1

1 Pʼunaj tejkan tachun puʼaqtaynil, va tavanancha ixlhiʼalin qayntaun yu junkan ni Chivinti. Ni Chivinti va chʼantaun ixtʼaʼalinta ni Dios, vachu ni anchanuʼ Chivinti yucha va Dios ixjunita. 2 Yucha va chʼantaun ixtʼaʼalinta ni Dios tejkan tachun puʼaqtaynil. 3 Va por yucha Dios makal tachun yu alin. Incha jantu kaʼalil ni yucha, ex jantu ixmakakal tuʼuchun yu alin. 4 Va kun yucha minchal ni jatsukunti. Ni jatsukunti va tacha taun maklku yu jalakmasuniy ni lapanakni yu ox tin. 5 Chuncha yu maklku tʼoqx mapulkuy laka putsʼisniʼ. Ixtapʼasta ni putsʼisniʼ jantu lay kamaqalhajal. 6 Ni Dios malaqachal qayntaun lapanaki yu ixjunkan Juan. 7 Yucha mil va para kalhichivinil ni anchanu maklku para chuncha lay katalhakapuʼal tachun ni lapanakni. 8 Pero ni Juan yucha jantu ni maklku kaval. Yucha malaqachakal va para kalhichivinil yu anchanuʼ maklku para katamispal ni lapanakni. 9 Ni anchanuʼ maklku va yu laqsaval mapulkuy la ixjatsukuntikʼan tachun ni lapanakni. Va yucha ixminta aniy lakamunukpaʼ. 10 Yucha makal ni lakamunukpaʼ, ex aniy kilachil, pero ni lapanakni yu ixtavilanal aniy jantu katamispal. 11 Kilachil la ixtʼun pero ixlapanakni jantu katalaqaʼil. 12 Pero ni lapanakni yu ox talaqaʼil, yu talhakapuʼal, yuʼuncha jalaqxtaqnil ixtapʼasta para kataval sasʼatʼan Dios. 13 Va Dios yu jalakmakal sasʼatʼan. Jantu chuncha katatsukul la ixlakatunajkʼan. Vachuʼ jantu por yu ixtanajun lapanakni. Va Dios yu chuncha jalakmakal. 14 Ni anchanu yu junkan ni Chivinti yucha kiilhitsukuchil ixlakatunaj y val lapanaki, ex taulal chʼantaun kun kijnan. Vamun yuʼ minchal kun Dios. Xlhiyucha klaqtsʼiu ni laqsaval la ay ixjunita. Va ayaj qalʼox y tachun yu masuy va laqsaval. 15 Ni Juan lhichivinil ni yucha, va pʼays naul: “Va yucha yu kitʼin xaklajunau kaminaʼ astan. Pero mas kamil astan, yucha ixlhiʼalin tejkan kitʼin jantukaʼ xaktsukuy. Xlhiyucha yucha apalay ay xajantu kitʼin.” 16 Ex yu kijnan tachun laqaʼiniu yu lajʼay ixmaqaliti, yucha kintaxtaqlhaanitan yu lajʼoxi. 17 Ni ixlhachimoʼon Dios lhimil qayntaun lapanaki yu ixjunkan Moisés. Va Jesucristo lhimil yu ay japaxkanti ali ni chivinti yu laqsaval kintamasuniyan Dios. 18 Jantu matichun kalaqtsʼil ni Dios. Ni istsʼal yu achaniy yucha va chʼantaun tʼavil ixPay. Va yucha kintamasunin tacha junitacha ni Dios. 19 Ni israelitas yu machaqan Jerusalén tamalaqachanil kuras ali levitas ni Juan ni katalhisakmil tasʼayucha ixjunita. 20 Tejkan talhisakmil, niman jalakjunil: —Ni kitʼin jantu ni Cristo kakval. 21 Ex astan tajunchoqol: —¿Ex tasʼayucha kʼatʼi? ¿Uxintʼicha kʼatʼi ni Elías yu maqancha ixlaqputeʼey ixchivinti Dios? Ex yu Juan naul: —Jantu yuʼ kakval. Ex aaqtaun tajunil: —¿Ex tasʼayucha unitʼa ni uxintʼi? ¿Uxintʼicha ni lapanaki yu maqancha ixtanajun tsʼanqay kamil astan laqputeʼeniʼ ixchivinti Dios? Ex qaltayanal: —Jantu yuʼ kakval. 22 Aaqtaun tajunchoqol: —Kilajuniu tasʼayucha kʼatʼi ni uxintʼi. Tsʼanqay kajkunchoqoo yu kintamalaqachan. ¿Tas naʼuncha uxintʼi ni taʼayucha kʼatʼi? 23 Ex jalakjunil ni Juan: —Kitʼin kunita ni lapanaki yu ixnaunkan kaminaʼ, yu pʼays tʼasay lakakʼavinan taʼan jaxixninta, yu najun: “Kʼamalaqltʼiʼatʼikcha maqataun tin taʼan kapuminaʼ ni Jalhachimoʼonuʼ.” 24 Ni fariseos tamalaqachal ni anchanu lapanakni ni chuncha katalhisakmil ni Juan. 25 Ex aaqtaun talhisakmichoqol, tajunil: —Uxintʼi naʼun ni jantu Cristo kaʼuntʼi, nisin Elías, vachu jantu kaʼuntʼi ni anchanu lapanaki yu maqancha ixtanajun kaminaʼ laqputeʼeniʼ ixchivinti Dios. ¿Ex valiʼiycha maqchʼajʼavanancha? 26 Ex ni Juan va jalajqaltayl: —Ni kitʼin va xkan kpumaqchajʼavanan. Pero alin qayntaun siya uxiknan yu jantu mispʼayatʼik. 27 Yucha kaminaʼ astan. Kitʼin tus jantu kimpaxtoqniy kakmusxʼoqnil xamusni ixvarachi. 28 Tachun yu aniy tapasal xalakatʼun yu junkan Betania takuktachal xalaʼaxkan Jordán. Ancha ixtʼajun jamaqchajʼavan ni Juan. 29 Tejkan atauncha julchan val ex ni Juan laqtsʼil ni Jesús ixminta taʼan ixyal. Ex naul ni Juan: —¡Kʼalaqtsʼintʼik! Yucha ni Sasʼatʼa borrego yu Dios maqxtaqlhi tacha taun lapaxkan. Va yucha maqosuy ni talaqalhin yu alin lakamunukpaʼ. 30 Yucha yu klhichivinil ni kitʼin tejkan knaul ni minta qayntaun yu apalay ay xajantu yu kitʼin. 31 Jantu xakmispay taʼayucha ixjunita. Pero xlhiyucha kitʼin kminta jamaqchajʼavanaʼ ni lay katamispal kintʼaʼisraelitas. 32 Ni Juan vachu naul: —Kitʼin klaqtsʼil ni Espíritu Santo taʼeltajuminchal tus laktʼiyan tacha laqataun palumax, ex kiitoqslachil la ixkuktan ni yucha. 33 Ni kitʼin jantukaʼ xajkʼatsay maticha ixjunita pero yu kimalaqachal kakmil jamaqchajʼavanaʼ kun xkan, yucha kijunil: “Kʼalaqtsʼineʼe ni Espíritu Santo kataʼeltajuminaʼ, katoqslayanta la ixkuktan. Va yucha yu kamaqchajʼavananaʼ kun ni Espíritu Santo.” 34 Ni kitʼin klaqtsʼil. Chavay klhichivininta ni va yucha laqsaval Sasʼatʼa Dios. 35 Tejkan atauncha julchan val ex ni Juan ancha ixlaktayachoqol pumatʼuy yu ixtatʼaʼan. 36 Tejkan laqtsʼil ni ixtʼajun tapasanaʼ ni Jesús ex ni Juan naul: —Kʼalaqtsʼintʼik ni anchanu lapanaki. Yucha ni Sasʼatʼa borrego yu Dios malaqachal tacha taun lapaxkan. 37 Tejkan chuncha taqasmaklhi yu pumatʼuy tacha naul ni Juan ex nimancha tatʼaʼal ni Jesús. 38 Ex ni Jesús niman talaqaspʼiklhi tejkan jalaqtsʼil ni ixtatixkaulhaʼanta. Va jalaklhisakmil: —¿Tisuncha tʼaunatʼikcha lakxkaunan ni uxiknan? Ex ni yuʼuncha talhisakmil: —Jamalaniniʼ, ¿tas ancha viltʼi ni uxintʼi? 39 Ni Jesús jalajqaltayl: —Kʼatʼantʼik laqtsʼinin taʼan kvil. Ex taʼal, talaqtsʼil taʼan ixvil. Ex ancha tamaqltoqoxalcha, va laʼatʼaticha putoqoxata ixjunita. 40 Xaqayntaun ni yuʼuncha yu taqasmaklhi ixchivinti ni Juan y tatʼamil ni Jesús va ixjunkan Andrés, yucha ixlaqaj ni Simón Pedro ixjunita. 41 Ni Andrés niman kiilakxkaul yu ixlaqaj Simón, va junil: —Chavay ktemaucha ni Mesías. (Yucha naunputun Cristo, yu ixtanajun kamalaqachayaʼ ni Dios.) 42 Taval ni Andrés lhaʼal ni Simón taʼan ixyal ni Jesús. Tejkan laqtsʼil Jesús ni Simón, va junil: —Uxintʼi va Simón kʼatʼi, yu istsʼal Jonás. Pero chavaycha kaʼunkʼaneʼe Cefas (yucha naunputun Pedro, yu naunputun Chiyux). 43 Tejkan tunkunchoqolcha ex ni Jesús pastaklhi kaʼal la xaʼestado Galilea. Ancha temal ni Felipe, va junil: —Kʼintʼatʼatʼicha ni kitʼin. 44 Ni Felipe va machaqaʼ Betsaida ixjunita, la ixtʼunkʼan ni Andrés ali Pedro. 45 Ni Felipe al lakxkaunaʼ ni Natanael. Tejkan temalcha va junil: —Chavaycha ktemaucha ni anchanu lapanaki yu maqancha lhitsʼoqʼulal ni Moisés la ixlhachimoʼon Dios, vachuʼ yu talhitsʼoqʼulal ni lapanakni yu ixtalaqputeʼey ixchivinti Dios maqancha. Yucha va Jesús istsʼal José yu machaqaʼ Nazaret. 46 Ex ni Natanael va niman naul: —¿Lay kaʼalil matichun ox yu machaqaʼ Nazaret? Ni Felipe junchoqol: —Kʼatʼatʼi y kʼalaqtsʼineʼecha tas junita. 47 Tejkan laqtsʼil ni Jesús va ukstsʼuniy ixminta ni Natanael va junil: —Aniy minta qayntaun israelita yu jantu aqtaun jamakanunun. 48 Ex ni Natanael lhisakmil: ¿Tas kʼimpʼumispʼaycha ni kitʼin? Ex ni Jesús va junil: —Tejkan jantukaʼ ixjuntaʼiyan ni Felipe, tejkan ixyatʼi la ixtaʼapuʼ xakʼiu higuera, kitʼin xaklhilaqtsʼintancha. 49 Ni Natanael junil: —Uxintʼi jamalaniniʼ kʼatʼi, va Sasʼatʼa Dios unitʼa, vachu uxintʼi va yu ay xaJalhachimoʼonuʼ Israel. 50 Ex ni Jesús junil: —Chavay ni uxintʼi ox kʼilhakʼapʼupʼin vamun por kunin ni klaqtsʼin la ixqaltaʼapuʼ higuera. Astan kʼalaqtsʼineʼe yu apalay lajʼay axtoqnu xajantu yu aniy. 51 Vachuʼ jalakjunil ni Jesús: —Laqsaval klajunau, kaminaʼ julchan tejkan kʼalaqtsʼinapitik ni laktʼiyan katalaqltiʼayaʼ, vachu yu ixmayulnin Dios katataʼeltajuyaʼ y katapataxtuyaʼ tejkan kintalaqminacha ni kitʼin yu kval Sasʼatʼa Lapanaki.

2

1 Tejkan paqtʼutucha val, alil taun lakxtuklati ancha laka putaulan Kaná, la xaʼestado Galilea. Chuncha yu ixnati ni Jesús vachuʼ ancha ixvil. 2 Ni Jesús kun ni lapanakni yu ixtatʼaʼanta vachuʼ ixjalakjuntaʼikanta taʼan ixʼalinta ni lakxtuklati. 3 Ex chuncha va miʼol ni xaxkan uva. Ex yu ixnati ni Jesús va junil: —Chavay jantucha katalhitsukul xaxkan uva. 4 Ex ni Jesús va junil: —Kinati, ¿valiʼiycha chuncha kʼiʼuncha? Tus chavaycha jantukaʼ lakachin kijulchan. 5 Ex ni ixnati jalakjunil yu ixtatʼajun tapatsanin: —Yu katajunan ni yucha, uxiknan kʼamakʼayapitik. 6 Chuncha va ancha ixvil laqachaxan aqxau yu jamakanti chiyux. Yucha va yu ixputajuy xkan yu ixtamapatsay ni israelitas, chuncha tacha yu ixputsukukʼan ixjunita yu maqancha ixjapayankʼan. Va si tsʼanqay katachaʼal kun xkan para ox kaval ixjatsukuntikʼan. 7 Ex ni Jesús jalakjunil: —Kʼalaqtsʼamaʼotʼik kun xkan ni aniy aqxavin. Ex chuncha tamakal ni yuʼuncha tus talaqtsamaʼol tachun. 8 Ni Jesús jalakjunil: —Chavay kʼamakʼutʼutʼik lakatsʼuniy ex kʼalhipʼinitʼik yu jamakʼatan. 9 Tejkan talhaanil ex ni makʼatan kilkʼatsal ni xkan pero va ixtapalata xaxkan uva. Yucha jantu kaxtaqnil kuenta toʼoxtaycha ixmintachal. Pero yu tamujul, yuʼuncha ixtakʼatsay toʼoxtay ixmintachal. Ex ni makʼatan nimancha juntaʼil ni tsʼal, 10 va junil: —Tachun ni lapanakni pʼunaj tamujuy yu ox xaxkan uva. Astan tejkan oxicha talhiʼotsay ni lapanakni yu jalakjuntaʼikan ex jamunikan ni xaxkan uva yu jantu la ox. Pero uxintʼi tus chavaycha vananaj maʼatʼa ni xaxkan uva yu apalay ox. 11 Chuncha tacha yu aniy xamakay ni Jesús, va yucha yu skutsajkaʼ xamasuy lajʼay axtoqnu, va makal laka putaulan Kaná taʼan xaʼestado Galilea. Va yucha pumasul ixʼayaxtu. Ex ni lapanakni yu ixtatʼaʼanta talhakapuʼal ni yucha. 12 Ex taval taʼal laka putaulan Capernaúm chʼantaun kun ixnati ali ixtʼalaqaunin ali ni lapanakni yu ixtatʼaʼanta. Ancha tataqmaqal tsʼuniy. 13 Va laycha kalakachil ni Paxku yu ay ixkʼatankʼan ni israelitas. Ex ni Jesús alcha laka putaulan Jerusalén. 14 Ex jalaktemal laka ay lakatajtan yu ixtastʼay vakaxna ali borregos ali tukunuʼ. Vachu jalaktemal taʼan ixtavilanal yu ixtamapaxaniy ixtuminkʼan ni lapanakni yu maqati ixtaminachal. 15 Tejkan chuncha laqtsʼil ni Jesús va chʼapal maqataun cuarta y laqxoqxtuʼol tachun yu ixʼalin laka ay lakatajtan, chʼantaun kun ni lapanakni ali ixborregoskʼan ali ixvakaxkʼan. Vachu yu ixtamapaxay tumin lakpumajʼaniʼol ixtuminkʼan, vachuʼ yu mesas jalaqmapuʼaqstal. 16 Jalakjunil yu xastʼanan palumax: —Kʼalhipʼintʼikcha yu aniy axtoqnuʼ. Yu aniy va ixchaqaʼ ni kimPay. ¡Jantu kʼamakʼatʼik taun ay pastʼan! 17 Ex yu ixjalakmalaniy, yuʼuncha tapastaklhi tacha ixnajunta taʼan istsʼoqʼulakanta la ixchivinti Dios yu inchineʼ najun: “Kitʼin va kxiyax kunita por minchaqaʼ tus va tacha taun jikmi yu kimpulakxavay.” 18 Va chuncha ni israelitas talhisakmil: —¿Tis va suncha lajʼay axtoqnuʼ kʼamakʼayeʼe yu kilamasuniyau incha alin mimpalhachimoʼon para chuncha kʼamakʼatʼi tachun yu aniy xamakʼay? 19 Ex ni Jesús jalakjunil: —Kʼalakpʼujtʼik ni aniy ay lakatajtan, ex ni kitʼin va laʼatʼutu julchan kakmaqayauchoqoyaʼ. 20 Ni israelitas tajunil: —Ni aniy ay lakatajtan va cuarenta y seis jachʼitin lal ixmaqayauka. ¿Ex lhilay yu uxintʼi va laʼatʼutu julchan lay kʼamaʼayauchʼoʼoyeʼe? 21 Pero ni ay lakatajtan yu lhichivinil ni Jesús yucha naunputun va ixlakatunaj ni yucha. 22 Xlhiyucha astan tejkan ixnitacha y takukchoqotacha ni Jesús ex yu ixjalakmalaniy tapastakchoqol tacha ixnajunta. Ex talhakapuʼal chuncha tacha istsʼoqkanta la ixchivinti Dios, vachu talhakapuʼanil yu naul ni Jesús. 23 Exnicha alil ni Paxku yu ay ixkʼatankʼan ni israelitas. Ni Jesús vananaj ixvil laka putaulan Jerusalén. Ni lapanakni ixtalaqtsʼin ni lajʼay axtoqnuʼ yu ixmakay, xlhiyucha qaynlhuvaj talhakapuʼal. 24 Pero ni Jesús ox ixjalakmispay ni yuʼuncha tacha ixtajunita, xlhiyucha ixkʼatsay ni lati jantu laqsaval katalhakapuʼal. 25 Jantu ixmaqskʼiniy matichun kajunil tacha ixtajunita ni lapanakni. Yucha ixjalakmispaniy ixjalhanutkʼan, tisuncha jatapastakʼati ixtalhitʼajun.

3

1 Ixʼalin qayntaun lapanaki, va fariseo ixjunita yu ixjunkan Nicodemo, yucha va qayntaun yu ixjalaklhichimoʼoy ni israelitas. 2 Va laqkilal ni Jesús tejkan tsʼis ixjunita, va junil: —Jamalaniniʼ, kijnan kʼatsayau ni va Dios malaqachatan para kilamiu masuninin. Yu va matichun kaval incha jantu chʼantaun katʼataulal ni Dios jantu lay kamakal lajʼay axtoqnuʼ chun tacha uxintʼi makʼay. 3 Ex ni Jesús va junil: —Laqsaval kunan ni matichun lapanaki yu jantu katsukuchoqoyaʼ, yucha jantu lay katanuyanta taʼan lhachimoʼonun ni Dios. 4 Ex ni Nicodemo lhisakmil ni Jesús, va naul: —¿Tas laycha kʼapʼutsʼukʼuchʼoʼo tejkan xapaycha kaʼuntʼi? ¿Incha qayntaun lapanaki lay katanuchoqol la ixpajan ixnati y astan katsukuchoqol? 5 Ex ni Jesús junil: —Kitʼin kunan, ni matichun lapanaki yu jantu kalhitsukuchoqoyaʼ saystʼi ixjatsukunti kun ni Espíritu ali xkan yucha jantu katanuyanta taʼan lhachimoʼonun Dios. 6 Taʼayuʼ yu vamun tsukuy aniy yucha va valiʼiy lapanaki. Yu tsukuy la ixtapʼasta ni Espíritu, yucha lhitsukuy sastʼi jatsukunti. 7 Jantu vak kakʼatsʼa mas kunan ni maqskʼiniy katsʼukʼuchʼoʼo saystʼi. 8 Ni un unilay taʼan yucha najun. Mas kʼaʼasmaktʼi ni makatʼajun, jantu kʼatsʼay toʼoxtay puminta nisin toʼoxtaycha kapuʼanaʼ. Vachu va chuncha tajunita ni lapanakni yu tatsukuy la ixtapʼasta ni Espíritu. 9 Ni Nicodemo aaqtaun lhisakmichoqol ni Jesús, va junil: —¿Tas laycha kaval? 10 Ex ni Jesús junil: —Uxintʼi mas ay jamalaniniʼ kʼatʼi aniy xalakatʼun Israel, ¿jantu malaʼasiy yu tacha kunan? 11 Kitʼin laqsaval kunan ni kijnan klhichivinanau yu laqsaval ijkʼatsayau. Kijnankʼan klhitaulau yu laqsaval klaqtsʼiu. Mas chuncha jantu kilalhakapuʼaniyau yu klajunau. 12 Tejkan klalhixaqalayau axtoqnu yu alin aniy lakamunukpaʼ jantu kilalhakapuʼaniyau. ¿Ex tas kʼapʼulhakʼapʼupʼintʼikcha incha kaklalhixaqalau yu alinachal laktʼiyan? 13 ’Jantu matichun kapataxtul laktʼiyan, vamun yu minchal laktʼiyan. Yucha ni kitʼin yu kval Sasʼatʼa Lapanaki. 14 Chuncha tacha Moisés maʼostaulnil maqataun tsapul taʼan ixjaxixninta lakatʼun, vachu chun kakmaʼostaulnichoqokanaʼ ni kitʼin yu kval Sasʼatʼa Lapanaki. 15 Ex chuncha tachun yu kintalhakapuʼanan jantu katatsʼanqayaʼ, va katalhitsukuyaʼ jatsukunti yu jantu aqtaun kamiʼoyaʼ. 16 ’Ni Dios va por ayaj ixjalakpaxkay xalapanakni aniy lakamunukpaʼ, va maqxtaqlhi yu vamun yuʼ istsʼal. Ex chuncha tachun yu katalhakapuʼanaʼ ni yucha jantu katatsʼanqayaʼ, va katalhitsukuyaʼ jatsukunti yu jantu aqtaun kamiʼoyaʼ. 17 Ni Dios jantu kamalaqachal istsʼal para kalaqxtaqnil maqanlqajnati ni lapanakni. Va para kaamalaqtaxtul. 18 ’Taʼayuʼ yu lhakapuʼan ni Sasʼatʼa Dios, yucha jantu kamukʼanikanaʼ laqtaqal. Pero taʼayu yu jantu lhakapuʼan, yucha mukʼanikantacha laqtaqal, va jantu kalhakapuʼal yu vamun yuʼ Sasʼatʼa Dios. 19 Jalakmukʼanikantacha ixlaqtaqalkʼan. Jantu talhakapuʼan mas chil ni maklku yu mapulkuy ni lakamunukpaʼ. Vamun tamaqamay yu japutsʼisniʼ, jantu tamaqamay yu jatunkunuʼ. 20 Yu tʼajun makan laqtaqal jantu maqamay katalakanul taʼan alin ixmaklku ni Dios, jantu najun katasul yu tʼajun makan. 21 Pero yu vas makay yu lajʼox, yucha talakanuy taʼan alin ixmaklku ni Dios para katasul ni tʼajun makan tacha yu Dios najun. 22 Ex chuncha astan ni Jesús alcha taʼan xaʼestado Judea, chʼantaun jalaktʼaʼal yu ixjalakmalaniy. Ancha tataqmaqal, ixtʼajun jamaqchajʼavan. 23 Vachu ni Juan ixtʼaunachal jamaqchajʼavan ancha xalakatʼun Enón, ixlhiʼukstsʼuniy Salim, ancha ixʼalin lhuu xkan. Ni lapanakni ixtalaqchaʼan, ex ancha ixjalaqmaqchajʼavakan. 24 Jantukaʼ ixtamanuy laka pachʼin ni Juan. 25 Taval lati lapanakni yu ixjalakmalaniy ni Juan taʼaqtayl tatʼachiviniy aqayntaun israelita. Taʼaqtayl talhilakchiviniy tacha ixputsukukʼan ni yuʼuncha yu maqskʼiniy kachʼaʼamajʼa tachun yu jantu ox para ox kalaqaʼin ni Dios. 26 Ex talaqʼal ni Juan, va tajunil: —Jamalaniniʼ, chavaycha yu ixyal chʼantaun kun uxintʼi takuktachal ni laka Jordán, yucha tʼajun jamaqchajʼavan. Va Jesús yu kilalhixaqalau pʼunaj. Tachun ni lapanakni jantucha kintalaqʼanan, va tatʼaʼan ni yucha. 27 Ex ni Juan jalakjunil: —Jantu matichun lay laqaʼiy tuʼuchun incha Dios jantu kaxtaqnil. 28 Uxiknan ox kilaqalasmakvi ni vas klajuniu ni kitʼin jantu yu Cristo kakval. Kitʼin kunita va qayntaun yu malaqachakal, yu japʼulminta, ex astan ni yucha. 29 Taʼan alin lakxtuklati yu laqsaval lhitʼajun la ixtamakaʼ ni jatsiʼi va yu tsʼal. Tejkan chiviniy ex ixʼamigo ni tsʼal vamun qasmatʼa y lhiʼachantajuy. Ex vachu chun klhiʼachantajuy ni kitʼin, va taqayntsay yu ixkintsʼanqaniy. 30 Yucha minta para kalalhaval ixtapʼasta. Yu kintapʼasta ni kitʼin, yucha maqskʼiniy kataʼeltajul. 31 Yu mintachal talman yucha lhichimoʼoy tachun yu alin. Pero yu valiʼiy lapanaki yu minchal aniy lakamunukpaʼ, yucha vamun lay lhichiviniy yu alin aniy. Yu mintachal laktʼiyan lhichimoʼoy tachun. 32 Yucha mas lhichiviniy tachun yu laqtsʼintacha ali yu qasmakta pero jantu matichun lhakapuʼan tacha yu yucha najun. 33 Pero yu lhakapuʼan yucha masuy ni va laqsaval yu najun ni Dios. 34 Ni lapanaki yu Dios malaqachal yucha vachuʼ xtaqnikal ixʼEspíritu, xlhiyucha lhichiviniy ixchivinti Dios. 35 Yu ixPay ayaj achaniy isTsʼal xlhiyucha yucha maqxtaqnil lhuu tapʼasta para kalhichimoʼol tachun yu alin. 36 Chuncha taʼayuʼ yu kalhakapuʼanaʼ ni isTsʼal yucha lhitʼajun jatsukunti yu jantu aqtaun kamiʼoyaʼ. Yu jantu lhakapuʼan ni isTsʼal yucha jantu kalhitsukuyaʼ ni anchanuʼ jatsukunti, va paxtoqniy yu ay maqanlqajnati yu xtaʼa ni Dios.

4

1 Ni fariseos taqasmaklhi ni apalay lhuu lapanakni ixtatʼaʼan ni Jesús xajantu ni Juan. Vachuʼ taqasmaklhi ni apalay lhuu yu ixjamaqchajʼavay, 2 mas jantu Jesús kamaqchajʼavanal, va yu lapanakni yu ixjalakmalaniy. 3 Xlhiyucha ni Jesús nimancha taxtul xaʼestado Judea, va anchoqolcha xaʼestado Galilea. 4 Para kachaʼal maqskʼiniy kapuʼal xaʼestado Samaria. 5 Tejkan tanuchal xalakatʼun Samaria va chaʼal taun putaulan yu junkan Sikar. Ancha va ixlhiʼukstsʼuniy ni lakatʼun yu maqancha ixlhitʼajun Jacob, ixpaykʼan tachun yu israelitas, va xtaqnil istsʼal yu José ixjunkan. 6 Ancha ixvil taun lakxkan yu ixlhimapaqaʼukan ixlakxkan ni Jacob. Ancha chinchal ni Jesús. Oxicha ixlaqalhoqonta ixjaltanti ex ancha taulalcha. Pero va laycha atunkuj ixjunita. 7 Ex ixtʼaltanan yu ixjalakmalaniy, ixtaʼanta inin laka putaulan yu kataʼul. Ex nimancha chinchal qayntaun xanati yu machaqaʼ Samaria va ixminta makutunuʼ xkan. Chuncha ni Jesús va junil: —Kʼintʼaʼoqtʼi tsʼuniy mixkan. 9 Ni israelitas jantu ox ixtalalhaʼan kun yu machaqan Samaria, xlhiyucha ni xanati va junil: —Uxintʼi va israelita kʼatʼi. ¿Valiʼiycha kʼiskʼiniycha xkan? Kitʼin va aniy machaqaʼ Samaria kunita. 10 Ex junil ni Jesús: —Incha uxintʼi kʼamispʼatʼi yu xtaʼa ni Dios, vachuʼ incha kʼimispʼatʼi ni kitʼin yu iktʼaunan skʼininin xkan, ex yu uxintʼi kʼiskʼinin kitʼin ex kakxtaqnin xkan yu xtaʼa jatsukunti. 11 Ex yu xanati va junil: —Ni uxintʼi jantu kʼalhitsʼukʼu yu kʼapʼumakʼutʼu ni xkan. Ni lakxkan ayaj pulman. ¿Ex tas ancha kaʼiyeʼe ni xkan yu kʼixtʼaqniyeʼe yu lhitʼajun jatsukunti? 12 Yu maqancha kimpaykʼan Jacob yucha kintamakaunin aniy lakxkan taʼan ixʼotʼa ni yucha, y vachu kun tachun sasʼatʼan y tachun ixtalhitsukukna, va si aniy ixtaʼotʼa. ¿Ex ni uxintʼi apalaycha ay lapanaki kʼatʼi xajantu yu Jacob? 13 Chuncha ni Jesús va junil: —Tachun yu taʼotʼa ni aniy xkan yuʼuncha aqtsʼiyaj va kataʼoqputunchoqoyaʼ. 14 Pero matichun yu kaʼoqlhi ni xkan yu kitʼin kakxtaqyaʼ, yucha jantucha aqtaun kapukikxixaʼ. Ni xkan yu kxtaʼa ni kitʼin yucha kunaʼ va tacha taʼan mukxi xajachil xkan laktalpa. Kalhixajtachal taun jatsukunti yu jantu aqtaun kamiʼoyaʼ. 15 Ex ni anchanuʼ xanati va junchoqol ni Jesús: —Kʼixtʼaqnin ni anchanuʼ xkan para jantucha aqtaun kajkʼoqputunchoqol, vachu jantucha kakmil uchuʼ. 16 Chuncha ni Jesús va junil: —Kʼapʼinchʼiy juntaʼin ni mixapay ex kʼatʼanchʼoʼo aniy. 17 Ex ni anu xanati qaltaychoqol, va junil: —Jantu kaklhitsukul kixapay. Ex ni Jesús junchoqol: —Uxintʼi ox xaʼaltʼayanan ni naʼun jantu kʼalhitsʼukʼu mixapay. 18 Laqsaval ni uxintʼi ixlhitʼaʼun pumakis mixapaynin. Vachu yu chavaycha lhitʼaʼun jantu laqsaval mixapay kaval. Va laqsaval yu uxintʼi naʼun. 19 Tejkan chuncha qasmaklhi ni xanati, va junil: —Chavaycha klaqtsʼinan tacha qayntaun yu laqputeʼey ixchivinti Dios. 20 La maqancha aniy ixtamin yu kepayankʼan ni kijnan yu aniy machaqan Samaria kuntau. Yuʼuncha ixtamin aniy laka aspajun para katatoʼoyal ni Dios. Pero yu uxiknankʼan israelitas untʼatʼik kilalhijunau ni va maqskʼiniy kaktoʼoyau Dios vamun laka putaulan Jerusalén. 21 Ex ni Jesús junil: —Uxintʼi, xanati kʼatʼi, kʼilhakʼapʼupʼinincha yu kunan. Kaminaʼ ni julchan tejkan uxiknankʼan jantucha katʼoʼoyayapitik ni kimPay Dioskʼan mas aniy laka aspajun, mas kaval laka putaulan Jerusalén. 22 Ni uxiknan tʼoʼoyayatʼik yu jantu mispʼayatʼik. Kijnankʼan ktoʼoyayau yu kmispayau. Ni Jamalaqtaxtunuʼ mintachal kun yu israelitas. 23 Ni julchan yu istsʼanqay kalakachil yucha chavaycha lakachin, tejkan ni lapanakni yu laqsaval katatoʼoyayaʼ kimPay Dioskʼan, katatoʼoyayacha chuncha tacha lhinajun ixʼEspíritu. KimPay Dioskʼan yucha lakxkajuy lapanakni para chuncha katatoʼoyal. 24 Ni Dios yucha va Espíritu junita xlhiyucha yu tatoʼoyay tsʼanqay katatoʼoyal tacha lhinajun ixʼEspíritu yu laqsaval masuy tacha junita. 25 Ex ni anchanuʼ xanati va junil: —Kitʼin ox ijkʼatsay ni kaminaʼ ni Mesías (va naunputun Cristo yu ixtanajun kaminaʼ). Tejkan kaminaʼ ex yucha ox kintamasuniʼoyan tachun. 26 Ni Jesús junil: —Va yucha ni kitʼin yu ktʼaunan tʼachivinin ni uxintʼi. 27 Tejkan chuncha ixtʼajun chivin ex tachinchoqolcha ixtʼaltanan yu ixjalakmalaniy. Ni yuʼuncha tus taun talhilal tejkan talaqtsʼil ixtʼachivijyal qayntaun xanati. Pero jantu matichun kalhisakmil yu ixmaqskʼiniy, vachu jantu katalhisakmil tisuncha ixtatʼajun lhilakchivinin. 28 Ex ni anchanu xanati makaulalcha ni ixʼaqxau, va anchoqolcha la ixchaqaʼ. Tejkan chaʼal va lakjunil ni lapanakni katatʼaʼal, va naul: 29 —Kʼatʼantʼikcha laqtsʼinin qayntaun lapanaki yu tus kijunʼol tachun yu kitʼin kmakata. Ka va lay va yucha ni Cristo yu ixtanajun kaminaʼ. 30 Chuncha nimancha tataxtul ni laka putaulan, va taʼalcha taʼan ixyachal ni Jesús. 31 Tejkan jantukaʼ ixtalaqchaʼan ex ni ixtʼaltanan ixtatʼajun lhijuninin para kavayl pero mas ixtalhijuniy jantu ixchavaniy. 32 Ni Jesús jalakjunil: —Ni kitʼin klhitʼajun vayti yu uxiknankʼan jantu mispʼayatʼik. 33 Ex ixtʼaltanan yu ixjalakmalaniy, taʼaqtayl talakchiviniy, ixtakʼatsaputun incha va matichun kalhiminil ixvayti. 34 Ni Jesús jalakjunil: —Alin aputaun kivayti. Kitʼin kmakay yu lhipaʼiniy ni Dios yu kimalaqachal tus kakmakaniʼol ixlhitapatsa yu kilhijuniy. Anchanu lhitapatsa va tacha kivayti. 35 Uxiknan naunatʼik: “Ni chavaycha vananaj tsʼanqay laʼatʼati malkuyuʼ para kalakachil ni jaxqanti.” Pero kitʼin klajunau tsʼanqay kʼamakʼatʼik kuenta ni taʼan jachʼananti va oxicha para kaxqaʼikal. 36 Chuncha qayntaun lapanaki yu jaxqanan yucha laqaʼiy ixlhilhajati, ex yu xqaʼikal yucha xtaʼa jatsukunti. Ex pumatʼuy talhiʼachantajuy, yu chʼal ali yu jaxqanal. 37 Laqsaval chuncha junita tacha klajunau: “Qayntaun tapatsay para kachʼanlhi, aqayntaun para kaxqanal.” 38 Kitʼin klamalaqachau jaxqanan taʼan jantu kachʼantʼik. Jalakxkʼauyatʼik lapanakni yu kintalhakapuʼal por yu tajunilcha alati lapanakni yu talaqtapatsatacha. Uxiknankʼan chavaycha aqchʼapʼatʼatʼik la ixlhitapatsakʼan. 39 Ni anu xanati ixjalakjunita ixtʼamachaqan ni ixnajunta Jesús tachun yu ixmakatacha, xlhiyucha ayaj lhuu lapanakni yu machaqan Samaria talhakapuʼal ni Jesús. 40 Ex tejkan tachil ni machaqan Samaria taʼaqtayl tatapayniniy ni Jesús para katamakaul kun yuʼuncha. Ex ni yucha ancha loqojlhi paqtʼuy. 41 Chuncha apalay lhuu talhakapuʼal tejkan taqasmaklhi yu ixnajun ni yucha. 42 Ex va tajunil ni xanati: —Chavaycha klhakapuʼanau pero jantucha vamun por yu kilajuniu. Va kijnankʼan ijqasmakvi ixchivinti, xlhiyucha klhakapuʼanau. Vachu ijkʼatsayau ni yucha va yu laqsaval ni Cristo, yu Jamalaqtaxtunuʼ aniy lakamunukpaʼ. 43 Chuncha tejkan paqtʼuy val, va taxtuchal ancha Samaria ni Jesús, ex al tus xaʼestado Galilea. 44 Ni yucha ixnajunta ni qayntaun lapanaki yu laqputeʼey ixchivinti Dios jantu toʼoyakan la ixtʼun. 45 Ex tejkan chaʼal Galilea ni lapanakni yu ancha machaqan va ox talaqaʼil. Ni yuʼuncha vachuʼ ixtaʼanta Jerusalén tejkan alil ni xakʼatan Paxku. Ancha talaqtsʼinʼol tachun lajʼox yu makal ni Jesús. 46 Ex astan anchoqol laka putaulan Caná ancha xalakatʼun Galilea taʼan yu valiʼiy xkan maxajnichal xaxkan uva. Ancha ixʼalin qayntaun yu ay jalhachimoʼonu yu ixtapatsaniy ni rey. Yucha ixlhitʼajun qayntaun istsʼal yu ixtaqanʼay laka putaulan Capernaúm. 47 Ni anchanu lapanaki kʼatsal ni Jesús va taxtul Judea, va chinchal Galilea. Ex niman al tapaynininiʼ ni katʼaʼal la ixchaqaʼ. Ixnajun palay kamakanichoqol istsʼal yu va laycha kanil. 48 Chuncha yu Jesús va niman naul: —Uxiknankʼan jantu kilalhakapuʼaniyau kinchivinti incha jantu pʼunaj laqtsʼinʼelayatʼik lajʼay axtoqnu yu kitʼin kmakay. 49 Pero yu jalhachimoʼonuʼ va naul: —Kʼintʼatʼatʼicha niman laqtsʼiniʼ kintsʼal ni jantukaʼ niy. 50 Chuncha ni Jesús va junil: —Kʼapʼinchʼoʼocha la minchaqaʼ, mintsʼal palay junchoqota. Ex ni yucha lhakapuʼal tacha junil ni Jesús y va anchoqolcha. 51 Tejkan va ixʼantakaʼ la ixchaqaʼ ex takipaxtoqʼil ixʼoqxtamatin, va tajunil: —Mintsʼal oxicha vilchoqol. 52 Ex laklhisakmil: —¿Tisuncha hora aqtaynil ox kʼatsanchoqoy? Ex tanaul ni yuʼuncha: —Va kutancha laqataun putoqoxata tejkan taʼeltajunichoqol iskakati. 53 Ex chuncha ni japay makal kuenta ni anchanu hora va exnicha tejkan junil ni Jesús: “Mintsʼal va palaycha junchoqota.” Ex ni anchanu japay kun tachun ixlapanakni talhakapuʼal ni Jesús. 54 Ex chuncha kun yu aniy, va aqtʼuycha makal ni Jesús yu lajʼay axtoqnuʼ tejkan minchal Judea, chinchal Galilea.

5

1 Ex astan tejkan tapasaʼol tachun yu aniy va ixjunita aputaun ixkʼatankʼan ni israelitas. Chuncha ni Jesús anchoqol Jerusalén. 2 Ancha Jerusalén ixlhiʼukstsʼuniy laka puerta yu lhimapaqaʼukan Borregos, ancha ixʼalin taun ay japuʼan yu junkan Betesda laka lhihebreo. Ixlhitʼajun laqakis xacorredor. 3 Ancha ixtamanal lhuu taqanʼanin. Ixtaʼalinta laʼachʼixin, vachu ixtaʼalin yu lakchʼanlkʼavil ali yu jantu lay ixtapiklay xantaʼan ixlakatunajkʼan. Yuʼuncha ixtapakxanʼita kalaklal ni xkan. 4 [Aqtamixna ixtaʼeltajuy ixmayul ni Dios ni laqapuʼan ex yucha ixlaqxaʼamuy ni xkan. Ex chuncha tejkan ixlaqxaʼamuʼojoy ni xkan ex taʼayu yu pʼunaj ixtataʼanuy, niman palay ixjunchoqoy mas va tuʼuchuncha taqanʼati yu kalhitsukul.] 5 Vachu ancha ixʼalin qayntaun lapanaki yu ixlhitʼajuncha ixtaqanʼati 38 jachʼitin. 6 Ex ni Jesús tejkan laqtsʼil ni ancha ixmal va makal kuenta ni ayaj maqancha ixtaqanʼay, va lhisakmil, va junil: —¿Palay unpʼutʼunchʼoʼoy? 7 Chuncha ni taqanʼan va naul: —Jalhachimoʼonuʼ, kitʼin kunan tejkan laklay ni xkan, ni jantu alin matichun kimataʼanul ni laqapuʼan. Tejkan kitʼin ktaʼanuputun, aqayntaun niman kilhajay. 8 Ex junil ni Jesús: —Kʼaʼostʼaycha. Kʼasaktʼicha ni mimputaman y kʼapiticha. 9 Ex chuncha ni anchanu lapanaki va nimancha palay junchoqol, saklhicha ixputaman, aqtaylcha jaltanan. Ni anchanu julchan va xajulchan jastaknati ixjunita. 10 Ex ni israelitas tajunil ni lapanaki yu palaycha ixjunchoqota: —Chavaycha va xajulchan jastaknati. Ex jantu paxtoqniy kʼalhipʼi mimputaman. 11 Ex ni yucha jalakjunil: —Yu palay kimakachoqol va yucha kijunil: “Kʼasaktʼicha ni mimputaman y kapʼinchʼoʼocha.” 12 Ex talhisakmil: —¿Tasʼayucha xalhijunan kʼasaktʼicha ni mimputaman y kapʼinchʼoʼocha? 13 Pero ni lapanaki yu palaycha ixjunchoqota jantu ixkʼatsay taʼayucha palay makal. Yu Jesús ixlaqmaqayauchoqotacha ni pumalhuu lapanakni yu ancha ixtayanal. 14 Ex taval ni Jesús paxtoqlhi ni anuʼ lapanaki taʼan ay lakatajtan, va junil: —Chavay palaycha unchʼoʼotʼa ni uxintʼi. Kitʼin kunan ni jantucha apalay kʼamaqtʼaʼalhin para jantu tuʼuchun kapʼaxtʼoqtʼay yu apalay pʼays maqanlqajnati. 15 Ex chuncha alcha ni anchanu lapanaki, jalakjunil ni israelitas ni va Jesús yu palay ixmakachoqota. 16 Xlhiyucha ni israelitas ixtaxkajiy ni Jesús por ixmakay lajʼay lhitapatsa xajulchan jastaknati, xlhiyucha ixtamaqniputun. 17 Ex ni Jesús jalakjunil: —Yu kimPay va si tapatsay ex kitʼin vachuʼ ktapatsay. 18 Chuncha ni israelitas takʼatsal ni jantucha vamun xajulchan jastaknati ixtʼajun tapasaniniʼ. Vachuʼ naul ni yucha ixPay va Dios. Chuncha ixmakakan xʼaman tacha Dios kaval, xlhiyucha apalay ixtamaqniputun. 19 Ni Jesús jalakjunil: —Kitʼin klajunau ni kitʼin yu Sasʼatʼa Dios jantu lay kmakay tuʼuchun keʼeman. Kitʼin vachu va chun kmakay tacha klaqtsʼin makay kimPay. Ex tachun yu makay ni kimPay va yucha kmakay ni kitʼin yu Sasʼatʼa. 20 Yu kimPay yucha kiʼachaniy y kimasuniy tachun yu makay. Vachuʼ kimasuniyaʼ alati axtoqnuʼ yu apalay lajʼay yu kʼalaqtsʼinapitik, tus vak kakʼatsʼanapitik. 21 Chuncha tacha yu jaPay jalakmajkujuchoqoy janinin y jalaqxtaqniy jatsukunti, vachuʼ kitʼin yu isTsʼal kxtaqniy jatsukunti va yu kitʼin kxtaqniputun. 22 Yu kimPay jantu matichun mukʼaniy laqtaqal. Va kixtaqnil kitʼin yu isTsʼal kunita tachun tapʼasta para kakmukʼal laqtaqal. 23 Ex chuncha tachun kintatoʼoyayaʼ kitʼin yu isTsʼal vachu chun tacha tatoʼoyay ni kimPay. Ni lapanakni yu jantu kintatoʼoyay ni kitʼin yu isTsʼal, yuʼuncha vachu jantu tatoʼoyay ni kimPay yu kimalaqachal. 24 ’Laqsaval klajunau ni uxiknan: Taʼayu yu qasmatʼa ni kinchivinti y vachu lhakapuʼan yu kimalaqachal, yucha lhitʼajun jatsukunti yu jantu aqtaun kamiʼoyaʼ. Jantu aqtaun kaxtaqnikanaʼ maqanlqajnati, ni yucha tapasatacha laka lhinin y lhitʼajuncha jatsukunti. 25 Laqsaval klajunau, ni lapanakni yu tacha janinin tajunita por jantu talhakapuʼan, kaminaʼ julchan tejkan yuʼuncha kintaqasmakniyaʼ kinchivinti kitʼin yu Sasʼatʼa Dios. Anchanu julchan va yu chavaycha lakachin. Yu taqalasmatʼa, yuʼuncha katatsukuyaʼ. 26 Yu jatsukunti minchal kun kimPay Dios. Vachu kimaqxtaqnil tapʼasta ni kitʼin yu isTsʼal kunita para lay kakxtaqlhi jatsukunti. 27 Vachuʼ ni kitʼin yu kval Sasʼatʼa Lapanaki, kimaqxtaqnil lhachimoʼon para kaklakmukʼanil ixlaqtaqalkʼan ni lapanakni. 28 Jantu vak kakʼatsʼantʼik por tachun yu aniy klajunau. Kaminaʼ julchan tejkan tachun ni janinin yu taʼaknunun kintaqasmakniyaʼ kinchivinti. 29 Ex tachun yu tamakal yu lajʼoxi la ixjatsukuntikʼan katakujchoqoyaʼ para katalhitsukul yu ox jatsukunti. Yu tamaqtaqalhinin yuʼuncha kalaqxtaqnikanaʼ maqanlqajnati. 30 ’Yu kitʼin jantu tuʼuchun lay kmakay kilaqʼaman, kmukʼay laqtaqal vamun tacha kilhijuniy kimPay. Xlhiyucha vas kmakay tejkan kmukʼay laqtaqal, va kmakay tacha najun kimPay yu kimalaqachal aniy. 31 Incha vamun kitʼin kaklhichivinkal kilaqʼaman ex ka jantu laqsaval kaval kinchivinti. 32 Klajunau ni alin qayntaun yu lay kilhichiviniy ni kitʼin. Kitʼin ijkʼatsay ni va laqsaval yu najun. 33 Laqsaval uxiknankʼan jamalaʼachʼanantʼik para kataʼal lhisakminin ni Juan taʼayucha kunita ni kitʼin. Yucha jaqaltayanal yu laqsaval. 34 Ni kitʼin jantu kmaqskʼiniy ixchivinti qayntaun lapanaki. Va klajunau taʼayuʼ kilhichiviniy para lay kʼalhakʼapʼupʼintʼik y kʼalaqtʼaxtʼutʼik. 35 ’Yu Juan ixjunita va tacha laqataun maklku yu ixmaqtajiy y ixmapulkuy. Taun panchʼix yu uxiknan ixtamaqamayan ixchivinti. 36 Pero yu kmakay ni kitʼin yucha apalay ox masuy taʼayucha kunita xajantu ixchivinti ni Juan. Ni lhitapatsa yu kixtaqnil kimPay va yucha yu kmakay. Chuncha ox masuy taʼayucha kunita ni kitʼin y masuy ni va kimPay kimalaqachal. 37 Ni kimPay yu kimalaqachal ni kitʼin yucha kilhichiviniy, mas jantu aqtaun kʼaʼasmaktʼik ixchivinti y vachu jantu aqtaun kʼalaqtsʼintʼik tacha junita. 38 Yucha kimalaqachal pero jantu kilalhakapuʼaniyau kinchivinti. Xlhiyucha uxiknan jantu kalhitsʼukʼutʼik ixchivinti la melhanutkʼan. 39 Uxiknankʼan laka laksniy lhitʼamoʼoyatʼik ixchivinti Dios taʼan tsʼoqkanta, lhilayatʼik ni va ancha katʼemayapitik ni jatsukunti yu jantu aqtaun kamiʼoyaʼ. Ni anchanu chivinti va yu kilhichiviniy ni kitʼin. 40 Pero jantu kilalaqʼuxaminau para kʼalhitsʼukʼutʼik ni anchanu jatsukunti. 41 ’Kitʼin jantu knajun ni kintatoʼoyal ni lapanakni. 42 Ox klamispayau ni uxiknankʼan jantu laqsaval tʼoʼoyayatʼik Dios. 43 Kitʼin kmil kun ixpalhachimoʼon ni kimPay pero uxiknan jantu kilalaqaʼiyau. Yu va kamil aqayntaun lapanaki yu vamun la ixtapʼasta ni yucha, ka tus laqa achati kʼalaʼaʼitʼik. 44 Xlhiyucha jantu lay lhakʼapʼupʼinatʼik. Ayaj tamaqamayan tejkan lajʼay tamakayan ni lapanakni, jantu lakxkʼauyatʼik para lajʼay katamakan ni Dios. 45 Kitʼin jantu kaklaslajau kun kimPay. Yu laqsaval kataslajan va Moisés mas va yucha yu pʼakxanʼiyatʼik para kataʼaqtayjun. 46 Incha laqsaval kʼalhakʼapʼupʼintʼik chuncha tacha yu naul ni Moisés ex vachuʼ ixkilalhakapuʼau ni kitʼin. Taʼan jatsʼoqnul ni Moisés yucha kilhichiviniy. 47 Incha jantu lhakʼapʼupʼinatʼik ni chivinti yu tsʼoqlhi ni Moisés ex yu kinchivinti vachu jantu lay lhakʼapʼupʼinatʼik.

6

1 Ex astan ni Jesús va alcha takukchal lakamar Galilea yu vachuʼ ixjunkan lakamar Tiberias. 2 Tatʼaʼal pumalhuu lapanakni, va talaqtsʼil ni palay jalakmakal taqanʼanin. 3 Taval ni Jesús taukʼal laqataun aspajun, ancha jalaktʼataulal yu ixjalakmalaniy. 4 Va laycha kalakachil ni Paxku yu ay ixkʼatankʼan ni israelitas. 5 Tejkan Jesús laqtsʼil ni qaynlhuu lapanakni ixtatixkaulhaʼanta, ex lhisakminil, va junkal ni Felipe: —¿Tas ancha kaʼiyaucha vayti para kalaqchaʼal tachun yu aniy lapanakni? 6 Chuncha junkal ni Felipe va para kalaqtsʼintanukal tisuncha chivinti kaqaltayanal. Ni Jesús yucha ixkʼatsaycha yu maqskʼiniy kamakal. 7 Chuncha ni Felipe va junil: —Mas laʼatʼuy ciento julchan katsʼukʼu tapatsan jantu kalaqchaʼal para kʼalakvavatʼi tachun ni lapanakni mas va laktsʼuninin pan. 8 Ex aqayntaun yu ixtʼaltanaʼ yu junkan Andrés yu ixlaqaj yu Simón Pedro va naul: 9 —Aniy alin qayntaun tsʼal. Yucha lhitʼajun aqskis pan yu lhiyal cebada, vachu lhitʼajun aqxtʼuy jatanti. Pero jantu kalaqchaanaʼ por tachun yu aniy lapanakni. 10 Ex chuncha ni Jesús laklhijunil: —Kʼaʼunitʼik katataulal ni lapanakni. Ancha ayaj ixʼalin lhuu jatsʼin. Tejkan tataulʼol va laqchaʼal tus laqakis mil joʼakna. 11 Chuncha ni Jesús chʼapal ni pan, aqtayl xtaqniy lhimalaqpuchuncha ni Dios. Ex jalaqxtaqnil ni lapanakni. Vachu chun makal kun yu jatanti. Jalaqxtaqnil tacha yu yuʼuncha ixtaʼuputun. 12 Tejkan oxicha talhiʼotsaʼol ex ni Jesús jalaklhijunil ixtʼaltanan katapusakchoqol tachun yu xajchal para jantu valiʼiy katalaqamanal. 13 Chuncha tapusaklhi ni yuʼuncha tachun yu xatalaqcheʼeniʼ, tus laqakautʼuy canasta talaqtsamal vamun por yu anuʼ aqskis pan yu jalakvaval ni lapanakni. 14 Ni lapanakni por talaqtsʼil yu aniy ay axtoqnu yu makal ni Jesús aqtayl talajuniy siya yuʼuncha: —Laqsaval ni aniy ka yucha yu laqputeʼey ixchivinti Dios yu ixtanajun kaminaʼ aniy lakamunukpaʼ. 15 Ni Jesús kʼatsal ni va kataminaʼ inin para katalhaʼal taʼan katamakayaʼ ixjalhachimoʼonukʼan. Xlhiyucha taʼeltajuchoqol laka aspajun, va qoslhi para ixlaqʼaman katiʼukxuntayal. 16 Tejkan putsʼislhicha ex ixtʼaltanan ni Jesús yu ixjalakmalaniy tataʼeltajulcha, va taʼalcha lakamar. 17 Ex ancha tataukʼal laka barco para katapalaqpuslhi ni lakamar para katachaʼal laka putaulan Capernaúm. Anchanuʼ hora oxicha tʼalaj ixputsʼista, yu Jesús jantukaʼ ixminchoqoy. 18 Chuncha ni lakamar aqtayl laklay kun taun pʼas un yu ostaulal. 19 Tejkan maqaqcha ixtaʼanta va tachaʼal laqakis, laqachaxan kilometro ex talaqtsʼil ni Jesús ixtʼajun taʼukstsʼunin laka barco, ixjaltanajʼanta la ixʼukxna lakxkan. Ex ayaj tatalhanal. 20 Ni Jesús jalakjunil: —Va kitʼin kunita. Jantu katʼalhanantʼik. 21 Va laqa achati talaqaʼil laka barco. Ex yu barco nimancha talakanuchal lakatʼun taʼan yuʼuncha ixtachaanputun. 22 Tejkan atauncha julchan junchoqol, ni lapanakni ixtayanal tus takuktachal lakamar. Tapastakchoqol ni vamun ixʼalin laqataun barco, va yucha yu tapuʼal ixtʼaltanan ni Jesús, pero ni Jesús jantu kalaktʼaʼal ni yuʼuncha. 23 Pero exnicha tachinchal alati barcos yu taminchal laka putaulan Tiberias. Tachinchal ixlhiʼukstsʼuniy taʼan taʼul yu pan tejkan ni Jesús xtaqnil lhimalaqpuchuncha ni Dios. 24 Pero tejkan taxtaqnil kuenta ni Jesús jantu an katayal y vachu ixtʼaltanan jantu sik ixtalay, ex tachun ni lapanakni tataukʼal ni laka barcos, taʼal lakxkaunan tus laka putaulan Capernaúm. 25 Chuncha tejkan tapalaqpuslhi ni lakamar ancha tatemal ni Jesús, talhisakmil, va tajunil: —Jamalaniniʼ, ¿tasvanancha chʼitʼi aniy? 26 Ex ni Jesús jalakjunil: —Kitʼin vas klajunau ni uxiknankʼan vayntʼik tus ox otsʼatʼik. Va xlhiyucha kilalakxkauyau, mas jantu kʼamalaʼasitʼik yu ay axtoqnuʼ yu xaklamasuniyau. 27 Jantu kʼatʼapʼatsʼatʼik por mivaytkʼan yu niman miʼojoy. Tsʼanqay kʼatʼapʼatsʼatʼik por ni vayti yu kataxtaqniyan jatsukunti yu jantu aqtaun kamiʼoyaʼ. Va yucha yu klaxtaqniyau ni kitʼin yu kval Sasʼatʼa Lapanaki, va kitʼin kilakʼulal kimPay Dios. 28 Chuncha talhisakmil ni Jesús: —¿Ex tisuncha tsʼanqay kakmakau para kakmakau ni lhitapatsa yu Dios lhinajun? 29 Ni Jesús jalajqaltaychoqol, va jalakjunil: —Ni lhitapatsa yu lhinajun Dios va inchineʼ. Yucha kimalaqachal aniy, va talhijunan ni maqskʼiniy kilalhakapuʼaniu yu klajunau. 30 Chuncha talhisakmil ni Jesús: —¿Suncha kilamasuniyau yu ay kaval para kaklaqtsʼiu? Ex lay kaklalhakapuʼaniu minchivinti. ¿Suncha lay makʼay? 31 Ni kimpaykʼan yu maqancha ixtatiʼukxuntayay lakakʼivinan yuʼuncha taʼul ni vayti yu junkan maná. Chuncha tapasal tacha tsʼoqkanta taʼan najun: “Ni yucha jalaqxtaqnil ixvaytkʼan yu minchal laktʼiyan.” 32 Ni Jesús jalakjunil: —Ni kitʼin klajunau. Ni Moisés jantu kataxtaqnin vayti yu minchal laktʼiyan. Chavay kimPay taxtaqniyan ni anchanu vayti yu laqsaval yu minachal laktʼiyan. 33 Ni vayti yu xtaʼa Dios minachal laktʼiyan, va yucha jaxtaqniy ixjatsukuntikʼan ni lapanakni lakamunukpaʼ. 34 Ex ni lapanakni tajunil: —Jalhachimoʼonuʼ, kilaxtaqniʼalhiu ni anchanuʼ vayti. 35 Ex ni Jesús jalakjunil: —Kitʼin kunita yu vayti yu xtaʼa jatsukunti. Taʼayuʼ yu kilaqmil ni kitʼin yucha jantucha aqtaun kachavanaʼ. Vachu yu kilhakapuʼanil kinchivinti yucha jantucha aqtaun kapukikxixaʼ. 36 Xaklajunaucha ni uxiknankʼan mas kilalaqtsʼinaucha jantu lhakʼapʼupʼinatʼik. 37 Tachun ni lapanakni yu kimaqxtaqniy kimPay yuʼuncha kintalaqminaʼ ni kitʼin. Tachun yu kintalaqminaʼ kitʼin jantu klakmaspʼitʼaʼ. 38 Ni kitʼin va kminchal laktʼiyan para kakmakal yu najun kimPay, jantu yu knajun ni kitʼin. Va yucha kimalaqachal. 39 Yu kimalaqachal va najun ni jantu kakmaqatsʼanqal mas va qayntaun yu kimaqxtaqnil. Va najun kaklakmajkujuʼochoqol ni anchanuʼ julchan tejkan tachun katamaktayaʼ. 40 Yu kimPay va najun ni katalhitsukul jatsukunti yu jantu aqtaun kamiʼoyaʼ tachun ni lapanakni yu kintalaqtsʼil y kintalhakapuʼal ni kitʼin yu isTsʼal. Ex kitʼin astan kaklakmajkujuchoqoyaʼ tejkan tachun katamaktayaʼ. 41 Tejkan chuncha naul ni Jesús va vayti junita yu minchal laktʼiyan, ex yu israelitas taʼaqtayl talhichiviniy ni Jesús, taqaltaʼestuklhi por chuncha naul. 42 Va tanaul: —Ni aniy lapanaki va Jesús yu istsʼal José. Ni kijnan ox mispayau ixpay ali ixnati. ¡Chavaycha kintajunan ni yucha taʼeltajuminchal laktʼiyan! 43 Ex chuncha ni Jesús jalakjunil: —Jantucha kilaqaltaʼestukvi. 44 Jantu matichun lay kilaqmin ni kitʼin incha kimPay yu kimalaqachal jantu kilhiminil. Ex kitʼin kakmajkujuchoqoyaʼ tejkan tachun katamaktayacha. 45 Yu maqancha ixtalaqputeʼey ixchivinti Dios va inchine tatsʼoqʼulal: “Ni Dios kalakmasuniyaʼ tachun ni lapanakni.” Tachun yu taqalasmatʼa ni kimPay y talaniy yu najun, yuʼuncha kintalaqmin ni kitʼin. 46 ’Yu kimPay yucha jantu aqtaun kalaqtsʼinkal pero ni kitʼin yu kminchal kun Dios va klaqtsʼil. 47 Laqsaval klajunau incha matichun lapanaki ox kilhakapuʼan ex ni yucha lhitʼajun jatsukunti yu jantu aqtaun kamiʼoyaʼ. 48 Ni kitʼin kunita ni vayti yu xtaʼa jatsukunti. 49 Ni mimpaykʼan yu maqancha ixtatʼajun, taʼul ni vayti yu patajul talman ancha lakakʼivinan pero ex astan tanil. 50 Kitʼin klhichiviniy ni vayti yu minchal laktʼiyan, matichun lapanaki yu kaʼul yu aniy vayti, yucha jantu aqtaun kaniyaʼ. 51 Kitʼin kunita ni vayti yu kujta yu minchal laktʼiyan. Taʼayu yu kaʼuyaʼ aniy vayti yucha katsukuyaʼ mas va tavanancha kaval. Ni anchanu vayti yu kitʼin kxtaʼa yucha va kilakatunaj yu kmaqxtaʼa para katalhitsukul jatsukunti tachun ni lapanakni. 52 Ex chuncha ni israelitas aqtayl talhilakchiviniy siya yuʼuncha, ixtanajun: —¿Ex tas laycha kintapuxtaqnin ixlakatunaj para kaʼuu? 53 Ex ni Jesús naul: —Kitʼin vas klajunau ni uxiknankʼan incha jantu kilaʼuniyau kilakatunaj ni kitʼin yu kval Sasʼatʼa Lapanaki, vachu incha jantu kilaʼoqniyau kijakʼalnan, ex jantu lay kʼalhitsʼukʼuyapitik jatsukunti. 54 Ex chuncha taʼayuʼ yu kaʼuyaʼ kilakatunaj, vachuʼ incha kaʼoqyaʼ kijakʼalnan, ex ni yucha lhitʼajuncha jatsukunti yu jantu aqtaun kamiʼoyaʼ. Ex astan tejkan kamiʼoyacha ni lakamunukpaʼ ex kakmajkujuchoqoyaʼ. 55 Yu kilakatunaj va yucha yu laqsaval lhiʼuti para kaʼutʼi, vachu yu kijakʼalnan va yu laqsaval xkan para kaʼoqtʼi. 56 Xlhiyucha ni lapanaki yu uy kilakatunaj y vachuʼ yu otʼa kijakʼalnan, yucha chʼantaun junita kun kitʼin y kitʼin vachuʼ chʼantaun kunita kun yucha. 57 Ni kimPay yu kimalaqachal yucha lhitʼajun jatsukunti y yu kitʼin va yucha kputsukuy. Ex chuncha vachuʼ matichun lapanaki yu kiʼuyaʼ ni kitʼin, yucha vachuʼ kimputsukuyaʼ ni kitʼin. 58 Kitʼin klhichiviniy vayti yu minchal laktʼiyan. Yucha jantu va aqstanchun kaval tacha yu junkan maná yu maqancha taʼul mepayankʼan. Yuʼuncha tejkan taʼul astan tanil. Pero yu kaʼuyaʼ ni aniy vayti yucha katsukuyaʼ mas va tavanancha kaval. 59 Ni Jesús va chuncha laqputeʼel laka putaulan Capernaúm laqa chaqaʼ taʼan ixtataqxtoʼa ni israelitas. 60 Tejkan chuncha taqasmaklhi tacha yu jalakmasunil ni Jesús ex lati lapanakni va tanaul: —Tacha najun ni yucha ayaj lhitaʼay para kʼalaʼaʼitʼi. ¿Tasʼayucha lapanaki lay kamakaniyaʼ kuenta yu najun? 61 Pero ni Jesús niman xtaqnil kuenta ni va ixtatʼajun pastaknan y ixtatʼajun jakiltaynan. Ex jalhisakmil, va jalakjunil: —¿Ex jantu katamaqaman yu xaklajunau? 62 ¿Tas kʼalhilatʼikcha ni uxiknan incha kilalaqtsʼinau ni kitʼin yu kval Sasʼatʼa Lapanaki kakpataxtuchoqol taʼan pʼunaj xakvilchal? 63 Ni Espíritu yucha xtaʼa jatsukunti, ixtapʼasta lapanaki jantu tuʼuchun ixtapal kaval. Tachun kinchivinti yu kitʼin kiltaxtuy va minachal kun ni Espíritu yu xtaʼa jatsukunti. 64 Pero vananaj alin lati uxiknankʼan yu jantukaʼ lhakʼapʼupʼinatʼik. Ni Jesús yucha ixkʼatsay mas tejkan aqtaynil ixlhitapatsa tasʼayuʼuncha yu jantu katalhakapuʼanaʼ. Vachu ox ixkʼatsay tasʼayucha yu kamaqxtaʼaʼ para kamaqnikal. 65 Ex jalakjunil: —Jantu matichun lapanaki lay kilaqmin ni kitʼin incha yu kimPay jantu xtaqniy lakatin. 66 Tejkan chuncha naunʼol ex lhuvaj lapanakni yu ixtatʼaʼanta tamakauntijlal, jantucha apalay katatijuntayal kun yucha. 67 Ex chuncha ni Jesús vachuʼ jalaklhisakmil yu pumakautʼuy yu ixjalakmalaniy va jalakjunil: —¿Uxiknan vachuʼ kilamakauntijlayau? 68 Ex ni Simón Pedro va liman qaltayl, va junil: —Jalhachimoʼonuʼ, ¿tasʼayucha lay kaktʼaʼau? Kijnan kʼatsayau ni laqsaval vamun uxintʼi kʼiltʼaxtʼuy chivinti yu xtaʼa jatsukunti yu jantu aqtaun kamiʼoyaʼ. 69 Chavay kijnan klalhakapuʼantaucha, vachuʼ ijkʼatsayau ni uxintʼi va yu ixnavin Dios kʼatʼi, jantu tuʼuchun laqtaqal kʼalhitsʼukʼu. 70 Ni Jesús jaqaltaychoqol, va jalakjunil: —Kitʼin klalaksakvi pumakautʼuy pero xaqayntaun ni uxiknankʼan va lhitʼajun aqmoqxnuʼ. 71 Va Judas yu ixtʼajun lhichivin. Yucha istsʼal ixjunita qayntaun joʼati yu junkan Simón Iscariote. Ni Judas va yucha yu kamaqxtaqyaʼ ni Jesús para kamaqnikal mas yucha va xaqayntaun ixtʼaltanaʼ yu ixjamalaniy.

7

1 Ex taval ni Jesús ixtiʼukxuyal la xalakatʼun Galilea. Jantu ixtaulputun Judea, ancha ixtatʼajun lakxkaunan niisraelitas para katamaqnil. 2 Pero ni anchanu julchan va laycha kalakachil ixkʼatankʼan ni israelitas tejkan ixtamakay ixmoqltakʼan ixlhimaqspaʼ ixchaqakʼan. 3 Yu ixtʼalaqaunin va tajunil: —Apalay ox kaval kʼapiti Judea. Ex ancha katalaqtsʼil mintʼaltanan ni lajʼay axtoqnuʼ yu makʼay. 4 Qayntaun lapanaki tejkan najun kamispakal ex yucha jantu makay axtoqnuʼ laqatamaqsaq. Ex uxintʼi incha makʼay lajʼay axtoqnuʼ ex apalay ox kʼamakʼatʼi taʼan lay katalaqtsʼin tachun ni lapanakni. 5 Ixtʼalaqaunin ni Jesús yu chuncha tanaul, yuʼuncha vachuʼ jantu ixtalhakapuʼan. 6 Xlhiyucha ni Jesús jalakjunil: —Kitʼin jantukaʼ lakachin julchan para kakmakal yu maqskʼiniy pero yu uxiknan mas va tisuncha hora kaval lay makʼayatʼik yu makʼapʼutʼunatʼik. 7 Aniy lakamunukpaʼ ni lapanakni jantu lay taxkayyan ni uxiknan pero yu kitʼin ayaj kintalhixkajiy va por klakjuniy ni yuʼuncha tamaqtaqalhinin. 8 Uxiknankʼan kapʼintʼik laka kʼatan pero kitʼin jantukaʼ. Jantukaʼ lakachin julchan yu kimpaxtoqniy. 9 Tejkan chuncha jalakjunil ex yucha tamakaul laka estado Galilea. 10 Astan tejkan taʼalcha ixtʼalaqaunin ni Jesús laka kʼatan ex ni yucha vachuʼ al. Jantu ixtakʼatsay ni lapanakni, valiʼiy ixtamaqsaqʼanta. 11 Ni israelitas yuʼuncha ayaj ixtatʼajun lakxkaunan ni laka kʼatan. Ixtalalhisakmiy: —¿Toʼoxtaycha katijuntayal ni anuʼ lapanaki? 12 Ni lapanakni va si ixtalhilakchiviniy ni yucha. Va saq ixtalajuniy: “Ni yucha va qayntaun yu ox lapanaki junita.” Yu alati ixtanajun: “Ni yucha va qayntaun yu tʼajun jalakmakanun lhuu lapanakni.” 13 Ni lapanakni va si ixtatamaqsaqchiviniy, ixtatalhauniy ixjalhachimoʼonunkʼan ni israelitas. 14 Tejkan ixpakltauncha ixʼanta ni kʼatan ex ni Jesús tanuchal ni ay lakatajtan. Aqtayl jalakmalaniy ni lapanakni. 15 Ni israelitas tus taun talhilal, va ixtalajuniy siya yuʼuncha: —¿Tas junitacha ni aniy lapanaki? Yucha ayaj lhuu jatalaniti lhitʼajun mas jantu katamoʼol. 16 Chuncha ni Jesús jalajqaltayl, va jalakjunil: —Tachun yu kitʼin kmasuy jantu vamun kinchivinti kaval. Va yu masuy ni kimPay yu kimalaqachal. 17 Taʼayu yu makaputun yu Dios lhinajun ex yucha kakʼatsayaʼ ni chivinti yu kmasuy incha va kun Dios mintachal u incha va por kitʼin kilaqʼaman. 18 Qayntaun lapanaki yu ixlaqʼaman chiviniy va najun katatoʼoyal ni lapanakni. Pero kitʼin va knajun katoʼoyakal ni Dios yu kimalaqachal. Klhichiviniy yu laqsaval, jantu kaklhitsukul talaqalhin. 19 ’Ni Moisés taxtaqnin ni uxiknan yu ixlhachimoʼon Dios pero jantu makʼayatʼik yu lhinajun ni anchanu lhachimoʼon. ¿Ex valiʼiycha kilamaqniputunau? 20 Ex taqaltayl ni lapanakni, va tajunil: —¿Tasʼayucha maqniputunan? Ka va lay lhitʼaʼun aqmoqxnuʼ. 21 Ex ni Jesús va jajunil: —Va aqtauncha kmakal yu ay lhitapatsa la xajulchan jastaknati, va xlhiyucha uxiknankʼan tus tumpaj lhilatʼik. 22 Laqsaval ni Moisés talhijunin kʼaxvililichʼukʼupʼuxnikʼantʼik pero jantu kaminchal kun Moisés. Yu laqsaval minchal va kun yu apalay maqancha kepayankʼan ixtatʼajun. Pero uxiknan mas xajulchan jastaknati vachuʼ xvililichʼukʼupʼuxniyatʼik mintsʼalankʼan. 23 Ayaj makʼapʼutʼunatʼik tacha yu lhinajun Moisés xlhiyucha mas xajulchan jastaknati xvililichʼukʼupʼuxniyatʼik qayntaun jasʼatʼa. ¿Ex valiʼiycha kilalukujlaniyau por kʼuchʼul qayntaun lapanaki tejkan xajulchan jastaknati? 24 Jantu kʼamukʼanitʼik laqtaqal matichun lapanaki vamun por yu laqtsʼinatʼik. Incha kʼamukʼanitʼik laqtaqal kaval yu laqsaval. 25 Lati lapanakni yu ixtavilanal Jerusalén taʼaqtayl talalhisakmiy, va tanaul: —¿Jantu kaval yu aniy lapanaki yu tatʼajun lakxkaunan para katamaqnil? 26 Chavay mas tʼajun chivin la ixlakaʼukxpukʼan ni lapanakni, yu lhachimoʼonun jantu tuʼuchun tajuniy. ¿Ex vachu talhakapuʼan ni yucha va Cristo yu Dios lakʼulata? 27 Ni kijnan ox kʼatsayau taʼan laqsaval minchal ni yucha. Pero yu Cristo tejkan kaminaʼ jantu matichun kamispayaʼ toʼoxtaycha kaminanta, ex ka jantu yucha. 28 Tejkan qasmaklhi ni Jesús tacha ixtatʼajun juninin, ex aqtayl jalaqxaqalay pʼaysni ancha ixpulakna laka ay lakatajtan, va jalakjunil: —Uxiknan ox kilamispayau, ox kʼatsʼayatʼik toʼoxtaycha kminchal. Pero jantu kilaqʼaman kakmil. Va kimPay kimalaqachal. Yucha najun yu laqsaval pero yu uxiknan jantu mispʼayatʼik. 29 Ni kitʼin ox kmispay. Kmintachal kun yucha, va yucha yu kimalaqachal kakmil aniy. 30 Ex astan lati ixtalaqxaqamaputun pero jantu matichun kachʼapal. Jantukaʼ ixlakachin julchan yu Dios laksaklhi para katalhimaqchapul. 31 Qaynlhuu lapanakni talhakapuʼal. Vachuʼ ixtanajun: —¿Tas kunacha tejkan kaminaʼ ni Cristo? ¿Kamakayaʼ ni yucha apalay lajʼay axtoqnu xajantu yu aniy lapanaki? 32 Ni fariseos takʼatsal ni lapanakni va chuncha ixtalhilakchiviniy ni Jesús. Chuncha ni yuʼuncha ali yu xaʼukxtinin kuras talhijunil yu xapolicias ni ay lakatajtan para kataʼal laqxaqamanan. 33 Ex ni Jesús naul: —Kitʼin jantucha paqlhuu kaktaulaʼ kun uxiknan. Niman kaklaqʼanchoqoyaʼ yu kimalaqachal. 34 Astan uxiknan kilalakxkauyau pero jantu lay kilatemayau. Jantu lay kapʼinapitik taʼan kitʼin kaktaulanta. 35 Chuncha ni israelitas aqtayl talalhisakmiy, va tanaul: —¿Tas ancha kaʼanacha ni yucha ni jantu lay katemayau? ¿Kalaqʼanaʼ taʼan tavilanal yu jantu israelitas kataval y kalakmalaniyaʼ? 36 Kintajunan “Kilalakxkauyau pero jantu kilatemayau.” Vachu najun “Jantu lay kapʼinapitik taʼan kitʼin kaktaulanta.” ¿Tis va suncha naunputun? 37 Tejkan va paqtauncha para kalal ni kʼatan, tayal ni Jesús, va pʼays chivinil, va naul: —Incha matichun oqputun xkan, kilaqmilcha ni kitʼin ex kaʼoqlhicha. 38 Yu kilhakapuʼan yucha kunaʼ tacha najun la ixchivinti Dios: “La xalhanuti kaxajtachal xkan yu xtaʼa jatsukunti.” 39 Tejkan chuncha naul ni Jesús va ixlhichiviniy ni Espíritu Santo yu katalaqaʼiyaʼ ni lapanakni yu katalhakapuʼanaʼ ni yucha. Pero ni Jesucristo jantukaʼ ay ixmakakan xlhiyucha ni Espíritu Santo jantukaʼ ixmin. 40 Ixʼalin lati lapanakni tejkan chuncha taqasmaklhi, va ixtajuniy: —Laqsaval, yucha va yu xalaqputeʼeniʼ ixchivinti Dios. 41 Y yu alati ixtajuniy: —Yucha ni Cristo yu lakʼulata Dios. Pero lati ixtanajun: —Jantu yuʼ kaval ni Cristo. Ni Cristo jantu kamintachal Galilea. 42 La ixchivinti Dios najun ni Cristo yu kaminaʼ va ixpapanti David kunaʼ. Najun kaminaʼ tsukunuʼ laka putaulan Belén taʼan la ixputaulan ixjunita ni David yu maqancha ixlhachimoʼonun. 43 Chuncha ni lapanakni tatapulvaqlhi va por Jesús. 44 Lati ixtalhiʼuxaʼan laka pachʼin pero jantu matichun kachʼapal. 45 Ex yu xapolicias laka ay lakatajtan taminchoqolcha taʼan ixtayanal ni fariseos ali ni xaʼukxtinin kuras. Va talhisakmil: —¿Valiʼiycha jantu kʼalhitʼantʼik? 46 Chuncha ni policias taqaltayanal, va tanaul: —Jantu aqtaun matichun lapanaki chiviniy tacha yu aniy lapanaki. 47 Ex ni fariseos tanaul: —¿Ex yu uxiknankʼan vachucha tamakanutan ni yucha? 48 Jantu matichun jalhachimoʼonuʼ lhakapuʼan. Vachuʼ ni kijnan yu fariseos kuntau jantu klhakapuʼanau. 49 Vamun talhakapuʼan ni valiʼiy lapanakni yu jantu tamispay ixlhachimoʼon ni Moisés. Yuʼuncha kalakmukʼanikanaʼ maqanlqajnati. 50 Ex ni Nicodemo yu aqtauncha laqkilal ni Jesús lakaputsʼisni va jalakjunil: 51 —La kilhachimoʼonkʼan najun ni jantu lay valiʼiy kʼamukʼanin laqtaqal qayntaun lapanaki. Pʼunaj maqskʼiniy kaʼasmaktʼi yu najun ex kʼalaqtsʼintʼanuyeʼe incha makal laqtaqal. 52 Ex tanaul ni ixtʼafariseos: —¿Ex yu uxintʼi vachu va machaqaʼ Galilea kʼatʼi? Kʼalanin ixchivinti Dios ex ancha kʼalaqtsʼineʼe ni jantu matichun yu xalaqputeʼeniʼ ixchivinti Dios kaminchal Galilea. [ 53 Ex astan tataxtul lakapulakchivin, va taʼanchoqol por qayntamin la ixchaqakʼan.

8

1 Ex astan ni Jesús alcha lakataun aspajun yu junkan Xaʼaspajun Olivos. 2 Tejkan ixtunkuminta ni Jesús al laka ay lakatajtan, ancha tachun ni lapanakni talaqʼanʼol. Taulalcha la ixpulakna ni laka ay lakatajtan ex aqtaylcha jalakmalaniy. 3 Ex yu fariseos ali ni lapanakni yu ixtamasuy ixlhachimoʼonkʼan ni israelitas, yuʼuncha talhiminil qayntaun xanati yu tatemal makanaʼ laqtaqal, tʼatamal qayntaun yu jantu ixapay kaval. Tamaqayaul ixtanʼajna taʼan ixtayanal ni lapanakni. 4 Ex tajunil ni Jesús: —Jamalaniniʼ, ni aniy xanati yucha temakal makanaʼ laqtaqal kun yu jantu ixapay kaval. 5 La ixlhachimoʼon ni Moisés ancha lhinajun kalaklakatʼalmakal xanatin yu chuncha talay. Yu uxintʼi, ¿tas naʼuncha? 6 Chuncha tamakal va para lay katatislajmal ni Jesús. Pero yucha taqayntal, aqtayl jatsʼoqnun lakatʼun kun ixmakaʼ. 7 Vananaj ixtataylhaanita lhisakminin, ex tayal ni Jesús jalakjunil: —Xaqayntaun uxiknan yu jantu kalhitsukul talaqalhin yucha pʼunaj katanqalhunil chiyux y katʼalal. 8 Ex aqtaun taqayntachoqol ni Jesús, taylhaʼal jatsʼoqnuʼ lakatʼun la ixmakaʼ. 9 Tejkan chuncha taqasmaklhi tacha jalakjunil ni Jesús ex taʼaqtaylcha taʼan por qayntamin. Yu tapʼulʼal va yu xapaynincha ixtajunita tus taʼanʼolcha. Ex ni Jesús laqtsʼil ni va xʼamancha tamakaul ni xanati. 10 Chuncha tayal, va junil ni xanati: —¿Tas ancha tayanal ni lapanakni? ¿Jantucha matichun kamukʼanin laqtaqal? 11 Ex naul ni xanati: —Jantucha matichun. Ex naul ni Jesús: —Kitʼin vachu jantu kakmukʼaniyan laqtaqal. Kʼapiticha. Jantucha kʼamaqtʼaʼalhin.] 12 Astan ni Jesús aaqtaun jalaqxaqalachoqol ni lapanakni, va jalakjunil: —Kitʼin va ixmaklkukʼan ni lapanakni kunita. Ex yu kintʼaminaʼ kalhitsukuyaʼ ni maklku yu kaxtaqniyaʼ jatsukunti. Ex jantucha aqtaun katijuntayayaʼ laka putsʼisni. 13 Ex tajunil ni fariseos: —Va milaqʼaman tʼaunkʼan lhichivinka. Jantu laqsaval kaval yu naʼun. 14 Ni Jesús jaqaltaychoqol, jalakjunil: —Mas va kilaqʼaman klhichivinkan, pero yucha laqsaval yu knajun. Kitʼin ox ijkʼatsay toʼoxtaycha kmintachal, vachuʼ toʼoxtaycha kajkʼanchoqoyaʼ. Yu uxiknan jantu kʼatsʼayatʼik. 15 Uxiknan mukʼayatʼik laqtaqal tacha tamukʼay yu valiʼiy lapanakni. Ni kitʼin jantu matichun kmukʼaniy laqtaqal. 16 Incha kitʼin kakmukʼal laqtaqal yucha kaval yu laqsaval, jantu kilaqʼaman kakmukʼal. Ni kimPay yu kimalaqachal, yucha va chʼantaun kun kitʼin. 17 La milhachimoʼonkʼan ancha najun incha qayntʼuy talhitaulay tuʼuchun, y va taun tanajun, ex chun lay kʼalhakʼapʼupʼi. 18 Chuncha kitʼin va klhitaulay yu knajun y vachuʼ alin aqayntaun yu lhitaulay kun kitʼin. Yucha va kimPay yu kimalaqachal. 19 Ex tajunil: —¿Tas ancha vil ni mimpay? Ex ni Jesús jaqaltayanal, jalakjunil: —Uxiknan jantu kilamispayau ni kitʼin, vachu jantu mispʼayatʼik yu kimPay. Incha kilamispau ni kitʼin ex vachu kʼamispʼatʼik ni kimPay. 20 Ni Jesús tejkan chuncha naul va ixtʼajun masun laka ay lakatajtan taʼan maqxtaqkan ofrenda. Jantu matichun kalhaʼal laka pachʼin, jantukaʼ ixlakachin ixjulchan tejkan Dios kanaunaʼ. 21 Ni Jesús jajunchoqol: —Kitʼin kajkʼanacha. Yu uxiknan kilalakxkauyau pero kʼaniyapitik la mintalaqalhinkʼan. Taʼan kitʼin kajkʼanaʼ uxiknankʼan jantu lay kapʼinapitik. 22 Ex ni israelitas talajunil siya yuʼuncha: —¿Ex va maqniputunkan ixlaqʼaman? Ka va lay xlhiyucha najun: “Taʼan kitʼin kajkʼanaʼ uxiknankʼan jantu lay kapʼinapitik”. 23 Ex ni Jesús jalakjunchoqol: —Uxiknan untʼatʼik xalapanakni yu aniy lakamunukpaʼ, pero kitʼin kminchal laktʼiyan. Uxiknan va aniy lakamunukpaʼ aqtʼaynitʼik tsukunun, pero kitʼin jantu aniy kajkʼaqtaynil. 24 Xlhiyucha klajuniu ni uxiknan kʼaniyapitik la mintalaqalhinkʼan. Incha jantu kilalhakapuʼaniyau tejkan klajunau taʼayucha kunita ex kʼaniyapitik la mintalaqalhinkʼan. 25 Ex tajunil ni Jesús: —¿Tasʼayucha kʼatʼi ni uxintʼi? Ex ni Jesús jalakjunil: —Kitʼin kunita vachu chun tacha klajunau. 26 Ni kitʼin ayaj lhuu chivinti lay kaklalhichiviniu ni uxiknan vachu pulhuu milaqtaqalkʼan lay klamukʼaniyau. Yu kimalaqachal yucha jantu aqtaun jalaklkanan y yu kijunil va yucha klajunchoqoyau. Xlhiyucha yu klajunau kitʼin, yucha jantu jalaklkanti kaval. 27 Ni lapanakni jantu katamalaqasil ni va ixPay Dios ixtʼajun lhichivin ni Jesús. 28 Ex naul ni Jesús: —Tejkan kilamukʼayau talman ni kitʼin yu kval Sasʼatʼa Lapanaki, exnicha kilamispayau taʼayucha kunita. Ni kitʼin jantu aqtaun kmakay tuʼuchun kilaqʼaman. Vamun knajun ni chivinti yu kimPay Dios kimasunil. 29 Ni kimPay yu kimalaqachal yucha alinta kun kitʼin. Kitʼin si kmakay yu lakanajun ni yucha, xlhiyucha jantu aqtaun kimakajun keʼeman. 30 Tejkan ni Jesús chuncha naunʼol ex ayaj qaynlhuu talhakapuʼal ni yucha. 31 Ni Jesús jalakjunil ni israelitas yu talhakapuʼal: —Incha uxiknan ox katʼaylhipʼiniyapitik chuncha tacha chavay xaʼasmatʼatʼik kinchivinti, ex laqsaval kilapanakni kaʼunapitik, kʼalaniyapitik yu klamasuniyau. 32 Chuncha kʼamispʼayapitik ni chivinti yu laqsaval, ex yucha oxamaktaun katamakayan. 33 Chuncha taqaltayl ni yuʼuncha, tajunil: —Kijnan va lapanakni kuntau yu kminchaʼau kun Abraham. Oxamaktaun kuntau, jantu aqtaun kaʼalil kiʼukxtinkʼan. ¿Valiʼiycha naʼun ni oxamaktaun kajkunau? 34 Ex ni Jesús jaqaltaychoqol, va jalakjunil: —Vas klajunau ni lapanakni yu tamaqtaqalhinin, yuʼuncha ixʼukxtinkʼan va yu talaqalhin. 35 Qayntaun oqxtamati yu ixnavin ixʼukxtin yucha jantu lay tsukuʼalhiy la ixchaqaʼ ixʼukxtin tacha ixlapanaki kaval. Pero yu sasʼatʼan ni ukxtin yuʼuncha chun lay ancha tataulʼalhiy mas va tavanancha kaval. 36 Chavay incha yu istsʼal miʼukxtinkʼan oxamaktaun katamakan ex laqsaval oxamaktaun kaʼunapitik. 37 Kitʼin ox ijkʼatsay ni va kun Abraham tʼanchʼipitik pero jantu laʼaʼiyatʼik kinchivinti, xlhiyucha kilamaqniputunau. 38 Tachun yu kchiviniy va si yu kimasunil kimPay. Yu uxiknan makʼayatʼik va yu tamasunin mimpaykʼan. 39 Ex tanaul ni israelitas: —Kijnan va Abraham yu maqancha kimpaykʼan junita. Ex ni Jesús jalakjunil: —Incha laqsaval ni Abraham maqancha mimpaykʼan ixval, ex kʼatʼiʼukxuntʼayatʼik tacha ixtiʼukxuntayay ni yucha. 40 Pero uxiknan mas klajuntaucha ni va Dios yu laqsaval kimasunil, aqtsʼiyaj kilamaqniputunau. Ni Abraham jantu aqtaun chun kamakal. 41 Uxiknan vananaj chun makʼayatʼik tacha yu makay mimpaykʼan. Ex tanaul ni yuʼuncha: —Kijnan jantu aqchunan kajkuu, va qayntaun yu kimPaykʼan yucha va Dios. 42 Ex ni Jesús jalakjunil: —Incha laqsaval ni Dios mimPaykʼan kaval ex kilaʼachaniu ni kitʼin, ni kitʼin va kun Dios kmintachal. Chavaycha aniy kvil pero jantu kakmil kilaqʼaman, va Dios kimalaqachal. 43 ¿Valiʼiycha jantu malaʼasiyatʼik yu klajunau? Va jantu tamaqamayan kaʼasmaktʼik, va xlhiyucha. 44 Yu mimpaykʼan va aqmoqxnuʼ junita, va makʼayatʼik yu yucha maqamay. Yucha junita jamaqniniʼ tus tejkan puʼaqtaynichal lakamunukpaʼ. Yucha vamun lhipaʼiniy yu jalaklkanti, jantu lay najun yu laqsaval. Tejkan jalaklkanan yucha va ixkilchuncha. Yucha va jalaklkanaʼ junita y va yucha xajapay tachun yu jalaklkanti. 45 Kitʼin klhichiviniy yu laqsaval, xlhiyucha uxiknan jantu kilalhakapuʼaniyau. 46 Ni uxiknan jantu matichun lay kalhitaulal ni kitʼin klhitʼajun talaqalhin. Chavay incha kitʼin klhichiviniy yu laqsaval, ¿ex valiʼiycha jantu kilalhakapuʼaniyau yu knajun? 47 Yu laqsaval ixnavin Dios yucha qasmatʼa ixchivinti Dios. Uxiknan jantu ixnavin Dios kaʼuntʼik, xlhiyucha jantu asmakpʼutʼunatʼik ixchivinti Dios. 48 Ex chuncha tajunil ni israelitas: —Kijnan klajuniu ni uxintʼi va qayntaun machaqa kʼatʼi Samaria. Klajuniu ni uxintʼi va laqtanuyan laqataun aqmoqxnuʼ y va laqsaval. 49 Ex naul ni Jesús: —Kitʼin jantu kaklhitsukul aqmoqxnuʼ. Kitʼin yu kmakay va ktoʼoyay ni kimPay, pero uxiknan jantu kilatoʼoyayau ni kitʼin. 50 Jantu klalhijunau kilatoʼoyau ni kitʼin pero alin qayntaun yu lhinajun kaktoʼoyakal. Yucha va Dios yu lay mukʼay laqtaqal. 51 Kitʼin vas klajunau. Matichun lapanaki yu makay kuenta kinchivinti yucha jantu aqtaun kaniyaʼ. 52 Ex tajunil ni israelitas: —Chavay ox ijkʼatsayau ni uxintʼi laqsaval lhitʼaʼun aqmoqxnuʼ. Ni Abraham ali yu ixtalaqputeʼey ixchivinti Dios maqancha yuʼuncha si tanil. Ex uxintʼi, ¿valiʼiycha naʼuncha ni yu kamakayaʼ kuenta minchivinti yucha jantu aqtaun kaniyaʼ? 53 ¿Apalaycha ay kʼatʼi ni uxintʼi xajantu yu kimpaykʼan Abraham yu maqancha nil? Vachu yu maqancha ixtalaqputeʼey ixchivinti Dios tanitacha. ¿Tasʼayucha lhilakʼan ni uxintʼi? 54 Ni Jesús jaqaltaychoqol, jalakjunil: —Yu va kitʼin kilaqʼaman kaktoʼoyakal ex jantu tuʼuchun xtapal kaval kintoʼoyaka. Pero yu kintoʼoyay kitʼin va kimPay. Yucha naunatʼik va miDioskʼan junita. 55 Yucha jantu mispʼayatʼik pero kitʼin ox kmispay. Incha kitʼin kaklajuniu jantu kmispay ex kakval tacha qayntaun jalaklkanaj lapanaki vachu va chun tacha uxiknan. Pero kitʼin laqsaval kmispay y kmakay kuenta ixchivinti. 56 Ni mimpaykʼan Abraham yu maqancha ixtʼajun ayaj lhiʼachantajul tejkan kʼatsal ni kalaqtsʼinaʼ ni julchan tejkan kitʼin kakminaʼ. Tejkan chuncha laqtsʼil ayaj lhiʼachantajul. 57 Ex tajunil ni israelitas: —Jantukaʼ malaqchʼipʼiniy cincuenta mijachʼitin. ¿Valiʼiycha naʼuncha uxintʼi mispʼay ni Abraham? 58 Ex ni Jesús jalakjunchoqol: —Kitʼin ktʼajun mas va tavanancha, mas tejkan jantukaʼ istsukuy ni Abraham. 59 Ex nimancha tasaklhi chiyux para katalakatʼalmal ni Jesús. Pero ni yucha niman tsʼalaj tamaqsaqlhi. Astan chʼapal ixlakatin, taxtulcha ni laka ay lakatajtan, va alcha.

9

1 Chuncha taʼan ixtʼajun tapasanaʼ ni Jesús ancha laqtsʼil qayntaun laʼachʼix yu chuncha tsukul. 2 Ex ixtʼaltanan yu ixjalakmalaniy talhisakmil, tajunil: —Jamalaniniʼ, ¿valiʼiycha tsukulcha laʼachʼix ni aniy lapanaki? ¿Va por ixtalaqalhin ixpay ali ixnati o va por ixtalaqalhin ni yucha? 3 Chuncha ni Jesús jalakjunil: —Jantu por ixtalaqalhinkʼan ixpay ali ixnati kaval, nisin por ixtalaqalhin ni yucha. Va para lay kamasukal ixlhitapatsa ni Dios. 4 Tejkan vananaj tunkujunta ex lay tapatsakan pero tejkan putsʼista jantucha lay. Vachu va chun chavaycha maqskʼiniy kamakau ixlhitapatsa yu kimalaqachal. Astan kaminaʼ ni japutsʼisniʼ tejkan jantucha matichun lay katapatsayaʼ. 5 Chavaycha vananaj ktijuyal aniy lakamunukpaʼ ex chuncha kalakmapulkulnita xalapanakni lakamunukpaʼ. 6 Tejkan chuncha naunʼol ni Jesús, ex aqchujʼul lakatʼun. Aqtayl makay pulʼan kun ixchujʼuti ex lhilakpuxapal ni laʼachʼix. 7 Ex junil ni laʼachʼix: —Chavay kapʼinchʼiycha oqxpuchaʼaʼ lakxkan yu junkan Siloé (yucha naunputun yu malaqachakanta). Ex ni laʼachʼix alcha oqxpuchaʼaʼ. Tejkan minchoqolcha va oxicha ixjalakavanan. 8 Chuncha ni ixtʼamachaqan ali tachun yu ixtalaqtsʼin taʼan ixtaulay ixpuskʼin limosna, yuʼuncha si ixtalalhisakmiy siya yuʼuncha: —¿Ni aniy lapanaki jantu yuʼ yu ixtaulay ixpuskʼin limosna? 9 Lati ixtanajun: —Va yucha junita. Pero lati ixtanajun: —Tasuy tacha yucha pero jantu yuʼ kaval. Pero ni laʼachʼix yucha ixnajun: —Chun, va kitʼin kunita. 10 Ex talhisakmil va tajunil: —¿Ex tas laycha pʼalakʼavanan? 11 Ex ni laʼachʼix jaqaltayanal, va jalakjunil: —Qayntaun lapanaki yu junkan Jesús makal pulʼan y kilhilakpuxapal la kilaqchul, ex astan kijunil: “Kʼapʼinchʼiy laqapuʼan la xalakxkan Siloé, ancha kʼaʼoqxpʼuchʼaʼayeʼe.” Ex kitʼin niman kʼal. Tejkan kʼoqxpuchaʼal ex klakavanalcha. 12 Chuncha aqtaun talhisakmichoqol, va tajunil: —¿Toʼoxtaycha yal ni anchanu lapanaki? Ex yucha naul: —Jantu ijkʼatsay toʼoxtaycha yal. 13 Ex astan ni lapanaki yu laʼachʼix ixjunita, talhaʼal taʼan ixtayanal ni fariseos. 14 Ni anchanu julchan tejkan ni Jesús laʼoxinil kun pulʼan ixlaqchul ni laʼachʼix va xajulchan jastaknati ixjunita. 15 Ex ni fariseos talhisakmichoqol tas palakavanalcha. Ex jalakjunil ni laʼachʼix: —Ni lapanaki yu kimalakavanil yucha kimukʼanil pulʼan la kilaqchul, ex kimalaqachal oqxpuchaʼaʼ, ex kʼaqtayl klakavanan. 16 Lati ni fariseos tanaul: —Yu malakavanil ni aniy lapanaki yucha jantu kaminchal kun Dios, jantu toʼoyay xajulchan jastaknati. Chuncha yu alati vachu tanaul: —Pero incha va maqtaqalhini lapanaki junita, ¿ex tas laycha kapumakal lajʼay axtoqnuʼ? Chuncha alil laʼatʼuy jatapastakʼati siya yuʼuncha. 17 Ex aqtaun talhisakmil ni lapanaki yu laʼachʼix ixjunita, va tajunil: —Chavay ni lapanaki yu malakavanin, ¿tas lhilaycha ni uxintʼi? Ex jaqaltayanal yu laʼachʼix ixjunita, va naul: —Kitʼin knajun ni yucha va qayntaun yu laqputeʼey ixchivinti Dios. 18 Ni anchanu israelitas jantu ixtalhakapuʼan ni yucha yu laʼachʼix ixjunita y chavay laycha lakavanan. Xlhiyucha tajuntaʼinil ixpay ali ixnati. 19 Ixtalhisakmin ni yuʼuncha, va tajunil: —¿Yucha ni aniy ni mintsʼalkʼan? Naunatʼik ni va laʼachʼix tsukul. ¿Ex tas pulaycha lakavanan? 20 Yu ixpay ali ixnati tanaul: —Kijnan ox ijkʼatsayau ni va yucha ni kintsʼalkʼan y yucha va laʼachʼix tsukul. 21 Pero jantu kʼatsayau tas laycha palakavanal. Vachu jantu kʼatsayau taʼayucha laʼoxinil ixlaqchul. Lay kʼalhisakmitʼik ni yucha. Yucha jantucha sʼatʼa kaval. Yucha lay katajunan tas laycha palakavanal. 22 Yuʼuncha ixtatalhanan, xlhiyucha chuncha tanaul. Ni xalajʼaynin israelitas chʼantauncha ixtamakata ixjatapastakʼatkʼan. Ixtanajun incha matichun kalhakapuʼal ni Jesús va yu Cristo junita, yucha katatinaqxtul laqa chaqaʼ taʼan ixtataqxtoʼa ni lapanakni. 23 Xlhiyucha tanaul ni ixpay ali ixnati: Jantucha sʼatʼa kaval y lay kʼalhisakmitʼik ni yucha. 24 Ni israelitas aqtaun tajuntaʼichoqol ni lapanaki yu laʼachʼix ixjunita, va tajunil: —La ixlakaʼukxpuʼ ni Dios kilalhitaulniu yu laqsaval. Kijnan ox kmispayau ni anchanu lapanaki yu palay makan, yucha ayaj maqtaqalhini lapanaki junita. 25 Ex jaqaltayl ni lapanaki yu laʼachʼix ixjunita, va jalakjunil: —Kitʼin jantu ijkʼatsay incha va maqtaqalhini lapanaki junita. Vamun ijkʼatsay ni kitʼin va laʼachʼix xajkunita y chavay laycha klakavanan. 26 Chuncha aaqtaun talhisakmichoqol, va tajunil: —¿Tas makancha? ¿Tas pumalakavanincha? 27 Ex naul ni laʼachʼix: —Kitʼin klajuntaucha pero jantu kilalhakapuʼaniu kinchivinti. ¿Valiʼiycha naunatʼik aaqtaun klajunchoqoo? ¿Vachu va tʼaʼuxapʼinatʼik ni yucha? 28 Chuncha ox talaktuʼul, va tajunil: —Uxintʼi maqamayan katʼapiti ni anchanu lapanaki. Kijnan vamun Moisés kintamaqamayan kaktʼaʼau. 29 Ni Moisés yucha ijkʼatsayau ni laqsaval tʼachivinil Dios pero ni anchanu lapanaki yucha jantu kʼatsayau toʼoxtaycha minchal. 30 Chuncha ni laʼachʼix jaqaltayl, va jalakjunil: —Tus vak ijkʼatsan. Naunatʼik ni uxiknankʼan jantu kʼatsʼayatʼik toʼoxtaycha minchal, pero ni kitʼin kimalakavanil. 31 Laqsaval ox kʼatsayau ni Dios yucha jantu qalasmakputun yu maqtaqalhinin. Yucha jaqalasmatʼa vamun yu tatoʼoyay y tamakay yu lhinajun. 32 Jantu aqtaun kʼatsayau matichun yu lay kakʼuchʼul yu laʼachʼix katsukul. 33 Ex chuncha yu anu lapanaki incha jantu kaminchal kun Dios ex jantu lay tuʼuchun kamakal. 34 Ex tajunil ni laʼachʼix: —Uxintʼi tsʼukʼu kun lhuu talaqalhin, ex chavay ¿va uxintʼi kilamalaniputunau ni kijnan? Ex chuncha va nimancha tatinaqxtul ni laqa chaqaʼ taʼan ixtataqxtoʼa ni israelitas para jantucha katanuchoqol. 35 Ni Jesús niman kʼatsal ni lapanaki yu laʼachʼix ixjunita ixtatinaqxtutacha laqa chaqaʼ taʼan ixtataqxtoʼa ni israelitas. Ex tejkan paxtoqlhi va lhisakmil: —¿Uxintʼi lhakʼapʼupʼin yu val Sasʼatʼa Lapanaki? 36 Ex qaltayl, va junil: —Jalhachimoʼonuʼ, kʼiʼun tasʼayucha junita para lay kaklhakapuʼal. 37 Ex junil ni Jesús: —Uxintʼi mispʼaycha y laqtsʼintʼacha. Va kitʼin kunita yu chavaycha ktʼaʼun tʼachivin uxintʼi. 38 Ex ni laʼachʼix va taʼaqtsoqoqtalcha taʼan ixyal ni Jesús, va junil: —Ox klhakapuʼanan ni uxintʼi, Jalhachimoʼonu kʼatʼi. 39 Ex naul ni Jesús: —Kitʼin kchil ni aniy lakamunukpaʼ va para lay kamukʼanikal ixlaqtaqalkʼan yu tapaxtoqniy. Chuncha kmil para kaklaqlaʼoxinil ixlaqchulkʼan yu laʼachʼixin. Vachu yu ox talakavanan para kataʼakxajchal tacha laʼachʼixin por jantu kintalhakapuʼan. 40 Lati ni fariseos yu ancha ixtayanal tejkan taqasmaklhi tacha naul ni Jesús ex talhisakmil, tajunil: —¿Ex kijnan vachuʼ va laʼachʼixin kuntau? 41 Chuncha jaqaltayl ni Jesús, jalakjunil: —Incha laʼachʼixin kaʼuntʼik, ex jantu tuʼuchun laqtaqal kʼamukʼanikʼantʼik. Pero naunatʼik ox jalakʼavananatʼik. Xlhiyucha mukʼanikʼanatʼik milaqtaqalkʼan.

10

1 Chuncha ni Jesús jalakjunil: —Laqsaval klajunau incha matichun lapanaki tanuy ixpulakna laka korral pero incha jantu putanuy taʼan yal xapuerta ex ni yucha va alhavanaʼ junita, laqatapʼasta maxtuy yu jantu ixnavin. 2 Yu putanuy taʼan yal xapuerta ex ni yucha va yu xalhistaknaʼ borregos. 3 Ancha qayntaun malaqltiʼaniy xapuerta para katanul. Ex laktʼasaniy la ixtaqaʼutkʼan laqatamin ni borregos. Yuʼuncha niman taqasmatʼa ixchivinti para kalakmaxtul laka korral. 4 Tejkan lakmaxtuʼojoy tachun yu ixnavin ex japʼulaycha ni yucha. Tachun tatʼaʼan, va taqalmispay ixchivinti. 5 Pero tejkan jalaktʼasaniy aqayntaun yu jantu tamispay, ex jantu taqalasmatʼa, jantu tatʼaʼan. Jantu taqalmispay, xlhiyucha va niman talajqosmajʼan. 6 Ni Jesús chuncha jalakjunil ni fariseos pero yuʼuncha jantu katamalaqasil. 7 Ex aaqtaun ni Jesús jalakjunil: —Laqsaval klajunau, ni kitʼin va xapuerta kunita taʼan lay taputanuy ni borregos. 8 Tachun yu pʼunaj takilachil, yuʼuncha va alhavanan ixtajunita. Ixtaʼalhaumaxtuputun yu jantu ixnavinkʼan kaval, pero ni borregos jantu kataqalasmaklhi. 9 Ni kitʼin va xapuerta korral kunita. Taʼayuʼ yu kaputanuyaʼ taʼan yal xapuerta, yucha kalaqtaxtuyaʼ. Kajunaʼ tacha laqataun borrego yu lay tanuy y lay taxtuy ni laka korral, lay temay yu kaʼuputul. 10 ’Yu alhavanaʼ yucha min vamun para kaʼalhavanal, vachu para kamaqninil y para kalaktʼilhininʼol. Kitʼin kminta va para laqsaval lay katalhitsukul yu ox jatsukunti y para katalhaval yu achati la ixjatsukuntikʼan. 11 Ni kitʼin ox xalhistaknaʼ borregos kunita. Yu ox xalhistaknaʼ borregos, yucha maqxtaʼa ixjatsukunti para ox katatsukul. 12 Pero qayntaun oqxtamati yu mapalkan jantu ixnavin kaval ni borregos. Xlhiyucha tejkan min yu maqtaliʼ, ex yucha niman takyajuy. Ex yu maqtaliʼ jalakchʼapayachal ni borregos y valiʼiy tʼikl taputaukʼay. 13 Chuncha ni anchanu lapanaki jalakmakauntijlaycha. Yucha jantu makay kuenta ni borregos, vamun yu ixlhilhajati makay kuenta. 14 ’Kitʼin kunita yu laqsaval ox xalhistaknaʼ borregos. Ox klakmispay kiborregos, vachu yuʼuncha ox kintamispay. 15 Vachu chun tacha kimPay ox kimispay ni kitʼin, kitʼin vachu ox kmispay ni yucha. Kitʼin kmaqxtaʼa ketsukunti para ox katatsukul ni kiborregos. 16 Vachu klhitʼajun alati borregos yu jantu xanavin aniy laka korral kataval. Yuʼuncha vachu maqskʼiniy kaklaklhimil. Kintatoʼoyayaʼ, va oqxlaqtaun kaʼalinaʼ laka korral. Va qayntaun xalhistaknaʼ kunaʼ. 17 ’Kitʼin kmaqxtaʼa ketsukunti para kaknil ex astan kaklaqaʼichoqol ketsukunti. Xlhiyucha yu kimPay ayaj kiʼachaniy. 18 Jantu matichun lay kimaxtuniy ketsukunti. Va kitʼin kmaqxtaʼa kilaqʼaman. Kitʼin lay kmaqxtaʼa, vachuʼ lay kaklaqaʼichoqoyaʼ. Va chuncha kilhijunil kimPay. 19 Tejkan chuncha taqasmaklhi ni israelitas va nimancha tumpaj taval. 20 Lati tanaul: —Ni yucha ka va aqmoqxnuʼ lhitʼajun la ixjatsukunti, vachu va lokoj. ¿Valiʼiycha makʼayatʼikcha kuenta yu najun? 21 Pero yu alati tanaul: —Jantu chiviniy tacha kalhitsukul aqmoqxnuʼ. Laqataun aqmoqxnuʼ jantu lay kalakmalakavanil yu laʼachʼixin. 22 Ancha Jerusalén lhikʼasnin ixjunita tejkan yu ancha machaqan va ixtatʼajun makaninin xakʼatan yu ay lakatajtan. 23 Ni Jesús va ixtijuyal la ixlhimaqspaʼ laka ay lakatajtan taʼan ixjapuchʼanan Salomón. 24 Ex ancha tamalaqachoqoxnul ni israelitas va aqtayl talhisakmiy, va tajunil: —¿Tasvanancha kilalhitaulniyau yu laqsaval? Incha va uxintʼi ni Cristo yu lakʼulatan ni Dios chavaycha va aqtauncha kilajuniu. 25 Ex jaqaltayl ni Jesús, jalakjunil: —Kitʼin klajuniucha pero jantu kilalhakapuʼaniyau. Tachun lajʼay axtoqnuʼ yu kmakay la ixtapʼasta ni kimPay ancha ox tasuy para lay kilapumispau. 26 Uxiknan jantu kiborregos kʼaʼuntʼik xlhiyucha jantu lhakʼapʼupʼinatʼik. 27 Yu kiborregos yuʼuncha kintaqalmispay. Kitʼin vachuʼ klakmispay ni yuʼuncha, va kintatʼaʼan ni kitʼin. 28 Kitʼin klaqxtaqniy jatsukunti yu jantu aqtaun kamiʼoyaʼ. Yuʼuncha jantu aqtaun kataniyaʼ, vachu jantu aqtaun matichun kimaxtuniyaʼ la kimakaʼ. 29 Va kimPay yu kimaqxtaqnil, vamun yuʼ ay junita. Jantu matichun lay maxtuniy la ixmakaʼ. 30 Yu kimPay Dios ali kitʼin va taun kuntau. 31 Ex ni israelitas aaqtaun talakasakchoqol chiyux para katalakatʼalmal. 32 Pero ni Jesús jalakjunil: —Kun ixtapʼasta kimPay kitʼin klamasuniu lhuu axtoqnuʼ yu lajʼay lhitapatsa. ¿Ex tisuncha yu klamasuniu yu kilalhilakatʼalmaputunau? 33 Chuncha ni israelitas taqaltayl, va tajunil: —Kijnan jantu klalhilakatʼalmayau por yu lajʼox lhitapatsa yu makʼatʼi. Va klalhilakatʼalmayau por minchivinti. Chuncha tacha naʼun ayaj tʼapʼasaniy ni Dios. Uxintʼi valiʼiy lapanaki kʼatʼi pero makʼakʼan milaqʼaman tacha Dios kʼaʼuntʼi. 34 Ni Jesús jalakjunil: —La mimpalhachimoʼonkʼan ancha tsʼoqkanta yu najun inchine: “Kitʼin klajuniu ni uxiknan va dioses untʼatʼik.” 35 Yu tsʼoqmukʼakanta la ixchivinti Dios va si laqsaval. Ancha Dios jalakjunil dioses ni anchanu lapanakni yu jalaqmalaqachanil ixchivinti. 36 Dios kilaksaklhi para kimalaqachal kakmil aniy lakamunukpaʼ. ¿Ex valiʼiycha kilajunaucha ni kitʼin va ktʼajun tapasaniniʼ ni Dios vamun por yu klajunau ni kitʼin va Sasʼatʼa kunita? 37 Incha kitʼin jantu kmakay ixlhitapatsa kimPay ex jantu maqskʼiniy kilalhakapuʼaniu yu klajunau. 38 Pero kitʼin aqtsʼiyaj va kmakay ixlhitapatsa ni kimPay. Ex mas jantu kilalhakapuʼaniyau yu klajunau, maqskʼiniy kilalhakapuʼaniu tejkan laqtsʼinatʼik ni lhitapatsa yu kmakay. Chuncha lay ox kʼatsʼayatʼik ni kimPay va chʼantaun junita kun kitʼin y kitʼin vachuʼ chʼantaun kunita kun yucha. 39 Ex aaqtaun ixtalaqxaqamaputunchoqoy ni Jesús, pero tamaqanqoslhi. 40 Ex anchoqolcha aaqtaun tus taʼan takuktachal xalaʼaxkan Jordán taʼan Juan pʼunaj ixmaqchajʼavanan. Ex ancha taulchalcha. 41 Ancha qaynlhuvaj lapanakni ixtalaqminta ni Jesús, va tanaul: —Ni Juan yucha jantu kamasul yu lajʼay axtoqnuʼ, pero tachun yu naul tejkan lhichivinil ni Jesús va si laqsaval val. 42 Chuncha qaynlhuu lapanakni talhakapuʼal ni Jesús.

11

1 Ixʼalin qayntaun lapanaki yu ixtaqanʼay yu ixjunkan Lázaro. Va machaqaʼ Betania ixjunita taʼan ixputaulankʼan ixjatʼalapanakni yu junkan María ali Marta. 2 Ni anchanuʼ María vachu va yuʼ yu lhilakxapanil yu sʼejenʼe la ixchʼajaʼ ni Jalhachimoʼonuʼ Jesús ex malakxixinil kun ixʼaji. 3 Chuncha ixlaʼatʼuykʼan jatʼalapanakni tamalaqachanil chivinti ni Jesús. Tajunil: —Jalhachimoʼonuʼ, chavay ni miʼamigo taqanʼay. 4 Ni Jesús tejkan qasmaklhi va naul: —Yu aniy taqanʼati chʼapata jantu kaʼaqxajtachal ixlhinin. Va para kamasukal ixʼayaxtu ni Dios, vachu kiʼayaxtu ni kitʼin yu isTsʼal kunita. 5 Ni Jesús ayaj ixlakpaxkay ni Marta ali ixtʼalapanaki ali Lázaro. 6 Pero vananaj taqmaqal paqtʼuy ancha taʼan ixvil mas tajunilcha ni Lázaro taqanʼay. 7 Ex astan jalakjunil yu ixjalakmalaniy: —Chavay kaʼanchoqoocha aaqtaun ni Judea. 8 Ex yu ixjalakmalaniy tajunil: —Jamalaniniʼ, jantukaʼ paqlhuu jun yu machaqan Judea ixtalakatʼalmaputunan para katamaqnin. ¿Ex aaqtauncha uxapʼinchʼoʼoy? 9 Ex jalakjunil ni Jesús: —Taun julchan lhitʼajun laqakautʼuy hora. Yu tijuyal tunkuj yucha jantu aystukkan, va lakavanan taʼan alin xamaklku lakamunukpaʼ. 10 Pero yu tijuyal lakaputsʼisniʼ yucha aystukkan, va tsʼanqaniy maklku. 11 Ex astan naul: —Ni kiʼamigojkʼan Lázaro chavaycha ltatay pero kteʼen maqloʼonuʼ. 12 Yu ixjalakmalaniy tajunil: —Jalhachimoʼonuʼ, incha valiʼiy ltatay, ex chun palay kajunchoqoyaʼ. 13 Tejkan naul ni va ltatay yucha naunputun ni Lázaro ixnitacha. Ixtʼaltanan yu ixjalakmalaniy, yuʼuncha talhilal valiʼiy ltatati ixlhichiviniy. 14 Ex ni Jesús va aaqtauncha vas jalakjunil para katamalaqasil: —Ni Lázaro yucha nitacha. 15 Chavaycha kitʼin ayaj klhiʼachantajuy ni jantu an xakvilchal. Apalay ox kaxajtachal para uxiknan para apalay kilalhakapuʼanau. Kaʼau laqtsʼinin. 16 Ex ni Tomás yu ixtalhimapaqaʼuy Jachiyan va jalakjunil ni alati ixtʼaltanan Jesús: —Katʼaʼaucha ni Jesús para kanichaʼau chʼantaun kun yucha. 17 Tejkan chaʼalcha ni Jesús ex kʼatsal ni va paqtʼaticha ixʼaknuy ni Lázaro. 18 Ancha laka putaulan Betania, va ukstsʼuniy laka putaulan Jerusalén, jantu kalaqchaʼal laʼatʼutu kilometro. 19 Lhuvaj israelitas ixtalaqminta ni Marta ali María. Ixtamalakaʼulaputun para jantu katamaqaninil por nil ni Lázaro yu ixtʼalapanakkʼan. 20 Tejkan Marta kʼatsal ni valaycha kachaʼal ni Jesús, ex niman takyauʼal laqaʼiniʼ. Yu María vananaj tamakaul ixpulakna la ixchaqaʼ. 21 Ni Marta junil ni Jesús: —Jalhachimoʼonuʼ, incha aniy ixtʼaʼul ex ni kintʼalapanakkʼan ka jantu ixnil. 22 Pero kitʼin ijkʼatsay ni uxintʼi, tachun yu chavaycha kʼaskʼiniyeʼe ni Dios, yucha kamaqxtaqniyan. 23 Ex ni Jesús qaltayl va junil: —Yu mimpʼisaqa yucha kakujchoqoyaʼ laka janinin. 24 Ex qaltaychoqol ni Marta, va naul: —Chun, kitʼin ijkʼatsay ni kakujchoqoyaʼ ni kimpʼisaqa, astan tejkan katakujchoqoyaʼ ni janinin, tejkan katamaktayacha ni lakamunukpaʼ. 25 Ex ni Jesús junil: —Va kitʼin klaqmaqloʼoy ni janinin, vachu kxtaʼa ni jatsukunti. Ex taʼayuʼ yu kilhakapuʼal ni kitʼin mas kanil katsukuchoqoyaʼ aaqtaun. 26 Tachun yu alin ixjatsukuntikʼan, incha kintalhakapuʼan, ex yuʼuncha jantu aqtaun kataniyaʼ. ¿Lhakʼapʼupʼin yu aniy? 27 Ex ni Marta junil: —Chun, Jalhachimoʼonuʼ, kitʼin klhakapuʼan ni uxintʼi va yu Cristo kʼatʼi yu Sasʼatʼa Dios unitʼa yu ixmaqskʼiniy kamil aniy lakamunukpaʼ. 28 Tejkan chuncha junʼol va nimancha takyauʼal juntaʼin ixtʼalapanaki María. Ex saq junil: —Ni jamalaniniʼ aniy yal, va tʼachivinputunan. 29 Tejkan chuncha qasmaklhi ni María va nimancha takyauʼostaulal, va laqʼal ni Jesús. 30 Ni Jesús jantukaʼ ixtanuyachal ni laka putaulan, vananaj an ixyal taʼan Marta paxtoqlhi. 31 Tejkan takyauʼostaulal ni María, y niman taxtul la ixchaqaʼ, ex ni israelitas yu ancha ixtatʼajun malakaʼulanan, tatʼaʼal, ixtalhilay va al qalhuʼ laka putaknun. 32 Tejkan chaʼal taʼan ixyal ni Jesús ex ni María niman taʼaqtsoqoqtanil, va junil: —Jalhachimoʼonuʼ, incha va aniy ixtʼaʼul ex ni kimpʼisaqa Lázaro ka jantu ixnil. 33 Ex ni Jesús va laqtsʼil ayaj qalhun ni María, vachuʼ ixtaqalhun ni israelitas yu tatʼamil, ex tus xkanil ixjalhanuti. 34 Ex jalhisakmil, va jalakjunil: —¿Tas ancha xamaknuyatʼikcha? Va tajunil: —Katʼatʼi laqtsʼiniʼ, Jalhachimoʼonuʼ. 35 Ex qalhul ni Jesús. 36 Ex ni israelitas tanaul: —Kʼalaqtsʼintʼik. Ni yucha ayaj ixʼachaniy ni Lázaro. 37 Alati vachu tanaul: —Yu aniy yucha lay malakavaniy laʼachʼix. Ka lay ixkʼuchʼul para jantu ixnil ni Lázaro. 38 Ni Jesús ixmaqaninijʼanta ni laka putaknun. Ni putaknun va taun poqapaj talpa ixpumalakchaukanta laqataun ay chiyux. 39 Chuncha ni Jesús naul: —Kʼamaʼosutʼikcha ni chiyux. Ex ni Marta yu ixtʼalapanaki ni lijunto Lázaro niman naul: —Jalhachimoʼonuʼ, chavay ka ayaj akamincha, va paqtʼaticha xajun tejkan nil. 40 Ni Jesús junil: —Kitʼin kunin incha kʼalhakʼapʼupʼineʼe ex kʼalaqtsʼineʼe ixʼayaxtu ni Dios. 41 Ex tamaqosul ni chiyux, ex ni Jesús talaqstʼal laktʼiyan, va naul: —KimPay Dios, kitʼin kxtaqniyan lhimalaqpuchuncha ni uxintʼi kʼiʼalasmatʼa. 42 Kitʼin ijkʼatsay ni uxintʼi va si ox kʼiʼalasmatʼa. Va chuncha knajun para kataqasmaklhi tachun ni lapanakni yu aniy tayanal, para katalhakapuʼal ni uxintʼi kʼimalaʼachʼatʼi aniy lakamunukpaʼ. 43 Astan tejkan chuncha naul ex ayaj pʼays chivinil, va naul: —¡Lázaro, katʼaxtʼucha ni anchanu laka putaknun! 44 Ex ni lijunto Lázaro va tsʼalaj taxtul ni laka putaknun. Va ox jamaqchʼinti y jachʼanchʼinti ixjunita kun laqchʼiti. Vachuʼ ixʼukxpuʼ ox jalaqapupaqanti ixjunita. Ex ni Jesús jalakjunil: —Kʼamaqxʼoqtʼik, kachʼanxʼoqtʼik, ex kʼaxtʼaqnitʼik lakatin kaʼal. 45 Tejkan chuncha makal ni Jesús ayaj lhuu israelitas yu tatʼachaʼal ni María, yuʼuncha talaqtsʼil, ex talhakapuʼal. 46 Pero lati niman taʼal laqputeʼeninin ni fariseos yu makal ni Jesús. 47 Ex ni fariseos ali yu xaʼukxtinin kuras, vachu yu xalajʼaynin jalhachimoʼonun va chʼantaun tataqxtoqlhi. Chuncha talajunil siya yuʼuncha: —¿Chavay tas kalayaucha ni kijnan? Ni anu lapanaki tʼajun masunuʼ lhuu axtoqnuʼ yu lajʼay yu jantu aqtaun laqtsʼinkan. 48 Incha kaxtaqniyau lakatin chuncha tacha lay ex tachun ni lapanakni si katalhakapuʼanaʼ. Ex yu talhachimoʼonun yu machaqan Roma kataminaʼ, katalaqmaqtayaʼ yu ay kilakatajtankʼan, vachu katalaktʼilhiyaʼ taʼakapuchun kimputaulankʼan. 49 Exnicha anchanuʼ jachʼitin ixʼalin qayntaun kuraj yu ixjunkan Caifás yucha jalakjunil: —Uxiknan jantu tuʼuchun kʼatsʼayatʼik. 50 Jantu malaʼasiyatʼik. Apalay ox kaxajchal para kijnan incha kanil qayntaun por yu alati lapanakni, para jantu tachun katsʼanqau. 51 Ni Caifás jantu xʼaman chuncha kanaul. Yucha va xaʼukxtin kura ixjunita ni anchanuʼ jachʼitin. Ni Dios va xtaqnil ixchivinti para kanaul ni Jesús va maqskʼiniy kanil por yu israelitas. 52 Vachu jantu vamun por yuʼuncha kaniyaʼ. Vachuʼ maqskʼiniy kanil por tachun ni sasʼatʼan Dios yu valiʼiy tʼikl taputaukʼata lakamunukpaʼ. 53 Exnicha ni israelitas yu ixtalhachimoʼonun va chʼantaun taval para katamaqnil ni Jesús. 54 Xlhiyucha ni Jesús jantucha ixtijuyal taʼan ixtatijuyanal ni xajalhachimoʼonun israelitas. Va taxtulcha xalakatʼun Judea, alcha lakataun putaulan yu junkan Efraín lakakʼavinan. Ancha tamakaulcha kun ixtʼaltanan yu ixjalakmalaniy. 55 Va ixtaʼukstsʼuniy ni Paxku yu ay ixkʼatankʼan ni israelitas. Lhuvaj lapanakni ixtataxtutacha la ixputaulankʼan. Ixtaʼantacha laka putaulan Jerusalén. Yuʼuncha pʼunaj ixtachaʼamajʼan yu jantu ox tacha ixlhinajun la ixlhachimoʼonkʼan para lay katatanul ni laka kʼatan. 56 Ancha ixtatʼajun lakxkaunan ni Jesús. Tejkan ixtatanuy ixpulakna ni laka ay lakatajtan, si ixtalalhisakmiy siya yuʼuncha: —¿Tas lhilayatʼikcha? ¿Kaminaʼ u jantu? 57 Ni fariseos ali yu xaʼukxtinin kuras ixtachʼiputun ni Jesús. Incha matichun kakʼatsal taʼan kataulal, yuʼuncha ixtalhinajunta ni kalhitaulal para lay katachʼil.

12

1 Tejkan vananaj istsʼanqay paqchaxan para kalakachaʼal ni xakʼatan Paxku, ex ni Jesús alcha laka putaulan Betania, taʼan ixvil ni Lázaro yu majkujuchoqol la ixputaknun tejkan ixnitacha. 2 Ancha tamakal taun lakvayti para ixlhitoʼoyakan ni Jesús. Ni Marta yucha ixmujuy yu ixtaʼuy. Yu Lázaro chʼantaun ixtʼavil laka mesa ni Jesús. 3 Ex ni María lhimil laʼatʼutu ciento gramos yu pʼays sʼejenʼe yu ayaj laqlhuu xtapal ixjunita. Chuncha lhichʼanxapal ni Jesús. Ex astan malakxixinichoqol kun ixʼaji. Tus taʼakchun ixpulakna ni chaqaʼ la sʼej ixʼakamin. 4 Ex ni Judas Iscariote, istsʼal Simón yu kamaqxtaqyaʼ ni Jesús, ancha ixyal chʼantaun kun yu alati ixtʼaltanan ni Jesús, va naul: 5 —¿Valiʼiycha jantu kastʼakal yu sʼejenʼe? Yucha lay ixlhistʼati tacha talhajay pumatʼutu ciento oqxtamatin por paqtamin. Ex lay ixjalaqxtʼaqnin kilpatanin. 6 Mas chuncha naul ni Judas yucha jantu laqsaval ixjalakmapayniy ni kilpatanin, va alhavanaʼ ixjunita. Ni bolsa yu ixtapumujuy tumin yu ixtaxtaʼa ni lapanakni, va yucha ixlhitʼajun ex ancha ixʼalhaumaxtuy. 7 Ex ni Jesús va junil: —Kʼamakʼaucha. Ni yucha aqtsʼiyaj va ixlhilkamaʼata para kaklhilakaxapakal tejkan kakniyaʼ. 8 Yu kilpatanin va tacha kaʼalinacha kun uxiknankʼan, pero yu kitʼin jantucha maqan kaklatʼaʼalinau. 9 Pumalhuvaj israelitas takʼatsal ni Jesús ixvilchal Betania. Ex taʼal laqtsʼinin pero vachu taʼal va para katalaqtsʼil ni Lázaro yu majkujuchoqol la ixputaknun tejkan ixnitacha. 10 Ex ni xaʼukxtinin kuras vachu ixtamaqniputun ni Lázaro. 11 Va por majkujuchoqokal ni Lázaro ayaj qaynlhuucha israelitas ixtalhakapuʼan ni Jesús, ixtatʼajun tamakauntʼaʼanan ni xaʼukxtinin kuras. 12 Lhuu lapanakni tachaʼal ancha Jerusalén taʼan laka kʼatan Paxku. Ataun julchan val, takʼatsal ni ancha ixʼantacha ni Jesús. 13 Chuncha talajʼexʼil xaxqoy chʼapʼa ex taʼalcha tastukʼinin, tanaul: —¡Kilamalaqtaxtuyau! ¡Katoʼoyakal yu minta la ixtaqaʼuti ni Dios! ¡Yucha va xaJalhachimoʼonuʼ Israel! 14 Ni Jesús temal laqataun burro ex putaukʼalhaʼal, chuncha tacha najun taʼan istsʼoqkanta la ixchivinti Dios: 15 Jantu katʼalhanantʼik ni uxiknan yu machaqan Jerusalén untʼatʼik. Kʼalaqtsʼintʼik ni miJalhachimoʼonukʼan, putaukʼalhiminta laqataun sasʼatʼa burra. 16 Tejkan chuncha val, ixtʼaltanan ni Jesús yu ixjalakmalaniy jantu katamalaqasil tachun yu ixtʼajun tapasanaʼ. Astan tejkan ni Jesús anchoqol laktʼiyan ex tapastakchoqol yu chuncha istsʼoqkanta. Ex takʼatsal va ixlhichiviniy ni Jesús kun tachun yu tapasal. 17 Ni lapanakni yu talaqtsʼil ni Jesús tejkan tʼasanil ni Lázaro y majkujuchoqol la ixputaknun, yuʼuncha ixtalaqputeʼechoqoy tacha yu tapasal. 18 Xlhiyucha ni lapanakni niman taʼal tastukʼinin. Takʼatsal ni ixmakata ni anchanuʼ ay axtoqnuʼ yu masul ixtapʼasta. 19 Ni fariseos ixtalajuniy siya yuʼuncha: —Kʼalaqtsʼintʼik, ni kijnan jantucha tuʼuchun lay xamakayau. Tachun ni lapanakni tatʼaʼanta. 20 Lati lapanakni yu ixtaʼanta ni laka kʼatan ancha Jerusalén va griegos ixtajunita. 21 Yuʼuncha talaqʼal ni Felipe yu machaqaʼ laka putaulan Betsaida xalakatʼun Galilea, va tajunil: —Kijnan klaqtsʼinputunau ni Jesús. 22 Ex ni Felipe niman chuncha al juniniʼ ni Andrés, ex ixlaʼatʼuykʼan chuncha taʼal makʼatsaninin ni Jesús. 23 Ex chuncha ni Jesús jalakjunil: —Chavay lakachilcha hora tejkan ay kakmakakanaʼ ni kitʼin yu kval Sasʼatʼa Lapanaki. 24 Kitʼin vas klajunau ni laqataun xatʼin trigo incha jantu patajuy lakatʼun para kataknul ex jantu tuʼuchun xtaʼa, va xʼamancha. Pero incha patajuy y taknuy ex talhavaʼan, va xtaʼa lhuu xaʼunikan. 25 Taʼayuʼ yu ayaj achaniy ixjatsukunti aniy lakamunukpaʼ, yucha astan kamaqatsʼanqayaʼ. Pero yu maqxtaqtacha ixjatsukunti aniy lakamunukpaʼ yucha kalhajaʼiyaʼ xajatsukunti laktʼiyan yu jantu aqtaun kamiʼoyaʼ. 26 Incha matichun kintapatsaniputun ex maqskʼiniy kintʼaʼal. Taʼan kaktaulaʼ ni kitʼin ex yucha vachuʼ ancha kataulaʼ. Yu kintapatsaniyaʼ yucha vachu katoʼoyakanaʼ, ni kimPay ay kamakayaʼ. Ni Jesús taylhaʼal ixchivinti, va naul: 27 —Chavaycha aniy hora ayaj kmaqaninin, tus taʼexpatajuy kelhanuti. ¿Suncha tsʼanqay kakskʼinil kimPay? ¿Va kakskʼinil para kimalaqtaxtul ni aniy maqanlqajnati? Jantu, va para yucha kminta ni aniy lakamunukpaʼ. 28 KimPay kʼatʼi, ay kʼamakʼakʼa para katoʼoyakal mintaqaʼuti. Ex niman qasmakkal laqataun chivinti tus laktʼiyan, va naul: —Chavaycha kitʼin aycha kmakakanta para kintatoʼoyal ni lapanakni. Aaqtaun kaklakmasunichoqoyaʼ kiʼayaxtu. 29 Ni lapanakni yu ancha ixtayanal talhilal va jamaxkan makatʼaul. Alati ixtalhilay va qayntaun ixmayul Dios tʼachivinil ni Jesús. 30 Ex ni Jesús jalakjunil: —Ni aniy chivinti yu xachivinkan jantu va para kitʼin kaval, va para uxiknankʼan. 31 Chavaycha lakachincha julchan tejkan kamukʼakanaʼ ixlaqtaqalkʼan xalapanakni lakamunukpaʼ. Chavay kalaqtinaqxtukanacha yu xajalhachimoʼonuʼ ni aniy lakamunukpaʼ. 32 Kitʼin tejkan kakmukʼakanaʼ talman aniy lakamunukpaʼ, kaklaktʼasaniʼoyacha tachun ni lapanakni ni kintalaqmil. 33 Chuncha naul ni Jesús para katamalaqasil tacha kapuniyaʼ. 34 Ni lapanakni taqaltayl, tajunil: —Kijnankʼan ijqasmatʼaucha ni Cristo yu kalakʼulayaʼ Dios, yucha katsukuʼalhiyaʼ. ¿Valiʼiycha naʼuncha ni Sasʼatʼa Lapanaki kamukʼakanaʼ talman? ¿Tasʼayucha ni anchanuʼ yu val Sasʼatʼa Lapanaki? 35 Chuncha ni Jesús jajunil: —Chavaycha vananaj kataulaʼ kun uxiknan ni maklku yu mapulkuy. Pero jantucha paqlhuu tsʼanqay para kaʼal. Chavaycha vananaj alin ni maklku xlhiyucha maqskʼiniy katʼiʼuntʼayatʼik. Chuncha jantu vak kakʼatsʼanapitik tejkan kaputsʼisaʼ. Yu tijuyal lakaputsʼisni yucha jantu kʼatsay taʼan puʼan. 36 Ni kitʼin yu xamaklku kunita, vananaj klatʼavilanau. Ex kʼalhakʼapʼupʼintʼik ni maklku yu mapulkuy. Chuncha kʼatsʼukʼuyapitik la kimaklku. Tejkan chuncha naunʼol ni Jesús, va al, va jatamaqsaqnilcha taʼan ixtayanal. 37 Ni Jesús mas ixjalakmasunitacha lhuu axtoqnuʼ yu jantu aqtaun ixtalaqtsʼin, jantu ixtalhakapuʼan. 38 Va maqskʼiniy chuncha katapasal tacha tsʼoqlhi ni Isaías yu maqancha ixlaqputeʼey ixchivinti Dios, yu najun inchineʼ: Jalhachimoʼonuʼ, ¿tasʼayucha lhakapuʼalcha yu kijnankʼan klaqputeʼeyau? ¿Maticha lay kalaqtsʼil ixtapʼasta ni Dios? 39 Xlhiyucha jantu lay ixtalhakapuʼan. Ni Isaías vachu tsʼoqlhi yu najun inchineʼ: 40 Ni Dios jalakmakal laʼachʼixin, vachuʼ pʼays jalakmakanil ixjalhanutkʼan para jantu katalakavanal y jantu katamalaqasil la ixjalhanutkʼan. Vachu jantu taʼuxamin kun kitʼin para palay kaklakmakal la ixtaqanʼatkʼan. 41 Tejkan chuncha tsʼoqlhi ni Isaías lhichivinil ni Jesús, va laqtsʼil ixʼayaxtu. 42 Qaynlhuu lajʼay lapanakni talhakapuʼal ni Jesús, pero jantu tsij ixtanajun. Ixtatalhauniy ni fariseos, ixtalhilay ni va lay kalaqtinaqxtukal ni laqa chaqaʼ taʼan ixtataqxtoʼa ni israelitas. 43 Apalay ixtamaqamay lajʼay kataval kun ni lapanakni xajantu kun Dios. 44 Ni Jesús pʼays chivinil, va naul: —Yu kilhakapuʼan ni kitʼin vachu lhakapuʼan yu kimalaqachata. 45 Yu kilaqtsʼin ni kitʼin vachuʼ laqtsʼin yu kimalaqachata. 46 Kitʼin kminta tacha taun maklku yu mapulkuy aniy lakamunukpaʼ para kajkamapulkunil ni lapanakni yu kintalhakapuʼan. Ex jantucha katatamakaul lakaputsʼisni. 47 Vachu yu qasmatʼa kinchivinti pero jantu makay kuenta, yucha jantu kitʼin kmukʼaniy maqanlqajnati. Kitʼin jantu kakmil mukʼaniniʼ maqanlqajnati ni lapanakni aniy lakamunukpaʼ. Va kminta para kajkalaqmalaqtaxtul. 48 Vachu yu jantu kilhiʼajin y jantu laqaʼiy kinchivinti yucha alincha yu kamukʼaniyaʼ ixmaqanlqajnati. Tejkan kamiʼoyaʼ ni lakamunukpaʼ exnicha kamukʼanikanaʼ maqanlqajnati por ni chivinti yu kitʼin knaul. 49 Kitʼin jantu kchiviniy kilaqʼaman, ni kimPay yu kimalaqachal yucha kilhijunil yu maqskʼiniy kaknaul, vachuʼ yu kakmasul. 50 Kitʼin ox kʼatsay tachun yu kilhijuniy kakmakal ni kimPay, yucha va para kaʼalil jatsukunti yu jantu aqtaun kamiʼoyaʼ. Xlhiyucha tachun yu knajun va yu kimPay kilhijuniy.

13

1 Va laycha kachil ni Paxku yu ay ixkʼatankʼan ni israelitas. Exnicha ni Jesús ox ixkʼatsay ni laqchaʼalcha ixhora para kamakauntijlalcha ni aniy lakamunukpaʼ. Ixkʼatsay ni kaʼanchoqoyacha taʼan vilchal ixPay. Yucha ayaj ixlakʼachaniy ixlapanakni yu ixtʼatiʼukxuyanal aniy lakamunukpaʼ, jantu aqtaun kamiʼol ixjapaxkanti. 2 Va laycha kaʼaqtaynil ni vayti. Exnicha ni xaʼukxtin aqmoqxnuʼ ixlhimanunita la ixjatapastakʼati ni Judas Iscariote yu istsʼal Simón para kamaqxtaqlhi ni Jesús. 3 Yu Jesús oxicha ixkʼatsay ni yucha va kun Dios ixmintachal, y kaʼanchoqoyaʼ kun yucha. Vachuʼ ixkʼatsay ni ixPay maqxtaqniʼol la ixtamakaʼ tachun yu alin para kalhichimoʼol. 4 Ex ostayal taʼan ixtatʼajun vaynin, majʼal ixlaqchʼiti yu ixmulata y lhitampachʼikal aqxtaun toalla. 5 Ex pulal taun paxutu xkan aqtayl lakchʼanchaʼay ni pumakautʼuy yu ixjalakmalaniy. Ex jalakmachʼanxixil kun ni toalla yu ixlhitampachʼikanta. 6 Tejkan ixchʼanchaʼaputun ni Simón Pedro ex yucha niman junil ni Jesús: —¿Valiʼiycha ni uxintʼi va kitʼin kʼinchʼanchʼaʼayeʼe? 7 Ex ni Jesús qaltaychoqol ni Pedro, va junil: —Chavaycha jantu malaʼasiy yu ktʼajun makan ni kitʼin, pero astan ex kʼamalaʼasiyeʼe. 8 Ex ni Pedro naul: —Kitʼin jantu aqtaun kakxtaqniyan lakatin kʼinchʼanchʼaʼatʼi. Ex ni Jesús aaqtaun qaltaychoqol, va junil: —Incha jantu kakchʼanchaʼayan ex jantu lay chʼantaun kʼaʼuneʼe kun kitʼin. 9 Ex chuncha ni Simón Pedro junil: —Jalhachimoʼonuʼ, ex jantu vamun kinchʼajaʼ kʼinchʼaʼanin. Vachuʼ kʼinchʼaʼanin kimakaʼ ali kiʼaqtsul. 10 Chuncha ni Jesús aaqtaun qaltaychoqol, va junil: —Taʼayuʼ yu ox laqachaʼata yucha jantu maqskʼiniy kalaqachaʼakal taʼakchun, vamun ixchʼajaʼ. Ox junita taʼakchun la ixlakatunaj. Uxiknan lajʼoxin untʼatʼik mas jantu mintachunkʼan. 11 Ni Jesús ox ixkʼatsay xaqayntaun ni yuʼuncha kamaqxtaʼaʼ, xlhiyucha naul ni jantu tachun lajʼoxin. 12 Ni Jesús tejkan jalaqchʼanchaʼaʼolcha ex ulachoqolcha ni ixlaqchʼiti ex anchoqolcha taul ni laka mesa, chuncha jalakjunil: —¿Malaʼasiyatʼik yu xaklamakaniyau? 13 Uxiknan kilajunau ni kitʼin va jamalaniniʼ kunita, vachuʼ kilajunau jalhachimoʼonuʼ. Laqsaval ixlaqmiti chuncha kilajuniu, va yucha kunita. 14 Ni kitʼin kunita miJamalaninikʼan, vachuʼ miJalhachimoʼonukʼan kunita. Xlhiyucha incha klachʼanchaʼau ex ni uxiknan vachuʼ maqskʼiniy kʼalachʼanchʼaʼatʼik. 15 Ni kitʼin klamasuniu va para kilalaqtsʼixtuu. Ex vachu chun kʼamakʼatʼik tacha kmakal kitʼin. 16 Ni kitʼin klajunau yu laqsaval. Qayntaun oqxtamati yucha jantu ay kaval tacha ixʼukxtin. Vachuʼ yu jamalaqachanan apalay ay xajantu yu malaqachakan. 17 Ex chuncha incha malaʼasiyatʼik tachun yu aniy, ex katsʼukʼuyapitik kun achati tejkan chuncha kʼamakʼayapitik. 18 Pero jantu mintachunkʼan klalhichivinau. Kitʼin ox klamispayau ni uxiknan yu klalaksaktau. Chuncha tacha tsʼoqkanta la ixchivinti Dios maqskʼiniy chuncha katapasal, yu najun inchineʼ: “Yu kintʼavajin chʼantaun kun kitʼin chavay kimakay ixtʼalaxkayaʼ.” 19 Chuncha klajuniu chavaycha mas jantukaʼ tapasay. Ex tejkan chuncha katapasayaʼ lay kalhakʼapʼupʼinapitik ni tasʼayucha kunita ni kitʼin. 20 Laqsaval kitʼin klajunau, taʼayuʼ yu ox kalaqaʼiyaʼ yu kmalaqachay ni kitʼin, yucha vachu kilaqaʼiy ni kitʼin. Yu kilaqaʼiy ni kitʼin, yucha vachuʼ laqaʼiy ni kimPay yu kimalaqachal. 21 Tejkan chuncha naul ni Jesús ayaj pʼays jamaqaninil la ixjalhanuti. Ex vas laklhitaulnil yu ixpastakʼa, va naul: —Kitʼin vas klajunau, xaqayntaun ni uxiknankʼan chavay kimaqxtaqyacha. 22 Chuncha ixtʼaltanan yu ixjalakmalaniy aqtayl sniy talalaqtsʼin siya yuʼuncha, pero jantu ixtakʼatsay tasʼayucha yu ixtʼajun lhichivin. 23 Ni Jesús ayaj ixʼachaniy qayntaun ni yuʼuncha y yucha ixtʼajun vayaʼ taʼan apeʼextaun taʼan ixvil ni Jesús. 24 Ex ni Simón Pedro majkunil ni anchanu lapanaki para kalhisakmil ni Jesús tasʼayucha yu ixtʼajun lhichivin. 25 Ex ni anchanuʼ lapanaki niman taʼukstsʼuninil ni Jesús ex lhisakmil, va junil: —Jalhachimoʼonuʼ, ¿tasʼayucha lhichʼiviniy ni uxintʼi? 26 Ni Jesús qaltayl, va junil: —Kajkʼavayaʼ lakatsʼuniy ni pan. Yu kakxtaqniyaʼ, va yucha klhichiviniy. Tejkan chuncha aval ni ixpan, va xtaqnil ni Judas Iscariote yu istsʼal Simón. 27 Tejkan laqaʼil ni pan ni Judas, ex ni Satanás nimancha laqtanul. Ex junkal, naul ni Jesús: —Yu kʼamakʼayeʼe, nimancha kʼamakʼatʼi. 28 Yu ixtatʼajun vaynin laka mesa jantu katamalaqasil tacha junil ni Jesús. 29 Ni Judas ixpaxtoqniy kamaʼal ixtuminkʼan. Ex lati talhilal va iskʼinikan tumin ni Judas para katalhiʼil axtoqnuʼ para yu kʼatan o para kalaqxtaqnil kilpatanin. 30 Chuncha tejkan ni Judas laqaʼil ni pan va nimancha taxtul. Ni anchanuʼ hora ixputsʼistacha. 31 Tejkan taxtul ni Judas ex ni Jesús naul: —Chavaycha katasuyaʼ kiʼayaxtu ni kitʼin yu kval Sasʼatʼa Lapanaki, vachuʼ la ketsukunti katasuyaʼ ixʼayaxtu ni Dios. 32 La ketsukunti ni katasuyaʼ ixʼayaxtu ni Dios, xlhiyucha yu Dios kamasuyaʼ kiʼayaxtu kitʼin y jantucha kataqmaqayaʼ. 33 Kesʼatʼan, kitʼin jantucha apalay kaktaqmaqayaʼ kun uxiknan. Uxiknan kilalakxkauyau pero vachu chun klajunau tacha klakjunil mintʼaʼisraelitaskʼan: uxiknan jantu lay kapʼinapitik taʼan kitʼin kajkʼanaʼ. 34 Chavaycha klalhijunau taun saystʼi putsuku. Kʼalapʼaxkʼatʼik vachu chun tacha kitʼin klapaxkau. 35 Incha lapʼaxkʼayatʼik ex tachun ni lapanakni katakʼatsayaʼ ni va laqsaval kintʼaltanan untʼatʼik yu klamalaniyau. 36 Ni Simón Pedro lhisakmil ni Jesús, va junil: —Jalhachimoʼonuʼ, ¿tas ancha tʼipʼincha? Ex ni Jesús qaltayl, va junil: —Taʼan kitʼin kteʼen chavaycha jantu lay kʼapʼineʼe pero astan ex chun lay kapʼineʼe. 37 Ex ni Pedro qaltayl, va junil: —Jalhachimoʼonuʼ, ¿valiʼiycha chavay jantu lay kaktʼaʼanan? Kitʼin kxtaqkan mas tus kakmaqxtaqlhi ketsukunti por uxintʼi. 38 Ex ni Jesús junil ni Pedro: —¿Laqsaval xtʼaqkʼan mas tus kʼamaqxtʼaqtʼi metsukunti por kitʼin? Kitʼin laqsaval kunan tejkan jantukaʼ tʼasay ni puyux uxintʼi aqtʼutu kʼanauneʼe ni jantu kʼimispʼay.

14

1 Ni Jesús taylhaʼal ixchivinti, jalakjunil: —Jantu kʼamaʼaninintʼik ni uxiknan la melhanutkʼan, kʼalhakʼapʼupʼintʼik ni Dios, vachu kilalhakapuʼau ni kitʼin. 2 Taʼan vilchal ni kimPay ayaj lhuu jachaqan alin taʼan lay katʼaʼul. Yu va jantu ixʼalil ex kitʼin xaklajuniu. Kitʼin kajkʼanacha jalaqlaʼoxin taʼan lay katʼaulatʼik. 3 Astan tejkan kaklaʼoxiʼoyacha taʼan katʼaulapitik ex kakminchoqoyaʼ, kaklalhaʼanau para katʼaulatʼik chʼantaun kun kitʼin taʼan kaktaulaʼ. 4 Uxiknan mispʼayatʼik taʼan kitʼin kajkʼanaʼ, vachuʼ mispʼayatʼik ni lakatin. 5 Chuncha ni Tomás junil ni Jesús: —Jalhachimoʼonuʼ, kijnan jantu ijkʼatsayau taʼan uxintʼi kapʼineʼe. ¿Tas lay kakpumispaucha ni lakatin? 6 Chuncha ni Jesús qaltaychoqol, va junil: —Va kitʼin kunita yu ox lakatin, va kitʼin kmasuy yu laqsaval, va kitʼin kxtaʼa yu jatsukunti. Jantu lay kachʼipʼi taʼan vilchal kimPay Dios incha jantu kʼilaʼaʼitʼi ni kitʼin. 7 Va ixkilamispau taʼayucha ni kitʼin ex yu kimPay vachu ixmispʼatʼik. Mas chavaycha mispʼayatʼikcha, va tʼaunatʼikcha laqtsʼinin. 8 Ex ni Felipe junil: —Jalhachimoʼonuʼ, kilamasuniu ni kimPay Dioskʼan, va yucha kalhitaulacha kejalhuntkʼan. 9 Ex qaltaychoqol ni Jesús, va junil: —Felipe, maqancha ktijuyal kun uxiknan. ¿Mas chavaycha jantukaʼ kilamispayau? Taʼayuʼ yu kilaqtsʼin ni kitʼin, vachu laqtsʼin kimPay. ¿Valiʼiycha kʼilhiʼuniycha kaklamasuniu ni kimPaykʼan? 10 ¿Jantu lhakʼapʼupʼin ni kitʼin va chʼantaun kunita kun kimPay, vachu yucha chʼantaun junita kun kitʼin? Tachun yu klajunau jantu klajunau keʼeman. Ni kimPay yu vil chʼantaun kun kitʼin va yucha makay ixlhitapatsa la kijatsukunti. 11 Kʼalhakʼapʼupʼintʼik ni kitʼin va chʼantaun kunita kun kimPay, yucha vachuʼ chʼantaun junita kun kitʼin. Incha jantu lhakʼapʼupʼinatʼik, maqskʼiniy kʼamakʼatʼik kuenta tachun yu lajʼay axtoqnuʼ yu kmakay, ex lay kʼalhakʼapʼupʼintʼik. 12 Kitʼin vas klajunau, ni lapanaki yu kilhakapuʼan, yucha vachu kamakayaʼ ixlhitapatsa tacha yu kmakay kitʼin. Chavay kajkʼanacha taʼan vilchal kimPay, xlhiyucha yu kilhakapuʼan kamakayaʼ apalay lajʼay axtoqnuʼ. 13 Tachun yu kaskʼinapitik la kintaqaʼuti, kitʼin kaklaxtaqniyau. Chuncha lay kakmasul ni kitʼin tas junitacha ixʼayaxtu ni kimPay. Ni Jesús vachu naul: 14 —Mas va tuʼuchuncha kaval yu kilaskʼiniyau la kintaqaʼuti, kitʼin si kakmakayaʼ. 15 Incha kilaʼachaniyau ni kitʼin, ex kamakʼatʼik tacha klhinajun. 16 Kitʼin kakskʼiniyaʼ ni kimPay Dios para katamalaqachanin aqayntaun yu lay kataʼaqtayjun, yu lay katalapʼasnin. Chuncha lay kataulal kun uxiknan mas va tavanancha. 17 Yucha ni Espíritu Santo yu masuy yu laqsaval. Ni lapanakni yu jantu talhakapuʼan Dios, yuʼuncha jantu katalaqaʼiyaʼ. Yuʼuncha jantu talaqtsʼin, vachu jantu tamispay, pero uxiknan mispʼayatʼik. Yucha alinta kun uxiknan y kaʼalinaʼ kun uxiknan mas va tavanancha. 18 ’Jantu kaklamakauntijlayau milaqʼamankʼan. Kaklalaqminchoqoyau. 19 Ni lapanakni yu jantu kintalhakapuʼan, yuʼuncha jantucha maqan kintalaqtsʼinaʼ. Pero uxiknan vananaj kilalaqtsʼinau. Ktʼajun ni kitʼin, xlhiyucha ni uxiknan lay katsʼukʼuyapitik. 20 Anchanuʼ julchan ex kakʼatsʼayapitik ni va chʼantaun kunita kun kimPay. Kakʼatsʼayapitik ni uxiknan chʼantaun untʼatʼik kun kitʼin y kitʼin chʼantaun kunita kun uxiknan. 21 Taʼayu yu mispay kinchivinti y makay yu klhinajun, va yucha laqsaval kiʼachaniy. Yu kiʼachaniy ni kitʼin, yucha kimPay paxkay. Kitʼin vachu kakpaxkayaʼ y kaktasuniyaʼ. 22 Qayntaun yu ixjunkan Judas, yu jantu Judas Iscariote kaval, yucha junil ni Jesús: —Jalhachimoʼonuʼ, ¿valiʼiycha kilatasuniyaucha ni kijnan pero yu lapanakni yu jantu talhakapuʼanan yuʼuncha jantu? 23 Ex ni Jesús qaltaychoqol, va junil: —Matichun lapanaki yu kiʼachaniy, yucha makay kuenta yu knajun ni kitʼin. Vachu kimPay kaʼachaniyaʼ ni yucha. Ex ni kimPay ali kitʼin chʼantaun kakminau taulnin kun yucha. 24 Yu jantu makay kuenta yu knajun, yucha jantu kiʼachaniy. Ni chivinti yu klaqputeʼey yu tʼaunatʼik qasmaknan, yucha jantu kinchivinti kaval, va ixchivinti kimPay yu kimalaqachal. 25 ’Chavaycha vananaj kvil kun uxiknan, xlhiyucha klatʼaunau juninin tachun. 26 Ni Espíritu Santo katamalakaʼulayan la memaqanitkʼan. KimPay katamalaqachaniyan la kintaqaʼuti. Katamalaniyan tachun y katamapastakniʼochoqoyan tachun yu aniy xaklajunau. 27 ’Kaklamakaunau oxamaktamin, kaklaxtaqniyau kiʼachati yu oxamaktamin katamakayan. Jantu va aqstanchun kaval tacha xaʼachati aniy lakamunukpaʼ. Jantu kʼamaʼaninintʼik la melhanutkʼan, jantu katʼalhanantʼik. 28 Chavay asmaktʼikcha ni kitʼin klajuniu chavay kajkʼanacha ex astan kaklalaqminchoqoyau. Incha laqsaval kilaʼachaniyau ex uxiknan ox xalhiʼachʼantʼaʼuyatʼik tejkan kʼatsʼatʼik ni kitʼin kteʼencha taʼan vilchal kimPay. Yucha apalay ay xajantu kitʼin. 29 Chavaycha chuncha klajunau mas jantukaʼ kʼan ni laktʼiyan. Ex tejkan chuncha katapasayaʼ lay kʼalhakʼapʼupʼinapitik. 30 ’Jantucha apalay kaktaqmaqayaʼ chiviniʼ kun uxiknan. Chavay mintacha yu jalhachimoʼonuʼ aniy lakamunukpaʼ, mas jantu kalhitsukul tapʼasta kun kitʼin. 31 Va chuncha maqskʼiniy katapasal para katakʼatsal ni lapanakni aniy lakamunukpaʼ ni laqsaval kʼachaniy kimPay y vachu kmakay yu kilhijuniy. ’Chavay kʼaʼostʼalatʼikcha, kaʼaucha.

15

1 Ni Jesús taylhaʼal ixchivinti, va naul: —Kitʼin kunita ni xakʼiu uvas yu lay lhakapuʼankan. KimPay va tacha qayntaun yu lhistakʼa ixjatachʼanati. 2 Incha alin maqlakapataun kimaqlaqapʼu yu jantu xtaʼa xaʼunikan ex yucha niman chaqxmajʼan. Incha ox xtaʼa xaʼunikan, ex yucha valiʼiy lakamajʼan laqachaqxtuniy yu jantu lajʼox xalaqapʼu. Chuncha laʼoxiy para apalay lhuu kaxtaqlhi xaʼunikan. 3 Uxiknan laʼoxitʼatʼikcha metsukuntikʼan por ni chivinti yu klamasuniu. 4 Katʼaylhipʼintʼik chʼantaun kun kitʼin, tacha kitʼin chʼantaun kunita kun uxiknan. Yu maqlaqapʼu jantu lay xtaʼa xaʼunikan ixlaqʼaman, maqskʼiniy katakilnul laka kʼiu yu titay lakatʼun. Vachu chun tapasay kun uxiknan, incha jantu chʼantaun kaʼuntʼik kun kitʼin ex metsukuntikʼan jantu lay kaxtaqlhi yu lajʼoxi. 5 ’Kitʼin va yu xakʼiu yu titay lakatʼun, yu uxiknan yu kilalhakapuʼanau, va xamaqlaqapʼu untʼatʼik. Incha qayntaun taylhaʼan chʼantaun kun kitʼin y kitʼin vachuʼ kun yucha, yucha junita tacha maqlaqapʼu yu xtaʼa lhuu xaʼunikan. Jantu lay makʼayatʼik tuʼuchun incha jantu chʼantaun kaʼuntʼik kun kitʼin. 6 Yu jantu chʼantaun kaval kun kitʼin, yucha kalaqchaqxmajʼankanaʼ, kapuchʼiyaʼ vachu chun tacha xamaqlaqapʼu yu laqchaqxmajʼankan. Chʼantaun maqxtoqmakan y laqxavakan laka jikmi. 7 ’Incha tʼaylhipʼinatʼik chʼantaun kun kitʼin, vachu incha kinchivinti ox taylhaʼan kun uxiknankʼan, ex kʼaskʼintʼik yu skʼinpʼutʼunatʼik y kʼaxtʼaqnikʼanapitik. 8 Incha uxiknan untʼatʼik tacha maqlaqapʼu yu xtaʼa lajʼox xaʼunikan ex ni kimPay ox toʼoyakan. Ex uxiknan vachuʼ lhiʼakxajyachʼipitik tacha yu laqsaval kintʼaltanan untʼatʼik. 9 Kitʼin ayaj klapaxkayau vachu chun tacha kimPay kimpaxkay. Katʼaylhipʼintʼik kun yu japaxkanti yu kitʼin klaxtaqniyau. 10 Incha laqsaval kʼamakʼayapitik tacha klhinajun, ex katʼaylhipʼinapitik kun yu japaxkanti yu klaxtaqniyau. Vachu va chun kitʼin kmakay yu lhinajun kimPay y chuncha ktaylhaʼanta kun yu japaxkanti yu kixtaqniy. 11 ’Kitʼin chuncha klalhixaqalayau para kaʼachʼantʼik tacha kʼachan ni kitʼin y tus kʼalhitsʼukʼuʼotʼik tachun ni achati. 12 Yu klalhijunau kʼamakʼatʼik va yu inchineʼ: Kʼalapʼaxkʼatʼik vachu va tacha ni kitʼin klapaxkayau. 13 Yu apalay ay japaxkanti yu lay kʼamakʼatʼi va kʼamaqxtʼaqtʼi mijatsukunti por mintʼaltanan. 14 Uxiknan va kintʼaltanan untʼatʼik incha makʼayatʼik tacha yu klalhijunau. 15 Jantucha klajunau kiʼoqxtamatin. Qayntaun oqxtamati jantu kʼatsay yu makay ixʼukxtin. Kitʼin klajunau va kintʼaltanan, va klamasuniʼojoo tachun yu kijunil kimPay. 16 Uxiknan jantu kilalaksakvi kitʼin, va kitʼin klalaksakvi ni uxiknan. Klamalaqachayau ni kaʼuntʼik tacha maqlaqapʼu yu xtaʼa lajʼox xaʼunikan yu jantu aqtaun kamiʼoyaʼ. Chuncha ni kimPay kataxtaqniyan tachun yu kʼaskʼiniyapitik la kintaqaʼuti. 17 Klalhijunau yu inchineʼ: Kʼalapʼaxkʼatʼik. Ni Jesús taylhaʼal ixchivinti, va naul: 18 —Incha ayaj taxkayyan yu xalapanakni lakamunukpaʼ, kapʼastʼaktʼik ni va pʼunaj kintaxkayl ni kitʼin. 19 Incha uxiknan ixʼuntʼik chʼantaun kun xalapanakni lakamunukpaʼ ex yuʼuncha ox ixtalaqtsʼin. Pero jantu chʼantaun kaʼuntʼik kun yuʼuncha, va kitʼin klalaksakvi para jantucha kaʼuntʼik xalapanakni lakamunukpaʼ. Xlhiyucha ayaj taxkayyan. 20 Kapʼastʼaktʼik tacha klajuntaucha: “Jantu matichun oqxtamati ay kaval tacha ixʼukxtin.” Incha kitʼin kintaxkaylhitʼajun, ex ni uxiknan vachu chun kataxkaylhitsukuyan. Yu taqasmatʼa kinchivinti, yuʼuncha vachu kataqasmakniyan minchivintikʼan. 21 Yu kataxkaylhitsukuyan chuncha katamakayan por kilapanakni untʼatʼik. Jantu tamispay yu kimalaqachata. 22 ’Incha jantu xakmil, incha jantu xaklaqlhixaqalal ex yuʼuncha jantu tuʼuchun laqtaqal ixtataukʼanil. Pero chavay yuʼuncha jantu lay tanajun ni jantu kaʼalil ixlaqtaqalkʼan. 23 Tachun yu kintaxkajiy vachu taxkajiy ni kimPay. 24 Jantu tuʼuchun laqtaqal ixtataukʼanil incha jantu xaklakmasunil lajʼay axtoqnuʼ yu jantu aqtaun laqtsʼinkan. Pero mas va talaqtsʼintacha va kintaxkajiy, vachuʼ taxkajiy ni kimPay. 25 Chuncha tapasay para katapasal tacha tsʼoqkanta la ixchivinti Dios yu najun inchineʼ: “Kintaxkajiy ni lapanakni mas jantu tuʼuchun laqtaqal kakmakal.” 26 ’Kaminaʼ yu kataʼaqtayjuyan yu kamintachal kun kimPay. Yucha ni Espíritu Santo yu masuy yu laqsaval. Yucha kaklamalaqachaniyau kamintachal kun kimPay ex vas kilhichivinanaʼ ni kitʼin. 27 Ex ni uxiknan vachuʼ maqskʼiniy kilalhichiviniu ni kitʼin. Va uxiknan ukxuyanantʼikcha kun kitʼin tus tejkan kʼaqtaynil jamalaniniʼ.

16

1 —Tachun yu aniy klalhixaqalayau para jantu kʼamakʼauntʼijlatʼik milhakapuʼatkʼan. 2 Katalaqnaqxtuyan taʼan tataqxtoʼa kintʼaʼisraelitaskʼan. Kaminaʼ julchan tejkan lati katamaqniyan, chuncha katalhilayaʼ ni va ox tatapatsaniy ni Dios. 3 Jantu tamispay ni kimPay y jantu kintamispay ni kitʼin, xlhiyucha chuncha katamakayaʼ. 4 Chuncha klajunau, ex tejkan chuncha kʼatʼapʼasayapitik kapʼastʼakchʼoʼoyapitik ni va pʼunaj chuncha xaklajuntaucha. ’Jantu chuncha kaklajuniu tejkan pʼunaj xaklatʼaʼukxuyanau. Ni kitʼin xakvil kun uxiknankʼan y jantu tuʼuchun ixtʼapʼasayatʼik. 5 Chavay klaqʼanacha yu kimalaqachal, jantu matichun ni uxiknan kilalhisakmiputunau toʼoxtaycha kteʼencha. 6 Klajunau ni kteʼenchoqoycha, xlhiyucha uxiknan va ayaj jamaʼanininatʼik. 7 Kitʼin laqsaval klajunau, apalay ox kaxajtachal para uxiknankʼan incha kajkʼalcha. Incha jantu kajkʼanaʼ ex jantu lay katalaqminan ni Espíritu Santo yu kataʼaqtayjuyan. Incha kajkʼanaʼ ex kaklamalaqachaniyau. 8 Tejkan yucha kaminaʼ ex kalakmasuniyaʼ xalapanakni lakamunukpaʼ ni alin ixtalaqalhinkʼan, kalakmasuniyaʼ tacha junita yu vas jatsukunti, vachuʼ kalakmasuniyaʼ ni Dios mukʼay laqtaqal. 9 Kalakmasuniyaʼ ni alin ixtalaqalhinkʼan por jantu kintalhakapuʼal ni kitʼin. 10 Kalakmasuniyaʼ tacha junita yu vas jatsukunti. Yucha klhitʼajun kitʼin xlhiyucha kaklaqʼanaʼ kimPay y uxiknan jantucha kilalaqtsʼinau. 11 Kalakmasuniyaʼ ni Dios mukʼay laqtaqal, xlhiyucha ni aqmoqxnuʼ yu lhachimoʼonun ni lakamunukpaʼ yucha mukʼanikantacha ixmaqanlqajnati. 12 ’Ayaj lhuu alin yu klajunputunau pero chavaycha jantukaʼ lay malaʼasiyatʼik. 13 Tejkan kaminaʼ ni Espíritu Santo yu masuy yu laqsaval, exnicha katamasuniyan tachun yu laqsaval. Yucha jantu kachivinanaʼ ixlaqʼaman, vamun yu kaqasmaktayaʼ. Yucha katamasuniyan yu katapasayaʼ astan. 14 Yucha kalaqaʼiyaʼ yu kakmaqxtaqniyaʼ ex katamasuniyan ni uxiknankʼan, chuncha kintoʼoyayaʼ. 15 Tachun yu lhitʼajun ni kimPay va si kinavin junita. Xlhiyucha klajunau ni Espíritu Santo kalaqaʼiyaʼ ni chivinti yu kitʼin kakmaqxtaqniyaʼ para katamasunin ni uxiknankʼan. 16 ’Jantucha kaktaqmaqayaʼ, ex ni uxiknan jantucha kilalaqtsʼinau. Pero astan ex kilalaqtsʼinchoqoyau, va kajkʼanaʼ taʼan vilchal kimPay. 17 Chuncha ixtʼaltanan yu jalakmalaniy aqtayl talalhisakmiy siya yuʼuncha, va tanaul: —¿Tisuncha naunputun yu ixkintajunan? Najun ni jantucha kataqmaqayaʼ ex jantucha kalaqtsʼinau. Vachu najun astan kalaqtsʼinchoqoyau. ¿Suncha naunputun tejkan naul ni kaʼanacha taʼan vilchal ixPay? 18 Ex tataylhaʼal lalhisakminin: —¿Suncha naunputun tejkan najun jantucha kataqmaqayaʼ? Tus jantu malaqasiyau. 19 Ni Jesús xtaqnil kuenta yu ixtalhisakmiputun. Ex lakjunil: —Va klajuniu ni jantucha kaktaqmaqayaʼ ex jantucha kilalaqtsʼinau pero astan kilalaqtsʼinchoqoyau. ¿Va yucha tʼaunatʼik lalhisakminin, valiʼiycha chuncha xaknajun? 20 Laqsaval klajunau ni kʼalajʼalhunapitik, ayaj kʼamaʼaninanapitik. Yu xalapanakni aniy lakamunukpaʼ, yuʼuncha ayaj katalhiʼachantajuyaʼ. Pero uxiknan mas kʼamaʼaninanapitik, astan kaʼachʼanapitik. 21 Tejkan qayntaun xanati kalhitsukuyaʼ sasʼatʼa ex ayaj jamaqaninin, va lakachilcha ixjulchan para kamajkʼatsal. Pero astan tejkan tsukuycha ni jasʼatʼa ex jantucha pastakʼa ixjamaqanlqajnati. Va lhiʼachantajuy ni tsukulcha qayntaun jasʼatʼa aniy lakamunukpaʼ. 22 Vachu va chun ni uxiknan chavaycha kʼamaʼaninanapitik pero astan kaklalaqtsʼinchoqoyau. Exnicha kʼalhitsʼukʼuyapitik lhuu achati la melhanutkʼan. Jantu matichun lay katamaxtunichoqoyan ni anuʼ achati. 23 ’Anchanu julchan ex jantucha tuʼuchun kilalhisakmiyau. Laqsaval kitʼin klajunau ni uxiknan tachun yu kʼaskʼiniyapitik ni kimPay la kintaqaʼuti yucha kataxtaqniyan. 24 Chavaycha uxiknan jantukaʼ tuʼuchun skʼinatʼik la kintaqaʼuti. Kaskʼintʼik ex kʼalaʼaʼiyapitik, chuncha kʼalhitsʼukʼuyapitik lhuu achati. 25 ’Chavay klalhixaqalayau tachun yu aniy kun chivinti yu tamapastakniyan pero lhitaʼay para kamalaʼasitʼik. Pero kaminaʼ julchan tejkan jantucha chuncha kaklalhixaqalayau, va vas kaklajunau tacha junita kimPay. 26 Anchanu julchan kʼaskʼiniyapitik kimPay la kintaqaʼuti yu kʼamaqskʼiniyapitik. Kitʼin jantucha maqskʼiniy kaktapayniniyaʼ por uxiknankʼan, 27 va yucha taʼachaniyan. Uxiknan kilaʼachaniyau vachu lhakʼapʼupʼintʼatʼikcha ni kitʼin va ancha kmintachal kun Dios, xlhiyucha taʼachaniyan. 28 Kminchal taʼan vilchal ni kimPay tus aniy lakamunukpaʼ. Pero chavay kakmakaunaʼ ni aniy lakamunukpaʼ, kaklaqʼanchoqoyacha ni yucha. 29 Ex ixtʼaltanan yu jalakmalaniy tajunil: —Chavay chun vas kilatʼaunau xaqalanan, jantucha mapʼatsʼay chivinti yu lhitaʼay ixmalaqasika. 30 Chavay ijkʼatsayau ni uxintʼi mispʼaʼoʼoy tachun, jantucha maqskʼiniy kʼalhisakmikʼa tuʼuchun. Xlhiyucha klhakapuʼanau ni laqsaval va kun Dios tʼantʼachiy. 31 Ex ni Jesús va jalakjunil: —¿Ex chavay lhakʼapʼupʼinatʼikcha? 32 Va tsʼuniycha tsʼanqay para kachil ni anchanu hora, chavaycha va chilcha tejkan uxiknan valiʼiy tʼikl kʼapʼutʼaukʼayapitik, siya lakatamin kapʼinapitik. Ex va keʼemancha kilamakaulayau. Pero jantu keʼeman kaktaulaʼ, ni kimPay chʼantaun vil kun kitʼin. 33 Chuncha klajunau para lay oxamaktamin katsʼukʼutʼik tejkan chʼantaun kilatʼatʼaunau ni kitʼin. Ni xalapanakni ni aniy lakamunukpaʼ va ayaj katamamaqanlqajnivayan. Pero kʼaʼayajnantʼik, ni kitʼin kmaqalhajatacha ixtapʼasta ni aniy lakamunukpaʼ.

17

1 Tejkan chuncha naunʼol ni Jesús ex talaqstʼal laktʼiyan, va naul: —Uxintʼi, kimPay kʼatʼi, chavay lakachilcha ni hora. Ay kʼimakʼatʼi ni kitʼin mesʼatʼa para vachuʼ ay kakmakan ni uxintʼi. 2 Uxintʼi kʼilakʼulatʼacha para kaklaklhichimoʼol tachun ni lapanakni. Ex chuncha tachun ni lapanakni yu kʼimaqxtʼaqnin kitʼin lay kaklaqmaqxtaqnil jatsukunti yu jantu aqtaun kamiʼoyaʼ. 3 Katalhitsukuyaʼ ni jatsukunti yu jantu aqtaun kamiʼoyaʼ incha tamispayan ni uxintʼi vamun yuʼ yu laqsaval Dios kʼatʼi. Vachu tejkan kintamispay ni kitʼin yu Jesucristo kunita yu kʼimalaʼachʼatʼa. 4 ’Kitʼin ay kmakancha ni aniy lakamunukpaʼ, chavay kmajkaniʼolcha tachun yu uxintʼi kʼilhiʼun kakmakal. 5 Chavaycha, kimPay kʼatʼi, ay kʼimakʼachʼoʼo chʼantaun kun uxintʼi chuncha tacha pʼunaj ay xajkunita tejkan jantukaʼ ixʼalin ni lakamunukpaʼ. 6 ’Ni lapanakni yu jalaksakmaxtʼu ni lakamunukpaʼ para kʼimaqxtʼaqnin kitʼin, va yuʼuncha klakmasunitacha tacha unitʼa ni uxintʼi. Va minavin ixtajunita pero uxintʼi kʼimaqxtʼaqnin ni kitʼin. Yuʼuncha tamakata kuenta ni minchivinti. 7 Chavay ox takʼatsay ni va si kun uxintʼi minchal tachun yu kʼimaqxtʼaqnin. 8 Kitʼin ijkalaqputeʼenilcha ni chivinti yu uxintʼi kʼimaqxtʼaqnin, ex yuʼuncha talaqaʼil. Ox takʼatsay va kun uxintʼi kmintachal y talhakapuʼantacha ni va uxintʼi kʼimalaʼachʼatʼa. 9 ’Kitʼin ktapayniniyan por yuʼuncha. Jantu ktapayniniyan por yu valiʼiy lapanakni aniy lakamunukpaʼ. Va ktapayniniyan por yu kʼimaqxtʼaqnin, yuʼuncha va minavin tajunita. 10 Tachun yu kitʼin kinavin va si minavin. Vachuʼ tachun yu minavin va si kinavin ni kitʼin. La ixjatsukuntikʼan kilapanakni ox tasuy kiʼayaxtu. 11 ’Kitʼin jantucha apalay kaktaulaʼ aniy lakamunukpaʼ, va klaqʼantachaʼancha. Pero yuʼuncha vananaj katataylhaanaʼ aniy. KimPay kʼatʼi, vamun uxintʼi ox unitʼa, kʼalaklhistʼaktʼi kun la ixtapʼasta mintaqaʼuti ni lapanakni yu kʼimaqxtʼaqnin. Kalaklhistʼaktʼi para chʼantaun kataval tacha uxintʼi ali kitʼin chʼantaun juntau. 12 Tejkan kitʼin chʼantaun xaklaktʼavil aniy lakamunukpaʼ si ox xaklaklhistakʼa kun ixtapʼasta ni mintaqaʼuti yu kʼimaqxtʼaqnin. Jantu matichun katsʼanqal, vamun tsʼanqal qayntaun yu aqtsʼiyaj istsʼanqatacha, va para chuncha katapasal tacha maqancha istsʼoqkanta. 13 ’Chavay kaklaqʼantachaʼancha. Pero vananaj kʼalinta aniy lakamunukpaʼ, xlhiyucha chuncha knajun tachun yu aniy para katalhitsukuʼol yu ox achati vachu va chun tacha klhitʼajun ni kitʼin. 14 Kitʼin klakjunita minchivinti. Ixtʼalapanaknikʼan aniy lakamunukpaʼ taxkajiy ni kilapanakni por jantucha chʼantaun kataval kun yuʼuncha. Chuncha tacha kitʼin jantu xalapanaki aniy lakamunukpaʼ kakval. 15 Kitʼin jantu kskʼiniyan para kʼalakmaxtʼu aniy lakamunukpaʼ. Yu kskʼiniyan va kʼalaqʼaqtʼayʼutʼi tejkan ni aqmoqxnuʼ kalaqmamaqanlqajnivaputul. 16 Jantucha chʼantaun kataval kun xalapanakni aniy lakamunukpaʼ, chuncha tacha kitʼin jantu xalapanakni lakamunukpaʼ kakval. 17 Kʼalakmasunin minchivinti y chuncha kʼalakmakʼanin milapanakni. Minchivinti vamun yuʼ yu laqsaval. 18 Chuncha tacha uxintʼi kʼimalaʼachʼatʼi aniy lakamunukpaʼ vachu chun ni kitʼin klaqmalaqachay para katalhixaqalal minchivinti yu xalapanakni aniy lakamunukpaʼ. 19 Va por yuʼuncha kmaqxtaqniyan ketsukunti para vachuʼ minavin kaval ixjatsukuntikʼan. 20 ’Kitʼin jantu ktapayniniyan vamun por kilapanakni. Vachu ktapayniniyan por alati yu kintalhakapuʼanaʼ astan tejkan kataqasmakyaʼ kinchivinti yu katalaqputeʼeyaʼ kilapanakni. 21 Vachu kskʼiniyan para chʼantaun kataval. Vachu chun tacha uxintʼi ali kitʼin chʼantaun juntau. Vachuʼ chʼantaun kataval kun kijnan para katalhakapuʼal yu xalapanakni aniy lakamunukpaʼ ni va uxintʼi kʼimalaʼachʼatʼa. 22 Vachu chun tacha uxintʼi ay kʼimakʼatʼa ni kitʼin, kitʼin vachuʼ lajʼay klakmakata ni yuʼuncha. Ex va chʼantaun katajunaʼ, vachu chun tacha ni uxintʼi kun kitʼin va laqataun juntau. 23 Kitʼin chʼantaun kunita kun yuʼuncha y uxintʼi chʼantaun unitʼa kun kitʼin. Va tacha laqataun kataval ni yuʼuncha. Ex ni xalapanakni aniy lakamunukpaʼ lay katakʼatsal ni va uxintʼi kʼimalaʼachʼatʼa, vachu katakʼatsal ni uxintʼi jalakpʼaxkʼay kilapanakni vachu chun tacha kʼimpʼaxkʼay ni kitʼin. 24 ’KimPay kʼatʼi, uxintʼi kʼimaqxtʼaqnin ni yuʼuncha. Kitʼin knajun vachuʼ ancha katataulal taʼan kitʼin kaktaulanta para lay katalaqtsʼil ni kiʼayaxtu. Uxintʼi kʼimpʼaxkʼay, xlhiyucha ay kʼimakʼatʼa tus la maqancha mas tejkan jantukaʼ ixʼalin ni lakamunukpaʼ. 25 KimPay kʼatʼi yu vas unitʼa, ni xalapanakni aniy lakamunukpaʼ jantu tamispayan. Pero kitʼin kmispayan y kilapanakni takʼatsay ni uxintʼi kʼimalaʼachʼatʼa. 26 Kitʼin klakmasunitacha taʼayucha ni uxintʼi, vachuʼ tas unitʼacha. Vananaj ktaylhaʼanta jalakmasuniniʼ. Knajun katalapaxkal vachu chun tacha uxintʼi kʼimpʼaxkʼay. Vachu kaktsukuyaʼ la ixjalhanutkʼan.

18

1 Tejkan chuncha naunʼol ni Jesús ex tataxtulcha chʼantaun kun ixtʼaltanan yu jalakmalaniy para katatakukchalcha yu xalaqxqatij Cedrón. Ancha jalaktʼatanuchalcha ni Jesús taʼan ixchʼankan xakʼiu olivos. 2 Ni Judas yu kamaqxtaʼaʼ ni Jesús, yucha vachu ox ixjamispanan ni ancha taʼan ixʼalin ni olivos. Ni Jesús aqlhuvaj ixtataqxtoqtacha ancha chʼantaun kun ixtʼaltanan yu jalakmalaniy. 3 Ex ni Judas jalaktʼachaʼal oqxlaqtaun tropas. Vachuʼ taʼal yu talhistaknan lakatajtan, va chuncha talhinaul ni xaʼukxtinin kuras ali yu fariseos. Ixtalhaʼanta ixpamaqninkʼan vachuʼ ixtalhaʼanta ixqaʼichikʼan ali ixmaklkukʼan. 4 Ni Jesús ox ixkʼatsay tachun yu kalhitapasayaʼ, ex taxtul y jalaklhisakmil: —¿Taʼayucha lakxkʼauyatʼikcha? 5 Ex taqaltayl, va tajunil: —Kijnan klakxkauyau Jesús yu machaqaʼ Nazaret. Ex ni Jesús naul: —Va kitʼin kunita. Ni Judas yu ixmaqxtaʼa ni Jesús ancha ixjalaktʼayalcha tachun yu ixjalaklhaʼanta. 6 Tejkan Jesús jalakjunil: “Va kitʼin kunita”, ex niman tatatichoqoʼal tus tataqtal lakatʼun. 7 Ni Jesús aaqtaun jalaklhisakmichoqol: —¿Tasʼayucha ni lakxkʼauyatʼikcha? Ex yuʼuncha aaqtaun taqaltayananchoqol: —Kijnan klakxkauyau va Jesús yu machaqaʼ Nazaret. 8 Chuncha ni Jesús aaqtaun jalakjunchoqol: —Kitʼin klajuniucha ni va kitʼin kunita. Incha laqsaval va kitʼin kilalakxkauyau ex kʼalaqxtʼaqnitʼik lakatin kataʼal yu aniy tayanal. 9 Chuncha naul va para chuncha kaval tacha ixnajuntacha ni Jesús: “KimPay kʼatʼi, tachun yu kʼimaqxtʼaqnin jantu katsʼanqal mas va qayntaun.” 10 Ex ni Simón Pedro maxtul ixʼespada yu ixlhitʼajun, niman aqatuchaqxpʼuxlhi aqxtaun ixʼaqaxqol taʼan la ixlhijakanaj qayntaun yu junkan Malko. Yucha va ixʼoqxtamati ixjunita yu xaʼay kuraj. 11 Ex ni Jesús junil ni Pedro: —Kʼamanuchʼoʼocha miʼespada la xapaʼinaj. Yu kimPay yucha kixtaqnil para ayaj kakmaqanlqajnal, kitʼin maqskʼiniy kaklaqaʼil. 12 Ni tropas ali ixʼukxtinkʼan, vachuʼ ni israelitas yu xalhistaknan lakatajtan tachʼapachal ni Jesús, va tachʼil. 13 Pʼunaj talhaʼal la ixchaqaʼ qayntaun jalhachimoʼonuʼ yu junkan Anás. Yucha va ixʼapaʼ ni Caifás yu ay kuraj ixjunita ni anchanuʼ jachʼitin. 14 Ni anchanuʼ Caifás vachu va yuʼ yu jalakjunil ni israelitas ni apalay ox kaxajchal incha kanil qayntaun lapanaki por tachun yu alati. 15 Ni Simón Pedro ali aqayntaun ixtʼaltanaʼ Jesús, yuʼuncha astan ixtatʼaʼanta ni Jesús. Ni anuʼ yu tʼaʼal ni Pedro yucha ixmispay ni ay kuraj. Yucha vas tanuchal taʼan lhaʼankal ni Jesús la ixjapuchʼanan ixchaqaʼ ni ay kuraj. 16 Yu Pedro tamakaul ixlhimaqspaʼ laka puerta, ex ni anchanuʼ yu ixmispay ni ay kuraj taxtul maqspaʼ. Ex lhijunil ni jatsiʼi yu xamalaqltiʼanaʼ para kamalaqpusul ni Pedro, ex tanulcha. 17 Chuncha ni xamalaqltiʼanaʼ lhisakmil ni Pedro, va naul: —¿Jantu uxintʼi kaʼuntʼi xaqayntaun ixtʼaltanaʼ ni anu lapanaki? Ex qaltayl ni Pedro, va junil: —Jantu kitʼin kakval. 18 Anchanuʼ julchan ayaj lhikʼasnin ixjunita. Ni oqxtamatin ali xalhistaknan lakatajtan ixtamamata jikmi, va ixtatʼajun sʼonun. Vachuʼ ancha ixyal ni Pedro, ixlaktʼatʼajun sʼonuʼ. 19 Ni ay kuraj aqtayl lhisakmiy ni Jesús taʼayucha ixtʼaltanan yu jalakmalaniy. Vachu lhisakmil tisuncha chivinti ixmasuy. 20 Ni Jesús junil: —Kitʼin kmasuy kinchivinti la ixlakaʼukxpukʼan tachun ni lapanakni. Vachuʼ kmasuy taʼan tataqxtoʼa yu alati israelitas y vachuʼ yu ay lakatajtan. Jantu aqtaun kmasuy laqatamaqsaq. 21 ¿Valiʼiycha kʼilhisakmiycha ni kitʼin? Kʼalhisakmitʼi yu kintaqalasmaklhi. Yuʼuncha katanaul yu klaqlhixaqalal, yuʼuncha takʼatsay tachun yu knaul ni kitʼin. 22 Tejkan chuncha naul ni Jesús ex qayntaun tropa yu ixjalhistaknan yu ay lakatajtan niman palaqstisal laqataun, va junil: —¿Valiʼiycha chuncha lhiʼaltʼaʼiy ni ay kuraj? 23 Ni Jesús junil: —Incha kitʼin jantu vas kakchivinil ex kʼiʼun tisuncha yu jantu vas kaknaul. Pero incha vas kchivinil, ¿ex valiʼiycha ixkʼisay? 24 Ex ni Anás lhinaul kalhaʼankal tachʼin taʼan vil ni Caifás yu xaʼukxtin kuraj. 25 Ni Pedro vananaj ixtaylhaʼanta sʼon laka jikmi. Lati talhisakmil, tajunil: —¿Jantu uxintʼi kaʼuntʼi xaqayntaun ixtʼaltanaʼ ni anchanuʼ lapanaki? Ni Pedro jantu kalhitaulal, va naul: —Jantu kitʼin kval. 26 Astan chivinil qayntaun ixʼoqxtamati yu ay kuraj. Yucha ixlaqaj ixjunita yu aqatuchaqxpʼuxlhi ni Pedro. Yucha vachuʼ lhisakmil, va junil: —¿Uxintʼi klaqtsʼin chʼantaun kun yucha ancha laka olivos? 27 Ni Pedro aaqtaun jantu kalhitaulal. Exnicha tʼasal ni puyux. 28 Tejkan tamaqaxtulcha la ixchaqaʼ ni Caifás ex ni lapanakni talhaʼalcha ni Jesús laqa ay chaqaʼ taʼan vil ni gobernador. Va ixtʼajuncha tunkunuʼ. Yuʼuncha jantu katatanuputunchal. Ixtalhilay incha katatanul la ixchaqaʼ qayntaun yu jantu israelita kaval ex kataxkilival ixjatsukuntikʼan. Ex astan jantucha lay katavayl la ixkʼatankʼan yu Paxku, ex jantu katatanul. 29 Xlhiyucha ni Pilato taxtul maqspaʼ para katʼachivinil, ex jalakjunil: —¿Tisuncha laqtaqal mukʼaniyatʼik ni aniy lapanaki? 30 Ex taqaltayl, va tajunil: —Yu va jantu ixlhitsukul tuʼuchun laqtaqal, kijnan jantu xaklalhiminiu. 31 Ex va chuncha jalakjunil ni Pilato: —Kʼalhipʼintʼikcha, uxiknan kʼamukʼanitʼik laqtaqal tacha yu lhinajun la milhachimoʼonkʼan. Ex taqaltayl ni israelitas, tajunil: —Kijnan yu israelitas kuntau jantu klhitsukuu lakatin kakmaqniu qayntaun lapanaki por ixlaqtaqal. 32 Ex laqsaval chuncha tapasal tacha naul ni Jesús tas kunacha tejkan kaniyaʼ. 33 Ni Pilato aaqtaun tanuchoqol laqa ay chaqaʼ ex juntaʼil ni Jesús, va lhisakmil: —¿Uxintʼicha kʼatʼi yu ay ixjalhachimoʼonukʼan ni israelitas? 34 Ni Jesús junil: —¿Va chuncha pʼastʼakʼa milaqʼaman u va chuncha tajuniy yu alati yu kintalhichiviniy kitʼin? 35 Ex qaltayanal ni Pilato, va naul: —¿Kilhilay ni kitʼin va israelita kunita? Tachun yu mintʼamachaqan ali yu xaʼukxtinin kuras, va yuʼuncha tamaqxtaqyan la kintamakaʼ. ¿Tisuncha laqtaqal makʼatʼa? 36 Ex qaltayanal ni Jesús: —Kimpalhachimoʼon jantu aniy lakamunukpaʼ kaval. Incha va aniy ixval ex xaklhitsukul lapanakni yu ixkintaʼaqtayjul para jantu kintachʼapachal kintʼaʼisraelitas. Pero kimpalhachimoʼon jantu aniy kaval. 37 Ex ni Pilato aaqtaun naunchoqol: —Ex ni uxintʼi ka va jalhachimoʼonu kʼatʼi. Ex ni Jesús qaltayl, va junil: —Laqsaval yu naʼun, ni va kitʼin jalhachimoʼonuʼ kunita. Xlhiyucha ktsukul aniy, kmil lakamunukpaʼ va para knaul yu laqsaval. Tachun yu taʼachaniy yu laqsaval yuʼuncha kintaqasmakniy kinchivinti. 38 Ex qaltaychoqol ni Pilato, va junil: —¿Ex tisuncha yu laqsaval? Tejkan chuncha naul ni Pilato ex anchoqol maqspaʼ jalaktʼachivin ni israelitas, jalakjunil: —Kitʼin jantu ktemaniy tuʼuchun laqtaqal ni aniy lapanaki. 39 Pero mimputsukukʼan yucha najun ni kitʼin maqskʼiniy kakxʼoqlhi qayntaun tachʼin tejkan xakʼatan Paxku jun. ¿Naunatʼik kakxʼoqlhi ni aniy lapanaki yu junkan mijalhachimoʼonukʼan ni uxiknan yu israelitas untʼatʼik? 40 Tachun tamatʼasal, tajunil: —¡Jantu kaxʼoqtʼi ni anchanu lapanaki! ¡Va kaxʼoqtʼi ni Barrabás! Ni Barrabás yucha va alhavanaʼ ixjunita.

19

1 Ex ni Pilato chʼapachal ni Jesús, lhinaul ixmaqanaqka. 2 Yu tropas tamalaqxtoqlhi jaltukun, tamakal laqataun korona. Ex tamaʼaqtanul la ixʼaqtsul, vachu taʼulanil aqxtaun laqchʼiti yu xakolor qoteʼe tacha ixtaʼulay jalhachimoʼonun. 3 Ex tatalakanunil ni Jesús, tanaul: —¡Katsukul ixlhachimoʼonukʼan ni israelitas! Tachun ixtalakapusay. 4 Ni Pilato aaqtaun taxtuchoqol, jalakjunil ni lapanakni: —Kʼaʼasmaktʼik. Kitʼin kmaqaxtul va para kataxtaqnin kuenta ni kitʼin jantu kaktemanil tuʼuchun laqtaqal. 5 Chuncha taxtulcha ni Jesús, ixʼaqtanuy ixkorona yu jamakanti kun jaltukun, vachu ixʼulata ni anchanu laqchʼiti yu qoteʼe. Ex naul ni Pilato: —Kʼalaqtsʼintʼik ni aniy lapanaki. 6 Tejkan ni xaʼukxtinin kuras ali yu xajalhistaknan lakatajtan talaqtsʼil ni Jesús, ex aqtayl pʼays tamatʼasay, tajunil: —¡Kʼamakxtʼukmukʼacha! ¡Kʼamakxtʼukmukʼacha! Chuncha ni Pilato jalakjunil: —Kʼalhipʼintʼikcha, kʼamakxtʼukmukʼatʼikcha uxiknan. Kitʼin jantu tuʼuchun laqtaqal ktemaniy. 7 Ex tanaul ni israelitas: —Kijnan la kilhachimoʼonkʼan, ancha najun yu aniy lapanaki maqskʼiniy kanil, va por najun ni yucha Sasʼatʼa Dios junita. 8 Tejkan chuncha qasmaklhi ni Pilato ex ayaj talhanal. 9 Tanuchoqochalcha aaqtaun ixpulakna ni ay chaqaʼ, va lhisakmil ni Jesús: —¿Toʼoxtaycha machaqa kʼatʼi ni uxintʼi? Pero yu Jesús jantu kaqaltayl. 10 Ex ni Pilato va junil: —¿Ex jantu kʼiʼaltʼayeʼe? ¿Jantu kʼatsʼay ni kitʼin klhitʼajun tapʼasta para kakmakajun oxamaktaun, vachu klhitʼajun tapʼasta para kakmakxtukmukʼan? 11 Ex qaltayl ni Jesús, va junil: —Yu mintapʼasta yu lhitʼaʼun vamun yu xtaqnin ni Dios. Xlhiyucha apalay ay laqtaqal tataukʼaniyachal yu kimaqxtaqlhi la mintamakaʼ. 12 Tejkan chuncha naul ni Jesús ex ni Pilato ayaj ixlakxkauniy tas kamakalcha para kamakaul oxamaktaun, pero yu israelitas pʼays tamatʼasal, tajunil: —Incha kʼamakʼauneʼe oxamaktaun ex jantu kaʼuntʼi ixʼamigo ni ay jalhachimoʼonuʼ César. Aniy lapanaki makakan tacha ay jalhachimoʼonuʼ kaval, xlhiyucha va ixtʼalaxkayaʼ ni César. 13 Tejkan chuncha qasmaklhi ni Pilato, ex lhinaulcha kamaqaxtukkal ni Jesús. Chuncha ni Pilato taulalcha laka siya yu palhachimoʼon yu vil taʼan ixlakmamakanta laqxtaʼalachiyux ixlhimaqspaʼ laqa ay chaqaʼ, ancha va junkan Gabata laka lhihebreo. 14 Ni anchanu julchan va paqtauncha istsʼanqay para xakʼatan Paxku yu ay ixkʼatankʼan ni israelitas. Tejkan atunkujcha ixjunita ex jalakjunil ni israelitas ni Pilato: —Aniy lhitʼaunatʼikcha la mintamakakʼan ni mijalhachimoʼonukʼan. 15 Ni yuʼuncha pʼays tamatʼasal, tajunil: —¡Tsʼanqay kanil! ¡Kanilcha! ¡Kʼamakxtʼukmukʼacha! Ex va chuncha jalhisakmil ni Pilato, va naul: —¿Ex kitʼin kakmakxtukmukʼayaʼ ni mijalhachimoʼonukʼan? Chuncha taqaltayl ni xaʼukxtinin kuras: —Kijalhachimoʼonukʼan vamun ni César yu ay jalhachimoʼonuʼ. Jantu kaklhitsukuu aqayntaun. 16 Ex ni Pilato maqxtaqlhicha ni Jesús para kamakxtukmukʼakalcha. Ex talhaʼalcha. 17 Ni Jesús taxtulcha, aqxaulhaʼalcha ixkurus taʼan ixlhimapaqaʼukan Xajalukuti Aqtsul yu laka lhihebreo junkan Gólgota. 18 Ancha tamakxtukmukʼachal chʼantaun kun qayntʼuy lapanakni yu lakmakxtukmukʼakanta la ixpaʼexnan, yucha tanʼajmukʼakalcha. 19 Ni Pilato jamalaqachanal kaʼankal tsʼoqmukʼaka letras la ixʼukxna ixkurus yu najun inchineʼ: “Jesús yu machaqaʼ Nazaret yu ay ixJalhachimoʼonukʼan ni israelitas.” 20 Ayaj qaynlhuu israelitas taputeʼel ni letrero, taʼan tamakxtukmukʼal ni Jesús jantu ixlhimaqati ixjunita yu ay putaulan. Yu letrero istsʼoqkanta laka putʼutu lhichivin. Istsʼoqkanta laka lhihebreo ali laka lhilatin ali laka lhigriego. 21 Xlhiyucha ni xaʼukxtinin kuras ali ni israelitas tajunil ni Pilato: —Jantu katsʼoqmukʼa “Ixjalhachimoʼonukʼan ni israelitas.” Apalay ox katsʼoqmukʼa “Yu ixnajun va ixJalhachimoʼonukʼan israelitas junita.” 22 Ni Pilato jalajqaltayl, jalakjunil: —Va chuncha ktsʼoqmukʼal, ex va chuncha kavalcha. 23 Taval tejkan tamakxtukmukʼalcha ni Jesús ex ni tropas tasaknil ixlaqchʼiti. Talaqlvaqnilcha siya yuʼuncha yu pumatʼati tropas ixtajunita. Vachu tasaknil aqxtaun ixlaqchʼiti yu jantu kalakatsʼapʼamakal, valiʼiy aqxtaun lman laqchʼiti ixjunita. 24 Ex ni tropas talajunil siya yuʼuncha: —Ox kaval jantu kalajʼexvi. Kamakau taun suerte para kakʼatsau tasʼayucha kapaxtoqniyacha. Ex laqsaval chuncha tapasal tacha tsʼoqkanta la ixchivinti Dios taʼan junkan Salmo yu najun inchine: “Talaqlvaqnil por qayntamin kilaqchʼiti y vachu tamakal suerte por kilaqchʼiti yu lman.” Y laqsaval chuncha tamakal ni tropas. 25 Ancha taʼan ixyal ni kurus, ixtayanal pumatʼati xanatin. Ancha ixyal ixnati ni Jesús ali ixtʼalapanaki ixnati ali ixanati Cleofas yu junkan María, vachu ancha ixyal ni María Magdalena. 26 Ni Jesús laqtsʼil ni ixnati va chʼantaun ixtʼayal ixtʼaltanaʼ yu ayaj ixʼachaniy. Ex junil ni ixnati: —Xanati, anchanuʼ yal mintsʼal. 27 Astan vachu junil ixtʼaltanaʼ yu ixmalaniy: —Kalaqtsʼi, anchanuʼ yal minati. Ex ni anchanu laqaʼil la ixchaqaʼ. 28 Ex astan ni Jesús tejkan tapasaʼolcha tachun yu ixmaqskʼiniy katapasal, ixnajun kataqayntsal tacha istsʼoqkanta, xlhiyucha naul: —Ayaj kpukikxixa. 29 Yu tropas ixtaʼulata taun xaluj vinagre. Tamatajul taun esponja ex taʼakatachʼimukʼal aqatataun javan yu junkan hisopo, talhachaʼanil la ixkilna. 30 Ni Jesús oqlhi ni vinagre ex naul: —Chavay taqayntsaʼolcha. Ex maqayntalcha ixʼaqtsul, ex nilcha. 31 Anchanu julchan va tauncha julchan istsʼanqay para kaval Paxku yu ay ixkʼatankʼan ni israelitas, vachu yu xajulchan jastaknati yu ayaj ixtatoʼoyay ni israelitas. Yuʼuncha jantu ixtamaqamay katamakaul laka kurus yu ixlakatunajkʼan yu ixlakmakxtukmukʼakan. Xlhiyucha tajunil ni Pilato para kalhinaul ixlajqatuteʼekakʼan para katanil y kamaqosukal ixlakatunajkʼan. 32 Yu tropas tejkan ancha tachaʼal, pʼunaj taqatuteʼel qayntaun yu ixmaknajukʼal, vachu yu aqayntaun taʼan ixpaʼexna ixjukʼal ni Jesús. 33 Pero tejkan talaqʼal ni Jesús taʼan ixjukʼal ex niman talaqtsʼil ni yucha ixnitacha. Ex jantucha kataqatuteʼel. 34 Pero qayntaun tropa vananaj ltoqonil ixtankilakna kun ixlanza, ex taxtul ixjakʼalnan kun xkan. 35 Yu laqsaval laqtsʼil yucha laqputeʼey tachun yu tapasal, va ox kʼatsay y najun yu laqsaval para kʼalhakʼapʼupʼintʼik vachuʼ. 36 Tachun yu aniy tapasal para kataqayntsal yu istsʼoqkanta la ixchivinti Dios yu najun inchineʼ: “Yucha jantu intachun katalaqteʼeniyaʼ ixjalukuti.” 37 Vachuʼ alakataun istsʼoqkanta yu najun inchineʼ: “Katalaqtsʼinaʼ ni lapanaki yu taltoqol.” 38 Ixʼalin qayntaun José yu machaqaʼ Arimatea yu vachu ixtʼaʼan Jesús para kalanil, pero va laqatamaqsaq. Ixjalaktalhauniy yu xalajʼaynin israelitas. Yucha tapayninil ni Pilato para kaxtaqnikal lakatin incha lay kalhaʼal ixlakatunaj ni Jesús. Ni Pilato xtaqnil lakatin ex alcha pʼuxnuʼ ni ixlakatunaj. 39 Vachuʼ chinchal ni Nicodemo, yucha va yu ixtʼachivininta ni Jesús aqtauncha tejkan tsʼis ixjunita. Lhichil treinta kilos yu sʼejenʼe perfume, ixlhiyal xakʼiu mirro ali aloes. 40 Ex ni José ali Nicodemo tapʼuxlhicha ixlakatunaj ni Jesús, aqtayl tapamiliy kun laqchʼiti. Ox talhilakaxapal ni sʼejenʼe perfume, va chuncha ixputsukukʼan ni israelitas tejkan ixtamaknunun. 41 Taʼan tamakxtukmukʼal ni Jesús ixʼalin taʼan ixchʼankanta olivos, ancha ixʼalin laqataun putaknun yu ox saystʼi ixjunita. Jantukaʼ matichun ixmamakan. 42 Va laycha kaʼaqtaynil xajulchan jastaknati y jantu maqati ixjunita yu putaknun. Ex ancha tamaʼalcha ixlakatunaj ni Jesús.

20

1 Yu xapʼunaj julchan laka semana ni puvakuj tejkan vanaj tsʼis ixjunita ex ni María Magdalena al laka putaknun. Ancha laqtsʼil ni va ixmoqosukantacha ni chiyux yu ixlhimalakchaukanta. 2 Ex takyaulaqʼal ni Simón Pedro ali yu aqayntaun ixtʼaltanaʼ Jesús yu ayaj ixʼachaniy. Va lakjunil: —¡Tamoqosutacha ni Jalhachimoʼonu Jesús la ixputaknun! ¡Jantu ijkʼatsayau toʼoxtaycha talhaʼanta! 3 Ex Pedro ali yu aqayntaun ixtʼaltanaʼ Jesús taʼal laka putaknun. 4 Tatakyauʼal pero yu aqayntaun apalay soqol xajantu yu Pedro, yucha pʼunaj chaʼal laka putaknun. 5 Ancha taqayntal, va lakavanal ixpulakna taʼan ixmal ni laqchʼiti yu ixlhipamilkanta pero jantu katanul. 6 Ex astan chaʼal ni Simón Pedro, yucha vas tanuchal laka putaknun. Ancha laqtsʼil ni laqchʼiti yu ixmal, 7 vachuʼ ni laqchʼiti yu ixlhipamilnikanta ixʼaqtsul ni Jesús. Ni anchanuʼ laqchʼiti jantu chʼantaun katamal kun yu alati laqchʼiti, va tumpaj ixmilmakanta. 8 Ex yu aqayntaun yu pʼunaj chaʼal vachuʼ tanuchal. Va laqtsʼil ex lhakapuʼal ni kujchoqol. 9 Jantukaʼ ixtamalaqasiy tacha istsʼoqkantacha la ixchivinti Dios ni maqskʼiniy kakujchoqol laka janinin. 10 Ex ni anchanuʼ pumatʼuy yu ixjalakmalaniy Jesús taʼanchoqol laqa chaqaʼ. 11 María ixqalhunyal ixlhimaqspaʼ laka putaknun. Tejkan ixqalhun va taqayntal, va lakavanal ixpulakna ni putaknun. 12 Ancha laqtsʼil qayntʼuy ixmayulnin Dios, ixtalhilakayanal laqxutʼutʼu laqchʼiti, va ixtavilanal taʼan ixmamakanta ixlakatunaj ni Jesús, qayntaun la ixlaqaʼaqtsul, yu aqayntaun la ixlakachʼajaʼ. 13 Ex tajunil: —Xanati, ¿valiʼiycha alhun? Ex yucha qaltayanal: —Talhaʼantacha ixlakatunaj kiJalhachimoʼonuʼ y jantu ijkʼatsay toʼoxtaycha tamamatacha. 14 Ex talaqaspʼiklhi, va laqtsʼil ni Jesús yu ancha ixyal pero jantu kamispal incha va Jesús. 15 Ex ni Jesús va junil: —Xanati, ¿valiʼiycha alhun? ¿Taʼayucha lakxkʼaʼuycha? Ni María lhilal va xalhistaknaʼ ni jatachʼanati, ex chuncha junil: —Incha va uxintʼi lhipʼi ex kiʼun toʼoxtaycha mamatʼa ex kitʼin kajkʼanaʼ iniʼ. 16 Ex ni Jesús junil: —María. Ni María talaqaspʼiklhi, va lhimapaqaʼul: —¡Raboni! (Yucha naunputun maestro laka lhihebreo.) 17 Ni Jesús va junil: —Jantucha kʼinchʼapʼa, jantukaʼ kpataxtuchoqoy taʼan vil kimPay. Kʼalaqpʼinchʼiy ketʼalaqaunin. Kʼalakʼun ni kakpataxtuchoqoyaʼ taʼan vil kimPay yu vachuʼ mimPaykʼan, yucha kiDios y vachuʼ miDioskʼan. 18 Ex ni María Magdalena jalaqʼal ixtʼaltanan ni Jesús, va jalakjunil: —¡Va klaqtsʼil ni Jalhachimoʼonu Jesús! Ex jalaqputeʼeniʼol tachun yu ixjunkanta. 19 Ni anchanu julchan yu xapʼunaj laka semana tejkan putsʼista val, ixtaʼaqxtoqnun ixtʼaltanan Jesús yu ixjalakmalaniy. Ixtalaqachʼinunun laqa chaqaʼ, va ixtatalhauniy yu alati ixtʼaʼisraelitaskʼan. Ex va chinchal ni Jesús, va tayachil taʼan ixtavilanal. Va lakjunil: —Kʼatʼaʼoxamaktʼamichʼoʼotʼik. 20 Tejkan chuncha naul, va jalakmasunil ixmakaʼ ali ixtankilakna. Ixtʼaltanan va ayaj talhiʼachantajul tejkan talaqtsʼil ixJalhachimoʼonukʼan. 21 Aaqtaun naunchoqol ni Jesús: —Kʼatʼaʼoxamaktʼamichʼoʼotʼik. Vachu va tacha kimalaqachal ni kimPay vachu va chun klamalaqachayau ni uxiknan. 22 Tejkan chuncha naul, va jalaksunul ex naul: —Kʼalaʼaʼitʼik ni Espíritu Santo. 23 Incha uxiknan malaqmixiniyatʼik ixtalaqalhin matichun ex va malaqmixikantacha. Incha naunatʼik ni jantu kamalaqmixikal ixtalaqalhin ex jantu kamalaqmixikal. 24 Ni Tomás yu vachuʼ ixlhimapaqaʼukan Jachiyan, xaqayntaun yu pumakautʼuy ixtʼaltanan Jesús, yucha jantu kalaktʼataulal tejkan jalaktasunil ni Jesús. 25 Yu alati ixtʼaltanan Jesús tajunil: —¡Klaqtsʼiucha ni Jalhachimoʼonu Jesús! Pero ni Tomás jalakjunil: —Incha jantu klaqtsʼiniy taʼan ixmakxtukkanta kun klavos, vachuʼ incha jantu kmanuy kimakaʼ taʼan ixmaqltoqokanta, vachuʼ taʼan ixtanqalaqltoqokanta, ex jantu klhakapuʼanaʼ ni kujchoqotacha. 26 Tejkan tauncha semana val ixtaʼaqxtoqnunchoqoy ixtʼaltanan ni Jesús. Yu Tomás vachuʼ ancha ixʼalinta kun yuʼuncha. Mas ox ixlakchajuy ni puertas, va chil ni Jesús, tayachal taʼan ixtaʼalinta. Va naul: —Kʼatʼaʼoxamaktʼamichʼoʼotʼik. 27 Ex naul, va junkal ni Tomás: —Kʼamanutʼi aniy mimakaʼ, vachuʼ kalaqtsʼi ni kimakaʼ. Kʼalhitʼi mimakaʼ ex kʼamanutʼi la kintankilakna. Jantucha kʼalapʼasnitʼi mijatapastakʼatʼi, kʼalhakʼapʼupʼicha. 28 Ni Tomás qaltayl: —¡KiJalhachimoʼonu kʼatʼi y kiDios kʼatʼi! 29 Ex ni Jesús va junil: —¿Va chavaykaʼ xalhakʼapʼupʼin tejkan kʼilaqtsʼi? Ni lapanakni yu kintalhakapuʼan mas jantu kintalaqtsʼin va yuʼuncha yu laqsaval taʼachantacha. 30 Ni Jesús jalakmasunichoqol ixtʼaltanan yu jalakmalaniy lhuu lajʼay axtoqnuʼ yu jantu katsʼoqmukʼakal aniy laka libro. 31 Pero yu aniy tsʼoqmukʼakal va para kʼalhakʼapʼupʼintʼik ni Jesús va yu Cristo, yu Dios ixnajunta kamalaqachayaʼ, vachuʼ yu Sasʼatʼa Dios junita. Kʼalhitsʼukʼuyapitik yu ox jatsukunti incha chuncha kʼalhakʼapʼupʼinapitik.

21

1 Astan ni Jesús aaqtauncha jalaktasunichoqol ixtʼaltanan yu ixjalakmalaniy taʼan ixkilpaʼ lakamar yu junkan Tiberias. Va inchineʼ val. 2 Va chʼantaun ixtaʼalinta ni Simón Pedro ali Tomás yu junkan Jachiyan ali Natanael yu machaqaʼ Kaná xalakatʼun Galilea ali yu pumatʼuy istsʼalan Zebedeo ali apumatʼuy yu ixjalakmalaniy ni Jesús. 3 Ni Simón Pedro va jalakjunil yu alati: —Kitʼin kteʼen chʼapanaʼ jatanti. Ex yuʼuncha tajunil: —Vachuʼ klatʼaʼanau. Ex taʼal laka barco pero tus taun tatsʼisin jantu tuʼuchun katachʼapal. 4 Tejkan ixtunkumintacha ni Jesús ixyal la ixkilpaʼ ni lakamar pero jantu katamispal incha va yucha. 5 Ex va jalaklhisakmil: —Tsʼalan, ¿jantukaʼ chʼapʼayatʼik tuʼuchun? Yuʼuncha tanaul: —Jantu. 6 Ex jalakjunil: —Kʼatʼanʼalhutʼik minchʼoqxkʼan la ixlhijakanaj ni barco, ex kʼachʼapʼayapitik. Ex tatanqalhul ixchʼoqxkʼan pero jantucha lay ixtaxaqakutuchoqoy por lhuu jatanti ixtanun. 7 Ni ixtʼaltanaʼ Jesús yu ayaj ixʼachaniy va junil ni Pedro: —¡Va yucha ni Jalhachimoʼonuʼ! Tejkan Pedro qasmaklhi ni va yu Jalhachimoʼonu Jesús, va lhitampachʼikal ixlaqchʼiti yu ixmajʼanta ex jakʼiuklnil lakxkan. 8 Yu alati yu ixtʼaltanan ni Jesús tapuminchoqol barco, ixtaxaqamalhaʼanta ni chʼoqxni yu aqtsamanta jatanti. Jantu maqati ixtatʼajun la ixkilpaʼ, va tacha cien metros. 9 Tejkan tapatajul ancha la ixkilpaʼ va talaqtsʼil jayaqan. Ancha ixmal jatanti, vachuʼ ixʼalin pan. 10 Ex ni Jesús jalakjunil: —Kʼalhitʼantʼik ni jatanti yu xachʼapʼayatʼikkaʼ. 11 Ex ni Simón Pedro taukʼachoqol ni laka barco, va xaqamaxtul ni chʼoqxni tus la ixkilpaʼ. Va ixʼaqtsamanta kun lajʼay jatantin tus 153. Pero jantu kataʼexlhi ni chʼoqxni. 12 Ni Jesús jalakjunil: —Kʼavaynchʼipitik. Jantu matichun ixtʼaltanan ixtapujuy kalhisakmil taʼayucha ixjunita. Ixtakʼatsay ni va yu Jalhachimoʼonuʼ Jesús. 13 Ni Jesús al iniʼ ni pan y jalaqxtaqnil. Vachuʼ jalaqxtaqnil ni jatanti. 14 Yucha va yu aqtʼutunucha val tejkan Jesús jalaktasunil ixtʼaltanan tejkan ixkujchoqotacha la ixlhinin. 15 Tejkan tavaynʼolcha ex ni Jesús lhisakmil ni Simón Pedro: —Simón, istsʼal Jonás kʼatʼi, ¿apalay kʼiʼachʼaniy xajantu yu alati? Ex Pedro qaltayl: —Chun, Jalhachimoʼonuʼ. Uxintʼi kʼatsʼaycha ni va kitʼin kʼachaniyan. Ex ni Jesús junil: —Kʼalaklhistʼaktʼi kilapanakni, yu va tacha lakstʼuniy borregos tajunita. 16 Aaqtauncha ni Jesús lhisakmichoqol: —Simón, istsʼal Jonás kʼatʼi, ¿kʼiʼachʼaniy? Ex ni Pedro qaltaychoqol: —Chun, Jalhachimoʼonuʼ. Uxintʼi kʼatsʼaycha ni va kitʼin kʼachaniyan. Ex ni Jesús junil: —Kʼalaklhistʼaktʼi kilapanakni yu va tacha lakstʼuniy borregos tajunita. 17 Ex yu aqtʼutunuʼ ni Jesús lhisakmichoqol: —Simón, istsʼal Jonás kʼatʼi, ¿kʼiʼachʼaniy? Ex va maqaninil ni Pedro va por aqtʼutucha ixlhisakmiy ni Jesús incha ixʼachaniy. Ex va junil: —Jalhachimoʼonuʼ, uxintʼi kʼatsʼaʼoʼoy tachun. Va kʼatsʼaycha ni kitʼin kʼachaniyan. Ex ni Jesús junil: —Kʼalaklhistʼaktʼi kilapanakni yu tacha lakstʼuniy borregos tajunita. 18 Laqsaval kunan ni tejkan tsʼalkaʼ ixʼunitʼa ixmalaqchʼinikʼan meʼeman, ixpʼin taʼan ixʼuxipʼin. Pero tejkan kʼatʼaxapʼayayeʼecha ex kʼamakxnujkʼaneʼe, va aqayntaun kamalaqchʼiniyan. Vachuʼ kalhaʼanan taʼan jantu kaʼuxapʼineʼe. 19 Chuncha naul ni Jesús para kamasul tas kapuniyaʼ ni Pedro y chuncha ay kamakakanaʼ ni Dios. Ex ni Jesús junil: —Kʼintʼaltʼancha. 20 Ex ni Pedro talaqaspʼiklhi, va laqtsʼil yu aqayntaun ixtʼaltanaʼ Jesús, yu ayaj ixʼachaniy. Va yucha ixtaʼukstsʼuninita ni Jesús tejkan ixtatʼatʼajun vaynin y ixlhisakmitacha: “Jalhachimoʼonuʼ, ¿taʼayucha yu kamaqxtaʼancha?” 21 Tejkan Pedro laqtsʼil, va lhisakmil ni Jesús: —Jalhachimoʼonuʼ, ¿tas kalhitapasayacha kun yucha? 22 Ex ni Jesús qaltayl: —Incha kitʼin knajun jantu kanil tus tejkan kakminchoqol, ex yucha jantu minkuenta kaval. Ni uxintʼi maqskʼiniy kʼintʼaltʼancha. 23 Por chuncha naul ni Jesús, lati ni tʼalaqaunin ixtanajun ni anchanu lapanaki jantu kaniyaʼ. Pero ni Jesús jantu kanaul incha jantu kaniyaʼ, vamun naul: “Incha kitʼin knajun jantu kanil tus tejkan kakminchoqol, ex yucha jantu minkuenta kaval.” 24 Ni anchanuʼ ixtʼaltanaʼ ni Jesús, va yucha yu lhichivinil tachun yu aniy lhitapasal y va yucha yu tsʼoqlhi. Kijnan ijkʼatsayau ni va laqsaval yu najun. 25 Apalay lhuu axtoqnuʼ alin yu makal ni Jesús. Incha katsʼoqmukʼakal tachun por laqatamin, kitʼin knajun kamaqskʼinil aqxlhuu libros tus jantu kalhival ni lakamunukpaʼ. Va chuncha kaval.