiʼuni. Ju chunch ju lamapainin ju aqʼuinavinipʼutʼu jantu chunch cava tachi ju va lacatapʼastu ju acsqʼuinin. Va iclacasqʼuin ni vasalh laʼixlhichux miʼalhunut ju anaviyaʼ. 15 Jantu xcai ni yuchi xalhimacoʼulayan ju Onésimo lakatʼui lakatʼutu malhquiyuʼ ni laich amaklhtʼayanankʼalhiyaʼ. 16 Para ju chavai jantu alaktsʼi ju yuchi tachi ju va milapanac junita. Ju chavai alaktsʼintʼich tachi tam xamatiʼ ju na tuʼuʼ lhiulatʼi. Ju chavai acʼatsʼatʼich ni milakʼau junita laʼixmacni Jesús. Pus ju quitʼin slivasalh icmapaini. Pus ja va a ti uxintʼi jantu atʼimapʼainitʼi ni mintʼalapanac junita chai ju chavai vachuʼ milakʼau laʼixmacni ju Jesús junita. 17 Pus ni miʼamigo qʼuilhimispʼai pus amaklhtʼayanch ju Onésimo tachi ju va junch quitʼin cava. 18 Chai ni navinitan tuʼuʼ macxcai u tuʼuʼ lhiʼaniyan pus quitʼin ju acmapalaʼ. 19 Quitʼin quiʼakstu ictsʼokʼulatach ju ani chivinti junta icjunan ni quitʼinch ju acmapalaʼ ni tuʼuʼ lhiʼaniyan. Para tun tʼicʼaptʼi ni palai kʼai lamapainin ju xacnaviniyan acsni tavanan icmasunin ixchivinti Dios chai xalhilacʼapʼin ju Jesús. 20 Pus ji quilakʼau aqʼuinavininch ju ani lamapainin ju icsqʼuiniyan ni vachuʼ lhilacʼapʼintʼach ju Jesús tachi ju quitʼin. Chai ni quilakʼauʼat laʼixmacni ju Cristo pus amakʼankʼachʼatʼi ju quiʼalhunut. 21 Pus ni iccʼatsaich ni alacʼaʼiyaʼich ju tuchi icjunan yuchi iclhiʼatsʼoknunitanch ju ani chivinti. Chai iccʼatsaich ni jantu va yuchi ju anaviyaʼ tachi ju icjunan para palai lhu ju anaviyaʼ. 22 Vachuʼ aqʼuilakʼasilakʼoxinin junta lai acʼastacnanaʼ. Pus ni va tachi atʼapʼaininiyaʼ ju Dios ju quilacata ta tsʼa jantu calacasqʼuinaʼ ju Dios ni laich acʼantachau lalaktsʼinin. 23 Macʼamiyan ju Epafras ju quintʼatachʼin junita ni vachuʼ ajuni ju lapanacni ixlacata ju Cristo Jesús. 24 Vachuʼ taʼamacʼaminin ju Marcos chai ju Aristarco chai ju Demas chai ju Lucas. Ju yuʼunch vachuʼ tajuni ju lapanacni ixlacata ju Jesús. 25 Ictapainini ju Jesucristo ni catanaviniyan lamapainin minchuxʼan ju uxijnan. Vasalh chunch icsqʼuini.
1 Ju makʼanchich ju Dios na paklhu ju alacxakʼala ju quilacpaʼitniʼan laʼixchivintiʼan ju lapanacni ju ixtanajun ixchivinti. Chai na tijlhu ju apuxakʼala ju Dios ju yuʼunch. 2 Ju makʼanchich chunch ju alhixakʼala ju Dios ju lapanacni. Para ju chavai ju yuchi malakachatachilh ju istsʼalh ju ani lacamunutpaʼ ni laich aquintajunan ixchivinti ju ixpai. Yuchach ju junilh ju ixpai ni canavilh ju lacamunutpaʼ chai ju lactʼiyan. Junicalh ju istsʼalh. Chai ju yuchi navilh. 3 Yuchi ju quintamalacasunin ni vasalh xakʼai ju Dios. Chai vachuʼ quintamalacasunin ta yu tucan junita ju Dios va ixlacaʼatalh ni vaklhtam chun tʼajunita. Chai yuchi ju lhinonkʼojui tachi chun ju taxtokni ni na tachapun ju ixchivinti. Chai yuchach ju quinichilh ni laich aquintaxacaniyan ju quintalakʼalhinʼan. Chai ju chavai ju yuchi vi ju lactʼiyan vanin junta vi ju ixpai ju tucan xakʼai. 4 Ju istsʼalh Dios palai xakʼai. Palai jantu ju anquilhnin. Chai tasui ni palai xakʼai ni istsʼalh Dios juncan. Jantu chun ajuncan ju anquilhnin. 5 Pus ju Dios jantu tavanan laich chani cajunilh tam anquilh: Ju uxintʼi quintsʼalhʼat. Chai ju chavai icmalacasuta ni mimpai icjunita. Nin lai chani cajunilh tam anquilh: Ju quitʼin ixpai acjunaʼ. Chai ju yuchi quintsʼalh cajunaʼ. 6 Para acsni tavanan quitsucuchilh ju lakatami istsʼalh ju ani lacamunutpaʼ pus chani ma naulh ju Dios: Chach talakʼaya ju yuchi tachi chun ju quiʼanquilhnin. 7 Chai ju Dios chani ma naulh ixlacata ju anquilhnin: Icnavi ju quiʼanquilhnin ni vatsʼalhti cataʼalh tachi ju tuʼuʼ un. Chai yuʼunch ju quintachʼalhcatnani. Na tachapunin tajunita tachi ju tuʼuʼ alapnaʼ. Chunch ma naulh ju Dios ixlacata ju ixʼanquilhnin. 8 Para ixlacata ju istsʼalh ma chani naulh: Ju mimpuʼucxtin ju uxintʼi ji Dios jonkʼalhita. Chai soknicʼa navi ju uxintʼi lamimpuʼucxtin. 9 Ju uxintʼi kʼachʼanitʼach ju soknicʼa chai lhitsʼisitʼa ju amacxcai. Pus yuchi palai iclhimakʼankʼachayan. Palai jantu na chun ju mincompañerojni. Quitʼin ju acxtakniyan chun. Quitʼin ju miDios icjunita. 10 Chai vachuʼ chani ma junilh ju istsʼalh: Uxintʼi ji ucxtin ju navitʼa ju lacamunutpaʼ acsni matiʼcaʼ tuʼuʼ ixjunita. Chai lamimacaʼ ju navitʼa ju lactʼiyan. 11 Pus tachi chun ju ani taxtokni catatsʼankʼakʼoyaʼ. Para ju uxintʼi onkʼalhitʼach. Chux ju yuʼunch catalaclayaʼ tachi ju tuʼuʼ pumpuʼ. 12 Chai alacpʼasmilaʼ tachi ju ulhtucan ju tuʼuʼ pumpuʼ. Chai chux catapaxakʼoyach. Para ju uxintʼi jantu tavanan atʼapʼaxayaʼ. Chai jantu tavanan caʼaclayaʼ ju miʼatsucunti. Chunch ju ma junilh ju Dios ju istsʼalh. 13 Para ju Dios jantu tavanan chani junilh ju tam anquilh: Vanin atʼaʼulh junta icvi tus acsni acʼaktaijuyan ni atʼalalhaʼayaʼ ju mintʼalaxcai. 14 Pus jantu chunch ju ajuncan ju anquilhnin ni va tachʼalhcatnani ju Dios ju yuʼunch. Va amalakachacantachilh ju ani ni aquintaʼaktaijuyan ju quijnanʼan ju catakʼalhtaxtuyau.
1 Pus palai xakʼai ju istsʼalh Dios. Palai jantu ju va anquilhnin. Yuchi lhitasqʼuini ni canaviu cuenta ju ixchivinti Dios ju juncantauch. Jantu xcai ni camaconau ju ixti Dios. 2 Pus ju makʼanchich ju anquilhnin tajunilh ju lapanacni ixchivinti Dios. Chai ju anuʼ chivinti stavasalanti ixjunita. Chai tachi chun ju jantu tamuctaxtulh chai ju jantu talacaʼilh amamakʼalhkʼajnicalh tachi ju ixlhijunch ni tapʼakxlh ju ixlhamapʼaksin ju Dios. 3 Pus ja va a ti quijnanʼan lai catitakʼalhtaxtu ni jantu tuʼuʼ calhiulayau ju ixchivinti ju istsʼalh Dios junta najun ta yu lai catakʼalhtaxtuyau. Chai ju anuʼ chivinti slivasalh na kʼox. Pus isʼakstu ju quiʼucxtinʼan Jesús ju pʼulhnan naulh ni laich catatakʼalhtaxtuyaʼ ju lapanacni. Chai ju yuʼunch ju takʼasmatnilh ixchivinti quintamavasalaninch ju quijnanʼan. 4 Chai vana acs ju Dios quintamalacasunin ju quijnanʼan ni stavasalanti ju tuchi xaquintajunan. Quintapumavasalanin laca tuʼuʼ kʼai lhamakʼan ju ixtanavi ju yuʼunch. Chai lacalhu tuʼuʼ ju jantu lai catitanavi ju va lapanacni. Vachuʼ pumavasala ixchivinti acsni axtaknicalh ju talhilacaʼalh yuchi ju lhakʼailaktsʼin ju xtʼakʼa ju Spiritu Santu tachi ju kʼoxich lhiulai ju yuchi. 5 Ju Dios naulh ni jantiyuʼ ju anquilhnin ju catalhinonaʼ acsni caʼalinaʼ ju sastʼi lacamunutpaʼ ju tuchi lhichivinau ju chavai. 6 Alai laʼixchivinti Dios chani ju tsʼokcanta: Na kʼai lhamakʼan iclhiulai ni laich tuʼuʼ lhiulai ju uxintʼi ji Dios ju va lapanac. Na kʼai lhamakʼan iclhiulai ni laich lhistʼacʼa ju uxintʼi ju istsʼalh ju va lapanac. 7 Pus pantsʼiquis palai lacatʼicstʼi ju navitʼa. Palai xalackʼajin ju anquilhnin. Para ju chavai xtʼaknitʼa ju ixpuxakʼai chai lacʼasqʼuin ni calakʼayacalh. Chai ulatʼa yuchi ni calhijunaʼ tachi chun ju navitʼa ju uxintʼi. 8 Lhcʼaʼulatʼa ni yuchi ju calhinonkʼoyaʼ chux. Chunch ju najun laʼixchivinti Dios. Pus ni lhcaʼulata ni yuchi ju lapanac ju calhijunaʼ chux pus jantu tuʼuʼ ju jantu caquiclacaʼi ju yuchi. Para mas chunch ju lhcaʼulata ju Dios para jantucaʼ laktsʼinau ni vasalh catalacaʼinikʼo tachi chun ju taxtokni. 9 Para cʼatsayau ni xakʼai navicanta ju Jesús chai lakʼayacanta va ixlacaʼatalh ni quilhimakʼalhkʼajnanchilh ju aninti. Para pʼulhnan ju yuchi lacatʼicstʼi cʼatsalh isʼakstu pantsʼiquis. Palai xalackʼajin ixtajunita ju anquilhnin. Chunch ju navicalh ni laich canilh ju ixlacata pumatamin lapanacni ni ixʼanaviniputun lamapainin ju Dios ju yuʼunch. 10 Pus ixlacata Dios ju alilh tachi chun ju taxtokni. Chai yuchi ju navikʼolh tachi chun ju taxtokni. Chai ju yuchi lhu ixʼalhiʼamputun ju isʼaskʼatʼan ju lactʼiyan. Pus ni chunch ju ixnaviputun pus aktsʼiya ixlhijun ni caʼucsacʼatsa ju Jesús lacamakʼalhkʼajnat ni laich aquintapumakʼalhtaxtuyan ju quijnanʼan laquiʼalactuʼuntiʼan. 11 Pus yuchi ju Jesús ju lai lasoknicʼai isʼatsucunti tam lapanac. Pus ixpai ju yuchi vachuʼ quimpaiʼan junita ju quijnanʼan ju quintalasoknicʼanitan quiʼatsucuntiʼan. Pus yuchi jantu lhimaxanan ju Jesús acsni quintalhixakʼalayan ixʼalakʼavin. 12 Pus laʼixchivinti Dios ju tsʼokcanta chani ma naulh ju Jesús: Acʼajunach ju quiʼalakʼavin ju milacata. Chai aclakʼayayan lacamilhpat junta tatakʼaixtʼokʼa ju yuʼunch ju talhilacaʼanan. 13 Chai alacatam chani naulh: Ju quitʼin aclhilacaʼanach ju Dios. Chai vachuʼ chani naulh: Anch icʼalactʼaya ju quiʼaskʼatʼan ju quixtaknita ju Dios. Chunch ma naulh ju Jesús. 14 Pus tachi chun ju anuʼ ju alhixakʼala isʼaskʼatʼan Dios alin ixlacatunaʼan. Pus yuchi vachuʼ lhiʼalilh ixlacatuna ju Jesús tachi ju yuʼunch ni laich caniyaʼ ixlacataʼan. Chai va ixlacata ni nilh ju yuchi pus taiʼinilh ixtachaput ju lhacaticuru ju malactuʼuni ju pʼulhnan xatʼin lapanacni. Chai ni alactuʼunulh ju yuchi pus yuchi lhiniyau ju chavai. 15 Pus tus ixlhitalacatʼicstʼinʼan slivasalh na ixtatalhoni ju aninti ju lapanacni. Para ju chavai ju talhilaksi ju yuchi jantu vana na tatalhoni ju aninti tachi ju ixtalai ju pʼulhnan. 16 Pus ju Jesús jantiyuʼ lhiquilachilh ju ani lacamunutpaʼ ni va ixʼaʼaktaijuputun ju anquilhnin. Alai va ixʼaʼaktaijuputun tachi chun ju talhilacaʼanta ju Dios tachi ju lalh ju Abraham. 17 Pus aktsʼiya istasqʼuini ni lana ixtʼachunch cajunlh ju Jesús tachi ju tajunita ju ixʼalakʼavin ju ani lacamunutpaʼ. Pus va chunch ju lai cajunlh ju xakʼai pali ju na lai aʼaktaijunun lacaʼamapaininti chai ju na lai lhilaksican acsni an ju quilacataʼan laʼixmacni Dios. Chai va ixlacata ixʼaninti ju yuchi lai xacanican ixʼalactuʼuntiʼan ju lapanacni. 18 Chai ju yuchi vachuʼ makʼalhkʼajnalh ju ani lacamunutpaʼ chai mapastʼacʼanicalh ju amacxcai. Para jantu tavanan navilh tuʼuʼ alactuʼunti ju yuchi. Chai ni chunch ju tapasalh laʼisʼatsucunti pus yuchi lai quintalhiʼaktaijuyan ju quijnanʼan ju mapastʼacʼanicanau ju tuʼuʼ amacxcai.
1 Pus ju uxijnan ji quiʼalakʼavin isʼaskʼatʼan Dios untʼatʼit chai lhisacxtʼucʼantʼatʼit ni amachakʼan lactʼiyan aʼunaʼitʼit. Pus apʼastʼactʼit ta yu junita ju Jesús. Pus ju Dios malakachatachilh ju ani. Chai ju yuchi xakʼai quimpaliʼan junita tachi ju lacaʼiyau ju quijnanʼan. 2 Dios ju sacxtulh ni canaviyaʼ ju ani lhichʼalhcat. Chai ju Jesús muctaxtulh. Chai vana va chun ju Moisés. Ju yuchi vachuʼ muctaxtulh lacalhichʼalhcat ju xtaknilh ju Dios ixlacata ixlapanacni yuchi. 3 Para ju Jesús palai kʼai lhiulacanta. Palai jantu ju Moisés. Chun tachi ju tam xamatiʼ ju lai yajui chakaʼ. Yuchi ju palai kʼai lhiulacan. Palai jantu ju chakaʼ ju xanavi. 4 Pus tachi chun ju chakaʼ alin tichi chavaich ju xanavi. Para yuchi ju Dios ju navikʼolh tachi chun ju taxtokni. 5 Pus ju Moisés slivasalh ni muctaxtulh ixlacataʼan isʼaskʼatʼan Dios. Para tachi ju va xalapanac ixjunita. Chai va ixnajun ju chivinti ju ixmavasalani ju Dios ixlacata ju aliʼ chivinti ju canonaʼ ju Dios astan. 6 Para ju Cristo ni istsʼalh Dios junita pus muctaxtukʼo tachi chun ju lhichʼalhcat ju xtaknilh ju ixpai ni caʼalhistaclh ju isʼaskʼatʼan. Chai ju quijnanʼan isʼaskʼatʼan Dios juntau ni va tachi lhilaksiyau ju yuchi chai va tachi calhikʼachanau ni aquintalhiʼanan ju lactʼiyan. 7 Pus tasqʼuini ni va tachi calhilaksiyau ju Cristo. Chai yuchi chani lhinaulh ju Spiritu Santu laʼixchivinti Dios ju tsʼokcanta: Ni kʼasmatʼatʼit ni taxakʼalayan ju Dios 8 pus ma jantu pʼas anavitʼit ju miʼalhunutʼan tachi ju talalh ju makʼaniya milacpaʼitniʼan acsni lana jantu ixtalacaʼiputun acsni ixtatʼajuncaʼ junta va aseknicʼa ixjunita. Ju acsnich ma va ixtalaktsʼimputun ju Dios ni vasalh catalhkʼamalh ni jantu catanaviyaʼ ju tuchi ixʼajuni u jantu. 9 Pus junta va aseknicʼa ixjunita ma anchach ju talaktsʼintanulh ju Dios ju makʼaniya milacpaʼitniʼan. Ma chunch ju talalh mas tʼupʼuxam cʼata ju talaktsʼilh tachi chun ju anavinilh ju yuchi. 10 Pus yuchi lhitalhkʼamalh ju Dios tachi ju ixtalai ju lapanacni ju ixtatʼajun ju acsni. Chai naulh ni ma aktsʼiya tumpa tapastʼacʼa laʼixʼalhunutʼan ju yuʼunch. Ma lana jantu taʼamputun laʼixti. 11 Pus ma yuchi lhitalhkʼamalh ju Dios chai lhipastacchokocalh isʼakstu ixpumavasalaca ixchivinti acsni naulh ni ma jantu tavanan catitaʼastacnalh laʼixmacni ju yuchi. Chunch ju ma naulh ju Spiritu Santu. 12 Pus alaktsʼintʼitch ji quiʼalakʼavin. Jantu xcai ni caʼalilh pumatam ju milhiʼuxijnan ju capacxalh ixʼalhunut ju jantu kʼox chai ju jantu lhilacaʼamputun ju Dios. Pus ju chunch junita ixʼalhunut lana camaconach ju Dios ju lakʼajunta. 13 Alai alamapʼaksitʼit ju milhiʼuxijnan chux avilhchan acsni titaxakʼalayan ju Dios. Ju chunch jantu xamatiʼ ju milhiʼuxijnan ju caʼokxchokʼocalh chai na pʼas cajunlh ixʼalhunut va ixlacaʼatalh ni alactuʼunun. 14 Para ni va tachi calhilacaʼanauch ju Cristo tus laʼixʼaclanti quiʼatsucuntiʼan tachi ju putaiʼulatauch pus aktsʼiya ixʼanuch conkʼalhiyau. 15 Pus ixchivinti Dios ju tsʼokcanta chani najun: Ni ma kʼasmatʼatʼit ni taxakʼalayan ju chavai ju Dios pus jantu pʼas anavitʼit ju miʼalhunutʼan tachi ju talalh ju makʼaniya milacpaʼitniʼan acsni lana jantu ixtaquiclacaʼiniputun ju Dios. Chunch najun laʼixchivinti Dios ju tsʼokcanta. 16 Pus apʼastʼactʼit ni yuʼunch ju quintʼaʼisraelitaninʼan ju takʼasmatnilh ixchivinti Dios para astan jantu talacaʼinilh. Ixchuxʼan yuʼunch ju amaxtulh ju Moisés ju xalacatʼun Egipto. 17 Apʼastʼactʼit ni yuʼunch ju na taʼalactuʼunulh chai ixlhiyuchi atʼalhkʼamnilh ju Dios tʼupʼuxam cʼata. Chai ni na taʼalactuʼunulh pus yuchi lhipʼuchʼitama ixlacatunaʼan junta aseknicʼa ixjunita. 18 Apʼastʼactʼit ni yuʼunchach ju ajuni ju Dios ni jantu tavanan lai catitaʼastacnalh laʼixmacni va ixlacaʼatalh ni lana jantu lai ixtalacaʼi. 19 Pus tasui ni jantu lai ixtaʼan laʼixmacni Dios va ixlacaʼatalh ni jantu talacaʼinilh ixchivinti.
1 Pus tus chavai quintajunan ju Dios ni lai caʼastacnanau laʼixmacni. Para ni chunch ju tapasalh laʼisʼatsucuntiʼan ju makʼaniya quintʼaʼisraelitaninʼan pus tasqʼuini ni catalhananauch. Jantu xcai ni caʼalilh pumatam milhiʼuxijnan ju catasu ni tachi ju va jantu catitanu ju anch. 2 Pus ju quijnanʼan vachuʼ juncantauch ni quintamakʼalhtaxtuputunan ju Dios. Vana va chunch juncantauch tachi ju ixʼajuncanta ju makʼaniya quintʼaʼisraelitaninʼan. Para ju anuʼ chivinti ju takʼasmatlh ju yuʼunch jantu tuʼuʼ lhitapalalh mas ixtakʼasmatʼach ni lana jantu ixtalacaʼi. 3 Pus va quijnanʼan ju lacaʼinitauch ixchivinti Dios ju caʼastacnanau laʼixmacni yuchi ni chani ma naulh ju yuchi: Ni na xactalhkʼamanta pus iclhipastacchokocalh quiʼakstu ixpumavasalaca ju quinchivinti chai icnaulh ni jantu tavanan lai catitatanu junta caʼixtaʼastacnalh ju laquimacni. Chunch ju ma naulh ju Dios. Pus acsni navikʼolh ju lacamunutpaʼ ju Dios chai astacnalh acsnich ju alilh junta lai astacnancan laʼixmacni. 4 Chai cʼatsacan ni lai astacnancan laʼixmacni ni vachuʼ astacnalh ju Dios laʼixlhichʼalhcat. Pus chani ju najun laʼixchivinti ju tsʼokcanta ixlacata ju ixlhilakatujun avilhchan: Ju ixlhilakatujun avilhchan astacnalh ju Dios laʼixlhichʼalhcat tachi chun ju ixnavita. 5 Para vana chani najun ju alacatam: Ju yuʼunch ma jantu tavanan lai catitatanu junta caʼixtaʼastacnalh ju laʼixmacni. Chunch ma naulh ju Dios. 6 Para aktsʼiya cataʼalinaʼ ju aliʼin ju catatanuyaʼ junta cataʼastacnanaʼ laʼixmacni Dios mas jantu lai xatatanui ju yuʼunch ju pʼulhnan ajunicalh ni ixʼamakʼalhtaxtuputun ju Dios. Pus ju yuʼunch jantu lai xatatanui ni jantu ixtalacaʼi. 7 Pus ni aktsʼiya caʼalinaʼ ju catatanuyaʼ pus yuchi lhilhcaʼulachokolh ju Dios alakatam avilhchan acsni lai tanucan junta caʼastacnancanaʼ laʼixmacni yuchi. Ju yuchi najun ni chavai acsni tʼonaucaʼ acsnich ju lai catanuyau. Chunch ju naulh laʼixchivinti ju David ju ixtʼajun acsni makʼanchich ixtanikʼota ju yuʼunch ju jantu ixtalacaʼi. Pus chani ju naulh tachi ju iclajuntau: Ni ma kʼasmatʼatʼit ni taxakʼalayan ju chavai ju Dios pus ma jantu pʼas anavitʼit ju miʼalhunutʼan. Chunch ju ma naulh ju Dios laʼixchivinti ju David. 8 Pus acsni alhiʼalh ju Josué ju makʼaniya quilacpaʼitniʼan ju xalacatʼun Canaán jantiyuʼ ixjunita junta astacnancan laʼixmacni Dios. Pus ni anchach caʼixva pus jantu tuʼuʼ ixlhichivinchokolh astan ju Dios ju alakatam avilhchan acsni lai tanucan junta astacnancan laʼixmacni yuchi. 9 Pus ju chunch putasui ni aktsʼiya alin junta lai cataʼastacnanaʼ ju ixlapanacni Dios. 10 Pus ju tanunch junta lai astacnancan laʼixmacni Dios vachuʼ astacnanta laʼixlhichʼalhcat tachi ju Dios ni astacnalh laʼixʼanuʼ. 11 Chai ni alin junta lai astacnancan laʼixmacni Dios pus yuchi calhilhistacchokocau quiʼakstuʼan ni laich catanu. Jantu xcai ni xamatiʼ catsʼankʼa ni va jantu calacaʼi tachi ju talalh ju yuʼunch ju jantu ixtalacaʼi. 12 Tasqʼuini ni caquiclacaʼiniyau ju ixchivinti Dios ni na tachapun junita ju yuchi chai laʼixmacni yuchi lhitajuyau quiʼatsucuntiʼan ju conkʼalhiyaʼ. Ju ixchivinti Dios quintamavasalaniyan ta yu tucan junita ju quiʼatsucuntiʼan u kʼox u jantu. Chai quintamavasalaniyan ta yu junita ju quiʼatalacpastʼacʼatʼan ju alin laquiʼalhunutʼan u kʼox u jantu. Laʼixchivinti Dios pucʼatsacan u kʼox u jantu ju tuchi lacasqʼuinau. Chunch junita tachi ju tuʼuʼ machita ju acxputʼui quicxtui. Ni acpuchʼucʼulh ju tuʼuʼ pus lana tasukʼojui ju ixpulacni ta junitach. 13 Jantu tuʼuʼ ju navita ju Dios ju lai catatankʼanunilh ju yuchi. Alai Dios alaktsʼinkʼojui chux chai laktsʼin ta yu vasalh junita. Chai yuchach ju cajunkʼoju chux tuchi navitau ju quijnanʼan acsni camakʼosaspitcanaʼ ju lapanacni. 14 Pus alin ju xakʼai quimpaliʼan ju tanu ju lactʼiyan junta vilhcha ju Dios. Yuchi ju Jesús istsʼalh Dios. Pus ixlhiyuchi tasqʼuini ni va tachi calhilacaʼanau ju yuchi. 15 Pus ju anuʼ ju xakʼai quimpaliʼan junita lai machakxai ta yu cʼatsancan ju va lhilapanac. Chai machakxai acsni na xcai sastʼucʼau ju tuʼuʼ macxai ju mapastʼacʼanicanau ni vachuʼ mapastʼacʼanicalh lhichux ju amacxcai tachi ju mapastʼacʼanicanau ju quijnanʼan. Va yuchi ni jantu tavanan alactuʼunulh ju yuchi. 16 Chai ni machakxai ju Jesús ta yu cʼatsancan pus cajunkʼoju chux ju yuchi chai jantu catalhananau. Caxakʼalayau ju yuchi ju na lai navi lamapainin. Ju chunch lai caʼaktaijucanau lacaʼamapaininti chai lai canavinicanau lamapainin acsni maktasqʼuiniyau.
1 Pus tachi chun ju ixpalijniʼan ju quintʼaʼisraelitaninʼan asacxtucanta laʼixtalhavat lapanacni chai alhcaʼulacanta ni yuʼunch ju cataxakʼalayaʼ ju Dios ju ixlacataʼan. Chai yuʼunch ju taxtakni ju Dios ju ixlhakʼailaktsʼinʼan ju lapanacni. Chai yuʼunch ju tamaknini ju Dios ju atapacxat ju talhimini ju lapanacni ixtapalh ixʼalactuʼuntiʼan. 2 Chai ju yuʼunch ni tacʼatsai ni va lapanacni tajunita vachuʼ pus yuchi jantu jeks alaclhiʼuni ju yuʼunch ju jantucaʼ tamispai ju stavasalanti chai ju taʼalactuʼununcaʼ. 3 Chai ju yuʼunch ni aktamixnin taʼalactuʼunun vachuʼ pus tasqʼuini ni vachuʼ catamaknilh ju atapacxat ixlacata ixʼalactuʼuntiʼan isʼakstuʼan tachi ju tamakni ju ixʼatapacxatʼan ju aliʼin lapanacni ixlacata ixʼalactuʼuntiʼan ju yuʼunch. 4 Chai jantu lai xamatiʼ tanui laʼixpupali va laʼixkʼachat isʼakstu. Va yuchi ju lai tanui ju sacxtuta ju Dios tachi ju pʼulhnan pali ju Aarón ixjuncan. Dios ju sacxtulh ju yuchi. 5 Pus nin yuchi ju Cristo jantu takʼaya isʼakstu ni laich canaulh ni catanuyaʼ laʼixpupali. Alai yuchi ju Dios ju xtaknilh ju chunch lhichʼalhcat. Chai ma chani ju junilh ju Cristo: Ju uxintʼi quintsʼalhʼat Chai ju chavai icmalacasuta ni mimpai icjunita. 6 Chai ju alacatam laʼixchivinti Dios ma chani juni: Ju uxintʼi onkʼalhitʼa pali. Chunch ju unitʼa tachi ju anuʼ makʼaniya lapanac ju Melquisedec ixjuncan. Chunch ma junicalh ju Cristo. 7 Pus ju Cristo acsni ixtʼajuncaʼ ju ani lacamunutpaʼ tʼachivinilh ju Dios chai na tapaininilh lacakʼai tʼasat. Chai slivasalh na kʼalhulh. Tapaininilh ju Dios ju lai caʼixmakʼalhtaxtulh laʼixʼaninti. Chai ni na ixtalhoni ju ixpai pus yuchi lhiʼaktaiju mas maknicalh. 8 Chai ju yuchi mas istsʼalh junita para makʼalhkʼajnalh. Chai chunch ju pucʼatsa tuchi nomputun ju alacaʼinti ni navinilh ju ixkʼachat ju ixpai. 9 Pus ni navikʼolh chux tachi ju ixlacasqʼuin ju ixpai Dios pus jantu tuʼuʼ cʼacxlh. Yuchi lai lhixtʼakʼa ju atsucunti jonkʼalhita lactʼiyan. Chai axtakni tachi chun ju taquiclacaʼini ju yuchi. 10 Pus yuchi ju Dios ju lhcaʼula ni xakʼai palich cava ju Jesús tachi ju ixjunita ju anuʼ makʼaniya lapanac ju Melquisedec ixjuncan. 11 Pus na lhu xaclajumputunau ixlacata ju Cristo chai ixlacata ju Melquisedec para na xcai iclamavasalaniyau ni lana jantu naviyatʼit cuenta ju tuchi iclajunau. 12 Pus ju uxijnan na makʼanchich ju xalhilacʼapʼinatʼit ju Cristo chai caʼixlhijun ni amamakaʼunin ixʼuntʼit ju chavai. Para maktʼasqʼuinichʼokʼoyatʼit alai ni amalanichʼokʼocʼantʼit ju taxtokni ju pʼulhnan lanitʼatʼit ixlacata ju Cristo. Tachi ju va xaʼunchʼokʼoyatʼit tachi ju tam askʼatʼa ju tsʼiquicaʼ. Tachi ju yuʼunch ju jantucaʼ lai tavajin. 13 Pus va tichi chavaich ju jantu lai machakxai ju xachivinti ixlacata ju soknicʼa atsucunti chunch junita tachi ju tam askʼatʼa ju va tsʼiquicaʼ. 14 Para ju lai tasacxtui tamalhch ju kʼox chai tamalhch ju jantu ni va tsa tsa tasacxtui ju kʼox pus chunch tajunita tachi ju tam kʼaya lapanac ju laich ui ju vaiti.
1 Pus jantu va yuchi ju chivinti ju pʼulhnan lanican ixlacata ju Cristo ju va tsa tsa calhitamakaʼuyau. Alai catailhiʼau ixlanica aliʼ ixlacata ju Cristo ni lai camachakxayau ju palai lhixcai. Pus jantu va yuchi ju calhitamakaʼutsucuyau ju lanitauch tachi acsni maconcan ixnavica ju tuʼuʼ ju jantu lai aquintaxtakniyan ju sastʼi quiʼatsucuntiʼan. Nin yuchi ni calhitamakaʼutsucuyau ni tasqʼuini ni calhilaksiyau ju Jesús ni lai catakʼalhtaxtuyau. 2 Jantu tasqʼuini ni va yuchi calhitamakaʼutsucuyau ixlacata tijpachux akpaxat u tachi acsni xamatiʼ mokslani ixmacaʼ laʼisʼaktsulh tam xamatiʼ acsni cataiʼulayach ixnavica ju ixlhichʼalhcat ju Dios. Jantu tasqʼuini ni va yuchi calhitamakaʼutsucuyau ju chivinti junta najun ni catalokʼonchokoyaʼ ju tanita. Jantu tasqʼuini ni va yuchi ju calhitamakaʼutsucuyau ta yu pucʼatsai ju Dios tichi chavaich ju camamakʼalhkʼajnikʼalhicanaʼ chai tichi chavaich ju jantu. 3 Pus ni calacasqʼuinaʼ ju Dios pus catailhiʼau ixlanica ju palai lhixcai ixlacata ju Cristo. 4 Para alin lapanacni ju tamachakxata ixchivinti Dios ju tsʼokcanta chai ju tamispa ju kʼox atsucunti ju xtʼakʼa ju Dios chai tamispa lacatsʼunin ju ixtachaput ju Spiritu Santu. 5 Chai tacʼatsa ni na kʼox ju ixchivinti Dios chai talaktsʼinta ju tachaput ju alin ju chavai ni quilatachilh ju Cristo. 6 Pus ju yuʼunch ni astan catamaconaʼ ju Dios pus jantu lai xamatiʼ alakmalakaspʼitchokoi ni catalhilacaʼanchokolh ju Cristo ni tachi ju va tamaquilhtachokotach aktam ju istsʼalh Dios. Chai tatalacasui laʼixʼucxlacapuʼan ju ixtʼalapanacʼan tachi ju va jantu tuʼuʼ ixtapalhni talhiulai ju Jesús. 7 Ju quiʼatsucuntiʼan ju lapanacni juntau chunch junita tachi ju tuʼuʼ lacatʼun junta va tsa tsa tamai ju xcan. Pus ju anuʼ lacatʼun ni lhu caxtʼakʼaʼ ju xatocʼat ju laich cataʼiyaʼ ju tachʼalhcatnanta ju anch pus ju Dios caʼaktaijuyaʼ ni palai lhu caxtʼakʼaʼ. 8 Para ju anuʼ lacatʼun ni va si alhtucunuʼ chai suniya achʼitin capʼunaʼ pus jantu tuʼuʼ ixtapalhni junita. Ju Dios canonaʼ ni jantu kʼox chai calakxavacanach. 9 Pus mas chunchach ju iclajunau ji quiʼalakʼavin para iccʼatsayau ni jantu chun layatʼit ju uxijnan tachi ju anuʼ lacatʼun. Alai tasui lamiʼatsucuntiʼan ni vasalh makʼalhtʼaxtʼucʼantʼatʼit. 10 Pus ju Dios sok navi ju tuʼuʼ chai ju yuchi jantu cacʼapʼaʼ ju lhichʼalhcat ju navinitʼatʼit. Nin lai caticaplh ju amapaininti ju malacʼasutʼatʼit ixlacata ju Dios acsni chʼalhcʼatnanitʼit ju yuʼunch ju talhilacaʼanta ju Cristo. Chai tus chavai vana va chunch ju tʼailhipʼinatʼit. 11 Chai tachi ju lamapʼainiyatʼit ixlhichux miʼalhunutʼan pus iclacasqʼuin ni vana va chun ju anavitʼit cuenta tachi chun ju taxtokni ju quintajuntan ju Dios ni aquintaxtakniyan. Chai iclacasqʼuin ni chunch ju atʼailhipʼinaʼitʼit tus laʼixʼaclanti ju miʼatsucuntiʼan. 12 Iclacasqʼuin ni ixlhichux miʼalhunutʼan atsʼucʼutʼit tachi ju lhijunch ni alinch ju sastʼi miʼatsucuntiʼan. Chunch ju atsʼucʼutʼit tachi ju talai ju lapanacni ju taʼamaklhtayanan tachi chun ju ixʼakʼalhtasunita ju Dios. Pus ju yuʼunch taʼamaklhtayanan ju yuchi ni talhilaksi ju Dios chai jantu tavanan jeks taʼui. 13 Tachi ju lalh ju Abraham acsni kʼalhtasunilh ju Dios ni lhu caʼalinaʼ ju ixʼapapanatnich. Pus ju Dios lhipastacchokocalh isʼakstu ni ixmavasalaputun ixchivinti. Chunch ju lalh ni matiʼ apumatam ju palai kʼai cava ju lai calhipastaccalh. 14 Chai ma chani ju juni ju Abraham: “Slivasalh kʼox atsucunti ju acxtakniyan chai slivasalh lhu caʼalinaʼ ju miʼapapanatnich”. Ma chunch ju junilh ju Dios ju Abraham. 15 Pus ju Abraham jantu jeks ulh. Alai va tachi lhilaksilh ju ixchivinti Dios chai astan vasalh uctaxtulh tachi ju ixkʼalhtasunita ju Dios. 16 Pus ju quintʼaʼisraelitaninʼan acsni tamavasalaputun tuʼuʼ ixchivintiʼan talhipastʼacʼa Dios ni yuchi ju palai xakʼai. Palai jantu ju yuʼunch. Chai acsni alin tuʼuʼ lakʼaiti chai xamatiʼ lhipastʼacʼa ju Dios ixpumavasalaca ju ixchivinti pus ju akʼantam jantu lai tuʼuʼ aliʼ najun. 17 Pus ni chunch ju talai ju va lapanacni pus vana va chun lalh ju Dios ni lai catamachakxayaʼ ju lapanacni ju cataʼamaklhtayananaʼ ju kʼox isʼatsucuntiʼan ni vasalh caʼamuctaxtuniyaʼ ju ixchivinti. Pus yuchi lhilhipastacchokocalh isʼakstu ixpumavasalaca ju ixchivinti acsni junilh ju chunch ju Abraham. 18 Ni cʼatsayau ni jantu lai najun taʼaklhtamat ju Dios yuchi lhicʼatsayau ni aquintamuctaxtunikʼoyan tachi chun ju quintajuntan ju quijnanʼan ju lhilacaʼantauch ju Cristo ni aquintamakʼalhtaxtuyan. Pus lhikʼach lai lhilaksiyau ixchivinti Dios ni vasalh aquintalhiʼanan ju lactʼiyan. 19 Chai ni vasalh lacaʼiyau ni aquintalhiʼanan ju lactʼiyan ju Dios pus jantu va tam tam nonau mas va tuchi min laquiʼatsucuntiʼan. Jantu lai tam tam nonau ni yuchi ju Dios ju vilhcha lactʼiyan ju lhilaksiyau. 20 Chai anchach vachuʼ vilhcha ju Jesús ju pʼulhnan chaʼalh. Astan ju quijnanʼan cachaʼanau. Chai ju yuchi jonkʼalhita xakʼai quimpaliʼan chai yuchi ju tapainini ju Dios ju quilacataʼan. Lana chunch ju junita tachi ju anuʼ makʼaniya pali ju Melquisedec ixjuncan.
1 Pus ju anuʼ Melquisedec xakʼai ucxtin ixjunita ju lakʼachakʼan Salem. Pus Dios ju lhinonkʼojui tachi chun ju taxtokni. Chai yuchi ju xtaknilh ju lhichʼalhcat ni kʼai pali cava vachuʼ. Pus ju yuchi quipakxtoklh ju Abraham acsni taspʼitcha ju yuchi junta alactʼalalhajalh ilhuʼan ju xalackʼajin ucxtinin. Chai ju Melquisedec sqʼuinilh ju Dios kʼox isʼatsucunti ju Abraham. 2 Pus lakacavin taxtokni ju ixlhiminta ju Abraham ju ixlhajata lacalasat pus xtaknilh lakatamin ju Melquisedec. Pus ixtapakaʼut ju Melquisedec nomputun ni yuchi ju kʼai ucxtin ju navi ju soknicʼa. Chai ju lakʼachakʼan junta kʼai ucxtin ixjunita Salem ixjuncan. Chai ju yuchi nomputun ni matiʼ ju lasat ju anch. Pus ju chunch va nomputun ni jantu lasani lapanac ixjunita vachuʼ. 3 Pus jantu tsʼokcanta tichi chavaich ju ixpai ixjunita ju Melquisedec nin yuchi ju ixnati nin ixtapakaʼutʼan ju makʼaniya ixlacpai. Jantu cʼatsacan tavanan ju lakʼaulh nin tavanan ju nilh. Pus ni chunch ju lhitsʼokcanta ju isʼatsucunti pus tachi ju va chunch ixjunita isʼatsucunti tachi ju isʼatsucunti ju istsʼalh Dios. Tachi ju vachuʼ ixjonkʼalhita kʼai pali. 4 Pus alaktsʼintʼit ni vasalh xakʼai ixjunita ju Melquisedec. Mas yuchi ju Abraham xtaknilh tijtamin ju lakacavin taxtokni ju ixlhajata lacalasat. Chai ju Abraham jantu va xamatiʼ ixjunita. Ju yuchi xapai lhitalacxtuta tachi chun ju quijnanʼan ju israelitanin juntau. 5 Ju laʼixlhamapʼaksin ju Moisés ixnajun ni tachi chun ju isʼaskʼatʼan ju Leví ju palijni ixtajunita caʼaxtaknicalh lakatamin ju lakacavin ixtaxtokni ju istʼaʼisraelitanin. Pus va sia lhiʼalakʼavin talaxtaknilh ni si ixʼapapanatnich ju Abraham ixtajunita. 6 Para ju Melquisedec jantu isʼaskʼatʼa ixjunita ju Leví. Para ixlaquilhtu xtaknicalh lakatamin ju lakacavin taxtokni ju ixlhiminta ju Abraham. Chai ju Melquisedec sqʼuinilh ju Dios kʼox isʼatsucunti ju Abraham mas jantu va xamatiʼ ixjunita ju Abraham ni Dios ju ixkʼalhtasunita ni lhu caʼalinaʼ ju ixʼapapanatnich. 7 Chai ju quijnanʼan ju israelitanin juntau cʼatsayau ni yuchi ju palai xakʼai ju lai sqʼuin ju kʼox isʼatsucunti tam xamatiʼ. Palai jantu ju tichi ixlacata ju sqʼuinican. 8 Pus ju Melquisedec chai tachi chun ju isʼaskʼatʼan ju Leví ju palijni ixtajunita si taʼamaklhtayanalh ju lhakʼailaktsʼin. Pus ju isʼaskʼatʼan ju Leví si tani ni va lapanacni ixtajunita. Para laʼixchivinti Dios lhichivinin ju Melquisedec tachi ju va jantu tavanan xani. 9 Pus ju Leví makʼaniya ixpaiʼan ixjunita tachi chun ju ixpalijniʼan ju quintʼaʼisraelitaninʼan. Chai ju yuʼunch taʼamaklhtayanalh ju lhakʼailaktsʼin ju taxtaklh ju quintʼaʼisraelitaninʼan. Para ca laich acnaulh ni tachi ju va junch xtaklh vachuʼ ixlhakʼailaktsʼin ju Leví acsni xtaklh ju Abraham. 10 Ca laich acnaulh ju chunch mas tucaʼ istsucuta ju Leví acsni quipakxtokchilh ju Abraham ju Melquisedec ni ixpapanti ixjunita. 11 Acsni axtaknicalh ju quintʼaʼisraelitanin ju lhamapʼaksin pus laʼixmacniʼan ju levitanin ju xtakcalh. Chai ju yuʼunch ixʼapapanatnich ixtajunita ju Aarón chai vachuʼ palijni ixtajunita. Para matiʼ ixjunita ixtachaput ju ani pupali nin yuchi ju lhamapʼaksin. Jantu lai ixtaʼaxtakni ju lapanacni ju soknicʼa isʼatsucuntiʼan laʼixmacni Dios. Pus yuchi ixlhitasqʼuini ni caʼula ju sastʼi pupali tachi ixʼanuʼ ju Melquisedec. Jantiyuʼ tachi ixʼanuʼ ju Aarón. 12 Pus acsni mapaxacan ju pupali pus tasqʼuini ni vachuʼ camapaxacalh ju lhamapʼaksin. 13 Pus ju tanulh lacasastʼi pupali lhichivinincanta laʼixchivinti Dios. Yuchi ju Cristo. Chai ju yuchi jantu ixpapanti ixjunita ju Leví. Alai ixpapanti ixjunita apumatam chai jantu xamatiʼ pali ixjunita sia lhiyuʼunch. 14 Pus aktsʼiya cʼatsacan ni ixpapanti Judá ixjunita ju Cristo. Chai jantu tuʼuʼ naulh ju Moisés lacalhamapʼaksin ni laich pali cava ju tam ixpapanti ju yuchi. 15 Pus ju Cristo ni xakʼai pali junita tachi ju Melquisedec pus anchach ju putasui ni mapaxalh ixlhamapʼaksin ju Dios ju tsʼoklh ju Moisés. 16 Pus ju Cristo jantiyuʼ ju lai putanulh laʼixpupali ni ixpapanti ixjunita ju Leví tachi ju ixnajun lacalhamapʼaksin. Alai yuchi lai xaputanui laʼixpupali ni jantu lai xatamaknikʼalhi. Alai tʼonkʼalhi. 17 Pus laʼixchivinti Dios ma chani ju najun ixlacata yuchi: Uxintʼi ju paliʼat ju onkʼalhitʼa. Chunch unitʼa ju uxintʼi tachi ju Melquisedec. Chunch ju najun laʼixchivinti Dios. 18 Pus ju pʼulhnan lhamapʼaksin ixlacata ju palijni makʼosucalh ni matiʼ ixjunita ixtachaput ni laich calasoknicʼa isʼatsucuntiʼan ju lapanacni. Jantu tuʼuʼ ixlhitapalai ixlacata yuchi. 19 Ju laʼixlhamapʼaksin ju Moisés jantu tavanan lai ixlhitajucan ju soknicʼa atsucunti laʼixmacni Dios. Para ju chavai alin ju palai kʼox chivinti ju lhilaksiyau. Yuchi ni ulata ju Dios ju sastʼi pupali. Chai ju Cristo tanulh ju anch chai ixlacata yuchi laich calakʼanau ju Dios. 20 Pus ju Dios lhipastacchokocalh isʼakstu ixpumavasalaca ixchivinti acsni tavanan ulalh ju Cristo laʼixpupali. 21 Pus ju levitanin acsni tavanan tatanu laʼixpupaliʼan jantu lhipastaccalh ju Dios ixpumavasalaca tuʼuʼ chivinti. Para acsni tavanan tanulh laʼixpupali ju Cristo pus ju Dios lhipastacchokocalh isʼakstu ixpumavasalaca ixchivinti. Pus laʼixchivinti Dios ju tsʼokcanta chani naulh ju yuchi: Ju quitʼin icDios chai iclhipastacchokocalh quiʼakstu ixpumavasalaca ju quinchivinti chai jantu tam actinaulh. Ju uxintʼi paliʼat onkʼalhitʼa Chai chunch unitʼa tachi ju Melquisedec. Chunch ma naulh ju Dios. 22 Chai ni chunch ju ulhtucalh ju Jesús pus yuchi pucʼatsayau ni aktsʼiya aquintamuctaxtuniyan ju sastʼi chivinti ju alactʼatakʼoxita ju lapanacni ju Dios. Chai ju yuchi palai kʼox. Palai jantu ju pʼulhnan lhamapʼaksin. 23 Pus ixʼapapanatnich ju Leví na ilhuʼan ixtajunita ju ixtachʼalhcatnan lacapupali ni va ixtatʼankʼojui ninkʼonin chai jantu lai ixtatailhiʼankʼalhi ju ixlhichʼalhcatʼan. 24 Para ju Jesús ni jantu ni pus jonkʼalhita pali. Chai jantu tasqʼuini ni catanu astan apumatam pali. 25 Chai yuchi lai lhixtakni isʼatsucuntiʼan jonkʼalhita tachi chun ju talhilacaʼanta ju Dios laʼixmacni ju yuchi. Pus lai alacmakʼalhtaxtukʼalhi ni tʼonkʼalhi. Chai tʼonkʼalhi ni laich va tachi tapaininich ju Dios ju quilacataʼan ju lhilacaʼanauch ju yuchi. 26 Ju Jesús yuchi ju xakʼai pali ju maktasqʼuiniyau. Matiʼ apumatam ju ixtʼachunch cava. Ju yuchi lana na salaka junita. Chai matiʼ lana ixtalakʼalhin. Chai jantu tavanan alactuʼununta. Chai ju chavai jantu alactʼaʼalhtanan ju alactuʼuni lapanacni. Para lakʼayacalh chai anch ju vilhcha ju lactʼiyan. 27 Pus ju xakʼai ixpalijniʼan ju quintʼaʼisraelitaninʼan tuncujun tuncujun tamakni ju atapacxat ixlacata ixʼalactuʼuntiʼan isʼakstuʼan. Chai astan tamakni ju atapacxat ixlacata ixʼalactuʼuntiʼan ju ixtʼalapanacniʼan. Para ju Jesús jantu maknitʼajun tuʼuʼ atapacxat ixlacata ju alactuʼunti. Pus mas xakʼai pali junita para jantu tasqʼuini ni chunch ju calalh ni mapalhkʼalhi ixtapalh ixʼalactuʼuntiʼan ju lapanacni acsni tavanan makʼaxtakchokocalh isʼakstu laʼixʼaninti. Chai jantu tasqʼuini ni tavanan canavichokocalh. 28 Pus laʼixlhamapʼaksin ju Moisés ixʼaxtaknican ixpupali ju lapanacni ju jantu salaka ixtajunita ni va lapanacni ixtajunita. Para acsni makʼosucalh ju anuʼ lhamapʼaksin pus ju Dios lhipastacchokocalh isʼakstu ixpumavasalaca ixchivinti chai ulalh istsʼalh laʼixpupali. Chai ju yuchi jonkʼalhita salaka.
1 Pus ju tucan iclajumputunau yuchi ni alin pumatam xakʼai quimpaliʼan ju chunch junita tachi ju iclajuntau. Chai ju yuchi vilhcha lactʼiyan vanin junta vi ju Dios. 2 Chai ju yuchi navi ixlhichʼalhcat ju ixpupali ju lactʼiyan junta vasalh lakʼayacan ju Dios. Chai ju anch jantu va tam xamatiʼ lapanac ju navita. Para isʼakstu ju Dios ju navilh. 3 Pus tachi chun ju ixpalijniʼan ju quintʼaʼisraelitaninʼan alhilhcaʼulacanta ni cataxtakniyaʼ ju tuʼuʼ lhakʼailaktsʼin ju Dios chai catamakniniyaʼ ju atapacxat. Pus aktsʼiya istasqʼuini ni vachuʼ caʼalilh tuchi caxtakniyaʼ ju Dios ju Jesucristo ni vachuʼ pali junita. 4 Pus ju Jesús ni vanach tʼajuncaʼ cava ju ani lacamunutpaʼ pus jantu lai ixtitanu laca sastʼi ixpupali va ixlacaʼatalh ni ixtaxtʼakʼacaʼ ixlhakʼailaktsʼinʼan ju ixpalijniʼan ju quintʼaʼisraelitaninʼan tachi ju najun laʼixlhamapʼaksin ju Moisés. 5 Chai ixlhichʼalhcatʼan ju ixpalijniʼan ju quintʼaʼisraelitaninʼan chunch ju jumputun tachi ju navicantacha ju lactʼiyan. Chai ju yuʼunch anch ju tachʼalhcatnan junta navicanta tachi ju junita ju xalhilaktsʼintaiti ju lactʼiyan. Chai cʼatsayau ni chunch junita ni chani junilh ju Moisés ju Dios acsni ixnaviputun ju anuʼ lonachakaʼ ju ixpujitatʼan cajunaʼ pantsʼiquis. Juni: “Alaktsʼich. Lana chunch ju anavitʼi chux tachi ju junita ju lhilaktsʼintaiti ju icmasunin acsni xaquintʼavilhtʼi ju anuʼ akstijun”. Chunch ma junilh ju Dios. 6 Para palai kʼox ju lhichʼalhcat ju xtaknicanta ju Cristo. Palai jantu tachi ju ixtachʼalhcatnan ju ixpalijniʼan ju quintʼaʼisraelitaninʼan. Chai palai kʼox ju chivinti ju quintalhitʼatakʼoxitan ju Dios ni palai kʼox ju chivinti ju quintakʼalhtasunitan. Jantu chun ixjunita ju pʼulhnan chivinti ju alaclhitʼatakʼoxilh ju makʼaniya quilacpaʼitniʼan. 7 Pus ju makʼaniya quintʼaʼisraelitaninʼan jantu lai xatatakʼalhtaxtui mas ixtalhilaksi ju anuʼ pʼulhnan chivinti ju alaclhitʼatakʼoxilh ju Dios ni jantu lai ixtamuctaxtui. Pus ni laich cava ixtatakʼalhtaxtulh ju lapanacni ju chunch pus jantu caʼixʼalaclhitʼatakʼoxilh ju Dios alakatam chivinti astan. 8 Pus isʼakstu Dios ju jantu kʼox xalhiulai tachi ju ixtalai ju makʼaniya quintʼaʼisraelitaninʼan. Chai chani ma naulh: Ju quitʼin icnajun ni cachinaʼ ju avilhchan acsni acʼalaclhitʼatakʼoxiyaʼ ju sastʼi chivinti ju amachakʼan ju xaʼestado Israel chai ju amachakʼan ju xaʼestado Judea. 9 Jantu chun cajunaʼ tachi ju icʼalaclhitʼatakʼoxilh ju makʼaniya ixlacpaiʼan acsni quiʼakstu icʼamaxtulh ju xalacatʼun Egipto. Pus ju yuʼunch jantu tamuctaxtulh tachi ju xacʼalaclhitʼatakʼoxita. Pus yuchi icʼalaclhimacaulh. 10 Para icnajun ni chani cajunaʼ ju chivinti ju acʼalaclhitʼatakʼoxiyaʼ ju amachakʼan Israel acsni catapasayaʼ ju anuʼ avilhchan. Acʼaxtakniyaʼ ju kʼox ixtacʼatsanʼan ni laich catacʼatsayaʼ tuchi iclacasqʼuin ni catanaviyaʼ. Chai acʼaxtakniyaʼ ju kʼox ixʼalhunutʼan ni catanaviputunach. Chai isDiosʼan acjunaʼ. Chai ju yuʼunch quilapanacni catajunaʼ. 11 Chai ju acsnich jantu tasqʼuini ni xamatiʼ camasunilh tam ixtʼalapanac nin tam ixlakʼau ni laich aquintamispa ju quitʼin. Jantu tasqʼuini ni chunch catalalh ni si aquintamispakʼoyaʼ. Mas yuʼunch ju palai lactʼicstʼin cava u mas yuʼunch ju palai lackʼajinch cava. 12 Chai acʼamacʼacxaniyaʼ ixtalakʼalhinʼan. Chai jantu tavanan actipastacchokolh ju alactuʼunti ju tanavita. Chunch ma naulh ju Dios. 13 Chai acsni naulh ni alin ju sastʼi chivinti ju alaclhitʼatakʼoxita ju lapanacni pus va nomputun ni jantuch vana lhitapalai ju xapʼulhnan chivinti ju ixʼalaclhitʼatakʼoxita ju quintʼaʼisraelitanin. Pus ju jantuch vana tuʼuʼ lhitapalai chai ju va kʼatʼilh pus makʼancanch.
1 Pus ju pʼulhnan chivinti ju ixʼalaclhitʼatakʼoxita ju Dios ju makʼaniya quilacpaʼitniʼan vachuʼ ixnajun ta yu catapulakʼayalh ju Dios. Chai ixʼalin ju chakaʼ ju ani lacamunutpaʼ junta ixtalakʼayai ju yuchi. 2 Pus ju anuʼ chakaʼ va lonachakaʼ ixjunita. Chai pulactʼui ixjunita. Ju pulactam junta pʼulhnan putanucan pus ixlhimapakaʼucan ixchakaʼ Dios. Chai ju anch ixya lakatam kʼai ixputayan maclhcu chai ju mixa junta ismokslacan ju xkapavati ju ixlhikʼailaktsʼinican ju Dios. 3 Chai junta ixlhvakpitsicanta ju anuʼ chakaʼ ixmucʼacanta lakatam kʼai pumpuʼ. Chai ju apulactam anchach tucan ju ixchin ju Dios. 4 Chai ju anch ixʼalin lakatam kʼai pumapʼun ju si oro ixlhinavicanta. Para tachi tuʼuʼ mixa istasui. Vachuʼ ixʼalin lakatam pʼaklat ju ixlhimanicanta ju oro. Pus ju lacapʼaklat ixtajun lakatam xalu oro ju ixputajun lacatsʼunin ju anuʼ vaiti ju ixminacha lactʼiyan ju mana ixjuncan. Vachuʼ ixtajun ixpalic ju Aarón ju pʼunlh chai ju laklhtʼakʼalh chiux junta istsʼokcanta ju chivinti ju alaclhitʼatakʼoxilh ju Dios ju makʼaniya quilacpaʼitniʼan. 5 Chai laʼixʼucxni ju anuʼ pʼaklat ixʼayocanta lakatʼui anquilhnin ju ixʼaxapalaxtucanta lacaʼoro. Chai ju yuʼunch querubines ixʼajuncan. Chai anchach ju ixmalacasucan ju ixʼamatuncunit ju Dios. Chai ju anuʼ querubines ixtaʼakxtakmai laʼixpakʼachu ixʼucxni ju anuʼ pʼaklat junta lax ixtamucʼai lactsʼunin acʼalhni ixpuxacacan ixtalakʼalhinʼan ju lapanacni. Para jantu lai lhu actilajuniu ixlacata ju ani taxtokni ju chavai. 6 Pus acsni talakʼoxikʼolh ju chakaʼ pus ju palijni tatsuculh tanunin junta quilhpʼulhya chakaʼ. Va ixtaʼan navinin ta yu ixtapulakʼayai ju Dios tachi ju ixʼajuncanta. 7 Para ju ixlhipulactam va isʼakstu ju ixʼan ju xakʼai pali. Chai ju yuchi va paktam ju tamin cʼata ju ixʼan. Chai aktsʼiya ixlhiʼan ju ixʼacʼalhni ju atapacxat. Chai ju yuchi lax ixmucʼai ju acʼalhni laʼixʼucxni ju anuʼ pʼaklat ixlacata ixtalakʼalhin isʼakstu chai ixlacata ixtalakʼalhinʼan ju ixtʼalapanacni. 8 Pus ju Spiritu Santu quintapumamachakxaniputunan ni tulai va kʼaya catanu xamatiʼ lacachakaʼ junta ixchaʼan ju Dios acsni vana chun ixtitalakʼayai ju Dios tachi ju pʼulhnan ilhcaʼulata ju Dios. 9 Pus tachi chun ju ani alin tuchi quintamasuniputunan. Va quintamavasalaniputunan ni jantu tavanan lai ixʼaxacani ixʼalhunutʼan ju lapanacni ju lhakʼailaktsʼin ju ixtaxtakni ju Dios nin yuchi ju ixʼacʼalhni ju tuʼuʼ atapacxat ju ixtamaknini ju yuchi. 10 Pus ju anuʼ lhamapʼaksin va ixnajun tuchi ixtalakxtuch ju lai ucan chai tuchi lai kʼotcan chai ta yu istasqʼuini ni catamakchakʼalh u catapaxlh. Va si lhamapʼaksin ixjunita ixlacata ixlacatunaʼan. Para va ixʼaxtaknican ju chunch tus acsni chilh ju avilhchan acsni mapaxalh ju Dios ju lhamapʼaksin chai alaclhitʼatakʼoxilh ju sastʼi chivinti ju lapanacni. 11 Pus ju Cristo quilatachilh chai xakʼai quimpaliʼan junita ixlacata ju sastʼi lhamapʼaksin ju palai kʼox junita. Chai astan ju yuchi anchokolh ju lactʼiyan. Chai junta chʼalhcatnan ju yuchi laʼixpupali palai kʼox chai chunchach junita tachi ju aktsʼiya ispastacta ju Dios. Palai jantu chun ixjunita junta ixtalakʼayai ju Dios ju makʼaniya quintʼaʼisraelitaninʼan ju ani lacatʼun. Chai junta chʼalhcatnan ju Cristo pus jantu va ixtanavin lapanacni junita nin xachakaʼ ju ani lacamunutpaʼ cava. 12 Ju Cristo ni tanulh laʼixpupali va paktam ju tanulh junta vi ju Dios chai anchach ju vilhkʼalhi. Para jantiyuʼ ju lai xaputanui ni ixmaknita ju tuʼuʼ chivo u tuʼuʼ askʼatʼa vacax tachi ju ixtalai ju aliʼin palijni. Alai tanu ni taxtulh ixʼacʼalhni isʼakstu. Chai ju chunch lai caʼalinaʼ ju quiʼatsucuntiʼan jonkʼalhita lactʼiyan. 13 Ju laʼixlhamapʼaksin ju Moisés ixʼalin ju atsʼoknut junta ixnajun ni tachi ju va lhquiliqui cajunlh ju ixlacatunaʼan laʼixmacni Dios ni jantu catamuctaxtulh tachi ju najun lacalhamapʼaksin. Para lai salaka cajunchokolh ixlacatunaʼan ni va calacamucʼacalh ixʼacʼalhni ju xapai vacax u ixʼacʼalhni chivo u va calaxʼalacpulacʼakʼavalh ju lacaxcan ju lhiya ju xalhcʼacʼa ju saʼatsiʼ vacax. 14 Pus ni lai ixacai ju ixlacatunaʼan ju lapanacni ju ixʼacʼalhni ju va tuʼuʼ atapacxat ja va a ti yuchach jantu lai aquintaxacaniyan ju quiʼalhunutʼan ixʼacʼalhni ju Cristo. Pus ju Spiritu Santu jonkʼalhita. Chai yuchi ju aktaijulh ju Cristo ni lai xamakʼaxtaknichokoi isʼatsucunti ju Dios. Chai ju Cristo matiʼ lana junita ju ixtalakʼalhin. Chai ni taxtulh ixʼacʼalhni ju quilacataʼan pus jantu tasqʼuini ni calhamakʼaninitsucu ju ixnavica ju jantu lai xapulhitajuyau ju quiʼatsucuntiʼan ju jonkʼalhita. Alai calakʼayayau ju Dios ju lakʼajunta. 15 Pus ni nilh ju Cristo ixtapalh ju alactuʼunti pus pumavasala ni aquintamuctaxtuniyan ju Dios ju sastʼi chivinti ju quintalhitʼatakʼoxitan ixlacata ju quiʼatsucuntiʼan jonkʼalhita. Pus ju Cristo vachuʼ mapalalh ixtapalh ixʼalactuʼuntiʼan ju makʼaniya quintʼaʼisraelitaninʼan ju ixtanavita acsni jantu lai ixtamuctaxtui tachi ju ixnajun lacapʼulhnan chivinti ju alaclhitʼatakʼoxilh ju Dios. Chai ju chavai tachi chun ju asacxtulh ju Dios cataʼamaklhtayananaʼ ju sastʼi isʼatsucuntiʼan ju conkʼalhiyanta ju lactʼiyan tachi ju quintakʼalhtasunitan. 16 Pus tam xamatiʼ laquilhiquijnanʼan ju israelitanin juntau laich catsʼokʼulayaʼ ta yu capulhvakpitsicanaʼ ju ixʼalinta acsni caniyaʼ ju yuchi. Para va acsnich ju lai lhvakpitsican acsni mavasalacanta ni nilh ju ixnonaʼ ju chivinti. 17 Pus ju anuʼ chivinti junta najunta ta yu capulhvakpitsicanach ju ixʼalinta tam xamatiʼ va acsnich ju tachapun acsni caniyaʼ ju ixnonaʼ ju chivinti. Para acsni tʼajuncaʼ ju amanavin pus jantucaʼ lhitapalai ju chivinti. Acsni caniyaʼ acsnich ju lhitapalai ju anuʼ atsʼoknut. 18 Pus vana va chun ixlacata ju pʼulhnan chivinti ju alaclhitʼatakʼoxichalh ju Dios ju makʼaniya quilacpaʼitniʼan. Tus acs ixlhitapalai acsni tavananch ixtamakni ju tuʼuʼ atapacxat chai ixtaxtunilh ixʼacʼalhni. 19 Pus ju Moisés acsni ajunkʼo ju lapanacni tachi chun ju chivinti ju istsʼokcanta lacalhamapʼaksin pus chʼapalh lacatsʼunin ju ixʼacʼalhni ju askʼatʼa vacax chai ixʼacʼalhni ju satsʼalan chivo chai lhiyocalh lacatsʼunin xcan. Chai chʼapalh ju achʼitin ju hisopo juncan chai tʼachʼapalh ju ixʼapamat borrego ju ixlhimanicanta slapulh. Chai tʼokʼo mataju lacaʼacʼalhni. Chai lax alacpukʼava ju alhiqui junta istsʼokʼulacanta ixlhamapʼaksin Dios. Vachuʼ lax alaclacamucʼalh ju lapanacni. 20 Chai alacjuni: “Ju ani acʼalhni mavasalai ju chivinti ju talhitʼatakʼoxitan ju Dios. Yuchi ju chivinti ju iclajunau ju chavai”. Chunch ma naulh ju Moisés. 21 Chai vana va chun ju lacamucʼalh ju acʼalhni ju chakaʼ junta ixtalakʼayai ju Dios chai chux ju ixtapuchʼalhcatnan ju palijni. 22 Pus ju lacalhamapʼaksin na lacatsʼunin taxtokni ju jantu lhixacacan ju acʼalhni. Chai jantu lai macʼacxanican ju alactuʼunti ni jantu taxtui ju acʼalhni. 23 Junta ixtalakʼayai ju Dios ju quintʼaʼisraelitaninʼan ju ani lacamunutpaʼ lana chunch ixnavicanta tachi ju xalhilaktsʼintaiti ju vilhcha lactʼiyan junta lakʼayacan ju Dios. Pus lacachakaʼ junta ixtalakʼayai ju Dios ju ani lacamunutpaʼ pus aktsʼiya istasqʼuini ni camaknicalh ju atapacxat ni lai calhixacacalh ixʼacʼalhni ju taxtokni ju anch. Para tasqʼuini ni caʼalilh ju acʼalhni ju palai laklhu ixtapalh cava ni laich capuxacacalh ju quiʼalhunutʼan ju quijnanʼan ju caʼanau ju lactʼiyan. 24 Pus ju anuʼ chakaʼ ju ixtayajuta ju ani va chunch ju navicalh tachi ju alinacha ju lactʼiyan junta lakʼayacan ju Dios. Pus ju Cristo acsni tavanan amaklhtayanalh ixpupali jantu tanu ju lacachakaʼ junta lakʼayacan Dios ju va ixtanavin lapanacni junita. Para ju Cristo alai tanu ju lactʼiyan. Chai anch ju vilhcha ju chavai laʼixʼucxlacapuʼ Dios ju quilacataʼan. 25 Pus ju xakʼai ixpalijniʼan ju quintʼaʼisraelitanin paktamin ju tamin cʼata tatanu junta ixchin ju Dios. Chai ixtalhiʼan ixʼacʼalhni ju atapacxat. Para ju Cristo jantu paklhu ju nilh ni laich paklhu caxtaklh ju ixʼacʼalhni. 26 Ni chunch ixlalh pus caʼistasqʼuini ni na paklhu ixnilh ju Cristo tus acsni tavanan navicantacha ju lacamunutpaʼ. Para alai va paktam ju quitalacasuchilh ju Cristo acsni aclalh ju cʼata ju ilhcaʼulata ju Dios. Chai quilhitapʼuxchilh ju isʼatsucunti ju quilacataʼan ni lai aquintaxacaniyan ju quintalakʼalhinʼan. 27 Pus ju Dios lhcaʼulata ni va paktamch ju tani ju lapanacni chai astan caʼamakʼosaspitcanach. 28 Pus vana va chun ju Cristo. Ju yuchi va paktam ju nilh acsni mapalalh ixtapalh ju ixʼalactuʼuntiʼan na lhu lapanacni. Para ju yuchi catalacasuchokoyaʼ ju ani lacamunutpaʼ. Para ju acsnich jantiyuʼ ju quiʼalactuʼuntiʼan ju calhiminaʼ mapalhnaʼ. Alai va aquintaminan makʼalhtaxtunun ju quijnanʼan ju pacxanauch ju yuchi.
1 Pus ju ixlhamapʼaksin Moisés chunch ixjunita tachi ju tuʼuʼ makʼantsʼastʼilit. Va ixpumamachakxani ju quilacpaʼitniʼan ni caʼalinaʼ astan ju taxtokni ju palai kʼox. Pus yuchi jantu lai xalhilasoknicʼai isʼatsucuntiʼan ju lapanacni ju ixtalakʼayaputun ju Dios tachi ju ixnajun ju anch. Jantu lai ixʼalasoknicʼai isʼatsucuntiʼan ju lapanacni mas tamin cʼata tamin cʼata vana yuʼ ju atapacxat ju ixʼamakninican ju Dios. 2 Pus ni laich cava islasoknicʼai isʼatsucuntiʼan ju lapanacni acsni ixtamaknini ju Dios ju atapacxat pus jantu istasqʼuini ni va tsa tsa ixtamakni. Pus ju chunch ixtalakʼayai ju Dios ni caʼixʼaxacanikʼalhicalh ixtalakʼalhinʼan pus jantu vana ixtapastactsuculh ju ixʼalactuʼuntiʼan. 3 Para alai acsni ixmaknican ju atapacxat chux cʼata pus ixpumapastʼacʼanicanch va ni alactuʼunin ixtajunita. 4 Pus ju va ixʼacʼalhni ju tuʼuʼ vacax u tuʼuʼ chivo jantu lai xacai ju talakʼalhin. 5 Yuchi chani lhijunilh ju Cristo ju ixpai acsni tavanan quilachilh ju ani lacamunutpaʼ: Jantu tucan ju lhakʼailaktsʼin ju lacʼasqʼuin ju uxintʼi. Jantiyuʼ ju lacasqʼuin ni catamakninin ju lapanacni ju tuʼuʼ atapacxat. Yuchi qʼuilhixtʼaknitʼa ju quilacatuna ni acmakʼaxtʼakʼaʼ quiʼakstu. 6 Ju uxintʼi jantu kʼachʼani acsni lacxavanicʼan ju tuʼuʼ atapacxat. Nin acsni makninicʼan ju tuʼuʼ atapacxat ixtapalh ju alactuʼunti. 7 Pus acsnich ju icjunin ni acnaviniyan ju minkʼachat. Yuchi iclhimilh ju ani. Acnaviyaʼ tachi ju tsʼokcanta laminchivinti ju quilacata. Chunch ma naulh ju Cristo. 8 Pus ju Cristo naulh ni jantu kʼachani ju Dios chai jantu lacasqʼuin ju yuchi ni catamakninilh ju atapacxcat ju lapanacni nin tuʼuʼ catalhikʼailaktsʼinilh nin yuchi ni cataxavanilh ju tuʼuʼ atapacxat nin tuʼuʼ cataxtaknilh ixlacata ixʼalactuʼuntiʼan. Chunch ju naulh mas chunch ju ixlhamapʼaksinincanta laʼixlhamapʼaksin ju Moisés. 9 Chai astan naulh ni yuchi ju lhimilh ni canaviniyach ju ixkʼachat ju ixpai Dios. Pus acsni naulh ju chunch va nomputun ni makʼosulh ju xapʼulhnan lhamapʼaksin chai taiʼula ju sastʼi. 10 Pus va ixlacaʼatalh ni navinilh ixkʼachat ju Dios ju Jesús chai makʼaxtaklh laʼixʼaninti ixlacatuna pus lai salaka cajunau laʼixmacni Dios. Pus ju yuchi navinikʼolh ixkʼachat ju Dios acsni paktam xtaklh ju ixlacatuna chai jantu tasqʼuini ni caxtakchokolh aktam. 11 Pus tachi chun ju ixpalijniʼan ju quintʼaʼisraelitaninʼan chux avilhchan tachʼalhcatnan chai na paklhu tamaknini ju Dios ju atapacxat. Chai jantu tavanan tamapaxai ju tuchi tamaknini ju Dios. Para ju anuʼ atapacxat jantu tavanan lai xacai ju alactuʼunti. 12 Para ju Cristo va paktam ju xtaklh ju isʼatsucunti ixlacata quiʼalactuʼuntiʼan. Chai astan tavi vanin junta vi ju Dios. 13 Chai anch ju pacxanvi tus acsni calhajakʼocanach ju ixtʼalaxcai. 14 Pus ju Jesús va paktam ju xtaklh ju isʼatsucunti para chunch ju soknicʼa punavikʼalhi yuʼunch ju salaka tajunita laʼixmacni Dios. 15 Chai vana va chun quintajunan ju Spiritu Santu lacaʼatsʼoknut. Pus chani naulh: 16 Ma najun ju Dios ni ma yuchi ju ani ju chivinti ju caʼalaclhitʼatakʼoxiyaʼ acsni catapasayaʼ ju anuʼ avilhchan. Ma caʼaxtakniyaʼ ju kʼox ixʼalhunutʼan ni catanaviputunach ju tuchi lacasqʼuin ni catanavi. Chai ma caʼaxtakniyaʼ ju kʼox ixtacʼatsanʼan ni laich catacʼatsayaʼ tuchi ju lacasqʼuin ni catanaviyaʼ. 17 Chai astan chani ma naulh: Jantu tavanan actipastacchokolh ju alactuʼunti ju tanavita nin yuchi ju talakʼalhin ju tanavita. Chunch najun laʼixchivinti Dios. 18 Pus acsni quintaxacanitan ju quiʼalactuʼuntiʼan ju Dios pus jantu vana tasqʼuini ni camaknicalh aliʼ atapacxat ixtapalh quiʼalactuʼuntiʼan. 19 Pus ji quiʼalakʼavin ni quintalhixacanitan ju quiʼalactuʼuntiʼan ju ixʼacʼalhni ju Cristo pus lai xakʼalayau ju Dios quiʼakstuʼan chai jantu tasqʼuini ni catalhananau. 20 Lai xakʼalayau ju Dios ni lhitʼapʼuxlh isʼatsucunti ju Jesús ju quilacataʼan. Chai acsni nilh ju yuchi pus lana kʼexlh ju anuʼ pumpuʼ laquimpujitatʼan ju israelitanin juntau ju ixpulhvakpitsican ju chakaʼ ni jantu lai va kʼaya ixtatanui ju palijni ju ixlhipulactam junta tucan ixchin ju Dios. Para ju chavai va tichi chavaich lai xakʼalai ju Dios. 21 Chai tachi chun ju quijnanʼan ju lhilacaʼanau ju Cristo pus ju yuchi xakʼai quimpaliʼan junita. Chai ju yuchi chʼalhcatnan ju quilacataʼan ju isʼaskʼatʼan Dios juntau. 22 Yuchi ixlhichux quiʼalhunutʼan vanin calhitsucu laʼixmacni Dios. Chai ni chʼakʼacanta ju quiʼalhunutʼan ixlacata ju quiʼalactuʼuntiʼan chai ni akpaxtau pus vasalh calhilaksiyau ju yuchi. 23 Slivasalh calacaʼiyau ni aquintamakʼalhtaxtuyan ju Dios chai jantu va tam tam capastacvi. Chunch ju canaviyau ni aktsʼiya muctaxtui ju Dios tuchi najun. 24 Vachuʼ capastacvi ta yu lai calaʼaktaiju ni laich palai calapumapainiu chai laich palai canaviu ju kʼox. 25 Pus jantu cacʼapʼau tachi ju talai ju aliʼin ni jantu caʼanau junta tatakʼaixtʼokʼa ju talakʼayai ju Dios. Alai calamapʼaksiyau ju pumatamin. Chai palai canaviu ju chunch ni laktsʼinauch ni vaninch minta ju avilhchan acsni caminchokoyaʼ ju Cristo. 26 Pus ni va catailhiʼanau ju alactuʼunti mas mispatauch ju stavasalanti ixlacata ju Cristo pus jantu lai tuʼuʼ lhitaxacai ju quiʼalactuʼuntiʼan. 27 Va yuchi ni caʼalinaʼ ju kʼai quimakʼalhkʼajnatʼan ju slivasalh lhitalhan cajunaʼ. Chai catalhkʼamnaʼ ju Dios chai calacxavacanaʼ tachi chun ju ixtʼalaxcai. 28 Ni xamatiʼ ixpʼakx ju ixlhamapʼaksin ju Moisés pus ixmaknican laʼixchivintiʼan lhipumatʼui u lhipumatʼutu ju ixtalaktsʼinta. Chai jantu ixmapainican. 29 Pus ja jantu cʼatsʼayatʼit ni lhijunch ni palai kʼai makʼalhkʼajnat ju caxtaknicalh ju lapanac ju jantu tuʼuʼ lhiulai ju istsʼalh Dios chai najunta ni jantu lhitapalai ju ixʼacʼalhni. Tanajun ni jantu lhitapalai ju ixʼacʼalhni mas yuchi ju mavasalalh ju chivinti ju quintalhitʼatakʼoxitan ju Dios chai mas yuchi ju salaka navi quiʼalhunutʼan. Vachuʼ ju anuʼ lapanac lana maktalhkʼaman ju Spiritu Santu ju naviniputun lamapainin ni xakʼalai laʼixʼalhunut. 30 Pus cʼatsayau ni ma chani naulh ju Dios: “Quitʼin ju icʼamamakʼalhkʼajniniʼ. Quitʼin ju acmamapalaniyaʼ”. Chunch ju ma naulh ju Dios. Chai vachuʼ ma chani naulh: “Quitʼin quiʼakstu ju acmakʼosaspitaʼ ju quilapanacni”. 31 Pus slivasalh kʼai lhitalhan cava ni aquimamakʼalhkʼajni ju Dios ju lakʼajunta. 32 Para apʼastʼactʼit ju anuʼ avilhchan ju tapasatach acsni tavanan mispʼachitʼit ju Cristo. Pus na lhu xachʼixatʼit ju kʼai makʼalhkʼajnat. 33 Ju aliʼin lamilhiʼuxijnan laʼixtalhavat lapanacni slivasalh ixmamaxanicʼanatʼit chai ixmamakʼalhkʼajnicʼanatʼit. Chai acsni ixʼalhimakchapucan ju aliʼin pus ju aliʼin lamilhiʼuxijnan jantu ixtʼalhananatʼit. Alai ixlaʼaktʼaiʼuyatʼit. 34 Chai na ixʼaʼaktʼaiʼuyatʼit ju ixʼatʼalhnucanta va ixlacaʼatalh ni ixtalhilacaʼanta ju Cristo. Chai na ixkʼachʼanatʼit mas ixʼatʼaiʼinicʼanatʼit ju mintaxtokniʼan. Chunch ju navitʼit ni cʼatsʼayatʼit ni pʼacxanatʼit lactʼiyan ju taxtokni ju palai kʼox chai ju jonkʼalhita. 35 Pus ju chavai jantu anaʼuntʼit ni ca palai kʼox cava ni jantu na chun ju alhilacʼapʼinaʼitʼit ju Cristo. Pus ni va tachi alhilacʼapʼinaʼitʼit ju yuchi pus caʼalinaʼ ju kʼai mintalhajaʼan. 36 Va tasqʼuini ni jantu jeks aʼutʼit. Va anavinitʼit ixkʼachat ju Dios chai ju yuchi catamuctaxtuniyan ju chivinti ju takʼalhtasunitan. 37 Pus laʼixchivinti Dios ju tsʼokcanta chani najun: Jantuch makʼan cʼacx tus cachinach ju yuchi ju caminaʼ. Jantuch catitamakʼa. 38 Pus ju lapanac ju soknicʼa junita isʼatsucunti laquimacni caʼalinaʼ isʼatsucunti lactʼiyan ni quilhilaksi. Para ju yuchi ni aquincʼapʼaʼ pus ju quitʼin jantu kʼox actilhiulayaʼ ju anuʼ lapanac. Chunch najun laʼixchivinti Dios. 39 Para ju quijnanʼan jantu chun juntau tachi ju yuʼunch ni laich camacaju ju Dios chai yuchi calhitsʼankʼakʼalhi ju quiʼatsucuntiʼan. Alai ju quijnanʼan lhilaksiyau ju Dios chai yuchi calhiʼalinaʼ ju quiʼatsucuntiʼan ju jonkʼalhita.
1 Acsni lhilaksiyau ju Dios pus vasalh lacaʼiniyau ju ixchivinti ni aquintaxtakniyan ju tuchi quintakʼalhtasunitan. Lana cʼatsayau ni aquintaxtakniyan mas tucaʼ lai laktsʼinau. 2 Pus ju makʼaniya lapanacni kʼox alhiula ju Dios ni chunch ju talacaʼinilh ixchivinti. 3 Pus ju quijnanʼan lacaʼiniyau ixchivinti Dios acsni naulh ni navicalh chux ju lacamunutpaʼ va laʼixchivinti. Pus ju taxtokni ju laktsʼinau ju chavai punavicalh ju taxtokni ju jantu istasui. 4 Ju Abel lacaʼinilh ixchivinti Dios chai ixlhiyuchi makninilh ju atapacxat. Pus yuchi palai kʼox xalhilaktsʼin ju Dios ju yuchi. Palai jantu ju tuchi xaxtakni ju Caín. Pus putasulh ni salaka xalaktsʼin ju Dios ju Abel ni amaklhtayanalh ju tuchi ixtakni. Chai ju chavai mas nitach ju Abel para aktsʼiya lai pulaniyau ju isʼatsucunti. 5 Ju Enoc lacaʼinilh ixchivinti Dios chai yuchi lhilhiʼancalh ju lactʼiyan. Jantu tavanan nilh. Jantu tavanan lhitajucalh ju ixlacatuna ni Dios ju lhiʼalh. Chai najun laʼixchivinti Dios ni na kʼox xalhiulai ju Dios isʼatsucunti ju Enoc mas tucaʼ ixlhiʼancanta. 6 Pus jantu lai tavanan navican ju tuʼuʼ ju kʼox calhiulayaʼ ju Dios acsni jantu lacaʼinican ju yuchi. Pus va tichi chavaich ju lakʼayaputun ju Dios tasqʼuini ni calacaʼiyaʼ ni tʼajun ju yuchi chai ni amamispani ju yuchi va tichi chavaich ju slivasalh capuxcaulh. 7 Ju Noé lacaʼinilh ixchivinti Dios chai acsni tavanan junilh ju Dios ni caʼalinaʼ ju akmuxtut pus ju yuchi lacaʼi mas jantucaʼ istasui ni lai camilh ju xcan. Pus navilh lakatam barco junta taputakʼalhtaxtulh chux ju ixtatanumanalh ixchakaʼ. Pus ni navilh ju barco ju Noé pus putasu ni lacaʼinilh ixchivinti Dios. Chai ni takʼalhtaxtulh ju Noé ni xalacaʼini ju Dios pus putasui ni talakʼalhin ju xatanavi ju ixtalhavatʼan lapanacni ni jantu xatalacaʼini ju Noé mas ixʼalacjuni ni catalacaʼinilh ju Dios. Vachuʼ va ixlacata ni lacaʼinilh ixchivinti Dios ju Noé yuchi lhilaktsʼincalh ni soknicʼa ixjunita ju isʼatsucunti. 8 Ju Abraham lacaʼinilh ixchivinti Dios chai acsni junicalh ni cataxtulh laʼixtʼun chai caʼalh alacatam junta ixʼanuʼ cajunaʼ astan pus quiclacaʼi chai alh mas jantu iscʼatsai ta anchach tucan ju cachaʼananta. 9 Chai ni lacaʼinilh ixchivinti Dios ju Abraham pus tsucucha ju anuʼ lacatʼun junta ixjuncanch ni caxtaknicanach. Para tsucucha lacalonachakaʼ. Tachi ju va jantu makʼan catolhcha. Chai astan vana va chun lalh ju istsʼalh ju Isaac ixjuncan chai ju ixpapanti ju Jacob ixjuncan. Vana va chun ajunicalh ju yuʼunch ni caʼaxtaknicanach ju anuʼ lacatʼun. 10 Chai yuchi lhitsucucha lacalonachakaʼ ju Abraham ni ixpacxan tus acsni cachaʼanaʼ ju xalakʼachakʼan lactʼiyan ju jonkʼalhita. Yuchi ju isʼakstu Dios ju pastaclh ta yu cajunach chai yuchach ju navilh ju anuʼ lakʼachakʼan lactʼiyan. 11 Vachuʼ lacaʼinilh ixchivinti Dios ju Sara ju ixʼamachakaʼ Abraham ixjunita. Chai amaklhtayanalh ju tachaput ni laich caʼalilh isʼaskʼatʼa mas na ixtapasatach ju ixtakʼayanti. Alilh isʼaskʼatʼa ni lacaʼilh ni camuctaxtuniyaʼ ju chivinti ju ixjunita ju Dios. 12 Pus chunch ju puʼokxpakʼalh ju isʼaskʼatʼan ju Abraham mas tachi ju va ixnitach ixlacatuna va ixlacaʼatalh ni jantu lai ixʼalin ju isʼaskʼatʼanʼan ju yuʼunch. Para astan slivasalh na talhava ju ixʼapapanatnich chai lana jantu lai aputekʼekʼocalh. Tantsʼuntsʼa tajunita tachi ju stʼacu chai tachi ju cucu ju alin laʼixquilhtuʼ ju alama. 13 Pus tachi chun ju pʼulhnan icʼamapakaʼuta acsni tavanan tani tucaʼ ixtaʼamaklhtayananta ju tuchi ixʼakʼalhtasunita ju Dios. Para ni vasalh talacaʼinilh ixchivinti Dios pus tacʼatsa ni vasalh cataʼamaklhtayananaʼ chai talhikʼachalh. Tanaulh ni jantu ixtʼunʼan junita ju ani lacamunutpaʼ. Para tachi ju va ixtatʼajun tapasatilanin ju ani. 14 Pus ju lapanacni ju chunch tachivinin vas taʼamamachakxaninin ni na taʼamputun ju lactʼiyan junta vasalh ixtʼunʼan junita. 15 Para ni caʼixtapastaclh ju ixlacatʼunʼan junta ixtamintacha pus ixʼalincaʼ ju avilhchan ni laich caʼixtaʼanchokolh. 16 Para jantu chun ixtanaviputun. Alai va ixtalacasqʼuin ju lacatʼun ju palai kʼox. Ju chunch va nomputun ni ixtaʼamputun ju lactʼiyan ni anchach ju ixtʼunʼan. Chai ni chunch ju talalh pus ixlhiyuchi ju Dios jantu lhimaxanalh ni cajuncalh isDiosʼan ju yuʼunch. Alai alakʼoxinilh lakatam lakʼachakʼan ju lactʼiyan. Chai ju chunch putalacasu ni na kʼoxich alhiula ju Dios. 17 Ju Abraham lacaʼinilh ixchivinti Dios chai acsni laktsʼintanu ju Dios pus quiclacaʼi ju Abraham chai makʼaxtaknilh ju Dios ju istsʼalh ju Isaac ixjuncan. Lana ixmakniputun ju lakatami istsʼalh mas ixjuncanta ni laʼixmacni yuchi lhikʼach catatsucuyaʼ ju lapanacni. 18 Tucan ixmakniputun mas ixnajunta ju Dios ni laʼixmacni yuchi ju caʼalinaʼ lhu ixʼapapanatnich. 19 Para ju Abraham cʼatsalh ni laich camalokʼonichokoyaʼ ju Dios ju istsʼalh mas caʼixmakni. Chai ca laich acnaulh ni tachi ju va lokʼonchokolh ni va lacatsʼuninch ixmakniputun ju Abraham ju istsʼalh. 20 Ju Isaac lacaʼinilh ixchivinti Dios chai ajunilh ju istsʼalan ni kʼox caʼalinaʼ ju isʼatsucuntiʼan. Ju istsʼalan Jacob chai Esaú ixʼajuncan. 21 Ju Jacob lacaʼinilh ixchivinti Dios chai acsni ixtʼajun niniʼ ajunilh ju ixtʼiyunʼan isʼaskʼatʼan ju José ni na kʼox cajunaʼ isʼatsucuntiʼan. Astan putakʼampalhutaya laʼixquincatiʼ ixpalic chai lakʼaya ju Dios. 22 Ju José lacaʼinilh ixchivinti Dios chai acsni ixniputun pus naulh ni aktsʼiya caʼalacmaxtuyaʼ ju Dios ju istʼaʼisraelitanin ju xalacatʼun Egipto. Chai ni slivasalh lacaʼilh pus xtaklh ju lhamapʼaksin ni calhiʼancalh vachuʼ ju ixʼalucutni ju acsnich. 23 Ju ixnati chai ixpai ju Moisés talacaʼinilh ixchivinti Dios chai acsni tavanan lakʼaulh ju Moisés pus tamatankʼanu ju ixpai chai ixnati lakatʼutu malhquiyuʼ. Chunch ju talalh ni talaktsʼilh ni jantu va xamatiʼ askʼatʼa ixjunita chai ixlhiyuchi jantu tatalhonilh ju ixlhamapʼaksin ju kʼai ucxtin acsni lhinaulh ixmaknica tachi chun ju lactʼicstʼi tsʼalan. 24 Chai isʼakstu ju Moisés lacaʼinilh ixchivinti Dios chai acsni kʼaya lapanac va jantu lacasqʼuilh ni calhimapakaʼucalh ni isʼaskʼatʼa cava istsiʼ ju kʼai ucxtin xalacatʼun Egipto. 25 Palai kʼox xalhiulai ni caʼalactʼamakʼalhkʼajnalh ju ixlapanacni Dios. Palai jantu ni cakʼachanilh pantsʼiquis tachi chun ju alin laʼixchakaʼ ju kʼai ucxtin. Iscʼatsai ni alactuʼunti cava ni jantu caʼaʼaktaiju ju istʼaʼisraelitanin. 26 Palai lhitapalai ixlhiulai mas camakʼalhkʼajnalh va ixlacaʼatalh ni ixlapanac Dios ixjunita. Palai jantu mas ixʼanuʼ cajunkʼo chux ixmakʼaliʼ ju xalacatʼun Egipto. Chunch ju naulh ni na ixnavi cuenta ju ixtalhaja ju caxtakniyaʼ ju Dios astan. 27 Chai ni lacaʼinilh ixchivinti Dios ju Moisés pus jantu talhonilh ju ixtalhkʼamti ju kʼai ucxtin acsni amaxtulh ju istʼaʼisraelitanin ju xalacatʼun Egipto. Chai jantu tavanan caplh tuchi ixnaviputun ni tachi ju vasalh ixlaktsʼin ju Dios. 28 Chai va ixlacata ni lacaʼinilh ixchivinti Dios ju Moisés yuchi lhinaulh ixmaknica ju askʼatʼa borregojni chai ixmucʼaca ju ixʼacʼalhni laxamalhtich ju lakatamin chakaʼ. Ju chunch mas catapasayaʼ ju anquilh ju malakachalh ju Dios para jantu caʼamakniyaʼ ju xalackʼajin istsʼalan ju quintʼaʼisraelitaninʼan. 29 Chai ju quintʼaʼisraelitaninʼan talacaʼinilh ixchivinti Dios chai tatapasalh laʼixlacaitat lacatʼicstʼi alama junta saslapulh juncan. Chai junta tatapasalh pus Dios maxixi ju xcan chai va axixnita ixjunita ju lacatʼun. Para acsni vana va chun ixtapuʼamputun ju amachakʼan Egipto pus lana amalacʼacnukʼo ju xcan. 30 Ju quintʼaʼisraelitaninʼan talacaʼinilh ixchivinti Dios chai ju Dios maktalh ju xakʼex ju ixya ixtalakʼachoko ju lakʼachakʼan Jericó acsni tatalakʼachokolh ju yuʼunch lakatujun avilhchan. 31 Ju Rahab alactuʼunuʼ chakoʼulh ixjunita para ju yuchi lacaʼinilh ixchivinti Dios chai yuchi jantu alhitʼanilh ju ixtʼaʼamachakʼan ju jantu ixtatalhoni ju Dios. Pus tasu ni lacaʼinilh ixchivinti Dios ni kʼox amaklhtayanalh ju quintʼaʼisraelitaninʼan ju taquitankʼajlaktsʼilh ju ixlakʼachakʼan. 32 Pus ca jantu lai actilajuniu ju aliʼ ni na kʼox panicni acchivinilh ni aclajunau tuchi tanavilh ju Gedeón chai ju Barac chai ju Sansón chai ju Jefté chai ju David chai ju Samuel chai ju makʼaniya lapanacni ju ixtanajun ixchivinti Dios. 33 Pus ni talacaʼinilh ixchivinti Dios ju aliʼin pus tatʼalalhajalh aliʼ lackʼai lakʼachakʼanixni. Alhajanalh ju yuʼunch ju ixtalacaʼini ju Dios. Chai ju aliʼin sok tanavi acsni kʼai ucxtinin ixtajunita. Chai ju aliʼin taʼamaklhtayanalh tuchi ixʼakʼalhtasunita ju Dios. Chai ju aliʼin jantu ta aʼulhtulh ju maktilin acsni va kʼaixtam ixʼalactʼatʼalhnucanta. 34 Chai ju aliʼin jantu tuʼuʼ tatapasalh mas ixʼamacaʼancanta junta na kʼai ixmaktajita. Ju aliʼin tatakʼalhtaxtulh junta ixʼamakniputuncan. Chai ju aliʼin mas matiʼ ixjunita ixtachaputʼan na tachapunin tava. Ju aliʼin na tachapunin taxajcha lacalasat. Chai tamakʼantsʼalakʼo ixchuxʼan ju taropajni ju makat ixtamintacha ni va ixtatʼalasaputun ju yuʼunch. 35 Vachuʼ ixʼalin ju chakolun ju talacaʼinilh ixchivinti Dios chai mas ixma xanin istsʼalh laʼixchakaʼ para taʼamaklhtayananchokolh xalakʼajun acsni malokʼonichokocalh. Chai ju aliʼin talacaʼinilh ixchivinti Dios para alhimakchapucalh tus tani. Ju yuʼunch lai caʼixtatakʼalhtaxtulh ni caʼixtanaulh ni jantu vana catalhilacaʼanaʼ ju Dios. Para jantu ixtanaviputun ju chunch. Palai kʼox talhiula mas caʼamaknicalh ni ixtacʼatsai ni caʼamalokʼonichokocanaʼ chai caʼaxtaknicanaʼ ju palai kʼox isʼatsucuntiʼan ju lactʼiyan. 36 Chai ju aliʼin na alhimakchapucalh acsni na alhitsʼiʼincalh chai alakanekmacalh. Chai ju aliʼin atʼalhnucalh chai amakchʼicalh chai achʼanchʼicalh lacacadena. 37 Ju aliʼin alacatʼalhmacalh. Ju aliʼin achʼucʼupaklhtʼiyucalh. Ju aliʼin alaktsʼintanucalh ni vasalh talacaʼinilh ixchivinti Dios u jantu. Ju aliʼin amaknicalh lacacuchilu. Ju aliʼin ixʼapuxcocan chai takʼostsuculh. Chai ixtalhimalakchʼinin ixʼaxtʼakʼan borregojni chai ixʼaxtʼakʼan chivo. Ju yuʼunch na kʼox quilhpatinin ixtajunita. Chai na ixʼamamakʼalhkʼajnican. Chai na alhimakchapucalh. 38 Ju yuʼunch ixtaʼucxuntʼajun junta va aseknicʼa ixjunita chai lacaqʼuivin. Chai istatsucui junta va laclhucucu ixjunita lactalhpa chai junta laclhucucu ixjunita ju lacatʼun. Pus ju ani lapanacni slivasalh na lackʼoxin lapanacni ixtajunita. Chai jantu ixlhijun ni va amachakaʼan lacamunutpaʼ caʼixʼalhimispacalh. 39 Ju Dios na kʼox xaʼalhiulai ixchuxʼan ju yuʼunch ni ixtalacaʼinich ju yuchi. Para ju yuʼunch jantu taʼamaklhtayanalh tuchi ixʼakʼalhtasunita ju Dios. 40 Pus yuchi jantu tuʼuʼ talhiʼamaklhtayanalh ni ispastacta ju Dios ju tuʼuʼ ju palai kʼox ju quilacataʼan quinchuxʼan. Yuchi ni quintapastacnin ju Dios ju quijnanʼan chai naulh ni palai kʼox ni va kʼaixtam aquintaxtakniyan ju sastʼi quiʼatsucuntiʼan ju lactʼiyan.
1 Pus laktsʼintauch ni slivasalh na lhu alin ju lapanacni ju talacaʼinilh ixchivinti Dios mas va tuchi ixtapasai laʼisʼatsucuntiʼan. Chai ixlhiyuchi cʼatsayau ni lai lhilaksican ju Dios. Pus yuchi calhimacajuch ju tuʼuʼ ju quintamamaktilayan laquiʼatsucuntiʼan chai ju alactuʼunti ju quintamakʼalhkʼosuputunan. Chai catailhiʼauch ju quiʼatsucuntiʼan tachi ju quintalhilhcatan ju Dios. Chai jantu jeks caʼu. 2 Pus pʼas calhilacaʼau ju Jesús. Yuchi ju quintamasunin ta yu lacaʼinican ixchivinti Dios ni laich cachaʼanau ju lactʼiyan. Chai yuchach ju quintaʼaktaijuyan ni calacaʼinikʼalhiyau. Pus ju yuchi ni iscʼatsai ni slivasalh cakʼachanaʼ astan pus yuchi lhimakʼalhkʼajnalh ju lacacurus. Chai vachuʼ yuchi jantu tuʼuʼ xalhilhiulai ni tamamaxanilh ju lapanacni. Chai ju chavai vanin tʼavi ju Dios ju lactʼiyan. 3 Apʼastʼactʼit ta yu lalh ju Jesús ni chʼixkʼolh tachi chun ju macxcai ju tanavi ju alactuʼuni lapanacni. Chai ni pʼastʼacʼatʼit ju yuchi pus jantu alhokʼonaʼitʼit ju mimakʼalhkʼajnatʼan nin yuchi ni lai acʼappʼutʼutʼit ju Dios. 4 Pus ju uxijnan jantucaʼ maknicʼantʼatʼit mas na tamamakʼalhkʼajniyan ju alactuʼuni lapanacni. 5 Ja va cʼapkʼotʼatʼit ju chivinti ju tsʼokcanta junta mapʼaksicanauch. Ju anch ju Dios quintalhixakʼalayan isʼaskʼatʼan. Chai chani ma quintajunan: Quiʼaskʼatʼan jantu anaʼuntʼit ni jantu tuʼuʼ nomputun ju makʼalhkʼajnat ju iclaxtakniyau. Chai jantu va acʼappʼutʼutʼit acsni iclakʼayau. 6 Ju quitʼin ni icmapaini tam xamatiʼ pus yuchi iclhikʼaji acsni alactuʼunun. Chai yuchi icʼalhimamakʼalhkʼajni tachi chun ju icʼalhimispaich ni quiʼaskʼatʼan tajunita acsni va jantu quintaquiclacaʼi. Chunch ma quintajunan ju Dios. 7 Pus achʼixtʼitch ju mimakʼalhkʼajnatʼan ni tachi isʼaskʼatʼan taʼulhtuyan ju Dios chai va lacasqʼuin ni aqʼuiclacʼaʼitʼit. Chai matiʼ xamatiʼ askʼatʼa ju jantu cakʼailh ju ixpai acsni alactuʼunun. 8 Pus ju Dios amamakʼalhkʼajni tachi chunch ju isʼaskʼatʼan acsni jantu talacaʼi. Para ju uxijnan ni jantu mamakʼalhkʼajnicʼanatʼit pus jantu isʼaskʼatʼan untʼatʼit. 9 Pus ju quilacpaʼitniʼan ju ani lacamunutpaʼ xaquintakʼayan acsni jantu ixʼaquiclacaʼiyau chai ni jantu ixʼatalhoniyau. Pus ja va a ti yuchach jantu caquiclacaʼiyau ju quimpaiʼan ju vilhcha lactʼiyan ni laich caʼalinaʼ ju quiʼatsucuntiʼan ju conkʼalhiyaʼ. 10 Pus ju quilacpaʼitniʼan slivasalh na lacatsʼunin cʼata ju xaquintalacakʼaimayan tachi ju kʼox ixtalhiulai. Para ju quimpaiʼan Dios quintamamakʼalhkʼajniyan acsni quintalaktsʼinan ni vasalh navitau tuʼuʼ. Ju yuchi va lacasqʼuin ni soknicʼa capuva lacamakʼalhkʼajnat ju quiʼatsucuntiʼan tachi ju yuchi ni soknicʼa junita. Chai yuchi quintalhimamakʼalhkʼajniyan. 11 Lana jantu kʼox lhiulayau acsni kʼaicanau. Alai va lhiʼamakʼanininau. Para ju tam xamatiʼ ju lai puʼalacpastacnan acsni mamakʼalhkʼajnican pus soknicʼa jun ju isʼatsucunti chai tayakʼach jun ju ixʼalhunut. 12 Chai ni chunch ju iclajuntau pus yuchi jantu jeks alhiʼunitʼit ju mimakʼalhkʼajnatʼan. Alai atʼachʼapʼuchʼokʼotʼitch lamintacʼatsanʼan. 13 Chai sok atsʼucʼutʼit tachi ju kʼachani ju Dios. Ju chunch ju na xcai tatailhiʼan laʼixti Dios jantu catacʼapʼaʼ para alai pʼas catalhilacaʼanchokoyaʼ ju Dios. 14 Laʼixlhichux miʼalhunutʼan anavitʼit talakmaskʼatʼin ni jantu atʼalasatʼit xamatiʼ. Chai salaka atsʼucʼutʼit. Pus ni jantu salaka ju miʼatsucuntiʼan jantu lai atʼilaktsʼintʼit ju Dios. 15 Alhistʼaccʼantʼit miʼakstuʼan. Jantu xcai ni xamatiʼ lamilhiʼuxijnan cacapputulh ju lamapainin ju tanaviniputunan ju Dios. Alhistʼaccʼantʼit miʼakstuʼan. Jantu xcai ni caʼalilh tam xamatiʼ ju lamilhiʼuxijnan ju calhitalhkʼamalh tuʼuʼ chai ju yuchi caʼamapastʼacʼani ju amacxcai ju aliʼin chai na lhu caputakʼalhi ju isʼatsucuntiʼan. 16 Alhistʼaccʼantʼit miʼakstuʼan. Jantu xcai ni caʼalilh lamilhiʼuxijnan tam xamatiʼ ju catʼatsuculh apumatam ju jantu ixʼamachakaʼ u ju jantu ixpapa. Chai jantu xcai ni caʼalilh tam xamatiʼ ju jantu tuʼuʼ calhiula ju ixtaxtokni Dios tachi ju lalh ju anuʼ makʼaniya lapanac ju Esaú ixjuncan. Ju yuchi jantu tuʼuʼ xalhiulai ju kʼox atsucunti ju caʼixpacxalh ni xakʼai istsʼalh ixjunita ju ixpai. Alai laich tucan lhistʼa ju isʼatsucunti lakatam vaiti. 17 Chai ju uxijnan cʼatsʼayatʼit ni astan ixlacasqʼuin ni ixtaknicalh ju kʼox atsucunti ju ixʼanuʼ caʼixva para jantu xtaknicalh. Chai mas na ixkʼalhun jantu lai xalhitajui ta yu laich camapaxachokolh ju tuchi ixnavita. 18 Pus ju laquiʼatsucuntiʼan ju quijnanʼan jantu chun xatapasai tachi ju tapasalh laʼisʼatsucuntiʼan ju makʼaniya quintʼaʼisraelitaninʼan acsni axtaknicalh ju ixlhamapʼaksin ju Dios. Pus ju anuʼ kʼai talhpa ju Sinaí juncan junta quilachilh ju Dios na ixmaktajita chai na istsʼista ju anch chai na lhu ixjucʼalh ju ataputsʼi chai na pʼas lalh ju kʼai un. 19 Chai ju yuʼunch takʼasmatlh ju istʼasat ju skʼolh chai vachuʼ takʼasmatlh ixchivinti Dios. Para acsni takʼasmatlh ixchivinti Dios pus tatapaininilh ni jantuch aliʼ caʼajunilh tuʼuʼ. 20 Pus na ixtatalhanan ju lapanacni. Para palai tatalhanalh acsni takʼasmatlh ixchivinti Dios ni naulh ni catalacatʼalhma u calhtokʼocalh mas va tuchi atapacxat ju cachaʼamputulh junta vi ju anuʼ talhpa. 21 Pus aktsʼiya kʼai lhitalhan ixjunita chai mas yuchi ju Moisés naulh ni na ixtalhanan chai na ixʼaxqʼuipʼipʼitnin. 22 Para ju quijnanʼan jantu chunch xatapasai laquiʼatsucuntiʼan. Alai amachakʼan Jerusalén juntau. Ju xaJerusalén lactʼiyan. Chai anchach ju vi ju Dios ju lakʼajunta. Chai vachuʼ anch tavilanancha ixtalhavatʼan anquilhnin ju na talackʼachan. 23 Ju quijnanʼan isʼaskʼatʼan Dios makjuntau. Chai kʼaixtam alactʼakʼachanau ju aliʼin. Chai chux ju quijnanʼan tsʼokʼulacantau ju lactʼiyan. Chai ju Dios quintatʼavilan. Yuchach ju xakʼai ucxtin junita lhichux. Vachuʼ makyuʼunch juntau ju talhilaksi ju Dios. Chai ju chavai soknicʼa junita ju quiʼatsucuntiʼan vachuʼ. 24 Vachuʼ ixʼanuʼ ju Jesús makjuntau. Chai laʼixʼaninti quintaʼaktaijutan ixlacata ju sastʼi chivinti ju xaquintalhitʼatakʼoxitan ju Dios. Chai laʼixʼaninti mapastʼacʼanicanau ni quintamapainin ju yuchi. Pus acsni tavanan maknicalh ju Abel cʼatsayau ni mamalakchavanicalh ixʼaninti ju maknilh. Para acsni tavanan maknicalh ju Jesús cʼatsayau ni jantu xamatiʼ mamalakchavani. 25 Pus alaktsʼintʼit. Jantu anaʼuntʼit ni jantu kʼasmatnipʼutʼunatʼit ju Dios ju taxakʼalayan ju chavai. Pus ju makʼaniya quintʼaʼisraelitaninʼan jantu tatakʼalhtaxtulh ni jantu takʼasmatnilh ixchivinti Dios acsni alacxakʼala ju ani lacatʼun. Pus ja va a ti quijnanʼan lai catitakʼalhtaxtu ni jantu kʼasmatniputunau ju chivinti ixlacata ju Jesús ju malakachatachilh ju Dios. Yuchi ju minchalh lactʼiyan. 26 Acsni axakʼala ju Dios ju makʼaniya quintʼaʼisraelitaninʼan ju anuʼ lactalhpa pus lana tataclh ju lacatʼun. Para ju chavai ju Dios najun ni apaktam ma camalucunichokoyaʼ ju lacatʼun. Para ju acsnich ma vachuʼ ju lactʼiyan calucununach. 27 Pus acsni najun ni va apaktam camalucunichokoyaʼ ju lacatʼun va nomputun ni camakʼosucanach ju taxtokni ju laktsʼinau ju navilh ju Dios para ju jantu jonkʼalhita. Chai ju chunch va yuchi ju catamaconach ju taxtokni ju jonkʼalhita chai ju jantu lai malucunican. 28 Pus yuchi calhijunau lakʼailaktsʼiuch ni jonkʼalhita ju quimpuʼucxtinʼan. Chai calakʼayayau tachi ju kʼoxich lhiulai ju quiʼucxtinʼan. Chai catalhoniyau chai jantu cacʼapʼau tichi chavaich ju yuchi. 29 Chunch calau ni chunch junita ju Dios tachi ju tuʼuʼ jipi ju lacxavakʼojui tachi chun ju jantu kʼox. Ju yuchi vachuʼ amamakʼalhkʼajni ju taʼalactuʼunun.
1 Va tachi alamapʼaininitʼit tachi ju lhiʼalakʼavin laʼixmacni Cristo. 2 Alakʼaʼitʼit ni catalakacujtilalh laminchakaʼ ju tatapaininiyan. Chunch ju alatʼit mas jantu amispʼatʼit. Pus ju aliʼin ju makʼaniya quilacpaʼitniʼan chunch talalh chai taʼamaklhtayanalh laʼixchakaʼan ju anquilhnin mas jantu ixtamispai ni anquilhnin ixtajunita. 3 Aʼaktʼaiʼutʼit ju atʼalhnucanta tachi ju va tachʼin tʼaʼuntʼatʼit ju uxijnan. Vachuʼ aʼaktʼaiʼutʼit ju alhimakchapucan ni vachuʼ tʼonatʼitcaʼ lamilacatunaʼan ju lai makʼalhkʼajnan. 4 Tachi minchuxʼan jantu va alhakʼamanantʼit ju mintamakʼaxtokʼatʼan. Jantu va kʼaya atʼatsʼucʼutʼit ju va akʼantam. Pus Dios ju camucʼaniyaʼ ixtalakʼalhin ju alin ixnavin chai ju tʼatsucui ju akʼantam ju jantu ixpapa u ju jantu ixʼamachakaʼ junita. 5 Jantu na tuʼuʼ alhiulatʼit ju tumin. Alai alhikʼachʼantʼit tuchʼi pʼacxantʼatʼit. Chunch ju alatʼit ni isʼakstu Dios ju najunta ni jantu tavanan aquintacʼapʼan nin lai aquintamacoʼulan. 6 Chai vachuʼ yuchi lai lhinonauch ixlhichux quiʼalhunutʼan: Yuchi ju Dios ju quiʼaktaijui. Jantu actitalhanalh. Pus tijuch ju lai aquinavilh ju va lapanac. Chunch ju lai nonau. 7 Apʼastʼactʼit ju xalackʼajin lamilhiʼuxijnan ju ixtamalaniyan ixchivinti Dios. Apʼastʼactʼit ta yu ixjunita isʼatsucuntiʼan ju yuʼunch ni talhilaksilh ju Dios chux laʼisʼatsucuntiʼan tus ni tani. Chai chunch ju alhilaksitʼit ju Dios tachi ju ixtalhilaksi ju yuʼunch. 8 Ju Jesucristo va tachi ju junitach tus makʼanchich. Mas chavai. Mas va tavananch cava. 9 Jantu alakʼaʼitʼit ni xamatiʼ cataʼokxchokʼoyan chai na tijlhu atalaninti catajunan ju jantu ixtʼachunch junita tachi ju lanitʼatʼit. Pus ju tuʼuʼ lhamapʼaksin ixlacata ju tuʼuʼ vaiti jantu tavanan aktaijuta tam xamatiʼ ni lai salaka cava laʼixmacni Dios. Alai va yuchi ju Dios ju aquintaʼaktaijuyan laʼixʼamapaininti ni lai va tachi calhilaksiyau ju yuchi. 10 Pus ju quijnanʼan alin ju xamaknican ixtapalh quiʼalactuʼuntiʼan. Yuchi ju Jesús. Para ju vanach talhilaksi ju lhamapʼaksin ju tsʼokʼula ju Moisés chai tanajun ni anch ju catalhitajuyaʼ ju soknicʼa isʼatsucuntiʼan jantu lai catiʼaʼaktaijucalh laʼixʼaninti ju Jesús. 11 Pus ju xakʼai ixpaliʼan ju quintʼaʼisraelitaninʼan ixlhiʼan ju ixʼacʼalhni ju atapacxat tus laʼixpulacni ju chakaʼ junta ixlakʼayacan ju Dios. Va ixtapalh ixjunita ixʼalactuʼuntiʼan ju lapanacni. Para ju ixlacatunaʼan ju anuʼ atapacxat lacamacni ixʼancan lakxavaca. 12 Pus vana va chunch ju Jesús. Ju yuchi mamaxanicalh ni lacamacni ju maknicalh. Pus nilh ni laich caxacanilh ixtalakʼalhinʼan ju lapanacni laʼixʼacʼalhni. 13 Pus na lhimaxan tamapasa ju Jesús ni lacamacni ju tamakni. Pus mas aquintamamaxanin vachuʼ ju lapanacni ni jantu vana chun ju naviyau ju chavai tachi ju ixlayau ju pʼulhnan para cachʼakʼokʼauch ju yuchi. 14 Pus chunch ju calau ni cʼatsayau ni jantu amachakʼan lacamunutpaʼ juntau. Alai cʼatsayau ni amachakʼan lactʼiyan juntau chai anchach ju cachaʼanau. 15 Pus yuchi lhitasqʼuini ni va tachi cajunau lakʼailaktsʼiuch ju Dios laʼixlacata ju Jesús. Chai ni chunch ju calau pus tachi ju va jun tuʼuʼ lhakʼailaktsʼin ju xtakniyau ju yuchi chai pulakʼayayau ju yuchi. 16 Para jantu acʼaptʼit ju ixnavica ju kʼox chai aʼaktʼaiʼutʼit ju quilhpatinin lamiʼalintaʼan. Chai acsni naviyau ju chunch pus jun tachi ju lakatam lhakʼailaktsʼin ju xtakniyau ju Dios chai ju yuchi na kʼoxich lhiulai. 17 Aqʼuiclacʼaʼitʼit ju yuʼunch ju talhinajun lamilhiʼuxijnan. Anavitʼit tachi ju tajunan. Pus chunch ju aʼulhtʼutʼit ni yuʼunch ju talhistacniyan ju miʼatsucuntiʼan ni laich sokch apʼinaʼitʼit laʼixti ju Dios. Chai ju yuʼunch casacmikʼocanaʼ ni kʼox talhistactan u jantu. Pus aqʼuiclacʼaʼinitʼit ni laich lhikʼach catanaviyaʼ ju ixlhichʼalhcat. Jantu va catalhamakʼanininan tachi ju layatʼit. Pus ni va catalhamakʼanininan pus ju chunch jantu kʼox cava ju milacataʼan. 18 Atʼapʼaininitʼit ju Dios ju quilacata quijnan. Pus iccʼatsayau ni jantu tuʼuʼ quintaxcaniyan ju quiʼalhunut quincʼan ni kʼox naviputunau mas va tuchi cava. 19 Pus iclatapaininiyau ni asqʼuinitʼit ju Dios ju quilacata ni laich vatsʼalhti aclalakʼanchokotachau. 20 Pus Dios ju quintalhistacniyan ju quiʼalhunutʼan ni jantu calacʼalh. Chai yuchach ju malokʼonichokolh laʼixʼaninti ju Jesucristo ju quintalhistʼacʼan ju quijnanʼan tachi tam lapanac ju lhistʼacʼa ju ixborregojni. Chai ni lokʼonchokolh ju Jesús laʼixʼaninti pus quintamamachakxanin ni laʼixʼacʼalhni ju xapumavasalai ju chivinti ju quintalhitʼatakʼoxitan ju Dios. Chai ju anuʼ chivinti jonkʼalhita. 21 Pus ictapainini ju yuchi ju Dios ni cataxtakniyan tachi chun ju kʼox atalacpastʼacʼat ni laich anaviyaʼitʼit ju ixkʼachat ju yuchi. Chai ictapainini ni cataʼaktaijuyan ni laʼixtachaput ju Jesucristo laich anaviyaʼitʼit tachi chun ju kʼachani ju yuchi. Pus chach lakʼayacalh ju Jesucristo tus va tavananch. Chunchach vasalh canavicalh. 22 Pus iclatapaininiyau ji quiʼalakʼavin ni anavitʼit cuenta ju tuchi iclalhimapʼaksitauch. Pus jantu lhu chivinti ju iclaʼatsʼoknunitau. 23 Acʼatsʼatʼit ni maxtucanta lacapulachʼin ju quilakʼauʼan Timoteo. Pus ni vatsʼalhti camilh pus yuchi ju actʼaʼananta acsni acʼantachau lalaktsʼinin. 24 Amacʼamitʼit ixchuxʼan ju talhinajun lamilhiʼuxijnanʼan. Vachuʼ amacʼamitʼit ixchuxʼan ju aliʼin ju vachuʼ talhilacaʼanta ju Jesucristo. Pus ju amachakʼan Italia taʼamacʼaminin. Tamacʼamiyan. 25 Pus ictapainini ju Dios ni catanaviniyan lamapainin minchuxʼan ju uxijnan. Vasalh chunch iclacasqʼuin ni catanaviyan.
1 Ju quitʼin icSantiago. Ixlapanac icjunita ju Dios chai ju quiʼucxtinʼan Jesucristo. Va iclamacʼamiyau ju uxijnan ju quintʼaʼamachivinti untʼatʼit ju vachuʼ lhilacʼapʼintʼatʼit ju Cristo para va makpʼitsʼicʼantʼatʼit ju ani lacamunutpaʼ. 2 Quiʼalakʼavin slivasalh alhikʼachʼantʼit acsni tijlhu alin ju makʼalhkʼajnat ju lamiʼatsucuntiʼan. 3 Alhikʼachʼantʼit ni cʼatsʼayatʼit ni palai lai atʼastʼucnitʼit va tuchi camilh lamiʼatsucuntiʼan acsni va tachi alhilacʼapʼitʼit ju Dios mas amakʼalhkʼajnantʼit. 4 Pus jantu asamakʼantʼit ju tuʼuʼ makʼalhkʼajnat ju taxtakniyan ju Dios. Lhikʼach amaklhtʼaʼitʼit. Chai acsni tavanan lai chunch alatʼit pus tasui ni ixlhichux miʼalhunutʼan ju lhilacʼapʼintʼatʼit ju Cristo chai jantu tuʼuʼ tamakʼancʼacxnitan laʼixmacni Dios. 5 Ni alin xamatiʼ ju milhiʼuxijnan ju tulai machakxai tamalhch ju kʼox lhiulai ju Dios chai tamalhch ju jantu pus chach tapainini ju Dios chai ju yuchi camamachakxaniyaʼ. Ju Dios na lai amamachakxaninin chai ju yuchi jantu kʼaji ju tapaininich. 6 Para acsni catapaininiyaʼ tasqʼuini ni calacaʼiyach ni camamachakxaniyaʼ ju Dios. Jantu va tam tam canaulh. Ju va tam tam najun chai jantu va lakatam navita ju ixʼalhunut pus chunch junita tachi ju xcan acsni lacatam lacatam sun lhiʼan ju un. 7 Pus ju lapanac ju chunch lai jantu canaulh ni caxtakniyaʼ ju tuchi xasqʼuini ju quiʼucxtinʼan Dios. 8 Pus ju anuʼ lapanac ju lakatʼui navi ixʼatalacpastʼacʼat jantu lai tuʼuʼ vas najun. 9 Ju tam quilhilakʼauʼan laʼixmacni Jesús ju va quilhpatiniʼ chach lhikʼachalh ni lakʼayacanta ni navicanta isʼaskʼatʼa Dios. 10 Chai ju tam quilhilakʼauʼan ju na makʼaliʼ chach lhikʼachalh ni malacatʼicstʼicalh ni jantu tuʼuʼ lhiulacan ni lhilacaʼanta ju Cristo. Pus ju Dios mamachakxani ni jantu tuʼuʼ ixtapalh ju ixmakʼalit. Chai mamachakxani ni va tam pantsʼiquis lai canilh. Chai chunch ju catapasalh laʼisʼatsucunti tachi ju tuʼuʼ xanti ju va tsʼalhti xixa. 11 Acsni caxajtachilh ju avilhchan ni na lhiʼichich cajunaʼ pus ju xaxanti capatajuniyaʼ. Chai jantu vana na cʼusich tasui. Pus vana va chun ju tam makʼaliʼ. Lai canilh va tam pantsʼiquis mas tʼajun makʼaixtoknuʼ ju ixmakʼalit. 12 Na kʼachan ju lapanac ju lai tastucni ju ixmakʼalhkʼajnat. Jantu najun ni va ixlhiyuchi camaconaʼ ixti ju Dios. Pus ju yuchi acsni laktsʼintanucanta chai tasui ni lai tastucni ju makʼalhkʼajnat chai jantu tam najun mas mamakʼalhkʼajnican pus caʼamaklhtayananach ju ixtalhaja ju akʼalhtasunitach ju Dios tachi chun ju vasalh tamapaini. Yuchi ni caʼalinaʼ ju isʼatsucunti ju conkʼalhiyanta ju lactʼiyan. 13 Ni alin xamatiʼ ju mapastʼacʼanican ju tuʼuʼ macxcai pus jantu catinaulh ni Dios ju mapastʼacʼani chai ixlhiyuchi lai canavilh. Ju Dios jantu lai mapastʼacʼanican ju tuʼuʼ macxcai nin camapastʼacʼani tuʼuʼ macxcai ju akʼantam. 14 Para ni na lhu tanun ju macxcai ju laquiʼalhunutʼan ju naviputunau pus yuchi va tsa lhipastʼacʼau ju macxcai. Chai ni na kʼox ju lhiulayau ju pastʼacʼau pus putaʼokxchokʼoyau. 15 Chai acsni kʼachaniyau ju tuʼuʼ macxcai pus alactuʼununau acsni naviyauch. Chai acsni va tsa caʼalactuʼunulh tam xamatiʼ pus yuchi lhimacaʼancan junta jonkʼalhita makʼalhkʼajnat. 16 Ji quiʼalakʼavin jantu atʼaʼokxchʼokʼotʼit. Ju Dios jantu xtʼakʼa ju tuʼuʼ macxcai. 17 Para tachi chun ju xtaknicantau ju kʼox chai tachi chun ju xtaknicantau ju aktsai talaclhman ju minacha. Yuchi ju Dios ju macamin. Yuchi ju navikʼolh tachi chun ju tamapulhcui. Pus ju anuʼ ju mapulhcui aktamixnin kʼox mapulhcui chai aktamixnin jantu kʼox lai tasui. Para ju Dios jantu va tam tam junita. Nin lacatsʼunin ju va astan tam canaulh. 18 Ju yuchi laʼixkʼachat isʼakstu quintanavitan isʼaskʼatʼan acsni lacaʼiniuch ju ixchivinti. Chai ju yuchi stavasalanti. Chai ni quintanavitan isʼaskʼatʼan pus alin tuʼuʼ ju palai kʼox ju aquintaxtakniyan ju quijnanʼan. Palai jantu na chun catiʼaxtaknilh tachi chun ju aliʼ taxtokni ju navita ju Dios ju ani lacatʼun. 19 Ji quiʼalakʼavin tasqʼuini ni tachi chun ju quijnanʼan va lhikʼach cakʼasmatʼauch ju ixchivinti Dios. Para jantu vatsʼalhti canonau ju tuʼuʼ chai jantu vatsʼalhti catalhkʼamnau. 20 Pus ni va catalhkʼamnau jantu lai aquintajunan ju Dios ni sok ju naviyau. 21 Pus ixlhiyuchi amacʼaʼuntʼit tachi chun ju macxcai chai tachi chun ju tamalhquiliquiniyan ju miʼatsucuntiʼan. Chai alacʼaʼikʼotʼit chux ixchivinti Dios ju kʼasmatʼatʼit chai jantu asamakʼantʼit. Pus ni alacʼaʼikʼoyaʼitʼit pus atʼakʼalhtʼaxtʼuyaʼitʼit. 22 Para amuctʼaxtʼutʼit tachi ju najun laʼixchivinti Dios. Tun va anaʼuntʼit ni va yuchi ju tasqʼuini ni akʼasmatʼit. Ni va chunch ju anaʼuntʼit pus va okxchʼokʼocʼanatʼit miʼakstuʼan. 23 Ni alin xamatiʼ ju va kʼasmatʼa ju ixchivinti Dios para ni jantu muctaxtui tachi ju najun pus ju yuchi chunch junita tachi tam lapanac ju laktsʼin ixmakʼantsastʼilit laca tuʼuʼ speo. 24 Ju yuchi laktsʼinchokocan isʼakstu chai an alacatam chai lana cʼapʼa ta yu junitach ju ixʼucxpuʼ. 25 Pus lhikʼach catsucuyaʼ ju lapanac ju kʼasmatʼa ixchivinti Dios chai va tachi navi cuenta chai muctaxtui chai jantu va cʼapʼa ju tuchi kʼasmatʼa. Pus ixchivinti Dios sok najun chai acsni lacaʼinican ju yuchi pus palai jantu na tachapun jun ju alactuʼunti laquiʼatsucuntiʼan. 26 Ni xamatiʼ najun ni lakʼayai ju Dios para ni jantu lhistʼacʼa ju isimakʼat pus va okxchokʼocan isʼakstu. Jantu lhitapalai mas najun ni lakʼayai ju Dios. 27 Pus ju quimpaiʼan Dios najun ni xamatiʼ talhoni laʼixlhichux ixʼalhunut chai tachi ju kʼachani ju yuchi pus chach alh aʼaktaijunuʼ ju quilhpatinin askʼatʼan ju alin ixmaktasqʼuinitʼan chai ju chakolun ju animacontilacanta. Vachuʼ calhistaccalh ni jantu vana va chun calalh tachi ju talai ju jantucaʼ talhilacaʼanta ju Cristo.
1 Quiʼalakʼavin ju uxijnan vachuʼ lhilacʼapʼintʼatʼit ju quiʼucxtinʼan Jesucristo ju xakʼai junita ju lactʼiyan. Pus tasqʼuini ni vaklhtam chun alaktsʼintʼit ju mintʼalapanacniʼan. 2 Junta tʼakʼaixtʼokʼatʼit jantu xcai ni catanucha pumatam lapanac ju mactanun ixmactanut ju si oro chai na kʼox malakchʼininta. Chai vachuʼ catanucha pumatam quilhpatiniʼ ju jantu kʼox malakchʼininta. 3 Para jantu kʼox cava ni palaich tuʼuʼ alhiulatʼit ju na kʼox malakchʼininta chai chanich aʼunitʼit: “Anich atʼaʼulh ju uxintʼi lacakʼox putolan”. Para ju anuʼ quilhpatiniʼ chanich aʼunitʼit: “Anuch atʼayachiʼ ju uxintʼi u ani atʼaʼulh lacatʼun vanin laquintantsʼi”. 4 Pus acsni chun ju aʼulhtʼutʼit lana tasui ni jantu vaklhtam chun ju laktsʼinatʼit ju mintʼalapanacniʼan. Chai ju chunch va untʼatʼit tachi ju tam ucxtin ju va kʼachani tumin. 5 Para alaktsʼintʼit ji quiʼalakʼavin. Ju Dios asacxtuta ju aliʼin quilhpatinin. Chai ju yuʼunch palai makʼalinin tajunita laʼixmacni Dios ni talhilaksich ju Jesucristo. Palai jantu ju tatasui tachi makʼalinin ju ani lacamunutpaʼ. Chai ju yuʼunch catatanuyanta ju lactʼiyan junta lhinajun ju Dios. Pus ju Dios kʼalhtasuta ni laich catatanuyanta tachi chun ju tamapaini ju yuchi. 6 Para ju uxijnan ni jantu vaklhtam chun laktsʼinatʼit ju tamin junta tʼakʼaixtʼokʼatʼit pus pʼutʼalacʼasuyatʼit tachi ju va jantu tuʼuʼ lhiulayatʼit ju quilhpatinin. Para jantu yuʼunch ju na quintalhimakchapuyan. Alai yuʼunch ju makʼalinin ju quintalhimakchapuyan chai quintachivimakʼanan ju quijnanʼan lacapuʼucxtin. 7 Chai yuʼunchach ju tanajun macxcai chivinti ixlacata ju Cristo. Chai ju quijnanʼan ni isʼaskʼatʼan jumpalhtau. 8 Pus na kʼoxich ju naviyatʼit acsni vasalh muctʼaxtʼuyatʼit tachi ju najun laʼixlhamapʼaksin ju quiʼucxtinʼan Dios. Pus ju anch najun ni amapʼainitʼit ju mintʼalapanacʼan tachi ju va jun miʼakstuchʼan ju mapʼainichʼokʼocʼanatʼit. 9 Para ni jantu vaklhtam chun ju alaktsʼinatʼit ju lapanacni pus alactuʼunti ju naviyatʼit. Chai laktsʼincʼantʼatʼit lacalhamapʼaksin tachi ju alactuʼunin untʼatʼit. 10 Pus va tichi chavaich ju navi mas va lakatam talakʼalhin lakʼalhi ju lhamapʼaksin mas camuctaxtukʼo chux ju aliʼ tachi ju najun ju anch. 11 Pus Dios ju naulh ni jantu atʼatsʼucʼutʼit ju jantu miʼamachakaʼan u ju jantu mimpapaʼan. Chai yuchi ju vachuʼ naulh ni jantu alamaknitʼit. Pus ju uxintʼi mas jantu amaknitʼi tam lapanac para ni tʼatsʼucʼui ju jantu mimpapa u ju jantu miʼamachakaʼ pus lakʼalhitʼach ju ixlhamapʼaksin Dios. 12 Pus chunchach ju achʼivinintʼit chai chunchach ju atsʼucʼutʼit tachi ju lhijunch ni alaktsʼincʼanaʼitʼit laʼixlhamapʼaksin Dios. Pus ju ixchivinti Dios sok najun chai acsni lacaʼinican ju yuchi pus palai jantu na tachapun jun ju alactuʼunti laquiʼatsucuntiʼan. 13 Pus acsni camakʼosaspitcanach ju lapanacni pus ju jantu ixʼaʼaktaijunun lacaʼamapaininti pus nin yuchi jantu caʼaktaijucanaʼ lacaʼamapaininti. Para ju aʼaktaijunun lacaʼamapaininti pus caʼaktaijucanaʼ vachuʼ lacaʼamapaininti acsni camakʼosaspitcanach. 14 Quiʼalakʼavin jantu lhitapalai ni xamatiʼ najun ni lhilacaʼanta ju Jesús para ni jantu navi ju kʼox. Ju anicʼach va najun ju chunch jantu catitakʼalhtaxtulh ni jantu caʼalh ju lacajipi. 15 Jantu xcai ni caʼalilh tam milakʼau laʼixmacni Jesús ju matiʼ ixpumpuʼ chai jantu lhijun ju ixvaiti ju caʼulh tuncujun tuncujun. 16 Chai ju pumatam ju milhiʼuxijnan jantu xcai ni va chani cajunilh: “Asta lhich. Ta tsʼa jantu alhitʼaʼuyaʼ ju mimpumpuʼ ju casastucnin ju lhicʼasnin chai laich alhitʼaʼuyaʼ ju na canch alhivenaʼ”. Pus ni va chunch ju cajunilh para ni jantu caxtaknilh tuʼuʼ ju maktasqʼuini pus tis kʼoxich ju navini. 17 Pus ju chunch navi jantu lhitapalai mas najunch ni lhilacaʼanta ju Jesús. 18 Para jantu xcai ni xamatiʼ chani canaulh: “Ma alin lapanacni ju talhilacaʼanta ju Jesús mas jantu tuʼuʼ kʼox ju tanavi. Para ju aliʼin ma va yuchi ni tanavi ju kʼox”. Pus ni xamatiʼ chunch canaulh chani acjunilh: “Ni jantu tuʼuʼ kʼox ju navi pus tas laich acpucʼatsayach ni vasalh lhilacʼapʼintʼach ju Jesús. Ju quitʼin acpulamasuniyau ni vasalh iclhilacaʼanta ju Jesús ju tuchi kʼox icnavi”. 19 Pus ju aliʼin lamilhiʼuxijnan tanajun ni jantu tasqʼuini ni acnavi tuʼuʼ ju kʼox. Va yuchi ni aclacaʼilh ni va pumatam ju Dios. Na kʼoxich. Para jantu va yuchi ju lacasqʼuin ju Dios. Alaktsʼintʼit ju lhacaticurulhni. Ju yuʼunch talacaʼi ni va pumatam ju Dios chai na taʼaxqʼuipʼipʼitnin ni na tatalhoni tuchi caʼanaviyaʼ ju Dios. 20 Ja lana jantu machʼakxayatʼit ji tontojni lapanacni ju chunch nonatʼit. Ja va jantu machʼakxayatʼit ni jantu lhitapalai ni acnaulh ni iclhilacaʼanta ju Jesús acsni jantu acnavi tuʼuʼ ju kʼox. 21 Alaktsʼintʼit ju makʼaniya quimpaiʼan Abraham. Ju Dios laktsʼilh ni na salaka ixjunita ju ixʼalhunut laʼixmacni acsni makʼaxtaklh ju istsʼalh ju Isaac ixjuncan. Ju yuchi ixmucʼata ju istsʼalh junta ixmakniputun tachi ju junilh ju Dios. 22 Pus lana tasui ni lhilacaʼalh ju Dios ju Abraham para vachuʼ navilh ju kʼox. Pus ju tuchi navilh putasulh ni vasalh ixlhilacaʼanta ju Dios. 23 Chai acsni navilh ju chunch ju Abraham pus uctaxtulh junta chani tsʼokcanta laʼixchivinti Dios: “Ju Abraham ni quiclacaʼilh ju Dios pus ju yuchi ma laktsʼilh ni na salaka ixjunita ju ixʼalhunut laʼixmacni yuchi”. Chunch ju najun junta tsʼokʼulacanta ju ixchivinti Dios. Pus ju Abraham lhimispacalh ixʼamigo Dios. 24 Pus lana tasui ni Dios jantu laktsʼin ni soknicʼa cava ju isʼatsucunti tam lapanac acsni anicʼach va najun ni lhilacaʼanta ju yuchi. Para ju yuchi laktsʼin ni soknicʼa ju isʼatsucunti acsni vachuʼ navi ju kʼox. 25 Chai vana va chun ju anuʼ chakoʼulh ju Rahab ixjuncan. Ju yuchi xanavin lacati ixjunita. Para ju Dios laktsʼilh ni soknicʼa ixjunita ju isʼatsucunti acsni amaklhtayanalh ju israelitanin ju ixʼamalakachatachilh ju Josué. Chai amakʼalhtaxtulh laʼixmacaʼan ju ixʼatʼalaxcaiʼan acsni apumalakachachokolh kakʼantamch ti acsni taʼanchokolh junta ixtamintacha. 26 Tachi ju quilacatunaʼan ni jantu tuʼuʼ ixtapalhni jun acsni va niyau chai taxtui ju quintacuvinʼan pus vana va chun ju quijnanʼan ju nonau ni lhilacaʼantau ju Jesús. Jantu tuʼuʼ ixtapalhni ju quinchivintiʼan ni canonau ni lhilacaʼanauch ju yuchi ni jantu naviyau tuʼuʼ ju kʼox.
1 Quiʼalakʼavin palai kʼox cava ni jantu lhu milhiʼuxijnan ju aʼuntʼit amamakaʼunin. Cʼatsʼayatʼit ni palai aquintamamakʼalhkʼajniyan ju Dios ju quijnan ju amamakaʼunin icjuntau ni jantu sok acʼamalanininau. Palai jantu ju va lapanacni. 2 Quinchuxʼan quijnanʼan na paklhu ju kʼalhkʼosau ju laquiʼatsucuntiʼan. Ni alin cava xamatiʼ ju jantu cakʼalhkʼoslh laʼixchivinti pus ju yuchi vasalh salakach cava ju isʼatsucunti. Chai laich calhistackʼo tachi chun ju ixlacatuna. 3 Ju quijnanʼan maquilhtanuyau ixfreno ju caballo ni laich camalacaʼiniuch. Chai mas va lacatʼicstʼi ju freno para lai lhinonkʼojui chux ixlacatuna. 4 Vachuʼ chunch ju barco. Mas na kʼai chai na lai sun lhiʼan ju kʼai un chai mas va lacatʼicstʼi ju qʼuiu ju pulacnavilhiʼancan para lai pulhiʼan ju amanavin vanta anchach ju pulhiʼamputun. 5 Pus vachuʼ na lacatʼicstʼi ju quisimakʼatʼan para na lai alakʼalhinin. Alaktsʼintʼit ju jipi. Mas va lacatʼicstʼi ju acmama ju lacaqʼuivin na kʼai ju calhcuyaʼ. 6 Pus ju quisimakʼatʼan tachi ju tuʼuʼ jipi junita. Pus ju macxcai chivinti ju nonau anchach ju minacha junta alin ju jipi junta jonkʼalhita makʼalhkʼajnat. Va ixlacata quisimakʼatʼan na lhu pʼun ju amacxcai. Ju yuchi tanun laquilacatunaʼan chai lai lakʼalhikʼojui chux ju quilacatunaʼan. Chai vachuʼ lai lakʼalhini isʼatsucunti ju aliʼin lapanacni. 7 Tachi chun ju atapacxat chai ju tuʼuʼ tsʼokʼo chai ju tuʼuʼ tsapu chai ju tuʼuʼ atumpa atapacxat ju alin ju lacaʼalama lai mamansulacan chai tamamansulata ju lapanacni. 8 Para jantu xamatiʼ lai mamansulai ju quisimakʼatʼan ju va laʼisʼakstu. Ju quisimakʼatʼan na kʼai junita. Chai jantu lai malacaʼinican tuʼuʼ. Ju laquisimakʼatʼan lai lakʼalhiniyau isʼatsucunti apumatam. 9 Laquisimakʼatʼan nonau ni na kʼox ju quimpaiʼan Dios. Chai vana yuʼ ju pujunchokoyau macxcai ju tam quintʼalapanacʼan ju ixtʼachunch navicanta tachi ju Dios. Lai acnaulh ni ixtʼachunch Dios ju navicantauch ni alacpastʼacʼau chai amapainiyau chai lhitsʼisiyau ju tuʼuʼ macxcai tachi ju lai ju Dios. 10 Pus laquinquilhniʼan lai nonau ju kʼox chai lai nonau ju macxcai chivinti. Pus ji quiʼalakʼavin jantu kʼox ni chunch ju layau. 11 Junta taxtui ju xcan jantu lai tijtʼui ixtacanit cava. Jantu lai na canch cava chai vana na xkʼejni cava. 12 Quiʼalakʼavin ju tuʼuʼ xaqʼuiu higo jantu lai catixtaklh ju xatocʼat ju olivos. Chai ju xaqʼuiu uvas jantu lai catixtaklh ju xalhiʼut ju higo. Pus chunchach vachuʼ junta taxtui ju xcan. Jantu lai skʼokʼo cava chai vana na canch. Pus vana va chun ju quinquilhniʼan. Jantu lai chʼatʼui atinaulh. 13 Ju lamilhiʼuxijnan ja alin lapanacni ju na taʼacʼatsananta chai taʼamachakxanan. Ni alin pus catasuyaʼ ni vasalh taʼacʼatsananta ni na kʼox ju isʼatsucuntiʼan. Chai caputasuyaʼ acsni jantu talhitakʼayai ju tuʼuʼ kʼox ju tanavita. 14 Para ni na axcʼayananatʼit chai va navipʼutʼunatʼit minkʼachatʼan miʼakstuʼan pus jantu anaʼuntʼit ni na acʼatsʼanantʼatʼit. Pus ni nonatʼit ni acʼatsʼanantʼatʼit mas alin ju chunch atalacpastʼacʼat lamiʼalhunutʼan pus va tʼaʼaklhtʼamayatʼit. 15 Ju lapanac ju chunch lai jantu lai catinaulh ni yuchi ju Dios ju xtaknilh ju istacʼatsan. Ju chun tacʼatsan va xaʼatalacpastʼacʼat ju ani lacamunutpaʼ. Va laʼixʼalhunut isʼakstu ju minacha. Chai yuchi ju lhacaticuru ju mapastʼacʼani ju chunch. 16 Pus junta taʼalin ju lapanacni ju taʼaxcayanan chai va ixkʼachatʼan isʼakstuʼan ju tanaviputun pus vachuʼ alin ju lasat chai tachi chun ju amacxcai. 17 Para ju Dios vilhcha lactʼiyan chai yuchach ju xtʼakʼa ju kʼox tacʼatsan. Chai ju xtaknican ju chunch tacʼatsan na salaka ju ixʼatalacpastʼacʼat. Chai ju yuchi jantu kʼachani ju lasat. Na cʼus lapanac junita. Chai lai malacaʼinican tuʼuʼ. Na aʼaktaijunun lacaʼamapaininti. Chai va tachi navich ju kʼox. Ju yuchi vaklhtam chun alaktsʼin ju ixtʼalapanacni chai jantu acxputʼiyunun. 18 Chai ju anuʼ lapanacni ju jantu takʼachani ju lasat para kʼox alactʼalalhiʼan ju aliʼin lapanacni pus soknicʼa jun ju isʼatsucuntiʼan isʼakstuʼan.
1 Ju uxijnan na laclasayatʼit chai na laclakʼayatʼit. Para ju yuchi minacha lamiʼalhunutʼan junta va talaclasai ju miʼatalacpastʼacʼatʼan ju navipʼutʼunatʼit. Va talaclasai ni alin ju kʼox chai alin vachuʼ ju jantu kʼox. 2 Pus alin ju tuchʼi pʼacxampʼutʼunatʼit chai ni jantu lai amaklhtʼayananatʼit pus va lai alamaknitʼit. Chai lhacchʼiʼinatʼit ju ixtaxtokni ju aliʼin chai ni jantu lai latʼaiʼiniyatʼit pus va laclakʼayatʼit chai lasayatʼit. Para va jantu pʼacxantʼatʼit tuchʼi lacʼasqʼuinatʼit ni va jantu sqʼuiniyatʼit ju Dios. 3 Chai acsni sqʼuiniyatʼit ju Dios jantu amaklhtʼayananatʼit ni jantu kʼox ju miʼatalacpastʼacʼatʼan. Pus va lhu ju lacʼasqʼuinatʼit ni lai alhakʼamanantʼit. 4 Ju uxijnan chunch untʼatʼit tachi ju tam chakoʼulh ju lactuʼui ju ixpapa. Ju uxijnan lactʼuʼuyatʼit ju Dios ni va kʼachʼaniyatʼit ju xataxtokni ju ani lacamunutpaʼ. Tachi ju va jantu cʼatsʼayatʼit ni ixtʼalaxcai Dios junita va tichi chavaich ju na kʼachani tachi ju talai ju jantucaʼ talhilacaʼanta ju Jesús. Pus va tichi chavaich ju najun ni yuchach ju kʼachani tachi ju takʼachani ju yuʼunch ju jantucaʼ talhilacaʼanta ju Jesús pus ju yuchi ixtʼalaxcai Dios junita. 5 Jantu va anaʼuntʼit ni va kʼaya najun ixchivinti Dios ju tsʼokʼulacanta junta ma chani najun: “Ju iSpiritu Santu Dios ju tʼajun laquiʼalhunutʼan ma na lacasqʼuin ni ixʼanuʼ cajonkʼo chux ju quiʼatsucuntiʼan”. 6 Para mas aktamixnin jantu xtaknikʼoyau chux ju quiʼatsucuntiʼan para ju Dios kʼai lamapainin quintanaviniyan ni laich xtaknikʼoyau ju quiʼatsucuntiʼan. Yuchi lhinajun ju Dios laʼixchivinti ju tsʼokʼulacanta ni ma va alacmajkʼan ju va talhitakʼayai ju tuʼuʼ. Para ma anavini lamapainin ju jantu tuʼuʼ talhitakʼayai. 7 Pus yuchi alhilakʼaʼitʼit ni calhinonkʼoyaʼ ju Dios chux ju miʼatsucuntiʼan. Asamakʼantʼit ju tuchi tamapastʼacʼaniyan ju lhacaticuru chai ju yuchi catalackʼosan. 8 Ixlhichux miʼalhunutʼan va tachi apʼastʼactʼit ju Dios chai ju yuchi va tachi cataʼaktaijuyan. Ji alactuʼunin amacʼaʼuntʼit ju alactuʼunti ju va tsa tsa naviyatʼit. Pus uxijnan ju mapʼainipʼutʼunatʼit ju Dios chai vana navipʼutʼunatʼit ju xataxtokni ju ani lacamunutpaʼ salaka anavitʼit ju miʼalhunutʼan laʼixmacni Dios. 9 Chach taxcanin ju miʼalhunutʼan ixlacata ju tuchi amacxcai ju navitʼatʼit. Amakʼaninintʼit chai alackʼalhuntʼitch. Jantuch vana alactsʼiʼintʼit. Para alackʼalhuntʼit. Jantu vana alackʼachʼantʼit. Para amakʼaninintʼitch ixlacata ju tuchi amacxcai ju navitʼatʼit. 10 Atʼalacʼatʼicstʼitʼit laʼixmacni ju quiʼucxtinʼan Dios chai ju yuchi catalakʼayayan ju lactʼiyan. 11 Quiʼalakʼavin jantu macxcai alhichʼivinintʼit ju apumatam. Pus va tichi chavaich ju macxcai lhichivinin ju tam ixlhilakʼau laʼixmacni Cristo chai najun ni talakʼalhin tuchi ju xanavi ju yuchi pus va samakʼan ju ixlhamapʼaksin ju Dios junta najun ni calamapainiu ju quijnanʼan. Tachi ju va canaulh ni jantu chun najun laʼixlhamapʼaksin Dios. Chai ni chunch ju navi ju anuʼ lapanac pus tachi ju va najun ni palai machakxai ju tuʼuʼ kʼox ju canavilh xamatiʼ. Tachi ju va palai jantu vas najun ju tuʼuʼ lhamapʼaksin. 12 Para va pumatam ju xtaklh ju lhamapʼaksin. Yuchi ju Dios. Chai va yuchi ju lai mucʼani ixtalakʼalhin tam xamatiʼ. Va yuchi ju lai makʼalhtaxtui xamatiʼ u mamakʼalhkʼajni. Pus ju uxintʼi tis chavaichʼat ni naʼun ni vachuʼ lai mucʼani ixtalakʼalhin ju mintʼalapanac. 13 Pus apʼacxantʼitcaʼ lacatsʼunin ju uxijnan ju chani nonatʼit: “Ju chavai u lhi acʼanauch ju anuʼ lakʼachakʼan. Chai anchach ju actolhtachau tachi tam cʼata. Chai acmalakxtutachauch ju lhistʼat chai lhu aclhajayau”. 14 Para ju uxijnan jantu cʼatsʼayatʼit tuchi catapasayaʼ ju alhi. Ju quiʼatsucuntiʼan chunch junita tachi ju ixpuquilhau ju tuʼuʼ ju tasui pantsʼiquis chai vatsʼalhti lakmixchokoi. 15 Palai kʼox cava ni chanich anaʼuntʼit: “Ni calacasqʼuinach ju quiʼucxtinʼan Dios pus catsucuyauch chai chani chani canaviyau”. 16 Para ju uxijnan alai va lhitʼakʼayayatʼit ju tuchi vas nonatʼit ni anaviyaʼitʼit. Para ju chunch na talakʼalhin. 17 Pus mas acmispa ju kʼox para ni jantu icnavi pus alactuʼunti ju icnavi.
1 Pus ju chavai ji makʼalinin ju lhilaksiyatʼit ju mintuminʼan alackʼalhuntʼit. Alactʼasatʼit ixlacata ju mimakʼalhkʼajnatʼan ju caminaʼ astan. 2 Ju mimakʼalitʼan chunch junita tachi ju tuʼuʼ ju na puchʼitach. Ju mimpumpuʼan chunch junita tachi ju tuʼuʼ pumpuʼ ju na pacxanta ju xaʼatsʼacanaʼ. 3 Ju miʼoroʼan chai ju mimplataʼan na lacjokstach. Chai ni na jokstach pus anchach caputasuyach ju mintalakʼalhinʼan ni na lhu xamakʼayatʼit ju mimakʼalitʼan. Chai tachi ju tuʼuʼ jipi ni na lai lakʼalhi ju tuʼuʼ pus vana va chun ju mimakʼalitʼan. Ni va yuchi ju alhilaksitʼit pus catalakʼalhiniyan ju miʼatsucuntiʼan. Na lhu xamakʼaixtʼokʼatʼit ju mimakʼalitʼan ju chavai avilhchan mas vanin ixʼaclanti ju lacamunutpaʼ. 4 Pus ju chʼalhcatnin ju chakxʼi ju micebadaʼan va aʼokxchʼokʼotʼit ju uxijnan. Jantu aktsai ju xaʼamapʼalatʼit. Chai ju ixtalhajaʼan ju makʼatʼatʼit cataʼulaniyan ju mintalakʼalhinʼan laʼixmacni Dios. Chai ju chʼalhcatnin na talactʼasai. Chai ju Dios akʼasmatnilh ju istʼasatʼan. Chai ju yuchi xaʼucxtin junita ixtalhavat taropajni ju si anquilhnin tajunita. 5 Pus ju uxijnan jantu tuʼuʼ ixtacʼacxnitan ju ani lacamunutpaʼ. Na ixnaviyatʼit tachi ju ixkʼachʼaniyatʼit. Chunchach junita ju miʼalhunutʼan ju chavai tachi ju tuʼuʼ atapacxat ju lakʼonuncantach ni camaknicanach. Ju uxijnan vachuʼ amamakʼalhkʼajnicʼanaʼitʼit. 6 Ju uxijnan mucʼanitʼatʼit ixtalakʼalhinʼan ju lapanacni ju soknicʼa junita isʼatsucuntiʼan. Chai lhinaʼuntʼit ixmaknicaʼan. Chai ju yuʼunch jantu tasastucnitan. 7 Pus ji quiʼalakʼavin jantu jeks aʼutʼit mas chunch taʼulhtuyan. Cʼatsʼayatʼit ni aktsʼiya caminchokoyaʼ ju quiʼucxtinʼan Jesucristo. Alaktsʼintʼit tachi ju lai ju tam cuxtu lapanac. Ju yuchi jantu jeks ui mas jantu sai amaklhtayanan ju xatocʼat ju ixʼachʼananti. Ju yuchi va pacxan tus calayaʼ ju xcan ju min acsni va ancaʼ chʼanlh chai ju xcan ju astan min ni laich catakʼayayaʼ ju ixʼachʼananti. 8 Pus vachuʼ chunch atsʼucʼutʼit ju uxijnan. Jantu jeks aʼutʼit chai ixlhichux miʼalhunutʼan alhilaksitʼit ju Jesucristo. Cʼatsʼatʼit ni vaninch minta ju avilhchan acsni caminchokoyaʼ ju yuchi. 9 Jantu alasamucʼanitʼit ixlacata ju mimakʼalhkʼajnatʼan. Jantu xcai ni caʼalilh ju mintalakʼalhinʼan ju chunch. Chai ju Jesús yuchi ju tucan kʼai ucxtin chai ju yuchi vatsʼalhti caminaʼ. 10 Quiʼalakʼavin alaktsʼintʼit ju makʼaniya ixlapanacni Dios ju ixtanajun ixchivinti. Ju yuʼunch tajunita tachi ju tuʼuʼ lhilaktsʼintaiti ixlacata quiʼatsucuntiʼan ju quijnanʼan. Ju yuʼunch jantu jeks xataʼui mas na lhu ixʼamamakʼalhkʼajnican. 11 Ju quijnanʼan nonau ni na kʼox ju isʼatsucuntiʼan ju lapanacni ju lai tatastucni ixmakʼalhkʼajnatʼan. Pus ju uxijnan kʼasmatʼatʼit ta yu lai xatastucni ju ixmakʼalhkʼajnat ju anuʼ makʼaniya lapanac ju Job ixjuncan. Chai vachuʼ laktsʼintʼatʼit ni na kʼox ju isʼatsucunti ju xaxtakni astan ju Dios. Pus ju quiʼucxtinʼan Dios chunch ju navilh ni jantu kʼai junita chai na lai amapaininin. 12 Para ji quiʼalakʼavin alin ju tuʼuʼ ju na tasqʼuini ni anavitʼit. Yuchi ni acʼaptʼit ju ixlhipastʼacʼa ju Dios ju va tuʼuch lacatsʼunin ju naviyatʼit. Nin yuchi ni lai alhipʼastʼactʼit ju tuʼuʼ ju ani lacatʼun nin yuchi ju tuʼuʼ atumpa ju va ixpumavasalacan ju minchivintiʼan. Vas alaʼunitʼit mas va a u jantu. Para ni va lhipʼastʼacʼatʼit ju Dios u tuʼuʼ atumpa ju va ixpumavasalacan ju minchivintiʼan pus ju Dios catamucʼaniyan ju mintalakʼalhinʼan. 13 Ni alin xamatiʼ ju milhiʼuxijnan ju na makʼalhkʼajnan chach tapaininilh ju Dios ni caʼaktaiju. Chai ni alin xamatiʼ ju na kʼachan pus chach lakʼaya ju Dios lacamilhpat. 14 Ni alin xamatiʼ ju milhiʼuxijnan ju takʼankʼai chach tʼasanilh ju talhinajun laʼixtalhavat ju talhilacaʼanta ju Jesús. Chai anch junta ma ju takʼankʼan catasqʼuiniyach ju Dios ixlacata ju anuʼ takʼankʼan. Chai catalacamucʼayach ju aceite laʼixtapakaʼut ju quiʼucxtinʼan Jesús. 15 Chai ni ixlhichux ixʼalhunutʼan talacaʼi ni akʼasmatni ju Dios acsni tasqʼuini lamapainin ixlacata ju anuʼ takʼankʼan pus palai cajunaʼ ju yuchi. Isʼakstu ju quiʼucxtinʼan Jesús ju camakʼostolayaʼ. Chai ni alin ju alactuʼunti ju xanavi chai yuchi lhitakʼankʼai pus camacʼacxanicanach. 16 Alatʼapʼaininitʼit ju milhiʼuxijnanʼan ixlacata tuʼuʼ macxcai ju lanavinitʼatʼit. Chai asqʼuinitʼit ixʼaʼaktaijunti ju Dios ixlacata ju akʼantam. Ju chunch ni lai palaich aʼunaʼitʼit acsni atakʼankʼayaʼitʼit. Ju tam xamatiʼ ju soknicʼa isʼatsucunti laʼixmacni Dios acsni ixlhichux ixʼalhunut casqʼuinilh tuʼuʼ ju Dios pus na lhu ju canavinicanach. 17 Ju Elías vachuʼ va lapanac ixjunita tachi ju quijnanʼan. Chai ju yuchi ixlhichux ixʼalhunut ju sqʼuinilh ju Dios ni jantu calalh ju xcan. Chai lakatʼutu cʼata a lakachaxan malhquiyuʼ jantu lalh ju xcan ju anch. 18 Chai aktam tʼachivinchokopa ju Dios chai lachokolh ju xcan chai alilh ju xaʼachʼananti ju ani lacatʼun. 19 Quiʼalakʼavin jantu xcai ni xamatiʼ ju milhiʼuxijnan ju va camacaulh ju ixti Dios. Mas yuchi ju stavasalanti. Chai ju apumatam ni caʼaktaijulhch ni calhilaksichokolh ju Jesús pus chach cʼatsa ju ani. Pus ju anuʼ ju xaʼaktaijui ju anuʼ alactuʼunuʼ acsni ixcapputun ju ixti ju Dios pus puʼaktaiju ni lai xatakʼalhtaxtui junta caʼixjonkʼalhita ixmakʼalhkʼajnat chai na lhu xamacʼacxanican ju ixʼalactuʼunti ju anuʼ ju xaʼalactuʼununta.
1 Ju quitʼin icPitaluʼ. Ixtamalakachan ju Jesucristo icjunita. Chai va iclamacʼamiyau ju uxijnan ju vachuʼ lhilacʼapʼinatʼit ju Jesús. Ju uxijnan amachakʼan makat untʼatʼit para makpʼitsʼicʼantʼatʼitcaʼ ju xalacatʼun Ponto chai ju xalacatʼun Galacia chai Capadocia chai Asia chai Bitinia. 2 Ju quimpaiʼan Dios cʼatsai tuchi catapasayaʼ mas tucaʼ tapasai. Pus yuchi ju makʼanch tasacxtutan ni ixʼanuʼ anavicʼanaʼitʼit laʼixtachaput ju Spiritu Santu. Ju chunch lai aqʼuiclacʼaʼiyaʼitʼit ju Dios chai laich cataxacaniyan mintalakʼalhinʼan ni lhilacʼapʼinatʼit ju Jesucristo ni nilh ju milacataʼan. Pus ictapainini ju Dios ni palai catanaviniyan lamapainin chai cataʼaktaijuyan ni jantu calacʼalh ju miʼalhunutʼan ju uxijnan. 3 Chach kʼox lhichivinincalh ju isDios chai ixpai ju quiʼucxtinʼan Jesucristo. Slivasalh na kʼai ju ixʼamapaininti ni lai xaquintaʼaktaijuyan. Pus quintaxtaknitan sastʼi quiʼatsucuntiʼan chai ixlhiyuchi lai lhilaksiyau ju Dios ni aktsʼiya aquintaxtakniyanch chux tuchi quintakʼalhtasunitan ni aquintaxtakniyan. Chai cʼatsayau ni chunch ju aquintaʼulhtuyan va ixlacaʼatalh ni taʼacxtuchokolh ju Jesucristo junta ixmacnucanta. 4 Chai tachi chun ju kʼox ju pastacta ju Dios ju quilacataʼan aquintaxtaknitachan ju lactʼiyan. Chai ju yuchi conkʼalhiyanta. Chai jantu lai lhquiliquin chai na kʼox conkʼalhiyaʼ. 5 Chai ju quijnan ni lhilaksiyau ju Dios pus ju yuchi aquintalhistʼacʼan laʼixtachaput. Chai aquintalhistackʼalhiyan tus acsni aquintaxtakniyan ju ixtaʼaktsanti ju sastʼi quiʼatsucuntiʼan ju lactʼiyan. Chai ju anuʼ sastʼi quiʼatsucuntiʼan lakasivi chai aquintamasuniyan ju Dios acsni cachinaʼ ixʼaclanti ju lacamunutpaʼ. 6 Chai yuchi alhikʼachʼantʼit mas jantu xcai ni tasqʼuini ni amakʼaninintʼit pantsʼiquis ju chavai. Amakʼaninintʼit ni na tijlhu macxcai ju pʼulaktsʼintʼanucʼanatʼit. 7 Va laktsʼintʼanucʼanatʼit ni caputasuyach ni vasalh lhilacʼapʼinatʼit ju Cristo. Pus palai lhitapalai ni catasu ni vasalh lhilacʼapʼinatʼit ju Cristo. Palai jantu ju va tuʼuʼ oro ni catasu ni vasalh oro. Ju yuchi mas jantu tsucukʼalhi para mapasacan ju lacajipi acsni laktsʼintanucan. Ja va a ti quijnanʼan jantu calaktsʼintanucanau laca tuʼuʼ macxcai. Chai ni tasui ni stavasalanti lhilacʼapʼinatʼit ju Cristo pus ju Dios catajunan ni na kʼox ju navitʼatʼit chai catalakʼayayan chai kʼoxich catalhiulayan acsni tavanan catalacasuchokoyach ju Jesucristo. 8 Chai ju chavai mas jantucaʼ laktsʼinatʼit ju Jesús para mapʼainiyatʼit. Chai ju chavai mas jantucaʼ laktsʼinatʼit para lhilacʼapʼinatʼit chai alin ju minkʼachatʼan ju matiʼ ixtʼachunch ju ani lacamunutpaʼ. Va anch ju lactʼiyan ju minacha ju chunch. 9 Chai ni lhilacʼapʼinatʼit ju Cristo pus atʼakʼalhtʼaxtʼuyaʼitʼit chai jantu apʼinaʼitʼit ju lacamakʼalhkʼajnat ju jonkʼalhitach. 10 Ju makʼanch ju Dios amaʼatsʼoknunilh ixlapanacni ju ixchivinti. Ju yuʼunch ixtachivinin ixlacata ju lamapainin ju quintanavinitan ju Dios. Para jantu kʼox ixtamachakxai tuchi ixtanajun. Pus na talhasacminilh chai ixlhichux ixʼalhunutʼan tapuxcaulhch lacaʼalhiqui ta yu laich takʼalhtaxtucan lacamakʼalhkʼajnat junta jonkʼalhita. 11 Pus yuchi ju iSpiritu Santu ju Cristo ju alacmaʼatsʼokʼulani lacaʼalhiqui ju ixlapanacni. Chai ixʼajuni ni catanaulh ni Dios camalakachayaʼ pumatam ju camamakʼalhkʼajnicanaʼ chai astan calakʼayacanach. Para ju yuʼunch jantu tamachakxa ni yuchi ju Jesús ju ixtalhichivinin. Pus va tapuxcaulh lacaʼalhiqui ni va ixtacʼatsaputun tis chavaich ju ixlhichivincan chai tavananch ju catapasayaʼ ju chunch. 12 Pus ju anuch makʼaniya lapanacni ju ixtanajun ixchivinti Dios ixʼamavasalanican ni jantu lana acsni ju catapasayaʼ ju tuchi ixtanajun. Para chavai acsni tʼonau ju quijnanʼan. Chai tachi ju yuʼunch ni laʼixtachaput ju Spiritu Santu ju tachivinilh pus vana va chun ju yuʼunch ju tajuntan ju chavai ju chivinti ixlacata ju Cristo. Vachuʼ tachivinin laʼixtachaput ju Spiritu Santu ju malakachacantachilh. Ju minchalh ju lactʼiyan. Chai ni na kʼai lhamakʼan ju ani chivinti ixlacata ju Cristo pus mas yuʼunch ju anquilhnin na tamachakxaputun ixlacata ixmakʼalhkʼajnat ju Cristo chai acsni calakʼayacanaʼ. 13 Chai ni slivasalh na kʼai lamapainin ju quintanavinitan ju Dios pus ixlhichux miʼalhunutʼan alacʼaʼitʼit ni catalaktsʼaniyan ju anuʼ lamapainin ju Dios. Pus acsnich ju cataʼaktsayach acsni catalacasuchokoyach ju Jesucristo. Chai ni caminchokoyaʼ ju yuchi pus lhitasqʼuini ni skʼala atsʼucʼutʼit chai alaccʼatsʼanantʼit. 14 Chai ni isʼaskʼatʼan Dios untʼatʼit pus aqʼuiclacʼaʼitʼit. Jantu anavichʼokʼotʼit ju macxcai tachi ju ixkʼachʼaniyatʼit makʼanchich acsni tucaʼ ixmachʼakxayatʼit ju ixchivinti Dios. 15 Pus yuchi ju Dios ju tasacxtutan ni isʼaskʼatʼan aʼunaʼitʼit. Chai tachi ju yuchi ni salaka isʼatsucunti pus vachuʼ chunch atsʼucʼutʼit ju uxijnan mas va tuchi ju naviyatʼit. 16 Chunchach ju atsʼucʼutʼit ni chunchach ju tsʼokcanta laʼixchivinti Dios junta chani najun ju yuchi: “Ma salaka atsʼucʼutʼit ni salaka junita ju isʼatsucunti ju yuchi”. Ma chunch ju najun ju Dios. 17 Chai ni lhixakʼalayatʼit ju Dios tachi ju mimpaiʼan pus alhitʼalacʼasutʼitch ni tʼalhoniyatʼit chux tuncujun acsni makvilatʼitcaʼ ju ani lacamunutpaʼ. Chunch ju alatʼit ni vaklhtam chun alaktsʼintanui ju yuchi ju lapanacni tuchi ju navich ju pumatamin. 18 Chai cʼatsʼayatʼit ni Dios ju tamalakxtutan ni jantu tasqʼuini ni vana anavitʼit ju mincostumbreʼan ju jantu lhitapalai. Ju anuʼ costumbre ju ixtamacontilanitan ju milacpaiʼan. Chai cʼatsʼayatʼit ni jantu lhimalakxtʼucʼantʼatʼit ju va laca tuʼuʼ oro u laca tuʼuʼ plata ju lai takʼalhi. 19 Para lhimalakxtʼucʼantʼatʼit ju ixʼacʼalhni ju Cristo. Chai ju ixʼacʼalhni ju yuchi na laklhu ixtapalh. Pus ju aliʼin quintʼaʼisraelitaninʼan tamakninicaʼ ju Dios ixborregoʼan ju jantu xatakʼalhin tajunita nin capacxalh ju tuʼuʼ istsʼitsʼi. Chai ju anuʼ borrego ixtapalh va ixʼalactuʼuntiʼan ju anuch lapanacni. Pus vana va chun ju Cristo. Ju yuchi na salaka junita chai ju yuchi nilh ixtapalh ju quiʼalactuʼuntiʼan. 20 Ju Cristo ilhcaʼulacantacha ni caniyaʼ acsni tucaʼ ixnavicanacha ju lacamunutpaʼ. Para va chavaicaʼ laʼixlhiʼaclanti ju lacamunutpaʼ malacasucalh ju milacataʼan. 21 Chai ni quinichilh ju Cristo pus ju uxijnan lhilacʼapʼinatʼit ju Dios. Yuchi ju Dios ju macxtuchokolh ju Jesús laʼixʼaninti chai lakʼayalh. Chai ni chunch ju lalh ju Dios pus ixlhichux miʼalhunutʼan laich lhilacʼapʼinatʼit ju yuchi chai laich acʼatsʼayaʼitʼit ni aktsʼiya cataxtakniyan tachi chun ju takʼalhtasunitan. 22 Ixchivinti Dios stavasalanti. Chai ju chavai ni qʼuiclacʼaʼitʼatʼit pus chʼakʼanicʼantʼatʼit ju miʼalhunutʼan chai lai lamapʼainiyatʼit islivasalh ju milhiʼalakʼavinʼan. Pus alamapʼainitʼitch minchuxʼan ju laʼistavasalanti ixlhichux miʼalhunutʼan. 23 Ju xapʼulasastʼinicʼanatʼit ju miʼatsucuntiʼan jantu va ixlacata tam mintʼalapanacʼan ju va caniyaʼ. Para tasastʼichokolh ju miʼatsucuntiʼan acsni qʼuiclacʼaʼitʼatʼit ju ixchivinti Dios. Chai ju anuʼ chivinti conkʼalhiyach. Chai acsni quiclacaʼiniyau pus alin ju quiʼatsucuntiʼan ju jonkʼalhita. 24 Ju ixchivinti Dios chani najun: Tachi chun ju lapanacni ma tachi ju tuʼuʼ achʼitin tajunita. Chai tachi chun ju alin laʼisʼatsucuntiʼan ju na talhitakʼayai ma chunch junita tachi ju tuʼuʼ ixʼaxanat achʼitin. Acsni xixach ju xaʼachʼitin pus minacha ju ixʼaxanat. 25 Para ixchivinti ju quiʼucxtinʼan Dios ma jonkʼalhita. Ma chunch najun laʼixchivinti Dios. Pus vasalh chunch junita laquiʼatsucuntiʼan. Acsni niyau jantu tuʼuʼ ixtapalh jun ju tuchi ixlhitakʼayayau. Para ju chivinti ixlacata ju Cristo ju uncʼantʼatʼit jonkʼalhita.
1 Chai ni taxtaknitan ju sastʼi miʼatsucuntiʼan ju Dios pus jantuch alanavinitʼit tuʼuʼ macxcai. Jantu alaʼokxchʼokʼotʼit. Jantuch va tam tam amalacʼasutʼit. Jantu alhacchʼipʼitʼit tuʼuʼ. Chai jantuch vana alhichʼivinintʼit ju akʼantam. 2 Aʼuntʼit tachi ju tam askʼatʼa ju va ancaʼ lakʼajunta. Ju yuchi va tsa tsʼiquiputun. Pus vana va chun alatʼit ju uxijnan. Va tsa tsa alaktsʼintʼit ju ixchivinti Dios. Ju yuchi jantu va aʼokxchokʼonti. Chai yuchach ju cataʼaktaijuyan ni lai palai alhilacʼapʼinaʼitʼit ju Cristo. Chai vachuʼ palai lai atsʼucʼuyaʼitʼit tachi ju kʼachani ju Dios. 3 Pus chunch aʼunaʼitʼit va ixlacaʼatalh ni cʼatsʼayatʼit ni na kʼox ju miʼucxtinʼan Dios. 4 Ju uxijnan lhilacʼapʼitʼit ju Jesús. Chai ju yuchi chunch junita tachi ju tuʼuʼ chiux ju lhiyocan chakaʼ ju istasacmackʼanta ju ixyonin chakaʼ. Pus vana va chunch taʼulhtulh ju Cristo. Ju lapanacni vachuʼ jantu tuʼuʼ talhiula ju yuchi. Para ju Dios sacxtulh chai slivasalh na tapalai ju yuchi. 5 Chai ju uxijnan vachuʼ chunch untʼatʼit tachi ju tuʼuʼ chiux ju sacxtucan acsni yocan ju tuʼuʼ chakaʼ. Pus ju Dios tasacxtutan. Chai tachi ju va ixchakaʼ tanaviyan ni yuchi ju Spiritu Santu ju tʼajun lamiʼalhunutʼan. Chai vachuʼ ixpalijni Dios untʼatʼit chai naviyatʼit ixlhichʼalhcat. Chai ni ixpalijni untʼatʼit pus laich lakʼayayatʼit tachi ju kʼoxich lhiulai ju yuchi va ixlacaʼatalh ni lhilacʼapʼinatʼit ju Jesucristo. 6 Vachuʼ chani ixnajunta ju Dios laʼixchivinti ju tsʼokcanta: Ju yuchi najun ni ma ulai ju lakʼachakʼan Sion pumatam lapanac. Chai ju yuchi ma chunch junita tachi ju tuʼuʼ lhtakʼalh chiux ju makʼastumucʼacanta chakaʼ junta tsʼokcanta tuchi cʼata ju yocanta. Chai yuchi ma sacxtulh ju Dios chai ma na laklhu ixtapalhni. Pus ju calhilacaʼanach ju yuchi ma jantu lai astan catinaulh ni jantu kʼox tachi ju xalai. Chunch ma najun ju Dios. 7 Pus ju uxijnan ju lhilacʼapʼinatʼit ju Jesús slivasalh ni na tuʼuʼ lhiulayatʼit. Para ju jantucaʼ talhilacaʼan pus uctaxtui laʼisʼatsucuntiʼan tachi ju tsʼokcanta laʼixchivinti Dios junta ma chani najun: Ju anuʼ chiux ju tasacmackʼalh ju ixyonin chakaʼ astan valhch ju chiux ju makʼastumucʼacanta chakaʼ junta tsʼokcanta tuchi cʼatach ju yocanta. Chunch najun laʼixchivinti Dios. Chai ju chunch va nomputun ni vana va chun taʼulhtui ju Cristo ju yuʼunch ju jantu talhilacaʼamputun. Va talakmackʼan. 8 Chai ju Dios vachuʼ najun ni vachuʼ valh ju Cristo tachi ju tuʼuʼ chiux ju pukʼalhkʼoscan chai tachi ju tuʼuʼ lhkajani chiux ju lai putaʼakkʼajucan. Pus tachi ju va tapukʼalhkʼos ju Jesús ni jantu taquiclacaʼiputun ju ixchivinti Dios. Chai ju Dios alhcata ni catakʼalhkʼosaʼ ju chunch talai. 9 Para ju uxijnan Dios ju tasacxtutan ni isʼaskʼatʼan aʼunaʼitʼit. Chai ixpalijni ju kʼai ucxtin Dios aʼunaʼitʼit. Chai aʼunaʼitʼit lapanacni ju salaka ixʼalhunutʼan chai ixlapanacni Dios aʼunaʼitʼit. Chunch ju taʼulhtutan ju Dios ni laich alakʼayayaʼitʼit ju yuchi laʼixʼucxlacapuʼan ju mintʼalapanacniʼan acsni aʼunaʼitʼit tachi chun ju kʼox ju navita ju yuchi. Alakʼayayaʼitʼit ju Dios ju tamapaxanitanch ju makʼaniya miʼatsucuntiʼan ju na ixkʼachani ju alactuʼunti. Chai taxtaknitan ju sastʼi miʼatsucuntiʼan ju slivasalh na kʼox. 10 Pus ju makʼanchich jantu uxijnan ju tasacxtun ju Dios. Alai aliʼin ju asacxtucalh. Para ju chavai ixlapanacni Dios untʼatʼit. Ju makʼanch jantu ixʼaktʼaiʼucʼantʼatʼit lacaʼamapaininti. Para ju chavai ju Dios taʼaktaijutan laʼixʼamapaininti. 11 Ju uxijnan ji quiʼalakʼavin va iclajumputunau ju ani. Pus ni ixlapanacni Dios untʼatʼit pus amachakʼan lactʼiyan untʼatʼit. Tachi ju va tʼonatʼit tapasatilanin ju ani lacamunutpaʼ. Pus ixlhiyuchi iclatapaininiyau ni amacʼaʼuntʼit ju macxcai ixkʼachat ju milacatunaʼan. Ju yuchi va tʼalasai ju sastʼi quiʼatsucuntiʼan ju quintaxtaknitan ju Dios. 12 Va tachi kʼox atsʼucʼutʼit laʼixʼucxlacapuʼan ju jantucaʼ talhilacaʼanta ju Cristo. Ju chunch mas catalacnonach ju chavai ni va alactuʼunin untʼatʼit para astanch catalakʼayayach ju Dios ni catalaktsʼinach ju kʼox miʼatsucuntiʼan. Chai vachuʼ catalakʼayayach ju Dios acsni caʼalacxtakniyaʼ ju kʼox ixtacʼatsanʼan ju Dios chai catalhilacaʼanach ju Cristo. 13 Chai ni cʼatsacan ni lhilacʼapʼintʼatʼit ju Cristo pus aqʼuiclacʼaʼitʼitch tachi chun ju xalackʼajin ju ani lacamunutpaʼ. Aqʼuiclacʼaʼitʼit ju xakʼai tucan ju ani lacamunutpaʼ. 14 Vachuʼ aqʼuiclacʼaʼitʼit ju gobernadornin ju amalakachai ju xakʼai tucan. Pus yuchi alhimalakachacanta ni cataʼulaniyach ixtalakʼalhinʼan ju alactuʼunin chai catalakʼayayach ju tanavich ju kʼox. 15 Pus ju Dios lacasqʼuin ni apʼukʼelhchʼapʼayaʼitʼit ju ixquilhniʼan ju lapanacni ju va kʼaya talhichivinan mas jantu tacʼatsai tuchi tanajun. Chunch ju lai anaviniyaʼitʼit acsni na kʼox ju atsʼucʼuyaʼitʼit. 16 Ju chavai jantu tasqʼuini ni vana canaviu tachi ju najun laʼixlhamapʼaksin ju Moisés. Para jantu anaʼuntʼit ni ixlhiyuchi laich anaviyaʼitʼit va tuchi alactuʼunti ju navipʼutʼunatʼit. Alai atsʼucʼutʼitch tachi ju vasalh xalapanacni untʼatʼit laʼixmacni Dios. 17 Atʼalhonitʼit tachi chun ju lapanacni. Amapʼainitʼit ju vachuʼ talhilacaʼanta ju Cristo. Atʼalhonitʼit ju Dios. Atʼalhonitʼit ju xakʼai tucan ju ani lacamunutpaʼ. 18 Ju uxijnan ju va xalapanacni untʼatʼit aqʼuiclacʼaʼitʼitch ju miʼucxtinʼan chai atʼalhonitʼit. Para jantu va yuʼunch ju aqʼuiclacʼaʼitʼit chai atʼalhonitʼit ju va lackʼoxin lapanacni tajunita chai ju na lai taʼamapaininin. Para vachuʼ atʼalhonitʼit chai aqʼuiclacʼaʼitʼit ju na kʼai tajunita. 19 Pus ju Dios na kʼoxich lhiulai acsni xamatiʼ ju lhilacaʼanta ju Cristo tastucni acsni mamakʼalhkʼajnican mas jantu slivasalh ni tuʼuʼ canavi. Pus ju anuʼ lapanac yuchi lhitastucni ni cʼatsai ni laktsʼinch ju Dios. 20 Para acsni lhilakʼanekmacʼanatʼit ju va miʼalactuʼuntiʼan chai tʼastʼucniyatʼit pus tis chavaich ju lai catajunin ni kʼoxich ju naviyatʼit. Para acsni lhimamakʼalhkʼajnicʼanatʼit ju va ixnavica ju tuʼuʼ kʼox chai tʼastʼucniyatʼit pus ju Dios na kʼoxich lhiulai ju chunch. 21 Pus yuchi talhisacxtutan ju Dios. Ju yuchi lacasqʼuin ni atʼastʼucniyaʼitʼit acsni amamakʼalhkʼajnicʼanaʼitʼit mas navitʼatʼit ju kʼox ni vana va chun makʼalhkʼajnalh ju Cristo ju quilacataʼan. Ju yuchi quintamaconinch ju lhilaktsʼintaiti ni laich canaviu tachi ju navilh ju yuchi. 22 Ju yuchi jantu tavanan alactuʼunulh nin canaulh taʼaklhtamat chivinti. 23 Ju yuchi acsni ixtajuni macxcai chivinti jantu ixʼalhimapuspʼitni tuʼuʼ macxcai chivinti. Acsni ixtamamakʼalhkʼajni pus ju yuchi jantu ajuni ni caʼamamapʼalhniyach. Alai va ixmakʼaxtakni ju ixlhamakʼan laʼixmacni Dios ni yuchi ju sok lakʼoxi ju tuʼuʼ lhamakʼan. 24 Tachi chun ju quiʼalactuʼuntiʼan mucʼanikʼocalh ju Cristo acsni xtucnicalh ju ixlacatuna ju lacacurus. Chunch ju navinicalh ni jantu vana catailhiʼanau ju quiʼalactuʼuntiʼan para canaviu ju soknicʼa. Chai ni macʼatsanicalh ju Cristo pus yuchi ju xapuʼalinch ju sastʼi quiʼatsucuntiʼan. 25 Pus ju uxijnan chunch ixʼuntʼatʼit tachi ju tuʼuʼ borregojni ju jantu tachʼakʼokʼai ju ixʼucxtinʼan. Ju uxijnan vachuʼ jantu ixchʼakʼokʼatʼit ju Cristo. Para ju chavai ni xalhilacʼapʼinatʼit ju yuchi pus tachi ju va laktʼanchʼokʼotʼit ju miʼalhistacnaʼan. Chai yuchi ju talhistacniyan ju miʼalhunutʼan ni jantu atʼitsʼankʼakʼalhitʼit astan.
1 Vachuʼ chun ju uxijnan ji chakolun ju icʼantʼatʼit. Aqʼuiclacʼaʼitʼit ju mimpapaʼan. Pus ju chunch mas tucaʼ talacaʼita ju ixchivinti Dios ju mimpapaʼan para catalhilacaʼanaʼ ju Cristo acsni catalaktsʼinaʼ ju kʼox miʼatsucuntiʼan mas jantu tuʼuʼ aʼunitʼit. 2 Ju yuʼunch catalhilacaʼanaʼ ju Cristo acsni catalaktsʼinaʼ ni salaka ju miʼatsucuntiʼan chai ni tʼalhoniyatʼit ju Dios. 3 Jantu va yuchi ju anavitʼit cuenta ju milacatunaʼan. Ju tam xamatiʼ jantu acsnich ju na cʼus tasui acsni maxantilai ju ixʼai u lhu calacatocʼalh ju tuʼuʼ oro u na kʼox camalakchʼini. 4 Alai yuchi ju na cʼus putalacasui ju tam lapanac acsni na kʼox ju minacha laʼixpulacni ixʼalhunut. Yuchi ni va seknicʼa lapanac cava. Yuchi ju ani ju ixmaxantilaca ju quiʼatsucuntiʼan chai ju yuchi jantu lai takʼalhi. Chai yuchi ju slivasalh kʼox lhiulai ju Dios. 5 Ju makʼanch chunchach ju ixtalhimaxantilai isʼatsucuntiʼan ju chakolun ju ixtalhilacaʼanta ju Dios. Ju yuʼunch ixtalhilaksi ju Dios chai ixtaquiclacaʼi ju ixpapaʼan. 6 Tachi ju Sara. Ju yuchi ixʼamachakaʼ ixjunita ju makʼaniya ixlapanac Dios ju Abraham ixjuncan. Ju yuchi quiclacaʼilh ju ixpapa chai lhixakʼalalh ucxtin. Pus ju chavai tachi ju va isʼatsiʼin untʼatʼit ni vachuʼ anaviyaʼitʼit ju kʼox chai jantu tuʼuʼ atʼalhoniyaʼitʼit. 7 Vachuʼ ju uxijnan xapapaninch ju alin ju miʼamachakaʼan. Kʼox atʼatsʼucʼutʼit ju miʼamachakaʼan chai alakʼayatʼitch. Acʼatsʼatʼitch ni na tachapun untʼatʼit ju uxijnan para ju tam chakoʼulh jantu na chun tachapun ju ixlacatuna. Chunchach ju alatʼit ni mintʼiyunʼan ju amaklhtʼayanantʼatʼit ju lamapainin ju tanavinitan ju Dios acsni taxtaknitan ju miʼatsucuntiʼan ju conkʼalhiyanta ju lactʼiyan. Pus ni chunch ju atʼatsʼucʼutʼit ju miʼamachakaʼan pus jantu xtuʼuʼ catasastucniyan acsni atʼachʼivinaʼitʼit ju Dios. 8 Pus vachuch iclajumputunau ju ani. Va lakatamch anavitʼit ju miʼalhunutʼan. Chach taxcaniyan vachuʼ ju miʼalhunutʼan acsni apumatam tʼajun makʼalhkʼajnaʼ. Alamapʼainitʼit tachi ju lhiʼalakʼavinch. Chach na tʼayeka va ju miʼalhunutʼan. Jantu alhitʼakʼayatʼit ju tuʼuʼ. 9 Jantu alamapʼuspʼitnitʼit ju macxcai acsni tuʼuʼ macxcai ju anavicʼanaʼitʼit. Nin yuchi ni lai aʼunitʼit macxcai chivinti ju tajunan macxcai chivinti. Alai va asqʼuinitʼit ju Dios ni caʼaxtakniyaʼ kʼox isʼatsucuntiʼan. Asqʼuintʼit ju kʼox ixlacataʼan ni cʼatsʼayatʼit ni Dios tasacxtutan ni vachuʼ axtʼaknicʼanaʼitʼit ju kʼox miʼatsucuntiʼan. 10 Pus chani najun laʼixchivinti Dios ju tsʼokcanta: Ma va tichi chavaich ju lacasqʼuin ni lhikʼach chai kʼox cava ju isʼatsucunti pus ma calhistaclh ju isimakʼat. Ma jantu canaulh ju macxcai nin taʼaklhtamat chivinti. 11 Ma jantu canavi tuʼuʼ macxcai. Ma va yuchi ju canavi ju kʼox. Ma capuxcaulh ixlhichux ixʼalhunut ta yu laich kʼox catʼaʼucxuntsuculh ju aliʼin. 12 Ma chunchach ju calalh ni cʼatsai ni quiʼucxtinʼan Dios alhistactʼajun ju soknicʼa ixʼalhunutʼan laʼixmacni yuchi. Chai akʼasmatni ju yuʼunch ni tuʼuʼ tasqʼuini. Para ju quiʼucxtinʼan Dios ma va kʼotʼitʼi alaktsʼin tachi chun ju tanavi ju amacxcai. Chunch ju najun laʼixchivinti Dios. 13 Pus na lacatsʼunin ju lai catanavinin ju amacxcai ni slivasalh anavitʼit ju kʼox ju laʼixlhichux ju miʼalhunutʼan. 14 Para mas tuʼuch alhimakʼalhkʼajnantʼit acsni anaviyaʼitʼit ju kʼox pus lana na akʼachʼanaʼitʼit. Jantu atʼalhonitʼit acsni va catamakʼesvaputunan. Nin calacʼalh ju miʼalhunutʼan. 15 Alai alakʼayatʼit ju quiʼucxtinʼan Cristo chai alacʼaʼinitʼit ju yuchi. Chai va tachi anavitʼit cuenta ta yu laich alhikʼalhtʼayaʼitʼit ni xamatiʼ catasacmiyan tajuch ni va lacʼaʼiyatʼit ni catamakʼalhtaxtuyan ju Dios. Para va kʼoxich akʼalhtʼayanantʼit. Jantu alhitʼakʼayatʼit ju tuchʼi mispʼayatʼit. Atʼalhonitʼit ju Dios. 16 Jantu tuʼuʼ anavitʼit ju va catalhixcanichokon ju miʼalhunutʼan. Ju chunch mas catalhichivininan tachi ju va alactuʼunin untʼatʼit para catamaxananach astan ni laich va kʼaya xatalhichivinanch ju kʼox miʼatsucuntiʼan ju uxijnan ju lhilacʼapʼinatʼit ju Cristo. 17 Ni va calacasqʼuilh ju Dios ni amamakʼalhkʼajnicʼanaʼitʼit pus palai kʼox ni amamakʼalhkʼajnicʼanaʼitʼit mas navitʼatʼit ju kʼox. Palai jantu ni amamakʼalhkʼajnicʼanaʼitʼit acsni navitʼatʼit ju amacxcai. 18 Pus vachuʼ ju Cristo makʼalhkʼajnalh. Ju yuchi va paktam nilh ixlacata ju quiʼalactuʼuntiʼan. Yuchi ju soknicʼa isʼatsucunti makʼalhkʼajnalh ju quilacataʼan ju jantu soknicʼa junita ju quiʼatsucuntiʼan. Chunch ju lalh ni lai isʼaskʼatʼan Dios cajumvi. Pus ju Cristo nilh laʼixlacatuna para acsni lokʼonchokolh amaklhtayananchokolh ju isʼatsucunti tachi ju aktsʼiya ixjunita ju lactʼiyan. 19 Para acsni tucaʼ ixʼamaklhtayananchokota ju isʼatsucunti tachi ju aktsʼiya ixjunitach ju lactʼiyan pus ju Cristo quilalh junta ixʼatʼalhnucanta ju aliʼin tacuvin. Aquijunilh ixchivinti Dios. 20 Ixtacuvinʼan ixtajunita ju makʼaniya lapanacni ju ixtatʼajun acsni ixtʼajun naviniʼ ju ixbarco ju Noé. Ju yuʼunch jantu ixtaquiclacaʼita ju Dios mas ixʼapacxantaji ni catalhilacaʼalh chai jantu jeks ixʼaʼuni. Pus ju acsnich na lacatsʼunin ju tatakʼalhtaxtulh acsni akmuxtucalh. Va pumatsajin lapanacni. 21 Chai tachi ju yuʼunch ni tatakʼalhtaxtulh ju lacxcan pus vana va chun ju nomputun acsni akpaxtauch. Acsni akpaxtauch putasui ni Dios ju quintamakʼalhtaxtutanch va ixlacaʼatalh ni taʼacxtuchokolh ju Jesucristo junta ixmacnucanta. Acsni akpaxtauch jantu va yuʼ ni va cachʼakʼacalh ju quilacatunaʼan ju laca tuʼuʼ xcan. Para va nomputun ni lacasqʼuinauch ni kʼox cava ju quiʼalhunutʼan ju laʼixmacni Dios. 22 Pus ju Jesucristo acsni taʼacxtuchokolh junta ixmacnucanta tanulh ju lactʼiyan chai ju chavai vanin tʼavilhcha ju Dios. Chai ju anquilhnin chai ju xaʼucxtinin anch chai ju xalackʼajinch anch taquiclacaʼi ju yuchi.
1 Ju Cristo makʼalhkʼajnalh ju quilacataʼan acsni quitsuouchilh ju ani lacamunutpaʼ. Pus vana alhilakʼaʼitʼit ju uxijnan acsni tamamakʼalhkʼajniyan ju lapanacni mas navitʼatʼit ju kʼox. Pus ju chunch mamakʼalhkʼajnican tasui ni vasalhch macajunta ju macxcai. 2 Chai ju yuchi mas tʼajuncaʼ ju ani lacamunutpaʼ para jantuch vana yuʼ ju navi ju macxcai ixʼatalacpastʼacʼat. Alai yuchi ju canaviyaʼ ju kʼachani ju Dios. 3 Pus acsni tucaʼ ixlhilacʼapʼinatʼit ju Cristo pus ixnaviyatʼit va tuchi ixtalakxtuch tachi ju talai ju jantucaʼ talhilacaʼanta ju yuchi. Pus ixnaviyatʼit tachi chun ju alactuʼunti ju ispʼastʼacʼatʼit. Chai ixnaviyatʼit ju macxcai ixkʼachat ju milacatunaʼan. Chai ixtʼakʼapʼayatʼit. Chai ixpʼinatʼit junta lai cʼatan junta va kʼaya ixlayatʼit. Chai va tachi ixʼalactʼatʼakʼapʼatʼonatʼit ju aliʼin. Chai ixlakʼayayatʼit ju misantoʼan tachi ju jantu lhijun laʼixlhamapʼaksin Dios. Para kʼoxich ju chavai. Jantu lhijun ni vana va chunch ju alatʼit. 4 Pus ju chavai ju yuʼunch ju jantucaʼ talhilacaʼanta ju Cristo na va talhamakʼaninin ni jantu vanach alactʼanaviyatʼit ju alactuʼunti tachi ju ixtʼanaviyatʼit pʼulhnan. Chai na macxcai chivinti ju talhichivinan. 5 Para ju yuʼunch catajunach ju Jesucristo tajuch ni va chunch ju xataʼulhtuyan. Chai ju yuchi lakasivi ni caʼamucʼanikʼalhiyaʼ ixʼalactuʼuntiʼan ju lapanacni ju tatʼajuncaʼ chai ju tanitach. 6 Yuchi alhijunicalh ixlacata ju Cristo ju lapanacni ju tanitach ju chavai ni laich catatsucuyanta ju ixtacuvinʼan ju lactʼiyan. Chai mas caniyaʼ ju ixlacatunaʼan tachi ju nican ju ani lacamunutpaʼ para catatsucukʼalhiyanta lactʼiyan tachi ju Dios ni jonkʼalhita. 7 Vaninch minta ju ixʼaclanti ju lacamunutpaʼ. Pus ixlhiyuchi chunch ju atsʼucʼutʼitch ta yu apʼutʼalacʼasutʼit ni acʼatsʼanantʼatʼit. Akʼaichʼokʼocʼantʼit miʼakstuʼan. Chai atʼachʼivinintʼit ju Dios. 8 Chai ju tucan tasqʼuini yuchi ni alamapʼainitʼit ixlhichux miʼalhunutʼan. Ju vasalh amapaininin na lhu macʼacxai ixtalakʼalhin ju akʼantam. 9 Alamalakʼavitʼit ju milhiʼalakʼavinʼan laʼixmacni Cristo ju tachin laminchakaʼan. Chai jantu lacatalhkʼamti ju anavitʼit ju chunch. 10 Ju Dios taxtaknitan pumatamin ju uxijnan lakatamin lhakʼailaktsʼin. Pus apʼuʼaktʼaiʼutʼit ju aliʼin tachi ju lhijunch ni canavilh tam lapanac ju lai lhistʼacʼa ju lhakʼailaktsʼin ju xtaknita ju Dios ni jantu va camakʼatsʼankʼa. Chai ju Dios tijtam tijtam ju xtʼakʼa ju lhakʼailaktsʼin. 11 Tachi ju tam lapanac ju xtaknican ju lhakʼailaktsʼin ni lai amalaninin ixchivinti Dios. Pus ni xtaknicanta ju chunch lhakʼailaktsʼin chach naulh tachi ju va junch Dios ju chivinin. U ni xamatiʼ xtaknicanta ju lhakʼailaktsʼin ni lai aʼaktaijunun chach cʼatsa ni Dios ju xaxtakni ju ixtachaput ni laich caʼaʼaktaijunulh. Ju chunch mas va tuchi ju canaviyau ju quijnanʼan ju lhilacaʼanauch ju Jesús capulakʼayacanaʼ ju Dios. Ju yuchi alin ixtachaput ju va jonkʼalhita chai aktsʼiya tasqʼuini ni calakʼayacalh ju yuchi tus va tavananch. 12 Ji quiʼalakʼavin jantu alhamakʼaninintʼit acsni makʼalhkʼajnanatʼit laca tuʼuʼ tsʼinqʼui makʼalhkʼajnat. Jantu anaʼuntʼit ni jantu chun tapasacan laquiʼatsucuntiʼan ju chʼakʼokʼayau ju Jesús. 13 Alai va alhikʼachʼantʼit acsni mamakʼalhkʼajnicʼanatʼit. Acʼatsʼatʼit ni vana va chun tamamakʼalhkʼajnilh ju Cristo. Chai ni mamakʼalhkʼajnicʼanatʼit ju chavai pus vachuʼ slivasalh akʼachʼanaʼitʼit acsni tavanan catasuyach ni yuchach ju Cristo ju tucan xakʼai. 14 Ni macxcai lhichʼivincʼanatʼit va ixlacata ni lhilacʼapʼinatʼit ju Cristo va alhikʼachʼantʼitch. Yuchi lai alhikʼachʼantʼit ni tʼajun lamiʼalhunutʼan ju iSpiritu Santu ju Dios. Yuchach ju minchalh ju lactʼiyan. Chai yuchach ju taxtakniyan ju mintachaputʼan ni lai alhikʼachʼanaʼitʼit. Pus ju aliʼin lapanacni macxcai chivinti talhichivinin ju Dios para ju uxijnan lakʼayayatʼit. 15 Para tun xamatiʼ ju milhiʼuxijnan amamakʼalhkʼajnicʼantʼit va ixlacata ju amakninti u ixlacata ju akʼalhaʼunti nin ixlhiyuchi ni va navitʼach ju tuʼuʼ ju jantu kʼox u nin ixlhiyuchi ni va kʼaya atʼanutʼich junta jantu mincuenta. 16 Para acsni xamatiʼ camamakʼalhkʼajnicanaʼ ju va ixlacata ni maklacaʼanitach ju Cristo pus jantu camaxanalh. Alai va caxtaknilh lakʼailaktsʼiuch ju Dios ni laich makʼalhkʼajnan va ixlacata ni lhilacaʼanta ju Cristo. 17 Ju chavai chilh ju avilhchan acsni cataiʼulayaʼ ju ixlaktsʼintanuca ju isʼaskʼatʼan Dios. Chai ni pʼulhnan calaktsʼintanucanau ju quijnanʼan ju lhilacaʼanauch ju Cristo pus painiʼitnich ju yuʼunch ju jantu talacaʼita ju ixchivinti Dios ixlacata ju Cristo. 18 Pus ju quijnanʼan ju soknicʼa junita ju quiʼatsucuntiʼan mas makʼalhkʼajnanau ju ani para aktsʼiya catakʼalhtaxtukʼalhiyau. Pus ni chunch tapasai laquiʼatsucuntiʼan ju quijnanʼan pus tas va catijunach ju isʼatsucuntiʼan ju jantu talhilacaʼanta ju Cristo chai ju va taʼalactuʼununch. 19 Pus ju na tamakʼalhkʼajnan va ixlacaʼatalh ni chunch ju lhilhcata ju Dios ju ixlacataʼan pus chach va tachi tanavilh ju kʼox chai chach tamakʼaxtaknikʼo isʼatsucuntiʼan ju Dios. Chach talhilaksilh ju Dios ni yuchi ju axtaknilh ju isʼatsucuntiʼan chai ju yuchi aktsʼiya muctaxtui ju ixchivinti.
1 Ju quitʼin icmaklhinajun lacatalhavat ju talhilacaʼanta ju Jesús. Chai iclaktsʼilh ju ixmakʼalhkʼajnat ju Cristo chai acmaklakʼayacanaʼ ju Cristo acsni calaktsʼinau ni calakʼayacanaʼ ju yuchi. Pus iclamapʼaksiputunau ju uxijnan ju vachuʼ lhinonatʼit lacatalhavat ju talhilacaʼanta ju Jesús. 2 Kʼoxich alhistʼactʼitch ju lapanacni junta chʼalhcʼatnanatʼit ju uxijnan. Ju yuʼunch mas talhilacaʼanta ju Dios para chunch tajunita tachi ju tuʼuʼ borregojni. Na tamaktasqʼuini ju ixʼalhistʼacʼaʼan. Chai ju uxijnan chunch untʼatʼit tachi ju xaʼalhistacnin. Pus alhistʼactʼit lacakʼachatch. Chai ni va nonatʼitch ni va lacatapʼastu ju amanavinicʼantʼit pus jantu anavitʼit. Chai jantiyuʼ alhiʼamaklhtʼayanantʼit ju ixlhichʼalhcat Dios ni va apʼulhaʼapʼutʼuntʼit. Va ixlhichux miʼalhunutʼan ju anavitʼit ju ixlhichʼalhcat. 3 Jantu atʼalacʼasutʼit tachi ju tam xakʼai ju va kʼai junita. Jantu atʼalacʼasutʼit chun laʼixʼucxlacapuʼan ju lapanacni ju taxtaknitan ju Dios ni alhistʼacʼaʼitʼit. Alai va atsʼucʼutʼit tachi lakatam lhilaktsʼintaiti ixlacataʼan ju yuʼunch ju alhistʼacʼatʼit. 4 Chai acsni catalacasuchokoyach ju Cristo ju tucan xakʼai alhistacnaʼ pus ju uxijnan ju alhistʼacʼatʼit ju lapanacni ju tachi borregojni tajunita pus axtʼaknicʼanaʼitʼit ju mintalhajaʼan. Yuchi ni alakʼayakʼalhicʼanaʼitʼit. 5 Vachuʼ ju uxijnan ji tsʼalan. Aqʼuiclacʼaʼitʼit ju talhinajun lacatalhavat ju talhilacaʼanta ju Cristo. Chux ju uxijnan alaqʼuiclacʼaʼitʼit chai jantu kʼai alhicʼatsʼatʼit tuʼuʼ. Chunch alatʼit ni chani ju tsʼokcanta: Ju Dios ma na xcaji ju va talhitakʼayai tuʼuʼ. Para ma aʼaktaijui lacaʼamapaininti ju jantu tuʼuʼ talhitakʼayai. 6 Pus jantu tuʼuʼ alhitʼakʼayatʼit ni cʼatsʼayatʼit ni na tachapun ju Dios. Chai ni jantu tuʼuʼ alhitʼakʼayayaʼitʼit pus ju yuchi catalakʼayayan acsni cachinaʼ ju avilhchan ju lhcata ju yuchi. 7 Aʼunitʼit ju Dios tachi chun ju lhamakʼanininatʼit ni aktsʼiya tuʼuʼ talhiulayan. 8 Acʼatsʼanantʼit. Chai skʼala atsʼucʼutʼit. Chunch ju alatʼit ni yuchi ju lhacaticuru ju mintʼalaxcaiʼan junita. Chai ju yuchi chun lai tachi ju tuʼuʼ maktiliʼ ju tʼasai ni chavani. Ju lhacaticuru va puxcolhitʼajun tichi chavaich ju lai catʼalalhajalh. 9 Pus asamakʼantʼit ju tuchi tamapastʼacʼaniyan ju lhacaticuru. Slivasalh ixlhichux ju miʼalhunutʼan alhilacʼapʼitʼit ju Cristo. Acʼatsʼatʼitch ni vana va chun tatʼajun makʼalhkʼajnin ju aliʼin milhiʼalakʼavinʼan laʼixmacni Cristo tachi ju makʼalhkʼajnanatʼit ju uxijnan. Si chun tamakʼalhkʼajnan mas vanta anchach cava. 10 Para Dios ju aʼaktaijunun lacaʼamapaininti. Chai isʼakstu ju cataxtakniyan ixtachaput ni chunch aʼuntʼit tachi ju aktsʼiya lacasqʼuin ju yuchi. Chai yuchi ju cataʼaktaijuyan ni va tachi alhilacʼapʼitʼit ju yuchi mas va tuchi camilh. Chai cataxtakniyan ixtachaput ju yuchi. Chai cataʼaktaijuyan ni jantu tavanan alhilacʼapʼinaʼitʼit tuʼuʼ atumpa. Va yuchi ju Cristo. Chai yuchach ju tasacxtutan ni laich atʼanuyaʼitʼit ju lactʼiyan junta alin ju stavasalanti atuncunuʼ junta va jonkʼalhita. Chai lai atʼanuyaʼitʼit ju anch va ixlacaʼatalh ni lhilacʼapʼinatʼit ju Jesucristo. Anchach ju atʼanuyaʼitʼit astan acsni makʼalhkʼajnantʼit pantsʼiquis ju ani lacamunutpaʼ. 11 Yuchach ju Dios ju alin ixtachaput ju jonkʼalhita. Chach lakʼayacalh ju yuchi tus va tavananch. Chunch vasalh cava. 12 Yuchi ju Silvano ju catalhiʼaniyan ju ani ju iclaʼatsʼoknuniyau ju uxijnan. Ju quitʼin icnajun ni yuchi ju quilakʼauʼan ju lai lhilaksican. Pus va lacatsʼunin ju iclaʼatsʼoknuniyau. Iclamapʼaksiyau. Chai iclajunauch ni stavasalanti ju xaclajunau acsni iclajuniu ni chunch ju quintapuʼaktaijun ju Dios laʼixʼamapaininti. Pus va tachi alhilacʼapʼitʼit ju yuchi. 13 Pus ju vachuʼ talhilacaʼanta ju Cristo ju ani tavilanalh lakʼachakʼan Babilonia asacxtuta vachuʼ ju Dios tachi ju tasacxtutan ju uxijnan. Ju yuʼunch chai ju Marcos taʼamacʼaminin. Ju Marcos tachi ju va quintsʼalh iclaktsʼin. 14 Alamacʼamitʼit ju pumatamin lacaʼamapaininti. Ictapainini ju Dios ni cataʼaktaijuyan ni jantu calacʼalh ju miʼalhunutʼan tachi chun ju uxijnan ju lhilacʼapʼinatʼit ju Jesucristo. Chunchach vasalh cava.
1 Ju quitʼin icSimón Pitaluʼ. Ju quitʼin xalapanac icjunita laʼixmacni ju Jesucristo. Chai ixtamalakachan icjunita. Va iclamacʼamiyau ju uxijnan ju taʼaktaijutan ju Dios ni laich vachuʼ xalhilacʼapʼinatʼit ju Jesús. Pus ju quijnan chai vachuʼ ju uxijnan na tuʼuʼ lhiulayau ni lai lhilaksiyau ju Dios. Pus ju quiDiosʼan chai ju quiʼamakʼalhtaxtunuʼan Jesucristo sok tanavi acsni talacasqʼuin ni takʼalhtaxtuyau acsni lhilaksiyau ju Jesús. 2 Pus ictapainini ju Dios ni palai lhu catanavinin lamapainin chai palai cataʼaktaijuyan ni jantu calacʼalh ju miʼalhunutʼan. Chai chunch ju catapasayaʼ lamiʼatsucuntiʼan ni palai amispʼayaʼitʼit ju Dios chai ju quiʼucxtinʼan Jesucristo. 3 Ju Dios na tachapun. Chai yuchach ju quintaʼaktaijuyan laquiʼatsucuntiʼan ni lai tsucuyau tachi ju kʼachani ju yuchi mas va tuchi catapasalh. Chai quintaʼaktaijuyan va ixlacata ni mispayauch ju Cristo. Pus acsnich ju xalhilacaʼanau ju yuchi acsni quintamacʼatsanitan ni yuchach ju xakʼai tucan chai slivasalh na kʼox. 4 Chai ni chunch junita ju Cristo pus vachuʼ quintaxtaknitan ju ixchivinti ju slivasalh na kʼox chai lhitapalai. Chai va ixlacaʼatalh ni lacaʼiniyau ju ixchivinti ni aquintaʼaktaijuyan pus laich macaju ju macxcai ju alin ju ani lacamunutpaʼ va ixlacaʼatalh ju macxcai quiʼatalacpastʼacʼatʼan. Vachuʼ lai cakʼachanikʼoyau tachi chun ju taxtokni ju vachuʼ kʼachani ju Cristo. 5 Pus ni chunch aquintaʼaktaijuyan ju Cristo ni lhilacaʼanauch ju yuchi pus tasqʼuini ni ixlhichux quiʼalhunutʼan canaviu cuenta ta yu lai soknicʼa cava ju quiʼatsucuntiʼan. Chai ni soknicʼa ju quiʼatsucuntiʼan pus tasqʼuini ni cacʼatsau tamalhch ju kʼox lhiulai ju Cristo chai tamalhch ju jantu. 6 Chai ni cʼatsayauch tamalhch ju kʼox lhiulai ju Cristo chai tamalhch ju jantu kʼox pus tasqʼuini ni cakʼaichokocau quiʼakstuʼan. Chai ni cakʼaichokocau quiʼakstuʼan pus tasqʼuini ni vachuʼ catastucniyau ju quimakʼalhkʼajnatʼan chai jantu jeks caʼuniu. Chai ni catastucniyau ju quimakʼalhkʼajnatʼan chai jantu jeks caʼuniyau pus tasqʼuini ni vachuʼ stunin canavinikʼoyau ju ixkʼachat ju Dios. 7 Chai ni stunin canavinikʼoyau ju ixkʼachat ju Dios pus tasqʼuini ni vachuʼ camapainiyau ju vachuʼ talhilacaʼanta ju Cristo. Chai ni camapainiyau ju vachuʼ talhilacaʼanta ju Cristo pus tasqʼuini ni vachuʼ camapainiyau ju aliʼin lapanacni. 8 Chai ni chunch junita ju quiʼatsucuntiʼan chai ni va tachi palai chunch catasuyaʼ pus aktsʼiya lhitapalai ju quiʼatsucuntiʼan. Chai ni mispayauch ju Jesús pus ju yuchi aquintaxtakniyan ju ixtachaput ni laich canaviyau ju ixlhichʼalhcat. 9 Para ju tam lapanac ju jantu chun junita ju isʼatsucunti pus na tsʼistacaʼ ju laʼixʼalhunut. Lana jantuch pastacpalai ta yu ixjunita ju isʼatsucunti ju makʼanchich. Jantu vasalh laʼixlhichux ixʼalhunut lhilacaʼamputun ju Dios. Va captach ni xacʼanicanta ju ixʼalactuʼunti ju xanavi. 10 Pus ji quiʼalakʼavin yuchi alhitʼalacʼasutʼit laʼixlhichux miʼalhunutʼan ni vasalh tasacxtutan ju Dios chai talhcaʼulatan ni isʼaskʼatʼan aʼunaʼitʼit. Chai ni tasui lamiʼatsucuntiʼan tachi chun ju ani taxtokni pus jantu atʼitsʼankʼatʼit. 11 Chai ni chunch junita ju miʼatsucuntiʼan pus slivasalh lhikʼach atʼanuyaʼitʼit ju lactʼiyan junta lhinajun ju quiʼucxtinʼan chai quiʼamakʼalhtaxtunuʼan Jesucristo. Chai ju yuchi jonkʼalhita ucxtin. 12 Pus yuchi va tachi aclalhimapastʼacʼaniyau junima taxtokni. Chunch aclayaʼ mas mispʼayatʼitch chai ixlhichux miʼalhunutʼan lhilacʼapʼintʼatʼit ju stavasalanti ju masunicʼantʼatʼit. 13 Chai iccʼatsai ni lhijunch ni aclamalacpucujuchokoch ju lamintacʼatsanʼan acsni iclamapastʼacʼaniyau ju ani taxtokni. Chai chunch aclanaviyau ni ictitʼajuncaʼ. 14 Pus iccʼatsai ni jantu makʼan actitsuculh ni chunch ju quimavasalanilh ju quiʼucxtinʼan Jesucristo. 15 Chai vachuʼ ixlhichux quiʼalhunut acpuxcoyaʼ ta yu laich va tachi apʼastʼacʼaʼitʼit ju ani taxtokni mas acniyach. 16 Acsni xaclajunau ni yuchi tucan ju xakʼai ju quiʼucxtinʼan Jesucristo chai ni caminchokoyaʼ ju yuchi jantu xaclajunau ixchivinti ju tam lapanac ju va isʼakstu calakʼoxi ni tachi ju va stavasalanti catasu. Ju quijnan iccʼatsayau ni xakʼai ju Jesucristo ni laquilakchulh quincʼan ju iclaktsʼiuch ni chunch junita. 17 Pus iclaktsʼiuch ni xlapʼapʼapʼa talacasu ju ixlacatuna. Chai icpumachakxauch ni vasalh chunch junita. Chai ickʼasmatvich acsni chivinilh ju Dios. Tus lactʼiyan mincha ju ixchivinti chai naulh ni xakʼai junita ju Jesús acsni chani naulh: “Yuchach ju ani ju quintsʼalh ju na icmapaini. Na kʼox iclhiulai ju yuchi”. Chunch naulh ju Dios. 18 Chai ju quijnan ickʼasmatvich ju anuʼ chivinti ju mincha lactʼiyan acsni kʼaixtam xactʼavilau ju Jesús ju anuʼ akstijun junta isacxtuta ju Dios ni anch camavasalayanta ni vasalh xakʼai ju istsʼalh. 19 Ju makʼaniya ixlapanacni Dios na lhu chivinti ixtanajun ixlacata ju tuchi catapasayaʼ astan. Chai ju chavai iclaktsʼiuch ni stavasalanti ju tuchi ixtanajun. Chai na kʼoxich tachi ju naviyatʼit ni na naviyatʼit cuenta ju ani ixchivintiʼan. Ju yuʼunch quintamalacpucujun junta jantucaʼ lai ixmachakxayau. Chai tasqʼuini ni va tachi anavitʼit cuenta ju ixchivintiʼan tus acsni cachinchokoyaʼ ju Cristo. 20 Para ju tucan tasqʼuini yuchi ni amachʼakxatʼit ju ani. Matiʼ tuʼuʼ ju ixchivinti Dios ju ixtanajunch makʼanch ju camavasala ju va isʼakstu tam lapanac. 21 Jantu lai chunch catilalh ni matiʼ ixchivinti Dios ju va ixtalakʼoxinti lapanac cava. Para ixlapanacni Dios tachivinilh tachi ju ajunilh ju Spiritu Santu.
1 Para ju makʼanchich ixtaʼalin vachuʼ ju sia yuʼunch ju quintʼaʼisraelitanin ju va ixtatalacasui tachi ju yuʼunch ju ixtanajun ixchivinti Dios mas jantu. Pus vana va chun ju lamilhiʼuxijnan. Caʼalinaʼ ju aʼokxchokʼoni amamakaʼunin. Ju yuʼunch va catanonaʼ tuʼuʼ tachi ju va stavasalanti para va aʼokxchokʼonti chivinti junita. Ju yuʼunch jantu vas tachivinin acsni tanajun ixlacata ixʼucxtinʼan Jesús ju amakʼalhtaxtunulh. Pus ju chunch isʼakstuʼan tapuxcolakxtui ju ixmakʼalhkʼajnatʼan ju vatsʼalhti cachinaʼ. 2 Chai na pumalhu vachuʼ va lhilakachapui catatsucuyaʼ tachi ju talai ju aʼokxchokʼoni amamakaʼunin. Chai yuchi macxcai chivinti calhichivincanaʼ ju ixti Dios mas stavasalanti ju yuchi. 3 Chai ni na talhacchaʼaniyan pus cataʼaʼokxchokʼomaxtuniyan ju mintuminʼan laʼixchivintiʼan. Pus ni akʼasmatnitʼit tachi ju va stavasalanti alhiulatʼit. Para makʼanchich ixʼamucʼanicanta ixtalakʼalhinʼan chai aktsʼiya caʼalinaʼ ju ixmakʼalhkʼajnatʼan ju jonkʼalhita. 4 Pus ju Dios jantu amacʼacxanilh ju anquilhnin ju na taʼalactuʼunulh. Para amacaʼancalh ju lacajipi. Alacchʼimacaʼalh lacaʼatatsʼisni. Anchach alacmakʼacanta tus acsni camakʼosaspitcanach. 5 Chai jantu amacʼacxanilh ju makʼaniya lapanacni. Va yuchi ju makʼalhtaxtulh ju Noé ju ajuni ju lapanacni ixlacata ju soknicʼa atsucunti. Vachuʼ amakʼalhtaxtulh ju aliʼin ixpumatujunʼan lapanacni. Tatakʼalhtaxtulh acsni milh ju akmuxtut ju ixlhilacaputsʼun ju lacamunutpaʼ. Tatsʼankʼakʼo ju jantu ixtatalhoni ju Dios. 6 Vachuʼ ju Dios amucʼanilh ixtalakʼalhinʼan ju amachakʼan lakʼachakʼan Sodoma chai Gomorra acsni amaclalh. Va lhcʼacʼa va ju anuch lakʼachakʼanixni. Chunch ju navilh ju Dios ni va capuʼamalacpastacniyaʼ ju catatsucuyaʼ astan ju jantuch catatalhoniyaʼ ju Dios. 7 Para ju Dios amakʼalhtaxtulh pumatam lapanac ju Lot ixjuncan. Ju yuchi ixchaʼanta ju lakʼachakʼan Sodoma chai na soknicʼa ixjunita ju isʼatsucunti ju yuchi laʼixmacni Dios. Ju yuchi na jeks ixtamavatach va ixlacaʼatalh ju macxcai alactuʼunti ju ixtanavi ju yuʼunch ju jantu tuʼuʼ ixtalhiulai ju lhamapʼaksin. 8 Pus ju anuʼ lapanac ju Lot ixjuncan ni na va soknicʼa ixjunita ju isʼatsucunti laʼixmacni Dios chai ni anch ju ixtʼajun ju lakʼachakʼan Sodoma pus va tachi ixʼamakʼaninin. Va ixlhiʼamakʼaninin ju tuchi islaktsʼin chai tuchi iskʼasmatʼa ju ixtanavi ju amachakʼan anch ni lana jantu tuʼuʼ ixtalhiulai ju ixlhamapʼaksin Dios. 9 Pus ju Dios ni amakʼalhtaxtulh ju Noé chai ju Lot pus tasui ni cʼatsai ju Dios ta yu laich capumakʼalhtaxtuyaʼ ju tatalhoni ju yuchi acsni amapastʼacʼanican ju tuʼuʼ alactuʼunti. Ju Dios vachuʼ cʼatsai ta yu lai capumakʼayaʼ ju alactuʼunin tus acsni cachinaʼ ju avilhchan acsni camakʼosaspitcanach ju lapanacni. Chai mas tucaʼ chin ju anuʼ avilhchan amamakʼalhkʼajni. 10 Para palai catamakʼalhkʼajnanaʼ ju yuʼunch ju va tanavini ju macxcai ixkʼachat ixlacatunaʼan. Va lhitsʼisita tanavi. Jantuch tuʼuʼ talhiulai ju lhamapʼaksin. Jantu xamatiʼ tatalhoni. Jantu lai talacaʼi. Jantu tatalhoni ixlhichivininca ju amacxcai ju tavilanancha ju lactʼiyan. 11 Para ju anquilhnin jantu macxcai talhiʼachivimakʼan ju chunch talai. Jantu tajuni ju quiʼucxtinʼan Dios. Jantu chun talai ju anquilhnin mas palai tachapunin ju yuʼunch chai palai xalackʼajin. Palai jantu ju va lapanacni. 12 Ju tuʼuʼ atapacxat yuchi lhiʼalin ni laich cachʼapacalh chai laich camaknicalh. Chai talakʼan ju tuʼuʼ skʼapa ju aʼulanican. Pus vana va chun ju anuch lapanacni. Chunch ju tatsucui tachi ju tuʼuʼ tonto atapacxat. Isʼakstuʼan tapuxcolakxtui ixmakʼalhkʼajnatʼan junta jonkʼalhita ni na macxcai talhichivinin ju tavilanancha ju lactʼiyan mas jantu tamachakxai ta talhijunitach. 13 Cataʼamaklhtayananaʼ ju ixtalhajaʼan ixʼalactuʼuntiʼan. Ju yuʼunch na kʼoxich talhiulai acsni va lhilakachapuʼ talai mas tuncuj. Ju yuʼunch chunch tajunita tachi ju tuʼuʼ lhquiliqui. Tachi ju tuʼuʼ ju na takʼalhitach. Ju yuʼunch va tachi taʼalactuʼunun chai na kʼox talhiulai acsni taʼokxchokʼoyan ju uxijnan acsni va kʼaixtam tatʼavenan tachi ju va vasalh miʼalakʼavinʼan tajunita. 14 Ju yuʼunch acsni talaktsʼin tam atsiʼ va ixʼalactuʼuntiʼan tapastʼacʼa. Va tachi taʼalactuʼunun laʼixlakchulhʼan. Va taʼokxchokʼoi ju apumatam ju jantu lai kʼaichokocan isʼakstu. Na talanitach ixlhacchaʼantiʼan. Pus ju yuʼunch aktsʼiya camamakʼalhkʼajnikʼalhicanaʼ. 15 Ju yuʼunch tamacajuntach ju ti ju soknicʼa. Tatsʼankʼatach. Chunch ju talai tachi ju lalh ju makʼaniya lapanac ju Balaam ixjuncan. Istsʼalh ju Beor. Ju yuchi kʼox ixlhiulata ju tumin ju ixlhajalh ni laich cava ixnavilh ju macxai. 16 Para ju yuchi kʼajicalh ixlacata ixʼalactuʼunti. Pus ju puru ju ixpuʼanta xakʼala. Chivinilh tachi ju tam lapanac. Manunilh ixtalhanti laʼixʼalhunut ju anuʼ lapanac ju ixnajun ixchivinti Dios ni jantu catailhiʼalh ju ixlhilakachapuʼ. 17 Pus ju anuch alactuʼunin lapanacni chunch tajunita tachi ju tuʼuʼ pos ju lhilaksican ni laich caʼicalh ju xcan. Para va puxixta. Pus vana va chun ju yuʼunch. Jantu lai alhilaksican ni tuʼuʼ kʼox chivinti aquijunilh. Chai chunch tajunita tachi ju tuʼuʼ ataputsʼi ju vaklhun alacmatsʼalatʼoncan lacaʼun. Jantu tavanan lhimin ju xcan. Pus ju yuʼunch vachuʼ va taʼaʼokxchokʼonun. Para makʼacanta ixlacataʼan junta jonkʼalhitach atatsʼisni. 18 Slivasalh na cʼus tachivinin ju yuʼunch mas jantu tuʼuʼ nomputun ju ixchivintiʼan. Tapuʼokxchokʼoi ju ixtʼalapanacniʼan ju va ancaʼ tamacaulh ju aliʼin ixtʼalapanacniʼan ju pʼulhnan na ixtatʼaʼalactuʼunun. Tanajun ni laich navican ju macxcai ixkʼachat ju quilacatunaʼan. 19 Ju yuʼunch taʼajuni ju lapanacni ni laich catanavi va tuchi tanaviputun. Para isʼakstuʼan jantu lai chunch tanavipalai. Jantu lai tanavi ju kʼox. Va yuchi ju alactuʼunti ju tanavi ni va yuchi ju alin laʼixʼalhunutʼan. Pus ju tuchi alin laquiʼalhunutʼan yuchi ju va tsa tsa naviputunau laquiʼatsucuntiʼan. 20 Ni xamatiʼ camacaulh ju alactuʼunti ju alin ju lacamunutpaʼ va ixlacaʼatalh ni mispaich ju quiʼucxtinʼan chai quiʼamakʼalhtaxtunuʼan Jesucristo para ni aktam catanuchokopa lacaʼalactuʼunti chai calhinonchokopa laʼisʼatsucunti ju macxcai ju alin laʼixʼalhunut pus palai takʼalhi ju isʼatsucunti. Palai jantu chun ixjunita acsni tucaʼ ismispai ju Jesús. 21 Palai kʼox ixva ni jantu tavanan ismispa ju xati ju kʼox atsucunti. Palai macxcai ni mispaich chai astan va macajun ju ixlhamapʼaksin Dios ju ixtaknicanta. 22 Pus ni va astaniya macajun ju ixlhamapʼaksin Dios pus vasalh chunch xajcha laʼisʼatsucunti tachi ju noncan junta chani najun: “Ju xkʼoi laich uchokoi ixpʼatʼat. Chai ju pʼaxni mas acpaxa catatʼaspitchokoyaʼ lacapulhkʼom”.
1 Ji quiʼalakʼavin iclajumputunau ju ani. Ju ani yuchi ju ixlhilakatʼui alhiqui ju iclaʼatsʼoknuniu. Chai chux lakatʼui alhiqui iclapumalacpucujuchokoputunau ju salaka mintacʼatsanʼan. 2 Pus ju makʼaniya lapanacni ju ixtanajun ixchivinti Dios na lhu chivinti ixtanajun. Chai ju quijnan ju ixtamalakachan Jesús icjuntau iclajuntau na lhu ixchivinti ju quiʼucxtinʼan chai quiʼamakʼalhtaxtunuʼan Jesús. Pus iclaʼatsʼoknuniu ni laich aclamapastʼacʼaniyau ju tuchi iclajuntau chai tuchi ixtanajun ju makʼaniya lapanacni. 3 Pus pʼulhnan acʼatsʼatʼit ju ani. Acsni vanin minta ju avilhchan acsni caminchokoyaʼ ju Cristo pus cataʼalinach ju lapanacni ju catalhitsʼiʼinaʼ ixtaxtokni Dios. Chai catanaviyaʼ ju macxcai ixkʼachat ixlacatunaʼan. 4 Chai chani catanonach: “Tajuch ni jantuch min ju Jesús ni sala najunta ni caminchokoyaʼ. Tus acsni tanita ju milacpaʼitniʼan jantu tuʼuʼ tapaxata. Chunch ju tailhiʼancanta tachi ju ixjunita tus acsni navicantachalhch ju lacamunutpaʼ”. Chunch ju catanonach. 5 Para alin tuchi ju tacapputun. Ju yuʼunch tacʼatsai ni laʼixchivinti Dios alilh ju lactʼiyan ju makʼanchich. Chai ju xcan ju ixma ju ani lacamunutpaʼ ju Dios punavilh ju lacatʼun. 6 Pus ju yuʼunch tanajun ni jantu tuʼuʼ tapaxata para va tacapputun ni akmuxtucalh ju lacamunutpaʼ ju ixʼalin ju acsnich chai ju lapanacni tanitajukʼolh ju lacxcan. 7 Pus ju lactʼiyan chai ju lacatʼun ju alin ju chavai vana laʼixchivinti Dios ju makʼacanta tus acsni calacxavacanach. Makʼacanta tus acsni cachinach ju avilhchan acsni camakʼosaspitcanach ju lapanacni chai acsni camacaʼancanaʼ laʼixmakʼalhkʼajnatʼan ju yuʼunch ju jantu tatalhoni ju Dios. 8 Pus ji quiʼalakʼavin jantu acʼaptʼit ni jantu chun putekʼeʼanta ju Dios ju avilhchan tachi ju quijnanʼan. Ju yuchi lhilhcai tam avilhchan tachi ju tam milh cʼata cava. Chai ju tam milh cʼata ju yuchi lhilhcai tachi ju va lakatam avilhchan cava. 9 Jantiyuʼ ni va jantu sai camimputulh ju quiʼucxtinʼan Cristo tachi ju quintakʼalhtasunitan. Jantu chun lai mas chun tanajun ju aliʼin. Para ju yuchi lacsni quintalhiʼanan. Jantu lacasqʼuin ni xamatiʼ catitsʼankʼa. Ju yuchi lacasqʼuin ni chux tamch catapastaclh chai catalhilacaʼalh ju yuchi. 10 Ju tam akʼalhonaʼ chin ju tsʼis acsni jantu cʼatsacan ni lai cachilh. Pus vana va chun cajunaʼ ju anuʼ avilhchan acsni caminchokoyaʼ ju Cristo chai caʼamakʼosaspitkʼocanaʼ ju lapanacni. Jantu xamatiʼ cacʼatsayaʼ ni acsnich ju lai camilh ju yuchi. Chai ju acsnich na pʼas camacatʼonaʼ acsni catsʼankʼayaʼ ju tʼiyan. Chai tachi chun ju taxtokni na scacata catajunaʼ chai cataxtʼajkʼoyaʼ. Chai ju lacatʼun chai tachi chun ju alinch ju anch calhcukʼoyaʼ. 11 Pus ni catsʼankʼakʼoyaʼ tachi chun ju ani taxtokni pus tasqʼuini ni salaka aʼuntʼit lamiʼatsucuntiʼan. Chai atʼalhonitʼit ju Dios. 12 Tasqʼuini ni apʼacxantʼaʼitʼit ju Cristo chai slivasalh alacʼasqʼuintʼit ni vatsʼalhti cachilh ju anuʼ avilhchan acsni caminchokoyaʼ ju quiʼucxtinʼan Cristo chai caʼamakʼosaspitcanach ju lapanacni. Pus ju acsnich calhcukʼoyaʼ ju tʼiyan. Catsʼankʼakʼoyaʼ. Chai ju xataxtokni ni na cascacayaʼ pus caxtʼajkʼoyaʼ. 13 Para ju quijnanʼan pacxantaitauch ju sastʼi tʼiyan chai ju sastʼi lacatʼun tachi ju quintakʼalhtasunitan ju Dios. Chai ju anch va si salaka cajunaʼ. 14 Ju uxijnan ji quiʼalakʼavin ni pʼacxanatʼit ju Cristo ni caminchokoyaʼ chai catasastʼichokoyaʼ ju tʼiyan chai ju lacatʼun pus ixlhichux miʼalhunutʼan alhistʼaccʼantʼit. Ju chunch acsni caminchokoyaʼ ju yuchi pus jantu lhquiliqui cajunaʼ ju miʼatsucuntiʼan. Alai salaka cajunaʼ laʼixmacni ju yuchi. Vachuʼ catalaktsʼinan ju Dios ni jantu va atʼalakʼaitʼonatʼit ju aliʼin. 15 Amachʼakxatʼit ni yuchi jantu sai lhiminta ju Cristo ni va lacasqʼuin ni palai lhu catatakʼalhtaxtulh ju lapanacni chai jantu cataʼalh ju lacajipi. Chai vana va chun ju taʼatsʼoknunitan ju quilakʼauʼan Pablo ju na mapainiyau. Chunch ju atsʼoknunta ju yuchi ni Dios ju xtaknilh ju kʼox ixtacʼatsan. 16 Chai vana va chun ju lhichivinin ju ixʼamapaininti Dios laca aliʼ ixʼalhiqui ju atsʼoknunta ju Pablo. Chai laʼixʼalhiqui ju yuchi na alin ju chivinti ju na xcai machakxacan. Chai ju jantu kʼox tamachakxai chai ju va tam tam tanajun pus mas tamachakxai para tanajun ni jantu chun nomputun ju ixchivinti. Chunch tanajun ni va jantu tanaviputun. Chai chunch vachuʼ taʼulhtui ju aliʼ ixchivinti Dios ju tsʼokcanta. Para ju chunch talai catatsʼankʼakʼalhiyaʼ. 17 Para ju uxijnan ji quiʼalakʼavin ni cʼatsʼayatʼit ni chunch ju talai ju yuʼunch ju va taʼaʼokxchokʼonun pus alhistʼaccʼantʼit. Jantu xcai ni aʼokxchʼokʼocʼantʼit laʼixchivintiʼan ju anuch alactuʼunin lapanacni. Chai ju chunch va acʼapʼaʼitʼit ju tuchi pʼas lhilacʼapʼinatʼit ju chavai. 18 Alai va palai lhu amachʼakxatʼit ju lamapainin ju quintanaviniyan ju Dios. Chai palai amispʼatʼit ju quiʼucxtinʼan chai quiʼamakʼalhtaxtunuʼan Jesucristo. Chach lakʼayacalh ju yuchi ju chavai chai tus va tavananch. Chunch vasalh cava.
1 Ju Jesús ixtʼajun acsni tucaʼ ixʼalin ju lacamunutpaʼ. Para ju quijnan ickʼasmatʼauch ju ixchivinti chai iclaktsʼintauch ju yuchi laquilakchulh quincʼan. Va tsa tsa xaclaktsʼinauch acsni ixvi ju ani lacamunutpaʼ. Chai iclakchaʼauch ju yuchi laquimacaʼ quincʼan. Ju yuchi xtʼakʼa ju kʼox atsucunti. Chai quintamamachakxanin ta yu junita ju ixʼalhunut ju quimpaiʼan Dios. 2 Chai ju yuchi ju lai xtʼakʼa ju kʼox atsucunti quitsucuchilh ju ani. Chai iclajunauch ni vasalh iclaktsʼiuch ju quijnan. Chai iclajunau ixlacata ju yuchi ju lai xtʼakʼa ju kʼox atsucunti. Ju yuchi va jonkʼalhita. Ju yuchi ixtʼavilhcha ju quimpaiʼan Dios chai lapanac quitsucuchilh ju ani lacamunutpaʼ. 3 Chai ju tuchi iclaktsʼintauch chai ju ickʼasmatʼauch pus yuchach ju iclajunau ju uxijnan. Ju chunch ju uxijnan vachuʼ aʼunaʼitʼit ixʼamigojni ju quimpaiʼan Dios chai ju istsʼalh ju Jesucristo juncan. Tachi ju quijnan ni ixʼamigojni icjuntau vachuʼ. 4 Pus va iclacasqʼuinau ni slivasalh akʼachʼanaʼitʼit. Yuchi iclalhiʼatsʼoknuniyau ju ani taxtokni. 5 Pus ju ani chivinti ju aclajunau ju uxijnan yuchi ju quintajuntan isʼakstu ju Jesús. Ma va yuchi ju atuncunuʼ ju alin junta vilhcha ju Dios. Nin lacatsʼunin ma matiʼ ju atatsʼisni. 6 Pus ju quijnanʼan taʼaklhtamat canaju chai jantu vasalh canaviu ju stavasalanti ni canaju ni ixʼamigojni Dios juntau para ni va alactuʼununau. Ju chunch tachi ju va tsʼistacaʼ laquiʼalhunutʼan ni jantu lai sok anau. 7 Pus junta vilhcha ju Dios si atuncunuʼ junita. Chai ju quijnanʼan ni naviyau ju kʼox pus tachi ju va putuncujun junita laquiʼalhunutʼan. Chai ju chunch kʼox ixʼamigojni juntau ju aliʼin ju vachuʼ talhilacaʼanta ju Cristo. Chai ju chunch vachuʼ quintaxacanikʼoyan tachi chun ju macxcai laquiʼalhunutʼan va ixlacaʼatalh ni nilh ju Jesucristo istsʼalh Dios ju quilacataʼan. 8 Para ni va canaju ni matiʼ ju quiʼalactuʼuntiʼan pus va okxchokʼocanau quiʼakstuʼan. Jantu nonau ju stavasalanti. 9 Para ni cajunkʼoju tachi chun ju quiʼalactuʼuntiʼan ju Dios pus ju yuchi aquintamacʼacxaniyan ju quiʼalactuʼuntiʼan chai aquintaxacanikʼoyan tachi chun ju amacxcai. Pus ju yuchi aktsʼiya muctaxtui tuchi najunta. Chai soknicʼa ju navi acsni quintamacʼacxaniyan ju quiʼalactuʼuntiʼan. Pus lai quintamacʼacxaniyan ju quiʼalactuʼuntiʼan va ixlacaʼatalh ni quinichilh ju Cristo ju quilacataʼan. 10 Para ni va canaju ni jantu alactuʼununau pus tachi ju va nonau ni taʼaklhtamat najun ju Dios chai lana jantu lacaʼiniyau ju ixchivinti.
1 Ju uxijnan tachi ju va quiʼaskʼatʼan untʼatʼit. Chai jantu iclacasqʼuin ni alactʼuʼununtʼit. Yuchi iclalhiʼatsʼoknuniyau ju ani. Para ni caʼalactuʼunulh tam xamatiʼ pus alin ju quintaʼaktaijuyan laʼixmacni quimpaiʼan Dios. Yuchi ju Jesucristo ju na soknicʼa ju isʼatsucunti. 2 Chai ju yuchi acsni tavanan nilh pus matanʼula ixʼalhunut ju Dios ixlacata ju quiʼalactuʼuntiʼan acsni mapalalh ju quiʼalactuʼuntiʼan. Chai jantu va quilacata quiʼakstuʼan ju nilh para vachuʼ ixlacata tachi chun ju lapanacni ju ani lacamunutpaʼ. 3 Chai cʼatsayau ni mispayauch ju Dios acsni quiclacaʼiyau ju ixlhamapʼaksin ju yuchi. 4 Para ni xamatiʼ canonaʼ ni mispai ju Dios para ni jantu quiclacaʼi ju ixlhamapʼaksin pus ju yuchi va taʼaklhtamai. Jantu najun ju stavasalanti. 5 Para va tichi chavaich ju quiclacaʼi ju ixchivinti Dios putasui ni ixlhichux ixʼalhunut ju mapaini ju Dios. Chai chani ju lhicʼatsayau ni vasalh va lakatam tʼajuntau ju Cristo. 6 Va tichi chavaich ju najun ni va lakatam tʼajunita ju Cristo tasqʼuini ni catsuculh tachi ju ixtʼajun ju yuchi acsni ixtʼajun ju ani lacamunutpaʼ. 7 Quiʼalakʼavin jantu iclaʼatsʼoknuniyau tuʼuʼ sastʼi lhamapʼaksin acsni iclajunau ni alamapʼainitʼit. Alai yuchi ju aktsʼiya mispʼayatʼit tus acsni tavanan lhilacʼapʼitʼit ju Cristo. Chai yuchi ju chavai ju iclajunchokopalau. Pus ju anuʼ lhamapʼaksin ju aktsʼiya mispʼayatʼit yuchach ju chivinti ju iskʼasmatʼatʼit tus acsni tavanan lhilacʼapʼitʼit ju Cristo. 8 Para mas chunch ca aktsʼiya laich acnaulh ni sastʼi junima lhamapʼaksin ju iclajunau. Tachi ju va sastʼi ixjunita acsni quintaxtaknitan ju Jesús. Chai ju uxijnan amaklhtʼayanantʼatʼit ju anuʼ lhamapʼaksin tachi ju va sastʼi. Chai vasalh sastʼi junita ni tam xajun ju quiʼatsucuntiʼan ni mispayau ju Dios ju vasalh quintamalacpucujunitan quintacʼatsanʼan. Tʼajun tapasanaʼ ju anuʼ avilhchan acsni na tsʼista ixjunita laquintacʼatsanʼan ni na ixʼalactuʼununau. 9 Para ju najun ni vasalh lhilacaʼanta ju Cristo para ni va xcaji ju tam ixlhilakʼau laʼixmacni Cristo pus ju yuchi aktsʼiya tsʼistacaʼ laʼixtacʼatsan ni vanach navi ju macxcai. 10 Para ju tʼalamapaini tam ixlakʼau pus ju yuchi alhtanan lacaʼatuncunuʼ ni navi ju kʼox chai jantu tuʼuʼ alin ju laʼisʼatsucunti ju lai capukʼalhkʼoslh apumatam. 11 Va tichi chavaich ju xcaji ju tam ixlakʼau pus aktsʼiya na tsʼistacaʼ ju laʼixtacʼatsan ni va axcayanan. Lana lacaʼatatsʼisni ju tʼajun chai jantu cʼatsai taʼanchach ju cachaʼanaʼ ju laʼisʼatsucunti. Jantu lai cʼatsai ni na va tsʼista ju laʼixtacʼatsan ni va axcayanan. 12 Ju uxijnan tachi ju va quiʼaskʼatʼan untʼatʼit. Chai ni macʼacxanicʼantʼatʼit ju miʼalactuʼuntiʼan va ixlacaʼatalh ni lhilacʼapʼintʼatʼit ju Jesús pus yuchi iclalhiʼatsʼoknuniyau ju uxijnan. 13 Chai ju uxijnan ji quiʼacucun mispʼayatʼit ju Cristo ju tʼajun tus acsni maticaʼ ixjunita ju lacamunutpaʼ. Chai yuchi iclalhiʼatsʼoknuniyauch ju uxijnan. Chai ju uxijnan ji paitat lapanacni tʼalalhaʼatʼatʼit ju lhacaticuru. Chai yuchi iclalhiʼatsʼoknuniyauch ju uxijnan. Chai ju uxijnan ji quiʼaskʼatʼan mispʼayatʼitch ju quimpaiʼan Dios. Chai yuchi iclalhiʼatsʼoknuniyauch ju uxijnan. 14 Chai ju uxijnan ji kʼaya lapanacni mispʼayatʼit ju Cristo ju tʼajun tus acsni maticaʼ ixjunita ju lacamunutpaʼ. Chai yuchi iclalhiʼatsʼoknuniyauch ju uxijnan. Chai ju uxijnan ji paitat lapanacni lai sastʼucʼatʼit ju macxcai chai slivasalh mispʼayatʼit ju ixchivinti Dios chai tʼalalhaʼatʼatʼitch ju lhacaticuru. Chai yuchi iclalhiʼatsʼoknuniyauch ju uxijnan. 15 Jantu va yuʼ ju anavitʼit cuenta ju xataxtokni ju ani lacamunutpaʼ. Nin yuchi ni akʼachʼanitʼit tachi ju talai ju amachakʼan ju ani lacamunutpaʼ ju jantucaʼ talhilacaʼanta ju Jesús. Pus va tichi chavaich ju va yuchi canavi cuenta ju xataxtokni ju ani lacamunutpaʼ pus ju chunch tasui ni jantu slivasalh ni camapaini ju Dios. 16 Tachi chun ju taxtokni ju takʼachani ju jantucaʼ talhilacaʼanta ju Jesús si xanavin lacamunutpaʼ tajunita. Ju yuʼunch takʼachanicaʼ tachi chun ju macxcai ju kʼachani ju quilacatunaʼan chai tachi chun ju tuʼuʼ ju lhacchaʼanau acsni laktsʼinau chai acsni va xalackʼajin jumputunau laʼixmacni ju aliʼin quintʼalapanacniʼan. Ju ani si xanavin lacamunutpaʼ tajunita. Jantiyuʼ ju quimpaiʼan Dios ju xtʼakʼa ju ani taxtokni. 17 Para ju lacamunutpaʼ catapasayaʼ. Chai chux ju xataxtokni ju ani ju na tapuxcajui ju lapanacni vachuʼ catsʼankʼayaʼ. Para va tichi chavaich ju canaviyaʼ ju ixkʼachat ju Dios caʼalinaʼ isʼatsucunti ju conkʼalhiyanta ju lactʼiyan. 18 Quiʼaskʼatʼan vaninch ju ixʼaclanti ju lacamunutpaʼ. Chai ju uxijnan kʼasmatʼatʼit ni caminaʼ ju catalacasuyaʼ tachi ju Cristo mas jantiyuʼ. Chai ju yuchi va calakʼalhiputunaʼ ju tuchi navita ju Cristo. Pus mas chavai na lhu taʼalinch ju talakʼalhiputun ju tuchi navita ju Cristo. Yuchi lhicʼatsayauch ni vaninch ju ixʼaclanti ju lacamunutpaʼ. 19 Pus ju yuʼunch ju talakʼalhiputun ju tuchi navita ju Cristo tataxtuta laquilhiquijnanʼan va ixlacaʼatalh ni jantu vasalh quilakʼauʼan ixtajunita. Pus ni lhiquijnanʼan ixtava jantu ixtataxtulh. Para yuchi talhitaxtulh ni chunch ju capucʼatsacanach ni jantu vasalh quiʼalakʼavinʼan tajunita ju anuʼ lapanacni ju talakʼalhiputun ju tuchi navita ju Cristo. Nin tachi pumatam. 20 Para ju uxijnan Cristo taxtaknitan ju Spiritu Santu chai minchuxʼan mispʼayatʼit ju ixchivinti Dios. Chai ju yuchi stavasalanti. 21 Jantiyuʼ ju iclalhiʼatsʼoknuniyau ni va jantu amispʼatʼit ju stavasalanti. Yuchach ju ixchivinti Dios. Para ju uxijnan mispʼayatʼit ju stavasalanti chai cʼatsʼayatʼit ni jantu lai stavasalanti cativa ju tuʼuʼ taʼaklhtamat. Chai yuchi iclalhiʼatsʼoknunitau ju uxijnan. 22 Pus ju taʼaklhtamat ju palai kʼai cava yuchi ni canaulh tam xamatiʼ ni Jesús jantiyuʼ ju Cristo ju ixnoncan camalakachatachilh ju Dios. Ju najun ni Dios jantu quimpaiʼan chai ju Jesús jantiyuʼ ju istsʼalh yuchach ju va lakʼalhiputun ju tuchi navita ju Cristo. 23 Va tichi chavaich ju najun ni jantu lhilacaʼamputun ju istsʼalh Dios pus jantu lai vachuʼ ixʼamigo cativa ju quimpaiʼan Dios. Para va tichi chavaich ju najun ni lhilacaʼanta ju istsʼalh Dios pus ju yuchi ixʼamigo junita ju quimpaiʼan Dios. 24 Pus ixchivinti Dios ju kʼasmatʼatʼit acsni pʼulhnan lacʼaʼitʼit pus yuchach ju alacʼaʼikʼalhitʼit. Chai ni alacʼaʼikʼalhiyaʼitʼit ixchivinti Dios ju kʼasmatʼatʼit acsni pʼulhnan lacʼaʼitʼit pus islivasalh ixʼamigojni aʼunaʼitʼit ju quimpaiʼan Dios chai ju istsʼalh. 25 Chai ju Jesucristo quintakʼalhtasunitan ni aquintaxtakniyan ju quiʼatsucuntiʼan ju conkʼalhiyanta ju lactʼiyan. 26 Iclaʼatsʼoknunitau ju ani taxtokni ni va iclajumputunau ni alin ju taʼaʼokxchokʼoputunan. 27 Para ju Cristo taxtaknitan ju uxijnan ju Spiritu Santu chai ju yuchi tʼonkʼalhi lamiʼalhunutʼan. Chai yuchi jantu lhimaktasqʼuiniyatʼit ni xamatiʼ catamasuniyan tichi chavaich ju najun ju istavasalanti chai tichi chavaich ju najun ju taʼaklhtamat chivinti. Isʼakstu ju Spiritu Santu ju catamasuniyan tachi chun ju taxtokni. Chai ju yuchi aktsʼiya najun ju stavasalanti. Jantu va taʼaklhtamat chivinti ju najun ju yuchi. Chai tachi ju tamasuniyan ju Spiritu Santu pus chunchach ju alatʼit. Kʼox ixʼamigojni aʼuntʼit ju Cristo. 28 Pus ji quiʼaskʼatʼan kʼoxich atʼalalhiʼitʼit ju Cristo. Ju chunch acsni tavanan caminchokoyaʼ ju yuchi pus lhikʼach calakʼanau chai jantu catimaxananiu laʼixʼucxlacapuʼ. 29 Ju uxijnan cʼatsʼayatʼit ni si soknicʼa navikʼojui ju Dios. Chai yuchi lai vachuʼ lhicʼatsʼayatʼit ni isʼaskʼatʼa Dios junita va tichi chavaich ju navi ju soknicʼa.
1 Alaktsʼintʼit. Slivasalh na quintamapainiyan ju quimpaiʼan Dios. Chai tasui ni vasalh quintamapainiyan ni lacasqʼuinch ni calhimispacanauch ni isʼaskʼatʼan juntau. Chai ju lapanacni ju jantucaʼ talhilacaʼanta ju Cristo jantu tacʼatsai ni isʼaskʼatʼan Dios juntau va ixlacata ni jantu tamispai ju yuchi. 2 Ji quiʼalakʼavin tachi chun ju quijnanʼan ju lhilacaʼanauch ju Cristo isʼaskʼatʼan Dios juntau ju chavai. Chai mas tucaʼ mavasalanicanau ta yu tucan cajunauch astan para cʼatsayau ni chunch cajunau tachi ju Cristo acsni tavanan caminchokoyaʼ ju yuchi. Chai chunch cajunau ju acsnich ni calaktsʼinauch ju yuchi ta yu junitach. 3 Chai tachi chun ju talhilaksi ju Cristo ni chunch catajunaʼ tachi ju junita ju yuchi pus salaka tanavitʼajun isʼatsucuntiʼan va ixlacata ni salaka junita ju isʼatsucunti ju Cristo. 4 Para tachi chun ju tanavitʼajun ju alactuʼunti tamalaclai ju ixlhamapʼaksin Dios. Pus ju jantu muctaxtui tachi ju najun laʼixlhamapʼaksin Dios pus alactuʼunti ju navi. 5 Chai ju uxijnan cʼatsʼayatʼit ni yuchi lapanac quilhitsucuchilh ju Cristo ni laich aquintaxacanikʼoyan ju quiʼalactuʼuntiʼan. Para ju yuchi jantu tavanan alactuʼunulh. 6 Pus tachi chun ju kʼox tʼalalhiʼanta ju Jesús jantu va tsa alactuʼunun. Para va tichi chavaich cava ju va tsa alactuʼunun jantu tavanan machakxata tichi lapanac ju Jesús nin calhilacaʼalh ju yuchi. 7 Quiʼaskʼatʼan tun xamatiʼ cataʼokxchokʼon. Ju va tsa navi ju soknicʼa yuchi lhinavi ni lasoknicʼanitach ju ixʼalhunut ju Dios tachi ju Cristo ni soknicʼa ju yuchi vachuʼ. 8 Para ju va tsa alactuʼunun pus isʼaskʼatʼa lhacaticuru junita. Pus ju lhacaticuru va tsa alactuʼunun tus acsni alactuʼununtacha ju makʼanchich. Para vachuʼ yuchi lhiquitsucuchilh ju ani tachi lapanac ju istsʼalh Dios ni jantuch vana tasqʼuini ni catanavi ju alactuʼunti ju talhilacaʼanta ju Cristo tachi ju amanaviniputun ju lhacaticuru. 9 Va tichi chavaich ju vasalh isʼaskʼatʼa Dios junita jantu va tsa alactuʼunun ni xtaknita ju Dios ju sastʼi isʼatsucunti. Pus jantu lai va tsa alactuʼunun ni isʼaskʼatʼa Dios junita. 10 Pus chani ju apumispacanch tichi chavaʼitnich ju isʼaskʼatʼanch Dios tajunita chai tichi chavaʼitnich ju isʼaskʼatʼan ju lhacaticuru tajunita. Pus tachi chun ju jantu tanavi ju soknicʼa chai ju jantu tamapaini tam ixlhilakʼauʼan pus jantu isʼaskʼatʼan Dios tajunita. 11 Pus tus acsni tavanan lhilacʼapʼitʼit ju Cristo kʼasmatʼachitʼit ju chivinti junta najun ni calamapainiuch ju pumatamin. 12 Jantu chun calau tachi ju lalh ju makʼaniya lapanac ju Caín ixjuncan. Ju yuchi isʼaskʼatʼa lhacaticuru ixjunita chai maknilh ju ixlakʼau. Pus ja cʼatsʼayatʼit tuchi ju lhimaknilh ju ixlakʼau. Yuchi xalhimakni ni va jantu kʼox ixjunita ju isʼatsucunti isʼakstu chai ju isʼatsucunti ju ixlakʼau na soknicʼa ixjunita. 13 Quiʼalakʼavin jantu alhamakʼaninintʼit acsni cataxcayan ju jantucaʼ talhilacaʼanta ju Cristo. 14 Ju quijnanʼan cʼatsayau ni takʼalhtaxtutauch junta jonkʼalhita makʼalhkʼajnat chai alin sastʼi quiʼatsucuntiʼan. Chai pucʼatsayau ju chunch ni mapainiyau ju quilhiʼalakʼavinʼan. Pus ju jantu mapaini ju tam ixlhilakʼau pus jantucaʼ takʼalhtaxtui lacamakʼalhkʼajnat ju jonkʼalhita. 15 Pus va tichi chavaich ju jantu catʼalalaktsʼimputulh ju tam ixlhilakʼau pus va ixtʼachunch junita tachi ju amakniniʼ. Chai ju uxijnan cʼatsʼayatʼit ni maticaʼ ju isʼatsucunti ju conkʼalhiyanta lactʼiyan ju tam amakniniʼ. 16 Ju Cristo quintamasunitan ju istavasalanti amapaininti acsni isʼakstu makʼaxtaklh ju isʼatsucunti ju quilacataʼan. Pus vachuʼ ju quijnanʼan tasqʼuini ni camakʼaxtakputuch ju quiʼatsucuntiʼan laʼixlacataʼan ju aliʼin ju vachuʼ talhilacaʼanta ju Cristo. 17 Para ju tam lapanac ju alin ixmakʼalit ju ani lacamunutpaʼ chai ni cacʼatsa ni alin ju ixmaktasqʼuinit ju apumatam ju vachuʼ lhilacaʼanta ju Cristo para ni jantu pakʼeunicʼa ixʼalhunut chai ni jantu caʼaktaijuputulh pus tas aclhinaulich ni vasalh mapaini ju Dios ju anuʼ lapanac. 18 Quiʼaskʼatʼan jantu anicʼa va calajuniu ni lamapainiyau. Tasqʼuini ni calamapainiu ixlhichux quiʼalhunutʼan chai calapumasuniu ni lamapainiyau ni laʼaktaijuyau. 19 Chai ni chunch calayau pus pucʼatsayau ni lacaʼitauch ju stavasalanti. Yuchi ju ixchivinti Dios. Chai jantu tuʼuʼ calhimakʼantalhanayau ju laquiʼalhunutʼan acsni tʼachivinau ju Dios. 20 Para mas cʼatsayau ni aktamixnin quintacʼacxnitan ju quiʼamapainintiʼan para tasqʼuini ni calhilaksiyau ju Dios. Ju yuchi cʼatsai ni vasalh mapainiyau. Ju yuchi cʼatsakʼojui tachi chun ju taxtokni. 21 Ji quiʼalakʼavin ni jantu tuʼuʼ navitau ju laich calhamakʼanininau astan pus lhikʼach lai xakʼalayau ju Dios. 22 Chai ju chunch va tuchi ixtalakxtuch ju casqʼuiniyau ju yuchi pus aquintaxtakniyan va ixlacaʼatalh ni muctaxtuyau tachi ju najun laʼixlhamapʼaksin chai naviyauch tachi ju kʼachani ju yuchi. 23 Chai yuchi ju ani ju quintajuntan ju Dios ni canaviu. Quintajuntan ni calhilaksiyau ju istsʼalh. Yuchi ju Jesucristo. Chai calamapainiuch ju pumatamin tachi ju quintalhimapʼaksitan ju Cristo. 24 Pus ju navi tachi ju najun laʼixlhamapʼaksin ju Dios pus ixʼamigo junita ju Dios chai ju Dios tʼajun laʼixʼalhunut. Pus ju Spiritu Santu ju quintaxtaknitan yuchi ju quintamavasalaniyan ni tʼajun ju Dios laquiʼalhunutʼan.
1 Ji quiʼalakʼavin jantu alacʼaʼikʼotʼit ixchivintiʼan tachi chun ju lapanacni ju tanajun ni tachivinin ixchivinti Dios. Pʼulhnan kʼox alaktsʼintʼit junta tsʼokʼulacanta ixchivinti Dios ni vasalh chunch tachi ju taʼamasuninin ju yuʼunch u jantu. Chunch anavitʼit va ixlacata ni na lhu ju tatalacasui ju ani lacamunutpaʼ tachi ju yuʼunch ju tanajun ixchivinti Dios mas jantu vasalh ni ixchivinti Dios ju tanajun ju yuʼunch. 2 Pus chani ju apʼumispʼayaʼitʼit ni vasalh ixchivinti ju Spiritu Santu ju tʼajun nonaʼ ju anuʼ lapanac u jantu. Pus tachi chun ju lapanacni ju talhilaksi ju Jesús ni yuchach ju Cristo ju ixnoncan camalakachatachilh ju Dios chai talacaʼi ni quitsucuchilh ju yuchi tachi tam lapanac ju ani lacamunutpaʼ chai ni chunch ju tajuni ju lapanacni pus putasui ni tʼajun ju Spiritu Santu laʼixʼalhunutʼan. 3 Para tachi chun ju lapanacni ju jantu talhilaksi ju Jesús chai chunch ju taʼamalaninin pus ju Spiritu Santu jantu tʼajun laʼixʼalhunutʼan ju yuʼunch. Chai ju yuʼunch va tachivinin tachi ju chivinin ju anuʼ lapanac ju talacasui tachi ju Cristo para alai va lakʼalhiputun tuchi navita ju yuchi. Chai ju uxijnan kʼasmatʼatʼit ni noncan ni caminaʼ ju yuchi. Chai mas chavai tatʼajun ju lapanacni ju ani lacamunutpaʼ ju taʼamalaninin tachi ju caʼamalaniyaʼ ju anuʼ lapanac ju catalacasuyaʼ tachi ju Cristo para alai va calakʼalhiputunaʼ tuchi navita ju yuchi. 4 Quiʼaskʼatʼan ju uxijnan isʼaskʼatʼan Dios untʼatʼit. Chai jantu taʼokxchokʼotan ju yuʼunch ju jantu vasalh ixchivinti Dios tanajun. Pus palai tachapun ju Dios ju tʼajun lamiʼalhunutʼan. Palai jantu ju lhacaticuru ju tʼajun ju ani lacamunutpaʼ. Yuchi jantu talhiʼokxchokʼoyan. 5 Pus ju yuʼunch ju jantu vasalh ixchivinti Dios ju taʼamalaninin pus va taʼalacpastacnan tachi ju taʼalacpastacnan ju jantucaʼ talhilacaʼanta ju Cristo. Chai yuchi talhichivinin ju xataxtokni ju ani lacamunutpaʼ. Chai ixlhiyuchi takʼasmatni ju aliʼin lapanacni ju vachuʼ jantucaʼ talhilacaʼanta ju Cristo. 6 Para ju quijnan isʼaskʼatʼan Dios icjuntau. Chai ju lapanacni ju tamispai ju Dios pus quintakʼasmatniyanch. Para ju jantu isʼaskʼatʼan Dios jantu quintakʼasmatniyan. Yuchi alhimispayauch tichi chavaʼitnich ju taʼamalaninin tachi ju ajuni ju Spiritu Santu chai tichi chavaʼitnich ju va taʼaʼokxchokʼonun. 7 Ji quiʼalakʼavin calamapainiu ni Dios ju xtʼakʼa ju chun atalacpastʼacʼat. Chai va tichi chavaich ju tʼalamapaini ju ixtʼalapanac pus isʼaskʼatʼa Dios junita chai mispai ju Dios. 8 Para ju jantu amapaininin pus jantucaʼ mispai ju Dios. Ju Dios ni na amapaininin. 9 Chani ju pumasunicau ju ixʼamapaininti Dios ju quilacataʼan ni malakachachilh ju Dios ju lakatami istsʼalh ju ani lacamunutpaʼ ni laich caʼalilh ju quiʼatsucuntiʼan ju conkʼalhiyanta lactʼiyan va laʼixʼaninti ju Jesús. 10 Ju Dios quintamasunitan ni slivasalh quintamapainin mas tucaʼ ixmapainiyau ju yuchi. Ju yuchi quintamapainiyan chai macamilh ju lakatami istsʼalh ju matanʼula ixʼalhunut ju Dios ixlacata ju quiʼalactuʼuntiʼan acsni tavanan nilh. Ju chunch ju yuchi mapalalh ixtapalh ju quiʼalactuʼuntiʼan. 11 Ji quiʼalakʼavin ni chunch ju quintapumapainitan ju Dios pus tasqʼuini ni vachuch calamapainiu ju quijnanʼan. 12 Jantu xamatiʼ laktsʼinta ju Dios. Para ni calamapainiu ju quijnanʼan pus Dios ju tʼajun laquiʼalhunutʼan chai tasui ni slivasalh mapainiyau ju Dios. 13 Ju Dios quintaxtaknitan ju iSpiritu Santu. Chai yuchi lai lhicʼatsayau ni ixʼamigojni juntau ju Dios chai ni tʼajunch ju yuchi laquiʼalhunutʼan. 14 Chai ju quijnan iclaktsʼintauch ju istsʼalh Dios chai icʼajuniuch ju lapanacni ni macaminta ju quimpaiʼan Dios ju istsʼalh. Chai yuchi lhimilh ni laich caʼalacmakʼalhtaxtulh tachi chun ju lapanacni ju catamaklacaʼaniyach ju yuchi. 15 Pus va tichi chavaich ju najun ni yuchi ju istsʼalh Dios ju Jesús pus ju Dios tʼajun laʼixʼalhunut chai ju yuchi ixʼamigo Dios junita. 16 Chai ju quijnanʼan cʼatsayauch chai lacaʼiyauch ni quintamapainiyan ju Dios. Pus Dios ju na amapaininin. Chai ju amapaininin pus ixʼamigo Dios junita chai ju Dios tʼajun laʼixʼalhunut. 17 Chai acsni vasalh mapainiyau ju Dios pus jantu catalhoniyau ju anuʼ avilhchan acsni caʼamakʼosaspitcanach tachi chun ju lapanacni. Jantu catalhoniyau ni vachuʼ chunch quintamapainiyan ju quijnanʼan mas vilaucaʼ ju ani lacamunutpaʼ tachi ju mapaini ju Jesucristo. 18 Chai ni vasalh cʼatsayau ni quintamapainiyan ju Dios pus jantu catalhananau. Ni va talhananau pus va nonau ni aquintamamakʼalhkʼajniyan ixlacata ju tuchi navitauch. Para ni slivasalh lacaʼiyau ni quintamapainiyan ju Dios pus jantu talhoniyau ju tuchi aquintanaviyan. Pus ni va talhananau va nomputun ni jantu vasalh mapainiyau ju Dios. 19 Pus ju quijnanʼan yuchi lhimapainiyau ju Dios ni pʼulhnan quintamapainin ju yuchi. 20 Para ni xamatiʼ najun ni mapaini ju Dios para ni va xcaji ju tam ixlhilakʼau pus va taʼaklhtaman. Pus ju jantu mapaini ju tam ixlhilakʼau ju tʼalalaktsʼin ja va a ti yuchach lai catimapaini ju Dios ni jantu tavanan laktsʼinta. 21 Chai ju quijnanʼan mispayauch ju ixlhamapʼaksin Dios junta ma chani najun: “Ju vasalh mapaini ju Dios pus ma vachuʼ camapaini ju ixlhilakʼau”.
1 Isʼaskʼatʼan Dios juntau tachi chun ju lacaʼiyauch ni yuchi ju Jesús ju ixnoncan camalakachatachilh ju Dios. Chai tachi chun ju tamapaini ju quimpaiʼan Dios pus vachuʼ taʼamapaini ju aliʼin ju talhilacaʼanta ju Cristo ni vachuʼ isʼaskʼatʼan Dios tajunita. 2 Pus chani ju pumispayau ni vasalh amapainiyauch ju isʼaskʼatʼan Dios. Pus ni mapainiyau ju Dios chai quiclacaʼiyau ju ixlhamapʼaksin pus vachuʼ amapainiyau ju isʼaskʼatʼan. 3 Chai chani ju putasui ni vasalh mapainiyau ju Dios acsni naviyau tachi ju najun laʼixlhamapʼaksin. Chai jantu xcai lhiulayau ixmuctaxtuca tachi ju najun laʼixlhamapʼaksin ju yuchi. 4 Tachi chun ju isʼaskʼatʼan Dios lai tamacajun ju macxcai atsucunti ju alin ju ani lacamunutpaʼ. Chai yuchi lai lhimaconau ju macxcai atsucunti va ixlacata ni lhilaksiyau ju Cristo Jesús. 5 Para jantu si lai tamacajun ju macxcai atsucunti ju alin ju ani lacamunutpaʼ. Va yuchi ju lai macajun ju lacaʼich ni yuchi ju Jesús ju Cristo ju ixnoncan camalakachatachilh ju Dios chai ni yuchi istsʼalh Dios junita. 6 Pus ju Jesucristo yuchach ju quimakpaxacalh chai quinichilh ju ani lacamunutpaʼ. Jantu va yuchi ni quimakpaxacalh para vachuʼ quinichilh. Chai yuchi ju Spiritu Santu ju quintamavasalaniyan laquiʼalhunutʼan ni chunch ju tapasalh laʼisʼatsucunti. Chai ju Spiritu Santu yuchach ju najun ju istavasalanti. 7 Alin pumatʼutu ju tavilanancha lactʼiyan ju tanajun ni vasalh istsʼalh Dios ju Jesús. Yuchi ju quimpaiʼan Dios chai yuchi ju Jesús ju quintaquimamachakxanichin laʼisʼatsucunti ta yu junita ju ixʼalhunut ju Dios. Chai vachuʼ chunch najun ju Spiritu Santu. Chai ju ani pumatʼutu si tanajun ni vasalh istsʼalh Dios ju Jesús. 8 Chai vachuʼ ju ani lacamunutpaʼ ju Spiritu Santu najun ni vasalh istsʼalh Dios ju Jesús. Chai vachuʼ chunch ju nomputun acsni tavanan akpaxlh ju Jesús chai acsni tavanan nilh ju yuchi. Pus ju Spiritu Santu chai acsni chunch ju tapasalh laʼisʼatsucunti ju Jesús va lakatam taxtokni ju tamavasalai. Va tamavasalai ni vasalh istsʼalh Dios ju Jesús. 9 Pus ju quijnanʼan lai lacaʼiniyau ju ixchivinti ju akʼantam quintʼalapanacʼan. Chai ni chunch ju layau pus aktsʼiya tasqʼuini ni calacaʼiniyau ju ixchivinti Dios ni yuchi ju palai xakʼai lhichux. Chai ju Dios najunta ni yuchach ju istsʼalh ju Jesús juncan. 10 Pus ju lhilacaʼanta ju istsʼalh Dios cʼatsai laʼixʼalhunut ni vasalh istsʼalh Dios ju Jesús. Para ju jantu lacaʼita ju ixchivinti Dios pus tachi ju va najun ni taʼaklhtamat najun ju Dios ni jantu lacaʼita ju ixchivinti junta najunta ni yuchach ju istsʼalh. 11 Pus chani najun ju Dios: “Ma quintaxtaknitan ju quiʼatsucuntiʼan ju conkʼalhiyanta tus lactʼiyan. Chai ju ani atsucunti ma quintaxtaknitan acsni lhilacaʼantauch ju istsʼalh”. Ma chunch najun ju Dios. 12 Pus ju ixlhichux ixʼalhunut maklacaʼanita ju istsʼalh Dios alin ju isʼatsucunti ju conkʼalhiyanta lactʼiyan. Para ju jantu ixlhichux ixʼalhunut maklacaʼanita ju istsʼalh Dios pus matiʼ ju isʼatsucunti ju caʼixjonkʼalhicha ju lactʼiyan. 13 Pus ju ani taxtokni iclaʼatsʼoknuniu ju uxijnan ju maklacʼapʼinitʼatʼit ju istsʼalh Dios. Chai yuchi iclalhiʼatsʼoknuniu ni apʼucʼatsʼayaʼitʼit ni alin ju miʼatsucuntiʼan ju conkʼalhiyanta ju lactʼiyan. 14 Chai jantu talhananau acsni tʼachivinau ju Dios. Para cʼatsayau ni quintakʼasmatniyan ju Dios acsni tuʼuʼ casqʼuiniyau tachi ju kʼoxich lhiulai ju yuchi. 15 Chai ni vasalh cʼatsayau ni quintakʼasmatniyan acsni tuʼuʼ sqʼuiniyau tachi ju kʼoxich lhiulai ju yuchi pus vachuʼ cʼatsayau ni aquintaxtakniyan ju tuchi sqʼuiniyauch. 16 Ni canavi tuʼuʼ alactuʼunti xamatiʼ ju anicʼach va najun ni lhilacaʼanta ju Cristo chai ni calaktsʼilh apumatam ju vasalh lhilacaʼanta ju Cristo pus ju yuchi lai casqʼuiniyaʼ ju Dios ixlacata ju anuʼ alactuʼunuʼ ni jantu canavichokolh tuʼuʼ macxcai chai caʼalilh ju isʼatsucunti jonkʼalhita. Pus laich casqʼuinilh ixlacata apumatam ni jantu navita ju alactuʼunti ju jantu lai macʼacxai ju Dios. Alin ju alactuʼunti ju jantu lai macʼacxai ju Dios. Ni xamatiʼ navita ju chunch alactuʼunti jantu iclajunau ni asqʼuinitʼit ju Dios ixlacata ju yuchi. 17 Tachi chun ju jantu sok navican yuchi ju alactuʼunti. Para va lakatam alactuʼunti ju jantu lai macʼacxacan. 18 Cʼatsayau ni jantu va tsa alactuʼunun ju isʼaskʼatʼa Dios. Para ju istsʼalh Dios lhistʼacʼa ju lhilacaʼanta yuchi chai ju lhacaticuru jantu lai ta catinavi. 19 Cʼatsayau ni isʼaskʼatʼan Dios juntau. Para tachi chun ju jantucaʼ talhilacaʼanta ju Cristo tanavinitʼajuncaʼ ixkʼachat ju lhacaticuru. 20 Chai cʼatsayau ni quilatachilh ju istsʼalh Dios chai quintaxtaknitan ju kʼox quintacʼatsanʼan ni laich camispauch ju yuchi ju laʼistavasalanti Dios junita. Chai ju quijnanʼan ixʼamigojni juntau ju istavasalanti Dios ni lhilacaʼantauch ju lakatami istsʼalh ju Jesucristo juncan. Yuchach ju istavasalanti Dios chai yuchi ju xtʼakʼa ju atsucunti ju conkʼalhiyanta ju lactʼiyan. 21 Quiʼaskʼatʼan jantuch va kʼaya amaklacʼapʼinitʼit ju jantu vasalh Dios. Chunch vasalh cava.
1 Ju quitʼin icmaklhinajun lacatalhavat ju talhilacaʼanta ju Jesús. Va icmacʼamiyan ju uxintʼi ji lakʼau atsiʼ. Pus Dios ju sacxtutan. Pus vachuʼ icʼatsʼoknuni ju miʼaskʼatʼan. Slivasalh iclamapainiyau. Chai jantu va quitʼin para vachuʼ tachi chun ju tamispaich ju stavasalanti. Yuchi ju ixchivinti Dios. 2 Chai yuchi iclalhimapainiyau ni lacaʼiyau ju stavasalanti ixlhichux quiʼalhunutʼan chai calacaʼikʼalhiyau. 3 Ju quimpaiʼan Dios chai ju quiʼucxtinʼan Jesucristo ju istsʼalh Dios junita yuʼunch ju catanaviniyan lamapainin chai cataʼaktaijuyan laʼixʼamapainintiʼan chai cataʼaktaijuyan ni jantu calacʼanaʼ ju miʼalhunutʼan. Chai yuchi catalhinaviniyan ju chunch va ixlacata ni qʼuiclacʼaʼitʼatʼit ju stavasalanti chai lamapʼainiyatʼit. 4 Slivasalh na ickʼachan ni ickʼasmatʼa ni chunch ju tatsucui ju aliʼin miʼaskʼatʼan tachi ju najun laʼixchivinti Dios. Chai ju yuchi stavasalanti. Talacaʼita ju lhamapʼaksin ju quintaxtaknitan ju quimpaiʼan Dios. 5 Chai ju chavai ji lakʼau ictapaininiyan ni camapainiyau ju aliʼin ju vachuʼ talhilacaʼan ju Cristo. Chai ju ani jantu sastʼi lhamapʼaksin ju icʼatsʼoknuniyan. Para yuchi ju aktsʼiya mispatauch ju quijnanʼan tus acsni tavanan lhilacaʼanchau ju Cristo. 6 Chai acsni lamapainiyau pus naviyau tachi ju najun laʼixlhamapʼaksin ju Dios. Pus laʼixlhamapʼaksin najun ni calamapainiu. Chai ju uxijnan chunch ju kʼasmatʼatʼit tus acsni tavanan lhilacʼapʼitʼit ju Cristo. 7 Pus iclalhijunau chunch ni na lhu alin ju lapanacni ju va taʼaʼokxchokʼonun. Chai ju yuʼunch va makpitsicanta ju ani lacamunutpaʼ. Ju yuʼunch jantu talacaʼi ni quitsucuchilh ju Jesucristo ju ani lacamunutpaʼ chai talacasu tachi lapanac. Yuchach ju ixnoncan camalakachatachilh ju Dios. Pus ju yuʼunch va aʼokxchokʼonin tajunita. Va tatalacasui tachi ju Cristo para va talakʼalhiputun tuchi navita ju yuchi. 8 Pus alhistʼaccʼantʼit ni jantu xamatiʼ cataʼokxchokʼon. Ni va aʼokxchʼokʼocʼanaʼitʼit pus catsʼankʼayaʼ ju lhichʼalhcat ju xacnaviyau ju lamilhiʼuxijnan. Para ni va tachi alhilacʼapʼitʼit ju stavasalanti pus amaklhtʼayananaʼitʼit chux ju kʼox ju quintaxtakniputunan ju Dios ju lactʼiyan. 9 Chai va tichi chavaich ju lacatam capulhiʼalh ju ixchivinti Cristo chai jantu vana calacaʼi tachi ju ismasui ju Cristo pus ju yuchi jantu ixʼamigo ju Dios. Para va tichi chavaich ju va tachi calacaʼiyaʼ ju ixchivinti ju Cristo pus ju yuchi ixʼamigo junita ju quimpaiʼan Dios. Chai vachuʼ ixʼamigo junita ju lakatami istsʼalh ju Cristo juncan. 10 Ni xamatiʼ talakminan chai tajunan ni va tamalaniputunan ixchivinti Dios para ni jantu lacaʼi tachi ju ismasui ju Cristo pus jantu alacʼasqʼuinitʼit ni catavi laminchakaʼan. Nin lai amalakʼavitʼit. 11 Pus ju va malakʼavi ju chunch talacaʼi pus tachi ju va tʼanavi ju ixʼalactuʼunti. 12 Na lhu taxtokni ju iclajumputunau para jantu iclaʼatsʼoknuniputunau va lacaʼalhiqui chai lacatinta. Va iclaʼamputunachau laktsʼinin ju uxijnan. Ju chunch lai calacchivinauch laquiʼucxlacapuʼan. Ju chunch slivasalh caʼalinaʼ ju quinkʼachatʼan. 13 Ju isʼaskʼatʼan ju milakʼau atsiʼ tamacʼamiyan. Ju milakʼau atsiʼ Dios ju sacxtuta ni isʼaskʼatʼa cava vachuʼ. Ca va yuchach.
1 Ju quitʼin icmaklhinajun lacatalhavat ju talhilacaʼanta ju Jesús. Va icmacʼamiyan ju uxintʼi ji quiʼamigo Gayo. Slivasalh na icmapainiyan. 2 Ji quiʼamigo ictapainini ju Dios ju milacata ni kʼox atsʼucʼuyaʼ. Chai ju uxintʼi ni palai palai tʼaʼun chʼapanaʼ ixchivinti Dios pus ictapainini ju yuchi ni vana va chun kʼox cajunaʼ ju miʼatsucunti chai jantu jintaʼ caxcanin. 3 Slivasalh na xaclhikʼachan acsni tamilh ju quiʼalakʼavin chai quintajunilh ni vanach lhilacʼapʼin ju ixchivinti Dios. Ju yuchi stavasalanti. Chai tasui ni vasalh lhilacʼapʼintʼa ju Jesús ni muctʼaxtʼui tachi ju najun laʼixchivinti Dios. Chai yuchach ju stavasalanti. 4 Matiʼ tuʼuʼ ju palai iclhikʼachan. Va yuchi acsni ickʼasmatʼa ni tamuctaxtui tachi ju najun laʼixchivinti Dios tachi ju va quiʼaskʼatʼan icʼalaktsʼin. Chai ixchivinti ju Dios stavasalanti. 5 Ji quiʼamigo na kʼox ju navi ju uxintʼi acsni tuʼuʼ alhiʼaktʼaiʼui ju quilhiʼalakʼavinʼan ju tapasatilai laminchakaʼ mas jantuch amispʼai ju yuʼunch. 6 Ju yuʼunch taʼalacjuni ju vachuʼ talhilacaʼanta ju Cristo ju ani tavilanalh ni ma na amapʼaininin ju uxintʼi. Chai na kʼox ju anaviyaʼ ni tuʼuʼ alhiʼaktʼaiʼuyaʼ ju yuʼunch ixlacata ju lacati. Chai lhijunch ni chunch ju aʼulhtʼunin ni tanavini ixlhichʼalhcat ju Dios. 7 Ju yuʼunch va lacatam lacatam taʼucxuntʼajun ni va taʼamamispaniputun ju lapanacni ixlacata ju Jesús. Para jantu tasqʼuiniputun lamapainin laca lacatsʼunin aʼaktaijunti ju jantucaʼ talhilacaʼan ju Cristo. 8 Pus yuchi lhitasqʼuini ni caʼaʼaktaiju ju quijnanʼan ju yuʼunch ju chunch talhichʼalhcatnan. Ju chunch tachi ju va jun atʼachʼalhcatnanauch ju yuʼunch acsni tanajun ju ixchivinti Dios. Chai yuchach ju stavasalanti. 9 Icʼatsʼoknunita ju mintʼaʼamachakʼan ju talhilacaʼanta ju Jesús para ju Diótrefes va xakʼaich jumputun ju sia lhiyuʼunch. Ju yuchi jantu tuʼuʼ quintalhiulayan. 10 Chai ni chunch ju lai ju yuchi pus acsni acʼananta acʼamapastʼacʼaniyach ju quiʼalakʼavinʼan ju tuchi navich ju Diótrefes. Ju yuchi va kʼaya najun chai macxcai chivinti ju xaquintalhichivinan ju quijnan. Chai jantu va yuchi ju navich. Para vachuʼ jantu amaklhtayanan ju quiʼalakʼavinʼan ju tachaʼanacha. Chai vachuʼ jantu alakʼaʼini ju aliʼin ni cataʼamaklhtayanalh. Chai ju taʼamaklhtayanamputun ju quiʼalakʼavinʼan pus ju Diótrefes jantu alacasqʼuini ni camaktakʼaixtoklich ju talhilacaʼan ju Cristo. 11 Ji quiʼamigo jantu chunch ju anavitʼi ju uxintʼi tachi ju tanavi ju yuʼunch ju va macxcai talai. Para chunch anavitʼi tachi ju yuʼunch ju tanavi ju kʼox. Ju va tachi macxcai navi jantu mispai ju Dios. 12 Chux ju lapanacni tanajun ni na kʼox lapanac ju Demetrio. Chai laʼisʼatsucunti lana tasui ni vasalh quiclacaʼita ju ixchivinti Dios. Chai ju yuchi slivasalh. Vachuʼ ju quijnan icnonau ni na kʼox lapanac ju Demetrio chai ju uxijnan cʼatsʼayatʼit ni vas icnonau. 13 Na lhu taxtokni ju xacʼatsʼoknuniputunan para jantu actiʼatsʼoknunin va lacatinta chai lacapatsʼoknu. 14 Vatsʼalhti iclakʼamputunachan chai calacchivinauch lacaʼucxlacapuʼ. 15 Ictapainini ju Dios ni jantu calacʼalh ju miʼalhunut. Tamacʼamiyan ju quiʼamigojniʼan ju ani tavilanalh. Chai amacʼamitʼachich ju uxintʼi ju pumatamin quiʼamigojniʼan ju tavilanancha anch. Ca va yuchach.
1 Ju quitʼin icJudas. Xalapanac icjunita laʼixmacni ju Jesucristo. Vachuʼ ixlakʼau ju Jacobo icjunita. Pus iclamacʼamiyau ju uxijnan ju tasacxtutan ju quimpaiʼan Dios. Chai ju yuchi na tamapainiyan. Chai catalhistʼacʼan ni va tachi alhilacʼapʼinaʼitʼit ju Jesucristo. 2 Icsqʼuini ju Dios ni palai cataʼaktaijuyan laʼixʼamapaininti chai palai cataʼaktaijuyan ni jantu calacʼanaʼ ju miʼalhunutʼan chai palai catamapainiyan ju yuchi. 3 Ju uxijnan ji quiʼamigojni na xaclaʼatsʼoknuniputunau chai xaclajumputunau ta yu lai putakʼalhtaxtucan ni jantu ancan ju lacajipi. Para tasqʼuini ni alai aclaʼatsʼoknuniu chai pʼas aclajuniu ni ixlhichux ju miʼalhunutʼan jantu alakʼaʼitʼit ni xamatiʼ catalakʼalhinin ju miʼatalacpastʼacʼatʼan ni jantuch vana alhilacʼapʼitʼit ju Jesucristo. Pus ju ixchivinti Dios ju lacaʼiyau tachi chun ju quijnanʼan ju isʼaskʼatʼan Dios juntau pus Dios ju quintaxtaknitan chai jantu catimapaxalh astan. 4 Tasqʼuini ni aclajuniu ni jantu xanaviyatʼit cuenta acsni tavanan sek tatanucha lamilhiʼuxijnan ju aliʼin lapanacni. Ju yuʼunch lana jantu tatalhoni ju Dios. Chai tanajun ni va ixlacaʼatalh ni na lai navi lamapainin ju Dios pus yuchi lai lhinavican lhu ju alactuʼunti. Pus acsni tanajun ju chunch va jantu vas tachivinin acsni tanajun ixlacata ju Jesucristo. Para ju quijnanʼan ixlapanacni juntau chai va yuchach ju quiʼucxtinʼan junita. Pus mas chunch talai ju yuʼunch para makʼanchich istsʼokʼulacanta ni camamakʼalhkʼajnicanaʼ ju lapanacni ju chunch tajunita. 5 Va iclamapastʼacʼaniputunau ju ani ju aktsʼiya mispʼayatʼitch. Pus ju quiʼucxtinʼan Dios amakʼalhtaxtulh ju quintʼaʼisraelitanin ju xalacatʼun Egipto. Ju yuʼunch ixlapanacni ixtajunita. Para astanch amaknikʼolhch ju jantu lai ixtalacaʼi. 6 Chai ju aliʼin anquilhnin jantu talhistaclh ju ixpuʼucxtinʼan ju ixʼaxtaknicanta. Alai va tamacaulh ju ixchakaʼan. Pus ju chavai ju Dios amakʼatacaʼ ju yuʼunch lacaʼatatsʼisni. Anch ju atʼalhnukʼalhita tus acsni cachinaʼ ju anuʼ avilhchan acsni camakʼosaspitcanach. 7 Chai vana va chunch amamakʼalhkʼajni ju amachakʼan Sodoma chai ju amachakʼan Gomorra chaich ju amachakʼan ju aliʼ lakʼachakʼanixni ju vanin ixtʼalachʼapata. Slivasalh na ixtaʼalinch ju ixnavinʼan chai ixtalalactuʼui sia lhijokʼat chai ixtalalactuʼui sia lhichakolun. Pus mas chavai lai titasui ta yu xaʼamamakʼalhkʼajni ju Dios. Ju yuchi lana amaclakʼo lacajipi. Chai ni chunch ju aʼulhtucalh pus va quintamapastʼacʼaniyan ni alin ju alapnaʼ ju jantu lai mixa tavanan. Chai anch ju camamakʼalhkʼajnicanaʼ ju jantu tamacomputun ixʼalactuʼuntiʼan. 8 Para ju anuʼ lapanacni ju tatanulh lamilhiʼuxijnan mas tacʼatsai ni chunch ju aʼulhtucalh ju makʼaniya lapanacni ju ixtaʼalactuʼunun para ixlaquilhtu taʼalactuʼunun. Va tanajun ni Dios ju amapastʼacʼani ju tuchi tanajun mas jantu. Chai va talakʼalhi ju ixlacatunaʼan. Chai jantu tuʼuʼ talhiulai ju tam xakʼai. Chai macxcai chivinti talhichivinin ju tavilanancha lactʼiyan. 9 Para nin yuchi ju xakʼai anquilh ju Miqui juncan jantu chun lalh. Ju yuchi acsni tavanan tʼalakʼailh ju lhacaticuru ixlacata ixlacatuna ju lijunto Moisés jantu lai xamucʼani ixtalakʼalhin lacamacxcai chivinti. Va yuchi ni junilh ni yuchi ju ucxtin Jesús ju cakʼayaʼ. 10 Para ju anuch lapanacni ju tavilanancha lamilhiʼuxijnan macxcai talhichivinin ju tavilanancha lactʼiyan mas jantu tamachakxai ta yu talhijunitach. Para ju taxtokni ju tamachakxai va laʼisʼakstuʼan tachi ju talai ju tuʼuʼ atapacxat yuchi ju tapulhitajui ixmakʼalhkʼajnatʼan junta jonkʼalhita. 11 Painiʼitnich ju yuʼunch. Ju yuʼunch lana jantu kʼox ju isʼatsucuntiʼan. Chunch tajunita tachi ju ixjunita ju isʼatsucunti ju makʼaniya lapanac ju Caín ixjuncan. Chai vachuʼ talai tachi ju lalh ju makʼaniya lapanac ju Balaam ixjuncan. Ju yuʼunch vachuʼ va tapulhajaputun ju chivinti ju jantu soknicʼa. Chai vachuʼ talhitajulh ju ixmakʼalhkʼajnatʼan junta jonkʼalhita ni jantu taquiclacaʼiputun ju ixlhamapʼaksin Dios tachi ju lalh ju makʼaniya lapanac ju Coré ixjuncan. Ju yuchi vachuʼ va samakʼalh ju ixlhamapʼaksin Dios chai yuchi lhimaknicalh. 12 Ju yuʼunch na lhimaxan talai acsni tatʼavenan ju lamincʼatanʼan. Va isʼakstuʼan ju talacvenchokoi. Jantu xamatiʼ tatalhoni. Va tanavi tachi ju takʼachani isʼakstuʼan. Ju yuʼunch chunch tajunita tachi ju tuʼuʼ ataputsʼi ju va lacatam lacatam alaclhiʼanch ju un chai jantu tavanan lhimin ju xcan. Pus ju yuʼunch vachuʼ va taʼaʼokxchokʼonun. Chai ju yuʼunch lana jantu tuʼuʼ taxtʼakʼa ju kʼox. Chunch tajunita tachi ju tuʼuʼ qʼuiu ju jantu xtʼakʼa ju tuʼuʼ xatocʼat mas chinta ju avilhchan ni caxtaklh tuʼuʼ. Chai jantu va yuchi ni xaxixa para vachuʼ tipulhumakʼancanch. Pus ju anuʼ aʼokxchokʼoni amamakaʼunin tachi ju va tanitach vachuʼ ni matiʼ ju kʼox laʼisʼatsucuntiʼan. 13 Chai chunch tajunita tachi ju tuʼuʼ alama. Acsni lucunun ju yuchi pus na lhu lhimin ju amacxtalh. Pus vachuʼ chunch ju yuʼunch. Va yuchi ju talhimin ju jantu kʼox atsucunti. Chai lana jantu lai tuʼuʼ vas cʼatsacan laʼixchivintiʼan ju yuʼunch. Pus mas yuchi ju kʼai stʼacu jantu caʼokxchokʼon tuchi horach atatsʼisni ju xajachilh. Para ju aʼokxchokʼoni lapanacni na lai cataʼokxchokʼon laʼixtaʼaklhtamatʼan. Para ju Dios lakʼoxita junta jonkʼalhita atatsʼisni ixlacataʼan ju lapanacni ju chunch tajunita. 14 Ju pʼulhnan lapanac Adán ixjuncan. Chai ju yuchi alilh ju isʼaskʼatʼa chai ju istsʼalh vachuʼ alilh ju istsʼalh. Chai acsni chaʼalh ju ixlhitantalaktujun pus ju yuchi Enoc junicalh. Pus ju yuchi naulh ixchivinti Dios junta najun tuchi catapasayaʼ laʼisʼatsucuntiʼan ju lapanacni ju chunch tajunita tachi ju iclajuntauch. Ma chani ixnajunch: “Ma mintach ju ucxtin Dios. Ma tʼaminta ixtalhavat ixlapanacni. 15 Chai ma camakʼosaspitcanach tachi chun ju lapanacni. Chai ma tachi chun ju jantu tatalhoni ju Dios ma camucʼanicanaʼ tachi chun ju ixtalakʼalhinʼan ni va tanavita tachi ju jantu kʼachani ju Dios. Pus ni lana jantu tatalhoni ju Dios ma yuchi jantu talhinavi tachi ju kʼachani ju yuchi. Chai ma vachuʼ caʼamucʼanicanaʼ ixtalakʼalhinʼan ni na macxcai chivinti ju ma talhichivinilh ju Dios ju anuʼ alactuʼuni lapanacni. Pus ni lana jantu tatalhoni ju Dios ma yuchi macxcai talhilhichivinilh ju yuchi”. Ju Enoc naulh ni ma chunch ixnajun ju Dios. 16 Pus ju lapanacni ju chunch tajunita va tachi kʼotʼin tacʼatsantach. Jantu tuʼuʼ kʼox talhiulai. Tanavitʼajun ju macxcai ixʼatalacpastʼacʼatʼan isʼakstuʼan. Tachivinin tachi ju na va taʼacʼatsananta mas jantu. Na kʼoxich talhixakʼalai ju aliʼin ni va tapulhajaputun. 17 Para uxijnan ji quiʼalakʼavin apʼastʼactʼit ju chivinti ju pʼulhnan ixtanajunta ju ixtamalakachan ju quiʼucxtinʼan Jesucristo. 18 Ju yuʼunch chani tajuntan: “Ma acsni vaninch cachinaʼ ju avilhchan acsni caminchokoyaʼ ju Cristo pus ma cataʼalinach ju catalhitsʼiʼinaʼ ju ixtaxtokni Dios. Ma yuchach ju catanaviyach ju macxcai ixʼatalacpastʼacʼatʼan ju jantu kʼachani ju Dios. 19 Ju yuʼunch ma va amaktalhkʼamaninch. Va taʼalacpastacnan tachi ju aliʼin lapanacni ju jantucaʼ talhilacaʼanta ju Jesús. Ma jantu tanun ju Spiritu Santu laʼixʼalhunutʼan”. Ma chunch ju tajuntan ju ixtamalakachan ju Jesús. 20 Para uxijnan ji quiʼalakʼavin palai tachapun aʼuntʼit lacasastʼi miʼatsucuntiʼan. Chai lai chunch alatʼit ni palai palai alaniyaʼitʼit ju ixchivinti Dios. Atʼachʼivinintʼit ju Dios laʼixtachaput ju Spiritu Santu. 21 Va tachi aqʼuiclacʼaʼitʼit ju ixchivinti Dios. Ju chunch va tachi catamapainiyan ju Dios. Chunchach ju atsʼucʼutʼit acsni pʼacxantʼayatʼitcaʼ ju Jesucristo tus acsni cachinaʼ ju avilhchan acsni cataʼaktaijuchokopalan lacaʼamapaininti chai catalaktsaniyan ju miʼatsucuntiʼan ju jonkʼalhita lactʼiyan. 22 Aʼaktʼaiʼutʼit lacaʼamapaininti ju jantucaʼ tacʼatsai u slivasalh u jantu ju ixchivinti Dios. 23 Ju tam xamatiʼ ni tʼajunch cava lakxonaʼ pus vatsʼalhtich acmakʼalhtaxtulh. Pus vana va chun alatʼit ixlacataʼan ju aliʼin ju tatʼajuncaʼ laʼixʼalactuʼuntiʼan. Va tsa tsa alacʼunitʼitch. Tsʼa ma laich catatakʼalhtaxtulh. Chai ju aliʼin aʼaktʼaiʼutʼit lacaʼamapaininti para vachuʼ alhistʼaccʼantʼit. Jantu xcai ni vachuʼ chunch alatʼit tachi ju talai ju yuʼunch. Na alhitsʼisitʼit ju ixʼalactuʼuntiʼan. 24 Ju Dios na tachapun. Chai ju yuchi lai talhistʼacʼan ni jantu akʼalhkʼosaʼitʼit. Vachuʼ lai salaka catanaviniyan ju miʼalhunutʼan. Chai lhikʼach catalhiʼanan junta vilhcha ju yuchi. 25 Va pumatam ju Dios. Yuchi ju quintamakʼalhtaxtuyan acsni lhilacaʼanau ju quiʼamakʼalhtaxtunuʼan. Yuchi ju Jesucristo. Chai va yuchi ju mispakʼojui tachi chun ju taxtokni. Pus yuchach ju lakʼayacan. Chai yuchach ju xakʼai tucan. Chai yuchach ju alin ju ixtachaput. Chai yuchach ju lhinonkʼojui chux mas makʼanchich chai chavai chai tus va tavanan cava. Vasalh chunch junita.
1 Ju quitʼin icXivan ixlapanac ju Jesucristo. Pus ju Dios mavasalanilh ju ani chivinti ju Jesucristo ni laich caʼamasuniyaʼ ju ixlapanacni tachi chun ju taxtokni ju vasalh catapasayaʼ. Chai jantu makʼan cativa tus catapasayaʼ ju ani taxtokni. Pus ju Jesucristo quimalakachanichilh pumatam anquilh chai yuchi ju quijunilh ni actsʼokʼulayaʼ tachi chun ju ani taxtokni. 2 Pus ju quitʼin ictsokʼulata ixchivinti Dios chai tuchi naulich ju Jesucristo chai tachi chun ju taxtokni ju iclaktsʼilh. 3 Na kʼachan va tichi chavaich ju najun ju ani chivinti ju ictsʼokʼulata junta icnaulh tuchi catapasayaʼ. Chai na takʼachan tachi chun ju takʼasmatʼa ju ani chivinti chai talacaʼi ju chivinti ju ictsʼokʼulata. Na takʼachan ni vanin chinta ju avilhchan acsni caʼuctaxtuyaʼ tachi chun ju ani taxtokni ju ictsʼokʼulata. 4 Ju quitʼin icXivan chai iclamacʼamiyau ju uxijnan ju lhilacʼapʼinatʼit ju Jesús ju lakatujun lakʼachakʼanixni vilatʼit ju laxalacatʼun Asia. Ju Dios tʼajun tus va tavananch chai yuchi ju caminaʼ astan. Pus ju Spiritu Santu chunch junita tachi ju anuʼ lakatujun maclhcu ju lacya laʼixʼucxlacapuʼ ju kʼai putolan junta lhinajun ju Dios. Pus ju Spiritu Santu chai ju Dios cataʼaktaijuyan lacaʼamapaininti chai cataʼaktaijuyan ni jantu calacʼalh ju miʼalhunutʼan. 5 Vachuʼ ju Jesucristo cataʼaktaijuyan. Pus yuchi ju lana vas najun tuchi cʼatsai. Chai yuchi ju pʼulhnan lokʼonchokolh acsni ixnita. Chai yuchi ju alhijuni tachi chun ju ucxtinin ju ani lacamunutpaʼ. Chai yuchi ju quintamapainiyan chai quintachʼakʼanin ju quiʼalactuʼuntiʼan acsni taxtunilh ju ixʼacʼalhni ju lacacurus. 6 Chai yuchi ju quintalhilhcaʼulatan ni ucxtinin catʼajumvi ju yuchi. Chai vachuʼ quintalhilhcaʼulatan ni palijni cajumvi ni lai calakʼayayau ju Dios. Chai yuchach ju ixpai vachuʼ ju Cristo. Pus yuchach ju va tachi calakʼayacalh ni alin ixtachaput jonkʼalhita. Vasalh chunch junita. 7 Pus yuchi ju Cristo ju caminchokoyaʼ lacaʼataputsʼi chai tachi chun ju lapanacni catalaktsʼinaʼ. Chux ju yuʼunch ju talhtokʼolh acsni ixtʼajun ju ani lacamunutpaʼ. Chai tijpachux ju lapanacni ju alin ju ani lacamunutpaʼ pʼas catalactʼasayaʼ va ixlacata yuchi. Slivasalh chunch ju catapasayaʼ. 8 Pus ju Jesucristo chani najun: “Ju quitʼin xactʼajunch tus acsni maticaʼ tuʼuʼ ixjunita chai actsucukʼalhiyaʼ tus mas va tavananch. Chai quitʼin ju acminchokopalaʼ astan. Quitʼin ju lai icnavikʼojui tachi chun ju taxtokni”. 9 Pus ju quitʼin ju ictʼajun atsʼoknuʼ ju ani alhiqui milakʼauʼan Xivan icjunita. Pus tachi ju uxijnan makʼalhkʼajnanatʼit chai lhinajun ju Jesucristo lamiʼatsucuntiʼan chai chʼixkʼoyatʼit tachi chun ju macxcai va ixlacaʼatalh ni lhilacʼapʼinatʼit ju Jesús pus vachuʼ chunch iclai ju quitʼin. Pus ju quitʼin xacvi lacalacatʼicstʼi lacatʼun laʼixtampusni alama. Chai ju anuʼ lacatʼun Patmos juncan. Pus ju quitʼin tachʼin xacjunita ju anch va ixlacaʼatalh ni xacnajun ixchivinti Dios chai xacʼajuni ju lapanacni ixlacata ju Jesús. 10 Pus lhitumincu ixjunita acsni lakʼayacan ju quiʼucxtinʼan Jesús. Chai ju Spiritu Santu quimakʼasmatni lakatam chivinti ju xachivincan ju laquimpulacan. Lana na pʼas ju chivinilh tachi acsni na pʼas suncan ju tuʼuʼ skʼolh ni va xaquimamachakxaniputun ni jantu va xamatiʼ ju xaquixakʼalai. 11 Chai chani ju quijuni: ―Ju quitʼin xactʼajunch tus acsni maticaʼ tuʼuʼ ixjunita chai actsucukʼalhiyaʼ tus mas va tavananch. Atsʼokʼulatʼi lacaʼalhiqui ju tuchʼi alaktsʼinaʼ. Chai amalakʼachʼaninch ju quintalhilacaʼanta ju tavilanancha ju ani lakatujun lakʼachakʼanixni laxalacatʼun Asia. Anch ju Efeso chai ju Esmirna chai ju Pérgamo chai ju Tiatira chai ju Sardis chai ju Filadelfia chai ju Laodicea. ―Chunch ju xaquijuni ju xaquixakʼalai. 12 Pus ju quitʼin ictalakaspʼitlh ni va xaclaktsʼimputun tichi chavaich ju xaquixakʼalai. Chai acsni ictalakaspʼitlh pus iclaktsʼilh lakatujun ixputayan cantila ju si oro ixtajunita. 13 Chai laʼixlacaitat junta ixlacya ixputayan cantila ixya pumatam ju va ixtʼachunch ixjunita tachi ju yuchi ju malakachachilh ju Dios ni lapanac catsucuyaʼ ju ani lacamunutpaʼ. Chai ju yuchi ixlakchʼita ju lhman ixpumpuʼ ju ixʼakxtakmanikʼota ju ixchʼajaʼ. Chai vachuʼ ixtanquilhakchʼimucʼacanta ju liston ju oro ixjunita. 14 Chai ju ixʼai slivasalh na xnapapa ixjunita. Chun tachi ju tuʼuʼ apamat borrego ju na xnapapa junita u tachi ju tuʼuʼ miqui. Chai kʼai lam lam ixtalakpuyajui tachi ju tuʼuʼ xaʼalapnaʼ jipi. 15 Chai ju ixchʼajaʼ lana kʼox slamnicʼa ixjunita tachi ju tuʼuʼ kʼoxi tsasnat ju va ancaʼ camaxtucalh lacajipi. Chai ju laʼixchivinti lana istasui ni na alin ju ixtachaput. Chunch tachi ju ixkʼasmatca istʼasat ju tuʼuʼ talhavanti xcan. 16 Chai ixchʼapata laʼixlhicana lakatujun stʼacu. Chai ju laʼixquilhni ixtaxtui lakatam espada ju na lhman ixjunita chai acxputʼui ixquicxtui. Chai ju ixʼucxpuʼ na slamnicʼa ixjunita tachi ju avilhchan acsni na pʼas maktaji. 17 Chai ju quitʼin acsni iclaktsʼilh pus lana tin ictaʼaktalh. Chai tachi ju va xanin ictama laʼixchʼajaʼ acsni ictaʼaktalh. Pus ju yuchi quimokslanilh ixmacaʼ laʼixlhicana laquilacatuna chai chani quijuni: ―Jantu atʼalhan. Quitʼin ju xactʼajun tus acsni maticaʼ tuʼuʼ ixjunita chai actsucukʼalhiyaʼ tus mas va tavananch. 18 Chai ictʼajun ju chavai. Chai mas xacnita para ictʼajun chai actsucukʼalhiyaʼ. Chai quitʼin ju icnajun tichi chavaich ju caniyaʼ chai quitʼin ju icchʼapata ju xallave junta taʼan ju tanita. 19 Pus atsʼokʼulatʼich ju tuchʼi xalaktsʼin chai ta yu junita ju aliʼ taxtokni ju chavai chai ju tuchi catapasayaʼ astan. 20 Pus chanich ju nomputun ju anuʼ ju jantu lai xamachʼakxai ixlacata ju anuʼ lakatujun stʼacu ju laktsʼintʼa laquilhicana chai ju anuʼ lakatujun ixputayan cantila ju si oro ixtajunita. Pus ju anuʼ lakatujun stʼacu pulaktsʼipaxcavacan ju talhistʼacʼa ju quintalhilaksi ju tavilanancha ju lakatujun lakʼachakʼanixni. Chai ju ixputayan cantila ju laktsʼintʼa pulaktsʼipaxcavacan ju quilhmaktujun ju quintalhilaksi.
1 Ju xaqʼuitʼachivinin vachuʼ chani ju quijuni: ―Chanich atsʼoknunin ju alhistʼacʼa ju quintalhilaksi ju tavilanancha ju lakʼachakʼan Efeso: “Ma chanich tajunan ju yuchi ju chʼapata ju lakatujun stʼacu laʼixlhicana chai ju alhtanatʼajun laʼixlacaitat junta lacya ju lakatujun ixputayan cantila ju si oro tajunita. 2 Ma cʼatsai ju yuchi tuchʼi naviyatʼit. Ma cʼatsai ta yu chʼalhcʼatnanatʼit ju ixlacata chai ni chʼixkʼoyatʼit ju macxcai. Chai ma cʼatsai ni lana jantu laktsʼimpʼutʼunatʼit ju na kʼai tajunita. Chai ma alaktsʼintʼanutʼatʼit ju tanajunch ni ixtamalakachan tajunita mas jantu chai alhitʼaʼutʼatʼit ni va aʼokxchokʼonin. 3 Chai ma cʼatsai ni chʼixkʼoyatʼit va tuchi makʼalhkʼajnat. Chai ma chʼalhcʼatnanatʼit ju ixlacata. Chai ma jantu tavanan xkʼopʼatʼit. 4 Para ma alin ju tuchi jantu kʼox tapulhiulayan. Ma yuchi ni jantuch vana amapʼainininatʼit tachi ju ixlayatʼit ju pʼulhnan. 5 Pus ma apʼastʼactʼit ta yu ixlayatʼit ju makʼanchich acsni na ixmapʼainiyatʼit ju yuchi. Chai ma tamch apʼastʼactʼit. Chai ma chunchach ju alachʼokʼotʼit tachi ju ixlayatʼit acsni ixlhilacʼapʼintʼatʼitcaʼ ju yuchi. Chai ni jantu tamch apʼastʼacʼaʼitʼit pus ma va tam pantsʼiquis catalakminan ju yuchi chai ma catamakʼosuniyan ju ixputayan ju mincantilaʼan. 6 Para ju tuchʼi naviyatʼit ma alin lacatsʼunin ju kʼachani ju yuchi. Ma yuchi ni lana jantu kʼox lhiulayatʼit tuchi tanavi ju nicolaítanin. Chai ju yuchi ma vachuʼ jantu kʼox lhiulai tuchi tanavi ju yuʼunch. 7 Pus ju alin ixpakʼasmatni ma chach kʼasmatlh ju tuchi najun ju Spiritu Santu. Tuchi ajuni ju talhilaksi ju yuchi ju xaquimaʼatsʼokni ju ani chivinti. Pus ju casastʼucʼaʼ ju macxcai ma caxtaknicanaʼ ju xatocʼat ju qʼuiu ju xtʼakʼa ju atsucunti ju conkʼalhiyanta ju lactʼiyan junta vilhcha ju Dios. Ma yuchi ju caxtakniyaʼ ju xaquimaʼatsʼokni ju ani chivinti”. Chunch ju quijuni ni acʼajunilh ju amachakʼan Efeso. 8 Chai ju yuchi ju xaquimaʼatsʼokni ju ani chivinti vachuʼ chani quijuni: “Chani atsʼoknunin ju anuʼ ju alhistʼacʼa ju quintalhilaksi ju tavilanancha ju lakʼachakʼan Esmirna. Ma chani tajunan ju ixtʼajun tus acsni maticaʼ tuʼuʼ ixjunita chai catsucukʼalhiyaʼ tus mas va tavananch. Yuchi ju ixnita para lokʼonchokolh. 9 Ju yuchi ma cʼatsakʼojui tuchʼi naviyatʼit chai tuchʼi lhimakʼalhkʼajnanatʼit. Chai ma cʼatsai ni nonatʼit ni na quilhpatinin untʼatʼit mas jantu vasalh quilhpatinin untʼatʼit. Alai ma na makʼalinin untʼatʼit. Chai ju yuchi ma cʼatsai tuchi macxcai chivinti tajunan ju talhitapakaʼuchokoi isʼakstuʼan ni israelitanin mas jantu vasalh israelitanin tajunita. Alai ma va Satanás ju tachʼakʼokʼai. 10 Pus ma jantu atʼalhonitʼit ju alhimakʼalhkʼajnanaʼitʼit. Pus ju lhacaticuru ma caʼamapastʼacʼaniyaʼ ju lapanacni ni catalhinonaʼ ixtʼalhnuca ju aliʼin lamilhiʼuxijnan. Chai ni jantu acʼapʼaʼitʼit ju yuchi mas chunch cataʼulhtuyan pus ma catasuyaʼ ni vasalh lhilacʼapʼinatʼit ju xaquimaʼatsʼokni ju ani chivinti. Chai ma tachi lakacau avilhchan ju amamakʼalhkʼajnicʼanaʼitʼit. Para va tachi alhilaksitʼit ju yuchi mas amaknicʼanaʼitʼit chai ju yuchi ma cataxtakniyan ju mintalhajaʼan. Ma yuchi ni caʼalinaʼ ju miʼatsucuntiʼan jonkʼalhita lactʼiyan. 11 Pus ju alin ixpakʼasmatni ma chach kʼasmatlh ju tuchi najun ju Spiritu Santu. Tuchi ajuni ju talhilaksi ju xaquimaʼatsʼokni ju ani chivinti. Pus ju casastʼucʼaʼ ju macxcai ma jantu catinilh ju ixlaktʼui”. Chunch ju quijuni ni acʼajunilh ju amachakʼan Esmirna. 12 Chai ju xaquimaʼatsʼokni ju ani chivinti vachuʼ chani quijuni: “Atsʼoknunin ju quintalhilaksi ju tavilanancha ju lakʼachakʼan Pérgamo. Ma chani tajunan ju quilhtaxtuta lakatam espada ju acxputʼui quicxtui. 13 Ma cʼatsakʼojui tuchʼi ju naviyatʼit. Chai ma cʼatsai ni anchach ju tʼonatʼit junta lhinajun ju Satanás. Chai ma cʼatsai ni mas anch ju tʼonatʼit para va tachi lhilaksiyatʼit ju yuchi ju xaquimaʼatsʼokni ju ani alhiqui. Chai ma jantu tavanan nontʼatʼit ni jantu mispʼayatʼit ju yuchi mas acsni maknicalh lamilhiʼuxijnan ju Antipas ju vasalh ixlapanac ixjunita. Ma anchach ju maknicalh junta lhinajun ju Satanás. 14 Para ma alin lacatsʼunin ju naviyatʼit ju jantu kʼox lhiulai ju yuchi. Pus ma alin ju lamilhiʼuxijnan ju talacaʼini ju ixlhamapʼaksin ju makʼaniya lapanac ju Balaam ixjuncan. Yuchach ju junilh ju kʼai ucxtin Balac ta yu laich caʼapumakʼalhkʼosuyach ju israelitanin. Ju Balaam va ajunilh ni laich cataʼulh ju lhivai ju ixlhakʼailaktsʼincanta ju santo chai ni laich catatʼatsuculh va tichi chavaich. 15 Pus ma vana va chunch tanavi ju aliʼin ju lamilhiʼuxijnan. Chai vachuʼ ma va talacaʼini ju ixlhamapʼaksinʼan ju nicolaítanin. Chai lana jantu kʼox lhiulai ju yuchi ju xaquimaʼatsʼokni ju ani alhiqui. 16 Pus ma tamch apʼastʼactʼit. U ni jantu pus ma vatsʼalhti catalakminan ju uxijnan ju yuchi ju xaquimaʼatsʼokni ju ani chivinti chai ma catatʼalasayan. Ma capulasayaʼ ju espada ju taxtui laʼixquilhni. 17 Pus ju alin ixpakʼasmatni ma chach kʼasmatlh ju tuchi najun ju Spiritu Santu. Tuchi ajuni ju talhilaksi ju xaquimaʼatsʼokni ju ani chivinti. Pus ju casastʼucʼaʼ ju macxcai ma caxtaknicanach ju vaiti ju makʼanicantacha ju lactʼiyan. Ma yuchi ju caxtakniyaʼ ju xaquimaʼatsʼokni ju ani chivinti. Chai ma vachuʼ caxtakniyaʼ lakatam xnapapa chiux junta tsʼokcanta ju sastʼi ixtapakaʼut. Chai ju anuʼ tapakaʼut ma jantu xamatiʼ mispai. Va yuchi ju caʼamaklhtayananach”. Chunch ju quijuni ni acʼajunilh ju amachakʼan Pérgamo. 18 Chai ju xaquimaʼatsʼokni ju ani chivinti vachuʼ chani quijuni: “Chani atsʼoknunin ju alhistʼacʼa ju quintalhilaksi ju tavilanancha ju lakʼachakʼan Tiatira. Ma chani tajunan ju istsʼalh Dios ju kʼai lam lam talakpuyajui tachi ju tuʼuʼ xaʼalapnaʼ jipi. Chai ju ixchʼajaʼ ma lana kʼox slamnicʼa junita tachi ju tuʼuʼ kʼoxi tsasnat ju va ancaʼ camaxtucalh lacajipi. 19 Pus ju yuchi ma cʼatsai tuchʼi naviyatʼit. Chai ma cʼatsai ni na amapʼainininatʼit chai vasalh lhilaksiyatʼit ju yuchi. Chai chʼalhcʼatnaniyatʼit chai chʼixkʼoyatʼit tachi chun ju macxcai. Chai ma vachuʼ cʼatsai ni palai lhu ju chʼalhcʼatnaniyatʼit ju chavai. Ma palai jantu acsni pʼulhnan xalhilacʼapʼinatʼit. 20 Para ma alin lacatsʼunin ju jantu kʼox lhiulai ju yuchi. Ma yuchi ni va yauch unitʼit ju anuʼ chakoʼulh ju Jezabel juncan ni laich catavi lamilhiʼuxijnan. Chai ju yuchi va tajunan ni laich najun ixchivinti Dios mas jantu. Chai ju yuchi amalani chai aʼokxchokʼoi ju ixlapanacni ju anuʼ ju xaquimaʼatsʼokni ju ani chivinti. Ma va ajuni ni laich catatʼatsuculh va tichi chavaich chai ma lai cataʼulh ju lhivai ju ixlhakʼailaktsʼincanta santo. 21 Pus ma na lakalhu avilhchan ju xapacxan ni camacaulich ju alactuʼunti ju navi ni va tʼatʼajun va tichi chavaich. Para ma lana jantu tam pastacputun. 22 Pus ju yuchi ju xaquimaʼatsʼokni ju ani chivinti ma caxtakniyaʼ ju Jezabel ju na macxcai ixtakʼankʼat. Chai tachi chun ju talanita ju chunch atsucunti laʼixmacni yuchi ma caʼaxtakniyaʼ ju kʼai ixmakʼalhkʼajnatʼan vachuʼ. Ma chunch ju canaviyaʼ ni jantu catamaconaʼ ju tuchi tanavich. 23 Chai tachi chun ju isʼaskʼatʼan ju anuʼ chakoʼulh ma lana caʼamakniyach. Pus ju chunch tachi chun ju talhilaksi ju yuchi ju xaquimaʼatsʼokni ju ani chivinti ma catacʼatsayach ni ma yuchach ju alaktsʼintanuni ju tuchi takʼachani ju lapanacni chai tuchi tapastʼacʼa. Chai ma yuchach ju cataxtakniyan ju pumatamin milhiʼuxijnan tachi ju lhijunch ixlacata ju tuchi xanavi ju kʼantam kʼantam. 24 Pus ju yuchi ma taxakʼalayan ju uxijnan ju amachakʼan Tiatira ju jantu lacʼaʼinitʼatʼit ju ixlhamapʼaksin ju anuʼ chakoʼulh ju Jezabel juncan. Jantu ixlanipʼutʼunatʼit mas ixtajunan ni yuchach ju palai kʼox tucan lhamapʼaksin mas va ixʼanuch ju Satanás. Pus uxijnan ju ma taxakʼalayan. Ma jantu tuʼuʼ atumpa tsʼinqʼui lhamapʼaksin ju cataxtakniyan. 25 Ma va yuchi ni atʼailhipʼitʼit tachi ju layatʼit tus acsni caminchokoyaʼ ju yuchi. 26 Pus ju casastʼucʼaʼ ju macxcai chai ju camuctaxtuyaʼ tachi ju najunta ju yuchi pus ma caxtakniyaʼ ju ixtachaput ni laich calhijonkʼoyaʼ ixlhilacaputsʼun ju lacamunutpaʼ. 27 Ju ixpai ju xaquimaʼatsʼokni ju ani chivinti xtaknita ju ixtachaput. Chai ju yuchi ma caxtakniyaʼ vachuʼ ixtachaput ju casastʼucʼaʼ ju macxcai. Chai ju yuchi ma calhinonaʼ. Para ju lapanacni ju jantu talacaʼini ma chunch ju caʼaʼulhtuyaʼ tachi acsni lhinekcan ju tuʼuʼ xalu. 28 Chai ju casastʼucʼaʼ ju macxcai ma vachuʼ caxtaknicanaʼ ju kʼai stʼacu ju xajachilh vatsʼisin. 29 Pus ju alin ixpakʼasmatni ma chach kʼasmatlh ju tuchi najun ju Spiritu Santu. Tuchi ajuni ju talhilaksi ju xaquimaʼatsʼokni ju ani chivinti”. Pus chunch ju quijuni ni acʼajunilh ju amachakʼan Tiatira.
1 Chai ju yuchi ju xaquimaʼatsʼokni ju ani chivinti vachuʼ chani quijuni: “Chani atsʼoknunin ju anuʼ ju alhistʼacʼa ju quintalhilaksi ju tavilanancha ju lakʼachakʼan Sardis. Ma chani tajunan ju anuʼ ju malakachai ju Spiritu Santu chai ju chʼapata ju lakatujun stʼacu. Pus ju yuchi ma cʼatsai tuchʼi naviyatʼit. Chai mas noncanch ni lhilaksiyatʼit ju Dios para jantu slivasalh. Alai tachi ju va nitʼatʼit. 2 Pus ma alacpʼucʼuchʼokʼotʼitch. Chai ma alaʼaktʼaiʼutʼitch ni tachapun aʼunchʼokʼoyaʼitʼit. Chai ju chunch ma jantu acʼapkʼalhiyaʼitʼit ju Dios. Ma chunch ju alatʼit ni laktsʼinta ju tuchʼi naviyatʼit ju xaquimaʼatsʼokni ju ani chivinti. Chai ma najun ni jantu soknicʼa lhiulai ju Dios tachi ju naviyatʼit. 3 Pus ma apʼastʼactʼit ta yu xapʼuʼamaklhtʼayananatʼit ixchivinti Dios chai ni lhikʼach ju xakʼasmatʼatʼit. Pus ma alacʼaʼikʼalhitʼit. Chai ma tamch apʼastʼactʼit ixlacata tuchʼi naviyatʼit. Chai ni jantu alacpʼucʼuʼaʼitʼit pus ma catalakminan ju xaquimaʼatsʼokni ju ani chivinti. Ma tachi tam akʼalhonaʼ ju catalakminan chai ma lana jantu acʼatsʼayaʼitʼit tavanan ju lai camilh. 4 Para ma alin lacatsʼunin ju milhiʼuxijnan ju vilatʼit lakʼachakʼan Sardis ju jantu talhimalhquiliquita ixpumpuʼan ju tuchʼi naviyatʼit ju uxijnan. Chai ju yuʼunch ma catatʼaʼalhtananaʼ lactʼiyan ju xaquimaʼatsʼokni ju ani chivinti. Ma na xnapapa cajunaʼ ju ixpumpuʼan. Chai ma lhijunch ni chunch caʼamalakchʼinincalh. 5 Pus ju casastʼucʼaʼ ju macxcai ma camalakchʼinincanaʼ ju xnapapa pumpuʼ. Chai ma jantu catixacacalh ju ixtapakaʼut lacaʼalhiqui junta tsʼokcanta ixtapakaʼutʼan tachi chun ju alin isʼatsucuntiʼan jonkʼalhita. Chai laʼixʼucxlacapuʼ ju Dios chai laʼixʼucxlacapuʼan ju ixʼanquilhnin canoncanaʼ ni talhilaksi ju xaquimaʼatsʼokni ju ani alhiqui. 6 Pus ju alin ju ixpakʼasmatni ma chach kʼasmatlh ju tuchi najun ju Spiritu Santu. Tuchi ajuni ju talhilaksi ju xaquimaʼatsʼokni ju ani chivinti”. Pus chunch ju quijuni ni acʼajunilh ju amachakʼan Sardis. 7 Chai ju yuchi ju xaquimaʼatsʼokni ju ani chivinti vachuʼ chani quijuni: “Chani atsʼoknunin ju anuʼ ju alhistʼacʼa ju quintalhilaksi ju tavilanancha ju lakʼachakʼan Filadelfia. Ma chani tajunan ju yuchi ju na salaka junita chai ju va tachi najun ju istavasalanti. Yuchi ju chʼapata ju llave ju ixtaknita ju Dios ju kʼai ucxtin David. Chai ju yuchi ju chʼapata ju anuʼ llave acsni malhtekʼai tuʼuʼ malhtich pus ma jantu lai xamatiʼ malacchauchokoi. Chai acsni malacchajui tuʼuʼ malhtich ju yuchi pus ma jantu lai xamatiʼ malhtekʼai. 8 Pus ju yuchi ma cʼatsai tuchʼi naviyatʼit. Pus ma tamalhtekʼanitan ju malhtich junta lai chʼalhcʼatnanatʼit chai ma jantu lai xamatiʼ catamalacchoniyan. Chai ma cʼatsai ju yuchi ni tachapun untʼatʼit lacatsʼunin. Chai mas va chunch untʼatʼit para lacʼaʼitʼatʼit ju ixchivinti chai jantu tavanan nontʼatʼit ni jantu ixlapanacni untʼatʼit. 9 Pus ma alin ju talakʼayai ju Satanás chai tanajun ni israelitanin tajunita mas jantu. Va tanajun taʼaklhtamat chivinti. Pus ju xaquimaʼatsʼokni ju ani chivinti ma catamalakachanitachan ju yuʼunch chai ma catataquilhputaniyan ju uxijnan. Chai ma catanonaʼ ni na tamapainiyan ju Dios. 10 Pus ni ma xalacʼaʼiyatʼit ju ixchivinti ju xaquimaʼatsʼokni ju ani chivinti chai xachʼixkʼoyatʼit ju macxcai pus ju yuchi ma vachuʼ catalhistʼacʼan acsni caʼalinaʼ ju makʼalhkʼajnat ixlhilacaputsʼun ju lacamunutpaʼ. Ma yuchi calhiʼalinaʼ ju makʼalhkʼajnat ni ma calaktsʼintanucanach ju lapanacni ju tatʼajun ju ani lacamunutpaʼ. 11 Pus ma jantu makʼan cajunaʼ tus caminchokoyaʼ ju yuchi. Pus ma alacʼaʼikʼalhitʼit tuchʼi xtʼaknicʼantʼatʼit. Ju chunch ma lai amakʼalhtʼayananaʼitʼit ju mintalhajaʼan miʼakstuʼan. Jantu va akʼantam caxtaknicalh. 12 Pus ju casastʼucʼaʼ ju macxcai ma tachi ju tuʼuʼ xatantun ixpujitat Dios canavicanaʼ. Ma lana jantu tavanan catitaxtulh ju anch. Chai ma calhimichicanaʼ laʼixkʼaimacan ixtapakaʼut ju Dios chai ixtapakaʼut ju ixlakʼachakʼan ju Dios. Ma yuchi ju sastʼi lakʼachakʼan Jerusalén ju caminanta ju lactʼiyan junta vilhcha ju Dios. Chai vachuʼ ma catsʼokʼulaniyach ju sastʼi ixtapakaʼut ju xaquimaʼatsʼokni ju ani chivinti. 13 Pus ju alin ixpakʼasmatni ma chach kʼasmatlh ju tuchi najun ju Spiritu Santu. Tuchi ajuni ju talhilaksi ju xaquimaʼatsʼokni ju ani chivinti”. Pus chunch ju quijuni ni acʼajunilh ju amachakʼan Filadelfia. 14 Chai ju xaquimaʼatsʼokni ju ani alhiqui vachuʼ chani quijuni: “Chani atsʼoknunin ju anuʼ ju alhistʼacʼa ju quintalhilaksi ju tavilanancha ju lakʼachakʼan Laodicea. Ma chanich najun ju stavasalanti najun. Ma yuchi ju lai lhilaksican chai yuchi ju navikʼolh tachi chun ju taxtokni ju ixnajunta ju Dios ni caʼalilh. 15 Ju yuchi ma cʼatsai tuchʼi naviyatʼit. Pus ju uxijnan ma jantu ixlhichux ju miʼalhunutʼan ju lhilacʼapʼimpʼutʼunatʼit ju yuchi. Nin yuchi ni ma amacʼompʼutʼutʼit ju macxcai. Pus ma palai kʼox caʼixva ni lana ixlhilacʼapʼitʼit ixlhichux miʼalhunutʼan. U lana asamakʼantʼit. 16 Para ju uxijnan ni jantu ixlhichux miʼalhunutʼan ju lhilacʼapʼimpʼutʼunatʼit pus ju yuchi ma vachuʼ catasamakʼananch. 17 Pus ju uxijnan ma nonatʼit ni na makʼalinin untʼatʼit. Ma nonatʼit ni na lhu ju makʼaixtʼoktʼatʼit ju mimakʼalitʼan. Chai ma va nonatʼit ni jantu tuʼuʼ maktasqʼuiniyatʼit. Ma chunch ju nonatʼit para ma jantu machʼakxayatʼit ni Dios talaktsʼinan tachi ju lana na makʼalhkʼajnanatʼit chai painiʼitnich untʼatʼit chai quilhpatinin untʼatʼit chai alakʼachʼixnin untʼatʼit chai lana matich ju mimpumpuʼan. 18 Para ju yuchi ma taquilhtapujuyan ni atʼamonin ju yuchi ju oro ju lakʼoxicanta lacajipi. Ju chunch ma vasalh makʼalinin aʼunaʼitʼit. Chai ma atʼamonin ju xnapapa pumpuʼ ni laich alakchʼiyaʼitʼit. Chai ju chunch jantu amaxananaʼitʼit va ixlacaʼatalh ni va kʼai tsasau aʼunaʼitʼit. Chai ma atʼamonin ju cʼuchʼu ju laich amucʼayaʼitʼit lamilakchulhʼan ni laich vasalh alacʼavananaʼitʼit. 19 Pus ju yuchi acsni vasalh mapaini tam xamatiʼ pus ma kʼaji acsni jantu sok an chai mamakʼalhkʼajni. Pus ma yuchi talhijunan ni ixlhichux ju miʼalhunutʼan tamch apʼastʼactʼit ixlacata tuchʼi naviyatʼit. 20 Pus ju yuchi ju xaquimaʼatsʼokni ju ani alhiqui ma ya lacamalhtich lhimakspaʼ chai xakʼalai ju tanun pulacni. Chai ni xamatiʼ cakʼasmatniyaʼ ju ixchivinti chai camalhtekʼanilh pus ju yuchi ma catanuyaʼ chai ma catʼavenach. 21 Pus va tichi chavaich ju casastʼucʼaʼ ju macxcai ma calakʼaʼicanaʼ ni catʼatolaʼ laʼixpuʼucxtin ju xaquimaʼatsʼokni ju ani chivinti tachi ju yuchi ni sastuclh ju macxcai chai tʼavi ju ixpai ju laʼixpuʼucxtin. 22 Pus ju alin ju ixpakʼasmatni ma chach kʼasmatlh ju tuchi najun ju Spiritu Santu. Tuchi ajuni ju talhilaksi ju xaquimaʼatsʼokni ju ani chivinti”.
1 Acsni quintʼachivinkʼolh ju xaquimaʼatsʼokni ju ani alhiqui pus astan iclaktsʼilh ni ilhtekʼai lakatam malhtich ju lactʼiyan. Chai ickʼasmatnichokolh ixchivinti ju xaquimaʼatsʼokni ju ani chivinti. Chai ju iskʼasmatca ju anuʼ chivinti chunch ixjunita tachi ju istʼasat ju tuʼuʼ skʼolh. Chai chani quijuni: ―Asokʼoch ani chai acmasuniyan ju tuchi vasalh catapasayaʼ astan. ―Chunch ju xaquijuni. 2 Pus icʼalh chai ju Spiritu Santu tachapun xaquinavi ni lai xaclaktsʼin ju lactʼiyan ixputolan ju kʼai ucxtin. Chai anch ixvi ju Dios. 3 Chai ju yuchi chun slamnicʼa istasui tachi ju tuʼuʼ chiux ju jaspe juncan. Chai vachuʼ slapulh istasui tachi ju tuʼuʼ chiux ju sardis juncan. Vachuʼ ixtalakachoko ju putolan istasui lakatam quilhmacchat. Chai ju yuchi stakʼau istasui tachi ju tuʼuʼ chiux ju esmeralda juncan. 4 Chai ixtalakachoko ju anuʼ xakʼai putolan ixʼalin alakapʼuxamtʼatʼi putolan. Chai ixtapuvilanalh pumapʼuxamtʼatʼi lackʼajin papaninch. Sich ixtalakchʼita ju na xnapapa ixpumpuʼan. Chai ixtalacpatanumanalh ixcoronaʼan ju si oro ixjunita. 5 Chai ju lacakʼai putolan ixtaxtui ju makʼalipniʼ. Vachuʼ ixtaxtui ixchivintiʼan ju anuʼ ju ixtachivinin. Chai na pʼas istʼasai ju tʼajin. Chai laʼixʼucxlacapuʼ ju kʼai putolan ixmaktajita lakatujun maclhcu. Yuchach ju ixpupastaccan ju Spiritu Santu. 6 Chai laʼixʼucxlacapuʼ ju anuʼ kʼai putolan ixma ju tuʼuʼ tachi lakatam kʼai atantsʼin. Para na kʼox stalankʼa ixjunita. Chai laʼixtalakachoko ju anuʼ kʼai putolan ixʼalin lakatʼatʼi atapacxat. Pumatam laʼixʼucxlacapuʼ. Pumatam laʼixpulacan. Pumatam laʼixlhicana. Chai pumatam laʼixlhimacx. Chai ju anuʼ lakatʼatʼi atapacxat si lana lakchulh ixtajunita laʼixʼucxlacapuʼan chai laʼixpulacanʼan. 7 Pus ju xapʼulhnan atapacxat chunch istasui tachi ju tuʼuʼ león. Chai ju ixlhilakatʼui atapacxat chunch istasui tachi ju satsʼalh vacax. Ju ixlhilakatʼutu atapacxat ixpacxanta ixʼucxpuʼ tachi ixʼucxpuʼ lapanac. Chai ju ixlhilakatʼatʼi atapacxat chunch istasui tachi ju tuʼuʼ kʼatsʼokʼo ju alhtʼilitnin. 8 Chai ju pumatamin ju anuʼ lakatʼatʼi atapacxat ixpacxanta lakachaxan ixpakʼachuʼan. Chai laʼixkʼelhtankʼajpuʼ ju ixpakʼachuʼan chai laʼixʼucxni va si lakchulh ixjunita. Chai tontacuj chai tontatsʼis va tachi ixtamilhpai. Lana jantu tavanan ju jantu tamilhpa. Ixtanajun: Salaka. Salaka. Salaka ju kʼai ucxtin Dios ju lai navikʼojui tachi chun ju taxtokni. Yuchi ju ixtʼajun tus acsni maticaʼ tuʼuʼ ixjunita chai yuchi ju catsucukʼalhiyaʼ tus mas va tavananch. 9 Pus ju anuʼ atapacxat ixtalakʼayai chai ixtajunich lakʼailaktsʼiuch ju Dios ju ixvi lacakʼai putolan. Yuchach ju tʼonkʼalhi. 10 Pus va ta pakchux ju chunch ixtalai ju anuʼ atapacxat pus ju pumapʼuxamtʼatʼi papanin ixtataʼaktsokotaich laʼixʼucxlacapuʼ ju Dios ju ixvi lacakʼai putolan. Yuchi ju jonkʼalhita. Chai ixtalakʼayai. Chai ixtalakamamai ixcoronaʼan laʼixʼucxlacapuʼ ju Dios chai ixtamilhpani. Chani ixtajuni: 11 Ji quiʼucxtin chai quiDios aktsʼiya lhijunch ni alakʼayacʼanaʼ chai ni atʼalhonicʼanaʼ. Chai ni alinch ju mintachaput pus lhijunch ni chunch ju aʼulhtʼucʼanaʼ ni uxintʼi ju navikʼotʼa tachi chun ju taxtokni chai laminkʼachat ju alinkʼo.
1 Chai iclaktsʼilh ju anuʼ ju ixvi lacakʼai putolan ni ixchʼapata laʼixlhicana lakatam alhiqui ju ispasmilhcanta. Chai ju anuʼ alhiqui istsʼokcanta laʼixpulacni chai laʼixmacan. Chai lacatujun ixlakalamcanta. 2 Chai iclaktsʼilh pumatam anquilh ju na tachapun ixjunita. Chai ju yuchi na pʼas ixtʼajun chiviniʼ ni laich cakʼasmatkʼocalh. Chani ixtʼajun nonaʼ: ―Tis chavaich ju lhijunch ni laich camalamaconi junta lam lakxtokcanta junima alhiqui chai laich capuxkʼotlh. 3 Para jantu lai xamatiʼ ixpuxkʼotʼa ju anuʼ alhiqui. Nin anch ju lactʼiyan nin anch ju lacatʼun nin anch laxtankʼajni ju lacatʼun. Nin caʼalilh xamatiʼ ju lai catʼachivinilh. 4 Chai ju quitʼin slivasalh xackʼalhun ni jantu ixlhitajucanta xamatiʼ ju ixlhijun ni laich capuxkʼotli ju anuʼ alhiqui nin yuchi ni lai catʼachivinilh. 5 Pus ju acsnich pumatam sia yuʼunch ju papanin ju ixtavilanancha anch chani quijuni: ―Jantu akʼalh. Ju Jesús sastuclich ju macxcai. Chai ju yuchi xaleón junita sia yuʼunch ju makʼaniya ixtamaskʼatʼanti ju Judá chai ju kʼai ucxtin David. Chai ni sastuclich ju macxcai ju yuchi pus laich calamamaconiyaʼ junta lacatujun lakalamcanta chai lai capuxkʼotʼaʼ ju alhiqui. 6 Chai iclaktsʼilh lakatam Askʼatʼa Borrego. Anch ixya laʼixlacaitat junta ixvi ju kʼai putolan chai junta ixtayanancha ju lakatʼatʼi atapacxat chai junta ixtavilanancha ju papaninch. Chai ju anuʼ Askʼatʼa Borrego chunch istasui tachi ju va ixmaknicanta. Chai ju yuchi ixʼalin lakatujun ixʼakalokot chai lakatujun ixlakchulh. Pus ju anuʼ lakchulh yuchi ju Spiritu Santu ju malakachai ju Dios ixlhilacaputsʼun ju lacamunutpaʼ. 7 Pus ju anuʼ Askʼatʼa Borrego alh. Chai amaklhtayanalh ju alhiqui ju ixchʼapata laʼixlhicana ju anuch ju ixvi lacakʼai putolan. 8 Chai acsni amaklhtayanalh ju alhiqui ju Askʼatʼa Borrego pus ju anuʼ ixpumatʼatʼiʼan atapacxat chai ixpumapʼuxamtʼatʼiʼan papanin tataʼaktsokotanilh laʼixʼucxlacapuʼ ju anuʼ Borrego. Chai pumatamin ju yuʼunch ixtachʼapata ixlhisanʼan ju arpa juncan chai ixpumapʼunʼan ju si oro ixjunita. Chai anchach ju ixtaxavai ixpumʼan. Chai ju pum yuchach ixchivintiʼan ju ixlapanacni Dios ju ani lacamunutpaʼ ju tuchi tapuxakʼalai ju Dios. 9 Chai ju anuʼ atapacxat chai ju papaninch tamilhpa lakatam sastʼi milhpat. Chani ixtanajun: Lhijunch ni uxintʼi ju achʼapʼa ju alhiqui chai alamamacʼonitʼi junta lakalamcanta. Lhijunch ni chunch ju alatʼi ni ixmaknicʼantʼa ju uxintʼi. Chai laminʼacʼalhni alhimalakxtʼutʼa ju lapanacni ju talhilaksich ju Dios. Amalakxtʼutʼa sia yuʼunch ju tachivinin tijpachux chivinti chai sia yuʼunch ju tatʼajun ixlhilacaputsʼun ju lacamunutpaʼ. 10 Chai ju uxintʼi aʼulatʼa kʼai ucxtinin. Chai vachuʼ aʼulatʼa ju palijni ni catalakʼayayach ju quiDiosʼan. Chai ju yuʼunch catalhinonaʼ ju lacamunutpaʼ. 11 Pus ju acsnich iclaktsʼilh lhu lana ju anquilhnin. Jantu lai ixputekʼekʼocan ni lana na lhu istasui. Pus ju yuʼunch anch ixtayanancha laʼixlacaitat junta ixvi ju kʼai putolan chai junta ixtayanancha ju atapacxat chai ju papanin. Chai ickʼasmatlh ni ixtachivinin ju anquilhnin. 12 Pʼas ixtachivinin ni laich cakʼasmatkʼocalh. Chai chani ixtanajun: Ixmaknicanta ju Askʼatʼa Borrego. Chai lhijunch ni calakʼayacalh. Catanonach ni yuchi ju alin ixmakʼalit chai na kʼox ixtacʼatsan chai na alin ixtachaput. Pus yuchi lhijunch ni calakʼayacalh chai catalhonicalh. 13 Chai ickʼasmatlh ni ixtachivinin tachi chun ju taxtokni ju navita ju Dios ju tatʼajun ju lactʼiyan chai ju lacatʼun chai ju laxtankʼajni ju lacatʼun chai ju lacaʼalama. Ixchuxʼan chani ixtanajun: Ju vi lacakʼai putolan chai ju Askʼatʼa Borrego yuʼunchach ju tucan xalackʼajin. Chach atalhonikʼalhicalh. Chai chach alakʼayakʼalhicalh. Chach noncalh ni na alin ixtachaputʼan. Chunch ju tanaulh. 14 Chai ju ixpumatʼatʼiʼan atapacxat ixtanajun ni chunch vasalh caʼanavicalh. Chai ju papanin lana tataʼaktsokotanilh. Chai talakʼaya.
1 Pus iclaktsʼilh ju Askʼatʼa Borrego acsni malamaconi junta ixlamcanta lacatam. Chai ickʼasmatlh ixchivinti pumatam sia yuʼunch ju ixpumatʼatʼiʼan atapacxat. Chai acsni chivinilh na pʼas istʼasai tachi acsnich tʼasai ju tʼajin. Chani ju quijuni: ―Asokʼoch. Alaktsʼich ju ani. 2 Pus icʼalh. Chai iclaktsʼilh lakatam caballo ju na xnapapa ixjunita. Chai ju lapanac ju ixpujucʼalh ixchʼapata ixʼakxmuti chai ixtaknicanta lakatam ixcorona. Pus taxtulh. Chai junta alh lasanaʼ jantu tavanan istsʼankʼai. 3 Chai ju Askʼatʼa Borrego acsni malamaconilh ju ixlhilacatʼui junta ixlamcanta pus ickʼasmatlh ju ixchivinti ju ixlhipumatʼui atapacxat. Chai ju yuchi quijuni: ―Asokʼoch. Alaktsʼich ju ani. 4 Chai icʼalh. Chai lana taxtuchokolh alakatam caballo ju na slapulh ixjunita. Chai ju lapanac ju ixpujucʼalh ixtaknicanta ixpokʼai ni laich camalasani ju lapanacni ixlhilacaputsʼun ju lacamunutpaʼ. Ju chunch ju lapanacni catalamakniyach. Chai ju anuʼ ju ixpujucʼalh ju caballo xtaknicalh lakatam kʼai espada. 5 Chai ju Askʼatʼa Borrego acsni malamaconi ju ixlhilacatʼutu junta ixlamcanta pus ickʼasmatlh ixchivinti ju ixlhipumatʼutu atapacxat. Chai ju yuchi quijuni: ―Asokʼoch. Alaktsʼich ju ani. Pus icʼalh. Chai iclaktsʼilh alakatam caballo ju na tsʼiti ixjunita. Chai ju lapanac ju ixpujucʼalh ixchʼapata lakatam pamakchʼixni laʼixmacaʼ. 6 Chai ickʼasmatlh lakatam chivinti tachi ju va anch ixminacha junta ixtayananchalh ju pumatʼatʼi atapacxat. Chai chani ixnajun: ―Ju tam kilo ju trigo lhistʼacan tachi ju lhajacan tamin avilhchan lacalhichʼalhcat. Chai lakatʼutu kilo ju cebada lhistʼacan tachi ju lhajacan tam avilhchan lacalhichʼalhcat. Para jantu catilhitapalalh ju aceite nin yuchi ju vino. ―Chunch ju naulh ju xachivinin. 7 Pus ju Askʼatʼa Borrego acsni malamaconi ju ixlhilacatʼatʼi junta lamcanta pus ickʼasmatlh ixchivinti ju ixlhipumatʼatʼi atapacxat. Chai ju yuchi quijuni: ―Asokʼoch. Alaktsʼich ju ani. 8 Pus icʼalh. Chai iclaktsʼilh alakatam caballo ju na istakta. Chai ju lapanac ju ixpujucʼalh ixjuncan aninti. Chai ju alasaninin tachʼakʼokʼalh. Chai xtaknicalh ju lapanac ixpokʼai ni laich calhinaulh ixmaknica tam cuarto tachi chun ju lapanacni ju ixtatʼajun ixlhilacaputsʼun ju lacamunutpaʼ. Laich caʼamakni lacamachita chai lacachavanti chai lacatakʼankʼat chai caʼamamakninin ju maktilin ju alin ju lacamunutpaʼ. 9 Chai ju Askʼatʼa Borrego acsni malamaconilh ju ixlhilacaquis junta ixlamcanta pus icʼalacʼavanalh laʼixtankʼapuʼ junta ixavanican ju Dios ju pum. Chai ju anch iclaktsʼilh ju ixtacuvinʼan ju lapanacni ju ixʼamaknicanta va ixlacaʼatalh ni ixtalacaʼita ixchivinti Dios chai ni ixtajuni ju anuʼ chivinti ju ixtʼalapanacni. 10 Chai ju yuʼunch na pʼas tachivinilh acsni chani tanaulh: ―Ji quiʼucxtin ju uxintʼi na salakaʼat. Chai aktsʼiya muctʼaxtʼui ju minchivinti. Pus tus tavananch ju alaktsʼintʼanuyaʼ ju quilhamakʼan quincʼan chai amamalakchʼavaniyaʼich ixlacata ju quinʼacʼalhni quincʼan ju lapanacni ju tatʼajun ju lacamunutpaʼ. ―Chunch tanaulh ju anuʼ tacuvin. 11 Pus ju acsnich axtaknicalh ju yuʼunch xnapapa ixpumpuʼan ju pumatamin. Chai ajunicalh ni catapacxalhcaʼ atilacatsʼunin tus acsni catataʼaktsayach ixtʼaxalapanacni chai ixlhiʼalakʼavinʼan ju vachuʼ chunch catapuniyaʼ tachi ju yuʼunch. 12 Chai iclaktsʼilh ju Askʼatʼa Borrego acsni malamaconilh ixlhilacachaxan junta ixlamcanta chai lana na pʼas tataclh ju lacatʼun. Chai ju avilhchan lana na smalaka va tachi ju tuʼuʼ tsʼiti pumpuʼ. Chai ju malhquiyuʼ lana na lapulh va tachi ju acʼalhni. 13 Chai ju stʼacu tapataju. Tamachilh ju lacatʼun tachi ju tuʼuʼ xalhiʼut qʼuiu ni jopʼon patajui ni sunui ju un. 14 Chai ju lactʼiyan lana matich va tachi acsni pasmilhcan ju tuʼuʼ alhiqui. Chai tachi chun ju talhpa chai tachi chun ju lactʼicstʼi lacatʼun lacaʼalama si amakʼosukʼocalh. 15 Pus ju acsnich ju xaʼucxtinin ju ani lacamunutpaʼ chai ju xalackʼajinch chai ju xaʼucxtinin taropajni chai ju makʼalinin chai ju lactachapunin chai tachi chun ju lapanacni mas xalapanacni ixtajunita chai vachuʼ ju yuʼunch ju matiʼ ixjunita ixʼucxtinʼan sich lana tatankʼanukʼo junta pulhucucu talhpa ixjunita chai junta lacvi ju chiux ju lacaqʼuivin. 16 Chai chani ixtajuni ju anuʼ lactalhpa chai ju anuʼ chiux: ―Apʼatʼaʼutʼitch. Aquilatantʼalhmauch. Chach jantu aquintalaktsʼin ju yuchi ju vi lacakʼai putolan. Chai chach jantu aclaktsʼiu ixtalhkʼamti ju Askʼatʼa Borrego. 17 Chunch aquilaʼulhtuch ni chilh ju avilhchan acsni aquintamamakʼalhkʼajniyan ju Dios. Chai tis chavaich ju lai casastʼucʼaʼ ju yuchi.
1 Chai acsni tapasakʼolh ju ani taxtokni pus iclaktsʼilh pumatʼatʼi anquilhnin. Chai ju yuʼunch ixtayanalh laʼixmakastutʼatʼi ju lacamunutpaʼ chai istasastʼucʼach ju un ju ixajachilh ju makastutʼatʼi ju lacamunutpaʼ. Ju chunch jantu catilalh ju un ju ani lacatʼun nin anch ju lacaʼalama nin yuchi ni lai casunulh ju qʼuiu. 2 Chai iclaktsʼilh apumatam anquilh ju ixminacha junta xajachilh ju avilhchan. Chai ju yuchi ixchʼapata ixpamichin ju Dios ju lakʼajunta. Chai lana na pʼas axakʼala ju anuʼ ixpumatʼatʼiʼan anquilhnin ju ixʼaxtaknicanta ju ixpokʼaiʼan ni laich catalakʼalhiyaʼ ju lacatʼun chai ju alama. 3 Chai ju anuʼ anquilh ajuni: ―Tucaʼ alakʼalhitʼit ju lacatʼun nin yuchi ju alama nin yuchi ju qʼuiu. Chach ictimichikʼoyau ju ixlapanacni Dios laʼismuntsanʼan. 4 Chai ickʼasmatlh ta pumachux ju ixʼamichican. Chaʼalh tam cientos a cuarenta y cuatro milh lapanacni. Asacxtucalh sia yuʼunch ixʼapapanatnich ju pumacautʼuiʼan istsʼalan ju Israel. 5 Lakacautʼui milh amichicalh ju ixʼapapanatnich ju Judá. Chai lakacautʼui milh ju ixʼapapanatnich ju Rubén. Chai lakacautʼui milh ju ixʼapapanatnich ju Gad. 6 Chai lakacautʼui milh amichicalh ju ixʼapapanatnich ju Aser. Chai lakacautʼui milh ju ixʼapapanatnich ju Neftalí. Chai lakacautʼui milh ju ixʼapapanatnich ju Manasés. 7 Chai lakacautʼui milh ju ixʼapapanatnich ju Simeón. Chai lakacautʼui milh ju ixʼapapanatnich ju Leví. Chai lakacautʼui milh ju ixʼapapanatnich ju Isacar. 8 Chai lakacautʼui milh ju ixʼapapanatnich ju Zabulón. Chai lakacautʼui milh ju ixʼapapanatnich ju José. Chai lakacautʼui milh ju ixʼapapanatnich ju Benjamín. 9 Chai acsni tapasakʼolh ju ani taxtokni pus iclaktsʼilh aliʼin lhu lapanacni. Jantu lai xamatiʼ ixʼaputʼekʼekʼojui. Ixtataxtutacha ixlhilacaputsʼun ju lacamunutpaʼ junta ixtachʼanxtaminin chai ixtachivinin tijpachux chivinti. Chai ju anuch lapanacni ixtayanalh laʼixʼucxlacapuʼ ju Dios ju ixvi lacakʼai putolan chai laʼixʼucxlacapuʼ ju anuʼ Askʼatʼa Borrego. Chai ixtalakchʼita xnapapa ju ixpumpuʼan chai ixtachʼapata ixʼaxtacnaʼan. 10 Chai na pʼas ixtachivinin ni laich cakʼasmatkʼocalh. Chani ixtanajun: Ju quiDiosʼan vi lacakʼai putolan. Pus ju yuchi chai ju Askʼatʼa Borrego yuʼunch ju taʼamakʼalhtaxtunun. 11 Chai chux ju anquilhnin ixtayanankʼo ixtalakachoko junta ixvi ju Dios lacakʼai putolan chai junta ixtayanalh ju papanin chai ixpumatʼatʼiʼan atapacxat. Chai ju anuʼ anquilhnin tataquilhputalh laʼixʼucxlacapuʼ ju Dios junta ixvi lacakʼai putolan chai talakʼayalh ju yuchi. 12 Tanaulh: Vasalh chanich canavicalh ju quiDiosʼan. Chach xtaknikʼalhicalh lakʼailaktsʼiuch. Chai chach lakʼayakʼalhicalh ni yuʼunch ju tacʼatsakʼojui tachi chun ju taxtokni. Chach talhonikʼalhicalh yuchi ju lai navikʼojui tachi chun ju taxtokni. Vasalh chach navikʼalhicalh chunch. 13 Pus ju acsnich pumatam sia yuʼunch ju papaninch quixakʼala. Quisacmi: ―Tis chavaʼitnich ju ani tayanalh ju talakchʼita sasnapapa ixpumpuʼan. Tas anchach ju tamintacha. 14 Chai ju quitʼin icjuni: ―Uxintʼich ju cʼatsʼai. Chai ju yuchi quijuni: ―Pus yuʼunch ju ani ju tamintacha lacakʼai makʼalhkʼajnat chai tamakpatach ju ixpumpuʼan chai lhixnapapantach laʼixʼacʼalhni ju Askʼatʼa Borrego. 15 Yuchi talhiyanalh ju laʼixʼucxlacapuʼ ju kʼai putolan junta vi ju Dios. Chai tachʼalhcatnanich tontacuj chai tontatsʼis junta lakʼayacan ju yuchi. Chai ju Dios ju vi lacakʼai putolan yuchi ju vanin caʼalactʼatolaʼ ju tayanalh laʼixʼucxlacapuʼ ni caʼalhistʼacʼach. 16 Jantu tavanan catitachavanilh nin yuchi ni lai cataquicxixli. Jantu catitalhini ju ixmacxcat ju avilhchan nin yuchi ni cataʼucsacʼatsa ju ixmacxcat. 17 Jantu chun catitapasalh ni isʼakstu ju Askʼatʼa Borrego ju calhistʼacʼaʼ. Yuchach ju ya laʼixʼucxlacapuʼ ju kʼai putolan. Chai yuchi ju caʼapʼulhniyach. Chai caʼalhiʼanach junta lhu ma ju xcan ju jantu lai xixa. Chai ju Dios yuchi ju camakʼosuyaʼ ju amakʼanita chai jantu xamatiʼ cakʼalhununaʼ.
1 Acsni malamaconilh ju Askʼatʼa Borrego ju ixlhilacatujun junta lamcanta pus lana sek tajunkʼo tachi chun ju ixtavilanalh ju lactʼiyan. Tachi paitat hora sek tajunlh. 2 Pus ju acsnich iclaktsʼilh ju anuʼ ixpumatujunʼan anquilhnin ju ixtayanalh laʼixʼucxlacapuʼ ju Dios chai axtaknicalh lakatamin iskʼolhʼan. 3 Chai milh apumatam anquilh chai taya laʼixʼucxlacapuʼ junta xavanican ju Dios ju pum. Pus anch laʼixʼucxlacapuʼ ju kʼai putolan ixjunita. Chai ju anuʼ anquilh ixchʼapata lakatam pumapʼun si oro. Chai na lhu xaxtaknican ju pum ni laich caxavayaʼ junta xavanican ju Dios ju pum. Chai acsni ixtatʼajun tʼachivinin ju Dios tachi chun ju ixlapanacni acsnich ju lhu ixavai ju ixpum. 4 Pus ju xajin ju pum ju ixtʼajun tʼacutnuʼ lacapumapʼun ju ixchʼapata ju anuʼ anquilh alh junta ixvi ju Dios. Va lhiyaulh ixchivintiʼan ju ixlapanacni Dios acsni ixtatʼachivinin. 5 Pus ju acsnich ju anquilh lhiʼanchokolh ixpumapʼun junta xavanican ju Dios ju pum chai mujulh ju jipi. Astan ju yuchi xtʼekʼemacamilh ju jipi ju lacatʼun. Chai lana tʼasalh ju tʼajin. Chai na pʼas lacchivinincalh. Chai makʼalipnilh. Chai tataclh ju lacatʼun. 6 Pus ju acsnich ju ixpumatujunʼan anquilhnin ju ixtachʼapata lakatamin iskʼolhʼan lana talalhcayaulh ni va ixtaʼasanamputunch. 7 Pus ju xapʼulhnan anquilh sunulh ju iskʼolh chai lana tamachilh ju lacatʼun ju chajʼit chai ju jipi. Va lhiyalhch acʼalhni. Pus lana lhculh ju lacamunutpaʼ. Para jantu chaʼalh paitat ju lhculh. Chai anch junta lhculh pus lhcukʼo chux ju qʼuiu chai chux ju achʼitin ju stakʼau ixjunita. 8 Chai ju ixlhipumatʼui anquilh sunulh ju iskʼolh chai ju tuʼuʼ tachi ju kʼai talhpa maktaitavi chai macaʼancalh lacaʼalama. Chai na lhu ju xaxcan alama ju lapa acʼalhni. Para nin ixpaitat ju alama jantu xachaʼan ju acʼalhni. 9 Chai anch junta lapa acʼalhni pus tanikʼo tachi chun ju atapacxat ju ixtatʼajun ju anch. Chai lana takʼalhikʼo ju barco ju ixtaʼanta ju anch. 10 Chai ju ixlhipumatʼutu anquilh sunulh ju iskʼolh chai mincha lactʼiyan lakatam kʼai stʼacu. Na kʼai ixmactaiminta tachi tuʼuʼ maclhcu. Chai tajuchilh junta acxtui ju kʼai xcan chai ju xkʼati. Para jantu tajulh nin ixpaitat ixlhilacaputsʼun ju lacamunutpaʼ junta acxtui ju kʼai xcan chai ju xkʼati. 11 Pus ju anuʼ kʼai stʼacu Ajenjo juncan. Chai ju kʼai xcan ju alin ju lacatʼun lana na sunch va tachi ju achʼitin ju ajenjo juncan. Para jantu chaʼalh paitat ju kʼai xcan ju alin ju ixlhilacaputsʼun ju lacamunutpaʼ ju na sun va. Chai na lhu lapanacni talhini ju xcan ni lana na sun va. 12 Chai ju ixlhipumatʼatʼi anquilh sunulh ju iskʼolh chai lana takʼalhilh lacatsʼunin ju avilhchan para jantu chaʼalh paitat ju takʼalhi. Chai vana va chunch tapasalh lacamalhquiyuʼ. Takʼalhilh lacatsʼunin para jantu chaʼalh paitat ju takʼalhi. Chai vana va chun tapasalh ju stʼacu. Takʼalhi lacatsʼunin para jantu chaʼalh paitat ju takʼalhi. Pus ju chunch pus lana jantu isʼaktsai tachi ju aktsʼiya ixtamapulhcui. Pus ju tamin avilhchan lakatʼatʼi hora na istsʼista. Chai vana va chun ju tsʼis. Lakatʼatʼi hora jantu lai istasui nin yuchi ju stʼacu. 13 Pus ju acsnich iclaktsʼilh lakatam kʼatsʼokʼo ju ixʼalhtʼilitnitʼajun laʼixlacaitat lactʼiyan. Chai ickʼasmatlh acsni na pʼas istʼasaʼanta. Ixnajun: ―Painiʼitnich. Painiʼitnich. Painiʼitnich catajunaʼ ju tatʼajun ju lacamunutpaʼ acsni cataskʼolach ju ixpumatʼutuʼan anquilhnin ju titacʼacx.
1 Pus ju ixlhipumaquis anquilh sunulh ju iskʼolh chai iclaktsʼilh ni patajulh lakatam stʼacu. Tamacha ju lacatʼun. Chai xtaknicalh ju anuʼ stʼacu ju xallave junta na makat lhokʼonkʼoʼanta. Lana jantu lai cʼatsacan tas tus anch ju chaʼan. 2 Pus ju yuchi malhtekʼa junta na makat lhokʼonkʼoʼanta. Chai lana na lhu xajchilh ju jin. Chunch tachi ju tuʼuʼ jin ju taxtui lacahorno. Pus lana lakapuchʼapakʼo ju avilhchan. Chai tachi ju va paitat tsʼis va va ixlacaʼatalh ju xajin ju taxtulh junta na makat lhokʼonkʼoʼanta. 3 Chai lacajin taxtulh ju silek. Chai taʼakpitsilh ju lacatʼun. Chai axtaknicalh ju yuʼunch ixtachaputʼan tachi ixtachaput ju tuʼuʼ statsucu ju alin ju lacamunutpaʼ. 4 Chai ajunicalh ni ma jantu catalakʼalhi ju atsʼin ju alin ju lacamunutpaʼ nin ju tuʼuʼ ju stakʼau cava nin tuʼuʼ qʼuiu. Ma va yuʼunch ju lai catamamakʼalhkʼajni ju lapanacni ju jantu amichita ju Dios laʼismuntsanʼan. 5 Chai ajunicalh ni ma laich cataʼamamakʼalhkʼajni ju lapanacni lakaquis malhquiyuʼ. Para ma jantu lai catiʼamakni. Pus ju ixmakʼalhkʼajnatʼan chunch ixjunita tachi ju tuʼuʼ statsucu acsni atsʼacʼanan. 6 Chai ju acsni avilhchan ju lapanacni na cataniputunach para jantu lai catitani. 7 Pus ju anuʼ silek ixtʼachunch ixtatasui tachi ju tuʼuʼ caballo ju mucʼanicanta ju tsasnat pumpuʼ acsni an lacalhilucut. Chai laʼisʼaktsulhʼan ixmucʼacanta ju tuʼuʼ tachi ixcoronaʼan ju si oro. Chai ju ixʼucxpuʼan tachi ixʼucxpuʼ lapanac ixtajunita. 8 Chai ixʼaiʼan chun ixjunita tachi ixʼai tam chakoʼulh. Chai istatsalatʼan chun ixtajunita tachi istatsalat ju tuʼuʼ león. 9 Chai laʼixtanquilhakni ixjucʼanilh ju tuʼuʼ tachi tsasnat. Chai ju ixpakʼachu ixmacatʼajun tachi istʼasat lhu carro ju taxakʼamai ju caballo acsni taʼan lacalhilucut. 10 Chai ixʼalin isʼistaʼan tachi isʼista ju statsucu chai ixʼalin ixpatsʼacʼanʼan. Chai laʼisʼistaʼan anchach ju ixʼalin ju ixtachaputʼan ni lai cataʼamamakʼalhkʼajniyaʼ ju lapanacni. Para ajunicalh ni va lakaquis malhquiyuʼ lai cataʼamamakʼalhkʼajniyaʼ ju lapanacni. 11 Chai alin ixʼucxtinʼan ju anuʼ silek. Yuchi ju xaʼanquilh junta na makat lhokʼonkʼoʼanta. Junta jantu lai cʼatsacan tas tus anch ju chaʼan. Ju ixtapakaʼut ju anuʼ anquilh lacalhihebreo Abadón juncan. Chai lacalhigriego ma Apolión juncan. Ju chunch va nomputun ni amakniniʼ junita. 12 Pus tapasalh ju xapʼulhnan makʼalhkʼajnat. Chai timinta alakatʼui makʼalhkʼajnat. 13 Pus ju acsnich ju ixlhipumachaxan anquilh sunulh ju iskʼolh chai ickʼasmatlh lakatam chivinti ju taxtucha ju laxmakʼastunuxni mixa ju tsupilin makʼastuya. Yuchach ju mixa junta xavanican ju Dios ju pum. Chai ju anuʼ tachi mixa ixjunita oro ixlhimanicanta chai ixvi laʼixʼucxlacapuʼ ju Dios. 14 Pus ju anuʼ ju ixchivinin xakʼalalh ixlhipumachaxan anquilh ju ixchʼapata ju iskʼolh. Junich: ―Axkʼotʼich ju ixpumatʼatʼiʼan anquilhnin ju alacchʼiyocanta laʼixquilhtuʼ kʼai xcan ju Eufrates juncan. 15 Pus lana axkʼotlh ju ixpumatʼatʼiʼan anquilhnin. Pus yuʼunch ju ixʼalaclhcaʼulacanta ixlacata ju anuʼ pantsʼiquis chai ju anuʼ avilhchan chai ju anuʼ malhquiyuʼ chai ju anuʼ cʼata ni laich catamakni lhu lana ju lapanacni. Para jantu ixchaʼanta nin paitat tachi chun ju lapanacni ju tatʼajun ju ixlhilacaputsʼun ju lacamunutpaʼ ju camaknicanaʼ. 16 Pus ju anuʼ anquilhnin tapʼulhnilh ju taropajni ju ixtapuʼanta ixcaballoʼan. Chai ju anuʼ taropajni ixtachaʼanta lakatʼui cientos millón. Pus ickʼasmatlh ni chunch aputekʼecalh. 17 Pus chani istasui ju caballojni ju iclaktsʼilh tachi ju va laquinʼaklakʼavanti. Pus ju ixtajucʼanalh lacacaballo ixtalactanquilhakvilanalh ju tsasnat ju slapulh ixjunita. Chai azul chai xkavau ixjunita. Chai ju isʼaktsulhʼan ju caballojni chunch istasui tachi isʼaktsulh león. Chai laʼixquilhniʼan ixtapuquilhtaxtui ju jipi chai jin chai azufre. 18 Chai ju ani lakatʼutu makʼalhkʼajnat tapunilh lhu ju lapanacni. Para jantu chaʼalh nin paitat tachi chun ju lapanacni ju tatʼajun ixlhilacaputsʼun ju lacamunutpaʼ. Yuchi ju amaknilh ju jipi chai ju jin chai ju azufre ju ixtaquilhtaxtui ju caballojni. 19 Pus alin ixtachaputʼan ju caballojni laʼixquilhniʼan chai laʼisʼistaʼan. Pus ju isʼistaʼan chunch ixtajunita tachi ju tuʼuʼ lu ju alin isʼaktsulh chai yuchi ju taputacʼatsani ju lapanacni. 20 Pus ju aliʼin lapanacni ju jantu xatalhini ju ani makʼalhkʼajnat jantu tavanan tam ixtapastʼacʼa ixlacata tuchi ixtanavi. Va tachi ixtalhilacaʼan ju macxcai un chai ju santo ju lhinavicanta oro chai plata chai ju atumpa tsasnat chai ju va chiux chai ju va qʼuiu. Chunch ixtalai mas jantu lai taʼalacʼavanan ju isantoʼan nin lai catakʼasmatnalh nin yuchi ni lai cataʼalhtanalh. 21 Chai jantu tavanan tam xatapastʼacʼa ixlacata ju ixʼamaknintiʼan nin yuchi ni ixʼalhicujnutʼan nin yuchi ni va ixtatʼatʼajun va tichi chavaich nin yuchi ni ixtaʼakʼalhonan.
1 Pus ju acsnich iclaktsʼilh apumatam anquilh ju na tachapun ixjunita. Chai ju yuchi mincha lactʼiyan. Va milh lacaʼataputsʼi. Chai lakatam quilhmacchat ixlacpajucalh. Chai ju ixʼucxpuʼ chunch istasui tachi ju avilhchan. Chai ju ixchʼajaʼ chunch ixtajunita tachi ju tuʼuʼ makʼakʼai tantun ju na maktajita. 2 Chai ixchʼapata lakatam lacatʼicstʼi alhiqui ju ixtapuxkʼota. Chai laʼixlhichʼancana putachʼanju lacaʼalama. Chai laʼixlhichʼanmacx putachʼantalh lacatʼun. 3 Chai lana kʼox pʼas ju chivinilh tachi acsni na pʼas tʼasai ju tuʼuʼ kʼai león. Chunchach ju chivinilh ni laich cakʼasmatkʼocalh ixlhilacaputsʼun ju lacamunutpaʼ. Chai acsni tʼasalh ju anuʼ anquilh pus paktujun tʼasalh ju tʼajin. 4 Chai acsni istʼasakʼolhch paktujun ju tʼajin pus ju quitʼin xactsʼokʼulaputun tuchi naulh. Para ickʼasmatlh lakatam chivinti ju mincha lactʼiyan ju chani xaquijuni: ―Jantu atsʼokʼulatʼi. Va amakʼatʼich lamiʼalhunut ju tuchi xanajun ju tʼajin acsni xatʼasai paktujun. 5 Chai ju anuʼ anquilh ju iclaktsʼilh ni ixya lacaʼalama chai lacatʼun macʼalh ju lactʼiyan laʼixlhicana. 6 Chai lhipastacli ju Dios ixpumavasalaca ixchivinti. Lhipastaclh ju Dios ju tʼonkʼalhi. Yuchi ju navilh ju tʼiyan chai tachi chun ju taxtokni ju alin ju anch. Chai yuchi ju navilh ju lacatʼun chai tachi chun ju taxtokni ju alin ju ani. Chai yuchi ju navilh ju lacatʼun chai tachi chun ju taxtokni ju alin ju anch. Pus lhipastacli ju Dios chai naulh ni jantuch aliʼ tuʼuʼ cʼacx. Va yuchi ni caʼuctaxtukʼoyach tachi chun ju ispastacta ju Dios. 7 Para acsni cachinaʼ ju avilhchan acsni casunaʼ ju iskʼolh ju ixlhipumatujun anquilh acsnich ju cacʼatsacanaʼ ju tuchi ixʼajuni ju Dios ju ixlapanacni para jantu tavanan lai tamachakxa. 8 Pus ju acsnich ju anuʼ chivinti ju ickʼasmatlh ju minchalh lactʼiyan aktam quixakʼalachokopa. Quijuni: ―Inchich iniʼ ju alhiqui ju tapuxkʼota laʼixmacaʼ ju anuʼ anquilh ju chʼanjui ixtachʼantam lacaʼalama chai ju ixtachʼantam lacatʼunch. 9 Pus iclakʼalh ju anquilh chai icjunilh ni aquixtaknilh ju lacatʼicstʼi alhiqui. Chai ju yuchi quijuni: ―Nich. Aʼutʼich. Na sun cajunaʼ lamimpajan para ju laminquilhni slivasalh na saksi cajunaʼ tachi ju tuʼuʼ tʼaxcat. 10 Pus ju quitʼin icʼamaklhtayanalh ju lacatʼicstʼi alhiqui laʼixmacaʼ ju anquilh chai lana icʼulh. Chai vasalh na saksi iclhiula laquinquilhni. Lana chun tachi ju tuʼuʼ tʼaxcat. Para acsni icʼokʼolh pus na sunch va laquimpajan. 11 Chai icjunicalh: ―Aktsʼiya tasqʼuini ni aʼunchʼokʼoyaʼich ju lapanacni tuchi catapasayaʼ. Aʼunch ju lapanacni ju tatʼajun ixlhilacaputsʼun ju lacamunutpaʼ chai ju tachivinin tijpachux chivinti chai ju kʼai ucxtinin.
1 Pus acsnich icxtaknicalh kʼantam actiyac ju pulhcacan tuʼuʼ. Chai icjunicalh: ―Akʼostʼaʼulh chai alhcʼatʼich ju ixpujitat Dios chai junta xavanican ju pum ju Dios. Vachuʼ apʼutʼekʼe ju anch taʼan lakʼayanin ju Dios. 2 Para jantu alhcʼayapʼi ju laʼismakspaʼ ju pujitat. Ju anch axtaknican ju yuʼunch ju jantu talakʼayai ju Dios. Chai lakatʼutu cʼata a paitat catalhinonaʼ ju yuʼunch ju lakʼachakʼan junta lakʼayacan ju Dios. 3 Chai acʼaxtakniyaʼ ixtachaputʼan ixtʼiyunʼan quilapanacni. Ju chunch laich catanonaʼ ju quinchivinti tam milh a lakatʼui cientos a sesenta avilhchan. Chai catalakchʼiyaʼ ju pumpuʼ tachi ju talakchʼi ju na taʼamakʼaninin. 4 Yuʼunch ju tachi akʼatʼui xaqʼuiu olivo tajunita. Chai tachi ju lakatʼui ixputayan cantila ju ya laʼixʼucxlacapuʼ ju Dios ju amanavin ju lacamunutpaʼ junita. 5 Chai ni xamatiʼ calactuʼuputunaʼ pus lana taxtui ju alapnaʼ laʼixquilhniʼan ju ixtʼiyunʼan lapanacni. Chai lana amakni ju ixtʼalaxcaiʼan. Pus ni xamatiʼ calactuʼuputunaʼ chunchach ju capuniyaʼ. 6 Chai ju yuʼunch ixtʼiyunʼan lapanacni axtaknicanta ju ixtachaputʼan ni laich catanonaʼ ni jantu caminaʼ ju xcan tachi chun ju avilhchan ju catatsucuyaʼ nonin ixchivinti Dios. Chai vachuʼ alin ixtachaputʼan ni lai catalapalakʼo acʼalhni ju xcan. Chai lai caʼamamakʼalhkʼajni ju lapanacni tijpachux ju makʼalhkʼajnat va tapakchux ju catanaviputunaʼ. 7 Chai acsni catanavikʼoyaʼ ixlhichʼalhcatʼan ixnajunca ixchivinti Dios pus ju maktiliʼ ju cataxtuyaʼ junta na makat lhokʼonkʼoʼanta caʼalactʼalasayaʼ ju yuʼunch. Chai calhajananaʼ ju yuchi. Chai caʼamakniyach ju ixtʼiyunʼan lapanacni. 8 Chai ixlacatunaʼan catamayaʼ lacati ju lakʼachakʼan junta maknicalh lacacurus ju Jesús. Pus ju Dios najun ni chunch junita ju anuʼ lakʼachakʼan tachi ju lakʼachakʼan Sodoma chai tachi ju lacatʼun Egipto. 9 Pus ju lapanacni ju tatʼajun ixlhilacaputsʼun ju lacamunutpaʼ chai ju tachivinin tijpachux chivinti catalaktsʼiniyach ju ixlacatunaʼan lakatʼutu avilhchan a paitat. Ju anuʼ ixtʼiyunʼan ju xaʼamaknican. Chai jantu calacasqʼuincanaʼ ni lai caʼancalh amacnuca. 10 Chai ju lapanacni ju tatʼajun ju ani lacatʼun catalhikʼachanach ixlacataʼan ju yuʼunch. Chai catalhicʼataniyaʼ chai catalapuxtakniyaʼ lhakʼailaktsʼin. Chunch ju catanaviyaʼ ni na ixtaʼamamakʼalhkʼajni ju lapanacni ju ixtatʼajun ju ani lacamunutpaʼ ju anuʼ ixtʼiyunʼan ixlapanacni Dios. 11 Para acsni tapasalh ju anuʼ lakatʼutu avilhchan a paitat pus ju Dios axtaknichokolh isʼatsucuntiʼan chai lana takʼostavi junta ixtamanalh. Chai na kʼox tatalhanalh ju talaktsʼilh. 12 Pus ju acsnich ixtʼiyunʼan takʼasmatlh lakatam chivinti ju minchalh lactʼiyan. Na pʼas ju chivinilh ni laich catakʼasmatʼaʼ. Chanich ju ajuni: ―Atʼatʼitch ju ani. Chai lana tapuʼalh ju ataputsʼi ju lactʼiyan. Chai na kʼoxich talaktsʼilh ju ixtʼalaxcaiʼan. 13 Chai ju anuʼ pantsʼiquis lana na pʼas tataclh ju lacatʼun. Chai ju tamin cientos chakaʼ ju ixyanalh ju anuʼ lakʼachakʼan lakacavin chakaʼ takʼalhikʼo junta lai. Chai acsni tataclh ju lacatʼun pus tani lakatujun milh lapanacni. Chai ju aliʼin na tatalhanalh chai talakʼaya ju Dios ju vilhcha lactʼiyan. 14 Pus chunch ju tapasalh ju ixlhilakatʼui makʼalhkʼajnat chai vatsʼalhti caʼalinaʼ ju ixlhilakatʼutu. 15 Pus ju acsnich sunulh ju iskʼolh ju ixlhipumatujun anquilh. Chai lana na pumalhu ju na pʼas ixtachivinacha ju lactʼiyan ni laich cakʼasmatkʼocalh. Ixtanajun: Ju chavai quiDiosʼan chai ju Cristo catamalacasuyaʼ ixtachaputʼan. Chai catalhinonkʼalhiyaʼ ixlhilacaputsʼun ju lacamunutpaʼ. 16 Pus ju ixpumapʼuxamtʼatʼi papanin ixtavilanalh lacakʼai ixputolanʼan laʼixʼucxlacapuʼ Dios. Pus ju yuʼunch lana tataquilhputanilh ju Dios chai talakʼayalh. 17 Ixtajuni: Ji quiʼucxtin Dios ju lai navikʼoʼui tachi chun ju taxtokni uxintʼi ju ixtʼaʼun tus acsni maticaʼ tuʼuʼ ixjunita chai atsʼucʼukʼalhiyaʼ tus mas va tavananch. Pus iclaxtakniyau lakʼailaktsʼiuch ni chʼapʼatʼa ju mimpokʼai chai lhinaʼunch ju chavai. 18 Pus ju lapanacni ju tatʼajun ixlhilacaputsʼun ju lacamunutpaʼ tatalhkʼamalh. Para vachuʼ tʼalhkʼamch ju uxintʼi. Chai chilh ju chavai ju avilhchan acsni calaktsʼintanucanach ju tanitach. Vachuʼ chilh ju avilhchan acsni axtʼakniyaʼ ixtalhajaʼan ju milapanacni chai ju ixtanajun ju minchivinti chai ju salaka alaktsʼin chai ju na tatalhoniyan. Axtʼaknikʼoyaʼ chux. Mas yuʼunch ju jantu tuʼuʼ ixtapalhniʼan chai vachuʼ yuʼunch ju xalackʼajin tajunita. Chai chilh ju chavai ju avilhchan acsni amamakʼalhkʼajniyaʼ ju na ixtaʼamamakʼalhkʼajninin ju lacamunutpaʼ. 19 Pus ju acsnich ju lactʼiyan lana malhtekʼacalh ju laʼixpujitat Dios chai istasui laʼixpulacni ju kʼai pʼaklat junta ixmakʼacanta ju chivinti ju ixʼalaclhitʼatakʼoxita ju Dios ju israelitanin. Chai lana makʼalipnilh. Chai na pʼas lacchivinincalh. Chai tʼasalh ju tʼajin. Chai tataclh ju lacatʼun. Chai tamachilh ju chajʼit.
1 Chai alilh ju lactʼiyan lakatam kʼai lhamakʼan. Yuchi ni tasu pumatam chakoʼulh ju ixlakchʼita ju avilhchan. Chai ixpuchʼantai ju malhquiyuʼ. Chai laʼisʼaktsulh ixʼalin ixcorona junta ixmucʼacanta lakacautʼui stʼacu. 2 Chai ixpacxanta isʼaskʼatʼa. Chai ni na ixtʼajun makʼalhkʼajnaʼ pus na pʼas istʼasai ni va laich sokʼon camaklakʼavanalh. 3 Chai tasuchokopa alakatam lhamakʼan ju lactʼiyan. Yuchi ni tasu lakatam makakʼai lu ju na slapulh ixjunita. Chai ju yuchi ixpacxanta lakatujun isʼaktsulh chai lakacau ixʼakalokot chai lakatamin ixcorona laʼixlacʼaktsulh. 4 Chai ju anuʼ kʼai lu laʼisʼista amapatajuni ju stʼacu. Tatamachilh tus lacatʼun. Para jantu ixchaʼanta paitat ju stʼacu ju patajulh. Chai ju anuʼ kʼai lu taya laʼixʼucxlacapuʼ ju anuʼ chakoʼulh ju na ixlokʼomputunch ni va caʼixʼunilh ju isʼaskʼatʼa ju ixmaklakʼaulich. 5 Pus ju chakoʼulh maklakʼaulh pumatam tsʼalh. Yuchach ju kʼai ucxtin catalhimispayaʼ tachi chun ju lapanacni. Chai ju tuchi canonaʼ ju yuchi yuchach ju cataquiclacaʼiyaʼ ju lapanacni. Para ju isʼaskʼatʼa ju anuʼ chakoʼulh lhiʼancalh junta vilhcha ju Dios tus lacakʼai ixputolan. 6 Chai ju anuʼ chakoʼulh atsʼalaʼalh junta va aseknicʼa junta ixlakʼoxinita ju Dios. Anchach junta lai camavacalh tam milh a lakatʼui cientos a sesenta avilhchan. 7 Chai alilh ju kʼai lasat ju lactʼiyan. Pus ju Miqui yuchi ju lhinajun laʼixtalhavatʼan ixʼanquilhnin Dios. Pus ju yuchi chai ju ixʼanquilhnin tatʼalasalh ju makakʼai lu chai ju ixʼanquilhnin ju makakʼai lu. 8 Para tatsʼankʼa ju makakʼai lu chai ixʼanquilhnin. Chai jantu lai tatsuculh ju lactʼiyan. 9 Pus lana tixcoxtucalh ju lactʼiyan ju kʼai lu. Yuchach ju anuʼ lu ju makʼaniya ixtʼajunch. Yuchach ju lhacaticuru chai Satanás juncan. Yuchach ju aʼokxchokʼoi tachi chun ju lapanacni. Pus acsni lhajacalh ju makakʼai lu acsnich ju tin macamincalh tus ani lacatʼun. Chai ju ixʼanquilhnin alactʼamacamincalh. 10 Chai ickʼasmatlh ni na pʼas ixchivincan ju lactʼiyan ni laich cakʼasmatkʼocalh. Ixnajun: ―Ju chavai chilh ju avilhchan acsni caʼamakʼalhtaxtuyaʼ ixlapanacni ju Dios. Catasuyaʼ ni vasalh alin ju ixtachaputʼan ju Dios chai ju Cristo. Pus putasui ni alin ixtachaputʼan ni tixcauxtucalh ju ixʼachivixtʼakʼa ju quiʼalakʼavinʼan. Tontacuj chai tontatsʼis ixʼan achivixtaknaʼ laʼixmacni Dios. 11 Para ju quiʼalakʼavinʼan tatʼalalhajalh ju anuʼ kʼai lu. Tapulhajalh ixʼacʼalhni ju anuʼ Askʼatʼa Borrego chai laʼixchivintiʼan junta ixtanajun ni laʼixlhichux ixʼalhunutʼan ixtalhilaksi ju Jesucristo. Chai ju yuʼunch jantu tuʼuʼ ixtalhiulai ju isʼatsucuntiʼan mas catanilhch. 12 Pus ni alhajanalh ju Cristo pus yuchi calhiʼalinaʼ ju kʼachat ju lactʼiyan. Na catakʼachanach tachi chun ju tatʼajun ju anch. Para painiʼitnich ju uxijnan ju tʼonatʼit ju lacatʼun chai ju lacaʼalama. Painiʼitnich untʼatʼit ni taquilakquilatachin ju uxijnan ju lhacaticuru. Chai slivasalh talhkʼaman ju yuchi ni cʼatsai ni jantu makʼan catichʼalhcatnalh. ―Chunch ju naulh ju anuʼ ju ixchivinin. 13 Chai ju kʼai lu acsni tixcolhimincalh tus lacatʼun pus lana chʼakʼokʼaxma ju anuʼ chakoʼulh ju ixmaklakʼajunta istsʼalh. 14 Para lana xtaknicalh lakatʼui ixpakʼachu ju anuʼ chakoʼulh. Chunch ixjunita ju ixpakʼachu tachi ixpakʼachu ju kʼai kʼatsʼokʼo. Ju chunch ni lai capulackʼosmakʼanaʼ ju kʼai lu. Laich caʼalhtʼilitniʼalh junta aseknicʼa junta ixlakʼoxinita ju Dios. Anchach junta lai camavacalh lakatʼutu cʼata a paitat. 15 Chai ju anuʼ kʼai lu tsuculh quilhtaxtunuʼ ju xcan tachi ju tuʼuʼ kʼai xcan. Chai ju xcan taima ju anuʼ chakoʼulh ni va ixlacasqʼuin ju kʼai lu ni camuxtulh ju anuʼ chakoʼulh. 16 Para ju lacatʼun aktaijulh ju chakoʼulh. Pus lana lakchʼuchʼuʼokʼo ju xcan. Chai maxixilh ju kʼai xcan ju ixquilhtaxtuta ju kʼai lu. 17 Pus ju acsnich ju kʼai lu slivasalh tʼalaxcailich ju anuʼ chakoʼulh. Pus alh alactʼalasanaʼ ju aliʼin isʼaskʼatʼan ju anuʼ chakoʼulh. Yuʼunch ju tamuctaxtui tachi ju najun laʼixlhamapʼaksin ju Dios chai va tachi talhilacaʼanta ju Jesucristo.
1 Pus ju quitʼin ictachʼantalh lacacucu laʼixquilhtuʼ alama. Chai iclaktsʼilh ni tacutlh lacaʼalama lakatam maktiliʼ. Chai ixʼalin lakacau ixʼakalokot chai lakatujun isʼaktsulh chai lakatamin ixcorona laʼixʼakalokot. Chai ju lakatamin isʼaktsulh ju yuchi ixmuntiʼulacanta ju tapakaʼut ju lana jantu kʼox lhiulai ju Dios. 2 Pus ju anuʼ maktiliʼ ju iclaktsʼilh chunch ixjunita ju ixlacatuna tachi ju tuʼuʼ leopardo. Chai ju ixchʼajaʼ chunch ixjunita tachi ixchʼajaʼ ju tuʼuʼ oso. Chai ju ixquilhni chunch ixjunita tachi ixquilhni ju tuʼuʼ león. Chai ju kʼai lu xtaknilh ju ani maktiliʼ ixtachaput chai ixpuʼucxtin. 3 Pus na iscʼatsani ju anuʼ maktiliʼ ju lakatam ju isʼaktsulh. Chai istasui tachi ju va lai caʼixpuni. Para macaxnilh junta iscʼatsani. Chai tachi chun ju lapanacni ju tatʼajun ju ani lacatʼun tachʼakʼokʼalh ju anuʼ maktiliʼ chai na talhamakʼaninilh. 4 Pus ju lapanacni talakʼayalh ju kʼai lu ni ixtaknita ixtachaput ju maktiliʼ. Vachuʼ talakʼayalh ju maktiliʼ. Ixtanajun: ―Tis chavaich ju laich ixtʼachunch cava ju maktiliʼ. Chai tis chavaich ju lai catʼalasa ju yuchi. 5 Chai ju maktiliʼ xtaknicalh ixtachaput ni laich na jokʼat cachivinilh chai vachuʼ canaulh macxcai chivinti ixlacata ju Dios. Chai yau junicalh ni laich cachʼalhcatnanaʼ lakatʼutu cʼata a paitat. 6 Pus na macxcai chivinti ixnajun ixlacata Dios chai ixlacata ju ixpujitat Dios chai ixlacataʼan ju tatʼajun ju lactʼiyan. 7 Chai yau junicalh ni laich caʼalactʼalasa ju talhilacaʼanta ju Cristo chai laich caʼalhajanalh. Chai vachuʼ xtaknicalh ixtachaput ni ixʼucxtinʼan cava tachi chun ju lapanacni ju tatʼajun ixlhilacaputsʼun ju lacamunutpaʼ chai ju tachivinin tijpachux chivinti. 8 Chai tachi chun ju lapanacni ju tatʼajun ju ani lacamunutpaʼ catalakʼayayaʼ ju anuʼ maktiliʼ. Para alin ju lapanacni ju atsʼokʼulacanta laʼixʼalhiqui ju Askʼatʼa Borrego ju ixmaknicanta. Chai anch ju najun tichi chavaich ju alin isʼatsucunti jonkʼalhita. Chai ixtapakaʼut ju kʼantam kʼantam anch ju istsʼokʼulacanta tus acsni tucaʼ ixnavicantacha ju lacamunutpaʼ. Pus ju yuʼunch ju anch atsʼokʼulacanta jantu catitalakʼaya ju anuʼ maktiliʼ. 9 Pus ni xamatiʼ alin ixpakʼasmatni chach kʼasmatlh. 10 Ju talhiʼan lacapulachʼin ixtʼalapanac pus vana va chunch ju canavicanaʼ. Chai ju lacamachita amakninin pus lacamachita capumaknichokocanaʼ. Pus yuchi lhitasqʼuini ni catachʼixlh ju makʼalhkʼajnat ju talhilacaʼanta ju Dios chai va tachi catalhilaksilhch ju yuchi. 11 Pus ju acsnich iclaktsʼilh alakatam maktiliʼ ju taʼacxtulh ju lacatʼun. Chai ixʼalin lakatʼui lactʼicstʼi ixʼakalokot tachi ixʼakalokot ju tuʼuʼ askʼatʼa borrego. Chai chunch ju ixchivinin tachi ju ixchivinin ju anuʼ makakʼai lu. 12 Chai ixʼalin ixtachaput tachi ju xapʼulhnan maktiliʼ. Chai tavilh laʼixpuʼucxtin laʼixʼucxlacapuʼ ju xapʼulhnan maktiliʼ chai tapʼastu ajuni ju lapanacni ni catalakʼayalh ju xapʼulhnan maktiliʼ. Yuchi ju macaxnilh junta iscʼatsani chai istasui tachi ju va lai caʼixnilh. 13 Chai ju anuʼ ixlhilakatʼui maktiliʼ na lai ixnavi ju tuʼuʼ lhamakʼan. Mas yuchi ju jipi lai ixmakʼalhtajui ju lactʼiyan. Ixchin ju lacatʼun laʼixʼalacʼavantiʼan ju lapanacni. 14 Chai yau junicalh ni laich canavi laʼixʼucxlacapuʼ ju xapʼulhnan maktiliʼ ju tuʼuʼ lhamakʼan. Chai yuchi ju apuʼokxchokʼolh ju lapanacni ju ani lacamunutpaʼ. Va ajuni ni catalapalaxtulh tachi ixlacatuna ju anuʼ maktiliʼ ju iscʼatsani lacamachita para jantu xani. 15 Chai ixtaknicanta ixtachaput ni laich caxtakniyaʼ isʼatsucunti ju anuʼ lapalaxtucanta tachi ixlacatuna ju maktiliʼ. Pus ju chunch ju anuʼ ju ixlapalaxtucanta naulh ni camaknicanaʼ va tichi chavaich ju jantu calakʼayayaʼ ju yuchi. 16 Chai ju ixlhipumatʼui maktiliʼ lhinaulh ni camichicalh tachi chun ju lapanacni laʼixlhicana ixlacmacaʼan u laʼismuntsanʼan. Chux ju xalactʼicstʼin chai ju xalackʼajin. Chux ju makʼalinin chai ju quilhpatinin. Chux ju matiʼ ixʼucxtinʼan chai ju va xalapanacni ixtajunita. 17 Pus ju chunch jantu lai xamatiʼ catitamaulh ju tuʼuʼ u castʼalh ju tuʼuʼ ni jantu michicanta. Pus ju ixʼalhimichican yuchi ixtapakaʼut ju maktiliʼ ju istsʼokcanta lacachivinti u lacaʼaputekʼenta ju alhimispacan ju anuʼ maktiliʼ. 18 Pus na tasqʼuini ju kʼox acʼatsanti ni lai machakxacan ju ani. Pus ju na lai amachakxanan laich camispayaʼ ixʼaputekʼenti ju maktiliʼ. Pus ju anuʼ aputekʼenti nomputun ixtapakaʼut tam xamatiʼ. Pus ju anuʼ aputekʼenti yuchi ju lakachaxan cientos a sesenta y seis.
1 Pus ju acsnich iclaktsʼilh ju Askʼatʼa Borrego ni ixyacha laxatalhpa Sion. Chai vachuʼ ixtayanancha tam cientos a cuarenta y cuatro milh lapanacni. Chai si ixtalacapavilanankʼo ixtapakaʼut ju Askʼatʼa Borrego chai ixtapakaʼut ju ixpai. 2 Chai ickʼasmatlh lakatam chivinti ju mincha lactʼiyan. Chai istʼasat chunch ixjunita tachi ixtalhavanti xcan chai tachi istʼasat ju tʼajin acsni na pʼas tʼasai. Ju anuʼ chivinti ju ickʼasmatlh chunch ixjunita tachi acsni na lhu sacan ju arpa. 3 Chai ixtamilhpaich lakatam sastʼi milhpat laʼixʼucxlacapuʼ ju kʼai putolan junta ixvi ju Dios chai laʼixʼucxlacapuʼan ju pumatʼatʼi atapacxat chai laʼixʼucxlacapuʼan ju papanin. Chai jantu xamatiʼ lai xalani ju anuʼ milhpat. Va yuʼunch ju lapanacni ju ixtachaʼanta tam cientos a cuarenta y cuatro milh. Yuʼunch ju ixʼalacmakʼalhtaxtucanta ju lacamunutpaʼ. 4 Yuʼunch ju jantu tavanan ixtamacajunta ju Dios. Va tachi ixtalhilaksita ju yuchi. Chai yuʼunchach ju tachʼakʼokʼai ju Askʼatʼa Borrego mas vanta anchach ju caʼalh. Yuʼunchach ju pʼulhnan alhimalakxtucanta sia ju lapanacni ju tatʼajun ju ani lacamunutpaʼ ni laich ixlapanacni catava ju Dios chai ju Askʼatʼa Borrego. 5 Chai ju yuʼunch jantu tavanan ixtaʼaʼokxchokʼonun. Na salaka tajunita. 6 Pus ju acsnich iclaktsʼilh apumatam anquilh ju alhtʼilitniʼalh laʼixlacaitat lactʼiyan. Chai ixlhiʼanta ju chivinti ixlacata ju Cristo ju jantu tavanan catimapaxacalh. Chai ju anquilh yuchi lhilhiʼanta ni laich caʼajunilh tachi chun ju lapanacni ju tatʼajun ixlhilacaputsʼun ju lacamunutpaʼ chai ju tachivinin tijpachux chivinti. 7 Chai ju anuʼ anquilh na pʼas chivinilh ni laich cakʼasmatkʼocalh. Naulh: ―Atʼalhonitʼit ju Dios chai alakʼayatʼit ni chilh ju pantsʼiquis acsni camucʼacanaʼ ju talakʼalhin. Alhilacʼapʼitʼit ju yuchi ju navita ju tʼiyan chai ju lacatʼun chai ju alama chai junta taʼacxtui ju xcan. 8 Chai apumatam anquilh chʼakʼokʼalh ju xapʼulhnan anquilh. Chai ixnajun: ―Taiʼinicalh ixtachaput ju kʼai lakʼachakʼan Babilonia ni yuchi ju xaʼamalanikʼojui tachi chun ju lapanacni ixkʼachanica ju alactuʼunti tachi ju ixnavi ju yuchi. 9 Chai ixlhipumatʼutu anquilh chʼakʼokʼalh chai na pʼas chivinilh ni laich cakʼasmatkʼocalh. Pus na pʼas quilhuʼalh ni xamatiʼ calakʼayayaʼ ju maktiliʼ chai ju lapalaxtucanta tachi ixlacatuna ju anuʼ maktiliʼ chai ni calakʼaʼiyaʼ ni camichicalh laʼismuntsan u laʼixmacaʼ pus ju yuchi ma slivasalh camakʼalhkʼajnanaʼ laʼixtalhkʼamti ju Dios. Chai ma lana matiʼ cajunaʼ ju ixʼamapainicaʼan ju acsnich. Ma na camamakʼalhkʼajnicanaʼ lacajipi chai lacaʼazufre laʼixʼucxlacapuʼan ixʼanquilhnin Dios chai laʼixʼucxlacapuʼ ju Askʼatʼa Borrego. 11 Chai junta tamakʼalhkʼajnan ju yuʼunch ma va tachi jinilatach. Chai ma jantu tavanan catitaʼastacnalh ju yuʼunch ju tamaklacaʼanita ju anuʼ maktiliʼ chai ju anuʼ ju talapalaxtulh tachi ixlacatuna ju maktiliʼ chai ju alhimichicanta ixtapakaʼut ju anuʼ maktiliʼ. Ma tontacuj chai tontatsʼis catamakʼalhkʼajnanaʼ. 12 Pus ma yuchi lhitasqʼuini ni catachʼixlh ju makʼalhkʼajnat ju talhilacaʼanta ju Cristo. Ma cataquiclacaʼiyach ixlhamapʼaksin ju Dios chai ma va tachi catalhilacaʼanaʼ ju Jesús. 13 Chai ickʼasmatlh lakatam chivinti ju minchalh lactʼiyan. Chai quijuni: ―Chanich atsʼokʼulatʼi: “Ma na takʼachan ju tani ju talhilacaʼankʼalhita ju Jesús”. Chai ju Spiritu Santu ma chani najun: “Ma na takʼachan ni taʼastacnantach ju chavai mas na tamakʼalhkʼajnanta ixnavinica ixlhichʼalhcat ju Dios chai mas na talhixkʼopta. Para pastacnikʼalhican tuchi ixtanavinita acsni ixtavilanalhcaʼ ju ani lacamunutpaʼ”. 14 Pus ju acsnich iclaktsʼilh ju xnapapa ataputsʼi. Chai laʼixʼucxni ju anuʼ ataputsʼi ixvi pumatam ju chunch istasui tachi ju yuchi ju malakachachilh ju Dios ni lapanac catsucuyaʼ ju ani lacamunutpaʼ. Chai ixʼalin ixcorona si oro chai ixchʼapata lakatam machita ju na quicxtui chai akxaxcʼavincʼa. 15 Chai apumatam anquilh taxtuchilh lacakʼai pujitat chai na pʼas chivinilh acsni xakʼala ju anuʼ ju ixvi lacaʼataputsʼi. Chunch ju chivinilh ni laich cakʼasmatkʼocalh. Chai junich: ―Amanutʼich ju mimachita lacalhitai. Achʼakxʼitʼich ju xatocʼat ju achʼananti. Pus chilh ju avilhchan tachi ju lai apʼuchʼakxʼitʼi ni na cʼatʼatach ju xatocʼat. ―Chunch ju naulh ju anquilh. 16 Pus ju anuʼ ju ixvi lacaʼataputsʼi lana macatachini ju ixmachita ju lacatʼun. Chai lana puchakxʼikʼo ju xaʼachʼananti. 17 Chai taxtulh apumatam anquilh lacakʼai pujitat ju yacha lactʼiyan. Chai vachuʼ ixchʼapata ixmachita ju na ixquicxtui. 18 Pus ju acsnich taxtulh apumatam anquilh junta xavanican ju Dios ju pum. Chai ixʼalin ixtachaput ni lai camamactayani ju jipi vanta anchach. Chai ju yuchi lana na pʼas ju chivinilh acsni xakʼala ju anuʼ ixchʼapata ixmachita ju na ixquicxtui. Junich: ―Amanutʼich ju mimachita lacalhitai. Apʼuchʼakxtʼich ju xalhiʼut ju xaqʼuiu uvas ju lacatʼun ni na cʼatʼatach ju xaʼuvas. ―Chunch ju naulh ju anquilh. 19 Pus ju anquilh puchʼalhcatnalh ju ixmachita ju ani lacatʼun chai lana puchakxʼikʼo ju xaʼuvas ju ani lacamunutpaʼ. Chai macaʼankʼo lacakʼai puchʼipni ni lai camaxtunicanaʼ ju xaxcan. Ju chunch va nomputun ni slivasalh na caʼamamakʼalhkʼajnininaʼ ju Dios laʼixtalhkʼamti. 20 Pus ju anuʼ kʼai puchʼipni ixya lacamacni ju lakʼachakʼan. Chai ju anuʼ lacapuchʼipni si acʼalhni ju taxtulh tus chaʼalh laʼixkʼalhtsan ju caballo. Chunch ju ixlhikʼalhtankʼai xajun. Chai alhtanalh ju acʼalhni lakatʼutu cientos kilómetros.
1 Chai iclaktsʼilh alakatam lhamakʼan ju lactʼiyan. Chai slivasalh na kʼai lhamakʼan ixjunita. Pus iclaktsʼilh ixpumatujunʼan anquilhnin chai pumatamin ju sia yuʼunch ixtachʼapata lakatamin makʼalhkʼajnat ju tamacamimputun ju ani lacatʼun. Chai ju ani lakatujun makʼalhkʼajnat va yuchach cajunaʼ. Yuchach ju capumaclayaʼ ju Dios ju makʼalhkʼajnat ju axtakni ju lapanacni ju ani lacatʼun. 2 Pus iclaktsʼilh tachi tuʼuʼ atantsʼin ju na stalankʼa ixjunita. Para istasui tachi ju va ixlhiya ju jipi. Chai anch ixtayanalh laʼixquilhtuʼ ju anuʼ atantsʼin ju lapanacni ju jantu ixtanavinita ixkʼachat ju anuʼ maktiliʼ chai ju anuʼ lapalaxtucanta tachi ju maktiliʼ. Chai vachuʼ jantu ixtalakʼaʼita ni caʼamichicalh laxalhaputʼekʼenti ixtapakaʼut ju anuʼ maktiliʼ. Chai ju yuʼunch ixtachʼapata ju ixʼarpaʼan. Yuchi ju ixʼaxtaknita ju Dios. 3 Chai ixtamilhpaich ixmilhpat ju Moisés junta istsʼokʼulata. Ju Moisés ixlapanac Dios ixjunita. Chai vachuʼ ixtamilhpai ixmilhpat ju Askʼatʼa Borrego. Ixtanajun: Slivasalh na kʼai lhamakʼan ju tuchʼi navi ju uxintʼi ji ucxtin Dios ju lai navikʼoʼui tachi chun ju taxtokni. Soknicʼa ju navi tuʼuʼ chai aktsʼiya muctʼaxtʼui ju minchivinti ju uxintʼi ju kʼai ixʼucxtin unitʼa tachi chun ju amachakʼan lacamunutpaʼ. 4 Tis chavaich ju jantu catalhoniyan chai jantu calakʼayayan ju uxintʼi ji ucxtin ni va uxintʼi ju salakaʼat. Pus tachi chun ju lapanacni ju tatʼajun ju ani lacamunutpaʼ catalakminanch chai catalakʼayayan. Chunch ju aʼulhtʼucʼanaʼ ni laktsʼincʼantʼa ni na soknicʼa ju navi. 5 Chai acsni tapasakʼo ju ani taxtokni pus iclaktsʼilh ni ilhtekʼai ju kʼai pujitat lactʼiyan. Anchach junta vi ju Dios chai anch junta ixmakʼacanta ju lhtʼakʼalh chiux junta istsʼokcanta ju lhamapʼaksin. 6 Pus lacpujitat tataxtulh ju ixpumatujunʼan anquilhnin ju ixtachʼapata lakatamin makʼalhkʼajnat ju ixmacamimputun ju lacatʼun. Chai ju yuʼunch ixtalakchʼita ju kʼoxi ixpumpuʼan ju slivasalh na xnapapa ixjunita. Chai ixʼatanquilhakchʼimucʼacanta ju liston ju oro ixjunita. 7 Chai pumatam ju ixlhipumatʼatʼiʼan atapacxat axtaknikʼo ju ixpumatujunʼan anquilhnin lakatamin ixpumapʼunʼan si oro. Chai ju anuʼ pumapʼun isʼaktsamanta ju makʼalhkʼajnat ju camacaminaʼ ju Dios ju tʼonkʼalhi. 8 Chai ju anuʼ pujitat na aktsamalh ju jin chai malacasucalh ni yuchi ju Dios ju tachapun chai yuchi ju xakʼai tucan. Chai jantu lai xamatiʼ ixtanui ju anch lacpujitat tus catapasakʼoyach ju anuʼ lakatujun makʼalhkʼajnat ju ixtachʼapata ju ixpumatujunʼan anquilhnin.
1 Pus ju acsnich ickʼasmatlh lakatam chivinti ju minchalh lacpujitat. Chani ajuni ju ixpumatujunʼan anquilhnin: ―Inchitʼit. Axtʼekʼemacʼapʼitʼit ju lacatʼun ju makʼalhkʼajnat ju xalhinajun ju Dios ixmacaʼanca. Yuchi ju tajun lacalakatujun mimpumapʼunʼan. 2 Pus alh ju xapʼulhnan anquilh chai xtʼekʼemacamilh ju lacatʼun ju tuchi ixtajun laʼixpumapʼun. Chai lana alilh ju macxcai istsʼitsʼiʼan ju lapanacni ju ixtapacxanta ixlhamichin ju maktiliʼ chai tamaklacaʼanilh ju ixlapalaxtucanta tachi ixlacatuna ju anuʼ maktiliʼ. 3 Pus ju ixlhipumatʼui anquilh vachuʼ xtʼekʼemacamilh ju lacaʼalama ju tuchi ixtajun laʼixpumapʼun. Chai lana tapalakʼo acʼalhni tachi ju tamai acʼalhni junta lamaknican. Pus tachi chun ju atapacxat ju ixtʼajun lacaʼalama tanikʼo. 4 Chai ixlhipumatʼutu anquilh vachuʼ xtʼekʼemacamilh ju lacxcan ju tuchi ixtajun laʼixpumapʼun. Vachuʼ taju junta taʼacxtui ju xcan. Pus lana si acʼalhni jonkʼo. 5 Chai ickʼasmatlh ni chivinilh ju anquilh ju lakʼalhilh ju xcan. Chani naulh: ―Aktsʼiya soknicʼa ju navi acsni xtʼakʼa ju chunch makʼalhkʼajnat ji uxintʼi ju na salakaʼat. Ju uxintʼi tʼaʼun chai tus va tavananch ixtʼaʼun. 6 Chunch icjunan ni yuʼunch ju amamakʼalhkʼajni ju chavai ju taʼamaxtunilh ixʼacʼalhniʼan ju milapanacni chai ju ixtanajun ju minchivinti. Chai ju chavai ju uxintʼi amakʼotʼutʼa ju xcan ju lapʼalatʼi acʼalhni. Pus ixlhijunch ni chunch ju caʼaʼulhtucalh. 7 Chai ickʼasmatlh lakatam chivinti ju taxtuchalh junta ixavanican ju Dios ju pum. Chai chani naulh: ―Ji ucxtin Dios ju lai navikʼoʼui tachi chun ju taxtokni ju uxintʼi aktsʼiya muctʼaxtʼui ju minchivinti chai sok ju navi acsni xtʼakʼa ju makʼalhkʼajnat. ―Chunch ju naulh. 8 Pus ju ixlhipumatʼatʼi anquilh xtʼekʼemacaʼalh ju lacaʼavilhchan ju tuchi ixtajun laʼixpumapʼun. Chai xtaknicalh ju avilhchan ixtachaput ni laich slivasalh caʼalacamaccha ju lapanacni chai catalackʼaimakataxtulh. 9 Pus ju lapanacni slivasalh na talaclacacha ju lacaʼascʼunuʼ. Chai na macxcai chivinti tajunilh ju Dios ju ixlhinajun ni caʼalilh ju chunch makʼalhkʼajnat. Para nin chunch jantu tavanan tam tapastaclh nin yuchi ni laich catalakʼaya. 10 Chai ju ixlhipumaquis anquilh xtʼekʼemacamilh laʼixputolan ju maktiliʼ ju tuchi ixtajun laʼixpumapʼun. Pus lana putsʼiskʼo junta ixlhinajun ju anuʼ maktiliʼ ju ixtacutcha lacaʼalama. Chai ju lapanacni na ixtapakʼatsʼi ju isimakʼatʼan ni na ixtamakʼalhkʼajnan. 11 Chai tajuni macxcai chivinti ju Dios ju vilhcha lactʼiyan ni ixtatʼajun makʼalhkʼajnin ni na lhu lana ixʼalin ju istsʼitsʼiʼan. Para mas chunch ju ixtamakʼalhkʼajnan jantu tavanan tam tapastaclh ixlacata ju tuchi ixtanavi. 12 Pus ju ixlhipumachaxan anquilh xtʼekʼemacamilh laxakʼai xcan Eufrates ju tuchi ixtajun laʼixpumapʼun. Pus lana xixkʼo ju xcan. Ju chunch ni jantu xcai catatapasayaʼ ju xaʼucxtinin ju cataminanta ju lhichʼatoʼanta ni va cataminaʼ lasanin. 13 Chai iclaktsʼilh pumatʼutu lhacaticurulhni. Ju pumatam taxtulh laʼixquilhni ju kʼai lu. Chai pumatam taxtulh laʼixquilhni ju maktiliʼ. Chai apumatam taxtulh laʼixquilhni ju anuʼ lapanac ju istasui tachi ixlapanac Dios mas jantu. Chai ju anuʼ ixpumatʼutuʼan chunch istasui tachi ju tuʼuʼ venkʼen. 14 Pus ju yuʼunch lhacaticurulhni tajunita. Chai lai tanavi ju tuʼuʼ lhamakʼan. Pus talakʼan ju xalackʼajin ucxtinin ixlhilacaputsʼun ju lacamunutpaʼ ni va tamakʼaixtokputun ni laich catalasayaʼ acsni cachinaʼ ju kʼai avilhchan. Ju acsnich catatʼalasayaʼ ju Dios ju lai navikʼojui tachi chun ju taxtokni. 15 Acsnich ju caminaʼ ju Jesús tachi ju naulh. Chunch tachi tam akʼalhonaʼ ni chin acsni jantu cʼatsacan ni laich cachilh ju acs pantsʼiquis. Pus na kʼachanch ju skʼala tsucui chai lhistʼacʼa ju snapapa ixpumpuʼ ni jantu va kʼai tsasau cajunlh chai camaxanalh ni matiʼ ju xnapapa ju ixpumpuʼ. 16 Pus amakʼaixtokcalh ju xalackʼajin ucxtinin junta Armagedón juncan lacalhihebreo. 17 Chai ju ixlhipumatujun anquilh xtʼekʼemacaʼalh ju lacaʼun ju tuchi ixtajun laʼixpumapʼun. Chai lana taxtulh lakatam chivinti lacpujitat. Anchach junta ixya ju kʼai putolan. Chai ixnajun: ―Va yuchach ju ani ju makʼalhkʼajnat. 18 Chai lana makʼalipnilh. Chai na pʼas lacchivincalh. Chai na pʼas tʼasalh ju tʼajin. Chai na pʼas tataclh ju lacatʼun. Pus tus acsni tavanan alilh ju lapanacni ju ani lacamunutpaʼ jantu tavanan ixlaktsʼincanta ni catataclh ju lacatʼun tachi ju lalh ju acsni. 19 Pus ju anuʼ kʼai lakʼachakʼan ju Babilonia ixjuncan pumakatʼutu pupaklh chai takʼalhikʼo. Chai tachi chun ju kʼai lakʼachakʼanixni ixlhilacaputsʼun ju lacamunutpaʼ lana takʼalhikʼo. Chai ju Dios pastaclh ju talakʼalhin ju ixtanavita ju amachakʼan ju anuʼ kʼai lakʼachakʼan. Chai naulh ni vasalh camispayaʼ ixtatsʼinqʼuit ju ixtalhkʼamti. 20 Pus tachi chun ju lactʼicstʼi lacatʼun ju ixvi lacaʼalama tatsʼankʼakʼo. Chai matiʼ va ju talhpa. 21 Chai lackʼai chajʼit ju minchalh lactʼiyan. Ixtatsʼinqʼui tachi tʼupʼuxam kilo ju lakatamin. Chai ju lapanacni tajuni macxcai chivinti ju Dios ixlacata ju makʼalhkʼajnat ju alilh ni tamachilh ju chajʼit. Slivasalh na kʼai lhitalhan va.
1 Pus ju acsnich quilakmilh pumatam sia yuʼunch ju anquilhnin ju ixtachʼapata ju lakatamin ixpumapʼunʼan. Chai quijuni: ―Asokʼoch. Chai acmasuniyanch ju ixmakʼalhkʼajnat ju anuʼ alactuʼunu chakoʼulh ju na lhu puvi ju xcan. 2 Yuchach ju tatʼaʼalactuʼununta ju xalackʼajin ucxtinin ju lacamunutpaʼ. Chai tachi chun ju lapanacni ju tatʼajun ju ani lacamunutpaʼ tachi ju va talhitʼakʼapʼatach ju va ixkʼachanicach ju ixʼalactuʼuntiʼan ju xaʼamasuni ju anuʼ chakoʼulh. 3 Chai ju Spiritu Santu xaquimapaxanita ju quiʼalacʼavanti chai iclaktsʼilh ju ani tachi ju va laquiʼaklakʼavanti. Pus tachi ju va quilhiʼalh ju anuʼ anquilh junta na aseknicʼa ixjunita. Chai iclaktsʼilh pumatam chakoʼulh ju ixpujucʼalh lakatam maktiliʼ ju na slapulh ixjunita. Chai laʼixlacatuna ju anuʼ maktiliʼ si lana istsʼokʼulacanta macxcai tapakaʼut. Chai ixʼalin lakatujun isʼaktsulh chai lakacau ixʼakalokot. 4 Chai ju chakoʼulh ixlhimalakchʼininta morado chai slapulh pumpuʼ. Chai ixlhimaxantilacanta ju oro chai aliʼ lactʼicstʼi chiux ju na laklhu ixtapalh chai ju perlas. Chai ixchʼapata lakatam tasa si oro. Ju yuchi na ixʼaktsamanta ju tuchi na tsʼisi ju Dios chai ju tuchi na lhquiliqui ju navi laʼixʼalactuʼunti. 5 Chai ixmuntitsʼokcanta lakatam tapakaʼut ju jantu lai machakxacan. Chai ixnajun: “Xakʼai Babilonia. Ixnatiʼan ju lakachapu tʼacunin chai ju taxtokni ju na lhitsʼisit ju alin ju ani lacamunutpaʼ”. 6 Chai iclaktsʼilh ju anuʼ chakoʼulh ni na ixlhitʼakʼapʼatach ju ixʼacʼalhniʼan ju lapanacni ju ixtalhilacaʼanta ju Jesús ni ixlhinajuntach ixʼamaknica. Chai acsni iclaktsʼilh slivasalh iclhamakʼaninilh ju tuchi xacmasunicanta. 7 Para ju anquilh quijuni: ―Tajuch ni va lhamakʼanininch ju anuʼ chakoʼulh. Quitʼin ju acmavasalaniyan ju ixlacata ju anuʼ chakoʼulh chai ixlacata ju anuʼ maktiliʼ ju pujucʼalh. Yuchi ju alin lakatujun isʼaktsulh chai lakacau ixʼakalokot. 8 Pus ju anuʼ slapulh maktiliʼ ju xalaktsʼin ixtʼajun para ju chavai nitach. Para cataʼacxtuchokotachilh junta na makat lhokʼonkʼoʼanta. Para aktsʼiya camaclacanaʼ. Chai na catalhamakʼanininaʼ ju maktʼiliʼ ju lapanacni ju tatʼajun ju lacamunutpaʼ acsni catalaktsʼinchokoyaʼ ju anuʼ maktiliʼ. Para ju chunch catalayaʼ jantu atsʼokʼulacanta lacaʼalhiqui junta najun tichi chavaʼitnich ju alin ju isʼatsucuntiʼan ju jonkʼalhita. Pus ixtapakaʼutʼan ju kʼantam kʼantam ju alin isʼatsucunti jonkʼalhita istsʼokʼulacantacha tus acsni tucaʼ ixnavicanta ju lacamunutpaʼ. Para ju aliʼin lapanacni catalhamakʼanininaʼ ju maktiliʼ ni talaktsʼinchokoi ju yuchi. Tacʼatsai ni ixtʼajun para nilh chai ju chavai tʼonchokoi. 9 Pus ju ani na tasqʼuini ju kʼox acʼatsanti ni acmachakxa. Pus ju anuʼ lakatujun isʼaktsulh ju maktiliʼ yuchi ju laktsʼipaxcavacan ju anuʼ lakatujun talhpa junta vi ju chakoʼulh. 10 Vachuʼ laktsʼipaxcavacan ixpumatujunʼan kʼai ucxtinin. Pus ju ixpumaquisiʼan alhajacalh. Ju pumatam tʼajuncaʼ. Ju pumatam tucaʼ tasui. Para acsni caminach jantu makʼan catolaʼ laʼixpuʼucxtin. 11 Chai ju anuʼ maktiliʼ ju ixtʼajun chai nitach ju chavai yuchach ju ixlhipumatsajin ucxtin cajunaʼ. Ixtʼalapanac cajunaʼ ju ixlhipumatujunʼan ju pʼulhnan ixtatʼajun. Para vachuʼ camaclacanaʼ. 12 Chai ju anuʼ lakacau ixʼakalokot ju anuʼ slapulh maktiliʼ ju laktsʼintʼa yuchi laktsʼipaxcavacan ju ixpumacauʼan ucxtinin. Ju yuʼunch tucaʼ axtaknican ixpuʼucxtinʼan. Para catʼaʼaxtaknicanaʼ ju maktiliʼ ixpokʼaiʼan chai va tam hora ju lai catalhinonaʼ. 13 Ju yuʼunch va lakatam junita ixʼatalacpastʼacʼatʼan. Chai taxtakni ixpokʼaiʼan ju anuʼ maktiliʼ. 14 Chai ju yuʼunch catatʼalasayaʼ ju Askʼatʼa Borrego. Para ju Askʼatʼa Borrego calhajananaʼ ni yuchi ju tucan ucxtin tachi chun ju ucxtinin. Chai yuchi ju tucan xakʼai tachi chun ju xalackʼajin. Chai ju alactʼavi atʼasanicanta chai asacxtucanta chai na tamuctaxtui ju ixchivinti ju yuchi. 15 Chai vachuʼ chani quijunilh ju anquilh: ―Ju anuʼ xcan ju laktsʼintʼa junta ixvi ju anuʼ alactuʼunu chakoʼulh yuchi laktsʼipaxcavacan tachi chun ju lapanacni ju tatʼajun ixlhilacaputsʼun ju lacamunutpaʼ chai tachivinin tijpachux chivinti. 16 Chai ju anuʼ lakacau akalokot ju laktsʼintʼa ju ixlaccʼatujucalh ju anuʼ maktiliʼ cataxcayach ju chakoʼulh. Chai ixlacataʼan ju yuʼunch camaconicanaʼ ju anuʼ chakoʼulh. Chai ju yuchi va kʼai tsasau camaconicanaʼ. Chai ju lakacau akalokot chai ju maktiliʼ tachi ju va catakʼaiʼuyach ixʼacanit chai catalacxavayach ju caxajanta. 17 Chunch ju catanaviyaʼ ni Dios ju xaʼamapastʼacʼani ni chunch ju catalalh tachi ju lhilhcata ju yuchi. Pus ju anuʼ lakacau akalokot catanaviyaʼ tachi ju lhilhcata ju Dios acsni va lakatam cajunaʼ ixʼatalacpastʼacʼatʼan chai acsni cataxtakniyaʼ ixpuʼucxtinʼan ju maktiliʼ tus acsni caʼuctaxtuyanta ju ixchivinti Dios. 18 Chai ju anuʼ chakoʼulh ju laktsʼintʼa laktsʼipaxcavacan ju kʼai lakʼachakʼan ju alhijuni tachi chun ju xalackʼajin ucxtinin ju ani lacamunutpaʼ. ―Chunch ju xaquijuni ju anquilh.
1 Chai acsni tapasakʼolh ju ani taxtokni pus iclaktsʼilh apumatam anquilh ni taxtucha ju lactʼiyan. Milhch ju lacatʼun. Chai ixpacxanta ju kʼai ixtachaput. Chai ju ani lacatʼun lana mapulhcukʼo laʼixʼamatuncunit. 2 Chai na pʼas chivinilh ni laich cakʼasmatkʼocalh. Chai chani naulh: ―Lakʼalhikʼocalh ju kʼai lakʼachakʼan Babilonia. Valhch ixchakaʼan ju lhacaticurulhni. Vachuʼ anch tatanumanalh tachi chun ju tsʼokʼo ju va lhitsʼisi tavajin. 3 Chunchach ju ulhtucalh ju anuʼ lakʼachakʼan ni yuʼunch ju amachakʼan anch ju xataʼamalanikʼojui tachi chun ju lapanacni ixkʼachanica ju alactuʼunti tachi ju ixtanavi ju yuʼunch. Chai ju xalackʼajin ucxtinin ju lacamunutpaʼ tatʼaʼalactuʼunulh ju yuʼunch. Chai ju saʼastʼanin ju lacamunutpaʼ na makʼalinin tapujunita ni va ixtalhakʼamanan ixtuminʼan ju amachakʼan ju anuʼ lakʼachakʼan. 4 Pus ju acsnich ickʼasmatlh alakatam chivinti ju mincha lactʼiyan ju chani ixnajun: ―Atʼaxtʼutʼit ju anch ji quilapanacni. Jantu xcai ni vachuʼ amaknavitʼit ju alactuʼunti. Jantu xcai ni atʼamakʼalhkʼajnantʼit ju yuʼunch vachuʼ. 5 Pus ju ixʼalactuʼuntiʼan ju amachakʼan ju anuʼ lakʼachakʼan chaʼanta tus lactʼiyan. Chai ju Dios jantu tavanan xacʼapʼa ju alactuʼunti ju xatanavi. ―Chunch ju naulh ju xachivinin. 6 Pus ni na ixtaʼalactuʼunun ju amachakʼan ju anuʼ lakʼachakʼan yuchi chani alhijunicalh ju anquilhnin: ―Pus chunch ju axtʼaknitʼit ju makʼalhkʼajnat tachi ju ixtaxtʼakʼach ju yuʼunch. Paktʼui amamapʼalanitʼit ju makʼalhkʼajnat tachi ju ixtaʼalacnavich ju aliʼin. Chai ju vino ju taʼamakʼotʼunulh yuʼunch pus ju chavai amakʼotʼutʼit ju vino ju palai tucan sunilhcʼacʼa. 7 Chai tachi ju yuʼunch ni na kʼai ixtacʼatsan chai na lhu ixtaʼalactuʼunun pus vana va chun lhu amamakʼalhkʼajnitʼit chai lhu amamakʼaninitʼit ju yuʼunch. Pus ju yuʼunch tanajun laʼixʼalhunutʼan ni xalackʼajin tajunita chai jantu va amaconcanta chai jantu tavanan cataʼamakʼanininaʼ. 8 Chai ni tanajun ju chunch pus ixlhiyuchi lana va tam pantsʼiquis caʼalinaʼ ju ixmakʼalhkʼajnatʼan. Cataniyaʼ ju lapanacni. Chai caʼalinaʼ ju amakʼanit chai ju chavanti. Chai calhcukʼoyaʼ ju lakʼachakʼan. Chunch ju canavicanaʼ ni na tachapun ju ucxtin Dios. Chai yuchach ju amucʼani ju ixtalakʼalhinʼan. ―Chunch ju ajunicalh ju anquilhnin. 9 Chai na catalackʼalhunach. Chai ai ai catanonaʼ ju xalackʼajin ucxtinin ju lacamunutpaʼ ju tatʼaʼalactuʼunulh ju yuʼunch chai tatʼanavilh ju ixkʼachatʼan. Chunch ju catanaviyaʼ acsni catalaktsʼinaʼ ju xajin ni catsucuyaʼ lhcunuʼ ju lakʼachakʼan. 10 Na makat catatayayaʼ ni va tatalhonich ju ixmakʼalhkʼajnatʼan ju amachakʼan ju anuʼ lakʼachakʼan. Chai chanich ju catanonaʼ: ―Painich ju xakʼai lakʼachakʼan Babilonia. Na tachapun ixjunita. Para va tam pantsʼiquis xamin ju ixmakʼalhkʼajnat. 11 Chai tachi chun ju saʼastʼanin ju ixlhilacaputsʼun ju lacamunutpaʼ na catalhikʼalhunach ju yuchi. Chai ai ai catanonaʼ. Chunch ju catanaviyaʼ ni matich ju ixʼatamonaʼan. 12 Na istastʼai ju oro chai plata chai chiux ju na laklhu ixtapalh ixjunita chai ju perlas chai ju kʼoxiya pumpuʼ ju lino juncan chai ju morado pumpuʼ chai ju pumpuʼ ju seda juncan chai ju lakslapulh pumpuʼ chai tachi chun ju qʼuiu ju na kʼox acamin chai tachi chun ju taxtokni ju navicanta lacakʼai istatsalat ju elefante chai tachi chun ju taxtokni ju lhinavicanta qʼuiu ju na laklhu ixtapalh chai ju cobre chai ju tsasnat hierro chai ju chiux ju marmol juncan. 13 Vachuʼ istastʼai ju canela chai ju aliʼ xalhalakʼoxin vaiti chai ju pum chai ju perfume chai ju vino chai ju aceite chai ju harina chai ju trigo chai ju vacax chai borrego chai caballo chai carro chai xalapanacni. Va istastʼai ixtʼalapanacniʼan. Chai ju isʼastʼacan mas ixtachʼalhcatnan para jantu tuʼuʼ ixtalhajai ni va ixʼatamocanta. 14 Pus ju anuʼ astʼanin chani catajunach ju amachakʼan ju anuʼ kʼai lakʼachakʼan: ―Tachi chun ju lhiʼut ju na ixʼupʼutʼunatʼit cʼacxtach ju chavai. Chai tachi chun ju taxtokni ju na lackʼox ixjunita chai ju na cʼus istasui tacʼacxkʼolh. Chai jantu tavanan atʼalaktsʼinchʼokʼotʼit. ―Chunch ju catanonaʼ ju astʼanin. 15 Chai ju istastʼai ju anch ju lakʼachakʼan ju ani taxtokni chai ju na makʼalinin xatapujun na makat catatayayaʼ ni na catatalhoniyaʼ ju ixmakʼalhkʼajnatʼan ju amachakʼan ju anuʼ lakʼachakʼan. Na catakʼalhunaʼ. Chai ai ai catanonaʼ. 16 Vachuʼ chani catanonach: ―Painiʼitnich ju amachakʼan ju anuʼ kʼai lakʼachakʼan ju na ixʼalin ju lackʼoxi ixpumpuʼan ju lino juncan chai ju lacmoradonicʼa ixpumpuʼan chai lacslapulh ixpumpuʼan. Chai na ixtalhachʼachʼinincanta ju oro chai ju lacatʼicstʼi chiux ju na laklhu ixtapalh chai ju perlas. 17 Para va tam pantsʼiquis tsʼankʼakʼolh tachi chun ju ani ixmakʼalitʼan. Chai vachuʼ na makat catatayayaʼ tachi chun ju amanavin barco chai ju tapuʼalhtananch ju barco chai ju tachʼalhcatnan lacabarco chai tachi chun ju tachʼalhcatnan lacaʼalama. 18 Chai acsni catalaktsʼinaʼ ju xajin ni tʼajun lhcunuʼ pus na pʼas catalacchivinaʼ ni na cataʼamakʼanininaʼ. Catanonach: ―Matiʼ alakatam lakʼachakʼan ju ixtʼachunch cava tachi ju anuʼ kʼai lakʼachakʼan. ―Chunch ju catanonaʼ. 19 Chai catamucʼayaʼ ju pokxni laʼisʼaktsulhʼan ni cacʼatsacanaʼ ni na taʼamakʼaninin. Chai na catalackʼalhunaʼ. Chai ai ai catalacnonaʼ. Pʼas catachivinaʼ acsni chani catanonaʼ: ―Painich ju kʼai lakʼachakʼan. Tachi chun ju quijnan ju amanavin barco icjuntau xacpuchʼalhcatnanau lacaʼalama chai na makʼalinin xacpujuntau ju ixmakʼalitʼan ju amachakʼan ju anuʼ lakʼachakʼan. Para va tam pantsʼiquis ju takʼalhikʼo ju lakʼachakʼan. 20 Alhikʼachʼantʼit ji amachakʼan lactʼiyan chai ju uxijnan ju lhilacʼapʼinatʼit ju Jesús chai ju uxijnan ju ixtamalakachan Jesús untʼatʼit chai ju uxijnan ju nonatʼit ixchivinti Dios. Chunch ju alatʼit ni milacataʼan ju xamamakʼalhkʼajni ju Dios ju anuʼ lakʼachakʼan. 21 Pus ju acsnich pumatam anquilh ju na tachapun ixjunita chʼapalh lakatam chiux tachi ju tuʼuʼ kʼai xvati. Chai tarr macaʼalh lacaʼalama. Naulh: ―Tachi ju anuʼ chiux ni lacatachaput ju makʼancalh chai taʼacnukʼalhi lacxcan pus chunch vachuʼ canavicanaʼ ju Babilonia ju anuʼ kʼai lakʼachakʼan. Chai vachuʼ jantu tavanan lai catitasuchokolh. 22 Chai jantu tavanan catikʼasmatcalh ju anch ju isʼasanti arpa nin yuchi ju milhpat nin yuchi ju skʼolh. Vana jantu tavanan calhitajucalh anch ju ixnavini tijpachux lhichʼalhcat. Chai jantu catikʼasmatcalh ju anch ni calacsquiticalh. 23 Jantu tavanan catimapulhcu ju anch tuʼuʼ maclhcu. Nin yuchi ni cakʼasmatcalh ju anch ju ixchivintiʼan ju na talackʼachan ni va ancaʼ tamakʼaxtʼokʼa. Chunch cajunaʼ mas xalackʼajin ixtajunita ju saʼastʼanin ju anch lakʼachakʼan. Chai tachi chun ju lapanacni ju tatʼajun ixlhilacaputsʼun ju lacamunutpaʼ alacpuʼokxchokʼolh laʼixʼalhicujnut. 24 Chai laʼixpulacni ju anuʼ lakʼachakʼan amaknicancha ju ixtanajun ixchivinti Dios chai ju ixtalhilacaʼanta ju Jesús. Chai ju amachakʼan anch yuʼunch ju talhinaulh ixʼamaknicaʼan tachi chun ju ixlapanacni Dios ju ixtatʼajun ixlhilacaputsʼun ju lacamunutpaʼ.
1 Chai acsni tapasakʼolh ju ani taxtokni pus ickʼasmatlh lhu chivinti tachi ju na va lhu lapanacni ixtachivinin ju lactʼiyan. Ixtanajun: Calakʼayauch ju Dios. Yuchach ju xaquintamakʼalhtaxtuyan. Chai yuchach ju calakʼayacalh. Chai yuchach ju alin ixtachaput. 2 Yuchi calhiʼulhtucanaʼ chunch ni aktsʼiya muctaxtui ju ixchivinti chai sok navi acsni xtʼakʼa ju tuʼuʼ makʼalhkʼajnat. Pus xtaknilh ju ixmakʼalhkʼajnat ju kʼai alactuʼunu chakoʼulh ju lakʼalhita ju lacamunutpaʼ laʼixʼalactuʼunti. Chai ju quiDiosʼan vachuʼ amamapalhni ixʼacʼalhniʼan ju ixlapanacni. 3 Chai aktam tanonchokopa ju ixtalhavatʼan: ―Calakʼayau ju Dios ni jantu tavanan lakmixa ju xajin junta tʼajun lhcunuʼ ju anuʼ lakʼachakʼan. 4 Pus ju ixpumapʼuxamtʼatʼiʼan papanin chai ju ixpumatʼatʼiʼan atapacxat tataʼaktsokotanilh chai talakʼayalh ju Dios ju vi lacakʼai ixputolan. Ixtajuni: ―Vachuʼ iclacasqʼuinau ni chunch ju caʼulhtucalh ju Dios. Vachuʼ calakʼayayau. 5 Chai vachuʼ ju lacakʼai putolan mincha lakatam chivinti junta naulh: Alakʼayatʼit ju quiDiosʼan tachi chun ju uxijnan ju ixlapanacni untʼatʼit. Chux ju uxijnan ju tʼalhoniyatʼit mas xalactʼicstʼin untʼatʼit chai vachuʼ ju uxijnan ju xalackʼajin untʼatʼit. 6 Pus ju acsnich ickʼasmatlh ju chivinti tachi ju na va lhu ixlacchivincanch. Chai ju iskʼasmatca chunch ixjunita tachi ju tuʼuʼ atalhavana xcan. Tachi acsni na tʼasai ju tʼajin. Pus ju yuʼunch chani ixtanajun: Calakʼayau ni yuchi ju lhinajun. Yuchi ju quiʼucxtinʼan Dios ju lai navikʼojui tachi chun ju taxtokni. 7 Cakʼachanauch chai calakʼayauch ju yuchi ni chilh ju ixputamakʼaxtokni ju Askʼatʼa Borrego chai malakchʼininkʼotach ju isʼasqʼuininti. 8 Chai xtaknicalh ju yuchi ju kʼoxi pumpuʼ ju lino juncan. Chai ju yuchi na xlipnicʼa junita chai na snakʼankʼa. Pus ju anuʼ na kʼoxi pumpuʼ laktsipaxcavacan ju tuʼuʼ kʼox ju tanavita ju talhilacaʼanta ju Jesús. 9 Chai ju anquilh quijuni: ―Atsʼokʼulatʼich ju acjunan: “Ma na takʼachan ju caʼatʼasanicanach lacalacvaiti acsni catamakʼaxtʼokʼaʼ ju Askʼatʼa Borrego”. Vachuʼ chani quijuni: ―Ju ani chivinti slivasalh ni yuchi ju Dios ju chunch xanajun. 10 Pus ju acsnich ictaʼaktsokotanilh vanin laʼixchʼajaʼ ju anuʼ anquilh ni va xaclakʼayaputun. Para ju yuchi quijuni: ―Jantu chun aqʼuiʼulhtʼu ni va mintʼaxalapanac icjunita chai ixtʼaxalapanac ju miʼalakʼavin ju tajuni ju lapanacni ixlacata ju Jesús. Alai yuchi ju Dios ju alakʼayatʼi. ―Chunch ju xaquijuni ju anquilh. Pus ju ixlapanac Dios junita yuchi ju vas najun ju chivinti ixlacata ju Jesús. 11 Chai iclaktsʼilh ju tʼiyan ni ilhtekʼai chai ixya lakatam caballo ju na xnapapa. Chai ju ixpujucʼalh yuchi ju lai lhilaksican chai najun ju stavasalanti. Chai ju yuchi acsni lakʼoxi tuʼuʼ lhamakʼan chai acsni lasai pus sok ju navi. 12 Chai ju yuchi kʼai lam lam ixtalakpuyajui tachi ju tuʼuʼ xaʼalapnaʼ jipi. Chai na lhu ixʼalin ju ixcorona. Chai ju anuʼ tapakaʼut ju ixvilhnilh jantu xamatiʼ ixmachakxai. Va isʼakstu ixmachakxai. 13 Chai ixlakchʼita lakatam ixpumpuʼ ju lana istsʼamkʼota acʼalhni. Chai ju ixpujucʼalh ju caballo lhimapakaʼucanta ixchivinti Dios. 14 Chai tachi chun ju xataropajni lactʼiyan si lacxnapapa caballo ixtapuchʼakʼokʼata chai ixtalakchʼita lackʼoxi pumpuʼ ju lino juncan. Chai na xnapapa chai na salaka ixjunita. 15 Chai ju xaʼapʼulanaʼ ixquilhtaxtuta lakatam espada ju na quicxtui. Yuchi ju caʼaputʼalasayaʼ ju lapanacni ju tatʼajun ixlhilacaputsʼun ju lacamunutpaʼ. Chai ju tuchi canonaʼ ju yuchi pus yuchach ju cataquiclacaʼiyaʼ ju lapanacni. Pus yuchach ju caʼamamakʼalhkʼajniyaʼ ju lapanacni laʼixtalhkʼamti ju Dios. 16 Chai laʼixpumpuʼ chai laʼixkʼatuʼ lacvilhnilh ixtapakaʼut. Chani najun: “Yuchi ju ani ju palai xakʼai tachi chun ju xalackʼajin. Chai yuchi ju palai xakʼai ucxtin tachi chun ju ucxtinin”. 17 Pus ju acsnich iclaktsʼilh pumatam anquilh ju ixya lacaʼavilhchan. Chai na pʼas axakʼala tachi chun ju tsʼokʼo. Ajuni: ―Atʼatʼit. Atʼakʼaixtʼoktʼit ni canaviyaʼ lakatam kʼai lacvaiti ju Dios. 18 Laich aʼuniyaʼitʼit ju ixʼacanitʼan ju xalackʼajin chai ju xaʼucxtinin taropajni chai ixʼacanitʼan ju lactachapunin lapanacni chai ixʼacanitʼan ju caballo chai ju ixtapujucʼanalh chai ixʼacanitʼan va tichi chavaich. Yuʼunch ju matiʼ ixʼucxtinʼan chai yuʼunch ju va xalapanacni tajunita. Yuʼunch ju salactʼicstʼin chai ju xalackʼajin. 19 Chai iclaktsʼilh ni ixtatakʼaixtokta ju maktiliʼ ju ixtacuttacha lacaʼalama chai ju xalackʼajin ucxtinin ju ani lacamunutpaʼ chai chux ju ixtaropajniʼan. Va catatʼalasayaʼ ju pujucʼalh ju xnapapa caballo chai ixtaropajni ju yuchi. 20 Pus tachʼinin tava ju maktiliʼ chai ju lapanac ju istasui tachi ixlapanac Dios mas jantu. Yuchi ju ixnavich ju tuʼuʼ lhamakʼan laʼixʼucxlacapuʼ ju maktiliʼ chai ixʼalacpuʼokxchokʼota ju lapanacni ju ixʼalhimichicanta ixtapakaʼut ju maktiliʼ chai yuʼunch ju ixtalakʼayai ju ixlapalaxtuta tachi ixlacatuna ju anuʼ maktiliʼ. Pus ju maktiliʼ chai ju anuʼ aʼokxchokʼonu lapanac vaklhtam amacaʼancalh xalakʼajun junta maktajita jipi lacaʼazufre. 21 Chai ju aliʼin tapuni ju espada ju taxtui laʼixquilhni ju ixpujucʼalh ju xnapapa caballo. Pus tachi chun ju tsʼokʼo na talhilalh ju anuʼ acanit.
1 Pus ju acsnich iclaktsʼilh pumatam anquilh ju minchalh lactʼiyan. Chai ixchʼapata ju xallave junta na makat lhokʼonkʼoʼanta. Vachuʼ ixchʼapata ju makakʼai cadena. 2 Chai ju anuʼ anquilh chʼapalh ju kʼai lu ju na makʼanchich ixtʼajun. Yuchach ju lhacaticuru chai Satanás juncan. Chai chʼiʼula tam milh cʼata. 3 Chai lana tin macaʼalh junta makat lhokʼonkʼoʼanta. Chai malakachinu. Chai lana mucʼalh ju ixpamichin ju kʼai ucxtin laxamalhtich junta malakachinu. Ju chunch ni jantuch lai xamatiʼ camaklhtekʼaniyaʼ ni lai cataxtulh ni caʼaʼokxchokʼochokolh ju lapanacni tus ni calaktsayanta tam milh cʼata. Acsni calaktsayach pus tasqʼuini ni camacajuncalh pantsʼiquis. 4 Pus ju acsnich iclaktsʼilh ju lackʼai putolan chai ixtapuvilanalh ju lapanacni ju axtaknicalh ixtachaputʼan ni laich catalakʼoxiyaʼ ju tuʼuʼ lhamakʼan. Chai iclaktsʼilh ixtacuvinʼan ju ixʼalacʼacchʼucʼupʼuxcanta va ixlacaʼatalh ni ixtanajun ni ixtalhilaksi ju Jesús chai ni ixtaʼajuni ju lapanacni ixchivinti Dios. Chai ju yuʼunch jantu ixtalakʼayata ju anuʼ maktiliʼ nin yuchi ju ixlapalaxtucanta ixlacatuna ju maktiliʼ nin yuchi ni caʼamuntiʼulacalh ixtapakaʼut ju maktiliʼ nin caʼulanicalh laʼixmacaʼan. Pus ju yuʼunch talokʼonchokolh laʼixʼanintiʼan chai tatʼataʼucxtini ju Cristo tam milh cʼata. 5 Yuʼunch ju pʼulhnan amalokʼonichokocalh laʼixʼanintiʼan. Para ju aliʼin aninin catalokʼonchokoyaʼ laʼixʼanintiʼan acsni caʼaclayaʼ tam milh cʼata. 6 Slivasalh na talackʼachan chai salaka tajunita ju makyuʼunch tajunita ju pʼulan amalokʼonichokocalh laʼixʼanintiʼan. Ju yuʼunch jantu catitani ju ixlhipaktʼui. Alai yuʼunch palijni catajunaʼ ju catalakʼayayaʼ ju Dios chai ju Cristo. Chai catatʼataʼucxtiniyach ju Cristo tam milh cʼata. 7 Chai acsni aclalhch ju tam milh cʼata pus ju Satanás maxtucalh laʼixpulachʼin. 8 Chai taxtulh. Alh aʼokxchokʼonuʼ ju lapanacni ju tatʼajun ixlhilacaputsʼun ju lacamunutpaʼ. Aʼokxchokʼomakʼaixtoklh ju Gog chai ju Magog ni catalasalh. Pus ju yuʼunch lana na ilhuʼan ixtajunita. Chunch ilhilhuʼan ixtajunita tachi ju tuʼuʼ xacucu alama. 9 Chai laʼixlhilacaputsʼun ju lacamunutpaʼ tatakʼaixtoklh. Chai talakʼaxcʼavitnu talakachoko ju ixlapanacni Dios junta ixtatʼajun ju lakʼachakʼan ju na mapaini ju Dios. Para ju Dios macamilh ju jipi chai lana alacmaknikʼo ju anuʼ talakʼaxcʼavitnunun. 10 Chai ju lhacaticuru ju ixʼaʼokxchokʼota ju yuʼunch lana tin macaʼancalh junta na kʼai maktajita lacaʼazufre. Anch junta ixtatanumanalh ju anuʼ maktiliʼ chai ju anuʼ lapanac ju ixlhitalacasuich tachi ixlapanac Dios. Pus caʼamamakʼalhkʼajnikʼalhicanaʼ tontatsʼis chai tontacuj. 11 Pus ju acsnich iclaktsʼilh lakatam kʼai putolan ju na xnapapa ixjunita. Vachuʼ iclaktsʼilh ju ixvi ju anch. Chai ju acsnich vachuʼ iclaktsʼilh ju lacatʼun chai ju lactʼiyan ni lana tatsʼankʼakʼo. 12 Chai iclaktsʼilh ju tanita ni ixtayanalh laʼixʼucxlacapuʼ ju anuʼ kʼai putolan mas yuʼunch ju xalackʼajin chai ju salactʼicstʼin. Chai ju lackʼalhtankʼai alhiqui apuxkʼotcalh. Chai vachuʼ puxkʼotcalh alakatam alhiqui. Yuchach ju alhiqui junta atsʼokʼulanicanta ixtapakaʼutʼan tachi chun ju alin isʼatsucuntiʼan jonkʼalhita. Chai tachi chun ju ixtanita amucʼanicalh ixtalakʼalhinʼan ixlacata ju taxtokni ju tsʼokcanta lacaʼalhiqui ni anchach istsʼokʼulakʼocanta tuchi tanavita ju kʼantam kʼantam. 13 Chai tachi chun ju lapanacni ju ixtanitajumanalh lacaʼalama talokʼonchokolh. Chai vachuʼ tachi chun ju aliʼin ju ixtanita. Chai ixchuxʼan amucʼanicalh ju ixtalakʼalhinʼan ixlacata tuchi navitach ju pumatamin. Chai tachi chun ju ani amacaʼancalh ju lacajipi. 14 Chai ju acsni jantu tavanan catini xamatiʼ. Para junta catamakʼalhkʼajnankʼalhiyaʼ yuchach ju ixlhipaktʼui aninti juncan. 15 Chai vachuʼ amacaʼancalh lacajipi tachi chun ju jantu alhitajunicalh ixtapakaʼutʼan lacaʼalhiqui junta tsʼokʼulanicanta ixtapakaʼutʼan ju alin isʼatsucuntiʼan jonkʼalhita.
1 Pus ju acsnich iclaktsʼilh lakatam sastʼi tʼiyan chai lakatam sastʼi lacatʼun. Pus ju pʼulhnan tʼiyan chai ju pʼulhnan lacatʼun tatsʼankʼakʼolh chai matich ixjunita ju alama. 2 Pus ju quitʼin icXivan chai quitʼin ju iclaktsʼilh ju ixlakʼachakʼan Dios ni minchalh lactʼiyan. Dios ju macamilh. Chai yuchach ju sastʼi Jerusalén junita. Slivasalh na cʼus istasui. Chun tachi ju tam atsiʼ ju na cʼus malakchʼinin ixlacata ixlhitʼataviti. 3 Chai ickʼasmatlh lakatam chivinti ju taxtucha ju lactʼiyan. Na pʼas ju chivinilh ni laich cakʼasmatkʼocalh. Chai chani naulh: ―Ju chavai ju Dios catsucuyaʼ junta tatʼajun ju lapanacni. Ju Dios anch ju camaktsucuyaʼ. Chai ju yuʼunch ixlapanacni catajunaʼ. Chai isʼakstu ju Dios caʼalactʼatolhkʼalhiyach chai isDiosʼan cajunaʼ. 4 Chai matich cajunaʼ ju kʼalhut. Chai jantu xamatiʼ caniyaʼ. Chai jantu xamatiʼ caʼamakʼanininaʼ nin yuchi ni lai cakʼalhulh nin yuchi ni lai jintaʼ caxcanilh. Jantu catiʼalilh tuʼuʼ ju chunch ni tapasakʼota ju xapʼulhnan taxtokni. 5 Chai ju yuchi ju ixvi laʼixputolan ju xakʼai ucxtin chani naulh: ―Quitʼin ju iclasastʼikʼojui tachi chun ju taxtokni. Vachuʼ chani ju quijunilh: ―Atsʼokʼulatʼich tachi chun ju ani taxtokni ni lai lhilaksican ju ani chivinti chai stavasalanti junita. 6 Chai vachuʼ chani ju quijunilh: ―Icnavikʼolhch tachi chun ju taxtokni. Ju quitʼin xactʼajun tus acsni maticaʼ tuʼuʼ ixjunita chai actsucukʼalhiyaʼ tus mas va tavananch. Pus ni xamatiʼ na quicxixa pus acxtakniyaʼ ju xcan ju va aclhikʼailaktsʼinaʼ. Anchach acʼiyaʼ junta taxtui ju xcan ju xtʼakʼa ju atsucunti jonkʼalhita. Laich cakʼotʼaʼ chai jantu catimapalalh tuʼuʼ. 7 Chai ju casastʼucʼaʼ ju macxcai sich ixʼanuʼ cajunaʼ tachi chun ju taxtokni. Chai ju quitʼin isDios acjunaʼ. Chai ju yuchi quintsʼalh cajunaʼ. 8 Para tachi chun ju va tatalhanan chai ixlhiyuchi jantu tachʼakʼokʼakʼalhiputun ju Jesús chai yuʼunch ju jantu talhilaksita ju Jesús chai yuʼunch ju na alactuʼunun chai ju amakninin chai ju tatʼatʼajun va tichi chavaich chai ju alhicujnin chai ju va tamaklacaʼani ju tuʼuʼ santo chai tachi chun ju tanajun taʼaklhtamat chivinti sich camacaʼancanaʼ lacajipi junta na maktajita lacaʼazufre. Yuchach ju ixlhipaktʼui aninti. ―Ma chunchach ju quijuni ju Dios ni actsʼokʼula. 9 Pus ju acsnich quilakmilh pumatam sia yuʼunch ju ixpumatujunʼan anquilhnin ju ixtachʼapata ju lakatamin ixpumapʼunʼan ju isʼaktsamanta lakatamin makʼalhkʼajnat ju va yuchach cajunaʼ. Chai ju anuʼ anquilh chani quijuni: ―Asokʼoch chai acmasuniyan ju isʼasqʼuininti ju ixʼamachakaʼ cajunaʼ ju Askʼatʼa Borrego. 10 Pus ju Spiritu Santu quimapaxanilh ju quiʼalacʼavanti chai ju anuʼ anquilh quilhiʼalh junta vi ju kʼai talhpa junta na putankʼai ixjunita. Chai ju anch quimasunilh ju kʼai ixlakʼachakʼan Dios ju Jerusalén juncan. Ixtʼonachilh takʼalhtajuchiniʼ ju ani lacatʼun. Minchalh ju lactʼiyan junta vilhcha ju Dios. 11 Chai ju anch lakʼachakʼan kʼai xlapʼapʼa ixmaktaji ni vachuʼ anch ju ixtʼajun ju Dios. Ixmaktaji tachi ju tuʼuʼ kʼoxi chiux ju slivasalh laklhu ixtapalh. Chun tachi ju tuʼuʼ chiux ju jaspe juncan. Chai na stalankʼa ixjunita tachi ju tuʼuʼ vaso. 12 Chai ixʼulacanta kʼex ju na putankʼai ixjunita. Chai ixʼalin lakacautʼui xamalhtich. Chai ju lacalakatamin malhtich ixtayanalh pumatamin anquilh. Chai ju lacalakatamin malhtich istsʼokʼulacanta ixtapakaʼutʼan ju ixpumacautʼuiʼan istsʼalan ju makʼaniya lapanac ju Israel ixjuncan. 13 Ju lhichʼatoʼanta ixʼalin lakatʼutu xamalhtich. Chai ju lhinorte ixʼalin lakatʼutu xamalhtich. Chai ju lhisur ixʼalin lakatʼutu xamalhtich. Chai ju lhitsʼastʼai ixʼalin vachuʼ lakatʼutu xamalhtich. 14 Chai ju xakʼex ju anuʼ lakʼachakʼan lakacautʼiyun chiux ixlachʼapata ju ixlhiputankʼai junta putachʼanʼacnui. Chai ju lakatamin ju anuʼ chiux anch istsʼokʼulacanta ixtapakaʼutʼan ixpumacautʼuiʼan ju ixtamalakachan ju Askʼatʼa Borrego. 15 Chai ju xaquintʼachivinin ixchʼapata lakatam palhcan ju si oro. Yuchi ju capulhcayaʼ ju lakʼachakʼan chai ju xamalhtich chai ju xakʼex. 16 Chai ju lakʼachakʼan va makʼastutʼatʼi ixjunita. Chai vaklhtam chun ixjunita ju ixlhilhman chai ixlhipokʼai. Pus ju anuʼ anquilh pulhcalh ju lakʼachakʼan ju anuʼ palhcan. Pus chaʼalh lakatʼui milh a lakatʼui cientos kilómetro. Ju ixlhilhman chai ju ixlhipokʼai chai ju ixlhiputankʼai vaklhtam chun ju alhcanti. 17 Chai vachuʼ lhcalh ju xakʼex. Chaʼalh sesenta y cuatro metro. Chunch ju putʼekʼelh ju anquilh tachi ju taʼaputʼekʼenin ju lapanacni. 18 Ju ixlhinavicanta ju kʼex si yuʼ ju chiux ju jaspe juncan. Chai ju lakʼachakʼan si oro ixjunita. Chai slapʼapʼa ixmaktaji ju lacascʼun tachi ju tuʼuʼ vaso. 19 Chai junta putachʼanʼacnui ju xakʼex ju lakʼachakʼan yuchi ju putachʼanʼacnui tijpachux ju chiux ju na laklhu ixtapalh tajunita. Ju pʼulhnan ulacalh yuchi ju jaspe. Chai ju ixʼokslai ju anch yuchi ju zafiro. Chai astan yuchi ju ágata ixlhiʼulacanta. Chai astan yuchi ju esmeralda. 20 Astan ju ónice. Astan ju cornalina. Astan ju crisólito. Astan ju berilo. Astan ju topacio. Astan ju crisoprasa. Astan ju jacinto. Chai ju ixlhilakacautʼui ju tavi laʼixʼucxni chux yuchi ju amatiste. 21 Chai ju lakacautʼui xamalhtich lakatamin perla ixjunita. Ju lakatamin malhtich lakatamin perla ixjunita. Chai ju xati ju anuʼ lakʼachakʼan si oro ixjunita. Chai na slapʼapʼa ixmaktaji lacascʼun tachi ju tuʼuʼ vaso. 22 Chai jantu iclaktsʼilh tuʼuʼ pujitat ju anch ni vanta anchach ju anuʼ lakʼachakʼan ixvi ju Dios ju lai navikʼojui tachi chun ju taxtokni. Vachuʼ vanta anchach ixvi ju Askʼatʼa Borrego. 23 Chai ju anuʼ lakʼachakʼan jantu ixmaktasqʼuini ni camapulhcu ju tuʼuʼ avilhchan nin malhquiyuʼ ni Dios ju maputuncunita ju anch. Chai ju Askʼatʼa Borrego yuchi ju xamaclhcu. 24 Chai laʼixʼamatuncunit cataʼalhtananaʼ tachi chun ju amachakʼan kʼai lakʼachakʼanixni ju amakʼalhtaxtucanta. Chai tachi chun ju xalackʼajin ucxtinin ju ani lacamunutpaʼ catalhiminach ju anch ju ixmakʼalitʼan ni catapulakʼayayach ju Dios. 25 Chai ju xamalhtich jantu tavanan camalacchonicanaʼ ju tuncuj. Chai ju anch matiʼ cajunaʼ ju atatsʼisni. 26 Chai tachi chun ju lapanacni ju tatʼajun ixlhilacaputsʼun ju lacamunutpaʼ catalakʼayayach ju Dios. 27 Para jantu tavanan lai catitanu ju anch ju tuʼuʼ lhquiliqui nin xamatiʼ ju navi ju tuʼuʼ ju na tsʼisi ju Dios nin xamatiʼ ju najun taʼaklhtamat. Va yuʼunch ju lai tatanui anch ju atsʼokʼulacanta ixtapakaʼutʼan laʼixʼalhiqui ju Askʼatʼa Borrego. Yuchi ju alhiqui junta najun tichi chavaich ju alin isʼatsucunti jonkʼalhita.
1 Pus ju acsnich quimasunilh ju kʼai xcan ju xtʼakʼa ju atsucunti jonkʼalhita. Chai ju anuʼ xcan na stalankʼa ixjunita tachi ju tuʼuʼ vaso. Chai anch ju ixtaxtui laʼixputolanʼan ju kʼai ucxtin Dios chai ju Askʼatʼa Borrego. 2 Chai ju anuʼ xcan va sok ixchʼakʼokʼai ju xati ju anuch lakʼachakʼan. Chai ju quilhtumacatam ju anuʼ kʼai xcan lacya ju xaqʼuiu ju xtʼakʼa ju atsucunti jonkʼalhita. Chai ju aquilhtumacatutam xcan vana. Chai ju anuʼ qʼuiu pakcautʼui ixtʼakʼa ju xatocʼat ju tamin cʼata. Paktamin ju tamin malhquiyuʼ. Chai tachi chun ju lapanacni ju tatʼajun ixlhilacaputsʼun ju lacamunutpaʼ ixtalhitacʼuchʼui ju xaxkʼoi ju anuʼ qʼuiu. 3 Chai ju anch jantu catiʼalilh tuʼuʼ ju alactuʼunti. Jantu lai catiʼalilh tuʼuʼ ju chunch ni anch vi ju ixputolanʼan ju kʼai ucxtin Dios chai ju Askʼatʼa Borrego. Chai ju ixlapanacni catalakʼayayaʼ. 4 Chai catalaktsʼinaʼ ju ixʼucxpuʼ ju Dios. Chai ju ixtapakaʼut caʼalhimichicanaʼ ju ixlapanacni laʼismuntsanʼan. 5 Chai ju anch matich cajunaʼ ju atatsʼisni. Chai jantu catamaktasqʼuiniyaʼ ju tuʼuʼ maclhcu nin avilhchan ni yuchi ju kʼai ucxtin Dios ju amapulhcuni. Chai ju ixlapanacni Dios catatʼataʼucxtinikʼalhiyaʼ ju yuchi. 6 Chai ju anuʼ anquilh chani ju quijuni: ―Tachi chun ju ani chivinti lai lhilaksican chai stavasalanti junita. Pus ju makʼanchich ju Dios amapastʼacʼani ju ixlapanacni ju tuchi catanaulh. Chai ju chavai ju yuchi amalakachalh ju ixʼanquilh ni laich catacʼatsayaʼ ju ixlapanacni ju tuchi vasalh catapasayaʼ. Chai jantu makʼan cativa tus catapasayaʼ ju anuʼ taxtokni. 7 Chai jantu makʼan cativa tus acsni caminaʼ ju Jesús. Chai na kʼachan ju yuchi ju caquiclacaʼiyaʼ ju ixchivinti Dios ju tsʼokcanta ju ani. ―Chunch xaquijuni ju anquilh. 8 Pus ju quitʼin icXivan chai quitʼin ju ickʼasmatlh chai iclaktsʼilh tachi chun ju ani taxtokni. Chai acsni ickʼasmatlh chai iclaktsʼilh ju ani taxtokni pus lana ictaʼaktsokotalh laʼixchʼanchʼajaʼ ju anuʼ anquilh. Va xaclakʼayaputun ju yuchi ju xaquimasunikʼojui ju ani taxtokni. 9 Para ju yuchi chani quijuni: ―Jantu chun aqʼuiʼulhtʼu. Ju quitʼin va mintʼaxalapanac icjunita. Chai ixtʼachunchʼan icjunita tachi ju milhiʼalakʼavin ju tanajun ixchivinti Dios chai ju taquiclacaʼi tachi chun ju chivinti ju tsʼokcanta ju ani. Yuchach ju Dios ju alakʼayatʼi. 10 Chai quijumpa: ―Tun va atʼilaclamtʼi junima alhiqui junta tsʼokcanta ixchivinti Dios. Jantu chunch alatʼi ni vaninch chinta ju avilhchan acsni cataiʼulacanaʼ ju taxtokni ju tsʼokcanta ju anch. 11 Ju na alactuʼunun pus chach tailhiʼalh ixnavica ju alactuʼunti. Chai ju na lhquiliqui ju ixʼatalacpastʼacʼat chach tailhiʼalh ju chunch. Chai ju soknicʼa ju isʼatsucunti chach va tachi navi ju soknicʼa. Chai ju salaka ju isʼatsucunti chach jonkʼalhi chunch. 12 Chai ju Jesús chani quijuni: ―Vaninch chinta ju avilhchan acsni acminaʼ chai aclhiminaʼ ju ixtalhajaʼan tachi chun ju lapanacni. Acʼalhimapalach ju tuchi navitach ju kʼantam kʼantam. 13 Ju quitʼin xactʼajun tus acsni maticaʼ tuʼuʼ ixjunita chai actsucukʼalhiyach tus mas va tavananch. ―Chunch ju quijunilh ju Jesús. 14 Na takʼachan ju tachʼakʼatʼajun ju ixpumpuʼan ni va tachi snapapa catajunaʼ. Pus yuʼunch ju laich catapʼuxaʼ ju xatocʼat ju qʼuiu ju xtʼakʼa ju atsucunti jonkʼalhi. Chai lai cataputanuyaʼ ju xalacmalhtich ju lakʼachakʼan. 15 Para lacamacni tatʼajun ju va ixtʼachunch tajunita tachi ju tuʼuʼ atapacxat chai ju alhicujnin chai ju tatʼatʼajun va tichi chavaich chai ju amakninin chai ju tamaklacaʼani ju tuʼuʼ santo chai tachi chun ju takʼachani ixnajunca ju taʼaklhtamat chivinti. 16 Chai ju Jesús quijunchokopa: ―Ju quitʼin icJesús chai icmalakachanichin ju quiʼanquilh ju caxtakniyan ju ani chivinti ixlacataʼan ju yuʼunch ju quintalhilaksi. Ju quitʼin ixtamaskʼatʼanti makʼaniya kʼai ucxtin David icjunita. Vachuʼ tachi ju kʼai stʼacu icjunita. Yuchi ju vatsʼisin xajachilh. ―Chunch ju xaquijuni ju Jesús. 17 Pus ju Spiritu Santu chai ju tachi isʼasqʼuininti Jesús junita tanajun: ―Asokʼoch. Chai ju kʼasmatʼa ju anuʼ chivinti chach vachuʼ chunch cajunilh ju aliʼin. Chai ju na quicxixta chach milh. Chai ju kʼotputun ju xcan ju xtʼakʼa ju atsucunti jonkʼalhita pus chach kʼotlh. Chai ju Dios jantu tuʼuʼ achʼinin. 18 Pus ju quitʼin pʼas icʼajuni tachi chun ju takʼasmatʼa ju ixchivinti Dios ju tsʼokcanta ju ani. Chai slivasalh ju icʼajuni. Ni xamatiʼ calalhavayaʼ ju ani chivinti pus ju Dios calalhavaniyaʼ ju makʼalhkʼajnat ju tsʼokcanta ju ani lacaʼalhiqui. 19 Chai ni xamatiʼ caxacamakʼanaʼ ju tuʼuʼ ixchivinti Dios ju tsʼokcanta ju ani lacaʼalhiqui pus ju Dios caxacaxtuyaʼ junta istsʼokcanta ju ixpuʼalilh ju isʼatsucunti jonkʼalhi chai jantu lai catitanu ju laʼixlakʼachakʼan Dios. 20 Pus ju najun ni stavasalanti tachi chun ju ani chivinti yuchi ju chani najun: ―Jantuch makʼan cativa tus acminach. Chunch ju najun chai vachuʼ iclacasqʼuin ni vatsʼalhti camilh. 21 Ju quiʼucxtin Jesús caʼanaviniyaʼ lamapainin tachi chun ju lapanacni ju talhilaksi ju Dios. Slivasalh chunch.