/1 Ya calbeyexcotic awa'iyic bin u't'il ay te C'opil te ya ya'c' cuxlejal te stalel ay ta sjahchi'bal to tale; Yu'un te jo'otcotic laj ca'iycotic, laj quil ta jsitcotic, soc mero la jna'beycotic sba bin yilel, soc laj pictic ta jc'a'bcotic. Laj quilcotic chicnaj ta comonsitil te j'ac'cuxlejale; Jo'otcotic testigohotcotic yu'un; Soc ya calbeyexcotic awa'iyic bin u't'il ay te cuxlejal sbahtel q'uinale, ja' te ma'ch'a stalel ja' sjoc te Tatile, te chicnajix ta jcuentatique. Ja' yu'un ya calbeyexcotic awa'iyic te bintic laj quilcotique soc te laj ca'iycotique, scuenta yu'un jich me joc jbahtic yax c'ohotic a; Mero joc me jbahtic soc te Tatile, soc te Sni'ch'ane, ja' te Jesucristohe. Ja' la jtz'ihbabeyexcotic awa'iyic spisil ini, scuenta yu'un jich me yac awi'ch' xan yutzil awo'tanic a. Te sc'op ca'iybeyejcotique, ya calbeyexcotic awa'iyic: Ja' sacal q'uinal te Diose; Ma'yuc yihc'al q'uinal ta scuenta stuquel. Teme joquinej Dios, teme xchihotique, pero teme ayotic ta scuenta te yihc'al q'uinale, yacotic me ta lot a a'bi; Ma' meleluc te bin ya caltique. Yan teme ayotic ta scuenta te sacal q'uinale, jich te bin u't'il ay ta sacal q'uinal stuquel te Diose, jich me tal c'axel joc jbahtic ta stojol Dios a a'bi; Soc ja' yax pojc spisil jmultic a te ta sch'i'ch'el te Jesucristohe, ja' te Sni'ch'an Diose. Teme ma'yuc jmul, teme xchihotique, tojol me ya jlo'loy jbahtic; Yu'un nix ma'yuc ta jtojoltic a te smelelil c'ope. Yan teme jamal ya calbeytic jmultic te Diose, ya me spasbotic perdon yu'un spisil jmultic, soc ya me spocbotic lo'q'uel spisil sbohlil co'tantic; Como toj yo'tan stuquel, soc yax c'oht ta pasel yu'un spisil bin yaloj. Teme ma' nix ayuc ya jle jmul a te jo'one, teme xchihotique, yu'un ja' yac ta lot ta jc'optic a jiche te Diose, soc yu'un nix ma'yuc ta co'tantic a jiche te sc'ope. /2 Cal jni'ch'na'b, jich la jtz'ihbabeyex, scuenta yu'un ma' me xalehix amulic a; Pero teme repente ay ma'ch'a ya sta smule, ja' me yax c'opoj cu'untic ta stojol Jtatic Dios te Jesucristohe, te toj yo'tan stuquele.