Ti Xnich'on Diose laj yich' sbec'tal stacopal
1 C'alal lic meltsajuc talel scotol ti c'usitic oye, oy xa ono'ox ti Jesucristoe, ja' ti Buch'u ta xac' ta na'el stalel ti Diose. Ti stuque xchi'uc ono'ox sbaic xchi'uc ti Diose, yu'un ja' ono'ox Dios ti stuque. 2 Ti ta sliquebale, xchi'uc ono'ox sbaic xchi'uc ti Diose. 3 Ta sventa ti Jesucristoe, meltsaj scotol ti c'usitic oye. Mu'yuc buch'u yan laj smeltsan. 4 Ja' ta sventa ayan talel ti cuxlejale. Ti cuxlejal taje, ja' c'ot ta saquilal osil yu'un ti jnaclejetic ta banomile. 5 Yu'un xnobobet no'ox ta ic'al osil xojobal ti saquilal osile. Ti ic'al osile mu'yuc c'usi xut xtub yu'un ti saquilal osile. 6 Tal jun vinic ti Juan sbiinoje ti tacbil talel yu'un ti Dios 7 ta sva'anel sba ta yalbel ya'iic ti jnaclejetic ta banomil ti ja' bats'i j'ac'-cuxlejal ti Jesucristoe, yo' jech scotolic ta xc'ot ta yo'ntonic ti c'usi ta xal ti Juane. 8 Ti Juane ma'uc ti j'ac'-cuxlejale, yu'un ja' no'ox jun vinic tacbil talel yu'un ti Diose yo' ta svinajesbe sc'oplal ti j'ac'-cuxlejale. 9 Talem xa ta banomil ma' ti Buch'u ta xac' ti xojobal ta stojol scotol ti jnaclejetic ta banomile. 10 Ti j'ac'-cuxlejale li' xa oy ta stojol ti jnaclejetique. Manchuc mi ja' ta sventa meltsaj ti banomile, ti jnaclejetic ta banomil une mu'yuc laj yojtiquinic. 11 Tal ta stojol ti yalab xnich'nabe, ja'ic ti israeletique, ja'uc ti stuquique mu'yuc laj yich'ic ta muc'. 12 Ja'uc ti buch'u ich'vanic ta muq'ue, ti c'ot ta yo'ntonic ta xch'unele, ac'bat stsatsalic ti c'otic ta xnich'nab Dios yu'une. 13 Ti buch'u c'otic ta xnich'nab ti Diose, ja' ta xvoq'uesatic ta ach' yu'un ti Diose. Mu xa xco'olaj xchi'uc jech c'u cha'al ta xvoq'uesatic yu'un ti stot sme'ique, mi ja'uc ti c'usi oy ta yo'nton stuc ti jnaclejetic li' ta banomile. 14 Ti Jesucristoe laj yich' sbec'tal, naqui ta jtojolcutic. Melel, mu albajuc ti syail xc'uxul yo'ntone. Yu'un laj quilbecutic slequilal yutsilal, ti ja' slequilal yutsilal stuc ti c'ajomal no'ox yo junomal Xnich'on ti Diose. 15 Ti Juane xi laj yalbe sc'oplal ti Jesucristoe: “Ja' me ti vinic le'e ti Buch'u laj calboxuc ava'iic ti sc'oplale, ti laj ono'ox calboxuc ava'iic ti oy Buch'u ts'acal ta xtal ta patil cu'une, ti x'ech' to cajal sc'oplale, ti ja' mu sta ti vu'une, yu'un oy xa ono'ox ti stuc c'alal mu'yucun to ox ti vu'une.” 16 Laj xa quich'tic jcotoltic ti smuc' ta c'ulejal ti Xnich'on Diose, ti mu'yuc spajeb ta yaq'uel ti slequilal yutsilale. 17 Ti oy c'usi tsots albil sc'oplale vul ta jtojoltic ta sventa ti Moisese. Ja'uc ti c'uxubinele xchi'uc ti c'usi ja' melele, c'ot ta pasel ta sventa ti Jesucristoe. 18 Mu'yuc buch'u junucal yiloj ta sba ta sat ma' ti Diose, c'ajomal no'ox yo jun ti Xnich'on ti ja' ono'ox Diose, ti co'ol yo'ntonic xchi'uc ti Totile, ja' tal yac'botic ta ojtiquinel.
Ti Juan j'ac'-ich'-vo'e ta xalbe sc'oplal ti Jesucristoe
19 Ti j'abteletic yu'un ti israeletic ta Jerusalene, laj staquic batel ti paleetique xchi'uc levitaetic ta sjac'bel buch'u ti Juane. 20 Ti Juane xi jamal laj yale: —Ti vu'une mu'cun ti Cristoune. 21 Ti stuquique xi laj xcha'jac'beique: —Ti xcaltic un cha'e, ¿buch'uot? ¿mi vo'ot ti j'alc'op Eliase? —Mu'cun —xi laj yal ti Juane. Xi laj xcha'jac'beique: —¿Mi vo'ot ti j'alc'op vinajem sc'oplal ti ta xtal ono'oxe? —Mu'cun —xi laj stac' ti Juane. 22 Xi laj yalbeic no'ox xtoque: —¿Buch'uot ta melel un cha'e? yu'un tsots sc'oplal ta xquich'cutic batel ac'oplal ta stojol ti buch'utic laj stacuncutic talele. ¿C'usi xu' ta xavalbe aba atuc? 23 Xi laj stac' ti Juane: —Vu'un jbainoj ti xi ta xal ta avetel ta xocol banomil jech c'u cha'al laj yal ti j'alc'op Isaías ti xi laj yale: ‘Jambeic jun tuq'uil be ti Cajvaltique.’ 24 Ti buch'utic bat sc'oponic ti Juane, ti tacbilic batel yu'un ti fariseoetique, 25 xi laj sjac'beic no'ox xtoque: —Mi ma'ucot ti Cristoe, mi ma'ucot ti Eliase, mi ma'ucot ti yan j'alc'op ta xtale, ¿c'u cha'al ta xavac' ich' vo'? 26 Xi laj stac' ti Juane: —Ti vu'une, ja' no'ox lital ta yaq'uel ich' vo'. Ja'uc le'e, oy talem jun ta atojolic ti mu xavojtiquinique. 27 Ja' ti laj cal ti oy Buch'u ts'acal to xtal ta patil cu'une, ti ta sliques ti yabtele, ti x'ech' to cajal sc'oplale, ti mu ja'uc jutebuc xic'ot o ta sjitunbel ti yaq'uil xonobe. 28 Scotol ti va'i s'elan taje, c'ot ta pasel ti bu sbiinoj Betania ti oy ta sloq'ueb c'ac'al yu'un ti uc'um Jordane, ti bu laj yac' ich' vo' ti Juane.
Ti Jesuse co'ol s'elan uni ch'iom chij yu'un ti Diose
29 Ta yoc'omal un, laj yil ti Juan ti ta xnopaj talel ti Jesús ta stojol ti xi laj yale: —Q'uelo avilic le'e, ja' ti xch'iom chij Dios ti ta xch'aybe smul scolo' ti jnaclejetic ta banomile. 30 Ja' ma' le' une, ti Buch'u ti xi ono'ox laj calboxuc ava'iic ti sc'oplale: ‘Oy Buch'u ts'acal to ta xtal ta patil cu'une, ti x'ech' to cajal sc'oplale, ti ja' mu sta ti vu'une. Yu'un ti stuque oy xa ono'ox ti c'alal mu'yucun to oxe.’ 31 Mi ja'uc jna' ec ti Buch'ue. Le' une, tsots sc'oplal tal cac' ich' vo' yo' ti israeletic ta xojtiquinic Buch'ue. 32 Ja' jech xtoc xi laj yal ti Juane: —Yu'un laj quil ti Ch'ul Espiritue yal talel ta vinajel co'ol s'elan jcot ta paloma ti com o ta stojole. 33 Mu jna' ec un ti Buch'ue, ja'uc ti Buch'u laj stacun talel ta yaq'uel ti ich' vo'e, xi laj yalbune: ‘Ti buch'u ta xavil ta xcom o ti Ch'ul Espíritu ta xyal talel ta stojole, ja' ti Buch'u ta xac' avich'ic ti Ch'ul Espiritue.’ 34 Laj xa quil un, rexticoun ta j'ech'el ti ja' Xnich'on ti Diose.
Ti ba'yel yajchanc'optac ti Jesuse
35 Ti ta yoc'omale, xchi'inoj sbaic xchi'uc cha'vo' yajchanc'optac ti Juane. 36 C'alal laj yil ti ta x'ech' ti Jesuse, ti Juane xi laj yale: —Q'uelo avilic le'e, ja' ti xch'iom chij ti Diose. 37 C'alal laj ya'iic ti va'i s'elan albatic yu'un ti Juane, ti cha'vo' yajchanc'optaque laj sts'acliic batel ti Jesuse. 38 Ti Jesuse joybij laj sq'uel ti spate, laj yil ti ta sts'acliat batele. Xi laj sjaq'ue: —¿C'usi ta xasa'ic? —Jchanubtasvanej, ¿bu nacalot? —xi laj sjaq'uic ti cha'vo'ique. 39 —La'ic, ba q'uel avilic —xi laj stac' ti Jesuse. Batic un, laj yilic ti bu nacale, jmoj mal ti c'ac'al yu'unique, yu'un nopol xa batel chanib ora mal c'ac'al ti laj snup sbaic ta bee. 40 Oy jun ta xchibalic laj ya'iic ti va'i s'elan laj yal ti Juane, ti laj sts'acliic batel ti Jesuse, ja' ti Andrese, xchi'il sbaic ta voq'uel xchi'uc ti Simón Pedroe. 41 Ti Andrese bat sa' ta anil ti xchi'il ta voq'uel ti Simón sbie, ti xi laj yalbee: —Laj xa jtacutic Buch'u ti Mesiase (Cristo, xi smelol ti Mesiase). 42 Ti Andrese yic'oj batel ti Simón bu oy ti Jesuse. C'alal ile yu'un ti Jesuse, xi albate: —Simón, xnich'onot ti Jonase, ta xlic abiin Cefas avi tana li'e (Pedro, xi ti smelole).
Ti Jesuse laj yic' talel ti Felipee xchi'uc ti Natanaele
43 Ti ta yoc'omale, laj snop ta xbat ta Galilea banomil ti Jesuse. Laj snup ta be ti Felipee, xi laj yalbee: —Chi'inun, batic. 44 Ti Felipee ja' liquem talel ta jteclum Betsaida ti bu nacalic ti Andrese xchi'uc ti Pedroe. 45 Xi laj yal ti Felipe c'alal bat sa' ti Natanaele: —Laj xa quilcutic ma' ti Buch'u ts'ibabil sc'oplal ta jpoc svunal ti oy c'usi tsots sc'oplal albil yu'un ti Moisese, xchi'uc ti ts'ibabil yu'un ti j'alc'opetique, ja' ti Jesuse, xnich'on ti José ti nacal ta jteclum Nazarete. 46 Xi laj yal ti Natanaele: —Bu xata oy c'usi lec ta xc'ot ta loq'uel ta Nazaret. —Batic, ba q'uel avil —xi laj stac' ti Felipee. 47 C'alal laj yil Jesús ti ta xnopaj talel ti Natanaele, xi laj yale: —Li' xtal jun bats'i israelal vinic ti mu sna' xlo'lavane. 48 Xi laj sjac' ti Natanael c'alal jech ta x'albat sc'oplale: —¿C'uxi laj ana' yo' laj avojtiquinun? Xi laj yal ti Jesuse: —Laj quilot ti c'alal oyot ta yolon icux ti mu'yuc to ox ta xic'ot talel ti Felipee. 49 Xi laj yal ti Natanaele: —Jchanubtasvanej, vo'ot xnich'onot ti Dios un cha'e, Ajvalil yu'un ti Israele. 50 Xi laj yal ti Jesuse: —¿Mi ach'unoj c'ot ti laj calbot ava'i ti laj quilot ta yolon icuxe? ¡Yepal ta xavil liquel ti oy c'usitic muc' ti ta xc'ot ta pasele! 51 Xi laj yal xtoc ti Jesuse: —Ta xcalboxuc ava'iic ta melel, ta xavilic liquel ta xlic jamuc ti vinajele, ti xmuy xyal ti yaj'ánjeltac Dios ta jts'el ti vu'un co'ol j'elantique.
Ti nupunel c'ot ta pasel ta Caná jteclum ti oy ta Galileae
1 Ta yoxibal c'ac'al un, oy buch'u nupun ta jteclum Caná ti oy ta Galilea banomile. Batem ec sme' ti Jesuse. 2 Jech ec, ti Jesuse xchi'uc ti yajchanc'optaque ic'bilic ta uch'vanej ta sventa ti nupunele. 3 Laj ti vinoe. Jech o xal xi laj yal sme' ti Jesuse: —Mu'yuc xa vino yu'unic. 4 Xi laj stac' ti Jesuse: —Jun me'tic, ¿c'u cha'al jech xtal avalbun ti va'i s'elan taje c'alal mu'yuc to c'otem ti coraile? 5 Ti sme'e xi laj yalbe ti jtuneletique: —Pasic scotol ti c'u s'elan ta xalboxuque. 6 Ti bu taje, oy vacbej ( 6 ) bin ti meltsanbil ta tone, sventa xch'amobil vo' yu'unic ti yo' ta smes stus sbaic ti israeletique, ti ta x'och yu'un vo'vinic ( 100 ) ta litro vo' ti jujubeje. 7 Xi ti Jesús ta stojol ti jtuneletique: —Nojesic ta vo' ti binetic li'e. Xjaxet c'ot yu'unic sti' ti bin c'alal laj snojesic ta vo'e. 8 Xi laj yal ti Jesuse: —Lupic loq'uel jutebuc. Ba ac'beic ti jpas-mantal yu'un ti q'uine. Jech laj spasic ti jtuneletique. 9 Ti jpas-mantal yu'un ti q'uine, laj spas preva ti vo' ti joybijem xa ta vinoe. Mi ja'uc sna' bu tal. Ja' no'ox sna'ic ti jtuneletic bu laj slupic loq'uele. Jech o xal ti jpas-mantal yu'un ti q'uine, laj yic' talel ti jnupunele, 10 ti xi laj yalbee: —Jcotoltic jech jtaleltic ti ja' ba'yel ta xcuch'tic ti lequil vinoe. C'alal mi laj xa yuch'ic ti jq'uel-q'uinetique, ts'acal ta xlic yich' uch'el ti siclojan vinoe. Ja'uc ti vo'ote ja' laj aq'uej ti bu jun yutsil meltsanbile. 11 Ja' sliquebal to ti va'i s'elan laj spas ti Jesús ta jteclum Caná ti oy ta Galileae, ti laj yac' iluc senyail ti oy c'usi ch'ayal c'ot o'ntonal yu'un ta sventa ti slequil yutsilale, ti ich'bil ta muc' ic'ot yu'un ti yajchanc'optaque. 12 Ts'acal to taj un, bat ta jteclum Capernaum xchi'uc ti sme'e, ti yits'inabtaque, xchi'uc ti yajchanc'optaque. Joc'tsajic jayib c'ac'al ti bu taje.
Ti Jesuse ta smes ta xch'uba ti ch'ulnae
13 Nopol xa sc'an ti q'uin Colel yu'un ti israeletique. Ti Jesuse bat ta jteclum Jerusalén. 14 Noj ta jchon-vacaxetic, ta jchon-chijetic, ta jchon-palomaetic, xchi'uc jel-taq'uinetic chotajtic ta sts'el sti'il xmexa ta sjelic staq'uinic c'ot sta ti ch'ulnae. 15 Ti jech laj yile, ti Jesuse lic smochilan ch'ojon. Laj snutsan loq'uel ti jchonolajeletique xchi'uc ti xvacaxique, ti xchijique. Laj stanibe ta banomil ti staq'uinique. Laj svalc'unanbe xmexaic ti jel-taq'uinetique. 16 Xi laj yalbe ti jchon-palomaetique: —¡Loq'uesic batel li'e! ¡Mu xapasic ta jun ch'ivit sna ti Jtote! 17 Va'i un, ti yajchanc'optaque vul ta yo'ntonic ti xi ta xal ti ch'ul c'ope: “Tsots sc'oplal c'otem ta co'nton ta xca'i ti ach'ulna ti lecuc oyuque.” 18 Xi laj sjaq'uic ti j'abteletic yu'un ti israeletic ta stojol ti Jesuse: —¿C'usi senyail ta xavac' quilcutic yo' ta jna'cutic buch'u yac'ojbot avabtel ti vi s'elan ta xapase? 19 Xi laj stac' ti Jesuse: —Lilinic ti ch'ulna li'e, ta oxib c'ac'al xu' ta jcha'va'an ta ach'. 20 Xi laj yalbeic Jesús ti israeletique: —Laj yich' vaquib yoxvinic ( 46 ) jabil ta yabtelanel ti ch'ulna li'e yo' c'ot ta meltsajel. ¡Bu xata ti vo'ot ta xameltsan ta oxib c'ac'ale! 21 Ti ch'ulna ti ta xalbe sc'oplal ti Jesuse, ja' sbec'tal stacopal stuc. 22 Jech o xal c'alal cha'cuxie, vul ta yo'ntonic ti yajchanc'optac ti jech ono'ox laj yale. C'ot ta yo'nton xtoc ti c'u s'elan ta xal ti ch'ul c'ope xchi'uc sc'op ti Jesuse.
Ti Jesuse xojtiquinbe yo'nton scotol
23 C'alal oy ta q'uin Colel ta Jerusalén ti Jesuse, ep ti buch'utic laj yich'ic ta muc' ta sventa ti laj yac' iluc ti oy c'usi ch'ayal ta xc'ot yu'un ti o'ntonale. 24 Ma'uc ma' ti Jesús xch'un xa ti jun yo'ntonic ta stojole, yu'un xojtiquinbe yo'nton scotolic. 25 Ma'uc to sc'an ti oy buch'u ta x'albun c'u s'elan ta snop ti jnaclejetic ta banomile, yu'un sna'be c'u s'elan yo'nton ti buch'uuc no'oxe.
Ti Jesuse xchi'uc ti Nicodemoe
1 Oy jun fariseo vinic, Nicodemo sbi, ja' jun banquilal ti ich'bil ye sti' yu'un ti israeletique. 2 Xi laj yal ti Nicodemo c'alal bat sc'opon ta ac'ubaltic ti Jesuse: —Jchanubtasvanej, jna'ojcutic lec ti tacbilot talel yu'un ti Dios yo' jech tal achanubtasuncutique, yu'un mu'yuc buch'u junucal xu' ti jech ta xac' iluc smuc'ul stsatsal Dios jech c'u cha'al ta xapase ti mi mu'yuc chi'inbil yu'un ti Diose. 3 Xi albat yu'un ti Jesuse: —Ta xcalbot ava'i ta melel, ti buch'u mu xvoc' ta ach'e, mu xu' x'och batel ti bu ta xventainvan ti Diose. 4 Xi laj sjac' ti Nicodemoe: —¿C'usi ta xut jun yijil vinic ta xvoc' ta ach'? ¿Mi yu'un xu' ta x'och batel ta xch'ut sme'e yo' jech ta xvoc' xtoc? 5 Xi tac'bat yu'un ti Jesuse: —Ta xcalbot ava'i ta melel, mu'yuc buch'u ta x'och batel bu ta xventainvan ti Diose mi mu'yuc voq'uem ta sventa ti vo'e xchi'uc ta sventa ti Ch'ul Espiritue. 6 Ti buch'u voq'uem ta sventa ti stot sme'e, stalel no'ox stot sme' yich'ojbe. Ti buch'u voq'uem ta sventa ti Ch'ul Espiritue, yich'ojbe stalel ti Ch'ul Espiritue. 7 Ti xi s'elan ta xcalbote, mu lo'iluc no'ox xava'i, yu'un acotolic tsots sc'oplal sc'an xacha'voq'uic ta ach'. 8 Ac'o mi ta xava'i buyuc no'ox xjumet ti ic' ta jujujote, ja'uc le' une, mu xana' bu ta xlic talel, bu ta xbat. Ja' jech s'elanic ti buch'utic ta xvoq'uic ta sventa ti Ch'ul Espiritue. 9 Xi laj xcha'jac' ti Nicodemoe: —¿C'u ono'ox xi ta utel taje? 10 Xi laj stac' ti Jesuse: —¿Mi mu banquilal jchanubtasvanejucot ya'yel yu'un ti achi'iltaque? ¿Mi mu xa ono'ox xava'ibe smelol taje? 11 Ta xcalbot ava'i ta melel, ja' ta xcalbecutic sc'oplal ti c'usi jna'cutique, ti c'usi quilojcutique. Ja'uc ti vo'oxuque, mu xac'an xach'unic ti c'usi ta xcalcutique. 12 Mi mu xach'un ti laj calbot sc'oplal ti oy c'usi ta xc'ot ta pasel li' ta banomile, ¿c'usi xavut ta xach'un mi ta xcalbot sc'oplal ti oy c'usi ta xc'ot ta pasel ta vinajele? 13 “Mi junuc oy buch'u muyem batel sq'uel ti c'usi oy ta vinajele. Ja' no'ox yiloj ti Buch'u liquem talel ti bu taje. Ti xcaltique, ja' ti vu'un co'ol j'elantique. 14 Jech c'u cha'al ti Moisés laj sjipan ta te' sloc'obbail chon ta xocol banomile, ja' jech ta xquich' jipanel ta curus ec ti vu'un co'ol j'elantique. 15 Scotol ti buch'u ta xc'ot ta yo'ntonic taje, ta sta xcuxlejalic sbatel osil.
Ti Diose oy syail xc'uxul yo'nton ta stojol ti jnaclejetic ta banomile
16 “Ti Diose mu albajuc laj xc'uxubinan scotol ti jnaclejetique, laj stac talel ta stojolic ti yo junomal Xnich'one. Buch'uuc no'ox ti ta xc'ot ta yo'ntonic ti ja' Jpojvanej yu'unique, mu xch'ayic, ta sta xcuxlejalic sbatel osil. 17 Ti Diose mu yu'unuc laj stac talel ti Xnich'on yo' tal yac'be stoj smul ti jnaclejetique, ja' no'ox tal scolta. 18 “Ti buch'u ta xc'ot ta yo'nton ti ja' Jpojvanej yu'un ti Xnich'on Diose, mu x'ac'bat stoj ti smule. Ja'uc ti buch'u mu xc'ot ta yo'nton ti ja Jpojvanej yu'une, chapal xa sc'oplal ta stoj ti smule, ta scoj ti mu xc'ot ta yo'nton ti yo junomal Xnich'on ti Diose. 19 Ti buch'utic mu xc'ot ta yo'ntonique, chapal xa sc'oplal ta stoj ti smulique, yu'un yacalic ta spasel c'usi chopol c'alal ja' o tal ta banomil ti Jesucristo ti ja' luze, mu lecuc laj ya'iic. Ja' lec laj ya'iic ta spasel ti c'usi ja' sventa ti ic'al osile. Ja' mu sc'anic ti saquilal osile. 20 Scotol ti buch'utic ta spasic ti c'usi chopole, xti'et sjolic yu'un ti luze. Mu sc'an xnopajic ta stojol ti luze yo' mu xvinajesbatic ti c'usi chopol ta spasique. 21 Ja'uc ti buch'u co'ol yo'ntonic xchi'uc ti bu ja' melele, ta xnopajic ta stojol ti luze yo' jech ta xvinaj sva'anoj sba ti Dios ta stojolic ti c'usi ta spasique.”
Ti Juan j'ac'-ich'-vo'e ta xcha'albe sc'oplal ti Jesuse
22 Ts'acal to ti Jesuse xchi'uc ti yajchanc'optaque batic ta Judea banomil, ti bu joc'tsajic xchi'uc ta yaq'uel ich' vo'e. 23 Jech ti Juan eque, yacal ta xac' ich'uc vo' ta jteclum Enón ti nopol xil sbaic xchi'uc ti Salim jteclume, yu'un yepal vo' ti bu taje. Ta xbatic ti jnaclejetique, ta x'ac'bat yich'ic vo'. 24 Taje, c'ot ta pasel c'alal mu'yuc to ox ta x'och ta chuquel ti Juane. 25 Ja'uc le' une, oy jun chib yajchanc'optac ti Juane, lic stsac sbaic ta c'op xchi'uc jun chib israeletic ta scoj ti c'u s'elan liquem sc'oplal yu'unic ti mesel tusele. 26 Xi laj yalbeic ti Juane: —Jchanubtasvanej, ti buch'u jmoj laxanavic xchi'uc ta sti'il uc'um Jordán ti oy ta sloq'ueb c'ac'ale xchi'uc ti laj avalbuncutic sc'oplale, avi tana le'e, ta xac' ich'uc vo'. Scotolic ta sts'acliic batel. 27 Xi laj stac' ti Juane: —Mu'yuc c'usi xu' yu'un jun vinic mi ma'uc ac'bil yabtel yu'un ti Diose. 28 Laj ava'iic lec c'alal jamal laj cal, ma'ucun ti Cristoune, ti ja' no'ox jun vinicun ti tacbilun jelavel talel yu'une. 29 Ti jun jlecomajele, ti buch'u ta x'och ta yoc ta sc'ob ti tsebe, ja' ti jlecomajel vinique. Ti vinic ti buch'u lec ta xil sbaic xchi'uc ti jlecomajele xmuyubaj xa ta xa'ibe ti sc'ope. Ja' jechun ec, ximuyubaj xa yu'un. 30 Tana le'e, yac' ta cajtsajel ech'el ti sc'oplale, ja'uc ti vu'une, ta xa xpec'tsaj ech'el ti jc'oplale.
Ti Buch'u liquem talel ta vinajele
31 Ti Buch'u ta xlic talel ta vinajele, sbainoj scotol. Ti buch'u ayanem li' ta banomile, sba no'ox banomil, naca sba banomil ti sc'ope. Ti Buch'u ta xlic talel ta vinajele, sbainoj scotol. 32 Ta xalbe sc'oplal ti c'usi yiloje, ti c'usi ya'yioj ti bu taje. Ja'uc le'e, mu'yuc buch'u ta xc'ot ta yo'ntonic ti c'usi ta xale. 33 Mi oy buch'u ta xc'ot ta yo'ntone, ta sva'an sba ta yalel xchi'uc ti ja' melel ti c'usi ta xal ti Diose. 34 Ti buch'u tacbil talel yu'un ti Diose, naca sc'op Dios ta xal, yu'un ti Diose, yepal no'ox ta xac' ti Ch'ul Espiritue. 35 Ti Totile c'ux ta xa'i ti Xnich'one. Laj xa yac'be yip stsatsal ta sbainel scotol ti c'usitic oye. 36 Ti buch'u ta xc'ot ta yo'nton ti ja' Jpojvanej yu'un ti Nich'onile, oy xcuxlejal sbatel osil. Ja'uc ti buch'u mu xc'ot ta yo'ntone, mu sta ti xcuxlejale. C'ajomal xa no'ox chapal sc'oplal ti tsots tsitsel ta x'ac'bat yu'un ti Diose.
Ti Jesuse xchi'uc ti samaria antse
1 Ti fariseoetique laj ya'iic ti oy ep yajts'aclivanejtac ti Jesuse xchi'uc ti yepal no'ox oy buch'u ta xac'be yich' vo'e, ti ja' mu sta ti Juane, 2 ac'o mi ma'uc stuc ti Jesús ta xac' ti ich' vo'e, yu'un ja' ta xaq'uic ich' vo' ti yajchanc'optaque. 3 C'alal jech laj ya'i ti Jesuse, loc' batel ta Judea banomile, sut batel ta Galilea banomil. 4 Ti jech bate, ech' ta yosilal Samaria. 5 C'ot ta jteclum Sicar ti oy ta yosilal Samariae, nopol xil sbaic xchi'uc ti banomil ti ja' to ox yu'un ti Jacob ti laj yac'be comel ti xnich'on José sbie. 6 Ti bu taje, oy jun joc' yu'un ti Jacobe. Lubem xa ta xanobal ti Jesuse, chot xi c'otel ta sti'il joc', yu'un jutuc xa sc'an o'lol c'ac'al. 7 C'alal ja' o chotol ta sti'il joc' ti Jesuse, ja' o tal slup vo' jun ants ti liquem talel ta Samariae. Xi laj yal ti Jesuse: —Ac'bun jutebuc ava'al cuch'. 8 Ti yajchanc'optaque batemic ta jteclum ta smanel talel sve'elic. 9 Xi laj stac' ti samaria antse: —¿C'u cha'al ta xac'anbun vo' avuch' ti vo'ot israelot c'alal vu'un samaria antsune? Ja' jech laj yal ti antse, yu'un ti israeletique mu lecuc xil sbaic xchi'uc ti samariaetique. 10 Xi laj stac' ti Jesuse: —Ti xana'uc oy c'usi ta xac' ti Diose, ti xana'uc ti Buch'u ta sc'anbot ti vo'e, ta melel unbi, vo'ot ta xac'anbun ti vo' jechuque. Ta xcac'bot ti cuxul sat vo'e. 11 Xi laj yal ti antse: —Ti vo'ote mi ja'uc c'usi oy avu'un yo' ta xalup loq'uel tal ti vo'e, yu'un toj nat ti joq'ue. ¿Bu ta xata talel ti vo' ti mu xtub sc'oplale? 12 ¿Mi yu'un vo'ot x'ech' to cajal latal ya'yel? ¿Mi ja' mu sta ti jmolmuc'totcutic Jacob ti laj yac'buncutic comel ti joc' li'e, ech' yuch' ti stuque, laj yuch' ec ti xnich'nabtaque xchi'uc scotol ti c'usitic oy yu'une? 13 Xi laj stac' ti Jesuse: —Scotol ti buch'u ta xuch'ic ti vo' li'e ta xlic ya'iic taqui ti'il. 14 Ja'uc ti buch'u ta xuch' ti vo' vu'un ta xcaq'ue, j'ech'el mu xa'iic taqui ti'il. Yu'un ta xc'ot ta yo'ntonic jech c'u cha'al nio' ti mu sna' x'ul ti xtuctun o ti ta x'ac'bat xcuxlejalic sbatel osil yu'une. 15 Xi laj stac' ti antse: —Ac'bun ti vo' taje yo' mu xca'i ti taqui ti'ile, ti mu li'uc no'ox xiva'vun ta slupel vo' li' ta joq'ue. 16 Xi laj yal ti Jesuse: —Batan, ba ic'o talel ti amalale, la'ic li' une. 17 Xi laj stac' ti antse: —Mu'yuc jmalal une. Xi laj stac' ti Jesuse: —Melel ti ch'abal amalal ta xavale. 18 Yu'un laj xa amalalin vo'ob ( 5 ) viniquetic. Ti tey achi'uc avi li'e, ma'uc amalal. Jech o xal, jamal laj aval ti ch'abal amalale. 19 C'alal laj ya'i ti va'i s'elan taje, xi laj yal ti antse: —Yojtot, ta xquil ti ja' jun j'alc'opote. 20 Ti jmolmuc'totcutic ti vu'uncutic samariauncutique, li' ta vits laj yich'ic ta muc' ti Diose. Ja'uc ti vo'oxuc israeloxuque, ta xavalic ti sc'an c'alal to Jerusalén ta xbat avich'ic ta muc' ti Diose. 21 Xi laj stac' ti Jesuse: —Ch'unbun ti oy bu ta sta yorail mi ja'uc li' ta vitse, mi ja'uc ta Jerusalén ta xbat avich'ic ta muc' ti Diose. 22 Ti vo'oxuque mu xana'ic ti buch'u ta xavich'ic ta muq'ue. Ja'uc ti vu'uncutique, jna'cutic ti Buch'u ta xquich'cutic ta muq'ue, yu'un ti coltaele ta xlic talel ta stojol ti israeletique. 23 Sta xa yorail, ja' xa yorail avi li'e, ti buch'utic ta xich'ic ta muc' ti Diose, ac'o spasic jech c'u cha'al ta sc'an ti Ch'ul Espíritu yu'un ti Diose. Yu'un ti Diose, jech ta yo'nton ti ac'o ich'atuc ta muq'ue. 24 Yu'un ti Diose mu xvinaj ta q'uelel. Jech o xal ti buch'utic ta xich'ic ta muq'ue, ac'o loc'uc ayanuc ta yut yo'nton ta melel. 25 Xi laj stac' ti antse: —Ca'binoj sc'oplal ta xtal ti Mesiase, ti xcaltique, ja' ti Cristoe. C'alal mi tale, xtal svinajesbuncutic scotol ti c'usi mu jna'cutique. 26 Xi laj yal ti Jesuse: —Taje, vu'unun ti li' yacal ta xic'opoj ta atojole. 27 C'alal yacal ta xlo'ilaj ti Jesuse, ja' o vulic ti yajchanc'optaque. Yan o laj yilic ti jech ta xchi'in ta lo'il ants ti Jesuse, ac'o mi mu'yuc buch'u junucal laj sjac'beic c'usi ta sc'an, c'usi ti slo'ilique. 28 Ti antse laj yicta comel ti sq'uibe, bat ta jteclum ti xi laj yalbe ti xchi'iltaque: 29 —La', q'uelo avilic jun vinic ti buch'u laj xa svinajesbun scotol ti c'usi laj jpase. Mu jna' mi ja' ti Cristo ta xcale. 30 Va'i un, c'alal jech laj ya'iique, loq'uic batel ta jteclum, batic bu oy ti Jesuse. 31 C'alal jech ta xc'ot ta pasel taje, xi c'anbat vocol yu'un ti yajchanc'optaque: —Jchanubtasvanej, ve'an jutebuc. 32 Xi laj yal ti Jesuse: —Oy yan jve'el ta jlajes ti vo'oxuc mu xana'ique. 33 Xi laj sjac'be sbaic ti yajchanc'optaque: —¿Mi yu'un van oy buch'u tal ac'batuc sve'el? 34 Xi laj yal ti Jesuse: —Ti jve'el ta jtun ta jlajese, ja' ti ta jpas ti c'usi oy ta yo'nton ti Buch'u laj stacun talele, ti c'otuc ta tsutsel cu'un ti yabtele. 35 Xi ta xavalic ti vo'oxuque: ‘Sc'an to chanib u ta xich' tsobel ti ts'unobale.’ Ja'uc le'e, ta xcalboxuc ava'iic, toyic batel asatic ta sq'uelel batel ti ts'unobaltique, yu'un yijuneb xa. 36 Ti buch'u ta x'abtej ta stsobel ti ts'unobale, ta xich' stojol. Ti ts'unobal ta stsobe ja' sventa cuxlejal sbatel osil. Jech ec, ti buch'u ta sts'une xchi'uc ti buch'u ta stsobe co'ol xmuyubajic. 37 Ja' o no'ox melel ti oy xi x'ale ti c'ope: ‘Yan o ti buch'u laj sts'une, yan o ti buch'u laj stsobe.’ 38 Vu'un laj jtacoxuc batel ta stsobel ti ts'unobal ti bu ma'uc ta achic' ava'lelic la'abtejique. Yan ti buch'u abtejique, loc' venta avu'unic ta sventa yabtel ti yane. 39 Ti jnaclejetic ta Samariae ep laj xch'unic ti Jesuse ta sventa ti ants ti xi laj yale: “Laj yalbun scotol ti c'usi laj jpase.” 40 C'alal c'otic ti samariaetic ta stojol ti Jesuse, laj sc'anbeic vocol ti ac'o comuc ta stojolique. Ti Jesuse com chib c'ac'al ti bu taje. 41 X'ech' to epajic ta xch'unel ta sventa ti c'usi ta xal stuc ti Jesuse. 42 Xi laj yalbeic ti antse: —Avi tanae, ma'uc no'ox ta jch'uncutic ti c'usi laj avale, yu'un laj xa ca'icutic, laj xa jna'cutic ti ja' ta melel ti Cristoe, Jcoltavanej yu'un ti jnaclejetic ta banomile.
Ti Jesuse ta scolesbe xnich'on jun yaj'abtel ti ajvalile
43 C'alal ech' ti chib c'ac'ale, ti Jesuse loc' batel ta Samaria banomil. Laj stam batel c'alal to Galilea banomil. 44 Ti Jesuse stuc laj yalbe sba sc'oplal, ti jun j'alc'ope mu'yuc ich'bil ta muc' ta slumal stuc. 45 Va'i un, c'alal c'ot ta Galileae, ti jnaclejetic taje xmuyubajic laj yich'ic ta muc', yu'un laj yilic c'usitic laj xa spas ti Jesús c'alal ayic ta q'uin Colel ta Jerusalene. 46 Ti Jesuse sut batel ta jteclum Caná ti oy ta Galilea ti bu laj sjoybin ta vino ti vo'e. Ti bu taje, oy jun yaj'abtel ajvalil ti tsots yabtel yich'oje, ti ip ta xa'i ti xnich'on oy ta Capernaume. 47 Ti jcuch-abtele c'alal laj ya'i tal xa ta Galilea ti Jesuse, bat sq'uel. Laj sc'anbe vocol ti ac'o batuc ta snae, ti ac'o colesbatuc ti xnich'one yu'un ta xa xcham. 48 Xi laj stac' ti Jesuse: —Mi mu xcac' avilic ti c'usitic ch'ayal ta xc'ot o'ntonal yu'une, mu xavich'icun ta muc' ta xch'unel. 49 Xi laj yal ti jcuch-abtele: —Cajval, batic ta anil yo' to mu ta xcham ti jnich'one. 50 Xi laj yal ti Jesuse: —Batan xa ta ana. Ti anich'one lec xa oy. Ti jcuch-abtele laj xch'un ti va'i s'elan albat yu'un ti Jesuse, loc' batel. 51 C'alal nopol xa sc'an xc'ot ta snae, ja' o loq'uic talel yajtuneltac, tal nupatuc ta be ti xi laj yalbeique: —Ti anich'one lec xa oy. 52 Ti jcuch-abtele laj sjac'be ti yajtuneltac c'usi ora col ti xnich'one. —Jliquel xa sts'ebujel c'ac'al volje yam ti sc'ac'ale —xi laj yalbeique. 53 Laj sna' ti totile ti ja' jech ora xi albat yu'un ti Jesuse: “Ti anich'one lec xa oy.” Ti stuque xchi'uc ti c'u yepal oyic ta nae, c'ot ta yo'ntonic ti ja' Jcoltavanej ti Jesuse. 54 Taje, ja' xa xcha'cojal laj yac' iluc ti oy c'usi ch'ayal ta xc'ot o'ntonal yu'une. C'alal loc' talel ta Judeae, vul ta Galilea ti Jesuse.
Ti Jesuse laj scoles jun t'el-t'el jchamel
1 Ech' c'uc sjaliluc un, ti Jesuse sut batel ta Jerusalén ti bu ta spasic q'uin ti israeletique. 2 Ti ta jteclum Jerusalene, nopol ta sts'el ti'na ti sbiinoj Chijetique, oy jun yavil sts'anleb vo' ti Betesda sbi ta hebreo c'ope, ti yich'oj vo'ob scot-cotil scoriolal ti nae. 3 Ta yolon scoriolal ti nae, yepal jchameletic puch'ajtic ta lumtic jech c'u cha'al ti ma'satetique, ti coxovetique, xchi'uc ti buch'u aluneb ti sbec'talique. Yu'un ta smalaic ta xlic yuq'uilajuc ti vo'e. 4 C'otem ta yo'ntonic ta xch'unel ti ta xyal talel ta vinajel jun ánjel ti ta xtal syuq'uilan ti vo' snom stae. Jech ti buch'u ba'yel ta sts'aj sba ochele, ta xcol yu'un ti c'usiuc no'ox ti xchamelique. 5 Ta scotol ti c'u yepal taje, oy jun vinic yich'oj xa vaxaclajuneb xcha'vinic ( 38 ) jabil ti oy xchamele. 6 C'alal laj yil ti Jesús puch'ul ti vinic ti bu taje, ti jal xa c'ac'al sts'icoj talel ti xchamele, xi laj sjac'bee: —¿Mi ta xac'an ta xacol yu'un ti achamele? 7 Xi laj stac' ti jchamele: —Yojtot, mu'yuc buch'u xu' ta xists'aj ochel c'alal ta xyuq'uilaj ti vo'e. C'alal ta jc'an jtic' jba ca'i ochel ta vo'e, yan o ti buch'u ba'yel ta sts'aj sba ta anile. 8 Xi albat yu'un ti Jesuse: —Lican, balo batel ti apope, batan. 9 Ta jech yepal laj stam sba ti jchamele, ta ora no'ox lecub. Laj sbal batel ti spope, lic xanavuc. Ja' o xa sc'ac'alil cuxob o'ntonal ma' taje. 10 Jech o xal ti israeletique xi laj yal ta stojol ti buch'u cole: —Avi li'e, sc'ac'alil ti cuxob o'ntonale, jech mu stac' xavich' batel ti apope. 11 Xi laj stac' ti vinique: —Ti Buch'u laj scolesune, xi laj yalbune: “Balo bal ti apope, batan”, xiyut. 12 Xi laj yalbeique: —¿Buch'u ti va'i s'elan xi laj yalbote: “Balo batel ti apope, batan”, ti xayute? 13 Ti vinic taje, mu sna' ti Buch'u icoltavane, yu'un ti Jesuse laj scap sba batel ti bu xvolvun ti jnaclejetique. 14 Laj taj une, ti vinique tae ta ch'ulna yu'un ti Jesuse, ti xi albate: —Ti li'e, colemot xa. Mu xa xasa' amul yo' jech mu xc'ot ta atojol ti x'ech' to chopole. 15 Ti vinique bat yalbe ya'i ti israeletique ti ja' coltaat yu'un ti Jesuse. 16 Jech o xal ti israeletique lic scontrainic ti Jesuse xchi'uc sc'an ta smilic ya'iic, yu'un ta sc'ac'alil cuxob o'ntonal ti va'i s'elan ta spase. 17 Xi laj yal ti Jesuse: —A'yio ava'iic, ti Jtote yacal ta abtel avi li'e. Ja' jech ti vu'une ta xi'abtej ec. 18 Jech o xal ti israeletique x'ech' to stsac yip yo'ntonic ta smilic ya'iic ti Jesuse, yu'un ma'uc no'ox mu xich' ta muc' smantalil ti cuxob o'ntonale, yu'un ta sco'oltas sba jech c'u cha'al ti Diose, ti laj yal ti ja' stot ti Diose.
Tsots yabtel yich'oj ti Xnich'on Diose
19 Xi laj yal ti Jesuse: —J'ech'el ta xcalboxuc ava'iic, ti vu'un Xnich'onun ti Diose, mu'yuc c'usi stac' jpas ta jtuc no'ox. Ja' no'ox ta jpas ti c'u s'elan ta xquil ta spas ti Jtote. Scotol ti c'usi ta spas ti Jtote, ja' jech ta jpas ti vu'un Xnich'onune. 20 Yu'un ti Jtote c'ux ta xiya'i ti vu'un Xnich'onune. Ja' ta xac'bun jna' scotol ti c'usi ta spase. Oy yan to c'usi x'ech' ta xac'bun jpas ti ch'ayal ta xc'ot avo'ntonic yu'une. 21 Jech c'u cha'al ti Jtot ta xcha'cuxes ti animaetic yo' ta xac'be ti xcuxlejale, ja' jech ti vu'un Xnich'onune, ta xcac'be xcuxlejal ti buch'u ta jc'an ta xcac'bee. 22 Mi junuc sbainoj ta xchapanel ma' ti Jtote. Laj xa yac'bun jmuc'ul jtsatsal ta xchapanel scotol, 23 yo' scotolic ac'o yich'icun ta muc' ti vu'un Nich'onilune jech c'u cha'al, ta xich'ic ta muc' ti Jtote. Ti buch'u mu xiyich'icun ta muc' ti vu'un Nich'onilune, mu xich'ic ta muc' ti Jtot ti ja' laj stacun talele. 24 “J'ech'el ta xcalboxuc ava'iic, buch'uuc no'ox ta sts'etan xchiquin ta ya'yiel ti c'usi ta xcale, ti ta xich'ic ta muc' ti Buch'u laj stacun talele, oy xa xcuxlejal sbatel osil. Mu'yuc ta xich'ic chapanel. Laj xa yech'ta comel ti lajebale, laj xa sta ti cuxlejale. 25 “Ta xcalboxuc ava'iic ta melel, sta xa yorail, ja' xa yorail li'e, ti buch'u chamemique ta xa'ibeicun jc'opojel ti vu'un Xnich'onun ti Diose. Ti buch'u ta xich'ic ta muc' ti jc'ope, ta xcuxiic. 26 Yu'un ti Jtote, stalel o cuxul, oy smuc'ul stsatsal ta yaq'uel ti cuxlejale. Ja' jech ti vu'un Nich'onilune, ac'bilun jmuc'ul jts'ats'al ta yaq'uel ti cuxlejale. 27 Laj yac'bun tsots cabtel ta chapanvanej yu'un vu'un ti co'ol j'elantique. 28 Mu ch'ayaluc xc'ot avo'ntonic yu'un taje, yu'un ta sta yorail ta xa'ibeicun jc'opojel scotol ti animaetique. 29 Ta xloq'uic talel ta muquinaltic. Ti buch'utic oy c'usi lec laj spasique, ta xcha'cuxiic yo' ta staic ti cuxlejale. Ja'uc ti buch'utic oy c'usi chopol laj spasique, ta xcha'cuxiic yo' ta x'ac'bat stoj ti smulique.
Ta xvinaj ti tsots yabtel yich'oj ti Jesuse
30 “Mu'yuc c'usi stac' jpas ta jtuc no'ox. Ti ta xichapanvane, ja' ti c'u s'elan ta xi'albat yu'un ti Jtote. Lec tuc' ti c'u s'elan ta xichapanvane, yu'un ma'uc ta jpas ti c'u s'elan ta jc'an jtuque, yu'un ja' ta jpas ti c'u s'elan ta sc'an stuc ti Jtot ti Buch'u laj stacun talele. 31 Yan mi ta jvinajes ti jc'oplal jtuc no'oxe, mu'yuc c'usi xtun o ti oy c'usi ta xcale. 32 Le'e, oy buch'u yan laj sva'an ta svinajesel ti jc'oplale. Ti c'usi laj yale, xvinaj ti ja' melele, yu'un jna' lec. 33 Ti oy buch'u laj ataquic batel ta sjaq'uel ta stojol ti Juane, ti c'usi laj stac'boxuque, ja' melel. 34 Yu'un ma'uc tsots sc'oplal ta xca'i ta svinajesbun jc'oplal jun vinic. Ti jech ta xcalboxuc ava'iic taje, yo' xu' ta xata acolelic. 35 Yu'un ti c'usi laj yalboxuc ti Juane, co'ol s'elan jun lámpara ti tsanal ta xac' xojobale. Jech ti vo'oxuque jayib no'ox c'ac'al xamuyubajic xa yu'un ti luz taje. 36 Ja'uc le'e, oy Buch'u x'ech' to ta svinajesbun ti jc'oplale. Ti c'u s'elan ta jpase, ta svinajes ti ja' laj yac'bun jbain ta spasel yu'un ti Jtote, xchi'uc ta svinajes ti tacbilun yu'un ti Jtote, ti ja' mu sta laj svinajesbun jc'oplal ti Juane. 37 Manchuc mi mu'yuc ava'binojic ti sc'opojele, mi mu'yuc avilojic ti stuque, ti Jtot ti laj stacun talele, ja' ta xalboxuc ti jc'oplale. 38 Mi ja'uc xc'ot ta avo'ntonic ti sc'ope, yu'un mu xavich'ic ta muc' ti tacbilun talel yu'un ti Jtote. 39 Ti ch'ul c'ope ta xalbun jc'oplal xtoc. Ac'o mi batem xa avo'ntonic ta sq'uelel ti ch'ul c'ope, ti avalojic xa ta xataic ti acuxlejalic yu'une, 40 ja'uc ti vo'oxuc une, mu xac'an xatalic ta jtojol yo' ta xata ti acuxlejalique. 41 “Yu'un ma'uc ta jc'an ti lec xa ave ati'ic yilel ta jtojole. 42 Ma'uc no'ox taje, yu'un xacojtiquinoxuc, yu'un jna' lec mu'yuc c'ux ta xava'iic ti Diose. 43 Tacbilun talel ta sventa ti Jtote, mi ja'uc xavich'icun ta muc'. Yan mi ta xtal yan vinic ti spasoj sba ta mantal stuque, lec xava'iic, xavich'ic ta muc'. 44 Ti mi ja' no'ox ta xac'anic ti ich'el ta muc' yu'un ti achi'iltaque, ti mi mu xasa'ic ti ich'biloxuc ta muc' yu'un ti Dios stuque, ¿c'usi la ta xavutic ta xavich'icun ta muc'? 45 Ma'uc tac'al xc'ot avu'unic ti vu'un ta jtic' amulic ta stojol ti Jtote. Ti buch'u ta stic' amulique ja' ti Moisese, ti buch'u apatoj avo'ntonic ta stojole. 46 Ti tauc xc'ot ta avo'nton ti c'usi laj sts'iba ti Moisese, ta xavich'icun ta muc' ti jechuque. Yu'un ti Moisese, ja' laj sts'iba comel jc'oplal. 47 Mi mu xavich'ic ta muc' ti c'usi laj sts'iba comele, mi ja' xa la ta xavich'ic ta muc' ti c'usi ta xcale.”
Ti Jesuse ta xac' ve'uc vo'mil ta vo'
1 Laj taj une, ti Jesuse bat ta jot sti'il nab Galilea, ti ja' ono'ox ti snabil ti Tiberiase. 2 Yepal no'ox jnaclejetic ts'acalic batel, yu'un laj yilic ti ch'ayal no'ox ta xc'ot o'ntonal ta scolesel ti jchameletique. 3 Va'i un, ti Jesuse muy batel ta vits ti bu c'ot chotluc xchi'uc ti yajchanc'optaque. 4 Yu'un nopol xa sc'an ti q'uin Colele, sq'uinic ti israeletique. 5 C'alal laj yil ti Jesús ti yepal no'ox ta xtal ts'acliatuc yu'un ti jnaclejetique, xi laj sjac'be ti Felipee: —¿Bu ta xba jmanbetic talel sve'elic scotol ti vi yepal le'e? 6 Jech laj yal yo' ta xvinaj c'u s'elan ta stac' ti Felipee, yu'un ti Jesuse sna'oj lec ti c'usi ta spase. 7 Xi laj stac' ti Felipee: —Ac'o mi ta jmantic talel chib ( 2 ) ciento denario taq'uin ti ve'lile, mi ja'uc xloq'uic o jujuti'uc ti jujune. 8 Va'i un, ti Andrese, ti ja' jun yajchanc'op ti Jesuse, ti yits'in Simón Pedroe, xi laj yale: 9 —Oy li' jun querem yich'oj talel vo'bej pan ti pasbil ta jchop o ta trigoe, xchi'uc cha'cot choy. ¿Mi yu'un ta xloc' o ti yepal no'ox ti jnaclejetique? 10 Xi laj stac' ti Jesuse: —Albeic ya'i ti ac'o chotliicuc scotolic. Yu'un naca yaxaltic ti bu oyique, chotiic nopol van vo'miluc ( 5,000 ) ta vo'. 11 Ti Jesuse laj stsac ti pane. C'alal laj yalbe vocol ti Diose, laj yac'be jelavel ti yajchanc'optaque. Ti yajchanc'optaque laj spuquic batel ti pan ta stojol scotolic ti c'u yepal chotolique. Ja' jech xtoc laj spuquic batel ti choye. Ac'batic ti bu xa c'alal xal ti yo'ntonique. 12 C'alal laj yac'beic bu xa c'alal xal ti yo'ntonique, ti Jesuse xi laj yalbe ti yajchanc'optaque: —Tsobic ti scomelale yo' mu jeche'uc no'ox ta x'ixtolaj. 13 Laj stsobic un, noj lajcheb ( 12 ) moch xch'uch'ulil scomelal ti vo'bej pan meltsanbil jchop o ta trigoe. 14 Ti jech laj yilic ti jnaclejetic ti laj yac' iluc ti Jesús ti ch'ayal ta xc'ot o'ntonal yu'une, xi laj yalique: —Ta melel ti vinic li'e, ja' jun j'alc'op ti albil ono'ox sc'oplal ta xtal li' ta banomile. 15 Ti Jesuse laj yilbe yo'nton ti jnaclejetic ti tsots sc'oplal ta scomtsanat ta ajvalil yu'unique. Laj sq'uej sba batel, bat comuc stuc ta jun toyol vits. Ti Jesuse ta xanav ta ba vo' 16 C'alal ac'ubaltic xae, ti yajchanc'optac ti Jesuse batic ta ti' nab. 17 Ochic ta jun barco, ta xjelavic batel ta jot sti'il nab yo' jech ta xc'otic ta Capernaum jteclum. C'alal jal xa yic'ubele, jech ti Jesuse mu'yuc to sutem talel ti bu oye. 18 Ti jech taj une, lic tsots ic'. Xva'i xcotij xa liquel ti nab yu'une. 19 C'alal xanavic xa ox batel o'loluc xchibal revae, laj yilic ta xanav talel ta ba vo' ti Jesuse. Ti ta xnopaj talel ta sts'el ti barcoe, lic xi'icuc. 20 Xi laj yal ti Jesús ta stojol ti yajchanc'optaque: —Vu'unun, mu xaxi'ic. 21 Xmuyubajic xa laj yiq'uic ochel ta barco. C'otic no'ox ta ora ta banomil ti bu ta xbatique.
Ti jnaclejetique ta sa'ic ti Jesuse
22 Ta yoc'omal un, ti jnaclejetic ti comic ta jot sti'il nabe laj yilic ti jchanc'opetic ja' ochic batel ta barco ti cotol to ox ta ti' nabe, xchi'uc laj sna'ic ti mu'yuc xchi'inojic batel ti Jesuse. 23 Ti jech taj une, ja' o yacal ta xc'ot barcoetic ti ta xlic talel ta jteclum Tiberías ti bu nopol laj sve'ic ti pane, ti bu laj yalbe vocol Dios ti Jesuse. 24 C'alal laj yilic ti mu'yuc xa ti Jesuse, mi ja'uc ti yajchanc'optac ti bu taje, ti jnaclejetique ochic ta barco ec. Laj stam batel sbeic ta sa'el c'alal to jteclum Capernaum.
Ti Jesuse ja' pan sventa cuxlejal
25 C'alal c'otic ta jot sti'il nabe, laj staic Jesús ti bu taje, ti xi laj sjac'beique: —Jchanubtasvanej, ¿c'usi ora lavul li'e? 26 Xi laj yal ti Jesuse: —Ta xcalboxuc ava'iic ta melel, ta xasa'icun yu'un noj lec ach'utic c'alal lave'ique, mu yu'unuc ja' laj ava'iic smelol ti c'usi ch'ayal ta xc'ot o'ntonal yu'un laj cac' iluque. 27 Ma'uc xavabtelanic ta sa'el ti ave'elic ti sna' xlaje. Ja' ac'beic yipal ta sa'el ti ve'lil ti mu sna' xlaje, ti ta xac' cuxlejal sbatel osile. Vu'un ta xcac' ti ve'lile, ti vu'un co'ol j'elantique. C'ot ta jventa yu'un ti Jtot ti ja' Diose. 28 Xi laj sjac'beique: —¿C'usi sc'an ta jpascutic yo' ta xc'ot ta pasel ti c'usi ta sc'an yo'nton ti Diose? 29 Xi laj stac' ti Jesuse: —Ti c'usi ta sc'an ti Dios ta xapasique, c'otuc ta avo'ntonic ta yich'el ta muc' ti Buch'u tacbil talele. 30 Va'i un, xi laj sjaq'uique: —¿C'usi jtosucal avabtel, c'usi senyail ta xavac' quilcutic yo' ta xc'ot ta co'ntoncutic ta xch'unel? 31 Yu'un ti ch'ul c'ope xi ta xale: ‘Ti jmolmuc'totic ta vo'ne ti oyic ta sbajtical banomile, ac'bat sve'ic yu'un Dios ti maná liquem talel ta vinajele.’, 32 Xi laj stac' ti Jesuse: —Ta xcalboxuc ava'iic, ma'uc ti Moisés laj yac' ti pan ti liquem talel ta vinajele. Ti bats'i pan ti liquem talel ta vinajele, ja' laj yac' talel ti Jtote. 33 Yu'un ti pan ta xac' ti Diose, ja' ti Buch'u yal talel ta vinajele, yu'un ja' tal yac'be xcuxlejal ti jnaclejetic ta banomile. 34 Xi laj sc'anbeique: —Yojtot, j'ech'el ac'buncutic o ti pan taje. 35 Ti Jesuse xi laj yale: —Vu'unun ti pan ta xac' cuxlejale. Ti buch'u ta xtal ta jtojole mu xa'i o vi'nal. Ti buch'u ta xc'ot ta yo'nton ta xch'unelune, j'ech'el mu xa'i o taqui ti'il. 36 Ja'uc le'e, laj ono'ox calboxuc ava'iic ti mu xc'ot ta avo'ntonique manchuc mi laj xa avilbeicun jsat. 37 Scotol ti buch'utic ta xac' ta coc ta jc'ob ti Jtote, ta xtal ta jtojol. Ti buch'u ta xtal ta jtojole, mu'yuc ta jten loq'uel. 38 Ti liyal talel ta vinajele, ma'uc tal jpas ti c'usi ta sc'an ti co'ntone. Ti litale, ja' tal jpas ti c'usi ta sc'an yo'nton ti Buch'u laj stacun talele. 39 Ti oy ta yo'nton ti Buch'u laj stacun talele, ja' ti mu xch'ayic cu'un junuc ti laj yac'bun ta coc ta jc'obe, ti ja' ta jcha'cuxesic ta slajeb ti c'ac'ale. 40 Yu'un ti c'usi oy ta yo'nton ti Jtote, ti scotolicuc ac'o yojtiquinicun vu'un Xnich'onun ti Diose, ti c'otuc ta yo'ntonic ta xch'unelicune, ti staicuc ti xcuxlejalic sbatel osile, xchi'uc ti ta jcha'cuxesic ta slajeb ti c'ac'ale. 41 Ti va'i s'elan taje, ti israeletique lic bic'tal c'opojicuc ta sna'leel ti Jesuse ta scoj ti laj ya'iic ti xi laj yale: “Vu'unun ti pan liquem talel ta vinajele.” 42 Ti israeletique xi ta xalbe sbaique: —¿Mi mu ja'uc xnich'on José ti Jesús li'e? Yu'un xcojtiquinbetic ti stote, ti sme'e. ¿C'u cha'al ta xalbe sba ti liquem talel ta vinajele? 43 Xi laj yal ti Jesús une: —Ch'an chanic ta vulajetel xchi'uc taje. 44 Mu'yuc buch'u junuc xu' ta xtal ta jtojol mi ma'uc ic'bil talel yu'un ti Jtot ti laj stacun talele yo' ta jcha'cuxes ta slajeb ti c'ac'ale. 45 Yu'un xi ta xal ti ts'ibabil ta spocol-poc vunetic yu'un ti j'alc'opetique: ‘Scotolic ta xtojobtasatic ta xchanubtasatic yu'un ti Diose.’ Scotol ti buch'utic ta xa'ibeic sc'opojel ti Jtote xchi'uc ti ta xchanbeic ti yo'ntone, ta xtalic ta jtojol un. 46 “Mu yu'unuc oy buch'u yiloj ti Jtote. Ja' no'ox yiloj ti Buch'u liquem talel ta stojol ti Diose. 47 Bats'i ta xcalboxuc ava'iic, ti buch'u ta xc'ot ta yo'nton ta xch'unelune, oy xcuxlejal sbatel osil. 48 Vu'unun ti pan ti ta xac' cuxlejale. 49 Ti amolmuc'totic ta vo'nee laj sve'ic ti maná ta xocol banomile. Manchuc mi jech un, chamic ono'ox. 50 Ja'uc ti vu'une ta xcalbe sc'oplal ti pan ti liquem talel ta vinajele. Ti buch'u ta sve'e mu xcham. 51 Vu'unun ti cuxul pan liquem talel ta vinajele. Ti buch'u ta sve' ti pan taje, ta xcuxi o sbatel osil. Ti pan ti vu'un ta xcaq'ue, ja' ti jbec'tal jtacopale. Ta xcac' ta c'abal yo' jech ta sta xcuxlejal scotol ti jnaclejetic ta banomile.” 52 Xi xvulajetic liquel ta yalbel sbaic ti israeletique: —¿C'usi xut ta xijyac'botic jve'tic ti sbec'tale? 53 Xi laj yal ti Jesuse: —Ta xcalboxuc ava'iic ta melel, mi mu xave'ic ti jbec'tal ti vu'un co'ol j'elantique, mi mu xavuch'ic ti jch'ich'ele, mu xata acuxlejalic. 54 Ti buch'u ta sve' ti jbec'tale, ti ta xuch' ti jch'ich'ele, oy xcuxlejal sbatel osil. Vu'un ta jcha'cuxes ta slajeb c'ac'al. 55 Yu'un ja' bats'i ve'lil ti jbec'tale, ja' bats'i j'uch'el ti jch'ich'ele. 56 Ti buch'u ta sve' ti jbec'tale, ta xuch' ti jch'ich'ele, tsacal xcuxlejal ta jtojol, xchi'uc cuxulun ta stojol ec. 57 Yu'un cuxul ti Totil ti Buch'u laj stacun talele, cuxulun ta stojol ec. Ti buch'u ta smalq'uin sba ta jtojole, ta xcuxi ta jventa. 58 Ti pan ta xcal ti liquem talel ta vinajele, mu xco'olaj xchi'uc jech c'u cha'al ti maná laj sve'ic ti amolmuc'totic ta vo'nee, yu'un chamic ono'ox. Ti buch'u ta sve' ti pan li'e, ta xcuxi o sbatel osil. 59 Ta ch'ulna yu'un Capernaum jteclum ti va'i s'elan chanubtasvan ti Jesuse.
Naca sc'oplal cuxlejal sbatel osil ma' ti sc'ope
60 C'alal jech laj ya'iic ti va'i s'elan ti chanubtasele, yepal ti buch'utic sts'acliojic ti Jesús ti xi laj yalique: —Toj vocol ta ch'unel ti va'i s'elan ta xale. ¿Mi yu'un la oy buch'u ta xch'unbat ti yaloj une? 61 Ti Jesuse laj yil ti xvulajetic xa liquel ta labanvanej ti va'i s'elan laj yale, xi laj sjac'bee: —¿Mi ta soc avo'ntonic yu'un taje? 62 ¿C'usi van ta xc'ot ta avo'ntonic c'alal ta xavilic ta xisut batel ti bu lilic talel ti vu'un co'ol j'elantique? 63 Ta sventa ti Ch'ul Espiritue oy cuxlejal, ja'uc ti lum ach'ele, mu'yuc c'usi bal o. Ti va'i s'elan laj calboxuc ava'iique, naca sc'oplal ti Ch'ul Espíritu ti ta xac' cuxlejale. 64 Ja'uc le'e, oy jlom avu'unic ti mu'yuc to ta xc'ot ta avo'ntonic ta xch'unele. Ja' jech laj yal ti Jesuse, yu'un sna'oj ta sliquebal ti oy buch'u mu xch'unique, xchi'uc sna'oj ti buch'u ta x'ac'van batel ta c'abale. 65 Xi laj sts'ac batel lo'il ti Jesuse: —Laj ono'ox calboxuc ava'iic, mu'yuc buch'u ta xtal ta jtojol mi ma'uc ic'bil talel yu'un ti Jtote. 66 Va'i un, ja' o lic xch'ac sbaic ti yepal to ox sts'acliojic ti Jesuse. Mu'yuc xa ta xchi'inic ti Jesuse. 67 Xi laj sjac' ti Jesús ta stojol ti lajcha'vo' ( 12 ) yajchanc'optaque: —¿Mi ta xac'an ta xabatic ec? 68 Xi laj stac' ti Simón Pedroe: —Cajval, ¿buch'u xa ta jts'aclicutic batel? yu'un ti ac'ope ja' cuxlejal sbatel osil. 69 Ti vu'uncutique c'ot xa ta co'ntoncutic ta xch'unel. Yu'un laj xa jna'cutic vo'ot ti Cristoe, Xnich'onot ti cuxul Diose. 70 Xi tac'av ti Jesuse: —¿Mi yu'un mu'yuc laj jt'ujoxuc ti lajcha'vo'oxuque ( 12 )? Manchuc mi jech un, oy jun avu'unic ja' jun pucuj ta j'ech'el. 71 Ti jech laj yal ti Jesuse, ja' ta xalbe sc'oplal ti Judas Iscariote, xnich'on ti Simone. Yu'un ti Judase ja' ta x'ac'van batel ta c'abal, manchuc mi ja' jun ta xlajcha'vo'al ( 12 ) yajchanc'optac ti Jesuse.
Ti Jesuse mu x'ich'e ta muc' yu'un ti yits'inabtaque
1 Laj taj une, ti Jesuse ta xanav ta yosilal Galilea, yu'un mu sc'an oy ta Judea, yu'un ti bu taje, sc'an ta xmile yu'un ti jpas-mantal israeletique. 2 Ti jech nopol xa sc'an xc'ot sq'uinal ti Axibal yanal te' nae, ti ja' jun q'uin na'bil yu'un ti israeletique, 3 xi laj yalic ti yits'inabtaque: —Mu li'uc no'ox xacome. Ac'bo yilic ec ti avajts'aclivanejtac ti oyic ta Judeae, ti oy c'usi xu' avu'un ta spasele. 4 Yu'un mi oy buch'u ta xac' sba ta ojtiquinele, ma'uc ta mucul ta spas. Ti c'usi ta xapas li'e, ba ac'o ta ilel ta sba ta sat scotol ti jnaclejetic ta banomil ti bu taje. 5 Jech laj yalic, yu'un mi juteb x'ich'e ta muc' yu'un ti yits'inabtaque. 6 Xi laj stac' ti Jesuse: —Yu'un mu'yuc to ta xc'ot corail. Ti vo'oxuque, c'usiuc no'ox ora xu' xabatic. 7 Yu'un ti buch'utic co'ol avo'ntonic xchi'uque, mu'yuc xti'et sjolic ta atojolic. Ja'uc ti vu'une ta xiscontrainicun, ja' ti jamal ta xcalbe ya'iic ti c'usi chopol ta spasique. 8 Batan ta q'uin ti vo'oxuque, mu xibat ma' ti vu'une. Yu'un ma'uc to yorail ta xc'ot ta pasel ti bu q'uelel talel ti coraile. 9 C'alal jech laj yal taje, com ta Galilea.
Oy ta sq'uinal Axibal yanal te' na ti Jesuse
10 C'alal batemic xa ta q'uin ti yits'inabe, bat ec ti Jesuse ac'o mi ta mucul, yu'un mu sc'an xac' sba iluc. 11 Ti jech xyaquet ti q'uine, ti israeletique ta sa'ic ti Jesuse, ti xi ta xalique: —¿Bu oy xana' ti vinique? 12 Scotol c'u yepal oy ti jnaclejetique, xpuquet no'ox sc'oplal yu'unic. Yu'un xi ta xal ti jlome: “Ja' jun lequil vinic.” Ti jlome xi ta xalique: “Ja' jun chopol vinic, yu'un ta slo'laan ti jnaclejetique.” 13 Manchuc mi jech un, mu'yuc buch'u ta sjam lec ye ta yalbel sc'oplal ta scoj xi'el yu'un ti banquilaletic yu'un ti israeletique. 14 C'alal o'lol xa ox batel ti q'uine, och batel ta ch'ulna ti Jesuse, lic chanubtasvanuc ti bu taje. 15 Ch'ayal no'ox ta xc'ot yo'nton ti j'abteletic yu'un ti israeletic ti xi ta xalbe sbaique: —¿C'usi xut ep sbijil ti vinic le'e c'alal mu'yuc c'usi xchanoje? 16 Xi laj yal ti Jesuse: —Ti c'u s'elan ta xichanubtasvane, ma'uc ta jbijil jtuc. Ja' yac'ojbun jbijil ti Buch'u laj stacun talele. 17 Mi oy buch'u oy ta yo'nton sc'an ta spas ti c'usi oy ta yo'nton ti Diose, ta xlic yil mi liquem talel ta stojol ti Diose, mi ja' no'ox ta jnop jtuc ti c'u s'elan ta xichanubtasvane. 18 Ti buch'u yeilal no'ox yu'un ti c'usi ta xale, ja' no'ox ta sc'an ich'el ta muc' yu'un ti jnaclejetique. Ja'uc ti Buch'u ta xac'be yipal ti ich'bil ta muc' ta xc'ot yu'un ti Buch'u tacbil talele, le'e, melel ti c'usi ta xale, ma'uc ta xlo'lavan. 19 “¿Mi mu ja'uc Moisés laj yac'boxuc ti oy c'usi tsots albil sc'oplale? Manchuc mi avich'ojic un, mu'yuc buch'u junucal spas avu'unic ma' taje, yu'un ta xac'an xamilicun ava'iic.” 20 Xi laj yalic ti jnaclejetique: —Ach'ulelinojbe xch'ulel pucuj. ¿Buch'u sc'an ta smilot ya'i? 21 Itac'av ti Jesuse: —Acotolic ch'ayal c'ot avo'ntonic yu'un ti c'usi laj jpas avilic ta sc'ac'alil cuxob o'ntonale. 22 Manchuc mi jech un, ti Moisese laj yalboxuc mantal ti ac'o apasic ti c'u s'elan liquem sc'oplal ti circuncisione. (Ja'uc le'e, ma'uc laj sliques ta spasel, ja' laj sliquesic ta spasel ti amolmuc'totic ta vo'nee.) Ti vo'oxuc une ta xavac'beic yich' circuncisión jun biq'uit querem manchuc mi ta sc'ac'alil cuxob o'ntonal. 23 Ti jech tsots sc'oplal ta xava'iic ta yac'bel yich'ic circuncisión jun biq'uit querem yo' mu stselbuj avu'unic smantal ti Moisés manchuc mi sc'ac'alil ti cuxob o'ntonale, ¿c'u cha'al xti'et ajolic ta jtojol ti laj jcolesbe sjunul sbec'tal jun vinic ti oy xchamel ti ja' o sc'ac'alil ti cuxob o'ntonale? 24 Ma'uc no'ox xachapanvanic c'u s'elan ta xac' ti snopbenal avu'unique. Oyuc stuq'uil smelol xachapanvanic.
Ti Jesuse ta xal ti bu liquem talele
25 Oy jlom ti buch'utic nacalic ta Jerusalene xi lic sjac'be sbaique: —¿Mi mu ja'uc ti vinic le'e ti ta sa'ic yo' ta smilique? 26 Q'uel avil, le' va'al ta satilal ta xchanubtas ti jnaclejetique, ch'an xutic mu'yuc c'usi ta xalbeic. ¿Mi yu'un c'otem ta yo'ntonic ti j'abteletic xana' ti ja' Cristo ti vinic le'e? 27 Ti vo'otique jna'ojtic bu liquem talel le'e, ja'uc ti bu ta xlic talel ti Cristoe, mu'yuc buch'u sna'. 28 Ti jech ta xchanubtasvan ta ch'ulna ti Jesuse, xi tsots laj yale: —Ati xcaltic un cha'e, xavojtiquinicun, xana'ic bu liquemun talel. Ja'uc le' une, ma'uc talemun ta jmantal jtuc, ja' tacbilun talel yu'un ti Buch'u oy slequil yutsil yo'ntone, ti vo'oxuc mu xavojtiquinique. 29 Ti vu'une xcojtiquin ti Buch'u laj stacun talele. Yu'un liquemun talel ta stojol. 30 Va'i un, sc'an xa ox ta stsaquic ya'iic. Mu'yuc buch'u junucal laj stic' sba mi junuc, yu'un mu'yuc to ta xc'ot yorail. 31 Ep buch'utic c'ot ta yo'ntonic ti ja' Cristo ti Jesuse, ti xi laj yalique: —C'alal mi tal ti Cristoe, ¿mi yu'un van x'ech' to ta xac' iluc ti oy c'usi ch'ayal ta xc'ot o'ntonal yu'une, mi ja' mu sta ta xac' iluc ti vinic le'e?
Ti fariseoetique yo'ntonuc stsaquic ya'iic ti Jesuse
32 Ti fariseoetique laj ya'iic ti c'u s'elan ta xalbeic sc'oplal ti Jesuse. Ti stuquique xchi'uc ti banquilal yu'un ti paleetique, laj staquic batel mayoletic yu'un ti ch'ulnae yo' ta stsaquic talel ti Jesuse. 33 Xi laj yal ti Jesuse: —Mu xa jaluc li' oyun ta atojolique, yu'un ta xisut batel ta stojol ti Buch'u laj stacun talele. 34 Xasa'icun xa, mi ja'uc xataicun, yu'un ti bu oyune, mu xu' ta xac'otic. 35 Xi lic sjac'be sbaic ta jujun tal ti j'abteletic yu'un ti israeletique: —¿Bu ta xbat yaloj ti ta xal ti mu xu' ta jtatic ta sa'ele? ¿Mi yu'un van ta xbat ta stojol yan israeletic ti tanijemic ta naclej xchi'uc ti jyanlumetique yo' jech ta xbat xchanubtas ti buch'utic yan yajvalique? 36 ¿C'usi smelol ti va'i s'elan laj yale: “Ta xasa'icun, mi ja'uc xataicun ta sa'el, yu'un ti bu oyune, mu xu' xac'otic”, ti xie?
Ti cuxul sat vo'e
37-38 Ti slajeb xa c'ac'al yu'un ti muc' ta q'uine, ti jech c'ac'al taje, laj sva'an sba ti Jesús ti xi tsots lic c'opojuque: —Mi oy buch'u ta xa'i ti taqui ti'ile, ac'o taluc ta jtojol. Ti buch'u ta xc'ot ta yo'nton ta xiyich'un ta muq'ue, ac'o yuch' ti vo'e, yu'un xi ti ts'ibabil ta ch'ul c'ope: ‘Co'ol s'elan cuxul sat vo' ta x'ayan talel ta yo'nton.’ 39 Ti va'i s'elan laj yal ti Jesuse, ja' ta xac' ta na'el ta xich'ic Ch'ul Espíritu ti buch'utic ta xc'ot ta yo'ntonic ta xch'unele. Mu'yuc to talem ti Ch'ul Espiritue, yu'un mu'yuc to muyem batel ta vinajel ta yich'el slequilal yutsilal ti Jesuse. Jelel snopobil yu'unic ti jnaclejetique 40 C'alal jech laj ya'iic ti jnaclejetic ti va'i s'elan laj yal ti Jesuse, oy jlom ti xi laj yalique: —Melel, ti vinic li'e ja' ti j'alc'op ti oy ono'ox sc'oplal ta xtale. 41 Xi ta xalic ti yane: —Ja' ti Cristoe. Oy yan ti xi ta xalique: —¡Bu xata ti ta Galilea ta xlic talel ti Cristoe! 42 Yu'un ta xalbe sc'oplal ti ts'ibabil ta ch'ul c'ope, ti Cristoe ta x'ayan talel ta stojol snitilul ti ajvalil Davide, ta jteclum Belén, slumal stuc ti Davide. 43 Jech o xal ti jnaclejetique, jelel ti snopbenal yu'unic ta sventa ti Jesuse. 44 Oy jlom ta ox stsaquic ya'iic ta chuquel. Mi junuc oy bu cuch yu'unic.
Ti j'opisialetique mu stsaquic ta venta ti Jesuse
45 Ti mayoletic yu'un ti ch'ulnae sutic batel bu oy ti fariseoetique xchi'uc ti banquilal yu'un ti paleetique, ti xi jac'batique: —¿C'u cha'al mu'yuc laj atsaquic talel? 46 Xi tac'av ti mayoletique: —Yu'un mu'yuc buch'u jech xco'olaj ta xc'opoj jech c'u cha'al ti vinic le'e. 47 Xi laj yalic ti fariseoetique: —¿Mi yu'un lalajic ta lo'lael ec? 48 ¿Mi yu'un avac'touc oy buch'u laj xa xch'un cu'uncutic ti banquilaletique xchi'uc ti fariseouncutique? 49 Mu jechuc un, yu'un ti buch'utic mu sna'ic ti mantale, jbel sc'oplal bisbil ta cotol chaval x'ile yu'un ti Diose. 50 Ti Nicodemo ti jun fariseo eque, ti oy bu ay sq'uel ta ac'ubaltic ti Jesuse, xi laj yale: 51 —Mu xu' jsa'betic smul jun vinic mi mu'yuc to ca'binojtic lec ti c'usi laj xa spase, xi ti mantal cu'untique. 52 Xi laj stac'beic ti Nicodemoe: —¿Mi yu'un galilea vinicot ec? Q'uelo avil lec ti ch'ul c'ope, mu junuc j'alc'op ti ta xloc' talel ta Galileae. 53 Ts'acal to un, ta jujun tal bat ta snaic.
Ti jlo'laej vinic antse
1 Ti Jesuse laj stam batel sbe, bat ta vits Olivos. 2 C'alal sacub ta yoc'omale, sut batel ta ch'ulna. Laj stsob sbaic talel ti jnaclejetic ta stojole. Lic chotiuc ta chanubtasvanej. 3 Ti jchanubtasvanejetic yu'un ti oy c'usi tsots albil sc'oplale xchi'uc ti fariseoetique, yic'ojic talel jun ants ti yacal ta spas smul laj staique. Laj sva'anic ta o'lol ta stojol ti c'u yepal oye. 4 Xi laj yalbeic ti Jesuse: —Jchanubtasvanej, ti ants li'e yacal ta spas smul laj staic. 5 Ti buch'u jech jun ants jech c'u cha'al li'e, ta xalbotic ta smantal ti Moisese ti ac'o yich' milel ta tone. ¿C'u xachi ti vo'ote? 6 Jech laj sjaq'uic taje yo' ta slajeltsaic ta stabel ti smule. Ti Jesuse cuji. Laj sts'iba ti banomil ta sni' sc'obe. 7 Ti jech xvulajetic ta sjaq'uele, ti Jesuse va'i ti xi laj yale: —Buch'uuc no'ox junucal avu'unic mu sna' sa' ti smule, ja' ac'o syales ba'yel ti yoc sc'ob ta yac'bel ton ti antse. 8 Lic cha'cujiuc ta sts'ibael ti banomile. 9 Oy smul laj ya'iic ti c'alal jech albatique. Ta jujun tal loq'uic batel. Ti buch'u ba'yel loq'uic batele ja' ti moletique. C'alal stuc xa ti Jesús com xchi'uc ti antse, 10 va' xi liquel ti xi laj sjac'be ti antse: —¿Bu bat ti buch'utic ta sa' amule? ¿Mi oy buch'u laj yac' atoj ti amule? 11 Xi laj stac' ti antse: —Mu'yuc chquil, Yojtot. Xi laj yal ti Jesuse: —Mi ja'uc vu'un ta xcac' atoj ti amule. Avi li'e, batan. Mu xa xasa' yan amul.
Oy saquilal osil ta sventa ti Jesuse
12 Ti Jesuse xi laj no'ox yal xtoc ta stojol ti jnaclejetique: —Luzun yu'un ti jnaclejetique. Ti buch'u ta xists'aclie, oy luz yu'un ti ta x'ac'bat ti xcuxlejale. Mi ja'uc ta xanav ta ic'al osil. 13 Xi albatic yu'un ti fariseoetique: —Ti vo'ote ja' no'ox ta xavalbe aba ac'oplal atuc. Ti jech ta xaval taje, mu'yuc c'usi bal o. 14 Xi tac'av ti Jesuse: —Tsots sc'oplal ta xcalbe jba jc'oplal ti jtuque, yu'un jna' ti bu litale, ti bu ta xibat xtoque. Ja'uc ti vo'oxuque, mu xana'ic. 15 Ti vo'oxuque ja' no'ox ta xachapanvanic c'u s'elan xac' ti ajol avo'ntonique. Mu jechuc ta jpas ma' ti vu'une. 16 Mi ta xichapanvane, ja' melel ti c'u s'elan ta xcale. Mu jtucuc no'ox ti ta xichapanvane, ja' tacbilun talel yu'un ti Jtote, xchi'inojun ta xchapanel. 17 Ti ts'ibabil ti oy c'usi tsots albil sc'oplal ti oy ta atojolique, ich'bil ta muc' ta xc'ot mi oy chib rextico mi co'ol ti sc'opique. 18 Ti jun cajrextico oy ta jtojole, vu'un jtuc. Ti yan rextico xtoque, ja' ti Jtot ti Buch'u laj stacun talele. 19 Xi laj sjac'beique: —¿Bu oy ti atote? Xi laj stac' ti Jesuse: —Ti vo'oxuque mu xavojtiquinicun, mi ja'uc xavojtiquinic ti Jtote. Ti yu'unuc xavojtiquinicune, xavojtiquinic ti Jtot jechuque. 20 Ja' jech laj yal ti Jesuse c'alal ta xchanubtasvan ta ch'ulna ti bu oy xcaxail smoton ti Diose. Mi ja'uc junuc oy buch'u tsacvanic yu'un mu to ta xc'ot ti yoraile. “Ti bu ta xibate mu xac'otic” 21 Xi laj xcha'al ti Jesuse: —Ti vu'une ta xibat. Ta xasa'icun un. Le' une, acuchoj amul xacham xalajic. Yu'un ti bu ta xibate, mu xac'otic. 22 Xi laj yal ti israeletique: —¿Mi yu'un ta snop ta smil sba ya'luc? ¿Mi jech o xal ti xi laj yale: ‘Ti bu ta xibate, mu xac'otic?’ 23 Xi laj yal ti Jesuse: —Ti vo'oxuque, ta banomil oyoxuc, yan ti vu'une, ta ac'ol liquemun talel. Ti vo'oxuque, jnaclejoxuc ta banomil. Ja'uc ti vu'une ma'uc c'otem ta jventa ti sba banomile. 24 Jech o xal laj calboxuc ava'iic ti acuchoj amul xacham xalajique, yu'un mi mu xc'ot ta avo'ntonic ti Buch'uun ta melele, acuchoj amul xacham xalajic, xacutoxuc. 25 Xi laj sjaq'uique: —¿Buch'uot un cha'e? Xi laj stac' ti Jesuse: —Laj xa calboxuc ava'iic ta sliquebal. 26 Oy ep ti c'usi xu' ta xcalboxuque xchi'uc ta xchapaneloxuque, yu'un ti Buch'u laj stacun talele, ja' melel ti c'usi ta xale. Ti c'u s'elan ta xcalbe ya'i ti jnaclejetic ta banomile, ja' ta xcal ti c'u s'elan laj yac'bun jna' ti stuque. 27 Mi jutebuc laj ya'ibeic smelol ti ja' ta xalbe sc'oplal ti Stote. 28 Xi laj yal ti Jesuse: —C'alal ti vo'oxuc ta xajipanic ta curus ti vu'un co'ol j'elantique, ja' to ta xlic avojtiquinicun Buch'uun ta melel. Scotol ti c'usi ta xcale, ma'uc ta jol jtuc, yu'un ja' ta xcal c'u s'elan lichanubtasat yu'un ti Jtote. 29 Yu'un ti Buch'u laj stacun talele, li' xchi'inojune. Mu'yuc yictaojun comel jtuc ti Jtote. Ti vu'une ja' ta jpas ti c'usi lec ta xile. 30 C'alal jech laj yal ti Jesuse, ep buch'u c'ot ta yo'ntonic.
Ti xnich'nabtac Diose xchi'uc ti buch'u mosovinbilic yu'un ti mulile
31 Ti Jesuse xi laj yalbe ti israeletic ti buch'utic laj xch'unique: —Mi staoj yav avo'ntonic ta xch'unel ti c'u s'elan laj calboxuque, ta j'ech'el ja' cajchanc'opoxuc. 32 Ta xlic avojtiquinic ti bu ja' melele, xchi'uc ta xaspojoxuc loq'uel ta mosovil ti melele. 33 Xi laj staq'uique: —Laj to c'op ma' ti ochemuncutic ta mosovinele. Ti vu'uncutique snitiluluncutic ti Abrahame. ¿C'u cha'al ta xaval ta jtacutic pojel colel? 34 Xi laj stac' ti Jesuse: —Ta melel ta xcalboxuc ava'iic, scotol ti buch'u ta sa' smulique, ja' mosovinbilic yu'un ti mulile. 35 Ti jun mosovile mu xcom o ta bats'i alab nich'nab, ja'uc ti bats'i nich'onile ta xcom o ta bats'i alab nich'nab. 36 Jech o xal un, mi ta jcoltaoxuc ti vu'un Nich'onilune, c'otem ta jventa ti apojel acolelique. 37 Jna' lec ti snitiluloxuc ti Abrahame. Ja'uc le' une, ta xamilicun ava'iic, mu xac'an xach'unic ti c'u s'elan ta xcale. 38 Ja' no'ox ta xcal ti c'u s'elan laj yac'bun jna' ti Jtote. Ti vo'oxuque ja' ta xapasic c'u s'elan ta xa'albatic yu'un ti atotique. 39 Xi tac'avique: —Ti jtotcutique, ja' ti Abrahame. Xi laj yal ti Jesuse: —Ti xnich'nabucoxuc ti Abrahame, jech ta xapasic jech c'u cha'al laj spas ti stuque. 40 Manchuc mi ta xcalboxuc ava'iic ti ja' chanubtasbilun yu'un ti Diose, ta xamilicun ava'iic. Ti Abrahame mu jechuc laj spas jech c'u cha'al le'e. 41 Ja'uc ti vo'oxuque, ja' jech ta xapasic jech c'u cha'al ta spas ti atotique. Xi laj yalique: —Ti vu'uncutique ma'uc tsobbilal ololuncutic, yu'un oy jun jtotcutic, ja' ti Diose. 42 Xi tac'batic yu'un ti Jesuse: —Ti ja'uc Atotic ti Diose, c'ux ta xava'iicun ti jechuque. Yu'un liquemun talel ta stojol Dios ti li' oyune. Ma'uc talemun ta jventa jtuc, yu'un ja' tacbilun talel yu'un ti Diose. 43 ¿C'u cha'al ti mu xava'iic ti c'usi ta xcale? Yu'un ja' ti mu xac'an xava'iic ti jc'ope. 44 Yu'un ti atotique, ja' ti pucuje. Yu'un ja' yu'unoxuc. Ja' ta xapas ava'iic jech c'u cha'al ta sc'an ti stuque. Ta sliquebal ono'ox, ja' jun jmilvanej ti pucuje. Mu xac' ta venta ti bu ja' melele. Mu no'ox meleluc sna' xal. Ti buch'u naca jutbil ti c'usi ta xale, jech ta xal jech c'u cha'al ti stuque. Yu'un jutc'op ono'ox ta j'ech'el, ja' jun totil jutc'op. 45 Ti jech melel ti c'usi ta xcale, mu xc'ot ta avo'ntonic. 46 ¿Buch'u junucal avu'unic xu' ta svinajes ti oy jmule? Melel ti c'usi ta xcalboxuque, ¿c'u cha'al mu xc'ot ta avo'ntonic? 47 Ti buch'u ja' xnich'nabtac ti Diose, ta sts'etan sni' xchiquin ta ya'yiel ti c'u s'elan ta xal ti sc'op Diose. Ti vo'oxuque mu xac'an xats'etan ani' achiquin ta ya'yiel ti jc'ope, yu'un ma'uc xnich'naboxuc ti Diose —xi ti Jesuse.
Ti Cristoe oy xa ono'ox c'alal voc' ti Abrahame
48 Xi laj yalic ti israeletique: —Oy smelol ti ta xcalcutic ja' jun samaria vinicote, yu'un ach'ulelinojbe xch'ulel ti pucuje. 49 Xi laj stac' ti Jesuse: —Ma'uc quich'ojbe xch'ulel ti pucuje. Ti c'usi ta jpase, ja' yich'el ta muc' ti Jtote. Ja'uc ti vo'oxuque mu xavich'icun ta muc'. 50 Ti vu'une ma'uc tal jsa' ti lecuc ti jc'oplal avu'unique. Yu'un oy Buch'u ta xiyac'un ta ich'el ta muc', ja' ti Buch'u ta xchapan scotole. 51 Ta xcalboxuc ava'iic ta melel, ti buch'u ta xich' ta muc' ti c'usi ta xcale, mi ja'uc ta xcham. 52 Xi laj staq'uic ti israeletique: —Melel ach'ulelinojbe xch'ulel ti pucuje. Yu'un ti Abrahame, scotol ti j'alc'opetique laj xa chamicuc. Ja'uc ti vo'ote xachi ta xavale: “Ti buch'u ta xich' ta muc' ti c'usi ta xcale, mu xcham.” 53 ¿Mi yu'un vo'ot x'ech' to cajal latal? ¿Mi ja' mu sta ti jmolmuc'totic Abrahame? Yu'un ti stuque cham xa. Ti j'alc'opetique chamic xa xtoc. ¿Buch'uot ya'yel ta xabis aba un cha'e? 54 Xi laj stac' ti Jesuse: —Ti tauc xcac' jba ich'el ta muq'ue, j'ech'el mu'yuc c'usi bal o. Yu'un ti Buch'u ta xiyac'un ta ich'el ta muq'ue, ja' ti Jtote, ti ja' Dios avu'un ta xavalique. 55 Ti vo'oxuque mu xavojtiquinic. Ja'uc ti vu'une xcojtiquin. Mi ta xcal ti mu xcojtiquine, ja' jun jutc'opun ta j'ech'el jech c'u cha'al ti vo'oxuque. J'ech'el xcojtiquin ma' ti vu'une, xchi'uc ta xquich'be ta muc' ti c'usi ta xale. 56 Ti Abraham ti ja' amolmuc'totic ta vo'nee, xmuyubaj xa yo'nton ti laj ya'i ti ta xitale. Laj yil ti litale, xmuyubaj xa ta jmec. 57 Xi laj yalic ti israeletic ta stojol ti Jesuse: —Ti vo'ote mu'yuc to avich'oj lajuneb yoxvinic ( 50 ) jabil. ¿C'usi laj avut ti laj avil ti Abrahame? 58 Xi laj stac' ti Jesuse: —Ta xcalboxuc ava'iic ta melel, c'alal mu'yuc to ox voq'uem ti Abrahame, oyun xa ono'ox. 59 Va'i un, ti stuquique laj stsaquic ton yo' ta xac'beic. Ja'uc ti Jesuse laj sq'uej sba, loc' batel ta ch'ulna. Ech' batel ta o'lol yu'unic, bat.
Ti Jesuse ta sjambe sat jun vinic ti ma'sat ono'ox voq'ueme
1 Ti bu to x'ech' ti Jesuse, laj yil jun vinic ti ma'sat ono'ox voq'ueme. 2 Xi jac'batic yu'un ti yajchanc'optaque: —Jchanubtasvanej, ¿c'u cha'al ma'sat voc' ti vinic li'e? ¿Mi ja' ta scoj smul ti stot sme'e, mi ta scoj smul stuc? 3 Xi laj stac' ti Jesuse: —Ma'uc ta scoj smul stuc, mi ja'uc ta scoj smul ti stot sme'e. Ti jech ma'sat voq'ue yo' jech vinajuc yabtel ti Dios ta stojole. 4 Yo' to sac ti osile, ta sc'an ta jpasbe yabtel ti Buch'u laj stacun talele. Yu'un ta xa xtal ti ac'ubaltique c'alal mu'yuc xa buch'u xu' ta x'abteje. 5 Ti li' to oyun ta banomile, c'otemun ta saquilal osil yu'un ti jnaclejetique. 6 C'alal jech laj yal ti va'i s'elan taje, ti Jesuse laj stubta banomil. Laj spas juteb ach'el xchi'uc ti stube. Laj sbonbe ta jujubej sat ti ma'sate. 7 Xi laj yal ti Jesuse: —Batan, ba poco asat ta sat vo' ti Siloee (“ja' tacbil”, xi ta xal smelol ti Siloee). Jech ti ma'sate ba spoc ti sate. C'alal sut talele, lec xa xil ti osile. 8 Xi ta sjac'olanbe sba ti slac'nataque xchi'uc ti buch'utic yilojic ono'ox ta sc'an limoxnae: —¿Mi mu ja'uc ti vinic le'e, ti xchotet ta sc'anel limuxnae? 9 Xi ta xalic ti jlome: —Ja' ma' le'e. Xi ta xalic ti jlom xtoque: —Ma'uc, ja' no'ox ti xco'olaj yilele. Ja'uc ti vinique, “Vu'unun”, xi stuc. 10 Xi laj sjac'beique: —¿C'usi laj avut ti xavil ti osile? 11 Xi laj staq'ue: —Ti vinic ti sbiinoj Jesuse laj spas ach'el. Laj sbonbun ta jsat, xi laj yalbune: ‘Batan ta sat vo' Siloé, xapoc ti asate.’ Libat ec un, laj jpoc ti jsate. Ta jech yepal laj quil ti saquilal osile. 12 Xi laj sjac'beique: —¿Bu oy ti vinic taje? Xi laj staq'ue: —Mu jna' bu oy.
Ti fariseoetique ta sjac'beic c'u s'elan jam sat ti ma'sate
13 Ti ma'sat to oxe, ic'bil bat ta stojol ti fariseoetique. 14 Yu'un ja' o sc'ac'alil cuxob o'ntonal c'alal jech laj spas ach'el ti Jesús ta sventa scolel ti ma'sate. 15 Ti fariseoetique laj sjac'beic ti ma'sat to oxe, c'usi laj yut ti xil xa ti osile. Xi laj stac' ti vinique: —Laj sbonbun ach'el ta jsat. Laj jpoc un. Avi tana une, xquil ti osile. 16 Xiic laj yalic ti jlom fariseoetique: —Ti vinic jech laj spas taje, ma'uc tacbil talel yu'un ti Diose, yu'un mu xich' ta muc' sc'ac'alil ti cuxob o'ntonale. Xiic laj yalic ti jlom xtoque: —¿C'u ono'ox xi ta xac' ta ilel ti oy c'usi ch'ayal ta xc'ot o'ntonal yu'une ti mi ja' jun jsa'mulile? Ti jech taje, mu co'oluc ti snopbenal yu'unique. 17 Xi laj xcha'jac'beic ti ma'sat to oxe: —¿C'usi xu' ta xaval ta stojol ti vinic taje, ti ja' laj sjambot ti asate? Xi laj staq'ue: —Ti vu'un ta xcale, ja' jun j'alc'op. 18 Ja'uc ti israeletique mu xch'unic ti ma'sat to oxe, ti jech xil ti osil tanae. Laj yic'beic talel xtoc ti stot sme'e. 19 Xi laj sjac'beique: —¿Mi ja' ti aquerem li'e ti ta xavalic ti ma'sat voq'ue? ¿C'u cha'al xil xa ti osil tana une? 20 Xi laj staq'uic ti stot sme'e: —Jna'cutic ti ja' jqueremcutique, ti ma'sat voq'ue. 21 Ti bu mu jna'cutique, ti jech ta xil xa ti osile, ti buch'u jambun ti sate. Jac'beic ava'iic ti stuque, x'al xa yu'un, julem xa xch'ulel. 22 Ti jech laj yal ti stot sme'e ta scoj xi'el. Yu'un ti j'abteletic yu'un ti israeletique laj xa scomonop sc'opic ti buch'uuc no'ox ta xal ja' Cristo ti Jesuse, ta xtenat loq'uel ta ch'ulna yu'unic. 23 Jech o xal, “Jac'beic ava'iic ti jqueremcutique, julem xa xch'ulel”, xi laj yalic ti stot sme'e. 24 Jech o xal ti israeletique laj xcha'taic ta iq'uel ti vinic ti ma'sat to oxe, ti xi laj yalbeique: —Ta melel, albun ca'icutic ta sba ta sat ti Diose, yu'un ti vinic taje, jna'cutic ti ja' jun jsa'mulile. 25 Xi laj stac' ti vinique: —Mu jna' mi ja' jun jsa'mulil, mi ma'uc. Ti c'usi jna' leque, ja' jun ma'satun to ox. Avi tana, xquil xa ti saquilal osile. 26 Xi laj xcha'jac'beique: —¿C'u s'elan laj spas? ¿C'usi laj yut laj sjam ti asate? 27 Xi laj stac' ti vinique: —Laj xa calboxuc ava'iic, mu xac'an xach'unbeicun. ¿C'u cha'al ep ta coj ta xac'an ta xcalboxuc? ¿Mi yu'un ta xac'an ta xats'acli ava'iic ec? 28 Va'i un, xi lic sjajantaique: —Vo'ot ma' ti yajts'aclivanejot ti vinic taje. Yan ti vu'uncutique ja' ta jts'acliuncutic ti Moisese. 29 Yu'un jna'ojcutic ic'oponat yu'un Dios ti Moisese. Ja'uc ti vinic taje, mi ja'uc jna'cutic bu liquem talel. 30 Xi laj stac' ti ma'sat to oxe: —Labal ta xca'i avu'unic ti mu xana'ic bu liquem talel c'alal ja' laj sjambun ti jsate. 31 Jna'tic lec, ti jun jsa'mulile mu x'a'yibat sc'op yu'un ti Diose. Ja' no'ox ta xa'ibe sc'op ti buch'u ta xich'ic ta muq'ue, xchi'uc ti ta spasic ti c'usi lec ta xil ti stuque. 32 Yu'un mu'yuc xca'ibetic sc'oplal ta sjambe sat jun vinic ti ma'sat voq'ueme. 33 Mi ma'uc tacbil talel yu'un Dios ti vinic taje, mu'yuc c'usi xu' yu'un ta spas ti jechuque. 34 Ti fariseoetique xi laj yalbeique: —Yu'un mu albajuc amul lavoc' talel ta banomil. ¿Bu latal ti cajal xa ave ati' ta xac'an xachanubtasuncutic ti avaloje? Laj sjipic laj staquic loq'uel ta ch'ul na.
Naca sba banomil sq'uelojic batel
35 Ti Jesuse laj ya'i ti jipbil xa loq'uel ta ch'ulna ti ma'sat to oxe. C'alal laj snup sbaic ta bee, xi jac'bat yu'un ti Jesuse: —¿Mi ta xavich' ta muc' ti Xnich'on Diose? 36 Xi laj yal ti vinique: —Yojtot, albun ca'i Buch'u yo' jech ta xquich' ta muc'. 37 Xi laj stac' ti Jesuse: —Vu'unun, laj xa avil ta aba asat, yacal ta xachi'in ta lo'il. 38 Va'i un, ti vinique laj squejan sba ta stojol ti Jesuse, ti xi laj yalbee: —Cajval, ta xquich'ot ta muc'. 39 Xi laj yal ti Jesuse: —Ti lital li' ta banomile, tal jvinajesbe c'u s'elan yo'nton ti jnaclejetique yo' jech ta xjam sat ti ma'satetique, yo' jech ti buch'u xilic ti osil yalojique, ta xjoybijic ta ma'sat. 40 Oy jlom fariseoetic jmoj ta xanavic xchi'uc, c'alal laj ya'iic jech taje, xi laj sjac'beique: —¿Mi yu'un ma'satuncutic ya'yel ec un? 41 Xi laj stac' ti Jesuse: —Ati yu'unuc ma'satucoxuque, mu'yuc amulic ti jechuque. Ja'uc le' une, ta scoj ta xavalic ti xavilic ti osile, oy amulic.
Ti j'il-chije, ti chijetic xtoque
1 Va'i un, xi laj yal ti Jesuse: —Ta xcalboxuc ava'iic ta j'ech'el, ti buch'u mu x'och talel ta sti' ti scorral bu lapal ti chije, ti ta x'och talel bu ma'uc ti sti'e, ja' jun j'elec' j'ilbajinvanej. 2 Ja'uc ti buch'u ta x'och talel ta ti' ti corrale, ja' jq'uel-chij unbi, ta xchabi ti chije. 3 Ta xjambat sti' corral yu'un ti jchabiej ti' corrale, ta x'och batel. Ti j'il-chije, ta jujun ta sloq'uesbe sbi ti xchijtaque. Ti chijetique ta xa'ibeic ti sc'opojele. Ta sloq'ues ech'el ta corral un. 4 C'alal loc' xa batel scotole, jba'be ta xanav batel ti stuque. Xlamet ech'el ti xchijtac ta spate yu'un xa'ibeic ti sc'opojele. 5 Yu'un mi ma'uc sc'opojel ta xa'iic ti buch'u mu xojtiquinique, mu sts'acliic batel, c'ajomal ta xjatavic. 6 Jech laj sbabac'opta ti Jesuse. Mi ja'uc laj ya'ibeic ti smelol ti va'i s'elan laj yale.
Jun lequil j'il-chij ti Jesuse
7 Xi laj xcha'al ti Jesuse: —J'ech'el ta xcalboxuc ava'iic, xi oy ti jc'oplale: Vu'unun ma' ti ti' corral bu ta x'och batel ti chijetique. 8 Scotol ti buch'u ba'yel talique, naca j'elec', j'ilbajinvanejetic. Ja'uc ti chijetique mu'yuc laj ya'ibeic ti sc'opojele. 9 Vu'unun ti ti' corrale. Ti buch'u ta x'och talel ta jtojole, ta xcol. Co'ol s'elan chij ti x'och xloc' ta corral ta stael ti sve'ele. 10 Ti j'eleq'ue, ja' no'ox ta xtal ta soquesel, ta yelc'anel, ta smilel. Ja'uc ti vu'une lital ta yac'bel xcuxlejal ti ja' bats'i xcuxlejal ta j'ech'ele. 11 “Vu'unun ma' ti lequil j'il-chije. Ti lequil j'ilchije ta xac' sba ta milel ta sventa ti xchijtaque. 12 Yu'un ti buch'u ta x'abtej ta sventa tojel no'oxe, c'alal ta xil ta xtal ti jti'oval oq'uile, ta xjatav batel. Lamal ta xicta comel ti chije yu'un ma'uc bats'i j'il-chij. Ma'uc yu'un ti chijetique. Ti chije, ta x'ilbat svocol yu'un jti'oval oq'uile. Tan puc ta xbat yu'un. 13 Ta xjatav ti vinic taje yu'un ja' no'ox tsots sc'oplal ta xa'i ti tojel ta sa'e. Ma'uc tsots ta xa'i ta sventainel ti chijetique. 14 Vu'unun ti lequil j'il-chije. Xcojtiquinan ti jchijtaque, xiyojtiquinic ec. 15 “Jech c'u cha'al ti Jtot xiyojtiquine, jechun ec, xcojtiquin ti Jtote. Ta xcac' jol jbaquil yu'un ti chijetique. 16 Oy to yan jchijtac ti mu'yuc to ochem talel ta corral li'e, ti tsots sc'oplal ta xba jtsob talele. Jech ec un, ta sts'etan xchiquinic ta ya'yiel ti jc'ope, ta xch'unic, ta stsob sbaic ta jmoj, jun no'ox ti j'il-chij yu'unique. 17 “C'uxun ta yo'nton ti Jtote, yu'un ta xcac' jol jbaquil yo' ta jcha'ich' ti jcuxleje. 18 Mi junuc buch'u xu' ta xtuch' ti jcuxleje, yu'un ta xloc' x'ayan ta co'nton jtuc ti jech ta xc'ot ta pasele. Oy ta jba ta yaq'uel yo' jech ta jcha'ich' ti jcuxleje. Taje, ja' jech albilun talel yu'un ti Jtote —xi ti Jesuse. 19 C'alal jech laj ya'iic ti j'abteletic yu'un ti israeletic ti va'i s'elan laj yale, ch'ac sba ti snopbenal yu'unique. 20 Xi laj yalic ti yepale: —¿C'u cha'al ta xach'unbeic sc'op le'e? Yu'un chuvajibem xchi'uc xch'ulelinojbe xch'ulel pucuj. 21 Xi ta xalic ti yan xtoque: —Ati yu'unuc xch'ulelinojucbe xch'ulel ti pucuje, mu xc'opoj jech c'u cha'al le'e. Ati yu'unuc xch'ulelinojucbe xch'ulel ti pucuje, ¿mi yu'un xu' la yu'un ta sjambe sat ti ma'satetic jechuque?
Ti Jesuse bajbil tenbil yu'un ti israeletique
22 Ti israeletic ta Jerusalene, yacalic ta spasel q'uin sna'obil stsajobil ti ch'ulna yu'unique, c'alal ja' o yorail ti sique. 23 Ti Jesuse oy ta ch'ulna ec. Ta xanav ta cotcot na ti sbiinoj Salomone. 24 Ti israeletique laj sjoyobtaic ti Jesuse, ti xi laj yalbeique: —Xmacmun co'ntoncutic avu'un. Mi vo'ot ti Cristoe, alo xch'a ta jamal. 25 Xi laj stac' ti Jesuse: —Laj xa calboxuc ava'iic, mi ja'uc xc'ot ta avo'ntonic. Ta sventa Jtot ti c'usi ta jpase, ja' ta xayac'boxuc avilic ta jamal ti Buch'uun ta melele. 26 Ti vo'oxuc une, mi ja'uc xc'ot ta avo'ntonic yu'un ma'uc jchijoxuc jech c'u cha'al laj xa calboxuc ava'iique. 27 Ti jchijtaque ta xa'iic ti jc'opojele, xcojtiquinic ec un, ta xists'acliicun. 28 Sbatel osil ta xcac'beic xcuxlejalic, mi ja'uc ta xch'ayic, mu'yuc buch'u xispojbun ta coc ta jc'ob. 29 Ti laj yac'bun ta coc ta jc'ob ti Jtote, stuc no'ox cajal sc'oplal ta j'ech'el. Laj to sc'oplal ma' ti xpojbun ta yoc ta sc'ob une. 30 Jununcutic xchi'uc ti Jtote. 31 Ti israeletique laj stamic ton xtoc yo' ta xac'beic ti Jesuse. 32 Xi laj yal ti Jesuse: —Ta sventa smuc'ul stsatsal ti Jtote, ep ti c'usi laj jpas ta aba ta asatique. ¿C'usi jtosucal yo' ta xavac'beicun ti ton yu'un une? 33 Xi laj staq'uic ti israeletique: —Ma'uc ta xacac'becutic ton yu'un ti c'usi lec laj apase. Yu'un ti c'u s'elan ta xac'opoje, ta soquesbe sc'oplal ti Diose. Yu'un ta xabis aba ta Dios c'alal vinicot no'oxe. 34 Xi laj stac' ti Jesuse: —Ti ts'ibabil ti oy c'usi tsots albil sc'oplal oy ta atojolique, xi ta xale: ‘Laj calboxuc ava'iic, vo'oxuc ti diosoxuque.’ 35 Jna'tic lec ti c'u s'elan ts'ibabil ta ch'ul c'ope, j'ech'el mu stac' muquel. Diosetic, laj yac'be sbi ti buch'utic laj xch'unbeic ti sc'op Diose. 36 Ti Diose laj st'ujun ti laj stacun talel li' ta banomile. ¿C'u cha'al un cha'e ta xavalic ta soquesbe sc'oplal Dios ti c'alal laj cal ti vu'unun Xnich'onune? 37 Mi mu xco'olaj yabtel ti Jtot ti c'usi ta jpase, mu xavich'icun ta muc'. 38 Yan mi xco'olaj yabtel ti Jtot ti c'usi ta jpase, manchuc mi mu xavich'icun ta muq'ue, ja' tsots sc'oplal sc'an xavich'ic ta muc' yabtel ti Jtot ti c'usi ta jpase yo' jech j'ech'el ta xava'iic ti oy ta jtojol ti Jtote xchi'uc ti oyun ta stojol eque. 39 Ta ox stsaquic ya'iic xtoc, ja'uc ti Jesuse col batel. 40 Ti Jesuse sut batel ta jot xocon sti'il uc'um Jordán ti oy ta sloq'ueb c'ac'ale. Ti bu come, ja' ti bu to ox laj yac' ich'uc vo' ti Juane. 41 Xi ta xalic ti buch'utic xvoletic batel ta sq'uelele: —Ti Juan j'ac'-ich'-vo'e, ac'o mu'yuc c'usi laj yac' iluc ti ch'ayal ta xc'ot o'ntonal yu'une, scotol ti c'u s'elan laj yalbe sc'oplal ti vinic li'e, ja' melel. 42 Ti bu taje, yepal c'ot ta yo'ntonic ti ja' Jcoltavanej ti Jesuse.
Cham ti Lazaroe
1 Oy jun vinic ip ta xa'i, ti Lázaro sbie. Tey nacal ta Betania, steclumalic ti Mariae xchi'uc ti Martae, ti xchi'il sbaic ta voq'uele. 2 Ti María taje, ja' ti buch'u laj smalbe muil poxil ta yoc ti Cajvaltique, ti laj staquintas ta stsotsil sjole, xchi'uc ja' yixlel ti Lázaro ti ip ta xa'ie. 3 Jech un, ti cha'vo' antsetique laj staic ta iq'uel ti Jesús ti xi laj yalbeique: —Cajval, ti buch'u lec xavil abaic xchi'uque, ip ta xa'i. 4 Xi laj yal ti Jesús c'alal laj ya'ie: —Ti jech ip ta xa'ie, mu xcham o xchi'uc. Ja' ta xc'ot ta pasel yo' ta svinajes yutsilal slequilal ti Dios ta stojole, xchi'uc ta svinajesel yutsilal slequilal Xnich'onun ti Diose. 5 Ti Jesuse, manchuc mi c'ux ta xa'i ta yo'nton ti Martae, ti Mariae, ti Lazaroe, 6 ti bu oye, com to chib c'ac'al c'alal albat ti ip ta xa'i ti Lazaroe. 7 Xi laj yalbe yajchanc'optac ti Jesuse: —Batic no'ox xtoc ta Judea. 8 Xi laj yalic ti yajchanc'optaque: —Jchanubtasvanej, ti bu taje, ach' to no'ox jutuc mu laj smilot ta ton ti israeletique. ¿Mi ta xabat ava'i xtoc? 9 Xi laj yal ti Jesús ta stojol ti yajchanc'optaque: —¿Mi ma'uc melel ti yich'oj lajcheb ( 12 ) ora ti jun c'ac'ale? Mi ta xijxanav ta c'ac'altique, mu jbosi cacantic, yu'un sac jaman ti banomile. 10 Ja'uc mi ta xijxanav ta ac'ubaltique, ta jbosi cacantic yu'un mu'yuc sac jaman ti banomile. 11 Vay xa ti Lázaro ti lec xquil jbatic xchi'uque. Ja'uc le'e, ta xbat jtij ti jech vay xae. 12 Xi laj staq'uic ti yajchanc'optaque: —Cajval, mi vayeme, ja' svinajeb ti ta xlecube. 13 Taje, ja' ta xal ti Jesús ti cham xa ti Lazaroe. Ti yajchanc'optaque xac'toicuc ti bats'i vayel no'oxe. 14 Va'i un, ti Jesuse xi laj yalbe ta jamal ti yajchanc'optaque: —Cham xa ma' ti Lázaro une. 15 Ta sventa ti vo'oxuque, ximuyubaj xa ti mu'yuc tey oyune yo' ta xc'ot ta pasel ta atojolic ti ich'bil ta muc' ta xic'ot avu'unique. Ja'uc le'e, batic, ba jq'ueltic. 16 Va'i un, ti Tomase, ti sbiinoj vache, xi laj yalbe ti yan jchanc'opetique: —Batic ec yo' jmoj chamcutic xchi'uc ti Jesuse.
Sbainoj cha'cuxiel xchi'uc cuxlejal ti Jesuse
17 C'alal c'ot ti Jesuse, xchanibal xa ox c'ac'al smuclej ti Lazaroe. 18 Nopol xil sbaic xchi'uc Jerusalén ti Betaniae, x'ech' jutuc ta o'lol reva snamal. 19 Yepal no'ox ti israeletic bat svu'lanic yo' ta spatbeic yo'nton ti Martae, ti Mariae ti jech cham ti xchi'ilic ta voq'uele. 20 C'alal laj ya'i ti Marta ta xa xvul ti Jesuse, loc' batel, ba snup talel ta be. Ja'uc ti Mariae com ta na. 21 Ti Martae xi laj yalbe ti Jesuse: —Cajval, ti li'uc oyucote, mu'yuc xcham ti jchi'il ta voq'uel jechuque. 22 Avi tana li'e, ta jna' ti c'usi ta xac'anbe ti Diose, ta xac'bot scotol. 23 Xi laj yal ti Jesuse: —Ti achi'il ta voq'uele, ta xcha'cuxi talel. 24 Xi laj yal ti Martae: —Ta jna' ti ta xcha'cuxie ja' to c'alal mi ta xcha'cuxiic ti animaetic ta slajebal c'ac'ale. 25 Xi laj yal ti Jesuse: —Vu'un jbainoj ti cha'cuxiele xchi'uc ti cuxlejale. Ti buch'u ta xch'un ti c'usi ta xcale, manchuc mi ta xcham, ta xcha'cuxi. 26 Ti buch'u cuxul avi tana li'e, ti ta xch'un ti c'usi ta xcale, mu xchamic. ¿Mi ta xc'ot ta avo'nton xana' taje? 27 Xi laj yal ti Martae: —Jech, Cajval, ta xc'ot ta co'nton ti vo'ot ti Cristoe, Xnich'onot ti Diose, ti oy sc'oplal ta ono'ox xatal ta banomile.
Ti Jesuse ta x'oc' ta muquinal ti bu mucul ti Lazaroe
28 Ti jech laj yal taj une, ti Martae bat yic' talel ti María ti ja' xchi'il ta voq'uele, ti xi laj yalbe ya'i ta mucule: —Li' xa oy ti Jchanubtasvaneje, ta xastaot ta iq'uel. 29 Va' xi batel ta anil ti María ti c'alal jech laj ya'ie. Bat sq'uel ti Jesuse. 30 Yu'un mu'yuc ochem batel ta jteclum ti Jesuse, tey to oy ti bu laj snup ta be ti Martae. 31 C'alal laj yilic ti va' xi loq'uel ta anil ti Mariae, ti israeletic ti oyic ta na ta spatel ti o'ntonale, tijil batic, yu'un laj snopic ti ta xbat oc'uc ta muquinale. 32 C'alal c'ot ti María bu oy ti Jesuse, laj squejan sba ta yoc ti xi laj yalbee: —Cajval, ti li'uc oyucote mu'yuc xcham ti jchi'il ta voq'uel jechuque. 33 Ti Jesuse, mu xnel, mu x'ech' laj ya'i sme'unalil c'alal laj yil ti ta x'oc' ti Mariae xchi'uc ti israeletic ti ts'acalic batele. 34 Xi laj sjac' ti Jesuse: —¿Bu laj amuquic un? Xi laj yalbeique: —Cajval, la' jq'ueltic avil. 35 Oc' ti Jesuse. 36 Xi laj yalic ti israeletic une: —Q'uel avil, mu tuch'baj ta yo'nton xa'i sbaic. 37 Xi ta xalbe sbaic ti jlome: —Ti vinic le'e, ja' ti buch'u laj sjambe sat ti ma'sate, ¿mi mu'yuc xa ono'ox c'usi laj yut jutebuc yo' mu'yuc xcham ti Lazaroe?
Xcha'cuxi ti Lazaroe
38 Ti Jesuse mu x'ech' ta xa'i xtoc ti me'unale, nopaj batel ta muquinal. Ti muquinale co'ol s'elan jun pujul yut ch'en ti macbil sti' ta jun muc' ta tone. 39 Xi laj yal ti Jesuse: —Loq'uesic ti smac sti'e. Xi laj yal ti Marta ti ja' xchi'il ta voq'uel ti animae: —Tu xa van, Cajval, yu'un oy xa xchanibal c'ac'al ti chame. 40 Xi laj yal ti Jesuse: —Mi ta xc'ot ta avo'ntone, ta xavilbe yutsilal slequilal Dios, ¿mi mu xacutot? 41 Laj sloq'uesbeic ti smac sti'e. Ti Jesuse laj stoy muyel sat ta vinajel ti xi laj yale: —Tot, colaval xacutot, yu'un laj ava'ibun ti jc'ope. 42 Jna' ti ta ono'ox xava'ibun ti jc'ope. Jech ta xcal un, yo' ta xc'ot ta sventa slequilal yutsilal ti jnaclejetic li' oyique, yo' ta xc'ot ta yo'ntonic ta xch'unel ti vo'ot laj atacun talele. 43 C'alal jech laj yal taje, xi laj yal ti tsots avane: —Lázaro, loc'an talel teye. 44 Ti animae, ts'otol ta poc' yoc sc'ob loc' talel, xchi'uc pixil ta poc' ti sate. Ti Jesuse xi laj yale: —Jitunic ti sts'ote, ac'o batuc.
Laj snopic ti ta stsaquic ti Jesuse
45 Ti israeletic ti buch'utic xchi'inojic batel ti Mariae, c'alal laj yilic ti laj xcha'cuxes anima ti Jesuse, yepal no'ox c'ot ta yo'ntonic ta xch'unel ti ja' Jcoltavanej ti Jesuse. 46 Ja'uc le' une, oy jlom bat yalbeic ya'i ti fariseoetic ti laj yilic ti oy c'usi laj spas ti Jesuse. 47 Ti fariseoetique xchi'uc ti banquilal yu'un ti paleetique, bat stsob sbaic xchi'uc ti banquilal jchapanvanejetic ti xi laj yalique: —¿C'usi ta xcutic ti vinic taje, ti ep ta xac' iluc ti oy c'usi ch'ayal ta xc'ot o'ntonal yu'une? 48 Mi ch'an no'ox xcutique, scotolic ta xlic yich'ic ta muc'. Ti ajvalil ta Romae ta xtal slilinic ti jlumaltique xchi'uc ti ch'ulna cu'untique. 49 Ja'uc le'e, oy jun yu'unic ta scotolic ti ja' Caifás sbie, ti ja' o sjabilal tiq'uil ta banquilal pale ti xi laj yale: —Mu xana'beic smelol ti vo'oxuque. 50 Mi mu xa ono'ox xava'ibeic xchiquinal ti ja' xloc' venta ti chamuc jun vinic yu'un ti jteclumaltique. Toj vocol mi scotol jteclumaltic ta xlaje. 51 Ti va'i s'elan laj yale, yu'un ja' o tiq'uil ta banquilal pale ti Caifás ti jech jabil taje. Mu ta sjoluc stuc ti jech laj yale, ja' ac'bat sna' yu'un Dios ti chamuc ti Jesús ta sventa ti israeletique. 52 Yu'un ma'uc no'ox ta xcham ta sventa ti israeletique, yu'un ja' ta xc'ot ta sventa stsobel scotol xnich'nab ti Dios ti buyuc no'ox tanijemic batele. 53 Ti jech c'ac'al taje, ti j'opisialetic yu'un ti israeletique laj snopic ti jbel sc'oplal ta smilic ti Jesuse. 54 Jech o xal ti Jesuse mu xa xac' sba iluc ta stojol ti israeletique. Loc' batel ta Judea, bat ta sts'el xocol banomil ta jun jteclum ti sbiinoj Efraine. Ti bu taje, com xchi'uc ti yajchanc'optaque. 55 Jutuc xa sc'an xlic ti q'uin Colel yu'un ti israeletique. Yepal no'ox ti jnaclejetic ta banomile ta xbatic ta Jerusalén yo' ta xchapan sbaic ta smesel stusel sbaic jech c'u cha'al liquem yu'unic c'alal mu'yuc to xlic ti q'uine. 56 Ta sa'olanic ti Jesuse, ti xi ta sjac'olanbe sbaic c'alal oyic ta ch'ulnae: —¿C'u xachi xana'? ¿Mi ta xtal ta q'uin xana'ic, mi mo'oj? 57 Ti fariseoetique xchi'uc ti banquilal paleetique, yalojic ono'ox mantal mi oy bu ta xilic ti Jesuse, ac'o yalic yo' xu' ta stsaquic talel.
Ti ants ti laj smalbe muil poxil ta yoc ti Jesuse
1 Vaquib xa c'ac'al sc'an ti q'uin Colele, ti Jesuse bat ta Betania ti bu nacal ti Lazaroe, ti cha'cuxesat yu'un ti Jesuse. 2 Ti bu taje, laj yich' meltsanel ve'lil ta sventa ti Jesuse. Ti Martae ta xet'es jelavel ti ve'lile. Chotol ta sts'el sti'il mexa ec ti Lázaro ta xve'ic xchi'uc ti Jesuse. 3 Ti Mariae laj yich' talel o'lol litro muil poxil naca nardo, ti tojol stojol ta j'ech'ele. Laj sq'uebbe ta sba yoc ti Jesús ta smuibtasele. Ts'acal to un, ta stsotsil sjol laj staquintasbe ti yoque. Sjunul yut na xpaq'uet ti smuile. 4 Va'i un, ti Judas Iscariotee, xnich'on ti Simone, ti ja' jun jchanc'op ta x'ac'van ta c'abale, xi laj yale: 5 —¿C'u cha'al mu laj yich' chonel ta oxib ( 3 ) ciento denario taq'uin ti muil poxile yo' jech ta xich' coltael ti buch'u abol sbaique? 6 Ti jech laj yal ti Judas taje, ma'uc oy ta yo'nton ti buch'u abol sbaique, yu'un j'elec' xa'i sba, xchi'uc oy ta yoc ta sc'ob ti yavil taq'uine, yu'un ta stam loq'uel ti taq'uin ti buch'u ta xaq'uique. 7 —Ch'an uto ti antse, yu'un scaj-nac'oj sventa ti jmucobbaile. 8 Yu'un ti buch'utic abol sbaique li' ono'ox oy ta atojolique. Ti vu'une mu li'uc ono'ox oyun ta atojolique —xi laj yal ti Jesuse.
Nopbil xa yu'unic ti paleetique ta smilic ti Lazaroe
9 Yepal ti israeletique laj ya'iic oy ta Betania ti Jesuse, bat sq'uelic. Ma'uc no'ox ta sq'uelic ti Jesuse, ta sq'uelic xtoc ti Lázaro ti buch'u cha'cuxesat yu'un ti Jesuse. 10 Va'i un, ti banquilal yu'un paleetique laj scomonopic ta smilic xtoc ti Lazaroe, 11 yu'un ja' ta scoj, yepal ti israeletic laj xch'ac sbaic yo' ta xc'ot ta yo'ntonic ta xch'unel ti Jesuse.
Ti Jesuse ta x'och batel ta Jerusalén
12 Yepal no'ox ti buch'utic batemic ta Jerusalén ta sventa ti q'uin Colele. Ta yoc'omal un, laj ya'iic ti ta xc'ot ta Jerusalén ti Jesuse. 13 Va'i un, laj sc'oquic talel yanal xan. Bat snupic talel ta be ti xi ta x'avanique: —Jun yutsil ta j'ech'el. Jun yutsil ti Buch'u talem ta sventa ti Diose, Ajvalil yu'un ti Israele. 14 Ti Jesuse laj sta jcot burro, ti laj scajlebin batel jech chac c'u cha'al ta xal ti ts'ibabil ta ch'ul c'ope: 15 “Mu xaxi', jteclum Sión, le' cajal ta xtal ta yol me' burro ti Ajvalil avu'une.” 16 Ti ta sliquebale, mi jutebuc laj ya'ibeic smelol ti yajchanc'optaque. Ta ts'acal to un, lic ya'ibeic smelol ti c'alal yilic laj yich' slequilal yutsil ti Jesuse. Yu'un vul ta sjolic ti c'u s'elan ts'ibabil ta ch'ul c'ope, naca sc'oplal stuc ti c'u s'elan ta xc'ot ta pasele. 17 Ti buch'utic ayic xchi'uc Jesús ti laj yilic c'alal laj yavta loq'uel ti Lázaro ta smuquinal ti c'alal cha'cuxie, ja'ic ta slo'iltaic ta yalel ti c'usi laj yilique. 18 Ti buch'utic laj ya'iic ti oy c'usi ch'ayal ta xc'ot o'ntonal yu'un ta spasel ti Jesuse, loq'uic batel ta snupel ta be. 19 Ja'uc ti fariseoetique xi ta xalbe sbaique: —Ta xavilic ti mu'yuc c'usi stac jpastic jutebuque. Q'uel avilic, ¡yu'un scotolic ta xbatic ta stojol!
Oy jun chib jyanlumetic ta sa'ic ti Jesuse
20 Ta scotol ti c'u yepal batemic ta q'uin ta Jerusalén ta yich'el ta muc' ti Diose, oy jun chib griego jyanlumetic. 21 Taje, nopajic ech'el ta stojol ti Felipe ti liquem talel ta Betsaida jteclum ti oy ta Galilea banomile, ti xi xvocoletique: —Yojtot, ta jc'an ta xcojtiquin ca'icutic ti Jesuse. 22 Ti Felipee bat yalbe ti Andrese. Xcha'vo'alic bat yalbeic ya'i ti Jesuse. 23 Xi laj yal ti Jesuse: —Sta xa yorail ta xquich' jlequilal cutsilal ti vu'un co'ol j'elantique. 24 J'ech'el ta xcalboxuc ava'iic, mi mu xich' muquel ta lum ti jbej sat trigo yo' ta xvoq'ue, staoj yav yo junomal. Ja'uc mi ta xvoq'ue, ta xbol ti ts'unobale. 25 Ti buch'u mu tuch'baj ta xa'i ti xcuxlejal li' ta banomile, laj tub xa ti sc'oplale. Ja'uc ti buch'u xjip xten no'ox yu'un ti xcuxlejal li' ta banomile, ta sta xcuxlejal sbatel osil. 26 Mi oy buch'u ta xac' sba ta tunel cu'une, ac'o sts'acliun batel. Ti buyuc no'ox oyune, tey oy ec ti buch'u ta xac' sba ta tunel cu'une. Ti buch'u ta xac' sba ta tunel ta jtojole, ich'bil ta muc' yu'un ti Jtote.
Ti Jesuse ta xal ti ta xchame
27 “¡Mu xnel, mu x'ech' ta xca'i ta j'ech'el ti vocole! ¿C'usi ta xcal un? ¿Mi ja' van xichi ta xcale: ‘Tot, coltaun yo' mu xc'ot ta jtojol ti vocol avi li'e?’ ti c'alal ja' sventa lital li'e. 28 Ac'o aba ta ich'el ta muc' atuc, Tot”, xi ti Jesuse. Va'i un, ja' o vinaj oy Buch'u ta xc'opoj talel ta vinajel ti xi ta xale: “Laj xa cac' jba ta ich'el ta muc'. Ta xcac' to no'ox jba xtoc ta ich'el ta muc'.” 29 Ti bu taje, oy buch'utic laj ya'iic. Laj yalic ti ja' jun chauque. Ti yan xtoque ta xalic ti c'oponat talel yu'un jun ánjel. 30 Xi laj yal ti Jesuse: —Ti laj ava'iic ti oy Buch'u c'opoje, ma'uc c'otem ta jventa, ja' c'otem ta aventaic. 31 Ja' xa yorail avi tana li' une, ta xlic yich' chapanel ti jnaclejetic ta banomile. Ja' xa yorail ta xich' jipel loq'uel ti buch'u ta spas mantal li' ta banomile. 32 C'alal ta sta yorail ta xquich' jipanel ta curuse, ta jtijbe yo'nton ta yiq'uel talel scotolic ta jtojol. 33 Ti va'i s'elan laj yale, ja' ta xac' ta na'el ti c'u s'elan ta xchame. 34 Xi laj staq'uic ti jnaclejetic ta banomile: —Ta sventa ti oy c'usi tsots albil sc'oplale, oy bu ca'binojcutic ti cuxul sbatel osil ti Cristoe. Mi vo'ot ti Cristoote, ¿c'u cha'al ta xaval ti ta xquich' milel ti vu'un co'ol j'elantique? ¿Buch'uot un cha'e? 35 Xi ti Jesuse: —Li' to oy ta atojolic ti saquilal osile. Ja' no'ox un, mu xa jaluc li' oye. Xanavanic ta stojol ti saquilal osile yo' to li' oy ta atojolique, yo' mu ch'ayaluc avo'ntonic xastaoxuc ti ic'al osile. Yu'un ti buch'u ta xanav ta ic'al osile, mu sna' bu ta xbat. 36 C'otuc ta avo'ntonic ta xch'unel ti saquilal osile yo' to li' va'al ta atojolique, yo' jech ta xac'otic ta yalab xnich'nab ti saquilal osile. C'alal jech laj yale, bat snac' sba ti Jesuse.
C'u cha'al ti israeletique mu xaq'uic ta venta ti Jesuse
37 Manchuc mi laj yac' ta ilel ti Jesús ti oy c'usi ch'ayal ta xc'ot o'ntonal yu'un ta sba ta sat ti israeletique, mi ja'uc c'ot ta yo'ntonic ta xch'unel. 38 Yu'un tsots sc'oplal yo' ta xc'ot ta pasel jech chac c'u cha'al ti xi laj sts'iba comel ti j'alc'op Isaiase: Cajval, ¿buch'u la ta xc'ot ta yo'nton ta xch'unel ti c'usi ta xcaltique? ¿Buch'u la ta x'ac'bun yil smuc'ul stsatsal ti Diose? 39 Oy smelol c'u cha'al mu xc'ot ta yo'ntonic ta xch'unele, yu'un xi laj sts'iba ti Isaías xtoque: 40 Macbat satic yu'un ti Diose. Tsatsubtasbat yo'ntonic, yo' mu xilic, yo' mu xa'iic, yo' mu xtal ta jtojol ta xpoxtael sbaic. 41 Jech laj yal ti Isaías taje, yu'un laj yilbe slequilal yutsilal ti Jesuse, xchi'uc ta yalbel ti sc'oplale. 42 Manchuc mi jech un, yepal israeletic c'ot ta yo'ntonic ta xch'unel ti ja' Jcoltavanej ti Jesuse. Oy jlom jpas-mantaletic c'ot ta yo'ntonic ta xch'unel xtoc. Ja'uc le' une, yo'nton no'ox sna'ic yu'un ta xi'ic mi ta xjipatic loq'uel ta ch'ulna yu'un ti fariseoetique. 43 Yu'un ja' lec ta xa'iic ti ich'bilic ta muq'ue. Ja' mu sc'anic ta xc'ot ta stojolic yutsilal slequilal ti Diose.
Ta staic chapanel ta sventa sc'op Jesús
44 Tsots xi laj yal ti Jesuse: —Ti buch'u ta xc'ot ta yo'nton ta xch'unelune, ma'uc no'ox ta xc'ot ta yo'nton ta xch'unelun, ta xich' ta muc' ti Jtot ti buch'u laj stacun talele. 45 Ti buch'u ta xc'ot sat ta jtojole, ta xc'ot sat ta stojol ti Buch'u laj stacun talele. 46 Yu'un saquilal osilun lital ta banomil yo' jech ti buch'u ta xc'ot ta yo'nton ta xch'unelune, mu xcom ta ic'al osil. 47 Ja'uc ti buch'u ta xa'i ti jc'ope, ti mi mu tsots sc'oplal ta xa'ie, ma'uc jbainoj ta jchapanel, yu'un tal coltavancun. Ma'uc lital ta chapanvanej. 48 Ti buch'u ta xisjip xistenune, xchi'uc ti mu xich' ta muc' ti jc'ope, xi s'elan ta xc'ot ta stojole: ta xich' chapanel ta slajebal c'ac'al ta sventa ti c'u s'elan laj cale. 49 Yu'un mu ta jmantaluc no'ox jtuc ti c'u s'elan ta xic'opoje. Ti Jtot ti Buch'u laj stacun talele, ja' ta smantal ti c'u s'elan ta xic'opoje, ti c'u s'elan ta xichanubtasvane. 50 Jna' lec ti c'u s'elan laj yalbun talel ti Jtote, ja' sventa cuxlejal sbatel osil. Ti c'u s'elan ta xcal une, ja' jech ta xcal jech c'u cha'al laj yalbun talel ti Jtote —xi laj yal ti Jesuse.
Ti Jesuse ta spocbe yacan ti yajchanc'optaque
1 Ta yac'ubalil xa ti q'uin Colele, sna'oj xa ti Jesuse ti c'ot xa yorail ta xicta comel ti banomile, ti ta sut batel ta stojol ti Stote. Ti jech mu tuch'baj jipbaj ta xa'i ti yu'untac li' ta banomile, jech o staoj o yav c'ux ta xa'i ti c'uxi ta xc'ot ta tsutsele. 2 Ti jech yorail xa ta xve'ique, tijbat yo'nton yu'un pucuj ti Judas Iscariotee, xnich'on ti Simone, ti ta xac' ta c'abal ti Jesuse. 3 Ti Jesuse sna'oj xa ti ac'bat xa ta yoc ta sc'ob yu'un Stot scotol ti c'usitic x'ayane, xchi'uc ti ta sut xa batel ta stojol Dios ti bu liquem talele. 4 Ti jech yacal ta xve'ic ta mexae, va' xi liquel ta sloq'uel ti xcha'lomal sc'u'e, tsac xut jlic poc' ti laj sc'am ta xchucbenale. 5 Laj taj une, lic sq'ueb vo' ta pocob-c'obal. Lic spocbe yacan ti yajchanc'optaque. Laj scusbe o ti yacantac ta poc' ti c'amal ta xchucbenale. 6 C'alal ja' o xa ta xpocbat yacan ti Simón Pedroe, xi laj yale: —¿C'u ono'ox xi ti vo'ot ta xtal apocbun ti coque, Cajval? 7 Xi laj stac' ti Jesuse: —Avi tana li'e, mu xava'ibe smelol ti jech ta jpase. Ta ts'acal to ta xlic ava'ibe smelol. 8 Xi laj yal ti Pedroe: —Mi ja'uc xcac' apoc ma' ti coque. Xi laj stac' ti Jesuse: —Mi mu jpoc ti avoque, mu stac' xatal ta jtojol. 9 Xi laj yal ti Pedroe: —Ma'uc no'ox xapocbun ti cacane, Cajval, pocbun ti jc'obe, ti jole. 10 Xi laj stac' ti Jesuse: —Ti Buch'u atinem xae, laj xa sc'oplal ta xich' poquel sjunul, yacan xa no'ox ta xich' pocbel, yu'un pocbil xa sjunul. Ti vo'oxuque pocbiloxuc xa, ac'o mi mu acotolicuc. 11 Ti mu'yuc pocbiloxuc acotolic ti xie, yu'un sna'oj ti oy buch'u ta x'ac'van ta c'abale. 12 C'alal jech laj yo'nton ta spoquel ti acanile, ti Jesuse lic xcha'lap ti sc'u'e, bat chotluc ta sts'el sti'il mexa xtoc, ti xi laj yale: —¿Mi laj ava'ibeic smelol ti jech laj jpas ta atojolique? 13 Ti ‘Jchanubtasvanej, Cajval’, xavuticune, melel ava'uquic un, yu'un vu'unun ono'ox. 14 Vu'un ti Jchanubtasvaneje, ti Ajvalilun avu'unique, laj xa jpoc ti avacanique. Jech xapocbe abaic avacanic ta jujun tal un. 15 Yu'un laj xa cac' avilic ti jech sc'an xapasic jech c'u cha'al laj cac' avilique. 16 Ta xcalboxuc ava'iic ta melel, ti mosovile ma'uc cajal ta xac' sba ta stojol ti yajvale. Ti buch'u tacbile, ma'uc cajal ta xac' sba ta stojol ti jtacvanej yu'une. 17 Mi ta xava'ibeic smelol ti jech laj jpase, mi ta xapasic xtoc jech c'u cha'al laj cac' avilique, xamuyubajic no'ox. 18 “Ma'uc ac'oplal acotolic ti va'i s'elan laj cale, yu'un jna'oj ti buch'u t'ujbilic cu'une. Ja'uc le'e, yu'un tsots sc'oplal ta xc'ot ta pasel jech c'u cha'al ti xi ts'ibabil ta ch'ul c'ope: ‘Ti buch'u jmoj ta xive' xchi'uque, joybij ta cajcontra.’ 19 C'alal ta xavilic jech ta xc'ot ta pasele, jpoco'alojboxuc xa ono'ox ava'iic yo' ta xc'ot ta avo'ntonic ta xch'unel Buch'uun ta melel. 20 Ta xcalboxuc ava'iic ta melel, ti buch'u ta xich' ta muc' ti buch'u ta jtac batele, ta xiyich'un ta muc'. Ti buch'u ta xich'un ta muq'ue, ta xich' ta muc' ti Buch'u laj stacun talele.”
Ti Jesuse ta xal ti ta x'ac'van ta c'abal ti Judase
21 C'alal jech laj yal ti Jesuse, lic ochuc ta at o'nton ti xi to laj sts'ac batel ti lo'ile: —Ta xcalboxuc ava'iic ta melel, oy jun avu'unic ta xiyac' ta c'abal. 22 Ti yajchanc'optaque, sq'uel-q'uelbe xa sba satic ta jujun tal, ti mu sna'ic buch'u sc'oplal taje. 23 Oy jun ta scotolic ti mu tuch'baj ta o'ntonal yu'un ti Jesuse, ti nabal ta sts'el c'alal ta xve'ique. 24 Ti Simón Pedroe lic spas senya ti ac'o sjac'be Jesús buch'u sc'oplal ta xalbe taje. 25 Jech ti stuque x'ech' to to laj snaban sba ta sts'el ti Jesuse, ti xi laj yalbee: —¿Buch'u, Cajval? 26 Xi laj stac' ti Jesuse: —Ti buch'u ta xcac'be avil ti juteb pan ta jts'aj ta jsets'e, ja' me unbi. Ta jech yepal un, laj sts'aj ti juteb pane, laj yac'be jelavel ti Judas Iscariotee, xnich'on ti Simone. 27 C'alal laj stsac pan ti Judase, ta jech yepal ventainbat yo'nton yu'un ti pucuje. Xi albat yu'un ti Jesuse: —Paso me xch'a ti c'usi ta xapas ono'oxe. 28 Ja'uc le' une, mi junuc laj ya'ibeic smelol yu'unic ti ta xve'ic ta mexa ti va'i s'elan laj yal ti Jesuse. 29 Oy jlom laj snopic ti pase ta mantal yu'un Jesús ti bat sman talel ti oy nan c'usi ta xtun ta sventa ti q'uine. Ti jlome laj snopic ti oy c'usi ta xac'be ti me'unetique, yu'un ja' yich'oj ta sventa yavil taq'uin ti Judase. 30 C'alal laj stsac pan ti Judase, loc' batel. Ac'ubaltic xa.
Sc'oplal ti ach' mantale
31 Va'i un, c'alal loc' xa batel ti Judase, xi laj yal ti Jesuse: —Avi tana ti vu'un co'ol j'elantique, ta xvinaj ti jlequilale, ta xvinaj yutsil slequilal ti Diose ta sventa. 32 Mi ta xvinaj yutsilal slequilal ti Dios ta jventa ti co'ol j'elantique, ta xac' iluc yutsilal slequilal Dios ta jtojol ec. Ta xa xc'ot ta pasel un. 33 Mu xa jaluc li' oyun ta atojolique, Cuni nich'nab. Xasa'icun xa un, ja' no'ox ta xcalboxuc ava'iic jech c'u cha'al xichi laj calbe ya'iic ti israeletique: ‘Mu xac'otic ti bu ta xibate.’ 34 Xi ta xcalboxuc comel sc'oplal ti ach' mantale: J'ech'el c'uxuc xava'i abaic ta jujun tal jech c'u cha'al laj c'uxubinoxuque. Jechuc c'uxuc xava'i abaic ta jujun tal. 35 Mi jech c'ux ta xava'i abaique, ta xalic scotolic ti vo'oxuc cajchanc'opoxuque.
Ti Pedroe ta xal ti mu xojtiquin ti Jesuse
36 Xi laj sjac'be Jesús ti Simón Pedroe: —¿Bu ta xabat un, Cajval? Xi laj stac' ti Jesuse: —Ti bu ta xibate, mu to stac' xats'acliun batel avi li'e. Ta ts'acal to ta xc'ot ta atojol. 37 Xi laj yal ti Pedroe: —¿C'u cha'al mu stac' ta jts'acliot batel avi li'e, Cajval? Jchapanoj xa jba ta xcac' jba ta milel ta aventa. 38 Xi laj stac' ti Jesuse: —¿Mi melel ti chapalot xa ta xavac' aba ta milel ta jventae? Ta xcalbot ava'i ta melel, laj xa ox aval oxcoj ti mu xavojtiquinun c'alal mu'yuc to ta x'oc' ti cotse.
Ja' sbelal Dios ti Jesuse
1 “Tsotsanic, mu xachibajic. Pato avo'ntonic ta stojol ti Diose, pato avo'ntonic ta jtojol ec. 2 Ti bu nacal ti Jtote, yepal no'ox naetic oy ti bu ta xanaquiique. Ati yu'unuc mu'yucuque, laj xa calboxuc ava'iic ti mu'yuc ta xibat ta smeltsanel ti bu ta xanaquiic ti jechuque. 3 Ta xibat un, ta xba jchapan ta smeltsan ti bu ta xanaquiique. Ts'acal to un, ta xisut talel yo' ta xquic'oxuc ech'el yo' tey oyoxuc ti bu oyune. 4 Ti be ta stam batel ti bu oyune, xana'ic xa bu oy —xi ti Jesuse. 5 Xi laj yal ti Tomase: —¿Mi yu'un ta jna'cutic ta stamel batel ti bee c'alal mu jna'cutic bu ta xabate, Cajval? 6 Xi laj stac' ti Jesuse: —Vu'un c'otem ta jventa ti bee, ti melele, xchi'uc ti cuxlejale. Ti xu' xac'otic bu oy ti Jtote, vu'un ta jventa. 7 Mi xavojtiquinicune, xavojtiquinic ti Jtot unbi. Avi li'e, xavojtiquinic xa, yu'un le' xa talel laj avilic une. 8 Xi laj yal ti Felipee: —Ac'bun quilcutic Buch'u ti Totile, Cajval. Bal to xca'icutic unbi. 9 Xi laj stac' ti Jesuse: —Felipe, jal xa li' oyun ta atojolique, ¿mi mu to xavojtiquinicun? Ti buch'u laj xa yilicune, laj xa yilic ti Jtote. ¿C'u cha'al un, ta xac'an ta xcac'bot avojtiquin ti Jtote? 10 ¿Mi mu xc'ot ta avo'nton ti oyun ta stojol ti Jtote, ti oy ta jtojol ti Jtote? Ti c'usi ta xcalboxuque, mu ta co'ntonuc jtuc. Ja' ta jpasbe yabtel ti Jtot ti jech oy ta jtojole. 11 C'otuc ta avo'ntonic ti oyun ta stojol ti Jtote. Mi mu jechuque, c'otuc ta avo'ntonic ti abtel yacal ta jpas ta atojolique. 12 J'ech'el ta xcalboxuc ava'iic, ti buch'u ta xc'ot ta yo'nton ta xch'unelune, ja' jech ta spas ec jech c'u cha'al ta jpase. Xu' ti x'ech' to xjelav ta spas, yu'un ta xibat bu oy ti Jtote. 13 Scotol ti c'usi ta xac'anic ta jventae, ta xc'ot ta pasel yo' jech ta sventa ti Nich'onile, ta jvinajes yutsilal ti Totile. 14 Ti c'usiuc no'ox ta xac'anic ta jventae, ta xc'ot ta pasel cu'un.
Ti Jesuse ta xal ti jbel sc'oplal ta xac' talel ti Ch'ul Espiritue
15 “Mi c'ux ta xava'iicune, ta xach'unic ti jmantal unbi. 16 Ta jc'anbe ti Jtote ti ac'o stacbucoxuc talel jun Jpat-o'ntonal ti j'ech'el xi s'elan ta xchi'inoxuque: 17 Ja' ti Ch'ul Espíritu ti ta xac' ta na'el ti bu melele, ti mu lecuc ta xa'iic ti jnaclejetic ta banomile, yu'un mu xilic, mu xojtiquinic. Ja'uc ti vo'oxuque xavojtiquinic, yu'un oy ta atojolic xchi'uc nabal o ta atojolic. 18 Ma'uc ta xaquictaoxuc comel atuquic, yu'un ta xtal jchi'inoxuc. 19 Ti buch'u lec xa'iic sc'upinel ti banomile, mu xa jaluc li' ta xilbeicun ti jsate. Ja'uc ti vo'oxuque ta xavilicun, xchi'uc ta xacuxiic yu'un cuxulun. 20 Ti jech c'ac'al taje, ta xlic ana'ic ti oyun ta stojol ti Jtote, ti oyoxuc ta jtojole, ti oyun ta atojolic eque. 21 Ti buch'u ta xac' ta venta ti jmantale, ti ta xc'ot ta pasel yu'une, ta xac' ta ilel ti j'ech'el c'ux ta xiya'ie. C'ux ta x'a'yie yu'un ti Jtot ti buch'u c'ux ta xiya'ie, c'ux ta xca'i ti vu'un eque, xchi'uc ta xcac' jba iluc ta stojol —xi ti Jesuse. 22 Ti yan Judas ti ma'uc ti Judas Iscariotee, xi laj yale: —Cajval, ¿c'u cha'al ja' no'ox ta xavac' aba iluc ta jtojolcutic? ¿C'u cha'al mu ja'uc ta xavac' aba iluc ta stojol ti jnaclejetic ta banomile? 23 Ti Jesuse xi laj stac'bee: —Ti buch'u c'ux ta xiya'ie, ta xch'un ti c'usi ta xcale. Jech ta xc'uxubinat yu'un ti Jtote. Ti Jtote xchi'uc ti vu'une ta xtal jchi'incutic, ta xinaquicutic ta stojol. 24 Ti buch'u mu'yuc c'ux ta xiya'ie, mu xch'un ti c'usi ta xcale, yan sc'oplal ta j'ech'el. Yu'un ti c'usi ta xcal ava'iic li'e, ma'uc jc'op jtuc, ja' sc'op ti Jtot ti Buch'u laj stacun talele. 25 “Yo' to li' oyun ta atojolique, jech ta xcalboxuc ava'iic scotol taje. 26 Ti Ch'ul Espiritue, ti ja' Jpat-o'ntonal ti ta stac talel ti Jtot ta jventae, ja' ta xa scoltaoxuc, ja' ta xa xchanubtasoxuc scotol taje, ja' ta svules ta ajolic scotol ti va'i s'elan laj calboxuque. 27 “Ta xcac' comel ta atojolic ti slamajemal o'ntonale. Mu xco'olaj xchi'uc jech c'u cha'al ta xaq'uic ti buch'u li' oyic ta banomile. Mu me xatsiq'ues avo'ntonic, mu xaxi'ic. 28 Laj xa calboxuc ava'iic ti ta xibate, xchi'uc ti laj cal ta xtal jchi'inoxuc xtoque. Ti yu'unuc c'uxuc ta xava'iicune, xamuyubajic xa jechuc ti laj ava'iic ta xibat bu oy ti Jtote. Yu'un ti stuque x'ech' to jelavem sc'oplal, ja' mu sta ti vu'une. 29 Jech ta xcalboxuc ava'iic yo' to mu ta xc'ot ta pasel. C'alal mi ta xc'ot ta pasele, ta xc'ot ta avo'ntonic ta xch'unel unbi. 30 “Jliquel xa li' ta jchi'inoxuc ta lo'ile, yu'un tal xa ti buch'u sbainoj ta spasel mantal li' ta banomile, ac'o mi mu'yuc c'usi xu' yu'un spasel ta jtojol. 31 Yu'un tsots sc'oplal ta xc'ot ta pasel yo' jech ta sna'ic ti buch'utic sventainojic ti banomile ti c'ux ta xca'i ti Jtote, xchi'uc ta jpas ti c'usi yalojbune. Va'lanic, batic xa li'e —xi laj yal ti Jesuse.
C'otem ta smuc'ul aq'uil uva ti Jesuse
1 Ti Jesuse xi to laj yale: —Ti vu'une co'ol j'elan jech c'u cha'al smuc' ta ibel ti uvae. Ti Jtote co'ol s'elan jech c'u cha'al ti buch'u ta xabtelan ta sq'uelel ti uvae. 2 Mi oy junuc ti sc'ob c'otem ta jventa ta sbainel ti uva ti mu xac' lec ti sate, ta sboj loq'uel. Mi ta xac' ti sate, ta sloq'uesbe ti sc'a'epale. Ta set loq'uel ti staquijemale yo' ta x'epaj ta yaq'uel ti sate. 3 Ti vo'oxuque mesbil tusbiloxuc xa ta sventa ti jc'op laj calboxuque. 4 Staojuc yav junuc avo'ntonic, nablanic ta jtojol jech c'u cha'al oyun ta atojolique. Mu xu' ta xac' uva ti jun sc'ob mi mu'yuc tsacal xchi'uc ti smuc' ta ibele. Ja' jechoxuc, mu'yuc c'usi xu' avu'unic ec un mi mu'yuc nabaloxuc ta jtojole. 5 “Vu'un ti smuc'ul ibelun ti uvae. Vo'oxuc ti sc'ob-c'obtaque. Mi staoj yav nabal ta jtojole, oyun ta stojol ec. Yepal no'ox ti sat ta xaq'ue. Mi ch'acal ta jtojole, mu'yuc c'usi stac' ta spas. 6 Mi ta xch'ac sba ta jtojole, ta xich' setel loq'uel. Ta xtaquij jech c'u cha'al sc'obtac ti uvae. Ta xich' tsobel, chic' xi ta c'oc'. 7 “Mi staoj yav nabaloxuc ta jtojole, mi mu xch'ay ta avo'ntonic ti c'u s'elan laj jchanubtasoxuque, c'anbeic ti c'usi ta xac'anique, ta xa'ac'batic. 8 Ti jech taj une, ta xvinaj yutsilal slequilal ti Jtote, ta sventa ti yepal no'ox ti oy c'usi lec ta xapasique, xchi'uc ta xac'otic ta bats'i cajchanc'optac. 9 C'ux ta xca'ioxuc ta j'ech'el jech c'u cha'al c'ux ta xiya'i ti Jtote. Staojuc o yav oyuc ta avo'ntonic ti syail xc'uxul co'nton ti oy ta atojolique. 10 Mi ta xavich'ic ta muc' ta xch'unel ti jmantale, oy ta atojolic ti syail xc'uxul co'ntone, jech c'u cha'al ta jch'unbe smantal ti Jtote, staoj yav oy ta jtojol ti syail xc'uxul yo'ntone. 11 “Ti jech ta xcalboxuc taje, yo' jech xijmuyubajotic, yo' jech ataojic ta j'ech'el ti xamuyubajique. 12 Ti jmantale xi s'elane: C'uxuc xava'i abaic ta jujun tal jech c'u cha'al laj jc'uxubinoxuque. 13 Ti buch'u ta xac' sba ta milel ta sventa ti buch'u lec xil sba xchi'uque, mu albajuc ma' ti syail xc'uxul yo'nton une. 14 Mi ta xapasic ti c'usi ta xcalboxuque, lec xquil jbatic. 15 Ma'uc xa ta xcalboxuc ti mosoviloxuque, yu'un ti mosovile mu sna' c'usi ta spas ti yajvale. Lec xquil jbatic xacutoxuc, yu'un laj xa cac'boxuc ana'ic scotol ti c'u s'elan laj yalbun ti Jtote. 16 Ma'uc vo'oxuc laj at'ujicun, yu'un vu'un laj jt'ujoxuc yo' ta xcac' abainic ta spasel ti c'usi leque, ti staojuc oy yav ta atojolic ta spasel ti c'usi leque, ti mu xlaj sc'oplale. Jech ti Jtote ta xayac'boxuc ti c'usi ta xac'anic ta jventae. 17 Ja' me smelol ti xi s'elan ta xcalboxuc ti jmantale: C'uxuc xava'i abaic ta jujun tal.
Ti jnaclejetic ta banomile xti'et sjolic ta stojol ti Jesuse xchi'uc ta stojol ti yu'untaque
18 “Mi ta scontrainoxuc ti jnaclejetic ta banomile, na'ic me ti jech laj scontrainicun ta ba'yele. 19 Ti co'oluc ta xapasic jech c'u cha'al ta spasic ti jnaclejetic ta banomile, c'ux ta xa'ioxuc jech c'u cha'al c'ux ta xa'i sbaique. Ja'uc le'e, laj jt'ujoxuc loq'uel talel ta stojolic. Jech o xal un, contra ta xayiloxuc, yu'un mu xa co'oluc avo'ntonic xchi'uquic. 20 Ja' vuleso ta avo'ntonic ti xi laj calboxuque: ‘Ti mosovile, ma'uc cajal ta xac' sba ta stojol ti yajvale.’ Mi laj quich' ilbajinele, ja' no'ox jech ta xavich'ic ilbajinel ec. Mi laj yich'ic ta muc' ti c'u s'elan laj calbeique, ja' no'ox jech ich'bil ta xc'ot ta muc' ti ac'opic ti c'u s'elan ta xavalique. 21 Scotol taje, jech ta xc'ot ta atojolic ta jventa, yu'un mu xojtiquinic ti Buch'u laj stacun talele. 22 “Ti manchucuc lital ta sc'oponelique, mu'yuc smulic ti jechuque. Ja'uc avi tana li'e, mu xa stac' ti spac sc'oplalic ta scoj ti smulique. 23 Yu'un ti buch'u xti'et sjolic ta jtojole, xti'et sjolic ta stojol ti Jtote. 24 Ti manchucuc laj staic ta ilel ti jtuc xa no'ox oy c'usi laj jpas ta stojolique, mu'yuc smulic ti jechuque. Le'e laj xa yilic un. Manchuc mi jech laj yilic ti c'usi laj jpase, xti'et sjolic ta jtojol, xchi'uc xti'et sjolic ta stojol ti Jtote. 25 Ti jech taje, yo' tsots sc'oplal ta xc'ot ta pasel jech c'u cha'al ti xi ts'ibabil ti smantalique: ‘Ta jech no'ox yepal xti'et sjolic ta jtojol.’ 26 “Ja'uc ti c'alal ta jtac talel ta atojolic ta sventa Jtot ti jpat-o'ntonale, ja' ti Ch'ul Espíritu ti melel c'usi ta xac' ta na'ele, ja' ta xalboxuc ava'iic ti jc'oplale. 27 Ta xavalbeicun jc'oplal ec un, yu'un ta sliquebal ono'ox laj achi'inicun talel.
1 “Jech ta xcalboxuc ava'iic taje, yo' jech mu xchibaj avo'ntonic ta jtojol. 2 Yu'un ta xavich'ic jipel loq'uel ta ch'ul na. Xu' ta xc'ot ta pasel ti oy buch'u ta xasmiloxuc ti ta snopic ti ja' jech ta xtunic yu'un ti Diose. 3 Jech ta spasic, yu'un mu xojtiquinic ta j'ech'el ti Jtote, mi ja'uc xiyojtquinicun ec. 4 Jech ta xcalboxuc ava'iic yo' xavules ta ajolic ti c'alal ta sta yoraile, ti jech ono'ox laj calboxuc ava'iique.
Ti yabtel ta spas ti Ch'ul Espiritue
“Ti ta sliquebale, mu'yuc laj calboxuc ava'iic ti ta xavich'ic ilbajinele, yu'un li' to jchi'inojoxuque. 5 Ja'uc avi tana li'e, ta xibat ta stojol ti Buch'u laj stacun talele. Ja'uc le'e, mu'yuc buch'u junucal avu'un ta sjac' ti bu ta xibate. 6 C'ajomal no'ox ochemoxuc ta at o'nton yu'un ti jech laj cal taje. 7 Xi jamal ta xcalboxuc ava'iique: Yu'un toj lec ta xc'ot ta pasel ta atojolic ti ta xibate. Yu'un mi mu xibate, mu xtal ta atojolic ti Buch'u ta scoltaoxuque, ti ta xac' smuc'ul avo'ntonique. Ti mi libate, ta jtac talel. 8 C'alal jech ta xtal ti Ch'ul Espiritue, ja' ta xac'be sna'ic ti jnaclejetic ta banomil c'usi ti mulile, c'usi ti lequilale, xchi'uc ti chapanel yu'un ti Diose. 9 Ti mulile, ja' ti mu xisch'unique. 10 Ta xilic ti oy jlequilale, yu'un ta xibat bu oy ti Jtote, mu xa xilbeicun liquel ti jsate. 11 Ta x'ac'bat sna'ic ti chapanel yu'un ti Diose, yu'un laj xa yich' chapanel ti buch'u sventainoj ti banomile. 12 “Yepal no'ox ti oy c'usi ta jc'an xcalboxuc ava'iique. Ja'uc li'e, ma'uc to yorail, yu'un mu xava'ibeic smelol. 13 C'alal ta xtal ti Ch'ul Espíritu ti melel c'usi ta xac' ta na'ele, ja' ta stojobtasoxuc ta yaq'uel ana'ic ti bu melel scotole. Yu'un mu ta yo'ntonuc stuc ti c'usi ta xale, yu'un ja' ta xal scotol ti c'u s'elan ta x'ac'bat sna'e, xchi'uc ta xac'boxuc ana'ic ti c'usitic ta xc'ot ta pasele. 14 Yu'un ja' ta xac' ta ilel ti jlequil cutsile, yu'un ta xlic sbain ti c'usi c'otem ta jventae, ja' ta xac'boxuc ana'ic scotol. 15 Scotol ti c'usitic oy yu'un ti Jtote, ja' cu'un. Jech o xal laj calboxuc ava'iic sc'oplal ti Ch'ul Espiritue, yu'un ja' ta xich' ta sventa ti c'usitic oy cu'une, yo' jech ta xac'boxuc avojtiquinic ti vo'oxuque.
Ta xjoybij ta muyubajel ma' ti at o'ntone
16 “Mu xa jaluc ta xavilicun li'e, ts'acal to ta xlic avilicun —xi ti Jesuse. 17 Oy jlom ti yajchanc'optaque xi lic sjac'be sbaic ta jujun tale: —¿C'usi smelol ta xac' ta na'el taje? Ta xal ti ‘mu xa jaluc li' oyun ta atojolic ti ta xavilicune’. Ta xal ti ‘ts'acal to ta xtal ti ta xavilicune’. ¿C'usi taje, ti ta xbat bu oy ti Totile? 18 ¿C'usi ta xac' ta na'el ti ‘mu xa jaluc’, ti xie? Mi ja'uc xca'ibetic smelol ti sc'ope. 19 Ti Jesuse laj yil ti oy c'usi ta xjac'bate, xi laj yale: —¿Mi ja' ta xajac'be abaic ti laj cal ti mu xa jaluc li' oyun ti ta xavilicune, ti ts'acal to ta xital ta xavilicun ti xichie? 20 Jbel sc'oplal ta xcalboxuc ava'iic, ta xlic oc'anic, ta xavat avo'ntonic, ja'uc ti jnaclejetic ta banomile xmuyubajic xa liquel. Ti jech oyoxuc ta vul o'ntone, ta xlic joybijuc ta muyubajel. 21 C'alal ta svoq'ues yol ti jun antse, mu x'ech' ta xa'i ti svocole, ja' ti sta xa yorail ti xc'uxule. Ts'acal to un, mi voc' xa ti yole, ta xch'ay ta yo'nton ti xc'uxule, xmuyubaj xa ti lec voc' ti yole. 22 Ja' jech ti vo'oxuc avi tana li'e, mu x'ech' ta xava'iic ti avocolique. Ja'uc c'alal ta xisut talel jq'ueloxuque, ta xlic muyubajanic, jun muyubajel ti mu'yuc buch'u xasmacboxuque. 23 “Ti jech c'ac'al taje, mu'yuc xa c'usi ta xajac'beicun. J'ech'el ta xcalboxuc ava'iic, scotol c'usi ta xac'anbeic ti Jtot ta jventae, ta xayac'boxuc. 24 Avi li'e, mu'yuc to c'usi ac'anojbeic ti Jtot ta jventae. C'anic un, yo' ta xavich'ic, yo' ta xataic ti xamuyubajique.
Ti Jesucristoe laj stsal ti banomile
25 “Naca ta co'oltasbil c'op ti c'u s'elan laj jc'oponoxuque. Oy bu ta sta yorail un ti ma'uc xa ta co'oltasbil c'op ta jc'oponoxuque. Jamal xa ta xcalboxuc ava'iic sc'oplal ti Jtote. 26 Ti jech c'ac'al taje, oy c'usi ta xac'anbeic ti Jtot ta jventae. Ma'uc xa vu'un ta jc'anbe vocol ti Jtote. 27 Yu'un ti Jtote, c'ux ta xaya'ioxuc. C'ux ta xaya'ioxuc, yu'un c'ux ta xava'iicun, yu'un c'ot ta avo'ntonic ta xch'unel ti liquemun talel ta stojol ti Diose. 28 Lilic talel ta stojol ti Jtote yo' lital li' ta banomile. Avi tana un, ta xquicta comel ti banomile, ta xisut batel ti bu oy ti Jtote.” 29 Xi laj yalic ti yajchanc'optaque: —Avi tana, jamal xa ta xavalbuncutic. Ma'uc xa ta co'oltasbil c'op ta xac'opoj. 30 Ta xquilcutic ti ta xana' scotole, ti ma'uc tsots sc'oplal ta xava'i ti oy buch'u ta sjac'bote. Ta xc'ot ta co'ntoncutic ti liquemot talel ta stojol ti Diose. 31 Xi laj stac' ti Jesuse: —¿Mi ta xc'ot ta avo'ntonic avi tana une? 32 Sta xa yorail, ja' xa yorail avi tana li' une, ti tan puc ta xabatique, jtuc ta xavictaicun comel. Manchuc mi jech, yu'un chi'inbilun yu'un ti Jtote. 33 Ja' jech laj cal ava'iic scotol taje, yo' jech lamajem avo'ntonic ti oyoxuc ta jtojole. Ti li' ta banomile, ta xavich' avocolic. Ja'uc le'e, tsotsanic, yu'un tsal xa cu'un ti sba banomile.
Ti Jesuse ta xc'opoj xti'in ta sventa ti yajchanc'optaque
1 C'alal laj c'opojuc ti Jesuse, laj sq'uel muyel vinajel ti xi laj yale: —Sta xa yorail, Tot, ac'bo yich' slequilal ti Anich'one yo' jech ta svinajes alequilal ec. 2 Yu'un laj avac'bun cabtel ta sbainel scotol ti jnaclejetic ta banomile, yo' jech ta xcac'beic xcuxlejalic sbatel osil ti buch'utic laj avac'bune. 3 Taje, ja' sc'oplal ti xcuxlejalic sbatel osil ti xi s'elane: Ti ac'o xayojtiquinic ti atuc no'ox Diosot ta melele, xchi'uc ti ac'o xiyojtiquinicun ti Jesucristoun ti laj atacun talele. 4 “Yu'un laj xa jvinajes avutsil li' ta banomile, yu'un tsuts xa cu'un ti cabtel laj avac'bun jbaine. 5 Avi tana une, Tot, ac'bun quich' ti jlequilal ti oy ta atojol jech c'u cha'al quich'oj to ox c'alal mu'yuc to ox meltsajem ti banomile. 6 “Ti buch'utic laj at'uj loq'uel li' ta banomil ti laj avac'bune, laj xa cac'be sna'ic Buch'uot ta melel. Ti buch'utic laj avac'bune, ja' ono'ox avu'un, xchi'uc c'ot xa ta yo'ntonic ti ac'ope. 7 Scotol ti c'usi laj xa avac'bune, avi tana une, laj xa sna'ic ti liquem talel ta atojole. 8 Yu'un laj xa calbe ya'iic ti c'u s'elan laj avac'bun jna'e, laj xa xch'unic. Laj sna'ic ti liquemun talel ta atojole, c'ot ta yo'ntonic ti laj atacun talele. 9 “Avocoluc ta jc'ubanbot ta atojol ti buch'utic laj avac'bune. Ma'uc ta jc'ubanbot ta atojol ti buch'utic lec xa'i ti sba banomile. Ja' ta jc'ubanbot ta atojol ti buch'utic laj avac'bune, yu'un ja' avu'untac. 10 Scotol ti bu c'otem ta cu'untaque, ja' avu'un. Ti bu c'otem ta avu'une, ja' cu'un ec. Ta xvinaj ti xojobin no'ox ti jlequilal cutsilal ta stojolique. 11 “Mu li'uc ta xicom ta sba banomile. Ti stuquique li' ta xcomic ta sba banomile, yu'un ta xtal jchi'inot. Jch'ul Tot, ti buch'utic laj avac'bune, chabio ta sventa ti amuc'ul atsatsale, ja' ti amuc'ul atsatal ti laj xa avac'bune, yo' jech co'oluc yo'ntonic jech c'u cha'al ti vo'otique. 12 C'alal li' jchi'inoj ta banomil ti buch'utic laj avac'bune, laj jchabi lec ta sventa ti amuc'ul atsatsal ti laj avac'bune. Mi junuc ch'ay. Ja' no'ox ch'ay ti buch'u ch'ayem xa ono'oxe yo' jech ta xc'ot ta pasel jech c'u cha'al ts'ibabil ta ch'ul ac'ope. 13 “Avi tana une, ta xital ta atojol. Ja'uc le'e, ta jc'oponic comel ti li' oyun ta banomile yo' jech ta staic ti j'ech'el xmuyubajicuc jech c'u cha'al ti vu'une. 14 Yu'un laj xa calbe ya'i ti ac'ope. Ja'uc le'e, contrainbilic yu'un ti jnaclejetic ta banomile, yu'un mu co'oluc yo'ntonic xchi'uc ti buch'utic oyic ta banomile, jech c'u cha'al ti vu'un mu co'oluc co'nton xchi'uque. 15 Ma'uc ta jc'ubanbot ti ta xach'ac loq'uel li' ta banomile. Ja' no'ox ta jc'ubanbot ti pojo yo' mu stsalatic yu'un ti pucuje. 16 Jech c'u cha'al mu co'oluc co'nton xchi'uc ti buch'utic oyic ta banomile, ja' jech ti stuquique, ma'uc xa co'oluc yo'ntonic xchi'uc ti buch'utic oyic ta banomile. 17 Ti buch'utic laj avac'bune, lecubtaso ta sventa ti melel ta xavac' ta na'ele, yu'un melel ono'ox ti ac'ope. 18 Jech c'u cha'al laj atacun talel ta stojol ti jnaclejetic ta banomile, ja' jech ta jtaquic batel ta stojol ti jnaclejetic ta banomile. 19 Ventainbiluc c'otuc avu'un ta sventa ti melel ta xcac' ta na'ele, jech c'u cha'al ventainbil lic'ot avu'un ec ti laj cac' jba ta tunele. 20 “Ma'uc no'ox ta jc'ubanbot ta atojol ti stuquique, ta jc'ubanbot ta atojol xtoc ti buch'utic ts'acal to ta xlic c'otuc ta yo'ntonic ta xch'unelun ta sventa ti ac'op ta xalic batele. 21 Ta jc'ubanbot ta atojol ti co'oluc yo'ntonic scotolique, jech c'u cha'al, Tot, ti jun avo'nton ta jtojole, ti jun co'nton ta atojole, ti co'oluc ti yo'ntonic ta jtojoltic yo' jech ta xc'ot ta yo'ntonic ti jnaclejetic ta banomil ti vo'ot laj atacun talele. 22 Laj xa cac'be yich'ic ti jlequilal ti laj avac'bune yo' jech jun sjol yo'ntonic jech chac c'u cha'al ti vo'otique. 23 Oyun ta stojolic ec jech c'u cha'al oyot ta jtojole yo' jech jun no'ox ta xc'otic ti junuc yo'ntonic ta jbel sc'oplale, yo' jech ta xlic yilic ti jnaclejetic ta banomil ti vo'ot laj atacun talele, ti c'ux ta xava'iic jech c'u cha'al c'ux ta xava'iune. 24 “Tot, yu'un vo'ot laj avac'bun, ta jc'an ti tey oyicuc ti bu oyun eque, yo' jech ta xilic ti jlequilal laj avac'bune, yu'un ac'uxubinojun ono'ox c'alal mu'yuc to meltsaj ti banomile. 25 Jch'ul Tot, ti oy alequilal avutsilale, ti buch'utic sventainojic ti sba banomile mu xayojtiquinic. Ti vu'une xacojtiquin. Ti jayib li' oyique laj xa sna'ic ti vo'ot laj atacun talele. 26 Laj xa cac'be sna'ic Buch'uot. Staoj yav jech ta jpasolan ta yac'bel sna'ic yo' jech oy ta stojolic ti syail xc'uxul avo'nton ti laj avac'bune yo' jech oyun ta stojolic.”
Chucbil bat ti Jesuse
1 C'alal jech laj yal taj une, ti Jesuse loq'uic batel xchi'uc ti yajchanc'optaque yo' ta xbatic ta jot sti'il uc'um Cedrón. Ti bu taje, oy ts'unobaltic ti bu och batel ti Jesuse xchi'uc ti yajchanc'optaque. 2 Jech ec ti j'ac'vanej ta c'abal Judase, xojtiquin lec ti ts'unobaltic taje, yu'un tey ono'ox ta xc'ot stsob sbaic ti Jesuse xchi'uc ti yajchanc'optaque. 3 Ti Judase xvolet c'otel xchi'uc soldadoetic xchi'uc mayoletic yu'un ti ch'ulnae, ti ja' tacbilic batel yu'un ti banquilal paleetique xchi'uc ti fariseoetique. Chapalic batel xchi'uc yabtejebic, xchi'uc yinternoic, xchi'uc stojic. 4 Ja'uc ti Jesuse, ti sna'oj xa scotol ti c'usi ta xc'ot ta pasel ta stojole, bat snup ta be ti xi laj sjac'bee: —¿Buch'u ta xasa'ic? 5 —Ja' ti Jesús ta Nazarete —xi laj staq'uique. —Vu'unun —xi laj stac' ti Jesuse. Ti Judase, ti j'ac'vanej ta c'abale, xchi'inoj xa batel ti jtsacvanejetique. 6 C'alal laj yal ti Jesús “Vu'unun” ti xie, valopat sutic ti yalic ta lum ti jtsacvanejetique. 7 Xi laj xcha'jac' ti Jesuse: —¿Buch'u ta xasa'ic? Xi laj xcha'alique: —Ja' ti Jesús ta Nazarete. 8 Xi laj xcha'al ti Jesuse: —Laj xa calboxuc ava'iic ti vu'unune. Mi vu'un ta xasa'icune, ch'an utic ti jchi'iltaque, ac'o baticuc. 9 Ti jech taje, yo' ta xc'ot ta pasel jech c'u cha'al ti xi laj yal ti Jesuse: “Ti buch'utic laj yac'bun ti Jtote, mi junuc ch'ay.” 10 Va'i un, ti Simón Pedroe laj snit loq'uel ti yespada yich'oje. Laj sbojbe sbats'i chiquin smosov ti banquilal pale. Malco sbi ti mosove. 11 Xi laj yal ti Jesús ta stojol ti Pedroe: —Tic'o ta sna ti avespadae. Yu'un loc' xa ta yo'nton ti Jtot ta xquich' ti jvocole. ¿Mi yu'un xavac'touc mu ta xquich' ti jvocole?
Ti Jesuse oy ta stojolal ti Anás ti ja' banquilal palee
12 Ti soldadoetique xchi'uc ti banquilal yu'unique, ti jchabiej ch'ulna mayoletic yu'un ti israeletique, laj stsaquic laj xchuquic ti Jesuse. 13 Yic'ojic batel ba'yel ta sna ti Anase, yu'un ja' smuni' ti Caifase, ti ja' o tiq'uil ta banquilal pale ti jech jabil taje. 14 Ti Caifás taje, ja' ono'ox ti laj yalbe ya'iic ti j'abteletic yu'un ti israeletique, ti xloc' venta ta xcham jun vinic ta sventa ti jteclume.
Ti Pedroe ta xal ti mu xojtiquin ti Jesuse
15 Ti Simón Pedroe xchi'uc ti jun jchanc'ope, tijil batel ta spat ti Jesuse. Ti jun jchanc'op taje, ojtiquinbil lec yu'un ti banquilal palee. Jmoj ochic batel xchi'uc ti Jesús ta yamaq'uil sna ti banquilal palee, 16 ja'uc ti Pedroe va'al com ta pat ti'na. Jech o xal ti jun jchanc'op ojtiquinbil yu'un ti banquilal palee, loc' batel, bat sc'opon ti me' jq'uel-ti'nae, laj yac' ochuc ti Pedroe. 17 Xi laj sjac'be Pedro ti me' jq'uel-ti'nae: —¿Mi ma'uc jun yajchanc'opot ti vinic le'e? —Mu'cun —xi laj stac' ti Pedroe. 18 Ti jech toyol ti sique, ti mosoviletique xchi'uc ti mayoletic yu'un ti ch'ulnae, laj stsanic c'oc' yo' ta xc'atinic ti bu taje. Tey capal ta xcatin ec ti Pedroe.
Ti Jesuse ta x'ich'bat ye yu'un ti banquilal palee
19 Ti banquilal palee lic sjac'beic ti Jesuse, buch'u ti yajchanc'optaque xchi'uc c'usi ti ta xchanubtasvane. 20 Xi laj stac' ti Jesuse: —Ta sba ta sat scotolic lichanubtasvan. Yu'un laj jva'an jba ta chanubtasvanej ta muc' ta ch'ulna xchi'uc ta ch'ul naetic ti bu ta stsob sbaic ti israeletique. Mu'yuc c'usi ta mucul laj cal. 21 ¿C'u cha'al ta xajac'beicune? Ja' jac'beic ti buch'utic laj ya'iic ti c'u s'elan laj jchanubtasique. Ja' sna'ic ti c'u s'elan laj cale. 22 C'alal jech laj yal ti Jesuse, ti jun mayol yu'un ti ch'ulnae, laj yac'be majel ti xi laj yalbee: —¿Mi ja' jech ta xatac'be ti banquilal pale taje? 23 Xi laj yal ti Jesuse: —Mi oy c'usi chopol laj cale, albun ca'i. Mi lec ti c'usi laj cale, ¿c'u cha'al ta xamajun? 24 Va'i un, ti Anase chucul laj stac batel ti Jesús ta stojol ti banquilal pale Caifase.
Ti Pedroe ta xcha'al ti mu xojtiquin ti Jesuse
25 Xi jac'bat ti Pedro ti jech va'al ta xc'atin ta ti' c'oq'ue: —¿Mi ma'uc jun yajchanc'opot ti vinic le'e? —Mu'cun —xi laj smuc sba ti Pedroe. 26 Ti yajmosov ti banquilal palee, yuts' yalal ti buch'u bojbat xchiquin yu'un ti Pedroe, xi lic yalilane: —¿Mi yu'un mu'yuc laj quilot avaloj ta ts'unobaltic xchi'uc ti vinic le'e? 27 Ti Pedroe laj xcha'muc sba, ja' o lic oc'uc ti cotse.
Ti Jesuse bat ta stojol ti Pilatoe
28 Ti Jesuse ic'bil loc' batel ta sna ti Caifase, yic'ojic batel ta stojol ti its'inal ajvalil Romanoe. Ti jech jutuc xa sc'an sacub talel ti osile, ti israeletique mu'yuc x'ochic batel bu oy ti ajvalile yo' mu sta smulic yu'un ti c'u s'elan liquem yu'unique. Mi mu jechuque, mu xu' ta xve'ic ta sventa ti q'uin Colele. 29 Jech o xal ti Pilatoe iloc' batel ti xi laj sjac'be ti jchapanvanej israeletique: —¿C'usi smul avu'unic ti vinic li'e? 30 Xi laj staq'uique: —Ti mu'yucuc tsots ti smule, mu'yuc xquic'cutic talel ta atojol ti jechuque. 31 Xi tac'batic yu'un ti Pilatoe: —Iq'uic batel, chapanic atuquic co'ol jech c'u cha'al ta xal ti mantal avu'unique. Xi laj staq'uic ti israeletique: —Ti vu'uncutic israeluncutique, mu'yuc quich'ojcutic mantal ti xu' ta ximilvancutique. 32 Taje, ja' c'ot ta pasel ti laj ono'ox yal ti Jesús c'u s'elan ta xchame. 33 Ti Pilatoe cha'och batel ta chapanobbail, laj yic' ochel ti Jesuse, ti xi laj sjac'bee: —¿Mi vo'ot ajvalilot yu'un ti israeletique? 34 Xi laj stac' ti Jesuse: —¿Mi ta ajol atuc ti jech ta xajaq'ue? ¿Mi yu'un oy buch'u laj yalbot ava'i ti jc'oplale? 35 Xi laj stac' ti Pilatoe: —¿Mi yu'un judioun ya'yel ec? Ja' laj yac'ot ta coc ta jc'ob ti ateclumale, ti banquilal paleetique. ¿C'usi laj apas? 36 Xi laj stac' ti Jesuse: —Ti jech Ajvalilune, ma'uc li' ta sba banomile. Ti yu'unuc ja'uque, laj xa sliques c'op ti cajchanc'optac ti jechuque yo' mu xistsaquicun ti jteclumale. Ja'uc le'e, ma'uc li' ta xi'och ta Ajvalilale. 37 Xi laj yal ti Pilatoe: —Ati xcaltic un cha'e, ajvalilot. Xi laj stac' ti Jesuse: —Ajvalilun jech c'u cha'al ta xavale. Yu'un ja' jtu ti tal voc'cun ta banomile yo' tal cal ti c'usi ja' melel ta stojol ti jnaclejetic ta banomile. Scotolic ti buch'utic ta xc'ot ta yo'nton ta xch'unel ti c'usi ja' melele, ta xa'iic ti c'usi ta xcale. 38 Xi laj stac' ti Pilatoe: —¿C'usi ti ja' melele?
Chapajem xa sc'oplal ti ta xich' milel ti Jesuse
C'alal jech laj sjaq'ue, loc' batel ti Pilato ta sc'oponel ti israeletique, ti xi laj sjam ta alele: —Mu jutebuc laj jtabe smul ti vinic li'e. 39 Ti vo'oxuque, liquem stalelic avu'unic ta yorail q'uin Colele, ti ta xac'anic ti ta jcolta batel jun jchuquele. ¿Mi ta xac'anic ta jcolta batel ti ajvalil avu'unic ta xavalique? 40 Xi lic avanicuc scotolique: —Mu xacolta batel le'e, ja' coltao ti Barrabase. Ti Barrabás taje, ja' jun j'elec'.
1 Ti Pilatoe laj yal mantal ac'o yich' tsitsel ta nucul ti Jesuse. 2 Ti soldadoetique laj xotic ta jalel ch'ix, laj xojbeic ta sjol ti Jesuse. Laj yac'be slap ti ic'-ic' losantic sba stsajal c'u'ile, 3 ti xiic ta stojol ta sna'leel ti nopajic ech'el ta smajbel ti sate: —Jun yutsil ti muc' ta ajvalil yu'un ti Israele. 4 Xi laj yal ti Pilato ti cha'loc' talel ti bu oye: —A'yio ava'iic, laj quic' tal ti vinic ti ta jva'an ta atojolic yo' jech ta xava'iic ti mu jutebuc laj jtabe ti smule. 5 Xojol xa batel ti xotbil ch'ix ta sjol ti Jesuse, slapoj batel ti c'u'il ic'-ic' losantic sba stsajale. Xi laj yal ti Pilatoe: —¡Li' oy ti vinique! 6 Xi avanic ti banquilal paleetique xchi'uc ti mayoletic ti c'alal laj yilique: —¡Jipano ta curus! ¡Jipano ta curus! Xi laj yal ti Pilatoe: —Ba jipanic ta curus ti vo'oxuque, yu'un mu jtabe jutebuc smul ti vinic li'e. 7 Xi laj staq'uic ti israeletique: —Oy c'usi jbel tsots albil sc'oplal cu'uncutic. Ti c'u s'elan tsots albil sc'oplal cu'uncutique, ta xal ti ac'o chamuque, yu'un ta sbis sba ta Xnich'on Dios. 8 C'alal jech laj ya'ie, ti Pilato x'ech' to och xi'el ta yo'nton. 9 Xi laj sjac'be Jesús ti cha'och batel ta chapanobbaile: —¿Bu liquemot talel un cha'e? Mi jbeluc oy c'usi laj stac' ti Jesuse. 10 Xi laj yal ti Pilatoe: —¿C'u cha'al mu xatac'bune? ¿Mi mu xana' ti oy cabtel xu' ta jipanot ta curuse, xchi'uc ti ja' cabtel ta spojelote? 11 Xi laj stac' ti Jesuse: —Mu'yuc c'usi xu' avu'un ta jtojol ti manchuc laj yac'bot avabtel ti Diose. Ja'uc ti buch'u tal yac'un ta avoc ac'obe, ech'em smulic, ja' mu sta ti vo'ote. 12 Va'i un, ti Pilatoe lic sa'ilan c'u s'elan xu' ta scolta batel ti Jesuse, ja'uc ti israeletique xi laj yavtaic batele: —Mi ta xacolta batel ti vinique, ma'uc lequil jtunelot yu'un ti muc' ta ajvalil Cesare. Buch'uuc no'ox ta sbis sba ta ajvalile, ja' yajcontra ti ajvalil Cesare. 13 C'alal jech laj ya'i ti Pilatoe, laj yal mantal ac'o yich' sloq'uesel batel ti Jesús ti bu oye. Bat chotluc ta chapanobbail ti Gabatá sbi ta hebreo c'ope, ti ja' ta xac' ta na'el smelol Pacbil tone. 14 Nopol xa batel o'lol c'ac'al, yorail xa ta xchapan sbaic ta sventa ti q'uin Colele, ja' o xi laj yal ti Pilato ta stojol ti israeletique: —Li' oy ti ajvalil avu'unique. 15 Xi avanique: —¡Ac'o chamuc! ¡Ac'o chamuc! ¡Jipano ta curus! Xi laj sjac' ti Pilatoe: —¿Mi yu'un vu'un ta jipan ta curus ti ajvalil avu'unique? Xi laj staq'uic ti banquilal paleetique: —Mu'yuc yan, ja' no'ox ajvalil cu'uncutic ti Cesare. 16 Va'i un, ti Pilatoe laj yac' batel ta sc'obic ti Jesuse yo' ta sjipanic ta curus, yic'ojic batel un.
Ta xjipanat ta curus ti Jesuse
17 Ti Jesuse loc' batel, xcuchoj batel ta snequeb ti scurusal yo' ta xbat bu oy ti Baquil Jolil sbie, ti ja' Gólgota sbi ta hebreo c'ope. 18 Ti bu taje, laj sjipanic ta curus ti Jesuse. Oy yan cha'vo' laj sjipanic ta curus ta jujujot xocon, ta o'lol c'ot ti Jesuse. 19 Ti Pilatoe laj yal mantal ti yich'uc ts'ibael letra ti xiuc ac'o yale: “TI JESÚS TA NAZARETE, JA' AJVALIL YU'UNIC TI ISRAELETIQUE.” 20 Yepal israeletic laj sq'uelic c'u s'elan ta xal ti letrae, yu'un ti bu laj sjipanic ta curus ti Jesuse, nopol no'ox xil ti jteclume. Ti letrae ts'ibabil ta hebreo, ta latín, xchi'uc ta griego c'op. 21 Ti banquilal paleetic yu'un ti israeletique xi laj svulic ti Pilatoe: —Altic laj ats'iba ti ta xal ‘ajvalil yu'un ti israeletique’. Ja' ts'ibao ti xiuc ac'o yale: ‘Ti buch'u ta xalbe sba ajvalilun yu'un ti israeletique.’ 22 Xi laj stac' ti Pilatoe: —Ti c'usi laj xa jts'ibae, ja' jech ta xcom o. 23 Ti soldadoetic c'alal laj xa sjipanic ta curus ti Jesuse, laj stambeic ti sc'u'e. Laj spasic ta chanch'ac. Jujun laj yich'ic ti xchanvo'alique. Laj stsacbeic xtoc ti scotone. Mu'yuc ts'isbil. Jis no'ox jalbil. 24 Xi laj yalbe sbaic ti soldadoetique: —Altic ta jatic ta chanch'ac. Jq'ueltic yorail buch'u junucal ta xich' cu'untic. Ti jech laj spasic ti soldadoetic taje, ja' c'ot ta pasel jech c'u cha'al ti xi ta xal ta ch'ul c'ope: ‘Laj xch'acbe sbaic ti jc'u'e. Ta yorail laj sq'uelic buch'u junucal ta xich'ic ti jcotone.’ 25 Ta sts'el curus bu oy ti Jesuse, tey va'al ti sme'e, ti xchi'il ta voq'uel ti sme'e, ti María yajnil ti Cleofase, xchi'uc ti María Magdalenae. 26 Ti Jesuse laj yil ti sme' va'al ta sts'el ti jun yajchanc'op ti buch'u mu tuch'baj ta xa'ie, ti xi laj yalbe ti sme'e: —Me', tey va'al ta ats'el ma' ti aquerem ole. 27 Xi laj yalbe ti jun yajchanc'op ti mu tuch'baj ta yo'nton ta xa'ie: —Va'al ta ats'el ma' ti ame'e. Va'i un, ti yajchanc'ope laj yic' batel ta sna sme' ti Jesuse.
Ta xcham ti Jesuse
28 Laj taj une, ti sna'oj xa lec Jesús ti scotol c'ot xa ta pasel ta stojole, xchi'uc yo' ta xc'ot ta pasel jech c'u cha'al ta xal ta ch'ul c'ope, xi laj yale: —Taquin xa ma' ti co'nton une. 29 Ti bu taje, oy jun jarru noj ta ch'ail pox. Laj sts'ajic ta ch'ail pox ti esponjae. Laj xchuquic ta sc'ob jun hisopo te'. Laj xtuchbeic muyel ta ye ti Jesuse. 30 Xi laj yal Jesús ti c'alal laj yuch' ti ch'ail poxe: —Cuch xa cu'un scotol. Nijbuj yalel, cham.
Oy jun soldado laj spajbe ta lanza xocon ti Jesuse
31 Jun xa c'ac'al sc'an ti q'uin Colele. Ti israeletique mu sc'anic ti jipil ta curus ta xcom sbec'tal ti jmileletic c'alal ta sta sc'ac'alil ti cuxob o'ntonale, yu'un ja' jun c'ac'al ich'bil ta muc' yu'unic. Jech o xal laj sc'anbeic ti Pilatoe, ac'o yal mantal ti ac'o yich'ic c'asbel sbaquil yo'ic ti buch'u jipil ta curuse, yo' xu' ta syalesic talel ta curus ti sbec'talique. 32 Ti soldadoetique bat sc'asbeic sbaquil yo' ti bu ba'yel jipile. Ts'acal to laj sc'asbeic sbaquil yo' ti jun jipil ta xocon ti Jesuse. 33 Ja'uc c'alal nopajic batel ta sts'el ti Jesuse, laj yilic ti chamem xae, mu'yuc xa sc'asbeic ti sbaquil yo'e. 34 Manchuc mi jech un, oy jun soldado laj to spajbe ta lanza xocon xch'ilte' ti Jesuse. Ta jech yepal, loc' talel ch'ich' xchi'uc vo'. 35 Ti buch'u laj sts'iba ti c'op li'e, ja' jun ti laj yile, yu'un melel. Sna' ti ja' melel ti c'usi ta xale yo' jech ta xc'ot ta avo'ntonic ta xch'unel ec. 36 Ti jech c'ot ta pasel taje yo' ta xc'ot ta pasel jech c'u cha'al ti xi ta xal ti ts'ibabil ta ch'ul c'ope: ‘Mi junuc sbaquil laj sc'asbeic.’ 37 Oy bu ts'ibabil ta ch'ul c'op xtoc ti xi ta xale: ‘Laj yilic ti buch'u laj syayijesic ta lanzae.’
Ta xich' muquel ti Jesuse
38 Laj taj une, ti Josee liquem talel ta jteclum Arimatea, ba yich'be ye ti Pilatoe mi xu' ta xich' batel sbec'tal ti Jesuse. Yu'un ti Josee, ja' jun ti c'otem ta yo'nton ta xch'unel ti Jesuse, ja' no'ox ti ta mucule yu'un ta xi' yu'un ti israeletique. Ti Pilatoe laj yac' ye ti xu' ta xich'be batel sbec'tal Jesús ti Josee. 39 Tal ec ti Nicodemoe, ti buch'u ay sc'opon ta ac'ubaltic ti Jesuse, yich'oj talel nopol lajuneb xcha'vinic ( 30 ) kilo muil momoletic ti capal ta mirra xchi'uc yan muil pox ti áloe sbie. 40 Ti Josee xchi'uc ti Nicodemoe laj spoyic batel sbec'tal ti Jesuse, xchi'uc laj slilinic ta sba manta ti muil momoletique. Laj xpixic ta manta sbec'tal ti Jesuse jech c'u cha'al stalelic ta smuc sbaic ti israeletique. 41 Ti bu laj yich' jipanel ta curus ti Jesuse, oy ts'unobaltic. Ti ta ts'unobaltic taje, oy jun ach' muquinal jombil ta ton ti mu to junuc anima tic'bile. 42 Ti bu taje, laj stic'beic comel sbec'tal ti Jesuse, yu'un ti muquinale nopol no'ox oy. Ma'uc no'ox ti nopole, yu'un xa yorail ta xlic ti sc'ac'alil cuxob o'ntonal yu'un ti israeletique.
Cha'cuxi ti Jesuse
1 Yamal to, mu to ta sacub talel ti osil ta sliquebal c'ac'al yu'un ti xemunae, ti María Magdalenae bat ta muquinal, laj sta ta ilel ti loq'uesbil xa ti ton smac ti ti' muquinale. 2 Xbitet batel ta anil bu comem ti Simón Pedroe xchi'uc ti jun jchanc'op ti mu tuch'baj ta o'ntonal ta x'a'yie yu'un ti Jesús ti xi laj yalbe ya'iique: —Laj xa spoyic loq'uel ta muquinal ti Cajvaltique, mu jna'tic bu laj yaq'uic. 3 Ti Pedroe xchi'uc ti jun jchanc'ope batic ta muquinal. 4 Jmoj to ox xbitetic batel ta anil xchibalic, ja'uc ti jun jchanc'ope ven x'anilaj, ja' mu sta ti Pedroe, ja' ba'yel c'ot ta muquinal. 5 Cuji laj sq'uel ochel ti muquinale. Naca xa no'ox xpixobil Jesús laj sta ta ilele. Ti stuque mi ja'uc x'och batel. 6 C'alal c'ot ti Simón Pedro ta muquinal tajee, och batel. Laj yil ec un ti ja' xa no'ox xpixobil ti Jesús laj stae. 7 Ma'uc no'ox taje, laj yil ti jlic poc' svolobil sjol ti Jesuse. Slecoj xa oy ti pacbil leque, ti ma'uc xa capal xchi'uc ti yan poc' xpixobil ti Jesuse. 8 Va'i un, och batel ec ti jun jchanc'op ti buch'u ba'yel c'ot ta muquinale. Tac'al c'ot ta yo'nton ti laj yil jech c'ot ta pasele. 9 Yu'un mu'yuc to laj ya'ibeic smelol ti ta xal ti ch'ul c'op ti tsots sc'oplal ta xcha'cuxi ti Jesuse. 10 Laj taj une, sut batel ta snaic ti jchanc'opetique.
Ti Jesuse laj yac' sba iluc ta stojol ti María Magdalenae
11 X'oc'olet xa com ta ti' muquinal ti Mariae. C'alal jech ta x'oq'ue, laj scujan sba ta sq'uelel ochel ti muquinale. 12 Laj yil cha'vo' ánjeletic sac ta j'ech'el ti sc'u' slapojique, ti chotolic ti bu to ox laj yaq'uic sbec'tal ti Jesuse. Jun chotol ti bu to ox oy stuq'uil ti sjolinabe, jun chotol ta stuq'uil yoc ti bu to ox tuts'ule. 13 Xi laj sjaq'uic ti ánjeletique: —¿C'u cha'al ta xa'oc', jun me'tic? Xi tac'av ti Mariae: —Laj xa spoyic loq'uel sbec'tal stacopal ti Cajvale. Mu jna' bu laj yaq'uic. 14 Naca jech laj yal, joybij, laj yilbe sat ti Jesuse. Ja'uc le'e, mu sna' mi ja' ti Jesuse. 15 Xi laj sjac' ti Jesuse: —Jun me'tic, ¿c'u cha'al ta xa'oc'? ¿Buch'u ta xasa'? Xi laj yal ti Mariae, yu'un yac'touc ja' ti jchabiej-ts'unubale: —Yojtot, mi vo'ot laj apoy loq'uel sbec'tal stacopal ti Cajvale, albun ca'i bu laj avac' yo' jech ta jpoy batel. 16 Xi laj yal ti Jesuse: —María. Ti Mariae ijoybij, xi laj yalbe ta hebreo c'op ti Jesuse: —¡Rabuni! (“Jchanubtasvanej”, xi ti smelole.) 17 Xi laj yal ti Jesuse: —Mu xamacun ta be María, yu'un mu'yuc to muyemun batel bu oy ti Jtote. Batan, ba albo ya'i ti buch'u jun co'ntoncuntic xchi'uque ti ta ximuy batel ta stojol ti Jtote, ti ja' Atotique, ti Dios cu'une, ti ja' Dios avu'unique. 18 Va'i un, ti María Magdalenae bat yalbe ya'i ti jchanc'opetic ti laj xa yilbe sat ti Jesuse. Laj yalbe ya'iic xtoc ti c'u s'elan albat yu'une.
Ti Jesuse laj yac' sba iluc ta stojol ti yajchanc'optaque
19 Ta smalel c'ac'al yu'un ti sliquebal xemunae, bajalic ta jbej na ti stsobolic ti jchanc'opetique, ta scoj xi'el yu'un jpas-mantaletic yu'un ti israeletique. Och batel ti Jesús ti c'ot sva'an sba ta o'lol yu'unic ti xi laj yale: —Tsotsanic, junuc avo'ntonic, mu xaxi'ic. 20 C'alal jech laj yal taje, laj yac' iluc ti sc'obe, ti xocone. Xmuyubajic xa ti laj yilic ti Cajvaltique. 21 Laj taj une, ti Jesuse xi laj yal xtoque: —¡Laetuc, siquetuc avo'ntonic! Jech c'u cha'al laj stacun talel ti Jtote, ja' jech ta xajtacoxuc batel ec. 22 Ti Jesuse laj xvuch'ta ti yajchanc'optaque, ti xi laj yalbee: —Ich'ic ti Ch'ul Espiritue. 23 Ti buch'u ta xavalbe ch'aybil ti smule, jech ta xc'ot ta pasel ti ch'aybil ta xc'ot ti smulique. Ja'uc ti buch'u ta xavalbe ch'abal ch'aybil ti smule, jech ta xc'ot ta pasel.
Ti Tomase ta xil ti cha'cuxiem xa ti Jesuse
24 Ti Tomase, ti ja' jun ta xlajcha'vo'al ti yajchanc'ope, ti sbiinoj yu'unic vache, mu'yuc tey c'alal c'ot ti Jesuse. 25 Xi laj yalic ti yan jchanc'optaque: —Laj xa quilcutic ti Cajvaltique. Xi laj yal ti Tomase: —Mi mu xquil ti yayijem ta laux ti sc'obe, mi mu'yuc ta jtic' ochel sni' jc'obe, mi mu jpic ta jc'ob ti xocone, mi ja'uc ta jch'un. 26 Xvaxaquibal ( 8 ) xa c'ac'al yech'el, tsobolic ta jbej na xtoc ti yajchanc'optaque, xchi'uc tey xa oy ec un ti Tomase. Ac'o mi bajal lec ti ti' na yu'unique, och batel ti Jesuse. C'ot sva'an sba ta o'lol yu'unic ti xi laj yale: —Laetuc, siquetuc avo'ntonic. 27 Xi albat ti Tomase: —Tic'o ochel ti sni' ac'ob li' ta jc'obe. Q'uelo avil ti jc'obe. Tic'o ochel ti ac'ob ta jxocone. C'otuc ta avo'nton, altic ti xana'ete. 28 Xi tsots laj yal ti Tomase: —¡Cajval, Ch'ul Dios! 29 Xi laj yal ti Jesuse: —¿Mi ta la xc'ot ta avo'nton ti jech laj avilune? Ti buch'utic ta xc'ot ta yo'ntonic ti mu'yuc xilicune, mu'yuc c'usi sna'ic ta j'ech'el.
C'u cha'al ti jech ts'ibabil ti jpoc vun li'e
30 Ti Jesuse yepal to oy c'usi laj yac' iluc ta stojol yajchanc'optac ti ch'ayal xc'ot o'ntonal yu'une, ti mu'yuc ts'ibabil com ta jpoc vun li'e. 31 Ja'uc ti ts'ibabil vun li'e, yo' ta xc'ot ta avo'ntonic ta xch'unel ja' Cristo ti Jesuse, Xnich'on ti Diose, yo' jech ta xata acuxlejalic ta sventa c'alal ta xc'ot ta avo'ntonic ta xch'unele.
Ti Jesuse ta xac' sba iluc ta stojol ti vucvo' ( 7 ) yajchanc'ope
1 Laj taj une, ti Jesuse laj yac' sba iluc ta stojol ti yajchanc'optac ta sti'il nab Tiberiase. C'alal laj yac' sba iluque, xi s'elan c'ot ta pasele: 2 Jmoj tsobolic xchi'uc Simón Pedro ti Tomas sbiinoj vach yu'unique, ti Natanael liquem talel ta jteclum Caná ti oy ta Galileae, ti cha'vo' xnich'nab Zebedeoe, xchi'uc yan cha'vo' yajchanc'op ti Jesuse. 3 Xi laj yal ti Simón Pedroe: —Ta xibat ta mas choy. Xi laj yalic ti yan xchi'iltaque: —Ta xba jchi'inotcutic ec. Batic un, ochic ech'el ta jun barco. Ja'uc ti ta ac'ubaltic taj une, mu'yuc bu laj staic ta masel jcotuc ti choye. 4 C'alal ta xa sacub talel ti osile, ja' o vul ta loq'uel ta ti' nab ti Jesuse, ja'uc ti yajchanc'optaque mu sna'ic mi ja' ti Jesuse. 5 Xi laj yal ti Jesuse: —Jmas choyetic, ¿mi mu'yuc laj ataic jcotuc ti choye? Xi laj staq'uic ti yajchanc'optaque: —Ch'abal. 6 Xi laj yal ti Jesuse: —Jipic ochel ti smasobil achoyic ta sbats'i xocon ti barcoe, ta xataic talel ti choye. Jech laj spasic jech c'u cha'al albatique. Yepal no'ox laj staic ta masel ti choy ti mu stac' nitel loq'uel talel ta vo' ti smasobil xchoyique. 7 Va'i un, ti jun jchanc'op ti mu tuch'baj ta o'ntonal ta x'a'yie yu'un ti Jesuse, xi laj yalbe ti Pedroe: —¡Ja' Cajvaltic ta xquil une! Naca jech laj ya'i ti Simón Pedro ti ja' Cajvaltique, laj slap ta anil ti sc'u' ti sloc'oj to oxe. Laj sjip sba batel ta vo'. 8 Ja'uc ti yan yajchanc'optaque c'otic ta ti' nab xchi'uc ti barcoe, ti xjochojic batel ti smasobil xchoyique, yu'un noj ta choy. Oy nan vo'vinicuc ( 100 ) metro ochemic batel ta yutil ti nabe. 9 C'alal c'otic ta ti' nabe, x'ubet xa yac'alil laj staic ti c'oq'ue, ti cajal jcot choy ta sba ti ac'ale, xchi'uc jbej pan. 10 Xi laj yal ti Jesuse: —Ich'ic talel jaycotuc choy ti naca to laj amasique. 11 Ti Simón Pedroe och batel ta yut barco, ti loq'uel xjoch talel ta ti' nab ti smasobil xchoy ti noj ta muc'tic choye, ti tiq'uil nan oxlajuneb xvaxacvinic ( 153 ) ta cot ti choye. Manchuc mi noj ta choy ti smasobil xchoyique, mi ja'uc jat. 12 Xi laj yal ti Jesuse: —La' ve'anic. Mu'yuc buch'u junucal ti yajchanc'optac laj sjac'beic ti Buch'ue, yu'un sna'ojic xa ja' ti Cajvaltique. 13 Ti Jesuse laj stsac ti pane, laj yac'be ti yajchanc'optaque. Ja' jech laj spas xchi'uc ti choye. 14 Yoxcojal xa taje ti laj yac' sba iluc ti Jesús ta stojol ti yajchanc'optac ti c'alal cha'cuxiem xae.
Ti Jesuse ta xchi'in sbaic ta lo'il xchi'uc ti Simón Pedroe
15 C'alal laj yo'ntonic ta ve'ele, ti Jesuse xi lic sjac'be ti Simón Pedroe: —Simón, xnich'onot ti Jonase, ¿mi yepal no'ox c'ux ta xava'iun ta avo'nton, mi ja' mu sta ti yan le'e? Xi laj stac' ti Pedroe: —Jech, Cajval, ana'oj lec ti c'uxot ta co'ntone. Xi laj yal ti Jesuse: —Mi c'uxun ta avo'ntone, q'uelbun ti cuni jmimitaque. 16 Xi laj yal no'ox xtoc ti Jesuse: —Simón, xnich'onot ti Jonase, ¿mi c'ux ta xava'iun ta avo'nton? Xi laj stac' ti Pedroe: —Jech, Cajval, ana'oj lec ti c'uxot ta co'ntone. Xi laj yal ti Jesuse: —Mi jech c'uxun ta avo'ntone, q'uelbun tuc'ulanbun ti jchijtaque. 17 Xi laj sjac' ta yoxcojal ti Jesuse: —Simón, xnich'onot ti Jonase, ¿mi c'ux ta xava'iun ta avo'nton? At o'nton xa oy ti Pedroe, yu'un yoxcojal xa albat, ¿mi c'ux ta xava'iun ta avo'nton? ti x'utee. Xi laj yal ti Pedroe: —Cajval, ana'oj scotol. Xana' lec ti c'ux ta xca'iot ta co'ntone. Xi laj yal ti Jesuse: —Mi jech c'uxun ta avo'ntone, q'uelbun tuc'ulanbun ti jchijtac un cha'e. 18 Ta xcalbot ava'i, ti ta aqueremale, laj alap atuc ti ac'u'e, labat ti bu ta xac'ane. Mi layijube, ta xalich' ti ac'obe, yan o ti buch'u ta xac' alap ti ac'u'e. Ta xic'ot batel ti bu mu xmuyubaj avo'nton yu'une. 19 Ti jech laj yal ti Jesús taje, ta xac'be sna' c'u s'elan ta xcham ti Pedroe yo' ta svinajes yutsil slequil ti Dios c'alal ta xcham ti Pedroe. Laj taj une, xi laj yal ti Jesuse: —Batic, ts'acliun.
Ti jun jchanc'op ti c'ux ta x'a'yie yu'un ti Jesuse
20 C'alal joybij sq'uel spat ti Pedroe, laj yil ti tijil ech'el ta spatic ti jun jchanc'op ti c'ux ta x'a'yie yu'un ti Jesuse, ja' ti buch'u nabal ta sts'el Jesús ti xi laj sjac' ti c'alal jmoj ta xve'ique: “Cajval, ¿buch'u ta xac'ot ta c'abal?” 21 Xi laj sjac' ti Pedro ta stojol Jesús c'alal laj yil nabal ech'el ta spatic ti jun jchanc'ope: —Cajval, ati jun vinic le'e, ¿c'usi ta xc'ot ta stojol? Xi laj stac' ti Jesuse: 22 —Mi ta jc'an cuxul ta jta c'alal ta xicha'sut talele, ¿c'usi aventa? Tsacliun no'ox batel ti vo'ote. 23 Ti jech taj une, xpuquet no'ox sc'oplal yu'unic ti mu'yuc la ta xcham ti jun jchanc'ope. Ja'uc le' une, ma'uc laj yal ti Jesús ti mu'yuc ta xchame. “Mi ta jc'an ti c'uxul ta jta c'alal ta xicha'sut talele, ¿c'usi aventa?” naca xi laj yale. 24 Ti jchanc'op taje, ja' ti buch'u laj sts'iba ti jpoc vun li'e, ti yiloj scotol ti c'usi c'ot ta pasele. Jna'tic lec un, melel ti c'usi ta xale. 25 Ti Jesuse, yepal ti oy c'usi laj spase. Ti lajuc yich' ts'ibael ta jujutos ti c'usi laj spase, ta jnop ti mu x'och ta scotol banomil ti spocol-poc vunetic ti lajuc yich' ts'ibael scotole. Jechuc.