1

1 Diizd guia'xchej chi gad guidxliuj gacchaaw, mal yu' bén na̱j xtiidx Dios. Laaman za'në Dios abi' laagajcaman na̱j Dios. 2 Laaman mal za'në Dios diizd guia'xchej. 3 Laaman been graczi ni yu'. Achetczi ni yu' niajc bal id laaman. 4 Laaman rajp guialnaban, guiáad guialnaban guin na̱j bajl par gra bénguidxliuj. 5 Bajl guin rusni bén nacay xquiarguiejn, abi' ad rajct rutëë guialnacay guin loj bajl guin. 6 Guyu tijb bén brii laj Waj, Dios guxhaal laaman, 7 bidgaguieman diidx xcwent bén na̱j xbajl Dios, din gac chililadx gra ree bejn laaman. 8 Per ad Wajt goc bajl guin, bi'tzaman bidgaguieman diidx xcwent bajl guin. 9 Din bén na̱j quijb bajl guin, laaman rusni xquiarguiejn gra bénguidxliuj, abi' ma bi'taman loj guidxliuj. 10 Laaman guzu loj guidxliuj, abi' majsi laaman been guidxliuj, per ree bénguidxliuj ad bayagbeet reeman laaman. 11 Bi'taman loj ree bén Israel, abi' majsi gojcaman bén Israel, per ad bidxga't reeman laaman. 12 Per, gra ree bén bidxga' laaman bililadx tëë reeman laaman, beenman laa reeman xi'n Dios. 13 Abi' na̱j reeman xi'n Dios, ad zi'c rut xi'n bejn loj guidxliuj por xixgab bejn o guial rën bejn chu' xi'nman, por guial rliladx reeman ma na̱j reeman xi'n Dios. 14 Jesús, bén na̱j xtiidx Dios, laaman goc bejn abi' gubajnman loj guidxliuj con dunuj ree, abi' dád guyënman bejn ree gunee tëëman ganax diidxli. Dunujn baguiaa xguialrniabeeman, guialrniabee ni ca'man guial tijbzi laaman na̱j Xi'n Dios. 15 Chi be Waj xtiidxaman loj ree bejn, guneeman rejs, rëbaman: ―Jesús guie na̱j bén ruzatan, chi rnin guial bén zëëd xichan mazri lasajcaman guial lon, din diizd gocli mal yu'man guial lon. 16 Dád rënman dunuj ree, gra dxejczi raca' dugra ree xguialnaza'caman. 17 Por Moisejs banee Dios xleyaman duloj ree, per por Jesucrist bayagbee ree xhienaag rën Dios dunuj ree xhie tëë naag na̱j xtiidxliman. 18 Ad yu't dxej waguiaa bejn Dios. Bén na̱j tijbzi xi'nman. Bén nabannë laaman balüü duloj ree xhienaag na̱j Dios. 19 Diizd Jerusalén guxhaal ree xguxtis ree bén Israel bixhioz ree con ree bén na̱j ree levitas persi bignabdiidx reeman loj Waj chu najman. 20 Dxel be Waj diidxli loj reeman, rëbaman: ―Ad najtan na̱j Cristo. 21 Abi' gunabdiidx reeman lojman stijb rëb reeman: ―¿Chuza najl? ¿Lüjn na̱j Elías ya, bén badëë xtiidx Dios loj ree bejn? Badxi' Wajn rëbaman: ―Ad najtan. Dxel gunabdiidx reeman stijb rëb reeman: ―O, ¿lüjn na̱j bén na̱j diidx gui't ya, bén gudëë xtiidx Dios loj ree bejn? Badxi'man laan rëbaman: ―Ad najtan. 22 Abi' rëb reeman: ―¿Chuza najl? Din rayal yugnë'n ruson loj ree bén guxhaal dunujn. Guna chu najl. 23 Dxel rëb Waj loj reeman: ―Naj na̱j tijb bén rbidxa' loj yujbidx: “Gol guxhal tijb nejz nali par bén ca' guialrniabee” ―zi'c rëb Isaías bén badëë xtiidx Dios loj ree bejn. 24 Abi' ree bén guxhaal ree bénfarisew din guinieenë reeman Waj, 25 gunabdiidx reeman lojman, rëb reeman: ―Bal id lüjn na̱j Cristo, ni'qui Elías, ni'qui bén na̱j diidx gui't, bén gudëë xtiidx Dios loj ree bejn, ¿chexquiza zeel ruroobnijsil bejn? 26 Badxi' Waj laan rëbaman: ―Naj rurobnijs con nijs, per lojdi no'ch tijb bén ad wayünbeetidi. 27 Laaman na̱j bén zëëd xichan, ni'qui xgurëchaman ad rayalt gaxhiecan guial najman bén mazri lasajc guial lon. 28 Gra niguie gojc lod la Betábara, ni na̱j stiblad ro' guiiw Jordán, lod baroobnijs Waj bejn ree. 29 Chi bareguiaal, baguiaa Waj zibig Jesús lod za'man, dxel rëbaman: ―Gol baguiaa, bén guin na̱j bén bacaabee Dios din guiëtaman zi'c xiildoo por xtol ree bénguidxliuj. 30 Laaman bazatan lojdi chi rnin: “Xichan zidnal bén mazri lasajc guial lon, din laaman mal yu' diizd gocli guial lon.” 31 Ni'qui naj ad gogbeetan guial laaman na̱j bén gui't, per naj zialan din gurobnijsan bejn ree con nijs din chile' güünbee ree bén Israel laaman. 32 Rëb tëë Waj loj reeman: ―Naj baguia biguiajt xSprijt Dios diizd xanyabaa zi'c tijb palom xt guijcaman. 33 Majsi ad nünbeetan laaman, per bén guxhaal naj barobnijsan con nijs, laaman na lon: “Chi guguiaal guiat xSprijt Dios xt guijc tijb bejn, laaman na̱j bén runee xSprijt Dios.” 34 Naj ma baguia laaman, abi' ragbeechaawan guial laaman na̱j Xi'n Dios. 35 Chi bareguiaal, za' Waj yagaj stijb, za'në tio'p ree xbejnman. 36 Abi' chi baguiaaman cadëd Jesús, dxel rëbaman loj reeman: ―Gol baguiaa, bén guinan na̱j zi'c xi xiildoo Dios din guiëtaman por xtol bénguidxliuj. 37 Chi biguiejn reeman rëb Waj zian, dxel binal reeman Jesús. 38 Chi badxi' lojman, baguiaaman zinal reeman laaman, abi' rëbaman loj reeman: ―¿Xhie rguiilidi? Badxi' reeman laan rëb reeman: ―Mextr, ¿ban zojbil? 39 Dxel rëb Jesús loj reeman: ―Gol guda din guguiaadi. Dxel wej reeman biquiaa reeman lod zojbaman, abi' baya'nnë reeman laaman dxej guin, guial ma gojl cost raca tajp wadxe. 40 Tijb ree xbejn Waj bén binal Jesús, bén bacaagdiajg ni rëb Waj, laaman brii laj Andrejs, bijch Simón Bëd. 41 Andrejs guin, yalojxgaj bijchaman Simón bigdiilaman, abi' rëbaman lojman: ―Ma badxaaglojn bén na̱j Mesías ―rën guiëban Cristo. 42 Dxel binë Andrejs Simón lod za' Jesús, chi baguiaa Jesús laaman, rëbaman: ―Lüj na̱j Simón, xi'n Jonás, per yan grii lajl Cefas ―rën guiëban Bëd. 43 Chi bareguiaal been Jesús xgab cheman niz Galilea, abi' badxaagaman Felip, zianz rëbaman: ―Tanal naj. 44 Ladx Felip guin na̱j guiedx Betsaida, ni gajc na̱j ladx Andrejs con Bëd. 45 Dxel bigdiil Felip Natanael, abi' rëbaman lojman: ―Ma badxaaglojn bén ruza't Moisejs loj xlibr xleyaman, bén ruza't ree bén badëë xtiidx Dios loj ree bejn loj ni bacaa reeman. Laaman na̱j Jesús, xi'n Xiëb, bén Nazaret. 46 Dxel rëb Natanael lojman: ―¿Wen yu' benza'c Nazaret ya? Badxi' Felipan rëbaman: ―Yo' din guguiaal. 47 Chi baguiaa Jesús zëëd Natanael, rëbaman: ―Guie zëëd tijb bén na̱j quijb bén Israel, abi' ad rusquieetaman. 48 Dxel gunabdiidx Natanael lojman, rëbaman: ―¿Xoza nünbeel naj? Badxi' Jesúsan rëbaman: ―Chi gad Felip cwedx lüj, chi za'l xan yag higo, dxel baguian lüj. 49 Zianz rëb Natanael lojman: ―Mextr, lüj na̱j Xi'n Dios, lüj na̱j rey Israel. 50 Badxi' Jesús laan rëbaman: ―¿Rliladxil naj ya guialzi rnin baguian lüj xan yag higo? Per mazri na̱j ree ni guguiaal guial loj ni ma baguiaal. 51 Rëb tëëman: ―Naj ragbeechaaw, zuguiaadi zojbyal xanyabaa, abi' zuguiaadi xianjl ree Dios yayë'p reeman xanyabaa yaguiajt tëë reeman xt guijc Bén guxhaal Dios loj guidxliuj.

2

1 Ni goc choon dxej guyu tijb guialruxhliaa luguiedx Caná, ni riga' niz Galilea. Dxel në xniaa Jesús za' yagaj, 2 abi' në Jesús con ree xbejnman gunee reeman persi wej reeman loj lanij guin. 3 Chi babidx vin, dxel rëb xniaa Jesús lojman: ―Achetri vin rajp reeman. 4 Badxi' Jesúsan rëbaman: ―Na, ¿chexquiza zeel nal lon zian? Ad wadxint da horan günan ni rayal günan. 5 Per xniaaman rëb gajcaman loj ree bén cayüjn mandad yagaj: ―Gol been gra ni naman. 6 Yagaj za' xho'p ree guiajs guiaj, ni ru nijs ni rüjnnë ree bén Israel dxiin chi rusia laa reeman zi'c na̱j xcostumbr reeman. Abi' lën tijbgaj reen ru cost tibgayuu lijtr. 7 Abi' rëb Jesús loj ree bén rüjn mandad guin: ―Gol bacha ree guiajs guie nijs. Dxel bachadi reeman laa reen, 8 abi' rëbaman loj reeman: ―Yan gol gulëë ta'nan, gol bigdëën loj bén canabee loj lanij guie. Dxel bigdëë reeman laan lojman, 9 abi' bén canabee loj lanij guin beenman prueb nijs bayajc vin guin, sin guial niagbeeman ban guzan, bén cayüjnz ree mandad guin ragbee, din laa reeman bica' nijs guin. Dxel gurejdxaman xin cuxhliaa guin, 10 rëbaman lojx: ―Graczi bejn rgui's yaloj vin zagdxe, abi' chi ma gu' reeman zilan, dxel rgui'saman vin corrient. Per lüj badxe'chaawil vin zagdxe guin persi cagui'silan yan. 11 Ni guin na̱j milagr yaloj been Jesús, beenman milagr guin Caná, guiedx riga' niz Galilea. Zian balüü guialrniabee ni rajpaman abi' bililadx ree xbejnman laaman. 12 Chi gulox gojc zian dxel zë reeman guiedx Capernaum, con xniaaman, con ree bijchaman con në ree xbejnman. Ni guzu reeman tio'p choon dxej. 13 Chi ma zidyob pascw xlanij ree bén Israel, wej Jesús Jerusalén. 14 Abi' ro' yadooro' bidxaaglojman bén cuto' ree go'n, con ree xiil con ree palom, në ree bén zojb xan mex ruchaa reeman xmilia ree bén ziaad lood ren. 15 Chi baguiaa Jesús zian, dxel beenchaawaman tijb duu persi babëëman gra reeman, con gra ree xgo'n reeman në ree xiil. Gutie'chaman xmilia ree bén ruchaa milia guin barexguiat tëëman xmex reeman. 16 Dxel rëbaman loj ree bén cuto' palom: ―¡Gol babëë reeb guie! ¡Ad rüjnnëdi lidx da Dadan zi'c luguia'! 17 Dxel basaaladx ree xbejnman ni ca loj xtiidx Dios lod rëb: “Dád ralenan ruguian ni rüjn reeman lidxil.” 18 Zianz rëb ree bén Israel lojman: ―¿Xhie milagr gulüül du lojn din yayagbeen guial rajpil guialrniabee güünl zian? 19 Badxi' Jesús laan rëbaman: ―Gol base'n yadoo guie, naj yayün laan loj choon dxejzi. 20 Dxel rëb ree bén Israel guin lojman: ―Tiuubixho'p ijz goglaa reeman been reeman yadoo guie, ¿guiáad lüj ya yayüjnlan choon dxejzi? 21 Per Jesús xcuerp gajcaman ruza'taman chi ruza'taman yadoo guin. 22 Zeel chi babanman loj ree bengüt, basaaladx ree xbejnman ni rëbaman, abi' bililadx reeman xtiidxaman bililadx tëë reeman ni ca loj xtiidx Dios. 23 Chi guzu Jesús Jerusalén pascw, zien ree bejn bililadx laaman, chi baguiaa reeman milagr ree ni beenman. 24 Per laaman ad rëbtaman loj reeman chu najman, din laaman nünbeechaaw xhienaag na̱j xixgab reeman. 25 Ad biaadxtaman chu niëjb lojman xhienaag na̱j bejn, din laaman ragbeechaaw xhienaag na̱j xixgab tijbgaj bejn.

3

1 Guyu tijb bénfarisew brii lajman Nicodemo, gojcaman tijb guxtis loj ree bén Israel. 2 Abi' wejman bignajman Jesús tijb guxhin, dxel rëbaman lojman: ―Mextr, rayagbeen guial Dios guxhaal lüj din gulüül dunujn, din achutczi zajc güün lasa' ree milagr ni rüjnl bal id za'në Dios laaman. 3 Dxel rëb Jesús: ―Diidxliczi rnin lüj, bén ad zajlt stijb, ad zajct guguiaaman xguialrniabee Dios. 4 Abi' rëb Nicodemo lojman: ―Per, ¿xhienaag gal bejn stijb chi ma najman bengol? ¿Wen zajc yayu lën xniaaman ya abi' galaman stijb? 5 Badxi' Jesús laan rëbaman: ―Diidxliczi rnin, bén ad rirobnijst ad nabannë tëëtaman xSprijt Dios ad zile't yayuman loj xguialrniabee Dios. 6 Bén naban zi'c na̱j xixgabaman, lojzi guidxliuj guie rajpaman guialnaban, per bén nabannë xSprijt Dios, por Sprijt guin rajpaman stijb guialnaban. 7 Ad bal radxa lojl guial rnin: “Rüjn naguiejn gal bejn stijb.” 8 Din zi'c rbi' bi gralad abi' majsi riguiejnl chi rbi'n, per ni'quid ragbeetil ban zëëdan o ban zën. Ziangajc na̱j xSprijt Dios con gra ree bén nabannë laaman. 9 Dxel rëb Nicodemo lojman: ―¿Xhienaag rajc zian? 10 Badxi' Jesúsan rëbaman: ―¿Lüj, na̱j mextr loj ree bén Israel, ad rignia'til gra ree ni guin ya? 11 Diidxliczi rnin lojl, raneen ni rayagbeen ni baguiaa tëën, per lëjt ad rliladxtidi ni ranan. 12 Bal id rliladxidi chi rnin xcwent ree ni loj guidxliuj guie, ¿xhienaag chililadxidi bal ganin xcwent ree ni xanyabaa? 13 ’Achut wayej xanyabaa, tijbzi bén biguiat diizd xanyabaa, Bén guxhaal Dios loj guidxliuj. 14 Abi' zi'c bacaa Moisejs bëël guiib loj yag niz loj yujbidx, ziangajc Bén guxhaal Dios loj guidxliuj, gucaa reeman laaman loj crüjz, 15 din gra bén chililadx laaman ad zanijtt reeman loj Dios, gap reeman guialnaban tiblayaa con laaman. 16 ’Guial tant rën Dios bénguidxliuj, majsi tijbzi xi'nman, per guxhaalaman laaman loj guidxliuj, din graczi bén chililadx laaman ad zanijtt reeman loj Dios, gap reeman guialnaban tiblayaa con laaman. 17 Din Dios ad guxhaalt xi'nman loj guidxliuj din gudëëdaman bejn casti, guxhaalaman laaman din gap ree bejn perdon loj Dios. 18 ’Bén rliladx Xi'n Dios ad rayaltaman xcasti Dios. Per bén ad rliladxt, laaman ma rayal casti guial ad rliladxtaman Xi'n Dios, bén na̱j tijbzi xi'nman. 19 Bén ad rliladxt ree rayal reeman casti, din yan ni bi't bén na̱j xbajl Dios, mazri bayuladx reeman nejz mal, guial rüjn reeman ganax ni mal. 20 Graczi ree bén rüjn ni mal ad ruladxtczi reeman bajl guin, ad rbigt reeman lojn, chitëë guiguien ni mal cayüjn reeman. 21 Per ree bén naban zi'c rayal loj Dios, laa reeman rbig loj xbajlaman din guiguien guial graczi ni cayüjn reeman na̱j ni rën Dios. 22 Chi gudëd gojc zian, Jesús con ree xbejnman wej reeman niz Judea, lod guzunëman laa reeman tio'p choon dxej, ni baroobnijs reeman bejn ree. 23 Nëgajc Waj curoobnijs bejn ree luguiedx la Enón, ni riga' gajxh guiedx Salim, guial yu' zil nijs ni. Abi' rej ree bejn persi rirobnijs reeman. 24 Laan goc chi gad Waj chu' ladxguiib. 25 Per bëlzi ree xbejn Waj, con za tio'p choon gajc ree bén Israel guzuloj cadildiidx reeman por xcostumbr reeman guial xhienaag gac reeman naya. 26 Dxel biguiedx reeman loj Waj: ―Mextr, bén guzunël stiblad ro' guiiw Jordán, bén bel xtiidx du lojn, në laaman curoobnijs bejn ree abi' gra reeman zinal laaman. 27 Badxi' Waj laan rëbaman: ―Achut zajc gap guialrniabee bal id Dios gudëë laan. 28 Lëjt ragbee guial biguiejndi rën guial ad najtan na̱j Cristo, naj guneed lojman zidgagojnan por laaman. 29 Dunuj ree rayagbee guial loj guialruxhliaa, xin za'në biingunaa guin, laaxan cuxhliaa, guiáad xmiwix xin za' con laax rabaanë da'tix laax chi riguiejnx rnieex. Ziangajc naj dád rabaanë'n laaman. 30 Abi' laaman gusnuu gacaman mazri bén zojbloj, guiáad naj gusnuu gacan bén ad lasajct guial lojman. 31 ’Din bén zëëd diizd xanyabaa, laaman na̱j bén rniabee loj gra. Per bénguidxliuj, bénguidxliujzi najman abi' ganax ni yu' loj guidxliuj ruza'taman. Per Bén zëëd diizd xanyabaa laaman rniabee gra, 32 abi' rüman ni ma baguiaaman ni ma biguiejn tëëman, per achut rliladx ni rnieeman. 33 Bal yu' bén rliladx xtiidxaman, zian rguien guial ni diidxli na̱j xtiidx Dios. 34 Abi' bén zëëd por Dios, laaman rü xtiidx Dios guial guidiblagaa badëëd Dios xSprijtaman lojman. 35 Dios rën Xi'nman abi' basa'nman gra lojman. 36 Abi' chutëëz bén rliladx Xi'nman, laaman rajp guialnaban tiblayaa loj Dios. Per bén ad rtiëjbt chililadx, ad rajptaman guialnaban guin, laaman rayal xcasti Dios.

4

1 Gogbee ree bénfarisew guial mazri zien bejn ma zinal Dad Jesús mazri zien tëë bejn ruroobnijsaman guial loj Waj, 2 majsi diidxliczi ad Jesústan ruroobnijs bejn ree, bén na̱j ree xbejnman ruroobnijs. 3 Chi gogbeeman zian dxel briiman niz Judea zëman niz Galilea stijb. 4 Per chi zëman niz Galilea been naguiejn gudëdaman niz Samaria. 5 Abi' bidxinman tijb guiedx la Sicar, ni nulen Samaria, gajxh lod naga' yuj ni badëë Jacob loj xi'nman Xiëb. 6 Yagaj na̱j tijb bizëduu rniee reeman laan xbizë Jacob. Abi' guial ma badxag Jesús cazaman, dxel gurejman ro' bizë guin. Ma zidyob garol dxej. 7 Guiáad ree xbejnman zë reeman luguiedx guin zisii ni gaw reeman. Hor guin bidxin tijb béngunaa Samaria ro' bizë guin din tia'man nijs, dxel rëb Jesús lojman: ―Bazaladx ta'n xnijsil guië'n. 9 Per guial ad rnieenët lasa' ree bén Israel zagdxe con ree bén Samaria, badxi' béngunaa guinan rëbaman: ―¿Chexquiza zeel rniabil nijs lon najl bén Israel awa bén Samaria naj? (Din bén Israel ree ad rnieenët reeman bén Samaria ree zagdxe.) 10 Badxi' Jesús laan rëbaman: ―Bal zian ragbeel ni rën Dios guneeman lüj, chutëë bénan canab nijs lojl, zanabil nijs lon abi' naj zunen nijs runee guialnaban. 11 Dxel rëb béngunaa guin loj Jesús: ―Dad, ni'quid ca'til ni cwëënël nijs, abi' bizë guin dád naxhitan. ¿Ban chica'l nijs runee guialnaban? 12 Dux béngulalan Jacob basa'nnë dunujn bizë guie, lod gu'man nijs con ree xi'nman con ree xbegui'xhaman. ¿Wen mazri najl guial lojman ya? 13 Badxi' Jesús laan rëbaman: ―Graczi ree bén rë' nijs guie re'c reeman nijs stijb. 14 Per bén guië' nijs gudëdan, ad yu'tri dxej che'caman nijs. Din nijs gudëdan gacan luxdooman zi'c lod ad rbëzt rajch nijs, abi' nijs guin gudëë guialnaban tiblayaa. 15 Dxel rëb béngunaa guin lojman: ―Dad, banee nijs guin lon, chitëë che'cran nijs ad zial tëëtran guidca'n nijs guie. 16 Rëb Jesús lojman: ―Bignee lacheelil, dxel yaguiaadil guie. 17 Badxi' béngunaa guinan rëbaman: ―Achut da bénguiaawan yu'. Dxel rëb Jesús: ―Waliquil achut lacheelil yu', 18 din ma gojc gaay xinguiaaw rtia' lüj, abi' yan xin zojbnël ad lacheeltilan. Zeel waliqui ni nal. 19 Chi biguiejnman ni rëb Jesús, dxel rëbaman: ―Dad, ma ragbeen guial lüj na̱j bén rudëë xtiidx Dios loj ree bejn. 20 Dux béngulalan gunajchi' reeman Dios ruguia' guie, per lëjt najdi bén Israel rëbidi guial Jerusalén na̱j lod guiniajchi' bejn laaman. 21 Badxi' Jesúsan rëbaman: ―Na, zagdxe rnin guial guidxin dxej guiniajchi'di dux Dad ree Dios, ad zi'ttridi ruguia' guie ad zej tëëtridi Jerusalén. 22 Lëjt ni'quid ragbeetidi chunin rniajchi'di, per dunujn rayagbeen chunin ranajchi'n, din loj ree bén Israel grii bén güün bejn ree perdon. 23 Abi' ma bidxin dxej ni gra ree bén diidxli rniajchi' Dios, guiniajchi' reeman laaman zi'c rayal por xSprijtaman. Din zian rën dux Dad ree Dios güün ree bén rniajchi' laaman. 24 Dios na̱j Sprijt, abi' bén rniajchi' ree laaman rayal guiniajchi' reeman laaman con guidib luxdoo reeman por xSprijtaman. 25 Dxel rëb béngunaa guin lojman: ―Naj ragbee gui't bén na̱j Mesías, bén la gajc, Cristo. Abi' chi gui'taman, laaman gusignia' dunuj ree gran. 26 Abi' rëb Jesús: ―Najn na̱j bén zii, laaman caneenë lüj. 27 Loj hor guin badxin ree xbejn Jesús, abi' dád badxaloj reeman guial cayünëman tijb béngunaa diidx. Per ni'qui tijb reeman ad gunabdiidxt lojman xhie rënman o xhie diidxan cayü reeman. 28 Guiáad béngunaa guin basa'n xreman ro' bizë guin, dxel ziaman luguiedx guin, abi' rëbaman loj ree bejn: 29 ―Gol taquiaa tijb bén ma na graczi ni ma benan. ¿Nid laaman na̱j Cristo ya? 30 Dxel brii reeman luguiedx guin zë reeman lod za' Jesús. 31 Per la'tgaj zia béngunaa guin luguiedx guin, rëb ree xbejn Jesús lojman: ―Mextr, gudaw. 32 Per rëbaman loj reeman: ―Laa da guialrawan yu', ni ad nünbeetidi. 33 Dxel guzuloj canabdiidx loj lasa' reeman rëb reeman: ―¿Ni yu' chu bidnë ni gudawaman ya'n? 34 Dxel rëb Jesús loj reeman: ―Da guialrawan na̱j günan zi'c rën Dios, bén guxhaal naj abi' guloox günan ni naman. 35 Lëjt rëb: “Ryaadx zatajp bëëw din gac ni yu' loj guiniaa.” Per naj rni lëjt: Gol gules lojdi, gol baguiaa loj ree guiniaa, ma na̱j reen din yado'p reen. 36 Abi' bén rato'p loj guiniaa guin, rtia'man ni rayalaman por dxiin ni rüjnman. Guiáad ni rato'paman na̱j par lod yu' guialnaban tiblayaa. Dxel zi'c bén rxübin zi'c bén rato'p, rabaa reeman tiblojzi. 37 Waliqui ni rëb ree bejn: “Ben ren rxübin, ben ren rato'p guialnaza'c.” 38 Naj guxhal lëjt din chigto'pidi guialnaza'c lod ad beentidi dxiin. Ben ren ree been dxiin, guiáad lëjt gaz bigto'pidi guialnaza'c lod ad beentidi dxiin. 39 Zien ree bén Samaria bililadx Jesús guial be béngunaa guin diidx loj reeman rëbaman: “Ma gunaman graczi ni benan.” 40 Zeel chi bidxin reeman lod za' Jesús, guzajc reeman laaman liaadx din yaya'nnëman laa reeman. Dxel baya'nnëman laa reeman tio'p dxej. 41 Abi' mazri zien reeman bililadx laaman chi biguiejn reeman ni rnieeman, 42 dxel rëb reeman loj béngunaa guin: ―Bajy yan ad por ni natzil raliduladxan laaman, nëgajc dunujn ma baguiejn ni rnieeman, abi' rayagbeen walican laaman na̱j Cristo, bén yabëë bénguidxliuj loj dol. 43 Chi goc tio'p dxej guin, baza Jesús niz Samaria abi' zëman niz Galilea, 44 majsi laagajcaman rëb guial ni'qui tijb bén rudëë xtiidx Dios loj ree bejn ad rajpt reeman laaman respejt ladx gajcaman. 45 Per chi badxinman niz Galilea, bén niz ni ree baca' reeman laaman zagdxe. Din në laa reeman wej lanij pascw Jerusalén, abi' baguiaa reeman gra ni beenman ni. 46 Chi za'man niz ni wejman Caná stijb, lod bayüjnman nijs vin. Abi' luguiedx Capernaum guyu tijb xbejn rey ragxuu xi'nman. 47 Chi gogbee bén guin baza Jesús niz Judea badxinman niz Galilea, wejman lod za' Jesús bisajcaman laaman liaadx din cheman yayüjnman xi'nman guial zamer guiëtix. 48 Abi' rëb Jesús lojman: ―Lëjt, bal id zuguiaadi xhie ree sen o milagr ree, ad zaliladxtidi. 49 Per rëb bén guin: ―Dad, yo' yan gajc, naga gad da xi'nan guiët. 50 Dxel rëb Jesús lojman: ―Baguiaj lidxil, ma bayajc xi'nl. Bililadx bén guin ni rëb Jesús, abi' zia lidxaman. 51 La'tgaj ziaman, bigchaagloj ree xmojsaman laaman, abi' rëb reeman: ―Ma bayajc xi'nl. 52 Dxel gunabdiidxaman loj reeman, rëbaman: ―¿Xhie hor guzuloj banaa da xi'nan? Abi' rëb reeman lojman: ―Nieey cost raca tijb wadxe bariix xliaa. 53 Dxel basaaladx bén guin guial hor ziin rëb Jesús lojman: “Ma bayajc xi'nl.” Abi' laaman në gra bén zojb lidxaman bililadx reeman Jesús. 54 Ni ne na̱j milagr barojp ni been Jesús niz Galilea chi bazaman niz Judea.

5

1 Chi gudëd gojc zian, guyu tijb xlanij ree bén Israel, abi' wej Jesús Jerusalén. 2 Jerusalén guin, gajxh ro' port la xport ree Xiil, na̱j tijb tanc ro', diidx hebreo lan Betesda, yu' gaay xcurduran. 3 Yagaj riga' zien ree bénragxuu, zi'c ree bénlutia'p, në ree bencoj con ree bén ad rajctczi rza, cabëz reeman guiniib nijs yu' lën tanc guin. 4 Din gocli goc rguiajt tijb xianjl Dios runiibaman nijs guin, abi' bén ru lojnijs guin yaloj chi caniiban, rayajcaman xhietëëz guialguijdxan rajcaman. 5 Dxel loj ree bén guin no'ch tijb bejn, ma gojc zi'ctiubichoon ijz ragxuuman. 6 Chi baguiaa Jesús laaman naga'man yagaj, abi' gogbeeman guial gocli ragxuuman dxel gunabdiidxaman lojman rëbaman: ―¿Rënl ya yayajquil? 7 Badxi' bénragxuu guinan rëbaman: ―Dad, achut ra'pan gudxe' naj loj nijs guin chi riniiban. Beegaj chi rënan gayu'n, yalojl ben ren ru. 8 Dxel rëb Jesús lojman: ―Bixche, baca' ni naal loj, baguiaj. 9 Loj hor guin gajc bayajc bén guin, baca' ni naaman loj abi' guzuloj cazaman. Per guial dxej zii na̱j dxej raziiladx ree bén Israel, 10 zianz bén Israel zinal ree ley rëb reeman loj bén bayajc guin: ―Yandxej na̱j dxej raziiladx bejn, ad zajct yaca' ni go'til loj. 11 Badxi' bén guinan rëbaman: ―Bén bayüjn naj naman: “Baca' ni naal loj, baguiaj.” 12 Dxel gunabdiidx reeman lojman rëb reeman: ―¿Chu na lojl: “Baca' ni naal loj, baguiaj”? 13 Per bén guin ad ragbeetaman chunin bayüjn laaman guial bi'ch Jesús loj ree benzien riga' yagaj. 14 Chi badxaag Jesús laaman lën yadooro' Jerusalén, abi' rëbaman lojman: ―Baguiaa ma bayajquil, ad güünril dol chitëë gaquil mazri guial loj ni goquil. 15 Dxel zia bén guin abi' biguiedxaman loj ree bén Israel guial Jesús na̱j bén bayüjn laaman. 16 Zeel guzunal reeman Jesús din gugüjt reeman laaman, guial rüjnman milagr guin ree dxej raziiladx bejn. 17 Per rëb Jesús loj reeman: ―Da Dadan Dios ad rbëzt rüjnman ni rayal güünman, zeel nëgajc naj rün zi'c rüjnman. 18 Zianan zeel mazri rejs guzuj reeman din gugüjt reeman laaman, ad guialzi rüjntaman ni ad najt gac dxej raziiladx bejn, në guial rüjn laagajcaman zi'c Dios chi rnieeman guial quijb xDadaman na̱j Dios. 19 Rëb Jesús loj reeman: ―Diidxliczi rnin, achet zajc güün Xi'n Dios por xixgabzaman, rüjnman ni ruguiaaman rüjn xDadaman. Din graczi ni rüjnman rüjn gajc xi'nman. 20 Din Dios rën xi'nman abi' rulüüman laaman gra ree ni rüjnman. Abi' mazri na̱j ni gulüü loj xi'nman ni yadxa da't lojdi. 21 Din zi'c rasban Dios bengüt ree rudëë tëëman guialnaban loj reeman, ziangajc rudëë xi'nman guialnaban loj ree bén nüjnman xgab. 22 Abi' ad Diost rüjn guialguxtis, bazuj xi'nman din güünman guialguxtis, 23 din gap gra ree bejn xi'nman respejt zi'cgajc rajp reeman laaman respejt. Bén ad rajpt Xi'n Dios respejt, ad rajp gajctaman respejt xDadaman Dios, bén guxhaal laaman. 24 ’Diidxliczi rnin: Bén ruzoob da diidxan rliladx tëëman Dios, bén guxhaal naj, laaman ma rajp guialnaban tiblayaa lojman. Abi' ad rayaltraman casti din ad najtraman zi'c bengüt par Dios, rajpaman guialnaban lojman. 25 Diidxliczi rnin ma bidxin hor, abi' yandxej gajcan, bén na̱j ree zi'c bengüt loj Dios gucaagdiajg reeman cha' xi'nman. Abi' ree bén guzoob xtiidxaman zajp reeman guialnaban tiblayaa con Dios. 26 Din zi'c rajp Dios guialnaban, lasa'gajc guialnaban guin ma badëë loj xi'nman, 27 abi' badëëman guialrniabee lojman din güünman guialguxtis, din laaman na̱j Bén guxhaal Dios loj guidxliuj. 28 Ad bal radxa lojdi ni rnin, din zadxin dxej guien gra ree bengüt cha' Xi'n Dios, 29 abi' yarii reeman lën baa. Dxel bén been ree ni ruladx Dios, yaban reeman, din gap reeman guialnaban tiblayaa con laaman. Guiáad ree bén been ni mal, yaban reeman din yayal reeman casti ni rayal reeman. 30 ’Achet zajc günan por da xgabzan, rünan guialguxtis zi'c rniabee da Dadan. Abi' rünan guialguxtis zi'c rayal, din ad rüntanan zi'c na̱j da xgaban, rünanan zi'c rën da Dadan bén guxhaal naj. 31 Bal gü da diidx gajcan, achet lasajcan. 32 Per yu' ben ren rü da diidxan, abi' ragbeechaawan guial diidxlin. 33 Lëjt guxhaal bén bignabdiidx ree loj Waj, abi' laaman ganax ni diidxli gunaman. 34 Majsi ad ryaadxt yadxi'n ni gunee ree bejn por naj, per canin lojdi ni guna Waj din chililadxidi gap tëëdi perdon. 35 Waj goc zi'cgajczi tijb bajl ni re'c abi' rusnin, guiáad lëjt dád babaadi bidxga'di tijb tiamp ni balüüman lëjt. 36 Per naj mazri na̱j ni gulün lëjt guial loj ni balüü Waj lëjt por naj. Din ni na da Dadan Dios günan, laanan cayünan yan din guiguien guial diidxli laaman guxhaal naj. 37 Në da Dadan bén guxhaal naj, laagajcaman be da diidxan, majsi ad waguiejntidi cha'man ad waguiaa tëëtidi laaman. 38 Ad yu'guijc tëëtidi xtiidxaman zeel ad rliladxtidi bén guxhaalaman. 39 Lëjt con cudad da't roolidi loj xtiidx Dios, guial ragbeedi con laan gapidi guialnaban tiblayaa con Dios. Abi' majsi loj xtiidx gajcaman ruza't naj, 40 per ad rëntidi chililadxidi naj din gapidi guialnaban guin. 41 ’Naj ad raguiltan guilies ree bejn da valoran. 42 Abi' ragbeechaawan guial ad walit rëndi Dios. 43 Naj zial por da Dadan abi' ad ridxga'tidi naj. Per bal stijb bejn gui't por laagajcaman, laaman guidxga'di. 44 ¿Xoza chililadxidi naj? Awa mazri naguiejn rüjndi guilies ree bejn xvaloridi luar yaya'ndi zagdxe loj bén na̱j tijbzi Dios. 45 Ad bal naladxidi naj gabec xguialquiadi loj Dios, din bén cwe'c xguialquiadi na̱j Moisejs, bén rbëzidi güün lëjt yudar. 46 Bal bililadxidi ni rëb Moisejs, në naj zaliladxidi, din Moisejs bacaa loj xtiidx Dios lod ruza't naj. 47 Per bal id rliladxidi ni bacaaman, ¿xoza chililadxidi ni rnin lëjt?

6

1 Chi gudëd gojc zian, dxel zë Jesús stiblad ro'nijsdoo riga' niz Galilea, nijsdoo la gajc Tiberias. 2 Bénguixiuj binal laaman, guial ruguiaa reeman milagr ree ni rüjnman rayüjnman bénragxuu ree. 3 Dxel wë'paman tijb ruguia' abi' gurenë ree xbejnman. 4 Dxejzii ree ma zidyob pascw, xlanij ree bén Israel. 5 Chi gules loj Jesús, abi' baguiaaman zëëd ree bénguixiuj lod za'man, dxel rëbaman loj Felip: ―¿Ban yusii ree ni gaw gra ree bén guin? 6 Per rëbzaman zian din guidoon xhie guiëb Felip, din Jesús mal ragbeeman xhie güünman. 7 Dxel badxi' Felipan rëbaman: ―Ni'qui ni rüjn bejn gan loj xhujn bëëw ad zadaant yo' guiadxtil din gaw tijbgaj reeman majsi tiblia'dogajzan. 8 Dxel gunee stijb xbejn Jesús, bén la Andrejs bijch Simón Bëd, rëbaman: 9 ―Laa tijb xindo ca' gaay guiadxtil con zatio'p bëjl za' guie. Per, ¿të'czi taan ni guin par gra bén guin? 10 Dxel rëb Jesús: ―Gol güjdx loj gra reeman din cwe reeman. Abi' guial yu' da't guixya' yagaj, dxel gurej reeman. Na̱j reeman cost gaay mil xinguiaaw. 11 Dxel cwa' Jesús guiadxtil guin ree. Chi gulox badëëman quixtëë loj Dios, badëëman laa reen loj ree xbejnman persi gudi's reeman laa reen loj gra ree bén zojb yagaj. Ziangajc beenman con ree bëjl guin, badëëman laa reen zi'ctzi guyën reeman. 12 Chi ma bixienladx reeman, dxel rëbaman loj ree xbejnman: ―Gol bato'p gra ree ni laay baya'n, chitëë xhie guizëëb. 13 Zianz bato'p reeman laa reen, abi' bacha reeman chiptio'p dxüm nilaay baya'n ree loj gaay guiadxtil guin. 14 Chi baguiaa ree bejn milagr naroob ni been Jesús, rëb reeman: ―Walican bén guin na̱j bén rudëë xtiidx Dios loj ree bejn, bén na̱j gui't loj guidxliuj. 15 Per gogbee Jesús guial rën reeman chinë naguiejn reeman laaman din güün reeman laaman rey, dxel bazaman yagaj, wë'paman mazri ladya guijc guia' guin, lod su xtijbaman. 16 Chi ma cabej guiaal, biguiajt ree xbejn Jesús ro'nijsdoo, 17 guyu reeman loj tijb barcw, abi' cadëd reeman loj nijs guin din guidxin reeman Capernaum. Ma bicajy, guiáad Jesús gadaman yadxin. 18 Dxel guzuloj cabi' bidoxh abi' wajs xtüjp nijs guin. 19 Chi ma gojc zi'c gaay o xho'p kilometro zë reeman, baguiaa reeman caza Jesús lojnijs guin cabigaman lod zë barcw guin, dád bidxeb reeman. 20 Per rëbaman loj reeman: ―¡Najn, ad rdxebidi! 21 Dxel guyën reeman niuman loj barcw guin, per hor guin gajc bidxin reeman lod zë reeman. 22 Chi bareguiaal, bén riga' ree stiblad ro' nijs guin, ragbee reeman guial tijbzi barcw guzu yagaj, abi' gogbee reeman, lojn zë ree xbejn Jesús per ad nët laaman. 23 Loj hor zii bidxin ree barcw ren za guiedx Tiberias, gajxh lod gudaw reeman guiadxtil chi gulox badëëd Jesús quixtëë loj Dios. 24 Chi baguiaa reeman achutri Jesús za' yagaj ni'qui ree xbejnman, dxel wë'p reeman loj ree barcw guin, zë reeman Capernaum zigdiil reeman laaman. 25 Chi bidxin reeman Capernaum, badxejl reeman Jesús, abi' gunabdiidx reeman lojman, rëb reeman: ―Mextr, ¿goc bi'til guie? 26 Badxi' Jesúsan rëbaman: ―Ragbeechaawan, raguiilidi naj guial gudawidi xt bigdxinladxidi, ad guial baguiaatidi milagr ree ni rünan. 27 Ad chu'di xgab guialraw rara, gol guyu xgab guialraw runee guialnaban tiblayaa con Dios. Din laan na̱j ni runee Bén guxhaal Dios loj guidxliuj guial ma bacaabee Dios laaman. 28 Dxel gunabdiidx reeman lojman rëb reeman: ―¿Xhie rayal yaguieenan din chile' yaguieenan ni rën Dios? 29 Badxi' Jesús laan rëbaman: ―Ni rën Dios güündi na̱j guial chililadxidi bén guxhaalaman loj guidxliuj. 30 Dxel rëb reeman lojman: ―¿Xhie gulüül dunujn din yaliduladxan lüj? ¿Xhietëë ree milagr rüjnl? 31 Dux béngulal ree gudaw reeman mana chi guzu reeman niz loj yujbidx, zi'c rëb loj xtiidx Dios: “Badëëman guiadxtil biajb xanyabaa loj reeman gudaw reeman.” 32 Badxi' Jesús laan rëbaman: ―Naj rni lojdi: Ad Moisejst badëëd guiadxtil guin, da Dadan na̱j bén runee quijb guiadxtil za xanyabaa. 33 Guiadxtil runee Dios, laan bi't diizd xanyabaa abi' runeen guialnaban loj bénguidxliuj. 34 Abi' rëb reeman lojman: ―Dad, banee guiadxtil guin du lojn zianczi. 35 Rëb Jesús loj reeman: ―Naj na̱j guiadxtil runee guialnaban guin. Bén gui't lon, ad yu't dxej guiliaanman, ziangajc bén chililadx naj, ad yu't dxej che'caman nijs. 36 Per zi'c rnin lojdi, majsi ma baguiaadi naj, ad rliladxtidi naj. 37 Gra ree bén ma banee da Dadan lon, gui't reeman lon, abi' bén gui't lon, ad zasiejctan laaman. 38 Din naj zial diizd xanyabaa, zidgaguienan zi'c rën da Dadan bén guxhaal naj, ad par güntan zi'c rënan. 39 Da Dadan bén guxhaal naj, ni rënman na̱j guial gra ree bén baneeman lon ni'qui tijb reeman ad zunijttan, rënman yasbanan laa reeman chi nit guidxliuj. 40 Din rënman guial gra ree bén yayagbee Xi'nman chililadx tëë reeman laaman, gap reeman guialnaban tiblayaa con laaman, guiáad naj yasban laa reeman chi nit guidxliuj. 41 Dxel guzuloj ree bén Israel caneeguijdx reeman Jesús, guial rëbaman: “Naj na̱j guiadxtil ni biguiajt diizd xanyabaa.” 42 Abi' rëb reeman: ―¿Nid laaxan na̱j Jesús ya, xi'n Xiëb? Dunuj ree naguieenbee xdadix con xniaax. Yan, ¿chexc zeel nax xanyabaa biguiajtix? 43 Dxel rëb Jesús: ―Gol bacwëëz rnieeguijdxidi naj loj lasa'di. 44 Dios na̱j bén guxhaal naj. Achut zile' gui't lon bal id zëëdaman por da Dadan, abi' naj yasban laaman chi nit guidxliuj. 45 Loj ree libr ni bacaa ree bén badëë xtiidx Dios loj ree bejn, rëb: “Dios gulüü gra ree bejn.” Zeel gra ree bén rucaagdiajg xtiidxaman, rusiid tëë reeman ni rulüüman laa reeman, laa reeman zëëd lon. 46 ’Achutczi waguiaa da Dadan Dios, tijbzi bén guxhaalaman loj guidxliuj ma baguiaa laaman. 47 Diidxliczi rnin, bén rliladx naj rajpaman guialnaban tiblayaa con Dios. 48 Naj na̱j guiadxtil ni runee guialnaban. 49 Xbéngulalidi gudaw mana loj yujbidx, per ni'czi zian güjt gajc reeman. 50 Per naj canin lojdi xcwent guiadxtil za xanyabaa, bén gaw laan gapaman guialnaban tiblayaa con Dios. 51 Naj na̱j guiadxtil naban ni biyajb diizd xanyabaa. Bén gaw guiadxtil guie zajpaman guialnaban tiblayaa con Dios. Guiadxtil ni rudëdan, laan na̱j quijb da cuerpan, gudëdanan din gap ree bénguidxliuj guialnaban. 52 Dxel guzuloj ree bén Israel guin cadildiidx reeman, rëb reeman: ―¿Xhienaag gunee xin guin xcuerpix yadaaw ree? 53 Abi' rëb Jesús loj reeman: ―Naj rni lëjt, bal id zajwidi xcuerp Bén guxhaal Dios, bal id zë' tëëdi xrejnman, ad zajptidi guialnaban. 54 Per bén gaw da cuerpan guië' tëëman da rejnan, zajpaman guialnaban tiblayaa con Dios, abi' naj yasban laaman chi nit guidxliuj. 55 Din da cuerpan na̱j quijb guialraw, guiáad da rejnan na̱j quijb ni guië' bejn. 56 Abi' bén raw da cuerpan rë' tëëman da rejnan, laaman nabannë naj, guiáad naj nabannë' laaman. 57 Da Dadan bén guxhaal naj, rajpaman guialnaban, abi' naj nabanan por laaman. Ziangajc bén gaw da cuerpan, zajpaman guialnaban tiblayaa con Dios por naj. 58 Naj cani xcwent guiadxtil ni biguiajt xanyabaa. Abi' guiadxtil guie ad najtan zi'c na̱j mana ni gudaw xbéngulalidi, din laa reeman majsi gudaw reeman mana guin, per güjt gajc reeman. Guiáad bén gaw guiadxtil guie zajpaman guialnaban tiblayaa con Dios. 59 Zian balüü Jesús bejn ree lën yadoo Capernaum. 60 Chi gulox bacaagdiajg reeman ni balüü Jesús laa reeman, zien ree bén zinal laaman rëb: ―Nawëëg da't na̱j yayignia' ree ni naman. ¿Chu zajc guidxga' laaman? 61 Chi gogbee Jesús ni canee reeman, gunabdiidxaman loj reeman, rëbaman: ―¿Rüjnnaa ni rnin lëjt ya? 62 ¿Xhieza güündi bal guguiaadi Bén guxhaal Dios yayë'paman lod guzuman gocli? 63 Tijbzi por xSprijt Dios rajp bejn guialnaban tiblayaa, bejn ad zile't güün laazaman xhienin. Abi' naj por xSprijt Dios zëëd ree diidx ni gunen lojdi, por ree diidx guin rajp bejn guialnaban. 64 Per lëjt yu'di ad waliladxt. Rëb Jesús zian guial ragbeechaawaman diizd yaloj chu ree ad rliladxt laaman chu tëë yayü laaman. 65 Rëb tëëman loj reeman: ―Zeel ma rnin lojdi guial achut zile' gui't lon bal id zëëdaman por da Dadan Dios. 66 Diizd nadxel, zien ree bén zinal Jesús guro'nladx laaman, abi' ad guzanëtri reeman laaman. 67 Dxel rëb Jesús loj guidxiptio'p ree xbejnman: ―¿Në lëjt rën yaguiaj ya? 68 Per badxi' Simón Bëd laan, rëbaman: ―Dad, ¿chu loj yo'n? Awa xtiidxil zidnë guialnaban tiblayaa con Dios. 69 Dunujn ma baliduladx rayagbee tëën guial lüj na̱j Cristo, Xi'n Dios naban. 70 Dxel rëb Jesús loj reeman: ―¿Nid naj gule guidxiptio'pidi ya? Abi' yan tijb gajqui lëjt na̱j zi'c xindxab. 71 Rëb Jesús zian por Judas Iscariote, xi'n Simón, din Judas guin na̱j bén bayü laaman, majsi tijb gajc xbejnman najman.

7

1 Chi gudëd gojc zian, wej Jesús loj ree guiedx riga' niz Galilea. Ad guyëntaman niejman niz Judea, guial cayguiil ree bén Judea guin laaman din gugüjt reeman laaman. 2 Per guial ma zidyob lanij ni rüjn ree bén Israel, chi rbej reeman lën ranch, 3 rëb ree bijch Jesús lojman: ―Brii, wej niz Judea, din në ree xbejnl bén riga' ree niz ni guguiaa milagr rüjnl. 4 Din chi chu rën gagbee bejn ni rüjnman, ad rayalt güünman laan ralan. Yan zi'c rüjnl milagr ree, beenan loj gra ree bejn. 5 Gunee ree bijch Jesús zian, guial ni'qui laa reeman ad rliladxt laaman. 6 Dxel rëb Jesús loj reeman: ―Ad wadxint da horan, per par lëjt xhietëëz horan na̱j zagdxe. 7 Ad zajct guidxe'ch bénguidxliuj lëjt, sa'n naj rdxe'ch reeman naj guial rën loj reeman ad laat na̱j ni rüjn reeman. 8 Gol wej lanij guin, sa'n naj ad zazaagajtan, din ad wadxint hor ni gazaan. 9 Chi gulox rëbaman loj reeman zian, baya'nman Galilea. 10 Chi ma zë ree bijch Jesús, dxel nëman zë lanij guin, per ralanzi zëman chitëë chu gagbee. 11 Per yu' ree bén Israel raguiil laaman loj lanij guin, rëb reeman: ―¿Con bén guin ya'n? 12 Loj gra ree benzien we lanij guin, zienloj ni rniee reeman Jesús. Yu' reeman rëb: “Benza'can”, yu'za reeman rëb: “Ad benza'ctan, rusquieeman bejn ree.” 13 Per achutczi ruza't laaman loj gra bejn, guial rdxeb reeman guxtis Israel ree. 14 Chi gurol xuman ni cayajc lanij guin, guyu Jesús lën yadooro' Jerusalén, abi' guzuloj culüüman bejn ree. 15 Guiáad ree bén Israel badxaloj reeman, rëb reeman: ―¿Chexc ya'n contzi gra ragbeex, awa ni'quid basiidtix? 16 Dxel rëb Jesús loj reeman: ―Ad guictan carii ni culün lëjt, zëëdan por Dios, bén guxhaal naj. Bal chu rën güün zi'c rënman, zignia'man bal ni carii guicanan culün lëjt o zëëdan por Dios ya. 18 Bén rulüü ganaxzi ni rbëëguijcaman, rüjnman laan din guilies ree bejn xvaloraman. Per bén rüjn mazri din guilies bejn xvalor Dios, bén guxhaal laaman, laaman rniee ni diidxli, ad rusquieetaman bejn. 19 ’Yan, majsi basa'nnë Moisejs lëjt ley, per ni'qui tijbidi ad rüjnt zi'c rëb ley guin. ¿Chexquiza zeel rëndi gugüjtidi naj? 20 Badxi' ree bén guinan, rëb reeman: ―Xindxab yu' luxdool. ¿Chuczi rën gugüjt lüj? 21 Abi' rëb Jesús loj reeman: ―Por tijbzi milagr ni benan radxalojdi. 22 Abi' lëjt gunabee Moisejs lëjt guial gra ree xinguiaaw chu' sen, (majsi ad por Moisejst ru bejn sen guin, mal rüjn ree dux bengol gulal ree zian), abi' lëjt rgu'di bejn ree sen, majsi dxej raziiladx bejn. 23 Yan, bal chitëë gusaglojdi ley ni basa'nnë Moisejs lëjt, rgu'di sen bejn ree majsi dxej raziiladx bejn. ¿Chexquiza zeel ralendi guial bayünan tijb bénragxuu dxej raziiladx bejn? 24 Ad rüjndi xgabmal por ni ruguiaazidi rüjn bejn, yaloj xgaj gol gogbee zagdxe xhie cayüjnman. 25 Yu' ree bén Jerusalén guzuloj rniabdiidx loj lasa' reeman, rëb reeman: ―¿Nid bén guinan cayguiil reeman ya din gugüjt reeman laaman? 26 Abi' yan laaman canee niz loj ree bejn, abi' ni'qui chut xhie rëb lojman. ¿Ni ma bililadx ree guxtis ya'n guial laaman na̱j Cristo? 27 Per dunuj ree rayagbeechaaw ban zaman, guiáad chi gui't Cristo, achut gagbee ban saman. 28 Chi biguiejn Jesús zian, la'tgaj culüüman bejn ree lën yadooro' Jerusalén, dxel guneeman rejs rëbaman: ―¡Lëjt rëb nünbeedi naj abi' ragbeedi ban guzaan! Per ad zialtan por naj gajc, zialan por quijb bén rniabee bén ad nünbeetidi. 29 Per naj nünbee laaman guial zialan diizd lod za'man, laa tëëman guxhaal naj. 30 Chi biguiejn reeman zian, guyën reeman niniaaz reeman laaman, per achut gunaaz laaman, guial gad hor gal guiniaazaman. 31 Loj ree bénguixiuj za' yagaj zien reeman bililadx laaman, abi' rëb reeman: ―Chi gui't Cristo, ¿wen mazri zien ree milagr güünman guial loj bén guin ya? 32 Biguiejn ree bénfarisew ni rniee ree bejn Jesús. Abi' laa reeman con ree bixhioz rniabee, guxhaal reeman bén rajp ree ro' yadooro' Jerusalén din guiniaaz reeman Jesús. 33 Dxel rëb Jesús: ―Ad xchejtri gazunë'n lëjt, dxel yaya'n lod za' bén guxhaal naj. 34 Yaguiilidi naj, per ad zadxejltidi naj, din ad zile't gui'tidi lod gazun. 35 Abi' ree bén Israel guin guzuloj rniabdiidx loj lasa' reeman, rëb reeman: ―¿Banczi zajc che bén guin din ad zadxejltaman? ¿Ni zejman lod zojb ree bén Israel loj ree benzit ya, chiglüüman laa reeman në ree bén ad najt bén Israel? 36 ¿Xhie rën guiëb guial naman: “Yaguiilidi naj per ad zadxejltan, din ad zile't gui'tidi lod gazun”? 37 Dxej rliox lanij guin na̱j mazri dxej zojbloj, dxejzii guzuli Jesús guneeman rejs, rëbaman: ―Bal chu lëjt re'c nijs, gol guda lon din guië'dan. 38 Din bén rliladx naj zi'c ca loj xtiidx Dios, lën luxdooman gach nijs runee guialnaban. 39 Chi gunee Jesús zian, rën guiëb xtiidxaman guial gra ree bén chililadx laaman zabajnnë reeman xSprijt Dios. Din nadxel ad wayi'tt xSprijt Dios guial ad waguiajt Jesús lod canabeeman. 40 Yu' ree bén no'ch loj ree benzien guin, chi bacaagdiajg reeman ni gunee Jesús, rëb reeman: ―Walican, bén guin na̱j gui't guidgadëë xtiidx Dios loj ree bejn. 41 Yu'za reeman rëb: ―Bén guin na̱j bén bacaabee Dios. Per yu' reeman rëb: ―Ad laataman na̱j Cristo, din ad niz Galileat na̱j griiman. 42 Loj xtiidx Dios ca guial loj xdiaa rey Davi grii Cristo, abi' Belén galaman ladx gajc rey Davi. 43 Zian gojc dxel gula' lasa' reeman por Jesús. 44 Zien reeman guyën niniaaz laaman, per achut bayax niniaaz laaman. 45 Chi bayejc ree bén rajp ro' yadoo guin lod za' ree bénfarisew guin con ree bixhioz rniabee guin. Rëb reeman loj reeman: ―¿Chexc zeel ad bidnëtidi laax? 46 Dxel rëb ree bén rajp ro' yadoo guin: ―¡Ad goct wayu bén guiniee zi'c rnieex! 47 Abi' rëb ree bénfarisew guin: ―¿Në lëjt ma cwëjb basquieex lëjt ya? 48 ¿Wen yu' ree dux guxtis ree, o bénfarisew ree ma bililadx laax ya? 49 ¿Nid ragbeedi ya guial zien ree bén guin banijt loj Dios guial ad nünbeet reeman ley? 50 Per bénfarisew la Nicodemo bén bignaj Jesús tijb guxhin, rëbaman loj reeman: 51 ―Loj dux ley ree ca guial ad zile't yaguie'ch ree xhie casti rayal tijb bejn, chi gad dunuj ree yacaagdiajg xtiidxaman, din chile' yayagbee ree xhie beenman. 52 Badxi' reeman laan rëb reeman: ―¿Wen në lüj za'në ree bén Galilea ya? Basiid zagdxe loj xtiidx Dios din gagbeel ad goct warii bén rudëë xtiidx Dios loj ree bejn niz Galilea. 53 Dxel bare'ch reeman zia lidx lidx reeman.

8

1 Per Jesús zëman ruguia' Olivos. 2 Chi bareguiaal, rsil badxinman lën yadooro' Jerusalén stijb. Zien ree bejn bido'p lod za'man, dxel gurejman guzuloj culüüman laa reeman. 3 Abi' mextr rulüü ree ley con ree bénfarisew bidxinnë tijb béngunaa banaaznë tijb xinguiaaw, dxel bazuj reeman laaman galay ree bén guin, 4 zianz rëb reeman loj Jesús: ―Mextr, banaaz béngunaa guie loj mer hor ni yu'nëman xinguiaaw ren. 5 Abi' loj ley basa'nnë Moisejs dunuj ree ca guial lasa' béngunaa guie rayal guiëtaman con guiaj. ¿Laadx lüj xhie nal? 6 Gunabdiidx reeman zian din guidoon xhie guiëbaman din gac gutedia' reeman laaman. Per con basajb lojman abi' guzulojman cucaaman luyuj con xbacwënman. 7 Per guial laa reeman canabdiidxzi canabdiidx reeman lojman, abi' babejliman, rëbaman loj reeman: ―Chutëëz bén ad wayüjnt dol, yaloj laaman gucaaguiaj béngunaa guie. 8 Dxel basajb lojman stijb, basnuu bacaaman luyuj guin. 9 Chi biguiejn reeman ni guneeman, guzuloj cayza tijbgaj reeman, diizd mazri bengol xt bara reeman baza. Tijbzi béngunaa guin baya'n con Jesús loj ree bén riga' yagaj. 10 Dxel babejliman, rëbaman loj béngunaa guin: ―¿Con ree bén bidnë lüj? ¿Ni'qui tijb reeman achut xhie been lüj ya? 11 Dxel rëb béngunaa guin: ―Dad, ni'qui tijbaman. Abi' rëb Jesús: ―Ni'qui naj achet günan lüj. Baguiaj yan, ad güünril dol. 12 Dxel gunee Jesús stijb, rëbaman loj ree bén riga' yagaj: ―Naj na̱j bajl rusni bénguidxliuj. Abi' bén guzoob da diidxan, zani xquiarguiejnman xhienaag gapaman guialnaban tiblayaa con Dios, ad yu' tëët dxej guicajy xquiarguiejnman. 13 Abi' ree bénfarisew rëb reeman lojman: ―Lüj gajc ruza't lüj, abi' achet lasajc xtiidxil. 14 Dxel rëb Jesús loj reeman: ―Lasajc da diidxan, majsi naj gajc cane por naj, din naj ragbee ban zialan ban tëë gan, sa'n lëjt ad ragbeetidi ban zialan ban tëë gan. 15 Lëjt rnieedi bejn zi'ctizi na̱j xixgabidi, sa'n naj achut ruzatan. 16 Abi' bal guzatan bejn, ganen diidxli, din ad zanetan zi'c na̱j da xgaban, në da Dadan bén guxhaal naj ragbee guial diidxli na̱j ni ganen. 17 Abi' loj xleydi ca guial chi yu' tio'p bén rniee tiblojzi, diidxliqui na̱j ni rniee reeman. 18 Yan, naj gajc na̱j tijb bén rniee por naj, abi' da Dadan bén guxhaal naj, na̱j stijb bén rniee por naj. 19 Gunabdiidx reeman lojman rëb reeman: ―¿Con xdadil? Badxi'man laan rëbaman: ―Lëjt ad nünbeetidi naj, ad nünbee tëëtidi da Dadan, din bal nüjnbeedi naj, ziangajc nüjnbeedi da Dadan. 20 Zian gunee Jesús la'tgaj rulüüman bejn ree lën yadooro' Jerusalén, niz lod za' ree ni rgu' reeman gon. Per achut gunaaz laaman, din ad wadxint hor guiniaazaman. 21 Gunee Jesús stijb, rëbaman: ―Chi ma gan, zaguiilidi naj, per zëjtnë xtolidi, din lod gan ad zile't gui'tidi. 22 Dxel rëb ree bén Israel guin: ―¿Wen ni laagajcaman gugüjt laaman ya, zeel naman guial ad zajct yo' ree lod cheman? 23 Abi' rëb Jesús loj reeman: ―Lëjt na̱j bén ladguiajt guie, sa'n naj ladya ni zialan. Lëjt na̱j bénguidxliuj, sa'n naj ad bénguidxliujt na̱j. 24 Zeel rnin, zëjtnë xtolidi. Din bal id zaliladxidi guial naj na̱j bén najn, zëjtnë xtolidi. 25 Dxel gunabdiidx reeman lojman, rëb reeman: ―¿Chuza lüj? Badxi'man laan rëbaman: ―Ma rnin lojdi diizd yaloj. 26 Zien ni ra'pan gulün lëjt ni ganenë' tëën lëjt. Per naj, ni canen loj bénguidxliuj na̱j ni rucagdiagan rniee bén guxhaal naj, abi' ni rnieeman na̱j diidxli. 27 Per laa reeman ad gogbeet guial Diosan ruza'taman. 28 Zeel rëbaman loj reeman: ―Chi ma beendi zi'ctizi rëndi con Bén guxhaal Dios, dxel gagbeedi najcan, gagbee tëëdi guial achetczi rünan por da xgabzan, naj rnie ni ma balüü da Dadan naj. 29 Din laaman guxhaal naj, laaman za' con naj, abi' ad yu't dxej cwëëladxaman naj, guial zianczi rünan ni rayuladxaman. 30 Chi rëb Jesús zian, zien ree bejn bililadx laaman. 31 Rëb Jesús loj ree bén Israel bililadx laaman: ―Bal gusnuu guzoobidi da diidxan, waliqui najdi da bejnan, 32 abi' züjnbeedi conin na̱j diidxli, abi' por diidxli guin zalaadi. 33 Badxi' reeman laan rëb reeman: ―Dunujn zio'p loj xdiaa Abraham, abi' ad yu't dxej wayajcan zi'c bén nado'. ¿Chexquiza zeel nal du lojn, guial por diidxli zalaan? 34 Dxel rëbaman loj reeman: ―Diidxli rnin lojdi, guial graczi bén rüjn ganaxzi dol, laa reeman na̱j zi'c bén nado' loj dol. 35 Abi' tijb bén nado' loj bejn, ad zile't guiëbaman xfamilaman na̱j xpatronman, sa'n xi'n patron guin zile' guiëbix xfamilixan. 36 Zeel bal Xi'nman guslaa lëjt, ad najtridi zi'c bén nado'. 37 Ma qui ragbeen guial loj xdiaa Abraham zëëdidi, per lëjt rën gugüjt naj guial ad rayuladxtidi da diidxan. 38 Naj rni ni ma balüü da Dadan naj, sa'n lëjt rüjndi zi'c na xDadidi güündi. 39 Badxi' reeman rëb reeman: ―Dux Dadan na̱j Abraham. Dxel rëb Jesús loj reeman: ―Bal niajquidi xi'n Abraham, züjndi zi'c beenman. 40 Per yan, majsi ma rnin lëjt diidxli zi'c balüü Dios naj, lëjt rëndi gugüjtidi naj. ¡Abi' Abraham ad yu't dxej nüjnman zian! 41 Sa'n lëjt rüjndi zi'cgajc rüjn xDadidi. Abi' rëb reeman loj Jesús: ―Dunujn achut mazri xi'n nayajcan. Tijbzi Dios na̱j dux Dadan. 42 Dxel rëb Jesús loj reeman: ―Bal walidi Dios na̱j xDadidi, guiëndi naj, din por laaman zialan loj guidxliuj. Ad zialtan por naj gajc, zialan por Dios bén guxhaal naj. 43 Abi' ad rignia'tidi ni rnin, guial ad rëntidi gucaagdiajguidi da diidxan. 44 XDadidi na̱j xindxab, abi' rüjndi zi'c rënx güündi, din diizd yaloj ruladx xindxab guin gugüjtix bejn. Ad yu't dxej chinalix ni na̱j diidxli, din ad rnieetix diidxli. Chi rnieex diidx rusquiee, achet naladxix, din laax na̱j xin rusquiee na̱j tëëx xdad guialrusquiee. 45 Per guial naj rni lëjt ganax diidxli, ad rliladxtidi naj. 46 ¿Chu lëjt zajc na guial yu' xhie dol ma benan? Abi' bal diidxli na̱j ni canen, ¿chexquiza zeel ad rliladxtidi naj? 47 Bén na̱j xbejn Dios rucaagdiajgaman xtiidxaman, per lëjt ad xbejntaman najdi, zeel ad rucaagdiajgtidi xtiidxaman. 48 Dxel rëb ree bén Israel guin loj Jesús: ―Waliqui ni ranan guial xindxab yu' luxdool na̱j tëël bén Samaria. 49 Badxi'man laan rëbaman: ―Achut xindxab yu' luxdon, naj cuzob xtiidx da Dadan, per lëjt ganax diidxguijdx rnieedi naj. 50 Naj ad raguiltan guilies ree bejn da valoran, majsi yu' bén rën güün bejn zian, abi' laaman rüjn xguialguxtis. 51 Diidxli rnin lëjt, bén guzoob da diidxan, ad yu't dxej guiëtaman. 52 Dxel rëb ree bén Israel guin lojman: ―Yanri ma rayagbeechaawan guial xindxabqui yu' luxdool. Abraham në gra ree bén badëë xtiidx Dios loj ree bejn, güjt reeman, guiáad lüj nal: “Bén guzoob da diidxan, ad yu't dxej guiëtaman.” 53 ¿Wen mazri lasajquil ya guial loj dux béngulal ree Abraham? Güjtaman, güjt tëë ree bén badëë xtiidx Dios loj ree bejn. ¿Laadx lüj chu naladxil najl? 54 Abi' rëb Jesús loj reeman: ―Bal naj gajc gales da valoran, achet lasajc ni ganen por naj. Per bén rlies da valoran na̱j da Dadan, bén nagajquidi na̱j xDiosidi. 55 Lëjt ad nünbeetidi laaman, sa'n naj nünbeen laaman. Abi' bal ganin ad nünbeetan laaman, nëgajc naj ma na̱j bén rusquiee zi'cgajc lëjt. Per nünbeen laaman abi' ruzoban xtiidxaman. 56 Xbéngulalidi Abraham, babaaman guial guguiaaman dxej ni guialan. Abi' chi baguiaaman dxej guin, mazri babaaman. 57 Dxel rëb ree bén Israel guin lojman: ―Ni'qui gadil chu' tü'pchii ijz, ¿guiáad lüj ya nal baguiaal Abraham? 58 Abi' gunee Jesús rëbaman: ―Diidxli rnin lojdi, mal nabanan chi gad Abraham chu'. 59 Dxel gules reeman guiaj din nucaa reeman laan Jesús. Per laa guzëëb gajcaman galay ree bejn, abi' gudëdaman galay reeman bariiman lën yadoo guin, laa zia gajcaman.

9

1 Chi cadëd Jesús tiblajt, baguiaaman tijb xin ad ranit loj diizd chi golix. 2 Dxel gunabdiidx ree xbejnman lojman, rëb reeman: ―Mextr, ¿chexc zeel ad ranit loj bén guin diizd chi golaman? ¿Por xtol ree xDadaman ya, o por xtol gajcaman? 3 Badxi' Jesúsan, rëbaman: ―Najman zian ad por xtoltaman ad por xtol tëët ree xDadaman. Gojlaman zian din chi yayajcaman, guguiaa ree bejn xguialrniabee naroob Dios. 4 Yan, la'tgaj yu' tiamp, rüjn naguiejn yaguieen ree ni na bén guxhaal naj, din ma yayaaloj tiamp ni achetri zajc gac. 5 Abi' la'tgaj za'n loj guidxliuj guie, naj na̱j bajl rusni bénguidxliuj. 6 Chi gulox guneeman zian, guxhie' xhiejnman luyuj, abi' beennëman laan bajn, persi gudëëbaman laan guiaaloj xin guin. 7 Abi' rëbaman lojx: ―Bitiib lojl ro' tanc Siloé ―Siloé rën guiëb ni guxhaalaman. Dxel bitiib lojx, abi' chi bayejquix, ma rani lojx. 8 Dxel bén zojb ree gajxh lod zojbix con ree bén ragbee guial laax rniab carda, rëb reeman: ―¿Nid xin guinan rbej rniab carda ya? 9 Yu' reeman rëb: ―Laaquixan. Yu'za reeman rëb: ―Ad laatixan, rguienzix zian. Per laax rëb: ―Najcan. 10 Dxel gunabdiidx reeman lojx, rëb reeman: ―¿Xhieza naag gojc bani lojl? 11 Badxi'xan, rëbix: ―Bén la Jesús been bajn, gudëëbaman guiaalon abi' naman: “Wej bitiib lojl ro' tanc Siloé.” Dxel wan, chi gulox gudiib lon, max bani lon. 12 Abi' rëb reeman lojx: ―¿Conzaman yan? Zeel rëbix: ―Ad ragbeetan. 13 Loj hor zii binë reeman xin bayajc guiaaloj guin loj ree bénfarisew, 14 din dxej been Jesús bajn persi bayüjnman guiaaloj xin guin, dxej guin raziiladx ree bejn. 15 Dxel gunabdiidx ree bénfarisew guin lojx xhienaag guzuloj rani lojx. Abi' rëbix loj reeman: ―Jesús gudëëb bajn guiaalon, dxel bitiib lon, yan ma ranin. 16 Yu' ree bénfarisew guin rëb: ―Bén bayüjn guiaalojl ad xbejnt Diosan, din ad rajptaman respejt dxej raziiladx bejn. Per yu'za reeman rëb: ―¿Xhienaag güünman milagr guie ree, bal najman béndol? Garent garen rëb reeman. 17 Abi' gunabdiidx reeman loj xin bayajc guin zatijb, rëb reeman: ―¿Laadx lüj xhie nal chu na̱j bén bayüjn guiaalojl? Badxi'xan rëbix: ―Naj rni guial laaman na̱j bén rudëë xtiidx Dios loj ree bejn. 18 Per bén Israel guin ree ad rliladxt reeman, din ad banit lojx abi' yan ma ranin, dxel gurejdx reeman xdadix con xniaax, 19 abi' gunabdiidx reeman loj reeman, rëb reeman: ―¿Xin guien na̱j xi'ndi ya, xin rëbidi ad ranit loj diizd gojlix? Yan, ¿xhienaag gojc zeel ma ruguiaax? 20 Badxi' reeman laan rëb reeman: ―Dunujn rayagbee guial du xi'nanan, rayagbee tëën guial diizd chi golix ad ranit lojx. 21 Per ad rayagbeetan xhienaag gojc zeel rani lojx, ad rayagbee tëëtan chu bayüjn guiaalojx. Gol gunabdiidx lojx, ma najx xingol, ma zajc na laagajquix lojdi xhienaag gojc. 22 Rëb ree xdadix zian guial rdxeb reeman xguxtis ree bén Israel, din ma baya'n reeman diidx, chutëëz bén guiëb guial Jesús na̱j Cristo, ad zatiëjbtri reeman chu'man lën yadoo. 23 Zianan zeel rëb reeman: “Gol gunabdiidx lojx, ma najx xingol.” 24 Dxel gurejdx reeman laax zatijb, abi' rëb reeman: ―Laa Dios ruguiaa, guna diidxli, din dunujn rayagbee guial béndol na̱j bén bayüjn lüj. 25 Badxi'xan rëbix: ―Ad ragbeetan bal béndolan o ad béndoltan ya. Tijbzi ni ragbeen na̱j guial ad banit lon, abi' yan ma ruguian. 26 Dxel gunabdiidx reeman lojx stijb, rëb reeman: ―¿Xhienaag beennëman lüj? ¿Xhienaag beenman persi rani lojl? 27 Badxi'xan rëbix: ―Ma rnin lojdi, abi' lëjt ad rliladxtidi naj. ¿Chexc zeel rëndi ganin zatijb xhienaag beenman? ¿Wen në lëjt rën gac xbejnman ya? 28 Dxel gudilë reeman laax rëb reeman: ―Lüj bal najl xbejnman, sa'n dunujn xbejn Moisejs nayajcan. 29 Din dunujn rayagbee Dios gunee Moisejs, per bén guin ni'quid rayagbeetan ban zaman. 30 Badxi'xan rëbix: ―¡Xhiechalnin zeel ad ragbeetidi ban zaman! Guiáad naj por laaman ma rani lon. 31 Dunuj ree rayagbeechaaw guial ad ridxga't Dios xtiidx ree béndol, ridxga'man xtiidx ree bén ruzoob xtiidxaman rüjn tëë reeman zi'c rënman. 32 Ad goct wacaagdiajg ree guial chu' bén yayüjn loj bén ad ranit loj diizd gojlaman. 33 Yan, bal id por Dios zëëd bén guin, achetczi nile' nüjnman. 34 Dxel rëb reeman lojx: ―Lüj gojl con dol, ¿wed lüj gulüü dunujn? Abi' babëë reeman laax yagaj. 35 Gogbee Jesús ni guzac xin bayüjnman, dxel chi badxaagaman laax, rëbaman lojx: ―¿Rliladxil bén guxhaal Dios loj guidxliuj ya? 36 Badxi'xan rëbix: ―Dad, guna chunin, din chililadxan laaman. 37 Dxel rëbaman lojx: ―Ma baguiaal laaman, laaman na̱j bén caneenël. 38 Abi' bazuxib xin guin lojman, rëbix: ―Rliladxan lüj, Dad. 39 Zianz rëb Jesús: ―Bialan loj guidxliuj guie din günan guialguxtis, din por naj yani loj ree bén ad ranit loj, guiáad ree bén rani loj, ad zanit loj reeman. 40 Yu' ree bénfarisew za'në laaman. Chi biguiejn reeman rëbaman zian, rëb reeman: ―¿Wen në dunujn ad ranit duloj ya? 41 Dxel rëb Jesús loj reeman: ―Bal id rani lojdi, achet dol rajpidi. Per guial nadi rani lojdi, rajpidi dol por ree xtolidi.

10

1 Rëb tëë Jesús: ―Diidxliczi rnin lojdi, bén ad rut niz ro' xgurajl ree xiil, bén ru niz lood ren, laaman na̱j béngubaan. 2 Per bén ru niz ro' xgurajl reeb, laaman na̱j bén rniaj laa reeb. 3 Abi' rxhial bén rajp ro' xgurajl reeb persi ru bén rniaj laa reeb, abi' chi rbejdxaman tijbgaj reeb, rayünbee reeb cha'man. Zianz rbëëman laa reeb lën gurajl guin. 4 Abi' chi ma brii gra reeb, dxel rniedaman loj reeb, guiáad laa reeb rnal laaman, guial nünbee reeb cha'man. 5 Per ad rnalt reeb tijb bén ad nünbeet reeb, ruxüünl reeb lojman, guial ad nünbeet reeb cha'man. 6 Chi gulox gunee Jesús zian, ad bignia't ree bén riga' yagaj xhie rën guiëb ni guneeman. 7 Rëb Jesús loj reeman zatijb: ―Diidxliczi rnin, naj na̱j zi'c ro' xgurajl ree xiil, lod ru reeb. 8 Gra ree bén bi't chi gad naj guial na̱j reeman zi'c béngubaan, rban reeman rusagzi tëë reeman. Per ree bén na̱j da bejnan ad bidxga't reeman laa reeman. 9 Naj na̱j ro' port, abi' bén ru ro' port guie zajpaman perdon, dxel ma zile' chu'man yarii tëëman zi'cgajczi tijb xiil abi' zian rdxejl ni rawib. 10 ’Béngubaan ri'tzaman din cwanman, gugüjtaman gunijt tëëman, sa'n naj zialan din gapidi guialnaban, gap tëëdi zro' da'tan. 11 Naj na̱j zi'c tijb bén rniaj xiil ree zagdxe. Abi' bén rniaj xiil ree zagdxe xt xguialnabanman rudëëman por laa reeb. 12 Per bén rniaj laa reeb por milia, chi ruguiaaman zëëd cuyojt, laa ruxüün gajcaman, rbëëladxaman xiil guin ree guial ad najt reeb xi xiilaman në guial ad najtaman bén rniaj ree xiil, dxel rniaaz cuyojt guin laa reeb abi' rtie'chib laa reeb. 13 Laaman rbëëladx laa reeb, din por miliazi rniajman laa reeb abi' achet naladxaman por laa reeb. 14 ’Naj na̱j zi'c bén rniaj xiil ree zagdxe. Abi' zi'c nünbee da Dadan naj, zian nünbeen laaman, ziangajc nünbee ree da xiilan, guiáad laa reeb nünbee naj. Abi' xt da guialnabanan gudëdan por laa reeb. 16 Ra'p tëën stibcwaa ree xiil ad yu't lën gurajl guie. Në laa reeb ryaadx chigxin, laa reeb guzoob da diidxan, yadxaag grop cwaa reeb gac reeb tijbzi, abi' tijbzi bejn gap laa reeb. 17 ’Da Dadan Dios rënman naj guial naj gajc rudë naj guiëtan par yabanan stijb. 18 Achut zajc gugüjt naj bal id naj gatiëëb. Naj ra'p guialrniabee par gatiëëban guiëtan në par yabanan stijb, din laan na̱j guialrniabee ni banee da Dadan lon. 19 Chi biguiejn ree bén Israel guin ni rëbaman, gojc reeman tio'p lala' stijb. 20 Zien reeman rëb: ―¿Chexc zeel ridxga'di laaman? Awa xindxab yu' luxdooman rajc tëë guijcaman. 21 Per yu' reeman rëb: ―Ni'qui tijb bén yu' xindxab luxdoo ad rnieet zian. ¿Wen zajc yaxhal xindxab guiaaloj ree bén ad ranit loj ya? 22 Tiamp nayaag, chi cayüjn ree bén Israel lanij ni rüjn reeman gazobijz par yadooro' Jerusalén. 23 Wej Jesús lën yadoo guin. Chi cazaman niz ro' curdur ni rniee reeman xcurdur Salomón. 24 Dxel biyaw ree bén Israel laaman, rëb reeman lojman: ―¿Xt goc naga'loj cu'nawëëguil dunujn? Guna du lojn bal lüj na̱j Cristo. 25 Badxi' Jesúsan rëbaman: ―Ma rnin lojdi, per lëjt ad rliladxtidi naj. Abi' ree ni rünan con xguialrniabee da Dadan Dios, laa reen rulüü chu najn. 26 Per ad rliladxtidi, guial ad najtidi da bejnan. 27 Bén na̱j ree da bejnan, nünbee reeman cha'n, guiáad naj nünbeen laa reeman, abi' laa reeman rzanal naj. 28 Naj rudë guialnaban tiblayaa loj reeman, ad yu't dxej nit reeman. Abi' achut zajc chiquied laa reeman lon. 29 Din da Dadan, bén banee laa reeman lon, rajpaman mazri guialrniabee guial loj gra. Achut zajc chiquied laa reeman lojman. 30 Da Dadan con naj, nayajcan tijbzi. 31 Dxel cwa' ree bén Israel guin guiaj din gucaaguiaj reeman Jesús. 32 Per rëbaman loj reeman: ―Por xguialrniabee da Dadan, zien ni zagdxe ma benan niz lojdi. ¿Con pornin gucaaguiajdi naj? 33 Badxi' reeman laan rëb reeman: ―Ad por ree ni zagdxe ni beentilan yacaaguiajn lüj, yacaaguiajn lüj guial ad rajptil Dios respejt, din bénguidxliujzi lüj, abi' rüjn lüj gajc zi'c Dios. 34 Dxel rëb Jesús: ―Loj xleydi rëb: “Naj rni guial lëjt na̱j dios.” 35 Dunuj ree rayagbee guial ad ni rusquieet na̱j ni ca loj xtiidx Dios. Abi' laaman gulëëlaj dios bén basa'nnë ree xtiidxaman, bén gojp ree guialrniabee loj ree bén Israel. 36 Yan, bal da Dadan Dios gulëëca naj persi guxhaalaman naj loj guidxliuj, ¿chexquiza zeel nadi ad ra'ptan laaman respejt guial rnin, xi'nman naj? 37 Bal id cayünan zi'c na da Dadan, ad chililadxidi naj. 38 Per bal cayünan zi'c naman, majsi ad zaliladxtidi naj, per gol bililadx guial por laaman zëëd ni rünan din gagbeedi guial da Dadan za'në naj, guiáad naj za'në'n laaman. 39 Dxel guyën reeman niniaaz reeman Jesús, per gulaaman loj reeman. 40 Abi' zëman zatiblad ro' guiiw Jordán, lod baroobnijs Waj bejn ree yaloj, yagaj baya'nman. 41 Abi' zien ree bén bidxin yagaj rëb: ―Walin, majsi achet milagr been Waj, per gra ni guneeman xcwent bén guie na̱j diidxli. 42 Dád zien reeman bililadx Jesús yagaj.

11

1 Guyu tijb bénragxuu, brii lajman Lazr. Laaman con re bizanman Li con Mart, na̱j ladx reeman Betania. 2 Abi' Li bizan Lazr, laam baroob perfum guia' Jesús abi' bacwiidximin con guidxguijquim. 3 Dxel grop bël reem guxhaal ruson loj Jesús, rëb reem: ―Dad, ragxuu xmiwil Lazr. 4 Chi biguiejn Jesús zian, rëbaman: ―Guialguijdx guin ad zëëdtan par gugüjtan, zëëdan din gac guguiaa bejn xguialrniabee Dios në par guguiaa reeman xguialrniabee Xi'n Dios. 5 Majsi rën da't Jesús Mart con Li në Lazr, 6 per chi cwa'man ruson ragxuu Lazr, sta goglaaman zatio'p dxej lod za'man. 7 Dxel rëbaman loj ree xbejnman: ―Yo' ree niz Judea zatijb. 8 Abi' rëb reeman lojman: ―Mextr, ad wayajct xchej guyën ree bén zojb niz ni nucaaguiaj reeman lüj. ¿Abi' chel ni zatijb ya? 9 Dxel rëb Jesús: ―Lëjt ragbee guial chiptio'p hor yu' tibdxej. Abi' bén rza radxe, achet rirejl guia'man, din yu' bajl rusni loj guidxliuj guie. 10 Per bén rza guxhin, yu' ni rirejl guia'man, din achet bajl guin rajpaman. 11 Rëb tëë Jesús loj reeman: ―Ma naga'yëjs dux miw ree Lazr, per chicwëënan laax. 12 Dxel rëb ree xbejnman: ―Dad, bal naayëjsix, rën guiëban yayajquix. 13 Per ni rëb Jesús rën guiëban guial ma güjt Lazr, guiáad ree xbejnman gunaladx reeman rëbaman naga'yëjsizix. 14 Dxel bagojn Jesús laa reeman, rëbaman: ―Ma güjt Lazr. 15 Rabaan por lëjt guial ad guzutan ni din chililadxidi naj. Yan, yo' ree yugnaj reex. 16 Dxel Tumajs, bén rniee reeman cwajch, rëbaman loj los demazri xbejn Jesús: ―Yo' ree yunë' reeman, din lod guiëtaman, yayëjtnë' reeman. 17 Chi bidxin Jesús Betania, ma gojc tajp dxej biguie'ch Lazr. 18 Betania guin raya'nan gajxh Jerusalén, zi'ct choon kilometro. 19 Abi' zien ree bén Israel bignaj Mart con Li din yagu' reeman luxdoo reem guial güjt bizan reem. 20 Chi gogbee Mart ma zëëd Jesús gajxh, briim bigchaaglojm laaman, guiáad Li baya'nm lënü. 21 Dxel rëb Mart loj Jesús: ―Dad, bal nizujl guie, ad ziant niëjt da zanan. 22 Per naj ragbee guial ni'qui yan zunee Dios ni guiniabil lojman. 23 Dxel rëb Jesús: ―Naj rni yaban bizanl. 24 Badxi'min rëbim: ―Ma qui ragbeen, yabanm dxej yaban gra ree bengüt. Chi guidxin dxej güün xguialguxtis Dios. 25 Abi' rëb Jesús: ―Naj na̱j bén rusban ree bengüt rudë tëën guialnaban loj ree bejn. Bén chililadx naj, majsi guiëtaman, per zajpaman guialnaban loj Dios. 26 Guiáad gra bén naban rliladx tëë naj, zajpaman guialnaban loj Dios. ¿Rliladxil ni canin lüj ya? 27 Dxel rëbim lojman: ―Rliladxanan Dad. Rliladxan lüj na̱j Cristo, Xi'n Dios, bén na̱j gui't loj guidxliuj. 28 Chi gulox rëb Mart zian, dxel bignee xbëlim Li, rëbim ralan: ―Ma bi't Jesús, abi' caneeman lüj. 29 Biguiejnzi Li zian, laa bisugajquim bigchaaglojm Jesús. 30 Abi' Jesús gadzaman chu' luguiedx guin, sta za'man lod bigchaagloj Mart laaman. 31 Guiáad ree bén Israel zojbnë Li ragu' reeman luxdoom, chi baguiaa reeman cari da't bisum zëm, binal reeman laam. Gunaladx reeman ro' xbaa Lazr ziguiaanm. 32 Chi bidxinm lod za' Jesús, bazuxibim lojman rëbim: ―Dad, bal nizujl guie, ad ziant niëjt da zanan. 33 Chi baguiaaman roon Li con ree bén Israel nal laam, dád gognaa luxdooman guyu naya tëëman. 34 Dxel gunabdiidxaman rëbaman: ―¿Ban biquie'chidi laax? Abi' rëb reeman: ―Dad, guda nial din guguiaal. 35 Dxel biinman. 36 Abi' rëb ree bén Israel guin: ―Gol baguiaa nial dád guyënman laax. 37 Per yu' reeman rëb: ―Bén guinan baxhal guiaaloj tijb bén ad ranit loj. Yan, ¿niche niajc nüjnman ya'n chitëë niëjt Lazr? 38 Dád guyu naya luxdoo Jesús stijb, chi gubigaman ro' xbaa Lazr. Najn tijb guiajbiliaa, nada'cw tijb guiaj ro'n. 39 Dxel rëbaman: ―Gol biquied guiaj guin. Per Mart, bizan xingüt guin, rëbim: ―Dad, ma rliaam nadxuudx, din ma gojc tajp dxej ni gütim. 40 Badxi' Jesúsan rëbaman: ―¿Nid rnin ya, bal rliladxil, guguiaal xguialrniabee Dios? 41 Dxel bisüd reeman guiaj guin. Zianz gules loj Jesús xanyabaa rëbaman: ―Dad, quixtëë lüj guial ma bacaagdiajguil ni rnin. 42 Naj ragbeechaaw guial zianczi rucaagdiajguil ni rnin. Per rnin zian por ree bén riga' guie, din chililadx reeman guial lüj guxhaal naj. 43 Chi gulox rëbaman zian, dxel guridxa'man rëbaman: ―¡Lazr, barii yagaj! 44 Dxel barii Lazr lën baa guin nalüüb vend yaax con guia'x, guiáad lojx nayaaw lajd. Dxel rëb Jesús loj reeman: ―Gol baxhiequix, gol baslaax yaguiajx. 45 Dád zien ree bén binal Li bililadx Jesús, guial baguiaa reeman milagr beenman. 46 Per yu' reeman bicojn bénfarisew ree ni been Jesús. 47 Dxel bénfarisew ree në ree bixhioz rniabee, bachajg lasa' reeman con los demazri ree guxtis, rëb reeman: ―¿Xhienaag yaguieen ree ya'n, din dád zien milagr cayüjn xin guin? 48 Bal yadëëd ree mod, graczi bejn guililadx laax, dxel guxtis Rom ree guidganijt reeman dux yadoo ree në dux nacion ree. 49 Per loj reeman yu' bén la Caifás, bixhioz zojbloj rniabee loj ijzsii, rëbaman loj reeman: ―¿Nid ragbeedi ya, 50 nid rignia' tëëdi ya, zagdxe na̱j guiët tijbzi bejn por gra bén Israel, luar nit dux nacion ree? 51 Per Caifás guin ad ni naladxtzaman rëbaman. Guial najman bixhioz zojbloj rniabee loj ijzsii, zeel badëëd Dios ni guneeman, guial guiët Jesús por gra ree bén Israel. 52 Abi' ad por laatzi reeman, par gac reeman tijbzi con gra ree xbejn Dios, bén riga' ree guidib guidxliuj. 53 Zeel diizd dxejzii baya'n reeman diidx gugüjt reeman Jesús. 54 Zianan zeel ad contzi rulüülojtraman loj ree bén Israel, bazaman yagaj ziaman guiedx la Efraín, najn gajxh yujbidx, yagaj guzunë ree xbejnman. 55 Dxejzii ree ma zidyob pascw, lanij rüjn ree bén Israel, dád zien ree bén guiedx ree zë Jerusalén din güün reeman zi'c na̱j xcostumbr reeman par gac reeman naya loj Dios chi gad pascw gal. 56 Dxel raguiil reeman Jesús, abi' rniabdiidx loj lasa' reeman lën yadooro' Jerusalén, rëb reeman: ―¿Xhie nadi? ¿Zi'taman lanij ya o ad zi'ttaman? 57 Bénfarisew ree con ree bixhioz rniabee, gunabee reeman bal chutëëz bén ragbee ban za' Jesús, gugojnman din chile' guiniaaz reeman laaman.

12

1 Za xho'p dxej riaadx gal pascw, chi we Jesús Betania, lod zojb Lazr, xin basbanman. 2 Ni been reeman tijb guialraw par xche ni gudawnë reeman Jesús. Mart gule'c guialraw guin, guiáad Lazr na̱j tijb bén gurenë laa reeman xan mex. 3 Dxel cwa' Li cost garol lijtr perfum ni lasajc wayëjx, najcchaawnën ganax nardo, baroobimin guia' Jesús abi' bacwiidxnë guidxguijquimin. Guidibczi lënü guin baree nejxh. 4 Dxel Judas Iscariote, xin na̱j tijb ree xbejn Jesús, xin bayü laaman, rëbix: 5 ―¿Chexc ad gudo't perfum guin? Zagdxeli nido'n zi'ct rüjn tijb bejn gan tib ijz, din nüjnan yudar bénprob ree. 6 Ad guial yu'tix xgab bénprob guin ree zeel rëbix zian, rëbix zian guial najx xin gubaan. Abi' guial laax naaz bols yu' milia, rbanx ni rudëë reeman rgu'chaawix. 7 Dxel rëb Jesús lojx: ―Guzujr biinan. Ma badxe'xgajm naj perfum guin par chi guidxin dxej guiguie'chan. 8 Din bénprob guin ree zianczi za'në reeman lëjt, per naj ad ziantczi gazunë'n lëjt. 9 Bén guixiuj bén Israel gogbee za' Jesús Betania, abi' wej reeman yagaj, ad par guguiaatzi reeman Jesús, në par guguiaa reeman Lazr, xin basbanman. 10 Zeel baya'n ree bixhioz rniabee diidx guial në Lazr gugüjt reeman. 11 Din por laax dád zien ree bejn cayrii loj reeman, abi' caliladx reeman Jesús. 12 Chi bareguiaal, zien da't ree bén zë lanij pascw Jerusalén gogbee guidxin Jesús yagaj, 13 dxel cwa' reeman zijn, brii reeman bigchaagloj reeman laaman, rbidxa' reeman rëb reeman: ―¡Benza'c bendxoon na̱j Dios! ¡Nüjnle'man Bén guxhaalaman! ¡Nüjnle'man bén na̱j rey Israel! 14 Bidxaagloj Jesús tijb burdoo, abi' gudxibaman laab, persi gojc zi'c ca loj xtiidx Dios lod rëb: 15 Bén Sión, ad rdxebidi. Gol baguiaa, laa xreydi zëëd, dxiibaman tijb burdoo. 16 Yaloj ad bignia't ree xbejn Jesús ni cayajc. Per chi ma bayë'paman xanyabaa, dxel bignia' reeman guial zian ca loj xtiidx Dios xcwentaman, zeel gojc zian. 17 Bén guzu ree con Jesús chi guredxaman Lazr din yariix lën baa, basban tëëman laax loj ree bengüt, rusnuu rü reeman diidx loj ree bejn ni baguiaa reeman. 18 Zeel zien ree bejn brii bigchaagloj laaman, guial gogbee reeman milagr beenman. 19 Dxel rëb loj lasa' ree bénfarisew: ―Gol baguiaa nial graczi bejn zinal laax, achetri zajc yaguieen ree. 20 Loj gra ree bén we lanij bignajchi' reeman Dios Jerusalén, no'ch bëlzi ree bén grieg, 21 gubig reeman loj Felip, bén za guiedx Betsaida, ni riga' niz Galilea, guzajc reeman liaadx rëb reeman: ―Dad, rayënan yaneenë'n Jesús. 22 Abi' wej Felip biguiedxaman loj Andrejs, dxel wej grop reeman bicojn reeman Jesús. 23 Badxi' Jesúsan rëbaman: ―Ma bidxin hor par Bén guxhaal Dios, guiëtaman abi' yabanman. 24 Diidxliczi rnin, zi'c tijb xob bal idan chu' luyuj najz najn tijbzi, per bal chu'n luyuj zajcxhiejn. 25 Bén ru mazri xgab naabzi por guialnaban yu' loj guidxliuj guie, yu' dxej gunijtaman laan, per bén ru mazri xgab güünman zi'c rën Dios, xhietëëz sacaman, zajpaman guialnaban tiblayaa con laaman. 26 Bal chu rën güün ni rënan guidnalaman naj, lod gazun, nëgajcaman su. Bén güün ni rënan, guiën da Dadan laaman. 27 Rëb tëë Jesús: ―Dád yu'n xgab. ¿Xhie guiën? ¿Zën ya: “Dad, babëë naj loj ni gazaagdiajn”? Per ad zëtan zian, din par zian zialan. 28 Dad, balüü xguialrniabeel. Dxel biguien cha' bejn xanyabaa rëbaman: ―¡Ma balü da guialrniabeen, per gulünan stijb! 29 Riguiejn ree bén riga' yagaj, zeel rëb reeman: ―Guziaawan guridxa'. Per yu' reeman rëb: ―Tijb anjlan gunee laaman. 30 Dxel rëb Jesús: ―Ad por najtan biguien cha' bejn, por lëjtan. 31 Ma bidxin dxej gac guialguxtis loj guidxliuj, yan yarii bén rniabee lojn. 32 Per chi guilies reeman naj ya loj guidxliuj guie, dxel gui't graloj bejn lon. 33 Zian basignia'man xhienaag guiëtaman. 34 Badxi' ree bén guinan rëb reeman: ―Dunujn rayagbee rëb loj ley, Cristo guiban tiblayaa. ¿Chexc zeel nal, rayal guilies reeman Bén zëëd xanyabaa? ¿Chunin na̱j Bén zëëd xanyabaa? 35 Rëb Jesús loj reeman: ―Ad zien dxejtri sunë bajl guie lëjt. Gol guza la'tgaj za'nëdi bajl guie, chitëë guiniaaz guiaal lëjt. Din bén rza loj xcay, ad ragbeetaman ban cheman. 36 Gol bililadx bajl guie, la'tgaj za'nëdan, din gaquidi xbejnan. Chi gulox gunee Jesús zian, dxel baquie'chlojman loj reeman. 37 Majsi been Jesús zien da't milagr baguiaa reeman, ad bililadxt reeman. 38 Zian gojc cumplid ni bacaa Isaías bén badëë xtiidx Dios loj ree bejn, rëban: Dad, ¿chu ma bililadx ruson radëëdan? ¿Chu loj ma balüü Dios xguialrniabeeman? 39 Zianan zeel ad gojct nililadx reeman, din në ze bacaa Isaías: 40 Dios basiaaw guiaaloj reeman, bascajy tëëman xquiarguiejn reeman, chitëë guguiaa reeman chignia' tëë reeman, chitëë yadxi' loj reeman lon, abi' ad zayüntan laa reeman. 41 Rëb Isaías zian guial baguiaaman xbiani Jesús, zeel baza'taman laaman. 42 Per ni'czi zian, dád zien ree bén zojbloj bililadx Jesús. Per ad rëbt reeman loj ree bejn zian, guial rdxeb reeman yabëë ree bénfarisew laa reeman lod ricaagdiajg reeman xtiidx Dios, 43 din mazri rën reeman guiën ree bejn laa reeman, guial guiën Dios laa reeman. 44 Gunee Jesús rejs rëbaman: ―Bén rliladx naj, ad najtzan rliladxaman, në da Dadan bén guxhaal naj. 45 Bén ruguiaa naj, në bén guxhaal naj ruguiaaman. 46 Naj na̱j bajl, bialan loj guidxliuj guie, chitëë yaya'n ree bén rliladx naj loj xcay. 47 Bal chu guien da diidxan abi' ad zuzoobtaman laan, ad najt gudëd laaman casti, din ad bialtan din gudëdan casti, bialan din yabën laa reeman loj dol. 48 Bén ad rënt naj ad rucaagdiajg tëëtaman da diidxan, mal yu' ni gudëëd laaman casti: diidx ni rën, laan gudëëd laaman casti chi guidxin dxej. 49 Din ad ni rbëguictan rnien. Da Dadan, Bén guxhaal naj rniabee ni ganen ni gulü tëën, 50 zeel ragbeen, ni rniabee da Dadan runee guialnaban tiblayaa. Zianan zeel ni rnin rulünan zi'c rniabeeman.

13

1 Guixiezi gal lanij pascw. Ma ragbee Jesús guial ma bidxin hor gusa'nman guidxliuj guie din yaguiaj loj xDadaman. Zianczi guyën ree xbejnman, bén riga' ree loj guidxliuj, rënman laa reeman goctëëz. 2 Chi gad reeman gaw xche, mal badxe' xindxab ni mal luxdoo Judas, xi'n Simón Iscariote, ma rüjnx xgab yayüx Jesús loj ree bén gugüjt laaman. Ragbee Jesús guial badëëd xDadaman gra guialrniabee lojman, laa tëëman guxhaal laaman, zeel yaguiajman lod za'man. La'tgaj cayaw reeman, bisuman xan mex, gulëëman tijb lajd najcwaman luya, dxel cwa'man tijb tuay guxhii xizaman. 5 Abi' badxe'man nijs loj tijb xijg, guzulojman caguiibaman guia' ree xbejnman, cucwiidx tëëman laan con tuay naxii xizaman. 6 Chi bayal quiibaman guia' Simón, bén rniee reeman Bëd, rëbaman loj Jesús: ―Dad, ¿lüj quiib guia'n ya? 7 Badxi'man laan rëbaman: ―Ad rignia'til ni cayünan yan, per qui chignia'rilan. 8 Zeel rëb Bëd lojman: ―Ad zatiëëbtan quiibil guia'n. Abi' rëb Jesús: ―Bal id zaguiiban guia'l, ad zile'tri gaquil da bejnan. 9 Zeel rëb Bëd lojman: ―Dad, ad bal guia'zan quiibil, gudiib në yan con guican. 10 Badxi'man laan rëbaman: Bén goznejz guia'zaman riaadx chëd, din guidibaman naya. Abi' lëjt ma nayadi, majsi ad gratidi. 11 Ma ragbeeman chu yayü laaman, zeel rëbaman: “Ad gratidi naya.” 12 Chi gulox gudiibaman guia' reeman, bayajcw xabaman, gurejman xan mex guin zatijb, dxel rëbaman: ―¿Bignia'di ni benan ya? 13 Rnieedi naj Mextr në Dad, waliquidi najn. 14 Bal najn Mextr në Dad, gudiiban guia'di, ziangajc quiib guia' lasa'di. 15 Ma balün lëjt, din güündi zi'c benan. 16 Diidxliczi ganin, achut mojs na̱j mazri guial loj bén rniabee laaman, achut bén ri't na̱j mazri guial loj bén rxhiaal laaman. 17 Bal rignia'di nine güün tëëdan, yabaanë Dios lëjt. 18 ’Ad gratidi ruzatan ragbeen chu reenin gulen. Per rayal gac cumplid ni ca loj xtiidx Dios, rëban: “Bén rawnë'n tijbzi, bayejcaman contr naj.” 19 Ma rugojnan lëjt din gagbeedi chi gac zian, din chililadxidi chu najn. 20 Diidxliczi ganin, bén rucaagdiajg ni rëb bén rxhialan, najn rucaagdiajgaman, guiáad bén rucaagdiajg da diidxan, xtiidx bén guxhaal najn rucaagdiajgaman. 21 Chi gulox gunee Jesús zian, dád guyunayaman, dxel rëbaman loj reeman zagdxe: ―Diidxliczi ganin, tijb lëjt yayü naj loj ree bén gugüjt naj. 22 Dxel guzuloj ree xbejnman ruguiaa loj lasa' reeman, ni'quid ragbeet reeman chunin ruza'taman. 23 Tijb bén guyën da'taman zojb cwë'man, hor zii chi cayaw reeman xche, 24 dxel been Bëd sen lojman din guiniabdiidxaman chunin ruza't Jesús. 25 Zeel mazri gubigaman cwë' Jesús gunabdiidxaman, rëbaman: ―Dad, ¿chunin? 26 Badxi' Jesúsan rëbaman: ―Gugajdxan ta'n guiadxtil, din loj xin gudëdanan, laaxan yayü naj. Dxel bagajdxaman ta'n guiadxtil badëëman laan loj Judas, xi'n Simón Iscariote. 27 Chi gudawixan, laa guyu gajc xindxab luxdoox. Zeel rëb Jesús lojx: ―Ni güünl, cari beenan. 28 Per achutczi ree bén zojb xan mex guin bignia' chexc zeel rëbaman zian. 29 Guial ca' Judas bols ni yu' milia, zeel naladx garol reeman rëb Jesús lojx din chisiix ni gaw reeman lanij guin o gudëëdix ta'nan loj ree bén rzagdiaj ya. 30 Chi ma gudawix guiadxtil guin, dxel briix, ma guxhin. 31 Chi ma brii Judas, rëb Jesús loj ree xbejnman: ―Yan guien xguialrniabee Bén guxhaal Dios din gagbee ree bejn xhienaag na̱j guialrniabee gudëë Dios lojman. 32 Din bal gulüü Bén guxhaal Dios xguialrniabee Dios, ziangajc gulüü Dios xguialrniabeeman, zeel ma gudëëdaman laan. 33 Xi'n, ad zien dxejtri gazunë'n lëjt, yaguiilidi naj, per zi'cgajc rën loj ree bejn, ziangajc ganin lojdi yan: Ad zajct chedi lod gan. 34 Ganin tijb nicüb ganabeen: Gol guyën lasa'di zi'c rënan lëjt. 35 Bal guiën lasa'di, zian gagbee gra bejn guial najdi da bejnan. 36 Gunabdiidx Bëd loj Jesús rëbaman: ―Dad, ¿ban chel? Zeel rëb Jesús: ―Ad zajct guidnalil naj lod gan yan, per zadxin dxej guidnalil naj. 37 Zeel rëb Bëd: ―Dad, ¿chexc zeel ad zajct guidnaalan lüj yan? Xt zajc guiëtan por lüj. 38 Badxi' Jesúsan rëbaman: ―¿Walil ya rënl guiëtil por naj? Diidxliczi ganin, chi gad gui̱d cwidxa', mal rëbil choon volt, ad nünbeetil naj.

14

1 Rëb tëë Jesús: ―Ad rudi xgab. Gol bililadx Dios, gol bililadx tëë naj. 2 Lidx da Dadan dád zien luar lod guiban bejn yu'. Bal iche yu', ad ziant ganin lojdi, chiguienchaawan xluaridi. 3 Chi ma benchaawan luar guin, dxel yaguialan guidgaxin lëjt din sudi lod gazun. 4 Ma nünbeedi nejz zë lod gan. 5 Zeel rëb Tumajs lojman: ―Dad, ad rayagbeetan ban chel, ¿xhienaag yaguieenbeen nejz guin? 6 Badxi'man laan rëbaman: ―Naj na̱j nejz, najn diidxli, naj tëën guialnaban. Tijbzi naj zajc chinë' bejn ree loj da Dadan. 7 Bal nünbeedi naj, në da Dadan güünbeedi. Per ma nünbeedi laaman diizd yan, din ma baguiaadi laaman. 8 Dxel rëb Felip: ―Dad, banee mod majsi yaguiaazan bén na̱j xDadil. 9 Badxi'man laan rëbaman: ―Felip, ma gojc xchej za'në'n lëjt. ¿Nid wayünbeel naj ya? Din bén ruguiaa naj, da Dadanan ruguiaaman. ¿Chexc zeel nal gunen mod guguiaal da Dadan? 10 ¿Nid rliladxil ya, naj za'në' da Dadan, guiáad laaman za'në naj? Ni rnin lojdi, ad rbëguictanan. Da Dadan, bén nabannë'n, laaman rüjn dxiin guin. 11 Gol bililadx naj za'në' da Dadan, guiáad laaman za'në naj. Balgui majsi ni rünzan gol bililadx. 12 Diidxliczi ganin: Bén rliladx naj, nëgajcaman güün ni rünan, güünman ni mazri naroob, din naj yaya' lod za' da Dadan. 13 Graczi ni guiniabidi lojman por naj, günanan din gulün xguialrniabeeman. 14 Günan xhietëëz ni guiniabidi. 15 ’Bal rëndi naj, gucaagdiajguidi ni balün. 16 Din guië loj da Dadan guixhiaalaman Sprijt sunë lëjt, 17 Sprijt gulüü diidxli, din zianczi sunëman lëjt. Bén ad rliladxt ree Dios ad zajct tia' reeman Sprijt guin, din ad ruguiaat reeman ad nünbee tëët reeman laaman. Per lëjt nünbee laaman, din sunëman lëjt yaya'n tëëman luxdoodi tiblayaa. 18 Ad zusa'ntan xtijbidi, yaguialan stijb guidganan lëjt. 19 Sta'nz riaadx ad zuguiaatri ree bénguidxliuj naj, per lëjt guguiaadi naj, guibandi din nabanan. 20 Dxej zii ree, gagbeedi za'në' da Dadan, lëjt za'në naj, guiáad naj za'në'n lëjt zianczi. 21 Bén rucaagdiajg ni rniabeen rüjn tëëman laan, walicaman rënman naj. Guiën da Dadan bén rën naj, në naj guiën laaman din güünbeeman naj. 22 Gunabdiidx Judas (ad bén bayüt Jesús) rëbaman: ―Dad, ¿chexc zeel dunujzan yayagbee chu lüj, guiáad ree bénguidxliuj ad zagbeet reeman? 23 Badxi' Jesúsan rëbaman: ―Bén guiën naj guzoobaman da diidxan, guiën da Dadan laaman, guiáad naj guidnë' da Dadan din yabajnnë'n laaman. 24 Bén ad zënt naj ad zuzoobtaman da diidxan, din diidx cucaagdiajguidi yan ad da diidxtanan, xtiidx da Dadanan bén guxhaal naj. 25 ’Canin lojdi gra nine, la'tgaj za'në'n lëjt. 26 Per xSprijt Dios, bén sunë lëjt zianczi, bén guixhiaal da Dadan por naj, graczi gulüüman lëjt din gusaaladxidi ni canin. 27 ’Chi yaya'n, yabecdxen luxdoodi, gunen guialnaza'c lojdi, ad zi'c runeet ree bénguidxliujn, ad bal ru nayadi ad rdxeb tëëdi. 28 Ma rnin lojdi, yaya'n, dxel yaguialan zatijb. Bal walidi rëndi naj, chu' luxdoodi zagdxe, guial gagbeedi yaya' loj da Dadan, din mazri zojblojman guial lon. 29 Ma rugojnan lëjt, din chi gac zian, chililadxidi. 30 ’Ad zro'tri ganenë'n lëjt, din ma zëëd xin rniabee guidxliuj, majsi ad nët naj rniabeex. 31 Per zian gac din gagbee ree bénguidxliuj, rënan da Dadan, zeel rünan ni rniabeeman. Gol bisu, yo' ree yan.

15

1 Basnuu rëb Jesús: ―Naj na̱j zi'c yag rtia ni nejxh zagdxe, guiáad da Dadan na̱j zi'c bén rxübin laan. 2 Da bejn reen na̱j zi'c ree xidx yag guin. Bal id rtia reen gutüüg da Dadan laa reen. Per bal rtia reen, gusiaman laa reen din tia reen mazri. 3 Lëjt ma nayadi, guial basia diidx rnin lëjt. 4 Gol gubajnnë naj zi'c nabannë'n lëjt. Ad zajct tia xidx yag, bal id najnën yag guin tijbzi. Ziangajc lëjt ad zajct güündi ni rën Dios bal id za'nëdi naj. 5 ’Naj na̱j zi'c yag rtia ni nejxh, guiáad lëjt na̱j zi'c xidxan. Bén sunë naj zianczi nuchajgaman naj, guiáad naj nuchagan laaman, zeel rüjnman ni rën Dios. Din bal ichu naj, achet zajc güündi. 6 Bén ad zazujnët naj guizëëbaman zi'c yagbidx ruto'p reeman, din che'can. Rëb tëë Jesús: 7 ―Bal za'nëdi naj tijbzi ruzoob tëëdi da diidxan, gol gunab ni rëntzidi, din tia'dan. 8 Bal güündi ni rën da Dadan, gaquidi quijb da bejnan, din guza't ree bejn laaman zagdxe. 9 Rënan lëjt zi'c rën da Dadan naj, gol basaaladx rënan lëjt. 10 Bal guzoobidi da diidxan, gusaaladxidi rënan lëjt, zi'cgajc ruzoban xtiidx da Dadan, ragbeen rënman naj. 11 ’Rnin lojdi zian din chu' luxdoodi zagdxe zi'c yu' luxdon zagdxe, zagdxe da't chu' luxdoodi. 12 Gol guyën lasa'di zi'c rënan lëjt, laan rniabeen güündi. 13 Achut rën xmiw mazri guial loj bén rëjt por laa reeman. 14 Lëjt na̱j da miwan bal güündi ni rënan. 15 Ad zanetran lëjt mojs, din mojs ad ragbeetaman xhie rüjn bén rniabee laaman. Ganen lëjt miw, din balün lëjt graczi ni na da Dadan lon. 16 Ad lëjtt gule naj, naj gule lëjt. Zeel rnin lojdi, chedi chiglüüdi bejn ree ni rën da Dadan, din gusnuu güün reeman ni rënman, din guneeman graczi ni guiniabidi por naj. 17 Rniabeen: Guiën lasa'di. 18 Rëb tëë Jesús: ―Bal ralen ree bénguidxliuj lëjt, gol basaaladx, yaloj naj balen reeman. 19 Bal niajquidi bénguidxliuj, niën reeman lëjt zi'c rën lasa' reeman. Per naj gule lëjt loj reeman, zeel ralen reeman guial ad najtidi bénguidxliuj. 20 Gol basaaladx ni rnin: “Achut mojs na̱j mazri guial loj bén rniabee laaman.” Bal basagzi reeman naj, ziangajc gusagzi reeman lëjt, bal bazoob reeman da diidxan, ziangajc guzoob reeman xtiidxidi. 21 Graczi nine güünnë reeman lëjt por naj, din ad nünbeet reeman bén guxhaal naj. 22 ’Achet xtol reeman niu, bal idan nial ninienë'n laa reeman, per yan yu' xtol reeman. 23 Bén ralen naj, nëgajc da Dadan ralenman. 24 Achet xtol reeman niu, bal idan nün ree ni benan loj reeman ni achutczi wayüjn, per ma baguiaa reeman laa reen, majsi zian ralen gajc reeman naj në da Dadan. 25 Per rajc zian din gac cumplid ni ca loj xley reeman, rëban: “Achet rünan ralen reeman naj.” 26 ’Per chi gui't Sprijt gaxhalan din sunëman lëjt gulüü tëëman diidxli, Sprijt zëëd loj da Dadan, laaman gü da diidxan. 27 Nëgajc lëjt gü laan, din diizd yaloj za'nëdi naj.

16

1 ’Rnin zian, din ad zabëjzt chililadxidi naj. 2 Yabëë reeman lëjt lod ricaagdiajg reeman xtiidx Dios, zadxin dxej, chutëëz bén gugüjt lëjt naladx reeman Dios cayüjn reeman wen. 3 Güün reeman zian din ad nünbeet reeman naj ni'qui da Dadan. 4 Per ma rnin lëjt, din chi guidxin dxej guin gusaaladxidi guial ma bagojnan lëjt. ’Ad rnitan lojdi zian diizd yaloj, din naj guzunë' lëjt. 5 Per yan yaya'n loj bén guxhaal naj. Achutczidi rniabdiidx ban gan, 6 aal yu'nayadi guial canin zian. 7 Per diidxliczi rnin: zagdxe najn yaya'n. Din bal idan yaya', ad zi'tt xSprijt Dios sunë lëjt, per bal yaya'n, naj gaxhal laaman. 8 Chi gui'taman, laaman gulüü ree bénguidxliuj ni na̱j dol, ni na̱j ni zagdxe, në xguialguxtis Dios. 9 Gagbee reeman yu' xtol reeman, guial ad rliladxt reeman naj. 10 Ni zagdxe guin na̱j guial yaya' loj da Dadan din ad zuguiaatridi naj. 11 Guiáad Dios ma been xguialguxtisaman con xindxab rniabee guidxliuj. 12 ’Yu'ri ni rënan ganin, per dád zien gacan par lëjt. 13 Chi gui't Sprijt gulüü lëjt diidxli, din ad züt xtiidx gajcaman, guinieeman graczi ni guienman, laaman gulüü lëjt ni gac. 14 Guza'taman naj zagdxe, din naj gudëd ni gulüüman lëjt. 15 Graczi ni rajp da Dadan na̱j par naj, zeel rnin, Sprijt guin tia' ni gudëdan din gulüüman laan lëjt. 16 ’Ma guidxin dxej ad zuguiaatridi naj, per ad zajct xchej, guguiaadi naj stijb. 17 Chi rëb Jesús zian, dxel guzuloj ree xbejnman canabdiidx loj lasa' reeman, rëb reeman: ―¿Chexc zeel naman, ma guidxin dxej ad zaguiaatri reeman, per ad zajct xchej, yaguiaa reeman stijb, din yaguiaj loj xDadaman? 18 ¿Chexc zeel naman: “Ad zajct xchej”? Ad rayignia't ree ni caneeman. 19 Gogbee Jesús guial rën reeman guiniabdiidx reeman, zeel rëbaman: ―Ma rnin lojdi, ma guidxin dxej ad zuguiaatridi naj, per ad zajct xchej, guguiaadi naj stijb. ¿Ni nen canabdiidxidi ya? 20 Diidxli ganin, goondi chu' tëë luxdoodi naya, guiáad ree bénguidxliuj yabaa reeman. Per majsi chu' luxdoodi naya, guidxin dxej yabaadi. 21 Chi gal xi'n béngunaa, rdëdaman tarbajw, din ma bidxin hor guin. Per chi ma gojl xi'nman, dxel rayanladxaman tarbajw guin, ru luxdooman zagdxe, guial ma gojl xi'nman. 22 Ziangajc lëjt cadëdidi tarbajw yan, per chi guguian lëjt zatijb, chu' luxdoodi zagdxe, achutczi zajc yabëë laan luxdoodi. 23 ’Dxel achetri guiniabdiidxidi lon. Diidxliczi ganin, graczi ni guiniabidi loj da Dadan por naj, guneeman. 24 Guiáad yan achet wanabidi por naj, gol gunaban din tia'dan, din chu' luxdoodi zagdxe tiblayaa. 25 Rëb tëë Jesús: ―Rnin nine ree zi'c cwent, per zadxin dxej ad zulütran zian, gusignia'n lëjt zagdxe xcwent da Dadan. 26 Dxej zii ree guiniabidi loj da Dadan por naj, ad rüjnt naguiejn ganaaban por lëjt lojman, 27 din rënman lëjt, rënman lëjt guial rëndi naj rliladx tëëdi guial laaman guxhaal naj. 28 Briin lod za' da Dadan persi bialan loj guidxliuj guie, yan gusa'nan laan din yaya'n lojman. 29 Dxel rëb ree xbejnman: ―Yanri ma cusignia'l zagdxe. 30 Rayagbeen rajquil graczi, ad rüjnt naguiejn chu guiniabdiidx lojl. Zianan zeel raliduladxan guxhaal Dios lüj. 31 Badxi' Jesús laan rëbaman: ―¿Ma rliladxidi yan ya? 32 Gol gogbee, ma bidxin hor yare'chidi, tijb gajdi yaguiaj lidx, gusa'ndi da xtijban. Per ad za't da xtijban, da Dadan za'në naj. 33 Rnin gra nine din cwedi zagdxe guial nuchajguidi naj. Loj guidxliuj sagdiajdi, per ad guidxebidi, din ma benan gan loj guidxliuj.

17

1 Chi gulox rëb Jesús zian loj ree xbejnman, dxel baguiaaman xanyabaa rëbaman: ―Dad, ma bidxin hor, balüü da guialrniabeen din gulün xguialrniabeel. 2 Baneel guialrniabee lon din ganabeen gra bejn gudëd tëën guialnaban tiblayaa loj gra bén baneel. 3 Guiban reeman tiblayaa bal güünbee reeman lüj, tijbzi lüj na̱j quijb Dios, güünbee tëë reeman najn guxhaalil. 4 ’Naj bazat lüj zagdxe loj guidxliuj; yan ma gulox benan ni nal. 5 Yan, Dad, yaguialan lojl, din yaneel guialrniabee ca'n gocli, diizd chi gad guidxliuj gacchaaw. 6 Rëb tëë Jesús: ―Bén gulel loj guidxliuj baneel lon, ma balün laa reeman chu lüj. Gojc reeman xbejnl, per baneel laa reeman lon, ma bazoob reeman xtiidxil. 7 Yan ma gogbee reeman guial gra ni benan gra tëë ni balün na̱j xieenl. 8 Gunen xtiidxil ni baneel, zeel bacaagdiajg reeman laan, gogbee reeman, walican lojl guzaan, bililadx tëë reeman lüj guxhaal naj. 9 ’Rbedx rniaaban lüj por laa reeman, guial na̱j reeman xbejnl banee tëël laa reeman lon, ad rbedx rniaabtan por ree bénguidxliuj. 10 Gra ni ca'n na̱j xieenl, guiáad gra ni ca'l na̱j da xieenan, ma rguien da guialrniabeen por ree bén baneel. 11 ’Ad zazutran loj guidxliuj, per laa reeman suri reeman guie, guiáad naj yazaan din yaguialan lod za'l. Dad, lüj na̱j bén naya nali, gunaj reeman con gra guialrniabee ca'l ni banee tëël lon, din gac reeman tijbzi zi'c nayajc. 12 Chi guzunë'n laa reeman loj guidxliuj, gunan laa reeman con xguialrniabeel ni baneel. Achut reeman bizëëb, tijbzi xin ma na̱j diidx bizëëb, din gac cumplid ni ca loj xtiidxil. 13 ’Yan yaguialan lod za'l, per canen zian la'tgaj za'n loj guidxliuj guie, din chu' luxdoo reeman zagdxe, zi'c yu' luxdon zagdxe. 14 Ma balün laa reeman xtiidxil, zeel ralen ree bénguidxliuj laa reeman guial ad najt reeman bénguidxliuj, zi'cgajc ad najtan bénguidxliuj. 15 Ad rniaabtan yabëël laa reeman loj guidxliuj, rënan guinial laa reeman, chitëë güün reeman ni mal. 16 Ad najt reeman bénguidxliuj, zi'cgajc naj. 17 Basia reeman con xtiidxil, din laan na̱j ni diidxli. 18 Zi'c guxhaalil naj loj ree bénguidxliuj, ziangajc rixhial ree da bejnan loj reeman. 19 Por laa reeman rudëd da guialnabanan din gac reeman xbejnl diidxliczi. 20 Basnuu Jesús, rëbaman: ―Ad por laatzi reeman rbedx rniaaban lüj, në por ree bén chililadx chi gucaagdiajg reeman ni guiniee reeman. 21 Rniaaban lojl din guchajg lasa' reeman din yayajcnë' reeman tijbzi, Dad, zi'c za'nël naj ziangajc za'në'n lüj, ziangajc sunë lasa' reeman. Din chililadx ree bejn lüj guxhaal naj. 22 Badëdan guialrniabee baneel loj reeman, din gac reeman tijbzi zi'c nayajc, 23 naj za'në' laa reeman, guiáad lüj za'nël naj. Zeel gac reeman tijbzi din gagbee ree bejn, lüj guxhaal naj rën tëël laa reeman zi'c rënl naj. 24 ’Dad, lüj banee laa reeman lon, zeel rënan su reeman lod gazun din guguiaa reeman biani baneel lon, din guyënl naj diizd chi gad guidxliuj gacchaaw. 25 Dad, lüj rüjn guialguxtis zagdxe. Ad nünbeet ree bénguidxliuj lüj, sa'n naj nünbeen lüj, në ree da bejnan ragbee lüj guxhaal naj. 26 Balün laa reeman chu najl, gulüran laa reeman mazri, din gagbee reeman rënl laa reeman zi'c rënl naj, gazunë' tëën laa reeman.

18

1 Chi gulox gunee Jesús zian, dxel briinë ree xbejnman, zë reeman stiblad ro' guiiw la Cedrón, bidxin reeman lod yu' ree yag. 2 Në Judas, xin yayü laaman, nünbee yagaj, guial zien volt binëman laa reeman ni. 3 Zeel bidxinnëx tibcwaa ree suldad në ree bén rajp ro' yadoo, guxhaal quijb ree bixhioz laa reeman në ree bénfarisew, ca' reeman bajl rusni ree, në ree espad con ree lans. 4 Per ma ragbee Jesús gra ni gac, briiman gunabdiidxaman loj reeman, rëbaman: ―¿Chu raguiilidi? 5 Badxi' reeman laan rëb reeman: ―Jesús bén Nazaret. Abi' rëbaman loj reeman: ―Najn. Judas xin bayü laaman bidxinnë laa reeman. 6 Chi rëbaman loj reeman: “Najn”, dxel baguiadruxan reeman biajb reeman luyuj. 7 Gunabdiidxaman zatijb rëbaman: ―¿Chu raguiilidi? Rëb reeman: ―Jesús bén Nazaret. 8 Zeel rëbaman: ―Ma rnin, najn. Bal naj raguiilidi, gol baslaa ree bén guie yaguiaj reeman. 9 Zian gojc cumplid ni rëb loj xDadaman: “Achut ree bén baneel lon bizëëb.” 10 Dxel gulëë Bëd espad, gutü'man guidiajg ladbee xin la Malco, najx xmojs quijb bixhioz zojbloj. 11 Dxel rëb Jesús loj Bëd: ―Bagu'chaaw espad zii. Bal rën da Dadan gazaagdiajn zian, gaza'canan. 12 Suldad guin ree con xin rniabee laa reex con ree bén rajp ro' yadoo gunaaz reeman Jesús, guxhii reeman laaman. 13 Dxel binë reeman laaman yaloj lidx bén la Anás, din laaman na̱j xdadsuegr Caifás quijb bixhioz zojbloj loj ijz zii. 14 Laagajcaman rëb loj gabilt, mazri zagdxe guiët tijbzi bejn por gra ree bén Israel. 15 Tio'p ree xbejn Jesús binal laaman. Tijbaman la Simón, bén rniee reeman Bëd, stijbaman na̱j bén nünbee quijb bixhioz zojbloj, zeel guyunëman Jesús lënü guin, 16 guiáad Bëd baya'nman lule'. Zeel barii bén nünbee bén rniabee ree bixhioz, guneenëman biin rajp ro' port guin, persi guyu Bëd lënü. 17 Gunabdiidxim lojman rëbim: ―¿Nid lüjn na̱j tijb xbejn bén guin ya? Badxi'man laan rëbaman: ―Ad najtan. 18 Per guial dád nayaag, zeel bén na̱j ree mojs con ree bén rajp ro' yadoo nabe'c reeman guij rucha' reeman. Nëgajc Bëd cucha'në reeman rudëj guin. 19 Guzuloj bén la Anás canabdiidxaman loj Jesús xcwent ree xbejnman në xcwent ni rulüüman. 20 Zeel rëb Jesús: ―Gunen loj gra ree bejn. Zianczi balün lod rucaagdiajg ree xtiidx Dios në lën dux yadooro' ree, lod rado'p dugra ree. Achet ni gunen ralan. 21 ¿Chexc zeel rniabdiidxil lon? Gunabdiidx loj ree bén bacaagdiajg ni rën, laa reeman na xhie gunen, laa reeman ragbee. 22 Chi rëbaman zian, tijb bén rajp ro' yadoo guin wëëz ro'man, rëbaman: ―¿Zian yadxi'l xtiidx bén rniabee guin ya? 23 Badxi' Jesús laan rëbaman: ―Bal xhie ni mal rën, guna xhienin. Per bal gunen zagdxe, ¿chexc zeel rguinl naj? 24 Dxel guidib naxiiman guxhaal Anás laaman loj Caifás, bén na̱j quijb bixhioz zojbloj. 25 Per Bëd sta za'man cucha'man rudëj guin. Abi' gunabdiidx reeman lojman, rëb reeman: ―¿Nid në lüj na̱j tijb ree xbejn bén guin ya? Badxi' Bëd laan rëbaman: ―A'n, ad xbejntaman naj. 26 Dxel tijb xmojs bixhioz zojbloj guin, bén na̱j lasa' bén gutü' Bëd guidiajg, rëbaman loj Bëd: ―¿Nid lüjn baguian ya za'nël laaman guia' ree yag olivos? 27 Rëb Bëd stijb guial ad nünbeetaman Jesús, loj hor zii gajc guridxa' tijb gui̱d. 28 Chi bani luyuj, bazanë reeman Jesús lidx Caifás, zinë reeman laaman lën xpalas gobernador Pilato. Per ree bén Israel guin ad guyut reeman lën palas guin, din par laa reeman bal niu reeman, ad nayatri reeman loj Dios, abi' ad nile't niajw reeman xche guialraw ni raw reeman pascw. 29 Zeel brii Pilato persi guneenëman laa reeman, rëbaman: ―¿Xhie been xin guie zeel zidnëdi laax guie? 30 Badxi' reeman laan rëb reeman: ―Bal najman benza'c, ad ziant nudnë'n laaman lojl. 31 Dxel rëb Pilato: ―Gol bignëx, gol been guialguxtis zi'c na̱j xleydi. Abi' rëb reeman: ―Per ad naca'tan guialrniabee yanabeen guiët bejn. 32 Zian gojc cumplid xtiidx Jesús chi bagojnman xhienaag guiëtaman. 33 Bayu Pilato lën palas guin, dxel gurejdxaman Jesús, gunabdiidxaman lojman rëbaman: ―¿Lüj na̱j xrey ree bén Israel ya? 34 Badxi' Jesúsan rëbaman: ―¿Lüjczi rniabdiidx lon ya o yu' ree ben ren na lojl zian? 35 Badxi' Pilato laan, rëbaman: ―¿Wen bén Israel naj ya? Bén ladx gajc reel con ree bixhioz rniabee bidnë lüj lon. ¿Xhie beenl? 36 Badxi' Jesúsan rëbaman: ―Guialrniabee ni ra'pan ad lojt guidxliuj zan, din bal loj guidxliuj zan, nia'pan bén nidijl ree chitëë niniaaz ree ben Israel naj. Per yan ad lojt guidxliuj guie za da guialrniabeen. 37 Dxel rëb Pilato lojman: ―¿Zë loj diidxan ya rey najl? Badxi' Jesús laan rëbaman: ―Reyqui naj, zi'c nal. Par zian goolan par zian tëë zialan loj guidxliuj guie zidgaguien ni na̱j diidxli, graczi ree bén zinal ni diidxli rucaagdiajg reeman ni rnien. 38 Dxel rëb Pilato: ―¿Xhiezanin na̱j diidxli? Chi gulox rëb Pilato zian, dxel briiman bigneenëman bén Israel ree stijb, rëbaman: ―Achet xguialquia xin guin radxejlan. 39 Per lëjt, xcostumbridi na̱j guial loj lanij pascw laa tijb bén yu' ladxguiib. Yan, ¿rëndi ya guslaan xreydi? 40 Dxel gurixdiaj ree bén Israel guin, rëb reeman: ―¡Ad laataman guslaal! ¡Zagdxeli baslaa Barrabás! Abi'za Barrabás guin béngubaanan.

19

1 Dxel gunabee Pilato gudijn ree suldad Jesús. 2 Abi' beenchaaw reeman coron guiëjch, badxe' reeman laan guijcaman, bascajcw reeman laaman tijb lajd xniaya's. 3 Dxel gubig reeman lojman, rëbgaj reeman: ―¡Guibanri xrey ree bén Israel! Dxel rëëzgaj reeman lojman. 4 Brii Pilato stijb, abi' rëbaman loj ree bén Israel guin: ―Gol baguiaa, gabën laax din gagbeedi, achet xguialquiax radxejlan. 5 Dxel brii Jesús, yu' coron guiëjch guin guijcaman, najcw tëëman lajd xnia guin. Abi' rëb Pilato: ―Laax guie. 6 Dxel bixhioz rniabee ree në ree bén rajp ro' yadooro' Jerusalén, chi baguiaa reeman laaman, guzuloj rbixdiaj reeman, rëb reeman: ―¡Bacaax loj crüjz! ¡Bacaax loj crüjz! Rëb Pilato loj reeman: ―Gol chinëx, lëjt gol bacaax loj crüjz, achet xtolix radxejlan. 7 Badxi' reeman laan rëb reeman: ―Laa tijb dux leyan yu', rëb lojn rayal guiëtix, guial nax najx Xi'n Dios. 8 Chi biguienman ni rëb reeman, mazri bidxebaman. 9 Bayuman lën palas guin zatijb, gunabdiidxaman loj Jesús rëbaman: ―¿Ban xin lüj? Per ad badxi't Jesús laan. 10 Zeel rëb Pilato: ―¿Nid zadxi'l ni rnin ya? ¿Nid ragbeel ya ca'n guialrniabee din gucan lüj loj crüjz o guslaan lüj ya? 11 Dxel rëb Jesús: ―Achetczi guialrniabee nitia'l bal id Dios nunee laan. Zianan zeel mazri zien xtol bén bidnë naj guie yu' guial lojl. 12 Diizd hor zii gajc raguiil Pilato mod, xhienaag guslaaman Jesús, per rbidxa' ree bén riga' yagaj, rëb reeman: ―¡Bal guslaal laax, ad najtil xmiw bén na̱j César! ¡Din chutëëz bén rajc rey rzuj contr César! 13 Chi biguien Pilato rëb reeman zian, gunabeeman babëë reeman Jesús, dxel gurej lod rniabeeman, lod la Gabata con diidx hebreo, rën guiëban Lod yu' ree guiaj. 14 Chi guixiez gal lanij pascw, cost garol dxej rëb Pilato loj ree bén Israel: ―¡Laa xreydi guie! 15 Per rbidxa' reeman rëb reeman: ―¡Guiëtix! ¡Guiëtix! ¡Bacaax loj crüjz! Gunabdiidx Pilato loj reeman, rëbaman: ―¿Wen gucan xreydi loj crüjz ya? Badxi' ree bixhioz rniabee laan, rëb reeman: ―Achut dux reyan yu', tijbzi César. 16 Dxel bayü Pilato Jesús loj ree suldad din gucaa reex laaman loj crüjz, dxel zinë reex laaman. 17 Briinë reex Jesús, nüüman crüjz, binë reex laaman lod la Calaver, diidx hebreo lan Gólgota. 18 Ni bacaa reex laaman loj crüjz con zatio'p ree bejn, tijb gaj reeman ca cwë'man. 19 Gunabee Pilato cwa lejtr guijc crüjz guin, rëban: “Jesús bén Nazaret, xrey ree bén Israel.” 20 Dád zien ree bén Israel biil lejtr guin, guial na̱j luar zii gajxh loj ciuda, guiáad lejtr guin can con diidx hebreo, diidx latin në diidx grieg. 21 Rëb ree bixhioz rniabee ree bixhioz loj Pilato: ―Ad rucaal: “Xrey ree bén Israel”, bacaa: “Bén rëb na̱j xrey ree bén Israel.” 22 Badxi' Pilato laan rëbaman: ―Ni ma bacan yaya'nan zian. 23 Chi gulox bacaa ree suldad guin Jesús loj crüjz, baca' reex xabaman, gudixya' reexan tajp la', dxel cwa' reex tib la' gajn. Në stijb xabaman cwa' reex, ad nadiibtan, najcchaaw diizd yëjnan xt guia'n, najn tijbzi lajd. 24 Zeel rëb loj lasa' reex: ―Ad zarooxt reen, yadxi't ree suert din guidoon chu yayal laan. Zian gojc cumplid ni ca loj xtiidx Dios, rëban: “Bala' reeman da xaban, gudxijt tëë reeman suert guijcan.” Zeel been ree xinsuldad guin zian. 25 Gajxh cwë' crüjz ca Jesús za' xniaaman con xbël xniaaman con Li xbéngunaa Cleofas con Li bén gunee reeman Magdalena. 26 Chi baguiaa Jesús xniaaman, za' tijb ree xbejnman cwë'man, bén rën da'taman, rëb loj xniaaman: ―Na, laa xi'nl yagaj. 27 Dxel rëb loj xbejnman: ―Laa xniaal yagaj. Diizd dxej zii bignëman xniaa Jesús lidxaman. 28 Chi gulox rëb Jesús zian, gogbeeman ma gojc gran cumplid. Per din gac cumplid ni ca loj xtiidx Dios, rëbaman: ―Re'can nijs. 29 Yagaj za' tijb re yu'n vin no'chan vinagr, zeel bagajdx reex tijb xiil loj vin guin, bacaa reexan loj tijb yag, dxel badxig reexan ro'man. 30 Chi ma gu'man laan, dxel rëbaman: ―Ma gojc gran cumplid. Dxel basajb lojman luyuj, güjtaman. 31 Ma cayüjn ree bén Israel porvinid din guixiez gal lanij pascw. Zeel ad guyënt reeman naya'n ree cuerp guin loj crüjz dxej raziiladx reeman, din dád rajp reeman dxej guin respejt. Zeel biguiedx reeman loj Pilato din nabeeman qui'ch ree suldad guin xdxijt ree bén ca loj crüjz din guiët reeman yalet tëë reex laa reeman. 32 Zeel wej reex. Yaloj gudi'ch reex xdxijt bén ca cwë' Jesús, dxel gudi'ch reex xdxijt bén ca stiblad cwë'man. 33 Chi gubig reex lod ca Jesús, baguiaa reex ma güjtaman, zeel ad gudi'cht reex xdxijtaman. 34 Per tijb suldad guin guxhal ladaman con guiib ca'x, dxel briin rejn con nijs. 35 Bén rü diidx guie baguiaaman, zeel ragbeeman najn diidxli, rüman laan din në lëjt chililadx. 36 Gra nine gojc din gac cumplid ni ca loj xtiidx Dios, rëban: “Ad rayalt gach xdxijt xiildoo.” 37 Stiblajt rëb: “Guguiaa reeman bén guxhalnë reeman guiib lad.” 38 Chi gulox gojc zian, wej Xiëb, bén zëëd guiedx la Arimatea, bignabaman diidxbee loj Pilato din yaletaman xcuerp Jesús din chiquie'chaman laaman. Në bén la Xiëb bililadx Jesús, per ralanzi, guial bidxebaman bejn ree. Badëëd Pilato diidxbee, zeel wej Xiëb bigxiiman xcuerp Jesús. 39 Në Nicodemo wej, bén bigneenë Jesús tijb guxhin, bidxinnëman cost gajlbichii quil ni la mirra, no'chan aloe, rureen nejxh. 40 Bagajdxnë reeman laan lajd batüüb reeman laaman, zi'c rüjn ree bén Israel chi ruquie'ch reeman bengüt. 41 Lod cwa Jesús loj crüjz naga' tijb guidxliuj lod yu' ree yag. Yagaj na̱j tijb baa cüb lod achutczi waguie'ch. 42 Yagaj gudixh reeman xcuerpaman, guial najn gajxh, guial ma suloj tëë dxej raziiladx reeman.

20

1 Chidumingw chi sta nacayri, wej María Magdalena ro' xbaa Jesús, abi' baguiaaman ma bisüd guiaj nayaaw ro' baa guin. 2 Dxel ruxüünman wejman lod za' Simón Bëd con zatijb xbejn Jesús, bén rën da'taman, abi' rëbaman loj reeman: ―Ma zinë reeman xcuerp Dad Jesús, banczi bigsa'n reeman laaman, achutri laaman yu' lën baa guin. 3 Abi' brii Bëd con bén guin, zë reeman ro' baa guin. 4 Grop reeman ruxüün zë reeman. Per bén guin mazri ruxüünman guial loj Bëd, abi' yaloj laaman bidxin ro' baa guin. 5 Dxel gudixlojman baguiaaman vend bidüüb Jesús, per ad guyutaman. 6 Dxelri bidxin Simón Bëd, abi' guyuman lën baa guin. Nëgajcaman baguiaa vend guin 7 Baguiaa tëëman lajd bidüüb guijc Jesús, nadüüban naga'n lood ren, ad naga'tan tijbzi con vend guin. 8 Dxel guyu bén bidxin ro' baa guin yaloj, baguiaaman ni goc, zianz bililadxaman, 9 guial gocli ad bignia't reeman ni ca loj xtiidx Dios guial yaban Jesús loj ree bengüt. 10 Dxel zia ree xbejn Jesús lidx reeman. 11 Per Li baya'nman ro' baa guin cayoonman. La'tgaj cayoonman gudixlojman lën baa guin, 12 abi' baguiaaman tio'p ree anjl, najcw reeman lajd naquich, zojb reeman lod go't xcuerp Jesús, tijbaman lod go't guijcaman, zatijbaman lod go't guia'man. 13 Dxel gunabdiidx ree anjl guin lojman, rëb reeman: ―Na, ¿chexc zeel roonl? Badxi'man laan rëbaman: ―Guial zinë reeman xcuerp Dad Jesús, abi' banczi guin bigsa'n reeman laaman. 14 Guloxzi rëbaman zian, badxi' lojman baguiaaman za' Jesús yagaj, per ad bayünbeetaman laaman. 15 Dxel gunabdiidx Jesús lojman, rëbaman: ―Na, ¿chexc zeel roonl? ¿Chu raguiilil? Gunaladx Li, bén rajp lod yu' ree yagnejxh guinan, abi' rëbaman: ―Dad, bal lüj binë xcuerpaman, guna ban bigsa'nl laaman din chigxin laaman. 16 Zianz rëb Jesús lojman: ―¡Li! Dxel badxi' loj Li, rëbaman lojman con diidx hebreo: ¡Rabuni! ―rën guiëban Mextr. 17 Rëb Jesús lojman: ―Ad guqui'l naj, din gadan yaya' loj da Dadan. Per baguiaj biguiedx loj ree da bejnan guial yaya' loj da Dadan bén naj gajc xDadidi, loj da Diosan bén naj gajc xDiosidi. 18 Dxel wej María Magdalena bicojnman xbejn ree Dad Jesús guial baguiaaman laaman, bagojn tëëman laa reeman gra ni rëbaman lojman. 19 Chidumingw zii gajc chi ma caxhin, bado'p ree xbejn Jesús, nayaaw ro' port yu' reeman guial rdxeb reeman guxtis Israel ree. Dxel balüüloj Jesús galay reeman, rëbaman loj reeman: ―Yabe'cdxe Dios luxdoodi. 20 Chi ma gulox rëbaman zian, balüü yaaman loj reeman në cwë'lënman, abi' laa reeman dád babaa reeman baguiaa reeman Dad Jesús. 21 Dxel rëbaman loj reeman zatijb: ―Yabe'cdxe Dios luxdoodi. Zi'c guxhaalaman naj, ziangajc rxhialan lëjt. 22 Dxel balüjbaman guijc reeman, rëbaman: ―Gol gubajnnë xSprijt Dios. 23 Bén güündi perdon xtol, chiquied xtol reeman, guiáad bén ad züjntidi perdon xtol, yaya'nnë xtol reeman. 24 Tumajs, bén rniee reeman Cwajch, achut laaman za' chi balüüloj Jesús loj ree xbejnman. 25 Chi rëb reeman loj Tumajs: ―Ma baguiaan Dad Jesús. Dxel rëbaman: ―Bal id zuguian yaaman lod wëëz clav, abi' bal id zagu' da bacwënan lod wëëz clav guin, bal id zagu' tëë yan cwë'lënman lod bidxeelguijdx, ad zaliladxtan. 26 Chi goc xhujn dxej, badxajg lasa' ree xbejn Jesús zatijb, per dxel në Tumajs za'në laa reeman, nayaaw ruyu yu' reeman. Per balüüloj Jesús galay reeman, rëbaman loj reeman: ―Yabe'cdxe Dios luxdoodi. 27 Dxel rëbaman loj Tumajs: ―Badxe' xbacwënl guie, baguiaa ree yan, banee yaal guie badxe'n cwë' lënan. Ad runawëëgril, bililadx. 28 Dxel rëb Tumajs lojman: ―¡Da Dadan, da Diosan! 29 Abi' rëb Jesús lojman: ―Rliladxil guial ma baguiaal naj. Xiquilbaa ree bén rliladx, majs ad waguiaat reeman naj. 30 Zienri ree milagr been Jesús loj ree xbejnman, ni ad cwat ree loj gui'ch guie. 31 Sa'n nine ree cwa reen din chililadxidi guial Jesús na̱j Cristo, Xi'n Dios, abi' guial chililadxidi laaman guibandi tiblayaa con Dios.

21

1 Chi gudëd gojc zian, balüüloj Jesús loj ree xbejnman zatijb, ro' nijs na̱j gajxh guiedx Tiberias. Ze balüülojman: 2 Chi nadxag lasa' ree Simón Bëd con Tumajs bén rniee reeman Cwajch, në Natanael bén za Caná guiedx riga' niz Galilea, con ree xi'n Zebedeo, nëtëë zatio'p xbejn Jesús, 3 dxel rëb Bëd loj reeman: ―Gan chignaazan bëjl. Badxi' reeman laan rëb reeman: ―Në dunujn yadxoo. Abi' wë'p reeman loj barcw zë reeman, per guxhin zii achutczi bëjl gunaaz reeman. 4 Chi ma cayreguiaal, bidxin Jesús ro' nijs guin, per ad bayünbeet reeman laaman. 5 Dxel gunabdiidxaman loj reeman rëbaman: ―Xi'n, ¿nid chu bëjl wanaazidi ya? Badxi' reeman laan rëb reeman: ―Achutczi. 6 Abi' rëb Jesús loj reeman: ―Gol bazaal xguijxhidi xladbee barcw guin din guiniaazidi bëjl. Zian been reeman, abi' ad rajctri rabëë reeman guijxh guin, guial dád zien bëjl yu' lojn. 7 Dxel xbejn Jesús, bén rën da'taman, rëbaman loj Bëd: ―¡Dad Jesúsan! Biguiejnzi Simón Bëd zian, laa got gajc xabaman ni gulëëman, abi' gutiajsaman lojnijs guin. 8 Guiáad zaxho'p xbejn Jesús loj barcw guin badxin reeman ro' nijs guin, coobyuj reeman guijxh guin, guidxan bëjl, guial zi'ctzi tibgayuu mejtr ryaadx yadxin reeman ro' nijs guin. 9 Chi baguiajt reeman, baguiaa reeman laa guij ma riga', dxiib tijb bëjl lojn, në guiadxtil riga' yagaj. 10 Dxel rëb Jesús loj reeman: ―Gol tanë tio'p choon bëjl gunaaz nejzidi. 11 Dxel wë'p Bëd loj barcw guin, guxoobyujman guijxh guin guidxan bëjl naroob ree, xt ro' nijs guin. Tibgayuu tü'pchiibichoon bëjl yu' lojn. Abi' majsi zienb, per ad goxya'tan. 12 Zianz rëb Jesús loj reeman: ―Gol guda din gawidi rsiil. Abi' ni'qui tijb reeman ad rayaxt guiniabdiidx chu bénan, guial ragbee reeman Dad Jesúsan. 13 Dxel gubigaman cwa'man guiadxtil badëëman loj reeman, ziangajc beenman con bëjl guin. 14 Ni ne bayon volt balüüloj Jesús loj ree xbejnman chi babanman loj ree bengüt. 15 Chi gulox gudaw Jesús con ree xbejnman, gunabdiidxaman loj Simón Bëd, rëbaman: ―Simón, xi'n Waj, ¿walil ya rënl naj mazri guial loj ree bén guie? Badxi' Bëdan rëbaman: ―Dad, ragbeequil rënan lüj. Zeel rëb Jesús: ―Gunaj ree da xiildoon. 16 Abi' rëb Jesús zatijb: ―Simón, xi'n Waj, ¿walil ya rënl naj? Badxi' Bëdan rëbaman: ―Dad, ragbeequil rënan lüj. Zeel rëb Jesús: ―Gunaj ree da xiilan. 17 Bayon volt gunabdiidx Jesús rëbaman: ―Simón, xi'n Waj, ¿rënl naj ya? Dád guyunaya Bëd, guial ma gojc choon volt gunabdiidx Jesús bal rënman laaman. Zianz rëb Bëd: ―Dad, lüj ragbee graczi, ragbeel rënan lüj. Zeel rëb Jesús: ―Gunaj ree da xiilan. 18 Diidxliczi ganin, chi goquil xinguiag, rajcw xabil persi rejl lod rënl. Per chi ma najl bengol, gusli xu'quil din guscajcw ben ren xabil din chinë reeman lüj lod ad rëntil chel. 19 Rëb Jesús zian guial basignia'man xhienaag guiët Bëd, din güünbee ree bejn Dios. Dxel rëb Jesús: ―Tanal naj. 20 Chi badxi' loj Bëd, baguiaaman laa bén rën da't Jesús zinal laa reeman. Laaman gure cwë' Jesús chi gudaw reeman xche, gunabdiidx tëëman loj Jesús rëbaman: “Dad, ¿chu yayü lüj?” 21 Chi baguiaa Bëd laaman, gunabdiidxaman loj Jesús rëbaman: ―Dad, laadxza xin guin, ¿xhie saquix? 22 Badxi' Jesúsan rëbaman: ―Bal rënan guibanx xt yaguialan, ¿xhie güünl? Lüj tanal naj. 23 Zianan zeel bire'ch diidx loj ree xbejnman guial ad zëjtt bén guin. Per ad ziantan rëb Jesús, rëbaman: “Bal rënan guibanx xt yaguialan, ¿xhie güünl?” 24 Bén guin gajcan rü diidx xcwent ree nine, laa tëëman bacaa laan, rayagbee tëë ree rüman diidxli. 25 Dád zien ree ni been Jesús, bal nitia tijb gajn, wed ad zadaant loj guidxliuj niu ree libr ni niajc.