Aceh Bible | Unicode | alkitab bahasa aceh

The Old Testament of the Holy Bible

1 Nibak awaiphon, watée Po teu Allah geucebta álam seumeusta, Nibak awaiphon, watée Po teu Allah ... álam seumeusta, atawa Watée Po teu Allah phon that geucebta álam seumeusta, atawa Nibak awaiphon Po teu Allah geucebta álam seumeusta. 2 bumoe nyoe gohlom meurupa, dan mantong kéng keueng hana meuteuntée. Laôt luwah nyang meualon, habéh teutob peue-peue nyang na, dan saboh nyan seupôt hana deuh sapeue, teuma kuasa Po teu Allah meugrak-grak ateueh ié. 3 Po teu Allah meufeureuman, "Beujeuet kheueh trang!" Laju na trang. 4 Po teu Allah galak that watée geukalon nyan. Laju geupeu aséng trang nyan nibak seupôt, 5 dan laju geuboh nan trang nyan "Uroe" dan seupôt nyan "Malam". Óh habéh malam, jiteuka kheueh beungoh. Nyan kheueh uroe nyang keuphon. 6 Óh lheueh nyan Po teu Allah meufeureuman, "Beujeuet kheueh saboh kubah mangat jeuet teuweuek ié nyan dua bagian, dan teuteun ié nyan lam dua boh teumpat nyang aséng-aséng." Laju hainyan pih teujadi. Meunan kheueh Po teu Allah geupeu jeuet kubah nyang teupeu aséng ié nyang na dimiyueb kubah nyan nibak ié nyang na di ateueh nyan. 8 Kubah nyan geuboh nan "Langét". Malam habéh jiteuka kheueh beungoh, nyan kheueh uroe nyang keudua. 9 Óh lheueh nyan Po teu Allah meufeureuman lom, "Bah kheueh ié nyang na dimiyueb langét ji ile ubak saboh teumpat, sampoe tanoh deuh teukalon." Teuma hainyan pih teujadi. 10 Po teu Allah geuboh tanoh nyan "Darat", dan ié nyang meugumpôi nyan geuboh nan "Laôt". Dan Po teu Allah galak that watée geukalon hai nyan. 11 Po teu Allah meufeureuman lom, "Bah kheueh tanoh jipeuteubiet meubagoe rupa seunaman, na kheueh jeunéh nyang jipeuhase aneuk dan jeunéh nyang jipeuhase boh-boh kayée." Teuma hainyan pih teujadi. 12 Meunan kheueh jeuet jih, tanoh laju jipeuteubiet meubagoe rupa seunaman. Dan Po teu Allah galak geukalon hai nyan. 13 Malam habéh jiteuka kheueh beungoh. Nyan kheueh uroe nyang keu lhée. 14 Óh lheueh nyan Po teu Allah meufeureuman lom, "Beuna kheueh meubagoe rupa beunda trang di langét keu jipeutrang bumoe, keu jipeuaséng uroe ngon malam, dan keu teutunyok saát pon uroe, thon, dan uroe raya agama." Teuma hainyan pih teujadi. 16 Meunan kheueh Po teu Allah geupeujeuet bandua boh beunda trang nyang rayeuk, atranyan na kheueh mata uroe nyang jikuasa uroe, dan buleuen keu jikuasa malam; seulaén nibak nyan geupeujeuet teuma meubagoe rupa bintang. 17 Po teu Allah laju geukeubah beunda-beunda trang nyan ateueh langét keu jipeutrang bumoe, 18 keu jikuasa uroe ngon malam, dan keuteupeu aséng uroe trang nibak seupôt. Dan Po teu Allah galak that watée geukalon hainyan. 19 Malam habéh, jiteuka kheueh beungoh. Nyan kheueh uroe nyang keupeuet. 20 Óh lheueh nyan Po teu Allah meufeureuman, "Bah kheueh lam ié beuna meubagoe rupa makhluk udeb, dan di udara meubagoe rupa cicém po." 21 Teuma Po teu Allah laju geucebta beulatang-beulatang rayeuk nyang udeb di laôt, dan mubagoe jeunéh makhluk nyang udeb lam ié, meunan cit meubagoe jeunéh cicém. Dan po teu Allah galak that watée geukalon hainyan. 22 Po teu Allah geubri beureukat ubak mandum nyan deungon cara geubri peurintah ubak makhluk nyang udeb lam ié mangat meu aneuëk cucoe dan peunoh lam ié laôt, dan ubak meubagoe cicém mangat meutamah le. 23 Habéh malam teuka kheueh beungoh. Nyan kheueh uroe nyang keulimong. 24 Óh lheueh nyan Allah meufeureuman lom, "Bah kheueh bumoe jipeuna mubagoe jeunéh beulatang darat, nyang seu-iet dan nyang kleut, nyang rayeuk dan nyang ubit." Dan hainyan pih teujadi. 25 Meunan kheueh Po teu Allah geukalon mandum nyan dan Gobnyan galak geukalon nyan. 26 Óh lheueh nyan Po teu Allah meufeureuman lom, "Jinoenyoe tanyoe tapeujeut manusia nyang teuma jeuet lagée geutanyoe dan saban lagée geutanyoe. Jihnyan teuma jikuasa ateueh mandum eungkot, mandum cicém, dan banmandum beulatang nyang laén, bah kheueh nyang seu-iet meunan cit nyang kleut, bah kheueh nyang rayeuk meunan cit nyang ubit." 27 Meunan kheueh Po teu Allah geucebta manusia, dan geupeujeuet manusia nyan lagée Gobnyan keudroe. Geucebta awaknyan agam ngon inong. 28 Óh lheueh nyan geubri beureukat ubak awaknyan deungon geupeugah lagée nyoe "Meu aneuëk cucoe kheueh nyang le, mangat aneuëk cucoe gata jipeupeunoh ateueh bumoe nyoe dan jikuasa bumoe nyoe. Gata Ulôn bri tugaih gata useuha banmandum eungkot, mandum cicém, dan banmandum beulatang laén nyang kleut. 29 Keupeunajoh gata Ulôn bri keu gata meubagoe jeunéh seunaman nyang jipeuhase mubagoe jeunéh pade dan boh-boh kayée. 30 Teuma ubak mandum cicém dan beulatang kleut nyang laén, Ulôn bri naleueng dan sinaman nyang meuôn sibagoe peunajoh jih." Teuma hainyan pih teujadi. 31 Po teu Allah geukalon peue-peue mantong nyang ka geupeujeuet nyan, dan Gobnyan galak lumpah na. Malam habéh dan teuka kheueh beungoh. Nyan kheueh uroe nyang keunam.

Keujadian 2

1 Teuma seuleusoe kheueh geucebta banmandum álam seumeusta. 2 Bak uroe nyang keutujoh Po teu Allah ka geupeuseuleusoe banmandum buet Geuh nyan, óh lheueh nyan laju Gobnyan geupiôh. 3 Teuma geubri kheueh beureukat keu uroe nyang keutujoh nyan dan geupeujeuet uroe nyan sibagoe uroe nyang khusos, sabab bak uroe nyan Allah geupiôh óh ka lheueh geupeuseuleusoe mandum buet Gobnyan. 4 Nyan kheueh riwayat teucebta álam seumeusta. Watée TUHAN Allah geupeujeuet álam seumeusta, 5 gohlom na bijéh nyang ka meutarôk dan gohlom na seunaman ateueh rhueng bumoe, sabab Allah gohlom geupeutreun ujeuen dan gohlom na ureuëng nyang pubuet tanoh nyan. 6 Teuma ié ka jipeuphon teubiet nibak miyueb dan laju ji-ile ateueh bumoe. 7 Óh lheueh nyan TUHAN Allah laju geucok bacut tanoh, tanoh nyan laju geupeugét lagée sidroe manusia, óh lheueh nyan laju geuyueb nafáh jih lam ruhuéng idong mangat udeb; óh lheueh nyan udeb kheueh manusia nyan. 8 Óh ka lheueh nyan TUHAN Allah geupeugét teuma taman di Eden, disiblaih utimu, lam taman nyan laju geukeubah manusia nyang ka lheueh geupeujeuet nyan. 9 TUHAN Allah laju geupeutimoh meubagoe rupa bak kayée nyang gét-gét, nyang jipeuhase boh kayée nyang gét. Bak teungoh taman timoh kheueh bak kayée nyang teubri udeb, dan bak kayée nyang jibri peungeutahuan keuhai nyang brok ngon nyang jeuhet. 10 Na saboh krueng ié ji-ile nibak Eden, jipeubasah taman nyan; dan diluwa Eden krueng nyan meucabeueng peuet boh cabeueng. 11 Nyang phon nan jih Pison; krueng nyan ji-ile jikeulileng tanoh Hawila. 12 Nibak teumpat nyan na meuteumé méuh aseuli meunan cit deungon reumpah-reumpah nyang mangat bée nyang payah that meuteumé, meunan cit deungon batée-batée peumata. 13 Krueng nyang keudua nan jih Gihon; ié jih ji-ile jikeulileng tanoh Kus. 14 Krueng nyang keulhée nan jih Tigris ji-ile siblaih utimu Asyur. Dan Krueng nyang keu peuet nan jih Efrat. 15 Óh lheueh nyan TUHAN Allah laju geukeubah manusia nyan di taman Eden mangat jipeubuet dan jipeulara taman nyan. 16 Allah meufeureuman ubak manusia nyan, "Gata jeuet gata pajoh peue-peue mantong boh kayée nyang na lam taman nyoe, 17 nyang hán jeuet gata pajoh na kheueh nibak kayée nyang jibri peungeutahuan keuhai nyang gét dan nyang jeuhet. Boh kayée nyan hana jeuet gata pajoh; meunyoe gata pajoh cit, gata pasti maté bak uroe nyan cit teuma." 18 Óh lheueh nyan TUHAN Allah meufeureuman lom, "Hana gét manusia udeb keudroe. Ulôn teuma Lôn peujeuet rakan keujih nyang sisuai mangat jeuet keupeubantu jihnyan." 19 Teuma Gobnyan laju geucok tanoh bacut dan geupeugét laju mubagoe jeunéh beulatang darat dan beulatang nyang po di manyang. Banmandum nyan geuba lé Po teu Allah ubak manusia nyan mangat geukalon peue nan jih nyang gét teuboh keu nan beulatang-beulatang nyan. Nyan kheueh asaiphon beulatang di darat dan di manyang ka meuteumé nan jih maséng-maséng. 20 Meunan kheueh manusia nyan geubri nan ubak beulatang bah kheueh nyang na udeb di darat meunan cit nyang udeb di manyang. Teuma lamkawan beulatang nyan hana meusaboh pih nyang jeuet geucok keurakan dan nyang jeuet keu peubantu gobnyan. 21 Dan TUHAN Allah laju geupeuéh manusia nyan sampoe teungét lagée ureuëng pangsan, teungoh mangat that teungét manusia nyan, TUHAN Allah laju geupeuteubiet sikrék tuleueng rusôk manusia nyan, inciek luka nyan laju geutôb ngon asoe. 22 Nibak tuleueng rusôk nyan lé TUHAN Allah laju geupeujeuet sidroe ureuëng inong, óh lheueh nyan laju geuba lé Allah ubak manusia nyan. 23 Dan jipeugah kheueh lé manusia nyan, "Nyoe pat jih, ureuëng nyang saban lagée ulôn -- tuleueng nibak tuleueng lôn, dan asoe nibak asoe lôn. Ulôn boh nan jihnyoe inong, sabab jihnyan teucok nibak ureuëng agam." 24 Nyang kheueh sabab jih ureuëng agam jitinggai ma ngon yah jih, dan meusaboh ngon peurumoh jih, laju bandua jihnyan ka jeuet keusaboh. 25 Ureuëng agam ngon ureuëng inong nyan teulon, teuma nibak awaknyan hana meurasa malée.

Keujadian 3

1 Uleue na kheueh beulatang nyang paleng lisek meunyoe teubandeng ngon beulatang-beulatang laén nyang geucebta lé TUHAN Allah. Uleue nyan jitanyong bak ureuëng inong nyan, "Peu kheueh biet-biet Allah geutam gatanyoe mangat bék awaknyoe pajoh mubagoe rupa boh kayée nyang na lam taman nyoe?" 2 "Kamoe jeuet kamoe pajoh banmandum boh kayée nyang na lam taman nyoe," jaweueb ureuëng inong nyan, 3 "nyang hán jeuet kamoe pajoh na kheueh boh bak kayée nyang na bak teungoh-teungoh taman nyoe. Allah geutam bak kamoe mangat bék kamoe pajoh boh kayée nyan, bék teuk án kamoe pajoh boh kayée nyan kamoe mat mantong pih hán jeuet; meunyoe hainyan teutab kamoe peubuet, kamoe teuma maté." 4 Jijaweueb lé uleue nyan, "Nyan hana beutôi; gatanyoe hana maté. 5 Allah geupeugah lagée nyan sabab Gobnyan geuteupeue meunyoe gata pajoh cit boh kayée nyan, pikeran gata laju teuhah; gata teuma jeuet lagée Po teu Allah dan gata tateupeue peue nyang gét dan peue nyang jeuhet." 6 Ureuëng inong nyan laju jikalon bahwa bak kayée nyan lagak that, dan boh kayée nyan leumah jih mangat that meunyoe teupajoh. Dan laju teupike lam até jih pakriban gét jih meunyoe jeuet keu ureuëng árif. Ngon sabab nyan laju jipot boh kayée nyan, laju jipajoh, jibri cit ubak lakoe jih, dan di po lakoe pih laju jipajoh. 7 Hana treb óh ka lheueh jipajoh boh kayée nyan, pikeran awaknyan teubuka dan awaknyan barô kheueh jitée droe bahwa awaknyan teulon hana meupeukayan. Sabab nyan kheueh awaknyan laju jitôb tuboh droe jih maséng-maséng ngon ôn ara nyang ka awaknyan manyuem. 8 Óh ka seupôt uroe teudeungoe bak awaknyan TUHAN Allah teungoh geujak-jak lam taman, dan awaknyan pih laju jimusöm dilikot-likot bak kayée mangat bék geungieng lé TUHAN. 9 Dan TUHAN Allah laju geutawök ubak ureuëng agam nyan, "Dipat kheueh gata?" 10 Jijaweueb lé ureuëng agam nyan lagée nyoe, "Na ulôn deungoe Droeneueh na lam taman; ulôn teumakot, nyang kheueh sabab jih ulôn musöm sabab ulôn teulon hana meupeukayan." 11 "Soe nyang peugah bak gata bahwa gata teulon?" Allah geutanyong lom, "Peu kheueh ka gata pajoh boh kayée nyang Ulôn tam bak gata nyan?" 12 Jijaweueb lé ureuëng agam nyan, "Ureuëng inong nyang Droeneueh bri keu ureuëng nyang peungon ulôn, jih kheueh nyang bri boh kayée nyan keu ulôn, dan laju lôn pajoh boh kayée nyan." 13 TUHAN Po teu Allah laju geutanyong bak ureuëng inong nyan, "Keupeue gata peubuet lagée nyan?" Jaweueb ureuëng inong nyan, "Ulôn ka jipeungéut lé uleue, sampoe ulôn pajoh boh kayée nyan." 14 Óh lheueh nyan TUHAN Allah geupeugah ubak uleue nyan, "Gata teuma teuhuköm sabab buet gata nyan; nibak beulatang peue mantong nyang laén, nyang keunong kutok na kheueh gata nyang harôh gata tanggong kutokan nyoe: Phon saát nyoe gata teuma gata meu-éue ngon pruet gata, dan gata pajoh abée siumu udeb gata. 15 Gata ngon ureuëng inong nyan sabe meumusoh, keuturonan inong nyan dan keuturonan gata sabe jimeumusoh. Keuturonan inong nyan teuma jipeurumok ulée gata, dan gata teuma gata kab tumet awaknyan." 16 Dan TUHAN laju meufeureuman bak ureuëng inong nyan, "Ulôn teuma Lôn tamah sakét ubak gata watée gata mume dan sampoe bak watée gata peulahé aneuëk. Teuma bahpi lagée nyan, gata teutab mantong beureuhi keu lakoe gata, dan gata teutab gata tundok ubak lakoe." 17 Dan ubak ureuëng agam nyan TUHAN meufeureuman lagée nyoe, "Sabab gata tadeungoe peue nyang jipeugah lé peurumoh gata boh kayée nyang ka Ulôn tam bék gata pajoh ka gata pajoh. Sabab buet gata nyan, teukutok kheueh tanoh. Gata harôh meukeureuja brat siumu udeb gata mangat tanoh nyoe na hase keu peunajoh gata. 18 Tamah meuduro teuma jipeuhase lé tanoh nyoe keu gata, dan seunaman nyang timoh keudroe teuma jeuet keupeunajoh gata. 19 Gata teuma tamubuet ngon reuoh reuah sampoe meureuoh keu gata peusaneut tanoh nyoe sampoe na hase, sampoe gata gisa ubak tanoh, sabab nibak tanoh gata teupeujeuet. Gata teupeujeuet nibak tanoh dan teuma tawoe ubak tanoh." 20 Nabi Adam geuboh nan peurumoh geuh nyan Siti Hawa, kareuna ureuëng inong nyan jeuet keu ma banmandum umat manusia. 21 Dan TUHAN Allah laju geupeugét peukayan nibak kulét beulatang keu Nabi Adam dan siti Hawa, óh lheueh geupeugét peukayan nyan laju geupeusok bak awaknyan. 22 TUHAN Allah meufeureuman, "Jinoenyoe manusia ka jeuet lagée geutanyoe dan kana iéuleumé peungeutahuan keuhai nyang gét dan nyang jeuhet. Ngon lagée nyan peureulée that teutam bék jipajoh boh kayée nyang teubri udeb, mangat jihnyan hana udeb siumu masa." 23 Dan TUHAN Allah laju geu use manusia nyan nibak lam taman Eden dan geuyue laju ubak awaknyan mangat jimubuet bak tanoh teumpat asai jih nyan. 24 Óh lheueh nyan, disiblaih utimu taman nyan nibak keue pintoe rot tamong, TUHAN Allah laju geukeubah kerub-kerub, dan sikrék peudeueng meu apui nyang meuputa jeub-jeub sagoe, keu jijaga rot jak ubak bak kayée nyang jibri udeb nyan. Deungon lagée nyan, hana meusidroe pih jeuet jitamong dan jipeurab bakbinéh bak kayée nyan.

Keujadian 4

1 Nabi Adam laju geumeusituboh ngon siti Hawa, peurumoh geuh nyan, dan inong nyan pih mume. Óh trok bak uroe laju lahé sidroe aneuëk agam dan laju geupeugah lé Nabi Adam, "Ngon tulông TUHAN ulôn ka meuteumé sidroe aneuëk agam." Dan laju geuboh nan aneuëk geuh nyan Kain. 2 Óh lheueh nyan siti Hawa geupeulahé lom sidroe teuk aneuëk agam, geuboh nan aneuëk nyan Habel. Habel jeuet keutukang rabe bubiri, seudangkan Kain jeuet keusidroe peutani. 3 Na meupadub watée teuma óh lheueh nyan Kain laju jicok siladum nibak hase seunaman jih jijak peuseumah laju ubak TUHAN. 4 Dan Habel jicok teuma aneuëk bubiri nyang tuha nyang na lam kawan bubiri jih nyan, laju jisie, laju jipeuseumah jeumba nyang paleng gét ubak TUHAN. TUHAN galak that ubak Habel dan peue nyang ka jipeuseumah nyan, 5 teuma nyang jipeuseumah lé Kain geutulak. Kain beungéh lagoena, ié muka jih seudhok that. 6 Dan meufeureuman kheueh TUHAN ubak Kain, "Pakon gata beungéh? Dan pakon ié muka gata seudhok? 7 Meunyoe gata tapeubuet nyang jroh, pasti gata teuseungeh; teuma meunyoe gata tapeubuet jeuhet, desya ka jipreh-preh jikeuneuk tamong lam até gata. Desya jikeuneuk kuasa droe gata, teuma gata harôh gata peutaloe jihnyan." 8 Dan Kain laju jipeugah ubak Habel, adoe jihnyan, "Jak geutanyoe tajak u lampôh." Watée awaknyan ka trok keunan, Kain laju jiseurang dan jipoh maté Habel adoe jih nyan. 9 TUHAN meufeureuman ubak Kain sira geutanyong, "Hei Kain, dipat Habel adoe gata nyan?" Jijaweueb lé Kain, "Hana lôn tuho. Peu kheueh harôh lôn jaga adoe lôn nyan?" 10 Dan TUHAN meufeureuman lom, "Keupeue gata peubuet hai nyang lumpah laknat nyan? Darah adoe gata jimeuhôi Ulôn nibak tanoh, lagée su ureuëng nyang klik jilakée balaih. 11 Gata ka teukutok sampoe hana jeuet le gata mubuet bak tanoh. Tanohnyan ka jiuét darah adoe gata, siulah-ulah jipeuhah babah jih keu jiteurimong darah adoe gata watée gata poh maté adoe gata nyan. 12 Meunyoe gata tapula seunaman, bak tanoh nyang gata pula nyan hana jibri hase sapeue; gata teuma jeuet keu ureuëng peungeumbara dan hana teumpat tinggai ateueh rhueng bumoe nyoe." 13 Teuma jipeugah lé Kain ubak TUHAN "Huköman nyang Droeneueh peurhot ateueh lôn nyan brat lumpah na, ulôn hana ek lôn tanggong huköman nyang brat nyan. 14 Droeneueh ka neu-use ulôn nibak tanoh nyoe, jiôh nibak Droeneueh. Ulôn teuma jeuet keu ureuëng peungeumbara nyang hana teumpat tinggai ateueh rhueng bumoe, dan ulôn teuma jipoh maté lé soe mantong nyang meurumpok ngon ulôn." 15 Teuma TUHAN meufeureuman lagée nyoe, "Hana. Meunyoe gata jipoh maté, sibagoe tungbila jih, tujoh droe ureuëng jitamong cit keunan dan ureuëng nyang poh maté gata nyan teupoh maté cit teuma." Óh lheueh nyan TUHAN geuboh tanda ubak Kain mangat soe mantong nyang meurumpok ngon Kain nyan bék jipoh maté si Kain nyan. 16 Óh lheueh nyan jijak kheueh Kain dikeue TUHAN laju jitinggai bak tanoh nyang nan jih, "Tanoh Peungeumbara" siblaih utimu taman Eden. 17 Kain dan peurumoh jih laju meu aneuëk sidroe aneuëk agam nyang jiboh nan Henokh. Óh lheueh nyan Kain laju jipeudong saboh banda dan jiboh nan banda nyan meunurot nan aneuëk jih. 18 Henokh jimeu aneuëk teuma nan jih Irad. Irad ji meu aneuëk Mehuyael. Mehuyael jimeu aneuëk Metusael, dan Metusael na kheueh ayah si Lamekh. 19 Lamekh peurumoh jih dua droe, Ada dan Zila. 20 Ada jipeulahé aneuëk Yabal, dan keuturonan Yabal nyan kheueh bansa nyang peulara beulatang peulara dan teumpat tinggai jih lam khimah. 21 Adoe jih nan jih Yubal, dan keuturonan Yubal na kheueh peumeuén musik keucapi ngon suleng. 22 Zila jipeulahé teuma aneuëk Tubal-Kain, dan keuturonan jihnyoe nyang peugét mubagoe rupa peukakaih nibak teumaga dan beuso. Adoe nyang inong Tubal-Kain nan jih Naama. 23 Jipeugah kheueh lé Lamekh ubak bandua droe peurumoh jih, "Ada dan Zila, deungoe kheueh nyoe! sidroe ureuëng muda ka lôn poh maté sabab ka jiheuntam ulôn. 24 Meunyoe tujoh droe teupoh maté sibagoe tungbila ka jipoh maté Kain, teuma tujoh ploh tujoh droe teupoh maté meunyoe ulôn jipoh maté." 25 Nabi Adam dan peurumoh gobnyan na lom geumeu aneuëk sidroe teuk aneuëk agam. Geupeugah lé siti Hawa, "Allah ka geubri ubak ulôn aneuëk agam sibagoe geunantoe Habel, nyang ka jipoh maté lé Kain." Sabab nyan siti Hawa geuboh nan aneuëk geuh nyan Set. 26 Set na teuma aneuëk agam nyang jiboh nan Enos. Bak jamén nyan kheueh lé manusia jipeuphon kheun TUHAN nibak watée jiseumah.

Keujadian 5

1 Nyoe kheueh dafeutar keuturonan Nabi Adam. Bak watée Allah geucebta manusia, geupeujeuet awaknyan lagée Allah keudroe. 2 Geucebta awaknyan agam ngon inong. Geubri beureukat ubak awaknyan dan geuboh nan awaknyan "Manusia". 3 Watée Nabi Adam na meu-umu 130 thon, gobnyan na lom geumeu aneuëk nyang agam nyang ruman jih saban that lagée gobnyan, dan aneuëk nyan geuboh nan Set. 4 Óh lheueh nyan Nabi Adam mantong udeb 800 thon teuk dan na lom geumeu aneuëk nyang laén-laén. 5 Gobnyan meuninggai donya óh ka meu-umu 930 thon. 6 Watée Set ka na umu 105 thon, gobnyan na geumeu aneuëk nyang agam, geuboh nan aneuëk nyan Enos. 7 Óh lheueh nyan Set mantong na udeb 807 thon teuk dan na geumeu aneuëk lom aneuëk-aneuëk nyang laén. 8 Gobnyan meuninggai donya óh ka meu-umu 912 thon. 9 Watée Enos ka meu-umu 90 thon, gobnyan na geumeu aneuëk nyang agam, geuboh nan aneuëk nyan Kenan. 10 Óh ka lheueh nyan Enos mantong udeb 815 thon teuk dan na geumeu aneuëk lom aneuëk-aneuëk nyang laén. 11 Gobnyan meuninggai donya watée ka na umu 905 thon. 12 Watée Kenan ka meu-umu 70 thon, gobnyan na geumeu aneuëk nyang agam, geuboh nan aneuëk geuh nyan Mahalaleel. 13 Kenan mantong udeb 840 thon teuk dan lom geumeu aneuëk nyang laén-laén. 14 Gobnyan meuninggai donya óh ka meu-umu 910 thon. 15 Watée Mahalaleel ka meu-umu 65 thon, gobnyan na geumeu aneuëk nyang agam, geuboh nan aneuëk nyan Yared. 16 Óh ka lheueh Mahalaleel mantong na udeb 830 thon teuk dan na geumeu aneuëk lom nyang laén-laén. 17 Gobnyan meuninggai donya óh meu-umu 895 thon. 18 Watée Yared ka na meu-umu 162 thon, gobnyan na geumeu aneuëk nyang agam, geuboh nan aneuëk nyan Henokh. 19 Óh lheueh nyan Yared mantong na udeb 800 thon teuk dan na geumeu aneuëk lom nyang laén. 20 Gobnyan meuninggai watée ka meu-umu 962 thon. 21 Watée Henokh ka na umu 65 thon, gobnyan na geumeu aneuëk nyang agam geuboh nan Metusalah. 22 Óh lheueh nyan Henokh na udeb lam peutobatan gobnyan ngon Po teu Allah 300 thon treub jih. Gobnyan na geumeu aneuëk lom nyang laén 23 dan gobnyan trok umu sampoe 365 thon. 24 Sabab Henokh sabe udeb rab that ngon Po teu Allah, gobnyan gadôh-gadôh sabab geucok lé Po teu Allah. 25 Watée Metusalah ka meu-umu 187 thon, gobnyan na geumeu aneuëk nyang agam geuboh nan Lamekh. 26 Óh lheueh nyan Metusalah mantong udeb 782 thon teuk dan na lom geumeu aneuëk nyang laén. 27 Gobnyan meuninggai donya watée ka meu-umu 969 thon. 28 Bak watée Lamekh ka meu-umu 182 thon, gobnyan na geumeu aneuëk nyang agam. 29 Geupeugah lé Lamekh, "Aneuëk nyoe teuma jipeuphui geutanyoe watée takeureuja brat ta catok tanoh nyang ka geukutok lé TUHAN." Sabab nyan Lamekh geuboh nan aneuëk geuh nyan Nuh. 30 Óh ka lheueh nyan Lamekh mantong na udeb 595 thon teuk. gobnyan na geumeu aneuëk lom nyang laén, 31 dan gobnyan meuninggai donya watée ka meu-umu 777 thon. 32 Óh ka na umu Nuh 500 thon, gobnyan na geumeu aneuëk lhée droe aneuëk agam, nan-nan aneuëk nyan na kheueh Sem, Yafet, dan Ham.

Keujadian 6

1 Watée manusia ka meutamah le dan ka meutabu bansigom donya, dan aneuëk-aneuëk inong ka na teupeulahé, 2 makhluk-makhluk ilahi geukalon bahwa aneuëk-aneuëk dara nyan lagak-lagak. Laju jimeukawen ngon dara-dara nyang awaknyan galak. 3 Teuma meufeureuman kheueh TUHAN "Ulôn hana Lôn bri manusia udeb siumu masa; awaknyan makhluk fana, nyang harôh maté. Phon saát nyoe umu awaknyan hana leubeh nibak 120 thon." 4 Bak jamén nyan, dan meunan cit óh ka lheueh nyan, na ureuëng-ureuëng rayeuk badan lagée gogasi ateueh rhueng bumoe. Awaknyan keuturonan aneuëk-aneuëk dara manusia nyang meukawen ngon makhluk-makhluk ilahi. Ureuëng-ureuëng rayeuk badan lagée gogasi nyan na kheueh pahlawan-pahlawan rayeuk dan ureuëng-ureuëng nyang paleng meusyeuhu bak watée jameuen purbakala. 5 TUHAN geukalon padub na jeuhet-jeuhet jih ureuëng-ureuëng nyang na ateueh rhueng bumoe nyoe; nyang jipike lé pikeran awaknyan mandum na kheueh nyang jeuhet-jeuhet. 6 Gobnyan pih ka teulah sabab ka geukeubah awaknyan ateueh rhueng bumoe. Gobnyan that-that keucewa, 7 sampoe geupeugah lagée nyoe, "Teuma Ulôn peupalo manusia nyang ka Ulôn cebta nyan, dan mandum cicém-cicém meunan cit beulatang nyang laén, sabab Ulôn teulah that ka Ulôn cebta awaknyan." 8 Teuma Nabi Nuh galak that bak até TUHAN. 9 Nyoe kheueh riwayat Nabi Nuh. Gobnyan na aneuëk lhée droe dan ban lhée nyan aneuëk agam, geuboh nan jih maséng-maséng Sem, Yafet dan Ham. Nabi Nuh hana geupeubuet salah, dan gobnyan kheueh sidroe ureuëng nyang jroh nibak jamén nyan. Gobnyan udeb saleh dan krab that ngon Po teu Allah. 11 Teuma meunyoe nyang laén banmandum jeuhet nibak mata po teu Allah, dan buet-buet nyang keujam dipat mantong na. 12 Allah geukalon donya nyan dan nyang geukalon na kheueh buet nyang jeuhet mantong, sabab mandum manusia jeuhet udeb jih. 13 Dan meufeureuman kheueh Po teu Allah ubak Nabi Nuh, "Ulôn ka lheueh Lôn cok keuputosan banmandum makhluk Lôn peubinasa. Ulôn teuma Lôn peuranab awaknyan meusajan ngon bumoe, sabab bumoe ka peunoh ngon buet nyang keujam nyang jipeubuet lé awaknyan. 14 Peugét kheueh saboh kapai kayée keu gata nyang kong ngon teuga; lam kapai nyan gata peugét meukama-kama, gata lapek laju ngon ter bah kheueh nyang na didalam meunan cit dibagian luwa. 15 Kapai nyan harôh 133 metée panyang jih dan 22 metée luwah jih, 13 metée manyang jih. 16 Dan kapai nyan harôh gata boh bubong, dan rayeuk leung bubong ngon bintéh 44 sentimetée. Kapai nyan gata peugét lhée boh tingkat, bak binéh jih gata peugét saboh pintoe. 17 Ulôn teuma Lôn peutron ié raya keu Lôn peubinasa peue mantong makhluk nyang na udeb ateueh bumoe. Peue mantong nyang na ateueh bumoe teuma maté, 18 teuma meunyoe ngon gata Ulôn keuneuk peuna peujanjian. Tamong kheueh lam kapai nyan meusajan-sajan ngon peurumoh gata, dan aneuëk gata meunan cit ngon peurumoh-peurumoh awaknyan. 19 Peutamong kheueh lam kapai nyan saboh agam dan saboh inong nibak tieb-tieb jeunéh cicém dan beulatang nyang laén, mangat awaknyan hana rhot ubak binasa. 21 Meunan cit gata ba meubagoe rupa peunajoh keu gata dan keu beulatang nyang gata ba nyan." 22 Nabi Nuh laju geupeubuet peue-peue nyang ka geupeurintah lé Allah ubak gobnyan.

Keujadian 7

1 Dan meufeureuman TUHAN ubak Nabi Nuh, "Ulôn ka kungieng keudroe bahwa gata kheueh sidroe-droe nyang gata peubuet keuheundak Ulôn. Dan gata tamong laju lam kapai nyan meusajan-sajan ngon banmandum keuluwarga gata. 2 Gata ba kheueh tujoh boh judo tieb-tieb jeunéh cicém dan beulatang laén nyang haleu, meunyoe nyang hareuem seb sijudo mantong tieb-tieb jeunéh beulatang nyan. Gata peubuet kheueh banmandum nyan mangat tieb-tieb jeunéh beulatang nyan na nyang teupeusiliseh nibak bala dan jeuet meuaneuk cucoe lom ateueh rhueng bumoe. 4 Tujoh uroe teuk Ulôn teuma Lôn peutron ujeuen nyang hana pirang-pirang nyang treb jih sampoe peuet ploh uroe peuet ploh malam, mangat makhluk udeb nyang ka Ulôn cebta nyan habéh binasa." 5 Dan Nabi Nuh laju geupeubuet peue-peue nyang ka geupeurintah lé TUHAN ubak gobnyan. 6 Nabi Nuh meu-umu 600 thon watée teujadi ié raya ateueh muka bumoe. 7 Nabi Nuh ngon peurumoh gobnyan, meunan cit ngon aneuëk-aneuëk gobnyan dan peurumoh jih maséng-maséng, laju geutamong lam kapai nyan keu jipeuseulamat droe nibak ié raya. 8 Saboh agam dan saboh inong nibak tieb-tieb cicém dan beulatang laén -- bah kheueh nyan nyang haleue meunan cit nyang hareuem -- 9 peutamong laju lam kapai nyan meusajan-sajan ngon Nabi Nuh, nyang sisuai ngon peurintah Allah. 10 Tujoh uroe óh lheueh nyan ié raya pih jiteuka habéh meurata bansaboh bumoe. 11 Bak watée Nabi Nuh meu-umu 600 thon, bak tanggai tujoh blaih buleuen dua, beukah kheueh bubena mata ié nyang na dimiyueb bumoe. Banmandum pintoe ié nyang na dilangét habéh teubuka, 12 dan ujeuen jitron treb jih peuet ploh uroe peuet ploh malam. 13 Bak uroe nyan cit teuma, Nabi Nuh dan peurumoh gobnyan laju geutamong lam kapai nyan meusajan ngon ban lhée droe aneuëk gobnyan, Sem, Yafet dan Ham meusajan ngon peurumoh-peurumoh awaknyan maséng-maséng. 14 Meusigoe ngon awaknyan teupeutamong teuma mubagoe jeunéh cicém dan beulatang laén, bah kheueh nyan seuiet meunan cit nyang kleut, nyang rayeuk meunan cit nyang ubit. 15 Saboh agam dan saboh inong nibak tieb-tieb jeunéh makhluk udeb jitamong lam kapai nyan meusigoe-sigoe ngon Nabi Nuh, 16 lagée nyang ka geupeurintah lé Po teu Allah ubak gobnyan. Óh ka lheueh banmandum nyan jitamong, TUHAN laju geutob pintoe kapai. 17 Ié raya nyan hana putôh-putôh ji-ile bansaboh nyan nyang treb jih peuet ploh uroe, dan ié pih kamanyang that sampoe kapai ka meuapong. 18 Ié maken treb maken manyang sampoe kapai laju meuapong ateueh ié raya nyan. 19 Dan ié nyan hana putôh-putôh laju meutamah manyang, akhé jih bubena gunong nyang paleng manyang ka habéh lham. 20 Ié laju jiék akhé jih ka sampoe tujoh metée manyang jih diateueh pucak-pucak gunong. 21 TUHAN ka geupeubinasa bubena makhluk nyang udeb ateueh bumoe nyoe: Manusia, cicém dan beulatang darat bah kheueh nyang ubit meunan cit nyang rayeuk. Nyang hana binasa na kheueh Nabi Nuh dan banmandum nyang na meusajan ngon gobnyan lam kapai nyan. 24 Ié nyan hana surot-surot nyang treb jih sampoe 150 uroe.

Keujadian 8

1 Allah hana geutuwoe ubak Nabi Nuh meunan cit banmandum beulatang nyang na meusajan gobnyan lam kapai nyan. Allah laju geupeulheueh angén sampoe angén nyan ka jipot dan ié pih ka jipeuphon surot. 2 Banmandum mata ié nyang dimiyueb bumoe dan banmandum pintoe ié nyang na dilangét laju geutôb. Ujeuen jipiôh, 3 dan ié raya pih maken jisurot. Óh ka lheueh na 150 uroe ié pih hana padubna manyang le. 4 Bak tanggai tujoh blaih buleuen tujoh, kapai nyan laju sok dan meusadeue bak saboh pucak gunong Ararat. 5 Ié laju jisurot dan bak tanggai sa buleuen siploh, pucak-pucak gunong ka jipeuphon leumah teukalon. 6 Óh ka lheueh peuet ploh uroe, Nabi Nuh laju geupeuhah saboh tingkab bak kapai nyan, laju geupeulheueh saboh cicém gagak. 7 Cicém nyan hana jiwoe bak kapai teuma laju jipo keudeh keunoe sampoe ié raya ka habéh jisurot banmandum. 8 Óh lheueh nyan Nabi Nuh geupeulheueh teuma saboh cicém mirah pati keu geuteupeue peu kheueh beutôi ié nyan ka surot. 9 Teuma sabab ié nyan keubiet mantong teutob bansigom muka bumoe, cicém mirah pati nyan hana jiteumé teumpat keu jidong. Dan jigisa kheueh teuma ubak kapai; Nabi Nuh laju geusunyueng jaroe geuh dan geucok laju cicém nyan geupeutamong lom teuma. 10 Nabi Nuh mantong geupreh tujoh uroe teuk, dan óh lheueh nyan geupeulheueh lom cicém mirah pati nyan. 11 Óh watée ka seupôt uroe cicém nyan barô kheueh jiwoe laju jipuwoe keu Nabi Nuh siôn-ôn zaiton nyang mantong udeb bak cutok jih. Jinoenyoe Nabi Nuh ka geuteupeue bahwa ié nyan ka jisurot. 12 Óh ka lheueh geupreh tujoh uroe teuk, laju geupeulheueh lom cicém mirah pati nyan sigoe teuk; dan phon saát nyan cicém nyan hana jigisa le ubak gobnyan. 13 Bak watée Nabi Nuh ka meu-umu 601 thon, bak tanggai sa buleuen sa, ié raya nyan ka habéh jisurot mubacut hana tinggai le. Nabi Nuh laju geupeuhah bubong kapai nyan, geungieng laju bansikeulileng nyan. Deuh laju geukalon bahwa ateueh muka tanoh ka tho kreng. 14 Bak tanggai dua ploh tujoh buleuen dua, bumoe ka biet-biet tho kreng. 15 Dan meufeureuman kheueh Allah ubak Nabi Nuh, 16 "Gata teubiet kheueh laju lam kapai nyan meusigoe ngon peurumoh gata, aneuëk-aneuëk gata dan peurumoh-peurumoh awaknyan. 17 Gata peuteubiet kheueh meusigoe ngon gata mandum cicém dan beulatang laén, nyang rayeuk meunan cit nyang ubit, mangat beulatang nyan jeuet meu-aneuëk cucoe dan meutabu bansigom bumoe." 18 Dan geuteubiet kheueh laju lé Nabi Nuh lam kapai nyan meusajan ngon peurumoh gobnyan, meunan cit ngon aneuëk-aneuëk gobnyan meusajan ngon peurumoh jih maséng-maséng. 19 Banmandum cicém dan beulatang darat jiteubiet lam kapai nyan, maséng-maséng meusigoe ngon nyang sijeunéh ngon jih. 20 Nabi Nuh laju geupeudong saboh miseubah keu TUHAN. Laju geucok saboh tieb-tieb cicém dan beulatang laén nyang haleue, geupeuseumah laju atra nyan sibagoe keureubeuen nyang teutot ateueh miseubah nyan. 21 Bée keureubeuen nyang mangat nyan lumpah that galak até TUHAN, dan Gobnyan jikheun lam até Geuh, "Donya nyoe hana le Lôn kutok sabab buet manusia; Ulôn kuteupeue bahwa yoh masa muda kon, pikeran manusia nyan jeuhet. Ulôn hana teuma Lôn peuhanco lé peue-peue mantong makhluk nyang udeb lagée nyang ban lheueh Ulôn peubuet nyoe. 22 Simantong na donya nyoe, sabe na watée seumula dan watée keumeukoh, musém sijuek dan musém seu-eum, musém khueng dan musém ujeuen, uroe dan malam."

Keujadian 9

1 Allah laju geubri beureukat ubak Nabi Nuh meunan cit ngon aneuëk-aneuëk gobnyan sira geupeugah lagée nyoe, "Meu aneuëk cucoe kheueh nyang le, mangat keuturonan gata jeuet jitinggai bansigom bumoe. 2 Banmandum cicém dan eungkot meunan cit ngon beulatang-beulatang laén teuma jitakot ubak gata. Beulatang nyan banmandum na lam keukuasaan gata. 3 Banmandum nyan jeuet gata cok keupeunajoh gata, meunan cit ngon seunaman nyang ijo jitimoh; banmandum nyan Ulôn bri ubak gata mangat jeuet keupeunajoh gata. 4 Sapeue nyang hán jeuet sagai-sagai gata pajoh na kheueh eungkot sie nyang mantong meudarah, sabab nyawöng nyan na lam darah. 5 Soe mantong ureuëng dan beulatang nyang jipoh maté manusia teuma Lôn huköm maté. 6 Manusia teucebta saban lagée Ulôn; sabab nyan, soemantong nyang poh maté manusia, ureuëng nyan keudroe teuma jipoh maté cit lé manusia. 7 Nyoe, gata harôh meu-aneuëk cucoe nyang le, mangat keuturonan gata jeuet jitinggai bansigom bumoe." 8 Allah meufeureuman ubak Nabi Nuh dan aneuëk-aneuëk gobnyan lagée nyoe, 9 "Jinoenyoe Ulôn peugét janji ngon gata dan mandum keuturonan gata, 10 dan deungon banmandum makhluk nyang udeb, na kheueh cicém-cicém dan beulatang darat, mandum nyang teubiet lam kapai nyan meusajan-sajan ngon gata. 11 Nyoe kheueh janji Ulôn ngon gata: Ulôn peujanji bahwa banmandum makhluk nyang udeb hana le jipeubinasa lé ié raya. Hana le ié raya nyang jipeubinasa bumoe nyoe. 12 Sibagoe tanda nyang keukai, nyang Ulôn peugét ngon gata dan ngon banmandum makhluk nyang udeb, 13 teuma Ulôn keubah peulangi Lôn lam awan sibagoe tanda janji Ulôn ngon donya nyoe. 14 Tieb-tieb watée, meunyoe Ulôn tob langét ngon awan, peulangi nyan laju deuh teukalon, 15 Ulôn teuma Lôn ingat janji Lôn ubak gata dan ubak mandum makhluk nyang udeb, bahwa ié raya hana le jipeubinasa makhluk nyang udeb. 16 Meunyoe ka deuh teukalon peulangi lam awan, Ulôn teuma Lôn ngieng nyan dan Lôn ingat janji nyang keukai Ulôn ngon mandum makhluk nyang udeb ateueh rhueng bumoe. 17 Nyan kheueh tanda janji Lôn nyang Ulôn bri ubak banmandum makhluk nyang udeb ateueh bumoe nyoe." 18 Aneuëk-aneuëk Nabi Nuh nyang teubiet lam kapai nyan na kheueh Sem, Yafet dan Ham. (Ham na kheueh ayah Kanaan.) 19 Ban lhée droe aneuëk Nabi Nuh nyan kheueh indatu banmandum manusia nyang na ateueh rhueng donya. 20 Nabi Nuh buet geuh tieb-tieb uroe na kheueh meulampôh, dan gobnyan kheueh nyang phon-phon that peugét lampôh anggô. 21 Óh lheueh geujieb ié anggô lé Nabi Nuh, gobnyan pih mabök. Geusuet banmandum peukayan nyang na bak tuboh geuh dan lam keuadaan teulon lagée nyan laju geuéh lam khimah geuh. 22 Watée Ham, ayah Kanaan nyan, jingieng ayah jih lam keuadaan teulon, laju jiteubiet dan jijak peugah laju hainyan ubak bandua droe syedara jih nyang laén. 23 Óh lheueh nyan Sem ngon Yafet laju geucok siôn bajée jubah laju jileueng bak bahô awaknyan. Sira jijak ngon jisurot awaknyan jitamong laju lam khimah ngon jubah nyan laju jipeulimbot ayah jih. Muka awaknyan jipaleng holaén mangat bék jikalon ayah jih teulon lagée nyan bagoe. 24 Óh ka Nabi Nuh geutée droe hana le mabök dan geuteupeue peue nyang ka jipeubuet ateueh geuh lé aneuëk tulot geuhnyan teuhadab droe gobnyan, 25 laju geupeugah, "Teukutok kheueh Kanaan! Jihnyan teuma jeuet keu namiet nyang hina keu syedara-syedara jih. 26 Pujoe kheueh TUHAN, Allah Sem! Kanaan teuma jeuet keu namiet Sem. 27 Seumoga Po teu Allah teuma geutamah geubeureukat keu Yafet deungon geupeuluwah teumpat jih tinggai. Seumoga keuturonan jih tinggai meusajan-sajan ngon keuturonan Sem. Kanaan teuma jeuet keu namiet Yafet." 28 Óh ka lheueh ié raya nyan, Nabi Nuh mantong na udeb 350 thon teuk. 29 Gobnyan meuninggai donya lam umu 950 thon.

Keujadian 10

1 Nyoe kheueh keuturonan aneuëk-aneuëk Nabi Nuh nyang lhée droe nyan, Sem, Yafet dan Ham. Óh lheueh teuka ié raya, awaknyan ban lhée droe laju meuteumé aneuëk-aneuëk agam. 2 Aneuëk-aneuëk Yafet na kheueh Gomer, Magog, Madai, Yawan, Tubal, Mesekh dan Tiras. 3 Keuturonan Gomer na kheueh nyang jeuet keupeunduduek Askemas, Rifat dan Togarma. 4 Keuturonan Yawan na kheueh peunduduek Elisa, Spanyol, Siprus dan Rodes. 5 Awaknyan na kheueh indatu bansa-bansa nyang tinggai nibak bansipanyang panté dan bak pulo-pulo. Nyan kheueh banmandum keuturonan Yafet. Tieb-tieb bansa dan sukée tinggai di nanggroe jih maséng-maséng, na jipeuguna basa jih keudroe. 6 Aneuëk-aneuëk Ham na kheueh Kus, Meusé, Libia dan Kanaan. 7 Keuturonan Kus na kheueh peunduduek Seba, Hawila, Sabta, Raema dan Sabtekha. Keuturonan Raema na kheueh nyang tinggai di Syeba dan Dedan. 8 Kus na jimeu aneuëk agam nyang nan jih Nimrod, Nimrod nyan kheueh nyang phon that jeuet keu ureuëng nyang paleng peukasa ateueh rhueng donya. 9 Deungon geutulông lé TUHAN gobnyan jeuet keu ureuëng peuleut beulatang buih nyang paleng beuhe. Sabab nyan ureuëng biasa jipeugah lagée nyoe, "Seumoga TUHAN geupeujeuet gata sidroe ureuëng leut beulatang juah nyang paleng beuhe lagée Nimrod." 10 Phon-phon that keurajeuen gobnyan bansaboh Babel, Erekh, dan Akad, ban lhée boh nyan di Babilonia. 11 Nibak sinan laju geujak u Asyur, laju geupeudong banda Niniwe, Rehobot-Ir, Kalah, 12 dan Resen nyang teumpat jih bak teungoh Niniwe ngon Kalah. Banmandum nyan na kheueh banda-banda raya. 13 Keuturonan Meusé na kheueh peunduduek Lidia, Anamim, Lehabim, Naftuhim, 14 Patrusim, Kasluhim, dan Kaftorim, Bansa Kasluhim nyan na kheueh indatu bansa Filistin. 15 Aneuëk-aneuëk Kanaan na kheueh nyang paleng tuha Sidon, dan Het. 16 Dan Kanaan nyan na kheueh indatu bansa Yebusi, Amori, Girgasi, 17 ureuëng Hewi, Arki, Sini, 18 Arwadi, Semari dan Hamati. Sukée-sukée bansa Kanaan nyan meusiseu sampoe án jiôh, 19 sampoe bataih-bataih nanggroe awaknyan luwah nibak Sidon u seulatan teutuju u Gerar, sampoe rab troh to Gaza, dan siblaih utimu teutuju u Sodom, Gomora, Adma, dan Zeboim, hingga rab trok to Lasa. 20 Nyan kheueh banmandum keuturonan Ham. Tieb-tieb bansa dan sukée tinggai bak nanggroe jih maséng-maséng dan jipeuguna basa droe jih keudroe. 21 Sem, aduen Yafet, na kheueh indatu banmandum bansa Ibrani. 22 Aneuëk-aneuëk Sem na kheueh Elam, Asyur, Arpakhsad, Lud dan Aram. 23 Keuturonan Aram na kheueh peunduduek Us, Hul, Geter dan Mas. 24 Arpakhsad ayah nibak Selah. Dan Selah ayah Eber. 25 Eber na teuma dua droe aneuëk agam; nyang tuha nan jih Peleg, sabab bak jamén geuh nyan bansa-bansa nyang na ateueh rhueng donya teubagi-bagi; nyang keudua nan jih Yoktan. 26 Keuturonan Yoktan na kheueh peunduduek Almodad, Selef, Hazar-Mawet dan Yerah, 27 Hadoram, Uzal, Dikla, 28 Obal, Abimael, Syeba, 29 Ofir, Hawila dan Yobab. Banmandum nyan keuturonan Yoktan. 30 Daerah teumpat tinggai awaknyan meuluah nibak Mesa u Sefar, na kheueh daerah gunong-gunong siblaih utimu. 31 Nyan kheueh banmandum keuturonan Sem. Tieb-tieb bansa dan sukée tinggai lam nanggroe jih maséng-maséng dan jipeuguna basa droe jih keudroe. 32 Banmandum nyan keuturonan Nabi Nuh, bansa nibak bansa, meunurot gareh keuturonan awaknyan maséng-maséng. Awaknyan kheueh nyang peutron bansa-bansa lam donya nyoe óh ka lheueh seuleusoe ié raya nyan.

Keujadian 11

1 Yoh awaiphon, bansa-bansa nyang na ateueh rhueng donya nyoe na kheueh saboh bansa dan tutoe basa jipi saboh teuma. 2 Watée awaknyan jijakmeuranto siblaih utimu, trok kheueh laju bak saboh darat nyang na di Babilonia, dan awaknyan pi laju tinggai teutab nibak teumpat nyan. 3 Awaknyan laju jimariet sabe keudroe-droe, "Jak tapeugét batée bata dan tatot sampoe kreueh." Meunan kheueh awaknyan jipeuna batée bata keubatée rumoh dan ter keungon peuleukék jih. 4 Jipeugah lé awaknyan lagée nyoe, "Jak tapeudong saboh banda nyang meunara jih manyang meulambong sampoe u langét, mangat tanyoe meusyeuhu dan hana meucrebre bansigom donya." 5 Dan watée nyan geutron kheueh TUHAN keu geujak kalon banda dan meunara nyang jipeugét lé manusia. 6 Laju geupeugah lé Gobnyan, "Awaknyoe saboh bansa ngon saboh basa, dan nyoe barô nyang phon nibak reuncana-reuncana awaknyan. Hana treb le awaknyan teuma hase jipeubuet peue mantong nyang jigalak. 7 Nyang gét jih bah kheueh tajak treun ubumoe tajak peukaru basa awaknyan mangat awaknyan hana jimuphom le sidroe ureuëng ngon nyang laén." 8 Meunan kheueh cara jih TUHAN geupeu crebre manusia nyoe bansigom bumoe. Dan watée teuka bala nyan awaknyan pih jipiyoh jipeugét banda nyan. 9 Sabab nyan kheueh banda nyan geuboh nan Babel, sabab disinan TUHAN geupeukaru ngon geupeucawo basa banmandum bansa, dan nibak sinan lé TUHAN laju geupeu crebre awaknyan bansaboh bumoe. 10 Nyoe kheueh keuturonan Sem. Dua thon óh ka lheueh teujadi ié raya, watée Sem ka meu-umu 100 thon, geuh nyan meuteumé sidroe aneuëk agam nyang geuboh nan Arpakhsad. 11 Óh ka lheueh nyan gobnyan mantong na udeb 500 thon teuk, dan na meuteumé aneuëk-aneuëk nyang laén. 12 Watée Arpakhsad ka meu-umu 35 thon, gobnyan meuteumé sidroe aneuëk agam, nyang geuboh nan Selah. 13 Óh lheueh nyan Arpakhsad mantong na udeb 403 thon teuk, dan na geumeu aneuëk nyang laén-laén. 14 Watée Selah meu-umu 30 thon, gobnyan meuteumé sidroe aneuëk agam, geuboh nan Eber. 15 Óh lheueh nyan Selah mantong udeb 403 thon teuk, dan mantong geumeu aneuëk nyang laén-laén. 16 Watée Eber meu-umu 34 thon, gobnyan na meuteumé aneuëk agam, geuboh nan Peleg. 17 Óh lheueh nyan Eber mantong udeb 430 thon teuk, dan na geumeu aneuëk nyang laén-laén. 18 Watée Peleg meu-umu 30 thon, gobnyan na meuteumé aneuëk agam, geuboh nan aneuëk nyan Rehu. 19 Óh lheueh nyan Peleg mantong na udeb 209 thon teuk, dan na meuteumé aneuëk-aneuëk nyang laén. 20 Watée Rehu ka meu-umu 32 thon, gobnyan na geumeu aneuëk sidroe aneuëk agam, geuboh nan Serug. 21 Óh lheueh nyan Rehu mantong udeb 207 thon teuk dan na meuteumé aneuëk-aneuëk nyang laén. 22 Watée Serug meu-umu 30 thon, gobnyan na geumeu aneuëk sidroe aneuëk agam, geuboh nan aneuëk nyan Nahor. 23 Óh lheueh nyan Serug mantong udeb 200 thon teuk, dan geumeu aneuëk lom nyang laén-laén. 24 Watée Nahor meu-umu 29 thon, gobnyan na meuteumé sidroe aneuëk agam, geuboh nan aneuëk nyan Terah. 25 Óh ka lheueh nyan Nahor mantong na udeb 119 thon teuk, dan na meuteumé aneuëk-aneuëk nyang laén. 26 Óh ka Terah meu-umu 70 thon, gobnyan na meuteumé lhée droe aneuëk agam, geuboh nan aneuëk-aneuëk geuh nyan na kheueh, Brahim, Nahor dan Haran. 27 Nyoe kheueh keuturonan Terah: Terah ayah Brahim, Nahor dan Haran. Haran na aneuëk agam, nan aneuëk nyan Lot. 28 Haran meuninggai di gampông droe geuh, nyang nan gampông nyan Ur di Babilonia, watée ayah gobnyan mantong udeb. 29 Brahim laju meukawen ngon Sarai, dan Nahor meukawen ngon Milka aneuëk inong Haran. Haran mantong na aneuëk agam nyang laén nyang nan jih Yiska. 30 Sarai nyan balui hana jitem meu-aneuëk. 31 Terah laju jitinggai banda Ur di Babilonia meusajan-sajan ngon Brahim aneuëk gobnyan, Lot cucoe gobnyan, dan sarai meulintée gobnyan, peurumoh Brahim. Gobnyan kana niet keuneuk jak u nanggroe Kanaan. Teuma watée gobnyan ka trok u Haran, awaknyan laju tinggai teutab disinan. 32 Dan bak teumpat nyan cit teuma Terah meuninggai donya lam umu 205 thon.

Keujadian 12

1 TUHAN meufeureuman ubak Brahim, "Gata tinggai kheueh nanggroe gata, waréh kawöm gata dan rumoh ayah gata, dan gata jak kheueh laju u nanggroe nyang teuma Ulôn tunyok ubak gata. 2 Ulôn teuma Lôn bri ubak gata keuturonan nyang le dan Lôn peujeuet keuturonan gata nyan keu bansa-bansa nyang rayeuk. Ulôn teuma Lôn bri beureukat ubak gata dan Lôn peumeusyeuhu nan gata bansigom donya, akhé jih gata teuma jeuet keubeureukat. 3 Ulôn teuma Lôn bri beureukat keu ureuëng-ureuëng nyang bri beureukat ubak gata dan Lôn kutok ureuëng-ureuëng nyang kutok gata. Dan sabab gata Ulôn teuma Lôn bri beureukat ubak banmandum bansa nyang na di ateueh bumoe." 4 Brahim ka meu-umu 75 thon watée geutinggai Haran, lagée nyang ka geupeurintah lé TUHAN ubak gobnyan. Brahim geujak u tanoh Kanaan meusajan-sajan ngon Sarai peurumoh gobnyan, dan Lot aneuk kumuen gobnyan, meunan cit banmandum hareuta beunda gobnyan dan namiet-namiet nyang geuteumé watée di Haran. Óh watée awaknyan ka troh u Kanaan, 6 Brahim laju geujak-jak bansaboh tanoh nyan sampoe gobnyan trok nibak-bak kayée keuramat di More, na kheueh teumpat iébadat di Sikhem. (Bak watéenyan ureuëng Kanaan mantong geutinggai nibak tanoh nyan.) 7 TUHAN geupeuleumah droe ubak Brahim dan laju geumeufeureuman ubak gobnyan, "Nyoe kheueh nanggroe nyang teuma Ulôn bri keu keuturonan gata." Dan Brahim laju geupeudong saboh miseubah nibak teumpat nyan keu TUHAN nyang ka geupeuleumah droe ubak gobnyan. 8 Óh lheueh nyan gobnyan laju geujak lom u bagian seulatan, u daerah meubukét dibagian timu banda Betel, dan laju geupeudong khimah lamkawan Betel ngon banda Ai: Betel siblaih ubarat dan Ai siblaih utimu, meunan cit bak teumpat nyan gobnyan geupeudong miseubah dan geuseumah TUHAN. 9 Óh lheueh nyan gobnyan geujak lom nibak teumpat nyang saboh uteumpat nyang laén, teupeukeu ubagian seulatan tanoh Kanaan. 10 Teuma watée nyan di Kanaan teungoh teuka musém deuk nyang lumpah gawat, sampoe Brahim geujak leubeh jiôh lom ubagian seulatan, u nanggroe Meusé mangat jeuet geutinggai disinan sampoe beuncana nyan habéh. 11 Watée gobnyan keuneuk geuliengkeu bataih nanggroe dan geutamong u nanggroe Meusé, geupeugah kheueh lé gobnyan ubak Sarai meurumoh geuh nyan, "Gata lagak that, wahei peurumoh lôn. 12 Meunyoe gata jingieng lé ureuëng Meusé, awaknyan laju jipike bahwa gata na kheueh peurumoh ulôn dan ulôn laju jipoh maté dan gata jipeubiyeu udeb. 13 Teuma nyang gét gata peugah mantong bahwa gata na kheueh adoe ulôn mangat ulôn jipeubiyeu udeb dan jipeusaneut ulôn seucara gét sabab na gata." 14 Dan beutôi that, watée Brahim ka geuliengkeu bataih nanggroe dan laju trok u nanggroe Meusé, lé ureuëng Meusé laju jikalon bahwa Sarai nyan gagah lumpah na. 15 Na padub droe peugawée meuligoe jingieng inong nyan dan laju jijak peugah ubak raja pakriban gagah jih ureuëng inong nyan; sabab nyan Sarai nyan laju jiba ubak meuligoe raja. 16 Deumi Sarai, raja geupeutimang Brahim seucara gét dan geubri ubak gobnyan namiet-namiet, kawan bubiri dan kawan kaméng, leumô, keuleudée dan unta. 17 Teuma sabab raja geucok Sarai, TUHAN laju geupeutreun peunyakét nyang lupah parah ateueh raja nyan meunan cit ubak ureuëng-ureuëng nyang na lam meuligoe raja. 18 Laju raja geucok Brahim dan geutanyong ubak gobnyan, "Peue nyang ka tapeubuet ateueh ulôn nyoe? Pakon hana gata peugah bahwa inong nyan peurumoh gata? 19 Pakon gata peugah jihnyan adoe gata dan gata peubiyeu inong nyan ulôn cok keupeurumoh lôn? Nyoe pat jih, peurumoh gata, cok laju dan gata jak laju keudeh!" 20 Raja laju geupeutreun titah ubak siladum peugawée gobnyan, dan awaknyan laju jipeuteubiet Brahim nibak nanggroe nyan meusajan-sajan ngon peurumoh gobnyan dan banmandum atra milék gobnyan.

Keujadian 13

1 Brahim laju geutinggai nanggroe Meusé dan geujak laju u arah utara, geupeukeu u bagian seulatan Kanaan meusajan ngon peurumoh gobnyan meunan cit banmandum atra milék gobnyan, meunan cit deungon Lot geuba sajan. 2 Brahim biet-biet ka jeuet keu ureuëng kaya; bak gobnyan na bubiri, kaméng, leumô, pirak dan méuh. 3 Teuma geujak kheueh laju gobnyan nibak saboh teumpat u teumpat nyang laén, geutuju u Betel. Laju trok u daerah lamkawan Betel ngon Ai, bak teumpat keuramat teumpat yoh masa ilée gobnyan geupeudong khimah 4 dan geupeudong miseubah. Bak teumpat nyan gobnyan geuseumah TUHAN. 5 Lot na cit keuluwarga meunan cit deungon namiet dan bubiri, kaméng dan leumô na bak gobnyan. 6 Sabab nyan tanoh nyang na disinan hana seb blang naleueng keu eumpeuen beulatang peulara awaknyan mandua, sabab beulatang peulara awaknyan jai lumpah na. 7 Lam keuadaan nyang lagée nyan, ditukang rabe beulatang peulara Brahim ngon tukang rabe beulatang peulara Lot sabe lam karu dan meudakwa. (Bak watéenyan ureuëng Kanaan dan ureuëng Feris mantong tinggai bak tanoh nyan.) 8 Geupeugah lé Brahim ubak Lot, "Tanyoe nyoe meusyedara, hana gét meunyoe ureuëng gata ngon ureuëng ulôn jimeudakwa. 9 Sabab nyan, nyang gét jih tameuaseng. Gata piléh kheueh bagian toh tanoh nyoe nyang gata galak. Meunyoe gata cok nyang blah nyoe, ulôn cok nyang blah laén." 10 Lot laju jingieng bansikeulileng nyan, dan deuh laju jingieng bahwa bansaboh Pantôn Yordan, sampoe trok u banda Zoar jai that ié jih, lagée Taman TUHAN atawa saban lagée tanoh nanggroe Meusé. (Meunan kheueh keuadaan jih sigohlom TUHAN geupeuhanco banda-banda Sodom dan Gomora.) 11 Akhé jih Lot geupiléh banmandum Pantôn Yordan nyan, dan geujak laju u bagian timu. Meunan kheueh akhé jih awaknyan bandua meuaséng. 12 Brahim teutab tinggai di tanoh Kanaan, seudangkan Nabi Lot geupeudong khimah nibak banda-banda pantôn sampoe trok bak binéh Sodom. 13 Banda Sodom nyan jiduek lé ureuëng-ureuëng nyang lumpah jeuhet dan meudesya ubak TUHAN. 14 Óh ka leupah Nabi Lot geujak, TUHAN meufeureuman ubak Brahim, "Nibak teumpat gata dong nyan, gata ngieng kheueh beujroh-jroh ujeub-jeub arah; 15 Ulôn teuma Lôn bri ubak gata dan ubak keuturonan gata banmandum tanoh nyang gata ngieng nyan mangat jeuet keu atra gata siumu masa. 16 Ulôn teuma Lôn bri ubak gata keuturonan nyang lumpah le, sampoe hana meusidroepi nyang hase jikira keuturonan gata nyan. Pakriban ureuëng hana hase jikira abée bak tanoh, meunan kheueh keuturonan gata hana hase jikira. 17 Jinoenyoe, gata tamong dan gata bloh kheueh bansaboh tanoh nyoe, sabab Ulôn teuma Lôn bri mandum nyan keugata." 18 Óh lheueh nyan Brahim laju geupinah khimah-khimah gobnyan dan laju geutinggai teutab ubak binéh dumna bak kayée keuramat teumpat iébadat di Mamre to ngon Hebron, dan bak teumpat nyan gobnyan laju geupeudong miseubah keu TUHAN.

Keujadian 14

1 Na peuet droe raja, raja-raja nyan na kheueh: Amrafel nibak Babilonia, Ariokh nibak Elasar, Kedorlaomer nibak Elam, dan Tideal nibak Goyim 2 ban peuet droe raja nyoe jimuprang jilawan limong droe raja nyang laén, raja-raja nyang jilawan nyan na kheueh: Bera nibak Sodom, Birsya nibak Gomora, Syinab nibak Adma, Semeber nibak Zeboim, dan raja nibak Zela nyang jihôi Zoar. 3 Ban limong droe rajanyan laju sapeupakat dan jipeusapat sidadu jih di Pantôn Sidim, nyang jinoenyoe nan jih Laôt Maté. 4 Dua blaih thon treb jih awaknyan jikuasa lé Raja Kedorlaomer, teuma bak thon nyang keu lhée blaih, awaknyan jibrontak jilawan gobnyan. 5 Bak thon nyang keu peuet blaih, Kedorlaomer dan sikutu-sikutu jih teuka ngon sidadu awaknyan laju jimuprang akhé jih talo ureuëng Refaim di Asyterot-Karnaim, ureuëng Zuzim di Ham, ureuëng Emim di Syawe-Kiryataim, 6 dan ureuëng Hori di gunong-gunong Edom, laju jipeulet awaknyan sampoe u El-Paran bak binéh padang pasi. 7 Óh lheueh nyan lé ureuëng-ureuëng nyang peulet bunoe jigisa dan jiriwang u En-Mispat nyang jinoenyoe nan jih Kades. Awaknyan jipeutaklok banmandum tanoh Amalek dan jipeutaloe ureuëng Amori nyang na tinggai di Hazezon-Tamar. 8 Óh lheueh nyan raja-raja nibak Sodom, Gomora, Adma, Zeboim dan Bela laju jiatoe baresan sidadu awaknyan di Pantôn Sidim dan óh lheueh nyan laju jimuprang 9 jilawan raja-raja nibak Elam, Goyim, Babilonia, dan Elasar; jadi, limong droe raja jilawan peuet droe raja. 10 Pantônnyan peunoh ngon mon aspal, dan watée raja-raja nibak Sodom dan Gomora jiuseuha keuneuk jiplueng nibak mideuen prang, awaknyan laju rhot lam mon-mon aspal nyan. Seudangkan ban lhée droe raja laén hase jipeulheuh droe dan laju jiplueng ugunong-gunong. 11 Ban peuet droe raja nyan meunang, laju jirampah peue-peue nyang na di Sodom ngon Gomora, meunan cit ngon peue-peue nyang na bahan peunajoh habéh jirampah lé raja peuet droe nyan, óh lheueh nyan laju jijak. 12 Nabi Lot aneuëk keumuen Brahim tinggai jih di Sodom, sabab nyan gobnyan pi jiba lé musoh meusigo ngon banmandum hareuta beunda. 13 Teuma na sidroe ureuëng nyang hase jipeulheuh droe laju jijak peugah hainyan ubak Brahim, ureuëng Ibrani nyan. Brahim tinggai bak binéh bak kayée-kayée keuramat teumpat iébadat atra Mamre ureuëng Amori. Mamre dan syedara-syedara gobnyan, na kheueh Eskol dan Aner na kheueh rakan-rakan sikutu Brahim. 14 Watée Brahim geudeungoe bahwa aneuëk keumeum geuh ka jidrob, laju geupeusapat banmandum ureuëng nyang na lam khimah-khimah geuh, na kheueh ureuëng-ureuëng nyang carông muprang, nyang jeumeulah jih 318 droe, dan laju jipeucrok ban peuet droe raja nyan sampoe trok u banda Dan. 15 Disinan Brahim laju geuatoe ureuëng-ureuëng gobnyan jeuet jih na padub boh keulompok, óh watée malam ka teuka laju geuprang musoh nyan dan dimusoh pih talo. Gobnyan laju geupeucrok awaknyan sampoe trok u Hoba siblaih utara banda Damsyik. 16 Brahim hase geucok lom teuma barang-barang nyang ka jirampah, meunan cit ngon Nabi Lot ngon banmandum atra gobnyan hase geupeuseulamat, ureuëng-ureuëng inong dan ureuëng-ureuëng teutawan nyang laén banmandum hase geupeubeubaih lom teuma. 17 Óh ka lheueh geupeutaloe raja Kedorlaomer ngon raja-raja sikutu jihnyan, Brahim laju geuwoe teuma. Dan raja Sodom pih laju jisambot gobnyan di Pantôn Syawe nyang nan laén teumpat nyan Pantôn Raja. 18 Melkisedek, raja Salem, jabatan gobnyan nyang laén jeuet keu imeum Allah Nyang Mahamanyang, laju geuba ruti dan anggô keu Brahim, 19 óh lheueh nyan laju geubri beureukat ubak Brahim sira geupeugah lagée nyoe, "Seumoga Allah Nyang Mahamanyang, nyang ka geucebta langét ngon bumoe, geubri beureukat ubak Brahim! 20 Teupujoe kheueh Allah Nyang Mahamanyang, nyang ka geupeumeunang gata ateueh musoh gata." Óh lheueh nyan Brahim laju geujok keu Melkisedek siper siploh nibak banmandum barang rampasan nyang ka geucok lom nyan. 21 Dan geupeugah kheueh lé raja Sodom ubak Brahim, "Cok kheueh barang nyang ka gata reupah nyan, nyang ulôn lakée bak gata ureuëng-ureuëng ulôn nyang ka gata cok neupulang lom ubak ulôn." 22 Geujaweueb lé Brahim, "Ulôn meusumpah dikeue TUHAN, Allah Nyang Mahamanyang, nyang cebta langét ngon bumoe, 23 bahwa ulôn hana lôn cok sapeue atra gata, bahpi sikrék beuneueng atawa sikhan taloe silob pih hana lôn cok. Deungon lagée nyan gata hana jeuet gata peugah, 'Ulôn kheueh nyang peujeuet Brahim nyan kaya raya.' 24 Ulôn hana lôntem cok sapeue meunyoe nyan keulôn keudroe. Nyang ulôn tem teurimong peue-peue nyang ka jingui lé ureuëng lôn keudroe. Teuma bah kheueh rakan-rakan sikutu lôn, Aner, Eskol dan Mamre, jicok jeumba awaknyan."

Keujadian 15

1 Óh lheueh nyan Brahim geuteurimong nyang deuh teukalon dan geudeungoe laju TUHAN meufeureuman ubak gobnyan, "Bék gata takot, hei Brahim, Ulôn teuma Lôn lindong gata nibak sigala bahaya, dan Ulôn jok keu gata upah nyang paleng raya." 2 Teuma lé Brahim geupeugah lagée nyoe, "TUHAN Nyang Mahamanyang, TUHAN hana geubri aneuëk ubak ulôn. Ureuëng nyang jeuet keu ahli waréh hareuta lôn na kheueh Eliezer, namiet ulôn nibak Damsyik. Teuma, keupeuguna jih TUHAN geubri upah keu ulôn?" 4 Óh lheueh nyan Brahim geudeungoe TUHAN meufeureuman ubak gobnyan, "Bukon namiet gata nyang teuma jeuet keu ahli waréh hareuta gata nyan, nyang jeuet ahli waréh atra gata nyan na kheueh aneuëk agam gata keudroe." 5 TUHAN geuba Brahim uluwa dan laju geupeugah ubak gobnyan, "Tangah kheueh ulangét, dan gata kalon kheueh bintang-bintang nyang na disinan, cuba kheueh gata itong padub na jeumeulah jih bintang nyan banmandum; dan lagée bintang nyang le nyan kheueh teuma na keuturonan gata." 6 Brahim meuiman ubak TUHAN, dan sabab nyan kheueh TUHAN geuteurimong gobnyan sibagoe ureuëng nyang peugalak até Gobnyan. 7 Óh lheueh nyan TUHAN meufeureuman lom ubak gobnyan, "Ulôn kheueh TUHAN, nyang ka Lôn pimpén gata mangat gata teubiet nibak nanggroe Ur di Babilonia, keu teubri tanoh nyoe ubak gata jeuet keu hak milék gata." 8 Teuma geutanyong lé Brahim, "Ya, TUHAN Nyang Mahamanyang, pakriban jeuet lôn teupeu bahwa tanoh nyan jeuet keumilék ulôn?" 9 Geujaweueb lé TUHAN, "Cok kheueh keu Ulôn saboh leumô inong, saboh kaméng inong dan saboh teuk kaméng agam, maséng-maséng atra nyan meu-umu lhée thon, meunan cit gata cok saboh cicém teukukur dan saboh teuk cicém mirah pati." 10 Laju Brahim geucok banmandum beulatang nyan keu Po teu Allah. Leumô, kaméng dan bubiri nyan maséng-maséng atra nyan geuplah dua, dan sie-sie nyang teuplah nyan laju geukeubah meuatoe dua boh baréh lam keuadaan meuhadab keu. Teuma meunyoe cicém-cicém nyan hana geuplah. 11 Ateueh eungkot sia nyan laju jidong lé cicém-cicém nyang pajoh bangke, teuma Brahim laju geuparöih cicém-cicém nyan. 12 Watée mata uroe ka jipeuphon lhob lam tanoh, Brahim laju teuéh sampoe teungét hana geutée droe. Ngon hana geusangka-sangka Brahim nyan ka jiteuka rasa teumakot nyang luwa biasa. 13 TUHAN meufeureuman ubak gobnyan, "Ingat kheueh, keuturonan gata teuma jeuet ureuëng aséng di nanggroe laén; awaknyan teuma jeuet keunamiet di nanggroe nyan dan jipeunamiet peuet reutoh thon treb jih. 14 Teuma bansa nyang peunamiet keuturonan gata nyan teuma Lôn huköm dan bak watée keuturonan gata jitinggai nanggroe nyan, awaknyan teuma jiba hareuta nyang jai lumpah na. 15 Gata keudroe teuma meuteumé umu nyang panyang; gata maté deungon teunang, dan laju jipeutamong lam jrat. 16 Óh ka lheueh trok bak peuet boh keuturonan, aneuëk cucoe gata teuma jiriwang keunoe, sabab Ulôn hana Lôn use ureuëng Amori sigohlom awaknyan biet-biet that ka jeuet keu ureuëng jeuhet sampoe peureulée teuhuköm." 17 Watée uroe ka malam, hana teusangka-sangka teuka saboh anglo nyang meuasab dan suwa nyang hu meucahya, dan atranyan laju jijak bak eungkot-eungkot sie nyan. 18 Bak watée nyan TUHAN Allah laju geupeugét peujanjian ngon Brahim. Feureuman TUHAN, "Ulôn meujanji teuma Lôn bri ubak keuturonan gata banmandum tanoh nyoe, phon nibak bataih nanggroe Meusé sampoe troh u Krueng Efrat, 19 jitamong cit keunan tanoh ureuëng-ureuëng Keni, Kenas, Kadmon, 20 Het, Feris, Refaim, 21 Amori, Kanaan, Girgasi dan Yebus."

Keujadian 16

1 Sarai, peurumoh Brahim, gohlom cit meu-aneuëk. Teuma gobnyan na sidroe namiet ureuëng Meusé, sidroe aneuëk dara nyang nan jih Hagar. 2 Sarai geupeugah ubak Brahim, "TUHAN hana geubri keumungkenan ulôn nyoe meuteumé lôn peulahé aneuëk. Sabab nyan, nyang gét jih droeneueh éh ngon namiet ulôn nyoe. Mungken jihnyoe jeuet jipeulahé aneuëk keu ulôn." Brahim situju lagée nyang guyue lé Sarai. 3 Meunan kheueh Hagai geubri Sarai ubak Brahim mangat jeuet geucok keu selir. Bak watée nyan Brahim kana siploh thon di Kanaan. 4 Brahim laju geuéh ngon Hagar, dan inong nyan pih mume. Teuma watée Hagar jiteupeue bahwa gobnyan ka mume, gobnyan ka jeuet keu ureuëng sombong dan geuanggab enteng ubak Sarai. 5 Dan Sarai geupeugah ubak Brahim, "Ulôn ka lôn jok Hagar namiet ulôn keu droeneueh, dan yoh ka jiteupeue bahwa jih nyan ka mume, laju jianggab enteng ateueh lôn. Nyan salah droeneueh. Bah kheueh TUHAN nyang peuputôh peukara nyoe ulôn ngon droeneueh." 6 Jaweueb Brahim, "Ka jeuet meunyoe meunan, jihnyan namiet gata dan gata jeuet gata peubuet peue mantong ateueh jihnyan." Dan Sarai pi laju ji-iélanya Hagar nyan, sampoe Hagar laju jipeuplueng droe. 7 Malaikat TUHAN laju geujak meurumpok ngon Hagai bak binéh mata ié dipadang pasi Sur. 8 Geupeugah lé malaikat nyan, "Hagar, namiet Sarai, gata rot pane dan ho gata keuneuk jak?" Jaweueb Hagar, "Ulôn plueng nibak Sarai, pocut lôn." 9 Jaweueb malaikat nyan, "Woe kheueh ubak pocut gata dan peutimang kheueh jihnyan." 10 Dan geupeugah lom lé malaikat nyan, "Ulôn teuma lôn bri keu gata aneuëk cucoe nyang le, sampoe hana meusidroe ureuëng pih nyang hase jikira awaknyan. 11 Hana treb le gata teuma tapeulahé sidroe aneuëk agam; gata boh kheueh nan aneuëk nyan Ismail, sabab TUHAN ka geudeungoe su gata mo. 12 Teuma aneuëk gata nyan udeb lagée keuleudée kleut; jihnyan teuma jilawan ureuëng toh mantong, dan soe mantong ureuëng jilawan. Jihnyan teuma udeb keudroe dan jiôh teuaseng nibak banmandum waréh kawöm jih." 13 Hagar laju jikheun lam até geuh, "Peu kheueh beutôi ka ulôn ngieng Allah nyang geupakoe lôn?" Teuma óh lheueh nyan laju geupeugah nan TUHAN, nyang ka geumeututoe ngon gobnyan, "Allah geupakoe." 14 Nyang kheueh sabab jih ureuëng jipeugah mon lamkawan Kades ngon Bered nyan, "Mon Gobnyan Nyang Udeb Nyang Pakoe Ulôn." 15 Óh lheueh nyan Hagar laju geupeulahé sidroe aneuëk agam, dan Brahim, ayah gobnyan, geuboh nan aneuëk nyan Ismail. 16 Bak masanyan Brahim ka meu-umu lapan ploh nam thon.

Keujadian 17

1 Watée Brahim ka meu-umu sikureueng ploh sikureueng thon, TUHAN geupeuleumah droe ubak gobnyan sira meufeureuman lagée nyoe, "Ulôn kheueh Allah Nyang Mahakuasa. Taát kheueh bak Ulôn dan peubuet kheueh lagée nyang Ulôn lakée. 2 Ulôn teuma Lôn ikat janji ngon gata dan Ulôn bri ubak gata keuturonan nyang le." 3 Dan geusujut kheueh Brahim, óh lheueh nyan Allah meufeureuman lom, 4 "Nyoe kheueh janji Ulôn nyang Ulôn peugét ngon gata: Ulôn meujanji bahwa gata teuma jeuet keu bapak indatu bansa-bansa. Ngon sabab nyan nan gata bukon le Brahim, teuma Lôn gantoe jeuet keu Ibrahim. 6 Ulôn teuma kubri ubak gata aneuëk cucoe nyang le, dan lamkawan awaknyan teuma na nyang jeuet keu raja-raja. Keuturonan gata jai lumpah na, sampoe awaknyan jeuet keu bansa-bansa. 7 Ulôn teuma Lôn peupeunoh janji Lôn ubak gata dan ubak keuturonan gata, tronmuron, dan janji Lôn nyan keukai. Ulôn teuma jeuet keu Allah gata dan Allah keuturonan gata. 8 Ulôn teuma Lôn bri ubak gata dan ubak keuturonan gata, tanoh nyoe, nyang saát nyoe gata duek sibagoe ureuëng aséng. banmandum tanoh Kanaan teuma jeuet keumilék aneuëk cucoe gata siumu masa dan Ulôn jeuet keu Allah awaknyan." 9 Allah meufeureuman lom ubak Nabi Ibrahim, "Gata pih harôh seutia ubak peujanjian nyoe, bah kheueh gata meunan cit ngon keuturonan gata tronmuron. 10 Gata dan banmandum keuturonan gata nyang agam harôh meukatan. 11 Phon saát nyoe gata harôh gata peukatan aneuëk manyak gata nyang agam nyang meu-umu lapan uroe, meunan cit namiet nyang lahé dirumoh gata atawa namiet nyang gata bloe. Katan nyan sibagoe tanda Ulôn ngon gata. 13 Soe mantong ureuëng harôh meukatan, dan nyan sibagoe tanda lahériyah keu teutunyok bahwa peujanjian Ulôn ngon gata na kheueh keukai. 14 Soe mantong ureuëng agam nyang hana meukatan hana le teu anggab anggota umat Ulôn sabab jihnyan hana jimumat ubak peue nyang ka Ulôn peujanji." 15 Óh lheueh nyan Allah meufeureuman ubak Nabi Ibrahim, "Gata hana jeuet le gata hôi peurumoh gata Sarai; pon saát nyoe nan inong gata nyan Sara. 16 Ulôn teuma Lôn bri beureukat ubak jih nyan dan jihnyan teuma jipeulahé sidroe aneuëk agam nyang teuma Ulôn bri ubak gata. Biet, Ulôn teuma Lôn bri beureukat ubak Sara, dan jihnyan jeuet keu ma indatu bansa-bansa. Lamkawan keuturonan jihnyan teuma na raja-raja." 17 Dan geusujut kheueh laju Nabi Ibrahim, teuma gobnyan teukém watée geupike, "Panena mungken sidroe ureuëng agam nyang ka meu-umu sireutôh thon nyoe meuteumé aneuëk? Dan panena mungken Sara jipeulahé aneuëk bak umu sikureueng ploh thon?" 18 Dan geupeugah kheueh lé gobnyan ubak Allah, "Bah kheueh Nabi Ismail mantong nyang jeuet keu ahli waréh lôn." 19 Jaweueb Allah, "Hán jeuet. Sara peurumoh gata teuma jipeulahé sidroe aneuëk agam dan gata boh nan jih Ishaq. Ulôn teuma seutia ubak peujanjian Lôn ngon aneuëk nyan dan ngon keuturonan gata siumu masa. Peujanjian nyan keukai. 20 Dan teuma Ulôn peukabul peue nyang gata lakée keuhai Nabi Ismail. Sabab nyan jihnyan teuma Lôn bri beureukat dan Lôn bri keuturonan nyang le. Jihnyan teuma jeuet keu indatu dua blaih boh ulée sukée, dan keuturonan jih Lôn peujeuet saboh bansa nyang rayeuk. 21 Teuma peujanjian Ulôn teuma Lôn ikat ngon Nabi Ishaq, aneuëk gata nyang teuma jipeulahé lé Sara peurumoh gata, thon ukeu kira-kira watée jih lagée nyoe." 22 Óh ka lheueh geupeugah lagée nyan, Allah laju geutinggai Nabi Ibrahim disinan. 23 Bak uroe nyan cit teuma, Nabi Ibrahim geutaát ubak Po teu Allah laju geujak peukatan aneuëk gobnyan Nabi Ismail, dan banmandum ureuëng agam nyang na lam rumoh gobnyan, meunan cit namiet-namiet nyang lahé dirumoh gobnyan atawa nyang geubloe banmandum nyan geupeukatan. 24 Nabi Ibrahim ka meu-umu sikureueng ploh sikureueng thon watée gobnyan teupeukatan 25 dan Nabi Ismail aneuëk gobnyan ka meu-umu lhée blaih thon. 26 Awaknyan teupeukatan bak uroe nyang saban, 27 meusajan-sajan ngon banmandum namiet Nabi Ibrahim.

Keujadian 18

1 TUHAN geupeuleumah droe ubak Nabi Ibrahim bak binéh bak-bak kayée keuramat teumpat iébadat di Mamre. Bak watée nyan uroe tutong lumpah na, dan Nabi Ibrahim teungoh geuduek-duek bak babah pintoe khimah gobnyan. 2 Watée gobnyan geubeuôt ulée geuh, leumah laju geukalon na lhée droe ureuëng ka teudong dikeue gobnyan. Nabi Ibrahim lagée geuplueng geujak sambot awaknyan. Sira geusujut 3 laju geupeugah, "Teungku, teungku, bék neuliengkeu khimah ulôn sigohlom droeneueh piôh bak teumpat lôn; neupeu idhin kheueh ulôn mangat jeuet lôn peutimang Teungku. 4 Bah kheueh lôn jakcok ié mangat jeuet lôn rhah gaki Teungku. Deungon galak até lôn peusila Teungku neupiôh hék yueb bak kayée nyoe. 5 Ulôn teuma lôn peuhidang peunajoh meusikada, mangat teungku-teungku meuteumé teunaga barô keuneujak lom teuma. Teungku-teungku ka neuhoreumat ulôn, deungon neupiôh bak rumoh ulôn nyoe." Jaweueb awaknyan, "Teurimong gaséh ateueh keugét até gata. Kamoe teuma kamoe piôh." 6 Reujang that-that Nabi Ibrahim geutamong lam khimah sira geupeugah ubak Sarai peurumoh geuh nyan, "Bubagaih, gata cok laju saboh eumpang teupông nyang paleng gét, dan gata peugét laju ruti bulat." 7 Óh lheueh nyan laju geuplueng ubak beulatang peulara gobnyan, deungon sigab laju geucok saboh aneuëk leumô nyang teumbon dan nyang leumpok asoe jih, óh ka lheueh geucok atranyan banmandum laju geujok ubak namiet geuh, lé namiet geuhnyan laju jipeusaneut deungon bagaih that. 8 Óh ka lheueh nyan Nabi Ibrahim laju geucok mom jih, ulée mom, dan eungkot sie nyang ka lheueh teutaguen nyan, mandum nyan laju geuhidang ubak jamé-jamé geuh nyang kana jiduek yueb bak kayée nyan. Teungoh awaknyan makheun, Nabi Ibrahim keudroe nyang peutimang awaknyan yueb bak kayée nyan. 9 Óh lheueh nyan awaknyan geutanyong, "Pat peurumoh gata, Sara nyan?" "Na lam khimah," jaweueb Nabi Ibrahim. 10 Sidroe nibak awaknyan laju geupeugah, "Sikureueng buleuen teuk ulôn teuma lôn gisa. Dan bak watée nyan Sara peurumoh gata teuma jipeulahé sidroe aneuëk agam." Bak watée nyan Sara teungoh geudeungoe peue nyang jipeugah lé ureuëng nyan, Sara na dikeue pintoe khimah dilikot jamé, watée ureuëng nyang peugah haba. 11 Nabi Ibrahim dan Sara ka tuha that, dan Sara ka hana le jiteuka he. 12 Sabab nyan kheueh Sara teukém lam até geuh sira geupeugah, "Ulôn nyang ka tuha dan layée lagée nyoe, panena mungken lôn meujimak lom ngon lakoe lôn? -- Dan dilakoe lôn pih ka tuha saban lagée lôn." 13 Dan TUHAN laju geutanyong ubak Nabi Ibrahim, "Pakon Sara jikém dan jiragu peu kheueh jihnyan mantong hase jipeulahé aneuëk bak masa tuha jih? 14 Hana sapeue pih nyang mustahe nibak TUHAN, lagée nyang ka lheueh Ulôn peugah bunoe, sikureueng buleuen teuk Ulôn teuma kuriwang keunoe. Dan bak watée nyan Sara teuma jipeulahé sidroe aneuëk agam." 15 Sabab Sara teumakot, laju geubantah, geupeugah lé Sara, "Ulôn hana lôn kém." Geujaweueb lé TUHAN, "Beutôi, bunoe gata kém." 16 Óh lheueh nyan ban lhée droe jamé bunoe laju geujak sira geu intat lé Nabi Ibrahim. Dan trok kheueh laju awaknyan bak saboh teumpat nibak teumpat nyan awaknyan hase geukalon Sodom. 17 TUHAN geupeugah lam até geuh, "Ulôn hana Lôn som ubak Nabi Ibrahim peue nyang harôh Ulôn peubuet. 18 Seudangkan keuturonan jih teuma jeuet keu bansa nyang meukuasa dan bansa nyang paleng rayeuk? Bukon kheueh sabab na jih nyan, banmandum bansa nyang na ateueh rhueng bumoe nyoe ka Ulôn bri beureukat? 19 Jihnyan ka Ulôn piléh mangat jipeurintah ubak aneuëk-aneuëk jih dan ubak keuturonan jih mangat jitaát ubak Ulôn dan jipeubuet peue-peue nyang gét dan ade. Meunyoe hainyan awaknyan peubuet, peue-peue nyang ka Ulôn meujanji ngon Nabi Ibrahim teuma Lôn peusampoe." 20 Dan meufeureuman lom TUHAN keu Nabi Ibrahim, "Na tudohan nyang paleng brat ateueh Sodom dan Gomora, dan keubit desya awaknyan raya lumpah na. 21 Sabab nyan kheueh Ulôn keuneuk tron keudeh keuneuk jak pareksa peu kheueh banmandum tudohan nyang Ulôn deungoe nyan beutôi atawa hana?" 22 Dan óh lheueh nyan dua droe nibak jamé-jamé nyan laju geujak u Sodom, teuma TUHAN mantong tinggai meusajan ngon Nabi Ibrahim. 23 Nabi Ibrahim laju geupeurab ubak TUHAN sira geutanyong lagée nyoe, "Peu kheueh beutôi TUHAN keuneuk peubinasa ureuëng nyang hana meusalah meusajan-sajan ngon ureuëng nyang meusalah? 24 Seukira jih na limong ploh droe nyang hana meusalah lam banda nyan, peu kheueh bansaboh bansa nyan TUHAN peubinasa cit teuma? Peu kheueh hana TUHAN peuamphon mangat nyang limong ploh droe nyan seulamat? 25 Bék kheueh ureuëng-ureuëng nyang hana meusalah nyan teupoh maté meusajan ngon ureuëng nyang salah. Bék TUHAN! Sabab meunyoe hainyan TUHAN peubuet, ureuëng nyang hana meusalah pasti jihuköm meusajan-sajan ngon ureuëng nyang meusalah. Panena mungken hakém seumeusta álam nyoe geupeubuet nyang hana ade!" 26 TUHAN meufeureuman, "Seukira jih na Lôn teumé limong ploh droe ureuëng nyang hana meusalah di Sodom, teuma Lôn peuamphon bansaboh banda nyan deumi awaknyan." 27 Geutanyong lom lé Nabi Ibrahim, "Peuamphon kheueh ateueh keubeuranian lôn-ulôn sambong haba geutanyoe nyoe, TUHAN. Ulôn nyoe na kheueh manusia, dan hana hak keu lôn peugah sapeue-sapeue. 28 Teuma mungken na peuet ploh limong droe nyang hana meusalah, bukon limong ploh droe. Peu kheueh deungon lagée nyan TUHAN teutab neupeuhanco bansaboh banda nyan sabab seuliseh jih cit limong droe sagai?" TUHAN meufeureuman, "Banda nyoe hana Ulôn peuhanco meunyoe Lôn teumé disinan peuet ploh limong droe nyang hana meusalah." 29 Nabi Ibrahim geupeugah lom, "Pakriban meunyoe peuet ploh droe nyang na ureuëng nyang hana meusalah?" Feureuman TUHAN ubak Nabi Ibrahim, "Deumi nyang peuet ploh droe nyang hana meusalah nyan, banda nyan Ulôn peuseulamat." 30 Nabi Ibrahim geupeugah lom, "Bék neubeungéh beuh, TUHAN, meunyoe ulôn meututoe lom. Pakriban meunyoe nyang hana meusalah nyan cit lhée ploh droe sagai?" Feureuman TUHAN ubak Nabi Ibrahim, "Meunyoe na Ulôn teumé lhée ploh droe nyang hana meusalah lam banda nyan, niet Ulôn keuneuk peuhanco banda nyan Ulôn peubateu." 31 Geupeugah lom lé Nabi Ibrahim, "Neupeu amphon kheueh ulôn ateueh keuajaman babah lôn nyoe lôn meututoe lom ngon Droeneueh. Ya TUHAN, pakriban meunyoe nyang hana meusalah nyan cit dua ploh droe sagai?" Feureuman TUHAN ubak Nabi Ibrahim, "Meunyoe na Ulôn teumé dua ploh droe lam banda nyan nyang hana meusalah, teuma banda nyan hana Lôn peuhanco." 32 Akhé jih Nabi Ibrahim geupeugah lom, "Bék beungéh ya TUHAN, sigoe teuk lôn peugah haba ngon Droeneueh. Pakriban meunyoe na ureuëng nyang meusalah cit siploh droe sagai?" Feureuman TUHAN ubak Nabi Ibrahim, "Meunyoe na siploh droe nyang hana meusalah, banda nyan hana Ulôn peuhanco." 33 Óh ka lheueh seuleusoe TUHAN geumeufeureuman ubak Nabi Ibrahim, TUHAN laju geujak dan Nabi Ibrahim pih laju geuwoe u rumoh gobnyan.

Keujadian 19

1 Óh lheueh geumeujamé bak Nabi Ibrahim, bandua droe malaikat nyan laju geujak u Sodom dan trok keunan watée ka malam. Nabi Lot teungoh geuduek-duek bak babah pintoe geureubang banda, dan watée geukalon mandua droe malaikat nyan, laju geubeudôh keugeujak sambot awaknyan, 2 óh ban trok keunan laju geupeugah, "Teungku-teungku, neutamong laju lam rumoh lôn. Teungku bandua droe jeuet neurhah gaki dan neumudom bak rumoh lôn. Singoh beungoh, beunyoe neutem, Teungku-teungku jeuet neubeudôh banbeungoh that keu neujak lom teuma." Teuma geujaweueb lé malaikat dua droe nyan, "Teurimong gaséh, bah kheueh kamoe mudom disinoe mantong, bak blang banda." 3 Nabi Lot laju geulakée ngon meuharab that-that, dan akhé jih mandua droe malaikat nyan laju geutamong lam rumoh Nabi Lot nyan. Nabi Lot laju geuhidang peunajoh nyang mangat that-that sira geutot ruti bube nyang séb, dan óh lheueh nyan awaknyan pi laju geumakheun. 4 Teuma sigohlom mandua droe jamé nyan geujak éh, ureuëng-ureuëng Sodom laju jikeupong rumoh Nabi Lot nyan. Banmandum ureuëng agam nyang na lam banda nyan, bah kheueh nyan nyang tuha meunan cit nyang muda, na disinan. 5 Awaknyan jitawök ubak Nabi Lot sira jitanyong, "Dipat ureuëng-ureuëng nyang banteuka dan jimudom di rumoh gata? Peujok laju awaknyan ubak kamoe, mangat jeuet kamoe meugumpôi ngon awaknyan!" 6 Nabi Lot laju geuteubiet nibak rumoh geuh, dan óh ka lheueh geutob pintoe, 7 laju geupeugah ubak ureuëng-ureuëng Sodom nyang ka jikeulileng rumoh geuh nyan, "Syedara-syedara lôn banmandum, ulôn lakée ngon peunoh harab, bék kheueh gata peubuet hai-hai nyang jeuhet lagée nyan! 8 Deungoe kheueh ulôn peugah, ulôn na aneuëk dara dua droe dan mantong peurawan. Bah kheueh ulôn jok aneuëk nyan ubak gata dan gatanyoe banmandum jeuet gata peubuet ban galak droe ateueh aneuëk ulôn mandua nyan. Asai bék sagai-sagai gata peukaru jamé ulôn nyoe; sabab ulôn wajéb lôn jaga awaknyan." 9 Teuma laju jipeugah lé ureuëng-ureuëng Sodom nyan ubak Nabi Lot, "Jak wéeh keudeh! Gata ureuëng aséng keuneuk atoe kamoe? Bagaih, jak laju! Meunyoe hán, gata teuma teupoh leubeh brat nibak mandua ureuëng nyan." Óh lheueh jikheun lagée nyan awaknyan laju jitulak Nabi Lot óh lheueh nyan meusajan-sajan jicuba keuneuk dubrak pintoe rumoh Nabi Lot nyan. 10 Teuma lé jamé nyang na lam rumoh nyan laju geusunyueng jaroe geuh uluwa dan geutarek Nabi Lot nyan lam rumoh lom dan óh lheueh nyan pintoe pih laju geutob. 11 Lé malaikat nyang dua droe nyan laju geupeubuta mata ureuëng-ureuëng nyang na bansikeulileng rumoh nyan, sampoe awaknyan hana deuh jikalon pat pintoe rumoh Nabi Lot. 12 Ban dua droe jamé nyan geupeugah ubak Nabi lot, "Meunyoe gata na aneuëk agam, aneuëk inong, meulintée atawa waréh kawöm nyang laén nyang na tinggai lam banda nyoe, gata ba kheueh awaknyan mangat jiteubiet nibak teumpat nyoe, 13 sabab banda nyoe keuneuk kamoe peuhanco. TUHAN ka geudeungoe tudohan-tudohan nyang lumpah brat ateueh ureuëng-ureuëng duek lam banda nyoe, dan kamoe ka geukirém lé gobnyan keukamoe peuhanco banda Sodom nyoe." 14 Dan Nabi Lot pih laju geujak meurumpok ngon bandua droe tunangan aneuëk gobnyan, óh trok keunan laju geupeugah, "Bubagaih gata teubiet lam banda nyoe, sabab TUHAN keuneuk peuhanco banda Sodom nyoe." Teuma lé awaknyan jipike haba Nabi Lot nyan geumeukra. 15 Óh watée uroe ka suböh, mandum droe malaikat nyan geupaksa ubak Nabi Lot mangat bubagaih geujak geutinggai teumpat nyan. "Bagaih," Kheun malaikat nyan. "Gata jak kheueh laju ngon peurumoh gata dan bandua droe aneuëk dara gata nibak teumpat nyoe, mangat gata hana maté watée banda nyoe teupeuhanco." 16 Nabi Lot bingong. Teuma TUHAN wéueh watée geungieng ateueh Nabi Lot nyan; sabab nyan kheueh mandua droe jamé geuhnyan laju geutunton Nabi Lot, peurumoh gobnyan dan mandua droe aneuëk gobnyan geupeuteubiet uluwa banda. 17 Óh ka lheueh nyan, sidroe lamkawan malaikat nyan laju geupeugah ubak Nabi Lot lagée nyoe, "Plueng kheueh, jak peuseulamat nyawöng gata! Bék gata ngieng ulikot dan bék teuma gata piyoh lam pantôn. Gata plueng kheueh u gunong-gunong, mangat gata hana maté!" 18 Teuma Nabi Lot laju geujaweueb, "Hei, Teungku bék neuyue plueng kamoe u gunong-gunong. 19 Beutôi, Teungku ka neutulông ulôn dan ka neupeuseulamat nyawöng ulôn. Teuma gunong-gunong nyan jiôh lumpah na; pat tateupeue ulôn meuteumé jilet lé bala nyang raya nyan dan ulôn pih laju maté sigohlom trok ubak gunong nyan. 20 Ngieng kheueh, dikeue nyan na banda ubit nyang hana that jiôh. Neupeu idhin kheueh ulôn plueng keunan mangat ulôn seulamat." 21 Geujaweueb lé malaikat nyan, "Gét, meunyoe meunan banda ubit nyan hana ulôn peuhanco. 22 Bagaih, plueng kheueh laju! Sabab ulôn hana hase lôn peubuet sapeue sigohlom gata trok ubak teumpat nyan." Sabab Nabi Lot geupeugah banda nyan ubit, laju teuboh nan banda nyan Zoar. 23 Mata uroe teungoh jiteubiet watée Nabi Lot trok u Zoar. 24 Dan TUHAN laju geupeutreun ujeuen beulerang nyang meu apui ateueh banda Sodom dan Gomora. 25 Mandua boh banda nyan habéh geupeuhanco, meunan cit banmandum pantôn dan seunaman dan mandum peunduduek nyang na lam banda nyan habéh hanco sampan sapa. 26 Teuma peurumoh Nabi Lot geungieng ulikot, dan bak watée nyan cit teuma gobnyan meu-ubah jeuet keu taméh sira. 27 Óh singoh beungoh, banseuboh that, Nabi Ibrahim bagaih-bagaih geujak u teumpat gobnyan dong dikeue TUHAN siuroe sigohlom teujadi nyan. 28 Gobnyan laju geupandang u ateueh Sodom dan Gomora meunan cit ubak mandum pantôn, dan deuh geukalon asab meukeupong nibak tanoh nyan, lagée asab nyang na bak tungkée apui raya. 29 Meunan kheueh, watée Po teu Allah geupeubinasa banda-banda nyan bak pantôn teumpat Nabi Lot tinggai, Allah ingat ubak Nabi Ibrahim dan geutulông Nabi Lot keu jeuet geuplueng droe. 30 Sabab Nabi Lot teumakot tinggai bak banda Zoar, teuma geujak kheueh laju ubak gunong-gunong meusajan-sajan ngon mandua aneuëk inong gobnyan, dan geutinggai laju lam guha nyang na bak gunong nyan. 31 Aneuëk inong nyang tuha jipeugah ubak adoe jih, "Ayah ka tuha, dan bansaboh nanggroe nyoe hana ureuëng agam nyang jitem meukawen ngon tanyoe mangat tanyoe meuteumé aneuëk. 32 Jak, tapeujeuet ayah geutanyoe mabök, laju taéh ngon gobnyan mangat tanyoe hase tameu aneuëk." 33 Bak malam nyan awaknyan mandua adoe ngon po laju jipeujieb ayah jih ngon ié anggô, óh lheueh nyan aneuëk nyang tuha laju jiéh ngon ayah jih nyan; dan ayah jihnyan sabab brat that mabök sampoe hana geuteupeue peue nyang ka teujadi. 34 Óh singoh beungoh aneuëk nyang tuha nyan jipeugah ubak adoe jih, "Beuklam ulôn ka ulôn éh ngon ayah! Euntreuk malam tapeumabök gobnyan lom, dan laju gata teuma nyang éh ngon gobnyan. Singoh tanyoe maséng-maséng na aneuëk." 35 Dan meunan kheueh bak malam nyan aneuëk dara Nabi Lot nyan jipeumabök lom ayah jih nyan, dan aneuëk gobnyan nyang keudua laju jiéh ngon Nabi Lot. Dan Nabi Lot sabab ka mabök nyang lumpah brat sampoe hana geuteupeue peue nyang ka teujadi. 36 Dan mume kheueh mandua aneuëk Nabi Lot sabab buet ayah jih keudroe. 37 Aneuëk nyang tuha jipeulahé sidroe aneuëk agam nyang jiboh nan Moab. Dan Moab nyan kheueh nyang jeuet keu indatu bansa Moab nyang na bak saát nyoe. 38 Aneuëk nyang keudua jipeulahé aneuëk agam nyang jiboh nan Ben-Ami. Dan jihnyan jeuet keu indatu bansa Amon nyang na bak saát nyoe.

Keujadian 20

1 Nabi Ibrahim laju geuminah nibak Mamre u bagian seulatan tanoh Kanaan, dan laju geutinggai teutab lamkawan Kades ngon Syur. Na padub treb teuma óh lheueh nyan, watée gobnyan tinggai di Gerar, 2 laju geupeugah bahwa Sara peurumoh geuhnyan na kheueh adoe gobnyan. Sabab nyan kheueh Raja Abimelekh nibak Gerar jikirém utosan gobnyan mangat Sara jiba ubak raja nyan. 3 Bak simalam Allah geupeuleumah droe ubak raja nyan lam lumpo, dan laju geupeugah, "Gata teuma maté, sabab ka gatacok ureuëng inong nyan; sabab inong nyan ka meulakoe." 4 Teuma di Abimelekh gohlom geuteumemat Sara nyan, teuma geupeugah lé raja nyan, "TUHAN, ulôn nyoe hana salah! Peu kheueh TUHAN neupeubinasa ulôn dan bansa lôn? 5 Nabi Ibrahim keudroe geupeugah bahwa inong nyan adoe gobnyan, dan inong nyan pih jipeugah bahwa jihnyan na kheueh adoe Nabi Ibrahim. Ulôn ka lôn peubuet hainyan ngon até nyang gleh, dan ulôn hana salah." 6 Allah laju geujaweueb lam lumpo nyan, "Nyan bit beutôi, Ulôn teupeu gata peubuet nyan ngon até nurani nyang gleh. Sabab nyan kheueh Ulôn seugah bék gata peubuet desya ateueh Ulôn, dan hana Lôn peubiyeu gata mat inong nyan. 7 Teuma jinoenyoe, jakpulang kheueh inong nyan bak lakoe jih. Lakoe jihnyan sidroe nabi, dan jihnyan jimeudoá keu gata, mangat gata bék maté. Teuma meunyoe gata hana tajokpulang peurumoh jihnyan, ingat, gata dan banmandum rakyat gata teuma maté!" 8 Óh singoh beungoh, banbeungoh that, Abimelekh laju geutawök banmandum peugawée gobnyan dan óh ka meusapat laju geupeugah peue nyang ka leumah lam lumpo geuh beuklam. Dan awaknyan pi teumakot ngon yo lumpah na. 9 Óh lheueh nyan Abimelekh laju geutawök Nabi Ibrahim laju geutanyong, "Peue nyang ka gata peulaku ateueh kamoe? Peue salah ulôn ateueh gata, sampoe gata peuteuka bala nyoe ateueh droe ulôn dan keurajeuen lôn? Biet hana patot gata peubuet lagée nyan ateueh ulôn. 10 Pakon tapeubuet lagée nyan?" 11 Geujaweueb lé Nabi Ibrahim, "Ulôn pike, disinoe hana ureuëng nyang jitakot ubak Po teu Allah, sampoe ulôn keuneuk jipoh maté lé ureuëng nyang keuneuk cok peurumoh lôn. 12 Lom teuma jihnyan beutôi adoe ulôn. Kamoe saboh yah, laén ma, dan óh lheueh nyan kamoe meukawen. 13 Dan watée Allah geuyue tinggai rumoh ayah dan geuyue jak meuranto u nanggroe aséng, laju lôn peugah ubak peurumoh lôn, 'Peuleumah kheueh keuseutiaan gata ubak ulôn deungon gata peugah bahwa ulôn nyoe na kheueh aduen gata.' " 14 Óh lheueh nyan Abimelekh laju geupulang Sara ubak Nabi Ibrahim, bak watéenyan na cit geubri namiet, bubiri dan leumô. 15 Geupeugah lé raja nyan ubak Nabi Ibrahim, "Nyoe kheueh banmandum nanggroe lôn; gata duek kheueh pat nyang galak gata." 16 Dan geupeugah laju ubak Sara, "Ubak aduen gata ka ulôn bri siribée péng pirak sibagoe bukeuti ubak mandum ureuëng bahwa gata beutôi-beutôi hana meusalah." 17 Banmandum ureuëng inong nyang na lam meuligoe Abimelekh ka habéh geupeu balui lé TUHAN sabab keujadian ateueh Sara peurumoh Nabi Ibrahim nyan. Dan Nabi Ibrahim pih laju meudoá ubak Po teu Allah, dan Allah laju geupeupuléh Abimelekh, peurumoh gobnyan dan namiet-namiet gobnyan nyang inong, akhé jih banmandum ureuëng inong nyang na lam meuligoe nyan ka jeuet jipeulahé aneuëk lom teuma.

Keujadian 21

1 TUHAN geubri beureukat ateueh Sara, lagée nyang ka peujanji. 2 Bak watée nyang ka geupeuteuntée lé Po teu Allah, watée Nabi Ibrahim ka tuha, mume kheueh Sara dan óh trok bak watée geupeulahé kheueh sidroe aneuëk agam, 3 Nabi Ibrahim laju geuboh nan aneuëk geuh nyan Nabi Ishaq; 4 dan watée Nabi Ishaq ka na umu lapan uroe, lé Nabi Ibrahim laju geupeukatan aneuëk geuhnyan, lagée nyang ka geupeurintah lé Allah ubak gobnyan. 5 Nabi Ibrahim ka meu-umu sireutôh thon watée Nabi Ishaq lahé. 6 Geupeugah lé Sara, "Allah ka geupeujeuet ulôn teukém sabab harok até. Soe mantong nyang deungoe hainyoe teuma teukém ngon galak meusajan ulôn." 7 Óh lheueh nyan geupeugah lom, "Soe bunoe nyang peugah bak lakoe lôn bahwa ulôn teuma lôn peumom aneuëk manyak? Teuma hainyan ka teujadi ulôn ka lôn peulahé aneuëk bahpi lakoe ulôn ka tuha lumpah na." 8 Aneuëk nyan meutamah rayeuk, dan bak uroe pon that aneuëk nyan teulah mom, Nabi Ibrahim laju geupeuna khanuri nyang lumpah rayeuk. 9 Bak siuroe, Nabi Ismail, aneuëk Nabi Ibrahim dan Hagar ureuëng inong nanggroe Meusé nyan teungoh jimeuén-meuén ngon Nabi Ishaq, aneuëk Sara. 10 Sara jikalon hainyan dan laju jipeugah ubak Nabi Ibrahim, "Use laju namiet inong nyan meusajan ngon aneuëk jih, hana jeuet aneuëk inong nyan jiteurimong atra waresan droeneueh nibak keukayaan droeneueh nyang teuma jiteurimong lé aneuëk ulôn Nabi Ishaq." 11 Nabi Ibrahim mubacut pih hana galak peue nyang ka jiyue lé inong geuh nyan, sabab Nabi Ismail aneuëk gobnyan cit. 12 Teuma po teu Allah meufeureuman ubak Nabi Ibrahim, "Bék kheueh gundah até gata keuhai namiet gata Hagar dan aneuëk jih nyan Nabi Ismail, turot kheueh peue nyang jipeugah lé Sara nyan, sabab rot Nabi Ishaq kheueh gata teuma meuteumé keuturonan nyang le lagée nyang ka Ulôn peugah ubak gata nyan. 13 Meunan cit keu aneuëk Hagar teuma Ulôn bri aneuëk cucoe nyang le mangat awaknyan jeuet keu saboh bansa. Sabab nyan aneuëk gata cit teuma." 14 Óh singoh beungoh mantong seuboh that, Nabi Ibrahim laju geujok ubak Hagar peunajoh dan saboh baluem kulét nyang meuasoe ié keubeukai bak rot ueh. Aneuëk nyan laju geukeubah bak rhueng Hagar, óh lheueh nyan laju geuyue ureuëng inong nyan. Dan geujak kheueh Hagar ngon aneuëk geuh meugeumbara lam padang pasi Bersyeba. 15 Watée ié beukai bak rot ueh nyan ka habéh, Hagar laju geukeubah aneuëk geuhnyan bak binéh gle, 16 óh lheueh nyan laju geuduek na kira-kira sireutôh metée nibak teumpat nyan. Kheun gobnyan lam até geuh, "Ulôn hana ek lôn teun watée lôn kalon aneuëk lôn maté." Dan laju geumo ngon até peudeh. 17 Po teu Allah geudeungoe su Nabi Ismail, dan dilangét malaikat Allah geumeututoe ubak Hagar, kheun gobnyan, "Peue nyang gata susah, hei Hagar? Bék teumakot, Allah ka geudeungoe su aneuëk gata. 18 Jak kheueh laju bak aneuëk gata, gata tiengkue dan gata peuseungab kheueh jihnyan. Ulôn teuma lôn peujeuet keuturonan gata saboh bansa nyang raya." 19 Dan bak saát nyan cit teuma Allah geupeudeuh bak Hagar ngon nyata, sampoe deuh geukalon lé Hagar nyan saboh mon. Dan geujak kheueh laju keunan geupasoe laju baluem kulét nyan ngon ié sampoe peunoh, óh lheueh nyan laju geubri ubak aneuëk gobnyan dan Nabi Ismail pih laju geujieb ié nyan. 20 Po teu Allah teutab geujaga Nabi Ismail, treb bak treb aneuëk nyan pih meutamah rayeuk; gobnyan tinggai teutab nibak padang pasi nyang nan jih Paran, dan jeuet keu sidroe ureuëng peulet beulatang buih nyang paleng carông. 21 Ma gobnyan laju geupeukawen Nabi Ismail nyan ngon sidroe inong ureuëng nanggroe Meusé. 22 Bak watée nyan raja Abimelekh dan Pikhol, panglima sidadu gobnyan, geujak ubak Nabi Ibrahim sira jipeugah lagée nyoe, "Allah geutulông droeneueh peue-peue mantong nyang droeneueh peubuet. 23 Sabab nyan, neumeusumpah kheueh disinoe, dikeue Po teu Allah, bahwa droeneueh hana neupeubuet nyang jeuhet ateueh ulôn, meunan cit ateueh aneuëk-aneuëk lôn, atawa keuturonan lôn. Lagée ulôn ka lôn peudeuh bahwa ulôn jroh até teuhadab droeneueh, dan neupeubuet kheueh lagée nyan teuma ateueh ulôn dan ubak nanggroe nyang droeneueh duek nyoe." 24 Kheun Nabi Ibrahim, "Ulôn meusumpah." 25 Óh lheueh nyan Nabi Ibrahim geungeuen that geuh ubak Abimelekh keuhai saboh mon nyang ka jireupah lé namiet-namiet raja nyan. 26 Jipeugah lé Abimelekh, "Ulôn hana lôn tusoe soe nyang ka reupah mon nyan. Gohlom na droeneueh peugah hainyan ubak ulôn, dan nyoe kheueh barô lôn deungoe hainyan nibak droeneueh." 27 Dan óh lheueh nyan Nabi Ibrahim laju geubri na meupadub boh bubiri, leumô ubak Abimelekh, dan bandua droe ureuëng nyan laju geupeugét peujanjian. 28 Nabi Ibrahim geupeuweuk laju tujoh boh aneuk bubiri nyang na lamkawan bubiri geuh, 29 dan Abimelekh laju geutanyong ubak gobnyan, "Keupeue droeneueh peubuet hai nyoe?" 30 Geujaweueb lé Nabi Ibrahim, "Teurimong kheueh bantujoh boh aneuëk bubiri nyoe sibagoe tanda droeneueh neuaku bahwa ulôn kheueh nyang kueh mon nyoe." 31 Nyang kheueh jeuet teumpat nyan teuboh nan Bersyeba, sabab bak teumpat nyan kheueh awaknyan bandua geumeusumpah. 32 Óh ka lheueh awaknyan geupeuna janji di Bersyeba nyan, Abimelekh dan Pikhol laju jigisa u nanggroe ureuëng Filistin. 33 Dan Nabi Ibrahim laju geupula sibak bak kayée tamariska di Bersyeba dan phon saát nyan teumpat nyan jipeuguna keu teumpat seumah TUHAN, Allah nyang keukai. 34 Óh ka lheueh nyan Nabi Ibrahim treb lom gobnyan tinggai di nanggroe ureuëng Filistin.

Keujadian 22

1 Na meupadub treb teuma óh lheueh nyan Allah geu-ujoe keuseutiaan Nabi Ibrahim, Allah geutawök, "Hei Ibrahim!" Laju Nabi Ibrahim geuseuôt, "Nyoepat lôn, TUHAN." 2 Feureuman Allah, "Gata jak kheueh u gunong Moria ngon aneuëk gata nyan Nabi Ishaq, aneuëk gata nyang tunggai, nyang paleng gata galak. Bak teumpat nyan, bak saboh gunong nyang teuma Ulôn tunyok ubak gata, gata peuseumah kheueh aneuëk gata sibagoe keureubeuen nyang teutot keu Ulôn." 3 Óh singoh beungoh, banseuboh that, Nabi Ibrahim laju geuplah-plah kayée keukayée keureubeuen nyang teutot, óh lheueh nyan kayée nyan laju geuikat ateueh keuleudée gobnyan. Óh lheueh nyan laju geujak ngon Nabi Ishaq dan dua droe peulayan gobnyan ubak gunong nyang ka geupeugah lé Allah ubak gobnyan. 4 Bak uroe nyang keulhée deuh kheueh geukalon lé Nabi Ibrahim teumpat nyang geupeugah lé Allah nyan rot jiôh. 5 Dan geupeugah laju ubak bandua droe peulayan gobnyan, "Bah kheueh kamoe mantong tinggai disinoe ngon keuleudée nyoe. Ulôn dan aneuëk ulôn keuneuk jak bak teumpat jéh keukamoe seumah TUHAN, euntreuk teuma kamoe riwang ubak gata." 6 Nabi Ibrahim laju geukeubah kayée keukeureubeuen nyan ateueh bahô Nabi Ishaq, seudangkan gobnyan keudroe geuba sikin dan ngéue apui keungon tot kayée. Watée awaknyan teungoh geujak meusajan, 7 Nabi Ishaq geutanyong bak ayah gobnyan, "Ayah!" jaweueb Nabi Ibrahim, "Nyoe lôn neuëk, peue na peureulée?" Geutanyong lé Nabi Ishaq, "Tanyoe kataba ngéue apui ngon kayée, teuma nyang lôn tanyong pat kheueh aneuëk bubiri nyang tanyoe keureubeuen nyan?" 8 Geujaweueb lé Nabi Ibrahim, "Allah keudroe nyang jok aneuëk bubiri nyan keugeutanyoe." Dan mandua aneuëk ngon yah nyan pih geujak laju. 9 Watée awaknyan ka trok ubak teumpat nyang ka lheueh geupeugah lé Allah ubak Nabi Ibrahim nyan, lé Nabi Ibrahim laju geupeudong saboh miseubah dan geususon teuma kayée apui keu ngon keureubeuen ateueh miseubah nyan. Óh lheueh nyan geuikat laju aneuëk geuhnyan dan geupeuéh laju ateueh kayée apui nyang kana diateueh miseubah nyan. 10 Óh lheueh nyan geucok laju sikin geukeuneuk sie aneuëk geuhnyan. 11 Teuma malaikat TUHAN geupeugah ubak gobnyan di langét, "Nabi Ibrahim, Nabi Ibrahim!" Jaweueb Nabi Ibrahim, "Nyoepat lôn TUHAN!" 12 "Bék gata peusakét aneuëk nyan atawa gata peubuet peue mantong ateueh aneuëk nyan," kheuen TUHAN meulalu malaikat Geuh nyan. "Jinoenyoe ka Ulôn teupeu bahwa gata taát dan horeumat ubak Ulôn, sabab gata hana tatulak keu gata seurah aneuëk gata nyang tunggai nyan ubak Ulôn." 13 Dan Nabi Ibrahim laju geukalon bansikeulileng nyan dan deuh laju geungieng na saboh bubiri agam nyang lungkée jih meusangkot lam seumak-seumak nyang na disinan. Nabi Ibrahim laju geucok bubiri nyan dan geusie laju sibagoe keureubeuen nyang teutot ubak TUHAN keugeunantoe aneuëk gobnyan. 14 Nabi Ibrahim geuboh nan teumpat nyan, "TUHAN geukeubah nyang teupeureulée". Dan sampoe saát nyoe jipeugah lé gob "Di ateueh gunong Geuhnyan TUHAN geukeubah nyang teupeureulée". 15 Sigoe teuk di langét nyang manyang malaikat TUHAN geupeugah ubak Nabi Ibrahim, 16 "TUHAN meufeureuman: Ulôn meusumpah deumi nan Ulôn keudroe, sabab gata ka gata peubuet hainyoe dan hana gata tulak keu gata jok aneuëk gata nyan nyang tunggai ubak Ulôn, 17 Ulôn teuma Lôn bri beureukat ubak gata nyang meulimpah ruwah dan Lôn peujeuet keuturonan gata sidub le bintang di langét dan lagée anoe bak binéh laôt. Aneuëk cucoe gata teuma jipeutaloe bubena musoh-musoh nyang jeuet keusiteuru jih. 18 Banmandum bansa nyang na ateueh rhueng bumoe teuma jilakée ubak Ulôn mangat Lôn bri beureukat ubak jihnyan lagée nyang ka Lôn bri beureukat ubak keuturonan gata -- sabab gata ka gata taát ubak peue nyang Ulôn peurintah." 19 Óh ka lheueh nyan geuriwang kheueh Nabi Ibrahim ubak bandua droe peulayan gobnyan, dan ngon awaknyan meusajan-sajan geujak u Bersyeba, dan Nabi Ibrahim laju geutinggai teutab disinan. 20 Nabi Ibrahim na aduen geuh nan jih Nahor. Óh ka lheueh keujadian bak Gunong Moria nyan, Nabi Ibrahim na geudeungoe bahwa Milka, peurumoh Nahor kana geumeu aneuëk lapan droe aneuëk agam, nan-nan aneuëk nyan na kheueh: 21 Us, nyang paleng tuha; Bus, adoe gobnyan; Kemuel, nyang óh dudoe jeuet keu ayah Aram; 22 Kesed, Hazo, Pildas, Yidlaf, dan Betuel, 23 nyang óh dudoe jeuet keu ayah Ribka. Nyan kheueh banlapan droe aneuëk nyang geupeulahé lé Milka keu Nahor, syedara Nabi Ibrahim. 24 Nahor na gundek geuh nan jih Reuma dan nibak gundek nyan na jipeulahé Tebah, Gaham, Tahas dan Maakha.

Keujadian 23

1 Watée Sara kana umu gobnyan 127 thon, 2 gobnyan meuninggai donya di Hebron bak tanoh Kanaan. Nabi Ibrahim seudeh that dan laju geupeumo ba-e watée meuninggai peurumoh geuh nyan. 3 Óh lheueh nyan Nabi Ibrahim geutinggai manyét peurumoh gobnyan disinan dan geujak laju ubak ureuëng-ureuëng Het, nyang duek lam nanggroe nyan. Óh trok keunan laju geupeugah, 4 "Ulôn nyoe ureuëng aséng nyang na tinggai lamkawan Syedara; neupeu idhin kheueh bak ulôn mangat jeuet ulôn bloe saboh keubeueng tanoh mangat jeuet lôn jakpeukubu lam jrat peurumoh ulôn nyang ka meuninggai donya." 5 Jijaweueb lé awaknyan, 6 "Kamoe horeumat ubak Amphon sibagoe peumimpén nyang teuga lamkawan kamoe, dan neujak peukubu kheueh peurumoh Amphon bak tanoh jrat nyang paleng gét nyang na nibak kamoe. Kamoe banmandum galak kamoe peuna kubu keupeurumoh Amphon." 7 Óh lheueh nyan Nabi Ibrahim pih laju geusujut dikeue awaknyan, 8 dan laju geupeugah, "Meunyoe Syedara banmandum rela lôn peukubu peurumoh lôn disinoe, tulông kheueh neulakée ubak Efron, aneuëk agam Zohar, 9 mangat gobnyan geupeubloe keu ulôn Guha Makhpela nyang na bak binéh ladang geuhnyan. Bah kheueh gobnyan geupeubloe tanoh nyan disinoe, Syedara-syedara nyang na disinoe jeuet neukalon keudroe. Yuem jih teuma lôn bayeue peunoh, mangat tanoh nyan jeuet keuhak milék lôn." 10 Bak watée nyan Efron teungoh jiduek-duek ngon ureuëng Het nibak teumpat meurumpok nyang nan jih pintoe geureubang banda. Dan deungon jikalon lé ureuëng nyang na disinan, laju jijaweueb, 11 "Bansa ulôn keudroe jeuet keusaksi bahwa ladang nyan meunan cit ngon guha nyang na disinan ulôn bri ubak Amphon mangat bak teumpat nyan jeuet Amphon kubu peurumoh droeneueh." 12 Teuma Nabi Ibrahim laju geusujut dikeue ureuëng-ureuëng Het nyan, 13 dan deungon jideungoe lé banmandum ureuëng nyang na disinan, laju geupeugah ubak Efron, "Deungoe kheueh ulôn peugah. Ulôn meukeusut keuneuk bloe banmandum ladang nyan. Teurimong kheueh péng jih, mangat jeuet ulôn kubu peurumoh lôn bak teumpat nyan." 14 Jijaweueb lé Efron, "Saboh keubeung tanoh nyang yuem jih cit peuet reutoh péng pirak keupeue kheueh guna nyan keutanyoe bandua? Jak kubu kheueh peurumoh Amphon bak teumpat nyan." 16 Nabi Ibrahim situju ngon yuem sidueb nyan. Gobnyan laju geuitong péng pirak sidub nyang ka jipeugah lé Efron nyan, na kheueh peuet reutoh péng pirak, meunurot timbangan nyang jipeuguna lé saudaga. Dan geubayeue laju ubak Efron, deungon jikalon lé banmandum ureuëng Het nyang na disinan. 17 Meunan kheueh jeuet jih, ladang Efron nyang na di Makhpela disiblaih utimu Mamre, ka jeuet keu hakmilék Nabi Ibrahim. Lam tanoh nyan nyang na ladang ngon guha meunan cit banmandum bak-bak kayée nyang na disinan dan bak kayée nyang na bak bataih-bataih nyan. 18 Tanoh nyan jiaku sibagoe tanoh Nabi Ibrahim lé banmandum ureuëng Het nyang na teuka bak teumpat meurumpok di babah pintoe geureubang banda. 19 Óh ka lheueh nyan Nabi Ibrahim laju geupeukubu Sara peurumoh geuhnyan lam guha Makhpela di tanoh Kanaan. 20 Meunan kheueh ladang meusajan ngon guha nyang na disinan nyang yoh awai atra ureuëng Het, ka jeuet keu hakmilék Nabi Ibrahim keugeupeuguna sibagoe lampôh jrat.

Keujadian 24

1 Nabi Ibrahim ka tuha lumpah na, dan gobnyan geubri beureukat lé TUHAN lam hai peue mantong. 2 Bak siuroe geupeugah kheueh lé Nabi Ibrahim ubak namiet gobnyan nyang paleng tuha, nyang peutimang hareuta beunda gobnyan, "Gata peuduek kheueh jaroe gata ateueh pha ulôn. 3 Gata meusumpah kheueh deumi TUHAN, Allah nyang kuasa langét bumoe, bahwa gata hana gata mita peurumoh keu Nabi Ishaq aneuëk lamkawan ureuëng-ureuëng nyang na di tanoh Kanaan nyoe. 4 Gata harôh gata gisa u nanggroe teumpat ulôn lahé keu gata mita inong lamkawan syedara lôn keupeurumoh Nabi Ishaq." 5 Dan jitanyong kheueh lé namiet nyan ubak Nabi Ibrahim, "Pakriban meunyoe aneuëk inong nyan hana jitem tinggai rumoh jih hana teuma jitem seutôt ulôn u nanggroe nyoe? Peu kheueh harôh ulôn ba aneuëk Amphon nyan u nanggroe asai Amphon?" 6 Geujaweueb lé Nabi Ibrahim, "Awaih! Bék sagai-sagai aneuëk ulôn nyan gata ba keudeh! 7 TUHAN, Allah nyang kuasa langét, ka geuba ulôn nibak rumoh ayah lôn dan nibak nanggroe waréh kawöm lón, dan Gobnyan ka geumeusumpah ubak ulôn bahwa Gobnyan teuma geubri nanggroe nyoe ubak keuturonan lôn. Meunan cit Gobnyan teuma geukirém malaikat Geuh keu jitulông gata, mangat gata hase gata teumé sidroe peurumoh nibak teumpat nyan keu aneuëk ulôn. 8 Teuma meunyoe aneuëk dara nyan hana jitem jak ngon gata, gata beubaih nibak sumpah nyoe. Pakriban cit teuma, bék gata ba aneuëk ulôn nyan keudeh." 9 Óh lheueh nyan dinamiet nyan pi laju jikeubah jaroe jih ateueh lhak pha Nabi Ibrahim amphon jih nyan, dan laju jimeusumpah keu jipeubuet peue nyang ka geupeugah lé Nabi Ibrahim nyan. 10 Namiet nyan laju jicok siploh boh unta meunan cit mubagoe rupa barang-barang nyang meuhái yuem jih atra amphon jih dan jijak laju ubanda teumpat tinggai Nahor yohmantong udeb gobnyan; teumpat jih siblaih utara Mesopotamia. 11 Óh ka trok namiet nyan keudeh, jipeupiôh laju banmandum unta-unta nyan bak binéh mon di luwa banda. Uroe ka seupôt, dan watée uroe seupôt nyan kheueh ureuëng-ureuëng inong jijak bakmon keu jijakcok ié. 12 Dan namiet nyan pih laju jimeudoá, "TUHAN, Allah amphon lôn Nabi Ibrahim, tulông kheueh, mangat tugaih lôn hase nibak uroe nyoe; beugét kheueh até Droeneueh keu amphon lôn Nabi Ibrahim. 13 Ngieng kheueh, ulôn dong bak binéh mon nyoe. Sikeujab teuk aneuëk-aneuëk dara nibak banda teuma jijak cok ié bak mon nyoe. 14 Ulôn teuma lôn peugah ubak sidroe ureuëng lamkawan aneuëk dara nyan, 'Tulông, peutreun kheueh pacök ié gata ulôn keuneuk jieb ié bacut.' Meunyoe jijaweueb, 'Bapak jieb kheueh, dan meunan cit ngon unta-unta Bapak teuma lôn bri cit ié jieb!' Nyan kheueh ureuëng nyang TUHAN piléh keu peurumoh hamba Droeneueh Nabi Ishaq. Meunyoe hainyan teujadi, ulôn teuma lôn teupeu bahwa TUHAN ka jroh até ubak amphon lôn Nabi Ibrahim." 15 Teungoh gobnyan meudoá nyan, na sidroe aneuëk dara nyang nan jih Ribka, ureuëng jih lagak lagoena dan mantong peurawan, laju trok bak mon nyan sira jigulam pacök ié nibak bahô. Sidara nyan aneuëk Betuel, dan ureuëng syiek Betuel na kheueh Nahor dan Milka; Nahor nyan na kheueh aduen Nabi Ibrahim. Ribka laju jijak bak mon nyan óh trok keunan laju jipaso pacök ié jihnyan, óh lheueh nyan laju jiwoe. 17 Namiet Nabi Ibrahim nyan laju jiplueng sira jipeurab ubak aneuëk dara nyan dan jipeugah laju, "Tulông neuëk, gata bri kheueh ulôn jieb ié nyang na lam pacök gata nyan." 18 Jijaweueb lé aneuëk dara nyan, "Neujieb kheueh pak," dan bagaih-bagaih pacök nyan jipeutreun nibak bahô jih, dan sira jimat pacök nyan laju jibri ié jieb ubak namiet nyan. 19 Óh ka lheueh seuleusoe namiet nyan jijieb ié; jipeugah kheueh lé aneuëk dara nyan, "Ulôn keuneuk jak timok ié lom keu unta-unta Bapak, mangat banmandum beulatang nyan jeuet jijieb ié sipuih-puih jih." 20 Óh lheueh nyan bagaih-bagaih ié nyang na lam pacök nyan jiro lam teumpat ié unta, dan óh lheueh nyan jiplueng lom bak mon jijak cok ié leubeh le lom sampoe banmandum unta nyan habéh jiteumé jieb ié. 21 Namiet Nabi Ibrahim teutab geungieng mantong hainyan dan hana geumeututoe meusikrak haba. Gobnyan geukeuneuk kalon peu kheueh TUHAN geubri hase useuha geuh nyan atawa hana. 22 Óh ka lheueh jijieb ié unta nyan banmandum samoe puih sipuih-puih jih, namiet Nabi Ibrahim laju geucok piasan méuh nyang paleng meuyuem, dan laju geupeungui bak idong aneuëk dara nyan. Bak jaroe aneuëk nyan geupeungui teuma sipasang gleueng méuh. 23 Dan geupeugah laju lé namiet nyan, "Ci gata peugah soe ayah gata. Peu kheueh na teumpat éh dirumoh gobnyan keu ulôn dan rakan-rakan lôn?" 24 "Ayah ulôn Betuel bin Nahor dan Milka," jaweueb sidara nyan. 25 "Dirumoh kamoe na teumpat éh keu Bapak dan dirumoh pi jai that jerami keu eumpeuen beulatang." 26 Dan jisujut kheueh namiet nyan jiseumah TUHAN. 27 Sira jipeugah, "Pujoe kheueh TUHAN, Allah amphon ulôn Nabi Ibrahim. TUHAN rupari seutia dan get até ubak amphon ulôn Nabi Ibrahim. Gobnyan ka geupimpén ulôn langsong ubak waréh kawöm geuh." 28 Óh lheueh nyan aneuëk dara nyan laju jiplueng urumoh mak jih dan jipeugah laju banmandum peue nyang ban lheueh jialami. 29 Ribka na sidroe aduen nyang nan jih Laban. Jihnyan jideungoe mandum peue nyang ka jicalitra lé adoe jih keuhai peue nyang jipeugah lé namiet nyan. Dan jikalon teuma na piasan bak idong ngon gleung méuh bak jaroe adoe jih nyan. Dan jiplueng kheueh Laban uluwa rumoh jijak meurumpok ngon namiet Nabi Ibrahim nyan nyang mantong teudong ngon unta-unta jih bak binéh mon nyan. 31 Laju jipeugah lé Laban, "Bapak ureuëng nyang geubri beureukat lé TUHAN! Bék bapak tinggai diluwa lagée nyoe. Jak urumoh kamoe. Kamoe ka peusiab kama keu Bapak dan meunan cit keuteumpat unta-unta Bapak." 32 Dan jijak kheueh namiet nyan sira jitamong lam rumoh. Laban laju jipeutreun banmandum barang-barang nyang na ateueh unta-unta nyan, óh lheueh nyan laju jibri jerami dan eumpeuen-eumpeuen keu mandum unta nyan. Óh lheueh nyan laju jijakcok ié rhah gaki namiet nyan dan keu ureuëng-ureuëng laén rakan-rakan namiet nyan. 33 Watée peunajoh ka jihidang, namiet nyan laju jipeugah haba, "Ulôn hana lôn pajoh bu sigohlom lôn peusampoe peusan nyang ulôn ba." Jijaweueb Laban, "Hana peue, ci gata peugah." 34 Dan jipeuphon kheueh peugah haba lé namiet Nabi Ibrahim nyan, kheun gobnyan, "Ulôn nyoe namiet Nabi Ibrahim. 35 TUHAN geugaséh that-that keu amphon lôn nyan dan geupeujeuet gobnyan sidroe ureuëng nyang kaya lumpah na. TUHAN ka geubri ubak gobnyan saboh kawan bubiri, kaméng, leumô, unta, keledée, pirak, méuh, dan namiet agam ngon namiet inong. 36 Watée umu ka tuha that, Sara, peurumoh amphon lôn nyan ka geupeulahé sidroe aneuëk agam, dan amphon ulôn nyan ka geupeutreun hak waréh banmandum hareuta beunda ateueh aneuëk geuh nyan. 37 Gobnyan ka geuyue ubak ulôn mangat lôn meujanji ngon meusumpah beulôn taát peue nyang geupeurintah, meunoe kheun gobnyan ubak ulôn, 'Bék kheueh gata piléh peurumoh keu aneuëk ulôn dara-dara nyang na di nanggroe Kanaan nyoe, 38 keucuali gata mita aneuëk dara nibak waréh kawöm ayah ulôn. Dan gata jak kheueh keudeh deungoe sigra.' 39 Laju ulôn tanyong ubak gobnyan, 'Pakriban meunyoe aneuëk dara nyan hana jitem seutôt ngon ulôn?' 40 Laju geujaweueb lé gobnyan, 'TUHAN nyang sabe ulôn taát, teuma geukirém malaikat gobnyan keu geujak tulông mangat tugaih gata na hase. Gata teuma meuteumé gata mita peurumoh keu aneuëk ulôn nyang na lam kawöm lôn keudroe, jihnyan na kheueh nibak waréh kawöm ayah lôn. 41 Teuma meunyoe awaknyan jitulak gata, gata pih leupaih nibak sumpah.' 42 Dan watée ulôn katrok bak mon bunoe, laju lôn meudoá lam até, 'TUHAN, Allah amphon lôn Nabi Ibrahim, bah kheueh TUHAN neupeujeuet tugaih ulôn nyoe na hase. 43 Ulôn teuma teutab lôn dong bak binéh mon nyoe. Meunyoe na sidroe dara jijak cok ié, teuma lôn lakée bak jihnyan mangat keu ulôn jitem bri ié jieb. 44 Meunyoe aneuëk dara nyan jitem bri ié nyang ulôn lakée nyan, dan jilakée cit mangat jibri ié jieb keu unta-unta lôn, lôn yakén nyan kheueh ureuëng nyang ka TUHAN piléh jeuet keupeurumoh aneuëk amphon lôn nyan.' 45 Gohlom seuleusoe ulôn kheun doá nyan lam até, teuka kheueh Ribka jiba pacök ié ateueh bahô jih dan laju jicok ié lam mon nyan. Óh lheueh nyan ulôn peugah ubak jihnyan, 'Tulông kheueh ulôn jieb ié, ulôn grah that.' 46 Bagaih that aneuëk dara nyan jipeutreun pacök nyan nibak bahô jih sira jipeugah, 'Jieb kheueh, dan unta-unta Bapak teuma lôn bri cit jijieb ié.' 47 Óh lheueh nyan laju lôn tanyong, 'Soe kheueh ayah gata hai aneuëk meutuah?' Dan laju jijaweueb, 'Ayah ulôn nan geuh Betuel, bin Nahor dan Milka.' Laju ulôn peungui piasan méuh nibak idong meunan cit gléung méuh nibak jaroe jih. 48 Laju ulôn sujut lôn seumah dan lôn pujoe TUHAN, Allah amphon ulôn Nabi Ibrahim. Gobnyan ka geupimpén ulôn langsong bak teumpat nyoe, ubak waréh kawöm amphon ulôn, sampoe ulôn hase meurumpok ngon aneuëk dara nyoe keu aneuëk amphon lôn. 49 Jinoenyoe, meunyoe awaknyoe neutem peusaneut amphon ulôn deungon jroh dan neupeupeunoh tanggong jaweueb droeneuh sibagoe syedara gobnyan, beuneutem kheueh peugah ubak ulôn, teuma meunyoe hán neutem, neupeugah cit teuma, mangat jeuet lôn teupeu peue nyang harôh ulôn peubuet." 50 Laban dan Betuel laju geujaweueb, "Sabab peue nyang teujadi nyoe asai jih nibak TUHAN, kamoe hana patot kamoe bri keuputosan. 51 Nyoe Ribka; bah kheueh jihnyoe jijak ngon Bapak dan beujeuet keupeurumoh aneuëk amphon Bapak, lagée nyang ka geupeugah lé TUHAN keudroe." 52 Watée namiet Nabi Ibrahim nyan jideungoe haba awaknyan, laju jisujut jiseumah TUHAN. 53 Óh lheueh nyan jipeuteubiet laju peukayan, piasan pirak dan méuh, banmandum nyan laju geubri ubak Ribka. Meunan cit ubak aduen gobnyan ngon ma geuh jibri hadiah nyang meuhái-meuhái. 54 Óh lheueh nyan namiet Nabi Ibrahim meunan cit ngon rakan-rakan gobnyan nyang laén laju geumakheun meusajan teuma, dan bak malam nyan awaknyan geumudom disinan. Óh ka lheueh awaknyan jibeudôh óh singoh beungoh, namiet nyan laju jipeugah, "Neupeu idhin kheueh ulôn keuneuk jakwoe ubak amphon lôn" 55 Teuma aduen dan mak Ribka geutanyong, "Bah kheueh Ribka tinggai ngon kamoe tujoh atawa siploh uroe teuk, óh lheueh nyan barô kheueh jeuet jijak." 56 Teuma namiet nyan jijaweueb, "Bék neupeuteun ulôn. TUHAN ka geupeujeuet ulôn jak keunoe na hase; neupeu idhin kheueh ulôn woe ubak amphon lôn." 57 Jaweueb awaknyan, "Jak tajak hôi Ribka sira tatanyong pakriban kheun jih." 58 Laju awaknyan geutawök Ribka dan laju geutanyong, "Peu kheueh gatatem seutôt ureuëng nyoe?" Jaweueb aneuëk dara nyan, "Nyoe, ulôn tem." 59 Teuma awaknyan laju geubri idhin ubak Ribka ngon dendayang jiseutôt namiet Nabi Ibrahim dan rakan-rakan gobnyan. Laju awaknyan geubri beureukat ubak Ribka ngon tutoe haba lagée nyoe, "Seumoga gata Ribka, jeuet keu mak meujuta-juta manusia! Seumoga keuturonan gata jipeutaklok bubena banda musoh-musoh jih!" 61 Óh lheueh nyan meukeumah-keumah kheueh Ribka meusajan ngon inong-inong muda nyang jeuet keu dendayang gobnyan, óh seuleusoe nyan laju geuék unta dan geujak kheueh laju meusajan ngon namiet Nabi Ibrahim nyan. 62 Watée nyan Nabi Ishaq ka trok geuteuka nibak padang pasi, trok laju bak mon nyang teupeunan "Gobnyan Nyang Kalon Ulôn" dan tinggai bak bagian seulatan nanggroe Kanaan. 63 Bak siuroe watée óh seupôt, gobnyan laju geuteubiet nibak lam khimah keuneuk jak-jak lam ladang geuh, dan deuh laju geukalon unta-unta teungoh jijak. 64 Watée Ribka geukalon Nabi Ishaq, laju geutreun ateueh unta, 65 dan geutanyong laju ubak namiet Nabi Ibrahim nyan, "Soe ureuëng agam nyang na lam ladang nyan teungoh jijak ubak geutanyoe?" "Gobnyan amphon ulôn," jaweueb namiet nyan. Ban geudeungoe lagée nyan Ribka laju geucok ija seulendang geutob laju muka gobnyan. 66 Óh lheueh nyan namiet nyan laju jicalitra ubak Nabi Ishaq peue-peue nyang ka geupeubuet. 67 Óh lheueh nyan Nabi Ishaq laju geucok Ribka geupeutamong lam khimah ma gobnyan, Sara, dan Nabi Ishaq laju geumeukawen ngon Ribka. Nabi Ishaq geucinta that-that ubak Ribka; dan teuhibur kheueh até Nabi Ishaq nyang seudeh sabab ka hana le ma geuh.

Keujadian 25

1 Nabi Ibrahim geumeukawen lom ngon sidroe inong nyang nan jih Ketura. 2 Peurumoh geuhnyan jipeulahé teuma aneuëk-aneuëk nyang laén nyan nan jih na kheueh: Zimran, Yoksan, Medan, Midian, Isybak, dan Suah. 3 Yoksan ayah Syeba dan Dedan, dan keuturonan Dedan na kheueh ureuëng Asyur, ureuëng Letus, dan ureuëng Leum. 4 Aneuëk-aneuëk Midian na kheueh: Efa, Efer, Henokh, Abida, dan Eldaa. Awaknyan banmandum keuturonan Ketura. 5 Bahpi Nabi Ibrahim geupeutreun banmandum hareuta geuh ubak Nabi Ishaq, 6 yoh gobnyan mantong udeb le that-that geubri hadiah keu aneuëk-aneuëk geuh nyang laén nyang lahé nibak peurumoh-peurumoh gobnyan nyang laén. Óh lheueh nyan geuyue aneuëk-aneuëk geuhnyan u daerah bagian timu Kanaan, mangat jeuet jiôh nibak Nabi Ishaq, aneuëk gobnyan. 7 Nabi Ibrahim meuninggai watée umu geuh ka tuha that, na kheueh 175 thon. 9 Gobnyan laju geupeukubu lé aneuëk-aneuëk gobnyan, na kheueh Nabi Ishaq dan Nabi Ismail, lam Guha Makhpela nyang na bak ladang siblah utimu Mamre. Yoh masa dilée ladang nyan atra Efron bin Zohar, ureuëng Het, 10 teuma ka geubloe lé Nabi Ibrahim bak ureuëng Het nyan. Sara, peurumoh Nabi Ibrahim, nyang teukubu bak teumpat nyan. 11 Óh ka lheueh Nabi Ibrahim meuninggai donya, Allah laju geubri beureukat ubak Nabi Ishaq, aneuëk Nabi Ibrahim. Nibak masanyan Nabi Ishaq tinggai bak binéh mon nyang teuboh nan "Gobnyan Nyang Kalon Ulôn." 12 Nabi Ismail na kheueh aneuëk Nabi Ibrahim dan Hagar, inong nibak nanggroe Meusé, namiet Sara nyan. 13 Nabi Ismail na geumeu aneuëk dua blaih droe nyang teupeugah disinoe meunurot urotan lahé jih: Nebayot, Kedar, Adbeel, Mibsam, Misyma, Duma, Masa, Hadad, Tema, Yetur, Nafis dan Kedma. Banmandum aneuëk-aneuëk nyan jeuet keu indatu dua blaih boh sukée bansa, dan gampông meunan cit nan khimah-khimah awaknyan teuboh nan meunurot nan-nan awaknyan. 17 Nabi Ismail na meu-umu 137 thon bak watée gobnyan meuninggai donya. 18 Keuturonan gobnyan tinggai bak daerah lamkawan Hawila dan Syur disiblaih utimu nanggroe Meusé rot jak u Asyur. Awaknyan udeb teuaseng nibak keuturonan Nabi Ibrahim nyang laén. 19 Nyoe kheueh riwayat Nabi Ishaq aneuëk Nabi Ibrahim. 20 Nabi Ishaq ka meu-umu peuet ploh thon watée gobnyan meukawen ngon Ribka, adoe Laban, aneuëk Betuel, sidroe ureuëng Aram nibak Mesopotamia. 21 Sabab Ribka hana meuteumé aneuëk, Nabi Ishaq laju geumeu doá ubak TUHAN keupeurumoh gobnyan. Dan TUHAN geudeungoe doá Nabi Ishaq, akhé jih Ribka mume. 22 Gobnyan mume aneuëk meukeumbeue, dan sigohlom aneuëk-aneuëk nyan lahé, aneuëk manyak nyan jimeuglueng-glueng lam pruet ma jih. Geupeugah lé Ribka lagée nyoe, "Pakon hainyoe harôh teujadi ateueh ulôn?" Laju geulakée peutunyok ubak TUHAN. 23 TUHAN meufeureuman ubak gobnyan, "Dua boh bansa na lam pruet gata; gata teuma tapeulahé dua boh bansa nyang saléng jimeumusoh; adoe jih leubeh teuga nibak aduen jih nyang tuha jipeutimang nyang tulot." 24 Trok kheueh watée jih nibak Ribka keu geupeulahé aneuëk, dan laju geupeulahé dua droe aneuëk agam meukeumbeue. 25 Nyang tuha hi jih mubayang-bayang mirah, dan kulét jih lagée bajée jubah nyang mubulée. Sabab nyan kheueh teuboh nan jih Esau. 26 Watée aneuëk nyang lumboi dua lahé, jaroe jih jimat tumet Esau. Sabab nyan kheueh jihnyan teuboh nan Yakub. Nabi Ishaq ka meu-umu nam ploh thon watée awaknyan lahé. 27 Bandua droe aneuëk nyan meutamah rayeuk. Esau jeuet keusidroe ureuëng nyang peulet beulatang juah nyang gagah dan beuhe dan galak that tinggai di padang, teuma Nabi Yakub ureuëng jih seungab dan galak tinggai di rumoh. 28 Nabi Ishaq leubeh geugalak ubak Esau, sabab Nabi Ishaq galak geupajoh eungkot sie beulatang kleut. Teuma Ribka leubeh geugalak ubak Nabi Yakub. 29 Bak siuroe watée Nabi Yakub teungoh geutaguen gulée kacang mirah, geuwoe kheueh Esau nibak teumpat geupeulet beulatang kleut. Gobnyan deuk lumpah na. 30 Laju geupeugah ubak Nabi Yakub, "Ulôn deuk that. Bie bacut kacang mirah nyan." (Nyang kheueh sabab jih gobnyan teupeugah Edom. 31 Geujaweueb lé Nabi Yakub, "Gét, asai neubri keulon leubeh ilée hak droeneueh sibagoe aneuëk tuha." 32 Kheun Esau, "Hana kupako haknyan keu ulôn. Ulôn deuk lumpah na!" 33 Geupeugah lom lé Nabi Yakub, "Meusumpah kheueh ilée bahwa hak droeneueh nyan neubri ubak ulôn." Esau laju meusumpah dan geubri hak geuhnyan ubak Nabi Yakub. 34 Óh lheueh nyan lé Nabi Yakub laju geubri ubak awaknyan ruti dan siladum nibak gulée kacang mirah nyan. Esau laju geupajoh dan geujieb ié óh lheueh nyan laju geujak. Meunan kheueh Esau geupeubeuah hak gobnyan sibagoe aneuëk tuha.

Keujadian 26

1 Lam nanggroe nyan teuka lom musém deuk lagée nyang ka lheueh teujadi bak jamén Nabi Ibrahim. Nabi Ishaq laju geujak meuhadab ubak Abimelekh, raja ureuëng Filistin di Gerar dan geulakée idhin mangat geubri tinggai gobnyan disinan. 2 Hai nyan geupeubuet sabab TUHAN ka geupeuleumah droe ubak gobnyan ngon feureuman TUHAN lagée nyoe, "Bék gata jak u nanggroe Meusé; tinggai mantong di nanggroe nyoe, lagée nyang ka Ulôn peurintah ubak gata. 3 Ulôn teuma Lôn lindong dan Lôn bri beureukat ubak gata. Banmandum wilayah nyoe teuma Ulôn bri keue gata dan ubak keuturonan gata. Ulôn teuma Lôn peutrok janji lagée nyang ka lheueh Ulôn meujanji bak ayah gata Nabi Ibrahim. 4 Ulôn teuma Lôn bri keugata aneuëk cucoe nyang le jih lagée bintang di langét, dan banmandum wilayah nyoe Ulôn bri ubak awaknyan. Banmandum bansa nyang na ateueh bumoe nyoe jilakée ubak Ulôn mangat Ulôn bri beureukat ubak awaknyan lagée nyang ka Ulôn bri beureukat ubak keuturonan gata. 5 Ulôn teuma Lôn bri beureukat ubak gata, sabab Nabi Ibrahim ka jitaát ubak Ulôn dan jipeulara banmandum huköm dan peurintah Ulôn." 6 Dan phon saát nyan tinggai kheueh Nabi Ishaq di Gerar. 7 Watée ureuëng-ureuëng nyang na disinan jitanyong keuhai Ribka, Nabi Ishaq laju geujaweueb bahwa Ribka nyan na kheueh adoe gobnyan, dan bukon peurumoh gobnyan. Nabi Ishaq teumakot ureuëng-ureuëng nyang na disinan teuma jipoh maté gobnyan keu jicok Ribka nyang lumpah ceudah nyan. 8 Óh ka lheueh Nabi Ishaq tinggai disinan na padub na treb teuma, bak siuroe Raja Abimelekh geukalon gobnyan nibak peuradeun rumoh geuh, deuh laju jingieng bahwa Nabi Ishaq teungoh meuayang dan meuseunda ngon peurumoh gobnyan Ribka. 9 Dan laju geutawök Nabi Ishaq sira geupeugah lagée nyoe, "Inong nyan peurumoh gata? Keupeue gata peugah jihnyan adoe gata?" Geujaweueb lé Nabi Ishaq, "Ulôn pike ulôn nyoe jipoh maté meunyoe ulôn peugah Ribka nyan peurumoh ulôn." 10 "Peue nyang ka gata peubuet ateueh kamoe nyoe?" tanyong Abimelekh. "Sidroe lamkawan rakyat lôn jeuet mantong jiéh ngon peurumoh gata, dan meunyoe hainyan teujadi, gata kheueh nyang meutanggong jaweueb ateueh keusalahan kamoe nyan." 11 Óh lheueh nyan Raja Abimelekh laju geupeuingat banmandum rakyat geuh lagée nyoe, "Soe mantong nyang peukaru ureuëng nyoe atawa peurumoh jih, ureuëng nyan teuhuköm maté." 12 Nabi Ishaq laju geutabu bijéh keu teupula seunaman di nanggroe nyan, dan bak thon nyan meuteumé hase sireutôh goe lipat nibak nyang geutabu nyan, sabab TUHAN geubri beureukat ubak gobnyan. 13 Hareuta gobnyan laju meutamah-tamah dan gobnyan ka jeuet keu ureuëng nyang kaya lumpah na. 14 Ureuëng Filistin bingik até ubak Nabi Ishaq nyan sabab gobnyan jai that geupeulara namiet, kawan bubiri dan kawan leumô. 15 Dan awaknyan laju jidho ngon tanoh banmandum mon nyang ka jikhueh lé namiet-namiet Nabi Ibrahim yoh gobnyan mantong udeb. 16 Óh lheueh nyan Abimelekh geupeugah ubak Nabi Ishaq, "Gata tinggai kheueh nanggroe kamoe nyoe. Sabab gata ka leubeh meukuasa nibak kamoe." 17 Dan geujak kheueh laju Nabi Ishaq geujak peudong khimah gobnyan bak Pantôn Gerar. Bak teumpat nyan gobnyan tinggai na meupadub treb teuma. 18 Gobnyan laju geukueh lom banmandum mon nyang ka lheueh geukueh bak jamén Nabi Ibrahim dan nyang ka jiseubée ngon tanoh lé ureuëng Filistin óh lheueh geutinggai lé Nabi Ibrahim. Mon-mon nyan laju geuboh nan nyang saban lagée nyang ka lheueh geuboh nan lé ureuëng syiek gobnyan. 19 Namiet-namiet Nabi Ishaq geukhueh mon di Pantôn Gerar nyan dan laju jiteubiet ié nibak mata ié nyang meulimpah ruwah. 20 Teuma di ureuëng meurabe nyang na di Gerar jimeudakwa ngon ureuëng meurabe atra Nabi Ishaq. Jipeugah lé awaknyan, "Ié nyoe atra kamoe." Sabab nyan kheueh Nabi Ishaq geuboh nan mon nyan "Mon Meudakwa". 21 Namiet-namiet Nabi Ishaq geukhueh teuma mon nyang laén, teuma jiteuka lom dakwa ngon dakwi keuhai mon nyan cit teuma. Sabab nyan, Nabi Ishaq geuboh nan mon nyan "Mon Meumusoh". 22 Óh lheueh nyan gobnyan laju geuminah nibak teumpatnyan laju geukhueh teuma mon nyang keu lhée. Goenyoe hana jiteuka dakwa ngon dakwi. Sabab nyan Nabi Ishaq geuboh nan mon nyan, "Mon Beubaih". Kheun gobnyan, "Jinoenyoe TUHAN ka geubri ubak geutanyoe beubaih keu jeuet tatinggai di nanggroe nyoe, dan tanyoe teuma jeuet keu ureuëng nyang makmu nibak teumpat nyoe." 23 Óh lheueh nyan Nabi Ishaq geujak lom dan trok laju u Bersyeba. 24 Bak malam nyan TUHAN geupeuleumah droe ubak gobnyan sira geu peutreun feureuman lé TUHAN ubak gobnyan lagée nyoe, "Ulôn kheueh Allah ayah gata Nabi Ibrahim. Bék teumakot; Ulôn teutab Lôn lindong gata. Ulôn teutab Lôn bri beureukat ubak gata dan Ulôn bri ubak gata keuturonan nyang le sabab janji Ulôn ubak hamba Lôn Nabi Ibrahim." 25 Dan Nabi Ishaq pi laju geupeudong miseubah dan geuseumah TUHAN nibak teumpat nyan. Gobnyan geupeudong khimah disinan dan namiet-namiet gobnyan laju jikhueh mon nyang laén. 26 Bak siuroe teuka kheueh Abimelekh nibak Gerar, ngon Ahuzat, nyang bri naseuhat ubak gobnyan, dan Pikhol, panglima sidadu geuh, keugeujak meurumpok ngon Nabi Ishaq. 27 Dan geutanyong kheueh lé Nabi Ishaq ubak awaknyan, "Pakon gatanyoe tajak meurumpok ngon lôn saát nyoe, padahai yohmasa ilée gata meumusoh ngon lôn di nanggroe gata?" 28 Dan laju jijaweueb lé awaknyan, "Jinoenyoe barô kheueh kamoe teupeu bahwa Droeneueh geulindong lé TUHAN, teuma ngon sabab nyan nyang gét jih tanyoe peu ikat janji. Meusumpah 29 bahwa droeneueh hana neupeubuet jeuhet ateueh kamoe, lagée kamoe pih hántom na kamoe peubuet jeuhet ateueh droeneueh. Kamoe ka kamoe meusikeub nyang gét ubak droeneueh dan kamoe peubiyeu droeneueh jak deungon aman. Ka jeulaih nibak kamoe bahwa droeneueh geubri beureukat lé TUHAN." 30 Óh lheueh nyan Nabi Ishaq laju geupeujamé awaknyan, dan awaknyan pih laju makheun meusajan teuma. 31 Óh singoh beungoh awaknyan maséng-maséng laju geuikat janji nyang teupeusah ngon sumpah. Dan Nabi Ishaq pih laju geupeugah seulamat jijak ubak awaknyan sibago sahabat. 32 Bak uroenyan cit teuma namiet-namiet Nabi Ishaq jijak meulapor ubak gobnyan keuhai mon-mon nyang ka lheueh awaknyan khueh. Kheun awaknyan, "Kamoe ka meuteumé ié." 33 Laju Nabi Ishaq geuboh nan mon nyan, "Mon Sumpah". Nyang kheueh asaiphon banda nyan nan jih Bersyeba. 34 Watée Esau ka meu-umu peuet ploh thon, gobnyan laju geumeukawen ngon dua droe aneuëk dara nibak sukée bansa Het, na kheueh Yudit binti Beeri, dan Basmat binti Elon. 35 Mandua droe inong nyan jipeususah udeb Nabi Ishaq dan Ribka.

Keujadian 27

1 Bak siuroe, watée Nabi Ishaq ka tuha dan mata geuh pih ka buta, laju geutawök Esau, aneuëk gobnyan nyang paleng tuha, dan geupeugah laju ubak aneuëk geuh nyan lagée nyoe, "Pat gata hei aneuëk lôn!" "Nyoepat ulôn, ayah," jaweueb Esau aneuëk geuhnyan. 2 Geupeugah lé Nabi Ishaq, "Gata ka tateupeue bahwa ulôn nyoe ka tuha that dan bak dali adat hana treb le udeb lôn ateueh rhueng donya. 3 Dan gata cok kheueh laju bede ngon panah-panah gata, tajak laju upadang dan gata peulet kheueh keu ayah saboh beulatang kleut. 4 Óh lheueh nyan gata taguen kheueh bumangat lagée nyang ayah galak, lheuehnyan gata ba laju keunoe ubak ayah. Óh ka lheueh atranyan ayah pajoh, teuma ayah bri beureukat ayah ubak gata sigohlom ayah maté." 5 Peue nyang geupeugah lé Nabi Ishaq ngon Esau nyan geudeungoe lé Ribka peurumoh gobnyan. Dan óh ka leupah Esau geujak let beulatang buih keu ayah gobnyan Nabi Ishaq nyan, 6 geupeugah laju lé Ribka ubak aneuëk geuh Nabi Yakub, "Ban that ulôn deungoe ayah gata geupeugah ubak Esau lagée nyoe, 7 'Jak let laju saboh beulatang dan taguen laju nyang mangat keu ulôn. Óh ka lheueh atranyan ulôn pajoh, teuma ulôn bri beureukat keu gata dikeue TUHAN, sigohlom ulôn maté.' 8 Nyan, aneuëk lôn," geupeugah lom lé Ribka ubak aneuëk geuh Nabi Yakub nyan, "deungoe kheueh dan gata peubuet kheueh peue nyang ulôn peugah nyoe. 9 Gata jak kheueh ubak teumpat bubiri geutanyoe, dan gata piléh laju dua boh aneuëk kaméng nyang teumbon-teumbon, mangat jeuet ulôn taguen lagée nyang geulakée lé ayah gata. 10 Óh lheueh nyan gata ba laju ubak ayah gata mangat geupajoh, dan óh lheueh nyan gobnyan laju geubri beureukat ubak gata sigohlom gobnyan meuninggai donya." 11 Teuma Nabi Yakub laju geupeugah ubak ma geuh, "Mak, tuboh Esau mubulée seudangkan tuboh ulôn hana? 12 Pat tateupeue ayah geuraba tuboh lôn dan laju geuteupeue bahwa tanyoe ka tapeungéut gobnyan; tatakot bukon beureukat nyang geubri, nyang geubri na kheueh kutokan." 13 Geujaweueb lé ma geuh, "Bék picek até gata, hai aneuëk. Bah kheueh ulôn nyang tanggong meunyoe gata geukutok lé yah gata. Jak peubuet kheueh peue nyang ulôn yue, dan jakcok laju kaméng-kaméng nyang ulôn peugah nyan." 14 Dan Nabi Yakub pih laju geujakcok kaméng-kaméng lagée nyang ka geupeugah lé ma geuhnyan dan óh ka lheueh atranyan geucok laju geuba ubak ma geuh, dan Ribka pih laju geutaguen gulée sie lagée nyang geuhawa lé Nabi Ishaq. 15 Óh lheuehnyan Ribka laju geucok peukayan Esau nyang paleng gét, nyang na geukeubah dirumoh, peukayan nyan laju geupeungui ubak Nabi Yakub. 16 Kulét aneuëk kaméng nyan laju geubalot bak taukue dan jaroe Nabi Yakub nyang hana mubulée nyan. 17 Dan gulée nyang ka geutaguen mangat nyan laju geujok ubak Nabi Yakub meunan cit ngon ruti nyang ka lheueh geupeugét nyang rasa jih lumpah mangat. 18 Óh lheuehnyan geujak kheueh Nabi Yakub ubak ayah geuh sira geupeugah, "Ayah!" "Nyoepat lôn neuëk" seuot ayah geuh, "soe gatanyan Esau atawa Nabi Yakub?" 19 Geujaweueb Nabi Yakub, "Esau yah, aneuëk ayah nyang tuha; peue nyang ayah peusan ka ulôn peubuet. Ayah duek kheueh dan ayah pajoh kheueh eungkot sie hase lôn peulet nyoe nyang ka ulôn mita keu ayah, mangat ayah jeuet neubri beureukat ateueh ulôn." 20 Geupeugah lé Nabi Ishaq, "Bagaih that gata teumé hei aneuëk ayah." Geujaweueb Nabi Yakub, "Sabab TUHAN Allah nyang ayah seumah ka geutulông ulôn." 21 Laju geupeugah lé Nabi Ishaq ubak Nabi Yakub, "Gata peurab kheueh keunoe mangat jeuet lôn geue gata. Peu kheueh beutôi gata Esau?" 22 Nabi Yakub laju geupeurab ubak ayah geuh sira geuraba óh lheueh nyan laju geupeugah, "Su gata lagée su Nabi Yakub, teuma jaroe gata lagée jaroe Esau." 23 Nabi Ishaq hana geuturi keu Nabi Yakub sabab jaroe geuhnyan mubulée lagée jaroe Esau. Teuma bak watée Nabi Yakub keuneuk geubri beureukat, 24 gobnyan mantong geutanyong sigo teuk, "Peu kheueh beutôi gata Esau?" "Beutôi, ayah," jaweueb Nabi Yakub. 25 Laju geupeugah lé Nabi Ishaq, "Ba keunoe eungkot sie nyan. Óh ka lheueh ulôn makheun barô kheueh ulôn bri beureukat ubak gata." Nabi Yakub laju geubri eungkot sie nyan keu ayah geuh meunan cit ié anggô geubri bacut mangat geujieb. 26 Dan geupeugah kheueh laju lé ayah geuhnyan ubak gobnyan, "Peurab kheueh keunoe leubeh to lom, Neuëk, dan gata cöm kheueh ulôn." 27 Watée Nabi Yakub geupeurab keuneuk geukeucob ayah geuh nyan, Nabi Ishaq laju mubée peukayan Esau, dan laju geubri beureukat ubak gobnyan. Geupeugah lé Nabi Ishaq, "Bée nyang mangat nibak aneuëk lôn lagée bée padang nyang ka geubri beureukat lé TUHAN. 28 Seumoga Allah geubri keu gata iémbon di langét, dan geupeujeuet lampôh-lampôh ngon ladang gata subô! Seumoga Gobnyan geubri keu gata gandom dan anggô nyang meulimpah-limpah! 29 Seumoga banmandum bansa jeuet keunamiet gata, dan sukée-sukée bansa taklok ubak gata. Seumoga gata takuasa banmandum waréh kawöm gata, dan keuturonan ma gata jisujut dikeue gata. Dan teukutok kheueh mandum ureuëng nyang kutok gata dan geubri beureukat kheueh banmandum ureuëng nyang geubri beureukat ubak gata." 30 Bansagai lheueh Nabi Ishaq geubri beureukat ubak Nabi Yakub, Nabi Yakub pih laju geujak, Esau, aduen gobnyan ka geuwoe nibak ceumeucrok beulatang kleut. 31 Meunan cit gobnyan laju geutaguen gulée nyang mangat dan geuba laju ubak ayah geuhnyan, sira geupeugah lagée nyoe, "Neuduek kheueh ayah, dan neupajoh kheueh eungkot sie nyang ka ulôn ba keu ayah, mangat ayah jeuet neubri beureukat keu ulôn." 32 "Soe kah nyoe?" geutanyong lé Nabi Ishaq. "Esau aneuëk ayah nyang tuha," jaweueb Esau. 33 Nabi Ishaq ka teuka yo bansaboh tuboh geuh, dan gobnyan laju geutanyong, "Meunyoe meunan, soe nyang ka jimita beulatang dan jibri keu ulôn bunoe? Atranyan ka lheueh ulôn pajoh sigohlom gata teuka. Dan beureukat ulôn nyang paleng akhé ka ulôn bri keu jihnyan, dan jinyoe beureukat nyan ka jeuet keumilék jih siumu masa." 34 Watée geudeungoe hainyan lé Esau, gobnyan laju geumo ngon su meuleungkeng dan até geuh that peudeh, sira geupeugah lom, "Neubri cit ulôn beureukat, hei ayah!" 35 Nabi Ishaq geupeugah lom, "Adoe gata ka jijak keunoe dan jipeungéut ulôn. Jihnyan ka jicok beureukat nyang sibeutôi jih atranyan ulôn bri keugata." 36 Geupeugah lé Esau, "Nyoe kali keudua jipeungéut ulôn. Pantaih nan jih Yakub. Jihnyan ka jicok hak ulôn sibagoe aneuëk tuha, dan jinoenyoe ka jicok teuma beureukat nyang sibeutôi jih atra ulôn. Peu kheueh ayah hana le beureukat nyang laén keu ulôn?" 37 Geujaweueb lé Nabi Ishaq, "Ulôn ka lôn peujeuet jih nyan amphon gata, dan banmandum waréh kawöm jih ka ulôn peujeuet keu namiet jih. Ulôn ka lheueh ulôn bri bak jihnyan gandom dan anggô. Jinoenyoe hana sapeuena le nyang ulôn bri keu gata, Neuëk!" 38 Esau teutab hana geutem piyoh geulakée sabe ubak ayah gobnyan, "Peu kheueh bak ayah nyang na cit saboh sagai beureukat? Neubri kheueh teuma beureukat nyan ubak ulôn, Ayah!" Dan Esau pih laju geumo lom teuma. 39 Óh lheuehnyan Nabi Ishaq geupeugah ubak Esau, "Hana le ié mbon nyang jitreun nibak langét keu gata hei aneuëk lôn, hana teuma lampôh nyang subô keu gata. 40 Gata teuma udeb bak mata peudeueng gata, teuma jeuet keu namiet adoe gata, teuma meunyoe gata tabrontak, gata teuma beubaih nibak kuasa jih." 41 Teuma Esau laju geubanci ubak Nabi Yakub sabab ayah gobnyan ka geubri beureukat nyan ubak adoe geuh. Laju teuka pikeran geuh, "Hana treb le ayah ka meuninggai donya dan óh ka lheueh ulôn meukabông, Nabi Yakub teuma ulôn poh maté!" 42 Watée geudeungoe lé Ribka reuncana Esau nyan, laju geuyue tawok Nabi Yakub sira geupeugah lagée nyoe, "Deungoe mak peugah, aduen gata Esau na niet keuneuk balaih dam ateueh gata dan ka jireuncana jikeuneuk poh maté gata. 43 Jinoenyoe peubuet kheueh peue nyang ulôn peugah nyoe. Gata jak laju bubagaih keudeuh ubak Laban aduen ulôn di Haran, 44 dan gata tinggai kheueh ngon gobnyan keu meupadub watée treb jih, sampoe beungéh aduen gata nyan seungab 45 dan laju jipeutuwoe peue nyang ka gata peubuet ateueh jihnyan. Óh lheuehnyan ulôn teuma lôn yue ureuëng laén mangat jipuwoe gata urumoh nyoe lom. Ulôn hán lôntem aneuëk ulôn gadôh bak uroe nyang sa." 46 Dan geupeugah kheueh lé Ribka ubak Nabi Ishaq, "Ulôn geungeuen dan gundah that watée ulôn ngieng akai peurumoh-peurumoh Esau nibak sukée bansa laén nyan. Meunyoe Nabi Yakub jimeukawen cit ngon aneuëk dara Het, leubeh gét ulôn maté."

Keujadian 28

1 Óh lheuehnyan Nabi Ishaq laju geuhôi Nabi Yakub dan geubri laju beureukat sira geupeugah lagée nyoe, "Bék kheueh gata meukawen ngon ureuëng Kanaan. 2 Gata jak kheueh u Mesopotamia, ubak keuluwarga Betuel, abusyik gata, dan gata meukawen kheueh ngon sidroe aneuëk dara apha gata si Laban. 3 Seumoga Allah Nyang Mahakuasa geubri beureukat ubak keuluwarga gata dan geubri ubak gata aneuëk cucoe nyang le, sampoe gata jeuet keu indatu bansa-bansa! 4 Seumoga TUHAN geubri beureukat ubak gata dan keuturonan gata lagée nyang ka geubri beureukat ubak Nabi Ibrahim, dan seumoga gata meuteumé keuhak milék tanoh nyang gata duek bak saát nyoe, nyang ka geubri lé Allah ubak Nabi Ibrahim!" 5 Meunan kheueh Nabi Ishaq geupeulheueh Nabi Yakub mangat geujak u Mesopotamia, ubak Laban bin Betuel ureuëng Aram nyan. Laban na kheueh aduen Ribka mak Nabi Yakub dan Esau. 6 Esau geudeungoe bahwa Nabi Ishaq ka geubri beureukat ubak Nabi Yakub dan ka geupeulheueh gobnyan mangat jeuet Nabi Yakub geujak u Mesopotamia keu geujak mita peurumoh di Mesopotamia nyan. Meunan cit bak watée Nabi Ishaq geubri beureukat ubak Nabi Yakub, gobnyan geutam Nabi Yakub mangat bék geumeukawen ngon aneuëk dara Kanaan. 7 Dan Esau geuteupeue bahwa Nabi Yakub taát that ubak peue-peue nyang geupeugah lé ayah ngon mak gobnyan dan ka geujak u Mesopotamia. 8 Barô kheueh geuteupeue lé Esau bahwa ayah gobnyan, Nabi Ishaq hana galak ubak inong Kanaan, 9 sabab nyan geujak kheueh Esau ubak Nabi Ismail, aneuëk Nabi Ibrahim, dan laju geumeukawen ngon aneuëk Nabi Ismail nyang nan jih Mahalat, adoe Nebayot. 10 Nabi Yakub laju geutinggai Bersyeba dan geujak u Haran. 11 Watée mata uroe lhob gobnyan ka trok bak saboh teumpat, laju geumudom disinan. Watée ka geupeureubah badan keuneuk geu-éh; geucok laju sineuk batée geunantoe bantai dan batée nyan laju geukaleueng bak ulée geuh. 12 Lam seuneungeut geuh nyan teuka kheueh lumpo, lam lumpo nyan deuh geukalon saboh reunyeuen nyang teudong ateueh bumoe dan ujong reunyeuen nyan manyang jih sampoe ulangét dan malaikat-malaikat geu-ek-ek treun nibak reunyeuen nyan. 13 Dan bak binéh gobnyan ka teudong TUHAN deungon feureuman geuh lagée nyoe, "Ulôn kheueh TUHAN, Allah nyang jipujoe lé Nabi Ibrahim dan Nabi Ishaq. Ulôn teuma Ulôn bri ubak gata dan keuturonan gata tanoh teumpat gata éh nyoe. 14 Keuturonan gata jai lumpah na lagée abée nyang na bak bumoe. Awaknyan teuma jipeuluwah wilayah jih sampoe u jeub-jeub arah, dan meulalu gata dan keuturonan gata, Ulôn teuma Lôn bri beureukat ubak mandum bansa nyang na ateueh rhueng bumoe. 15 Ingat kheueh, Ulôn kutulông dan Lôn jaga gata, homantong nyang gata jak, dan Ulôn teuma kupuwoe lom gata u nanggroe nyoe. Ulôn hana Lôn tinggai gata sampoe Ulôn peubuet banmandum peue-peue nyang ka lheueh Ulôn meujanji ubak gata." 16 Dan Nabi Yakub laju teubeudôh nibak teumpat éh geuh dan laju geupeugah, "TUHAN na disinoe, bak teumpat nyoe, teuma barô kheueh jinoe ulôn teupeu!" 17 Gobnyan teumakot that laju geupeugah, "Biet-biet yo dan teumakot that bak teumpatnyoe! Ka pasti nyoe baét Allah, babah pintoe geureubang syeuruga." 18 Óh singoh beungoh banseuboh buta, Nabi Yakub geubeudôh, laju geucok batée nyang geupeuguna sibagoe bantai dan geupeudong laju batée nyan sibagoe batée peuingat. Óh lheuehnyan laju geuro minyéuk zaiton ateueh batée nyan keu geupeukhusos keu Po teu Allah. 19 Teumpat nyan geuboh nan Betel. (Yoh ilée nan jih Lus). 20 Dan geumeusumpah kheueh Nabi Yakub bak teumpat nyan, "Meunyoe TUHAN geutulông dan geulindong ulôn bak lôn jak nyoe dan geubri keu ulôn peunajoh ngon peukayan 21 sampoe ulôn woe u rumoh ayah lôn deungon seulamat, TUHAN teuma jeuet keu Allah ulôn. 22 Dan ulôn teuma ulôn bri ubak TUHAN siper siploh nibak peue-peue mantong nyang ka TUHAN bri keulôn. Batée peuingat nyang ulôn peudong nyoe teuma beujeuet keu teumpat seumujoe ubak TUHAN."

Keujadian 29

1 Nabi Yakub geujak laju sampoe trok u nanggroe siblah utimu Kanaan. 2 Hana geusangka-sangka deuh laju geukalon saboh mon nyang na bak teungoh padang, bak binéh mon nyan leumah geukalon na lhée boh kawan kaméng ngon bubiri teungoh teu éh-éh nyang lazemjih jibri iéjieb bak mon nyan. Mon nyan teutob ngon batée raya. 3 Meunyoe banmandum kawan kaméng ngon bubiri nyan ka meusapat bak teumpat nyan, lé ureuëng nyang rabe beulatang nyan laju geugule batée nyan bak binéh, dan kaméng ngon bubiri nyan laju jipeujieb ié. Óh lheuehnyan lé ureuëng-ureuëng meurabe nyan laju jitob lom babah mon nyan ngon batée lom. 4 Dan geutanyong kheueh lé Nabi Yakub ubak ureuëng-ureuëng meurabe nyang na disinan, "Hei rakan, pane gata jak?" "Nibak Haran," jaweueb awak meurabe nyan. 5 Geutanyong lom lé Nabi Yakub, "Peu kheueh gata turi Laban bin Nahor?" "Kamoe turi," jaweueb awaknyan. 6 "Pakriban keuadaan gobnyan?" tanyong Nabi Yakub lom. "Lam keuadaan gét," jaweueb awaknyan. "Ngieng kheueh, nyoepat na aneuëk inong gobnyan nyang nan jih Rahel. Jihnyoe jijak keunoe jiba kawan kaméng ngon bubiri ayah jih." 7 Geupeugah lé Nabi Yakub, "Uroe mantong peungeuh dan gohlom watée jih kaméng ngon bubiri teupeutamong lam weue. Pakon mandum beulatang nyan hana gata peujieb ié, dan gata peubiyeu jimurot naleueng lom teuma?" 8 Jaweueb awaknyan, "Barô kheueh jeuet kamoe peujieb ié mandum beulatang nyoe meunyoe banmandum kaméng ngon bubiri ka habéh meusapat bak teumpat nyoe dan barô kheueh batée nyan teugule." 9 Teungoh Nabi Yakub geupeugah haba ngon awaknyan, Rahel teuka laju keunan ngon kawan beulatang kaméng dan bubiri geuh. 10 Watée geukalon lé Nabi Yakub Rahel ngon kawan kaméng dan bubiri jihnyan, geujak laju Nabi Yakub bakmon nyan dan batée nyang teutôb babah mon nyan laju geugule bakbinéh dan óh lheuehnyan geupeujieb laju ié ubak kawan beulatang Rahel. 11 Óh lheueh nyan laju geucöm Rahel dan geumo sabab até gobnyan teuharu lagoena. 12 Geupeugah lé Nabi Yakub ubak Rahel, "Ulôn aneuëk Ribka, syedara ayah gata." Dan Rahel pih laju jiplueng jiwoe urumoh dan jipeugah laju bak ayah jih peue nyang ban lheueh jialami. 13 Watée Laban geudeungoe haba keuhai Nabi Yakub, aneuëk keumuen geuhnyan, laju geuplueng keuneuk jak meurumpok ngon gobnyan. Óh banmurumpok laju geuwa lé Laban Nabi Yakub sira geucöm, dan geupeuwoe laju urumoh. Óh ka lheueh geupeugah banmandum peue-peue mantong lé Nabi Yakub ubak Laban, 14 laju geupeugah lé Laban bak aneuëk keumuen geuh nyan, "Keubiet beutôi, gata syedara krab that ngon ulôn." Nabi Yakub tinggai dirumoh nyan sibuleuen peunoh. 15 Bak siuroe geupeugah kheueh lé Laban bak Nabi Yakub, "Hana patot gata meubuet bak ulôn ngon hana teubri upah, sabab gata waréh kawöm lôn. Padub upah nyang gata lakée?" 16 Laban na dua droe aneuëk inong; nyang tuha nan jih Lea, dan adoe geuh nan jih Rahel. 17 Lea mata jih lagak that, seudangkan Rahel tuboh jih gagah dan rupa jih lagak lumpah na. 18 Nabi Yakub ka rhot cinta ubak Rahel, sabab nyan laju geujaweueb ubak Laban, "Ulôn keuneuk mubuet bak droeneueh tujoh thon treb jih meunyoe apha bie lôn meukawen ngon Rahel." 19 Geupeugah lé Laban, "Leubeh gét ulôn bri si Rahel nyan ubak gata nibak ureuëng laén; dan tinggai kheueh gata dirumoh nyoe." 20 Dan geumubuet kheueh Nabi Yakub di rumoh Laban tujoh thon treb jih mangat meuteumé geumeukawen ngon Rahel, dan nibak gobnyan thon-thon nyan hana teurasa sang-sang ban barô sa, sabab cinta gobnyan bak aneuëk dara nyan. 21 Óh lheueh nyan Nabi Yakub geupeugah ubak Laban apha geuhnyan, "Tujoh thon ka trok, neubri kheueh lôn meukawen ngon aneuëk droeneueh, apha." 22 Dan Laban pih laju geupeuna khanuri meukawen dan geu-undang mandum ureuëng nyang na lam banda nyan. 23 Teuma bak malam nyan, bukon Rahel, nyang geu intat lé Laban bak Nabi Yakub, nyang geuba bak gobnyan na kheueh Lea, dan Nabi Yakub laju geumeujampu ngon Lea. ( 24 Laban laju geubri namiet gobnyan nyang inong nyang nan jih Zilpa ubak Lea, keu jeuet keu namiet Lea.) 25 Óh singoh nyan barô kheueh geuteupeue lé Nabi Yakub bahwa nyang meukawen ngon gobnyan na kheueh Lea. Dan geujak meurumpok kheueh Nabi Yakub bak Laban sira geupeugah lagée nyoe, "Pakon apha peubuet ateueh lôn lagée nyoe? Ulôn mubuet ngon apha mangat jeuet lôn meukawen ngon Rahel? Pakon apha neupeungeut lôn?" 26 Geujaweueb lé Laban, "Meunurot adat lam nanggroe nyoe, adoe hana jeuet jimeukawen leubeh awai nibak aduen. 27 Gata preh kheueh sampoe trok tujoh uroe masa gata meukawen, Rahel pih ulôn bri ubak gata, asai gata tem mubuet tujoh thon teuk." 28 Nabi Yakub situju, dan óh ka lheueh khanuri meukawen nyan ka trok tujoh uroe, Laban laju geubri teuma Rahel ubak Nabi Yakub keupeurumoh gobnyan. ( 29 Laban geubri teuma namiet gobnyan nyang inong nyang nan jih Bilha ubak Rahel mangat jeuet geucok keu namiet geuh.) 30 Dan Nabi Yakub geumeujampu ngon Rahel, dan gobnyan leubeh geucinta bak Rahel nibak Lea. Óh lheueh Nabi Yakub geumubuet tujoh thon teuk bak Laban. 31 Watée geukalon lé TUHAN bahwa Nabi Yakub hana that geucinta ubak Lea kon lagée Rahel nyang geusayang that lé gobnyan, TUHAN laju geubri idhin ubak Lea mangat jipeulahé aneuëk, teuma Rahel teutab hana jitem meu aneuëk. 32 Lea mume dan laju jipeulahé sidroe aneuëk agam. Laju jipeugah, "TUHAN ka geukalon ulôn ureuëng susah, dan jinoenyoe lakoe lôn teuma geucinta bak ulôn." Dan laju geuboh nan keu aneuëk geuhnyan Ruben. 33 Lea mume lom dan laju geupeulahé aneuëk agam. Kheun Lea, "TUHAN ka geubri lom ubak ulôn aneuëk nyoe sabab geudeungoe bahwa ulôn hana geucinta lé lakoe." Dan laju geuboh nan aneuëk geuhnyan Simeon. 34 Lea mume lom dan geupeulahé laju aneuëk agam. Laju geupeugah, "Jinoenyoe lakoe lôn leubeh teuikat bak ulôn sabab ulôn ka lôn peulahé lhée droe aneuëk agam." Dan geuboh nan aneuëk geuhnyan Lewi. 35 Óh lheueh nyan Lea mume lom dan jipeulahé laju sidroe teuk aneuëk agam. Kheun jihnyan, "Goenyoe ulôn lôn pujoe TUHAN." Dan laju jiboh nan aneuëk nyan Yehuda. Óh lheueh nyan Lea hana le jimeu aneuëk.

Keujadian 30

1 Teuma Rahel teutab gohlom meuteumé aneuëk, sabab nyan kheueh gobnyan teuka ceumuru ubak cutpo geuh, dan laju geupeugah ubak Nabi Yakub, "Neubri kheueh aneuëk keu ulôn, meunyoe hán, ulôn teuma maté." 2 Nabi Yakub beungéh that ubak Rahel sira geupeugah, "Ulôn nyoe bukon Allah. Gobnyan kheueh nyang peujeuet gata sampoe gata hana meuteumé aneuëk." 3 Dan laju geupeugah lé Rahel, "Nyoe namiet ulôn Bilha; droeneueh éh kheueh ngon jihnyoe mangat namiet nyoe jeuet jipeulahé aneuëk. Ngon lagée nyan ulôn nyoe ka jeuet keu ma meulalu jihnyan." 4 Dan Bilha nyan laju jijok bak lakoe geuh, dan Nabi Yakub pih geumeusituboh ngon namiet nyan. 5 Bilha laju mume dan jipeulahé sidroe aneuëk agam. 6 Dan Rahel laju geupeugah, "Allah ka geupeuade deumi keu keupeuntengan ulôn. Geudeungoe doá ulôn dan geubri keu ulôn sidroe aneuëk agam." Óh lheuehnyan laju geuboh nan aneuëk nyan Dan. 7 Bilha mume lom dan jipeulahé teuma sidroe aneuëk agam. 8 Geupeugah lé Rahel, "Ulôn ka lôn useuha siteungoh maté lôn lawan cutpo lôn, dan ulôn meunang," sabab nyan laju geuboh nan aneuëk nyan Naftali. 9 Watée Lea ka jitée droe bahwa jihnyan hana hase lé jipeulahé aneuëk, laju jijok namiet jihnyan, Zilpa, keu Nabi Yakub mangat jeuet geucok keupeurumoh gobnyan. 10 Zilpa laju jipeulahé sidroe aneuëk agam. 11 Lea laju jipeugah lagée nyoe, "Ulôn meu-untong," laju jiboh nan aneuëk nyan Gad. 12 Zilpa jipeulahé lom sidroe teuk aneuëk agam, 13 dan Lea jipeugah lagée nyoe, "Mubahgia that ulôn nyoe! Jinoenyoe banmandum ureuëng inong teuma jipeugah keu ulôn bahwa ulôn nyoe mubahgia." Sabab nyan laju jiboh nan aneuëk nyan Asyer. 14 Watée musém pot boh gandom, Ruben laju jijak u padang dan jiteumé laju disinan sijeunéh seunaman ubat, dan atra nyan laju jiba ubak Lea, ma jihnyan. Rahel geupeugah ubak Lea, "Neubri kheueh keu ulôn bacut mantong nibak jeunéh seunaman ubat nyang jiteumé lé aneuëk droeneueh nyan." 15 Jijaweueb lé Lea, "Peu kheueh gohlom seb gata cok lakoe ulôn? Jinoenyoe keuneuk gata cok teuma sijeunéh seunaman ubat nyang ka jiteumé lé aneuëk ulôn." Kheun Rahel, "Meunyoe droeneueh neutem bri ubat nyang jiteumé lé aneuëk droeneueh nyan ubak ulôn, droeneueh jeuet neuéh ngon Nabi Yakub malam nyoe." 16 Watée Nabi Yakub geuwoe u rumoh nibak padang seupôt uroe nyan, Lea laju lajujisambot gobnyan sira jipeugah lagée nyoe, "Neu-éh kheueh ngon ulôn malam nyoe sabab ulôn ka ulôn bayeue keunyan ngon sinaman ubat nyang jiteumé lé aneuëk ulôn." Dan Nabi Yakub laju meusibadan ngon Lea bak malam nyan. 17 Allah laju geuteurimong doá Lea, dan geuhnyan laju mume dan geupeulahé aneuëk nyang keulimong. 18 Jipeugah lé lea, "Allah kheueh nyang bri keu ulôn upah sabab ulôn ka ulôn jok Zilpa keu lakoe lôn," sabab nyan laju jiboh nan aneuëk nyan Isakhar. 19 Lea mume lom dan laju jipeulahé aneuëk nyang keunam. 20 Jipeugah lé Lea, "Allah ka geubri keu ulôn hadiah nyang paleng lagak. Jinoenyoe lakoe lôn teuma geuhoreumat keu ulôn, sabab ulôn ka lôn peulahé nam droe aneuëk agam," sabab nyan laju jiboh nan aneuëk nyan Zebulon. 21 Óh ka lheueh nyan Lea jipeulahé teuma sidroe aneuëk inong nyang jiboh nan Dina. 22 Dan teuingat kheueh Allah keu Rahel; Allah laju geuteurimong doá Rahel dan geubri keumungkenan Rahel nyan jipeulahé aneuëk. 23 Dan Rahel laju mume dan jipeulahé laju sidroe aneuëk agam. Jipeugah lé Rahel, "Allah ka geusampôh banmandum keuhinaan ulôn. 24 Seumoga TUHAN geubri keu ulôn sidroe teuk aneuëk agam." Sabab nyan jiboh nan aneuëk nyan Yusuf. 25 Óh ka lheueh Rahel geupeulahé Nabi Yusuf, Nabi Yakub laju geupeugah ubak Laban, "Neupeu idhin kheueh ulôn woe u neugahra lôn. 26 Bah kheueh ulôn ba mandua droe peurumoh dan aneuëk-aneuëk ulôn. Awaknyan ka ulôn teumé ngon cara ulôn mubuet keu apha. Apha neuteupeue, ulôn ka lôn mubuet bak droeneueh brat lumpah na." 27 Laban laju geupeugah ubak Nabi Yakub, "Gata deungoe kheueh ulôn: Ulôn meuteumé ramalan bahwa Tuhan ka geubri beureukat keu ulôn sabab na gata. 28 Gata peugah laju padub nyang gata lakée." 29 Geujaweueb lé Nabi Yakub, "Apha keudroe neuteupeue bahwa ulôn ka lôn mubuet brat lumpah na bak droeneueh, dan beulatang peulara Apha meutamah jai lé sabab ulôn peulara. 30 Sigohlom ulôn teuka keunoe, atra milék Apha hana padub na, teuma bak saát nyoe apha ka kaya. Tuhan ka geubri beureukat Apha sabab na ulôn. Jinoenyoe ka watée jih ulôn mubuet keu keuluwarga droe lôn keudroe." 31 Geupeugah lé Laban, "Dan peue nyang harôh ulôn bri keu gata?" Geujaweueb lé Nabi Yakub, "Hana peue Apha bri hareuta. Ulôn teutab lôn peulara beulatang peulara Apha, asai Apha situju ngon peue nyang ulôn usui nyoe: 32 Neupeu idhin kheueh keu ulôn bak uroe nyoe ulôn jak-jak lamkawan kaméng ngon bubiri Apha, dan ulôn cok tieb-tieb aneuëk bubiri nyang itam, meunan cit tieb-tieb aneuëk kaméng nyang muda nyang meubalang dan burek-burek. Nyang kheueh mantong upah nyang ulôn lakée. 33 Saboh bak watée singoh deungon mudah jeuet Apha teupeu peu kheueh ulôn ka lôn peubuet nyang jujoe. Watée apha neuteuka neujak ngieng upah ulôn, dan neungieng na kaméng nyang hana mubalang dan burek-burek, atawa bubiri nyang hana itam, Apha teuma neuteupeue bahwa beulatang nyan ka ulôn cue." 34 Geujaweueb lé Laban, "Ulôn situju lagée usui gata nyan! Geutanyoe teuma tapeubuet peue nyang gata peugah nyan!" 35 Teuma bak uroenyan Laban laju jipeuaséng banmandum kaméng agam nyang mubalang dan mandum kaméng inong nyang mubalang, nyang burek-burek, atawa nyang na tanda putéh jih; meunan cit geupeuaséng banmandum bubiri nyang itam. Óh lheueh nyan laju geuyue bak aneuëk-aneuëk mangat jiuseuha beulatang nyan, 36 dan jijak kheueh awaknyan sira jiba beulatang-beulatang nyan jipeujiôh nibak Nabi Yakub, jiôh jih na lhée uroe jak. Nyang tinggai nibak kaméng ngon bubiri atra Laban nyan laju geupeulara lé Nabi Yakub. 37 Óh lheueh nyan Nabi Yakub geucok laju cabeueng-cabeueng bak kayée hawar nyang ijo-ijo, bak badam dan bak berangan, laju geupuliek siladum kulét bak kayée nyan sampoe ka jeuet mubalang-balang. 38 Laju geukeubah cabeueng kayée nyan dikeue kawan kaméng nyan, lam teumpat jieb ié jih, sabab beulatang nyan galak that jimeukawen watée keuneuk jijieb ié. 39 Dan kaméng-kaméng nyan laju jimeukawen dikeue cabeueng-cabeueng kayée nyan, aneuëk beulatang nyan kureng atawa mubalang atawa burek-burek. 40 Óh lheuehnyan Nabi Yakub laju geucok bubiri-bubiri laju geupeuhadab ukeue kaméng-kaméng nyang mubalang dan nyang itam. Deungon cara lagée nyan gobnyan ka meuteumé kawan beulatang geuh keudroe dan geupeuaséng laju nibak kawan beulatang Laban. 41 Meunyoe beulatang-beulatang nyang teuga teungoh jimeukawen, Nabi Yakub laju geukeubah cabeueng-cabeueng kayée nyang ka lheueh geupuliek nyan dikeue beulatang nyan, lam teumpat jieb ié. 42 Teuma cabeueng-cabeueng kayée nyan hana geukeubah dikeue beulatang nyang leumoh. Dan banmandum beulatang nyang putéh nyan leumoh, dan nyan kheueh atra Laban, seudangkan banmandum beulatang nyang itam, mubalang, burek-burek teuga nyan, dan nyan kheueh atra Nabi Yakub. 43 Deungon lagée nyan Nabi Yakub ka jeuet keu ureuëng kaya raya. Bak gobnyan ka jai that kawan kaméng ngon bubiri, unta, keuleudée dan namiet-namiet.

Keujadian 31

1 Nabi Yakub geudeungoe aneuëk-aneuëk Laban geupeugah lagée nyoe, "Nabi Yakub ka geucok banmandum hareuta ayah geutanyoe. Mandum atra keukayaan geuhnyan asai jih nibak atra ayah tanyoe." 2 Dan Nabi Yakub geukalon Laban tuwan geuhnyan hana ramah le lagée yoh ilée ubak gobnyan. 3 Laju TUHAN meufeureuman ubak Nabi Yakub, "Jakwoe kheueh u nanggroe ayah gata dan ubak waréh kawöm gata. Ulôn teuma Lôn jaga gata." 4 Óh lheuehnyan Nabi Yakub geuyue bak sidroe ureuëng mangat jijak peugah ubak Rahel dan Lea mangat meurumpok ngon gobnyan di padang, bak teumpat kawan kaméng ngon bubiri gobnyan. 5 Dan geupeugah laju lé Nabi Yakub ubak awaknyan, "Ulôn kalon ayah gata hana ramah le lagée nyangka-ka ubak ulôn; teuma Allah nyang geupujoe lé ayah ulôn geupeulara ulôn. 6 Dan gata bandua kon ka gata teupeu bahwa sikeubiet-keubiet jih ulôn mubuet bak ayah gata. 7 Bahpi meunan ulôn ka geutipée dan geu-ubah-ubah upah ulôn sampoe siploh goe. Teuma Po teu Allah hana geupeubiyeu gobnyan geupeubuet jeuhet ateueh ulôn. 8 Watée ayah gata geupeugah, 'Kaméng nyang meureunek-reunek jeuet keu upah gata,' dan mandum kawan beulatang nyan jipeulahé aneuëk meureunek-reunek. Watée geupeugah, 'Kaméng nyang meubalang jeuet keu upah gata,' dan banmandum kawan kaméng nyang jipeulahé aneuëk jih mubalang. 9 Meunan kheueh Po teu Allah ka geucok kawan beulatang atra ayah gata laju geubri ubak ulôn. 10 Dan watée musém meuagam banmandum beulatang nyan, ulôn meulumpo lôn ngieng kaméng agam nyang teungoh meukawen, kureng, meubalang, dan meureunek-reunek. 11 Dan Allah ngon rupa lagée malaikat laju meufeureuman ubak ulôn lam lumpo nyan, 'Nabi Yakub!' Laju lôn jaweueb, 'Nyoe'. 12 Malaikat nyan geupeugah lom, 'Ngieng kheueh, banmandum kaméng agam nyang teungoh meukawen nyan kureng, dan meureunek-reunek dan meubalang. Hai nyan lôn saja atoe keugata sabab ka lheueh lôn kalon banmandum nyang jipeubuet lé Laban ateueh gata. 13 Ulôn kheueh nyang ka lheueh Lôn peuleumah droe ubak gata di Betel. Disinan gata ka lheueh tapeuseumah sineuk batée peuingat, deungon gata ro minyéuk zaiton ateueh batée nyan. Dan bak teumpat nyan teuma gata meusumpah ubak Ulôn. Jinoenyoe meusiab-siab kheueh dan jakwoe kheueh u nanggroe teumpat gata lahé.' " 14 Lea dan Rahel laju geujaweueb, "Hana le jeumba ayah kamoe nyang jeuet geupeuwaréh ubak kamoe. 15 Kamoenyoe geuanggab ureuëng aséng. Gobnyan ka geupeubloe kamoe dan peue nyang ka geuteurimong keu nyan, nyan pih ka geupeuhabéh tan sapeue na le. 16 Banmandum keukayaan nyang ka geucok lé Allah bak ayah kamoe nyang sibeuna jih na kheueh atra kamoe dan milék aneuëk-aneuëk kamoe. Dan neupeubuet kheueh peue nyang ka geupeurintah lé Po teu Allah ubak droeneueh." 17 Dan Nabi Yakub laju meusiab-siab keuneuk woe ubak ayah gobnyan di nanggroe Kanaan. Laju geupeuék bandua droe peurumoh geuh dan aneuëk-aneuëk gobnyan ateueh unta, dan laju geuiréng banmandum kawan kaméng ngon bubiri dan peue-peue mantong atra nyang laén nyang na geuteumé di Mesopotamia. 19 Bak watée nyan Laban na di padang teungoh geugunteng bulée bubiri, dan watée nyan kheueh teuma Rahel geucue patong peulindong keuluwarga atra ayah gobnyan. 20 Nabi Yakub hana geupeugah ubak Laban keuhai gobnyan ka geubeurangkat. 21 Gobnyan geujakcok banmandum atra beunda milék gobnyan ngon cara meudab-dab. Laju geujeumeurang Krueng Efrat dan geutuju laju u daerah gunong-gunong Gilead. 22 Lhée uroe óh lheuehnyan barô kheueh jibri thée ubak Laban bahwa Nabi Yakub ka geuplueng. 23 Dan Laban laju geupeusapat ureuëng-ureuëng gobnyan óh lheueh nyan geujak peulet laju Nabi Yakub tujoh uroe treb jih barô kheueh meurumpok di daerah gunong-gunong Gilead. 24 Watée ka malam Allah teuka ubak Laban lam lumpo gobnyan, dan geupeugah, "Awaih, bék sagai-sagai gata ancam Nabi Yakub nyan bahpi ngon sikrék haba." 25 Bak watée nyan Nabi Yakub ka geupeudong khimah gobnyan bak saboh bukét. Óh lheueh nyan bak bukét nyang laén Laban ngon ureuëng-ureuëng gobnyan pih ka geupeudong khimah. 26 Óh lheuehnyan Laban geupeugah ubak Nabi Yakub, "Keupeue gata peungeut ulôn dan gata baplueng bandua aneuëk-aneuëk lôn, siulah-ulah aneuëk lôn nyan tawanan prang? 27 Pakon gata peungeut ulôn dan gata jak seungab-seungab, hana gata lakée idhin? Seukira jih na gata lakée idhin, pasti gata ulôn peuleuh ngon galak até dan teupeuleupah gatajak sira teuiréng ngon su rapa-i musik keucapi dan surune kale! 28 Dan gata sagai-sagai hana gata bri keuseumpatan ulôn cöm aneuëk cucoe lôn sibago kamoe ka meupisah. Bangai lumpah na buet gata nyan! 29 Ulôn mantong teuga meunyoe lôn peubuet jeuhet ateueh gata, teuma beuklam Allah nyang geupujoe lé ayah gata geupeuingat ubak ulôn mangat bék sagai-sagai ulôn peuyo gata. 30 Ulôn kuteupeue bahwa gata jaknyan sabab ka meuheuet that keuneuk woe u nanggroe gata. Teuma keupeue gata cue patong peulindong keuluwarga ulôn?" 31 Dan laju geujaweueb lé Nabi Yakub, "Ulôn jak ngon seungab-seungab sabab ulôn takot apha neupeuteun aneuëk droeneueh hana jeuet ulôn ba. 32 Keuhai patong nyan, meunyoe apha na neuteumé disinoe sidroe-droe ureuëng ka jicue patong apha nyan, ureuëng nyan teuma teuhuköm maté. Peureksa kheueh, peu kheueh na barang-barang atra apha disinoe. Meunyoe na, ngon galak até neucok laju. Dan ureuëng-ureuëng geutanyoe jeuet jikalon." Nabi Yakub hana geuteupeue bahwa Rahel nyang cue patong nyan. 33 Dan Laban laju geujak ubak khimah Nabi Yakub óh trok keunan laju geu-uengkie ngon geuteumeuweueh bansaboh nyan; óh lheuehnyan geujak teuma ubak khimah Lea dan ubak khimah mandua droe namiet inong aneuëk geuhnyan, patong nyan teutab hana geuteumé. Dan akhé jih laju geutamong lam khimah Rahel. 34 Rupari Rahel ka geucok patong nyan geukeubah lam baluem peulana unta, dan gobnyan keudroe geuduek ateueh peulana nyan. Bansaboh khimah Rahel habéh geuteuweueh lé Laban, patong nyang geumita nyan teutab hana meuteumé. 35 Dan Rahel laju geupeugah ubak ayah geuh, "Bék kheueh Ayah neubeungéh keu ulôn, ulôn hana hase lôn dong lôn sambot Ayah, sabab ulôn teungoh teuka he." Laban teutab geumita keudeh keunoe, patong nyan teutab hana geuteumé. 36 Dan bak saát nyan cit teuma jiteuka kheueh beungéh Nabi Yakub, "Peue buet nyang jeuhet nyang ka ulôn peubuet ateueh droeneueh hei apha?" Kheun Nabi Yakub sira beungéh ngon geungeuen lumpah na. "Peue salah lôn sampoe apha neulet-let ulôn? 37 Jinoe, óh ka lheueh neu-uengkie ngon neuteuweueh banmandum barang-barang lôn, peue na apha teumé barang apha nyan? Peuteubiet kheueh barang nyan dan keubah laju keunoe, mangat jeuet bubena ureuëng lôn dan ureuëng-ureuëng apha jeuet keusaksi keu jicok keuputosan soe nyang beutôi dan soe nyang hana beutôi tanyoe bandua. 38 Dua ploh thon ulôn ka lheueh lôn duek dirumoh apha. Kawan bubiri ngon kaméng apha ka meuhase meu aneuëk cucoe, dan gohlom na ulôn pajoh meusaboh kaméng pih nyang atra apha nyan. 39 Nyang maté jiteugom lé beulatang juah hántom na ulôn ba ubak apha, teuma ulôn keudroe nyang gantoe beulatang peulara apha nyan. Nyang jicue lé gob bah kheueh nyan watée uroe meunan cit watée malam sabe apha lakée mangat ulôn nyang bayeue atra apha nyan. 40 Kayém that lôn rasa seu-uem watée uroe dan leupie óh watée malam. Dan kayém that mata lôn hán teupet watée ulôn éh. 41 Meunan kheueh keuadaan ulôn watée lôn tinggai dan lôn mubuet ngon apha nyang treb jih dua ploh thon peunoh. Peuet blaih thon treb jih ulôn mubuet bak apha mangat jeuet lôn meukawen ngon aneuëk apha bandua droe -- dan nam thon teuk teuma beu meuteumé kawan kaméng dan bubiri nyan. Dan sidubnyan treb pih apha ka neu-ubah-ubah upah lôn sampoe siploh goe. 42 Seukira jih ulôn hana geulindong lé Allah indatu lôn, na kheueh Allah nyang geupujoe lé Nabi Ibrahim dan Nabi Ishaq, teuma lé Apha ka pasti neuyuejak ulôn ngon jaroe sôh. Teuma Po teu Allah ka geukalon keuadaan ulôn nyang apoh apah dan buet-buet nyang ka ulôn peubuet, dan beuklam gobnyan ka geubri keuputosan nyan." 43 Dan Laban laju geujaweueb ubak Nabi Yakub lagée nyoe, "Bandua droe inong nyan aneuëk ulôn; aneuëk jih na kheueh atra ulôn, dan kawan bubiri nyan pih atra ulôn. Nyang sibeuna jih, peue-peue mantong nyang gata ngieng disinoe na kheueh atra ulôn. Teuma diulôn hana hase lôn peubuet sapeue keu lôn peuteun aneuëk cucoe lôn nyan. 44 Kareuna nyan jak kheueh geutanyoe tapeugét peujanjian dan tasuson batée-batée sibagoe tanda bahwa geutanyoe ka meujanji." 45 Óh lheueh nyan Nabi Yakub laju geucok saboh batée dan geupeudong laju sampoe jeuet keu batée peuingat. 46 Dan óh lheueh nyan laju geuyue bak ureuëng-ureuëng gobnyan mangat jipeusapat batée keu jitamon. Óh lheueh batée-batée nyan ka habéh jitamon disinan. Barô kheueh awaknyan jimakheun meusajan bak binéh sinamon batée nyan. 47 Laban geuboh nan sinamon batée nyan Yegar-Sahaduta, seudangkan lé Nabi Yakub geunoh nan Galed. 48 Geupeugah lé Laban ubak Nabi Yakub, "Sinamon batée nyoe teuma jeuet keupeuingat keu geutanyoe bandua." Nyang kheueh sabab jih teumpat nyoe teuboh nan Galed. 49 Geupeugah teuma lé Laban, "Seumoga TUHAN geukawai geutanyoe simantong tanyoe udeb jiôh lagée nyoe bagoe." Nyang kheueh sabab jih teumpat nyan geuboh nan nyang laén Mizpa. 50 Geupeugah lom lé Laban, "Meunyoe gata tapeubuet jeuhet ateueh aneuëk-aneuëk ulôn, atawa gata meukawen ngon inong laén, bah kheueh hana nyang teupeu, ingat kheueh, Allah teutab geukawai geutanyoe. 51 Nyoe kheueh batée-batée nyang ka ulôn seubée, dan nyoe batée peuingat. 52 Bah kheueh sinamon nyoe, meunan cit ngon batée peuingat nyan sibagoe peuingat keu geutanyoe bahwa ulôn hana jeuet lôn léewat sinamon nyoe keu lôn jakprang gata, dan gata pih hana jeuet gata léewat sinamon nyoe dan batée peuingat nyoe keu tajak prang lôn. 53 Allah nyang geupujoe lé Nabi Ibrahim dan nyang geupujoe lé ayah ulôn Nahor teuma jeuet keuhakém keu geutanyoe bandua." Dan óh lheueh nyan Nabi Yakub laju geumeusumpah deumi Allah nyang geuseumah lé Nabi Ishaq, ayah gobnyan keu geupeuteupat janji nyan. 54 Gobnyan laju geusie saboh beulatang dan geupeuseumah laju ateueh bukét nyan. Dan geu-undang laju ureuëng-ureuëng gobnyan mangat jimakheun meusajan. Óh ka lheueh jimakheun, awaknyan laju geumudom ateueh bukét nyan. 55 Óh singoh beungoh ban seuboh buta, Laban laju geucöm tanda meupisah keu aneuëk-aneuëk ngon cucoe gobnyan, geubri beureukat ubak awaknyan, dan óh lheueh nyan laju geuwoe urumoh gobnyan.

Keujadian 32

1 Geubeudôh nibak teumpat nyan Nabi Yakub laju geujak lom. Dan malaikat-malaikat geujak meurumpok ngon gobnyan. 2 Watée geukalon lé Nabi Yakub malaikat-malaikat nyan, laju geupeugah, "Nyoe khimah Allah," ngon sabab nyan geuboh nan teumpat nyan Mahanaim. 3 Óh lheueh nyan Nabi Yakub laju geuyue jak leubeh awai nibak gobnyan na padub droe utosan u nanggroe Edom keugeujak meurumpok ngon Esau, aduen gobnyan. 4 Nabi Yakub geupeugah ubak awaknyan, "Gata peugah ubak aduen ulôn Esau lagée nyoe, 'Ulôn Nabi Yakub, hamba droeneueh. Nyang ka nyoe ulôn na tinggai bak Laban. 5 Jinoenyoe bak ulôn na leumô, keuleudée, bubiri, kaméng dan namiet-namiet. Ulôn kirém haba ubak amphon lôn, deungon harapan amphon lôn teuma galak.' " 6 Watée mandum utosan nyan geuriwang lom bak Nabi Yakub, laju jipeugah lé awaknyan lagée nyoe, "Kamoe ka lheueh kamoe jak ubak aduen amphon, Esau, dan jinoenyoe gobnyan teungoh geujak keunoe keu geujak meurumpok ngon Amphon. Gobnyan geujak na geuba ureuëng peuet reutoh droe." 7 Ban geudeungoe habanyan Nabi Yakub teumakot lumpah na dan khawate. Dan ureuëng-ureuëng nyang na meusajan gobnyan laju geubagi jeuet dua boh keulompok, meunan cit deungon bubiri gobnyan, kaméng geuh, leumô dan unta gobnyan. 8 Geupike lé gobnyan lagée nyoe, "Meunyoe Esau geuprang keulompok nyang phon, dan keulompok nyang keudua mungken hase jipeuseulamat droe." 9 Óh lheueh nyan geupeugah lé Nabi Yakub, "Ya Allah, Allah nyang geupujoe lé abusyiek lôn Nabi Ibrahim, dan ayah ulôn Nabi Ishaq, deungoe kheueh doá ulôn nyoe! TUHAN ka geuyue ulôn mangat lôn woe lom u nanggroe lôn dan ubak waréh kawöm lôn. Dan TUHAN ka geumeujanji bahwa gobnyan nyang atoe peue-peue nyang jroh keu ulôn. 10 Ulôn hana patot lôn teurimong banmandum gaséh dan keuseutiaan nyang ka TUHAN tunyok ubak ulôn. Watée ulôn beurangkat lôn jeumeurang Krueng Yordan, watée nyan hana lôn ba sapeue nyang na cit tungkat. Jinoenyoe ulôn teuka lom deungon dua boh keulompok nyoe. 11 Ulôn lakée deungon meuharab, neupeuseulamat kheueh ulôn nibak aduen lôn Esau. Ulôn teumakot pat tateupeue gobnyan geujak prang dan geupeumaté kamoe banmandum, meunan cit ureuëng inong ngon aneuëk-aneuëk manyak. 12 Ingat kheueh bahwa TUHAN ka geumeujanji teuma geuatoe peue-peue mantong nyang jroh keu ulôn dan geubri ubak ulôn keuturonan nyang le. Hana meusidroe pi nyang hase ji-itong nyan sabab jai jih lagée anoe bak binéh pasi." 13 Óh ka lheueh geumudom disinan, Nabi Yakub laju geucok siteungoh nibak beulatang-beulatang geuhnyan keu geuhadiah ubak Esau. Hadiah nyan na kheueh: dua reutoh boh kaméng inong, dua ploh boh kaméng agam, dua reutoh boh bubiri inong, dua ploh boh bubiri agam, lhée ploh boh unta inong nyang mantong jipeumom aneuëk, meusigoe ngon aneuëk jih, peuet ploh boh leumô inong, siploh boh leumô agam, dua ploh boh keuleudée inong dan siploh boh keuleudée agam. 16 Laju geuweuk-weuk beulatang nyan lam meupadub boh keulompok dan maséng-maséng laju geuseurah ubak sidroe namiet gobnyan. Geupeugah lé Nabi Yakub ubak awaknyan, "Gata jak kheueh beuawai nibak ulôn, dan gata jaga kheueh mangat na jarak lamkawan keulompok nyang phon ngon keulompok nyang laén." 17 Nabi Yakub geupeurintah ubak namiet gobnyan nyang phon, "Meunyoe aduen ulôn Esau meurumpok ngon gata, dan geutanyong, 'Soe amphon gata? Ho keuneuk jak? Atra soe kheueh beulatang-beulatang nyang gata iréng nyan?' 18 Dan gata jaweueb kheueh lagée nyoe, 'Atra namiet droeneueh Nabi Yakub. Gobnyan geukirém nyoe sibagoe peuseumahan ubak Esau, amphon gobnyan. Namiet droeneueh keudroe Nabi Yakub teungoh geujak keunoe.' " 19 Ubak namiet gobnyan nyang keudua, nyang keu lhée dan banmandum nyang geubri tugaih yue urôh kawan beulatang-beulatang nyan, geubri peurintah nyang saban lagée nyang ka lheueh geupeugah bak keulompok nyang phon. Sabab Nabi Yakub geupike gobnyan hase geubujuk Esau deungon peue-peue nyang geupeuseumah nyan, seuhingga meunyoe meurumpok eunteuk, Esau geutem peumeuáh gobnyan. 21 Jadi gobnyan geukirém leubeh awai peuseumahan nyan, seudangkan gobnyan keudroe geumudom lam khimah-khimah. 22 Bak malam nyan cit teuma Nabi Yakub geubeudôh dan laju geuba bandua droe peurumoh gobnyan, bandua droe namiet gobnyan dan ban siblaih droe aneuëk-aneuëk gobnyan, laju geujeumeurang Krueng Yarbok. 23 Óh ka lheueh geupeuleupah meurandeh krueng awaknyan, gobnyan laju geugisa dan geukirém banmandum atra milék gobnyan u meurandeh. 24 Teuma gobnyan tinggai sidroe khong. Dan watée nyan teuka kheueh sidroe ureuëng agam jijak meulo ngon Nabi Yakub hingga sampoe rab beungoh uroe. 25 Watée ureuëng nyan ka teurasa bahwa jihnyan hana hase meunang bak meulo nyan, laju jiseupôt Nabi Yakub bak boh punggong gobnyan, sampoe seundi punggong gobnyan meukilah. 26 Laju jipeugah lé ureuëng nyan, "Peulheuh ulôn; sikeujab teuk mata uroe jiteubiet." Geujaweueb lé Nabi Yakub, "Droeneueh hana lôn peulheuh, keucuali Droeneueh neubri beureukat ubak ulôn." 27 "Soe nan gata?" geutanyong lé ureuëng nyan. "Nabi Yakub," jaweueb gobnyan. 28 Geupeugah lom lé ureuëng nyan, "Nan gata bukon le Nabi Yakub. Gata ka gatameulo ngon Allah dan ngon manusia, dan gata meunang; sabab nyan nan gata Israel." 29 Geupeugah lom lé Nabi Yakub, "Neupeugah kheueh nan Droeneueh." Teuma di ureuëng nyan geujaweueb, "Hana peureulée gata tanyong soe nan ulôn!" Dan laju geubri beureukat ubak Nabi Yakub. 30 Óh lheueh nyan Nabi Yakub geupeugah lom, "Ulôn ka meuhadab keu ngon Po teu Allah, dan ulôn mantong udeb." Sabab nyan kheueh geuboh nan teumpat nyan Pniel. 31 Bak watée mata uroe ka jiteubiet, Nabi Yakub laju geutinggai Pniel, dan gobnyan capiek sabab boh punggong gobnyan meukilah. 32 Sampoe saát nyoe keuturonan Israel hana jipajoh eungkot sie nyang teutob boh punggong beulatang nyan, sabab Nabi Yakub ka keunong seupôt bak boh punggong gobnyan.

Keujadian 33

1 Nabi Yakub geukalon Esau geujak sira geuba na peuet reutoh droe ureuëng gobnyan. Sabab nyan laju geubagi-bagi aneuëk-aneuëk gobnyan nyang na bak Lea, Rahel dan bandua droe gundek gobnyan. 2 Gobnyan geukeubah mandua droe gundek geuh meusapat ngon aneuëk-aneuëk awaknyan dikeue, óh lheueh nyan Lea meusapat teuma ngon aneuëk-aneuëk gobnyan, dilikot that Rahel ngon Yusuf. 3 Nyang paleng dikeue na kheueh Nabi Yakub, dan sira geupeurab ubak aduen geuh, laju geusujut sampoe tujoh goe. 4 Teuma Esau laju geuplueng ubak Nabi Yakub, laju geuwa sira geucöm adoe geuhnyan. Dan bandua droe adoe aduen nyan laju geumo musôk-musôk sabab meucen lumpah na. 5 Watée geukalon lé Esau mandum ureuëng inong dan aneuëk-aneuëk manyak nyan, laju geutanyong, "Soe awaknyoe banmandum nyang na meusajan gata nyoe?" "Awaknyoe aneuëk-aneuëk ulôn," Kheun Nabi Yakub, "Allah ka geubri aneuëk-aneuëk nyoe ubak ulôn." 6 Óh lheueh nyan manduadroe gundek laju geupeurab ngon aneuëk-aneuëk jih, dan laju jisujut. 7 Óh lheuehnyan teuka kheueh Lea meusajan ngon aneuëk-aneuëk gobnyan, dan nyang paleng akhé Yusuf ngon Rahel geupeurab dan laju geusujut. 8 Geutanyong lé Esau, "Peue meukeusut gata ngon keulompok-keulompok ureuëng nyang meurumpok ngon lôn bunoe?" Geujaweueb Nabi Yakub, "Keu lôn peugalak até aduen." 9 Teuma lé Esau geupeugah, "Ka seb atra ulôn, hana peureulée le gata bri hadiah-hadiah nyan keu ulôn." 10 Kheun Nabi Yakub, "Bék meunan hei aduen meutuwah! Meunyoe ulôn ka lôn peugalak até Aduen, teurimong kheueh meuneubri ulôn nyoe. Nibak ulôn, watée lôn ngieng rupa Aduen saban lagée lôn ngieng rupa Allah, sabab Aduen ramah that-that ubak ulôn. 11 Ulôn lakée, Aduen teurimong kheueh peuseumahan nyang ka ulôn ba nyoe. Allah gét that até ubak ulôn dan ka geubri peue-peue mantong nyang ulôn peureulée." Nabi Yakub laju geupaksa dan akhé jih Esau geuteurimong cit meuneubri adoe geuh nyan. 12 Dan Esau laju geupeugah ubak Nabi Yakub, "Jak kheueh geutanyoe meusiab-siab keu tabeurangkat, ulôn jak dikeue gata." 13 Geujaweueb lé Nabi Yakub, "Aduen kon neuteupeue bahwa aneuëk-aneuëk manyak nyoe leumoh, dan ulôn harôh beugét-gét lôn peutimang ngon beulatang nyang mantong jimiek. Meunyoe teuparôh bagaih-bagaih, bah kheueh nyan siuroe sagai, dan banmandum kawan beulatang nyan teuma maté. 14 Aduen jak kheueh leubeh ilée, ulôn seutôt bacut-bacut. Ulôn kujak reujang-reujang ngon beulatang peulara dan aneuëk-aneuëk ulôn nyoe sampoe meurumpok ngon Aduen di Edom." 15 Geupeugah lé Esau, "Meunyoe meunan, bah kheueh ulôn tinggai bak gata meupadub droe ureuëng-ureuëng lôn." Geujaweueb lé Nabi Yakub, "Bék Aduen meususah payah, ulôn teuka keuneuk peugalak até Aduen." 16 Meunan kheueh jeuet jih, bak uroe nyan Esau geuwoe lom u Edom. 17 Teuma Nabi Yakub geujak u Sukot, disinan laju geupeudong rumoh gobnyan keudroe dan teumpat meuceue keu beulatang peulara gobnyan. Nyang kheueh sabab jih teumpat nyan teupeunan Sukot. 18 Teungoh geujak nibak Mesopotamia, trok kheueh laju Nabi Yakub deungon seulamat u banda Sikhem di nanggroe Kanaan, dan laju geupeudong khimah gobnyan bak saboh padang bak binéh banda. 19 Padang nyang na bak teumpat khimah-khimah nyan geubloe bak ureuëng keuturonan Hemor, ayah Sikhem, deungon yuem sireutôh péng pirak. 20 Óh lheueh nyan gobnyan laju geupeudong miseubah nibak teumpat nyan, dan geuboh nan "El, Allah Israel".

Keujadian 34

1 Nibak siuroe, Dina aneuëk inong Nabi Yakub ngon Lea, jijak saweue na meupadub droe ureuëng inong Kanaan. 2 Bak watée Sikhem, aneuëk Hemor ureuëng Hewi nyang jeuet keuraja lam wilayah nyan, meunan jikalon Dina, jicok laju jipeuplueng aneuëk dara nyan dan jipeukosa. 3 Rupari jihnyan galak that keu Dina, sampoe jihnyan rhot cinta keu aneuëk dara nyan dan jiuseuha mangat aneuëk dara nyan pi jicinta cit ubak jih. 4 Jikheun lé Sikhem ubak ureuëng syiek jih, "Ulôn meuharab that Ayah beumeuteume keulôn aneuëk dara nyan. Ulôn meuharab that beumeuteumé lôn meukawen ngon jihnyan." 5 Nabi Yakub geudeungoe bahwa aneuëk dara gobnyan ka jipeukosa, teuma lé sabab aneuëk-aneuëk gobnyan teungoh jirabe beulatang peulara geuh ideh lam padang, gobnyan hana hase geucok tindakan sapeue pih sigohlom awaknyan jiwoe. 6 Hemor, ayah Sikhem, jijak ubak Nabi Yakub keuneuk meurok pakat ngon gobnyan. 7 Teuma nibak watéenyan aneuëk-aneuëk Nabi Yakub ka habéh jiwoe nibak lam padang. Watée jideungoe peue nyang ka teujadi nyan, awaknyan teukeujot that dan beungéh lagoena. Sabab, deungon jipeukosa aneuëk Nabi Yakub nyan, Sikhem ka jihina banmandum ureuëng Israel. 8 Geukheun lé Hemor ubak Nabi Yakub, "Aneuëk ulôn Sikhem ka rhot cinta ubak aneuëk Droeneueh; ulôn meuharab beujeuet aneuëk lôn jimeukawen ngon jihnyan. 9 Jak kheueh geutanyoe tapeuget peujanjian bahwa bansa Droeneueh dan bansa ulôn jeuet meukawen meujampu. 10 Deungon nyan teuma droeneueh banmandum jeuet tinggai meusajan ngon kamoe lam nanggroe nyoe; dipat mantong nyang Droeneueh galak. Syedara banmandum beubaih neumeukat dan neupeusapat dumna hareuta." 11 Óh lheueh nyan Sikhem jikheun ubak ayah Dina meunan cit ubak aduen-aduen jih, "Neupeupunoh kheueh peue nyang lôn lakéenyan, teuma droeneueh ulôn bri peue mantong nyang droeneueh lakée. 12 Kheun kheueh laju hadiah peue nyang keuneuk droeneueh lakée, meunan cit peuteuntée kheueh laju méuh meukawen nyan. Ulôn teuma lôn bri peue mantong nyang droeneueh lakée, asai droeneueh mandum neupeu idhin ulôn meukawen ngon sidara nyan." 13 Sabab Sikhem ka jipeukosa adoe awaknyan Dina, aneuëk-aneuëk Nabi Yakub jimeusulet ubak Sikhem dan Hemor ayah jihnyan. 14 Kheun awaknyan ubak bandua droe ureuëng nyan, "Kamoe malée kamoe peuidhin adoe kamoe jimeukawen ngon ureuëng nyang hana meukatan. 15 Teuma kamoe hase kamoe peupeunoh nyang droeneueh lakée nyan ngon saboh syarat: Syarat nyan na kheueh gata meuseuti beujeuet lagée kamoe, meukeusut jih na kheueh banmandum ureuëng agam nyang na lamkawan gata harôh teupeukatan. 16 Óh lheuehnyan barô kheueh jeuet kamoe situju ateueh usui droeneueh nyan meukawen meujampu. Kamoe tinggai teutab lamkawan gata dan jeuet keusaboh bansa ngon gata. 17 Teuma meunyoe gata hana neutem teurimong banmandum syarat-syarat kamoe nyan, dan hana neutem teupeukatan, kamoe teuma kamoe cok lom teuma aneuëk daranyan dan laju kamoe jak." 18 Hermon ngon Sikhem teurasa banmandum syarat-syarat nyan ka pantaih, 19 dan Sikhem ka siabseudia jipeupunoh banmandum syarat-syarat nyan sabab jihnyan cinta that ubak Dina. Lam banmandum waréh kawöm Sikhem nyan, Sikhem nyan kheueh nyang paleng rayeuk peungaroh. 20 Óh lheuehnyan Hermon ngon Sikhem laju jijak ubak teumpat meurok pakat nibak babah pintoe geureubang banda, dan laju jipeugah ubak wareuga banda awaknyan lagée nyoe, 21 "Ureuëng-ureuëng Israel nyan sabat tanyoe. Ngon lagéenyan bah kheueh awaknyan tinggai lam nanggroe nyoe meusajan tanyoe dan bah kheueh jijak lam nanggroe nyoe ho-ho nyang jigalak. Nanggroe nyoe keubiet that luwah keu awaknyan mandum, tanyoe jeuet tameukawen ngon aneuëk-aneuëk dara awaknyan, dan awaknyan pi jeuet jimeukawen ngon aneuëk-aneuëk dara geutanyoe. 22 Teuma ureuëng-ureuëng nyan teuma jitem tinggai ngon geutanyoe dan jeuet keusaboh bansa ngon geutanyoe deungon saboh syarat, na kheueh: banmandum ureuëng agam nyang na lamkawan geutanyoe meuseuti teupeukatan. 23 Teuma banmandum kawan beulatang awaknyan meunan cit hareuta beunda awaknyan jeuet keu atra geutanyoe teuma. Ngon lagéenyan jak kheueh geutanyoe tasituju mandum nyang jilakée lé awaknyan mangat awaknyan jeuet tinggai meusajan ngon geutanyoe." 24 Banmandum peunduduek banda nyang meusapat inan situju peue nyang geupeugah lé Hermor dan Sikhem, ngon lagéenyan teuma banmandum ureuëng agam nyang na lam banda nyan teupeukatan. 25 Lhée uroe teuma óh lheuehnyan, watée ureuëng-ureuëng agam nyan mantong lam keuadaan sakét sabab meukatan nyan, dua droe aneuëk Nabi Yakub na kheueh aduen-aduen Dina nyang nan jih Simeon dan Lewi, jijakcok peudeueng droejih, ngon lagéenyan seucara seungab-seungab jitamong laju u dalam banda. Óh lheuehnyan laju jipoh maté banmandum ureuëng agam nyang na disinan, 26 meunan cit Hermor ngon Sikhem maté meusajan ngon wareuga banda nyan. Laju awaknyan jijakcok Dina di rumoh Sikhem lheuehnyan laju jijak. 27 Óh ka lheueh ceumeucang nyan, aneuëk-aneuëk Nabi Yakub nyang laén laju jijak rampok bubena asoe bandanyoe sibagoe balaih dam sabab adoe awaknyan ka jipeukosa lé awaknyan. 28 Laju awaknyan jicok bubena kawan kaméng, bubiri, leumô, keuleudée, dan banmandum nyang na lam banda meunan cit lam padang. 29 Awaknyan laju jicok banmandum barang-barang nyang meuyuem, jiteun banmandum ureuëng inong dan aneuëk-aneuëk manyak, dan jireupah bunena asoe rumoh nyang na lam banda nyan. 30 Nabi Yakub geupeugah ubak Simeon dan Lewi, "Gatanyoe bit tapeususah ulôn, jinoenyoe bunena ureuëng Kanaan meunan cit ngon ureuëng Feris lam nanggroe nyoe jibanci keulôn. Ureuëng-ureuëng geutanyoe hana le; meunyoe peunduduek nyan mandum meusaboh jilawan ngon jiseurang ulôn, banmandum keuluwarga geutanyoe teuma binasa." 31 Teuma awaknyan jijaweueb, "Kamoe hana mungken kamoe teurimong adoe kamoe jipeusa ngon inong lunte."

Keujadian 35

1 Bak siuroe Allah meufeureuman ubak Nabi Yakub, "Ulôn kheueh Allah nyang peuleumah droe ubak gata watée gata taplueng nibak aduen gata Esau. Gata jak kheueh bubagaih u Betel. Tinggai kheueh disinan dan gata peudong kheueh saboh miseubah keu Ulôn." 2 Dan Nabi Yakub laju geupeugah ubak keuluwarga gobnyan dan ubak banmandum ureuëng nyang na meusajan ngon gobnyan, "Geutanyoe teuma tatinggai teumpat nyoe dan tajak u Betel. Disinan ulôn teuma lôn peudong saboh miseubah keu Allah nyang ka geutulông ulôn watée ulôn meuteumé keususahan dan nyang ka lindong ulôn ho-homantong nyang ulôn jak. Dan gata tiek kheueh banmandum patong-patong dewa aséng nyang na nibak gata; dan peubuet kheueh upacara teupeugleh droe dan gata sôk kheueh peukayan nyang gleh." 4 Dan awaknyan laju jijok ubak Nabi Yakub banmandum patong-patong dewa aséng nyang na bak awaknyan meunan cit deungon talo takue jih. Banmandum atranyan laju geuseubée lam tanoh lé Nabi Yakub dimiyueb bak kayée raya to ngon banda Sikhem. 5 Watée Nabi Yakub ngon rombongan keuluwarga gobnyan geubeurangkat, Allah laju geupeupunoh peunduduek banda-banda nyang na sikeulileng nyan deungon rasa teumakot nyang luwabiasa, sampoe awaknyan hana jitiyeub Nabi Yakub dan rombongan gobnyan. 6 Dan trok kheueh laju awaknyan bak tanoh Kanaan lam banda Betel nyang yoh awai ilée nan jih Lus. 7 Nibak teumpat nyan Nabi Yakub laju geupeudong miseubah dan geuboh nan teumpat nyan "El-Betel", sabab Po teu Allah ka geupeuleumah droe ubak gobnyan nibak teumpat nyan watée gobnyan geupeuplueng droe nibak aduen geuh. 8 Dan disinan cit teuma Debora, deundayang nyang useuha Ribka, meuninggai dan laju teupeukubu dimiyueb bak kayée raya siblaih seulatan banda nyan. Nyang kheueh sabab jih bak kayée nyan teuboh nan "Bak kayée Moe". 9 Watée Nabi Yakub ka geugisa nibak Mesopotamia, Allah geupeuleumah droe lom teuma ubak gobnyan sira geubri beureukat ubak gobnyan. 10 Feureuman Allah ubak gobnyan, "Gata hanale teupeugah Yakub, teuma ka jeuet keu Israel." Meunan kheueh Po teu Allah geuboh nan gobnyan Israel. 11 Dan feureuman Allah ubak gobnyan, "Ulôn kheueh Allah Nyang Mahakuasa. Bah kheueh gata meu aneuëk cucoe nyang le! Gata teuma gata peutreun mubagoe bansa dan teuma jeuet keu bapak indatu raja-raja. 12 Nanggroe nyang ka Ulôn bri keu Nabi Ibrahim dan Nabi Ishaq, teuma Ulôn bri keu gata dan keuturonan gata." 13 Óh ka lheueh geubri feureuman nyan Allah laju geutinggai Nabi Yakub nibak teumpat nyan. 14 Bak teumpat Allah geumeututoe bak Nabi Yakub, gobnyan laju geupeudong saboh batée peuingat. Dan batée nyan laju jipeuseumah ubak Allah ngon cara geuro ié anggô dan minyéuk zaiton ateueh nyan. 15 Teumpat nyan geuboh nan "Betel". 16 Óh lheuehnyan Nabi Yakub dan rombongan gobnyan laju geutinggai Betel. Watée awaknyan mantong agak jiôh nibak Efrata, Rahel pi ka trok watée keugeupeulahé aneuëk. Teuma aneuëk lam pruet geuh nyan payah that lahé. 17 Watée sakét pruet geuhnyan meutamah brat, jipeugah kheueh lé ma bidan ubak gobnyan, "Beurayeuk kheueh até droeneueh Rahel, aneuëk droeneueh nyoe agam." 18 Teuma Rahel ka to that ajai geuh, dan watée gobnyan keuneuk meuninggai, laju geuboh nan aneuëk geuh nyan Bin Oni teuma lé ayah aneuëk nyan geuboh nan Benyamin. 19 Óh ka lheueh Rahel meuninggai donya, manyét gobnyan laju teupeukubu bak binéh rot jak u Efrata, nyang jinoenyoe nan teumpat nyan Betlehem. 20 Nabi Yakub laju geupeudong saboh batée peuingat nibak teumpat nyan, dan sampo uroenyoe kubu Rahel nyan mantong teutanda ngon batée nyan. 21 Óh ka lheuehnyan Nabi Yakub laju geujak lom, dan geupeudong laju khimah bak saboh teumpat liwat meunara Eder. 22 Teungoh awaknyan mantong na bak teumpat nyan, Ruben laju jiéh ngon Bilha, gundek ayah jih. Hai nyan geudeungoe lé Nabi Yakub, dan gobnyan beungéh lumpah na. Nabi Yakub na geumeu aneuëk dua blaih droe aneuëk agam. 23 Aneuëk-aneuëk Lea na kheueh Ruben (aneuëk tuha Nabi Yakub), Simeon, Lewi, Yehuda, Isakhar dan Zebulon. 24 Aneuëk-aneuëk Rahel na kheueh Nabi Yusuf dan Benyamin. 25 Aneuëk-aneuëk Bilha namiet Rahel na kheueh Dan ngon Naftali. 26 Aneuëk-aneuëk Zilpa, namiet Lea na kheueh Gad dan Asyer. Aneuëk-aneuëk nyan lahé di Mesopotamia. 27 Dan trok kheueh laju Nabi Yakub ubak Nabi Ishaq ayah gobnyan, bak teumpat tinggai gobnyan di Mamre to ngon Hebron. (Ilée Nabi Ibrahim, indatu gobnyan, disinan cit tinggai gobnyan.) 28 Watée umu ka tuha that, sireutôh lapan ploh thon, Nabi Ishaq meuninggai donya dan laju teukubu lé Esau dan Nabi Yakub, aneuëk-aneuëk gobnyan.

Keujadian 36

1 Nyoe kheueh keuturonan Esau nyang teuhôi Edom. 2 Esau geumeukawen ngon lhée droe ureuëng inong Kanaan, awaknyan na kheueh: Ada, binti Elon ureuëng Het; Oholibama binti Ana dan cucoe Zibeon ureuëng Hewi; 3 Basmat aneuëk Ismail dan adoe Nebayot. 4 Ada jipeulahé Elifas, Basmat jipeulahé Rehuel, 5 dan Oholibama jipeulahé Yeus, Yaelam dan Korah. Banmandum aneuëk nyan lahé di Kanaan. 6 Óh lheueh nyan Esau laju geutinggai Nabi Yakub dan geujak u nanggroe laén sira geuba mandum peurumoh geuh, aneuëk gobnyan dan banmandum ureuëng nyang na tinggai lam rumoh geuh, meusajan ngon banmandum beulatang peulara dan hareuta beunda nyang na geuteumé di nanggroe Kanaan. 7 Esau geupeuaséng droe nibak Nabi Yakub sabab hareuta awaknyan jai lumpah na sampoe awaknyan hana hase udeb ngon gobnyan. Lom teuma lam nanggroe nyang awaknyan tinggai nyan hana séb peunajoh keu beulatang peulara awaknyan nyang le nyan. 8 Dan Esau nyang teuhôi nan Edom, laju geutinggai teutab dibagian gunong-gunong Seir. 9 Nyoe kheueh keuturonan Esau, indatu ureuëng Edom. 10 Peurumoh Esau nyang nan jih Ada jipeulahé sidroe aneuëk agam, jiboh nan aneuëk agam nyan Elifas. Dan Elifas na teuma jimeu aneuëk limong droe aneuëk agam, nan aneuëk-aneuëk nyan na kheueh: Téman, Omar, Zefo, Gaetam dan Kenas. Elifas na gundek, nan gundek nyan Timna. Timna nyan na teuma jipeulahé sidroe aneuëk agam nyang jiboh nan Amalek. Peurumoh Esau nyang nan jih Basmat jipeulahé sidroe aneuëk agam nyang jiboh nan Rehuel. Dan Rehuel na teuma jimeu aneuëk peuet droe aneuëk agam, aneuëk-aneuëk nyan na kheueh: Nahat, Zerah, Syama dan Miza. 14 Peurumoh Esau nyang nan jih Oholibama, na kheueh aneuëk Ana dan cucoe Zibeon, na jipeulahé lhée droe aneuëk agam, aneuëk-aneuëk nyan na kheueh: Yeus, Yaelam dan Korah. 15 Nyoe ulée sukée-sukée keuturonan Esau: Elifas, aneuëk tuha Esau, na kheueh indatu sukée-sukée nyang teupeugah dimiyueb nyoe: Téman, Omar, Zefo, Kenas, 16 Korah, Gaetam dan Amalek. Awaknyan banmandum keuturonan Ada, peurumoh Esau. 17 Rehuel, bin Esau, na kheueh indatu sukée-sukée nyang teupeugah dimiyueb nyoe: Nahat, Zerah, Syama dan Miza. Awaknyan banmandum keuturonan Basmat, peurumoh Esau. 18 Sukée-sukée nyang seulanjut jih nyoe na kheueh keuturonan Esau nibak peurumoh nyang nan jih Oholibama bin Ana, awaknyan na kheueh: Yeus, Yaelam dan Korah. 19 Banmandum sukée nyan keuturonan Esau. 20 Peunduduek aseuli tanoh Edom teubagi ateueh sukée-sukée keuturonan Seir, ureuëng Hori. Sukée-sukée nyan na kheueh: Lotan, Syobal, Zibeon, Ana, Disyon, Ezer dan Disyan. 22 Lotan na kheueh indatu marga Hori dan Heman. (Lotan na syedara nyang inong, nan jih Timna.) 23 Syobal na kheueh indatu marga: Alwan, Manahat, Ebal, Syefo dan Onam. 24 Zibeon na dua droe aneuëk agam, Aya dan Ana. (Ana nyoe kheueh nyang teumé teumpat-teumpat mata ié seu-eum di padang pasi, watée gobnyan teungoh geurabe keuleudée ayah jih.) 25 Ana na kheueh ayah Disyon, dan Disyon indatu marga: Hemdan, Esyban, Yitran dan Keran. Ana na teuma sidroe aneuëk inong, nan jih Oholibama. 27 Ezer indatu marga: Bilhan, Zaawan, dan Akan. 28 Disyan indatu marga Us dan Aran. 29 Nyoe kheueh sukée-sukée Hori di nanggroe Edom: Lotan, Syobal, Zibeon, Ana, Disyon, Ezer dan Disyan. 31 Sigohlom na raja nyang mat peurintah di nanggroe Israel, raja-raja nyang teupeugah dimiyueb nyoe jimat peurintah di tanoh Edom seucara meuturot-turot: Bela bin Beor nibak Dinhaba. Yobab bin Zera nibak Bozra. Husyam nibak daerah Téman. Hadad bin Bedad nibak Awit (jihnyan kheueh nyang peutaloe ureuëng Midian lam mideuen prang didaerah Moab). Samla nibak Masreka. Saul nibak Rehobot bak binéh krueng. Baal-Hanan bin Akhbor. Hadar nibak Pahu (peurumoh jih nan geuh Mehetabeel, bin Matred dan cucoe Mezahab). 40 Esau na kheueh indatu sukée-sukée Edom nyang teupeugah dimiyueb nyoe: Timna, Alwa, Yetet, Oholibama, Ela, Pinon, Kenas, Téman, Mibzar, Magdiel, dan Iram. Tieb-tieb sukée jiboh nan geuh bak daerah teumpat tinggai jih maséng-maséng.

Keujadian 37

1 Nabi Yakub tinggai teutab di nanggroe Kanaan, teumpat tinggai ayah gobnyan, 2 dan nyoe kheueh riwayat keuluwarga Nabi Yakub: Watée Nabi Yusuf, aneuëk Nabi Yakub meu-umu tujoh blah thon, gobnyan geu-useuha saboh kawan kaméng ngon bubiri meusajan-sajan ngon aduen-aduen gobnyan, na kheueh aneuëk-aneuëk Bilha dan Zilpa, mandua droe gundek ayah gobnyan. Nabi Yusuf sabe geulapor bak ayah geuh Nabi Yakub buet-buet nyang jeuhet nyang jipeubuet lé aduen-aduen geuh. 3 Nabi Yakub leubeh geugaséh keu Nabi Yusuf nibak aneuëk-aneuëk geuh nyang laén, sabab Nabi Yusuf lahé watée ayah gobnyan ka tuha. Bak siuroe Nabi Yakub geupeugét keu Nabi Yusuf bajée jubah nyang paleng lagak. 4 Watée jingieng lé aduen-aduen Nabi Yusuf bahwa ayah geuh nyan leubeh geugaséh ubak Nabi Yusuf nibak keu awaknyan, teuka kheueh banci awaknyan keu Nabi Yusuf, sampoe hana jitem peugah haba le nyang gét-gét ngon gobnyan. 5 Bak simalam Nabi Yusuf meulumpo, dan watée geupeugah lumpo geuh nyan ubak aduen-aduen geuh, awaknyan meutamah banci keu adoe jih nyan. 6 Nyoe kheueh nyang geupeugah lé Nabi Yusuf ubak aduen-aduen geuh nyan, "Cuba deungoe nyang ulôn peugah nyoe! 7 Ulôn meulumpo geutanyoe banmandum na di blang teungoh ta ikat gandom, dan gandom ulôn laju teudong óh cot. Dan gandom-gandom droeneueh banmandum jikeulileng gandom ulôn dan jisujut ubak gandom ulôn nyan." 8 "Gata pike gata jeuet keuraja dan gata kuasa ateueh kamoe?" kheun aduen-aduen gobnyan. Dan deungon na lagée nyan meutamah-tamah banci awaknyan keu Nabi Yusuf sabab lumpo-lumpo gobnyan dan peue nyang ka geupeugah ubak awaknyan. 9 Óh lheueh nyan Nabi Yusuf meulumpo lom, dan laju geupeugah ubak aduen-aduen geuh nyan, "Ulôn meulumpo lom, hei aduen meutuwah, ulôn ngieng mata uroe, buleuen dan siblaih boh bintang jisujut ubak ulôn." 10 Lumpo nyan geucalitra teuma ubak ayah geuh, dan lé ayah geuh laju geudhot gobnyan sira geupeugah lagéenyoe, "Peue lumpo nyan? Gata pike ulôn nyoe, meunan cit ngon ma gata dan syedara-syedara gata jiteuka sujut dan jiseumah gata?" 11 Aduen-aduen Nabi Yusuf bingiek até ubak gobnyan, teuma ayah gobnyan teutab geupike ubak lumpo nyan. 12 Nibak siuroe bak watée aduen-aduen Nabi Yusuf jijak u Sikhem keujijak rabe kawan kaméng ngon bubiri ayah jih, 13 geupeugah kheueh lé Nabi Yakub ubak Nabi Yusuf, "Gata jak kheueh laju u Sikhem, nibak teumpat aduen-aduen gata teungoh jimeurabe kaméng ngon bubiri tanyoe." Seuot Nabi Yusuf, "Gét, Ayah." 14 Kheun ayah geuh, "Ngieng kheueh, pakriban keuadaan aduen-aduen gata, meunan cit keuadaan kaméng ngon bubiri tanyoe, lheuehnyan woe kheueh laju keugata peugah ubak ulôn." Ngon lagéenyan geupeulheueh kheueh Nabi Yusuf geujak geutinggai Pantôn Hebron. Hana treb teuma óh lheuhnyan trok kheueh laju Nabi Yusuf u Sikhem. 15 Teungoh gobnyan geujak keudeh keunoe lam padang nyan, laju meurumpok gobnyan ngon sidroe ureuëng agam nyang laju jitanyong ubak gobnyan, "Peue nyang gata mita?" 16 "Aduen-aduen ulôn, awaknyan teungoh meurabe kaméng ngon bubiri," jaweueb Nabi Yusuf, "Peu kheueh Bapak neuteupeue dipat awaknyan?" 17 Seuot ureuëng nyan, "Awaknyan ka jibeurangkat nibak teumpat nyoe. Ulôn deungoe awaknyan na jipeugah bahwa awaknyan keuneukjak u Dotan." Ban geufeungoe haba nyan Nabi Yusuf pi laju geuseutôt aduen-aduen geuhnyan dan meurumpok laju awaknyan di Dotan. 18 Phon nibak jiôh awaknyan ka jikalon Nabi Yusuf, dan sigohlom gobnyan trok ubak awaknyan, awaknyan ka sipakat jikeuneuk poh maté Nabi Yusuf nyan. 19 Kheun awaknyan sidroe ubak nyang laén, "Ngieng, tukang meulumpo nyan ka jijak keunoe. 20 Jak tapoh maté jihnyan dan tatiek manyét jihnyan lam mon nyang tho. Takheun ubak ayah bahwa jihnyan ka jiteugom lé beulatang juah. Dan ngon nyan teuma jeuet takalon teuma pakriban jeuet jih ngon lumpo-lumpo jihnyan." 21 Ruben jideungoe reuncana brok awaknyan, laju ji-useuha keuneuk peuseulamat Nabi Yusuf. "Bék tapoh maté jihnyan," kheun geuhnyan. 22 "Tatiek mantong lam mon nyang na lam padang pasi nyoe, teuma bék tapoh atawa tapeuluka jih nyan." Hainyan geupeugah sabab geuhnyan keuneuk peuseulamat Nabi Yusuf dan geuyue woe gobnyan u rumoh. 23 Watée Nabi Yusuf ka trok ubak aduen-aduen geuh, ngon buet nyang gasa that awaknyan laju jisuet bajée jubah Nabi Yusuf nyang lagak nyan. 24 Laju awaknyan jihila gobnyan dan jirhom laju Nabi Yusuf nyan lam mon nyang tho. 25 Bak watée awaknyan teungoh jimakheun, laju deuh jikalon lé awaknyan saboh kafipilah ureuëng Ismail nyang teungoh geujak nibak Gilead u nanggroe Meusé. Ateueh unta-unta awaknyan peunoh ngon meubagoe reumpah dan kismis. 26 Laju jikheun lé Yehuda ubak banmandum syedara-syedara geuh nyan, "Keupeue guna jih tapoh maté adoe geutanyoe dan tasom rahsia nyan? 27 Jak tapeubloe jih nyan ubak ureuëng Ismail nyan. Bék tapeusakét jihnyan. Pakriban kheueh mantong jihnyan na kheueh adoe geutanyoe keudroe." Banmandum syedara jihnyan laén situju, 28 dan bak watée na meupadub droe saudaga Midian teuka, Nabi Yusuf laju jipeuteubiet lé aduen geuh lam mon nyan dan laju jipeubloe ubak ureuëng-ureuëng Ismail nyan ngon yuem dua ploh leumpeng péng pirak. Óh lheuehnyan gobnyan laju jiba lé saudaga-saudaga nyan u nanggroe Meusé. 29 Watée Ruben geugisa ubak mon nyan dan geukalon ka hana le Nabi Yusuf lam mon nyan, laju jipriek-priek peukayan nyang na bak tuboh jih sabab seudeh that. 30 Gobnyan laju geugisa ubak syedara-syedara geuh sira geupeugah lagée nyoe, "Aneuëk nyan ka hana le lam mon nyan, peue nyang harôh lôn pubuet jinoenyoe?" 31 Laju awaknyan jisie saboh kaméng dan laju jiceulob bajée jubah Nabi Yusuf lam darah kaméng nyan. 32 Óh lheuehnyan bajée jubah nyan jiyue lé awaknyan mangat ji-intat ubak ayah jih ngon peusan lagée nyoe, "Bajée jubah nyoe kamoe teumé, peu kheueh nyoe atra aneuëk ayah?" 33 Nabi Yakub geuturi keu jubah nyan, laju geupeugah, "Beutôi, nyoe jubah aneuëk ulôn! Ka pasti aneuëk nyoe ka jiteugom lé beulatang juah. Keubiet seudeh aneuëk ulôn ka maté jipriek-priek lé beulatang juah nyan!" 34 Nabi Yakub geupriek peukayan geuh sabab seudeh that laju geungui peukayan meukabông meu-uroe-uroe treb jih gobnyan geupeuratok keu aneuëk geuh nyang geusayang nyan. 35 Banmandum aneuëk-aneuëk gobnyan, bah nyang agam meunan cit nyang inong jiteuka jijak peumangat até gobnyan, teuma gobnyan teutab hana jitem mangat até. Kheun gobnyan, "Sampoe án maté ulôn teutab lôn peuba-e aneuëk ulôn nyan." Meunan kheueh jeuet jih gobnyan sabe lam keuadaan meukabông sabab Nabi Yusuf aneuëk geuhnyan. 36 Nibak watéenyan, di nanggroe Meusé, lé ureuëng-ureuëng Midian laju jipeubloe Nabi Yusuf ubak Potifar, sidroe panglima nyang jabatan geuh sibagoe keumandan peungawai meuligoe.

Keujadian 38

1 Kira-kira bakwatée nyan Yehuda jitinggai syedara jih dan jiduek ngon Hira, sidroe ureuëng agam nyang asaijih nibak banda Adulam. 2 Disinan Yehuda jimeuturi ngon sidroe aneuëk dara Kanaan, aneuëk Sua, nibak meuturinyan laju awaknyan jimeukawen. 3 Aneuëk awaknyan nyang phon lahé agam, jiboh nan lé ayah jih Er. 4 Aneuëk nyang keudua agam cit, jiboh nan Onan. 5 Aneuëk nyang keu lhée agam cit, jiboh nan Syela. Watée Syela lahé Yehuda mantong na di Kezib. 6 Yahuda laju jipeukawen Er, aneuëk jih nyang tuha ngon Tamar. 7 Peurangoe Er jeuhet lumpah na, sampoe TUHAN beungéh keu jihnyan dan laju geupoh maté. 8 Dan Yehuda laju jipeugah ubak Onan, adoe Er, "Gata jak kheueh laju ubak inong balée aduen gata, dan gata éh kheueh ngon jih nyan. Peupeunoh kheueh keuwajéban gata ateueh jih nyan, sabab gata adoe lakoe jih; deungon lagée nyan aduen gata jeuet jiteumé keuturonan." 9 Teuma Onan jiteupeue aneuëk-aneuëk jihnyan singoh hana jeuet jikuasa. Lé sababnyan, tieb-tieb jimeusibadan ngon balée aduen jih nyan, jipeubiyeu mantong ié mani jih rho uluwa mangat aduen jih hana jiteumé keuturonan. 10 Sabab buet nyang lagée nyan, TUHAN beungéh lumpah na, dan TUHAN laju geupoh maté Onan nyan. 11 Óh lheueh nyan jipeugah kheueh lé Yehuda ubak Tamar meulintée geuh nyan, "Jakwoe kheueh u rumoh ureuëng tuha gata dan tinggai kheueh disinan sibagoe inong balée sampoe aneuëk ulôn Syela rayeuk." Yehuda geupeugah lagée nyan sabab geutakot TUHAN teuma geupoh maté Syela, lagée nyang ka jirasa lé aduen-aduen jih. Dan jiwoe kheueh Tamar u rumoh ureuëng tuha jih. 12 Hana padub treb teuma óh lheueh nyan peurumoh Yehuda meuninggai donya. Óh ka seuleusoe masa meukabông, Yehuda laju geupakat Hira, rakan geuh nibak Adulam nyan, jijak ubak Timna, bak teumpat bubiri-bubiri jih teugunteng bulée. 13 Tamar meuteumé haba bahwa tuwan jih Yehuda geujak u Timna keu geujak gunteng bulée-bulée bubiri geuh. 14 Teuma lé Tamar nyan laju jigantoe peukayan inong balée nyang jingui nyang ka nyoe jigantoe ngon peukayan laén. Muka jih jitob ngon silubong, dan jiduek kheueh laju bak babah pintoe banda Enaim, nyang na bak rot jak u Timna. Tamar jiteupeue that bahwa Syela, aneuëk Yehuda nyang tulot, ka rayeuk, teuma jihnyan gohlom cit jipeukawen ngon aneuëk muda nyan. 15 Watée Yehuda geungieng ateueh Tamar, jipike inong nyan inong jeuhet, sabab muka jih teuseulubong. 16 Dan Yehuda laju jipeurab bak inong nyang na bak binéh rot nyan dan laju jipeugah, "Padub nyang gata lakée?" Yehuda nyan hana jiteupeue bahwa inong nyan na kheueh meulintée geuh keudroe. Jaweueb lé Tamar, "Teuseurah bak Droeneueh." 17 Yehuda jipeugah lom, "Ulôn teuma lôn bri ubak gata saboh kaméng muda." Jaweueb Tamar, "Jeuet, asai na jaminan, sampoe Droeneueh neukirém kaméng nyan keu ulôn." 18 "Jaminan peue?" Seuôt Yehuda. Jaweueb Tamar, "Neujok bak ulôn cab Droeneueh ngon taloe jih meunan cit tungkat nyang na bak Droeneueh nyan." Yehuda laju jijok barang-barang nyang jilakée nyan ubak inong nyan, dan laju awaknyan meusibadan, dan Tamar laju mume. 19 Tamar laju jiwoe urumoh dan jipeuhah laju ija ngon tob muka jih, dan laju jingui peukayan inong balée lagée nyang ka-ka. 20 Hana padub treb teuma óh lheueh nyan Yehuda laju geuyuejak Hira, rakan jihnyan keu jijak intat kaméng nyan dan jilakée lom barang-barang nyang ka jikeubah sibagoe jaminan, teuma Hira hana meurumpok ngon inong nyan. 21 Hira laju jiteumanyong ubak ureuëng-ureuëng nyang na di Enaim, "Hoka jijak inong jeuhet nyang kanyoe jih na jiduek bak binéh rot nyoe?" "Hántom na inong jeuhet disinoe," jaweueb awaknyan. 22 Dan jiwoe kheueh Hira ubak Yehuda sira jipeugah, "Ulôn hana meurumpok ngon inong jeuhet nyan. Meunurot nyang jipeugah lé ureuëng-ureuëng nyang na disinan hántom na inong jeuhet disinan." 23 Jipeugah lé Yehuda, "Bah kheueh barang-barang ulôn nyan bak jih, asai geutanyoe hana meuteumé malée. Ulôn ka lôn useuha keuneuk bayeue jih nyan, teuma gata hana meuteumé gata mita pat inong nyan." 24 Kira-kira na lhée buleuen teuma óh lheueh nyan, Yehuda meuteumé haba bahwa meulintée jih Tamar ka jeuet keu inong jeuhet dan ka mume. Laju Yehuda jipeurintah, "Cok inong nyan dan jaktot laju lam apui sampoe maté!" 25 Teungoh Tamar jiba uluwa, laju jikirém haba keu yah tuwan jih, "Ulôn ka jipeuraya pruet lé ureuëng nyang po barang-barang nyoe. Peureksa kheueh atra soe cab taloe dan tungkat nyoe." 26 Yehuda jituri barang-barang nyan dan laju jipeugah, "Inong nyan hana meusalah. Ulôn hana lôn peupeunoh keuwajéban ulôn ubak jih nyan; sibeuna jih ulôn peukawen aneuëk ulôn Syela ngon jih nyan." Dan phon saát nyan Yehuda hántom na le jimeusibadan ngon Tamar. 27 Óh ka trok watée jih Tamar jimeu aneuëk, teunyata jihnyan jipeulahé aneuëk keumbeue. 28 Teungoh aneuëk nyan jipeuteubiet lam pruet jih, sidroe aneuëk jih nyan laju jisunyueng jaroe jih uluwa, dan lé ma bidan laju jimat jaroe nyan dan ji-ikat ngon beuneueng mirah. Laju jikheun, "Aneuëk nyoe lahé leubeh awai." 29 Rupa jih aneuëk manyak nyan jitarek jaroe jih keula-i, dan aneuëk manyak nyang sidroe teuk lahé leubeh ilée. Óh lheueh nyan laju jipeugah lé bidan nyan, "Meunan kheueh cara gata tapeusak uluwa!" Dan aneuëk nyang lahé leubeh awainyan laju jiboh nan Peres. 30 Óh lheueh nyan barô kheueh lahé adoe jih nyang jaroe jih ka teuikat ngon beuneueng mirah bunoe. Dan aneuëk nyang keudua nyan jiboh nan Zerah.

Keujadian 39

1 Nabi Yusuf laju jiba u nanggroe Meusé lé ureuëng-ureuëng Nabi Ismail nyan, óh trok keudeh laju jipeubloe Nabi Yusuf nyan ubak Potifar, sidroe panglima raja nyang jeuet keu ulée peungawai meuligoe. 2 TUHAN geutulông Nabi Yusuf sampoe peue-peue nyang geupeubuet sabe na hase. Nabi Yusuf nyan tinggai di rumoh po geuh, ureuëng Meusé nyan. 3 Po geuhnyan deuh jikalon bahwa TUHAN geutulông Nabi Yusuf ngon sabab nyan Nabi Yusuf hase banmandum peue-peue mantong nyang geupeubuet. 4 Potifar galak that keu Nabi Yusuf akhé jih laju jiangkat gobnyan jeuet keupeugawée pribadi jih; dan laju jibri tugaih ubak Nabi Yusuf mangat geu-urôh banmandum nyang teupeureulée lam rumoh tangga dan peue-peue mantong atra milék Potifar nyan. 5 Phon saát nyan, deumi Nabi Yusuf, TUHAN laju geubri beureukat keu rumoh tangga ureuëng Meusé nyan dan peue-peue mantong nyang na bak jih, bah kheueh nyang na dirumoh meunan cit nyang na di blang. 6 Peue-peue mantong atra Potifar jipeucaya ubak Nabi Yusuf. Deungon lagée nyan Potifar mubacut pih hana jipike keuhai rumoh tangga, nyang jipike na kheueh keuhai peunajoh jih mantong. Nabi Yusuf ureuëng jih ceudah dan lagak lumpah na. 7 Na meupadub treb teuma, peurumoh Potifar ka jiteuka beureuhi ubak Nabi Yusuf, dan laju jipakat éh Nabi Yusuf nyan lé peurumoh Potifar nyan. 8 Nabi Yusuf hana geutem dan laju geupeugah bak ureuëng inong nyan, "Meuáh, hai ma, ulôn ka geupeucaya lé Po Potifar peue-peue mantong atra milék gobnyan keu lôn jaga ngon lôn peulara. Gobnyan hana peureulée lé geupike sapeue lam rumoh nyoe. 9 Lam rumoh nyoe kuasa ulôn sabe rayeuk ngon kuasa gobnyan. Hana meusapeue pih nyang hana geupeucaya ubak ulôn keucuali droeneueh ma. Pakriban mungken ulôn peulaku buet nyang jeuhet nyan dan ulôn meudesya ubak Po teu Allah?" 10 Bahpi peurumoh Potifar geurayu Nabi Yusuf tieb-tieb uroe, peumuda nyan teutab hana geutem éh ngon ureuëng inong nyan. 11 Bak siuroe watée Nabi Yusuf geutamong lam rumoh keu geujak keureuja buet-buet gobnyan, hana meusidroe ureuëng pih nyang na disinan. 12 Peurumoh Potifar laju jitarek Nabi Yusuf bak bajée jubah geuh sira jipeugah, "Jak keunoe tajak éh meusajan." Nabi Yusuf geumeulawan-lawan dan laju lheueh, dan geuplueng laju uluwa, teuma bajée jubah gobnyan teutab tinggai bak jaroe ureuëng inong nyan. 13 Watée jingieng lé peurumoh Potifar Nabi Yusuf ka geuplueng dan bajée jubah mantong tinggai bak jaroe jih, 14 laju jitawök bubena peulayan jih dan jipeugah, "Cuba gata ngieng! Ureuëng Ibrani nyang geuba lé lakoe lôn u rumoh nyoe, jihina tanyoe. Jihnyan jitamong lam kama lôn dan jikeuneuk peukosa ulôn, teuma di ulôn laju lôn kliek-kliek ngon su nyang teuga. 15 Watée teudeungoe su ulôn kliek, laju jiplueng uluwa dan bajée jubah jih tinggai." 16 Dan peurumoh Potifar laju jikeubah bajée jubah nyan sampoe lakoe jih jiwoe. 17 Óh watée lakoe jih katrok jiwoe u rumoh, calitra nyan laju jipeugah ubak lakoe jih, "Ureuëng Ibrani nyang droeneueh ba keunoe nyoe, jitamong lam kama lôn keu jikeuneuk hina lôn. 18 Teuma watée ulôn kliek nyan, laju jiplueng uluwa dan bajée jubah jih tinggai lam kama." 19 Potifar beungéh lumpah na. 20 Dan lé Potifar laju jipeurintah mangat Nabi Yusuf teudrob dan jak peutamong lam glab, lam teumpat tahanan raja-raja teukurông. 21 Teuma TUHAN geutulông Nabi Yusuf dan sabe geugaséh keu gobnyan, sampoe keumeundan rumoh glab pih lumpah jisayang keu gobnyan. 22 Dan di keumeundan rumoh glab nyan laju jipeucaya bak Nabi Yusuf mangat ureuëng-ureuëng nyang na lam glab nyan geu-urôh lé gobnyan, dan ubak Nabi Yusuf kheueh jibri tanggong jaweueb ateueh peue-peue mantong buet nyang teupeubuet lam rumoh glab nyan. 23 Ulée rumoh glab nyan hana jikawai peue-peue mantong nyang geupeubuet lé Nabi Yusuf, sabab TUHAN geutulông gobnyan sampoe gobnyan meuhase peue-peue mantong nyang geupeubuet.

Keujadian 40

1 Na meupadub treb teuma óh lheueh nyan dua droe peulayan raja nanggroe Meusé, bandua droe awaknyan na kheueh nyang urôh ié jieb dan nyang urôh ruti raja, ka jipeubuet buet nyang salah ateueh po raja. 2 Dan beungéh that raja ubak mandua droe peulayan nyan, 3 dan laju awaknyan jipeutamong lam glab di rumoh keumeundan nyang kawai meuligoe, bak teumpat Nabi Yusuf keunong teun. 4 Treb cit awaknyan lam glab nyan, dan keumeundan kawai meuligoe jibri tugaih ubak Nabi Yusuf mangat geupeutimang awaknyan. 5 Bak simalam ureuëng urôh ié jieb dan ureuëng nyang urôh ruti raja nyan maséng-maséng laju meulumpo. Makna lumpo awaknyan hana saban. 6 Watée Nabi Yusuf geujak bak awaknyan óh singoh beungoh, awaknyan deuh jih seudeh lumpah na. 7 Laju geutanyong lé Nabi Yusuf bak awaknyan, "Pakon gatanyoe mandua deuh jih seudeh that-that nibak uroe nyoe?" 8 Jaweueb awaknyan, "Beuklam kamoe meulumpo, dan hana nyang teupeu peue makna lumpo kamoe nyan." Geujaweueb lé Nabi Yusuf, "Po teu Allah nyang geubri keumungkenan ubak manusia keu jipeutrang makna lumpo. Cuba gata peugah peue lumpo gata nyan." 9 Nyang urôh ié jieb jara nyan jipeugah, "Lam lumpo nyan na deuh ulôn ngieng bak anggô dikeue ulôn. 10 Bak anggô nyan meucabeueng lhée. Banmantong cabeueng-cabeueng nyan jipeuphon meuôn, bagaih that bungöng-bungöng jih keumang, dan boh jih pi laju masak. 11 Bak watée nyan ulôn teungoh lôn mat glaih teumpat jieb ié raja, jadi laju ulôn cok boh anggô nyan dan ulôn praih laju ié jih lam glaih raja, dan ulôn peuhidang laju ubak gobnyan." 12 Geujaweueb Nabi Yusuf, "Nyoe kheueh makna lumpo gata nyan: Lhée boh cabeueng nyan muphom jih lhée uroe. 13 Lam lhée uroenyoe raja teuma geupeubeubaih gata, gobnyan geupeuamphon gata dan geubri ubak gata jabatan nyang gata mat yoh masa ilée. Dan gata teuma gata peuhidang glaih teumpat jieb ié raja keu raja lagée nyang gata peubuet yoh masa ilée. 14 Teuma ingat kheueh ubak ulôn meunyoe keuadaan gata ka gét. Tulông gata peusampoe soai ulôn nyoe ubak raja, mangat ulôn geupeubeubaih nibak lam glab nyoe. 15 Sabab, nyang sibeuna jih ulôn nyoe jibaplueng nibak nanggroe ureuëng Ibrani dan disinoe pih, di nanggroe Meusé nyoe, hántom na ulôn peubuet peue-peue mantong buet nyang jeuhet sampoe ulôn jipeutamong lam glab nyoe." 16 Óh ka lheueh tukang urôh ruti nyan jiteupeue makna lumpojih, rakan jih sidroe teuknyan galak that, sabab makna lumpo nyan gét, dan jihnyan pih jipeugah ubak Nabi Yusuf, "Ulôn pih na meulumpo, rasa jih na ulôn seuôn lhée boh raga ruti ateueh ulée lôn. 17 Lam raga nyang paleng ateueh na meubagoe rupa kue peunajoh raja, teuma cicém-cicém laju jiteuka jijak pajoh kue-kue nyan." 18 Geujaweueb lé Nabi Yusuf, "Nyoe kheueh muphom jih lumpo gata nyan: Lhée boh raga nyan muphom jih lhée uroe. 19 Lam lhée uroenyoe raja teuma geuyue bakgob keujijak koh takue gata dan laju jigantung manyét gata bak saboh taméh, dan cicém-cicém laju jiteuka jijak pajoh asoe gata." 20 Lhée uroe óh lheueh nyan na kheueh uroe ulang thon raja, gobnyan geupeuna khanuri rayeuk keu banmandum peugawai geuh. Gobnyan laju geubri peurintah mangat nyang urôh ié jieb dan nyang urôh ruti teupeuteubiet lam glab dan jiba laju ukeue banmandum peugawée meuligoe. 21 Tukang urôh ié jieb raja laju teupeugisa ubak buet jih yoh awai. 22 Teuma nyang urôh ruti raja teuhuköm maté. Banmandum nyan teujadi paih lagée nyang ka lheueh geupeugah lé Nabi Yusuf. 23 Dan tukang urôh jieb ié raja hana le teuingat ubak Nabi Yusuf. Dan biet-biet that jihnyan ka tuwoe keu gobnyan.

Keujadian 41

1 Óh ka liwat dua thon, raja nanggroe Meusé meulumpo, bahwa raja nyan teungoh jidong bak binéh Krueng Nil. 2 Hana jisangka-sangka na tujoh boh leumô nyang teumbon-teumbon dan kulét leumô nyan meukilat-kilat, jiteubiet lam krueng nyan dan laju jirôt naleueng nyang na bak binéh krueng nyan. 3 Óh lheueh nyan na teuma tujoh boh teuk leumô nyang laén jiteuka cit keunan; beulatang nyang pijuet-pijuet nyan nyang na tinggai cit kulét ngon balot tuleueng. Leumô-leumô nyang pijuet nyan jidong bak binéh leumô nyang teumbon-teumbon, dan nibak binéh krueng Nil nyan. 4 Óh lheuehnyan leumô-leumô nyang pijuet laju jipajoh leumô-leumô nyang teumbon. Óh ka lheueh nyan raja laju teubeudôh nibak geuéh. 5 Óh lheuehnyan raja nyan pi teugantuek dan laju teungéut lam teungéut nyan jiteuka lom lumpo. Lam lumpo jihnyan laju jingieng tujoh neuk aneuëk gandom nyang meuasoe ngon masak-masak meugantueng dan jitimoh bak saboh tangke. 6 Óh lheueh nyan timoh teuma tujoh neuk aneuëk gandom nyang laén, nyang pijuet-pijuet dan krôt ngon tho kreng sabab jipôt lé angén guron. 7 Dan aneuëk gondom nyang pijuet nyan laju jiuét bantujoh neuk aneuëk gandom nyang meuasoe bunoe. Óh lheuehnyan raja laju jaga bak teungéut dan barô kheueh geusadar bahwa droe geuh nyan bunoe lam tengéut ka meulumpo. 8 Beungoh nyan raja deuh jih apoh apah até geuh hana meuteuntée, ngon sabab nyan laju geupeurintah mangat banmandum tukang sihe dan nyang na iéuleumé di nanggroe Meusé mangat meugumpôi ubak gobnyan, óh trok keunan laju geucalitra banmandum peue-peue nyang ka geulumpo lam teungéut geuh beuklam ubak awaknyan, teuma hana meusidroe pi lamkawan ureuëng nyang meuhase jiboh makna lumpo raja nyan. 9 Óh lheueh nyan tukang urôh ié jieb raja laju jipeurab dan jipeugah ubak raja, "Nibak uroenyoe ulôn harôh lôn aku keusalahan ulôn. 10 Yoh masa ilée Po raja neubeungéh ubak tukang urôh ruti dan keu ulôn, dan laju kamoe Po raja peutamong lam glab, nibak rumoh ulée kawai meuligoe. 11 Bak simalam kamoe mandua na meulumpo, dan lumpo kamoe nyan hana saban makna jih. 12 Sidroe ureuëng muda bansa Ibrani na disinan meusajan ngon kamoe. Gobnyan jeuet keu ulée kawan peulayan meuligoe di meuligoe nyan. Laju kamoe peugah lumpo kamoe bak ureuëng nyan, dan laju jipeutrang bak kamoe makna lumpo nyan. 13 Banmandum nyang jipeugah makna lumpo kamoe nyan paih that lagée nyang geupeugah, Po raja neupeugisa ulôn bak jabatan ulôn yoh awai, dan neuhuköm maté tukang urôh ruti nyan." 14 Ban geudeungoe haba nyan raja laju geupeutreun peurintah geuyuejak cok Nabi Yusuf didalam glab, dan deungon pantaih that Nabi Yusuf laju jipeuteubiet lam glab nyan. Óh ka lheueh Nabi Yusuf geumeucuko dan geugantoe peukayan geuh, laju geujak meuhadab ubak raja. 15 Geupeugah lé raja ubak Nabi Yusuf, "Ulôn ka meulumpo, dan hana meusidroe pih nyang hase jipeutrang peue makna lumpo ulôn nyan. Na nyang peugah ubak ulôn bahwa droeneueh jeuet neutafeuse makna lumpo." 16 Geujaweueb lé Nabi Yusuf, "Bukon, ya Po raja, teuma Po teu Allah nyang bri tafeusé lumpo nyang paih." 17 Dan geupeugah kheueh lé raja, "Ulôn meulumpo bahwa ulôn teungoh lôn dong bak binéh Krueng Nil. 18 Dan laju jiteungoh nibak lam krueng nyan tujoh boh leumô nyang teumbon-teumbon dan kulét meukilat-kilat, dan laju jirot naleueng nyang na bak binéh krueng nyan. 19 Óh lheueh nyan jiteuka teuma tujoh boh leumô nyang laén, pijuet-pijuet tinggai kulét ngon balot tuleueng. Gohlom na ulôn kalon leumô nyang meunan brôk bansaboh nanggroe Meusé. 20 Leumô-leumô nyang pijuet nyan laju jipajoh habéh banmandum leumô-leumô nyang teumbon bunoe. 21 Óh lheuehnyan leumô nyang pijuet nyan teutab pijuet, óh lheuehnyan teujaga kheueh ulôn nibak teungéut nyan. 22 Óh lheuehnyan ulôn teungéut lom dan meulumpo lom, bahwa na deuh ulôn kalon tujoh neuk aneuëk gandom nyang meuasoe dan masak-masak, jitimoh bak saboh tangke. 23 Dan timoh teuma tujoh neuk aneuëk gandom nyang pijuet ngon tho kreng sabab jipupot lé angén guron. 24 Aneuëk gandom nyang pijuet nyan laju jiuét aneuëk gandom nyang meuasoe bunoe. Dan ka lheueh ulôn peugah bandua boh lumpo nyan ubak tukang sihe, teuma hana meusidroe pih nyang hase jipeutrang peue makna lumpo ulôn nyan." 25 Dan laju geupeugah lé Nabi Yusuf ubak raja nyan, "Mandua boh lumpo nyan saban makna jih; Po teu Allah ka geubri tée ubak Po raja peue nyang teuma geupeubuet. 26 Tujoh boh leumô nyang teumbon-teumbon nyan na kheueh tujoh thon, dan tujoh neuek aneuëk gandom nyang meuasoe nyan saban cit tujoh thon; mandua nyan saban makna jih. 27 Tujoh boh leumô nyang pijuet, nyang teuka óh lheueh nyan, meunan cit tujoh neuk gandom nyang pijuet nyang tho kreng sabab jipupot lé angén guron nyan na kheueh masa musém deuk nyang treb jih tujoh thon teuma. 28 Lagée toh nyang ka lheueh ulôn peugah ubak Po raja, Po teu Allah ka geupeuleumah ubak Po raja peue nyang teuma geupeubuet. 29 Singoh teuma teuka tujoh thon masa nyang makmu bansaboh nanggroe Meusé nyoe. 30 Óh lheuehnyan teuka tujoh thon masa musém deuk, dan watée nyang peunoh ngon makmu nyan ka jipeutuwoe mandum, sabab watée meuseum deuk nyan keubit parah lumpah na sampoe bansaboh nanggroe nyoe ka habéh tho. 32 Lumpo Po raja nyan teuka jih dua goe, nyan sibagoe tanda bahwa hainyan ka geupeuteutab lé po teu Allah dan bahwa Allah teuma geupeubuet deungon sigra. 33 Ngon sabab nyan, Po raja neupiléh sidroe ureuëng nyang ceureudek ngon bijaksana dan neubri kuasa ubak ureuëng nyan keu jeuet jiatoe nanggroe nyoe. 34 Po raja harôh teuma neuangkat peugawée-peugawée nyang laén, dan neubri bak peugawéenyan kuasa keu jikuteb siper limong nibak banmandum wasé teupot aneuëk gandom lam watée tujoh thon nyang peunoh ngon makmu nyan, laju jitamon di banda-banda dan jijaga teuma. 36 Gandom nyan jeuet keu keuneubah sibagoe cadangan óh trok watée musém deuk nyang teuma teuka di nanggroe Meusé. Deungon lagée nyan rakyat hana maté ngon sabab lé deuk." 37 Raja dan banmandum peugawée situju reuncana Nabi Yusuf nyan. 38 Dan laju geupeugah lé raja ubak awaknyan, "Hana mungken tanyoe teumé ureuëng laén nyang sisuai nibak Nabi Yusuf, sabab gobnyan geupimpén lé roh Allah." 39 Dan raja laju geupeugah ubak Nabi Yusuf, "Allah ka geubri tée banmandum nyoe ubak gata, dan ka jeulaih bahwa gata leubeh carông dan bijaksana nibak soemantong nyan. 40 Gata teuma lôn angkat jeuet keu gubunur, dan banmandum rakyat ulôn jitaát peue-peue nyang gata peurintah. Teuma ulôn kheueh mantong nyang leubeh meukuasa nibak gata." 41 Óh lheuehnyan raja laju geusuet nibak jaroe geuh euncien nyang na cab keurajeuen, dan laju geupeusok bak jaroe Nabi Yusuf sira geupeugah, "Deungon nyoe gata ulôn angkat jeuet keu gubunur bansaboh nanggroe Meusé." Óh lheueh nyan laju geusôk bak Nabi Yusuf bajée jubah nyang teupeugét nibak ija lineun nyang halôh, dan geupeungui bak takue Nabi Yusuf saboh rante méuh. 43 Dan laju geubri ubak Nabi Yusuf geuritan keurajeuen nyang keudua keu geuritan gobnyan, dan peungawai keuhormatan raja jijak dikeue geuritan nyan sira jitawök-tawök, "Awas! Jok rot! Jok rot!" Meunan kheueh jeuet jih Nabi Yusuf jiangkat jeuet keu gubunur bansaboh nanggroe Meusé. 44 Geupeugah lé raja ubak Nabi Yusuf, "Ulôn kheueh raja -- dan ulôn peumaklum bahwa meunyoe hana idhin gata hán jeuet meusidroe ureuëng pih bansaboh nanggroe Meusé jipeubuet sapeue." 45 Dan raja laju geubri saboh nan Meusé keu Nabi Yusuf, nan nyan na kheueh, Zafnat-Paaneah. Dan geubri teuma sidroe peurumoh keu Nabi Yusuf nyang nan jih Asnat binti Potifera nyang jeuet keu imeum nibak banda Heliopolis. Nabi Yusuf meu-umu lhée ploh thon watée gobnyan jeuet keu gubunur raja nanggroe Meusé. Dan geubeudôh kheueh Nabi Yusuf nibak meuligoe raja geujak keulileng bansaboh nanggroe Meusé. 47 Lam masa tujoh thon nyang peunoh ngon makmu nyan, tanoh di nanggroe Meusé nyan jipeuteubiet hase meukuyan-kuyan. 48 Gandom nyang jipeuhase lé tanoh nyan laju geupeusapat lé Nabi Yusuf dan geukeubah laju di banda-banda bansaboh nanggroe. Nibak tieb-tieb banda geucok hase gandom nyang na di blang-blang disinan laju geukeubah lam banda nyang na tho disinan. 49 Gandom nyang geupeusapat nyan lumpah that jai sampoe lé Nabi Yusuf hana le geusukat gandom-gandom nyan, sabab jai jih lagée anoe bak binéh laôt. 50 Sigohlom trok musém deuk nyan teuka, Asnat peurumoh Nabi Yusuf laju geupeulahé dua droe aneuëk agam. 51 Geupeugah lé Nabi Yusuf, "Allah ka geupeujeuet ulôn tuwoe ubak banmandum nyang ulôn deurita dan ubak waréh kawöm ayah ulôn." Sabab nyan kheueh geuboh nan aneuëk geuh nyang tuha "Manasye". 52 Geupeugah lom lé gobnyan, "Allah ka geubri aneuëk-aneuëk ubak ulôn bak watée ulôn susah," dan laju geuboh nan aneuëk nyang keudua "Efraim". 53 Tujoh thon masa nyang peunoh ngon makmu nyang ka jirasa lé bansa Meusé nyan pih habéh. 54 Dan teuka kheueh masa tujoh thon musém deuk nyang cukob brat, paih lagée nyang ka geupeugah lé Nabi Yusuf. Bansigom donya ka habéh deuk, teuma di nanggroe Meusé na teukeubah meunajoh. 55 Watée rakyat nanggroe Meusé jirasa bahwa jihnyan ka deuk, awaknyan laju jijak lakée peunajoh ubak Po raja. Dan raja laju geuyuejak awaknyan ubak Nabi Yusuf dan laju jitaát peue-peue mantong nyang geupeurintah lé Nabi Yusuf ubak awaknyan. 56 Watée musém deuk nyan meutamah-tamah hebat dan ka trok bansaboh nanggroe, Nabi Yusuf laju geubuka banmandum beurandang dan laju geupeubloe gandom ubak ureuëng Meusé. 57 Bansaboh donya manusia jijak ubak Nabi Yusuf keu jijak bloe gandom, sabab musém deuk nyan biet-biet parah bansaboh donya.

Keujadian 42

1 Watée Nabi Yakub geudeungoe bahwa na gandom di nanggroe Meusé, laju geupeugah ubak aneuëk-aneuëk gobnyan, "Pakon gatanyoe teunang-teunang mantong? 2 Ka ulôn deungoe bahwa na gandom di nanggroe Meusé; jak kheueh keudeh dan gata bloe laju gandom nyang na disinan mangat geutanyoe mandom bék maté deuk." 3 Dan jijak kheueh bansiploh droe aduen Nabi Yusuf nyan u nanggroe Meusé keu jijak bloe gandom. 4 Teuma Nabi Yakub hana geubri jak Benyamin, adoe droe Nabi Yusuf, sabab gobnyan geutakot meuteumé ceulaka ateueh aneuëk geuh nyan. 5 Sabab musém deuk ka trok u nanggroe Kanaan, teuma aneuëk-aneuëk Nabi Yakub ngon ureuëng laén laju jijak u nanggroe Meusé keujijak bloe gandom. 6 Nyang publoe gandom keu ureuëng-ureuëng nyang teuka bansaboh donya na kheueh Nabi Yusuf, sibagoe gubunur nanggroe Meusé. Sabab nyan kheueh aduen-aduen Nabi Yusuf teuka laju jisujut ukeue gobnyan. 7 Watée Nabi Yusuf geukalon aduen-aduen geuh nyang teuka, gobnyan geuturi keu awaknyan banmandum, teuma gobnyan pura-pura hana geuturi. Ngon haba nyang gasa laju geutanyong bak awaknyan, "Gatanyoe ureuëng pane?" "Kamoe ureuëng Kanaan. Kamoe meuteuka keunoe keukamoe jakbloe peunajoh," jaweueb awaknyan. 8 Bahpi Nabi Yusuf geuturi keu aduen-aduen geuhnyan, teuma awaknyan meusidroe hana jituri keu Nabi Yusuf. 9 Dan laju teuingat keuhai lumpo gobnyan keuhai awaknyan. Dan laju geupeugah ubak awaknyan, "Kah nyoe banmandum mata-mata; kah nyoe kajak keunoe keukah seulidek pat keuleumahan nanggroe kamoe." 10 "Bukon, hai amphon," jaweueb awaknyan. "Kamoe, namiet-namiet po meujak keunoe hana laén tujuan na kheueh keu kamoe jak bloe peunajoh. 11 Kamoe nyoe meusyedara, hai amphon. Kamoe nyoe ureuëng gét-gét, bukon mata-mata." 12 Laju geujaweueb lé Nabi Yusuf, "Sulet! kahnyoe kajak keunoe keukah seulidek pat keuleumahan nanggroe nyoe." 13 Jaweueb awaknyan, "Kamoe nyoe dua blaih droe meusyedara, hai amphon, kamoe nyoe aneuëk nibak sidroe ayah di nanggroe Kanaan. Sidroe lamkawan kamoe ka meuninggai donya dan adoe kamoe nyang tulot na meusajan ayah kamoe." 14 "Biet-biet beutôi lagée ulôn peugah," jaweueb Nabi Yusuf, "kah-kah nyoe mata-mata. 15 Ulôn keuneuk ujoe kah nyoe banmandum: Ulôn meusumpah deumi nan raja bahwa kah-kah nyoe hana kah tinggai nanggroe nyoe meunyoe adoe gata nyang tulot nyan hana kahba keunoe. 16 Sidroe lamkawan kah nyoe harôh jiwoe jijakcok adoe kah nyan. Nyang laén teuteuen disinoe sampoe tutoe haba kah nyoe na bukeuti. Meunyoe hán, deumi nan raja, kahnyoe banmandum mata-mata musoh!" 17 Óh lheuehnyan awaknyan laju jipeutamong lam glab lhée uroe treb jih. 18 Bak uroe nyang keu lhée Nabi Yusuf laju geupeugah ubak awaknyan, "Ulôn ureuëng nyang teumakot dan taát ubak Po teu Allah. Kahnyoe teuma lôn peuseulamat ngon saboh syarat. 19 Keu teubukeuti bahwa kah-kahnyoe jujoe, sidroe lamkawan kahnyoe teutab teuteun dalam glab; nyang laén jeuet jiwoe sira jiba gandom nyang gata bloe keu keuluwarga gata nyang teungoh meudeurita deuk. 20 Óh ka lheueh nyan kahnyoe harôh kahba adoe kah nyang tulot ubak ulôn. Nyan kheueh bukeuti jih singoh bahwa tutoe haba kah nyan beutôi, dan kahnyoe hana lôn huköm maté." Awaknyan situju lagée keuputosan gubunur nyan. 21 Dan laju jimariet awaknyan sabe keudroe-droe, "Nyan, geutanyoe jinoenyoe jihuköm sabab buet tanyoe nyang salah teuhadab adoe tanyoe yoh masa ilée; adoe geutanyoe nyan jilakée tulông teuma lé geutanyoe hana tapako, bahpi takalon adoe tanyoe nyan lumpah that meudeurita. Nyang kheueh sabab jih geutanyoe kata rasa deurita nyang lagée nyoe bagoe." 22 Jipeugah lé Ruben, "Kon ka ulôn peugah bak gatanyoe yoh masa ilée mangat adoe geutanyoe nyan bék tapako-pako. Teuma gatanyoe banmandum hana tatem deungoe nyang ulôn peugah nyan. Dan jinoenyoe adoe geutanyoe nyang maté nyan teubalaih ateueh geutanyoe." 23 Nabi Yusuf muphom basa awaknyan, teuma awaknyan hana jiteupeue hainyan, sabab awaknyan jimariet ngon Nabi Yusuf jipeuguna jurubasa. 24 Nabi Yusuf geutinggai awaknyan disinan, dan laju geujak moe. Óh ka jeuet geumeututoe lom teuma, gobnyan laju geuriwang ubak awaknyan, laju geucok Simeon, dan laju geuyue ikat Simeon nyan dikeue banmandum syedara jihnyan. 25 Nabi Yusuf laju geupeurintah mangat eumpang-eumpang nyang na jiba lé aduen geuhnyan teupasoe laju beupunoh ngon gandom, dan péng awaknyan maséng-maséng jipeutamong lom lam eumpang-eumpang nyan. Meunan cit mangat ubak awaknyan jibri peunajoh keubeukai bak rot ueh. Banmandum peurintah geuh nyan laju jipeubuet. 26 Óh lheueh nyan lé aduen-aduen Nabi Yusuf laju jipeudieng ateueh rhueng keuleudée jih maséng-maséng ngon eumpang gandom nyang ka awaknyan bloe nyan, laju jijak kheueh awaknyan nibak teumpat nyan. 27 Bak teumpat awaknyan mudom, sidroe lamkawan awaknyan laju jipeuhah eumpang gandom jih keujibri makheun ubak keuleudée jih. Dan laju jiteumé péng lam eumpang gandom nyan. 28 "Péng ulôn jijok pulang," kheun ureuëng nyan ubak syedara-syedara jih. "Ngieng, na lam eumpang ulôn!" Até awaknyan meutamah teumakot, dan deungon rasa teumakot nyang luwabiasa awaknyan laju jiteumanyong sabe keudroe-droe, "Peue nyang geupeubuet lé Allah ateueh geutanyoe?" 29 Óh ka trok u Kanaan, awaknyan laju jimeucalitra ubak ayah jih peue-peue mantong nyang ka awaknyan rasa. 30 Jipeugah lé awaknyan, "Gubunur nanggroe Meusé nyan jimeututoe gasa that ubak kamoe dan jitudoh kamoenyoe mata-mata nanggroe jih. 31 Laju kamoe jaweueb, 'Kamoenyoe ureuëng gét-gét, bukon mata-mata, kamoenyoe ureuëng jujoe. 32 Kamoe banmandum na dua blaih droe meusyedara, aneuëk nibak saboh ayah, dan sidroe ka meuninggai donya, seudangkan nyang tulot na meusajan ayah kamoe di nanggroe Kanaan.' 33 Laju jipeugah lé gubunur nyan, 'Ulôn keuneuk ujoe kah-kahnyoe peu kheueh kah-kahnyoe biet-biet ureuëng jujoe: sidroe lamkawan kahnyoe harôh tinggai disinoe; nyang laén jeuet jiwoe sira jipuwoe gandom keu keuluwarga kah nyang teungoh deuk. 34 Óh ka lheueh kah gisa sira kahba adoe kah nyang tulot, barô kheueh lôn teupeu bahwa kahnyoe bukon mata-mata, teuma na kheueh ureuëng jujoe. Dan syedara kah nyang ulôn teuen nyan ulôn jok lom ubak kah dan kah jeuet tinggai di nanggroe nyoe dan beubaih kah meuniaga.' " 35 Óh lheuehnyan, bak watée awaknyan jipeusoh banmandum eumpang-eumpang jih, awaknyan laju jiteumé dumpet jih maséng-maséng nyang meuasoe péng; ngon nyan awaknyan pi laju jiteuka teumakot, meunan cit ayah awaknyan. 36 Laju geupeugah lé ayah awaknyan, "Lé sabab gatanyoe ka jeuet keusabab ateueh ulôn sampoe gadôh banmandum aneuëk-aneuëk lôn. Nabi Yusuf ka hana le; Simeon ka hana le; dan jinoenyoe gata keuneukcok teuma Benyamin. Hana wayang deurita ulôn nyoe!" 37 Laju geupeugah lé Ruben ubak ayah geuh, "Neujok kheueh Benyamin nyan ubak ulôn, Ayah; teuma ulôn puwoe lom, meunyoe hana, Ayah jeuet neupoh maté bandua droe aneuëk agam ulôn." 38 Teuma Nabi Yakub geupeugah, "Hán jeuet, Benyamin hana jeuet gata ba; aduen jih ka meuninggai dan jinoenyoe nyan kheueh jih nyang na tinggai. Pat tateupeue jihnyoe meuteumé bala nibak rot euh raya. Ulôn nyoe ka tuha, dan seudeh nyang gata peuteuka ubak ulôn nyan jeuet keuakibat ulôn nyoe maté."

Keujadian 43

1 Musém deuk di nanggroe Kanaan meutamah-tamah hebat, dan óh ka lheueh keuluwarga Nabi Yakub ka habéh geupajoh banmandum gandom nyang teupuwoe nibak nanggroe Meusé, geupeugah kheueh lé Nabi Yakub ubak aneuëk-aneuëk geuh, "Gatajak kheueh lom u nanggroe Meusé dan gata bloe kheueh gandom keu geutanyoe." 3 Dan Yehuda laju jipeugah ubak ayah jih nyan, "Gubunur nanggroe Meusé nyan ka geupeuingat ngon haba nyang biet-biet brat kamoenyoe hana jeuet kamoe gisa u nanggroe Meusé meunyoe adoe kamoe Benyamin hana kamoe ba sajan. 4 Meunyoe Ayah neubri idhin adoe kamoe nyan jeuet jijak ngon kamoe, barô kamoe tem jak keudeh keu kamoe jakbloe peunajoh. 5 Teuma meunyoe Ayah hana neubri Benyamin jijak ngon kamoe, kamoe hán kamoetem jak, sabab gubunur nyan ka geupeugah hana jeuet kamoe meuhadab gobnyan meunyoe adoe kamoe Benyamin hana kamoe ba." 6 Geupeugah lé Nabi Yakub, "Keupeue gata nyoe tapeususah ulôn ngon cara gata peugah bahwa mantong na adoe gata di Kanaan nyoe?" 7 Jaweueb awaknyan, "Ureuëng nyan hana putôh-putôh jitanyong keuhai kamoe dan keuhai keuluwarga tanyoe, jipeugah lé gubunur nyan, 'Peu kheueh mantong udeb ayah gata? Peu kheueh gata mantong na adoe teuh nyang agam?' Dan kamoe teupaksa kamoe jaweueb peue-peue nyang jitanyong nyan. Pakriban jeuet kamoe sangka bahwa lé gubunur nyan geuyue jakcok adoe kamoe nyan?" 8 Dan laju geupeugah lé Yehuda ubak ayah jih Nabi Yakub nyan, "Neupeu idhin kheueh hai Ayah adoe kamoe nyan jiseutôt kamoe, dan ulôn nyang meutanggong jaweueb ateueh adoe kamoe nyan. Kamoe teuma kamoe jak ngon reujang-reujang mangat hana meusidroe pih nyang maté deuk lam keuluwarga geutanyoe. 9 Ulôn kheueh jaminan jih, dan Ayah jeuet neutuntot adoe lôn nyan ateueh ulôn. Meunyoe adoe kamoe nyan hana ulôn puwoe riwang deungon seulamat, ulôn tanggong huköman nyan siumu udeb. 10 Meunyoe tanyoe hana tapreh ka meunoe treb, ka pasti kamoenyoe ka lheueh kamoe jak woe keu nyang keu dua." 11 Dan laju geupeugah lé Nabi Yakub, "Meunyoe biet-biet harôh lagée gata peugah nyan, taba kheueh hase nyang paleng gét nibak nanggroe geutanyoe nyoe dan gata pasoe laju lam eumpang-eumpang gata sibagoe bungöng jaroe geutanyoe keu gubunur nyan: Kismis, meulisan, reumpah-reumpah, boh kréeh dan boh badam. 12 Meunan cit gata ba péng dua goe lipat, sabab péng nyang gata teumé lam eumpang gata nyan harôh teujok pulang ubak gobnyan. Mungken awaknyan kasilab jipeutamong lam eumpang-eumpang gata. 13 Dan gata ba kheueh adoe teuh nyan, dan meunyoe ka seuleusoe gatawoe kheueh bubagaih keunoe. 14 Seumoga Allah Nyang Mahakuasa geupeujeuet até gubunur nyan geugaséh ubak gata, sampoe gobnyan geutem jokpulang Benyamin ngon Simeon ubak gata. Keuhai ulôn nyoe, meunyoe ulôn biet-biet harôh gadôh banmandum aneuëk-aneuëk lôn, ulôn ka rila." 15 Óh lheuehnyan lé syedara-syedara Nabi Yusuf nyan laju jijak gisa u nanggroe Meusé sira jiba bungöng jaroe meunan cit péng dua goe lipat dan adoe jih Benyamin. Óh ka trok keudeh, awaknyan laju jijak meuhadab ubak Nabi Yusuf. 16 Watée Nabi Yusuf geukalon Benyamin ngon aduen-aduen geuh ka trok jigisa, laju geupeugah ubak peulayan nyang jeuet keu ulée lam rumoh gobnyan, "Jakba laju banmandum ureuëng nyan u rumoh lôn. Awaknyan teuma jimakheun meusajan ngon ulôn cot uroenyoe, ngon sabab nyan gata sie kheueh saboh beulatang peulara dan gata peusiab kheueh peunajoh kamoe." 17 Peulayan nyan laju jipeubuet peue-peue nyang ka geupeurintah lé Nabi Yusuf nyan dan laju jiba syedara-syedara Nabi Yusuf nyan u rumoh gubunur. 18 Watée awaknyan jiba u rumoh Nabi Yusuf, awaknyan laju teuka teumakot sira jipike, "Tanyoe ka jiba keunoe, sabab péng nyang tanyoe teumé lam eumpang geutanyoe ilée. Awaknyan jidrob geutanyoe lam sikeujab, laju jicok keuleudée tanyoe dan jipeujeuet geutanyoe keu namiet gobnyan." 19 Kareuna nyan, bak binéh pintoe rumoh Nabi Yusuf awaknyan laju jipeugah ubak ulée rumoh tangga, 20 "Meuáh, Teungku, kamoe ka lheueh kamoe jak keunoe keu kamoe jakbloe peunajoh. 21 Watée kamoe woe, óh trok bak saboh teumpat kamoe keuneuk mudom, laju kamoe peuhah eumpang gandom kamoe. Hana kamoe sangka-sangka banmandum péng ngon bayeue yuem gandom kamoe mantong na lam eumpang ateueh aneuk gandom kamoe. Kamoe tan kamoe teupeue soe nyang peutamong péng lam eumpang gandom kamoe nyan. Jinoe péng nyan kamoe ba lom ubak Teungku. Seulaén nibak nyan mantong na kamoe ba péng laén keu kamoe bayeue yuem gandom nyang teuma kamoe bloe lom." 23 Peulayan nyan laju jipeugah "Bék teumakot. Bék picek até. Allah droeneueh, na kheueh Allah nyang geupujoe lé ayah droeneueh, gobnyan kheueh nyang peutamong péng nyan lam eumpang droeneueh. Dan ulôn ka lôn teurimong yuem gandom droeneueh nyan." Óh lheuehnyan laju jiba Simeon ubak awaknyan, 24 dan laju ji intat awaknyan u dalam rumoh. Ubak awaknyan laju jijok ié ngon rhah gaki, dan eumpeuen keuleudée awaknyan pih jijok cit teuma. 25 Óh lheuehnyan awaknyan laju jipeusiab-siab bungöng jaroe keu jijok ubak Nabi Yusuf watée gobnyan geuwoe jak pajoh bu cot uroe, sabab awaknyan ka jibri tée bahwa awaknyan teuma jimakheun meusajan-sajan ngon Nabi Yusuf. 26 Watée Nabi Yusuf ka trok u rumoh, awaknyan laju jijok banmandum bungöng jaroe nyan ubak Nabi Yusuf sira jisujut dikeue gobnyan. 27 Nabi Yusuf laju geutanyong keuadaan awaknyan, "Gatanyoe ka lheueh tapeugah ubak ulôn keudaan ureuëng syiek gata nyang ka tuha nyan. Pakriban keuadaan gobnyan? Peu kheueh lam keuadaan seuhat-seuhat?" 28 Jaweueb awaknyan, "Nyoepat ulôn hai Teungku, ayah kamoe, gét-gét mantong keuadaan gobnyan." Dan laju awaknyan jisujut ubak gobnyan. 29 Watée Nabi Yusuf geungieng Benyamin, adoe gobnyan, laju geupeugah lagée nyoe, "Nyoe kheueh adoe droeneueh nyang tulot nyan, nyang ka lheueh gata peugah-peugah ubak ulôn? Seumoga Po teu Allah geubri beureukat ubak gata, aneuëk ulôn." 30 Até Nabi Yusuf meutô-tô sabab rasa rindu dan gaséh gobnyan ubak adoe geuh. Gobnyan rab hán hase geukuasa droe, lé sabab nyan geujak kheueh gobnyan nibak teumpat nyan laju geujak tamong lam kama dan laju geumo. 31 Óh lheuehnyan gobnyan laju geurhah muka geuh dan laju geuteubiet lom teuma, dan deungon geupeuteun até geuh, laju geuyue peuhidang peunajoh. 32 Nabi Yusuf geumakheun bak meuja geuh keudroe, dan bandum syedara gobnyan bak meja nyang laén. Ureuëng-ureuëng Meusé nyang na nibak teumpat nyan jimakheun cit bak meuja nyang laén, sabab awaknyan meurasa hina meunyoe awaknyan jimakheun meusajan-sajan ngon ureuëng Ibrani. 33 Banmandum syedara Nabi Yusuf geupeuduek nibak meuja nyang meuhadab ngon meuja Nabi Yusuf, meunurot urotan umu awaknyan maséng-maséng, phon nibak nyang tuha trok ubak nyang tulot. Watée jikalon lé awaknyan cara teuatoe nyan, awaknyan saléng jimeugieng ngon hireuen lagoe na. 34 Awaknyan jibri peunajoh nyang na nibak meuja Nabi Yusuf, dan Benyamin geupeutimang limong goe leubeh le nibak aduen-aduen gobnyan nyang laén. Laju awaknyan jimakheun ngon jijieb ié sipuih-puih jih meusajan ngon Nabi Yusuf.

Keujadian 44

1 Óh lheuehnyan Nabi Yusuf laju geupeurintah ubak ulée rumoh tangga geuh, "Jak pasoe kheueh eumpang awaknyan banmandum ngon gandom, bube ek jiba lé awaknyan, dan péng awaknyan peutamong lom lam eumpang jih maséng-maséng ateueh gandom nyan. 2 Dan piala pirak ulôn nyan gata peutamong lam eumpang adoe awaknyan nyang tulot, meusajan-sajan ngon péng yuem gandom jih nyan." Peulayan nyan laju jipeubuet banmandum nyang geupeurintah lé Nabi Yusuf nyan. 3 Óh singoh beungoh, banbeungoh that, Nabi Yusuf laju geumeucre ngon aduen-aduen geuh, dan awaknyan pi laju jiwoe ngon keuleudée jih maséng-maséng. 4 Awaknyan gohlom jiôh nibak banda nyan, watée Nabi Yusuf geupeugah ubak peulayan rumoh gobnyan, "Jak peulet bubagaih awaknyan. Meunyoe ka meurumpok, peugah laju bak awaknyan, 'Pakon gata balaih buet nyang gét ngon buet nyang jeuhet? 5 Pakon gata cua piala pirak po ulôn? Piala nyan geupeuguna sibagoe teumpat jieb ié dan sibagoe alat nujum. Gata ka tapeubuet buet nyang jeuhet nyang paleng rayeuk!' " 6 Watée peulayan nyan sampoe ubak syedara-syedara Nabi Yusuf, laju jipeugah peue nyang ka geupeurintah lé Nabi Yusuf nyan. 7 Jaweueb awaknyan ubak peulayan nyan, "Peue nyang Droeneueh meukeusut? Kamoe jeuet meusumpah bahwa kamoe hana kamoe peubuet nyang lagée nyan! 8 Droeneueh keudroe neuteupeue bahwa péng nyang kamoe teumé lam eumpang-eumpang kamoe ateueh gandom nyan, ka kamoe jok pulang ubak Droeneueh. Jadi, hana mungken kamoe cua pirak atawa méuh lam rumoh gubunur! 9 Deungon kamoe peugah hai Teungku, meunyoe na meuteumé lamkawan kamoe nyoe, bah kheueh ureuëng nyan teuhuköm maté, dan kamoe jeuet keu namiet Droeneueh." 10 Peulayan nyan jipeugah, "Meunyoe meunan bah kheueh; teuma jihnyan, baksoe mantong piala nyan meuteumé, jihnyan kheueh jeuet keu namiet ulôn; nyang laén jeuet jijak." 11 Dan deungon bagaih that awaknyan maséng-maséng laju jipeutreun eumpang-eumpang gandom jih. 12 Peulayan Nabi Yusuf nyan laju jipareksa banmandum eumpang-eumpang nyan deungon teuliti, phon eumpang nyang tuha sampoe ubak eumpang nyang tulot, dan pialanyan laju meuteumé lam eumpang Benyamin. 13 Aduen-aduen Benyamin nyan lumpah that seudeh, sampoe peukayan nyang na jingui nyan laju jipriek-priek. Awaknyan laju jipeudieng keuleudée droejih dan jigisa laju u banda. 14 Watée Yehuda dan syedara-syedara geuhnyan katrok u rumoh Nabi Yusuf, Nabi Yusuf mantong na disinan, dan awaknyan laju jisujut dikeue Nabi Yusuf nyan. 15 Dan geupeugah kheueh lé Nabi Yusuf ubak awaknyan, "Peue nyang ka gata peubuet nyan? Peu kheueh hana gata teupeu bahwa ureuëng nyang lagée lônnyoe hase lôn ngieng ureuëng nyang jipeubuet jeuhet ngon iéuleumé gaéb?" 16 "Peue nyang jeuet kamoe kheun, Teungku?" jaweueb Yehuda. "Pakriban kamoe jeuet kamoe bantah atawa kamoe peubeuna droe kamoe nyoe? Po teu Allah ka geupeudeuh buet kamoe nyang salah, jinoenyoe bah kheueh kamoe banmandum jeuet keu namiet Teungku, kon mantong jihnyan nibak soe piala nyan meuteumé." 17 Seuot Nabi Yusuf, "Hán jeuet! Ulôn hánkutem pubuet lagée nyan bagoe! Teuma ureuëng nyan nibak soe pialanyan meuteumé, jihnyan kheueh nyang jeuet keu namiet lôn. Nyang laén jeuet jiwoe ngon beubaih ubak ureuëng syiek droeneueh." 18 Yehuda geumaju geupeurab ubak Nabi Yusuf dan laju geupeugah, "Meuáh, Teungku po, idhin kheueh ulôn meututoe ngon Teungku po. Bék neubeungéh ubak ulôn; Teungku po lagée raja nanggroe Meusé keudroe. 19 Teungku po ka neutanyong ubak kamoe nyoe 'Peu kheueh droeneueh mantong na ureuëng syiek atawa syedara-syedara nyang laén?' 20 Kamoe jaweueb, 'Ayah kamoe ka tuha dan adoe kamoe lahé bak watée ayah kamoe ka tuha that. Aduen saboh ma nibak adoe kamoe nyan ka meuninggai donya, teuma jinoenyoe jihnyan keudroe kheueh nyang mantong udeb nibak awaknyan bandua, dan ayah lumpah that geugaséh ubak jihnyoe.' 21 Teungku po neuyue kamoe mangat jeuet kamoe ba jihnyan keunoe, mangat Teungku po jeuet neukalon jihnyan, 22 laju kamoe jaweueb bahwa aneuëk nyan hana jeuet meucre nibak ayah jih; meunyoe jihnyoe meucre nibak ayah jih, ayah kamoe teuma meuninggai donya. 23 Óh lheuehnyan Teungku po neupeugah, 'Gata hana jeuet meuhadab le ngon ulôn meunyoe adoe gatanyan hana gata ba sajan.' 24 Bak watée kamoe woe ubak ayah kamoe, laju kamoe peutrok ubak gobnyan peue nyang ka Teungku po peugah nyan. 25 Óh lheuehnyan ayah kamoe geuyue lom ubak kamoe mangat kamoejak lom keunoe keukamoe jak bloe peunajoh. 26 Laju kamoe jaweueb, 'Kamoe hana jeuet le kamoe jak keudeh, sabab kamoe hana jeuet meuhadab gubunur meunyoe adoe kamoe nyang tulot hana jijak sajan. Barô kheueh jeuet keumoejak keudeh meunyoe adoe kamoe nyan jeuet kamoe ba sajan.' 27 Óh lheuehnyan ayah kamoe geukheun, 'Gatanyoe tateupeue bahwa Rahel, peurumoh ulôn teuma na dua droe aneuëk. 28 Nyang tuha ka jitinggai ulôn. Jihnyan pasti ka jiteugom lé beulatang juah, sabab sampoe án jinoe jihnyan hana ulôn kalon le. 29 Meunyoe gata tacok aneuëk nyang tulot nyoe nibak ulôn, dan keunong sapeue-sapeue ateueh jihnyoe, seudeh nyang gata peuteuka ateueh ulôn nyoe jeuet keuakibat ulôn nyoe meuninggai donya, sabab ulôn nyoe ka tuha.' " 30 "Sababnyan kheueh, Teungku po," kheun Yehuda ubak Nabi Yusuf, "Meunyoe kamoe meuwoe ubak ayah kamoe ngon hana kamoe ba sajan adoe kamoe nyan, ka pasti ayah kamoe meuninggai donya. Nyawöng gobnyan teugantueng nibak aneuëk nyan, dan gobnyan ka tuha that dan seudeh nyang kamoe peuteuka nyan jeuet keusabab gobnyan meuninggai donya. 32 Lom teuma, ulôn ka meujanji ubak ayah lôn ulôn kheueh nyang jeuet keujaminan keuhai adoe ulôn nyan. Ulôn kheun ubak gobnyan bahwa meunyoe ulôn hana lôn puwoe aneuëk nyan ubak gobnyan, ulôn kheueh nyang tanggong huköman siumu udeb. 33 Ngon lagéenyan, ulôn meuharab that, Teungku po, idhin kheueh ulôn nyoe tinggai disinoe jeuet keunamiet Teungku po sibagoe geunantoe adoe kamoe nyoe; bah kheueh jihnyoe jiwoe meusajan-sajan ngon aduen-aduen jih. 34 Pakriban ulôn hase lôn woe ubak ayah kamoe meunyoe aneuëk nyan hana jiwoe meusajan? Ulôn hana ek lôn teun teuma watée lôn ngieng bala nyang rhot ateueh ayah kamoe nyan."

Keujadian 45

1 Nabi Yusuf ka hana ek geupeuteun peurasaan droe geuh dikeue peugawée-peugawée gobnyan. Sabab nyan laju geuyue ubak peugawée-peugawée geuhnyan mangat jitinggai kama teumpat geuhnyan deungon nyan mangat jeuet gobnyan geupeugah ubak syedara-syedara geuh soe gobnyan nyang sibeuna jih. 2 Óh habéh banmandum peugawée gobnyan jitinggai kama teumpat geuhnyan, laju geumo Nabi Yusuf sikeubiet-keubiet jih, sampoe ureuëng-ureuëng Meusé nyang na diluwa jideungoe su gobnyan mo, dan trok kheueh haba nyan ubak meuligoe raja. 3 Nabi Yusuf laju geupeugah ubak banmandum syedara geuh nyan, "Ulôn nyoe Nabi Yusuf. Peu kheueh Ayah mantong udeb?" Ban jideungoe hainyan banmandum syedara Nabi Yusuf nyan teumakot lumpah na seuhingga peue nyang geutanyong lé Nabi Yusuf nyan hana hase jijaweueb. 4 Laju geupeugah lé Nabi Yusuf ubak awaknyan, "Jak kheueh keunoe." Awaknyan laju jipeurab, dan gobnyan geupeugah lom, "Ulôn nyoe Nabi Yusuf, nyang ka gata publoe u nanggroe Meusé. 5 Bék teumakot atawa meunyeusai peue nyang droeneueh peubuet sabab droeneueh ka neupeubloe ulôn. Nyang sibeuna jih Allah keudroe nyang ba ulôn keunoe leubeh awai nibak droeneueh keu lôn jak peuseulamat dum na rakyat ba. 6 Jinoenyoe barô thon nyang keudua musém deuknyoe, dan limong thon teuk treb jih ureuëng hana jimeu-ué atawa jipot wasé peunula. 7 Po teu Allah ka geuba ulôn leubeh awai nibak droeneueh banmandum keujeuet lôn peuseulamat droeneueh nyoe deungon cara nyang hireuen that nyoe, dan keuteujamin beuseulamat droeneueh dan keuturonan droeneueh. 8 Jadi, nyang seubeuna jih bukon sabab lé droeneueh ulônnyoe na disinoe, teuma ngon sabab Po teu Allah. Gobnyan ka geupeujeuet ulôn jeuet keupeugawée manyang nibak raja Meusé nyoe. Ubak ulôn jibri kuasa keu lôn urôh banmandum rumoh tangga jih dan bansilurôh nanggroe Meusé. 9 Jinoenyoe, bubagaih kheueh droeneueh woe ubak Ayah dan droeneueh peugah Nabi Yusuf, aneuëk gobnyan, geupeugah lagée nyoe, 'Po teu Allah ka geupeujeuet ulôn nyang mat kuasa ateueh bansaboh nanggroe Meusé; neujak kheueh bubagaih keudeh. 10 Ayah jeuet geutinggai didaerah Gosyen, to ngon ulôn -- ayah, ngon aneuëk cucoe, bubiri, kaméng, leumô dan banmandum atra ayah. 11 Meunyoe Ayah kana di Gosyen, ulôn hase lôn useuha ayah. Musém deuk mantong na limong thon teuk dan teuma lôn useuha mangat ayah, keuluwarga dan beulatang peulara ayah hana kureueng sapeue.' " 12 Geupeugah lom lé Nabi Yusuf, "Jinoenyoe droeneueh ngieng keudroe, meunan cit keu kah Beunyamin, bahwa ulôn nyoe biet-biet Nabi Yusuf. 13 Peugah kheueh ubak ayah geutanyoe padub na rayeuk kuasa ulôn di nanggroe nyoe, di nanggroe Meusé, dan calitra kheueh ubak gobnyan peue-peue mantong nyang ka droeneueh kalon. Dan bubagaih kheueh droeneueh ba gobnyan keunoe." 14 Óh lheueh geukheun nyan laju geuwa Benyamin, adoe geuhnyan, dan laju geumo; meunan cit deungon Benyamin laju jimo sira jiwa aduen jih Nabi Yusuf. 15 Óh lheuehnyan, deungon mantong geumo, Nabi Yusuf laju geuwa banmandum syedara geuh sira geucöm awaknyan sidroe-droe. Óh lheuehnyan laju geupeuphon mariet-mariet ngon awaknyan. 16 Watée trok haba nyan ubak meuligoe raja bahwa syedara-syedara Nabi Yusuf ka trok jiteuka, raja dan peugawée-peugawée gobnyan galak lumpah na. 17 Dan geupeugah lé raja ubak Nabi Yusuf, "Neuyue kheueh ubak syedara droeneueh nyan jipeudieng keuleudée jih ngon gandom dan yue puwoe kheueh u Kanaan 18 keu jijaktueng ayah dan keuluwarga awaknyan laju minah keunoe. Ulôn teuma lôn bri ubak awaknyan tanoh nyang paleng gét di nanggroe Meusé nyoe, dan awaknyan teuma jeuet geu-udeb ngon hase nyang cukob nibak hase tanoh nyan. 19 Neuyue teuma ubak awaknyan jiba nibak nanggroe nyoe meupadub boh geuritan keu peurumoh ngon aneuëk-aneuëk awaknyan nyang mantong ubit, dan keu teujaktueng ayah awaknyan. 20 Awaknyan hana peureulée geupike barang-barang teupaksa awaknyan tinggai, sabab nyang paleng gét bansaboh nanggroe Meusé nyoe teuma jeuet keu milék awaknyan." 21 Aneuëk-aneuëk Nabi Yakub laju jipeubuet peue-peue nyang geupeurintah lé raja nyan. Nabi Yusuf laju geubri ubak awaknyan na meupadubboh geuritan, sisuai lagée nyang geupeurintah lé raja, meunan cit deungon beukai nibak rot euh raya. 22 Dan meunan cit geubri ubak awaknyan maséng-maséng sigoe salen peukayan barô, meunyoe keu Benyamin geubri lhée reutoh péng pirak dan limong salen peukayan barô. 23 Meunan cit geukirém keu ayah geuh siplôh boh keuleudée nyang peunoh teupeudieng ngon barang-barang nyang paleng gét nibak nanggroe Meusé, dan siploh boh keuleudée teuk teupeudieng teuma ngon boh gandom, ruti dan peunajoh nyang laén keu teupajoh watée teugisa u Meusé. 24 Óh lheuehnyan barô kheueh geu intat syedara-syedara geuhnyan, sira geupeugah ubak awaknyan, "Bék meudakwa bak rot euh." 25 Awaknyan laju jitinggai nanggroe Meusé dan jiwoe laju u nanggroe Kanaan, ubak ayah gobnyan Nabi Yakub. 26 "Nabi Yusuf mantong udeb!" kheun awaknyan ubak gobnyan. "Gobnyan geumat kuasa bansaboh nanggroe Meusé!" Ban geudeungoe haba nyan Nabi Yakub teumanueng-manueng, dan gobnyan hana geupatéh peue nyang ka jipeusampoe lé aneuëk-aneuëk geuhnyan. 27 Teuma óh ka lheueh jicalitra banmandum peue-peue nyang ka geupeugah lé Nabi Yusuf ubak ayah geuh nyan, dan watée geukalon geuritan nyang geukirém lé Nabi Yusuf keu teujaktueng gobnyan dan teuba gobnyan u nanggroe Meusé, barô kheueh sada gobnyan nibak teumanueng nyan. 28 "Aneuëk ulôn Nabi Yusuf mantong udeb!" kheun gobnyan. "Dan nyan kheueh nyang ulôn lakée! Ulôn harôh lônjak dan lôn teumeungieng jihnyan sigohlom ulôn maté."

Keujadian 46

1 Nabi Yakub laju geupeukeumah banmandum atra milék gobnyan dan laju geubeurangkat. Óh trok u Bersyeba laju geupeuseumah keureubeuen ubak Po teu Allah nyang geupujoe lé Nabi Ishaq ayah gobnyan. 2 Lam keumalon gobnyan nyang deuh teukalon bak simalam, Po teu Allah meufeureuman ubak gobnyan, "Yakub, Yakub!" "Nyoepat lôn, TUHAN," jaweueb gobnyan. 3 "Ulôn nyoe Allah, Allah nyang jipujoe lé ayah gata," kheun gobnyan. "Bék teumakot keu gatajak u nanggroe Meusé. Ulôn teuma Lôn peujeuet keuturonan gata bansa nyang rayeuk di nanggroe nyan. 4 Ulôn teuma Lôn peungon gata u nanggroe Meusé dan Ulôn ba keuturonan gata jigisa lom u nanggroe nyoe. Nabi Yusuf teuma na bak binéh gata watée ajai gata ka sampoe." 5 Óh lheuehnyan geubeurangkat kheueh laju Nabi Yakub geutinggai Bersyeba. Aneuëk-aneuëk gobnyan laju jipeuék ayah jih dan peurumoh ngon aneuëk jih ateueh geuritan nyang geukirém lé raja Meusé. 6 Meunan cit awaknyan laju jiba beulatang peulara dan hareuta nyang laén nyang na awaknyan teumé di nanggroe Kanaan, dan jijak kheueh laju u nanggroe Meusé. Nabi Yakub geuba banmandum keuturonan gobnyan, na kheueh 7 banmandum aneuëk cucoe gobnyan nyang agam dan nyang inong. 8 Anggota-anggota keuluwarga Nabi Yakub nyang geuba sajan u nanggroe Meusé na kheueh: 9 Ruben, aneuëk tuha; aneuëk-aneuëk gobnyan: Henokh, Palu, Hezron dan Karmi. 10 Simeon; aneuëk-aneuëk gobnyan na kheueh: Yemuel, Yamin, Ohad, Yakhin, Zohar dan Saul, aneuëk nibak peurumoh gobnyan sidroe ureuëng inong Kanaan. 11 Lewi; aneuëk-aneuëk geuh: Gerson, Kehat dan Merari. 12 Yehuda; aneuëk-aneuëk gobnyan na kheueh: Syela, Peres dan Zerah, seudangkan aneuëk Yehuda nyang laén na kheueh: Er dan Onan nyang meuninggai di nanggroe Kanaan. Aneuëk-aneuëk Peres: Hezron dan Hamul. 13 Isakhar; aneuëk-aneuëk gobnyan na kheueh: Tola, Pua, Ayub dan Simron. 14 Zebulon; aneuëk-aneuëk gobnyan na kheueh: Sered, Elon dan Yahleel. 15 Awaknyan banmandum na kheueh aneuëk-aneuëk nyang geupeulahé lé Lea keu Nabi Yakub di Mesopotamia, seulaén nibak nyan na teuma aneuëk geuh nyang inong nyang nan jih Dina. Jadi banmandum keuturonan Nabi Yakub nibak peurumoh gobnyan Lea jeumeulah jih lhée plôh lhée droe. 16 Gad; aneuëk-aneuëk gobnyan na kheueh: Zifyon, Hagi, Syuni, Ezbon, Eri, Arodi dan Areli. 17 Asyer; aneuëk-aneuëk gobnyan na kheueh: Yimna, Yiswa, Yiswi dan Beria ngon Serah, syedara awaknyan nyang inong. Aneuëk-aneuëk Beria na kheueh Heber dan Malkiel. 18 Ban nam blaih droe awaknyan na kheueh keuturonan Nabi Yakub nibak Zilpa, na kheueh namiet inong nyang geubri lé Laban keu Lea, aneuëk inong gobnyan. 19 Rahel peurumoh Nabi Yakub na geumeu aneuëk dua droe, awaknyan na kheueh Nabi Yusuf dan Benyamin. 20 Di nanggroe Meusé Nabi Yusuf na geumeu aneuëk dua droe, aneuëk-aneuëk geuh nyan na kheueh Manasye dan Efraim nyang geupeulahé lé peurumoh geuh Asnat, binti Potifera, nyang jeuet keu imeum di Heliopolis. 21 Benyamin; aneuëk-aneuëk gobnyan na kheueh: Bela, Bekher, Asybel, Gera, Naaman, Ehi, Ros, Mupim, Hupim dan Ared. 22 Ban peuet blaih droe nyan na kheueh keuturonan Nabi Yakub nibak peurumoh gobnyan Rahel. 23 Óh lheueh nyan Dan; aneuëk gobnyan Husim. 24 Naftali; aneuëk-aneuëk gobnyan na kheueh: Yahzeel, Guni, Yezer dan Syilem. 25 Bantujoh droe nyan na kheueh keuturonan Nabi Yakub nibak Bilha, namiet inong nyang geubri lé Laban ubak Rahel aneuëk gobnyan. 26 Keuturonan Nabi Yakub nyang jak u nanggroe Meusé jeumeulah jih banmandum na nam ploh nam droe, hana jitamong lam itongan nyan meulintée-meulintée gobnyan. 27 Aneuëk-aneuëk Nabi Yusuf nyang lahé di nanggroe Meusé na dua droe, ngon nyan keuluwarga Nabi Yakub nyang trok u Meusé banmandum na tujoh ploh droe. 28 Nabi Yakub geuyue Yehuda mangat geujak leubeh awai nibak gobnyan mangat jeuet jijak hôi Nabi Yusuf mangat jeuet meurumpok ngon ayah geuhnyan di Gosyen. Watée awaknyan trok u Gosyen, 29 Nabi Yusuf geu-ék geuritan droegeuh keu geujak meurumpok ngon ureuëng syiek geuh nibak teumpat nyan. Watée awaknyan ka meurumpok, Nabi Yusuf laju geuwa ayah geuh dan treb lumpah na. 30 Geukheun lé Nabi Yakub ubak Nabi Yusuf, "Jinoenyoe ulôn ka rila maté, sabab ka lheueh lôn ngieng gata dan lôn teupeu bahwa gata mantong udeb." 31 Laju geupeugah lé Nabi Yusuf ubak mandum syedara geuh dan meunan cit ubak kawöm gobnyan nyang laén, "Ulôn harôh lôn jak britée hainyoe ubak raja bahwa syedara-syedara lôn dan banmandum waréh kawöm lôn nyang na tinggai di Kanaan katrok geuteuka, 32 ulôn jak peugah bak geuhnyan bahwa droeneueh na kheueh tukang-tukang meurabe bubiri ngon leumô, dan ka neuba beulatang peulara gata dan banmandum hareuta gata. 33 Meunyoe raja geutawök gata dan geutanyong buet gata, 34 peugah kheueh ubak gobnyan bahwa gatanyoe na kheueh ureuëng peulara beulatang phon yoh ubitkon, saban lagée indatu gata. Deungon lagéenyan gobnyan geuyue tinggai gata nibak daerah Gosyen." Nabi Yusuf geupeugah meunan sabab ureuëng Meusé meurasa hina keujimeurakan ngon tukang-tukang meurabe.

Keujadian 47

1 Óh lheuehnyan Nabi Yusuf laju geuba limong droe syedara gobnyan keu geujak meuhadab raja. Óh trok bak raja laju geupeugah, "Ayah dan syedara-syedara ulôn ka trok keunoe nibak nanggroe Kanaan meunan cit deungon kawan kaméng dan bubiri gobnyan, leumô dan banmandum atra milék gobnyan. Jinoenyoe awaknyan na di daerah Gosyen." Dan óh lheueh nyan syedara-syedara gobnyan nyang geuba meusajan ngon gobnyan nyang limong droe nyan laju geupeuturi ubak raja. 3 Raja laju geutanyong ubak awaknyan, "Peue buet gatanyoe?" Jijaweueb lé awaknyan, "Kamoenyoe tukang meurabe lagée indatu kamoe. 4 Kamoenyoe meuteuka keunoe keuneuk tinggai di nanggroe nyoe, sabab di tanoh Kanaan teungoh teuka musém deuk nyang paleng brat, sampoe ka hana le naleueng keu eumpeuen kaméng ngon bubiri kamoe. Idhin kheueh keukamoe beujeuet kamoe tinggai di daerah Gosyen." 5 Dan geupeugah kheueh lé raja ubak Nabi Yusuf, "Jinoenyoe ayah ngon syedara-syedara droeneueh kana disinoe. 6 Anggab kheueh nanggroe Meusé nyoe sibagoe nanggroe droeneueh keudroe. Bah kheueh awaknyan tinggai teutab di daerah Gosyen, daerah nyang paleng gét lam nanggroe nyoe. Dan droeneueh bri kheueh tugaih ubak ureuëng nyang carông mangat jiurôh beulatang peulara lôn." 7 Meunan cit Nabi Yusuf geupeuturi ayah gobnyan ubak raja. Nabi Yakub laju geubri beureukat ubak raja nyan, 8 dan raja laju geutanyong ubak gobnyan, "Padub na umu Bapak saátnyoe?" 9 Geujaweueb Nabi Yakub, "Ulôn ka udeb lam donya nyoe sireutôh lhée ploh thon sibagoe peungeumbara. Udeb ulôn nyan peunoh ngon nyang susah dan paneuk meunyoe teubandeng ngon umu indatu ulôn sibagoe peungeumbara." 10 Óh lheuehnyan Nabi Yakub laju geulakée droe dan geubri beureukat watée geulakée idhin keuneuk jak nyan. 11 Nabi Yusuf laju geutulông ayah dan syedara-syedara gobnyan tinggai teutab di nanggroe Meusé. Laju geubri ubak awaknyan tanoh sibagoe hak milék bak bagian nyang paleng gét nyang na lam nanggroe nyan, tô ngon banda Rameses, sisuai lagée nyang geupeurintah lé raja. 12 Dan Nabi Yusuf laju geubri beukai peunajoh nyang seb keu ayah gobnyan, syedara-syedara gobnyan, sampoe ubak nyang paleng muda. 13 Musém deuk nyang teuka nyan meutamah hebat, akhéji dipat mantong ka hana le peunajoh. Rakyat nanggroe Meusé dan rakyat nanggroe Kanaan ka habéh leumoh dan hana meudaya sabab ka keunong deuk. 14 Tieb-tieb watée awaknyan jijak bloe gandom, Nabi Yusuf laju geupeusapat péng ngon bloe gandom nyan, dan péng nyang ka geupeusapat nyan geukeubah laju bak meuligoe raja. 15 Óh ka habéh péng lam nanggroe Meusé dan Kanaan, ureuëng-ureuëng Meusé laju jijak ubak Nabi Yusuf sira jipeugah lagée nyoe, "Neubri kheueh keu kamoe peunajoh! Bék neupeubiyeu kamoenyoe maté. Péng kamoe ka habéh." 16 Geujaweueb lé Nabi Yusuf, "Meunyoe péng gata ka habéh, neubri kheueh beulatang peulara gata; mangat lôn bri peunajoh keu gata." 17 Dan awaknyan pih laju jibri beulatang peulara nyan ubak Nabi Yusuf, dan gobnyan laju geubri peunajoh ubak ureuëng nyang ka jibri beulatang peulara nyan sibagoe geunantoe guda, bubiri, kaméng, leumô dan keuleudée awaknyan. Lam thon nyan Nabi Yusuf geubri peunajoh ubak awaknyan dan awaknyan jibayeue ngon peulara jih. 18 Bak thon seulanjut jih awaknyan jijak lom ubak gobnyan sira jipeugah lagée nyoe, "Kamoe trok trang ubak Po bahwa péng kamoe ka habéh dan beulatang peulara kamoe pih ka jeuet keu atra milék Po. Dan bak kamoe ka hana sapeue na le nyang jeuet kamoe bri keu Po, seulaén droe kamoe keudroe dan tanoh kamoe. 19 Bék neupeubiyeu kamoe nyoe maté! Dan bék neupeubiyeu lampôh-lampôh kamoe to. Neubloe kheueh kamoe dan neubloe kheueh blang kamoe dan gandom keu yuem jih. Kamoe dan tanoh kamoe teuma jeuet keu hakmilék raja. Neubri kheueh keu kamoe gandom keukamoe peupanyang udeb kamoe dan bijéh keu teutabu lam ladang kamoe!" 20 Dan Nabi Yusuf laju geubloe banmandum tanoh nyang na di nanggroe Meusé keuraja. Tieb-tieb ureuëng Meusé teupaksa jipeubloe tanoh jih, sabab musém deuk nyang teuka nyan lumpah that brat; dan banmandum tanoh nyang na di nanggroe Meusé ka jeuet keu hakmilék raja. 21 Banmandum rakyat Meusé jipeujeuet keu namiet lé Nabi Yusuf. 22 Tanoh nyang hana geubloe sagai na kheueh tanoh imeum-imeum. Awaknyan hana peureulée jipeubloe tanoh jih sabab geubri tunjangan nyang teutab lé raja keu peubiaya udeb jih. 23 Nabi Yusuf geupeugah ubak rakyat nyan, "Ngieng kheueh, gata dan tanoh gata ka ulôn bloe keu raja. Nyoe kheueh bijéh nyang jeuet gata tabu lam ladang gata. 24 Bak watée gata pot boh gandom nyan singoh, gata harôh tabri siperlimong hase jih nyan ubak raja. Nyang leubeh nyan jeuet gata peuguna keu bijéh dan keugata pajoh dan keu keuluwarga gata." 25 Jaweueb awaknyan, "Po ka neupeuseulamat kamoe dan kamoe lakée teurimong gaséh nyang paleng raya. Kamoe ka rela jeuet keu namiet raja." 26 Óh lheuehnyan lé Nabi Yusuf laju geupeujeuet keu undang-undang hai nyang lagée nyan di nanggroe Meusé, bahwa siperlimong nibak hase tani jeuet keu hakmilék raja. Sampoe uroenyoe undang-undang nyan mantong jipeujak. Dan tanoh imeum-imeum kheueh nyang hana jeuet keu hakmilék raja. 27 Meunan kheueh ureuëng-ureuëng Israel tinggai teutab di nanggroe Meusé, di daerah Gosyen. Awaknyan ka jeuet keukaya dan meu aneuëk cucoe nyang le nibak teumpat nyan. 28 Nabi Yakub mantong na udeb tujoh blaih thon di nanggroe Meusé sampoe umu gobnyan trok sireutôh peuet ploh tujoh thon. 29 Óh trok bak watée gobnyan keuneuk meuninggai donya, laju geuhôi Nabi Yusuf, aneuëk geuh nyan, dan laju geupeugah ubak gobnyan, "Gata peuduek kheueh jaroe gata bak lak pha ulôn dan gata meusumpah kheueh laju bahwa gata hana tapeukubu ulôn lam nanggroe Meusé nyoe. 30 Ulôn kutem jipeukubu nibak teumpat bubena indatu lôn; gata ba kheueh manyét ulôn nibak nanggroe nyoe dan gata kubu kheueh nibak lampôh jrat awaknyan." Geujaweueb lé Nabi Yusuf, "Ulôn teuma lôn peubuet peue nyang Ayah peugah nyan." 31 Geupeugah lé Nabi Yakub, "Meusumpah kheueh bahwa gata tapeubuet lagée nyang ulôn lakée nyan." Nabi Yusuf laju geumeusumpah, dan Nabi Yakub laju geu lakée syukô nibak ateueh teumpat éh gobnyan.

Keujadian 48

1 Na meupadub treb teuma óh lheuehnyan trok haba ubak Nabi Yusuf bahwa ayah gobnyan Nabi Yakub brat that sakét. Ban geudeungoe haba nyan geujak kheueh laju ngon mandua aneuëk geuh Manasye dan Efraim ubak ayah gobnyan Nabi Yakub. 2 Watée geudeungoe lé Nabi Yakub aneuëk gobnyan Nabi Yusuf ka trok geuteuka, laju geupaksadroe geugumpôi bubena teunaga geuh, dan laju geuduek bak teumpat éh. 3 Geupeugah lé Nabi Yakub ubak aneuëk gobnyan Nabi Yusuf, "Po teu Allah Nyang Mahakuasa ka geupeuleumah droe Gobnyan ubak ulôn di Lus, nibak tanoh Kanaan, dan ka geubri beureukat ubak ulôn." 4 Gobnyan meufeureuman ubak ulôn, "Ulôn teuma Lôn bri ubak gata aneuëk cucoe nyang le, mangat keuturonan gata jipeujeuet bansa nyang le; Ulôn teuma Lôn bri nanggroe nyoe ubak keuturonan gata sibagoe atra milék awaknyan keusiumu masa." 5 Geupeugah lom lé Nabi Yakub, "Hei Yusuf, mandua droe aneuëk gata nyan, Manasye ngon Efraim nyang lahé di nanggroe Meusé nyoe sigohlom ulôn trok keunoe, ulôn anggab aneuëk ulôn, saban lagée Ruben dan Simeon. 6 Meunyoe gata na meuteumé aneuëk nyang laén, awaknyan hana ulôn anggab sibagoe aneuëk lôn teuma jihnyan teutab aneuëk gata; waresan keu awaknyan jiteurimong nibak Efraim dan Manasye. 7 Ulôn peubuet nyan na kheueh keu ma gata Rahel. Watée ulôn woe lom nibak Mesopotamia, ma gata meuninggai di tanoh Kanaan, hana padubna jiôh nibak Efrata, dan até ulôn hanco lumpah na. Laju ulôn kubu ma gata nyan disinan, bak binéh rot jak u Efrata." (Jinoenyoe Efrata nyan meugantoe nan ngon Betlehem.) 8 Watée Nabi Yakub geungieng ateueh aneuëk-aneuëk Nabi Yusuf nyan, laju geutanyong, "Soe aneuëk miet nyoe?" 9 Geujaweueb lé Nabi Yusuf, "Nyoe kheueh aneuëk-aneuëk ulôn nyang ka geubri lé Po teu Allah keu ulôn di nanggroe Meusé nyoe." Laju geupeugah lé Nabi Yakub, "Peurab kheueh awaknyan ubak ulôn mangat ulôn bri beureukat." 10 Nabi Yakub hana hase geukeumalon ngon trang sabab gobnyan ka tuha dan mata gobnyan ka sapu. Nabi Yusuf laju geupeurab mandua aneuëk geuhnyan ubak Nabi Yakub, dan gobnyan laju geuwa sira geucöm awaknyan. 11 Dan geupeugah kheueh lé Nabi Yakub ubak Nabi Yusuf, "Sagai-sagai hana lôn sangka ulôn hase meurumpok lom ngon gata, teuma jinoenyoe Po teu Allah ka geubri idhin ubak ulôn keu jeuet ulôn ngieng aneuëk-aneuëk gata." 12 Óh lheuehnyan Nabi Yusuf laju geucok aneuëk-aneuëk geuhnyan lam pangkée Nabi Yakub, dan óh lheuehnyan gobnyan keudroe laju geusujut ukeu ayah gobnyan. 13 Óh lheueh nyan Nabi Yusuf laju geupeuduek mandua aneuëk geuhnyan bak binéh Nabi Yakub, Efraim nyang tulot nyan blaih wie dan Manasye nyang tuha nyan blaih uneuen Nabi Yakub. Teuma Nabi Yakub laju geupeusilang jaroe gobnyan geupeuduek jaroe uneuen geuh ateueh ulée Efraim dan jaroe wie geuh ateueh ulée Manasye. 15 Óh lheuehnyan laju geubri beureukat ubak Nabi Yusuf sira geupeugah lagée nyoe, "Allah, Gobnyan kheueh TUHAN, nyang geupujoe lé Nabi Ibrahim ngon Nabi Ishaq, Gobnyan kheueh nyang pimpén ulôn sampoe saát nyoe; 16 Gobnyan kheueh malaikat nyang ka geupeulheueh ulôn nibak mandum bahaya. Seumoga Allah nyan geubri beureukat ubak aneuëk-aneuëk nyoe. Seumoga nan ulôn teutab udeb nan Nabi Ibrahim dan nan Nabi Ishaq, ngon sabab aneuëk-aneuëk nyoe! Seumoga awaknyan meu aneuëk cucoe nyang le, dan keuturonan jih jai that ateueh rhueng bumoe." 17 Nabi Yusuf hana galak watée geungieng jaroe ayah gobnyan geukeubah ateueh ulée Efraim; laju geumat jaroe ayah geuhnyan keugeupinah nibak ulée Efraim u ateueh ulée Manasye. 18 Laju geupeugah ubak ayah gobnyan, "Bék lagée nyan Ayah. Nyoe kheueh aneuëk nyang tuha; neukeubah kheueh jaroe uneuen Ayah ateueh ulée jih." 19 Teuma ayah gobnyan geutulak, kheun gobnyan, "Ulôn kuteupeue, hei aneuëk lôn, ulôn kuteupeue. Manasye teuma rayeuk kuasa jih dan keuturonan jih teuma jeuet keu bansa nyang rayeuk. Teuma adoe jihnyoe leubeh rayeuk keukuasaan jih nyan nibak aduen jih nyoe, dan keuturonan adoe jihnyoe teuma jeuet keu bansa-bansa nyang rayeuk." 20 Laju geubri beureukat lom aneuëk-aneuëk nyan nibak uroenyan sira geukheun lagée nyoe, "Ureuëng Israel teuma jiteuoh nan gata watée awaknyan jibri beureukat keu gob. Awaknyan teuma jipeugah, 'Seumoga Po teu Allah geupeujeuet gata lagée Efraim dan Manasye.' " Deungon nyan, Nabi Yakub ka geupeuawai Efraim nibak Manasye. 21 Dan geupeugah kheueh lé Nabi Yakub ubak Nabi Yusuf, "Lagée nyang gata kalon keudroe, ajai ulôn ka tô that, teuma Po teu Allah geutulông gata dan geupeuwoe gata ubak tanoh indatu gata. 22 Ubak gata kheueh, dan bukon ubak syedara-syedara gata, ulôn jok Sikhem, daerah subô nyan nyang ka lôn reubot nibak ureuëng Amori deungon peudeung dan panah ulôn."

Keujadian 49

1 Óh lheuehnyan Nabi Yakub laju geutawök banmandum aneuëk-aneuëk geuh watée awaknyan ka meusapat keunan laju geupeugah lagée nyoe, "Meusapat kheueh gata mandum disinoe, bak binéh ulôn. Jinoe ulôn peugah ubak gata peue nyang teuma gata rasa bak saboh watée singoh: 2 Meusapat kheueh hei aneuëk-aneuëk Nabi Yakub, deungoe kheueh Israel, ayah gata. 3 Ruben aneuëk lôn nyang tuha, gata kheueh teunaga ulôn, boh keuphon nyang peujeuet ulôn peukasa. Gata nyang gagah dan nyang teuga lamkawan mandum aneuëk ulôn. 4 Gata bagaih meuguncang saban lagée ié, sampoe bukon nyang paleng phon; sabab gata éh ngon gundek ulôn, gata peukuto teumpat éh ayah gata. 5 Simeon dan Lewi nyang meusyedara; sinjata awaknyan alat keukerasan. 6 Ulôn hana rôh sajan bak buet meurok pakat awaknyan, meunan cit hana rôh sajan lamkawan awaknyan. Sabab awaknyan jiseumeupoh maté lam watée beungéh, jipeuhanco kuta deumi keumangat droe. 7 Teukutok kheueh ubak beungéh awaknyan, kareuna dahsyat jih. Teukutok kheueh ubak keujam awaknyan, sabab keujam jih nyang luwa biasa. Ulôn teuma lôn peu crebre awaknyan bansaboh nanggroe Israel. Ulôn teuma lôn peuhambo awaknyan lamkawan meubagoe bansa. 8 Yehuda, gata teuma tateugom takue musoh gata; bubena syedara gata teuma jipujoe gata dan jisujut dikeue gata. 9 Yehuda lagée singa muda; jihnyan jipoh maté musoh jih, laju jiwoe lam eumpueng jih; jihnyan teubot laju teuéh, dan hana meusidroe pi nyang jijeuet peukaru jihnyan. 10 Yehuda teuma geumat tungkat keurajeuen, keuturonan gobnyan geumat peurintah siumu masa. Bansa-bansa jibayeue upeti, dan sujut ngon taklok dikeue gobnyan. 11 Aneuëk keuleudée gobnyan ji-ikat nibak kayée, bak anggô nyang paleng gét. Gobnyan geurhah peukayan gobnyan ngon anggô, anggô mirah lagée darah. 12 Mirah mata geuh sabab geujieb ié anggô, putéh gigoe geuh sabab geujieb ié susu. 13 Zebulon teuma tinggai bak binéh laôt; kapai-kapai laju meusaôh bak panté geuhnyan; trok u Sidon bataih wilayah geuhnyan. 14 Isakhar nyan na lagée keuleudée teuga nyang teu-éh lamkawan raga barang jih. 15 Jikalon padubna gét jih teumpat nyan dan padub na ceudah jih nanggroe nyan, dan jitukui kheueh jihnyan dan rila droe jih teupeudieng beuban, dan jipaksa mubuet sibagoe namiet. 16 Gata Dan, teuma gata peusidang bansa gata, gata jeuet keusukée saban lagée sukée laén di Israel. 17 Gata lagée uleue bakbinéh rot ueh, uleue beubisa bak binéh jurong, nyang jikab bak tumet guda sampoe teugeutieb ureuëng ateueh guda nyan. 18 Ya TUHAN, seulamat nyang Droeneueh bri nyan, nyan kheueh nyang ulôn preh-preh, 19 Gata Gad, gata teuma jiheuntam lé peurampok, teuma gata tagisa jak rampok awaknyan. 20 Gata Asyer, peunajoh gata meulimpah ngon meuwáh, gata teuma takeubah peunajoh keuraja-raja. 21 Gata Naftali, gata lagée rusa nyang lheueh, lumpah that ceudah bubena aneuëk-aneuëk gata. 22 Nabi Yusuf lagée keuleudée muda, keuleudée kleuet nyang rab ngon mata ié, jiplueng-plueng bak gaki gunong. 23 Musoh jiseurang deungon hebat that, jipeucrok gobnyan ngon ali-ali dan aneuk panah. 24 Teuma Nabi Yusuf teutab teuga kukoh jaroe gobnyan, teutab teuga aneuk panah gobnyan, sabab kuasa Tukang Rabe Nyang Maha Teuga, Po teu Allah Nabi Yakub, Nyang Lindong Israel. 25 Allah ayah gata geutulông gata; Nyang Mahakuasa geubri beureukat keu gata deungon ujeuen jitreun di langét dan ié dimiyueb tanoh. Deungon aneuëk dan leumô, 26 gandom dan bungöng. Beureukat Allah bapa gata leubeh jai nibak kaya gunong-gunong nyang leubeh tuha. Seumoga jitreun kheueh banmandum beureukat nyan u ateueh ulée Nabi Yusuf, u ateueh keunéng gobnyan. Jihnyan kheueh nyang paleng istimewa lamkawan syedara-syedara jihnyan. 27 Benyamin na kheueh srigala nyang juwah. Watée beungoh uroe laju jiteugom mangsa. Óh watée malam laju jibagi-bagi atra nyang jiteugom nyan." 28 Nyan kheueh ban dua blah sukée Israel, dan tutoe haba nyang geupeugah lé ayah awaknyan watée geubri saleuem seulamat meupisah ubak awaknyan maséng-maséng. 29 Óh lheuehnyan Nabi Yakub geupeugah ubak aneuëk-aneuëk gobnyan, "Sikeujab teuk ulôn teuma meuninggai lagée mandum indatu lôn. Kubu kheueh ulôn bak binéh awaknyan lam guha di Makhpela, siblaih u timu Mamre nibak tanoh Kanaan, Nabi Ibrahim ka geubloe guha ngon ladang nyang na nibak teumpat nyan bak Efron ureuëng Het keugeupeujeuet keu lampôh jrat. 31 Nibak teumpat nyan teukubu Nabi Ibrahim ngon Sara, Nabi Ishaq ngon Ribka; dan nibak teumpat nyan cit teuma ulôn peukubu Lea. 32 Ladang ngon guha nyang na nibak teumpat nyan ka geubloe nibak ureuëng Het. Kubu kheueh ulôn nibak teumpat nyan." 33 Óh ka lheueh Nabi Yakub geupeusan banmandum nyan ubak aneuëk-aneuëk gobnyan, laju geu-éh dan meuninggai kheueh gobnyan.

Keujadian 50

1 Nabi Yusuf laju geupeureubah droe ateueh ayah geuh sira geumo ngon geucöm muka ureuëng syiek geuh nyan. 2 Dan Nabi Yusuf laju geupeurintah ubak tukang peuawet manyét mangat jijakcang laju reumpah-reumpah keungon peuawet manyét Nabi Yakub nyan. 3 Buet peuawet manyét nyan jipajoh watée peuet ploh uroe, na kheueh watée nyang lazem jih teupeuguna keu teuboh reumpah ateueh manyét. Ureuëng nanggroe Meusé laju meukabông ateueh meuninggai Nabi Yakub nyan, tujoh ploh uroe treb jih. 4 Óh ka seuleusoe masa meukabông nyan, geupeugah kheueh lé Nabi Yusuf ubak peugawée-peugawée raja, "Jak peusampoe laju peue nyang ulôn peugah nyoe ubak raja, 5 'Watée ayah ulôn kato that ajai gobnyan, geuyue ubak ulôn mangat lôn meujanji ubak gobnyan, bahwa ulôn teuma lôn kubu gobnyan lam kubu nyang ka geupeusiab di tanoh Kanaan. Sabab nyan, neupeu idhin kheueh ulôn jak keudeh keulôn peukubu ayah ulôn. Óh lheuehnyan lôn gisa teuma.' " 6 Dan geupeugah kheueh lé raja, "Jak kheueh kubu ayah gata lagée nyang ka gata meujanji ubak gobnyan." 7 Dan geujak kheueh Nabi Yusuf keugeujak kubu ayah gobnyan. Banmandum peugawée raja, banmandum ureuëng-ureuëng patot nyang na lam meuligoe dan ureuëng-ureuëng rayeuk nyang na lam nanggroe Meusé, geujak meusajan-sajan ngon Nabi Yusuf. 8 Keuluwarga gobnyan, banmandum syedara gobnyan, dan kawöm syedara gobnyan, banmandum geujak sajan. Nyang tinggai aneuëk-aneuëk miet dan beulatang peulara di daerah Gosyen. 9 Meunan cit deungon pasokan nyang ek geuritan ngon nyang meuguda jijak cit, sampoe iréng-iréngan nyan panyang lumpah na. 10 Watée awaknyan ka trok ubak teumpat ureuëng nyang koh dan jipéh boh gandom di Goren-Haatad, siblaih utimu Krueng Yordan, awaknyan laju jikliek ngon jimeumo meuba-e deungon seudeh dan su nyang meutaga. Nabi Yusuf laju geupeuna acara meukabông, tujoh uroe treb jih. 11 Watée peunduduek Kanaan jingieng na ureuëng meukabông di daerah Goren-Haatad nyan, jipeugah kheueh lé awaknyan, "Lumpah that seudeh upacara meukabông ureuëng Meusé nyan!" Nyang kheueh sabab jih teumpat nyan jiboh nan Abel-Mizraim. 12 Meunan kheueh cara jih aneuëk-aneuëk Nabi Yakub geupeubuet peue nyang ka geupeusan lé Nabi Yakub ayah gobnyan ubak awaknyan. 13 Awaknyan laju jiba manyét ayah geuhnyan u nanggroe Kanaan dan laju geupeukubu lam guha Makhpela, siblaih utimu Mamre, nibak ladang nyang ka geubloe lé Nabi Ibrahim nibak Efron ureuëng Het nyan, keu geupeujeuet keuteumpat teupeukubu ureuëng meuninggai. 14 Óh ka seuleusoe geupeukubu lé Nabi Yusuf ureuëng syiek geuhnyan, laju geugisa lom u nanggroe Meusé meusajan-sajan ngon banmandum syedara gobnyan dan banmandum ureuëng nyang na seutôt gobnyan keu teujak peukubu ayah gobnyan. 15 Óh ka lheueh meuninggai ayah awaknyan, aduen-aduen Nabi Yusuf laju geupeugah, "Pakriban meunyoe Nabi Yusuf jibalaih dam ateueh geutanyoe sabab jihnyan ka tanyoe iénanya yoh masa dilée?" 16 Sabab nyan awaknyan laju jikirém peusan nyang lagée nyoe ubak Nabi Yusuf, "Sigohlom ayah tanyoe meuninggai donya, 17 gobnyan geuyue ubak kamoe mangat kamoe peugah ubak droeneueh lagée nyoe, 'Peuamphon kheueh buet-buet nyang salah nyang yoh masa ilée jipeubuet lé aduen-aduen gata ateueh gata.' Jadi, sibagoe hamba-hamba Allah nyang geupujoe lé ureuëng syiek geutanyoe, kamoe lakée, peuamphon kheueh buet-buet kamoe nyang salah." Nabi Yusuf laju geumo watée geuteurimong peusan nyan. 18 Dan lé syedara-syedara geuhnyan keudroe jijak ubak gobnyan dan laju jisujut dikeue gobnyan sira jipeugah, "Kamoenyoe namiet droeneueh." 19 Teuma Nabi Yusuf geupeugah ubak mandum polem geuh nyan, "Bék teumakot; sabab ulôn hana jeuet lôn meutindak sibagoe Po teu Allah. 20 Droeneueh ka meusipakat keu droeneueh peubuet jeuhet ateueh ulôn, teuma lé Po teu Allah geu-ubah buet nyang jeuhet nyan jeuet nyang keu jroh, mangat jeuet na lagée nyang teujadi yoh masa dilée ramé ureuëng nyang udeb bak saát nyoe hase teupeuseulamat. 21 Bék yo teu, ulôn teuma lôn peuseb peue-peue nyang droeneueh peureulée dan meunan cit peue-peue nyang jipeureulée lé aneuëk-aneuëk awaknyoe." Meunan kheueh cara jih gobnyan geupeuleupie até banmandum polem geuh ngon tutoe haba nyang leumoh leumbot, sampoe awaknyan banmandum teuharu. 22 Nabi Yusuf teutab di nanggroe Meusé ngon waréh kawöm geuh; gobnyan udeb sampoe meu-umu sireutôh siploh thon. 23 Gobnyan mantong hase geukalon aneuëk cucoe Efraim. Gobnyan pih na meuteumé geu-useuha aneuëk-aneuëk Makhir, na kheueh cucoe Manasye, sibagoe aneuëk geuh keudroe. 24 Laju geupeugah ubak banmandum syedara geuh, "Ajai ulôn kato that, teuma Po teu Allah pasti geupeulara gata dan geupimpén gata mangat tateubiet nibak nanggroe nyoe, u nanggroe nyang ka geupeujanji ngon sumpah ubak Nabi Ibrahim, Nabi Ishaq dan Nabi Yakub." 25 Dan Nabi Yusuf laju geuyue ubak mandum kawöm syedara geuh mangat jimusumpah, kheun gobnyan, "Meujanji kheueh ubak ulôn, bahwa meunyoe Po teu Allah ka geupimpén gatanyoe u nanggroe nyan, gata teuma taba sajan manyét ulôn." 26 Óh lheueh geukheun nyan Nabi Yusuf laju meuninggai donya di nanggroe Meusé watée ka meu-umu sireutôh siploh thon. Awaknyan laju jipeuawet manyét gobnyan ngon reumpah-reumpah laju jikeubah lam peuto maté.

Keuluaran 1

1 Nabi Yakub nyang teuhôi nan Israel, geujak u nanggroe Meusé ngon aneuëk-aneuëk gobnyan dan keuluwarga awaknyan maséng-maséng. Aneuëk-aneuëk Nabi Yakub nyan na kheueh lagée nyang teupeugah di miyueb nyoe: 2 Ruben Simeon Lewi Yehuda 3 Isakhar Zebulon Benyamin 4 Dan Naftali Gad Asyer. 5 Keuturonan Nabi Yakub nyan jeumeulah jih na tujoh ploh droe. Nabi Yusuf ka leubeh awai na di nanggroe Meusé. 6 Na padub watée teuma óh lheuehnyan Nabi Yusuf dan syedara-syedara gobnyan meuninggai donya, meunan cit deungon ureuëng-ureuëng nyang saboh angkatan ngon gobnyan. 7 Teuma keuturonan awaknyan, na kheueh ureuëng-ureuëng Israel, ka meuaneuëk cucoe nyang lumpah le, dan jeumeulah awaknyan laju meutamah-tamah bagaih lagoena, sampoe nanggroe Meusé ka peunoh ngon awaknyan. 8 Óh lheuehnyan na sidroe raja barô nyang hana jituri ubak Nabi Yusuf ka jipeuphon mat peurintah di nanggroe Meusé. 9 Raja nyan jipeugah ubak rakyat jih, "Ureuëng-ureuëng Israel nyan paleng mubahya bak geutanyoe, sabab awaknyan ka ramé that dan leubeh teuga nibak geutanyoe. 10 Meunyoe beureutoh prang, na keumungkenan awaknyan jimeusikutu ngon musoh keu jilawan geutanyoe, óh lheueh nyan laju jiplueng jitinggai nanggroe nyoe. Geutanyoe banmandum harôh tamita jalan mangat awaknyan bék meutamah jai le." 11 Ngon sabab nyan di ureuëng-ureuëng Meusé laju jiangkat ureuëng-ureuëng nyang kawai ateueh ureuëng-ureuëng Israel keu jipeususah udeb jih ngon cara jibri keureuja paksa. Ubak awaknyan jipaksa mangat jipeudong keu raja Meusé banda-banda Pitom dan Raamses sibagoe pusat teumpat teukeubah barang. 12 Teuma dilikot nibak nyan, awaknyan meutamah jipeusulet ngon jihina, teuma ureuëng-ureuëng Israel nyan pi meutamah-tamah jai, dan di ureuëng-ureuëng Israel nyan maken meutabu bansaboh nanggroe, sampoe bubena ureuëng Meusé meutamah-tamah teumakot ubak awaknyan. 13 Dan di ureuëng-ureuëng Meusé pi deungon keujam laju jiseksa bubena ureuëng Israel nyan, 14 laju jipeususah udeb ureuëng-ureuëng Israel sampoe ureuëng-ureuëng Israel habéh seungsara. Hana rasa gaséh sayang awaknyan laju jipaksa meubuet bak proyek-proyek bangunan dan di ladang-ladang ngon di blang awaknyan. 15 Óh lheueh nyan raja Meusé laju jibri peurintah ubak Sifra dan Pua, dua droe ma bidan nyang tulông ureuëng-ureuëng inong Ibrani peulahé aneuëk. 16 Jipeugah lé raja Meusé nyan, "Watée gatanyoe tatulông inong Ibrani nyan jipeulahé aneuëk, ingat kheueh lagée ulôn peugah nyoe: Meunyoe aneuëk nyang lahé nyan agam, gata poh maté laju aneuëk nyan! Dan meunyoe nyang lahé nyan inong, bah kheueh aneuëk nyan udeb." 17 Teuma rupari mandua droe ma bidan nyan ureuëng nyang teumakot that ubak Allah. Awaknyan hana jitem seutôt peurintah raja dan jipeubiyeu mantong tieb-tieb aneuëk agam nyang lahé nyan udeb. 18 Dan lé raja laju jitawök bandua droe ma bidan nyan dan jitanyong, "Pakon gata peubiyeu aneuëk agam nyang lahé nyan udeb?" 19 Jaweueb awaknyan, "Ureuëng inong Ibrani hana saban lagée ureuëng inong Meusé. Awaknyan mudah that jipeulahé aneuëk. Sigohlom bidan trok keunan, aneuëk jihnyan ka lahé." 20 Dan Po teu Allah geubri beureukat ubak bidan-bidan nyan dan laju geubri keuturonan ubak awaknyan, sabab awaknyan jihoreumat Po teu Allah. Dan di ureuëng Israel pih meutamah le dan teuga-teuga. 22 Dan raja laju jibri peurintah nyang lagée nyoe ubak rakyat Meusé, "Tieb-tieb aneuëk agam nyang lahé nibak ureuëng inong Ibrani harôh jitiek lam Krueng Nil, dan banmandum aneuëk inong nyang lahé jeuet teupeubiyeu aneuëk nyan udeb."

Keuluaran 2

1 Bak watée nyan na sidroe ureuëng agam nibak sukée Lewi, jimeukawen ngon ureuëng inong lam sukée jih keudroe. 2 Dan laju ureuëng inong nyan jipeulahé sidroe aneuëk agam. Watée jikalon bahwa aneuëk agam nyang ban lahé nyan lagak lumpah na, aneuëk agam nyan laju jisöm nyang treb jih na lhée buleuen. 3 Rupari aneuëk manyak nyan hana mungken jisöm leubeh treb. Teuma lé ma aneuëk nyan laju jicok saboh raga nyang teupeugét nibak naleueng geulagah, laju jilapék ngon ter mangat bék jitamong ié. Aneuëk manyak nyan laju jikeubah lam raga nyan, dan laju jiba u Krueng Nil dan laju jipeuduek bak teungoh-teungoh naleueng geulagah bak binéh krueng nyan. 4 Poda aneuëk manyak nyan jidong jiôh bacut nibak teumpat adoe jih teukeubah nyan sira jikalon peue nyang teuma teujadi ateueh adoe jih nyan. 5 Watée nyan teuka kheueh putroe raja. Putroe nyan jitreun u krueng keuneuk jak manoe, seudangkan deundayang putroe nyan jijak-jak bak binéh krueng. Ngon hana jisangka-sangka putroe raja nyang teungoh manoe nyan laju jingieng saboh raga di teungoh-teungoh krueng lam naleueng geulagah, dan laju jiyue ubak sidroe namiet inong mangat jijakcok raga nyan. 6 Watée jipeuhah lé putroe raja babah raga nyan, deuh laju jikalon na aneuëk manyak lam raga nyan, dan aneuëk manyak nyan teungoh jimo. Putroe nyan teuka rasa weueh ubak aneuëk nyan sira geupeugah lagée nyoe, "Nyoe pasti aneuëk ureuëng Ibrani." 7 Dan lé poda aneuëk manyak nyan laju jipeugah ubak putroe, "Peu kheueh Po cut Putroe neutem ulôn mita sidroe ma ureuëng Ibrani keu jipeumom aneuëk manyak nyan?" 8 "Gét that," jaweueb putroe raja. Dan jijak kheueh laju aneuëk dara nyan jijak tawök ma jih keudroe. 9 Geupeugah lé putroe raja ubak ma nyan, "Neuba kheueh aneuëk manyak nyoe, dan gata peumom kheueh jihnyan keu ulôn; singoh keu droeneueh hai ma ulôn jok upak." Dan laju jiba aneuëk manyak nyan sira jibri mom keu aneuëk nyan. 10 Watée aneuëk manyak nyan ka meutamah rayeuk, ma aneuëk nyan laju geujok aneuëk nyan ubak putroe raja. Dan lé putroe raja laju jicok aneuëk manyak nyan sibagoe aneuëk angkat jih. "Aneuëk nyoe ulôn boh nan Musa, sabab aneuëk nyoe ulôn cok lam ié," kheun putroe nyan. 11 Watée Nabi Musa ka meutamah rayeuk, laju geujak mita ureuëng-ureuëng nyang saboh bansa ngon gobnyan. Gobnyan geukalon pakriban bansa gobnyan jiseksa ngon jiyue meubuet nyang brat-brat. Dan na geukalon ureuëng Meusé jipoh maté sidroe ureuëng Ibrani. 12 Nabi Musa laju geukalon bansikeulileng geuh, dan watée geukalon hana ureuëng nyang ngieng ateueh gobnyan, laju geupoh maté ureuëng Meusé nyan dan manyét ureuëng nyan laju geusöm sira geuseubée lam anoe. 13 Óh singoh beungoh Nabi Musa geujak lom, deuh laju geukalon dua droe ureuëng Ibrani teungoh jimeulo meugasui-gasui. "Pakon gata poh rakan gata?" geutanyong lé Nabi Musa ubak ureuëng nyang meusalah nyan. 14 Jaweueb ureuëng nyan, "Soe nyang peujeuet droeneueh jeuet keupeumimpén dan hakém kamoe? Peu kheueh droeneueh keuneuk poh maté ulôn, lagée ureuëng Meusé nyang ka droeneueh poh maté nyan?" Dan laju Nabi Musa jiteuka teumakot sira geuseumike, "Cilaka ulôn! Buet ulôn ka jiteupeue." 15 Watée jideungoe lé raja keujadian nyan, laju jimita akai keu jikeuneuk peumaté Nabi Musa. Teuma Nabi Musa geuteupeue laju geuplueng dan tinggai di nanggroe Midian. Imeum nanggroe Midian, nyang nan geuh Yitro, na tujoh droe aneuëk geuh nyang inong. Bak siuroe, watée Nabi Musa teungoh geuduek bakbinéh saboh mon, teuka kheueh keunan bantujoh droe aneuëk dara Yitro keuneukjak cröng ié dan jipasoe teumpat jieb ié kawan kaméng dan bubiri ayah awaknyan. 17 Teuma lé ureuëng-ureuëng meurabe nyang laén laju jiuse aneuëk-aneuëk dara nyan. Dan Nabi Musa laju geutulông awaknyan dan geubri laju jijieb ié kawan kaméng ngon bubiri awaknyan. 18 Watée awaknyan jiwoe u rumoh, ayah awaknyan laju geutanyong, "Pakon bak uroenyoe gatanyoe bagaih that tawoe?" 19 Jaweueb awaknyan, "Na sidroe ureuëng Meusé jitulông kamoe nibak jipeukaru lé ureuëng-ureuëng meurabe nyang laén. Gobnyan kheueh nyang cröng ié keukamoe, dan geupeujieb ié ubak beulatang peulara tanyoe." 20 "Pat ureuëng nyan jinoe?" geutanyong lé Yitro ubak aneuëk-aneuëk gobnyan. "Pakon gatanyoe tatinggai ureuëng nyan? Jak kheueh hôi ureuëng nyan mangat jimakheun meusajan ngon geutanyoe." 21 Nabi Musa geutem tinggai disinan. Óh lheuehnyan Yitro laju geupeukawen aneuëk gobnyan nyang nan jih Zipora ngon Nabi Musa. 22 Zipora laju geupeulahé sidroe aneuëk agam. Aneuëk nyan geuboh nan Gersom, sabab Nabi Musa geupike lagée nyoe, "Ulôn sidroe ureuëng aséng nibak teumpat nyoe." 23 Meuthon-thon teuma óh lheuehnyan raja nanggroe Meusé laju meuninggai donya. Teuma bansa Israel teutab apoh apah sabab awaknyan jicok keunamiet, akhé jih awaknyan laju jikliek jilakée tulông. Kliek ngon dumpék awaknyan trok ubak Po teu Allah. 24 Po teu Allah geudeungoe awaknyan, dan Gobnyan laju geuingat ubak janji Gobnyan ngon Nabi Ibrahim, Nabi Ishaq dan Nabi Yakub. 25 Gobnyan geukalon ureuëng-ureuëng Israel jipeubudak, dan laju geucok peunutôh bahwa ureuëng-ureuëng Israel nyan harôh geutulông.

Keuluaran 3

1 Bak masanyan Nabi Musa teungoh geurabe bubiri-bubiri ngon kaméng-kaméng Yitro, atra yah tuwan gobnyan, nyang jeuet keu imeum di tanoh Midian. Watée gobnyan teungoh geuparôh beulatang nyang geurabe nyan u meurandeh padang guron, trok kheueh laju gobnyan u Gunong Sinai, gunong nyang suci. 2 Bak teumpat nyan malaikat TUHAN laju geupeuleumah droe ubak Nabi Musa lam apui hu nyang jiteubiet di teungoh-teungoh uteun. Nabi Musa geukalon uteun nyan hu, teuma hana tutong. 3 "Luwa biasa," pike gobnyan. "Uteun nyan hana tutong! Meunyoe meunan bah kheueh ulôn ngieng leubeh rab lom." 4 TUHAN geukalon Nabi Musa geupeurab ubak uteun nyang hu nyan, dan gobnyan laju geutawök nibak teungoh-teungoh uteun nyan, "Musa! Musa!" "Ulôn na disinoe," jaweueb Nabi Musa. 5 Laju Po teu Allah meufeureuman, "Bék to keunoe. Suét seulob bak gaki gata nyan, sabab tanoh nyang gata giloe nyan na kheueh tanoh suci. 6 Ulôn nyoe Allah indatu gata, Allah Nabi Ibrahim, Allah Nabi Ishaq dan Allah Nabi Yakub." Dan Nabi Musa laju geutob muka gobnyan, sabab gobnyan teumakot geupandang Po teu Allah. 7 Dan laju TUHAN meufeureuman, "Ulôn ka Ulôn ngieng seungsara nyang jirasa lé umat Ulôn di nanggroe Meusé, dan ka Ulôn deungoe awaknyan jikliek-kliek jilakée mangat bubagaih teupeubeubaih nibak ureuëng-ureuëng nyang seksa awaknyan. Sikeubiet jih, Ulôn kuteupeue banmandum keuseungsaraan awaknyan. 8 Sababnyan kheueh Ulôn treun keu Lôn jak peubeubaih awaknyan nibak jaroe ureuëng Meusé dan Ulôn ba awaknyan mangat jiteubiet nibak nanggroe nyan jituju ubak saboh nanggroe nyang luwah. Tanoh jih kaya ngon subô, dan jinoenyoe jiduek lé bansa Kanaan, bansa Het, Amori, Feris, Hewi dan Yebus. 9 Jimo ngon jimeuba-e bansa Israel ka Ulôn deungoe, dan Ulôn kalheueh cit Ulôn ngieng pakriban awaknyan jiseksa ngon jiteugom lé bansa Meusé. 10 Jinoenyoe gata Ulôn utus keu gata jak meuhadab ubak raja Meusé mangat gata hase gata peuteubiet bansa Ulôn nibak nanggroe nyan." 11 Teuma Nabi Musa geupeugah ubak Po teu Allah, "Soe ulôn nyoe, sampoe hase ulôn jak meuhadab raja dan ulôn ba ureuëng Israel jiteubiet nibak nanggroe Meusé?" 12 Feureuman Allah, "Ulôn teuma Lôn tulông gata. Dan meunyoe bansa nyan ka gataba dan gata peuteubiet nibak nanggroe Meusé, gata teuma meuiébadat ubak Ulôn bak gunong nyoe. Nyan kheueh bukeuti jih bahwa Ulôn kutulông gata." 13 Geujaweueb lom lé Nabi Musa, "Teuma meunyoe ulôn meurumpok ngon ureuëng-ureuëng Israel dan ulôn peugah ubak awaknyan: 'Allah indatu gata ka geu-utus ulôn ubak gata,' awaknyan pasti jitanyong, 'Soe nan gobnyan?' Dan peue nyang harôh ulôn jaweueb ubak awaknyan?" 14 Feureuman Allah, "Ulôn na kheueh ULÔN NA. Nyoe kheueh nyang harôh gata peugah ubak bansa Israel, Gobnyan nyang teupeugah ULÔN NA, ka geu-utus Ulôn ubak gata. 15 Peusampoe cit teuma ubak awaknyan bahwa Ulôn, TUHAN Allah indatu awaknyan, Allah Nabi Ibrahim, Allah Nabi Ishaq, dan Allah Nabi Yakub, geu-utus gata ubak awaknyan. Ulôn kheueh TUHAN, nyan kheueh nan Ulôn keusiumu masa. Nyan kheueh teuhôi keu Ulôn keu banmandum bansa treun meutreun. 16 Jak kheueh dan peusapat kheueh banmandum peumimpén Israel. Peumaklum kheueh ubak awaknyan bahwa Ulôn, TUHAN Allah indatu awaknyan, Allah Nabi Ibrahim, Allah Nabi Ishaq dan Allah Nabi Yakub, ka geupeuleumah droe ubak gata. Peugah kheueh ubak awaknyan bahwa Ulôn ka lheueh Ulôn jak ubak awaknyan dan ka Ulôn ngieng pakriban awaknyan jiseksa lé bansa Meusé. 17 Dan ka Ulôn cok keuputosan keu Ulôn ba awaknyan jiteubiet nibak nanggroe Meusé, teumpat awaknyan jiseksa, dan Ulôn ba awaknyan bak saboh nanggroe nyang kaya ngon subô, nanggroe bansa Kanaan, bansa Het, Amori, Feris, Hewi dan Yebus. 18 Umat Ulôn teuma jideungoe tutoe haba gata. Óh lheuehnyan gata meusajan-sajan ngon peumimpén-peumimpén bansa Israel harôh gata jak meuhadab ubak raja Meusé sira gata peugah ubak raja nyan lagée nyoe, 'TUHAN, Allah ureuëng Ibrani ka teuka geujak peugah droe ubak kamoe. Jinoenyoe neubri kheueh idhin ubak kamoe keukamoe jak nyang jiôh jih lhée uroe meuneujak u padang pasi guna kamoe peuseumah keureubeuen ubak TUHAN, Allah kamoe.' " 19 Óh lheueh nyan Po teu Allah meufeureuman lom, "Ulôn kuteupeue bahwa raja nanggroe Meusé nyan hana jipeubiyeu gata jak, keucuali meunyoe raja nyan teupaksa. 20 Teuma Ulôn kupeuguna keukuasaan Lôn, dan Ulôn huköm Meusé ngon bala dan beuncana nyang brat-brat nyang Ulôn peuteuka keu nanggroe nyan. Óh ka lheuehnyan, barô kheueh jih nyan jibri idhin ubak gata keu gata beurangkat. 21 Ulôn teuma Lôn peujeuet ureuëng nanggroe Meusé nyan jipeumurah até ubak gata, teuma bak watée umat Ulôn jibeurangkat, gata hana tajak ngon jaroe söh. 22 Tieb-tieb ureuëng inong bansa Israel jilakée ubak waréh sileungka ureuëng Meusé dan nibak inong nanggroe Meusé nyang tinggai saboh rumoh, peukayan, meunan cit deungon piasan pirak dan méuh, banmandum nyan teuma gata peungui bak aneuëk-aneuëk gata. Deungon cara lagée nyan gata ka gata reupah ureuëng Meusé."

Keuluaran 4

1 Dan Nabi Musa laju geujaweueb ubak TUHAN, "Teuma pakriban miseuji ureuëng-ureuëng Israel hana jipatéh ubak ulôn dan hana jipakoe peue-peue nyang ulôn peugah? Peue nyang harôh ulôn peugah meunyoe awaknyan jipeugah TUHAN hana geupeuleumah droe ubak ulôn?" 2 Feureuman TUHAN ubak Nabi Musa, "Peue nyan bak jaroe gata?" Jaweueb Nabi Musa, "Tungkat." 3 Feureuman TUHAN, "Cuba gata rhom tungkat nyan ateueh tanoh." Nabi Musa laju geu rhom tungkat bak jaroe geuhnyan ateueh tanoh, dan tungkat nyan laju meu-ubah jeuet keu uleue dan Nabi Musa laju geuplueng sabab geutakot keu uleue nyan. 4 TUHAN meufeureuman ubak Nabi Musa, "Peurab kheueh bak uleue nyan, dan mat kheueh laju bak ikue jih." Nabi Musa laju geupeurab sira geudrob uleue nyan dan watée nyan cit uleue nyan meu-ubah jeuet keu tungkat lom teuma lam jaroe Nabi Musa. 5 Feureuman TUHAN, "Peubuet kheueh lagée nyan mangat ureuëng-ureuëng Israel jipatéh bahwa Ulôn kheueh TUHAN, Allah indatu awaknyan, Allah Nabi Ibrahim, Allah Nabi Ishaq, dan Allah Nabi Yakub, ka Ulôn peuleumah droe ubak gata." 6 TUHAN meufeureuman lom ubak Nabi Musa, "Peutamong kheueh jaroe gata lam bajée gata keudroe." Nabi Musa laju geupeubuet lagée nyang geuyue lé TUHAN nyan, dan watée jaroe geuh nyan geutarek lom uluwa, laju jaroe nyan ka meu-ubah jeuet keu putéh muplak-plak sabab ka keunong peunyakét kulét nyang paleng parah. 7 Dan feureuman TUHAN, "Peutamong kheueh lom jaroe gata nyan lam bajée gata." Nabi Musa laju geupeubuet lagée nyang geuyue lé TUHAN nyan, dan watée jaroe geuhnyan geupeuteubiet, jaroe geuhnyan ka puléh sagée sot teuma. 8 Feureuman TUHAN, "Meunyoe awaknyan hana jitem patéh ubak gata, atawa hana yakén óh lheueh jingieng buet ajaéb nyang phon, dan buet ajaéb nyang nyoe teuma teupeujeuet awaknyan jipatéh. 9 Meunyoe awaknyan teutab cit hana jitem patéh ubak gata bahpi ka jingieng mandua boh buet nyang ajaéb nyoe, dan awaknyan teutab hana jipakoe tutoe haba gata, gatacok kheueh bacut ié Krueng Nil dan ié nyan gata roe kheueh ateueh tanoh. Ié nyan teuma meu-ubah jeuet keu darah." 10 Teuma Nabi Musa geupeugah, "Ya, TUHAN, ulôn bukon ureuëng nyang carông peugah haba, bah kheueh yoh masa ilée meunan cit bak masa jinoe, óh ka lheueh TUHAN neumeututoe ngon ulôn. Lidah ulôn ka brat, lôn meututoe ka meulét dan hana tajam le." 11 TUHAN meufeureuman ubak gobnyan, "Soe nyang bri babah ubak manusia? Soe nyang peujeuet manusia nyan kalu atawa punyueng jih klo? Soe nyang peujeuet manusia nyan teubleuet mata atawa buta? Bukon kheueh Ulôn, TUHAN? 12 Jinoenyoe jak kheueh, Ulôn teuma Lôn tulông gata tapeugah haba dan Lôn peurunoe gata peue nyang harôh gata peugah." 13 Dan Nabi Musa geujaweueb, "Ulôn lakée, bék kheueh ya, TUHAN, neu-utus ulôn, neuyue kheueh ureuëng laén." 14 Dan TUHAN meufeureuman ubak Nabi Musa deungon beungéh, "Bukon kheueh na syedara nyang nan jih Nabi Harun? Ulôn kuteupeue jihnyan carông jipeugah haba. Nyang sibeuna jih, Nabi Harun nyan mantong bak rot euh teungoh jijakkeunoe, dan jihnyan teuma galak that meunyoe ka meurumpok ngon gata. 15 Meututoe kheueh ngon jihnyan dan peugah kheueh ubak jihnyan peue nyang harôh jipeugah. Ulôn teuma Lôn tulông gata bandua dan teuma Lôn peurunoe gata bandua peue nyang harôh gata peugah dan gata peubuet. 16 Jihnyan harôh jimeututoe ateueh nan gata ngon rakyat. Jihnyan teuma jeuet keu tukang peugah haba gata dan gata jianggab lagée Po teu Allah nyang geupeugah peue nyang harôh geupeugah. 17 Ba kheueh sajan tungkat nyan, gata teuma gata peubuet buet-buet nyang ajaéb ngon tungkat nyan." 18 Óh ka lheueh nyan Nabi Musa laju geuwoe u rumoh Yitro, yah tuwan gobnyan, dan laju geupeugah ubak ayah tuwan geuh nyan, "Neubri kheueh idhin ubak ulôn hei ayah keu lôn gisa u nanggroe Meusé lôn keuneuk jakngieng banmandum syedara lôn peu kheueh awaknyan mantong udeb." Yitro laju geupeugah ubak Nabi Musa, "Jak kheueh ngon seulamat." 19 Yoh mantong Nabi Musa di tanoh Midian, TUHAN meufeureuman ubak gobnyan, "Jakgisa kheueh u nanggroe Meusé. Banmandum ureuëng nyang keuneuk poh maté gata ka habéh maté." 20 Dan Nabi Musa laju geupakat peurumoh geuh dan aneuëk-aneuëk gobnyan sira geupeu ek awaknyan ateueh keuleudée laju geujak meusajan awaknyan u nanggroe Meusé. Ateueh peurintah Allah, Nabi Musa geuba sajan tungkat gobnyan. 21 Feureuman TUHAN ubak Nabi Musa, "Ulôn ka Lôn bri kuasa ubak gata keu gata peuna buet-buet ajaéb. Dan meunyoe gata ka tagisa u nanggroe Meusé singoh, gata keureuja kheueh banmandum buet nyang ajaéb nyan dikeue raja Meusé. Teuma di Ulôn teutab Lôn peujeuet jihnyan ureuëng kreueh ulée, sampoe jihnyan teutab hán jibri bansa Ibrani nyan jitinggai nanggroe Meusé. 22 Dan gata peugah kheueh ubak raja nyan bahwa Ulôn, TUHAN, Lôn peugah lagée nyoe: 'Israel na kheueh aneuëk Ulôn nyang tuha, 23 dan gata ka Ulôn peurintah keu Lôn bri idhin aneuëk Ulôn nyan jijak mangat jihnyan hase jiseumah ngon jimeungabdi ubak Ulôn, teuma gata tatulak. Jinoenyoe Ulôn teuma Lôn poh maté aneuëk gata nyang tuha.' " 24 Bak saboh teumpat jipeudong khimah dalam watée meuneujak nyan, TUHAN laju geujak ubak Nabi Musa keuneuk geupeu maté Nabi Musa nyan. 25 Zipora, peurumoh gobnyan, laju geucok sineuk batée nyang tajam óh lheuehnyan laju jisie kulét aneuëk jih, óh lheuehnyan laju jipeutupéh bak gaki Nabi Musa. Geupeugah lé Zipora, "Droeneueh lakoe darah keu ulôn." 26 Hainyan geupeugah lagée nyan sabab na hubongan ngon upacara meusunat. Deungon na lagée nyan TUHAN ka hana jadéh geupeumaté Nabi Musa. 27 Feureuman TUHAN ubak Nabi Harun, "Gata jak kheueh laju u padang pasi keugata jak meurumpok ngon Nabi Musa." Nabi Harun laju geujak, dan laju meurumpok ngon adoe geuhnyan bak gunong suci, laju geucöm adoe geuhnyan. 28 Nabi Musa laju geupeugah ubak Nabi Harun banmandum nyang ka geufeureuman lé TUHAN ubak gobnyan watée gobnyan geuyue gisa lé TUHAN u nanggroe Meusé, dan meunan cit keuhai banmandum buet nyang ajaéb nyang harôh geupeubuet. 29 Óh lheuehnyan Nabi Musa ngon Nabi Harun laju geujak u nanggroe Meusé sira geupeusapat banmandum peumimpén-peumimpén Israel. 30 Nabi Harun laju geupeutrok ubak awaknyan peue-peue nyang ka geufeureuman lé TUHAN ubak Nabi Musa, dan Nabi Musa laju geupeubuet banmandum buet-buet nyang ajaéb dikeue awaknyan banmandum. 31 Ngon na lagée nyan, barô kheueh awaknyan jipatéh ubak Nabi Musa, dan watée awaknyan jideungoe bahwa TUHAN ka geupeurati bansa Israel dan ka geukalon peue-peue nyang ka jirasa deurita ateueh bansa nyan, awaknyan laju jisujut sira jiseumah.

Keuluaran 5

1 Óh lheuehnyan Nabi Musa ngon Nabi Harun laju geujak meuhadab ubak raja Meusé sira geupeugah lagée nyoe, "Meunoe kheueh feureuman TUHAN, Allah Israel, 'Peuidhin kheueh bansa Ulôn jijak mangat jeuet jimeu iébadat ubak Ulôn di padang pasi.' " 2 "Soe kheueh TUHAN nyan?" jitanyong lé raja. "Keupeue ulôn harôh lôn pakoe keu Jih nyan dan lôn bri idhin ubak bansa Israel jijak nibak nanggroe nyoe? Ulôn hana lôn turi soe TUHAN nyan, dan ureuëng Israel hana ulôn bri idhin jitinggai nanggroe nyoe." 3 Nabi Musa ngon Harun geupeugah, "Allah ureuëng Ibrani ka geupeuleumah droe ubak kamoe. Idhin kheueh kamoe mangat jeuet kamoe jak u padang pasi nyang jiôh jih na lhée uroe watée jak keu kamoe jak peuseumah keureubeuen ubak TUHAN, Allah kamoe. Meunyoe hainyan hana kamoe peubuet, kamoe geupoh maté ngon peunyakét atawa ngon prang." 4 Geupeugah lé raja Firauén nyan ubak Nabi Musa ngon Nabi Harun, "Keupeue gata peujeuet banmandum ureuëng nyan jipeulaloe bak buet jih? Yue kheueh namiet-niamiet nyan jimeukeureuja! 5 Ureuëng-ureuëng nyan ka lumpah that ramé jeumeulah jih. Dan jinoenyoe gata na meukeusut mangat awaknyan beujipiôh meubuet!" 6 Uroenyan cit teuma banmandum ureuëng nyang kawai bansa Meusé dan mando-mando bansa Israel meuteumé peurintah nibak raja, 7 "Bék le gata bri jeurami ubak bansa nyan keu jipeugét batée bata. Bah kheueh jijak mita keudroe. 8 Dan yue kheueh bak awaknyan mangat jipeugét batée bata hana kureueng nibak nyang ka-ka. Awaknyan keuneuk peubeu oe beu oe droe; nyang kheueh sabab jih awaknyan jimeu krôb-krôb mangat jeuet teubri idhin jijak peuseumah keureubeuen ubak Allah jih. 9 Paksa laju awaknyan mangat jimeubuet leubeh brat nibak nyang ka-ka, mangat awaknyan laloe deungon buet dan hana watée keu jideungoe haba seumeungéut nyang jipeusampoe lé rakan-rakan jih." 10 Bubena tukang kawai bansa Meusé dan mando-mando Israel nyan laju jiteubiet jijak peugah ubak bansa Israel, "Raja geupeutreun titah mangat keu gata banmandum hana geubri le jeurami. 11 Gata harôh tamita keudroe dipat mantong nyang gata teumé mita, teuma ingat, batée bata nyang gata peugét hana jeuet kureueng nibak nyang ka-ka." 12 Ban jideungoe haba nyan jijak kheueh laju bansa Israel nyan jijakbroh bansaboh nanggroe Meusé keu jipeusapat jeurami. 13 Lé tukang kawai nyan hana putôh-putôh jipaksa mangat tieb-tieb uroe awaknyan beuna jipeuhase batée bata nyang sadub jai jih lagée yoh masa awaknyan teubri jeurami. 14 Lé tukang kawai nyan laju jiseunuét mando-mando Israel nyang jibri tugaih keu jikawai awaknyan meubuet. Awaknyan laju jitanyong, "Pakon jinoenyoe bansa gata hana jipeuhase batée bata nyang sadub jai jih lagée yoh masa ilée?" 15 Dan mando-mando Israel nyan laju jijak meuhadab ubak raja sira jipeugah ubak raja nyan, "Pakon Po raja neupeubuet lagée nyoe ateueh kamoe? 16 Kamoe hana jibri jeurami, teuma jipaksa mangat kamoe peugét batée bata! Jinoenyoe kamoe jiseunuét padahai peugawée-peugawée Po raja kheueh nyang salah!" 17 Jijaweueb lé raja, "Gata mandum meumang biet-biet that beu oe dan hana tatem meubuet. Nyang kheueh sabab jih gata lakée idhin ubak ulôn keugata jak peuseumah keureubeuen ubak TUHAN gata. 18 Jak kheueh jakmeubuet lom. Jeurami teutab hana teubri keu gata, teuma di gata harôh teutab tapeugét batée bata nyang sadub le jih." 19 Mando-mando nyan laju jiteuka sada bahwa awaknyan lam keuadaan sulet watée jibri tée bahwa ureuëng-ureuëng Israel harôh jipeuna batée bata nyang teutab sadub le jih lagée nyang ka-ka. 20 Watée awaknyan jiteubiet nibak lam meuligoe raja, awaknyan laju meurumpok ngon Nabi Musa dan Nabi Harun nyang teungoh geupreh-preh awaknyan. 21 Jipeugah lé mando nyan ubak Nabi Musa ngon Nabi Harun, "TUHAN geuteupeue peue nyang droeneueh peubuet! Gobnyan teuma geuhuköm droeneueh! Gata kheueh nyang jeuet keu sabab kamoe nyoe jibanci lé raja dan banmandum peugawée gobnyan, sampoe awaknyan keuneuk poh maté banmandum kamoe." 22 Dan Nabi Musa geujak meuhadab lom ubak TUHAN sira geupeugah lagée nyoe, "TUHAN, pakon bansa Israel Droeneueh peulaku keuadaan jih nyang lumpah seudeh lagée nyoe bagoe? Pakon Droeneueh neu-utus ulôn keunoe? 23 Seumeunjak ulôn jak meuhadab raja dan lôn meututoe ateueh nan Droeneueh, raja nyan laju jipeuphon iénanya bansa nyoe. Dan Droeneueh hana neupeubuet sapeu keu neutulông awaknyan."

Keuluaran 6

1 Dan feureuman TUHAN ubak Nabi Musa, "Jinoenyoe gata teuma tangieng pakriban Ulôn meutindak ateueh raja nyang zalem nyan. Raja nyan teuma Ulôn paksa mangat jitinggai bansa Ulôn. Nyang sibeuna jih, jihnyan teuma Lôn paksa mangat ji-use awaknyan nibak nanggroe nyoe." 2 Po teu Allah geumeututoe ubak Nabi Musa, "Ulôn kheueh TUHAN. 3 Ulôn ka lheueh Lôn peuleumah droe ubak Nabi Ibrahim, Nabi Ishaq dan Nabi Yakub sibagoe Allah Nyang Mahakuasa, teuma Ulôn hana Lôn puturi droe ubak awaknyan deungon nan 'TUHAN'. 4 Meunan cit Ulôn peuna peujanjian ngon awaknyan. Ulôn meujanji teuma Ulôn bri nanggroe Kanaan keu awaknyan, nanggroe nyang yoh masa dilée awaknyan udeb sibagoe ureuëng aséng. 5 Ulôn ka Lôn deungon ureuëng Israel apoh apah sabab jipeubudak lé bansa Meusé, dan laju teuingat ubak janji Lôn. 6 Ngon sabab nyan, jak peumaklum kheueh ubak bansa Israel bahwa Ulôn peugah ubak awaknyan: Ulôn kheueh TUHAN; gata Ulôn peubeubaih nibak jipeubudak lé bansa Meusé. Ulôn teuma Lôn tunyok keukuasaan Lôn nyang luwa biasa guna keu Lôn peuseulamat gata dan Lôn peurhot huköman nyang brat ateueh bansa Meusé. 7 Gata Lôn peujeuet keu umat Lôn, dan Ulôn jeuet keu Allah gata. Deungon lagée nyan gata tateupeue bahwa Ulôn nyoe na kheueh TUHAN, Allah gata, nyang peubeubaih gata nibak jipeujeuet keubudak di nanggroe Meusé. 8 Gata Ulôn ba u nanggroe nyang ka Ulôn peujanji deungon sumpah ubak Nabi Ibrahim, Nabi Ishaq dan Nabi Yakub; tanoh nyan Ulôn bri ubak gata jeuet keuhak milék gata keudroe. Ulôn kheueh TUHAN." 9 Banmandum feureuman TUHAN nyan geupeusampoe lé Nabi Musa ubak bansa Israel, teuma awaknyan teutab hana jipakoe peue-peue nyang geupeugah lé Nabi Musa nyan, sabab jipeujeuet keunamiet nyang lumpah keujam nyan, ureuëng-ureuëng Israel ka jeuet keuputôh asa. 10 Óh lheuehnyan TUHAN meufeureuman ubak Nabi Musa, 11 "Jak kheueh meuhadab ubak raja Meusé dan peugah ubak jihnyan bahwa raja nyan harôh jibri idhin bansa Israel jitinggai nanggroe jihnyan." 12 Teuma Nabi Musa geujaweueb, "Ureuëng Israel keudroe hana jitem deungoe ulôn. Panena mungken raja Meusé jideungoe ureuëng nyang hana carông jimariet lagée ulôn?" 13 Meunan kheueh cara jih TUHAN geu-utus Nabi Musa dan Nabi Harun keugeujak peusampoe ubak bansa Israel dan ubak raja nanggroe Meusé bahwa awaknyan geubri tugaih lé TUHAN keu teujak pimpén bansa Israel jiteubiet nibak nanggroe Meusé. 14 Nyoe kheueh asai usui Nabi Musa ngon Nabi Harun: Ruben, aneuëk tuha Nabi Yakub, na peuet droe aneuëk agam: Henokh, Palu, Hezron, dan Karmi. Awaknyan na kheueh indatu nibak kawöm-kawöm nyang na lam sukée Ruben. 15 Simeon dan peurumoh gobnyan sidroe ureuëng inong nanggroe Kanaan na teuma nam droe aneuëk agam; aneuëk-aneuëk nyan na kheueh: Yemuel, Yamin, Ohad, Yakhin, Zohar dan Saul. Awaknyan na kheueh indatu nyang na lam kawöm-kawöm Simeon. 16 Lewi na lhée droe aneuëk agam; aneuëk-aneuëk geuh nyan na kheueh: Gerson, Kehat dan Merari; awaknyan indatu nibak banmandum kawöm nyang na lam sukée Lewi. Lewi sampoe na umu 137 thon. 17 Gerson na teuma dua droe aneuëk agam; aneuëk-aneuëk geuh nyan na kheueh: Libni dan Simei; bak awaknyan jai that-that jipeutreun keuturonan. 18 Kehat na teuma peuet droe aneuëk agam: Amram, Yizhar, Hebron dan Uziel. Kehat sampoe na umu gobnyan 133 thon. 19 Merari na teuma dua droe aneuëk agam: Mahli dan Musi. Nyan kheueh kawöm-kawöm nyang na lam sukée Lewi deungon keuturonan awaknyan maséng-maséng. 20 Amram geumeukawen ngon Yokhebed, adoe nyang inong ayah gobnyan, dan aneuëk-aneuëk awaknyan na kheueh Nabi Harun ngon Nabi Musa. Amram sampoe na meu-umu 137 thon. 21 Yizhar na teuma lhée droe aneuëk agam; aneuëk-aneuëk geuhnyan na kheueh: Korah, Nefeg dan Zikhri. 22 Uziel na teuma lhée droe aneuëk agam: Misael, Elsafan dan Sitri. 23 Nabi Harun geumeukawen ngon Eliseba, aneuëk inong Aminadab; dan Eliseba meusyedara ngon Nahason. Eliseba jipeulahé Nadab, Abihu, Eleazar dan Itamar. 24 Korah na teuma lhée droe aneuëk agam: Asir, Elkana dan Abiasaf. Awaknyan indatu nibak kawöm keuluwarga Korah. 25 Eleazar, aneuëk agam Nabi Harun, jimeukawen ngon sidroe aneuëk nibak Putiel, dan aneuëk awaknyan na kheueh Pinehas. Nyan kheueh banmandum ulée kawöm dan ulée keuluwarga nyang na lam sukée Lewi. 26 Nabi Harun ngon Nabi Musa nyan kheueh nyang geupeurintah lé TUHAN keu geuba banmandum ureuëng Israel jiteubiet lam nanggroe Meusé. 27 Awaknyan bandua geujak meuhadab ubak raja nanggroe Meusé mangat gobnyan geupeubeubaih ureuëng Israel. 28 Watée TUHAN meufeureuman ubak Nabi Musa di Meusé, 29 Feureuman TUHAN, "Ulôn kheueh TUHAN. Jak peugah kheueh ubak raja Meusé peue-peue mantong nyang ka Ulôn peugah ubak gata." 30 Teuma Nabi Musa geujaweueb, "TUHAN, Droeneueh neuteupeue bahwa ulôn hana carông lôn peugah haba. Panena mungken raja jitem deungoe peue nyang ulôn peugah?"

Keuluaran 7

1 Feureuman TUHAN ubak Nabi Musa, "Ulôn teuma Lôn peujeuet gata lagée Allah dikeue raja, dan syedara gata Nabi Harun teuma jimeututoe bak raja nyan sibagoe Nabi gata. 2 Jak peusampoe laju bak Nabi Harun banmandum nyang Ulôn peurintah nyoe ubak gata. Yue kheueh bak Nabi Harun mangat jipeugah ubak raja bahwa raja nyan harôh jipeu idhin keu ureuëng Israel jitinggai nanggroe Meusé. 3 Teuma Ulôn kupeujeuet raja nyan teutab kreueh ulée. Raja nyan teutab hana jipakoe ubak gata, bahpi Ulôn teutab Lôn peuteuka bala nyang le di nanggroe Meusé. 4 Ngon sabab nyan Ulôn teuma Lôn huköm nanggroe Meusé ngon huköman nyang leubeh brat, óh lheuehnyan Ulôn ba mandum bansa Israel, umat Ulôn, jiteubiet lam nanggroe nyan. 5 Dan ureuëng Meusé teuma jiteupeue bahwa Ulôn nyoe na kheueh TUHAN, bak watée Ulôn huköm awaknyan dan Ulôn ba Israel jiteubiet nibak nanggroe awaknyan." 6 Nabi Musa ngon Nabi Harun laju geupeubuet peue nyang ka geupeurintah lé TUHAN ubak gobnyan. 7 Nabi Musa ka meu-umu 80 thon dan Nabi Harun 83 thon watée awaknyan geujak meuhadab ubak raja Meusé. 8 Feureuman TUHAN ubak Nabi Musa ngon Nabi Harun, 9 "Meunyoe raja nyan jilakée ubak gata mangat gata peugét buet nyang ajaéb sibagoe bukeuti, gata yue kheueh bak Nabi Harun mangat jicok tungkat jih keudroe dan jitiek laju ateueh tanoh dikeue raja. Tungkat nyan laju meu-ubah jeuet keu uleue." 10 Óh lheuehnyan geujak kheueh laju Nabi Musa ngon Nabi Harun jak meuhadab raja dan awaknyan laju geupeubuet peue nyang ka geupeurintah lé Po teu Allah. Nabi Harun laju geutiek tungkat gobnyan ateueh tanoh dikeue raja dan banmandum peugawée raja nyang na disinan, dan laju tungkat nyan meu-ubah jeuet keu uleue. 11 Ngon sabab nyan raja pih laju jihôi ngon jipeusapat banmandum ureuëng-ureuëng jih nyang ahli sihe ngon nyang manyang iéleumé, dan awaknyan pih laju jipeubuet ngon iéleumé gaéb awaknyan lagée nyang ka geupeubuet lé Nabi Harun nyan. 12 Awaknyan laju jitiek tungkat droejih ateueh tanoh dan tungkat jih nyan pih laju meu-ubah habéh jeuet keu uleue. Teuma tungkat Nabi Harun laju jiuét banmandum tungkat awaknyan. 13 Bah pi meunan, raja teutab jimeukreueh ulée dan hana jipakoe peue-peue nyang geupeugah lé Nabi Musa ngon Nabi Harun, lagée nyang ka lheueh geupeugah lé TUHAN. 14 Óh lheuehnyan TUHAN meufeureuman lom ubak Nabi Musa, "Raja nyan lumpah that kreueh ulée jih; raja nyan hana jibri bansa Israel jijak jitinggai nanggroe Meusé nyan. 15 Ngon sabab nyan gatajak kheueh laju jak meurumpok ngon gobnyan ban beungoh that, bak watée nyan raja nyan jitreun u Krueng Nil. Gata ba kheueh tungkat nyang hase meu-ubah jeuet keu uleue nyan dan gata preh kheueh raja nyan trok ubak binéh krueng. 16 Gata peugah kheueh ubak raja nyan lagée nyoe: TUHAN, Allah ureuëng Ibrani, ka geu-utus ulôn keu lôn jak peusampoe ubak Po raja mangat umat Gobnyan neubri jijak meuiébadat ubak Gobnyan di padang pasi. Teuma sampoe bak saát nyoe lé Po raja teutab hana neutem deungoe. 17 Sabab nyan kheueh, TUHAN meufeureuman lagée nyoe, 'Nibak peue nyang Ulôn peubuet eunteuk, gata teuma tateupeue bahwa Ulôn kheueh TUHAN. Ngon tungkat nyoe ulôn teuma lôn seukok ateueh muka ié krueng, dan ié krueng nyoe laju meu-ubah jeuet keu darah. 18 Eungkot-eungkot teuma maté, dan krueng nyoe meubée khiéng, sampoe bansa Meusé ka hana jeuet jijieb le ié krueng nyan.' " 19 Feureuman TUHAN ubak Nabi Musa, "Gata yue kheueh ubak Nabi Harun mangat jicok tungkat jihnyan laju jiseunuét ateueh banmandum krueng, lueng-lueng dan bubena kulam ié nyang na lam nanggroe Meusé. Ié nyan teuma meu-ubah jeuet keu darah, dan bansaboh nanggroe habéh meudarah, meunan cit lam tông-tông kayée, dan guci-guci batée." 20 Nabi Musa ngon Nabi Harun laju geupeubuet peue nyang geupeurintah lé TUHAN ubak gobnyan. Dikeue raja dan peugawée-peugawée raja nyan. Nabi Harun laju geubeuôt tungkat geuh dan geuseunuét laju ateueh Krueng Nil, dan watée nyan cit teuma ié nyan ka meu-ubah jeuet keu darah. 21 Bubena eungkot lam krueng nyan ka habéh maté, dan bée eungkot nyan khiéng lumpah na, sampoe ureuëng Meusé ka hana jeuet jijieb ié nyan. Bansaboh nanggroe Meusé kana darah. 22 Dan di ureuëng-ureuëng ahli iéleumé sihe nanggroe Meusé pih hánjitem taloe awaknyan pih laju jipeugét ngon iéleumé gaéb jih lagée nyang ka geupeugét lé Nabi Harun nyan. Sampoe raja teutab kreueh ulée. Lagée nyang ka lheueh geupeugah lé TUHAN, raja teutab hana jitem deungoe peue-peue nyang geupeugah lé Nabi Musa ngon Nabi Harun. 23 Teuma di raja nyan laju jiwoe lam meuligoe jih ngon hana jipakoe ubak peue-peue nyang ka geupeubuet lé Nabi Harun nyan mubacut pih. 24 Banmandum ureuëng Meusé laju jikueh uruek bansipanyang binéh krueng keu jimita ié jieb, sabab ié krueng nyan ka hana jeuet jijieb. 25 Ka trok tujoh uroe TUHAN geukutôk Krueng Nil nyan.

Keuluaran 8

1 Dan feureuman TUHAN ubak Nabi Musa, "Jak laju meuhadab ubak raja dan gata peusampoe kheueh peusan Ulôn nyang lagée nyoe, 'Peuidhin kheueh umat Ulôn jijak meuiébadat ubak Ulôn. 2 Meunyoe hainyan gata tulak, nanggroe nyoe Ulôn peupeunoh ngon cangguek sibago huköman. 3 Lam Krueng Nil peunoh ngon cangguek, sampoe cangguek-cangguek nyan teuma jiteubiet lam ié nyan jitamong laju lam meuligoe gata, lam kama éh ngon teumpat éh gata, lam rumoh-rumoh peujabat dan rumoh rakyat gata, meunan cit lam teumpat tot ruti dan lam banmandum ayan. 4 Cangguek-cangguek nyan jigrob-grob na nyang ji-ek ateueh gata, ateueh banmandum peujabat dan rakyat gata.' " 5 TUHAN meufeureuman ubak Nabi Musa, "Gata yue kheueh ubak Nabi Harun mangat tungkat jihnyan jireuntang u ateueh bubena krueng, lueng-lueng ié dan banmandum kulam-kulam ié mangat cangguek-cungguek jiteubiet jipeupeunoh bansaboh tanoh Meusé." 6 Dan Nabi Harun laju geuayon tungkat geuhnyan ateueh bubena ié, dan laju jiteubiet bubena cangguek sampoe ka peunoh bansaboh nanggroe. 7 Teuma lé tukang peugét iéleumé sihe laju jipeuguna banmandum iéleumé gaéb nyang na nibak jih, dan meunan cit jipeujeuet cangguek-cangguek akhé jih ka jiteuka bansaboh nanggroe nyan. 8 Raja nanggroe Meusé nyan laju jihôi Nabi Musa ngon Nabi Harun, sira jipeugah lagée nyoe, "Meudoá kheueh gata ubak TUHAN mangat Gobnyan geupeugadôh bubena cangguek-cangguek nyoe, óh lheuehnyan barô kheueh ulôn bri bansa gata keu jijak peuseumah keureubeuen ubak TUHAN." 9 Geujaweueb lé Nabi Musa, "Deungon até nyang seunang ulôn meudoá keu Po raja. Peuteutab kheueh watée jih, teuma di ulôn laju lôn meudoá keu Po raja, keu banmandum peujabat dan rakyat. Dan Po raja teuma geupeubeubaih nibak banmandum cangguek-cangguek nyan, dan hana nyang tinggai bahpi meusaboh, teukeucuali nyang na tinggai nyang lam Krueng Nil." 10 Jaweueb raja, "Meudoá kheueh keu ulôn singoh." Kheun Nabi Musa, "Ulôn teuma lôn peubuet peue nyang Po raja lakée. Teuma Po raja neuteupeue bahwa hana Allah nyang lagée TUHAN, Allah kamoe. 11 Gobnyan geupeubeubaih Po raja, banmandum peujabat dan rakyat nyang ka jipeukaru lé cangguek-cangguek nyan. Hana le cangguek-cangguek nyan lam rumoh-rumoh, teukeucuali nyang tinggai lam Krueng Nil." 12 Óh lheueh geukheun nyan Nabi Musa ngon Nabi Harun laju geutinggai raja. Óh lheuehnyan Nabi Musa laju geumeudoá ubak TUHAN mangat bubena cangguek nyan geusampôh banmandum nyang ka teuka ateueh Po raja. 13 TUHAN laju geuteurimong ngon geukabui doá Nabi Musa, dan bubena cangguek nyang na di rumoh-rumoh, nibak leuen-leuen rumoh dan nyang na di ladang banmandum maté. 14 Ureuëng Meusé laju jipeusapat banmandum bangke-bangke cangguek nyan sampoe meutamon meukuyan-kuyan, bansaboh nanggroe habéh mubée khiéng. 15 Watée jingieng lé raja bahwa cangguek-cangguek nyan ka habéh maté, laju ji-iengkeue ubak haba jih lé raja nyan dan ulée jih meutamah-tamah kreueh. Dan lagée nyang ka lheueh geupeugah lé TUHAN, raja teutab hana jipakoe peue-peue nyang geupeugah lé Nabi Musa ngon Nabi Harun. 16 Feureuman TUHAN ubak Nabi Musa, "Gata yue kheueh ubak Nabi Harun mangat jiseukok tanoh ngon tungkat jihnyan, dan laju bansaboh nanggroe Meusé jibeudôh abée meu-ubah jeuet keu jamôk." 17 Ban geudeungoe haba nyan Nabi Harun laju geuseukok tanoh ngon tungkat geuh, dan banmandum abée nyang na lam nanggroe Meusé laju meu-ubah jeuet keu jamôk dan di jamôk nyan laju jiramien ateueh manusia dan beulatang. 18 Lé ureuëng-ureuëng ahli iéleumé sihe di Meusé ji-useuha ngon iéleumé gaéb nyang na bak jih keu jipeujeuet jamôk-jamôk, goenyoe awaknyan hana meuhase. Dipat mantong bansaboh nanggroe na jamôk, 19 akhé jih banmandum ureuëng ahli iéleumé sihe nyan laju jipeugah ubak raja, "Nyoe kheueh buet Po teu Allah." Teuma lé raja nyan teutab kreueh ulée, dan saban lagée nyang ka geupeugah lé TUHAN, raja nyan teutab hana jipakoe ubak peue-peue nyang ka geupeugah lé Nabi Musa ngon Nabi Harun. 20 TUHAN meufeureuman ubak Nabi Musa, "Gata jak kheueh singoh beungoh ban seuboh that watée raja nyan jijak ukrueng, dan gata peugah ubak raja nyan haba Ulôn nyoe, 'Neupeuidhin kheueh umat Ulôn jijak meuiébadat ubak Ulôn. 21 Meunyoe gata tulak, Ulôn teuma Lôn peutreun lalat ubak gata, ubak banmandum peujabat dan ubak rakyat gata. Rumoh-rumoh ureuëng Meusé, meunan cit bansaboh nanggroe peunoh ngon lalat. 22 Teuma keu daerah Gosyen na keucuali, bak teumpat umat Ulôn tinggai. Disinan hana lalat, mangat gata tateupeue bahwa Ulôn kheueh TUHAN, nyang ka Lôn peubuet nyan. 23 Ulôn teuma Lôn peubeda umat Ulôn ngon rakyat gata. Buet nyang ajaéb nyan teuka singoh.' " 24 TUHAN geupeutreun lalat nyang lumpah jai ubak meuligoe raja dan ubak rumoh-rumoh peujabat. Bansaboh nanggroe Meusé lumpah that meudeurita sabab lé lalat-lalat nyan. 25 Óh lheuehnyan raja laju geuhôi Nabi Musa ngon Harun dan laju geupeugah, "Jak kheueh peuseumah keureubeuen ubak Allah gata, teuma bak nanggroe nyoe mantong." 26 "Nyang gét jih bék," jaweueb Nabi Musa, "sabab ureuëng nanggroe Meusé meurasa teusinggong watée jingieng nyang kamoe peuseumah nyoe, dan pasti kamoe nyoe jigeulawa ngon batée sampoe maté. 27 Kamoe harôh kamoe jak u padang pasi nyang jiôh jih lhée uroe meuneujak keu kamoejak peuseumah keureubeuen ubak TUHAN Allah kamoe, lagée nyang ka geupeurintah ubak kamoe." 28 Kheun raja, "Gét kheueh, meunyoe meunan, ulôn bri gata tajak u padang pasi mangat gata peuseumah keureubeuen keu TUHAN, Allah gata, asai gata hana tajak jiôh. Ingat, doá kheueh keu ulôn!" 29 Jaweueb Nabi Musa, "Óh ka leupah ulôn jak, kamoe laju kamoe jak meudoá ubak TUHAN mangat singoh beungoh banmandum lalat nyan jitinggai Po raja, banmandum peujabat dan rakyat. Teuma nyang kamoe lakée bék le neutipée kamoe, dan bék neutam-tam bansa Israel jijak peuseumah keureubeuen keu TUHAN." 30 Nabi Musa laju geutinggai raja, dan laju geumeudoá ubak TUHAN, 31 dan TUHAN laju geukabui doá Nabi Musa. Lalat-lalat nyan laju jipo jitinggai raja, banmandum peujabat dan rakyat ba. Hana meusaboh lalat pih nyang na mantong tinggai. 32 Teuma goenyoe di raja teutab kreueh ulée dan teutab hana jibri idhin bansa Israel nyan jijak nibak nanggroe Meusé nyan.

Keuluaran 9

1 Dan feureuman TUHAN ubak Nabi Musa, "Gata jak kheueh laju meuhadab raja, dan gata peugah ubak raja nyan peusan TUHAN, Allah ureuëng Ibrani lagée nyoe: 'Peubiyeu mantong umat Ulôn nyan jijak mangat jihnyan jeuet jimeubakti ubak Ulôn. 2 Meunyoe gata hana tatem peulheueh awaknyan, 3 Ulôn teuma Lôn peutreun bala peunyakét nyang paleng hebat ateueh banmandum beulatang peulara gata, guda, keuleudée, unta, leumô, bubiri dan kaméng gata. 4 Ulôn kupiléh beulatang nyang jipeulara lé ureuëng Israel ngon beulatang nyang jipeulara lé ureuëng Meusé, nibak beulatang atra ureuëng Israel hana meusaboh pih nyang maté. 5 Ulôn, TUHAN, ka Lôn peuteutab bahwa singoh beungoh laju Lôn peubuet hai nyan.' " 6 Óh singoh beungoh TUHAN laju geupeubuet lagée nyang ka lheueh geumeujanji nyan, bubena beulatang nyang jipeulara lé bansa Meusé habéh maté, dan beulatang peulara atra ureuëng Israel meusaboh pih hana nyang maté. 7 Raja laju jitanyong peue nyang ka teujadi, laju jipeugah ubak raja nyan bahwa meunyoe beulatang atra ureuëng Israel hana meusaboh pih nyang maté. Teuma di raja nyan teutab kreueh ulée dan teutab hana jitem peulheueh bansa Israel nyan mangat jeuet jijak. 8 TUHAN meufeureuman ubak Nabi Musa ngon Nabi Harun lagée nyoe, "Jakcok kheueh mupadub boh reugam abée nyang na lam dapu. Gata ba laju ukeue raja, óh trok keunan, dikeue raja nyan Nabi Musa laju jisipreuek abée nyan u manyang. 9 Dan abée nyan laju jipo dan meutabu bansaboh nanggroe Meusé. Nibak manusia dan beulatang abée nyan laju jipeuteuka cumuét-cumuét nyang beureutoh jeuet keuluka dan jiteubiet danôh." 10 Dan Nabi Musa ngon Nabi Harun laju geucok abée lagée nyang ka geuyue lé TUHAN ubak gobnyan nyan, óh lheuehnyan laju geujak meuhadab ubak raja. Dan Nabi Musa laju geusipreuek abée nyan u manyang. Ateueh manusia dan beulatang laju jitimoh cumuét-cumuét nyang beureutoh dan laju luka jeuet keudanôh. 11 Bubena ureuëng nyang ahli iéleumé sihe hana hase jihadab Nabi Musa sabab bansaboh tuboh jih ka habéh peunoh jitimoh cumuét meudanôh saban cit lagée ureuëng-ureuëng Meusé nyang laén. 12 Teuma TUHAN teutab geupeujeuet raja nyan kreueh ulée, dan lagée nyang ka lheueh geupeugah lé TUHAN, bahwa raja nyan teutab hana jipakoe peue-peue nyang geupeugah lé Nabi Musa ngon Nabi Harun. 13 TUHAN meufeureuman ubak Nabi Musa, "Singoh banbeungoh that gatajak kheueh laju meuhadab ubak raja, dan gata peusampoe laju ubak raja nyan bahwa TUHAN, Allah ureuëng Ibrani geupeugah lagée nyoe: 'Peulheueh kheueh laju umat Ulôn mangat awaknyan jeuet jijak meuiébadat ubak Ulôn. 14 Goenyoe Ulôn peutreun beuncana kon mantong ateueh mandum peujabat dan rakyat gata, beuncananyan Lôn peutreun teuma ateueh gata, mangat gata tateupeue bahwa hana nyang hase jilawan Ulôn bansigom donya. 15 Seukira jih Ulôn keuneuk meuhuköm gata dan rakyat gata deungon peunyakét, pasti gata banmandum habéh binasa. 16 Teuma gata Ulôn peubiyeu udeb, mangat Ulôn jeuet Lôn peudeuh ubak gata kuasa Ulôn, sampoe nan Ulôn meutamah meusyeuhu bansigom bumoe. 17 Bahpi meunan, gata mantong teutab manyang até dan hana gata peuidhin umat Ulôn jijak. 18 Singoh beungoh, bak watée nyang saban, Ulôn teuma ku peutreun ujeuen éeh nyang paleng hebat, lagée nyang gohlom na teujadi di nanggroe Meusé phon yoh dilée sampoe saát nyoe. 19 Dan peurintah kheueh laju mangat banmandum beulatang peulara dan atra milék gata nyang na diluwa jiba ubak teumpat nyang aman. Banmandum manusia dan beulatang peulara nyang na diluwa dan hana hase jimusöm laju maté jitingkeh lé ujeuen éeh.' " 20 Na meupadubdroe ureuëng lamkawan peujabat jitakot ubak peue nyang geupeugah lé TUHAN. Awaknyan jiba banmandum namiet dan beulatang nyang jipeulara lé awaknyan laju jipeutamong lam rumoh mangat teupeusie nibak beuncana nyan. 21 Teuma nyang laén hana jipakoe peue nyang ka geupeuingat nyan dan jipeubiyeu mantong banmandum namiet ngon beulatang nyang jipeulara nyan di blang naleueng. 22 Dan TUHAN laju meufeureuman ubak Nabi Musa, "Beuôt kheueh laju jaroe gata u ateueh, dan ujeuen éeh laju jitreun bansaboh tanoh nanggroe Meusé. Ujeuen nyan jitingkeh ateueh manusia, beulatang peulara dan banmandum sinaman nyang na di lampôh." 23 Nabi Musa laju geubeuôt tungkat gobnyan u ateueh, dan TUHAN laju geupeutreun gogo ngon ujeuen éeh, meunan cit deungon geulanteue jisama bumoe. TUHAN laju geupeutreun 24 ujeuen éeh nyang lumpah that brat dan dahsyat jisambong teuma ngon geulanteue nyang jisama keudeh keunoe. Nyan kheueh ujeuen éeh nyang paleng hebat nyang ka jirasa lam seujarah nanggroe Meusé. 25 Bansaboh nanggroe ujeuen éeh nyan laju jipeuranab peue-peue nyang na di blang, meunan cit ngon manusia dan beulatang peulara, habéh mandum binasa. Banmandum sinaman nyang na di lampôh habéh rusak dan bubena bak kayée habéh jipeureubah sapan sapa. 26 Teuma daerah Gosyen, teumpat tinggai ureuëng-ureuëng Israel, nyang hana keunong ngon ujeuen éeh. 27 Dan raja laju jitawök Nabi Musa ngon Nabi Harun sira jipeugah, "Ulôn nyoe ka meudesya. TUHAN kheueh nyang beutôi, ulôn ngon rakyat lôn ka kamoe peubuet salah. 28 Meudoá kheueh ubak TUHAN gata; kamoe kaseb meudeurita sabab gogo ngon ujeuen éeh nyoe. Ulôn teuma lôn peulheueh ho nyang gatajak. Gata békle tinggai disinoe." 29 Geupeugah lé Nabi Musa ubak raja, "Meunan ulôn trok u luwa banda, ulôn teuma lôn bôt jaroe lôn meudoá ubak TUHAN. Gogo jipiôh dan ujeuen éeh teuma reuda, mangat Po raja neuteupeue bahwa bumoe nyoe na kheueh atra TUHAN. 30 Teuma ulôn kuteupeue bahwa Po raja dan banmandum peujabat gohlom cit jitakot ubak TUHAN Allah." 31 Sinaman jeurami meunan cit sinaman jelai teuma ranab, sabab rami teungoh meubungöng, dan jelai teungoh meuasoe. 32 Teuma gandom ngon mubagoe rupa kacang hana rusak sabab gohtrok bak musém. 33 Dan Nabi Musa laju geutinggai raja disinan dan geujak uluwa banda; disinan laju geubeuôt jaroe geuh keu geumeudoá ubak TUHAN. Watée nyan cit teuma geulanteue jipiôh, ujeuen éeh dan ujeuen biasa. 34 Watée raja jikalon peue nyang teujadi, raja nyan laju ji-iengkeue ubak janji jih dan meudesya lom. Raja dan peujabat jihnyan teutab jimeukreueh ulée. 35 Lagée nyang ka geufeureuman lé TUHAN meulalu Nabi Musa, raja teutab hana jibri idhin ureuëng Israel nyan jitinggai nanggroe Meusé.

Keuluaran 10

1 Feureuman TUHAN ubak Nabi Musa, "Gata jak laju meuhadab ubak raja. Ulôn ka Lôn peujeuet jihnyan dan banmandum peujabat jih kreueh ulée, mangat Ulôn jeuet Lôn keureuja buet-buet nyang ajaéb lamkawan awaknyan, 2 dan mangat gata jeuet tameuhaba ubak aneuëk cucoe gata pakriban Ulôn peumeuén bansa Meusé deungon buet-buet nyang ajaéb nyan. Teuma banmandum gata tateupeue bahwa Ulôn kheueh TUHAN." 3 Ban geudeungoe haba nyan Nabi Musa ngon Nabi Harun laju geujak meuhadab raja óh trok keunan laju geupeugah lagée nyoe, "TUHAN, Allah bansa Ibrani, meufeureuman, 'Trok án pajan gata hana tatem tundok ubak Ulôn? Bah kheueh umat Ulôn jijak, mangat awaknyan jeuet jimeu iébadat ubak Ulôn. 4 Meunyoe gata teutab cit gata tulak, hana gata bri umat Ulôn nyan jijak meu iébadat ubak Ulôn, singoh beungoh teuma Lôn kirém daruet u nanggroe gata. 5 Bansaboh rhueng bumoe habéh teutôb ngon daruet nyang lumpah that jai nyan. Mandum sinaman nyang mantong na tinggai, meunan cit bak-bak kayée nyang hana habéh binasa lé ujeuen éeh, teuma jipeuhabéh lé daruet-daruet nyan. 6 Meuligoe gata, rumoh-rumoh bubena peujabat meunan cit deungon rumoh rakyat peunoh ngon daruet. Beuncana nyan teuma leubeh hebat nibak peue nyang ka lheueh geurasa lé indatu gata.' " Óh lheueh geupeugah nyan Nabi Musa geubalek laju geujak. 7 Jipeugah kheueh laju lé mandum peujabat ubak raja, "Trok ánpajan ureuëng nyan jipeususah geutanyoe, hai Po? Neupeubiyeu mantong ureuëng Israel nyan jijak meuiébadat ubak TUHAN, Allah awaknyan. Neungieng kheueh nanggroe tanyoe nyoe ka habéh hanco!" 8 Dan Nabi Musa ngon Nabi Harun jitawök lom lé raja keu geujak meuhadab gobnyan, kheun raja ubak mandua droe Nabi nyan, "Gata jeuet gatajak keu meu iébadat ubak TUHAN, Allah gata. Teuma jinoenyoe ulôn tanyong soe-soe mantong nyang na lamkawan gata nyang jijak meusajan gata?" 9 Geujaweueb lé Nabi Musa, "Banmandum kamoe, bah kheueh nyan muda meunan cit nyang tuha. Kamoe teuma kamoe ba mandum aneuëk kamoe, banmandum leumô, bubiri, dan kaméng kamoe, sabab kamoe harôh kamoe peuna saboh peurayaan nyang paleng rayeuk keu kamoe horeumat TUHAN." 10 Kheun raja ubak Nabi Musa, "Hana mungken kamoe bri gata banmandum ureuëng-ureuëng inong dan aneuëk-aneuëk gata! Nyang gata lakée nyan saban cit deungon meuharab ulôn lakée ubak TUHAN mangat geubri beureukat ubak gata. Ka jeulaih nibak ulôn bahwa gata kana niet nyang jeuhet. 11 Hán jeuet! Nyang jeuet na kheueh ureuëng-ureuëng agam mantong jijak meu iébadat ubak TUHAN, meunyoe gata beutôi-beutôi keuneuk meu iébadat kong!" Deungon haba nyan Nabi Musa ngon Nabi Harun laju jiuse nibak meuligoe. 12 Dan TUHAN laju meufeureuman ubak Nabi Musa, "Tunyok laju jaroe gata ateueh tanoh Meusé. Bubena daruet teuma jiteuka dan jijak pajoh banmandum sinaman nyang na mantong tinggai óh ka lheueh jitreun ujeuen éeh." 13 Nabi Musa laju geubeuôt jaroe geuh dan TUHAN laju geupeutreun angén timu jipeupot lam nanggroe nyan siuroe-simalam. Dan watée karab beungoh angén nyan laju jiba daruet-daruet 14 nyang hana teukira jai jih, akhé jih bansaboh nanggroe ka habéh peunoh ngon daruet. Gohlom na ureuëng kalon daruet-daruet biet-biet that jai lagée nyan bagoe, dan óh ka lheueh nyan pih hai nyang lagée nyan hana teu-ulang le. 15 Bansigom muka tanoh ka habéh jitôb lé daruet sampoe itam deuh jih. Daruet-daruet nyan laju jiseuba peue-peue mantong nyang hana habéh keunong watée jitron ujeuen éeh, meunan cit deungon boh-boh kayée nyang na dicong bak. Bansaboh tanoh Meusé hana nyang ijo le deuh jih bah kheueh nyan bak-bak kayée meunan cit deungon sinaman-sinaman peunula. 16 Ban jingieng keuadaan nyang luwa biasa yo jihnyan, raja laju jitawök Nabi Musa ngon Nabi Harun sira jipeugah lagée nyoe, "Ulôn nyoe ka meudesya teuhadab TUHAN, Allah gata dan meunan cit teuhadab gata. 17 Peuamphon kheueh desya ulôn keu goenyoe, dan meudoá kheueh ubak TUHAN, Allah gata, mangat Gobnyan geucok nibak ulôn huköman nyang jipeumaté nyoe." 18 Nabi Musa laju geutinggai raja disinan dan geujak meudoá ubak TUHAN. 19 Dan TUHAN laju geu-ubah ulée angén jeuet keu angén barat nyang lumpah kancang. Bubena daruet nyan habéh jipot lé angén dan laju rhot lam Laôt Geulagah. Meusaboh pih hana nyang tinggai bansaboh tanoh Meusé. 20 Teuma TUHAN teutab geupeujeuet raja nyan teutab kreueh ulée, dan lé raja nyan teutab hana jipeubiyeu ureuëng Israel nyan jeuet jijak. 21 Feureuman TUHAN ubak Nabi Musa, "Beuôt kheueh jaroe gata u ateueh, dan tanoh nanggroe Meusé teuma jiteuka seupôt glab bansalam le." 22 Nabi Musa laju geubeuôt jaroe gobnyan u ateueh, dan lhée uroe treb jih bansaboh nanggroe Meusé jiteuka seupôt glab bansalam le. 23 Ureuëng Meusé hana hase jikeumalon peue mantong dan watée nyan awaknyan hana meusidroe pih nyang na jijak ho-ho mantong. Teuma meunyoe lam rumoh-rumoh ureuëng Israel teutab trang. 24 Dan raja laju jitawök Nabi Musa sira jipeugah lagée nyoe, "Gata jeuet gatajak meu iébadat ubak TUHAN gata. Ureuëng-ureuëng inong dan aneuëk-aneuëk manyak jeuet jijak sajan. Teuma meunyoe leumô, bubiri dan kaméng gata hana jeuet gata ba." 25 Geujaweueb lé Nabi Musa, "Meunyoe meunan Po raja neubri keu kamoe beulatang peulara keu kamoe peuseumah ngon kamoe keureubeuen nyang teutot ubak TUHAN, Allah kamoe. 26 Banmandum beulatang nyang kamoe peulara harôh kamoe ba sajan; meusaboh pi hana jeuet kamoe tinggai. Nibak beulatang peularanyan kamoe piléh nyang toh nyang jeuet teupeuseumah ubak TUHAN Allah kamoe. Disideh hainyan kamoe teupeue beulatang peulara nyang toh nyang jeuet kamoe peuseumah." 27 TUHAN teutab geupeujeuet raja nyan teutab kreueh ulée dan hana jibri idhin bansa Israel nyan jijak. 28 Kheun raja ubak Nabi Musa, "Jak wéh keudeh, békna le dikeue ulôn nyoe! Bék sampoe ulôn ngieng gata na disinoe le! Meunyoe sampoe na ulôn ngieng lom muka gata, gata teuma maté!" 29 "Lagée kheun Po raja," geupeugah lé Nabi Musa, "Po raja pasti hana neungieng le ulôn nyoe."

Keuluaran 11

1 TUHAN meufeureuman ubak Nabi Musa, "Ulôn teuma Lôn peuteuka saboh bala teuk ateueh raja nanggroe Meusé dan rakyat jihnyan. Óh ka lheuehnyan barô kheueh jibri keugata banmandum gatajak tatinggai nanggroe jih nyan. Dan gata banmandum ji-use nibak nanggroe jih nyan. 2 Sabab nyan jak peugah kheueh ubak bansa droe gata Israel; yue kheueh ubak awaknyan mangat jilakée piasan pirak ngon méuh nibak waréh silingka awaknyan." 3 TUHAN geupeujeuet ureuëng Meusé nyan hana kliet dan murah até ateueh ureuëng Israel. Dan Nabi Musa jeuet keu ureuëng nyang paleng jihoreumat lé banmandum peujabat dan siluroh rakyat nanggroe Meusé. 4 Nabi Musa laju geupeugah ubak raja, "Nyoe kheueh feureuman TUHAN, 'Kira-kira watée jih teungoh malam Ulôn teuma Lôn jak-jak bansaboh tanoh Meusé. 5 Tieb-tieb aneuëk agam nyang tuha nyang lahé di tanoh Meusé laju maté, phon nibak aneuëk raja Meusé sampoe ubak aneuëk namiet inong nyang jigileng gandom. Meunan cit aneuëk phon nyang jipeulahé lé banmandum beulatang nyan pih maté. 6 Bansigom nanggroe Meusé teuma teudeungoe su ureuëng meumo ba-e nyang meuweueh-weueh dan teuga-teuga, lagée nyang gohlom na teujadi dan hana teuma teujadi le. 7 Teuma nibak ureuëng-ureuëng Israel, bah kheueh nyan ateueh manusia meunan cit ateueh beulatang peulara nyan hana teuma jipeukaru. Ngon na lagée nyan gata tateupeue bahwa Ulôn kheueh TUHAN, Lôn peujeuet meulaén ureuëng Meusé ngon ureuëng Israel.' " 8 Akhé jih geupeugah lé Nabi Musa, "Banmandum peujabat Po raja teuma teuka dan jisujut dikeue ulôn dan jilakée mangat ulôn ngon bansa ulôn kamoe tinggai nanggroe nyoe, óh lheuehnyan barô kheueh kamoe jak." Dan ngon beungéh raya Nabi Musa laju geutinggai raja. 9 TUHAN meufeureuman ubak Nabi Musa, "Raja hana jipakoe peue-peue nyang gata peugah nyan, mangat Ulôn hase Ulôn peubuet nyang leubeh jai buet ajaéb bansaboh nanggroe Meusé." 10 Nabi Musa ngon Nabi Harun laju geukeureuja buet ajaéb nyan dikeue raja. Teuma TUHAN teutab geupeujeuet raja nyan kreueh ulée, sampoe raja nyan hana jibri idhin ubak ureuëng Israel jitinggai nanggroe Meusé nyan.

Keuluaran 12

1 TUHAN meufeureuman ubak Nabi Musa ngon Nabi Harun di nanggroe Meusé, 2 "Buleuen nyoe ka jeuet keu buleuen nyang keu phon nibak thon keunira gata. 3 Jak peusampoe kheueh peurintah nyoe ubak banmandum umat Israel: Bak tanggai siploh buleuen nyoe, tieb-tieb ureuëng agam harôh jisie saboh aneuëk bubiri keu jimakheun meusajan ngon keuluwarga jih. 4 Meunyoe anggota keuluwarga nyan cit bacut sampoe hana hase jipeuhabéh saboh aneuëk bubiri nyang ka lheueh teusie nyan jipajoh, dan keuluwarga nyan meunan cit deungon kawöm nyang paleng tho jeuet jipajoh meusajan-sajan aneuëk bubiri nyan. Aneuëk bubiri nyan harôh teubagi meunurot jeumeulah ureuëng nyang pajoh atra nyan. 5 Gata jeuet gata piléh bubri atawa kaméng, teuma harôh nyang agam, umu jih sithon dan hana nyang meucupa. 6 Gata harôh takeubah sampoe trok tanggai peuet blaih. Bak uroe nyan, watée seupôt uroe, banmandum ureuëng Israel harôh jisie aneuëk bubiri nyan. 7 Cok darah beulatang nyan bacut siliek laju bak mandua taméh pintoe dan bak ambang bagian ateueh pintoe rumoh teumpat awaknyan makheun atranyan. 8 Malam nyan cit teuma sie beulatang nyan harôh teutot laju jipajoh ngon gulée phet dan ruti nyang hana meurago. 9 Aneuëk bubiri nyan harôh teutot banmandum, leungkab deungon ulée jih, gaki jih dan asoe pruet jih. Pajoh kheueh sie nyang ka teutot nyan, bék na nyang pajoh meuntah-meuntah atawa jireubôh. 10 Bék na nyang tinggai bahpi mubacut sampoe án beungoh uroe; meunyoe na séueh jih, atra nyan harôh teutot sampoe habéh. 11 Watée makheun atra nyan gata harôh ka tasok peukayan nyang leungkab keu gata jak, meunan cit seulob bak gaki dan tungkat bak jaroe. Gata harôh gata makheun nyang bagaih-bagaih, nyan kheueh peurayaan Paskah keu teuhoreumat Ulôn, TUHAN. 12 Bak malam nyan Ulôn teuma Lôn jak-jak bansaboh tanoh nanggroe Meusé, dan Ulôn poh maté bubena aneuëk agam nyang tuha, bah kheueh nyan manusia, meunan cit deungon beulatang. Ulôn teuma Lôn huköm banmandum ilah nyang na di nanggroe Meusé, sabab Ulôn kheueh TUHAN. 13 Darah nyang na bak pintoe rumoh gata teuma jeuet keu tanda nibak rumoh-rumoh teumpat tinggai gata. Meunyoe Ulôn ngieng darah nyan, gata Ulôn liengkeue dan hana Ulôn peubinasa bak watée Ulôn huköm nanggroe Meusé. 14 Uroe nyan harôh gata peuingat sibagoe uroe raya keu TUHAN. Dan keu seulanjut jih uroe nyan harôh gata peuraya tieb-tieb thon." 15 Feureuman TUHAN, "Tujoh uroe treb jih gata hana jeuet gata pajoh ruti nyang meurago. Bak uroe nyang keu phon banmandum rago harôh teupeuteubiet lam rumoh gata, sabab meunyoe nyang treb jih tujoh uroe nyan na ureuëng nyang jipajoh ruti nyang meurago, ureuëng nyan hana jeuet le teu anggab anggota umat Ulôn. 16 Bak uroe nyang phon, dan meunan cit bak uroe nyang keutujoh, gata harôh meusapat mangat gata meu iébadat. Bak uroe nyan gata hana jeuet gata peubuet buet-buet peue mantong seulaén nyang peureulée keu gata peusiab peunajoh. 17 Bak uroe nyan banmandum bansa gata Ulôn peuteubiet nibak nanggroe Meusé. Sababnyan na kheueh keu siumu masa, tieb-tieb thon, uroe nyan harôh gata peuingat sibagoe uroe raya. 18 Bak buleuen nyang phon, nibak phon tanggai peuet blaih malam, sampoe ubak tanggai dua ploh sa malam, gata hana jeuet gata pajoh ruti nyang meurago. Tujoh uroe treb jih nyan banmandum rago harôh gata peuteubiet lam rumoh gata. Ureuëng Israel atawa ureuëng aséng nibak watée peurayaan nyan laju jipajoh ruti nyang meurago, ureuëng nyang lagéenyan hana le teu anggab anggota umat Ulôn." 21 Nabi Musa laju geutawök mandum peumimpén Israel sira geupeugah ubak awaknyan, "Jak kheueh dan gata cok kheueh keu keuluwarga gata saboh aneuëk bubiri keu peurayaan Paskah. 22 Gata cok kheueh saboh ikat ôn sob, ceulob laju lam baskom nyang meuasoe darah bubiri nyan, dan darah nyan gata siliek laju bak mandum dua boh taméh pintoe meunan cit bak ambang pintoe bagian ateueh rumoh gata. Sampoe án beungoh bék na nyang tinggai rumoh. 23 Watée TUHAN geujak jak-jak bansaboh nanggroe nyoe keu geujak poh maté ureuëng-ureuëng Meusé, TUHAN teuma geungieng darah nyang na meusiliek bak bandua boh taméh dan ambang pintoe rumoh gata; dan gobnyan geujak laju holaén dan hana geubri Malaikat Mawöt jitamong lam rumoh gata keu geujak poh maté gata. 24 Gata ngon aneuëk-aneuëk gata harôh gata taát ubak peurintah nyan keu siumu masa. 25 Meunyoe gata ka tatamong lam nanggroe nyang ka geupeujanji lé TUHAN keu gata, gata harôh tapeuna upacara nyang lagée nyoe. 26 Meunyoe aneuëk-aneuëk gata jitanyong, 'Peue makna jih upacara nyoe?' 27 Gata harôh tajaweueb, 'Nyoe keureubeuen Paskah keu ta horeumat TUHAN, sabab rumoh-rumoh ureuëng Israel di nanggroe Meusé geuliengkeue lé Gobnyan, watée geujak poh maté bubena aneuëk agam ureuëng Meusé nyang tuha, dan geutanyoe geupeubiyeue udeb!' " Dan jimeuteuôt kheueh ureuëng-ureuëng Israel sira jiseumeumah. 28 Dan awaknyan pih laju jijak jipeubuet laju peue-peue nyang ka geupeurintah lé TUHAN ubak Nabi Musa ngon Nabi Harun. 29 Watée jih teungoh malam TUHAN habéh banmandum geupoh maté aneuëk agam nyang tuha nibak bansa Meusé, phon nibak aneuëk raja, sampoe ubak aneuëk-aneuëk ureuëng nyang teuhuköm dalam glab. Meunan cit banmandum beulatang peulara nyang phon lahé pih geupoh maté. 30 Bak malam nyan, raja, banmandum peujabat dan siluroh ureuëng nanggroe Meusé teubeudôh nibak teumpat éh. Bansaboh nanggroe Meusé laju teudeungoe su ureuëng moba-e ngon su nyang teuga sabab hana meusaboh rumoh pih nyang hana aneuëk maté aneuëk agam nyang phon lahé. 31 Malam nyan cit teuma, raja laju geutawök Nabi Musa ngon Nabi Harun sira jipeugah lagée nyoe, "Jakwéh laju nibak teumpat nyoe, gata banmandum! Tinggai laju nanggroe ulôn nyoe! Jak kheueh laju gata pujoe Allah gata lagée nyang gata lakée. 32 Ba kheueh laju banmandum leumô, bubiri dan kaméng gata, dan jak kheueh laju! Dan gata lakée kheueh beureukat keu ulôn teuma!" 33 Ureuëng Meusé laju jipaksa ubak ureuëng Israel mangat bubagaih jitinggai nanggroe jihnyan. Kheun awaknyan, "Kamoe banmandum teuma maté meunyoe gatanyoe tajak nibak nanggroe kamoe!" 34 Dan ureuëng-ureuëng Israel laju jicok talam nyang ka meuasoe ngon teupông teulawok ruti nyang hana meurago, jibalot laju ngon ija, óh lheueh nyan laju jigulam sira jiba. 35 Dan awaknyan pih ka jipeubuet peue nyang ka geupeugah lé Nabi Musa, jilakée piasan méuh ngon pirak dan peukayan nibak ureuëng Meusé. 36 TUHAN ka geupeujeuet ureuëng Meusé murah até ubak ureuëng Israel, akhé jih lé ureuëng-ureuëng Meusé nyan laju jibri peue-peue nyang jilakée lé ureuëng Israel. Deungon na lagée nyan lé ureuëng-ureuëng Israel ka jiba atra keukayaan ureuëng Meusé teupeuteubiet nibak lam nanggroe nyan. 37 Ureuëng Israel laju beurangkat sira jijak ngon gaki nibak banda Raamses u banda Sukot. Jeumeulah awaknyan na 600.000 droe, nyan hana teuitong ureuëng inong dan aneuëk-aneuëk miet. 38 Awaknyan jiba leumô nyang jai that, bubiri dan kaméng. Dan ureuëng-ureuëng aséng deungon jeumeulah nyang ramé pih na jijak sajan. 39 Awaknyan laju jitot ruti nyang hana meurago nibak teupông nyang ka teulawok nyang awaknyan ba nibak nanggroe Meusé. Awaknyan jiuse nibak nanggroe Meusé nyan ngon teugeusa-geusa, sampoe hana hase jipeusiab beukai nibak rot euh raya. 40 Bansa Israel ka tinggai di nanggroe Meusé 430 thon treb jih. 41 Bak uroe nyang akhé nibak thon nyang keu 430 thon nyan, banmandum saf-saf umat TUHAN laju jitinggai nanggroe Meusé. 42 Malam nyan TUHAN teutab geujaga keu geuintat awaknyan jiteubiet nibak nanggroe Meusé. Dan nyan kheueh teuma malam nyang keu siumu masa malam jipeuseumah ubak TUHAN sibagoe malam peuingat. Bak malam nyan umat Israel harôh meujaga-jaga. 43 TUHAN meufeureuman ubak Nabi Musa ngon Nabi Harun, "Nyoe kheueh atoran-atoran Paskah nyang harôh gata peubuet. Ureuëng aséng hana jeuet jipajoh eungkot sie bubiri nyang teupeuseumah keu Paskah. 44 Teuma meunyoe namiet nyang gata bloe jeuet jipajoh sie Paskah nyan, meunyoe namiet nyang gata bloe nyang ka lheueh teupeukatan. 45 Ureuëng jamé nyang teuka atawa ureuëng tueng upah hana jeuet jipajoh eungkot sie Paskah nyan. 46 Banmandum eungkot sie bubiri nyan harôh teupajoh lam rumoh, dan hana jeuet teupeuteubiet uluwa. Bék teupeupatah meusikrek pih nibak tuleueng jih nyan. 47 Banmandum umat Israel wajéb jipeuna khanuri Paskah nyan. 48 Ureuëng nyang hana teupeusunat hana jeuet jipajoh peunajoh bak teumpat khanuri nyan. Meunyoe sidroe ureuëng aséng nyang ka treb tinggai teutab ngon gata keuneuk jipeuna khanuri Paskah keu jihoreumat Ulôn, TUHAN, banmandum ureuëng agam nyang na lam keuluwarga ureuëng nyan harôh teuleubeh ilée teupeukatan. Óh ka lheuehnyan ureuëng nyan barô kheueh teuanggab lagée ureuëng Israel aseuli, dan jeuet jiseutôt lam peurayaan Paskah. 49 Peuratoran nyang lagée nyan keu ureuëng Israel aseuli pih saban dan ureuëng-ureuëng aséng nyang na tinggai teutab lamkawan gata." 50 Banmandum ureuëng Israel taát dan jipeubuet mandum lagée nyang ka geupeurintah lé TUHAN ubak Nabi Musa ngon Nabi Harun. 51 Bak uroenyan TUHAN ka geuba banmandum ureuëng Israel jiteubiet nibak nanggroe Meusé.

Keuluaran 13

1 TUHAN meufeureuman ubak Nabi Musa, "Peuseumah kheueh banmandum aneuëk agam nyang tuha keu Ulôn. 2 Tieb-tieb aneuëk agam nyang tuha nibak ureuëng Israel, dan tieb-tieb beulatang peulara nyang agam nyang phon lahé, na kheueh atra Ulôn." 3 Nabi Musa geupeugah ubak bansa Israel, "Nibak uroenyoe TUHAN geupeubeubaih gata ngon kuasa Gobnyan nyang raya, sampoe gata banmandum hase tateubiet nibak nanggroe Meusé, bak teumpat gata jicok keubudak. Sababnyan, peuingat kheueh uroe nyoe. Bék gata pajoh ruti nyang hana meurago. 4 Bak uroenyoe, tanggai sa buleuen Abib atawa buleuen sa, gata tatinggai nanggroe Meusé. 5 Deungon meusumpah TUHAN ka geumeujanji ubak indatu gata keu geuseurah ubak gata nanggroe bansa Kanaan, Het, Amori, Hewi dan Yebus. Óh ka lheueh TUHAN geuba gata u nanggroe nyang kaya dan tanoh jih nyang subô nyan, tieb-tieb thon bak buleuen Abib, gata harôh gata peuna upacara nyang lagée nyoe. 6 Tujoh uroe treb jih gata harôh tapajoh ruti nyang hana meurago, dan bak uroe nyang keutujoh harôh gata peuna peurayaan keu teuhoreumat ubak TUHAN. 7 Treb jih tujoh uroe gata hana jeuet tapajoh ruti nyang meurago, dan bansaboh nanggroe gata hana jeuet na rago atawa peue-peue mantong nyang meurago. 8 Watée uroe phon teupeuna peurayaan nyan harôh gata peugah ubak aneuëk gata nyang agam bahwa banmandum nyang gata peubuet nyan sabab mandum nyang ka lheueh geupeubuet lé TUHAN keu gata bak watée gata tatinggai nanggroe Meusé. 9 Peurayaan nyoe sibagoe peuingat ubak gata lagée tanda nyang teukalon nibak jaroe atawa bak keunéng gata. Peurayaan nyoe sibagoe teupeuingat ubak gata keu sabe gata meututoe dan gata meuruno huköm-huköm TUHAN, sabab TUHAN ka geupeuteubiet gata nibak nanggroe Meusé deungon kuasa Gobnyan nyang raya. 10 Peuraya kheueh khanuri Paskah nyoe tieb-tieb thon bak watée nyang ka teupeuteuntée keu nyan." 11 Nabi Musa geupeugah ubak bansa Israel, "TUHAN teuma geu intat gata u nanggroe Kanaan nyang ka geupeujanji ngon sumpah ubak gata dan indatu gata. Óh ka lheueh tanoh nyan jeuet keu hak milék gata, 12 gata harôh tapeuseumah tieb-tieb aneuëk tuha gata nyang agam dan tieb-tieb aneuëk beulatang nyang agam nyang phon that lahé. Banmandum nyan na kheueh atra TUHAN, 13 teuma meunyoe tieb-tieb aneuëk keuleudée agam nyang phon lahé atra nyan harôh teutuboh nibak TUHAN deungon cara teukeureubeuen saboh aneuëk bubiri sibagoe geunantoe jih. Meunyoe keuleudée nyan hana gata tem tuboh, takue keuleudée nyan harôh gata wiet. Tieb-tieb aneuëk gata nyang agam nyang phon that lahé harôh teutuboh. 14 Meunyoe bak saboh watée singoh aneuëk gata jiteumanyong peue makna jih banmandum nyan, gata harôh tajaweueb lagée nyoe, 'Deungon kuasa nyang raya TUHAN ka geuba geutanyoe tateubiet nibak nanggroe Meusé, bak teumpat geutanyoe jiboh keunamiet. 15 Watée raja nanggroe Meusé jimeukreueh ulée dan hana jitem peulheueh geutanyoe mangat tajak, TUHAN laju geupoh maté tieb-tieb aneuëk nyang tuha di Meusé, bah kheueh nyan aneuëk manusia meunan cit ngon aneuëk beulatang. Nyang kheueh sabab jih geutanyoe takeureubeuen ubak TUHAN tieb-tieb beulatang peulara nyang agam nyang phon that lahé, teuma tanyoe tateuboh aneuëk-aneuëk geutanyoe nyang tuha.' 16 Keubiasaan nyan ka jeuet keupeuingat nibak geutanyoe lagée tanda nyang na teuikat bak jaroe atawa nibak dho geutanyoe. Deungon lagée nyan geutanyoe teuma teutab geupeuingat bahwa TUHAN ka geupeuteubiet geutanyoe nibak nanggroe Meusé ngon kuasa Gobnyan nyang raya." 17 Óh ka lheueh raja Meusé jipeulheueh bansa Israel nyan jijak, Po teu Allah hana geuba awaknyan nibak rot nyang lazem jijak lé Filistin, bahpi nyan rot nyang paleng paneuk. Po teu Allah geupike lagée nyoe, "Pat tateupeue awaknyan ka meunyeusai watée jikalon bahwa awaknyan harôh jimuprang, dan laju jigisa u nanggroe Meusé." 18 Ngon sabab nyan TUHAN laju geuba awaknyan meulalu rot meuwet laju rhot lam padang pasi teutuju u Laôt Geulagah. Watée teutinggai nanggroe Meusé, ureuëng-ureuëng Israel nyan na sinjata lagée keuneuk jakmuprang. 19 Nabi Musa laju geuba tuleueng-tuleueng Nabi Yusuf, sabab yoh Nabi Yusuf mantong udeb gobnyan geuyue bak ureuëng Israel mangat jimeusumpah beujipeubuet lagée nyan. Lagée geutinggai peusan lé Nabi Yusuf bak watée nyan, "Bak watée TUHAN geupeubeubaih gata, manyét ulôn harôh gata ba sajan nibak teumpat nyoe." 20 Ureuëng Israel laju geutinggai Sukot dan jipeudong khimah bak banda Etam, bak binéh padang pasi. 21 Bak watée uroe TUHAN geujak dikeue awaknyan lam taméh awan dan bak watée malam Gobnyan geujak leubeh awai nibak awaknyan lam taméh apui keu geutunyok jalan. Deungon lagée nyan awaknyan jeuet jijak uroe ngon malam. 22 Siuroe suntok taméh awan na dikeue bansa nyan dan simalam suntok taméh apui na meusajan awaknyan.

Keuluaran 14

1 Óh lheueh nyan TUHAN meufeureuman ubak Nabi Musa, 2 "Gata yue kheueh ubak ureuëng Israel mangat jigisa dan jipeudong khimah dikeue banda Pi-Hahirot, lamkawan banda Migdol dan Laôt Geulagah, toe ngon banda Baal-Zefon. 3 Raja nanggroe Meusé jipike bahwa ureuëng Israel nyan teungoh meucawo-cawo lam nanggroe nyoe dan teungoh sisat lam padang pasi. 4 Ulôn teuma Lôn peujeuet raja nyan teutab kreueh ulée akhéjih raja nyan teutab jipeulet gata. Teuma di Ulôn laju Lôn tunyok keukuasaan Lôn ateueh raja Meusé dan sidadu jih nyan, dan awaknyan teuma jiteupeue bahwa Ulôn kheueh TUHAN." Dan di ureuëng Israel laju jipeubuet lagée nyang ka geupeurintah lé TUHAN ubak awaknyan. 5 Watée raja Meusé jideungoe bahwa bansa Israel ka jiplueng, raja nyan ngon peujabat-peujabat jih meunyeusai that laju jipeugah, "Peue nyang harôh tapeubuet? Keupeue tapeubiyeu ureuëng Israel nyan jijak sampoe geutanyoe ka hana le namiet?" 6 Dan raja pih laju jipeusiab geuritan prang dan sipa-i jih. 7 Raja nyan laju jibeurangkat ngon banmandum geuritan prang jih, jitamong keunan nam reutoh boh geuritan istimewa, nyang jigiduek lé mandum peuwira raja. 8 Biet-biet that, TUHAN geupeujeuet raja nyan teutab kreueh ulée, sampoe raja nyan laju jipeucrok ureuëng Israel nyang teungoh jijak jitinggai nanggroe nyan dimiyueb lindongan TUHAN 9 Sidadu Meusé deungon banmandum guda, geuritan dan nyang ba geuritan nyan laju jipeulet ureuëng Israel, akhé jih laju meurumpok awaknyan bak teumpat ureuëng Israel jipeudong khimah bak binéh panté laôt to ngon Pi-Hahirot. 10 Watée jingieng lé ureuëng Israel raja dan sidadu Meusé teungoh jijak ubak jih, awaknyan teumakot lumpah na dan laju jikliek jimeuhôi TUHAN jilakée tulông. 11 Jipeugah lé awaknyan ubak Nabi Musa, "Peu kheueh di nanggroe Meusé hana lampôh jrat, sampoe droeneueh neuba kamoe mangat maté bak teumpat nyoe? Ngieng kheueh, akibat peue nyang ka droeneueh peubuet! 12 Yoh masa ilée di nanggroe Meusé ka lheueh kamoe peugah bahwa hainyan teuma teujadi! Kamoe ka kamoe paksa mangat droeneueh bék neupeukaru kamoe, teuma teutab neupeubiyeu kamoe jeuet keu namiet di nanggroe Meusé. Leubeh gét jeuet keu namiet di nanggroe Meusé nibak maté lam padang pasi nyoe!" 13 Geujaweueb lé Nabi Musa, "Bék yo teuh! Meuteuen kheueh! Gata takalon keudroe peue nyang teuma geupeubuet lé TUHAN keu geupeuseulamat gata. Ureuëng Meusé nyang na gata ngieng nibak saát nyoe, hana teuma gata ngieng le. 14 TUHAN teuma geumeujuang keu gata, dan gata hana peureulée gata peubuet sapeue." 15 Feureuman TUHAN ubak Nabi Musa, "Pakon gata kliek talakée tulông? Neuyue kheueh laju ubak ureuëng Israel mangat jijak laju! 16 Beuôt tungkat gata dan seupôt laju ateueh ié laôt. Dan ié laôt nyan teuma teuplah meuweuk dua dan ureuëng Israel jeuet jijak jijeumeurang laôt deungon cara jijak ateueh tanoh nyang tho. 17 Ureuëng Meusé teuma Lôn peujeuet teutab kreueh ulée sampoe hana jipiôh jitiyeub ureuëng Israel, dan Ulôn teuma Lôn tunyok keukuasaan Lôn ateueh raja Meusé, pasokan jih, geuritan-geuritan meunan cit ngon supe nyang ba geuritan nyan. 18 Teuma ureuëng Meusé jiteupeue bahwa Ulôn kheueh TUHAN." 19 Dan malaikat Allah, nyang na dikeue ureuëng Israel, laju geuminah u bagian likot. Deungon lagée nyan taméh awan pih laju jiminah sampoe u teungoh-teungoh 20 lamkawan pasokan Meusé ngon pasokan Israel. Awan nyan laju jipeuteuka seupôt akhé jih simalam beungoh mandua pasokan nyan sabe-sabe hana jeuet jipeutoe. 21 Dan Nabi Musa laju geusunyueng jaroe geuh ateueh ié laôt, dan TUHAN laju geupeutreun angén timu jipoet nyang kancang lumpah na sampoe ié laôt nyan laju jisurot. Simalam beungoh angén nyan jipoet, akhé jih laôt nyan laju meu-ubah jeuet keutanoh tho. 22 Ié laôt nyan laju teuweuek dua, dan watée ureuëng Israel jijeumeurang laôt, awaknyan jijak ateueh tanoh nyang tho, dan ié nyang na blaih wie ngon blaih uneuen awaknyan deuh jih lagée bintéh beuton. 23 Di ureuëng Meusé deungon banmandum guda, geuritan dan supe nyang ba geuritan nyan laju jipeulet dan jiseutôt ureuëng Israel sampoe trok u teungoh laôt. 24 Watée karab beungoh TUHAN laju geupandang ateueh taméh apui dan taméh awan ubak sidadu Meusé dan laju geukaru kawak-kawok hana meuteuntée. 25 Ruda-ruda geuritan awaknyan laju geupeuteun sampoe hana jeuet le jijak, akhé jih ngon kaáh keuéuh jipaksa laju ukeue. Jipeugah lé ureuëng Meusé, "TUHAN geumeujuang keu ureuëng Israel geulawan geutanyoe. Jak geutanyoe taplueng nibak teumpat nyoe!" 26 Feureuman TUHAN ubak Nabi Musa, "Sunuet kheueh jaroe gata ateueh ié laôt, dan ié laôt nyan teuma jigisa lagée sot nyang ka, bubena ureuëng Meusé habéh lham lam laôt raya, meunan cit deungon geuritan dan supe-supe geuritan nyan banmandum wapuk ana." 27 Dan Nabi Musa laju geusunyueng ngon geusunuet jaroe geuh ateueh ié laôt nyan, watée nyan uroe pih ka jiteubiet paja, ié laôt nyan laju jiwoe lagée sot teuma. Ureuëng Meusé jiuseuha keuneuk peuseulamat droe, teuma TUHAN laju geupeukaram awaknyan habéh banmandum lam laôt raya. 28 Ié laôt laju jiriwang habéh jitôb bubena geuritan-geuritan, ureuëng-ureuëng supe geuritan, dan banmandum tantra Meusé nyang peulet ureuëng Israel u teungoh laôt, akhé jih awaknyan banmandum maté. 29 Teuma watée ureuëng Israel jijeumeurang laôt, awaknyan teutab jijak ateueh tanoh nyang tho, dan ié ka jeuet keu bintéh blaih wie ngon blaih uneuen awaknyan. 30 Bak uroe nyan TUHAN geupeuseulamat bansa Israel watée jiseurang lé bansa Meusé, dan laju geukalon manyét-manyét ureuëng Meusé habéh teutiek-tiek bak binéh panté. 31 Watée ureuëng Israel jikalon pakriban TUHAN deungon kuasa Gobnyan nyang rayeuk geupeutaloe ureuëng Meusé, awaknyan hireuen lumpah na akhéjih laju jimeuiman ubak Gobnyan dan ubak Nabi Musa, hamba Gobnyan nyan.

Keuluaran 15

1 Dan Nabi Musa ngon banmandum ureuëng Israel laju geumeulagu keu geupujoe TUHAN, "Ulôn keuneuk meulagu keu TUHAN, sabab Gobnyan ka meunang hana ngon peusa. Banmandum guda dan supe guda nyan habéh geu rhom lam laôt raya. 2 TUHAN nyang bila ulôn nyang paleng teuga; Gobnyan kheueh nyang peuseulamat ulôn. Gobnyan Allah ulôn, ulôn keuneuk pojoe Gobnyan, Allah nyang geupujoe lé indatu lôn, ulôn peuagong Gobnyan. 3 TUHAN na kheueh peujuang nyang peukasa, TUHAN, nyan kheueh nan Gobnyan. 4 Sipa-i Meusé dan banmandum geuritan awaknyan habéh geutiek lam laôt raya. Beuntara-beuntara nyang beuhe ngon meugah nyan pih lham lam Laôt Geulagah nyang raya. 5 Awaknyan ji uéut lé laôt nyang lhok, dan lagée batée nyang jitreun lam tuwie raya. 6 Teunaga Droeneueh lupah that takjob, ya TUHAN, Droeneueh peujeuet musoh hanco sapan sapa. 7 Deungon keuagongan Droeneueh nyang raya, ya TUHAN, banmandum neupeubinasa nyang lawan Droeneueh. Beungéh Droeneueh hu mubura lagée apui, dan awaknyan teutot lagée jumpung jiliet lé apui hu. 8 Laôt Droeneueh kipaih, ié meugulong manyang, ka teudong cot lagée beuton, sampoe tanoh lam laôt ka jeuet teujak. 9 Jipeugah lé musoh, 'Awaknyan teuma tatiyueb dan ulôn drob, ulôn suet peudeueng lam sarông, laju lôn heuntam awaknyan. Dan banmandum atra milék awaknyan ulôn reupah, ulôn weuek-weuek meujeumba-jeumba dan ulôn pajoh keudroe sampoe puih.' 10 Teuma di TUHAN deungon sigoe geupeulheuh nafáh laju teuka keu ureuëng Meusé uroe nyang meubala. Awaknyan karam lagée timah nyang brat lam geulumbang ié nyang raya. 11 Ya Po teu Allah, hana nyang sa teubandeng ngon Droeneueh, Ya TUHAN, Nyang Mahamulia dan suci? Soe nyang hase jipeubuet buet-buet nyang ajaéb dan buet nyang rayeuk lagée buet TUHAN? 12 Droeneueh reuntang jaroe uneuen neuh, dan sapansapa dum musoh jiúet lé bumoe. 13 Droeneueh pimpén bansa nyang ka Droeneueh peuseulamat nyoe, kareuna Droeneueh seutia ubak janji Geuh. Ngon teunaga nyang raya awaknyan Droeneueh lindong, dan Droeneueh bimbeng ubak tanoh Droeneueh nyang suci. 14 Bansa-bansa jideungoe nyan laju jiteuka yo; ureuëng Filistin dan bubena peumimpén Edom habéh teukeujot. Ureuëng Moab nyang beuhe peukasa yo meugúm-gúm, ureuëng Kanaan habéh cut até. 16 Awaknyan lumpah teumakot watée jikalon teunaga TUHAN. Watée umat Droeneueh jijak, bubena musoh hana kuasa jipeuteun; leupah kheueh bansa nyang ka Droeneueh peubeubaih. 17 Dan Israel laju Droeneueh intat ubak teumpat nyang Droeneueh piléh keu teumpat tinggai Droeneueh. Awaknyan tinggai teutab bak bukét Droeneueh nyang suci, bak rumoh nyang Droeneueh peudong keudroe. 18 Droeneueh kheueh, TUHAN, Raja, nyang mat peurintah siumu masa." 19 Watée ureuëng Israel jijeumeurang laôt, awaknyan jijak ateueh tanoh nyang ka tho kreng. Dan watée geuritan-geuritan ureuëng Meusé ngon guda dan supe geuritan nyan jitamong lam laôt, TUHAN laju geupeujeuet ié laôt ji-ile lom sampoe awaknyan habéh mandum maté sabab ka karam. 20 Teuka kheueh Miryam, sidroe nabiah, cutpo Nabi Harun, laju geucok saboh rapa-i, dan banmandum ureuëng inong jipéh rapa-i sira jimeunari ngon meulagu ria. 21 Miryam meulagu keu awaknyan, "Meulagu kheueh keu TUHAN, sabab Gobnyan meunang ngon geumilang. Banmandum guda ngon supe geuritan laju geu rhom lam laôt raya." 22 Óh lheuehnyan Nabi Musa laju geuba bansa Israel nibak Laôt Geulagah laju geutuju ubak padang pasi Syur. Lhée uroe treb jih awaknyan jijak rot padang pasi hana meuteumé meusaboh pih na mata ié. 23 Dan trok kheueh laju awaknyan ubak saboh teumpat nyang nan jih Mara, rupari ié nyang na bak teumpat nyan phet lagoena, dan akhé jih ié nyan hana jeuet teu jieb. Sabab nyan kheueh teumpat nyan teuboh nan Mara, nyang makna jih phet. 24 Deungon na lagée nyan banmandum awaknyan laju jimeu krôb-krôb bak Nabi Musa sira jitanyong, "Peue nyang harôh tajieb nibak saát nyoe?" 25 Nabi Musa laju geumeudoá sikeubiet-keubiet jih ubak TUHAN, dan TUHAN laju geutunyok ubak gobnyan sikrek kayée. Kayée nyan laju geugeulawa lé Nabi Musa u dalam ié, dan ié nyan laju meu-ubah jeuet keu tabeue, sampoe awaknyan ka jeuet jijieb ié. Bak teumpat nyan TUHAN laju geubri peuratoran-peuratoran ubak awaknyan, dan disinan cit teuma Gobnyan geucuba awaknyan. 26 Feureuman TUHAN, "Taát kheueh gata ubak Ulôn deungon biet-biet taát, dan gata keureuja kheueh peue nyang Ulôn ngieng gét; seutôt kheueh banmandum nyang Ulôn peurintah. Meunyoe gata tapeubuet lagée nyan, gata hana teuma Lôn huköm ngon peue-peue mantong peunyakét nyang ka Ulôn peu rhot ateueh ureuëng Meusé. Ulôn kheueh TUHAN nyang peupuléh gata." 27 Óh ka lheuehnyan awaknyan trok laju ubak teumpat nyang nan jih Elim. Bak teumpat nyan na dua blaih boh mata ié dan tujoh ploh bak kuruma. Awaknyan laju jipeudong khimah bak binéh mata ié nyan.

Keuluaran 16

1 Óh lheuehnyan banmandum umat Israel jijak nibak Elim, dan bak tanggai limong blaih buleuen nyang keudua óh ka lheueh awaknyan jitinggai nanggroe Meusé, trok kheueh laju awaknyan ubak padang guron nyang nan jih padang pasi Sin, teumpat nyan teuduek jih lamkawan Elim ngon Gunong Sinai. 2 Lam padang pasi nyan awaknyan mandum meukrôb-krôb ubak Nabi Musa ngon Nabi Harun. 3 Kheun awaknyan, "Leubeh gét meunyoe kamoe nyoe ka maté geupoh lé TUHAN di nanggroe Meusé. Disideh sihana-hana jih kamoe mantong jeuet kamoe duek sira kamoe pajoh eungkot sie ngon ruti sitroe-troe jih. Teuma bak saát nyoe droeneueh ka neuba kamoe keunoe mangat kamoe banmandum maté sabab keunong deuk." 4 Feureuman TUHAN ubak Nabi Musa, "Jinoenyoe Ulôn peutreun peunajoh nyang meulimpah ruwah lagée ujeuen keu gata banmandum. Tieb-tieb uroe gata harôh tapeusapat peunajoh nyan siseb-seb jih keu siuroe pajoh. Deungon cara lagée nyan Ulôn keuneuk ujoe umat Ulôn mangat jeuet Lôn teupeue peu kheueh awaknyan taát ubak peue-peue nyang ka Ulôn peurintah atawa hana? 5 Bak uroe nyang keunam awaknyan harôh ka jipeusapat peunajoh nyan dua goelipat le jih." 6 Dan geupeugah kheueh lé Nabi Musa ngon Nabi Harun ubak mandum ureuëng Israel nyan, "Seupôt nyoe gata mandum ta teupeue bahwa TUHAN kheueh nyang ba gata geupeuteubiet lam nanggroe Meusé. 7 Singoh beungoh teuma gata ngieng cahya TUHAN teuka. TUHAN geudeungoe gata beungéh-beungéh ubak Gobnyan; nyoe, ubak TUHAN, sabab kamoenyoe nyang kamoe peubuet peue-peue nyang geupeurintah ubak kamoe. 8 TUHAN teuma geubri keu gata eungkot sie óh watée uroe seupôt, dan geubri ruti óh watée beungoh sampoe gata banmandum troe, sabab TUHAN ka geudeungoe gata beungéh-beungéh ubak Gobnyan. Nyang sikeubiet jih, meunyoe gata beungéh-beungéh ubak kamoe, gata pih beungéh-beungéh ubak TUHAN." 9 Óh lheueh nyan Nabi Musa geupeugah ubak Nabi Harun, "Neuyue kheueh bak awaknyan mangat banmandum jijak meuhadab ubak TUHAN, sabab TUHAN ka geudeungoe awaknyan jimeuseurapa." 10 Teungoh Nabi Harun geumeututoe ngon awaknyan mandum, awaknyan laju jingieng lam padang pasi hana jisangka-sangka cahya TUHAN leumah lam awan miga. 11 Feureuman TUHAN ubak Nabi Musa, 12 "Ulôn ka Lôn deungoe ureuëng Israel jimeurapa. Peugah kheueh laju ubak awaknyan bahwa óh watée uroe ka seupôt eunteuk awaknyan ka jeuet jipajoh eungkot sie, dan óh watée beungoh awaknyan jeuet jipajoh ruti sampoe án troe. Dan awaknyan teuma jiteupeue bahwa Ulôn kheueh TUHAN, Allah awaknyan." 13 Óh watée uroe ka seupôt, jiteuka kheueh ubak khimah awaknyan cicém puyoh nyang lumpah that jai hana teukira, sampoe khimah awaknyan ka habéh seupôt jitôb lé cicém-cicém puyoh nyan, dan óh watée beungoh jitreun teuma iémbon bansikeulileng khimah awaknyan. 14 Watée iémbon nyan meuasab, leumah kheueh laju lam padang pasi sapeu-sapeu hi nyang lipeh lagée sisék dan halôh lagée iémbon nyang ka kreueh. 15 Watée ureuëng Israel jingieng atra nyan, awaknyan hana jiteupeue peue atra nyan. Teuma jiteumanyong kheueh awaknyan sabe keudroe-droe, "Peue atra nyan?" Dan Nabi Musa laju geupeugah ubak awaknyan, "Nyan kheueh peunajoh nyang geubri lé TUHAN keu gata. 16 TUHAN geupeurintah maséng-maséng gata tapeusapat bubeseb nyang peureulée, na kheueh dua arée keu tieb-tieb anggota keuluwarga." 17 Ureuëng Israel laju jipeubuet lagée nyang geuyue lé Nabi Musa nyan, teuma na cit nyang peusapat leubeh nibak dua arée keu sidroe ureuëng dan na teuma nyang kureueng. 18 Watée atra nyan jisukat lé awaknyan, teunyata ureuëng nyang jipeusapat leubeh le, hana nyang leubeh, dan ureuëng nyang peusapat bacut, hana kureueng. Maséng-maséng awaknyan jipeusapat sidub nyang jipeureulée. 19 Nabi Musa geupeugah ubak awaknyan, "Soemantong ureuëng jih hana jeuet jikeubah peunajoh nyan keu singoh bahpi atranyan bacut sagai." 20 Teuma na cit meupadubdroe ureuëng lamkawan awaknyan hana jipakoe peue nyang geupeugah lé Nabi Musa nyan. Jikeubah cit siparo nibak peunajoh nyan. Óh singoh beungoh teunyata peunajoh nyan ka meu-ulat dan mubée khiéng; deungon na lagée nyan Nabi Musa ka jeuet keubeungéh ubak awaknyan. 21 Tieb-tieb beungoh awaknyan jipeusapat peunajoh nyan sidub nyang awaknyan peureulée, dan meunyoe ka jipeuphon seu-uem, peunajoh nyang na tinggai bak tanoh nyan laju caye meuliléh. 22 Bak uroe nyang keunam awaknyan peusapat peunajoh nyan dua goelipat le jih, na kheueh peuet arée keu sidroe ureuëng. Banmandum peumimpén awaknyan jiteuka dan jijak bri tée hainyan ubak Nabi Musa. 23 Geupeugah lé Nabi Musa ubak awaknyan, "Nyoe kheueh peurintah TUHAN: Singoh na kheueh uroe khusos keu meureuhat, sabab nyan na kheueh uroe Sabat, uroe nyang teupeuseumah ubak TUHAN. Peue nyang keuneuk gata panggang nibak uroe nyoe, panggang kheueh, dan peue nyang keuneuk gata reubôh nibak uroe nyoe, reubôh kheueh. Nyang leubeh nibak nyang teupeureulée keu uroe nyoe, peungkréeh kheueh keu singoh." 24 Dan peunajoh nyang leubeh nyan awaknyan keubah keu singoh lagée nyang geupeugah lé Nabi Musa; peunajoh nyan hana jeuet keubasi dan hana teuma meu-ulat. 25 Nabi Musa geupeugah, "Nyoe kheueh peunajoh keu uroe nyoe, sabab uroenyoe na kheueh uroe Sabat, uroe meureuhat keu teuhoreumat TUHAN, dan gata hana teuma gata teumé peunajoh nyan bah mubacut pi diluwa khimah nyoe. 26 Nam uroe treb jih gata harôh tapeusapat peunajoh, teuma bak uroe nyang keutujoh na kheueh uroe meureuhat, dan hana peunajoh nyang jitreun nibak uroe nyan." 27 Bak uroe nyang keutujoh na padub droe ureuëng Israel keuneuk jijak peusapat peunajoh, teuma awaknyan hana jiteumé sapeue. 28 Dan TUHAN laju meufeureuman ubak Nabi Musa, "Sampoe ánpajan gatanyoe hana tatem taát ubak peue-peue nyang ka Ulôn peurintah? 29 Ingat kheueh bahwa Ulôn ka Lôn bri ubak gata siuroe keu gata piôh meureuhat. Nyang kheueh sabab jih bak uroe nyang keunam Ulôn bri peunajoh nyang seb keu dua uroe. Bak uroe nyang ketujoh soe mantong ureuëng harôh tinggai lam rumoh, dan hana jeuet jiteubiet." 30 Sabab nyan kheueh bak uroe nyang keutujoh awaknyan hana jimeubuet. 31 Peunajoh nyan jiboh nan manna lé ureuëng Israel. Hijih lagée aneuëk bijéh nyang ubit-ubit wareuna jih putéh dan rasa jih lagée juadah nyang teupeugét teuboh meunisan. 32 Nabi Musa geupeugah, "TUHAN geuyue ubak geutanyoe mangat tacok leubeh kureueng dua arée manna keu teukeubah tatinggai keu keuturonan geutanyoe, mangat awaknyan singoh jiteumé kalon peunajoh nyang geubri lé TUHAN ubak geutanyoe di padang pasi, watée geutanyoe geupeuteubiet lam nanggroe Meusé." 33 Nabi Musa geupeugah ubak Nabi Harun, "Neucok kheueh saboh beulangong, neupeutamong laju leubeh kureueng dua arée manna lam beulangong nyan dan neukeubah laju dikeue TUHAN keu geukeubah keu keuturonan geutanyoe." 34 Teuma lé Nabi Harun laju geukeubah beulangong nyan dikeue Peuto Peujanjian keu teukeubah paih deungon janji TUHAN ubak Nabi Musa. 35 Manna nyan ka jeuet keupeunajoh ureuëng Israel peuet ploh thon treb jih, sampoe awaknyan trok u Kanaan, bak teumpat awaknyan tinggai teutab. ( 36 Sinukat barang nyang padek nyang lazem jipeuguna lé ureuëng bak jamén nyan, asoe jih na dua ploh arée.)

Keuluaran 17

1 Óh lheuehnyan banmandum umat Israel laju jitinggai padang pasi Sin dan laju jiminah-minah nibak saboh teumpat u teumpat nyang laén lagée nyang ka geupeurintah lé TUHAN. Bak saboh watée awaknyan jipeudong khimah di Rafidim, teuma bak teumpat nyan hana ié jieb. 2 Dan awaknyan laju meukrôb-krôb ubak Nabi Musa sira jipeugah, "Neubri kheueh keu kamoe ié jieb." Geujaweueb Nabi Musa, "Pakon gata meukrôb-krôb dan gata ujoe TUHAN?" 3 Teuma awaknyan ka lumpah that glaih rukueng jih, hana putôh teutab jimeurapa ubak Nabi Musa. Kheun awaknyan, "Keupeue droeneueh ba kamoe meuteubiet lam nanggroe Meusé? Mangat kamoe, aneuëk-aneuëk kamoe, dan beulatang peulara kamoe maté sabab glaih tho rukueng?" 4 Dan geumeudoá kheueh Nabi Musa ubak TUHAN, "Ya TUHAN, peue nyang harôh ulôn peubuet ateueh ureuëng-ureuëng nyoe? Ngieng kheueh, awaknyan keumeung rhom ulôn ngon aneuëk batée." 5 Feureuman TUHAN ubak Nabi Musa, "Jak tawök kheueh mupadub droe peumimpén dan gatajak kheueh meusajan-sajan ngon awaknyan leubeh awai nibak bansa nyan. Dan bék tuwoe gata ba sajan tungkat nyang gata peuguna watée gata seukok Krueng Nil. 6 Ulôn teuma Lôn dong dikeue gata ateueh saboh batée rayeuk nibak Gunong Sinai. Seukok kheueh batée nyan, dan ié laju jiteubiet lam batée nyan sampoe banmandum awaknyan jeuet jijieb ié." Nabi Musa laju geupeubuet lagée nyan sira jikalon lé peumimpén Israel. 7 Teumpat nyan geuboh nan Masa sabab bak teumpat nyan ureuëng Israel jiujoe TUHAN watée awaknyan jiteumanyong, "Peu kheueh TUHAN na meusajan geutanyoe atawa hana?" Dan teumpat nyan jiboh cit nan laén Meriba sabab bak teumpat nyan ureuëng Israel jimeurapa. 8 Óh lheuehnyan ureuëng Amalek teuka laju jijak prang ureuëng Israel di Rafidim. 9 Geupeugah lé Nabi Musa ubak Yosua, "Piléh laju mupadub droe ureuëng mangat teujak prang ureuëng Amalek. Singoh ulôn teuma lôn dong bak pucak gunong sira ulôn mat tungkat nyang TUHAN yue ba." 10 Yosua laju jipeubuet peue nyang ka geupeurintah lé Nabi Musa ubak gobnyan. Gobnyan laju geujak prang ureuëng Amalek, seudangkan Nabi Musa, Nabi Harun dan Hur laju geuteungoh gunong sampoe trok u pucak. 11 Simantong Nabi Musa geubeuôt jaroe geuh, ureuëng Israel meunang. Teuma watée Nabi Musa geupeutreun jaroe geuh, ureuëng Amalek kheueh nyang meunang. 12 Watée Nabi Musa ka jiteuka hek, Nabi Harun ngon Hur laju geucok sianeuk batée mangat Nabi Musa jeuet geuduek; Nabi Harun ngon Hur geudong blaih wie ngon blaih uneuen Nabi Musa keu geutumpang jaroe gobnyan mangat teutab teubeuôt sampoe án mata uroe jilob. 13 Akhé jih ureuëng Amalek ji peutaloe lé Yosua. 14 Feureuman TUHAN ubak Nabi Musa, "Tuléh kheueh laju keuhai meunang nyoe mangat teutab ji-ingat. Peugah laju ubak Yosua bahwa Ulôn teuma Lôn peubinasa ureuëng Amalek." 15 Dan Nabi Musa laju geupeudong saboh miseubah geuboh nan miseubah nyan "TUHAN na kheueh Bupanji ulôn." 16 Geupeugah lé Nabi Musa, "Mat kheueh bumanyang-manyang bupanji TUHAN! TUHAN geumuprang geulawan ureuëng Amalek keu siumu masa!"

Keuluaran 18

1 Yitro, ayah tuwan Nabi Musa, imeum di Midian, geudeungoe sapeu-sapeu nyang ka geupeubuet lé Po teu Allah keu Nabi Musa dan bansa Israel, bak watée gobnyan geupimpén awaknyan jiteubiet nibak nanggroe Meusé. 2 Dan geujak kheueh laju Yitro ubak Nabi Musa, sira geuba Zipora, peurumoh Nabi Musa nyang mantong tinggai di Midian, 3 meusigoe ngon Gersom dan Eliezer, mandua droe aneuëk gobnyan nyang agam. Aneuëk nyang tuha geuboh nan Gersom sabab Nabi Musa geupeugah, "Ulôn sidroe ureuëng jamé di nanggroe aséng", 4 aneuëk nyang keudua geuboh nan Eliezer sabab Nabi Musa geupeugah, "Allah nyang geupujoe lé indatu lôn ka geutulông dan geupeuseulamat ulôn ngon nyan ulôn hana jipeumaté lé raja Meusé". 5 Yitro geujak meusajan ngon peurumoh Nabi Musa dan mandua droe aneuëk gobnyan u padang pasi bak teumpat Nabi Musa geupeudong khimah to ngon gunong suci. 6 Nabi Musa meuteumé haba bahwa awaknyan ka trok jiteuka, 7 dan geuteubiet kheueh gobnyan geujak sambot awaknyan. Nabi Musa laju geusujut dikeue Yitro sira geucöm yah tuwan geuh nyan. Awaknyan saléng teumanyong keuseuhatan maséng-maséng, óh lheueh nyan laju geutamong lam khimah Nabi Musa. 8 Nabi Musa laju geucalitra ubak yah tuwan geuh peue-peue nyang ka geupeubuet lé TUHAN ateueh raja dan bansa Meusé keu geupeuseulamat ureuëng Israel. Dan meunan cit gobnyan geucalitra ubak geuhnyan keuhai nyang sulet-sulet nyang jihadab lé bansa Israel bak rot euh raya, dan pakriban TUHAN geupeuseulamat awaknyan. 9 Watée geudeungoe banmandum nyan, Yitro galak lumpah na 10 dan laju geupeugah, "Teupujoe kheueh TUHAN nyang ka geupeuseulamat gata nibak raja dan bansa Meusé! Teupujoe kheueh TUHAN nyang ka geupeubeubaih bansa Israel nibak jipeubudak lé bansa Meusé! 11 Jinoenyoe ka ulôn teupeue bahwa TUHAN leubeh rayeuk nibak banmandum ilah-ilah, sabab banmandum nyan geupeubuet watée ureuëng Meusé jipeusaneut ateueh ureuëng Israel ban galak droe dan jipeusombong droe ateueh ureuëng Israel." 12 Óh lheuehnyan Yitro laju geuba keureubeuen nyang teutot dan keureubeuen nyang teusie sibagoe peuseumahan ubak Po teu Allah. Nabi Harun dan banmandum peumimpén bansa Israel geujak keunan dan laju geumakheun meusajan-sajan ngon Yitro nibak teumpat teuka Po teu Allah. 13 Óh singoh beungoh Nabi Musa laju geuba lam sidang ureuëng-ureuëng Israel nyang na meuseuliseh paham. Buet geuhnyan jipajoh watée phon beungoh sampoe án malam. 14 Watée Yitro geukalon banmandum nyang geupeubuet lé Nabi Musa, laju geutanyong, "Peue mantong nyang harôh gata peubuet keu bansa nyoe? Peu kheueh banmandum nyoe gata peubuet keudroe, sampoe keu jilakée naseuhat gata mantong, ureuëng-ureuëng nyang harôh jidong disinoe phon beungoh sampoe án malam?" 15 Geujaweueb lé Nabi Musa, "Awaknyan jijak ubak ulôn keu jiteupeue peue keuheundak Po teu Allah. 16 Meunyoe awaknyan meuseuliseh paham, awaknyan laju jijak meuhadab ulôn mangat peukara awaknyan ulôn peuputôh, dan laju ulôn peugah ubak awaknyan peue-peue nyang ka geupeurintah dan huköm-huköm Po teu Allah." 17 Kheun Yitro, "Hana gét meunan. 18 Ngon cara lagée nyan gata ka tapeuhék droe teuh keudroe, meunan cit deungon awaknyan. Buet teuh nyan lumpah that jai meunyoe tapeubuet keudroe. 19 Deungoe kheueh naseuhat ulôn, dan Po teu Allah teuma geutulông gata. Keubiet jroh that gata jeuet keuwaki nibak bansa nyoe dikeue Po teu Allah dan gata ba masa-alah awaknyan ubak gobnyan. 20 Gata harôh gata peurunoe ubak awaknyan peue-peue peurintah Allah dan gata peutrang cara udeb nyang gét dan peue nyang harôh awaknyan peubuet. 21 Teuma dilikot nibak nyan gata harôh gata mita meupadub droe ureuëng agam nyang bijaksana, dan gata tunyok ureuëng nyang gata piléh nyan jeuet keupeumimpén ateueh siribée droe ureuëng, sireutoh droe, limong ploh droe, dan siploh droe. Ureuëng nyang gata piléh nyan nyang paleng jroh ureuëng nyang jitakot ubak TUHAN, dan jeuet teupeucaya lom hana jitem pajoh péng sogok. 22 Neuyue kheueh awaknyan jimeubuet sibagoe hakém bansa nyoe, maséng-maséng lamkawan jih keudroe. Tugaih nyan harôh awaknyan peubuet seucara teuatoe. Meunyoe peukara-peukara nyang peunteng jeuet jipeutrok ubak gata, teuma meunyoe hai-hai nyang ubit peukara jih bah kheueh jipeuseuleusoe lé awaknyan keudroe. Hai nyang lagée nyan teuma teupeuphui gata sabab awaknyan meusajan meutanggong jaweueb. 23 Meunyoe gata peubuet nyang lagée nyan, dan hai nyan geupeurintah lé Po teu Allah ubak gata, gata teuma hase gata peubuet tugaih-tugaih gata, dan banmandum ureuëng teuma jiwoe ngon puih até sabab masa-alah awaknyan bagaih teupeuseuleusoe." 24 Nabi Musa geuseutôt peue nyang ka geunaseuhat lé Yitro tuwan geuh nyan, 25 dan laju geupiléh ureuëng-ureuëng nyang bijaksana nyang na lamkawan bansa Israel. Gobnyan laju geutunyok awaknyan jeuet keupeumimpén ateueh siribée droe, sireutoh droe, limong ploh droe, dan siploh droe. 26 Awaknyan jipeubuet tugaih-tugaih jih sibago hakém ateueh bansa Israel. Meunyoe peukara-peukara nyang peunteng awaknyan peusampoe ubak Nabi Musa, meunyoe hai-hai nyang ubit awaknyan peubéeréeh keudroe. 27 Óh lheuehnyan Nabi Musa laju geupeulheuh Yitro geuwoe u nanggroe gobnyan.

Keuluaran 19

1 Óh lheueh nyan bansa Israel laju geutinggai Rafidim, dan bak tanggai sa buleuen nyang keu lhée watée awaknyan ka lheueh jitinggai nanggroe Meusé, trok kheueh laju awaknyan bak padang pasi Sinai. Awaknyan laju jipeudong khimah bak gaki Gunong Sinai, 3 dan Nabi Musa laju geuteungoh gunong nyan keu geujak meurumpok ngon Po teu Allah. TUHAN meufeureuman ubak Nabi Musa nibak ateueh gunong nyan dan geuyue ubak Nabi Musa nyan mangat geupeumaklum ubak ureuëng Israel, keuturonan Nabi Yakub, 4 "Gata ka deuh takalon peue nyang Ulôn peubuet ateueh ureuëng Meusé, dan pakriban Ulôn ba gata ubak Ulôn bak teumpat nyoe ngon kuasa nyang raya, lagée cicém rajawali jipeupo aneuëk jih ateueh sayeub jih. 5 Jinoenyoe meunyoe gata taát ubak Ulôn dan seutia ubak peujanjian Lôn. Gata teuma Lôn peujeuet keu umat Lôn keudroe. Bansigom bumoe na kheueh atra Ulôn, dan gata jeuet keumilék Ulôn nyang Ulôn gaséh, 6 khusos keu Lôn keudroe, dan gata teuma tapeutimang Ulôn sibagoe Imeum-imeum." 7 Dan geutreun kheueh laju Nabi Musa geujak peusapat bubena peumimpén mangat meusapat, óh lheuehnyan laju geucalitra ubak awaknyan peue-peue nyang ka TUHAN peurintah ubak gobnyan. 8 Awaknyan banmandum jijaweueb ngon su nyang meusigoe, "Kamoe teutab kamoe tem peubuet peue-peue nyang geuyue lé TUHAN," dan jeunaweueb awaknyan laju geupeusampoe lé Nabi Musa ubak TUHAN. Dan TUHAN laju meufeureuman ubak Nabi Musa, "Ulôn teuma Lôn jak ubak gata sira meukeurubông lam awan nyang teubai; ureuëng laén teuma jideungoe Ulôn meututoe ngon gata, dan phon saát nyan awaknyan sabe jipeucaya ubak gata. 10 Jinoenyoe jak meurumpok kheueh ngon awaknyan, dan gata yue kheueh ubak awaknyan phon uroe nyoe dan singoh mangat jipeusiab droe keu jimeu iébadat. Awaknyan harôh jijak rhah peukayan jih keudroe. 11 Lusa awaknyan harôh ka siab seudia. Bak uroenyan Ulôn teuma Lôn treun ateueh Gunong Sinai, bak teumpat mandum ureuëng hase jikalon Ulôn. 12 Peugét kheueh tanda bansikeulileng gunong nyoe sibagoe bataih nyang hana jeuet jijak lé bansa nyan. Gata tam kheueh awaknyan bék jiteungoh ateueh gunong, peulom jipeutoe sagai-sagai hana jeuet. Soemantong nyang liengkeue bataih nyan, ureuëng nyan teuma teuhuköm maté; 13 ureuëng nyan harôh teugeulawa ngon batée atawa teugando ngon aneuëk panah, dan hana jeuet teucukéh. Hainyan keunong banmandum bah kheueh nyan manusia meunan cit ateueh beulatang; banmandum ureuëng nyang jiliengkeue bataih nyan harôh teuhuköm maté. Watée teudeungoe su beureuguih nyang panyang, bubena awaknyan harôh jiteungoh gunong." 14 Óh lheuehnyan Nabi Musa laju geutreun nibak ateueh gunong dan geuyue laju ubak awaknyan mangat meusiab-siab keu meu iébadat, geupeugah lé Nabi Musa, "Lusa gata harôh ka siab, dan siatnyoe gata hana jeuet tameusituboh." Dan watée jideungoe haba nyan bansa nyan pih laju meusiab-siab jirhah peukayan jih. 16 Bak uroe nyang keu lhée, bak watée beungoh, dan su go-go ngon geulanteue. Awan nyang teubai laju teuka ateueh gunong dan laju teudeungoe su beureuguih nyang lumpah teuga. Banmandum ureuëng nyang lam khimah-khimah habéh teumakot. 17 Nabi Musa laju geuba awaknyan keu jijak meurumpok ngon Po teu Allah, dan laju awaknyan jidong bak gaki gunong nyan. 18 Bansaboh Gunong Sinai ka habéh teutôb ngon asab, kareuna TUHAN geutreun ateueh nyan lam apui hu. Asabnyan meukeubok lagée asab bak teumpat ureuëng teumeutot, dan bansaboh gunong meugok-gok meutaga-taga. 19 Su beureuguih meutamah-tamah teuga. Laju geupeugah lé Nabi Musa, dan Po teu Allah geujaweueb ngon su go-go. 20 TUHAN laju geutreun ateueh pucak Gunong Sinai, dan geutawök Nabi Musa mangat geujak ubak pucak gunong nyan. Dan Nabi Musa laju geuteungoh ateueh gunong nyan, 21 dan TUHAN laju meufeureuman ubak gobnyan, "Jak treun kheueh dan gata peugah laju ubak awaknyan bahwa awaknyan hana jeuet jiliengkeue bataih keu jijak ubak Ulôn. Meunyoe hainyan awaknyan iengkeue, jai that-that lamkawan awaknyan teuma maté. 22 Meunan cit deungon imeum-imeum nyang keuneuk peurab ubak Ulôn, harôh jipeusuci droe; meunyoe hán, awaknyan teuma Lôn huköm." 23 Geupeugah lé Nabi Musa ubak TUHAN, "Awaknyan hana hase jiteungoh, ya TUHAN, sabab Droeneueh ka neupeurintah ubak kamoe mangat kamoe anggab gunong nyoe sibagoe teumpat nyang suci dan jipeurati bataih nyang na ban sikeulileng nyan." 24 Geujaweueb lé TUHAN, "Jak treun kheueh, dan gisa kheueh u Sinai meusajan ngon Nabi Harun. Teuma imeum-imeum ngon rakyat ba hana jeuet jiliengkeue bataih keu jijak ubak Ulôn. Meunyoe awaknyan teutab jilieng bataih nyan, awaknyan Lôn huköm." 25 Dan geutreun kheueh laju Nabi Musa geujak meurumpok ngon bansa nyan dan geupeusampoe laju peusan TUHAN ubak awaknyan.

Keuluaran 20

1 Dan Po teu Allah laju meufeureuman, dan nyoe kheueh feureuman Gobnyan, 2 "Ulôn kheueh TUHAN Allah gata nyang ba gata teupeuteubiet nibak nanggroe Meusé bak teumpat gata jicok keunamiet. 3 Bék gata seumah ilah-ilah nyang laén, dan seumah kheueh Ulôn mantong. 4 Bék gata peugét keudroe gata patong nyang saban lagée peue mantong nyang na di langét, di bumoe atawa lam ié dimiyueb bumoe. 5 Bék gata seumah patong nyang lagée nyan, sabab Ulôn kheueh TUHAN Allah gata, dan Ulôn hana kutem gata peusa ngon peue mantong. Ureuëng-ureuëng nyang banci keu Ulôn, Ulôn huköm sampoe ubak keuturonan jih nyang keu lhée dan nyang keu peuet. 6 Teuma di Ulôn kutunyok gaséh sayang Lôn ubak meuribée-ribée keuturonan ureuëng-ureuëng nyang jicinta keu Ulôn dan jitaát ubak peue-peue nyang Ulôn peurintah. 7 Bék gata hôi nan Ulôn ngon sia-sia, sabab Ulôn, TUHAN Allah gata, Ulôn huköm soemantong nyang jipeusalah guna nan Ulôn. 8 Peuraya kheueh uroe Sabat dan horeumat kheueh uroe nyan sibagoe uroe nyang suci. 9 Keu gata Ulôn bri nam uroe keu gata meubuet, 10 teuma bak uroe nyang keutujoh na kheueh uroe meureuhat nyang khusos keu Ulôn. Bak uroenyan hana meusidroe pih nyang jeuet jimeubuet, bah kheueh nyan gata, meunan cit ngon aneuëk-aneuëk gata, namiet-namiet gata, beulatang peulara gata dan ureuëng aséng nyang na tinggai lam nanggroe gata. 11 Lam watée nyang nam uroe nyan, Ulôn, TUHAN, nyang peugét bumoe, langét, laôt raya, dan peue-peue mantong nyang na lam nyan, teuma bak uroe nyang keutujoh Ulôn meureuhat. Nyang kheueh sabab jih, Ulôn, TUHAN, Ulôn bri beureukat ubak uroe Sabat dan Ulôn peukhusos uroe nyan keu Ulôn. 12 Horeumat kheueh ubak ayah ngon ma gata, mangat gata seujahtra dan panyang umu lam nanggroe nyang teuma Ulôn bri keu gata. 13 Bék gata poh maté gob. 14 Bék gata peubuet mukah. 15 Bék gata ceumucue. 16 Bék jeuet keusaksi peuleusu keuhai ureuëng laén. 17 Bék gata meuheut atra ureuëng laén: rumoh jih, peurumoh jih, namiet-namiet jih, beulatang peulara jih, keuleudée jih, atawa peue mantong atra ureuëng nyan." 18 Watée ureuëng-ureuëng nyan jideungoe su go-go dan su beureuguih, dan jingieng kilat meunan cit gunong nyang jiteubiet asab, awaknyan laju jiteuka yo ngon teumakot dan jidong jiôh-jiôh. 19 Jipeugah lé awaknyan ubak Nabi Musa, "Droeneueh mantong meututoe ubak kamoe, kamoe teutab kamoe deungoe; teuma bék kheueh Po teu Allah nyang meututoe ubak kamoe, eunteuk kamoe maté bubena." 20 Geujaweueb lé Nabi Musa, "Bék teumakot teuh, Allah teuka teuma keu geujak cuba gata mangat lé gata teutab gata taát, dan hana meudesya." 21 Teuma di ureuëng-ureuëng nyan teutab jidong rot jiôh, teuma Nabi Musa nyang peuto awan seupôt bak teumpat Po teu Allah teuka. 22 TUHAN meufeureuman ubak Nabi Musa sira geuyue peurintah ubak bansa Israel, "Gata ka gata kalon pakriban Ulôn, TUHAN, geumeututoe ubak gata dilangét manyang. 23 Bék gata peugét keu gata seumah patong-patong pirak atawa patong méuh keu gata pujoe seulaén Ulôn. 24 Gata peugét kheueh keu Ulôn saboh miseubah nyang teupeugét nibak tanoh, dan ateueh miseubah nyan gata peuseumah kheueh laju bubiri ngon leumô gata keu keureubeuen nyang teutot ngon keureubeuen peudaméan. Bak tieb-tieb teumpat nyang ka Ulôn peuteuntée keu gata sibagoe teumpat keu gata meu iébadat keu Ulôn, Ulôn kuteuka dan Lôn bri beureukat ubak gata. 25 Meunyoe gata peugét keu Ulôn saboh miseubah nibak batée, atranyan bék gata peugét nibak batée nyang teupeuet, sabab meunyoe gata peuguna peuet keu ngon plah batée, miseubah nyan hana jeuet le gata peuguna keu Ulôn. 26 Bék gata peudong miseubah nyang panyang sampoe harôh teuék ngon reunyeuen, mangat bék deuh teukalon bagian tuboh gata nyang hana patot teukalon."

Keuluaran 21

1 Dan feureuman TUHAN ubak Nabi Musa, "Gata bri kheueh ubak ureuëng Israel peuratoran-peuratoran lagée nyoe: 2 Meunyoe gata tabloe sidroe namiet nibak bansa gata keudroe, namiet nyan harôh jimeubuet bak gata nam thon treb jih. Bak thon nyang keutujoh namiet nyan harôh gata peumeurdehka dan hana peureulée teubayeue sapeue. 3 Seukira jih ureuëng nyang mantong bujang watée jeuet keu namiet gata, dan peurumoh jih hana jiseutôt watée namiet nyan jiteubiet. Dan seubalék jih seukira jih ka jimeukawen watée gata bloe jeuet keu namiet gata, peurumoh jih nyan jeuet jijak seutôt meusajan ngon namiet nyang ka gata peubeubaih nyan. 4 Meunyoe Po jih jipeukawen namiet nyan ngon sidroe ureuëng inong, dan laju namiet nyan jimeu aneuëk, dan peurumoh ngon aneuëk jih nyan na kheueh atra milék Po jih, dan hana jeuet jiseutôt ngon namiet nyan watée namiet nyan teupeubeubaih. 5 Teuma seukira jih namiet nyan jipeugah jihnyan lumpah that gaséh ubak peurumoh jih, aneuëk-aneuëk jih, dan Po jih, dan hana jitem teupeubeubaih, 6 dan lé Po jih nyan harôh jiba namiet jihnyan ubak teumpat iébadat. Bak teumpat iébadat nyan namiet nyan harôh jiyue dong sira jimeusadeue bak pintoe atawa taméh pintoe teumpat iébadat, lé Po jih laju jitindek punyueng namiet jih nyan. Teuma namiet nyan ka jeuet keu namiet siumu masa. 7 Meunyoe sidroe ureuëng inong Ibrani jipeubloe sibagoe namiet lé ayah droe jih, ureuëng inong nyan hana teupeubeubaih óh ka trok nam thon, nabida ngon namiet nyang agam. 8 Meunyoe jihnyan hana galak Po jih nyan naniet keuneuk meukawen ngon jih, aneuëk inong nyan harôh jipeubloe lom teuma ubak ayah aneuëk inong nyan. Ureuëng inong nyan hana jeuet jipeubloe ubak ureuëng aséng, sabab jihnyan ka jipeusaneuet ngon hana ade lé Po jih nyang hana tupat janji. 9 Meunyoe sidroe ureuëng jibloe namiet nyang inong keu jipeujeuet keupeurumoh aneuëk agam jih, namiet nyang inong nyan harôh jipeusaneuet lagée aneuëk jih keudroe. 10 Meunyoe aneuëk agam nyan jimeukawen lom, jihnyan teutab na keuwajéban jibri makheun dan peukayan dan mandum hak lagée nyang lazem ubak peurumoh jih nyang phon. 11 Meunyoe ureuëng agam nyan hana jipeupeunoh keuwajéban jih nyan, ureuëng agam nyan harôh jipeubeubaih peurumoh jih nyan ngon hana jiteurimong péng sineuboh bah mubacut pih." 12 "Soe mantong nyang jipoh ureuëng laén sampoe maté, ureuëng nyang poh nyan harôh teuhuköm maté. 13 Teuma meunyoe ureuëng nyan jipoh ngon hana jisaja dan hana niet keuneuk jipoh maté, ureuëng nyan jeuet jipeuplueng droe ubak saboh teumpat nyang teuma Ulôn tunyok ubak gata, dan bak teumpat nyan ureuëng nyan meuteumé peulindongan. 14 Teuma meunyoe sidroe-droe ureuëng bagaih that ji-ek darah ngon jisaja laju jipoh maté ureuëng laén, óh lheuehnyan jiplueng ubak khimah Ulôn keujilakée peulindongan, ureuëng nyan harôh teucok bak khimah nyan dan teuhuköm maté. 15 Soemantong nyang poh ayah atawa ma jih ureuëng nyan harôh teuhuköm maté. 16 Soemantong nyang jijakcok paksa sidroe-droe ureuëng, ureuëng nyang jakcok nyan harôh teuhuköm maté, peu kheueh ureuëng nyan ka jipeubloe atawa mantong na lam rumoh jih. 17 Soemantong nyang kutôk ayah atawa ma jih, ureuëng nyan harôh teuhuköm maté. 18 Meunyoe na teujadi ureuëng jimeulo sidroe ureuëng jipoh ureuëng laén ngon batée atawa ngon boh shoh jaroe jih, teuma ureuëng nyang jipoh nyan bukon jipoh maté, ureuëng nyan hana teuhuköm. Meunyoe ureuëng nyang jipoh nyan sampoe harôh reubah bak teumpat ngon sabab keunong poh nyan, 19 teuma óh lheueh nyan jeuet jibeudôh dan jijak lom ngon tungkat, ureuëng nyang poh ureuëng nyan harôh jipeu-ubat sampoe puléh dan jibri geunantoe rugoe seumantong ureuëng nyan lam sakét. 20 Soemantong nyang poh maté namiet jih nyang agam atawa nyang inong meunan jipoh laju maté bak teumpat, ureuëng nyang poh nyan harôh teuhuköm. 21 Teuma meunyoe namiet nyan hana maté lam dua atawa lhée uroe, Po jihnyan hana teuhuköm. Rugoe nyang jideurita sabab ka gadôh namiet jih nyan nyang ka jeuet sibagoe huköman keu ureuëng nyan. 22 Meunyoe na meupadub droe ureuëng agam teungoh jimeulo dan sidroe nyang teungoh meulo nyan jeuet keusabab cidra ateueh sidroe ureuëng inong nyang teungoh mume sampoe aneuëk lampluet nyang teungoh jikandong nyan rhot, teuma hana meudeurita bak bagian nyang laén, dan ureuëng nyan harôh jibayeue deunda nyang rayeuk jih sidub nyang jilakée lé lakoe jih dan jisituju lé hakém-hakém. 23 Teuma meunyoe ureuëng inong nyan cidra jih leubeh brat, dan huköman keu keujeuhetan nyan na kheueh nyawöng teugantoe ngon nyawöng, 24 mata teugantoe ngon mata, gigoe gantoe ngon gigoe, jaroe teugantoe ngon jaroe, gaki teugantoe ngon gaki, 25 luka teugantoe ngon luka, luka tutong teugantoe ngon luka tutong, kumong teugantoe ngon kumong. 26 Soemantong nyang seukok mata namiet jih sampoe buta, namiet nyan harôh jipeubeubaih sibagoe meunayeue mata namiet nyan. 27 Meunyoe sidroe-droe ureuëng jipoh namiet jih sampoe patah gigo jih, namiet nyan harôh jipeubeubaih sibagoe sineuboh keu gigoe namiet nyan." 28 "Meunyoe na saboh leumô agam jipok ureuëng laén sampoe maté, leumô nyan harôh teupoh deungon cara teugeulawa ngon batée, dan asoe jih hana jeuet teupajoh, teuma ureuëng po leumô nyan hana jeuet teuhuköm. 29 Meunyoe leumô agam nyan ka biasa buet jih galak jipok gob, dan ureuëng po leumô nyan ka lheueh teupeuingat, teuma teutab hana jijaga beulatang jihnyan, dan leumô agam nyan jipok lom ureuëng laén sampoe maté, beulatang nyan harôh teupoh maté ngon cara teugeulawa ngon batée meunan cit deungon ureuëng po leumô nyan teuhuköm maté. 30 Teuma meunyoe ureuëng po leumô nyan teupeuidhin jibayeue sineuboh, ureuëng nyan harôh jibayeue sidub nyang jilakée keu teutuboh nyawöng jih. 31 Meunyoe nyang jipok lé leumô nyan sidroe aneuëk agam atawa aneuëk inong, atoran nyan teutab keunong ateueh jih. 32 Meunyoe nyang jipok maté nyan sidroe namiet agam atawa namiet inong, ureuëng po leumô nyan harôh jibayeue lhée ploh péng pirak ubak ureuëng po namiet nyan, dan leumô agam nyan harôh teugeulawa ngon batée sampoe maté. 33 Soe mantong ureuëng nyang jicok sinutôb bak saboh mon atawa jikueh mon laén hana jitôb, teuka saboh leumô agam atawa keuleudée laju rhot lam mon nyan, 34 ureuëng po mon nyan harôh jibayeue gantoe rugoe ubak ureuëng po beulatang peulara nyan, teuma beulatang nyang ka maté nyan jeuet jicok keudroe jih keudroe. 35 Meunyoe leumô agam sidroe ureuëng jipok leumô agam ureuëng laén sampoe maté, mandua droe ureuëng po leumô nyan harôh jipeubloe leumô nyang mantong udeb nyan dan péng hase jipeubloe leumô nyan harôh jiweuek dua. Dan meunan cit eungkot sie beulatang nyang ka maté nyan harôh teuweuek dua. 36 Teuma meunyoe ka jiteupeue bahwa leumô agam nyan keubiet keubiasaan jih tukang seumupok, dan ureuëng po leumô nyan hana jijaga leumô jih nyan, leumô gob nyang ka maté nyan harôh jigantoe ngon leumô agam nyang mantong udeb, dan leumô nyang ka maté nyan jeuet jicok keudroe jih keudroe."

Keuluaran 22

1 "Soemantong nyang cue saboh leumô atawa bubiri óh lheueh nyan laju jisie beulatang nyang ka lheueh jicue nyan atawa jipeubloe, atra gob nyang jicue nyan harôh jigantoe tieb saboh leumô nyang gadôh ngon limong boh leumô nyang laén dan tieb saboh bubiri ngon peuet boh bubiri nyang laén. 2 Ureuëng nyan harôh jigantoe barang nyang jicue nyan. Meunyoe bak ureuëng nyan hana sapeuena, ureuëng nyan keudroe teuma teupeubloe sibagoe namiet sibagoe geunantoe barang nyang ka jicue nyan. Meunyoe nyang jicuenyan leumô, keuleudée atawa bubiri, dan meuteumé bak ureuëng nyan lam keuadaan udeb, ureuëng nyan harôh jigantoe tieb saboh beulatang peulara ngon dua boh beulatang peulara. Meunyoe watée malam sidroe pancuri teudrob jaroe watée jiceumucue bak saboh rumoh, dan pancuri nyan teupoh maté, ureuëng nyang poh pancuri nyan hana salah. Teuma meunyoe hainyan teujadi bak watée uroe, ureuëng nyang poh maté pancuri nyan teuanggab salah. 5 Soe nyang peubiyeu beulatang peulara jih jimeurot lam ladang jih atawa lam lampôh anggô jih, dan beulatang nyan laju jimeurawöh keudeh keunoe sira jijakrot seunaman ureuëng laén, teuma lé ureuëng po beulatang nyan harôh jibayeue geunantoe rugoe deungon hase nyang leubeh gét nibak ladang atawa lampôh anggô ureuëng nyan keudroe. 6 Soe nyang peukab apui lam ladang jih keudroe óh lheuehnyan apui nyan laju jimeu-éue lam ladang ureuëng laén dan laju tutong sampoe habéh gandom nyang bantimoh atawa geuneude-geuneude gandom nyang ban lheueh teupot, dan ureuëng nyang peukab apui nyan harôh jibri geunantoe rugoe. 7 Miseujih na ureuëng nyang situju jikeubah péng atawa barang nyang meuhareuga. Teuma óh dudoe teunyata barang keuneubah gobnyan jicue lam rumoh ureuëng teumpat jikeubah nyan. Meunyoe ureuëng nyang cue barang nyan meuteumé, ureuëng nyang eue harôh jibayeue duagoe lipat. 8 Teuma meunyoe pancuri nyan hana meuteumé, ureuëng teumpat jikeubah barang nyan harôh teuba u rumoh iébadat, dan disinan ureuëng nyan harôh jimeusumpah bahwa barang nyang jikeubah lé gob di rumoh jihnyan hana jicok. 9 Keuhai tieb-tieb na dakwa-dakwi keuhai hak milék, bah kheuehnyan keuhai leumô, keuleudée, bubiri, peukayan atawa peue mantong nyang gadôh óh lheuehnyan meurumpok lom teuma, ureuëng nyang meungaku barang nyan atra jih ureuëng nyan harôh teuba u rumoh iébadat. Ureuëng nyang geupeugah lé Po teu Allah sibagoe ureuëng nyang meusalah, ureuëng nyan harôh jibayeue dua goe lipat ubak ureuëng po barang nyan. 10 Miseue jih sidroe ureuëng jipeulara leumô, keuleudée, bubiri atawa beulatang laén atra rakan jih sabe keudroe-droe. Óh lheuehnyan beulatang nyang jipeulara nyan maté, luka atawa jireupah lé musoh, padahai hana saksi nyang kalon atra nyan. 11 Lam keuadaan lagée nyan ureuëng nyan harôh jijak u rumoh iébadat disinan jimeusumpah deumi nan TUHAN bahwa jihnyan hana jicue beulatang peulara nyang ka jipeucaya ubak jihnyan. Meunyoe jihnyan biet-biet hana jicue, ureuëng po beulatang nyan harôh jitanggong keudroe ateueh rugoe beulatang jih nyan, dan di ureuëng nyang peulara atra nyan hana peureulée jibayeue. 12 Meunyoe beulatang peulara nyan jicue lé ureuëng laén, dan ureuëng nyang peulara atranyan harôh jibayeue ateueh rugoe ureuëng po atra nyan. 13 Meunyoe beulatang peularanyan jiteugom lé beulatang juwah, ureuëng nyang peulara beulatang nyan harôh jitunyok séueh-séueh tuleueng sibagoe barang bukeuti ubak ureuëng po beulatang nyan. Dan hana peue jibayeue geunantoe rugoe ateueh beulatang nyang jiteugom lé beulatang juwah nyan. 14 Meunyoe sidroe-droe ureuëng jipeupinjam saboh beulatang peulara dan beulatang nyan laju keunong luka atawa maté bak watée ureuëng po atranyan hana bak teumpat teujadi nyan, ureuëng nyang ngui beulatang nyan harôh jibayeue geunantoe rugoe. 15 Teuma meunyoe hainyan teujadi watée ureuëng po beulatang nyan na disinan, ureuëng nyang ngui beulatang nyan hana peureulée jigantoe rugoe. Meunyoe beulatang peulara nyan beulatang teumat gala, ateueh rugoe beulatang nyan ka teutôb ngon upah-upah mat gala." 16 "Soe nyang bujuk sidroe aneuëk dara nyang gohlom meutunangan keu jiéh meusajan ngon jih, ureuëng nyan harôh jibayeue jeunamé dan jimeukawen ngon aneuëk dara nyan. 17 Teuma ayah inong nyan hana jibri aneuëk agam jihnyan jimeukawen ngon si dara nyan, ureuëng agam nyan harôh jibayeue ubak ayah aneuëk inong nyan péng nyang le jih sidub jeunamé meukawen keu sidroe aneuëk dara. 18 Soemantong ureuëng inong nyang buet jih jipeuguna iéleumé sihe ureuëng inong nyan harôh teupoh maté. 19 Ureuëng nyang buet jih jimeujeuhet ngon beulatang ureuëng nyan harôh teupoh maté. 20 Soe mantong nyang jipeuseumah keureubeuen ubak ilah-ilah nyang laén seulaén nibak Ulôn, TUHAN, ureuëng nyang peubuet nyan harôh teuhuköm maté. 21 Bék gata seksa atawa gata peubuet nyang hana ade ateueh ureuëng aséng; ingat kheueh bahwa yohmasa ilée gata pih ureuëng aséng di nanggroe Meusé. 22 Bék peusaneut inong balée atawa aneuëk yatem ngon aneuëk meuntui ban galak droe. 23 Meunyoe gata tapeubuet nyang jeuhet ateueh awaknyan, Ulôn, TUHAN teuma Lôn deungoe awaknyan meunyoe jimeuhôi ngon jilakée tulông ubak Ulôn. 24 Ulôn teuma beungéh dan Ulôn poh maté gata lam mideuen prang, akhéjih bubena peurumoh gata jeuet keu inong balée, dan aneuëk-aneuëk gata jeuet keu aneuëk yatem. 25 Meunyoe gata tapeu-utang péng keu ureuëng gasien nyang na lam bansa Ulôn, bék kheueh gata meubuet lagée ureuëng nyang tunggée utang deungon jilakée bungöng. 26 Meunyoe gata cok bajée jubah ureuëng laén sibagoe jaminan ateueh utang ureuëng nyan, bajée jubah nyan harôh gata jokpulang sigohlom mata uroe jilhob, 27 sabab ija nyan na kheueh atra ureuëng dan hana nyang laén keu ija silimbot. Meunyoe ija nyan hana teujok pulang ubak ureuëng nyan, peu kheueh lom nyang harôh jingui keu ija limbot watée jiéh? Meunyoe ureuëng nyan jimeuhôi sira jilakée tulông ubak Ulôn, hainyan teuma Ulôn deungoe sabab bak Ulôn na gaséh sayang. 28 Bék gata peusumpah Po teu Allah dan bék teuma gata kutôk peumimpén bansa gata. 29 Bak watée nyang ka teupeuteuntée, peuseumah kheueh keu Ulôn siladum nibak hase gandom gata, ié anggô gata dan minyéuk zaiton gata. Jok kheueh ubak Ulôn aneuëk agam gata nyang tuha, 30 meunan cit leumô dan bubiri agam nyang phon lahé. Peubiyeu mantong mandum beulatang nyan tinggai bak nang jih treb jih tujoh uroe, óh lheueh nyan jok kheueh ubak Ulôn bak uroe nyang keulapan. 31 Gata umat Ulôn, sabab nyan kheueh beulatang peue mantong nyang jiteugom lé beulatang juwah, hana jeuet gata pajoh sie beulatang nyan; dan gata jok laju banmandum nyan keu asée-asée."

Keuluaran 23

1 "Bék gata peutabu haba sulet nyang hana beutôi, dan bék gata tulông ureuëng nyang jeuhet nyang jibri keusaksian nyang hana beutôi. 2 Bék jeuet keu ureuëng lagée ureuëng ramé meunyoe awaknyan jipeubuet salah atawa jiseuleweng huköm deungon cara jibri keusaksian nyang hana beutôi. 3 Bék gata bida-bida manusia nibak peukara di kantô mahkamah, bah pih nyang teungoh jipeusidang nyan ureuëng gasien. 4 Meunyoe gata hana teusangka-sangka na gata ngieng leumô atawa keuleudée musoh gata ka sisat, gata ba kheueh lom ubak ureuëng po jih. 5 Meunyoe keuleudée musoh gata nyan rhot sabab brat beuban jih, gata tulông kheueh mangat keuleudée nyan jeuet jidong lom; bék gata tinggai meunan mantong. 6 Peusaneut kheueh ureuëng gasien deungon ade meunyoe ureuëng nyan jijak peugét peukara u kantô mahkamah. 7 Beujiôh kheueh nibak tudohan nyang hana beutôi dan bék na jeuet keusabab ureuëng nyang hana meusalah teuhuköm maté, sabab Ulôn hana galak keu ureuëng nyang jipeubuet buet nyang jeuhet lagée nyan. 8 Bék gata teurimong péng sogok, sabab ngon péng sogok nyan ka teupeujeuet ureuëng laén buta ubak nyang beuna dan jeuet keurugoe ubak ureuëng-ureuëng nyang hana meusalah. 9 Bék gata peusaneut ateueh ureuëng aséng ban galak droe; gata tateupeue pakriban rasa jih jeuet keu ureuëng aséng, sabab yoh masa ilée pih gata jeuet keu ureuëng aséng di nanggroe Meusé." 10 "Nam thon treb jih gata jeuet gata seumula lam ladang gata dan gata pajoh nibak hase ladang nyan. 11 Teuma bak thon nyang keutujoh tanoh nyan harôh gata peubiyeu meunan mantong. Nyang treb jih tujoh thon gata hana jeuet gata peusapat sapeu nyang timoh deungon keudroe jih lam ladang gata. Gata peubiyeu mantong atra nyan jicok lé ureuëng gasien, dan séueh-séueh nyang na mantong tinggai keu beulatang kleut. Dan hai nyang lagée nyan gata peubuet teuma ateueh lampôh anggô dan bak-bak zaiton gata. 12 Nam uroe lam sigoe aleuhat gata jeuet gata meubuet, teuma bak uroe nyang keutujoh gata harôh tapiôh, mangat beulatang peulara gata, namiet-namiet dan ureuëng-ureuëng aséng nyang jimeubuet keu gata jeuet cit jipiôh teuma. 13 Ngieng kheueh banmandum nyang ka lheueh Ulôn peugah ubak gata, bék gata seumah ilah-ilah nyang laén, meunan cit gata teuôh nan mantong nyan pih hana jeuet." 14 "Tieb-tieb thon harôh gata peuna lhée goe peurayaan keu gata horeumat ubak Ulôn. 15 Bak buleuen Abib, bak watée nyang ka teupeuteutab, gata harôh tapeuna peurayaan Ruti Hana Meurago deungon cara nyang ka lheueh Ulôn peurintah ubak gata, sabab lam buleuen nyan gata ka gata tinggai nanggroe Meusé. Bék pajoh ruti nyang meurago treb jih tujoh uroe seumantong peurayaan nyan. Pajan mantong gata jak meuiébadat ubak Ulôn harôh gata ba peuseumahan. 16 Peuna kheueh Khanuri Keumeukoh bak watée gata jipeuphon pot hase nibak ladang gata. Peuna kheueh Khanuri Jambo Ôn bak akhé thon watée gata peusapat hase lampôh anggô dan lampôh boh-boh kayée. 17 Tieb-tieb thon watée teupeuna ban lhée boh khanuri nyan, banmandum ureuëng agam harôh jijak meuiébadat ubak Ulôn, TUHAN Allah gata. 18 Bék gata peuseumah ruti nyang meurago watée gata keureubeuen beulatang peulara keu Ulôn. Gapah beulatang peulara nyang gata keureubeuen keu Ulôn watée peurayaan nyan hana jeuet teutinggai sampoe óh singoh beungoh nyan. 19 Tieb-tieb thon harôh gata ba u baét TUHAN Allah gata gandom nyang phon gata pot. Eungkot sie aneuëk bubiri atawa aneuëk kaméng hana jeuet teutaguen ngon iémom nang jih." 20 "Ulôn teuma Lôn kirém malaikat Lôn leubeh awai nibak gata keu jijak lindong gata watée gatajak dan jiba gata ubak teumpat nyang ka Ulôn keubah. 21 Simak kheueh dan taát kheueh ubak Gobnyan. Bék brontak bak malaikat nyan sabab jihnyan na kheueh utosan Lôn, dan jihnyan hana teuma jipeuamphon tieb-tieb nyang salah nyang gata peubuet. 22 Meunyoe gata taát ubak jihnyan dan gata peubuet peue-peue mantong nyang Ulôn peurintah, Ulôn teuma Lôn muprang Lôn lawan banmandum musoh gata. 23 Malaikat Ulôn jijak leubeh awai nibak gata dan jiba gata u nanggroe bansa Amori, Het, Feris, Kanaan, Hewi dan Yebus, dan awaknyan Ulôn peubinasa. 24 Bék gata seumah patong-patong peulindong awaknyan dan bék gata iébadat lagée awaknyan peubuet. Peuhanco kheueh bubena patong-patong peulindong awaknyan dan peupatah laju bubena taméh-taméh batée nyang awaknyan peugét keu teumpat jih iébadat. 25 Meunyoe gata taseumah Ulôn, TUHAN Allah gata, gata teuma Ulôn bri beureukat deungon peunajoh dan ié jieb, dan sigala peunyakét teuma Lôn peujiôh nibak gata. 26 Lam nanggroe gata hana ureuëng inong nyang rhot aneuëk atawa inong balui. Gata Ulôn bri umu nyang panyang. 27 Bansa-bansa nyang gata teuka nyan teuma Ulôn peujeuet jiteumakot ubak Ulôn; awaknyan teuma Lôn peujeuet keukaru kráb kriéb hana meuteuntée; banmandum musoh gata teuma jisurot sira jiplueng. 28 Bubena musoh gata teuma Ulôn peucrebre hana meuteuntée, dan bansa-bansa Hewi, Kanaan dan bansa Het Ulôn use dikeue gata mangat gata jeuet tamaju. 29 Awaknyan hana Ulôn use sigoguih lam sithon, mangat tanoh nyan hana teulanta, dan beulatang juwah hana meuraja lela. 30 Awaknyan teuma Lôn use bacut-bacut, sampoe ureuëng-ureuëng gata ka seb jai jiduek nibak tanoh nyan. 31 Bataih-bataih nanggroe gata teuma Lôn peuteutab phon nibak Lhok Akaba sampoe ubak Krueng Efrat, dan nibak Laôt Teungoh sampoe ubak padang pasi. Keu gata teuma Ulôn bri kuasa ateueh peunduduek nanggroe nyan, sampoe awaknyan hase gata use watée gata maju tareubot tanoh nyan. 32 Bék gata peugét janji ngon ureuëng-ureuëng nyan atawa ngon ilah-ilah awaknyan. 33 Bék gata peubiyeu ureuëng-ureuëng nyan jitinggai di nanggroe gata, mangat gata bék gata seumah ilah-ilah awaknyan dan meudesya teuhadab Ulôn. Meunyoe gata taseumah ilah-ilah awaknyan, gata ka rhot lam peurangkab mawöt."

Keuluaran 24

1 Óh lheueh nyan TUHAN meufeureuman ubak Nabi Musa, "ék kheueh laju keu gata jak meuhadab ubak Ulôn, gata meusajan ngon Nabi Harun, Nadab dan Abihu, dan tujoh ploh droe peumimpén bansa, dan sujut kheueh laju taseumah Ulôn rot jiôh. 2 Dan gata keudroe nyang jeuet peurab ubak Ulôn. Nyang laén hana jeuet jipeurab toe ngon Ulôn, dan rakyat sagai-sagai bék jipeutoe ubak gunong nyoe." 3 Óh lheuehnyan Nabi Musa laju geujak sira geupeumaklum habanyan ubak banmandum bansanyan banmandum peurintah dan atoran TUHAN. Awaknyan mandum jijaweueb ngon haba nyang sipeue kheun, "Kamoe kamoetem peubuet banmandum nyang geupeugah lé TUHAN." 4 Óh lheueh nyan Nabi Musa laju geutuléh banmandum peurintah TUHAN. Óh singoh nyan banbeungoh that-that, laju geupeudong saboh miseubah deungon dua blaih boh tugu bak gaki gunong nyan; tieb-tieb saboh tugu sibagoe waki saboh sukée bansa Israel. 5 Óh lheuehnyan Nabi Musa laju geu-utus na meupadubdroe ureuëng muda, dan awaknyan laju jipeuseumah keureubeuen nyang teutot keu TUHAN dan jisie teuma na meupadub boh leumô keu keureubeuen peudamé. 6 Siladum nibak darah leumô nyan laju geucok lé Nabi Musa laju geurô lam ayan-ayan. Siladum teuk laju geurô ateueh miseubah. 7 Óh lheuehnyan laju geucok kitab peujanjian nyang na teutuléh peurintah-peurintah TUHAN, dan laju geubeuet ngon su nyang meuleungkeung keu bansa nyan. Kheun awaknyan, "Kamoe meutem kamoe taát ubak TUHAN dan kamoe peubuet peue-peue mantong nyang geupeurintah lé Gobnyan." 8 Óh lheuehnyan Nabi Musa laju geucok darah nyang na lam ayan-ayan nyan dan laju geureutek ateueh rakyat. Kheun gobnyan, "Darah nyoe sibagoe teupeukong peujanjian nyang ka geu ikat lé TUHAN deungon gata ngon dasai peue-peue nyang geupeurintah lé Gobnyan." 9 Óh lheuehnyan Nabi Musa, Nabi Harun, Nadab dan Abihu dan bantujoh ploh droe peumimpén nyan laju geupeurab ubak gunong, 10 dan awaknyan laju jingieng Po teu Allah Israel teungoh geudong ateueh sisuatu lagée aleue nyang teupeugét nibak batée nilam, dan ijo lagée langét nyang drang. 11 Banmandum peumimpén Israel nyan ka jikalon Po teu Allah; bahpi meunan awaknyan hana geupeubinasa. Óh lheuehnyan awaknyan laju jimakheun ngon ji-jieb ié. 12 Feureuman TUHAN ubak Nabi Musa, "Gata jak kheueh ubak Ulôn di ateueh gunong. Disinan teuma Ulôn bri ubak gata dua boh batée nyang ka Lôn tuléh ngon banmandum huköm Lôn. Banmandum huköm nyan Ulôn bri sibagoe peungajaran keu bansa nyan." 13 Dan Nabi Musa dan Yosua peumbantu gobnyan meusiab-siab dan Nabi Musa laju geuteungoh ateueh gunong teumpat tinggai TUHAN nyan. 14 Nabi Musa ka geupeusan ubak banmandum peumimpén Israel, "Gata preh kheueh bak teumpat khimah-khimah nyoe sampoe kamoe meugisa keunoe. Nabi Harun ngon Hur na meusajan gata disinoe. Soe mantong nyang na masa-alah, jeuet jak meuhadab ubak awaknyan keu teupeuseuleusoe." 15 Nabi Musa laju geuteungoh ateueh Gunong Sinai, dan gobnyan laju jipeupayong lé sigumpai awan. 16 Cahya TUHAN teuka laju geutreun nibak ateueh gunong nyan dan lé ureuëng Israel jingieng atranyan lagée apui nyang hu ateueh pucak gunong. Nam uroe treb jih awan jipeupayong gunong nyan, dan bak uroe nyang keutujoh TUHAN laju geuhôi Nabi Musa nibak lam awan nyan. 18 Dan Nabi Musa laju geuteungoh sampoe gobnyan ka geutamong lam awan nyan. Peuet ploh uroe peuet ploh malam Nabi Musa tinggai disinan.

Keuluaran 25

1 Feureuman TUHAN ubak Nabi Musa, 2 "Gata yue kheueh ubak ureuëng Israel mangat jeuet jiba peuseumahan keu Ulôn. Soemantong nyang meugrak até jih, harôh jiba peuseumahan 3 nyang jiba nyan na kheueh: méuh, pirak dan peurunggu; 4 ija lineun nyang halôh, ija wol ijo, ungu dan mirah, ija nyang teupeugét nibak bulée kaméng, 5 kulét bubiri agam nyang wareuna mirah, kulét halôh dan kayée akasia, 6 minyéuk keu panyöt, mubagoe jeuneh reumpah-reumpah keu minyéuk upacara dan keu dupa mangat bée, 7 mubagoe rupa batée peumata keu teupeungui nibak efod dan sinutôb dada Imeum Agong. 8 Gata yue kheueh ubak bansa nyan mangat jipeugét saboh khimah keu Ulôn, mangat Ulôn jeuet Lôn tinggai di lamkawan awaknyan. 9 Khimah-khimah ngon peuleungkab jih harôh awaknyan peugét seucara teureuncana nyang teuma Ulôn tunyok ubak gata." 10 "Gata peugét kheueh laju saboh peuto nibak bak kayée akasia nyang panyang jih 110 seuntimetée, luwah dan manyang jih maséng-maséng 66 seuntimetée. 11 Gata seupôh laju bagian dalam ngon bagian luwa jih ngon méuh aseuli dan gata peugét teuma bingkée jih nibak méuh. 12 Keu kayée ngon gulam peuto jih, gata peugét laju peuet boh gleueng méuh dan gata sangkot laju bak ban peuet boh gaki jih, dua boh gleueng nibak ban dua boh sagoe jih. 13 Meunan cit kayée ngon gulam atranyan gata peugét nibak kayée akasia dan gata seupôh cit deungon méuh, 14 dan kayée geunulam nyan gata peutamong laju lam gleueng-gleueng nyan nibak tieb-tieb sagoe peuto nyan. 15 Kayée geunulam nyan bah teutab na lam gleueng-gleueng nyan, dan hana jeuet teusuet. 16 Dan lam peuto nyan gata keubah laju bandua neuk batée deungon peurintah-peurintah nyang teuma Ulôn peugah ubak gata. 17 Gata peugét kheueh laju sinutôb peuto nyan nibak méuh aseuli, nyang panyang jih 110 seuntimetée dan luwah jih 66 seuntimetée. 18 Dan gata peugét teuma dua boh gamba kerub nyang teupeugét nibak méuh teuteumpeun, 19 saboh nibak tieb-tieb ujong sinutôb peuto nyan. Mandua boh gamba kerubim nyan harôh gata peujeuet saboh bagian ngon sinutôb jih, 20 dan teupeuduek saléng meuhadab keue deungon sayeub nyang na meureuntang ateueh peuto nyan. 21 Keubah kheueh laju bandua neuk batée lam peuto nyan dan gata pasang kheueh laju sinutôb di ateueh nyan. 22 Nibak teumpat nyan Ulôn teuma meurumpok ngon gata, dan nibak ateueh sinutôb nyan, lamkawan mandua kerubim nyan, keu gata Ulôn bri huköm-huköm Lôn keu bansa Israel." 23 "Gata cok laju kayée akasia dan gata peugét saboh meuja nyang panyang jih 88 seuntimetée, luwah jih 44 seuntimetée, dan manyang jih 66 seuntimetée. 24 Óh lheuehnyan gata seupôh laju ngon méuh aseuli dan gata pasang teuma saboh bingkée méuh bansikeulileng. 25 Gata peugét teuma binéh meuja nyang luwah jih 7,5 seuntimetée, dan gata peugét bataih méuh bansikeulileng binéh nyan. 26 Gata peugét teuma peuet boh gleueng méuh óh lheuehnyan gata pasang laju bak ban peuet boh sagoe nibak gaki jih, rab ngon binéh jih. 27 Gleueng nyan ngon peuteun kayée geunulam mangat meuja nyan hase teugulam. 28 Kayée ngon gulam nyan harôh teupeugét nibak kayée akasia dan teuseupôh teuma ngon méuh. 29 Peugét kheueh teuma pireng-pireng, cangkie-cangkie, keundi-keundi dan cambông-cambông keu ngon peuseumah ié anggô. Banmandum peuleungkap meuja nyan harôh teupeugét nibak méuh aseuli. 30 Meuja nyan harôh teukeubah dikeue Peuto Peujanjian, dan ateueh meuja nyan harôh na teukeubah ruti peuseumahan." 31 "Peugét kheueh gaki panyöt nibak méuh aseuli. Lapek ngon teumpat mat jih harôh teupeugét nibak méuh nyang teuteumpah; bungöng-bungöng hiasan, meunan cit deungon kuncôb dan keulopak jih harôh meusaboh ngon lapek dan teumpat mat jih. 32 Nibak teumpat mat nyan harôh teupeugét nam boh cabeueng, lhée boh cabeueng nibak tieb-tieb binéh jih. 33 Bak tieb-tieb cabeueng harôh teupeugét hiasan lhée boh bungöng badam deungon kuncôb dan keulopak jih. 34 Nibak teumpat mat jih harôh teupeugét hiasan peuet boh bungöng badam deungon kuncôb dan keulopak jih. 35 Dimiyueb tieb-tieb pasang cabeueng nyan harôh teupeugét saboh kuncôb. 36 Banmandum gaki panyöt nyan deungon kuncôb-kuncôb dan cabeueng-cabeueng jih harôh teupeugét nibak sikrek méuh aseuli nyang teuteumpa. 37 Peugét kheueh tujoh boh panyöt nibak gaki panyöt nyan dan pasang kheueh beumeusigak sampoe cahya jih muble ukeue. 38 Peugét kheueh alat keu teupeugleh dah panyöt dan talam jih pih harôh teupeugét nibak méuh aseuli. 39 Peuguna kheueh lhée ploh limong kilogram méuh aseuli keu teupeugét gaki panyöt nyan deungon banmandum peuleungkapan jih. 40 Jaga kheueh mangat gaki panyöt teupeugét paih lagée cuntoh nyang Ulôn tunyok ubak gata di ateueh gunong nyoe."

Keuluaran 26

1 "Peugét kheueh Khimah keu Ulôn nibak siploh ôn ija lineun nyang halôh, teuteunun ngon ija wol ijo, ungu dan mirah. Cob kheueh ija nyan ngon gamba kerub. 2 Tieb-tieb siôn ija harôh saban ukoran jih, panyang jih dua blah metée dan luwah jih dua metée. 3 Limong ôn ija harôh teusambat jeuet jih keu saboh layeue, dan nyang limong ôn teuk lagée nyan cit teupeugét. 4 Peugét kheueh ceunawiét ija ijo nibak binéh bandua boh layeue nyan, 5 limong ploh boh ceunawiét nibak maséng-maséng layeue. 6 Peugét kheueh limong boh sinangkot méuh keu ngon sambat bandua boh layeue nyan mangat hase teupeusaboh. 7 Keu bubong Khimah nyan peugét kheueh teuma siblaih ôn ija nibak bulée kaméng. 8 Tieb-tieb siôn museuti saban sinuko jih, panyang jih lhée blaih metée dan luwah jih dua metée. 9 Limong ôn harôh teusambat jeuet keu saboh layeue, dan nam ôn nyang laén nyan meunan cit teupeugét. Sinambat nyang keunam harôh teulipat dua guna jih keungon tob bagian keue Khimah. 10 Pasang kheueh limong ploh boh ceunawiét nibak binéh layeue nyang phon dan limong ploh boh ceunawiét nibak binéh layeue nyang keu dua. 11 Peugét kheueh teuma limong ploh boh ceunawiét nibak peurunggu dan lhat laju ubak layeue nyan mangat jeuet bandua boh layeue nyan hase teupeusaboh jeuet keu bubong Khimah. 12 Siteungoh nibak sikhan ija nyang leubeh nyan na kheueh keu ngon tôb bagian likot Khimah. 13 Ija leubeh nyang luwah jih limong ploh seuntimetée nyang na bansipanyang Khimah bah kheueh teupeubiyeu mantong teutôb nibak binéh Khimah nyan. 14 Peugét kheueh dua boh sinutôb keu bagian keu luwa Khimah, siôn nibak kulét bubiri nyang teuboh wareuna mirah dan saboh teuk nibak kulét halôh. 15 Peugét kheueh rungka-rungka Khimah nyang teudong cot nibak kayée akasia. 16 Tieb-tieb rungka manyang jih peuet metée dan luwah jih 66 seuntimetée. 17 Nibak tieb-tieb rungka na dua boh patok nyang sipasang, ngon nyan rungka-rungka nyan hase teusambat saboh ngon nyang laén. 18 Keu bagian seulatan Khimah, peugét kheueh dua ploh boh rungka, 19 deungon peuet ploh boh lapek jih nyang teupeugét nibak pirak, dua boh dimiyueb keu tieb-tieb rungka keu bandua boh patok jih nyan. 20 Keu bagian utara Khimah nyan, peugét kheueh dua ploh boh rungka 21 deungon peuet ploh boh lapek nyang teupeugét nibak pirak, dua boh dimiyueb tieb-tieb rungka. 22 Keubagian likot Khimah siblaih u barat, peugét kheueh nam boh rungka 23 dan dua boh rungka keu ujong-ujong jih. 24 Rungka-rungka ujong nyan harôh teupeu hubong nibak bagian gaki jih, laju trok ubak bagian ateueh jih. Bandua boh rungka nyang meubantuek sudut jihnyan bah kheueh teupeugét ngon cara nyan. 25 Ngon nyan banmandum nyan na lapan boh rungka deungon nam blaih boh lapek pirak, dua boh dimiyueb tieb-tieb rungka. 26 Peugét kheueh limong blaih boh kayée linteung nibak kayée akasia, limong boh keu rungka-rungka nibak saboh binéh Khimah, 27 limong boh keu binéh nyang laén, dan limong boh teuk keu bagian binéh Khimah siulikot siblaih ubarat. 28 Kayée lineung bagian teungoh harôh teupasang nyang manyang jih siteungoh rungka, nibak ujong trok ubak ujong Khimah nyan. 29 Rungka Khimah dan kayée-kayée linteung nyan harôh teuseupôh ngon méuh. Gleung-gleung keu ngon peuteun kayée nyan harôh teupeugét nibak méuh. 30 Peudong kheueh Khimah nyan meunurot reuncana nyang Ulôn tunyok ubak gata di ateueh gunong nyoe. 31 Peugét kheueh saboh ija pintoe nibak ija lineun halôh nyang teuteunun ngon ija wol ijo, ungu dan mirah. Cob sulam kheueh ija nyan deungon gamba kerub. 32 Gantung laju ija pintoe nyan nibak peuet boh taméh kayée akasia nyang teuseupôh ngon méuh deungon ceunawiét méuh dan teupasang ateueh peuet boh keunaleueng pirak. 33 Peuduek laju ija nyan dimiyueb deretan ceunawiét nibak bubong Khimah. Dilikot ija nyan harôh teukeubah Peuto Peujanjian nyang meuasoe bandua batée nyan. Ija nyan teupeu jarak Ruweueng Suci ngon Ruweueng Mahasuci. 34 Peuduek kheueh laju sinutôb Peuto Peujanjian diateueh peuto nyan. 35 Meuja teumpat teubri peuseumahan harôh teukeubah diluwa Ruweueng Mahasuci nibak bagian utara, dan gaki panyöt nibak bagian seulatan lam Khimah nyan. 36 Peugét kheueh tirée keu pintoe Khimah nibak ija lineun halôh nyang teuteunun ngon ija wol ijo, ungu dan mirah, teuhias deungon cob sulam. 37 Keu tirée nyan harôh teupeugét limong boh taméh nibak kayée akasia nyang teuseupôh ngon méuh dan teupeukab ngon limong boh ceunawiét méuh. Peugét kheueh limong boh keunaleueng nibak peurunggu keu taméh-taméh nyan."

Keuluaran 27

1 "Peugét kheueh laju saboh miseubah nyang teupeugét nibak bak kayée akasia. Hi jih peuet sagoe timang, panyang jih dan luwah jih maséng-maséng 2,2 metée dan manyang jih 1,3 metée. 2 Nibak tieb-tieb bagian ateueh jih harôh teupeugét lungkée-lungkée nyang meusaboh ngon miseubah. Banmandum nyan harôh teulapek ngon peurunggu. 3 Peugét kheueh kuali-kuali, sudok, cambông-cambông, geurupu-geurupu dan teumpat apui. Banmandum peuleungkapan nyan harôh teupeugét nibak peurunggu. 4 Peugét kheueh teuma kawat teumanyuem nibak peurunggu dan pasang kheueh teuma peuet boh gleueng nibak kayée geunulam nibak ban peuet boh sagoe bagian miyueb. 5 Manyang jih kawat nyang teumanyuem nyan na kheueh siteungoh nibak manyang miseubah. Kawat nyang teumanyuem nyan harôh teupalet nibak miseubah bagian miyueb. 6 Peugét kheueh dua boh kayée geunulam nibak kayée akasia nyang meulapek ngon peurunggu, 7 dan peutamong laju u dalam gleueng-gleueng nibak mandua boh binéh miseubah watée teugulam miseubah nyan. 8 Peugét kheueh miseubah nyan nibak papeuen dan meuruhuéng bagian dalam jih, meunurot reuncana nyang Ulôn tunyok ubak gata di ateueh gunong nyoe." 9 "Peugét kheueh peulataran ban sikeulileng Khimah Ulôn nyang teupageue deungon layeue nibak ija lineun halôh. Nibak bagian seulatan, layeue nyan panyang jih 44 metée, 10 teupeuteun bak dua ploh boh taméh peurunggu, maséng-maséng deungon lapek perunggu teuma, dan ceunawiét meunan cit deungon sinangkot jih teupeugét nibak pirak. 11 Meunan cit nibak bagian utara gata peugét lagée nyan teuma. 12 Bagian siubarat, layeue nyan panyang jih 22 metée, deungon siploh boh taméh dan siploh boh keunaleueng. 13 Nibak bagian utimu, nyang na pintoe jih, panyang layeue nyan 22 metée. 14 Siblaih wie ngon blah uneuen pintoe nyan harôh teupasang layeue, maséng-maséng panyang jih 6,6 metée deungon lhée boh taméh lam lhée boh keunaleueng. 16 Keu pintoe jih harôh teupeungui tirée nyang panyang jih 9 metée nibak lineun nyang halôh nyang teucôb ngon ija wol ijo, ungu dan mirah, dan teuhias ngon côb sulam. Keu ngon peuteuen ija pintoe nyan harôh teupeugét peuet boh taméh ngon peuet boh keunaleueng. 17 Banmandum taméh nyang na bansikeulileng leuen nyan harôh teusambat saboh ngon nyang laén deungon ceunawiét pirak; ceunawiét jih harôh teupeugét nibak pirak dan keunaleueng jih nibak peurunggu. 18 Layeue nyang na bansikeulileng peulataran nyan panyang jih 44 metée, luwah jih 22 metée dan manyang jih 2,2 metée. Layeue jih harôh teupeugét nibak ija lineun nyang halôh dan keunaleueng jih nibak peurunggu. 19 Banmandum peuleungkapan nyang teupeuguna lam Khimah, banmandum pancang keu Khimah dan keu layeue nyan harôh teupeugét nibak peurunggu." 20 "Gata yue kheueh ureuëng Israel mangat jiba minyéuk zaiton nyang aseuli dan nyang paleng jroh keu panyöt lam Khimah Ulôn mangat jeuet teupeukab dan hu sabe. 21 Nabi Harun dan aneuëk-aneuëk jihnyan harôh ji urôh panyöt nyan phon seupôt sampoe beungoh bak teumpat Ulôn teuka, diluwa ija nyang teugantung di keue Peuto Peujanjian. Peurintah nyan harôh jipeubuet keu siumu masa lé ureuëng Israel dan keuturonan jih."

Keuluaran 28

1 "Jakhôi kheueh laju Nabi Harun aduen gata meusajan ngon aneuëk-aneuëk jih Nadab, Abihu, Eleazar dan Itamar, dan peukhusos kheueh awaknyan mangat jeuet jilayani Ulôn sibagoe imeum. 2 Peugét kheueh peukayan imeum keu Nabi Harun, mangat jih nyan deuh leubeh teuhoreumat. 3 Jakhôi kheueh banmandum tukang ceumeucob nyang ka Ulôn bri keu-ahlian. Gata yue kheueh ubak awaknyan mangat jicob peukayan Nabi Harun mangat jeuet jihnyan teupeukhusos keu jipeutimang Ulôn sibago imeum. 4 Gata yue teuma bak awaknyan mangat jipeugét tutôb dada, efod, bajée jubah, bajée keumeja nyang teucôb sulam, seureuban dan talo keuiéng. Peukayan Imeum nyan harôh awaknyan peugét keu Nabi Harun aduen gata dan aneuëk-aneuëk jihnyan mangat hase jipeutimang Ulôn sibagoe imeum. 5 Peukayan nyan harôh awaknyan peugét nibak ija wol ijo, ungu dan mirah, beuneueng méuh dan lineun halôh. Seulaén nibak nyan efod harôh teuhias ngon côb sulam. 7 Dua krek talo bahô ngon ikat efod nyan harôh teucôb nibak binéh jih. 8 Saboh talo keuiéng, ija teunun halôh nyang teupeugét nibak bahan nyang saban atranyan harôh teucôb nibak efod nyan mangat jeuet saboh bagian. 9 Cok kheueh laju dua neuk batée deulima. Mita kheueh sidroe pandée méuh nyang ahli ji uke nibak batée nyan nan-nan mandua blaih droe aneuëk Nabi Yakub meunurot urotan umu jih, nam boh nan nibak tieb-tieb batée. Dan óh lheuehnyan mandua neuk batée peumata nyan harôh teupasang lam bingkée méuh dan teukeubah bak taloe bahô efod sibagoe tanda peuingat ubak bandua blaih boh sukée Israel. Deungon cara lagée nyan Nabi Harun ka geuba nan awaknyan bak bahô gobnyan, sampoe Ulôn, TUHAN, sabe Lôn ingat keu awaknyan. 13 Seulaén bandua boh bingkée méuh nyan 14 harôh teuma teupeugét dua krek rante nyang teupeugét nibak méuh aseuli nyang teuputa lagée talo, keu teupasang nibak bingkée méuh nyan." 15 "Peugét kheueh laju saboh sinutôb dada keu Imeum Agong keu jingui bak watée jihnyan keuneuk jiteupeue peue keuheundak Po teu Allah. Bahan dan sinulam sinutôb dada nyan harôh saban ngon bahan dan sinulam efod. 16 Hi jih peuet sagoe dan teulipat dua, panyang ngon luwah jih maséng-maséng 22 seuntimetée. 17 Pasang kheueh peuet boh baréh batée peumata nibak sinutôb dada nyan. Bak baréh nyang phon batée deulima, topas dan baiduri sepah. 18 Nibak baréh nyang keudua batée zamrod, batée nilam dan intan. 19 Nibak baréh nyang keu lhée batée lazuardi, batée akik dan batée keucubong. 20 Nibak baréh nyang keupeuet batée pirus, batée yakut dan batée ratna ceumpaka. Bandua blaih peumata nyan harôh teu ikat ngon méuh. 21 Nibak tieb-tieb peumata harôh teu-uke sidroe nan nyang na lamkawan aneuëk Nabi Yakub sibagoe tanda peuingat keu sukée-sukée Israel. 22 Peugét kheueh teuma keu sinutôb dada nyan dua kréek rante nibak méuh aseuli nyang teuputa lagée taloe. 23 Peugét kheueh teuma dua boh gleueng méuh dan pasang kheueh laju bak mandua ujong ateueh sinutôb dada nyan 24 dan óh lheuehnyan peutamong laju bandua kréek rante méuh nyan u dalam gleueng-gleueng nyan. 25 Bandua kréek ujong laén nibak rante nyan harôh teuikat nibak bandua boh bingkée, mangat sinutôb dada nyan jeuet teusambat ngon bagian keue talo bahô efod. 26 Óh lheuehnyan peugét kheueh teuma dua boh gleueng méuh nyang laén, dan peukab kheueh laju nibak sinutôb dada nyan nibak ujong miyueb bagian dalam nyang keunong efod. 27 Óh ka lheuehnyan, peugét kheueh teuma dua boh gleueng méuh nyang laén dan pasang kheueh laju nibak bagian keue mandua boh talo bahô efod nyang to ngon sinambat agak u miyueb, bak bagian ateueh talo keuiéng nibak teunun halôh nyan. 28 Gleueng sinutôb dada harôh teuhubong deungon talo ijo nyang na nibak gleueng efod mangat sinutôb dada nyan teutab na di ateueh talo keuiéng dan hana leukang. 29 Bak watée Nabi Harun geutamong ubak teumpat nyang suci, gobnyan harôh geuba nan-nan nibak sukée-sukée Israel nyang na teu-uke nibak sinutôb dada jihnyan, mangat Ulôn, TUHAN, sabe Lôn ingat keu umat Lôn. 30 Peuduek kheueh Urim dan Tumim didalam sinutôb dada nyan keu jingui lé Nabi Harun meunyoe jihnyan jijak meuhadab ubak Ulôn. Bak saát-saát nyang lagée nyan jihnyan harôh jipeuguna sinutôb dada, mangat jihnyan jeuet jiteupeue keuheundak Ulôn keu umat Israel." 31 "Bajée jubah nyang teungui ateueh efod banmandum teupeugét nibak ija wol ijo. 32 Ruhuéng takue jih teupeukong ngon pita teununan mangat hana bagaih teupriek. 33 Bansikeulileng miyueb jih harôh teupeugét hiasan lagée boh deulima nibak wol ijo, ungu dan mirah, teupeuseulang seuleng ngon boh teng-tóng nyang teupeugét nibak méuh. 35 Bajée jubah nyan harôh jingui lé Nabi Harun bak watée jihnyan jimeutugaih sibagoe imeum. Bak watée jihnyan harôh jijak ubak Ulôn lam Kama Suci atawa jitinggai teumpat nyan, teuma teudeungoe su boh teng-tóng nyan, mangat jihnyan bék maté. 36 Peugét kheueh saboh hiasan nibak méuh aseuli dan uke laju ngon haba lagée nyoe 'Teupeu khusos keu TUHAN'. 37 Ikat laju nyan nibak seureuban ngon talo ijo. 38 Piasan méuh nyan harôh jipasang lé Nabi Harun bak dho jih mangat jeuet Ulôn, TUHAN, Lôntem teurimong banmandum nyang jipeuseumah nyang jiba lé ureuëng Israel keu Ulôn, bah kheueh watée jiba nyang jipeuseumah nyan jihnyan ka jipeubuet salah. 39 Bajée keumeja Nabi Harun harôh teuteunun ngon ija lineun nyang halôh. Meunan cit peugét cit teuma saboh seureuban nibak ija lineun halôh dan talo keuiéng nyang teusulam. 40 Peugét kheueh bajée keumeja, talo keuiéng dan seureuban keu aneuëk-aneuëk Nabi Harun mangat awaknyan deuh teuhoreumat. 41 Peungui kheueh peukayan nyan bak Nabi Harun syedara gata dan aneuëk-aneuëk jihnyan. Bôh kheueh minyéuk awaknyan ngon minyéuk zaiton; deungon na lagée nyan awaknyan ka teubaiát dan ka teupeukhusos jihnyan keu jiuseuha Ulôn sibagoe imeum. 42 Dan peugét kheueh teuma keu awaknyan sileuweue paneuk nyang teupeugét nibak ija lineun, panyang jih nibak keuiéng sampoe trok ubak pha keu teutôb bagian tuboh nyang hana patot teukalon. 43 Sileuweuenyan harôh sabe awaknyan ngui bak watée jitamong lam Khimah Ulôn atawa watée jipeurab bak miseubah watée jipeubuet upacara iébadat sibagoe imeum di Kama Suci, mangat awaknyan hana maté sabab ka teungieng bagian tuboh awaknyan nyang hana patot teukalon. Atoran nyang lagée nyan teutab meulaku ateueh Nabi Harun dan keuturonan jih."

Keuluaran 29

1 "Meunoe kheueh cara jih teubaiát Nabi Harun dan aneuëk-aneuëk jih mangat jihnyan jeuet jilayani Ulôn sibagoe imeum. Cok kheueh laju saboh leumô agam nyang mantong muda dan dua boh bubiri agam nyang hana meucupa. 2 Nibak teupông teurigu nyang paleng get, peugét kheueh adonan hana meurago. Siladum nibak teupông nyang ka teulawok nyan harôh teupeugét ruti deungon minyéuk zaiton, siladum teuk bék teuboh minyéuk, dan nyang leubeh teupeugét kuwe nyang teusiliek ngon minyéuk. 3 Pasoe kheueh lam raga dan peuseumah kheueh atranyan keu Ulôn meusigoe ngon keureubeuen leumô agam dan bandua boh bubiri agam. 4 Gata yue kheueh ubak Nabi Harun dan aneuëk-aneuëk jihnyan jijak ubak babah pintoe Khimah Ulôn sira jipeumanö droe. 5 Peungui kheueh peukayan imeum ubak Nabi Harun: bajée panyang jaroe, efod, bajée jubah nyang teutôb ateueh efod, sinutôb dada dan talo keuiéng. 6 Peuseuôn kheueh seureuban ateueh ulée jihnyan dan samek kheueh bak seureuban nyan piasan méuh deungon ukeran 'Teupeukhusos keu TUHAN'. 7 Óh lheuehnyan cok teuma minyéuk upacara, rô kheueh laju ateueh ulée jih dan boh kheueh minyéuk ateueh jihnyan. 8 Óh lheuehnyan, yue teuma aneuëk-aneuëk jihnyan jiteuka dan peungui bajée panyang jaroe 9 ngon talo keuiéng nibak jih nyan, óh lheuehnyan peuseuôn kheueh seureuban ateueh ulée awaknyan. Meunan kheueh cara jih teupeubaiát Nabi Harun dan aneuëk-aneuëk jih. Awaknyan dan keuturonan jih harôh jilayani Ulôn sibagoe imeum keu siumu masa. 10 Óh lheuehnyan leumô agam nyan harôh gata ba ukeue Khimah Ulôn. Nabi Harun dan aneuëk-aneuëk jihnyan harôh jikeubah jaroe ateueh ulée beulatang nyan. 11 Sie kheueh laju leumô agam nyan dikeue Ulôn, nibak babah pintoe Khimah Ulôn. 12 Cok kheueh laju siladum nibak darah leumô nyan dan gata siliek laju ngon jaroe gata nibak lungkée-lungkée miseubah. Darah nyang leubeh nyan harôh gata rô ubak bagian miyueb miseubah. 13 Óh lheuehnyan gata cok kheueh banmandum gapah nyang teutôb ateueh asoe pruet jih, bagian nyang paleng gét nibak até dan bandua boh kitong ngon gapah jih dan gata keubah banmandum nyan ateueh miseubah dan gata tot kheueh laju sibagoe peuseumahan keu Ulôn. 14 Asoe jih, kulét jih dan pruet nibak leumô agam nyan harôh teutot diluwa khimah-khimah. Nyan kheueh peuseumahan keu teupeu amphon banmandum desya Imeum-imeum. 15 Óh lheuehnyan cok kheueh laju saboh nibak bubiri agam nyan. Nabi Harun dan aneuëk-aneuëk jihnyan harôh jipeuduek jaroe awaknyan ateueh ulée beulatang nyan. 16 Dan sie kheueh laju beulatang nyan, cok laju darah jih dan reutek laju nibak ban peuet boh sagoe miseubah nyan. 17 Bubiri agam nyan harôh teusie-sie. Asoe pruet dan pha jih harôh teu rhah dan teupeuduek ateueh ulée jih meunan cit ateueh sie-sie nyang laén. 18 Peuseumah kheueh laju banmandum bubiri agam nyan ateueh miseubah keu keureubeuen nyang teutot. Bée keureubeuen nyang mangat nyan lumpah that galak até Ulôn. 19 Cok teuma bubiri agam nyang saboh teuk, na kheueh bubiri agam keu upacara peubaiát. Gata yue kheueh ubak Nabi Harun dan aneuëk-aneuëk jihnyan mangat jipeuduek jaroe jih ateueh ulée beulatang nyan. 20 Óh lheueh nyan sie laju bubiri agam nyan, gata cok bacut darah beulatang nyan dan siliek laju bak ôn geulinyueng Nabi Harun dan aneuëk-aneuëk jih, nibak nang jaroe uneuen dan nang gaki uneuen awaknyan. Darah nyang na mantong leubeh nyan harôh gata siram ateueh ban peuet boh sagoe miseubah nyan. 21 Meunan cit gata cok laju bacut darah nyang na ateueh miseubah dan bacut minyéuk upacara, dan reutek kheueh ateueh Nabi Harun dan aneuëk-aneuëk jihnyan meunan cit ateueh peukayan awaknyan. Deungon cara lagée nyan Nabi Harun dan aneuëk-aneuëk jihnyan meunan cit deungon peukayan awaknyan ka teupeukhusos keu Ulôn. 22 Cok kheueh teuma gapah bubiri agam nyan, ikue jih nyang meugapah, lapeh gapah nibak asoe pruet jih, bagian nyang paleng gét nibak até jih, ban dua boh kitong deungon gapah jih, dan pha uneuen beulatang nyan. 23 Nibak raga ruti nyang ka teupeuseumah keu Ulôn, cok kheueh saboh ruti nibak tieb-tieb macam: saboh nyang na teuboh minyéuk zaiton dan saboh teuk nyang hana teuboh minyéuk, meunan cit saboh kuwe. 24 Peuduek kheueh laju banmandum peunajoh nyan lam jaroe Nabi Harun dan jaroe aneuëk-aneuëk jihnyan dan gata yue kheueh bak awaknyan mangat jitunyok ubak Ulôn sibagoe peuseumahan nyang teubri. 25 Óh lheuehnyan cok kheueh laju ruti nyan nibak awaknyan dan tot laju ateueh miseubah, ateueh keureubeuen nyang teutot nyan. Bée keureubeuen nyang mangat nyan lumpah that galak até Ulôn. 26 Cok kheueh teuma dada bubiri agam nyan dan peuseumah kheueh atranyan sibagoe peuseumahan nyang teubri keu Ulôn. Dan nyan kheueh jeumba gata. 27 Bak upacara watée teubaiát imeum, dada dan pha bubiri agam nyang teupeuguna lam upacara nyan harôh teupeuseumah sibagoe peuseumahan nyang teubri keu Ulôn dan teupeu aséng keu imeum-imeum. 28 Nyoe kheueh keuputosan nyang hana jeuet teu-ubah: Bak watée umat Ulôn jijak ba peuseumahan keu peudamé, dada dan pha beulatang keureubeuen nyan na kheueh atra imeum-imeum. Nyang kheueh peuseumahan nyang jibri lé umat keu Ulôn. 29 Peukayan iébadat Nabi Harun harôh teupeutreun ubak aneuëk-aneuëk jih, mangat jeuet jingui watée awaknyan teupeubaiát. 30 Aneuëk Nabi Harun nyang jeuet keu imeum geunantoe ayah jih dan jitamong lam Khimah Ulôn keu jipeubuet iébadat lam Kama Suci, harôh jingui peukayan nyan tujoh uroe treb jih. 31 Cok kheueh laju sie bubiri agam nyang jipeuguna watée upacara teupeubaiát Nabi Harun dan aneuëk-aneuëk jihnyan dan taguen kheueh eungkot sie nyan bak saboh teumpat nyang suci. 32 Eungkot sie nyan harôh awaknyan pajoh bak babah pintoe Khimah Ulôn deungon ruti nyang na leubeh lam raga. 33 Awaknyan harôh jipajoh peunajoh nyang ka teukeureubeuen lam upacara peuamphon desya bak watée teubaiát. Imeum nyang jeuet pajoh peunajoh nyang ka teupeukhusos keu Ulôn nyan. 34 Meunyoe sampoe singoh beungoh eungkot sie dan ruti nyan mantong na tinggai, dan nyang leubeh nyan harôh teutot sampoe habéh, dan hana jeuet teupajoh, sabab ka teupeukhusos. 35 Upacara teupeubaiát Nabi Harun dan aneuëk-aneuëk jihnyan harôh teupeuna tujoh uroe peunoh, lagée nyang ka Ulôn peurintah ubak gata. 36 Tieb-tieb uroe harôh teupeuseumah saboh leumô agam keu keureubeuen peuamphon desya. Deungon keureubeuen nyang lagée nyan miseubah ka teupeusuci. Óh lheuehnyan miseubah nyan harôh gata boh minyéuk ngon minyéuk zaiton mangat jeuet teupeukhusos keu Ulôn. 37 Peubuet kheueh lagée nyan tieb-tieb uroe nyang treb jih tujoh uroe. Dan miseubah banmandum nyan ka jeuet keusuci; peue mantong nyang keunong ateueh miseubah nyan atranyan harôh teujok ubak TUHAN, dan soemantong nyang cukéh atranyan, ureuëng nyan teuma meuteumé bala sabab teunaga keusucian nyan." 38 "Tieb-tieb uroe keu siumu masa, ateueh miseubah nyan harôh teukeureubeuen dua boh bubiri nyang meu-umu sithon. 39 Nyang saboh keu keureubeuen beungoh seudangkan nyang saboh teuk keu keureubeuen seupôt. 40 Meusigoe ngon aneuëk bubiri keu keureubeuen beungoh, harôh teukeureubeuen teuma sikilogram teupông gandom nyang paleng gét teujampu teuma ngon siarée minyéuk zaiton aseuli. Seulaén nibak nyan siarée ié anggô. 41 Aneuëk bubiri keu keureubeuen seupôt harôh teukeureubeuen ngon cara nyang saban, beuna cit teupông, minyéuk zaiton dan ié anggô. Bée keureubeuen nyang teutot nyan lumpah that galak até Ulôn. 42 Dan seulanjut jih keu sigala jamén, keureubeuen nyang teutot nyan harôh teupeuseumah dikeue Ulôn bak babah pintoe Khimah Ulôn. Disinan kheueh Ulôn meurumpok ngon umat Lôn dan Lôn peugah haba ubak gata. 43 Nibak teumpat nyan Ulôn meurumpok ngon bansa Israel, dan deungon cahya Ulôn teuka teuma teupeujeuet teumpat nyan suci. 44 Ulôn teuma Lôn peujeuet Khimah dan miseubah nyan suci. Nabi Harun ngon aneuëk-aneuëk jihnyan teuma Ulôn peukhusos nibak nyang laén mangat awaknyan jilayani Ulôn sibagoe Imeum. 45 Ulôn teuma tinggai lamkawan bansa Israel, dan jeuet keu Allah awaknyan. 46 Awaknyan teuma jiteupeue bahwa Ulôn kheueh TUHAN Allah awaknyan nyang ba awaknyan Lôn peuteubiet nibak nanggroe Meusé, mangat Ulôn jeuet Lôn tinggai lamkawan awaknyan. Ulôn kheueh TUHAN Allah awaknyan."

Keuluaran 30

1 TUHAN meufeureuman lom ubak Nabi Musa, "Gata peugét saboh miseubah nibak bak kayée akasia keu teumpat tot dupa. 2 Hi miseubah nyan harôh timang peuet sagoe, panyang dan luwah jih maséng-maséng 45 seuntimetée, dan manyang jih 90 seuntimetée. Nibak ban peuet sagoe jih nyan peugét kheueh teuma lungkée-lungkée nyang jeuet meusaboh ngon miseubah nyan. 3 Siblah u ateueh jih, dan meunan cit ban peuet boh sagoe dan lungkée-lungkée jih harôh teuseupôh ngon méuh aseuli dan meunan cit teuboh teuma bingkée ban sikeulileng nyan. 4 Dan peugét kheueh dua boh gleueng nibak bandua boh sagoe mangat jeuet ngon peuteuen kayée geunulam miseubah nyan. 5 Kayée geunulam nyan harôh teupeugét nibak kayée akasia dan teuseupôh teuma ngon méuh. 6 Dan keubah kheueh miseubah nyan nibak mandua kréek ija nyang na dikeue Peuto Peujanjian, bak teumpat Ulôn teuma meurumpok ngon gata. 7 Tieb-tieb beungoh watée Nabi Harun jijak tot panyöt, jihnyan harôh jitot dupa nyang mangat bée diateueh miseubah nyan. 8 Hai nyang lagée nyan harôh jipeubuet cit teuma bak watée jihnyan jijak tot panyöt óh seupôt uroe. Peuseumahan ateueh dupa nyan harôh jipeubuet hana putôh-putôh siumu masa. 9 Dan bék kheueh gata peuseumah ateueh dupa nyan keureubeuen nyang teularang, keureubeuen beulatang atawa keureubeuen teuhidang; bék teuma teurô keureubeuen ié anggô di ateueh nyan. 10 Lam sithon sigoe Nabi Harun harôh jipeuna upacara teupeusuci miseubah deungon cara teupeugleh ban peuet boh lungkée jih ngon darah beulatang peulara nyang teukeureubeuen keu peuamphon desya. Hai nyang lagée nyan harôh teupeubuet tieb-tieb thon siumu masa. Miseubah nyan harôh suci banmandum dan teupeukhusos keu Ulôn." 11 TUHAN meufeureuman ubak Nabi Musa, 12 "Bak watée teupeuna seunsus ateueh bansa Israel, tieb-tieb ureuëng agam harôh jibayeue keu Ulôn péng sinuboh keu droe-droe jih mangat jih nyan hana keunong bala bak watée seunsus nyan teupeuna. 13 Banmandum ureuëng nyang rhoh teuitong nibak seunsus nyan ureuëng nyan harôh jibayeue ngon péng nyang ka teupeuteuntée meunurot yuem nyang kana atoran bak Khimah Ulôn sibagoe deureuma khusos keu Ulôn. 14 Soemantong ureuëng nyang na teuitong lam seunsus nyan, na kheueh tieb-tieb ureuëng agam nyang kana umu dua ploh thon atawa leubeh, ureuëng nyan harôh jibri deureuma khusos nyan. 15 Ureuëng kaya hana jeuet jibayeue leubeh, dan di ureuëng gasien hana jeuet jibayeue kureueng bak watée awaknyan jibayeue péng sinuboh keudroe-droe jih. 16 Kutéb kheueh péng nyan nibak ureuëng Israel, dan peuguna kheueh péng nyan keu iébadat lam Khimah Ulôn. Banmandum nyan na kheueh péng sinuboh droe awaknyan keudroe, dan Ulôn teuma sabe Lôn ingat keu Lôn lindong awaknyan." 17 TUHAN meufeureuman ubak Nabi Musa, 18 "Peugét kheueh saboh kulah ié nibak peurunggu meunan cit deungon lapek teupeugét nibak peurunggu. Keubah laju kulah ié nyan lamkawan Khimah dan miseubah, óh lheuehnyan pasoe kheueh kulah nyan ngon ié. 19 Ié nyan keu Nabi Harun dan aneuëk-aneuëk jih mangat awaknyan jeuet ji rhah jaroe ngon gaki 20 sigohlom jitamong lam Khimah atawa jipeurab ubak miseubah keu jiba keureubeuen nyang teutot. Awaknyan harôh jikeureuja nyang lagée nyan mangat bék teupoh maté. Peuratoran nyan harôh jitaát lé awaknyan dan keuturonan awaknyan siumu masa." 22 TUHAN meufeureuman ubak Nabi Musa, 23 "Gata cok kheueh reumpah-reumpah nyang paleng gét, nam kilo mur nyang caye, lhée kilo kayée maméh, lhée kilo teubée mangat bée, dan nam kilo kayée teja. 24 Banmandum nyan teutimang meunurot sinimang nyang na teupeuguna lam Khimah Lôn. Tamah kheueh teuma peuet arée minyéuk zaiton, 25 dan peugét kheueh minyéuk upacara, nyang teujampu lagée minyéuk mangat bée. 26 Peuguna kheueh nyang ka teujampu nyan keu teuboh minyéuk Khimah Ulôn, Peuto Peujanjian, 27 meuja dan banmandum peuleungkapan jih, gaki panyöt dan banmandum peuleungkapan jih, miseubah teumpat tot dupa, 28 miseubah keu keureubeuen teutot deungon sigala peuleungkapan jih, dan kulah ié deungon keunaleueng jih. 29 Deungon cara lagée nyan harôh gata peukhusos barang-barang nyan keu Ulôn, mangat banmandum nyan ka jeuet keusuci. Peue mantong nyang keunong bak miseubah nyan atranyan harôh teujok ubak TUHAN, dan soemantong nyang mat atranyan teuma meuteumé bala sabab teunaga keusucian atranyan. 30 Meunan cit boh teuma minyéuk ateueh Nabi Harun dan aneuëk-aneuëk gobnyan mangat awaknyan teubaiát jeuet keu imeum keu jilayani Ulôn. 31 Peugah laju ubak bansa Israel bahwa siumu masa minyéuk upacara nyan khusos keu Ulôn. 32 Minyéuk nyan hana jeuet teuprée ateueh ureuëng-ureuëng bala. Bék gata peugét minyéuk nyang lagée nyan deungon gata peuguna alat jampu jih nyang nyan cit teuma. Minyéuk nyan suci, dan harôh teuanggab sibagoe barang suci. 33 Ureuëng nyang peugét minyéuk nyang lagée nyan, atawa jipeuguna keu ureuëng nyang bukon imeum, ureuëng nyan hana le teuanggab anggota umat Ulôn." 34 TUHAN meufeureuman ubak Nabi Musa, "Gata cok kheueh laju mupadub macam reumpah-reumpah nyang sadub le jih, atranyan na kheueh geutah dama, kulét kleueng, geutah rasamala dan dupa nyang tulen. 35 Peuguna kheueh banmandum nyan keu teupeugét dupa meujampu nyang mangat bée. Tamah kheueh teuma sira mangat dupa nyan teutab aseuli dan jeuet teupeuguna keu Ulôn. 36 Siladum nyang na nibak dupa nyan harôh teugileng sampoe halôh. Gata ba kheueh atranyan ubak Khimah Ulôn dan sipreuk kheueh atranyan dikeue Peuto Peujanjian. Dupa nyan harôh teuanggab barang suci nyang teupeukhusos keu Ulôn. Bék peugét dupa teujampu deungon bahan jih saban lagée nyan cit teuma keudroe gata. 38 Soemantong nyang peugét nyang harôm lagée nyan bagoe, ureuëng nyan hana le teuanggab anggota umat Ulôn."

Keuluaran 31

1 TUHAN meufeureuman ubak Nabi Musa, 2 "Ulôn ka Lôn piléh Bezaleel bin Uri, cucoe Hur nibak sukée Yehuda, 3 dan Ulôn anugeurah jihnyan ngon kuasa Ulôn. Ubak jih Ulôn bri peungeurtian, malem dan carông bak buet seuni: 4 Keu jipeugét reuncana nyang that teupeureulée nibak buet nyang ahli ngon carông dan jipeugét nibak méuh, pirak dan peurunggu; 5 keu teuasah batée peumata nyang teutatah; keu teu-uke kayée dan keumubagoe rupa karya seuni nyang laén. 6 Oholiab, bin Ahisamakh nibak sukée Dan, nyan pih ka Ulôn piléh keu jitulông jihnyan. Meunan cit Ulôn bri keu-ahlian nyang luwa biasa ubak utôh-utôh nyang carông, mangat awaknyan jeuet jipeugét peue mantong nyang Ulôn peurintah: 7 Khimah Ulôn, Peuto Peujanjian dan sinutôb nyan, banmandum peurabot Khimah, 8 na kheueh meuja dan peuleungkapan jih, gaki panyöt nibak méuh aseuli deungon peuleungkapan jih, miseubah teumpat tot dupa, 9 miseubah teumpat tot keureubeuen nyang teutot dan banmandum peuleungkapan jih, kulah ié ngon keunaleueng jih, 10 peukayan iébadat keu Nabi Harun dan aneuëk-aneuëk jih, nyang harôh jingui watée awaknyan meutugaih sibagoe imeum, 11 minyéuk upacara, dan dupa mangat bée keu Kama Suci. Banmandum nyan harôh awaknyan peugét paih lagée peutunyok nyang ka Ulôn bri ubak gata." 12 TUHAN meufeureuman ubak Nabi Musa ngon peurintah Gobnyan 13 mangat geupeumaklum ubak bansa Israel, "Peuraya kheueh uroe Sabat, uroe nyang ka Ulôn peuteutab sibagoe uroe meureuhat. Keu siumu masa uroenyan ka jeuet keu uroe peuingat gata ngon Ulôn, mangat gata tateupeue bahwa Ulôn kheueh TUHAN, dan bahwa Ulôn ka Lôn peujeuet gata bansa Lôn keudroe. 14 Uroe meureuhat nyan harôh gata horeumat sibagoe uroe nyang suci. Keu gata Ulôn bri nam uroe keu gata meubuet, teuma bak uroe nyang keutujoh na kheueh uroe raya nyang teupeukhusos keu Ulôn. Soemantong nyang hana jihoreumat uroe Sabat nyan, teuma teutab jimeubuet bak uroe nyan, ureuëng nyan harôh teuhuköm maté. 16 Bansa Israel harôh jipeuraya uroenyan treun meutreun sibagoe tanda uroe peujanjian. 17 Uroe nyan na kheueh uroe peuingat nyang teutab bansa Israel dan Ulôn, sabab Ulôn, TUHAN, ka Ulôn peujeuet langét ngon bumoe lam watée nam uroe, dan nibak uroe nyang keutujoh Ulôn piôh nibak buet dan Ulôn meureuhat." 18 Óh ka seuleusoe geumeututoe ngon Nabi Musa di ateueh Gunong Sinai nyan, Po teu Allah laju geubri ubak Nabi Musa dua boh keupéng batée nyang ka geutuléh lé Po teu Allah deungon sigala peurintah-peurintah Gobnyan.

Keuluaran 32

1 Watée bansa Israel jikalon bahwa Nabi Musa treb that-that hana geutreun-treun di ateueh gunong, dan mantong teutab na di ateueh gunong nyan, awaknyan laju jihudom bak Nabi Harun sira jipeugah ubak gobnyan, "Geutanyoe hana tateupeue peue nyang teujadi ateueh Nabi Musa, ureuëng nyang ba geutanyoe geupeuteubiet nibak nanggroe Meusé; dan deungon lagée nyan neupeugét kheueh keu kamoe ilah nyang jeuet jipimpén kamoe." 2 Dan Nabi Harun laju geupeugah ubak awaknyan, "Plôh kheueh laju bubena taloe takue méuh nyang na jingui lé peurumoh-peurumoh dan aneuëk-aneuëk gata, dan gata ba kheueh nyan ubak ulôn." 3 Dan awaknyan laju jiplôh bubena taloe takue méuh nyang na bak ureuëng inong jih maséng-maséng meunan cit nyang na nibak aneuëk-aneuëk jih óh lheuehnyan laju jijakba atranyan ubak Nabi Harun. 4 Nabi Harun geucok banmandum taloe takue nyan dan laju geupeucaye lam saboh teumpat acuwan dan geupeugét laju saboh patong leumô. Bansa nyan jipeugah, "Hei Israel, nyoe kheueh ilah geutanyoe nyang ba geutanyoe jipeuteubiet nibak nanggroe Meusé!" 5 Óh lheuehnyan Nabi Harun laju geupeudong saboh miseubah dikeue leumô méuh nyan dan laju geupeumaklum, "Singoh beungoh na khanuri keu tahoreumat TUHAN." 6 Óh singoh beungoh banseuboh that, ureuëng-ureuëng Israel laju jiba meupadub boh beulatang peulara keu keureubeuen nyang teutot, dan na padub boh teuk keu keureubeuen peudamé. Awaknyan jiduek sira jimakheun dan jijieb ié, dan laju jibeudôh keu meusukaria. 7 Ngon sabab nyan TUHAN meufeureuman ubak Nabi Musa, "Gata jaktreun kheueh laju beureujang-reujang, sabab bansa gata nyang gata pimpén jiteubiet nibak nanggroe Meusé ka jipeubuet jeuhet. 8 Awaknyan ka jiseuleweng peue-peue nyang Ulôn peurintah. Awaknyan jipeugét patong leumô nibak méuh nyang teuteumpah, laju jiseumah dan jipeuseumah keureubeuen ubak patong leumô nyan. Kheun awaknyan, nyang kheueh ilah jih nyang ba awaknyan jiteubiet nibak nanggroe Meusé. 9 Ulôn kuteupeue bahwa bansa nyan kreueh that ulée. 10 Bék cuba-cuba jitam Ulôn. Ulôn beungéh keu awaknyan dan keuneuk Lôn peubinasa awaknyan. Teuma meunyoe gata dan keuturonan gata keu Lôn peujeuet saboh bansa nyang raya." 11 Nabi Musa geulakée bak TUHAN Allah, sira geupeugah, "TUHAN, pakon Droeneueh harôh neupeubuet lagée nyan ateueh awaknyan? Bukon kheueh Droeneueh ka neupeuseulamat awaknyan di nanggroe Meusé deungon keukuasaan dan teunaga nyang raya? 12 Meunyoe Droeneueh neupeubinasa awaknyan, ureuëng Meusé teuma jipeugah bahwa Droeneueh neupimpén bansa nyan jiteubiet nibak nanggroe Meusé keu neujakpoh maté awaknyan nibak gunong-gunong dan neupeubinasa awaknyan habéh banmandum. Bék lagée nyan, ya TUHAN, ubah kheueh niet Droeneueh dan bék kheueh neupeuceulaka bansa nyan. 13 Ingat kheueh ubak hamba-hamba Droeneueh Nabi Ibrahim, Nabi Ishaq, dan Nabi Yakub. Ingat kheueh bahwa Droeneueh ka neumeujanji ubak awaknyan deungon sumpah keu Droeneueh bri keu awaknyan keuturonan nyang le lagée bintang dilangét, meunan cit banmandum tanoh nyang Droeneueh meujanji nyan jeuet keumilék keuturonan awaknyan siumu masa." 14 Watée geudeungoe nariet Nabi Musa nyang lagée nyan TUHAN laju geu-ubah niet Gobnyan dan hana jadéh geupeubuet peue nyang ka geu ancam nyan keu geupeurhot ateueh awaknyan deungon bala nyang raya. 15 Nabi Musa laju geutreun lom nibak gunong nyan sira geuba mandua boh batée nyang ka teutuléh peurintah-peurintah Po teu Allah nibak bandua binéh batée nyan. 16 Po teu Allah keudroe nyang peugét batée nyan dan geu-uke peurintah-peurintah Gobnyan ateueh batée nyan. 17 Teungoh geujak sira geutreun nibak gunong nyan, Yosua laju jideungoe ureuëng-ureuëng Israel teungoh jikliek-kliek, dan jipeugah kheueh lé Yosua ubak Nabi Musa, "Na su ureuëng karu lagée ureuëng muprang lam khimah-khimah." 18 Kheun Nabi Musa, "Nyang teudeungoe kon su ureuëng meusurak sabab ka meunang meunan cit kon su ureuëng teuklik sabab ka taloe; nyan su ureuëng meunyanyoe." 19 Watée Nabi Musa ka meutamah to ubak khimah-khimah nyan, deuh laju geukalon leumô méuh nyan dan ureuëng ramé teungoh meunari ngon meulikak, dan teuka kheueh beungéh gobnyan. Bak teumpat nyan cit teuma, bak gaki gunong nyan, Nabi Musa geuseumpom batée nyang geuba nyan sampoe hanco meukeupéng-keupéng. 20 Óh lheuehnyan laju geucok patong leumô nyang teupeugét nibak méuh atra ureuëng-ureuëng Israel nyan, geupeuhanco, geugileng sampoe halôh lagée abée, óh lheuehnyan laju geujampu ngon ié. Óh lheuehnyan laju geuyue ubak ureuëng Israel mangat jijieb ié nyan. 21 Laju geupeugah ubak Nabi Harun, "Peue nyang awaknyan peubuet ateueh droeneueh sampoe awaknyan ka jipeubuet desya nyang paleng rayanyoe?" 22 Geujaweueb lé Nabi Harun, "Bék neubeungéh keu ulôn; droeneueh neuteupeue keudroe pakriban neukat jih ureuëng-ureuëng nyoe keu jipeubuet jeuhet. 23 Awaknyan jipeugah ubak ulôn, 'Geutanyoe hana tateupeue peue nyang teujadi ateueh Nabi Musa, ureuëng nyang ka geuba geutanyoe geupeuteubiet nibak nanggroe Meusé; sabab nyan neupeugét kheueh keu kamoe ilah nyang hase jipimpén kamoe.' 24 Ulôn kuyue awaknyan mangat jibri bak ulôn piasan méuh, dan atranyan laju jijok lé awaknyan bak ulôn. Banmandum piasan nyan ulôn peutamong lam apui, dan jeuet kheueh leumô nyoe!" 25 Nabi Musa geusadar bahwa Nabi Harun ka geupeulheuh bansa Israel lagée guda lheueh lam weue, sampoe awaknyan ka jipeukém ngon jihina lé musoh-musoh jih. 26 Dan geudong kheueh laju gobnyan dibabah pintoe geureubang khimah-khimah sira geudumpék, "Soe nyang dong blaih TUHAN jak keunoe!" Dan teuka kheueh sukée Lewi jidong bansilingka Nabi Musa, 27 dan laju geupeugah lé Nabi Musa ubak awaknyan, "TUHAN Allah Israel geupeurintah ubak gata mangat jeuet maséng-maséng gata suet peudeueng gata laju gata jak bansikeulileng khimah-khimah nyoe, phon nibak pintoe geureubang nyoe sampoe ubak babah pintoe geureubang nyang laén sira gata poh maté syedara-syedara, rakan-rakan dan waréh silingka gata." 28 Sukée Lewi laju jipeubuet peurintah nyan dan bak uroenyan na lhée ribée droe maté jipoh. 29 Geupeugah lé Nabi Musa ubak sukée Lewi, "Uroenyoe gata ka tapeukhusos droe jeuet keu imeum nyang layani TUHAN deungon cara gatapoh maté aneuëk-aneuëk manyak dan syedara-syedara gata, dan TUHAN geubri beureukat ubak gata." 30 Óh singoh beungoh Nabi Musa geupeugah ubak bansa nyan, "Gata ka gata peubuet desya nyang paleng rayeuk. Teuma bak uroenyoe ulôn teuma lôn teungoh gunong nyan lom keu lônjak meuhadab TUHAN; mudah-mudahan ulôn geutem peuamphon keu desya-desya gata." 31 Óh lheuehnyan Nabi Musa geujaklom meuhadab ubak TUHAN sira geupeugah, "Bansa nyan ka jipeubuet desya nyang paleng rayeuk. Awaknyan ka jipeugét ilah nibak méuh. 32 Ulôn meulakée bak Droeneueh neupeuamphon kheueh desya awaknyan; meunyoe hán, neusampôh kheueh nan ulôn nyang na lam kitab ureuëng-ureuëng udeb." 33 Geujaweueb lé TUHAN, "Teuma ureuëng-ureuëng nyang meudesya nibak Ulôn nyang Lôn sampôh nan jih lam kitab nyan. 34 Gata jak kheueh laju jinoenyoe, dan gata ba kheueh awaknyan ubak teumpat nyang ka Ulôn peugah ubak gata. Malaikat Lôn teuma jibimbéng gata teuma watée jih trok jiteuka ureuëng-ureuëng nyan Ulôn huköm sabab desya-desya nyang jipeubuet." 35 Óh lheuehnyan TUHAN laju geupeutreun bala ateueh ureuëng-ureuëng nyan sabab awaknyan jipaksa Nabi Harun jipeugét patong leumô nibak méuh nyan.

Keuluaran 33

1 Feureuman TUHAN ubak Nabi Musa, "Tinggai kheueh teumpat nyoe dan gata jak kheueh laju meusajan ngon bansa nyang gata ba nibak nanggroe Meusé u nanggroe nyang ka Ulôn meujanji bak Nabi Ibrahim, Nabi Ishaq dan Nabi Yakub meunan cit keuturonan awaknyan. 2 Ulôn teuma Lôn kirém sidroe malaikat nyang bimbeng gata. Ulôn ku use bansa Kanaan, bansa Amori, bansa Het, bansa Feris, bansa Hewi dan bansa Yebus. 3 Gata tajak ubak tanoh nyang kaya dan subô. Teuma Ulôn keudroe hana Ulôn jak meusajan gata, mangat gata hana Lôn peubinasa bak teungoh rot, sabab gata na kheueh bansa nyang kreueh ulée." 4 Óh lheuehnyan TUHAN geuyue ubak Nabi Musa mangat jeuet geupeugah ubak bansa Israel, "Gata bansa nyan kreueh ulée. Meunyoe Ulôn jak meusigoe ngon gata bahpi sikeujab mantong, kapasti gata Ulôn peubinasa banmandum. Ploh kheueh laju bubena piasan nyang gata ngui nyan, teuma Ulôn laju Lôn peuteuntée peue nyang teuma Ulôn peubuet ateueh gata." Óh ka lheueh geudeungoe TUHAN geubeungéuh lagée nyan, awaknyan seudeh lumpah na lagée ureuëng nyang meukabông. Dan laju jiploh banmandum piasan nyang jingui lé awaknyan. Jadi, Óh ka lheueh jitinggai Gunong Sinai, bansa Israel ka hana le jingui piasan. 7 Pajan mantong, meunyoe bansa Israel jipeudong khimah, Nabi Musa laju geucok Khimah dan geupeudong jiôh bacut nibak khimah-khimah awaknyan. Khimah nyan teuboh nan Khimah TUHAN, dan soemantong nyang keuneuk lakée naseuhat ubak TUHAN, jak kheueh keunan. 8 Meunyoe Nabi Musa geujak ubak Khimah nyan, ureuëng-ureuëng Israel laju jidong bak babah pintoe Khimah droe jih dan jikalon Nabi Musa sampoe geutamong. 9 Óh ka lheueh Nabi Musa geutamong, jitreun kheueh taméh awan dan laju jipiôh bak babah pintoe Khimah. Nibak lam awan nyan TUHAN laju geumeututoe ngon Nabi Musa. 10 Watée ureuëng Israel jikalon taméh awan teudong bak babah pintoe Khimah TUHAN, awaknyan banmandum jibeudôh dan jisujut dikeue khimah droe jih maséng-maséng. 11 TUHAN meufeureuman bak Nabi Musa sira meuhadab-hadab keue, lagée ureuëng meututoe ngon rakan jih. Óh lheuehnyan Nabi Musa laju geugisa ubak khimah-khimah. Teuma Yosua bin Nun, sidroe aneuëk muda nyang bantu Nabi Musa, teutab tinggai lam Khimah nyan. 12 Bak siuroe Nabi Musa geumeututoe ubak TUHAN, "TUHAN, Droeneueh neupeurintah ubak ulôn keu lôn bimbeng bansa nyoe sampoe trok u nanggroe nyang Droeneueh peujanji. Teuma Droeneueh hana neupeugah soe nyang teuma Droeneueh utus keu jitulông ulôn. TUHAN, Droeneueh neupeugah bahwa Droeneueh neuturi keu ulôn, dan neutem ngon ulôn. 13 Meunyoe meunan, neutulông kheueh peugah ubak ulôn peue reuncana Droeneueh, TUHAN, mangat jeuet lôn layani Droeneueh dan teutab galak até Droeneueh. Ingat kheueh teuma bahwa bansa nyoe ka Droeneueh piléh jeuet keu milék Droeneueh." 14 Geupeugah lé TUHAN, "Gata Ulôn lindong mangat meuteumé gata cok keuhak milék tanoh nyang ka Ulôn peujanji." 15 Geujaweueb lé Nabi Musa, "Meunyoe TUHAN hana neujak meusajan ngon kamoe, bék neuyue kamoe tinggai teumpat nyoe. 16 Pakriban ureuëng laén jiteupeue bahwa Droeneueh neutem tulông ulôn dan keu bansa nyoe meunyoe Droeneueh hana neutulông kamoe? TUHAN na di lamkawan kamoe teuma jeuet keumeulaén kamoenyoe ngon bansa-bansa laén nyang na ateueh rhueng bumoe." 17 Feureuman TUHAN ubak Nabi Musa, "Nyang gata lakée nyan teuma Ulôn kabui, sabab Ulôn kuturi gata dan Ulôn kutem ngon gata." 18 Óh lheuehnyan Nabi Musa geulakée lom, "TUHAN, peudeuh kheueh bak ulôn cahya Droeneueh teuka." 19 Jaweueb TUHAN, "Teuma Ulôn teuka deungon sigala keuagongan Ulôn dikeue gata, sira gata peugah nan Ulôn nyang suci. Ulôn kheueh TUHAN, dan Ulôn ku tunyok até Ulôn nyang murah dan gaséh sayang keue ureuëng-ureuëng nyang Ulôn piléh. 20 Rupa Ulôn hana Ulôn peudeuh ubak gata, sabab hana mungken manusia jingieng Ulôn, dan Ulôn teutab udeb. 21 Blaih Ulôn nyoe na bukét batée; gata jeuet gata dong disinan. 22 Watée cahya Ulôn teuka lewat disinan, gata Ulôn peutamong lam saboh luengkiek nyang na lam bukét batée nyan dan Ulôn peupadok ngon jaroe Ulôn sampoe Ulôn ka jeuet Lôn jak. 23 Dan teuma Ulôn tarek jaroe Ulôn mangat gata jeuet gata ngieng Ulôn rot likot, teuma rupa Ulôn teutab hana gata kalon."

Keuluaran 34

1 Feureuman TUHAN ubak Nabi Musa, "Gata peuet laju dua boh batée tuléh lagée atra awai. Ateueh batée nyan teuma Ulôn tuléh tutoe haba nyang saban lagée haba bak batée nyang ka gata peubeukah nyan. 2 Beusiab-siab kheueh singoh beungoh gata jak teungoh Gunong Sinai dan gata meuhadab Ulôn bak pucak gunong nyan. 3 Hana meusidroe pih nyang jeuet jiseutôt ngon gata atawa jidong bak sagoe toh mantong ateueh gunong nyan. Leumô-leumô dan bubiri-bubiri bék gata peubiyeu jimeurot naleueng bak gaki gunong nyan." 4 Óh lheuehnyan Nabi Musa laju geujak peuet dua boh keupéng batée, dan óh singoh beungoh mantong seuboh that laju geuba batée nyan geupeuteungoh ateueh Gunong Sinai lagée nyang ka geupeurintah lé TUHAN ubak gobnyan. 5 Dan geutreun kheueh TUHAN nibak saboh gumpai awan; TUHAN laju geudong ngon Nabi Musa nibak teumpat nyan, dan laju geupeugah nan Gobnyan nyang suci, na kheueh TUHAN. 6 Óh lheuehnyan TUHAN laju geujak dikeue Nabi Musa sira geupeugah lagée nyoe, "Ulôn nyoe TUHAN, na kheueh Allah nyang peunoh ngon murah até dan gaséh sayang. Geunaséh Ulôn meulimpah-limpah, Ulôn nyoe seutia dan hana bagaih beungéh. 7 Ulôn teutab Ulôn gaséh meuribée-ribée keuturonan dan Ulôn peuamphon ureuëng nyang salah dan desya-desya; teuma ureuëng nyang meusalah sagai-sagai hana Ulôn peubeubaih nibak huköman, dan Ulôn huköm teuma aneuëk-aneuëk jih meunan cit cucoe-cucoe jih sampoe trok ubak keuturonan nyang keu lhée dan nyang keupeuet sabab desya ureuëng syiek awaknyan." 8 Bak watée nyan cit teuma Nabi Musa geusujut sira geuseumah. 9 Geupeugah lé Nabi Musa, "TUHAN, meunyoe Droeneueh beutôi-beutôi neugaséh ulôn, ulôn lakée, beuneutem kheueh TUHAN neujak meusajan ngon kamoe. Bansa nyan beutôi kreueh that ulée, teuma neupeuamphon kheueh buet nyang jeuhet dan desya kamoe dan neuteurimong kheueh kamoe sibagoe umat Droeneueh keudroe." 10 Feureuman TUHAN ubak Nabi Musa, "Jinoenyoe Ulôn peugét peujanjian ngon bansa Israel. Dikeue mata awaknyan Ulôn teuma Lôn peutahe ngon buet-buet nyang ajaéb nyang gohlom na peureunah jipeubuet lé bansa yoh mantong na ateueh rhueng bumoe. Banmandum bansa teuma jikalon buet-buet nyang ajaéb nyang Ulôn peubuet, sabab Ulôn, TUHAN teuma Ulôn peubuet sipeue-peue nyang paleng parah ateueh gata. 11 Taát kheueh huköm-huköm nyang Ulôn peugah ubak gata nibak uroe nyoe. Ulôn teuma Lôn use bansa Amori, bansa Kanaan, bansa Het, bansa Feris, bansa Hewi dan bansa Yebus bak watée gata tamaju. 12 Bék kheueh gata peugét janji ubak ureuëng-ureuëng lam nanggroe teumpat gata teuka, sabab nyan jeuet keupeurangkab nyang akibat jih mawöt ateueh gata. 13 Deungon lagée nyan, bék kheueh gata peubuet lagée nyan, teuma gata reulôh laju bubena mezbah-mezbah awaknyan, peuhanco bubena tugu-tugu keuramat awaknyan dan gata koh kheueh laju taméh-taméh Asyera, beurala awaknyan. 14 Bék gata seumah ilah nyang laén, sabab Ulôn nyoe TUHAN, na kheueh Po teu Allah nyang hana Lôntem jipeusa ngon peue mantong. 15 Bék gata peuna janji ngon bansa nanggroe nyan, sabab bak watée awaknyan jiseumeumah dan jipeuseumah keureubeuen keu ilah-ilah awaknyan, awaknyan teuma jipakat gata, dan gata teuma gata turot. 16 Meunyoe aneuëk-aneuëk gata jimeukawen ngon ureuëng-ureuëng inong bansa aséng, awaknyan teuma jirayu lé ureuëng-ureuëng inong nyan keu jitinggai Ulôn dan jiseumah ilah-ilah awaknyan. 17 Bék gata peugét atawa gata seumah ilah-ilah nyang teupeugét nibak logam. 18 Peuraya kheueh Khanuri Ruti Nyang Hana Meurago. Lagée nyang ka Ulôn peurintah ubak gata, gata harôh gata pajoh ruti nyang hana meurago nyang treb jih tujoh uroe nibak buleuen Abib, sabab lam buleuen nyan gata tinggai nanggroe Meusé. 19 Tieb-tieb aneuëk agam lahé nyang tuha dan beulatang agam nyang phon lahé nyan na kheueh atra Ulôn, 20 teuma gata harôh gata teuböih aneuëk keuleudée nyang phon lahé deungon cara gata peuseumah saboh aneuëk bubiri keugeunantoe jih. Meunyoe hainyan hana gatatem teuboih, takue keuleudée nyan harôh gata wiet. Tieb-tieb aneuëk agam gata nyang tuha harôh gata teuboih. Hana meusidroe pih nyang jeuet jijak ubak Ulôn meunyoe hana jiba peuseumahan. 21 Na nam uroe watée teumeubuet; bék kheueh meubuet bak uroe nyang keutujoh, bah kheueh bak musém meu-uéue atawa musém mupot. 22 Peuna kheueh Khanuri musém Mupot nyang raya bak watée gata peuphon pot hase phon nibak boh gandom. Dan meunan cit gata peuna kheueh Khanuri Jambo Ôn nibak akhé thon, watée gata pot boh-boh kayée. 23 Lhée goe lam sithon banmandum ureuëng agam harôh jiteuka jijak seumah Ulôn, TUHAN, Allah Israel. 24 Óh ka lheueh Ulôn use bansa-bansa dikeue gata dan Ulôn peuluwah daerah gata, hana meusidroe pih nyang jijeuet reupah nanggroe gata watée gata tajak peuna Khanuri Ruti Hana Meurago, Khanuri Mupot dan Khanuri Jambo Ôn. 25 Bak watée gata tapeuseumah beulatang peulara nyang teusie, bék gata peuseumah peue mantong nyang teuboh rago. Beulatang peulara nyang teusie keu keureubeuen peurayaan Paskah harôh teupeuhabéh bak malam nyan cit teuma; hana jeuet tinggai sampoe óh singoh beungoh. 26 Tieb-tieb thon gata harôh gata ba u Rumoh TUHAN Allah gata wase nyang phon nibak tanoh gata. Sie aneuëk bubiri atawa aneuëk kaméng hana jeuet teutaguen ngon ié mom nang jih." 27 Feureuman TUHAN ubak Nabi Musa, "Tuléh kheueh tutoe haba nyan, sabab ngon dasai haba nyan, Ulôn peugét janji ngon gata dan deungon bansa Israel." 28 Peuet ploh uroe peuet ploh malam Nabi Musa tinggai disinan meusajan ngon TUHAN, dan sidubnyan treb gobnyan hana geumakheun dan hana geujieb ié. Tutoe haba peujanjian nyan, na kheueh Siploh Peurintah Allah, nyang teutuléh ateueh keupéng batée. 29 Watée Nabi Musa geutreun di ateueh Gunong Sinai sira geuba Siploh Peurintah TUHAN nyan, muka gobnyan muble-ble cahya sabab gobnyan ka meuhadab keue deungon TUHAN, teuma Nabi Musa keudroe hana geuteupeue bahwa muka gobnyan muble-ble cahya. 30 Nabi Harun meunan cit banmandum rakyat deuh jikalon bahwa Nabi Musa muble-ble cahya muka gobnyan, dan awaknyan teumakot jipeurab ubak gobnyan. 31 Teuma Nabi Musa laju geuhôi awaknyan, dan Nabi Harun meunan cit banmandum peumimpén awaknyan jipeurab ubak gobnyan, dan óh lheuehnyan Nabi Musa laju geumeututoe ubak awaknyan. 32 Óh lheuehnyan banmandum rakyat Israel meusapat jikeulileng gobnyan, dan ubak awaknyan banmandum Nabi Musa laju geupeusampoe banmandum huköm nyang ka geubri lé TUHAN ubak gobnyan di ateueh Gunong Sinai. 33 Óh ka lheueh geumariet ngon awaknyan, Nabi Musa laju geutob muka geuh ngon ija. 34 Pajan mantong Nabi Musa geutamong lam Khimah TUHAN keu geujak meututoe ngon TUHAN, ijanyan laju geupeuhah sampoe gobnyan geuteubiet uluwa. Óh lheueh nyan laju geupeusampoe ubak bansa Israel banmandum peusan TUHAN, 35 dan awaknyan laju jingieng muka Nabi Musa muble-ble cahya. Dan geutob lom muka gobnyan sampoe ubak gileran seulanjut jih meunyoe gobnyan geujak meututoe ngon TUHAN.

Keuluaran 35

1 Nabi Musa laju geupeusapat banmandum bansa Israel óh lheueh nyan laju geupeugah, "Nyoe kheueh peurintah TUHAN keugatanyoe banmandum: 2 Na nam uroe geubri lé Gobnyan keu gata meubuet, teuma bak uroe nyang keu tujoh na kheueh uroe keu gata meureuhat, uroe raya nyang geupeukhusos keu TUHAN. Soe nyang meubuet bak uroe Sabat ureuëng nyan teuhuköm maté. 3 Nibak uroenyan gata hana jeuet peuhu apui lam rumoh gata." 4 Nabi Musa geupeugah ubak banmandum bansa Israel, "Meunoe kheueh peurintah TUHAN: 5 Ba kheueh peuseumahan keu TUHAN. Soe nyang meugrak até jih, bah kheueh jipeuseumah méuh, pirak dan peurunggu; 6 ija lineun halôh, ija wol ijo, ungu meunan cit nyang mirah; ija nyang teupeugét nibak bulée kaméng; 7 kulét bubiri agam nyang ka teuboh wareuna mirah; kulét halôh, kayée akasia, 8 minyéuk keu panyöt; meubagoe reumpah keu minyéuk upacara dan keu dupa nyang mangat bée; 9 peumata deulima dan peumata nyang laén keuteuboh tatah nibak bajée efod dan sinutôb dada Imeum Agong." 10 "Banmandum utoh-utoh nyang carông lamkawan gata harôh jiteuka keujijak peugét peue nyang geupeurintah lé TUHAN, atra nyan na kheueh lagée nyoe: 11 Khimah, bubong dan sinutôb jih, ceunawiét dan rungka jih, kayée-kayée meulinteung, taméh pintoe dan keunaleueng jih; 12 Peuto Peujanjian ngon kayée geunulam jih, sinutôb jih dan ija ngon tob jih; 13 meuja ngon kayée geunulam jih, banmandum peuleungkapan jih meunan cit ruti peuseumah 14 gaki panyöt keu ngon peutrang meunan cit deungon mandum peuleungkapan jih, panyöt minyéuk jih; 15 miseubah keu teumpat tot dupa meunan cit ngon kayée geunulam jih, minyéuk upacara, dupa nyang mangat bée; tirée keu pintoe Khimah, 16 miseubah keu teumpat keureubeuen nyang teutot meunan cit deungon kisi-kisi nibak peurunggu, kayée geunulam deungon banmandum peuleungkapan jih; bak ié keuteumpat rhah keunaleueng jih, 17 layeue-layeue keu peulataran, taméh-taméh deungon keunaleueng jih, tirée pintoe geureubang peulataran, 18 patok-patok dan talo keu Khimah dan keu peulataran jih; 19 Peukayan iébadat keu dumna imeum bak watée awak meutugaih nibak Ruweueng Suci dan peukayan khusos keu imeum Nabi Harun dan aneuëk-aneuëk gobnyan." 20 Laju bubena ureuëng Israel nyang na meugumpoi nibak teumpat nyan bubar, 21 dan soe mantong nyang na meugrak até jih, jijak ba peuseumahan keu TUHAN keuteupeu leungkab Khimah TUHAN. Meunan cit awaknyan jiba banmandum nyang teupeureulée keumeu iébadat dan bahan keu peukayan imeum. 22 Soe mantong nyang jitem, bahnyan ureuëng agam meunan cit ureuëng inong, jiteuka sira jiba peuto piasan, lagée keurabu, euncien, taloe takue, dan mubagoe rupa piasan méuh keu jipeuseumah ubak TUHAN. 23 Tieb-tieb ureuëng nyan na ija lineun halôh, ija wol ijo, ungu atawa mirah, ija nibak bulée kaméng, kulét bubiri agam nyang ka teuboh wareuna mirah, atawa kulét halôh, jipeuseumah atra nyan. 24 Tieb-tieb ureuëng nyang hase jipeuseumah pirak atawa peurunggu, jiba atranyan keu TUHAN. Meunan cit teuma nyang jipeubuet lé ureuëng-ureuëng nyang na kayée akasia keu ngon keureuja nyan. 25 Bubena ureuëng inong nyang carông ceumeucob jiba beuneueng lineun halôh ngon beuneueng wol ijo, ungu dan mirah nyang ka awaknyan peugét. 26 Meunan cit awaknyan jicob beuneueng nyang teupeugét nibak bulée kaméng. 27 Bubena peumimpén jiba peumata deulima dan peumata laén keu teutatah dan nibak efod dan sinutôb dada. 28 Meunan cit awaknyan jiba reumpah-reumpah dan minyéuk keu panyöt, minyéuk upacara dan dupa nyang mangat bée. 29 Banmandum ureuëng Israel deungon galak até jiba peuseumahan awaknyan keu TUHAN dan buet nyang geupeurintah lé TUHAN rot Nabi Musa. TUHAN 30 Óh lheuehnyan Nabi Musa geupeugah ubak bansa Israel, "TUHAN ka geupiléh Bezaleel bin Uri, cucoe Hur, nibak sukée Yehuda 31 dan jianugeurah jihnyan deungon kuasa Gobnyan. Po teu Allah geubri ubak jih ngon peungeurtian, carông meunan cit dan hase geupeubuet lam meubagoe jeuneh karya seuni, 32 keuteupeugét reuncana nyang teupeureulée ubak buet nyang ahli, meunan cit teupeugét nibak méuh, pirak dan peurunggu; 33 keu teuasah batée peumata nyang keuneuk teutatah; keu ngon uke kayée dan keumubagoe rupa karya seuni nyang laén. 34 Keu Bezaleel dan Aholiab, aneuëk Ahisamakh nibak sukée Dan, TUHAN geubri buet nyang carông mangat jipeurunoe keuahlian jihnyan ubak ureuëng laén. 35 Awaknyan geubri buet nyang ahli nibak meubagoe buet nyang jipeubuet lé ahli meu-uke, peurancang, ahli ceumeucob ija lineun halôh, ija wol ijo, ungu dan mirah, dan ija nyang laén. Awaknyan na kheueh peurancang nyang ahli dan hase jipeubuet meubagoe rupa buet.

Keuluaran 36

1 Bazaleel, Aholiab, dan banmandum utoh nyang ka meuteumé iéleumé sampoe carông dan ahli nibak TUHAN, jituóh peubuet banmandum nyang teupeureulée keuteupeugét Khimah TUHAN. Awaknyan harôh jipeugét banmandum nyang ka geupeuteuntée lé TUHAN." 2 Nabi Musa laju geutawök Bazaleel meunan cit deungon Ahiloab dan banmandum ureuëng nyang meuteumé keu ahlian nibak TUHAN dan nyang jitem bantu, laju geuyue awaknyan jipeuphon keureuja. 3 Nabi Musa geubri keu awaknyan banmandum nyang jisumbang lé ureuëng Israel keu teupeugét Khimah TUHAN. Teuma bansa Israel teutab mantong jiba peuseumahan ubak Nabi Musa bak tieb-tieb beungoh. 4 Dan lé utoh-utoh nyang teungoh jikeureuja buet nyan 5 jijak lapor ubak Nabi Musa, "Bahan-bahan nyang jibri lé awaknyan ka leubeh nibak nyang seb keu buet nyang ka geubri tugaih lé TUHAN." 6 Deungon nyan Nabi Musa laju geupeumaklum ubak banmandum khimah-khimah bahwa kaseb sumbangan keu Khimah TUHAN; deungon nyan bubena ureuëng ka hana jiba lé. 7 Bahan-bahan nyang ka awaknyan bri nyan ka leubeh nibak nyang teupeureulée keuteupeuseuleusoe banmandum buet nyan. 8 Óh lheuehnyan nyang paleng carông lamkawan utoh-utoh nyan laju jipeugét Khimah TUHAN. Khimah nyan awaknyan peugét nibak siploh ôn ija lineun halôh teucob nibak ija wol ijo, ungu dan mirah, laju atranyan teusulam ngon gamba kerub. 9 Tieb-tieb lam siôn sadub ukoran jih; panyang jih na dua blaih metée, dan luwah jih na dua metée. 10 Limong ôn ija teusambat jeuet saboh layeue, meunan cit limong ôn nyang laén teupeugét saban cit lagée nyan teuma. 11 Nibak bandua boh binéh layeue nyan teupeugét teuma ceunawiét nibak ija ijo, 12 na limong ploh ceunawiét nibak maséng-maséng layeue, deungon nyan ka jeuet keusaboh pasang. 13 Óh lheuehnyan laju teupeugét teuma limong ploh boh ceunawiét méuh keungon peusaboh bandua boh layeue nyan. 14 Óh lheuehnyan awaknyan laju teuma jipeugét bubong Khimah nibak siblaih ôn ija nibak bulée kaméng. 15 Tieb-tieb lam siôn sadub ukoran jih, panyang jih lhée blaih metée dan luwah jih dua metée. 16 Limong ôn teusambat jeuet keu saboh layeue, dan nyang nam ôn teuk nyang laén teupeugét lagée nyan cit teuma. 17 Limong ploh boh ceunawiét teupasang nibak binéh layeue nyang phon dan limong ploh boh ceunawiét teuk nyang laén nibak binéh layeue nyang keudua. 18 Óh lheuehnyan laju teupeugét limong ploh ceunawiét nibak peurunggu keungon peusaboh bandua boh layeue nyan jeuet keusaboh bubong Khimah. 19 Óh lheuehnyan teupeugét teuma dua boh sinutôb keu bagian Khimah, saboh nibak kulét bubiri agam nyang teuboh wareuna mirah, dan nyang laén nibak kulét halôh. 20 Óh lheuehnyan awaknyan laju jipeugét rungka-rungka Khimah nyang teudong cot nibak kayée akasia. 21 Tieb-tieb rungka manyang jih nam metée dan luwah jih nam ploh nam seunti metée. 22 Nibak tieb-tieb rungka teupeugét teuma patok nyang sipasang, deungon nyan banmandum rungka-rungka nyan hase teusambat nyang saboh ngon nyang laén. 23 Keubagian seulatan Khimah teupeugét teuma dua ploh boh rungka, 24 deungon peuet boh keunaleueng jih nibak pirak, dua boh dimiyueb keu tieb-tieb rungka keubandua boh patok jih. 25 Keubagian utara Khimah teupeugét teuma dua ploh boh rungka, 26 deungon peuet ploh boh keunaleueng jih nibak pirak, dua boh dimiyueb keu tieb-tieb rungka. 27 Keu bagian likot Khimah nibak bagian barat, teupeugét teuma nam boh rungka 28 dan dua boh rungka keubagian sagoe jih. 29 Rungka-rungka sagoe nyan teuhubong teuma ubak bagian gaki laju trok ubak bagian ateueh jih. Bandua boh rungka nyang teubantuek sagoe jih teupeugét ngon cara lagée nyan cit teuma. 30 Deungon nyan banmandum nyan na lapan boh rungka deungon nam blaih boh keunaleueng pirak, dua boh dimiyueb keu tieb-tieb rungka. 31 Óh lheuehnyan laju awaknyan jipeugét limong blaih boh kayée meulinteung nibak kayée akasia, limong boh keurungka-rungka keu tieb-tieb saboh sagoe Khimah, 32 limong boh teuk keu sagoe nyang laén, dan limong boh teuk keulikot Khimah siblaih ubarat. 33 Kayée linteung nyang bagian teungoh, teupasang manyang jih siteungoh rungka, phon nibak ujong trok ubak ujong Khimah nyan. 34 Rungka Khimah dan kayée-kayée linteung nyan teuseupôh ngon méuh, óh lheuehnyan teupasang laju gleung-gleung méuh keungon peuteun kayée-kayée nyan. 35 Meunan cit awaknyan jipeugét ija sinutôb pintoe nibak ija lineun halôh nyang teucob ngon ija wol ijo, ungu dan mirah, lheueh nyan laju teusulam ngon gamba kerub. 36 Keu ngon gantung ija nyan teupeugét teuma peuet boh taméh nibak kayée akasia dan teuseupôh ngon méuh deungon ceunawiét méuh dan teupasang nibak peuet boh keunaleueng pirak. 37 Lheuehnyan laju teupeugét tirée nibak keu pintoe Khimah nibak lineun halôh nyang teucob ngon ija wol ijo, ungu dan mirah dan teuhias deungon cob sulam. 38 Keu ija pintoe nyan teupeugét teuma limong boh taméh nyang teupeuhubong deungon ceunawiét-ceunawiét. Ujong-ujong dan sinambat-sinambat ban limong boh taméh nyan teuseupôh deungon méuh, dan ban limong boh keunaleueng jih teupeugét nibak peurunggu.

Keuluaran 37

1 Bezaleel laju jipeuget Peuto Peujanjian nibak kayée akasia, panyang jih 110 seuntimetée, luwah dan manyang jih maséng-maséng na 66 seuntimetée. 2 Siblah udalam meunan cit ngon siblah u luwa teuseupôh ngon méuh aseuli, óh lheueh nyan laju jipeugét bingkée méuh bansilingka jih. 3 Óh lheuehnyan jipeuget teuma peuet boh gleung méuh keukayée ngon gulam jih dan laju jipasang nibak ban peuet boh gaki nyan, dua boh gleung nibak tieb-tieb sagoe. 4 Meunan cit jipeuget teuma ngon gulam jih nibak kayée akasia, dan atranyan pih teuseupôh ngon méuh, 5 laju kayée geunulam nyan jipeutamong lam gleung nibak tieb-tieb sagoe nyan. 6 Óh lheuehnyan jipeuget teuma saboh sinutôb nibak méuh aseuli, panyang jih na 110 seuntimetée dan luwah jih 66 seuntimetée. 7 Meunan cit jipeuget teuma dua boh kerub nibak méuh teuteumpah, 8 saboh nibak tieb-tieb ujong sinutôb nyan. Bandua boh kerub nyan teupeujeuet saboh bagian ngon sinutôb jih 9 dan atranyan jipeugét meuhadab-hadab keue, deungon sayeub nyang teupeunyue sampoe teutôb peuto nyan. 10 Bezaleel jipeugét meuja nibak kayée akasia, nyang panyang jih na 88 seuntimetée, luwah jih 44 seuntimetée dan manyang jih 66 seuntimetée. 11 Meuja nyan teuseupôh ngon méuh aseuli dan bansilingka nyan jipasang teuma ngon bingkée méuh. 12 Laju jipeugét teuma binéh meuja nyang luwah jih 7,5 seuntimetée. Binéh nyan teuboh teuma ngon bingkée méuh bansilingka. 13 Jipeugét teuma peuet boh gleung keu ngon geunulam atranyan dan laju jipasang nibak ban peuet boh gaki meuja. 14 Gleung keu ngon peuteun kayée geunulam nyan jipasang nibak thon ngon binéh meuja. 15 Geunulam nyan teupeugét nibak kayée akasia dan teuseupôh teuma ngon méuh. 16 Meunan cit jipeugét teuma cipe-cipe, cangkie-cangkie, keundi-keundi dan cambông-cambông keuteumpat teupeuseumah ié anggô. Banmandum peuleungkapan meuja nyan jipeugét nibak méuh aseuli. 17 Bezaleel jipeugét teuma gaki panyöt nibak méuh aseuli. Keunaleueng dan tangke teumpat mat jih teupeugét teuma nibak méuh teuseupôh. Bungöng-bungöng teuhias, meunan cit ngon kumbée dan keulopak jih teupeugét saboh ngon tangke teumpat mat jih. 18 Nibak tangke ngon teumpat nyan jipeugét teuma nam boh cabeueng nibak tieb-tieb sagoe jih. 19 Nibak tieb-tieb cabeueng jih teuhias teuma deungon lhée boh bungöng badam deungon kumbée-kumbée dan keulopak jih. 20 Nibak tangke teumpat mat jih teuhias teuma deungon peuet boh bungöng badam deungon kumbée dan keulopak jih. 21 Dimiyueb tieb-tieb cabeueng keulopak nyan teupeugét teuma saboh kumbée. 22 Bansaboh gaki panyöt nyan deungon kumbée-kumbée dan cabeueng-cabeueng jih teupeugét nibak sikréek méuh teuseupôh aseuli. 23 Nibak gaki panyöt nyan teupeugét teuma tujoh boh panyöt meunan cit deungon alat keu ngon peugleh dah panyöt dan talam jih nibak méuh aseuli. 24 Keuteupeugét gaki panyöt meunan cit deungon peuleungkap jih teupeureulée 35 kilogram méuh aseuli. 25 Bezaleel jipeugét teuma nibak kayée akasia saboh miseubah keu teumpat tot dupa. Miseubah nyan hi jih meusagoe; panyang dan luwah jih maséng-maséng 45 seuntimetée dan manyang jih 90 seuntimetée. Nibak ban peuet boh sagoe blaih si u ateueh jipeugét teuma lungkée nyang jeuet meusaboh ngon miseubah nyan. 26 Siblaih u ateueh, ban peuet boh sagoe meunan cit ngon lungkée-lungkée jih teuseupôh teuma ngon méuh aseuli dan bansilingka jih teupeugét teuma ngon bingkée méuh. 27 Jipeugét cit teuma dua boh gleung dimiyueb bingkée méuh nibak bandua boh sagoe jih keungon peuteun kayée geunulam miseubah nyan. 28 Geunulam nyan teupeugét nibak kayée akasia dan teuseupôh deungon méuh. 29 Bezaleel jipeugét minyéuk upacara dan dupa aseuli nyang mangat bée, teujampu lagée minyéuk mangat bée.

Keuluaran 38

1 Bezaleel laju jicok kayée akasia, óh lheuehnyan laju jipeugét miseubah keu keureubeuen nyang teutot. Miseubah nyan hi jih peuet sagoe, panyang ngon luwah jih maséng-maséng na 2,2 metée, dan manyang jih 1,3 metée. 2 Nibak tieb-tieb sudut blaih u ateueh jipeugét lungkée nyang jeuet meusaboh ngon miseubah nyan. Bansabohnyan teuseupôh ngon peurunggu. 3 Meunan cit jipeugét kuali-kuali, sudok, cambông-cambông, geureupu-geureupu meunan cit teumpat apui. Banmandum peuleungkapan nyan teupeugét nibak peurunggu. 4 Meunan cit jipeugét teuma kawat teumanyuem nibak peurunggu nyang teulilet nibak miseubah siblaih u miyueb, manyang jih siteungoh nibak manyang miseubah. 5 Óh lheuehnyan laju jipeugét peuet boh gleung nibak kayée geunulam nibak ban peuet boh geunulam siblaih u miyueb jih. 6 Kayée geunulam nyan teupeugét nibak kayée akasia nyang teuseupôh ngon peurunggu. 7 Laju bandua kayée geunulam nyan jipeutamong lam gleung-gleung nibak bandua sagoe miseubah nyan. Miseubah nyan teupeugét nibak papeuen dan siblaih u dalam jih meurongga. 8 Bezaleel jipeuget bak peurunggu dan keunaleueng peurunggu. Peurunggu nyan nibak ceureumen-ceureumen atra ureuëng-ureuëng inong nyang peutimang nibak babah pintoe Khimah TUHAN. 9 Bezaleel laju jipageue Peulataran Khimah TUHAN ngon layeue nyang teupeugét nibak ija lineun halôh. Nibak siblah u seulatan, panyang jih na 44 metée, 10 jipeuteun lé dua ploh boh taméh peurunggu, maséng-maséng lam keunaleueng peurunggu, deungon ceunawiét dan sinangkot jih nyang teupeugét nibak pirak. 11 Meunan cit blaih si utara lagée nyan teuma teupeugét. 12 Si blaih u barat teupasang layeue nyang panyang jih na 22 metée, deungon siploh boh taméh dan siploh boh teuma keunaleueng; ceunawiét dan sinambat jih teupeugét nibak pirak. 13 Si blaih u timu nyang na pintoe jih, luwah layeue jih na 22 metée. 14 Nibak wie ngon uneuen pintoe nyan teupasang layeue, maséng-maséng panyang jih 6,6 metée, deungon lhée boh taméh dan lhée boh teuma keunaleueng. 16 Banmandum layeue nyang na bansilingka nyan teupeugét nibak ija lineun halôh. 17 Keunaleueng taméh-taméh jih teupeugét nibak peurunggu, meunyoe ceunawiét, sinambat meunan cit ngon pucak taméh jih teupeugét nibak pirak. Banmandum taméh nyang na bansilingka peulataran nyan teusangkot saboh ngon nyang laén deungon sinangkot pirak. 18 Ija tirée keu pintoe geureubang nyan teupeugét nibak ija lineun halôh nyang teucôb ngon ija wol ijo, ungu dan mirah dan teuboh hias ngon côb sulam. Panyang jih na sikureueng metée dan manyang jih dua metée, saban ngon layeue nibak peulataran. 19 Ija pintoe nyan jipeuteun lé peuet boh taméh deungon peuet boh keunaleueng peurunggu. Banmandum ceunawiét meunan cit sinutôb pucak jih dan sinangkot jih teupeugét nibak pirak, 20 teuma patok-patok keu Khimah meunan cit keu pageue jih teupeugét nibak peurunggu. 21 Nyoe kheueh dafeutar nyang teupeuguna lam Khimah TUHAN, teumpat bandua neuk batée dan siploh Peurintah Allah nyan teukeubah. Dafeutar nyan teupeugét ateueh peurintah Nabi Musa dan jisuson lé ureuëng-ureuëng Lewi nyang meukeureuja dimiyueb pimpénan Itamar, aneuëk Imeum Nabi Harun. 22 Bezaleel aneuëk Uri, cucoe Hur nibak sukée Yehuda, jipeugét banmandum nyang geupeurintah lé TUHAN. 23 Peumbantu gobnyan Aholiab aneuëk Ahisamakh nibak sukée Dan, na kheueh sidroe tukang meu-uke, peurancang dan tukang côb ija lineun nyang halôh, meunan cit ija wol ijo, ungu dan mirah. 24 Méuh nyang jipeuseumah ubak TUHAN keu Khimah Suci banmandum nyan na siribée kilogram, teutimang meunurot céng nyang teupeuguna nibak Khimah TUHAN. 25 Pirak nyang jiteumé nibak seunsus bansa Israel le jih na 3.430 kilogram atranyan teutimang meunurot céng nyang teupeuguna lam Khimah TUHAN. 26 Jeumeulah nyan sadub lagée peue nyang jibayeue lé mandum ureuëng nyang teudafeutar lam seunsus nyan. Tieb-tieb ureuëng jibayeue yuem nyang ka teupeuteuntée, teutimang meunurot céng nyang teupeuguna. Nibak seunsus nyan na teudafeutar 603.550 droe ureuëng agam nyang meu-umu dua ploh thon u ateueh. 27 Nibak pirak nyan, 3.400 kilogram teupeuguna keuteupeugét bansireutôh keunaleueng Khimah TUHAN dan ija pintoe jih. Tieb-tieb keunaleueng na brat jih 34 kilogram. 28 Pirak nyang leubeh nyan, nyang le jih 30 kilogram. Bezaleel laju jipeugét sinambat-sinambat dan ceunawiét-ceunawiét keu taméh-taméh nyan, meunan cit sinutôb pucak nibak taméh-taméh nyan. 29 Peurunggu nyang jipeuseumah ubak TUHAN banmandum nyan na jeumeulah jih 2.425 kilogram. 30 Peurunggu nyan teupeuguna keu ngon peugét keunaleueng pintoe Khimah TUHAN, miseubah deungon meunanyum kawat nibak peurunggu, banmandum peuleungkapan miseubah, 31 keunaleueng layeue bansilingka peulataran dan babah pintoe geureubang jih, banmandum patok Khimah dan peulataran bansilingka nyan.

Keuluaran 39

1 Bezaleel dan Aholiab jipeugét teuma peukayan iébadat nibak ija wol ijo, ungu dan mirah keu imeum-imeum bak watée awaknyan meutugaih nibak Ruweueng Suci. Peukayan imeum keu Nabi Harun jipeugét lagée nyang geupeurintah lé TUHAN bak Nabi Musa. 2 Efod jipeugét nibak ija lineun halôh, ija wol ijo, ungu dan mirah, lom beuneueng méuh. 3 Awaknyan jiseupôh leumpéng-leumpéng méuh nyang óh lheuehnyan jikoh-koh jeuet keu beuneueng lipeh, laju jicôb ngon ija lineun halôh dan wol ijo, ungu dan mirah. 4 Óh lheuehnyan jipeugét teuma dua boh taloe bahô keungon ikat efod nyang teucob nibak binéh jih. 5 Talo keuiéng teunun halôh teupeugét nibak bahan nyang saban dan teucôb nibak efod nyan sampoe jeuet meusaboh bagian lagée nyang geupeurintah lé TUHAN ubak Nabi Musa. 6 Awaknyan laju jiasah batée deulima lheuehnyan laju jipasang lam bingkée méuh. Deungon peunoh keuahlian awaknyan uke nan-nan bandua blaih droe aneuëk Nabi Yakub ateueh batée-batée nyan. 7 Lheuehnyan batée-batéenyan jipasang nibak taloe bahô efod sibagoe tanda peuingat ubak bandua blaih sukée Israel, lagée nyang geupeurintah lé TUHAN ubak Nabi Musa. 8 Bezaleel dan Aholiab jipeugét teuma sinutôb dada nibak bahan nyang saban deungon efod, dan côb sulam jih pi saban. 9 Hijih masagoe nyang teulipat dua, luwah ngon panyang jih maséng-maséng 22 seuntimetée. 10 Nibak sinutôb dadanyan awaknyan pasang teuma peuet boh baréh batée peumata. Nibak baréh nyang phon batée deulima, topas dan baiduri seupah. 11 Nibak baréh nyang keudua zamrod, batée nilam dan intan. 12 Nibak baréh nyang keu lhée batée lazuardi, batée akik dan batée keucubong. 13 Nibak baréh nyang keu peuet batée pirus, batée yakut dan batée ratna ceumpaka. Ban dua blaih peumata nyan teuikat teuma ngon méuh. 14 Nibak tieb-tieb peumata nyan teu-uke teuma ngon nan sidroe lamkawan aneuëk Nabi Yakub sibagoe tanda peuingat ubak sukée-sukée Israel. 15 Laju jipeugét teuma dua boh rante méuh aseuli nyang teuputa lagée talo. 16 Meunan cit jipeugét teuma dua boh gleung méuh nyang teupasang nibak bandua boh ujong siblah u ateueh sinutôb dada nyan. 17 Laju bandua boh rante méuh nyan jipeutamong lam gleung-gleung nyan, 18 dan bandua ujong nyang laén ji-ikat teuma nibak bandua boh bingkée, sampoe sinutôb dadanyan hase teuhubong ngon bagian keu talo bahô nibak efod nyan. 19 Laju jipeugét teuma dua boh gleung méuh teuk nyang jipasang nibak sinutôb dadanyan, nibak ujong miyueb siblaih u dalam nyang keunong efod. 20 Óh lheuehnyan jipeugét teuma dua boh gleung méuh nyang jipasang nibak siblaih ukeue bandua talo bahô efod, tho ngon sinambong meucôb bacut siblaih u miyueb, di ateueh talo keuiéng nibak teunun halôh. 21 Paih lagée nyang geupeurintah lé TUHAN ubak Nabi Musa, gleung sinutôb dada teupeuhubong teuma ngon talo ijo nibak gleung efod, sampoe sinutôb dada nyan teutab na di ateueh talo keuiéng dan hana leukang. 22 Bajée jubah nyang teungui di ateueh efod, banmandum nyan teupeugét nibak ija wol ijo. 23 Ruhuéng takue jih teupeukong ngon pita teunun mangat bék bagaih beukah. 24 Ban siseunlingka miyueb jih jipeugét hiasan boh deulima nibak ija lineun nyang halôh dan wol ijo, ungu dan mirah, nibak lheung-lheung deungon keulintengan nibak méuh, paih lagée peurintah TUHAN ubak Nabi Musa. 27 Awaknyan jipeugét teuma bajée panyang jaroe keu Nabi Harun dan aneuëk-aneuëk gobnyan, 28 meunan cit deungon seureuban, destar dan sileuweue paneuk nibak ija lineun, 29 dan talo keuiéng nibak ija lineun halôh, wol ijo, ungu dan mirah, teuhias teuma deungon côb sulam, lagée nyang geupeurintah lé TUHAN ubak Nabi Musa. 30 Meunan cit jipeugét teuma hiasan nibak méuh aseuli, sibagoe tanda bahwa awaknyan ka teupeukhusos keu TUHAN. Nibak hiasan nyan teu uke deungon tutoe haba lagée nyoe, "Teupeukhusos keu TUHAN". 31 Hiasan nyan teupasang nibak seureuban blaih si ukeue, paih lagée peurintah TUHAN ubak Nabi Musa. 32 Akhé jih seuleusoe kheueh banmandum keureuja keu teupeugét Khimah TUHAN. Ureuëng Israel ka jipeubuet banmandum lagée nyang geupeurintah lé TUHAN ubak Nabi Musa. 33 Awaknyan jiba ubak Nabi Musa Khimah deungon banmandum peuleungkapan jih, ceunawiét-ceunawiét jih, kayée-kayée linteung jih, taméh-taméh dan keunaleueng jih, 34 sinutôb nibak kulét kaméng agam nyang teuboh wareuna mirah, sinutôb nibak kulét halôh, ija tudong. 35 Peuto Peujanjian nyang meuasoe bandua neuk batée meunan cit deungon kayée-kayée geunulam dan sinutôb jih, 36 meuja deungon banmandum peuleungkapan jih dan ruti sajian, 37 gaki panyöt nibak méuh aseuli, panyöt-panyöt jih deungon banmandum peuleungkapan jih, minyéuk keu panyöt, 38 miseubah nibak méuh, minyéuk upacara, dupa mangat bée, tirée keu pintoe Khimah, 39 miseubah peurunggu deungon meunanyum kawat nibak peurunggu, kayée geunulam dan bandum peuleungkapan jih; bak ié teumpat seumeurhah deungon keunaleueng jih, 40 layeue-layeue keu peulataran dan taméh-taméh meunan cit deungon keunaleueng jih, tirée babah pintoe geureubang peulataran meunan cit deungon talo-talo jih, patok-patok Khimah; banmandum peurabot nyang na teungui lam Khimah, 41 dan peukayan iébadat keu imeum-imeum bak watée awaknyan meutugaih nibak Ruweueng Suci dan peukayan khusos keu Nabi Harun dan aneuëk-aneuëk gobnyan. 42 Ureuëng israel ka jipeubuet banmandum nyan paih lagée nyang geupeurintah lé TUHAN ubak Nabi Musa. 43 Nabi Musa geupareksa mandum dan geukalon bahwa awaknyan ka jipeubuet paih lagée nyang geupeurintah lé TUHAN. Laju Nabi Musa geubri beureukat keu awaknyan.

Keuluaran 40

1 TUHAN meufeureuman ubak Nabi Musa, 2 "Peudong kheueh Khimah Lôn bak tanggai sa buleuen sa. 3 Pasoe kheueh lam Peuto Peujanjian nyang meuasoe Siploh Peurintah dan pasang kheueh tudong ija dikeue jih nyan. 4 Keubah kheueh meuja deungon peuleungkapan jih. Peutamong teuma gaki panyöt dan tot kheueh panyöt nyan. 5 Peuduek kheueh miseubah méuh teumpat tot dupa dikeue Peuto Peujanjian, dan gantung kheueh tabeng dikeue pintoe Khimah. 6 Peuduek kheueh miseubah keu keureubeuen nyang teutot dikeue pintoe Khimah. 7 Keubah kheueh bak ié lamkawan Khimah ngon miseubah nyan, lheueh nyan pasoe kheueh ngon ié. 8 Lheueh nyan pasang kheueh layeue nibak silingka peulataran Khimah, dan gantung teuma tirée pintoe geureubang peulataran. 9 Óh lheuehnyan Khimah dan banmandum peuleungkapan jih harôh gata peuseumah ubak Ulôn deungon cara teuboh minyéuk ngon minyéuk upacara, deungon nyan banmandum nyan teupeukhusos keu Ulôn. 10 Peuseumah kheueh miseubah dan banmandum peuleungkapan jih deungon cara nyan, mangat banmandum nyan teupeukhusos keu Ulôn. 11 Peubuet lagéenyan cit teuma deungon bak ié dan keunaleueng jih. 12 Óh lheuehnyan, yue kheueh ubak Nabi Harun dan aneuëk-aneuëk jih jijak ubak babah pintoe Khimah lheueh nyan laju jirhah droe. 13 Peungui kheueh peukayan imeum ateueh Nabi Harun, dan boh kheueh minyéuk ateueh jihnyan mangat jeuet jihnyan teupeukhusos jipeutimang Ulôn sibagoe imeum. 14 Lheueh nyan yue kheueh aneuëk-aneuëk jih mangat jipeurab, dan peusok kheueh bajée panyang jaroe bak awaknyan. 15 Lheueh nyan boh kheueh minyéuk ateueh awaknyan lagée gata boh minyéuk ateueh ureuëng syiek jih, mangat awaknyan pi hase jipeutimang Ulôn sibagoe imeum. Deungon na upacara teuboh minyéuk nyan, sukée awaknyan treun meutruem jeuet jimat jabatan sibagoe imeum." 16 Nabi Musa geupeubuet banmandum nyan lagée nyang geupeurintah lé TUHAN. 17 Teuma nibak tanggai sa buleuen sa nibak thon nyang keudua óh ka lheueh bansa Israel jitinggai nanggroe Meusé, Khimah TUHAN nyan teupasang. 18 Nabi Musa geukeubah keunaleueng-keunaleueng jih, geupeudong rungka-rungka jih, geupeudab kayée-kayée linteung jih, dan geupeudong taméh-taméh jih. 19 Lheuehnyan jileueng kheueh bubong Khimah deungon sinutôb siblaih u luwa di ateueh nyan lagée nyang geupeurintah lé TUHAN. 20 Lheueh nyan bandua batée nyan jipeutamong lam Peuto Peujanjian. Laju lé Nabi Musa geupasang sinutôb Peuto nyan dan geupeutamong kayée geunulam u dalam gleung jihnyan. 21 Lheuehnyan laju jipeutamong Peuto nyan u dalam Khimah dan geugantung ija silubong dikeue nyan, lagée nyang geupeurintah lé TUHAN ubak gobnyan. 22 Óh lheuehnyan Nabi Musa geukeubah meuja lam Khimah, siblaih utara blaih luwa ija, 23 lheueh nyan ateueh meuja nyan geukeubah teuma ruti sajian. 24 Gaki panyöt geukeubah lam Khimah, blaih u seulatan, meuhadab keu ngon meuja nyan, 25 lheuehnyan, panyöt-panyöt nyan laju geutot dikeue TUHAN. 26 Miseubah méuh geukeubah lam Khimah, dikeue ija, 27 lheuehnyan geutot laju dupa mangat bée lagée nyang geupeurintah lé TUHAN ubak Nabi Musa. 28 Nabi Musa geugantung tirée pintoe di Khimah, 29 dan dikeue pintoe nyan geukeubah teuma miseubah keu keureubeuen nyang teutot. Di ateueh miseubah nyan geupeuseumah keureubeuen nyang teutot dan keureubeuen sajian. 30 Kulah peurunggu geukeubah teuma di lamkawan Khimah ngon miseubah nyan, laju kulah nyan geupasoe ngon ié. 31 Nabi Musa, Nabi Harun dan aneuëk-aneuëk gobnyan geurhah jaroe dan gaki gobnyan nibak teumpat nyan, 32 tieb-tieb watée awaknyan jitamong u dalam Khimah TUHAN atawa jipeurab bak miseubah. 33 Bansilingka Khimah dan miseubah nyan Nabi Musa geupasang layeue, laju gobnyan geugantung tirée pintoe geureubang peulataran. Deungon lagée nyan seuleusoe kheueh banmandum buet nyan. 34 Óh lheuehnyan jitreun kheueh awan jitôb Khimah TUHAN, dan Khimah nyan peunoh ngon cahya TUHAN teuka. 35 Lé sababnyan Nabi Musa hana hase geutamong lam Khimah nyan. 36 Tieb-tieb awannyan jiék nibak ateueh Khimah TUHAN, bansa Israel laju jireuloih khimah-khimah jih keu jiminah u teumpat laén. 37 Teuma, meunyoe awannyan hana jiék, awaknyan hana jiminah nibak teumpat nyan. 38 Simantong bansa Israel jiminah-minah teumpat, TUHAN na nibak Khimah nyan lam hi awan óh watée uroe dan lam ji apui óh watée malam.

Imeum-Imeum 1

1 Nibak khimah Gobnyan, TUHAN geutawök Nabi Musa dan geubri ubak geuhnyan banmandum peuratoran 2 nyang harôh jitaát lé ureuëng Israel. Meunyoe sidroe-droe ureuëng jipeuseumah keureubeuen nyang teutot ubak TUHAN, ureuëng nyan jeuet jipeuseumah leumô, bubiri atawa kaméng jih. 3 Meunyoe nyang jipeuseumah saboh leumô, beulatang nyan harôh nyang agam dan hana meucupa, leumô nyan harôh jiba ubak babah pintoe Khimah TUHAN, mangat TUHAN geuteurimong atra ureuëng nyan. 4 Dan jihnyan harôh jipeuduek jaroe jih ateueh ulée beulatang nyan, deungon nyan peuseumahan ureuëng nyan teuma geuteurimong lé TUHAN keuteupeu amphon desya. 5 Óh lheueh nyan leumô nyan harôh teusie dikeue pintoe Khimah. Darah beulatang nyan harôh jipeuseumah lé imeum-imeum keuturonan Nabi Harun ubak TUHAN, laju jireutek ban peuet boh sagoe miseubah nyang na dikeue pintoe khimah. 6 Óh lheueh nyan lé ureuëng nyan harôh jipuliek kulét jih dan jikoh-koh beulatang nyan. 7 Imeum-imeum harôh jipeukab apui u ateueh miseubah laju jiatoe kayée apui u ateueh nyan. 8 Sie-sie keureubeuen nyang ka lheueh teukoh-koh nyan, meunan cit deungon ulée dan gapah jih, mandum nyan harôh awaknyan keubah u ateueh apui hu. 9 Óh lheueh nyan lé ureuëng nyan harôh ji rhah asoe pruet dan pha leumô nyan, dan imeum nyang meutugaih disinan harôh geutot banmandum nyan. Bée keureubeuen nyang teutot nyan keubit that galak até TUHAN. 10 Meunyoe nyang jipeuseumah saboh bubiri atawa kaméng, beulatang nyan harôh nyang agam dan hana meucupa. 11 Ureuëng nyan harôh jisie beulatang nyan disiblaih utara miseubah, laju lé Imeum-imeum harôh jireutek darah beulatang nyan ateueh ban peuet boh sagoe miseubah. 12 Óh ka lheueh beulatang nyan teusie-sie, mandum sie nyan, meunan cit deungon ulée dan gapah jih, harôh jikeubah lé imeum u ateueh apui nibak miseubah nyan. 13 Lé ureuëng nyan laju jirhah asoe pruet dan pha beulatang nyan. Óh lheueh nyan lé imeum harôh jipeuseumah mandum nyan ubak TUHAN, dan laju jitot u ateueh miseubah. Bée keureubeuen nyang teutot nyan lumpah that galak até TUHAN. 14 Meunyoe nyang jipeuseumah saboh cicém, cicém nyan harôh leuek putéh atawa cicém mirah pati nyang mantong muda. 15 Imeum harôh geuba cicém nyan ubak miseubah, laju geuwiet takue jih dan geutot ulée jih u ateueh miseubah nyan. Darah cicém nyan harôh jipicet uluwa nibak sampeng miseubah. 16 Beue jih meunan cit mandum asoe jih harôh teupeuteubit, laju teujak tiek siblah u timu miseubah bak teumpat abée. 17 Óh lheueh nyan cicém nyan harôh teulheueb bak uram sayeueb jih, sayeueb nyan hán jeuet putôh. Dan cicém nyan harôh teutot ateueh miseubah. Bée keureubeuen nyang teutot nyan lumpah that galak até TUHAN.

Imeum-Imeum 2

1 Meunyoe sidroe-droe ureuëng jipeuseumah keureubeuen teuhidang ubak TUHAN, keureubeuen nyan harôh teupông nyang paleng jroh nyang ka teuprée ngon minyéuk zaiton dan teuboh keumeunyan diateueh nyan. 2 Ureuëng nyan harôh jiba ubak imeum-imeum keuturonan Nabi Harun. Imeum nyang meutugaih disinan geucok laju sireugam teupông nyan meunan cit deungon minyéuk zaiton dan banmandum keumeunyan, dan atranyan mandum geutot laju ateueh miseubah sibagoe tanda bahwa banmandum nyan ka geupeuseumah ubak TUHAN. Bée keureubeuen teuhidang nyang mangat nyan lumpah that galak até TUHAN. 3 Keureubeuen teuhidang nyang leubeh nyan na kheueh keu imeum-imeum. Keureubeuen nyan suci that sabab teucok nibak peunajoh nyang ka teupeuseumah ubak TUHAN. 4 Meunyoe nyang jipeuseumah nyan ruti nyang teutot didalam acuwan, ruti nyan harôh teupeugét hana meurago. Ruti nyan jeuet teubai, teupeugét nibak teupông halôh nyang teuramah ngon minyéuk zaiton, jeuet cit juadah nyang teusiliek ngon minyéuk zaiton. 5 Meunyoe nyang jipeuseumah nyan ruti nyang teupanggang di ateueh panggang, ruti nyan harôh teupeugét nibak teupông halôh deungon minyéuk zaiton, teuma hana jeuet teuboh rago. 6 Ruti nyang teupeuseumah nyan harôh teupriek-priek, laju teuro minyéuk zaiton. 7 Meunyoe nyang teupeuseumah nyan ruti nyang teutaguen lam kuali, ruti nyan harôh teupeugét nibak teupông nyang halôh dan minyéuk zaiton. 8 Ruti nyang teupeugét deungon cara lagée nyan harôh teupeuseumah ubak TUHAN dan teujok ubak imeum-imeum nyang ba atranyan ubak miseubah. 9 Imeum-imeum geucok siladum nibak rutinyan laju geutot ateueh miseubah sibagoe tanda bahwa banmandum nyan ka geupeuseumah ubak TUHAN. Bée jih nyang mangat nyan lumpah that galak até TUHAN. 10 Nyang leubeh nibak nyan na kheueh hak milék imeum. Ruti nyan lumpah suci sabab teucok nibak peunajoh nyang ka teupeuseumah ubak TUHAN. 11 Keureubeuen hidangan keu TUHAN hana jeuet teujampu ngon meulisan atawa rago, sabab meulisan dan rago hana jeuet teutot keu teupeuseumah ubak TUHAN. 12 Nibak wase tanoh nyang phon bak tieb-tieb thon, siladum harôh teupeuseumah ubak TUHAN, teuma hana jeuet teutot ateueh miseubah. 13 Tieb-tieb keureubeuen teuhidang harôh teuboh sira, sabab sira sibagoe tanda janji Po teu Allah deungon gata. Jadi mandum peuseumahan harôh teuboh sira. 14 Meunyoe gata tapeuseumah ubak TUHAN gandom nyang phon gata pot, taba kheueh gandom barô nyang ka teutôb halôh atawa teupanggang. 15 Gandom nyan harôh teuboh minyéuk zaiton dan teuboh keumeunyan di ateueh nyan. 16 Imeum harôh geutot siladum nibak gandom dan minyéuk nyan meunan cit banmandum keumeunyan, sibagoe tanda bahwa banmandum nyan ka geupeuseumah ubak TUHAN.

Imeum-Imeum 3

1 Meunyoe sidroe-droe ureuëng jipeuseumah saboh leumô keu keureubeuen peudamé, leumô nyan jeuet nyang agam dan jeuet nyang inong, teuma hana jeuet meucupa. 2 Ureuëng nyang peuseumah atra nyan harôh jikeubah jaroe jihnyan ateueh ulée beulatang nyan laju jisie bak babah pintoe Khimah TUHAN. Imeum-imeum keuturonan Nabi Harun harôh geureutek darah leumô nyan ateueh ban peuet boh sagoe miseubah nyan. 3 Keu keureubeuen peudamé ubak TUHAN, imeum harôh geupeuseumah bagian-bagian nyoe, nibak beulatang nyan: gapah nyang meubalot asoe pruet jih, 4 boh keuiéng deungon gapah jih dan bagian nyang paleng gét nibak até jih. 5 Mandumnyan meusajan-sajan deungon keureubeuen-keureubeuen nyang laén, harôh teutot u ateueh miseubah. Bée keureubeuen nyang teutot nyan lumpah that galak até TUHAN. 6 Meunyoe nyang jipeuseumah keu keureubeuen peudamé nyan saboh bubiri atawa kaméng, beulatang nyan jeuet agam dan jeuet inong, teuma hana jeuet meucupa. 7 Meunyoe sidroe-droe ureuëng jipeuseumah saboh bubiri, ureuëng nyan harôh jiba atranyan ubak Khimah TUHAN. 8 Disinan ureuëng nyan harôh jipeuduek jaroe jih ateueh ulée bubiri nyan óh lheueh nyan laju jijak sie dikeue Khimah. Dan di imeum laju geureutek darah beulatang nyan ateueh ban peuet boh sagoe miseubah nyan. 9 Keu keureubeuen peudamé ubak TUHAN imeum harôh geupeuseumah bagian-bagian nyoe nibak bubiri nyan: gapah jih, mandum ikue nyang na gapah dan teukoh bak bineh tuleueng-tuleueng jih, gapah nyang meubalot asoe pruet jih, 10 boh keuiéng deungon gapah jih dan bagian nyang paleng gét nibak até jih. 11 Imeum nyang meutugaih disinan harôh geutot banmandum nyan di ateueh miseubah keu keureubeuen peunajoh keu TUHAN. 12 Meunyoe nyang jipeuseumah saboh kaméng, ureuëng nyang peuseumah atranyan harôh jiba ubak Khimah TUHAN. 13 Nibak teumpat nyan harôh jipeuduek jaroe jihnyan ateueh ulée kaméng nyan dan laju jisie dikeue Khimah. Imeum harôh geureutek darah beulatang nyan ateueh ban peuet boh sagoe miseubah. 14 Keu keureubeuen peunajoh keu TUHAN, imeum harôh geupeuseumah bagian-bagian nyoe nibak kaméng nyan: gapah nyang meubalot asoe pruet jih, 15 boh keuiéng ngon gapah jih dan bagian nyang paleng gét nibak até jih. 16 Imeum nyang meutugaih disinan harôh geutot mandum nyan u ateueh miseubah. Bée keureubeuen peunajoh nyan lumpah that galak até TUHAN. Mandum gapah beulatang nyan keu TUHAN. 17 Ureuëng Israel sagai-sagai hana jeuet jipajoh gapah atawa darah. Peuratoran nyan teutab na siumu masa dan harôh jitaát lé tieb-tieb ureuëng Israel dipat mantong jihnyan tinggai.

Imeum-Imeum 4

1 TUHAN meufeureuman ubak Nabi Musa, geuyue peumaklum ubak bansa Israel bahwa soemantong nyang deungon hana jisaja meudesya sabab jilangga salah saboh nibak peurintah TUHAN, harôh jiseutôt peuratoran nyoe. 3 Meunyoe nyang meudesya Imeum Agong, sampoe bansa Israel meusajan meusalah, ureuëngnyan harôh jikeureubeuen saboh leumô agam muda nyang hana meucupa ubak TUHAN mangat desya jihnyan geupeu amphon. 4 Leumô nyan harôh jiba ubak babah pintoe Khimah TUHAN. Imeum Agong harôh geupeuduek jaroe gobnyan ateueh ulée beulatang nyan, óh lheueh nyan laju jisie dikeue Khimah. 5 Siladum nibak darah nyan harôh jipeutamong lam Khimah. 6 Laju jihnyan jiculok jaroe jih lam darah nyan dan jireutek tujoh goe dikeue tirée nyang peujareueng Ruweueng Suci. 7 Siladum nibak darah nyan harôh jisiliek ubak lungkée-lungkée nibak sagoe miseubah dupa mangat bée didalam Khimah, dan nyang leubeh nyan harôh jireutek nibak aleue miseubah keureubeuen teutot nyang na bak pintoe Khimah. 8 Imeum harôh geucok banmandum gapah leumô agam nyan, na kheueh gapah nyang meubalot asoe pruet jih, 9 boh keuiéng ngon gapah jih dan bagian nyang paleng gét nibak até jih. 10 Banmandum nyan harôh teutot ateueh miseubah keureubeuen nyang teutot lagée bak keureubeuen peudamé. 11 Teuma asoe leumô nyan, kulét jih, ulée jih, gaki jih, asoe pruet nyang leubeh jitamong cit keunan usus jih, 12 jadi banmandum keucuali jeumba nyang ka teupeu meungkréeh, harôh teupeuteubiet uluwa khimah. Disinan leumô nyan harôh teutot ateueh kayée apui bak teumpat teuboh abée, na kheueh teumpat nyang khusos keu nyan. 13 Meunyoe nyang meudesya mandum umat Israel, sabab ngon hana jisaja ka ji-iengkeue salah saboh peurintah TUHAN, 14 teuma meunan desya nyan jiteupeue, umat harôh jiba saboh leumô agam nyang muda ukeue Khimah TUHAN. Beulatang nyan harôh jipeuseumah sibagoe keureubeuen peuamphon desya. 15 Mandum peumimpén bansa harôh geupeuduek jaroe gobnyan ateueh ulée nyan, dan laju geusie bak teumpat nyan. 16 Imeum Agong harôh geuba siladum nibak darah nyan keu teupeutamong dalam Khimah. 17 Disinan jihnyan harôh jiculok jaroe jih u dalam darah nyan dan laju jireutek tujoh goe dikeue tirée nyang jeuet keubataih Ruweueng Suci. 18 Siladum treuk harôh jisiliek ateueh lungkée-lungkée nibak sagoe-sagoe miseubah dupa didalam Khimah dan nyang leubeh nyan harôh teureutek ateueh aleue miseubah teumpat keureubeuen nyang teutot di babah pintoe Khimah. 19 Banmandum gapah beulatang nyan harôh teucok dan laju teutot u ateueh miseubah. 20 Cara jih lagée teupeuseumah leumô agam keu keureubeuen peuamphon desya. Meunan kheueh cara Imeum Agong geupeuseumah keureubeuen keu desya-desya umat, teuma mandum desya-desya nyan teuma geupeu amphon lé TUHAN. 21 Óh lheueh nibaknyan di leumô agam nyan harôh jipeuteubiet uluwa, dan jitot laju diluwa khimah-khimah, lagée teupeu seumah leumô agam keu keureubeuen peuamphon desya Imeum Agong nyan keudroe. Meunan kheueh cara jih teupeuseumah keureubeuen peuamphon desya umat. 22 Meunyoe nyang meudesya sidroe ureuëng nyang mat kuasa sabab deungon hana jisaja ka geuiengkeue salah saboh peurintah TUHAN, 23 teuma bagaih that watée ka jiteupeu, gobnyan harôh jikeureubeuen saboh kaméng agam nyang hana meucupa keu peuamphon desya. 24 Jihnyan harôh jipeuduek jaroe jih ateueh ulée beulatang nyan, laju jisie u siblah utara miseubah, teumpat teusie beulatang keu keureubeuen nyang teutot. 25 Imeum harôh geuculok jaroe gobnyan udalam darah beulatang nyan dan geusiliek laju nibak lungkée-lungkée nibak sagoe miseubah dan geureutek laju ateueh aleue miseubah. 26 Óh lheueh nyan banmandum gapah beulatang nyan harôh geutot u ateueh miseubah, lagée bak keureubeuen peudamé. Meunan kheueh cara imeum geupeuseumah keureubeuen keu desya ureuëng nyan mat kuasa, deungon na lagée nyan ureuëng nyan teuma geupeuamphon lé TUHAN. 27 Meunyoe sidroe lamkawan rakyat ba jipeubuet desya sabab ngon hana jisaja ji-iengkeue salah saboh peurintah TUHAN, 28 teuma bubagaih that watée ka jiteupeu hainyan, jihnyan harôh jikeureubeuen saboh kaméng inong nyang hana meucupa. 29 Ureuëng nyan harôh jipeuduek jaroe jih nyan ateueh ulée beulatang nyan, laju jijak sie u siblah utara miseubah bak teumpat teusie beulatang keu keureubeuen teutot. 30 Imeum harôh geuculok jaroe geuh lam darah nyan, dan geusiliek laju ubak lungkée-lungkée nyang na bak sagoe-sagoe miseubah dan darah nyang leubeh nyan laju geureutek ubak aleue miseubah nyan. 31 Banmandum gapah beulatang nyan harôh teucok lagée bak keureubeuen peudamé. Gapah nyan harôh geutot lé imeum u ateueh miseubah, bée jih nyang mangat nyan teupeugalak até TUHAN. Meunan kheueh cara jih imeum geupeuseumah keureubeuen keu desya sidroe ureuëng biasa, teuma ureuëng nyan laju geupeu amphon lé TUHAN. 32 Meunyoe na sidroe ureuëng jikeureubeuen saboh bubiri keu teupeuamphon desya jihnyan, bubiri nyan harôh nyang inong nyang hana meucupa. 33 Ureuëng nyan harôh jipeuduek jaroe jih ateueh ulée beulatang nyan, laju jijak sie u siblah utara miseubah, bak teumpat teusie beulatang keu keureubeuen nyang teutot. 34 Imeum harôh geuculok jaroe gobnyan lam darah nyan, dan laju geusiliek ubak lungkée-lungkée nyang na bak sagoe-sagoe miseubah, dan darah nyang leubeh nyan laju geureutek bak aleue miseubah. 35 Óh lheueh nyan banmandum gapah beulatang nyan harôh geucok lagée bak keureubeuen peudamé. Gapah nyan harôh geutot ateueh miseubah, meusajan-sajan ngon keureubeuen peunajoh nyang teupeuseumah ubak TUHAN. Meunan kheueh cara imeum geupeuseumah keureubeuen keu desya ureuëng nyan, teuma ureuëng nyan laju geupeuamphon lé TUHAN.

Imeum-Imeum 5

1 Keureubeuen peuamphon desya peureulée teupeuseumah: Meunyoe sidroe ureuëng seucara reseumi teulakée jeuet keusaksi ubak kantô peungadelan, teuma hana jitem peugah peue nyang ka jingieng atawa jideungoe sampoe ureuëng nyan harôh jitanggong akibat jih. 2 Meunyoe sidroe ureuëng meusalah sabab deungon hana jisaja ka jeuet keu kuto, sabab ka tupéeh ngon salah sapeue nyang kuto, miseu jih, bangke beulatang, dan óh lheueh nyan jisadar buet jih nyan. 3 Meunyoe sidroe ureuëng meusalah sabab ngon hana jisaja ka tupéeh barang kuto nyang asai jih nibak manusia, dan óh lheueh nyan jisadar buet jih nyan. 4 Meunyoe na sidroe ureuëng meusalah sabab jimeusumpah ban galak droe keu jipeubuet peue mantong, dan óh lheueh nyan ji insaf peue nyang ka jipeubuet. 5 Bak tieb-tieb buet jih nyan, ureuëng nyang meusalah harôh ji aku buet jih nyang salah nyan. 6 Dan keu teutuboh desya jihnyan, ureuëng nyan harôh jiba saboh bubiri atawa kaméng inong keu TUHAN. Imeum harôh geupeuseumah keureubeuen nyan mangat jeuet desya ureuëng nyan geupeu amphon. 7 Meunyoe ureuëng nyang salah nyan hana hase jipeuna saboh bubiri atawa kaméng keu teutuboh desya jih nyan, ureuëng nyan harôh jiba dua boh cicém leuek putéh atawa cicém mirah pati nyang muda, saboh keu keureubeuen peuamphon desya, dan saboh treuk keu keureubeuen nyang teutot. 8 Cicém-cicém nyan harôh teuba ubak imeum. Imeum harôh teuleubeh ilée geupeuseumah cicém nyang ka teupeu teuntée keu keureubeuen peu amphon desya. Takue cicém nyan harôh jiputa, teuma hana jeuet sampoe putôh ulée jih. 9 Darah cicém nyan harôh geureutek ubak sagoe miseubah, dan nyang leubeh nibak nyan harôh geupirét uluwa ubak aleue miseubah sibagoe keureubeuen peu amphon desya. 10 Óh ka lheueh nyan imeum geupeuseumah cicém nyang keudua keu keureubeuen nyang teutot, saban lagée peuratoran nyang na. Meunan kheueh cara jih imeum geupeuseumah keureubeuen keu desya ureuëng nyan, laju ureuëng nyan geupeu amphon lé TUHAN. 11 Meunyoe ureuëng nyang meusalah nyan hana hase jipeuna dua boh cicém leuek putéh atawa cicém mirah pati keu keureubeuen peu amphon desya, ureuëng nyan harôh jiba sikilo teupông. Teupông nyan hana jeuet teujampu ngon minyéuk zaiton atawa meusajan ngon keumeunyan, sabab keureubeuen nyan na kheueh keureubeuen peu amphon desya dan bukon keureubeuen teuhidang. 12 Teupông nyan harôh teuba ubak imeum. Imeum harôh geucok saboh reugam nibak teupông nyan sibagoe tanda bahwa banmandum nyan ka lheueh geukeureubeuen ubak TUHAN. Teupông nyang sireugam nyan harôh geutot ateueh miseubah sibagoe keureubeuen peunajoh. Nyan kheueh keureubeuen gobnyan keu peu amphon desya. 13 Meunan kheueh cara jih imeum geupeuseumah keureubeuen keu ureuëng nyan, teuma ureuëng nyan geupeu amphon lé TUHAN. Teupông nyang leubeh nyan keu imeum, lagée bak keureubeuen gandom. 14 TUHAN geubri ubak Nabi Musa peuratoran-peuratoran lagée nyoe. 15 Meunyoe sidroe-droe ureuëng deungon hana jisaja ka jipeubuet desya sabab lalo bak jijok keureubeuen-keureubeuen droe jih nyang teupeu wajéb ubak TUHAN, teuma lé ureuëng nyan harôh jiba keureubeuen gantoe rugoe. Keureubeuen nyan harôh saboh bubiri atawa kaméng agam nyang hana meucupa, dan teutakse meunurot yuem nyang ka teuntée bak Khimah TUHAN. 16 Ureuëng nyan harôh jibayeue peue nyang yoh watée ilée ka geupeulalo, teutamah dua ploh peureusen. Óh lheueh nyan jihnyan harôh jijok beulatang nyan ubak imeum, dan imeum laju geukeureubeuen keu desya ureuëng nyan, teuma di ureuëng nyan laju geupeuamphon lé TUHAN. 17 Meunyoe sidroe-droe ureuëng jipeubuet desya sabab ka ji-iengkeue ubak sapeue-sapeue peurintah TUHAN, ureuëng nyan meusalah dan harôh jitanggong akibat jih. 18 Keu keureubeuen gantoe rugoe ureuëng nyan harôh jiba saboh bubiri atawa kaméng agam nyang hana meucupa dan teutakse meunurot yuem nyang saban lagée yuem bak Khimah TUHAN. Imeum geukeureubeuen keu desya ureuëng nyan, teuma gobnyan geupeu amphon lé TUHAN. 19 Nyan kheueh keureubeuen gantoe rugoe keu buet nyang salah nyang ka jipeubuet teuhadab TUHAN.

Imeum-Imeum 6

1 TUHAN geubri ubak Nabi Musa peuratoran-peuratoran nyoe. 2 Sidroe-droe ureuëng harôh jipeuseumah keureubeuen meunyoe ureuëng nyan meudesya ubak TUHAN sabab hana jitem jok pulang barang nyang jikeubah lé ureuëng laén nibak jihnyan, atawa jitipée gob, jicue atra gob, atawa ka meuteumé barang nyang gadôh, lé ureuëng nyan ji-iengkeue ngon jimeubudok cula-calo. 4 Ureuëng nyang meusalah nyan harôh jibayeue lom mandum nyang jiteumé nyan ngon cara hana jujoe. Watée jihnyan ka meuteumé bahwa jihnyan salah, ureuëng nyan harôh jibayeue peunoh keu ureuëng po atra nyan, teutamah dua ploh peureusen. 6 Keu keureubeuen geunantoe rugoe ureuëng nyan harôh jipeuseumah saboh bubiri atawa kaméng agam nyang hana meucupa dan teutakse meunurot yuem nyang meuyuem bak Khimah TUHAN. 7 Imeum geukeureubeuen keu desya ureuëng nyan, teuma ureuëng nyan laju geupeu amphon desya jih lé TUHAN. 8 TUHAN meufeureuman ubak Nabi Musa, mangat geujak peusampoe ubak Nabi Harun dan aneuëk-aneuëk gobnyan peuratoran-peuratoran lagée nyoe keuhai keureubeuen nyang teutot banmandum. Imeum harôh geupeuduek keureubeuen nyang teutot u ateueh miseubah dan geupeubiyeu disinan simalam beungoh, dan apui jih teutab hu sabe. 10 Óh ka lheueh keureubeuen nyan jeuet keu abée, imeum geusôk sileuweue paneuek bajée jubah nibak ija lineun, harôh geubeu ôt abée nyang meugapah nyan nibak ateueh miseubah laju geukeubah bak binéh miseubah. 11 Óh ka lheueh nyan gobnyan harôh geugantoe peukayan dan geuba laju abée u luwa khimah-khimah, ubak teumpat nyang ka teupeu khusos keu nyan. 12 Tieb-tieb beungoh imeum harôh geukeubah kayée apui u ateueh miseubah, geuatoe keureubeuen nyang teutot di ateueh nyan, dan geutot gapah nibak keureubeuen peudamé. Apui nyang na ateueh miseubah harôh hu sabe hana jeuet lon. 14 Nyoe kheueh peuratoran-peuratoran keuhai keureubeuen teuhidang keu TUHAN. Keureubeuen nyan harôh teuba ukeue miseubah lé sidroe nibak keuturonan Nabi Harun. 15 Gobnyan harôh geucok saboh reugam teupông halôh deungon minyéuk dan banmandum keumeunyan, laju geutot u ateueh miseubah sibagoe tanda bahwa banmandum keureubeuen nyan geupeuseumah ubak TUHAN. Bée keureubeuen nyang mangat nyan lumpah that galak até TUHAN. 16 Teupông nyang leubeh nyan harôh teupeugét keu ruti hana meurago dan geupajoh lé imeum-imeum nibak teumpat nyang khusos, na kheueh nibak leuen Khimah TUHAN. Nyan kheueh jeumba imeum nyang geubri lé TUHAN keu awaknyan ateueh keureubeuen peunajoh. Peunajoh nyan that suci, lagée keureubeuen peuamphon desya dan keureubeuen geunantoe rugoe. 18 Keu siumu masa soe mantong ureuëng agam nibak keuturonan Nabi Harun jeuet geumakheun ruti nyan; nyan kheueh jeumba awaknyan nyang teutab nibak peunajoh nyang geupeuseumah ubak TUHAN. Ureuëng laén nyang cukéh peunajoh nyang ka geukeureubeuen nyan, teuma meuteumé bala ngon sabab teunaga suci nibak nyan. 19 TUHAN geubri ubak Nabi Musa peuratoran-peuratoran lagée nyoe, 20 keuhai keureubeuen bak teubaiát sidroe imeum keuturonan Nabi Harun. Bak uroe gobnyan teubaiát, ureuëng nyan harôh geupeuseumah sikilogram teupông gandom ubak TUHAN. Siteungoh treuk harôh geupeuseumah watée beungoh uroe dan nyang leubeh nyan óh watée uroe ka seupôt. 21 Teupông nyan harôh teujampu ngon minyéuk, laju teutot ateueh panggang apui, óh lheueh nyan geupriek-priek dan geupeuseumah sibagoe keureubeuen teuhidang. Bée keureubeuen nyang mangat nyan lumpah galak até TUHAN. 22 Keu siumu masa tieb-tieb keuturonan Nabi Harun nyang teubaiát jeuet keu Imeum Agong harôh geupeuseumah keureubeuen nyan. Banmandum nyan harôh teutot sibagoe peuseumahan keu TUHAN. 23 Tieb-tieb keureubeuen teuhidang nyang geupeuseumah lé imeum harôh teutot banmandum, mubacutpi hana jeuet teupajoh. 24 TUHAN meufeureuman ubak Nabi Musa, geuyue jak peusampoe ubak Nabi Harun ngon aneuëk-aneuëk gobnyan keuhai peuratoran-peuratoran lagée nyoe keuhai keureubeuen peu amphon desya. Beulatang keu keureubeuen peu amphon desya teusie nibak teumpat nyang lazem teusie beulatang keu keureubeuen nyang teutot. Keureubeuen nyan lumpah that suci. 26 Imeum nyang peuseumah keureubeuen nyan harôh geumakheun atra nyan nibak teumpat nyang khusos, na kheueh nibak seuramo Khimah TUHAN. 27 Soe mantong atawa peue mantong nyang keunong nibak sie beulatang peulara nyan teuma keunong bala sabab sakeuti nyang ka keunong nibak sie nyan. Meunyoe siôn bajée nyang keunong meusipreuk darah beulatang nyan, bajée nyan harôh teu rhah bak teumpat nyang khusos. 28 Beulangöng tanoh nyang teupeuguna keu teumpat reuböh sie keureubeuen nyan harôh teupeubeukah. Meunyoe nyang teupeuguna beulangöng beuso, beulangöng nyan harôh teu-uet dan teupeu gleh laju ngon ié. 29 Tieb-tieb ureuëng agam lam keuluwarga imeum-imeum nyan jeuet jipajoh keureubeuen nyang lumpah suci nyan. 30 Beulatang keu keureubeuen peu amphon desya nyang teucok bacut darah jih keu teuba ubak Ruweueng Suci, atranyan harôh teutot sampoe habéh dan hanjeuet teupajoh.

Imeum-Imeum 7

1 Nyoe kheueh peuratoran-peuratoran keuhai keureubeuen geunantoe rugoe. Keureubeuen nyan lumpah suci. 2 Beulatang nyang teu keureubeuen nyan harôh teusie nibak teumpat lazem teuseumeusie keu keureubeuen nyang teutot, dan darah jih laju teureutek nibak ban peuet boh sagoe miseubah. 3 Imeum harôh geupeuseumah u ateueh miseubah banmandum gapah beulatang nyan, na kheueh: Ikue jih nyang meugapah, gapah nyang teutôb nibak asoe pruet jih, boh keuiéng ngon gapah jih, dan bagian nyang paleng gét nibak até jih. 5 Banmandum nyan harôh teutot ateueh miseubah sibagoe keureubeuen peunajoh keu TUHAN. Keureubeuen nyan na kheueh keu keureubeuen geunantoe rugoe. 6 Tieb-tieb ureuëng agam lam keuluwarga imeum-imeum jeuet jipajoh sie keureubeuen nyan, teuma awaknyan harôh jipajoh atra nyan nibak teumpat nyang khusos, sabab keureubeuen nyan lumpah that suci. 7 Keu keureubeuen peu amphon desya dan keureubeuen geunantoe rugoe keunong cit nibak peuratoran nyang saban, na kheueh: Asoe sie beulatang peulara nyang teukeureubeuen nyan na kheueh keu imeum nyang geupeuseumah. 8 Meunan cit kulét beulatang nyan pih keu imeum. 9 Tieb-tieb keureubeuen teuhidang nyang teutot nibak teumpat teutot atawa teutaguen lam kuali atawa nyang teupanggang, atranyan jeuet keu jeumba imeum nyang geupeuseumah. 10 Teuma keureubeuen teuhidang nyang hana teupeumasak, bah kheueh nyan nyang teujampu ngon minyéuk meunan cit nyang tho, banmandum nyan keu imeum-imeum keuturonan Nabi Harun, dan harôh teuweuek rata sabe keudroe-droe awaknyan. 11 Nyoe kheueh atoran-atoran jih keuhai keureubeuen peudamé nyang teupeuseumah ubak TUHAN. 12 Meunyoe keureubeuen nyan jipeuseumah keu teulakée teurimong gaséh, deungon beulatang nyan harôh teupeuseumah teuma ruti nyang hana meurago. Ruti nyan jeuet nyang teubai teupông teuwot ngon minyéuk zaiton, meunan cit jeuet ruti tho nyang lipeh nyang teusiliek ngon minyéuk, atawa juadah teupông nyang teupeugét ngon minyéuk zaiton. 13 Seulaén nibak nyan harôh jipeuseumah cit nyang teupeugét teuboh rago. 14 Nibak tieb-tieb bagoe ruti nyan siladum harôh teupeuseumah ubak TUHAN, dan nyan jeumba imeum nyang cok darah beulatang nyan laju teureutek nibak miseubah keu keureubeuen peudamé. 15 Asoe sie nyan harôh teupajoh nibak uroe beulatang nyan teukeureubeuen, mubacutpi hana jeuet teutinggai sampoe óh singoh beungoh. 16 Meunyoe na sidroe-droe ureuëng jiba keureubeuen peudamé keu jijak peulheueh kaôi jihnyan, atawa keu keureubeuen keugalak droe, atranyan hana peureulée teupajoh sampoe habéh bak uroe nyan cit teuma. Nyang leubeh nyan jeuet jipajoh óh singoh teuma. 17 Meunyoe trok bak uroe nyang keu lhée mantong na cit tinggai, sie nyan harôh teutot sampoe habéh. 18 Teuma meunyoe bak uroe nyang keu lhée eungkot sie nyan jipajoh cit, keureubeuen nyan hana geuteurimong dan hana teuba hase sapeue keu ureuëng nyan, teuma ka jeuet keu hareuem. Ureuëng nyang pajoh atra nyan ka salah dan harôh jitanggong akibat jih. 19 Sie nyang ka keunong salah sapeue najis atra nyan harôh teutot sampoe habéh dan hana jeuet teupajoh. Sie keureubeuen peudamé teuma jeuet jipajoh lé ureuëng nyang hana meu najih. 20 Meunyoe na ureuëng jipajoh euengkot sie nyan bak watée jih nyan lam najis, ureuëng nyan hana lé teu anggab anggota umat Po teu Allah. 21 Meunyoe na ureuëng jipajoh sie keureubeuen nyan óh ka lheueh tupéh ngon najis, bah kheueh nyan nyang asai jih nibak manusia meunan cit nibak beulatang, ureuëng nyan pih saban cit hana lé teu anggab anggota umat Po teu Allah. 22 TUHAN geubri ubak Nabi Musa peuratoran-peuratoran lagée nyoe 23 keu bansa Israel. Gapah leumô, gapah bubiri atawa gapah kaméng hana jeuet teupajoh. 24 Gapah beulatang nyang maté keudroe atawa sabab jiteugöm lé beulatang juwah, atranyan hana jeuet teupajoh teuma jeuet teupeuguna keu keupeue laén. 25 Ureuëng nyang pajoh gapah beulatang nyang jeuet teupeuseumah sibagoe keureubeuen peunajoh keu Po teu Allah, ureuëng nyan hana le teu anggab sibagoe anggota umat Po teu Allah. 26 Ureuëng Israel, dipat mantong awaknyan tinggai, hana jeuet jipajoh darah cicém atawa darah beulatang nyang laén. 27 Soe mantong nyang iengkeue ubak atoran nyan ureuëng nyan hana le teuanggab sibagoe anggota umat Po teu Allah. 28 TUHAN geubri lom ubak Nabi Musa peuratoran-peuratoran nyang lagée nyoe 29 keu bansa Israel. Soe mantong nyang jiba keureubeuen peudamé, harôh jiweuek siladum keu keureubeuen khusos ubak TUHAN. 30 Gobnyan keudroe harôh jiba keureubeuen peunajoh nyan. Gapah ngon dada beulatang nyan harôh jipeuseumah sibagoe keureubeuen nyang teujok ubak TUHAN. 31 Imeum harôh geutot gapah beulatang nyan ateueh miseubah, teuma dada jih na kheueh jeumba imeum-imeum. 32 Pha uneuen harôh jibri sibagoe keureubeuen khusos 33 ubak imeum nyang jipeuseumah darah dan gapah keureubeuen peudamé nyan. 34 Dada ngon pha uneuen na kheueh teujok khusos nyang geucok lé TUHAN nibak keureubeuen nyang jijok lé bansa Israel dan jibri ubak imeum-imeum. Nyan kheueh meuneubri bansa Israel keu imeum-imeum siumu masa. 35 Nibak peunajoh nyang jipeuseumah ubak TUHAN, jeumba nyan kheueh nyang jijok ubak Nabi Harun ngon aneuëk-aneuëk gobnyan bak uroe awaknyan teubaiát jeuet keu imeum. 36 Bak uroe nyan TUHAN geupeurintah ubak bansa Israel mangat jeuet nibak keureubeuen awaknyan, jeumba nyan keu imeum-imeum. Atoran nyang lagée nyan harôh jiseutôt lé bansa Israel siumu masa. 37 Meunan kheueh atoran-atoran keuhai keureubeuen nyang teutot, keureubeuen teuhidang, keureubeuen peu amphon desya, keureubeuen geunantoe rugoe, keureubeuen peubaiát dan keureubeuen peudamé. 38 TUHAN geubri banmandum peurintah nyan ubak Nabi Musa di Gunong Sinai bak watée gobnyan geuyue bansa Israel jipeuseumah keureubeuen bak padang guron Sinai.

Imeum-Imeum 8

1 TUHAN meufeureuman ubak Nabi Musa, "Gata jak hôi laju Nabi Harun ngon aneuëk-aneuëk jihnyan dan gata ba laju peukayan imeum, minyéuk upacara, saboh leumô agam muda, keu keureubeuen peu amphon desya, dua boh bubiri agam dan saboh raga ruti nyang hana meurago. 3 Óh lheueh nyan gata yue meusapat banmandum umat Israel nibak leuen Khimah Ulôn." 4 Nabi Musa laju geupeubuet peue nyang ka geupeurintah lé TUHAN ubak gobnyan. Bak watée banmandum umat ka meusapat nibak teumpat nyan, 5 Nabi Musa laju geupeugah ubak awaknyan, "Nyang ulôn peubuet bak saát nyoe na kheueh peurintah TUHAN." 6 Óh lheueh nyan laju geuyue ubak Nabi Harun ngon aneuëk-aneuëk gobnyan mangat jipeurab ukeue sira geu rhah droe. 7 Óh ka lheueh nyan lé gobnyan laju geupeungui peukayan imeum ubak Nabi Harun: bajée panyang jaroe, talo keuiéng ngon bajée jubah. Meunan cit ngon efod nyang geugantung bak keuiéng gobnyan deungon ikat ija nyang halôh. 8 Óh lheueh nyan geupeungui laju tutôb dada ubak Nabi Harun, dan udalam sinutôb dada nyan geupeutamong laju Urim ngon Tumim. 9 Laju geupeuseuôn seureuban ateueh ulée Nabi Harun, dan nibak seureuban nyan geupeungui ngon piasan méuh, nyan na kheueh sibagoe tanda bahwa Nabi Harun ka jeuet keu hak milék TUHAN. Banmandum nyan geupeubuet lé Nabi Musa lagée nyang ka geupeurintah lé TUHAN ubak gobnyan. 10 Laju lé Nabi Musa geucok minyéuk upacara geusiliek laju ubak Khimah TUHAN ngon banmandum peukakaih nyan. Deungon lagée nyan banmandum ka geupeu khusos keu TUHAN. 11 Bacut nibak minyéuk nyan laju geureutek tujoh goe u ateueh miseubah dan banmandum peukakaih nyang na disinan, meunan cit u ateueh bak ié ngon aleue jih. Deungon lagée nyan banmandum ka geupeu khusos keu TUHAN. 12 Óh ka lheueh nyan lé Nabi Musa laju geubaiát Nabi Harun deungon cara geurô bacut minyéuk ateueh ulée Nabi Harun nyan. 13 Óh lheueh nyan geuyue laju ubak bandum aneuëk-aneuëk Nabi Harun mangat jijak ukeue. Laju geupeungui ubak awaknyan bajée panyang jaroe ngon talo keuiéng. Laju geupeuseuôn seureuban ateueh ulée awaknyan lagée nyang ka geupeurintah lé TUHAN ubak gobnyan. 14 Óh ka lheueh nyan Nabi Musa laju geucok saboh leumô agam muda keu keureubeuen peu amphon desya. Nabi Harun dan aneuëk-aneuëk gobnyan geupeuduek laju jaroe gobnyan ateueh ulée beulatang nyan. 15 Lé Nabi Musa laju geusie óh lheueh nyan geucok teuma bacut darah beulatang nyang ka lheueh geusie nyan. Darah nyan laju geusiliek ngon jaroe gobnyan ateueh lungkée-lungkée nyang na nibak sagoe-sagoe miseubah, mangat jeuet miseubah nyan teupeu khusos keu Po teu Allah. Darah nyang leubeh nyan laju geu rô ateueh aleue miseubah. Meunan kheueh cara jih miseubah nyan teupeusuci dan teupeu khusos keu TUHAN. 16 Nibak leumô nyang ban teusie nyan, lé Nabi Musa laju geucok banmandum gapah nyang na meutamon nibak asoe pruet jih, boh keuiéng ngon gapah jih ngon bagian nyang paleng get nibak até jih. Banmandum nyan laju geutot u ateueh miseubah. 17 Teuma asoe leumô nyan, kulét jih, asoe pruet nyang leubeh, meunan cit deungon pruet, jadi banmandum leumô nyan seulaén bagian-bagian nyang ka teupeueng kréeh teutot laju diluwa khimah-khimah lagée nyang ka geupeurintah lé TUHAN. 18 Óh lheueh nyan Nabi Musa laju geucok bubiri agam sibagoe keureubeuen nyang teutot, lé Nabi Harun ngon aneuëk-aneuëk gobnyan laju geupeuduek jaroe geuh ateueh ulée bubiri nyan. 19 Nabi Musa laju geusie beulatang nyan darah jih laju geureutek ateueh ban peuet boh sagoe miseubah nyan. 20 Beulatang nyan laju geukoh-koh dan asoe pruet meunan cit deungon gaki jih laju geu rhah deungon ié. Ulée, gapah, ngon nyang leubeh nyan nibak asoe bubiri agam geutot laju sibagoe keureubeuen nyang teutot u ateueh miseubah lagée nyang ka geupeurintah lé TUHAN ubak gobnyan. Bée keureubeuen peunajoh nyang mangat nyan lumpah that galak até TUHAN. 22 Óh lheueh nyan lé Nabi Musa laju geucok bubiri agam nyang saboh treuk keu keureubeuen peubaiát imeum. Nabi Harun ngon aneuëk-aneuëk gobnyan laju geupeuduek jaroe gobnyan ateueh ulée beulatang nyan, 23 óh lheueh nyan Nabi Musa laju geusie bubiri nyan. Óh lheueh nibak nyan geucok darah bacut laju geusiliek ubak punyueng uneuen Nabi Harun, ubak nang jaroe blah uneuen, ngon nang gaki uneuen gobnyan. 24 Óh ka lheueh geupeubuet nyang lagée nyan bagoe laju geuyue banmandum aneuëk-aneuëk Nabi Harun mangat jipeurab, óh ban sare rab, laju geusiliek maséng-maséng blah uneuen punyueng awaknyan darah beulatang nyan bacut sapoe, ubak nang jaroe blah uneuen, dan ubak nang gaki blah uneuen. Darah nyang na mantong leubeh laju geuro ateueh ban peuet boh sagoe miseubah. 25 Nabi Musa laju geucok gapah bubiri nyan, ikue jih nyang meugapah, mandum gapah nyang meulabô bak asoe pruet jih, bagian nyang paleng get nibak até jih, boh keuiéng deungon gapah jih meunan cit deungon gaki uneuen jih. 26 Lam raga nyang meuasoe ruti hana meurago nyang ka teupeuseumah keu TUHAN, Nabi Musa laju geucok saboh ruti teubai nyang teupeugét deungon minyéuk dan saboh treuk ruti lipeh. Ruti nyan laju geukeubah ateueh gapah ngon ateueh pha uneuen bubiri. 27 Banmandum nyan geupeuduek bak jaroe Nabi Harun ngon aneuëk-aneuëk gobnyan, laju awaknyan peuseumah sibagoe keureubeuen teujok ubak TUHAN. 28 Óh ka lheueh nyan Nabi Musa laju geucok peunajoh nibak awaknyan laju geutot u ateueh miseubah, meusigoe deungon keureubeuen nyang teutot keu keureubeuen peubaiát. Bée keureubeuen peunajoh nyan lumpah that galak até TUHAN. 29 Lé Nabi Musa laju geucok dada bubiri nyan laju geupeuseumah sibagoe keureubeuen nyang teujok ubak TUHAN. Nyan kheueh jeumba Nabi Musa nibak bubiri agam nyang teukeureubeuen keu upacara peubaiát imeum. Banmandum nyan geupeubuet lé Nabi Musa lagée nyang ka geupeurintah lé TUHAN ubak gobnyan. 30 Óh lheueh nyan Nabi Musa geucok siladum minyéuk upacara dan siladum darah nyang mantong na ateueh miseubah, laju geureutek ateueh Nabi Harun dan aneuëk-aneuëk gobnyan meunan cit ateueh peukayan awaknyan. Deungon cara lagée nyan Nabi Musa ka geupeu khusos awaknyan dan peukayan awaknyan keu TUHAN. 31 Óh lheueh nyan Nabi Musa geupeugah ubak Nabi Harun dan aneuëk-aneuëk gobnyan, "Neutaguen kheueh laju eungkot sie keureubeuen nyan bak babah pintoe Khimah TUHAN. Meunurot peurintah TUHAN, droeneueh nyoe harôh neupajoh nibak teumpat nyan ngon ruti keureubeuen peubaiát nyang na dalam raga. 32 Eungkot sie ngon ruti nyang na mantong leubeh nyan harôh droeneueh tot sampoe habéh. 33 Tujoh uroe treb jih droeneueh hana jeuet neutinggai Khimah TUHAN sampoe upacara peubaiát seuleusoe. 34 TUHAN geupeurintah peue nyang tapeubuet nibak uroe nyoe meunan cit teuma tapeubuet bak uroe laén. Deungon upacara nyan mandum desya-desya droeneueh geupeu amphon. 35 Tujoh uroe treb jih, uroe ngon malam, droeneueh harôh tinggai dikeue pintoe Khimah keu neupeubuet peue nyang geupeurintah lé TUHAN. Meunyoe droeneueh hana neupeubuet lagée nyang geupeurintah nyan, droeneueh teuma maté. Nyan kheueh nyang geupeurintah lé TUHAN ubak ulôn." 36 Dan Nabi Harun pi ngon banmandum aneuëk-aneuëk gobnyan laju geupeubuet banmandum nyang geupeurintah lé TUHAN meulalu Nabi Musa.

Imeum-Imeum 9

1 Siuroe óh lheueh upacara peubaiát nyan seuleusoe, bak uroe nyang keulapan, Nabi Musa laju geuhôi Nabi Harun ngon aneuëk-aneuëk gobnyan meunan cit bubena peumimpén bansa Israel. 2 Geupeugah lé Nabi Musa ubak Nabi Harun, "Neucok kheueh laju saboh leumô agam nyang mantong muda dan saboh bubiri agam, mandum nyan hana meucupa. Neupeuseumah kheueh bandua boh beulatang nyan ubak TUHAN, leumô agam keu keureubeuen peu amphon desya dan bubiri agam keu keureubeuen nyang teutot. 3 Dan neuyue kheueh laju bansa Israel mangat jipeuseumah saboh kaméng agam sibagoe keureubeuen peu amphon desya saboh aneuëk leumô dan saboh aneuëk bubiri nyang maséng-maséng meu umu sithon nyang hana meucupa keu keureubeuen nyang teutot. 4 Neuyue cit ubak awaknyan mangat jikeureubeuen saboh leumô agam dan saboh kaméng agam sibagoe keureubeuen peudamé. Mandum nyan harôh awaknyan peuseumah keu TUHAN meusajan-sajan deungon keureubeuen teuhidang nyang ka teuboh minyéuk, sabab nibak uroe nyoe TUHAN geuteuka ubak awaknyan." 5 Bandum nyang geupeugah lé Nabi Musa awaknyan ba ukeue Khimah, dan banmandum umat meugumpôi bak teumpat nyan keu meu iébadat ubak TUHAN. 6 Laju geupeugah lé Nabi Musa, "TUHAN geuyue ubak droeneueh neupeubuet nyoe mangat droeneueh deueh neukalon cahya TUHAN teuka." 7 Óh ka lheueh nyan gobnyan laju geupeugah ubak Nabi Harun, "Neujak kheueh laju ubak miseubah óh trok keunan neupeusiab laju keureubeuen peu amphon desya ngon keureubeuen nyang teutot, mangat desya droeneueh ngon desya umat geupeu amphon lé TUHAN. Neupeubuet kheueh nyan lagée nyang ka geupeurintah lé TUHAN." 8 Ban geudeungoe haba nyan geujak kheueh laju Nabi Harun ubak miseubah ban sare trok keunan geusie laju saboh leumô agam keu keureubeuen peu amphon desya geuh keudroe. 9 Aneuëk-aneuëk Nabi Harun jipeusampoe laju darah beulatang nyan ubak Nabi Harun, dan lé gobnyan laju geuculok jaroe geuh lam darah nyan, dan geusiliek laju ubak lungkée-lungkée nyang na nibak peuet boh sagoe miseubah. Óh ka lheueh nyan darah nyang na mantong leubeh laju geuro ubak aleue miseubah. 10 Gapah, boh keuiéng ngon bagian nyang paleng gét nibak beulatang nyan geutot laju u ateueh miseubah, lagée nyang ka geupeurintah lé TUHAN ubak Nabi Musa. 11 Teuma asoe ngon kulét beulatang nyan geutot laju diluwa khimah-khimah. 12 Óh lheueh nyan Nabi Harun laju geusie beulatang keureubeuen teutot keu droe geuh. Aneuëk-aneuëk Nabi Harun laju geujakjok darah beulatang nyan ubak gobnyan, dan darah nyan laju geurô ubak ban peuet boh sagoe miseubah. 13 Óh lheueh nyan awaknyan jijok laju ubak gobnyan ulée dan bagian-bagian nyang laén nibak beulatang nyan, dan atranyan laju geutot u ateueh miseubah. 14 Óh lheueh nyan asoe pruet ngon pha beulatang nyan laju geu rhah dan geutot laju ngon keureubeuen nyang teutot u ateueh miseubah. 15 Óh ka lheueh nyan gobnyan laju geukeureubeuen kaméng sibagoe keureubeuen peu amphon desya umat. Kaméng nyan geusie dan geupeuseumah lagée keureubeuen peu amphon desya geuéh keudroe. 16 Lheueh nyan geucok teuma beulatang keu keureubeuen teutot, laju geupeuseumah atranyan meunurot atoran. 17 Óh lheueh nyan geupeuseumah teuma keureubeuen teuhidang; geucok laju saboh reugam teupông, geutot laju ateueh miseubah. Nyan kheueh sibagoe seunamah keu keureubeuen teutot tieb-tieb uroe. 18 Geusie teuma lom saboh leumô agam dan saboh bubiri agam keu keureubeuen peudamé keu umat. Aneuëk-aneuëk Nabi Harun laju geujakjok darah nyan ubak gobnyan, ngon darah nyan laju geurô ateueh ban peuet boh sagoe miseubah. 19 Bak teumpat-teumpat nyang na gapah nibak leumô dan kaméng nyan awaknyan peuduek 20 u ateueh dada mandua beulatang nyan, lé Nabi Harun laju geutot u ateueh miseubah. 21 Dada ngon pha beulatang nyan geupeuseumah sibagoe keureubeuen nyang teujok keu TUHAN. Nyan na kheueh jeumba imeum-imeum, lagée nyang geupeurintah lé Nabi Musa. 22 Óh ka seuleusoe geupeuseumah banmandum keureubeuen nyan, Nabi Harun laju geubot jaroe geuh u ateueh umat Israel dan laju geubri beureukat ubak awaknyan, óh lheueh nyan laju geutron. 23 Nabi Musa ngon Nabi Harun laju geutamong lam Khimah TUHAN. Óh lheueh nyan awaknyan geuteubiet laju geubri beureukat ubak umat. Dan banmandum umat Israel deueh jikalon cahya TUHAN teuka. 24 Ngon hana teusangka-sangka TUHAN laju geupeutreun apui nyang jilahiéb habéh banmandum keureubeuen nyang teutot dan bagian-bagian nyang meugapah di ateueh miseubah. Watée umat Israel jikalon hai nyan, awaknyan meusurak-surak laju jisujut jiseumah Gobnyan.

Imeum-Imeum 10

1 Bak siuroe, Nadab dan Abihu, aneuëk-aneuëk Nabi Harun, jicok laju teumpat apui jih maséng-maséng jipasoe laju ngon ngeue apui. Óh lheueh nyan lé awaknyan jipasoe teuma dupa lam teumpat apui nyan dan jipeuseumah laju ubak TUHAN. Teuma apui nyan hana haleue sabab TUHAN hana geuyue peuseumah atranyan keu Gobnyan. 2 Lé TUHAN laju geupeutreun apui ateueh awaknyan dan awaknyan laju maté sabab jipajoh lé apui bak Khimah TUHAN. 3 Laju geupeugah lé Nabi Musa ubak Nabi Harun, "Nyan kheueh nyang geumeukeusut lé TUHAN watée Gobnyan geupeugah, 'Mandum nyang peutimang Ulôn harôh jihoreumat keusucian Ulôn. Ulôn teuma Lôn peugah keu agungan Lôn ubak banmandum bansa Lôn.' " Teuma Nabi Harun geuiemdroe. 4 Óh lheueh nyan Nabi Musa laju geuhôi Misael ngon Elsafan, aneuëk-aneuëk Uziel, apha Nabi Harun. Geupeugah ubak awaknyan, "Tajak kheueh keunoe dan tacok kheueh laju manyét syedara sipupu gata nibak Khimah TUHAN dan takeubah laju diluwa Khimah-khimah." 5 Awaknyan laju jijakcok ngon jipeuteubiet mandua droe manyét nyan nyang mantong meupeukayan jiba laju uluwa Khimah-khimah, lagée nyang ka geupeurintah lé TUHAN. 6 Nabi Musa laju geupeugah ubak Nabi Harun meunan cit ubak aneuëk-aneuëk nyang laén, awaknyan na kheueh Eleazar dan Itamar, "Bék tapeuleumah ôk bak ulée gata sansui, dan bék tapriek peukayan gata keu gata tunyok bahwa gata seudeh ngon meukabông. Meunyoe gata tapeubuet lagée nyan, gata teuma maté, dan banmandum umat Israel teuma geubeungéh lé TUHAN. Teuma meunyoe ureuëng Israel nyang laén jeuet meukabông keu bandua droe nyang maté sabab tutong ngon apui nyan teuka nibak TUHAN. 7 Bék tatinggai Khimah TUHAN mangat gatanyoe hana maté, sabab gata ka teubaiát ngon minyéuk upacara keu tapeutimang TUHAN." Awaknyan laju jipeubuet lagée nyang ka geupeugah lé Nabi Musa. 8 TUHAN meufeureuman ubak Nabi Harun, 9 "Óh ka lheueh gata jieb ié anggô atawa ié kreueh nyang laén, gata dan aneuëk-aneuëk gata hana jeuet tatamong lam Khimah Lôn. Meunyoe gata iengkeue keu peuratoran Ulôn nyan, gata maté. Peurintah nyan harôh jitaát lé banmandum keuturonan gata. 10 Gata harôh hase tapeubeda lamkawan nyang geupeukhusos keu Po teu Allah ngon nyang hana, lamkawan nyang najih ngon nyang hana najih. 11 Banmandum huköm nyang Ulôn bri ubak gata meulalu Nabi Musa, harôh beuhase gata peurunoe keu bansa Israel." 12 Nabi Musa geupeugah ubak Nabi Harun dan ubak bandua droe aneuëk geuhnyan, Eleazar ngon Itamar, "Tacok kheueh laju gandom nyang leubeh nibak nyang teupeuseumah keu TUHAN. Nibak teupông nyan neupeuget kheueh ruti nyang hana meurago, dan jak pajoh kheueh nyan bak binéh miseubah, sabab keureubeuen nyan lumpah suci. 13 Ruti nyan harôh teupajoh bak teumpat nyang suci, sabab nibak peunajoh nyang teupeuseumah ubak TUHAN, ruti nyan ka jeuet keu jeumba gata dan aneuëk-aneuëk gata nyang agam. Nyan kheueh peurintah TUHAN ubak ulôn. 14 Teuma gata ngon aneuëk-aneuëk gata nyang agam ngon nyang inong jeuet gata pajoh dada keureubeuen nyang teubri dan pha keureubeuen khusos. Nyan kheueh jeumba imeum-imeum nibak keureubeuen peudamé bansa Israel. Atranyan jeuet gata jak pajoh patmantong asai bék bak teumpat nyang na najih. 15 Pha keureubeuen khusos ngon dada keureubeuen nyang teubri nyan harôh teuba meusajan-sajan ngon gapah keu keureubeuen nyang teutot sibagoe keureubeuen khusos keu TUHAN. Jeumba-jeumba nyan ka jeuet keu hak milék gata dan aneuëk-aneuëk gata siumu masa, lagée nyang geupeurintah lé TUHAN." 16 Óh lheueh nyan Nabi Musa geutanyong keuhai kaméng keu keureubeuen peu amphon desya. Gobnyan geubri tée bahwa kaméng nyan ka teutot. Ngon sabab nyan Nabi Musa beungéh that ubak Eleazar dan Itamar, dan gobnyan geupeugah ubak awaknyan, 17 "Pakon keureubeuen peu amphon desya nyan hana gata pajoh bak teumpat nyang suci? Keureubeuen nyan that suci; TUHAN geubri nyan ubak gata, mangat desya umat Israel geupeu amphon. 18 Darah kaméng nyan hana teuba ubak Khimah TUHAN, nyang sikeubit jih keureubeuen nyan gata makheun bak teumpat nyan lagée nyang ka ulôn peurintah ubak gata." 19 Geujaweueb lé Nabi Harun, "Beutôi, nibak uroe nyoe umat Israel ka jipeuseumah keureubeuen peu amphon desya ngon keureubeuen nyang teutot keu TUHAN. Bahpi lagée nyan, bala nyoe ka rhot u ateueh lôn. Meunyoe uroe nyoe ulôn makheun cit keureubeuen peu amphon desya nyan, peu kheueh TUHAN teuma harok?" 20 Nabi Musa that-that puih watée geudeungoe Nabi Harun geujaweueb lagée nyan.

Imeum-Imeum 11

1 TUHAN geubri ubak Nabi Musa ngon Nabi Harun peuratoran-peuratoran lagée nyoe 2 keu bansa Israel. Mandum beulatang nyang udeb ateueh darat nyang mamah biak dan gukée jih teuprah na kheueh haleue dan jeuet teupajoh. 4 Bék tapajoh unta, peulandok atawa marmut. Beulatang nyan hareuem sabab bahpi jimamah biak, gukée jih hana teuprah. 7 Bék gatapajoh bui. Beulatang nyan hareuem, sabab bahpi gukée jih teuprah, beulatang nyan hana jimamah biak. 8 Asoe jih hana jeuet teupajoh dan bangke jih pi hana jeuet teucukéh sabab beulatang nyan hareuem. 9 Gata jeuet tapajoh meubago rupa eungkot nyang na sireb dan nyang na sisék. 10 Beulatang nyang udeb lam ié teuma hana meusireb dan hana meusisék nyan na kheueh hareuem. Nyang lagée nyan hana jeuet teupajoh, meunan cit deungon bangke jih hana jeuet teucukéh. 13 Nyang rhoh lamkawan mubagoe cicém nyang hana jeuet gata pajoh sabab najih na kheueh: cicém Siwah, cicém kutôktôk, mubagoe jeunéh kleueng, cicém nasar, cicém gagak, cicém unta, cicém cama, blekok, dan mubagoe jeunéh cangiriek, undan, cicém kasa dan simantông. 20 Banmandum jeunéh seurangga nyang meusayeub na kheueh hareuem, 21 keucuali nyang jeuet ji grob. 22 Daruet, daruet kléng dan daruet ijo jeuet teupajoh. 23 Teuma banmandum seurangga laén nyang meusayeub meunan cit jimeu éue na kheueh hareuem. 24 Sidroe-droe ureuëng ka keunong najih sampoe án mata uroe jilob na kheueh meunyoe ureuëng nyan ka tupéh ngon saboh lamkawan bangke nyoe: beulatang nyang meugukée, keucuali nyang gukée jih teuprah dan jimamah biak, dan beulatang nyang meugaki peuet dan na gukée jih. Barang sigasoe nyang ba bangke beulatang nyang seujeunéh nyan ureuëng nyan harôh ji rhah peukayan jih, teuma ureuëng nyan teutab mantong najih sampoe án mata uroe jilob. 29 Tiköih tanoh, tiköih rayeuek, tiköih ubit, kadal, asai ateueh nan cangguek peue mantong teutab hareuem, landak, muruwa, bengkarung, eungkot cue dan bunlon teutab hareuem. 31 Soemantong nyang mat beulatang nyan atawa bangke jih atranyan teutab najih sampoe mata uroe jilob. 32 Meunyoe bangke beulatang nyan rhot u ateueh barang peue mantong, teuma barang nyan pi ka jeuet keu najih. Hainyan keunong ateueh barang bah kheueh nyan nyang teupeugét nibak kayée, ija, kulét, atawa ija kröng, dan hana soai keupeue barang nyan teupeuguna. Barang nyan harôh teureundam lam ié, teuma teutab najih sampoe mata uroe jilob. 33 Meunyoe bangke nyan rhot lam beulangöng tanoh, peue mantong nyang na lam beulangöng nyan ka jeuet keu najih, dan beulangöng nyan harôh teupeubeukah. 34 Peunajoh nyang keunong ié nibak beulangöng nyan ka jeuet keu najih, meunan cit ié jieb nyang na lam beulangöng nyan ka jeuet keu najih. 35 Peue mantong nyang keunong ateueh bangke nyang rhot nyan ka jeuet keu najih. Dapu atawa teumpat tot nibak tanoh nyang keunong bangke nyan harôh teupeubeukah sabab ka keunong najih. 36 Laén hai meunyoe mata ié atawa mon, mandum nyang laén ka jeuet keu najih meunyoe keunong bangke. 37 Meunyoe bangke nyan rhot ateueh bijéh nyang keuneuk tabu, bijéh nyan teutab gleh. 38 Laén hai meunyoe bijéh nyan teungoh teureundam lam ié laju rhot bangke nyan ateueh bijéh nyang teureundam nyan, teuma bijéh nyan ka jeuet keu najih. 39 Barang gasoe nyang mat bangke beulatang haleue ka jeuet keunajih sampoe án mata uroe jilob. 40 Ureuëng nyang ba atawa nyang pajoh bangke nyan ureuëng nyan harôh jirhah peukayan droe jih, teuma ureuëng nyan teutab najih sampoe mata uroe jilob. 41 Mandum beulatang nyang meulata ateueh tanoh, bah kheueh nyang jimeu-eue, nyang meugaki peuet atawa nyang jai gaki, nyan na kheueh hareuem dan hana jeuet teupajoh. 43 Bék gata peunajih droe gata deungon teupajoh beulatang nyang lagée nyan. 44 Ulôn kheueh TUHAN Allah gata, sabab nyan jaga kheueh mangat gata teutab suci, sabab Ulôn suci. 45 Ulôn kheueh TUHAN nyang peuteubiet dan ba gata nibak nanggroe Meusé, mangat Ulôn nyoe jeuet keu Po teu Allah gata. Bah kheueh gata suci, sabab Ulôn suci. 46 Nyan kheueh atoran keuhai beulatang, rhoh cit keunan cicém, beulatang nyang udeb lam ié dan nyang meulata ateueh tanoh. 47 Gata harôh hase tapeubeda lamkawan nyang gleh ngon nyang najih, lamkawan beulatang nyang jeuet teupajoh ngon beulatang nyang hana jeuet teupajoh.

Imeum-Imeum 12

1 TUHAN geubri ubak Nabi Musa peuratoran-peuratoran lagée nyoe 2 keu bansa Israel. Meunyoe sidroe ureuëng inong jipeulahé aneuëk agam, tujoh uroe ureuëng inong nyan lam keuadaan kuto, saban lagée yoh watée ureuëng nyan teuka he. 3 Bak uroe nyang keulapan aneuëk nyang lahé nyan harôh teupeusunat. 4 Óh ka lheueh lhée ploh lhée uroe treuk inong nyan mantong lam keuadaan kuto sabab jiteubiet darah. Ureuëng nyan hana jeuet jimat barang-barang nyang teupeuguna keu iébadat dan hana jeuet jitamong lam Khimah TUHAN sampoe trok bak watée inong nyan suci teuma. 5 Meunyoe ureuëng inong jipeulahé aneuëk inong, peuet blah uroe ureuëng inong nyan lam keuadaan kuto, saban lagée yoh watée ureuëng nyan teuka he. Óh lheueh nyan nam ploh nam uroe treuk ureuëng nyan mantong lam kuto sabab jiteubiet darah. 6 Óh ka lheueh seuleusoe masa peusuci, bah kheueh sabab ka lheueh jipeulahé aneuëk agam meunan cit ngon aneuëk inong, ureuëng inong nyan harôh jiba peuseumahan ubak imeum dikeue pintoe Khimah TUHAN. Keureubeuen nyan na kheueh saboh aneuëk bubiri nyang meu umu sithon keu keureubeuen nyang teutot, dan saboh cicém mirah pati nyang muda atawa cicém leuek nyang muda keu keureubeuen peu amphon desya. 7 Imeum harôh geujok keureubeuen jih nyan ubak TUHAN dan geupeuna upacara keu teusampôh najih ureuëng inong nyan, sampoe ureuëng inong nyan ka jeuet keu gleh. Lagée nyan kheueh nyang harôh jipeubuet lé sidroe ureuëng inong meunyoe jihnyan jipeulahé aneuëk. 8 Meunyoe ureuëng inong nyan hana hase jipeuna saboh aneuëk bubiri, ureuëng nyan harôh jiba dua aneuëk cicém mirah pati muda atawa cicém leuek muda: saboh keu keureubeuen nyang teutot saboh treuk keu keureubeuen peu amphon desya. Imeum harôh geupeubuet upacara keu teusampôh najih bak ureuëng inong nyan, deungon lagée nyan ureuëng nyan ka jeuet keu gleh lom teuma.

Imeum-Imeum 13

1 TUHAN geubri ubak Nabi Musa ngon Nabi Harun peuratoran-peuratoran nyang lagée nyoe: 2 Meunyoe na sidroe-droe ureuëng jibeudôh kru, atawa purée atawa jitimoh putéh meutumpok-tumpok nibak kulét ureuëng nyan nyang akhé jih rhot keu peunyakét kulét nyang mubahya, ureuëng nyan harôh teuba ubak imeum keuturonan Nabi Harun. 3 Imeum harôh geupareksa bak teumpat nyang sakét nibak kulét ureuëng nyan. Meunyoe bulée nyang na bak teumpat nyan ka jeuet keu putéh, dan bak teumpat nyang sakét deuh jih leubeh lhok nibak kulét silingka nyan, ureuëng nyan ka keunong peunyakét kulét nyang paleng mubahya. Lé imeum harôh geupeugah bahwa ureuëng nyan najih. 4 Teuma meunyoe bagian nyang sakét wareuna jih putéh dan hana leubeh nibak kulét nyang na silingka nyan, meunan cit bulée nyang na nibak nyan hana cit putéh, ureuëng nyan harôh teupeu aséng tujoh uroe treb jih. 5 Bak uroe nyang keutujoh, lé imeum harôh geupareksa lom. Dan meunurot geupike lé gobnyan peunyakét nyan mantong sa keuadaan jih dan hana jimeu-eue ho laén, ureuëng nyan harôh teupeu aséng tujoh uroe treuk. 6 Bak uroe nyang keutujoh lé imeum harôh keupareksa lom, dan meunyoe bagian nyang sakét nyan ka leu-eueng dan jimeu-eue, lé imeum harôh geupeugah bahwa ureuëng nyan ka gleh. Nyan peunyakét kulét nyang hana mubahya. Dan ureuëng nyan harôh jirhah peukayan jih dan gobnyan ka jeuet keu gleh. 7 Teuma óh lheueh geupeugah lé imeum peunyakét ureuëng nyan gleh teuma peunyakét nyan ka jimeu-eue, ureuëng nyan harôh meuhadab lom ubak imeum. 8 Lé imeum harôh geupareksa lom, dan meunyoe peunyakét nyan beutôi ka jimeu-eue, ureuëng nyan harôh teupeugah ka najih; ureuëng nyan keunong peunyakét kulét nyang paleng mubahya. 9 Sidroe ureuëng keunong peunyakét kulét nyang mubahya ureuëng nyan harôh teuba ubak imeum. 10 Meunyoe meunurot geukalon lé imeum nibak kulét ureuëng nyan na keumong putéh nyang ka luhok dan bulée jih pih nyang na silingka nyan ka putéh, 11 ureuëng nyan ka keunong peunyakét kulét nyang mubahya. Lé imeum harôh geupeugah bahwa ureuëng nyan ka jeuet keu najih. Hana peureulée le ureuëng nyan teupeu aséng, sabab ka nyata bahwa ureuëng nyan najih. 12 Meunyoe geukalon lé imeum meucak-cak putéh nyan ka jimeu-eue phon nibak ulée ka trok bak gaki, 13 dan hase geupeureksa lé gobnyan kulét nyan ka jimeu-eue bansaboh tuboh dan banmandum kulét ureuëng nyan ka jeuet keu putéh, ureuëng nyan ka jeuet teupeugah gleh. 14 Teuma meunyoe jitimoh luhok, lé imeum harôh geupareksa lom. 15 Meunyoe nyan meumang luhok, ureuëng nyan harôh geupeugah najih, sabab ureuëng nyan ka keunong peunyakét kulét nyang mubahya. 16 Teuma meunyoe luhok nyan puléh dan ka jeuet keu putéh lom, ureuëng nyan harôh jijak meuhadab ubak imeum 17 keu teupareksa lom. Meunyoe luhok nyan meumang ka jeuet keu putéh, lé imeum harôh geupeugah bahwa ureuëng nyan gleh. 18 Meunyoe sidroe ureuëng na keunong ceumuét nyang ka puléh, 19 teuma nibak beukaih nyan na jibeudôh keumong putéh atawa meucak-cak putéh hi jih lagée mirah-mirah, ureuëng nyan harôh jijak meuhadab ubak imeum 20 keu teupeureksa. Meunyoe meucak-cak nyan leumah jih leubeh lhok nibak kulét sikeulileng nyan dan bulée nyang na sikeulileng nyan pih ka jeuet keu putéh, lé imeum harôh geupeugah bahwa ureuëng nyan ka jeuet keu najih. Ceumuét nyan sibagoe awai keu keunong peunyakét kulét nyang meubahya. 21 Teuma meunyoe meunurot geupeureksa lé imeum bulée nyang na bak bagian nyan hana jeuet keu putéh, dan bagian nyan hana leubeh nibak kulét sikeulileng nyan, teuma leubeh muda wareuna jih, ureuëng nyan harôh teupeu aséng nyang treb jih tujoh uroe. 22 Meunyoe meucak-cak putéh nyan na jimeu-eue, lé imeum harôh geupeugah bahwa ureuëng nyan najih sabab ureuëng nyan ka keunong peunyakét kulét nyang mubahya. 23 Teuma meunyoe meucak-cak putéh nyan hana meu-ubah dan hana teuma jimeu-eue, nyan na kheueh beukaih ceumuét, jadi ureuëng nyan na kheueh gleh. 24 Meunyoe na sidroe ureuëng nyang luka sabab tutong ngon apui, laju kulét nibak teumpat luka nyan ka jeuet keu putéh atawa putéh mubayang-bayang mirah, 25 lé imeum harôh geupareksa. Meunyoe bulée nyang na silingka nyan ka jeuet keu putéh dan luka jih leubeh lhok nibak kulét silingka nyan, teuma peunyakét kulét nyang paleng mubahya dan jibeudôh nibak teumpat luka tutong nyan, dan lé imeum harôh geupeugah bahwa ureuëng nyan najih. 26 Teuma meunyoe bulée nyang na bak teumpat nyan hana jeuet keu putéh dan bagian nyan hana leubeh lhok nibak kulét nyang na silingka nyan, teuma leubeh muda wareuna jih, teuma ureuëng nyan harôh teupeu aséng nyang treb jih tujoh uroe. 27 Bak uroe nyang keutujoh imeum harôh geupareksa lom. Meunyoe meucak-cak putéh nyan ka jimeu-eue, teuma ureuëng nyan ka keunong peunyakét kulét nyang mubahya, dan harôh teupeugah najih. 28 Teuma meunyoe meucak-cak putéh nyan hana meu-ubah dan hana teuma jimeu-eue, teuma leubeh putéh wareuna jih, nyan bukon peunyakét kulét nyang mubahya. Imeum harôh geupeugah bahwa ureuëng nyan gleh, sabab wareuna nyang putéh nyan beukaih tutong ngon apui. 29 Meunyoe sidroe ureuëng agam atawa ureuëng inong ka keunong peunyakét kulét bak ulée jihnyan atawa bak keueng jih, 30 ureuëng nyan harôh geupeureksa lé imeum. Meunyoe bagian nyang sakét nyan leumah jih leubeh lhok nibak kulét nyan na silingka nyan, dan ôk atawa janggot nyang na disinan ka lagée kunéng laju luroh, teuma ureuëng nyan ka keunong peunyakét kulét nyan mubahya dan ureuëng nyan harôh teupeugah najih. 31 Meunyoe meunurot geupeureksa lé imeum bagian deuh jih hana leubeh lhok nibak kulét nyang na silingka nyan, teuma hana deuh ôk atawa janggot nyang gét nibak bagian nyan, teuma ureuëng nyan harôh teupeu aséng nyang treb jih tujoh uroe. 32 Bak uroe nyang keutujoh, imeum harôh geupareksa lom bagian nyang sakét nibak ureuëng nyan, meunyoe peunyakét nyan hana jimeu-eue dan hana meurumpok ôk atawa janggot nyang rab-rab kunéng nibak bagian nyan, lom teuma deuh jih hana leubeh lhok nibak kulét di silingka nyan, 33 ureuëng nyan harôh teucuko ôk atawa janggot disilingka teumpat nyang sakét. Ôh lheueh nyan ureuëng nyan harôh teupeu aséng lom nyang treb jih tujoh uroe. 34 Bak uroe nyang keu tujoh, lé imeum harôh geupareksa lom. Meunyoe peunyakét ureuëng nyan hana jimeu-eue dan bagian nyan leumah jih hana leubeh lhok nibak kulét nyang na silingka nyan, ureuëng nyan ka jeuet teupeugah gleh dan peukayan ureuëng nyan harôh teujak rhah. 35 Teuma meunyoe ka lheueh geupeugah peunyakét ureuëng nyan ka gleh teuma ka jimeu-eue, 36 lé imeum harôh geupareksa lom. Meunyoe peunyakét nyan beutôi ka jimeu-eue, hana peureulée le geupareksa lé imeum peu kheueh ôk atawa janggot ureuëng nyan ka kunéng, sabab ka nyata bahwa ureuëng nyan ka najih. 37 Teuma meunyoe meunurot kheun imeum peunyakét ureuëng nyan hana jimeu-eue, dan ôk atawa janggot gét jitimoh nibak teumpat nyan, teuma peunyakét nyan ka jeuet geupeugah puléh. Dan imeum harôh geupeugah ureuëng nyan ka gleh. 38 Meunyoe sidroe-droe ureuëng agam atawa ureuëng inong na meucak-cak putéh nibak kulét jih, 39 imeum harôh geupareksa ureuëng nyan. Meunyoe meucak-cak putéh nyan deuh jih mubayang-bayang putéh, ureuëng nyan teuma keunong peunyakét kurab, dan ureuëng nyan jeuet teupeugah gleh. 40 Meunyoe sidroe ureuëng agam ulée siblah ulikot ka jeuet keu-ueh lagée teucuko, ueh nyan hana meusabab gobnyan ka jeuet keu najih. 42 Teuma meunyoe jibeudôh keumong putéh mubayang-bayang mirah nibak teumpat ulée nyang ueh nyan, ureuëng nyan ka keunong peunyakét kulét nyang mubahya. 43 Imeum harôh geupareksa ureuëng nyan, dan meunyoe beutôi na keumong putéh mubayang-bayang mirah, 44 lé imeum harôh geupeugah bahwa ureuëng nyan najih sabab ka keunong peunyakét kulét nyang lumpah mubahya bak ulée gobnyan. 45 Sidroe-droe ureuëng nyang keunong peunyakét nyang mubahya, ureuëng nyan harôh jingui peukayan nyang beukah-beukah dan ôk jih bak ulée jipeubiyeu mantong sansui ngon meugeureupé. Gobnyan harôh jitôb bagian miyueb muka jih sira ji klik-klik, "Najih! Najih!" 46 Simantong ureuëng nyan keunong peunyakét nyan ureuëng nyan teutab najih dan harôh tinggai diluwa khimah-khimah, jioh nibak ureuëng nyang laén. 47 Meunyoe meuteumé lumpok nibak peukayan atawa ija wol atawa ija lineun, 48 atawa nibak kulét atawa peue mantong nyang teupeugét nibak kulét, 49 dan wareuna ija rapöh nyan mubayang-bayang ijo atawa mubayang-bayang mirah, teuma rapöh nyang lagée nyan jeunéh jimeu-eue laju atranyan harôh teupeuleumah ubak imeum. 50 imeum harôh geupareksa barang nyan, laju geupeu aséng nyang treb jih tujoh uroe. 51 Bak uroe nyang keutujoh atranyan harôh geupareksa lom, dan meunyoe rapöh nyan keubit ka jimeu-eue, teuma barang nyan na kheueh najih. 52 Imeum harôh geutot ija nyan, sabab rapöh nyang na nyan jeunéh nyang jimeu-eue, jadi harôh teupeu ranab lam apui hu. 53 Teuma meunyoe meunurot nyang geupareksa lé imeum nyan rapöh nyan hana jimeu-eue nibak barang nyan, 54 gobnyan laju geuyue mangat barang nyan jirhah dan jipeu aséng nyang treb jih tujoh uroe trek. 55 Óh lheueh nyan lé imeum harôh geupareksa lom. Meunyoe rapöh nyan hana jimeu-eue teuma hi jih teutab saban, barang nyan mantong najih dan harôh teutot lam apui hu, bahpi nyang rapöh nyan teuma na nibak bagian keue atawa nibak bagian likot. 56 Teuma meunyoe nyang meunurot geupareksa lé imeum rapöh nyan ka meukureueng hi jih, bak nyang keunong rapöh nibak ija atawa kulét nyan harôh teupriek. 57 Meunyoe óh dudoe jiteubiet lom, dan rapöh nyan jimeu-eue, lé ureuëng po ija atawa kulét nyan harôh geutot lam apui barang nyan. 58 Meunyoe óh ka lheueh teu rhah hi nyang lumpok nibak ija nyan atawa kulét nyan ka gadôh, teuma atranyan harôh teu rhah lom, barô kheueh teuanggab gleh. 59 Meunan kheueh atoran-atoran keuhai nyang rapöh nyang meuteumé nibak peukayan atawa ija nibak lineun atawa ija wol, atawa nibak peue mantong nyang teupeugét nibak kulét.

Imeum-Imeum 14

1 TUHAN geubri ubak Nabi Musa peuratoran-peuratoran lagée nyoe keuhai upacara teupeugleh óh ka lheueh puléh nibak peunyakét kulét nyang mubahya. Bak uroe ureuëng nyang teupeugah gleh, ureuëng nyan harôh teuba ubak imeum, 3 lé imeum laju geuba ureuëng nyan uluwa khimah-khimah. Meunyoe meunurot teupareksa ureuëng nyan ka puléh, 4 lé imeum laju geuyue ba ubak ureuëng nyan dua boh cicém udeb nyang hana hareuem, sikrék kayée bak aron, sikrék talo mirah dan saboh tangke ôn hisop. 5 Cicém nyang saboh harôh teusie ateueh beulangöng tanoh nyang meuasoe ié gleh nyang teucok nibak mata ié. 6 Cicém nyang saboh treuk nibak kayée bak aron, talo mirah ngon saboh tangke ôn hisop harôh teuculok lam darah cicém nyang ka teusie nyan. 7 Lé imeum laju geureutek tujoh goe darah cicém nyan ubak ureuëng nyang ka puléh nyan, dan laju geupeugah bahwa ureuëng nyan ka gleh. Dan cicém nyang mantong udeb geujak peuleueh laju u blang. 8 Óh lheueh nyan lé ureuëng nyan laju jijak rhah peukayan droe jih, jicukö mandum ôk jih, dan jijak manoe. Deungon nyan gleh kheueh ureuëng nyan, dan ka jeuet jitamong u dalam khimah-khimah, teuma tujoh uroe treuk ureuëng nyan hana jeuet jitamong lam khimah jih keudroe. 9 Bak uroe nyang keutujoh ureuëng nyan harôh jicukö mandum ôk jih, meunan cit deungon janggot jih, calak mata ureuëng nyan dan banmandum bulée nyang na nibak tuboh ureuëng nyan. Óh lheueh nyan lé ureuëng nyan laju jijak rhah peukayan jih keudroe dan jimanoe. Barô kheueh óh lheueh nyan ureuëng nyan ka gleh. 10 Bak uroe nyang keu lapan ureuëng nyan harôh jiba dua boh aneuëk bubiri agam dan saboh aneuëk bubiri inong nyang meu umu sithon, nyang maséng-maséng hana meucupa. Seulaén nibak nyan jiba teuma lhée kilo gram teupông nyang ka teujampu ngon minyéuk zaiton dan siper lhée arée minyéuk zaiton. 11 Lé imeum laju jiba ureuëng nyan meusigoe ngon peuseumahan jih nyan ubak babah pintoe Khimah TUHAN. 12 Imeum harôh geucok saboh aneuëk bubiri agam dan siper lhée arée minyéuk zaiton keu keureubeuen geunantoe rugoe, dan laju geupeuseumah sibagoe keureubeuen teubri ubak TUHAN. 13 Aneuëk bubiri nyan harôh teusie bak teumpat nyang khusos na kheueh bak teumpat sie keureubeuen peu amphon desya dan keureubeuen teutot. Bubiri nyan harôh teusie disinan sabab keureubeuen gantoe rugoe ngon keureubeuen peu amphon desya na kheueh lumpah that suci dan jeuet keu jeumba imeum. 14 Imeum harôh geucok bacut darah aneuëk bubiri nyan laju geusiliek ubak punyueng blah uneuen, bak nang jaroe uneuen dan bak nang gaki uneuen ureuëng nyang teuma geupeugah ka gleh. 15 Óh lheueh nyan lé imeum geucok laju bacut minyéuk zaiton laju geuro lam paleuet jaroe geuh nyang blah wie. 16 Óh ka lheueh gobnyan geuculok aneuëk jaroe geuh nyang blah uneuen lam minyéuk, dan geu ceupet tujoh goe lam Khimah TUHAN. 17 Dan minyéuk nyang mantong na tinggai bacut bak jaroe gobnyan nyan laju geusiliek ubak teumpat-teumpat nyang ka teusiliek darah, na kheueh ubak ôn punyueng blah uneuen, bak nang jaroe blah uneuen, dan nang gaki blah uneuen ureuëng nyang teuma geupeugah ka gleh. 18 Minyéuk nyang leubeh nyan harôh geuro ateueh ulée ureuëng nyan. Deungon lagée nyan imeum ka geupeuna upacara peusuci keu ureuëng nyan dikeue TUHAN. 19 Óh lheueh nyan lé imeum harôh geupeuseumah keureubeuen peu amphon desya mangat ureuëng nyang najih nyan ka jeuet keu gleh. Óh lheueh nyan gobnyan harôh geusie beulatang keu keureubeuen nyang teutot 20 dan geupeuseumah meusajan ngon keureubeuen teuhidang ateueh miseubah. Deungon lagée nyan imeum ka geupeuna ucapara teupeusuci keu ureuëng nyan, dan ureuëng nyan pih ka jeuet keu gleh. 21 Meunyoe ureuëng nyan gasien dan hana mampu, teuma keu keureubeuen geunantoe rugoe jihnyan jeuet jiba saboh aneuëk bubiri agam sibagoe keureubeuen nyang teujok ubak TUHAN. Seulaén nibak nyan sikilo gram teupông nyang teujampu ngon minyéuk zaiton sibagoe keureubeuen teuhidang, dan siper lhée minyéuk zaiton. 22 Meunan cit di ureuëng nyan harôh teuma jiba dua boh cicém mirah pati nyang mantong muda atawa cicém leuek muda: saboh keu keureubeuen peu amphon desya dan saboh treuk keu keureubeuen teutot. 23 Banmandum peuseumahan nyan harôh teuba ubak imeum dikeue babah pintoe Khimah TUHAN bak uroe nyang keu lapan upacara teupeu gleh droe gobnyan. 24 Le imeum laju geucok aneuëk bubiri ngon minyéuk zaiton dan laju geupeuseumah sibagoe keureubeuen nyang teujok ubak TUHAN, dan nyan keu jeumba imeum. 25 Laju lé imeum harôh geusie aneuëk bubiri nyan dan geusiliek laju darah jih bacut ubak punyueng blah uneuen, nang jaroe blah uneuen dan nang jaroe gaki uneuen ureuëng nyang ka geupeugah gleh. 26 Lé imeum harôh geuro bacut minyéuk ubak tapak jaroe gobnyan blah wie 27 dan deungon jaroe uneuen gobnyan laju geupicet minyéuk nyan tujoh goe u dalam Khimah TUHAN. 28 Dan minyéuk nyang na tinggai bacut treuk lam jaroe gobnyan harôh geusiliek ubak teumpat-teumpat nyang ka teusiliek darah, na kheueh ubak ôn punyueng nyang blah uneuen, nang jaroe uneuen dan nang gaki blah uneuen ureuëng nyang teuma geupeugah gleh. 29 Minyéuk nyang leubeh nyan harôh geuro ateueh ulée ureuëng nyan sibagoe upacara teupeu gleh droe gobnyan dikeue TUHAN. 30 Óh lheueh nyan lé imeum harôh geupeuseumah saboh cicém mirah pati muda atawa cicém leuek muda 31 keu keureubeuen peu amphon desya, dan saboh treuk keu keureubeuen nyang teutot meusigoe ngon keureubeuen teuhidang. Deungon lagée nyan imeum geupeuna upacara teupeu gleh ateueh ureuëng nyan dikeue TUHAN. 32 Nyan kheueh peuratoran keuhai upacara teupeusuci óh ka lheueh keunong peunyakét kulét nyang mubahya keu ureuëng nyang hana meudaya. 33 TUHAN geubri ubak Nabi Musa ngon Nabi Harun 34 peuratoran-peuratoran keuhai rumoh nyang ka keunong peunyakét rapöh dan ka jimeu-eue. Peuratoran-peuratoran nyoe teupeubuet óh ka lheueh bansa Israel jitamong u Kanaan, nanggroe nyang geubri lé TUHAN keu awaknyan. 35 Soemantong nyang meuteumé rumoh droe ka keunong rapöh, harôh jijak peugah hainyan ubak imeum. 36 Sigohlom imeum teuka geujak pareksa nyang keunong rapöh nyan, gobnyan harôh geupeurintah mangat peue-peue nyang na lam rumoh nyan teupeuteubiet uluwa. Meunyoe hán, peue mantong nyang na lam rumoh nyan ka jeuet keu najih, dan laju imeum teuka 37 keu geupareksa nyang rapöh nyan. Meunyoe na deuh meucak-cak rab lagée ijo-ijo atawa mubayang-bayang mirah nyang leumah jih lagée ka jitamong u dalam beuton nyan, 38 imeum harôh geutinggai laju rumoh nyan dan geupeubiyeu mantong rumoh nyan teugunci nyang treb jih tujoh uroe. 39 Bak uroe nyang keutujoh imeum nyan harôh geuteuka dan geupareksa lom teuma. Meunyoe nyang rapöh nyan ka jimeu-eue, 40 gobnyan harôh geupeurintah mangat batée-batée beuton nyang ka keunong rapöh nyan teureulôh dan mandum beuton siblah udalam teu kréh. Nyang teukréh nyan lagée peulaster ngon batée-batée nyan harôh teujak böih ubak saboh teumpat nyang najih nyang na diluwa banda. 42 Dan batée-batée nyang ka geupeuteubiet nyan harôh teugantoe deungon batée-batée nyang barô. Banmandum beuton rumoh nyan harôh teulapeh ngon peulaster barô. 43 Meunyoe rapöh nyan jiteuka lom, padahai batée-batée rumoh nyan ka teugantoe dan beuton-beuton rumoh nyan ka teu kréh dan teupeulaster lom, 44 lé imeum harôh geujak ngieng dan geupareksa rumoh nyan lom. Meunyoe rapöh nyan keubiet ka ji-éue meuluwah teuma rumoh nyan ka jeuet keu najih 45 dan harôh teureulôh. Batée-batée, kayée-kayée dan banmandum peulaster jih harôh teuba u teumpat nyang najih nyang na di luwa banda. 46 Sigohlom nyan soe mantong nyang tamong lam rumoh nyan ka jeuet keu najih sampoe mata uroe jilob. 47 Soe mantong nyang éh atawa jimakheun nibak rumoh nyan harôh ji rhah peukayan droe jih. 48 Teuma meunyoe imeum nyang teuka dan meunurot nyang geupareksa lé gobnyan hana jiteuka lé nyang rapöh óh ka lheueh rumoh nyan teupeulaster lom, gobnyan harôh geupeugah bahwa rumoh nyan ka gleh, sabab nyang rapöh nyan ka gadôh banmandum. 49 Keu teupeu suci rumoh, imeum harôh geucok dua boh cicém, kayée bak sala, talo mirah dan saboh tangke hisop. 50 Cicém nyang saboh harôh teusie ateueh beulangöng nyang meuasoe ié gét nibak mata ié. 51 Laju óh lheueh nyan, kayée bak sala, talo mirah, hisop dan cicém nyang mantong udeb harôh teuculok lam darah cicém nyang ka lheueh teusie dan u dalam ié nyang gét. Óh lheueh nyan, rumoh nyan harôh geureutek tujoh goe. 52 Cicém nyang mantong udeb harôh geupeuleueh lam padang uluwa banda. Deungon lagée nyan imeum ka geupeubuet upacara teupeusuci rumoh, dan rumoh nyan ka jeuet keu gleh. 54 Nyan kheueh peuratoran-peuratoran keuhai peunyakét kulét nyang paleng mubahya, 55 keuhai bucôh-bucôh, luhok atawa meucak-cak putéh atawa kumong nibak tuboh, dan keuhai rapöh nibak peukayan atawa rumoh. 57 Peuratoran-peuratoran nyan guna jih keu teupeu teuntée peu kheueh sapeue-peue nyan gleh atawa najih.

Imeum-Imeum 15

1 TUHAN geubri ubak Nabi Musa dan Nabi Harun peuratoran-peuratoran nyang lagée nyoe 2 keu bansa Israel. Meunyoe sidroe ureuëng agam jiteubiet meuliléh akibat keunong peunyakét nibak boh kréh, nyang jiteubiet meuliléh nyan najih, 3 bah kheueh nyang teubiet meunan cit nyang meuteun. 4 Teumpat duek atawa teumpat éh ureuëng nyan najih. 5 Soe mantong nyang cukéh ureuëng nyang jiteubiet meuliléh atawa teumpat éh ureuëng nyan, atawa jiduek nibak teumpat beukaih ureuëng nyan duek, atawa teumpat jiludah lé ureuëng nyan, ureuëng nyang keunong nyan harôh ji rhah peukayan dan jimanoe, dan ureuëng nyan najih sampoe án mata uroe jilob. 9 Peulana atawa peue mantong nyang jiduek lé ureuëng nyang peuteubiet meuliléh nyan ka jeuet keu najih. 10 Soe mantong nyang cukéh sapeue-sapeue nyang beukaih jiduek lé ureuëng nyan, nyan ka jeuet keu najih sampoe mata uroe jilob. Soe mantong ureuëng nyang beuôt barang nyan harôh ji rhah peukayan ureuëng nyan dan jimanoe, dan ureuëng nyan najih sampoe mata uroe jilob. 11 Meunyoe ureuëng nyang jiteubiet meuliléh nyan gohlom ji rhah jaroe laju jicukéh ureuëng laén, teuma ureuëng nyang jicukéh nyan harôh ji rhah peukayan droe jih dan jimanoe, dan ureuëng nyan najih sampoe mata uroe jilob. 12 Beulangöng tanoh nyang jicukéh lé ureuëng nyan harôh jipeubeukah dan peukakaih nyang jimat nyan harôh teu rhah. 13 Meunyoe ureuëng nyan ka puléh, ureuëng nyan harôh jipréh tujoh uroe treuk. Óh lheueh nyan gobnyan harôh ji rhah peukayan jih keudroe dan jijak manoe ubak mata ié, teuma gleh kheueh ureuëng nyan. 14 Bak uroe nyang keu lapan ureuëng nyan harôh jiba dua boh cicém mirah pati nyang muda atawa cicém leuek muda ubak babah pintoe Khimah TUHAN laju jijok ubak imeum. 15 Imeum harôh geupeuseumah cicém nyang saboh sibagoe keureubeuen peu amphon desya, dan saboh treuk keu keureubeuen nyang teutot. Deungon lagée nyan imeum ka geupeuna upacara peusuci ureuëng nyan dikeue TUHAN. 16 Meunyoe sidroe ureuëng agam jipeuteubiet ié manikam, ureuëng nyan harôh jimanoe teuma teutab najih sampoe án mata uroe jilob. 17 Barang peue mantong bah kheueh nyan nyang nibak ija atawa kulét nyang keunong manikam nyan harôh teu rhah; barang nyan najih sampoe án mata uroe jilob. 18 Óh ka lheueh meusituboh, bah kheueh ureuëng agam meunan cit ureuëng inong harôh manoe, teuma awaknyan teutab najih sampoe án mata uroe jilob. 19 Ureuëng inong nyang teungoh jiteuka he, ureuëng inong nyan najih nyang treb jih tujoh uroe. Soe mantong nyang cukéh ureuëng nyan ka jeuet keu najih sampoe mata uroe jilob. 20 Peue mantong nyang jigiduek atawa ji éh lé ureuëng inong nyang mantong lam he nyan atranyan ka jeuet keu najih. 21 Soe mantong nyang cukéh teumpat beukaih ji éh atawa jigiduek lé ureuëng inong nyang teungoh jiteuka he, ureuëng nyan harôh ji rhah peukayan gobnyan dan jimanoe, dan ureuëng nyan najih sampoe án mata uroe jilob. 24 Meunyoe sidroe ureuëng agam jimeusituboh ngon ureuëng inong nyang teungoh teuka he, ureuëng agam nyan pih ka jeuet keu najih nyang treb jih tujoh uroe, dan tieb-tieb teumpat éh nyang ji éh lé ureuëng nyan pih ka jeuet keu najih. 25 Meunyoe ureuëng inong jiteubiet darah na meupadub uroe treb jih diluwa masa teuka he jih, atawa darah jih nyan jiteubiet hana jipiôh sampoe ka habéh watée teuka he gobnyan, ureuëng nyan najih seumantong meudarah nyan saban lagée gobnyan masa lam he. 26 Teumpat éh atawa teumpat duek gobnyan seumantong ureuëng nyan jiteubiet darah na kheueh najih. 27 Soe mantong nyang cukéh teumpat nyan, jihnyan jeuet keu najih. Gobnyan harôh ji rhah peukayan jih dan jimanoe, dan gobnyan najih sampoe án mata uroe jilob. 28 Óh ka lheueh darah nyan jipiôh, ureuëng inong nyan harôh jipréh nyang treb jih tujoh uroe trek. Barô kheueh óh lheueh nyan gobnyan ka gleh. 29 Bak uroe nyang keu lapan ureuëng nyan harôh jiba dua boh cicém mirah pati muda atawa cicém leuek muda ubak imeum nibak babah pintoe Khimah TUHAN. 30 Cicém nyang saboh harôh jipeuseumah sibagoe keureubeuen peu amphon desya, dan nyang saboh trek sibagoe keureubeuen teutot. Deungon cara nyan imeum ka geupeuna upacara peusuci ureuëng inong dikeue TUHAN. 31 TUHAN meufeureuman ubak Nabi Musa mangat geujak peuingat ubak bansa Israel mangat geupeurati pajan awaknyan jiteuka najih dan pajan teuma hana jiteuka, mangat awaknyan hana jipeunajih Khimah TUHAN nyang na lamkawan khimah-khimah awaknyan. Meunyoe awaknyan jipeunajih Khimah nyan, awaknyan teuma maté. 32 Meunan kheueh peuratoran-peuratoran keuhai ureuëng agam nyang jipeuteubiet meuliléh sabab sakét eumpang kréeh atawa jipeuteubiet manikam, 33 keuhai ureuëng inong nyang teungoh he, dan keuhai ureuëng agam nyang meujimak ngon ureuëng inong nyang teungoh teuka he.

Imeum-Imeum 16

1 Óh ka lheueh meuninggai bandua droe aneuëk Nabi Harun watée awaknyan jipeuseumah apui nyang hana geu rela lé TUHAN, TUHAN meufeureuman ubak Nabi Musa, 2 kheun TUHAN, "Tajak peusampoe kheueh ubak syedara gata Nabi Harun, bahwa bak uroe nyang ka teupeuteuntée mantong jihnyan jeuet jitamong lam Ruweueng Nyang Mahasuci nyang teupeuleung ngon tirée rawa, sabab disinan kheueh Ulôn peuleumah droe Lôn lam awan di ateueh tutôb Peuto Peujanji. Meunyoe Nabi Harun ji iengkeue ubak peurintah nyan, laju jihnyan teuma maté. 3 Teuma ngon cara jipeuseumah leumô agam nyang mantong muda keu keureubeuen peu amphon desya dan saboh bubiri agam keu keureubeuen nyang teutot, Nabi Harun jeuet jitamong lam Ruweueng Mahasuci." 4 Lheueh nyan teuma Nabi Harun jipeurati ubak peuratoran-peuratoran nyoe. Sigohlom jitamong lam Ruweueng Mahasuci leubeh dilée harôh jimanoe dan jingui peukayan imeum, na kheueh bajée, sileuweue paneuk, talo keuiéng dan seureuban, banmandum nyang teupeugét nibak lineun. 5 Lé umat Israel harôh jiseurah ubak Nabi Harun dua boh kaméng agam keu keureubeuen peu amphon desya dan saboh bubiri agam keu keureubeuen nyang teutot. 6 Nabi Harun harôh jipeuseumah saboh leumô agam keu keureubeuen peu amphon desya keu droe jihnyan dan keuluwarga jih. 7 Ban dua boh leumô agam nibak Israel nyan harôh jiba ubak babah pintoe Khimah TUHAN. 8 Disinan jihnyan harôh ji rhom undi deungon cara jipeuguna dua neuk aneuk batée, nyang sineuk jiboh tanda "keu TUHAN", dan nyang laén "keu Azazel". 9 Kaméng nyang teupiléh keu TUHAN harôh teupeuguna keu keureubeuen peu amphon desya. 10 Kaméng nyang teupiléh keu Azazel harôh teuba udeb-udeb dikeue TUHAN dan laju teuparoh u padang pasi keu Azazel, deungon na lagée nyan mangat desya-desya bansa Israel geu sampôh bube nyang na. 11 Óh ka lheueh Nabi Harun geupeuseumah dan geusie leumô agam keu keureubeuen peu amphon desya keu droe gobnyan keudroe dan keu keuluwarga, 12 gobnyan harôh geucok teumpat apui nibak miseubah dan geupasoe laju peunoh deungon ngeue apui dan dua boh reugam dupa nyang halôh, atranyan laju geuba ubak Ruweueng Mahasuci. 13 Dupa nyan harôh teutot dikeue Peuto Peujanjian, sampoe asab meukeubok akhé jih teutôb Peuto nyan dan Nabi Harun hana deuh geukalon gobnyan, sabab meunyoe gobnyan geukalon, gobnyan teuma maté. 14 Laju Nabi Harun geucok bacut darah leumô, ngon jaroe gobnyan geureutek darahnyan ubak bagian muka tutôb Peuto Peujanjian dan tujoh goe ukeue Peuto. 15 Óh ka lheueh nyan Nabi Harun harôh geusie kaméng keu keureubeuen peu amphon desya umat Israel. Darah kaméng nyan harôh jiba ubak Ruweueng Mahasuci, laju geupicet ubak bagian keue situtôb Peuto Peujanjian dan ukeue Peuto, lagée nyang ka geupeubuet ngon darah leumô agam. 16 Deungon cara nyan gobnyan ka geupeu gleh Ruweueng Mahasuci nibak najih bansa Israel dan nibak banmandum desya awaknyan. Khimah TUHAN harôh teupeusuci sabab na jih di teungoh-teungoh khimah-khimah bansa Israel dan keunong najih awaknyan. 17 Phon nibak saát Nabi Harun geutamong lam Ruweueng Mahasuci keu geupeubuet upacara teupeusuci sampoe án gobnyan geuteubiet, meusidroe pi hana jeuet na lam Khimah nyan. Óh ka lheueh seuleusoe geupeubuet upacara keu gobnyan keudroe, keu keuluwarga gobnyan dan keu banmandum bansa Israel, 18 Nabi Harun harôh geuteubiet dan geujak laju ubak miseubah nyan. Gobnyan harôh geucok bacut sapeue darah leumô ngon darah kaméng, dan geusiliek laju darah-darah nyan ubak lungkée-lungkée nibak sagoe-sagoe miseubah. 19 Ngon jaroe gobnyan lé geuhnyan harôh geureutek bacut darah nyan tujoh goe u ateueh miseubah. Deungon caranyan gobnyan ka geupeusuci miseubah nibak najih bansa Israel, mangat jeuet keu suci. 20 Óh ka seuleusoe geupeuna upacara teupeusuci Ruweueng Mahasuci dan bagian-bagian nyang laén nibak Khimah TUHAN meunan cit ngon miseubah gobnyan, Nabi Harun harôh geupeuseumah ubak TUHAN kaméng nyang udeb nyang geupiléh keu Azazel. 21 Gobnyan harôh geupeuduek bandua jaroe gobnyan ateueh ulée kaméng nyan sira geu aku banmandum nyang salah, desya dan nyang ji iengkeue lé bansa Israel. Ngon lagée nyan, banmandum salah bansa Israel geupinah laju ateueh ulée kaméng nyan. Dan ureuëng nyang ka geubri tugaih keu nyan laju jiparoh kaméng nyan u padang pasi. 22 Lé kaméng nyan jiba banmandum desya bansa Israel u daerah tandus nyang hana ureuëng tinggai dan kaméng nyan harôh jipeuleueh nibak padang pasi. 23 Óh ka lheueh nyan Nabi Harun geutamong lam Khimah, geusut peukayan imeum nyang geungui bak tuboh gobnyan watée geutamong lam Ruweueng Mahasuci, dan geutinggai laju peukayan nyan disinan. 24 Dan gobnyan harôh geujak manoe ubak saboh teumpat nyang ka teupeu khusos laju geungui peukayan geuh keudroe. Óh ka lheueh nyan gobnyan harôh geuteubiet dan geupeuseumah keureubeuen nyang teutot keu teupeu amphon desya geuh keudroe dan desya bansa Israel. 25 Gapah beulatang keu keureubeuen peu amphon desya nyan harôh teutot ateueh miseubah nyan. 26 Ureuëng nyang peuleueh kaméng keu Azazel nibak padang pasi harôh ji rhah peukayan droe jih ngon jimanoe sigohlom ureuëng nyan jiwoe ubak khimah-khimah. 27 Leumô agam dan kaméng keu keureubeuen peu amphon desya, nyang darah jih teupeutamong lam Ruweueng Mahasuci keu peu amphon desya, harôh teuba uluwa khimah-khimah dan laju jitot. Kulét, asoe ngon asoe pruet bandua beulatang nyan harôh teutot banmandum. 28 Ureuëng nyang tot atranyan harôh ji rhah peukayan droe jih dan jimanoe sigohlom jiwoe ubak khimah-khimah. 29 Banmandum peuratoran nyoe harôh jitaát keu siumu masa. Bak tanggai siploh buleuen tujoh, ureuëng Israel dan ureuëng aséng nyang na tinggai teutab di teungoh-teungoh awaknyan harôh jipuasa dan hana jeuet jimubuet, sabab uroe nyoe uroe nyang lumpah suci. Bak uroe nyan harôh jipeuna upacara keu teupeusuci bansa Israel nibak banmandum desya awaknyan mangat awaknyan gleh. 32 Imeum Agong, nyang ka lheueh teubaiát dan teupeu khusos keu Po teu Allah keu geunantoe ayah gobnyan, harôh geupeubuet upacara peusuci nyan. Gobnyan harôh geungui peukayan khusos, 33 gobnyan geupeubuet upacara peusuci Ruweueng Mahasuci, bagian-bagian laén nibak Khimah TUHAN, miseubah, imeum-imeum dan banmandum bansa Israel. 34 Upacara nyan harôh geupeubuet sigoe dalam sithon keu teupeusuci bansa Israel nibak sigala desya awaknyan. Nyan kheueh peuratoran-peuratoran nyang harôh jitaát keu siumu masa. Nabi Musa geupeubuet laju lagée nyang ka geupeurintah lé TUHAN ubak gobnyan.

Imeum-Imeum 17

1 TUHAN meufeureuman ubak Nabi Musa mangat geujak jok peuratoran-peuratoran nyoe ubak Nabi Harun, aneuëk-aneuëk gobnyan dan banmandum bansa Israel. 3 Meunyoe sidroe ureuëng Israel jipeuseumah leumô, bubiri atawa kaméng keu TUHAN, beulatang nyan harôh jisie nibak babah pintoe Khimah TUHAN. Meunyoe atranyan jisie bak teumpat nyang laén, jihnyan ka ji iengkeue ubak huköm sabab jipeurô darah. Jihnyan hana teu anggab sibagoe anggota umat Po teu Allah. 5 Peurintah nyan meukeusut jih mangat bansa Israel jiba ubak Khimah TUHAN banmandum beulatang keureubeuen nyang lazem jih awaknyan sie di ladang-ladang. Awaknyan wajéb jiba keureubeuen nyan ubak imeum dikeue babah pintoe Khimah TUHAN dan jisie atranyan nibak teumpat nyan sibagoe keureubeuen peudamé. 6 Imeum harôh geureutek darah nyan ubak sagoe-sagoe miseubah dikeue babah pintoe Khimah TUHAN laju geutot gapah mangat jeuet bée jih nyang mangat nyan lumpah that galak até TUHAN. 7 Bansa Israel harôh teutab seutia ubak TUHAN dan sagai-sagai hana jeuet jisie beulatang nibak blang-blang sibagoe keureubeuen ubak jén-jén jeuhet. Peuratoran nyan harôh jitaát keu siumu masa. 8 Meunyoe sidroe ureuëng Israel atawa sidroe ureuëng aséng nyang na tinggai teutab lamkawan bansa Israel jipeuseumah keureubeuen nyang teutot atawa keureubeuen laén 9 ubak TUHAN, ureuëng nyan harôh jipeuseumah dikeue babah pintoe Khimah TUHAN. Meunyoe jihnyan jipeuseumah atranyan bak teumpat laén, ureuëng nyan hana jeuet teu anggab anggota umat Po teu Allah. 10 Meunyoe sidroe-droe ureuëng Israel atawa ureuëng aséng nyang na tinggai teutab lamkawan bansa Israel jipajoh darah, teuma ureuëng nyan geuhuköm lé TUHAN dan hana geu anggab anggota umat Gobnyan. 11 Nyawöng tieb-tieb makhluk na lam darah nyan. Sabab nyan TUHAN geupeurintah mangat bandum darah jireutek ateueh miseubah mangat desya-desya umat geusampôh bubena. Darah na kheueh nyawöng, teusampôh desya. 12 Nyan kheueh sabab jih ureuëng Israel atawa ureuëng aséng nyang na tinggai teutab di lamkawan awaknyan teutam bék jipajoh darah. 13 Meunyoe na sidroe-droe ureuëng Israel atawa ureuëng aséng nyang na tinggai di lamkawan bansa Israel jidrob cicém atawa beulatang laén nyang hana hareuem, jihnyan harôh jipeuteubiet darah beulatang nyan dan laju jiseubée ngon tanoh. 14 Nyawöng tieb-tieb makhluk na lam darah nyan, sababnyan TUHAN geutam bansa Israel jipajoh darah. Soe mantong ureuëng nyang jipeubuet buet nyang teutam nyan ureuëng nyan hana le teu anggab anggota umat Po teu Allah. 15 Soe mantong ureuëng Israel atawa ureuëng aséng nyang pajoh sie beulatang nyang ka maté keudroe atawa maté sabab jiteugöm lé beulatang juwah, harôh jijak rhah peukayan jih óh lheueh nyan jimanoe dan jipréh sampoe án mata uroe jilob, barô kheueh ureuëng nyan teupeugah ka gleh. 16 Meunyoe jihnyan hana jipeubuet lagée nyan, jihnyan harôh jitanggong akibat jih.

Imeum-Imeum 18

1 TUHAN meufeureuman ubak Nabi Musa mangat geujak peusampoe ubak bansa Israel peurintah nyang lagée nyoe, "Ulôn kheueh TUHAN Allah gata. 3 Bék kheueh gata seutôt lagée nyang jipeubuet lé ureuëng nyang na di nanggroe Meusé, teumpat gata phon-phon that tinggai, atawa lagée ureuëng nyang na di Kanaan, nibak teumpat nyang jinoe Ulôn ba gata. 4 Taát kheueh ubak huköm-huköm Ulôn dan gata peubuet kheueh laju peue nyang Ulôn peurintah. Ulôn kheueh TUHAN Allah gata. 5 Taát kheueh ubak peuratoran-peuratoran dan huköm-huköm nyang Ulôn bri ubak gata. Meunyoe gata tapeubuet lagée nyan, udeb gata seulamat. Ulôn kheueh TUHAN." 6 TUHAN geubri peuratoran-peuratoran lagée nyoe. Bék meusituboh ngon sidroe lamkawan syedara gata. 7 Bék meusituboh ngon ma gata, peurumoh ayah gata, sabab jihnyan hak bapak gata. 8 Bék gata hina ayah gata ngon cara gata meusituboh ngon peurumoh ayah gata nyang laén. 9 Bék meusituboh ngon syedara gata nyang inong atawa syedara ui gata, bah kheueh nyang rayeuek saboh rumoh ngon gata meunan cit nyang rayeuek di rumoh laén. 10 Bék meusituboh ngon cucoe gata; nyang lagée nyan teuma teupeu malée droe gata keudroe. 11 Bék meusituboh ngon syedara gata nyang inong nyang saboh yah laén ma atawa nyang saboh ma laén yah, sabab jihnyan saboh darah cit deungon gata. 12 Bék meusituboh ngon ma cut gata, bah kheueh nyan syedara ayah gata meunan cit syedara ma gata. 14 Bék meusituboh ngon peurumoh apha gata, sabab jihnyan ma cut gata cit teuma. 15 Bék meusituboh ngon aneuëk meulintée 16 atawa ngon peurumoh aduen gata. 17 Bék meusituboh ngon aneuëk atawa cucoe sidroe ureuëng inong nyang ka lheueh gata meusituboh ngon inong nyan. Mungken awaknyan rakan krab gata, dan buet nyang lagée nyan hana jeuet na. 18 Bék gata meukawen ngon syedara peurumoh gata seumantong udeb peurumoh gata. 19 Bék meusituboh ngon ureuëng inong nyang mantong lam he, sabab jih nyan mantong lam najih. 20 Bék meusituboh ngon peurumoh ureuëng laén; buet nyang lagéenyan ka rhoh gata jeuet keu najih. 21 Bék gata jok sidroe lamkawan aneuëk gata keu jiseumuja ubak Molokh, sabab buet nyang lagée nyan teuhina nan Po teu Allah, TUHAN gata. 22 Ureuëng agam hana jeuet jimeusituboh sabe ngon agam; Po teu Allah geubanci that bak buet lagée nyan. 23 Ureuëng agam meunan cit di ureuëng inong, sagai-sagai hana jeuet jimeusituboh ngon beulatang; buet nyang jeuhet nyan ka teupeu najih gata. 24 Bék gata peunajih droe gata deungon buet-buet nyang lagée nyan, sabab deungon cara lagée nyan bansa-bansa nyang tinggai di Kanaan sigohlom gata ka jipeunajih droe jih keudroe. Lé sabab nyan awaknyan geu use lé TUHAN mangat gata jeuet ta tinggai di nanggroe nyan. 25 Awaknyan ka jipeubuet banmandum buet nyang luwat that nyan, sampoe tanoh awaknyan ka jeuet keu najih. Teuma TUHAN geuhuköm awaknyan sampoe awaknyan hán jeuet tinggai le nibak teumpat nyan. Teuma digata bék sagai-sagai gata peubuet nyang lagée nyan. Gata banmandum, ureuëng Israel dan ureuëng aséng nyang tinggai lamkawan gata, harôh gata taát peuratoran dan peurintah TUHAN, 28 mangat gata bék geuhuköm lé Gobnyan dan teu-use nibak tanoh nyan lagée ureuëng-ureuëng nyang hana jituri TUHAN, nyang tinggai disinan sigohlom gata. 29 Gata tateupeue bahwa soe mantong nyang peubuet buet nyang kuto ngon luwat nyan ureuëng nyan hana lé teu anggab anggota umat Po teu Allah. 30 Laju TUHAN meufeureuman, "Taát kheueh ubak peuratoran-peuratoran nyang ka Ulôn bri dan bék gata seutôt buet-buet ureuëng nyang tinggai di tanoh Kanaan sigohlom gata. Bék gata peunajih droe gata keudroe ngon cara teupeubuet buet-buet nyang lagéenyan bagoe. Ulôn kheueh TUHAN Allah gata."

Imeum-Imeum 19

1 TUHAN meufeureuman ubak Nabi Musa mangat geujak peusampoe ubak bansa Israel peurintah nyang lagée nyoe, "Beusuci kheueh gata, sabab Ulôn TUHAN Po teu Allah gata na kheueh suci. 3 Tieb-tieb ureuëng harôh jihoreumat ubak ayah ngon ma jih dan jipeuraya uroe raya Sabat lagée nyang Ulôn peurintah. Ulôn kheueh TUHAN Allah gata. 4 Bék gata seumah beurala. Bék gata peugét patong nibak logam dan gata seumah. Ulôn kheueh TUHAN Allah gata. 5 Meunyoe gata tapeuseumah beulatang keu keureubeuen peudamé, seutôt kheueh peuratoran-peuratoran nyang Ulôn bri, mangat keureubeuen nyan Ulôn teurimong. 6 Asoe sie jih harôh teupajoh bak uroe beulatang nyan teusie atawa óh singoh nyan teuma. Asoe sie nyang mantong na tinggai bak uroe nyang keu lhée atranyan harôh teutot sampoe habéh, 7 sabab sie nyan ka hareuem. Meunyoe sie nyan jipajoh cit teuma, keureubeuen nyan hana Lôn teurimong. 8 Soe mantong nyang pajoh sie nyan ureuëng nyan ka salah sabab hana jihareuga peue nyang Ulôn peu khusos keu Ulôn. Ureuëng nyan hana le Ulôn anggab anggota umat Ulôn. 9 Meunyoe gata tamupot, bék kheueh gata pot boh gandom nyang timoh bak binéh-binéh blang gata, dan bék gata riwang tajakcok boh gandom nyang na tinggai óh lheueh gata pot. 10 Bék gata riwang ubak lampôh anggô keu gata jak peusapat boh anggô nyang mantong tinggai óh ka lheueh gata pot nyang paleng pon. Meunan cit ngon boh-boh jih nyang ka rhot bék gata cok. Bah kheueh nyan keu ureuëng gasien dan ureuëng aséng. Ulôn kheueh TUHAN Allah gata. 11 Bék cumucue, seumeunget atawa meusulet. 12 Bék meujanji deumi nan Ulôn meunyoe gata meukeusut keu tapeutrok janji nyan, sabab deungon lagée nyan gata ka tahina nan Ulôn. Ulôn kheueh TUHAN Allah gata. 13 Bék gata lakée paksa seusamoe gata atawa gata reupah barang jih. Eungkoh sidroe-droe ureuëng nyang jimubuet nibak gata bék gata teun-teun, bahpi nyan simalam mantong. 14 Bék gata seurapa ureuëng tulo dan bék gata tiek batée dikeue ureuëng buta. Horeumat dan teumakot kheueh gata ubak Ulôn, sabab Ulôn nyoe na kheueh TUHAN Allah gata. 15 Gata harôh jujoe meunyoe gata peusidang gob; bék gata dong blah ureuëng gasien dan bék gata takot keu ureuëng kaya. 16 Bék gata tabu fiteunah ubak ureuëng-ureuëng nyang sibansa ngon gata, deungon na lagée nyan gata hana teupeusabab manusia maté. Ulôn kheueh TUHAN. 17 Bék na gata dam ateueh soe mantong. Peubéeréeh kheueh sileuséh gata deungon soe mantong, mangat gata hana meudesya ngon sabab ureuëng laén. 18 Bék gata balaih dam dan bék gata banci ubak ureuëng laén, teuma cinta kheueh seusamoe gata lagée gata cinta ubak droe gata keudroe. Ulôn kheueh TUHAN. 19 Taát kheueh peue-peue nyang Ulôn peurintah. Bék gata peukawen beulatang nyang laén jeunéh jih. Bék gata pula dua macam bijéh bak saboh keubeueng tanoh. Bék gata ngui peukayan nyang teucôb ngon dua boh rupa. 20 Meunyoe na sidroe-droe ureuëng agam jimeujanji jipeubloe namiet jih nyang inong ubak ureuëng agam laén keu jipeujeuet keu gundek jih, dan ureuëng nyang tem bloe namiet nyan gohlom jibayeue, laju lé ureuëng po nyang phon jimeusituboh ngon namiet nyan, awaknyan bandua harôh teuhuköm, teuma hana jeuet teuhuköm maté, sabab ureuëng inong nyan mantong namiet jih. 21 Ureuëng agam nyan harôh jiba saboh bubiri agam ubak babah pintoe Khimah Ulôn keu keureubeuen geunantoe rugoe. 22 Lé imeum harôh geukeureubeuen bubiri nyan nibak upacara teupeusuci, mangat desya ureuëng nyan teupeu amphon. Teuma Ulôn, Allah teuma Lôn peu amphon jihnyan. 23 Meunyoe gata ka tatamong u nanggroe Kanaan dan gata pula na meupadub macam bak kayée nyang meuboh disinan, teuma lhée thon nyang keuphon boh kayée nyan harôh gata anggab hareuem dan hana jeuet gata pajoh. 24 Bak thon nyang keu peuet banmandum boh jih harôh teupeuseumah keu teupeugah teurimong gaséh ubak Ulôn, TUHAN. 25 Bak thon nyang keu limong barô kheueh jeuet gata pajoh boh jih. Meunyoe banmandum gata peubuet peuratoran nyan, seunaman bak kayée gata teuma jimeuboh leubeh jai nibak nyan. Ulôn kheueh TUHAN Allah gata. 26 Bék pajoh darah. Bék peuguna iéleumé gaéb. 27 Bék gata gunteng ôk bak binéh ulée gata atawa gata cukö janggot gata. 28 Bék gata tob-tob kulét gata keu gata peugét tanda-tanda atawa gata peuluka badan gata sibagoe tanda meukabông ateueh ureuëng maté. Ulôn kheueh TUHAN. 29 Bék gata peuhina deurajat aneuëk gata nyang inong deungon cara gata peujeuet aneuëk nyan keu inong jeuhet bak kuil. Deungon gata peubuet lagée nyan gata ka tapeukuto nanggroe droe gata, dan ureuëng-ureuëng nyang peubuet mukah ban galak droe meuraja lela. 30 Peuraya kheueh uroe Sabat dan horeumat kheueh teumpat nyang ka teupeukhusos keu teuseumah Lôn. Ulôn kheueh TUHAN. 31 Bék gata lakée naseuhat ubak dukun nyang jimeuhubongan ngon areuwah-areuwah ureuëng maté. Meunyoe nyan gata peubuet gata ka jeuet keu najih. Ulôn kheueh TUHAN Allah gata. 32 Seugan kheueh dan horeumat kheueh ubak ureuëng tuha. Horeumat dan teumakot kheueh gata ubak Ulôn, sabab Ulôn kheueh TUHAN. 33 Bék gata peubuet nyang kon-kon ateueh ureuëng aséng nyang na tinggai di nanggroe gata. 34 Peutimang kheueh awaknyan lagée gata peutimang ureuëng-ureuëng nyang saboh bansa ngon gata dan gata sayang kheueh keu awaknyan lagée gata sayang ubak droe gata keudroe. Ingat kheueh bahwa gatapi ka lheueh udeb lagée ureuëng aséng di nanggroe Meusé. Ulôn kheueh TUHAN Allah gata. 35 Bék gata tipé ureuëng laén ngon cara gata peuguna sinipat, sinimang atawa sinukat peuleusu. 36 Peuguna kheueh metée, sinimang dan sinukat nyang beutôi. Ulôn kheueh TUHAN Allah gata, dan Ulôn ka Lôn ba gata peuteubiet nibak nanggroe Meusé. 37 Taát kheueh ubak mandum huköm dan peurintah Lôn. Ulôn kheueh TUHAN."

Imeum-Imeum 20

1 TUHAN meufeureuman ubak Nabi Musa mangat geujak peusampoe hainyoe ubak bansa Israel, "Soe mantong ureuëng lamkawan gata atawa ureuëng aséng nyang na tinggai lamkawan gata nyang jikeureubeuen aneuëk jih ubak Molokh, ureuëng nyang peubuet nyan harôh teurhom ngon batée sampoe maté lé banmandum masyarakat. 3 Ureuëng nyang keureubeuen aneuëk jih ubak Molokh, ka jipeunajih Khimah Lôn dan jipeuhina nan Ulôn nyang suci. Ureuëng nyan teuma Lôn huköm dan hana le Lôn anggab sibagoe anggota umat Lôn. 4 Meunyoe masyarakat jikalon ban ateueh buet nyang jipeubuet lé ureuëng nyan hana jipeu rhot huköman maté ateueh ureuëng nyan, 5 teuma Ulôn keudroe nyang huköm ureuëng nyan, banmandum keuluwarga ureuëng nyan, meunan cit banmandum ureuëng nyang na meusajan ngon ureuëng nyan jitinggai Ulôn dan jiseumah Molokh. Awaknyan hana le Lôn anggab anggota umat Lôn. 6 Ureuëng nyang jak lakée naseuhat ubak dukun nyang dukun nyan jimeuhubongan ngon areuwah-areuwah ureuëng maté teuma Lôn huköm dan ureuëng nyan hana Lôn anggab le anggota umat Lôn. 7 Jaga kheueh droe gata mangat gata teutab suci, sabab Ulôn kheueh TUHAN Allah gata. 8 Taát kheueh bak huköm-huköm Lôn, sabab Ulôn kheueh TUHAN nyang peukhusos gata keu Ulôn." 9 TUHAN geubri peuratoran-peuratoran nyoe, "Ureuëng nyang kutok ayah ngon ma jih ureuëng nyan harôh teuhuköm maté. Ureuëng nyan maté sabab salah jih keudroe. 10 Meunyoe na sidroe ureuëng Israel jimeumukah ngon peurumoh ureuëng saboh bansa ngon jih, ureuëng nyan ngon inong nyan harôh teuhuköm maté. 11 Sidroe ureuëng agam nyang jimeusituboh ngon peurumoh ayah jih nyang laén, ureuëng nyan ka jipeukosa hak milék ayah jih. Ureuëng agam ngon ureuëng inong nyan harôh teuhuköm maté. Awaknyan maté sabab salah jih keudroe. 12 Meunyoe na sidroe ureuëng agam jimeusituboh ngon meulintée jih nyang inong, bandua droe ureuëng nyan harôh teuhuköm maté. Awaknyan ka jimeumukah, dan maté sabab salah jih keudroe. 13 Meunyoe na sidroe ureuëng agam jimeusituboh ngon ureuëng agam nyang laén, awaknyan ka jipeubuet buet nyang luwat dan hina, dan bandua ureuëng nyan harôh teuhuköm maté. Awaknyan maté sabab salah jih keudroe. 14 Meunyoe sidroe ureuëng agam jimeukawen ngon sidroe ureuëng inong dan ma ureuëng inong nyan, ban lhée droe awaknyan harôh teutot lam apui sampoe án maté, sabab awaknyan ka jipeubuet buet nyang lumpah hina. Dan buet nyang lagée nyan hán jeuet na lamkawan gata. 15 Meunyoe sidroe ureuëng agam jimeusituboh ngon beulatang, ureuëng ngon beulatang nyan harôh teupoh maté. 16 Meunyoe sidroe ureuëng inong jimeusituboh ngon beulatang, ureuëng dan beulatang nyan harôh teupoh maté. Jihnyan maté sabab buet jih keudroe. 17 Meunyoe sidroe ureuëng agam jimeusituboh ngon syedara jih nyang inong atawa ngon syedara jih nyang inong laén ma atawa saboh ma laén ayah, awaknyan hana le teu anggab anggota umat Ulôn. Awaknyan ka jipeubuet buet nyang lumpah hina dan harôh jitanggong akibat jih. 18 Meunyoe sidroe ureuëng agam jimeusituboh ngon sidroe ureuëng inong nyang teungoh teuka he, awaknyan hana le teu anggab anggota umat Ulôn. 19 Meunyoe sidroe ureuëng agam jimeusituboh ngon ma cut jih, bandua awaknyan harôh jitanggong akibat buet nyang jipeubuet nyan. 20 Meunyoe sidroe ureuëng agam jimeusituboh ngon peurumoh apha jih, ureuëng nyan ka jihina apha jih. Agam ngon inong nyan harôh jitanggong huköman jih. Sampoe án maté awaknyan hana meuteumé aneuëk. 21 Meunyoe sidroe ureuëng agam jireupah peurumoh syedara jih, jihnyan ka jihina syedara jih nyan dan ka jipeubuet buet nyang paleng hina. Sampoe án maté awaknyan hana meuteumé aneuëk." 22 TUHAN meufeureuman, "Taát kheueh ubak huköm dan peurintah Lôn, mangat gata hana teu use nibak nanggroe Kanaan, bak Ulôn ba gata. 23 Bék gata seutôt adat istiadat bansa nyang tinggai disinan. Awaknyan jipeuluwat Ulôn ngon buet jih nyang jeuhet. Nyang kheueh sabab jih awaknyan Ulôn use, mangat gata meuteumé tatamong u nanggroe nyan. 24 Tanoh nyang kaya dan subô nyan ka Ulôn peujanji keu gata, dan Ulôn bri keu gata jeuet keu hak milék gata. Ulôn kheueh TUHAN Allah gata nyang peu aséng gata nibak bansa-bansa nyang laén. 25 Lé sabab nyan gata harôh meuteumé gata peubeda beulatang nyang hareuem ngon nyang hana hareuem. Bék gata pajoh beulatang hareuem. Beulatang nyan Ulôn peugah hareuem, jadi gata pajoh cit gata ka jeuet keu najih. 26 Gata Ulôn peu aséng nibak bansa-bansa laén mangat gata jeuet keu milék Ulôn. Gata harôh suci sabab Ulôn kheueh TUHAN, dan Ulôn suci. 27 Tieb-tieb ureuëng agam atawa ureuëng inong nyang jipeuna hubongan ngon areuwah-areuwah ureuëng maté ureuëng nyan harôh teu rhom ngon batée sampoe án maté. Ureuëng nyan maté sabab salah jih keudroe."

Imeum-Imeum 21

1 TUHAN meufeureuman ubak Nabi Musa mangat geujak peusampoe peurintah nyoe ubak imeum-imeum keuturonan Nabi Harun, "Sidroe imeum hana jeuet jipeunajih droe jih keudroe sabab meusajan jijak bak upacara teupeukubu waréh kawöm jih, 2 laén hai meunyoe nyang maté nyan ma jih keudroe, ayah jih, aneuëk jih, syedara jih nyang agam, 3 atawa syedara jih nyang inong nyang gohlom meukawen, dan tinggai saboh rumoh ngon jih. 4 Jih nyan hana jeuet jipeu najih droe deungon cara jiseutôt upacara teupeukubu waréh kawöm peurumoh jih. 5 Sidroe imeum hana jeuet jicukö siladum nibak ôk jih bak ulée dan hana jeuet gunteng janggot jih atawa jipeuluka tuboh jih ngon barang tajam sibagoe tanda bahwa jihnyan teungoh meukabông. 6 Jihnyan milék Ulôn nyang khusos dan hana jeuet jipeukuto nan Ulôn. Jihnyan jikeureubeuen peunajoh keu Ulôn, deungon nyan jihnyan harôh suci. 7 Sidroe imeum hana jeuet jimeukawen ngon beukaih inong jeuhet atawa sidroe inong nyang hana le peurawan atawa nyang ka meucre, sabab imeum na kheueh milék Ulôn. 8 Bansa Israel harôh jiaku imeum sibagoe ureuëng nyang teupeu khusos keu Ulôn sabab jihnyan jipeuseumah keureubeuen peunajoh keu Ulôn. Ulôn kheueh TUHAN; Ulôn nyoe suci dan Ulôn harôh Lôn peusuci umat Lôn. 9 Meunyoe aneuëk imeum nyang inong ka jeuet keu inong jeuhet, aneuëk nyan ka jihina ayah jih dan nyan harôh teutot lam apui sampoe maté. 10 Imeum Agong ka lheueh teubaiát deungon cara teuprée minyéuk ateueh ulée gobnyan dan deungon cara teupeungui peukayan imeum agong bak ureuëng nyan. Lé sabab nyan gobnyan hana jeuet jipeubiyeu ôk jih bak ulée sansui atawa jipriek peukayan jih sibagoe tanda meukabông. 11 Jihnyan ka jipeuseumah ubak Ulôn beu jeuet keu milék Ulôn, teuma ngon na lagée nyan jih nyan hana jeuet jipeu najih droe. Meunan cit jih nyan hana jeuet jipeunajih Khimah Ulôn deungon cara jiteubiet nibak sinan keu jijak tamong lam rumoh nyang na manyét, bahpi nyan manyét ayah jih atawa ma jih keudroe. 13 Jihnyan jeuet jimeukawen ngon sidroe inong nyang mantong peurawan nibak sukée jih keudroe. Dan hana jeuet jimeukawen ngon sidroe inong balée atawa sidroe inong nyang ka meucre, atawa beukaih inong jeuhet. 15 Meunyoe ji iengkeue peurintah nyan, teuma aneuëk-aneuëk jih nyang siharôh jih suci, teuma jeuet keu najih. Ulôn kheueh TUHAN dan Ulôn ka Lôn peukhusos jihnyan jeuet keu Imeum Agong." 16 TUHAN meufeureuman ubak Nabi Musa mangat geujak peugah nyoe ubak Nabi Harun, "Sidroe keuturonan gata nyang cidra tuboh jih hana jeuet jipeuseumah keureubeuen peunajoh keu Ulôn. Hai nyang lagée nyan teutab na sabe siumu masa. 18 Ureuëng nyang peuseumah keureubeuen hana cidra badan jih, na kheueh ureuëng buta dan ureuëng lapée, ureuëng cacat muka jih atawa anggota tuboh jih, 19 nyang lapée jaroe jih atawa nyang capiek gaki jih, 20 nyang bungkok dan ureuëng nyang paleng ubit nibak ureuëng biasa, nyang keunong peunyakét mata atawa nyang keunong peunyakét kulét dan ureuëng nyang teugasi. 21 Tieb-tieb keuturonan Imeum Harun nyang cidra badan jih hana jeuet jipeuseumah keureubeuen peunajoh keu Ulôn. 22 Teuma jih nyan jeuet jipajoh peunajoh nyang teupeuseumah nyan, bah kheueh nyan keureubeuen peunajoh nyang suci meunan cit keureubeuen peunajoh nyang lumpah suci. 23 Sabab ureuëng nyan cidra badan jih, ureuëng nyan hana jeuet jipeurab ubak tirée nyang teupisah Ruweueng Suci atawa miseubah. Jihnyan hana jeuet jipeukuto barang-barang nyang ka teupeu khusos keu Ulôn, sabab Ulôn kheueh TUHAN, dan Ulôn kheueh nyang peu khusos barang-barang nyan." 24 Nyan kheueh peuratoran-peuratoran nyang geupeusampoe lé Nabi Musa ubak Nabi Harun dan aneuëk-aneuëk gobnyan, dan ubak banmandum bansa Israel.

Imeum-Imeum 22

1 TUHAN meufeureuman ubak Nabi Musa beu geujak peusampoe peurintah nyoe ubak Nabi Harun dan aneuëk-aneuëk gobnyan, "Peubuet kheueh beu jroh-jroh peue nyang jipeuseumah lé bansa Israel khusos keu Ulôn, mangat gata hana tapeukuto nan Ulôn nyang suci. Ulôn kheueh TUHAN. 3 Meunyoe sidroe nibak keuturonan gata lam keuadaan najih jijak peurab ubak keureubeuen-keureubeuen suci nyang jipeukhusos lé bansa Israel keu Ulôn, jihnyan hana jeuet jilayani nibak miseubah. Peuratoran nyan teutab na siumu masa. Ulôn kheueh TUHAN. 4 Sidroe keuturonan Nabi Harun nyang keunong peunyakét kulét nyang mubahya, atawa nyang keunong peunyakét nibak alat keulamin jih sampoe jiteubiet meuliléh-liléh, teutam hán jeuet jipajoh keureubeuen suci sigohlom jihnyan teupeugah ka gleh. Sidroe imeum ka jeuet keu najih meunyoe imeum nyan tupéh ngon barang nyang meunajih sabab keunong manyét. Meunan cit di ureuëng nyan najih meunyoe ié manikam ureuëng nyan jiteubiet, 5 atawa tupéh ngon beulatang dan ureuëng nyang najih. 6 Sidroe imeum nyang deungon cara peue mantong ka jeuet keu najih, teuma najih nyan sampoe mata uroe jilob. Dan óh ka lheueh mata uroe jilob jih nyan gohlom jeuet jipajoh peunajoh nyang teupeu seumah ubak TUHAN meunyoe jihnyan gohlom jimanoe. 7 Óh ka lheueh mata uroe jilob ureuëng nyan ka gleh dan ka jeuet jipajoh, sabab nyan kheueh peunajoh jih. 8 Ureuëng nyan hana jeuet jipajoh sie beulatang nyang maté keudroe atawa beulatang nyang maté jiteugöm lé beulatang juwah. Meunyoe nyang lagée nyan jipajoh cit, ureuëng nyan ka jeuet keu najih. Ulôn kheueh TUHAN. 9 Banmandum imeum harôh jitaát ubak peuratoran nyang Ulôn bri. Meunyoe hán, awaknyan salah dan teuma jih maté, sabab ji iengkeue ubak peuratoran-peuratoran nyan suci nyan. Ulôn kheueh TUHAN, dan Ulôn kheueh nyang peu khusos awaknyan keu Ulôn. 10 Keureubeuen nyang teupeu khusos keu Ulôn nyang jeuet pajoh na kheueh lé keuluwarga imeum nyan keudroe; ureuëng laén hana jeuet, bahpi ureuëng nyan saboh rumoh ngon imeum nyan atawa ureuëng nyang tung upah ubak gobnyan. 11 Teuma namiet-namiet nyang jibloe lé imeum nyan ngon péng jih keudroe atawa nyang lahé lam rumoh jih nyan, jeuet ji pajoh peunajoh jeumba imeum nyan. 12 Aneuëk inong sidroe imeum nyang meukawen ngon kon imeum, hana jeuet jipajoh keureubeuen nyan. 13 Teuma aneuëk inong imeum nyang ka jeuet keu inong balée atawa nyang jicre teuma hana meu aneuëk laju jiwoe u rumoh ayah jih dan ka jeuet tanggong jaweueb ureuëng syiek jih nyan lom, jeuet jipajoh jeumba ureuëng syiek jih nyan. Teuma keuluwarga imeum mantong nyang jeuet pajoh keureubeuen nyan. 14 Meunyoe sidroe nyang bukon anggota imeum nyang deungon hana jisaja ka jipajoh peunajoh nyang teupeuseumah ubak TUHAN, ureuëng nyan harôh jibri geunantoe ubak imeum jitamah lom dua ploh peureusen. 15 Imeum-imeum hana jeuet jipeunajih keureubeuen nyang teupeu khusos keu Ulôn 16 deungon jipeubiyeu jipajoh lé ureuëng nyang hana hak jih. Hai nyan ka teupeu jeuet ureuëng nyan salah dan teupeuteuka huköman ateueh ureuëng nyan. Ulôn kheueh TUHAN, dan Ulôn nyang peusuci peuseumahan nyan." 17 TUHAN meufeureuman ubak Nabi Musa geuyue jak peusampoe ubak Nabi Harun, aneuëk-aneuëk gobnyan dan banmandum bansa Israel peuratoran-peuratoran nyang lagée nyoe. Meunyoe sidroe ureuëng Israel atawa ureuëng aséng nyang tinggai teutab di Israel jipeuseumah keureubeuen teutot keu jipeu lheueh kaôi, atawa keu keureubeuen keugalak droe, beulatang nyan harôh nyang agam dan hana jeuet na meucupa mangat jeuet teuteurimong. 20 Bék peuseumah beulatang nyang na cupa, sabab nyang lagée nyan TUHAN hana geuteurimong. 21 Meunyoe sidroe ureuëng jipeuseumah ubak TUHAN keureubeuen peudamé keu jibayeue kaôi jih atawa keu keureubeuen keu galak droe, beulatang nyan hán jeuet na meucupa, mangat jeuet geuteurimong. 22 Bék kheueh teupeuseumah ubak TUHAN beulatang nyang buta, nyang patah tuleueng jih atawa nyang luka, nyang jitimoh barah ka meudanoh, nyang ka keunong peunyakét kulét atawa kude. Beulatang nyang lagée nyan bék jipeuseumah keu keureubeuen peunajoh u ateueh miseubah. 23 Keu keureubeuen keu galak droe gata jeuet tapeuseumah beulatang nyang hana sampoereuna hi jih; teuma keu teupeu lheueh kaôi, beulatang nyang lagée nyan hana jeuet teuteurimong. 24 Bék kheueh peuseumah keu TUHAN beulatang nyang aneuëk keumiro jih ka rusak sabab meuseupet, ka teukoh, luka leumbam-leumbam atawa teutiek. Hai nyang lagée nyan hana jeuet na di nanggroe gata. 25 Beulatang peulara nyang meuteumé nibak ureuëng aséng hana jeuet teupeuseumah keu keureubeuen peunajoh. Beulatang nyan teu anggab ka cupa dan hana jeuet teuteurimong. 26 Aneuëk leumô, aneuëk bubiri atawa aneuëk kaméng nyang ban lahé harôh tinggai nibak nang jih treb jih tujoh uroe. Barô kheueh óh lheueh nyan beulatang nyan jeuet teuteurimong keu keureubeuen peunajoh. 28 Bék kheueh gata keureubeuen nang leumô atawa bubiri atawa kaméng meusigoe ngon aneuëk jih nibak uroe nyang saban. 29 Meunyoe gata tapeuseumah keureubeuen teurimong gaséh ubak TUHAN, gata peubuet kheueh nyan meunurot atoran nyang na, mangat keureubeuen gata geuteurimong. 30 Makheun kheueh keureubeuen nyan bak uroe nyan cit teuma, dan bék gata tinggai mubacut pi keu keusingoh beungoh. 31 TUHAN meufeureuman, "Taát kheueh ubak peue-peue nyang Ulôn peurintah; Ulôn kheueh TUHAN gata. 32 Bék gata peukuto nan Ulôn nyang suci. Banmandum bansa Israel harôh jiseumah Ulôn sibagoe Nyang Mahasuci. Ulôn kheueh TUHAN dan Ulôn nyang peujeuet gata suci. 33 Ulôn ba gata teupeuteubiet nibak nanggroe Meusé, mangat Ulôn jeuet keu Po teu Allah gata. Ulôn kheueh TUHAN."

Imeum-Imeum 23

1 TUHAN geubri ubak Nabi Musa atoran-atoran keuhai peurayaan agama, nyang harôh geupeumaklum sibagoe uroe raya keu meu iébadat. 3 Na nam uroe watée jak mubuet, teuma bak uroe nyang keu tujoh, uroe Sabat, na kheueh uroe meureuhat nyang teupeu khusos keu TUHAN. Nibak uroe nyan gata harôh gata meusapat keu gata meu iébadat dan hana jeuet nyang jak meubuet. 4 Nyoe kheueh uroe-uroe raya nyang ka geupeuteutab lé TUHAN dan nyang harôh teupeumaklum bak watée nyang ka teupeu teuntée. 5 Uroe Raya Paskah nyang teupeu raya keu teuhoreumat TUHAN, teupeuphon watée mata uroe lhob bak tanggai peuet blaih buleuen sa. 6 Óh singoh nyan, tanggai limong blaih, phon Peurayaan ruti hana Meurago, dan tujoh uroe treb jih hana jeuet gata pajoh ruti nyang teupeugét teuboh rago. 7 Tujoh uroe treb jih nyan gata harôh tapeuseumah keureubeuen peunajoh ubak TUHAN. Bak uroe nyang phon dan nyang keu tujoh peurayaan nyan gata harôh tameusapat keu gata iébadat dan hana jeuet gata meubuet nyang brat-brat. 9 Meunyoe gata ka trok u nanggroe nyang geubri lé TUHAN keu gata, dan gata peusapat wase tanoh, beureukah gandom nyang phon that gata pot harôh gata ba ubak imeum. 11 Bak uroe óh ka lheueh uroe Sabat, imeum harôh jipeuseumah gandom nyan sibagoe keureubeuen nyang teubri ubak TUHAN, mangat TUHAN galak keu gata. 12 Bak uroe gata tapeuseumah gandom nyan, harôh cit gata peuseumah keu keureubeuen nyang teutot saboh aneuëk bubiri agam nyang meu-umu sithon dan hana meucupa. 13 Keu keureubeuen peunajoh peuseumah kheueh teuma dua kilo gram teupông teujampu ngon minyéuk zaiton. Bée keureubeuen nyang haröm nyan lumpah that galak até TUHAN. Meusigoe ngon nyan peuseumah teuma si arée ié anggô. 14 Sigohlom teuba peuseumahan nyan ubak TUHAN, hana jeuet gata pajoh mubacut pi nibak gandom nyang barô nyan, bah kheueh nyang mantong meuntah, teupanggang atawa teutot jeuet keu ruti. Peuratoran nyan harôh jitaát lé banmandum keuturonan gata keu siumu masa. 15 Phon nibak uroe óh ka lheueh uroe Sabat, watée gata peuseumah ubak TUHAN beureukah gandom nyang phon, gata harôh ta itong tujoh goe aleuhat peunoh. 16 Bak uroe nyang keulimong ploh, na kheueh uroe óh ka lheueh uroe Sabat nyang keutujoh, gata harôh taba keureubeuen teuhidang ubak TUHAN. 17 Tieb-tieb keuluwarga harôh jiba dua boh ruti sibago peuseumahan teujok keu TUHAN, tieb-tieb ruti harôh teupeugét nibak dua kilo gram teupông halôh nyang teuboh rago dan atra nyan harôh jipeuseumah ubak TUHAN sibagoe keureubeuen wase tanoh nyang phon. 18 Meusajan ngon ruti nyan bansa Israel harôh jipeuseumah teuma tujoh boh aneuëk bubiri nyang meu-umu sithon, saboh leumô agam muda dan dua boh kaméng. Maséng-maséng beulatang nyan hana jeuet na meucupa dan harôh teupeuseumah sibagoe keureubeuen nyang teutot keu TUHAN, deungon keureubeuen teuhidang dan keureubeuen ié anggô. Bée keureubeuen nyang haröm nyan lumpah that galak até TUHAN. 19 Dan peuseumah teuma saboh kaméng agam keu keureubeuen peu amphon desya dan dua boh bubiri agam nyang meu-umu sithon keu keureubeuen peudamé. 20 Ruti dan bandua boh aneuëk bubiri nyan harôh jipeuseumah lé imeum sibago keureubeuen nyang teubri ubak TUHAN, dan nyan na kheueh keu imeum. Banmandum peuseumahan nyan na kheueh suci. 21 Bak uroe nyan gata harôh meusapat keu meuiébadat dan hana jeuet gata meubuet nyang brat-brat. Peuratoran nyan harôh jitaát lé keuturonan gata keu siumu masa, dan dipat mantong awaknyan tinggai. 22 Meunyoe gata jakmupot, bék kheueh gata koh gandom nyang na timoh nibak binéh-binéh blang gata dan bék gata riwang keu gata jak peusapat boh-boh gandom nyang na tinggai óh ka lheueh gata pot. Bah kheueh atra nyan jicok lé ureuëng gasien dan ureuëng aséng. TUHAN na kheueh Allah gata. 23 Tanggai sa buleuen tujoh harôh teupeuraya sibago uroe nyang khusos keu meureuhat. Bak uroe nyan meutanda deungon su beureuguih, dan gata harôh meusapat keu gata jak meuiébadat. 25 Peuseumah kheueh keureubeuen peunajoh keu TUHAN dan bék gata peubuet buet-buet nyang brat nibak uroe nyan. 26 Tanggai siploh buleuen tujoh na kheueh uroe upacara sithon sigo keu peu amphon desya bansa Israel. Bak uroe nyan gata harôh tapuasa dan gata meusapat keu gata jak iébadat meunan cit meusigoe ngon nyan gata peuseumah keureubeuen peunajoh keu TUHAN. 28 Bék gata jak bak buet, sabab uroe nyan na kheueh uroe peu amphon desya, mangat gata meuteumé amphon dikeue TUHAN Po teu Allah. 29 Soe mantong nyang pajoh peue mantong nibak uroe nyan, ureuëng nyan hana teu anggab le anggota umat Allah. 30 Dan soe mantong nyang jipeubuet buet nibak uroe nyan, ureuëng nyan geuhuköm lé TUHAN keudroe ngon huköman maté. 31 Peuratoran nyan keunong ateueh banmandum keuturonan gata dipat mantong awaknyan tinggai. 32 Phon bak saát mata uroe lob bak tanggai sikureueng buleuen nyan trok ubak watée mata uroe jilob bak tanggai siploh, harôh gata peuraya lagée uroe Sabat, uroe nyang khusos keu meureuhat. Siuroe peunoh nyan gata harôh puasa. 33 Khanuri Jambo Ôn phon bak tanggai limong blaih buleuen tujoh dan treb jih tujoh uroe. 35 Nyang tujoh uroe treb jih nyan, tieb-tieb uroe gata harôh gata peuseumah keureubeuen peunajoh. Bak uroe nyang phon dan nyang keulapan gata harôh meusapat keu meu iébadat dan gata peuseumah keureubeuen peunajoh ubak TUHAN. Bék kheueh gata peubuet buet-buet nyang brat nibak uroe nyan. 37 Nyan kheueh uroe raya agama nyang ka geupeuteutab lé TUHAN dan nyang harôh gata peumaklum. Nibak peurayaan-peurayaan nyan gata harôh gata horeumat TUHAN deungon gata meusapat keu meu iébadat dan gata peuna keureubeuen peunajoh, keureubeuen nyang teutot, keureubeuen teuhidang, keureubeuen beulatang dan keureubeuen ié anggô, lé jih dub nyang teupeureulée tieb-tieb uroe. 38 Peurayaan-peurayaan nyan na kheueh sibagoe seunamah nibak uroe-uroe Sabat biasa, meunan cit deungon banmandum peuseumahan nyan sibago seunamah nibak meuneubri gata nyang biasa, bak keureubeuen gata keu gata teuboh kaôi, atawa keureubeuen keugalak droe nyang gata bri ubak TUHAN. 39 Óh ka lheueh musém mupot, phon tanggai limong blaih buleuen tujoh, gata harôh gata peuna peurayaan nyang treb jih tujoh uroe. Uroe nyang phon dan nyang lapan na kheueh uroe nyang khusos keu meureuhat. 40 Bak uroe nyang phon gata harôh gata pot boh kayée nyang paleng jroh lam lampôh gata, meunan cit deungon ôn-ôn palma dan ranteng-ranteng nibak bak-bak kayée nyang luhu, dan gata peuphon kheueh peurayaan sukacita keu teuhoreumat TUHAN Po teu Allah gata. 41 Peurayaan nyan harôh gata peuna nyang treb jih tujoh uroe. Peuratoran nyan harôh jipeubuet lé keuturonan gata keu siumu masa. 42 Tujoh uroe treb jih banmandum bansa Israel harôh tinggai lam jambo-jambo ôn, 43 mangat keuturonan gata jiteupeue bahwa TUHAN geuyue bansa Israel tinggai lam jambo-jambo nyang seuderhana, watée Gobnyan geuba awaknyan peuteubiet lam nanggroe Meusé. Gobnyan kheueh TUHAN Po teu Allah gata. 44 Meunan kheueh cara jih Nabi Musa geupeusampoe ubak bansa Israel peuratoran-peuratoran keuhai cara teupeuna peurayaan-peurayaan keu tehoreumat TUHAN.

Imeum-Imeum 24

1 TUHAN meufeureuman ubak Nabi Musa geuyue jak peusampoe peurintah-peurintah nyoe ubak bansa Israel: Ba kheueh laju minyéuk zaiton nyang murni dan nyang paleng gét keu panyöt lam Khimah TUHAN, mangat jeuet teupeu udeb dan hu sabe. 3 Nabi Harun harôh geu atoe banmandum panyöt-panyöt nyan pon seupôt sampoe troh beungoh nibak teumpat TUHAN teuka, diluwa tirée nyang teutôb Peuto Peujanjian nibak Ruweueng Mahasuci. Peurintah nyan harôh jipeubuet keu siumu masa. 4 Nabi Harun harôh geu urôh banmandum panyöt-panyöt bak gaki panyöt nyang teupeugét nibak méuh murni mangat teutab hu lam Khimah TUHAN. 5 Cok kheueh laju dua blaih kilo gram teupông nyang paleng gét dan peugét kheueh laju dua blaih boh ruti bulat, maséng-maséng sikilo gram teupông. 6 Keubah laju ruti nyan lam dua boh suson, tieb-tieb suson nam boh ruti, ateueh meuja nyang meulapéh ngon méuh murni nyang na dalam Khimah TUHAN. 7 Pasoe laju keumeunyan nyang aseuli ubak tieb-tieb sinuson ruti sibago tanda bahwa ruti nyan keureubeuen peunajoh keu TUHAN. 8 Tieb-tieb uroe Sabat harôh na ruti nyang teuhidang lam Khimah TUHAN. Nyan kheueh keuwajéban bansa Israel keu siumu masa. 9 Ruti nyan na kheueh keu Nabi Harun dan keuturonan gobnyan. Awaknyan harôh geupajoh atra nyan bak teumpat nyang suci, sabab rutinyan sibagoe bagian nyang paleng suci nibak keureubeuen peunajoh nyang teupeuseumah ubak TUHAN keu imeum-imeum. 10 Nibak khimah-khimah ureuëng Israel na sidroe ureuëng agam. Ayah jih ureuëng Meusé dan ma jih ureuëng Israel nyang nanjih Selomit, aneuëk Dibri nibak sukée Dan. Bak siuroe ureuëng nyan jimeudakwa ngon ureuëng Israel di khimah-khimah nyan. Watée meudakwa nyan, ureuëng nyan laju jikutok Po teu Allah. Sabab nyan kheueh lé ureuëng Israel jiba ureuëng nyan meuhadab ubak Nabi Musa, 12 dan jiteun ureuëng nyan disinan sira jipréh keuputosan TUHAN keuhai peue nyang harôh awaknyan peubuet ateueh ureuëng nyan. 13 TUHAN meufeureuman ubak Nabi Musa, 14 "Gata ba laju ureuëng nyan uluwa khimah-khimah. Soe mantong ureuëng nyang ka jideungoe ureuëng nyan jikutok Ulôn, harôh jipeuduek jaroe ateueh ulée ureuëng nyan keu jibri keusaksian bahwa ureuëng nyan salah. Óh lheueh nyan banmandum umat harôh jirhom ureuëng nyan ngon batée sampoe án maté. 15 Óh ka lheueh nyan jak peumaklum kheueh nyoe ubak bansa Israel: Soe mantong nyang kutok Po teu Allah ureuëng nyan harôh jitanggong akibat jih 16 dan teuhuköm maté. Soe mantong nyang kutok TUHAN ureuëng nyan harôh teugeulawa ngon batée sampoe maté lé banmandum jeumaáh. Huköm nyan teutab berlaku keu ureuëng Israel dan ureuëng aséng nyang ka tinggai teutab di Israel. 17 Soe mantong nyang poh maté ureuëng laén ureuëng nyan harôh teuhuköm maté. 18 Soe mantong nyang poh maté beulatang ureuëng laén harôh jigantoe. Dasai jih na kheueh 'nyawöng geunantoe nyawöng'. 19 Soe mantong ngon sabab jih ureuëng laén cidra, peue mantong nyang ka jipeubuet, harôh teubalah teuma ateueh ureuëng nyan. 20 Meunyoe jihnyan jipeupatah tuleueng, teuma tuleueng jih pih harôh teupeupatah teuma. Meunyoe jih nyan jipeubuta siblaih mata ureuëng laén, teuma mata ureuëng nyan harôh teupeubuta siblaih. Meunyoe jih jipoh ureuëng laén sampoe patah gigo, teuma gigo ureuëng nyan pih harôh teupeupatah teuma. Peue mantong nyang jipeubuet seuhingga ureuëng laén cidra, nyan pih harôh teubalaih ateueh ureuëng nyan sampoe cidra. 21 Soe mantong nyang poh maté beulatang harôh jigantoe, teuma soe mantong nyang poh maté manusia ureuëng nyang harôh teuhuköm maté. 22 Huköm nyan teutab berlaku keu gata banmandum dan keu ureuëng aséng nyang tinggai teutab meusajan gata, sabab Ulôn kheueh TUHAN, Allah gata." 23 Óh ka lheueh Nabi Musa geupeusampoe hai nyan ubak bansa Israel, awaknyan laju jiba ureuëng nyang ka kutok Po teu Allah nyan uluwa khimah-khimah laju jigeulawa ureuëng nyan ngon batée sampoe maté. Deungon cara lagée nyan bansa Israel ka jipeubuet peue nyang ka geupeurintah lé TUHAN ubak Nabi Musa.

Imeum-Imeum 25

1 Nibak ateueh Gunong Sinai TUHAN meufeureuman ubak Nabi Musa dan geuyue laju ubak gobnyan 2 jak peusampoe kheueh peuratoran-peuratoran nyoe ubak bansa Israel. Meunyoe gata tatamong lam nanggroe nyang teuma geubri lé TUHAN keu gata, gata harôh gata horeumat TUHAN deungon cara lagée nyoe: Tieb-tieb thon nyang keutujoh gata hana jeuet gata pula sapeue nibak tanoh. 3 Nam thon treb jih harôh gata pula banmandum lampôh atawa ladang gata, gata gunteng lampôh-lampôh anggô dan gata peusapat wase tanoh gata. 4 Teuma tieb-tieb thon nyang keutujoh teupeu khusos keu TUHAN. Sithon peunoh nyan tanoh gata peubiyeu mantong meunan hana jeuet gata keureuja. Bék gata pula sapeue pi lam ladang dan bék gata gunteng lampôh anggô gata. 5 Meunan cit gandom nyang timoh keudroe atawa anggô bak anggô gata keudroe nyang hana teugunteng, hana jeuet gata peusapat dan gata keubah, sabab thon nyoe na kheueh thon tanoh meureuhat. 6 Bah kheueh meunan, tanoh nyan teuma jibri cit wase keu teupeujeuet peunajoh keu gata, namiet-namiet gata, ureuëng-ureuëng nyang tung upah nibak gata, dan ureuëng aséng nyang na tinggai deungon gata. 7 Meunan cit keu beulatang-beulatang nyang gata peulara dan beulatang-beulatang kleuet lam nanggroe gata. Peue mantong nyang jipeuhase lé tanoh nyan jeuet teumakheun. 8 Itong kheueh tujoh go tujoh thon, deungon jeumeulah jih peuet ploh sikureueng thon. 9 Óh lheueh nibak tanggai siploh buleuen tujoh, bak uroe peu amphon desya, gata yue kheueh ureuëng mangat jiyueb beureuguih jeub-jeub teumpat bansaboh nanggroe. 10 Harôh gata peukhusos thon nyang keu limong ploh nyan, dan gata peumaklum keuhai beubaih ubak mandum ureuëng lam nanggroe. Lam thon nyan banmandum hareuta milék nyang ka teupeubloe harôh teujok pulang ubak ureuëng po jih nyang phon atawa ubak keuturonan jih. Soe nyang jipeubloe sibagoe namiet harôh jipeuriwang ubak keuluwarga jih. 11 Bék kheueh gata pula ladang gata. Gandom nyang timoh keudroe jih atawa boh anggô lam lampôh anggô gata nyang hana teugunteng atra nyan hana jeuet peusapat dan gata keubah. 12 Thon nyan na kheueh thon nyang suci keu gata. Gata teuma jeuet teupajoh peue nyang na timoh di ladang gata. 13 Bak thon nyan banmandum tanoh nyang ka teupeubloe harôh teujok pulang ubak ureuëng nyang phon po tanoh nyan. 14 Teuma meunyoe gata tapeubloe tanoh bansa droe gata ureuëng Israel, atawa gata bloe tanoh nibak ureuëng nyan, bék kheueh gata peubuet bloe peubloe nyan ngon hana jujoe. 15 Yuem tanoh nyan harôh teupatok meunurot jeumeulah thon seumantong tanoh nyan mantong jibri hase trok ubak Thon Teupulang lom teuma. 16 Meunyoe jeumeulah thon jih le, yuem tanoh nyan meuhái. Teuma meunyoe jeumeulah thon jih bacut, yuem jih harôh murah, sabab nyang teupeubloe na kheueh jeumeulah wase mupot. 17 Bék teumipée sabe keudroe gata ureuëng Israel, teuma bah kheueh gata takot ubak TUHAN, Po teu Allah gata. 18 Taát kheueh ubak mandum huköm dan peurintah TUHAN, mangat gata udeb deungon aman nibak nanggroe nyan. 19 Tanoh nanggroe nyan teuma jibri wase sampoe gata na peunajoh nyang seb dan tinggai disinan deungon aman seujahtera. 20 Mungken na nyang teumanyong peue nyang teupajoh watée thon nyang keutujoh bak watée tanoh hana teupula sapeue dan hase jih hana teukuteb. 21 Bak thon nyang keunam TUHAN teuma geubri beureukat ubak tanoh sampoe wase jih seb keu lhée thon. 22 Bak thon gata tapula ladang gata nyan lam thon nyang keulapan, hase nyang teupot bak thon nyang keunam mantong na keu gata pajoh. Dan keuneubah peunajoh gata nyang mantong teukeubah seb sampoe bak watée gata tapeusapat hase nibak thon nyan. 23 Pajan mantong tanoh gata hana jeuet teupeubloe, sabab tanoh nyan bukon atra gata, teuma milék Po teu Allah. Gata cit lagée ureuëng aséng nyang meuteumé idhin gata peuguna tanoh nyan. 24 Meunyoe saboh keubeueng tanoh teupeubloe, harôh jiaku hak milék ureuëng po phon keu teutuboh tanoh nyan. 25 Meunyoe sidroe ureuëng Israel ka rhot ubak gasien sampoe jih nyan teupaksa jipeubloe tanoh jih, waréh kawöm jih nyang paleng to wajéb jiteuboh tanoh nyan. 26 Meunyoe hana ureuëng nyang teuboh tanoh nyan teuma di ureuëng po tanoh nyan bak saboh saát hase dan na péng nyang seb keu jiteuboh tanoh nyan, 27 teuma ureuëng nyan harôh jibayeue ubak ureuëng nyang ka bloe tanoh jihnyan deungon yuem hase tanoh nyan sampoe bak thon-thon seulanjut jih sampoe trok ubak Thon Teupulang nyang teuma teuka. Deungon lagée nyan jihnyan ka meuteumé lom tanoh droe jih. 28 Teuma dilikot nibaknyan meunyoe ureuëng nyan hana daya keu jiteuboh tanoh nyan, di ureuëng nyang bloe tanoh nyan teutab na kuasa sampoe trok ubak Thon Teupulang teuma. Bak thon nyan tanoh nyan harôh teupulang ubak ureuëng po nyang phon. 29 Meunyoe sidroe ureuëng jipeubloe saboh rumoh lam banda nyang jikeulileng lé beuton, teuma ureuëng nyan nahak jiteuboh rumoh jihnyan lam jangka watée sithon teuhitong phon tanggai teupeubloe atra nyan. 30 Teuma meunyoe rumoh nyan hana jiteuboh lam watée sithon teuma gadôh kheueh hak jih keu jiteuboh rumoh nyan. Rumoh nyan teutab hak milék ureuëng nyang bloe dan keuturonan ureuëng bloe nyan. Lam Thon Teupulang, rumoh nyan hana teujok pulang. 31 Keu rumoh di gampông nyang hana jikeulileng lé beuton keunong ubak peuratoran nyang phon lagée nibak tanoh: ureuëng nyang phon na hak jiteuboh dan rumoh nyan harôh jijok pulang nibak Thon Teupulang. 32 Teuma di ureuëng Lewi na hak keu pajan mantong jiteuboh atra milék awaknyan di banda-banda nyang ka teupeuteutab keu awaknyan. 33 Meunyoe ureuëng Lewi jipeubloe rumoh jih bak saboh banda nyan dan jihnyan hana niet jiteuboh atra nyan, rumoh nyan harôh jijok lom ubak jih nyan nibak Thon Teupulang lom teuma. Sabab rumoh ureuëng Lewi di banda-banda awaknyan na kheueh milék awaknyan nyang teutab lamkawan bansa Israel. 34 Teuma blang naleueng nyang bansikeulileng banda-banda sukée Lewi hana jeuet teupeubloe. Nyan na kheueh atra ureuëng Lewi keu siumu masa. 35 Meunyoe na ureuëng nyang saboh bansa ngon gata nyang tinggai lamkawan gata ka rhot ubak gasien dan hana hase lé jimita hareutakat keu biaya udeb jih, gata harôh gata tulông jih nyan lagée ureuëng aséng atawa jamé teuka, mangat ureuëng nyan hase udeb sabe lamkawan gata. 36 Bék kheueh gata lakée bungöng nibak péng nyang gata peu-utang bak ureuëng nyan, teuma bah kheueh gata tatakot ubak Po teu Allah, dan peubiyeu mantong ureuëng nyan udeb lamkawan gata. Meunan cit bék gata cok laba nibak peunajoh nyang gata peubloe keu ureuëng nyan. 38 Nyang kheueh peurintah TUHAN Po teu Allah gata nyang ka geupeuteubiet gata nibak nanggroe Meusé keu geubri nanggroe Kanaan ubak gata, mangat gobnyan jeuet keu Po teu Allah gata. 39 Meunyoe na ureuëng nyang saboh bansa ngon gata nyang rhot ubak gasien sampoe ji peubloe droe jih sibagoe namiet ubak gata, ureuëng nyan hana jeuet gata yue jimubuet lagée buet nyang jipeubuet lé namiet. 40 Ureuëng nyan harôh tinggai nibak gata sibagoe ureuëng tung upah dan jimubuet bak gata sampoe ubak Thon Teupulang. 41 Bak watée nyan ureuëng nyan ngon aneuëk-aneuëk jih jeuet jitinggai rumoh gata dan jigisa ubak keuluwarga jih dan ubak tanoh indatu jih. 42 Ureuëng Israel na kheueh hamba-hamba TUHAN; Gobnyan kheueh nyang ba awaknyan peuteubiet nibak nanggroe Meusé, dan ngon sabab nyan awaknyan hana jeuet teupeubloe sibagoe namiet. 43 Jadi ureuëng Israel nyang jipeubloe droeji ubak gata hán jeuet barang gaho gata peubuet ateueh jihnyan. Bah kheueh gata teumakot ubak Po teu Allah gata. 44 Meunyoe gata na peureulée namiet, jeuet gata bloe bak bansa-bansa nyang na tinggai sikeulileng gata. 45 Meunan cit jeuet gata bloe aneuëk-aneuëk ureuëng aséng nyang na tinggai teutab lamkawan gata. Aneuëk-aneuëk ureuëng aséng nyang lahé di nanggroe gata atra nyan jeuet keuhak milék gata 46 dan jeuet cit gata peuwaréh ubak aneuëk-aneuëk gata keu jeuet keu namiet awaknyan siumu masa. Meunyoe seusabe gata ureuëng Israel hana jeuet gata peubuet ngon gasa. 47 Meunyoe na ureuëng aséng nyang tinggai lamkawan gata jeuet keu kaya, dan na teuma ureuëng gata Israel ka rhot gasien sampoe ureuëng nyan jipeubloe droe jih sibagoe namiet ubak ureuëng aséng nyan atawa ubak keuluwarga jih, 48 ureuëng Israel nyan teutab na hak keu teutuboh. Sidroe nibak syedara jih nyang agam, 49 atawa apha jih, atawa syedara karong jih atawa sidroe nyang laén nibak rakan jih nyang paleng krab, jeuet jiteuboh nyan. Atawa meunyoe jih keudroe keumungkenan mampu, ureuëng nyan jeuet jiteuboh droe jih keudroe. 50 Namiet nyan harôh jimupakat ngon ureuëng nyang ka bloe jih. Awaknyan harôh ji itong jeumeulah thon nibak phon droe jih nyan teupeubloe sibagoe namiet sampoe ubak Thon Teupulang teuma, laju jipeuteuntée yuem sineuboh jihnyan. Yuem nyan harôh teupeuteutab meunurot teu itong upah nyang teubri ubak ureuëng tung upah. 51 Namiet nyan harôh jijok pulang yuem teubloe droe jih nyan nyang le jih sidub upah ureuëng tung upah nyang treb jih sithon nyang gohlom trok, 53 siulah-ulah jihnyan ka jimubuet sibago ureuëng tung upah nyang teugaji sithon sigoe. Toke jih hana jeuet jipeubuet ateueh ureuëng nyan deungon gasa. 54 Meunyoe jihnyan hana hase teutuboh ngon cara lagée nyan, ureuëng nyan dan aneuëk-aneuëk jih harôh teupeubeubaih bak Thon Teupulang ukeue nyan teuma. 55 Sidroe ureuëng Israel hana jeuet jihnyan jeuet keu namiet siumu masa sabab bansa Israel na kheueh hamba-hamba TUHAN. TUHAN kheueh nyang ba awaknyan teupeuteubiet nibak nanggroe Meusé. Gobnyan kheueh TUHAN, Allah awaknyan.

Imeum-Imeum 26

1 TUHAN meufeureuman, "Bék kheueh gata peugét beurala atawa gata peudong patong atawa taméh batée nyang meu-uke keu gata seumah. Ulôn kheueh TUHAN Allah gata. 2 Peuraya kheueh uroe raya Sabat dan uroe-uroe raya agama nyang laén dan horeumat kheueh ubak teumpat nyang teupeu khusos keu teuseumah Ulôn. Ulôn kheueh TUHAN. 3 Meunyoe gata udeb meunurot atoran-atoran nyang teuka nibak Ulôn dan gata taát peue-peue nyang Ulôn peurintah, 4 Ulôn ku peutreun ujeuen óh trok bak watée, sampoe tanoh jibri wase dan dumna bak kayée jimeuboh. 5 Wase tanoh gata meulimpah ruwah, dan meunyoe ka trok watée jih keu teujak pot boh anggô, gata mantong gata koh gandom. Dan meunyoe ka trok watée keu tapula gandom, gata mantong tapot boh anggô. Bak gata teuma na peunajoh nyang seb dan udeb seujahtera di nanggroe gata. 6 Ulôn teuma Lôn jaga keuamanan nanggroe gata sampoe gata jeuet gata éh deungon teunang dan hana teumakot keu soe mantong. Beulatang-beulatang juah teuma Lôn peuranab nibak nanggroe gata, dan muprang pi teuma hana lé di nanggroe gata. 7 Gata teuma hase tapeutaloe bubena na musoh gata; 8 deungon limong droe gata hase tapeutaloe sireutoh droe musoh, dan deungon sireutoh droe hase tapeuloe siploh ribée droe musoh. 9 Ulôn teuma Lôn bri beureukat ubak gata dan teuma Lôn bri aneuëk-aneuëk cucoe nyang jai keu gata. Peue nyang ka Ulôn meujanji ngon gata, pasti Ulôn peutrok. 10 Wase tanoh gata teuma meulimpah ruwah, sampoe trok sithon. Sikeubit jih gata teupaksa harôh gata peuteubiet hase meuneupot gata nyang ka treb mangat na teumpat gata keubah hase meuneupot nyang barô. 11 Ulôn teuma tinggai lamkawan gata lam Khimah Ulôn, dan hana Lôn tulak gata. 12 Ulôn teuma na meusajan gata; Ulôn jeuet keu Po teu Allah gata dan gata jeuet keu umat Ulôn. 13 Ulôn, TUHAN Allah gata, nyang ba gata teupeuteubiet nibak nanggroe Meusé mangat gata bék jeuet le keunamiet. Keukuasaan nyang seupet gata ka Ulôn wiet, dan gata Ulôn peujeuet keu ureuëng nyang meurdehka." 14 TUHAN meufeureuman, "Meunyoe gata hana tadeungoe Ulôn dan hana gata peubuet lagée nyang ka Ulôn peurintah, 15 meunyoe gata ta iengkeue ubak janji nyang Ulôn peugét ngon gata dan hana gata taát ubak peue-peue nyang ka Ulôn peuteutab dan peuratoran-peuratoran Lôn, 16 gata teuma Lôn huköm. Ulôn teuma ku peuteuka bala u ateueh gata, peunyakét ngon deumam nyang hana hase teupeupuléh, sampoe mata gata jeuet keubuta dan gata udeb meurana. Gata teuma gata pula seunaman dan hase jih hana gata teumé pajoh, sabab musoh-musoh gata teuka jijak peutaloe gata dan jipeuhabéh peue nyang gata pula. 17 Gata teuma Lôn huköm, sampoe gata jipeutaloe lé musoh-musoh gata dan jikuasa lé ureuëng nyang banci keu gata. Gata teuma jeuet keu ureuëng nyang paleng geusun sampoe gata plueng, bahpi hana nyang peulet gata. 18 Meunyoe ka lheueh gata rasa banmandum huköman nyan dan gata gohlom taát ubak Ulôn, huköman ateueh gata teuma Lôn tamah tujoh go ganda. 19 Gata sombong lumpah na, Ulôn teuma Ulôn peutundok gata. Ujeuen hana teuma jitreun, sampoe tanoh gata ka habéh tho dan kreuh lagée beuso. 20 Banmandum jeureh payah gata hana meuguna. Sabab tanoh gata hana jibri wase dan mandum seunaman gata hana teuma meuboh. 21 Meunyoe hana putôh cit gata lawan Ulôn dan hana gata tem taát ubak Ulôn, teuma huköman gata Lôn tamah lom tujoh go ganda. 22 Ulôn teuma Lôn peuteuka meubago rupa beulatang juwah lamkawan gata. Beulatang-beulatang nyan jiteugöm bubena aneuëk-aneuëk gata, jipoh maté beulatang peulara gata dan jipeuhabéh gata, sampoe jeumeulah jih tinggai bacut teuk, meunan cit rot-rot nyang na di nanggroe gata ka jeuet keu sungue. 23 Meunyoe ka lheueh gata rasa banmandum huköman nyan gohlom cit gata deungoe Ulôn, mantong cit hana gata piôh talawan Ulôn, 24 deungon nyan laju Lôn heuntam gata dan Lôn huköm gata tujoh goe leubeh brat nibak nyang ka-ka. 25 Ulôn teuma Lôn peuteuka prang lamkawan gata keu teuhuköm gata sabab ka gata iengkeue peujanjian Ulôn deungon gata. Dan meunyoe gata meusapat di banda gata keu gata jak mita teumpat meusom, Ulôn laju Lôn peutreun peunyakét nyang hana hase teupeupuléh, sampoe gata teupaksa gata seurah droe ubak musoh gata. 26 Gata teuma habéh peunajoh, akhéji lam siploh droe ureuëng inong teuma cit saboh teumpat tot ruti nyang na bak awaknyan. Peunajoh nyan teuma teupulang ubak gata seucara teuransom, dan óh ka lheueh gata pajoh ruti nyan, gata hana troe dan teutab mantong teurasa deuk. 27 Óh ka lheueh gata rasa banmandum huköman nyan gata teutab cit mantong talawan Ulôn dan hana gatatem taát ubak Ulôn, 28 teuma deungon beungéh gata laju Lôn heuntam, dan Lôn huköm gata tujoh goe leubeh brat nibak nyang ka-ka. 29 Gata teuma deuk, sampoe trok ubak aneuëk-aneuëk gata keudroe. 30 Ulôn teuma Lôn peuhanco bubena teumpat-teumpat seumuja gata di ateueh bukét-bukét, Lôn reuloh bubena miseubah gata teumpat gata tot dupa, dan Ulôn rhom manyét-manyét gata u ateueh beurala-beurala gata nyang ka reuloh nyan. Deungon rasa luwat 31 banda-banda gata Ulôn peuhanco sampoe jeuet keu rungka-rungka, teumpat-teumpat seumuja gata Ulôn peuhanco dan keureubeuen-keureubeuen gata hana Lôn teurimong. 32 Nanggroe gata teuma Lôn peuhanco sapan sapa, sampoe bubena musoh nyang duek lam nanggroe nyan teuma teukeujot óh jingieng pakriban hibat hanco nanggroe nyan. 33 Ulôn teuma Lôn peuteuka prang di nanggroe gata dan Ulôn peucrebre gata di nanggroe-nanggroe aséng. Blang-blang gata teulanta, dan banda-banda gata teupeubiyeu mantong jeuet keu rungka. 34 Bak watée nyan teungoh gata mantong na di teumpat-teumpat nyang teuböih lam nanggroe musoh-musoh gata, tanoh gata nyang hana gata peubiyeu jipioh meusikeujab yoh watée mantong gata tinggai disinan, teuma teulanta dan na watée jimeureuhat. 36 Ureuëng-ureuëng gata nyang na di teumpat nyang teuböih di nanggroe laén, teuma Lôn peujeuet keuteumakot nyang luwa biasa, sampoe siôn-ôn kayée nyang jiyueb lé angén pi awaknyan ka jiplueng. Gata teuma taplueng sang-sang gata jilet lam mideuen prang, laju reubah bahpi hana musoh bak binéh gata. 37 Gata teuma gata plueng dan laju meugantoh sidroe ngon nyang laén, bahpi hana nyang peucrok gata. Dan gata hana teuma hase gata lawan musoh-musoh gata. 38 Gata teuma maté nibak teumpat nyang teuböih dan jipeubinasa lé nanggroe musoh-musoh gata. 39 Bacut nyang tinggai ureuëng gata nyang mantong udeb lam nanggroe musoh gata teuma meurana sabab desya gata keudroe dan desya indatu gata. 40 Teuma keuturonan gata jiaku keuhai desya jih dan desya indatu jih nyang ka jilawan Ulôn dan jibeurontak ubak Ulôn, 41 sampoe Ulôn cok tindakan Lôn lawan awaknyan dan Lôn use awaknyan u teumpat nyang teuböih nibak nanggroe musoh-musoh awaknyan. Akhé jih, meunyoe keuturonan gata ka taklok dan jirasa huköman sabab desya dan brontak awaknyan, 42 Ulôn teuma Lôn ingat peue nyang ka lheueh Lôn meujanji ngon Nabi Yakub, Nabi Ishaq dan Nabi Ibrahim. Ulôn teuma Lôn peubarô janji Ulôn keu Lôn jok tanoh nyan ubak bansa Ulôn. 43 Teuma tanoh nyan leubeh ilée harôh jitinggai lé peunduduek disinan, mangat beutôi-beutôi meuteumé ji meureuhat. Dan umat Ulôn harôh jirasa banmandum huköman nyang ka Lôn peurhot ateueh droe jih sabab hana jitem taát ubak mandum peuratoran dan peue-peue nyang ka Ulôn peurintah. 44 Teuma meunyoe awaknyan mantong na di nanggroe musoh, awaknyan teutab hana Lôn tinggai atawa Ulôn peubinasa. Sabab meunyoe awaknyan Ulôn peubinasa, saban cit ka Ulôn peuputôh peue nyang ka lheueh Lôn meujanji ngon awaknyan, sabab Ulôn nyoe na kheueh TUHAN, Allah awaknyan. 45 Ulôn teuma Lôn peubarô peujanjian nyang ka lheueh Lôn peugét ngon indatu awaknyan, watée Ulôn tunyok keukuasaan Lôn ubak banmandum bansa deungon cara Ulôn ba umat Lôn nibak tanoh Meusé, mangat Ulôn, TUHAN, jeuet keu Allah awaknyan." 46 Nyan kheueh huköm-huköm dan peurintah-peurintah nyang geubri lé TUHAN di ateueh Gunong Sinai ubak Nabi Musa keu bansa Israel.

Imeum-Imeum 27

1 TUHAN meufeureuman ubak Nabi Musa keuhai peuratoran nyoe keu bansa Israel. Meunyoe sidroe-droe ureuëng jipeuseumah ubak TUHAN keu jiteuboh sapeue-sapeue kaôi nyang khusos, ureuëng nyan jeuet jiteuboh ngon sijeumeulah péng 3 meunurot yuem nyang ka teuntée bak Khimah TUHAN: -- di ateueh 60 thon: -- lamkawan 20-60 thon: -- lamkawan 5-20 thon: -- dimiyueb 5 thon: 8 Meunyoe ureuëng nyang meukaôi nyan gasien that keu jibayeue yuem nyang ka teupeuteutab nyan, ureuëng nyan harôh jiba ureuëng nyang ka teupeuseumah ubak TUHAN nyan ubak imeum. Imeum harôh geupeuteutab yuem nyang leubeh miyueb nyang sisuai deungon keumampuan ureuëng nyan. 9 Meunyoe kaôi nyan beulatang haleue nyang jeuet teupeuseumah ubak TUHAN, ureuëng nyang meukaôi nyan hana jeuet jituka ngon beulatang laén, sabab banmandum nyang ka jipeuseumah ubak TUHAN atra nyan ka jeuet keu milék TUHAN. Meunyoe atra nyan jituka cit, bandua boh beulatang nyan ka jeuet keu milék TUHAN. 11 Teuma meunyoe kaôi nyan keuhai beulatang hareuem nyang hana jeuet jiteurimong sibagoe keureubeuen ubak TUHAN, ureuëng nyang meukaôi nyan harôh jiba beulatang nyan ubak imeum. 12 Imeum teuma geupeuteuntée yuem jih meunurot keuadaan beulatang nyan. Dan yuem nyang ka teupeuteuntée nyan na kheueh yuem maté. 13 Meunyoe ureuëng nyan keuneuk jiteuboh beulatang jih nyan, ureuëng nyan harôh jibayeue yuem jih teutamah dua ploh peureusen. 14 Meunyoe sidroe ureuëng jipeuseumah rumoh jih ubak TUHAN, imeum geupeuteuntée yuem rumoh nyan meunurot keuadaan rumoh nyan. Yuem nyang ka geupeuteuntée na kheueh yuem maté. 15 Meunyoe ureuëng nyan keuneuk jituboh rumoh jih nyan, ureuëng nyan harôh jibayeue yuem jih dan jitamah lom dua ploh peureusen. 16 Meunyoe sidroe ureuëng keuneuk jipeuseumah siladum tanoh jih ubak TUHAN, yuem tanoh nyan harôh teupeuteuntée jeumeulah bijéh nyang peureulée keu teupula lam tanoh nyan. Keu tieb-tieb dua ploh kilo gram gandom yuem jih siploh péng pirak. 17 Meunyoe tanoh nyan jipeuseumah phon watée Thon Teupulang, yuem jih harôh teubayeue peunoh. 18 Meunyoe tanoh nyan teupeuseumah óh ka lheueh Thon Teupulang, imeum harôh geutakse yuem kontan jih meunurot jeumeulah thon nyang mantong na sampoe ubak Thon Teupulang nyang teuma teuka, dan geupeuteuntée laju yuem jih nyang leubeh murah. 19 Meunyoe ureuëng nyang peuseumah ladang nyan keuneuk jiteuböh, ureuëng nyan harôh jibayeue yuem jih jitamah teuma dua ploh peureusen. 20 Meunyoe jihnyan jipeubloe lampôh jih nyan deungon hana leubeh dilée jiteuboh ubak TUHAN, ureuëng nyan hana hak le jiteuboh lampôh jih nyan. 21 Bak Thon Teupulang teuma lom, lampôh nyan ka jeuet keumilék TUHAN keu siumu masa, dan atranyan geubri ubak imeum-imeum. 22 Meunyoe sidroe ureuëng jipeuseumah ubak TUHAN saboh lampôh nyang ka jibloe, 23 imeum harôh geutakse yuem meunurot jeumeulah thon nyang mantong na sampoe ubak Thon Teupulang lom teuma. Dan di ureuëng nyan laju jibayeue yuem jih bak uroe nyan cit. Péng nyan ka jeuet keu hak milék TUHAN. 24 Bak Thon Teupulang, lampôh nyan harôh teupulang ubak ureuëng po nyang phon atawa ubak keuturonan jih. 25 Banmandum yuem harôh teupeuteuntée meunurot yuem nyang ka teuntée bak Khimah TUHAN. 26 Beulatang nyang phon lahé na kheueh milék TUHAN, jadi atra nyan hana jeuet teukeureubeuen sibagoe keureubeuen keugalak droe. Aneuëk leumô, aneuëk bubiri atawa aneuëk kaméng nyang phon that lahé na kheueh atra TUHAN. 27 Teuma beulatang hareuem nyang phon lahé jeuet teutuboh meunurot yuem nyang ka teuntée bak Khimah TUHAN, teutamah teuma ngon dua ploh peureusen. Meunyoe hana teutuboh, beulatang nyan jeuet teupeubloe ubak ureuëng laén meunurot yuem nyang ka teuntée bak Khimah TUHAN. 28 Hana meusidroe pi jeuet jipeubloe atawa jituboh peue nyang ka teupeukhusos tanpa syarat ubak TUHAN, bah kheueh nyan manusia, beulatang atawa tanoh. Atranyan na kheueh milék TUHAN siumu masa. 29 Manusia keudroe nyang ka teupeukhusos keu TUHAN keu geupeubinasa nyan hana jeuet teutuboh; ureuëng nyan harôh teupoh maté. 30 Siper siploh nibak banmandum wase tanoh, bah kheueh nyan gandom meunan cit ngon boh-boh kayée, atranyan na kheueh milék TUHAN. 31 Meunyoe sidroe-droe ureuëng jikeuneuk teuboh siladum nibak hase nyan, ureuëng nyan harôh jibayeue yuem nyang ka teupeuteuntée teutamah teuma dua ploh peureusen. 32 Saboh nibak tieb-tieb siploh boh beulatang peulara na kheueh atra TUHAN. Meunyoe beulatang nyan teu itong, tieb-tieb saboh beulatang peulara nyang keu siploh na kheueh atra TUHAN. 33 Ureuëng po beulatang nyan hana jeuet jipiléh-piléh toh nyan gét dan toh nyang hana gét. Meunan cit atra nyan hana jeuet jituka ngon nyang laén. Meunyoe atra nyan jituka cit teuma, ban dua boh beulatang peulara nyan ka jeuet keuhak milék TUHAN dan hana jeuet teutuboh. 34 Nyan kheueh peurintah-peurintah nyang geubri lé TUHAN di ateueh Gunong Sinai ubak Nabi Musa keu bansa Israel.

Teubileueng 1

1 Nibak tanggai sa buleuen dua nibak thon nyang keudua óh kalheueh bansa Israel jitinggai nanggroe Meusé, TUHAN laju geupeugah ubak Nabi Musa didalam Khimah TUHAN di padang pasi Sinai. Kheun gobnyan, 2 "Gata dan Nabi Harun harôh kheueh gata peuna seunsus ateueh banmandum umat Israel, meunurot kawöm dan keuluwarga awaknyan maséng-maséng. Gata peuget kheueh dafeutar nan banmandum ureuëng agam 3 nyang meu-umu dua ploh thon u ateueh nyang sanggob jeuet keu tantra. Awaknyan harôh kheueh teudafeutar meunurot pasokan jih maséng-maséng. 4 Nibak tieb-tieb sukée, gata lakée kheueh sidroe ureuëng peumimpén kawöm mangat jitulông gata." 5 Nyoe kheueh nan-nan ureuëng nyang geupiléh nibak umat keu jitulông Nabi Musa dan Nabi Harun dan nyang jeuet keu peumimpén maséng-maséng sukée, na kheueh: Sukée & Peumimpén 17 Deungon jitulông lé bandua blaih droe ureuëng nyan, Nabi Musa dan Nabi Harun 18 geuyue banmandum awaknyan meusapat nibak tanggai sa buleuen dua, laju óh lheuehnyan silsilah awaknyan geususon meunurot kawöm-kawöm nyang na didalam tieb-tieb sukée awaknyan. Nan-nan tieb ureuëng agam nyang meu-umu dua plôh thon u ateueh jicetet ngon ji itong, 19 lagée nyang geupeurintah lé TUHAN. Banmandum nyan geupeubuet lé Nabi Musa di padang pasi Sinai. 20 Ureuëng agam nyang meu-umu dua ploh thon u ateueh nyang kaék jeuet keu tantra, teudafeutar nan awaknyan meunurot kawöm dan keuluwarga jih nyan, phon nibak Ruben, aneuëk tuha Nabi Yakub trok ubak Naftali. Jeumeulah awaknyan na kheueh: Jeumeulah Ureuëng 47 Ureuëng-ureuëng Lewi hana rhoh teu itong meusajan deungon sukée-sukée laén, 48 Sabab TUHAN ka geupeugah ubak Nabi Musa, 49 "Bak watée gata tacetet nan-nan ureuëng nyang ék jeuet keu tantra, sukée Lewi nyan hana peu gata cetet. 50 Gatayue mantong awaknyan jijaga Khimah Ulôn deungon banmandum peuleungkapan jih. Tugaih awaknyan na kheueh jigulam Khimah Ulôn deungon banmandum peuleungkapan jih meunan cit jiuruih nyan sigoe guih teuma. Awaknyan harôh kheueh jipeudong khimah droe jih ban seukeulileng Khimah Ulôn nyan. 51 Teuma meunyoe gata taminah, ureuëng-ureuëng Lewinyan harôh kheueh jireuloh Khimah Ulôn, laju atranyan jipeudong lom teuma nibak teumpat teupeudong Khimah nyang barô. Seulaén awaknyan, soe mantong nyang jipeutoe ubak Khimah nyan ureuëngnyan harôh teuhuköm maté. 52 Ureuëng-ureuëng Israel nyang laén nyan harôh kheueh jipeudong khimah jihnyan meukeulompok-keulompok, tieb-tieb ureuëng didalam keulompok jih nyan harôh kheueh jikeulileng lé bupanji jih maséng-maséng. 53 Teuma ureuëng-ureuëng Lewi harôh kheueh jipeudong khimah jih nyan di seukeulileng Khimah Ulôn. Awaknyan harôh kheueh jijaga mangat hana ureuëng nyang jicuba-cuba peuto keunan, sampoe jeuet teupeusabab Ulôn beungéh dan Ulôn huköm umat Israel." 54 Teuma di ureuëng Israel nyan laju jipeubuet peue nyang ka geupeurintah lé TUHAN ubak Nabi Musa.

Teubileueng 2

1 TUHAN meufeureuman ubak Nabi Musa dan Nabi Harun: 2 "Bak watée ureuëng Israel jipeudong Khimah, tieb-tieb ureuëng bah kheueh jipeudong khimah jih nibak ban silingka bupanji keusatuan droe jih deungon lambang kawöm jih keudroe teuma. Banmandum khimah-khimah nyan bah kheueh jipeudong ban seukeulileng Khimah Ulôn, teuma beujiôh bacut nibak Khimah Ulôn nyan." 3 Di siblaih u timu, tantra nyang dimiyueb keusatuan Yehuda harôh jimeukhimah meunurot pasokan dan peumimpén jih maséng-maséng lam sinuson nyoe: Sukée & Peumimpén & Jeumeulah Ureuëng 10 Disiblaih u seulatan, tantra nyang dimiyueb peumimpén bupanji Ruben, awaknyan harôh kheueh jipeudong khimah meunurot pasokan ngon peumimpén jih maséng-maséng lam sinuson nyoe: Sukée & Peumimpén & Jeumeulah Ureuëng Ruben & Elizur bin Syedeur & Keusatuan Ruben harôh kheueh jibeurangkat sibagoe nyang keudua. 17 Óh ka lheueh nyan, lamkawan banmandum tantra Israel, jijak sukée Lewi sira jigulam Khimah TUHAN. Lagée awaknyan meukhimah, meunan cit teuma awaknyan jijak, maséng-maséng diteumpat jih keudroe meunurot bupanji awaknyan keudroe. 18 Disiblaih u barat, tantra nyang dimiyueb bupanji tantra Efraim harôh kheueh jimeukhimah meunurot pasokan deungon peumimpén maséng-maséng lam sinuson nyang lagée nyoe: Sukée & Peumimpén & Jeumeulah Ureuëng Keusatuan Efraim nyan harôh kheueh jijak dilikot sukée Lewi. 25 Disiblaih utara, tantra nyang dimiyueb bupanji keusatuan Dan harôh meukhimah pasokan deungon peumimpén jih maséng-maséng lam sinuson nyoe: Sukée & Peumimpén & Jeumeulah Ureuëng 32 Jeumeulah ureuëng Israel nyang teudafeutar meunurot pasokan maséng-maséng na kheueh 603.550 droe. 33 Lagée nyang geupeurintah lé TUHAN ubak Nabi Musa, ureuëng Lewi hana teudafeutar meusajan ngon ureuëng-ureuëng Israel nyang laén. 34 Ureuëng Israel jipeubuet banmandum peue-peue nyang geupeurintah lé TUHAN ubak Nabi Musa. Maséng-maséng jipeudong khimah nibak seukeulileng bupanji jih nyan keudroe, dan jibeurangkat meunurot kawöm dan keuluwarga jih nyan teuma.

Teubileueng 3

1 Nyoe kheueh keuluwarga Nabi Harun dan Nabi Musa nibak watée TUHAN geumeututoe deungon Nabi Musa di ateueh Gunong Sinai. 2 Nabi Harun na geumeu aneuëk peuet droe aneuëk agam. Nyang tuha nan jih Nadab, óh lheuehnyan Abihu, Eleazar dan Itamar. 3 Awaknyan ka geupeubaiát sibagoe imeum deungon cara upacara teupeurô minyéuk di ateueh ulée awaknyan. 4 Teuma Nadab ngon Abihu maté di ateueh padang pasi Sinai, bak watée awaknyan jijak meuhadab TUHAN deungon apui nyang hana haleue. Awaknyan bandua hana jitem meu aneuëk. Jadi simantong Nabi Harun udeb, Eleazar dan Itamar jimeutugaih sibagoe imeum. 5 TUHAN geumeufeureuman lom ubak Nabi Musa, 6 "Gata yue kheueh sukée Lewi nyan jijak meuhadab, dan tunyok kheueh awaknyan jeuet keupeulayan-peulayan Nabi Harun. 7 Awaknyan jimeutugaih di Khimah Ulôn dan harôh jijak peutimang teungku imeum dan banmandum umat deungon meuneubuet awaknyan di Khimah Ulôn. 8 Tugaih awaknyan na kheueh jiurôh banmandum peuleungkapan jih didalam Khimah Ulôn sibagoe geunantoe ureuëng-ureuëng Israel. 9 Nibak bansa Israel, teuma sukée Lewi nyang Ulôn bri tugaih jeuet keupeulayan teutab keu Nabi Harun dan keuturonan jih nyan. 10 Teuma Nabi Harun dan aneuëk-aneuëk jih bah Ulôn angkat mangat Ulôn bri tugaih sibagoe imeum; seulaén awaknyan, soe mantong nyang jicuba peukaru tugaih nyan ureuëng nyan harôh teuhuköm maté." 11 TUHAN geumeufeureuman lom, 12 "Jinoenyoe ureuëng-ureuëng Lewi Ulôn piléh jeuet keu milék Ulôn. Bak watée Ulôn poh maté banmandum aneuëk tuha bansa Meusé, Ulôn peukhusos keu Ulôn banmandum aneuëk agam nyang tuha nibak bansa Israel dan meunan cit banmandum beulatang peulara awaknyan nyang phon-phon lahé. Banmandum nyan na kheueh hak milék Ulôn. Sibagoe keugantoe aneuëk-aneuëk tuha bansa Israel, laju Ulôn cok ureuëng Lewi keu Ulôn; awaknyan teuma jeuet keuhak milék Ulôn. Ulôn kheueh TUHAN." 14 Dipadang pasi Gunong Sinai TUHAN geuyue ubak Nabi Musa 15 geuyue peuget dafeutar ureuëng-ureuëng Lewi meunurot kawöm dan keuluwarga jihnyan maséng-maséng; tieb-tieb aneuëk agam nyang meu-umu sibeuleuen u ateueh harôh kheueh teucetet nan jih. 16 Laju Nabi Musa geupeubuet peue nyang ka geupeurintah lé TUHAN ubak gobnyan nyan. 17 Lewi na lhée droe aneuëk agam: Gerson, Kehat dan Merari. Awaknyan na kheueh indatu kawöm-kawöm nyang teupeugah meunurot nan awaknyan. Gerson na teuma dua droe aneuëk agam: Libni dan Simei. Bak si Kehat na teuma peuet droe aneuëk agam: Amram, Yizhar, Hebron dan Uziel. Merari na teuma dua droe aneuëk agam: Mahli dan Musi. Awaknyan na kheueh indatu nibak keuluwarga-keuluwarga nyang teupeugah meunurot nan awaknyan. 21 Kawöm Gerson na kheueh nibak keuluwarga Libni dan Simei. 22 Jeumeulah ureuëng agam nibak kawöm Gerson nyang meu-umu si buleuen u ateueh nyang teucetet 7.500. 23 Elyasaf aneuëk Lael nyang jeuet keu ulée kawöm nyan. Dalam khimah-khimah bansa Israel, kawömnyan jicok teumpat disiblaih u barat dilikot Khimah TUHAN. 25 Dalam hai teu urôh Khimah TUHAN, awaknyan meutanggong jaweueb ateueh Khimah dan sinutôb jihnyan, ija nibak babah pintoe rot tamong nyan, 26 layeue peulataran nyang jikeulileng Khimah dan miseubah, dan ija tirée pintoe nibak peulataran nyan. Awaknyan meutanggong jaweueb ateueh banmandum meuneubuet nyang na hubongan deungon barang-barang nyan. 27 Kawöm Kehat na kheueh nibak keuluwarga-keuluwarga Amram, Yizhar, Hebron dan Uziel. 28 Ureuëng agam nyang meu-umu sibuleuen u ateueh nibak kawöm nyan banmandum nyan na sijeumeulah 8.600 droe. Awaknyan tugaih jih jiurôh barang-barang nyang na di Khimah TUHAN. 29 Elisafan aneuëk Uziel nyang jeuet keu ulée kawöm nyan. Didalam khimah-khimah, kawöm nyan jicok teumpat di siblaih u seulatan Khimah TUHAN. 31 Awaknyan meutanggong jaweueb u ateueh Peuto Peujanjian nyan, meja, gaki panyöt, miseubah-miseubah, alat-alat nyang geungui lé imeum di Ruweueng Suci dan tirée nyang jiôh bacut nibak Ruweueng Suci. Awaknyan meutanggong jaweueb u ateueh banmandum meuneubuet nyang na hubongan deungon barang-barang nyan. 32 Ulée sukée Lewi na kheueh Eleazar, aneuëk Nabi Harun. Gobnyan geukawai ureuëng-ureuëng nyang meutugaih di dalam Ruweueng Suci. 33 Kawöm Merari na kheueh nibak keuluwarga Mahli dan keuluwarga Musi. 34 Ureuëng nyang meu-umu sibuleuen u ateueh nibak kawöm nyan banmandum na sijeumeulah 6.200 droe. 35 Zuriel aneuëk Abihail nyang jeuet keu ulée nibak kawöm nyan. Didalam khimah-khimah, kawöm nyan jicok teumpat di siblaih utara Khimah TUHAN. 36 Awaknyan meutanggong jaweueb ateueh rungka Khimah nyan, balok-balok jih, taméh-taméh jih, keunaleueng jih, dan banmandum peukakaih meunan cit sigala meuneubuet jihnyan nyang na hubongan deungon barang-barang nyan. 37 Meunan cit u ateueh taméh-taméh, keunaleueng, bajo-bajo dan talo teumalo keu peulataran jihnyan. 38 Di dalam peukhimahan nyan, Nabi Musa ngon Nabi Harun dan meunan cit teuma deungon aneuëk-aneuëk geuhnyan harôh kheueh jicok teumpat dikeue Khimah TUHAN, siblaih u timu nyan. Awaknyan meutanggong jaweueb ateueh upacara iébadat keu bansa Israel didalam Ruweueng Suci. Seulaén awaknyan, soe mantong nyang jicuba-cuba jikeuneuk peubuet hai nyan ureuëng nyan harôh teuhuköm maté. 39 Banmandum ureuëng agam lam sukée Lewi nyang meu-umu sibuleuen u ateueh geudafeutar lé Nabi Musa meunurot kawöm awaknyan maséng-maséng ateueh peurintah TUHAN, jeumeulah jihnyan banmandum na 22.000 droe. 40 TUHAN geumeufeureuman lom ubak Nabi Musa, "Banmandum aneuëk agam nyang tuha nibak ureuëng Israel na kheueh atra Ulôn. Neucetet kheueh nan-nan awaknyan nyang meu-umu sibuleuen u ateueh. Teuma keu gantoe awaknyan, Ulôn peugah bahwa banmandum ureuëng Lewi na kheueh hak milék Ulôn. Ulôn kheueh TUHAN! Dan beulatang peulara ureuëng Lewi pih Ulôn peugah keugeunantoe banmandum nyang phon-phon lahé lamkawan beulatang peulara bansa Israel." 42 Nabi Musa laju geupeubuet peue nyang geupeurintah lé TUHAN ubak gobnyan; laju geucetet banmandum nan-nan aneuëk agam nyang tuha 43 nyang meu umu sibuleuen u ateueh. Awaknyan banmandum na jeumeulah jih 22.273 droe. 44 Laju TUHAN meufeureuman lom ubak Nabi Musa, 45 "Gata peukhusos kheueh ureuëng-ureuëng Lewi nyan keu Ulôn sibagoe keugantoe banmandum aneuëk tuha nibak bansa Israel; meunan cit beulatang peulara ureuëng Lewi sibagoe keugantoe beulatang ureuëng Israel. 46 Sabab aneuëk-aneuëk agam nyang tuha nibak ureuëng Israel 273 droe leubeh le nibak jeumeulah ureuëng Lewi, teuma nyang leubeh nyan harôh kheueh gata teuboih. 47 Keu tieb-tieb aneuëk, gata harôh tabayeue limong péng pirak meunurot yum nyang lazem nibak Khimah Ulôn; 48 gata bri kheueh laju péng nyan ubak Nabi Harun dan aneuëk-aneuëk jihnyan." 49 Nabi Musa geupeubuet laju peue nyang ka geupeurintah lé TUHAN nyan. 50 Gobnyan laju geucok 1.365 péng pirak, 51 dan geujôk laju atranyan ubak Nabi Harun dan aneuëk-aneuëk geuhnyan.

Teubileueng 4

1 TUHAN meufeureuman ubak Nabi Musa dan Nabi Harun 2 mangat geupeuna seunsus keu ureuëng Lewi nibak kawöm Kehat meunurot keuluwarga awaknyan maséng-maséng, 3 laju geucetet nan banmandum ureuëng agam nyang meu-umu lhée ploh sampoe ubak umu limong ploh thon, nyang hase jimeubuet nibak Khimah TUHAN. 4 Buet awaknyan na kheueh ji urôh barang-barang nyang mahasuci. 5 TUHAN geubri lom ubak Nabi Musa peuratoran nyoe: Meunyoe ka trok watée jih keu teureulôh khimah-khimah, Nabi Harun dan aneuëk-aneuëk geuhnyan harôh jitamong u dalam Khimah TUHAN, geupeutreun tirée dikeue Peuto Peujanjian, dan geutob lajunyan deungon ija. 6 Óh ka lheuehnyan, awaknyan harôh kheueh jitôb lom teuma deungon siôn kulét nyang halôh, laju teuma jileueng siôn ija ijo di ateueh nyan, dan jipasang laju kayée keu ngon gulam Peuto nyan. 7 Awaknyan harôh teuma jileueng siôn ija ijo di ateueh meja teumpat teukeubah ruti sajian keu TUHAN, dan di ateueh meja nyan harôh teuma awaknyan keubah pingan, baki teumpat dupa, baki teumpat peuseumahan, dan ciriek ié keu teumpat peuseumahan ié anggô. Ruti sajian bah kheueh déh jih sabe na di ateueh meja nyan. 8 Banmandum nyan bah kheueh sabe jitôb lé awaknyan deungon siôn ija mirah, laju di ateueh nyan jileueng teuma siôn kulét halôh, dan laju jipasang kayée geunulam nibak meja nyan. 9 Awaknyan bah kheueh jicok siôn ija ijo jitôb ateueh gaki panyöt meunan cit ateueh panyöt nyan, alat keu ngon sampôh dah panyöt nyan meunan cit ngon peunadah jih, dan banmandum teumpat minyéuk zaiton. 10 Gaki panyöt dan banmandum peuleungkapan jihnyan harôh kheueh awaknyan bungkôh deungon sikrak kulét halôh laju atranyan jipeuduek di ateueh teumpat geunulam. 11 Óh ka lheuehnyan lé awaknyan jileueng teuma siôn ija ijo di ateueh miseubah nyang nibak méuh nyan, dan atranyan laju jitôb teuma deungon siôn kulét halôh, laju jipasang kayée geunulam miseubah nyan. 12 Banmandum alat-alat nyang jingui didalam Ruweueng suci nyan harôh kheueh awaknyan cok dan jibungkôh deungon siôn ija ijo. Laju atranyan jitôb teuma deungon siôn kulét halôh, dan atranyan laju jikeubah di ateueh geunulam. 13 Awaknyan harôh teuma jipeugleh miseubah nyan nibak abée, óh lheueh nyan jileueng teuma laju siôn ija ungu di ateueh nyan. 14 Dan di ateueh nyan teuma bah kheueh jikeubah lé awaknyan banmandum peuralatan nyang teungui bak watée iébadat nibak miseubah nyan: teumpat apui, geureupu, sudok, dan baskom. Banmandum nyan harôh kheueh jitôb deungon siôn kulét halôh dan geupasang laju kayée geunulam nyan. 15 TUHAN meufeureuman ubak Nabi Musa dan Nabi Harun, "Bak watée teureulôh khimah-khimah, Nabi Harun dan aneuëk-aneuëk jihnyan bah kheueh jitamong u dalam Khimah Ulôn dan jitôb banmandum barang dan peuleungkapan nyang na disinan. Barô kheueh óh lheueh nyan, ureuëng Kehat jeuet jiteuka keu jijak gulam atranyan. Teuma hana jeuet jikalon lé awaknyan, jipeuto atawa jicukéh barang-barang nyan, sabab barang nyan ka teupeukhusos keu Ulôn. Meunyoe awaknyan jipeubuet cit nyang ka teutam nyan, awaknyan teuma maté. Jadi, mangat ureuëng-ureuëng Kehat nyan hana teusampôh nibak sukée Lewi, Nabi Harun dan aneuëk-aneuëk jihnyan harôh kheueh jibri tugaih maséng-maséng lamkawan awaknyan peue nyang museuti awaknyan ba. Nyan kheueh tugaih ureuëng-ureuëng Kehat nibak watée Khimah Ulôn teupinah. Eleazar, aneuëk Nabi Harun, meutanggong jaweueb u ateueh banmandum Khimah Ulôn, minyéuk panyöt, dupa, keureubeuen gandom keu sajian teutab, minyéuk upacara dan banmandum nyang na didalam Khimah Ulôn." 21 TUHAN geuyue lom ubak Nabi Musa 22 mangat geupeuna seunsus ateueh ureuëng Lewi nibak kawöm Gerson meunurot keuluwarga maséng-maséng. 23 Nabi Musa harôh geucetet nan banmandum ureuëng nyang meu umu phon lhée ploh sampoe ubak umu limong ploh thon nyang sanggob jipeubuet buet wajéb keureuja di Khimah TUHAN. 24 Awaknyan geubri tugaih keu ji angkot barang-barang nyoe: 25 Ija tenda Khimah nyan deungon sinutôb jih siblaih didalam dan siblaih diluwa nyang teupeuget nibak kulét nyang halôh, ija nibak babah pintoe Khimah, 26 layeue-layeue dan meubagoe talo keu peulataran nibak binéh Khimah dan miseubah, ija nibak geureubang peulataran, dan banmandum peuleungkapan nyang geungui keu teupeungui banmandum barang nyan. Awaknyan meutanggong jaweueb ateueh banmandum buet-buet nyang na hubongan deungon barang-barang nyan. 27 Nabi Musa dan Nabi Harun harôh geu jaga sabe mangat buet-buet nyang geuseurah lé Nabi Harun dan aneuëk-aneuëk geuhnyan ubak ureuëng-ureuëng Gerson nyan jikeureuja teuma, dan banmandum barang nyang harôh teuba, beuteuba. 28 Nyan kheueh tugaih ureuëng-ureuëng Gerson di dalam Khimah; tugaih-tugaih nyan harôh kheueh jipeubuet di miyueb pimpénan Itamar, aneuëk Imeum Nabi Harun. 29 TUHAN meufeureuman lom ubak Nabi Musa mangat geujak peuna seunsus ureuëng Lewi nibak kawöm Merari meunurot keuluwarga jihnyan maséng-maséng. 30 Nabi Musa harôh geucetet nan banmandum ureuëng agam nyang meu-umu lhée ploh sampoe limong ploh thon nyang sanggob jipeubuet wajéb meukeureuja di Khimah TUHAN. 31 Awaknyan geubri tugaih keu jijakba rungka-rungka Khimah nyan, balok-balok jih, taméh-taméh jih dan meunan cit deungon keunaleueng jih. 32 Meunan cit deungon taméh-taméh peulataran diban silingka Khimah nyan meunan cit deungon keunaleueng jih, patok-patok jih dan talo teumalo jih deungon banmandum peukakaih nyang teupeureulée keu ngon peudong jih. Tieb-tieb ureuëng geubri tugaih jiba barang-barang nyang ka teupeuteuntée. 33 Nyan kheueh tugaih-tugaih kawöm Merari; banmandum buet awaknyan di Khimah TUHAN harôh jipeubuet dimiyueb pimpénan Itamar, aneuëk Imeum Nabi Harun. 34 Paih lagée peurintah TUHAN, Nabi Musa, Nabi Harun dan banmandum peumimpén umat geupeuna laju seunsus ubak ban lhée boh kawöm nibak sukée Lewi, na kheueh Kehat, Gerson dan Merari. Cara awaknyan jipeubuet seunsus nyan na kheueh nibak keuluwarga ubak keuluwarga. Awaknyan jicetet banmandum phon nan ureuëng agam nyang meu-umu lhée ploh sampoe limong ploh thon nyang sanggob jikeureuja tugaih wajéb keureuja di Khimah TUHAN. Nyoe kheueh hase jih: Kawöm & Jeumeulah Ureuëng 49 Ateueh peurintah TUHAN rot Nabi Musa, tieb-tieb ureuëng geudafeutar dan geubri tanggong jaweueb maséng-maséng ateueh peue nyang harôh geupeutimang atawa peue nyang harôh geu seuôn.

Teubileueng 5

1 TUHAN meufeureuman ubak Nabi Musa, 2 "Gata jak peurintah kheueh laju ubak ureuëng Israel haba lagée nyoe: Banmandum ureuëng nyang keunong peunyakét kulét nyang bit-bit mubahya, atawa peunyakét keulamin, atawa nyang ka tupéeh deungon manyét, ureuëng nyan harôh kheueh teupeuteubiet nibak khimah ureuëng Israel. 3 Awaknyan harôh kheueh teuyue jak, mangat khimah-khimah hana keunong kuto, nibak teumpat Ulôn tinggai meusajan-sajan deungon umat Ulôn." 4 Ureuëng Israel laju jipeubuet banmandum peurintah nyan dan jipeuteubiet laju bubena ureuëng-ureuëng nyang meupeunyakét lagée nyan nibak khimah nyan. 5 TUHAN geubri ubak Nabi Musa peuratoran-peuratoran nyoe keu bansa Israel: Meunyoe sidroe-droe ureuëng nyang hana seutia ubak TUHAN deungon jipeubuet salah ateueh ureuëng laén, 7 ureuëng nyan harôh kheueh jiaku desya jih dan jibayeue sineuboh jih nyan deungon peunoh, teutamah lom ngon dua ploh peureusen, keu ureuëng nyang jipeurugoe nyan. 8 Teuma meunyoe ureuëng nyang jipeurugoe nyan ka meuninggai donya dan hana teuma jitinggai waréh syedara nyang toe, laju sineuboh nyan harôh kheueh jijok ubak TUHAN, dan nyan jeuet keujeumba imeum. Sineubohnyan hana jitamong keunan lagée leumô agam keu upacara peu amphon desya keu ureuëng nyang ka meusalah nyan. 9 Atra peue mantong nyang jipeuseumah lé ureuëng Israel ubak TUHAN, peuseumahan khusos jihnyan ka jeuet keujeumba imeum nyang teurimong peuseumahan nyan. 10 Peue mantong nyang jipeuseumah lé sidroe-droe ureuëng ubak TUHAN, nyan ka jeuet keujeumba ureuëng nyan keudroe. Teuma peue mantong nyang jipeuseumah ubak sidroe imeum, nyan ka jeuet keujeumba imeum. 11 TUHAN meufeureuman ubak Nabi Musa 12 deungon peuratoran-peuratoran lagée nyoe ubak bansa Israel. Jeuet mantong sidroe ureuëng agam jicuriga keu peurumoh jih. Jihnyan jisangka bahwa ureuëng binoe jih hana seutia ubak jihyan dan ka teuma jipeukuto droe jih sabab ka jimeumukah deungon ureuëng agam nyang laén. Teuma ureuëng lakoenyan hana jiteumé keupastian, sabab hai nyang jipeubuet lé peurumoh atawa binoe jihnyan ngon cara jimeusom-meusom; saksi keuhai nyan hana teuma, dan jihnyan hana teuma teudrob basah. Atawa jeuet cit teuma di ureuëng lakoe jicuriga, padahai peurumoh jihnyan hana teuma ji meumukah ngon ureuëng agam nyang laén. 15 Dalam hai nyang dua masa alah nyan di ureuëng lakoe harôh kheueh jiba peurumoh jih nyan ubak imeum. Meunan cit jihnyan harôh kheueh jiba peuseumahan nyang teupeureulée, na kheueh sikilo gram teupông gandom. Teupông nyan hana jeuet teuro ngon minyéuk zaiton atawa teuboh ngon dupa, sabab atranyan peuseumahan nyang teucuriga dan teumeukeusut sibagoe tanda na jih curiga si ureuëng lakoe keu ureuëng bino jih nyan. 16 Di imeum harôh kheueh geuyue ureuëng inong nyan jidong di keue miseubah meuhadab TUHAN. 17 Laju lé imeum geucok laju saboh cangkie tanoh dan geuroe laju bacut ié suci u dalam cangkie tanoh nyan. Óh lheueh nyan gobnyan geucok laju abée nibak aleue Khimah TUHAN laju atranyan geupeutamong u dalam ié nyan. 18 Óh lheueh nyan jiploih laju ôk ureuëng inong nyan, dan teupông keucurigaan nyan jikeubah laju teuma u dalam paleuet, seudangkan di teungku imeum keudroe geumat ié phet dan nyan kheueh ié nyang teupeuteuka kutok. 19 Óh lheuehnyan lé imeum geupeugah laju sumpah dan sira geulakée ureuëng inong nyan jisituju keuhainyan. Imeum harôh geupeugah, "Meunyoe gata hana tameumukah, gata hana keunong kutok nyang jipeuteuka lé ié nyoe. 20 Teuma meunyoe gata ka neumeumukah, 21 seumoga TUHAN geupeujeuet nan gata jeuet keu sumpah ngon kutok lamkawan bansa gata. Seumoga lé Gobnyan geupeujeuet lhak pha gata jeuet keu kroet dan pruet gata pi jiteuka gumbong. 22 Ié nyang jipeuteuka kutoknyoe teuma jitamong u dalam pruet gata deungon nyan teuma pruet gata jeuet keu gumbong meunan cit teupeukroet teuma lhak pha gata." Ureuëng inong nyan harôh jijaweueb, "Ulôn situju; Seumoga TUHAN geupeujeuet meunan." 23 Laju di imeum geutuléh laju kutoknyan u ateueh keureutah meugulong dan geusampôh teuma deungon ié nyang phet nyan. 24 Di imeum geuyue lom ureuëng inong nyan jijieb ié nyang phet nyang teupeuteuka kutok nyan. Meunyoe jijieb ié nyan jeuet keusabab rasa sakét. 25 Meunan cit di imeum geucok laju peuseumahan teupông nyan, dan atranyan geutunyok laju u keue TUHAN, laju geuba teuma u keu miseubah. 26 Laju lé gobnyan geucoklom saboh reugam teupông sibagoe tanda bahwa banmandum teupông nyan kalheueh geupeuseumah, laju atra nyan geutot teuma di ateueh miseubah. Akhé jih iényan geupeu jieb teuma ubak ureuëng inong nyan. 27 Seukira jih ureuëng inong nyan ka jimeumukah, deungon keunong ié nyan teupeusabab jihnyan sakét lagoena; pruet jih laju gumbong meunan cit deungon lhak pha jih pi laju teuma teuka kroet. Nan jihnyan jeuet keu sumpah ngon kutok lamkawan bansa jih keudroe. 28 Teuma seukira jih ureuëng inong nyan hana meusalah, jihnyan hana teuma keunong kutok dan mantong hase ji meu aneuëk. 29 Meunan kheueh peuratoran jih meunyoe sidroe ureuëng lakoe ceumeuru dan curiga bahwa peurumoh jih nyan ka jipeubuet jeuhet deungon ureuëng agam laén dan jipeukuto droe jihnyan. Ureuëng agam nyan harôh jijak peuhadab binoe jihnyan ubak TUHAN dan di imeum harôh teuma geupeubuet peuratoran nyan u ateueh ureuëng nyan. 31 Ureuëng agam nyan beubaih nibak salah jihnyan, teuma binoe jihnyan, meunyoe teunyata meusalah, harôh kheueh jitanggong bubena akibat jih.

Teubileueng 6

1 TUHAN meufeureuman ubak Nabi Musa 2 geuyue jak peusampoe peuratoran-peuratoran lagée nyoe keu ureuëng Israel. Tieb-tieb ureuëng agam atawa ureuëng inong nyang meusapat mangat udeb khusos keu TUHAN sibagoe sidroe nazir, 3 hana jeuet teujieb ié anggô dan meunan cit ié kreueh. Jihnyan hana jeuet jijieb ié kreueh peue mantong nyang teupeuget nibak boh anggô atawa nibak boh peue mantong. Meunan cit jihnyan hana jeuet jipajoh boh anggô nyang mantong barô atawa nyang ka thô, atawa peue mantong nyang meuasai nibak bak anggô; aneuëk jih atawa pucok jihpi hana jeuet jipajoh. 5 Meunyoe mantong jihnyan lam meukaôi hana jeuet jigunteng atawa jicuko ôk jihnyan. Nibak watéenyan ôk ngon janggot bah kheueh teupeubiyeu mantong jitimoh sampoe panyang. Jihnyan teuikat ubak kaôi sampoe teuma ubak watée teupeukhusos droe jih ubak TUHAN seuleusoe. 6 Ôk jihnyan na kheueh sibagoe tanda bahwa jihnyan teupeukhusos mantong ubak Po teu Allah. Simantong kaôi jihnyan na ureuëng nyan hana jeuet jipeukuto droe jih keudroe; jihnyan hana teuma jeuet jipeuto nibak manyét ureuëng maté, bahpi kheueh nyan manyét bapak jih keudroe, ma jihnyan, atawa syedara jih nyan saban cit hana jeuet jipeuto ngon jimat. 8 Meunyoe mantong jihnyan sidroe ureuëng nyang meujabat nazir, jihnyan na kheueh ureuëng khusos keu TUHAN. 9 Meunyoe ôk sidroe nazir nyang teupeukhusos jeuet keu kuto atawa najih kareuna jihnyan na toe ngon ureuëng maté deungon hana teusaja, teuma ureuëng nyan bah jipréh tujoh uroe treb jih; óh ka lheueh nyan harôh jicuko ôk nibak ulée jih meunan cit ngon janggot jih, barô kheueh jihnyan teukheun ka gleh. 10 Nibak uroe nyang keulapan jihnyan harôh jiba dua boh cicém mirah pati atawa cicém teukukur ubak imeum di babah pintoe Khimah TUHAN. 11 Cicém nyang saboh harôh jipeuseumah lé imeum sibagoe keureubeuen teupeu amphon desya, dan nyang saboh teuk keu keureubeuen nyang teutot gunaji keu teupeugadôh nyang kuto nibak jihnyan. Bak uroe nyan cit teuma jihnyan bah jipeukhusos lom teuma ôk jih nyan keu TUHAN 12 dan geupeubarô keuhai jipeujok droe jih sibagoe sidroe nazir. Jangka watée nyang ka lewat hana teu itongle sabab ka jeuet keu kuto. Sibagoe keureubeuen gantoe rugoe jihnyan harôh jipeuseumah saboh aneuëk bubiri nyang mantong meu-umu sithon. 13 Meunyoe kaôi sidroe nazir nyan ka seuleusoe, nazir nyan harôh teuma jipeubuet upacaranyoe. Ureuëng nyan harôh teu intat u babah pintoe Khimah TUHAN 14 deungon teuba sajan ubak TUHAN lhée boh beulatang peulara nyang hana meucupa: saboh bubiri agam nyang meu-umu sithon keu keureubeuen nyang teutot, saboh aneuëk bubiri nyang inong nyang mantong meu-umu sithon keu keureubeuen peu amphon desya, dan saboh bubiri agam keu keureubeuen peudamé. 15 Ureuëng nyan harôh jipeuseumah teuma saboh raga ruti nyang teupeuget hana meurago, na kheueh ruti bulat nyang teupeuget nibak teupông teujampu deungon minyéuk zaiton dan kue lipeh nyang teusiliek ngon minyéuk zaiton. Seulaén nibak nyan ureuëng nyan harôh teuma jipeuseumah keureubeuen sajian dan keureubeuen nyang teujieb. 16 Lé imeum harôh geuba banmandum nyan ukeue TUHAN, laju geupeuseumah keureubeuen peu amphon desya dan keureubeuen nyang teutot. 17 Meusigoe deungon ruti nyang saboh raga nyan, lé geuh nyan harôh teuma geupeuseumah bubiri agam nyan ubak TUHAN sibagoe keureubeuen peudamé. Meunan cit keureubeuen teuhidang dan keureubeuen nyang teujieb nyan harôh teupeuseumah ubak TUHAN. 18 Lé nazir nyan harôh kheueh teuma jicuko ôk jihnyan di babah pintoe Khimah TUHAN, dan lheueh nyan rhom laju atranyan u dalam apui diteumpat keureubeuen peudamé nyang teungoh teutot. 19 Óh kalheueh nyan, meunyoe pha keu bubiri agam nyan ka teupeumasak, lé imeum harôh geucok atranyan dan geukeubah atranyan meusajan-sajan deungon saboh ruti nyang bulat dan saboh teuma kue lipéh nibak raga nyan u dalam paleuet jaroe ureuëng nazir nyan. 20 Laju lé imeum harôh kheueh geutunyok peunajoh nyan sibagoe meuneubri khusos ubak TUHAN; nyan na kheueh jeumba suci nyang ka jeuet keu jeumba imeum, seulaén dada dan pha bubiri agam nyang meunurot peuratoran ka jeuet keu jeumba imeum. Barô kheueh óh ka lheueh nyan lé nazir nyan ka jeuet jijieb ié anggô. 21 Nyan kheueh peuratoran keu ureuëng nazir; teuma meunyoe sidroe nazir geupeujanji keureubeuen nyang leubeh nibak syarat-syarat kaôi jihnyan, gobnyan harôh geupeupeunoh deungon paih peue nyang ka geupeujanji nyan. 22 TUHAN meufeureuman lom ubak Nabi Musa 23 mangat geujak peusampoe ubak Nabi Harun dan aneuëk-aneuëk geuhnyan bahwa awaknyan harôh jipeugah nariet nyoe bak watée awaknyan geubri beureukat keu bansa Israel: 24 Seumoga TUHAN geubri beureukat dan geupeulara gata. 25 Seumoga TUHAN geumeuget até dan murah até keu gata. 26 Seumoga TUHAN geubri beureukat keu gata dan geubri teuma keu gata damé. 27 Dan TUHAN meufeureuman, "Meunyoe awaknyan ji teuôh nan Ulôn sibagoe beureukat ateueh bansa Israel, Ulôn teuma Lôn bri beureukat keu awaknyan."

Teubileueng 7

1 Bak watée ka seuleusoe geupeudong Khimah TUHAN lé Nabi Musa, laju Khimah nyan deungon sigala peuleungkapan jih geubaiát laju meunan cit banmandum peuleungkapan jihnyan geusiliek deungon minyéuk upacara. Meunan cit atranyan geupeusiliek ubak miseubah deungon sigala peuleungkapan jihnyan. 2 Laju lé ureuëng-ureuëng patot Israel, na kheueh ulée sukée nyang meutanggong jaweueb ateueh teupeubuet keuhai seunsus nyan, 3 geupeuseumah u keue TUHAN nam boh geureubak leumô meusigoe deungon leumô jih na dua blaih boh: Tieb-tieb dua droe peumimpén jideureuma saboh geureubak, dan maséng-maséng saboh teuma leumô. Óh ka lheueh seuleusoe atranyan jipeuseumah lé awaknyan, 4 TUHAN geupeugah ubak Nabi Musa, 5 "Teurimong kheueh meuneubri-meuneubri peuseumahan nyan keu teu angkot Khimah Ulôn; gata seurah kheueh banmandum nyan ubak ureuëng Lewi sisuai deungon tugaih awaknyan." 6 Laju geureubak-geureubak leumô meunan cit deungon banmandum leumô nyan geujok laju ubak ureuëng Lewi lé Nabi Musa. 7 Dua boh geureubak ngon peuet boh leumô geujok teuma keu ureuëng-ureuëng Gerson, 8 peuet boh geureubak ngon lapan boh leumô geujok teuma keu ureuëng-ureuëng Merari, sisuai deungon buet nyang awaknyan peubuet dimiyueb pimpénan Itamar, aneuëk Imeum Nabi Harun. 9 Teuma ureuëng-ureuëng Kehat hana jiteurimong geureubak meunan cit deungon Leumô nibak Nabi Musa, sabab barang-barang nyang suci nyang jeuet keu tanggong jaweueb awaknyan, harôh awaknyan gulam di ateueh bahô. 10 Lé peumimpén nyang jiba barang peuseumahan keu teupeuna upacara teubaiát miseubah. Bak watée awaknyan ka keumah keu jiba peuseumahan awaknyan u keue miseubah, 11 TUHAN meufeureuman lom ubak Nabi Musa, "Gatajak peugah kheueh laju ubak awaknyan bahwa tieb-tieb uroe nyang treb jih dua blaih uroe sidroe lamkawan peumimpén nyan harôh kheueh jipeuseumah keureubeuen jihnyan keu upacara teubaiát miseubah." 12 Maséng-maséng jiba peuseumahan meunurot urutan nyoe: Uroe & Sukée & Peumimpén Peuseumahan awaknyan maséng-maséng na kheueh saban: saboh pingan pirak nyang brat jih 1,5 kilogram dan saboh teuma baskom pirak nyang brat jih 800 gram, meunurot ceng nyang jipeuguna nibak Khimah TUHAN. Ban dua boh teumpat nyan peunoh teupaso deungon teupông teujampu ngon minyéuk keu peuseumahan sajian. Seulaén nibak nyan saboh teuma pingan méuh nyang brat jih na 110 gram nyang meu asoe dupa; saboh leumô agam nyang mantong muda, saboh bubiri agam dan saboh teuma aneuëk bubiri nyang meu-umu sithon keu keureubeuen nyang teutot, meunan cit saboh kaméng agam keu keureubeuen teupeu amphon desya; dua boh leumô, limong boh bubiri agam, limong boh kaméng agam, dan limong boh bubiri nyang meu-umu sithon keu keureubeuen peudamé. 84 Peuseumahan nyang jiba lé bandua blah droe peumimpén keu teubaiát miseubah nyan banmandum nyan na kheueh sidubnyoe: -- dua blah boh pingan pirak dan dua blah boh teuma baskom pirak nyang brat jih banmandum nyan na kheueh 27,6 kilogram -- dua blah boh pingan méuh nyang brat banmandum nyan na kheueh 1,32 kilogram, peunoh meuasoe ngon dupa -- dua blah boh teuma leumô agam, dua blah boh bubiri agam, dua blah boh aneuëk bubiri nyang mantong meu-umu sithon, meusajan deungon keureubeuen sajian sibagoe keuleungkapan jih keu keureubeuen nyang teutot -- dua blah boh teuma kaméng keu keureubeuen peu amphon desya -- dua ploh peuet boh leumô agam, nam ploh boh bubiri agam, nam ploh boh kaméng, dan nam ploh boh teuma aneuëk bubiri nyang meu-umu sithon keu keureubeuen peudamé. 89 Tieb-tieb geutamong lé Nabi Musa u dalam Khimah TUHAN keu geujak peugah haba deungon TUHAN, gobnyan geudeungoe su TUHAN nyang geupeugah ubak gobnyan nibak ateueh sinutôb Peuto Peujanjian lamkawan bandua patong kerub.

Teubileueng 8

1 TUHAN meufeureuman lom ubak Nabi Musa, 2 "Jak peugah kheueh laju ubak Nabi Harun bahwa bak watée jihnyan jipasang ban tujoh boh panyöt nibak gaki panyöt nyan, jihnyan harôh jipasang lagée nyan bagoe sampoe jipeupeungeueh bagian keue gaki panyöt nyan." 3 Nabi Harun geupeubuet laju peue nyang ka geupeurintah lé TUHAN ubak gobnyan nyan. Gobnyan laju geupasang panyöt nyan meuhadab u bagian keue nibak gaki panyöt nyan. 4 Teumpat panyötnyan, trok u ateueh dan bungöng-bungöng piasan jihnyan teupeuget nibak méuh nyang teu seupoh, meunurot cuntoh nyang ka geupeuleumah lé TUHAN ubak Nabi Musa. 5 TUHAN meufeureuman lom ubak Nabi Musa, "Gata peuaséng kheueh ureuëng-ureuëng Lewi nibak ureuëng-ureuëng Israel nyang laén dan gata peubuet kheueh laju upacara teupeusuci keu awaknyan 7 deungon caranyoe: Gata siték kheueh u ateueh awaknyan deungon ié keu upacara teupeusuci dan gata yue kheueh awaknyan jicuko bansaboh badan dan jirhah teuma peukayan jihnyan. Deungon lagée nyan awaknyan ka suci. 8 Meunan cit gata yue kheueh ubak awaknyan jijak cok saboh leumô agam nyang mantong muda meunan cit deungon keureubeuen teuhidang nibak teupông meujampu minyéuk. Meunan cit gata cok lom leumô agam nyang laén keu keureubeuen peu amphon desya. 9 Óh lheuehnyan gata peusapat kheueh banmandum umat Israel dan gatayue kheueh ubak ureuëng Lewi mangat jidong dikeue Khimah Ulôn. 10 Umatnyan harôh jipeuduek jaroe jihnyan di ateueh ulée ureuëng-ureuëng Lewi nyan, 11 meunan cit Nabi Harun laju teuma geupeuseumah ureuëng-ureuëng Lewi nyan sibagoe peuseumahan khusos nibak ureuëng-ureuëng Israel keu Ulôn, mangat awaknyan hase jipeubuet iébadat Ulôn. 12 Meunan cit di ureuëng Lewi nyan harôh teuma jipeuduek jaroe jihnyan u ateueh ban dua boh leumô agam nyan; nyang saboh bah jipeuseumah sibagoe keureubeuen teupeu amphon desya, dan nyang saboh teuk keu keureubeuen nyang teutot. Deungon upacaranyan ureuëng Lewi ka teupeu suci. 13 Gata peukhusos kheueh ureuëng Lewi nyan keu Ulôn dan tayue kheueh awaknyan jipeutimang Nabi Harun meunan cit deungon aneuëk-aneuëk jihnyan. 14 Deungon na upacaranyan gata ka tapeu siblaih ureuëng Lewi nibak ureuëng Israel nyang laén, mangat awaknyan ka jeuet keuhak milék Ulôn. 15 Óh ka lheueh gata peubuet upacara teuseurah ureuëng Lewi nyan, awaknyan meuhak jimeubuet didalam Khimah Ulôn. 16 Ulôn ka Ulôn peujeuet awaknyan keugeunantoe aneuëk tuha nyang agam nibak bansa Israel; teuma awaknyan na kheueh khusos keu Ulôn. 17 Bak watée Ulôn poh maté banmandum aneuëk tuha di nanggroe Meusé, aneuëk agam nyang tuha nibak tieb-tieb keuluwarga ureuëng Israel dan nibak tieb-tieb beulatang nyang lahé aneuëk nyang keuphon nyan pi ka Ulôn peujeuet keu hak milék Ulôn nyang khusos. 18 Jinoe sibagoe keugantoe banmandum aneuëk tuha Israel, Ulôn cok ureuëng-ureuëng Lewi, 19 dan ureuëng-ureuëng Lewi nyan Ulôn peujok laju ubak Nabi Harun meunan cit deungon aneuëk-aneuëk jih nyan, mangat awaknyan hase jimeutugaih keu ureuëng Israel di dalam Khimah Ulôn. Meunan cit mangat awaknyan jilakée mangat Ulôn peu amphon keu bansa Israel beujeuet bansa nyan hana keunong lé beuncana meunyoe awaknyan jijak tô-tô ubak teumpat nyang paleng suci nyan." 20 Lé sabab nyan, Nabi Musa, Nabi Harun dan banmandum umat Israel jipeuseumah ureuëng Lewi nyan ubak TUHAN, lagée nyang geupeurintah lé TUHAN ubak Nabi Musa. 21 Ureuëng-ureuëng Lewi nyan jipeubuet upacara teupeu gleh droe dan meunan cit jirhah sampoe gleh teuma peukayan jihnyan, laju Nabi Harun geupeuseumah awaknyan sibagoe peuseumahan khusos ubak TUHAN. Gobnyan geupeubuet cit teuma upacara teupeu gleh keu awaknyan. 22 Ureuëng Israel banmandum jipeubuet peue mantong nyang geupeurintah lé TUHAN ubak Nabi Musa keuhai ureuëng Lewi nyan. Deungon lagéenyan ureuëng Lewi meuteumé hak ji meukeureuja didalam Khimah TUHAN dimiyueb keumandoe Nabi Harun dan aneuëk-aneuëk geuhnyan. 23 TUHAN meufeureuman lom ubak Nabi Musa, 24 "Tieb-tieb ureuëng Lewi nyang meu-umu dua ploh limong thon u ateueh, ureuëng nyan harôh kheueh jipeubuet tugaih didalam Khimah Ulôn, 25 dan nibak umu limong ploh thon barô kheueh ureuëng nyan teupeu beubaih nibak tugaih jih nyan. 26 Óh ka lheueh nyan jihnyan jeuet jitulông ureuëng Lewi nyang laén nyang meutugaih didalam Khimah Ulôn, teuma jihnyan kon ureuëng meutugaih nyang teutab. Meunan kheueh cara jih teu atoe buet-buet ureuëng Lewi"

Teubileueng 9

1 Nibak buleuen sa bak thon nyang keudua óh ka lheueh bansa Israel jitinggai nanggroe Meusé, TUHAN meufeureuman ubak Nabi Musa di padang pasi Sinai. 2 Kheun TUHAN, "Nibak tanggai peuet blah buleuen nyoe, phon nibak saát mata uroe jilhob, ureuëng Israel harôh jipeuraya uroe raya Paskah meunurot peuratoran nyang ka teupeuteutab." 4 Teuma Nabi Musa geuyue bansa Israel mangat jipeuraya uroe raya Paskah. 5 Awaknyan jipeuraya nyan di padang pasi Sinai bak watée uroe seupôt tanggai peuet blah buleuen sa. Banmandum nyan awaknyan peubuet paih lagée nyang geupeurintah lé TUHAN ubak Nabi Musa. 6 Teuma lamkawan awaknyan na meupadubdroe nyang kuto sabab ka jimat manyét, deungon nyan awaknyan hana jeuet jipeuraya uroe raya Paskah nibak uroe nyan. Awaknyan laju jijak meuhadab Nabi Musa ngon Nabi Harun 7 dan laju jipeugah, "Kamoe ka kuto sabab ka kamoe mat manyét. Teuma pakon kamoe geupeukeucuali sampoe hana jeuet kamoe peuseumah keureubeuen ubak TUHAN meusigoe deungon syedara-syedara kamoe?" 8 Nabi Musa geujaweueb, "Neupréh dilée sampoe ulôn meuteumé peutunyok nibak Po teu TUHAN." 9 TUHAN geuyuelom ubak Nabi Musa 10 mangat geujak peusampoe ubak bansa Israel lagée nyoe, "Meunyoe lamkawan gata atawa keuturonan gata na nyang kuto atawa meunajih sabab ka jimat manyét atawa teungoh lam meuneujak nyang jiôh, ureuëng nyan harôh kheueh jipeuraya Paskah keu TUHAN. 11 Teuma peurayaan nyan harôh teupeuna sibuleuen óh lheuehnyan, na kheueh nibak malam tanggai peuet blah nibak buleuen nyang keudua. Tapeuraya kheueh uroenyan deungon gata makheun bubiri Paskah meunan cit deungon ruti nyang hana meurago lom teuma deungon gulée phet. 12 Bék gata tinggai sapeue nibak peunajoh nyan sampoe án singoh beungoh, dan bék teuma gata peupatah meu sikrék pi nibak tuleueng beulatang nyang teupeuseumah ubak Ulôn. Gata peuraya kheueh uroe raya Paskah nyan nyang sisuwai deungon sigala peuratoran jih. 13 Seubalék jih ureuëng nyang hana meunajih atawa hana kuto dan hana teuma mantong lam meuneujak, teuma nibak peurayaan uroe Paskah, teuma ureuëng nyang laén jipeubuet keuwajéban Paskah nyan, hana Ulôn anggab le sidroe ureuëng nyan nibak umat Ulôn, sabab jihnyan hana jipeuseumah keureubeuen keu Ulôn bak watée nyang ka teupeuteuntée. Ureuëng nyan harôh kheueh jitanggong banmandum akibat jih. 14 Meunyoe na lamkawan gata na ureuëng aséng nyang jikeuneuk peuraya uroe raya Paskah, jihnyan harôh kheueh jipeuraya nyang sisuai deungon banmandum peuratoran dan keuteutapan. Huköm nyan keunong ateueh banmandum ureuëng, bah kheuehnyan ureuëng Israel meunan cit nyang bukon." 15 Nibak uroe Khimah TUHAN teupeudong, teuka kheueh awan dan reudok nyang teutob Khimah nyan. Óh watée malam sampoe án beungoh awan nyan deuhjih lagée apui. 17 Tieb watée awan nyan jiék, ureuëng Israel laju jireuloh khimah-khimah jih, laju teuma jibeurangkat. Dan dipat awan nyan jitron, diteumpatnyan teuma awaknyan jipeudong khimah. 18 Ateueh peurintah TUHAN bansa Israel nyan jireuloh khimah dan ateueh peurintah TUHAN cit teuma khimahnyan jipeudong lom teuma. Seumantong awan nyan mantong na di ateueh Khimah TUHAN, awaknyan teutab na tinggai di teumpat nyan. 19 Meunyoe awan nyan treb na di ateueh khimah awaknyan, awaknyan keubit that taát ubak peuratoran TUHAN dan hana teuma jibeurangkat nibak teumpat nyan. 20 Teuma kadang-kadang na meupadub uroe mantong awan nyan na di ateueh Khimah awaknyan. Pakriban kheueh mantong, peurintah TUHAN kheueh nyang peuteuntée awaknyan tinggai nibak saboh teumpat atawa jijak lom teuma. 21 Kadang-kadang awan nyan teuma tinggai phon seupôt trok beungoh uroe, dan bak watée awan nyan jiék nibak beungoh uroe, awaknyan pi laju beurangkat. Pajan mantong awan nyan jiék, bah kheueh uroe meunan cit malam, awaknyan teutab cit jibeurangkat. 22 Simantong na awan nyan di ateueh Khimah TUHAN, aléh nyan treb jih dua uroe, sibuleuen, sithon atawa leubeh, sitréb nyan teuma awaknyan tinggai di teumpat nyan. Meunyoe awan nyan jiék, barô kheueh awaknyan jibeurangkat hoe nyan jijak awannyan teuma. 23 Awaknyan tinggai nibak saboh teumpat dan jibeurangkat u teumpat nyang laén sisuai deungon peurintah TUHAN nyang geubri lé TUHAN ubak Nabi Musa.

Teubileueng 10

1 TUHAN meufeureuman lom ubak Nabi Musa, 2 "Gata peuget kheueh dua boh beureuguih nibak pirak nyang teuseupoh keu teuhôi rakyat mangat jimeusapat atawa keu teuyue awaknyan mangat jijak. 3 Meunyoe ban dua boh beureuguih nyan jiyueb panyang su jih nyan muphom jih mandum umat harôh meusapat di seukeulileng gata dikeue pintoe Khimah Ulôn. 4 Teuma meunyoe saboh mantong nyang jiyueb, nyan saban cit muphom jih teuma keu ureuëng patot-patot mantong nyang harôh jimeusapat bansikeulileng gata. 5 Meunyoe beureuguih nyan teuyueb paneuk-paneuk su jih, nyan tanda jih sukée-sukée nyang jipeudong khimah disiblah rot timu harôh ji beurangkat. 6 Meunyoe beureuguih nyan teuyueb paneuk-paneuk su jih keu nyang keudua goe, teuma lé sukée-sukée nyang na disiblah seulatan harôh jibeurangkat. Jadi su beureuguih nyang paneuk-paneuk nyan tanda jih umat harôh jibeurangkat, 7 seudangkan su beureuguih nyang panyang nyan tanda jih umat harôh jimeusapat. 8 Beureuguih-beureuguih nyan harôh kheueh jiyueb lé teungku-teungku imeum, aneuëk-aneuëk Nabi Harun. Nyang kheueh peuratoran nyang harôh gata taát keu siumu masa. 9 Dan meunyoe gata tamuprang di nanggroe gata keu gata peuteuen droe ateueh musoh nyang jiseurang, gatayueb kheueh laju beureuguih-beureuguih nyan. Teuma Ulôn, TUHAN Allah gata, Lôn tulông dan Lôn peuseulamat gata nibak musoh-musoh gata nyan. 10 Meunan cit nibak uroe-uroe gata tameusuka ria, na kheueh nibak khanuri Buleuen Barô dan peurayaan-peurayaan nyang laén teuma, beureuguih nyan harôh kheueh gatayueb bak watée gata peuseumah keureubeuen nyang teutot dan keureubeuen peudamé keu Ulôn. Teuma Ulôn ku tulông gata. Ulôn kheueh TUHAN Allah gata." 11 Nibak thon nyang keudua óh ka lheueh bansa Israel jitinggai nanggroe Meusé, bak tanggai dua ploh buleuen dua, jiék kheueh awan nibak ateueh Khimah TUHAN. 12 Laju ureuëng Israel meutalo-talo jijak jitinggai padang pasi Sinai, dan awan nyan laju jipiôh bak watée awaknyan trok dipadang pasi Paran. 13 Nyan kheueh phon-phon that awaknyan jibeurangkat ateueh peurintah TUHAN meulalu Nabi Musa. 14 Dikeue that nyang beurangkat nyan na kheueh tantra nyang dimiyueb bupanji Yehuda, pasokan deumi pasokan: Nahason, aneuëk Aminadab peumimpén pasokan sukée Yehuda, 15 Netaneel aneuëk Zuar peumimpén pasokan sukée Isakhar, 16 dan Eliab aneuëk Helon nyang pimpén pasokan sukée Zebulon. 17 Laju Khimah TUHAN nyan ji reuloh, dan jibeurangkat kheueh laju kawöm Gerson dan Merari nyang gulam Khimah TUHAN nyan. 18 Óh lheueh nyan beurangkat kheueh teuma tantra nyang dimiyueb bupanji keusatuan Ruben, pasokan deumi pasokan: Elizur aneuëk Syedeur nyang pimpén pasokan sukée Ruben, 19 Selumiel aneuëk Zurisyadai geupimpén baresan sukée Simeon, 20 dan Elyasaf aneuëk Rehuel geupimpén teuma baresan sukée Gad. 21 Óh lheuehnyan beurangkat kheueh ureuëng-ureuëng Kehat nyang jiseuôn barang-barang suci. Meunyoe awaknyan ka trok ubak teumpat khimah-khimah nyang óh lheuehnyan, Khimah TUHAN ka jipeudong lom teuma. 22 Óh lheuehnyan jijak teuma tantra nyang dimiyueb bupanji sukée Efraim, pasokan deumi pasokan: Elisama aneuëk Amihud geupimpén pasokan sukée Efraim, 23 Gamaliel aneuëk Pedazur jipimpén teuma pasokan sukée Manasye, 24 dan Abidan aneuëk Gideoni jipimpén teuma baresan sukée Benyamin. 25 Akhé jih beurangkat kheueh teuma tantra nyang dimiyueb bupanji keusatuan sukée Dan. Awaknyan na kheueh peungawai dilikot banmandum keusatuan. Awaknyan jijak pasokan deumi pasokan: Ahiezer aneuëk Amisyadai nyang pimpén baresan sukée Dan. 26 Pagiel aneuëk Okhran jipimpén teuma baresan sukée Asyer, 27 dan Ahira aneuëk Enan jipimpén teuma baresan sukée Naftali. 28 Nyan kheueh urutan baresan ureuëng Israel, pasokan deumi pasokan, tieb-tieb watée awaknyan jibeurangkat keu jiminah. 29 Nabi Musa geupeugah ubak parui gobnyan, Hobab aneuëk Rehuel ureuëng Midian, "Kamoe teuma kamoejak u teumpat nyang meunurot geukheun lé TUHAN teuma geubri keu kamoe. TUHAN ka geubri janji nyang get keu ureuëng Israel. Lé sababnyan, gata seutôt kheueh, kamoe teuma kamoe peuget nyang get keu gata." 30 Geujaweueb lé Hobab, "Teurimong gaséh, teuma ulôn meuheuet keuneuk woe u gampông droe ulôn." 31 "Bék kheueh gata tinggai kamoe," geukheun lé Nabi Musa, "Gata hase jeuet keu ureuëng peutunyok rot ueh keu kamoe, sabab gata tateupeue dipat geutanyoe jeuet ta peudong khimah di padang pasi. 32 Meunyoe gata taseutôt, teuma banmandum nyang get nyang TUHAN keureuja keu kamoe, teuma kamoe peubuet cit nyan keu gata." 33 Óh ka lheueh bansa Israel nyan jitinggai Sinai, gunong teumpat tinggai TUHAN, awaknyan laju jijak lhée uroe treb jih. Peuto Peujanjian TUHAN sabe jiba teupeu awai nibak awaknyan keu teujak mita teumpat peudong khimah keu awaknyan. 34 Meunyoe awaknyan jibeurangkat nibak teumpat peukhimahan, awan TUHAN sabe na di ateueh óh watée uroe. 35 Tieb-tieb watée Peuto Peujanjian nyan teuma jiba sajan, Nabi Musa geupeugah, "Neubeudôh kheueh, ya TUHAN, neupeu crebre kheueh musoh droe neueh sampoe ureuëng nyang jibanci droeneueh jiplung banmandum." 36 Dan tieb-tieb watée Peuto Peujanjian nyan trok ubak teumpat peuniyôh, Nabi Musa geupeugah lom, "Neugisa kheueh ya TUHAN, ubak meuribée bansa Israel."

Teubileueng 11

1 Nibak siuroe bansa nyan jipeuphon aloh alah ubak TUHAN keuhai keususahan awaknyan. Watée geudeungoe awaknyan apoh apah, TUHAN that-that beungéh dan laju geupeuteuka apui u ateueh awaknyan. Apuinyan jimeu-éue laju lamkawan awaknyan dan laju tutong siladum nibak khimah-khimah awaknyan. 2 Ureuëng-ureuëng nyan laju jikliek-kliek jilakée tulông ubak Nabi Musa. Laju Nabi Musa geumeudóa ubak TUHAN, teuma lon kheueh laju apui nyan. 3 Sabab keujadian nyan, teumpatnyan geuboh nan Tabera, sabab nibak teumpatnyan apui TUHAN hu deungon raya that lamkawan awaknyan. 4 Nibak jijak ureuëng-ureuëng Israel nyan na cit teuma lamkawan nyan ureuëng aséng nyang seutôt sajan. Awaknyan meuheuet that keuneuk pajoh uengkot sie, dan meunan cit deungon ureuëng Israel ka teuma apoh apah. Kheun awaknyan, "Ah, cuba meunyoe na uengkot sie keugeutanyoe! 5 Tanyoe teuingat that keu uengkot nyang tanyoe pajoh deungon pre mantong di nanggroe Meusé, na boh timon, na boh timon bruek, prée, bawang mirah ngon bawang putéh! 6 Jinoenyoe geutanyoe ka habéh teunaga sabab hana peunajoh nyang laén seulaén manna mantong nyang deuh tanyoe kalon." 7 Rupa jih manna nyan lagée bijéh nyang ubit-ubit, hi jih putéh meujampu kunéng-kunéng. 8 Meunyoe ka trok bak watée malam manna nyan rhot meusigoe-sigoe deungon ié mbon u ateueh khimah-khimah. Óh ka beungoh uroe dumna ureuëng laju jijak keudéh keunoe keu jijak peusapat boh manna nyang rhot nyan, atranyan jigiléng sampoe jeuet keuteupông, dan jipeuget laju keu peunajoh kuwe nyang bulat teuma timpiek. Rasajih lagée kuwe nyang teupanggang di ateueh apui nyang teujampu deungon minyéuk zaiton. 10 Nabi Musa geudeungoe ureuëng-ureuëng Israel nyan jimeu ôk-ôk, sira jidong meu hudom-udom dikeue khimah droe jih. Teuma teuka kheueh beungéh TUHAN nyang lumpah brat sampoe Nabi Musa meurasa seudeh lagoena. 11 Dan geupeugah kheueh lé gobnyan ubak TUHAN, "Pakon Droeneueh ya TUHAN neupeususah ulôn lagéenyoe? Peu kheueh Droeneueh ya Allah hana neu galak keu ulôn? Pakon teuma Droeneueh neupeujok tanggong jaweueb banmandum ureuëngnyan u ateueh ulôn? 12 Peu kheueh ulôn nyang kandong atawa nyang peulahé awaknyan banmandum? Pakon kheueh Droeneueh neuyue ulôn jeuet lagée sidroe ureuëng dendayang nyang buet jih jiteumingkue aneuëk manyak nyan ban lahé, sampoe ulôn nyoe harôh lôn useuha awaknyan sipanyang rot u nanggroe nyang Droeneueh ka peujanji keu indatu awaknyan? 13 Neungieng kheueh nyan, awaknyan hana jipiôh ji meurengék jilakée uengkot sie. Dan dipat kheueh harôh lôn mita uengkot sie nyan keu awaknyan? 14 Hana ek le ulôn seuôn tanggong jaweueb nyang raya ngon brat nyan; lumpah that brat tanggong jaweuebnyan ateueh ulôn! 15 Meunyoe Droeneueh ya TUHAN hana neupiôh neupeusaneut ulôn lagéenyoe sabe, neugaséh kheueh keu ulôn; leubeh gét Droeneueh poh maté mantong ulôn nyoe jinoe cit teuma mangat ulôn nyoe hana le lôn tanggong ázeb deurita nyang lagéenyoe." 16 Laju meufeureuman kheueh TUHAN ubak Nabi Musa sira geupeugah lagéenyoe, "Gata peusapat kheueh lamkawan bansa Israel tujoh ploh droe ureuëng patot-patot nyang jiaku sibagoe peumimpén bansa. Gataba kheueh laju awaknyan ukeue Ulôn di dalam Khimah Ulôn, laju gata yuedong awaknyan disinan bak binéh gata. 17 Ulôn teuma Lôn treun Lôn jak peugah haba deungon gata nibak teumpatnyan, dan siladum nibak kuasa nyang ka Ulôn bri keu gata, nyan teuma Ulôn bri keu awaknyan. Dan deungon lagée nyan awaknyan ka hase jitulông gata jiseuôn tanggong jaweueb ateueh bansa nyoe, dan bék gata seuôn tanggongnyan sidroe gata. 18 Jinoenyoe gata peugah kheuehnyoe ubak bansa nyan: Peugleh kheueh droe gatanyan keu singoh beungoh; gata teuma tapajoh uengkot sie. TUHAN ka geudeungoe gatamo ngon apoh apah bahwa gata meuheuet that keuneuk pajoh uengkot sie, dan bahwa naseb gata leubeh jroh nibak watée di nanggroe Meusé. Jinoenyoe TUHAN teuma geubri gata uengkot sie, dan gata ka hase gata makheun atranyan. 19 Gata teuma tapajoh uengkot sie nyan kon mantong treb jih si uroe atawa dua uroe, atawa limong uroe atawa lom siploh uroe, dan hana teuma treb jihnyan dua ploh uroe, 20 teuma nyan sibeuleuen peunoh gata pajoh atranyan, sampoe gata rhot bak sakét dan muntah-muntah sabab tapajoh sie nyan. Hainyan jeuet sabab gata ka tatulak TUHAN nyang na lamkawan gata. Dan lom teuma sabab lé gata ka gatamo dikeue Geuhnyan dan meunyeusai bahwa gata ka gata tinggai tanoh Meusé." 21 Laju Nabi Musa geupeugah lom ubak TUHAN, "Bansa nyang ulôn pimpén nyoe meujeumeulah na 600.000 droe. Pakriban Droeneueh peugah bahwa Droeneueh teuma neubri uengkot sie siseb-seb jih nyang treb jih sibuleuen peunoh? 22 Dipat kheueh na leumô ngon bubiri nyang meunanle nyang harôh teusie keu teupeutroe awaknyan? Peu kheueh banmandum uengkot lam laôt seb keu teubri makheun keu awaknyan?" 23 Geujaweueb lé TUHAN, "Peu kheueh keukuasaan Ulôn teubataih? Gata hana treb lé takalon peue nyang Ulôn peugah nyan bit-bit beutôi teujadi atawa hana!" 24 Teuma geuteubit kheueh laju Nabi Musa geujak peusampoe habanyan peue nyang ka geupeugah lé TUHAN ubak gobnyan. Laju Nabi Musa geupeusapat tujoh ploh droe peumimpén laju geuyue dong awaknyan bansilingka Khimah TUHAN. 25 Laju TUHAN geutreun di lam awan dan geupeugah laju ubak Nabi Musa. TUHAN geucok laju siladum nibak kuasa nyang ka geubri ubak Nabi Musa dan laju geubri atranyan ubak bantujoh ploh droe peumimpén nyan. Bak watée Roh TUHAN nyan geutreun u ateueh awaknyan, jipeuphon kheueh awaknyan jimeuhôi lagée nabi meuhôi teuma hana treb. 26 Dua lamkawan tujoh ploh droe peumimpén nyan, Eldad dan Medad, tinggai di dalam khimah dan hana jijak meusajan-sajan deungon nyang laén u dalam Khimah TUHAN. Di khimah-khimah nyan Roh laju jitreun u ateueh awaknyan, dan awaknyan bandua pi jipeuphon teumawok lagée su nabi. 27 Laju lé sidroe ureuëng jiplung u luwa keu jijak peugah ubak Nabi Musa peue nyang ka teujadi ateueh Eldad dan Medad. 28 Yosua bin Nun, nyang ka jibantu Nabi Musa yoh phon masa muda jihnyan, jipeugah ubak Nabi Musa, "Neuyue kheueh awaknyan jipiôh hai Bapak!" 29 Nabi Musa geujaweueb, "Keupeue gata tapike keu lôn? Ulôn keubit meuharab seumoga TUHAN geubri Roh Geuhnyan ubak banmandum bansa Geuhnyan, dan geupeujeuet awaknyan banmandum hase jeuet keunabi!" 30 Laju Nabi Musa geujak woe lom ubak khimah meusigoe deungon ban tujoh ploh peumimpén bansa Israel nyan. 31 Deungon hana teusangka-sangka TUHAN geupeuteuka laju angén rot laôt; di angén nyan laju jiba cicém-cicém puyoh nyang jipoe miyueb lagoena, teuma na simetée mantong di ateueh tanoh. Cicém nyan jipoe keudéh-keunoe di ateueh khimah-khimah nyan sampoe jiôh na meupadub metée di bansikeulileng nyan. 32 Sipanyang uroenyan, sipanyang malam dan sipanyang uroe óh lheueh nyan teuma, ureuëng-ureuëng laloe jidrob cicém puyoh. Tieb-tieb ureuëng jidrob cicém puyoh nyan na siribée kilo gram. Cicém-cicém nyan awaknyan tabu bansikeulileng khimah-khimah mangat jeuet tho. 33 Seumantong jai uengkot sie nyang jipajoh, TUHAN jeuet keu beungéh keu bansa nyan dan geupeutreun laju bala u ateueh awaknyan. 34 Laju teumpat nyan geuboh nan, "Jirat ureuëng leuha", sabab disinan geupeukubu ureuëng-ureuëng nyang maté sabab lé leuha jih. 35 Nibak teumpat nyan bansanyan laju jiminah u daerah Hazerot, laju jipeudong khimah nibak teumpat nyan.

Teubileueng 12

1 Nabi Musa ka geucok sidroe ureuëng inong Kus geupeu jeuet keu peurumoh gobnyan, dan hainyan jipeujeuet keu alasan lé Miryam dan Nabi Harun keu jipeubrok Nabi Musa. 2 Ji kheun le awaknyan, "Peu kheueh meulalu Nabi Musa mantong TUHAN geupeugah haba? Bukon kheueh meulalu geutanyoe TUHAN geupeugah haba cit?" TUHAN geudeungoe peue nyang awaknyan peugah. 3 Nabi Musa na kheueh ureuëng nyang get that lom miyueb até, leubeh nibak banmandum ureuëng nyang udeb ateueh bumoe nyoe. 4 Hana teusangka-sangka TUHAN meufeureuman ubak Nabi Musa, Nabi Harun dan Miryam, "Gata ban lhée droe tajak kheueh laju ubak Khimah Ulôn." Laju awaknyan geujak keunan 5 dan TUHAN laju geutreun didalam taméh awan. Laju TUHAN geudong dibabah pintoe Khimah Gobnyan dan geutawok Nabi Harun meunan cit deungon Miryam. Ban dua awaknyan laju geuseuk ngon geupeuto, 6 dan TUHAN geupeugah laju, "Tadeungoe kheueh tutoe Ulôn nyoe! Meunyoe na lamkawan gata sidroe nabi, Ulôn peugah droe Lôn ubak jihnyan meulalu keumalon-keumalon, dan Ulôn meututoe deungon jihnyan didalam lumpo. 7 Teuma kon lagéenyan deungon hamba Ulôn Nabi Musa. Jihnyan ureuëng nyang paleng seutia lamkawan umat Ulôn. 8 Dan Ulôn peugah haba deungon jihnyan meuhadab keue, seucara nyata dan hana teuma deungon teumeu hiëm. Bahpi ruman Ulôn pih ka jikalon! Pakon gata tajeuet that talawan Nabi Musa, hamba Ulôn nyan?" 9 TUHAN gét that beungéh keu awaknyan bandua, dan geubeudôh laju geujak. 10 Bak watée awan nyan jitinggai Khimah TUHAN, leumah kheueh Miryam ka keunong peunyakét kulét nyang cukob mubahya; kulét jih putéh lagée gapeueh. Bak watée Nabi Harun geupaléng ateueh Miryam dan jingieng bahwa jihnyan ka keunong peunyakét, 11 jipeugah laju ubak Nabi Musa, "Neutulông kheueh, hai teungku amphon, bék kheueh neupeubiyeu kamoe teuseksa kareuna desya nyang kamoe peubuet nibak bangai kamoenyoe. 12 Bék kheueh neupeubiyeu jihnyan lagée aneuëk manyak lahé nyang ka maté, deungon asoe jih siladum ka brôk." 13 Teuma geumeulakée kheueh lé Nabi Musa ubak TUHAN, "Ya Allah Po, ulôn lakée, neupeupuléh kheueh jihnyan!" 14 TUHAN geujaweueb, "Seukira jih muka jihnyan jiludah lé bapak jih, bukon kheueh tujoh uroe treb jih harôh jitanggong malée? Gata peuaséng kheueh jihnyan nibak khimah-khimah nyang treb jih tujoh uroe, dan óh lheuehnyan jeuet jitamong lom teuma." 15 Lheuehnyan laju geupeuteubiet Miryam nibak khimah-khimah nyang treb jih tujoh uroe, dan bansa nyan hana jiminah nibak teumpat nyan sampoe Miryam jiwoe lom ubak khimah-khimah. 16 Óh lheuehnyan awaknyan laju jitinggai Hazerot dan jipeudong khimah nibak padang guron Paran.

Teubileueng 13

1 TUHAN meufeureuman lom ubak Nabi Musa, 2 "Nibak tieb-tieb sukée Israel gata yue kheueh utosan sidroe nibak peumimpén-peumimpén jihnyan mangat jijak luem tanoh Kanaan nyang teuma Ulôn bri keu bansa Israel." 3 Banlagée peurintah Po teu Allah nyan, Nabi Musa geukirém awaknyan phon nibak padang pasi Paran. Banmandum ureuëng nyan na kheueh peumimpén-peumimpén lamkawan ureuëng Israel: Sukée & Peumimpén 16 Nyan kheueh ureuëng nyang geukirém lé Nabi Musa keu jijak meuluem u nanggroe nyan. Hosea bin Nun geugantoe nan jih lé Nabi Musa jeuet keu Yosua. 17 Bak watée Nabi Musa geuyue awaknyan mangat jibeurangkat, lé gobnyan geupeuingat awaknyan, "Gatajak kheueh rot blah utara, gata tuju ubagian seulatan tanoh Kanaan, laju trok ubak daerah nyang meugunong. 18 Gata seulidék kheueh pakriban nanggroe nyan, peu kheueh peunduduek jih le atawa bacut, peu kheueh awaknyan teuga atawa leumoh. 19 Meunan cit gata peureksa peu kheueh nanggroe nyan gét atawa hana, dan peu kheueh peunduduek jih tinggai di gampông-gampông nyang teubuka atawa didalam banda nyang meupageue ngon kuta. 20 Beutabah kheueh até gata. Gata kalon laju peu kheueh tanoh nyan suboe dan jai bak-bak kayée nyang udeb. Bék tatuwoe gata peuwoe bacut boh-boh kayée nyang udeb disinan." Bak watée nyan ka jipeuphon muboh bak anggô. 21 Teuma jijak kheueh laju awaknyan u arah utara dan jiseulidék nanggroe nyan phon nibak padang pasi Zin disiblah seulatan u utara sampoe u banda Rehob, rab ngon rot ueh u Hamat. 22 Phon-phon that awaknyan jijak u bagian seulatan nanggroe nyan dan trok laju u banda Hebron, teumpat tinggai ureuëng-ureuëng Ahiman, Sesai dan Talmai, keuturonan Enak. Hebron geupeuget bandanyan tujoh thon sigohlom banda Zoan di nanggroe Meusé. 23 Trok kheueh laju awaknyan di Pantôn Eskol. Disinan awaknyan laju jikoh sikrék ranténg boh anggô nyang get that brat, seuhingga atranyan harôh teugulam deungon sikrék kayée lé dua droe ureuëng. Meusigoe deungon nyan jiba cit teuma na meupadub boh boh geulima dan boh ara. 24 Teumpatnyan jirasinan Pantôn Eskol sabab ranténg boh anggô nyang jikoh lé ureuëng Israel disinan. 25 Óh kalheueh jiseulidék nanggroe nyan peuet ploh uroe treb jih, lé awak nyang jak meuluem jiwoe teuma 26 dan awaknyan laju jibri laporan keuhai buet muluem nyang ka seuleusoe jikeureuja nyan ubak Nabi Musa, Nabi Harun dan banmandum umat Israel nyang teungoh meugumpôi di Kades, diteungoh padang pasi Paran. Awaknyan jicalitra laju peue nyang ka awaknyan kalon dan jijok teuma laju boh-boh kayée nyang ka awaknyan pot ateueh bak jih. 27 Kheun awaknyan ubak Nabi Musa, "Kamoe ka kamoe seulidék nanggroenyan dan kamoe kalon teuma bahwa tanoh jih kaya ngon suboe, dan nyoe na bacut boh kayée nyang kamoe ba di sidéh. 28 Banda awaknyan raya-raya lom teuma teupageue deungon kuta nyang kukoh, meunan cit kamoe kalon ureuëng-ureuëng nyang tinggai disinan badan jih raya-raya awaknyan na kheueh keuturonan gogasi disinan. 29 Ureuëng Amalek tinggai dibagian seulatan nanggroe nyan; ureuëng Het, Yebus dan Amori awaknyan tinggai di daerah nyang meugunong-gunong; seudangkan ureuëng Kanaan awaknyan tinggai di daerah di seupanyang laôt dan di seutôt talo Krueng Yordan." 30 Teuma Kaleb jipeumangat até ureuëng-ureuëng nyang meualoh alah ubak Nabi Musa. Kheun Kaleb, "Nanggroe nyan harôh taprang dan tareubot saát nyoe cit teuma, kareuna geutanyoe seb that teuga keu ta peutaloe awaknyan." 31 Teuma ureuëng-ureuëng nyang jigisa deungon Kaleb nyan jipeugah, "Hana, geutanyoe hana hase taprang awaknyan. Peunduduek nanggroe nyan leubeh teuga nibak geutanyoe." 32 Laju awaknyan jitabu haba seumeungeuet lamkawan ureuëng Israel keuhai nanggroe nyang awaknyan luem nyan. Kheun awaknyan, "Nanggroe nyan keubit mubahya, bahpi keu peunduduek jihnyan keudroe. Ureuëng nyang kamoe kalon disideh keubiet badan jih gét that raya-raya. 33 Bit that kamoe kalon ureuëng-ureuëng nyan lagée gogasi, na kheueh keuturonan Enak. Teubandéng deungon awaknyan kamoe nyoe na kheueh bube daruet, dan pasti lagéenyan kheueh anggapan awaknyan keu kamoe."

Teubileueng 14

1 Simalam suntok umat Israel jikliek-kliek sira jimo. 2 Awaknyan jimeukrôb-krôb ubak Nabi Musa dan Nabi Harun sira jipeugah, "Leubeh gét geutanyoe maté di nanggroe Meusé atawa di teungoh padang pasi nyoe! Bah kheueh geutanyoe maté mantong! 3 Keupeue TUHAN geuba geutanyoe u nanggroe nyan? Euntrék geutanyoe maté bak tajak muprang dan ureuëng-ureuëng binoe meunan cit deungon aneuëk-aneuëk geutanyoe jidrob ngon jiteuen sibagoe ureuëng nyang teutawan. Bukon kheueh leubeh gét geutanyoe tawoe mantong u nanggroe Meusé!" 4 Laju awaknyan jimariet sabe keudroe-droe, "Bah kheueh tapiléh sidroe peumimpén dan tawoe lom u nanggroe Meusé." 5 Nabi Musa ngon Nabi Harun laju geusujut dikeue ureuëng ramé nyan. 6 Yosua aneuëk Nun dan Kaleb aneuëk Yefune, dua droe lamkawan tukang meuluem nyan, laju jipriek peukayan jihnyan sibagoe meuduka cita. 7 Awaknyan jipeugah ubak banmandum rakyat nyan, "Nanggroe nyang kamoe jak seulidék nyan luwa biasa gét jih. 8 Meunyoe TUHAN geubri ubak geutanyoe, Gobnyan teuma geuba geutanyoe keunan dan geubri teuma ubak geutanyoe tanoh nyang kaya dan suboe nyan keu geutanyoe. 9 Bék kheueh gata lawan TUHAN, dan bék kheueh teuma gata takot ubak ureuëng-ureuëng nyang tinggai di nanggroe nyan, sabab deungon mudah geutanyoe ta peutaloe awaknyan. Nyang lindong awaknyan ka jitinggai awaknyan, dan TUHAN na deungon geutanyoe. Lé nyan, bék kheueh teumakot." 10 Banmandum rakyat ji ancam keuneuk rhom jihnyan deungon aneuk batée sampoe án maté. Teuma siat nyan cit teuma awaknyan jikalon cahya TUHAN nyang meuble-ble teuka di ateueh Khimah Geuhnyan. 11 TUHAN meufeureuman lom ubak Nabi Musa, "Padub na treb teuk ureuëng-ureuëngnyoe jilawan Ulôn? Trok án pajan awaknyan hana jitem meuiman ubak Ulôn, bah kheueh Ulôn kalé that Ulôn peubuet buet nyang ajaéb lamkawan awaknyan? 12 Ulôn teuma kupeubinasa awaknyan deungon Lôn peutreun bala peunyakét nyang hase ji minah-minah. Teuma gata Ulôn peujeuet keu sidroe ayah nibak saboh bansa leubeh rayeuk dan leubeh teuga nibak awaknyan!" 13 Laju Nabi Musa geupeugah lom ubak TUHAN, "Ya, TUHAN, enteuk ureuëng Meusé jideungoe hai nyan! Padahai deungon kuasa Droeneueh TUHAN ka neupeuteubiet kamoe lam nanggroe nyan, 14 dan awaknyan teuma jipeugah ubak ureuëng-ureuëng di nanggroe nyoe, nyang ka jideungoe bahwa Droeneueh ya, TUHAN, nasabe neupeungon kamoe. Meunan cit awaknyan ka jideungoe bahwa Droeneueh neupeuleumah droe ubak kamoe bak watée Droeneueh neujak dikeue kamoe lam taméh awan nibak watée uroe, dan lam taméh apui nibak watée malam. 15 Meunyoe Droeneueh neupoh maté banmandum umat Droeneueh nyoe, teuma bansa-bansa nyang ka lheueh jideungoe keuhai nan Droeneueh nyang meusyeuhu nyoe laju jipeugah bahwa 16 Droeneueh neupoh maté umat Droeneueh dipadang pasi sabab Droeneueh hana meuhase neuba awaknyan jijak u nanggroe nyang ka Droeneueh peujanji nyan. 17 Sabab nyan, TUHAN, ulôn lakée, neutunyok kheueh keukuasaan Droeneueh ubak kamoe dan peubuet kheueh peue nyang ka TUHAN peujanjinyan keu kamoe. Droeneueh ka neupeugah, 18 'Ulôn, TUHAN, hana bagaih beungéh. Ulôn kutunyok geunaséh Ulôn dan seutia Ulôn deungon meulimpah-limpah. Ulôn kupeu amphon ureuëng nyang meudesya dan jilawan Ulôn. Bahpi meunan, keusalahan ureuëng tuha teuma Ulôn balaih ubak aneuëk-aneuëk dan cucoe-cucoe jih, trok ubak keuturonan nyang keulhée dan nyang keu peuet.' 19 Jinoenyoe, ya, TUHAN, sabab raya that geunaséh Droeneueh dan Droeneueh seutia ubak janji Droeneueh, ulôn meulakée deungon meuharab that-that, neupeu amphon kheueh desya ureuëng-ureuëng nyoe lagée Droeneueh ka neupeu amphon awaknyan yoh phon awaknyan jitinggai tanoh Meusé." 20 Geujaweueb lé TUHAN, "Get kheueh, Ulôn teuma kupeu amphon awaknyan lagée nyang gata lakée nyan. 21 Teuma Ulôn meujanji deumi droe Ulôn dan deumi Ulôn nyang udeb dan meukuasa di ateueh bumoe nyoe, 22 bahwa nibak ureuëng-ureuëng nyoe hana meusidroe pi nyang mantong udeb keu jitamong u dalam nanggroe nyang ka Ulôn peujanji ubak indatu awaknyan. Sabab awaknyan hana jitem taát ubak Ulôn, dan hana putôh-putôh jicuba Ulôn. Padahai awaknyan ka jikalon cahya nyang meuble-ble, dan buet-buet nyang ajaéb nyang Ulôn peubuet di tanoh Meusé dan dipadang pasi. 23 Hanjeuet! Awaknyan hana teuma jitamong u dalam nanggroe nyan. Lamkawan awaknyan nyang jilawan Ulôn, hana meusidroe pi nyang teuma jigilo nanggroe nyan. 24 Teuma hana lagéenyan keu hamba Ulôn si Kaleb. Jihnyan teutab seutia ubak Ulôn. Sabab nyan Ulôn teuma Lôn ba jihnyan u nanggroe nyang ka jitamong nyan. Jinoenyoe ureuëng Amalek dan ureuëng Kanaan tinggai di ateueh dataran nyan. Teuma daerahnyan jeuet keu daerah milék keuturonan si Kaleb, hamba Ulôn nyan. Singoh beungoh gata harôh tagisa dan gatajak laju u padang pasi u daerah Lhok Akaba." 26 TUHAN meufeureuman lom ubak Nabi Musa dan Nabi Harun, 27 "Sampoe án pajan ureuëng-ureuëng jeuhet nyan jimeu krôb-krôb ubak Ulôn? Banmandum apoh apah awaknyan ka Ulôn deungoe. 28 Gata harôh tajaweueb awaknyan lagéenyoe: TUHAN geupeugah, 'Ulôn meusumpah bahwa deumi Ulôn nyang udeb bahwa gata teuma Ulôn peusaneut lagée nyang gata peugah dikeue Ulôn. Ulôn TUHAN, ka Ulôn peugah haba. 29 Gata ka meukrôb-krôb ateueh Ulôn. Sabab nyan gata teuma maté, dan manyét-manyét gata teuma meusipreuk bansaboh padang pasi nyoe. 30 Seulaén Kaleb dan Yosua, hana meusidroe pi lamkawan gata nyang meu-umu dua ploh thon u ateueh nyang hase teuma jitamong u nanggroe nyang Lôn peujanji nyan. 31 Gata ka tapeugah bahwa aneuëk-aneuëk miet teuma jiteun. Teuma awaknyan kheueh nyang teuma Ulôn ba u nanggroe nyang gata tulak nyan, dan nanggroe nyan teuma jeuet keu tanoh ié awaknyan. 32 Teuma di gata maté lam padang pasi nyoe. 33 Peuet ploh thon treb jih aneuëk-aneuëk gata jimeuwot-wot lam padang pasi. Sabab lé gata hana seutia, aneuëk-aneuëk gatanyan teuma meudeurita, sampoe ureuëng nyang keuneulheuh lamkawan gata ka meuninggai donya. 34 Gata teuma tatanggong akibat-akibat lé desya gata peuet ploh thon treb jih; sithon teuitong siuroe nibak tieb-tieb peuet ploh uroe nyang gata peuguna keu gata seulidék tanoh nyan. Gata teuma tateupeue pakriban rasa jih meunyoe Ulôn kulawan gata! 35 Ulôn meusumpah bahwa Ulôn teuma kupeubuet hainyan ateueh gata, ureuëng-ureuëng jeuhet nyang sipakat keujilawan Ulôn. Lam padang pasi nyoe gata banmandum teuma maté. Ulôn, TUHAN, ka Lôn peugah haba.' " 36 Ureuëng-ureuëng nyang ka geu-utus lé Nabi Musa keujijak seulidék tanoh nyan, jiwoe lom sira jiba laporan nyang hana beutôi keuhai nanggroe nyan, dan lé sababnyan ureuëng Israel meukrôb-krôb ubak TUHAN. Lé sababnyan TUHAN geuhuköm awaknyan akhé jih awaknyan maté banmandum lé sabab keunong peunyakét. 38 Nibak bandua blaih droe tukang muluem nyan teuma Yosua ngon Kaleb nyang mantong udeb. 39 Óh ka lheueh Nabi Musa geupeusampoe feureuman TUHAN ubak bansa Israel, bansanyan laju meuduka cita deungon peudeh that. 40 Óh singoh nyan watée seuboh buta, meukeumah-keumah kheueh awaknyan keuneuk jijak ék ateueh pucak gunong. Kheun awaknyan, "Keubiet kamoe ka meudesya. Teuma jinoenyoe kamoe ka siab keuneukjak ubak teumpat nyang geutunyok lé TUHAN." 41 Teuma Nabi Musa geupeugah, "Pakon gata jinoenyoe keuneuk taliengkeu peurintah TUHAN? Gata hana meuhase! 42 Bék gatajak, gata teuma jipeutaloe lé musoh-musoh gata sabab TUHAN hana meusajan gata. 43 Bak watée gata meuhadab ngon ureuëng Amalek dan ureuëng Kanaan nyan, gata teuma maté lam prang nyan. TUHAN hana meusajan gata sabab gata hana taát ubak Gobnyan." 44 Teuma lé ureuëng-ureuëng Israel nyan teutab neukat cit jikeuneuk ék ateueh pucak gunong nyan, bahpi Nabi Musa dan Peuto Peujanjian hana jitinggai khimah-khimah nyan. 45 Teuma lé ureuëng Amalek dan ureuëng Kanaan nyang na tinggai disinan laju jiprang dan jipeutaloe banmandum ureuëng-ureuëng Israel dan jipeucrok awaknyan sampoe trok u Horma.

Teubileueng 15

1 TUHAN geubri lom ubak Nabi Musa peuratoran-peuratoran nyoe 2 nyang harôh jipeubuet lé bansa Israel di nanggroe nyang teuma geubri lé TUHAN keu awaknyan. 3 Keu keureubeuen nyang teutot ngon keureubeuen teupeu lheueh kaôi meunan cit keureubeuen keugalak droe atawa lom keureubeuen nibak peurayaan-peurayaan biasa, gata jeuet tapeuseumah ubak TUHAN: leumô agam, bubiri agam, bubiri atawa kaméng. Bée keureubeuen nyang lumpah mangat nyan keubit gét that galak até TUHAN. 4 Soe mantong nyang jipeuseumah domba atawa kaméng keu keureubeuen nyang teutot keu TUHAN, meunan cit jiba teuma meusigoe ngon tieb-tieb saboh beulatang peulara nyan, sikilo gram teupông teujampu deungon si arée minyéuk zaiton keu keureubeuen sajian, dan meunan cit teuma deungon si arée ié anggô. 6 Meunyoe nyang jibri keu keureubeuen nyan na kheueh saboh bubiri agam, bah kheueh teuma jipeuseumah dua kilo gram teupông teujampu teuma deungon si arée si teungoh minyéuk zaiton keu keureubeuen sajian, 7 dan siarée siteungoh teuma ié anggô. Bée keureubeuen nyang lumpah mangat nyan keubit that-that galak até TUHAN. 8 Meunyoe nyang jikeureubeuen na kheueh saboh leumô agam keu keureubeuen nyang teutot atawa keureubeuen teupeuleueh kaôi atawa keureubeuen peudamé, 9 meunan cit teuma jipeuseumah lhée kilo gram teupông nyang teujampu deungon dua arée minyéuk zaiton keu keureubeuen sajian, 10 dan dua arée teuma ié anggô. Bée keureubeuen nyang lumpah mangat nyan keubit that-that galak até TUHAN. 11 Nyan kheueh nyang harôh jipeuseumah meusigoe deungon tieb-tieb saboh leumô agam, bubiri agam, bubiri atawa kaméng. 12 Meunyoe nyang teukeureubeuen nyan leubeh nibak dua boh beulatang peulara, teuma peuseumahan teupông, minyéuk dan ié anggô nyan pi harôh teutamah meunurot peubandengan jih. 13 Hainyan harôh jipeubuet lé tieb-tieb ureuëng Israel bak watée jihnyan jipeuseumah keureubeuen. Bée keureubeuen nyang mangat nyan lumpah that galak até TUHAN. 14 Meunyoe na ureuëng aséng nyang tinggai lamkawan gata, bah kheuehnyan keu sikeujab mantong meunan cit keuneuk tinggai teutab, jihnyan harôh kheueh jitaát ubak banmandum meunyoe jihnyan jipeuseumah keureubeuen peunajoh nyang teupeu mangat até TUHAN. 15 Banmandum huköm dan peuratoran na kheueh saban keu banmandum gata dan keu ureuëng aséng nyang na tinggai lamkawan gata, sabab gata dan ureuëng nyan na kheueh saban nibak mata TUHAN. Dan hainyan teutab na keu siumu masa. 17 TUHAN geubri lom ubak Nabi Musa peuratoran-peuratoran nyoe nyang harôh jipeubuet lé bansa Israel di nanggroe nyang teuma geubri lé TUHAN keu awaknyan. 19 Meunyoe gata ka gata peuphon pajoh peue nyang jipeuhase lé nanggroe nyan, gata harôh pinah siladum keu teupeuseumah khusos keu TUHAN. 20 Meunyoe droe gata tatot ruti nyang teupeugét nibak teupông gandom nyang phon-phon that teukôh, rutinyan harôh teupeuseumah sibagoe keureubeuen khusos keu TUHAN. Cara teupeuseumah atranyan saban cit lagée cara teupeuseumah gandom nyang phon nyang ka gata giléng. 21 Keu siumu masa tieb-tieb ruti nibak gandom nyang phon teukôh nyan harôh kheueh gata bri sibagoe peuseumahan khusos keu TUHAN. 22 Meunyoe gata deungon hana teusaja ka teupeulalée sapeue-sapeue nibak peuratoran nyang ka geubri lé TUHAN ubak Nabi Musa, phon nibak uroe TUHAN geubri peuratoran nyan dan seulanjut jih treun meutreun, dan buet nyang salah nyan jipeubuet sabab umat hana jiteupeu peuratoran, deungon nyan banmandum umat harôh kheueh jipeuseumah saboh leumô agam keu keureubeuen nyang teutot. Meusigoe deungon nyan harôh teuma teupeuseumah keureubeuen sajian dan ié anggô lagée nyang ka teupeu teuntée. Bée keureubeuen nyang mangat nyan keubit that-that galak até TUHAN. Seulaén nibak nyan harôh teuma teukeureubeuen saboh bubiri agam keu keureubeuen teupeu amphon desya. 25 Laju lé imeum harôh teuma jipeubuet upacara teupeu amphon desya keu umat. Teuma awaknyan geupeu amphon sabab buet jih nyang salah nyang awaknyan peubuet deungon hana jisaja, dan sabab awaknyan ka jiba keureubeuen teupeu amphon desya meunan cit keureubeuen nyang teutot ubak TUHAN. 26 Banmandum umat Israel dan ureuëng aséng nyang na tinggai di teumpat awaknyan teuma geupeu amphon, sabab banmandum nyan karôh nibak buet nyang salah nyang hana teusaja nyan. 27 Meunyoe na sidroe ureuëng mantong meudesya deungon hana jisaja, teuma ureuëng nyan bah kheueh jikeureubeuen saboh kaméng inong nyang meu-umu sithon sibagoe keureubeuen peu amphon desya. 28 Di imeum harôh geupeuna upacara peu amphon desya dikeue TUHAN, mangat ureuëng nyan geupeu amphon teuma desya jihnyan. 29 Peuratoran nyan meulaku keu soe mantong nyang jipeubuet desya deungon hana jisaja, bah kheueh nyan ureuëng Israel meunan cit teuma deungon ureuëng aséng nyang na tinggai teutab di lamkawan awaknyan. 30 Teuma meunyoe sidroe ureuëng Israel atawa ureuëng aséng deungon jisaja jipeubuet desya, jihnyan ka jipeujayéh TUHAN. Ureuëng nyan harôh teuhuköm maté, 31 sabab jihnyan ka jilawan TUHAN dan deungon jisaja ka jilawan peurintah TUHAN. Ureuëng nyan maté sabab lé salah jih keudroe. 32 Bak watée ureuëng Israel ka na dipadang pasi, na sidroe ureuëng agam teungoh ji koh kayée apui nibak uroe Sabat. 33 Ureuëng nyan laju jiba jak meuhadab ubak Nabi Musa, Nabi Harun dan banmandum umat, 34 laju ureuëng nyan jiteuen sabab gohlom jeulaih peue nyang teupeubuet u ateueh ureuëng nyan. 35 Laju TUHAN meufeureuman ubak Nabi Musa, "Ureuëng nyan harôh teuhuköm maté. Ureuëng nyan harôh gataba u luwa khimah-khimah nibak teumpat nyan banmandum umat harôh jirhom ureuëng nyan deungon batée sampoe maté." 36 Teuma banmandum umat laju jiba ureuëng nyan u luwa khimah-khimah dan laju jirhom ureuëng nyan deungon batée sampoe maté, lagée nyang ka geupeurintah lé TUHAN. 37 TUHAN geuyue lom ubak Nabi Musa geuyuejak peusampoe ubak bansa Israel, "Gata peugét kheueh rumbai-rumbai nibak ujong peukayan gata dan gata ikat kheueh talo ijo nibak tieb-tieb rumbai. Nyan harôh gata peubuet treun meutreun. 39 Rumbai-rumbai na kheueh keu teu peuingat: Tieb-tieb watée gata kalon, gata ingat teuma sigala peurintah Ulôn dan gata taát teuma. Dan sabab nyan gata hana teuma gata tuwoe keu Ulôn keu gata seutôt keuheundak dan hasrat droe gata nyan. 40 Rumbai-rumbai nyan teuma teupeu ingat gata mangat gata taát ubak banmandum peurintah Ulôn, sampoe gata beutôi-beutôi jeuet keu hak milék Lôn. 41 Ulôn kheueh TUHAN Allah gata; Ulôn nyang ba gata teupeuteubit nibak nanggroe Meusé mangat Ulôn jeuet keu Allah gata, Ulôn kheueh TUHAN."

Teubileueng 16

1 Korah aneuëk Yizhar nibak kawöm Kehat, sukée Lewi, jimeubeurontak ubak Nabi Musa. Jihnyan jisukong teuma lé dua droe nibak sukée Ruben, na kheueh Datan dan Abiram aneuëk-aneuëk Eliab, dan Ôn aneuëk Pelet, dan lé 250 droe peumimpén meusyeuhu nyang jipiléh lé rakyat. 3 Awaknyan meusigoe jijak meuhadab ubak Nabi Musa dan Nabi Harun dan jipeugah, "Kaséb nyan, hai Nabi Musa! Banmandum umat Israel ka teupeukhusos keu TUHAN, dan TUHAN na lamkawan geutanyoe banmandum. Teuma pakon kheueh neu anggab Droeneueh leubeh manyang nibak umat TUHAN?" 4 Geudeungoe hai nyan, Nabi Musa laju geusujut ubak tanoh sira geumeudoá ubak TUHAN. 5 Laju lé gobnyan geupeugah ubak Korah dan peungikot-peungikot jihnyan, "Singoh beungoh TUHAN teuma geutunyok ubak geutanyoe soe kheueh nyang po Gobnyan, dan soe teuma nyang teupeukhusos keu Geuhnyan. Ureuëng nyang geupiléh lé Gobnyan teuma geubri jijak peurab ubak Gobnyan. 6 Singoh beungoh gata dan bubena peungikot gata jijakcok laju teumpat-teumpat apui, laju atranyan jipasoe deungon ngeue apui dan dupa, laju atranyan jiba ubak miseubah. Bah kheueh geutanyoe kalon singoh soe kheueh lamkawan geutanyoe nyang ka geupiléh lé TUHAN. Kaséb kheueh nyan, hai ureuëng-ureuëng Lewi!" 8 Seulanjut jih Nabi Musa geupeugah ubak Korah, "Deungoe kheueh, hai ureuëng-ureuëng Lewi! 9 Peu kheueh neupike nyoe soai ubit bahwa Po teu Allah ureuëng Israel geupiléh gata lamkawan ureuëng-ureuëng Israel mangat gata jeuet tapeurab ubak Gobnyan, dan gata meutugaih nibak Khimah Gobnyan, lom gata meukeureuja keu umat Israel dan gata peutimang awaknyan? 10 Gata, Korah, dan banmandum ureuëng Lewi ka meuteumé keuhoreumatan nyan nibak TUHAN -- dan jinoenyoe gata tatuntot keu beuhase teuma jeuet keu imeum! 11 Meunyoe gata deungon peungikot-peungikot gata hana jipiôh meu ôk-ôk ubak Nabi Harun, ngon lagée nyan gata talawan TUHAN!" 12 Laju Nabi Musa geuyue jaktawok Datan dan Abiram, teuma awaknyan jipeugah, "Kamoe han kamoe tem teuka! 13 Gohlom séb droeneueh neuba kamoe meuteubiet nibak tanoh Meusé nyang suboe nyan keu neupoh maté kamoe di padang pasi nyoe? Harôh kheueh droeneueh neupeurintah kamoe? 14 Nyang jikeubiet jih droeneueh hana neuba kamoe u tanoh nyang suboe, atawa neubri keu kamoe blang-blang dan lampôh-lampôh anggô jeuet keuhak milék pusaka kamoe! Jinoenyoe droeneueh neu keuneuk peungeuet kamoe! Hana, kamoe hana kamoe tem teuka" 15 Nabi Musa bit that beungéh dan geupeugah ubak TUHAN, "TUHAN, bék kheueh neuteurimong peuseumahan awaknyan. Hán tom na ulôn peurugoe sidroe ureuëng pih nibak awaknyan; bahpi saboh beulatang keuleudée hántom na ulôn cok nibak awaknyan." 16 Laju geupeugah lé Nabi Musa ubak Korah, "Gata teuka kheueh singoh uroe ubak Khimah TUHAN ngon gataba sajan ban 250 droe peungikot gata. Meunan cit deungon Nabi Harun na disideh. Gata harôh gataba teumpat apui gata maséng-maséng. Gata pasoe kheueh dupa di dalam teumpat apui nyan, laju atranyan gata peuseumah kheueh ubak TUHAN." 18 Teuma tieb-tieb ureuëng nyang jijak cok teumpat apui jihnyan, laju jipasoe didalam nyan deungon ngeue apui meunan cit deungon dupa, laju gata dong dipintoe Khimah TUHAN meusajan ngon Nabi Musa dan Nabi Harun. 19 Óh kalheueh nyan Korah laju jipeusapat banmandum umat, dan awaknyan laju jidong meubaréh muhadab keue ngon Nabi Musa dan Nabi Harun di babah pintoe Khimah TUHAN. Hana teusangka-sangka mantong banmandum umat deuh jikalon cahya hu TUHAN nyang meuble-ble. 20 Laju TUHAN meufeureuman ubak Nabi Musa dan Nabi Harun, 21 "Gata yue surot kheueh laju nibak ureuëng-ureuëng nyan; Ulôn keuneuk peubinasa awaknyan jinoenyoe cit teuma." 22 Teuma Nabi Musa dan Nabi Harun laju geusujut ubak TUHAN sira geupeugah, "Ya Allah Po, Droeneueh nyang bri udeb ubak mahluk nyang udeb. Meunyoe teuma na sidroe mantong nyang meudesya, peu kheueh Droeneueh neubeungéh keu banmandum umat Droeneueh?" 23 TUHAN meufeureuman ubak Nabi Musa, "Gata yue kheueh laju bubena ureuëng nyan ji minah nibak khimah-khimah Korah, Datan dan Abiram." 25 Laju Nabi Musa deungon ji-iréng lé peumimpén bansa Israel, geujak u teumpat Datan dan Abiram. 26 Nabi Musa geupeugah bak ureuëng-ureuëng Israel, "Gata wéeh kheueh laju nibak khimah ureuëng-ureuëng jeuhet nyoe dan bék gatamat sapeue pi nibak hareuta milék awaknyan. Meunyoe gata hana tapatéh, gata teuma geupeubinasa meusigoe deungon awaknyan sabab lé desya-desya nyang awaknyan peubuet." 27 Laju ureuëng-ureuëng Israel nyan jiwéeh nibak khimah-khimah Korah, Datan dan Abiram. Datan dan Abiram ka jiteubiet dan ka jidong di babah pintoe khimah awaknyan maséng-maséng, meusajan deungon aneuëk dan peurumoh jih nyan. 28 Laju Nabi Musa geupeugah, "Deungon nyoe gata teuma neuteupeue bahwa TUHAN ka geu utus ulôn keu lôn peubuet banmandum nyoe dan bahwa nyan bukon keuheundak ulôn keudroe. 29 Meunyoe ureuëng nyan maté deungon cara biasa, deungon hana huköm sapeue pih nibak Po teu Allah, nyan kheueh tanda jih TUHAN hana geu utus ulôn. 30 Teuma meunyoe TUHAN geupeubuet sigala sisuatu nyang hántom gata deungoe nyang ka nyoe, dan meunyoe tanoh beukah keu jiuét awaknyan meusigoe deungon hareuta milék awaknyan, sampoe awaknyan jitamong udeb-udeb u dalam donya ureuëng maté, gata teupeu kheueh lé gata bahwa ureuëng-ureuëng nyan na kheueh nyang lawan TUHAN." 31 Hana treb teuma óh lheueh Nabi Musa nyan geupeugah haba, laju tanoh dimiyueb gaki awaknyan beukah, 32 dan laju jiuét awaknyan deungon banmandum keuluwarga awaknyan meunan cit banmandum peungikot Korah, dan banmandum hareuta beunda awaknyan. 33 Dan rhot kheueh awaknyan udeb-udeb u dalam donya ureuëng maté deungon banmandum hareuta awaknyan. Tanoh nyang beukah nyan laju teuma meucob lom dan awaknyan gadôh sapansapa jiuét lé bumoe. 34 Banmandum ureuëng Israel nyang na disinan laju jipeuplueng droe bak watée jideungoe awaknyan jitawök, "Jak plueng! Enteuk geutanyoe jiuét lé bumoe!" 35 Laju TUHAN geupeutreun teuma apui dan di apuinyan laju teuma jitot sampoe hangôh ban 250 droe nyang jipeuseumah dupa nyan. 36 TUHAN meufeureuman lom ubak Nabi Musa, 37 "Gata yue kheueh Eleazar aneuëk Imeum Harun jeuet jijak beuôt teumpat-teumpat apui nibak rungka-rungka nyang teutot dan meusipreuk abée ngon adang nyan u teumpat nyang laén, sabab teumpat apui nyan na kheueh suci. Barang-barang nyan na kheueh nyan jipeuseumah lé ureuëng nyang ka geuhuköm maté sabab desya nyang jipeubuet. Barang-barang nyan na kheueh suci ngon gleh sabab ka jipeuseumah dikeue TUHAN, sabab nyan bah kheueh jeuet keu leumpeng-leumpeng lipéh keulapék blah luwa miseubah. Hainyan teuma jeuet keu peuingat keu bansa Israel." 39 Teuma di Imeum Eleazar laju geujak cok teumpat-teumpat apui nyan dan geuyue laju ureuëng laén jijak teumpa mangat hase jeuet keu leumpeng-leumpeng nyang lipéh jeuet keu keulapék blah luwa miseubah. 40 Nyan na kheueh sibagoe peuingat keu bansa Israel bahwa seulaén keuturonan Nabi Harun, hana meusidroe pi jeuet jijak ubak miseubah keu jijak tot dupa keu TUHAN. Ureuëng nyang iengkeue peuratoran nyan teuma geupeubinasa lagée Korah dan peungikot-peungikot jihnyan. Banmandum nyan geupeubuet lagée nyang geupeurintah lé TUHAN ubak Eleazar rot Nabi Musa. 41 Óh singoh beungoh nyan banmandum umat Israel jibeungéh ubak Nabi Musa ngon Nabi Harun. Awaknyan jipeugah, "Gata poh maté umat TUHAN." 42 Teungoh awaknyan jimeusapat jilawan Nabi Musa ngon Nabi Harun, awaknyan jipaléng ubak Khimah TUHAN, dan deuh laju jikalon awan ka teutob u ateueh Khimah nyan, dan leumah kheueh cahya keuhai TUHAN teuka. 43 Nabi Musa dan Nabi Harun laju geujak ubak Khimah TUHAN nyan, 44 laju TUHAN meufeureuman ubak Nabi Musa, 45 "Gata surot kheueh nibak awaknyan. Ulôn keuneuk peubinasa awaknyan nibak teumpat nyan cit teuma." Ban dua awaknyan pi laju geusujut geuseumah, 46 laju Nabi Musa geupeugah ubak Nabi Harun, "Neucok kheueh laju teumpat apui droeneueh, neupaso laju deungon ngeue apui nibak miseubah dan neupasoe teuma deungon dupa di ateueh nyan. Neuba kheueh laju deungon beubagaih ubak umat dan neupeugét kheueh laju upacara peu amphon desya keu awaknyan. Bagaih! Meureuka TUHAN nyan ka lumpah that brat dan bala ka jipeuphon." 47 Nabi Harun laju geupeubuet peue nyang geupeugah lé Nabi Musa nyan. Gobnyan laju geuplueng lamkawan umat nyang teungoh meusapat nyang ka jipeuphon keunong peunyakét bala nyan. Teuma Nabi Harun laju geupeuduek dupa nyan di ateueh ngeue apui, dan geupeubuet laju upacara peu amphon desya keu umat nyan. 48 Peunyakét bala nyan laju teudong, dan Nabi Harun na lamkawan ureuëng nyang mantong udeb dan nyang ka maté. 49 Nyan maté bak watée nyan na 14.700 droe, hana jitamong keunan nyang maté nibak beurontak Korah. 50 Óh kalheueh bala nyan jipiôh, Nabi Harun laju geugisa ubak Nabi Musa nibak babah pintoe Khimah TUHAN.

Teubileueng 17

1 TUHAN meufeureuman ubak Nabi Musa, 2 "Gata yue kheueh ureuëng Israel mangat jijok keu gata dua blah boh tungkat, tieb-tieb sukée saboh tungkat, nyang harôh jijok lé peumimpén sukée. Tuléh kheueh nan nibak tieb-tieb peumimpén nyan nibak tungkat jih, 3 dan nan Nabi Harun nibak tungkat sukée Lewi. Keu tieb-tieb peumimpén sukée harôh na saboh tungkat. 4 Gata ba kheueh laju tungkat-tungkat nyan ukeue Khimah Ulôn dan gata keubah laju dikeue Peuto Peujanjian, nibak teumpat Ulôn lazem meurumpok deungon gata. 5 Tungkat ureuëng nyang Ulôn piléh laju meutarök. Deungon cara nyan Ulôn teuma laju Lôn peupiôh apoh apah keu ureuëng-ureuëng nyang hana piôh-piôh ji meu krôb-krôb ateueh Ulôn." 6 Hainyan geupeusampoe lé Nabi Musa ubak ureuëng-ureuëng Israel. Laju lé peumimpén awaknyan jiseurah ubak gobnyan saboh tungkat keu tieb-tieb peumimpén sukée. Banmandum nyan na dua blah boh, dan tungkat Nabi Harun na lamkawan nyan. 7 Laju Nabi Musa geukeubah tungkat-tungkat nyan di dalam Khimah TUHAN dikeue Peuto Peujanjian. 8 Óh beungoh singoh nyan, bak watée Nabi Musa geutamong udalam Khimah TUHAN, leumah geukalon bahwa tungkat Nabi Harun, na kheueh tungkat sukée Lewi, ka jitimoh tarök. Tungkat nyan meubungöng, dan jipeuhase boh keutapang nyang ka tuha! 9 Nabi Musa laju geucok banmandum tungkat nyan geutunyok laju ubak ureuëng Israel. Awaknyan jikalon peue nyang ka teujadi, laju tieb-tieb peumimpén jijakcok teuma tungkat jih nyan lom. 10 Óh lheueh nyan TUHAN meufeureuman lom ubak Nabi Musa, "Gata keubah kheueh lom tungkat Nabi Harun nyan dikeue Peuto Peujanjian. Tungkat nyan harôh teukeubah sibagoe peuingat keu bansa Israel nyang galak beurontak nyan nyang toh jihnyan teuma maté meunyoe awaknyan hana jipiôh ji meu-ok-ok." 11 Nabi Musa laju geupeubuet peue nyang geupeurintah lé TUHAN ubak gobnyan. 12 Lé ureuëng Israel laju jipeugah ubak Nabi Musa, "Meunyoe meunan, cilaka kheueh kamoe! Kamoe nyoe teuma binasa! 13 Meunyoe ureuëng nyang jipeutoe ubak Khimah TUHAN harôh maté, deungon nyan ka hanale harapan keu kamoe!"

Teubileueng 18

1 TUHAN meufeureuman ubak Nabi Harun, "Gata, aneuëk-aneuëk gata dan ureuëng-ureuëng Lewi harôh jitanggong akibat buet-buet salah nyang teujadi didalam Khimah Ulôn, teuma gata dan aneuëk-aneuëk gata mantong nyang tanggong buet-buet nyang salah nyang jipeubuet lé imeum. 2 Kawöm syedara gata, sukée Lewi, harôh gata peuroh sajan sibagoe peumbantu nibak peulaksanaan tugaih gata dan tugaih aneuëk-aneuëk gata. 3 Sukée Lewi harôh kheueh jipeubuet keuwajéban droe jih ateueh gata dan jipeubuet tugaih jih nyan di Khimah Ulôn, teuma awaknyan hana jeuet jipeutoe ubak miseubah atawa jimat beunda-beunda suci di Ruweueng Suci. Meunyoe awaknyan ji iengkeue keu peuratoran nyan, bah kheueh awaknyan meunan cit gata, teuma maté. 4 Awaknyan harôh jimeubuet meusapat deungon gata dan jipeubuet tugaih-tugaih nyang na hubongan deungon peulayanan di dalam Khimah Ulôn, teuma nyang hana teubri hak keu nyan, teutam bék jijak buet meusajan deungon gata. 5 Teuma gata, Nabi Harun dan aneuëk gata kheueh nyang jeuet meutugaih di Ruweueng Suci dan miseubah, mangat Ulôn bék lé beungéh keu bansa Israel. 6 Nyang sikeubiet jih, Ulôn ka Lôn piléh kawöm syedara gata ureuëng-ureuëng Lewi di lamkawan bansa Israel sibagoe meuneubri keu gata. Awaknyan ka teupeukhusos keu Ulôn, keu jijak peutimang di Khimah Ulôn. 7 Teuma gata dan aneuëk-aneuëk gata mantong nyang jeuet jimeutugaih sibagoe imeum, nibak sigala meuneubuet nyang na hubongan deungon miseubah dan peue nyang na meuteumé diteungoh-teungoh Ruweueng Mahasuci. Nyang kheueh tanggong jaweueb gata, sabab Ulôn ka Lôn bri keugata jabatan sibagoe imeum. Tieb-tieb ureuëng nyang hana jipoe hak nyan teuhuköm maté meunyoe jipeutoe ubak barang-barang nyang suci nyan." 8 TUHAN meufeureuman lom ubak Nabi Harun, "Ingat kheueh! Banmandum peuseumahan khusos nyang jijok keu Ulôn nyang hana teutot nyan na kheueh jeumba gata. Nyan kheueh jeumba gata nyang ka teupeuteuntée keu siumu masa. Nyan Ulôn jok ubak gata dan keu banmandum keuturonan gata. 9 Nibak peuseumahan-peuseumahan nyang paleng gleh lom suci nyang hana teutot di ateueh miseubah, nyang seulanjut jih nyoe na kheueh keu gata: Keureubeuen sajian, keureubeuen peu amphon desya dan keureubeuen geunantoe rugoe. Banmandum nyan peuseumahan suci nyang ka jeuet jeumba gata dan jeumba aneuëk-aneuëk gata. 10 Nyan na kheueh suci keu gata, lé nyan, atranyan bah kheueh gata pajoh nibak teumpat nyang suci teuma. Teuma ureuëng agam mantong nyang jeuet jipajoh atra nyan. 11 Banmandum peuseumahan khusos nyang laén nyang jipeuseumah lé ureuëng Israel, keu Ulôn, nyan na kheueh keu gata cit teuma. Ulôn kubri keu gata meunan cit keu aneuëk-aneuëk gata nyang agam dan nyang inong. Peuratoran nyan teutab na keu siumu masa. Soe mantong anggota keuluwarga gata nyang hana kuto jeuet ji pajoh atra nyan. 12 Ulôn jok keu gata banmandum nyang paleng gét nibak hase teupot nyang phon nyang jipeuseumah lé ureuëng Israel keu Ulôn tieb-tieb thon, na kheueh minyéuk zaiton, ié anggô dan gandom. 13 Banmandum nyan na kheueh keu gata. Tieb-tieb anggota keuluwarga gata nyang hana kuto jeuet jipajoh atra nyan. 14 Peue-peue mantong nyang na di tanoh Israel nyang ka teupeukhusos keu Ulôn, nyan na kheueh keu gata. 15 Banmandum nyang phon-phon lahé lamkawan manusia meunan cit nibak beulatang peulara nyang jipeuseumah lé ureuëng Israel keu Ulôn, na kheueh keu gata cit teuma. Teuma gata harôh tateuboh aneuëk-aneuëk gata nyang tuha, meunan cit aneuëk beulatang hareuem nyang phon lahé. 16 Aneuëk-aneuëk harôh teuteuboh bak watée jihnyan meu umu sibuleuen. Yuem nyang ka teupeuteuntée keu yuem nyan na kheueh limong péng pirak, meunurot yuem nyang lazem nibak Khimah Ulôn. 17 Teuma meunyoe leumô, bubiri dan kaméng nyang phon-phon lahé, nyan hana jeuet teutuboh. Beulatang nyan meuteulak keu Ulôn dan nyan harôh teukeureubeuen. Gata siram kheueh darah jihnyan nibak miseubah dan gatatot kheueh teuma gapah jihnyan sibagoe keureubeuen. Bée jih nyang mangat nyan keubiet that-that galak até Ulôn. 18 Asoe sie nyan na kheueh keu gata, saban cit lagée dada dan pha jih nyang siblaih uneuen nyang jipeuseumah lom nyang jijok keu Ulôn. 19 Banmandum peuseumahan khusos nyang jiba lé ureuëng Israel ubak Ulôn, nyan Ulôn bri keu gata dan keu aneuëk-aneuëk gata agam ngon inong. Peuratoran nyan teutab na keu siumu masa dan jeuet keu ngon ikat peujanjian nyang hana hase teupeubateue Ulôn deungon gata dan keuturonan gata." 20 TUHAN meufeureuman lom ubak Nabi Harun, "Gata hana meutemé warésan meusapeue pi. Dinanggroe nyang Ulôn peujanjinyan hana meusaboh keubeueng tanoh pi nyang jeuet keu hak milék gata. Ulôn, TUHAN, na kheueh jeumba nibak warésan gata." 21 Geupeugah lé TUHAN ubak Nabi Harun, "Banmandum peuseumahan siper siploh ureuëng Israel Ulôn jok keu ureuëng-ureuëng Lewi. Nyan kheueh hak waréh awaknyan keubuet awaknyan di Khimah Ulôn. 22 Ureuëng-ureuëng Israel nyang laén hana jeuet jipeutoe ubak Khimah nyan mangat awaknyan bék jipeuteuka desya dan huköman maté ateueh droe awaknyan 23 Phon saát nyoe teuma ureuëng Lewi mantong kheueh nyang jeuet ji urôh Khimah Ulôn dan ateueh jih jitanggong banmandum tanggong jaweueb ateueh buet jihnyan. Peuratoran nyan teutab na cit teuma ubak keuturonan gata sampoe siumu masa. Ureuëng Lewi hana jiteumé warésan di Israel, 24 sabab keu hak waréh awaknyan ka Ulôn jok banmandum peuseumahan siper siploh nyang jipeuseumah lé ureuëng Israel keu Ulôn na kheueh sibagoe meuneubri nyang khusos. Nyang kheueh sabab jih keuhai ureuëng Lewi Ulôn peugah bahwa awaknyan hana meuteumé jeumba hak waréh di Israel." 25 TUHAN geuyue lom ubak Nabi Musa mangat jipeusampoe peurintah nyoe ubak ureuëng Lewi: Meunyoe gata tateurimong nibak ureuëng Israel peuseumahan siper siploh nyang geuseurah lé TUHAN ubak gata keu jeumba gata, atra nyan harôh teuma gata jok siper siploh keu TUHAN keu peuseumahan khusos gata. 27 Peuseumahan khusos nyan teuanggab saban deungon peuseumahan gandom barô dan ié anggô nyang barô teuma. 28 Deungon lagéenyan gatapi harôh tapeuseumah keu peuseumahan khusos ubak TUHAN siladum nibak peuseumahan siper siploh ureuëng Israel. Peuseumahan khusos nyan harôh gata jok ubak Imeum Nabi Harun. 29 Gata jok kheueh jeumba nyang paleng gét nibak peue nyang gata teurimong. 30 Óh kalheueh gata jok jeumba nyan, gata jeuet tacok nyang leubeh nyan, lagée sidroe ureuëng peutani meunan cit jicok peue nyang leubeh óh kalheueh jihnyan jiba peuseumahan. 31 Nyang leubeh nyan jeuet gata pajoh dipat mantong meusajan-sajan deungon keuluwarga gata, sibagoe upah nyang peubuet di dalam Khimah TUHAN. 32 Gata hana meusalah meunyoe nyan gata pajoh, asai mantong jeumba nyang paleng gét ka tapeuseumah ubak TUHAN. Bék gata peukuto peuseumahan suci ureuëng Israel deungon cara tapajoh sapeue-sapeue nibak peuseumahan nyan sigohlom jeumba nyang paleng gét teupeu khusos ubak TUHAN. Meunyoe gata taiengkeue peurintah nyan, gata teuma maté.

Teubileueng 19

1 TUHAN meufeureuman ubak Nabi Musa dan Nabi Harun 2 mangat geujak jok peuratoran-peuratoran nyoe ubak bansa Israel: Gata cok kheueh saboh leumô inong nyang bulée jih jagat lom teuma hana meucupa dan leumô nyan hántom lom teupeuguna keu ngon tarék beuban. 3 Tajok kheueh laju leumô nyan ubak Imeum Eleazar. Beulatang nyan harôh teuba u luwa khimah-khimah laju teusie dikeue imeum. 4 Di Imeum Eleazar harôh teuma geucok bacut darah beulatang nyan dan geureuték laju tujoh goe u teuh Khimah TUHAN nyan. 5 Banmandum beulatang nyan, meunan cit deungon kulét jih, asoe jih, darah dan asoe pruet jih, nyan banmandum harôh teutot dikeue imeum. 6 Óh lheuehnyan lé imeum geucok laju bacut kayée aras, saboh tangke hisop dan saboh untie teuma talo mirah, atra nyan geutiek laju u dalam apui nyang teungoh jipajoh leumô jagat nyan. 7 Óh ka lheueh nyan lé imeum geujak rhah laju peukayan gobnyan lom geumano teuma. Óh ka seuleusoe nyan barô kheueh jeuet geutamong u dalam khimah-khimah, teuma geuh nyan mantong kuto trok án mata uroe jilhob. 8 Meunan cit deungon ureuëng nyang tot leumô nyan jihnyan jijak rhah cit peukayan jih lom ngon jimano; ureuëng nyanpi mantong kuto sampoe án mata uroe jilhob. 9 Meunan cit deungon sidroe ureuëng nyang hana kuto jih nyan harôh jijak peusapat abée leumô nyan dan jijak keubah laju u teumpat nyang gleh di luwa khimah-khimah. Abée nyan jikeubah disinan mangat umat Israel hase jingui nyan keu jijak peugét ié upacara teupeu gleh keu teupeu amphon desya. 10 Ureuëng nyang peusapat abée leumô nyan harôh jijak rhah peukayan jih, teuma ureuëng nyan mantong kuto sampoe án mata uroe jilhob. Peuratoran nyan teutabna sampoe án siumu masa, bah kheueh nyan keu ureuëng Israel meunan cit keu ureuëng aséng nyang na tinggai lamkawan awaknyan. 11 Ureuëng nyang teumat manyét ureuëng nyan ka jeuet keu kuto nyang treb jih tujoh uroe. 12 Bak uroe nyang keu lhée dan nyang keu tujoh jihnyan harôh kheueh jipeugleh droe deungon ié upacara; barô kheueh ureuëng nyan teupeugah ka gleh. Teuma meunyoe uroe nyang keu lhée dan nyang keu tujoh jihnyan gohlom jijak peu gleh droe, jihnyan teutab kheueh lam keuadaan kuto. 13 Ureuëng nyang tupéeh deungon manyét dan hana teuma jijak peu gleh droe nyan na kheueh kuto, sabab jihnyan gohlom teusiram deungon ié upacara. Jihnyan ka jipeukuto Khimah TUHAN dan lé sababnyan jihnyan hanale teuanggab anggota umat Po teu Allah. 14 Meunyoe na sidroe ureuëng maté didalam khimah, soe mantong nyang na didalam khimah nyan atawa jitamong u dalam nyan, ureuëngnyan ka jeuet keu kuto nyang treb jih tujoh uroe. 15 Banmandum kendi dan kanot nyang hana meututob nyan pi ka jeuet keu kuto. 16 Tieb-tieb ureuëng nyang tupéeh deungon manyét nyang maté lé sabab keunong poh, atawa nyang maté keudroe jih di blang, ureuëng nyan ka jeuet keu kuto nyang treb jih tujoh uroe. Meunan cit deungon ureuëng nyang tupéeh deungon jirat ureuëng maté atawa ngon tuleueng ureuëng maté. 17 Keu teupeugleh ureuëng nyang kuto nyan, harôh teucok bacut abée nibak leumô inong nyang jagat nyang ka teutot keu teupeu amphon desya. Abée nyan harôh teupeu tamong u dalam saboh kanot, laju teuboh ié nyang teucok nibak ié nyang ji ilé. 18 Keuhai nyang phon, meunyoe na ureuëng maté didalam khimah, ureuëng nyang hana kuto harôh kheueh jicok saboh tangke hisop, laju jiceulob u dalam ié nyan, laju teuma jiseuték khimah nyan deungon banmandum nyang na didalam nyan, meunan cit deungon ureuëng nyang na disinan. Nibak hai nyang keu dua, na kheueh meunyoe sidroe-droe ureuëng tupéeh ngon manyét, keunong jirat atawa tuleueng ureuëng maté, ureuëng nyang hana kuto harôh kheueh jireuték ubak ureuëng nyang kuto nyan deungon cara nyang saban cit lagéenyan teuma. 19 Jihnyan harôh kheueh teureuték nibak uroe nyang keu lhée dan uroe nyang keutujoh. Bak uroe nyang keu tujoh nyan keumah kheueh upacara teupeu gleh ureuëng nyang kuto nyan. Ureuëng nyan harôh jijak rhah keudroe peukayan jih sigoeguih jimano teuma. Phon nibak mata uroe jilhob ureuëng nyan ka jeuet keu gleh. 20 Ureuëng nyang jeuet keu kuto dan hana jipeuna upacara teu peu gleh droe, ureuëng nyan teutab kuto sabab gohlom teu siram deungon ié upacara. Jihnyan ka jipeukuto Khimah TUHAN, dan hanale teu anggab anggota umat Po teu Allah. 21 Peuratoran nyan teutab na keu siumu masa. Di ureuëng nyang reuték ié upacara nyan harôh kheueh teuma jirhah peukayan jih nyan, dan ureuëng nyang keunong ié nyan ka jeuet keu kuto sampoe án mata uroe jilhob. 22 Barang nyang jimat lé ureuëng kuto nyan ka jeuet keukuto, dan di ureuëng laén nyang mat atranyan pi ka jeuet keukuto teuma trok án mata uroe jilhob.

Teubileueng 20

1 Nibak buleuen sa banmandum umat Israel ka trok u padang pasi Zin dan laju jitinggai teutab di Kades. Miryam meuninggai dan laju jipeukubu disinan. 2 Bak saboh watée nibak teumpat khimah-khimah awaknyan ka hanale meu ié. Teuma jijak kheueh awaknyan ubak Nabi Musa dan Nabi Harun 3 sira ji meu ôk-ôk, "leubeh gét kamoe nyoe maté dikeue TUHAN meusajan-sajan deungon syedara-syedara kamoe! 4 Keupeue droeneueh neuba kamoe u padang pasi nyoe? Peu kheueh mangat jeuet kamoe nyoe maté disinoe meusigoe-sigoe deungon beulatang peulara kamoe? 5 Keupeue droeneueh ba kamoe meuteubiet nibak tanoh Meusé u teumpat nyang lumpah peudeh ngon seungsara nyoe sampoe kamoe hana hase kamoe pula sapeue nibak tanoh nyoe? Disinoe hana gandom, hana bak ara, anggô dan geulima. Meunan cit ié keu teujieb pi hana disinoe!" 6 Nabi Musa dan Nabi Harun laju geujak geupeu jiôh droe nibak awaknyan dan laju geujak dong di babah pintoe Khimah TUHAN. Awaknyan laju geusujut, dan laju teuma deuh cahya TUHAN nyang teuka u ateueh awaknyan. 7 TUHAN meufeureuman lom ubak Nabi Musa, 8 "Gata cok kheueh tungkat nyang na dikeue Peuto Peujanjian, laju lé gata dan Nabi Harun gatajak peusapat banmandum umat. Dikeue awaknyan banmandum, gata harôh tapeugah ubak gunong batée nyang na disinan mangat nibak gunong batée nyan ji peuteubiet ié. Meunan kheueh gata ka tapeuteubiet ié nibak gunong batée nyan mangat rakyat dan beulatang peulara awaknyan hase jijieb ié." 9 Teuma geujak kheueh laju Nabi Musa geujak cok tungkat nyan lagée nyan geupeurintah lé TUHAN. 10 Nabi Musa dan Nabi Harun laju teuma geupeusapat banmandum umat dikeue gunong batée nyan. Óh lheueh nyan Nabi Musa geupeugah, "Deungoe kheueh nyoe, hai kawöm peumbeurontak! Peu kheueh kamoe harôh kamoe peuteubiet ié lam gunong batée nyoe?" 11 Lé Nabi Musa laju geubeuôt tungkat geuh nyan dan tungkat nyan laju geu seukok u ateueh gunong batée nyan dua goe. Teuma jiteubiet kheueh ié nibak batée nyan nyang lumpah teuga, sampoe banmandum ureuëng dan beulatang peulara hase jijieb. 12 Teuma TUHAN geusapa Nabi Musa dan Nabi Harun, kheun Gobnyan, "Sabab gata kureueng meuiman ubak Ulôn keu teupeugah kuasa Ulôn nyang suci dikeue bansa Israel, gata hana teuma tapimpén awaknyan jitamong u nanggroe nyang Ulôn peujanji keu awaknyan." 13 Nyan kheueh mata ié Meriba. Di Teumpat nyan ureuëng-ureuëng Israel ji meu ôk-ôk lom ubak TUHAN, nibak teumpat nyan cit TUHAN geupeudeuh kuasa Geuh nyang suci ubak bansa nyan. 14 Óh lheueh nyan nibak Kades, Nabi Musa laju geukirém utosan-utosan keujijak meuhadab ubak Raja Edom. Kheun awaknyan, "Kamoe nibak sukée-sukée Israel nyan mantong na hubongan jih deungon syedara Teungku po. Di Teungku po mungken neuteupeue keususahan nyang teuka ateueh kamoe. 15 Lé indatu kamoe geujak u nanggroe Meusé dan geutinggai teutab disinan meuthon-thon treb jih. Indatu kamoe dan kamoe jipeusaneut hana gét lé bansa Meusé, 16 dan kamoe meulakée ubak TUHAN kamoe meulakée tulông. TUHAN geudeungoe teumawok kamoe laju geukirém sidroe malaikat. Malaikat nyan kheueh nyang pimpén kamoe meuteubiet nibak tanoh Meusé. Jinoenyoe kamoe ka na di Kades, saboh bandar nibak bataih wilayah Teungku po. 17 Kamoe lakée ngon meuharab beu Teungku peu idhin ubak kamoe mangat jeuet kamoejak rot nanggroe Teungku nyoe. Kamoe dan beulatang peulara kamoe hana meusimpang ho laén dan hana teuma kamoe tamong u lampôh-lampôh anggô. Dan meunan cit hana teuma kamoe jieb ié nibak mon-mon nyang atra Teungku. Kamoe teuma kamoe jak mantong di ateueh rot ueh rayeuk sampoe án kamoe teubiet nibak daerah Teungku po." 18 Teuma lé ureuëng Edom nyan jijaweueb, "Pakriban mantong gata-gata nyoe hana kamoe peu idhin gatajak rot wilayah kamoe. Meunyoe gata tapeusak droe, kamoe teuma kamoe seurang gata!" 19 Ureuëng Israel nyan jipeugah, "Kamoe teuma kamoe jak rot jalan rayeuk, dan meunyoe kamoe atawa beulatang peulara kamoe nyoe jijieb ié droeneueh, nyan teuma kamoe bayeue. Kamoe meuheuet keukamoe liwat mantong." 20 Ureuëng-ureuëng nyan jipeugah lom, "Han jeuet!" Laju awaknyan jiteubiet deungon tantra nyang jai lumpah na lom teuga keu jijak prang bansa Israel. 21 Teuma ureuëng Israel nyan laju jigisa dan jijak mita rot laén sabab ureuëng Edom nyan hana jibri idhin rot nanggroe jih. 22 Banmandum umat Israel nyan laju jitinggai Kades dan trok laju u Gunong Hor, 23 nibak bataih ngon Edom. Disinan TUHAN geupeugah ubak Nabi Musa dan Nabi Harun, 24 "Nabi Harun hana geutamong u nanggroe nyang ka Ulôn peujanji ubak bansa Israel; jihnyan teuma maté sabab gata ban dua ka talawan peurintah Ulôn tô ngon mata ié Meriba. 25 Gata ba kheueh Nabi Harun dan Eleazar, aneuëk jih nyan jijak teungoh u ateueh Gunong Hor. 26 Gatasut kheueh peukayan Nabi Harun nyan dan tapeusok kheueh laju ubak Eleazar. Nabi Harun teuma maté di teumpat nyan." 27 Nabi Musa laju geupeubuet peue nyang ka geupeurintah lé TUHAN ubak gobnyan. Nabi Musa, Nabi Harun dan Eleazar laju geujak teungoh u ateueh Gunong Hor dan jikalon lé banmandum umat. 28 Laju Nabi Musa geusut peukayan Nabi Harun geupeusok laju peukayan nyan ubak Eleazar. Di ateueh pucak gunong nyan Nabi Harun laju meuninggai donya, óh lheueh nyan Nabi Musa ngon Eleazar geutreun laju diateueh gunong nyan dan geujak gisa lom teuma. 29 Banmandum umat jideungoe bahwa Nabi Harun ka meuninggai donya, dan awaknyan banmandum jimeukabong keu lhée ploh uroe treb jih.

Teubileueng 21

1 Arad na kheueh saboh banda di siblah seulatan nanggroe Kanaan. Bak watée raja banda nyan jideungoe bahwa ureuëng-ureuëng Israel teuka jijak liwat rot Atarim, jijak kheueh laju awaknyan jijakprang bansa nyan dan laju jiteumeteun napadub droe lamkawan awaknyan. 2 Lé ureuëng Israel nyan jimeukaôi lagée nyoe ubak TUHAN, "Meunyoe Droeneueh ya TUHAN neubri beumeunang nyang muteulak keu kamoe ateueh bansa nyan, awaknyan dan banda-banda awaknyan teuma kamoe gulong sampoe án habéh." 3 TUHAN geuteurimong peue nyang jilakée lé ureuëng Israel nyan dan geutulông awaknyan geupeutaloe ureuëng Kanaan. Teuma ureuëng Israel laju jijak prang ureuëng-ureuëng Kanaan nyan sampoe ureuëng Kanaan nyan taloe habéh binasa meunan cit deungon banda-banda awaknyan jipeu hanco banmandum, laju teumpatnyan jiboh nan Horma. 4 Óh lheueh nyan ureuëng Israel laju jitinggai Gunong Hor nyan, dan jicok rot nyang beusôt u Lhok Akaba, keu jikeulileng daerah Edom. Teuma di teungoh rot ueh, bansa nyan ka habéh saba jih, 5 dan laju ji ôk-ôk lom ubak Po teu Allah dan Nabi Musa. Awaknyan jipeugah, "Keupeue Droeneueh ba kamoe neupeuteubiet nibak nanggroe Meusé? Peu kheueh keu neujak poh maté kamoe di teungoh padang pasi nyoe? Disinoe hana peunajoh, meunan cit ié jieb pi hana. Kamoe luwat deungon peunajoh nyang tabeue nyoe!" 6 Teuma TUHAN laju geupeutreun uleue nyang lumpah meubisa lamkawan bansa nyan. Jai that-that ureuëng Israel nyang jikhab lé uleue-uleue meubisa nyan. 7 Laju bansa nyan jijak meuhadab ubak Nabi Musa dan jipeugah, "Kamoe ka meudesya sabab kamoe meu ôk-ôk ubak TUHAN dan ubak droeneueh. Neu meudoá kheueh ubak TUHAN mangat jeuet uleue-uleue nyoe jiwéeh beujiôh nibak kamoe." Lé Nabi Musa laju geumeudoá keu bansa-bansa nyan. 8 Laju TUHAN meufeureuman ubak Nabi Musa geuyue peugét saboh uleue nibak logam dan atranyan geuyue keubah di ateueh saboh taméh. Soe mantong ureuëng nyang jikab lé uleue, laju puléh meunyoe jikalon uleue nyang teupeugét nibak logam nyan. 9 Lé Nabi Musa laju geupeugét uleue nibak teumaga dan geukeubah laju di ateueh taméh lagée nyang geuyue lé TUHAN ubak gobnyan. Tieb-tieb ureuëng nyang jikab lé uleue, hase puléh meunyoe jikalon u ateueh uleue teumaga nyan. 10 Ureuëng Israel jibeurangkat lom, laju jipeudong khimah di banda Obot. 11 Óh kalheueh jitinggai teumpat nyan, awaknyan laju teuma jipeudong khimah di teumpat beukaih bangunan reuloh Abarim di padang pasi siblaih u timu daerah Moab. 12 Óh lheuehnyan awaknyan laju jipeudong khimah di Pantôn Zered. 13 Beudôh nibak teumpat nyan awaknyan jijak lom dan jipeudong teuma khimah di meurandeh Krueng Arnon, nibak padang pasi nyang meubinteueng u wilayah ureuëng Amori. Krueng Arnon nyan na kheueh bataih daerah ureuëng Moab deungon daerah ureuëng Amori. 14 Nyang kheueh sabab jih dalam 'Kitab Muprang TUHAN' teutuléh: "... Gampông Waheb, didaerah Sufa dan pantôn-pantôn jihnyan; Krueng Arnon 15 dan barieh nyang meulinteung trok u gampông Ar dan beusôt u bataih daerah ureuëng Moab." 16 Beudôh nibak teumpat nyan awaknyan laju jijak u teumpat nyang teupeunan Beer, makna jih mon-mon. Disinan TUHAN na meufeureuman ubak Nabi Musa, "Gata yue kheueh umat jeuet jimeusapat; Ulôn keuneuk bri ié keu awaknyan." 17 Nibak watée nyan ureuëng Israel laju jimeu ca-e lagéenyoe, "He, mon-mon, beumeue bok-bok kheueh ié gata, kamoe teuma meusambot gata deungon lagu. 18 Mon nyang geukueh lé ureuëng-ureuëng patot dan lé ureuëng peumimpén bansa geukueh deungon tungkat keupeumimpénan geuh dan deungon tungkat tanda kuasa awaknyan." Nibak padang pasi awaknyan jiminah u Matana, 19 dan beudôh nibak teumpat nyan u Nahaliel, laju teuma u Bamot, 20 óh lheueh nyan u pantôn didaerah ureuëng Moab, di miyueb pucak Gunong Pisga nyang meuhadab u padang pasi. 21 Laju bansa Israel jikirém utosan-utosan ubak Sihon, raja Amori, keu jijak peusampoe peusan nyoe, 22 "Neu peuidhin kheueh kamoe beujeuet kamojak rot nanggroe Teungku. Kamoe dan beulatang kamoe hana meusimpang ho laén dan hana teuma kamoe tamong u dalam blang atawa lampôh-lampôh anggô atawa kamoe jieb ié nibak mon-mon. Kamoe hana meu simpang nibak rot ueh raya trok án kamoe teubiet nibak nanggroe Teungku." 23 Teuma Raja Sihon nyan hana jipeu idhin ureuëng-ureuëng Israel nyan jijak rot nanggroe jih nyan. Raja nyan jipeusapat laju tantra dan jibeudôh disinan laju jijak u Yahas di padang pasi dan laju jiprang ureuëng-ureuëng Israel nyang na disinan. 24 Teuma lam prang nyan jai that-that tantra Amori nyang jipoh maté lé bansa Israel. Laju ureuëng-ureuëng Israel nyan jiduek di daerah awaknyan phon di Krueng Arnon trok u Krueng Yabok, nyan na kheueh bataih daerah ureuëng Amon, sabab nibak bataih nyan leumpah teuga peutahanan jih. 25 Deungon lagéenyan ureuëng Israel jireubot banmandum banda ureuëng Amori, jitamong cit keunan Hesybon dan banmandum banda ubit di bansilingka nyan, laju awaknyan pi tinggai teutab disinan. 26 Hesybon na kheueh ma banda Raja Sihon. Jihnyan ka lheueh na jimuprang jilawan raja Moab dan jireubot daerah ureuëng nyan sampoe sijiôh Krueng Arnon. 27 Nyang kheueh sabab jih lé pujangga geumeu ca-e lagéenyoe, "Teuka kheueh u Hesybon, u banda Raja Sihon. Kamoe meuheuet keuneuk kamoe kalon banda nyoe ji peugét dan peubarô lom teuma. 28 Na sigoe teujadi dibanda nyoe pasokan Sihon jimaju lagée apui hu. Nyang jipeuhanco banda Ar di Moab, dan jikuasa bukét-bukét disipanyang Arnon. 29 Wahe bansa Moab, gata ceulaka! Peumujoe Kamos, gata binasa! Gata geupeubiyeu lé Allah keu gata meungungse, kawöm ureuëng inong gata jeuet keu tawanan ureuëng Amori. 30 Teuma jinoenyoe binasa kheueh keuturonan awaknyan, nibak ban sipanyang rot ueh phon di Hesybon u Dibon, nibak Nasyim u Nofah rab ngon Medeba." 31 Deungon lagéenyan bansa Israel ka tinggai teutab di daerah ureuëng Amori. 32 Óh lheuehnyan Nabi Musa geuyue teuma ureuëng-ureuëng nyan jijak mita rot nyang paleng gét keu jijak prang banda Yaezer. Di ureuëng Israel pih jireubot laju banda nyan meunan cit deungon banda-banda ubit nyang na dibansilingka nyan dan ji use laju ureuëng Amori nyang na tinggai disinan. 33 Óh lheueh nyan ureuëng Israel laju jiwet dan jicok rot ueh nyang beusôt u Basan. Raja Og di Basan jimaju laju deungon tantra keu jijak prang Ureuëng Israel di banda Edrei. 34 TUHAN meufeureuman ubak Nabi Musa, "Bék gata takot keu jihnyan. Ulôn teuma Lôn peumeunang gata. Gata teuma tapeutaloe jihnyan, banmandum rakyat jih dan nanggroe jih. Gata peusaneut kheueh jihnyan lagée gata peusaneut ateueh Raja Sihon nyang jimat peurintah di Hesybon." 35 Teuma ureuëng Israel jipeutaloe ngon jipoh maté Raja Og, aneuëk-aneuëk jih dan banmandum rakyat jih; hana nyang na teutinggai. Óh lheuehnyan awaknyan laju jitinggai ngon jiduek nibak nanggroe nyan.

Teubileueng 22

1 Bansa Israel nyan jibeurangkat lom dan laju jipeudong khimah ateueh darat Moab, di daerah meurandeh Krueng Yordan, toe ngon banda Yerikho. 2 Bak watée raja Moab nyang nan jih Balak, aneuëk Zipor, jideungoe pakriban bansa Israel nyan jipeusaneut ateueh ureuëng Amori, dan bahwa bansa Israel nyan gét that jai jeumeulah jih, yoe that-that raja nyan dan meunan ngon banmandum rakyat jih nyan teumakot banmandum. 4 Lé ureuëng Moab nyan laju jipeugah ubak peumimpén Midian, "Hana treb le geureumbolan nyan ji reupah ngon jiuét peue nyang deuh nibak binéh geutanyoe lagée leumô jirot naleueng di blang." Teuma Raja Balak 5 geu kirém laju utosan mangat jijak hôi Bileam, aneuëk Beor, nyang tinggai di banda Petor to ngon Krueng Efrat di daerah Amau. Awaknyan geuyue jak peusampoe ubak Bileam peusannyoe nibak Raja Balak, "Beuneu teupeu kheueh, na saboh bansa nyang teuka nibak nanggroe Meusé; awaknyan ka meutabu bansaboh nyoe dan ka siab jikeuneuk prang daerah kamoe. 6 Awaknyan leubeh teuga nibak kamoe. Lé sababnyan, tateuka kheueh! Neukutok kheueh awaknyan keu ulôn. Mungken kamoe hase kamoe peutaloe awaknyan dan kamoe use awaknyan nibak nanggroe nyoe. Sabab ulôn yakén that sabab ureuëng nyang droeneueh bri beureukat teuma meuteumé beureukat, dan ureuëng nyang droeneueh kutok teuma meuteumé bala." 7 Deungon nyan jijak kheueh laju peumimpén Moab dan Midian deungon jiba upah keu Bileam mangat geuhnyan geutem kutok ureuëng Israel. Óh ka trok awaknyan ubak Bileam, awaknyan laju jipeusampoe ubak gobnyan peue nyang ka geupeusan lé Raja Balak watée jikeuneuk jak meurumpok ngon Bileam nyan. 8 Kheun Bileam ubak awaknyan, "Gata dom kheueh disinoe. Singoh ulôn peugah ubak gata peue nyang ka geupeugah lé TUHAN ubak ulôn." Teuma lé peumimpén Moab nyan laju jitinggai di teumpat Bileam. 9 Lé Po teu Allah laju geujak ubak Bileam dan geutanyong, "Soe kheueh ureuëng-ureuëng nyang tinggai di teumpat gata, Bileam?" 10 Geu jaweueb lé Bileam, "Awaknyan utosan Raja Balak nibak Moab jijak keunoe jipeugah 11 bahwa na saboh bansa nyang teuka nibak nanggroe Meusé ka meutabu bansaboh nyoe. Raja Balak geuyue ubak ulôn mangat lôn kutok bansa nyan keu jihnyan, mangat hase rajanyan jijak prang ngon ji use ureuëng nyan." 12 Geupeugah lom lé Po teu Allah ubak Bileam, "Bék kheueh gatajak ngon ureuëng nyan, dan bék teuma gata kutok bansa nyan, sabab awaknyan ka Ulôn bri beureukat." 13 Óh singoh beungoh Bileam laju geupeugah ubak ureuëng nyang jikirém lé Raja Balak nyan, "Gata woe kheueh laju, TUHAN hana geupeu idhin ulôn jak deungon gata." 14 Teuma jigisa kheueh laju awaknyan ubak Balak dan jipeusampoe ubak geuhnyan bahwa Bileam hana geutem jak deungon droe jihnyan. 15 Lé Raja balak geukirém lom leubeh le utosan nyang leubeh manyang pangkat jih nibak nyang phon. 16 Awaknyan jipeusampoe laju ubak Bileam peusan nyoe nibak Raja Balak, "Ulôn lakée deungon meuharab that: neuteuka kheueh, dan bék kheueh neutulak. 17 Ulôn kubri upah keu droeneueh nyang jai that, dan ulôn peubuet peue mantong nyang droeneueh peugah. Neuteuka kheueh, dan neukutok kheueh bansa nyan keu ulôn." 18 Teuma Bileam geujaweueb, "Bahpi nyan méuh dan pirak nyang na didalam meuligoe Raja Balak jijok banmandum nyan keu ulôn, teuma ulôn hana hase lôn iengkeue peue nyang ka geupeurintah lé TUHAN ubak ulôn, Po teu Allah nyang ulôn seumah. Bahpi nyan hai nyang paleng ubit ulôn hana jeuet lôn lawan hai nyan. 19 Teuma bahpi meunan bah kheueh nibak malam nyoe gata mudom disinoe, lagée nyang ka jipeubuet lé utosan nyang ka awai dilée. Ulôn meuheuet lôn keuneuk teupeu peu kheueh mantong na nyang teuma geupeugah lé TUHAN ubak ulôn." 20 Malam nyan Po teu Allah teuka lom ubak Bileam dan geupeugah, "Ureuëng-ureuëng nyan jiteuka keu jilakée gata mangat gatajak deungon awaknyan. Teuma meusiab-siab kheueh mangat gatajak. Teuma gata peubuet kheueh peue nyang teupeurintah ubak gata." 21 Óh singoh beungoh Bileam laju geupasang peulana ateueh keuleudée geuh, laju geujak meusigoe deungon mandum peumimpén Moab nyan. 22 Teuma bak watée Bileam geujak, Po teu Allah gét that beungéh. Teungoh Bileam geupasang ateueh keuleudée geuhnyan, ji iréng lé dua droe peulayan gobnyan, laju malaikat TUHAN geudong di teungoh-teungoh rot ueh rayeuk keu geu pagab geuhnyan nyang teungoh geujak. 23 Jikalon malaikat TUHAN ka teudong disinan deungon peudeueng bak jaroe nyang ka teusuet didalam sarong, laju keuleudée nyan jijak wet holaén nyang meusimpang nibak rot ueh nyang teungoh jijak nyan, dan jijak laju u dalam blang. Bileam laju geuseunuét keuleudée nyan mangat jigisa lom ubak rot nyang phon. 24 Óh lheuehnyan malaikat TUHAN geudong laju lom di teungoh rot ueh nyang leubeh sampiek, nibak dua boh lampôh anggô deungon bintéh beuton nyang meuapet siblah saho. 25 Bak watée keuleudée nyan deuh lom jikalon malaikat TUHAN nyang ka na teudong disinan, laju keuleudée nyan ji seuek bak binéh sampoe gaki Bileam teuseupet bak bintéh beuton nyan. Bileam geu seunuét lom keuleudée nyan. 26 Lé malaikat TUHAN geuminah teuma, dan laju geudong bak binéh nyang leubeh sampiek, sampoe ka hanale rot ueh keu rot jijak bah kheueh nyan di blaih wie meunan cit di blaih uneuen. 27 Watée jikalon malaikat TUHAN nyan, keuleudée nyan laju jpeureubah droe. Bileam meutamah beungéh laju geuseunuét lom keuleudée geuh nyan deungon tungkat. 28 Lé TUHAN geupeujeuet keuleudée nyan hase jipeugah haba. Jipeugah lé beulatang nyan ubak Bileam, "Peu kheueh nyang ulôn peubuet keu Teungku sampoe Teungku neu seunuét ulôn nyoe trok án lhée goe?" 29 Jaweueb Bileam, "Gata tapeu meuén ulôn! Seukira jih na peudeueng nibak ulôn, ka pasti gata ulôn cang sampoe án maté!" 30 Ji Jaweueb lé keuleudée nyan, "Bukon kheueh ulôn nyoe keuleudée droeneueh hei Teungku nyang yoh awaikon ilée ulôn nyoe ka neupasang? Peu kheueh kana ulôn meubantah ateueh Teungku?" "Hana," jaweueb Bileam. 31 Lé TUHAN geupeuleumah ubak Bileam malaikat TUHAN nyang ka teudong disinan deungon peudeueng ka teusuet sarong ka siab nibak jaroe malaikat nyan. Siat nyan cit Bileam geusujut ubak tanoh sira geujok seumah. 32 Malaikat TUHAN laju geutanyong, "Pakon droeneueh seunuét keuleudée droeneueh trok án lhée goe? Ulôn nyoe teuka keu lôn jak tam gata, sabab meunurot peundapat ulôn hana gét droeneueh neujak keudéh. 33 Bak watée keuleudée droeneueh nyan jikalon ulôn, keuleudée droeneueh nyan jiseuek u binéh sampoe án lhée goe. Meunyoe hán, pasti droeneueh ka ulôn poh maté, teuma keuleudée nyan ulôn peuseulamat." 34 Geujaweueb lé Bileam, "Ulôn ka meudesya. Ulôn hana lôn teupeu bahwa droeneueh neudong di ateueh rot ueh keu neu pagab-pagab ulôn. Teuma jinoenyoe, meunurot peundapat Teungku hana gét ulôn jak laju ubak teumpat nyang lôn tuju, jinoenyoe bah ulôn woe lom teuma." 35 Teuma malaikat TUHAN geupeugah, "Neu seutôt kheueh meusajan deungon ureuëng-ureuëngnyan. Teuma droeneueh jeuet neupeugah peue nyang ulôn peugah." Bileam laju geujak lom teuma deungon ureuëng-ureuëng nyang geu kirém lé Raja Balak nyan. 36 Bak watée Balak jideungoe bahwa Bileam teuma geuteuka, gobnyan geujak tueng Bileam di banda Moab, nyang teuduek jih to ngon binéh Krueng Arnon, to teuma ngon bataih daerah Moab. 37 Geupeugah lé Raja Balak nyan ubak Bileam, "Pakon droeneueh hana neuteuka bak watée ulôn jaktueng phon-phon that? Peu kheueh neupike ulôn nyoe hana hase ulôn bayeue droeneueh?" 38 Geu jaweueb lé Bileam, "Ka jeuet, jinoenyoe ulôn ka trok lôn teuka. Teuma ulôn nyoe hana hak ulôn peugah peue-peue mantong keucuali Po teu Allah nyang yue ubak ulôn." 39 Teuma geujak kheueh laju Bileam deungon Raja Balak nyan u banda Huzot. 40 Nibak teumpat nyan Balak laju geukeureubeuen na meupadubboh leumô ngon bubiri. Siladum nibak sie nyan jijok laju ubak Bileam dan bubena peumimpén nyang na meusajan-sajan ngon gobnyan. 41 Óh singoh beungoh nyan Balak geuba Bileam jak teugoh bukét Bamot Baal. Nibak teumpat nyan Bileam hase geukalon siladum nibak bansa Israel.

Teubileueng 23

1 Kheun Bileam ubak Raja Balak nyan, "Gata peudong kheueh laju di teumpatnyoe tujoh boh miseubah keu ulôn, dan gata peusiab teuma disinan tujoh boh leumô agam dan tujoh boh teuma bubiri agam." 2 Raja Balak nyan geupeubuet laju lagée nyang geupeugah lé Bileam ubak gobnyan. Di ateueh tieb-tieb miseubah nyan awaknyan keubah laju saboh leumô agam dan saboh bubiri agam. 3 Laju Bileam geupeugah ubak Raja Balak, "Gata dong kheueh to ngon keureubeuen nyang teutot atra droeneueh nyan. Siat nyoe ulôn jak ngieng peu kheueh TUHAN geutem meurumpok deungon ulôn atawa hana. Teuma ulôn peugah banmandum peue-peue nyang geupeugah lé TUHAN ubak ulôn." Teuma Bileam geujak laju sidroe gobnyan ubak pucak saboh bukét, 4 dan disinan Po teu Allah teuka laju ubak gobnyan. Geupeugah lé Bileam ubak Po teu Allah, "Ulôn ka ulôn peudong tujoh boh miseubah dan ulôn peuseumah saboh leumô agam dan saboh teuma bubiri agam di ateueh maséng-maséng miseubah nyan." 5 Laju TUHAN geubri tée ubak Bileam peue nyang harôh geupeugah, dan geuyue laju Bileam nyan geugisa ubak raja Balak mangat geujak peutrok peusan TUHAN keu jih nyan. 6 Bileam laju geugisa dan geukalon Balak mantong teudong to ngon keureubeuen nyang teutot atra geuh nyan, meusajan-sajan deungon banmandum peumimpén Moab. 7 Laju Bileam geumeu lagu deungon nubuat nyoe, "Nibak Aram, gunong-gunong di timu sidéh, Balak, raja Moab jijak hôi ulôn, geupeugah, 'Neuteuka kheueh, dan neumeututoe kheueh keu ulôn. Neukutok kheueh bansa Israel nyan!' 8 Peu kheueh mungken ulôn kutok nyan, geupeugah lé Po teu Allah hana teukutok? Mungken kheueh ulôn keunong huköm, meunyoe TUHAN hana geumeuhuköm? 9 Nibak ateueh pucak gunong-gunong ulôn kalon awaknyan: nibak bukét-bukét ulôn pandang awaknyan. Ngieng kheueh, saboh bansa nyang teu aséng keudroe hana jitamong ubak kawöm bansa-bansa laén. 10 Keuturonan Nabi Yakub lagée ano di panté nyang hana hase teubileueng; bansa Israel nyan ramé jih hana ngon peusa. Seumoga ulôn maté lagée ureuëng nyang jujoe kira jih ajai ulôn lagée ajai ureuëng-ureuëng nyan." 11 Laju Raja Balak geupeugah ubak Bileam, "Peu kheueh nyang teupeubuet ateueh ulôn? Gata ulôn ba keunoe mangat takutok musoh-musoh ulôn. Teuma meubalek gata bri beureukat ateueh awaknyan." 12 Geujaweueb lé Bileam, "Ulôn teuma hase ulôn peubuet peue nyang ka TUHAN yue ubak ulôn." 13 Laju Raja Balak geupeugah lom ubak Bileam, "Jak kheueh geutanyoe tajak meusajan-sajan u teumpat nyang laén; phon sinan droeneueh jeuet neukalon teuma siladum mantong nibak bansa Israel. Neukutok kheueh laju awaknyan enteuk phon disinan." 14 Teuma Raja Balak geuba laju Bileam u padang Zofim, di pucak Gunong Pisga. Meunan cit disinan laju geupeudong tujoh boh miseubah dan geupeuseumah laju saboh leumô agam dan saboh teuma bubiri agam di ateueh maséng-maséng miseubah nyan. 15 Geupeugah lé Bileam ubak Balak, "Tinggai kheueh droeneueh disinoe, to ngon keureubeuen nyang teutot atra Teungku, jinoenyoe ulôn jak meurumpok deungon TUHAN disinan." 16 TUHAN geumeurumpok laju deungon Bileam dan geubri tée laju ubak gobnyan peue nyang harôh geupeugah, laju gobnyan geugisa ubak Balak keu geujak peusampoe peusan TUHAN nyan. 17 Teuma geugisa laju Bileam geujak meurumpok ngon Balak nyang mantong teudong to ngon keureubeuen nyang teutot atra geuhnyan, meunan cit na disinan dumna peumimpén ureuëng Moab. Raja Balak nyan laju geutanyong peue nyang ka geupeugah lé TUHAN ubak Bileam nyan, 18 laju Bileam geumeu lagu lom lagée nyoe, "Hai, Balak, aneuëk Zipor, neujak kheueh keunoe, deungoe kheueh peue nyang ulôn peugah nyoe. 19 Po teu Allah kon lagée manusia nyang mudah meunyeusai dan galak teuma meubuhak bak peugah haba. Meunyoe Po teu Allah meujanji, janji nyan pasti geupeutrok! Meunyoe Gobnyan geupeugah haba, nyan ka teuntée teupeubuet teuma! 20 Ulôn geuyue bri beureukat; dan meunyoe Po teu Allah nyang bri beureukat, nyan hana hase ulôn tarék lom teuma. 21 Bak Nabi Yakub hana leumah buet nyang jeuhet; bak ureuëng Israel hana teuma deuh nyang payah-payah. TUHAN, Po teu Allah awaknyan, sabena deungon awaknyan. Awaknyan jimeusurak: Gobnyan kheueh Raja! 22 Po teu Allah nyang ba awaknyan geupeuteubiet nibak nanggroe Meusé; lagée banteng kleuet nyang jimeulo keu awaknyan. 23 Hana iéleumé sihe nyang hase keunong ateueh Nabi Yakub hana teuma iéleumé tanueng nyang meudaya u ateueh ureuëng Israel. Keuhai bansa nyan gob laén teuma jipeugah, 'Kalon, buet ajaéb nyang geupeuleumah lé Po teu Allah!' 24 Bansa nyan jibeudôh lagée singa inong, dan jidong óh cot na lagée singa agam. Singa nyan hana lom jiéh sigohlom ji teugom umpeuen jih dan jijieb darah musoh nyang jeuet keu umpeuen jihnyan." 25 Laju Balak jipeugah ubak Bileam, "Ka kheueh nyan, meunyoe gata hana cit tatem kutok bansa Israel; teuma bék kheueh cuba-cuba neubri beureukat keu awaknyan!" 26 Jaweueb Bileam, "Bukon kheueh ka lheueh ulôn peugah ubak Teungku bahwa ulôn teuma lôn peubuet peue-peue mantong nyang geupeurintah lé TUHAN?" 27 Geupeugah lom lé Raja Balak ubak Bileam, "Bôh jak kheueh geutanyoe tajak u teumpat nyang laén, pat tateupeue, mungken diteumpat nyan teuma Po teu Allah geupeu biyeu gata kutok ureuëng Israel keu ulôn." 28 Teuma Raja Balak nyan laju jiba Bileam u ateueh pucak Gunong Peor nyang meuhadab u padang pasi. 29 Geupeugah lé Bileam ubak Raja Balak nyan, "Neupeudong kheueh laju tujoh boh miseubah disinoe dan neupeusiab kheueh teuma tujoh boh leumô agam dan tujoh boh teuma bubiri agam." 30 Raja Balak nyan geupeubuet laju lagée nyang geupeurintah lé Bileam. Gobnyan geukeureubeuen laju saboh leumô agam dan saboh teuma bubiri agam di ateueh tieb-tieb miseubah nyan.

Teubileueng 24

1 Jinoenyoe Bileam ka geuteupeue keuheundak TUHAN bahwa gobnyan geubri beureukat ubak bansa Israel. Sababnyan gobnyan hanale geujak mita tanda-tanda lagée nyang ka geupeubuet nyang ka nyoe. Bileam geupandang u arah padang pasi, 2 dan geungieng bansa Israel teungoh jipeudong khimah seucara meukeulompok-keulompok meunurot sukée bansa awaknyan maséng-maséng. Laju Roh Po teu Allah geutreun geukuasa ateueh Bileam nyan, 3 dan Bileam nyan laju teuma geupeugah nubuat nyoe, "Nyoe kheueh peusan Bileam, aneuëk Beor, nyang tutoe haba sidroe ureuëng keumalon 4 nyang ka geudeungoe tutoe haba Po teu Allah dan geukalon nyang teupeudéh nibak Nyang Mahakuasa, sira teu éh, teuma mata geuh teutab teubleuet. 5 Padubna gét jih khimah-khimah droeneueh hai Nabi Yakub, dan teumpat-teumpat tinggai gata hai ureuëng Israel! 6 Lagée pantôn nyang luwah meureutang, atawa taman bungöng nibak binéh krueng; lagée bak gaharu nyang geupula lé TUHAN, atawa bak aras nyang na nibak lueng. 7 Awaknyan meuteumé ié ujeuen nyang meulimpah, bijéh sinemoh nyang meuteumé ié le. Raja jihnyan teuma jaya, leubeh nibak Agag, dan keurajeuen jih teupeu agong teuma. 8 Po teu Allah nyang ba awaknyan teupeuteubiet nibak nanggroe Meusé, lagée keubeue kleuet nyang meuloe keu awaknyan. Bubena bansa musoh ka habéh banmandum jiúet, tuleueng-tuleueng awaknyan jipeureumok banmandum, dan panah-panah seunjata awaknyan habéh geuwiet banmandum 9 Bansa-bansa nyan na lagée singa agam ngon singa inong, nyang jitiarab ngon sira jiéh. Soe kheueh nyang beuhe ji peubeudôh jihnyan? Seumoga ureuëng nyang bri beureukat ubak gata geubri beureukat teuma ubak ureuëng nyan, dan ureuëng nyang kutok gata jikutok teuma." 10 Deungon beungéh nyang hana teukira Raja Balak sira geu reugam boh sininju geuh geupeugah ubak Bileam, "Gata ulôn hôi keu gata kutok bubena musoh-musoh ulôn, teuma pakon gata bri beureukat ubak awaknyan sampoe án lhée goe. 11 Jinoenyoe gata jeuet tajak keudeh, tajakwoe u rumoh gata! Ulôn meujanji upah ubak gata, teuma TUHAN hana geupeu idhin gata keu tateurimong upah nyan." 12 Geujaweueb lé Bileam, "Bukon kheueh kalheueh ulôn peugah ubak utosan-utosan Teungku bahwa 13 bahpi Teungku neubri keu ulôn méuh dan pirak dan banmandum nyang na di dalam meuligoe Teungku nyan, ulôn hana hase ulôn iengkeue peurintah TUHAN dan lôn peubuet sapeue-sapeue ban galak droe ulôn? Ulôn teuma hase lôn peugah peue nyang ka TUHAN yue ubak ulôn." 14 Geupeugah lé Bileam ubak Raja Balak, "Jinoenyoe ulôn keuneuk woe ubak bansa ulôn. Teuma sigohlom ulôn jak, bah kheueh ulôn bri tée ubak Teungku keuhai peue nyang teuma jipeubuet lé bansa Israel ateueh bansa Teungku óh laén uroe." 15 Laju Bileam geupeugah teuma nubuat nyoe sira geu meulagu, "Nyoe kheueh peusan Bileam aneuëk Beor; tutoe haba sidroe ureuëng nyang deuh keumalon 16 nyang ka ji deungoe feureuman Po teu Allah, dan jeuet jituri Nyang Mahamanyang; nyang peuleumah nyang teukalon nibak Nyang Mahakuasa sira teu éh teuma mata teutab teubleuet. 17 Ulôn kalon gobnyan, teuma bukon watée nyoe; ulôn pandang gobnyan, teuma rot jiôh. Sidroe raja nyang meuasai nibak bansa Israel, teuma teuka lagée bintang nyang hu meu ble-ble. Bubena peumimpén Moab geupeu reumok banmandum bansa Set teuma geupeuhanco. 18 Tanah Edom teuma jiduek lé musoh jih nyan, teuma Israel jipeubuet buet nyang lumpah peukasa. 19 Nibak Nabi Yakub teuma teuka sidroe nyang mat kuasa, nyang jipeuhanco bubena musoh-musoh jih." 20 Óh ka lheueh nibak geupeubuet nyan Bileam geukalon ureuëng-ureuëng Amalek. Teuma lé gobnyan laju geupeugah ngon geu meulagu nubuat nyoe, "Nibak sigala bansa nyang na di donya nyoe, Amalek na kheueh nyang paleng meukuasa. Teuma bansa nyan nibak akhé jih, teuma teusampôh cit teuma keu siumu masa." 21 Nibak meuneubuet nyan Bileam geukalon teuma keuturonan Kain, laju geupeugah ngon geu meulagu lagée nubuat nyoe, "Teumpat tinggai gata keubit lumpah that kukoh, na lagée umpung cicém di ateueh gunong batée. 22 Teuma gata, hai ureuëng Keni, teuma geupeubinasa, hana treb le Asyur ji angkot gata lagée ureuëng nyang teuteun." 23 Óh lheuehnyan Bileam geupeugah teuma nubuat nyang lagée nyoe, "Cilaka! Soe nyang udeb, meunyoe Po teu Allah geupeubuet hai nyan? 24 Teuma nibak siprus jiteuka saboh kawan kapai, awaknyan laju jipeutaklok Asyur dan Heber, óh lheuehnyan kawan kapai nyanpi teuma hanco binasa." 25 Laju Bileam meukeumah-keumah geukeuneuk woe u teumpat tinggai gobnyan, dan meunan cit ngon Raja Balak geujak cit teuma.

Teubileueng 25

1 Teungoh bansa Israel nyan tinggai di Pantôn Sitim, ureuëng agam awaknyan ka jipeuphon meumukah deungon ureuëng-ureuëng inong Moab nyang na tinggai disinan. 2 Ureuëng-ureuëng inong nyan jipakat awaknyan ubak teumpat-teumpat khanuri keureubeuen keu jijak bri horeumat ubak ilah awaknyan. Meunan cit di ureuëng-ureuëng Israel nyan meusajan cit jimakheun keureubeuen nyan dan ji seumah ilah ureuëng Moab. 3 Lé sabab ureuëng Israel nyan jiseumah Baal di Peor, TUHAN beungéh ubak awaknyan dan geupeugah ubak Nabi Musa, 4 "Gatajak drob kheueh laju banmandum bansa nyan dan gata jakpoh bu maté awaknyan dikeue rakyat ba sibagoe teulaksana peurintah Ulôn, mangat Ulôn hanale Lôn beungéh keu bansa nyan." 5 Óh lheuehnyan Nabi Musa geupeugah laju ubak hakém-hakém bansa Israel, "Gatanyoe maséng-maséng harôh tajak poh maté banmandum ureuëng didalam sukée gata nyang ka jiseumah Baal di Peor." 6 Bak watée Nabi Musa dan banmandum umat teungoh jimo ngon jimeuba-e dikeue Khimah TUHAN, awaknyan jingieng sidroe ureuëng Israel teungoh geuba sidroe ureuëng inong Midian jipeutamong u dalam khimah jihnyan. 7 Bak watée Pinehas, aneuëk Eleazar, cucoe Imeum Harun geukalon hai nyan, laju geubeudôh dan geutinggai laju ureuëng meu hudôm nyan. Laju geucok saboh kapak 8 laju geujak tiyéub ureuëng agam ngon ureuëng inong nyan u dalam khimah. Bandua droe ureuëng nyan laju geutob deungon kapak nyan teuma jipiôh kheueh bala nyang teungoh jiteuka deungon hebat that di Israel nyan. 9 Teuma bak watée nyan nyang maté ka na 24.000 droe. 10 TUHAN meufeureuman lom ubak Nabi Musa, 11 "Pinehas aneuëk Eleazar, cucoe Imeum Harun, deungon bit-bit dan hana jipiôh jibila keuhoreumatan Ulôn lamkawan ureuëng Israel, sampoe beungéh Ulôn nyan reuda dan Ulôn hana jadéh Ulôn peubinasa bansa nyan. 12 Lé nyan, tajak peugah kheueh ubak Pinehas bahwa Ulôn keuneuk peugot sapeue-sapeue ikat janji deungon jihnyan. 13 Jihnyan dan keuturonan jih ka Ulôn peuteutab sibagoe imeum keu siumu masa, sabab jihnyan deungon gigéh that ka jibila Ulôn, Po teu Allah jih, dan ka teuma jipeuna damé keu desya ureuëng Israel." 14 Nan ureuëng Israel nyang geupoh maté meusigoe ngon ureuëng inong nyan Zimri, aneuëk Salu, ulée kawöm saboh keuluwarga nibak sukée Simeon. 15 Ureuëng inong nyan nan jih Kozbi; jihnyan aneuëk Zur, sidroe ulée kawöm Midian. 16 TUHAN laju geubri peurintah nyoe ubak Nabi Musa, 17 "Gata jaklawan kheueh ureuëng Midian, dan gata peubinasa kheueh awaknyan 18 sabab buet nyang jeuhet nyang ka awaknyan reunca keue gata di Peor, dan kareuna Kozbi aneuëk sidroe ulée kawöm di Midian. Kozbi nyan ureuëng inong nyang maté keunong poh bak watée teujadi beuncana sabab peuristiwa di Peor."

Teubileueng 26

1 Óh ka lheueh beuncana nyan seuleusoe, TUHAN geupeugah ubak Nabi Musa dan Eleazar aneuëk Imeum Harun, 2 "Gata harôh tapeuna seunsus keu banmandum umat Israel meunurot keuluwarga jihnyan maséng-maséng. Banmandum ureuëng agam nyang meu umu dua ploh thon u ateueh nyang ka mampu jeuet keu tantra, ureuëng nyan harôh teucetet." 3 Nabi Musa dan Eleazar laju geupeubuet peue nyang ka geupeurintah nyan. Awaknyan laju geuhôi banmandum ureuëng agam nyang meu umu dua ploh thon u ateueh dan geupeusapat laju awaknyan di ateueh darat Moab, nibak siblaih Krueng Yordan, toe ngon banda Yerikho. Nyoe kheueh ureuëng-ureuëng Israel nyang jiteubiet nibak nanggroe Meusé: 5 Nibak sukée Ruben, aneuëk tuha Nabi Yakub: kawöm Henokh, Palu, 6 Hezron dan Karmi. 7 Ureuëng agam dalam kawöm nyan na jeumeulah jih 43.730 droe. 8 Aneuëk Palu na kheueh Eliab, 9 dan aneuëk-aneuëk Eliab na kheueh Nemuel, Datan dan Abiram. Datan dan Abiram nyan ka jipiléh lé umat, teuma awaknyan jipeusaho droe deungon murit-murit Korah keu jilawan Nabi Musa dan Nabi Harun dan lom jilawan TUHAN. 10 Laju bumoe pi beukah bubena awaknyan meunan cit deungon Korah habéh banmandum jiuét lé bumoe sampoe maté bak watée apui jitot sampoe binasa 250 droe ureuëng agam. Hainyan jeuet keu peuingat keu bansa Israel. 11 Teuma aneuëk-aneuëk Korah hana rhoh teupoh maté. 12 Nibak sukée Simeon: kawöm Nemuel, Yamin, dan Yakhin, 13 Zerah dan Saul. 14 Ureuëng agam lam kawöm nyan na jeumeulah jih 22.200 droe. 15 Nibak sukée Gad: Kawöm Zefon, Hagi, Syuni, 16 Ozni, Eri, 17 Arod dan Areli. 18 Ureuëng agam lam kawöm-kawöm nyan na jeumeulah jih 40.500 droe. 19 Nibak sukée Yehuda: Kawöm Syela, Peres, Zerah, Hezron dan Hamul. Dua droe aneuëk Yehuda, na kheueh Er dan Onan, ka meuninggai donya di tanoh Kanaan. 22 Ureuëng agam dalam kawöm nyan na jeumeulah jih 76.500 droe. 23 Nibak sukée Isakhar: Kawöm Tola, Pua, 24 Yasub dan Simron. 25 Ureuëng agam lam kawöm nyan na jeumeulah jih 64.300 droe. 26 Nibak sukée Zebulon: Kawöm Sered, Elon dan Yahleel. 27 Ureuëng agam lam kawöm nyan na jeumeulah jih 60.500. 28 Nibak keuturonan Nabi Yusuf, nyang na jimeu aneuëk dua droe aneuëk agam: sukée Manasye dan sukée Efraim. 29 Nibak sukée Manasye: Makhir, aneuëk Manasye na kheueh bapak Gilead; dan kawöm-kawöm nyang seulanjut jihnyoe na kheueh nibak kawöm Gilead: 30 Kawöm Lezer, Helek, 31 Asriel, Sekhem, 32 Semidan dan Hefer. 33 Zelafehad aneuëk Hefer hana jimeu aneuëk nyang agam, teuma aneuëk-aneuëk inong. Nan-nan awaknyan na kheueh Mahla, Noa, Hogla, Milka dan Tirza. 34 Ureuëng agam lam kawöm nyan na jeumeulah jih 52.700 droe. 35 Nibak sukée Efraim: Kawöm Sutelah, Bekher, dan Tahan. 36 Kawöm Eran na kheueh keuturonan Sutelah. 37 Ureuëng agam lam kawöm nyan na jeumeulah jih 32.500 droe. Nyan kheueh kawöm-kawöm keuturonan Nabi Yusuf. 38 Nibak sukée Benyamin: Kawöm Bela, Asybel, Ahiram, 39 Sefufam dan Hufam. 40 Kawöm Ared dan Naaman na kheueh keuturonan Bela. 41 Ureuëng agam lam kawöm-kawöm nyan na jeumeulah jih 45.600 droe. 42 Nibak sukée Dan: Kawöm Suham. 43 Ureuëng agam lam kawöm nyan na jeumeulah jih 64.400 droe. 44 Nibak sukée Asyer: Kawöm Yimna, Yiswi dan Beria. 45 Kawöm Heber dan Malkiel na kheueh keuturonan Beria. 46 Asyer na jimeu aneuëk sidroe aneuëk inong nyang meunan Serah. 47 Ureuëng agam lam kawöm-kawöm nyan na jeumeulah jih 53.400 droe. 48 Nibak sukée Naftali: Kawöm Yahzeel, Guni, 49 Yezer dan Syilem. 50 Ureuëng agam lam kawöm nyan na jeumeulah jih 45.400 droe. 51 Banmandum ureuëng agam Israel na jeumeulah 601.730 droe. 52 TUHAN geupeugah ubak Nabi Musa, 53 "Tabagi kheueh tanoh-tanoh nyan keu sukée-sukée bansa Israel meunurot rayeuk jih maséng-maséng sukée. 54 Gata peubuet kheueh nyan deungon cara teutiek undi. Ubak sukée nyang rayeuk harôh neubri jeumba nyang rayeuk, dan meunan cit keu sukée nyang ubit gatabri teuma jeumba nyang ubit teuma." 57 Sukée Lewi na kheueh nibak kawöm-kawöm Gerson, Kehat dan Merari. 58 Lam keuturonan awaknyan jitamong cit keunan kawöm Libni, Hebron, Mahli, Musi dan Korah. Kehat na kheueh bapak si Amram. 59 Amram jimeukawen deungon Yokhebed, aneuëk Lewi. Yokhebed nyan lahé di nanggroe Meusé. Amram dan Yokhebed nyan na teuma jimeu aneuëk dua droe aneuëk agam: Nabi Harun dan Nabi Musa, meunan cit teuma sidroe aneuëk inong nyang nan jih Miryam. 60 Nabi Harun na teuma geumeu aneuëk peuet droe aneuëk agam: Nadab, Abihu, Eleazar dan Itamar. 61 Nadab dan Abihu maté bak watée awaknyan jipeuseumah apui nyang hana geu galak lé Po teu Allah. 62 Ureuëng agam nibak sukée Lewi nyan nyang meu umu sibuleuen u ateueh na jeumeulah jih 23.000 droe. Awaknyan teudafeutar aséng hana meusajan nibak syedara-syedara saboh bansa jihnyan, sabab awaknyan hana meuteumé tanoh pusaka di Israel. 63 Nyan kheueh dafeutar nyang geupeubuet lé Nabi Musa dan Imeum Eleazar keuhai kawöm-kawöm Israel bak watée awaknyan teupeuna seunsus di darat Moab di siblah Krueng Yordan to ngon kota Yerikho. 64 Nibak ureuëng-ureuëng nyang yoh watée ilée ka geudafeutar lé Nabi Musa ngon Nabi Harun dipadang pasi Sinai, hana meusidroe pi nibak awaknyan nyang mantong udeb. 65 Hainyan ka geupeugah lé TUHAN bahwa awaknyan banmandum maté di padang pasi. Dan keubit awaknyan banmandum maté, teukeucuali Kaleb aneuëk Yefuna dan Yosua aneuëk Nun.

Teubileueng 27

1 Zelafehad na teuma jimeu aneuëk limong droe aneuëk inong, awaknyan na kheueh Mahla, Noa, Hogla, Milka dan Tirza. Bapak Zelafehad nyan nan jih Hefer, dan bapak Hefer nyan na kheueh Gilead. Bapak Gilead nyan na kheueh Makhir, bapak Makhir nan jih Manasye, dan bapak Manasye na kheueh Nabi Yusuf. 2 Banlimong droe aneuëk Zelafehed nyan laju jijak meuhadab ubak Nabi Musa, dan Imeum Eleazar, meunan cit bubena peumimpén ngon banmandum umat nyang teungoh meusapat to ngon babah pintoe Khimah TUHAN. Kheun awaknyan. 3 "Bapak kamoe meuninggai donya di padang pasi dan lom gobnyan hana teuma meu aneuëk agam. Geuhnyan bukon peungikot korah nyang beurontak ubak TUHAN. Bapak kamoe meuninggai sabab lé desya geuh nyan keudroe. 4 Teuma pakon nan gobnyan harôh gadôh nibak bansa Israel sabab gobnyan hana geumeu aneuëk nyang agam? Neubri kheueh ubak kamoe tanoh pusaka meusajan-sajan deungon kawöm syedara bapak kamoe." 5 Laju Nabi Musa geupeusampoe hai awaknyan ubak TUHAN, 6 dan TUHAN geupeugah ubak Nabi Musa, 7 "Peue nyang jipeugah lé aneuëk-aneuëk Zelafehad keubit beutôi. Deungon nyan gata jok kheueh keu awaknyan tanoh pusaka meusajan deungon kawöm syedara bapak awaknyan. Warésan Zelafehad nyan harôh kheueh jipeutreun keu aneuëk-aneuëk jihnyan nyang inong. 8 Gata peugah kheueh ubak bansa Israel meunyoe sidroe aneuëk agam maté dan jihnyan hana jimeu aneuëk nyang agam, teuma tanoh pusaka jihnyan harôh jipeuwaréh ubak aneuëk inong. 9 Meunyoe ureuëng nyan hana teuma aneuëk inong, tanoh pusaka nyan jipeuwaréh ubak syedara jih nyang agam. 10 Meunyoe jihnyan hana teuma syedara nyang agam, tanoh jihnyan rhot ubak syedara nyang agam nibak bapak jihnyan. 11 Meunyoe jihnyan hana teuma syedara nyang agam, dan hana teuma syedara agam siblah bapak jihnyan, tanoh nyan rhot ubak rakan nyang paleng krab atawa paleng to deungon kawöm jihnyan." Peuratoran nyan harôh jitaát ngon jiturot lé ureuëng Israel sibagoe peuratoran huköm nyang geupeurintah lé TUHAN meulalu Nabi Musa. 12 TUHAN meufeureuman lom ubak Nabi Musa, "Gata jak ék kheueh u ateueh Gunong Abarim, dan nibak ateueh gunong nyan gata pandang kheueh nanggroe nyang teuma Ulôn bri keu ureuëng Israel. 13 Óh ka lheueh gata pandang nyan, gata teuma maté lagée aduen gata Nabi Harun, 14 sabab dipadang pasi Zin gata ban dua ka gata iengkeue ubak peurintah Ulôn. Bak watée di Meriba banmandum rakyat ji meukrôb-krôb ubak Ulôn, gata hana tatem peugah keuhai keukuasaan Ulôn dikeue awaknyan nyang na hubongan jih deungon ié nyan." (Peuristiwanyan teujadi nibak mata ié Meriba di Kades, padang pasi Zin). 15 Lé Nabi Musa laju geumeu doa, 16 "Ya, TUHAN Po teu Allah, nyang bri udeb keu mandum nyang udeb, ulôn meulakée, neutunyok kheueh sidroe ureuëng nyang hase jipimpén bansa nyoe; 17 sidroe ureuëng nyang hase jeuet keu panglima bak watée awaknyan jijak muprang. Bék kheueh neupeubiyeu umat Droeneueh nyoe lagée kawan domba nyang hana ureuëng rabe." 18 Kheun TUHAN ubak Nabi Musa, "Gatajak hôi kheueh Yosua aneuëk Nun. Jihnyan sidroe ureuëng nyang carông. Gata peuduek kheueh jaroe gata u ateueh ulée jihnyan. 19 Gata yue kheueh jihnyan jidong dikeue Imeum Eleazar dan banmandum umat. Dikeue awaknyan banmandum gata harôh gata peumaklum bahwa Yosua nyan na kheueh keu geunantoe gata. 20 Gata seurah kheueh ubak jihnyan siladum nibak keukuasaan gata, mangat umat Israel jitaát keu jihnyan. 21 Yosua harôh jijak lakée naseuhat ngon peutunyok ubak Imeum Eleazar, dan Eleazar harôh teuma jitanyong keuheundak Ulôn deungon jingui Urim dan Tumim. Deungon caranyan Eleazar jipimpén Yosua dan banmandum bansa Israel dalam sigala peukara nyang awaknyan peukeue." 22 Nabi Musa laju geupeubuet lagée nyang geupeurintah lé TUHAN nyan ubak geuhnyan. Gobnyan geuyue dong laju Yosua dikeue Imeum Eleazar dan dikeue banmandum umat. 23 Laju Nabi Musa geupeuduek jaroe gobnyan di ateueh ulée Yosua dan geupeumaklum laju bahwa Yosua nyan na kheueh keugeunantoe gobnyan, lagée nyang geupeugah lé TUHAN ubak gobnyan.

Teubileueng 28

1 TUHAN meufeureuman ubak Nabi Musa 2 mangat gobnyan geujak peugah ubak bansa Israel bahwa awaknyan harôh jisimak beuget-get bahwa bak watée-watée nyang ka teupeuteuntée, teupeuseumah keureubeuen-keureubeuen peunajoh nyang teupeugalak até TUHAN. 3 Nyoe kheueh keureubeuen nyang harôh jipeuseumah ubak TUHAN: Keu keureubeuen tieb-tieb uroe, dua boh aneuëk bubiri agam nyang meu umu sithon, dan hana teuma meucupa mubacut pi nibak atra keureubeuen nyan, 4 nyang saboh keu peuseumahan beungoh, dan nyang saboh teuk teuma keu peuseumahan seupôt. 5 Meusigoe deungon aneuëk bubiri nyan harôh teuma teupeuseumah sikilo gram teupông teujampu deungon si arée minyéuk zaiton nyang paleng get. 6 Nyan kheueh keureubeuen nyang teutot nyan teutab dan nyang phon-phon that teupeuseumah di Gunong Sinai. Bée keureubeuen nyan keubit that teupeugalak até TUHAN. 7 Meusigoe-sigoe deungon aneuëk bubiri nyan beuna teuma si arée ié anggô nyang jisiram u ateueh miseubah. 8 Aneuëk bubiri keu keureubeuen seupôt uroe harôh kheueh jikeureubeuen deungon cara nyang saban lagée nyang jipeuseumah beungoh uroe, meusajan ngon ié anggô. Bée keureubeuen nyang teutot nyan keubit that-that galak até TUHAN. 9 Nibak uroe Sabat harôh kheueh teupeuseumah dua boh aneuëk bubiri agam nyang mantong meu umu sithon nyang hana teuma meucupa mubacut pi nibak beulatang nyan, dua kilo gram teupông nyan ka teujampu deungon minyéuk zaiton keu keureubeuen sajian dan keureubeuen ié anggô. 10 Keureubeuen nyang teutot nyan harôh kheueh teupeuseumah tieb-tieb uroe Sabat sibagoe seunamah ubak keureubeuen uroe-uroe meusigoe-sigoe deungon keureubeuen ié anggô. 11 Nibak phon tieb-tieb buleuen harôh teupeuseumah ubak TUHAN keureubeuen nyang teutot lagée dua boh leumô agam nyang muda, saboh bubiri agam, tujoh boh aneuëk bubiri agam nyang mantong meu umu sithon, maséng-maséng nyang hana keunong cupa meubacut pi. 12 Sibagoe keureubeuen sajian harôh kheueh jipeuseumah teupông nyang meujampu ngon minyéuk zaiton; lhée kilo gram teupông keu tieb-tieb saboh leumô agam; dan dua kilo gram teuma teupông keu bubiri agam, 13 dan sikilo gram teupông keu tieb-tieb saboh aneuëk bubiri agam. Keureubeuen nyang teutot nyan na kheueh lagée keureubeuen peunajoh, dan bée keureubeuen nyang mangat nyan keubit that-that galak até TUHAN. 14 Meusigoe-sigoe deungon keureubeuen nyang teutot nyan harôh teuma jipeuseumah keureubeuen ié anggô, lé jih dua arée keu tieb-tieb leumô agam, si arée siteungoh keu bubiri agam, dan si arée teuma keu tieb-tieb saboh aneuëk bubiri. Nyan kheueh peuratoran keuhai keureubeuen nyang teutot nyan harôh jipeuseumah nibak tieb-tieb tanggai sa tieb-tieb buleuen lom tieb-tieb thon. 15 Sibagoe sinamah nibak keureubeuen nyang teutot uroe-uroe deungon keureubeuen ié anggô, meunan cit harôh teuma neupeuseumah saboh kaméng agam keu keureubeuen peu amphon desya. 16 Nibak tanggai peuet blaih buleuen nyang keu sa, na kheueh uroe raya Paskah keu TUHAN. 17 Nibak uroe óh lheueh nyan teuma, tanggai limong blaih, na kheueh phon-phon Peurayaan Ruti nyang hana Meurago, dan treb jih tujoh uroe gata hana jeuet gata pajoh ruti nyang teupeuget na meurago. 18 Nibak uroe nyang keuphon bak uroe peurayaan nyan gata harôh kheueh gata meusapat mangat meusajan-sajan ta meuiébadat, dan hana jeuet gata peubuet buet-buet nyang brat. 19 Gata peuseumah kheueh ubak TUHAN keureubeuen nyang teutot dua boh leumô agam nyang mantong muda, saboh bubiri agam, dan tujoh boh teuma aneuëk bubiri agam nyang mantong meu-umu sithon, maséng-maséng nyang hana meucupa meubacut pi. 20 Gata peuseumah kheueh teuma keureubeuen sajian nyang teupeu wajéb, lagée teupông nyang meujampu deungon minyéuk zaiton: lhée kilo gram teuma teupông keu tieb-tieb saboh leumô agam, dua kilo gram keu bubiri agam, 21 dan sikilo gram teuma keu tieb-tieb saboh aneuëk bubiri agam. 22 Gata peuseumah cit teuma saboh kaméng agam keu keureubeuen peu amphon desya. Deungon caranyan gata ka gata peubuet upacara teupeu sampôh desya umat. 23 Banmandum keureubeuen nyan na kheueh sibagoe sinamah ubak keureubeuen nyang teutot beungoh nyang ka lazem. 24 Deungon cara nyan cit teuma harôh kheueh gata peuseumah ubak TUHAN keureubeuen nyang teutot si treb jih tujoh uroe. Keureubeuen nyan na kheueh lagée keureubeuen sinamah ubak keureubeuen nyang teutot uroe-uroe deungon keureubeuen ié anggô jihnyan teuma. Bée keureubeuen nyang mangat nyan lumpah that galak até TUHAN. 25 Bak uroe nyang keutujoh gata harôh gata meusapat mangat gata meuiébadat dan hana jeuet gata peubuet buet nyang brat-brat. 26 Nibak uroe nyang keuphon Khanuri Musém Keumeukôh, óh lheueh uroe raya lewat tujoh goe aleuhad, bak watée gata tapeuseumah gandom barô ubak TUHAN, gata harôh tameu iébadat seucara meujeumaáh, dan hana jeuet gatapeubuet buet nyang brat-brat. 27 Gata peuseumah kheueh ubak TUHAN keureubeuen teutot na kheueh dua boh leumô agam, saboh bubiri agam nyang mantong muda dan tujoh boh aneuëk bubiri agam nyang meu-umu sithon, maséng-maséng nyang hana meucupa mubacut pi. Bée keureubeuen nyang teutot nyan keubit that galak até TUHAN. 28 Gata peuseumah kheueh teuma keureubeuen uroe-uroe nyang teupeu wajéb, na kheueh teupông teujampu ngon minyéuk zaiton: lhée kilo gram keu tieb-tieb saboh leumô agam, dua kilo gram teuma keu bubiri agam, 29 dan sikilo gram keu tieb-tieb saboh aneuëk bubiri. 30 Gata peuseumah cit teuma saboh kaméng agam keu keureubeuen peu amphon desya. Deungon caranyan gata ka tapeubuet upacara teupeu sampôh desya umat. 31 Keureubeuen-keureubeuen nyan meunan cit deungon keureubeuen anggô na kheueh sibagoe keureubeuen sinamah ubak keureubeuen nyang teutot uroe-uroe dan keureubeuen sajian.

Teubileueng 29

1 Nibak tanggai sa buleuen tujoh gata harôh gata iébadat seucaya meujeumaáh ngon meusapat, dan hana jeuet gata peubuet buet nyang brat-brat. Nibak uroe nyan beureuguih-beureuguih harôh gata yueb. 2 Gata peuseumah kheueh ubak TUHAN keureubeuen teutot na kheueh saboh leumô agam nyang mantong muda, saboh bubiri agam dan tujoh boh aneuëk bubiri nyang mantong meu umu sithon, maséng-maséng atranyan nyang hana meubacut pi meucupa. Bée keureubeuen nyang mangat nyan keubit that-that galak até TUHAN. 3 Gata peuseumah kheueh teuma keureubeuen sajian nyang geupeu wajéb, na kheueh teupông nyang teujampu deungon minyéuk zaiton: lhée kilo gram keu leumô agam, dua kilo gram teuma keu bubiri agam, 4 dan sikilo gram teuma keu tieb-tieb saboh aneuëk bubiri. 5 Gata peuseumah kheueh teuma saboh kaméng agam, keu keureubeuen peu amphon desya. Deungon caranyan gata ka gata peubuet upacara teupeu sampôh dumna desya umat. 6 Keureubeuen-keureubeuen nyan na kheueh sibagoe sinamah ubak keureubeuen nyang teutot nyang teupeuseumah meusajan-sajan deungon keureubeuen sajian jihnyan, nibak tanggai sa di tieb-tieb buleuen. Meunan cit sibagoe keureubeuen sinamah keu keureubeuen nyang teutot uroe-uroe nyang teupeuseumah meusigoe-sigoe deungon keureubeuen sajian dan keureubeuen ié anggô jihnyan. Bée keureubeuen nyang mangat nyan keubit that-that galak até TUHAN. 7 Bak tanggai siploh buleuen tujoh gata harôh gata peuna iébadat seucara meujeumaáh. Bak uroenyan gata harôh gata puasa dan hana teuma jeuet gata meukeureuja. 8 Gata peuseumah kheueh ubak TUHAN saboh leumô keu keureubeuen nyang teutot dan leumô nyang mantong muda lom teuma nyang agam, saboh bubiri agam dan tujoh boh aneuëk bubiri agam nyang meu-umu sithon, maséng-maséng nyang hana keunong cupa mubacut pi. Bée keureubeuen nyang mangat nyan keubit that galak até TUHAN. 9 Gata peuseumah cit teuma keureubeuen sajian nyang teupeuwajéb, na kheueh teupông meujampu deungon minyéuk zaiton: lhée kilo gram keu leumô agam, dua kilo gram keu bubiri agam, 10 dan sikilo gram keu tieb-tieb saboh aneuëk bubiri. 11 Meunan cit gata peuseumah teuma saboh kaméng agam keu upacara teupeu amphon desya umat, seulaén keureubeuen teupeu amphon desya dan keureubeuen nyang teutot uroe-uroe meusajan ngon keureubeuen sajian dan keureubeuen ié anggô nyang teupeuseumah nibak uroe nyan. 12 Bak tanggai limong blaih buleuen tujoh gata harôh gata peuna iébadat seucara meujeumaáh, dan hana jeuet gata peubuet buet nyang brat-brat. Nyang treb jih tujoh uroe gata harôh tapeuna peurayaan keu teuhoreumat TUHAN. 13 Bak uroe nyang keuphon gata peuseumah kheueh ubak TUHAN keureubeuen teutot na kheueh lhée blaih boh leumô agam muda, dua boh bubiri agam nyang mantong muda, dan peuet blaih boh teuma aneuëk bubiri agam nyang umu jih sithon, maséng-maséng beulatang nyan hana meucupa mubacut pi. Bée keureubeuen nyang keubit mangat nyan biet-biet that galak até TUHAN. 14 Tapeuseumah kheueh teuma keureubeuen sajian nyang teupeuwajéb lagée teupông meujampu ngon minyéuk zaiton: lhée kilo gram keu tieb-tieb saboh leumô agam, dua kilo gram keu tieb-tieb saboh bubiri agam, 15 dan sikilo gram teuma keu tieb-tieb aneuëk bubiri. Meusigoe-sigoe deungon keureubeuen sajian nyan harôh kheueh teuma teupeuseumah keureubeuen ié anggô nyang teupeureulée. 16 Seulaén nibak nyan tapeuseumah kheueh teuma saboh kaméng agam keu keureubeuen teupeu amphon desya. Keureubeuen nyan na kheueh sibagoe keureubeuen seunamah ubak keureubeuen nyang teutot uroe-uroe meusigoe ngon keureubeuen sajian dan keureubeuen ié anggô. 17 Bak uroe nyang keu dua gata peuseumah kheueh teuma dua blaih boh leumô agam nyang mantong muda, dua boh bubiri agam, dan peuet blaih boh teuma aneuëk bubiri agam nyang meu-umu sithon, maséng-maséng atra nyan nyang hana keunong mucupa mubacut pi. 18 Gata peuseumah kheueh teuma meusigoe-sigoe deungon nyan keureubeuen-keureubeuen nyang laén lagée nyang teupeureulée keu uroe nyang phon. 20 Bak uroe nyang keulhée gata peuseumah kheueh teuma siblaih boh leumô agam nyang mantong muda, dua boh bubiri agam, dan peuet blaih boh aneuëk bubiri agam nyang meu-umu sithon, maséng-maséng atra nyan nyang hana keunong cupa mubacut pi. 21 Gata peuseumah kheueh teuma meusigoe-sigoe deungon nyan banmandum keureubeuen nyang laén lagée nyang teupeureulée nibak uroe-uroe nyang phon. 23 Bak uroe nyang keu peuet gata peuseumah kheueh siploh boh leumô agam nyang mantong muda, dua boh bubiri agam, dan peuet blaih boh teuma aneuëk bubiri agam nyang mantong meu-umu sithon, maséng-maséng nyang hana keunong cupa mubacut pi. 24 Meusigoe deungon nyan gata peuseumah kheueh teuma keureubeuen nyang laén lagée nyang teupeureulée keu uroe-uroe nyang phon. 26 Bak uroe nyang keulimong tapeuseumah kheueh teuma sikureueng boh leumô agam nyang muda-muda, dua boh teuma bubiri agam, dan peuet blaih boh aneuëk bubiri nyang meu-umu sithon, maséng-maséng atranyan nyang hana meucupa mubacut pi. 27 Meusigoe deungon nyan gata peuseumah kheueh teuma keureubeuen nyang laén lagée nyang teupeureulée keu uroe nyang phon. 29 Bak uroe nyang keunam tapeuseumah teuma lapan boh leumô agam nyang muda, dua boh teuma bubiri agam, peuet blaih boh aneuëk bubiri agam nyang meu-umu sithon, maséng-maséng nyang hana keunong cupa mubacut pi. 30 Meusigoe deungon nyan gata peuseumah kheueh teuma banmandum keureubeuen nyang laén lagée nyang teupeureulée keu uroe nyang phon. 32 Bak uroe nyang keu tujoh tapeuseumah kheueh teuma tujoh boh leumô agam nyang mantong muda, dua boh bubiri agam, dan peuet blaih boh aneuëk bubiri agam nyang mantong meu-umu sithon, maséng-maséng atra nyan nyang hana meucupa mubacutpi. 33 Meusigoe deungon nyan gata peuseumah kheueh teuma banmandum keureubeuen-keureubeuen nyang laén lagée nyang teupeureulée keu uroe nyang phon. 35 Bak uroe nyang keulapan harôh kheueh teuma gata meusapat keu gata iébadat dan meunan cit hana teuma jeuet gata keureuja buet-buet nyang brat. 36 Gata peuseumah kheueh teuma ubak TUHAN keureubeuen nyang teutot sibagoe leumô agam nyang mantong muda, saboh bubiri agam dan tujoh boh teuma aneuëk bubiri agam nyang meu-umu sithon, maséng-maséng nyang hana meucupa mubacutpi. Bée keureubeuen nyang mangat nyan keubit that-that galak até TUHAN. 37 Meusigoe deungon nyan tapeuseumah kheueh teuma keureubeuen nyang laén lagée nyang teupeureulée keu uroe nyang phon. 39 Nyan kheueh peuratoran-peuratoran keuhai keureubeuen nyang teutot, keureubeuen sajian, keureubeuen ié anggô, seureutoe keureubeuen peudamé nyang harôh gata peuseumah ubak TUHAN nibak peurayaan-peurayaan gata nyang ka geupeuteuntée nyan. Keureubeuen-keureubeuen nyan na kheueh sibagoe sinamah keu keureubeuen-keureubeuen nyang gata peuseumah keu gata peuleueh kaôi dan keu keureubeuen keu galak droe. 40 Nabi Musa laju geujak peusampoe ubak bansa Israel peue-peue mantong nyang geupeurintah lé TUHAN ubak gobnyan.

Teubileueng 30

1 Nabi Musa geubri teuma peuratoran nyoe ubak peumimpén bansa Israel. 2 Meunyoe na sidroe ureuëng agam jimeukaôi ngon ji meujanji jimeusumpah ubak TUHAN, sampoe ureuëng nyan ka ji ikat droe jih deungon janji nyan, ureuëng nyan harôh kheueh jipeu peunoh peue nyang ka jipeujanji nyan, dan hana jeuet ji iengkeue ubak peue nyang ji peugah nyan. 3 Meunyoe na sidroe aneuëk dara nyang tinggai di rumoh ureuëng syiek jih jimeukaôi ubak TUHAN, dan nibak kaôi nyan ji ikat droe jih deungon sapeue-sapeue janji, dan si ayah aneuëk dara nyan hana teuma jeuet keu masa alah bak watée jideungoe hai nyan, teuma aneuëk dara nyan harôh kheueh jipeulheueh banmandum kaôi dan janji jihnyan. 5 Teuma, meunyoe watée jideungoe hai nyan ureuëng syiek aneuëk dara nyan hana jiharok, teuma lé aneuëk dara nyan hana teu ikat ubak janji dan kaôi jih nyan. TUHAN teuma geupeu amphon si dara nyan, sabab jihnyan jitam lé ureuëng syiek jih. 6 Meunyoe na sidroe ureuëng inong nyang gohlom jimeukawen jimeukaôi ubak sapeue-sapeue janji, aléh na jipike-pike hai nyan leubeh ilée atawa bit meunan mantong, teuma ureuëng inong nyan ka teu ikat ubak kaôi dan janji jih nyan. Meunyoe óh trok watée ureuëng inong nyan ji meukawen, jihnyan teutab teu ikat ubak kaôi dan janji jihnyan, asai ureuëng lakoe jihnyan hana meurasa brat ateueh janji dan kaôi ureuëng binoe jih nyan. 8 Teuma seubalék jih meunyoe ureuëng lakoe jih nyan jitam hai nyan, di ureuëng inongnyan hana teu ikat ubak janji dan kaôi jih nyan. TUHAN teuma geupeu amphon ureuëng inong nyan. 9 Meunyoe na sidroe ureuëng inong balée nyang ka jitaleuek lé ureuëng lakoe jih jimeukaôi sampoe kaôi jihnyan teu ikat droe jih, ureuëng nyan teu ikat ubak kaôi jih nyan dan nyan harôh jipeutrok dan jipeubuet teuma. 10 Meunyoe na sidroe ureuëng inong nyang ka jimeukawen jimeukaôi dan jimeujanji nyang teu ikat droe jih nyan, 11 ureuëng nyan harôh kheueh jipeupeunoh banmandum nyang ka jipeujanji nyan, asai lakoe ureuëng inong nyan hana jeuet keu masa alah bak watée jideungoe hai nyan. 12 Teuma meunyoe watée jideungoe hai nyan lakoe ureuëng inong nyan jitam peurumoh jih nyan, di ureuëng inong nyan hanale teu ikat ubak kaôi jih nyan. TUHAN teuma geupeu amphon jih nyan, sabab lakoe jih hana jipeu idhin. 13 Ureuëng lakoe na hak keu situju atawa jipeubateue tieb-tieb kaôi nyang geupeugét lé ureuëng binoe jihnyan. 14 Teuma meunyoe watée jideungoe hai nyan ureuëng lakoe jih nyan hana jeuet keu masa alah, ureuëng inongnyan harôh kheueh jijak peulheueh banmandum kaôi nyang ka ji ikat nyan. Ureuëng lakoe jih nyan situju deungon kaôi ureuëng binoe jih nyan sabab hainyan hana jeuet keu masa alah bak watée jideungoe hai nyan. 15 Meunyoe laén watée ureuëng lakoe nyan jipeu bateue kaôi ureuëng binoe jih nyan, teuma lé ureuëng lakoe nyan kheueh nyang harôh jitanggong akibat nyang teuka ateueh peue nyang ka jipeu bateue nyan. 16 Nyan kheueh peuratoran-peuratoran nyang geubri lé TUHAN ubak Nabi Musa keuhai kaôi dan janji nyang jipeugét lé sidroe aneuëk dara nyang tinggai di rumoh ureuëng syiek jih nyan, atawa lé sidroe ureuëng inong nyang ka ji meukawen.

Teubileueng 31

1 TUHAN meufeureuman lom ubak Nabi Musa, "Gata jak tueng bila kheueh laju ubak ureuëng Midian sabab peue nyang ka awaknyan peubuet ateueh bansa Israel. Óh lheueh nyan gata teuma maté." 3 Teuma Nabi Musa geupeugah ubak bansa Israel, "Meusiab-siab kheueh keu tajak muprang: gata harôh tajak prang ureuëng Midian keu teujak peubuet huköman TUHAN ubak awaknyan. 4 Nibak tieb-tieb sukée bansa Israel, gata harôh tapeusiab siribée droe tantra keu jimaju u mideuen prang." 5 Teuma jipiléh kheueh siribée droe nibak tieb-tieb sukée bansa Israel, banmandum jih nyan na jeumeulah dua blaih ribée droe nyang ka siab keu jijak maju u mideuen prang. 6 Nabi Musa geuyue awaknyan jijak muprang meusajan-sajan deungon Pinehas aneuëk Imeum Eleazar. Pinehas jiba sajan barang-barang suci dan beureuguih-beureuguih guna jih keu teutujok sibagoe tanda-tanda. 7 Paih lagée peurintah TUHAN ubak Nabi Musa, ureuëng Israel laju jijak prang ureuëng Midian dan laju jijakpoh maté banmandum ureuëng agam awaknyan, 8 jitamong cit keunan limong droe raja Midian, awaknyan na kheueh Ewi, Rekem, Zur, Hur, dan Reba. Bileam, aneuëk Beor, meunan cit jipoh maté. 9 Ureuëng Israel laju jidrob ngon jiteuen ureuëng inong dan aneuëk-aneuëk manyak ureuëng Midian, dan jireupah teuma bubena beulatang peulara, meunan cit bubena hareuta keukayaan awaknyan. 10 Banda-banda dan khimah-khimah awaknyan pi jitot banmandum. 11 Óh lheueh nyan ureuëng-ureuëng Israel jijak cok laju bubena hareuta nyang jirampah nyan, jitamong cit keunan ureuëng nyang teuteuen dan beulatang peulara, 12 laju atranyan jijak ba ubak Nabi Musa dan Imeum Eleazar dan keu banmandum umat Israel. Nibak watée nyan awaknyan teungoh jipeudong khimah di ateueh darat Moab, nibak binéh Krueng Yordan, toe ngon banda Yerikho. 13 Teuma Nabi Musa, Imeum Eleazar dan banmandum peumimpén nyang laén nibak umat Israel laju jiteubiet nibak lam khimah keu jijak sambot tantra Israel nyang ka jiwoe nibak mideuen prang nyan. 14 Nabi Musa geubeungéh keu panglima-panglima prang nyan, ubak ulée pasokan dan ubak ulée laseukar nyang ban mantong jiwoe nibak prang. 15 Geupeugah lé gobnyan ubak awaknyan, "Pakon gatanyoe tapeubiyeu banmandum ureuëng inong nyan udeb? 16 Bukon kheueh ureuëng-ureuëng nyan nyang ka jiseutôt naseuhat Bileam, sampoe jibujuk umat Israel di Peor mangat jitinggai TUHAN? Dan nyan kheueh teuma nyang peuteuka beuncana u ateueh umat TUHAN! 17 Nyan, jinoenyoe tajak poh maté kheueh laju bubena aneuëk agam dan aneuëk inong nyang hanale gadih. 18 Teuma banmandum aneuëk inong nyang mantong peurawan jeuet gatacok keu gata. 19 Dan gata banmandum nyang ka gatamat manyét ureuëng maté harôh gata tinggai diluwa khimah-khimah nyang treb jih tujoh uroe. Nibak uroe nyang keu lhée dan nyang keu tujoh gata dan banmandum ureuëng inong nyang ka gata teun nyan harôh gata peuna upacara teupeu gleh droe. 20 Tieb-tieb siôn peukayan dan peue mantong nyang nibak kulét, bulée kaméng atawa kayée, nyan pi harôh kheueh teupeu suci." 21 Óh lheueh nyan di Imeum Eleazar geupeugah laju ubak mandum tantra nyang ban jiwoe nibak mideuen prang nyan, "Nyoe kheueh peuratoran-peuratoran nyang geubri lé TUHAN ubak Nabi Musa. 22 Peue-peue mantong nyang hana tutong meunyoe teutot ngon apui, lagée méuh, pirak, teumaga, beuso, timah putéh dan timah itam, harôh teupeu gleh atra nyan deungon cara teupeutamong u dalam apui. Óh lheueh nyan barang-barang nyan harôh kheueh teuma teu rhah sampoe gleh deungon ié upacara nyang teupeu suci mangat atra nyan hana jeuet keu kuto lé. Dan banmandum beunda nyang laén nyang tutong keunong apui harôh kheueh teupeu suci atra nyan deungon ié upacara nyang teupeu gleh nyan. 24 Nibak uroe nyang keutujoh harôh teuma rhah peukayan gata, barô kheueh gata hanale teupeugah kuto, dan jeuet gata tamong u dalam khimah-khimah." 25 TUHAN meufeureuman ubak Nabi Musa, 26 "Gata dan Imeum Eleazar meunan cit deungon banmandum peumimpén nyang laén nibak umat Israel, harôh kheueh gata itong banmandum hase hareuta nyang teureupah watée di mideuen prang, jitamong cit keunan ureuëng nyang teuteuen dan beulatang nyang laén. 27 Hase nibak hareuta nyang teureupah dimideuen prang nyan harôh gata bagi dua nyang sadub le jih; saboh jeumba keu tantra nyang ka jijak muprang dan saboh jeumba teuk keu umat nyang tinggai. 28 Keu jeumba Ulôn nyang khusos, Ulôn, TUHAN, nibak hak jeumba tantra nyan harôh kheueh gatacok saboh nibak tieb-tieb limong reutoh -- bah kheuehnyan nibak ureuëng-ureuëng nyang teuteuen, meunan cit nibak leumô, keuleudée, bubiri dan kaméng. 29 Gata jok kheueh nyan ubak Imeum Eleazar sibagoe peuseumahan khusos keu Ulôn, TUHAN. 30 Nibak jeumba nyang teubri keu umat Israel nyan, harôh teuma teucok saboh nibak tieb-tieb limong ploh, bah kheueh nyan nibak ureuëng-ureuëng nyang teuteuen, meunan cit nibak leumô, keuleudée, bubiri dan kaméng. Gata jok kheueh banmandum nyan ubak ureuëng Lewi nyang jiurôh Khimah Ulôn." 31 Nabi Musa dan Imeum Eleazar laju geupeubuet lagée nyang ka geupeurintah lé TUHAN ubak gobnyan. 32 Seulaén nyang ka jicok lé tantra keujeumba awaknyan, hase nyang teureupah nyan na jeumeulah jih: 675.000 boh bubiri dan kaméng, 72.000 boh leumô, 61.000 boh keuleudée, dan 32.000 droe aneuëk dara nyang mantong gadih. 36 Siteungoh nibak jeumeulah nyan harôh kheueh teubri keu tantra deungon reuncijih na kheueh lagéenyoe: 337.500 boh bubiri dan kaméng, dan nibak jeumeulah nyang 675 boh na kheueh keu meuneubri khusos ubak TUHAN; 36.000 boh leumô, 72 boh keu meuneubri khusos ubak TUHAN 30.500 boh keuleudée, 61 boh na kheueh keu meuneubri khusos ubak TUHAN; 16.000 droe aneuëk dara mantong gadih, 32 droe na kheueh keu meuneubri khusos ubak TUHAN. 41 Lé Nabi Musa geujok laju meuneubri khusos nyan ubak Imeum Eleazar keu geupeuseumah teuma ubak TUHAN, lagée nyang ka geupeurintah lé TUHAN. 42 Jeumba keu rakyat sadub meuneuweuek jih deungon jeumba tantra: 337.500 boh bubiri dan kaméng, 36.000 boh leumô, 30.500 boh keuleudée, dan 16.000 droe aneuëk dara nyang mantong gadih. 47 Lagée nyang geupeurintah lé TUHAN, Nabi Musa laju geucok saboh nibak tieb-tieb limong ploh droe tawanan dan beulatang, laju atra nyan geujok ubak ureuëng-ureuëng Lewi nyang meutugaih di Khimah TUHAN. 48 Óh ka seuleusoe lé panglima prang nyang ka jipimpén tantra Israel, laju jijak meuhadab ubak Nabi Musa 49 dan laju jilapor, "Teungku, kamoe ka kamoe itong bubena tantra dimiyueb kamoe. Teunyata jeumeulah awaknyan geunab, hana meusidroe pi nyang gadôh. 50 Sabab nyan kamoe na kamoe ba piasan-piasan méuh, gleueng jaroe ngon gleueng gaki, iencien, keurabu dan talo takue nyang ka jicok maséng-maséng. Banmandum nyoe kamoe seurah ubak TUHAN sibagoe peuseumahan kamoe, mangat TUHAN teutab geulindong kamoe." 51 Nabi Musa dan Imeum Eleazar geuteurimong laju méuh nyan, banmandum nyan na kheueh teupeugét lam bantuek piasan. 52 Nyang jipeuseumah lé panglima nyan na brat jih rab dua reutoh kilo gram. 53 Teuma di tantra nyan maséng-maséng ka jicok hase hareuta teureupah nibak mideuen prang nyan dan ka jingui keudroe jih maséng-maséng. 54 Teuma Nabi Musa dan Imeum Eleazar laju geuba méuh nyan ubak Khimah TUHAN keu geupeuseumah ubak TUHAN mangat TUHAN geulindong bansa Israel.

Teubileueng 32

1 Sukée-sukée Ruben dan Gad awaknyan jai lumpahna jipeulara beulatang peulara. Bak watée awaknyan jikalon padubna gét jih tanoh Yaezer dan tanoh Gilead keu teumpat peulara beulatang, 2 laju awaknyan jijak meuhadab ubak Nabi Musa, Imeum Eleazar, dan peumimpén-peumimpén nyang laén nibak sukée Israel sira jipeugah, 3 "Tanoh banda Atarot, Dibon, Yaezer, Nimra, Hesybon, Eleale, Sebam, Nebo dan Beon nyang ka jiduek lé bansa Israel deungon geutulông lé TUHAN, lumpah gét keu teumpat peulara beulatang. Dan sabab beulatang peulara kamoe ka jai lumpah na, 5 kamoe lakée mangat jeuet tanoh nyoe neubri keukamoe mangat jeuet keu hak milék kamoe. Bék kheueh neuyue kamoe minah u meurandeh Krueng Yordan." 6 Geujaweueb lé Nabi Musa, "Trok that até gata tinggai disinoe, jeh ureuëng-ureuëng saboh bansa ngon gata ka jijak muprang? 7 Pakon gata peutakot bansa Israel jijeumeurang Krueng Yordan dan jitamong u nanggroe nyang ka geubri lé TUHAN ubak awaknyan? 8 Meunan cit deungon ayah-ayah gata pi jipeugot lagée nyan, bak watée ulôn yuejak awaknyan u Kades-Barnea mangat jijak meurawoh lam nanggroe nyan. 9 Awaknyan ka trok u Pantôn Eskol dan ka lheueh teuma jingieng tanoh nyan. Teuma watée awaknyan jigisa, awaknyan jipeujeuet bansa Israel teumakot keu jitamong lam tanoh nyang geubri lé TUHAN ubak awaknyan. 10 Teuma watée nyan TUHAN beungéh lumpah na laju geupeugah lé Gobnyan, 'Ureuëng-ureuëng nyan hana seutia ubak Ulôn. Ngon sabab nyan Ulôn meusumpah bahwa nibak awaknyan nyang ka meu-umu dua ploh thon u ateueh bak watée awaknyan ji tinggai nanggroe Meusé, hana nyang jiteumé tamong u nanggroe nyang ka Ulôn peujanji bak Nabi Ibrahim, Nabi Ishaq dan Nabi Yakub.' 12 Banmandum ureuëng nyan keunong huköman keucuali si Kaleb aneuëk Yefune, ureuëng Kenas dan Yosua aneuëk Nun, sabab awaknyan bandua teutab seutia ubak TUHAN. 13 TUHAN beungéh that-that ubak bansa Israel sampoe Gobnyan geupeu biyeu mantong bansa Israel nyan ji meuwot-wot di padang pasi peuet ploh thon treb jih sampoe án banmandum angkatan nyang ka jibeurontak ubak Gobnyan maté banmandum. 14 Dan jinoenyoe, gata teuma nyang beurontak lagée ayah-ayah gata! Gata keubit saboh kawan ureuëng-ureuëng nyang meudesya nyang jeuet keu beungéh TUHAN leubeh-leubeh lom ubak bansa Israel! 15 Meunyoe gata gisa gata peulikot TUHAN, teuma banmandum bansa nyoe geupeubiyeu leubeh treb lom di padang pasi, dan gata kheueh nyang peusabab awaknyan binasa!" 16 Ureuëng-ureuëng Ruben dan ureuëng-ureuëng Gad nyan laju jijak peurab ubak Nabi Musa sira jipeugah, "Meunyoe meunan bah kheueh teuleubeh ilée kamoe peugot weue nyang meu bintéh batée keu bubiri-bubiri kamoe, dan banda-banda nyang bintéh jih beuton teuma keu aneuëk peurumoh kamoe. 17 Kamoe reujang meusiab-siab keu kamoe jak maju u mideuen prang meusajan-sajan deungon syedara-syedara kamoe nyang laén. Kamoe teuma kamoe pimpén seurangan nyan dan kamoe ba awaknyan ji tamong u dalam nanggroe nyang ka jeuet keu hak milék awaknyan. Siatnyoe aneuëk dan peurumoh kamoe bah kheueh tinggai disinoe, di banda-banda nyang meu pageue ngon beuton nyang kukoh dan aneuëk dan peurumoh kamoe nyan aman nibak ji peukaru lé peunduduek nanggroe nyoe. 18 Kamoe hana teuma kamoe woe u rumoh kamoe sigohlom ureuëng Israel jiteumé tanoh keu hak milék pusaka awaknyan. 19 Kamoe hana kamoe tem teurimong mubacut pi nibak tanoh nyang na di meurandeh Krueng Yordan nyan, sabab kamoe ka kamoe teurimong jeumba hak milék kamoe nyang disinoe, di siblah u timu Krueng Yordan." 20 Geujaweueb lé Nabi Musa, "Meunyoe gata bit-bit deungon sunggoh-sunggoh keu ka siab gata jak muprang keu TUHAN, 21 dan banmandum nyang na lamkawan gata nyang jeuet jimuprang jijak jeumeurang Krueng Yordan, dan dimiyueb pimpénan TUHAN gata prang musoh-musoh sampoe TUHAN geujak parôh awaknyan, 22 akhé jih nanggroe nyan taklok ubak Gobnyan, teuma gata jeuet tawoe, dan beubaih kheueh gata nibak keuwajéban gata teuhadab TUHAN dan teuhadab syedara-syedara gata, dan TUHAN teuma geubri tanoh di siblah u timu nyan jeuet keu hak milék gata. 23 Teuma ingat, meunyoe gata hana tapeuteupat janji gata nyan, gata meudesya ubak TUHAN dan teuma geuhuköm sabab desya gata nyan. 24 Gata jak kheueh peudong banda-banda ngon weue beulatang gata nyan, bék tuwoe gata peuteupat janji deungon janji nyang ka gata peugah nyan!" 25 Laju ureuëng-ureuëng Gad ngon ureuëng-ureuëng Ruben jipeugah, "Teungku, kamoe teuma kamoe peubuet peue nyang Teungku peurintah. 26 Aneuëk peurumoh kamoe meunan cit ngon beulatang peulara lagée leumô dan bubiri kamoe teuma tinggai disinoe, di banda-banda Gilead. 27 Teuma kamoe nyoe ka siab keu kamoejak muprang dimiyueb pimpénan TUHAN. Kamoe teuma kamoe jeumeurang Krueng Yordan dan kamoe muprang lagée nyang ka Teungku peugah." 28 Teuma Nabi Musa geubri peurintah nyoe ubak Imeum Eleazar, Yosua dan peumimpén-peumimpén Israel, 29 "Meunyoe ureuëng-ureuëng Gad dan ureuëng-ureuëng Ruben jiseutôt peurintah TUHAN dan jijeumeurang Krueng Yordan keu jijak muprang, dan meunyoe ateueh bantuan awaknyan gata meuhase gata reubot nanggroe nyan, teuma tanoh Gilead harôh gata bri ubak awaknyan jeuet keu hak milék awaknyan. 30 Teuma meunyoe awaknyan hana jijeumeurang Krueng Yordan keu jijak muprang meusajan-sajan deungon gata, teuma awaknyan harôh jiteurimong jeumba tanoh pusaka di nanggroe Kanaan, saban lagée gata." 31 Jaweueb ureuëng Gad dan ureuëng-ureuëng Ruben, "Teungku, kamoe teuma kamoe peubuet peue nyang geupeurintah lé TUHAN. 32 Dimiyueb pimpénan TUHAN kamoe teuma kamoe jeumeurang u nanggroe Kanaan dan laju lam mideuen prang, teuma nyang kamoe harab bah kheueh tanoh nyang na disiblaih u timu Krueng Yordan nyoe teutab jeuet keu hak milék kamoe." 33 Lé Nabi Musa laju geuseurah ubak sukée-sukée Gad dan Ruben dan ubak siladum sukée Manasye banmandum daerah Sihon, raja Amori, dan daerah Og, raja Basan, jitamong cit keunan banda-banda dan tanoh nyang na di seukeulileng nyan. 34 Sukée Gad jipeudong lom banda Dibon, Atarot, Aroër, 35 Atarot-Sofan, Yaezer, Yogbeha, 36 Bet-Nimra, dan Bet-Haran sibagoe banda-banda nyang meu kuta dan sibagoe teumpat weue-weue bubiri. 37 Sukée Ruben jipeudong lom banda-banda Hesybon, Eleale, Kiryataim, 38 Nebo, Baal-Meon, dan Sebam. Banda-banda nyang awaknyan peudong lom nyan awaknyan gantoe nan jih. 39 Gata Makhir, aneuëk Manasye, jijak prang tanoh Gilead laju jireubot dan jiuse ureuëng-ureuëng Amori nyang na disinan. 40 Sabab nyan Nabi Musa laju geubri tanoh Gilead nyan ubak kawöm Makhir, dan awaknyan tinggai teutab disinan. 41 Yair, nibak sukée Manasye, jijak prang dan laju jireubot na meupadub boh gampông, laju gampông-gampông nyang jireubot nyan jiboh nan, "Gampông-gampông Yair". 42 Nobah jijak prang dan jireubot Kenat meusajan ngon gampông-gampông nyang na seukeulileng nyan, laju jiboh nan Nobah, meunurot nan jih keudroe.

Teubileueng 33

1 Óh ka lheueh bansa Israel jitinggai tanoh Meusé, dalam baresan meunurot sukée bansa maséng-maséng di miyueb pimpénan Nabi Musa ngon Nabi Harun, awaknyan jipioh disinan na meupadub boh teumpat. 2 TUHAN geupeurintah ubak Nabi Musa mangat teucetet nan-nan nibak tieb-tieb teumpat dipat mantong awaknyan jipiôh. 3 Bansa Israel jitinggai Meusé bak tanggai limong blaih buleuen sa, si uroe óh ka lheueh Paskah nyang phon. Deungon geulindong lé TUHAN awaknyan jitinggai laju banda Rameses, jikalon keudroe lé bansa Meusé, 4 nyang teungoh jiseubeé u dalam jirat aneuëk-aneuëk tuha awaknyan nyang maté geupoh lé TUHAN. Deungon buet nyan, TUHAN ka geubri bukeuti bahwa Gobnyan leubeh teuga nibak ilah-ilah ureuëng Meusé. 5 Óh ka lheueh bansa Israel jitinggai Rameses, awaknyan laju jipeudong khimah di Sukot. 6 Laju awaknyan jibeurangkat lom dan jipeudong teuma khimah di Etam, nibak binéh padang pasi. 7 Nibak teumpat nyan awaknyan jigisa u Pi-Hahirot, disiblah u timu Baal-Zefon, laju jipeudong khimah to ngon Migdol. 8 Óh lheuehnyan awaknyan jitinggai teuma Pi-Hahirot, jijeumeurang laôt dan jitamong laju u dalam padang pasi Etam; óh kalheueh watée lhée uroe jijak, laju jipeudong teuma khimah di Mara. 9 Beudôh inan awaknyan jijak laju dan jipeudong teuma khimah di Elim; disinan na dua blaih boh mata ié dan tujoh ploh bak kuruma. 10 Óh lheuehnyan awaknyan jitinggai teuma Elim dan laju teuma geupeudong khimah to ngon Lhok Suez. 11 Óh lheueh nyan watée jijak lom awaknyan jipeudong teuma khimah di padang pasi Sin, laju óh lheueh nyan tô ngon Dofka, óh lheueh nyan di Alus, dan óh lheuehnyan di Rafidim, teuma disinan hana meuteumé teumpat cok ié jieb. 15 Nibak Rafidim nyan awaknyan jijak laju trok u Gunong Hor dan jipeudong laju khimah di teumpat-teumpat nyoe: padang pasi Sinai, Kibro-Taawa, "Kubu nyang leuha", Hazerot, Ritma, Rimon-Peres, Libna, Risa, Kehelata, Gunong Syafer, Harada, Makhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona, Ezion-Geber, padang pasi Zin, dan Gunong Hor, nibak bataih tanoh Edom. 38 Ateueh peurintah TUHAN, Imeum Harun laju geujak teungoh u ateueh Gunong Hor. Disinan gobnyan meuninggai bak tanggai sa buleuen limong nibak thon nyang keu peuet ploh óh ka lheueh ureuëng Israel ji tinggai tanoh Meusé. Watée meuninggai, Nabi Harun meu umu 123 thon. 40 Óh lheuehnyan teuma, na raja nibak nanggroe Arad, nyang tinggai di Tanoh Neged, siblah u seulatan Kanaan, meuteumé haba bahwa umat Israel teungoh ji tuju u nanggroe gobnyan. 41 Nibak teujak nibak Gunong Hor u darat Moab, laju ureuëng Israel nyan jipeudong khimah di teumpat-teumpat nyang teupeugah di miyueb nyoe: Zalmona, Funon, Obot, di teumpat beukaih reuloh Abarim di daerah Moab, Dibon-Gad, Almon-Diblataim, Gunong Abarim to ngon Gunong Nebo, dan di darat Moab nibak binéh Krueng Yordan, lom to teuma ngon banda Yerikho, lamkawan Bet-Yesimot dan Pantôn Sitim. 50 Di ateueh darat Moab nyan, nibak binéh Krueng Yordan, to ngon banda Yerikho, laju TUHAN geubri ubak Nabi Musa 51 peurintah-peurintah nyoe keu bansa Israel, "Meunyoe gata jeumeurang Krueng Yordan keu tajak tamong u nanggroe Kanaan, 52 gata harôh ta use banmandum peunduduek nanggroe nyan. Gata peubinasa banmandum bubena beurala awaknyan nyang teupeugét nibak batée logam dan meunan cit deungon teumpat-teumpat iébadat awaknyan gatapeu hanco banmandum. 53 Tanoh nyan harôh gata reubot ngon gataduek disinan sabab atra nyan Ulôn nyang bri keu gata. 54 Óh lheuehnyan gata bagi-bagi laju keu kawöm-kawöm gata deungon cara jih gata tiek undi. Ubak kawöm nyang rayeuk harôh kheueh gatabri nyang rayeuk, dan ubak kawöm nyang ubit gatabri teuma jeumba jih nyang ubit. 55 Teuma meunyoe peunduduek nanggroe nyan hana jitem teu use, ureuëng-ureuëng nyan teutab tinggai disinan teuma jipeu susah gata lagée ano di dalam mata atawa duro didalam aso gaki gata. Teuma awaknyan kheueh nyang jijak prang gata. 56 Meunyoe gata hana gata use awaknyan, Ulôn teuma nyang peubinasa gata lagée nyang ka Ulôn reuncana ateueh awaknyan."

Teubileueng 34

1 TUHAN meufeureuman ubak Nabi Musa 2 keuhai peurintah Gobnyan keu bansa Israel lagée nyoe, "Sikeujab teuk gata ka tatamong u dalam nanggroe ureuëng Kanaan, nanggroe nyang Ulôn bri ubak gata sibagoe tanoh pusaka. Nyoe kheueh bataih-bataih nanggroe gata nyan. 3 Di siblaih u seulatan, bataih nyan phon nibak padang pasi Zin meu iseuk laju u Edom. Di siblaih u timu bataih nyan phon nibak ujong seulatan Laôt Maté, 4 wét laju u seulatan trok ubak Rot ueh Akrabim dan laju u Zin sampoe u Kades-Barnea di seulatan. Nibak teumpat nyan wét lom teuma u barat laôt trok u Hazar-Adar, dan laju trok u Azmon. 5 Disinan wét u pantôn di bataih nanggroe Meusé dan akhé jih di Laôt Teungoh. 6 Laôt Teungoh na kheueh bataih nanggroe gata di siblaih u barat. 7 Di utara, phon nibak Laôt teungoh sampoe trok u Gunong Hor 8 dan nibak teumpat nyan teujak laju u Rot Hamat laju trok Zedad 9 dan u Zifron dan akhé jih di Hazar-Enan. 10 Di siblaih u timu bataih nyan phon nibak Hazar-Enan u Sefam. 11 Nibak teumpat nyan treun laju u Ribla di siblaih u timu Ain, laju trok u bukét-bukét di panté timu Danau Galilea, 12 laju u seulatan bansipanyang Krueng Yordan sampoe ubak Laôt Maté. Nyang kheueh nanggroe gata meunurot bataih-bataih nyang na di seukeulileng jih nyan." 13 Nabi Musa geupeugah laju ubak bansa Israel, "Nyang kheueh tanoh nyang teuma gata teurimong deungon cara tatiek undi, tanoh nyang meunurot peurintah TUHAN nyang harôh teubagi ubak sikureueng siteungoh sukée bansa Israel. 14 Sukée-sukée Ruben dan Gad meunan cit siladum nibak sukée Manasye ka jiteurimong jeumba awaknyan, dan tanoh nyan pi ka teubagi teuma keu keuluwarga-keuluwarga awaknyan. 15 Tanoh pusaka awaknyan teuduek di siblaih u timu Krueng Yordan, to ngon banda Yerikho." 16 TUHAN meufeureuman lom ubak Nabi Musa, 17 "Nyang wajéb ureuëng bagi tanoh keu awaknyoe na kheueh lé Imeum Eleazar, dan Yosua aneuëk Nun. 18 Gata tunyok kheueh teuma sidroe ureuëng peumimpén nibak tieb-tieb sukée mangat jijak tulông Eleazar dan Yosua jibagi tanoh nyan." 19 Nan ureuëng-ureuëng nyan na kheueh: Sukée & Peumimpén 29 Nyang kheueh ureuëng-ureuëng nyang geupeurintah lé TUHAN mangat geujak bagi tanoh pusaka nyan keu bansa Israel di nanggroe Kanaan.

Teubileueng 35

1 Di ateueh darat Moab, nibak binéh Krueng Yordan, to ngon banda Yerikho, TUHAN meufeureuman ubak Nabi Musa, 2 "Gatajak peusampoe kheueh ubak bansa Israel bahwa nibak tanoh pusaka nyang teuma awaknyan teurimong nyan, na teuma meupadub boh deungon blang naleueng nyang na disilingka nyan, atranyan harôh kheueh jijok keu ureuëng Lewi mangat awaknyan jeuet jitinggai disinan. 3 Banda-banda nyan ka jeuet keu hak milék ureuëng Lewi keu teumpat tinggai awaknyan. Naleueng lam blang nyang na silingka nyan na kheueh keu beulatang peulara dan mubagoe beulatang awaknyan. 4 Blang naleueng nyan luwah jih na 450 metée u sigala jurusan, atra nyan teu uko nibak bintéh beuton banda. 5 Teuma, daerah ureuëng Lewi nyan hijih timang peuet sagoe, nyang meu ukoran 900 metée di tieb-tieb binéh jih, deungon banda jihnyan na di teungoh-teungoh. 6 Keu ureuëng Lewi harôh kheueh gatajok nam boh banda teumpat jimeulindong ureuëng-ureuëng nyang jipeuplueng droe sabab deungon hana jisaja ureuëng nyan ka jipoh maté ureuëng laén. Seulaén nibak nyan keu ureuëng Lewi meunan cit harôh kheueh teujok peuet ploh dua boh banda nyang laén 7 deungon blang naleueng jih teuma. Jadi jeumeulah banmandum na peuet ploh lapan boh banda keu ureuëng Lewi. 8 Jeumeulah banda-banda Lewi dalam wilayah maséng-maséng sukée Israel harôh kheueh teupeu teuntée meunurot lejih banda dan rayeuk jih wilayah nyan." 9 TUHAN geuyue ubak Nabi Musa mangat geupeusampoe keu bansa Israel tutoe haba nyoe, "Óh kalheueh gata tajeumeurang Krueng Yordan dan gata tamong u nanggroe Kanaan, 11 gata harôh gata peuteuntée laju banda-banda teumpat ureuëng plueng jilakée meulindong, mangat ureuëng-ureuëng nyang jiplueng nyan deungon hana ji saja ka jipoh maté ureuëng laén, teuma meuhase jiplueng u banda nyan. 12 Nibak bandanyan ureuëng nyan teuma aman nibak waréh kawöm ureuëng nyang keunong poh nyang keuneuk jijak tungbila. Sabab ureuëng nyan jitudoh kajipoh maté ureuëng laén, hana jeuet jipoh maté meunyoe peukara jihnyan gohlom teupeureksa di kantô mahkamah. 13 Gata peuteuntée kheueh nam boh banda teumpat ureuëng plueng jijak lakée meulindong nyan, 14 lhée boh di siblaih u timu Krueng Yordan dan lhée boh teuk teuma di tanoh Kanaan. 15 Ban nam boh bandanyan jeuet keu banda teumpat ureuëng plueng nibak gata, ureuëng Israel, dan keu ureuëng aséng aneuëk rantoe atawa nyang tinggai teutab lamkawan gata. Soe mantong nyang ka jipoh maté ureuëng laén deungon hana jisaja, jeuet jipeuplueng droe u dalam saboh nibak banda-banda nyang ka teukheun nyan. 16 Teuma meunyoe sidroe ureuëng jipoh maté ureuëng laén deungon beuso atawa batée dan atawa kayée, ureuëng nyang peubuet lagéenyan na kheueh ureuëng tukang poh gob sampoe maté; ureuëng nyan meusalah dan harôh teuhuköm maté. 19 Waréh kawöm nibak ureuëng nyang keunong poh maté nyan jeuet jipeurhot huköman maté nyan. Meunyoe jihnyan meuteumé ngon ureuëng nyang poh maté syedara jih nyan, jeuet lé ureuëng nyan jipoh maté ureuëng nyang poh syedara jih nyan. 20 Meunyoe na sidroe ureuëng jibanci ureuëng laén, laju ureuëng nyang jibanci nyan jipoh maté ngon cara ji seumpom ureuëng nyan dan jigeulawa teuma peue-peue nyang na u ateueh ureuëng nyan, 21 atawa jishoh ureuëng nyan deungon boh sineunju, ureuëng nyan teupeunan tukang poh gob sampoe maté; ureuëng nyan meusalah dan harôh teuhuköm maté. Waréh kawöm nyang rab nibak ureuëng nyang keunong poh nyan jeuet jipeubuet huköm maté u ateueh ureuëng nyang ka jipoh maté syedara jih nyan. Dan meunyoe jihnyan jiteumé ureuëng nyang poh maté syedara jih nyan, jeuet lé ureuëng nyan jipoh maté ureuëng nyang poh syedara jih nyan. 22 Teuma, jeuet mantong sidroe-droe ureuëng deungon hana jisaja jipoh maté ureuëng laén nyang hana jibanci, aléh deungon jisumpom ureuëng nyan atawa deungon jirhom deungon sapeue-sapeue beunda u ateueh ureuëng nyan. 23 Atawa jeuet mantong sidroe-droe ureuëng deungon hana leumah jikalon, jipeurhot si aneuëk batée deungon nyan meuakibat ureuëng laén meuninggai donya, teuma di ureuëng nyang maté nyan bukon teuma musoh jih, dan ureuëng nyan hana teuma meukeusut keuneuk peuceulaka ureuëng nyan. 24 Nibak hai-hai nyang lagéenyan bagoe umat jimeurok pakat keu jipeutimang ngon jipeusidang ureuëng nyang ka jipoh maté gob laén nyan, dan meunan cit ureuëng nyang keuneuk balah keuhai maté syedara geuh nyan. 25 Meurok pakat umat nyan harôh kheueh teuma jilindong ureuëng nyang ka jipoh maté ureuëng laén deungon hana jisaja nyan lé ancaman syedara ureuëng nyang ka keunong poh maté nyan. Ureuëngnyan harôh jipeuriwang u banda teumpat meulindong, di teumpat jih puplueng droe nyan. Ureuëng nyan harôh tinggai disinan sampoe ureuëng nibak watée nyan jeuet keu Imeum Agong ka meuninggai donya; barô kheueh teuma di ureuëng nyan ka jeuet jiwoe u gampông leuen jih. Teuma meunyoe ureuëng nyan jitinggai banda teumpat jimeulindong nyan, laju meuteumé dan ka jipoh maté lé syedara ureuëng nyang jipoh ngon hana ji saja nyan, teuma peue nyang ka jipeubuet ngon tungbila nyan bukon kheueh nyan teukheun saboh kasus teuseumeupoh maté. 29 Peuratoran-peuratoran nyan teutab na keu gata dan keu banmandum keuturonan gata, dipat mantong gatanyoe tinggai. 30 Lamhai teupoh ureuëng sampoe maté, ureuëng nyang teutudoh sibagoe ureuëng nyang poh, teuma jeuet teupeugah meusalah atawa teuhuköm maté meunyoe buet jihnyan hase teubukeuti lé dua droe saksi atawa leubeh. Meunyoe sidroe ureuëng saksi hana seb keubukeuti bahwa peue nyang jitudoh nyan beutôi. 31 Sidroe ureuëng nyang jipoh maté ureuëng laén ureuëng nyan harôh teuhuköm maté. Ureuëng nyan hana jeuet jiteuboh huköm jihnyan deungon péng. 32 Meunyoe na ureuëng jipeuplueng droe u salah saboh banda teumpat meulindong, bék kheueh gata peuidhin ureuëng nyan jijok péng mangat jih nyan hase lom jiwoe ubak khimah jih sigohlom Imeum Agong meuninggai donya. 33 Meunyoe gata tapeubuet meunan, gata ka tapeu kuto tanoh nyang teumpat gata duek nyan. Ureuëng poh maté gob laén nyan jipubrok nanggroe; teuma hanale cara laén keu teupeugleh nanggroe nyan seulaén deungon cara teusuit teuma nyawöng ureuëng nyang seumeupoh maté nyan. 34 Bék kheueh gata peukuto tanoh nyang teumpat gata duek, sabab Ulôn kheueh TUHAN, dan Ulôn tinggai lamkawan bansa Israel."

Teubileueng 36

1 Bubena ulée keuluwarga dalam kawöm Gilead, aneuëk Makhir, na kheueh cucoe Manasye, aneuëk Nabi Yusuf, jijak meuhadab ubak Nabi Musa dan peumimpén-peumimpén nyang laén. 2 Kheun awaknyan, "TUHAN geuyue ubak droeneueh mangat neubagi tanoh nyan keu ureuëng Israel deungon cara teutiek undi. Meunan cit Gobnyan geuyue droeneueh mangat neubri tanoh pusaka syedara kamoe Zelafehad ubak aneuëk-aneuëk gobnyan nyang inong. 3 Teuma nyoe peureulée neuingat meunyoe awaknyan jimeukawen deungon ureuëng agam nibak sukée laén, tanoh awaknyan ka rhot ubak jaroe sukée nyan. Deungon lagéenyan tanoh nyang ka teupeuteuntée keu wilayah kamoe teuntée meukureueng. 4 Nibak Thon Teupulang, bak watée banmandum hareuta milék nyang ka ji peubloe jijok pulang ubak ureuëng po hak milék nyang phon, tanoh aneuëk-aneuëk inong Zelafehad teuma teutab jeuet keu hak milék ureuëng lakoe awaknyan, deungon nyan sukée kamoe ka teuntée gadôh tanoh nyan." 5 Lé Nabi Musa laju geupeutrok ubak bansa Israel peurintah nyoe nibak TUHAN, "Peue nyang jipeugah lé ureuëng keuturonan Nabi Yusuf nyan beutôi, 6 dan lé sababnyan TUHAN geupeugah ubak aneuëk inong Zelafehad bahwa awaknyan beubaih ji meukawen deungon soe mantong nyang ji galak, asai nyang saban sukée jih deungon awaknyan. 7 Tanoh pusaka tieb-tieb ureuëng Israel teutab teu ikat nibak sukée jihnyan. 8 Tieb-tieb ureuëng inong nyang jiteurimong waréh tanoh pusaka di dalam salah saboh sukée bansa Israel, di ureuëng inong nyang na jiteurimong warésan pusaka nyan harôh kheueh jimeukawen deungon sukée jih nyan cit teuma. Deungon lagéenyan tieb-tieb ureuëng Israel teuma jiteurimong hareuta pusaka tanoh indatu jih nyan, 9 sampoe tanoh pusaka nyan hana meupinah-pinah nibak saboh sukée ubak sukée nyang laén. Tieb-tieb sukée bansa Israel teutab na hak milék tanoh pusaka jihnyan keudroe." 10 Jadi paih lagée peurintah TUHAN ubak Nabi Musa, ban limong droe aneuëk inong Zelafehad nyan, na kheueh Mahla, Tirza, Hogla, Milka dan Noa jimeukawen deungon ureuëng-ureuëng nyang mantong meusyedara rot siblaih bapak jih nyan. 12 Awaknyan jimeukawen ngon ureuëng-ureuëng nibak kawöm-kawöm dalam sukée bansa Manasye, aneuëk Nabi Yusuf. Deungon lagéenyan tanoh pusaka awaknyan teutab jeuet keu hak milék nibak sukée bansa bapak awaknyan. 13 Nyan kheueh peuratoran-peuratoran dan keuteutapan-keuteutapan nyang geubri lé TUHAN ubak bansa Israel meulalu Nabi Musa, bak watée bansa Israel nyan mantong na di ateueh darat Moab nibak binéh Krueng Yordan, to ngon banda Yerikho.

Kitab Teu-Ulang 1

1 Kitab nyoe meu asoe tutoe haba nyang geupeusampoe lé Nabi Musa ubak bansa Israel bak watée awaknyan mantong na di padang pasi nibak Pantôn Yordan. Pantôn nyan na disiblaih u timu Krueng Yordan, tô ngon banda Suf, lamkawan banda Paran di saboh pihak, dan banda-banda Tofel, Laban, Hazerot dan Di-Zahab dipihak nyang laén. ( 2 Phon di Gunong Sinai trok u Kades-Barnea liwat daerah gunong-gunong Edom, treb jih siblaih uroe jak.) 3 Bak tanggai sa buleuen siblaih nibak thon nyang keu peuet ploh óh kalheueh awaknyan jitinggai nanggroe Meusé, Nabi Musa geupeusampoe ubak bansa nyan banmandum nyang geupeurintah lé TUHAN keu teupeugah ubak awaknyan. 4 Nyan na jih bak watée Nabi Musa geupeutaloe Sihon, raja ureuëng Amori, nyang jiba peurintah di banda Hesybon, dan Og, raja Basan, nyang jimat peurintah di banda-banda Asytarot dan Edrei. 5 Jadi, disiblaih u timu Yordan di daerah Moab, Nabi Musa phon-phon that geupeutrang huköm-huköm dan peurintah-peurintah TUHAN. Geupeugah lé Nabi Musa, 6 "Bak watée geutanyoe mantong na di Gunong Sinai, TUHAN Po teu Allah geutanyoe geupeugah, 'Droeneueh nyoe ka treb that tinggai di gunong nyoe. 7 Jinoenyoe gatareuloh kheueh laju khimah-khimah gata dan tajak laju u daerah gunong-gunong ureuëng Amori dan ubak mandum daerah nyang na tô-tô disinan, na kheueh Pantôn Yordan, daerah meu bukét dan darat nyang miyueb, daerah di siblaih u seulatan dan panté Laôt Teungoh. Tajak duek laju nibak tanoh Kanaan dan Gunong-gunong Libanon trok u krueng raya Efrat. 8 Ulôn, TUHAN, ka Ulôn peujanji tanoh nyan na kheueh keu hak milék indatu gata Nabi Ibrahim, Nabi Ishaq dan Nabi Yakub meunan cit ubak keuturonan awaknyan lhée. Jadi tajak kheueh laju gataduek nibak tanoh nyan.' " 9 Nabi Musa geupeugah ubak bansa nyan, "Bak watée geutanyoe mantong na di Gunong Sinai, disinan na ulôn peugah ubak gata: Tanggong jaweueb keu ulôn pimpén gata lumpah that brat nibak ulôn. Hai nyan hana hase ulôn peubuet keudroe ulôn, lé sabab 10 TUHAN Po teu Allah gata ka geupeujeuet gata meutamahle siduble bintang-bintang nyang na di langét. 11 Seumoga TUHAN, Po teu Allah indatu gata hana piôh geutamah sabe jeumeulah gata sampoe siribée goe lipat, dan geupeu jeuet gata bansa nyang makmu lagée nyang ka geupeujanji nyan! 12 Teuma panena mungken atranyan lôn seuôn keudroe tanggong jaweueb nyang geuhon nyan keu ulôn peuseuleusoe mandum hai gata? 13 Gata piléh kheueh nibak tieb-tieb sukée meupadub droe ureuëng agam nyang patot-patot lom ngon bijaksana, meupeungalaman dan peunoh peungeurtian, mangat ulôn angkat awaknyan jeuet keu peumimpén gata. 14 Usui nyan gata teurimong deungon gét. 15 Sabab nyan lamkawan peumimpén-peumimpén nyang gata piléh, meupadub droe nyang patot-patot lom na iéleumé ngon malém lom ngon bijaksana ulôn cok dan ulon angkat mangat jeuet keu peumimpén gata. Meupapadub droe teupeu jeuet keu pimpén ateueh siribée droe, nyang laén ateueh sireutôh droe, ateueh limong ploh droe dan ateueh siploh droe. Meunan cit ulôn baiát teuma peumimpén-peumimpén nyang laén mangat teu urôh sukée-sukée gata. 16 Bak watéenyan ulôn bri tugaih awaknyan lagéenyoe: Gata ngieng kheueh ureuëng meudakwa nyang teuka lamkawan bansa gata. Gata jok kheueh keuputosan nyang ade keuhai nyan meuseuliseh waham nyan, bah kheueh nyan lam peukara nyang teusangkot deungon ureuëng saboh bansa gata atawa meusangkot ureuëng jamé nyang na tinggai lamkawan gata. 17 Keuputosan nyang gata cok nyan harôh kheueh ade dan bék brat siblah; tieb-tieb ureuëng nyang meusalah harôh kheueh gata peusidang deungon cara nyang saban, deungon hana gata peubeuda soe ureuëng nyang teungoh gata peusidang nyan. Bék teumakot ubak soe mantong, sabab keuputosan nyang gata cok nyan asai jih nibak Po teu Allah. Meunyoe na saboh peukara nyang brat nibak gata, gataba kheueh nyan ubak ulôn, mangat ulôn nyang peuputôh atra nyan. 18 Bak watée nyan cit teuma ulôn bri peutunyok-peutunyok ubak gata keuhai banmandum nyang laén nyang teuma ulôn bri tée ubak gata nyang harôh teuma gata peubuet." 19 "Dan lom teuma paih lagée peurintah TUHAN Po teu Allah geutanyoe, geutanyoe laju ta tinggai Gunong Sinai dan tajak laju rot padang pasi nyang luwah lom lumpah mubahya tajak lalu u daerah gunong-gunong ureuëng Amori. Bak watée geutanyoe ka trôk u Kades-Barnea, 20 ulôn peugah: Jinoenyoe gata ka trôk u daerah gunong-gunong ureuëng Amori, tanoh nyang geubri keu geutanyoe lé TUHAN Po teu Allah geutanyoe dan Po teu Allah indatu geutanyoe. Ngieng kheueh, dikeue gata ka meureuntang tanoh nyan. Gatajak kheueh laju taduek disinan lagée nyang geupeurintah lé TUHAN. Bék kheueh bimbang ngon ragu gata dan bék kheueh teuma teumakot teuh. 22 Teuma gatajak ubak ulôn dan gata peugah, 'Leubeh gét geutanyoe tayue ureuëng meupadub droe leubeh awai nibak geutanyoe keu mangat jijak seulidék nanggroe nyan dan jeuet awaknyan hase jipeugah ubak geutanyoe rot toh nyang museuti geutanyoejak dan pakriban teuma deungon banda-banda nyang tanyoe jak nyan.' 23 Usui nyan ulôn situju that, nyang kheueh jeuet laju ulôn piléh dua blah droe, sidroe nibak tieb-tieb sukée. 24 Awaknyan jitamong u daerah gunong-gunong nyan nyang jiôh sampoe trok u Pantôn Eskol, banmandum nyan jirawoh. 25 Óh lheueh nyan awaknyan pi jiriwang laju ubak geutanyoe sira jiba boh-boh kayée nyang awaknyan teumé disinan dan meunan cit jilapor lom teuma nanggroe nyang teuma geubri lé TUHAN Allah nyan keubit gét that meubaja. 26 Teuma gata talawan peurintah TUHAN Allah gata dan hana gatatem tamong u nanggroe nyan. 27 Gata tameu ôk-ôk ngon haba lagéenyoe, 'TUHAN geubanci keu geutanyoe. Nyang kheueh sabab Gobnyan geuba geutanyoe geupeuteubiet nibak nanggroe Meusé keu geujak peujok geutanyoe u dalam jaroe ureuëng Amori mangat ureuëng Amori nyan jipoh maté mandum geutanyoe. 28 Deungon nyan, keupeue geutanyoe tajak keunan? Ureuëng-ureuëng nyang tanyoe kirém keunan takot jimeulapor bahwa bansa nyan leubeh teuga ngon leubeh gagah nibak geutanyoe, dan lom awaknyan tinggai di banda-banda nyang meubintéh beuton meunan cit kong ngon kukoh lom ngon manyang rab trôk u langét. Awaknyan deuh jingieng gogasi disinan!' 29 Teuma ulôn peugah: Bék teumakot ubak ureuëng-ureuëng nyan. 30 TUHAN Allah teuma geupimpén gata dan geumeujuang keu gata lagée nyang ka gata kalon keudroe di nanggroe Meusé 31 dan di padang pasi. Gata deuh takalon pakriban TUHAN Po teu Allah gata geuba gata deungon seulamat bansipanyang rot ueh nyan sampoe trôk u teumpat nyoe, hana meubeda lagée sidroe bapak ji tiengkue aneuëk droe jih keudroe. 32 Teuma bahpi ulôn ka lôn kheun meunan, gata gohlom cit gata meuiman ubak TUHAN Po teu Allah gata, 33 nyang geujak dikeue gata keu geujak mita teumpat peudong khimah keu gata. Gobnyan geutunyok rot uh keu gata bak watée malam lam taméh apui, dan bak watée uroe lam taméh awan." 34 "TUHAN geudeungoe peue nyang gata jeuet keu apoh apah nyan laju Gobnyan jiteuka beungéh. TUHAN geumeusumpah, 35 'Hana meusidroe pi nibak angkatan jeuhet nyoe hase jitamong u dalam nanggroe nyang subô nyang ka Ulôn peujanji ubak indatu gata. 36 Na kheueh si Kaleb, aneuëk Yefune nyang teuma jitamong keunan, sabab jih nyan teutab seutia ubak Ulôn. Keu si Kaleb dan keuturonan jihnyan teuma Ulôn bri nanggroe nyang ka jijak-jak bansaboh nyan.' 37 Meunan cit deungon gata nyang jeuet keusabab TUHAN geubeungéh keu ulôn dan geupeugah, 'Hai Nabi Musa, gatapi hana cit tateumé tamong u dalam nanggroe nyan. 38 Teuma gatayue kheueh beutabah até peumbantu gata, Yosua aneuëk Nun. Jihnyan kheueh nyang pimpén bansa Israel jijak reubot tanoh nyan.' 39 Laju TUHAN geupeugah lom keugeutanyoe banmandum, 'Aneuëk-aneuëk gata nyan mantong that ubit keu hase ji peubeuda nyang jroh deungon nyang jeuhet, aneuëk-aneuëk nyan meunurot kheun gata teuma jireupah lé musoh-musoh gata, keu awaknyan kheueh teuma Ulôn jok tanoh nyan, dan awaknyan teuma jiduek nibak tanoh nyan. 40 Teuma gata, tajak woe kheueh u padang pasi meulalu rot nyang rhot u Lhôk Akaba.' 41 Gata tajaweueb, 'Hai Nabi Musa, kamoe nyoe ka meudesya ubak TUHAN. Teuma jinoenyoe kamoe keuneuk maju u mideuen prang lagée nyang geupeurintah lé TUHAN, Po teu Allah geutanyoe.' Teuma lé maséng-maséng lamkawan gata ka meusiab-siab keu tajak muprang, deungon anggapan bahwa teuseureubu tanoh gunong-gunong nyan mudah that. 42 Teuma TUHAN meufeureuman ubak ulôn, 'Bék tapeubiyeu awaknyan jimuprang, sabab ulôn hana meusajan awaknyan, teuma awaknyan ji peutaloe banmandum lé musoh awaknyan.' 43 Ulôn peutrok ubak gatanyoe peue nyang ka geupeugah lé TUHAN, teuma gata hana tapakoe mubacutpi. Gata tabantah peurintah TUHAN, dan deungon sombong gata jak laju ubak gunong-gunong nyan. 44 Lé ureuëng Amori nyang na tinggai nibak gunong-gunong nyan laju jiteubiet jijak prang gata banmandum. Jeumeulah awaknyan jai lumpah na, lagée kawan uno. Awaknyan ji peucrok gata sampoe trok u Horma, laju jipeutaloe gata nibak daerah gunong-gunong Edom. 45 Óh lheueh nyan gatawoe dan talakée tulông ubak TUHAN, teuma Gobnyan hana geutem deungoe ngon hán teuma geukalon gata." 46 "Óh lheuehnyan geutanyoe tinggai di Kades nyang treb lumpah na.

Kitab Teu-Ulang 2

1 Akhé jih geutanyoe tawoe lom u padang pasi meulalu rot ueh nyang rhot u Lhôk Akaba, lagée nyang geupeurintah lé TUHAN. Treb that geutanyoe meuwot-wot nibak gunong-gunong Edom. 2 Laju TUHAN meufeureuman ubak ulôn 3 bahwa ka lumpah that treb geutanyoe meuwot-wot di daerah nyan. Deungon nyan geutanyoe jinoenyoe harôh tajak u siblah utara. 4 Óh lheueh nyan TUHAN geuyue ubak ulôn mangat lôn bri peutunyok nyang lagéenyoe ubak gata, 'Hana treblé teuma gata tatamong u daerah Edom, daerah syedara-syedara gata, keuturonan Esau. Awaknyan jitakot keu gata, 5 teuma gata hana jeuet taseurang awaknyan, sabab nibak tanoh awaknyan hana meubacutpi Ulôn bri keu gata, sabab daerah Edom ka Ulôn bri keu keuturonan Esau. 6 Gata jeuet tabloe peunajoh meunan cit deungon ié jieb nibak awaknyan.' 7 Gata ingat kheueh pakriban TUHAN Po teu Allah gata ka geubri beureukat ubak gata lamhai peue mantong nyang gata peubuet. Gobnyan geupeulara gata bak watée gata mantong na meuwot-wot di teungoh-teungoh padang pasi nyang luwah nyoe. Gobnyan geulindong gata peuet ploh thon treb jih nyoe dan geubri teuma peue mantong nyang gata peureulée. 8 Óh lheuehnyan geutanyoe tajak laju, tatinggai teuma rot ueh nyang rhot u banda-banda Elat dan Ezion-Geber rhot laju u Laôt Maté, laju teuwét u timu laôt rhot u Guron Moab. 9 TUHAN meufeureuman ubak ulôn, 'Ureuëng Moab, keuturonan Nabi Lot, awaknyan hana jeuet gata peukaru. Meunan cit bék teuma gata seurang awaknyan. Nanggroe Ar ka Ulôn bri keu awaknyan dan nibak tanoh awaknyan hana mubacutpi Ulôn bri keu gata.' " ( 10 Yoh watée ilée Ar nyan jiduek lé bansa Emim. Awaknyan gét that rayeuk-rayeuk hi badan jih, saban ngon ureuëng Enak, meunan cit bansa gogasi. 11 Lagée ureuëng Enak, meunan cit awaknyan teuhôi ngon nan ureuëng Refaim, teuma lé ureuëng Moab jiboh nan awaknyan ureuëng Emim. 12 Ilée ureuëng Hori tinggai di Edom, teuma ji use ngon jipeuranab lé keuturonan Esau, nyang kheueh óh dudoe teuma jiduek tanoh awaknyan; meunan cit teuma deungon bansa Israel teuma óh dudoe singoh ji use musoh-musoh jihnyan nibak tanoh nyang teujok keu awaknyan.) 13 "Óh lheueh geutanyoe tajeumeurang Krueng Zered lagée nyang geupeurintah lé TUHAN ubak geutanyoe. 14 Nyan na jih lhée ploh lapan thon óh ka lheueh geutanyoe ta tinggai Kades-Barnea. Banmandum tantra nibak angkatan nyan ka maté lagée nyang geupeugah lé TUHAN. 15 TUHAN hana putôh-putôh geulawan sabe awaknyan sampoe teuma awaknyan bak akhé jih banmandum sapansapa. 16 Óh habéh banmandum awaknyan maté, TUHAN laju geupeugah ubak geutanyoe, 18 'Uroenyoe gata tajak rot daerah Moab, rhot rot nanggroe Ar. 19 Teuma gata trôk u tanoh ureuëng Amon, keuturonan Nabi Lot. Bék kheueh gata peukaru ngon gata seurang awaknyan, sabab nibak tanoh nyang ka Ulôn jok keu awaknyan, meubacutpi hana nyang Ulôn jok keu gata.' " ( 20 Daerah nyan meunan cit meusyeuhu sibagoe nanggroe Refaim, nan bansa nyang watée ilée na tinggai disinan; lé ureuëng Amon awaknyan jiboh nan ureuëng Zamzumim. 21 Lagée ureuëng Enak, awaknyan meunan cit badan jih rayeuk-rayeuk. Awaknyan teuga-teuga that dan lom teuma jeumeulah jih le that. Teuma TUHAN geupeuhanco awaknyan, sampoe ureuëng Amon laju jireubot tanoh nyan, óh lheuehnyan awaknyan laju tinggai disinan. 22 Meunan cit nyang geupeubuet lé TUHAN keu ureuëng Edom, keuturonan Esau nyang tinggai di daerah gunong-gunong Edom. TUHAN geupeuranab banmandum ureuëng Hori, sampoe ureuëng Edom laju jireubot tanoh nyan dan jiduek di ateueh tanoh nyan, laju jitinggai teutab disinan trôk án jinoe. 23 Tanoh nyang meureuntang di seupanyang pante Laôt Teungoh ji duek lé ureuëng-ureuëng nibak pulo Kreta. Awaknyan ka jipeupoh habéh ureuëng Awi, peunduduek aseuli nibak tanoh nyan, lé awaknyan jiduek laju nibak daerah nyan dan trôk u seulatan jiôh nibak banda Gaza.) 24 "Óh ka seuleusoe tajak rot daerah Moab, TUHAN geupeugah ubak geutanyoe, 'Gatajak kheueh laju dan jinoenyoe tajak jeumeurang Krueng Arnon. Ulôn teuma Lôn jok keu gata Sihon, raja Amori nyang mat peurintah di Hesybon, meusigoe deungon nanggroe jihnyan. Gata jakprang kheueh laju awaknyan, laju gataduek ateueh tanoh jihnyan. 25 Phon nibak uroenyoe Ulôn teuma Lôn peujeuet gata beujitakot lé bansa-bansa dipat mantong. Tieb-tieb watée teuma jiteuka yo nyang lumpah teumakot meunyoe jideungoe keuhai gata.' " 26 "Óh ka lheueh ulôn kirém na meupadub droe utosan nibak padang pasi Kedemot ubak Raja Sihon nibak Hesybon mangat jijak peutrok usui meudamé nyoe: 27 'Neupeu idhin kheueh kamoe mangat kamoejak rot nanggroe Teungku po. Kamoe teuma kamoe jak laju dan hana kamoe wét nibak rot ueh raya. 28 Kamoe teuma kamoe bayeue peunajoh nyang kamoe pajoh dan ié nyang kamoe jieb. Kamoe peureulée kamoe jakmantong rot nanggroe nyoe, 29 sampoe trôk teuma kamoe jeumeurang Krueng Yordan keu kamoe tamong u nanggroe nyang geubri lé TUHAN Po teu Allah kamoe keu kamoe. Keuturonan Esau nyang na tinggai di Edom dan ureuëng Moab nyang na tinggai di Ar meunan cit awaknyan ka jipeu idhin ubak kamoe mangat kamoejak rot nanggroe awaknyan.' 30 Teuma lé Raja Sihon hana jibri idhin keu geutanyoe tajak rot nanggroe jih nyan. TUHAN Po teu Allah geutanyoe geu peujeuet jih nyan kreueh ulée dan neukat mangat geutanyoe hase tapeu taloe awaknyan. Daerah jihnyan mantong tanyoe duek sampoe án jinoe. 31 Óh lheueh nyan TUHAN geupeugah ubak ulôn, 'Raja Sihon dan nanggroe jih Ulôn jok keu gata; tacok kheueh dan taduek kheueh di nanggroe jih nyan.' 32 Teuma teuka kheueh Sihon deungon banmandum sipa-i jih keu jijak prang geutanyoe rab ngon banda Yahas. 33 Teuma Po teu Allah TUHAN geutanyoe geuseurah awaknyan ubak geutanyoe, lé geutanyoe laju tapeutaloe awaknyan meunan cit banmandum deungon aneuëk-aneuëk jih dan lom mandum sipa-i jih. 34 Bak watéenyan cit geutanyoe peuhanco ngon tanyoe reubot tieb-tieb banda, dan tapoh maté banmandum peunduduek disinan, ureuëng agam, ureuëng inong, dan aneuëk manyak. Hana nyang tapeubiyeu awaknyan udeb. 35 Beulatang peulara awaknyan tacok habéh banmandum dan banda-banda jihnyan tanyoe reupah bubena. 36 Deungon tulông Po teu Allah TUHAN geutanyoe, geutanyoe meuteumé tareubot banmandum bandanyan, phon nibak Aroër, di ujong Pantôn Arnon, dan banda di teungoh pantôn nyan, trôk u daerah Gilead. Hana meusabohpi banda nyang kuta beuton jih nyang keubiet that khong nibak geutanyoe, banmandum nyan taheuntam sapansapa. 37 Teuma geutanyoe hana ta peurab ubak daerah ureuëng Amon atawa binéh Krueng Yabok atawa banda-banda di daerah gunong-gunong atawa teumpat laén dipat mantong nyang geutam lé TUHAN Po teu Allah geutanyoe."

Kitab Teu-Ulang 3

1 "Óh lheuehnyan tanyoe tameugrak laju u arah utara tatuju u daerah Basan, Og, raja Basan jingaza u mideuen prang meusajan ngon banmandum sipa-i jih keujijak prang geutanyoe tô ngon banda Edrei. 2 Teuma TUHAN geupeugah ubak ulôn, 'Bék teumakot keu jihnyan, he Nabi Musa. Ulôn teuma Lôn peujok jihnyan, sipa-i jih dan banmandum daerah jih nyan keu gata. Gata peusaneut kheueh jihnyan lagée nyang ka Ulôn peusaneut u ateueh ureuëng Sihon, raja Amori nyang jimat peurintah di nanggroe Hesybon.' 3 Dan meunan cit TUHAN Po teu Allah geutanyoe geujok Raja Og dan rakyat jihnyan keu geutanyoe, dan awaknyan banmandum tanyoe nyang peutaloe. 4 Bak watée nyan tanyoe reubot banmandum banda jihnyan, hana meusaboh banda jihpi nyang na tinggai. Banmandum nyan na nam ploh boh banda nyang geutanyoe reubot bansaboh Argob, nyang jipeurintah lé Raja Og nibak Basan. 5 Banmandum banda nyan jipeugét deungon pageue-pageue beuton nyang manyang-manyang, pintoe-pintoe geureubang dan palang-palang pintoe keu teutôb pintoe geureubang nyan. Seulaén nibaknyan mantong jai banda nyang laén nyang hana meupageue ngon beuton. 6 Banmandum banda nyan tanyoe peuhanco, dan banmandum teuma ureuëng agam, ureuëng inong dan aneuëk-aneuëk awaknyan tanyoe poh maté, lagée nyang geutanyoe peubuet ateueh banda-banda Raja Sihon nibak Hesybon. 7 Beulatang peulara awaknyan tanyoe cok dan banda-banda nyan tanyoe reubot teuma. 8 Bak watéenyan tanyoe cok nibak bandua raja Amori daerah di siblaih u timu Krueng Yordan dan Krueng Arnon sampoe trôk u Gunong Hermon. ( 9 Gunong Hermon nyan teukheun cit ngon nan Siryon lé ureuëng Sidon, dan Senir lé ureuëng Amori.) 10 Tanyoe cok banmandum wilayah Raja Og nibak Basan: banda-banda nyan nyang na ateueh darat manyang, lagée daerah Gilead dan Basan, laju trok u timu nibak banda Basan dan Edrei." ( 11 Raja Og na kheueh ureuëng Refaim nyang keuneulheuh. Keureunda manyét jih teupeugét nibak batée, panyang jih peuet metée dan luwah jih rab dua metée meunurot ukoran nyang ka teupeuteuntée. Trok nibak uroenyoe mantong deuh teukalon di Raba, banda ureuëng Amori.) 12 "Óh ka lheueh tanoh nyan jeuet keu atra geutanyoe, ulôn jok keu sukée Ruben dan Gad daerah siblah utara banda Aroër tô ngon Krueng Arnon, dan siladum nibak daerah gunong-gunong Gilead, dan banda-banda nyan. 13 Siladum nibak sukée Manasye ulôn jok teuma nyang leubeh nibak Gilead, meunan cit daerah Basan beukaih jajahan Og, na kheueh banmandum wilayah Argob." (Basan meusyeuhu sibagoe nanggroe ureuëng Refaim. 14 Yair nibak sukée Manasye jicok banmandum wilayah Argob, na kheueh nibak Basan trok ubak bataih Gesur dan Maakha. Jihnyan jiboh nan gampông-gampông nyan meunurot nan jih keudroe, dan trok án jinoe mantong meugah ngon nan Yair.) 15 "Daerah Gilead ulôn jok keu kawöm Makhir nibak sukée Manasye. 16 Dan keu sukée-sukée Ruben dan Gad ulôn jok teuma daerah lamkawan Gilead dan Krueng Arnon. Nibak teungoh krueng nyan na kheueh sibagoe bataih awaknyan siblaih u seulatan, siblaih utara meubataih teuma ngon Krueng Yabok, nyang siladum nyan na kheueh bataih nanggroe ureuëng Amon. 17 Siblaih ubarat, daerah awaknyan meureuntang trok u Krueng Yordan, nibak Danau Galilea di utara trok u Laôt Maté siblaih u seulatan, lheueh nyan trok laju ubak gaki Gunong Pisga disiblaih u timu. 18 Nibak watéenyan ulôn jok keu awaknyan peurintah nyang lagée nyoe: TUHAN Po teu Allah gata geubri keu gata daerah siblah u timu Krueng Yordan keu teumpat tinggai gata. Teuma tantra-tantra gata harôh leungkab ngon sinjata dan jijeumeurang Krueng Yordan leubeh awai nibak sukée-sukée Israel nyang laén. 19 Teuma aneuëk ngon peurumoh gata meunan cit deungon beulatang peulara gata nyang le nyang jeuet tinggai nibak banda-banda nyang ka ulôn jok keu gata. 20 Tulông kheueh ureuëng-ureuëng saboh bansa ngon gata sampoe awaknyan hase jiduek nibak tanoh nyang geubri lé TUHAN Po teu Allah gata keu awaknyan nibak blah ubarat Krueng Yordan, dan sampoe trok TUHAN geuteurimong awaknyan udeb deungon aman teuntram nibak teumpat nyan, lagée nyang ka geupeujeuet ateueh gata nibak teumpat nyoe. Barô kheueh óh ka lheuehnyan gata jeuet gata woe ubak tanoh atra gata nyang ka ulôn bri keu gata. 21 Laju ulôn peugah ubak Yosua: Gata ka gata ngieng banmandum nyang geupeubuet lé TUHAN Po teu Allah gata ateueh Sihon dan Og, bandua rajanyan. Meunan cit Gobnyan teuma geupeubuet nyang saban ateueh tieb-tieb raja nyang gata reupah tanoh jih. 22 Bék teumakot keu awaknyan, sabab TUHAN Po teu Allah gata teutab geumeujuang keu gata." 23 "Nibak watéenyan ulôn meulakée ubak TUHAN: 24 Ya TUHAN Nyang Mahamanyang, ulôn kuteupeue bahwa nyang Droeneueh tunyok ubak ulôn na kheueh awai nibak buet-buet Droeneueh nyang rayeuk dan ajaéb. Hana ilah nyang laén bah kheueh nyang di langét meunan cit nyang na di bumoe nyang lagée Droeneueh nyang hase neupeubuet hai-hai nyang paleng hebat. 25 Neupeu idhin kheueh ulôn mangat lôn jeumeurang Krueng Yordan, ya TUHAN, mangat jeuet lôn jak kalon nanggroe nyang subô di meurandeh jeh, daerah gunong-gunong nyang gagah dan Gunong-gunong Libanon. 26 Teuma lé sabab gata ka jeuet keu beungéh TUHAN ateueh ulôn sampoe Gobnyan hana geutem teurimong peue-peue nyang ulôn lakée. Dilikot nibak nyan TUHAN teuma geupeugah, 'Kaseb nyan he Nabi Musa, bék gata teuoh lé hainyan! 27 Gata jak kheueh u pucak Gunong Pisga dan gata pandang kheueh u arah utara ngon arah seulatan, u timu dan u barat. Ngieng kheueh beugét-gét peue nyang gata kalon nyan, sabab gata hana teuma gata jeumeurang Krueng Yordan. 28 Gata bri kheueh peutunyok-peutunyok ubak Yosua. Peutabah kheueh até jih, sabab jihnyan kheueh nyang teuma pimpén bansa nyan u meurandeh keu jijak duek nanggroe nyang gata kalon nyan.' 29 Deungon nyan tinggai kheueh geutanyoe nibak pantôn meurandeh banda Bet-Peor."

Kitab Teu-Ulang 4

1 Lé Nabi Musa geupeugah ubak bansa nyan, "Gata taát kheueh ubak mandum huköm nyang ulôn peurunoe ubak gata, mangat gata hase udeb sampoe gata duek tanoh nyang teuma geubri lé TUHAN, Po teu Allah indatu gata, keu gata. 2 Peue nyang ulôn peurintah, bék gata tamah dan gata peukureueng meubacutpi. Gata taát kheueh ubak peurintah-peurintah Po teu Allah gata nyang ulôn bri keu gata. 3 Gata ka takalon keudroe peue nyang geupeubuet lé TUHAN Po teu Allah gata di ateueh Gunong Peor. Soe mantong ureuëng nyang jiseumah Baal di teumpat nyan geupeubinasa banmandum, 4 teuma gata nyang teutab seutia ubak TUHAN Po teu Allah gata teutab mantong udeb sampoe án jinoe. 5 Banmandum huköm nyan ulôn peurunoe ubak gata lagée nyang geupeurintah lé TUHAN Po teu Allah ulôn. Gata taát kheueh banmandum nyan di nanggroe nyang teuma gata tamong dan teumpat gata tinggai. 6 Gata peubuet kheueh nyan deungon seutia. Meunyoe gata tapeubuet lagée nyang ka ulôn peugah nyan, teuma keubijaksanaan gata seumaken deuh nibak bansa-bansa laén. Meunyoe awaknyan jideungoe keuhai huköm-huköm nyan, awaknyan teuma jipeugah, 'Keubit bijaksana that dan carông that bansa nyang raya nyan!' 7 Bansa nyang rayeuk toh kheueh nyang na ilah nyang lagéenyan tô meunyoe tapeureulée lagée TUHAN Po teu Allah geutanyoe nyang meunan tô deungon geutanyoe? Gobnyan geujaweueb pajan mantong geutanyoe ta meuhôi talakée tulông ubak Gobnyan. 8 Dan bansa nyang rayeuk toh teuma kheueh nyang na huköm-huköm nyang meunan ade lagée huköm-huköm nyang ulôn peurunoe ubak gata nibak uroe nyoe? 9 Gata ngieng kheueh dan gata ingat kheueh beu jroh-jroh, mangat siumu udeb gata hana tatuwoe ubak peue nyang ka gata kalon keudroe. Gata peugah kheueh hainyan ubak aneuëk cucoe gata treun meutreun 10 keuhai uroe nyan, bak watée gata tadong dikeue TUHAN Po teu Allah gata di Gunong Sinai. Bak watée nyan Gobnyan geupeugah ubak ulôn, 'Gata peusapat kheueh bansa nyan. Ulôn meuharab awaknyan jideungoe peue nyang keuneuk Ulôn peusampoe, mangat awaknyan jimeurunoe taát ubak Ulôn siumu udeb, dan lom teuma mangat awaknyan jipeurunoe ubak aneuëk cucoe jih keu jitaát ubak Ulôn.' 11 Gata peugah kheueh ubak aneuëk-aneuëk gata pakriban gata teuka dan gatadong nibak gaki gunong nyang meusagob ngon asab nyang seupôt tulo lagée awan nyang teubai nyang apui jih hu meuháb-háb trôk u langét. 12 Óh lheueh nyan TUHAN geukheun lom ubak gata nibak lam apui dan gata tadeungoe teuma su Gobnyan nyan, teuma hana deuh gata kalon Gobnyan lam hi peue mantong. 13 Nibak teumpatnyan Gobnyan geupeumaklum ubak gata peue nyang harôh gata peubuet keu gata peutrok janji nyang ka geupeugét deungon gata. Siploh boh Peurintah nyang geutuléh nibak ban dua boh batée tuléh harôh gata peubuet. 14 TUHAN geuyue ubak ulôn mangat lôn peurunoe gata banmandum huköm nyang harôh gata taát di nanggroe nyang singoh gata tamong dan teumpat gata tinggai nyan." 15 "Ingat kheueh beu gét-gét! Bak watée TUHAN geumeututoe ubak gata nibak lam apui di Gunong Sinai, gata hana deuh gata kalon sapeue. 16 Lé nyan gata jaga kheueh mangat gata bék sampoe meudesya sabab gata peugét keudroe patong-patong keu gata seumah nibak hi peue mantong, agam atawa inong, 17 cicém atawa uengkot, beulatang meulata atawa beulatang nyang laén. 19 Bék meudesya sabab taseumah ateueh peue nyang gata kalon di langét: mata uroe, buleuen dan bintang-bintang. TUHAN Po teu Allah gata geupeubiyeu mantong bansa-bansa nyang laén jiseumah beunda-beunda nyan. 20 Teuma gata na kheueh bansa nyang geupeuseulamat nibak nanggroe Meusé, diteumpat gata meudeurita nyang keubit that brat dan seungsara. Gata geuba dan geupeuteubiet nibak nanggroe nyan, mangat jeuet keu bansa Geuh keudroe lagée keuadaan gata bak saát jinoenyoe. 21 Teuma TUHAN Po teu Allah gata jeuet keu beungéh ubak ulôn lé sabab gata, dan Gobnyan geumeusumpah bahwa ulôn hana teuma lôn jeumeurang Krueng Yordan dan lôn tamong u dalam tanoh nyang subô nyang teuma geubri ubak gata. 22 Hana treble gata tajeumeurang dan gataduek nibak tanoh nyang subô nyan; teuma ulôn hana lôn seutôt, sabab ulôn teuma maté disinoe. 23 Ingat kheueh beugét-gét! Bék gata tuwoe peujanjian nyang ka geupeugét lé TUHAN Po teu Allah gata deungon gata. Gata taát kheueh ubak banmandum nyang geupeurintah; bék sagai-sagai gata peugét patong keu gata seumah atawa peue mantong nyang saban ngon nyan keu gata seumah, 24 sabab TUHAN Po teu Allah gata lagée apui hu nyang jipeuhangôh peue-peue nyang na. Gobnyan hana geutem teupeusaban deungon peue mantong. 25 Meunan cit meunyoe gata singoh ka treb gata tinggai di nanggroe nyan dan ka gata meu aneuëk cucoe, bék meudesya kareuna gata peugét keudroe patong nibak ruman peue mantong. Buet nyang lagée nyan na kheueh buet nyang jeuhet nibak mata TUHAN Po teu Allah gata dan teuma geubeungéh lé Gobnyan deungon beungéh nyang keubit hana ngon peusa. 26 Bah kheueh langét dan bumoe nibak uroenyoe jeuet keu saksi bahwa meunyoe gata hana tataát ubak ulôn, gata ngon sikeujab teuma ranab nibak tanoh teumpat gata tinggai di meurandeh Krueng Yordan nyan. Gata hana teuma treb tinggai disinan; gata teupeubinasa sampoe án habéh sapansapa. 27 TUHAN teuma geupeu crebre gata lamkawan bansa-bansa laén dan nabacut sagai lamkawan gata nyang mantong udeb. 28 Disinan gata teuma taseumayang ubak ilah-ilah nyang jipeugét lé jaroe-jaroe manusia, ilah-ilah nyang teupeugét nibak kayée dan batée nyang hana hase jimeungieng atawa jimeudeungoe, meunan cit hana teuma hase jimakheun atawa ji meucôm. 29 Laju lé gata teuma tamita TUHAN Po teu Allah gata, dan meunyoe gata tamita nyan deungon sigeunab até gata, gata teuma meurumpok deungon Gobnyan. 30 Meunyoe gata kakeunong ngon banmandum beuncana nyan dan gata na teuma lam keuadaan sosah, laju gata teuma tagisa ubak TUHAN Po teu Allah gata dan gata taát ubak Gobnyan. 31 TUHAN Po teu Allah gata nyan na kheueh Allah nyang le that-that gaséh ngon sayang. Gobnyan hana teuma geutinggai atawa geupeubinasa gata, atawa geupeutuwoe ubak janji nyang ka geupeugah nyan ubak indatu gata. 32 Gata seulidék kheueh watée urojéh, jiôh sigohlom gatanyoe lahé, phon nibak uroe bak watée Po teu Allah geucebta manusia di bumoe nyoe. Gatamita kheueh nibak bansaboh muka bumoe. Peu kheueh ka lheueh hai nyang lagéenyoe hebat jih na teujadi sigohlom nyoe? Dan peu kheueh kana ureuëng jideungoe keuhai keujadian nyang lagéenyoe? 33 Peu kheueh na bansa nyang teutab udeb óh kalheueh jideungoe sidroe ilah jipeugah haba ubak awaknyan nyang jiteubiet lam apui, lagée nyang gata rasa nyoe? 34 Peu kheueh na sidroe ilah nyang jijeuet jakcok saboh bansa nyang na laju jipeu jeuet keu umat jihnyan keudroe, lagée nyang geupeubuet lé Po teu Allah gata ateueh gata di nanggroe Meusé? Gata kalon keudroe pakriban Po teu Allah deungon teunaga nyang rayeuk geupeuteuka bala dan prang, geupeubuet buet-buet nyang ajaéb meunan cit nyang hebat-hebat. 35 Banmandum nyan geutunyok lé TUHAN ubak gata mangat jeuet keubukeuti teuma TUHAN nyan kheueh Po teu Allah, dan hana nyang laén seulaén Gobnyan. 36 Ideh dilangét Gobnyan geupeudeungoe su Gobnyan keu gata keu geupeurunoe gata; di ateueh bumoe nyoe Gobnyan ka teuma geupeuleumah ubak gata apui Gobnyan nyang lumpah hebat, dan nibak lam apuinyan kheueh TUHAN geumeututoe ubak gata. 37 Sabab Gobnyan that-that geucinta ubak indatu gata, teuma gata ka geupiléh lé Gobnyan; deungon kuasa Gobnyan nyang rayeuk gata ka geuba geupeuteubiet lam nanggroe Meusé. 38 Bansa-bansa nyang leubeh rayeuk lom ngon leubeh teuga ka habéh geu-use dikeue gata, mangat geu intat gata u nanggroe awaknyan nyang ka geubri keu gata, nanggroe nyang jinoenyoe ka jeuet keu hak milék gata. 39 Sabab nyan gata ingat kheueh uroe nyoe dan bék tatuwoe: TUHAN Po teu Allah na kheueh sidroe di langét dan di bumoe; hana nyang laén seulaén Gobnyan. 40 Gata taát kheueh ubak mandum huköm nyang ulôn bri keu gata nibak uroe nyoe, deungon nyan gata dan keuturonan gata teuma seujahtra dan udeb sabe di nanggroe nyang geubri lé TUHAN Po teu Allah gata jeuet keuhak milék gata keu siumu masa." 41 Laju Nabi Musa geutunyok lhée boh banda di siblaih u timu Krueng Yordan 42 jeuet keu banda teumpat meulindong atawa banda suaka, di teumpat ureuëng laén hase jipeuplueng droe deungon hana jisaja ka jipoh maté ureuëng laén nyang bukon musoh jih. Ureuëng nyan hase jipeuplueng droe ubak saboh nibak banda-banda nyan mangat jihnyan hana jipoh lé ureuëng laén. 43 Keu sukée Ruben geukeubah banda Bezer di ateueh darat nyang cot nibak padang pasi; keu sukée Gad banda Ramot di daerah Gilead, dan keu sukée Manasye banda Golan di daerah Basan. 44 Laju Nabi Musa geubri huköm-huköm dan peuratoran-peuratoran Po teu Allah keu bansa Israel. 45 Hai nyan geupeubuet óh kalheueh awaknyan jiteubiet nibak nanggroe Meusé dan ka trôk ubak pantôn siblah u timu Krueng Yordan, meuhadab keue ngon banda Bet-Peor. Wilayah nyan beukaih daerah Sihon, raja ureuëng Amori, nyang yoh watée ilée jimat peurintah nibak banda Hesybon. Nabi Musa dan bansa Israel jipeutaloe awaknyan bak watée awaknyan jitinggai nanggroe Meusé. 47 Awaknyan laju jiduek nibak tanoh Raja Sihon nyan, meunan cit deungon tanoh Raja Og nibak Basan, sidroe raja Amori nyang laén nyang tinggai siblah u timu Krueng Yordan. 48 Tanoh nyan meureuntang phon nibak banda Aroër nibak binéh Krueng Arnon, laju u utara sampoe trok ubak Gunong Siryon, na kheueh Gunong Hermon, 49 dan bansaboh daerah siblah utimu Krueng Yordan u seulatan trok ubak Laôt Maté nibak gaki Gunong Pisga.

Kitab Teu-Ulang 5

1 Nabi Musa laju geupeusapat banmandum bansa Israel, lé gobnyan laju geupeugah ubak awaknyan, "Syedara ulôn banmandum, neudeungoe kheueh huköm-huköm nyang teuma ulôn bri keu gata nibak uroe nyoe. Neumeurunoe kheueh ubak huköm nyan, dan neutaát kheueh deungon seutia. 2 Di ateueh Gunong Sinai TUHAN Po teu Allah geutanyoe ka geupeugét saboh peujanjian, 3 bukon mantong deungon indatu geutanyoe, teuma deungon geutanyoe nyang na disinoe banmandum. 4 Nibak lam apui nyang na di ateueh Gunong nyan TUHAN geupeugah haba langsong deungon gata. 5 Teuma sabab lé gata teumakot keu apui nyan dan hana teuma gata jeuet keu gata teungoh u ateueh gunong nyan, teuma ulôn nibak watéenyan lôn dong di teungoh-teungoh gata deungon TUHAN mangat ulôn peusampoe feureuman TUHAN nyan keu gata. 6 TUHAN meufeureuman, 'Ulôn kheueh TUHAN Po teu Allah gata nyang ka Ulôn ba gata teupeuteubiet nibak nanggroe Meusé, di teumpat gata jipeujeuet keu namiet. 7 Bék gata seumah ilah-ilah nyang laén, teuma gata seumah kheueh Ulôn mantong. 8 Bék teuma gata peugét keudroe patong nyang saban deungon peue mantong nyang na di langét, lom ngon nyang na di bumoe atawa nyang na di dalam ié di miyueb bumoe. 9 Bék kheueh gata seumah patong nyang lagée nyan sabab Ulôn kheueh TUHAN Po teu Allah gata dan Ulôn hana Lôn tem gata peusaban deungon peue mantong. Ureuëng nyang jibanci keu Ulôn, Ulôn huköm jih nyan sampoe ubak keuturonan nyang keu lhée dan nyang keu peuet. 10 Teuma Ulôn kutunyok gaséh sayang Ulôn ubak meuribée-ribée keuturonan keu ureuëng-ureuëng nyang jicinta ubak Ulôn dan jitaát teuma peue-peue nyang Ulôn peurintah. 11 Bék kheueh gata kheun nan Ulôn ban galak droe gata, sabab Ulôn, TUHAN Po teu Allah gata, Ulôn huköm soe mantong nyang jipeusalah guna nan Ulôn. 12 Gata peuraya kheueh uroe raya Sabat, dan horeumat kheueh nyan sibagoe uroe nyang suci, sabab, Ulôn kheueh TUHAN Allah gata nyang bri peurintah ubak gata. 13 Keu gata Ulôn bri nam uroe jeuet gata mubuet, 14 teuma uroe nyang keutujoh na kheueh uroe meureuhat, nyang khusos keu Ulôn, TUHAN Po teu Allah gata. Nibak uroenyan hana meusidroepi nyang jeuet meukeureuja, bah kheueh gata, aneuëk-aneuëk gata, namiet-namiet gata, beulatang peulara gata, atawa ureuëng aséng nyang tinggai di nanggroe gata. Namiet-namiet gata harôh jimeureuhat saban cit lagée gata. 15 Ingat kheueh, yoh watée ilée gata pi jipeujeuet keu namiet di nanggroe Meusé, laju geupeubeubaih lé TUHAN Po teu Allah gata deungon teunaga nyang rayeuk. Sababnyan, gata Ulôn peurintah gata peuraya uroe raya Sabat. 16 Horeumat kheueh dan peulara kheueh ayah ngon ma gata; nyan kheueh peurintah Ulôn, TUHAN Po teu Allah gata, mangat jeuet gata seujahtra dan panyang teuma umu nibak nanggroe nyang teuma Ulôn bri keu gata. 17 Bék poh maté gob. 18 Bék meumukah. 19 Bék ceumeucue. 20 Bék jeuet keu saksi duseuta keuhai ureuëng laén. 21 Bék gata galak atra gob laén: lagée rumoh jih, tanoh jih, peurumoh jih, namiet-namiet jih, beulatang peulara jih, keuleudée jih atawa peue mantong nyang na nibak ureuëng nyan.' 22 Nyang kheueh peurintah-peurintah nyang geubri lé TUHAN ubak gata bak watée gata meusapat di gunong. Bak watée Gobnyan geumeututoe ngon su nyang meugeunta nibak lam apui dan awan nyang teubai, Gobnyan geubri peurintah-peurintah nyan, dan bukon nyang laén. Lheueh nyan laju geutuléh lé Gobnyan ateueh dua boh batée tuléh dan laju geubri atra nyan ubak ulôn." 23 "Watée bansaboh gunong hu dan gata tadeungoe su nyang teuka nibak lam seupôt, banmandum peumimpén sukée gata dan ureuëng-ureuëng patot jijak ubak ulôn. 24 Kheun awaknyan, 'TUHAN Po teu Allah geutanyoe ka geupeuleumah keubeusaran dan keumuliaan Gobnyan bak watée kamoe deungoe Gobnyan geumeututoe nibak lam apui. Uroenyoe ka kamoe kalon bahwa keubit mungken nibak manusia keu teutab udeb. Bahpi Po teu Allah ka geumeututoe bak awaknyan. 25 Teuma pakon kheueh kamoe harôh kamoe peusabong nyawöng kamoe lom? Apui nyang hu be raya nyoe teuma jipeubinasa kamoe! Kamoe yakén that bahwa kamoe teuma maté meunyoe kamoe deungoe TUHAN Po teu Allah geupeugah haba lom. 26 Peu kheueh ka lheueh na manusia nyang teutab udeb watée ka lheueh jideungoe Po teu Allah nyang udeb geumeututoe nibak lam apui? 27 Lé sabab nyan, geujak kheueh Nabi Musa, deungoe kheueh mandum nyang geupeugah lé TUHAN Po teu Allah geutanyoe, lheuehnyan peutrok kheueh laju ubak kamoe peue nyang geupeugah lé Gobnyan ubak droeneueh. Kamoe teuma meudeungoe dan kamoe taát laju.' 28 Watée geudeungoe nyan, TUHAN meufeureuman ubak ulôn, 'Ulôn ka Lôn deungoe peue nyang jipeugah lé bansa nyan, dan beutôi that nyang jikheun lé awaknyan. 29 Cuba meunyoe awaknyan sabe na peurasaan lagée nyan bagoe! Cuba meunyoe awaknyan sabe jihoreumat Ulôn dan jitaát banmandum nyang Ulôn peurintah nyan, sampoe awaknyan dan keuturonan awaknyan seujahtra keu siumu masa! 30 Jak kheueh jinoenyoe dan yue kheueh bansa nyan jiwoe lom ubak khimah jih maséng-maséng. 31 Teuma gata, Nabi Musa, gisa dan tinggai kheueh disinoe meusajan Ulôn, keu gata teuma Ulôn bri banmandum huköm dan peurintah Ulôn. Peurunoe kheueh ubak awaknyan, mangat awaknyan jitaát nibak nanggroe nyang Ulôn bri ubak awaknyan.' 32 Syedara-syedara, taát kheueh deungon seutia banmandum nyang geupeurintah lé TUHAN Allah gata ubak gata. Bék gata iengkeue meubacutpi nibak peurintah-peurintah nyan. 33 Peubuet kheueh banmandum nyang geupeurintah lé TUHAN Allah gata ubak gata mangat gata meuteumé seujahtra dan hase gata duek nibak nanggroe nyang teuma gata duek!"

Kitab Teu-Ulang 6

1 "TUHAN Po teu Allah geuyue nibak ulôn jeuet lôn peurunoe banmandum huköm nyoe ubak gata mangat atranyan gata peubuet singoh di nanggroe nyang hana treble teuma gata duek. 2 Bah kheueh gata dan keuturonan gata siumu udeb jihoreumat TUHAN Po teu Allah gata mantong, dan meunan cit gata taát ubak banmandum huköm nyang teuma ulôn peusampoe ubak gata, mangat gata panyang umu di nanggroe nyan. 3 Sabab nyan deungoe kheueh hai syedara-syedara ulôn, gata peubuet kheueh nyan deungon seutia, mangat gata seujahtra dan jeuet keu bansa nyang raya di nanggroe nyang kaya lom tanoh jih subô, lagée nyang ka geupeujanji lé TUHAN Allah indatu geutanyoe. 4 Syedara-syedara, ingat kheueh! Teuma TUHAN, dan TUHAN mantong Allah geutanyoe! 5 Cinta kheueh TUHAN Allah gata deungon sipeunoh até gata: tunyok kheueh nyan lam cara udeb gata siuroe-uroe dan nibak buet gata. 6 Bék kheueh sagai-sagai gata peutuwoe peurintah-peurintah nyang ulôn bri ubak gata nibak uroenyoe. 7 Gata peurunoe kheueh ubak aneuëk-aneuëk gata. Bah kheueh hainyoe gata peugah sabe bah nyan di dalam rumoh meunan cit di luwa rumoh, watée gata meureuhat dan nibak watée gata meukeureuja. 8 Ikat kheueh nibak jaroe gata dan pasang kheueh teuma nibak keuneng gata mangat teu ingat-ingat. 9 Gata tuléh kheueh nibak taméh pintoe rumoh gata dan nibak babah pintoe geureubang gata." 10 "TUHAN Po teu Allah ka geumeujanji ubak indatu gata Nabi Ibrahim, Nabi Ishaq dan Nabi Yakub bahwa Gobnyan teuma geubri nanggroe nyan keu gata. Banda-banda jih raya-raya meunan cit makmu-makmu, dan bukon gata nyang peudongnyan. 11 Rumoh-rumoh peunoh deungon barang-barang nyang gét-gét, dan meunan cit atra nyan bukon gata nyang pasôe. Gata teuma meurumpok deungon mon-mon, dan nyanpi kon gata nyang kueh mon nyan. Gata teuma meumeurumpok deungon lampôh-lampôh anggô dan lampôh zaiton, dan meunan cit atra nyan bukon gata nyang pula. Meunyoe TUHAN geuba gata u nanggroe nyan, dan gata meuteumé banmandum nyang gata galak keu gata pajoh, 12 jaga kheueh beugét-gét mangat gata hana gatatuwoe ubak TUHAN nyang ka geupeubeubaih gata di nanggroe Meusé, di teumpat gata jicok keunamiet. 13 Horeumat kheueh ubak TUHAN, Po teu Allah gata, dan gata seumah kheueh Gobnyan mantong, dan meunyoe gata ta meubudok, peubuet kheueh nyan deumi nan TUHAN mantong. 14 Bék kheueh gata seumah ilah-ilah nyang laén nyang jiseumah lé ureuëng nyang na di seukeulileng gata. 15 Meunyoe gata taseumah cit ilah-ilah nyang laén, deungon nyan gata geupeutreun azéb deungon meureuka jih lé TUHAN Po teu Allah gata dan geupeusapansapa atranyan banmandum, sabab TUHAN Allah gata nyang na lamkawan gata hana geutem tapeusaban deungon peue mantong. 16 Bék kheueh gata cuba TUHAN Po teu Allah gata lagée nyang ka gata peubuet di Masa. 17 Taát kheueh ubak huköm nyang ka geubri lé TUHAN Po teu Allah gata keu gata. 18 Gata peubuet kheueh nyan meunurot TUHAN nyan gét dan ade, teuma gata meuteumé seujahtra. Tanoh nyang subô nyang ka geupeujanji lé TUHAN ubak indatu gata, teuma jeuet keu hak milék gata, 19 dan gata teuma ta use bubena musoh-musoh gata lagée nyang ka geupeujanji lé TUHAN. 20 Óh singoh uroe aneuëk-aneuëk gata teuma jitanyong ubak gata, 'Pakon TUHAN Po teu Allah geutanyoe geuyue ubak geutanyoe ta-taát ubak banmandum peurintah nyan?' 21 Teuma hainyan gata harôh tajaweueb lagée nyoe, 'Masa ilée geutanyoe jeuet keu namiet raja di nanggroe Meusé, lé TUHAN laju geupeubeubaih geutanyoe deungon kuasa Gobnyan nyang luwabiasa. 22 Kamoe keudroe jeuet keusaksi TUHAN geupeubuet buet-buet nyang ajaéb dan hai-hai nyang lumpah teumakot keu ureuëng Meusé dan raja awaknyan meunan cit banmandum peujabat raja nyan. 23 Gobnyan ka geupeubeubaih geutanyoe lam nanggroe Meusé mangat geuba geutanyoe keunoe, dan tanohnyoe geubri keu geutanyoe lagée nyang ka geupeujanji ubak indatu geutanyoe. 24 TUHAN Po teu Allah geutanyoe geuyue ubak geutanyoe ta peubuet banmandum peurintah nyan dan tahoreumat Gobnyan. Meunyoe geutanyoe ta peubuet meunan, Gobnyan teuma sabe geupeulara bansa geutanyoe mangat teutab udeb seujahtra. 25 Meunyoe geutanyoe nyang deungon seutia ta-taát ubak peue nyang ka geupeurintah lé Tuhan Po teu Allah geutanyoe ubak geutanyoe, teuma Gobnyan sabe na deungon geutanyoe.' "

Kitab Teu-Ulang 7

1 "TUHAN Po teu Allah gata teuma geuba gata u nanggroe nyang keuneuk gata duek nyan, dan jai that bansa nyang na disinan teuma geu use nibak teumpat nyan. Dikeue mata gata Gobnyan laju geu use tujoh boh bansa nyang leubeh rayeuk dan leubeh teuga nibak gata, na kheueh ureuëng-ureuëng Het, Girgasi, Amori, Kanaan, Feris, Hewi dan Yebus. 2 Meunyoe TUHAN Po teu Allah gata geuseurah ureuëng nyan u dalam kuasa gata dan gata tapeutaloe awaknyan, tapoh maté kheueh awaknyan banmandum. Bék tagaséh keu awaknyan atawa gata peugét janji deungon awaknyan. 3 Gata hana jeuet tameukawen deungon awaknyan, dan meunan cit bék gata peuidhin aneuëk-aneuëk gata jimeukawen deungon awaknyan, 4 mangat awaknyan hana jipeujiôh aneuëk-aneuëk gata nibak TUHAN keu jiseumah ilah-ilah nyang laén. Meunyoe gata taseumah ilah-ilah nyang laén, TUHAN beungéh that dan gata teuma deungon sikeujab laju geupeusapansapa. 5 Sabab nyan, gata reulôh dan gata peureubah kheueh banmandum miseubah-miseubah bansa-bansa nyan, gata peuhanco kheueh banmandum taméh-taméh batée nyang awaknyan anggab keuramat, gata reulôh kheueh teuma lambang-lambang Asyera, dan tatot kheueh beu habéh patong beurala nyang awaknyan seumah. 6 Gata peubuet kheueh banmandum nyan sabab gata milék TUHAN Po teu Allah gata. Nibak banmandum bansa nyang na ateueh rhueng bumoe, gata kheueh nyang geupiléh lé TUHAN Po teu Allah gata mangat jeuet keu umat Gobnyan nyang isteumewa. 7 Gata geucinta dan geupiléh lé TUHAN, bukon kareuna gata nyang leubeh rayeuk nibak bansa-bansa laén; nyang sikeubit jih gata na kheueh bansa nyang paleng halôh ateueh rhueng bumoe. 8 Teuma TUHAN geupiléh gata sabab Gobnyan geugaséh keu gata dan meuheut keuneuk peuteupat janji Gobnyan nyang ka geupeugét deungon indatu gata. Nyang kheueh sabab jih Gobnyan ka geupeuseulamat gata deungon kuasa nyang raya dan geupeubeubaih gata nibak keunamiet raja nanggroe Meusé. 9 Ingat kheueh bahwa TUHAN Po teu Allah gata na kheueh sidroe mantong Allah, dan Gobnyan Allah nyang seutia. TUHAN geupeu peunoh janji Gobnyan dan geutunyok gaséh seutia Geuh nyang teutab sampoe siribée keuturonan keu ureuëng nyang jicinta ubak Gobnyan dan taát ubak peue-peue nyang geupeurintah. 10 Teuma deungon hana seugan-seugan Gobnyan geuhuköm awaknyan nyang jibanci keu Gobnyan. 11 Lé nyan, gata taát kheueh ubak banmandum huköm nyang ulôn peusampoe keu gata nibak uroenyoe." 12 "Meunyoe gata tasimak ubak peurintah-peurintah nyan, dan gata punuet nyan deungon seutia, teuma TUHAN Po teu Allah gatapi teutab seutia ubak janji nyang geupeugét nyan deungon gata. Gobnyan geupeuleumah gaséh sayang Geuhnyan nyang teutab ubak gata, lagée nyang ka geupeujanji ubak indatu gata. 13 Gobnyan geugaséh ngon geubri beureukat ateueh gata, sampoe aneuëk gata le lom meutamah-tamah teuma jeumeulah jih. Meunan cit Gobnyan geubri beureukat keu lampôh ngon blang gata, sampoe jipeuhase gandom, anggô dan minyéuk zaiton. Gobnyan geubri beureukat keu gata sampoe leumô gata le meunan cit kaméng ngon bubiri gata. Banmandum beureukat nyan teuma gata teurimong di nanggroe nyang geubri lé TUHAN keu gata, paih deungon janji nyang ka geupeugét ubak indatu gata. 14 Nibak banmandum bansa nyang na di ateueh donya nyoe, hana meubacutpi beureukat nyang jiteurimong lagée nyang gata teurimong nyan sampoe meulimpah-limpah. Nibak gata banmandum meunan cit banmandum beulatang peulara gata hana meusabohpi nyang éue. 15 Gata teuma geulindong lé TUHAN nibak meubagoe peunyakét dan geupeujiôh nibak meubagoe bala nyang ka gata kalon di nanggroe Meusé, teuma bala-bala nyan teuma geupeurhot ateueh musoh-musoh gata. 16 Tieb-tieb bansa nyang geuseurah lé TUHAN Po teu Allah gata u dalam kuasa gata harôh gata peubinasa; bék kheueh gata peudeuh gaséh sayang keu awaknyan. Bék kheueh teuma gata seumah ilah-ilah awaknyan, sabab buet nyang lagéenyan teuma jipeuteuka bala ateueh gata. 17 Mungken gata pike bansa nyan leubeh rayeuk jeumeulah jih sampoe gata hana hase gata use awaknyan. 18 Teuma bék kheueh teumakot keu awaknyan; ingat kheueh peue nyang ka geupeubuet lé TUHAN Po teu Allah gata ateueh raja di nanggroe Meusé dan ateueh banmandum rakyat jihnyan. 19 Gata ingat kheueh teuma bala beuncana nyang lumpah that hebat nyang ka lheueh gata kalon keudroe, keu ajaéban-keu ajaéban dan teunaga nyang lumpah rayeuk nyang ka geupeuguna lé TUHAN Po teu Allah gata nyang ka geupeubeubaih gata. Meunan cit teuma deungon TUHAN Allah gata teuma geutindak ateueh banmandum bansa nyang gata takot. 20 Bit that TUHAN Po teu Allah gata teuma geupeuteuka nyang leubeh payah ngon susah lamkawan awaknyan, sampoe ureuëng-ureuëng nyang hase jipeuplueng droe ngon jimusom hase geupeubinasa. 21 Lé nyan, bék kheueh gata takot keu bansa-bansa nyan. TUHAN Po teu Allah gata nyang lindong gata. Gobnyan na kheueh Po teu Allah nyang paleng agong dan nyang paleng meukuasa. 22 Bansa-bansa nyan teuma geu-use bacut-bacut dikeue gata. Gata jeuet gata peuranab awaknyan deungon sigra, mangat beulatang-beulatang buih hana meutamahle dan jeuet keu ancaman ateueh gata. 23 Meunan kheueh TUHAN Po teu Allah gata teuma geuseurah musoh-musoh gata ateueh gata. Gobnyan teuma geupeukaru awaknyan sampoe awaknyan banmandum binasa. 24 Gobnyan teuma geuseurah raja-raja awaknyan keu gata. Awaknyan gata poh maté, dan nan awaknyan gata peutuwoe teuma. Hana meusidroepi hase jimeuteun jilawan gata; awaknyan banmandum teuma gana peuhabéh. 25 Gatatot kheueh patong-patong beurala nyang awaknyan seumah. Bék kheueh teuma gata meuheut pirak atawa méuh nyang na meukeumat nibak atranyan dan bék gatacok atranyan keu gata keudroe. Meunyoe gata iengkeue hai nyan gata maté, sabab TUHAN Po teu Allah that-that geubanci keu ureuëng nyang seumah patong beurala. 26 Bék kheueh teuma gata keubah meusabohpi patong beurala di dalam rumoh gata, mangat kutok nyang rhot ateueh awaknyan bék keunong ateueh gata. Hainyan harôh kheueh gata banci dan gata kalon ngon cara hina, sabab hainyan geukutok lé TUHAN."

Kitab Teu-Ulang 8

1 "Banmandum huköm nyang ulôn bri keugata bak uroe nyoe harôh kheueh gata peubuet deungon seutia, mangat gata teutab udeb, meutamahle dan tinggai teutab nibak tanoh nyang ka geupeujanji lé TUHAN ubak indatu gata. 2 Ingat kheueh! Peuet ploh thon treb jih TUHAN Po teu Allah gata geupimpén gata nibak gatajak nyang lumpah jiôh lam padang pasi nyang luwah. Lam jak gatanyan lé TUHAN geumeukeusut keu geucuba gata, mangat Gobnyan hase geukalon peue nyang na di dalam até gata dan peu kheueh gata taát ubak peurintah-peurintah Gobnyan. 3 Gobnyan geupeubiyeu gata deuek ngon grah, laju keu gata geubri manna keu peunajoh. Gata dan indatu gata hántom na geupajoh peunajoh nyang lagéenyan bagoe. TUHAN geupeubuet lagéenyan keu geupurunoe gata bahwa manusia nyoe kon udeb nibak peunajoh mantong, teuma nibak meubagoe rupa nyang geupeugah lé TUHAN. 4 Sampoe peuet ploh thon treb jih peukayan gata hana jeuet keu useueng dan gaki gata hana teuma jiteuka kumong. 5 Ingat kheueh bahwa TUHAN Allah gata geupeurunoe gata lagée sidroe bapak geupeurunoe aneuëk gobnyan. 6 Lé sababnyan, gata peubuet kheueh laju peue nyang geupeurintah lé TUHAN Po teu Allah gata. Udeb kheueh meunurot huköm-huköm Gobnyan dan horeumat kheueh ubak Gobnyan. 7 TUHAN Po teu Allah gata geuba gata u nanggroe nyang leubeh subô; nanggroe nyang le krueng dan mata ié jih, deungon ié nyang ile tajam di miyueb tanoh nyang ji ile teuma u pantôn-pantôn dan bukét-bukét. 8 Nanggroe nyan jipeuhase meubagoe rupa gandom, anggô, boh ara, boh geulima, bak zaiton dan meunisan. 9 Disinan gata hana deuek atawa kureueng meusapeu pih. Batée kareueng jih na meungandong beuso, dan nibak bukét-bukétnyan gata hase teuma gata kueh teumaga. 10 Nibak teumpatnyan gata tamakheun sipueh-pueh até, dan gata meusyukoe ubak TUHAN Po teu Allah gata keu tanoh nyang subô nyang geubri Gobnyan keu gata." 11 "Gata jaga kheueh beugét-gét mangat gata hana tatuwoe ubak TUHAN Allah gata; bék kheueh gata peujayéh meubacutpi meusapeue pih nibak banmandum huköm Gobnyan nyang teuma ulôn bri keu gata nibak uroe nyoe. 12 Meunyoe gata ka tamakheun sipueh-pueh até gata dan ka teuma gata peugét rumoh-rumoh nyang gét-gét keu teumpat tinggai gata, 13 dan meunyoe ka meutamah leumô ngon kaméng dan bubiri gata, pirak ngon méuh dan banmandum hareuta milék gata nyang laén, 14 jaga kheueh beugét-gét mangat gata hana jeuet keu sombong dan gata tuwoe ubak TUHAN Po teu Allah gata nyang ka geupeubeubaih gata nibak nanggroe Meusé, di teumpat gata jipeucok keunamiet. 15 TUHAN geupimpén gata rot padang pasi nyang luwah lom ngon dahsyat, nyang jai that uleue meubisa meunan cit deungon kala-kala nyang lumpah meubisa teuma. Nibak tanoh nyang thoe hana meu ié meubacutpi Gobnyan laju geupeuteubiet ié lam lungkiek-lungkiek aneuk batée mangat gata hase tajieb ié deungon sipueh-pueh jih. 16 Di padang pasi Gobnyan geubri manna keu peunajoh gata, peunajoh nyang gohlom geuturi lé indatu gata. TUHAN geupeubuet nyan keu geucuba gata dan geupeumiyueb até gata, mangat jeuet óh dudoe teuma Gobnyan hase geupeugét nyang leubeh jroh keu gata. 17 Deungon nyan, bék kheueh sagai-sagai gata pike bahwa deungon useuha dan teunaga gata keudroe gata hase jeuet keukaya. 18 Ingat kheueh, bahwa TUHAN Po teu Allah gata nyang bri keukayaan nyan keu gata. Hainyan geupeubuet sabab sampoe án uroenyoe Gobnyan mantong seutia deungon janji nyang kalheueh geupeugét ngon indatu gata. 19 Bék kheueh tuwoe ubak TUHAN Po teu Allah gata dan bék teuma gata seutôt ubak ilah-ilah nyang laén keu gata pujoe ngon gata meungabdi ubak awaknyan. Uroenyoe ulôn peuingat ubak gata bahwa meunyoe hainyan gata peubuet cit teuma, gata ka pasti geupeubinasa lé TUHAN. 20 Meunyoe gata hana tataát ubak TUHAN Po teu Allah gata, gatapi teuma geupeubinasa, lagée bansa-bansa nyang geupeuranab dikeue mata gata."

Kitab Teu-Ulang 9

1 "Deungoe kheueh nyoe hei syedara-syedara! Nibak uroenyoe gata jeumeurang Krueng Yordan mangat gata duek nibak daerah bansa-bansa nyang leubeh rayeuk dan leubeh teuga nibak gata. Banda-banda awaknyan rayeuk-rayeuk lom teubintéh ngon beuton nyang manyang-manyang meujulang u langét. 2 Ureuëng jih badanji rayeuk-rayeuk dan teugab-teugab potongan tuboh jih; awaknyan lagée badan gogasi nyang juwah. Dan gata ka tadeungoe bahwa hana meusidroepi nyang hase jilawan awaknyan. 3 Teuma jinoenyoe gata kalon keudroe pakriban TUHAN Allah gata geujak dikeue mata gata lagée apui nyang jitot peue-peue nyang na. Jihnyan jipeutaloe awaknyan dikeue mata gata, akhé jih gata hase gata use dan gata peuhanco awaknyan deungon bagaih that lagée nyang geupeujanji lé TUHAN. 4 Óh ka lheueh TUHAN Po teu Allah gata geu use awaknyan keu gata, bék gata pike bahwa gata geuba keudeh mangat jeuet gata cok keumilék gata tanoh nyan sabab gata gét dan gata peubuet keuheundak TUHAN Po teu Allah gata deungon nyan gata pike hak gata teurimong. Sagai-sagai hana! TUHAN geu use bansa-bansa nyan keu gata sabab awaknyan jeuhet. TUHAN geupeubiyeu gata mangat gatacok tanoh awaknyan, sabab Gobnyan keuneuk geupeutrok janji Gobnyan bak indatu gata Nabi Ibrahim, Nabi Ishaq dan Nabi Yakub. 6 Peucaya kheueh bahwa TUHAN Po teu Allah hana geujok tanoh subô nyan keu gata lé sabab hak gata teurimong. Hana! Gatanyoe bansa nyang kreueh ulée. 7 Ingat kheueh pakriban gata tapeujeuet TUHAN Po teu Allah gata beungéh nibak padang pasi. Phon gata tatinggai nanggroe Meusé sampoe gata ka trok keunoe, gata talawan TUHAN. 8 Meunan cit di Gunong Sinai gata peujeuet TUHAN beungéh lumpah na, sampoe Gobnyan keuneuk geupeubinasa gata. 9 Ulôn kuteungoh gunong nyan keuneuk lôn jak teurimong batée peujanjian nyang geupeugét lé TUHAN deungon gata. Peuet ploh uroe dan peuet ploh malam treb jih ulôn tinggai ateueh gunong nyan deungon hana lôn makheun dan lôn jieb ié. 10 Óh lheuehnyan TUHAN geubri bak lôn bandua neuk batée nyang ka geutuléh lé Allah keudroe. Nibak batée nyan teutuléh deungon tutoe Gobnyan nyang geupeugah nibak teungoh-teungoh apui hu keu gata, bak watée gata na meusapat nibak gaki gunong. 11 Biet, óh ka seuleusoe peuet ploh uroe dan peuet ploh malam, laju lé TUHAN geujok ubak ulôn bandua boh batée peujanjian nyan. 12 Lheueh nyan laju TUHAN meufeureuman ubak ulôn, 'Jak treun kheueh laju, sabab bansa gata nyang gata ba di nanggroe Meusé ka jipeubuet jeuhet. Awaknyan ka meusimpang nibak peue-peue nyang Ulôn peurintah, dan jipeugét patong keu jiseumah.' 13 Meunan cit TUHAN meufeureuman ubak ulôn lagée nyoe, 'Ulôn kuteupeue bahwa bansanyan keubiet that kreueh ulée. 14 Bék cuba-cuba jihalang Ulôn. Ulôn keuneuk peubinasa awaknyan sampoe awaknyan hana ji-ingat lé. Teuma gata Ulôn peujeuet keu ayah nibak saboh bansa nyang leubeh rayeuk dan leubeh teuga nibak awaknyan.' 15 Lheuehnyan laju ulôn paleng, dan sira ulôn ba bandua boh batée peujanjian deungon bandua jaroe lôn, laju ulôn treun di ateueh gunong nyang teungoh hu meuháb-háb nyan. 16 Ulôn kalon bahwa gata ka ta iengkeue peurintah TUHAN Po teu Allah gata. Gata ka meudesya ubak TUHAN sabab gata peugét keudroe gata saboh patong leumô nibak logam. 17 Teuma dikeue mata gata keudroe bandua boh batée peujanjian nyan ulôn seumpom sampoe hanco meukeupeng-keupeng. 18 Lheuehnyan ulôn sujut lom dikeue TUHAN di ateueh pucak gunong nyang treb jih peuet ploh uroe dan peuet ploh malam, hana lôn makheun dan hana teuma lôn jieb ié. Nyan ulôn peubuet sabab gata ka meudesya ubak TUHAN deungon gata peubuet peue nyang geuanggab jeuhet, lé sababnyan kheueh Gobnyan beungéh. 19 Ulôn teumakot ubak beungéh TUHAN nyang luwabiasa ateueh gata sampoe gata keuneuk geupeubinasa, teuma goenyoepi TUHAN geutem deungoe ulôn. 20 Meunan cit TUHAN beungéh that-that keu Nabi Harun sampoe Gobnyan keuneuk geupoh maté Nabi harun nyan, laju ulôn meudoá keu keu Nabi Harun nyan cit teuma. 21 Patong leumô logam nyang gata peugét nyan, laju ulôn rhom lam apui. Lheuehnyan laju lôn peuhanco dan ulôn tôb sampoe halôh lagée abée, dan abéenyan ulôn geulawa lam aneuk krueng nyang na ile nibak gunong nyan. 22 Meunan cit di Tabera, Masa dan Kibrot-Taawa, gata tapeujeuet TUHAN beungéh. 23 Dan watée gata geuyue lé TUHAN mangat gata tinggai Kades-Barnea keugata maju dan gata tinggai ateueh tanoh nyang geubri keu gata, gata tabantah peurintah TUHAN Allah gata; gata hana tatem peucaya atawa gata taát ubak Gobnyan. 24 Watée phon that ulôn meuturi ngon gata, gata sabe talawan TUHAN. 25 Ulôn kuteupeue bahwa TUHAN ka brat that até keuneuk geupeubinasa gata. Dan nyang kheueh jeuet peuet ploh uroe dan peuet ploh malam ulôn sujut dikeue TUHAN 26 sira lôn meudoá lagée nyoe: Ya TUHAN Nyang Mahamanyang, bék kheueh neupeubinasa umat atra Droeneueh nyoe, bansa nyang Droeneueh peubeubaih dan Droeneueh intat jiteubiet lam nanggroe Meusé deungon teunaga dan keukuasaan Droeneueh nyang rayeuk. 27 Ingat keu hamba-hamba Droeneueh Nabi Ibrahim, Nabi Ishaq dan Nabi Yakub, dan bék kheueh neukalon ateueh sikeueb kreueh ulée buet nyang jeuhet dan desya bansa nyoe. 28 Meunyoe umat Droeneueh neupeubinasa cit teuma, deungon nyan ureuëng Meusé teuma jipeugah bahwa Droeneueh hana hase neuba bansa Droeneueh keudroe ubak nanggroe nyang Droeneueh meujanjinyan keu awaknyan, dan bahwa Droeneueh ba awaknyan u padang pasi keu Droeneueh jak poh maté awaknyan, sabab Droeneueh banci keu awaknyan. 29 Teuma ingat kheueh, TUHAN, bahwa awaknyoe bansa nyang Droeneueh piléh jeuet keu umat Droeneueh, dan neuba nibak nanggroe Meusé deungon teunaga dan kuasa Droeneueh nyang rayeuk."

Kitab Teu-Ulang 10

1 "Óh lheueh nyan TUHAN meufeureuman lom ubak ulôn, 'Hai, Nabi Musa, gata jakpeut kheueh laju dua boh leumpeng batée lagée nyang phon-phon, dan gata peugét kheueh teuma saboh peuto kayée keu teumpat atranyan, lheueh nyan gatajak kheueh ubak Ulôn di pucak gunong. 2 Nibak batée-batée nyan teuma Ulôn tuléh deungon haba nyang saban lagée nibak batée nyang ka gata peubeukah nyan; óh lheueh nyan batée-batée nyan harôh kheueh gata peutamong u dalam peuto nyan.' 3 Laju ulôn peugét peuto nibak kayée akasia dan lôn peut laju dua boh batée lagée nyang ilée, lheuehnyan atranyan laju ulôn ba u ateueh gunong. 4 Nibak batéenyan geutuléh laju lé TUHAN Siploh boh Peurintah saban ngon atra awai, na kheueh peurintah-peurintah nyang geubri keu gata, bak watée Gobnyan geupeugah haba di teungoh-teungoh apui bak uroe gata meusapat di gaki gunong. Óh lheueh nyan TUHAN geubri laju batée tuléh nyan ubak ulôn 5 dan laju teuma lôn gisa lom sira lôn treun diateueh gunong nyan. Laju óh lheuehnyan dan paih lagée peurintah TUHAN, ban dua boh batée tuléh nyan ulôn peutamong laju udalam peuto nyang ka ulôn peugét -- dan phon saát nyan sampoe án jinoe ban dua batée tuléh nyan mantong na disinan." ( 6 Óh lheuehnyan ureuëng Israel nyan laju jibeurangkat nibak mon-mon ureuëng Yaakan, dan jijak u Mosera. Di teumpat nyan kheueh teuma Nabi Harun meuninggai donya ngon jikubu. Eleazar geunantoe gobnyan sibagoe imeum. 7 Beudôh nibak teumpat nyan awaknyan jijak laju u Gudgod, laju u Yotbata, daerah nyang jai that ié jih. 8 Di gunongnyan TUHAN geupeukhusos sukée Lewi keu nyang urôh Peuto peujanjian dan jipeutimang TUHAN, meunan cit teu kheun beureukat ateueh nan Gobnyan. Nyang kheueh tugaih awaknyan sampoe án jinoe. 9 Lé sababnyan sukée Lewi hana jiteurimong tanoh pusaka lagée sukée-sukée nyang laén, sabab TUHAN kheueh jeumba dan warésan awaknyan, lagée nyang geupeugah lé TUHAN Po teu Allah ubak awaknyan.) 10 "Peuet ploh uroe peuet ploh malam ulôn tinggai di ateueh gunong lagée nyang ulôn peubuet phon-phon that. Sigoe teuk TUHAN geudeungoe ulôn, dan Gobnyan situju hana geu peubinasa gata. 11 Lé Gobnyan geuyue ulôn mangat lônjak pimpén gata mangat gata hase tateurimong sibagoe hak milék tanoh nyang ka geupeujanji ubak indatu gata." 12 "Jinoenyoe, Syedara-syedara, ngieng kheueh peue nyang geulakée TUHAN Po teu Allah gata nibak gata: Horeumat kheueh TUHAN Po teu Allah gata dan peubuet kheueh banmandum nyang geupeurintah lé Gobnyan. Cinta kheueh Gobnyan dan meuiébadat kheueh ubak Gobnyan deungon bansaboh jiwa raga gata. 13 Taát kheueh ubak peurintah TUHAN nyang nibak uroenyoe ulôn peutrok ubak gata deumi keugét gata keudroe. 14 TUHAN Po teu Allah gata nyang po langét nyang manyang; bumoepi atra Gobnyan meunan cit banmandum nyang na di ateueh nyan. 15 Teuma geunaséh TUHAN keu indatu gata rayeuk lumpah na, sampoe nibak meubagoe bansa gata kheueh nyang geupiléh lé Gobnyan, dan trok án jinoepi gata umat Gobnyan nyang teupiléh. 16 Lé sababnyan phon saátnyoe gata harôh taát ubak TUHAN dan bék kheueh gata meukreueh ulée le. 17 TUHAN Po teu Allah gata na ateueh meubagoe ilah nyang laén dan leubeh nibak meubagoe kuasa. Gobnyan Po teu Allah nyang agong dan meukuasa nyang harôh teutaát. Gobnyan hana galak geudong siblaih meunan cit hana galak geuteurimong sugok. 18 Gobnyan geubila hak aneuëk yatem ngon muntui dan inong balée mangat awaknyan jipeusaneut deungon ade; Gobnyan geugaséh keu ureuëng aséng nyang udeb meusapat deungon bansa geutanyoe dan geujok keu awaknyan peunajoh deungon peukayan. 19 Deungon nyan gatapi harôh gata tunyok gaséh sayang gata ubak ureuëng aséng nyan. Sabab yoh watée ilée gatapi ureuëng aséng di nanggroe Meusé. 20 Horeumat kheueh TUHAN Po teu Allah gata dan meuiébadat kheueh ubak Gobnyan mantong. Bah kheueh gata teutab seutia ubak Gobnyan dan meunyoe meubudok deumi nan Gobnyan mantong. 21 Pujoe kheueh Gobnyan sabab Gobnyan TUHAN Po teu Allah gata. Ngon mata ulée gata keudroe gata ka lheueh takalon buet-buet nyang hebat luwabiasa nyang ka geupeubuet lé Gobnyan keu gata. 22 Watée indatu gata geujak u nanggroe Meusé, jeumeulah awaknyan na kheueh tujoh ploh droe. Teuma, TUHAN Po teu Allah ka geupeujeuet gata le jih sidub bintang-bintang nyang na di langét."

Kitab Teu-Ulang 11

1 "Cinta kheueh ubak TUHAN Allah gata, dan taát kheueh sabe ubak banmandum peurintah Gobnyan. 2 Ingat kheueh phon saát nyoe peue nyang gata teupeue keuhai TUHAN dan peungalaman gata. Aneuëk-aneuëk gata hana jiteupeue peungalaman nyan. Gata kheueh nyang ka gata peusaksi keu agongan TUHAN Po teu Allah gata, teunaga Gobnyan, keuhai keukuasaan Gobnyan 3 dan buet-buet nyang ajaéb nyang Gobnyan peubuet. Gata takalon keudroe peue nyang geupeubuet ateueh raja nanggroe Meusé dan bansaboh nanggroe jihnyan. 4 Gata takalon pakriban TUHAN geupeuhanco sipa-i nanggroe Meusé meusajan deungon mandum guda jih meunan cit deungon geuritan prang jih. Awaknyan banmandum geupeukaram lam Laôt Geulagah watée awaknyan teungoh jipeulet gata. 5 Gata tateupeue peue nyang geupeubuet lé TUHAN keu gata dipadang pasi sigohlom gata trok keunoe. 6 Meunan cit gata teuingat peue nyang geupeubuet lé TUHAN ateueh Datan dan Abiram, aneuëk-aneuëk Eliab nibak sukée Ruben. Nibak teumpat gata banmandum, bumoe teuprah dua laju jiúet awaknyan meusigoe ngon keuluwarga jih, khimah dan banmandum beulatang peulara awaknyan. 7 Biet, gata kheueh nyang ngon mata ulée gata keudroe ka lheueh gata kalon banmandum buet nyang ajaéb nyang ka geupeubuet lé TUHAN." 8 "Taát kheueh ubak mandum huköm nyang ulôn peutrok keu gata nibak uroenyoe, deungon nyan gata hase tajeumeurang krueng dan gata tamong lam nanggroe nyang hana treb lé gata duek teuma. 9 Dan gata teuma udeb nyang treb nibak nanggroe nyang kaya ngon subô, nyang ka geupeujanji lé TUHAN ubak indatu gata dan ubak keuturonan awaknyan. 10 Nanggroe nyang gata duek teuma kon lagée tanoh Meusé, nibak teumpat tinggai gata yoh masa ilée. Disideh gata harôh tameubuet nyang brat keu gata peuék ié lam ladang mangat jeuet gata tabu bijéh. 11 Teuma keu nanggroe nyang teuma gata tamong nyan na kheueh tanoh meugunong-gunong dan pantôn-pantôn; tanoh jih ji-ile lé ié ujeuen. 12 TUHAN Po teu Allah gata geupeulara nanggroe nyan dan geujaga sipanyang thon. 13 Lé sababnyan, taát kheueh ubak peue-peue mantong peurintah nyang ulôn peusampoe ubak gata nibak uroenyoe; cinta kheueh ubak TUHAN Po teu Allah gata dan meuiébadat kheueh ubak Gobnyan deungon banmandum jiwa raga gata. 14 Meunyoe gata tapeubuet lagée nyan, teuma lé TUHAN geupeutreun ujeuen ateueh tanoh gata watée musém ka teuka, óh ka lheueh gata mupot, nibak watée gata tapeuphon seumula. Teuma gata na gandom nyang seb, anggô dan minyéuk zaiton, 15 meunan cit na leueng keu beulatang peulara gata. Peue-peue mantong peunajoh nyang gata peureulée teuma teukeubah keu gata. 16 Bék gatatem jipeujiôh gata nibak TUHAN mangat jak seumah dan gata meungabdi ubak ilah-ilah nyang laén. 17 Meunyoe gata ta iengkeue ubak peurintah nyan, TUHAN teuma beungéh keu gata. Gobnyan hana teuma geupeutreun ujeuen; tanoh gata ka jeuet keu tho kreng deungon nyan seunaman nyang teupula hana jipeuna hase. Deungon nyan teuma lam watée nyang paneuk gata maté nibak tanoh nyang subô nyang geubri lé TUHAN keu gata. 18 Ingat kheueh dan simak kheueh peurintah-peurintah nyan. Ikat kheueh bak jaroe gata dan pasang kheueh teuma nibak dho gata mangat jeuet teuingat-ingat. 19 Peurunoe kheueh ubak aneuëk-aneuëk gata. Peugah kheueh hainyan bahnyan lam rumoh meunan cit diluwa rumoh, bak watée meureuhat dan bak watée keureuja. 20 Tuléh kheueh atranyan nibak taméh rumoh gata dan nibak babah pintoe geureubang gata. 21 Deungon nyan, gata ngon aneuëk-aneuëk gata teuma panyang umu nibak nanggroe nyang geupeujanji lé TUHAN Po teu Allah gata ubak indatu gata. Simantong na langét di ateueh bumoe, sidub treb nyan kheueh teuma gata tinggai nibak tanoh nyan. 22 Taát kheueh deungon seutia banmandum huköm nyang ulôn peusampoe ubak gata; Cinta kheueh TUHAN Po teu Allah gata, peubuet kheueh banmandum nyang geupeurintah ubak gata, dan bah kheueh gata teutab seutia ubak Gobnyan. 23 Deungon nyan TUHAN geu-use banmandum bansa nyan dikeue gata, dan gata tatinggai nibak tanoh atra bansa-bansa nyang leubeh rayeuk dan leubeh teuga nibak gata. 24 Tieb-tieb wilayah nyang gata tamong teuma jeuet keu hak milék gata. Wilayah gata beureuntang phon nibak padang pasi di seulatan sampoe trok u Gunong-gunong Libanon di siblaih utara, dan phon nibak Krueng Efrat di siblaih u timu sampoe trok u Laôt Teungoh di siblaih u barat. 25 Bansaboh nanggroenyan TUHAN Po teu Allah gata teuma geupeujeuet ureuëng-ureuëng habéh teumakot keu gata lagée nyang ka geupeujanjinyan, deungon nyan hana meusidroepi nyang hase jitam gata. 26 Uroenyoe gata jeuet tapiléh beureukat atawa kutôk. 27 Gata teuma geubri beureukat meunyoe gata taát ubak peurintah-peurintah TUHAN Po teu Allah gata, nyang nibak uroenyoe ulôn peutrok keu gata. 28 Teuma gata geukutok meunyoe gata hana taát ubak peue-peue nyang geupeurintah lé TUHAN Po teu Allah gata, sabab ka gata paleng gata seumah ilah-ilah nyang hántom na gata seumah. 29 Óh ka lheueh TUHAN Po teu Allah gata geuba gata geupeutamong lam nanggroe nyang teuma gata tinggai nyan, beureukatnyan harôh gata kheun nibak Gunong Gerizim dan kutôk nyan nibak Gunong Ebal. ( 30 Bandua boh gunongnyan teuduek jih siblaih u barat Krueng Yordan nibak wilayah ureuëng Kanaan nyang tinggai di Pantôn Yordan, meuhadab keu u barat hana padubna jiôh nibak bak-bak kayée teumpat iébadat di More rab ngon banda Gilgal.) 31 Hana treble gata tajeumeurang Krueng Yordan dan laju gata duek ateueh tanoh nyang geubri lé TUHAN Po teu Allah gata keu gata. Óh ka lheueh gata reupah tanoh nyan dan gata duek disinan, 32 gata harôh tataát banmandum huköm nyang ulôn peusampoe keu gata nibak uroenyoe."

Kitab Teu-Ulang 12

1 "Nyoe kheueh huköm-huköm nyang harôh gata taát si umu udeb gata di nanggroe nyang geubri keu gata lé TUHAN, Po teu Allah indatu gata. 2 Óh ka lheueh gata tamong u dalam nanggroe nyan gata harôh tahanco banmandum teumpat-teumpat seumujoe awaknyan nyang teukeubah di ateueh-ateueh gunong nyang manyang, di bukét-bukét dan dimiyueb-miyueb kayée nyang rampak, nibak teumpat bansa nyang tinggai bak teumpat jiseumah ilah-ilah awaknyan. 3 Gata peuhanco kheueh laju miseubah-miseubah awaknyan meunan cit peureumok kheueh taméh-taméh batée nyang awaknyan anggab keuramat. Gatatot kheueh teuma lambang-lambang Asyera, dan gata peuhanco kheueh patong-patong beurala awaknyan, akhéjih ilah-ilah nyan hanale jiseumah nibak teumpat-teumpat nyan. 4 Bak watée gata taseumah TUHAN Po teu Allah gata, bék kheueh gata tiru nibak awaknyan deungon cara awaknyan jiseumah ilah-ilah awaknyan. 5 Nibak banmandum wilayah sukée-sukée Israel, TUHAN Po teu Allah gata teuma geupiléh saboh teumpat mangat jeuet bansa geutanyoe jiteumé jak ukeue Gobnyan dan jiseumah Gobnyan. 6 Ubak teumpat nyan kheueh harôh gataba keureubeuen-keureubeuen nyang teutot meunan cit keureubeuen-keureubeuen nyang laén, keureubeuen siper siploh gata meunan cit keureubeuen-keureubeuen nyang laén teuma, keureubeuen teupeuleuh kaôi gata, keureubeuen ban galak até droe gata dan aneuëk leumô meunan cit deungon kaméng dan bubiri gata nyang phon that lahé. 7 Nibak teumpat nyan cit teuma, dikeue TUHAN Po teu Allah gata, gata meusajan-sajan deungon keuluwarga gata harôh gata makheun dan meugeumbira ateueh useuha-useuha gata nyang meuhase sabab geubri beureukat lé TUHAN Po teu Allah gata. 8 Meunyoe watéenyan ka teuka, gata békle tapeubuet lagéenyan bagoe. Trok bak watéenyoe gata meuiébadat ban galak até droe, 9 sabab gata gohlom tatamong lam nanggroe nyang geubri lé TUHAN Po teu Allah gata keu gata, teumpat gata jeuet tatinggai teutab deungon aman. 10 Óh ka lheueh gata tajeumeurang Krueng Yordan, TUHAN Po teu Allah teuma geutulông gata mangat gata duek nibak teumpat dan tanoh nyang na di meurandeh krueng nyan. Gobnyan teuma keulindong gata nibak meubagoe musoh, dan gata teuma udeb deungon aman dan teuntram. 11 Óh lheuehnyan TUHAN Po teu Allah gata teuma geupiléh saboh teumpat mangat jeuet gata taseumah Gobnyan. Keunan kheueh gata harôh tajak sira taba banmandum nyang ulôn peurintah, na kheueh keureubeuen nyang teutot dan keureubeuen-keureubeuen nyang laén, lagée keureubeuen siper siploh dan keureubeuen khusos nyang gata peujanji ubak TUHAN. 12 Meugeumbira kheueh dikeue TUHAN Allah gata, meusajan-sajan deungon aneuëk-aneuëk gata, namiet-namiet gata dan ureuëng-ureuëng Lewi nyang na tinggai nibak banda gata, lé sabab ureuëng Lewi hana meuteumé tanoh nibak nanggroe gata. 13 Gata hana jeuet tapeuseumah keureubeuen gata nibak barang gapat teumpat nyang gata piléh keudroe, 14 teuma nibak teumpat nyang geupiléh lé TUHAN didaerah saboh lamkawan sukée gata. Nibak teumpatnyan mantong nyang jeuet peuseumah keureubeuen nyang teutot dan gata peubuet hai nyang laén nyang ulôn peurintah ubak gata. 15 Teuma gata beubaih keu gata sie beulatang peulara gata dan gata pajoh asoe jih dipat mantong gata tinggai. Gata jeuet tapajoh sidub toh nyang geubri lé TUHAN Po teu Allah gata keu gata. Tieb-tieb ureuëng, bah nyan nyang gleh meunan cit nyang kuto, jeuet jipajoh sie nyan, lagée gata jeuet tapajoh eungkot sie rusa. 16 Teuma darah jih nyang hana jeuet teupajoh, dan darah nyan harôh teuroe ateueh tanoh lagée teuro ié. 17 Nibak teumpat tinggai gata hana jeuet gata pajoh keureubeuen siper siploh nibak hase gandom gata, anggô gata, minyéuk zaiton gata, leumô atawa kaméng ngon bubiri gata nyang phon that lahé, keureubeuen teupeuleuh kaôi gata, keureubeuen ban galak droe atawa keureubeuen nyang laén. 18 Gata meusajan ngon aneuëk-aneuëk gata, meunan cit namiet-namiet gata dan meusajan-sajan ngon ureuëng-ureuëng Lewi nyang na tinggai lam banda gata, harôh tapajoh keureubeuen nyan dikeue TUHAN Allah gata, nibak teumpat nyang geupiléh lé TUHAN Po teu Allah gata. Dan nibak teumpat nyan gata harôh meugeumbira sabab lé meubagoe useuha gata. 19 Jaga kheueh bék sampoe gata peubiyeu kawöm Lewi nyan teulanta simantong gata udeb lam nanggroe nyan. 20 Óh ka lheueh TUHAN Po teu Allah gata geupeuluwah bataih-bataih nanggroe gata lagée nyang geupeujanji nyan, gata jeuet tapajoh asoe jih nyan ban galak droe gata. 21 Meunyoe teumpat nyang geupiléh lé TUHAN Po teu Allah jiôh that nibak teumpat tinggai gata, gata jeuet tasie saboh leumô, bubiri atawa kaméng nyang geubri lé TUHAN keu gata, dan gata pajoh sie jih nibak teumpat gata ban galak até gata, lagée nyang ka lheueh ulôn peugah bak gata. 22 Tieb-tieb ureuëng bah nyan nyang gleh meunan cit nyang kuto, jeuet jipajoh eungkot sie nyan, lagée gata jeuet tapajoh eungkot sie rusa. 23 Teuma sie nyang mantong na meudarah hana jeuet tapajoh, sabab nyawöng na lam darah, dan gata hana jeuet tapajoh nyawöng meusigoe ngon asoe jih. 24 Darah jih sagai-sagai hana jeuet gata pajoh, teuma harôh teuro ateueh tanoh lagée teuro ié. 25 Meunyoe gata tataát ubak peurintah nyan, TUHAN galak that, dan gata meunan cit keuturonan gata teuma seujahtra. 26 Banmandum keureubeuen dan nyang gata peuseumah nyang ka gata peujanji ubak TUHAN, harôh gata ba ubak teumpat nyang geupiléh lé TUHAN. 27 Keureubeuen nyang teutot dan keureubeuen nyang teupajoh asoe jih harôh teupeuseumah ateueh miseubah TUHAN Po teu Allah gata dan darah gobnyan geurô ateueh miseubah nyan. 28 Simak kheueh beujroh-jroh peue-peue nyang ka ulôn peurintah ubak gata, deungon nyan gata ka tapeubuet nyang jroh dan geugalak lé TUHAN Po teu Allah gata, deungon nyan teuma gata dan keuturonan gata seulamat dan seujahtra keu siumu masa." 29 "TUHAN Po teu Allah gata teuma geupeubinasa bansa-bansa nyang na tinggai nibak nanggroe nyan, deungon nyan gata hase gata duek dan gata tinggai disinan. 30 Óh ka lheueh bansa-bansa nyan teupeubinasa, até-até kheueh bék sampoe gata taseutôt awaknyan teuseumah ilah-ilah laén, sabab ngon buet lagéenyan jipeuteuka beuncana. 31 Cara bansa-bansa nyan jiseumah ilah-ilah jih, bék kheueh gata seutôt keu gata peubuet taseumah TUHAN Po teu Allah gata, sabab awaknyan jiseumah deungon cara jipeubuet buet-buet nyang jeuhet nyang geubanci lé TUHAN. Dan aneuëk-aneuëk awaknyan keudroe awaknyan tot ateueh miseubah sibagoe keureubeuen keu ilah-ilah awaknyan. 32 Peubuet kheueh banmandum nyang ulôn peurintah ubak gata; bék gata tamah atawa gata peukureueng.

Kitab Teu-Ulang 13

1 Meunyoe na sidroe nabi atawa tukang boh tapeuse lumpo jipeujanji sapeue-sapeue mujizat atawa buet nyang ajaéb 2 deungon meukeusut mangat gata taseumah ubak ilah-ilah nyang hántom na gata turi, bah kheueh peue nyang awaknyan peujanji nyan biet-biet teujadi, 3 bék tabri peuratian keu hai nyan. TUHAN Po teu Allah gata geupeuguna ureuëng nyan keu geu ujoe gata, mangat geukalon peu kheueh gata biet-biet gata cinta ubak TUHAN deungon sipeunoh até atawa hana. 4 Ureuëng nyang lagéenyan harôh kheueh teuhuköm maté, kareuna jikeuneuk peusisat gata nibak jalan nyang geupeurintah lé TUHAN Po teu Allah gata keu gata. Jihnyan na kheueh ureuëng jeuhet sabab jiyue gata mangat gata beurontak ubak TUHAN Po teu Allah gata nyang ka geupeubeubaih gata nibak nanggroe Meusé, di teumpat gata jiboh keunamiet. Jadi ureuëng nyang lagéenyan harôh teupoh maté, mangat buet nyang jeuhet teusampôh beu habéh. Teuma gata harôh kheueh taseutôt peurintah TUHAN Po teu Allah gata dan gata horeumat Gobnyan; gata taát kheueh ubak Gobnyan dan gata peubuet kheueh peue mantong nyang geupeurintah keu gata. Teutab kheueh seutia dan meungabdi ubak Gobnyan. 6 Meunyoe syedara gata atawa aneuëk agam meunan cit ngon aneuëk inong, atawa peurumoh gata nyang gata gaséh atawa teuma rakan nyang that-that tho deungon gata deungon sengab-seungab jibujuk gata mangat gata tatem seumah ilah-ilah nyang laén nyang hana gata turi meunan cit hana geuturi lé indatu gata, ilah-ilah nibak bansa-bansa nyang tinggai tô ngon jiôh, 8 bék gata deungoe jihnyan dan bék kheueh teuma gata peubiyeu droe gata jibujuk lé ureuëng nyang lagéenyan. Meunan cit bék teuma gata lindong ngon gata gaséh ureuëng nyang lagéenyan. 9 Ureuëng nyang lagéenyan harôh kheueh teu rhom ngon aneuk batée sampoe án maté. Nyang peuphon rhom harôh kheueh gata, óh lheuehnyan barô kheueh jiseutôt lé banmandum rakyat ba. Ureuëng nyang meusalah nyan harôh kheueh teupoh maté, sabab jihnyan jikeuneuk peujiôh gata nibak TUHAN Po teu Allah gata nyang ka geupeubeubaih gata nibak jiboh keunamiet di nanggroe Meusé. 11 Teuma banmandum bansa Israel jideungoe keuhai teupoh maté nyan dan sabab nyan awaknyan jeuet keu teumakot, sampoe hana meusidroepi nyang jipeubuet jeuhet lagéenyan. 12 Meunyoe teuma gata tinggai di banda-banda nyang geubri lé TUHAN Po teu Allah gata keu gata, mungken na meutabu haba 13 bahwa na meupadub droe ureuëng jeuhet nibak bansa gata ka jipeusisat peunduduek banda mangat jiseumah ilah-ilah nyang hana gata turi. 14 Meunyoe na teudeungoe haba nyang meusáh sáh nyang lagéenyan bagoe, gata seulidék kheueh deungon teuliti. Meunyoe keujeuhetan nyan biet-biet ka teujadi, 15 teuma banmandum peunduduek banda nyan meunan cit deungon beulatang peulara jih harôh teupoh maté. Meunan cit deungon banda nyan harôh kheueh teupeuhanco sampoe rata ngon tanoh. 16 Banmandum hareuta beunda peunduduek banda nyan harôh teupeusapat lam padang nyang luwah, laju banda dan bubena hareuta beunda jihnyan teutot sibagoe keureubeuen ubak TUHAN Po teu Allah gata. Óh ka lheueh banmandum nyan harôh teutinggai disinan jeuet keu rungka-rungka dan hana jeuet teupeugét lom teuma. 17 Barang-barang teukutôk nyan hana jeuet teukeubah keu gata keudroe, teuma harôh kheueh teupeubinasa banmandum. Teuma keuhai beungéh TUHAN reuda dan Gobnyan geutunyok gaséh sayang keu gata. Gobnyan teuma geupumurah até keu gata dan geupeu jeuet gata keu bansa nyang raya lagée nyang ka geupeujanji ubak indatu gata, 18 asai gata ta-taát ubak mandum peurintah nyang ulôn peusampoe keu gata nibak uroenyoe, dan gata peubuet banmandum nyang geulakée lé Gobnyan."

Kitab Teu-Ulang 14

1 "Gata na kheueh umat TUHAN Po teu Allah. Teuma bak watée gata meukabong keu ureuëng nyang meuninggai donya, bék kheueh gata peuluka droe gata atawa tacuko bagian keue ulée gata lagée nyang jipeubuet lé bansa-bansa laén. 2 Gata na kheueh milék TUHAN Po teu Allah gata; nibak banmandum bansa di ateueh bumoe, gata kheueh yang geupiléh lé Po teu Allah mangat jeuet keu umat Gobnyan." 3 "Bék kheueh gata pajoh beulatang nyang geupeugah hareuem lé TUHAN. 4 Gata jeuet tapajoh beulatang-beulatang nyang nyoe: leumô, bubiri, kaméng, 5 rusa, kaméng uteuen, bubiri uteuen, 6 dan banmandum beulatang nyang gukée jih teuplah dan nyang jimomoh biak. 7 Beulatang nyang gukée jih hana teuplah nyan hana jeuet gata makheun meunan cit nyang hana jimomoh biak. Bék gata pajoh beulatang unta, keulinci dan marmot. Beulatang nyan na kheueh hareuem sabab bahpi na jimomoh biak teuma gukée jih hana teuplah. 8 Meunan cit deungon bui, bék gatapajoh, beulatang nyan hareuem, sabab bah kheueh gukée jih teuplah, beulatang nyan hana jimomoh biak. Asoe sie jih hana jeuet teupajoh, meunan cit deungon bangke jih hana jeuet gata cukéh. 9 Gata jeuet tapajoh uengkot peue mantong nyang meusisek dan na sireb. 10 Beulatang nyang udeb didalam ié teuma hana meusireb dan hana teuma meusisek nyan na kheueh hareuem, deungon nyan, atranyan hana jeuet gata pajoh. 11 Cicém peue mantong jeuet gata pajoh nyang hana hareuem. 12 Teuma na meupadub boh jeunéh cicém nyang hana jeuet gata pajoh, na kheueh: cicém siwah, cicém keutoktok, meubagoe jeunéh kleueng, cicém nasar, cicém gagak, cicém unta, cicém cama, blekok dan meubagoe jeunéh cicém cangiriek, undan, cicém kasa dan simantong. 19 Banmandum beulatang seurangga nyang meusayeub na kheueh hareuem, deungon nyan hana jeuet teupajoh. 20 Beulatang nyang na sayeub teuma hana hareuem nyan jeuet teupajoh. 21 Beulatang nyang maté keudroe bangke beulatang nyan hana jeuet teupajoh, teuma jeuet jipajoh lé ureuëng aséng nyang na tinggai lamkawan gata, atawa bangke beulatang nyang maté nyan teupeubloe keu bansa aséng nyang lagée nyan jeuet. Gata na kheueh umat nyang teupeukhusos keu TUHAN Po teu Allah gata. Uengkot sie aneuëk bubiri atawa aneuëk kaméng hana jeuet teutaguen ngon ié miek nang jih." 22 "Tieb-tieb thon gata harôh kheueh gata weuek siper siploh nibak banmandum hase tanoh gata. 23 Dikeue TUHAN Po teu Allah gata, di teumpat nyang geupiléh nyan, gata harôh gatapajoh keureubeuen siper siploh nibak hase gandom, ié anggô, minyéuk zaiton meunan cit ngon aneuëk leumô dan kaméng bubiri gata nyang phon that lahé. Gata peubuet kheueh hainyan mangat jeuet keu siumu masa gata tameurunoe keu tahoreumat TUHAN Po teu Allah gata. 24 Meunyoe teumpat nyang geupiléh lé TUHAN Po teu Allah gata jiôh that nibak rumoh gata, sampoe siper siploh nibak hase tanoh gata nyang geubri lé TUHAN Allah gata keu gata hana hase gata ba keunan, 25 teuma gata peubloe kheueh jeumba nibak hase tanoh gata nyan, dan gataba kheueh péng yuem nyan u teumpat nyang ka geupiléh lé TUHAN Po teu Allah gata. 26 Gata beulanja kheueh péng nyan keu peue mantong nyang gata keuneuk bloe -- leumô atawa kaméng bubiri, ié anggô atawa ié jieb nyang kreueh -- laju nibak teumpatnyan, dikeue TUHAN Po teu Allah gata, gata dan keuluwarga gata harôh kheueh tapajoh bu meusajan-sajan dan gata meuseunang-seunang. 27 Bék gata peubiyeu ureuëng Lewi nyang tinggai di banda-banda gata; ingat kheueh bahwa awaknyan hana meutanoh atrajih keudroe. 28 Bak tieb-tieb akhé thon nyang keu lhée, gata harôh taba siper siploh jeumba nibak hase tanoh gata dan gata peusapat laju atranyan nibak banda-banda gata. 29 Peunajohnyan keu ureuëng Lewi sabab awaknyan hana meutanoh atrajih keudroe, dan keu ureuëng aséng, aneuëk yatem ngon aneuëk meuntui dan ureuëng inong balée nyang udeb di banda-banda gata. Awaknyan jeuet jiteuka dan jijak cok banmandum peue nyang jipeureulée. Meunyoe gata tapeubuet lagéenyan, lé TUHAN Allah gata teuma geubri beureukat banmandum hase useuha gata."

Kitab Teu-Ulang 15

1 "Tieb-tieb akhé thon nyang keutujoh gata harôh tapeuna watée keuteupeusampôh utang. 2 Meunoe cara jih. Tieb-tieb ureuëng Israel nyang ji peu utang péng ubak ureuëng saboh bansa ngon jih, péng nyang jipeu utang nyan harôh jisampôh, sabab meunurot keuputosan TUHAN keudroe utang nyan ka geusampôh, deungon nyan hana jeuet le teujak tunggée. 3 Gata jeuet tatunggée péng nyang gata peu utang ubak ureuëng aséng, teuma hana jeuet le gata tunggée péng nyang na nibak ureuëng saboh bansa deungon gata. 4 TUHAN Po teu Allah gata teuma geubri beureukat keu gata di nanggroe nyang geubri keugata. Lé sababnyan lamkawan bansa gata hana ureuëng nyang gasien, 5 asai gata tataát ubak TUHAN Po teu Allah gata, dan deungon teuliti gatapeubuet laju peue-peue mantong nyang ulôn peurintah ubak gata nibak uroenyoe. 6 TUHAN Po teu Allah gata teuma geubri beureukat ubak gata lagée nyang ka geupeujanji nyan. Gata teuma tapeu utang péng ubak bansa nyang le, teuma gata keudroe hana teuma gata meu utang; gata teuma takuasa ateueh bansa nyang le, teuma awaknyan hana teuma jikuasa gata. 7 Meunyoe gata teuma ka tinggai teutab di nanggroe nyang geubri lé TUHAN Allah gata keu gata, laju nibak saboh lam banda gata na meurumpok ngon ureuëng saboh bansa gata nyang udeb jih lam keuadaan hana sapeuena, bék kheueh gata peupeunteng droe gata keudroe ngon cara gata tulak keu jitulông syedara saboh bansa ngon gata nyan. 8 Sikeubitji, gata harôh beumurah até dan gata peu utang ubak ureuëng nyan sidub le nyang jipeureulée. 9 Bék gata tulak keu gatabri peu utang ubak ureuëng nyan deungon alasan bahwa thon teusampôh bubena utang karab that. Bék gata peubiyeu pikeran nyang jeuhetnyan jitamong lam até gata. Meunyoe gata hana neutem peu utang ubak jihnyan, ureuëng nyan teuma jimeulakée ubak TUHAN keu jigadu gata, deungonnyan gata teuma geupeugah ka meusalah. 10 Gatabri kheueh keu jihnyan deungon mangat até dan ikhlas, deungon nyan TUHAN Po teu Allah gata teuma geubri beureukat ateueh peue mantong nyang gata useuha. 11 Lamkawan ureuëng gata Israel nyan sabe na meurumpok ureuëng-ureuëng gasien hana sapeuena. Sabab nyan kheueh ulôn peurintah ubak gata mangat gata peumurah até keu ureuëng nyang gasien nyan." 12 "Meunyoe na sidroe ureuëng agam atawa ureuëng inong nibak bansa gata jipeubloe droe jih jeuet keu namiet gata, jihnyan harôh jimeukeureuja ubak gata nyang treb jih nam thon. Nibak thon nyang keutujoh jihnyan harôh kheueh neupeubeubaih. 13 Namiet nyang ka gata peumeurdehka nyan hana jeuet jijak ngon jaroe shoh. 14 Gata jok kheueh keu jihnyan deungon murah até nibak peue nyang ka geubri lé TUHAN Po teu Allah gata keu gata na kheueh kaméng bubiri, gandom dan anggô. 15 Gata ingat kheueh yoh masa ilée bahwa gata nyan na kheueh namiet di nanggroe Meusé laju geupeubeubaih ngon geupeumeurdehka gata lé TUHAN Po teu Allah gata; nyang kheueh sabab jih ulôn bri peurintah nyoe ubak gata. 16 Teuma meunyoe namietnyan hana jitem jak sabab jihnyan jicinta ubak keuluwarga gata dan galak jitinggai meusapat ngon gata, 17 taba kheueh jihnyan ubak babah pintoe rumoh gata dan gata tindek kheueh ôn punyueng jihnyan, teuma jihnyan jeuet keu namiet gata siumu udeb jih. Meunan cit teuma nyang harôh gatapeubuet ateueh namiet gata nyang inong. 18 Meunyoe gata tapeubeubaih sidroe ureuëng namiet, bék kheueh gata meurasa tunu, sabab nyang treb jih nam thon namiet nyan ka jimeukeureuja keugata deungon upah jih siteungoh nibak sidroe upah si peulayan. Gata peubuet kheueh laju peurintah nyan, teuma TUHAN Po teu Allah gata teuma geubri beureukat keu banmandum useuha gata. 19 Aneuëk leumô dan kaméng bubiri nyang phon-phon jitoh atranyan harôh gata peuseumah ubak TUHAN Po teu Allah gata. Leumô nyan hana jeuet gatacok keu teujak muúe, dan bubiri nyan hana jeuet teuma gata cukoe bulée jih. 20 Tieb-tieb thon gata seukeuluwarga harôh gata pajoh sie jihnyan dikeue TUHAN Po teu Allah gata, teumpat jih nyang ka geupiléh lé TUHAN. 21 Teuma meunyoe beulatang peulara nyan na meucupa, miseu jih capiek atawa buta mata jih dan cacat nyang that brat, nyang lagéenyan hana jeuet gata peuseumah ubak TUHAN Po teu Allah gata. 22 Tieb-tieb ureuëng, bah kheueh jihnyan nyang gleh meunan cit ngon nyang kuto, atranyan jeuet jipajoh meunyoe di rumoh, lagée teupajoh uengkot sie rusa. 23 Darah jihnyan hana jeuet gata pajoh, teuma harôh gatarö u ateueh tanoh lagée gatarö ié."

Kitab Teu-Ulang 16

1 "Gata peuraya kheueh uroe raya Paskah nibak buleuen Abib keu teuhoreumat TUHAN Po teu Allah gata, sabab dalam buleuen nyan, bak watée óh malam teuka, Gobnyan geupeubeubaih gata nibak tanoh Meusé. 2 Gatajak kheueh u teumpat nyang geupiléh TUHAN keu gatajak sie saboh nibak kaméng bubiri gata atawa leumô gata sibagoe peuseumahan Paskah guna keu teuhoreumat TUHAN Po teu Allah gata. 3 Atra keureubeuen Paskah nyan harôh kheueh gata pajoh ngon ruti nyang hana meurago. Tujoh uroe treb jih gata harôh gatapajoh ruti nyang hana meurago, lagée yoh masa gata tatinggai tanoh Meusé deungon meugagéeh-gagéeh. Gata makheun kheueh ruti nyan, ruti nyang geupeugah ruti peundeuritaan, mangat jeuet siumu udeb gata atranyan gata ingat keu uroe gata tinggai nanggroe Meusé, nibak teumpat gata meudeurita. 4 Treb jih tujoh uroe bansaboh nanggroe gata hana meusidroepi jeuet jikeubah rago di dalam rumoh jih. Uengkot sie nyang teusie watée óh malam nyang phon harôh kheueh teupajoh sampoe habéh bak malam nyan cit teuma. 5 Beulatang peulara nyang teusie nibak uroe raya Paskah harôh kheueh teusie nibak teumpat nyang ka geupiléh lé TUHAN Po teu Allah gata, dan hana jeuet bak teumpat nyang na bansaboh nanggroe nyang geubri ubak gata. Hainyan harôh gata peubuet bak watée mata uroe ka jilhob, lagée bak watée gata tinggai tanoh Meusé. 7 Gata reuboh kheueh uengkot sie nyan dan gata pajoh kheueh laju nibak teumpat nyang ka geupiléh lé TUHAN Po teu Allah gata, óh singoh beungoh gata jakwoe kheueh u rumoh gata. 8 Treb jih nam uroe teuma óh lheueh nyan gata harôh tapajoh ruti nyang hana meurago. Bak uroe nyang keutujoh gata harôh gata meusapat keu gatajak seumah TUHAN Po teu Allah gata. Bak uroenyan bék kheueh sagai-sagai gata jak lam buet." 9 "Gata itong kheueh tujoh seuen aleuhad phon nibak uroe phon gata jakpot boh gandom, 10 laju gata peuna kheueh uroe raya Khanuri musém seumeupot keu gata horeumat ubak TUHAN Po teu Allah gata. Nibak uroenyan taba kheueh keureubeuen keugalak droe ubak Gobnyan meunurot jai jih raseuki nyang ka geubri nyan ubak gata. 11 Dikeue TUHAN Po teu Allah gata, nibak teumpat nyang ka geupiléh, gata harôh kheueh neumeusukaria meusajan ngon aneuëk-aneuëk gata, namiet gata dan ureuëng Lewi, ureuëng aséng, aneuëk yatem ngon aneuëk muntui dan bubena ureuëng inong balée nyang na tinggai banda-banda gata. 12 Gata taát kheueh ubak banmandum peurintah nyan deungon seutia, dan bék tatuwoe bahwa yohmasa ilée gatapi ka lheueh jeuet keu namiet di nanggroe Meusé." 13 "Óh ka seuleusoe banmandum gandom gata keubah dan meunan cit bubena boh anggô gata ka seuleusoe teuprah ié jih, gata harôh tapeuna khanuri Jambo Ôn nyang treb jih tujoh uroe. 14 Meuseunang-seunang kheueh meusajan-sajan ngon aneuëk-aneuëk gata, namiet gata, ureuëng Lewi, ureuëng aséng, aneuëk yatem ngon aneuëk muntui dan bubena inong balée nyang na tinggai lam banda-banda gata. 15 Tujoh uroe treb jih khanuri nyan gatapeuguna keu teuhoreumat ubak TUHAN Po teu Allah gata di teumpat nyang geupiléh lé TUHAN. Meugeumbira kheueh, sabab TUHAN Po teu Allah gata ka geubri beureukat hase tanoh nyang gata keureuja dan meunan cit ngon hase buet droe gata nyang laén. 16 Banmandum ureuëng agam nibak bansa Israel harôh jijak seumah TUHAN Po teu Allah gata nibak teumpat nyang ka geupiléh lhée goe dalam sithon, na kheueh nibak Uroe Raya Paskah, nibak Khanuri musém keumukôh dan bak musém Khanuri Jambo Ôn. Soe mantong ureuëng nyang teuka nyan harôh jiba peuseumahan ubak TUHAN 17 hainyan meunurot keumampuan jih, sisuai deungon le jih rejeuki nyang geubri lé TUHAN Po teu Allah gata ubak gata." 18 "Di tieb-tieb banda nyang geubri lé TUHAN Po teu Allah gata keu gata, gata harôh ta-angkat hakém-hakém dan peutugaih-peutugaih nyang laén mangat jeuet jibri keuputosan nyang ade ubak rakyat. 19 Lam hai gatacok keuputosan, awaknyan hana jeuet jimeubuet bangalak droeji peue teuklom meunyoe brat siblah. Meunan cit hana jeuet jiteurimong péng atawa ngon peue mantong nyang saban lagée buet teusogok, sabab deungon teusogoknyan ka teupeubuta ureuëng laén, bahpi keunong cit keu ureuëng nyang carông-carông ngon jujoe, deungon lagéenyan geucok keuputosan nyang geupeu ade nyan ngon cara hana ade. 20 Gata harôh kheueh beuade sabe, mangat hase udeb seujahtra ngon hase gata tinggai nyang treb nibak tanoh nyang geubri lé TUHAN Po teu Allah gata keu gata. 21 Meunyoe gata tapeugot miseubah keu TUHAN Po teu Allah gata, bék gata keubah patong beurala kayée lambang Asyera di siblah jihnyan, 22 dan meunan cit bék teuma gata peudong taméh keu gata seumah patong beurala, kareuna TUHAN Po teu Allah that-that geubeungéh keuhai nyang lagéenyan.

Kitab Teu-Ulang 17

1 Bék gata peuseumah leumô atawa domba nyang meucupa ubak TUHAN Po teu Allah gata, sabab nyang lagéenyan Gobnyan that-that geubanci. 2 Meunyoe gata na teudeungoe bahwa nibak saboh lam banda gata na ureuëng nyang meudesya ubak TUHAN Po teu Allah gata sabab ka ji-iengkeue peujanjian 3 dan peurintah Gobnyan deungon jiseumah dan meungabdi ubak ilah-ilah nyang laén atawa ubak mata uroe, buleuen atawa bintang, 4 teuma gata harôh kheueh gata seulidék deungon teuliti. Meunyoe bit buet nyang jeuhet nyan biet-biet ka teujadi di Israel, 5 ureuëng-ureuëng nyang meusalah harôh teuba u luwa banda dan laju teurajam ngon cara teurhom ngon aneuk batée sampoe án maté. 6 Teuma jihnyan jeuet teuhuköm maté meunyoe na dua droe saksi atawa leubeh; sidroe-droe ureuëng hana jeuet teuhuköm maté nyang dasaiji nibak keuteurangan nyang jipeugah lé sidroe saksi mantong. 7 Disaksi nyan harôh jipeuphon rhom batée nyang phon ateueh ureuëng nyan, óh lheuehnyan jiseutôt teuma lé ureuëng ramé nyang laén. Deungon na lagéenyan gata ka gata peuhanco buet nyang jeuhet. 8 Meunyoe peukara nyang hana hase teupeuputôh lé hakém-hakém bak saboh teumpat sabab brat that, miseu jih peukaranyan keuhai jipoh ureuëng sampoe maté nyang jisaja atawa hana jisaja, meuseuliseh keuhai hak milék atawa sabe-sabe jipeuluka badan maséng-maséng, gata harôh tajak ubak teumpat nyang ka geupiléh lé TUHAN Po teu Allah gata. 9 Gata peusampoe kheueh laju peukara gata nyan ubak teungku-teungku imeum ureuëng Lewi dan ubak hakém nyang teungoh na mantong meutugaih, laju gata peubiyeu mantong awaknyan nyang peuputôh huköman nyan. 10 Awaknyan kheueh nyang bri keuputosan, dan gata harôh gata peubuet nyan deungon teuliti peue nyang awaknyan peugah ubak gata. 11 Gata teurimong kheueh keuputosan awaknyan dan gata peubuet kheueh laju peue nyang ka awaknyan peuteutab sampoe ubak hai nyang siubiet-ubiet jih. 12 Soe mantong ureuëng jih nyang jijeuet jilawan hakém atawa teungku imeum nyang teungoh meutugaih, ureuëngnyan harôh teuhuköm maté; deungon na lagéenyan gata ka tapeuhanco buet nyang jeuhet nyan di Israel. 13 Banmandum ureuëng nyang jideungoe keuhai keujadian nyan dan ka jeuet keuteumakot, sampoe hanale nyang jijeuet jipeubuet nyang lagéenyan." 14 "Meunyoe teuma tanoh nyang gebri lé TUHAN Allah gata ka jeuet keu hak milék gata, dan gata ka teuma tatinggai di ateueh tanoh nyan, mungken gata tapeureulée teuma sidroe raja lagée bansa-bansa nyang na tinggai ban seukelileng gata. 15 Gata simak kheueh nyoe beugét-gét mangat ureuëng nyang gata angkat jeuet keuraja gata na kheueh ureuëng nyang geupiléh lé TUHAN Po teu Allah gata. Jihnyan harôh kheueh sidroe lamkawan bansa gata keudroe; dan bék teuma gata angkat bansa laén nyan jeuet keu raja gata. 16 Raja hana jeuet jipeulara guda nyang le keu tantra geuhnyan dan hana teuma jeuet bansa nyoe geuyue woe u nanggroe Meusé keu jijak bloe guda, sabab TUHAN ka geupeugah ubak umat Gobnyan bahwa awaknyan hana jeuet jiwoe u nanggroe nyan. 17 Meunan cit di rajanyan hana teuma jeuet geumeukawen nyang le sampoe ureuëng binoe geuh ramé, mangat gobnyan hana geupeulikot TUHAN. Meunan cit diraja nyan hana jeuet geupeukaya droe deungon geupeusapat méuh dan pirak. 18 Meunyoe sidroe ureuëng jiangkat jeuet keu raja, raja nyan harôh teubri saboh kitab nyang meuasoe keuhai huköm-huköm Po teu Allah nyang teusalen nibak kitab nyang aseuli nyang na geukeubah lé teungku-teungku imeum Lewi. 19 Kitab nyan harôh na sabe tô ngon raja nyan, dan siumu udeb geuhnyan harôh geubeuet sabe kitab nyan mangat gobnyan geumeurunoe keuhai pakriban cara teuhoreumat TUHAN Allah gobnyan dan deungon seutia teuma taát sabe peurintah nyang na teutuléh didalam kitab nyan. 20 Meunyoe kitab nyan geubeuet lé raja deungon peunoh horeumat lé droe geuhnyan, gobnyan geutée droe dan hana geu anggab droe geuh leubeh gét nibak ureuëng-ureuëng nyang saboh bansa deungon gobnyan, dan hana teuma geuiengkeue peurintah TUHAN bahpi pakriban mantong. Laju gobnyan dan keuturonan gobnyan teuma geupeurintah u ateueh bansa geuhnyan sampoe ubak treun meutreun ubak aneuëk cucoe gobnyan."

Kitab Teu-Ulang 18

1 "Banmandum nibak sukée Lewi ka geupeuteuntée bahwa awaknyan geubri tugaih lé TUHAN sibagoe imeum, sabab nyan di sukée Lewinyan hana jeuet jiteurimong jeumba tanoh di Israel. Awaknyan harôh kheueh udeb nibak peuseumahan-peuseumahan atawa keureubeuen nyang laén nyang teubri ubak TUHAN. 2 Awaknyan hana jeuet na tanoh lagée sukée-sukée nyang laén, sabab TUHAN kheueh jeumba warésan awaknyan, lagée nyang ka geupeujanji lé TUHAN keu awaknyan. 3 Meunyoe na sidroe ureuëng ji peuseumah keureubeuen leumô atawa bubiri, teuma pha keue, reuheueng dan pruet beulatang peulara nyan harôh jijok ubak imeum-imeum sibagoe jeumba awaknyan. 4 Hase nyang phon teupot nibak boh gandom, ié anggô, minyéuk zaiton dan bulée bubiri, atranyan na kheueh jeumba awaknyan. 5 Nibak banmandum sukée Israel, TUHAN Po teu Allah gata ka geupiléh sukée Lewi jeuet keu imeum keu siumu masa. 6 Meunyoe na ureuëng Lewi nyang meu asai nibak banda dipat mantong di Israel jijak u teumpat nyang ka geupiléh lé TUHAN dan jitem tinggai disinan, 7 gobnyan jeuet jipeutimang TUHAN Po teu Allah sibagoe imeum lagée ureuëng-ureuëng Lewi nyang laén nyang na meutugaih di teumpat nyan. 8 Lé jihnyan harôh jiteurimong peunajoh nyang sadub le jih lagée imeum-imeum nyang laén; peue nyang jiteurimong nibak keuluwarga jihnyan, meunan cit nyan keu gobnyan." 9 "Meunyoe singoh teuma ka gata tamong u dalam nanggroe nyang ka geubri lé TUHAN Po teu Allah gata nyan keu gata, bék kheueh gata seutôt buet-buet nyang jeuhet nyang jipeubuet lé bansa-bansa nyang na disinan. 10 Lamkawan gata bék kheueh na nyang jipeuseumah aneuëk-aneuëk jih sibagoe keureubeuen nyang teutot. Dan Meunan cit bék kheueh na meusidroepi nyang na jeuet keu tukang tanueng, jijak mita tanda-tanda, jingui iéleumé meurajah meunan cit ngon 11 iéleumé sihe, atawa jipeuna hubongan ngon areuwah-areuwah ureuëng maté. 12 Ureuëng nyang jipeubuet buet nyang jeuhet nyan that-that geubanci lé TUHAN Po teu Allah gata, dan nyang kheueh sabab jih bansa-bansa nyan geukireueh dikeue gata. 13 Lé sababnyan, bah kheueh gata tameungabdi ubak TUHAN Po teu Allah gata mantong deungon sipeunoh até gata." 14 Óh lheueh nyan Nabi Musa geupeugah, "Bansa-bansa di nanggroe nyang teuma gata tinggai teutab nyan awaknyan buet jih galak jipeucaya ubak tukang tanueng, dan jimita tanda-tanda. Teuma TUHAN Po teu Allah gata hana geugalak buet nyang lagéenyan. 15 Sikeubiet jih lam bansa geutanyoe keudroe TUHAN geu kirém keu gata sidroe nabi nyang lagée ulôn nyoe, dan gata harôh kheueh gata taát ubak nabi nyang teuma geu kirém nyan. 16 Bak uroe gata tameusapat di Gunong Sinai, gata lakée laju mangat gata bék le tadeungoe TUHAN Po teu Allah gata geumeu tutoe dan meunan cit bék le teuma gata kalon Gobnyan teuka didalam apui nyang hu meutaga, sabab gata takot keu maté. 17 Lé sababnyan TUHAN geupeugah ubak ulôn, 'Peue nyang jilakée lé awaknyan na kheueh bijaksana. 18 Nibak bansa awaknyan keudroe Ulôn teuma Lôn kirém sidroe nabi nyang lagée gata. Ulôn teuma Lôn peugah bak jihnyan peue nyang harôh jipeugah, laju jihnyan jipeusampoe ubak bansa nyan ateueh peue mantong nyang Ulôn peurintah. 19 Nabi nyan teuma jimeututoe ateueh nan Ulôn, dan Ulôn teuma Lôn huköm soe mantong nyang hana jitem deungoe nabi nyan. 20 Teuma meunyoe sidroe nabi jijeuet jipeusampoe saboh peuneusan ateueh nan Ulôn padahai Ulôn hana Lôn yue jihnyan jipeubeut nyang lagéenyan, jihnyan bah kheueh maté; meunan cit teuma tieb-tieb nabi nyang jipeugah haba ateueh nan ilah-ilah laén harôh maté.' 21 Mungken gata tateumanyong di dalam até, 'Pakriban kamoe teupeu peu kheueh peusan sidroe nabi nyan meu asai nibak TUHAN atawa hana?' 22 Meunyoe sidroe nabi geupeugah haba ateueh nan TUHAN, teuma peue nyang jipeugah nyan hántom na teujadi, teuma peue nyang jiramai nyan bukon asai jih nibak TUHAN. Nabi nyang lagéenyan jipeugah haba ateueh nan jih keudroe dan gata hanapeu gata takot ubak nabi nyan."

Kitab Teu-Ulang 19

1 "Óh ka seuleusoe bansa-bansa nyan geupeubinasa lé TUHAN Po teu Allah gata dan nanggroe nyan geubri teuma keu gata, dan óh ka lheueh gatacok banda-banda dan rumoh-rumoh awaknyan dan gata tinggai teutab disinan, 2 wilayah nyan harôh gata bagi jeuet keu lhée boh bagi, maséng-maséng na kheueh saboh banda teumpat ureuëng jijak lakée suaka nyang bagaih ngon mudah trok keunan lé ureuëng nyang ka jipoh gob sampoe maté. 4 Meunyoe na sidroe ureuëng nyang deungon hana jisaja ka jipoh maté ureuëng laén nyang bukon musoh jih, ureuëng nyan jeuet jipeuplueng droe ubak salah saboh nibak banda nyan dan jeuet awaknyan tinggai ngon udeb disinan. 5 Miseu jih na dua droe ureuëng meusigo-sigo jijak tamong u dalam uteuen keu jijak teubang kayée. Teuma sidroe nibak ureuëng nyan jikoh laju bak kayée, hana teusaja ulée pato ureuëng koh kayée nyan lheueh nibak goejih dan pato nyang lheueh nyan laju keunong ateueh rakan jih nyan dan ureuëng nyang keunong nyan laju maté. Teuma ureuëng nyang ka jipoh deungon hana jisajanyan hana meusalah dan jeuet jiplueng ubak saboh nibak lhée boh bandanyan mangat jih nyan seulamat. Teuma meunyoe na saboh banda teumpat meulindong sagai, nyang mungken jiôh jih ubak banda nyan jiôh that, dan anggota keuluwarga nyang meu tanggong jaweueb keu jijak tuengbila keuhai maté syedara jih nyan hase jitiyueb ureuëng nyan dan sabab beungéh jih nyan laju jipoh teuma ureuëng nyang hana meusalah nyan. 7 Lé sababnyan ulôn peurintah ubak gata taseudia lhée boh banda teumpat meulindong. 8 Meunyoe TUHAN Po teu Allah gata ka geupeuluwah wilayah gata lagée nyang ka geupeujanji ubak indatu gata, dan banmandum nanggroe nyan ka geubri keu gata, 9 gata harôh kheueh tapiléh lhée boh teuk banda meulindong teumpat ureuëng nyang meurasa meusalah jijak musom. (Nanggroenyan teuma geubri keugata meunyoe gata tapeubuet banmandum nyang ulôn peurintah ubak gata nibak uroe nyoe, dan meunyoe gata tacinta ngon tagaséh ubak TUHAN Allah gata dan gata udeb lagée nyang ka geupeurunoe nyan.) 10 Tapeubuet kheueh nyan mangat gata hana meudesya sabab gata peubiyeu ureuëng nyang hana meusalah jijak poh di nanggroe nyang ka geubri lé TUHAN Po teu Allah gata keugata." 11 "Teuma laén haijih meunyoe sidroe ureuëng jijak linteueng musoh gata dan ngon jisaja lom na rasa banci jih laju jijak poh maté ureuëng nyan, óh lheueh nyan ureuëng nyan laju jijak plueng ubak salah saboh nibak banda meulindong keu jijak mita peulindongan. 12 Lam hai nyang lagéenyan di ureuëng peumimpén bandanyan harôh jijak hôi ureuëng nyan dan jijok laju ubak anggota keuluwarga nyang meutanggong jaweueb mangat jijak balaih syedara jih nyang ka jipoh maté nyan, mangat jihnyanpi hase teupoh maté. 13 Bék kheueh na rasa weueh ngon teusayang keu ureuëng nyang lagéenyan. Gata peubeubaih kheueh Israel nibak hai nyang seumeupoh nyan, mangat gata mubahgia ngon seujahtra." 14 "Meunyoe gata katrok ubak nanggroe nyang geubri lé TUHAN Po teu Allah gata keu gata, bék kheueh gata géesée bataih tanoh waréh kawöm gata nyang ka teupeuteuntée yoh jamén ilée." 15 "Meunyoe sidroe mantong nyang jeuet keusaksi hana seb keu teukheun sidroe ureuëng nyang teutudohnyan meusalah; sikureueng-kureueng jih dua droe saksi teupeureulée keuhai nyang lagéenyan bagoe. 16 Meunyoe na sidroe ureuëng jikeuneuk peurhot ureuëng nyang laén deungon jitudoh nyang peuleusu nibak kantô mahkamah, teuma 17 bandua ureuëng nyan harôh jijak ubak teumpat iébadat nyang ka geupeuteuntée lé TUHAN mangat geupeu huköm lé imeum-imeum dan hakém nyang teungoh meutugaih. 18 Di teungku hakém nyan harôh geuseulidek peukaranyan deungon teuliti, dan meunyoe teunyata ureuëng nyan ka jipiteunah seusabe keudroe jih ureuëng Israel, 19 ureuëng nyan harôh jipeujak ile huköm nyang ka teupeu meukeusut keu lawan jih nyan. Deungon na lagéenyan gata ka gata beurantaih buet nyang jeuhet nyan. 20 Banmandum ureuëng jideungoe keuhai nyan dan deungon lagéenyan ka jeuet jitakot, dan sampoe hanale nyang jijeuet peubuet-buet nyang jeuhetnyan. 21 Bék kheueh na rasa gaséh lam até gata keuhai buet-buet nyang lagéenyan bagoe. Huköm jih na kheueh lagéenyoe: Nyawöng gantoe jih nyawöng, mata gantoe jih mata, gigo gantoe jih gigo, jaroe gantoe jaroe dan gaki gantoe gaki."

Kitab Teu-Ulang 20

1 "Meunyoe gata tajak muprang gata lawan bube na musoh-musoh gata, bék teumakot watée gata kalon geuritan prang meunan cit deungon guda-guda awaknyan nyang le dan tantra awaknyan nyang jai leubeh nibak jeumeulah gata. TUHAN Po teu Allah gata nyang peubeubaih gata nibak nanggroe Meusé, meunan cit Gobnyan teuma geutulông gata. 2 Sigohlom gata peuphon muprang, sidroe nibak imeum harôh kheueh jimaju sira jipeugah haba ubak gata lagéenyoe, 3 'Syedara-syedara, gata deungoe kheueh nyoe! Nibak uroenyoe gata tamaju u mideuen prang. Bék kheueh gata takot atawa cut até peuteuk lom gata bingong. 4 TUHAN Po teu Allah gata teuma geuseutôt sira geujak tulông gata, dan Gobnyan teuma geupeumeunang gata.' 5 Óh lheueh nyan dipeurwira harôh kheueh jijak peugah tutoe haba nyoe ubak gata, 'Peue na lamkawan gata ureuëng nyang ban mantong jipeugét rumoh, teuma gohlom na jipeugét khanuri keuhai teureuseumi rumohnyan? Meunyoe nyan na, jihnyan ka jeuet jijakwoe. Sabab meunyoe jih nyan rhoh teupoh maté lam mideuen prang, ureuëng laén nyang teuma jitinggai didalam rumoh nyan. 6 Peu kheueh na lamkawan gata ureuëng nyang banmantong jijak pula bak anggô di dalam lampôh jih? Meunyoe na, jih nyan ka jeuet jijakwoe. Sabab meunyoe jihnyan sampoe maté didalam mideuen prang, ureuëng laén nyang rasa ié anggô jih nyan. 7 Lom teuma peu kheueh na lamkawan gata ureuëng nyang meutunangan laju na napeusu jimeukawen? Meunyoe na, jih nyan ka jeuet jijakwoe. Sabab meunyoe jihnyan teupoh maté didalam prang, ureuëng laén teuma jimeukawen ngon tunangan jih nyan.' 8 Meunan cit di lé peurwira harôh kheueh jipeugah lagéenyoe ubak gata, 'Peu kheueh na lamkawan gata ureuëng nyang gugob ngon teumakot? Meunyoe nyan na, jih nyan jeuet jijakwoe, mangat jihnyan hana jipeurhot seumangat ureuëng laén.' 9 Óh ka lheueh peurwiranyan jipeugah haba ubak tantra, harôh teuma jitunyok peumimpén-peumimpén keu tieb-tieb keusatuan. 10 Meunyoe gata tajak keu gatajak prang saboh-saboh banda, gatajok kheueh ilée watée nyang reunggang ubak banmandum peunduduek disinan mangat jiseurah droe. 11 Meunyoe awaknyan jijak buka pintoe-pintoe geureubang dan jiseurah droe, awaknyan banmandum harôh kheueh beujeuet keu namiet gata dan jijak peubuet keureuja paksa keu gata. 12 Teuma meunyoe peunduduek bandanyan hana jitem seurah droe jih dan leubeh galak jimuprang, dan gata harôh kheueh tajak keupông bandanyan. 13 Óh lheueh nyan, meunyoe TUHAN Po teu Allah gata, geupeumungken gata tajak reubot bandanyan, gata harôh kheueh tapoh maté banmandum peunduduek nyang na disinan khusos jih nyang agam mantong. 14 Teuma gata jeuet tacok bubena kawöm ureuëng inong, aneuëk-aneuëk manyak, meunan cit ngon beulatang peulara dan peue mantong nyang na di bandanyan. Banmandum hareuta beunda atra musoh-musoh gata nyan jeuet gata ngui. TUHAN Po teu Allah gata teuma geujok nyan keu gata. 15 Meunan kheueh nyang harôh gata peubuet ateueh banda-banda nyang jiôh nibak nanggroe teumpat tinggai gata. 16 Teuma meunyoe banda nyan na didalam wilayah nyang ka geubri lé TUHAN Po teu Allah gata keu gata, banmandum peunduduek nyang na disinan harôh kheueh teupoh maté. 17 Lagée nyang ka geupeurintah lé TUHAN Po teu Allah, gata harôh kheueh gata peubinasa bubena ureuëng-ureuëng Het, Amori, Kanaan, Feris, Hewi, dan Yebus. 18 Gatapoh maté kheueh awaknyan mangat awaknyan hana meudesya ubak TUHAN Po teu Allah gata deungon cara jipeurunoe gata buet-buet nyang keubit luwat keu ilah-ilah awaknyan. 19 Meunyoe gata tajak muprang bak saboh banda dan banda nyan gata keupông lam watée nyang katreb that, bék kheueh gatakoh bak-bak kayée nyang muboh nyang na disinan. Gata pajoh kheueh bubena boh-boh kayéenyan, teuma bék kheueh gata peurusak bak-bak kayée jihnyan sabab bak-bak kayéenyan bukon kheueh musoh gata. 20 Bak-bak kayée nyang laén jeuet gata koh keu teupeugét keu pageue teukeupông sampoe banda-bandanyan rhot keu gata."

Kitab Teu-Ulang 21

1 "Meunyoe na di nanggroe nyang geubri lé TUHAN Po teu Allah gata keu gata na meurumpok ureuëng maté keunong poh didalam lampôh dan hana teuma teutuso so ureuëng nyang poh nyan, 2 teuma peumimpén dan hakém gata harôh jijak ukoe jarak nibak teumpat manyét nyang meuteuményan u tieb-tieb banda nyang tô-tô deungon nyan. 3 Teuma lé ureuëng patot-patot nyang paleng tô harôh geupiléh saboh leumô nyang mantong muda nyang hántom lom teupeuguna nibak meukeureuja. 4 Leumô nyan harôh kheueh awaknyan ba ubak saboh teumpat tô ngon krueng nyang hántom peureunah tho dan tanoh nyang hántom na teumeu-úe atawa teupula peue mantong di ateueh tanoh nyan. Disinan awaknyan harôh jiwiet takue beulatang nyan. 5 Meunan cit deungon imeum ureuëng Lewi harôh kheueh geujak cit keunan, sabab awaknyan harôh jijok peuputôh nibak tieb-tieb peukara deungon buet keukeurasan. Awaknyan geupiléh lé TUHAN Po teu Allah gata keu jimeungabdi ubak Gobnyan dan teupeugah syukoe ngon beureukat ateueh nan Gobnyan. 6 Teuma lé banmandum ureuëng patot-patot nibak banda nyang paleng tô harôh jirhah jaroe jih diateueh leumô nyan 7 dan jipeugah teuma, 'Bukon kamoe nyang poh maté ureuëng nyan, dan kamoe hana kamoe teupeu so nyang poh sampoe maté ureuëng nyan. 8 TUHAN, neupeu amphon kheueh ureuëng Israel umat Droeneueh nyang ka neupeubeubaih nibak nanggroe Meusé. Neupeu amphon kheueh kamoe dan bék kheueh neu anggab kamoe meutanggong jaweueb ateueh teupoh maté ureuëng nyang hana meusalah.' 9 Teuma deungon teupeubuet peue nyang geulakée lé TUHAN, gata hana geu anggab meutanggong jaweueb ateueh keu maté ureuëng nyang keunong poh nyan." 10 "Meunyoe gata tajak muprang dan TUHAN Po teu Allah gata geupeumeunang gata dimideuen prang nyan, laju gata tacok ureuëng nyang jeuet keu tawanan prang, 11 mungken lamkawan awaknyan na sidroe ureuëng inong nyang lumpah lagak nyang gata galak dan na niet keuneuk cok keu peurumoh gata. 12 Gataba kheueh ureuëng inongnyan u rumoh gata. Di rumoh gata inong nyan harôh kheueh jigunteng ôk jih nyang di ateueh ulée nyan, meunan cit jikoh teuma gukée droeji, 13 dan jigantoe peukayan. Dan ureuëng nyan harôh kheueh tinggai di rumoh gata dan jimeukabong ateueh maté ureuëng syiek jih nyan nyang trebji si buleuen peunoh. Óh ka lheueh nyan barô kheueh gata ka jeuet tameukawen ngon ureuëng nyan. 14 Teuma óh watée katreb di gata hana tagalak le keu ureuëng inong nyang ka jeuet keu binoe gata nyan, gata jeuet tayue ureuëng inong nyan jijak deungon beubaih. Jihnyan hana jeuet gata peubuet sibagoe namiet atawa gata peubloe, sabab jihnyan ka gata paksa jimeusituboh deungon gata." 15 "Miseu jih na sidroe ureuëng jimeukawen dua droe, dan ban dua droe binoe jih nyan jipeulahé aneuëk-aneuëk agam, teuma aneuëk nyang lahé leubeh ilée bukon kheueh aneuëk nibak peurumoh nyang paleng jigaséh. 16 Meunyoe ureuëng nyan jikeuneuk peuteuntée pakriban cara jih nyan jipeuweuek hareuta keukayaan jih nyan keu aneuëk-aneuëk jih nyan, ureuëng nyan hana jeuet jimeudong ubak aneuëk nyang jipeulahé lé inong nyang paleng jigaséh deungon cara jijok keu aneuëk nyan jeuet keu hak aneuëk tuha. 17 Lé ureuëng nyan harôh jibri jeumba duagoe lipat nibak hareuta beunda jihnyan keu aneuëk agam jih nyang tuha, bahpi aneuëk nyan bukon aneuëk nibak peurumoh jih nyang paleng ji gaséh. Hak aneuëk tuha harôh kheueh jiaku lé bapak jih nyan, dan keu aneuëk nyan harôh kheueh teujok hareuta warésan nyang jeuet keu hak jih meunurot huköm." 18 "Miseu jih na sidroe aneuëk agam nyang paleng kreueh ulée, galak that ubak buet beurontak dan hana jitem seutôt peue nyang jikheun lé ureuëng tuha jih bahpi jihnyan ka teuhuköm. 19 Lé ureuëng syiek jih harôh jiba aneuëk nyan ubak teungku peumuka banda di teumpat awaknyan tinggai dan jilakée laju mangat aneuëk jihnyan teupeusidang. 20 Lé ureuëng nyan harôh jipeugah ubak peumuka banda nyan, 'Aneuëk kamoe nyoe keubiet that kreueh ulée, galak that jibeurontak lom hana jitem taát ubak kamoe; aneuëknyoe galak that jipeuhabéh péng dan galak that nibak buet nyang mabök-mabök.' 21 Lé ureuëng agam nyang na di bandanyan jijak rhom aneuëknyan ngon aneuk batée sampoe án maté. Deungon na lagéenyan gata ka gata beurantaih buet nyang jeuhet nyan. Banmandum ureuëng Israel teuma jideungoe keuhai nyan dan deungon na nyang lagéenyan ureuëng Israel nyan jeuet keuteumakot." 22 "Meunyoe sidroe ureuëng ka teuhuköm maté sabab sapeue-sapeue buet nyang jeuhet nyang ka jipeubuet, dan manyét ureuëng nyan teugantung laju ubak taméh, 23 manyét nyan hana jeuet teupeubiyeu disinan simalam suntok, teuma harôh teujak peukubu nibak uroenyan cit teuma. Manyét nyang teugantung nibak taméh nyan teupeuteuka kutok Po teu Allah u ateueh nanggroe. Lé sababnyan, tajak kubu kheueh laju manyét nyan mangat digata hana tapeu kuto nanggroe nyang geubri lé TUHAN Allah gata keu gata.

Kitab Teu-Ulang 22

1 Meunyoe leumô atawa bubiri atra ureuëng saboh bansa ngon gata ka sisat dan gata na deuh gata kalon beulatang nyan, bék kheueh gata pura-pura hana tateupeue, teuma taba kheueh beulatang nyan gatapeuwoe ubak ureuëng po jih. 2 Meunyoe ureuëng po beulatang nyan rumoh jih jiôh, atawa gata hana tatuso sopo beulatang nyan, tapeuwoe kheueh beulatang nyan u rumoh gata. Meunyoe ureuëng po beulatang nyan jijak mita beulatang jih nyang gadôh nyan, gatajok kheueh laju ubak ureuëng po beulatang nyan. 3 Meunan cit gata peubuet kheueh lagéenyan cit teuma meunyoe gata neuteumé ngon saboh keuleudée, siôn peukayan, atawa peue mantong atra milék bansa gata nyan. 4 Meunyoe na saboh keuleudée atawa saboh leumô atra ureuëng nyang saboh bansa deungon gata reubah di ateueh jalan, bék kheueh gata pura-pura hana tateupeue, teuma tatulông kheueh beulatangnyan gata peubeudôh lom teuma. 5 Di ureuëng inong hana jeuet jisôk peukayan lagée ureuëng agam dan meunan cit teuma di ureuëng agam hana teuma jeuet jisôk peukayan lagée ureuëng inong, sabab ureuëng nyang peubuet nyang lagéenyan that-that geubanci lé TUHAN Po teu Allah gata. 6 Meunyoe gata na leumah takalon saboh uempung cicém di ateueh bak kayée atawa di ateueh tanoh teuma nang cicém nyan teungoh jikarom boh jihnyan atawa meusajan ngon aneuëk-aneuëk jihnyan, bék kheueh gatacok nang cicém nyan. 7 Gata jeuet tacok aneuëk-aneuëk cicém nyan, teuma bah kheueh nang cicém nyan jipo ho nyang galak droe jih, mangat gata panyang umu dan udeb gatapi makmu. 8 Meunyoe gata tapeugét saboh rumoh, rumoh nyan harôh gata pageue bansilingka binéh bubong rumoh nyan. Teuma gata hana meutanggong jaweueb meunyoe ureuëng maté akibat rhot di ateueh bubong rumoh nyan. 9 Bék kheueh gata pula seunaman nyang laén nibak ban sikeulileng lampôh anggô gata seulaén bak anggô mantong. Meunyoe atranyan gata pula cit teuma, gata hana tacok hase nibak lampôh nyan, bah kheueh nyan nibak boh anggô, meunan cit nibak sinaman nyang laén teuma. 10 Bék kheueh gata pasang saboh leumô ngon saboh keuleudée nibak saboh langai. 11 Bék kheueh gatangui peukayan nyang teupeugét nibak wol dan lineun nibak saboh teumpat teumpeun ija. 12 Gata peugét kheueh rumbai-rumbai nibak ban peuet boh ujong peukayan gata." 13 "Miseu jih na sidroe ureuëng agam jimeukawen deungon sidroe aneuëk dara, dan watée hana jitemle ngon aneuëk inong nyan. 14 Jihnyan ka jipeugét tudohan nyang peuleusu ngon jipeugah bahwa peurumoh jih nyan ka hanale peurawan bak watée jimeukawen ilée. 15 Lam hai nyan di ureuëng syiek ureuëng inong nyan harôh kheueh jijak cok ija dara barô nyang na mantong incik darah, nyang jeuet keubukeuti bahwa aneuëk jihnyan bak watéenyan mantong na peurawan jih. Ija nyan harôh kheueh jitunyok ubak dumna teungku pemuka banda nibak kantô mahkamah. 16 Ureuëng syiek di aneuëk dara nyan harôh kheueh jipeugah ubak awaknyan, 'Ulôn ka lôn seurah aneuëk ulôn keu ureuëng nyoe jeuet keupeurumoh jih, teuma jinoenyoe jihnyan ka hana jitueng le. 17 Ka jitudoh nyang peuleusu deungon cara jipeugah bahwa peurumoh jihnyan ka hanale peurawan bak watée awaknyan jimeukawen. Teuma nyoe bukeuti jih bahwa aneuëk ulôn nibak watéenyan mantong na peurawan jih. Neupeurati kheueh incik darah nyang mantong meuleukek nibak ija peunganten jih nyoe!' 18 Teuma di ureuëng peumuka banda harôh kheueh geuhôi ureuëng agam nyan dan laju geuseupôt ureuëng nyan. 19 Meunan cit awaknyan harôh teuma geudeunda ngon sireutôh péng pirak dan geuseurah péng nyan ubak tuwan jih nyan, sabab jihnyan ka jipeurusak keuhoreumatan sidroe ureuëng inong Israel. Meunan cit di ureuëng inong nyan harôh kheueh teuma teutab jeuet keu peurumoh jih nyan, dan hana jeuet jitaleuek siumu udeb jih. 20 Teuma meunyoe peue nyang jitudohnyan beutôi dan hana teuma bukeuti bahwa peurumoh jihnyan mantong na peurawan bak watée awaknyan jimeukawen, 21 teuma ureuëng inong nyan harôh jijakba u babah pintoe rumoh ureuëng syiek jih. Di teumpatnyan bubena ureuëng-ureuëng agam nyang na di banda nyan harôh kheueh jijak rhom ngon aneuk batée ureuëng inong nyan sampoe án maté. Ureuëng inong nyan ka jipeubuet sapeue-sapeue nyang keubit that malée keu bansa geutanyoe sabab ka jimeumukah sigohlom jimeukawen dan yoh mantong jihnyan tinggai dirumoh ureuëng syiek jih. Deungon ka teuhuköm jihnyan sibagoe tanda gata ka gata beurantaih buet nyang jeuhet. 22 Meunyoe na sidroe ureuëng agam teudrob basah teungoh jimeumukah ngon peurumoh gob, bandua ureuëng nyan harôh teuhuköm maté. Deungon na gata peubuet nyang lagéenyan gata ka tabeurantaih buet nyang jeuhet nyan. 23 Miseu jih na didalam banda meuteumé sidroe ureuëng agam teungoh jimeumukah deungon sidroe aneuëk dara teuma aneuëk daranyan ka jimeutunangan ngon ureuëng laén. 24 Lam hainyan awaknyan harôh kheueh teuba u luwa banda dan teurhom laju ngon aneuk batée sampoe án maté. Aneuëk dara nyan harôh kheueh teupoh maté sabab jihnyan hana ji useuha jiklik jilakée tulông, seudangkan hainyan najih didalam banda, nibak teumpat nyan meunyoe jiklik jilakée tulông pasti su jihnyan teudeungoe ubak ureuëng laén. Dan meunan cit di ureuëng agam nyan harôh cit teupoh maté sabab jihnyan ka jimeumukah ngon ureuëng nyang ka jimeutunangan. Deungon teuhuköm bandua awaknyan, gata ka tabeurantaih buet nyang jeuhet. 25 Laén haijih meunyoe nyan najih dilampôh sidroe ureuëng agam jipeukosa sidroe aneuëk dara nyang ka jimeutunangan deungon ureuëng laén. Lam hainyan teuma ureuëng agam nyang harôh teuhuköm maté. 26 Aneuëk dara nyan hana jeuet teupeusakét sabab jihnyan hana jipeubuet sapeue nyang pantaih jihnyan teuhuköm maté. Peukaranyan lagée peukara sidroe ureuëng nyang jiseurang ureuëng laén dan jipoh maté teuma. 27 Teumpat peukosa nyan najih di lampôh, dan bahpi aneuëk dara nyan jiklik jilakée tulông, teuma hana ureuëng nyang teuka jijak tulông aneuëk daranyan. 28 Miseu jih na sidroe ureuëng agam teudrob basah teungoh jipeukosa sidroe aneuëk dara nyang gohlom jimeutunangan. 29 Lam hai nyan ureuëng agam nyan harôh jibayeue ubak ureuëng syiek aneuëk daranyan jeuname meukawen sidubyuem limong ploh péng pirak. Aneuëk daranyan harôh kheueh jeuet keu peurumoh jih sabab jihnyan ka jipaksa meumukah dan sipanyang udeb awaknyan hana jeuet ji meu cre. 30 Hana meusidroe pih jeuet jihina bapak jih ngon cara ji-éh meusajan atawa jipeubuet buet nyang teularang ngon sidroe nibak peurumoh bapak jih nyan."

Kitab Teu-Ulang 23

1 "Ureuëng nyang ka keunong gasi alat keulamin jih ureuëng nyang lagéenyan hana jeuetle teukheum sibagoe umat TUHAN. 2 Ureuëng nyang lahé hase buet mukah banmandum keuturonan jih troh ubak nyang keu siploh, ureuëng nyang lagéenyan hana jeuet keu umat TUHAN. 3 Ureuëng Amon dan Moab dan banmandum keuturonan awaknyan trok ubak nyang keu siploh hana jeuet keu umat TUHAN, 4 sabab awaknyan hana jitem bri keu gata peunajoh ngon ié jieb bak watée gata mantong tajak bak rot ueh watée gata teubiet nibak nanggroe Meusé. Bahkan awaknyan jipeu-upah si Bileam, aneuëk Beor nibak banda Petor di Mesopotamia, keu teukutôk gata. 5 Teuma TUHAN Po teu Allah gata hana geutem deungoe Bileam nyan. Sikeubiet jih teuma nyang teujadi Gobnyan geu ubah kutok nyan jeuet keubeureukat, sabab Gobnyan geugaséh keugata. 6 Seumantong gata udeb dan sampoe trok siumu masa, bék kheueh gata tulông bansa-bansa nyan atawa gata peujeuet awaknyan makmu. 7 Bék kheueh teuma gata pandang hina keu ureuëng Edom sabab awaknyan na kheueh syedara gata. Meunan cit bék kheueh teuma gata pandang miyueb ubak ureuëng Meusé, sabab gata treb tatinggai di nanggroe awaknyan. 8 Phon nibak keuturonan nyang keu lhée trok ubak nyang silanjut jih keuturonan awaknyan jeuet keu wareuga umat TUHAN." 9 "Bak watée gata teungoh tamuprang, gata harôh tapeusie ubak peue mantong nyang teupeujeuet gata rhot bak kuto atawa najih. 10 Meunyoe sidroe ureuëng ka jeuet keu kuto sabab jipeuteubiet iémani bak watée teungét ateueh teumpat éh, ureuëng nyan harôh jitinggai khimah-khimah dan jitinggai laju di luwa. 11 Óh katrok bak watée seupôt ureuëng nyan harôh jijak manoe dan bak watée mata uroe jilhob ureuëng nyan ka jeuet jigisa lom ubak khimah-khimah. 12 Gata harôh kheueh takeubah diluwa khimah teumpat boh ié cut atawa ié rayeuk. 13 Meunyoe keuneuk jak keunan gataba kheueh laju seulaén peuleungkapan gata meunan cit sikrak kayée keungon kueh uruek teumpat teu tôh ék dan meunan cit keu ngon seubée jih. 14 TUHAN Po teu Allah na sajan gata didalam khimah gata keu geujak lindong gata dan geubri keu gata meunang ateueh musoh-musoh gata. Teuma gatajaga kheueh mangat khimah-khimah gatanyan teutab gleh. Bék sampoe meuteumé sapeue-sapeue nyang hana beutôi lamkawan gata, mangat TUHAN hana geutinggai gata." 15 "Meunyoe na sidroe namiet jipeuplueng droe nibak teungku droe di teumpat jih meukeureuja laju jijak lakée peulindongan, bék kheueh gatayue woe jihnyan. 16 Jihnyan jeuet jitinggai saboh lam banda gata meunurot banda toh nyang jipiléh ngon ji galak, dan gata hana jeuet tapeusaneut ateueh jihnyan deungon cara gasa. 17 Sidroe ureuëng Israel, bah kheueh jihnyan ureuëng agam meunan cit ngon ureuëng inong, ureuëng nyan hana jeuet jipeujeuet droe jih keu ureuëng lunte nibak kuil-kuil teumpat seumujoe. 18 Meunan cit ngon péng nyang jiteumé nibak hase buet meulunte nyan hana jeuet jiba u Baét TUHAN Po teu Allah gata keu tajak peulheueh kaôi, sabab TUHAN Po teu Allah that-that geubanci ubak buet meulunte nyan nibak kuil-kuil teumpat seumujoe dan keu péng upah meulunte. 19 Meunyoe gata tapeu utang péng ubak ureuëng laén, gata jeuet gata lakée bungöng ateueh péng gata nyan. Teuma meunyoe gata tangui péng atawa peunajoh atawa barang nyang laén nibak ureuëng nyang saboh bansa deungon gata, nyang jingui nyan harôh kheueh teujok deungon hana talakée bungöng. Gata taát kheueh ubak peurintah nyan, teuma TUHAN Po teu Allah gata geubri beureukat peue-peue mantong nyang gata peubuet di nanggroe nyang gata tinggai. 21 Meunyoe gata tameujanji peue-peue mantong ubak TUHAN Po teu Allah gata, bék kheueh nyan gata preh-preh le keu gata peuteupat janjinyan, sabab TUHAN Po teu Allah gata teutab geulakée atra nyan, dan gata ka meudesya meunyoe hana tapeupeunoh hai nyan. 22 Gata hana meudesya meunyoe hana tapeugét janji ubak TUHAN. 23 Teuma meunyoe gata deungon ban galak droe tameujanji ubak TUHAN Po teu Allah gata, janji nyan digata wajéb gata peuteupat. 24 Meunyoe gata teungoh tajak-jak rot lampôh anggô ureuëng laén, gata jeuet tapajoh boh anggô siduble nyang gata meuheut, teuma hana jeuet gata peusapat lam raga. 25 Meunan cit meunyoe gata teungoh tajak-jak di dalam lampôh gandom ureuëng laén, gata jeuet gatapajoh gandom nyang gata pot ngon jaroe gata, teuma hana jeuet atranyan takoh deungon sadeueb."

Kitab Teu-Ulang 24

1 "Miseu jih na sidroe ureuëng agam jimeukawen deungon sidroe aneuëk dara, dan óh lheuehnyan hana jigalakle sabab jihnyan jiteumé sapeue-sapeue nyang jiba malée keudroe ureuëng nyan. Lé ureuëng agam nyan laju jijok surat taleuek keu ureuëng inong nyan meunan cit jiuse teuma beukaih binoeji nibak rumoh jihnyan. 2 Óh lheueh nyan di ureuëng inong nyan jimeukawen teuma deungon ureuëng agam nyang laén. 3 Teuma óh kalheueh na meupadub watée di ureuëng agam nyan hana teuma jigalakle keu inong nyan, laju jijok surat taleuek ubak ureuëng inongjih nyan dan jiuse teuma inong nyan. Atawa mungken cit lakoe jih nyang keudua nyanpi meuninggai. 4 Lam hai bandua ureuëng lakoe nyang phon hana jeuet jimeukawen ngon ureuëng inong nyan le; ureuëng nyan harôh kheueh jipandang keu beukaih inong jih nyan sibagoe ureuëng inong nyang ka jipeucupa. Meunyoe ureuëng agam nyan jimeukawen cit teuma, buet nyang lagéenyan na kheueh jipeuhina keu TUHAN Po teu Allah gata. Gata hana jeuet tapeubuet desya nyang jeuhet nyan di nanggroe nyang geubri lé TUHAN keu gata." 5 "Sidroe ureuëng agam nyang ban mantong jimeukawen hana jeuet teuyue tamong tantra dan jijak muprang atawa jipeubuet tugaih masyarakat nyang laén. Ureuëng nyan harôh teupeubeubaih tugaih nyang treb jih sithon mangat ji urôh rumoh tanggaji dan meunan cit jipeugalak até ureuëng binoe jihnyan. 6 Meunyoe gata talakée ngui sapeue-sapeue bak ureuëng laén, bék kheueh atranyan gatacok sibagoe jaminan batée nyang jingui lé ureuëng nyan keungon giléng gandom. Deungon teucok batée nyan, gata ka tareupah alat nyang jingui lé keuluwarga keu teusambong udeb. 7 Ureuëng nyang jiculék ureuëng nyang saboh bansa deungon jihnyan, laju jipeusaneut ureuëng nyan sibagoe namiet atawa jipeubloe, nyang lagéenyan harôh teuhuköm maté. Deungon lagéenyan gata ka tabeurantaih buet nyang jeuhet. 8 Meunyoe na meuteumé peunyakét kulét nyang keubiet mubahya, gata peubuet kheueh deungon teuliti peue nyang geupeurintah lé imeum-imeum Lewi ubak gata; gata seutôt kheueh peutunyok-peutunyok nyang ulôn bri nyoe keu awaknyan. 9 Gata ingat kheueh peue nyang geupeubuet lé TUHAN Po teu Allah gata ateueh Miryam watée gatajak tateubiet nibak nanggroe Meusé. 10 Meunyoe gata tapeungui sapeue-sapeue keu seusabe gata, bék kheueh gata tamong u dalam rumoh ureuëng nyan keu gata jakcok bajéejih nyang jipeujeuet sibagoe jaminan. 11 Gatapreh kheueh diluwa mantong dan bah kheueh ureuëng nyan keudroe jijakba nyan ukeue gata. 12 Meunyoe ureuëng nyan gasien, bajée nyan hana jeuet gatateun simalam beungoh, 13 teuma harôh gata peuriwang ubak ureuëng nyan tieb-tieb malam, mangat ureuëng nyan hase jisok bak watée jijak éh. Teuma jihnyan jilakée teurimong gaséh dan TUHAN Allah gata teuma geugalak keu gata. 14 Bék gata prah ureuëng nyang tung upah nyang gasien lom teuma hana sapeuena, bah kheuehnyan ureuëng nyang saboh bansa deungon gata, meunan cit keu ureuëng aséng nyang na tinggai nibak saboh banda peulindong gata. 15 Tieb-tieb uroe sigohlom mata uroe jilhob gata harôh tabayeue upah jih nyang jikeureuja nibak uroe nyan; jihnyan jimeuharab péng nyan sabab keubit that jimeuharab atranyan. Meunyoe gata hana tabayeue upah jihnyan, ureuëng nyan teuma jimeudoá sira jimeulakée ubak TUHAN mangat Gobnyan geutulông gata, dan gata geupeugah ka meudesya. 16 Bék tahuköm maté ureuëng tuha sabab buet nyang jeuhet nyang jipeubuet lé aneuëk jihnyan, dan bék tahuköm maté aneuëkjih kareuna buet nyang jeuhet nyang jipeubuet lé ureuëng syiek jih. Tieb-tieb ureuëng teuma jeuet teuhuköm maté sabab buet nyang jeuhet nyang jipeubuet keudroe. 17 Bék kheueh tareupah hak ureuëng aséng dan aneuëk yatem ngon meuntui, dan bék teuma gatacok peukayan ureuëng inong balée sibagoe jaminan. 18 Gata ingat kheueh bahwa gata ka lheueh jeuet keu namiet watée di nanggroe Meusé dan geupeubeubaih lé TUHAN Po teu Allah gata; nyang kheueh sabab jih ulôn bri peungajaran nyoe keu gata. 19 Meunyoe gata tapeusapat wasé tanoh gata, bék kheueh gata gisa keu gata jakcok beureukah gandom nyang mantong na tinggai. Gandom nyan bah kheueh teupeubiyeu keu ureuëng aséng, aneuëk yatem ngon meuntui dan inong balée, mangat gata geubri beureukat lé TUHAN Po teu Allah gata dan banmandum nyang gata useuha. 20 Óh ka seuleusoe sigoe gata pot boh zaiton dan meunan cit ngon boh anggô gata, bék kheueh gata riwang lom keu gatajak peusapat boh-boh nyang mantong na tinggai. Nyang tinggai nyan harôh gata peubiyeu mantong keu ureuëng aséng, aneuëk yatem ngon meuntui dan ureuëng inong balée. 22 Gata ingat kheueh bahwa gata kalheueh jeuet keu namiet di nanggroe Meusé; nyang kheueh sabab jih ulôn bri peuratoran nyoe keu gata.

Kitab Teu-Ulang 25

1 Miseujih na dua droe ureuëng Israel jijak ubak kantô mahkamah keujijak gadu sapeue peukara, lé nyang sidroe jipeugah hana meusalah, dan nyang laén meusalah. 2 Meunyoe nyang meusalah teupeurhot ubak huköm seunuet, di teungku hakém geuyue laju ureuëng nyan meudugom. Jeumeulah na padubgo teuseunuet teugantung nibak buet nyang jeuhet nyang ka jipeubuet, 3 teuma hana jeuet leubeh nibak peuet ploh goe. Meunyoe leubeh, beuareuti ureuëng nyan ka jihina dikeue ureuëng ramé. 4 Bék kheueh peugaceb babah leumô nyang teungoh jimomoh gandom." 5 "Meunyoe ureuëng-ureuëng nyang meusyedara tinggai jih meusapat, laju sidroe nibak ureuëng nyan maté dan hana teuma jitinggai aneuëk agam, teuma balée jihnyan hana jeuet jimeukawen ngon ureuëng laén diluwa keuluwarga meureuhom lakoe jihnyan. Syedara meureuhom nyan wajéb jimeukawen ngon balée nyan. 6 Aneuëk agam tuha awaknyan harôh kheueh teuanggab aneuëk syedara nyang matényan, mangat jihnyan na keuturonan lamkawan bansa Israel. 7 Meunyoe ureuëng agam nyan hana jitem meukawen ngon peurumoh meureuhom syedara jihnyan, ureuëng inong nyan harôh jijak meuhadab ubak peumuka banda sira jipeugah lagéenyoe, 'Parui ulôn hana jitem peubuet keuwajébanjih keu jibri keu syedara jih sidroe keuturonan lamkawan bansa Israel.' 8 Laju lé peumuka banda harôh geuhôi ureuëng nyan dan geupeugah bak ureuëng nyan. Meunyoe ureuëng nyan teutab cit jitulak, 9 peurumoh meureuhom lakoe jih nyan harôh jijak peuto ubak jihnyan dikeue dumna peumuka banda, jisuet seulob ureuëng nyan, jiludah laju muka jihnyan dan jipeugah teuma lagéenyoe, 'Lagéenyoe kheueh nyang harôh teupeubuet ateueh ureuëng nyang hana jitem bri keuturonan keu syedara jih.' 10 Keuluwarga ureuëng nyan teuma jituri di Israel sibagoe 'Keuluwarga ureuëng nyang teusuet seulob jih.' " 11 "Meunyoe na dua droe ureuëng agam jimeulo, dan peurumoh nyang sidroe jiuseuha jitulông lakoe droe jih deungon cara jiramah ngon jipiret boh kréeh lawan lakoe jihnyan, 12 gatakoh kheueh jaroe ureuëng inong nyan dan bék kheueh tagaséh keu ureuëng nyang lagéenyan. 13 Bék gata peungéut ureuëng laén ngon cara gatangui ceng dan sinukat nyang hana beutôi. 15 Gatangui kheueh céng dan sinukat nyang paih mangat gata panyang umu di nanggroe nyang geubri lé TUHAN Po teu Allah keu gata. 16 TUHAN Po teu Allah gata that-that geubanci keu ureuëng nyang galak jipeungéut ureuëng laén." 17 "Gata ingat kheueh pakriban ureuëng Amalek jipeusaneut gata bak watée gata mantong gatajak dan tateubiet nibak nanggroe Meusé. 18 Awaknyan hana jitakot ubak Po teu Allah dan jiseurang gata rot likot bak watée gata mantong that-that hek meunan cit ka habéh teunaga, laju jipoh maté banmandum ureuëng-ureuëng gata nyang deungon susah payah jijak nibak rot likot. 19 Lé sabab nyan, meunyoe TUHAN Po teu Allah gata ka geubri nanggroe nyan keugata dan gata aman nibak banmandum musoh nyang na tinggai bansikeulileng gata, banmandum ureuëng Amaleknyan harôh gata poh maté sampoe awaknyan hana ji ingatle. Bék kheueh tuwoe!"

Kitab Teu-Ulang 26

1 "Meunyoe gata ka tatamong u nanggroe nyang geubri lé TUHAN Po teu Allah gata keu gata dan ka teuma gata tinggai teutab disinan, 2 teuma hase nyang phon tateumé nibak nyang gata peusapat nibak tanoh gata harôh gata peutamong u dalam saboh eumpang, dan atranyan taba laju u teumpat nyang geupiléh lé TUHAN Po teu Allah gata. 3 Gatajak kheueh laju ubak imeum nyang meutugaih nibak watéenyan dan tapeugah laju ubak gobnyan, 'Ulôn peugah ubak TUHAN Po teu Allah gata bahwa ulôn ka lôn tamong u nanggroe nyang geupeujanji bak indatu geutanyoe mangat geubri atranyan keu geutanyoe.' 4 Lé imeum teuma geuteurimong eumpang nyan nibak jaroe gata dan atranyan laju geupeuduek dikeue miseubah TUHAN Allah gata. 5 Óh lheuehnyan dikeue TUHAN Allah gata, gata tapeugah laju haba lagéenyoe: 'Ya TUHAN, indatu ulôn na kheueh sidroe ureuëng Aram nyang meugeumbara. Ureuëng nyan jiba keuluwarga jih u nanggroe Meusé mangat jitinggai disinan sibagoe ureuëng nyang meungunsi. Bak watée jijak keudeh jeumeulah awaknyan cit bacut sagai, teuma awaknyan jeuet keu bansa nyang raya dan teuga. 6 Ureuëng Meusé jipeusaneut kamoe deungon keubit keujam dan jipaksa kamoe meukeureuja sibagoe namiet. 7 Laju kamoe meuhôi sira kamoe lakée tulông ubak Droeneueh, TUHAN, Allah indatu kamoe. Droeneueh neudeungoe peue nyang kamoe lakéenyoe dan deuh neukalon deurita kamoe, apoh apah dan meunan cit deungon keuseungsaraan kamoe. 8 Deungon kuasa dan teunaga nyang raya Droeneueh ka neupeubeubaih kamoe lam nanggroe Meusé. Droeneueh neupeuna mujizat-mujizat dan buet-buet nyang ajaéb meunan cit neupeutreun keujadian-keujadian nyang jiteuka teumakot bubena musoh. 9 Óh lheueh nyan Droeneueh laju neuba kamoe keunoe dan laju neubri tanoh nyang kaya lom ngon subô nyoe keu kamoe. 10 Sabab nyan, ya TUHAN, ulôn peuseumah disinoe hase nyang phon ulôn cok nibak tanoh nyang Droeneueh bri keu ulôn.' Lheuehnyan takeubah laju eumpang nyan dikeue TUHAN Po teu Allah gata, dan gata seumah kheueh Gobnyan. 11 Gata meusyukoe kheueh keu banmandum rejeuki nyang ka geubri lé TUHAN Po teu Allah gata keu gata dan keuluwarga gata. Gata padan kheueh ureuëng Lewi dan ureuëng aséng nyang na tinggai lamkawan gata jiseutôt meusajan lam peurayaan nyan. 12 Tieb-tieb thon nyang keulhée gata harôh tabri keureubeuen siper siploh, na kheueh siper siploh nibak hase tanoh gata keu imeum Lewi, ureuëng aséng, aneuëk yatem ngon meuntui dan ureuëng inong balée, akhéji nibak tieb-tieb banda gata awaknyan na jiteumé peunajoh nyang awaknyan peureulée. Meunyoe ka lheueh, 13 gata kheun kheueh ubak TUHAN Po teu Allah gata, 'Lam siper siploh hase tanoh nyang harôh teupeuseumah keu Droeneueh, TUHAN, hana meubacutpi nyang tinggai dirumoh ulôn; banmandum nyan ka ulôn jok keu ureuëng Lewi, ureuëng aséng, aneuëk yatem ngon meuntui dan inong balée, lagée nyang geupeurintah lé TUHAN Po teu Allah gata ubak ulôn. Nibak peurintah TUHAN keuhai keureubeuen siper siploh banmandum nyan hana nyang ulôn lieungkeu. 14 Nibak peuseumahan nyan hana meubacutpi nyang ulôn pajoh bak watée ulôn mantong teungoh meukabong, atawa ulôn ba u luwa rumoh bak watée ulôn teungoh kuto, atawa ulôn bri sibagoe sajian keu ureuëng maté. Ulôn ka taát ubak Droeneueh, ya TUHAN; peue mantong nyang Droeneueh peurintah ka ulôn peubuet. 15 Nibak teumpat Droeneueh nyang suci di dalam syeuruga kira jih neutem kheueh kalon dan neubri beureukat keu umat Droeneueh Israel; meunan cit neubri kheueh beureukat keu nanggroe nyang kaya lom ngon subô nyang ka TUHAN bri keu kamoe paih lagée janji Droeneueh ubak indatu kamoe.' " 16 "Nibak uroenyoe TUHAN Po teu Allah gata geupeurintah ubak gata mangat jeuet gata peubuet banmandum peurintah nyan; tapeubuet kheueh nyan banmandum deungon seutia dan deungon bansaboh jiwa raga gata. 17 Nibak uroenyoe gata ka tameungaku TUHAN sibagoe Po teu Allah gata. Gata ka tameujanji mangat gata taát ubak Gobnyan dan tapeubuet banmandum huköm meunan cit peurintah Gobnyan. 18 Nibak uroenyoe TUHAN ka geuteurimong gata sibagoe umat Gobnyan keudroe, lagée nyang ka geupeujanji keu gata, dan geupeurintah gata mangat gata peubuet banmandum peue nyang ka geupeurintah bak gata. 19 TUHAN teuma geupeujeuet gata leubeh rayeuk nibak banmandum bansa laén nyang ka geucebtakan lé Gobnyan, dan gata teuma jipujoe dan jibri horeumat. Gata jeuet keu umat TUHAN Po teu Allah gata lagée nyang ka geupeujanji nyan."

Kitab Teu-Ulang 27

1 Óh lheuehnyan meusajan deungon dumna peumimpén Israel, Nabi Musa geupeutrok laju peusan nyang lagéenyoe ubak bansa nyan, "Taát kheueh banmandum peurintah nyang ulôn bri keu gata nibak uroenyoe. 2 Bak uroe gata tajeumeurang Krueng Yordan mangat tatamong u nanggroe nyang geubri lé TUHAN Po teu Allah gata keu gata, gata harôh tapeudong meupadubboh batée raya laju batéenyan gata cet deungon gapu. 3 Tatuléh kheueh teuma nibak batée-batée nyan tieb-tieb tutoe haba nibak huköm-huköm nyan. Meunyoe gata ka tatamong u nanggroe nyang kaya dan subô nyang geupeujanji lé TUHAN, Allah indatu gata keu gata, 4 dan gata ka na di meurandeh Krueng Yordan, gata harôh tajak laju u Gunong Ebal. Meunan cit disinan gata harôh tapeudong lom batée dan gata cet teuma ngon gapu lagée nyang ka ulôn peurintah ubak gata nibak uroenyoe. 5 Meunan cit di teumpat nyan gata harôh teuma tapeudong keu TUHAN Po teu Allah gata saboh miseubah nibak batée-batée nyang hántom na teupeugét keu meubagoe alat lagée beuso, 6 sabab tieb-tieb miseubah nyang teupeudong keu TUHAN Po teu Allah gata harôh teupeugét nibak batée nyang kong. Di ateueh miseubah nyan harôh gata peuseumah keureubeuen-keureubeuen nyang teutot. 7 Gata peuseumah kheueh teuma keureubeuen peudamé dan gata pajoh kheueh disinan dan meusuka cita kheueh dikeue TUHAN Po teu Allah gata. 8 Di ateueh batée-batée nyang teuboh gapu nyan harôh gata tuléh deungon jeulaih tieb-tieb tutoe haba nibak huköm-huköm Po teu Allah." 9 Óh lheuehnyan meusajan ngon dumna imeum Lewi, Nabi Musa geupeugah ubak banmandum bansa Israel, "Syedara-syedara, gata simak dan gata deungoe kheueh nyoe! Nibak uroenyoe gata ka jeuet keu umat TUHAN Po teu Allah gata. 10 Lé sababnyan, gata taát kheueh ubak TUHAN Po teu Allah gata dan gata peubuet kheueh laju peue mantong nyang geupeurintah lé Gobnyan nyang ulôn bri keu gata nibak uroenyoe." 11 Lheuehnyan Nabi Musa geupeugah lom ubak bansa Israel, 12 "Óh kalheueh gata tajeumeurang Krueng Yordan, sukée Simeon, Lewi, Yehuda, Isakhar, Yusuf dan Benyamin harôh jidong di ateueh Gunong Gerizim bak watée geupeugah beureukat ateueh bansa nyoe. 13 Bak watée geupeugah kutôk nyan, sukée Ruben, Gad, Asyer, Zebulon, Dan meunan cit ngon Naftali harôh jidong di ateueh Gunong Ebal. 14 Ureuëng-ureuëng Lewi harôh jipeugah tutoe haba nyang lagéenyoe deungon su nyang nyaréng dan ureuëng Israel harôh kheueh jijaweueb, 'Amin', 15 Ureuëng-ureuëng Lewi: 'Teukutôk kheueh keu ureuëng nyang jipeugét patong nibak batée, kayée dan logam, dan jiseumah nyan deungon musom-musom; TUHAN that-that geubanci ubak ureuëng nyang jipujoe beurala!' Banmandum rakyat: 'Amin!' 16 'Teukutôk kheueh nyang hana jihoreumat keu ureuëng syiek jih dan jipeubiyeu awaknyan teulanta.' 'Amin!' 17 'Teukutôk kheueh ureuëng nyang jigéesée bataih tanoh teutangga jih.' 'Amin!' 18 'Teukutôk kheueh keu ureuëng nyang jipeusisat ureuëng buta.' 'Amin!' 19 'Teukutôk kheueh keu ureuëng nyang jireupah hak ureuëng aséng, aneuëk yatem ngon meuntui dan ureuëng inong balée.' 'Amin!' 20 'Teukutôk kheueh keu ureuëng nyang jihina ayah jih sabab jimeumukah deungon sidroe lamkawan peurumoh ayah jih nyan.' 'Amin!' 21 'Teukutôk kheueh keu ureuëng nyang jimeu-agam deungon beulatang.' 'Amin!' 22 'Teukutôk kheueh keu nyang jimeumukah deungon syedara droe jih ureuëng inong, atawa syedara jih nyang saboh ayah atawa saboh mak.' 'Amin!' 23 'Teukutôk kheueh keu ureuëng nyang jimeumukah deungon mak tuwan jih.' 'Amin!' 24 'Teukutôk kheueh keu ureuëng nyang jipoh maté ureuëng laén ngon cara jimusöm-musöm.' 'Amin!' 25 'Teukutôk kheueh keu ureuëng nyang jiteurimong upah keu jijak poh maté ureuëng laén nyang hana meusalah.' 'Amin!' 26 'Teukutôk kheueh keu ureuëng nyang hana jipeuteupat ubak huköm dan peue nyang geupeurunoe lé Po teu Allah deungon buet-buet jih.' 'Amin!' "

Kitab Teu-Ulang 28

1 "Meunyoe gata tataát ubak TUHAN Po teu Allah gata dan seutia keu gata peubuet banmandum nyang geupeurintah lé Gobnyan nyang ulôn peugah ubak gata nibak uroenyoe, teuma Gobnyan geupeujeuet gata keu bansa nyang paleng meusyeuhu ateueh rhueng donya. 2 Gata taát kheueh ubak TUHAN Po teu Allah gata, teuma banmandum beureukat nyoe geubri keu gata: 3 Beugeubri kheueh beureukat ateueh banda-banda dan lampôh-lampôh gata. 4 Meunan cit beugeubri kheueh teuma beureukat keu gata, sampoe gata tameu aneuëk nyang le, hase tanoh gatapi meulimpah dan leumô meunan cit ngon kaméng dan bubiri gata meutamah le jeumeulah jih. 5 Beugeubri kheueh beureukat ubak hase teupot boh gandom gata meunan cit ngon peunajoh nyang gata peugét nibak gandom nyan. 6 Beugeubri kheueh beureukat ubak banmandum hase useuha gata. 7 Meunyoe gata jiseurang, TUHAN teuma geupeutaloe banmandum musoh gata. Awaknyan ji atoe seurangan ngon cara teu atoe, teuma jiplueng ngon hana seumike. 8 TUHAN Po teu Allah gata teuma geubri beureukat ateueh peue-peue mantong hase useuha gata dan geupasoe bubena gupok-gupok gata deungon gandom, meunan cit Gobnyan teuma geubri beureukat keu gata di nanggroe nyang teuma geubri keu gata. 9 Meunyoe gata tataát ubak TUHAN Po teu Allah gata dan takeureuja teuma banmandum peurintah gobnyan, gata geupeujeuet keu umat Gobnyan keudroe, lagée nyang ka geupeujanji nyan. 10 Teuma banmandum bansa di ateueh bumoe nyoe jikalon bahwa gata na kheueh bansa nyang geupiléh lé TUHAN, dan awaknyan teuma ji seugan keu gata. 11 Gata teuma geubri aneuëk nyang le. Beulatang peulara gata teuma meutamoh le dan hase tanoh gatapi teuma meulimpah di nanggroe nyang ka geupeujanji keu indatu gata mangat jibri keu gata. 12 TUHAN teuma geupeutreun ujeuen óh trok bak musém nibak teumpat tekeubah ujeuen nyan di ateueh langét. Gobnyan teuma geubri beureukat ateueh banmandum buet nyang gata useuha, sampoe gata hase gata peu utang keu bansa nyang le, teuma gata keudroe hana peu ta meu utang. 13 TUHAN Po teu Allah gata teuma geupeujeuet gata keupeumimpén lamkawan bansa-bansa, dan bukon sibagoe ureuëng nyang seumitôt. Meunyoe gata seutia tataát ubak banmandum peurintah TUHAN nyang ulôn bri keu gata nibak uroe nyoe, gata teuma seumaken makmu dan hántom na le jisurot. 14 Teuma bék sagai-sagai gata peulalée peurintah-peurintah nyan deungon cara peue mantong. Meunan cit bék kheueh teuma gata pujoe atawa gata meungabdi ubak ilah-ilah nyang laén." 15 "Teuma meunyoe gata hana taát ubak TUHAN Po teu Allah gata, dan hana teuma seutia tapeubuet peue nyang ka geupeurintah meunan cit ngon huköm Gobnyan nyang ulôn bri ubak gata nibak uroenyoe, teuma banmandum kutôk nyoe rhot u ateueh gata: 16 Teukutôk kheueh banda-banda dan lampôh-lampôh gata. 17 Teukutôk kheueh gandom gata nyang ka teupot dan meunan cit ngon peunajoh nyang gata peugét nibak gandom nyan. 18 Teukutôk kheueh gata, sampoe na bacut mantong aneuëk gata, hase tanoh gata, meunan cit deungon leumô dan kaméng meunan cit bubiri gata. 19 Teukutôk kheueh banmandum hase useuha gata. 20 Meunyoe gata tapeubuet jeuhet dan gata tulak TUHAN, Gobnyan teuma geupeuteuka bala, karu ngon susah that lam hai peue mantong nyang gata peubuet, sampoe lam watée nyang paneuk mantong gata ka geupeusapansapa peue-peue nyang na. 21 Meubagoe peunyakét hana putôh-putôh geupeuteuka ateueh gata, sampoe bak akhé jih hana meusidroepi nibak gata mantong na tinggai di nanggroe nyang gata duek nyan. 22 TUHAN teuma geuhuköm gata deungon peunyakét nyang hase jiminah bak gob, keumong-keumong dan deumam. Gobnyan teuma geupeuteuka musém khueng nyang tho kreng dan angén seu-uem nyang hase jipeuhangoh sampoe hase mupot gata nyan jadeh rusak. Beuncana-beuncana nyan harôh jitimpok ateueh gata sampoe gata meupaloe. 23 Ujeuen hana teuma jitreun dan tanoh gata teuma jeuet keu kreueh sampoe gata ranab banmandum. 24 TUHAN hana teuma geupeutreun ié ujeuen, teuma ujeuen abée dan anoe sampoe gata keunong bala banmandum. 25 Meunyoe gata hana tataát ubak TUHAN Po teu Allah gata, Gobnyan teuma geupeujeuet gata hase jipeutaloe lé musoh-musoh gata. Gata teuma taprang musoh deungon teu atoe, teuma gata plueng meutabubeba. Banmandum bansa dibumoe teuma jirasa gli jikalon gata nyang malang nyan. 26 Meunyoe gata maté, manyét gata teuma jeuet keu eumpeun cicém-cicém dan beulatang juah, dan hana ureuëng nyang hase ji use beulatang-beulatang nyan. 27 TUHAN teuma geuhuköm gata deungon peunyakét cumuet lagée nyang ka geupeuteuka u ateueh ureuëng Meusé. Ban saboh badan gata teuma peunoh jitimoh ngon peunyakét cabok dan kude nyang gatai-gatai teuma hana ubat keu peunyakét nyan. 28 TUHAN teuma geupeujeuet gata sampoe án pungoe, buta mata dan bingong. 29 Bak watée uroe trang gata meuraba-raba lagée ureuëng buta, teuma hana hase gata teumé rot nyang gata mita. Banmandum useuha gata teuma gagai hana meuhase. Gata hana pre-pre jireupah ngon jitindéeh, dan hana ureuëng nyang tulông gata. 30 Meunyoe gata hana tataát ubak TUHAN Po teu Allah gata, hai-hainyoe teuma jitimpok u ateueh gata: Gata teuma tameutunangan, teuma ureuëng laén nyang jimeukawen deungon tunangan gatanyan. Gata teuma tapeugot rumoh, teuma hana gata duek nibak rumoh nyan. Gata teuma tapeugét lampôh anggô, teuma boh jih hana teuma gata pajoh. 31 Leumô gata teuma jisie dikeue mata gata, teuma digata hana teuma gatapajoh uengkot sie nyan. Keuleudée-keuleudée gata teuma jiparôh jijak hoe laén teuma gata takalon mantong hana jipeuriwang lom teuma. Meunan cit deungon bubiri-bubiri gata teuma jijok keu musoh-musoh gata dan hana nyang tulông. 32 Dikeue mata gata aneuëk-aneuëk gata teuma jibri sibagoe namiet keu ureuëng aséng. Tieb-tieb uroe mata gata peudeh tajak mita aneuëk-aneuëk gata, teuma useuha gata nyan sia-sia mantong, sabab awaknyan hana jiriwang le. 33 Bansa aséng teuma jicok banmandum hase tanoh nyang gata teumé deungon keureuja nyang brat. Teuma gata keudroe hana teuma meuteumé sapeue seulaén nyang gata rasa dan gata jitindéeh ngon hana putôh-putôh dan jiseksa deungon buet-buet nyang keubiet keujam. 34 Gata teuma jeuet keu ureuëng pungoe sabab peue nyang gata rasa nyan. 35 TUHAN teuma geupeujeuet gaki gata nyan peunoh deungon peunyakét cabok nyang lumpah sakét dan hana teuma jitem puléh-puléh; phon nibak gaki sampoe ubak bruek ulée gata peunoh jitimoh deungon peunyakét cumuet. 36 Gata dan raja gata teuma geuba lé TUHAN u nanggroe gob nyang hana gata turi dan meunan cit hana teuma jituri lé indatu gata. Disinan gata teuma tameungabdi ubak ilah-ilah nyang jipeugot nibak kayée dan batée. 37 Di nanggroe dipat gata geupeu crebre lé TUHAN, ureuëng laén keubit that gli óh watée jikalon gata; gata teuma ji peuhina ngon jipeukém lé awaknyan. 38 Jai that bijéh nyang gata tabu, teuma cit bacut hase jih nyang gata teumé, sabab seunaman gata habéh banmandum jipajoh lé daruet. 39 Gata teuma tapula bak-bak anggô di dalam lampôh dan gata peulara lom teuma, teuma hana gatapot boh anggô meunan cit ngon gatajieb teuma ié anggô nyan, sabab bubena bak anggô nyan ka habéh banmandum jipajoh lé ulat. 40 Bansaboh nanggroe gata teuma jitimoh bak zaiton, teuma boh-boh jih nyan ka habéh rhot meutabu beba, akhéjih gata hana meuteumé meubacutpi minyéuk nibak hase jihnyan. 41 Gata teuma meuteumé aneuëk agam dan aneuëk inong, teuma awaknyan jicok sibagoe tawanan prang, akhéjih gata ka gadôh awaknyan. 42 Banmandum bak kayée dan seunaman habéh jipajoh lé seurangga. 43 Ureuëng aséng nyang na tinggai di nanggroe gata teuma seumaken meukuasa, seudangkan kuasa gata keudroe seumaken meukureueng. 44 Awaknyan na péng keu jipeu utang keu gata, teuma nibak gata hana sapeuena keu gata peu utang keu awaknyan. Dan bak akhé jih gata ka jikuasa lé awaknyan. 45 Banmandum balapeutaka nyan teuma jipeurhot u ateueh gata dan hana piôh jipeukaru gata sampoe gata binasa, sabab gata hana tataát ubak TUHAN Po teu Allah gata dan hana teuma gata peubuet keu huköm-huköm nyang geubri keu gata. 46 Beuncana-beuncana nyan na kheueh sibagoe bukeuti nibak huköm TUHAN ateueh gata dan keuturonan gata keu siumu masa. 47 Gata ka geubri beureukat lé TUHAN Po teu Allah gata nibak meubagoe hai, teuma hana tatem meungabdi ubak Gobnyan deungon até nyang rila galak ngon geumbira. 48 Lé sababnyan gata harôh tameungabdi ubak musoh-musoh nyang geukirém lé TUHAN keujijak lawan gata. Gata teuma jiteuka deuek, grah ngon teulon lom kureueng nibak meubagoe hai. TUHAN teuma geutindéeh gata deungon keujam sampoe án gata mandum mupaloe. 49 Saboh bansa nyang hana gata muphom basa jih teuma geukirém lé TUHAN nibak ujong bumoe keu jijak lawan gata. Lagée cicém siwah jisama gata. 50 Awaknyan keujam that dan hana nibak jihnyan rasa gaséh sayang keu ureuëng tuha meunan cit keu aneuëk manyak. 51 Awaknyan jipeuhabéh banmandum beulatang peulara meunan cit deungon banmandum hase seunaman gata, dan hana teuma jitinggai keu gata gandom, ié anggô, minyéuk zaiton atawa leumô dan kaméng meunan cit bubiri sampoe gata banmandum maté deuek. 52 Awaknyan jiseurang tieb-tieb banda ateueh nanggroe nyang teuma geubri lé TUHAN Po teu Allah gata keu gata sampoe bintéh-bintéh beuton nyang manyang dan tapeukukôh nyang gata peubangga nyan akhé jihpi reulôh. 53 Teungoh musoh-musoh gata jijak keupông banda-banda gata, gata putôh asa dan deuek, sampoe gata tapajoh aneuëk-aneuëk gata keudroe, aneuëk-aneuëk nyang geu anugeurah lé TUHAN Po teu Allah gata ubak gata. 54 Bahpi nyan lé ureuëng bangsawan nyang paleng gét budoe basaji pi teuma putôh asa bak watée bandanyan jikeupông, sampoe jihnyan jipajoh aneuëk-aneuëk jih keudroe sabab hanale peunajoh nyang laén. Hana meubacutpi nyang jibri ubak syedara jih atawa peurumoh jihnyan nyang jicinta atawa aneuëk-aneuëk jihnyan nyang mantong udeb. 56 Bahpi di ureuëng inong nyang paleng gét budoe basa jihpi dan nyang paleng kaya dan meunyoe jijak hántom na jijak ngon gaki, teuma jipeubuet cit lagéenyan. Bak watée musoh jikeupông banda, ureuëng inong nyan teuma putôh asa sabab deuek, akhéjih inongnyan deungon cara jimusöm-musöm jipajoh aneuëk jih keudroe nyang ban lahé dan mantong na ari-ari ngon talo pusat. Hana meubacutpi atranyan jibri keu lakoe nyang jicinta atawa keu aneuëk-aneuëk jih. 58 Meunyoe gata hana seutia tataát ubak banmandum huköm Po teu Allah gata nyang na teutuléh didalam kitab nyoe dan hana teuma tahoreumat ubak TUHAN Po teu Allah gata nyang agong dan luwabiasanyan, 59 TUHAN teuma geupeuteuka u ateueh gata dan keuturonan gata meubagoe peunyakét nyang hana hase teupeupuléh dan wabah-wabah nyang hana hase teupeu piôh. 60 Peunyakét-peunyakét nyang keubit parah nyang ka gata kalon di nanggroe Meusé teuma rhot u ateueh gata, dan gata hana hase puléh. 61 Meunan cit TUHAN geupeuteuka meubagoe macam peunyakét dan wabah nyang hana teupeugah didalam kitabnyoe, kitab Huköm TUHAN. Lheuehnyan gata banmandum geupeubinasa. 62 Bahpi jeumeulah gata leubeh sidub bintang nyang na di langét, teuma cit bacut that lamkawan gata nyan na tinggai udeb, sabab gata hana taát ubak TUHAN Po teu Allah gata. 63 Lagée TUHAN galak geubri makmu keu gata dan geutamah jeumeulah gata, meunan cit Gobnyan galak teuma geupeubinasa dan geupeuhabéh gata. Gata teuma geupeuteubiet nibak nanggroe nyang hana treble teuma gata tinggai disinan. 64 TUHAN teuma geupeu crebre gata lamkawan bansa-bansa di bansaboh muka bumoe. Disinan gata teuma taseumah ilah-ilah nyang jipeugét nibak kayée dan batée, ilah-ilah nyang hana gata turi dan hana teuma jituri lé indatu gata. 65 Lamkawan bansa-bansa nyan gata hana tateumé keuteunangan, dan hana teumpat nyang hase gata peugah sibagoe atra gata; TUHAN teuma geupeujeuet gata lumpah gundah ngon susah hana meuteuntée dan gata putôh asa hana harapan. 66 Udeb gata sabe teuancam lam bahya. Uroe ngon malam gata teuancam yo ngon teumakot maté. 67 Watée teukalon peue mantong jantong gata yo meugram-gram sabab teumakot. Meunyoe beungoh uroe gata lakée beubagaih malam, dan meunyoe ka malam gata lakée teuma beubagaih beungoh. 68 TUHAN teuma geukirém dan geupeuriwang lom gata u nanggroe Meusé deungon kapai, bahpi Gobnyan ka geupeugah bahwa gata hana tariwang le keudeh. Disinan gata teuma tauseuha tapeubloe droe gata sibagoe namiet ubak musoh gata, teuma hana meusidroepi nyang na niet jitem bloe gata."

Kitab Teu-Ulang 29

1 Nyoe kheueh feureuman TUHAN nyang geupeusampoe lé Nabi Musa keu bansa Israel bak watée awaknyan mantong na di tanoh Moab. Peujanjian nyan na kheueh sibagoe sinamah nibak janji nyang geupeugét lé TUHAN deungon awaknyan di Gunong Sinai. 2 Nabi Musa laju geuyue banmandum ureuëng Israel jimeusapat, laju geupeugah ubak awaknyan, "Gata nyoe ka takalon keudroe peue nyang geupeubuet lé TUHAN ateueh raja nibak nanggroe Meusé, lé peujabat jihnyan meunan cit bansaboh nanggroe Meusé nyan. 3 Meunan cit gata ka takalon beuncana-beuncana nyang lumpah azéb dan lumpah that phet, mujizat-mujizat dan buet-buet nyang ajaéb nyang ka geupeubuet lé TUHAN. 4 Teuma sampoe án nibak uroenyoe Gobnyan gohlom jeuet keumungken gata muphom banmandum nyang gata rasanyan. 5 Peuet ploh thon treb jih TUHAN geupimpén gata tajak rot padang pasi, teuma peukayan dan seulob gata hana cit jitem jeuet keu brôk atawa useueng. 6 Gata hana tateumé ruti keu peunajoh, ié anggô dan ié jieb nyang kreueh, teuma TUHAN geujok banmandum peue nyang gata peureulée nyan mangat gata tateupeue bahwa Gobnyan kheueh TUHAN Po teu Allah gata. 7 Dan bak watée geutanyoe katrok ubak teumpat nyoe, Raja Sihon nibak Hesybon dan Raja Og nibak Basan teuka geujak prang geutanyoe. Teuma geutanyoe hase ta peutaloe awaknyan. 8 Tanoh awaknyan tanyoe reubot dan laju tanoh nyan tanyoe bagi keu sukée Ruben, Gad dan siladum keu sukée Manasye. 9 Deungon nyan bah kheueh gata banmandum seutia tapeubuet banmandum nyan deungon tataát ubak peujanjian nyoe, mangat gata meuhase nibak banmandum useuha gata. 10 Nibak uroe nyoe gata banmandum tadong dikeue TUHAN Po teu Allah gata, banmandum ulée sukée, ureuëng patot-patot, ulée balang, banmandum ureuëng agam, 11 ureuëng inong, aneuëk miet, dan banmandum ureuëng aséng nyang na tinggai lamkawan gata dan jibantu gata jijak koh kayée ngon jigulam pacok ié. 12 TUHAN Po teu Allah gata geupeugét janji deungon gata, dan gata banmandum tameusapat disinoe mangat teuikat peujanjian nyan meunan cit mangat gata teurimong keuwajéban-keuwajéban nyan. 13 Deungon peujanjian nyan TUHAN nibak uroenyoe ka geupeu kong gata jeuet keu bansa, dan Gobnyan jeuet teuma keu Po teu Allah gata lagée nyang ka geupeujanji ubak gata dan ubak indatu gata Nabi Ibrahim, Nabi Ishaq dan Nabi Yakub. 14 Peujanjian nyan deungon banmandum keuwajéban jih geupeugét lé TUHAN kon kheueh deungon gata mantong, 15 teuma deungon tieb-tieb ureuëng nyang nibak uroe nyoe na jidong disinoe, dikeue TUHAN Po teu Allah geutanyoe, dan meunan cit teuma deungon keuturonan geutanyoe keu masa ukeue nyoe." 16 "Gata mantong taingat pakriban naséb geutanyoe bak watée mantong na di nanggroe Meusé dan pakriban teuma geutanyoe tajak rot nanggroe bansa-bansa laén. 17 Gata ka takalon patong-patong beurala awaknyan nyang lumpah luwat nyang teupeugét nibak kayée, batée, pirak dan méuh. 18 Lé sababnyan tajaga kheueh bék na meusidroepi lamkawan gata, ureuëng agam atawa ureuëng inong, keuluwarga atawa sukée nyang na teudong disinoe, meubalék nibak TUHAN Po teu Allah geutanyoe keu jijak seumah ilah-ilah bansa laén. Buet nyang lagéenyan na kheueh lagée ukeue nyang timoh jeuet keusinaman nyang phet meunan cit meuracon. 19 Lamkawan gata nyang jideungoe meulakée nyang kreueh nyan bék kheueh na nyang seumike bahwa naséb jih teutab gét, bahpi deungon neukat that jijak nibak rot jih keudroe. Hainyan teuma jeuet rhot ubak binasa gata banmandum, ureuëng-ureuëng nyang jeuhet meunan cit nyang gét. 20 TUHAN hana teuma geupeu amphon ureuëng nyang lagéenyan. Seubalék jih, ureuëng nyan teuma keunong ubak meureuka TUHAN nyang hana tanggong-tanggong, dan banmandum beuncana nyang teutuléh didalam kitab nyoe rhot ateueh ureuëng nyan, trok án bak watée ureuëng nyan geupeubinasa lé TUHAN. 21 TUHAN teuma geupeu jeuet ureuëng nyan saboh cuntoh keu saboh sukée Israel, dan geuhuköm jihnyan deungon kutôk nyang geupeugah didalam peujanjian nyang teutuléh didalam kitab nyoe, Kitab Huköm TUHAN. 22 Óh singoh nyan teuma, keuturonan gata dan ureuëng aséng nibak nanggroe jiôh jingieng beuncana-beuncana dan peundeuritaan nyang geupeuteuka lé TUHAN ateueh nanggroe gata. 23 Lampôh-lampôh gata teuma jeuet keu padang pasi nyang teutôb ngon tanoh beulerang dan sira. Tanoh jihnyan hana hase teupula sapeue dan naleuengpi hana jitem lé timoh ateueh tanoh nyan. Nanggroe gata nyan teuma jeuet lagée banda-banda Sodom dan Gomora, Adma dan Zeboim nyang geupeuranab lé TUHAN bak watée Gobnyan beungéh nyang hana ngon peusa. 24 Teuma banmandum donya jitanyong, 'Pakon TUHAN geupeujeuet meunan deungon nanggroe awaknyan? Peue sabab Gobnyan beungéh lagéenyan bagoe?' 25 Dan jaweueb jih na kheueh, 'Sabab awaknyan ji iengkeu ubak janji TUHAN, Allah indatu awaknyan; janji nyang geupeugét deungon awaknyan nibak watée Gobnyan geuba awaknyan geupeuteubiet nibak nanggroe Meusé. 26 Awaknyan jiseumah ubak ilah-ilah nyang laén nyang hana awaknyan turi, padahai TUHAN geutam awaknyan bék jiseumah ilah-ilah nyan. 27 Nyang kheueh sabab jih TUHAN beungéh keu umat Gobnyan dan geupeuteuka u ateueh nanggroe awaknyan banmandum beuncana nyang na teutuléh didalam kitab nyoe. 28 Keuhai beungéh TUHAN nyan teuka deungon hebat lumpah na, dan dalam beungéh Gobnyan nyang lumpah hebat nyan, Gobnyan laju geutarek bansa Israel nibak tanoh awaknyan dan laju geurhom awaknyan u nanggroe aséng sampoe awaknyan ka na disinan.' 29 Na meupadub boh hai nyang geurahsia lé TUHAN Po teu Allah geutanyoe: teuma huköm Gobnyan ka geupeusahéeh keu geutanyoe, dan geutanyoe meunan cit deungon keuturonan geutanyoe harôh jitaát nyan keu siumu masa."

Kitab Teu-Ulang 30

1 "Jinoenyoe gata jeuet tapiléh beureukat atawa kutok lagée nyang ka ulôn peugah ubak gata. Meunyoe gata ka tarasa banmandum peundeuritaan nyan dan gata udeb lamkawan bansa-bansa aséng di teumpat gata geupeu crebre lé TUHAN Po teu Allah gata, gata teuingat ubak peuniléh nyang ulôn bri keugata. 2 Meunyoe gata dan keuturonan gata tawoe ubak TUHAN Po teu Allah gata, dan deungon sipeunoh até teuma gata taát ubak peurintah-peurintah nyang ulôn bri ubak gata nibak uroenyoe, 3 teuma TUHAN Allah geugaséh keu gata. Gata teuma geupeuwoe lom nibak bansa-bansa di teumpat gata nyang ka geupeu crebre, dan geupeu makmu lom lagée nyang ka-ka. 4 Bahpi meutabu hán meuhosaho bansaboh bumoe nyoe. TUHAN Po teu Allah gata teuma geupeusapat gata dan geupeuwoe gata mangat tagisa lom teuma. 5 Teuma gata hase taduek lom nibak tanoh nyang yoh masa ilée hak milék indatu gata. Dan gata geupeujeuet leubeh makmu, dan jeumeulah gata jiôh leubeh jai nibak indatu gata. 6 Gata dan keuturonan gata teuma geubri até nyang leubeh patuh, sampoe gata tacinta ubak TUHAN Po teu Allah gata deungon sipeunoh até dan hase gata tinggai nibak nanggroe nyan. 7 Banmandum sumpah ngon kutok teuma geupeurhot u ateueh banmandum musoh-musoh gata nyang jibanci ji iélanya gata. 8 Gata teuma tariwang dan gata taát ubak TUHAN dan tapeubuet banmandum peue-peue nyang geupeurintah lé Gobnyan nyang ulôn bri keu gata nibak uroenyoe. 9 TUHAN Po teu Allah gata teuma geupeujeuet banmandum useuha nyang gata peubuet jeuet keuhase; gata teuma tameu aneuëk nyang le meunan cit beulatang peulara gata meutamah le; lampôh ngon blang gata teuma geubri hase nyang meulimpah ruwah. TUHAN deungon mangat até Geuh geubri makmu keugata, lagée Gobnyan ka lheueh geujok keumakmuran nyan keu indatu gata. 10 Teuma gata harôh taát ubak TUHAN Po teu Allah gata dan meunan cit gata taát kheueh banmandum keu huköm Gobnyan nyang na teutuléh lam kitab nyoe, kitab Huköm TUHAN. Gata harôh gata woe ubak Gobnyan deungon sipeunoh até gata. 11 Peurintah nyang ulôn bri nyoe keu gata hana that payah keugata dan meunan cit hana teuma jiôh that. 12 Teumpat jih bukon dilangét, sampoe gata tatanyong, 'Soe nyang ék keudeh mangat jijak cok nyan keu geutanyoe, mangat geutanyoe hase ta deungoe dan ta-taát teuma?' 13 Teumpat jihnyan bukon di meurandeh laôt, sampoe gata tatanyong, 'Soe nyang jak u meurandeh laôt mangat jijak cok nyan keu geutanyoe, mangat jeuet geutanyoe hase ta deungoe ngon ta-taát teuma?' 14 Bék gata tanyong lagéenyan, sabab peurintah nyan lumpah that rab ngon gata. Gata ka tateupeue dan hase gata apai nyan diluwa ulée, lé sababnyan, tinggai gata peubuet mantong. 15 Nibak uroenyoe gata jeuet tapiléh nyang get ngon nyang jeuhet, nyang udeb dan maté. 16 Nibak uroenyoe ulôn peurintah gata keu gata cinta ubak TUHAN Po teu Allah gata dan taát ubak Gobnyan meunan cit gata peubuet teuma banmandum huköm dan peurintah Gobnyan mangat gata makmu dan jeuet keu bansa nyang raya. TUHAN Po teu Allah gata teuma geubri beureukat keu gata di nanggroe nyang hana treble gata duek teuma. 17 Teuma meunyoe gata hana ta-taát dan hana teuma gatatem deungoe, dan tapeubiyeu droe gata jipeusisat mangat gata seumah ilah-ilah laén, 18 pasti gata geupeubinasa, dan umu gatapi hana teuma panyang di nanggroe nyang hana treble gata duek nyan. Ingat kheueh! Hainyan ka ulôn bri tée ubak gata nibak uroenyoe. 19 Jinoenyoe gata jeuet tapiléh udeb atawa maté, beureukat TUHAN ngon kutôk Gobyan. Langét dan bumoe ulôn hôi jeuet keusaksi ateueh keuputosan gata nyan. Piléh kheueh udeb. 20 Cinta kheueh TUHAN Po teu Allah gata, taát kheueh ubak Gobnyan, dan seutia kheueh gata ubak Gobnyan. Lé sababnyan gata dan keuturonan gata teuma udeb dan panyang umu gata di nanggroe nyang geupeujanji lé TUHAN keu indatu gata, Nabi Ibrahim, Nabi Ishaq dan Nabi Yakub."

Kitab Teu-Ulang 31

1 Nabi Musa geupeugah lom ubak bansa Israel, 2 kheun gobnyan, "Jinoenyoe umu ulôn ka sireutôh dua ploh thon dan ulôn nyoe hana hase le jeuet keu peumimpén gata. Seulaén nibak nyan TUHAN ka geupeugah bahwa ulôn hana jeuet lôn jeumeurang u meurandeh Krueng Yordan. 3 TUHAN Po teu Allah keudroe nyang jak dikeue gata dan Gobnyan teuma nyang peubinasa bansa-bansa nyang na tinggai disinan, sampoe gata hase taduek nibak tanoh awaknyan. Yosua teuma jeuet keu peumimpén gata, lagée nyang ka geupeugah lé TUHAN. 4 TUHAN teuma geupeubinasa bansa-bansa nyan, lagée Gobnyan ka geupeutaloe Sihon dan Og, raja ureuëng Amori, meunan cit geupeuhanco teuma nanggroe awaknyan. 5 TUHAN geupeu meunang gata ateueh awaknyan, laju awaknyan harôh gata peusaneut paih lagée nyang ka ulôn peugah ubak gata. 6 Bah kheueh gata ngon até nyang kong dan beuhe! Bék gata takot keu awaknyan, sabab TUHAN Po teu Allah gata keudroe nyang tulông gata. Gobnyan hana geupeukeucewa gata atawa geutinggai meunan mantong gata." 7 Nabi Musa geuhôi laju Yosua, dan dikeue banmandum bansa Israel Nabi Musa nyan laju geupeugah ubak jihnyan, "Bah kheueh gata beukong até ngon beuhe, Yosua! Gata kheueh nyang teuma pimpén bansa nyoe keu taduek nibak nanggroe nyang ka geupeujanji lé TUHAN ubak indatu awaknyan. 8 TUHAN keudroe nyang bimbeng dan nyang tulông gata. Gobnyan hana teuma geupeukeucewa dan geutinggai gata meunan mantong. Sabab nyan bék kheueh gata takot peuteuk lom gundah até." 9 Lé Nabi Musa geutuléh teuma huköm-huköm TUHAN Po teu Allah óh lheuehnyan geubri laju atranyan ubak imeum-imeum Lewi nyang geubri tugaih jijak jaga Peuto Peujanjian, dan keu peumimpén bansa Israel. 10 Gobnyan laju geupeurintah ubak awaknyan, "Nibak tieb-tieb akhé thon nyang keutujoh, nibak thon teusampôh utang khanuri Jambo Ôn, 11 gata harôh tabeuet bubena huköm-huköm nyoe deungon su gata nyang teuga keu ureuëng-ureuëng Israel nyang jiteuka jijak seumah TUHAN Po teu Allah gata diteumpat nyang ka jipiléh. 12 Gatayue kheueh banmandum ureuëng agam, ureuëng inong dan aneuëk miet meunan cit ngon ureuëng aséng nyang na tinggai di banda-banda gata jijak meusapat mangat jijak deungoe peue nyang teubeuet nyan, mangat awaknyan jimeurunoe pakriban cara jibri horeumat ubak TUHAN Po teu Allah gata meunan cit seutia dan jihoreumat ubak banmandum peurintah-peurintah Gobnyan. 13 Deungon na cara nyang lagéenyan bubena aneuëk-aneuëk gata nyang hántom lom jideungoe keuhai huköm-huköm TUHAN Po teu Allah gata ka hase jideungoe dan ka teuma hase jimeurunoe pakriban cara teuhoreumat TUHAN meunyoe awaknyan mantong udeb nibak nanggroe nyang hana treble ka gata duek di meurandeh Krueng Yordan." TUHAN ubak Nabi Musa 14 Óh lheueh nyan TUHAN meufeureuman lom ubak Nabi Musa, "Udeb gata hana treble. Lé sababnyan, tajak hôi kheueh Yosua dan taba kheueh laju jihnyan ubak Khimah Ulôn, mangat Ulôn hase Lôn bri peutunyok-peutunyok keu jihnyan." Teuma geujak kheueh laju Nabi Musa dan Yosua ubak Khimah TUHAN, 15 dan TUHAN laju teuma geupeudeuh droe ubak awaknyan didalam awan nyang meureuntang rab ngon pintoe Khimah TUHAN. 16 Feureuman TUHAN ubak Nabi Musa, "Ajai gata ka tho that. Óh ka lheueh gatajak tapeulikot donya nyoe, bansa Israel nyan hana seutia le ubak Ulôn dan laju ji-iengkeue ubak peujanjian nyang ka Ulôn peugét deungon awaknyan. Awaknyan jitinggai Ulôn keujijak seumah ilah-ilah di nanggroe nyang hana treble awaknyan jitamong. 17 Meunyoe nyan ka teujadi, beungéh Ulôn teuma teuka ngon hana tanggong-tanggong ateueh awaknyan. Awaknyan teuma Ulôn tinggai sidroe meunan cit Ulôn peubinasa teuma. Jai that-that beuncana nyang paleng hebat teuma jiteuka ateueh awaknyan, laju awaknyan jiteuka sadar bahwa banmandum nyan na kheueh sabab lé Ulôn, Allah awaknyan, hanale geupeungon awaknyan. 18 Bak watée nyan Ulôn hana Lôntem le Lôn tulông awaknyan, sabab awaknyan ka jiseumah ila-ilah nyang laén dan meunan cit jipeubuet jeuhet. 19 Jinoenyoe gata tuléh kheueh lagunyoe dan gata peurunoe kheueh laju ubak bansa Israel sibagoe keusaksian ateueh awaknyan. 20 Awaknyan teuma Ulônba u nanggroe nyang kaya ngon subô, lagée nyang ka Ulôn peujanji ubak indatu awaknyan. Disinan awaknyan udeb deungon makmu ngon seunang dan mudah teuma jiteumé meubagoe jeunéh peunajoh nyang awaknyan peureulée. Teuma óh singoh dudoe awaknyan jibalék dan jiseumah laju ilah-ilah nyang laén. Awaknyan jitulak Ulôn dan ji iengkeu teuma ubak janji nyang Ulôn peugét, 21 dan keubit jai that beuncana nyang luwabiasa rhot ateueh awaknyan. Teuma lagu nyoe teutab jipeunyanyoe dan jingui teuma sibagoe keusaksian ateueh awaknyan. Bahpi jinoenyoe, sigohlom awaknyan Ulôn ba u nanggroe nyang ka Ulôn peujanji nyan, Ulôn ka Lôn teupeue jalan pikeran awaknyan." 22 Bak uroenyan cit teuma Nabi Musa geutuléh lagu nyan, laju nyanyoe nyan geupurunoe ubak bansa Israel. 23 Óh lheueh nyan TUHAN meufeureuman ubak Yosua, aneuëk Nun, kheun Gobnyan, "Bah kheueh digata tapeukong até dan beuhe, Yosua! Gata teuma tapimpén bansa Israel mangat jitamong u nanggroe nyang ka Ulôn peujanji keu awaknyan, dan Ulôn teuma Lôn tulông awaknyan." 24 Lé Nabi Musa geutuléh laju huköm Po teu Allah dalam saboh kitab. Gobnyan geutuléh nyan deungon that-that até-até dan that-that teuliti nibak phon sampoe án akhé. 25 Bak watée kitab nyan ka seuleusoe geutuléh, laju gobnyan geupeugah ubak banmandum imeum ureuëng Lewi nyang geubri tugaih keu jijak uruih Peuto Peujanjian, 26 "Gata cok kheueh kitab Huköm Po teu Allah nyoe, dan takeubah laju kitab nyan blaih Peuto Peujanjian TUHAN Po teu Allah gata, mangat atranyan teutab na sabe disinan sibagoe saksi ateueh bansa nyan. 27 Ulôn kuteupeue bahwa awaknyan keubit that kreueh ulée dan galak that jimeulawan ngon jibeurontak. Seudangkan ulôn mantong udebpi awaknyan teutab hana jipiôh jimeubeurontak ubak TUHAN; peue teuk lom singoh, watée ka maté ulôn! 28 Jinoenyoe gatayue kheueh banmandum peumimpén bansa dan bubena ulée balang, peuwira mangat jijak meusapat dikeue ulôn, mangat ulôn hase lôn peusampoe hai-hai nyoe keu awaknyan. Langét ngon bumoe ulôn tawok sibagoe saksi ateueh awaknyan. 29 Ulôn kuteupeue bahwa óh kalheueh ulôn maté, ureuëng-ureuëng nyan jeuet keu jeuhet dan jitulak peue nyang ka ulôn peurunoe keu awaknyan. Dan teuma awaknyan jitimpok lé beuncana, sabab jihnyan ka jipeujeuet TUHAN beungéh deungon jipeubuet peue nyang ka geutam nyan." 30 Óh lheueh nyan Nabi Musa laju geupeugah lagu nyoe sampoe án seuleusoe dan bansa Israel jideungoe nyan banmandum.

Kitab Teu-Ulang 32

1 "Deungoe kheueh, hai langét, ulôn keuneuk peugah haba; hai bumoe, gata pasang kheueh punyueng! 2 Seumoga peue nyang ulôn purunonyoe beu jitreun lagée ujeuen, dan tutoe haba ulôn nyoe rho meutreb-treb lagée ié mbon, lagée ujeuen reuntek-reuntek jitreun di ateueh ôn naleueng, dan ujeuen raya jitreun di ateueh peunula. 3 Ulôn teuma lôn pujoe nan TUHAN. Gatajak peutrok kheueh keubeusaran Po teu Allah geutanyoe! 4 TUHAN kheueh nyang bila gata nyang peukasa, nyang geupeugét lé Gobnyan sampoereuna, dan banmandum rot Gobnyan ade lumpah na. Po teu Allah gata keubit that seutia, hana meubacutpi nyang kureueng nibak Gobnyan, Gobnyan geupeubuet nyang gét ngon beutôi. 5 Teuma gata na kheueh bansa nyang hana seutia, dan hana patot le jeuet keu umat Gobnyan, bansa nyang peunoh deungon jeuhet dan desya. 6 Meunan kheueh gata balaih lom buet nyang gét nibak TUHAN, hai ureuëng-ureuëng bangai nyang hana meu akai? Bukon kheueh Gobnyan Bapak gata, Nyang Peujeuet gata, nyang ka geupeujeuet gata keu saboh bansa? 7 Gata ingat kheueh nibak jamén ilée, gata kalon kheueh ubak jamén angkatan-angkatan nyang ka awai ilée. Gata tanyong kheueh nyan ubak ureuëng syiek gata, mangat hainyan lé awaknyan jibritée ubak gata. 8 Bak watée Po teu Allah Nyang Maha manyang geubagi tanoh, tieb-tieb bansa ka geupeuteuntée wilayah awaknyan deungon saboh ilah sibagoe nyangmat kuasa. 9 Teuma keuturonan Nabi Yakub nyoe ka geupiléh lé TUHAN keu droe Gobnyan. 10 Gobnyan geujak meurumpok ngon awaknyan nyang teungoh meungeumbara di teumpat nyang sungue lam padang beulantara. Lé Gobnyan laju geulindong awaknyan ngon geupeulara dan geujaga awaknyan lagée atra droe Geuh teuma. 11 Lagée kleueng po teungoh jipurunoe aneuëk jih seumama geudrob laju nibak sayeub nyang teuleueng meureuntang dan geutingkue teuma di ateueh sayeub nyang meukeupak, 12 meunan kheueh TUHAN keudroe geupimpén umat Gobnyan, hana ilah nyang aséng nyang na meusajan ngon Gobnyan. 13 Gobnyan geupeujeuet awaknyan jikuasa bubena gunong; nyang jipajoh lé awaknyan na kheueh nibak hase blang ngon lampôh dan jijieb ié meulisan nyang kleuet nyang na di bukét-bukét batée. Awaknyan meuteumé teuma minyéuk nibak bak zaiton nyang na timoh di ateueh tanoh nyang meubatée. 14 Leumô ngon kaméng dan bubiri awaknyan jai that jipeuhase ié susu; beulatang peulara awaknyan na kheueh nyang paleng gét mutu, gandom dan ié anggô awaknyan na kheueh nyang paleng gét teuma. 15 Umat TUHAN ka jeuet keu kaya, teuma paleng galak jipeubuet buet beurontak, awaknyan teumbon-teumbon, sabab troe lé sabab jai that peunajoh. Teuma awaknyan ka jipeulikot Po teu Allah, Peuncebta droe jih, dan jitulak nyang peuseulamat jih nyang paleng peukasa. 16 Awaknyan jiseumah beurala, sampoe TUHAN ceumuru lagoena, beungéh Gobnyan jiteuka sabab buet jih nyang jeuhet nyan. 17 Awaknyan jipeuseumah keureubeuen keu areuwah-areuwah jeuhet nyang bukon Po teu Allah, keu ilah-ilah nyang hana awaknyan turi, ilah-ilah nyang barô nyang hana jitakot lé indatu awaknyan. 18 Awaknyan jipeulalée nyang Peuseulamat awaknyan nyang paleng peukasa, jipeutuwoe ubak Po teu Allah awaknyan nyang ka geubri udeb keu awaknyan. 19 Watée geukalon hai nyang lagéenyan, TUHAN keubit that beungéh, dan laju geutulak aneuëk-aneuëk Gobnyan. 20 Kheun Gobnyan, 'Ulôn hana Lôntem le kutulông awaknyan; bah Ulôn ngieng pakriban awaknyan apoh apah. Sabab bansa nyan lumpah that kreueh ulée dan meubacutpi hana seutia. 21 Awaknyan jipeujeuet Ulôn ceumuru ubak nyang bukon Allah, dan beungéh ubak patong beurala awaknyan. Teuma Ulôn peujeuet umat Ulôn jiceumeuru keu nyang bukon bansa, dan beungéh keu bansa nyang bangai. 22 Keuhai beungéh Ulôn nyan hu lagée apui nyang meu háb-háb nyang jitot hangöh sampoe trok ubak donya ureuëng maté. Apui nyan laju jitot hangöh bumoe nyoe meunan cit peue nyang na hase di ateueh bumoe nyan, dan meunan cit ngon gunong-gunong trok ubak ukeu-ukeu jih. 23 Hana putôh-putôh bala Ulôn peutreun dan Ulôn timbak banmandum panah Ulôn ateueh awaknyan. 24 Awaknyan teuma maté sabab deumam ngon deuek, dan sabab lé peunyakét nyang lumpah parah. Ulôn peubiyeu awaknyan jiteugom lé beulatang juah, dan ji kab lé uleue nyang meubisa. 25 Muprang akibat jih mawöt ngon maté nyang jai di ateueh rot-rot raya; teumakot ngon yo keu ureuëng nyang na tinggai di rumoh-rumoh. Ureuëng muda dan aneuëk dara banmandum nyan geupeu sapansapa, meunan cit ngon aneuëk manyak dan ureuëng tuha banmandum geupeusaban rata. 26 Ulôn keuneuk peusampôh awaknyan bube nyang na, mangat awaknyan hana teu ingat-ingat le. 27 Teuma Ulôn hana Lôn tem musoh Israel jimeu bangga; hana-hana awaknyan salah sangka dan jipeugah awaknyan jipeutaloe umat Ulôn,' padahai ulôn kheueh nyang peubuet lagéenyan. 28 Israel nyan na kheueh saboh bansa nyang hana peutimbangan; meunan cit deungon peungeurtian hana nibak jihnyan. 29 Meunyoe nibak awaknyan na keubijak sanaan, awaknyan jituóh muphom, dan jipike teuma keuhai susah droe jih. 30 Pakriban sidroe ureuëng hase jitiyeueb ureuëng laén siribée droe, dan ngon dua droe ureuëng hase siploh ribée droe ureuëng jiplueng? TUHAN, Po teu Allah awaknyan, ka geupeubloe awaknyan; awaknyan ka geutinggai lé Po teu Allah nyang peukasa. 31 Musoh Israel jiteupeue bahwa peulindong awaknyan bukon lagée Po teu Allah peulindong ureuëng Israel. 32 Sabab awaknyan jeuhet lagée Sodom dan Gomora, lagée bak anggô nyang phet dan meuracon teuma boh jih. 33 Ié anggô awaknyan na kheueh racon uleue nyang that meubisa. 34 TUHAN geuingat buet musoh umat Geuh dan geuhuköm awaknyan óh trok bak watée jih. 35 TUHAN teuma geubalah dan geuhuköm awaknyan, hana treb le awaknyan banmandum rhot ubak binasa; watée awaknyan hanco ngon sikeujab teuma teuka. 36 TUHAN teuma geupeuseulamat umat Gobnyan dan geugaséh banmandum hamba-hamba Gobnyan, meunyoe geukalon awaknyan hana meudaya dan ka habéh dumna teunaga. 37 Teuma TUHAN geutanyong ubak umat Gobnyan 'Dipat ilah-ilah nyang teuga nyang gata peubangga nyan?' 38 Awaknyan teuma jipajoh gapah nyang gata peuseumah, dan jijieb ié anggô nyang gata keureubeuen nyan. Tayue kheueh awaknyan jiteuka mangat jitulông gata, bah kheueh awaknyan jeuet keu peulindong gata. 39 Gata kalon kheueh, Ulôn kheueh Po teu Allah Nyang Esa, hana laén Allah seulaén Ulôn. Ulôn teuma nyang peumaté meunan cit nyang peu udeb, nyang peuluka meunan cit nyang peupuléh. Meunyoe Ulôn teuma Lôn tindak, hana meusidroepi nyang hase jilawan. 40 Deumi keu Ulôn keudroe, Allah nyang udeb nyoe, Ulôn beuôt jaroe Ulôn dan Lôn meusumpah: 41 Ulôn teuma Lôn asah peudeueng nyang meukilat, dan Lôn keureuja laju buet meuhuköm nyan. Ulôn balaih banmandum lawan Ulôn dan Ulôn huköm banmandum nyang ji banci keu Ulôn. 42 Bubena aneuk panah Ulôn banmandum meulabo ngon darah awaknyan; banmandum ureuëng nyang jilawan Ulôn kucang sampoe maté ngon peudeueng Ulôn. Hana Ulôn peubiyeu meusidroepi jilawan Ulôn; meunan cit deungon ureuëng nyang teuteun lam glab dan nyang luka-luka harôh maté banmandum. 43 Hai bansa-bansa, gatapujoe kheueh umat TUHAN, sabab TUHAN geuhuköm banmandum nyang poh awaknyan. Gobnyan geubalaih dam ateueh musoh Geuhnyan teuma geupeu amphon desya umat Gobnyan." 44 Nabi Musa dan Yosua aneuëk Nun jikheun nyanyoe nyan, sampoe banmandum bansa Israel hase jideungoe nyan. 45 Óh ka lheueh geupeusampoe bubena ajaran-ajaran TUHAN ubak bansa Israel, 46 Nabi Musa geupeugah, "Gata seutôt kheueh banmandum peurintah nyang ulôn peusampoe ubak gata nibak uroe nyoe. Gata peurunoe kheueh nyan ubak aneuëk-aneuëk gata, mangat awaknyan deungon seutia jipeubuet banmandum huköm TUHAN. 47 Ajaran nyan bukon kheueh ajaran kosong nyang hana meumakna, teuma na kheueh ajaran nyang udeb. Taát kheueh ubak banmandum peurintah nyang na teutuléh didalam nyan, mangat umu gata panyang di dalam nanggroe nyang hana treb le gata duek di meurandeh Krueng Yordan." 48 Bak uroe nyan cit teuma TUHAN meufeureuman ubak Nabi Musa, 49 "Gatajak kheueh ubak gunong-gunong Abarim di nanggroe Moab dimeurandeh banda Yerikho. Gata ék kheueh laju u Gunong Nebo dan gata pandang kheueh u tanoh Kanaan nyang hana treb le teujok keu bansa Israel. 50 Gata teuma meuninggai di ateueh gunong nyan, lagée Nabi Harun syedara gata meuninggai di ateueh Gunong Hor. 51 Gata bandua hana seutia ubak Ulôn dan hana gata horeumat Ulôn dikeue bansa Israel bak watée gata mantong na nibak mata ié Meriba, hana jiôh ngon banda Kades, di padang pasi Zin. 52 Lé sababnyan gata hana jeuet gata tamong u nanggroe nyang Ulôn bri keu bansa Israel; teuma gata mantong jeuet tapandang nyan rot jiôh."

Kitab Teu-Ulang 33

1 Sigohlom meuninggai donya, Nabi Musa utosan Po teu Allah nyan, geubri beureukat ubak bansa Israel deungon haba lagéenyoe: 2 "TUHAN teuka nibak Gunong Sinai; Gobnyan geuteubiet di ateueh Edom lagée mata uroe dan di Gunong Paran Gobnyan geubri cahya keu umat Geuhnyan. Gobnyan geupeungon sajan lé siploh ribée droe malaikat; apui hu disiblah uneuen Gobnyan. 3 Keubit, TUHAN that-that geugaséh keu bansa Gobnyan Gobnyan geulindong mandum ureuëng nyang ka jeuet keu hak milék Geuhnyan. Jak kheueh geutanyoe ta sujut dikeue gaki Gobnyan dan tataát banmandum bubena peurintah Gobnyan. 4 Huköm nyang geubri lé Nabi Musa geutanyoe taát, sabab nyan na kheueh milék nyang paleng meuyuem keu bansa nyoe. 5 Bak watée Israel geupeusapat deungon dumna peumimpén jih nyan, TUHAN jeuet keu Raja ateueh umat Gobnyan." 6 Keuhai sukée Ruben, Nabi Musa geupeugah teuma, "Seumoga banmandum sukée Ruben hana nyang binasa, bahpi ureuëng Ruben na bacut sagai." 7 Keuhai sukée Yehuda gobnyan geupeugah teuma: "TUHAN, neudeungoe kheueh Yehuda ji meuhôi Droeneueh; neupeusaboh kheueh lom awaknyan deungon bansa droe jih. Neu muprang kheueh keu awaknyan, ya TUHAN, neutulông kheueh awaknyan ateueh bubena lawan." 8 Keuhai sukée Lewi gobnyan geupeugah teuma: "Deungon Urim dan Tumim neupeugah banmandum keuheundak Droeneueh, meulalu ureuëng Lewi, hamba Droeneueh nyang seutia. Droeneueh ka lheueh neu ujo awaknyan di Masa, dan neu meudakwa ngon awaknyan nibak mata ié Meriba. 9 Awaknyan seutia ubak gata leubeh nibak peue mantong, meunan cit leubeh nibak ureuëng tuha dan kawöm syedara. Peurintah-peurintah Droeneueh awaknyan taát, janji nyang Droeneueh peuget awaknyan keureuja hana piôh dan teupat teuma. 10 Awaknyan ji peurunoe umat Droeneueh mangat jitaát banmandum peurintah Droeneueh dan jipeuseumah keureubeuen di ateueh miseubah Droeneueh. 11 TUHAN, neutulông kheueh sukée nyoe mangat awaknyan teuga, seumoga Droeneueh neuteurimong teuma ubak buet-buet nyang jikeureuja lé awaknyan. Neupeubinasa kheueh banmandum musoh awaknyan sampoe awaknyan hana hasele jibeudôh lom teuma." 12 Keuhai sukée Benyamin gobnyan geupeugah: "Nyoe kheueh sukée nyang geugaséh lé TUHAN. Gobnyan geupeulindong awaknyan uroe ngon malam dan geutinggai teuma lamkawan awaknyan." 13 Keuhai keuturonan Nabi Yusuf gobnyan geupeugah: "Seumoga tanoh awaknyan geubri beureukat lé TUHAN ngon geupeutreun ié ujeuen, dan meunan cit deungon ié nibak miyueb bumoe. 14 Seumoga tieb-tieb musém meuboh kayée meulimpah, boh kayée nyang gét nyang masak di cong bak. 15 Seumoga bukét nibak jamén ilée peunoh ngon hase seunaman nyang isteumewa. 16 Seumoga tanoh nyan geupeulimpah teuma deungon meubagoe jeunéh nyang paleng gét, dan geubri beureukat lé keubaékan TUHAN nyang geumeututoe lam seumak nyang hu. Seumoga beureukat nyan jitreun u ateueh keuturonan Nabi Yusuf, sabab gobnyan kheueh peumimpén di lamkawan bubena syedara-syedara jih nyan. 17 Teunaga Nabi Yusuf nyan na dub teunaga saboh beulatang banteng, dan lungkée leumô agam uteuen nyang kheueh meuribée Manasye dan meuploh ribée teuma Efraim. Bubena bansa banmandum jipok dan jipeusak laju sampoe trok u ujong bumoe." 18 Keuhai sukée-sukée Zebulon dan Isakhar gobnyan geupeugah: " Seumoga Zebulon makmu kareuna nibakjak-nibakjak jih nyan, dan Isakhar seujahtra di dalam khimah-khimah jih nyan teuma. 19 Awaknyan ji undang bansa-bansa u gunong jih nyan dan jipeuseumah keureubeuen nyang beutôi teuma disinan. Awaknyan meuteumé keukayaan nibak lam laôt, dan didalam anoe nibak seutôt binéh panté." 20 Keuhai sukée Gad gobnyan geupeugah teuma: "Teupujoe kheueh Po teu Allah nyang ka geupeuluwah wilayah Gad. Gad jipreh-preh bak lagée saboh singa nyang keuneuk jipriek-priek kulét jaroe ngon kulét ulée. 21 Tanoh nyang paleng gét laju jicok keu droe jih mantong jeumba pimpénan jijok teuma keu awaknyan. Awaknyan jipeubuet mandum peurintah dan huköm TUHAN bak watée banmandum peumimpén Israel jimeusapat teuma." 22 Keuhai sukée Dan gobnyan geupeugah: "Dan nyan na kheueh lagée saboh singa nyang mantong muda nyang jigrob u luwa nibak Basan." 23 Keuhai sukée Naftali gobnyan geupeugah: "Naftali geubri limpah ngon geunaséh TUHAN; wilayah jih phon di Danau Galilea trok u seulatan." 24 Keuhai sukée Asyer gobnyan geupeugah: "Asyer geubri beureukat leubeh nibak sukée-sukée laén; seumoga gobnyan jeuet keu geunaséh dumna syedara-syedara geuh nyan, dan bak zaiton timoh ngon subô di ateueh tanoh jih nyan. 25 Seumoga banda-banda jihnyan geulindong deungon pintoe-pintoe geureubang teumaga dan beuso mangat udeb jih sabe lam aman dan teuntram." 26 "Hai Israel! Hana ilah laén nyang lagée Po teu Allah gata; Gobnyan geujak di ateueh langét deungon jaya dan geu lhôb ngon geujak didalam awan keu geujak tulông gata. 27 Po teu Allah kheueh siumu masa nyang jeuet keu peulindong gata, jaroe Gobnyan nyang kong nyan jeuet keu sinumpang gata. Gobnyan geu use musoh dikeue gata, dan geuyue teuma gata mangat tajak peubinasa awaknyan. 28 Teuma keuturonan Nabi Yakub udeb deungon aman dan teuntram di nanggroe nyang meulimpah gandom dan ié anggô, dan geupeutreun ngon iémbon di langét. 29 Mubahgia kheueh gata, hai Israel! Hana bansa laén nyang lagée gata nyang ka geupeuseulamat lé TUHAN. TUHAN na kheueh lagée peudeueng dan peurisai keu gata; keu geubila gata dan geupeumeunang ateueh gata. Bubena musoh-musoh gata jiteuka jijak lakée beugata wéueh ngon tagaséh awaknyan, dan gata teutab tagiloe-giloe awaknyan ngon gaki droe gata."

Kitab Teu-Ulang 34

1 Nabi Musa geutinggai laju tanoh data Moab nyan dan geujak teungoh laju u ateueh Gunong Nebo, di pucak Pisga di siblaih u timu Yerikho. Di sinan TUHAN geutunyok ubak Nabi Musa banmandum nanggroe nyan, na kheueh: Wilayah Gilead u utara sijioh banda Dan; 2 banmandum wilayah Naftali; wilayah Efraim dan Manasye, wilayah Yehuda u barat sijioh Laôt Teungoh; 3 u bagian seulatan Yehuda dan tanoh data nyang meureuntang phon di Zoar u Yerikho, banda nyang peunoh jitimoh lé bak keuruma. 4 Laju TUHAN meufeureuman ubak Nabi Musa, "Nyang kheueh nanggroe nyang ka Ulôn peujanji bak Nabi Ibrahim, Nabi Ishaq dan Nabi Yakub mangat jiseurah ubak keuturonan awaknyan. Ulôn peuleumah nyan bak gata hai Nabi Musa, teuma hana Lôn bri idhin gata tajak keunan." 5 Laju meuninggai kheueh teuma Nabi Musa hamba TUHAN nyan di tanoh Moab, lagée nyang ka geupeugah lé TUHAN sigohlom nyan. 6 TUHAN laju geupeutamong Nabi Musa nyan u dalam jrat nibak saboh pantôn di Moab di meurandeh banda Bet-Peor, teuma sampoe nibak uroenyoe hana meusidroepi jiteupeue deungon paih dipat makam Nabi Musa nyan. 7 Nabi Musa meuninggai donya lam umu sireutôh dua ploh thon. Teunaga gobnyan hana meukureueng dan meunan cit mata gobnyan mantong trang watée geukeumalon. 8 Di ateueh darat Moab nyan bansa Israel laju jipeuratok keu Nabi Musa nyang ka meuninggai nyan dan awaknyan jimeukabong nyang treb jih lhée ploh uroe. 9 TUHAN laju geubri keulimpahan keu Yosua aneuëk Nun deungon keubijaksanaan sabab jih nyan ka geutunyok lé Nabi Musa sibagoe geunantoe gobnyan. Bansa Israel jitaát ubak Yosua dan jipatuh teuma ubak peurintah-peurintah nyang lé TUHAN geujok keu awaknyan meulalu Nabi Musa. 10 Di Israel hana le nabi nyang lagée Nabi Musa nyan nyang geumeututoe meuhadab keue deungon TUHAN. 11 Hana nyang peubuet mujizat-mujizat dan buet-buet ajaéb lagée nyang ka geupeubuet lé Nabi Musa di nanggroe Meusé, raja awaknyan dan bubena peujabat awaknyan sisuai deungon peurintah TUHAN. 12 Hana ureuëng nyang jipeubuet-buet nyang hebat dan dahsyat ngon takjôb lagée nyang ka geupeubuet lé Nabi Musa dikeue bansa Israel.

Yosua 1

1 Óh ka lheueh Nabi Musa wafeuet geutinggai donya nyoe, hamba TUHAN nyan, TUHAN geupeugah ubak waki Nabi Musa, nyan kheueh Yusoa aneuëk Nun. 2 TUHAN meufeureuman, "Hamba Ulôn Nabi Musa ka wafeuet. Teuma jinoenyoe bah kheueh gata dan banmandum umat Israel meusiab-siab keu tajak jeumeurang u meurandeh Krueng Yordan, dan gata tamong u nanggroe nyang Ulôn bri keu awaknyan. 3 Ulôn ka lheueh Lôn peugah ubak Nabi Musa bahwa tieb-tieb wilayah nyang gata gilo atranyan ka Ulôn bri keu gata, Yosua dan meunan cit keu banmandum umat Ulôn. 4 Wilayah gata teuma meureuntang phon di padang pasi siblaih u seulatan trok u gunong-gunong Libanon di utara dan phon Krueng Efrat nyang raya nyan di siblaih u timu trok laju u bansaboh nanggroe bansa Het dan trok laju lom u Laôt Teungoh di siblaih u barat. 5 Meusidroepi hana nyang hase jipeutaloe gata, Yosua, siumu udeb gata. Sabab Ulôn teuma na sabe meusajan gata lagée yoh masa ilée Ulôn meusajan deungon Nabi Musa. Ulôn hana teuma Lôn tinggai gata. 6 Bah kheueh gata yakén dan tajeuet, sabab gata teuma tapimpén bansa nyoe bak watée awaknyan jijak u nanggroe nyang ka Ulôn peujanji ubak indatu awaknyan. 7 Teuma, bah kheueh gata biet-biet yakén dan gata jeuet. Gata harôh tajaga mangat gata tataát ubak banmandum huköm nyang geupeusampoe lé Nabi Musa hamba Ulôn nyan keu gata dan bék tapeulalée hai nyan meubacutpi, teuma gata meuhase. 8 Kitab huköm nyan harôh kheueh beusabe na gatabeuet keu umat Ulôn. Gata meuruno kheueh nibak kitab nyan uroe ngon malam, mangat peue nyang na teutuléh didalam nyan sabe gata peubuet. Meunyoe gata tapeubuet banmandum nyan, udeb gata teuma makmu dan meuhase. 9 Ingat, Ulôn ka Lôn bri peurintah ubak gata mangat gata biet-biet yakén dan beurani! Bék kheueh gata takot dan kureueng seumangat, sabab ulôn TUHAN Po teu Allah gata sabe na meusajan gata bahpi ho mantong nyang gata jak." 10 Teuma Yosua laju geupeurintah ubak peumimpén-peumimpén umat Israel 11 mangat jijak keulileng banmandum khimah umat Israel dan laju teubri peurintah nyan lagée nyoe, "Gata peusiab kheueh laju beukai, sabab lhée uroe teuk gata ka tajeumeurang u meurandeh Krueng Yordan keu gata jak ubak nanggroe nyang ka geubri lé TUHAN Po teu Allah gata keu gata." 12 Keu sukée Ruben, sukée Gad, dan siteungoh nibak sukée Manasye, Yosua geupeugah, 13 "Ingat! Nabi Musa hamba TUHAN nyan ka geupeugah ubak gata bahwa tanoh di siblaih u timu Krueng Yordan nyoe geubri lé TUHAN Allah gata keu gata mangat jeuet keu nanggroe gata. 14 Banmandum aneuëk peurumoh gata meunan cit deungon beulatang peulara gata jeuet tinggai disinoe, teuma bubena ureuëng peujuang gata harôh kheueh siab jijak meuprang leubeh awai nibak ureuëng-ureuëng Israel nyang laén jijak jeumeurang Krueng Yordan. 15 Gata harôh tatulông awaknyan sampoe awaknyan jiteumé duek nibak tanoh disiblaih u barat Krueng Yordan nyoe nyang geubri lé TUHAN Po teu Allah gata keu awaknyan. Óh ka lheueh TUHAN geubri keuamanan keu banmandum bansa Israel, barô kheueh gata jeuet tagisa ubak tanoh gata keudroe disiblaih u timu Yordan nyoe, nyang ka geubri lé Nabi Musa hamba TUHAN nyan keu gata." 16 Teuma lé sukée Ruben, Gad dan siladum nibak sukée Manasye nyan laju jijaweueb, "Peue mantong nyang neupeurintah keu kamoe, hai nyan teuma kamoe peubuet, dan ho mantong nyang neuyue jak kamoe, meunan cit hai nyan teuma kamoe jak. 17 Kamoe teuma taát ubak droeneueh, saban cit lagée kamoe taát ubak Nabi Musa. Seumoga TUHAN Po teu Allah droeneueh sabe na meusajan droeneueh saban cit lagée TUHAN Po teu Allah na sabe meusajan Nabi Musa! 18 Soe mantong ureuëng nyang hana jitem tundok ubak keukuasaan droeneueh, atawa hana jitem seutôt peue nyang droeneueh peurintah, ureuëng nyan teuma teuhuköm maté. Bah kheueh droeneueh yakén dan beurani!"

Yosua 2

1 Óh lheuehnyan nibak khimah-khimah di Sitim, Yosua geukirém laju dua droe mata-mata u Kanaan. Bandua droe ureuëng nyan geubri peurintah mangat jijak seulidek nanggroe Kanaan deungon cara seungab-seungab, nyang paleng peunteng na kheueh banda Yerikho. Dan jijak kheueh awaknyan ban dua droe u banda nyan, dan laju jimudom di rumoh sidroe ureuëng inong jeuhet nyang nan jih Rahab. 2 Raja banda Yerikho geudeungoe bahwa nibak malam nyan na ureuëng Israel nyang teuka jijak luem ngon jijak mata-mata banda Yerikho. 3 Teuma lé raja nyan laju geuyue jak ureuëng ubak Rahab keu jijak peusampoe peurintah nyoe, "Gata peuteubiet laju ureuëng-ureuëng nyang na jimudom didalam rumoh nyan. Awaknyan na kheueh mata-mata nyang teuka keuneuk jiseulidek bansaboh banda Yerikho!" 4 "Keubit beutôi na ureuëng jijak u rumoh ulôn," jijaweueb lé Rahab, "teuma ulôn hana lôn teupeu awaknyan teuka rot pané. Dan lom teuma awaknyan ka jijak bunoe bak watée uroe ka seupôt sigohlom pintoe geureubang teutôb. Dan meunan cit teuma ulôn hana teuma lôn tanyong ho awaknyan jijak, teuma meunyoe awaknyan bagaih-bagaih teujak tiyeub, mungken mantong hase meurumpok." (Padahai si Rahab nyan ka jisöm bandua droe ureuëng mata-mata nyan di miyueb sinumpok rami di bagian ateueh rumoh jihnyan.) 7 Dan jipeujak kheueh laju banmandum utosan raja nyan sira jitinggai banda. Óh ka trok awaknyan u luwa, laju pintoe geureubang banda jitôb. Dan awaknyan laju teuma jimita ban dua droe mata-mata nyan sampoe ubak teumpat jeumeurang nibak binéh Krueng Yordan. 8 Malam nyan sigohlom bandua droe ureuëng mata-mata Israel nyan teungeut nibak teumpat éh, lé Rahab laju jiék u bagian ateueh rumoh jijak meurumpok deungon ban dua droe mata-mata ureuëng Israel nyan, 9 dan laju jikheun bak awaknyan bandua, "Dilôn lôn teupeu bahwa TUHAN ka geubri nanggroe nyoe keu droeneueh. Banmandum ureuëng nyang na disinoe jitakot keu droeneueh nyoe. 10 Kamoe ka kamoe deungoe haba keuhai pakriban TUHAN geupeutho Laôt Geulagah dikeue droeneueh nyoe, bak watée awaknyoe ta tinggai nanggroe Meusé. Meunan cit kamoe disinoe ka kamoe deungoe pakriban droeneueh nyoe neupôh maté Sihon dan Og, bandua droe raja bansa Amori nyan di siblaih u timu Krueng Yordan. 11 Meunan kamoe deungoe mandum ceurita-ceurita nyan, kamoe nyoe banmandum jeuet keuteumakot that. Banmandum ureuëng-ureuëng kamoe ka gadôh ceubeueh ngon beuhe sabab lé awaknyoe. TUHAN Po teu Allah droeneueh keubiet Allah nyang beutôi dan Allah nyang Mahakuasa di ateueh langét meunan cit di ateueh bumoe. 12 Ulôn meuharab droeneueh nyoe neutem meusumpah deumi nan Gobnyan bahwa droeneueh nyoe neupeusaneut ulôn dan keuluwarga ulôn deungon jroh lagée nyang ka ulôn peubuetnyoe ateueh droeneueh. Neumeujanji kheueh bahwa ayah ngon ma ulôn, bubena syedara ulôn, dan banmandum keuluwarga awaknyan hana teuma neupoh maté, teuma droeneueh bri peulindongan. Dan keuhai nyan neubri kheueh saboh tanda sibagoe jaminan bahwa droeneueh nyoe jeuet ulôn peucaya!" 14 Teuma jijaweueb lé bandua droe awaknyan, "Kamoe meujanji bahwa meunyoe TUHAN geubri nanggroe nyoe keu kamoe, kamoe teuma kamoe peusaneut gatanyoe deungon jroh, asai gata hana tapeugah ubak so mantong keuhai kamoe. Bah kheueh TUHAN geuseurapa kamoe meunyoe kamoe hana kamoe peuteupat janji nyan." 15 Sabab rumoh Rahab nyan teupeugét nibak beuton banda, Rahab jipeutreun laju bandua droe ureuëng nyan deungon talo ret tingkab. 16 "Gata jak kheueh u daerah meugunong-gunong," jipeugah lé Rahab ubak awaknyan, "Mangat ureuëng-ureuëng nyang geukirém lé raja hana jiteumé drob awaknyoe. Droeneueh musöm kheueh disinan nyang treb jih lhée uroe sampoe awaknyan jigisa lom teuma, barô kheueh awaknyoe jeuet neujak teuma lom." 17 Bandua droe ureuëng mata-mata nyan jipeugah laju bak Rahab, "Get kheueh meunyoe meunan, kamoe teuma kamoe peuteupat janji nyang ka gata lakée nibak kamoe. 18 Teuma nyoe kheueh nyang harôh gata peubuet. Meunyoe kamoe ka kamoe jak prang nanggroe gata nyoe teuma, bah kheueh talo mirah nyoe gata ikat laju nibak peuradeun teumpat gata peutreun kamoe nyoe. Ayah ngon ma gata, meunan cit deungon banmandum syedara-syedara gata, banmandum waréh kawöm keuluwarga ayah gata bah kheueh gata peusapat di rumoh nyoe. 19 Meunyoe na sidroe lamkawan awaknyoe nyang jiteubiet nibak rumoh nyoe dan maté keunong poh, maté ureuëng nyan na kheueh akibat salah jih keudroe; kamoe hana meutanggong jaweueb ateueh hai nyan. Teuma meunyoe na nyang meuteumé bala atawa ceulaka nibak lam rumoh nyoe, nyan na kheueh kamoe nyang meutanggong jaweueb. 20 Teuma sikeubiet jih, meunyoe gata tabri tée keuhai kamoe nyoe ubak sidroe-droe ureuëng, deungon nyan teuma kamoe hanale teu ikat deungon janji nyang ka gata lakée nibak kamoe." 21 Rahab laju situju keuhai nyan, jipeubiyeu mantong awaknyan jijak teuma. Óh lheueh nyan si Rahab laju ji ikat talo mirah nyan ubak peuradeun jih lagée nyang ka jiyue lé mata-mata nyang dua droe nyan. 22 Teuma jijak kheueh laju bandua droe mata-mata nyan u daerah nyang meu gunong-gunong dan jimusöm kheueh laju disinan. Lhée uroe treb jih utosan raja nyan jijak mita-mita awaknyan ho-ho mantong bansaboh daerah nyan, teuma awaknyan teutab hana jiteumé. Akhé jih utosan-utosan nyan laju jiwoe lom u Yerikho. 23 Dan óh lheueh nyan bandua droe ureuëng mata-mata Israel nyan jitreun kheueh teuma laju nibak ateueh gunong teumpat awaknyan musöm laju jijak jeumeurang krueng, dan óh lheueh nyan jijak gisa teuma ubak Yosua. Banmandum peungalaman awaknyan jilapor laju ubak Yosua nyan. 24 Óh lheueh nyan awaknyan jipeugah, "Pasti TUHAN geubri banmandum nanggroe nyan keu geutanyoe; banmandum ureuëng nyang na disinan jitakot keu geutanyoe."

Yosua 3

1 Óh singoh beungoh nyan, Yosua dan banmandum umat Israel jibeudôh nibak éh watéenyan mantong seuboh buta, laju jijak dan jitinggai teumpat khimah-khimah awaknyan di Sitim, dan jijak laju u Krueng Yordan. Disinan awaknyan jipeudong lom khimah sira jipreh-preh watée jih mangat jeuet jijeumeurang. 2 Óh ka liwat lhée uroe, bubena ureuëng peumimpén nyan geukeulileng laju banmandum khimah-khimah, 3 dan laju geubri peurintah lagéenyoe keu umat Israel, "Meunyoe na gata kalon imeum-imeum geuseuôn Peuto Peujanjian TUHAN Po teu Allah gata, bah kheueh gata jak laju gata tinggai teumpat khimah-khimah nyoe. Gata seutôt kheueh Peuto nyan, 4 teuma bék gata peurab nyang to-to that nibak Peuto nyan; gata seutôt kheueh rot likot nyang jarak jih kira-kira sikilo metée. Deungon na lagée nyan gata teuma tateupeue rot nyang harôh gata jak, sabab gata gohlom na tajak u daerah nyoe." 5 Yosua geupeugah laju ubak umat Israel, "Bah kheueh gata nyoe tapeugleh droe, sabab singoh beungoh TUHAN teuma geupeubuet-buet nyang ajaéb lamkawan gata." 6 Di Yosua geupeurintah laju ubak dumna imeum-imeum mangat geubeuôt Peuto Peujanjian nyan dan laju teuma geuyuejak beu awai nibak umat Israel. Di imeum-imeum nyan jipeubuet laju peue nyang ka geupeurintah ubak awaknyan lé Yosua. 7 TUHAN geupeugah ubak Yosua, "Phon nibak uroenyoe gata teuma Ulôn peujeuet keu ureuëng rayeuk sampoe banmandum umat Israel jibri horeumat keu gata dan jisada bahwa Ulôn na sabe bak binéh gata lagée Ulôn ka lheueh Ulôn peubuet nyang lagée nyan ubak Nabi Musa. 8 Jinoenyoe gata peurintah kheueh laju ubak imeum nyang teungoh jiseuôn Peuto Peujanjian mangat watée ka trok awaknyan u krueng, gatayue bloih laju awaknyan u dalam krueng dan jidong laju nibak binéh krueng nyan." 9 Lé Yosua geutawök laju ureuëng-ureuëng Israel, dan geupeugah, "Gatajak kheueh keunoe dan tadeungoe kheueh laju peue nyang ka geupeurintah lé TUHAN Allah gata ubak gata. 10 Meunyoe gatanyoe mandum tamaju eunteuk, TUHAN pasti geu use ureuëng Kanaan, Het, Hewi, Feris, Girgasi, Amori dan Yebus. Dan nibak watée Peuto Peujanjian TUHAN seumeusta álam jijeumeurang Krueng Yordan leubeh awai nibak gata nyoe, gata teuma takalon bahwa Po teu Allah nyang udeb na lamkawan gata. 12 Jinoenyoe tapiléh kheueh laju ureuëng dua blaih droe -- dan sidroe nibak tieb-tieb sukée bansa Israel. 13 Eunteuk meunyoe imeum nyang seuôn Peuto Peujanjian TUHAN geubloih gaki gobnyan u dalam ié Krueng Yordan nyan, ié nyang teungoh ji-ile nyan teuma putôh; ié nyang ji-ile ditunong laju meugeunang nibak saboh teumpat." 14 Bak watée nyan teungoh musém mupot, lagée ka lazem bak watée nyang lagée nyan ié Krueng Yordan teungoh jiék meuboh bah. Bak watée ureuëng Israel jitinggai khimah-khimah droe jih keu jijak jeumeurang Krueng Yordan, di imeum jijak leubeh awai dikeue sira geuba Peuto Peujanjian. Dan bak watée imeum nyan geugilo gaki gobnyan u dalam ié krueng, 16 bak watée nyan cit teuma ié nyang teungoh ile lam krueng nyan teudong dan laju putôh. Jiôh ideh di pucok krueng, ié nyan laju meusaho di Adam, saboh banda nyang teuduek di siblaih banda Sartan. Ié nyang di barôh nyang ji-ile u Laôt Maté watéenyan cit teuma ka putôh meubacutpi hana le ji-ile, sampoe umat Israel deungon mudah jijeumeurang laju di ateueh tanoh nyang ka tho nyang meuhadab keu deungon banda Yerikho. Di imeum nyang geuseuôn Peuto Peujanjian nyan teutab mantong geudong di teungoh krueng sampoe banmandum umat Israel leupah jijeumeurang u meurandeh.

Yosua 4

1 Óh ka lheueh banmandum bansa nyan katinggai di meurandeh Krueng Yordan nyan, TUHAN laju meufeureuman ubak Yosua, 2 "Gata piléh kheueh laju dua blaih droe ureuëng dan sidroe nibak tieb-tieb sukée. 3 Gata peurintah laju bak awaknyan mangat jijak cok dua blaih neuk batée nyang na di teungoh-teungoh Krueng Yordan, paih nibak teumpat imeum nyan jidong. Gatayue kheueh laju awaknyan mangat jiseuôn batée-batée nyan sampoe u teumpat gata peudong khimah bak watée malam eunteuk." 4 Dan lé laju Yosua geutawök laju ureuëng nyang dua blaih droe nyang ka teupiléh nyan, 5 kheun gobnyan, "Gatajak kheueh laju ubak teungoh Krueng Yordan, u keue Peuto Peujanjian TUHAN Po teu Allah gata. Maséng-maséng harôh gata beuôt si aneuk batée nibak teumpatnyan -- jeumeulah jih dua blaih neuk batée sisuai deungon jeumeulah sukée-sukée nyang na didalam bansa Israel. 6 Batée-batée nyan teuma teupeu ingat keu bansa nyoe keu peue nyang ka geupeubuet lé TUHAN. Pajan-pajan teuma meunyoe aneuëk-aneuëk gata jiteumanyong peue maknajih batée-batée nyoe keu gata, 7 bah kheueh gata bri tée bahwa ié Krueng Yordan teudong ngon teuputôh bak watée Peuto Peujanjian TUHAN teuba ngon teujeumeurang rot lam Krueng Yordan nyan. Batée-batée nyan teuma sabe teupeu ingat keu bansa Israel keuhai peue nyang ka teujadi disinoe." 8 Ban dua blaih droe ureuëng nyanpi laju jipeubuet peue nyang ka geupeurintah lé Yosua nyan. Paih lagée peutunyok TUHAN ubak Yosua, awaknyan jijakcok laju dua blaih neuk batée nibak teungoh Krueng Yordan -- jeumeulah jih sisuai deungon sukée-sukée dalam bansa Israel -- laju atranyan jiba u teumpat khimah-khimah awaknyan. 9 Di teungoh-teungoh Yordan nyan cit teuma, Yosua laju geususon ban dua blaih neuk batée paih bak teumpat geudong lé imeum nyang geuseuôn Peuto Peujanjian nyan. (Batée-batée nyan mantong na disinan sampoe án saát nyoe.) 10 Di imeum-imeum nyan teutab geudong di teungoh-teungoh Yordan sampoe ureuëng nyan seuleusoe jipeubuet banmandum nyang geupeurintah lé TUHAN ubak awaknyan meulalu Yosua. Nyan sisuai deungon peutunyok-peutunyok Nabi Musa ubak Yosua. Deungon bagaih that umat Israel nyan laju jijeumeurang Krueng Yordan. 11 Óh ka banmandum trok u meurandeh krueng, di imeum-imeum nyang geuseuôn Peuto Peujanjian nyan laju geujak dikeue awaknyan. 12 Paih teuma lagée nyang ka geupeurintah lé Nabi Musa, peujuang-peujuang nibak sukée Ruben, Gad dan siladum nibak sukée Manasye, ka leubeh ilée awaknyan jijeumeurang krueng. 13 Banmandum nyan na 40.000 droe ureuëng agam nyang meuseunjata siab keu jijak meuprang. Dikeue TUHAN, awaknyan jijeumeurang laju jituju ubak pantôn rab deungon Yerikho. 14 Uroe nyan geupeubuet hai-hai nyang teupeujeuet bansa Israel jibri horeumat ubak Yosua sibagoe ureuëng rayeuk. Siumu udeb awaknyan ji horeumat gobnyan lagée awaknyan jihoreumat ubak Nabi Musa. 15 Óh lheueh nyan TUHAN geuyue teuma lom Yosua 16 mangat geupeurintah banmandum imeum-imeum nyang seuôn Peuto Peujanjian nyan mangat jiteubit nibak Yordan. 17 Yosua geupeubuet laju peue nyang geuyue lé TUHAN ubak gobnyan. 18 Meunan di imeum-imeum nyan trok ubak binéh krueng, ié krueng nyan ka jipeuphon ile lom dan bohbah lagée nyang ka-ka. 19 Umat Israel laju trok u meurandeh Krueng Yordan nibak tanggai siploh buleuen nyang keu phon, dan laju geupeudong khimah di Gilgal disiblah utimu Yerikho. 20 Nibak teumpatnyan Yosua laju geususon bandua blaih neuk batée nyang teucok lam Krueng Yordan. 21 Lé Yosua geupeugah ubak umat Israel, "Singoh óh ka treb-treb meunyoe aneuëk cucoe gata jitanyong keuhai makna nibak batée-batée nyoe, 22 gata peugah kheueh laju ubak awaknyan bahwa umat Israel jijeumeurang Krueng Yordan nyoe di ateueh tanoh nyang ka tho. 23 Gata meuhaba kheueh ubak awaknyan bahwa TUHAN Po teu Allah gata geupeutoe ié Krueng Yordan nyan mangat jeuet gata banmandum trok u meurandeh, saban cit lagée Gobnyan ka geupeutho ié Laôt Geulagah keu kamoe, 24 Mangat banmandum ureuëng di ateueh donya nyoe jiteupeue padubna rayeuk jih kuasa TUHAN. Dan deungon na nyang lagée nyan gata teuma tahoreumat TUHAN Po teu Allah gata keu siumu masa."

Yosua 5

1 Banmandum raja Amori disiblah u barat Krueng Yordan, dan banmandum teuma raja Kanaan nyang na tinggai di sitot binéh panté Laôt Teungoh jideungoe bahwa Krueng Yordan ka geupeutho lé TUHAN bak watée umat Israel jijeumeurang dalam krueng nyan. Lé sababnyan teuma awaknyan jiteuka teumakot ngon yo sabab lé ureuëng Israel nyan. 2 Bak watée nyan TUHAN geupeugah ubak Yosua, "Gata peugot kheueh sikin nibak batée, lheuehnyan gata peuna lom upacara meusunat keu ureuëng-ureuëng Israel." 3 Teuma Yosua laju geupeubuet peue nyang ka geupeurintah lé TUHAN, dan geupeusunat laju ureuëng-ureuëng Israel nibak teumpat nyang teuboh nan Bukét Meukatan. 4 Bak watée ureuëng-ureuëng nyan jiteubiet nibak nanggroe Meusé, banmandum ureuëng agam ka lheueh teupeusunat. Teuma bak watée awaknyan meugeumbara di padang pasi peuet ploh thon treb jih, aneuëk-aneuëk awaknyan nyang agam meusidroepi gohlom na nyang teupeusunat. Dan nibak akhé masa peuet ploh thon nyan, di ureuëng agam nyang bak watée jiteubiet lam nanggroe Meusé ka trok umu nyang ka pathot jeuet jitamong tantra, banmandum nyan ka habéh meuninggai donya, sabab hana jiseutôt peue nyang ka geupeurintah lé TUHAN. Teuma sisuai deungon sumpah TUHAN, awaknyan hana geubri idhin jijak kalon nanggroe nyang makmu dan subô nyang ka geupeu janji keu indatu awaknyan. 7 Nyang kheueh sabab jih banmandum aneuëk agam awaknyan gohlom na nyang teupeusunat. Geuneurasi barô nyoe kheueh nyang geupeusunat lé Yosua. 8 Óh ka lheueh awaknyan seuleusoe banmandum teupeusunat, awaknyan tinggai laju di khimah-khimah sampoe luka nibak boh nyang keunong peusunat nyan puléh. 9 TUHAN geupeugah ubak Yosua, "Uroe nyoe keuhai hina gatanyoe banmandum yoh mantong na di nanggroe Meusé ka Ulôn sampôh sampoe án habéh." Nyang kheueh sabab jih teumpat nyan geuboh nan Gilgal trok án saát nyoe. 10 Teungoh awaknyan mantong meukhimah di Gilgal di ateueh darat hana jiôh ngon Yerikho, umat Israel laju jipeuna peurayaan Paskah watée seupôt uroe tanggai peuet blaih buleuen nyan. 11 Óh singoh beungoh nyan, keu nyang keu phon that awaknyan jimakheun peunajoh hase nanggroe Kanaan, na kheueh: ruti nyang hana meurago dan gandom nyang teupanggang. 12 Dan bak uroe nyan cit teuma manna hana le rhot nibak ateueh langét, dan ureuëng Israel jipiôh teuma jipajoh manna. Yoh phon watée nyan awaknyan jipajoh peunajoh hase tanoh Kanaan. 13 Bak saboh watée Yosua to that ngon Yerikho. Hana geusangka-sangka na sidroe ureuëng agam ka jidong to that ngon gobnyan dan bak jaroe ureuëng nyan na saboh peudeueng nyang ka teusut lam sarong. Yosua geupeurab laju ubak ureuëng nyan, dan geutanyong, "Kah nyoe rakan peu kheueh lawan?" 14 "Bukon rakan dan bukon teuma lawan," jaweueb ureuëng nyan, "Ulôn teuka keunoe na kheueh sibagoe panglima tantra TUHAN." Óh ban geudeungoe haba nyan laju Yosua geusujut dikeue ureuëng nyan sira geuseumah. Yosua geupeugah, "Ulôn nyoe namiet Teungku. Peue nyang jeuet ulôn peubuet keu Teungku?" 15 Panglima tantra TUHAN nyan geujaweueb, "Gata suet laju sipatu gata nyan; tanoh teumpat gata dong nyan na kheueh tanoh suci." Teuma Yosua laju geusuet sipatu geuh nyan.

Yosua 6

1 Di banda Yerikho banmandum pintoe-pintoe geureubang rot tamong ka jijaga deungon kong that dan jitôb deungon rapat mangat ureuëng Israel hana hase jitamong. Hana meusidroepi nyang jeuet jitamong atawa jiteubiet lam banda nyan. 2 TUHAN geupeugah ubak Yosua, "Jinoenyoe Ulôn seurah ubak gata Yerikho deungon raja jihnyan dan banmandum tantra jih nyang beuhe-beuhe nyan. 3 Gata dan tantra gata harôh gatadong meubaréh takeulileng banda nyan sigoe siuroe nyang treb jih nam uroe. 4 Tujoh droe imeum, maséng-maséng imeum nyan jiba beureuguih, jihnyan harôh kheueh jijak dikeue Peuto Peujanjian. Nibak uroe nyang keutujoh, gata dan tantra gata mandum harôh teuma jikeulileng banda nyan nyang le jih tujoh goe teuma di imeum laju jiyueb beureuguih nyan. 5 Óh lheueh nyan di imeum-imeum nyan harôh kheueh teuma jiyueb beureuguih nyan deungon su nyang panyang. Meunan gatanyoe tadeungoe su nyang panyang nyan, banmandum tantra harôh jisumurak ngon su nyang meugeunta meunan cit deungon riôh nyang meutaga su jih sampoe beuton bintéh banda nyan reuloh sampoe hanco. Laju óh lheueh nyan gata banmandum tatamong laju u dalam banda nyan." 6 Teuma Yosua laju geuhôi bubena imeum, dan geupeugah, "Gata beuôt kheueh Peuto Peujanjian nyan; tujoh droe lamkawan gatanyoe harôh gatajak dikeue nyan sira gataba beureuguih keue awaknyan." 7 Lé Yosua geupeurintah laju ubak tantra geuh mangat jidong meubaréh lheuehnyan geuyue keulileng banda Yerikho nyan, phon that-that lé baresan peungawai keue nyang jijak leubeh awai nibak Peuto Peujanjian TUHAN. 8 Paih lagée peurintah nyang geubri lé Yosua, beurangkat kheueh baresan peungawai nyang dikeue leubeh awai nibak imeum-imeum nyang yueb siruné kale, laju dilikot nyan jiseutôt teuma lé imeum-imeum nyang geuseuôn Peuto Peujanjian, óh lheuehnyan nyang paleng dilikot na kheueh baresan peungawai nyang dilikot. Teungoh awaknyan jijak, siruné kale nyan hana putôh-putôh jipeumeusu sira jiyueb. 10 Banmandum tantra ka geupeurintah bék ji meusurak dan hana teuma jipeuteubiet tutoe bahpi meusikrék haba meunyoe Yosua gohlom geubri peurintah atawa aba-aba. 11 Meunan kheueh Yosua geubri peurintah ngon geuyue tantra geuh nyan keu jiba Peuto Peujanjian dan jikeulileng banda nyan sigoe kong teuma, óh lheueh nyan jigisa lom ubak khimah-khimah, dan laju geumudom disinan. 12 Óh singoh nyan, banseuboh buta, Yosua geubeudôh laju dan keu nyang keudua goejih bubena imeum-imeum dan tantra geuyue mubaréh dan geuyue keulileng bandanyan deungon urotan baresan jih lagée watée nyang ka lheueh: phon-phon that baresan peungawai nyang dikeue, óh lheueh nyan ban tujoh droe imeum nyang yueb siruné kale, lheueh nyan lom imeum-imeum nyang seuôn Peuto Peujanjian, dan keuneulheuh jih baresan peungawai nyang paleng dilikot. Dan di siruné kale laju jiyueb ngon hana piôh-piôh. 14 Nibak uroe nyang keudua nyan awaknyan jikeulileng banda sigoe sagai óh lheueh nyan laju jigisa lom ubak khimah-khimah. Meunan kheueh awaknyan jipeubuet tieb-tieb uroe sampoe trok nam uroe. 15 Bak uroe nyang keutujoh awaknyan laju jibeudôh bak watée mata uroe ka jipeuphon teubiet, laju awaknyan jimeubaréh tujoh goe geukeulileng banda Yerikho nyan deungon cara nyang saban teuma. Teuma bak uroe nyang keutujoh nyan mantong, awaknyan jikeulileng bandanyan tujoh goe. 16 Bak uroe nyang keu tujoh, meunan lé imeum-imeum geuyueb siruné kale nyan, Yosua laju geubri aba-aba geuyue sumurak ubak banmandum pasokan. Kheun Yosua, "TUHAN ka geuseurah bandanyoe keu gata! 17 Bansigom banda meunan cit deungon peue nyang na asoe jih bah kheueh teupeuhanco banmandum nyan na kheueh sibagoe peuseumahan ubak TUHAN. Na kheueh Rahab, ureuëng inong jeuhet nyang lunté nyan meunan cit deungon waréh kawöm keuluwarga jih nyang jeuet teupeubiyeu udeb, sabab jihnyan ka jitulông mata-mata geutanyoe. 18 Hana jeuet teucok peue mantong nibak atra nyang harôh teupeuhanco ngon teupeu ranab. Meunyoe gata tacok cit atra nyang teutam nyan, khimah-khimah ureuëng Israel teuma keunong bala dan beuncana. 19 Mandum barang lagée pirak, méuh, teumaga, dan beuso nyan harôh teupeu khusos keu TUHAN, dan teukeubah didalam teumpat hareuta nyang khusos milék TUHAN." 20 Lé imeum-imeum laju geuyueb siruné kale geuh nyan. Dan meunan ureuëng-ureuëng Israel jideungoe su siruné kale nyan, laju awaknyan jisumurak meuhubo deungon su nyang lumpah teuga, dan bak watée nyan cit teuma beuton bintéh banda Yerikho nyan rhot reuloh meukeupeng-keupeng. Dan banmandum tantra Israel nyan jitamong laju u dalam banda nyang ka reuloh bintéh nyan, deungon nyan teuma banda nyan laju geureubot nibak ureuëng nyang na duek dan tinggai disinan. 21 Banmandum nyang na tinggai didalam banda nyan, tuha muda, ureuëng agam ngon ureuëng inong, laju jicang deungon peudeueng sampoe maté. Meunan cit banmandum beulatang peulara leumô ngon bubiri dan keuleudée banmandum nyan jipoh maté. 22 Keu ureuëng nyang dua droe nyang ka jeuet keu mata-mata, Yosua geupeugah, "Gatajak kheueh laju u rumoh inong jeuhet nyang lunté nyan, dan gata peuteubiet kheueh awaknyan meusigoe deungon banmandum keuluwarga jih nyan lagée nyang ka gata peujanji ubak jihnyan." 23 Teuma bandua droe ureuëng mata-mata nyan laju jijak, dan laju jipeuteubiet Rahab meusajan deungon ban dua droe ureuëng syiek jih, syedara-syedara jih, dan waréh kawöm nyang laén. Banmandum keuluwarga Rahab nyan meunan cit deungon namiet-namiet jih laju jiba u luwa u teumpat nyang aman hana that jiôh deungon khimah-khimah Israel. 24 Óh lheueh nyan tantra Israel laju jitot sampoe habéh banmandum banda nyan deungon peue mantong nyang na didalam banda nyan, keucuali barang-barang méuh, pirak, teumaga dan beuso. Barang-barang nyan awaknyan cok dan laju jiba ngon jikeubah nibak teumpat keuneubah hareuta milék TUHAN. 25 Teuma Rahab ureuëng inong jeuhet nyang lunté nyan deungon banmandum kawöm keuluwarga jih geupeubiyeu udeb lé Yosua, sabab awaknyan ka jitulông bandua droe mata-mata nyang geu kirém lé Yosua u Yerikho. (Sampoe nibak uroe nyoe keuturonan Rahab mantong na di Israel.) 26 Bak watée nyan Yosua geupeu teubiet larangan nyang lagée nyoe, "Soe mantong nyang ji useuha ji peugot lom banda Yerikho nyoe, ureuëng nyan teuma keunong kutok nibak TUHAN. Soe mantong nyang keubah keunaleueng jih ureuëng nyan teuma gadôh aneuëk tuha; dan soe nyang peudong pintoe-pintoe geureubang jih nyan ureuëng nyan gadôh teuma aneuëk tulot." 27 TUHAN na meusajan Yosua, dan nan Yosua jeuet keumeusyeuhu bansaboh nanggroe nyan.

Yosua 7

1 TUHAN ka geupeurintah ubak umat Israel bahwa nibak peue mantong nyang na di banda Yerikho nyang harôh teupeuranab, sapeuepi hana jeuet teucok. Teuma peurintah nyan hana jitirot. Sidroe ureuëng agam nyang nan jih Akhan ji iengkeue keu peurintah nyan, sampoe TUHAN beungéh that-that keu umat Israel. (Ureuëng syiek Akhan nyang nanjih Karmi dan nék jih nyang meunan Zabdi nibak kawöm Zerah dalam sukée Yehuda.) 2 Bak watée nyan Yosua geu kirém meupadub droe ureuëng nyang na di Yerikho u Ai, na kheueh saboh banda di siblaih u timu Betel, hana that jiôh ngon Bet-Awen. Ureuëng-ureuëng nyan geubri tugaih mangat jijak seulidek daerah nyan. Óh ka lheueh seuleusoe awaknyan jipeubuet tugaih nyan, 3 awaknyan laju jiwoe teuma dan jijak lapor laju hai nyan ubak Yosua. Jipeugah lé awaknyan, "Hana peureulée geutanyoe banmandum tajak seurang Ai. Neukirém mantong kira-kira dua atawa lhée ribée droe. Bék teukirém banmandum tantra keudeh keu jijak meuprang, sabab banda nyan banda ubit." 4 Jadi nyang jak seureubu banda nyan na kheueh lhée ribée droe tantra, teuma awaknyan jipeutaloe dan tantra Yosua nyan laju jisurot. 5 Ureuëng-ureuëng Ai laju jitiyeub awaknyan phon nibak pintoe geureubang Ai sampoe u daerah tambangan, laju jipoh maté na kira-kira lhée ploh nam droe nibak tantra nyan dan hainyan teujadi to that ngon binéh barieh gunong. Teuma di ureuëng Israel ka jeuet keu yo ngon teumakot. 6 Yosua dan peumimpén umat Israel that-that seudeh deungon keujadian nyan, akibat seudeh jih awaknyan laju jipriek-priek peukayan jih nyan maséng-maséng, dan sipanyang uroe sampoe án malam awaknyan jisujut dikeue Peuto Peujanjian TUHAN deungon cara jibôh abée di ateueh ulée jih keudroe sibagoe tanda meuseudeh até. 7 Yosua geupeugah ubak TUHAN, "Ya Allah Po TUHAN ulôn! Keupeue Droeneueh neuba kamoe sampoe u meuradeh Krueng Yordan nyoe? Peu kheueh keuneuk neuseurah kamoe keu ureuëng-ureuëng Amori? Mangat jeuet kamoe banmandum maté? Leubeh gét kamoe tinggai disideh mantong, di meurandeh Krueng Yordan! 8 Ya TUHAN lôn! Musoh ka jiheuntam ureuëng-ureuëng Israel sampoe awak nyan ka jisurot. Jinoenyoe peue nyang harôh ulôn peugah? 9 Ureuëng Kanaan dan mandum ureuëng laén nyang na tinggai di daerah nyoe teuma jideungoe keuhai nyan. Awaknyan teuma jikeupông dan jipoh maté kamoe banmandum! Laju peu kheueh nyang Droeneueh peubuet keu neupeuteun keuhoreumatan Droeneueh?" 10 TUHAN laju geujaweueb ubak Yosua, "Beudôh! Hana meuguna gata sujut lagée nyan u ateueh tanoh! 11 Ureuëng Israel ka jipeubuet desya. Ulôn ka Lôn peurintah mangat awaknyan jitaát ubak peujanjian lé awaknyan deungon Ulôn, teuma awaknyan ji-iengkeue janji nyan! Barang-barang nyang siharôh jih teupeu leunyab ka jicok lé awaknyan. Awaknyan jiceumucue dan laju jisöm atranyan di teungoh barang-barang awaknyan keudroe mangat hana soe teupeue. 12 Nyang kheueh sabab jih awaknyan hana hase meuteun watée meuhadab keue ngon musoh. Awaknyan jipeutaloe lé musoh sabab awaknyan keudroepi ka jipeu rhot huköman keu teupeuhanco sampoe habéh. Ulôn hana Lôn peungon le gatanyoe banmandum, meunyoe barang-barang nyang hana jeuet teucok gohlom gata peuhanco. 13 Jinoenyoe gata beudôh kheueh laju, hai Yosua! Gata peu suci laju umat Israel nyan dan gatayue laju awaknyan siab-siab jijak meuhadab Ulôn. Gata peurintah awaknyan mangat jimeusiab-siab keu singoh beungoh, sabab Ulôn TUHAN Po teu Allah Israel teuma Ulôn peugah nyoe ubak awaknyan: 'Hai ureuëng-ureuëng Israel! Barang-barang nyang ka Ulôn peurintah ubak gata keu teupeu hanco nyan, teuma siladum mantong na nibak gata. Sigohlom gata tatiek sampoe habéh barang-barang nyan, gata hana teuma meuhase gata meuteun talawan musoh!' 14 Sabab nyan, Yosua, gatabri tée kheueh ubak awaknyan bahwa singoh beungoh awaknyan teupeureksa sukée deumi sukée. Meunyoe Ulôn Lôn tunyok saboh sukée, banmandum kawöm dalam sukée nyan harôh jimaju ukeue kawöm deumi kawöm. Dan meunyoe Ulôn tunyok saboh kawöm, banmandum keuluwarga dalam kawöm nyan harôh jimaju ukeue keuluwarga deumi keuluwarga. Óh lheueh nyan meunyoe Ulôn tunyok saboh keuluwarga, tieb-tieb ureuëng dalam keuluwarga nyan harôh kheueh teuma jimaju sidroe deumi sidroe. 15 Laju meunyoe ureuëng nyang teutunyok teunyata na jikeubah barang-barang nyang teularangnyan dan barang nyan harôh teutot sampoe habéh meusigoe deungon keuluwarga ureuëng nyan dan banmandum peue-peue mantong nyang na atra hak milék jih meunan cit harôh teutot beuhabéh banmandum; sabab jihnyan kheueh nyang ka ji-iengkeue peue nyang ka Ulôn peugét peujanjian dan ka teuma jipeubuet buet nyang jeuhet nyang paleng rayeuk lamkawan umat Israel." 16 Óh singoh nyan, ban seuboh buta, Yosua laju geuyue umat Israel mangat jimaju ukeue, sukée deumi sukée, teuma sukée Yehuda kheueh nyang keunong. 17 Laju Yosua geuyue sukée Yehuda nyan jimaju ukeue, kawöm deumi kawöm, dan kawöm Zerah kheueh nyang keunong. Óh lheueh kawöm Zerah nyan geuyue maju teuma ukeue, keuluwarga deumi keuluwarga, dan keuluwarga Zabdi kheueh nyang keunong. 18 Óh lheueh nyan Yosua geuyue teuma keuluwarga Zabdi nyan ji maju ukeue, sidroe deumi sidroe; teuma Akhan, aneuëk Karmi, cucoe nibak Zabdi nyang keunong. 19 Yosua geupeugah laju ubak Akhan, "Aneuëk ulôn, gata meungaku kheueh dan tapeugah kheueh teuma trok trang disinoe dikeue TUHAN Po teu Allah ureuëng Israel, peue nyang ka gata peubuet nyan. Tapeugah kheueh nyan ubak ulôn, bék tasöm-söm keu hainyan." 20 "Beutôi," kheun Akhan, "Ulôn ka lôn peubuet desya ubak TUHAN, Allah Israel. Nyoe kheueh nyang ulôn peubuet: 21 Nibak lamkawan barang-barang nyang tanyoe reubot nyan, déh ulôn kalon siôn ija jubah nyang gét that-that, atranyan meuneuget Babilonia, meunan cit deungon pirak kira-kira dua kilogram, dan sibak méuh ngon brat siteungoh kilogram leubeh. Ulôn meuheuet that-that barang-barang nyan, teuma laju atranyan ulôn cok dan ulôn som laju didalam tanoh nibak khimah ulôn; pirak teukeubah di miyueb that-that." 22 Laju Yosua geu kirém ureuëng laén bagaih-bagaih ubak khimah Akhan nyan. Teunyata barang-barang nyang teutam nyan banmandum na disinan, ka teusöm didalam tanoh, dan pirak jih beutôi na di miyueb that-that. 23 Di ureuëng utosan nyan laju jicok banmandum barang-barang nyan dan jiba laju ubak Yosua dan banmandum ureuëng Israel. Laju banmandum barang-barang nyan jikeubah dikeue TUHAN. 24 Óh lheueh nyan Yosua dan banmandum umat Israel laju geudrob Akhan, dan laju jiba Akhan nyan u Pantôn Keususahan meusigoe deungon banmandum aneuëk jih, beulatang peulara jih lagée leumô, keuleudée, bubiri, khimah, dan banmandum peue-peue mantong nyang na atra Akhan nyan, pirak, jubah dan méuh nyang jicue nyan. 25 Lé Yosua laju geupeugah ubak Akhan, "Keupeue gata peuteuka bala ateueh geutanyoe? Jinoenyoe TUHAN teuma geupeuteuka bala u ateueh gata!" Teuma Akhan meusigoe deungon keuluwarga jih nyan laju jirhom ngon aneuk batée sampoe maté lé banmandum ureuëng Israel. Banmandum hareuta milék jihnyan, dan meunan cit deungon hareuta nyang jicue nyan ka habéh teutot banmandum. 26 Óh ka lheueh nyan teumpat nyan laju teuseubée deungon aneuk batée nyang lumpah le nyang sampoe nibak uroe nyoe teumpat nyan mantong na disinan. Nyang kheueh sabab jih teumpat nyan teupeunan ngon nan Pantôn Keususahan. Teuma reuda kheueh keuhai beungéh TUHAN keu awaknyan.

Yosua 8

1 TUHAN meufeureuman lom ubak Yosua, "Gata peusapat kheueh banmandum tantra gata, dan tajak kheueh laju deungon awaknyan u Ai. Bék yo gata dan bék teumakot! Ulôn teuma Lôn peumeunang gata ateueh raja Ai. Rakyat jih, banda jih, dan nanggroe jih teuma gata reubot. 2 Ai dan raja jihnyan harôh gata peusaneut saban cit lagée gata peusaneut ateueh Yerikho dan raja jihnyan yoh masa ilée. Teuma goenyoe barang-barang jih dan beulatang peulara jih jeuet gata cok keuhak milék gata. Meukeumah-keumah kheueh laju mangat tajak prang bandanyan seucara meudadak rot likot." 3 Teuma Yosua geumeusiab-siab laju keu geujak u Ai meusajan-sajan deungon tantra geuh nyan. Gobnyan geupiléh 30.000 droe peujuang nyang gét, laju geu kirém awaknyan bak watée malam, 4 dan geupeurintah laju lagée nyoe bak awaknyan, "Gatamusöm kheueh u meurandeh jéh nibak banda nyan, teuma bék jiôh that; dan gata meukeumah-keumah kheueh laju keu tajak prang. 5 Ulôn dan aneuëk buah ulôn teuma lôn peurab ubak banda nyan. Meunyoe ureuëng-ureuëng Ai jiteubiet keu jijak lawan kamoe. Kamoe laju kamoe plueng meugisa lom lagée yoh masa ilée. 6 Awaknyan jitiyeub kamoe hana piôh sampoe án jiôh nibak banda nyan, dan jisangka kamoe nyoe kamoe peuplueng droe lagée yoh masa ilée. 7 Bak watée nyan kheueh gata tateubiet nibak teumpat gata musöm, dan gata reubot bandanyan. TUHAN Po teu Allah gata teuma geuseurah keu gata banda nyan. 8 Óh lheueh gata reubot, gatatot kheueh teuma bandanyan, paih lagée nyang ka geupeurintah lé TUHAN. Nyan kheueh tugaih gata." 9 Óh lheueh nyan Yosua geu kirém laju awaknyan, dan awaknyan laju jijak musöm di siblaih u barat Ai lamkawan Ai dan Betel, laju geupreh disinan. Teuma Yosua geubeudôh nibak khimah-khimah umat Israel. 10 Ban seuboh that-that Yosua geubeudôh nibak teumpat éh dan geupeurintah laju ubak pasokan geuh mangat jimeusapat. Óh lheueh nyan gobnyan dan banmandum peumimpén umat Israel laju geuba pasokan geuh nyan u Ai. 11 Pasokan nyan meusajan-sajan deungon Yosua jijak laju ubak pintoe geureubang phon banda Ai, laju jipeudong khimah disiblaih utara, disinan na meuteumé saboh pantôn lamkawan awaknyan dan banda nyan. 12 Leubeh kureueng na 5.000 droe ka geuyue musöm di siblaih u barat banda nyan, lamkawan Ai dan Betel. 13 Lé sababnyan, sinuson pasokan prang nyan geu atoe na kheueh lagée nyoe: markas nyang phon geupeuduek disiblaih utara banda nyan dan pasokan nyang laén siblaih u barat, seudangkan Yosua geujak laju u pantôn nibak malam nyan. 14 Meunan raja Ai jikalon aneuëk buah Yosua bagaih-bagaih jimeutindak. Raja nyan dan meunan cit banmandum sipa-i jih laju jiteubiet jijak u pantôn Yordan keu jijak prang ureuëng Israel nibak teumpat nyang masa ilée. Raja nyan hana jiteupeue bahwa jih nyan teuma jiseurang rot likot. 15 Yosua dan tantra geuh geu surot siulah-ulah gobnyan teungoh geumundo, awaknyan laju jiplueng jituju u padang nyang geureusang. 16 Banmandum ureuëng agam nyang na lam banda Ai jikrah bube nyang na mangat jijak tiyeub Yosua dan angkatan prang gobnyan. Teuma seumaken awaknyan jitiyeub Yosua seumaken jiôh laju awaknyan nibak banda droe jih. 17 Banmandum ureuëng Ai jiteubiet jijak tiyeub ureuëng Israel, akhé jih bandanyan jipeubiyeu mantong teubuka hana le teujaga. 18 Óh lheueh nyan TUHAN meufeureuman lom ubak Yosua "Beuôt kheueh laju kapak gata dan gata peukeu laju u arah Ai; banda nyan jinoenyoe cit Ulôn seurah keu gata." Yosua hana geupreh lé laju geupeubuet peurintah TUHAN nyan. 19 Meunan Yosua geubeuôt jaroe gobnyan, pasukan nyang teungoh jimusöm nyan bagaih-bagaih jibeudôh nibak teumpat jimusöm dan laju jijak seureubu banda nyan, dan hana treb teuma óh lheueh nyan banda nyan meuteumé jireubot nibak Ai. Dan lé awaknyan jitot laju sampoe hangoh ban saboh banda nyan. 20 Ureuëng-ureuëng Ai jipaleng u likot, dan jikalon asab ka meukeubok sampoe u langét. Meunan cit deungon Yosua dan pasokan geuh nyan geukalon cit asab nyan dan laju geusada bahwa pasokan gobnyan nyang laén ka jireubot banda nyan. Jadi, geugisa kheueh laju Yosua meusigoe ngon pasokan geuh nyan keu geujak prang dan geupoh maté banmandum ureuëng Ai. Ureuëng Israel nyang na di banda Ai nyan pi teuka jijak tulông Yosua ngon awaknyan meusajan-sajan jijak prang, sampoe bubena ureuëng Ai ka teukeupông dan hana hase jipeuplueng droe jih le. Hana meusidroe pi nibak ureuëng Ai nyan nyang hase jipeuseulamat droe jih, banmandum awaknyan maté jihpoh lé ureuëng Israel, 23 teuma raja Ai. Jih nyan teudrob laju jiba meuhadab ubak Yosua. 24 Óh ka lheueh pasokan Israel jipoh maté sampoe habéh pasokan musoh nyang jitiyeub awaknyan dipadang nyang geureusang, jigisa kheueh lom awaknyan u Ai, dan laju jijak poh bubena ureuëng disinan. 25 Yosua hana cit lom geupiôh kapak geuh nyan mantong cit geubeuôt-beuôt u ateueh Ai, dan hana lom geupeutreun sampoe bubena ureuëng-ureuëng Ai nyan ka maté banmandum. Bak uroe nyan cit teuma maté kheueh banmandum peunduduek Ai -- 12.000 droe, ureuëng agam dan ureuëng inong. 27 Beulatang peulara dan barang-barang nyang na jireubot nibak banda nyan, laju jicok lé ureuëng-ureuëng Israel jeuet keu hak milék awaknyan, sisuai lagée nyang ka geupeurintah lé TUHAN ubak Yosua. 28 Yosua laju geutot Ai nyan, dan geupeubiyeu mantong lagée nyan jeuet keu rungka-rungka sampoe án jinoe beukaih banda Ai nyang teutot nyan na tinggai. 29 Raja banda nyan laju geugantung bak taméh, dan geupeubiyeu disinan sampoe án seupôt uroe. Bak watée mata uroe ka jilhob, Yosua laju geuyue ureuëng laén jijak cok manyét nyan dan geuyue böih to ngon pintoe geureubang banda. Óh lheuehnyan teumpat nyan laju teuseubée ngon aneuk batée nyang lumpah le. Meunan cit batée-batée nyan sampoe án jinoe mantong na disinan. 30 Óh lheueh nyan Yosua geupeuget teuma saboh miseubah di Gunong Ebal keu TUHAN, Po teu Allah Israel. 31 Miseubah nyan geupeuget sisuai deungon peutunyok-peutunyok nyang na didalam kitab Nabi Musa, hamba TUHAN nyan, ubak ureuëng-ureuëng Israel: "Saboh miseubah nyang teupeuget nibak batée nyang hántom lom teupeubuet deungon alat-alat beuso." Di ateueh miseubah nyan ureuëng Israel jipeuseumah laju keu TUHAN: Keureubeuen nyang teutot dan meunan cit ngon keureubeuen peudamé awaknyan. 32 Nibak teumpat nyan, deungon jipeusaksi lé ureuëng-ureuëng Israel, Yosua laju geutuléh nibak batée-batée miseubah nyan seunalen nibak huköm-huköm TUHAN nyang na meuteumé lam Kitab Nabi Musa. 33 Ureuëng-ureuëng Israel, meunan cit deungon peumimpén-peumimpén, peuwira-peuwira atawa ulée balang-ulée balang jih, hakém-hakém dan meunan cit deungon ureuëng-ureuëng aséng nyang na tinggai lamkawan awaknyan, laju jidong rot deh ngon rot nyoe siblaih meusiblaih Peuto Peujanjian TUHAN meuhadab ubak dumna imeum-imeum Lewi nyang geuseuôn Peuto Peujanjian nyan. Siladum nibak ureuëng nyan jimeuhadab laju ubak Gunong Gerizim, dan siladum teuk teuma geumeu hadab ubak Gunong Ebal. Nabi Musa, hamba TUHAN nyan, ka geupeurintah mangat awaknyan jipeubuet laju hai nyan meunyoe ka trok watée jih keu awaknyan jiteurimong beureukat nyang ka geupeujanji lé TUHAN. 34 Óh lheueh nibak nyan Yosua laju geubeuet teuga-teuga banmandum huköm sisuai deungon nyang na teutuléh lam Kitab Huköm, meunan cit geubeuet deungon beureukat-beureukat dan kutukan-kutukan. 35 Tieb-tieb peurintah Nabi Musa geubaca lé Yosua ubak banmandum umat Israel nyang meusapat disinan, jitamong cit ureuëng inong, aneuëk miet, dan ureuëng aséng nyang na tinggai lamkawan awaknyan.

Yosua 9

1 Haba keuhai Israel ka meunang laju meutabu deungon bagaih that trok laju ubak mandum raja di meurandeh Krueng Yordan -- nibak gunong-gunong meunan cit nibak gaki gunong, dan di darat di ban sipanyang panté Laôt Teungoh trok lom teuma sampoe jiôh u Gunong Libanon di siblaih utara; na kheueh ubak raja-raja Het, Amori, Kanaan, Feris, Hewi dan Yebus. 2 Banmandum raja-raja nyan ka jimeupakat ngon jimeugabong keu jijak prang Yosua dan umat Israel. 3 Teuma ureuëng-ureuëng Gibeon nibak bansa Hewi ka jideungoe keuhai peue nyang ka geupeubuet lé Yosua ateueh Yerikho dan Ai. 4 Dan awaknyan jipeuputôh pakat keuneuk jijak peungeuet Yosua deungon cara jipeudieng di ateueh keuleudée awaknyan: umpang-umpang tuha, dan baluem-baluem anggô nyang ka brok-brok nyang teupeugét nibak kulét. Dan sibagoe beukai, awaknyan jipeusiab keu ruti nyang ka tho dan ka teuma meukulat. 5 Awaknyan jingui peukayan nyang ka brok lom ngon beukaih-beukaih meunan cit deungon sipatu nyang ka tuha lom ka teucob-cob. 6 Deungon keuadaan nyang lagée nyan bagoe awaknyan jijak laju meurumpok deungon Yosua di khimah-khimah Gilgal laju jipeugah ubak gobnyan dan ubak ureuëng-ureuëng Israel, "Kamoe nyoe teuka nibak nanggroe nyang jiôh deungon meukeusut keuneuk peugét peujanjian deungon Teungku-teungku." 7 Teuma ureuëng-ureuëng Israel geupeugah, "Keupeue kamoe peuna janji deungon gata nyoe? Mungken teumpat tinggai gata nyoe na di daerah nyoe mantong!" 8 Awaknyan jipeugah, "Kamoe meutem kamoe peubuet peue mantong nyang Teungku yue ubak kamoe." "Gata nyoe soe? Dan teuma nibak nanggroe pane?" geutanyong lé Yosua ubak awaknyan. 9 Awaknyan jijaweueb, "Kamoe nyoe teuka nibak nanggroe nyang jiôh lagoena, Teungku, sabab kamoe deungoe keuhai TUHAN Po teu Allah nyang neuseumah lé Teungku-teungku. Meunan cit ka kamoe deungoe keuhai banmandum nyang ka teupeubuet di nanggroe Meusé, 10 dan keuhai peue teuma nyang teupeubuet ateueh ban dua droe raja ureuëng Amori disiblaih u timu Krueng Yordan, na kheueh Sihon raja Hesybon meunan cit Og raja Basan nyang tinggai di Asytarot. 11 Peumimpén-peumimpén dan banmandum peunduduek nanggroe kamoe jiyue kamoe mangat kamoe peuna beukai keu kamoe beurangkat keunoe jak meurumpok deungon Teungku-teungku dan ngon nyoe teupeugah bahwa kamoe taklok ubak Teungku-teungku. Sabab nyan, kamoe lakée beumurah até Teungku-teungku keu teupeuna janji deungon kamoe. 12 Cuba kheueh Teungku kalon, ruti beukai nyang kamoe ba nyoe. Bak watée kamoe jak keunoe, ruti nyoe mantong seu-uem. Teuma jinoenyoe, kalon kheueh! Ka tho lom ka teuma meukulat. 13 Dan meunan cit deungon baluem-baluem anggô nyoe mantong barô bak watée kamoe pasoe; teuma jinoenyoe, neukalon kheueh! Ka beukaih ngon teupriek-priek teuma. Meunan cit deungon peukayan kamoe dan sipatu kamoe pi ka teuma teupriek sabab watée kamoe jak nyang lumpah jiôh nyoe." 14 Teuma lé ureuëng-ureuëng Israel jiteurimong bacut nibak peunajoh ureuëng-ureuëng Gibeon nyan, dan hana jitanyong ubak TUHAN keuhai nyan. 15 Laju Yosua geupeuna janji deungon ureuëng-ureuëng Gibeon nyan, dan lam janji nyan awaknyan hana teupoh. Peumimpén-peumimpén umat Israel meunan cit, geumeusumpah keu teupeupeunoh peue nyang ka teupeujanji nyan. 16 Teuma teunyata, bak uroe nyang keu lhée óh ka lheueh peujanjian nyan teupeugét, ureuëng Israel ka trok jijak ubak banda Gibeon, Kefira, Beerot dan Kiryat-Yearim di daerah awaknyan. Dan barô kheueh jiteupeue bahwa teumpat tinggai awaknyan hana jiôh nibak Gilgal. 18 Teuma ureuëng Israel hana jeuet jipoh maté awaknyan, sabab peumimpén-peumimpén Israel ka jimeusumpah keu awaknyan ateueh nan TUHAN Po teu Allah Israel. Banmandum umat Israel that-that meunyeusai keuhai nyan keu peumimpén-peumimpén awaknyan. 19 Teuma peumimpén-peumimpén nyan jijaweueb, "Peue ta keuneuk peugah! Kamoe ka kamoe meujanji ubak awaknyan ateueh nan TUHAN Allah Israel. Jinoenyoe geutanyoe hana jeuet neupeubuet buet nyang jeuhet u ateueh awaknyan. 20 Geutanyoe hana jeuet tapoh awaknyan sabab geutanyoe ka ta meujanji; dan meunyoe geutanyoe ta iengkeue ubak janji nyan Po teu Allah teuma geuhuköm geutanyoe. 21 Lé sababnyan, neupeubiyeu mantong kheueh awaknyan udeb, teuma geutanyoe banmandum ta peujeuet awaknyan keu tukang prah kayée dan tukang gulam ié keu geutanyoe banmandum." Meunan kheueh nyang geuyue lé peumimpén-peumimpén nyan. 22 Dan bubena ureuëng-ureuëng Gibeon nyan geuhôi jak meuhadab ubak Yosua. Yosua laju geupeugah, "Keupeue gatanyoe ta peungeuet kamoe dan gata peugah bahwa nanggroe gata jiôh lagoena, padahai tho disinoe? 23 Sabab gata tapeubuet meunan, Allah geuhuköm gata. Bansa gata teuma sabe jeuet keu namiet, tukang prah kayée dan tukang gulam ié keu Baét Allah ulôn." 24 Awaknyan jijaweueb, "Kamoe peubuet meunan sabab kamoe deungoe bahwa TUHAN Allah nyang Teungku seumah nyan ka geuyue ubak Nabi Musa, hamba Geuhnyan, geubri keu Teungku banmandum nanggroe nyoe dan neupoh maté bubena asoe nanggroe nyoe bak watée Teungku neucok tanoh disinoe. Kamoe teumakot that-that meunyoe kamoe sampoe teupoh maté, nyang kheueh sabab jih hai nyan kamoe peubuet. 25 Jinoenyoe kamoe ka na di miyueb kuasa Teungku. Neupeusaneut kheueh kamoe meunurot bak Teungku hainyan jroh." 26 Teuma nyoe kheueh nyang geupeubuet lé Yosua: gobnyan geulindong banmandum ureuëng nyan dan hana geupeu idhin ubak ureuëng Israel jijak poh awaknyan. 27 Teuma awaknyan geupeujeuet keu namiet -- na kheueh keu tukang prah kayée dan tukang gulam ié keu ureuëng Israel dan keu miseubah TUHAN. Trok án jinoe awaknyan mantong jipeubuet nyang lagée nyan di teumpat nyang geupiléh lé TUHAN jeuet keu teumpat iébadat keu awaknyan.

Yosua 10

1 Adoni-Zedek, raja nyang mat peurintah di Yerusalem, geudeungoe bahwa Yosua ka geureubot dan geupeuhanco banmandum banda Ai, dan jipoh maté teuma raja jih lagée nyang ka geupeubuet ateueh Yerikho dan raja jih nyan. Meunan cit geudeungoe teuma bahwa ureuëng Gibeon ka jipeuna janji keu meusahabat deungon ureuëng-ureuëng Israel dan tinggai lamkawan awaknyan. 2 Peunduduek Yerusalem lumpah teumakot, sabab Gibeon na kheueh banda nyang raya; sabe raya jih deungon banda-banda nyang na raja, dan leubeh rayeuk nibak Ai. Ureuëng-ureuëng jih pi na kheueh peujuang-peujuang nyang carông ngaza nibak mideuen prang. 3 Sabab nyan kheueh Adoni-Zedek ji kirém utosan ubak Raja Hoham di Hebron, Raja Piream di Yarmut, Raja Yafia di Lakhis, dan Raja Debir di Eglon, sira jiba peusan nyoe, 4 "Jak kheueh neubantu ulôn keu lôn jak prang Gibeon, sabab ureuëng-ureuëng disinan ka jipeuna janji meusahabat deungon Yosua dan ureuëng Israel." 5 Teuma ban limong droe raja Amori nyan, na kheueh raja Yerusalem, Hebron, Yarmut, Lakhis dan Eglon jimeusaho, laju deungon banmandum tantra awaknyan, awaknyan jikeupông dan jiprang Gibeon. 6 Ureuëng-ureuëng Gibeon jikirém laju haba nyoe ubak Yosua nyang na nibak khimah-khimah di Gilgal, "Bék neupeubiyeu kamoe keudroe, Teungku! Neuteuka kheueh deungon bubagaih neujak bantu kamoe, sabab tantra nibak banmandum raja Amori di daerah gunong-gunong ka jimeugabong jijak lawan kamoe!" 7 Laju Yosua dan banmandum tantra gobnyan, meunan cit deungon pasokan-pasokan gobnyan nyang gét ngon beuhe, geubeurangkat laju nibak Gilgal keu geujak meuprang. 8 TUHAN meufeureuman ubak Yosua, "Bék gata takot keu awaknyan. Keuhai meunang ka Ulôn bri keu gata, lé sababnyan hana meusidroe pi nibak awaknyan hase jimeuteun jilawan gata." 9 Sipanyang malam nyan Yosua deungon banmandum tantra geuh jijak laju nibak Gilgal u Gibeon, laju geuprang ureuëng-ureuëng Amori nyan ngon hana teusangka-sangka. 10 TUHAN ka geupeu jeuet ureuëng-ureuëng Amori nyan jeuet keu mumang ulée bak watée jikalon tantra Israel. Jai that-that ureuëng Amori nyan geupoh maté di Gibeon, dan nyang mantong udeb laju geutiyeub sira jitreun ngon jilisi binéh gunong di Bet-Horon sampoe jiôh u Azeka dan Makeda disiblaih u seulatan. 11 Bak watée ureuëng-ureuëng Amori teungoh jitreun rot binéh gunong nyan sabab jipeuplueng droe nibak tantra Israel, laju TUHAN geupeutreun ujeuen es nyang raya-raya di langét u ateueh awaknyan ban sipanyang rot sampoe u Azeka. Nyang maté jitimpok lé ujeuen es nyan jiôh leubeh le nibak nyang jipoh lé ureuëng Israel. 12 Bak uroenyan watée TUHAN geupeumeunang ureuëng Israel ateueh ureuëng Amori, Yosua geumeututoe deungon TUHAN. Dan dikeue ureuëng Israel, Yosua geupeugah, "Hai Mata uroe! Neupiôh kheueh di ateueh Gibeon. Dan gata buleuen! Bék kheueh gata minah nibak Pantôn Ayalon." 13 Teuma di mata uroe pi laju jipiôh dan buleuen hana teuma jiminah sampoe ureuëng Israel seuleusoe jipeutaloe bubena musoh-musoh jih nyan. Peuristiwa nyoe na teutuléh lam Kitab Yasar. Si uroe peunoh mata uroe jipiôh nibak teungoh-teungoh langét, dan treb that teuma barô kheueh jilhob. 14 Hántom na teujadi dan meunan cit hana teuma teujadi meu siuroepi nyang lagée uroe nyan, bahwa TUHAN geuseutôt ban lagée nyang jimeuheut lé manusia. TUHAN geumuprang ngon geudong blaih ureuëng Israel! 15 Óh ka lheueh teumuprang nyan, Yosua meusajan-sajan deungon tantra gobnyan geuwoe laju lom ubak khimah-khimah awaknyan di Gilgal. 16 Teuma banlimong droe raja Amori nyan lheueh dan jimusöm didalam saboh guha di Makeda. 17 Ureuëng laén deuh jikalon awaknyan, dan jijak britée laju teumpat awaknyan jimusöm ubak Yosua. 18 "Gata gule laju batée-batée nyang raya nyan u babah guha, dan peuduek teuma peungawai nyang jaga disinan," kheun Yosua, 19 "teuma gatanyoe bék tapiôh disinan. Gata peucrok laju, dan gata prang laju awaknyan rot likot; bék gata peubiyeu awaknyan jitamong u banda-banda jih! TUHAN Po teu Allah gata ka geubri meunang keu gata ateueh awaknyan." 20 Yosua dan ureuëng Israel nyang laén laju geupoh maté bubena ureuëng Amori nyan, teuma na cit lamkawan awaknyan nyang jiplueng u banda droe jih jijak mita teumpat meulindong, sampoe awaknyan hana keunong poh maté. 21 Óh lheueh nyan banmandum tantra Yosua jiwoe deungon seulamat ubak Yosua di teumpat khimah-khimah di Makeda. Hana meusidroe pi di nanggroe nyan nyang jijeuet peugah peue mantong keu jiteuntang ureuëng-ureuëng Israel. 22 Óh lheueh nyan Yosua geupeugah, "Jinoenyoe tajak buka laju babah guha nyan dan taba laju ban limong droe raja nyan jijak meuhadab ubak ulôn." 23 Guha nyan pi laju jibuka, lé raja-raja nibak Yerusalem, Hebron, Yarmut, Lakhis dan Eglon ji-iréng laju u luwa, 24 dan laju jiba meuhadab ubak Yosua. Dan Yosua pi geuhôi laju banmandum ureuëng Israel jijak meusapat, óh lheueh nyan geubri peurintah ubak mandum peuwira nyang na rhoh jijak meuprang deungon gobnyan dan laju jijak gilo bak takue dumna raja nyang limong droe nyan. Teuma di peuwiranyan pi laju jijak gilo takue raja-raja nyan. 25 Óh ka lheueh nyan, Yosua geupeugah laju ubak peuwira geuh nyan, "Bék yo gata dan bék teumakot. Bah kheueh gatanyoe yakén dan beuhe, sabab lagée nyoe kheueh cara jih TUHAN teuma geupeusaneut banmandum musoh gata." 26 Laju lé Yosua geupoh maté ban limong droe raja-raja nyan dan geugantung teuma laju ubak limong boh taméh. Manyét ureuëng nyan geupeubiyeu mantong disinan sampoe án seupôt uroe. 27 Bak watée mata uroe ka jilhob, ateueh peurintah Yosua, manyét-manyét nyan jipeutreun laju jirhom u dalam guha nyang yoh masa bunoe jipeuguna lé raja-raja nyan keu teumpat musöm. Óh lheueh nyan batée raya-raya jipeuduek laju bak babah guha nyan. Sampoe án jinoe batée-batée nyan mantong na. 28 Uroenyan cit Yosua geujak prang Makeda, dan geupeutaloe laju banda nyan meunan cit ngon raja jih. Banmandum peunduduek banda nyan geupoh maté; hana meusidroe pi nyang na tinggai udeb. Yosua geupeusaneut ateueh raja Makeda saban lagée geupeusaneut ateueh raja Yerikho. 29 Óh ka lheueh nyan, Yosua deungon tantra gobnyan geumaju laju nibak Makeda u Libna dan geuprang teuma banda Libna nyan. 30 Meunan cit TUHAN geupeumeunang lom keu ureuëng Israel ateueh banda nyoe dan raja jih nyan. Hana meusidroepi nyang geupeubiyeu udeb; banmandum ureuëng nyang na didalam banda nyan geupoh maté. Yosua geupeusaneut raja banda nyan saban cit lagée ka geupeusaneut u ateueh raja Yerikho. 31 Óh lheueh nyan Yosua dan tantra geuh nyan laju geu maju lom nibak Libna u Lakhis. Awaknyan laju geukeupông banda nyan dan laju geuseureubu. 32 TUHAN geupeumeunang lom keu tantra Israel ateueh Lakhis lam meuprang nyan nibak uroe nyang keudua. Peue nyang awaknyan peubuet di Libna, meunan cit awaknyan peubuet teuma di Lakhis; hana meusidroepi nyang geupeubiyeu udeb, banmandum geupoh maté. 33 Horam, raja Gezer teuka jijak bantu Lakhis, teuma Yosua pi geupeutaloe awaknyan dan tantra jih, hana meusidroe pi nyang na tinggai, banmandum maté. 34 Seulanjut jih, Yosua ngon tantra gobnyan geutinggai Lakhis dan geuheuntam teuma u Eglon dan banda nyan pi geukeupông dan geuprang bandanyan. 35 Bak uroe nyan cit teuma awaknyan geureubot Eglon, dan geupoh maté banmandum ureuëng nyang na disinan lagée nyang ka geupeubuet di Lakhis. 36 Beudôh di Eglon, Yosua dan tantra gobnyan laju geuteungoh gunong-gunong geujak laju u banda Hebron, dan banda nyanpi laju geuheuntam teuma 37 dan geureubot laju bandanyan. Raja disinan dan soe mantong ureuëng nyang na di banda nyan dan di banda-banda laén nyang na di silingka nyan, mandum geupoh maté. Yosua geupeuhanco teung bayeueng banda nyan saban cit lagée nyang ka geupeubuet u ateueh banda Eglon. Hana meusidroe pi geupeubiyeu udeb disinan. 38 Óh lheueh nyan Yosua dan tantra gobnyan geugisa geujak prang Debir. 39 Banda nyan dan raja jih dan banmandum banda nyang laén nyang na di silingka nyan geureubot mandum lé Yosua. Meunan cit banmandum ureuëng nyang na dalam banda nyan geupoh maté. Yosua geupeusaneut Debir saban cit lagée nyang ka geupeusaneut u ateueh banda Hebron dan Libna meunan cit raja jih. 40 Bansaboh nanggroe nyan ka geupeutaklok lé Yosua. Gobnyan geupeutaloe teuma raja-raja nyang na tinggai di daerah gunong-gunong, di binéh-binéh bukét disiblaih u timu, di gaki-gaki gunong siblaih u barat, dan di padang-padang siblaih u seulatan. Hana meusidroe pi nyang geupeubiyeu udeb; banmandum geupoh maté. Nyan paih deungon peue nyang ka geupeurintah lé TUHAN Allah Israel. 41 Meunan cit Yosua geupeutaloe teuma daerah-daerah nibak Kades-Barnea di siblaih seulatan sampoe trok u Gaza to ngon daerah panté, jitamong cit keunan banmandum daerah Gosyen, laju sampoe u Gibeon di siblaih utara. 42 Lam watée sigoe mantong geumeuprang, Yosua ka geupeutaloe banmandum raja-raja nyan dan geureubot laju daerah keukuasaan awaknyan, sabab TUHAN, Po teu Allah Israel, geumeuprang keu ureuëng Israel. 43 Óh ka lheueh nyan, Yosua ngon tantra gobnyan laju geuwoe lom teuma ubak khimah geuh di Gilgal.

Yosua 11

1 Bak watée Raja Yabin nibak Hazor jideungoe keuhai Israel meunang sabe lam mideuen prang, lé raja nyan laju jikirém utosan ubak Raja Yobab nibak banda Madon, meunan cit keu raja-raja banda Simron dan Akhsaf, 2 meunan cit ubak raja-raja nyang na di gunong-gunong siblaih utara, di Pantôn Yordan siblaih u seulatan Galilea, nibak daerah gaki gunong-gunong, dan didaerah panté nyang rab ngon Dor. 3 Meunan cit jikirém lom teuma ureuëng laén ubak ureuëng Kanaan di siblaih barat dan siblaih u timu Krueng Yordan, ubak ureuëng Amori, Het, Feris, dan ureuëng Yebus di daerah gunong-gunong, meunan cit ureuëng Hewi di gaki Gunong Hermon di daerah Mizpa. 4 Teuma teuka kheueh raja-raja nyan deungon banmandum tantra awaknyan nyang lumpah that le na lagée anou di pasi. Guda dan geuritan prang awaknyan pi lumpah le. 5 Banmandum raja-raja nyan jimeugabong dan jijak laju meusajan-sajan u markas nyang to ngon Krueng Merom keu jijak prang Israel. 6 TUHAN meufeureuman ubak Yosua, "Bék gata takot keu awaknyan. Bak watée nyang lagée nyoe óh singoh beungoh, awaknyan mandum ka Ulôn poh maté deumi Israel. Guda awaknyan harôh gata peulapée, dan geuritan-geuritan prang awaknyan harôh teuma gata tot." 7 Teuma Yosua deungon banmandum tantra geuh nyan laju geujak prang musoh nyan seucara meudadak to ngon aneuk Krueng Merom. 8 Dan TUHAN geupeumeunang umat Israel ateueh awaknyan. Ureuëng Israel sira jimuprang laju jitiyeub awaknyan sampoe u Misrefot-Maim dan Sidon di siblaih utara, dan trok laju sampoe jiôh jih u Pantôn Mizpa di siblaih utimu. Meuprang nyang gura ngon hebat that nyan hana putôh-putôh sampoe musoh habéh dumna hana meusidroe pi nyang na tinggai -- banmandum awaknyan maté. 9 Yosua geupeubuet nyan u ateueh awaknyan sisuai deungon peue nyang ka geupeurintah lé TUHAN ubak gobnyan: meunan cit guda awaknyan geupeulapée, dan geuritan-geuritan prang awaknyan geutot banmandum. 10 Óh ka seuleusoe nyan Yosua laju geugisa, dan geureubot lom teuma Hazor nyang nibak watéenyan na kheueh nyang paleng teuga lamkawan banmandum keurajeuen nyang na disinan. Banda nyan geutot, meunan cit deungon raja dan mandum peunduduek jih geupoh maté; hana meusidroe pi nyang na geupeubiyeu udeb. 12 Bubena banda-banda nyan ka geureubot lé Yosua, dan raja-raja nyang na disinan geudrob dan geupoh maté paih lagée peurintah TUHAN ubak Nabi Musa, hamba TUHAN nyan. 13 Teuma banda-banda nyang jipeudong di ateueh bukét-bukét puing, nyan hana meusabohpi jitot lé ureuëng Israel, keucuali Hazor nyang geutot lé Yosua keudroe. 14 Banmandum peunduduek banda-banda nyan geupoh maté; hana meusidroe nyang na geupeubiyeu udeb. Teuma banmandum barang-barang awaknyan nyang meuyuem lom meuhái meunan cit deungon beulatang peulara awaknyan jicok lé ureuëng Israel jeuet keuhak milék awaknyan. 15 Banmandum nyang geupeurintah lé TUHAN ubak Nabi Musa, hamba Geuhnyan, ka geupeusampoe lé Nabi Musa ubak Yosua, dan geupeubuet teuma lé Yosua; hana meusapeue pi nyang hana geupeubuet peurintah Nabi Musa nyan. 16 Yosua geureubot laju banmandum nanggroe nyan -- daerah gunong-gunong, daerah gaki gunong, bah kheuehnyan nyang di utara meunan cit nyang di seulatan; meunan cit banmandum wilayah Gosyen dan daerah padang tandus disiblaih u seulatan Gosyen, meunan cit deungon Pantôn Yordan. 17 Luwah daerah nyan phon nibak Gunong-gunong Ueh disiblaih u seulatan nyang to ngon Edom, trok utara nyang jiôh jih u Baal-Gad di Pantôn Libanon siblaih u seulatan Gunong Hermon. Treb that-that Yosua jimuprang deungon raja-raja di daerah nyan, teuma akhé jih awaknyan jidrob dan jipoh maté awaknyan banmandum. 19 Nibak banmandum banda-banda nyang di dalam wilayah nyan, hana meusaboh bandapi nyang na jipeugét peujanjian deungon Israel, keucuali Gibeon, banda bansa Hewi. Mandum banda nyang laén ka geupeutaloe banmandum bak watée meuprang nyan. 20 TUHAN ka geupeu jeuet awaknyan keu ureuëng kreueh até mangat jimuprang deungon Israel, mangat jeuet awaknyan teupeu habéh banmandum ateueh rhueng bumoe nyoe, dan teupeu maté banmandum paih lagée peurintah TUHAN ubak Nabi Musa. 21 Bak watée nyoe cit teuma Yosua geujak peuhanco bansa Enak, na kheueh bansa raksasa nyang raya badan lagée gogasi awaknyan tinggai di daerah gunong-gunong -- di Hebron, Debir, Anab, dan bansaboh daerah gunong-gunong Yehuda dan Israel. Awaknyan banmandum geupoh maté lé Yosua, dan meunan cit deungon banda-banda awaknyan mandum geupeu hanco rata ngon tanoh. 22 Hana meusidroepi nibak bansa Enak nyan nyang na tinggai keubijéh di daerah Israel, teuma di Gaza, Gat, dan Asdod nyang mantong na. 23 Banmandum nanggroe nyan ka geureubot lé Yosua paih deungon nyang geupeurintah lé TUHAN ubak Nabi Musa, laju nanggroe nyang geureubot nyan geubri ubak bansa Israel jeuet keu milék awaknyan. Nanggroe nyan geupeuweuk-weuk keu tieb-tieb sukée nyan meuteumé saboh jeumba. Bansa Israel pi jipiôh laju jimuprang dan nanggroe pi aman seuntosa.

Yosua 12

1 Daerah di siblaih u timu Yordan, phon nibak Pantôn Krueng Arnon teungoh laju u Pantôn Yordan sampoe jiôh jih u Gunong Hermon disiblaih utara, ka teureubot dan jiduek lé ureuëng Israel. Na dua droe raja nyang awaknyan peutaloe. 2 Nyang sidroe nan jih Sihon, raja Amori nyang teumpat duek jih di Hesybon. Daerah keukuasaan jih nyan siladum daerah Gilead: na kheueh phon di Aroër (nibak binéh Pantôn Arnon) dan banda nyang na bak teungoh-teungoh pantôn nyan trok laju u Krueng Yabok to ngon bataih daerah bansa Amon; 3 meunan cit jitamong daerah Pantôn Yordan di siblaih utimu, phon nibak Danau Galilea u arah seulatan trok laju u Bet-Yesimot (disiblaih u timu Laôt Maté), trok laju u gaki Gunong Pisga. 4 Raja nyang laén nyang jipeutaloe lé ureuëng Israel na kheueh Raja Og nibak nanggroe Basan, nyang teumpat tinggai di Asytarot dan Edrei. Jihnyan na kheueh sidroe lamkawan nyang na tinggai nibak bansa Refaim. 5 Wilayah keukuasaan jihnyan na kheueh Gunong Hermon, Salkha, dan banmandum Basan sampoe laju u daerah Gesur dan Maakha; meunan cit jitamong keunan siparoe nibak daerah Gilead sampoe ka trok u daerah nyang jimat kuasa lé Raja Sihon di banda Hesybon. 6 Nyan kheueh bandua droe raja nyang ka geupeutaloe lé Nabi Musa meusajan-sajan deungon bansa Israel. Tanoh raja-raja nyan geubri lé Nabi Musa, hamba TUHAN nyan, keu sukée Ruben, Gad dan siteungoh nibak sukée Manasye, mangat jeuet keu milék awaknyan. 7 Raja-raja nyang geupeutaloe lé Yosua meusajan-sajan deungon bansa Israel na kheueh banmandum raja-raja di daerah siblaih ubarat Krueng Yordan, phon nibak Baal-Gad di Pantôn Libanon laju trok u Gunong-gunong Ueh nyang tho hana hase jitimoh sapeue di siblaih u seulatan to ngon Edom. Daerah nyan geubagi-bagi lé Yosua keu sukée-sukée bansa Israel mangat jeuet keutanoh hak milék awaknyan. 8 Wilayah nyan jitamong cit daerah gunong-gunong, daerah gaki bukét di siblaih ubarat, Pantôn Yordan deungon daerah gaki bukét jihnyan, daerah lereng-lereng di siblaih utimu, dan daerah padang pasi di siblaih u seulatan. Daerah-daerah nyan na kheueh daerah beukaih teumpat tinggai bansa Het, Amori, Kanaan, Feris, Hewi dan Yebus. 9 Raja-raja nyang geupeutaloe nyan, jeumeulah jih na lhée ploh sa droe; na kheueh raja-raja nibak banda nyang teupeugah nyoe: Yerikho, Ai (tô ngon Betel), Yerusalem, Hebron, Yarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuah, Hefer, Afek, Lasaron, Madon, Hazor, Simron-Meron, Akhsaf, Taanakh, Megido, Kedes, Yokneam (di Karmel), Dor (di panté), Gozim (di Galilea) dan Tirza.

Yosua 13

1 Jinoenyoe Yosua ka tuha that-that. TUHAN meufeureuman ubak Yosua, "Gata ka tuha, Yosua! Teuma mantong jai that daerah nyang harôh teureubot: 2 banmandum wilayah Filistin dan Gesur, 3 dan banmandum wilayah Awi u arah seulatan. (Daerah nibak Krueng Sikhor nyang meubataih deungon nanggroe Meusé trok u bataih ngon Ekron di siblaih utara, mandum nyan teuhitong daerah bansa Kanaan; dan raja-raja Filistin tinggai di Gaza, Asdod, Askelon, Gat, dan Ekron.) 4 Meunan cit atranyan harôh teureubot: banmandum daerah Kanaan dan Meara (atra bansa Sidon), trok laju u Afek to ngon bataih bansa Amori; 5 óh lheuehnyan daerah bansa Gebal, dan mandum daerah Libanon u arah timu, phon di Baal-Gad disiblaih u seulatan Gunong Hermon, laju rhot u jalan nyang teutuju u Hamat. 6 Meunan cit jitamong keunan banmandum wilayah ureuëng Sidon, nyang tinggai di daerah gunong-gunong lamkawan gunong-gunong Libanon dan Misrefot-Maim." "Banmandum bansa-bansa nyan teuma Ulôn use singoh, bak watée ureuëng Israel jijak prang awaknyan," kheun TUHAN ubak Yosua. "Tanoh nyan harôh kheueh gata bagi-bagi keu umat Israel mangat jeuet keu tanoh milék awaknyan, lagée nyang ka Ulôn peurintah ubak gata. 7 Lé sababnyan, jinoenyoe gata bagi-bagi kheueh laju tanoh nyan keu ban sikureueng boh sukée dalam bansa Israel, dan keu siladum keu sukée Manasye, mangat atranyan jeuet keu tanoh milék awaknyan." 8 Sukée Ruben dan Gad meunan cit deungon siladum sukée Manasye ka jiteurimong jeumba jih tanoh nyang nibak Nabi Musa, hamba TUHAN nyan; na kheueh tanoh di siblaih utimu Krueng Yordan. 9 Wilayah awaknyan jitamong keunan Aroër (nibak binéh Pantôn Krueng Arnon), dan banda nyang na di teungoh-teungoh pantônnyan. Dan bagian darat nyang manyang nibak Medeba sampoe trok u Dibon. 10 Dan meunan cit trok u bataih daerah Amon, jitamong cit keunan banmandum banda nyang ka lheueh jikuasa lé Sihon, raja Amori, nyang jiduek di Hesybon. 11 Meunan cit jitamong keunan daerah Gilead, daerah nyang rab that ngon Gesur dan Maakha, meunan cit banmandum Gunong Hermon, dan mandum daerah Basan trok u Salkha. 12 Daerah awaknyan meunan cit jitamong daerah keukuasaan Raja Og, ureuëng Refaim nyang paleng dudoe nyang mat peurintah di Asytarot dan Edrei. Nabi Musa ka geupeutaloe bansa-bansa nyan dan geu use awaknyan mangat jiteubiet nibak daerah droe jih nyan. 13 Teuma peunduduek Gesur dan Maakha hana ji use lé ureuëng Israel; awaknyan mantong na tinggai di Israel. 14 Sukée Lewi awaknyan hana geuteurimong jeumba tanoh nibak Nabi Musa, sabab TUHAN ka geupeugah ubak Nabi Musa bahwa jeumba sukée Lewi na kheueh nibak keureubeuen-keureubeuen nyang teutot di ateueh miseubah keu TUHAN Po teu Allah Israel. 15 Siladum nibak tanoh nyang geupeujanji lé TUHAN keu umat Israel nyan ka geubri lé Nabi Musa keu keuluwarga-keuluwarga lam sukée Ruben, mangat jeuet keu tanoh hak milék droe awaknyan. 16 Wilayah awaknyan jitamong mandum Aroër (nibak binéh Pantôn Krueng Arnon) dan banda nyang na di teungoh-teungoh pantôn nyan trok laju u bansaboh darat manyang nyang to ngon Medeba; 17 meunan cit deungon Hesybon dan banmandum banda di darat nyang manyang nyan, na kheueh: Dibon, Bamot-Baal, Bet-Baal-Meon, 18 Yahas, Kedemot, Mefaat, 19 Kiryataim, Sibma, Zeret-Hasahar nyang na teuduek di ateueh bukét di pantôn nyan, 20 Bet-Peor, lereng-lereng Gunong Pisga, dan Bet-Yesimot. 21 Lheueh nyan jitamong cit keunan banmandum banda nyang na di darat nyang manyang nyan, dan banmandum keukuasaan Sihon, raja bansa Amori, nyang yoh masa ilée teumpat jihnyan na Hesybon. Gobnyan dan nyang mat kuasa Midian pih, na kheueh: Ewi, Rekem, Zur, Hur, dan Reba, mandum nyan ka geupeutaloe lé Nabi Musa. Dan mandum nyang mat kuasa nyan ka lheueh jipeurintah nanggroe nyan keu Raja Sihon. 22 Lamkawan ureuëng nyang geupoh maté lé bansa Israel na cit rhoh keunan Bileam aneuëk Beor, tukang ramai naseb gob. 23 Krueng Yordan na kheueh sibagoe bataih bagian barat sukée Ruben. Nyan kheueh banda-banda dan gampông-gampông nyang geubri keu keuluwarga-keuluwarga dalam sukée Ruben mangat jeuet keutanoh milék awaknyan. 24 Siladum nibak tanoh nyang ka geupeujanji lé TUHAN keu umat Israel nyan meunan cit ka geubri keu Nabi Musa ubak keuluwarga-keuluwarga dalam sukée Gad, mangat jeuet keuhak milék awaknyan. 25 Wilayah awaknyan jitamong cit Yaezer dan banmandum banda di Gilead meunan cit siladum nibak daerah bansa Amon trok laju nyang jiôh jih sampoe u Aroër di siblaih u timu Raba; 26 daerah di Hesybon sampoe u Ramat-Mizpa dan Betonim, meunan cit deungon daerah nibak Mahanaim trok laju ubak bataih Lodebar, banmandum nyan jitamong teuma lam wilayah keu sukée Gad. 27 Di Pantôn Yordan, wilayah sukée Gad nyan jitamong cit keunan Bet-Haram, Bet-Nimra, Sukot dan Zafon, na kheueh séuh daerah keukuasaan Raja Sihon di Hesybon. Bataih siblaih u barat sukée Gad nyan na kheueh Krueng Yordan sampoe laju jiôh jih ubak Danau Galilea di siblaih utara. 28 Nyan kheueh banda-banda dan gampông-gampông nyang geubri keu keuluwarga-keuluwarga lam sukée Gad mangat jeuet keu tanoh milék awaknyan. 29 Siladum nibak tanoh nyang ka geupeujanji lé TUHAN ubak umat Israel meunan cit atranyan ka geubri lé Nabi Musa ubak keuluwarga-keuluwarga siladum nibak sukée Manasye mangat jeuet keuhak milék awaknyan. 30 Bataih-bataih wilayah awaknyan trok u Mahanaim, jitamong cit keunan banmandum Basan -- na kheueh mandum wilayah keukuasaan Og, raja Basan, dan meunan cit ban nam ploh gampông-gampông Yair di Basan. 31 Seulanjut jih jitamong cit keunan siteungoh nibak daerah Gilead, meunan cit Asytarot dan Edrei, na kheueh bandua ma banda wilayah keukuasaan Raja Og di Basan. Banmandum wilayah nyan geubri siladum keu keuluwarga-keuluwarga keuturonan Makhir, aneuëk Manasye. 32 Meunan kheueh Nabi Musa geubagi tanoh bagian u timu Yerikho, di meurandeh Krueng Yordan, bak watée gobnyan na di daratan miyueb Moab. 33 Teuma sukée Lewi meubacut pi hana meuteumé tanoh nibak Nabi Musa. Nabi Musa geupeugah ubak awaknyan bahwa jeumba nyang geubri keu awaknyan na kheueh nibak keureubeuen-keureubeuen nyang jipeuseumah ubak TUHAN Po teu Allah Israel.

Yosua 14

1 Óh lheuehnyan nyoe na kheueh kisah keuhai pakriban nanggroe Kanaan disiblaih u barat Krueng Yordan geubagi-bagi keu umat Israel. Nyang peuweuk tanoh nyan keu umat Israel na kheueh Teungku Imeum Eleazar, Yosua aneuëk Nun, dan ulée-ulée keuluwarga nyang na didalam sukée-sukée bansa Israel. 2 Lagée peue nyang ka geupeurintah lé TUHAN ubak Nabi Musa, daerah-daerah di siblaih ubarat Krueng Yordan nyang ka geupeuteuntée keu sikureueng si teungoh sukée bansa Israel, harôh atranyan teubabi-bagi meunurot nyang teu undi. 3 Tanoh nyang di siblaih u timu Krueng Yordan nyan ka geubri lé Nabi Musa ubak bandua siteungoh sukée bansa nyang laén nyan teuma. (Peureulée teucetet disinoe bahwa keuturonan Nabi Yusuf teubagi u dalam dua boh sukée: sukée Manasye dan sukée Efraim.) Keuhai sukée Lewi, awaknyan hana meuteumé tanoh nyang geubri lé Nabi Musa keu awaknyan. Keu awaknyan teuma geubri banda-banda mantong keu teumpat tinggai, meunan cit geubri padang naleueng keu teumpat rabe leumô dan bubiri awaknyan. 5 Meunan kheueh cara jih umat Israel geubagi-bagi tanoh nyan sisuai deungon nyang ka geupeurintah lé TUHAN ubak Nabi Musa. 6 Bak si uroe ureuëng-ureuëng nibak sukée Yehuda jiteuka ubak Yosua di Gilgal. Sidroe nibak awaknyan na kheueh Kaleb aneuëk Yefune ureuëng Kenas, jipeugah, "Yosua! Droeneueh neuteupeue peue nyang geupeugah lé TUHAN ubak Nabi Musa, utosan Po teu Allah nyan, di Kades-Barnea keuhai droeneueh dan ulôn. 7 Ulôn meu umu peuet ploh thon bak watée Nabi Musa, hamba TUHAN nyan, geu kirém ulôn di Kades-Barnea sibagoe mata-mata mangat lôn jak seulidek nanggroe nyoe. Dan laju teuma ulôn gisa ubak gobnyan sira ulôn ba laporan nyang jujoe. 8 Ureuëng-ureuëng jijak deungon ulôn, teupeujeuet umat Israel keuteumakot. Teuma ulôn teutab seutia ulôn taát ubak TUHAN Po teu Allah ulôn. 9 Dan lé sabab nyan, Nabi Musa geupeujanji bahwa tanoh nyang ulôn jeulajah nyan pasti teuma geubri keu ulôn dan aneuëk-aneuëk ulôn jeuet keuhak milék kamoe keu siumu masa. 10 Jinoenyoe ka peuet ploh limong thon yoh TUHAN geupeugah hai nyan ubak Nabi Musa. Nyan teujadi bak watée bansa Israel teungoh jijak meugeumbara di padang pasi. Dan lagée nyang ka geupeujanji lé TUHAN, TUHAN pi ka geulindong ulôn sampoe ulôn teutab udeb sampoe án jinoe. Neu eue kheueh, jinoenyoe ulôn ka meu umu lapan ploh limong thon, 11 teuma mantong teuga lagée yoh masa Nabi Musa geu utus ulôn. Ulôn mantong na teunaga nyang seb keu lôn meuprang atawa keu ulôn peubuet peue mantong. 12 Lé sabab nyan, neubri kheueh jinoenyoe daerah gunong-gunong nyang ka geupeujanji lé TUHAN keu ulôn bak watée ulôn dan ureuëng-ureuëng nyang na meusajan deungon ulôn meugisa kamoe jakba laporan. Bak watée nyan droeneueh keudroe ka neudeungoe, bahwa disinan na bansa nyang raya lagée gogasi nyang geupeunan bansa Enak. Awaknyan tinggai didalam banda-banda rayeuk nyang meubintéh beuton. Mungken TUHAN teuma geutulông ulôn, sampoe ulôn hase lôn use awaknyan, lagée nyang geupeugah lé TUHAN." 13 Teuma Yosua laju geubri restu keu Kaleb aneuëk Yefune, laju geubri keu jih nyan banda Hebron jeuet keu tanoh hak milék jih. 14 Trok nibak uroenyoe banda nyan jeuet keuhak milék pusaka keuturonan Kaleb aneuëk Yefune, ureuëng Kenas nyan, sabab gobnyan seutia dan taát ubak TUHAN, Allah ureuëng Israel. 15 Yoh watée ilée Hebron geupeunan banda Arba. (Arba na kheueh ureuëng nyang paleng rayeuk lamkawan bansa Enak.) Teuma nanggroe nyan aman seuntosa sabab hana jipeukaru le deungon meuprang.

Yosua 15

1 Keuluwarga-keuluwarga nibak sukée Yehuda jiteurimong teuma jeumba tanoh deungon bataih-bataih jih na kheueh lagée nyoe: Di siblaih seulatan, daerah nyan meureuntang trok bak ujong nyang paleng seulatan daerah padang pasi Zin atranyan ngon bataih Edom; 2 phon nibak ujong seulatan Laôt Maté, 3 trok laju u seulatan rot reuleung-reuleung gunong di Akrabim sampoe Zin. Lheueh nyan rot seulatan Kades-Barnea, laju rot Hezron, teungoh u Adar, óh lheueh nyan teuwet laju u arah Karka. 4 Beudôh inan trok laju u Azmon, laju teujak rot sithot aneuk krueng nibak bataih ngon nanggroe Meusé, óh lheueh nyan barô kheueh trok ubak teumpat nyang keuneulheuh di Laôt Teungoh. Nyan kheueh garéh bataih siblaih u seulatan daerah keu sukée Yehuda. Dan garéh bataih nyan sibagoe garéh bataih siblaih u seulatan bansaboh nanggroe Israel. 5 Disiblaih u timu, bataih jih na kheueh Laôt Maté, laju u utara trok teuma ubak babah kuala Krueng Yordan. Di siblaih utara, bataih jih phon nibak babah kuala Krueng Yordan, 6 teungoh laju u Bet-Hogla, laju trok u bataih Pantôn Yordan. Phon sinan bataih siblaih utara nyan teungoh laju lom u utara sampoe laju ubak Batée Bohan (Bohan na kheueh aneuëk Ruben), 7 óh lheueh nyan jak laju u Pantôn Keususahan sampoe trok u Debir, laju wet teuma u utara nibak arah Gilgal di teumpat nyang meuhadab keu deungon reuleung-reuleung gunong di Adumim di siblaih u seulatan pantôn nyan. Beudôh sinan jak laju teuma ubak mata ié En-Semes, laju trok u En-Rogel, 8 óh ka lheueh eklom meulalu Pantôn Hinom u siblaih seulatan bukét, disinan teuduek Yerusalem, banda ureuëng Yebus. Phon disinan garéh bataih nyan teutuju ubak pucak gunong nyan di siblaih u barat Pantôn Hinom, di ujong utara Pantôn Refaim, 9 óh lheueh nyan trok laju ubak mata ié Me-Neftoah, trok u banda-banda nyang to ngon Gunong Efron. Beudôh sinan Garéh bataih daerah nyan wet laju u arah Baala (na kheueh Kiryat-Yearim), 10 dan teukeulileng bagian barat Baala u arah Gunong-gunong Edom, laju trok u bagian utara Gunong Yearim (na kheueh Gunong Kesalon), dan teutron laju u Bet-Semes, óh lheueh nyan jak laju u Timna. 11 Beudôh di Timna, garéh bataih óh lheueh nyan teutuju u siblaih utara Gunong Ekron, laju teuwet u arah Sikron, liwat rot Gunong Baala, laju u Yabneel, dan akhé jih u Laôt Teungoh, 12 nyan na kheueh garéh bataih siblaih ubarat wilayah sukée Yehuda. Didalam wilayah nyan tinggai ureuëng-ureuëng nibak keuluwarga dalam sukée Yehuda. 13 Paih lagée peue nyang ka geupeurintah lé TUHAN ubak Yosua, siladum nibak daerah Yehuda geubri keu Kaleb aneuëk Yefune nibak sukée Yehuda. Keu gobnyan teubri laju Hebron, na kheueh banda atra Arba, aneuëk Enak. 14 Keuturonan Enak na kheueh ureuëng Sesai, Ahiman dan Talmai. Kaleb ji use laju awaknyan banmandum nibak Hebron. 15 Beudôh sinan gobnyan jijak prang laju ureuëng-ureuëng nyang na tinggai di Debir. (Banda nyan yoh masa dilée meusyeuhu deungon nan Kiryat-Sefer.) 16 Geupeugah lé Kaleb, "Barang sigasoe nyang reubot Kiryat-Sefer, ureuëngnyan jeuet jimeukawen ngon aneuëk inong ulôn nyang nan jih Akhsa." 17 Otniel, aneuëk nibak syedara Kaleb nyang nan jih Kenas, jireubot bandanyan; lé nyan teuma Kaleb laju jibri Akhsa, aneuëk jih nyan, jeuet keubinoe Otniel. 18 Bak uroe meukawen awaknyan, Otniel jipaksa Akhsa mangat jilakée saboh keubeueng tanoh ubak ayah geuhnyan. Teuma jitreun kheueh laju Akhsa di ateueh keuleudée jihnyan, laju Kaleb geutanyong ubak jih nyan peue nyang jilakée. 19 Akhsa geujaweueb, "Ulôn meulakée meupadub boh mata ié, sabab tanoh nyang bapak brinyan keu ulôn na kheueh teumpat jih di ateueh tanoh nyang tho." Teuma Kaleb laju geujok keu jihnyan mata ié nyang na dibagian pucok dan mata ié nyang na di barôh. 20 Lheueh nyan teuma nyoe na kheueh tanoh nyang geubri keu keuluwarga-keuluwarga nibak sukée Yehuda mangat jeuet keuhak milék awaknyan. 21 Banda-banda nyang paleng jiôh dibagian seulatan, nyang ka jeuet keu jeumba Yehuda, na kheueh nyang teuduek nibak bataih Edom, banmandum nyan na dua ploh sikureueng boh banda, ka jitamong keunan gampông-gampông nyang na rab-rab deungon nyan. Banda-banda nyan na kheueh: Kabzeel, Eder, Yagur, Kina, Dimona, Adada, Kedes, Hazor, Yitnan, Zif, Telem, Bealot, Hazor-Hadata, Keriot-Hezron (na kheueh Hazor), Amam, Sema, Molada, Hazar-Gada, Hesmon, Bet-Pelet, Hazar-Sual, Bersyeba, Baala, Iyim, Ezem, Eltolad, Khesil, Horma, Ziklag, Madmana, Sansana, Lebaot, Silhim, Ain, dan Rimon. 33 Banda-banda, nyang jitamong cit keunan gampông-gampông nyang na silingka nyan, nyang na nibak gaki-gaki bukét, banmandum nyan na peuet blaih boh banda, banda-banda nyan na kheueh: Esytaol, Zora, Asna, Zanoah, En-Ganim, Tapuah, Enam, Yarmut, Adulam, Sokho, Azeka, Saaraim, Aditaim, Gedera dan Gederotaim. 37 Meunan cit nam blaih boh banda nyang teupeugah nyoe jitamong teuma keunan gampông-gampông nyang na bansikeulileng nyan: Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Khabon, Lahmas, Khitlis, Gederot, Bet-Dagon, Naama dan Makeda. 42 Meunan cit sikureueng boh banda nyang teupeugah nyoe jitamong teuma keunan gampông-gampông nyang na bansikeulileng nyan, banda-banda nyan na kheueh: Libna, Eter, Asan, Yiftah, Asna, Nezib, Kehila, Akhzib dan Maresa. 45 Meunan cit Ekron deungon banda-banda ubit dan gampông-gampông nyang na bansikeulileng nyan, 46 meunan cit banmandum banda-banda dan gampông-gampông nyang na dikeulileng Asdod, nibak Ekron trok u Laôt Teungoh. 47 Meunan cit teuma deungon Asdod dan Gaza deungon banda-banda ubit dan gampông-gampông nyang na meutabu sampoe karab ngon aneuk krueng nibak bataih deungon nanggroe Meusé dan panté Laôt Teungoh. 48 Di daerah gunong-gunong na teuma siblaih boh banda meunan cit deungon gampông-gampông nyang na bansilingka nyan: Samir, Yatir, Sokho, Dana, Kiryat-Sana (na kheueh Debir), Anab, Estemoa, Anim, Gosyen, Holon dan Gilo. 52 Meunan cit deungon sikureueng boh banda nyang teupeugah nyoe, jitamong lom keunan gampông-gampông nyang na bansilingka nyang rab-rab ngon nyan: Arab, Duma, Esan, Yanum, Bet-Tapuah, Afeka, Humta, Kiryat-Arba (na kheueh Hebron) dan Zior. 55 Meunan cit deungon siploh boh banda nyang teupeugah nyoe jitamong cit keunan gampông-gampông nyang na nyang rab-rab di bansikeulileng nyan: Maon, Karmel, Zif, Yuta, Yizreel, Yokdeam, Zanoah, Kain, Gibea dan Timna. 58 Dan nam boh banda nyang teupeugah lom nyoe, meusajan-sajan ngon gampông nyang na bansikeulileng nyan: Halhul, Bet-Zur, Gedor, Maarat, Bet-Anot, Eltekon. 60 Dan dua boh banda nyang teupeugah nyoe jitamong cit keunan gampông-gampông nyang na bansikeulileng: Banda Kiryat-Baal (na kheueh Kiryat-Yearim) dan Banda Raba. 61 Di daerah padang pasi nyang meuguron, na teuma nam boh banda nyang teupeugah nyoe jitamong cit deungon gampông-gampông nyang na bansikeulileng nyan: Bet-Araba, Midin, Sekhakha, Nibsan, Banda Sira dan En-Gedi. 63 Banda Yerusalem nyan jitamong cit keunan atra milék Yehuda, teuma di ureuëng Yehuda nyan hana hase jiuse ureuëng Yebus nyang na tinggai disinan. Sampoe án saátnyoe ureuëng Yebus nyan mantong na tinggai meusapat ngon ureuëng Yehuda nyang na tinggai nibak bandanyan.

Yosua 16

1 Garéh-garéh bataih tanoh nyang ka geutunyok keu keuturonan Nabi Yusuf, phon nibak Krueng Yordan nyang rab ngon Yerikho, siblaih utimu mata ié Yerikho sampoe trok u padang pasi. Phon di Yerikho garéh nyan ji ek laju trok u Betel di daerah meugunong-gunong. 2 Phon di Betel, garéh nyan jituju laju u arah Lus, liwat Atarot, na kheueh teumpat tinggai ureuëng Arki. 3 Phon nibak teumpatnyan garéh nyan teutuju teuma u barat u daerah kawöm Yaflet, sampoe u Bet-Horon-Barôh, trok laju u Gezer, laju akhé jih di Laôt Teungoh. 4 Nyan kheueh daerah nyang geubri keu sukée Manasye dan Efraim, keuturonan Nabi Yusuf, mangat jeuet keu tanoh hak milék awaknyan. 5 Lheuehnyan teuma jinoenyoe na kheueh bataih-bataih tanoh nyang geubri ubak keuluwarga-keuluwarga nibak sukée Efraim. Disiblaih u timu, garéh bataih tanoh awaknyan phon di Atarot-Adar trok laju u Bet-Horon-Tunong, 6 teutuju laju u Laôt Teungoh. Mikhmetat na disiblaih utara nyan. Disiblaih u timu nyan, garéh bataih nyan teu wet laju u arah Taanat-Silo, laju teuliwat nyan nibak siblaih u timu teutuju u Yanoah. 7 Dan phon disinan garéh nyan jitreun teuma u Atarot dan Naharat, laju trok rot binéh Yerikho dan akhé jih di Krueng Yordan. 8 Di siblaih u barat, garéh bataih Efraim nyan phon nibak Tapuah sampoe ubak aneuk Krueng Kana, laju akhé jih di Laôt Teungoh. Nyang kheueh tanoh nyang geubri keu keuluwarga-keuluwarga nibak sukée Efraim, mangat jeuet keu hak milék awaknyan, 9 jitamong cit keunan na mupadub boh banda ubit-ubit dan gampông nyang na teuduek lam wilayah Manasye. 10 Teuma lé sukée Efraim hana ji-use ureuëng Kanaan nibak daerah Gezer. Nyang kheueh sabab jih ureuëng Kanaan nyan sampoe án jinoe mantong na tinggai di Gezer meusajan-sajan deungon ureuëng Efraim, teuma awaknyan jipaksa meubuet sibagoe namiet keu ureuëng Efraim.

Yosua 17

1 Siladum daerah nyang na di bagian barat Krueng Yordan geubagi teuma keu keuluwarga-keuluwarga nibak keuturonan Manasye, aneuëk tuha Nabi Yusuf. Makhir, bapak nibak Gilead, na kheueh aneuëk tuha nibak Manasye. Sabab gobnyan sidroe peujuang, teuma daerah Gilead dan Basan nyang teuduek di siblaih u timu Krueng Yordan teujok laju keu gobnyan. 2 Daerah disiblaih ubarat Krueng Yordan geubri teuma keu keuluwarga-keuluwarga nyang laén nyang rhôh jitamong u dalam keuturonan Manasye, na kheueh keuluwarga: Abiezer, Helek, Asriel, Sekhem, Hefer dan Semida; banmandum nyan na kheueh keuturonan ureuëng agam nibak Manasye aneuëk Nabi Yusuf. Awaknyan na kheueh ulée-ulée keuluwarga. 3 Zelafehad aneuëk Hefer, cucoe Gilead (Gilead nyan na kheueh aneuëk Makhir, cucoe Manasye), gobnyan hana meu aneuëk nyang agam, nyang na aneuëk inong, nan aneuëk-aneuëk nyan na kheueh: Makhla, Noa, Hogla, Milka, Tirza. 4 Awaknyan laju jijak meuhadab ubak Teungku Imeum Eleazar, Yosua aneuëk Nun meunan cit deungon bubena peumimpén, dan geupeugah lagée nyoe, "TUHAN meufeureuman ubak Nabi Musa bahwa kamoe nyoe harôh kheueh meusajan-sajan beumeuteumé tanoh lagée syedara-syedara kamoe nyang agam." Lé sabab nyan, lagée nyang ka geupeurintah lé TUHAN, bahwa aneuëk-aneuëk inong Zelafehad nyan teubri tanoh meusajan-sajan deungon syedara-syedara awaknyan nyang agam. 5 Deungon na lagée nyan, bukon teuma keuturonan agam nibak Manasye nyang meuteumé jeumba tanoh nyang teubagi, teuma keuturonan gobnyan nyang inong meuteumé cit teuma. Nyang kheueh sabab jih pakon sukée Manasye geubri siploh boh jeumba, seulaén tanoh Gilead dan Basan di siblaih u timu Krueng Yordan. Tanoh Gilead geubri keu keuturonan Manasye nyang laén. 7 Garéh-garéh bataih wilayah sukée Manasye nyan phon nibak Asyer u Mikhmetat di siblaih u timu Sikhem. Nibak sinan garéh nyan jitreun u seulatan trok laju u daerah kawöm En-Tapuah. 8 Daerah Tapuah nyan na kheueh atra sukée Manasye, teuma banda Tapuah, nibak bataih, na kheueh milék keuturonan Efraim. 9 Seulanjut jih garéh bataih wilayah Manasye nyan jitreun laju sampoe trok u aneuk Krueng Kana. Banda-banda nyang na di siblaih u seulatan aneuk krueng nyan na kheueh atra Efraim, bah kheueh nyan na didalam wilayah Manasye. Garéh bataih wilayah Manasye nyan seulanjut jih jisithot laju rot siblaih utara aneuk krueng nyan, laju akhé jih di Laôt Teungoh. 10 Meunan kheueh Efraim ka na disiblaih u seulatan, dan Manasye di siblaih utara, dan Laôt Teungoh na kheueh bataih awaknyan di siblaih ubarat. Di barat laôt, wilayah sukée Manasye nyan meubataih teuma deungon Asyer, dan disiblaih timu laôt, meubataih teuma deungon wilayah Isakhar. 11 Di dalam wilayah Isakhar dan Asyer nyan na teuma tanoh-tanoh atra Manasye, tanoh-tanoh nyan na kheueh: Bet-Sean dan Yibleam jitamong teuma keunan deungon gampông-gampông nyang na di sikeulileng nyang to-to deungon nyan. Meunan cit: Dor (banda nyang teuduek nibak binéh laôt), En-Dor, Taanakh, Megido deungon gampông-gampông nyang na to-to bankeulileng nyan. 12 Teuma sukée Manasye nyan hana hase ji-use peunduduek banda-banda nyan; nyang kheueh sabab jih di ureuëng Kanaan mantong teutab na tinggai disinan. 13 Bah kheueh singoh teuma bak watée ureuëng Israel ka leubeh teuga, awaknyan hana ji-use banmandum ureuëng Kanaan; teuma awaknyan jipaksa ureuëng Kanaan nyan jimeukeureuja keu awaknyan. 14 Keuturonan Nabi Yusuf jipeugah ubak Yosua, "Pakon keukamoe neubri tanohnyan cit saboh bagi mantong, padahai kamoe lumpah that jai, sabab TUHAN ka geubri beureukat keu kamoe?" 15 Geujaweueb lé Yosua, "Sabab awaknyoe jai that-that, dan daerah gunong-gunong Efraim nyan lumpah that sampik keu gata, gatajak kheueh laju u daerah ureuëng Feris dan Refaim. Jakcah ngon tajak teubang kheueh laju uteuen barô nyang na di daerah awaknyan." 16 Keuturonan Nabi Yusuf nyan jijaweueb, "Daerah gunong-gunong nyan ubit meunan cit sampik that hana seb luwah keu kamoe nyoe, seudangkan bansa Kanaan nyang na tinggai di darat nyang miyueb awaknyan seb na banmandum geuritan prang nyang teupeuget nibak beuso bah kheueh awaknyan nyang na tinggai di Bet-Sean dan gampông-gampông nyang na di sikeulileng nyan, meunan cit deungon awaknyan nyang tinggai di Pantôn Yizreel." 17 Teuma geupeugah lé Yosua ubak sukée Efraim dan Manasye barat nyan, "Beutôi, gata ramé that-that lom ngon teuga-teuga, dan patot teubri leubeh nibak saboh jeumba tanoh. 18 Gata cok kheueh laju di daerah meugunong-gunong, sabab bahpi daerah nyan mantong meu uteuen, gata hase tacah ngon gata teubang dan tabuka laju daerah nyan óh lheuehnyan jeuet teuma gata cok keuhak milék gata banmandum nyan. Dan keuhai ureuëng-ureuëng Kanaan nyan, gata jeuet ta use awaknyan, bahpi awaknyan teuga dan na teuma geuritan-geuritan prang nyang teupeuget nibak beuso."

Yosua 18

1 Óh ka lheueh geupeutaklok nanggroe nyang ka geupeujanji lé TUHAN, banmandum umat Israel jimeusapat laju di Silo, lé awaknyan laju jipeudong Khimah Keuhai TUHAN Teuka. 2 Mantong na tujoh boh sukée bansa Israel nyang gohlom jiteurimong jeumba tanoh jih. 3 Jadi, Yosua laju geupeugah ubak umat Israel, "Gata preh trok án pajan lom, barô kheueh gata duek ubak nanggroe nyang geubri lé TUHAN, Po teu Allah indatu gata, keu gata? 4 Gata piléh kheueh laju lhée droe nibak tieb-tieb sukée. Ulôn teuma lôn yue awaknyan mangat jijak tilék bansaboh nanggroe nyoe mangat jicetet bataih-bataih daerah nyang awaknyan keuneuk cok nyan. Óh lheueh nyan, awaknyan harôh jigisa ubak ulôn. 5 Tanohnyan harôh kheueh teubagi jeuet keu tujoh boh bagi. Yehuda teutab mantong di wilayah jih nyan di siblaih u seulatan, dan Nabi Yusuf teutab teuma di wilayah gobnyan di siblaih utara. 6 Gamba bataih-bataih ban tujoh bagian tanohnyan harôh teupeuget, dan laju jijok atranyan ubak ulôn. Teuma ulôn rhom undi mangat lôn teupeue peue nyang ka geupeuteuntée lé Po teu Allah keu gatanyoe. 7 Teuma sukée Lewi nyang hana jiteurimong hak jeumba jih ateueh tanoh nyang teubagi nyan meusajan-sajan deungon gata, sabab jeumba awaknyan na kheueh jeuet keu teungku-teungku imeum mangat geupeutimang TUHAN. Dan keuhai sukée Gad, Ruben dan siladum sukée Manasye, beutôi awaknyan ka jiteurimong jeumba jihnyan di siblaih u timu Krueng Yordan. Nabi Musa, hamba TUHAN, ka geubri tanoh nyan keu awaknyan." 8 Teuma Yosua laju geubri peutunyok-peutunyok nyang seulanjut keu ureuëng-ureuëngnyan, "Gata jak tilék kheueh laju bansaboh nanggroe nyoe dan gata peuget kheueh laju gamba bataih-bataih jihnyan; óh lheuehnyan tagisa kheueh lom teuma keunoe bak ulôn. Teuma ulôn rhom undi disinoe di Silo mangat ulôn teupeue peue nyang ka geupeuteuntée lé TUHAN keu gata." Óh ka lheueh geuteurimong banmandum peutunyok-peutunyok nyan nibak Yosua, jijak kheueh laju awaknyan jijak tilék tanoh nyan. 9 Bansaboh nanggroenyan jijeulajah lé awaknyan, laju jicetet bataih-bataih bantujoh boh jeumba tanohnyan meunan cit jidafeutar cit teuma banda nyang na didalam nyan. Óh ka lheueh seuleusoe awaknyan laju jigisa ubak Yosua di khimah-khimah di Silo. 10 Laju lé Yosua geuboh thon mangat geuteupeue peue nyang geumeuheut lé TUHAN keu awaknyan. Óh lheueh nyan Yosua laju geubri jeumba tanoh keu tieb-tieb sukée bansa Israel nyang gohlom meuteumé jeumba tanoh. 11 Phon that teubagi na kheueh tanoh keu keuluwarga-keuluwarga sukée Benyamin. Jeumba awaknyan na jih lamkawan tanoh sukée Yehuda dan tanoh sukée keuturonan Nabi Yusuf. 12 Di siblaih utara, bataih-bataih tanoh awaknyan phon nibak Krueng Yordan, teungoh laju ubak reuleung disiblaih utara Yerikho, óh lheuehnyan ubarat rot daerah meugunong-gunong sampoe jiôh jih u daerah guron Bet-Awen. 13 Garéh bataih nyan sampoe laju ubak reuleung di siblaih u seulatan Lus (nyang meusyeuhu sibagoe Betel), laju treun u Atarot-Adar di Gunong siblaih u seulatan Bet-Horon-Barôh. 14 Nibak siblaih ubarat gunong nyan, garéh bataih tanohnyan teuwet u seulatan teutuju u Kiryat-Baal (na kheueh Kiryat-Yearim). Kiryat-Baal na kheueh atra ureuëng Yehuda. Nyang kheueh garéh bataih tanoh nyan di siblaih ubarat. 15 Bataih-bataih disiblaih u seulatan phon nibak binéh Kiryat-Yearim trok laju ubak mon-mon ié Me-Neftoah, 16 phon disinan treun laju u gaki gunong nyang meuhadab keue deungon Pantôn Hinom nibak ujong utara Pantôn Refaim. Óh lheueh nyan garéh bataih u seulatan meulalu Pantôn Hinom siblaih u seulatan lereng-lereng gunong di nanggroe Yebus, laju teutuju u En-Rogel, 17 wet laju u utara u En-Semes, laju u Gelilot di meurandeh Sineungoh Adumim. Óh ka lheuehnyan garéh bataihnyan jitreun laju ubak Batée Bohan (Bohan na kheueh aneuëk Ruben), 18 laju rot siblaih utara reuleung-reuleung nyang meuhadab keue deungon Pantôn Yordan, óh lheuehnyan treun laju u pantôn nyan, 19 meulalu utara lereng-lereng gunong Bet-Hogla, dan akhé jih disiblaih utara Laôt Maté di teumpat Krueng Yordan meukuala. Nyan kheueh bataih bagian u seulatan. 20 Krueng Yordan na kheueh bataih disiblaih utimu. Lagée nyan kheueh bataih-bataih tanoh nyang geubri keu keuluwarga-keuluwarga dalam sukée Benyamin mangat jeuet keuhak milék awaknyan. 21 Banda-banda nyang jipo jeuet keu hak milék lé keuluwarga-keuluwarga sukée Benyamin, banmandum nyan na dua blaih boh banda jitamong cit keunan deungon gampông-gampông nyang na rab-rab di sikeulileng nyan, atranyan na kheueh: Yerikho, Bet-Hogla, Emek-Kezis, Bet-Araba, Zemaraim, Betel, Haawim, Para, Ofra, Kefar-Haamonai, Ofni dan Geba. 25 Meunan cit peuet blaih banda nyang seulanjut jihnyoe jitamong cit keunan deungon gampông-gampông nyang na di sikeulileng nyan, atranyan na kheueh: Gibeon, Rama, Beerot, Mizpa, Kefira, Moza, Rekem, Yirpeel, Tarala, Zela, Elef, Yebus (na kheueh Yerusalem), Gibea dan Kiryat-Yearim. Nyan kheueh tanoh-tanoh nyang geubri keu keuluwarga-keuluwarga dalam sukée Benyamin mangat jeuet keuhak milék awaknyan.

Yosua 19

1 Peumbagian nyang keu dua na kheueh tanoh keu keuluwarga-keuluwarga Simeon. Bataih tanoh awaknyan jitamong lam bataih tanoh milék sukée Yehuda. 2 Bak awaknyan geubri lhée blaih boh banda meunan cit deungon gampông-gampông nyang na bankeulileng nyan: Bersyeba, Syeba, Molada, Hazar-Sual, Bala, Ezem, Eltolad, Betul, Horma, Ziklag, Bet-Hamarkabot, Hazar-Susa, Bet-Lebaot, dan Saruhen. 7 Meunan cit peuet boh banda nyang seulanjut jihnyoe jitamong cit keunan deungon gampông-gampông nyang na ban sikeulileng nyan: Ain, Rimon, Eter, dan Asan. 8 Jitamong cit keunan banmandum gampông nyang na di sikeulileng bandanyan sampoe ka jiôh u Baalat-Beer (na kheueh Rama) nibak tanoh siblaih u seulatan. Nyan kheueh tanoh nyang geubri keu keuluwarga-keuluwarga sukée Simeon mangat jeuet keuhak milék awaknyan. 9 Sabab tanoh keu sukée Yehuda nyan lumpah that luwah, teuma siladum nibak tanoh nyan teujok laju keu sukée Simeon. 10 Peumbagian nyang keu lhée na kheueh tanoh keu keuluwarga-keuluwarga dalam sukée Zebulon. Bataih tanoh nyang geubri keu awaknyan trok u Sarid. 11 Phon di Sarid, garéh bataih siblaih u barat teutuju laju u Marala, tupéeh teuma Dabeset dan aneuk krueng disiblaih u timu Yokneam. 12 Garéh bataih siblaih u timu phon di Sarid teutuju u bak bataih Khislot-Tabor, trok laju u Dobrat, teungoh laju u Yafia. 13 Phon disinan garéh bataih nyan trok laju u timu u Gat-Hefer dan Et-Kazin, laju teu wet u arah Nea teutuju u Rimon. 14 Di siblaih utara, bataih tanohnyan teuwet u arah Hanaton dan akhé jih di Pantôn Yiftah-El. 15 Lam wilayah sukée Zebulon nyan jitamong cit teuma na kheueh: Katat, Nahalal, Simron, Yidala dan Betlehem. Daerah awaknyan jitamong u dalam dua blaih boh banda deungon gampông-gampông nyang na bansilingka nyan. 16 Banda-banda dan gampông-gampông nyan na dalam daerah nyang geubri keu keuluwarga-keuluwarga didalam sukée Zebulon mangat jeuet keu tanoh hak milék awaknyan. 17 Peubagian nyang keu peuet na kheueh keu keuluwarga-keuluwarga dalam sukée Isakhar. 18 Dalam daerah awaknyan jitamong teuma na kheueh lagée nyoe: Yizreel, Khesulot, Sunem, 19 Hafaraim, Sion, Anaharat, 20 Rabit, Kisyon, Ebes 21 Remet, En-Ganim, En-Hada, dan Bet-Pazes. 22 Bataih tanoh awaknyan keunong keu Tabor, Sahazima, Bet-Semes, laju akhé jih di Krueng Yordan. Daerah awaknyan jitamong u dalam nam blaih boh banda jitamong cit keunan deungon gampông-gampông nyang na di bansikeulileng nyan. 23 Banda-banda deungon gampông-gampông nyan na di dalam daerah nyang geubri keu keuluwarga-keuluwarga sukée Isakhar mangat jeuet keu tanoh milék awaknyan. 24 Peumbagian nyang keulimong na kheueh tanoh keu keuluwarga-keuluwarga di dalam sukée Asyer. 25 Lam daerah awaknyan jitamong teuma na kheueh lagée nyoe: Helkat, Hali, Beten, Akhsaf, 26 Alamelekh, Amad, dan Misal. Bataih tanoh awaknyan di siblaih ubarat tupéeh ubak Gunong Karmel dan Krueng Libnat. 27 Nibak teumpatnyan garéh bataih awaknyan teuwet u timu u Bet-Dagon laju keunong teuma ubak bataih Zebulon dan Pantôn Yiftah-El teutuju laju u utara u Bet-Emek dan Nehiel. Laju garéh bataih nyan sampoe laju teutuju u utara u Kabul, 28 Ebron, Rehob, Hamon, dan Kana, sampoe laju sijiôh Sidon. 29 Nibak teumpatnyan garéh bataihnyan teuwet teuma u Rama trok laju sampoe u banda Tirus, na kheueh saboh banda nyang meu pageue ngon kuta; óh lheuehnyan garéh bataih nyan teuwet teuma lom u Hosa laju akhé jih di Laôt Teungoh. Dalam bataih-bataih nyan jitamong Mahalab, Akhzib, 30 Uma, Afek, dan Rehob. Banmandum daerah awaknyan jitamong dua ploh dua boh banda ka jitamong keunan gampông-gampông nyang na bansilingka nyan. 31 Banda-banda deungon gampông-gampông nyan na didalam daerah nyang geubri keu keuluwarga-keuluwarga didalam sukée Asyer mangat jeuet keutanoh hak milék awaknyan. 32 Peumbagian nyang keu nam na kheueh tanoh keu keuluwarga-keuluwarga dalam sukée Naftali. 33 Bataih tanoh awaknyan phon di Helef, trok ubak bak kayée ek di Zaananim, trok laju u Adami-Nekeb, laju u Yabneel, sampoe laju u Lakum, óh lheuehnyan akhé jih di Krueng Yordan. 34 Nibak sinan garéh bataih tanohnyan teuwet laju ubarat u Aznot-Tabor, dan nibak teumpat nyan u Hukok. Disiblaih u seulatan, daerahnyoe jitamong cit deungon daerah Zebulon, di siblaih ubarat deungon Asyer, dan disiblaih utimu deungon Krueng Yordan. 35 Banda-banda nyang meubintéh ngon kuta na kheueh: Zidim, Zer, Hamat, Rakat, Kineret, 36 Adama, Rama, Hazor, 37 Kedes, Edrei, En-Hazor, 38 Yiron, Migdal-El, Horem, Bet-Anat, dan Bet-Semes. Banmandum daerah awaknyan jitamong cit sikureueng blaih boh banda jitamong cit keunan gampông-gampông nyang na bansilingka nyan. 39 Banda-banda deungon gampông-gampông jihnyan na didalam daerah nyang geubri keu keuluwarga-keuluwarga dalam sukée Naftali mangat jeuet keutanoh hak milék awaknyan. 40 Peumbagian nyang keutujoh na kheueh tanoh keu keuluwarga-keuluwarga dalam sukée Dan. 41 Daerah awaknyan na kheueh jitamong Zora, Esytaol, Ir-Semes, 42 Saalabin, Ayalon, Yitla, 43 Elon, Timna, Ekron, 44 Elteke, Gibeton, Baalat, 45 Yehud, Beneberak, Gat-Rimon, 46 Me-Yarkon, Rakon, dan meunan cit daerah di bansilingka Yope. 47 Ureuëng-ureuëng sukée Dan nyan ka gadôh siladum nibak wilayah awaknyan, jadi awaknyan jijak laju u Lesem dan laju teuma jiprang bandanyan. Lheueh nyan laju jireubot bandanyan, meunan cit deungon peunduduek nyang na didalam bandanyan jipoh maté bube nyang na. Teuma tinggai kheueh awaknyan disinan dan geu ubah laju nan kota Lesem nyan jeuet keu banda Dan, meunurot nan indatu awaknyan. 48 Banda-banda meunan cit deungon gampông-gampông nyang na disinan ka rhoh udalam wilayah nyang geubri keu keuluwarga-keuluwarga dalam sukée Dan dan mangat jeuet keu hak milék awaknyan keudroe. 49 Óh ka lheueh umat Israel seuleusoe jibagi-bagi tanoh di nanggroe nyan, laju teuma awaknyan geubri keu Yosua aneuëk Nun sibagoe tanoh mangat jeuet keutanoh milék gobnyan. 50 Lagée nyang ka geupeurintah lé TUHAN, awaknyan geubri laju keu gobnyan banda nyang geulakée teuma, atranyan na kheueh: Timna-Serah di gunong-gunong Efraim. Yosua geupeudong lom bandanyan, laju geutinggai disinan. 51 Meunan kheueh cara jih Teungku Imeum Eleazar, Yosua aneuëk Nun dan bubena ulée keuluwarga dalam sukée-sukée bansa Israel geubagi-bagi tanoh nanggroe nyan deungon cara geu rhom undi mangat geulakée peutunyok nibak TUHAN. Hainyan geupeubuet banmandum di Silo di babah pintoe Khimah TUHAN. Deungon nyan seuleusoe kheueh teubagi tanoh nyan.

Yosua 20

1 Óh lheueh nyan TUHAN meufeureuman ubak Yosua mangat geupeugah lagée nyoe ubak ureuëng Israel, "Ulôn ka Lôn peurintah ubak Nabi Musa mangat gobnyan geupeugah ubak gata keuhai banda teumpat meulindong, na kheueh banda-banda teumpat ureuëng jeuet jibaplueng droe keu jilakée meulindong. Jinoenyoe piléh kheueh lé gata banda-banda nyan. 3 Ureuëng nyang poh maté ureuëng laén ngon hana jisaja, jeuet jiplueng u banda nyan keu teuhinda nibak ureuëng nyang naniet keuneuk balaih dam ateueh jihnyan. 4 Jihnyan jeuet jiplueng ubak saboh lamkawan banda nyan, dan jak laju ubak teumpat peungadelan di babah pintoe geureubang banda nyan, laju gata peugah ubak banmandum peumimpén nyang na lam banda nyan peue nyang ka teujadi. Peumimpén-peumimpén nyan teuma jibri idhin ureuëng nyan keu jitamong lam banda nyan, dan jibri laju keu ureuëng nyan teumpat tinggai. 5 Meunyoe ureuëng nyang keuneuk balaih dam nyan jitiyeub awaknyan sampoe ubak banda nyan, peunduduek banda nyan hana jeuet jiseurah ureuëng nyan ubak ureuëng nyang peucrok nyan. Awaknyan harôh jilindong ureuëng nyang plueng nyan, sabab jihnyan jipoh maté ureuëng laén ngon hana jisaja, dan bukon sabab jibanci. 6 Ureuëng nyan jeuet tinggai di banda nyan sampoe jihnyan jipeusidang dikeue rakyat ba, dan sampoe ureuëng nyang mat jabatan Imeum Agong bak masanyan meuninggai donya. Óh lheueh nyan barô kheueh ureuëng nyan jeuet jiwoe u gampông droe jih nibak pane jihnyan jipeuplueng droe." 7 Teuma di daerah barat Krueng Yordan umat Israel laju jipeuteuntée banda-banda teumpat meulindong: Kedes di gunong-gunong Naftali di Galilea, Sikhem di gunong-gunong Efraim, dan Hebron di gunong-gunong Yehuda. 8 Nibak daerah siblaih u timu Krueng Yordan di darat nyang manyang padang pasi siblaih u timu Yerikho, awaknyan laju jipeuteuntée banda-banda nyang teupeugah nyoe sibagoe banda teumpat meulindong: banda Bezer di wilayah Ruben, banda Ramot di Gilead di wilayah Gad, dan banda Golan Basan, diwilayah Manasye. 9 Nyan kheueh mandum banda-banda teumpat meulindong nyang ka teupeuteuntée keu banmandum bansa Israel dan keu banmandum ureuëng aséng nyang na tinggai lamkawan awaknyan. Soe mantong ureuëng nyang jipoh maté ureuëng laén ngon hana jisaja, jeuet jilakée meulindong di banda-banda nyan nibak jitiyeub lé ureuëng-ureuëng nyang keuneuk balaih dam ateueh jih nyan; ureuëng nyan hana jeuet teupoh maté meunyoe gohlom teusidang dikeue rakyat ba.

Yosua 21

1 Bak siuroe, bubena ulée keuluwarga dalam sukée Lewi jijak u Silo di nanggroe Kanaan, dan óh trok keunan jimeuhadab laju ubak Teungku Imeum Eleazar, Yosua aneuëk Nun, dan dumna ulée-ulée keuluwarga dalam sukée bansa Israel. Awaknyan jipeugah, "Meulalu Nabi Musa, TUHAN ka geupeurintah ubak kamoe, keu ureuëng-ureuëng Lewi, teubri banda-banda keu teumpat tinggai kamoe dan tanoh-tanoh padang nyang na tô-tô deungon bandanyan keu teumpat beulatang peulara kamoe." 3 Teuma di ureuëng Israel jiseutôt laju peue nyang ka geupeurintah lé TUHAN. Nibak tanoh atra droe awaknyan keudroe, awaknyan geubri keu ureuëng Lewi nyang ka teupeuteuntée meunan cit deungon tanoh padang teumpat jimeurot beulatang peulara jih. 4 Nyang phon-phon that jiteurimong banda-banda nyan na kheueh nibak keuluwarga kawöm Kehat dalam sukée Lewi. Keuluwarga-keuluwarga nibak keuturonan Teungku Imeum Nabi Harun geubri laju lhée blaih boh banda dalam wilayah sukée Yehuda, Simeon dan Benyamin. 5 Keuluwarga-keuluwarga nyang laén nibak kawöm Kehat geubri teuma siploh boh banda nyang na didalam wilayah Efraim, sukée Dan dan meunan cit sukée Manasye nyang na disiblaih ubarat Krueng Yordan. 6 Kawöm Gerson meuteumé teuma lhée blaih boh banda nibak wilayah sukée Isakhar, Asyer, Naftali dan sukée Manasye nyang na disiblaih utimu Krueng Yordan. 7 Keuluwarga-keuluwarga nibak kawöm Merari meuteumé teuma dua blaih boh banda nibak wilayah sukée Ruben, Gad dan Zebulon. 8 Meunan kheueh carajih ureuëng-ureuëng Israel geubagi-bagi banda nyan deungon tanoh-tanoh padang naleueng keu teumpat jimeurot beulatang peulara deungan cara teu undi keu ureuëng Lewi, lagée nyang ka geupeurintah lé TUHAN meulalu Nabi Musa. 9 Nibak kawöm Kehat dalam sukée Lewi, teungku-teungku imeum keuturonan Nabi Harun kheueh nyang phon-phon that jiteurimong banda-banda nyan; keu awaknyan geubri teuma lhée blaih boh banda sigoguih deungon tanoh padang naleueng teumpat jipeurot beulatang peulara jih nyan. Nibak sukée Yehuda dan Simeon, awaknyan jiteurimong teuma sikureueng boh banda, banda-banda nyan na kheueh: Libna, Yatir, Estemoa, Holon, Debir, Ain, Yuta, Bet-Semes dan Arba, nyang teuboh nan meunurot nan ayah Enak. Bandanyan, nyang jinoenyoe nan jih Hebron, na kheueh saboh banda meulindong gunong-gunong Yehuda. Lampôh ngon blang dan gampông-gampông bandanyoe ka teubri keu Kaleb aneuëk Yefune mangat jeuet keu tanoh milék gobnyan. Nibak sukée Benyamin awaknyan jiteurimong teuma peuet boh banda, banda-banda nyan na kheueh: Gibeon, Geba, Anatot dan Almon. 20 Keuluwarga-keuluwarga nyang laén nibak sukée Kehat teubri teuma siploh boh banda meunan cit deungon tanoh padang naleueng jih. Nibak sukée Efraim awaknyan jiteurimong teuma peuet boh banda, banda-banda nyan na kheueh: Bet-Horon, Kibzaim, Gezer dan Sikhem, saboh banda meulindong gunong-gunong Efraim. Nibak sukée Dan awaknyan jiteurimong teuma peuet boh banda, banda-banda nyan na kheueh: Elteke, Gibeton, Ayalon dan Gat-Rimon. Nibak sukée Manasye nyang na di siblaih ubarat awaknyan jiteurimong teuma dua boh banda, banda nyan na kheueh: Taanakh dan Gat-Rimon. 27 Saboh kawöm teuk nyang laén didalam sukée Lewi na kheueh kawöm Gerson. Keuluwarga-keuluwarga didalam kawöm Gerson nyan teubri lhée blaih boh banda meunan cit deungon tanoh blang naleueng teumpat teupeurot beulatang peulara jih. Nibak sukée Manasye nyang na disiblaih u timu awaknyan jiteurimong teuma dua boh banda, banda nyan na kheueh: Beestera dan Golan, saboh banda meulindong di daerah Basan. Nibak sukée Isakhar awaknyan jiteurimong teuma peuet boh banda, banda-banda nyan na kheueh: Kisyon, Dobrat, Yarmut dan En-Ganim. Nibak sukée Asyer meunan cit awaknyan jiteurimong teuma peuet boh banda, banda-banda nyan na kheueh: Misal, Abdon, Helkat dan Rehob. Nibak sukée Naftali awaknyan jiteurimong teuma lhée boh banda, banda-banda nyan na kheueh: Hamat-Dor, Kartan dan Kedes, saboh banda meulindong di Galilea. 34 Kawöm nyang na mantong leubeh dalam sukée Lewi, nyan kheueh kawöm Merari geubri cit teuma dua blaih boh banda sigoe guih deungon tanoh blang teumpat teupeumeurot beulatang peulara. Nibak sukée Zebulon awaknyan jiteurimong lom peuet boh banda, banda-banda nyan na kheueh: Yokneam, Karta, Dimna dan Nahalal. Nibak sukée Ruben awaknyan jiteurimong lom peuet boh banda, banda-banda nyan na kheueh: Bezer, Yahas, Kedemot dan Mefaat. Nibak sukée Gad awaknyan jiteurimong teuma peuet boh banda, banda-banda nyan na kheueh: Mahanaim, Hesybon, Yaezer dan Ramot, saboh banda meulindong di Gilead. 41 Deungon nyan, nibak tanoh-tanoh nyang jimilék lé sukée Israel nyan na jeumeulah jih peuet ploh lapan boh banda deungon tanoh-tanoh blang nyang na ban sikeulileng nyan mangat teubri keu ureuëng-ureuëng Lewi. 43 Meunan kheueh TUHAN geubri keu umat Israel banmandum tanoh nyang ka geupeujanji deungon meusumpah keu indatu awaknyan. Óh ka lheueh jiduek nibak nanggroe nyan, umat Israel teutab tinggai disinan. 44 Teuma paih lagée peue nyang ka geupeujanji lé TUHAN keu indatu awaknyan, nanggroe nyan aman that-that sabab geulindong lé TUHAN. Musoh-musoh awaknyan hana meusidroe pi nyang hase jilawan awaknyan, sabab TUHAN geupeumeunang keu ureuëng Israel ateueh banmandum musoh awaknyan. 45 TUHAN geupeutrok ubak tieb-tieb peue nyang ka geumeujanji keu umat Israel; hana meusapeue janji pih nyang geumeu uengkie lé Gobnyan, banmandum janji nyan geupeutrok.

Yosua 22

1 Óh lheueh nyan Yosua geuhôi laju ureuëng nyang nibak sukée Ruben, Gad dan siladum nibak sukée Manasye nyang na tinggai di siblaih u timu Krueng Yordan, 2 laju geupeugah ubak awaknyan, "Gata ka tapeubuet peue-peue mantong nyang ka geupeurintah ubak gata lé Nabi Musa, hamba TUHAN. Dan meunan kheueh teuma banmandum peurintah ulôn ka gata taát. 3 Nyang ka-ka lé gata hántom tapeubiyeu syedara-syedara gata, ureuëng Israel nyang laén, jimeujuang keudroe. Gata ka tataát ubak banmandum peurintah TUHAN Po teu Allah gata deungon keubit-keubit. 4 Teuma paih lagée janji Geuhnyan, TUHAN Po teu Allah ka geubri keuteunangan keu syedara-syedara gata, ureuëng Israel nyang laén. Lé sabab nyan, jinoenyoe tagisa kheueh laju u wilayah gata keudroe di siblaih u timu Krueng Yordan nyang ka geubri lé Nabi Musa keu gata yoh masa ilée. 5 Dan gata jaga kheueh mangat gata tataát ubak huköm nyang ka geu peurintah lé Nabi Musa keu gata, huköm nyan na kheueh: Gata gaséh kheueh ubak Tuhan Allah gata, taturot kheueh peue nyang geulakée, tataát kheueh teuma ubak peurintah-peurintah Gobnyan, seutia kheueh ubak Gobnyan, dan gata meungabdi kheueh ubak Gobnyan deungon sipeunoh até gata dan deungon banmandum jiwa raga gata." 6 Óh lheueh nibaknyan Yosua laju geubri reuseutu keu awaknyan dan geupeuleupah kheueh awaknyan jiwoe lom u wilayah droe jihnyan deungon geupeusan lagée nyoe, "Gata jinoenyoe ka kaya dan tawoe jinoenyoe deungon gataba sajan beulatang peulara nyang le, pirak, méuh, teumaga, beuso dan peukayan. Gata bagi-bagi kheueh teuma hase jarah gata nyan keu syedara gata nyang saboh sukée." Teuma sukée Ruben, Gad, dan sukée Manasye nyang na disiblaih u timu Krueng Yordan nyan laju jitinggai ureuëng Israel nyang laén nyan, laju jibeurangkat nibak Silo di nanggroe Kanaan jijak laju ubak tanoh jih keudroe di daerah Gilead. Awaknyan ji tinggai nibak tanoh nyan ateueh peurintah TUHAN meulalu Nabi Musa. (Siladum nibak sukée Manasye ka jiteurimong nibak Nabi Musa, tanoh di siblaih u timu Krueng Yordan, dan siladum teuma sukée Manasye nyang laén jiteurimong teuma nibak Yosua tanoh nyang di siblaih ubarat Krueng Yordan meusajan-sajan deungon sukée nyang laén.) 10 Bak watée sukée Ruben, Gad dan sukée Manasye di siblaih u timu Yordan nyan trok u Gelilot -- mantong di siblaih ubarat Krueng Yordan -- awaknyan laju jipeudong saboh miseubah nyang rayeuk dan meugah to that deungon krueng. 11 Di Ureuëng-ureuëng Israel nyang laén nyan jideungoe seusabe bansa awaknyan jipeugah lagée nyoe, "Ureuëng-ureuëng sukée Ruben, Gad dan Manasye di siblaih u timu Yordan ka geupeudong saboh miseubah di Gelilot to that deungon Krueng Yordan nibak bagian wilayah geutanyoe!" Teuma awaknyan banmandum ka ji meusapat di Silo keuneuk jijak prang sukée-sukée Israel nyang na tinggai di bagian timu Krueng Yordan nyan. 13 Laju teuka teuma si Pinehas, aneuëk Teungku Imeum Eleazer, gobnyan jikirém lé umat Israel keu sukée Ruben, Gad dan sukée Manasye nyang na tinggai di daerah Gilead di siblaih u timu Yordan. 14 Meusigoe-sigoe deungon Pinehas nyan jijak teuma siploh droe ureuëng patot-patot peumuka bansa Israel, -- sidroe ureuëng nibak tieb-tieb sukée di siblaih ubarat Krueng Yordan, maséng-maséng na kheueh ulée keuluwarga didalam kawöm awaknyan. 15 Teuma trok kheueh laju awaknyan ubak teumpat sukée Ruben, Gad dan sukée Manasye di daerah Gilead. 16 Dan ateueh nan banmandum umat TUHAN, awaknyan jipeugah laju ubak ureuëng sukée Ruben, Gad dan Manasye nyan, "Pakon kheueh gata peubuet hai nyang jeuhet nyoe u ateueh Po teu Allah Israel? Deungon cara gata peuget miseubah droe gata nyan keudroe, saban cit deungon gata ka talawan TUHAN! Gata hana le ta seutôt ubak peue-peue nyang geupeurintah lé Gobnyan! 17 Peu kheueh gata hana ta ingat keu desya geutanyoe watée di Peor? Bak watée nyan geutanyoe geuhuköm lé TUHAN deungon sapeue-sapeue bala, bah kheueh nyan geutanyoe nyoe umat Gobnyan keudroe! Sampoe án jinoe hai nyan mantong ta tanggong akibat jih. Peu kheueh nyan gohlom cit seb? 18 Dan jinoenyoe, peu kheueh gata takeuneuk peulikot lom TUHAN? Meunyoe uroenyoe gata talawan TUHAN, singoh beungoh Gobnyan teuma geubeungéh keu banmandum umat Israel. 19 Meunyoe daerah gata nyan ka kuto dan hana patot teupeubuet iébadat ubak TUHAN disinan, gata minah kheueh laju keunoe ubak daerah TUHAN nyoe dipat na meuteumé Khimah TUHAN. Gata lakée kheueh laju siladum nibak daerah kamoe, teuma bék kheueh gata lawan TUHAN atawa gata lawan kamoe deungon cara gata tamah miseubah nyang laén, sabab keuhai miseubahnyan ka na miseubah TUHAN Po teu Allah geutanyoe. 20 Gata ingat kheueh, ubak Akhan aneuëk Zerah nyan hana jitem seutôt peurintah TUHAN keuhai barang-barang nyang museuti teupeuhanco nyan, dan peue akibat jih ateueh awaknyan? Banmandum umat Israel geuhuköm! Seudangkan nyang meudesya na kheueh Akhan, teuma nyang maté bukon jihnyan keudroe teuma banmandum umat Israel!" 21 Laju ureuëng-ureuëng sukée Ruben, Gad dan Manasye di siblaih u timu nyan jijaweueb, 22 "Nyang Mahakuasa na kheueh TUHAN! Nyang Mahakuasa na kheueh TUHAN! TUHAN geuteupeue pakon kamoe peubuet hainyoe, dan kamoe meuharab mangat gatanyoe tateupeue nyan! Seukira jih kamoe peubuet hainyan deungon meukeusut teulawan TUHAN atawa sabab lé kamoenyoe hana kamoe meuiman le ubak Gobnyan, bah kheueh kamoenyoe maté bak saát nyoe cit teuma! 23 TUHAN keudroe nyang huköm kamoe, meunyoe kamoe na meukeusut keuneuk kamoe lawan TUHAN dan kamoe peudong miseubah kamoenyoe deungon meukeusut kamoe peuseumah keureubeuen nyang teutot atawa keureubeuen gandom atawa keureubeuen meusahabat di ateueh nyan. 24 Kon nyan nyang kamoe meukeusut, hai syedara-syedara mandum! Kamoe peudong miseubah nyan, sabab kamoe khawate óh ka treb-treb singoh keuturonan gata teuma jipeugah ubak keuturonan kamoe, 'Gata hana hubongan sapeue deungon TUHAN, Po teu Allah Israel! 25 Gata kalon kheueh, Gobnyan geukeubah Krueng Yordan nyoe di teungoh-teungoh geutanyoe mangat teupeujareueng kamoe deungon gata ureuëng-ureuëng Ruben dan Gad. Keubit gata hana hubongan sapeue deungon TUHAN.' Teuma peue-peue nyang teujadi teuma? Teuntée kheueh keuturonan gata jipeusaneut u ateueh keuturonan kamoe jipiôh meuiébadat ubak TUHAN. 26 Lé sababnyan, kamoe peudong miseubah nyoe, bukon keu keureubeuen nyang teutot dan bukon teuma keu teumpat teupeuseumah keureubeuen kamoe, 27 teuma mangat jeuet keutanda keu tanyoe bandua blaih pihak, dan keu keuturonan geutanyoe óh singoh teuma, bahwa beutôi kamoe nyoe meu iébadat ubak TUHAN di Khimah Teuka Gobnyan deungon teuba sajan keureubeuen nyang teutot, peuseumahan-peuseumahan dan keureubeuen meusahabat. Deungon na lagéenyan keuturonan gata hana teuma jipeugah bahwa keuturonan kamoe hana hubongan sapeue deungon TUHAN. 28 Jadi, nyang kamoe meukeusut na kheueh: seukira jih keuturonan gata jipeugah lagée nyoe, teuma keuturonan kamoe hase jipeugah, 'Gata kalon kheueh miseubah nyan! Indatu kamoe geupeudong saboh miseubah nyang saban deungon miseubah TUHAN, bukon keu keureubeuen nyang teutot atawa keu teumpat peuseumah, teuma mangat jeuet keu tanda keu geutanyoe bandua blaih pihak.' 29 Peucaya kheueh, kamoe hana kamoe tem lawan TUHAN atawa kamoe piôh meungabdi ubak Gobnyan deungon teutamah miseubah nyang laén keu keureubeuen nyang teutot atawa keureubeuen gandom atawa teuma keu peuseumahan, seudangkan miseubah TUHAN Po teu Allah geutanyoe nyan ka na dikeue Khimah Teuka TUHAN." 30 Banmandum nyang geupeutrang lé ureuëng-ureuëng sukée Ruben, Gad dan sukée Manasye di siblaih utimu nyan jideungoe lé Teungku Imeum Pinehas meunan cit lé ban siploh droe ureuëng-ureuëng patot peumuka ureuëng Israel nibak bagian barat Krueng Yordan. Deungon nyan teuma awaknyan pi puih até ateueh peue nyang ka jipeutrang nyan. 31 Laju jipeugah lé Pinehas, aneuëk Teungku Imeum Eleazar nyan, keu ureuëng-ureuëng nibak sukée Ruben, Gad dan sukée Manasye di siblaih u timu nyan, "Jinoenyoe ka kamoe teupeu TUHAN na meusajan ngon geutanyoe, sabab gata nyoe hana talawan Gobnyan. Gatanyoe ka tapeuseulamat umat Israel nibak geuhuköm lé TUHAN." 32 Óh ka lheueh nyan jijak kheueh laju Pinehas deungon ureuëng-ureuëng patot peumuka Israel nyan. Awaknyan jitinggai laju ureuëng Ruben dan Gad di Gilead, laju jiwoe u Kanaan, óh lheuehnyan jilapor laju hainyan ubak umat Israel. 33 Teuma di umat Israel pih puih até jih bak watée jideungoe hai nyan, akhé jih awaknyan laju jipujo-pujo Po teu Allah. Awaknyan hana le na niet lam até jih keu jijak prang ureuëng Ruben dan Gad, dan mangat jipeumuseunah nanggroe nyan. 34 Akhé jih, sukée Ruben dan sukée Gad nyan jipeugah, "Miseubah nyoe jeuet keusaksi keu geutanyoe banmandum bahwa TUHAN na kheueh Po teu Allah." Le sababnyan awaknyan jiboh nan miseubah nyan "Saksi".

Yosua 23

1 Treb that óh ka lheueh TUHAN geubri keuteutraman ateueh bansa Israel; awaknyan hana le jipeukaru meunan cit jiancam lé musoh-musoh jih. Bak watée nyan Yosua ka tuha that-that. 2 Lé sabab nyan gobnyan laju geutawök banmandum umat Israel, meunan cit bubena ureuëng-ureuëng patot, bubena peumimpén, bubena hakém dan bubena peuwira tantra, lheueh nyan laju geupeugah, "Ulôn jinoenyoe ka tuha. 3 Gata banmandum ka lheueh takalon peue-peue mantong nyang geupeubuet lé TUHAN Po teu Allah gata ateueh banmandum bansa nyang na disinoe deumi gata. Nyang meujuang keu gata na kheueh TUHAN Po teu Allah gata keudroe. 4 Tanoh bansa-bansa nyang mantong na tinggai, meunan cit teuma tanoh mandum bansa nyang ka ulôn peutaloe, na kheueh tanoh nyang meulienteung di siblaih u timu Krueng Yordan laju u barat sampoe trok u Laôt Teungoh, banmandum nyan ka ulôn bagi keu gata mangat jeuet keu hak milék gata. 5 TUHAN Po teu Allah gata geupeujeuet bansa-bansa nyan taloe dan jisurot, dan jiplueng dikeue gata meunyoe gata tajak prang awaknyan. Gata teuma tacok nanggroe awaknyan, lagée nyang ka geupeujanji lé TUHAN Po teu Allah gata keu gata. 6 Lé sababnyan, jaga kheueh mangat gata jeuet tataát dan gata peubuet banmandum nyang na teutuléh lam Kitab Huköm Nabi Musa. Bék kheueh gata liengkeu meusaboh pi nyang na nibak huköm-huköm nyan. 7 Deungon na lagée nyan gata hana teuma meulawok deungon bansa-bansa nyang na mantong tinggai lamkawan gata. Gata hana teuma tateuôh nan-nan dewa awaknyan dan meusumpah ateueh nan nyan. Meunan cit gata hana teuma gata meuiébadat ngon gata sujut ubak dewa-dewa nyan. 8 Teuma gata harôh teutab seutia ubak TUHAN, lagée nyang ka lheueh gata peubuet trok nibak uroenyoe. 9 Bansa-bansa nyang rayeuk dan teuga-teuga ka geu-use lé TUHAN deumi keu gata; hana meusidroe pih nibak awaknyan nyang hase jimeuteun jilawan gata. 10 Tieb-tieb ureuëng lamkawan gata hase jipeutaloe meuribée ureuëng nibak awaknyan, sabab TUHAN Po teu Allah gata nyang meuprang keu gata, lagée nyang ka geupeujanji nyan. 11 Lé sababnyan, ingat kheueh mangat tagaséh TUHAN Allah gata. 12 Meunyoe gata hana seutia dan gata meujampu ngon bansa-bansa nyang mantong tinggai lamkawan gata, dan gata meukawen ngon awaknyan, 13 ingat, pasti TUHAN Po teu Allah gata hana geu-use lé bansa-bansa nyan keu gata. Dan sikeubit jih awaknyan keubiet mubahya that keu gata, sabab awaknyan teuma jeuet keu taron atawa keu jeunieb keu gata. Dan awaknyanpi jipeujeuet gata keubiet meudeurita that; sabab awaknyan teuma jeuet lagée peunyunuet ateueh rhung gata atawa lagée duro lam mata gata. Gata teutab sabe meudeurita sampoe hana meusidroe pih nyang na tinggai lam nanggroe nyang gét nyoe, nanggroe nyang geubri lé TUHAN Po teu Allah gata keu gata. 14 Jinoenyoe ka watée jih ulôn maté. Gata banmandum, maséng-maséng tateupeue that bahwa TUHAN Po teu Allah gata ka geubri keu gata banmandum nyang jroh nyang geupeujanji nyan. Tieb-tieb janji Gobnyan ka geupeupeunoh, hana meusapeue pih nyang hana geupeutrok. 15 Teuma, lagée toh Gobnyan ka geupeupeunoh janji Gobnyan keu gata, meunan cit Gobnyan pasti geupeubuet teuma tieb-tieb na ancaman nyang teuka ateueh gata. 16 Meunyoe gata taliengkeu janji nyang ka geupeurintah ateueh gata lé TUHAN Po teu Allah mangat gata tataát, dan gata tameuiébadat ubak ilah-ilah laén dan gata seumah teuma ilah-ilah nyan, deungon nyan TUHAN teuma beungéh, dan geuhuköm gata. Lam watée nyang paneuk, gata banmandum teuma gadôh lam nanggroe nyang gét nyoe, nyang ka geubri lé TUHAN Po teu Allah gata keu gata."

Yosua 24

1 Yosua laju geupeusapat banmandum sukée bansa Israel di Sikhem, laju geuyue ubak mandum ureuëng patot-patot, banmandum peumimpén, banmandum hakém-hakém dan mandum peuwira tantra nyang meuhadab gobnyan. Teuma teuka kheueh awaknyan meuhadab ubak Po teu Allah. 2 Óh lheuehnyan Yosua geupeugah ubak awaknyan, "Deungoe kheueh peue nyang geupeugah lé TUHAN, Po teu Allah Israel keu gata, 'Yoh jamén ilée indatu gata tinggai di meurandeh Krueng Efrat, dan jiseumah dewa-dewa. Sidroe lamkawan awaknyan na kheueh Terah, ayah Nabi Ibrahim dan Nahor. 3 Laju Ulôn cok Nabi Ibrahim, ayah indatu gata nyan, nibak nanggroe nyang na meurandeh Krueng Efrat nyan, dan Lôn yue jihnyan mangat jibloh bansaboh nanggroe Kanaan. Ulôn jok keujih nyan keuturonan nyang le. Phon-phon that Ulôn jok Nabi Ishaq keu jihnyan, 4 lheuehnyan keu Nabi Ishaq Ulôn bri teuma dua droe aneuëk, awaknyan na kheueh Nabi Yakub dan Esau. Ulôn jok keu Esau gunong Edom mangat jeuet keu tanoh hak milék jih, teuma Nabi Yakub, ayah indatu nyan, jiminah u nanggroe Meusé meusajan-sajan ngon aneuëk-aneuëk jih. 5 Óh lheuehnyan Ulôn kirém Nabi Musa ngon Nabi Harun, dan Lôn peuteuka bencana nyang paleng rayeuk ateueh nanggroe Meusé, lheuehnyan laju Ulôn peuteubiet gata nibak nanggroe nyan. 6 Ulôn ba indatu gata nyan mangat jiteubiet lam nanggroe Meusé, dan lé ureuëng Meusé laju jipeucrok awaknyan ngon geuritan prang jih dan ngon tantra meuguda. Dan bak watée indatu gatanyan trok ubak Laôt Geulagah, 7 awaknyan laju jimeuhôi Ulôn dan jilakée tulông. Lé sabab nyan teumpat lamkawan awaknyan ngon ureuëng-ureuëng Meusé nyan Ulôn peuseupôt, dan Ulôn tôb ureuëng-ureuëng Meusé nyan ngon ié laôt sampoe awaknyan lham banmandum. Gata ka tateupeue peue nyang Ulôn peubuet ateueh nanggroe Meusé. Treb lumpah na gata tinggai lam padang pasi. 8 Laju Ulôn ba gata u nanggroe ureuëng Amori nyang tinggai nibak siblaih u timu Krueng Yordan. Awaknyan jiprang gata, teuma Ulôn kupeujeuet gata meunang ateueh awaknyan. Gata reubot nanggroe awaknyan, dan Ulôn peuhanco awaknyan. 9 Lheueh nyan, lé raja Moab, na kheueh Balak aneuëk Zipor, jilawan gata. Jihnyan jikirém ureuëng laén ubak Bileam aneuëk Beor dan jilakée mangat jitem Bileam jikutok jihnyan. 10 Teuma Ulôn hana Lôn seutôt peue kheun Bileam, lé sababnyan gobnyan geubri beureukat keu gata. Meunan kheueh cara jih Ulôn peuseulamat gata nibak Balak. 11 Lheueh nyan gata tajeumeurang Krueng Yordan, dan laju trok u Yerikho. Lé ureuëng-ureuëng Yerikho jijak prang gata, meunan cit teuma deungon ureuëng Amori, ureuëng Feris, ureuëng Kanaan, Het, Girgasi, Hewi dan ureuëng Yebus. Teuma Ulôn kupeumeunang gata ateueh awaknyan banmandum. 12 Bak watée gata tamaju tajak prang awaknyan, Ulôn peujeuet awaknyan jeuet keubingöng dan teumakot that-that, lé sabab nyan bandua droe raja ureuëng Amori nyan jiplueng dikeue gata. Kon lé sabab peudeueng jih dan kon teuma lé sabab aneuk panah gata nyang teupeujeuet gata meunang. 13 Tanoh nyang Ulôn jok keu gata, gata teurimong ngon hana meususah payah. Dan banda-banda nyang Ulôn jok keu gata kon teuma gata nyang peudong nyan. Teuma jinoe gata kheueh nyang tinggai disinan, dan gata kheueh teuma nyang rasa boh anggô meunan cit ngon boh zaiton, padahai kon gata nyang pula.' " 14 "Lé sabab nyan, jinoenyoe," geupeugah lé Yosua teuma óh lheuehnyan, "horeumat kheueh TUHAN. Meungabdi kheueh ubak Gobnyan deungon até nyang ikhlaih dan deungon seutia. Peujiôh kheueh ilah-ilah nyang laén nyang jiseumah lé indatu gata yoh watée ilée di Mesopotamia dan nanggroe Meusé. Meungabdi kheueh ubak TUHAN mantong. 15 Meunyoe gata hana tatem, meungabdi ubak TUHAN, gata cok kheueh keuputosan uroe nyoe cit teuma ubak soe nyang gata meungabdi: peu kheueh ubak ilah-ilah nyang laén nyang jiseumah lé indatu gata di Mesopotamia yoh watée ilée atawa ubak ilah-ilah ureuëng Amori nyang nanggroe jih gata duek nibak saát nyoe. Teuma kamoe -- ulôn dan keuluwarga ulôn -- teutab meungabdi ubak TUHAN mantong." 16 Teuma lé umat Israel laju jijaweueb, "Kamoe sagai-sagai hana kamoe tinggai TUHAN dan hana kamoe meungabdi ubak ilah-ilah nyang laén! 17 TUHAN Po teu Allah geutanyoe nyang ka geupeubeubaih indatu geutanyoe dan tanyoe keudroe nibak jicok keunamiet di nanggroe Meusé. Tanyoe ka takalon buet-buet ajaéb nyang geupeubuet lé Po teu TUHAN. Sabe TUHAN geulindong geutanyoe banmandum buet meuneujak geutanyoe, ta liwat rot nanggroe-nanggroe aséng. 18 Dan watée geutanyoe tatamong lam nanggroe nyoe, TUHAN laju geu-use banmandum ureuëng Amori nyang na tinggai disinoe. Lé sababnyan kamoe keuneuk meungabdi ubak TUHAN, sabab Gobnyan kheueh Po teu Allah geutanyoe." 19 Teuma lé Yosua laju geupeugah, "Mungken gata hana hase gata meungabdi ubak TUHAN, sabab Gobnyan Allah nyang suci, Nyang Maha Esa. Gobnyan hana geutem na siteru. Meunyoe gata tatinggai Gobnyan dan gata meungabdi ubak ilah-ilah nyang laén, Gobnyan hana geupeu amphon desya-desya gata. Teuma nyang keubiet jih, Gobnyan teuma geulawan dan geuhuköm gata. Gobnyan teuma geupeubinasa gata, bahpi yoh watée ilée Gobnyan gét keu gata." 21 Lé sababnyan ureuëng-ureuëng Israel nyan laju jiseuôt, "Hana! Kamoe hana kamoe seumah ilah-ilah nyang laén. Kamoe teutab meungabdi ubak TUHAN!" 22 Lé Yosua geupeugah lom, "Nyan, gata keudroe jeuet keusaksi bahwa gata ka tacok keuputosan bahwa gatanyoe teutab meungabdi ubak TUHAN." "Beutôi," seuôt awaknyan, "kamoe keudroe jeuet keusaksi jih." 23 "Meunyoe meunan, kireueh kheueh laju bubena ilah-ilah bansa laén nyang na nibak gata nyan," kheun Yosua, "dan meujanji kheueh bahwa gata teuma seutia ubak TUHAN, Po teu Allah Israel." 24 Laju lé ureuëng-ureuëng nyan jikheun ubak Yosua, "Kamoe teutab meungabdi ubak TUHAN, Po teu Allah geutanyoe. Kamoe teutab taát ubak peue-peue nyang geupeurintah lé Gobnyan." 25 Lé sababnyan nibak uroe nyan di Sikhem Yosua laju geu ikat janji ngon umat Israel; dan disinan gobnyan laju geubri keu awaknyan huköm-huköm dan atoran-atoran nyang harôh awaknyan taát. 26 Banmandum huköm dan atoran-atoran nyan teutuléh lam kitab Huköm Allah. Óh lheuehnyan gobnyan laju geucok sineuk batée nyang rayeuk, batéenyan laju geupeudong yueb bak kayée nyang rayeuk nibak teumpat nyang khusos keu TUHAN. 27 Óh lheuehnyan geupeugah kheueh laju lé Yosua ubak mandum ureuëng nyan, "Batée nyoe jeuet keusaksi geutanyoe. Banmandum feureuman nyang geupeugah lé TUHAN keu geutanyoe, ka geupeugah dikeue batée nyoe. Lé sababnyan, batée nyoe kheueh nyang teuma jeuet keu saksi keu gata, mangat jeuet keu peuingat keu gata mangat bék gata lawan Po teu Allah." 28 Akhé jih, Yosua laju geuyuewoe awaknyan; laju awaknyan jigisa ubak tanoh droe jih maséng-maséng. 29 Óh lheuehnyan Yosua aneuëk Nun hamba TUHAN nyan, meuninggai donya nibak umu 110 thon. 30 Gobnyan teupeukubu bak tanoh atra gobnyan keudroe nibak Timmat-Serah nibak tanoh meugunong Efraim siblaih utara Gunong Gaas. 31 Simantong Yosua udeb, umat Israel sabe meungabdi ubak TUHAN. Dan watée ka meuninggai pi awaknyan teutab meuiébadat ubak TUHAN simantong lamkawan awaknyan na peumimpén-peumimpén nyang ka jikalon keudroe peue-peue mantong nyang geupeubuet lé TUHAN keu umat Israel. 32 Manyét Nabi Yusuf nyang jiba lé umat Israel nibak nanggroe Meusé, teupeukubu di Sikhem ateueh tanoh nyang ka lheueh teubloe lé Nabi Yakub deungon yuem sireutôh péng pirak nibak aneuëk-aneuëk Hemor, ureuëng syiek Sikhem. Tanoh nyan teupeuwaréh keu keuturonan Nabi Yusuf. 33 Lheueh nyan Eleazar aneuëk Nabi Harun meuninggai cit, dan teupeukubu teuma di Gibea, na kheueh banda nyang na teuduek nibak daerah tanoh meugunong Efraim. Banda nyan ka teujok keu Pinehas, aneuëk Eleazar.

Hakém-Hakém 1

1 Óh ka lheueh Yosua meuninggai donya, umat Israel jitanyong laju ubak TUHAN, "TUHAN, sukée nyang toh nibak kamoe nyoe nyang phon-phon that kamoe jak prang ureuëng Kanaan?" 2 Geujaweueb lé TUHAN, "Sukée Yehuda. Bak awaknyan ka Ulôn bri keukuasaan keu jijak reubot nanggroe nyan." 3 Laju jipeugah lé sukée Yehuda ubak sukée Simeon, "Gata tulông kheueh kamoe mangat kamoe jak prang ureuëng Kanaan dan kamoe reubot wilayah nyang ka geupeuteuntée lé TUHAN keu kamoe. Saboh watée teuma kamoepi kamoe tulông gata keu gata reubot wilayah nyang ka geupeuteuntée lé TUHAN keu gata." Lé sababnyan sukée Simeon 4 dan Yehuda jijak heungkoe laju meusajan-sajan. Dan TUHAN geupeumeunang laju awaknyan ateueh ureuëng Kanaan dan ureuëng Feris. Siploh ribée droe tantra musoh maté di Bezek. 5 Awaknyan jijak meurumpok laju ngon Adoni-Bezek, raja nanggroe nyan, dan laju jiseurang jih nyan. 6 Raja nyan laju jiplueng, teuma awaknyan jitiyeub laju dan jidrob laju raja nyan lheuehnyan jikoh nang jaroe raja nyan meunan cit deungon nang gaki jih nyan. 7 Geupeugah lé Adoni-Bezek, "Yoh masa ilée ka tujoh ploh droe raja nyang ka ulôn koh nang jaroe dan nang gaki jih, laju ulôn peubiyeu teuma awaknyan jimakheun seuéh-seuéh peunajoh nyang rhot nibak ateueh meja ulôn. Jinoenyoe Po teu Allah ka geupeu rhot u ateueh ulôn saban lagée nyang ka ulôn peubuet ateueh awaknyan." Adoni-Bezek nyan laju teuma jiba u Yerusalem, dan disinan kheueh raja nyan meuninggai donya. 8 Di ureuëng Yehuda nyan laju jijak prang Yerusalem dan jireubot ngon jitot teuma laju banda nyan meunan cit deungon peunduduek banda nyan jipoh maté bube nyang na. 9 Óh ka seuleusoe disinan awaknyan jijak lom teuma dan jiseurang Kanaan nyang na tinggai di daerah gunong-gunong, dan nibak reuleung-reuleung bukét; meunan cit nyang na tinggai di daerah nyang tho kréng di siblaih seulatan, 10 dan di banda Hebron, na kheueh banda nyang yoh watée ilée teupeunan banda Kiryat-Arba. Disinan ureuëng Yehuda jipeutaloe kawöm Sesai, Ahiman dan Talmai. 11 Beudôh di Hebron, ureuëng Yehuda nyan laju jijak seureubu banda Debir, nyang nibak watée nyan bandanyan nan jih Kiryat-Sefer. 12 Na sidroe nibak sukée Yehuda nyan, nyang nan jih Kaleb, ureuëng nyan jipeugah lagéenyoe, "Barang sigasoe hase jireubot Kiryat-Sefer, ureuëng nyan jeuet jimeukawen deungon aneuëk ulôn nyang nan jih Akhsa." 13 Otniel, aneuëk nibak adoe si Kaleb nyang nan jih Kenas, laju jijak reubot bandanyan. Teuma Kaleb jibri laju Akhsa aneuëk jihnyan jimeukawen deungon Otniel. 14 Bak uroe keureuja teupeukawen awaknyan, Otniel jipaksa Akhsa mangat Akhsa nyan jilakée saboh keubeueng tanoh nibak bapak jihnyan. Teuma jitreun kheueh laju Akhsa di ateueh keuleudée nyang teungoh jigiduek nyan, laju Kaleb jitanyong bak aneuëk jih Akhsa peue nyang jikeuneuk lakée. 15 Jijaweueb laju lé Akhsa, "Ulôn keuneuk lakée bak bapak meupaduboh mon ié, sabab tanoh nyang bapak bri keu ulôn nyan teumpat jih na kheueh di daerah nyang leupah that tho hana meu ié." Teuma Kaleb laju jijok keu aneuëk jih nyan mata ié dibagian tunong dan mon mata ié di bagian barôh. 16 Keuturonan ayah tuwan Nabi Musa, na kheueh ureuëng-ureuëng Keni, jiseutôt laju ureuëng Yehuda jiteubiet nibak daerah Yerikho, banda keuruma, dan jijak laju u daerah nyang tho hana meu ié meunan cit ngon geureusang di siblaih u seulatan Arad di Yehuda. Disinan awaknyan tinggai teutab lamkawan bansa Amalek. 17 Óh lheueh nyan meusajan-sajan deungon sukée Simeon, sukée Yehuda nyan laju jijak prang dan jipeutaloe laju bube na nibak bansa Kanaan nyang na tinggai di banda Zefat. Awaknyan laju jikutok banda nyan, óh lheuehnyan jipeuhanco teuma dan laju jirasi nan banda nyan deungon nan Horma. 18 TUHAN geutulông ureuëng Yehuda sampoe awaknyan hase jireubot daerah meugunong-gunong. Teuma awaknyan hana hase jireubot Gaza, Askelon atawa Ekron deungon daerah-daerah nyang na di sikeulileng nyan, sabab bansa-bansa nyang na tinggai di daerah sitot binéh panté na bak awaknyan geuritan-geuritan prang nyang teupeugét nibak beuso; lé sabab nyan ureuëng Yehuda hana meuhase ji use awaknyan. 20 Lagée nyang ka geupeurintah lé Nabi Musa, Hebron geubri keu Kaleb, sabab yoh watée ilée lhée golongan nibak kawöm keuturonan Enak ka geu use lé Kaleb nibak bandanyan. 21 Sukée Benyamin hana teuma hase ji use sukée Yebus beujiteubiet nibak banda Yerusalem. Nyang kheueh sabab jih di ureuëng Yebus nyan mantong na tinggai disinan meusapat deungon ureuëng-ureuëng Benyamin. 22 Sukée Efraim dan Manasye keuturonan Nabi Yusuf, jijak prang teuma banda Betel, nyang bak watée nyan nan jih banda Lus. Dan TUHAN geutulông awaknyan. Bak watée mata-mata geu kirém u banda nyan, 24 awaknyan meurumpok deungon sidroe ureuëng agam nyang teuka di banda. Jipeugah lé awaknyan ubak ureuëng agam nyang meurumpok nyan, "Meunyoe gata tatem tulông kamoe mangat kamoe hase kamoe tamong u dalam banda nyoe, kamoe teuma kamoe peusaneut gata deungon get that-that." 25 Teuma di ureuëng agam nyan laju jitunyok ubak awaknyan rot tamong u dalam banda nyan. Lé ureuëng-ureuëng Efraim dan Manasye jitamong laju u dalam bandanyan dan laju teuma jipoh maté bubena peunduduek nyang na tinggai di dalam banda nyan, keucuali ureuëng agam nyan deungon banmandum waréh kawöm jih. 26 Gobnyan akhé jih jiminah u daerah ureuëng Het, laju jipeudong teuma saboh banda disinan dan jiboh nan banda nyan Lus. Banda nyan teutab meunan nyang lagée nyan. 27 Sukée Manasye hana ji use peunduduek banda Bet-Sean, Taanakh, Dor, Yibleam dan Megido deungon gampông-gampông nyang tô-tô disinan. Lé sababnyan ureuëng Kanaan teutab tinggai disinan. 28 Keubit óh lheueh ureuëng Israel meutamah teuga, awaknyan jipaksa ureuëng Kanaan jimeukeureuja keu awaknyan, teuma awaknyan hana cit jiuse ureuëng-ureuëng Kanaan nyan banmandum nibak teumpat nyan. 29 Di banda Gezer, sukée Efraim hana ji use ureuëng Kanaan, peunduduek banda nyan. Jadi, ureuëng Kanaan teutab na tinggai disinan meusapat-sapat deungon awaknyan. 30 Peunduduek banda Kitron dan Nahalol hana cit jiuse lé sukée Zebulon. Nyang kheueh sabab jih bansa Kanaan teutab mantong tinggai disinan meusapat-sapat deungon awaknyan, teuma ureuëng-ureuëng Kanaan nyan jipaksa meukeureuja keu awaknyan. 31 Peunduduek banda Ako, Sidon, Ahlab, Akhzib, Helba, Afek dan Rehob meunan cit hana jiuse lé sukée Asyer. 32 Nyang kheueh sabab jih ureuëng Kanaan, peunduduek aseuli nanggroe nyan teutab mantong na tinggai disinan meusapat-sapat deungon ureuëng Asyer. 33 Peunduduek banda Bet-Semes dan Bet-Anat pi hana cit ji use lé sukée Naftali. Nyang kheueh sabab jih di ureuëng Kanaan, peunduduek aseuli nanggroe nyan teutab mantong na tinggai disinan meusapat-sapat deungon ureuëng Naftali. Teuma, awaknyan jipaksa meukeureuja keu ureuëng Naftali. 34 Bansa Amori teutab mantong na tinggai di Ayalon, Saalbim dan Gunong Heres, sabab sukée Dan jipeusak lé awaknyan u daerah meugunong-gunong, dan hana jipeubiyeu jitreun u daerah pantôn. Teuma bansa Amori nyan sabe jiteugon lé sukée Efraim dan Manasye lom teuma jipaksa meukeureuja keu bandua sukée nyan. 36 Di siblaih utara Sela, bataih daerah ureuëng-ureuëng Amori teujak laju ubak Sineungoh Akrabim.

Hakém-Hakém 2

1 Malaikat TUHAN geujak nibak Gilgal u Bokhim dan geupeugah ubak ureuëng-ureuëng Israel, "Ulôn ka Lôn peuteubiet gata di nanggroe Meusé, dan Lôn ba gata u nanggroe nyang ka Ulôn peujanji ubak indatu gata. Dan ka cit Ulôn peugah, 'Teu ikat janji Ulôn deungon gata dan hainyan hana Ulôn peuputôh. 2 Sabab nyan gata hana jeuet taikat janji peue mantong deungon peunduduek nanggroe nyoe. Miseubah-miseubah awaknyan harôh kheueh gata reuloh.' Teuma gata hana tapeubuet peue nyang ka Ulôn peurintah ubak gata nyan. Teuma nyang gata peubuet nyang meulawan ngon nyang Ulôn peurintah nyan! 3 Lé sabab nyan, jinoenyoe tadeungoe kheueh Ulôn! Ulôn hana teuma Lôn use ureuëng-ureuëng nanggroe nyoe meunyoe gata tamuprang deungon awaknyan. Awaknyan teuma jeuet keu musoh-musoh gata, dan gata rhoh lam taron, deungon nyan gata taturot teuma taseumah ubak dewa-dewa awaknyan." 4 Óh ka lheueh malaikat nyan geupeusampoe haba nyan, banmandum bansa Israel jimo ba-e sira jikliek ngon su nyang teuga. 5 Nyang kheueh sabab jih teumpat nyan teuboh nan Bokhim. Laju nibak teumpat nyan di ureuëng-ureuëng Israel jipeuseumah keureubeuen keu TUHAN. 6 Óh ka seuleusoe Yosua geupeuleupah ureuëng-ureuëng Israel nyan jijak, awaknyanpi jibeurangkat laju mangat jijakduek ateueh tanoh nyang ka jeuet keujeumba awaknyan maséng-maséng. 7 Simantong Yosua udeb, ureuëng Israel mantong jimeungabdi ubak TUHAN. Óh ka lheueh Yosua meuninggai donya pi ureuëng-ureuëng Israel nyan teutab mantong meungabdi ubak TUHAN seumantong awaknyan jipimpén lé ureuëng-ureuëng nyang ka jikalon ngon mata ulée jih banmandum buet nyang ajaéb nyang ka geupeubuet lé TUHAN keu ureuëng Israel. 8 Yosua aneuëk Nun -- hamba TUHAN nyan -- meuninggai donya nibak umu sireutôh siploh thon. 9 Laju gobnyan teupeukubu nibak tanoh jrat gobnyan keudroe, na kheueh di Timnat-Serah di daerah meugunong-gunong Efraim di siblaih utara Gunong Gaas. 10 Óh lheueh banmandum angkatan nyan meuninggai cit teuma. Dan angkatan nyang dilikot awaknyan ka hana jituri TUHAN, sabab awaknyan hana jirasa peue nyang ka geupeubuet lé TUHAN keu bansa Israel. 11 Óh lheueh nyan ureuëng Israel ka meudesya ubak TUHAN. Awaknyan hana le jiseumah TUHAN Po teu Allah indatu awaknyan, nyan kheueh Po teu Allah nyang ka geuba awaknyan geuteubiet nibak nanggroe Meusé. Awaknyan ka jipeuphon seumah Baal dan Asytoret meunan cit deungon dewa-dewa nyang laén nyang jiseumah lé bansa-bansa di sikeulileng awaknyan. Teuma TUHAN laju geubeungéh keu awaknyan dan geupeubiyeu mantong geurombolan laén jijak prang sira jireupah awaknyan. Awaknyan hana meudaya jimeuhadab keu ngon musoh-musoh nyang na silingka awaknyan. 15 Tieb-tieb watée awaknyan jijak meuprang, TUHAN geulawan awaknyan, lagée nyang ka geupeu ingat ubak awaknyan. Teuma awaknyan jirasa sulet ngon sosah nyang lumpah meupalo. 16 Hana putôh-putôh TUHAN geukirém keu awaknyan peumimpén nyang meujuang mangat jipeubeubaih awaknyan nibak geurombolan peurampok. 17 Teuma awaknyan hana jipeuhiro keu peumimpén nyan. Awaknyan ji seumah ubak ilah-ilah laén, dan hana seutia le ubak TUHAN. Awaknyan hana jiseutôt cuntoh teuladan nyang ka geupeubuet lé indatu jih nyang that-that taát ubak mandum peurintah-peurintah TUHAN. 18 Meunyoe TUHAN ka geubri sidroe peumimpén keu bansa Israel, TUHAN sabe geutulông peumimpén nyan. Dan simantong peumimpén nyan mantong udeb, TUHAN sabe geupeu lheueh awaknyan nibak musoh-musoh jih. TUHAN that-that geugaséh keu awaknyan meunyoe TUHAN geudeungoe awaknyan ji meu rang-rang sabab peudeh jiseksa, ji iénanya meunan cit jitindéeh. 19 Teuma meunyoe peumimpén nyan ka meuninggai donya, bansa nyan meupi-e nyang leubeh brok nibak angkatan sigohlom nyan. Awaknyan jimeungabdi ubak ilah-ilah laén dan jiseumah ilah-ilah nyan. Awaknyan jigisa ubak buet nyang lazem nyang jeuhet dan hana teuma ji ubah buet nyang salah nyan. 20 Sabab nyan TUHAN get that beungéh keu bansa Israel, dan geupeugah, "Ulôn ka Ulôn peurintah ubak indatu bansa nyoe mangat jimumat ubak janji Ulôn deungon awaknyan. Teuma bansa nyoe ka jipeuputôh talo ngon ikat janji nyan; awaknyan ka ji-iengkeue peue nyang ka Ulôn peurintah. 21 Jinoenyoe Ulôn hana Lôn tem le use bansa toh mantong meunan cit deungon nyang mantong na di nanggroe nyoe bak watée Yosua meuninggai donya. 22 Ulôn teuma Ulôn ngui bansa-bansa nyan mangat jijak ujoe bansa Israel, deungon na lagéenyan hase Lôn teupeue peu kheueh umat Israel jitem seutôt peue nyang Ulôn peurintah lagée indatu awaknyan, atawa hana." 23 Nyang kheueh sabab jih TUHAN hana geubri meunang keu Yosua ateueh bansa-bansa nyan. Seubalek jih TUHAN geupeubiyeu awaknyan tinggai dinanggroe nyan, dan deungon bagaih that geu use awaknyan.

Hakém-Hakém 3

1 Mangat teu ujoe ureuëng-ureuëng Israel nyang hántom na jirasa meuprang di nanggroe Kanaan, TUHAN geupeubiyeu mantong meupadub boh bansa tinggai di nanggroe nyan. 2 TUHAN geupeubuet lagée nyan na kheueh deungon meukeusut geu peuruno tieb-tieb geuneurasi Israel jimuprang, khusos jih awaknyan nyang hana tom na ji maju ngaza dalam mideuen prang. 3 Bansa-bansa nyang na mantong tinggai di nanggroe nyan na kheueh: bansa nyang tinggai di dalam banlimong boh banda Filistin, banmandum bansa Kanaan, bansa Sidon, dan bansa Hewi nyang tinggai nibak gunong-gunong Libanon, phon nibak Gunong Baal-Hermon trok u jalan nyang teutuju u Hamat. 4 Awaknyan na nibak teumpatnyan na kheueh sibagoe batée teu ujo keu bansa Israel. Deungon lagée nyan hase kheueh teuteupeue peu kheueh bansa Israel nyan jiseutôt peurintah nyang ka geubri lé TUHAN ubak indatu awaknyan meulalu Nabi Musa. 5 Nyang kheueh sabab jih ureuëng-ureuëng Kanaan, Het, Amori, Feris, Hewi dan Yebus teutab tinggai di nanggroe nyan meusapat-sapat deungon ureuëng Israel. 6 Laju di umat Israel nyan jimeukawen meujampu deungon bansa-bansa nyang na tinggai disinan, dan meusajan teuma jiseumah dewa-dewa awaknyan. 7 Umat Israel meudesya ubak TUHAN, Po teu Allah droe jih nyan. Awaknyan tuwoe ubak Gobnyan sampoe awaknyan ji meuiébadat ubak beurala-beurala Baal dan Asyera. 8 Teuma TUHAN geubeungéh keu umat Israel, dan geupeubiyeu mantong awaknyan jipeutaloe lé Raja Kusyan-Risyataim nibak Mesopotamia. Lapan thon treb jih raja nyan jikuasa awaknyan. 9 Óh ka lheueh nyan umat Israel jimeuhôi jilakée tulông ubak TUHAN, laju TUHAN geukirém Otniel mangat jijak peubeubaih awaknyan. (Otniel na kheueh aneuëk nibak Kenas, adoe Kaleb.) 10 TUHAN ka geujok kuasa ubak Otniel sampoe Otniel nyan ka jeuet keupeumimpén umat Israel. Jihnyan jijak meuprang, laju TUHAN geupeumeunang awaknyan u ateueh raja Mesopotamia. 11 Teuma aman ngon teuntram kheueh nanggroenyan peuet ploh thon treb jih. Óh lheueh nyan Otniel pih meuninggai donya. 12 Umat Israel ka meudesya lom ubak TUHAN, sampoe TUHAN geupeujeuet Eglon, raja nanggroe Moab, jeuet keuleubeh teuga nibak Israel. 13 Raja Eglon nyan laju teuma jimeugabong deungon bansa Amon dan Amalek, dan laju jipeutaloe ureuëng Israel, óh lheueh nyan jireubot teuma Yerikho, banda boh kuruma nyan. 14 Lapan blaih thon treb jih Israel jijajah lé Eglon. 15 Teuma bak watée umat Israel jiteumawök jilakée tulông ubak TUHAN, Gobnyan laju geukirém Ehud mangat jijak peubeubaih awaknyan. Ehud nyan na kheueh sidroe ureuëng nyang jawie; jih nyan aneuëk Gera nibak sukée Benyamin, dan gobnyan kheueh nyang lazem jih ji-intat keu Raja Eglon upeti nyang harôh teubayeue keu umat Israel. 16 Bak si uroe Ehud jipeuget saboh peudeueng meumata dua nyang panyang jih rab siteungoh metée. Laju peudeueng nyan jilat nibak keuieng jih nyang teusöm didalam bajée, 17 óh lheueh nyan jijak laju sira jiba upeti keu jijak jok keu Raja Eglon. Raja Eglon nyan badan jih lumpah teumbon. 18 Óh ka lheueh jipeuseumah upeti nyan, lé Ehud laju jiyue woe ureuëng-ureuëng nyang seuôn péng méuh nyan. 19 Teuma Ehud keudroe laju jipiôh óh ka trok nibak batée-batée nyang meu uke nyang to ngon Gilgal, laju jijak gisa ubak Eglon. Bak watée nyan Eglon mantong di dalam kama nyang leupie lom ngon sijuek di kama tingkat ateueh meuligoe jih nyan. Jipeugah lé Ehud ubak Eglon, "Amphon deulat po nyang mulia! Ulôn na lôn ba haba rahsia keu amphon teungku." Teuma raja nyan geupeugah laju, "Preh ilée," laju raja geupeurintah ubak banmandum hamba geuh nyang na didalam ruweueng nyan mangat jiteubiet laju dan ji tinggai raja ngon Ehud mantong didalam kama nyan. Óh lheueh nyan, Ehud laju jipeurab ubak raja nyang teungoh geuduek, laju jipeugah, "Na haba nibak Po teu Allah keu Teungku amphon!" Ban geudeungoe nyan raja laju geubeudôh. 21 Bak watée nyan cit teuma Ehud deungon bagaih ban lagée kilat jisuit peudeueng nibak lam sarong nyang meugantung nibak keuieng siblaih uneuen, laju peudeueng nyan jitôb sampoe óh lhôk ubak pruet si raja. Banmandum mata peudeueng nyan trok án ubak go jih jitamong habéh u dalam pruet raja sampoe beusôt trok nibak rhueng dan meunan cit deungon gapah-gapah raja nyan habéh mandum meuhambo uluwa. Dan Ehud óh lheueh jipeubuet lagéenyan jipeubiyeu mantong peudeueng nyan meukeumat nibak pruet raja nyan, 23 óh lheueh nyan jiteubiet laju uluwa sira jitôb pintoe lom jigunci di luwa, 24 óh lheueh nyan jijak laju jitinggai teumpat nyan. Bak watée hamba raja nyan teuka dan jikalon banmandum pintoe kama teugunci, awaknyan jisangka raja mantong na didalam kama dan teungoh geujak u likot. 25 Óh ka lheueh jipreh nyang lumpah treb dan raja gohlom cit geubuka pintoe, awaknyan jiteuka bingong laju jicok gunci dan jibuka laju pintoe nyan. Rupari raja jih nyan ka maté teutiek di ateueh aleue. 26 Teungoh awaknyan mantong meupreh-preh, Ehud ka jiteumé peuplueng droe u Seira meulalu batée-batée meu uke. 27 Meunan trok u daerah meugunong Efraim, laju jiyueb beureuguih mangat jitawôb ureuëng Israel jeuet jijak meuprang. Di ureuëng Israel nyan teuka laju dan lé Ehud jipimpén laju awaknyan sira jipeutreun nibak daerah meugunong-gunong nyan. 28 "Seutôt ulôn," kheun Ehud ubak awaknyan, "TUHAN ka geupeutaloe bubena ureuëng Moab, musoh gata nyan keu gata." Teuma dimiyueb pimpénan Ehud nyan, jitreun kheueh laju ureuëng-ureuëng Israel nibak gunong-gunong nyan. Awaknyan laju jireubot teumpat jeumeurang ureuëng Moab di Krueng Yordan. Hana meusidroe pi nibak musoh nyan jipeubiyeu jijeumeurang deungon seulamat. 29 Nibak meu heungkoe lam prang nyan awaknyan jipoh maté na kira-kira 10.000 tantra Moab nyang paleng gét; hana meusidroe pi nyang na seulamat. 30 Uroe nyan Moab taloe ateueh ureuëng Israel, teuma teuntram kheueh nanggroe nyan lapan ploh thon treb jih. 31 Peumimpén nyang seulanjut jih nyoe na kheueh Samgar aneuëk Anat. Gobnyan pi jimeujuang dan geupeubeubaih ureuëng Israel. Deungon tungkat meurabée leumô, gobnyan jipoh maté 600 droe Filistin.

Hakém-Hakém 4

1 Óh ka lheueh Ehud meuninggai donya, bansa Israel ka meudesya lom ubak TUHAN. 2 Teuma TUHAN geupeubiyeu mantong awaknyan ji peutaloe lé Yabin, raja nanggroe Kanaan nyang teumpat duek di banda Hazor. Panglima angkatan prang na kheueh Sisera nyang tinggai di Haroset-Hagoyim. 3 Yabin na 900 boh geuritan prang nyang teupeugét nibak beuso. Dua ploh thon treb jih jihnyan jijajah ureuëng Israel deungon keujam. Óh lheueh nyan barô kheueh awaknyan jiteumawök ngon jilakée tulông ubak TUHAN. 4 Bak watée nyan nyang pimpén bansa Israel na kheueh sidroe nabi inong nyang nan geuh Debora, peurumoh Lapidot. 5 Debora nyan ka jeuet keu lazem nibak gobnyan geuduek-duek di miyueb bak kuruma, lamkawan Rama dan Betel, di daerah meugunong-gunong di Efraim. Dan disinan kheueh ureuëng-ureuëng Israel jiteuka keu jijak lakée naseuhat ubak gobnyan. 6 Bak siuroe gobnyan geuyue ureuëng laén mangat jijak hôi Barak, aneuëk Abinoam, nibak banda Kedes di daerah Naftali. Laju gobnyan geupeugah ubak Barak, "Nyoe peurintah TUHAN, Allah Israel, keu gata: 'Gata peusapat laju 10.000 droe ureuëng agam nibak sukée Naftali dan sukée Zebulon, dan taba kheueh laju awaknyan u Gunong Tabor. 7 Teuma Ulôn peujeuet Sisera, panglima angkatan prang Yabin, jijak ubak Krueng Kison deungon tantra jih dan geuritan prang jih keu jijak prang gata. Teuma Ulôn kupeumeunang gata nibak prang nyan.' " 8 Barak geupeugah teuma ubak Debora, "Meunyoe gata taseutôt, ulôn lôn tem jak sajan. Teuma meunyoe hana, ulôn pi hana teuma lôn tem jak." 9 Geu seuôt lé Debora, "Gét, ulôn teuma lôn seutôt! Teuma ingat, bukon gata eunteuk nyang meuteumé horeumat. Meulalu sidroe ureuëng inong kheueh TUHAN teuma geupeutaloe Sisera." Lé sabab nyan geubeurangkat kheueh Debora meusigoe-sigoe deungon Barak u Kedes. 10 Dan Barak laju geukrah sukée Zebulon ngon Naftali u Kedes. Nyang seutôt Barak dan Debora bak watée nyan na 10.000 droe ureuëng. 11 Bak watée nyan na sidroe ureuëng Heber, jihnyan ureuëng Keni, ka jipeu aséng droe nibak bansa jih. (Bansa Keni na kheueh keuturonan Hobab, parui Nabi Musa.) Heber ka jijak peudong khimah-khimah gobnyan nyang to ngon bak kayée Sala di Zaanaim, hana padubna jiôh nibak Kedes. 12 Meunan jideungoe lé Sisera bahwa Barak ka geujak u Gunong Tabor, 13 laju lé gobnyan jipeusapat ban sikureueng reutôh boh geuritan prang nyang teupeugét nibak beuso nyan, meusigoe-sigoe deungon banmandum pasokan jihnyan laju jiba awaknyan nibak Haroset-Hagoyim u Krueng Kison. 14 Lé Debora laju geupeugah hai nyan ubak Barak, "Jak, maju! TUHAN kheueh nyang pimpén gata. Nibak uroe nyoe Gobnyan geupeumeunang gata ateueh Sisera." Dan jitreun kheueh laju Barak nibak ateueh Gunong Tabor meusigoe-sigoe deungon ban siploh ribée droe ureuëng gobnyan, 15 óh lheuehnyan geujak prang laju Sisera. Dan TUHAN laju geupeukaru deungon geupeutabu beba banmandum pasokan Sisera meunan cit deungon banmandum geuritan prang jihnyan, sampoe Sisera jitreun di ateueh geuritan prang jih nyan, laju jiplueng deungon tapak. 16 Barak laju geupeucrok geuritan prang dan pasokan musoh nyan trok u Heroset-Hagoyim laju ban banmandum pasokan Sisera nyan geupoh maté; hana meusidroepi nyang geupeubiyeu udeb. 17 Bak watéenyan Sisera ka jiplueng u khimah Yael, peurumoh Heber, ureuëng Keni nyan. Sabab Raja Yabin nibak Hazor meusahabat deungon kawöm keuluwarga Heber nyan. 18 Bak watée Sisera teuka, Yael jisambot laju gobnyan dan geupeugah, "Keunoe Teungku, neutamong laju u dalam khimah ulôn; bék neutakot." Dan Sisera jitamong laju u dalam khimah Yael dan Yael pi jitôb laju pintoe khimah nyan deungon ija sinutôb tiengkab mangat hana leumah teungieng. 19 Geupeugah lé Sisera ubak Yael, "Gata tulông bri keu ulôn bacut ié jieb; ulôn leupah that grah." Teuma Yael laju geubuka baluem kulét, teumpat teukeubah susu, dan laju atranyan geubri ubak Sisera, óh lheueh nyan geutôb lom teuma deungon ija sinutôb tiengkab. 20 Laju Sisera geupeugah ubak Yael, "Gatajak kheueh laju dan gatadong nibak babah pintoe khimah. Meunyoe na ureuëng teuka dan jitanyong bak gata peu kheueh na ureuëng disinoe, gata peugah laju hana." 21 Sisera rupa jih lumpah that hék akhé jih gobnyan teugantuek dan laju teungeut deungon teuhanta hana jitée droe. Yael laju jicok saboh palée dan saboh pasak keu khimah, deungon seungab-seungab jipeurab laju ubak Sisera nyang mantong teungeut nyan. Óh lheuehnyan pasak nyang kana bak jaroe jih nyan jipéh laju u dalam ôn punyueng Sisera nyan sampoe beusôt trok ubak tanoh. Meunan kheueh cara Yael jipoh maté Sisera. 22 Bak watée Barak teuka geujak mita Sisera, Yael laju jisambot Barak sira jipeugah ubak gobnyan, "Jak keunoe, jeuet lôn tunyok ubak droeneueh ureuëng nyang neujak mita nyan." Barak laju geutamong meusigoe deungon Yael, deuh laju geukalon bahwa Sisera nyan ka maté, teutiek di ateueh tanoh deungon pasak khimah mantong na teulabang nibak punyueng jihnyan. 23 Uroe nyan TUHAN geupeumeunang keu ureuëng Israel ateueh Yabin, raja Kanaan. 24 Raja nyan maken treb seumaken jiteugon lé ureuëng Israel sampoe akhé jih gobnyan binasa.

Hakém-Hakém 5

1 Nibak uroenyan jimeu ca-e kheueh Debora dan Barak aneuëk Abinoam. Meunoe kheueh jipeugah: 2 Pujoe kheueh TUHAN, sabab pahlawan-pahlawan Israel ka meuteukat keu jimeujuang, dan rakyat deungon rila jijak meuprang. 3 Deungoe kheueh hai bubena raja dan pangeran, ulôn meuca-e keu Po teu Allah Israel, nyan kheueh TUHAN. 4 Bak watée Droeneueh beurangkat nibak Seir, ya TUHAN ulôn, dan wilayah Edom Droeneueh tinggai, bumoe meugeunta, luengkiek-luengkiek langétpi teubuka, dan awan dilangétpi jipeutreun ujeuen. 5 Gunong-gunongpi meuguncang di daerah peunguasa Sinai, dikeue TUHAN, Allah Israel. 6 Di masa Samgar, aneuëk Anat, dan meunan cit bak masa Yael, hana khalipah di nanggroe, hana teuma keulana nibak rot ueh raya. 7 Banda-banda Israel hana nyang keumiet, sungue ngon seungab sampoe watée droeneueh teuka, Debora; droeneueh teuka na lagée sidroe ma nyang teusayang. 8 Bak watée Israel phon jiseumah dewa, beukaih kheueh prang di nanggroe awaknyan; lamkawan 40.000 ribée pahlawan bansa, hana meusidroepi nyang na ji beuot sinjata. 9 Keu mandum panglima Israel nyang jipeutaba droe deungon sukarila, ulôn peusampoe peunghargaan ulôn nyang hana teuhingga. Pujoe kheueh TUHAN! 10 Hai gata nyang tapasang di ateueh keuleudée putéh, gata nyang duek di ateueh tika peureumadani, dan gata banmandum nyang jak deungon gaki, tapeugah kheueh laju kisah keuhai meunang nyoe! 11 Toe deungon mon-mon ié meumata na teudeungoe su ureuëng-ureuëng meuca-e, jiba kisah keumeunangan TUHAN sampoe meu ulang-ulang, keuhai meunang Israel, umat TUHAN. Teuma jimeubaréh kheueh awaknyan jijak laju u pintoe geureubang banda. 12 Beudôh kheueh hai Debora, dan gata peubeudôh kheueh ca-e ngon meunyanyoe. Beudôh kheueh teuma hai Barak, gata iréng kheueh ureuëng nyang teuhuköm! 13 Keusaria nyang na tinggai leubeh jijak meurumpok ubak peumimpén jih, awaknyan teuka, dan ka siab keu jimeujuang keu droe Geuhnyan. 14 Awaknyan geujak nibak Efraim u pantôn, jiseutôt pasokan Benyamin nyang meubaréh dikeue awaknyan. Nibak Makhir teuka bubena panglima, dan nibak Zebulon jibeudôh teuma dumna peuwira. 15 Bubena ureuëng patot Isakhar teuka meusajan ngon Debora, nyoe, Isakhar teuka, dan Barak pi jiseutôt sajan; awaknyan jiseutôt awaknyan jijak treun u pantôn. Teuma sukée Ruben hana hase jipeu teuntée sikeub sabab lamkawan awaknyan hana meuteumé haba sipakat. 16 Pakon awaknyan tinggai lamkawan bubiri-bubiri? Peu kheueh mangat jideungoe ureuëng meurabe jimehôi beulatang peulara jih? Beutôi sukée Ruben hana hase jipeuteuntée sikeub sabab lamkawan awaknyan hana meuteumé haba sipakat. 17 Teungoh Zebulon dan Naftali geumeujuang udeb maté di mideuen prang, sukée Dan ka teuduek di ateueh kapai, dan sukée Gad teutab teuma di siblaih u timu Yordan, teuma disukée Asyer teunang-teunang mantong hana jiteum minah nibak teumpat awaknyan disitot binéh panté. 19 Di Taanakh, teumpat nyang rab ngon krueng di Megido, raja-raja jimuprang, raja-raja Kanaan jimeujuang, teuma pirak hana nyang jiba sajan sibagoe atra rampasan. 20 Meunan cit bintang-bintang meusajan meujuang jilawan Sisera, nibak teumpat bintang nyan jijak-jak di angkasa. 21 Ié Krueng Kison rayeuk bohbah jipeuhanyot musoh. Maju, maju kheueh deungon peukasa, hai jiwa ulôn! 22 Deungon maju teudeungoe kheueh tapak-tapak langkah guda nyang jiparôh lé nyang giduek di ateueh rhueng jih nyan. 23 "Kutok kheueh Meros, dan nyang keumiet nyan," geupeugah lé Malaikat TUHAN "sabab awaknyan hana trok jibri bantuan sibagoe pahlawan nyang meujuang keu TUHAN." 24 Meu untông kheueh Yael, peurumoh Heber ureuëng Keni; nibak banmandum nyang keumiet khimah, gobnyan kheueh nyang paleng teuhoreumat. 25 Sisera jilakée ié, teuma jihnyan teubri susu keu gobnyan, teupeu seumah ukeue ié susu nyang ka teuro di dalam cangkie nyang patot keu raja-raja. 26 Deungon pasak dan palée bak jaroe geuhnyan lé Yael geuseukok nibak ulée Sisera sampoe meuhambo aso ulée. 27 Bak gaki Yael jih nyan reubah hana le meunyawöng teutiek bak tanoh sampoe trok ajai. 28 Nibak ruweueng-ruweueng teungkab mak Sisera jingieng sira geupeugah, "Pakon geuritan awaknyan hana trok jiwoe, pakon teuma hana teudeungoe su tapak guda?" 29 Nyang paleng áréh dumna dendayang jih nyan jijaweueb laju nyang ka jiteumé keudroe didalam até jih nyan: 30 "Awaknyan teungoh jipeuweuek ngon jibagi hareuta nyang jireupah, keu tieb-tieb tantra sidroe atawa dua droe aneuëk inong dara. Keu Sisera, bahan bajée nyang paleng meuhái yuem, keu ratu, ija seuleundang nyang ka teusulam ngon beuneueng meubagoe curak wareuna." 31 Seumoga dumna musoh-musoh Droeneueh, ya TUHAN, maté ngon tiwaih lagée Sisera, teuma banmandum sahabat Droeneueh mandum meujaya bak lagée surya di langét raya! Óh lheueh nyan, teuntram ngon aman kheueh nanggroe nyan sampoe peuet ploh thon treb jih teuma.

Hakém-Hakém 6

1 Lom sigoe teuk ureuëng Israel meudesya ubak TUHAN, akhé jih Gobnyan geupeubiyeu mantong bansa Midian jikuasa awaknyan na tujoh thon treb jih. 2 Ureuëng Israel lumpah that teumakot keu ureuëng Midian, sampoe awaknyan na nyang jijak musöm u dalam guha-guha dan di teumpat-teumpat laén nyang awaknyan anggab aman nibak gunong-gunong. 3 Lom teuma tieb-tieb watée bak watée ureuëng tani Israel jijak pula sinaman, bak watée nyan kheueh teuma teuka ureuëng Midian meusajan-sajan ngon ureuëng Amalek dan ureuëng-ureuëng laén nibak padang pasi jijak prang Israel. 4 Awaknyan jipeudong khimah didalam daerah ureuëng Israel dan bubena seunaman ureuëng Israel nyan sampoe u daerah sikeulileng Gaza di siblaih u seulatan. Meunan cit deungon beulatang peulara lagée bubiri, leumô dan keuleudée umat Israel nyan ka habéh jipeuplueng banmandum. Hana meusapeue nyang na awaknyan tinggai sampoe keu umat Israel hanale peunajoh meubacut pi teuma. 5 Ureuëng-ureuëng nyan jijak ngon cara meuroun-roun deungon beulatang peulara dan khimah awaknyan dalam jeumeulah nyang lumpah raya. Awaknyan dan unta-unta lumpah that jai keu hase teu itong. Awaknyan jiteuka keu jijak peurusak nanggroe nyan, 6 dan umat Israel nyan hana hase jipeubuet sapeue u ateueh awaknyan. 7 Óh lheueh nyan umat Israel laju jitawök ngon sira jimeulakée ubak TUHAN mangat TUHAN geutulông awaknyan geujak lawan ureuëng Midian. 8 Lé TUHAN geu kirém teuma sidroe nabi keu awaknyan. Nabi nyan geupeugah, "Meunoe kheueh feureuman TUHAN, Po teu Allah Israel: 'Gata ka Ulôn peubeubaih nibak jipeubudak di nanggroe Meusé. 9 Gata ka Ulôn peuseulamat nibak ureuëng Meusé dan nibak ureuëng-ureuëng nanggroe nyoe nyang jijak prang gata. Awaknyan ka Ulôn use nibak nanggroe nyoe bak watée gata tajak prang awaknyan, laju Ulôn bri tanoh awaknyan keu gata. 10 Ka lheueh Ulôn peugah ubak gata bahwa Ulôn nyoe kheueh TUHAN Po teu Allah gata, dan bahwa gata hana jeuet taseumah ubak dewa-dewa bansa Amori nyang nibak nanggroe jih gata tinggai nibak saát nyoe. Teuma gata hana taseutôt ubak peue nyang ka Ulôn peurintah nyan.' " 11 Bak si uroe malaikat TUHAN geujak ubak Ofra, laju geuduek dimiyueb bak sala, atra Yoas, Yoas nyan na kheueh sidroe nibak golongan kawöm Abiezer. Aneuëk jih nyan nan jih Gideon, sidroe ureuëng tukang prah gandom nibak teumpat teuprah ié anggô. Gobnyan geupeubuet nyan deungon teumusöm-musöm mangat hana jingieng lé ureuëng Midian. 12 Malaikat TUHAN laju geupeuleumah droe ubak gobnyan sira geupeugah, "Hai, peumuda nyang peukasa! TUHAN na meusajan deungon gata!" 13 Ji seuôt lé Gideon, "Meuáh, teungku! Meunyoe beutôi TUHAN na meusajan deungon kamoe, pakon banmandum hai nyoe jiteuka u ateueh kamoe? Dipat kheueh banmandum buet nyang ajaéb nyang ka geupeubuet lé TUHAN yoh masa ilée nyang ka lheueh geupeugah lé indatu kamoe keuhai pakriban TUHAN geupeuteubiet awaknyan nibak nanggroe Meusé? Jinoenyoe TUHAN ka geutinggai kamoe dan geupeubiyeu kamoe jikuasa lé ureuëng-ureuëng Midian." 14 Óh ka lheueh nyan TUHAN geubri teuma peurintah lagéenyoe ubak Gideon, "Deungon sigala teunaga gata tajak peuleuh kheueh ureuëng Israel nibak keukuasaan ureuëng Midian. Ulôn kheueh nyang kirém gata." 15 Geujaweueb lé Gideon, "Pakon jeuet ulôn, ya TUHAN? Panena mungken ulôn peuleuh umat Israel nibak keukuasaan ureuëng Midian. Didalam sukée Manasye, kawöm ulôn kheueh nyang paleng leumoh. Dan didalam sukée ulôn, ulôn kheueh ureuëng nyang paleng hana meuguna." 16 "Pasti gata hase!" kheun TUHAN, "sabab Ulôn kheueh nyang tulông gata. Ureuëng-ureuëng Midian teuma hase gata peuhanco deungon mudah, siulah-ulah nyang gata peukeunyan sidroe ureuëng mantong." 17 Geujaweueb lé Gideon, "Meunyoe ulôn nyoe beutôi-beutôi geugalak lé TUHAN, cuba kheueh neubri saboh tanda bahwa keubiet TUHAN kheueh nyang bri peurintah nyan ateueh ulôn. 18 Ulôn lakée beuneutem kheueh TUHAN neupreh ilée disinoe sampoe ulôn seuleusoe ulôn bri peunajoh keu TUHAN." "Get kheueh," jaweueb TUHAN, "Ulôn teuma Lôn preh sampoe gata tagisa." 19 Teuma jijak woe kheueh laju Gideon u rumoh gobnyan, óh trok u rumoh geusie laju saboh kaméng muda dan geutaguen laju sampoe masak, óh lheueh nyan geucok teuma siploh kilo gram teupông, teupông nyan geupeugét laju keuruti nyang hana meurago. Óh lheuehnyan uengkot sie nyan geukeubah laju dalam raga, dan kuwah jih dalam beulangong, banmandum nyan geuba dan geu peuseumah laju ubak malaikat TUHAN nyang teungoh geu preh di miyueb bak sala nyan. 20 Malaikat TUHAN nyan geupeugah, "Gata keubah kheueh laju uengkot cit dan ruti nyan di ateueh batée nyoe dan taro kheueh laju kuwah uengkot cit nyan u ateueh nyan." Gideon geupeubuet laju peue nyang ka geupeurintah nyan keu gobnyan. 21 Óh lheuehnyan malaikat TUHAN nyan geu sunyueng laju jaroe gobnyan laju deungon ujong kayée nyang teungoh geumat nyan geu cukéh laju uengkot sie dan ruti nyan. Batée nyan hu laju habéh kheueh tutong jipajoh lé apui uengkot sie dan ruti nyan. Óh lheueh nyan malaikat nyan pi gadôh. 22 Gideon sada bahwa nyang teuka ubak gobnyan na kheueh malaikat TUHAN keudroe. Dan deungon teumakot that-that meunan cit yo geupeugah kheueh laju lé Gideon nyan, "Ceulaka kheueh ulôn, ya TUHAN Nyang Maha Agong! Sabab ulôn ka meuhadab keue deungon malaikat Droeneueh!" 23 Teuma TUHAN geupeugah ubak gobnyan, "Teunang kheueh, bék teumakot. Gata hana teuma maté." 24 Lé Gideon laju jipeuget saboh miseubah disinan, dan geuboh nan miseubah nyan "TUHAN Punca Seujahtra". Miseubah nyan sampoe án jinoe mantong na di Ofra, nibak banda ureuëng Abiezer. 25 Bak malam nyan TUHAN geubri peurintah lagée nyoe ubak Gideon, "Gatajak cok kheueh laju leumô agam atra bapak gata, leumô nyang gata coknyan nyang paleng jroh nyang mantong meu-umu tujoh thon. Gata reuloh kheueh laju miseubah nyang jipeugét lé bapak gata keu Baal, gata peureubah laju taméh nyang meulambang Dewi Asyera nyang na disiblaih miseubah nyan. 26 Di ateueh sinumpok miseubah nyang ka reuloh nyan tapeudong kheueh laju saboh miseubah nyang ka teureuncana deungon gét lom teuatoe. Óh lheuehnyan ban saboh leumô agam nyan, gatatot sibagoe keureubeuen keu TUHAN. Gata cok kheueh taméh lambang Dewi Asyera nyang ka gata peureubah nyan keu kayée apui jih." 27 Teuma Gideon geupiléh laju siploh droe namiet dan geujak laju geupeubuet peue nyang ka geupeurintah lé TUHAN nyan ubak gobnyan. Teuma lé sabab geuhnyan teumakot that-that ubak keuluwarga gobnyan dan keu ureuëng-ureuëng nyang na di gampông nyan, teuma geuhnyan hana geujeuet geupeubuet peurintah nyan meunyoe mantong uroe. Lé sababnyan atra nyan geupeubuet óh watée malam teuka. 28 Óh beungoh singoh peunduduek banda nyan ka jibeudôh nibak teumpat éh, laju awaknyan jikalon miseubah keu Baal dan lambang keu Dewi Asyera ka reubah. Meunan awaknyan jikalon bahwa nibak teumpat nyan ka na teudong dan ka teuma lheueh teutot saboh leumô agam sibagoe keureubeuen. 29 Teuma awaknyanpi teuhireuen-hireuen dan jiteumanyong teuma sabe keudroe-droe jih, "Soe kheueh poe buet nyoe?" Óh ka lheueh jiseulidek, bahwa Gideon aneuëk Yoas kheueh nyang peubuet nyan. 30 Laju jipeugah lé awaknyan ubak Yoas, "Aneuëk droeneueh ka jireuloh miseubah Baal dan jipeureubah teuma taméh peulambang Dewi Asyera nyang na di siblaih miseubah nyan. Gataba kheueh laju aneuëk droeneueh nyan tapeuteubiet kheueh laju keunoe. Jihnyan harôh maté!" 31 Yoas geujaweueb laju ubak banmandum nyang lawan geuh nyan, "Peu kheueh gata nyoe banmandum gata dong ubak Baal dan ta keuneuk bila hai nyan? Soe nyang dong blah jihnyan, ureuëng nyan teuma teupoh maté nibak uroe nyoe cit! Meunyoe Baal keubiet Po teu Allah, bah kheueh jih nyan keudroe nyang bila droe jih, sabab nyang jireuloh nyan na kheueh miseubah jih keudroe." 32 Sabab Yoas geupeugah, "Bah kheueh Baal keudroe jilawan Gideon, sabab jihnyan ka jireuloh keudroe miseubah jih nyan." Dan phon saát nyan ureuëng jiboh nan Gideon deungon nan "Yerubaal". 33 Bak watée nyan banmandum ureuëng Midian, Amalek dan sukée-sukée bansa nyang laén di padang pasi siblaih u timu Yordan ka meusapat. Awaknyan laju jijeumeurang Krueng Yordan, dan jipeudong laju khimah di Pantôn Yizreel. 34 Teuma Gideon ka geukuasa lé Roh TUHAN, sampoe gobnyan laju geuyueb beureuguih keu geutawök bubena ureuëng-ureuëng kawöm Abiezer mangat teuka jijak meusaho deungon geuh nyan. 35 Gobnyan geukirém cit utosan ubak sukée Asyer, Zebulon, Naftali dan sukée Manasye -- bah nyang na blaih u timu meunan cit nyang blaih u barat Krueng Yordan, keu teulakée mangat awaknyan jimeusaboh ngon gobnyan. Dan awaknyan mandum keu jijak meusaboh ngon Gideon. 36 Laju Gideon geupeugah ubak Po teu Allah, "TUHAN, Droeneueh ka neupeugah bahwa Droeneueh keuneuk neupeuguna ulôn keu teupeubeubaih umat Israel. 37 Meunyoe biet lagéenyan, teuma di ateueh tanoh nyoe, bak teumpat kamoe nyang ka lazem kamoe lo aneuk gandom nibak mu jih ka ulôn keubah gunteng bulée bubiri. Meunyoe singoh nyang jipeubasah lé ié mbon bulée bubiri nyoe mantong, dan tanoh jih hana basah, dan nyan kheueh sibagoe bukeuti Droeneueh keuneuk peuguna ulôn keu lôn peubeubaih umat Israel." 38 Dan jeuet kheueh lagée nyan: Watée Gideon geubeudôh oh singoh beungoh nyan dan laju geuceupat bulée bubiri nyan, laju geuteumé ié mbon na saboh cangkie. 39 Laju gobnyan geupeugah ubak Po teu Allah, "TUHAN, bék kheueh Droeneueh beungéh meunyoe ulôn meututoe lom. Neupeu idhin kheueh lôn peuna lom saboh teuk nyang lôn ujoe ngon gunteng bulée bubiri nyoe. Teuma goenyoe bah kheueh bulée bubiri nyoe teutab tho, hana basah, dan tanoh jih nyang basah." 40 Malam nyan Po teu Allah geupeupeunoh peue nyang jilakée lé Gideon nyan, dan óh singoh beungoh nyan bulée bubiri nyan teutab tho, teuma tanoh jih ka basah lé sabab keunong ié mbon.

Hakém-Hakém 7

1 Bak siuroe Gideon deungon banmandum aneuëk buah gobnyan geubeudôh nibak teumpat éh ban beungoh that. Awaknyan jijak laju peudong khimah nibak mata ié Harod. Teumpat khimah-khimah ureuëng Midian nyang na disiblaih utara nibak awaknyan, nibak pantôn nyang tô ngon bukét More. 2 TUHAN meufeureuman ubak Gideon, "Aneuëk buah gata lumpah that jai. Ulôn hana Lôn peumeunang u ateueh awaknyan ureuëng Midian, sabab singoh awaknyan jipike awaknyan meunang lé sabab teunaga jih keudroe, nyang kheueh awaknyan hana jipujoe Ulôn. 3 Lé sababnyan, gata peumaklum kheueh ubak aneuëk buah gata, 'Soe nyang meurasa teumakot, harôh bubagaih jitinggai Gunong Gilead nyoe dan jakwoe laju u rumoh droe maséng-maséng.' " Teuma na 22.000 droe nyang jijak woe; dan nyang tinggai 10.000 droe mantong. 4 Laju TUHAN meufeureuman lom ubak Gideon, "Aneuëk buah gata nyan mantong ramé that nyan. Gata ba kheueh awaknyan u binéh krueng. Nibak teumpat nyan eunteuk Ulôn sareng awaknyan keu gata. Meunyoe Ulôn peugah ubak gata, 'Ureuëng nyoe jeuet jijak deungon gata,' ureuëng nyan bah jijak. Teuma meunyoe ulôn peugah, 'Ureuëng nyoe hana jeuet jijak deungon gata,' meunan cit ureuëng nyan hana jeuet jiseutôt gata." 5 Teuma Gideon laju geuba ureuëng-ureuëng nyan u binéh krueng, lé TUHAN geupeugah ubak Gideon, "Ureuëng nyang jilieh ié lagée asée meulieh, nyang lagée nyan harôh gata peumeueng kréeh deungon ureuëng nyang jijéb ié deungon ji meu teuôt." 6 Teuma na 300 droe ureuëng nyang jilieh ié dalam paleut jaroe jih; teuma banmandum nyang laén jimeu teuôt watée jijéb ié. 7 Óh lheueh nyan TUHAN geupeugah lom ubak Gideon, "Ban lhée reutôh droe nyang jijéb ié sira jilieh bak paleut jaroe jih nyan, Ulôn teuma Lôn peubeubaih gata dan Ulôn peumeunang gata ateueh ureuëng Midian. Gatayue kheueh nyang laén nyan jijak woe." 8 Sabab nyan Gideon geuyue woe laju ureuëng Israel nyang laén nyan mangat jijak woe keucuali nyang lhée reutôh droe nyan nyang tinggai. Banmandum beukai dan beureuguih jijok bak ureuëng nyang geuyue woe nyan. Ureuëng Midian na di Pantôn di miyueb teumpat ureuëng Israel jipeudong khimah. 9 Malam nyan TUHAN meufeureuman lom ubak Gideon, "Beudôh, Gideon! Gata jak prang laju khimah-khimah ureuëng Midian. Ulôn teuma Lôn peumeunang gata ateueh awaknyan. 10 Teuma meunyoe gata teumakot, gata pakat kheueh si Pura, namiet gata nyan jijak meusajan-sajan ubak khimah-khimah musoh nyan. 11 Nibak teumpat nyan eunteuk gata deungoe peue nyang teungoh jipeugah lé musoh nyan, dan hainyan teuma teupeujeuet gata beurani gata seurang." Lé sababnyan geujak kheueh laju Gideon deungon Pura, ubak panggong khimah-khimah musoh. 12 Ureuëng Midian, Amalek dan ureuëng-ureuëng nyang laén nibak padang pasi, na meutabu dipat-pat mantong nibak pantôn nyan. Pantôn jih lagée daruet nyang teungoh meukeurumon. Meunan cit deungon unta-unta awaknyan lumpah that jai na lagée anou dibinéh panté. 13 Bak watée Gideon ka trok keunan, laju geudeungoe na sidroe ureuëng teungoh jipeugah lumpo jih ubak rakan jih. Ureuëng nyan jipeugah lagée nyoe, "Ulôn meulumpo na saboh umpang ruti meugule-gule jitamong laju udalam khimah-khimah geutanyoe laju jipok ateueh saboh nibak khimah nyoe. Khimah nyan pi reuloh sampoe rata deungon tanoh." 14 Rakan ureuëng nyan jijaweueb, "Wah, nyan pasti peudeueng Gideon aneuëk Yoas, ureuëng Israel nyan! Nyan meumakna bahwa Po teu Allah ka geupeumeunang awaknyan ateueh ureuëng Midian dan banmandum angkatan prang geutanyoe!" 15 Bak watée Gideon geudeungoe keuhai lumpo ureuëng nyan dan makna jih, gobnyanpi laju geusujut geuseumah Po teu Allah. Óh lheuehnyan geugisa laju ubak khimah-khimah Israel dan geupeugah, "Meusiab-siab kheueh! TUHAN geupeumeunang keu gata ateueh angkatan prang Midian!" 16 Lé Gideon geubagi ban lhée reutôh droe aneuëk buah geuhnyan jeuet keu lhée boh reugu. Tieb-tieb sidroe ureuëng geubri saboh beureuguih dan saboh kendi nyang meu aso culot. 17 Kheun Gideon ubak awaknyan, "Meunyoe ulôn ka trok ubak bataih khimah-khimah ureuëng Midian, gata ngieng kheueh ateueh ulôn beuget-get, dan tapeubuet kheueh peue nyang ulôn peubuet. 18 Meunyoe ulôn dan reugu ulôn kamoe yueb beureuguih, meunan cit gata harôh neuyueb teuma beureuguih gata. Laju gata harôh teuma gata dumpék deungon su nyang teuga ban sikeulileng khimah-khimah nyan, 'Keu TUHAN dan keu Gideon!' " 19 Karab trok teungoh malam, Gideon dan ureuëng-ureuëng gobnyan sampoe laju ubak bataih khimah musoh. Bak watée nyan ureuëng nyang jaga khimah-khimah nyan ban mantong meugantoe ngon ureuëng laén. Lé Gideon dan reugu gobnyan geuyueb beureuguih dan geupeubeukah kendi-kendi awaknyan. 20 Ban dua boh reugu nyang laén pih jipeubuet cit nyang lagée nyang ka geupeubuet lé Gideon ngon reugu gobnyan nyan. Laju awaknyan banmandum jibeuôt culot-culot awaknyan deungon jaroe wie, dan jiyueb beureuguih nyang na bak jaroe uneuen awaknyan. Lé awaknyan jidumpék sira jiklik deungon su nyang teuga, "Peudeueng keu TUHAN dan keu Gideon!" 21 Awaknyan maséng-maséng teutab jidong nibak teumpat ban sikeulileng khimah nyan. Teuma banmandum angkatan prang musoh nyan ngon hana jisangka-sangka laju jiplueng ban saleuem lé sira jiklik ngon jiteumawök. 22 Bak watée Gideon dan ureuëng-ureuëng gobnyan teungoh geupeumusu beureuguih, TUHAN laju geupeujeuet angkatan prang musoh saléng jiseurang sidroe ngon nyang laén deungon peudeueng. Awaknyan laju jipeuplueng droe u arah Zerera sampoe jiôh jih u Bet-Sita dan banda Abel-Mehola nyang rab ngon Tabat. 23 Teuma di sukée Naftali, Asyer, dan sukée Manasye bah kheueh nyang di siblaih u timu meunan cit nyang siblaih u barat Krueng Yordan jitawök cit teuma. Lé awaknyan jijak tiyeub tantra Midian. 24 Meunan cit u banmandum daerah Efraim, Gideon teukirém haba teumawök nyoe, "Jak tatreun tajak prang ureuëng Midian. Gata peuteuen kheueh Krueng Yordan dan banmandum aneuk krueng sampoe jiôh u Bet-Bara. Bék tapeubiyeu ureuëng Midian jijeumeurang nibak teumpat nyan." Teuma bubena ureuëng-ureuëng Efraim pi jikraih banmandum, laju awaknyan jijak peuteuen Krueng Yordan dan banmandum aneuk krueng sampoe jiôh jih u Bet-Bara. 25 Dua droe tukoh bansa Midian, nyan kheueh Oreb dan Zeeb jidrob lé awaknyan. Oreb jipoh maté nibak Batée Oreb dan Zeeb jipoh maté di teumpat teupraih ié boh anggô Zeeb. Ureuëng-ureuëng Efraim nyan hana jipiôh jitiyeub laju ureuëng Midian, laju jiba ulée Oreb dan Zeeb ubak Gideon di meurandeh Krueng Yordan siblaih u timu.

Hakém-Hakém 8

1 Ureuëng Efraim jipeugah ubak Gideon, "Pakon kamoe nyoe hana neupakat bak watée droeneueh neubeurangkat neujak prang ureuëng Midian? Peu kheueh sabab jih kamoe nyoe neupeusaneut lagée nyan bagoe?" Meunan kheueh awaknyan jimeu kroéb-kroéb ubak Gideon. 2 Teuma Gideon geujaweueb, "Peue nyang ulôn peubuet hana kheueh meumakna meunyoe ulôn peubandeng deungon peue nyang ka awaknyoe peubuet. Bahpi nyang gata peubuet nyan cit bacut sagai, teuma nyang bacut nyan jiôh leubeh meuyuem nibak banmandum nyang ka jipeubuet lé banmandum pasokan ulôn. 3 Gata kheueh nyang ka meuteumé kuasa nibak Po teu Allah sampoe meuhase teupoh maté Oreb dan Zeeb, ban dua tukoh Midian nyan! Teubandeng deungon nyan, peu kheueh jasa ulôn?" Óh ka lheueh Gideon geupeugah lagée nyan, awaknyan hana beungéh le. 4 Bak watée nyan Gideon deungon ban lhée reutôh aneuëk buah gobnyan trok laju u meurandeh Krueng Yordan. Awaknyan ka hék that-that teuma mantong cit jitiyeub musoh. 5 Óh lheueh nyan awaknyan trok laju u Sukot. Di sinan Gideon geupeugah ubak peunduduek banda, "Gata tulông kheueh tabri keu aneuëk buah ulôn biôk peunajoh. Awaknyan ka hék that-that seudangkan kamoe mantong kamoe tiyeub Zebah dan Salmuna, raja-raja Midian nyan." 6 Teuma peumimpén-peumimpén di Sukot nyan jijaweueb, "Ah, gata nyoe gohlom tadrob Zebah dan Salmuna, gata ka talakée peunajoh! Keupeue guna jih aneuëk buah gata nyan teubri peunajoh?" 7 Teuma geupeugah lé Gideon, "Meunyoe meunan bah kheueh! Eunteuk meunyoe TUHAN ka geubri meunang keu ulôn ateueh Zebah dan Salmuna, gata ulôn sunuet deungon kayée meuduro nibak padang pasi!" 8 Óh lheuehnyan Gideon geujak lom meuneujak geuhnyan dan trok laju u Pnuel. Meunan cit disinan gobnyan geulakée peunajoh keu aneuëk buah geuh. Teuma geujaweueb lé ureuëng Pnuel saban cit lagée nyang ka jijaweueb lé ureuëng di Sukot. 9 Lé sababnyan Gideon geupeugah ubak awaknyan, "Eunteuk ulôn teuma lôn gisa deungon seulamat. Dan bak watéenyan ulôn teuma lôn peuhanco meunara banda nyoe!" 10 Bak watéenyan Zebah dan Salmuna deungon banmandum pasokan awaknyan teungoh na di Karkor. Nibak banmandum pasokan ureuëng-ureuëng padang pasi, teuma na kira-kira 15.000 droe mantong nyang na tinggai; 120.000 droe tantra ka habéh tiwaih. 11 Gideon geujak laju sitot rot bak bataih padang pasi di siblaih u timu Nobah dan Yogbeha laju geuseurang musoh ngon cara meudadak. 12 Zebah dan Salmuna, ban dua droe raja midian nyan laju jiplueng, teuma Gideon jipeuléb awaknyan dan geudrob, sampoe banmandum angkatan prang awaknyan ka jeuet keukaru hana meuteuntée. 13 Óh lheueh nyan nibak rot ueh teungoh geuwoe bak geujak meuprang nyan, Gideon geucok laju rot nyang meusineungoh meulalu Heres. 14 Di sinan jidrob teuma sidroe aneuëk muda nibak Sukot, laju gobnyan geutanyong bak ureuëng nyan nan-nan ureuëng malem agama nyang na di Sukot. Teuma ureuëngnyan laju jituléh nan-nan nyan keu Gideon -- banmandum nan-nan nyan na 77 droe. 15 Óh ka lheueh nyan Gideon laju geujak meurumpok deungon ureuëng patot-patot di banda nyan sira geupeugah, "Pasti gata mantong teuingat bahwa gata ka lheueh tatulak keu gata tulông ulôn, sabab ulôn gohlom ulôn droeb Zebah dan Salmuna, bukon? Gata hana tatem bri peunajoh keu aneuëk buah ulôn; padahai awaknyan teungoh hék that-that nibak watée nyan. Ngieng kheueh keunoe, nyoepat Zebah dan Salmuna." 16 Óh lheueh geupeugah lagéenyan Gideon laju geujakcok duro di padang pasi, laju ngon duronyan geuseunuet bansalam le ateueh ureuëng patot-patot di banda Sukot nyan. 17 Di Pnuel pi geureuloh dan geupeuhanco teuma meunara bandanyan meunan cit geupoh maté bubena ureuëng agam didalam banda nyan. 18 Óh lheuehnyan Gideon laju geutanyong ubak Zebah dan Salmuna, "Pakriban hi jih ureuëng-ureuëng nyang gata poh di Tabor nyan?" Zebah ngon Salmuna nyan laju jijaweueb, "Awaknyan banmandum lagée ruman gata, lagée keuturonan ureuëng bansawan." 19 "Nyan syedara-syedara ulôn -- aneuëk-aneuëk mak ulôn," geupeugah lé Gideon, "Seukira jih gatanyoe hana tapoh maté awaknyan, nyang jikeubit jih ulôn nyoe hana teuma ulôn poh maté gata." 20 Laju geupeugah lé Gideon ubak Yeter, aneuëk tuha gobnyan, "Gata poh maté banmandum awaknyan!" Teuma Yeter mantong muda. Teuma, gobnyan jitakot sampoe jihnyan hana jijeuet suit peudeueng jih lam sarong keu jipoh maté. 21 Jipeugah lé Zebah dan Salmuna bak Gideon, "Keunoe, meunyoe gata ureuëng agam, gatapoh maté kheueh kamoe ngon jaroe gata keudroe!" Teuma Gideon pih laju geupoh awaknyan geucok teuma banmandum piasan nyang na meugantung nibak takue unta Zebah dan Salmuna nyan. 22 Óh lheueh nyan jipeugah kheueh lé umat Israel ubak Gideon, "Droeneueh ka neupeulheueh kamoe nibak keukuasaan ureuëng Midian. Sabab nyan bah kheueh droeneueh jeuet keupeumimpén kamoe -- droeneueh dan keuturonan droeneueh." 23 Geuseuôt lé Gideon, "Han jeuet, ulôn hana hase jeuet keupeumimpén gata; meunan cit deungon aneuëk ulôn hana hase. TUHAN kheueh peumimpén gata." 24 Teuma óh lheueh nyan Gideon geupeugah lom, "Teuma saboh nyang ulôn lakée; anteng-anteng nyang gata reubot nibak musoh, bah kheueh nyan banmandum gata jok ubak ulôn." (Ureuëng Midian lazem jih galak that jingui anteng-anteng nyang teupeuget nibak méuh; saban cit lagée ureuëng laén nyang tinggai di padang pasi.) 25 "Get," jaweueb awaknyan, "Deungon sigala seunang até teuma kamoe bri nyan keu droeneueh." Laju awaknyan jileueng siôn ija, óh lheueh nyan tieb-tieb ureuëng laju jiteuka jijak keubah anteng-anteng nyang jireupah nibak musoh u dalam ija nyang ka teuleueng nyan. 26 Banmandum anteng-anteng méuh nyang jijok ubak Gideon bak watée nyan brat jih rab dua ploh kilogram, gohlom jitamong keunan piasan-piasan, taloe takue, ija ungu nyang jingui lé raja-raja Midian, dan taloe takue nyang na teupeungui nibak takue unta-unta awaknyan. 27 Nibak méuh nyan Gideon laju geupeuget saboh patong beurala, patong nyan geukeubah di gampông gobnyan, na kheueh di gampông Ofra. Banmandum ureuëng Israel jijak keunan keu jijak seumah patong beurala nyan, sampoe awaknyan hanale jipakoe ubak Po teu Allah. Dan hainyan ka jeuet keu taron nibak Gideon dan keuluwarga gobnyan. 28 Ureuëng Midian hana hase le jipeugah sapeue; awaknyan ka jipeutaloe lé ureuëng Israel. Deungon nyan aman kheueh nanggroe nyan peuet ploh thon treb jih simantong Gideon mantong udeb. 29 Óh ka lheueh meuprang nyang meukeubôk nyan, Gideon geuwoe laju u gampông droe geuh dan laju tinggai disinan. 30 Gobnyan na meu aneuëk tujoh ploh droe aneuëk agam, sabab peurumoh gobnyan ramé. 31 Na cit teuma gundek gobnyan di Sikhem; nibak gundek geuh nyan na teuma geumeu aneuëk sidroe aneuëk agam nyang geuboh nan Abimelekh. 32 Watée umu gobnyan ka tuha that barô kheueh Gideon aneuëk Yoas nyan meuninggai donya. Gobnyan teupeukubu nibak lampôh jrat Yoas, ureuëng syiek gobnyan. Jrat nyan na jih di Ofra, na kheueh banda kawöm Abiezer. 33 Óh ka lheueh Gideon meuninggai donya, ureuëng Israel ka hana seutia le ubak Po teu Allah. Awaknyan jiseumah dewa-dewa Baal dan jipeujeuet Baal-Berit keu dewa awaknyan. 34 Awaknyan hana meuiébadat le ubak Po teu Allah, TUHAN awaknyan, nyang ka peulheueh awaknyan nibak banmandum keukuasaan musoh bansikeulileng awaknyan. 35 Awaknyan pi hana jibalaih budo ateueh keuluwarga Gideon ateueh banmandum jasa Gideon keu umat Israel.

Hakém-Hakém 9

1 Bak si uroe Abimelekh aneuëk Gideon nyan jijak-jak u banda Sikhem di teumpat kawöm keuluwarga mak jih. Di sinan jihnyan jipeugah haba deungon awaknyan, kheun jihnyan, 2 "Ci gata tanyong ubak banmandum peunduduek nyang na di Sikhem, nyang toh nyang leubeh gét: Geupeurintah lé ban tujoh ploh droe aneuëk Gideon, atawa lé sidroe ureuëng mantong? Gata peu ingat ubak awaknyan bahwa ulôn mantong na hubongan darah deungon awaknyan." 3 Teuma jijak kheueh laju kawöm keuluwarga nibak mak Abimelekh nyan ubak ureuëng-ureuëng Sikhem dan jipeusampoe laju peusan Abimelekh ubak awaknyan dan di peunduduek Sikhem nyan jicok keuputosan mangat jijak seutôt Abimelekh, sabab meunurot awaknyan jih nyan keubit mantong na hubongan darah deungon awaknyan. 4 Óh lheueh nyan awaknyan laju jibri keu gobnyan tujoh ploh péng pirak nyang jicok nibak rumoh teumpat seumah Baal-Berit. Deungon péng nyan Abimelekh laju jipeu upah saboh kawan ureuëng kureueng aja mangat jijak meugabong deungon gobnyan, 5 dan óh lheueh nyan jijak u gampông bapak jihnyan di Ofra. Óh trok keudeh laju jijak poh maté ban tujoh ploh droe syedara gobnyan di ateueh saboh batée. Teuma si Yotam, aneuëk tulot Gideon, hana keunong poh sabab jihnyan jimusöm. 6 Teuma meusapat kheueh banmandum peunduduek Sikhem dan Bet-Milo, laju awaknyan jijak ubak bak kayée sala nyang keuramat di Sikhem. Disinan awaknyan laju jiangkat Abimelekh jeuet keu raja. 7 Óh ka lheueh Yotam jideungoe hai nyan, laju gobnyan geujak dong ubak pucak Gunong Gerizim, laju geu dumpék sira geutawök ubak awaknyan, "Gata deungoe ulôn, hai ureuëng-ureuëng Sikhem, mangat Po teu Allah geudeungoe teuma gata! 8 Bak siwatée na peuristiwa jimeusapat kheueh bak-bak kayée keuneuk jipiléh raja keu bak-bak kayée nyan. Teuma jipeugah kheueh lé jihnyan keu bak kayée zaiton, 'Jeuet kheueh raja kamoe.' 9 Ji jaweueb lé bak zaiton, 'Ah, hana takjan ulôn. Sabab meunyoe ulôn jeuet keu raja gata, ulôn harôh lôn piôh lôn peuhase minyéuk zaiton nyang that-that teupeureulée keu jingui lé dewa-dewa dan manusia.' 10 Laju jipeugah teuma lé bak-bak kayée keu bak kayée ara, 'Droeneueh mantong jeuet keu raja kamoe.' 11 Teuma di bak aranyan jijaweueb teuma lagée nyoe, 'Ulôn han cit ulôn tem, sabab keu jeuet keuraja gata ulôn harôh lôn piôh lôn muboh boh ara nyang maméh-maméh.' 12 Óh lheueh nyan, jipeugah teuma lé bak-bak kayée nyang laén keu bak kayée anggô, 'Nah, droeneueh kheueh mantong nyang jeuet keuraja kamoe.' 13 Teuma dibak anggô nyan pi jijaweueb, 'Éuk kheueh nyoe ulôn lôn piôh lôn peuteubiet boh anggô nyang teupeugalak até dewa-dewa dan manusia, teuma keu jeuet keuraja gata!' 14 Sababnyan jipeugah kheueh teuma banmandum bak kayée ubak tamah nyang meuduro, 'Droeneueh kheueh mantong hai tamah nyang meuduro jeuet keuraja kamoe.' 15 Teuma di tamah nyang meuduro nyanpi jijaweueb, 'Meunyoe gatanyoe biet-biet keuneuk peujeuet ulôn nyoe keu raja gata, jak kheueh keuno tamusöm dimiyueb ulôn. Meunyoe gata hana tatem, teuma nibak banmandum cabeueng-cabeueng ulôn nyang meuduro nyoe teuma jiteubiet apui nyang jitot habéh bubena bak aras di Libanon.' " 16 "Nyan," geupeugah lé Yotam teuma lom, "Peu kheueh deungon gata angkat Abimelekh jeuet keuraja, gatanyoe ka gata meubuet deungon jujo dan ikhlaih? Peu kheueh kalheueh tapeubuet nyang sipatot jih keu Gideon, bapak ulôn, dan kawöm keuluwarga gobnyan? Peu kheueh ka tabalaih jasa-jasa bapak ulôn 17 nyang ka geumeujuang keu gatanyoe? Ingat, gobnyan ka geupeusabong nyawöng keu geupeuleupah gata nibak keukuasaan ureuëng Midian. 18 Teuma jinoenyoe gata ka takianat ubak keuluwarga bapak ulôn. Aneuëk-aneuëk gobnyan ka gata poh maté banmandum -- tujoh ploh droe sigoguih di ateueh saboh batée. Abimelekh nyan na kheueh aneuëk bapak ulôn nibak gundek gobnyan. Teuma gatanyoe ka ta angkat geuhnyan jeuet keuraja Sikhem, lé sabab gobnyan mantong na hubongan darah deungon gata. 19 Meunyoe buet gatanyan nibak uroenyoe ateueh bapak ulôn dan keuluwarga gobnyan ngon tuloih até gata dan ikhlaih, silakan gata seunang-seunang deungon Abimelekh, dan bah kheueh teuma jihnyan jimeu seunang-seunang deungon gatanyoe. 20 Teuma meunyoe kon lagée nyan hai jih, seumoga nibak Abimelekh nyan jiteubit kheueh apui nyang hu meukeubok-keubok sampoe tutong ngon hangoh banmandum peududuek Sikhem meunan cit ngon Bet-Milo. Dan seumoga nibak peunduduek Sikhem dan Bet-Milo pi jiteubiet teuma apui nyang tutong habéh tuboh si Abimelekh." 21 Óh lheuehnyan Yotam laju jipeuplueng droe dan jiduek laju di Beer, sabab jihnyan teumakot ubak Abimelekh, syedara jihnyan. 22 Lhée thon treb jih Abimelekh geumat peurintah u ateueh ureuëng Israel nyan. 23 Laju teuka meureuka TUHAN sampoe TUHAN ka geupeumusoh Abimelekh deungon peunduduek Sikhem sampoe ureuëng-ureuëng Sikhem nyan jijak lawan Abimelekh. 24 Hainyoe teujadi mangat teubalaih buet nyang jeuhet nyang ka jipeubuet lé Abimelekh dan ureuëng-ureuëng Sikhem nyang peusuna jihnyan keu jipoh maté bantujoh ploh droe aneuëk-aneuëk Gideon. 25 Ureuëng-ureuëng Sikhem nyan laju jipeugét pageue peuhalang di ateueh pucak-pucak gunong mangat hase teudrob Abimelekh. Soemantong ureuëng nyang liwat rotnyan laju jireupah ngon jirampok lé ureuëng nyang preh nyan. Teuma hainyoe laju jibri tée ubak Abimelekh. 26 Bak watée nyan Gaal aneuëk Ebed ka teuka meusigoe-sigoe deungon syedara-syedara jih keujikeuneuk tinggai di Sikhem; dan di ureuëng-ureuëng pi jipatéh keu jihnyan. 27 Awaknyan laju jijakpot boh anggô nyang na di lampôh-lampôh anggô, nibak boh anggô nyang ka jipot nyan lé awaknyan laju jipeugét ié anggô, dan jipeuna khanuri. Awaknyan jimakheun sira jijieb ié anggô nibak teumpat jiseumah dewa-dewa droe jih sira jiseurapa ngon jimeu péb-péb u ateueh Abimelekh. 28 "Soe geutanyoe nyang sibeuna jih nyoe, sampoe geutanyoe ta taklok ubak Abimelekh?" geupeugah lé Gaal. "Dan jihnyan soe teuma nyang seubeuna jih? Bukon kheueh jih nyan aneuëk Gideon nyang deungon Zebul waki jihnyan ka jeuet keunamiet Hemor, bapak Sikhem, indatu geutanyoe!" 29 "Meunyoe ulôn nyang pimpén ureuëng-ureuëng Sikhem nyoe, pasti ka habéh riwayat Abimelekh nyan! Ulôn peugah ubak jihnyan, 'Kah tajoe keunoe! Gata krah beuhabéh tantra gata dan jak tateubiet tamuprang ngon ta adu ngaza!' " 30 Zebul, nyang mat kuasa ateueh banda Sikhem, get that beungéh watée jideungoe peue nyang ka jipeugah lé Gaal nyan. 31 Lé jihnyan laju jikirém utosan ubak Abimelekh di Aruma mangat jijak peusampoe peusan nyoe, "Gaal aneuëk Ebed meusajan-sajan deungon syedara-syedara jih ka jiteuka u Sikhem dan jipeusuna peunduduek mangat jilawan gata. 32 Lé sababnyan, bah kheueh gata dan ureuëng-ureuëng gata tajak musöm u lampôh bak watée malam. 33 Singoh beungoh meunyoe mata uroe ka jiteubiet, gata seureubu kheueh laju banda seucara meudadak. Dan meunyoe Gaal dan ureuëng-ureuëng jih jiteubiet jijak lawan gata, nyang kheueh watée jih gata heuntam awaknyan!" 34 Teuma Abimelekh ngon aneuëk buah gobnyan laju meugeurak óh watée malam. Awaknyan meutabu laju jeuet keu peuet boh pasokan dan jijak musöm laju ban silingka banda Sikhem. 35 Meunan jikalon lé Abimelekh dan ureuëng-ureuëng gobnyan Gaal jiteubiet dan ka jidong di babah pintoe geureubang banda, deungon seureuntak Abimelekh ngon ureuëng gobnyan laju geuteubiet nibak teumpat geumusöm. 36 Gaal leumah laju jikalon awaknyan, dan bak watéenyan cit jipeugah ubak Zebul, "Ngieng, na déh ureuëng ramé teungoh jitreun keunoe di ateueh pucak gunong!" "Ah, nyan kon ureuëng," jiseuôt lé Zebul, "nyan bubayang nyang leumah di ateueh gunong." 37 Laju jipeugah lom lé Gaal, "Beutôi, na ureuëng treun nibak lereng bukét, dan na lom saboh kawan teuk teungoh jijak keunoe nibak arah bak sala nyang keuramat!" 38 Jipeugah kheueh lé Zebul ubak Gaal, "Nyan, toh babah gata nyang raya haba nyan? Ilée gata peugah keupeue geutanyoe tatundok ubak Abimelekh nyan? Nyoe kheueh ureuëng-ureuëng nyang gata hina nyan. Jak, gata maju laju bak saátnyoe tajak seurang awaknyan!" 39 Dan Gaal nyan jipeuteubiet laju uluwa bubena ureuëng Sikhem dan jijak lawan laju Abimelekh. 40 Teuma Abimelekh geuseureubu laju awaknyan sampoe awaknyan habéh jipeuplueng droe. Ureuëng maté ka meulampa sampoe trok ubak babah pintoe geureubang banda. 41 Akhé jih Abimelekh geuwoe laju u Aruma, dan laju geutinggai teutab disinan, Zebul geu use laju Gaal meunan cit deungon syedara-syedara jihnyan jipeuteubiet nibak Sikhem, akhé jih awaknyan ka hana jeuet le tinggai nibak teumpat nyan. 42 Óh singoh beungoh di ureuëng-ureuëng Sikhem laju jitinggai banda, jikeuneuk jak u lampôh dan hainyan jilapor laju ubak Abimelekh. 43 Di Abimelekh pi laju geupeusapat dumna ureuëng-ureuëng gobnyan, dan geubagi teuma awaknyan jeuet keu lhée boh pasokan, dan awaknyan laju geujak musöm u lampôh-lampôh. Bak watée geukalon peunduduek bandanyan teungoh jijak u lampôh, gobnyan geuteubiet laju nibak teumpat musöm dan laju geupoh maté bubena awaknyan. 44 Teungoh Abimelekh ngon pasokan gobnyan geucang ngon geuseureubu pintoe geureubang banda, ban dua boh pasokan gobnyan nyan laju geutiyeueb ngon geujak seureubu ureuëng-ureuëng nyang teungoh jiplueng u lampôh-lampôh. 45 Di Abimelekh geumeucang laju si uroe suntok dan laju geuteumé duek nibak banda nyan; peunduduek bandanyan geupoh maté, laju bandanyan geupeuhanco ngon geutabu teuma deungon sira. 46 Bak watée ureuëng-ureuëng nyang mantong na di dalam kuta Sikhem geudeungoe habanyan, awaknyan jitamong laju u dalam uruek di miyueb kuil El-Berit keu jijak meulindong. 47 Teuma na ureuëng jijak peugah ubak Abimelekh bahwa bubena ureuëng di kuta Sikhem nyan ka jimeusapat disinan. 48 Lé sabab nyan, Abimelekh dan ureuëng-ureuëng gobnyan geujak laju u Gunong Zalmon. Di gunong nyan gobnyan geukoh laju cabeueng-cabeueng kayée deungon kapak, laju geugulam cabeueng kayée nyan nibak baho, óh lheueh nyan geupeurintah teuma ubak bubena ureuëng gobnyan mangat jipeubuet lagée nyang ka geupeubuet nyan. 49 Teuma awaknyanpi maséng-maséng laju jijak koh cabeueng kayée, dan jijak laju dilikot sira jiseutôt Abimelekh. Banmandum cabeueng kayée nyan ka jitamong nibak babah pintoe uruek kuil nyan, dan óh lheuehnyan kayée-kayée nyan laju teutot, seudangkan ureuëng-ureuëng Sikhem nyan mantong na didalam kuil nyan. Lé sabab nyan maté kheueh banmandum peunduduek Sikhem nyan, na kira-kira siribée droe ureuëng agam ngon ureuëng inong. 50 Óh lheuehnyan Abimelekh geujak teuma u Tebes. Bandanyan geukeupông teuma dan bandanyan pi taklok dan laju geuduek disinan. 51 Nibak teungoh-teungoh bandanyan na saboh meunara nyang lumpah kukôh dan không. Dan banmandum peunduduek bandanyan laju jiplueng keunan, awaknyan laju jitamong u dalam meunara nyan dan jigunci laju pintoe meunara nyan, dan awaknyan laju jiék u ateueh. 52 Óh lheuehnyan teuka kheueh Abimelekh deungon meukeusut jijak seurang meunara nyan. Bak watée Abimelekh nyan ka trok nibak babah pintoe meunara nyan dan geukeuneuk tot meunara nyan, 53 na sidroe ureuëng inong laju jipeurhot sineuk batée u ateueh ulée Abimelekh sampoe bruek ulée Abimelekh nyan reutak. 54 Bagaih-bagaih Abimelekh geutawök sidroe aneuëk bujang nyang teungoh jigulam seunjata dan geupeugah, "Gata suet kheueh peudeueng gatanyan dalam sarong dan gata tak kheueh ulôn deungon peudeueng gatanyan sampoe án maté; ulôn hana jipeugah lé gob bahwa maté ulôn nyoe jipoh lé sidroe ureuëng inong." Teuma di ureuëng muda nyang mantong bujang pi laju jisuet peudeueng dan deungon peudeueng nyan kheueh jitak u ateueh Abimelekh akhéjih Abimelekh pi maté sikeujab nyan cit teuma. 55 Bak watée ureuëng-ureuëng Israel jikalon bahwa Abimelekh ka maté, dan awaknyan pi banmandum jijakwoe u rumoh jih maséng-maséng. 56 Meunan kheueh cara jih Po teu Allah geubalaih u ateueh Abimelekh keuhai buet nyang jeuhet nyang ka jipeubuet ateueh bapak jih keudroe, bak watée jihnyan jipoh maté ban tujoh ploh droe syedara gobnyan. 57 Dan meunan cit TUHAN geuhuköm teuma u ateueh ureuëng Sikhem sabab keujeuhetan awaknyan. Hainyan paih that lagée nyang ka geupeugah lé Yotam aneuëk Gideon keuhai awaknyan bak watée gobnyan geupeusumpah awaknyan.

Hakém-Hakém 10

1 Óh ka lheueh Abimelekh nyan meuninggai donya, Tola aneuëk Pua ka jeuet keupeumimpén keu jijak peubeubaih ureuëng Israel. Gobnyan na kheueh cucoe Dodo nibak sukée Isakhar. Gobnyan tinggai di Samir nibak daerah meugunong Efraim. 2 Dua ploh lhée thon treb jih gobnyan jipimpén bansa Israel, óh lheuehnyan gobnyan meuninggai donya laju teupeukubu di Samir. 3 Óh ka lheueh Tola, dua ploh dua thon treb jih Israel jipimpén teuma lé Yair nyang asai jih nibak Gilead. 4 Aneuëk gobnyan nyang agam na lhée ploh droe. Bak awaknyan na teuma lhée ploih boh keuleudée nyang ka jeuet teupasang ngon teupeudieng barang di ateueh rhueng jih, meunan cit na teuma lhée ploih boh gampông di daerah Gilead. Gampông-gampông nyan mantong teupeunan deungon nan gampông Yair. 5 Yair pi meuninggai donya, dan laju teuma teupeukubu di Kamon. 6 Umat Israel meudesya lom ubak TUHAN. Awaknyan hana jipeuduli le keu TUHAN dan hana teuma jiseumah le Gobnyan. Awaknyan ka jiseumah dewa-dewa Baal dan Asytoret, meunan cit deungon dewa-dewa bansa Siria, Sidon, Moab, Amon dan Filistin. 7 Sabab buet nyang lagée nyan TUHAN lumpah that beungéh keu bansa Israel, sampoe Gobnyan geupeubiyeu mantong bansa Filistin dan bansa Amon jikuasa awaknyan. 8 Lapan blah thon treb jih bandua bansa nyan jiteugon banmandum ureuëng Israel nyang na tinggai di Gilead, na kheueh di daerah ureuëng Amori di siblaih u timu Krueng Yordan. Awaknyan jipeusaneut ateueh ureuëng-ureuëng Israel deungon keujam that. 9 Ureuëng Amon laju jijeumeurang Krueng Jordan keu jijak meuprang ngon sukée Yehuda, Benyamin dan Efraim sampoe umat Israel keubit that meudeurita. 10 Sabab ka hana ekle jiteuen ázéb seungsara nyang lagéenyan, akhé jih umat Israel nyan laju jimeulakée ngon munajab ubak TUHAN, jikheun, "TUHAN, kamoe ka meudesya ubak Droeneueh, sabab kamoenyoe hanale kamoe pako dan hana kamoe peuduli keu Droeneueh, ya Allah kamoe. Kamoe ka kamoe seumah ubak dewa-dewa Baal." 11 TUHAN laju geujaweueb, "Yoh watée uroe jéh gata ka jijajah lé bansa Meusé, bansa Amori, bansa Amon, Filistin, Sidon, Amalek dan bansa Maon. Laju nibak watée nyan gata tameulakée ngon meunajab ubak Ulôn, bukon? Ci gata ingat nyan banmandum, peu kheueh Ulôn hana Lôn peuseulamat gata nibak keukuasaan awaknyan? 13 Bahpi lagéenyan, teuma gatanyoe mantong cit tapeulikot Ulôn, laju tajak seumah ubak dewa-dewa. Jinoenyoe Ulôn hana Lôntem le Lôn peubeubaih gata. 14 Tajak kheueh mantong ubak dewa-dewa nyang gata piléh nyan. Gata meulakée kheueh ubak dewa-dewanyan! Bah kheueh awaknyan nyang tulông bak watée gata meuteumé susah nyang lagée teungoh gata rasa bak saátnyoe." 15 Teuma umat Israel jipeugah ubak TUHAN, "Kamoe ka meudesya, TUHAN. Neupeubuet kheueh u ateueh kamoe peue nyang TUHAN keuheundaki, asai TUHAN neutulông kamoe nibak uroenyoe." 16 Óh lheuehnyan awaknyan laju jitiek bubena patong beurala, laju jijak seumah Po teu Allah. Teuma Po teu Allah pi got that teuharu até Gobnyan watée geukalon awaknyan dalam apoh apah. 17 Bak watéenyan tantra Amon ka siab-siab keuneuk jijak meuprang. Awaknyan jipeudong khimah di Gilead. Meunan cit deungon umat Israel ka jimeusapat dan jipeudong khimah di Gilead. 18 Disinan rakyat dan bubena peumimpén nibak sukée-sukée Israel nyan jiteumanyong sabe keudroe-keudroe peu kheueh na lamkawan awaknyan nyang jijeuet beuôt sinjata jijak lawan bansa Amon. Ureuëng nyan teuma jiangkat jeuet keupeumimpén u ateueh banmandum peunduduek Gilead.

Hakém-Hakém 11

1 Yefta na kheueh sidroe sipa-i nyang ceubeueh lom beuhe. Jihnyan tinggai di Gilead. Bapak jihnyan nan jih Gilead teuma mak jihnyan na kheueh sidroe inong jeuhet nyang buet jih meumukah. 2 Bapak jihnyan na cit aneuëk agam nyang laén nibak peurumoh jih nyang sah. Watée aneuëknyan ka rayeuk-rayeuk, awaknyan laju jiuse Yefta nibak rumoh. Kheun awaknyan ubak jihnyan, "Droeneueh hana meuteumé sapeue warésan nibak bapak kamoe, sabab droeneueh aneuëk ureuëng inong nyang laén." 3 Lé sababnyan Yefta laju meuseuliseh ngon syedara-syedara jihnyan dan laju jijak dan tinggai di daerah Tob. Di teumpatnyan na saboh kawan ureuëng jeuhet nyang buet jih peurusak ureuëng laén jimeugabong laju deungon ureuëng nyan dan laju awaknyan jijak meurampok atra ureuëng laén. 4 Hana padub na treb óh lheueh nyan ureuëng Israel jiseurang lé ureuëng Amon. 5 Bak watée hainyan teujadi, dumna ureuëng patot-patot Israel nyang na di Gilead jijak pakat Yefta jitinggai daerah Tob. 6 Awaknyan jipeugah, "Gata pimpén kheueh kamoenyoe, sabab kamoe keuneuk jak meuprang ngon ureuëng Amon." 7 Teuma Yefta jijaweueb, "Bukon kheueh awaknyoe keu ulôn ka tabanci hanjeuet le ulôn meugabong deungon gata? Gatanyoe ka neu use ulôn lam rumoh bapak ulôn. Pakon teuma jinoenyoe bak watée gata lam keususahan, gata teuka ubak ulôn?" 8 Awaknyan jijaweueb, "Kamoenyoe meuteuka mangat gata tatem pimpén banmandum peunduduek Gilead keu teujak prang bansa Amon nibak uroenyoe cit teuma." 9 Jiseuôt lé Yefta, "Meunyoe gatanyoe tapakat lom ulôn mangat lôn woe u Gilead keu lôn jak meuprang ngon bansa Amon, dan TUHAN geubri meunang ateueh geutanyoe, ulôn kheueh nyang teuma jeuet keupeunguasa u ateueh gata banmandum." 10 Awaknyan jijaweueb, "Kamoe situju. TUHAN kheueh saksi jih." 11 Lé sababnyan jibeurangkat kheueh Yefta meusigoe deungon peumimpén Gilead. Óh lheuehnyan peunduduek Gilead laju jiangkat gobnyan jeuet keu peunguasa dan peumimpén. Dan dikeue TUHAN di Mizpa, Yefta laju jipeusampoe peue nyang jilakée ubak peunduduek Gilead. 12 Óh lheuehnyan Yefta laju jikirém ureuëng jihnyan ubak raja Amon mangat jipeugah lagée nyoe, "Peue keusalahan kamoe sampoe awaknyan jijak prang nanggroe kamoe?" 13 Lé Raja bansa Amon nyan laju geujaweueb ubak ureuëng nyang teuka sibagoe utosan nyan, "Bak watée umat Israel teuka nibak nanggroe Meusé, awaknyan ka jireupah tanoh kamoe, phon nibak Krueng Arnon trok u Krueng Yabok dan Krueng Yordan. Jinoenyoe tapulang kheueh nyan banmandum keu kamoe seucara damé." 14 Laju Yefta jikirém lom teuma ureuëng-ureuëng gobnyan keu raja Amon 15 mangat jijaweueb lagéenyoe, "Umat Israel sagai-sagai hana jireupah tanoh ureuëng Moab atawa tanoh ureuëng Amon. 16 Bak watée ureuëng Israel jitinggai nanggroe Meusé, awaknyan jituju ulhok Akaba meulalu padang pasi laju trok u Kades. 17 Óh lheuehnyan awaknyan jikirém teuma ureuëng laén ubak raja Edom mangat jilakée idhin jijak rot nanggroe ureuëng nyan. Teuma awaknyan hana jibri idhin keuhai nyan. Óh lheuehnyan jilakée teuma hai nyang lagéenyan ubak Moab, meunan cit di Moab nyan hana cit jibri keu awaknyan mangat jeuet jijak rot nanggroe jihnyan. Lé sababnyan kheueh umat Israel tinggai di Kades. 18 Óh lheuehnyan awaknyan jijak laju lom jisitot langkah awaknyan nyan rot padang pasi, teuma hana teuliwat rot daerah Edom dan Moab, teuma jicok rot meuliengka sampoe trok laju u siblaih timu Moab, di meurandeh Krueng Arnon. Awaknyan laju jipeudong khimah disinan, teuma hana jijeumeurang krueng nyan, sabab daerah nyan jitamong u dalam wilayah Moab. 19 Óh lheuehnyan umat Israel jikirém teuma ureuëng laén ubak Sihon, raja ureuëng Amori di Hesybon mangat jilakée idhin jijak rot daerah Amori, sabab awaknyan jikeuneuk jak u daerah droe jih keudroe. 20 Teuma Sihon hana jipeuidhin ubak awaknyan sabab jihnyan hana jipatéh bahwa awaknyan keuneuk jak mantong. Teuma jihnyan laju jikrah bubena angkatan prang jih dan laju jipeudong markas di Yahas óh lheuehnyan jijak prang laju ureuëng Israel. 21 Teuma TUHAN, Po teu Allah Israel, geubri keu umat Israel meunang ateueh Sihon meunan cit ateueh angkatan prang jih. Meunan kheueh cara jih umat Israel jiteumé tanoh-tanoh ureuëng Amori nyang na tinggai di nanggroe nyan. 22 Wilayah Amori nyan teuduek phon nibak daerah Arnon di siblaih u seulatan, trok u siblaih utara Krueng Yabok, dan nibak padang pasi di siblaih u timu, trok u Krueng Yordan di siblaih ubarat. 23 Jadi TUHAN Po teu Allah Israel, nyan kheueh nyang ka geu use ureuëng-ureuëng Amori deumi keu keupeuntengan umat TUHAN. 24 Dan jinoenyoe atranyan peu kheueh keuneuk gata cok lom teuma? Tanoh nyang jibri lé Kamos, dewa gata nyan, keu gata jeuet teutab keuhak milék gata. Teuma peue nyang ka geubri lé TUHAN, Po teu Allah kamoe keu kamoe, nyan teutab kamoe peuteuen. 25 Gata pike gata leubeh gét nibak Balak aneuëk Zipor, raja Moab? Balak nyan hántom na geulawan atawa geumuprang deungon kamoe. 26 Lhée reutôh thon treb jih Israel jiduek nibak Hesybon dan Aroër meunan cit deungon gampông-gampông ban sikeulileng nyan, dan banmandum banda-banda nibak binéh Krueng Arnon. Dan pakon sidubnyan treb atranyan hana gata cok pulang? 27 Hana, kamoe hana meusalah bak gata. Gata kheueh nyang ka meusalah sabab gata prang kamoe. TUHAN kheueh hakém nyang nibak uroe geupeuputôh peukaranyoe lé bansa Israel dan bansa Amon." 28 Teuma di raja Amon hana jipakoe meubacutpi peusan nyang ka geupeusampoe lé Yefta nyan. 29 Óh lheuehnyan Roh TUHAN geutreun laju geukuasa u ateueh Yefta. Dan geujak kheueh laju Yefta nyan geujak saweue daerah Gilead dan Manasye óh lheueh geuwoe lom u Mizpa di Gilead. Nibak teumpatnyan gobnyan geupeujak lom meuneujak geuh u wilayah bansa Amon. 30 Yefta geupeugét janjinyoe ubak TUHAN, "Meunyoe TUHAN neupeu idhin ubak ulôn lôn peutaloe ureuëng Amon, 31 dan ulôn woe ngon seulamat, dan soemantong nyang phon-phon that jiteubiet nibak rumoh ulôn jeuet jijak sambot ulôn, jihnyan teuma ulôn peuseumah sibagoe keureubeuen nyang teutot ubak TUHAN." 32 Laju Yefta geujeumeurang Krueng Yordan mangat geujak prang ureuëng Amon, dan TUHAN pi laju geupeumeunang keu gobnyan. 33 Yefta geu heungkoe awaknyan meuhabéh-habéh phon di Aroër trok u daerah silingka Minit -- banmandumnyan na dua ploh boh banda -- dan trok sampoe sijiôh Abel-Keramim. Jai that-that ureuëng Amon nyang maté dalam prang nyan, sampoe taloe kheueh awaknyan banmandum nibak ureuëng Israel. 34 Bak watée Yefta geuriwang u Mizpa, aneuëk dara gobnyan laju jiteuka jijak sambot keuhai ureuëng syiek geuh woe sira geumeunari geupéuh rapa-i. Dan nyan kheueh aneuëk gobnyan nyang tunggai. 35 Meunan geukalon lé Yefta aneuëk gobnyan teuka jijak sambot gobnyan, Yefta jeuet keuteuharu ngon seudeh sampoe gobnyan laju geupriek-priek bajée gobnyan, sira geupeugah, "Aduhai, aneuëk ulôn, hanco that até bapak! Pakon kheueh jeuet keu gata nyang teupeu jeuet até ulôn peudéh? Ulôn ka lôn meusumpah ubak TUHAN, dan sumpahnyan hana hase le bapak tarék!" 36 Laju jipeugah lé aneuëk daranyan ubak ureuëng syiek jih, "Bapak ka neumeusumpah ubak TUHAN, dan TUHAN pi ka geubri ubak bapak beumeunang ateueh meunalah buet nyang jeuhet nyang ma jih peubuet lé ureuëng Amon, musoh bapak nyan. Jadi, peue nyang ka bapak peujanji ubak TUHAN nyan, bah kheueh neupeutrok janjinyan." 37 "Teuma," jipeugah lé aneuëk daranyan, "nyang ulôn lakée sapeue mantong: Neubri kheueh watée keu ulôn meudua buleuen mangat lôn jak-jak meuén-meuén ngon jak peulalo até ubak gunong deungon rakan-rakan ulôn. Disinan ulôn teuma lôn peuratoh ngon lôn peumo ba-e keuhai naseb ulôn, sabab ulôn nyoe teuma maté simantong ulôn dalam keuadaan peurawan." 38 Bapak aneuëk daranyan laju geupeu idhin peue nyang ka jilakée lé aneuëk dara jihnyan, dan jipeulheueh laju aneuëk jihnyan mangat jeuet jijak. Daranyan dan rakan-rakan jih laju jijak u gunong keu jijak meuseudeh até disinan, sabab jihnyan teuma meuninggai sigohlom jihnyan meukawen dan jimeu aneuëk. 39 Óh ka liwat dua buleuen, jihnyan laju jiwoe ubak bapak jih, dan lé bapak jih nyan geupeubuet laju peue nyang ka geumeujanji ubak TUHAN. Deungon lagéenyan meuninggai kheueh aneuëk daranyan simantong jihnyan dalam keuadaan peurawan. Nyang kheueh asai phon jih, pakon lamkawan ureuëng Israel, lazem jih 40 aneuëk-aneuëk dara jijak peu aséng droe nyang treb jih peuet uroe tieb-tieb thon keu jijak meuseudeh até sabab ji-ingat aneuëk Yefta di Gilead.

Hakém-Hakém 12

1 Bak watéenyan sukée Efraim ka meusiab-siab keuneuk jijak meuprang, dan jijak laju jijeumeurang Krueng Yordan jituju u Zafon. Awaknyan jipeugah ubak Yefta, "Pakon droeneueh neujak meuprang ngon bansa Amon dan hana neupakat teuma kamoe? Jinoenyoe kamoe meuteuka keuneuk kamoe tot droeneueh meunan cit banmandum asoe rumoh droeneueh." 2 Geupeugah lé Yefta, "Lamkawan ureuëng Amon dan kamoe nyoe nyang ureuëng Gilead na meuseuleuséh waham nyang lumpah hebat. Gata ka deungoe ulôn hôi keu tajak bantu tapeubeubaih ulôn nibak ureuëng-ureuëng Amon nyan, teuma gatanyoe hana tateuka. 3 Jadi, óh ka lheueh ulôn yakén that bahwa gatanyoe hana tabantu ulôn, ulôn neukad lôn jakprang bubena ureuëng-ureuëng Amon nyan, bahpi ulôn harôh maté lé sabab nyan. Laju TUHAN geubri geupeumeunang ulôn ateueh awaknyan. Pakon teuma jinoenyoe gata tajak prang ulôn?" 4 Óh lheuehnyan Yefta geupeusapat banmandum ureuëng Gilead, laju awaknyan jijakprang ngon jipeutaloe ureuëng Efraim. (Ureuëng Gilead nyang na tinggai di Efraim dan Manasye ka jitudoh lé ureuëng Efraim bahwa awaknyan ka jipeu aséng droe nibak ureuëng Efraim, sukée jihnyan keudroe.) 5 Ureuëng-ureuëng Gilead nyang teungoh jimuprang nyan, geureubot laju teumpat-teumpat jeumeurang nibak Krueng Yordan, mangat hase jipeuteuen ureuëng-ureuëng Efraim nyang keuneuk plueng. Bak watée na sidroe ureuëng Efraim, nyang keuneuk jipeuplueng droe, jilakée idhin mangat jeuet jijeumeurang krueng nyan, ureuëng Gilead laju jitanyong ubak ureuëng nyan, "Peu kheueh gata nyoe ureuëng Efraim?" Meunyoe jihnyan jijaweueb, "Bukon," 6 awaknyan jiyue laju ureuëng nyan deungon tutoe haba lagéenyoe "Syibolet". Ureuëng teuma jipeugah cit "Sibolet" sabab hana hase jikheun nyan deungon paséeh. Lé awaknyan teuma laju jidrob ureuëng nyan dan laju jipoh maté nibak saboh teumpat di teumpat teujeumeurang nyan. Teuma teupoh maté kheueh 42.000 droe ureuëng Efraim bak watéenyan. 7 Nam thon treb jih Yefta jipimpén ureuëng Israel nyan. Óh lheuehnyan gobnyanpi meuninggai donya laju jipeukubu di gampông droe jih na kheueh di banda Mizpa di Gilead. 8 Óh lheueh Yefta, umat Israel jipimpén teuma lé Ebzan nibak Betlehem. 9 Ebzan nyan jimeu aneuëk lhée ploh droe aneuëk agam dan lhée ploh droe teuma aneuëk inong. Aneuëk-aneuëk geuhnyan nyang inong jipeukawen deungon sukée laén, dan meunan cit gobnyan jicok teuma lhée ploh droe aneuëk dara nibak sukée laén keu aneuëk gobnyan nyang agam. Tujoh thon treb jih Ebzan jipimpén umat Israel, 10 óh lheuehnyan gobnyan meuninggai dan teupeukubu laju di Betlehem. 11 Óh ka lheueh Ebzan, umat Israel jipimpén teuma lé Elon nibak sukée Zebulon siploh thon teuma treb jih. 12 Óh lheuehnyan gobnyan pih meuninggai donya laju teupeukubu di Ayalon di wilayah Zebulon. 13 Óh ka lheueh Elon, umat Israel nyan jipimpén teuma lé Abdon aneuëk Hilel nibak Piraton. 14 Aneuëk gobnyan nyang agam na peuet ploh droe, dan cucoe-cucoe gobnyan nyang agam na teuma lhée ploh droe. Awaknyan maséng-maséng na saboh keuleudée nyang jeuet pasang di ateueh rhueng. Lapan thon treb jih umat Israel geupimpén lé Abdon. 15 Óh lheuehnyan gobnyanpi meuninggai donya laju teupeukubu di Piraton dalam wilayah Efraim di daerah meugunong ureuëng Amalek.

Hakém-Hakém 13

1 Ureuëng Israel meudesya lom ubak TUHAN, laju lé TUHAN geupeubiyeu ureuëng Filistin jikuasa ateueh awaknyan nyang treb jih na peuet ploh thon. 2 Bak watéenyan na sidroe ureuëng agam di banda Zora. Nan jih Manoah, nibak sukée Dan. Peurumoh ureuëng nyoe malée. 3 Teuma nibak siuroe malaikat TUHAN geupeuleumah droe ubak ureuëng nyan dan geupeugah, "Seulawetnyoe gata hana jitem meu aneuëk, teuma hana treb le gata mume, dan gata peulahé sidroe aneuëk agam. 4 Le sababnyan jaga kheueh droe gata beujroh-jroh. Bék gata jieb ié anggô atawa ié kreueh, atawa gata pajoh sapeue-sapeue peunajoh nyang hareuem. 5 Óh ka lheueh aneuëk gatanyan lahé teuma, bék sagai-sagai gata koh ôk jih, sabab phon lam pruet ma jihnyan ka teupeuteuntée sibagoe sidroe nazir. Gobnyan kheueh nyang teuma meujuang keu geupeubeubaih bansa Israel nibak keukuasaan ureuëng Filistin." 6 Óh lheuehnyan peurumoh Manoah geujak ubak teungku lakoe geuh dan laju geupeugah, "Teungku lakoe lôn, na utosan Po teu Allah geujak ubak lôn; hi gobnyan lagée malaikat Allah, sampoe ulôn jiteuka teumakot. Ulôn hana lôn tanyong pane gobnyan geujak, dan gobnyan pih hana geupeugah ubak lôn soe nan gobnyan. 7 Teuma gobnyan geupeugah bahwa ulôn keuneuk mume dan lôn peulahé sidroe aneuëk agam. Gobnyan geupeugah lom bahwa ulôn hana jeuet lôn jieb ié anggô dan ié kreueh, atawa lôn pajoh sapeue-sapeue peunajoh nyang hareuem, sabab aneuëk nyan harôh teujok ubak Po teu Allah mangat jeuet keu sidroe nazir siumu udeb jih." 8 Watée geudeungoe nyan, geumeudoá kheueh Manoah ubak TUHAN, lagéenyoe su doá geuhnyan, "TUHAN, neutem kheueh kirém lom hamba Droeneueh nyan ubak kamoe mangat kamoe teupeue peue nyang harôh kamoe peubuet ateueh aneuëknyan watée jih ka lahé." 9 Po teu Allah geudeungoe doá Manoah. Malaikat TUHAN nyan geujak lom ubak peurumoh Manoah, watéenyan peurumoh Manoah teungoh geuduek-duek di ladang geuh. Dan lakoe gobnyan hana disinan. 10 Lé sabab nyan, gobnyan laju geuplueng geujak peugah hainyan ubak lakoe geuh, "Teungku lakoe, ngieng kheueh, ureuëng yoh ilée geujak ubah lôn, jinoe ka trok lom!" 11 Manoah reujang-reujang geuseutôt peurunoh geuh. Gobnyan geu peurab ubak ureuëng nyan dan laju geutanyong, "Peu kheueh Teungku nyang ba haba ubak peurumoh lôn?" "Beutôi," jaweueb ureuëng nyan. 12 Lé sababnyan Manoah laju geutanyong, "Meunyoe peue nyang Teungku kheun nyan ka jeuet keunyataan singoh, peue nyang harôh jipeubuet le aneuëk nyan? Pakriban udeb jih singoh?" 13 Geujaweueb le malaikat nyan, "Peurunoh gata hana jeuet jijieb ié anggô atawa ié kreueh, dan hana jeuet jipajoh peue-peue mantong nyang asai jih nibak bak anggô, atawa sapeue-sapeue nyang hareuem. Jihnyan harôh jipeubuet banmandum nyang ka ulôn peugah ubak jihnyan, dan jijaga mangat bék na nyang hana jipeubuet." 15 Laju geupeugah le Manoah ubak gobnyan, "Ulôn harab Teungku preh kheueh sikeujab. Kamoe jak taguen gulée kaméng muda keu Teungku." 16 Teuma malaikat TUHAN nyan geupeugah, "Bah pih ulôn preh nibak teumpat nyoe, ulôn hana lôn pajoh peue nyang gata hidang nyan. Teuma, meunyoe gata keuneuk hidang cit atranyan, hidang kheueh atranyan sibagoe keureubeuen nyang teutot, dan peuseumah kheueh nyan ubak TUHAN." Manoah gohlom geusada bahwa nyang meututoe ngon geuhnyan na kheueh malaikat TUHAN. Lé sababnyan gobnyan geupeugah, "Meunyoe meunan, neutem kheueh peugah soe nan Teungku, mangat meunyoe peue nyang ka Teungku peugah nyan ka jeuet teuma singoh, kamoe jeuet kamoe bri horeumat kamoe ubak Teungku." 18 Malaikat TUHAN nyan geutanyong, "Peue sabab gata meuheuet that keuneuk taturi nan ulôn? Nan ulôn nyan nan nyang ajaéb." 19 Teuma Manoah laju jicok saboh kaméng muda deungon bacut gandom, laju jikeubah ateueh batée dan jipeuseumah ubak TUHAN, na kheueh TUHAN nyang geupeubuet hai-hai nyang ajaéb. 20 Watéenyan teuka apui teungoh hu u ateueh nibak miseubah nyan Manoah dan peurumoh geuh geukalon malaikat TUHAN nyan geu ek u ateueh lam apui hu nyan, laju geujak u langét. Barô kheueh Manoah geusada bahwa nyan na kheueh malaikat TUHAN; lé sababnyan gobnyan ngon peurunoh geuh laju geusujut sira geuseumah. Lheuehnyan hántom le geukalon malaikat nyan óh dudoe teuma. 22 Laju geupeugah le Manoah ubak peurumoh geuh, "Tanyoe pasti maté sabab tanyoe ka takalon Po teu Allah!" 23 Peurumoh geuh geujaweueb, "Meunyoe TUHAN biet-biet keuneuk geupoh maté geutanyoe, pasti Gobnyan hana geutem teurimong keureubeuen nyang tajôk keu Gobnyan nyan; meunan cit Gobnyan hana geutem tunyok banmandum nyoe ubak geutanyoe atawa geubri tée hai-hai nyang ka geupeugah nyan ubak geutanyoe." 24 Na padub buleuen teuma óh lheuehnyan peurunoh Manoah nyan geupeulahé sidroe aneuëk agam laju geuboh nan Simson keu aneuëk nyan. Aneuëk nyan meutamah rayeuk dan geubri beureukat le TUHAN; 25 dan watée jihnyan na nibak khimah-khimah sukée Dan, nyang na lamkawan Zora dan Esytaol, Roh TUHAN laju geupeuphon bri teunaga ubak aneuëk nyan.

Hakém-Hakém 14

1 Nibak siuroe Simson geujak u Timna, dan geukalon sidroe aneuëk dara Filistin nibak teumpat nyan. 2 Laju geuwoe dan geupeugah ubak ureuëng syiek geuh, "Ulôn galak that até keu sidroe aneuëk dara Filistin di Timna. Ulôn lakée ayah ngon ma neujak seulangke aneuëk dara nyan." 3 Teuma ureuëng syiek geuh geupeugah, "Pakon jeuet teujak ubak ureuëng Filistin mangat meuteumé peurumoh teuh, seudangkan awaknyan kon umat TUHAN? Peu kheueh lam kawöm geutanyoe keudroe atawa nibak banmandum bansa geutanyoe hana nyang paih?" Jaweueb Simson ubak ayah gobnyan, "Teuma aneuëk dara Filistin nyan kheueh nyang ulôn galak. Ulôn meuharab ayah ngon ma neutem jak seulangke aneuëk nyan keu ulôn tuan." 4 Ureuëng syiek Simson hana geuteupeue bahwa TUHAN kheueh nyang peujeuet banmandum nyan sampoe Simson geupeubuet nyan. Sabab TUHAN teungoh geumita watée nyang paih keu teuprang ureuëng Filistin. Yoh watée nyan ureuëng Filistin jikuasa ureuëng Israel. 5 Dan geujak kheueh Simson u Timna meusajan-sajan ngon ureuëng syiek gobnyan, teungoh awaknyan geujak rot saboh keubeueng lampôh anggô, Simson laju meurumpok ngon saboh singa muda, singa nyan laju jitaum 6 dan hana teusangka-sangka Simson jiteuka teuga le kuasa TUHAN. Laju geupriek-priek singa nyan ngon jaroe gobnyan, sang-sang beulatang nyan lagée saboh kaméng. Hainyan hana geupeugah bak ureuëng syiek geuh. 7 Óh lheuehnyan Simson geujak saweue aneuëk dara nyan dan geumarit-marit ngon sidara nyan, dan Simson galak keu aneuëk dara nyan. 8 Óh ka lheueh na padub watée teuma óh dudoe, Simson geujak lom keu geujak meukawen ngon aneuëk daranyan. Nibak meuneujak gobnyan nyan, gobnyan geuwet lom keu geujak kalon bangke singa nyang ka geupoh maté nyan. Watée trok geuh keunan laju geukalon jai that-that unö lam bangke beulatang nyan, dan na cit meulisan unö. 9 Gobnyan laju geucok sira geukrok mulisan unö nyan lam paleuet paroe gobnyan, dan laju geujak sira geupajoh meulisan nyan. Óh lheuehnyan gobnyan geujak meurumpok ngon ureuëng syiek geuh dan geujôk cit bacut meulisannyan ubak awaknyan dan awaknyan laju jipajoh meulisan nyan meusajan-sajan. Teuma Simson hana geupeugah bahwa meulisan nyan geucok nibak bangke singa. 10 Óh ka lheueh ayah Simson geujak u rumoh aneuëk dara nyan, Simson laju geupeuna khanuri disinan, sabab lagéenyan kheueh keubiasaan nyang lazem nibak awak muda-muda. 11 Watée ureuëng Filistin jikalon gobnyan, awaknyan laju jipiléh lhée ploh droe awak muda keu ngon gobnyan. 12 Laju Simson geupeugah bak awaknyan, "Ulôn na hieuém. Meunyoe gata nyoe hase gata jaweueb, keue gata maséng-maséng ulôn jôk siôn ija lineun nyang halôh dan sipasang peukayan nyang lagak. Ubak gata ulôn jôk watée tujoh uroe sidub treb khanuri meukawen nyoe, keu gata jaweueb hieuém nyoe. 13 Teuma meunyoe gata hana hase gata jaweueb hieuém nyoe, gata kheueh maséng-maséng nyang jôk keu ulôn ija lineun nyang halôh dan saboh pasang peukayan nyang lagak." Laju ureuëng-ureuëng Filistin nyan jipeugah, "Jeuet! Jinoe peugah kheueh hiém nyan." 14 Teuma Simson geupeugah, "Nibak nyang makheun, jiteubiet nyang jimakheun; nibak nyang teuga, jiteubiet nyang mameh." Óh ka lheueh na lhée uroe, awaknyan gohlom cit meuhase jijaweueb hieuém nyan. 15 Lé sababnyan, bak uroe nyang keu peuet, jipeugah kheueh le awaknyan bak peurumoh Simson, "Gata harôh gata bujuk lakoe teuh mangat gobnyan geutem peugah keu kamoe makna hieuém nyan. Meunyoe hán, kamoe tot gata ngon banmandum asoe rumoh ureuëng syiek gata. Rupari gata tawök kamoe keunoe keu kamoe peuhabéh atra kamoe!" 16 Lé sababnyan, peurumoh Simson geujak bak lakoe geuh sira geumo, lheuehnyan geupeugah, "Ulôn kuteupeu droeneueh hana neucinta ulôn. Pakon neujôk hieuém ubak rakan-rakan lôn, teuma droeneueh hana neupeugah makna jih ubak ulôn? Teuntée droeneueh neubanci ulôn!" Seuôt Simson, "Preh ilée! Ubak ureuëng syiek lôn keudroe hana lôn peugah, keupeue bak gata harôh ulôn kheun?" 17 Tujoh uroe treb jih khanuri nyan peurumoh Simson jimo sabe. Dan lé sabab inong nyan hana piôh jimeurengek sabe, bak uroe nyang keutujoh, Simson laju geupeugah makna hieuém nyan ubak binoe geuh. Laju peurumoh Simson nyan jijak peugah makna hieuém nyan ubak ureuëng-ureuëng Filistin. 18 Dan bak uroe nyang keutujoh sigohlom mata uroe jilhob, ureuëng-ureuëng banda nyan jipeugah ubak Simson, "Peu kheueh nyang leubeh mameh nibak meulisan? Dan peu kheueh teuma nyang leubeh teuga nibak singa?" Simson geujaweueb, "Meunyoe gata hana tapeusuna peurumoh ulôn, gata hana hase tatapeuse makna hieuém nyan!" 19 Deungon hana teusangka-sangka Simson jiteuka teuga le kuasa TUHAN, laju geujak u Askelon. Disinan laju geupoh maté lhée ploh droe ureuëng agam nyang sok peukayan lagak-lagak. Gobnyan laju geucok peukayan awaknyan dan geujôk laju ubak awaknyan nyang ka jijaweueb hieuém geuh nyan. Óh lheuehnyan, laju geuwoe u rumoh gobnyan ngon até nyang tunu. 20 Laju le ayah tuan Simson geujôk peurumoh Simson nyan ubak nyang iréng Simson yoh watée awaknyan meukawen.

Hakém-Hakém 15

1 Na padubna treb teuma óh lheueh nyan, watée musém keumeukoh boh gandom, Simson laju geujak saweue peurumoh gobnyan. Gobnyan geuba saboh kaméng muda keu peurumoh geuh nyan. Geupeugah le Simson ubak ayah tuan geuh, "Ulôn keuneuk tamong lam bilek keu lôn jak meurumpok ngon peurumoh lôn." Teuma lé ayah tuan geuh hana geubri idhin gobnyan geutamong lam bilek aneuëk geuh. 2 Geupeugah le yah tuan nyan ubak Simson, "Ulôn pike gata biet-biet tabanci jihnyan, lé sababnyan, peurumoh gatanyan ka ulôn jôk ubak rakan gata nyang iréng gata ilée. Teuma, gata jeuet tacok adoe jih, jihnyan leubeh lagak nibak cutpo jih." 3 Geupeugah kheueh lé Simson, "Peue nyang harôh ulôn peubuet ateueh ureuëng Filistin goenyoe, kon kheueh salah ulôn!" 4 Laju geujak drob lhée reutôh boh asée srigala. Iku tieb-tieb asée srigala nyan geuikat dua-dua. Nibak sinambat talo ikatnyan, laju geuikat maséng-maséng saboh suwa apui. 5 Óh lheuehnyan gobnyan laju geutot suwa-suwa nyan ngon apui dan laju geupeuleueh asée-asée srigala nyan lam blang gandom ureuëng Filistin, nyang toh gandom-gandom nyan karab jeuet teupot. Lé sababnyan, tutong kheueh bubena gandom nyang ka jeuet pot disinan. Meunan cit kon nyan mantong, seunaman gandom dan lampôh anggô meusajan-sajan tutong mandum. 6 Ureuëng-ureuëng Filistin laju jijak seulidek soe poe buet nyan. Laju na ureuëng nyang peugah bak awaknyan bahwa Simson kheueh nyang peubuet mandum nyan, sabab yah tuan gobnyan nyang na di Timna ka geujôk peurumoh geuh ubak sidroe rakan Simson. Lé sababnyan ureuëng Filistin laju jitot inong nyan meunan cit banmandum asoe rumoh ureuëng syiek geuh sampoe habéh. 7 Laju geupeugah lé Simson ubak ureuëng Filistin nyan, "O, meunan cara jih gata balaih dam? Ulôn kumeusumpah hana lôn iem droe meunyoe hainyoe gohlom lôn balaih ateueh gata!" 8 Óh lheuehnyan gobnyan laju geuprang awaknyan ngon biet-biet keujam that dan geupoh maté awaknyan keubiet jai that-that. Óh lheuehnyan gobnyan geujak dan geumusöm lam saboh guha nibak saboh bukét batée di Etam. 9 Le sababnyan ureuëng Filistin jijak ubak daerah ureuëng Yehuda laju jipeusong khimah disinan, óh lheuehnyan awaknyan laju jiprang banda Lehi. 10 Ureuëng Yehuda geutanyong ubak ureuëng Filistin, "Pakon awaknyoe neujak prang kamoe?" Awaknyan jijaweueb, "Kamoe teuka keu kamoe jak drob Simson mangat kamoe hase kamoe peusaneut ateueh jihnyan lagée jihnyan jipeusaneut ateueh kamoe." 11 Watée jideungoe hainyan, jijak kheueh na lhée ribée droe ureuëng Yehuda ubak guha di bukét batée di Etam. Disinan awaknyan jipeugah, "Simson, peu kheueh gata hana tateupeue bahwa ureuëng Filistin meukuasa ateueh geutanyoe? Peue nyoe nyang ka gata peubuet ateueh kamoe!" Geuseuôt lé Simson, "Ulôn kubalah peue nyang ka awaknyan peubuet ateueh ulôn." 12 Kheun awaknyan, "Kamoe teuka keu kamoe ikat dan kamoe jôk gata ubak ureuëng Filistin." Geupeugah lé Simson, "Meujanji kheueh leubeh ilée bahwa awaknyoe hana neupoh maté ulôn." 13 "Get," kheun awaknyan, "keubiet kamoe keuneuk kamoe ikat dam kamoe jôk gata ubak ureuëng Filistin. Kamoe hana kamoe poh maté gata." Laju awaknyan ji ikat gobnyan ngon dua krak talo nyang mantong barô, dan jiba laju gobnyan nibak guha nyan. 14 Watée Simson jiba trok u Lehi, ureuëng-ureuëng Filistin jiplueng-plueng jijak ubak gobnyan sira jisurak gobnyan. Ngon hana teusangka-sangka gobnyan jiteuka teuga lé kuasa nibak TUHAN. Talo-talo nyang teuikat nibak jaroe geuhnyan putôh meukan-kan sang-sang talo nyan talo nyang tutong lé apui. 15 Óh lheuehnyan gobnyan laju geuteumé sikrak tuleueng geuheuém keuleudée nyang mantong barô. Laju geucok tuleueng nyan, ngon tuleueng nyan laju geulawan dan geuprang awaknyan, dan awaknyan maté na 1.000 droe. 16 Lé sababnyan geupeugah kheueh lé Simson sira meunyanyoe, "Ngon tuleueng keuleudée, ulôn poh maté siribée droe; ngon tuleueng keuleudée, ulôn tumpôk manyét-manyét awaknyan." 17 Óh lheuehnyan, gobnyan laju geutiek tuleueng geuheuém nyan. Nyang kheueh sabab jih teumpat nyan teuboh nan Ramat-Lehi. 18 Óh lheuehnyan Simson jiteuka grah that, lé sababnyan gobnyan geumeulakée ubak TUHAN. Gobnyan geupeugah, "TUHAN, banmantong Droeneueh neubri meunang nyang rayeuk keu ulôn. Jinoenyoe peu kheueh ulôn harôh maté sabab lé grah that nyoe, sampoe ulôn jidrob lé ureuëng Filistin nyang hana jituri Droeneueh?" 19 Lé sababnyan Po teu Allah laju geupeuhah ruhuéng nyang na lam bukét batée di Lehi nyan, laju jiteubiet ié nibak teumpat nyan. Simson laju geujieb ié nyan, lheuehnyan gobnyan ka meurasa puléh lom teuma. Nyang kheueh sabab jih mata ié nyan teuboh nan Mata Ié Hakor. Mata ié nyan sampoe án jinoe mantong na di Lehi. 20 Dua ploh thon treb jih Simson geupimpén umat Israel watée awaknyan jikuasa lé ureuëng Filistin.

Hakém-Hakém 16

1 Bak si uroe, watée Simson na di Gaza, deuh geukalon disinan na sidroe ureuëng inong jeuhet, di ureuëng inong lunté nyan laju jipeurab ubak gobnyan dan jiéh ngon gobnyan. 2 Bak watée teujok dan teupeugah hai nyan ubak ureuëng-ureuëng Gaza, "Simson ka teuka keunoe." Dan awaknyan laju jikeupông teumpatnyan dan ka siab jihadang gobnyan simalam suntok di babah pintoe geureubang banda, teuma sipanyang malamnyan awaknyan hana jipeubuet sapeue, sabab jipike meunoe, "Eunteuk óh watée ka reuneue nibak suboh butanyan, bak watéenyan kheueh jihnyan tapoh maté." 3 Teuma Simson teutab geuéh sampoe teungeut disinan trok án teungoh malam. Bak watée teungoh malamnyan teujaga dan geubeudôh kheueh gobnyan nibak teumpat éh, geumat laju bandua boh ôn pintoe geureubang bandanyan dan meunan cit bandua taméh pintoenyan geumat cit teuma. Lheuehnyan laju geubot sampoe teulot banmandum meunan cit deungon palang jih, óh lheueh geulot geucok geugulam laju ateueh bahoe gobnyan, dan banmandum nyan laju geu angkot ubak pucak gunong nyang meuhadab keue deungon Hebron. 4 Óh lheuehnyan Simson ka rhot cinta ubak sidroe inong dara nibak Pantôn Sorek nyang nan jih Delila. 5 Teuka kheueh laju raja-raja ureuëng Filistin ubak inong nyan sira jipeugah, "Ci kheueh gata bujuk ureuëng nyan mangat tateupeue dipat kheueh teuduek teunaga jihnyan nyang meunan raya, dan deungon peu kheueh kamoe hase kamoe peutaloe jihnyan dan teuikat jihnyan keu teupeutaklok jihnyan. Teuma kamoe maséng-maséng kamoe jok siribée sireutôh péng pirak keu gata." 6 Lé Delila jipeugah ubak Simson, "Neu calitra kheueh keu ulôn tuan keuhai teungku lakoe, peu kheueh sabab jih teunaga droeneueh meunan rayeuk, dan deungon peu kheueh teuma droeneueh harôh teu ikat dan teupeutaklok teuma?" 7 Geujaweueb lé Simson ubak binoe geuhnyan, "Meunyoe ulôn teu ikat deungon tujoh krek talo busur nyang barô nyang gohlom tho that, ulôn leumoh dan jeuet keu ureuëng biasa." 8 Lé peunguasa Filistin jijok laju ubak Delila tujoh krek talo busur nyang barô nyang gohlom tho that. Óh lheuehnyan, teungoh ureuëng Filistin nyan jipreh di ruweueng nyang laén, Delila laju geuikat Simson deungon talo nyang kana bak jaroe geuh sira geumeuhôi, "Simson! Ureuëng Filistin ka teuka!" Dan di Simson pi laju geureuet ngon geupeuputôh talo-talo nyang ka meuikat bak badan geuhnyan. Dan bubena talo nyang ka meuikat badan geuhnyan putôh lagée beuneueng nyang putôh keunong apui. Rahsia teunaga Simson nyan gohlom cit teubuka. 10 Geupeugah lom lé Delila ubak Simson, "Ah, droeneueh sulet! Droeneueh neupeuseunda ulôn nyang ureuëng binoe neueh. Neupeugah kheueh hai lakoe meutuah, ngon peu kheueh droeneueh hase teuikat!" 11 Geupeugah lom lé Simson, "Meunyoe ulôn teuikat deungon talo barô nyang hántom lom teungui, ulôn laju leumoh dan jeuet keu ureuëng biasa." 12 Teungoh ureuëng Filistin mantong jipreh-preh di dalam ruweueng kama nyang laén, Delila laju geujak cok meupadub krek talo nyang laén nyang mantong barô, ngon talonyan laju geuikat Simson lakoe geuhnyan. Óh lheuehnyan awaknyan laju jimeuhôi ngon su nyang teuga, "Simson! Ureuëng Filistin ka teuka!" Simson laju geupeuputôh talo-talo nyang meuikat nibak badan geuhnyan lagée ureuëng jipeuputôh beuneueng. 13 Laju geupeugah lom lé Delila ubak lakoe geuhnyan, "Ah, bit-bit droeneueh neupeumeuén ulôn, hai teungku lakoe. Droeneueh sulet, neupeugah kheueh laju ngon peue droeneueh teuikat!" Simson geujaweueb lom, "Meunyoe tujoh untie ôk ulônnyoe teurajot ubak beuneueng nibak peukakaih teumpeun ija, óh lheuehnyan teuikat teuma ubak kayée peukakaih teumpeun nyan, bak watée nyan ulôn laju leumoh dan ka jeuet lagée ureuëng biasa." 14 Lé Delila pi laju geujak peuteungeuet Simson, óh lheuehnyan geupeubuet laju lagée nyang ka geupeugah lé Simson nyan ubak gobnyan, geu rajot laju tujoh boh untie ôk Simson ngon beuneueng beukaih teumpeun dan óh lheuehnyan geuikat laju ubak kayée peukakaih teumpeun dan laju jimeuhôi Simson lakoe geuhnyan ngon su nyang teuga, "Simson! Beudôh, ureuëng Filistin ka teuka!" Bak siátnyan cit Simson geubeudôh laju geutarek ôk geuh nyang teuikat nibak kayée teumpeun ija nyan sampoe lheueh teuploh banmandum. 15 Óh lheuehnyan geupeugah lom lé Delila ubak gobnyan, "Ah, neupeugah droeneueh neucinta ngon neu gaséh keu ulôn, hai teungku lakoe, padahai até droeneueh that-that jiôh nibak ulôn! Ka lhée goe droeneueh neupeumeuén ulôn, dan sampoe án saátnyoe droeneueh hán cit neupeugah pakon droeneueh keubit that teuga." 16 Tieb-tieb uroe Delila teutab mantong jimeurengek-rengek lagée aneuëk manyak ubak lakoe geuh nyan sira geupa sabe, sampoe Simson pi ka tunu geudeungoe nyang lagéenyan. 17 Akhé jih sabab hán ék le geudeungoe ureuëng binoe geuhnyan jimeu réengeuek sabe, teuma geucalitra kheueh nyang seubeuna jih ubak peurumoh gobnyan rahsia nyang seubeuna jih. "Ôk ulôn di ateueh uléenyoe hántom na keunong sikin cuko," geupeugah lé Simson. "Ulôn nyoe ka teujok ubak Po teu Allah sibagoe milék Gobnyan nyang khusos. Yoh lahé ulônyoe ka jeuet keu sidroe Nazir. Meunyoe ôk nyang na di ateueh ulée ulônyoe teucuko, teunaga ulôn laju gadôh; ulôn leumoh dan jeuet keu ureuëng biasa." 18 Delila ka teurasa bahwa Simson biet-biet ka geubuka rahsia até gobnyan. Sabab nyan geukirém laju habanyan ubak peunguasa-peunguasa ureuëng Filistin, "Neuteuka kheueh goenyoe nyang keuneuleuh. Sabab Simson ka geupeugah ubak ulôn asoe até gobnyan nyang sibeuna jih." Teuma awaknyan pi jiteuka laju jijakba péng keu Delila. 19 Óh lheueh geupeugah nyan, lé Delila laju geugusuek-gusuek Simson sampoe gobnyan teungeut di dalam pankée binoe geuhnyan, geuhôi laju ureuëng laén geuyue jak cuko ôk nyang tujoh boh untie nibak ulée lakoe geuhnyan. Óh lheuehnyan laju jiseksa Simson, sabab Simson ka gadôh teunaga gobnyan. 20 Laju geumeuhôi sira geudumpék ngon su nyang teuga, "Simson! Ureuëng Filistin ka trok!" Simson geubeudôh, dan geusangka gobnyan hase lheuh lagée watée nyang ka-ka. Gobnyan hana geuteupeue bahwa TUHAN ka geutinggai gobnyan. 21 Deungon nyan di ureuëng-ureuëng Filistin jijak drob laju gobnyan dan jicungkée bandua neuek mata geuh. Awaknyan laju jiba gobnyan u Gaza dan ji ikat gobnyan deungon dua krek ranté teumaga, dan jipeutamong laju gobnyan u dalam rumoh glab. Disinan gobnyan jiyue meukeureuja meugileng. 22 Teuma sidubnyan treb ôk di ateueh ulée gobnyan ka jipeuphon timoh lom teuma. 23 Bak si uroe ureuëng nyang mat kuasa di Filistin nyan jimeusapat keuneuk jipeuna khanuri raya sira jipeuseumah keureubeuen keu dewa awaknyan nyang nan jih Dagon. Awaknyan laju jimeunyanyoe, "Dewa geutanyoe ka geujok keu geutanyoe jeuet meunang ateueh Simson, musoh geutanyoe!" 24 Teungoh awaknyan jimeusuka ria, awaknyan jipeugah, "Gata ba kheueh laju Simson nyan keunoe mangat jihnyan jeuet keu barang teupeukém dan barang peuhina keu geutanyoe!" Teuma awaknyan laju jijak cok Simson nibak rumoh glab. Dan gobnyan pi laju jeuet keu beunda nyang hina ngon jipeukém lé awaknyan. Awaknyan jiyue gobnyan mangat geudong di lamkawan bandua boh taméh nyang raya. Bak watée ureuëng ramé nyan jikalon Simson, awaknyan jipujoe laju Dagon sira jimeunyanyoe lagéenyoe, "Dewa geutanyoe ka geupeumeunang geutanyoe ateueh musoh nyang ka jipeurusak nanggroe geutanyoe dan jipoh maté nyang lumpah that jai ureuëng geutanyoe." 26 Geupeugah lé Simson ubak aneuëk agam nyang peujak gobnyan, "Gata peulheueh kheueh jaroe ulôn nyoe mangat jeuet ulôn mumat ubak taméh-taméh nyang meutumpang nibak geudong nyoe, sabab ulôn keuneuk meusadeue disinan." 27 Geudongnyan peunoh meusak-sak ngon ureuëng ramé. Dan banlimong droe nyang mat kuasa ateueh Filistin nyan pi na didalam geudong nyan. Dan nibak tingkat ateueh nibak geudong nyan na ureuëng kira-kira 3.000 droe. Awaknyan banmandum jijak meunonton sira ji peuhina ateueh Simson. 28 Bak watée nyan kheueh Simson geumeu doá ubak TUHAN Po teu Allah; doá geuhnyan na kheueh lagéenyoe, "Ya TUHAN Nyang Mahamanyang, beuneutem kheueh neuingat keu ulôn. Neubri kheueh ya TUHAN teunaga sigoe teuk nyoe keu ulôn, ya Po teu Allah, mangat jeuet lôn peubuet dan ulôn ka hase ulôn balaih ateueh ureuëng Filistin nyang ka jicungkée ban dua aneuk mata ulôn." 29 Óh lheueh geupeugah lé Simson nyang lagéenyan geumat laju dua boh taméh teungoh nyang na teutumpang geudong nyan. Dan sira geumeu tumpang deungon jaroe wie nibak taméh nyang saboh dan jaroe uneuen gobnyan ubak taméh nyang saboh teuk, 30 gobnyan geumeuhôi lom, "Bah kheueh ulôn maté meusajan-sajan ngon ureuëng Filistin nyoe!" Dan deungon habéh teunaga laju geuyok-yok dan geutulak taméh-taméh nyang teungoh geu mumat nyan, dan geudong nyan pi reubah laju sampoe jitimpok u ateueh banlimong droe ureuëng nyang mat kuasa ateueh Filistin nyan meunan cit meusajan-sajan ngon ureuëng laén nyang na didalam geudong nyan banmandum maté jitimpok lé geudong nyang geutulak lé Simson nyan. Dan meunan kheueh Simson pi wafeuet cit meusigoe ngon geudong nyan meusapat disinan deungon ureuëng laén. Teuma bak watée gobnyan maté lé gobnyan ka geupoh maté ureuëng laén leubeh jai nibak watée gobnyan mantong udeb. 31 Óh lheuehnyan teuka kheueh laju bubena kawöm syedara gobnyan keu jijakcok manyét gobnyan. Manyétnyan laju jipeuwoe urumoh, dan jipeukubu laju u dalam kubu Manoah, bapak gobnyan. Kubu nyan na jih di lamkawan Zora dan Esytaol. Simson jeuet keupeumimpén ureuëng Israel dua ploh thon treb jih.

Hakém-Hakém 17

1 Na sidroe ureuëng agam nyang nan jih Mikha. Gobnyan tinggai di daerah meugunong-gunong jitamong u dalam wilayah Efraim. 2 Bak siuroe geupeugah lé gobnyan ubak mak geuhnyan, "Ma, bak watée droeneueh geumadôh siribée sireutôh péng pirak, na ulôn deungoe droeneueh neukutok si pancurinyan. Nyoepat, mak, péng nyan! Ulôn kheueh nyang cue péng nyan." Geujaweueb lé mak geuhnyan, "Seumoga droe kheueh geubri beureukat lé TUHAN, hai aneuëk ulôn!" 3 Mikha laju geupulang péng nyan ubak mak geuh, laju lé mak geuhnyan geupeugah, "Mangat gata, hai aneuëk ulôn, leupah nibak kutokan nyang ka ulôn peugah nyan, ulôn peuseumah piraknyoe ubak TUHAN mangat jeuet teungui teupeuget patong kayée nyang teuseupoh deungon pirak. Jadi péng nyan ulôn peuriwang ubak gata." 4 Teuma óh kalheueh Mikha jijok pulang lom péng nyan ubak mak jihnyan, di mak nyan laju geucok dua reutôh keupeng nyan, dan atranyan laju geubri ubak tumpeun nyang peuget pirak. Laju gobnyan jiyue ubak tumpeun nyan mangat jipeuget saboh patong kayée nyang teu seupoh deungon pirak nyan. Óh lheuehnyan patong nyan laju jipeuduek dirumoh Mikha. 5 Di Mikha keudroe ka na nibak gobnyan saboh teumpat teumpat iébadat. Lé gobnyan geupeuget na meupadub boh patong beurala dan siôn efod laju geuangkat sidroe lamkawan aneuëk gobnyan nyang agam jeuet keu teungku imeum. 6 Nibak watéenyan bansa Israel gohlom na raja; tieb-tieb ureuëng beubaih jipeubuet peue nyang jianggab nyan beutôi. 7 Bak watéenyan cit teuma na sidroe ureuëng muda nibak sukée Lewi. Dilée gobnyan tinggai di Betlehem di dalam wilayah ureuëng Yehuda. 8 Teuma jinoenyoe ureuëng nyan ka jitinggai di bandanyan dan teungoh jijak mita teumpat tinggai nyang laén. Nibak meuneujak, gobnyan trok laju nibak rumoh Mikha di daerah meugunong-gunong Efraim. 9 Mikha geutanyong ubak ureuëngnyan, "Gata nyoe ureuëng pané?" Ureuëngnyan jijaweueb, "Ulôn ureuëng Lewi nibak Betlehem di Yehuda. Ulôn nyoe teungoh lôn mita teumpat tinggai." 10 Geupeugah lé Mikha, "Gata tinggai mantong deungon ulôn disinoe, mangat gata jeuet keupeunasihat dan teungku imeum kamoe. Singoh ulôn bri keu gata siploh péng pirak tieb-tieb thon, meunan cit teuma deungon peukayan dan peunajoh." 11 Di aneuëk muda ureuëng Lewi nyan laju situju, laju teuma gobnyan geuangkat lé Mikha jeuet keu teungku imeum jih. Gobnyan tinggai di rumoh Mikha dan geupeusaneut jihnyan lagée aneuëk droe gobnyan keudroe. 13 Teuma geupeugah lé Mikha, "Nyan, jinoenyoe ulôn yakén bahwa TUHAN teuma geupeugét nyang get keu ulôn sabab ka na sidroe ureuëng Lewi nyang jeuet keu teungku imeum nibak ulôn."

Hakém-Hakém 18

1 Bak watéenyan di nanggroe Israel hana meuraja. Sukée Dan mantong jimita-mita daerah mangat jeuet keu teumpat wilayah geuh, sabab awaknyan gohlom cit meuteumé tanoh meusajan ngon sukée-sukée nyang laén didalam bansa Israel. 2 Lé sababnyan awaknyan laju jipiléh limong droe ureuëng nyang gagah ngon beuhe lamkawan banmandum kawöm didalam sukée awaknyan nyang na tinggai di Zora dan Esytaol, laju jibri tugaih keu banlimong droe nyan mangat jijak seulidek nanggroe nyan. Dan beurangkat kheueh awaknyan, dan óh trok nibak wilayah meugunong-gunong di dalam wilayah Efraim. Disinan awaknyan jimudom di rumoh Mikha. 3 Bak watée jikeuneuk tamong u dalam rumoh nyan teudeungoe laju lé awaknyan peumuda Lewi nyan teungoh jipeugah haba. Dan awaknyan pi ka jituri nibak loghat ureuëng Lewinyan. Lé sababnyan, awaknyan laju jipeurab ubak gobnyan sira jitanyong, "Peue buet droeneueh disinoe? Peue urosan droeneueh? Soe nyang ba droeneueh keunoe?" 4 Geujaweueb lé ureuëng mudanyan, "Ulôn na disinoe sabab lé Mikha. Gobnyan kheueh nyang ka geu angkat ulôn jeuet keu teungku imeum geuh, dan geubri teuma gaji keu ulôn." 5 Jipeugah lé awaknyan ubak gobnyan, "Meunyoe meunan, tulông kheueh neutanyong ubak Po teu Allah peu kheueh meujak kamoenyoe meuhase atawa hana." 6 Geujaweueb lé teungku imeum nyan, "Bék khawate, meuneujak droeneueh nyan ka geureustu lé TUHAN." 7 Óh lheuehnyan jijak kheueh laju ban limong droe ureuëng nyan u Lais. Disinan awaknyan jingieng laju peunduduek nyang na disinan. Nyata kheuehnyan nibak awaknyan, bahwa cara udeb peunduduek disinan saban that ngon cara udeb peunduduek Sidon. Bahpi awaknyan jiôh tinggai teuaséng, dan jiôh nibak bansa Sidon, awaknyan udeb aman ngon teuntram, hana meumusoh, udeb makmu dan hana teuma kureueng meusapeue pi. 8 Bak watée ban limong droe ureuëng nyan jiriwang ubak mandum sukée gobnyan di Zora dan Esytaol, awaknyan laju jilakée lé sukée droe jih mangat jipeugét laporan. 9 Jipeugah lé awaknyan, "Jak geutanyoe tajak prang Lais. Kamoe ka kamoe jak keunan, dan kalheueh teuma kamoe kalon bahwa tanoh awaknyan diet that-that, luwah dan makmu, peue-peue mantong na disinan. Bék teutab mantong disinoe sampoe tanyoe hana tapeubuet sapeue. Beubagaih kheueh tajak keudeh dan jak reubot kheueh laju nanggroe nyan. Gatanyoe teuma tateupeue bahwa peunduduek disinan hana jisangka-sangka mubacut pi bahwa gatanyoe teuma tajak prang awaknyan. Kamoe yakén bahwa Po teu Allah ka geujok nanggroe nyan ubak gata." 11 Lé sabab nyan, jak kheueh laju nibak Zora dan Esytaol 600 droe sukée Dan. Deungon sinjata nyang leungkab, 12 awaknyan jijak u bagian barat Kiryat-Yearim di wilayah Yehuda laju jipeudong khimah disinan. Nyang kheueh sabab jih teumpat nyan sampoe án saátnyoe mantong teuboh nan Teumpat Meukhimah Dan. 13 Phon nibak teumpatnyan awaknyan geujak laju u daerah meugunong-gunong Efraim sampoe trok u rumoh Mikha. 14 Ban limong droe ureuëng tukang meuluem nyan jipeugah ubak rakan-rakan jihnyan, "Peu kheueh gatanyoe tateupeue bahwa di dalam saboh-saboh rumoh nyang na disinoe na jikeubah patong nyang meulapéh deungon pirak? Na cit patong-patong nyang laén dan Efod. Ci tapiké peue nyang harôh tanyoe peubuet." 15 Óh lheueh nibak nyan awaknyan jijak laju u rumoh Mikha, di teumpat peumuda Lewi nyan tinggai, dan jitanyong laju keuadaan gobnyan. 16 Bak watéenyan ban 600 droe tantra sukée Dan, nyang meusinjata leungkab nyan, teungoh jidong dikeue pintoe geureubang. 17 Ban limong droe mata-matanyan jitamong laju u dalam rumoh, laju jijakcok patong kayée nyang meulapéh deungon pirak meusigoe deungon patong-patong nyang laén, dan meunan cit Efod. Peumuda Lewinyan teungoh geudong lamkawan ban nam reutôh tantra nyan dibabah pintoe geureubang. 18 Bak watée banlimong droe ureuëng nyan jitamong u dalam rumoh Mikha dan jicok Efod meunan cit deungon banmandum patong-patong beuralanyan, peumuda Lewi nyan laju geutanyong, "Peu kheueh nyoe nyang awaknyoe peubuet?" 19 Awaknyan jijaweueb, "Iem! Hánjeuet teumanyong. Seutôt mantong ho nyang kamoe jak, eunteuk gata jeuet keupeunasihat dan teungku imeum kamoe. Nibak jeuet keu teungku imeum keu saboh keuluwarga, leubeh gét jeuet keu teungku imeum keu saboh sukée!" 20 Peumuda Lewi nyan galak that geudeungoe saran nyang lagée nyan. Lé sababnyan, gobnyan laju geucok Efod dan patong-patong beurala nyan laju geuseutôt ngon awaknyan. 21 Óh lheuehnyan rombongan nyan laju jijak lom, dikeue that aneuëk miet nyang jak, beulatang peulara dan barang-barang awaknyan. 22 Bak watée awaknyan ka jiôh, Mikha laju geuhôi mandum teutangga geuh dan geupakat laju awaknyan mangat jijak tiyeub ureuëng-ureuëng Dan nyan. Óh ka to ngon awaknyan, 23 Mikha dan ureuëng-ureuëng geuhnyan laju jiklik-klik geumeuhôi ngon su nyang riôh keu awaknyan. Di ureuëng-ureuëng sukée Dan nyan jipaleng laju u likot sira jitanyong ubak Mikha, "Peue hai? Pakon tajak ngon ureuëng nyang ramé meunan bagoe?" 24 Geujaweueb lé Mikha, "Awaknyoe ka jipeuplueng patong-patong ulôn meunan cit deungon teungku imeum ulôn, sampoe ulônnyoe ka hana sapeue na le, óh lheuehnyan mangat mantong gata peugah, 'Peue hai!' " 25 Jipeugah lé ureuëng-ureuëng sukée Dan nyan, "Leubeh gét tasumpai babah gatanyan; bék sampoe ureuëng-ureuëng nyoe beungéh dan jiseupôt gata. Eunteuk gata dan banmandum keuluwarga gata maté." 26 Óh lheueh jipeugah nyang lagéenyan di ureuëng sukée Dan nyan laju jijak lom teuma. Mikha jikalon bahwa awaknyan jiôh leubeh teuga nibak jihnyan, lé sababnyan geuhnyan jigisa laju jijakwoe. 27 Óh ka lheueh jipeuplueng teungku imeum nyan lé ureuëng sukée Dan meunan cit deungon barang-barang ngon peubuet iébadat peuneugét Mikha, awaknyan laju jijak prang Lais, banda nyang peunduduek jih aman dan teuntram. (Banda nyan na lam saboh pantôn ngon banda Bet-Rehob). Ureuëng-ureuëng Dan nyan laju jipoh maté banmandum peunduduek Lais dan jitot laju banmandum bandanyan. Hana nyang trok jijak tulông sukée-sukée Lais nyan sabab teumpat awaknyan jiôh teuaséng nibak Sidon. Óh lheuehnyan di ureuëng-ureuëng Dan laju jipeudong lom bandanyan dan jitinggai teuma disinan. 29 Nan bandanyan laju jigantoe deungon nan banda Dan, meunurot nan bapak indatu awaknyan, nyan kheueh Dan, aneuëk Nabi Yakub. 30 Patong beurala nyang awaknyan ba nyan, jipeudong laju di bandanyan óh lheueh nyan jiangkat teuma Yonatan, aneuëk Gersom, cucoe Nabi Musa, jeuet keu teungku imeum awaknyan. Keuturonan Gersom nyoe teutab jeuet keu teungku imeum sukée Dan trok án masa umat Israel teu angkot teujak tiek u nanggroe laén. 31 Patong beurala nyang jipeugét lé Mikha nyan teutab na di Lais simantong Khimah TUHAN na mantong di Silo.

Hakém-Hakém 19

1 Bak watée Israel gohlom na raja, na sidroe ureuëng Lewi nyang tinggai di gampông, nibak daerah gunong Efraim. Gobnyan jicok sidroe inong di Betlehem Yehuda jeuet keu gundek jih. 2 Teuma óh dudoe ureuëng inong nyan beungéh ubak gobnyan, lé sababnyan inong nyan jiwoe lom u rumoh ureuëng syiek jih di Betlehem. Óh ka lheueh ureuëng inong nyan tinggai disideh na peuet buleuen treb jih, 3 lé ureuëng Lewi nyan jijak seutôt inong nyan sira geubujuk mangat jitem gisa lom ubak gobnyan. Gobnyan jijak sira jiba sidroe namiet meunan cit dua boh keuleudée. Óh ka trok keudeh, lé ureuëng inong nyan laju jiba gobnyan ubak ayah jih. Watée ayah inong nyan jikalon gobnyan, lé ayah nyan laju jisambot gobnyan ngon até nyang mangat, 4 dan jipaksa mangat gobnyan bék geuwoe. Lé sababnyan, gobnyan tinggai na lhée uroe treb jih meunan cit geumakheun ngon geujéb ié dan geu-éh lom teuma ngon gundek jihnyan. 5 Bak uroe nyan keupeuet, awaknyan jibeudôh beungoh that-that dan laju meusiab-siab keuneuk beurangkat lom teuma. Teuma ureuëng syiek inong nyan jipeugah bak ureuëng Lewi nyan, "Gata makheun ilée mangat jeuet teuga. Lheueh nyan gata jeuet tajak lom teuma." 6 Lé sababnyan jiduek kheueh ureuëng Lewi nyan dan jimakheun laju meusajan-sajan ngon ayah inong nyan. Teuma watée gobnyan jidong keuneuk jijak, lé ayah inong nyan jibujuk Lewi nyan mangat bék jijak, "Meuseunang-seunang kheueh ilée," kheun gobnyan, "dan ta mudom kheueh disinoe." Lé sababnyan tinggai kheueh ureuëng Lewi nyan disinan simalam teuk. 8 Bak uroe nyang keulimong, ban suboh that, watée gobnyan keuneuk beurangkat, lé ureuëng syiek inong nyan jikheun lom, "Jak hai, tamakheun ilée, lheueh nyan barô kheueh jeuet gata woe." Lé sababnyan awaknyan bandua dan jipeutreb-treb sampoe mata uroe ka jipeuphon lhob. 9 Lheuehnyan, watée ureuëng Lewi nyan na meusajan ngon gundek jih dan namiet jih keuneuk jijak lom teuma, lé ayah inong nyan jikheun lom, "Uroe karab malam, hana treb le ka seupôt, leubeh gét mudom mantong disinoe dan gata meuseunang-seunang. Singoh gata beudôh banbeungoh that keu gata woe." 10 Teuma lé ureuëng Lewi nyan hana jitem mudom le. Gobnyan ngon gundek jih laju jijak, meusajan-sajan ngon namiet jih dan ban dua boh keuleudée nyang ka teuboh peulana. Watée uroe karab malam, awaknyan laju karab to ngon Yebus (na kheueh Yerusalem). Lé namiet nyan laju jipeugah ubak teungku po jih, "Teungku, jak kheueh geutanyoe tapiôh dan tamudom nibak banda Yebus nyoe mantong." 12 Teuma lé teungku po jih nyan jiseuôt, "Hán jeuet, tanyoe tajak laju dan geutanyoe hana jeuet tapiôh nyang peunduduek jih kon ureuëng Israel. Jak geutanyoe tajak lom bacut teuk eunteuk geutanyoe tamudom di Gibea atawa Rama." 14 Lé sababnyan awaknyan jijak laju hana jipiôh di Yebus. Mata Uroe ka jilhob watée awaknyan trok u Gibea nibak wilayah sukée Benyamin. 15 Awaknyan jipiôh disinan keu jimudom, laju jitamong lam banda dan jijak duek laju ubak padang. Teuma hana meusidroe pih nyang jitem undang awaknyan u rumoh jih mangat jimudom. 16 Teungoh awaknyan jiduek nibak padang banda, teuka kheueh sidroe ureuëng tuha nyang ban jiwoe nibak buet di ladang. Gobnyan nyang sikeubiet jih meuasai nibak daerah meugunong-gunong Efraim teuma jinoenyoe tinggai di Gibea. (Peunduduek laén di Gibea na kheueh ureuëng Benyamin.) 17 Watée jingieng lé ureuëng tuha nyan ureuëng Lewi nyan na di padang, laju jitanyong, "Gata nyoe dipat teuka, dan ho keuneuk jak?" 18 Ureuëng Lewi nyan geujaweueb, "Kamoe ban teuka nibak Betlehem di Yehuda, dan teungoh kamoe woe u rumoh nyang na nibak gampông tunong di Efraim. Ulôn asai jih disinan, hana meusidroe pih nibak peunduduek banda nyoe nyang jitem teurimong kamoe di rumoh jih keu kamoe mudom. 19 Kamoe hana peureulée sapeue nyang laén, beukai kamoe seb. Na jeurami dan eumpeuen keu keuleudée kamoe; na ruti ngon anggô keu ulôn meusajan ngon peurumoh ulôn nyoe meunan cit keu namiet lôn." 20 Laju geupeugah lé ureuëng tuha nyan, "Bé khawate, eunteuk ulôn tulông. Hana peue gata mudom lam padang nyoe." 21 Óh lheuehnyan lé ureuëng tuha nyan laju jiba awaknyan u rumoh jih dan jijok laju eumpeuen keu keuleudée-keuleudée jih. Dan óh ka lheueh jamé-jamé nyan jirhah gaki, laju awaknyan jimakheun. 22 Teungoh awaknyan meuseunang-seunang, ngon hana teusangka-sangka rumoh nyan ka jikeupông lé ureuëng-ureuëng jeuhet nyang teuka nibak banda nyan. Awaknyan laju jikeutok-keutok pintoe sira jipeugah bak ureuëng tuha nyan, "Jok laju keu kamoe ureuëng agam nyang gata ba u rumoh gatanyan, kamoe keuneuk peuguna jih nyan!" 23 Ureuëng tuha nyan geuteubiet dan laju geupeugah bak awaknyan, "Bék, syedara-syedara! Ulôn lakée, bék kheueh gata peubuet hai nyang jeuhet dan hana patot ateueh jamé lôn nyan, sabab jihnyan jamé ulôn. 24 Eunteuk ulôn jok gundek jihnyan ngon aneuëk dara lôn keu gata. Jeuet gata pupuih droe ngon awaknyan. Teuma bék kheueh gata peubuet nyang jeuhet ateueh jamé ulôn nyan!" 25 Teuma lé sabab ureuëng jeuhet nyan jimeukreueh cit, lé sababnyan ureuëng Lewi nyan laju jitulak gundek jih nyan u luwa keu awaknyan. Laju lé awaknyan jipeukosa ureuëng inong nyan hana piôh-piôh sampoe án beungoh uroe. 26 Óh watée suboh ureuëng inong nyan jigisa, meunan trok bak babah pintoe rumoh teumpat lakoe jih nyan ji-éh laju pansan, sampoe ka jiteubiet mata uroe jihnyan mantong disinan. 27 Beungoh nyan, watée lakoe jih jibeudôh dan jibuka pintoe keuneuk jak lom, laju deuh jikalon gundek jih nyan ka teutiek bak babah pintoe sira jaroe jih siblaih jimumat bak ôn pintoe. 28 "Beudôh kheueh laju," kheun Lewi nyan ubak gundek jih, "jak geutanyoe tajak lom." Teuma ureuëng inong nyan hana jijaweueb sabab ka meuninggai donya. Lé Lewi nyan laju jicok ureuëng inong nyan jikeubah ateueh keuleudée, óh lheuehnyan laju jijak sira jiwoe u rumoh jih. 29 Óh trok u rumoh, laju jicok sikin dan jikoh-koh laju manyét peurumoh jihnyan jeuet keu dua blaih krék. Óh lheueh nyan, laju jikirém ban dua blaih krék bagian binoe jih nyan ka teukoh-koh nyan keu bandua blaih boh sukée bansa Israel, maséng-maséng keu awaknyan saboh jeumba. 30 Banmandum ureuëng nyang kalon nyan jipeugah laju, "Gohlom na nyang ka-ka hai nyan na teujadi, yoh phon umat Israel jiteubit lam nanggroe Meusé trok nibak uroenyoe. Tanyoe hana jeuet ta seungab mantong. Tanyoe harôh tameurok pakat keu tanyoe balaih!"

Hakém-Hakém 20

1 Dan teuka kheueh banmandum umat Israel nibak daerah Dan di utara sampoe u Bersyeba di seulatan, dan Gilead di timu, keu meurumpok ubak teumpat teumawök nyan. Awaknyan meusapat dan meusaho di Mizpa dikeue TUHAN. 2 Banmandum nyan na 400.000 droe tantra nibak pasokan nyang jak ngon gaki. Peumimpén-peumipén nibak tieb-tieb sukée bansa Israel teuka cit keunan. 3 Óh lheueh nibaknyan di ureuëng-ureuëng nibak sukée Benyamin ka jideungoe bahwa banmandum ureuëng Israel nyang laén ka geumeugumpôi di Mizpa. Dan jiteumanyong kheueh lé ureuëng-ureuëng Israel nyan ubak ureuëng Lewi nyang selir jih ka jipoh maté nyan, "Ci gata peugah ubak kamoe pakriban buet nyang jeuhet nyan jeuet na!" Geujaweueb lé ureuëng Lewinyan, "Ulôn ngon gundek ulôn nyan kamoe piôh sikeujab di Gibea di dalam wilayah Benyamin dan kamoe mudom disinan. 5 Óh lheuehnyan teuka kheueh ureuëng-ureuëng Gibea ubak kamoe bak watée malam uroe jijak mita ulôn. Awaknyan laju jikeupông rumoh teumpat kamoe mudom nyan deungon meukeusut awaknyan jikeuneuk poh maté ulôn, teuma óh lheuehnyan awaknyan laju jipeukosa gundek ulôn sampoe án maté. 6 Lé ulôn laju ulôn cok manyét nyang ka maté nyan dan ulôn koh-koh laju óh lheueh nyan ulôn kirém ubak ban dua blaih boh sukée bansa geutanyoe maséng-maséng sikrak. Ulôn peubuet hai nyang lagéenyan sabab ureuëng Gibea nyan ka jipeubuet nyang jeuhet dan lumpah malée bala nyan keunong u ateueh bansa Israel. 7 Gatanyoe banmandum nyang na disinoe na kheueh bansa Israel. Jadi jinoenyoe hainyan ulôn lakée peudapat nibak gata banmandum!" 8 Deungon sireuntak ureuëng-ureuëng Israel nyang na meugumpôi di teumpat nyan laju jidong dan jipeugah, "Geutanyoe banmandum hana nyang jeuet nyang woe ubak khimah maséng-maséng atawa u rumoh droe. 9 Nyoe kheueh nyang geutanyoe peubuet: Geutanyoe tatiek undi mangat teupeuteuntée ureuëng-ureuëng nyang harôh jijak prang Gibea. 10 Siper siploh nibak banmandum ureuëng agam bansa Israel harôh jipeuna peunajoh keu awaknyan nyang jak meuprang. Nyang laén laju jijak prang Gibea mangat teuhuköm awaknyan sabab buet nyang jeuhet nyang ka awaknyan peubuet lamkawan umat Israel." 11 Meunan kheueh cara jih umat Israel ka jimeusaboh keu jijak prang Gibea. 12 Óh lheueh nyan lé ureuëng Israel laju jikirém bubena ureuëng gobnyan u dalam wilayah sukée Benyamin keu jijak peusampoe haba nyoe: "Keujeuhetan peue nyang ka teujadi u ateueh gatanyoe? 13 Gata seurah kheueh banmandum ureuëng-ureuëng jeuhet nyang beujat di Gibea nyan ubak kamoe mangat awaknyan kamoe poh maté dan deungon na nyang lagéenyan kamoe ka kamoe sampôh buet nyang jeuhet nyan lamkawan bansa Israel." Teuma ureuëng Benyamin hana jipako peue nyang ka jipeu ingat lé ureuëng Israel nyang laén nyan. 14 Malah banmandum banda nyang na di dalam wilayah Benyamin nyan dan ureuëng-ureuëng Benyamin jijak u Gibea keu jijak meuprang ngon ureuëng-ureuëng Israel nyang laén nyan. 15 Bak uroenyan awaknyan laju meusapat nibak banda-banda jihnyan na 26.000 droe tantra. Dan disampéng nyan teuma na cit peunduduek Gibea ka teuma meusapat 700 droe ureuëng nyang teupiléh dan teulatéh. Banmandum ureuëng jawie nyang gét that campen jiseumeurhom ngon batée ngon cara jipeuguna lagée ali-ali. Meunyoe awaknyan jigeulawa ngon ali-ali nyan, pasti keunong dan hana mieh meubacut pi. 17 Blaih ureuëng Israel nyang laén pi ka teuma meusapat 400.000 droe tantra nyang ka teulatéh. 18 Tantra umat Israel nyan jijak laju ubak teumpat iébadat di Betel, dan jiteumanyong ubak Po teu Allah, "Ya TUHAN, sukée toh kheueh lamkawan kamoe nyang harôh kamoe jak prang ureuëng Benyamin nyan?" TUHAN geujaweueb, "Sukée Yehuda." 19 Óh singoh beungoh nyan beurangkat kheueh laju awaknyan dan laju jipeudong khimah to ngon banda Gibea. 20 Awaknyan laju jipeudong baresan angkatan prang jih meuhadab keue ngon banda nyan, dan laju jiprang. 21 Dan bubena angkatan prang Benyamin nyan laju jiteubiet ngon jijak prang awaknyan óh lheueh nyan tantra Israel maté na 22.000 droe nibak uroenyan. 22 Sabab ka taloe nyan, jijak kheueh laju ureuëng Israel nyan ubak teumpat iébadat óh trok keunan laju jimo ba-e ubak TUHAN disinan sampoe án malam. Awaknyan jiteumanyong, "TUHAN, peu kheueh kamoe harôh kamoe jak meuprang lom ngon syedara-syedara kamoe ureuëng-ureuëng Benyamin nyan?" Geujaweueb lé TUHAN, "Nyoe, jak kheueh laju." Lé sababnyan angkatan prang Israel kana seumangat lom, sampoe awaknyan jiatoe lhom pasokan jihnyan lagée bak uroe nyang phon. 24 Keu nyang keudua jih awaknyan jijak prang angkatan prang Benyamin nyan. 25 Dan keu nyang keu dua teuma ureuëng-ureuëng Benyamin nyan jiteubiet jijak seurang awaknyan. Goenyan awaknyan jipoh maté teuma na l8.000 droe tantra nyang teulatéh nibak angkatan prang Israel. 26 Dan jijak kheueh lom ureuëng Israel nyan u Betel laju jijakmoe ba-e ubak TUHAN. Disinan awaknyan jipuasa sampoe án malam uroe dan jipeuseumah keureubeuen peudamé dan keureubeuen nyang teutot keu TUHAN. 27 Bak watéenyan Peuto Peujanjian Po teu Allah na di Betel, dan Pinehas aneuëk Eleazar, cucoe Nabi Harun, meutugaih sibagoe teungku imeum. Dan jitanyong kheueh lé umat Israel ubak TUHAN, "TUHAN, peu kheueh kamoenyoe kamoe jak prang lom syedara-syedara kamoe ureuëng-ureuëng Benyamin nyan, atawa peu kheueh harôh kamoe peupiôh meuprang nyoe?" Geujaweueb lé TUHAN, "Seurang kheueh awaknyan! Singoh beungoh Ulôn teuma Lôn peumeunang gata." 29 Watée jideungoe jaweueb TUHAN nyan, di ureuëng Israel laju jikeubah tantra gobnyan nibak teumpat-teumpat nyang teusöm ban sikeulileng Gibea. 30 Dan nibak uroe nyang keulhée awaknyan jijak maju ngon jijak eungkoe angkatan prang Benyamin, deungon sinuson angkatan nyan teutab lagée nyang ka-ka meuhadab u Gibea lagée nyang ka jipeubuet nibak uroe-uroe sigohlom nyan. 31 Meunan cit ngon ureuëng-ureuëng Benyamin jijak seureubu cit u ateueh pasokan Israel, dan awaknyan teupanceng keu jitem teubiet nibak banda. Lagée nyang ka lheueh-lheueh, awaknyan ka jipoh dumna ureuëng Israel dalam padang raya diluwa banda nibak rot ueh nyang teutuju u Betel dan meunan cit nibak rot ueh nyang teutuju u Gibea. Lhée ploh droe tantra Israel bak watéenyan teupoh maté. 32 Lé sababnyan lé ureuëng Benyamin jisangka awaknyan ka geupeutaloe ureuëng Israel lagée nyang ka-ka. Teuma tantra Israel ka na reuncana awaknyan jikeuneuk surot mangat teupanceng lom tantra Benyamin nyan u jalan-jalan raya, jiôh nibak banda. 33 Bak watée pasokan inti Israel nyan jisurot, dan jisuson baresan lom di Baal-Tamar, ureuëng-ureuëng awaknyan nyang jipeuteumpat bansikeulileng Gibea, deungon meugagéeh dan bagaih-bagaih jiteubiet nibak teumpat awaknyan jimusöm di daerah luwa banda. 34 Awaknyan na kheueh ureuëng-ureuëng peuniléh nibak ban saboh nanggroe Israel; jeumeulah jih na 10.000 droe. Dan teujadi kheueh prang nyang lumpah hibat bak watée tantra nyang 10.000 droe nyan jijak keupông Gibea. Ureuëng-ureuëng Benyamin meubacut pi hana jisangka bahwa droe jihnyan hana treb le teuma taloe. 35 TUHAN geubri keu ureuëng Israel meunang ateueh ureuëng Benyamin, sampoe nibak uroenyan ureuëng Israel ka meuhase jipoh maté na 25.100 droe tantra Benyamin. 36 Barô kheueh lé ureuëng Benyamin jisada bahwa jihnyan ka taloe. Pasokan inti Israel nyan deungon jisaja ka jipeuplueng droe nibak ureuëng-ureuëng Benyamin sabab awaknyan jipeubangga aneuëk buah jihnyan di teumpat-teumpat nyang teusöm ban keulileng Gibea. 37 Ureuëng-ureuëng nyang teungoh jimusöm nyan bagaih-bagaih jitamong jijak seureubu Gibea; awaknyan laju meutabu hoho mantong bansaboh bandanyan dan jipoh maté banmandum ureuëng nyang na disinan. 38 Teuma awaknyan ka sipakat leubeh ilée meunyoe na asab teubai nyang teungoh meukeubok u ateueh bak teungoh-teungoh banda, 39 pasokan inti nyang teungoh jisurot harôh jibalek jijak prang musoh. Bak watée nyan ureuëng-ureuëng Benyamin ka jipoh maté kira-kira na lhée ploh droe tantra Israel dan jisangka lé awaknyan jihnyan ka jipeutaloe ureuëng-ureuëng Israelnyan lagée nyang ka jipeubuet yoh awaiphon. 40 Teuma na siatnyan mantong asab ka meukeubok u ateueh di teungoh-teungoh banda Gibea nyan. Ureuëng-ureuëng Benyamin gét that teukeujot watée awaknyan jipaleng ulikot dan jikalon laju banmandum banda awaknyan ka habéh tutong. 41 Dan bak watée nyan cit teuma pasokan inti Israel jigisa laju jijak seurang, dan bubena tantra Benyamin nyan ka habéh mumang sabab awaknyan ka sada bahwa awaknyan ka pasti taloe. 42 Lé sababnyan, awaknyan laju jiplueng nibak ureuëng-ureuëng Israel jituju u padang pasi, teuma bahpi keunan awaknyan jipeuplueng droe teuma teutab hana hase lheueh. Awaknyan ka teukeupông lamkawan pasokan inti Israel dan pasokan nyang teungoh teuka nibak jurosan banda. Ureuëng Benyamin meudeurita taloe nyang lumpah hebat. 43 Ureuëng-ureuëng Israel laju jipong dan jitiyeub awaknyan hana piôh-piôh sampoe trok ubak saboh teumpat disiblaih utimu Gibea. Sira jitiyeub, awaknyan pi jipoh maté 44 18.000 droe tantra nyang teulatéh nibak angkatan prang Benyamin. 45 Tantra Benyamin nyang laén nyan laju jigisa dan jiplueng bansalamle meulalu daerah padang pasi jituju ubak gunong-gunong batée di Rimon. Na 5.000 droe lamkawan awaknyan keunong poh maté diteungoh rot ueh raya. Seudangkan nyang laén nyan jipeucrok laju sampoe u Gideom. Nibak ureuëng nyan na teuma 2.000 droe nyang teupoh maté. 46 Deungon nyan, tantra Benyamin nyang teupoh maté nibak uroenyan na 25.000 droe -- banmandum nyan na kheueh tantra nyang gagah beurani. 47 Teuma lamkawan awaknyan nyang jiplueng liwat rot padang-padang pasi jituju ubak gunong-gunong batée di Rimon na teuma 600 droe nyang lheueh. Awaknyan tinggai di Rimon na peuet beuleuen treb jih. 48 Óh lheuehnyan ureuëng Israel jigisa lom laju jijak prang dan jipoh maté mandum ureuëng Benyamin nyang na tinggai sidroe sapat -- agam, inong, aneuëk manyak meunan cit deungon beulatang peulara jih. Banmandum banda nyang na didaerahnyan jitot ngon apui.

Hakém-Hakém 21

1 Bak watée ureuëng Israel jimeusapat di Mizpa, awaknyan ka jimeujanji ubak TUHAN bahwa hana meusidroe pi nibak awaknyan nyang jipeu idhin aneuëk dara jih jimeukawen ngon sukée Benyamin. 2 Jinoenyoe awaknyan jijak u Betel dan jiduek ngon até nyang seudeh trok án malam dikeue TUHAN. Awaknyan jimo dan jimeusapat, 3 "Ya TUHAN, Po teu Allah Israel, pakon kheueh banmandum nyoe harôh teujadi? Sukée Benyamin, saboh nibak sukée bansa kamoe karab habéh!" 4 Óh singoh beungoh nyan, ban seuboh buta, umat Israel laju jipeudong saboh miseubah disinan, dan laju jipeuseumah ubak TUHAN keureubeuen nyang teutot dan keureubeuen peudamé. 5 Óh lheuehnyan awaknyan laju jiseulidek peu kheueh na lamkawan sukée-sukée bansa Israel nyang hana jijak u Mizpa bak watée meusapat disinan yoh masa ilée keujak meuhadab TUHAN. (Bak watéenyan awaknyan ka jimeusumpah bahwa ureuëng nyang hana jitemjak bak watée teupakat u Mizpa ureuëng nyan harôh teuhuköm maté.) 6 Umat Israel that-that jigaséh ubak mandum syedara-syedara gobnyan sukée Benyamin; awaknyan jipeugah, "Bak uroenyoe Israel teuma gadôh saboh lam sukée jihnyan. 7 Peue nyang harôh tapeubuet lé geutanyoe mangat ureuëng Benyamin nyang na mantong tinggai bacut teuk nyoe hase jimeukawen dan na peurumoh, sabab geutanyoe ka ta meusumpah ubak TUHAN bahwa geutanyoe hana tapeu idhin aneuëk-aneuëk dara geutanyoe jeuet keupeurumoh ureuëng Benyamin?" 8 Teuma lé awaknyan jiseulidek peu kheueh na saboh golongan nibak sukée bansa Israel nyang hana jijak meusapat di Mizpa. Dan awaknyan na meurumpok bahwa nibak ureuëng-ureuëng Yabes di Gilead, hana meusidroepi nibak awaknyan nyang na jijak u Mizpa. 9 Sabab, bak watée teupeureksa dafeutar hadé, teunyata hana meurumpok disinan ureuëng-ureuëng Yabes. 10 Lé sabab nyan, ureuëng-ureuëng nyang meusapat di Betel nyan jikirém 12.000 droe nyang paleng beuhe nibak awaknyan nyang laén mangat teujak poh tieb-tieb ureuëng di Yabes, jitamong cit keunan ureuëng inong dan aneuëk manyak. 11 Awaknyan jibri peurintah keu jiyue poh bubena ureuëng agam, dan meunan cit bubena ureuëng inong nyang hana le peurawan. 12 Teuma lamkawan ureuëng nyang na tinggai di Yabes nyan, awaknyan meurumpok 400 droe aneuëk dara nyang na mantong peurawan. Awaknyan laju jiba aneuëk-aneuëk daranyan ubak khimah-khimah di Silo nyang na di nanggroe Kanaan. 13 Óh lheuehnyan banmandum umat Israel jikirém utosan ubak ureuëng-ureuëng Benyamin nyang na tinggai di gunong-gunong batée di Rimon keu pakat meudamé. 14 Lé sababnyan di ureuëng-ureuëng Benyamin nyan laju geugisa, dan di umat Israel pi laju jijok aneuëk-aneuëk dara nibak Yabes nyang hana jipoh maté nyan. Teuma jeumeulah aneuëk dara nyan hana seb keu ureuëng-ureuëng Benyamin nyan. 15 Umat Israel gét that weueh keu ureuëng Benyamin, sabab TUHAN ka geupeureutak talo syedara sukée bansa Israel. 16 Sabab nyan, ureuëng-ureuëng nyang patot nyang na meusapat di Betel nyan jipeugah, "Di dalam sukée Benyamin hana le ureuëng inong. Teuma peue takeuneuk peugah; geutanyoe hana jeuet tabri idhin keu aneuëk-aneuëk dara geutanyoe jimeukawen deungon awaknyan, sabab geutanyoe ka ta peusumpah tieb-tieb ureuëng so mantong nibak lamkawan geutanyoe nyang jipeu idhin aneuëk dara jih jimeukawen ngon ureuëng Benyamin! Jadi, peu kheueh nyang harôh tanyoe peubuet keu awaknyan nyang na mantong tinggai sidroe dua nyoe mangat awaknyan hase jimeukawen? Bék sampoe Israel gadôh saboh lamkawan sukée jih nibak dua blaih sukée bansa Israel. Geutanyoe harôh tamita jalan mangat sukée Benyamin nyan jeuet jipeutreun keuturonan jih simantong na jih nyan dan jeuet teuma jipo hak milék tanoh jihnyan jeuet keu atra jih siumu masa." 19 "Meunoe," kheun awaknyan, "na saboh jalan keumasa alahnyan, na kheueh bak watée peurayaan siseun sithon keu TUHAN di Silo." (Di siblaih seulatan Silo nyoe na meuteumé banda Betel, dan siblaih ubarat nyan na teuma meurumpok jalan raya Betel u Sikhem, seudangkan disiblaih utara na teuma meurumpok banda Lebona.) 20 Teuma di ureuëng patot-patot nyang jipeuna meusapat di Betel nyan jipeugah ubak ureuëng-ureuëng Benyamin nyang na tinggai sidroe dua nyan, "Gata jak laju tajak musöm bak lampôh-lampôh anggô di Silo, 21 dan gata meujaga-jaga kheueh disinan. Eunteuk meunyoe aneuëk-aneuëk dara Silo jiteubiet keu jijak meunari bak watée peurayaan siseun sithon keu TUHAN, gatanyoe banmandum harôh beubagaih tateubiet nibak dalam lampôh anggô nyan. Lé gatanyoe maséng-maséng gata drob laju sidroe aneuëk dara lamkawan awaknyan dan gata peuplueng laju u dalam wilayah Benyamin mangat tapeujeuet keu ureuëng binoe gata. 22 Meunyoe na bapak atawa syedara inong nyan nyang agam jijak tuntot gata, gata mandum jeuet tapeugah nyang lagéenyoe, 'Kamoe meuharab ngon kamoe lakée, bah kheueh awaknyan tinggai nibak kamoe. Kamoe hana kamoe reupah awaknyan bak watée meuprang. Dan lé sabab gata hana tabri awaknyan keu kamoe, gata hana ta iengkeue janji, lé sababnyan hana meusalah.' " 23 Teuma ureuëng-ureuëng Benyamin nyan laju jipeubuet peue nyang ka jipeugah ubak jihnyan. Awaknyan maséng-maséng laju jibaplueng sidroe aneuëk dara Silo. Óh lheuehnyan awaknyan jiwoe u wilayah jih keudroe dan laju jipeudong lom banda-banda gobnyan dan laju jitinggai teutab disinan. 24 Meunan cit deungon ureuëng-ureuëng Israel nyang laén pi jibeurangkat cit teuma. Awaknyan jiwoe ubak tanoh milék jih keudroe di dalam wilayah droe jihnyan maséng-maséng, meunurot kawöm dan sukée-sukée jihnyan. 25 Bak watée jamén nyan gohlom na raja di nanggroe Israel. Tieb-tieb ureuëng jipeubuet peue nyang jianggab beutôi.

Rut 1

1 Bak watée jamén ilée sigohlom ureuëng Israel na raja nanggroe, nanggroe Kanaan keunong beuncana musém deuk nyang lumpah parah. Bak watée nyan na sidroe ureuëng agam nyang nan jih Elimelekh. Ureuëng nyan asai nibak kawöm Efrata, dan tinggai di Betlehem di dalam wilayah Yehuda. Sabab bala musém deuk nyan, gobnyan jijak u nanggroe Moab meusajan deungon peurumoh jih, Naomi, dan bandua aneuëk gobnyan nyang agam: Mahlon dan Kilyon. Laju awaknyan tinggai disinan. Watée awaknyan mantong disideh, 3 Elimelekh meuninggai donya. Deungon nyan tinggai kheueh Naomi meusajan ngon ban dua droe aneuëk geuh. 4 Ban dua aneuëk jihnyan jimeukawen ngon aneuëk dara Moab, nyang nan Orpa dan Rut. Siploh thon óh lheuehnyan, 5 ban dua aneuëk agam Naomi nyan, meuninggai teuma, akhé jih Naomi ka gadôh bah kheueh nyan lakoe droe meunan cit ban dua droe aneuëk jihnyan. 6 Na meupadubna treb teuma óh lheuehnyan Naomi jideungoe bahwa TUHAN ka geubri beureukat ateueh umat Israel deungon hase panén nyang gét. Lé sabab nyan Naomi deungon ban dua droe meulintée gobnyan jimeukeumah laju keu jitinggai Moab. 7 Awaknyan jibeurangkat meusigoe-sigoe jiwoe u Yehuda. Bak teungoh rot ueh, 8 Naomi jipeugah ubak ban dua droe meulintée jihnyan, "Gata nyoe tawoe mantong u rumoh mak gata. Seumoga TUHAN gét deungon gata saban cit lagée gata pih gét deungon ulôn dan keu awaknyan nyang ka meuninggai donya. 9 Seumoga TUHAN ngon murah até geubri lakoe lom keu gata mangat gata tameurumoh tangga lom teuma." Óh ka lheueh jipeugah nyang lagée nyan bagoe, Naomi laju geulakée idhin ubak awaknyan sira geucöm awaknyan. Teuma Orpa dan Rut laju geumo sira geukliek sihabéh teuneuga, 10 sira jikheun ubak Naomi, "Hánjeuet, Mak! Kamoenyoe meuseutôt ho nyang Makjak ubak bansa Mak." 11 "Bék, hai aneuëk!" geujaweueb lé Naomi, "gata leubeh gét tajakwoe. Keupeue guna jih gata seutôt deungon ulôn? Bukon kheueh ulôn nyoe hana hase le ulôn peulahé aneuëk keu jeuet keu lakoe gata? 12 Gatajak woe kheueh, hai aneuëk meutuah, sabab ulôn nyoe ka tuha that keu ulôn meukawen lom. Dan seukira jih mantong na harapan nibak ulôn keu lôn meukawen bak malam nyoe cit teuma dan meuteumé aneuëk agam, 13 peu kheueh gatanyoe tatem preh sampoe aneuëk nyan rayeuk? Ék kheueh mungken lé sababnyoe gata hana tatem meukawen deungon ureuëng laén? Han jeuet, aneuëk ulôn, bék gata peubuet nyang lagée nyan! Ulôn meurasa peudeh keuhai peue nyang harôh gata rasa kareuna huköm TUHAN ateueh ulôn." 14 Rut dan Orpa geumo lom ngon su nyang teuga óh lheuehnyan Orpa laju jilakée droe sira jicöm mak tuwan droe jih dan gobnyan pih geuwoe. Teuma Rut hana geutem reungggang deungon mak tuwan geuh nyan. 15 Jipeugah kheueh lé Naomi ubak Rut nyan, "Rut, gata kalon kheueh! Parui gata ka jiwoe ubak bansa droe jih dan ubak dewa-dewa droe jih. Gata jak kheueh teuma hai aneuëk meutuah, seutôt kheueh laju jihnyan nyang ka jiwoe!" 16 Teuma geujaweueb lé Rut, "Mak, bék kheueh neuyue woe ulôn dan lôn tinggai Mak sidroe disinoe! Ulôn tuan keuneuk seutôt ho nyang Mak jak. Ho mantong Mak jak, keunan cit ulôn jak. Dipat mantong Mak tinggai, disinan cit teuma ulôn tinggai. Bansa Mak, nyan pih bansa ulôn. Po teu Allah nyang Mak seumah, nyang cit nyang ulôn seumah. 17 Dipat mantong Mak meuninggai, disinan cit teuma ulôn meuninggai dan teupeukubu. Bah kheueh TUHAN geuhuköm ulôn sibrat-brat jih, meunyoe ulôn nyoe lôn meupisah deungon Mak, keucuali maté kheueh nyang hase peujiôh tanyoe!" 18 Naomi geukalon bahwa Rut nyan that-that jimeukreueh keuneuk jiseutôt, lé sababnyan, gobnyan ka hana hase geukheun sapeue. 19 Deungon nyan teuma awaknyan laju geujak lom sampoe ka trok u Betlehem. Meunan awaknyan trok keunan, bansaboh banda nyan ka karu ngon subra. Dumna ureuëng inong disinan jipeugah, "Peu kheueh beutôi gobnyan Naomi?" 20 "Bék tahôi ulôn Naomi," geupeugah lé Naomi, "gatahôi mantong ulôn Mara, sabab Po teu Allah Nyang Mahakuasa ka geupeubiyeu ulôn nyoe udeb peunoh deungon nyang phet-phet. 21 Bak watée ulôn tuan jak nibak teumpat nyoe peunoh deungon peue nyang tapeureulée, teuma jinoenyoe TUHAN ka geupeuriwang lom ulôn keunoe deungon jaroe nyang soh. Lé sabab nyan bék kheueh gatanyoe tahôi ulôn deungon nan Naomi, sabab TUHAN Nyang Mahakuasa ka geuhuköm ulôn deungon meubagoe deurita nyang le!" 22 Meunan kheueh kisah jih pakriban Naomi geuwoe nibak Moab meusajan deungon Rut meulintée gobnyan nyang ureuëng Moab nyan. Awaknyan trok u Betlehem paih bak musém keumeukoh boh gandom.

Rut 2

1 Naomi na sidroe anggota keuluwarga nibak pihak lakoe jih, Elimelekh, ureuëng nyan kaya lom teupandang. Nan ureuëng nyan Boas. 2 Bak si uroe geupeugah lé Rut ubak Naomi, "Mak, Ulôn lakée idhin keuneuk jak u lampôh keuneuk piléh boh gandom nyang mungken na nyang rhot nibak jaroe ureuëng mupot. Ulôn rasa teuntée na mantong ureuëng nyang jipeubiyeu keu ulôn mangat lôn peubuet nyang lagéenyan." "Get, neuëk!" jaweueb Naomi, "tajak kheueh!" 3 Deungon nyan geujak kheueh laju Rut u blang geujak piléh gandom nyang rhot nibak jaroe ureuëng mupot. Keubeutulan gobnyan geujak ublang atra Boas. 4 Hana treb óh lheuehnyan Boas teuka nibak Betlehem dan geubri saleuem ubak ureuëng nyang teungoh meupot, "Seumoga TUHAN na meusajan gata," kheun gobnyan. Geujaweueb teuma lé ureuëng nyang teungoh mupot nyan, "Seumoga TUHAN geubri beureukat keu Bapak." 5 Laju Boas geuteumanyong ubak mando gobnyan, "Soe ureuëng inong nyan?" 6 Jijaweueb lé mando nyan, "Jih nyan ureuëng inong nibak Moab nyang ban teuka meusigoe ngon Naomi nibak nanggroe Moab. 7 Gobnyan geulakée idhin ubak ulôn mangat jiseutôt rot likot ureuëng nyang teungoh mupot keu jipiléh boh gandom nyang rhot-rhot. Phon beungoh geuhnyan hana geupiôh meukeureuja, dan jinoenyoe ban sagai jipiôh jimeureuhat sikeujab lam jambo." 8 Lé Boas geupeugah ubak Rut, "Ci neudeungoe ilée. Gata bék tajak piléh boh gandom nibak blang ureuëng laén. Tapiléh mantong disinoe meusajan deungon ureuëng nyang meukeureuja nibak ulôn ureuëng nyang inong. Gata kalon kheueh ho nyang awaknyan jijak mupot. Taseutôt kheueh mantong awaknyan sabe dan bék jiôh gata nibak awaknyan. Meunyoe gata ka glaih keuneuk jieb ié, tajakcok mantong ié di dalam guci nyang ka jipaso lé ureuëng agam. Ulôn ka ulôn peurintah ubak awaknyan mangat awaknyan bék jipeukaru gata." 10 Geudeungoe nyang lagée nyan Rut laju geusujut dikeue Boas sira geupeugah, "Pak, ulôn hana patot ulôn teurimong neupeusaneut ulôn nyang meunan gét nibak Bapak. Ulôn nyoe ureuëng aséng dan hana sipatot jih ulôn teurimong neupeurati ulôn nyang meunan gét nibak Bapak!" 11 Boas geujaweueb, "Ulôn ka ulôn deungoe keuhai peue mantong nyang gata peubuet ateueh mak tuwan gata phon yoh lakoe gata meuninggai donya. Ulôn lôn teupeu bahwa gata ka tatinggai ureuëng syiek gata dan tanoh ié gata keu gata teuka tinggai disinoe meusapat ngon ureuëng-ureuëng nyang gohlom gata turi. 12 Seumoga TUHAN geubalaih buet gata nyang jroh. Seumoga gata tateurimong peue-peue mantong nyang geubri lé TUHAN, Po teu Allah Israel, sabab gata ka tateuka keu tajak meulindong ubak gobnyan!" 13 Geujaweueb lé Rut, "Bapak lumpah that gét keu ulôn, bahpi ulôn nyoe hana saban ngon ureuëng nyang meukeureuja nibak Bapak. Ramah Bapak nyan bit-bit gét that teupeu mangat até ulôn." 14 Watée katrok keu teujak pajoh bu, Boas geupeugah ubak Rut, "Jak geutanyoe tajak makheun. Nyoepat saus jih." Teuma Rut pi laju geumakheun meusigoe ngon ureuëng mupot nyan. Meunan cit Boas laju geubri gandom nyang teutot keu Rut nyan, dan Rut geumakheun sampoe troe. Óh lheueh geumakheun, mantong na nyang leubeh. 15 Óh lheuehnyan Rut geujak lom geujak piléh boh gandom. Óh ka leupah gobnyan geujak, Boas laju geupeugah ubak ureuëng nyang keureuja pot boh gandom nyan, "Meunyoe jihnyan jipiléh boh gandom nyang ka teu ikat-ikat, gata peubiyeu mantong. Bék gata peujeuet jihnyan malée atawa gata beungéh keu jih. Bah kheueh gata tasaja beuôt bacut-bacut nibak nyang ka gatapot ngon gata ikat-ikat nyan, dan gata peurhot keu jihnyan mangat jihnyan hase jipiléh atra nyan." 17 Rut hana geupiôh laju geupiléh gandom di blang sampoe án uroe seupôt. Óh ka lheueh gobnyan geuseunuet-seunuet bak gandom nyan keu geupeu leukang aneuk gandom nyang meukeumat nibak mu jih, teunyata gobnyan ka geupeusapat aneuk gandom nyan na siploh kilo gram. 18 Óh lheuehnyan gobnyan geuwoe laju u banda deungon geupeuwoe sajan hase nyang ka geupiléh nyan ubak mak tuwan sira geutunyok na meupadub na le hase nyang geupiléh nyan. Dan gobnyan geubri ubak mak tuwan geuh peunajoh nyang hana ek geupeu habéh bak watée makheun. 19 Teuma geupeugah kheueh lé Naomi ubak Rut nyan, "Dipat gata teumé banmandum nyoe? Diblang soe kheueh gata meubuet nibak uroe nyoe? Seumoga Po teu Allah geubri beureukat nyang gét keu ureuëng nyang ka jipeubuet nyang jroh keu gata!" Teuma lé Rut laju geucalitra hai nyang ka teujadi ateueh droe geuhnyan ubak Naomi nyang mak tuwan geuh, bahwa blang teumpat gobnyan piléh gandom nyan na kheueh atra sidroe ureuëng agam nyang nan jih Boas. 20 "Aneuëk meutuah, ureuëng nyan na kheueh keuluwarga nyang paleng rab deungon geutanyoe," kheun Naomi. "Gobnyan kheueh nyang harôh meutanggong jaweueb u ateueh geutanyoe. Seumoga TUHAN geubri beureukat ateueh gobnyan. TUHAN hántom na geu iengkeue janji dan tieb geumeujanji sabe geupeutrok, bah kheuehnyan janji keu ureuëng nyang mantong udeb meunan cit keu ureuëng nyang ka meuninggai donya." 21 Óh lheueh nyan Rut geupeugah lom, "Mak, ureuëng nyan geukheun lom bahwa ulôn nyoe jeuet ulôn piléh sabe gandom nyang rhot-rhot nyan meusajan deungon ureuëng nyang meukeureuja bak gobnyan sampoe án hase bansaboh blang ka seuleusoe teupot." 22 "Nyoe, neuëk," geujaweueb lé Naomi ubak Rut, "keubiet leubeh gét gata meukeureuja meusajan ngon ureuëng keureuja nyang inong diblang Boas. Sabab, meunyoe gata tajak ublang ureuëng laén, gata hase jipeukaru lé ureuëng nyang na disinan!" 23 Lé sabab nyan, Rut teutab geuseutôt ureuëng nyang meukeureuja nyang inong di blang Boas. Gobnyan geupiléh gandom disinan sampoe banmandum nyang ka jeuet pot nyan teukoh beuhabéh -- bah kheuehnyan nyang phon that teukoh meunan cit ngon teupot nyang paleng keuneuleuh. Dan sidubnyan treb Rut teutab tinggai deungon mak tuwan geuh.

Rut 3

1 Na meupadub na treb teuma óh lheuehnyan, Naomi geupeugah ubak Rut, "Ulôn harôh lôn useuha mangat gata meuteumé tameurumoh tangga lom dan mubahgia. 2 Gata takeureuja meusajan deungon ureuëng inong diblang Boas, bukon? Ingat, Boas nyan na kheueh syedara geutanyoe. Sabab nyan, gata deungoe kheuehnyoe! Bak malamnyoe gobnyan teuma geujak ceumeulo ubak jambo pui teumpat gandom gobnyan teutamon di blang geuh. 3 Tajak manoe kheueh laju, taboh kheueh laju minyéuk mangat bée dan tasok kheueh peukayan gata nyang paleng lagak. Laju gatajak ubak teumpat Boas di teumpat geuh meukeureuja nyang teungoh geuceumeulo gandom nibak mu jih. Gata preh kheueh gobnyan disinan sampoe gobnyan seuleusoe geumakheun, teuma bék sampoe geuteupeue bahwa gata na disinan. 4 Gata ngieng kheueh dipat teumpat gobnyan éh. Meunyoe gobnyan ka geuteungéuet, tapeurab kheueh laju ubak gobnyan dan gata buka laju ija silimbot gobnyan, laju gata-éh nibak gaki gobnyan. Eunteuk gobnyan teuma geubri tée bak gata peue nyang harôh gata peubuet." 5 "Gét, Mak," geujaweueb lé Rut, "ulôn teuma lôn peubuet banmandum nyang ka Mak peugah." 6 Dan geujak kheueh laju Rut u teumpat ureuëng meukeureuja nyang teungoh jilo gandom mangat leukang nibak mu jih. Disinan gobnyan geupeubuet banmandum nyang geupeugah lé mak tuwan geuh. 7 Óh ka seuleusoe Boas geupajoh bu, gobnyan ka meurasa puih dan até geuh pi ka mangat. Laju gobnyan geujak éh to ngon aneuk gandom nyang meutamon. Deungon seungab-seungab Rut teuka ngon geupeurab ubak gobnyan laju geubuka ija seulimbot Boas dan geupeureubah laju droe geuh nibak gaki gobnyan. 8 Watée teungoh malam hana teusangka-sangka Boas teujaga nibak teungeut dan geukeuneuk balék badan geuh. Gobnyan keubit that teukeujot bak watée geungieng na sidroe ureuëng inong ka teu-éh nibak gaki geuh. 9 "Soe ureuëng nyoe?" geutanyong lé Boas. "Ulôn Rut, Pak!" seuôt Rut. "Bapak na kheueh keuluarga kamoe nyang paleng to nyang harôh meutanggong jaweueb ateueh udeb ulôn. Rila kheueh Bapak neucok ulôn jeuet keu peurumoh Bapak." 10 "Seumoga TUHAN geubri beureukat ateueh gata, hai aneuëk ulôn," geupeugah lé Boas. "Teubandeng deungon peue nyang gata peubuet ateueh mak tuwan gata, teuma buet gata nyang jinoenyoe ka teutunyok cinta nyang paleng raya. Gata jeuet mantong tamita lakoe lamkawan ureuëng kaya atawa ureuëng gasin, teuma hainyan hana gata peubuet. 11 Lé sabab nyan, bék kheueh gata khawate, Rut, banmandum nyang lakéenyan teuma ulôn peubuet; sabab mandum ureuëng nyang na di banda nyoe ka jiteupeue bahwa gata na kheueh sidroe ureuëng inong nyang gét budo. 12 Keubiet beutôi that, ulôn harôh meutanggong jaweueb ateueh udeb gata, sabab ulôn na kheueh keuluwarga gata nyang paleng tô. Teuma mantong na sidroe teuk ureuëng nyang paleng meutanggong jaweueb u ateueh udeb gata. Dan gobnyan na kheueh keuluarga nyang leubeh to nibak ulôn. 13 Malam nyoe gata tinggai mantong disinoe. Singoh beungoh ulôn tanyong peu kheueh jihnyan jitem meutanggong jaweueb ateueh gata atawa hana. Meunyoe jihnyan jitem, bah kheueh; teuma meunyoe jihnyan hana jitem, teuma ulôn meujanji deumi Po teu Allah nyang udeb, ulôn teuma lôn peubuet tanggong jaweueb nyan. Jinoenyoe ta-éh kheueh mantong disinoe sampoe beungoh uroe." 14 Dan geuéh kheueh Rut disinan to ngon gaki Boas. Óh singoh beungoh suboh mantong reuneue-reuneue, Rut ka geubeudôh mangat bék jingieng lé gob. Sabab Boas hana geutem meusidroe ureuëng pi bahwa Rut na teuka u teumpat nyan. 15 Geupeugah kheueh lé Boas ubak Rut, "Gata sut laju ija sawak gata dan gataleueng laju." Teuma Rut laju geuploh ija seulendang geuh dan laju geuleueng Boas laju geuro u dalam ija sawak nyan na kira-kira dua ploh kilo gram gandom. Laju gandom nyan geubeuôt u ateueh baho Rut. Óh ka lheueh nyan Boas laju geujak u banda. 16 Óh watée katrok geuwoe Rut u rumoh, laju geutanyong lé mak tuwan geuh, "Peue nyang ka teujadi, hai aneuëk?" Dan Rut laju teuma geucalitra banmandum nyang geupeubuet lé Boas keu gobnyan. 17 "Dan," geupeugah lé Rut lom, "bahpi gobnyan nyang ka geubri gandomnyoe keu ulôn, sabab geupeugah lé gobnyan bahwa ulôn hana jeuet ulôn woe ubak Mak ngon jaroe nyang soh." 18 Laju geupeugah lé Naomi, "Tapreh mantong, hai aneuëk, sampoe gata tangieng pakriban keuneuleuh jih teuma. Boas hana seungab sigohlom peukaranyoe seuleusoe geupeubuet nibak uroenyoe cit teuma."

Rut 4

1 Lé Boas laju geujak ubak teumpat meurumpok nibak babah pintoe geureubang banda. Óh ka lheueh geuduek na sikeujab disinan deuh kheueh laju geungieng sidroe ureuëng agam jijak rab ngon gobnyan, meunurot Boas ureuëng agam nyang teungoh jak nyan na kheueh keuluwarga Elimelekh nyang paleng toe. Lé Boas laju geuhôi ureuëng nyan, "Syedara ulôn, gata duek disinoe rab ngon ulôn!" Ureuëng nyan laju jiteuka dan jiduek laju to deungon Boas nyan. 2 Óh lheueh nyan Boas laju teuma geuhôi siploh droe teuk ureuëng-ureuëng patot dalam banda mangat jiduek meusajan ngon gobnyan disinan. Óh lheueh awaknyan geuduek, 3 geupeugah kheueh laju lé Boas ubak syedara geuh nyan, "Meunoe hai syedara meutuah, Naomi ka jiwoe nibak nanggroe Moab. Jinoenyoe jihnyan keuneuk jipeubloe tanoh aruwah Elimelekh, keuluwarga geutanyoe. 4 Dan ulôn kira gata harôh tateupeue keuhai nyan. Meunyoe gata tatem bloe tanoh nyan, tapeugah kheueh laju dikeue ureuëng tuha nyang patot-patot nyang na teungoh duek disinoe. Meunan cit meunyoe hana, takheun cit teuma deungon trok-trang, sabab geutanyoe meudua mantong nyang na hak ateueh hainyan, gata nyang phon, óh lheuehnyan barô kheueh ulôn." Jijaweueb lé ureuëng nyan, "Jeuet, ulôn nyang bloe tanoh nyan." 5 Laju geupeugah lom lé Boas, "Get kheueh meunyoe ka meunan gata peugah. Teuma, meunyoe gata tabloe tanohnyan nibak Naomi, gata harôh teuma tacok Rut, ureuëng inong Moab, inong balée areuwah aneuëk Naomi. Sabab, tanoh nyan harôh kheueh teutab jeuet keuhak milék keuturonan ureuëng nyang ka meuninggai nyan." 6 Jijaweueb lé ureuëng nyan, "Meunyoe lagéenyan, ulôn hana sanggob. Jinoenyoe bah kheueh ulôn peulheueh hak ulôn sibagoe ureuëng nyang phon nyang wajéb teubloe tanoh nyan. Hana meuguna tanoh nyan ulôn bloe sabab tanoh nyan ka barang teuntée hana hase jeuet keuhak milék keuturonan ulôn. Leubeh gét droeneueh mantong nyang bloe tanoh nyan." 7 Bak masanyan meunyoe na ureuëng jipeubloe tanoh atawa jituka hak milék jih, lazem jih sibagoe tanda atranyan ka sah lé ureuëng nyan jibuka seulob nyang na meuleukek nibak gaki jih, laju seulobnyan jijok ubak ureuëng nyang ka bloe atra nyan. Meunan kheueh cara jih ureuëng-ureuëng di Israel jipeusah sapeue-sapeue peukara keuhai bloe peubloe tanoh. 8 Lé sabab nyan, bak watée mandum ureuëng jipeugah ubak Boas, "Droeneueh mantong nyang bloe tanoh nyan," lé gobnyan laju geupeu lheueh seulob geuh dan laju geubri atra nyan ubak Boas. 9 Dan geupeugah lé Boas ubak ureuëng-ureuëng tuha nyang patot-patot meunan cit ubak mandum ureuëng laén nyang na disinan, "Uroenyoe gata banmandum jeuet keusaksi bahwa ulôn ka ulôn bloe nibak Naomi banmandum nyang na atra hak milék lé Elimelekh dan aneuëk-aneuëk gobnyan, nyan kheueh Kilyon dan Mahlon. 10 Meunan cit disampéng nyan ulôn kucok Rut, ureuëng inong Moab nyan inong balée aruwah Mahlon nyan jeuet keu peurumoh ulôn. Deungon lagéenyan tanohnyan teutab jeuet keu hak milék keuluwarga nyang ka meuninggai nyan. Dan keuturonan geuhnyan pi teutab na lamkawan kawöm syedara gobnyan dan di banda banda gobnyan. Ingat kheueh syedara-syedara, uroenyoe gata banmandum jeuet keusaksi jih." 11 Ureuëng-ureuëng tuha nyang patot-patot dan ureuëng nyang laén nyang na disinan jipeugah, "Beutôi, kamoe nyoe jeuet keusaksi. Seumoga TUHAN geupeujeuet peurumoh droeneueh nyan lagée Rakhel dan Lea nyang ka geupeulahé aneuëk-aneuëk nyang le keu Nabi Yakub. Seumoga droeneueh makmu lamkawan ureuëng-ureuëng dalam kawöm Efrata dan seumoga droeneueh meusyeuhu di Betlehem. 12 Seumoga aneuëk-aneuëk nyang lahé nyang geubri lé TUHAN ubak droeneueh meulalu ureuëng inong muda nyoe teuma jeuet keu keuluwarga droeneueh lagée si Peres, aneuëk nibak Yehuda dan Tamar." 13 Teuma Boas pih laju geucok Rut jeuet keu peurumoh gobnyan. TUHAN geubri beureukat keu Rut sampoe gobnyan mume laju geupeulahé sidroe aneuëk agam. 14 Dumna ureuëng inong jipeugah ubak Naomi, "Teupujoe kheueh TUHAN! Gobnyan ka geubri sidroe cucoe keu droeneueh nyang agam nibak uroe nyoe mangat jeuet jipeulara droeneueh. Seumoga aneuëk nyan jeuet keu aneuëk nyang meusyeuhu di Israel! 15 Meulintée droeneueh nyan gét that jigaséh keu droeneueh. Gobnyan ka geubri keu droeneueh leubeh nibak peue nyang hase geubri ubak tujoh droe aneuëk agam. Jinoenyoe gobnyan ka teuma geubri sidroe cucoe nyang agam ubak droeneueh, nyang teuma jok seumangat barô keu gata, dan geupeulara droeneueh bak watée droeneueh ka tuha." 16 Naomi laju geucok aneuëknyan geupeulara laju ngon peunoh gaséh dan sayang. 17 Lé ureuëng inong teutangga gobnyan jiboh nan aneuëk nyan Obed. Ubak soe mantong awaknyan jipeugah, "Naomi ka na sidroe aneuëk agam!" Obed nyoe kheueh teuma óh singoh uroe jeuet keu bapak nibak Isai, dan Isai nyan na kheueh bapak Nabi Daud. 18 Dan nyoe kheueh garéh silsilah keuturonan Nabi Daud, phon nibak Peres, na kheueh: Peres, Hezron, Ram, Aminadab, Nahason, Salmon, Boas, Obed, Isai, Nabi Daud.

1 Samuel 1

1 Na sidroe ureuëng agam, nan gobnyan Elkana, nibak sukée Efraim. Gobnyan tinggai di banda Rama, nibak daerah gunong-gunong Efraim. Elkana na kheueh aneuëk Yeroham dan cucoe Elihu. Gobnyan jitamong u dalam keuluwarga Tohu, cabeueng nibak marga Zuf. 2 Elkana na teuma dua droe purumoh, nan-nan binoe geuhnyan Hana dan Penina. Penina na teuma ji meu aneuëk, teuma si Hana tanna aneuëk. 3 Tieb-tieb thon Elkana jijak nibak Rama keu geujak meuiébadat di Silo dan geupeuseumah keureubeuen keu TUHAN Nyang Mahakuasa. Nyang jeuet keu teungku imeum TUHAN di Silo na kheueh Hofni dan Pinehas, aneuëk-aneuëk Eli. 4 Tieb-tieb watée meunyoe Elkana geupeuseumah keureubeuen, Penina dan banmandum aneuëk gobnyan maséng-maséng geubri saboh jeumba nibak eungkot sie keureubeuen nyan. 5 Teuma Hana geubri bacut mantong sabab TUHAN hana geubri aneuëk keu jih nyan. Bahpi meunan Elkana keubit that-that geucinta keu Hana. 6 Hana sabe jipeusakét até geuh dan jipeuhina lé Penina, madu geuhnyan, sabab TUHAN hana geubri aneuëk keu gobnyan. 7 Hainyan teujadi ka meu thon-thon; meunyoe awaknyan geujak u Baét TUHAN, sabe Hana nyan jipeusakét até lé Penina. Kayém that Hana geumo dan hana geutem makheun sabab jihina nyang lagée nyan bagoe. 8 Meunan kheueh tieb-tieb watée teuma Elkana, lakoe gobnyan, geuteumanyong, "Pakon gata tamo Hana? Pakon teuma gata hán tatem makheun dan sabe dalam keuadaan seudeh? Bukon kheueh ulôn leubeh meuyuem nibak gata nibak ban siploh droe neuëk agam?" 9 Bak siuroe óh ka lheueh awaknyan geumakheuen di Baét TUHAN di Silo, Hana laju geubeudôh nibak meja makheuen. Bak watéenyan teungku Imeum Eli nyang na cit di Baét TUHAN, teungoh geuduek-duek nibak kurusi geuh dibabah pinto. Deungon até nyang that peudéh Hana geumeudoá ubak TUHAN sira geumo musôk-musôk. 11 Óh lheuehnyan Hana geupeugah janji, "TUHAN Nyang Mahakuasa, neungieng kheueh hamba Droeneueh nyoe! Neukalon kheueh seungsara hamba Droeneueh nyoe. Neu ingat kheueh keu ulôn dan bék kheueh neutuwoe keu ulôn! Meunyoe Droeneueh ya TUHAN neubri keu ulôn sidroe aneuëk agam, ulôn meujanji teuma ulôn bri aneuëk nyan keu Droeneueh siumu udeb jih. Meunan cit ulôn meujanji bahwa ôk jih ateueh ulée hántom na teuma teucuko." 12 Lumpah treb Hana geumeu doá, dan Eli geupeurati babah ureuëng inong nyan. 13 Hana geumeu doá didalam até, teuma bibi geuh mantong nyang na meu met-met, teuma su gobnyan hana teudeungoe. Sabab nyan kheueh lé Eli geusangka Hana nyan ka mabök. 14 Dan Eli pi laju geupeugah ubak ureuëng inong nyan, "Keubiet hana patot gata mabök disinyoe! Bék tajieb le ié anggô!" 15 Teuma Hana geujaweueb, "Ulôn kon mabök, ulôn meubacut pih hana ulôn jiéb ié anggô nyan! Ulôn putôh asa, dan teungoh lôn meudoá ulôn peugah hai banmandum nyang ulôn deurita ubak TUHAN. 16 Bék kheueh ulôn teuanggab ureuëng inong nyang jeuhet atawa inong jalang. Ulôn meudoá nyang lagée nyoe bagoe sabab ulôn lumpah that seudeh." 17 Geupeugah lom lé Eli, "Meunyoe meunan tajakwoe laju deungon seulamat, seumoga Po teu Allah ureuëng Israel geupeutrok doá gata nyan." 18 Geujaweueb lé Hana, "Seumoga ulôn meuteumé reustu Bapak." Óh lheueh geupeugah nyan laju geujak, dan laju geu pajoh bu; dan gobnyan ka hana seudeh le. 19 Óh singoh beungoh nyan Elkana dan keuluwarga gobnyan geubeudôh nibak teumpat éh ban bungoh that-that, dan óh ka lheueh geuseumayang ubak TUHAN, geuwoe laju u Rama. Dan Elkana laju geumeusituboh deungon peurumoh geuh Hana, dan TUHAN geupeutrok doá Hana. 20 Inong nyan laju mumé dan geupeulahé sidroe aneuëk agam. Aneuëk nyan geuboh nan Samuel, geupeugah, "Ulôn ka ulôn lakée jihnyoe ubak TUHAN." 21 Trok kheueh watée jih Elkana dan keuluwarga gobnyan geujak u Silo keu geujak peuseumah keureubeuen sithon sigoe keu TUHAN. Seulaén nibak nyan Elkana ka geumeujanji keu geupeuseumah keureubeuen nyang khusos. 22 Teuma goenyoe Hana hán geuseutôt. Geupeugah ubak lakoe geuh, "Teuma óh ka lheueh teucre jimik, Samuel ulôn intat u Baét TUHAN, dan jihnyan teuma tinggai disinan siumu udeb jih." 23 Geujaweueb lé Elkana, "Gét kheueh, meunyoe nyang gata kalon nyan jroh; tatinggai kheueh mantong di rumoh sampoe trok watée jih gata peucre mik aneuëk geutanyoe. Dan seumoga TUHAN geupeujeuet janji gata jeuet keunyata." Lé sabab nyan, Hana tiggai dirumoh sampoe án bak watée aneuëk gobnyan teupeu cre mik teuma. 24 Óh ka lheueh Samuel teupeu cre mik, gobnyan laju geu intat lé mak geuh u Baét TUHAN di Silo. Bak watée nyan gobnyan mantong ubiet that-that. Hana geupuwoe nibak teumpat nyan saboh leumô agam nyang meu-umu lhée thon, gandom siploh kilo gram, dan saboh baluem kulét nyang ka peunoh meu aso ngon ié anggô. 25 Leumô nyan laju geusie, dan Samuel geu intat laju ubak Eli. 26 Hana geupeugah ubak Eli, "Meuáh, Pak. Peu kheueh mantong Bapak ingat keu ulôn? Ulôn nyoe ureuëng inong nyang ka lheueh Bapak kalon ulôn dong disinoe, watée nyan teungoh meudoá ubak TUHAN. 27 Nyoe kheueh aneuëk nyang ulôn lakée ubak TUHAN uroe jéh. Doa ulôn ka geupeutrok lé Gobnyan, 28 dan lé sabab nyan aneuëk nyoe ulôn seurah jeuet keuhak milék TUHAN siumu udeb jih." Óh lheuehnyan awaknyan laju geuseumayang ubak TUHAN.

1 Samuel 2

1 Laju Hana geumeudoá, geupeugah, "TUHAN ka neupeu galak até ulôn; buet Gobnyan lumpah that seunang jiwa ulôn. Deungon rasa bahgia ulôn peu hina musoh ulôn, sabab sikeubit jih Po teu Allah ka geutulông ulôn. 2 Tanna lé nyang suci nyang lagée TUHAN! Teuma Gobnyan mantong nyang hase geubri peulindongan. 3 Gata peu-im kheueh haba gata nyang sulet! Bék kheueh tapeugah haba nyang meuhina! Sabab TUHAN nyan na kheueh Po teu Allah nyang keubit áréh; nyang geupeuhakém mandum buet manusia. 4 Peudeueng panglima ka geupeupatah, ureuëng nyang leumoh ka teuga teuma. 5 Ureuëng nyang dilée troe sabab makmu ngon padé, teuma jinoenyoe ka jeuet keu ureuëng geumadée teuma keu meuteumé peunajoh. Ureuëng nyang barokon jiteundeuek, jinoenyoe ka troe ngon puih, sabab ka seb peunajoh. Peurumoh nyang malée, jinoe ka bangga, tujoh droe aneuëk ka geupeulahé deungon seulamat! Teuma ma nyang le kajitôh aneuëk, ka geutinggai udeb meurana. 6 TUHAN geupeumaté, Gobnyan cit teuma nyang peu udeb. Lam donya ureuëng maté geupeutreun teuma manusia. Dan Gobnyan teuma nyang beuôt nibak teumpat nyan. 7 Na ureuëng nyang geupeu gasien ngon papa, dan na teuma nyang keupeukaya. Na ureuëng nyang geupeumiyueb deurajat jih, na teuma ureuëng nyang geupeu manyang deurajat jih. 8 Nibak deurita, geu beuôt ureuëng nyang hana meuhareuta, nibak seungsara, geupeu beubaih ureuëng nyang hina. Awaknyan geupeujeuet keu rakan lé ureuëng bansawan, dan geubri jabatan ngon keuhormatan. Lapeh bumoenyoe na kheueh atra TUHAN, di ateueh bumoenyan geupeugét laju donya. 9 Ureuëng nyang seutia bak Gobnyan sabe lam aman dalam lindongan TUHAN. Teuma nyang jeuhet pasti hanco binasa dalam seupôt nyang glab gulita. Teunaga keudroe hana hase teunguile, teunaga manusia hán hase geubri meunang. 10 Dumna musoh TUHAN ka habéh hanco, awaknyan teumakot; di langét Gobnyan geumusu lagée geulanteue. TUHAN teuma geupeuhakém bansigom asoe donya nyoe, dan geubri kuasa nyang mulia keu raja nyang geupiléh." 11 Laju jijak kheueh Elkana dan keuluwarga jihnyan u Rama, teuma Samuel, aneuëk geuh nyan, tinggai di Silo dan geupeutimang TUHAN dimiyueb peungawasan Imeum Eli. 12 Aneuëk-aneuëk Eli jeuhet-jeuhet that. Awaknyan hana jipako ubak TUHAN, 13 sibagoe teungku imeum awaknyan jimeubuet ban galak droe ateueh bansa Israel. Miseujih na ureuëng jikeuneuk peuseumah keureubeuen, lé teungku sida nibak teungku imeum nyan laju jiba gareupu nyang meugigo lhée. Teungoh uegkot sie nyan mantong teureuboh dalam panci, 14 gareupu nyan laju jitôb u dalam panci teumpat uengkot sie nyang teureuboh, dan peue mantong nyang jitarék u luwa deungon gareupu nyan atranyan ka jeuet keu hak milék teungku imeum. Banmandum ureuëng Israel nyang jijak u Silo keu jijak peuseumah keureubeuen jipeubuet lagéenyan. 15 Dan kadang-kadang teungku sida nyan teuka keunan sigohlom leumak uengkot sie nyan teupeungkréuh keu teutot, dan lé gobnyan jipeugah ubak ureuëng nyang peuseumah keureubeuen nyan, "Gata bri kheueh laju uengkot sie nyang gohlom masaknyan ubak teungku imeum mangat geutot lé gobnyan; gobnyan hana geutem teurimong uengkot sie nyang ka teureuboh." 16 Meunyoe ureuëng nyan jijaweueb, "Nyang siget jih geutanyoe tataát ubak peuratoran, bah kheueh tareuboh leumak nyan leubeh dilée; óh lheuehnyan barô kheueh tacok ban galak droe gata," dan lé teungku sida nyan jijaweueb, "Hán jeuet, jinoenyoe laju gata jok atra nyan, meunyoe hán, nyan teuma ulôn cok ngon cara lôn reupah." 17 Meunan kheueh cara jih, sampoe ban dua droe aneuëk Eli nyan ka meudesya nyang lumpah rayeuk ubak TUHAN, sabab awaknyan jihina ngon jipeubeuah keureubeuen nyang teupeureulée keu TUHAN. 18 Óh lheueh nyan, Samuel nyang mantong aneuëk manyak nyan hana geupiôh geulayani TUHAN. Gobnyan geushôk bajée khusos nyang teucob nibak ija lineun, saban lagée bajée iébadat dumna teungku imeum. 19 Tieb-tieb sithon ma laju jicob bajée jubah nyang ubiet dan atra nyan jijakjôk laju ubak Samuel meunyoe na gobnyan sajan deungon lakoe ji jiteuka jiujak peuseumah keureubeuen sithon sigoe. 20 Lé sabab nyan Eli laju geubri beureukat ubak Elkana dan peurumoh gobnyan, dan teungku Imeum Eli nyan geupeugah ubak Elkana, "Seumoga TUHAN geubri lom aneuëk keu gata nibak purumoh gata nyoe, keu geunantoe aneuëk nyang ka gata jok ubak TUHAN." Óh lheuehnyan awaknyan pi laju geuwoe u Rama. 21 Hana laju geujok beureukat lé Po teu Allah, sampoe geupeu lahé lom lhée droe aneuëk agam dan dua droe aneuëk inong. Samuel pih meutamah rayeuk dan gobnyan teutab geulayani Po teu Allah. 22 Eli ka tuha that. Gobnyan hana putôh-putôh geudeungoe ureuëng jimeugadu ubak gobnyan keuhai pi-e ngon peurangoe aneuëk-aneuëk gobnyan ateueh ureuëng Israel. Meunan cit Eli geuteupeu bahwa aneuëk-aneuëk geuhnyan ji-éh deungon ureuëng inong nyang jaga pintoe Khimah TUHAN Teuka. 23 Lé sabab nyan geupeugah kheueh lé Eli ubak aneuëk-aneuëk geuh, "Ulôn ka lôn deungoe laporan nyang jimeungadu lé banmandum umat keuhai pi-e peurangoe gata nyang jeuhet nyan. Pakon gata peubuet nyan? 24 Bék gata peubuet nyang meunan le, hai aneuëk meutuah. Keubiet that ayéb peue nyang geukheun lé umat TUHAN keuhai gata! 25 Meunyoe na ureuëng meusalah teuhadab manusia, Po teu Allah hase geubila ureuëng nyang meusalah nyan; teuma meunyoe na ureuëng jimeudesya ubak TUHAN, soe kheueh nyang hase tulông ureuëng nyan?" Teuma aneuëk-aneuëk Eli nyan meubacutpi hana jipakoe ubak naseuhat ureuëng syiek jih nyan, sabab TUHAN ka geupeuputôh bahwa awaknyan geupoh maté. 26 Laén hai deungon Samuel, aneuëk nyan, seumaken rayeuk seumaken ramé ureuëng harok, bah kheueh lé TUHAN, meunan cit lé manusia. 27 Bak si uroe teuka kheueh sidroe nabi ubak Eli dan geujak peusampoe peusan nibak TUHAN keu gobnyan, geupeugah, "Bak watée indatu gata Nabi Harun dan keuluwarga jihnyan jeuet keu namiet di nanggroe Meusé, Ulôn ka Lôn peugah soe droe Ulôn nyoe ubak Nabi Harun. 28 Nibak meubagoe sukée Israel ka Ulôn piléh keuluwarga jih nyan jeuet keu teungku imeum Ulôn, mangat jeuet keu ureuëng nyang meulayani nibak miseubah, jijak tot dupa, jishok bajée efod meunyoe jihnyan jimeututoe deungon Ulôn. Dan meunan cit keu awaknyan dan keuturonan awaknyan ka Ulôn bri hak mangat jeuet jijakcok siladum nibak keureubeuen peuseumahan nyang jitot di ateueh miseubah. 29 Nyang kheueh jeuet, pakon gata mantong cit leuha watée takalon keureubeuen-keureubeuen nyang paih lagée peurintah Ulôn, jipeuseumah lé bansa Ulôn ubak Ulôn? Pakon gata Eli, leubeh gata horeumat keu aneuëk-aneuëk gata nibak gata horeumat Ulôn, dan tapeubiyeu awaknyan jipeugah keudroe-droe jih deungon jeumba nyang paleng gét nibak tieb-tieb keureubeuen bansa Ulôn keu Ulôn? 30 Ulôn, TUHAN Po teu Allah Israel, nyang yoh watée ilée ka Ulôn meujanji, nyang bahwa keuluwarga gata dan marga gata teuma peutimang Ulôn sibagoe teungku imeum keu siumu masa. Teuma jinoenyoe Ulôn hana Lôn galak le hainyan! Sabab nyang horeumat Ulôn, teuma Ulôn horeumat, teuma nyang hina Ulôn, ureuëng nyan teuma Ulôn hina teuma. 31 Gata deungoe kheueh nyoe, teuma teuka watée jih Ulôn teuma Lôn poh maté banmandum aneuëk muda lam keuluwarga dan marga gata, sampoe hana meusidroepi ureuëng agam lam keuluwarga gata trok ubak umu nyang panyang. 32 Gata teuma seudéh dan meurasa cumuru ngon bingiek até watée gata kalon beureukat nyang teuma Ulôn bri keu ureuëng laén di Israel, teuma lam keuluwarga gata keudroe maté muda. 33 Teuma, sidroe nibak keuturonan gata, Ulôn peubiyeu udeb dan jilayani Ulôn sibagoe teungku imeum. Teuma jihnyan jeuet keu ureuëng buta mata dan udeb jih lam keuadaan putôh asa. Banmandum keuturonan gata nyang laén teuma teupoh maté. 34 Sibagoe bukeuti bahwa banmandum nyang Ulôn peugah nyan biet-biet teuma teujadi, dan ban dua droe aneuëk gata nyan, Hofni dan Pinehas awaknyan teuma maté lam si uroe. 35 Óh lheuehnyan Ulôn teuma Lôn piléh teungku imeum nyang seutia keu Ulôn dan jipeubuet peue nyang Ulôn peurintah ubak jih nyan. Keu jihnyan Ulôn bri keuturonan nyang sabe buet jih jimeutugaih sibagoe teungku imeum dikeue raja-raja nyang Ulôn piléh. 36 Tieb-tieb keuturonan gata nyang mantong udeb, teuma jijak ubak teungku imeum nyan keu jijak lakée péng dan peunajoh. Jihnyan teuma jipeugah, Neupeu idhin kheueh ulôn mangat jeuet lôn tulông bubena teungku imeum, mangat ulôn jeuet meuteumé makheuen bahpi nyan cit saboh sueb mantong."

1 Samuel 3

1 Nibak watée nyan, Samuel nyang mantong aneuëk miet nyan geulayani TUHAN mantong ateueh peutunyok Eli. Bak watée nyan lumpah that jareueng na peusan TUHAN. 2 Bak simalam, Eli nyang ka that tuha lom ngon mata gobnyan pih karab buta sabab ka rabon, gobnyan teungoh geu-éh didalam bilék geuh, 3 dan Samuel geu-éh teuma tô ngon Peuto Peujanjian TUHAN, didalam Khimah Suci. Bak watée mata uroe gohlom jiteubit dan mantong lam keuadaan reuneu-reuneu dan meunan cit panyöt mantong na hu, 4 TUHAN geutawök Samuel, laju Samuel pi geujaweueb, "Nyoe, Bapak!" 5 Óh lheueh nyan geubeudôh dan laju geuplueng geujak meurumpok ngon Eli dan geupeugah, "Peue na? Keupeue ulôn neu tawök?" Teuma Eli geujaweueb, "Ulôn hana lôn hôi gata, tajak -éh kheueh lom." Laju Samuel geujak ubak teumpat éh geuh lom. 6 Óh lheuehnyan Samuel geuhôi lom lé TUHAN, teuma Samuel hana geuteupeue bahwa nyang hôi gobnyan na kheueh TUHAN, sabab hántom na lom TUHAN geupeugah haba ngon gobnyan. Lé sabab nyan gobnyan geubeudôh lom, dan laju geujak meurumpok ngon Eli dan geu tanyong, "Peue na hai, Bapak? Pakon Bapak hôi ulôn?" Geujaweueb lé Eli, "Ulôn hana lôn hôi gata hai, aneuëk meutuah; tajak éh kheueh lom keudeh." 8 Keu nyang keu lhée goe TUHAN geuhôi Samuel; lagée biasa geubeudôh laju Samuel geujak meurumpok deungon Eli sira geupeugah, "Peue na hai Bapak? Pakon ulôn neuhôi?" Teuma bak saát nyan kheueh Eli barô geuteupeue bahwa nyang meuhôi aneuëk nyan na kheueh TUHAN. 9 Sabab nyan gobnyan geupeugah ubak Samuel, "Tajak éh kheueh lom, dan meunyoe Gobnyan teuka lom geuhôi gata tapeugah kheueh laju, 'Neumeututoe kheueh, TUHAN, ulôn na lôn deungoe su Droeneueh.' " Laju geujak kheueh Samuel ubak teumpat éh lom. 10 Óh lheueh nyan teuka kheueh lom TUHAN dan geudong laju diteumpat nyan óh lheuehnyan geuhôi kheueh teuma Samuel, "Samuel, Samuel!" Dan Samuel laju geujaweueb, "Neumeututoe kheueh ya, TUHAN, hamba Droeneueh nyoe meudeungoe su Droeneueh." 11 Laju geupeugah lé TUHAN ubak gobnyan, "Ulôn teuma Lôn pubuet nyang lumpah brat ateueh ureuëng Israel, dan soe mantong nyang deungoe nyan ureuëng nyan jiteuka bingong. 12 Bak uroenyan Ulôn teuma Lôn peubuet banmandum nyang ka lheueh Ulôn ancam ateueh keuluwarga Eli nibak awai sampoe án akhé. 13 Ka lheueh Ulôn peugah ubak gobnyan bahwa keuluwarga jihnyan Ulôn huköm siumu masa sabab aneuëk-aneuëk jihnyan ka jihina Ulôn. Eli jiteupeue mandum desya awaknyan, teuma awaknyan hana jibeungéh. 14 Lé sabab nyan Ulôn meusumpah keuhai keuluwarga Eli nyan, bahwa desya awaknyan nyang paleng rayeuk nyan hana hase teusampôh deungon keureubeuen atawa peuseumahan peue mantong keu siumu masa." 15 Óh lheuehnyan Samuel geuéh lom, dan watée uroe ka bungoh gobnyan laju geubeudôh geubuka dumna pintoe-pintoe Baét TUHAN. Gobnyan geutakot geujak peugah peue nyang ka geukalon nyan ubak Eli, 16 teuma Eli laju geuhôi Samuel dan geupeugah, "Samuel, aneuëk ulôn." Geujaweueb lé samuel, "Nyoe pat ulôn, hai Bapak." 17 Eli geutanyong, "Peue nyang ka geubri tée lé TUHAN ubak gata? Gata carita kheueh nyan banmandum ubak ulôn. Meunyoe sipeu-peu nyang gata söm ubak ulôn, pasti gata geuhuköm lé Po teu Allah." 18 Dan Samuel geupeugah banmandum nyan ubak Eli. Hana meubacut pi nyang na teusöm. Óh lheueh nyan geupeugah kheueh lé Eli, "Gobnyan TUHAN, bah kheueh Gobnyan geupeubuet peue nyang geu anggab nyan jroh." 19 Samuel ho siuroe meutamah rayeuk. TUHAN sabe na ngon gobnyan dan peue nyang geupeugah lé Samuel keubiet teujadi. 20 Nyang kheueh sabab jih bubena ureuëng Israel bansaboh nanggroe nyan jimeungaku bahwa Samuel nyan na kheueh nabi TUHAN. Tieb-tieb Samuel geupeugah haba, banmandum bansa Israel jideungoe. TUHAN teutab mantong geupeugah droe gobnyan di Silo, diteumpat gobnyan nyang keu phon-phon that geupeuleumah droe ubak Samuel dan geupeugah haba deungon geuh nyan.

1 Samuel 4

1 Bak masanyan ureuëng Filistin jikrah bubena sipa-i jih keu jijak prang ureuëng Israel; sababnyan di ureuëng Israel pih jikrah teuma bubena tantra jih keu jijak muprang ngon ureuëng Filistin; awaknyan jipeudong khimah tô ngon Eben-Haezer, seudangkan tantra Filistin jipeudong teuma khimah jih di Afek. 2 Tantra Filistin ka jipeuphon prang tantra Israel, dan óh ka lheueh jimeuheuntam udeb maté nyang lumpah hibat, tantra Israel taloe dan na kira-kita peuet ribée droe nyang tiwaih di mideuen prang nyan. 3 Bak watée tantra nyang taloe nyan na kira-kira meupadub droe teuk nyang na tinggai dan laju jiwoe ubak khimah jih, bubena peumimpén Israel jipeugah, "Pakon kheueh TUHAN geupeutaloe geutanyoe deungon tantra Filistin nibak uroe nyoe? Jak kheueh geutanyoe tajak cok Peuto Peujanjian TUHAN nyang na di Silo, dan atra nyan tanyoe ba keunoe, mangat TUHAN geutem tulông geutanyoe dan geupeuseulamat geutanyoe nibak musoh." 4 Awaknyan jikirém laju ureuëng laén u Silo mangat jijak cok Peuto Peujanjian TUHAN nyang lagée tahta TUHAN Nyang Mahakuasa. Bandua droe aneuëk Eli, Hofni dan Pinehas, ji-iréng Peuto Peujanjian TUHAN nyan. 5 Watée Peuto Peujanjian TUHAN nyan ka sampoe ubak khimah-khimah, jisumurak kheueh ureuëng Israel ngon su nyang meutaga, dan deungon su jih nyang meutaga nyan bumoe nyoe sampoe meugeumpa. 6 Lé ureuëng Filistin jideungoe su ureuëng sumurak nyan laju awaknyan jipeugah, "Pakon ureuëng-ureuëng Ibrani nyan jisumurak?" Teuma bak watée awak nyan jiteupeue bahwa Peuto Peujanjian TUHAN ka trok jiba keunan ubak khimah-khimah ureuëng Ibrani, 7 awaknyan ka jeuet keuteumakot dan jipeugah, "Na Dewa teuka ubak khimah-khimah awaknyan! Cilaka kheueh geutanyoe nyoe! Gohlom na nyang ka-ka geutanyoe rasa hai nyang lagéenyoe bagoe! 8 Cilaka kheueh nyang beuna! Soe kheueh nyang hase peuseulamat geutanyoe nibak dewa-dewa nyang teuga nyan? Bukon kheueh dewa-dewa nyan cit teuma nyang ka jipoh maté dumna ureuëng Meusé dipadang pasi yoh masa ilée? 9 Peu ceubeueh kheueh até gata, hai ureuëng Filistin! Gata muprang kheueh lagée ureuëng agam, meunyoe hán, gata teuma jeuet keu namiet ureuëng-ureuëng Ibrani nyan, lagée awaknyan yoh masa ilée jeuet keu namiet-namiet gata. Sabab nyan muprang kheueh deungon gagah beurani!" 10 Óh lheuehnyan jimuprang kheueh ureuëng Filistin deungon hebat peukasa sampoe bubena tantra Israel ka habéh taloe. Di ureuëng Israel nyan laju jiplueng ubak khimah droe jih maséng-maséng. Lumpah that rayeuk nyang taloe nyan: 30.000 droe tantra Israel ka reubah hancoe meulampa. 11 Peuto Peujanjian Po teu Allah nyan jipeugah ka jeuet keu musoh ureuëng Israel, dan bandua droe aneuëk Eli, Hofni dan Pinehas, nyan pih ka maté dalam prang nyan. 12 Sidroe lamkawan sukée Benyamin jiplueng nibak mideuen prang u Silo, dan trok keunan nibak uroe nyan cit teuma. Sibagoe tanda meuduka cita, ka jipriek-priek bajée jih dan jicok tanoh laju jipeuduek u ateueh ulée jih. 13 Eli nyang lumpah khawate bak jipike keuhai Peuto Peujanjian TUHAN, gobnyan teungoh geuduek di ateueh keurusi nibak binéh rot, sira teumanueng. Bak watée ureuëng nyan jijak peugah keuhai taloe ureuëng Israel, banmandum peunduduek banda nyan jimoba-e sira meuratok ngon su nyang meutaga. 14 Eli geudeungoe su ureuëng meuratok nyan, laju geutanyong, "Su peue nyang subra that nyan?" Bak watée nyan na ureuëng teungoh jiplueng ubak Eli; óh ka trok keunan, ureuëng nyan laju jipeugah haba nyang hana mangat nyan. 15 Seudang kan Eli nyan ka na umu geuh sikureueng ploh lapan thon dan mata gobnyan ka rabon ngon karab buta. 16 Ureuëng nyan jipeugah ubak Eli, "Ulôn kuplueng nibak uroenyoe di mideuen prang dan ban that trok keunoe." Eli geutanyong ubak ureuëng nyan, "Pakriban haba jih, hai aneuëk ulôn?" 17 Ureuëng nyang ba haba nyan laju jijaweueb, "Israel ka jiplueng nibak ureuëng Filistin. Geutanyoe meudeurita taloe nyang lumpah rayeuk. Jai that ureuëng nyang maté, meunan cit deungon bandua droe aneuëk Bapak, Hofni dan Pinehas. Dan Peuto Peujanjian Po teu Allah nyan ka jireubot lé musoh!" 18 Bak watée ureuëng nyan jipeugah keuhai Peuto Peujanjian nyan, Eli rhot laju dan reubah teulinteueng di ateueh kurusi bak teumpat geuduek di siblaih pintoe geureubang. Gobnyan ka that-that tuha tuboh geuh teumbon that sampoe bak watée rhot nyan takue gobnyan patah, dan gobnyan pi meuninggai donya. Gobnyan ka geupimpén bansa Israel nyan peuet ploh thon treb jih. 19 Bak watée nyan, meulintée Eli, na kheueh peurumoh Pinehas, teungoh brat mumé, dan watée keu jipeulahé aneuëk nyan ka to that-that. Bak watée jideungoe bahwa Peuto Peujanjian Allah ka jureupah, dan jideungoe teuma ayah tuwan meunan cit lakoe jih ka teuma meuninggai donya, hana teusangka-sangka jihnyan ka teuma teurasa sakét pluet tanda keuneuk tôh aneuëk, laju lahé kheueh teuma aneuëk jih hana padubna treb teuma óh lheuehnyan. 20 Bak watée geuhnyan karab meuninggai donya, lé ureuëng inong nyang tulông jihnyan jikheun, "Tabah kheueh até gata! Aneuëk gata nyoe agam!" Teuma jihnyan hana jijaweueb atawa jingieng awaknyan. 21 Aneuëk nyan jiboh nan Ikabod, kheun gobnyan, "Keuhaderan Po teu Allah Nyang Mulia ka gadôh nibak Israel." Nyang geumeukeusutnyan na kheueh bahwa Peuto Peujanjian ka jireupah dan tuan jih meusajan ngon lakoe jih ka meuninggai donya. Lé sababnyan gobnyan geupeugah, "Keuhaderan Po teu Allah Nyang Mulia ka gadôh di Israel, sabab Peuto Peujanjian Po teu Allah ka jireupah."

1 Samuel 5

1 Óh ka jireubot Peuto Peujanjian Allah nyan lé ureuëng Filistin, laju atra nyan jiba nibak Eben-Haezer u banda awaknyan, Asdod. 2 Disinan peuto nyan jipeutamong u dalam kuil dewa awaknyan, patong Dagon jikeubah teuma to ngon binéh patong dewa nyan. 3 Bak watée peunduduek Asdod óh singoh nyan ban suboh buta jijak laju ubak kuil nyan, awaknyan jikalon bahwa patong Dagon ka reubah teudugom u ateueh tanoh, dikeue Peuto Peujanjian TUHAN! Awaknyan laju geubeuôt patong nyan dan jikeubah lom nibak teumpat sot. 4 Teuma óh singoh uroe nyan, ban beungoh that, awaknyan ka deuh lom jikalon bahwa patong nyan ka reubah lom to ngon Peuto Peujanjian TUHAN. Goenyoe ulée patong nyan dan bandua blah jaroe jih ka putôh meukhan dan atra nyan teukeubah nibak babah pintoe; teuma badan patong nyan nyang na mantong tinggai sampoereuna. ( 5 Nyang kheueh sabab jih, sampoe án uroe nyoe bubena teungku imeum dewa Dagon dan banmandum nyang seumah nyan di Asdod jilingkeu babah pintoe kuil Dagon nyan dan hana jigilo.) 6 Óh lheuehnyan TUHAN geuhuköm peunduduek Asdod dan daerah nyang na di silingka nyan deungon keumong-keumong nibak tuboh awaknyan. 7 Bak watée awaknyan jikalon peue nyang teungoh teuka u ateueh droe awaknyan nyan, awaknyan laju jipeugah, "Allah ureuëng Israel ka geuhuköm geutanyoe dan dewa geutanyoe Dagon. Geutanyoe hánjeuet tapeubiyeu Peuto Peujanjian nyan tinggai disinoe leubeh treb lom." 8 Sabab nyan awaknyan laju jiundang ban limong droe raja Filistin mangat raja-raja nyan jeuet jimeugumpôi, laju jitanyong, "Peuto Peujanjian Israel nyan harôh tapeuguna keupeue?" Jijaweueb lé raja-raja nyan, "Neupinah kheueh laju u banda Gat." Lé sababnyan, peutonyan laju jipinah u banda Gat, saboh lamkawan banda Filistin nyang laén. 9 Teuma bak watée peuto nyan ka trok keunan, laju TUHAN geuhuköm teuma banda nyan dan teuka kheueh teumakot nyang lumpah rayeuk. Peunduduek banda nyan bah kheueh nyan nyang muda meunan cit nyang tuha laju geuhuköm dengon geupeutimoh keumong-keumong nyang lumpah brat dan keubiet meubaya ateueh tuboh awaknyan. 10 Laju Peuto Peujanjian nyan ji intat teuma u Ekron, saboh banda lamkawan banda Filistin nyang laén. Óh ka trok peuto nyan keunan, peunduduek disinan laju jikliek ngon geumeuhôi, "Peuto Peujanjian Allah Israel nyan ka jiba keunoe mangat jijakpoh maté geutanyoe banmandum." 11 Sabab nyan awaknyan jijakhôi banmandum raja Filistin mangat jimeusapat dan jieugah, "Neupeuriwang kheueh laju Peuto Peujanjian Israel nyan ubak teumpat jih mangat bék geupoh geutanyoe dan keuluwarga geutanyoe." Bansaboh banda nyan ka jeuet keuteumakot ngon karu riôh hana meuteuntée sabab Po teu Allah ka geuhuköm peunduduek banda nyan deungon keubiet that brat. 12 Ureuëng-ureuëng nyang hana maté, jitimoh lé peunyakét-peunyakét keumong nyan, sampoe peunduduek bandanyan laju jitawök sira jikliek ubak dewa-dewa awaknyan, jilakée tulông.

1 Samuel 6

1 Óh lheueh Peuto Peujanjian TUHAN nyan na di Filistin tujoh buleuen treb jih, 2 ureuëng Filistin laju jitawök bubena teungku imeum jih meunan cit deungon bubena tukang sihe lheuehnyan laju jitanyong, "Keupeue keugeutanyoe Peuto Peujanjian TUHAN nyan? Meunyoe atranyan tanyoe peuriwang ubak teumpat sot, pakriban cara jih?" 3 laju jijaweueb lé awaknyan, "Peuto Peujanjian Allah Israel nyan bék gata peuriwang meunan mantong, teuma harôh na ngon hadiah keungon teutuboh desya gata. Deungon na nyang lagée nyan gata teuma geupeupuléh, dan gata tateupeue pakon Po teu Allah Israel nyan hana piôh-piôh geuhuköm gata." 4 "Peue sineuboh jih nyang harôh geutanyoe bri keu awaknyan?" jitanyong lé awaknyan. Geujaweueb lé mandum teungku imeum nyan, "Limong boh keumong méuh dan limong boh teuma tikoih méuh, paih sidub raja-raja Filistin. Bukon kheueh beuncana nyang ka keunong deungon keumong-keumong dan tikoih nyang ka keunong ateueh gata banmandum, bah kheueh nyan ateueh rakyat meunan cit ateueh raja? 5 Lé sababnyan, gata harôh tapeuget keumong-keumong nyang teucuntoh dan tikoih nyang teungoh ganah di nanggroe gata. Deungon lagéenyan gata ka tabri horeumat ubak Po teu Allah Israel. Mungken gobnyan teuma geupiôh geuhuköm gata, dan dewa-dewa meunan cit ngon tanoh gata. 6 Keupeue guna jih gata tameukreueh ulée lagée raja dan ureuëng nanggroe Meusé yoh watée ilée? Bék tuwoe pakriban Po teu Allah geupeu meuén-meuén awaknyan, sampoe awaknyan jra dan ureuëng Israel awaknyan peubiyeu mantong jitinggai nanggroe Meusé. 7 Lé sababnyan, tapeuna kheueh saboh geurubak nyang barô deungon dua boh leumô nyang mantong jimom, dan nyang hántom lom teungui keu teutarék geurubak. Gata pasang kheueh laju ban dua boh leumô nyan nibak geurubak nyan, dan taparoh kheueh aneuëk-aneuëk leumô nyan u dalam weue droe jih. 8 Óh lheuehnyan, tacok kheueh laju Peuto Peujanjian TUHAN, gata peuék laju atra nyan u ateueh geurubak, dan gata keubah atra nyan neusaho ngon kutak nyang meuaso ngon méuh nyang meuseuti gata peuseumah sibagoe sineuboh desya gata. Bah kheueh geurubak dan leumô nyan jijak keudroe jih. 9 Gata ngieng kheueh meuneujak jih nyan; meunyoe Peuto Peujanjian nyan jiba u arah nanggroe jih keudroe, na kheueh u banda Bet-Semes, nyang lagéenyan muphom jih bahwa Po teu Allah ureuëng Israel kheueh nyang ka geupeutreun bala nyang cukob hibat nyoe u ateueh geutanyoe. Teuma meunyoe geurubak nyan hana jijak keudéh, geutanyoe teuma tateupeue bahwa bala nyan bukon teuka nibak Allah ureuëng Israel, teuma keubeutolan mantong." 10 Ureuëng nyan jiseutôt laju lagée geupeugah lé teungku imeum nyan; awaknyan laju jijakcok dua boh leumô nyang teungoh jifiék mom, atranyan jipeukeumat ubak geurubak, seudangkan aneuëk-aneuëk leumô nyan jikurong didalam eumpung. 11 Laju Peuto Peujanjian TUHAN nyan geupeuék u ateueh geurubak, meunan cit deungon kutak nyang meuasoe deungon tikoih méuh dan keumong-keumong nyang teucuntoh nyan. 12 Leumô nyan jijak laju langsong u arah Bet-Semes; sira jijak beulatang nyan jimeusu lagée jimeudroih, hana meusimpang uwie atawa u uneuen nibak rot ueh raya nyang teungoh jijak nyan. Dan ban limong droe raja Filistin nyan laju geuseutôt di likot sampoe trok ubak bataih Bet-Semes. 13 Bak watée nyan peunduduek Bet-Semes teungoh jipot boh gandom di pantôn. Bak watée jingieng Peuto Peujanjian nyan, deungon até nyang that galak lom ngon harok laju jijak sambot Peuto Peujanjian TUHAN nyan. 14 Peuto nyan jipiôh to ngon batée raya nibak lampôh Yosua, sidroe nibak peunduduek Bet-Semes. Peunduduek bandanyan laju jiplaih-plaih kayée geurubak nyan meunan cit ban dua boh leumô nyan laju teuma jisie nibak takue keu keureubeuen nyang teutot teupeuseumah ubak TUHAN. 15 Óh lheuehnyan lé ureuëng-ureuëng Lewi laju geupeutreun Peuto Peujanjian TUHAN dan kutak nyang na meuasoe deungon barang-barang méuh nyan, atranyan jikeubah di ateueh batée raya nyan. Óh lheuehnyan peunduduek Bet-Semes jipeuseumah laju keureubeuen nyang teutot dan keureubeuen nyang laén nyan ubak TUHAN. 16 Bak watée ban limong droe raja Filistin nyan geukalon banmandum nyan laju awaknyan jijakwoe u Ekron bak uroe nyan cit teuma. 17 Deungon na lagée nyan ureuëng Filistin ka jikirém keu TUHAN keureubeuen teuteuboih desya keu peunduduek limong boh banda nyang jimat peurintah lé limong droe raja Filistin nyan. Banda nyan na kheueh: Asdod, Gaza, Askelon, Gat dan Ekron. Lamkawan nyan na nyang meubintéh ngon kuta, dan na teuma nyang hana. Tieb-tieb banda nyan geukirém saboh keumong méuh dan saboh teuma tikoih méuh. Bukeuti nibak keujadian nyan batée raya teumpat awaknyan jikeubah Peuto Peujanjian TUHAN. Sampoe nibak uroe nyoe batée nyan mantong na dilampoh Yosua, ureuëng Bet-Semes nyan. 19 Teuma sabab ureuëng-ureuëng Bet-Semes nyan jiglib u dalam Peuto Peujanjian TUHAN, tujoh ploh droe lamkawan awaknyan geupoh maté lé TUHAN. Laju rakyat meuduka cita sabab TUHAN geupeurhot ateueh awaknyan deungon bala nyang meunan raya. 20 Laju peunduduek Bet-Semes jipeugah, "Soe kheueh ureuëng nyang hase jiteun dikeue TUHAN, Allah Nyang Suci nyan? Ho kheueh peuto nyan geutanyoe intat mangat atra nyan jiôh nibak geutanyoe?" 21 Laju awaknyan jikirém utosan ubak peunduduek Kiryat-Yearim deungon peusan nyang lagéenyoe, "Ureuëng Filistin ka jipeuriwang Peuto Peujanjian TUHAN. Gata teuka kheueh dan taba kheueh peuto nyan u teumpat gata."

1 Samuel 7

1 Dan jiteuka kheueh laju peunduduek Kiryat-Yearim jijakcok Peuto Peujanjian TUHAN nyan dan jiba ubak rumoh ureuëng nyang nan jih Abinadab; rumoh nyan na jih di ateueh gunong cut. Óh lheuehnyan awaknyan laju jibaiát Eleazar aneuëk Abinadab, mangat jeuet jijaga Peuto Peujanjian TUHAN nyan. 2 Treb cit Peuto Peujanjian TUHAN nyan tinggai di Kiryat-Yearim, na kira-kira dua ploh thon. Dub treb nyan teuma umat Israel jimeulakée sabe ubak TUHAN mangat TUHAN geutulông awaknyan. 3 Geupeugah kheueh lé Samuel ubak umat Israel, "Meunyoe gata keuneuk tawoe ubak TUHAN dan gata seumah Gobnyan deungon sipunoh até gata, bah kheueh tatiek banmandum dewa aséng nyang na nibak gata meunan cit deungon patong Dewi Asytoret. Tapeujok kheueh droe gata bulat-bulat ubak TUHAN sidroe dan gata meubakti ubak Gobnyan mantong, deungon nyan teuma gata geupeubeubaih nibak ureuëng Filistin." 4 Lé sababnyan di ureuëng Israel nyan laju jijak tiek bubena patong meunan cit deungon patong-patong Dewa Baal dan patong Dewi Asytoret, laju awaknyan jimeungabdi ngon jipeujok droe bulat-bulat ubak TUHAN nyang sidroe. 5 Óh lheuehnyan geupeugah kheueh lé Samuel, "Gata peusapat laju banmandum bansa Israel di Mizpa, teuma ulôn meudoá ubak TUHAN keu gatanyoe." 6 Dan meusapat kheueh awaknyan banmandum di Mizpa. Awaknyan jijak crong ié dan ié nyan laju jijak rôe sibagoe peuseumahan ubak TUHAN, lheueh nyan nibak uroe nyan awaknyan jipuasa siuroe punoh. Kheun awaknyan, "Kamoe ka meudesya ubak TUHAN." (Di Mizpa nyan Samuel geupeuphon peuseuleusoe peukara-peukara ureuëng Israel nyang meusiliséh faham.) 7 Bak watée ureuëng Filistin jideungoe bahwa ureuëng Israel ka meusapat di Mizpa, ban limong droe raja Filistin nyan laju jijak keunan deungon leumô awaknyan keu jijak prang ureuëng Israel. Ban jideungoe lé ureuëng Israel hainyan, awaknyan laju teumakot. 8 Jipeugah lé awaknyan ubak Samuel, "Bék kheueh neupiôh neumeudoá ubak TUHAN Po teu Allah geutanyoe mangat geutanyoe seulamat nibak ureuëng Filistin." 9 Lé sabab nyan Samuel laju geusie saboh aneuëk bubiri nyang mantong muda, atranyan geupeuseumah ubak TUHAN sibagoe keureubeuen nyang teutot. Óh lheuehnyan gobnyan laju geumeudoá mangat TUHAN geutulông ureuëng Israel, dan doá geuhnyan geukabui lé TUHAN. 10 Bak watée Samuel teungoh geupeuseumah keureubeuen nyang teutot nyan, ureuëng Filistin laju jipeuphon prang; teuma paih bak saát nyan TUHAN geupeutreun geulanteu di langét u ateueh awaknyan. Awaknyan ka jeuet keukaru hana meuteuntée na nyang plueng keudeh keunoe hán meuho saho. 11 Bak saát nyan teuma tantra Israel jiteubiet di Mizpa laju jijak peucrok ureuëng Filistin rab trok u Bet-Kar, dan geupeuhanco awaknyan. 12 Óh lheuehnyan Samuel laju geupeudong si aneuk batée, nibak bataih Mizpa ngon Sen. Gobnyan geupeugah, "TUHAN ka geutulông geutanyoe deungon sipeunoh jih." -- laju batée nyan geuboh nan "Batée Peunulông". 13 Meunan kheueh cara jih ureuëng Filistin geupeutaloe. TUHAN hana geupeu idhin awaknyan jitamong u dalam wilayah Israel simantong Samuel udeb. 14 Banmandum banda Israel nyang ka jipeutaklok lé ureuëng Filistin, phon di Ekron sampoe u Gat, geujok pulang keu ureuëng Israel. Lényan, Israel nyan jiteumé lom banmandum wilayah jihnyan. Ureuëng Israel dan ureuëng Amori pi udeb ngon damé. 15 Samuel geumat peurintah ateueh Israel siumu udeb gobnyan. 16 Tieb-tieb thon gobnyan geujak keulileng u Betel, Gilgal, dan Mizpa. Dan diteumpat-teumpat nyang geujak nyan gobnyan geupeuseuleusoe bubena peukara. 17 Sabe óh ka lheuehnyan gobnyan geuwoe u rumoh geuh di Rama. Disinan gobnyan jeuet keu hakém ureuëng Israel dan meunan cit geupeudong teuma saboh miseubah keu TUHAN.

1 Samuel 8

1 Bak watée Samuel ka tuha, geuangkat teuma aneuëk gobnyan jeuet keu hakém di nanggroe Israel. 2 Aneuëk gobnyan nyang tuha nan jih Yoël dan nyang keudua nan jih Abia. Awaknyan jeuet keu hakém di Barsyeba. 3 Teuma awaknyan hana jiseutôt peurangoe ureuëng syiek jih, teuma nyang jipeubuet na kheueh jimita laba keudroe jih mantong. Awaknyan jiteurimong péng sogok dan jihuköm rakyat ngon cara hana ade. 4 Sabab nyan mandum peumimpén Israel jimeurokpakat, laju jijak meuhadab ubak Samuel di Rama, 5 dan jipeugah ubak gobnyan, "Neudeungoe kheueh nyoe hai Bapak, Bapak ka tuha dan aneuëk-aneuëk Bapak hana jiseutôt pi-e peurangoe Bapak. Lé sababnyan Bapak angkat sidroe raja mangat kamoe na raja lagée bansa-bansa laén." 6 Teuma Samuel hana galak ngon usui awaknyan. Laju gobnyan meudoá ubak TUHAN, 7 dan TUHAN meufeureuman, "Gata peupeunoh kheueh peue nyang jilakée lé bansa nyan bak gata. Sabab bukon gata nyang hana jigalak lé awaknyan, teuma Ulôn. Awaknyan hana ji galak le keu Ulôn sibagoe raja jih. 8 Phon awaknyan Ulôn ba dan Ulôn peuteubiet nibak nanggroe Meusé, awaknyan ka jimeupaléng nibak Ulôn dan ka jiseumah dewa-dewa, dan peue nyang jinoenyoe awaknyan jipeusaneut ateueh gata, nyang kheueh teuma nyang ka jipeubuet u ateueh Ulôn. 9 Sabab nyan gata peutrok kheueh peue nyang jilakée lé awaknyan; teuma gata peuingat kheueh awaknyan deungon biet-biet, dan tapeugah kheueh ubak awaknyan pakriban awaknyan singoh jipeusaneut ban galak droe lé raja." 10 Peue nyang ka geupeugah lé TUHAN nyan geupeusampoe laju lé Samuel ubak awaknyan nyang jilakée sidroe raja ubak gobnyan, geupeugah, 11 "Meunoe kheueh singoh raja gata jipeusaneut gata," meunan kheueh Samuel geupeutrang nyan. "Raja nyan jipaksa aneuëk-aneuëk gata jiyue tamong tantra; siladum nibak awaknyan jipeutugaih nibak pasokan geuritan guda, siladum teuk sibagoe pasokan meuguda, dan nyang laén teuma sibagoe pasokan nyang jak ngon gaki. 12 Siladum geu angkat lé raja nyan sibagoe keumeundan ateueh siribée droe tantra, dan siladum nyang laén ateueh limong ploh droe. Raja nyan teuma geupaksa aneuëk-aneuëk gata geuyue jak meu úe bak blang gobnyan, geuyue peusapat hase blang gobnyan nyang ka teupot, geuyue peuget sinjata-sinjata dan peukakaih prang gobnyan. 13 Aneuëk-aneuëk gata nyang inong teuma geuyue peuget minyék mangat bée keu gobnyan dan geuyue teuma sibagoe tukang maguen dan tukang peuget ruti gobnyan. 14 Raja nyan geucok blang gata, lampôh anggô gata, dan lampôh zaiton gata nyang paleng get dan atranyan geubri laju ubak peugawée gobnyan. 15 Blang dan lampôh anggô gata teuma geupeukeunong cuké siper siploh nibak hase jihnyan, laju atranyan geubri ubak keumeundan dan peugawée gobnyan. 16 Raja nyan teuma geureupah namiet gata, beulatang peulara gata nyang paleng get dan keuleudée gata laju geungui nyan keu geuyue keureuja atra gobnyan. 17 Siper siploh nibak kawan kaméng bubiri gata teuma geucok lé gobnyan. Dan gata keudroe jeuet keu namiet gobnyan. 18 Meunyoe hainyan ka trok, gata apoh apah sabab buet raja nyang gata piléh nyan, teuma TUHAN hana geutem deungoe apoh apah gata nyan." 19 Teuma bansa nyan teutab hana jipakoe peue nyang ka geupeugah lé Samuel nyan, dan awaknyan jipeugah, "Bah keudeh! Pakriban kheueh mantong kamoe teutab kamoe lakée raja. 20 Kamoe teutab kamoe lakée beusaban deungon bansa-bansa nyang laén, raja kamoe harôh geupeurintah kamoe dan geupimpén kamoe lam mideuen prang." 21 Óh ka lheueh geudeungoe lé Samuel banmandum peue nyang jipeugah lé awaknyan, hai nyan laju geupeusampoe ubak TUHAN. 22 TUHAN geujaweueb, "Gata turot kheueh mantong peue nyang jilakée lé awaknyan dan gata angkat kheueh laju sidroe raja keu awaknyan." Óh lheuehnyan Samuel laju geuyue woe u rumoh jih maséng-maséng banmandum ureuëng Israel nyan.

1 Samuel 9

1 Na sidroe ureuëng kaya dan meuwibawa lam sukée Benyamin, nan ureuëng nyan Kish. Gobnyan anggota keuluwarga Bekhorat, cabeueng nibak marga Afiah. Bapak gobnyan Abiel dan nék gobnyan Zeror. 2 Kish nyan na teuma jimeu aneuëk nyang agam, jiboh nan Saul, sidroe aneuëk muda nyang tari dan teugab. Hana meusidroe pih nyang na di bansaboh Israel nyan nyang na leubeh tari nibak jihnyan. Meunan cit badan jihnyan leubeh panyang; rata-rata panyang ureuëng Israel teuma trok éut bahô ureuëng nyan. 3 Bak siuroe na meupadum boh keuleudée atra Kish gadôh. Sabab nyan geupeugah lheueh lé Kish ubak Saul, "Neuba kheueh sidroe lamkawan peulayan nyan, dan tajak mita kheueh keuleudée-keuleudée nyan." 4 Laju Saul dan peulayan gobnyan geujak tamong u dalam daerah gunong Efraim dan tanoh Salisa, teuma beulatang nyang gadôh nyan hana cit meuteumé. Óh lheuehnyan awaknyan geujak laju u tanoh Sahalim, teuma keuleudée-keuleudée nyan hana cit disinan. Meunan cit keuleudée nyan geujak mita u wilayah Benyamin, teuma sia-sia mantong. 5 Bak watée awaknyan ka sampoe ubak tanoh Zuf, Saul geupeugah ubak peulayan geuhnyan, "Boh jak geutanyoe tajak woe mantong, takot eunteuk bapak leubeh geugundah geupike geutanyoe nibak keu keuleudée nyang gadôh nyan." 6 Peulayan nyan jijaweueb, "Preh ilée! Di banda nyoe na sidroe hamba Allah. Ureuëng nyan gét that jihoreumat lé gob kareuna peue nyang geupeugahnyan sabe beutôi dan teujadi. Bohjak geutanyoe tajak ubak gobnyan, barang kali gobnyan hase geubri tée ubak geutanyoe dipat kheueh keuleudée geutanyoe nyan." 7 Geupeugah lé Saul, "Meunyoe tanyoe tajak meurumpok ngon ureuëng nyan, peu kheueh nyang teuma tabri keu ureuëng nyan? Beukai nyang geutanyoe ba ka habéh, dan nibak geutanyoe ka hana sapeu nale keu tajok ubak hamba Allah nyan, pakriban, kon nyoe meunan?" 8 Jijaweueb lé peulayan nyan, "Keubeutulan bak ulôn mantong na sikeupeng péng pirak. Nyan ulôn jok keu hamba Po teu Allah nyan mangat gobnyan geutem peugah ubak geutanyoe dipat kheueh keuleudée-keuleudée nyan." 9 "Gét kheueh, meunyoe ka meunan!" geujaweueb lé Saul. "Jak geutanyoe tajak." Laju geujak kheueh awaknyan u banda, di teumpat hamba Po teu Allah nyan. Bak watée awaknyan geuteungoh gunong cut rot teujak ubak banda nyan, meurumpok kheueh awaknyan deungon na meupadub droe aneuëk dara nyang keuneuk jak crong ié nibak mon. Laju awaknyan geutanyong ubak aneuëk dara nyan, "Peu kheueh ureuëng tukang keumalon nyan na gobnyan di banda?" (Bak jamén nyan sidroe nabi jipeugah tukang keumalon, jadi meunyoe na ureuëng jikeuneuk teumanyong peue-peue mantong ubak Po teu Allah, gobnyan geupeugah lagée nyoe, "Jak kheueh geutanyoe tajak ubak tukang keumalon.") 12 "Nyoe, beutôi na," jijaweueb lé aneuëk-aneuëk daranyan, "ban sikeujab nyoe geujak awai nibak droeneueh nyoe. Meunyoe droeneueh bagaih neujak, mungken hase meurumpok ngon gobnyan. Gobnyan ban geujak u banda sabab nibak uroenyoe di ateueh miseubah di ateueh gunong cut na peuseumahan keureubeuen keu rakyat. Bubena ureuëng nyang teu undang hana jimakheun meunyoe gobnyan gohlom trok keunan, kareuna gobnyan harôh geubri beureukat ubak atra nyang teukeureubeuen nyan leubeh ilée. Meunyoe droeneueh neujak laju jinoe, droeneueh hase meurumpok sigohlom gobnyan geu teungoh u ateueh gunong cut keu geujak makheun." 14 Lé sababnyan Saul dan peulayan gobnyan laju geujak u banda, dan bak watée awaknyan geutamong nibak babah pintoe geureubang, awaknyan meuseuleuseh deungon Samuel nyang teungoh geujak u teumpat iébadat di ateueh bukét. 15 Dan siuroe sigohlom nyan TUHAN ka geubri peusan ubak Samuel lagée nyoe, 16 "Singoh beungoh kira-kira bak watée lagéenyoe, Ulôn teuma Lôn yue sidroe lamkawan sukée Benyamin keu jijak meurumpok deungon gata. Neu baiát kheueh jihnyan deungon cara neuboh minyéuk mangat jeuet keu raja ateueh umat Ulôn Israel. Ureuëng nyan teuma jipeuseulamat umat Ulôn ateueh ureuëng Filistin. Ulôn ka Ulôn kalon deurita umat Ulôn nyang peudéh dan Lôn deungon awaknyan jimo jilakée tulông." 17 Bak watée Samuel geukalon Saul, TUHAN laju geupeugah ubak gobnyan, "Nyoe kheueh ureuëng nyang Ulôn peugah bak gata nyan. Jihnyoe jipeurintah umat Ulôn." 18 Watée nyan Saul laju geupeuto ubak Samuel bak babah pintoe geureubang, dan geutanyoeng, "Meuáh, Bapak, dipat rumoh ureuëng tukang keumalon nyan?" 19 Geujaweueb lé Samuel, "Ulôn kheueh tukang keumalon nyan. Tajak laju gata ilée ubak teumpat iébadat di ateueh gunong cut, sabab nibak uroe nyoe gata tamakheun deungon ulôn. Singoh beungoh banmandum peue nyang gata tanyoeng nyan ulôn jaweueb, óh lheuehnyan barô kheueh jeuet gata woe. 20 Keuhai keuleudée-keuleudée gata nyang gadôh ka na padub uroe nyang ka lheueh nyan, bék khawate, sabab ka meuteumé. Lhom teuma, nyang paleng meuyuem bansaboh Israel teuma teubri keu gata dan keuluwarga ayah gata." 21 Geujaweueb lé Saul, "Ulôn nyoe nibak sukée Benyamin, sukée nyang paleng ubit di Israel, dan lom keuluwarga ulôn nyang paleng hana meuguna dalam sukée nyan. Jadi pakon Bapak neupeugah meunan ubak ulôn?" 22 Óh lheueh nyan Samuel geupakat Saul dan peulayan geuh nyan geupeutamong u dalam saboh kama nyang lumpah luwah, laju gobnyan geubri teumpat nyang paleng lumboi sa ubak awaknyan dikeue ureuëng nyang teu undang nyang jeumeulah jih na kira-kira lhée ploh droe. 23 Lheueh nyan Samuel geupeugah laju ubak tukang taguen bu gobnyan, "Tapeu idang kheueh laju uengkot sie nyang buno ka lheueh ulôn jok ubak gata." 24 Óh lheuehnyan di tukang maguen nyan laju geujakcok uengkot sie teupiléh asoe bagian pha jih keu awaknyan, atranyan jipeu idang ubak Saul. Samuel geupeugah, "Nyoe jeumba nyang ka ulôn peu aséng keu gata mangat hase tapajoh nibak saát nyoe meusigo deungon jamé-jamé nyang laén. Tapajoh kheueh laju." Di Saul pi laju geupajoh atranyan. Teuma nibak uroenyan Saul geumakheun meusigo-sigo deungon Samuel. 25 Óh ka lheueh awaknyan geutreun nibak teumpat iébadat nyan dan geujak tamong laju u dalam banda. Saul geubri teumpat éh di ateueh rumoh, 26 laju gobnyan geuéh. Bak watée mata uroe beungoh ka jiteubiet, Samuel laju geujak hôi Saul nyang na di ateueh rumoh nyan, dan geupeugah, "Beudôh kheueh laju, jak ulôn intat gata mangat tajak." Saul geubeudôh, laju geujak beurangkat meusigoe-sigoe deungon Samuel. 27 Watée awaknyan ka trok u binéh banda, geupeugah kheueh laju lé Samuel ubak Saul, "Gata yue kheueh peulayan nyan jijak beu awai nibak geutanyoe." Dan peulayan nyan pi jijak teuma, dan Samuel geupeugah lom, "Gata piôh kheueh disinoe sikeujab, ulôn teuma lôn britée peusan Po teu Allah ubak gata."

1 Samuel 10

1 Óh lheueh nyan Samuel geucok laju kaca nyang meuaso minyéuk zaiton, minyéuk nyan geuroe u ateueh ulée Saul, dan geucom laju Saul sira geupeugah, "TUHAN ka geubaiát gata jeuet keu raja ateueh Israel umat Gobnyan. Gata tapeurintah umat Geuhnyan dan tabri peulindongan nibak banmandum musoh awaknyan. Nyoe kheueh tanda keu gata bahwa TUHAN ka geupiléh gata jeuet keu raja ateueh umat Gobnyan: 2 Óh ka lheueh gata tatinggai ulôn nibak uroenyoe, gata teuma meurumpok deungon dua droe ureuëng agam nibak jirat Rahel di Zelzah di wilayah Benyamin. Awaknyan jipeugah ubak gata lagée nyoe: Keuleudée-keuleudée nyang gata mita nyan ka meuteumé. Jinoenyoe bapak gata hana khawate le keuhai beulatang-beulatang nyan, teuma hana piôh-piôh geutanyong peu kheueh nyang harôh geupeubuet mangat meurumpok teuma ngon droeneueh." 3 Samuel geupeugah lom, "Beudôh disinan gata jak laju trok ubak-bak kayée teumpat iébadat di Tabor. Disinan gata meurumpok teuma deungon lhée droe ureuëng agam nyang teungoh jijak u Betel keu jijak peuseumah keureubeuen ubak Po teu Allah. Sidroe nibak ureuëng nyan jitarek lhée boh aneuëk kaméng, sidroe teuk jiba teuma lhée boh ruti, dan sidroe teuk jiba baluem kulét nyang meuasoe ié anggô. 4 Awaknyan jibri saleuem ateueh gata dan awaknyan jibri teuma dua boh ruti keu gata nyang harôh gata teurimong. 5 Óh lheuehnyan gata harôh teuma tajak ubak bukét Po teu Allah di Gibea, teumpat meukhimah ureuëng Filistin. Nibak babah pintoe tamong u dalam banda, gata laju meuseuliseh teuma deungon kawan nabi nyang teungoh geutreun nibak bukét keureubeuen. Awaknyan jimeunari-nari sira jikliek-kliek, jipeu meuén canang, rapa-i, suléng dan keucapi. 6 Bak saát nyan cit teuma gata geukuasa lé Roh TUHAN dan gata teuma taseutôt meunari deungon kliek awaknyan, laju gata geubri sifeuet barô akhé jih jeuet keu manusia laén. 7 Meunyoe banmandum nyan ka teujadi, tapeubuet kheueh laju peue nyang gata rasa nyan jroh, sabab Po teu Allah na meusajan gata. 8 Óh ka lheuehnyan gata harôh tajak u Gilgal dan tapreh disinan tujoh uroe. Eunteuk ulôn teuka keu lôn jak peuseumah keureubeuen nyang teutot dan keureubeuen peudamé, meunan cit teubri tée ubak gata peue nyang harôh gata peubuet." 9 Hana treb teuma óh lheueh Saul geutinggai Samuel, laju gobnyan geuteurimong sifeuet barô nibak Po teu Allah. Dan peue mantong hai nyang geubri tée lé Samuel ubak gobnyan pih teujadi nibak uroe nyan cit teuma. 10 Bak watée Saul dan peulayan gobnyan trok u Gibea, awaknyan laju meurumpok deungon saboh kawöm nabi. Bak watée nyan cit teuma Saul geukuasa lé Roh Po teu Allah, dan gobnyan laju geuseutôt meunari dan geu kliek lagée nabi nyan kliek. 11 Ureuëng nyang laén nyang jituri keu gobnyan yoh watée ilée, jingieng peurango geuh nyan, laju jitanyong sabe keudroe-droe, "Peu kheueh nyang ka teujadi ateueh aneuëk Kish nyan? Peu kheueh Saul nyan teuma jeuet keu nabi?" 12 Teuma sidroe lamkawan awaknyan nyang na tinggai disinan jiteumanyong, "Pakriban deungon nabi-nabi nyang laén nyan -- meunurot gatanyoe soe kheueh bapak awaknyan?" Nyang kheueh asaiphon jih pribasa nyang nyoe, "Peu kheueh Saul nyan jeuet teuma keunabi?" 13 Óh ka seuleusoe Saul geumeunari ngon geukliek-kliek, geujak kheueh laju gobnyan u ateueh miseubah di ateueh bukét. 14 Lé apha Saul deh geukalon gobnyan dan peulayan geuhnyan, laju geutanyong ubak aneuëk keumeun dan peulayan geuh nyan, "Pané gatanyoe tajak?" geujaweueb lé Saul, "Kamoe jakmita keuleudée nyang gadôh nyan, dan bak watée atranyan hana kamoe teume, laju kamoe meurumpok ngon Samuel." 15 "Dan peue nyang geupeugah lé Samuel nyan ubak gata?" geutanyong lé apha geuhnyan. 16 Geujaweueb lé Saul, "Gobnyan geubri tée bahwa bubena beulatang nyan ka meuteumé." Teuma Saul hana geucalitra ubak apha geuh nyan bahwa gobnyan ka geubaiát lé Samuel sibago raja Israel. 17 Teuma Samuel laju geuhôi rakyat Israel mangat jeuet jijak meusapat di Mizpa, 18 dan gobnyan geupeugah ubak awaknyan, "Nyoe kheueh nyang ka geufeureuman lé TUHAN, Po teu Allah Israel, 'Ulôn ka lheueh Lôn ba gata teupeuteubiet lam nanggroe Meusé dan Ulôn peubeubaih gata nibak kuasa ureuëng Meusé dan banmandum bansa nyang laén nyang jiteugon gata. 19 Ulôn ka Ulôn peubeubaih gata nibak mubagoe seungsara dan deurita, teuma jinoenyoe gata ka tatulak Ulôn, Allah gata, kareuna gata lakée mangat teutunyok sidroe raja keu gata. Nyang kheueh, gét that meunyoe meunan, gata meusapat kheueh dikeue Ulôn, TUHAN gata, meunurot sukée dan marga jih.' " 20 Lé Samuel laju geuyue maju banmandum sukée ukeue gobnyan dan sukée Benyamin nyang keunong piléh. 21 Bak watée keuluwarga-keuluwarga lam sukée Benyamin nyan teuyue jak ukeue, teuma keuluwarga Matri nyang keunong piléh. Akhé jih maju kheueh bubena ureuëng agam lam keuluwarga Matri, dan Saul aneuëk Kish nyang keunong piléh. Laju awaknyan jijak mita Saul, teuma hana meurumpok. 22 Sabab nyan bubena ureuëng ramé nyan laju jipeugah ubak TUHAN, "Ya, TUHAN, peu kheueh ureuëng nyang neupeugah nyan ka na gobnyan disinoe?" Geujaweueb lé TUHAN, "Saul na jimusöm dilikot barang-barang peuleungkapan." 23 Bak watée nyan cit awaknyan jijak tueng Saul nibak teumpat nyan, dan jiba laju gobnyan lamkawan rakyat. Dan geudong kheueh laju Saul lamkawan awaknyan dan gobnyan kheueh nyang paleng manyang; ureuëng laén teuma cit éut baho gobnyan. 24 Óh lheuehnyan Samuel geupeugah laju ubak rakyat, "Nyoe kheueh ureuëng nyang ka geupiléh lé TUHAN, hana ngon peusa lamkawan geutanyoe banmandum." Banmandum bansa nyan jisumurak, "Udeb kheueh raja kamoe!" 25 Óh lheuehnyan Samuel geupeutrang laju ubak bansa nyan keuhai hak dan keuwajeban raja, laju geutuléh didalam kitab dan geukeubah laju di teumpat nyang suci. Óh lheuehnyan Samuel geuyue laju banmandum bansa nyan mangat jijak woe u rumoh jih maséng-maséng. 26 Meunan cit deungon Saul laju geujakwoe u rumoh gobnyan di Gibea, meunan cit deungon na meupadubdroe ureuëng nyang gagah beurani dan nyang ka geugrak até jih lé TUHAN. 27 Teuma na meupadub droe ureuëng jeuhet jipeugah, "Pané na mungken ureuëng nyoe meuguna keu geutanyoe?" Awaknyan jipeuhina Saul dan hana teuma jibri bungöng jaroe keu gobnyan. Teuma gobnyan pura-pura hana jiteupeue.

1 Samuel 11

1 Óh lheuehnyan na teuma Nahas, raja nanggroe Amon, jikrah laju tantra jih jijak keupong banda Yabesh di wilayah Gilead. Peunduduek Yabesh laju jiusui lagée nyoe ubak Nahas, "Neupeugét kheueh peujanjian deungon kamoe, deungon nyan kamoe teuma taklok ubak droeneueh." 2 Geujaweueb lé Nahas, "Deungon syarat nyoe kheueh ulôn keuneuk peugot peujanjian deungon gata, 'Mata blaih uneuen gata maséng-maséng teuma ulôn cungke sibagoe peuhinaan keu banmandum ureuëng Israel!' " 3 Óh lheueh nyan banmandum peumimpén banda Yabesh nyan jijaweueb, "Kamoe lakée teumpo nyang treb jih tujoh uroe mangat kamoe hase kamoe kirém utosan ubak bansaboh tanoh Israel. Meunyoe hana nyang jitem tulông kamoe, kamoe teuma meunyeurah ubak droeneueh." 4 Meunan kheueh bubena utosan nyan trok laju u Gibea, teumpat tinggai Saul. Bak watée awaknyan jipeusampoe haba nyan, jimoe kheueh bubena rakyat sabab putôh asa. 5 Bak watée nyan Saul banmantong teuka nibak blang gobnyan sira geutarek leumô geuh. Gobnyan pi geutanyong, "Peue na? Pakon banmandum ureuëng jimo?" Laju ubak gobnyan jipeugah keuhai haba nyang jiba nibak Yabesh nyan. 6 Ban geudeungoe nyan laju Saul jikuasa lé Roh Allah. 7 Deungon beungéh that-that gobnyan laju geucok dua boh leumô atranyan geukoh-koh sampoe kajai that nyang teukoh meutumpok-tumpok. Óh lheuehnyan sie nyang ka teukoh-koh nyan laju geukirém ubak banmandum tanoh Israel deungon peurintah gobnyan lagée nyoe, "Soe nyang hana jitem muprang jiseutôt Saul ngon Samuel, banmandum leumô-leumô jihnyan teuma teukoh-koh cit lagée asoe sie nyang teukirém nyoe!" Bansa Israel jitakot that ubak peue nyang mungken geupeusaneut lé TUHAN, teuma banmandum ureuëng, hana teukeucuali, ka siab jijak maju lam prang meusajan-sajan. 8 Awaknyan geugumpôi laju dan geu itong di Bezek: Na 300.000 droe ureuëng Israel, dan 30.000 droe ureuëng Yehuda. 9 Óh lheuehnyan ubak utosan Yabesh geupeugah lagéenyoe, "Gata peugah laju ubak peunduduek Yabesh, bahwa singoh beungoh sigohlom cot uroe, awaknyan jiteuka ureuëng jijak bantu." Bak watée peunduduek Yabesh jiteurimong peusan nyan, até awaknyan lumpah galak dan seunang that. 10 Jipeugah lé awaknyan ubak Nahas, "Singoh beungoh kamoe meunyeurah, dan jeuet neupeubuet ateueh kamoe bangalak até droeneueh." 11 Singoh nyan, banbeungoh that, Saul laju geubagi-bagi ureuëng gobnyan jeuet keu lhée boh pasokan. Dan bak watée mata uroe beungoh ka meuble-ble awaknyan laju jiseureubu u teungoh-teungoh khimah-khimah ureuëng Amon dan laju jiheuntam awaknyan bansalanle. Sigohlom trok watée cot uroe, tantra Saul ka jipeutaloe bubena musoh. Ureuëng-ureuëng Amon nyang meuhase jipeusiblaih droe, laju meucrebre sampoe hana nyang dua droe saboh arah awaknyan jiplueng meusaho-saho. 12 Óh lheuehnyan jitanyong kheueh lé bansa Israel ubak Samuel, "Dipat kheueh ureuëng nyang buno beuhe that jipeugah bahwa Saul hana layak jeuet keu raja geutanyoe? Heundak kheueh ureuëng nyang peugah nyan neuseurah ubak kamoe, mangat jihnyan kamoe poh maté." 13 Teuma geupeugah lé Saul, "Meusidroe ureuëng pi hana jeuet teupoh nibak uroenyoe, sabab nibak uroenyoe TUHAN ka geupeuseulamat bansa Israel." 14 Laju geupeugah kheueh lé Samuel ubak awaknyan, "Bohjak geutanyoe tajak banmandum u Gilgal dan tajak reseumi Saul sibagoe raja geutanyoe." 15 Meunan kheueh nibak uroenyan awaknyan jijak u Gilgal, dan di rumoh iébadat nyan Saul teureuseumi laju sibagoe raja. Awaknyan laju jipeuseumah keureubeuen peudamé, dan Saul dan banmandum bansa Israel geupeuna peuristiwa nyan.

1 Samuel 12

1 Dan geupeugah kheueh lé Samuel ubak banmandum bansa Israel, "Ulôn ka lôn peupeunoh peue nyang gata lakée dan ka teuma ulôn baiát sidroe raja keu gata. 2 Phon saát nyoe gobnyan kheueh nyang pimpén gata. Takalon kheueh, ulôn nyoe ka tuha dan ôk bak ulée pih ka putéh. Ulôn nyoe ka treb that-that ulôn pimpén gata -- yoh watée muda ulôn sampoe án saát nyoe. Bukeuti jih na kheueh aneuëk-aneuëk ulôn nyang ka rayeuk-rayeuk nyan. 3 Bak saátnyoe kheueh, ulôn dong dikeue gata! Meunyoe ulôn ka ulôn keureuja buet nyang salah, gata tudoh kheueh ulôn dikeue TUHAN dan dikeue raja nyang geupiléh lé Gobnyan. Peu kheueh na peureunah ulôn cok leumô atawa keuleudée ureuëng laén? Peu kheueh na ulôn peungéut atawa lôn teugom atawa ulôn teurimong péng sogok? Gata peugah kheueh laju, mangat jeuet peue nyang ka ulôn cok hase ulôn jok pulang." 4 Bubena ureuëng disinan jijaweueb, "Hana, hántom na Bapak peungéut atawa neuteugom kamoe; hántom na teuma Bapak cok peue mantong atra ureuëng laén." 5 Dan geupeugah kheueh lom lé Samuel, "Bak uronyoe TUHAN dan raja nyang ka geupiléh nyan jeuet keu saksi bahwa ulôn nyoe teunyata hana meusalah meubacut pih." "Nyoe, beutôi, TUHAN jeuet keusaksi geutanyoe," jaweueb awaknyan meusigoe. 6 Laju geupeugah lom lé Samuel, "TUHAN kheueh nyang ka geupiléh Nabi Musa dan Nabi Harun, dan nyang ba indatu gata geupeuteubit lam nanggroe Meusé. 7 Jinoenyoe, bék tajak ilée. Ulôn teuma lôn tudoh gata dikeue TUHAN. Gata ingat kheueh ubak keumurahan TUHAN nyang ka geutunyok keu gata dan keu indatu gata. 8 Bak watée Nabi Yakub dan keuluwarga gobnyan geujak u nanggroe Meusé, dan ureuëng Meusé jiteugom awaknyan, indatu gata laju geulakée tulông ubak TUHAN, dan TUHAN geu tunyok Nabi Musa ngon Nabi Harun. Bandua droe awaknyan laju geupeuteubiet endatu gatanyan lam nanggroe Meusé dan laju geutulông awaknyan tinggai teutab di nanggroe nyoe. 9 Teuma óh lheuehnyan awaknyan laju tuwoe ubak TUHAN, Po teu Allah awaknyan, sababnyan Gobnyan geupeubiyeu mantong awaknyan jiprang lé ureuëng Siseria dan jipeutaloe awaknyan, panglima tantra di Hazor, dan lé ureuëng Filistin meunan cit lé raja Moab. 10 Óh lheuehnyan awaknyan jimeudoá ubak TUHAN dan jimeungaku banmandum desya jih; kheun awaknyan, 'Kamoe ka meudesya sabab ka kamoe meupaléng nibak Droeneueh, ya TUHAN, dan ka kamoe seumah patong-patong Dewa Baal dan Asytoret. Teuma, jinoenyoe, neupeuseulamat kheueh kamoe nibak musoh kamoe, teuma kamoe laju meungabdi ubak Droeneueh!' 11 Óh lheueh nyan TUHAN laju geu tunyok Gideon, óh lheuehnyan Barak, óh lheuehnyan Yefta, dan nyang paleng seuneuleueh ulôn. Kamoe maséng-maséng ka kamoe peulheueh gata nibak musoh gata, sampoe gata hase gata udeb deungon aman. 12 Teuma bak watée gata ngieng bahwa gata keuneuk jiprang lé Nahas raja Amon, gata tatulak TUHAN sibagoe raja gata dan tapeugah ubak ulôn, 'Kamoe meuhéuet that jipeurintah lé sidroe raja.' 13 Jinoenyoe, tangieng kheueh, nyoe kheueh gobnyan, raja nyang gata piléh nyan. Gata ka talakée, dan TUHAN ka teuma geubri keu gata. 14 Mubahgia kheueh gata meunyoe gata tahoreumat TUHAN, dan gata meungabdi ubak Gobnyan, meunan cit gata deungoe dan gata horeumat peurintah Gobnyan, peulom meunyoe gata dan raja gata nyan teutab seutia ubak TUHAN Po teu Allah gata. 15 Dilikot nibak nyan, meunyoe gata hana taturot peurintah TUHAN, teuma gata lawan ubak peue nyang geupeurintah lé gobnyan, ka pasti gata dan raja gata gatanyan geulawan lé TUHAN. 16 Jinoenyoe, gata deungoe kheueh lom! Gata simak kheueh buet ajaéb nyang rayeuk nyang geupubuet lé TUHAN dikeue mata gata. 17 Ulôn teuma ulôn lakée ubak TUHAN, dan bah kheueh jinoenyoe musém khueng, TUHAN teuma geupeutreun geulanteu dan ujeuen sibagoe jeunaweueb Gobnyan ateueh doá ulôn. Nibak watée nyan, gata tasada padub na rayeuk desya gata ubak TUHAN sabab gata lakée sidroe raja." 18 Laju geumeudoá kheueh Samuel, dan bak uroe nyan cit teuma TUHAN geupeutreun geulanteu ngon ujeuen. Bansaboh bansa nyan jeuet keuteumakot ubak TUHAN dan keu Samuel. 19 Dan jipeugah kheueh lé awaknyan ubak Samuel, "Neutulông kheueh kamoe, ya Bapak, neumeudoá kheueh keu kamoe ubak TUHAN Po teu Allah droeneueh, mangat kamoenyoe bék maté. Jinoenyoe kamoe ka sadar bahwa seulaén desya kamoe nyang uroejéh, kamoe ka meudesya lom sabab kamoe ka kamoe lakée sidroe raja." 20 Samuel pi geujaweueb, "Bék teumakot, bah kheueh gata ka tapubuet buet nyang jeuhet nyan, bék kheueh gata paleng nibak TUHAN, teuma teutab kheueh meungabdi ubak Gobnyan deungon sipeunoh até gata. 21 Bék kheueh teuma gata seutôt dewa-dewa nyang hana hase jitulông dan jipeuseulamat gata, sabab awaknyan nyang seubeuna jih hana. 22 TUHAN ka geumeusumpah, bahwa Gobnyan hana geutinggai gata sabab Gobnyan ka geupeuputôh keu geupeujeuet gata keu umat Geuh keudroe. 23 Keuhai droe ulôn, seumoga ulôn bék sampoe meudesya ubak TUHAN sabab hana lôn meudoá keu gata. Sikeubiet jih ulôn teutab ulôn peuruno keu gata hai-hai nyang gét dan nyang beutôi. 24 Horeumat kheueh TUHAN dan tameungabdi kheueh ubak Gobnyan deungon seutia dan deungon sipeunoh até gata. Ingat kheueh keuhai buet-buet nyang rayeuk nyang ka geupeubuet keu gata. 25 Teuma meunyoe gata teutab cit tapeubuet desya, gata dan raja gata teuma binasa."

1 Samuel 13

1 Bak siuroe, bak watée Saul ka jeuet keu raja, 2 gobnyan laju geupiléh 3.000 droe ureuëng Israel; lamkawan ureuëng nyan, na 2.000 droe tinggai deungon gobnyan di Mikhas dan di daerah meugunong-gunong Betel, dan nyang 1.000 droe teuk jijak deungon Yonatan aneuëk agam gobnyan u Gibea di wilayah sukée Benyamin. Nyang leubeh jih lamkawan rakyat nyan geupeu idhin jijakwoe u rumoh jih maséng-maséng. 3 Óh lheuehnyan lé Yonatan laju geupoh maté panglima Filistin di Geba, dan bansa Filistin jideungoe hainyan. Laju Saul geuyue peumeusu beureuguih keu ban saboh nanggroe guna keu teutawok ureuëng Ibrani mangat jijak jimaju u mideuen prang. 4 Keu bansaboh bansa Israel geupeugah bahwa Saul ka geupoh maté panglima Filistin nyan dan bahwa ureuëng Filistin gét that jibanci keu ureuëng Israel. Sababnyan kheueh rakyat jipatuh ubak panggelan mangat jimeugabong deungon Saul di Gilgal. 5 Bak watéenyan ureuëng Filistin ka meusapat keuneuk jijak prang ureuëng Israel; bak awaknyan na 30.000 boh geuritan prang, na teuma 6.000 droe pasokan nyang jiék guda, dan tantra-tantra na teuma ban lagée anou dibinéh pasi. Awaknyan laju jipeudong khimah di Mikhmas siblaih u timu Bet-Awen. 6 Óh lheuehnyan awaknyan laju jijak seureubu si habéh teunaga ateueh ureuëng Israel, sampoe ureuëng Israel ka teuseupet. Na siteungoh nibak ureuëng-ureuëng Israel nyan jijak musöm u lam-lam guha dan dalam barieh-barieh gunong atawa didalam luengkiek-luengkiek batée kareueng, atawa didalam mon dan uruek nyang na nibak tanoh, 7 na cit teuma nyang jijak jeumeurang u meurandeh Krueng Yordan dan jitamong laju u dalam wilayah Gad dan Gilead. Saul mantong na di Gilgal, dan rakyat nyang seutôt gobnyan kayo ngon teumakot. 8 Saul geupreh Samuel na tujoh uroe treb jih, paih lagée nyang ka geupeusan lé Samuel ubak gobnyan, teuma Samuel goh cit trok u Gilgal, seudangkan Saul ka jipeuphon tinggai lé rakyat droe geuh. 9 Sababnyan gobnyan laju geupeugah ubak awaknyan, "Gataba kheueh keuno keureubeuen nyang teutot dan keureubeuen peudamé nyan." Laju gobnyan keudroe nyang peuseumah keureubeuen nyang teutot nyan. 10 Teuma banmantong gobnyan seuleusoe geupeubuet nyan, teuka kheueh ubak gobnyan Samuel. Saul laju geutiyeub gobnyan keuneuk geumumat jaroe ngon geubri saleuem, 11 geutanyong lé Samuel, "Peue nyang ka geupeubuet lé Baginda?" Geujaweueb lé Saul, "Ka deuh ulôn kalon bahwa rakyat ka jipuphon tinggai ulôn, teuma di droeneueh hai Bapak hana neuteuka bak watée nyang ka neupeuteuntéenyan, lom teuma, ureuëng Filistin ka jimeusapat di Mikhmas. 12 Teupike lé ulôn, pat tateupeue tantra Filistin hana treble jijak prang ulôn disinoe di Gilgal, padahai ulôn gohlom lôn lakée beugeugaséh lé TUHAN. Sabab nyan kheueh ulôn cok keuputosan keu lôn peuseumah keureubeuen nyan." 13 Ban geudeungoe nyan laju Samuel geupeugah ubak Saul, "Buet droeneueh nyan hai Daulat Teungku Po, lumpah bangai. Meunyoe Daulat Teuku Po neutaát ubak peue nyang ka geupeurintah lé TUHAN Allah ubak Daulat Teuku Po, ka pasti TUHAN geupeuteutab Daulat Teuku Po dan keuturonan Daulat Teuku Po jeuet keu raja ateueh ureuëng Israel siumu masa. 14 Teuma jinoenyoe keukuasaan droeneueh hai Daulat Teuku Po hana treb meuteun. Sabab Daulat Teuku Po hana neuseutôt peue nyang ka geupeurintah lé TUHAN, teuma TUHAN ka geupiléh ureuëng laén nyang geugalak lé Gobnyan keu geu beuôt jeuet keuraja ateueh umat Gobnyan." 15 Óh geupeugah meunan Samuel laju geu tinggai Gilgal dan geujak laju u dalam wilayah Benyamin di Gibea. Bak watéenyan Raja Saul geujak peureksa laju pasokan gobnyan, na jeumeulah jih kira-kira 600 droe. 16 Meunan kheueh Saul dan Yonatan aneuëk agam gobnyan, dan aneuëk buah gobnyan geupeudong khimah di Geba di wilayah Benyamin; seudangkan ureuëng Filistin jipeudong khimah di Mikhmas. 17 Bak watée nyan cit teuma na lhée boh kawan tukang meurampok bansa Filistin jijak nibak teumpat khimah-khimah Filistin keu jijak meurampok; saboh kawan jijak u arah Ofra di wilayah Syual, 18 kawan nyang keudua jijak teuma u wilayah Bet-Horon, dan nibak kawan saboh teuk laju jijak ubak bataih nyang meuhadab u Pantôn Zeboim dan padang pasi. 19 Ban saboh nanggroe Israel hana teumpeun beuso, kareuna ureuëng Filistin hana jibri idhin keu ureuëng Ibrani jipeuget peudeueng dan kapak. 20 Lényan teuma ureuëng Israel harôh jijak ubak ureuëng Filistin meunyoe jikeuneuk jak asah mata langai jih, mata cangkoi, mata pato dan arit jih; 21 upah jih na kheueh saboh keupeng péng ubit keu teu asah mata pato dan teurawot peunyeunuet keu alat seumaroih leumô, dan dua boh keupeung péng ubit keu upah teuasah mata langai dan mata cangkoi. 22 Nyang kheueh sabab jih, bak uroe teumuprang di Mikhmas nyan, hana meusidroe pi nibak rakyat Israel nyang na peudeueng atawa kapak, seulaén Saul dan Yonatan aneuëk gobnyan nyang agam. 23 Ureuëng Filistin laju jiyue keubah saboh pos teumpat jaga guna keuteu peuteuen saboh barieh gunong di Mikhmas.

1 Samuel 14

1 Bak siuroe Yonatan geupeugah ubak aneuëk muda nyang ba sinjata gobnyan, "Boh jak tajak, geutanyoe tateuka ubak pos Filistin di meurandeh jéh!" Teuma gobnyan hana geulakée idhin ubak bapak geuh. 2 Bak watéenyan Raja Saul teungoh geudong dimiyueb bak geulima di Migron, hana padubna jiôh nibak Gibea. Rakyat nyang seutôt gobnyan na kira-kira 600 droe le jih. 3 (Teungku imeum nyang ba Efod na kheueh Ahia aneuëk Ahitub, nyan kheueh syedara Ikabod aneuëk Pinehas, dan Pinehas nyan aneuëk Eli, teungku imeum TUHAN di Silo.) Meunan cit dirakyat hana jiteupeue bahwa Yonatan ka geujak nibak teumpat nyan. 4 Keu beureujang trok ubak pos Filistin nyan, Yonatan harôh geujak meulalu saboh barieh gunong nyang meuapet lé dua boh batée kareueng nyang meugigoe, nyang maséng-maséng batée kareueng nyan nan jih Bozes dan Sene. 5 Batée kareueng nyang disiblaih utara meuhadab u Mikhmas, dan nyang disiblaih u seulatan meuhadab teuma u Geba. 6 Dan geupeugah kheueh lé Yonatan ubak aneuëk muda nyan, "Jak geutanyoe tajak ubak pos ureuëng Filistin nyang kaphé laknat nyan. Mungken TUHAN geutém tulông geutanyoe. Sabab TUHAN geutem bri keugeutanyoe meunang, bah kheueh deungon ureuëng nyang jai meunan cit deungon ureuëng nyang nit." 7 Aneuëk muda nyan jijaweueb, "Peue mantong nyang keuneuk Teungku peubuet di ulôn kutem mantong." 8 "Get kheueh, meunyoe meunan," geupeugah lé Yonatan. "Bak watée tajeumeurang, geutanyoe teuma tapeuleumah droe ubak ureuëng-ureuëng Filistin nyan. 9 Meunyoe awaknyan jiyue dong geutanyoe dan tapreh sampoe awaknyan jijak ubak geutanyoe, teuma geutanyoe teutab mantong tinggai disinan bék tajeumeurang. 10 Teuma meunyoe awaknyan jiyuejak tanyoe ubak jih, meunan cit geutanyoe teuma tajak ubak awaknyan, lé sabab nyan kheueh tanda jih awaknyan ka geuseurah lé TUHAN ubak geutanyoe." 11 Bak watée gobnyan bandua jipeuleumah droe ubak ureuëng Filistin nyang na nibak pos rondo, jipeugah kheueh lé ureuëng-ureuëng Filistin nyan, "Ngieng kheueh, na ureuëng-ureuëng Ibrani nyang jiteubiet nibak uruek-uruek teumpat jimusöm!" 12 Óh lheuehnyan di ureuëng Filistin nyang teungoh meurondo nyan laju jitawök ubak Yonatan dan namiet geuhnyan, "Neu ek kheueh laju keuno mangat kamoe peuleumah sapeue-sapeue ubak gata!" Laju geupeugah teuma lé Yonatan ubak aneuëk muda nyan, "Gata seutôt kheueh laju ulôn, sabab awaknyan ka geuseurah lé TUHAN ubak Israel." 13 Sira jiseutôt lé aneuëk muda nyan Yonatan laju geumeuéue u ateueh. Bak watée Yonatan ka trok u ateueh, reubah meugageueng kheueh bubena ureuëng Filistin nyan sabab geu hawien ngon geupoh lé gobnyan, seudangkan dilikot gobnyan, aneuëk muda nyan laju jipoh maté bubena awaknyan. 14 Bak seurangan nyang phon nyan, Yonatan dan aneuëk muda nyan ka geupoh maté na kira-kira dua ploh droe di daerah nyang luwah jih na siper peuet heta. 15 Keujadian nyan ka jeuet teukeujot ubak dumna ureuëng Filistin nyang na didalam khimah-khimah meunan cit nyang na di dalam blang. Banmandum rakyat Filistin meunan cit deungon pos-pos teumpat meurundo jih jitamah lom deungon kawan ureuëng meurampok ka jeuet keuteumakot; dan bumoepi meuhayak, teuma teujadi kheueh karu ngon subra nyang hana meuteuntée le. 16 Bak watée nyan tantra Saul nyang teungoh jikawai di Gibea didalam wilayah Benyamin, deuh jikalon ureuëng-ureuëng Filistin nyan jiplueng keudeh keunoe hán meuho tujuan. 17 Dan geupeugah kheueh laju lé Saul ubak aneuëk buah gobnyan, "Gata itong kheueh laju banmandum tantra dan tapeureksa laju soe-soe nyang hana didalam kawan nyoe." Awaknyan laju jipeubuet peurintah nyan dan barô kheueh jiteupeue bahwa Yonatan dan aneuëk muda nyang gulam sinjata gobnyan nyang hanale didalam kawan nyan. 18 "Neuba laju keuno efod nyan," geupeugah lé Saul ubak Teungku Imeum Ahia. (Bak uroenyan Ahia geuba efod nyan dikeue ureuëng Israel.) 19 Bak watée Saul teungoh geupeugah haba deungon teungku imeum nyan, didalam khimah ureuëng Filistin ka meutamah karu nyang hana meuteuntée le, akhé jih Saul geupeugah ubak teungku imeum nyan, "Geutanyoe hana watée le talakée peutunyok ubak TUHAN" 20 Laju Saul dan banmandum ureuëng-ureuëng gobnyan deungon seureuntak geumaju u mideuen prang. Disinan deuh geukalon na karu ban salamle lamkawan ureuëng-ureuëng Filistin; awaknyan saléng jiserang dan saléng jimupoh sabe keudroe-droe. 21 Ureuëng-ureuëng Ibrani nyang na tinggai didalam daerah ureuëng Filistin, dan nyang ka jeuet keusipa-i awaknyan, laju meubalek haluan dan jimeusaho laju deungon Saul dan Yonatan. 22 Meunan cit deungon ureuëng-ureuëng Israel nyang mantong jimusöm di bukét-bukét Efraim, ban jideungoe bahwa ureuëng Filistin ka jiplueng, awaknyan pi laju jipeusaho droe deungon jijak prang bubena ureuëng Filistin nyan. 23 Awaknyan jimuprang deungon lumpah gura bansipanyang rot sampoe trok u Bet-Awen. TUHAN ka geupeuselamat Israel nibak uroenyan. 24 Bak uroenyan bubena ureuëng Israel dalam keuadaan leumoh sabab kadeuk that, sabab Saul ka geumeusumpah lagéenyoe, "Teukutok kheueh ureuëng nyang jimakheun peue mantong nibak uroenyoe sigohlom ulôn balaih dam ateueh musoh ulôn." Lé sababnyan kheueh hana meusidroe pih nyang na pajohbu nibak uroenyan. 25 Óh lheuehnyan trok kheueh laju awaknyan mandum bak saboh uteuen dan disinan laju meuteumé meulisan nyang lumpah that jai, 26 teuma hana meusidroe pi nibak awaknyan nyang na jijieb meulisan nyan, sabab awaknyan teumakot bak sumpah nyang ka geupeugah lé Saul. 27 Teuma Yonatan hana geuteupeu bahwa bapak gobnyan ka geuancam rakyat deungon sumpah nyan; sababnyan laju geusunyueng tungkat nyang na nibak jaroe gobnyan, dan tungkatnyan laju geutôb ateueh eumpung unoe nyan, lheuehnyan geucok meulisan nyan dan geujieb teuma. Óh lheuehnyan gobnyan laju ka teurasa puleueh graih dan ka teuma meurasa mangat tuboh geuh lagée ban nyang ka. 28 Óh lheuehnyan na sidroe lamkawan tantra nyan jipeugah ubak gobnyan, "Kamoenyoe banmandum ka hana meudaya sabab ka graih ngon deuk. Teuma bapak Teungku ka geuancam kamoe deungon sumpah, geupeugah, 'Teukutok kheueh ureuëng nyang jimakheun nibak uroenyoe.' " 29 Geujaweueb lé Yonatan, "Nyang lagéenyan ka hana patot geupeubuet lé bapak ulôn keu bansa geutanyoe! Ngieng kheueh, keuadaan ulôn jinoenyoe jiôh leubeh gét óh kalheueh ulôn jieb bacut meulisan nyan. 30 Seukira jih rakyat geubri idhin nibak uroenyoe teupajoh peunajoh nyang ka teureupah bak watée teupeutaloe musoh, ka pasti leubeh le lom ureuëng Filistin nyang bisa tanyoe poh maté!" 31 Bak uroenyan ureuëng Israel ka jipeutaloe ureuëng Filistin bak watée jimuprang bansipanyang rot ueh raya phon di Mikhmas laju trok u Ayalon. Teuma óh ka lheuehnyan awaknyan ka leumoh that-that, 32 akhé jih awaknyan laju jimeureubot jicok hareuta nyang teureupah lam jaroe musoh; awaknyan laju jicok bubiri dan leumô laju jisie nibak teumpat nyan cit teuma, dan lansong jipajoh uengkoet sie nyang mantong meudarah-darah nyan. 33 Hainyan laju teubri tée ubak Saul lagéenyoe, "Amphon deulat Po, rakyat ka meudesya ubak TUHAN sabab ka jipajoh uengkoet sie nyang mantong meudarah." "Gatanyoe banmandum peukhianat!" geupeugah lé Saul sira geukliek. "Tagule laju sianeuk batée raya keunoe bak ulôn." 34 Óh lheuehnyan geupeugah lom ubak ureuëng nyang ba haba nyan, "Gata jak kheueh beumeutabu lamkawan rakyat dan tayue kheueh awaknyan jiba leumô ngon bubiri jihnyan keunoe, mangat teusie di ateueh batéenyoe dan ta makheun teuma disinoe; deungon na lagéenyan awaknyan hana jipajoh uengkoet sie deungon darah jih dan hana teuma meudesya le ubak TUHAN." Bak malam nyan cit teuma banmandum rakyat laju jiba beulatang nyang jireupah didalam prang nyan dan laju jisie disinan. 35 Lé Saul laju geupeudong miseubah keu TUHAN; nyang kheueh miseubah nyang phon that geupeudong. 36 Óh lheuehnyan geupeugah kheueh lé Saul ubak aneuëk buah gobnyan, "Jak kheueh geutanyoe tajak prang ureuëng Filistin bak malam nyoe cit teuma laju ta rampok awaknyan sampoe án bungoh uroe dan tapoh maté teuma awaknyan banmandum." Awaknyan jijaweueb, "Bah neupeubuet lé Teungku Amphon peue nyang Teungku Amphon ngieng nyan gét." Teuma di teungku imeum geupeugah, "Bohjak kheueh geutanyoe talakée peutunyok leubeh ilée ubak Po teu Allah." 37 Dan geutanyong kheueh lé Saul ubak Po teu Allah, "Peu kheueh jeuet ulôn prang ureuëng Filistin ya Allah? Peu kheueh awaknyan TUHAN jok ubak jaroe ureuëng Israel?" Teuma nibak uroenyan Po teu Allah hana geujaweueb. 38 Sababnyan geupeugah kheueh lé Saul ubak peumimpén rakyat, "Tajak kheueh keunoe banmandum dan desya peu kheueh nyang ka gata peubuet nibak uroenyoe. 39 Ulôn meujanji deumi TUHAN nyang udeb, nyang ka geubri meunang keu ureuëng Israel, bahwa ureuëng nyang meusalah teuma geuhuköm maté, bahpi jihnyan aneuëk agam ulôn si Yonatan." Teuma hana meusidroe pih nyang jijeuet jijaweueb haba nyan. 40 Dan geupeugah kheueh lé Saul ubak banmandum rakyat Israel, "Gata banmandum tadong disiblaih nyoe." Jaweueb awaknyan, "Peue nyang keuneuk neupeubuet hai Teungku Po nyang ka neukalon nyan gét." 41 Óh lheuehnyan geumeudoa kheueh Saul ubak TUHAN, "Ya TUHAN, Allah ureuëng Israel, pakon nibak uroenyoe Droeneueh hana neujaweueb ulôn? TUHAN, neujaweueb kheueh ulôn meulalu batée-batée nyang suci nyoe. Meunyoe salah nyan na nibak ulôn atawa Yonatan, neujaweueb kheueh deungon batée Urim, teuma meunyoe salah nyan na nibak umat Droeneueh Israel, neujaweueb kheueh deungon batée Tumim." Dan geujaweueb kheueh lé TUHAN geutunyok ubak Yonatan dan Saul; deungon lagéenyan rakyat ka teujaweueb hana meusalah. 42 Laju geupeugah kheueh lom lé Saul, "Ya TUHAN, teuntée kheueh ulôn ngon Yonatan." Teuma Yonatan kheueh nyang geupeugah meusalah. 43 Laju geupeugah kheueh lé Saul ubak aneuëk geuh Yonatan, "Peue nyang ka gata peubuet hai aneuëk meutuah?" Geujaweueb lé Yonatan, "Ulôn ka ulôn cok bacut meulisan deungon ujong tungkat ulôn; kareuna nyan, ulôn kasiab keu maté." 44 Geupeugah lé Saul ubak aneuëk geuh Yonatan, "Seumoga ulôn geuhuköm lé Po teu Allah meunyoe gata hana ulôn huköm maté, Yonatan!" 45 Teuma rakyat geupeugah bak Saul, "Peu kheueh harôh Yonatan nyan teuhuköm maté? Hana! Kamoe meujanji deumi TUHAN nyang udeb, bahwa Yonatan hana jeuet gadôh meu sion ôk pih nibak ulée gobnyan. Kareuna deungon tulông TUHAN kheueh, gobnyan ka meuteumé meunang nibak uroe nyoe." Meunan kheueh Yonatan jipeuseulamat lé rakyat nibak teuhuköm maté. 46 Óh ka lheueh nyan ureuëng Filistin laju geugisa ubak wilayah droe jih keudroe sabab Saul hanale geutiyeub awaknyan. 47 Óh ka lheueh Saul jeuet keu raja di nanggroe Israel, gobnyan laju geupeubeudôh prang dipat mantong geujak lawan bubena musoh Israel, ngon ureuëng Moab geumuprang, ngon ureuëng Amon, dan meunan cit deungon ureuëng Edom banmandum ka geuprang, na teuma raja-raja di nanggroe Zoba, dan ureuëng Filistin. Dipat mantong gobnyan geupeubeudôh prang, sabe gobnyan meuteumé meunang. 48 Gobnyan geumuprang deungon lumpah hibat beuhe gagah beurani dan ka teuma geupeutaloe ureuëng Amalek, meunan cit geupeubeubaih Israel nibak keukuasaan ureuëng peurampok. 49 Aneuëk-aneuëk agam Saul na kheueh Yonatan, Yiswi dan Malkisua. Aneuëk gobnyan nyang inong geuboh nan Merab, dan nyang keudua geuboh nan Mikhal. 50 Peurumoh gobnyan nan jih Ahinoam, aneuëk Ahimaas; keu panglima tantra gobnyan na kheueh Abner aneuëk Ner, na kheueh apha Saul. 51 Kish bapak Saul, dan Ner bapak Abner, na kheueh aneuëk-aneuëk Abiel. 52 Siumu udeb gobnyan Saul geumuprang sabe deungon keubiet hebat geulawan ureuëng Filistin. Sabab nyan, meunyoe Saul geukalon ureuëng nyang teuga atawa beuhe, gobnyan laju geucok jeuet keu anggota tantra geuh.

1 Samuel 15

1 Bak siuroe Samuel geupeugah ubak Saul, "TUHAN kheueh nyang yue ubak ulôn mangat lôn jak baiát Teungku Po jeuet keu raja ateueh umat Gobnyan Israel. Sababnyan, bah kheueh Teungku Po neudeungoe peurintah TUHAN Nyang Mahakuasa. 2 Gobnyan teuma geuhuköm ureuëng Amalek, kareuna indatu awaknyan jilawan ureuëng Israel bak watée ureuëng Israel teuka nibak nanggroe Meusé. 3 Lé sababnyan, tajak kheueh laju taprang ureuëng Amalek gata peuhanco peue mantong nyang na hareuta milék jihnyan. Bék tatinggai meusapeue pih, tapoh maté banmandum ureuëng agam, ureuëng inong, aneuëk miet dan aneuëk manyak nyang ban lahé; meunan cit deungon leumô, bubiri, unta dan keuleudée jih." 4 Laju Saul geupeusiab tantra gobnyan dan geuitong awaknyan di Telaim; na 200.000 droe sidadu nibak Israel dan 10.000 droe teuma teuka nibak nanggroe Yehuda. 5 Óh lheuehnyan laju geujak Saul meusigoe-sigoe deungon aneuëk buah gobnyan u banda Amalek dan laju geu hampeueng musoh didalam krueng nyang teungoh tho. 6 Meunan cit gobnyan geukirém peusan ubak ureuëng Keni meunoe geupeugah, "Gatajak kheueh laju dan tatinggai ureuëng Amalek, mangat gata bék rhoh ulôn sampoh sampoe habéh lagée awaknyan, sabab yoh watée ilée indatu gata ka geupeuleumah sikeub meusabat ubak ureuëng Israel bak watée ureuëng Israel teuka nibak nanggroe Meusé." Dan jijak kheueh laju ureuëng Keni nibak teumpat ureuëng Amalek nyan. 7 Óh ka lheuehnyan Saul laju geumeu heungko deungon ureuëng Amalek dan di ureuëng Amalek nyan taloe bansipanyang rot ueh raya phon di Hawila trok u Syur di siblaih u timu nanggroe Meusé. 8 Banmandum rakyat dan sipa-i Amalek nyan habéh geupoh maté lé Saul. Teuma raja ureuëng Amalek nyang nan jih Agag geudrob udeb-udeb dan geupeubiyeu udeb lé Saul dan tantra gobnyan, meunan cit deungon bubiri dan leumô nyang paleng diet, aneuëk leumô meunan cit ngon aneuëk bubiri nyang teumbon-teumbon, dan mandum peue-peue mantong nyang paleng meuyuem; teuma beulatang peulara nyang hana meuguna dan hana meuyuem nyang hana geupoh maté. 10 TUHAN meufeureuman lom ubak Samuel, 11 "Ulôn meunyeusai ka Ulôn baiát Saul jeuet keu raja, sabab jihnyan ka jipaleng nibak Ulôn, dan hana jipeubuet peue nyang ka Ulôn peurintah." Samuel lumpah that seudeh, simalam beungoh gobnyan meuapoh apah ubak TUHAN. 12 Óh singoh uroe, ban suboh that, Samuel geubeudôh laju geujak keuneuk meurumpok deungon Saul. Teuma lé ureuëng nyang na disinan jibri tée bahwa Saul ka geujak u banda Karmel geujak peudong batée peuingat keudroe gobnyan disinan, óh lheuehnyan geujak laju u Gilgal. 13 Bak watée Samuel ka meurumpok deungon Saul, geupeugah laju lé Saul ubak Samuel, "Seumoga TUHAN geubri beureukat keu Bapak! Ulôn ka ulôn peubuet peurintah TUHAN." 14 Teuma Samuel geutanyong, "Meunyoe meunan, pakon ulôn deungoe na su bubiri nyang meu mbék-mbék dan su leumô meuleunguih?" 15 Geujaweueb lé Saul, "Banmandum beulatang nyan na kheueh nyang teureupah nibak ureuëng Amalek. Bubiri dan leumô nyang paleng gét ka jicok lé rakyat geutanyoe keu jipeuseumah sibagoe keureubeuen keu TUHAN Po teu Allah Bapak. Teuma nyang laén nyan ka habéh kamoe peubinasa banmandum." 16 Ban geudeungoe nyang lagéenyan Samuel laju geupeugah, "Neupreh sikeujab, ulôn teuma lôn bri tée peue nyang ka geupeugah lé Po teu Allah ubak ulôn malam beuklam." "Neupeugah kheueh laju," kheun Saul. 17 Geupeugah lé Samuel, "Bukon kheueh Teungku Amphon ka jeuet keu peumimpén u ateueh sukée-sukée nyang na di Israel, bahpih Teungku Amphon neu anggab droe awaknyan hana peunteng? Teungku Amphon ka geupiléh lé TUHAN jeuet keu raja ateueh bansa Israel, 18 meunan cit teuma ubak Teungku Amphon lé TUHAN ka geuyue peubinasa bube na ureuëng Amalek nyang jeuhet nyan. Teungku Amphon geuyue muprang neulawan awaknyan sampoe awaknyan habéh banmandum binasa. 19 Pakon hai Teungku Po hana neu taát ubak peue nyang ka geupeurintah lé TUHAN nyan? Pakon Teungku Po meuseunoh-seunoh neureubot hareuta nyang teurampah didalam prang nyan, dan deungon na neupubuet nyang lagée nyan Teungku Amphon ka neupeujeuet até TUHAN beungeuh keu Amphon?" 20 Geujaweueb lé Saul, "Ulôn ka ulôn taát ubak peurintah TUHAN, dan lôn jak muprang sisuai lagée nyang ka geuyue lé Gobnyan ubak ulôn; mangat jeuet raja Amalek ulôn drob dan banmandum ureuëng Amalek ka lheueh ulôn poh maté. 21 Teuma lé aneuëk buah ulôn hana jipoh banmandum beulatang peulara; awaknyan ka jipiléh bubiri dan leumô nyang paleng gét nibak hase rampasan nyan keu jipeuseumah di Gilgal sibagoe keureubeuen keu TUHAN Po teu Allah Bapa." 22 Teuma geupeugah lé Samuel, "Nyang toh nyang paleng geugalak lé TUHAN, keutaátan atawa keureubeuen peuseumahan? Taát ubak TUHAN leubeh gét nibak keureubeuen nyang teupeuseumah ubak Gobnyan. Patuh leubeh gét nibak leumak bubiri. 23 Sabab ureuëng nyang ji-iengkeue ubak TUHAN saban jeuhet jih lagée ureuëng nyang jipeubuet sihé, dan ureuëng nyang até jih sombong saban teuma lagée ureuëng nyang jiseumah dewa. Sabab Teungku Amphon ka neulawan peurintah TUHAN, teuma TUHAN pih hana geuaku le Teungku Amphon sibagoe raja." 24 Ban geudeungoe nyan Saul laju geumeungaku ubak Samuel, sira geupeugah, "Beutôi ulôn ka meudesya. Ulôn ka ulôn ieungkeue peurintah TUHAN dan hana lôn pakoe nyang Bapak tunyok. Ulôn teumakot ubak aneuëk buah ulôn nyang kheueh jeuet ulôn peutrok peue-peue nyang jilakée lé awaknyan. 25 Teuma bak saát nyoe, ulôn lakée ubak Bapak, neupeu amphon kheueh desya ulôn dan neugisa kheueh meusigoe ngon ulôn u Gilgal, mangat ulôn hase meu iébadat ubak TUHAN." 26 Teuma geujaweueb lé Samuel, "Ulôn hán ulôn tem meugisa meusigoe deungon Teungku Amphon. Teungku Amphon ka neulawan peurintah TUHAN, dan jinoenyoe Gobnyan hana geuaku le Teungku Amphon sibagoe raja ateueh ureuëng Israel." 27 Laju Samuel geumeu paleng keuneuk geujak, teuma Saul laju geutam gobnyan sira geumat ubak bajée jubah gobnyan, sampoe bajée jubah Samuel nyan teupriek. 28 Dan geupeugah kheueh lom lé Samuel ubak raja Saul nyan, "Bak uroenyoe TUHAN ka geupriek keurajeuen Israel nibak Teungku Amphon, dan geubrinyan keu ureuëng laén nyang leubeh gét nibak Teungku Amphon. 29 Nyang mulia Po teu Allah Israel hana meusulet dan hana teuma geu ubah peundirian Gobnyan, sabab Gobnyan bukon manusia." 30 Geujaweueb lé Saul, "Ulôn ka meudesya, teuma neu tulông kheueh ulôn hai Bapak, neuwoe kheueh meusigoe-sigoe deungon ulôn mangat ulôn hase meu iébadat ubak TUHAN Po teu Allah Bapak. Deungon lagéenyan Bapak neuhoreumat ulôn dikeue dumna peumimpén bansa ulôn dan dikeue banmandum Israel." 31 Dan geugisa kheueh Samuel meusigoe-sigoe deungon gobnyan u Gilgal, dan Raja Saul pih laju geumeu iébadat ubak TUHAN. 32 Óh lheueh nyan Samuel laju geupeurintah, "Neuba laju keunoe raja Agag nyan," Agag laju jijak ubak gobnyan, deungon peunoh peungharapan karena gobnyan jipike, "Bahya mawôt ka lewat." 33 Lé Samuel geupeugah, "Lagée peudeueng gata sampoe le that mak-mak nyang ka gadôh aneuëk gobnyan, meunan cit teuma mak gata teuma gadôh aneuëk gobnyan." Laju Samuel geucang-cang Agag dikeue miseubah di Gilgal. 34 Óh ka lheueh geupeubuet nyan Samuel laju geujak u Rama, dan Raja Saul laju geuwoe u rumoh gobnyan di Gibea. 35 Sampoe gobnyan wafeuet, Samuel hanale meurumpok deungon Raja Saul. Teuma Samuel that-that seudeh sabab TUHAN ka meunyeusai ka geu baiát Saul jeuet keu raja Israel.

1 Samuel 16

1 Hana padub na treb teuma óh lheuehnyan TUHAN meufeureuman ubak Samuel, "Padub na treb teuk gata meuseudeh até sabab si Saul nyan? Bukon kheueh jihnyan ka hanale teu aku sibagoe raja Israel? Jinoenyoe tacok kheueh laju minyéuk zaiton dan tajak kheueh laju u Betlehem, ubak sidroe ureuëng nyang nan jih Isai, kareuna sidroe nibak aneuëk-aneuëk gobnyan ka Ulôn piléh jeuet keu raja." 2 Teuma Samuel geutanyong, "Pakriban hainyan ulôn peubuet? Meunyoe hainyan jideungoe lé Saul, ka pasti ulôn jipoh maté!" Geujaweueb lé TUHAN, "Taba kheueh laju saboh leumô nyang mantong muda, dan tapeugah kheueh laju ubak rakyat bahwa gata tajak keudeh keu tajak peuseumah keureubeuen ubak TUHAN. 3 Laju ta undang kheueh Isai ubak upacara keureubeuen nyan. Singoh Ulôn britée peue nyang harôh gata peubuet. Ureuëng nyang Ulôn tunyok ubak gata, harôh gata baiát jeuet keu raja." 4 Samuel laju geupeubuet lagée nyang ka geupeurintah lé TUHAN nyan. Bak watée gobnyan ka trok u Betlehem, bubena peumimpén banda laju jisambot gobnyan deungon rasa teukeujot dan jitanyong, "Peu kheueh kunjongan Bapak nyoe neuba seulamat?" 5 Geujaweueb lé Samuel, "Nyoe, beutôi that. Ulôn teuka keu lôn jak peuseumah keureubeuen ubak TUHAN. Dan tapeu suci kheueh laju droe gata mangat gata pih hase gata seutôt sajan bak upacara keureubeuen nyan." Meunan cit deungon Isai dan aneuëk-aneuëk gobnyan geuyue laju jak peusuci droe gobnyan maséng-maséng, dan laju geu undang ubak teumpat upacaranyan. 6 Bak watée awaknyan ka meusapat dan Samuel geukalon Eliab aneuëk Isai, laju teupike dalam até geuh, "Pasti nyang nyoe nyang ka geupiléh lé TUHAN." 7 Teuma TUHAN geupeugah ubak Samuel, "Bék kheueh gata teupeungaroh ngon rupa jih nyang jroh dan panyang teuma badan jih; bukon jihnyan nyang Ulôn piléh. Ulôn hana Ulôn ponten lagée manusia boh ponten. Manusia nyang jikalon hi, teuma Ulôn nyang Ulôn kalon na kheueh até." 8 Óh lheuehnyan Isai laju geuhôi Abinadab, aneuëk gobnyan, laju geuyue jak meuhadab ubak Samuel. Teuma Samuel geupeugah, "Bukon jihnyoe nyang geupiléh lé TUHAN." 9 Meunan cit geuyue maju teuma si Syama lé Isai, teuma nyan pih geupeugah lé Samuel, "Meunan cit jihnyoe bukon nyang geupiléh lé TUHAN." 10 Meunan kheueh cara jih Isai geuyuejak bantujoh aneuëk gobnyan meuturot-turot meuhadab ubak Samuel, teuma Samuel geupeugah ubak gobnyan, "Awaknyan hana geupiléh lé TUHAN." 11 Laju geutanyong kheueh lé Samuel ubak geuh nyan, "Peu kheueh nyoe mantong aneuëk agam gata?" Geujaweueb lé Isai, "mantong na sidroe teuk nyang tulot, teuma aneuëk nyan teungoh jijak meurabe bubiri." Samuel geupeugah, "Neuyue kheueh awaknyan jijak hôi aneuëk nyan, sabab geutanyoe hana lom tamakheun sigohlom aneuëk nyan teuka." 12 Laju Isai geuyue hôi aneuëk nyan. Teunyata aneuëk nyan sidroe peumuda nyang lumpah tari lom seuhat, dan mata jih pih lagak. Laju meufeureuman kheueh TUHAN ubak Samuel, "Nyoe kheueh jihnyan, gata baiát kheueh aneuëk nyan!" 13 Deungon bagaih that Samuel geucok minyéuk zaiton dan laju geubaiát Nabi Daud deungon cara geuboh minyéuk dikeue banmandum aduen-aduen gobnyan. Bak saát nyan cit teuma Nabi Daud ka geukuasa lé Roh TUHAN. Phon nibak uroenyan dan seulanjut jih Roh TUHAN na meusajan gobnyan. Óh lheuehnyan Samuel laju geujakwoe u rumoh gobnyan di Rama. 14 Saul ka geutinggai lé Roh TUHAN, dan jinoenyoe ka jiseksa lé roh jeuhet nyang geu kirém lé TUHAN. 15 Lé sabab nyan bubena namiet Saul laju jipeugah ubak gobnyan, "Kamoe ka kamoe teupeue bahwa roh jeuhet nyang geu kirém lé TUHAN nyang jiseksa Teungku raja. 16 Meunyoe Teungku Amphon situju, kamoe meuseudia kamoe jakmita sidroe ureuëng nyang carông jipeu meuén kecapi. Pajan mantong Teungku Amphon jiseksa lé roh jeuhet, ureuëng nyan hase jipeumeuén keucapi jih, dan di Teungku Amphon pih teurasa teunang lom teuma." 17 Laju Saul geupeutreun peurintah ubak awaknyan, "Tajak mita kheueh laju nyang carông jimeuén musik, dan taba kheueh laju ureuëng nyan keunoe." 18 Ban jideungoe haba nyan sidroe nibak namiet gobnyan jipeugah, "Isai peunduduek banda Betlehem na sidroe aneuëk agam nyang that carông ji meuén musik. Gobnyan ureuëng beuhe dan sidroe tantra nyang paleng gét. Lom teuma gobnyan lagak ngon lumpah carông geu meututoe haba, dan TUHAN sabe geu tulông gobnyan." 19 Teuma Saul laju geukirém utosan ubak Isai sira jiba haba nyang lagée nyoe, "Gatayue kheueh aneuëk gata Nabi Daud, nyang rabé bubiri-bubiri gata nyan jimeuhadab ubak ulôn." 20 Óh lheuehnyan Isai geupeusiab laju saboh keuleudée, di ateueh keuleudéenyan geupeudieng teuma saboh aneuëk kaméng, ruti dan baluem kulét nyang peunoh meuaso deungon ié anggô. Banmandum nyan geubri ubak Nabi Daud mangat geupeuseumah ubak Raja Saul. 21 Meunan kheueh cara jih Nabi Daud geujak ubak Raja Saul dan jeuet keu peulayan gobnyan. Gobnyan gét that geugaséh lé Raja Saul dan geuyue teuma Nabi Daud nyan ureuëng ba sinjata gobnyan. 22 Óh lheuehnyan Raja Saul geukirém haba ubak Isai, "Ulôn galak keu Nabi Daud. Tapeu idhin kheueh mangat jihnyoe teutab tinggai disinoe sira jipeusaneut ulôn." 23 Phon watée nyan, pajan mantong Saul jitamong lé roh jeuhet, Nabi Daud laju geucok keucapi gobnyan dan laju teuma geupeumeuén alat nyan. Bak watée nyan cit teuma Raja Saul ka meurasa leuga lom ngon teunang lagée ban nyang ka, sabab roh jeuhet ka jiteubiet lam badan gobnyan.

1 Samuel 17

1 Bak saboh watée ureuëng Filistin jikrah tantra jih keu jimaju lam mideuen prang. Awaknyan jiato baresan di banda Sokho, lam wilayah Yehuda dan jipeudong khimah-khimah awaknyan lamkawan Sokho dan Azeka, rab ngon Efes-Damim. 2 Saul dan ureuëng-ureuëng Israel na cit meusapat dan jipeudong khimah di Pantôn Ela; awaknyan meusiab-siab keu jihadang jiseurang lé ureuëng Filistin. 3 Meunan kheueh, baresan ureuëng Filistin laju jidong bak saboh bukét dan baresan ureuëng Israel jidong teuma bak bukét nyang laén, dan nibak teungoh-teungoh awaknyan na saboh pantôn. 4 Dan na sidroe nyang carông that bak meulo nan jih Goliat, asai jih nibak banda Gat, laju jiteubiet nibak khimah-khimah ureuëng Filistin keu jijak lawan ureuëng Israel. Manyang jihnyan na kira-kira lhée metée, 5 dan jihnyan jingui tupi teumaga dan bajée prang jih teumaga cit nyang geuhon jih na kira-kira limong ploh tujoh kilo. 6 Gaki jih pih jitôb ngon sinutôb gako nyang teupeuget nibak teumaga, dan bak bahô jih jigulam teuma leumbeng teumaga. 7 Gô kapak jih na bube kayée ngon peuget teumpeuen ija, dan mata kapak jih na kira-kira tujoh kilo geuhon jih. Na sidroe sidadu jijak dikeue jih sira jiba peurisée jih. 8 Goliat jipiôh dan laju jitawôk ubak tantra Israel, "Peue nyang teungoh gata peubuet disinan? Peu kheueh keuneuk muprang? Ulôn sidroe Filistin, he hamba-hamba Saul! Piléh kheueh sidroe lamkawan gata nyang jijeuet treun keujijak lawan ulôn. 9 Meunyoe nibak prang meutunang nyan, ulôn nyang maté, kamoe rila jeuet keu namiet gata, teuma meunyoe ulôn nyang meunang dan nyang poh maté jih nyan, gata kheueh nyang harôh jeuet keu namiet kamoe. 10 Jinoenyoe cit teuma, ulôn lawan tantra Israel; piléh kheueh sidroe mangat meutunang jilawan ulôn!" 11 Watée Saul dan ureuëng-ureuëng gobnyan jideungoe hainyan, laju teukeujôt awaknyan dan laju jiteuka teumakot. 12 Nabi Daud na kheueh aneuëk Isai ureuëng Efrata, nibak Betlehem di Yehuda. Isai na lapan droe aneuëk agam, dan nibak jamén peumeurintahan Saul, Isai ka tuha that-that. 13 Ban lhée droe aneuëk Isai nyang paleng tuha ka jijak seutôt Saul keujijak muprang. Nyang tuha nan jih Eliab, lumboi dua Abinadab, dan nyang keu lhée Syama. 14 Nabi Daud aneuëk tulot. Watée ban lhée droe aduen geuh nyang leubeh tuha nyan teungoh jimuprang jiseutôt Saul, 15 Nabi Daud kayem that geutinggai Saul dan geuwoe u Betlehem keu geujak rabé bubiri ayah geuh. 16 Treb jih na peuet ploh uroe, tieb-tieb beungoh dan seupôt, Goliat sabe jipeurab ubak baresan ureuëng Israel dan jisangak ateueh awaknyan. 17 Bak siuroe Isai geupeugah ubak Nabi Daud, "Cok kheueh siploh kilo gram jagong teutot ngon siploh boh ruti nyoe, dan jak intat kheueh laju ubak aduen-aduen gata nyang na nibak khimah-khimah tantra. 18 Meunan cit ba kheueh teuma siploh boh keuju keu keumandan pasokan. Tanyong kheueh pakriban keuadaan aduen-aduen gata, dan puwoe kheueh bukeuti keu ulôn bahwa gata ka meurumpok ngon awaknyan dan awaknyan lam keuadaan seulamat. 19 Awaknyan na di Pantôn Ela meusajan ngon Raja Saul, dan mandum ureuëng Israel teungoh meuheungkoe jilawan ureuëng Filistin." 20 Óh singoh beungoh nyan, bansuboh that-that, Nabi Daud geubeudôh laju geumeukeumah. Bubiri gobnyan geutinggai bak sidroe ureuëng jaga, lheueh nyan gobnyan laju geucok barang meuneuba geuh dan laju geujak, paih lagée nyang geupeurintah lé ureuëng syiek geuh. Gobnyan trok bak khimah-khimah nyan watée ureuëng Israel teungoh jijak u mideuen ngaza sira jidumpek surak lam mideuen prang. 21 Tantra Filistin dan tantra Israel ka meuhadab-hadab keue dan ka siab-siab keuneuk meuheungko. 22 Nabi Daud laju geukeubah barang-barang nyang geuba nyan ubak ureuëng nyang keumiet khimah-khimah tantra, dan laju geuplueng u mideuen keu geujak meurumpok ngon aduen-aduen geuh. 23 Teuma teungoh gobnyan geupeugah haba ngon awaknyan, Goliat jimaju ukeue laju jisangak ateueh ureuëng Israel, lagée nyang ka lazem jipeubuet. Nabi Daud pi geudeungoe haba jih nyang meulawan nyan. 24 Bagaih that watée ureuëng Israel jikalon Goliat, awaknyan jiplueng sabab teumakot. 25 "Ngieng kheueh awaknyan!" jikheun lé awaknyan seusabe keudroe jih. "Deungoe kheueh haba jih nyang teumakot nyan! Saul raja geutanyoe ka geumeujanji bahwa soe mantong nyang hase jipoh maté Goliat, geujôk hadiah nyang paleng rayeuk. Meunan cit lé raja geupeukawen ureuëng nyan ngon putroe gobnyan. Dan keuluwarga ureuëng syiek ureuëng nyan geupeubeubaih nibak cukée." 26 Laju geupeugah le Nabi Daud, "Biet beuhé that ureuëng Filistin si kaphé nyan jilawan tantra Allah nyang udeb!" Óh lheueh nyan gobnyan geutanyong ubak sidroe lamkawan tantra nyan, "Peu kheueh nyang hase geubri keu ureuëng nyang hase jipoh maté ureuëng Filistin nyan dan teusampoh jihina nibak Israel?" 27 Rakyat laju jipeugah ubak gobnyan peue nyang ka geupeujanji lé raja. 28 Eliab aduen Nabi Daud nyang tuha jideungoe Nabi Daud teungoh meututoe ngon tantra-tantra nyan. Gobnyan jiteuka beungéh ubak Nabi Daud dan laju geupeugah, "Peubuet kah jak keunoe? Soe nyang kah yue rabé bubiri-bubiri kah nyang na padub boh nyan dipadang pasi? Ulôn kuteupeu kahnyoe meulagak beuhe; kahjak keunoe keuneuk kah ngieng muprang, nyoe peue kon?" 29 Geujaweueb Nabi Daud, "Peue salah lôn, ulôn mantong teumanyong!" 30 Laju gobnyan geujak dan geutanyong hai nyan cit ubak tantra-tantra nyang laén; dan gobnyan meuteume jaweueb lagée nyan cit teuma. 31 Teuma na meupadub droe nyang jideungoe haba Nabi Daud laju jijak peugah ubak Raja Saul, le sabab nyan, Nabi Daud geutawok keu geujak meuhadab. 32 Gaupeugah lé Nabi Daud ubak Saul, "Amphon Teungku Po, tanyoe hana peureulée tatakot keu ureuëng Filistin nyan! Ulôn kutém kulawan jihnyan." 33 "Bék," jaweueb Saul. "Pakriban mungken gata meutunang talawan jihnyan? Gata mantong putik that, seudangkan jihnyan ka lazem that jimuprang yoh muda kon." 34 Teuma Nabi Daud geupeugah, "Teungku Po, ulôn hase lôn rabe bubiri ureuëng syiek lôn. Meunyoe singa atawa cagée nyang keuneuk teugom bubiri, 35 beulatang juah nyan ulôn tiyeueb dan ulôn poh, dan bubiri nyan ulôn peuseulamat. Dan meunyoe singa atawa cagée nyan jilawan ulôn, beulatang nyan ulôn mat takue jih, laju ulôn poh sampoe maté. 36 Ulôn ka lheueh lôn poh maté singa meunan cit cagée, dan ureuëng Filistin nyang kaphé nyan teuma saban cit lagée beulatang-beulatang nyan, sabab jihnyan jijeuet hina tantra Po teu Allah nyang udeb. 37 TUHAN ka geupeuseulamat ulôn nibak singa dan cagée, Gobnyan pi geupeuseulamat ulôn nibak ureuëng Filistin nyan." Laju geupeugah lé Saul ubak gobnyan, "Get kheueh, seumoga TUHAN geutulông gata." 38 Saul laju geujôk peukayan prang gobnyan, na kheueh saboh bajée beusoe ubak Nabi Daud dan Nabi Daud laju geungui peukayan nyan. Lheueh nyan Raja Saul geupeuseuôn tauma tupi teumaga ateueh ulée Nabi Daud. 39 Lheueh nyan Nabi Daud laju geuikat peudeueng Saul bak bajée beusoe nyan lheueh nyan laju geu ujoe jak, teuma hana jeuet geujak, sabab Nabi Daud hántom lazem geungui peukayan prang. "Ulôn tuan hana hase lôn jak ngon peukayan nyoe," kheun Nabi Daud ubak Saul. "Ulôn hántom lôn ngui nyang lagéenyoe bagoe." Lheuehnyan banmandum peukayan prang nyan geusuet lom teuma. 40 Lheuehnyan gobnyan laju geucok tungkat meurabé geuh, dan geupiléh limong neuek batée nyang bulat lam krueng, batée nyan laju geupeutamong lam baluem geuh. Deungon ali-ali ka siab bak jaroe geuh, lheueh nyan laju geujak ubak Goliat. 41 Hana padub na treb teuma óh lheueh nyan Goliat nyang jijak dikeue lé ureuëng nyang ba peurisée jihnyan laju jipeurab ubak Nabi Daud. 42 Teuma watée jihnyan jikalon Nabi Daud sira jingieng ateueh gobnyan, Goliat laju jikem sira jihina sabab jikalon Nabi Daud mantong putik that dan gagah lagoena. 43 Jipeugah le Goliat ubak Nabi Daud, "Keupeue tungkat nyan? Peue kah anggab ulôn nyoe asée?" Laju Nabi Daud jikutok deumi dewa-dewa jih. 44 Lom teuma jihnyan jilawan Nabi Daud sira jipeugah, "Keunoe, majo laju! Jeuet lôn jôk tuboh gata keu cicém dan beulatang jeuet jipajoh." 45 Teuma Nabi Daud geujaweueb, "Gata tateuka keu talawan ulôn ngon peudeueng, kapak dan leumbeng, teuma ulôn teuka lôn lawan gata ngon nan TUHAN Nyang Mahakuasa, Po teu Allah tantra Israel nyang gata hina nyan. 46 Uroenyoe cit teuma, TUHAN geujôk gata ubak ulôn; gata ulôn peutaloe dan ulée gata ulôn koh dua. Tuboh gata dan tuboh tantra-tantra Filistin ulôn jok ubak cicém dan beulatang jeuet jipajoh. Deungon nyan, bansaboh donya teuma jiteupeue bahwa kamoe bansa Israel na Po teu Allah nyang kamoe seumah, 47 dan banmandum ureuëng disinoe teuma jikalon bahwa TUHAN hana peureulée keu peudeueng atawa kapak mangat teupeuseulamat umat Gobnyan. Gobnyan kheueh nyang peuteuntée rot teumeuprang nyoe dan Gobnyan geuseurah gata lam jaroe kamoe." 48 Goliat laju jimaju jipeurab ubak Nabi Daud, deungon bagaih that Nabi Daud geuplueng lam baresan ureuëng Filistin keu geuhadang awaknyan. 49 Nabi Daud laju geugeue baluem geuh, geucok sineuek batée dan lheuehnyan laju geurhom ateueh Goliat. Batée nyan laju keunong dho Goliat lé nyan teuma dho Goliat nyan sampoe beukah bruek ulée jih, dan jihnyan rhot dan reubah deungon muka jih teudugom bak tanoh. 50 Nabi Daud laju geuplueng geupeucrok Goliat, dan laju geudong dikeue jihnyan; gobnyan laju geucok peudeueng Goliat dan laju jisuet nibak lam sarong, dan lheueh nyan laju jireupang ulée ureuëng Filistin nyan. Meunan kheueh cara jih Nabi Daud geupeutaloe dan geupoh maté Goliat, na kheueh ngon ali-ali dan batée! Watée ureuëng Filistin jikalon pahlawan awaknyan ka maté, awaknyan laju jipeuplueng droe. 52 Ureuëng-ureuëng Israel dan Yehuda meusurak meuhubô dan laju jipeucrok ureuëng Filistin sampoe trok u Gat dan u babah pintoe geureubang Ekron. Ureuëng-ureuëng Filistin nyang luka-luka teutiek-tiek bansipanyang rot u Saaraim nyan! 53 Óh lheueh nyan ureuëng Israel jiwoe nibak jipeulet ureuëng Filistin, laju jireupah bubena asoe khimah-khimah awaknyan. 54 Nabi Daud laju geucok ulée Goliat, dan geuba u Yerusalem, teuma seunjata-seunjata Goliat jikeubah lam khimah geuh keudroe. 55 Watée Saul geukalon Nabi Daud geujak lawan Goliat, geutanyong kheueh lé gobnyan ubak Abner panglima tantra geuh, "Abner, aneuëk soe kheueh jihnyan?" "Ulôn hana lôn turi, Teungku Amphon," jaweueb Abner. 56 Laju geupeurintah lé Saul, "Jak kheueh dan tanyong laju hai nyan." 57 Dan watée Nabi Daud geugisa ubak khimah-khimah óh ka lheueh geupoh maté Goliat, gobnyan laju jiba lé Abner mangat geujak meuhadab Saul. Nabi Daud mantong geutijiek ulée Goliat. 58 Laju geutanyong le Saul ubak gobnyan, "He aneuëk muda! Aneuëk soe gata?" Geujaweueb lé Nabi Daud, "Lôn tuan aneuëk Isai nibak Betlehem."

1 Samuel 18

1 Óh ka lheueh Saul dan Nabi Daud seuleusoe geupeugah haba, Nabi Daud laju geu angkat lé Raja Saul jeuet keu peugawée gobnyan dan phon uroe nyan gobnyan hana geubri woele u rumoh ureuëng syiek gobnyan. Yonatan aneuëk agam Saul, ka geudeungoe awaknyan meututoe haba. Gobnyan teurasa cit teutarek keu Nabi Daud nyan, dan geugaséh gobnyan lagée geugaséh droe geuh keudroe. 3 Sabab nyan Yonatan geumeusumpah teutab geumeusabat deungon Nabi Daud siumu masa. 4 Yonatan laju geusuit jubah gobnyan geubri laju atranyan ubak Nabi Daud, meunan cit deungon peukayan prang gobnyan dan deungon peudeueng gobnyan geubri sajan, ali-ali gobnyan meunan cit deungon talo keuieng gobnyan. 5 Nabi Daud geupeubuet deungon gét banmandum tugaih nyang ka geubri lé Raja Saul ubak gobnyan. Sabab nyan kheueh gobnyan jiangkat lé Raja Saul jeuet ulée balang didalam angkatan prang gobnyan, dan Nabi Daud nyan jiharoik banmandum lé tantra gobnyan meunan cit lé namiet Raja Saul. 6 Bak watée Nabi Daud geugisa óh ka lheueh geupeutaloe Goliat ureuëng Filistin nyan, dan banmandum tantra laju jimeubareh jitamong u dalam banda, bubena ureuëng inong jiteubiet laju nibak jeueb-jeueb banda Israel keu jijak sambot Raja Saul. Awaknyan jimeunyanyi ngon geumeu ca-e deungon lagu-lagu nyang geumbira, dan jimeunari ngon jimeulikak sira jipeumeuén rapa-i dan kecapi. 7 Sira jimeunari bubena ureuëng inong nyan laju jimeuca-e lagéenyoe, "Saul ka geupoh maté meuribée-ribée musoh, teuma Nabi Daud geupoh musoh meuploh-ploh ribée." 8 Ban geudeungoe nyan, Raja Saul gét that beungeuh. Sabab geupike, "Nabi Daud ka jianggab jipoh maté musoh meuploh-ploh ribée, seudangkan ulôn teuma meuribée-ribée mantong. Hana treb le teuntée kheueh jihnyan ji baiát keu raja lé awaknyan!" 9 Phon uroe nyan, gobnyan ka bingiek até keu Nabi Daud. 10 Óh singoh uroe Saul na didalam rumoh gobnyan teungoh geumat kapak dan bak watéenyan cit teuma Raja Saul nyan ka jitamong lé roh jeuhet nyang geu utôh lé Po teu Allah, sampoe gobnyan ka jilab jén geuh lagée ureuëng pungo. Bak watéenyan Nabi Daud teungoh geumeuén keucapi lagée nyang ka-ka. 11 "Ulôn labang ngon kapak nyoe ubak Nabi Daud sampoe án meukeumat bak bintéh!" geupike lé Saul, laju gobnyan geu rhom kapak nyan sampoe dua goe ateueh Nabi Daud, teuma Nabi Daud meuhase geusilek. 12 Raja Saul geusada bahwa Nabi Daud nyan geulindong lé TUHAN. Sababnyan gobnyan ka jeuet teumakot keu Nabi Daud. 13 Teuma gobnyan laju geupinah Nabi Daud nibak lingkongan meuligoe geuh, dan geu angkat gobnyan jeuet keu keumeundan u ateueh siribée droe tantra. Deungon na lagéenyan Nabi Daud ka geupimpén pasokan gobnyan bak tieb-tieb watée muprang. 14 Gobnyan meuhase geupubuet banmandum tugaih geuh, sabab TUHAN nyang tulông gobnyan. 15 Bak watée Raja Saul geukalon bahwa Nabi Daud sabe meuhase, makén geutakot kheueh lé gobnyan keu Nabi Daud nyan. 16 Teuma ban saboh nanggroe Israel dan Yehuda jigaséh keu Nabi Daud kareuna gobnyan nyang pimpén dan nyang paleng le jasa gobnyan. 17 Raja Saul ka meureuncana mangat jeuet Nabi Daud nyan jipoh maté lé ureuëng Filistin lam mideuen prang mangat bék deuh gobnyan keudroe nyang poh Nabi Daud nyan. Lé sababnyan nibak siuroe Raja Saul nyan geupeugah ubak Nabi Daud, "Si Merab putroe ulôn nyang tuha teuma ulôn peukawen deungon gata, asai mantong gata tapeuleumah keuhai gata ceubeueh lam mideuen prang keu TUHAN." 18 Nabi Daud geujaweueb, "Soe kheueh namiet nyoe, peu kheueh makna jih keuluwarga bapak ulôn di Israel, sampoe ulôn nyoe jeuet keumeulintée Raja?" 19 Teuma bak watée katrok saát jih Merab geukeuneuk peukawen deungon Nabi Daud, teuma deungon hana teusangka-sangka aneuëk dara nyan jipeukawen deungon Adriel nibak Mehola. 20 Mikhal putroe Raja Saul nyang laén ka rhot cinta ubak Nabi Daud. Bak watée Raja Saul geudeungoe hainyan gobnyan pi situju. 21 Geupike lé gobnyan, "bah kheueh ulôn peutaba Mikhal mantong keu Nabi Daud, mangat Nabi Daud teujeubak dan hase teupoh maté lé ureuëng Filistin." Lé sababnyan, nyang keu dua goe jih Raja Saul geupeugah ubak Nabi Daud, "Jinoenyoe gata ka hase jeuet keu meulintée ulôn." 22 Laju gobnyan geuyue peugawée geuhnyan mangat jipeugah ubak Nabi Daud seucara seungab-seungab lagéenyoe, "Teungku Amphon geugaséh ubak droeneueh dan meunan cit teuma keu banmandum peugawée gobnyan; jinoenyoe kheueh watée nyang paleng teupat keu droeneueh keu tajak seulangke putroe geuhnyan." 23 Teuma bak watée awaknyan jipeusampoe hainyan ubak Nabi Daud, gobnyan geujaweueb, "Gata pike mudah that beujeuet keu meulintée raja? Ulônnyoe ureuëng gasien dan hana meuguna!" 24 Banmandum peugawéenyan jijak peugah laju haba Nabi Daud nyan ubak Raja Saul, 25 Lé Raja Saul geuyue lom ubak awaknyan mangat jijak peugah ubak Nabi Daud lagéenyoe, "Nyang geulakée Teungku Amphon sibagoe jeuname na kheueh 100 boh kulét kulub ureuëng Filistin, sibagoe meunalaih keu musoh Teungku raja." (Nyoe kheueh nyang geureuncana lé Raja Saul mangat na cara geupoh maté Nabi Daud deungon peurantaraan ureuëng Filistin.) 26 Bubena peugawée Raja Saul nyan jijak peusampoe laju peusan nyan ubak Nabi Daud, dan Nabi Daud geuteurimong carat raja nyan. Kareuna nyan, sigohlom bataih watée habéh, gobnyan laju geubeurangkat deungon aneuëk buah gobnyan u daerah ureuëng Filistin. Geupoh maté laju na 200 droe ureuëng Filistin, laju geucok kulét kulub awaknyan, dan atra nyan geuseurah laju ubak Raja Saul deungon hana meukureueng meusapeu pih. Óh ka lheuehnyan Raja Saul laju geupeukawen Mikhal deungon Nabi Daud. 28 Barô kheueh Raja Saul geusada bahwa Nabi Daud nyan geulindong lé TUHAN dan meunan cit keubit that jigaséh lé aneuëk gobnyan si putroe Mikhal. 29 Teuma meutamah geutakot kheueh gobnyan keu Nabi Daud dan gobnyan geubanci ubak Nabi Daud nyan siumu udeb geuh. 30 Tieb-tieb watée pajan mantong tantra Filistin nyan jijak prang, Nabi Daud leubeh meuhase geupeuhanco awaknyan nibak peuriwa Raja Saul nyang laén. Lé sababnyan meutamah meusyeuhu kheueh laju nan Nabi Daud.

1 Samuel 19

1 Raja Saul geupeugah ubak Yonatan aneuëk agam gobnyan, dan ubak mandum peugawée mangat jitem poh maté Nabi Daud. Teuma Yonatan gét that geugaséh keu Nabi Daud, 2 lé sabab nyan gobnyan geupeugah ubak Nabi Daud, "Bapak ulôn geu-useuha keuneuk geupoh maté droeneueh; lé sababnyan beu até-até kheueh! Neujak musöm kheueh singoh beungoh bak saboh teumpat nyang teusöm, dan neutinggai kheueh laju disinan. 3 Ulôn teuma lôn jak u padang meusigoe deungon bapak ulôn dan kamoe dong nibak teumpat droeneueh musom nyan. Laju ulôn peugah haba deungon bapak keuhai bapak keuneuk poh droeneueh nyan, dan hase nibak tutou haba nyan teuma ulôn peugah ubak droeneueh." 4 Laju Yonatan geupeugah nyang gét keuhai Nabi Daud ubak bapak geuh nyang Raja Saul nyan, geupeugah, "Bapak, bék kheueh Bapak peuceulaka namiet droeneueh nyan Nabi Daud. Sabab jihnyan hana jipeubuet sapeue pih buet nyang salah ateueh Bapak; teuma seubalek jih, jihnyan ka that-that meujasa keu Bapak. 5 Gobnyan ka jipeusabong nyawöng jih bak watée jipoh maté Goliat, dan TUHAN ka geupeumeunang nyang rayeuk that keu Israel meulalu Nabi Daud nyan. Bapak keudroe ka lheueh neukalon keujadian nyan, dan Bapak that-that galak bak watéenyan. Jadi, pakon jinoenyoe Bapak keuneuk iénanya ureuëng nyang hana meusalah dan keuneuk poh Nabi Daud deungon hana alasan meubacut pih?" 6 Raja Saul nyan insaf watée geudeungoe tutoe haba Yonatan nyan, dan gobnyan geumeusumpah deumi nan TUHAN bahwa Nabi Daud nyan hana geupeukaru dan hana geupoh maté. 7 Óh ka lheuehnyan Yonatan geuhôi laju Nabi Daud, dan geucalitra banmandum peue nyang ka geumeututoe bunoe. Óh lheuehnyan gobnyan laju geuba Nabi Daud nyan ubak Raja Saul, dan Nabi Daud laju geupeutimang gobnyan lagée yoh masa ilée. 8 Óh lheuehnyan beureutoih prang lom deungon ureuëng Filistin. Nabi Daud laju geuprang dan watée nyan cit geupeutaloe awaknyan banmandum, akhé jih awaknyan jiplueng. 9 Bak siuroe Raja Saul teungoh geuduek dirumoh deungon kapak nibak jaroe gobnyan dan saát nyan cit teuma Raja Saul nyan ka ji tamong lom lé roh jeuhet nyang geu kirém lé TUHAN. Bak watéenyan Nabi Daud teungoh geupeumeuén keucapi geuh. 10 Laju Raja Saul geu useuha lom geuthob kapak geuhnyan ubak Nabi Daud nyang na toe ngon bintéh. Teuma Nabi Daud geusilek, sampoe kapak nyan meulabang nibak bintéh. Nabi Daud laju geuplueng keu geujak peuseulamat droe. 11 Bak malam nyan cit teuma Raja Saul geukirém utosan na meupadub droe u rumoh Nabi Daud keujijak luem Nabi Daud dan meusigoe teuma keu beuteupoh maté bak watée uroe beungoh. Teuma Mikhal ureuëng binoe geuh geupeugah ubak lakoe droe geuh, "Meunyoe droeneueh hai teungku lakoe hana neuplueng nibak malam nyoe, singoh beungoh droeneueh pasti jipoh maté lé ureuëng nyang geukirém lé bapak ulôn." 12 Laju Mikhal geupeutreun Nabi Daud nyan rot peuradeun, dan Nabi Daud laju geupeulueng droe akhé jih gobnyan seulamat. 13 Óh lheueh nyan Mikhal laju geucok patong dewa di rumoh tangga geuh laju atranyan geukeubah nibak teumpat éh Nabi Daud. Óh lheuehnyan nibak bagian ulée jih jikeubah teuma bantai nyang teupeuget nibak bulée kaméng. Dan lheueh nyan teuma patong nyan laju jipeukeulubong deungon ija seulimbot. 14 Bak watée mandum utosan Raja Saul teuka keu jijak drob Nabi Daud, Mikhal geupeugah laju, "Nabi Daud teungoh sakét." 15 Teuma Raja Saul geuyuejak lom awaknyan keunan geuyue kalon ngon mata ulée jih keudroe keuhai Nabi Daud nyan. Geupeurintah lagéenyoe, "Gataba laju jihnyan keunoe, meusigoe deungon teumpat éh jih, mangat jihnyan ulôn nyang poh." 16 Laju jitamong kheueh utosan nyan u dalam kama Nabi Daud dan teunyata nyang na teukeubah di ateueh teumpat éh nyan na kheueh patong deungon bantai bulée kaméng di ateueh miyueb ulée jih. 17 Saul geupeugah ubak aneuëk inong geuh si Mikhal, "Trok that até droe kheueh tapeungeut ulôn! Musoh ulôn ka droeneueh tulông jipeuplueng droe!" Jaweueb Mikhal, "Gobnyan geuancam keuneuk geupoh maté lôn, meunyoe ulôn hana lôn tem tulông geuhnyan geubaplueng droe." 18 Óh ka lheueh Nabi Daud meuhase geupeuplueng droe geuh, gobnyan laju geujak u rumoh Samuel di Rama, laju geubri tée banmandum nyang jipubuet lé Raja Saul nyan ateueh gobnyan. Óh lheuehnyan Nabi Daud dan Samuel laju geujak u Nayot dan tinggai laju disinan. 19 Teuma ubak Raja Saul geubritée bahwa Nabi Daud na di Nayot hana padub na jiôh ngon Rama. 20 Sabab nyan Raja Saul geukirém lom meupadub droe utosan keu teujak droeb Nabi Daud. Teuma awaknyan meurumpok deungon saboh kawan nabi nyang teungoh geumeunari ngon geumeulikak sira geu dhiké meusajan-sajan, nyang jeuet keu syeueh bak meu dhiké nyan na kheueh Samuel. Laju bubena utosan Raja Saul nyan jitamong lé Roh Po teu Allah sampoe awaknyan pih ka jilikak ngon meunari sira geumeu dhiké. 21 Bak watée habanyan trok ubak Raja Saul, gobnyan laju geukirém utosan nyang laén dan di ureuëng nyang geukirém nyan pih ka jitamong deungon Roh Po teu Allah dan ka geumeulikak ngon geumeu dhiké. Dan keu nyang keulhée goe jih Raja Saul geukirém utosan dan meunan cit teuma nyang teujadi ateueh awaknyan. 22 Lé sabab nyan Raja Saul keudroe nyang beurangkat u Rama. Óh ka trok ubak mon raya di Sekhu, gobnyan laju geuteumanyong dipat Samuel dan Nabi Daud, dan ureuëng nyang geutanyong nyan laju jijaweueb bahwa awaknyan na di Nayot. 23 Jadi gobnyan laju geujak keunan, teuma meunan cit deungon Raja Saul nyan gobnyan pih ka jikuasa lé Roh Po teu Allah, sampoe ka geumeulikak ngon geumeunari sira geumeu dhiké di sipanyang rot ueh-uh raya u Nayot. 24 Óh watée ka trok keunan, gobnyan laju jisuet peukayan jih dan laju teuma jimeunari ngon jimeulikak sira geumeu dhiké dikeue Samuel, laju óh lheuehnyan Raja Saul teuba ubak tanoh deungon tuboh geuh teulon bulat sipanyang uroe dan simalam suntok. (Nyoe kheueh awaiphon pribasa nyang teupeugah, "Peu kheueh Raja Saul nyan meunan cit jeuet keu nabi?")

1 Samuel 20

1 Teuma geuplueng kheueh laju Nabi Daud nibak Nayot nyang rab Rama dan geujak laju meurumpok ngon Yonatan, óh ban trok keunan laju geutanyong, "Peue salah ulôn? Peue buet nyang jeuhet nyang ka ulôn peubuet dan peue teuma desya ulôn ateueh bapak gata sampoe gobnyan keuneuk geupoh maté ulôn?" 2 Geujaweueb lé Yonatan, "Bék neupeugah meunan! Deumi TUHAN, droeneueh hana geupoh maté. Bapak ulôn sabe geubri tée reuncana gobnyan ubak ulôn, bahpi nyang peunteng, meunan cit nyang hana peunteng. Jadi hana mungken gobnyan geusom rahsia niet geuh nyan ubak ulôn. Sabab nyan, peue nyang gata peugah nyan banmandum hana beutôi!" 3 Geujaweueb lé Nabi Daud, "Bapak gata geuteupeue that-that bahwa gata keubiet that tagaséh keu ulôn. Jadi ka pasti gobnyan hana geubri tée hai nyan ubak gata mangat gata bék seudeh. Pakriban kheueh mantong, deumi TUHAN nyang udeb, sikeubiet jih udeb ulôn nyoe na lagée boh manok nibak ujong lungkée keubeue!" 4 Laju geupeugah lé Yonatan, "Peue mantong nyang droeneueh lakée ulôn peubuet." 5 Geujaweueb lé Nabi Daud, "Lagéenyoe, singoh beungoh na kheueh Khauri Buleuen Barô, dan nyang seuharôh jih ulôn makheun meusajan deungon teungku raja. Teuma meunyoe gata tatem, ulôn teuma lônjak dan lôn musöm dipadang sampoe án malam lusa. 6 Meunyoe bapak gata geutanyong pakon ulôn hana teuka, tapeugah laju ubak gobnyan, bahwa ulôn ka lôn lakée idhin ubak gata bahwa ulôn keuneuk jakwoe u Betlehem, sabab disideh geupeuna upacara keureubeuen siseun sithon keu banmandum keuluwarga ulôn. 7 Meunyoe raja geupeugah, 'Get kheueh,' teuma ulôn aman, teuma meunyoe gobnyan beungéh, tateupeue kheueh bahwa gobnyan ka geucok keuputosan keuneuk geupeuceulaka ulôn. 8 Ulôn lakée tulông ubak gata, sabab geutanyoe ka ta ikat janji dikeue TUHAN. Teuma meunyoe ulôn meusalah, tapoh kheueh laju ulôn, teuma bék kheueh taseurah ulôn ubak bapak gata." 9 Geujaweueb lé Yonatan, "Bék khawate! Meunyoe ulôn teupeue deungon pasti bahwa bapak ulôn ka habéh geupike keuneuk peuceulaka droeneueh, teuntée kheueh hainyan ulôn peugah bagaih-bagaih ubak droeneueh." 10 Óh lheuehnyan Nabi Daud geutanyong, "Soe kheueh nyang teuma peugah ubak ulôn seukira jih bapak gata geujaweueb deungon beungéh?" 11 "Jak kheueh geutanyoe tajak u padang," kheun Yonatan. Teuma geujak kheueh laju awaknyan meusigoe-sigoe u padang. 12 Laju Yonatan geupeugah ubak Nabi Daud, "Seumoga TUHAN, Po teu Allah Israel jeuet keu saksi geutanyoe! Singoh beungoh atawa lusa kira-kira bak watée lagée jinoenyoe, ulôn teuma lôn useuha beulôn teupeue asoe até bapak ulôn. Meunyoe gobnyan meusikeub gét ateueh droeneueh, ulôn teuma bagaih-bagaih lôn kirém haba ubak droeneueh. 13 Meunyoe gobnyan na niet keuneuk geupeuceulaka droeneueh, pasti haba nyan pih lôn peugah ubak droeneueh mangat droeneueh deungon bagaih-bagaih hase tapeuseulamat droe. Bah kheueh TUHAN geutarek nyawöng ulôn meunyoe hai nyan hana ulôn peubuet. Seumoga teuma TUHAN geutulông droeneueh lagée gobnyan ka lheueh cit teuma geutulông! 14 Dan meunyoe ulôn mantong udeb, neu ingat kheueh janji geutanyoe dikeue TUHAN dan seutia kheueh ubak ulôn; teuma meunyoe ulôn ka hanale, 15 neutunyok kheueh keuseutiaan droeneueh nyan ubak keuturonan ulôn keu siumu masa. Dan meunyoe TUHAN geupeubinasa banmandum musoh droeneueh, 16 bék kheueh neumeujanji keu geutanyoe bandua ka putôh. Meunyoe sampoe putôh, TUHAN kheueh nyang teuma huköm droeneueh." 17 Teuma keu nyang keudua goe jih Yonatan geuyue Nabi Daud meujanji keuhai geugaséh gobnyan, sabab gobnyan geugaséh keu Nabi Daud lagée geugaséh droe geuh keudroe. 18 Óh lheuehnyan geupeugah kheueh lé Yonatan ubak gobnyan, "Singoh beungoh Khauri Buleuen Barô. Pasti teuma geuteupeue bahwa droeneueh hana tateuka, sabab teumpat droeneueh soh nibak meja bu; 19 peue lom lusa! Sabab nyan, tajak musöm kheueh laju u teumpat musöm droeneueh nyang awai ilée, dan neupreh kheueh dilikot sinamon batée nyang na disinan. 20 Lusa ulôn teuma lôn peulheueh lhée neuk aneuk panah u arah batée nyan siulah-ulah teutimbak ubak sasaran. 21 Laju ulôn yue namiet lôn jijak piléh aneuk-aneuk panah nyan, dan meunyoe ulôn peugah ubak jihnyan, 'Ai, panah nyan leubeh to lom keuno; neucok kheueh,' nyang makna jih droeneueh aman dan jeuet neuteubiet. Ulôn meusumpah deumi TUHAN nyang udeb bahwa droeneueh hana meuteumé bala peue mantong. 22 Teuma meunyoe ulôn peugah ubak namiet ulôn, 'Ai, panah nyan leubeh jiôh lom keudeh,' nyan muphom jih TUHAN geuyue droeneueh neujak beujiôh; lé sababnyan neujak kheueh laju. 23 Seumoga TUHAN geujaga geutanyoe mangat geutanyoe keu siumu masa jih tamumat ubak janji nyang tapeugét lé geutanyoe bandua." 24 Dan geujak kheueh laju Nabi Daud geujak musöm u padang. Bak Khauri Buleuen Barô nyan, Raja Saul geuteuka ubak teumpat khauri. 25 Lagée lazem jih gobnyan geuduek rab ngon bintéh; di Yonatan aneuëk geuhnyan teucok teumpat dikeue gobnyan, Abner blaih binéh Saul, teuma kurusi teumpat duek Nabi Daud teutab soh. 26 Teuma Raja Saul hana geumeuceukot keuhai nyan nibak uroenyan, sabab, geupike, "Mungken jihnyan na meuhalangan sapeue-sapeue, sampoe jihnyan hana gleh meunurot agama." 27 Bak uroe laén lom, na kheueh uroe nyang keudua Buleuen Barô, kurusi teumpat duek Nabi Daud mantong cit soh, laju geutanyong kheueh lé Raja Saul ubak aneuëk geuh Yonatan, "Pakon baroe ngon uroenyoe Nabi Daud nyan hana cit jijak ubak teumpat khauri nyoe?" 28 Geujaweueb lé Yonatan, "Gobnyan ka geulakée idhin ubak ulôn keu geujak u Betlehem. 29 Geupeugah, 'Neupeu idhin kheueh ulônjak u Betlehem, sabab keuluwarga ulôn teungoh geupeuna uroe raya keureubeuen di Betlehem, dan ulôn geuyue teuka lé aduen ulôn. Sabab nyan, meunyoe neupeu idhin, bah kheueh ulônjak keudeh keu lôn jak meurumpok deungon kawöm syedara ulôn.' Nyang kheueh sabab jih gobnyan hana hadé teuka teumpat khanuri tanyoe nyoe, hai Teungku Bapak." 30 Ban geudeungoe lagéenyan Raja Saul beungéh that-that ubak Yonatan sira geupeugah ubak aneuëk geuhnyan, "Aneuëk hareum jadah! Jinoenyoe ka ulôn teupeu bahwa kah nyoe kahdong blaih Nabi Daud dan katapeu malée ateueh droe kah dan u ateueh mak kah! 31 Peu kheueh kah hana sadar bahwa simantong Nabi Daud nyan udeb kahnyoe hana mungken jeuet keuraja di ateueh nanggroe nyoe? Jinoenyoe tayue laju ureuëng laén jijak mita si Daud nyan dan jiba jihnyan keunoe, sabab jihnyan harôh maté!" 32 Dan geujaweueb lé Yonatan, "Pakon jihnyan harôh maté? Peue desya jih?" 33 Ban geudeungoe nyan Raja Saul laju geugeulawa kapak gobnyan ubak Yonatan keuneuk geupoh maté aneuëk geuh nyan. Dan geuteupeu kheueh lé Yonatan bahwa bapak geuhnyan ka keubiet-keubiet that keuneuk geupoh maté Nabi Daud. 34 Deungon that beungéh Yonatan laju geutinggai meja khanuri dan geujak laju ho laén, dan gobnyan hana geupajoh sapeue bak uroe keudua bak Peurayaan Buleuen Barô nyan. Gobnyan gét that gundah geupike keu Nabi Daud nyang ka geuhina lé Raja Saul bapak geuh keudroe. 35 Óh singoh beungoh nyan Yonatan laju geujak u padang keuneuk geujak meurumpok ngon Nabi Daud lagée nyang ka awaknyan reuncana bandua geuh. Gobnyan geuba sajan sidroe aneuëk agam namiet geuh, 36 laju geupeugah bak jihnyan, "Jak piléh laju aneuk panah nyang teuma ulôn panah." Teungoh aneuëk nyan jiplueng, Yonatan laju geutimbak saboh aneuk panah ukeu aneuëk namiet nyan. 37 Bak watée namiet nyan trok u teumpat rhot aneuk panah nyan, Yonatan geumeuhôi aneuëk nyan, "Ai, aneuk panah nyan leubeh jiôh lom keudeh! 38 Bagaih bacut, bék teumanueng!" si aneuëk namiet nyan laju jicok aneuk panah nyan dan jigisa laju ubak teungku jih. 39 Jihnyan meubacut pih hana muphom tutoe haba Yonatan nyan, teuma Yonatan deungon Nabi Daud kheueh nyang muphom haba nyan. 40 Óh lheuehnyan Yonatan laju geubri alat peumanah geuhnyan ubak aneuëk nyan dan geuyue namiet nyan jiwoe u banda. 41 Óh ka leupah aneuëk nyan jijak, Nabi Daud laju geuteubiet di likot sinamon batée nyang meutamon nyan, laju geusujut lhée goe. Bah kheueh gobnyan meunan cit Yonatan sabe-sabe geumo bak watée awaknyan lam keuadaan meuwa-wa sira geumucom. Keuseudehan Nabi Daud leubeh rayeuk nibak keuseudehan Yonatan. 42 Óh lheuehnyan geupeugah kheueh lé Yonatan ubak Nabi Daud, "Seumoga Po teu Allah geutulông droeneueh. TUHAN teuma geujamin bahwa geutanyoe dan keuturonan geutanyoe sabe geumat ubak janji geutanyoe dikeue Po teu Allah." Óh ka lheueh nyan geujak kheueh laju Nabi Daud, dan Yonatan pih geuwoe u banda.

1 Samuel 21

1 Teuma geujak kheueh laju Nabi Daud ubak Teungku Imeum Ahimelekh di Nob. Deungon rasa that teukeujot Ahimelekh laju geuteubiet geujak meurumpok ngon Nabi Daud dan geutanyong laju ubak gobnyan, "Peubuet tajak keunoe sidroe gata mantong?" 2 Geujaweueb lé Nabi Daud, "Ulôn ka geubri saboh tugaih lé teungku raja dan geutam tugaih nyoe teupeugah ubak soe mantong. Sabab nyan aneuëk buah ulôn ka ulôn yue preh bak saboh teumpat. 3 Meuáh, jinoenyoe ulôn keuneuk teumanyong, peuna peunajoh nyang na nibak Bapak? Neubri kheueh laju ubak ulôn ruti limong boh atawa peue mantong nyang na disinoe." 4 Laju geupeugah lé teungku imeum nyan, "Bak ulôn hana ruti nyang biasa, nyang na hanya ruti keureubeuen; gata jeuet tacok rutinyan, asai aneuëk buah gata hana jipubuet buet meusituboh nyang ban barô-barô nyoe." 5 Geujaweueb lé Nabi Daud, "Ka teuntée awaknyan hana jipeubuet hainyan, meunyoe awaknyan lam tugaih, aneuëk buah lôn sabe jijaga mangat awaknyan gleh meunurot ajaran agama, padahai nyan na kheueh keu tugaih-tugaih biasa; peuteuk lom tugaih nyang khusos lagée nyoe bagoe!" 6 Dan lé imeum nyan laju geujok ubak Nabi Daud ruti keureubeuen nyan, sabab nyang na bak gobnyan na kheueh ruti nyang teupeukeureubeuen ubak Po teu Allah, dan ka teurueng nibak miseubah keuteugantoe ngon ruti barô. ( 7 Keubeutolan, Doëg ureuëng Edom, ulée kawan nyang rabe beulatang peulara Raja Saul na disinan nibak uroe nyan, ureuëng nyan jijak keunan keujijak peupunoh sapeue-sapeue keuwajéban agama jih.) 8 Óh lheuehnyan geutanyong kheueh lé Nabi Daud ubak Ahimelekh, "Peu kheueh bak Bapak na neukeubah kapak atawa peudeueng nyang jeuet ulôn peuguna? Peurintah Po raja nyan keubiet meudab-dab that nyang kheueh jeuet ulôn jak keunoe deungon teugeusa-geusa hana hase le lôn jakcok peudeueng atawa sinjata nyang laén." 9 Geujaweueb lé Ahimelekh, "Nibak ulôn na lôn keubah peudeueng Goliat, ureuëng Filistin nyang gata poh maté nibak Pantôn Ela nyan; peudeueng nyan na dilikot Efod, balot lam ija. Meunyoe gata peureulée, cok kheueh, sabab nyan kheueh nyang na sinjata disinoe." Seuôt Nabi Daud, "Peudeueng nyan peudeueng nyang paleng gét bansaboh nanggroe, neujok kheueh nyan ubak ulôn!" 10 Bak uroenyan cit teuma Nabi Daud geupulkueng nibak Raja Saul, laju trok ubak Akhis raja banda Gat. 11 Ubak Akhis jipeugah lé peugawée gobnyan lagée nyoe, "Kon kheueh jihnyoe Nabi Daud, raja nibak nanggroe jih? Dan kon kheueh keujih nyan bubena ureuëng inong jimeunari-nari sira jimeunyanyoe lagée nyoe, 'Saul jipoh maté meuribée musoh, teuma Nabi Daud meuploh ribée musoh?' " 12 Tutoe haba nyan keubiet that jeuet keupikeran Nabi Daud, dan gobnyan ka jeuet teumakot that-that keu Raja Akhis. 13 Lé sabab nyan, dikeue ureuëng ramé Nabi Daud pura-pura pungoe. Watée awaknyan jicuba keuneuk jiteun gobnyan, Nabi Daud laju geupeudeuh droe lagée ureuëng pungoe; gobnyan geugaro-garo pintoe banda dan nibak babah gobnyan geupeubiyeu mantong ié babah geuh meuliléh bak janggot geuh. 14 Lé Akhis laju geupeugah ubak peugawée jih, "Peu kheueh hana deuh gata ngieng bahwa ureuëng nyan pungoe? keupeue gata ba keunoe? 15 Peu kheueh mantong kureueng ureuëng nyang hana waraih bansikeulileng lôn, sampoe gata ba lom sidroe teuk ureuëng pungoe u rumoh lôn nyoe?"

1 Samuel 22

1 Óh lheuehnyan Nabi Daud laju geutinggai banda Gat dan geujak musom u dalam guha to ngon banda Adulam. Bak watée aduen-aduen gobnyan dan banmandum keuluwarga gobnyan jideungoe gobnyan na disinan, jijak kheueh awaknyan ubak gobnyan. 2 Meunan cit deungon ureuëng-ureuëng nyang teutindéeh, nyang na utang bak gob, dan nyang meurasa hana puih, banmandum nyan meugabong deungon Nabi Daud, dan Nabi Daud jeuet keupeumimpén awaknyan. Jeumeulah peungikot Nabi Daud nyan na kira-kira 400 droe. 3 Nibak guhanyan Nabi Daud laju geujak u Mizpa di Moab dan geupeugah laju ubak raja nanggroe Moab, "Neupeu idhin kheueh bapak dan mak ulôn tinggai nibak Teungku Po, sampoe ulôn teupeue peue meukeusut Po teu Allah ateueh ulôn." 4 Óh lheuehnyan ureuëng syiek jihnyan jiba laju meuhadab ubak raja di nanggroe Moab, dan awaknyan teutab na disinan simantong Nabi Daud geumusöm didalam guha. 5 Bak siuroe na sidroe nabi nyang nan jih Gad jijak ubak Nabi Daud dan geupeugah, "Bék tatinggai didalam guha nyoe, tajak kheueh laju deungon bubagaih u tanoh Yehuda." Dan geujak kheueh Nabi Daud dan geutamong teuma u dalam uteuen Keret. 6 Bak siuroe Raja Saul teungoh geuduek-duek di miyueb bak tamariska di ateueh bukét di Gibea; bak jaroe gobnyan geureugam tumbak seudangkan banmandum peuwira gobnyan jidong ngon jijaga ban seukeulileng geuh. Bak watée geudeungoe teumpat Nabi Daud dan aneuëk buah gobnyan ka jitupat, 7 laju geupeugah ubak dumna ulée balang peuwira jih, "Deungoe kheueh nyoe, hai ureuëng-ureuëng Benyamin! Peu kheueh si Daud nyan teuma jibri ubak gata blang dan lampôh anggô? Peu kheueh gata banmandum teuma jiangkat jeuet keu peuwira dalam tantra gobnyan? 8 Nyang kheueh sabab jih gata nyoe ka sipakat tajak lawan ulôn dan hana meusidroe pi nyang tatem peugah ubak ulôn bahwa aneuëk ulôn keudroe ka jidong blah si Daud nyan? Hana meusidroe pih nibak gatanyoe nyang tapike keu untong ulôn atawa tapeugah ubak ulôn bahwa Nabi Daud, aneuëk buah ulôn keudroe, bak saát nyoe teungoh jipreh watée keu ji peumaté ulôn, dan bahwa aneuëk ulôn si Yonatan ka jibri lurong ubak si Daud nyan!" 9 Doëg si ulée kawan tukang meurabé beulatang peulara Raja Saul, bak watée nyan na cit disinan meusajan deungon bubena ulée balang Saul, laju geupeugah lé Doëg, "Ulôn ka lheueh ulôn kalon Nabi Daud geujak ubak Ahimelekh aneuëk Ahitub di Nob. 10 Ahimelekh laju geulakée peutunyok ubak TUHAN keuhai peue nyang harôh geupeubuet lé Nabi Daud. Seulaén nibak nyan Nabi Daud geubri teuma ngon beukai peunajoh nyang seb lom geubri teuma ubak gobnyan peudeueng Goliat, ureuëng Filistin nyan." 11 Laju Raja Saul geuyue hôi Teungku Imeum Ahimelekh dan banmandum waréh kawöm gobnyan nyang jeuet keu imeum di Nob; teuma lé teungku-teungku imeum nyan laju jijak meuhadab ubak Raja Saul. 12 Geupeugah lé Raja Saul ubak Ahimelekh, "Tadeungoe kheueh nyoe, hai aneuëk Ahitub!" Geujaweueb lé teungku imeum nyan, "Gét, Teungku Amphon." 13 Geutanyong lé Raja Saul ubak gobnyan, "Pakon gata sapeue that anggok deungon si Daud talawan ulôn? Pakon gata jok beukai bak jih deungon ruti meunan cit gata jok peudeueng dan talakée peutunyok ubak Po teu Allah? Jadi jinoenyoe jihnyan ka jilawan ulôn dan teungoh jipreh watée keu jih keuneuk peumaté ulôn." 14 Laju Ahimelekh geujaweueb, "Teuma bukon kheueh Nabi Daud nyan panglima Amphon Raja nyang paleng seutia? Dan gobnyan na kheueh meulintée Teungku Amphon, ulée peungawai droe keudroe Teungku Amphon, dan gét that jihoreumat lé mandum ureuëng didalam meuligoe Amphon. 15 Beutôi, ulôn ka lôn lakée peutunyok nibak Po teu Allah keu gobnyan, teuma bukon kheueh nyang phon-phon that hai nyan ulôn peubuet. Keuhai ka mupakat keuteulawan Teungku Amphon, bék kheueh neutudoh ulôn atawa soe mantong dalam keuluwarga ulôn. Ulôn hana lôn teupeue sapeue keuhai nyan!" 16 Teuma geupeugah lé raja, "Ahimelekh! Droeneueh dan banmandum waréh kawöm droeneueh harôh maté." 17 Laju gobnyan geupeurintah ubak banmandum peungawai geuyue dong tô ngon gobnyan, "Ayo, gata poh maté banmandum imeum-imeum TUHAN nyan! Awaknyan ka jimeusikutu deungon Nabi Daud. Awaknyoe jiteupeu bahwa si Daud nyan ka jipeuplueng droe, teuma awaknyoe hana jitem peugah hainyan ubak ulôn." Teuma lé ureuëng peungawai nyan hana jitem poh teungku-teungku imeum nyan. 18 Sabab nyan geupeugah kheueh lé Raja Saul ubak Doëg, "Ayo, bagaih! Gata mantong nyang poh awaknyan!" Teuma laju jimaju Doëg dan jipoh maté kheueh banmandum teungku imeum nyan. Bak uroenyan Doëg nyan ka jipoh maté lapan ploh limong droe teungku imeum nyang nahak jingui bajée efod. 19 Meunan cit Saul geupeurintah laju mangat jipoh maté banmandum peunduduek Nob, banda teumpat tinggai teungku imeum nyan; ureuëng agam, ureuëng inong, aneuëk-aneuëk manyak, meunan cit deungon leumô, keuleudée dan bubiri, banmandum nyan jipeuhabéh nyawöng jih. 20 Teuma Abyatar, sidroe lamkawan aneuëk-aneuëk Ahimelekh nyang meuhase leupah nibak bahaya mawöt nyan. Gobnyan laju jipeuplueng droe ubak Nabi Daud, 21 laju jipeugah bahwa Saul ka habéh geupoh maté bubena teungku imeum TUHAN. 22 Dan geupeugah kheueh lé Nabi Daud ubak gobnyan, "Bak watée ulôn kalon Doëg disinan nibak uroe nyan, ka ulôn duga bahwa jihnyan pasti jimeungadu ubak Raja Saul. Lé sababnyan, ulôn kheueh nyang meutanggong jaweueb ateueh maté banmandum kawöm syedara gata. 23 Tinggai kheueh gata sajan ulôn dan bék teumakot. Saul jikeuneuk poh maté gata, teuma meunan cit jihnyan jikeuneuk poh maté ulôn. Lé sababnyan, gata aman di teumpat ulôn."

1 Samuel 23

1 Bak si uroe geupeugah ubak Nabi Daud bahwa ureuëng Filistin jijak prang banda Kehila dan jirampok gandom nyang ban teukoh diblang. 2 Dan geuteumanyong kheueh gobnyan ubak TUHAN, "Peu kheueh ya TUHAN jeuet ulôn jak prang ureuëng Filistin nyan?" "Nyoe, beutôi," geujaweueb lé TUHAN, "gata prang kheueh laju awaknyan dan tapeuseulamat kheueh peunduduek Kehila." 3 Teuma aneuëk buah Nabi Daud jipeugah ubak gobnyan, "Nyang na disinoe, Yehuda, geutanyoe ka lumpah that yo ngon teumakot; peu kheueh lom meunyoe geutanyoe harôh tajak prang tantra Fisitin di Kehila." 4 Sabab nyan Nabi Daud sigoe teuk geulakée peutunyoek nibak TUHAN, dan TUHAN geujaweueb, "Bék khawate teuh. Prang kheueh laju banda Kehila nyan, sabab tantra Filistin nyan keuneuk Lôn seurah ubak gata." 5 Teuma geujak kheueh laju Nabi Daud dan aneuëk buah gobnyan u Kehila laju geuprang dan geupoh maté ureuëng Filistin nyang lumpah le, dan geureupah laju beulatang peulara awaknyan. Meunan kheueh cara jih Nabi Daud geupeubeubaih peunduduek banda nyan. 6 Bak watée Abyatar aneuëk Ahimelekh jipeuplueng droe ubak Nabi Daud, dan jijak meusajan Nabi Daud u Kehila, gobnyan geuba sajan efod. 7 Watée teubritée ubak Saul bahwa Nabi Daud na di Kehila geupike lé Saul, "Nabi Daud nyan ka geuseurah lé Po teu Allah ubak ulôn. Gobnyan ka teujeubak sabab ka geutamong u dalam banda nyang meupageue beuton dan meupintoe geureubang." 8 Laju Raja Saul geukrah bubena tantra gobnyan dan geutuju laju u Kehila keuneuk geujak keupong Nabi Daud meusajan ngon aneuëk buah gobnyan. 9 Teuma Nabi Daud ka geuteupeue bahwa ka na niet jeuhet keu gobnyan. Sabab nyan gobnyan laju geupeugah ubak Teungku Imeum Abyatar, "Neuba kheueh laju efod nyan keunoe." 10 Laju geumeudoá kheueh Nabi Daud, "Ya, TUHAN, Po teu Allah Israel, ulôn deungoe bahwa Saul ka na niet keuneuk jak u Kehila dan geupeuhanco banda nyan sabab lé ulôn, hamba Droeneueh. 11 Peu kheueh beutôi haba nyang ulôn deungoe nyan? TUHAN, Po teu Allah Israel, neupeugah kheueh nyan ubak ulôn." TUHAN geujaweueb, "Nyoe, Saul keuneuk teuka." Laju geutanyong lé Nabi Daud, "Peu kheueh wareuga Kehila jikeuneuk seurah ulôn deungon aneuëk buah ulôn ubak Saul?" Teuma TUHAN geujaweueb, "Nyoe." 13 Laju Nabi Daud deungon aneuëk buah gobnyan na kira-kira 600 droe, geutinggai laju Kehila dan meukeulana laju nibak saboh teumpat u teumpat nyang laén. Bak watée Saul geudeungoe bahwa Nabi Daud ka geujak nibak Kehila, gobnyan geupeubateue laju reuncana geujak prang banda Kehila nyan. 14 Óh ka lheuehnyan Nabi Daud geutinggai di dalam guha-guha nyang na di gunong-gunong di padang pasi Zif. Gobnyan sabe jilet-let lé Raja Saul, teuma TUHAN hana geuseurah Nabi Daud nyan ubak Raja Saul nyan. 15 Bahpih lagée nyan bak droe Nabi Daud teutab na rasa teumakot, sabab Raja Saul ka bulat teukat keuneuk geupoh maté gobnyan. Bak saboh watée Nabi Daud na di Hores, dipadang pasi Zif. 16 Yonatan laju geujak keunan keu geujak meurumpok ngon gobnyan guna keuneuk geupeukong peucaya gobnyan bahwa geuhnyan na kheueh geulindong lé Po teu Allah. 17 Geupeugah lé Yonatan ubak gobnyan, "Bék teumakot, droeneueh hana rhot u dalam jaroe bapak ulôn. Gobnyan geuteupeue that-that bahwa droeneueh kheueh nyang teuma jeuet keuraja Israel dan bahwa ulôn teuma meuteumé teumpat duek di miyueb keududukan droeneueh." 18 Óh lheueh nyan Nabi Daud dan Yonatan geupeugot lom peujanjian meusahabat dikeue TUHAN. Óh ka lheuehnyan Yonatan laju geujakwoe u rumoh droe geuh, dan Nabi Daud teutab tinggai di Hores. 19 Óh lheuehnyan na meupadub droe nibak Zif jijak meuhadab ubak Raja Saul di Gibea dan jipeugah, "Nabi Daud na geumusöm di daerah kamoe di dalam guha-guha nyang na to deungon Hores, di ateueh Bukét Hakhila di siblaih u seulatan padang pasi Yehuda. 20 Kamoe meuteupeue, bahwa Teungku Amphon ka treb that neumeuniet keuneuk drob gobnyan; sabab nyan, tateuka kheueh u daerah kamoe. Kamoe jamin bahwa Teungku Amphon pasti hase neudrob gobnyan." 21 Geujaweueb lé Raja Saul, "Seumoga gata geubri beureukat lé TUHAN kareuna ka tapeubuet nyang jroh keu ulôn! 22 Tajak kheueh laju, dan tapeu pasti nyang paih; tapeureksa kheueh deungon biet-biet dipat Nabi Daud nyan na dan soe nyang ka leumah jingieng gobnyan disinan. Ulôn deungoe bahwa jihnyan gét that lisek. 23 Lé sababnyan tajak peureksa kheueh deungon teuliti guha-guha nyang ka lheueh jeuet keu teumpat jihnyan musöm, óh lheuehnyan tagisa kheueh beureujang keunoe mangat tajak lapor hai nyan ubak ulôn. Óh lheuehnyan ulôn jak laju meusigoe-sigoe deungon gata, dan meunyoe jihnyan mantong na di wilayah nyan, pasti jihnyan ulôn mita, bahpi harôh ulôn peuteung bayeueng ban saboh Yehuda!" 24 Dan jibeurangkat kheueh laju ureuëng nyan jiwoe u Zif leubeh awai nibak Raja Saul. Bak watéenyan Nabi Daud dan aneuëk buah gobnyan mantong na di padang pasi Maon, di pantôn nyang sungue di daerah seulatan padang pasi Yehuda. 25 Tantra Raja Saul dan gobnyan keudroe laju geuteuka keu geujak mita Nabi Daud, teuma na ureuëng jijak britée hainyan ubak Nabi Daud, akhé jih gobnyan laju geujak u gunong batée nyang na di padang pasi Maon dan geutinggai laju disinan. Óh ka geuteupeue lé Raja Saul hainyan, gobnyan bagaih that geujak tiyeub Nabi Daud. 26 Raja Saul dan tantra gobnyan geujak rot binéh gunong siblaih rot nyoe dan Nabi Daud dan aneuëk buah gobnyan geujak teuma rot binéh siblaih jéh. Nabi Daud deungon bagaih-bagaih geupeu lheueh droe nibak Raja Saul nyang ka geupeuphon keupong teumpat nyan keuneuk geudrob awaknyan. 27 Teuma deungon hana teusangka-sangka teuka kheueh sidroe ureuëng utosan jijak meuhadab ubak Raja Saul dan laju jipeugah, "Beubagaih laju Teungku Amphon neuwoe! Ureuëng Filistin ka jiprang nanggroe geutanyoe!" 28 Raja Saul pih laju geupiôh geutiyeub Nabi Daud, dan geuwoe ngon geujak laju muprang deungon ureuëng Filistin. Nyang kheueh sabab jih teumpat nyan geuboh nan Gunong Peumisah.

1 Samuel 24

1 Geubeudôh di sinan Nabi Daud laju geujak u daerah En-Gedi, lagée lazem jih laju geumusöm di dalam guha-guha. 2 Bak watée Raja Saul banmantong geuwoe nibak muprang geujak lawan ureuëng Filistin, gobnyan geuteurimong laju haba bahwa Nabi Daud na di padang pasi tô that deungon En-Gedi. 3 Ban geudeungoe nyan Raja Saul deungon reujang that geupiléh lhée ribée droe tantra nibak bansaboh Israel, óh lheuehnyan laju geubeurangkat geujak mita Nabi Daud dan aneuëk buah gobnyan di siblaih u timu Gunong Batée Kaméng Uteuen. 4 Dan watée teungoh geujak nyan Raja Saul laju trok ubak meu padubboh uempung bubiri nyang to ngon binéh rot. Disinan na teuma saboh guha, dan Raja Saul geutamong laju u dalam guha nyan keuneuk geujak u krueng rayeuk. Keubeutulan Nabi Daud dan aneuëk buah gobnyan pih na disinan teungoh geumusöm, teuma jiôh bacut u dalam. 5 Dan jipeugah kheueh lé aneuëk buah Nabi Daud ubak gobnyan, "Nyoe kheueh keuseumpatan nyang paleng get keu droeneueh hai Bapak! Bukon kheueh TUHAN ka geupeugah ubak droeneueh nyang lagée nyoe, 'Musoh gata Ulôn intat ubak gata, tapeusaneut kheueh ban galak até gata ateueh jihnyan!' " Óh lheuehnyan Nabi Daud sira geumeuéue ngon teuot geupeurab laju ubak Raja Saul nyang teungoh geu toih ék nyan. Deungon cara seungab-seungab laju geukoh bacut ija bajée jubah Raja Saul nyang meuhue-hue meureula ateueh tanoh nyan. 6 Teuma óh lheuehnyan, Nabi Daud meurasa ka meusalah sabab gobnyan ka geupeubuet hainyan. 7 Gobnyan geupeugah ubak aneuëk buah geuh, "Seumoga TUHAN geujaga bék sampoe ulôn peubuet jeuhet ateueh raja ulôn nyang ka geupiléh lé TUHAN. Mubacut pih hainyan hana jeuet ulôn peusakét até gobnyan, sabab gobnyan raja nyang geupiléh lé TUHAN!" 8 Meunan kheueh carajih Nabi Daud geupeuteunang até aneuëk buah geuh, dan hana geupeu idhin aneuëk buah geuh nyan jijak heuntam Raja Saul. Óh ka lheueh geuboih hajat rayeuk nyan Raja Saul laju geubeudôh dan geutinggai laju guha nyan, laju geujak lom teuma. 9 Nabi Daud pih laju geuteubiet lam guha nyan dan geumeuhôi laju Raja Saul dari likot, "Hoi, Teungku Amphon!" 10 Raja Saul laju geupaleng u likot dan Nabi Daud pi laju geusujut ubak tanoh sira geubri horeumat sira geupeugah, "Pakon Teungku Amphon neudeungoe haba gob nyang jipeugah bahwa ulôn keuneuk peuceulaka Teungku Amphon? 11 Jinoenyoe Teungku Amphon ka neurasa keudroe bahwa di dalam guha bunoe, TUHAN ka geuseurah Teungku Amphon ubak ulôn. Ulôn ka jibujuk lé sidroe-droe ureuëng mangat ulôn poh maté Teungku Amphon, teuma hainyan ulôn tulak. Ulôn jaweueb ubak awaknyan bahwa ulôn hana lôntem peusakét raja ulôn nyang ka geupiléh lé TUHAN. 12 Neukalon kheueh nyoe, hai Bapak ulôn! Neukalon kheueh ujong bajée jubah Teungku Amphon nyang ulôn koih nyoe! Nyang seubeuna jih ulôn hase ulôn peumaté Teungku Amphon bak watéenyan, teuma hainyan hana ulôn peubuet cuma ulôn koih mantong bacut ujong bajée jubah Teungku Amphon. Le sababnyan, deuh kheueh bahwa ulôn hana mubacut pih na niet dalam até ulôn keu meukeusut doraka u ateueh Teungku Amphon. Teuma Teungku Amphon hana piôh neutiyeub-tiyeub ulôn keuneuk neupeu maté ulôn, bahpih ulôn nyoe hana meusalah mubacut pih ubak Teungku Amphon. 13 Seumoga TUHAN kheueh nyang puputôh soe kheueh nibak geutanyoe nyang meusalah! TUHAN kheueh kira jih nyang balaih buet Teungku Amphon ateueh ulôn, teuma di ulôn hana mubacut pih na niet ulôn peusakét Teungku Amphon. 14 Teungku kon neuteupeue pribasa kuno nyoe, 'Buet nyang jeuhet teuma jipeubuet lé ureuëng nyang jeuhet.' Sabab nyan kheueh ulôn hana niet ulôn peuceulaka Teungku Amphon. 15 Neukalon kheueh u ateueh ulôn nyoe nyang jikeuneuk poh lé raja Israel! Neungieng kheueh ulôn nyoe nyang jilet-let sabe! Ulôn nyoe na kheueh lagée saboh asée maté, atawa lagée saboh gutée. 16 TUHAN jeuet keu hakém Teungku Amphon ngon ulôn. Seumoga Gobnyan geupeureksa peukara nyoe, dan geubila ulôn dan geupeuseeulamat ulôn nibak Teungku Amphon." 17 Óh ka seuleusoe Nabi Daud geupeugah haba nyan, geupeugah kheueh lé Raja Saul, "Droe kheueh nyan, hai Daud, aneuëk ulôn?" Dan geumo kheueh laju Raja Saul nyan. 18 Dan geupeugah lom ubak Nabi Daud, "Droeneueh nyang beutôi hai, aneuëk meutuwah, dan ulôn kheueh nyang salah. 19 Jeuhet ulôn ateueh droe kheueh ka tabalaih deungon buet nyang jroh. Bak uroenyoe gata ka tatunyok bahwa gata meukeusut jroh that ateueh ulôn, sabab gata hana tapoh ulôn, bah kheueh TUHAN ka geuseurah ulôn ubak gata. 20 Jareueng meuteumé ureuëng nyang meurumpok deungon musoh jih teuma jipeubiyeu meunan mantong musoh jihnyan udeb! Lé sababnyan, seumoga TUHAN geubri beureukat ubak gata lé sabab buet gata nyang gét ateueh ulôn nibak uroe nyoe! 21 Jinoenyoe ulôn ka yakén bahwa gata teuma jeuet keuraja ateueh Israel dan bahwa keurajeuen Israel teutab teuga dimiyueb peumeurintahan gata. 22 Jinoenyoe tameujanji kheueh ubak ulôn deumi TUHAN, bahwa gata hana tapeumaté keuturonan ulôn, dan meunan cit hana teuma tasampöh nan keuluwarga ulôn!" 23 Dan geumeusumpah kheueh laju Nabi Daud keu geutaát ubak banmandum nyan. Óh lheueh nyan geuwoe kheueh laju Raja Saul u rumoh gobnyan, dan Nabi Daud ngon aneuëk buah geuhpi laju teuma geuriwang ubak teumpat gobnyan musöm.

1 Samuel 25

1 Hana padubna treb teuma óh lheuehnyan Samuel meuninggai donya. Bansaboh nanggroe Israel meusapat keujijak seutôt upacara meukabong, óh lheuehnyan gobnyan teupeumiyueb di rumoh geuh keudroe di Rama. Óh lheueh nyan Nabi Daud geujak u padang pasi Paran nan jih. 2 Lam banda Maon na sidroe ureuëng agam nibak kawöm Kaleb, nan jih Nabal. Gobnyan na tanoh teumpat rabe beulatang peulara to ngon banda Karmel. Ureuëng nyan kaya lumpah na dan na geupeulara 3.000 boh bubiri dan 1.000 boh kaméng. Abigail nyan peurumoh gobnyan carông dan lagak that rupa, teuma Nabal pi-e jih gasa that dan peurangoe jih brok. Baksiuroe Nabal teungoh jigunteng bulée bubiri di Karmel. 4 Watée Nabi Daud nyang mantong na lam padang pasi geudeungoe hai nyan, 5 gobnyan geuyue laju ubak siploh droe peumuda mangat jijak u Karmel, 6 keujijak meurumpok ngon Nabal mangat jijak peutrok saleuem Nabi Daud keu jih nyan. Gobnyan geuyue awaknyan mangat jipeugah lagée nyoe ubak Nabal, "Saleuem seujahtra keu gata dan keuluwarga gata dan banmandum atra beunda gata. 7 Ulôn kudeungoe bahwa gata teungoh tagunteng bulée bubiri gata keudroe. Beutateupeue kheueh bahwa tukang-tukang meurabe nyang na lam daerah kamoe hántom na kamoe peukaru, dan meunan cit hántom na awaknyan geumadôh peue-peue mantong yoh awaknyan mantong na di Karmel. 8 Cuba gata tanyong bak awaknyan, ka pasti awaknyan jipeubeutôi keuhai nyan. Lé sababnyan, lôn meuharab adak jeuet aneuëk buah ulôn gata teurimong deungon gét lam rumoh gata, sabab kamoe meuteuka nibak uroe nyang rayeuk nyoe. Tajok kheueh teuma ubak namiet-namiet nyoe meunan cit keu lôn cit teuma. Nabi Daud, rakan jroh gata, peue-peue mantong meunurot keurilaan até gata." 9 Óh ka trok u Karmel lé aneuëk buah Nabi Daud laju jipeutrok peue nyang ka geupeugah lé Nabi Daud nyan ubak Nabal ateueh nan Nabi Daud, lheuehnyan awaknyan laju jipreh. 10 Teuma Nabal jijaweueb, "Daud? Soe jih nyan, soe nyan aneuëk Isai? Hántom lom lôn deungon nan nyan! Silawet nyoe le that-that namiet nyang jiplueng droe nibak teungku po jih lam nanggroe nyoe! 11 Pane na jeuet ulôn cok ruti ngon ié jieb lôn, meunan cit eungkoet sie nyang ka lôn keubah keu tukang gunteng bulée bubiri lôn, dan atranyan laju ulôn jok keu ureuëng nyang hana jeulaih asai usui jih!" 12 Lé sababnyan aneuëk buah Nabi Daud nyan laju jigisa lom ubak Nabi Daud sira jijak peugah haba Nabal nyan ubak gobnyan. 13 "Lat kheueh laju peudeueng gata bak keuieng teuh maséng-maséng!" peurintah Nabi Daud. Dan bagaih that aneuëk buah gobnyan jitaát ubak peurintah nyan. Meunan cit Nabi Daud geulat cit peudeung geuh bak keuieng gobnyan dan laju geubeurangkat leubeh kureueng na 400 droe aneuëk buah geuh, nyang 200 droe tinggai keu nyang keumiet barang-barang. 14 Dan keu Abigail purumoh Nabal, ka jibritée lé sidroe peulayan Nabal lagéenyoe, "Peu kheueh Po cut deungoe? Nabi Daud ka geukirém na padubdroe utosan nibak padang pasi keujijak bri saleuem keu teungku tanyoe, teuma lé teungku po ka seub ngon geuteunak awaknyan. 15 Padahai awaknyan gét that keu kamoe. Hántom na kamoe jipeukaru, dan meunan cit hántom na kamoe geumadôh meusapeue-sapeue pih watée kamoe meurakan ngon awaknyan lam padang pasi. 16 Uroe malam awaknyan jijaga kamoe watée kamoe meurabe kaméng ngon bubiri to-to ngon awaknyan. 17 Lé sababnyan, peutimang kheueh hai nyoe, dan cok kheueh punutôh peue nyang hase Pocut peubuet. Sabab ka pasti na meunalah ateueh teungku po geutanyoe dan banmandum keuluwarga jih. Teungku po tanyoe keubit kreueh that ulée nyang kheueh sabab gobnyan hana hase tameututoe haba!" 18 Ban jideungoe meunan lé Abigail geucok dua reutoih boh ruti, dan baluem kulét peunoh meuasoe ngon ié anggô, limong boh bubiri teupanggang, tujoh blah kilo gram gandom gureng, 100 boh tangke boh anggô tho dan 200 boh juadah ara. Banmandum nyan laju teupeudieng ateueh keuleudée-keuleudée awaknyan. 19 Dan jipeugah kheueh Abigail nyan ubak peulayan-peulayan gobnyan, "Gatajak kheueh beuawai nibak ulôn; ulôn kuseutôt gata dilikot." Teuma lé ureuëng inong nyan hana geupeugah sapeue ubak lakoe geuh. 20 Abigail laju jipasang ateueh keuleudée jih, dan watée gobnyan ka trok bak saboh rot nyang meukuwet nibak binéh gunong, laju meusiliseh gobnyan ngon Nabi Daud dan aneuëk buah gobnyan nyang teungoh jitreun jijak ubak arah awaknyan. 21 Bak watéenyan Nabi Daud teungoh geupike, "Hana guna ulôn jaga atra awaknyan lam padang pasi! Hana meubacut pih nyang gadôh atra jihnyan; dan jinoenyoe jibalaih buat lôn nyang jroh ngon nyang jeuhet! 22 Bah kheueh Po teu Allah geupoh maté ulôn meunyoe hana ulôn maté banmandum ureuëng agam nyang na disinan sigohlom mata uroe jiteubiet!" 23 Watée Abigail geukalon Nabi Daud, gobnyan laju geutreun ateueh keuleudée geuh dan laju jisujut bak gaki Nabi Daud, 24 dan geupeugah ubak gobnyan, "Teungku Po, neutem kheueh deungoe ulôn meututoe! Bah kheueh buet nyang salah nyan ulôn tanggong keudroe! 25 Bék kheueh Teungku Po pike keu Nabal, ureuëng nyang hana meuguna nyan! Jihnyan ureuëng bangai -- saban deungon makna nan jih. Ulôn hana lôn ngieng utosan-utosan nyang Teungku kirém nyan. 26 Po teu Allah ka geutam Teungku Po neujak tungbila dan neupoh maté banmandum musoh-musoh teungku Po. Dan jinoenyoe Teungku Po, deumi nan TUHAN nyang udeb, ulôn meusumpah, bah kheueh naseb banmandum musoh Teungku Po dan soe mantong ureuëng nyang keuneuk peuceulaka Teungku Po saban lagée naseb Nabal. 27 Teurimong kheueh bungöng jaroe nyang kamoe ba nyoe keu Teungku Po, dan aneuk buah Teungku Po. 28 Peumeuáh kheueh ateueh buet kamoe nyang lalée. TUHAN pasti geupeujeuet Teungku Po dan keuturonan Teungku Po jeuet keuraja ateueh Israel, sabab Teungku Po neumuprang keu TUHAN; dan Teungku Po hana neupeubuet buet nyang jeuhet siumu udeb. 29 Meunyoe na sidroe ureuëng jijak seurang Teungku Po dan jicuba keuneuk poh maté Teungku Po, Teungku Po pasti geulindong lé TUHAN Po teu Allah lagée atra nyang jijaga lé ureuëng po jih. Teuma musoh Teungku Po teuma geurhom jiôh-jiôh lé TUHAN, jirhom le tukang geulawa. 30 TUHAN teuma geupubuet banmandum nyang jroh nyang ka geupeujanji ubak Teungku Po, dan hana treble Teungku Po teupeujeuet keu raja ateueh Israel. 31 Bak watéenyan Teungku Po teuma teuingat bahwa Teungku Po hana neupoh maté ureuëng laén deungon hana meusabab atawa neumeuhakém keudroe deungon nyan teuma Teungku Po hana peureulée meurasa seudeh atawa meunyeusai. Dan meunyoe TUHAN ka geubri beureukat ateueh Teungku Po, bék kheueh neutuwoe ubak namiet Teungku Po nyoe." 32 Dan geupeugah kheueh lé Nabi Daud ubak inong nyan, "Teupujoe kheueh TUHAN, Allah Israel, nyang ka geukirém gata tajak meurumpok ngon lôn nibak uroenyoe! 33 Teupujoe kheueh ateueh keubijaksanaan gata dan teupujoe kheueh teuma ateueh gata keudroe sabab ka tapeuteun langkah ulôn keu lôn jak pumaté ureuëng laén dan lôn meuhakém keudroe. 34 TUHAN ka geupeuteun ulôn lôn peubuet jeuhet ateueh gata. Deumi TUHAN Po teu Allah Israel nyang udeb, meunyoe gata hana reujang tajak meurumpok ngon lôn, ka pasti banmandum aneuëk buah Nabal ka maté bak watée mata uroe jiteubiet!" 35 Óh lheuehnyan Nabi Daud laju geuteurimong peue nyang ka jiba lé Abigail keu gobnyan, dan laju geupeugah ubak jihnyan, "Woe kheueh u rumoh gata dan bék khawate. Nyang gata lakée ulôn teurimong." 36 Watée Abigail jigisa ubak Nabal, rupari na khanuri rayeuk lam rumoh jihnyan, lagée khanuri lam rumoh raja. Dan lé sabab Nabal ka mabök jimeusukaria, ubak jihnyan hana jipeugah sapeue lé peurumoh gobnyan sampoe óh singoh bungoh nyan. 37 Beungoh nyan, watée Nabal ka hana mabök le, peurumoh jihnyan laju jipeugah ubak Nabal nyan banmandum buet-buet nyang jeuhet nyan. Lé sabab nyan teuma Nabal laju meuteumé seurangan jantong dan bansaboh tuboh jih ka jeuet keu lapée. 38 Na kira-kira siploh uroe teuma óh lheueh nyan Nabal jiteuka lom seurangan jantong nyang teuka nibak TUHAN lé sabab nyan gobnyan laju meuninggai donya. 39 Watée Nabi Daud geudeungoe bahwa Nabal ka meuninggai donya, laju geupeugah lagée nyoe, "Teupujoe kheueh TUHAN! Gobnyan ka geubalaih ateueh Nabal sabab jihina ulôn, dan ka geupeuteun ulôn nyoe bék sampoe ulôn peubuet nyang jeuhet. TUHAN ka geuhuköm Nabal sabab buet jih nyang jeuhet nyan." Óh lheueh nyan Nabi Daud geukirém utosan ubak Abigail keuneuk geuseulangke gobnyan jeuet keupurumoh geuh. 40 Dan trok kheueh laju utosan Nabi Daud ubak ureuëng inong nyan di Karmel dan jipeugah ubak inong nyan, "Kamoe geuyuejak lé Nabi Daud meuhadab Pocut, sabab gobnyan geuyue jak lakée Pocut mangat jeuet keubinoe gobnyan." 41 Abigail laju geubeudôh dan geusujut sira geupeugah, "Ulôn nyoe namiet Nabi Daud, ulôn kutém rhah gaki namiet gobnyan." 42 Óh lheuehnyan meukeumah kheueh laju Abigail keuneuk geujak ngon awak seulangke nyan. Gobnyan geu-ek ateueh keuleudée geuh keudroe dan ji-iréng teuma lé limong droe dendayang inong, geujak kheueh gobnyan geuseutôt utosan nyang geukirém lé Nabi Daud, deungon nyan teuma inong nyan ka jeuet keupurumoh Nabi Daud. 43 Sigohlom nyan Nabi Daud ka geumeukawen ngon Ahinoam di Yizreel, dan jinoenyoe Abigail pih ka jeuet keupeurumoh gobnyan. 44 Watéenyan cit teuma, Saul ka geupeukawen Mikhal, aneuëk inong gobnyan, na kheueh peurumoh Nabi Daud, deungon Palti bin Lais nibak banda Galim.

1 Samuel 26

1 Bak siuroe ureuëng-ureuëng dari Zif jijak ubak Saul di Gibea dan jijak britée ubak Raja Saul nyan bahwa Nabi Daud teungoh geumusöm di Gunong Hakhila nibak binéh padang pasi Yehuda. 2 Teuma deungon reujang that Raja Saul laju geubeurangkat sira geuba sajan na lhée ribée tantra nyang ka teupiléh di bansaboh nanggroe Israel, geujak laju u padang pasi Zif keu geujak mita Nabi Daud. 3 Raja Saul laju geupeudong khimah geuh nibak binéh jalan tô that ngon Gunong Hakhila nyan. Nabi Daud nyang mantong na di padang pasi, geudeungoe bahwa Raja Saul teungoh geuseutôt gobnyan dan ka sampoe u padang pasi. 4 Lé gobnyan pih geukirém ureuëng mangat jijak luem gobnyan, dan barô kheueh geuteupeue deungon pasti bahwa Raja Saul beutôi ka na disinan. 5 Deungon bagaih that Nabi Daud geujak ubak khimah-khimah Raja Saul nyan dan óh ban trok keunan deuh laju geukalon khimah teumpat Raja Saul teungoh geuéh to deungon Abner aneuëk Ner. Khimah Raja Saul nyan na diteungoh-teungoh that, dan tantra gobnyan jipeudong khimah jih diban sikeulileng nyan. 6 Óh lheuehnyan Nabi Daud geutanyong laju ubak Ahimelekh nyang ureuëng Het nyan, dan ubak Abisai syedara Yoab (Mak awaknyan na kheueh Zeruya), "Soe nyang beurani jijak tamong deungon ulôn u dalam khimah Raja Saul?" Ji jaweueb lé Abisai, "Ulôn!" 7 Teuma bak malam nyan cit teuma Nabi Daud dan Abisai sira geumusöm-musöm ngon geuseuk-seuk bacut-bacut laju geupeurab ubak khimah Raja Saul, dan leumah laju geukalon Raja Saul nyan teungoh geu éh didalam khimah geuhnyan, seudangkan kapak gobnyan na teuglông meukeumat nibak tanoh tô ngon bineh ulée gobnyan. Seudangkan Abner dan pasokan geuhnyan ka habéh teungéut banmandum nibak sikeulileng Raja Saul. 8 Laju geupeugah lé Abisai ubak Nabi Daud, "Po teu Allah ka geuseurah musoh droeneueh ubak droeneueh nibak malam nyoe. Neupeu idhin kheueh ulôn mangat lôn tob ngon kapak jih keudroe ubak gobnyan sampoe beusoit trok ubak tanoh, ulôn poh gobnyan deungon sigoe tob, hana trok dua goe!" 9 Teuma Nabi Daud geupeugah, "Bék gata peuteupéeh mubacut pih gobnyan! TUHAN pasti geuhuköm ureuëng nyang jipeubuet jeuhet keu raja nyang geupiléh lé Gobnyan. 10 Deumi TUHAN nyang udeb, ulôn ku teupeue bahwa singoh TUHAN keudroe nyang poh maté Raja Saul nyan, meunyoe ajai gobnyan ka trok, atawa pih meunyoe gobnyan tiwaih didalam prang. 11 Kira jih TUHAN geutham ulôn -- poh raja nyang ka geupiléh lé Gobnyan! Tacok kheueh mantong kapak gobnyan meunan cit deungon kendi geuhnyan óh lheueh nyan geutanyoe tajak laju nibak teumpat nyoe!" 12 Teuma Nabi Daud laju geucok kapak dan kendi Raja Saul nyan nyang na tou binéh ulée gobnyan, óh lheueh nyan laju geujak. Hana meusidroe pih deuh jikalon hainyan atawa jiteupeue peue nyang ka teujadi, atawa pih teujaga nibak teungéut, sabab TUHAN ka geupeuteungéut awaknyan banmandum teuéh deungon meukanga. 13 Lé Nabi Daud geujeumeurang u binéh pantôn nyang laén sampoe trok ubak pucak gunong, akhé jih gobnyan ka that jiôh nibak khimah-khimah Raja Saul. 14 Óh lheueh nyan teuma geukuk kheueh laju lé Nabi Daud ubak Abner dan tantra Saul, geupeugah, "Abner! Peu kheueh kah deungoe su ulôn nyoe?" Abner pih jikuk cit teuma, "Soe kheueh ureuëng nyang kuk-kuk nyan?" 15 Geujaweueb lé Nabi Daud, "Abner, bukon kheueh gata ureuëng nyang paleng hibat di Israel? Pakon gata hana tajaga Teungku Amphon gata, baginda raja gata? Banmantong na ureuëng jitamong u dalam khimah gata keu jijakpoh maté Teungku Amphon gata. 16 Gata hana hase tapeujak tugaih gata, Abner! Deumi TUHAN nyang udeb, gata banmandum patot maté, sabab hana tajaga Teungku Amphon gata, raja nyang ka geupiléh lé TUHAN. Cuba gata ngieng! Dipat kheueh kapak raja gata? Dipat teuma kendi nyang na teukeubah tô ngon ulée raja?" 17 Raja Saul geuturi keu su Nabi Daud, dan laju geutanyong, "Peu kheueh gata nyan, hai aneuëk ulôn?" Geujaweueb lé Nabi Daud, "Nyoe, beutôi, Teungku Raja." 18 Laju geupeugah lom, "Pakon trok án uroenyoe Teungku Amphon mantong neutiyeub-tiyeub ulôn? Peu kheueh keusalahan ulôn nyoe? 19 Teungku Amphon, neudeungoe kheueh seumah sujut ulôn nyoe. Seuandai jih TUHAN nyang yue Teungku Amphon mangat ulôn nyoe neulawan, tapeuna saboh peuseumahan keureubeuen mangat jeuet tapeu reuda beungéh gobnyan keu ulôn. Teuma meunyoe nyang yue Teungku Amphon na kheueh manusia, seumoga ureuëng nyang yue nyan geukutok lé TUHAN! Sabab akibat nibak buet awaknyan, ulôn ka teu use nibak tanoh atra TUHAN dan teupaksa harôh teujak u nanggroe laén di teumpat nyan ulôn harôh meu iébadat ubak dewa-dewa aséng. 20 Bék kheueh neupeubiyeu ulôn nyoe maté nibak tanoh gob, nyang that jiôh nibak TUHAN. Keupeue guna jih raja Israel geujak keu geujak tindéeh si aneuk gutée lagée ulôn nyoe? Keupeue guna jih gobnyan neutiyeub ulôn bak lagée neulet manok uteuen?" 21 Geujaweueb lé Raja Saul, "Ulôn ka meusalah. Gata woe kheueh hai Daud, aneuëk ulôn! Ulôn hana teuma lôn peubuet jeuhet le ateueh gata sabab gata ka tapeurela ulôn udeb sampoe malam beuklam. Pié ulôn gét that bangai. Ulôn biet-biet ka keuliru!" 22 Teuma Nabi Daud geujaweueb, "Nyoe kheueh tungkat Teungku Amphon, neuyue kheueh laju sidroe lamkawan tantra Teungku Amphon jeuet jijakcok keunoe. 23 TUHAN teuma geubri beureukat keu ureuëng nyang seutia dan jujoe. Sabab bahpih nibak uroenyoe TUHAN ka geuseurah Teungku Amphon keu ulôn, teuma ulôn hana meuniet meubacut pih ulôn peubuet jeuhet ateueh Teungku po, raja nyang ka geupiléh lé TUHAN. 24 Lé sababnyan, lagée Teungku Po ka ulôn peubiyeu udeb nibak uroenyoe, meunan cit kira jih ulôn geupeulindong lé TUHAN dan geupeuleupah nibak sigala bahya!" 25 Dan geupeugah kheueh teuma lé Raja Saul ubak Nabi Daud, "TUHAN geubri beureukat keu gata, hai aneuëk ulôn! Gata teuma meuhase nibak peue mantong nyang gata peubuet!" Óh lheueh geupeugah nyan Nabi Daud laju geutinggai teumpat nyan dan laju geujak lom ho laén teuma, seudangkan Raja Saul geubeudôh disinan laju geuwoe u rumoh gobnyan.

1 Samuel 27

1 Nabi Daud geupike didalam até gobnyan, "Pakriban mantong bak si uroe dan watée nyang paih pasti Raja Saul jipoh maté ulôn. Jadi, hanale jalan nyang laén nibak ulôn, seulaén ulôn peuplueng droe u nanggroe Filistin. Deungon lagée nyan Raja Saul hana geumita le ulôn di nanggroe Israel nyoe, dan ulôn pih aman." 2 Óh geupike nyang lagéenyan Nabi Daud deungon ban nam reutôh droe aneuëk buah gobnyan laju geujak meurumpok deungon Akhis aneuëk Moah, nyang mat keurajeuen di banda Gat. 3 Teuma geutinggai kheueh teutab gobnyan deungon aneuëk buah geuh nyang nam reutôh droe nyan di banda Gat, maséng-maséng awaknyan deungon keuluwarga droe geuh. Nabi Daud geuba sajan ban dua droe ureuëng binoe geuh, ureuëng inong nyan na kheueh Ahinoam inong nibak Yizreel, dan Abigail, inong balée si Nabal ureuëng Karmel. 4 Bak watée Raja Saul geudeungoe bahwa Nabi Daud ka geupeulueng droe u Gat, gobnyan hana le geu useuha geujak drob gobnyan. 5 Laju Nabi Daud geu bri usui ubak Akhis lagée nyoe, "Meunyoe Teungku Amphon meurasa seunang deungon ulôn, neubri kheueh ubak ulôn saboh banda nyang ubit di dalam gampông nyang sungue keu teumpat tinggai, sampoe namiet Teungku Amphon nyoe hana meunumpang di teumpat Teungku Amphon di ma banda nyoe." 6 Laju Akhis geubri banda Ziklag ubak Nabi Daud, dan nyang kheueh sabab jih Ziklag jeuet keuhak milék raja-raja Yehuda sampoe án jinoe. 7 Nabi Daud tinggai di nanggroe Filistin nyan nyang treb jih sithon peuet buleuen. 8 Sidub nyan treb Nabi Daud dan aneuëk buah gobnyan ka kayem that geuprang ureuëng Gesur, ureuëng Girzi, dan ureuëng Amalek; bansa-bansa nyan ka treb that tinggai di wilayah nyan. Awaknyan geuseureubu wilayah nyan sampoe trok u Sur, dan laju sampoe u nanggroe Meusé. 9 Bubena ureuëng agam dan ureuëng inong ka habéh geupoh maté, meunan cit geureupah laju bube nyang na beulatang peulara, bubiri, leumô, keuleudée, unta dan hana nyang tinggai trok ubak peukayan nyan pi geureupah bubena. Óh lheueh nyan laju geugisa geujak meuhadab ubak Akhis. 10 Meunyoe Akhis jitanyong ubak gobnyan, "Hoe neujak muprang bak uroe nyoe?" Teuma Nabi Daud laju geupeugah ubak gobnyan bahwa geuhnyan ka geujak u bagian seulatan Yehuda atawa u wilayah ureuëng Yerahmeel atawa u wilayah teumpat tinggai ureuëng Keni. 11 Hana meusidroe pih nibak daerah-daerah nyang geuprang nyan geupeubiyeu udeb, mangat bék nale ureuëng di daerah nyan nyang hase jijak u Gat jijak meulapor peue nyang sikeubiet jih ka geupubuet lé Nabi Daud dan aneuëk buah gobnyan. Meunan kheueh buet Nabi Daud seumantong gobnyan tinggai di nanggroe ureuëng Filistin. 12 Teuma Akhis geupeucaya ubak Nabi Daud dan geupike didalam até gobnyan, "Gobnyan keubiet that jibanci lé bansa jih keudroe, sampoe jihnyan teupaksa jeuet keu namiet ulôn siumu udeb."

1 Samuel 28

1 Na meupadub treb teuma óh lheuehnyan di ureuëng Filistin jikrah lom pasokan jih keu jijak prang ureuëng Israel, dan Akhis jipeugah ubak Nabi Daud, "Teuntée droeneueh muphom droeneueh dan aneuëk buah droeneueh harôh neumuprang neudong blaih ulôn." 2 Geujaweueb lé Nabi Daud, "Nyan ka teuntée ya Teungku Amphon, eunteuk Teungku Amphon jeuet neukalon keudroe peue nyang hase jipeubuet lé namiet Teungku Amphon nyan." Laju geupeugah lom lé Akhis, "Ka gét meunyoe meunan! Droeneueh ulôn angkat jeuet keu peungawal ulôn nyang teutab." 3 Samuel ka meuninggai donya, dan gobnyan jipeuratok ngon jipeuba-é lé banmandum rakyat Israel dan jipeukubu di Rama, banda gobnyan keudroe. Napadub na treb nyang ulikot Raja Saul ka geu use di Israel banmandum tukang tanueng nyang carông jingieng keutika meunan cit geu use teuma si tukang sihé nyang carông jihôi areuwah. 4 Teuma bak watée tantra Filistin jimeusapat dan jipeudong khimah tô ngon banda Sunem, Raja Saul pih laju geupeusapat ureuëng Israel, dan awaknyan laju teuma jipeudong khimah nibak Gunong Gilboa. 5 Bak watée Raja Saul deuh geukalon tantra Filistin nyan, gobnyan ka jeuet keu yo ngon teumakot that-that. 6 Laju gobnyan geulakée peutunyok ubak TUHAN, teuma TUHAN hana geujaweueb doá geuh nyan, bah kheueh nyan deungon meulumpo meunan cit deungon cara geungui Urim dan Tumim atawa pih meulalu nabi-nabi. 7 Sabab nyan Raja Saul laju geupeugah ubak dumna peungawai gobnyan, "Tajak mita kheueh laju sidroe dukon nyang inong nyang carông jihôi areuwah, ulôn teuma lônjak ubak jihnyan keu lônjak lakée peutunyok." Awaknyan jijaweueb, "Di En-Dor na tabeb nyang lagée neupeugah nyan." 8 Lé Raja Saul laju geumeunyamar mangat bék jiteupeue lé gob. Deungon jiseutôt lé dua droe ureuëng agam, geubeurangkat kheueh gobnyan dan trok kheueh teuma gobnyan u rumoh nyang geumita nyan óh ka watée malam teuka. Teuma geupeugah lé Saul, "Gatahôi kheueh laju areuwah ureuëng nyang teuma ulôn teuôh nan jih nyoe, dan talakée kheueh mangat jihnyan jitem ramai peue nyang teuma teujadi." 9 Ureuëng tabeb nyan jijaweueb, "Teuntée Teungku pih neuteupeue bahwa Raja Saul ka geu use di Israel banmandum dukön nyang carông meuramai dan nyang carông teuma jihôi areuwah. Pakon teuma Teungku neupeuceulaka ulôn sampoe ulôn neupoh maté?" 10 Lé Saul geumeusumpah, "Deumi TUHAN nyang udeb, ulôn meujanji bahwa gata hana teuhuköm sabab tapeubuet hainyoe." 11 Ureuëng nyan jitanyong, "Areuwah soe kheueh nyang harôh ulôn hôi keu Teungku Amphon?" Geujaweueb lé Saul, "Areuwah Samuel." 12 Bak watée ureuëng inong nyan geukalon Samuel, gobnyan laju jita-uk dan jipeugah ubak Raja Saul, "Keupeue Teungku neu peungeuet ulôn? Teungku Amphon kheueh rupari nyang Raja Saul nyan!" 13 Geujaweueb lé Raja Saul, "Bék ta-takot! Tapeugah mantong peue nyang ka gata kalon!" Ureuëng inong nyan jipeugah, "Deuh ulôn ngieng roh na teuka nibak bumoe." 14 Geutanyong lé Raja Saul, "Pakriban hi jih?" Geujaweueb lé gobnyan, "Na sidroe ureuëng agam nyang ka tuha, gobnyan teuka deungon geungui bajée jubah." Bak watée nyan geuteupeue lé Raja Saul bahwa nyan na kheueh Samuel, dan gobnyan laju geusujut geuhoreumat ubak geuhnyan. 15 Óh ka lheuehnyan Samuel geupeugah ubak Saul, "Kepeue gata peukaru ulôn? Keupeue teuma neuhôi ulôn nyoe lom?" Geujaweueb lé Saul, "Ulôn lumpah that bingong sabab ka jiprang lé ureuëng Filistin, seudangkan Po teu Allah ka geutinggai ulôn. Ulôn hana geutem seuôt le lé Gobnyan, bah kheueh nyan meulalu nabi-nabi, meunan cit meulalu lumpo. Sabab nyan ulôn lakée ubak Bapak, mangat Bapak neupeugah peue nyang harôh ulôn peubuet." 16 Geupeugah lom lé Samuel, "Keupeue guna jih ulôn neuhôi seudang kan TUHAN ka geutinggai gata dan jeuet keu musoh gata? 17 TUHAN ka geupeubuet nyan u ateueh gata lagée nyang ka geupeugah nyan ubak ulôn. TUHAN ka geucok keurajeuen Israel nibak jaroe gata dan geubri keurajeuen nyan ubak Nabi Daud. 18 Gata ka talawan peurintah TUHAN dan hana tatem peubinasa ureuëng Amalek meunan cit ngon banmandum hareuta milek awaknyan. Nyang kheueh sabab jih gata lagée tarasa nyan geupeusaneut lé TUHAN. 19 Gata dan ureuëng-ureuëng Israel teuma geuseurah ubak ureuëng Filistin. Singoh beungoh gata dan aneuëk-aneuëk agam gata teuma tameusapat deungon ulôn; bahpi banmandum tantra Israel pi geuseurah lé TUHAN keu ureuëng Filistin." 20 Bak watée nyan cit teuma, Raja Saul reubah teugageueng ateueh tanoh lagée ureuëng jitak lé geulanteue, sabab gobnyan leumpah that teukeujot geudeungoe haba Samuel nyan. Dan lom teuma gobnyan ka leumoh that-that, sabab hana geupajoh sapeue ka siuroe simalam. 21 Tabeb nyan laju jipeurab ubak Raja Saul dan deuh geukalon Raja Saul nyan gét that bingong: sababnyan tabeb inong nyan jipeugah ubak gobnyan, "Teungku Amphon, ulôn ka ulôn keureubeuen peue nyang Teungku Amphon lakée. 22 Lé sababnyan, bah kheueh Teungku Amphon neupeukabui teuma peue nyang ulôn lakée; neupajoh kheueh nyoe na bacut peunajoh nyang teuma ulôn keubah keu Teungku Amphon mangat Teungku Amphon hase neujak lom meuneujak Teungku Amphon." 23 Raja Saul geutulak dan geupeugah gobnyan hana geutem makheun. Teuma óh ka lheueh banmandum peungawai gobnyan jipaksa gobnyan mangat jitem cit makheun, awaknyan laju jiturot. Geubeudôh laju nibak tanoh teumpat gobnyan reubah nyan dan geuduek laju di ateueh meulasah. 24 Deungon reujang that ureuëng inong nyan laju jijak sie aneuëk leumô jihnyan nyang teumbon dan jicok teupông laju jiramah-ramah, teupông nyan jipeuget laju jeuet keu ruti nyang hana meurago. 25 Óh ka lheuehnyan laju jipeuhidang peunajoh nyan ubak Raja Saul dan peugawée-peugawée gobnyan, laju awaknyan geumakheun. Óh lheuehnyan jijak kheueh awaknyan nibak malam nyan cit teuma.

1 Samuel 29

1 Ureuëng Filistin laju jipeusapat banmandum tantra jih di Afek, seudangkan ureuëng Israel jipeudong khimah jih tô ngon mata ié di Pantôn Yizreel. 2 Ban limong droe raja Filistin laju geumaju dan geudong meuriti deungon keusatuan-keusatuan nyang maséng-maséng pasokan nyan na sireutoih dan siribée droe; seudangkan Nabi Daud dan aneuëk buah gobnyan geumeubaréh teuma dilikot to ngon raja Akhis. 3 Bubena panglima ureuëng Filistin ban jikalon awaknyan laju jitanyong, "Peubuet keunoe ureuëng-ureuëng Ibrani nyoe?" Geujaweueb lé Akhis, "Nyoe Nabi Daud, beukaih peungawai Raja Saul di nanggroe Israel. Jihnyoe ka treb tinggai nibak ulôn. Watée phon jihnyan jijak ubak ulôn sampoe án uroenyoe, gohlom na ulôn teumé jihnyan jipeubuet salah." 4 Teuma bubena panglima Filistin nyan beungéh keu Akhis sira jipeugah ubak gobnyan, "Neuyue laju ureuëng nyan jijak woe u banda nyang ka neubri ubak jih nyan. Jihnyan hana jeuet jimuprang meusigoe deungon geutanyoe; pat tateupeue jihnyan jikianat keu geutanyoe watée geutanyoe teungoh tamuprang. Peu kheueh nyoe bukon saboh keuseumpatan nyang paleng gét bak jih keu jicok até raja jih deungon jalan jipoh maté banmandum aneuëk buah geutanyoe? 5 Gobnyan Nabi Daud, keu jihnyan kheueh bubena ureuëng inong yoh watée ilée jimeuca-e ngon jimeunyanyo sira jimeulikak ngon jimeunari nyang jipeugah lagée nyoe, 'Saul ka jipoh maté meuribée-ribée musoh, teuma Nabi Daud meuploh-ploh ribée.' " 6 Laju Akhis jihôi Nabi Daud dan jipeugah ubak gobnyan, "Ulôn peucaya deumi TUHAN nyang udeb, bahwa gata seutia ubak ulôn. Ulôn galak meunyoe gata sabe na disampeng ulôn bak watée ulôn muprang nyoe. Sabab yohphon gata tateuka ubak ulôn sampoe án nibak uroenyoe, mubacut pih hana lôn teumé gata na meusalah. Teuma raja-raja nyang laén nyan hana jigalak keu gata. 7 Sabab nyan tajakwoe kheueh deungon seulamat, dan bék kheueh tapeubuet sapeue nyang hase jipeuteuka beungéh lé awaknyan." 8 Geujaweueb lé Nabi Daud, "Peu kheueh buet nyang salah nyang ka ulôn peubuet hai Teungku Amphon? Meunyoe lagée Teungku Amphon peugah nyan, Teungku Amphon hana neuteumeu meubacut pih buet nyang salah nibak ulôn yohphon that ulôn layani Teungku Amphon sampoe nibak uroe nyoe, pakon teuma ulôn hana neubri lôn jakmuprang mangat lônjak lawan musoh Teungku Amphon?" 9 Geujaweueb lé Akhis, "Gata tateupeue bahwa gata ulôn anggab seutia ban lagée Malaikat Po teu Allah. Teuma banmandum panglima nyan ka jipeuputôh bahwa gata hana jeuet tajak muprang meusajan-sajan deungon kamoe. 10 Lé sabab nyan, hai Nabi Daud, singoh beungoh gata banmandum nyang ka tatinggai Raja Saul dan tajak ubak ulôn, harôh gata beudôh ban suboh that dan tabeurangkat laju deungon sigra sigohlom mata uroe jiteubiet." 11 Lé sababnyan, ban singoh beungoh mantong reuneu-reuneu, geubeurangkat kheueh Nabi Daud dan aneuëk buah gobnyan geujakwoe u nanggroe Filistin, seudangkan tantra Filistin nyan jibeurangkat teuma u Yizreel.

1 Samuel 30

1 Dua uroe teuma óh lheueh nyan, Nabi Daud dan aneuëk buah gobnyan geugisa lom teuma u banda Ziklag. Óh watée ka trok keunan, laju deuh geukalon bahwa ureuëng Amalek ka jiseureubu bagian seulatan nanggroe Yehuda dan jiprang teuma Ziklag. Awaknyan hana geupoh ureuëng meusidroe pi. Teuma geutot sampoe habéh sapan sapa banda nyan dan óh lheuehnyan geubeudôh disinan geujak laju gobnyan sira geuba sajan bubena ureuëng inong, aneuëk manyak dan peunduduek nyang laén teuma. Meunan cit awaknyan ka jiteuen sidroe keuluwarga Nabi Daud dan keuluwarga aneuëk buah gobnyan, meunan cit deungon bandua droe peurumoh Nabi Daud, Ahinoam dan Abigail. Nabi Daud dan aneuëk buah gobnyan lumpah that seudeh, sampoe awaknyan laju geumo musok-musok hana piôh sampoe rab pansan. 6 Aneuëk buah Nabi Daud keubit that aloh alah sabab ka gadôh aneuëk peurumoh geuh. Sabab nyan awaknyan jikeuneuk geulawa Nabi Daud deungon aneuk batée. Jadi Nabi Daud na dalam keuadaan susah that-that, teuma até gobnyan geupeuteuga lom lé TUHAN Po teu Allah. 7 Lé Nabi Daud geupeugah ubak Teungku Imeum Abiyatar aneuëk Ahimelekh, "Taba kheueh laju efod nyan keunoe ubak ulôn!" Teuma lé Abiyatar laju geuba efod nyan ubak gobnyan. 8 Óh lheuehnyan geuteumanyong kheueh lé Nabi Daud ubak TUHAN, "Peu kheueh harôh ulôn tiyeub ho nyang jijak kawan ureuëng nyang seureubu nyan? Peu kheueh hase ulôn seutôt awaknyan?" Geujaweueb lé TUHAN, "Nyoe, jak let kheueh laju; gata teuma meurumpok ngon awaknyan dan tapeubeubaih bubena tawanan." 9 Ban geudeungoe nyan laju geubeurangkat kheueh Nabi Daud meusigo-sigo deungon ban nam reutoih droe aneuëk buah gobnyan. Bak watée awaknyan sampoe nibak binéh Krueng Besor, Nabi Daud geupeujak laju meuneujak gobnyan deungon aneuëk buah na 400 droe; seudangkan nyang 200 droe teuk nyan tinggai disinan. Sabab ka hék that-that dan hán hase jijeumeurang Krueng Besor. 11 Teungoh jijak nyan aneuëk buah Nabi Daud meurumpok teuma deungon sidroe aneuëk agam ureuëng bansa Meusé di padang, laju aneuëk nyan geucok geuba jak peuhadab ubak Nabi Daud. Aneuëknyan laju geubri makheuen meunan cit deungon ié jieb, 12 meunan cit deungon peunajoh kue boh ara, dan dua boh karang boh anggô nyang ka tho. Óh ka lheueh gobnyan jimakheun, teunaga aneuëknyan ka puléh lagée bak nyang ka; rupari aneuëk nyan ka lhée uroe jiteuen deuek hana jimakheuen meunan cit ngon jijieb ié! 13 Óh lheuehnyan Nabi Daud geutanyong ubak aneuëk nyan, "Soe teungku gata, dan dipat asai gata?" Jijaweueb lé aneuëk nyan, "Ulôn ureuëng nanggroe Meusé, namiet sidroe ureuëng Amalek. Ulôn jitinggai lé teungku lôn na lhée uroe nyang ka lheueh sabab ulôn deumam. 14 Kamoe ka lheueh kamoe jak prang wilayah ureuëng Kreti di wilayah seulatan Yehuda dan wilayah marga Kaleb, dan kamoe ka kamoetot habéh banda Ziklag." 15 Laju geutanyoeng lé Nabi Daud ubak aneuëk nyan, "Peu kheueh tatem gata intat ulôn ubak geurombolan nyan?" Jaweueb lé aneuëk nyan, "Ulôn tem, asai Teungku meujanji ubak ulôn deumi nan Po teu Allah, bahwa ulôn hana Teungku peumaté atawa Teungku seurah ubak Teungku Amphon droe ulôn." 16 Laju di aneuëk nyan jijak intat awaknyan u teumpat geurombolan nyan. Bak watée nyan anggota geurombolan nyan na disinan teuma meutabu saboh saho di daerah teumpat nyan, sira jimakheuen ngon jijieb ié lom ngon jimeu hura-hura sira jikém-kém ban galak droe jih sabab jai that-that barang nyang jireupah nibak nanggroe ureuëng Filistin dan Yehuda. 17 Bak watée mata uroe ka jiteubiet óh beungoh singoh nyan, awaknyan laju geuprang lé Nabi Daud, dan muprang nyan meuseub-seub sampoe án malam uroe. Seulaén peuet reutoih droe ureuëng muda nyang jipuplueng droe deungon jipasang unta, hana meusidroe pih nibak musoh nyan nyang hase jipeuseulamat droe. 18 Nabi Daud ka meuhase geupeubeubaih peue mantong nyang ka ji reupah lé ureuëng Amalek, meunan cit ban dua droe ureuëng binoe geuh; 19 hana meusapeue pih nyang gadôh. Banmandum aneuëk agam dan aneuëk inong meunan cit deungon hareuta nyang jireupah lé ureuëng Amalek, geucok lom teuma lé Nabi Daud. 20 Di sampeng nyan Nabi Daud geureupaih teuma banmandum bubiri dan beulatang peulara. Beulatang-beulatang nyan laju geu paroih lé aneuëk buah Nabi Daud dikeue, teupeu meungkléeh nibak banmandum hareuta nyang teureupah nyang laén, dan awaknyan jipeugah, "Nyoe jeumba keu Nabi Daud!" 21 Óh ka lheuehnyan Nabi Daud laju teuma geugisa ubak ureuëng nyang dua reutoih droe nyang ka lumpah leumoh ngon hék keu jiseutôt gobnyan, dan jitinggai nibak binéh Krueng Besor. Awaknyan laju jijak sambot Nabi Daud meunan cit deungon aneuëk buah gobnyan, dan Nabi Daud laju geupeutô sira geumumat jaroe ngon awaknyan. 22 Teuma lamkawan aneuëk buah Nabi Daud nyang na meusajan-sajan jiseutôt gobnyan, na teuma nyang jeuhet dan leuha ngon waba. Awaknyan jipeugah, "Banmandum ureuëng nyoe hana nyang jiseutôt; lé sababnyan awaknyan hana hak jiteumé sapeue nibak barang nyang teureupah nyan. Awaknyan teuma jeuet jicok aneuëk peurumoh jih óh lheuehnyan jeuet jijak ho rot jih." 23 Teuma geujaweueb lé Nabi Daud, "Syedara-syedara ulôn, bék kheueh gata nyoe tapeubuet nyang lagée nyan deungon peue nyang ka geubri lé TUHAN ubak geutanyoe! Bukon kheueh geutanyoe ka geulindong lé Gobnyan dan geupeumeunang tanyoe ateueh kawan peurampok nyan? 24 Lé sababnyan meusidroe pih hana jeuet situju keu usui nyan! Banmandum ureuëng harôh meuteumé jeumba nyang sadub le jih: ureuëng nyang tinggai nyang jaga barang-barang geutanyoe meunan cit harôh jiteurimong jeumba nyang sadub le jih lagée jeumba ureuëng nyang maju u dalam prang." 25 Óh lheueh nyan hainyan geupeugét lé Nabi Daud ka jeuet keu saboh peuratoran nyang ka jeuet undang-undang, jitaát banmandum lé ureuëng Israel sampoe nibak uroenyoe. 26 Bak watée Nabi Daud geugisa u Ziklag gobnyan laju geukirém siladum nibak barang-barang nyang teureupah nyan keu mandum peumimpén nyang na di banda-banda Yehuda nyang ka jidukong gobnyan, sira jipeugah, "Nyoe kheueh hadiah keu gata nibak barang nyang teureupah dalam mideuen prang nibak musoh TUHAN." 27 Banda nyan na kheueh: Betel dan Rama di bagian seulatan Yehuda, Yatir, Aroër, Sifmot, Estemoa, Rakhal, meunan cit deungon banda Yerahmeel, banda-banda ureuëng Keni, Horma, Bor-Asan, Atakh dan Hebron. Banmandum banda nyan dipat Nabi Daud dan aneuëk buah gobnyan ka lheueh geu meugeumbara, geukirém banmandum hadiah nyan.

1 Samuel 31

1 Bak watée nyan ureuëng Filistin teungoh gét that gura jimuprang ngon ureuëng Israel di gunong-gunong Gilboa. Jai that ureuëng Israel nyang maté didalam prang nyan, dan ureuëng nyang laén, jitamong cit keunan Raja Saul dan aneuëk-aneuëk agam pih ka geupeuplueng droe nibak mideuen prang nyan. 2 Teuma awaknyan laju jitiyeub lé ureuëng Filistin dan lhée droe lamkawan aneuëk agam ngon aneuëk inong Raja Saul nyan ka maté jipoh; awaknyan na kheueh Yonatan, Abinadab, dan Malkisua. 3 Lam keuadaan prang nyang lumpah hebatnyan keubit to that bak binéh Raja Saul, dan gobnyan keudroe keunong aneuk panah musoh sampoe luka nyang lumpah parah. 4 Lé Raja Saul laju geukheun ubak peumuda nyang ba sinjata gobnyan, "Tasuet laju peudeueng gata dan tob laju u ateueh ulôn, mangat ulôn bék jipeumeuén dan bék jipoh maté lé ureuëng nyang hana jituri TUHAN nyan." Teuma lé ureuëng muda nyan hana geutem tob gobnyan, sabab jihnyan gét that seugan ngon jihoreumat that ubak raja droe jihnyan. Sabab nyan kheueh Raja Saul geucok peudeueng geuh keudroe dan laju geupeureubah droe geuh u ateueh mata peudeueng geuh nyan. 5 Watée jikalon lé aneuëk muda nyan bahwa Raja Saul ka wafeuet, di gobnyan pih laju geupeureubah droe u ateueh mata peudeueng droe jih sampoe jihpi ka maté disinan to ngon binéh manyét Raja Saul. 6 Meunan kheueh Raja Saul meusigoe deungon ban lhée droe aneuëk geuh nyang agam, dan banmandum aneuëk buah gobnyan meunan cit deungon aneuëk muda nyang ireng gobnyan nyang seutia ka habéh maté bak uroe nyan cit teuma. 7 Bak watée jideungoe lé ureuëng-ureuëng Israel nyang na tinggai di Pantôn Yizreel dan nyang na di siblaih u timu Krueng Yordan tantra Israel ka jipeuplueng droe nibak mideuen prang, dan meunan cit deungon Raja Saul dan aneuëk-aneuëk gobnyan nyang agam ka habéh maté, awaknyan laju jiplueng jitinggai banda-banda teumpat gobnyan tinggai. Óh lheueh nyan teuka laju ureuëng Filistin jijakduek ubak banda nyang ka soh jitinggai nyan. 8 Óh singoh beungoh bak watée ureuëng Filistin teuka keu jijak rampok bubena manyét-manyét nyang ka maté nyan, awaknyan laju meurumpok ngon Raja Saul dan ngon ban lhée droe aneuëk gobnyan nyang agam ka maté teuéh di gunong-gunong Gilboa. 9 Awaknyan laju jikoih takue Raja Saul laju jicok meunan cit deungon bajée prang gobnyan jiba meusajan, meunan cit di ureuëng Filistin pih geukirém laju utosan ubak siluroih nanggroe Filistin mangat teupeusampoe haba nyang gét nyan ubak rakyat dan dewa awaknyan. 10 Óh lheueh nyan bajée prang Raja Saul nyan jicok dan jikeubah laju di dalam kuil dewi Asytoret, dan badan gobnyan laju teuma jilabang nibak bintéh beuton banda Bet-Sean. 11 Teuma peunduduek Yabes di Gilead geudeungoe peue nyang ka jipeubuet lé ureuëng Filistin nyan ubak Raja Saul, 12 laju lé ureuëng-ureuëng nyang paleng ceubeueh ngon beuhe geubeudôh disinan laju geubeurangkat dan geujak simalam suntok u Bet-Sean. Awaknyan laju jipeutron manyét Raja Saul dan manyét bubena aneuëk gobnyan nyang lhée droe nyan nibak beuton banda nyan geuba laju u Yabesh, dan manyét nyan pih laju jitot. 13 Banmandum tuleueng-tuleueng nyang na tinggai nyan laju jitanom u dalam jeurat dimiyueb bak kayée tamariska di banda nyan, óh lheueh nyan jipuasa kheueh awaknyan na tujoh uroe treb jih.

2 Samuel 1

1 Óh ka lheueh Raja Saul wafeuet, Nabi Daud laju geugisa nibak mideuen prang geujak peutaloe ureuëng Amalek, laju geutinggai di Ziklag nyang treb jih na dua uroe. 2 Óh singoh beungoh nyan, teuka kheueh sidroe aneuëk muda nibak khimah-khimah Raja Saul. Sibagoe tanda meukabong ureuëng nyan ka jipriek peukayan jih keudroe dan jiboh tanoh di ateueh ulée droe jih. Jihnyan jijak ubak Nabi Daud dan jisujut dikeue geuhnyan. 3 Nabi Daud laju geutanyong ubak aneuëk muda nyan, "Pane gatajak?" Jijaweueb lé aneuëk muda nyan, "Ulôn lheueh nibak khimah-khimah ureuëng Israel." 4 Geutanyong lé Nabi Daud, "Gata peugah kheueh laju, peue nyang ka teujadi!" Jijaweueb aneuëk muda nyan, "Tantra kamoe ka kamoe peuplueng droe di mideuen prang, dan jai that nyang tiwaih, lamkawan nyang tiwaih nyan Raja Saul dan aneuëk geuh Yonatan." 5 "Pakriban hai nyan gata teupeue?" geutanyong lé Nabi Daud ubak aneuëk muda nyan. 6 Jaweueb aneuëk muda nyan, "Keubeutulan mantong ulôn na disinan nibak Gunong Gilboa, laju deuh ulôn kalon Raja Saul geumeusadeue nibak kapak geuh, seudangkan geuritan-geuritan dan tantra meuguda atra musoh, ka tô that keuneuk jikeupong. 7 Raja Saul geupaleng u likot, dan geungieng ulôn, laju ulôn geuhôi, dan ulôn jaweueb, 'Nyoe pat ulôn, Teungku Amphon.' 8 Gobnyan geutanyong, soe ulôn nyoe, dan ulôn kheun ubak gobnyan bahwa ulôn nyoe na kheueh ureuëng Amalek. 9 Laju geupeugah lom ubak ulôn, 'Gata peurab kheueh keunoe, dan tapoh maté kheueh ulôn! Ulôn nyoe ka luka parah, dan karab maté.' 10 Lé sababnyan laju ulôn peurab ubak gobnyan dan laju ulôn poh sampoe gobnyan meuninggai, sabab ulôn kuteupeue meunyoe gobnyan reubah sabab hana teuga le geudong, pasti gobnyan meuninggai cit teuma. Óh lheueh nyan laju ulôncok mahkota ateueh ulée gobnyan dan gleueng nyang na nibak jaroe gobnyan, dan atranyan laju ulôn ba keunoe ubak Teungku Amphon." 11 Ban geudeungoe nyang lagéenyan Nabi Daud laju geupriek peukayan nyang na nibak badan geuh sabab seudeh lumpah na, meunan cit deungon banmandum aneuëk buah gobnyan jipeubuet cit lagée Nabi Daud peubuet nyan. 12 Awaknyan geumo ngon geupeuba-e geumeukabong ngon geupuasa sampoe án malam uroe keu Raja Saul dan Yonatan, dan lom keu rakyat Israel, umat TUHAN, sabab jai that-that nyang ka meuninggai di mideuen prang nyan. 13 Óh lheuehnyan Nabi Daud geuteumanyong ubak peumuda nyang ka jipeusampoe haba nyan, "Pat asai gata?" Jaweueb aneuëk muda nyan, "Ulôn nyoe ureuëng Amalek, sidroe aneuëk ranto nyang tinggai di nanggroe Teungku Amphon." 14 Geupeugah lom lé Nabi Daud, "Biet beuhé that teuh gata jeuet tapoh maté raja nyang ka geupiléh lé TUHAN!" 15 Lé gobnyan laju geuhôi sidroe lamkawan aneuëk buah gobnyan sira geupeurintah, "Gata poh maté ureuëng nyoe!" Di ureuëng nyang geuyuenyan laju jitak peumuda Amalek nyan sampoe maté. 16 Geupeugah lé Nabi Daud ubak peumuda Amalek nyan, "Gata keudroe nyang tapeurhot huköman maté nyoe ateueh droe gata deungon gata meungaku bahwa gata ka tapoh maté raja nyang ka geupiléh lé TUHAN!" 17 Óh lheuehnyan Nabi Daud laju geumeu ca-e sira geumeuba-e keu Saul dan Yonatan, 18 dan geupeurintah mangat ca-e nyoe teupeurunoe teuma ubak sukée Yehuda. (Ca-e nyoe na teutuléh didalam Kitab Yasar). 19 "Israel, di bukét-bukét droeneueh, jiôh disideh, gugur kheueh pahlawan, dumna aneuëk agam neugahra, maté kheueh awaknyan sibagoe bungöng bansa. 20 Seumoga lé ureuëng Gat hana jideungoe haba nyan. Seumuga jurong-jurong Askelon hana teuma meuteumé haba keuhai nyan. Bék sampoe ureuëng inong Filistin jisumurak meuhubo bék teuma sampoe ureuëng inong nyang kaphé jimeukuk geumbira. 21 Hai bukét-bukét Gilboa, deungoe kheueh ulôn meuhôi nyoe: Bék sampoe iémbon dan ujeuen jisiram bumoe! Bah kheueh tho ngon kreng blang dan padang gata. Sabab disinan kheueh meusaôh peudeueng beuso beurani. Dan peudeueng Saul pih ka meugeuratan, hántom na le teugeusok ngon minyéuk. 22 Panah Yonatan nyang ampoh ngon meubisa nyan. Peudeueng Raja Saul nyang hana jituri keu gaséh sayang bak teupoh musoh, teupeubinasa lawan. 23 Saul dan Yonatan ureuëng nyang that ramah lom ramé gob gaséh; sabe meusaboh lamhai udeb ngon maté; awaknyan leubeh bagaih nibak cicém geuruda, dan leubeh teuga nibak singa muda. 24 Hai, ureuëng inong Israel, tameuba-e kheueh keu Raja Saul! Nyang ka geupeungui gata deungon ija gawon mirah nyang meuwáh, dan geupeuhias gata deungon méuh peumata nyang ceudah. 25 Ka habéh reubah dumna pahlawan, reubah nibak mideuen prang dan nibak bukét ngon gunong nyang sungue Yonatan ka teunyue teugang. 26 Yonatan, hai syedara ulôn, até lôn hanco, sabab droeneueh gét that muyuem nibak ulôn. Geunaséh gata ubak ulôn gét that mulia, leubeh nibak geunaséh sidroe ureuëng inong. 27 Ka gugur dumna pahlawan bansa. Meusia-sia kheueh sinjata nyang na!"

2 Samuel 2

1 Óh lheuehnyan Nabi Daud laju geutanyong ubak TUHAN, "Peu kheueh Droeneueh ya TUHAN neubri kuasa keu ulôn mangat jeuet lôn kuasa saboh lamkawan laén banda di Yehuda?" "Nyoe," geujaweueb lé TUHAN. "Banda nyang toh?" geutanyong lom lé Nabi Daud. "Banda Hebron," geujaweueb TUHAN. 2 Lé sababnyan geujak kheueh laju Nabi Daud u Hebron meusajan deungon ban dua droe peurumoh gobnyan: Ahinoam inong nyang nibak Yizreel, dan Abigail beukaih inong si Nabal di Karmel. 3 Meunan cit teuma deungon aneuëk buah gobnyan deungon keuluwarga awaknyan maséng-maséng jiseutôt meusajan deungon Nabi Daud, dan awaknyan laju tinggai teutab di Hebron dan silingka nyan. 4 Óh lheuehnyan bubena ureuëng Yehuda jijak laju u Hebron, dan jilantek laju Nabi Daud jeuet keu raja ateueh nanggroe Yehuda. Bak watée Nabi Daud geudeungoe bahwa ureuëng-ureuëng Yabesh di Gilead ka jipeukubu lam jrat manyét Saul, 5 ureuëng nyan jipeutrok peusan lagéenyoe, "Seumoga TUHAN geubri beureukat ubak gata, sabab gata ka tatunyok keuseutiaan gata keu raja gata deungon cara ka taseumuyueb gobnyan u dalam jrat. 6 Lé sababnyan, TUHAN ka geutunyok gaséh sayang gobnyan keu gata. Ulôn pih teuma lôn peusaneut gata deungon gét sabab lé buet gata nyan. 7 Tabah kheueh até gata dan jakbuet kheueh sibagoe pahlawan! Saul, raja gata nyang keubiet ka wafeuet, teuma di ureuëng-ureuëng Yehuda ka jibaiát ulôn jeuet keu raja awaknyan." 8 Panglima tantra Raja Saul, na kheueh Abner aneuëk Ner, ka jipeuplueng droe meusajan deungon Isyboset aneuëk Raja Saul, u Mahanaim di meurandeh Krueng Yordan. 9 Disinan Abner laju geu angkat Isyboset jeuet keu raja ateueh wilayah-wilayah Gilead, Asyuri, Yizreel, Efraim dan Benyamin, dan ateueh bansaboh Israel. 10 Isyboset ka meu umu peuet ploh thon bak watée teubaiát jeuet keuraja ateueh Israel, dan gobnyan jimat peurintah dua thon treb jih. Teuma di sukée Yehuda teutab seutia ubak Nabi Daud sibagoe raja geuh, 11 dan Nabi Daud geumat peurintah di Hebron ateueh Yehuda na tujoh siteungoh thon treb jih. 12 Bak siuroe Abner jijak nibak Mahanaim u banda Gibeon, meusajan deungon aneuëk buah Isyboset. 13 Meunan cit deungon Yoab (mak jihnyan nan jih Zeruya), meusajan deungon aneuëk buah Nabi Daud jijak u banda nyan. Ban dua boh reugu nyang meulaén meunan cit saléng meulawan nyan laju meuhadab-hadab keu di kulam Gibeon; Abner dan meunan cit deungon pihak awaknyan jiduek di meurandeh nyoe, Yoab dan pihak droe jih teuma na dimeurandeh jéh. 14 Geupeugah kheueh lé Abner ubak Yoab, "Jak, tayue aneuëk buah geutanyoe mangat jimeutunang meulo!" "Gét kheueh, meunyoe meunan," geujaweueb lé Yoab. 15 Laju jimaju na dua blaih droe nibak sukée Benyamin nyang jiwaki lé Isyboset, dan dua blaih droe teuma nibak aneuëk buah Nabi Daud. 16 Awaknyan maséng-maséng saléng jiteumarek ôk nibak ulée dan saléng teuma jitob pruet lawan jih maséng-maséng, lé sabab nyan maté kheueh awaknyan meusigoe teuma. Sabab nyan kheueh teumpat di Gibeon nyan geuboh nan "Blang Peudeueng". 17 Óh ka lheueh teujadi nyang lagée nyan teuka kheueh teuma prang nyang keubiet hebat, dan Abner meunan cit deungon banmandum tantra Israel ka habéh taloe buet aneuëk buah Nabi Daud. 18 Ban lhée droe aneuëk Zeruya na disinan, awaknyan na kheueh Yoab, Abisai dan Asael. Asael nyan meunyoe bak plueng bagaih jih ban lagée jiplueng rusa, 19 dan jipeulet kheueh Abner nyan hana piôh-piôh. 20 Abner laju jingieng u likot sira jitanyong, "Peu kheueh gata nyan Asael?" "Nyoe, beutôi," jaweueb Asael. 21 "Bék tatiyeub ulôn!" geupeugah lé Abner. "Cuba kheueh gatadrob sidroe lamkawan tantra nyan dan tacok kheueh laju sinjata jihnyan!" Teuma Asael hana geupeuduli nyan gobnyan hana geupiôh geutiyeub laju ureuëng nyan. 22 Sigoe teuk Abner geupeugah ubak gobnyan, "Bék tatiyeub ulôn! Eunteuk meunyoe tatiyeub cit teupaksa gata ulôn poh maté. Meunyoe meunan, pakriban ulôn hase ulôn pandang muka Yoab adeun gata nyan?" 23 Bak watée nyan Asael teutab cit hana jitem piôh jipeucrok nyan, Abner laju jitob ngon kapak jih u likot, dan laju keunong ubak pruet Asael sampoe beusót kapak nyan dan peureulong ubak rhueng jih. Asael reubah dan maté laju di teumpat nyan. Banmandum ureuëng nyang trok jiteuka u teumpat jih nyang ka teugageueng nyan, laju teudong disinan. 24 Teuma Yoab dan Abisai mantong cit jitiyeub ngon hana geupiôh teuhadab Abner. Bak watée mata uroe ka jilhob, trok kheueh laju awaknyan u Bukét Ama, nyang na di siblaih u timu Giah, u arah padang pasi Gibeon. 25 Disinan ureuëng-ureuëng nibak sukée Benyamin jimeusaho lom deungon Abner, laju jiatoe baresan awaknyan nibak saboh pucak gunong. 26 Phon sinan Abner jitawök ubak Yoab, "Peu kheueh geutanyoe harôh ta muprang siumu masa? Peu kheueh gata hana tasada bahwa prang nyoe lumpah that phet? Kamoenyoe syedara gata saboh bansa. Padubna treb teuk gata harôh tapreh sigohlom tapeurintah aneuëk buah gata mangat jipiôh jipeucrok kamoe?" 27 Jijaweueb lé Yoab, "Deumi Po teu Allah nyang udeb, meunyoe gata hana tapeuphon peugah haba, pasti aneuëk buah ulôn hana jipiôh jipeu crok gata trok án singoh beungoh." 28 Lé Yoab laju geuyueb beureuguih sibagoe tanda keu aneuëk buah jih mangat jipiôh bék jilet le ureuëng Israel, dan deungon na nyang lagéenyan reuda kheueh muprang nyang lumpah gura nyan. 29 Abner dan aneuëk buah gobnyan simalam beungoh jimeubaréh jijak rot Pantôn Yordan, laju jijeumeurang Krueng Yordan, dan óh lheueh jijak siuroe seupôt nyan bak uroe lheueh nyan teuma, trok kheueh awaknyan u Mahanaim. 30 Óh ka lheueh Yoab geupiôh geutiyeub Abner, gobnyan laju geupeusapat banmandum aneuëk buah. Seulaén Asael teunyata na sikureueng blaih droe aneuëk buah gobnyan gadôh. 31 Aneuëk buah Nabi Daud ka jipoh maté 360 droe pasokan Abner nibak sukée Benyamin. 32 Óh lheuehnyan Yoab dan aneuëk buah gobnyan jibeuôt laju manyét Asael dan jipeukubu laju didalam lampôh jrat keuluwarga gobnyan di Betlehem. Óh lheueh nyan awaknyan jijak lom simalam suntok laju trok u Hebron bak watée ka teungoh malam.

2 Samuel 3

1 Prang nyang meutamah-tamah hibat lé peureuté keuluwarga Saul deungon peureuté Nabi Daud teutab hana lom reuda. Nabi Daud seumaken teuga, laén hai deungon lawan gobnyan seumaken leumoh. 2 Aneuëk-aneuëk agam Nabi Daud nyang lahé di Hebron na kheueh lagée nyang teupeugah nyoe meunurot urotan lahé jih: Amnon. Mak jihnyan na kheueh Ahinoam nibak Yizreel. 3 Kileab. Mak jihnyan na kheueh Abigail, beukaih peurumoh Nabal nibak Karmel. Absalom. Mak jihnyan na kheueh Maakha, putroe Raja Talmai nibak Gesur. 4 Adonia. Mak jihnyan na kheueh Hagit. Sefaca. Mak jihnyan na kheueh Abital. 5 Yitram. Mak jihnyan na kheueh Egla. Ban nam droe aneuëk agam geuhnyan lahé di Hebron. 6 Bak watée prang mantong that hebat lé peureuté Nabi Daud deungon peureuté keuluwarga Saul, Abner jiuseuha laju mangat peungarôh gobnyan meutamah rayeuk nibak peureuté Saul. 7 Bak siuroe Isyboset, aneuëk agam Saul, jitudoh Abner ka geu-éh sajan deungon sidroe lamkawan gundek Saul nyang nan jih Rizpa aneuëk Aya. 8 Ban geudeungoe habanyan, Abner beungéh geuh that-that dan gobnyan jipeugah, "Peu kheueh Teungku Po neuanggab bahwa ulôn nyoe ka lôn kianat ubak Saul dan lôn dong blaih Yehuda? Phon awaikon ulôn nyoe lôn dong blaih Saul bapak Teungku Po, dan keu kawöm syedara gobnyan meunan cit keu rakan-rakan gobnyan. Ulôn ka ulôn tulông Teungku Po sampoe hana hase le jipeutaloe lé Nabi Daud. Bahpih dubnyan ka ulôn peubuet, teuma Teungku Amphon neuhina cit ulôn teuma lé soai ureuëng inong! 9 Leubeh gét ulôn jak tulông Nabi Daud, peue lom TUHAN ka geumeujanji ubak gobnyan bak saboh watée geucok keurajeuen nyoe nibak Saul dan nibak keuturonan gobnyan, laju geubaiát Nabi Daud jeuet keuraja keu bansigom tanoh Israel dan Yehuda. Seumoga Po teu Allah geupeumaté ulôn, meunyoe hana ulôn peutrok janji Po teu Allah ubak Nabi Daud nyan!" 11 Isyboset hana hase geujaweueb haba nyan bahpi meu sikrék haba pih, sabab gobnyan geutakot ubak Abner. 12 Lé Abner geukirém utosan ubak Nabi Daud nyang nibak watée nyan gobnyan na di Hebron, haba peuneusan nyan na kheueh, "Soe nyang mat kuasa ateueh tanoh nyoe? Neupeugét kheueh peujanjian deungon ulôn, teuma ulôn tulông Teungku Amphon mangat jeuet banmandum bansa Israel jidong blaih Teungku Amphon!" 13 Geujaweueb lé Nabi Daud lagée nyoe, "Gét kheueh! Tapeutrok kheueh peusan nyoe ubak Abner: Ulôn lôntem peugét peujanjian deungon gata, teuma deungon saboh carat: Mikhal, aneuëk inong Saul, harôh taba ubak ulôn meunyoe gata tajak meuhadab ubak ulôn." 14 Óh lheueh nyan Nabi Daud geukirém utosan ubak Isyboset, dan haba peuneusan geuh lagée nyoe, "Bah kheueh Teungku Amphon neupeuriwang Mikhal, peurumoh ulôn, ubak ulôn. Jihnyan ka ulôn bloe deungon yuem sireutoih boh kulét ujong boh ureuëng Filistin." 15 Lé Isyboset geuyuejak laju utosan geuhnyan mangat teujak tueng Mikhal nibak lakoe jih, na kheueh Paltiel aneuëk si Lais. 16 Teuma Paltiel hana jipiôh jiseutôt laju Mikhal sira jimo. Bak watée awaknyan ka sampoe u banda Bahurim, Abner jipeugah ubak ureuëng nyan, "Ka kheueh, neujakwo mantong droeneueh!" Dan Paltiel pih jijakwo teuma. 17 Teungoh Abner geumupakat deungon mandum ureuëng patot-patot di Israel dan geupeugah, "Ka treb that-that gata tameuheuet mangat jeuet Nabi Daud teupeujeuet keuraja gata. 18 Dan, nyoe kheueh keuseumpatan nyang paleng rayeuk nibak gata. Ingat kheueh, TUHAN ka geumeujanji ubak Nabi Daud, bahwa gobnyan teuma geupeuguna Nabi Daud nyan mangat teupeuseulamat umat Israel nibak ureuëng Filistin dan nibak banmandum musoh nyang laén." 19 Meunan cit Abner geumupakat deungon ureuëng-ureuëng nibak sukée Benyamin, dan óh lheuehnyan geujak teuma u Hebron keu geujak peugah ubak Nabi Daud peue nyang ka jiseutuju lé ureuëng Benyamin dan ureuëng Israel nyan. 20 Bak watée Abner meusajan deungon dua ploh droe aneuëk buah gobnyan geumeuhadab ubak Nabi Daud di Hebron, Nabi Daud laju geupeuna khanuri keu awaknyan. 21 Óh lheueh nyan Abner laju geulakée droe sira geupeugah, "Neupeu idhin kheueh keu ulôn mangat lônjak peugrak até bansaboh Israel mangat awaknyan jimeugabong deungon Teungku Amphon. Awaknyan teuma jiteurimong Teungku Amphon sibagoe raja, dan deungon na nyang lagée nyan, Teungku Amphon ka jeuet keu raja keu saboh nanggroe, paih lagée meukeusut Teungku Amphon." Óh lheuehnyan Abner laju geupeu idhin lé Nabi Daud dan geujamin keuseulamatan gobnyan. 22 Óh ka leupah Abner geujak, Yoab meusajan deungon aneuëk buah Nabi Daud nyang laén geuwoe nibak mideuen prang dan jai that geupeuwoe barang rampasan. 23 Ubak Yoab laju geubri tée bahwa Abner banmantong geujak meuhadab ubak Raja Daud dan ka geupeu idhin jijak dan geujamin teuma keuseulamatan gobnyan. 24 Dan geujak meuhadab kheueh Yoab ubak raja sira geupeugah lagée nyoe, "Pakriban buet droeneueh nyan ya Teungku Amphon? Abner ka teuka jijak meuhadab ubak Teungku Raja. Pakon Teungku Raja neupeu idhin jijak meunan mantong? 25 Pasti kheueh Teungku Amphon ka neuteupeue bahwa Abner nyan teuka keunoe na kheueh keu jijak peungét Teungku Amphon, dan keu jiteupeue keuadaan dan peue-peue nyang ka Teungku Amphon reuncana." 26 Óh ka lheueh geutinggai Nabi Daud, Yoab laju geukirém utosan mangat jijak tueng Abner. Awaknyan laju jijak seutôt Abner sampoe trok ubak mon Sira, Dan Abnernyan awaknyan peuwo laju ubak Nabi Daud. Banmandum nyan teujadi hana geuteupeue mubacut pih lé Nabi Daud. 27 Meunan Abner nyan ka trok u Hebron, ureuëng nyan laju jipakat lé Yoab ubak binéh, tô ngon babah pintoe geureubang, siulah-ulah jikeuneuk peugah saboh rahsia. Teuma hana teusangka-sangka Yoab laju geutob nibak pruet Abner sampoe gobnyan maté bak watée nyan cit teuma. Meunan kheueh Abner ka maté jipoh lé Yoab keu jibalaih dam ateueh teupoh maté adoe gobnyan si Asael. 28 Bak watée Nabi Daud geudeungoe hainyan, gobnyan geupeugah, "TUHAN geuteupeue bahwa ulôn dan rakyat ulôn mubacut pih hana meusalah keuhai teupoh maté Abner nyan. 29 Bah kheueh Yoab dan banmandum keuluwarga jih nyan geuhuköm lé TUHAN ateueh buet jih nyang ka salah nyan. Seumoga dalam keuluwarga Yoab treun meutreun sabe na ureuëng nyang meudeurita peunyakét kulét nyang parah that, atawa ureuëng agam nyang leumoh hana meuteunaga, atawa nyang maté nibak mideuen prang atawa nyang sabe kureueng peunajoh!" 30 Meunan kheueh Yoab dan Abisai adoe gobnyan, geubalaih dam ubak Abner kareuna Abner ka geupoh maté Asael adoe gobnyan dalam prang di Gibeon. 31 Óh lheueh nyan Nabi Daud laju geubri peurintah ubak Yoab dan aneuëk buah gobnyan mangat geupriek peukayan droe geuh maséng-maséng, dan geungui ija meuduka cita meunan cit teupeuba-e keu Abner nyang ka maté keunong poh nyan. Dan bak watée manyét teu intat u dalam kubu, Nabi Raja Daud keudroe teuma nyang jak dilikot keureunda manyét nyang teungoh jiseuôn jiba ubak jrat nyan. 32 Abner teupeukubu di Hebron, raja dan banmandum rakyat geumo ba-e deungon meuratok ngon su nyang lumpah nyareng nibak binéh kubu nyan. 33 Óh ka lheuehnyan Nabi Daud geupeuratok keu Abner, lagée nyoe, 34 "Peu kheueh Abner harôh maté sibagoe ureuëng bangai: Jaroe gobnyan hana teu ikat, dan gaki gobnyan hana teubeuleunggu? Gobnyan maté keunong tob lé ureuëng jeuhet nyang keujam." Ban geudeungoe nyan banmandum rakyat jimo ba-e jipeumo Abner nyang leubeh teuga lom. 35 Si uroe suntok ureuëng laén ji useuha jibujuk Nabi Raja Daud mangat geutem makheun bahpi meubacut, teuma gobnyan geumeusumpah, "Kira jih Po teu Allah geupoh maté ulôn, meunyoe ulôn makheun sigohlom mata uroe jilhob!" 36 Ban geudeungoe hainyan rakyat ka meurasa seunang ngon galak. Beutôi, peue mantong nyang geupeubuet lé Nabi Raja Daud nyan, até awaknyan ka jeuet keu mangat. 37 Bak uroe nyan banmandum rakyat Nabi Daud dan banmandum Israel ka muphom, bahwa raja hana geuharab Abner teupoh maté. 38 Geupeugah lé Nabi Raja Daud ubak dumna ureuëng nyang iréng gobnyan, "Peu kheueh hana neuteupeue bahwa nibak uroenyoe sidroe peumimpén rayeuk bansa Israel ka maté syahid? 39 Bahpih ulôn nyoe raja nyang geupiléh lé Po teu Allah, teuma jinoenyoe ulôn meurasa that-that leumoh. Aneuëk-aneuëk Zeruya nyan lumpah that keujam. Ulôn hana hase ulôn kuasa ateueh awaknyan. Seumoga TUHAN geuhuköm bubena peunjahat-peunjahat nyan, nyang sisuai deungon peue nyang jipeubuet!"

2 Samuel 4

1 Keuturonan Saul nyang laén na kheueh Mefiboset, aneuëk agam nibak Yonatan. Aneuëk nyan capiek watée umu jih limong thon, bak watée Saul dan Yonatan meuninggai donya. Sabab bak watée haba keuhai awaknyan meuninggai teuka nibak banda Yizreel, deundayang nyang useuha Mefiboset nyan laju jiplueng; teuma sabab inong nyan bak jiplueng lumpah meudab-dab, aneuëk nyan rhot bak tanoh sampoe gaki jih capiek. Bak watée Isyboset aneuëk agam Saul nyan jideungoe bahwa Abner ka teupoh maté di Hebron, teuma rhot kheueh seumangat gobnyan, dan ban saboh bansa Israel ka jeuet keu geumpa. Isyboset nyan na dua droe peuwira nyang jeuet keu ulée pasokan seureubu; nyang sidroe nan jih Baana, dan nyang sidroe teuk nan jih Rekhab. Awaknyan na kheueh aneuëk Rimon, nibak Beerot dan asai nibak sukée Benyamin. (Beerot nyan rhoh lam daerah Benyamin. Peududuek aseuli nyang na disinan jipeuplueng droe u daerah Gitaim dan laju tinggai disinan phon saát nyan.) 5 Ban dua droe si peuwiranyan, na kheueh si Rekhab dan Baana jijak laju u rumoh Isyboset dan trok keunan bak watée cot uroe timang, bak watée Isyboset teungoh jipiôh hek watée uroe. 6 Ureuëng inong nyang jaga rumoh nyan teugantuek that mata watée nyan teungoh jitampoe boh gandom, nibak teugantuek nyan laju gobnyan teugéut. Sabab nyan Rekhab dan Baana hase deungon mudah jitamong u dalam. 7 Awaknyan laju jitamong ubak kama éh di teumpat Isyboset teungoh teungéut meukanga, lé awaknyan laju jitob Isyboset nyan sampoe maté. Óh lheuehnyan ulée ureuëng nyang ka maté nyan laju jikoh meukhan dan jiba laju nibak teumpatnyan. Simalam beungoh awaknyan jijak ngon tapak meulalu Pantôn Yordan. 8 Óh lheuehnyan ulée Isyboset nyan jijok laju ubak Nabi Daud di Hebron sira jipeugah, "Nyoe kheueh ulée Isyboset aneuëk agam si Saul, musoh Teungku Amphon nyang teungoh ji useuha jikeuneuk poh maté Teungku Amphon. Bak uroenyoe TUHAN ka geubalaih buet si Saul dan keuturonan gobnyan keu Teungku Amphon." 9 Teuma Nabi Daud geujaweueb, "TUHAN nyang udeb, nyang ka geupeuseulamat ulôn nibak sigala mara bahya, Gobnyan geuteupeue bahwa nyang ulôn peugah nyoe beutôi. 10 Bak watée di Ziklag na ureuëng nyang jijak britée ubak ulôn keuhai Saul ka wafeuet, jipike lé jih bahwa gobnyan jiba haba nyang jroh. Teuma jihnyan ka ulôn drob dan ulôn poh maté. Nyang kheueh upah nyang ulôn bri keu jihnyan sibagoe imbalan ateueh haba nyang ka jipeugah ubak ulôn nyan. 11 Padubna leubeh brat lom huköm nyang teuma ulôn peurhot ateueh ureuëng jeuhet nyang ka jipoh maté ureuëng nyang hana meusalah dan lom teungoh jiteungeut di rumoh jih keudroe! Jinoenyoe ulôn tueng bila ateueh peue nyang ka gata peubuet nyan, dan ulôn peuranab gata nibak ateueh muka bumoenyoe!" 12 Óh lheueh geupeugah nyan Nabi Daud laju geupeurintah ubak aneuëk buah gobnyan mangat jijak poh maté si Rekhab dan Baana. Óh ka lheueh teupoh maté, jaroe dan gaki awaknyan laju jikoh ngon jigantung teuma nibak binéh kulam. Teuma ulée Isyboset jicok dan laju jitanom di banda nyan cit teuma didalam kubu Abner.

2 Samuel 5

1 Óh ka lheueh nyan teuka kheueh ubak Nabi Daud bubena peumimpén-peumimpén nibak sukée Israel di Hebron dan jipeugah ubak gobnyan, "Kamoe nyoe na kheueh rakan Teungku Amphon. 2 Phon yoh masa ilée, dan yoh mantong Saul geumat peurintah ateueh kamoe, Teungku Amphon cit teuma nyang pimpén tantra Israel tieb-tieb watée awaknyan jijak maju u mideuen prang, meunan cit teuma TUHAN ka geumeujanji ubak Teungku Amphon bahwa Teungku Amphon kheueh nyang pimpén umat Gobnyan dan jeuet keu raja awaknyan." 3 Nabi Daud laju geupeuna peujanjian deungon bubena peumimpén-peumimpén nyan, laju awaknyan jibaiát gobnyan jeuet keu raja Israel. 4 Nabi Daud meu-umu lhée ploh thon bak watée gobnyan teulantek jeuet keu raja, dan gobnyan geumat peurintah peuet ploh thon treb jih. 5 Di Hebron gobnyan geumat peurintah ateueh Yehuda tujoh thon siteungoh treb jih, dan di Yerusalem gobnyan geumat peurintah ateueh banmandum Israel dan Yehuda nyang treb jih lhée ploh lhée thon. 6 Bak siuroe Nabi Raja Daud dan aneuëk buah gobnyan geubeudôh geubeurangkat keuneuk jak prang Yerusalem. Ureuëng Yebus peunduduek banda nyan, jipike bahwa Nabi Daud hana ek geupeutaloe Yerusalem. Sabab nyan awaknyan jipeugah ubak gobnyan, "Gata nyoe hana teuma leupah tatamong keunoe; ureuëng-ureuëng buta ngon ureuëng capiek pih hase ji-use gata." 7 Nabi Daud geupeugah ubak aneuëk buah gobnyan, "Peu kheueh na disinoe ureuëng nyang banci ubak ureuëng Yebus lagée ulôn nyoe lôn banci keu awaknyan? Peu kheueh ka lumpah jibanci that awaknyan sampoe jihnyan jikeuneuk poh awaknyan? Meunyoe meunan, tatamong kheueh laju rot guha ié dan taprang kheueh bubena ureuëng buta ngon ureuëng capiek nyang that-that ulôn banci nyan." (Nyang kheueh sabab jih ureuëng laén jipeugah, "Ureuëng buta dan ureuëng capiek hana jeuet jitamong u dalam Baét TUHAN.") Nabi Daud meuhase geureubot kuta Sion dan geuduek laju disinan. Laju geuboh nan nyan "Banda Nabi Daud". Banda nyan geupeudong nibak ban sikeulileng kuta nyan, phon nibak siblaih u timu bukét nyang ka teupeu manyang deungon tanoh. 10 Nabi Daud maken treb maken teuga, sabab TUHAN, Po teu Allah Nyang Mahakuasa nyang tulông gobnyan. 11 Raja Hiram di Tirus geukirém waki-waki gobnyan ubak Nabi Daud, meunan cit deungon kayée ceumara Libanon meunan cit deungon tukang-tukang kayée dan tukang batée keu jijak peudong meuligoe. 12 Kareuna nyan Nabi Daud meutamoh yakén bahwa TUHAN ka geupeukong gobnyan sibagoe raja ateueh Israel, dan geupeukong keurajeuen gobnyan deumi keu keupeuntengan umat TUHAN. 13 Óh ka lheueh Nabi Daud geuminah nibak Hebron u Yerusalem, gobnyan geumeukawen lom deungon na meupadub droe ureuëng inong dan geucok teuma na padub droe ureuëng inong keu gundek gobnyan; deungon na lagéenyan meutamoh kheueh teuma aneuëk agam ngon aneuëk inong gobnyan. 14 Aneuëk-aneuëk agam gobnyan nyang jipeulahé di Yerusalem na kheueh: Syamua, Sobab, Natan, Salomo, 15 Yibhar, Elisua, Nefeg, Yafia, 16 Elisama, Elyada dan Elifelet. 17 Bak watée ureuëng Filistin jideungoe bahwa Nabi Daud ka teubaiát jeuet keu raja ateueh Israel, awaknyan laju jijak jikeuneuk jak drob gobnyan. Teuma Nabi Daud geudeungoe hai nyan, geubeudôh geujak laju ubak kuta. 18 Ureuëng Filistin ka trok u Pantôn Refaim dan jiduek laju disinan. 19 Nabi Daud laju geutanyong ubak TUHAN, "Peu kheueh ulôn nyoe harôh ulôn jakprang ureuëng Filistin nyan, ya TUHAN? Peu kheueh teuma TUHAN neupeumeunang ateueh ulôn?" "Jak prang kheueh!" geujaweueb lé TUHAN. "Ulôn teuma Lôn bri keu gata meunang!" 20 Óh lheueh nyan geujak kheueh laju Nabi Daud u Baal-Perasim dan disinan kheueh pasokan Filistin nyan geupeu taloe. Laju gobnyan geupeugah, "TUHAN ka geupeuhanco peutahanan musoh lôn, lagée ié raya nyang jipeu hanyot ngon jisampôh peue-peue nyang na lam watée nyang sikeujab." Sabab nyan kheueh, teumpat nyan geuboh nan Baal-Perasim. 21 Pasokan Filistin nyan laju jiplueng dan hana jiteumeba patong-patong beurala droe jih. Banmandum patong-patong nyan laju geucok lé Nabi Daud dan aneuëk buah gobnyan. 22 Hana padubna treb teuma óh lheueh nyan teuka lom ureuëng Filistin jijakduek nibak Pantôn Rafaim. 23 Sigoteuk Nabi Daud geulakée peutunyok ubak TUHAN. TUHAN geujaweueb, "Bék gata prang jihnyan phon disinoe, teuma tajak kheueh meuputa dan gata prang kheueh awaknyan rot likot, to deungon bak kayée murbei. 24 Meunyoe na gata deungoe su lagée su langkah ureuëng meubaréh dipucok bak-bak kayée nyan, dan gata maju kheueh laju, sabab ulôn teuma ulônjak dikeue gata keu lônjak peutaloe tantra Filistin." 25 Nabi Daud laju geupeubuet peue nyang ka geupeurintah lé TUHAN, dan gobnyan meuhase geuseupôt sampoe tantra Filistin nyan jisurot nibak Geba sampoe trok u Gezer.

2 Samuel 6

1 Óh lheuehnyan Nabi Daud geutawök dan geupeusapat lom tantra-tantra nyang paleng gét di Israel mangat jimeugumpôi, jeumeulah jih na 30.000 droe. 2 Awaknyan geupimpén dan teutuju u Baale-Yehuda, mangat teujakcok nibak teumpat nyan Peuto Peujanjian nyang teupeugah deungon nan TUHAN Mahakuasa nyang duek meutahta di ateueh kerub-kerub. 3 Peuto Peujanjian nyan geucok di rumoh Abinadab di ateueh bukét dan atra nyan geupeu ék laju u ateueh geureubak peudati nyang barô. Dan lé si Uza dan Ahio, aneuëk-aneuëk Abinadab ji iréng laju geureubak peudati nyan; si Uza jijak bak binéh geureubak peudati nyan, 4 dan si Ahio jijak teuma dikeue geureubak peudati nyan. 5 Nabi Daud dan banmandum bansa Israel geujak teuma dikeue geureubak peudati nyan sira meunari ngon geumeulikak sihabéh teunaga meunan cit teuiréng deungon meuca-e keu teuhoreumat TUHAN. Awaknyan sira geujak geupeumeu én keucapi, gambus, rapa-i, keuleuntingan, dan simbal. 6 Óh watée ka trok awaknyan bak saboh teumpat nyang nan jih teumpat teupeuluroih aneuk gandom atra si Nakhon, hana teusangka-sangka di leumô-leumô nyang teungoh jitarek geureubak nyan meugantoih, laju si Uza jisunyueng jaroe jih dan jimat laju Peuto Peujanjian nyan mangat bék rhot. 7 Bak watée nyan cit teuma TUHAN Po teu Allah jeuet keu beungéh ubak Uza, sabab lé buet jih nyan na kheueh sibagoe teuhina ubak TUHAN. Dan Uza nyan laju geupoh maté di teumpat nyan, rab that ngon Peuto Peujanjian. 8 Teuma phon watéenyan teumpat nyan geuboh nan Peres-Uza. Nabi Daud beungéh sabab TUHAN ka geupoh maté si Uza. 9 Teuma Nabi Daud geutakot cit ubak TUHAN sira geupeugah lagée nyoe, "Jinoenyoe pakriban Peuto Peujanjian nyan hase ulôn ba?" 10 Sababnyan kheueh gobnyan hana geutem ba Peuto Peujanjian nyan u Yerusalem, teuma geukeubah di rumoh Obed-Edom ureuëng Gat. 11 Peuto Peujanjian nyan laju tinggai disinan na lhée buleuen treb jih, dan TUHAN laju geubri beureukat ubak Obet-Edom dan keuluwarga gobnyan. 12 Raja Daud geudeungoe bahwa TUHAN geubri beureukat ubak keuluwarga Obed-Edom dan banmandum atra milék jih sabab Peuto Peujanjian nyan. Teuma geujak kheueh laju gobnyan u rumoh Obed-Edom, geujak cok Peuto Peujanjian nyan geupinah teuma u Yerusalem deungon geupeuna peurayaan nyang lumpah gura. 13 Bak watée ureuëng-ureuëng nyang jibeuôt Peuto Peujanjian nyan ka jijak nam boh langkah, Nabi Daud laju geuyue dong awaknyan. Dan gobnyan pih geupeuseumah laju keureubeuen keu TUHAN, na kheueh leumô agam dan aneuëk leumô nyang ka geupeu teumbon. 14 Óh lheuehnyan Nabi Daud laju geumeulikak ngon geumeunari deungon peunoh seumangat keu geuhoreumat ubak TUHAN. Bak watée nyan gobnyan nyang na geungui cuma ija kroeng lineun nyang paneuk nyang geu ikat ubak keuieng. 15 Meunan kheueh cara jih Nabi Daud dan banmandum rakyat Israel geupinah Peuto Peujanjian nyan u Yerusalem, teupeu-iréng deungon sumurak nyang meuhubo dan su beureuguih nyang hana putôh-putôh. 16 Bak watée Peuto nyan teungoh geuba jipeutamong u dalam banda, si Mikhal putroe Saul jicingeuek nibak peuradeuen teuma deuh laju geukalon Raja Nabi Daud mantong geumeulumpat-lumpat sira geumeulikak keu geuhoreumat ubak TUHAN, dan si Mikhal nyan gét that geungeuen óh jikalon Nabi Daud nyang lagée nyan. 17 Peuto Peujanjian nyan geukeubah laju nibak teumpat jih didalam khimah nyang ka geupasang lé Nabi Daud keu Peuto nyan. Óh lheuehnyan Nabi Daud laju teuma geupeuseumah keureubeuen nyang teutot dan keureubeuen peudamé ubak TUHAN. 18 Laju gobnyan geubri beureukat ubak rakyat Israel deungon nan TUHAN Nyang Mahakuasa. 19 Óh ka lheuehnyan laju teuma geubagi-bagi peunajoh keu awaknyan banmandum. Tieb-tieb ureuëng nyang na tinggai disinan bah kheueh jih nyan sidroe ureuëng agam atawa ureuëng inong geubri laju sikrak eungkot sie nyang teupanggang, ruti dan kue kismis. Óh ka lheueh nyan awaknyan laju jijakwoe u rumoh jih maséng-maséng. 20 Bak watée Nabi Daud geuwoe ubak meuligoe geuh keu geujak bri saleuem ubak banmandum keuluwarga gobnyan, Mikhal laju jiteubiet keu jijak meurumpok ngon Nabi Daud dan jipeugah, "Bak uroenyoe raja Israel bit-bit ka geupeu jeuet droe geuh teuhoreumat! Gobnyan ka geumeulon lagée ureuëng bangai nyang hana jiteupeue malée dikeue namiet ureuëng inong atra milék dumna peugawée meuligoe!" 21 Nabi Daud laju geujaweueb, "Ulôn meulikak nyan na kheueh keu ulôn bri horeumat ubak TUHAN, nyang ka teutulak bapak droeneueh meunan cit deungon keuluwarga droeneueh, laju geupiléh ulôn mangat jeuet keu peumimpén ateueh Israel, umat Gobnyan. Sabab nyan kheueh ulôn hana lôn piôh meulikak ngon meunari ulôn horeumat TUHAN. 22 Bahpi meunan ulôn seudia jihina leubeh nibak nyang bunoe. Jeuet mantong droeneueh neupandang miyueb ateueh ulôn, teuma namiet-namiet nyang droeneueh peugah nyan bunoe, teuma jihareuga ulôn!" 23 Mikhal, putroe Saul nyan hana jimeu aneuëk siumu udeb gobnyan.

2 Samuel 7

1 TUHAN geupeulindong Raja Nabi Daud nibak meubagoe jipeukaru lé musoh-musoh gobnyan, akhé jih gobnyan hase teutab tinggai didalam meuligoe. 2 Teuma geupeugah kheueh lé raja ubak Nabi Natan, "Kalon, ulôn nyoe tinggai didalam meuligoe nyang teupeugét nibak bahan kayée ceumara Libanon, padahai Peuto Peujanjian Po teu Allah teuma teukeubah didalam khimah!" 3 Geujaweueb lé Natan, "Neupeubuet kheueh laju peue nyang ka neuniet lé Teungku Amphon, sabab TUHAN geutulông Teungku Amphon." 4 Teuma nibak malam nyan TUHAN geupeugah ubak Natan, 5 "Neujak kheueh laju dan neupeusampoe kheueh ubak hamba Ulôn Nabi Daud peusan ulôn nyoe, 'Ek kheueh gata nyang peudong rumoh keu ulôn. 6 Yoh phon that bansa Israel Ulôn peubeubaih di nanggroe Meusé sampoe nibak uroenyoe, hántom na lom Ulôn tinggai lam saboh rumah, seulaén ulôn meugeumbara dan tinggai didalam saboh khimah. 7 Yoh phon Ulôn meugeumbara meusajan deungon bansa Israel, hántom lom Ulôn teumanyong ubak peumimpén-peumimpén nyang ka Ulôn piléh, peue sabab jih awaknyan hana jipeudong rumoh nibak kayée ceumara Libanon keu Ulôn.' 8 Lé sabab nyan, hai Natan, tajak peugah kheueh ubak hamba Ulôn Nabi Daud, bahwa Ulôn, TUHAN Nyang Mahakuasa, Ulôn peugah ubak gobnyan, 'Gata ka Ulôn cok nibak buet gata meurabe didalam blang dan Ulôn baiát gata jeuet keu raja ateueh umat Ulôn Israel. 9 Ulôn ka Ulôn peungon gata ho mantong nyang gata jak, dan bubena musoh gata ka lheueh Ulôn sampôh banmandum bak watée gata teungoh lam prang. Gata teuma Ulôn peujeuet keu meusyeuhu saban lagée peumimpén-peumimpén nyang paleng rayeuk di ateueh donya. 10 Lom teuma, keu umat Israel ka Ulôn keubah teumpat dan Ulôn yue awaknyan tinggai teutab disinan, mangat awaknyan hase jih udeb deungon teunang, dan hana ureuëng laén nyang jijak peukaru. Phon awaknyan teuka ubak tanoh nyoe, dan Ulôn baiát peumimpén-peumimpén keu awaknyan, awaknyan ka jiprang lé ureuëng-ureuëng nyang galak ubak buet jeuhet lom kreueh. Teuma hainyan hana teujadi le. Ulôn meujanji bahwa gata teuma aman nibak mubagoe musoh, dan Ulôn teuma Lônbri keuturonan keu gata. 12 Teuma, meunyoe ajai gata ka sampoe, dan gata jitanom didalam jrat nibak teumpat jrat indatu gata, sidroe lamkawan aneuëk gata nyang agam Ulôn baiát jeuet keu raja. Jihnyan kheueh nyang peudong rumoh keu Ulôn. Keurajeuen jih teuma Ulôn peuteuga dan keu siumu masa sidroe nibak keuturonan jih teuma jimat peurintah sibagoe raja. 14 Ulôn teuma jeuet keu bapak jih, dan jihnyan teuma jeuet keu aneuëk Ulôn. Meunyoe jihnyan jipeubuet buet nyang salah, jihnyan teuma Ulôn huköm lagée sidroe bapak geuhuköm aneuëk geuh. 15 Teuma Ulôn teutab Ulôn peubuet nyang jroh keu jihnyan sisuai deungon janji Ulôn. Janji Ulôn keu jihnyan teuma teutab Ulôn mat, hana lagée nyang ka Ulôn peubuet ubak si Saul nyang ka Ulôn géesée nibak teumpat jih duek mangat gata hase jeuet keuraja. 16 Gata hana putôh sabe na keuturonan, dan Ulôn teuma Lôn peujeuet keurajeuen gata nyan jimeuteun siumu masa. Meunan cit keu siumu masa sidroe nibak keuturonan gata teuma jimat peurintah sibagoe raja.' " 17 Laju Natan geubri tée ubak Nabi Daud peue mantong nyang ka geupeugah lé Po teu Allah ubak gobnyan. 18 Geutamong kheueh laju Raja Nabi Daud u dalam Khimah TUHAN. Laju geuduek dan geumeudoá, "Ya TUHAN Nyang Mahamanyang, ulôn dan keuluwarga ulôn hana patot ulôn teurimong mandum keubaikan nyang ka TUHAN tunyok ubak ulôn seulawet nyoe. 19 Dan TUHAN ka geupeubuet leubeh nibak nyan, Ya TUHAN Nyang Mahamanyang; Droeneueh ka neupeugét janji keuhai keuturonan ulôn keu watée nyang teuma teuka. Dan Droeneueh peuleumah hainyan ubak ulôn, bahpih ulôn nyoe teuma sidroe manusia, Ya TUHAN Nyang Mahamanyang! 20 Peue lom nyang jeuet ulôn peugah ubak Droeneueh? Droeneueh ka neuteupeue banmandum keuhai ulôn nyoe. 21 Deumi janji Droeneueh dan ateueh keuheundak Droeneueh keudroe Droeneueh ka neupeubuet-buet nyang paleng rayeuk nyan guna jih keu neupeurunoe hamba Droeneueh nyoe. 22 Droeneueh keubiet akbar, ya TUHAN Allah! Teuma Droeneueh kheueh TUHAN Po teu Allah, hana nyang saban deungon Droeneueh. Kamoe meuteupeue hainyan sabab ka neubritée yoh phon masa ilée. 23 Di bansigom bumoe nyoe hana bansa nyang saban deungon bansa Israel. Israel na kheueh saboh bansa nyang ka neupeubeubaih nibak jipeujeuet keu namiet mangat jeuet keu umat Droeneueh keudroe. Banmandum buet nyang rayeuk dan ajaéb nyang ka neupeubuet keu awaknyan, sampoe ka jeuet nan Droeneueh meusyeuhu bansaboh donya. Bansa-bansa nyang laén meunan cit deungon dewa-dewa awaknyan ka Droeneueh use bak watée umat Droeneueh jimaju u mideuen prang. 24 Bansa Israel ka neupeujeuet keu umat Droeneueh keudroe keu siumu masa, dan Droeneueh, ya TUHAN, ka jeuet keu Po teu Allah awaknyan. 25 Dan jinoenyoe, ya TUHAN Po teu Allah, bah kheueh kira jih TUHAN peukong keu siumu masa janji nyang ka Droeneueh peugah keuhai droe ulôn dan keuturonan ulôn. Soe kheueh kira jih TUHAN peubuet peue nyang ka TUHAN peujanji nyan. 26 Dipat mantong bubena ureuëng sabe jipeu agong-agong nan Droeneueh sira jipeugah, 'TUHAN Nyang Mahakuasa na kheueh Po teu Allah ateueh Israel.' Teuma keu siumu masa sidroe nibak keuturonan ulôn teuma jimat peurintah sibagoe raja ateueh bansa nyoe. 27 TUHAN Nyang Mahakuasa! Ulôn peubeurani droe ulôn lakée doá nyoe ubak Droeneueh, sabab Droeneueh keudroe ka neubri tée ubak ulôn bahwa aneuëk cucoe ulôn treun meutreun teuma neupeujeuet keu raja ateueh bansa nyoe. 28 Ya TUHAN Nyang Mahamanyang, Droeneueh kheueh Po teu Allah; banmandum janji Droeneueh neupeuteupat, dan hai nyang gét-gét nyan ka neupeujanji ubak ulôn. 29 Sabab nyan, ulôn lakée, neutem kheueh kirajih neubri beureukat ateueh keuturonan ulôn, mangat jeuet keu siumu masa awaknyan teutab jirasa gaséh nyang seutia nibak Droeneueh. Ya TUHAN Nyang Mahamanyang, banmandum nyan ka lheueh TUHAN peujanji, teuma keuturonan ulôn teutab TUHAN bri beureukat keu siumu masa."

2 Samuel 8

1 Napadub na treb teuma óh lheuehnyan Nabi Raja Daud geujak prang lom ureuëng Filistin. Ureuëng Filistin nyan laju geupeutaloe dan teureubot tanoh awaknyan pi laju geureubot. 2 Meunan cit di Nabi Daud geujak prang teuma ureuëng Moab dan awaknyan pih taloe. Geuyue awaknyan mangat ji-éh di ateueh tanoh, ureuëng nyang ka ji-éh nyan laju geupoh maté dua droe tieb-tieb lhée droe nyang na éh disinan. Deungon nyan, di ureuëng Moab ka jitaklok ubak Nabi Daud dan laju jibayeue upeti ubak gobnyan. 3 Óh lheuehnyan Nabi Raja Daud nyan geujak prang dan geupeutaloe teuma Raja Hadadezer aneuëk Rehob nyan mat peurintah di Zoba, na kheueh saboh keurajeuen nyang rab ngon Damsyik. Bak watée nyan Hadadezer teungoh lamjak keuneuk jijak peupuléh keukuasaan jih di wilayah nyang rab ngon ulée Krueng Efrat. 4 Nabi Daud laju geudrob 1.700 droe tantra meuguda, dan 20.000 droe tantra nyang jijak ngon gaki. Gobnyan geupeuhanco mandum guda, teuma na bacut sagai, seb keu sireutoih geuritan prang. 5 Di Ureuëng Siria nyan na di Damsyik laju teuma jikirém sipa-i keu jijak tulông Raja Hadadezer. Teuma Nabi Daud laju geupeutaloe awaknyan dan meuteumé geupoh maté 22.000 droe nibak awaknyan. 6 Óh lheuehnyan Nabi Daud laju geupeudong khimah-khimah tantra lam wilayah awaknyan, dan awaknyan taklok dan jibayeue upeti ubak gobnyan. TUHAN geupeumeunang ubak Nabi Daud dipat mantong gobnyan geupeubeudôh prang. 7 Tameng-tameng méuh nyang jingui lé tantra Hadadezer laju geureupah lé Nabi Daud dan geuba laju atranyan u Yerusalem. 8 Seulaén nibaknyan Nabi Daud geucok teuma peurunggu nyang lumpah that le nibak Betah dan Berotai, banda-banda nyang yoh watée ilée jikuasa lé Raja Hadadezer. 9 Raja Tou di nanggroe Hamat geudeungoe teuma bahwa Nabi Daud ka geupeutaloe banmandum tantra Hadadezer. 10 Teuma lé geuhnyan laju geu kirém Yoram aneuëk agam gobnyan mangat geujak peutrok saleuem ubak Nabi Raja Daud dan geupeugah seulamat ateueh keumeunangan gobnyan, sabab Hadadezer ka kayém that geumuprang deungon Raja Tou. Yoram jijak ubak Nabi Daud sira jiba hadiah nyang lumpah le nyang teupeugét nibak méuh, pirak dan peurunggu. 11 Nabi Raja Daud nyan laju geupeuseumah banmandum hareuta nyan ubak TUHAN mangat teupeuguna didalam upacara iébadat. Meunan cit teuma geupeubuet u ateueh barang-barang méuh dan pirak nyang ka geureupah nibak Raja Hadadezer dan barang-barang bansa nyang ka geupeutaloe, bansa nyan na kheueh, bansa Edom, Moab, Amon, Filistin dan Amalek. 13 Nan Nabi Daud meutamah meusyeuhu lom bak watée gobnyan meuhase geupeutaloe ngon geupeumaté na kira-kira 18.000 droe ureuëng Edom di Pantôn Asin. 14 Gobnyan laju geupeudong khimah-khimah tantra nibak saboh nanggroe Edom, dan bubena ureuëng Edom nyan ka taklok ubak gobnyan. TUHAN geujok meunang keu Nabi Daud dipat mantong gobnyan geupeubeudôh prang. 15 Meunan kheueh cara jih Nabi Daud geumat peurintah nibak bansaboh nanggroe Israel dan geujaga mangat rakyat gobnyan sabe teupeusaneut ngon ade dan gét-gét. 16 Nyoe kheueh peujabat-peujabat rayeuk nyang geu angkat lé Nabi Daud nyan: Panglima angkatan prang: Yoab aneuëk Zeruya; Sekretaris meuligoe: Yosafat aneuëk Ahilud; Teungku-teungku imeum: Zadok aneuëk Ahitub, dan Ahimelekh aneuëk Abyatar; Sekretaris nanggroe: Seraya 18 Ulée kawan nyang kawai pribadi raja: Benaya aneuëk Yoyada; Teungku-teungku imeum di meuligoe: aneuëk-aneuëk agam Nabi Daud.

2 Samuel 9

1 Bak siuroe Nabi Daud geuteumanyong, "Peu kheueh mantong na ureuëng nyang udeb lam keuluwarga Saul? Meunyoe mantong na, ulôn keuneuk jak peubuet nyang gét ubak keuluwarga nyan deumi si Yonatan." 2 Keuluwarga Saul na sidroe namiet nyang nan jih Ziba, dan namiet nyan geuyue jak meuhadab ubak Raja Nabi Daud. Raja geuteumanyong, "Peu kheueh gata nyang nan Ziba?" "Nyoe, beutôi that Teungku Amphon," jijaweueb lé Ziba nyan. 3 Óh lheuehnyan raja geutanyong lom, "Peu kheueh mantong na ureuëng nyang udeb lam keuluwarga Saul? Ulôn keuneuk jak peubuet nyang gét keu ureuëng nyan, lagée nyang ka ulôn meujanji ubak Po teu Allah." Geujaweueb lé Ziba, "Mantong na sidroe aneuëk agam si Yonatan. Jihnyan capiek." 4 "Dipat jihnyan?" geutanyoe lé Raja Daud. "Di Lodebar, di rumoh si Makhir aneuëk si Amiel," jipeugah lé Ziba. 5 Lé Nabi Raja Daud laju geuyuejak hôi aneuëk agam si Yonatan nyan. 6 Aneuëk agam Yonatan nyan nan jih Mefiboset. Bak watée katrok jiteuka, laju jisujut jibri horeumat ubak Nabi Daud. Nabi Daud laju geusapa ureuëng nyan, sira geupeugah, "Mefiboset," dan aneuëk nyan laju jijaweueb, "Nyoe pat ulôn, Teungku Amphon." 7 Nabi geupeugah, "Bék teumakot teuh. Ulôn keuneuk peumurah até keu gata deumi si Yonatan bapak gata. Banmandum tanoh atra abusyiek gata si Saul, teuma ulôn jok pulang ubak gata dan keu siumu masa gata jeuet tamakheun nibak meuligoe gobnyan." 8 Mefiboset jisujut lom sira jipeugah, "Peu kheueh makna jih ulôn nyoe hai Teungku Amphon! Pakon Teungku Amphon leupah jroh keu ulôn?" 9 Laju lé raja geutawök Ziba namiet Saul nyan, dan geupeugah laju, "Peue mantong na hareuta nyang jitinggai lé Saul dan keuluwarga gobnyan sabab atra ulôn keuneuk bri keu cucoe Teungku gata nyoe. 10 Gata dan aneuëk-aneuëk meunan cit deungon peumbantu gata bahtajak meuúe tanoh nyan deumi keuluwarga teungku gata si Saul, dan neubri kheueh laju hase tanoh nyan ubak awaknyan mangat teupeuseb nyang jipeureulée lé awaknyan. Teuma Mefiboset jeuet geumakheun nibak meuligoe siumu masa." (Ziba na jimeu aneuëk 15 droe aneuëk agam dan 20 droe namiet). 11 Geujaweueb lé Ziba ubak raja, "Banmandum titah Teungku Amphon teuma ulôn peubuet." Teuma lé Mefiboset laju jimakheun saboh talam deungon raja, lagée aneuëk agam Nabi Raja Daud keudroe. 12 Mefiboset na teuma jimeu aneuëk agam nyang nan jih si Mikha. Banmandum anggota keuluwarga Ziba nyan ka jeuet keu namiet Mefiboset. 13 Meunan kheueh si Mefiboset nyang capiek nibak ban dua blaih gaki jih nyan tinggai di Yerusalem dan sabe jipajoh bu di Meuligoe.

2 Samuel 10

1 Na meupadub treb teuma óh lheueh nyan Nahas raja Amon meuninggai donya, dan aneuëk gobnyan nyang agam nyang nan jih Hanun duek keugeunantoe raja. 2 Dan geupeugah lé Nabi Raja Daud, "Nahas na kheueh rakan ulôn nyang that seutia. Jadi ulôn harôh kheueh ulôn meusahabat deungon Hanun aneuëk geuh nyan." Sabab nyan Nabi Daud laju geukirém utosan u nanggroe Amon mangat teujak peuhibor até Hanun ateueh kameuninggai bapak jihnyan. 3 Bak watée awaknyan ka trok u Amon, bubena peumimpén nanggroe nyan laju jijak peugah ubak Hanun, "Bék kheueh neupike hai Teungku Amphon Nabi Daud geukirém utosan geuh nyan sabab gobnyan geukeuneuk horeumat keu bapak Teungku Amphon! Gobnyan geukirém ureuëng geuh keunoe na kheueh sibagoe mata-mata jijak muluem u nanggroe geutanyoe nyoe, jijak seulidek banda geutanyoe mangat hase jireubot lé awaknyan." 4 Lé Hanun laju jidrob utosan Nabi Daud nyan, jicuko laju janggot awaknyan siblaih, dan jigunteng teuma peukayan awaknyan sampoe óh punggong, dan laju jiyue jak awaknyan. 5 Teuma awaknyan that-that malée keuneuk jiwoe u nanggroe droe jih. Óh watée hainyan jibritée ubak Nabi Daud, gobnyan laju geukirém lom utosan mangat awaknyan tinggai mantong di Yerikho sampoe janggot awaknyan jitimoh lom teuma. 6 Óh lheueh nyan di ureuëng Amon jisada bahwa deungon buet awaknyan nyang lagée nyan bagoe Nabi Daud ka jeuet keumusoh. Sabab nyan di awaknyan laju jijak siwa 20.000 droe tantra ureuëng Siria nyang na tinggai di Bet-Rehob dan Zoba, meunan cit deungon 12.000 droe tantra di nanggroe Tob, meunan cit meusajan teuma deungon raja nibak nanggroe Maakha deungon 1.000 droe tantra gobnyan. 7 Bak watée Nabi Daud geudeungoe hai nyan, gobnyan laju geuyue Yoab deungon banmandum angkatan prang gobnyan geuyue maju jak lawan musoh. 8 Ureuëng Amon laju jiteubiet dan ji ato laju baresan jih di keu pintoe geureubang Raba ma banda awaknyan keudroe, seudangkan ureuëng Siria, ureuëng Tob dan Maakha jiatoe teuma baresan jih di dalam padang. 9 Yoab jikalon bahwa gobnyan ka teuseupet ngon ji apet lé pasokan musoh dikeue dan dilikot droe geuh. Sabab nyan gobnyan laju geupiléh tantra Israel nyang paleng gét dan laju awaknyan geupeuduek meuhadab-hadab keue deungon tantra Siria. 10 Nyang leubeh nibak tantra Israel nyan jiseurah laju ubak Abisai adoe gobnyan, nyang atoe baresan awaknyan meuhadab keue teuma deungon tantra Amon. 11 Yoab jipeugah ubak adoe jih nyan, "Meunyoe ulôn singoh ka hana ekle ulôn meuteun teuhadab tantra Siria, bubagaih kheueh neutulông ulôn; meunan cit teuma, meunyoe droe kheueh hana ekle neupeuteuen teuhadab tantra Amon nyan, ulôn teuma lôn teuka jak tulông gata. 12 Saba kheueh! Jak kheueh geutanyoe tajak muprang deungon ceubeueh dan beurani deumi keu bansa geutanyoe dan keu banda-banda Po teu Allah geutanyoe. Seumoga TUHAN geupeubuet peue nyang geukeuheundaki." 13 Yoab dan pasokan gobnyan laju jimaju u mideuen prang, akhé jih bube nyang na tantra Siria ka habéh jiplueng. 14 Bak watée ureuëng Amon jikalon tantra Siria ka jiplueng bansalamle, awaknyan pih jiplueng cit nibak Abisai dan ji surot laju u dalam banda. Óh ka lheueh jiprang ureuëng Amon, Yoab laju geuwoe riwang u Yerusalem. 15 Ureuëng Siria jitée droe bahwa jihnyan ka jipeutaloe lé ureuëng Israel, sabab nyan laju jihôi banmandum anggota pasokan jih mangat jimeusapat lom. 16 Teuma lé Raja Hadadezer geuyue jakhôi ureuëng Siria nyang na di siblaih u timu Krueng Efrat, dan jiteuka kheueh awaknyan u Helam dimiyueb pimpénan panglima Sobakh, Sobakh nyan na kheueh panglima tantra Raja Hadadezer di Zoba. 17 Ban geudeungoe hai nyan, Nabi Daud deungon reujang that geupeusapat banmandum pasokan Israel, laju geujak jeumeurang u meurandeh Krueng Yordan, óh lheuehnyan jimaju laju u Helam. Disinan na teuma ureuëng Siria teungoh ji atoe baresan jih dan laju teuma jimaju jijak prang pasokan Nabi Daud. 18 Teuma di ureuëng Israel laju jipoh sampoe jisurot u likot tantra Siria. Nabi Daud dan pasokan gobnyan ka geupoh maté 700 droe nyang mat keumudoe geuritan prang, dan 40.000 droe teuma tantra meuguda; seulaén nibak nyan si Sobakh nyang panglima prang nyan keunong teuma dan luka jih lumpah parah akhé jih sabab luka nyan jihnyan pih maté di mideuen prang. 19 Bak watée raja-raja nyang jimat kuasa lé Hadadezer jikalon bahwa awaknyan ka jipeutaloe lé tantra Israel, awaknyan laju jilakée meudamé laju jitaklok ubak ureuëng Israel. Phon watéenyan di ureuëng Siria hana jijeuet le jibantu ureuëng Amon.

2 Samuel 11

1 Raja-raja biasa jijakmaju u mideuen prang bak watée musém semi. Dan bak watée musém semi thon nyan Nabi Daud geuyue ubak Yoab mangat jijak maju umideuen prang meusajan deungon mandum peuwira gobnyan dan banmandum peuwira Israel; laju awaknyan geupeutaloe ureuëng Amon dan geukeupong banda Raba. Teuma Nabi Daud teutab na tinggai di Yerusalem. 2 Bak siuroe, watée ka seupôt, óh ka lheueh Nabi Daud geubeudôh nibak teungéut, gobnyan laju geujak-jak di ateueh bubong meuligoe nyang data nyan. Nibak teumpatnyan leumah geukalon sidroe ureuëng inong teungoh jimano, dan ureuëng inong nyan lumpah ceudah. 3 Lé Nabi Daud laju geuyue tanyong soe ureuëng inong nyan, dan laju jibri tée bahwa ureuëng inong nyan nan jih Batsyeba; bapak jih nan geuh Eliam dan lakoe gobnyan na kheueh Uria ureuëng Het. 4 Nabi Daud laju geuyue jakhôi ureuëng inong nyan, dan óh ka trok inong nyan ubak meuligoe, Nabi Daud laju geu-éh deungon ureuëng inong nyan. (Batsyeba ban mantong lheueh jipeubuet upacara meusuci óh ka habéh jiteuka he). Dan jijakkwoe kheueh laju inong nyan u rumoh jih. 5 Hana padubna treb teuma óh lheuehnyan Batsyeba laju mume, laju gobnyan jijak peugah ubak Nabi Daud keuhai nyan. 6 Bak watée nyan cit teuma Nabi Daud geubri peurintah ubak Yoab, geupeugah, "Gata yue laju ubak Uria ureuëng Het nyan mangat jijak meurumpok deungon ulôn." Teuma Yoab laju jiyue Uria jijak meurumpok deungon Nabi Daud. 7 Bak watée Uria jijak meurumpok deungon Nabi Daud, raja laju geutanyong ubak jihnyan keuadaan Yoab dan pasokan Israel, dan meunan cit geutanyong pakriban teuma jalan jih watée teumuprang. 8 Óh lheuehnyan Nabi Daud geupeugah lom ubak Uria, "Tajak woe kheueh u rumoh gata dan tajak piôh hék kheueh meusikeujab." Óh ka lheueh Uria jitinggai meuligoe Nabi Daud nyan, Nabi Daud laju geukirém hadiah u rumoh Uria. 9 Teuma Uria hana jiwoe teuma jijak éh sampoe teungéut dibabah pintoe meuligoe meusajan deungon banmandum peungawai raja. 10 Ubak Nabi Daud jijak peugah laju keuhai nyan. Teuma gobnyan laju geutanyong ubak Uria, "Gata banmantong tawoe nibak meuneujak nyang lumpah jiôh, pakon hana tajakwoe u rumoh gata?" 11 Jijaweueb lé Uria, "Tantra Israel dan Yehuda teungoh jimeujuang udeb maté dan Peuto Peujanjian TUHAN na nibak awaknyan; Yoab panglima kamoe dan bubena peuwira awaknyan geupeudong khimah di teungoh padang. Ek kheueh ulôn nyoe lôn jakwoe u rumoh, dan makheun meusajan meunan cit lôn éh meusajan deungon ureuëng binoe? Deumi nyawöng Teungku Amphon dan nyawöng ulôn, ulôn hana ulôn peubuet hai nyan!" 12 Laju geupeugah lé Nabi Daud, "Ka kheueh meunyoe meunan, gata meureuhat kheueh disinoe bak uroenyoe dan singoh beungoh teuma ulôn peu idhin gata tajak." Deungon nyan Uria pih tinggai di Yerusalem nibak uroenyan. Bak uroe nyang seulanjut jih gobnyan teu-undang jak makheun meusajan Nabi Daud. 13 Teuma jipajoh kheueh bu meusigoe ngon Nabi Daud nyan meunan cit deungon ié meuneujieb na kheueh ié kreueh nyang lumpah jai sampoe Uria ka mabök. Teuma nibak malam nyan Uria nyan hana cit jiwoe u rumoh jih, teuma ji-éh di ateueh ija seulimbot jih di dalam kama peungawai meuligoe. 14 Óh singoh beungoh nyan Nabi Daud laju geutuléh surat bak Yoab di mideuen prang, dan surat nyan geukirém laju deungon peurantaraan si Uria. 15 Asoe surat nyan na kheueh lagée nyoe, "Gata peuduek kheueh si Uria nyoe nibak gareh nyang paleng dikeue bak watée tamaju u mideuen prang, óh lheuehnyan gata tasurot kheueh ulikot mangat jihnyoe maté." 16 Teuma teungoh Yoab jikeupong banda nyan, Uria laju geuyue ubak saboh teumpat nyang ka jiteupeue bahwa nibak teumpat nyan lumpah teuga jijaga lé musoh. 17 Bak watée tantra musoh jiteubiet nibak banda dan jijak prang tantra Yoab, na meupadub droe peuwira Nabi Daud ka teupoh maté, meunan cit deungon Uria maté disinan. 18 Óh lheuehnyan Yoab laju geukirém utosan ubak Nabi Daud keujijak peugah jalan teujadi muprang nyang paleng hebat nyan. 19 Haba peurintah Yoab ubak utosan nyan lagée nyoe, "Óh ka lheueh Teungku Amphon geudeungoe laporan gata keuhai jalan jih muprang nyoe, 20 mungken gobnyan jeuet keubeungéh dan geutanyong ubak gata, 'Pakon gata rab that-that deungon banda nyan? Bukon kheueh gata tateupeue bahwa musoh pasti ji timbak gata deungon panah-panah nyang jipeuleuh diateueh pageue-pageue beuton rumoh awaknyan? 21 Peu kheueh gata ka tuwoe bahwa si Abimelekh aneuëk Gideon nyan teupoh maté di Tebes? Bukon kheuehnyan maté lé sabab na sidroe ureuëng inong jigeulawa deungon aneuk batée ngon gileng teupông nibak ateueh beuton ubak gobnyan? Nyang kheueh, pakon gata meunan that tô deungon beuton nyan?' Meunyoe Teungku Amphon geutanyong lagée nyan, tapeugah kheueh laju ubak gobnyan, 'Uria si peuwira Teungku Amphon, meunan cit ka maté meusajan!' " 22 Jijak kheueh laju utosan nyan jimeuhadab ubak Nabi Daud dan jipeugah peue nyang ka jipeugah lé Yoab ubak gobnyan. 23 Utosan nyan jikheun, "Lawan kamoe leubeh teuga dan awaknyan jiteubiet dalam banda laju jijak prang kamoe nyang na didalam padang. Teuma deungon sihabéh teunaga hana meurasa teumakot kamoe lawan laju awaknyan sampoe trok lom u babah pintoe geureubang banda. 24 Óh lheueh nyan di ateueh bubong meunan cit deungon di ateueh pageue beuton awaknyan laju jipeutek kamoe deungon aneuk panah, dan napadub droe nibak peuwira Teungku Amphon meunan cit deungon si Uria pih ka maté." 25 Nabi Daud geupeugah ubak ureuëng nyang ba habanyan, "Gata peukhong kheueh até Yoab dan tapeugah kheueh laju ubak droe jihnyan mangat bék cut até, sabab hana hase jiramai soe nyang teuma maté lam prang nyan. Peugah kheueh ubak geuhnyan mangat jijak prang musoh nyang leubeh hibat dan leubeh nibak nyang ka-ka ateueh banda nyan sampoe banda nyan meuteumé teureubot dan meunyeurah." 26 Bak watée Batsyeba geudeungoe bahwa lakoe geuh ka meuninggai, laju gobnyan meukabong ngon até nyang peudeh. 27 Óh lheuehnyan óh ka habéh watée meukabong, Nabi Daud laju geuyuejak tueng ureuëng inong nyan mangat jiba u meuligoe gobnyan dan laju geucok keu ureuëng binoe geuh. Na padub beuleuen teuma óh lheuehnyan ureuëng binoe geuhnyan geupeulahé sidroe aneuëk agam. Teuma TUHAN hana galak keubuet Nabi Daud nyang lagée nyan.

2 Samuel 12

1 Óh ka lheueh nyan TUHAN laju geu kirém Nabi Natan geuyue jak meurumpok deungon Nabi Daud. Nabi Natan laju geujak ubak gobnyan dan geupeugah, "Na dua droe ureuëng nyang tinggai dalam saboh banda; nyang sidroe kaya dan nyang sidroe teuk gasien. 2 Sikaya bak jihnyan jai that jipeulara beulatang peulara dan bubiri, 3 seudangkan ureuëng gasien nyan bak jihnyan teuma na saboh aneuëk bubiri, nyang jibloe. Aneuëk bubiri nyan jipeulara sampoe ka rayeuk di dalam rumoh jihnyan meusajan-sajan deungon aneuëk-aneuëk gobnyan. Aneuëk bubiri nyan jijok peunajoh nibak peunajoh ureuëng nyan, sampoe ubak jipeujieb ié keu aneuëk bubiri nyan dalam cangkie ureuëng nyan keudroe, meunan cit deungon ji-éh aneuëk bubiri nyan didalam pangkée ureuëngnyan; paneuk haba, jipeusaneut aneuëk bubirinyan saban lagée jipeusaneut keu aneuëk inong jihnyan keudroe. 4 Bak siuroe ureuëng kaya jiteuka jamé dirumoh jih nyan. Ureuëng kaya nyan hana jitem sie bubiri atawa leumô jih nyan keudroe mangat jeuet teutaguen keu jamé jih nyan. Teuma jijak cok aneuëk bubiri ureuëng gasien nyan, laju atra ureuëng gasien nyan jisie dan jitaguen laju keu jamé jih nyan." 5 Ban geudeungoe nyang lagée nyan Nabi Daud gét that beungéh sabab buet ureuëng kaya nyang lagée nyan dan geupeugah, "Keujam that ureuëng kaya nyan! Deumi TUHAN nyang udeb, ureuëng nyan harôh jigantoe aneuëk bubiri nyan peuet goe lipat dan ureuëng nyan harôh teuhuköm maté!" 7 Geupeugah lé Nabi Natan ubak Nabi Daud, "Teungku Amphon kheueh ureuëng nyang teupeugah nyan! Dan nyoe kheueh nyang geupeugah lé TUHAN, Po teu Allah Israel, 'Droeneueh ka Ulôn baiát jeuet keu raja ateueh Israel dan ka Ulôn peuseulamat nibak si Saul. 8 Keurajeuen Saul dan bubena peurumoh jihnyan ka Ulôn bri keu gata, lom teuma gata Ulôn baiát jeuet keuraja ateueh Israel dan Yehuda. Meunyoe atra nyan gohlom seb, pasti teuma Ulôn jok lom keu gata nyang leubeh le nibak nyang na. 9 Pakon gata hana tapakoe peue nyang ka Ulôn peurintah? Keupeue tajak peubuet nyang jeuhet nyan? Uria gata yuepoh maté didalam prang; tapeubiyeu jihnyan maté jipoh lé ureuëng Amon, dan gata cok teuma peurumoh jih! 10 Lé sabab gata hana tataát ubak Ulôn dan tareupah teuma peurumoh Uria, lé sababnyan didalam tieb-tieb keuturonan gata treun meutreun na nyang maté teupoh. 11 Ulôn meusumpah teuma Ulôn peurhot mala peutaka nyan u ateueh gata nyang teuka jih nibak keuluwarga gata keudroe. Ulôn teuma Lôncok peurumoh-peurumoh gata dikeue mata gata keudroe dan teuma Ulôn jok keu ureuëng laén nyang teuma ji-éh meusajan awaknyan bak watée uroe ka peungeuh trang. 12 Gata ka tapeubuet desya seucara seungab-seungab, teuma saboh watée Ulôn kupeubukeuti ancaman Ulôn nyan deungon seucara trang-trang di bansaboh Israel.' " 13 Laju geupeugah lé Nabi Daud ubak Nabi Natan, "Ulôn ka meudesya ubak TUHAN." Geujaweueb lé Nabi Natan, "TUHAN ka geupeu amphon Teungku po; jadi Teungku Amphon hana teuma maté. 14 Teuma lé sabab Teungku Amphon ka neuhina TUHAN deungon buet droeneueh nyan, aneuëk agam Teungku Amphon nyang ban lahé nyan teuma maté." 15 Óh ka lheueh geupeugah nyan geuwoe kheueh Nabi Natan u rumoh gobnyan. Aneuëk agam Nabi Daud nyang geupeulahé lé Batsyeba balée Uria ka rhot bak sakét deungon keuheundak TUHAN. 16 Laju Nabi Daud geumeudoá ubak TUHAN mangat aneuëk geuh nyan puléh. Gobnyan geupuasa dan tieb-tieb malam geu-éh simalam beungoh ateueh aleue kama gobnyan. 17 Laju lé ureuëng-ureuëng patot nyang teupeucaya di dalam meuligoe jijak ubak gobnyan dan jibujuk gobnyan mangat geubeudôh, teuma gobnyan geutulak dan hana geutem makheun meusigoe ngon awaknyan. 18 Na siseuen aleuhat teuma óh lheuehnyan aneuëk nyan pih meuninggai donya, dan bubena namiet Nabi Daud ban mandum jitakot keu jijak britée hai nyan. Jipeugah lé awaknyan, "Yoh watée aneuëk nyan mantong udeb, raja hana geutem deungoe meunyoe tanyoe ta peugah haba deungon gobnyan. Peue lom jinoenyoe watée aneuëk geuh nyan ka meuninggai donya! Pat tateupeue gobnyan teuma geurajam droe gobnyan keudroe!" 19 Bak watée Nabi Daud geukalon namiet geuhnyan jimeusáih-sáih, sada kheueh gobnyan bahwa aneuëk geuh nyan ka meuninggai donya. Laju geutanyong ubak awaknyan, "Peu kheueh aneuëk nyan ka meuninggai?" "Ka Teungku Amphon," jaweueb awaknyan. 20 Dan geubeudôh kheueh laju Nabi Daud nibak aleue teumpat geu-éh nyan, laju geujak bakmon geumanoe óh lheueh nyan geusugot ngon ôk, dan geutuka peukayan. Óh lheuehnyan geubeudôh geujak laju meuiébadat u Baét TUHAN. Óh lheueh nyan gobnyan geuwoe laju ubak meuligoe, dan geulakée laju hidangan bu keuneuk makheun lé gobnyan, dan laju geu makheun. 21 Óh ban jingieng nyang lagée nyan bagoe, lé namiet Nabi Daud laju jitanyong ubak gobnyan, "Kamoe banmandum nyoe hana muphom, ya Teungku Amphon. Bak watée aneuëk nyan mantong udeb, Teungku Amphon neupuasa dan neupeuba-e aneuëk nyan, teuma óh ka lheueh aneuëk nyan meuninggai, Teungku Amphon neubeudôh laju neu pajoh bu!" 22 "Nyoe, beutôi," geujaweueb Nabi Daud, "Keubiet ulôn meupuasa dan ulôn moe bak watée aneuëk nyan mantong udeb dan teuma ulôn pike: Mungken TUHAN geugaséh keu ulôn dan geupeupuléh aneuëk nyan nibak peunyakét jih dan hase udeb lagée bak nyang ka. 23 Teuma jinoenyoe, óh ka sahéeh jihnyan ka meuninggai, keupeue guna jih ulôn nyoe sabe lôn puasa? Peu kheueh aneuëk nyan hase ulôn peu udeb lom teuma? Bak saboh watée teuma ulôn pih lôn jak cit ubak teumpat aneuëk lôn nyan jijak, teuma jinoenyoe jihnyan hana jiwoe le ubak ulôn." 24 Óh lheuehnyan Nabi Daud geupeu mangat lom até ureuëng inong gobnyan si Batsyeba, óh lheuehnyan laju geujak éh ngon binoe geuh nyan. Batsyeba laju geupeulahé lom sidroe aneuëk agam nyang geuboh nan Sulaiman lé Nabi Daud. TUHAN that-that geugaséh keu aneuëk nyan 25 dan geuyue Nabi Natan mangat geuboh nan aneuëk nyan ngon nan Yedija, sabab TUHAN geugaséh keu aneuëk nyan. 26 Bak watéenyan Yoab mantong hibat that teungoh geumeu heuengkoe dalam mideuen prang geulawan Raba ma banda nanggroe Amon, dan karab geureubot banda nyan. 27 Laju gobnyan geukirém utosan ubak Nabi Daud sira geupeugah, "Ulôn ka lôn prang Raba, dan ka ulôn reubot peuseudiaan ié jih. 28 Jinoenyoe, neutem kheueh Teungku Amphon neupeusapat tantra geutanyoe nyang na mantong tinggai, laju neupimpén seurangan mangat tapeutaklok banda nyan. Deungon na nyang lagée nyan teuma hana jikheun bahwa ulôn nyang reubot banda nyan." 29 Laju Nabi Daud geupeusapat banmandum tantra gobnyan, óh lheuehnyan laju geujak prang Raba, geuseureubu dan laju teuma geupeutaklok. 30 Nabi Daud laju geucok mahkota di ateueh ulée raja awaknyan dan atra nyan laju geungui keudroe di ateueh ulée gobnyan. Mahkotanyan na brat jih kira-kira 35 kilogram dan meutahta deungon peumata nyang lumpah ceudah. Meunan cit Nabi Daud geuba nibak teumpatnyan lumpah jai barang rampasan. 31 Seulaén nibaknyan peunduduek banda nyan laju geuparoih, dan geuyue bak awaknyan mangat jiba gogajo, cangkoi beuso, dan pato beuso dan awaknyan laju geuyue meukeureuja nibak teumpat peugét batée bata. Meunan cit hainyan geupeubuet u ateueh peunduduek banda-banda Amon nyang laén. Óh lheueh nyan Nabi Daud dan banmandum tantra gobnyan geuwoe lom u Yerusalem.

2 Samuel 13

1 Absalom aneuëk agam Nabi Daud na sidroe adoe jih nyang inong, aneuëk dara nyan cukob lagak, nan jih Tamar. Amnon aneuëk agam Nabi Daud nibak peurumoh nyang laén ka teuma rhot cinta keu si Tamar nyan, 2 dan ka meuheuet that jikeuneuk éh meusajan si dara nyan. Teuma hainyan mustahé hase teujadi sabab si Tamar nyan gohlom jimeukawen dan hana jeuet teuma jimeurakan deungon aneuëk agam. Amnon hana piôh-piôh jipike keuhai nyan sampoe jihnyan rhot keu sakét. 3 Amnon na teuma sidroe rakan nyang lumpah lisek, nan rakan jih nyan Yonadab aneuëk Simea aduen Nabi Daud. 4 Yonadab jipeugah ubak Amnon, "Hai Teungku Pangeran, pakon tieb-tieb uroe ulôn ngieng droeneueh seudeh that? Peue nyang ka teujadi u ateueh droeneueh?" Jijaweueb lé Amnon, "Ulôn ka rhot cinta ubak Tamar, adoe si Absalom syedara ulôn nyan." 5 Laju jipeugah lé Yonadab ubak gobnyan, "Oh, meunyoe hainyan mudah that hai teungku pangeran! Neujak éh kheueh laju u ateueh tika, dan neupeugét kheueh droeneueh sang-sang teungoh sakét. Meunyoe bapak droeneueh teuka dan geujak ngieng droeneueh, dan neupeugah laju ubak gobnyan, 'Bapak, neupeu idhin kheueh si Tamar jijak kalon ulôn sira ji peuhidang bu keu ulôn. Meunyoe ulôn hase ulôn ngieng si Tamar nyan teungoh jitaguen bu keu ulôn disinoe, ulôn ka hase lôn pajoh bu.' " 6 Óh lheueh nyan si Amnon laju jijak éh di teumpat éh pura-pura gobnyan lam keuadaan sakét. Bak watée Raja Nabi Daud bapak gobnyan teuka geujak kalon, Amnon laju jipeugah ubak bapak jih nyan, "Bapak, neupeu idhin kheueh si Tamar jijak keunoe mangat jipeugét juadah dikeue ulôn disinoe; meunyoe nyan ka lheueh jipeumasak mungken ulôn ka ek ulôn makheun." 7 Óh lheueh nyan Nabi Daud laju geukirém peusan ubak si Tamar nyang na di dalam meuligoe, geupeugah lagée nyoe, "Tajak kheueh laju u rumoh aduen gata si Amnon, dan tapeugét kheueh laju peunajoh keu jihnyan." 8 Óh ban jideungoe nyang lagée nyan si Tamar laju jijak u rumoh aduen jih nyan dan deuh laju jikalon aduen jih si Amnon mantong teubalek nibak teumpat éh. Tamar jicok laju bacut teupông dan dikeue aduen jih nyan jipeugét laju kue juadah dan laju jitot ngon jipanggang di ateueh ngeue apui. 9 Óh ka lheueh nyan jipeuteubiet laju juadah nyan didalam panci dan jibri ngon geupeuhidang laju ukeue aduen jih si Amnon nyan. Teuma Amnon hana jitem pajoh juadah nyan. Gobnyan jipeugah, "Tayue teubiet laju banmandum ureuëng nyang na didalam kama nyoe!" 10 Óh ka lheueh banmandum ureuëng jiteubiet nibak kama nyan, jipeugah kheueh lé Amnon ubak si Tamar, "Taba kheueh laju banmandum juadah nyan keunoe, ubak teumpat ulôn éh nyoe, dan gata suleueng kheueh u dalam babah ulôn!" Tamar jiturot peue nyang jiyue nyan. 11 Teuma bak watée Tamar jisunyueng juadah nyan u dalam babah Amnon, Amnon laju jimat aneuëk dara nyan sira jipeugah, "Adoe meutuah, keunoe gata éh meusapat ngon ulôn!" 12 "Ah, bék hai aduen meutuah!" jaweueb aneuëk dara nyan. "Bék neupaksa ulôn tapeubuet buet nyang hina nyan! Hai nyang lagée nyan hántom na teupeubuet di Israel. 13 Meunyoe teujadi nyang lagée nyan, ho ulôn nyoe harôh ulôn söm jumoh ulôn? Meunan cit deungon droeneueh hai aduen teuma jihina lé gob di nanggroe Israel nyoe. Nyang seugét jih hainyan neujak mariet kheueh ubak raja, ka pasti raja teuma situju ulôn nyoe jeuet keu ureuëng binoe droeneueh." 14 Teuma Amnon hana jitem deungoe peue nyang jipeugah lé si Tamar nyan, dan sabab Amnon nyan leubeh teuga, jipaksa laju adoe jih nyan deungon cara gasa, laju jipeukosa adoe jih si Tamar nyan. 15 Teuma óh ka lheueh jipeukosa nyan deungon hana teusangka-sangka Amnon ka teuka banci keu adoe jih nyan dan hana tanggong-tanggong, leubeh rayeuk banci jih nibak cinta jihnyan yoh awaiphon. Lé jihnyan laju jipeugah ubak adoe jih nyan, "Jak teubiet keudeh!" 16 Tamar jipeugah, "Ah, pakon jeuet keumeunan aduen? Meunyoe ulôn neu-use, keujeuhetan nyan leubeh rayeuk nibak hai nyang ka lheueh neupeubuet bunoe!" Teuma si Amnon hana jitem deungoe peue nyang jipeugah lé Tamar nyan. 17 Amnon laju geuhôi peulayan pribadi jih sira jipeugah, "Gata peuteubiet laju ureuëng inong nyoe uluwa, dan tagunci laju pintoe!" 18 Lé peulayan nyan laju jiturot peue nyang ka jiyue lé Amnon nyan. Peukayan si Tamar na kheueh bajée jubah panyang meujaroe panyang. Nibak jamén nyan putroe-putroe nyang gohlom jimeukawen lazem jih jingui peukayan nyang lagée nyan. 19 Lé Tamar laju jisipreuk abée u ateueh ulée droe jih, jipriek bajée jubah jih, dan jijak laju sira jitôb muka jih deungon bandua blaih jaroe sira jimo musok-musok ngon até nyang roga. 20 Bak watée Absalom jikalon aduen jih nyan, teuma jitanyong kheueh lé jihnyan ubak Tamar nyan, "Peu kheueh si Amnon bunoe ka ji-iengkeue keuhormatan gata? Ka kheueh adoe meutuah, bék tapike le hainyan. Bukon kheueh jihnyan aduen gata, dan bék kheueh hainyan gata peugah ubak soe mantong." Bak watée nyan cit teuma Tamar jipeuaséng droe jih di rumoh Absalom, dan jih nyan gét that seudeh lom ngon seungue hana meurakan. 21 Raja Nabi Daud laju geudeungoe hai nyang lagée nyan, dan gobnyan gét that beungéh. 22 Absalom that-that jitroih dam keu Amnon dan hana jitem le peugah haba deungon jihnyan sabab jihnyan ka jipeukosa adoe jih si Tamar. 23 Dua thon teuma óh ka lheueh nyan Absalom laju jipeuna khanuri teugunteng pita bulée bubiri di Baal-Hazor, tou ngon banda Efraim, dan lé gobnyan laju jiundang banmandum aneuëk raja nyang agam. 24 Gobnyan jijak laju meuhadab ubak Bapak geuh Raja Nabi Daud dan jipeugah, "Bapak, ulôn keuneuk peuna khanuri teugunteng bulée bubiri. Ulôn that-that meuharab Bapak pi neutem teuka ubak khanuri ulôn nyan meunan cit deungon ureuëng-ureuëng rayeuk nyang na di dalam meuligoe." 25 Teuma geujaweueb lé raja, "Bék, hai aneuëk meutuah, sabab jih meunyoe kamoe nyoe banmandum kamoe jak keunan beuareuti kamoe nyoe ka kamoe peusosah gata." Teuma di Absalom hana geutem sabe jipaksa pakriban mantong bapak jih nyan geutem teuka ubak teumpat khanuri nyang jipeugot nyan, teuma bapak jih nyan teutab cit hana geutem. Gobnyan teuma geubri idhin mantong ubak aneuëk geuh nyan. 26 Laju jipeugah kheueh lé Absalom, "Meunyoe meunan, neupeu idhin kheueh syedara ulôn si Amnon jiseutôt deungon kamoe." Geupeugah lé raja, "Bék kheueh jihnyan gata peurhoh sajan gata." 27 Teuma sabab Absalom hana jipiôh jideusak ngon jipaksa ureuëng syiek jih nyan, bak akhé jih Nabi Daud laju geubri idhin Amnon dan banmandum aneuëk agam geuh nyang laén jimeusajan jiseutôt meusapat deungon Absalom. Laju Absalom jipeu-idang peunajoh nyang lumpah meuwáh. 28 Gobnyan laju jibri peurintah ubak bubena namiet jih, "Gata deungoe kheueh nyoe beugét-gét, meunyoe Amnon ka mabök sabab jijieb ié anggô, ulôn teuma lôn bri aba-aba, laju gata poh maté jih nyan. Bék gata takot. Ulôn nyang meutanggong jaweueb ateueh hai nyan. Gata meubuet kheueh deungon beuhé dan bék ragu-ragu!" 29 Bubena namiet nyan laju jipeubuet peue nyang ka jipeurintah lé Absalom, laju awaknyan jipoh maté Amnon. Ban jikalon peue nyang ka teujadi nyan bubena aneuëk agam Nabi Daud nyang laén laju ji-ék u ateueh bagal jihnyan maséng-maséng dan laju jipeuplueng droe. 30 Teungoh awaknyan mantong nibak rot ueh teungoh jiwoe, na ureuëng laén laju jijak peugah ubak Nabi Daud, "Absalom ka jipoh maté banmandum aneuëk agam Teungku Raja -- hana meusidroe pi nyang na udeb!" 31 Raja geubeudôh nibak teumpat duek, laju geupriek peukayan nyang meuleukek nibak tuboh geuh sabab that-that seudeh, dan geupeureubah laju droe gobnyan u ateueh aleue. Meunan cit banmandum peugawée gobnyan jipeureubah droe jih u ateueh aleue. 32 Teuma Yonadab aneuëk Simea aduen Nabi Daud jipeugah, "Teungku Amphon, bék neugundah dan bék teuma neupike bahwa banmandum aneuëk agam teungku Amphon ka maté. Teuma na kheueh Amnon mantong nyang maté, sabab ka jeulaih nyan kheueh nyang jilakée lé Absalom yoh phon Tamar adoe geuhnyan jipeukosa lé Amnon. 33 Jadi bék kheueh neupateh bahwa banmandum aneuëk Teungku Amphon ka meuninggai donya, lagée nyang ka ulôn peugah bunoe nyang maté na kheueh Amnon sidroe kong." 34 Dan bak watée nyan cit teuma Absalom ka jipeuplueng droe geuh. Ureuëng jaga meuligoe Nabi Daud deuh jikalon bahwa ramé that ureuëng teungoh jitreun di ateueh gunong nibak Horonaim. Dan jijak peugah kheueh hainyan ubak raja. 35 Dan Yonadab pih laju geupeugah ubak Nabi Daud, "Nyang kheueh bubena aneuëk agam Teungku Raja! Beutôi lagée nyang ka ulôn peugah bunoe." 36 Banmantong gobnyan seuleusoe geupeugah haba, jitamong kheueh laju bubena aneuëk agam Nabi Daud nyan u dalam ruweueng meuligoe. Awaknyan ka jipeuphon mo, dan Nabi Daud meunan cit deungon banmandum namiet gobnyan ka geumo ba-e sabab seudeh. 37 Absalom laju jijak peuaséng droe ubak meuligoe raja Gesur, na kheueh Talmai aneuëk Amihur. Gobnyan tinggai disinan treb jih lhée thon. Treb that Nabi Daud geumeukabong keu Amnon, 39 teuma bak watée Nabi Daud hana meuseudeh até le, gobnyan pih ka teuma teuingat that-that ngon meucen that-that keu Absalom.

2 Samuel 14

1 Yoab geuteupeue bahwa Raja Nabi Daud gét that geumeucén keu Absalom, 2 lé sababnyan gobnyan geuyue jak tueng baksidroe ureuëng inong nyang lisek nyang na tinggai di Tekoa. Bak watée ureuëng inong nyan ka trok, Yoab laju geupeugah ubak ureuëng inong nyan, "Droeneueh mak harôh kheueh pura-pura neumeukabong ngon até nyang roga; neungui kheueh laju peukayan meukabong, dan bék neungui minyéuk mangat bée. Neupeujeuet kheueh droeneueh lagée ureuëng inong nyang ka lumpah treb jipeumo ngon jipeuba-e ureuëng nyang ka maté nyang gét that jicinta. 3 Óh lheueh nyan tajak kheueh laju meuhadab ubak raja, tapeugah laju ubak gobnyan lagée nyoe," Laju Yoab geupeugah ubak inong nyan peue nyang harôh jipeugah. 4 Laju di ureuëng inong nyan jimeuhadab ubak raja, sira jitukui ngon jiseumah jipeugah laju lagée nyoe, "Teungku Amphon Nyang Mulia, neutulông kheueh ulôn nyoe!" 5 "Peue hai?" geutanyong lé raja ubak ureuëng inong nyan. Ureuëng inong nyan geujaweueb "Ulôn nyoe sidroe ureuëng inong balée nyang lumpah gasien. Lakoe ulôn ka meuninggai donya. 6 Ulôn na dua droe aneuëk agam, dan bak siuroe awaknyan jimeudakwa di dalam blang. Sabab hana ureuëng nyang peugla, laju sidroe lamkawan aneuëk ulôn nyan ka maté teupoh. 7 Dan jinoenyoe, banmandum kawöm keuluwarga ulôn ka jipeumusoh ulôn dan jituntot ubak ulôn mangat ulôn jok aneuëk ulôn nyang ka jipoh maté nyan keu awaknyan, mangat awaknyan jihuköm teuma aneuëk ulôn nyan deungon huköman maté, sabab jihnyan ka jipoh maté syedara jih. Meunyoe ulôn jok aneuëk nyan, tinggai kheueh ulôn sidroe mantong. Awaknyan jipeuhanco harapan ulôn nyang kheueh sidroe teuk dan hana jitinggai meusidroe pih aneuëk agam keu lakoe ulôn mangat jeuet jipeusambong keuturonan gobnyan." 8 "Neujak woe kheueh laju," geupeugah lé raja, "teuma ulôn uroih hai nyan." 9 "Teungku Amphon Nyang Mulia," jipeugah lom lé ureuëng inong nyan, "peue mantong nyang Teungku Amphon peubuet, ulôn dan keuluwarga ulôn kheueh nyang tanggong akibat jih; Teungku Amphon dan keuluwarga Teungku Amphon hana meusalah." 10 Geujaweueb lé raja, "Meunyoe na ureuëng nyang jiancam gata, gataba kheueh ureuëng nyan ubak ulôn, teuma óh lheueh nyan pasti kheueh ureuëng nyan hana ji peukaru le gata." 11 Jipeugah lé ureuëng inong nyan, "Neumeudoá kheueh Teungku Amphon ubak TUHAN Po teu Allah Teungku Amphon, mangat ureuëng nyang jikeuneuk balaih ateueh keuhai maté aneuëk ulôn nyan bék sampoe jipeubuet buet nyang leubeh rayeuk lom deungon jipoh maté aneuëk ulôn nyang sidroe teuk nyan." Geujaweueb lé Nabi Daud, "Deumi TUHAN nyang udeb, aneuëk gata nyang na sidroe teuknyan hana jipakoe le lé awaknyan." 12 Laju jipeugah kheueh lé ureuëng inong nyan lom, "Teungku Amphon Nyang Mulia, neupeu idhin kheueh ubak ulôn nyoe ulôn peugah haba bacut teuk mantong." "Gét kheueh," geujaweueb lé Raja. 13 Kheun ureuëng inong nyan, "Deungon tutoe haba Amphon nyan, Teungku Amphon ka neumeungaku bahwa Teungku keudroe meusalah sabab hana neupeu idhin aneuëk agam Teungku Amphon jiwoe nibak teumpat gobnyan jipeusöm droe. Pakon Teungku Amphon neupeubuet buet nyang salah nyang lagée nyan ateueh umat Po teu Allah? 14 Geutanyoe nyoe banmandum teuma maté; geutanyoe manusia nyoe na kheueh saban lagée ié nyang roe ateueh tanoh dan hana meuteumé le ié nyan tapeusapat lom teuma. Dan meunan cit Po teu Allah pih hana teuma geupeu udeb ureuëng nyang ka maté; lé sabab nyan bah kheueh Teungku Amphon neu-useuha ureuëng nyang ka teuböih sampoe jiôh nyan hase jiwoe lom teuma. 15 Ulôn nyoe lônjak meuhadab ubak Teungku Amphon sabab ulôn jiancam lé gob. Laju teupike lé ulôn nyang sigot jih hainyoe ulôn jak meuhadab ubak Teungku Amphon sira ulôn peugah haba deungon peunoh harab peue nyang ulôn lakéenyoe Teungku Amphon peutrok. 16 Ulôn pike Teungku Amphon teuma neudeungoe dan neupeuseulamat ulôn nibak ureuëng nyang jiuseuha jikeuneuk poh ulôn dan meunan cit aneuëk ulôn. Awaknyan jimeuniet keuneuk jikireuh kamoe nibak tanoh nyang geubri lé Po teu Allah keu umat Gobnyan. 17 Ulôn yakén bahwa janji Teungku Amphon nyan teuma teujamin teupeuseulamat ulôn sabab Teungku Amphon na kheueh lagée Malaikat Allah, nyang hase teupeubeda peue nyang gét dan peue teuma nyang jeuhet. Seumoga TUHAN Po teu Allah Teungku Amphon sabe na meusajan Teungku Amphon!" 18 Geujaweueb lé Raja Nabi Daud, "Ulôn teumanyong sisuatu ubak gata, tajaweueb kheueh deungon jujoe." "Silahkan Teungku Amphon neupeugah haba," jijaweueb lé ureuëng inong nyan. 19 Kheun Raja, "Peu kheueh Yoab nyang yue gata?" Jaweueb ureuëng inong nyan, "Deumi nyawöng Teungku Amphon, ulôn hana mungken ulôn peu asek ulée nibak peue nyang ka Teungku Amphon tanyong. Beutôi that Teungku Amphon, Yoab ka geupeugah ubak ulôn peue nyang harôh ulôn peubuet dan ulôn peugah. 20 Teuma gobnyan geupeugah meunan na kheueh keu keuneuk peuseuleusoe peukara nyan deungon jroh-jroh. Teungku Amphon na kheueh ureuëng bijak sana lagée Malaikat Allah sampoe neuteupeue banmandum peue nyang teuma teujadi." 21 Óh lheueh nyan Raja Nabi Daud nyan laju geuhôi Yoab dan geupeugah ubak gobnyan, "Meukeusut até gata nyan teuma ulôn peupeunoh. Tajak kheueh laju tajaktueng Absalom dan taba kheueh laju jihnyan keunoe ubak ulôn." 22 Yoab laju geusujut dikeue Nabi Daud, dan geupeugah, "Kira jih Po teu Allah geubri beureukat ubak Teungku Amphon! Jinoenyoe ka ulôn teupeue bahwa Teungku Amphon neuteurimong ulôn kareuna Teungku Amphon ka neuteurimong peue nyang ulôn lakée." 23 Laju geubeurangkat kheueh Yoab u Gesur keu geujak tueng Absalom geupeuwoe lom u Yerusalem. 24 Teuma Raja Nabi Daud nyan hana geupeu idhin aneuëk geuh Absalom nyan tinggai didalam meuligoe. "Ulôn hana lôn tem ngieng jih nyan," geupeugah lé Raja Nabi Daud. Lé sababnyan Absalom langsong jiwoe u rumoh droe geuhnyan, dan hana jimeuhadab ubak raja. 25 Absalom jipujo lé gob sibagoe ureuëng nyang paleng gagah bansaboh nanggroe Israel. Hanale ureuëng nyang paleng ceudah seulaén nibak gobnyan. Phon nibak tapak gaki trok ubak ujong ôk hana mubacut pih na meucupa. 26 Ôk gobnyan teubai ngon patah manyang, dan ôk geuh nyan harôh geugunteng seun sithon sigoe sabab han ék geupeuteun sabab brat. Ôk nyang ka geu gunteng nyan na brat jih dua kilo gram leubeh nyan meunurot timbangan raja. 27 Absalom na geumeu aneuëk lhée droe aneuëk agam dan sidroe aneuëk inong nyang lumpah that lagak dan jiboh nan Tamar. 28 Ka na dua thon Absalom tinggai di Yerusalem, teuma gohlom cit gobnyan meurumpok deungon raja. 29 Lé sababnyan bak siuroe gobnyan geuhôi Yoab, keu geuyue ureuëng nyan jijak meuhadab ubak raja, teuma Yoab hana geutem teuka, Absalom laju jihôi gobnyan sigoteuk, teuma meunan cit Yoab hana cit jitem teuka. 30 Óh lheueh nyan jipeugah kheueh lé Absalom ubak namiet gobnyan, "Gata tateupeue lampôh si Yoab na di siblaih lampôh ulôn nyang ka jipula deungon bak jelai? Gata tot kheueh lampôh jih nyan." Dan awaknyan pih laju jijak tot lampôh nyan. 31 Teuma Yoab laju geujak u rumoh Absalom sira geutanyong, "Pakon namiet-namiet droeneueh jijak tot lampôh ulôn?" 32 Jijaweueb lé Absalom, "Sabab gata hana tatem teuka bak ulôn watée ulôn hôi. Ulôn keuneuk yue gata jak meuhadab ubak raja dan gata peusampoe peue nyang ulôn tanyong nyoe, 'Keupeue guna jih ulôn tinggai Gesur dan ulôn tinggai disinoe? Leubeh gét ulôn tinggai mantong disideh.' " Dan jipeugah lé Absalom lom teuma, "Gata useuha kheueh mangat ulôn hase lôn jak meuhadab ubak raja, dan meunyoe ulôn mantong na geu anggab meusalah, ulôn rila geu huköm maté." 33 Óh lheueh nyan geujak kheueh laju Yoab jak meuhadab ubak Raja Nabi Daud dan geupeusampoe laju peumohonan Absalom. Laju Raja geuhôi Absalom, dan Absalom pih teuka laju jisujut dikeue raja. Dan raja pih geusambot gobnyan deungon cara geucom.

2 Samuel 15

1 Óh ka lheueh nyan Absalom jikeubah laju keu droe jih saboh geuritan prang meunan cit deungon guda dan na limong ploh droe peungiréng gobnyan. 2 Tieb-tieb uroe Absalom jibeudôh nibak teumpat éh beungoh-beungoh that dan laju jijakdong nibak binéh jalan tô ngon pintoe geureubang meuligoe. Soe mantong ureuëng nyang jikeuneuk meungadu keuhai peukara jih ubak raja, laju jihôi ngon jitanyong lé Absalom nyan, jipeugah lagée nyoe, "Gata nyoe nibak sukée toih?" Dan meunyoe ureuëng nyang jitanyong nyan jijaweueb, "Nibak sukée nyoe atawa jéh," 3 teuma Absalom laju jipeugah, "Meunurot huköm, gata beuna, teuma sayang hana waki raja nyang geutem deungoe peue nyang gata gadu nyan." 4 Laju jipeugah lom lé ureuëng nyan, "Cuba, meunyoe ulôn nyang jeuet keu hakém, soe mantong ureuëng nyang na seungketa atawa tuntotan ureuëng nyan jeuet jijak ubak ulôn dan ulôn peusaneut ureuëng nyan deungon ade." 5 Meunyoe na ureuëng nyang jipeutou ubak Absalom keu jisujut jiseumah gobnyan, laju Absalom jisunyueng jaroe geuhnyan, laju di ureuëng nyan jipeusaneut ngon cara jicöm. 6 Meunan kheueh sikeub Absalom keu soe mantong ureuëng Israel nyang keuneuk jak peugah keuhai peukara jih ubak raja, dan deungon na lagée nyan Absalom ka jicok até ureuëng Israel. 7 Óh kana peuet thon teuma óh lheueh nyan, Absalom jipeugah ubak Raja Nabi Daud, "Bapak, neupeu idhin kheueh ulôn jak u Hebron keu ulôn jak peuteupat janji ulôn ubak TUHAN. 8 Sabab yoh ulôn mantong tinggai di Gesur nanggroe Siria, ulôn ka lheueh ulôn meujanji teuma ulôn jak meu iébadat ubak TUHAN di Hebron meunyoe gobnyan ka geupeu idhin ulôn woe u Yerusalem." 9 Geujaweueb lé raja, "Gata jak kheueh deungon seulamat." Dan jibeurangkat kheueh Absalom u Hebron. 10 Teuma sigohlom nyan gobnyan ka geukirém utosan-utosan geuh ubak bubena sukée Israel sira jiba peusan nyang lagée nyoe, "Meunyoe gata ka tadeungoe su beureuguih, gata kuk kheueh laju, 'Absalom ka jeuet keuraja di nanggroe Hebron!' " 11 Nibak Yerusalem na ureuëng dua reutoih droe nyang ji-iréng Absalom jijak u Hebron. Awaknyan hana jiteupeu sapeue keuhai komplotan nyan dan awaknyan banmandum jijak deungon teunang deungon hana curiga meubacut pi. 12 Dan teungoh Absalom jipeuseumah keureubeuen, gobnyan geukirém cit utosan u banda Gilo mangat geujak hôi Ahitofel, ureuëng nyan na kheueh sidroe peunaseuhat Nabi Raja Daud. Meunan kheueh komplotan nyang keuneuk lawan raja nyan seumaken le ngon teuga, dan meutamah le kheueh peuikot-peuikot Absalom. 13 Óh lheueh nyan na sidroe ureuëng jijak ba haba ubak Nabi Daud, "Ureuëng-ureuëng Israel ka jidong blaih Absalom." 14 Laju Nabi Daud geupeugah ubak banmandum peugawée gobnyan nyang na di Yerusalem, "Boh jak geutanyoe tajak meungunse, tajak musöm u teumpat nyang aman. Nyoe na kheueh jalan nyang paleng gét mangat geutanyoe teuhenda nibak Absalom. Hana treb le jih nyan jijak keunoe. Bagaih kheueh, bék sampoe geutanyoe jitiyeub ngon jipeutaloe, akhéjih banmandum peunduduek banda nyoe jipoh maté!" 15 "Get, Teungku Amphon," jaweueb awaknyan. "Kamoe ka siab kamoe peubuet peue mantong nyang Teungku Amphon peugah." 16 Dan geujak kheueh raja ji-iréng lé banmandum keuluwarga dan peugawée gobnyan, teuma na siploh droe gundek gobnyan nyang geutinggai keu jikeumiet meuligoe. 17 Bak watée raja dan banmandum peungiréng gobnyan teungoh geujak geutinggai banda, awaknyan laju geupiôh hek dan to that ngon rumoh nyang keuneuleueh. 18 Banmandum peugawée raja jidong blaih gobnyan bak watée pasokan peungawai raja meuriti jijak rot keu gobnyan. Meunan cit deungon nam reutoih droe tantra nyang ka jiseutôt gobnyan yoh phon di Gat, awaknyan pih meubaréh dikeue gobnyan. 19 Ban geungieng nyang lagée nyan lé raja laju geupeugah ubak Itai nyang jeuet keu keumeundan pasokan nyang nam reutoih droe nyan, "Pakon gata nyoe banmandum taseutôt cit meusajan deungon kamoe? Leubeh gét gata tajak gisa dan tinggai meusajan deungon raja nyang barô. Bukon kheueh gatanyoe ureuëng aséng, peungungsé nyang jiôh that nibak nanggroe gata keudroe? 20 Gohlom treb gata tinggai disinoe, ek kheueh gata ulôn yue jak seutôt tameungeumbara deungon ulôn? Ulôn keudroe hana lôn teupeue ho nyang harôh ulôn jak. Tajakwoe kheueh, dan taba kheueh sajan rakan-rakan gata nyang saboh bansa, seumoga TUHAN geugaséh keu gata dan seutia ubak gata." 21 Teuma lé Itai jijaweueb, "Amphon Deulat Tuanku Nyang Mulia, deumi TUHAN nyang udeb dan deumi nyawöng Teungku Amphon, ho mantong kheueh Teungku Amphon neujak, ulôn teutab lôn seutôt, bahpi nyang teupeukeue nyan na kheueh maté." 22 "Get kheueh, meunyoe meunan!" geujaweueb lé Nabi Daud, "Tajak kheueh laju!" Teuma jijak kheueh laju Itai meusajan deungon banmandum pasokan jih meunan cit deungon keuluwarga awaknyan. 23 Banmandum rakyat jikliek ngon jimo ba-e bak watée pasokan Nabi Daud geutinggai banda. Óh lheueh nyan raja laju geujeumeurang Krueng Kidron meunan cit jiseutôt mandum lé pasokan gobnyan, laju jijak kheueh awaknyan meulalu padang pasi. 24 Teungku Imeum Zadok dan Teungku Imeum Abyatar na lamkawan nyan meunan cit deungon banmandum ureuëng Lewi nyang ba Peuto Peujanjian TUHAN. Peuto Peujanjian nyan laju jikeubah, dan hana jibeuôt sigohlom banmandum rakyat jitinggai banda nyan. 25 Dan geupeugah kheueh lé raja ubak Zadok, "Gata peuriwang kheueh Peuto Peujanjian TUHAN nyan u dalam banda. Meunyoe TUHAN geutueng keu ulôn, teuntée kheueh Gobnyan geupeu idhin keu ulôn mangat jeuet lom lôn woe keunoe dan lôn teupeungieng Peuto Peujanjian nyan meunan cit meuteumé ulôn kalon teumpat tinggai jih. 26 Teuma meunyoe TUHAN hana geutueng keu ulôn, teuseurah kheueh mantong ubak TUHAN peue nyang geukeuneuk peubuet ateueh ulôn nyoe!" 27 Lheueh nyan geupeugah lom lé raja ubak Zadok, "Gata pakat kheueh Ahimaas aneuëk gata dan Yonatan aneuëk Abyatar; jakwoe kheueh u dalam banda deungon teunang. 28 Ulôn preh gata nibak teumpat jeumeurang krueng tô ngon padang pasi sampoe ulôn teurimong haba nibak gata." 29 Laju Zadok dan Abyatar jiba Peuto Peujanjian TUHAN nyan jipeugisa u Yerusalem dan awaknyan laju tinggai disinan. 30 Óh lheueh nyan Nabi Daud laju geusut sipatu geuh. Meunan cit deungon banmandum peungikot-peungikot gobnyan jiteungoh laju u ateueh Bukét Zaiton sira geumo deungon ulée teuthôb tanda ureuëng teungoh meukabong. 31 Bak watée jibritée ubak Nabi Daud bahwa Ahitofel na cit meusajan deungon geurombolan Absalom, laju geumeudoá kheueh Nabi Daud lagée nyoe, "Ya, TUHAN, neupeubateue kheueh peue nyang jinaseuhat lé Ahitofel!" 32 Bak watée Nabi Daud ka trok ubak pucak gunong di teumpat nyang lazem ureuëng jimeu iébadat ubak TUHAN, gobnyan laju jisambot lé rakan geuh nyang seutia, na kheueh Husai ureuëng Arki. Peukayan Husai nyan teupriek dan nibak ulée jih nyan teutabu deungon abée. 33 Nabi geupeugah ubak ureuëng nyan, "Meunyoe gata taseutôt meusajan deungon ulôn, gata ka jeuet keu beuban nibak ulôn. 34 Teuma gata hase tatulông ulôn, meunyoe gata tawoe u banda dan neupeugah ubak Absalom, bahwa jinoenyoe gata keuneuk peutimang jih nyan deungon peunoh seutia, lagée ka gata peutimang bapak jih yoh watée ilée. Deungon cara nyang lagée nyan gata ka hase tapeubateue peue mantong nyang jibri naseuhat lé Ahitofel. 35 Teungku Imeum Zadok dan Abyatar meunan cit na disinan. Tajak peugah kheueh ubak gobnyan peue-peue nyang gata deungoe di meuligoe. 36 Ahimaas aneuëk Zadok dan Yonatan aneuëk Abyatar meunan cit awaknyan jiseutôt bapak droe jih, deungon nyan awaknyan kana cit disinan. Aneuëk-aneuëk nyan kheueh gata yue teuka ubak ulôn mangat jijak peusampoe peue mantong haba nyang gata deungoe." 37 Teuma jiwoe kheueh Husai rakan Nabi Daud nyan u Yerusalem, paih bak watée Absalom trok keunan.

2 Samuel 16

1 Bak watée Nabi Daud ban mantong geuliwat bak pucak bukét, hana geusangka-sangka teuka kheueh si Ziba namiet si Mefiboset, namiet nyan laju jijak ubak gobnyan sira jiba sijudo keuleudée nyang na teupeudieng di ateueh rhueng keuleudée nyan na dua reutoih boh ruti, sireutoih boh tangke boh anggô nyang ka tho, sireutoih boh karang boh kayée nyang mantong jroh dan saboh baluem teuma ié anggô. 2 Raja Nabi Daud nyan laju geutanyong ubak namiet nyan, "Keupeue banmandum atranyoe?" Jijaweueb lé Ziba, "Keuleudée-keuleudée nyoe teupeuguna keu beulatang keu ngon peudieng keuluwarga Teungku Amphon, ruti dan dumna boh kayée nyoe na kheueh keu peulayan-peulayan Teungku Amphon, dan nyang ié anggô nyoe na kheueh keu ureuëng nyang graih nibakjak di padang pasi." 3 Laju geutanyong lom lé Raja Nabi Daud nyan ubak ureuëng nyan, "Dipat si Mefiboset cucoe teungku gata si Saul?" "Gobnyan mantong na teutab di Yerusalem," jaweueb Ziba, "sabab gobnyan yakén bahwa jinoenyoe ureuëng Israel teuma geujok pulang keurajeuen Saul indatu gobnyan ubak gobnyan." 4 Laju geupeugah kheueh lé raja ubak Ziba, "Jinoenyoe banmandum hareuta milék Mefiboset ka jeuet keu hakmilék gata." "Teurimong gaséh Teungku Amphon," jaweueb Ziba. "Seumoga Teungku Amphon sabe neugaséh keu ulôn!" 5 Watée Nabi Daud katrok u Bahurim, teuka kheueh sidroe nibak teumpat nyan, dan sira jipeurab ubak kawan raja, gobnyan laju jikutok Nabi Daud. Ureuëng nyan nan jih Simei bin Gera, nibak kawöm syedara Saul. 6 Simei jigeulawa Nabi Daud dan peugawée-peugawée gobnyan deungon aneuk batée, bahpi Nabi Daud jipagab ngon jikeulileng lé aneuëk buah gobnyan meunan cit lé dumna peuwira gobnyan. 7 Simei jikutok laju Nabi Daud deungon tutoe haba, "Jak wéeh laju keudeh, hai manusia tukang seumupoh maté! Droeneueh peunjahat! 8 Droeneueh ka neureupah keurajeuen Saul! Jinoenyoe droeneueh geuhuköm lé TUHAN sabab ka neupoh maté nyang lumpah thatle kawöm syedara Saul. TUHAN ka geubri keurajeuen droeneueh nyoe ubak aneuëk droeneueh si Absalom. Jinoenyoe bawa kireueh kheueh droeneueh, hai manusia tukang poh maté!" 9 Abisai adoe Yoab aneuëk Zeruya, jipeugah ubak raja, "Pakon Teungku Amphon neupeubiyeu ureuëng peurusak nyan jikutok Teungku Amphon? Neupeu idhin kheueh ubak ulôn mangat lônjak teubang nibak takue jih nyan!" 10 Teuma raja geupeugah ubak Abisai dan Yoab aduen jih nyan, "Bék tapeureumeun keu jih nyan, tapeubiyeu mantong jihnyan jikutok ulôn. Sabab meunyoe TUHAN nyang yue jihnyan, soe kheueh ureuëng nyang na hak jijak tanyong pakon jihnyan jipeubuet lagée nyan?" 11 Laju Nabi Daud geupeugah ubak Abisai, dan meunan cit ubak banmandum namiet gobnyan, "Aneuëk ié tuleueng ulôn keudroe jiuseuha jikeuneuk poh maté ulôn; pakon teuma gata hireuen takalon pi-e ureuëng Benyamin nyoe? TUHAN kheueh nyang yue jihnyan jikutok ulôn; lé sababnyan bék tapeukaru jihnyan dan tapeubiyeu mantong ureuëng nyan jikutok ulôn. 12 Mungken TUHAN teuma geupeurati peundeuritaan nyoe dan geubri beureukat ubak ulôn sibagoe geunantoe kutokan nyan." 13 Laju Nabi Daud dan dumna ureuëng nyang iréng gobnyan geujak laju nibak teumpatnyan sira geupeujak laju meuneujak gobnyan, seudangkan Simei laju teuma jiseutôt bagaih-bagaih nibak lereng gunong sira jimeurapa ngon jigeulawa gobnyan rotlikot ngon aneuk batée dan ngon tanoh. 14 Raja ngon aneuëk buah gobnyan ka hék that-that dan laju geupiôh nibak binéh Krueng Yordan. 15 Bak watée nyan Absalom dan banmandum ureuëng nyang jiseutôt gobnyan teungoh geujak geutamong u dalam banda Yerusalem, dan lamkawan nyan na cit jiseutôt lé Ahitofel. 16 Yoh watée Husai rakan Nabi Daud nyang seutia nyan meurumpok deungon Absalom, Husai laju jitawök ubak Absalom nyan, "Udeb raja! Udeb raja!" 17 Teuma Absalom jitanyong ubak jih nyan, "Dipat kheueh takeubah keuseutiaan gata teuhadab rakan gata Nabi Daud? Pakon gata hana taseutôt deungon gobnyan?" 18 Jijaweueb lé Husai, "Panena mungken! Ulôn dong blaih ureuëng nyang geupiléh lé TUHAN, lé ureuëng-ureuëng nyoe, dan lé banmandum ureuëng Israel. Ureuëng nyan kheueh nyang teuma ulôn seutôt. 19 Lom teuma, soe kheueh lom nyang teuma ulôn peutimang? Bukon kheueh aneuëk agam Teungku Amphon? Lagée nyang ka ulôn peutimang bapak Teungku Amphon, meunan cit teuma ulôn peutimang u ateueh Teungku Amphon nibak saát nyoe." 20 Óh lheueh nyan Absalom jipeugah ubak Ahitofel, "Gata peugah kheueh laju peue nyang harôh tanyoe peubuet." 21 Jijaweueb lé Ahitofel, "Neujak kheueh laju ubak gundek-gundek bapak Teungku Amphon nyang ka geutinggai keu jikeumiet meuligoe, dan neu-éh kheueh deungon gundek nyan. Bansaboh Israel teuma jiteupeu bahwa deungon na Teungku Amphon peubuet nyang lagée nyan, Teungku Amphon ka geu anggab musoh lé bapak Teungku Amphon. Deungon nyan banmandum peungikot Teungku Amphon meutamah-tamah jijeuet." 22 Lé sababnyan, keu Absalom geupeuget khimah di ateueh bubong meuligoe nyang data nyan. Laju óh jingieng lé rakyatba Absalom geutamong u dalam khimah nyan dan geu-éh laju deungon gundek-gundek bapak geuh nyan. 23 Bak watéenyan tieb-tieb naseuhat Ahitofel geuteurimong sang-sang nyan na kheueh haba Po teu Allah keudroe; bah kheueh Nabi Daud meunan cit Absalom geuturot sabe peue nyang geunaseuhat nyan.

2 Samuel 17

1 Hana treb teuma óh lheueh nyan, Ahitofel jipeugah lom ubak Absalom, "Neupeu idhin kheueh ubak ulôn mangat lôn piléh 12.000 droe. Eunteuk malam ulôn teuma lônjak tiyeub Nabi Daud. 2 Gobnyan ulôn prang bak watée awaknyan teungoh hék dan ka rhot seumangat. Ulôn teuma lôn peukeujot gobnyan, akhéjih banmandum aneuëk buah gobnyan jipeuplueng droe. Dan Raja Nabi Daud mantong nyang ulôn poh maté. 3 Teuma banmandum aneuëk buah gobnyan ulôn jok pulang ubak Teungku Amphon lagée dara barô jiwoe ubak lakoe jih. Bukon kheueh Teungku Amphon nyang lakée nyawöng sidroe ureuëng mantong? Seudangkan nyang laén hana teupeukaru." 4 Naseuhat nyan jipandang gét that lé Absalom dan lé banmandum peumimpén Israel. 5 Bahpi meunan Absalom jipeugah, "Tajak kheueh laju jinoenyoe hai Husai; jak tadeungoe pakriban peudapat jih." 6 Bak watée Husai jiteuka jak meuhadab, Absalom jipeugah laju reuncana Ahitofel sira jipeugah lagée nyoe, "Peu kheueh taseutôt peue nyang ka geunaseuhat nyan? Meunyoe hán, cuba neubri usui nyang laén." 7 Jijaweueb lé Husai, "Naseuhat Ahitofel goenyoe hana gét. 8 Teungku Amphon pasti neuteupeue bahwa Nabi Daud dan aneuëk buah gobnyan na kheueh peujuang nyang pantang meunyeurah lom gagah beurani. Awaknyan beuhé lagée cagée inong nyang ka gadôh aneuëk. Lom teuma Nabi Daud nyan na kheueh sidroe tantra nyang ka jaithat peungalaman nyang hántom geumeudom meusapat deungon aneuëk buah gobnyan. 9 Mungken nibak saát nyoe pih gobnyan teungoh geumusöm didalam saboh guha atawa di teumpat nyang laén. Lé sababnyan, meunyoe aneuëk buah Teungku Amphon geuprang lé Nabi Daud, dan na nyang maté, dan soemantong nyang jideungoe hainyan teuma jipeugah bahwa aneuëk buah Absalom ka teupeutaloe. 10 Dan ureuëng-ureuëng nyang paleng beurani dan gagah peukasa lagée singa pi pasti teumakot. Sabab banmandum ureuëng Israel jiteupeue bahwa bapak Teungku Amphon na kheueh sidroe pahlawan, dan meunan cit deungon aneuëk buah gobnyan na kheueh peujuang-peujuang nyang gagah beurani. 11 Lé sabab nyan, naseuhat ulôn lagée nyoe: Neujak peusapat kheueh laju banmandum ureuëng Israel bansaboh nanggroe, sampoe le jih na sidub ano dibinéh pasi. Laju Teungku Amphon keudroe kheueh nyang maju ukeue dalam mideuen prang dan droeneueh kheueh nyang jeuet keu panglima prang nyan. 12 Geutanyoe teuma meurumpok ngon Nabi Daud dipat mantong gobnyan na, dan tanyoe prang gobnyan sigohlom gobnyan sada peue nyang ka teujadi. Hana meusidroepi nyang hase jipeuleuh droe, bah kheueh gobnyan meunan cit deungon aneuëk buah geuh. 13 Meunyoe gobnyan geuplueng u dalam saboh banda, banmandum rakyat geutanyoe jicok laju bubena talo teumalo teujak ikat laju banda nyan dan ta seumpom u dalam barieh nyang paleng tô. Meusineuk batée pih hana nyang teutinggai di ateueh bukét nyan." 14 Ban geudeungoe nyang lagée nyan lé Absalom dan banmandum ureuëng Israel jipeugah, "Naseuhat Husai leubeh gét nibak naseuhat Ahitofel." Keubiet, TUHAN ka geupeuteuntée keu geupeu bateue naseuhat Ahitofel nyang jroh nyan, mangat Absalom geuteurimong mala peutaka. 15 Óh ka lheueh nyan Husai jilapor ubak Teungku Imeum Zadok dan Teungku Imeum Abyatar keuhai naseuhat Ahitofel dan naseuhat gobnyan keudroe ubak Absalom dan mandum peumimpén Israel. 16 Kheun Husai, "Bagaih, neubri tée ubak Nabi Daud mangat bék geu mudom nibak teumpat teujeumeurang krueng di padang pasi. Gobnyan harôh deungon sigra geujeumeurang Krueng Yordan. Meunyoe hana, gobnyan dan banmandum pasokan gobnyan jipeuhanco." 17 Bak watéenyan Yonatan aneuëk Abyatar dan Ahimaas aneuëk Zadok teungoh jipreh dan hana padubna jiôh ngon mata ié En-Rogel, nibak binéh banda Yerusalem. Awaknyan hana jijeuet jitamong u dalam banda sabab teumakot jingieng lé gob. Lagée nyang ka lazem, meunyoe na sidroe namiet ureuëng inong jijak peugah ubak awaknyan haba nyang harôh jipeusampoe ubak Raja Nabi Daud. 18 Teuma bak gobnyan na sidroe aneuëk agam keubeutulan deuh jikalon awaknyan, dan hainyan jijak britée laju ubak Absalom. Lé sababnyan awaknyan bagaih-bagaih jijak sira jimusöm nibak rumoh sidroe peunduduek nyang na di gampông Bahurim. Binéh rumoh nyan na saboh mon ié dan awaknyan laju jitamong u dalam mon nyan. 19 Peurumoh ureuëng po rumoh nyan laju jileueng siôn ija di ateueh babah mon nyan dan di ateueh ija nyang ka teuleueng nyan laju teuma jitabu aneuk gandom, akhéjih mon ié nyan ka hana leumah le. 20 Ureuëng nyang jiyue lé Absalom laju trok ubak rumoh nyan dan laju jitanyong ubak ureuëng inong nyan, "Dipat deuh kah kalon Ahimaas dan Yonatan?" "Awaknyan banmantong geujeumeurang krueng," jaweueb ureuëng inong nyan. Awaknyan jimita laju ban dua droe aneuëk mudanyan, teuma hana meurumpok ngon awaknyan, laju jijakwoe kheueh awaknyan u Yerusalem. 21 Ahimaas dan Yonatan laju geuteubiet dalam mon nyan, laju reujang-reujang geujak meurumpok ubak Raja Nabi Daud dan jilapor laju peue nyang ka geurasa nyan. Kheun awaknyan, "Ahitofel ka jibri naseuhat keu jijak prang Teungku Amphon. Deungon nyan phon saátnyoe tabeurangkat kheueh laju neujeumeurang krueng nyoe." 22 Laju Nabi Daud dan aneuëk buah gobnyan geujeumeurang Krueng Yordan, dan trok u meurandeh jéh ka beungoh uroe. 23 Bak watée Ahitofel ka jiteupeue bahwa naseuhat gobnyan hana jiseutôt lé Absalom, gobnyan laju jijak pasang peulana keuleudée jih dan jijakwoe laju u banda droe jih. Óh ka lheueh jipeubeuréeh banmandum urosan droe jih laju gobnyan jigantung droe, dan óh ka jeulaih jihnyan ka maté jitanom laju u dalam jrat nibak jrat-jrat keuluwarga droe jih. 24 Nabi Daud ka sampoe ubak banda Mahanaim bak watée Absalom jijeumeurang Krueng Yordan, ji iréng lé dumna ureuëng Israel. ( 25 Absalom ka geuangkat Amasa jeuet keu ulée pasokan keugeunantoe Yoab. Amasa nyan na kheueh aneuëk Yitra ureuëng Ismail; mak jih nan geuh Abigail aneuëk Nahas, na kheueh syedara inong mak Yoab nyang nan ji Zeruya.) 26 Absalom dan aneuëk buah gobnyan jipeudong khimah di tanoh Gilead. 27 Bak watée Nabi Daud trok u Mahanaim, gobnyan laju jisambot lé Sobi aneuëk si Nahas nibak banda Raba di Amon, dan lé Makhir aneuëk Amiel nibak Lodebar, dan lé Barzilai nibak Rogelim di Gilead. 28 Awaknyan laju jiba cambông, kuali dan tilam keu Nabi Daud dan aneuëk buah gobnyan, meunan cit jiba gandom, jeulai, teupông, gandom nyang ka lheueh teu cráih, kacang mirah, kacang mirah nyang rayeuk, meulisan, keuju, ulée susu dan meupadub boh bubiri. Awaknyan jiteupeu bahwa Nabi Daud dan aneuëk buah gobnyan teungoh deuk that, glaih ngon tou rukueng meutamah ngon hék sabab meuneujak nyang panyang di padang pasi.

2 Samuel 18

1 Raja Nabi Daud laju geupeusapat banmandum aneuëk buah gobnyan, óh lheuehnyan pasokan nyang geupeusapat nyan geubagi teuma jeuet keu pasokan na nyang sireubée saboh pasokan dan na teuma nyang sireutoih droe. Óh lheuehnyan geu angkat teuma peuwira-peuwira nyang mat keumudo ateueh pasokan-pasokan nyan. 2 Óh lheueh nyan geupeuleueh laju awaknyan u mideuen prang dalam lhée boh keulompok, maséng-maséng keulompok nyan geupimpén lé Yoab, Abisai adoe Yoab dan Itai ureuëng Gat. Geupeugah lé raja ubak aneuëk buah gobnyan, "Ulôn na cit meusajan gata." 3 Teuma bubena awaknyan jijaweueb, "Bék Teungku Amphon, meunyoe kamoe teupaksa harôh kamoe plueng, atawa bahpi siteungoh nibak kamoe nyoe maté, musoh gohlom meurasa puih até jih, sabab Teungku Amphon kheueh nyang awaknyan mita. Teungku Amphon saban yuem jih deungon siploh ribée droe kamoe nyoe. Lom teuma leubeh gét Teungku Amphon neukirém bantuan mantong ubak kamoe didalam banda." 4 Laju geupeugah lé raja, "Get kheueh, teuseurah mantong ubak gata." Óh lheuehnyan gobnyan laju geudong dibinéh pintoe geureubang banda, seudangkan banmandum pasokan ka teudong meuriti diluwa lam keusatuan-keusatuan nyang na nibak siribée droe dan sireutoih droe. 5 Laju Raja Nabi Daud geubri peurintah ubak Yoab, Abisai dan Itai, lagée nyoe geupeugah, "Bék kheueh gata peuluka si Absalom aneuëk muda nyan deumi ulôn." Banmandum pasokan jideungoe peurintah Nabi Daud nyan. 6 Dan beurangkat kheueh pasokan Nabi Daud jijak prang pasokan Israel, dan awaknyan jimeu heuengko dalam uteuen Efraim. 7 Pasokan Israel laju jipeutaloe lé aneuëk buah Nabi Daud; keuhai taloe pasokan Israel nyan lumpah rayeuk, na 20.000 droe maté nibak uroenyan. 8 Prang bak uroenyan ka meutamah gunjak dan hebat that, sampoe ka meuluwah ban saboh daerahnyan, dan leubeh jai ureuëng nyang maté nyang teukurong didalam uteuen nibak nyang maté dalam mideuen prang. 9 Bak watée Absalom teungoh ji-ék ateueh bagal droe jih, hana teusangka-sangka gobnyan laju meurumpok deungon aneuëk buah Nabi Daud. Bagal nyan teungoh jijak dimiyueb bak kayée raya nyang miyueb, dan meusangkot kheueh ulée Absalom nibak cabeueng kayée nyan. Bagal nyan laju jiplueng seudangkan Absalom mantong meugantueng meu ayon-ayon nibak cabeueng kayée nyan. 10 Sidroe lamkawan aneuëk buah Nabi Daud deuh jikalon hainyan dan laju jijak lapor ubak Yoab, "Teungku Amphon, bunoe leumah ulôn kalon Absalom ka meugantueng nibak cabeueng kayée raya!" 11 Geujaweueb lé Yoab, "Peue kah peugah? Deuh kahkalon gobnyan? Pakon hana kahpoh bumaté? Pasti ulôn bri keu gata siploh péng pirak dan saboh talo keuieng." 12 Teuma ureuëng nyan jijaweueb, "Bahpi neubri 1.000 péng pirak keu ulôn, ulôn hán lôntem peusakét aneuëk agam raja. Kamoe banmandum kamoe deungoe peue nyang ka geupeurintah lé raja ubak Teungku Amphon dan ubak Abisai meunan cit ubak Itai, mangat bék teupeuluka Absalom aneuëk muda nyan deumi raja. 13 Dan meunyoe jih nyan ulôn poh maté si Absalom nyan, ka pasti nyan geuteupeue lé raja, sabab raja ka teuntée geudeungoe keuhai peue-peue mantong -- dan Teungku Amphon pih ka pasti hana neutem bila ulôn." 14 "Boh ka kheueh nyan! Habéh watée meuseu éue jaweueb keuhai nyan deungon gata," geupeugah lé Yoab. Laju Yoab geucok lhée boh kapak dan kapak nyan laju geutôb ubak dada Absalom nyang bak watée nyan mantong udeb dan teugantueng bak cabeueng kayée. 15 Óh lheueh na teuma siploh droe aneuëk buah Yoab laju teuma jijak paran sira jicang-cang Absalom nyan sampoe maté. 16 Yoab laju geuyob beureuguih akhéjih aneuëk buah gobnyan banmandum jipiôh jipeucrok pasokan Israel. 17 Óh lheueh nyan manyét Absalom laju jibeuôt dan ji seumpom u dalam mon nyang that lhok didalam uteuen nyan. Mon nyan laju jiseubée lé awaknyan deungon aneuk batée sampoe manyang. Banmandum pasokan Israel laju jipeuplueng droe maséng-maséng u rumoh droe jih. 18 Yoh mantong udeb Absalom ka geupeudong keudroe gobnyan saboh tugu di Pantôn Raja, sabab gobnyan hana geumeu aneuëk nyang agam keu teusambong keuturonan gobnyan. Tugu nyan geuboh nan paih lagée nan gobnyan keudroe, dan sampoe nibak uroe nyoe tugu nyan teuboh nan tugu Absalom. 19 Óh lheuehnyan jipeugah kheueh lé Ahimaas aneuëk Zadok ubak Yoab, "Neupeu idhin kheueh ubak ulôn mangat ulôn plueng lônjak britée ubak raja dan ulôn ba haba mangat até nyang toh TUHAN ka geupeuseulamat Teungku Amphon nibak musoh gobnyan." 20 "Bék," kheun Yoab, "na watée laén singoh. Uroenyoe hánjeuet gata tajakba haba, sabab aneuëk agam raja ka maté." 21 Óh lheueh nyan Yoab geupeugah ubak sidroe lamkawan namiet gobnyan nyang ureuëng Sudan, "Tajak peugah kheueh haba nyoe ubak raja peue nyang ka gata kalon." Namiet nyan laju jisujut jiseumah Teungku droe jih dan jibeudôh sinan laju jijak sira jiplueng. 22 Teuma Ahimaas laju jipaksa ubak Yoab, "Peue mantong nyang teuma teujadi, neupeu idhin kheueh ubak ulôn nyoe mangat ulôn jakba haba." "Pakon gata gét that meuhasrat takeuneuk jak meusajan, hai aneuëk ulôn?" geutanyong lé Yoab. "Gata hana teuma neuteurimong gaji keuhai nyan." 23 "Hana peue," jipeugah lom lé Ahimaas, "Ulôn teuma teutab lônjak." "Meunyoe meunan, tajak kheueh," kheun Yoab. Dan jiplueng kheueh laju Ahimaas jiseutôt binéh rot nyang teuliwat sipanyang Pantôn Yordan, dan hana treb teuma óh lheueh nyan ka meuhase jitinggai namiet Yoab nyang ka awai jijak bunoe. 24 Nabi Daud bak saboh watée teungoh geuduek-duek di ruweueng pintoe lamkawan pintoe geureubang teungoh ngon pintoe geureubang luwa banda nyan. Teuka si peunjaga laju jijak ék u ateueh beuton dan jidong laju di ateueh bubong pintoe geureubang nyan. Bak watée ureuëng nyan teungoh jingieng sira jipandang keudeh keunoe, leumah laju jikalon na sidroe ureuëng jiteuka sira jiplueng-plueng. 25 Peunjaga nyan laju jitawök u miyueb sira jipeugah hainyan ubak raja, dan raja geupeugah, "Meunyoe jihnyan sidroe mantong, ka pasti nyang jiba nyan na kheueh haba nyang jroh." Bak watée ureuëng nyan ka rab sampoe, 26 peunjaga nyan jikalon na teuma sidroe teuk teuka meunan cit sira jiplueng. Lé sababnyan ureuëng nyan jitawök lom, "Ngieng! Na ureuëng laén sidroe teuk teungoh jiplueng cit keunoe." Raja geujaweueb, "Pasti ureuëng nyan jiba haba nyang gét cit teuma." 27 Peunjaga nyan jipeugah, "Ureuëng phon nyan Ahimaas. Ulôn lôn teupeu nibak cara jihnyan jiplueng." "Gobnyan ureuëng gét," kheun raja, "ka teuntée jihnyan jiba haba nyang jroh teuma." 28 Sira jiteumawök Ahimaas laju jibri saleuem ubak raja, laju jisujut dan geupeugah, "Teupujoe kheueh TUHAN Po teu Allah Teungku Amphon, nyang ka geuseurah ubak Teungku Amphon ureuëng-ureuëng nyang beurontak keu Teungku Po!" 29 Geutanyong lé raja, "Peu kheueh Absalom ureuëng muda nyan seulamat?" Jijaweueb lé Ahimaas, "Teungku Amphon, bunoe bakwatée ulôn geu utoih jak keunoe lé Yoab, deueh ulôn kalon karu ngon riôh nyang lumpah subra, teuma ulôn hana lôn teupeue peue nyang ka teujadi." 30 "Gata beudôh dan tajakdong kheueh blaih jéh," geupeugah lé raja; teuma Ahimaas jijak laju keunan dan jidong nibak binéh lagée nyang ka geuyue lé Nabi Daud nyan. 31 Óh lheuehnyan trok teuma namiet Yoab, dan jipeugah laju ubak raja, "Ulônnyoe lônba haba nyang paleng gét ubak Teungku Amphon! Bak uroenyoe TUHAN ka geubri keu Teungku Amphon keumeunangan ateueh banmandum ureuëng nyang ka jibeurontak ubak Teungku Amphon." 32 Raja laju geutanyong ubak budak nyan, "Peu kheueh Absalom aneuëk muda nyan seulamat?" Jijaweueb lé namiet nyan, "Kira jih banmandum musoh Teungku Amphon, meunan cit banmandum nyang ka beurontak teuhadab Teungku Amphon ka jirasa naseb nyang saban lagée aneuëk muda nyan." 33 Ban geudeungoe nyan raja gét that peudeh, laju geujak ék u ateueh ruangan di ateueh pintoe geureubang sira geumo ngon geumeu ba-e, "Oh aneuëk ulôn! Aneuëk ulôn Absalom! Absalom aneuëk ulôn! Leubeh gét ulôn mantong nyang maté keugeunantoe gata, aneuëk ulôn! Absalom, aneuëk ulôn!"

2 Samuel 19

1 Ubak Yoab teupeusampoe bahwa Raja Nabi Daud geumo ba-e ngon geumeukabong keu Absalom. 2 Dan keuhai meunang nibak uroenyan ka meu-ubah jeuet keu seudehan ubak banmandum tantra Nabi Daud kareuna awaknyan jideungoe bahwa raja teungoh keupeuratok aneuëk agam gobnyan. 3 Deungon cara seungab-seungab awaknyan jigisa u banda, bak lagée tantra nyang meurasa malée kareuna jipeuplueng droe nibak mideuen prang. 4 Raja geusöm muka gobnyan sira geumeuba-e ngon su nyang meuleungkeng, "Oh aneuëk ulôn! Aneuëk ulôn Absalom! Absalom, aneuëk ulôn!" 5 Yoab laju geujak meuhadab ubak raja dan geupeugah, "Bak uroenyoe Teungku Amphon ka neupeumalée aneuëk buah Teungku Amphon, padahai awaknyan kheueh nyang ka peuseulamat nyawöng Teungku Amphon, nyawöng aneuëk agam ngon aneuëk inong Teungku Amphon, meunan cit deungon peurumoh dan gundek Teungku Amphon. 6 Teungku Amphon ka neugaséh keu ureuëng-ureuëng nyang jibanci keu Teungku Amphon, teuma Teungku Amphon neubanci ubak ureuëng nyang jigaséh keu Teungku Amphon! Deungon jeulaih that Teungku Amphon ka neupeuleumah bahwa banmandum peuwira meunan cit deungon tantra Teungku Amphon nyan hana meu areuti nibak Teungku Amphon. Teuma leumah jih Teungku Amphon leubeh that-that galak meunyoe nibak uroenyoe Absalom mantong na udeb dan kamoenyoe banmandum maté! 7 Nyang sigét jih Teungku Amphon neubeudôh dan neujak uluwa keu teupeuteunang até aneuëk buah Teungku Amphon. Ulôn meusumpah deumi TUHAN, meunyoe Teungku Amphon hana neuteubiet neujak meurumpok ngon awaknyan, teuma nibak malam nyoe cit teuma hanale na ureuëng meusidroe pih nyang jitem na deungon Teungku Amphon. Nyan na kheueh sibagoe beuncana nyang paleng rayeuk nyang teuma Teungku Amphon rasa siumu udeb Teungku Amphon." 8 Óh lheuehnyan geubeudôh kheueh raja dan geujak laju uluwa, dan geuduek laju to ngon pintoe geureubang. Aneuëk buah gobnyan jideungoe bahwa gobnyan ka na disinan, laju awaknyan banmandum teuka jijak meuhadab. Bak watée nyan banmandum pasokan Israel ka jipeuplueng droe, dan jijakwoe u rumoh jih maséng-maséng. 9 Lamkawan banmandum sukée Israel teuka kheueh seuleuseh paham ka jimeudakwa ngon jimeudakwi sabe keudroe-droe. Kheun awaknyan, "Raja Nabi Daud ka geupeuseulamat geutanyoe nibak ureuëng Filistin dan meunan cit ka geupeu lheueh geutanyoe nibak musoh-musoh nyang laén, teuma jinoenyoe gobnyan ka geupeuplueng droe nibak Absalom dan geutinggai nanggroenyoe. 10 Absalom tanyoe baiát jeuet keu raja, teuma jinoenyoe ka maté didalam mideuen prang, pakon hana meusidroe ureuëng pih jiuseuha jiba peuwoe Nabi Daud mangat geuwoe keunoe?" 11 Tutoe haba nyan trok cit ubak Raja Nabi Daud. Sabab nyan gobnyan geuyue laju Teungku Imeum Zadok dan Teungku Imeum Abyatar geuyuejak tanyong ubak peumimpén Yehuda lagée nyoe, "Pakon gata ka jeuet keu nyang keuneuleueh keu teujak sambot ngon teujak iréng raja geuwoe lom teuma ubak meuligoe gobnyan? 12 Neupeugah kheueh laju gata waréh syedara ulôn dan kawöm keurabat ulôn? Pakon jeuet gata nyang keuneuleueh neulakée mangat ulôn woe?" 13 Meunan cit teuma lé Nabi Daud geupeugah geuyue peusampoe ubak awaknyan mangat jijak peugah ubak Amasa lagée nyoe, "Bukon kheueh gatanyoe sabat ulôn? Phon bak saátnyoe gata ulôn angkat jeuet keu panglima tantra ulôn keugeunantoe Yoab. Kira jih Po teu Allah geupoh maté ulôn meunyoe hainyan hana ulôn peubuet!" 14 Meunan kheueh cara jih Nabi Daud ka meuhase geucok até banmandum kawöm Yehuda sampoe awaknyan jikirém peusan ubak raja mangat geuwoe ubak meuligoe meusajan banmandum deungon dumna peugawée gobnyan. 15 Óh lheueh nyan raja pih geubeurangkat dan trok laju nibak Krueng Yordan, bak watée nyan di ureuëng-ureuëng Yehuda ka teuma sampoe u Gilgal keu jijak tueng raja dan jikawai gobnyan teujeumeurang Krueng Yordan. 16 Simei aneuëk si Gera, ureuëng Benyamin nyan jiba teuma na siribée droe nibak sukée Benyamin dan bagaih-bagaih jiteuka meusigoe deungon ureuëng-ureuëng Yehuda nyan keu jijak sambot raja. Meunan cit deungon Ziba namiet keuluwarga Saul, meunan cit deungon ban limong blaih droe aneuëk gobnyan nyang agam dan dua ploh droe namiet gobnyan; awaknyan ka jijeumeurang Krueng Yordan sigohlom raja teuka keunan. 18 Awaknyan jibantu keuluwarga raja geujeumeurang krueng nyan dan jipeubuet laju peue mantong nyang geuyue lé raja ubak gobnyan. Bak watée raja geukeuneuk jeumeurang krueng, Simei laju jisujut dikeue gobnyan dan jipeugah, 19 "Ulôn meulakée, bah kheueh Teungku Amphon hana neu anggab ulôn teutab meusalah. Bah kheueh Teungku Amphon neupeu tuwoe peue nyang ka ulôn peubuet nibak uroe Teungku Amphon neutinggai Yerusalem. 20 Ulôn ka insaf, bahwa ulôn ka lôn peubuet desya, dan lé sabab nyan, lamkawan sukée-sukée nyang na tinggai di daerah utara ulôn kheueh nyang phon-phon that teuka jak sambot Teungku Amphon nibak uroe nyoe." 21 Ban geudeungoe nyang lagée nyan di Abisai aneuëk Zeruya jipeugah, "Simei ka patot teuhuköm maté sabab jihnyan ka jikutok raja nyang ka geupiléh lé TUHAN." 22 Teuma Nabi Daud geupeugah ubak Abisai dan Yoab aduen gobnyan, "Bék taikot jampu urusan ulôn. Keupeue awaknyoe tapeususah ulôn? Bak uroenyoe ulôn ka jeuet keuraja lom ateueh Israel, dan hana jeuet na ureuëng Israel nyang teuhuköm maté." 23 Óh lheueh nyan geumeusumpah kheueh raja ubak Simei, "Ulôn jamin bahwa gata hana teuhuköm maté." 24 Meunan cit si Mefiboset cucoe Saul, jiteuka keu jiseutôt sajan jak sambot raja. Gobnyan hana jihrah gaki geuh, hana teuma jigunteng janggot geuh, dan hana teuma jirhah peukayan jih yohphon Nabi Daud geutinggai Yerusalem sampoe gobnyan deungon seulamat teuma geugisa. 25 Bak watée Mefiboset teuka di Yerusalem keu jijak sambot raja, geupeugah kheueh laju lé raja ubak jihnyan, "Hai Mefiboset, pakon gata hana tajak deungon ulôn nibak watée nyan?" 26 Jijaweueb lé Mefiboset, "Nyang ulôn peumulia Teungku Amphon, Teungku kon neuteupeue bahwa ulôn nyoe capiek. Ulôn yue peulayan ulôn sipeusiab keuleudée nyang hase ulôn pasang di teueh rhueng jih mangat jeuet ulôn seutôt Teungku Amphon. Teuma ulôn ka jikianat lé peulayan nyan. 27 Kon nyan mantong, ulôn jifiteunah teuma teuhadab Teungku Amphon. Teuma Teungku Amphon na kheueh ban lagée malaikat Allah. Sabab nyan neupeubuet kheueh laju peue nyang Teungku Amphon anggab gét. 28 Banmandum kawöm keuluwarga bapak ulôn ka pathot neuhuköm maté lé Teungku Amphon, teuma ulôn nyoe ka Teungku bri idhin keu meusajan lôn makheun ngon Teungku Amphon nibak meuligoe. Jinoenyoe ulôn hana beurani le lôn lakée peue mantong nibak Teungku Amphon." 29 Geujaweueb lé raja, "Hana peureulée le tapeugah peue mantong. Ulôn ka lôn cok keusimpolan keu ulôn bri peue mantong hareuta Saul keu gata dan keu Ziba." 30 Laju jijaweueb lé Mefiboset, "Bah kheueh atranyan jicok lé Ziba banmandum. Ulôn ka puih sabab Teungku Amphon ka neuwo deungon seulamat." 31 Meunan cit si Barzilai ureuëng Gilead nyan teuka di Rogelim keu jijak iréng raja geujak jeumeurang Krueng Yordan. 32 Barzilai bak watée nyan ka tuha that, umu gobnyan ka na lapan ploh thon. Gobnyan ureuëng nyang kaya that yoh mantong raja tinggai di Mahanaim yoh watée ilée, Barzilai nyan kheueh nyang peuna peunajoh keu raja. 33 Raja geupeugah ubak ureuëng nyan, "Gata seutôt kheueh laju deungon ulôn u Yerusalem, teuma disideh ulôn jok peue mantong nyang gata peureulée." 34 Teuma jijaweueb lé Barzilai, "Ulôn nyoe hana panyang le umu, dan udeb ulôn nyoe hana treb le. Lé sababnyan keupeue kheueh guna jih ulôn nyoe lôn seutôt deungon Teungku Amphon u Yerusalem? 35 Umu ulôn nyoe ka lapan ploh thon, dan hana le peue nyang ulôn harab nyang hase teubri keuteupeu mangat até ulôn. Ulôn nyoe hana le nyang mangat peue nyang ulôn makheun dan peue teuma nyang ulôn jieb, dan punyueng ulôn hana hase le ulôn deungoe su nyang meureudu ureuëng meuca-e. Ulôn teuma jeuet keubeuban u ateueh Teungku Amphon. 36 Ulôn nyoe hana patot ulôn teurimong upah nyang rayeuk nyan. Teuma ulôn nyoe meuheut ulôn keuneuk iréng Teungku Amphon meupadub langkah mantong di meurandeh Krueng Yordan. 37 Óh lheueh nyan, bah kheueh ulôn nyoe lônwoe u rumoh dan meuninggai disinan, óh lheueh nyan jipeukubu bak binéh jrat bapak ulôn, teuma nyoe kheueh aneuëk ulôn nyang nan jih Kimham. Neupeu idhin kheueh jihnyan ji iréng Teungku Amphon dan neupeubuet kheueh ateueh jihnyan peue nyang Teungku Amphon ngieng nyan gét." 38 Geujaweueb lé raja, "Kimham teuma ulôn ba dan ulôn uroih lagée nyang gata lakée, dan peue mantong nyang gata lakée ubak ulôn teuma ulôn peupeunoh." 39 Óh ka lheueh geupeugah nyan, Nabi Daud dan banmandum aneuëk buah gobnyan laju geujeumeurang Krueng Yordan. Sigohlom nyan Nabi Daud geucôm leubeh ilée Barzilai sira geulakée idhin. Óh lheueh nyan geuwoe kheueh laju si Barzilai u rumoh gobnyan. 40 Banmandum pasokan Yehuda dan siteungoh nibak pasokan Israel ji-iréng raja jak jeumeurang Krueng Yordan nyan. Óh ka lheueh nyan raja laju geujak u Gilgal, dan Kimham geuba sajan deungon gobnyan. 41 Óh ka lheueh nyan teuka kheueh banmandum ureuëng Israel jak meuhadab ubak raja dan jipeugah ubak gobnyan, "Teungku Amphon, pakon kheueh syedara kamoe nyang ureuëng Yehuda nyan jipike bahwa awaknyan kheueh nyang na hak jijak tueng ngon jikawai Teungku Amphon meunan cit deungon banmandum keuluwarga Teungku Amphon dan mandum aneuëk buah Teungku Amphon nyang meusajan-sajan teujeumeurang Krueng Yordan?" 42 Laju jijaweueb lé ureuëng Yehuda nyan, "Nyan ka patot hak kamoe, sabab raja nyan na kheueh sabat kamoe. Peue pasai jeuet keubeungéh gata? Peu kheueh keubutohan kamoe geutanggong lé raja, atawa ka geubri sapeue-sapeue hadiah keu kamoe?" 43 Jijaweueb lé ureuëng Israel nyan, "Hak kamoe u ateueh raja nyan na siploh goe lipat nibak hak gata, bahpih raja nyan na kheueh rakan nyang krab deungon gata. Pakon gata ngieng enteng teuhadab kamoe? Bék tuwoe gata bahwa kamoe kheueh nyang phon-phon that usui keu teuba raja mangat teupeuwo!" Teuma di ureuëng Yehuda leubeh kreueh nibak ureuëng Israel dan hán jitem taloe.

2 Samuel 20

1 Di Banda Gilgal na sidroe ureuëng jeuhet nyang buet jih jipeurusak ngon jipeukaru keuteuntraman masyarakat, nan ureuëng nyan Seba. Seba nyan aneuëk si Bikri nibak sukée Benyamin. Bak watée iréng-iréngan Nabi Daud teuka, Seba laju jiyueb beureuguih dan jipeugah, "Geutanyoe banmandum hana hubongan sapeuepi deungon Nabi Daud. Jadi hana peureulée geutanyoe taseutôt gobnyan? Ho droeneueh mandum ureuëng Israel, jak geutanyoe tajakwoe!" 2 Ban jideungoe nyang lagée nyan di ureuëng-ureuëng Israel nyan pih laju jijakwo jiseutôt Seba hana jipako meubacut pi ubak Nabi Daud. Teuma di ureuëng Yehuda teutab seutia dan ji iréng laju Nabi Daud nibak Krueng Yordan sampoe u Yerusalem. 3 Óh ka sampoe Nabi Daud ubak meuligoe gobnyan di Yerusalem, ban siploh droe gundek gobnyan nyang geutingggai disinan keu jikeumiet meuligoe, geupeuduek didalam rumoh nyang jijaga lé peugawée. Keubutohan awaknyan ka teukeubah siseb-seb jih, teuma Nabi Daud hántom geu-éh le deungon awaknyan. Jadi awaknyan hana geutukéh le dan udeb awaknyan lagée inong balée sampoe án maté. 4 Raja laju geubri peurintah ubak Amasa, "Gata peusapat kheueh laju bubena ureuëng Yehuda dan tayuejak kheueh keunoe deungon awaknyan lam tempo lhée uroe." 5 Óh lheueh nyan jijak kheueh laju Amasa keu jijak gumpôi awaknyan lagée nyang ka geupeurintah ubak jihnyan, teuma ureuëng nyan hana jigisa le lagée nyang ka geupeuteuntée lé raja. 6 Óh lheueh nyan geupeugah kheueh teuma lé raja ubak Abisai, "Seba nyan leubeh jai kajipeususah geutanyoe nibak Absalom. Sabab nyan taba kheueh aneuëk buah ulôn dan tapeulet kheueh awaknyan, mangat bék sampoe awaknyan jiduek nibak banda-banda nyang meukuta, dan jiteumeu plueng nibak geutanyoe." 7 Dan dimiyueb pimpénan Abisai, pasokan Yoab dan pasokan peungawai pribadi raja dan banmandum tantra nyang laén jibeurangkat u Yerusalem deungon tujuan jijak tiyeub Seba. 8 Bak watée awaknyan ka sampoe nibak batée raya di Gibeon, Amasa laju teuka jijak meurumpok ngon awaknyan. Yoab nibak watée nyan geungui peukayan prang deungon peudeueng dalam sarong nyang meugantueng nibak keuieng gobnyan. Bak watée gobnyan teungoh geujak ngon geumaju, sarong peudeueng nyan teuduit dan sampoe peudeueng nyan teugéesée ubak jaroe wie gobnyan. 9 Yoab geupeugah ubak Amasa, "Peue haba, rakan?" sira geumat janggot Amasa deungon jaroe uneuen geuh sang-sang geukeuneuk cöm jihnyan. 10 Amasa hana deuh jikalon na peudeueng nibak jaroe wie Yoab. Deungon hana teusangka-sangka Yoab laju geutôb peudeueng geuh nyan ubak pruet Amasa, sampoe asoe pruet Amasa nyan ro meuhambo ateueh tanoh. Amasa nyan maté bak watée nyan cit teuma, sampoe lé Yoab hana peureulée le geutôb jihnyan. Dan óh lheueh nyan Yoab dan Abisai adoe gobnyan, jijak let laju Seba. 11 Sidroe lamkawan tantra Yoab jidong tô ngon manyét Amasa dan jimeuhôi, "Sou nyang dong blaih Yoab dan Nabi Daud, gata seutôt kheueh Yoab!" 12 Manyét si Amasa nyang mantong meulabo ngon darah nyan mantong na teutiek di ateueh jalan raya. Tantra Yoab bunoe deuh jikalon bahwa banmandum ureuëng nyang teungoh jijak jipiôh disinan. Lé sabab nyan kheueh gobnyan jitarek manyét nyan u dalam lampôh dan jithob laju ngon ija seulimbot. 13 Óh ka lheueh manyét nyan jigéesée di ateueh rot nyan, barô kheueh bubena ureuëng nyang teungoh jipiôh bunoe ka hase jijak lom teuma, dan banmandum ureuëng nyan jiseutôt Yoab keuk jijak tiyeub Seba. 14 Seba nyan ka lheueh jijak bansaboh daerah sukée Israel, laju sampoe ubak banda Abel-Bet-Maakha jiseutôt banmandum lé sukée nyang meumarga Bikri. 15 Aneuëk buah Yoab jideungoe bahwa Seba na disinan, dan awaknyan pih laju jikeupong banda nyan. Awaknyan laju jitamon tanoh nibak seukeulileng beuton lua dan jipeuphon tema kueh tanoh nyang na dimiyueb beuton nyan mangat jeuet ji reuloih ngon geupeureubah bintéh beuton nyan. 16 Di banda nyan na sidroe ureuëng inong nyang bijak sana, dan gobnyan jidong di ateueh bintéh beuton laju jimeuhôi, "Neudeungoe! Neudeungoe! Neulakée kheueh mangat Yoab jiteuka keunoe; ulôn keuneuk peugah haba ngon gobnyan." 17 Geuteuka laju Yoab dan di ureuëng inong nyan jitanyong, "Droeneueh kheueh nyan Yoab?" "Nyoe, beutôi, ulôn Yoab," geujaweueb lé Yoab nyan. Jipeugah lé ureuëng inong nyan, "Neudeungoe kheueh peue nyang ulôn peugah nyoe, hai Teungku." "Get kheueh, ulôn deungoe," geujaweueb lé Yoab. 18 Jipeugah lé ureuëng inong nyan, "Yoh watée ilée ureuëng ramé jipeugah lagée nyoe, 'Meunyoe droeneueh na peureulée peutunyoek, neujak kheueh laju ubak banda Abel' -- dan nyan kheueh nyang jipeubuet lé awaknyan. 19 Banda kamoe nyang nan jih Abel nyoe banda nyang raya, dan saboh banda nyang paleng aman ngon seutia di nanggroe Israel. Pakon di Teungku neu-useuha neu keuneuk peuhanco? Peu kheueh Teungku kana niet neukeuneuk peurusak tanoh nyang atra TUHAN?" 20 "Mubacut pih hana niet nibak ulôn nyang lagée nyan!" geujaweueb lé Yoab, "ulôn mubacutpi tan na niet lôn peurusak atawa lôn peuhanco banda droeneueh! 21 Nyan bukon reuncana kamoe. Teuma sidroe ureuëng nyang nan jih Seba aneuëk si Bikri, ureuëng nyan meuasai nibak daerah meugunong-gunong Efraim, jih nyan ka jibeurontak ubak Nabi Raja Daud. Gata jok kheueh jih nyan, óh lheueh nyan ulôn teuma lônjak nibak banda nyoe." Jipeugah lom lé ureuëng inong nyan, "Ulée ureuëng nyan teuma kamoe rhom ubak Teungku rot bintéh beuton nyoe." 22 Jijak kheueh laju gobnyan dan deungon lisek jih jipeugah laju meukeusut jih nyan ubak peunduduek banda nyan. Óh lheueh nyan ulée Seba laju jiteubang dan jigeulawa laju ubak Yoab. Óh lheueh nyan Yoab geuyueb laju beureuguih dan bubena aneuëk buah gobnyan jitinggai laju banda nyan laju jijakwoe u rumoh droejih maséng-maséng. Dan meunan cit deungon Yoab laju geujakwoe u Yerusalem geujak meuhadab ubak raja. 23 Nyoe kheueh peujabat-peujabat nanggroe nyang meupangkat manyang nyang geu baiát lé Nabi Daud: Panglima keu banmandum tantra Israel: geuangkat Yoab. Ulée pasokan peungawai pribadi Nabi Daud: geuangkat Benaya aneuëk Yoyada. 24 Keu ulée ureuëng keureuja paksa: geuangkat si Adoram. Keu beundahara nanggroe: geuangkat si Yosafat aneuëk si Ahilud. 25 Keu sekretaris nanggroe: geuangkat Seya. Keu teungku imeum: geuangkat Zadok dan Abiyatar. 26 Teungku imeum dalam meuligoe: geuangkat Ira nibak banda Yair.

2 Samuel 21

1 Bak masa Nabi Daud geumat peurintah, teuka kheueh bala musém deuk nyang lumpah hibat dan treb jih lhée thon peunoh. Laju Nabi Daud geulakée peutunyok ubak TUHAN keuhai deuk nyan, dan TUHAN meufeureuman, "Teuka bala musém deuk nyan na kheueh sabab salah si Saul dan keuluwarga jih, jihnyan ka jipoh maté banmandum ureuëng-ureuëng Gibeon." 2 (Ureuëng-ureuëng Gibeon nyan bukon ureuëng Israel; awaknyan jitamong u dalam keulompok ubit nibak ureuëng Amori. Dan di ureuëng Israel ka jimeujanji bahwa awaknyan teuma jilindong, teuma Saul ka jiuseuha keu jipeuhabéh awaknyan sabab jihnyan nyang jipike na kheueh keu keupeuntengan ureuëng Israel dan Yehuda.) Dan Nabi Daud laju geutawök ureuëng-ureuëng Gibeon nyan, 3 dan geutanyong ubak awaknyan, "Peu kheueh nyang jeuet ulôn peubuet keu gata? Ulôn keuneuk teuboih buet nyang salah nyang ka geupeubuet lé Saul u ateueh gata, mangat gata tabri beureukat keu umat TUHAN." 4 Jaweueb awaknyan, "Peukara kamoe deungon Saul meunan cit deungon keuluwarga gobnyan hana hase teupeuseuleusoe ngon pirak atawa ngon méuh, teuma dikamoe pih hana meuheuet keuneuk poh maté bahpi meusidroe kong lamkawan bansa Israel." Laju geupeugah lom lé Nabi Daud, "Meunyoe meunan, peue nyang gata lakée jeuet ulôn peubuet?" 5 Jaweueb awaknyan, "Saul raja nyang ka geupiléh lé TUHAN nyan geukeuneuk peubinasa kamoe banmandum sampoe kamoenyoe ranab nibak bansaboh tanoh Israel. 6 Lé sabab nyan, neuseurah kheueh ubak kamoe tujoh droe keuturonan nyang agam, mangat awaknyan kamoe gantung dikeue TUHAN di Gibea, banda Raja Saul keudroe." Geujaweueb lé raja, "Get kheueh, awaknyan teuma ulôn jok ubak gata." 7 Teuma sabab Nabi Daud dan Yonatan ka lheueh geumeusumpah sabe keudroe-droe geuh, Nabi Daud hana geuseurah Mefiboset aneuëk Yonatan. 8 Nyang geucok lé Nabi Daud na kheueh Armoni dan Mefiboset, nyang na kheueh ban dua droe aneuëk agam Saul nyang jipeulahé lé ma jih ureuëng inong Rizpa aneuëk Aya; meunan cit ban limong aneuëk agam si Merab aneuëk inong Saul, aneuëk-aneuëk nyan lahé nibak hase jimeukawen Merab deungon Adriel aneuëk si Barzilai, ureuëng Mehola nyan. 9 Awaknyan geujok laju ubak ureuëng-ureuëng Gibeon, dan ban tujoh droe ureuëng nyan meuninggai maté teugantueng di ateueh bukét dikeue TUHAN. Huköman maté nyan teulaksana nibak musém semi, bak watée bak jelai ka jipeuphon koh. 10 Dan si Rizpa gundek Saul, jileueng laju ija krong keudroe jih di ateueh batée diteumpat manyét-manyét nyan teu-éh teulinteung. Rizpa hana jijak nibak teumpat nyan phon awai musém keumeukoh sampoe nibak jitreun ujeuen bak musém luroih ôn kayée. Gobnyan hana jipeubiyeu manyét-manyét nyan jicutok lé cicém-cicém óh watée uroe dan lé beulatang juah bak watée malam teuka. 11 Bak watée teujak peugah ubak Nabi Daud peue nyang ka geupeubuet lé Rizpa, 12 gobnyan laju geujakcok tuleueng-tuleueng Saul dan Yonatan nibak peunduduek banda Yabes di Gilead. (Awaknyan ka jajak cua tuleueng-tuleueng nyan nibak tanoh luwah di banda Bet-San, di teumpat ureuëng Filistin jigantung manyét-manyét nyan óh ka lheueh jipeutaloe Saul di bukét Gilboa.) 13 Banmandum tuleueng Saul dan tuleueng Yonatan nyan geuba nibak teumpat nyan, meunan cit geupeusapat teuma dumna tuleueng ban tujoh droe ureuëng nyang ka teugantueng nyan. 14 Óh lheueh nyan tuleueng-tuleueng Saul dan Yonatan dan tuleueng ban tujoh droe ureuëng nyan geutanom laju u dalam jrat Kish bapak Saul di Zela dalam wilayah Benyamin. Óh ka seuleusoe banmandum nyan geupeubuet nyang sisuai deungon peurintah raja, barô kheueh Po teu Allah geupeukabui doá awaknyan keu nanggroe nyan. 15 Lamkawan ureuëng Filistin dan ureuëng Israel beureutoih lom prang. Nabi Daud dan aneuëk buah gobnyan geujak laju u mideuen prang keu teujak meuheungko deungon ureuëng Filistin. Dalam prang nyan Nabi Daud jiteuka hék nyang biet-biet mupalo. 16 Dan teuka kheueh ubak gobnyan sidroe ureuëng rayeuk lagée gogasi nyang nanjih Yisbi-Benob. Kapak jih teupeugét nibak peurunggu nyang brat jih na kira-kira lhée siteungoh kilo gram. Meunan cit lé ureuëng nyan jigulam peudeueng nyang barô, dan ureuëngnyan yakén that deungon alat jih nyan nibak goenyan ka hase jipeutaloe Nabi Daud. 17 Teuma Abisai bin Zeruya bagaih that teuka jijak tulông Nabi Daud. Laju jiheuntam gogasi nyan dan lam watée sikeujab nyan cit teuma manusia gogasinyan maté. Óh lheueh nyan aneuëk buah Nabi Daud jimeulakée mangat Nabi Daud geumeujanji hana geuseutôt le óh watée na prang dipat mantong. "Teungku Amphon na kheueh harapan Israel, bék sampoe kamoe geumadôh Teungku Amphon," jipeugah lé awaknyan. 18 Teuma jiteuka lom prang ngon ureuëng Filistin di Gob. Lam prang nyan Sibkhai ureuëng Husa jipoh maté teuma sidroe ureuëng gogasi nyang nanjih Saf. 19 Nibak prang nyang laén deungon ureuëng Filistin di Gob, Elhanan aneuëk si Yair di Betlehem ka jipoh maté Goliat nibak Gat. Go kapak si Goliat nyan na bube kayée alat teumpeun ija. 20 Na lom muprang teulawan ureuëng Filistin di Gat. Disinan na sidroe ureuëng gogasi nyang lumpah galak jijak muprang. Manusia Gogasi nyan aneuk jaroe jih nam neuk tieb-tieb jaroe siblah jaroe dan meunan cit deungon aneuk gaki jih nam neuk cit tieb-tieb siblah gaki. 21 Ureuëng nyan jihina ngon jipeukém ureuëng Israel, dan sabab lé nyan kheueh jihnyan jipoh maté lé Yonatan aneuëk Simea, aduen Nabi Daud. 22 Ban peuet droe nyang geupoh maté lé Nabi Daud dan pasokan gobnyan, na kheueh keuturonan gogasi di Gat.

2 Samuel 22

1 Óh ka lheueh TUHAN geupeuseulamat Nabi Daud nibak Saul dan nibak meubagoe musoh gobnyan nyang laén, Nabi Daud laju geuca-e ngon lagu nyang ceudah ubak TUHAN: 2 Ulôn cinta ubak Droeneueh ya, TUHAN, Droeneueh kheueh teunaga ulôn. 3 TUHAN ban lagée kuta nyang kong teumpat ulôn meulindong. Allah ulôn ban lagée gunong batée, teumpat ulôn meureului. Lagée peurisai Gobnyan geutôb ulôn, dan geujaga ulôn jeuet aman sabe. 4 Ulôn meulakée ubak TUHAN nyang patot teupujoe, Gobnyan ka geupeu beubaih ulôn nibak musoh-musoh ulôn. 5 Ulôn jikeulileng lé bahya mawôt dan teugeunang lé ié raya keubinasaan. 6 Ulôn jikeulileng lé bahya mawôt, jeunieb mawôt meulinteung dikeue ulôn. 7 Lam keuadaan ulôn teukeupong lôn meulakée ubak TUHAN, ulôn kliek ubak Allah ulôn lôn lakée tulông. Di Baét Gobnyan TUHAN geudeungoe su ulôn dan geupeutrok nyang ulôn lakée. 8 Laju bumoe meuhayak dan meuhayon, gaki-gaki gunong pih goyah dan meuhayak sabab Allah ka mureuka! 9 Asab jiteubiet meukeubok lam ruhueng idong Gobnyan, bara apui nyang hu jiteubiet nibak babah Gobnyan. 10 Langét dimanyang geuplah dua, laju geutreun kheueh Gobnyan, deungon awan nyang seupôt na dimiyueb gaki Gobnyan. 11 Gobnyan geupo sira geugiduek ateueh kerub; Gobnyan meulayang di ateueh sayeub angén. 12 Geutôb droe Geuh deungon seupôt; awan ngon reudok nyang teubai jikeulileng Gobnyan. 13 Kilat nyang muble dikeue Gobnyan, jiteubiet awan, ujeuen éh meunan cit ngon apui. 14 Teuka TUHAN ngon su lagée lagée su geulanteue di langét, Allah Nyang Mahamanyang geupeudeungoe su Gobnyan. 15 Gobnyan laju geupeutek bubena aneuk panah Geuh, dan sampoe teupeu crebre bubena musoh. Gobnyan geuseumama ban lagée kilat meu-ulang-ulang dan sampoe awaknyan jiplueng teung bayeueng ka hana meuteuntée le. 16 Tuwie ié laôt nyang lhok sampoe teubeudôh dan meunan cit ngon lapek bumoe sampoe teuhah bak watée TUHAN geu dumpék musoh Gobnyan deungon that mureuka. 17 Nibak di manyang TUHAN geusunyueng jaroe Gobnyan; geumat bak ulôn dan laju geutarek dalam ié nyang lhok. 18 Gobnyan ka geupeuseulamat ulôn nibak musoh nyang kha dan nibak ureuëng nyang jibanci ulôn sabab awaknyan lumpah that teuga meunyoe ngon ulôn. 19 Awaknyan jiprang ulôn bak watée ulôn jitimpa lé beuncana teuma TUHAN kheueh nyang jeuet keu peunulông ulôn. 20 TUHAN kheueh nyang peulheueh ulôn nibak banmandum bala dan nyang peuseulamat ulôn sabab Gobnyan meukeunong keu ulôn. 21 TUHAN geubalaih peue nyang ulôn peubuet nyang beuna; Gobnyan geubri beureukat keu ulôn sabab ulôn hana meusalah. 22 Ulôn keubiet that taát ubak peurintah TUHAN, dan hana lôn meupaleng nibak Po teu Allah ulôn. 23 Banmandum huköm Gobnyan ulôn peubuet, bubena peurintah Gobnyan hana lôn peulalée. 24 Gobnyan geuteupeue bahwa ulôn hana meucupa dan lôn peujiôh droe nibak buet nyang salah. 25 Teuma TUHAN geubalaih buet ulôn nyang beutôi sabab Gobnyan geuteupeue bahwa ulôn hana meusalah. 26 TUHAN, Droeneueh that seutia keu ureuëng nyang seutia dan jroh ubak nyang jroh. 27 Ubak ureuëng suci neupeugah Droeneueh suci, dan keu ureuëng nyang jeuhet jeuet keumusoh TUHAN. 28 Ureuëng nyang miyueb até TUHAN peuseulamat; teuma ureuëng nyang congkak TUHAN peutundok. 29 TUHAN kheueh nyang puhu panyöt ulôn; dan TUHAN Allah ulôn kheueh nyang peupeungéuh ulôn didalam seupôt. 30 TUHAN kheueh nyang peuteuga ulôn mangat beuhase lôn peuhanco bubena musoh; deungon geubantu lé Po teu Allah hase ulôn peuhanco kuta peutahanan awaknyan. 31 Peue nyang geupeubuet lé Po teu Allah na kheueh sampoereuna, dan janji nyang ka geupeugah lé TUHAN na kheueh jeuet teupeucaya! Gobnyan saban lagée peurisai lé banmandum nyang jijak meulindong ubak Gobnyan. 32 Sabab TUHAN mantong kheueh nyang Po teu Allah; Allah kheueh nyang jeuet keu nyang bila geutanyoe. 33 Gobnyan na kheueh Po teu Allah nyang peuteuga ulôn dan Gobnyan geupeubuet rotjak ulôn nyoe aman. 34 Gobnyan nyang peukong gaki ulôn ban lagée gaki rusa, dan Gobnyan kheueh teuma nyang jaga keuseulamat ulôn di ateueh gunong-gunong. 35 TUHAN geulatih ulôn pakriban cara teujak muprang, akhéjih ka hase ulôn reuntang aneuk panah nyang paleng teuga. 36 TUHAN, Droeneueh kheueh nyang peulindong dan nyang peuseulamat ulôn, dan neutumpang ulôn deungon kuasa Droeneueh ulôn jeuet keumeugah sabab lé neutulông lé Droeneueh. 37 Droeneueh teuma nyang jaga ulôn mangat ulôn bék keunong teuen dan ulôn hántom na reubah. 38 Ulôn tiyeub musoh ulôn dan ulôn peutaloe awaknyan, dan pantang ulôn surot sigohlom awaknyan binasa. 39 Ulôn seumpom awaknyan sampoe hán hase jibeudôh le, awaknyan reubah hana meudaya dimiyueb gaki ulôn. 40 Droeneueh nyang bri teunaga keu ulôn mangat jeuet lônjak muprang, dan keuhai meunang ateueh musoh-musoh ulôn. 41 Droeneueh nyang peucrok sampoe musoh ulôn jiplueng nibak ulôn; dan ureuëng nyang jibanci keu ulôn ka habéh ulôn peubinasa. 42 Awaknyan jilakée tulông, teuma hana nyang tem bantu, awaknyan jimeuhôi TUHAN, teuma hana geujaweueb. 43 Awaknyan ulôn peuhanco ngon ulôn peureumok ban lagée abée nyang ro meutabu, dan ulôn sampôh ban lagée luhob nibak rot raya. 44 Droeneueh nyang peubeubaih ulôn nibak kawöm nyang doraka, dan neupeujeuet ulôn keupeunguasa ateueh bansa-bansa; bansa nyang hana ulôn turi ka jeuet keunamiet ulôn. 45 Meunan cit deungon ureuëng aséng jitundok ubak ulôn, dan jitaát meunyoe jideungoe peurintah ulôn. 46 Beuhé ngon ceubeueh awaknyan ka gadôh; awaknyan yo meugám-gám laju jiteubiet nibak kuta jih. 47 TUHAN udeb! Teupujoe kheueh nyang bila ulôn! Teupeu agong kheueh keubeusaran Allah, nyang peuseulamat ulôn! 48 Gobnyan nyang peumeunang Ulôn ateueh musoh ulôn, meunan cit deungon bansa-bansa geupeutaklok dikeue ulôn, 49 meunan cit geupeuseulamat ulôn ateueh lawan-lawan ulôn. TUHAN, Droeneueh nyang bri meunang ateueh musoh ulôn, Droeneueh nyang lindong ulôn nibak ureuëng nyang keujam. 50 Teuma ulôn peuagong Droeneueh lamkawan bubena bansa, dan ulôn meuca-e lagu seumujoe ubak Droeneueh. 51 Allah ka geubri meunang nyang lumpah raya keu raja nyang geubaiát lé Gobnyan, Gobnyan teutab geugaséh ubak ureuëng nyang ka geupiléh, nyang kheueh Nabi Daud dan keuturonan gobnyan keu siumu masa.

2 Samuel 23

1 Nabi Daud aneuëk Isai teupiléh jeuet keuraja dan geupeujeuet jeuet keu ureuëng rayeuk lé Po teu Allah Nabi Yakub. Gobnyan teuma nyang karang bubena ca-e-ca-e keu bansa Israel. Nyoe kheueh nariet Nabi Daud nyang keuneuleueh: 2 Roh TUHAN ka geupeugah meulalu ulôn; peusan dan amanat Gobnyan na nibak bibi ulôn. 3 Po teu Allah Nabi Yakub ka geupeugah haba; ubak ulôn peulindong Israel geupeugah meunoe: "Raja geupeurintah rakyat deungon keuadelan nyang geupimpén deungon keutaátan ubak TUHAN, 4 Gobnyan ban lagée cahya mata uroe nyang mantong meureukah bak watée teungoh malam deungon langét mantong gleh meucahya. Gobnyan ban lagée cahya mata uroe beungoh nyang ban habéh jisiram lé ujeuen treun sampoe naleueng jitimoh ijo lagak muble-ble." 5 Meunan cit deungon keuturonan ulôn nyang geubri beureukat lé Po teu Allah, janji Gobnyan ubak ulôn hana meu-ubah, janji Geuh nyan na kheueh keukai dan sampoereuna, teu-ato didalam mubagoe hai. Po teu Allah geujamin meunang u ateueh ulôn, dan geujamin peue mantong nyang ulôn meuheuet. 6 Teuma keu ureuëng nyang hana jitaát ubak TUHAN na kheueh saban lagée duro nyang teutiek. Jaroe gob hana hase jimumat; 7 hana meusidroepi nyang jitem cukéh meunyoe tan na alat nyang teupeugét nibak kayée atawa beuso. Bubena ureuëng nyan ka hanco jiliet lé apui. 8 Nyoe kheueh nan-nan bubena peuwira Nabi Daud nyang paleng meusyeuhu: Nyang phon that na kheueh Ishbaal, ureuëng Hakhmoni, peumimpén "Keulompok Lhée" (Triwira). Ka lheueh teujadi nibak saboh prang gobnyan geumuprang ngon lawan na lapan reutoih droe teuma digobnyan geumuprang nyan na kheueh ngon kapak gobnyan. 9 Ureuëng nyang keudua didalam Triwira nyan na kheueh Eleazar aneuëk Dodo nibak kawöm Ahohi. Gobnyan geuiréng Nabi Daud bak watée awaknyan geumuprang ngon ureuëng Filistin nyang meusapat keuneuk jijakmuprang. Laju bak watéenyan cit teuma pasokan Israel jisurot, 10 Eleazar hana jipiôh jimeujuang jiheungko ureuëng Filistin sampoe án awaknyan kaseb hék. Jaroe gobnyan ka jeuet keukeuboh bak jimat peudeueng sampoe peudeueng nyang na nibak jaroe gobnyan hana hase jipeuleueh. Bak uroenyan TUHAN geupeumeunang nyang lumpah rayeuk keu bansa Israel. Pasokan Israel nyang teungoh jisurot bunoe jiriwang lom ubak teumpat Eleazar nyang teungoh muprang, laju awaknyan jisuit bajée-bajée nyang na nibak manyét-manyét nyang ka maté disinan. 11 Ureuëng keu lhée didalam Triwira nyan na kheueh Sama aneuëk Age di Harari. Ka lheueh teujadi bak watée ureuëng Filistin teungoh meusapat di Lehi, nibak saboh lampôh nyang peunoh teupula ngon boh reuteuk mirah, pasokan Israel jiplueng nibak ureuëng Filistin. 12 Teuma si Sama teutab jimeuheungko, jipoh maté dan geupeutaloe ureuëng Filistin, sampoe gobnyan meuhase jipeuteuen lampôh jih nyan. Meunan kheueh cara jih TUHAN ka geubri meunang nyang lumpah rayeuk. 13 Bak uroe nyang laén karab tô ngon musém keumeukoh, na lhée droe ureuëng nibak 30 droe peuwira Nabi Daud nyang paleng meusyeuhu geutreun ubak Guha Adulam. Bak watéenyan Nabi Daud na didalam kuta di dalam guha nyan. Seudangkan ureuëng Filistin na teuma jipeudong khimah di Pantôn Refaim, dan na saboh pasokan nibak awaknyan ka jiduek di Betlehem. 15 Nabi Daud hana geusangka-sangka ka teuka rindu ngon meucén u gampông halaman geuh nyan dan geupeugah laju, "Ah, meunyoe na nibak ulôn jibri ié jieb nibak mon nyang tou ngon pintoe geureubang di Betlehem!" 16 Ban jideungoe nyang lagée nyan teuka kheueh lhée droe peuwira gobnyan laju jiteurobos khimah-khimah ureuëng Filistin nyan, laju jijak crong ié lam mon nyan, óh lheueh nyan ié nyang ka lheueh teu crong nyan jiba laju ubak Nabi Daud. Teuma Nabi Daud hana geutem jieb ié nyan, teuma laju geuro ié nyan sibagoe peuseumahan ubak TUHAN. 17 Gobnyan geupeugah, "Ya TUHAN, ulôn hán hase ulôn jieb ié nyoe! Meunyoe ulôn jieb, siulah-ulah ka ulôn jieb darah ureuëng nyang ka jipeusabong nyawöng jih!" Jadi Nabi Daud mubacut pi hana geutem jieb ié mon nyan. Nyan kheueh jasa-jasa peujuang nyang lhée droe lom peukasa nyan. 18 Ban lhée ploh droe peuwira nyan geuboh teuma nan jih deungon "Tridasawira". Awaknyan geupimpén lé Abisai adoe Yoab, aneuëk Zeruya. Ka lheueh lé gobnyan geupoh maté lhée reutoih droe deungon kapak gobnyan. Sabab nyan kheueh gobnyan meutamah meugah ngon meusyeuhu. Teuma gobnyan hana lagée hibat "Triwira". 20 Na sidroe teuk peuwira nyang paleng meusyeuhu nan jih Benaya aneuëk Yoyada ureuëng Kabzeel. Ureuëng nyan gét that beurani lom ngon ceubeueh. Na dua droe pahlawan rayeuk nibak Moab ka geupoh maté. Ka lheueh na teujadi nibak siuroe nyang meusalju, gobnyan geutamong u dalam saboh guha, óh trok keunan laju geupoh maté saboh singa nyang na disinan. 21 Meunan cit gobnyan ka lheueh teuma geupoh maté sidroe ureuëng Meusé, nyang keubiet beuhé ngon meusinjata kapak. Teuma Benaya geuhadab ureuëng nyan teuma deungon tungkat. Seudangkan kapak nyang na nibak jaroe ureuëng Meusé nyan geuteumé reubot dan ngon kapak nyan cit teuma geupoh maté ureuëng Meusé nyan. 22 Nyan kheueh jasa-jasa Benaya, sidroe nibak "Tridasawira". 23 Lamkawan nyan Benaya kheueh nyang paleng meusyeuhu, teuma gobnyan hana saban hebat jih lagée "Triwira". Nabi Daud geuangkat gobnyan jeuet keu ulée peungawai pribadi gobnyan. 24 Anggota-anggota nyang laén nibak "Tridasawira" na kheueh: Asael adoe Yoab Elhanan aneuëk Dodo ureuëng Betlehem Sama dan Elika ureuëng Harod Hele ureuëng Palti Ira aneuëk Ikes ureuëng Tekoa Abiezer ureuëng Anatot Membunai ureuëng Husa Zalmon ureuëng Ahohi Maharai ureuëng Netofa Heleb aneuëk Baana ureuëng Netofa Itai aneuëk Ribai ureuëng Gibea diwilayah sukée Benyamin Benaya ureuëng Piraton Hidai ureuëng di pantôn-pantôn Gaas Abialbon ureuëng Araba Azmawet ureuëng Bahurim Elyahba ureuëng Saalbon Aneuëk-aneuëk Yasyen Yonatan Sama ureuëng Harari Ahiam aneuëk Sarar ureuëng Harari Elifelet aneuëk Ahasbai ureuëng Maakha Eliam aneuëk Ahitofel ureuëng Gilo Hezrai ureuëng Karmel Paerai ureuëng Arbi Yigal aneuëk Natan ureuëng Zoba Bani ureuëng Gad Zelek ureuëng Amon Naharai ureuëng Beerot, nyang gulam sinjata Yoab Ira dan Gareb ureuëng Yetri Uria ureuëng Het. Bandum nyan na lhée ploh tujoh droe tantra nyang paleng meusyeuhu.

2 Samuel 24

1 TUHAN geubeungéh lom ubak bansa Israel, laju Nabi Daud geubujuk deungon meukeusut geupeuteuka keusosahan u ateueh bansa nyan. Feureuman TUHAN ubak gobnyan, "Tapeubuet kheueh laju peurintah Ulôn nyoe mangat tapeuna seunsus di nanggroe Israel dan Yehuda." 2 Geupeugah kheueh laju lé Nabi Daud ubak Yoab panglima tantra gobnyan, "Tajak kheueh laju meusajan deungon peuwira-peuwira gata ubak banmandum sukée Israel di bansaboh nanggroe keu tajak catat seunsus. Ulôn keuneuk teupeue padubna jeumeulah awaknyan." 3 Teuma Yoab geupeugah laju ubak raja, "Seumoga TUHAN Po teu Allah Teungku Amphon geupeulipat ganda rakyat Israel trok ubak sireutoih lipat nibak nyang na jinoenyoe, dan meunan cit seumoga Teungku Amphon mantong udeb mangat jeuet neukalon hase jihnyan. Teuma keupeue Teungku Amphon neukeuneuk teupeu seunsus nyan?" 4 Teuma lé raja teutab geumumat ubak peurintah nyan. Jadi Yoab meunan cit deungon peuwira nyang laén laju jijak itong jeumeulah bansa Israel. 5 Óh ka leupah jijeumeurang Krueng Yordan, Yoab dan aneuëk buah gobnyan geupeudong laju khimah disiblaih seulatan Aroër, Aroër nyan na kheueh saboh banda di teungoh-teungoh pantôn wilayah Gad. Jibeudôh disinan awaknyan jijak laju u arah utara, Yeazer nan jih, 6 beudôh sinan laju jijak dan sampoe u Gilead dan u Kades didalam wilayah ureuëng Het. Óh ka lheueh nyan jijak laju nibak Dan wet u, arah barat, u Sidon. 7 Geubeudôh sinan awaknyan jijak laju u arah seulatan u Tirus banda nyang na kuta nyan. Lheuehnyan awaknyan jijak laju ubak mandum banda ureuëng Hewi dan ureuëng Kanaan, dan akhéji u Bersyeba, dibagian seulatan Yehuda. 8 Awaknyan jiblôh laju bansaboh nanggroe lam tempo sikureueng buleuen dua ploh uroe. Óh lheuehnyan jiwoe kheueh laju awaknyan u Yerusalem 9 dan jijak lapor ubak raja Nabi Daud hase nibak seunsusnyan. Jeumeulah ureuëng agam nyang ka peunoh syarat keu jeuet teutamong tantra na 800.000 droe di Israel dan 500.000 droe na di Yehuda. 10 Teuma óh ka lheueh Nabi Daud geu itong bansanyan, Gobnyan ka meurasa meusalah, laju geupeugah ubak TUHAN, "Ya TUHAN, ulôn that-that meudesya! Neupeu amphon kheueh ulôn nyoe, sabab peue nyang ka ulôn peubuet nyan na kheueh keureuja nyang lupah bangai." 11 Laju TUHAN meufeureuman ubak Nabi Gad nyang jeuet keupeurantara lamkawan Nabi Daud ngon TUHAN, "Tajak peugah kheueh laju ubak Nabi Daud bahwa ulôn jok keu jihnyan na lhée boh peuniléh. Peue mantong nyang jipiléh lamkawan lhée nyan teuma ulôn peubuet." Banbeungoh singoh, bak watée Nabi Daud banmantong jibeudôh éh, 13 laju Gad teuka jijak meuhadab dan geupeugah laju ubak gobnyan peurintah TUHAN nyan, geupeugah, "Nyang toh nyang Teungku Amphon piléh: Nanggroe nyoe jiteuka lé bala musém deuk nyang treb jih na lhée thon, atawa Teungku Amphon neuplueng jilét-lét lé musoh nyang treb jih na teuma lhée buleuen, atawa nanggroe nyoe jiprang lé bala peunyakét nyang treb jih lhée uroe? Neupeuputôh kheueh laju jinoenyoe peue nyang harôh ulôn peugah ubak TUHAN." 14 Geujaweueb lé Nabi Daud, "Aduh! Mupalo ulôn! Teuma nibak ulôn jihuköm lé manusia, leubeh gét geutanyoe banmandum geuhuköm lé TUHAN, sabab Gobnyan rayeuk that gaséh sayang Geuh." 15 Teuma TUHAN laju geupeutreun bala peunyakét u ateueh bansa Israel phon nibak beungoh nyan sampoe ubak watée nyang ka geuteutab nyan. Bansaboh Israel na 70.000 droe meuninggai donya. 16 Malaikat TUHAN geupeutreun bala mawôt nyan sampoe ubak ureuëng nyang teungoh jiceumeulo boh gandom atra su Arauna, ureuëng Yebus. Bak watée TUHAN geukalon bahwa malaikat Geuhnyan ka siab teuma keu jipeuhanco Yerusalem, laju TUHAN geu-ubah keuputosan Gobnyan, dan Gobnyan laju geupiôh geuhuköm bansa nyan. Geupeugah ubak malaikat nyan, "Kaseb nyan! Neupiôh!" 17 Nadi Daud deuh geukalon malaikat teungoh geutarek nyawöng bansa gobnyan, laju gobnyan geupeugah ubak TUHAN, "Ulôn kheueh nyang meudesya, sabab ulôn nyang peubuet salah nyan. Teuma peu kheueh salah jih ateueh bansa nyang malang nyan? Neu huköm kheueh ulôn dan keuluwarga ulôn!" 18 Bak uroenyan cit teuma Gad teuka geujak meuhadab ubak Nabi Daud dan geupeugah laju ubak gobnyan, "Beubagaih kheueh laju Teungku Amphon neujak ék u ateueh teumpat ureuëng teungoh ceumeulo gandom atra Arauna nyan, dan neupeudong laju miseubah keu TUHAN." 19 Dan geujak kheueh laju Nabi Daud pakriban nyang ka geu peurintah lé TUHAN nyang ka geupeusampoe ubak gobnyan meulalu Nabi Gad nyan. 20 Âih teuma Arauna bak watée nyan teungoh jiceungeuek u miyueb, dan deuh laju jikalon raja ji-iréng lé bubena peuikot gobnyan teungoh geujak geutuju ubak Arauna. Arauna laju geusujut dikeue Nabi Daud, 21 dan jitanyong, "Peue meukeusut Teungku Amphon neuteuka keunoe?" Geujaweueb Nabi Daud, "Ulôn keuneuk bloe teumpat loe gandom nyoe, mangat di ateueh nyoe ulôn peudong miseubah ubak TUHAN sampoe bubena peunyakét nyang teungoh jiteuka lam nanggroe geutanyoe nyoe hase teusampôh." 22 Geupeugah lé Arauna, "Neucok kheueh laju Teungku Amphon, dan neupeuseumah laju ubak TUHAN peue nyang Teungku Amphon rasa gét. Nyoe leumô-leumô keu keureubeuen nyang teutot dan keu kayée sinungo apui jih Teungku Amphon jeuet neucok tangke langai dan papeun-papeun ceumeulo nyan." 23 Banmandum nyan geubri lé Arauna ubak raja, sira geupeugah, "Bah kheueh TUHAN Po teu Allah Teungku Amphon geuteurimong peuseumahan Teungku Amphon nyan." 24 Teuma Raja Nabi Daud geujaweueb, "Bék! Atra droeneueh nyan ulôn bloe mantong. Ulôn hán lôntem keureubeuen keu TUHAN Allah deungon sapeue-sapeue nyang ulôn teumé deungon meunang mantong." Laju Nabi Daud geubloe teumpat ceumeulo gandom si Arauna nyan meunan cit deungon leumô-leumô geuhnyan deungon yuem limong ploh péng pirak. 25 Laju Nabi Daud geupeudong miseubah disinan keu TUHAN dan geupeuseumah laju keureubeuen nyang teutot dan keureubeuen peudamé. TUHAN geupeukabui laju doá Nabi Daud, dan deungon nyan teuhinda kheueh bala peunyakét nyang ka jiheuntam nanggroe Israel nyan.

1 Raja-Raja 1

1 Jinoenyoe Raja Nabi Daud ka tuha that-that. Bah kheueh gobnyan teupeuseulimbot deungon ija nyang tubai, teuma gobnyan teutab sijuek. 2 Lé sabab nyan lé bubena peungawai gobnyan jipeugah, "Nyang Mulia Teungku Amphon, nyang gét jih bah kheueh kamoe jakmita sidroe aneuëk dara nyang jeuet jitinggai deungon Teungku Amphon dan jipeutimang Teungku Amphon. Jihnyan teuma jiéh deungon Teungku Amphon mangat Teungku Amphon meuteumé seuúem." 3 Dan jijak mita kheueh ban saboh nanggroe Israel sidroe aneuëk dara nyang ceudah rupa. Teuma di Sunem meuteumé sidroe aneuëk dara nyang lumpah ceudah nyang nan jih Abisag. Aneuëk dara nyan laju jiba ubak Nabi Daud, dan aneuëk dara nyan pi tinggai laju disinan sira jikeumiet nabi ngon jiuseuha gobnyan. Teuma Nabi Daud nyan hana geumeusituboh deungon aneuëk daranyan. 5 Sabab Absalom ka meuninggai donya, teuma Adonia, aneuëk agam Nabi Daud nyang lomboi dua jeuet keu nyang tuha. Mak jihnyan nan jih Hagit. Adonia na kheueh ureuëng nyang paleng lagak lom ngon tari. Bapak jih hántom na peureunah jibeungéh keu jihnyan meunyoe jihnyan jipeubuet buet nyang salah. Adonia meuheuet that keuneuk jeuet keu raja, lé sababnyan laju jipeuna keu droe jihnyan sijeumeulah geuritan prang dan tantra meuguda meunan cit deungon limong ploh droe peungawai pribadi. 7 Laju gobnyan jijak meurok pakat deungon Yoab dan Abyatar. Mak Yoab nan jih Zeruya. Yoab dan Teungku Imeum Abyatar ka situju keu geudukong useuha Adonia nyan. 8 Teuma Teungku Imeum Zadok, Benaya aneuëk Yoyada, Nabi Natan, Simei, Rei dan peungawai pribadi Raja Nabi Daud hana geudong blaih Adonia. 9 Bak siuroe diteumpat nyang nan jih Batée Uleue tô that ngon mata ié En-Rogel, Adonia laju geupeuseumah keureubeuen bubiri, leumô agam dan aneuëk leumô nyang teumbon-teumbon. Gobnyan laju geu undang bubena aneuëk agam Nabi Daud nyang laén, dan peungawée-peugawée meuligoe nibak sukée Yehuda ubak khanuri keureubeuen nyan. 10 Teuma Nabi Sulaiman adoe gobnyan, dan Nabi Natan meunan cit deungon Benaya dan peungawai pribadi Raja Daud hana ji undang. 11 Teuma Nabi Natan geujak laju meurumpok deungon Batsyeba, mak Nabi Sulaiman, óh ban trok keunan geupeugah laju ubak gobnyan, "Peu kheueh Pocut Ratu gohlom neudeungoe bahwa si Adonia, aneuëk agam Hagit, ka jibaiát droe jih jeuet keuraja, seudangkan raja Nabi Daud hana geuteupeue sapeue keuhainyan? 12 Meunyoe Pocut Ratu keudroe neu meulakée mangat Nabi Sulaiman nibak Pocut Ratu keudroe seulamat, ulôn naseuhat ubak 13 droeneueh bubagaih kheueh neujak meuhadab ubak Raja Nabi Daud, dan neupeugah laju lagéenyoe ubak gobnyan: 'Bukon kheueh Teungku Amphon keudroe ka neumeusumpah ubak ulôn bahwa aneuëk agam ulôn nyang nan jih Nabi Sulaiman teuma jeuet keuraja keugeunantoe Teungku Amphon? Jinoenyoe, pakon Adonia nyang jeuet keuraja?' " 14 Geupeugah lom lé Natan seulanjut jih, "Preh ilée, teungoh Pocut Ratu nyan geupeugah haba deungon raja, ulôn teuma lôn tamong lôn jak peukong peue nyang ka neupeugah lé Pocut Ratu nyan." 15 Dan geujak kheueh laju Batsyeba geujak meuhadab ubak raja u dalam kama gobnyan. Raja Nabi Daud nyan bak watéenyan ka tuha that-that, dan Abisag, aneuëk dara nibak Sunem nyan, teungoh jipeutimang gobnyan. 16 Batsyeba laju geusujut ukeue Raja, dan raja laju geutanyong, "Peue nyang gata lakée?" 17 Geujaweueb lé Batsyeba, "Paduka Teungku Amphon Nyang Mulia, Teungku Amphon ka neumeusumpah ubak ulôn deumi nan TUHAN, Allah Teungku Amphon, bahwa aneuëk agam ulôn Nabi Sulaiman teuma jeuet keuraja keugeulantoe Teungku Amphon. 18 Teuma jinoenyoe deungon hana neuteupeue lé Teungku Amphon, Adonia ka jeuet keuraja. 19 Jihnyan ka jipeuseumah bubiri nyang le, leumô agam dan aneuëk leumô nyang teumbon-teumbon. Meunan cit jihnyan ka teuma jiundang ubak khanuri nyan aneuëk-aneuëk Teungku Amphon nyang laén dan Teungku Imeum Abyatar meunan cit teuma deungon Yoab, panglima angkatan prang Teungku Amphon. Teuma gobnyan hana geuundang Nabi Sulaiman. 20 Teungku Amphon Nyang Mulia, banmandum rakyat Israel nibak saátnyoe teungoh teupreh-preh keuputosan Teungku Amphon keuhai soe kheueh nyang teuma jeuet keugeunantoe Teungku Amphon keu teu baiát sibagoe raja. 21 Meunyoe Teungku Amphon hana neubri keuputosan nyan, ka pasti teuma meunyoe Teungku Amphon ka meuninggai donya, ulôn dan aneuëk agam ulôn jipeusaneut sibagoe tukang khianat." 22 Teungoh Batsyeba mantong geupeugah haba nyan, Nabi Natan pih trok teuma ubak meuligoe nyan. 23 Laju raja geubri tée keuhai Natan teuka keunan. Batsyeba laju geuteubiet, dan Nabi Natan geutamong, laju geusujut dikeue Teungku Amphon Raja. 24 Nabi Natan geupeugah, "Teungku Amphon Nyang Mulia, peu kheueh Teungku Amphon ka neu peumaklum ubak rakyat bahwa Adonia teuma jimat geunantoe Teungku Amphon jeuet keuraja? 25 Uroenyoe cit teuma jihnyan ka jipeuseumah bubiri nyang cukob le, leumô agam dan aneuëk leumô nyang teumbon-teumbon. Banmandum aneuëk agam Teungku Amphon ka jiundang. Meunan cit deungon dumna panglima angkatan prang Teungku Amphon, dan Teungku Imeum Abyatar. Awaknyan jinoenyoe teungoh jipeuget khanuri deungon gobnyan sira jisumeurak nyang meuhubo-hubo, 'Udeb Raja Adonia!' 26 Teuma, gobnyan hana geu undang ulôn. Teungku Imeum Zadok dan Benaya meunan cit deungon Nabi Sulaiman hana geu undang. 27 Peu kheueh Teungku Amphon nyang yue gobnyan sampoe geupeubuet banmandum nyang lagéenyoe, deungon hana neubri tée ubak peugawée Teungku Amphon nyang laén soe nyang teuma jeuet keugeunantoe Teungku Amphon?" 28 Raja Nabi Daud geupeugah, "Gata jakhôi keunoe si Batsyeba bubagaih jijak meuhadab ulôn." Deungon nyan lé Nabi Natan geuteubiet laju dan geutamong teuma lom Batsyeba jak meuhadab raja. 29 Laju geupeugah lé raja ubak gobnyan, "Keubiet ulôn ka lheueh lôn meujanji ubak droeneueh, deumi nan TUHAN, Po teu Allah ureuëng Israel, bahwa Nabi Sulaiman aneuëk agam gata nyan teuma jeuet keugeunantoe ulôn teubaiát keu raja. Nah, phon saátnyoe ulôn meujanji ubak gata deumi nan TUHAN nyang udeb, nyang ka geupeu leupah ulôn nibak banmandum mara bahya, bahwa nibak uroenyoe cit teuma ulôn peutrok janji ulôn ubak gata." 31 Dan geusujut kheueh Batsyeba sira geupeugah, "Udeb kheueh Paduka Raja siumu masa!" 32 Laju Raja Nabi Daud geuyue jakhôi Zadok, Natan dan Benaya yue meuhadab ubak gobnyan. Óh ka lheueh awaknyan jitamong u dalam, 33 geupeugah kheueh laju lé raja ubak awaknyan, "Gatajak hôi kheueh laju bubena peuwira ulôn dan tajak kheueh laju deungon awaknyan ubak Nabi Sulaiman aneuëk agam ulôn nyan. Tapeuék kheueh jihnyan u ateueh bagal ulôn keudroe, dan taba laju jihnyan ubak mata ié di Gihon. 34 Di teumpatnyan eunteuk Natan dan Zadok harôh jibaiát laju Nabi Sulaiman nyan jeuet keuraja Israel. Óh ka lheueh nyan gatanyoe banmandum harôh tayueb beureuguih sira gata seumurak, 'Udeb Raja Sulaiman!' 35 Óh ka lheuehnyan tairéng kheueh jihnyan lom mangat jiwoe keunoe dan jijakduek ubak tahta ulôn, sabab jihnyan kheueh nyang ka ulôn piléh jeuet keuraja keugeunantoe ulôn keu jipeurintah ateueh Israel dan Yehuda." 36 "Get, Teungku Amphon," geuseuôt lé Benaya, "seumoga TUHAN, Allah Teungku Amphon, geupeukong peurintah Teungku Amphon nyan. 37 Lagée nyang ka-ka TUHAN na sabe meusajan Teungku Amphon, seumoga Gobnyan pih na sabe deungon Nabi Sulaiman. Seumoga TUHAN geupeujeuet peumeurintah Nabi Sulaiman nyan leubeh jaya lom nibak peumeurintah Teungku Amphon." 38 Dan Zadok, Natan, Benaya dan peungawai pribadi raja geupeusila Nabi Sulaiman geuék u ateueh bagal raja, laju awaknyan geuiréng gobnyan ubak mata ié di Gihon. 39 Óh ka lheuehnyan Zadok laju geucok teumpat minyéuk zaiton nyang ka geuba atranyan nibak khimah TUHAN, laju gobnyan geubaiát Nabi Sulaiman deungon cara geuboh minyéuk nyan. Beureuguih pih laju teuyueb dan banmandum ureuëng nyang na teuka keunan laju jisumeurak, "Udeb Raja Sulaiman!" 40 Óh ka lheuehnyan awaknyan banmandum ji-iréng gobnyan jijakwoe sira jikuk ngon jisumeurak nyang meuhubo, meunan cit hana keutinggalan sira teuyueb suleng, sampoe tanoh nibak teumpat geugidongnyan siulah-ulah lagée ka beukah kareuna ramé that-that ureuëng nyang jaknyan. 41 Adonia dan banmandum jamé gobnyan banmantong seuleusoe geupeuna khanuri, watée teudeungoe buet ramé nyan. Bak watée Yoab geudeungoe su beureuguih, laju gobnyan geuteumanyong. "Peue nyang ka teujadi di banda sampoe su nyang riôh ramé dan subra lagoena?" 42 Yoab gohlom seuleusoe geupeugah haba, teuka kheueh deungon hana sangka-sangka Yonatan, aneuëk Teungku Imeum Abyatar, "Jak tamong," kheun Adonia. "Gata ureuëng gét, pasti nyang gata ba haba nyang gét teuma." 43 "Meuáh, bukon haba nyang jroh," geujaweueb lé Yonatan. "Raja Daud ka geuangkat Nabi Sulaiman jeuet keuraja! 44 Zadok, Natan, dan Benaya meunan cit deungon peungawai pribadi raja ka geuyue jak iréng Nabi Sulaiman. Awaknyan ka geupeuék Nabi Sulaiman u ateueh bagal raja, 45 dan Zadok deungon Natan ka geulantek gobnyan nibak mata ié Gihon. Jinoenyoe awaknyan ka jigisa u banda sira jisumeurak ngon jimeulikak deungon hibat jih, dan banmandum banda ka meugah di ureuëng ramé ka habéh jiteupeu dan ka ka-ak ka-ok. Nyang kheueh keuramé nyang gatanyoe deungoe buno. 46 Nabi Sulaiman bak saát nyoe ka jeuet keuraja. 47 Meunan cit banmandum peuwira raja ka geujak geubri haba seulamat ubak Raja Daud. Awaknyan geupeugah, 'Seumoga Po teu Allah Teungku Amphon geupeujeuet Nabi Sulaiman nyan leubeh meusyeuhu nibak Teungku Amphon; seumoga peumeurintah Nabi Sulaiman nyan leubeh jaya nibak peumeurintah Teungku Amphon.' Óh lheueh nyan nibak teumpat éh gobnyan, Nabi Daud geusujut geuseumah Po teu Allah, 48 dan geumeu doá, 'Teupujoe kheueh Droeneueh ya TUHAN, Allah nyang jiseumah lé umat Israel. Nibak uroenyoe sidroe nibak keuturonan ulôn ka Droeneueh angkat jeuet keuraja keugeunantoe ulôn. Dan Droeneueh ka neupeu idhin ubak ulôn udeb beujeuet ulôn kalon!' " 49 Bubena jamé Adonia ka jeuet keuteumakot ngon yo, sampoe awaknyan banmandum jidong dan laju jijak, maséng-maséng jicok rot jih keudroe. 50 Dan bak watéenyan cit teuma Adonia teumakot that-that ubak Nabi Sulaiman, akhéjih gobnyan laju jiplueng ubak Khimah TUHAN dan laju geumat ujong-ujong miseubah nyang na disinan. 51 Di ureuëng laén laju jijak britée hainyan ubak Nabi Sulaiman. Awaknyan jipeugah bahwa Adonia gét that teumakot ubak Nabi Sulaiman, teuma gobnyan ka jijak ubak miseubah dan jimat laju ujong-ujong miseubah nyan sira jipeugah, "Ulôn hana lôn séuk disinoe sigohlom Nabi Sulaiman geumeusumpah ubak ulôn bahwa gobnyan hana geupoh maté ulôn." 52 Nabi Sulaiman geujaweueb, "Meunyoe jihnyan meupi-e ngon nyang jroh, jihnyan hana teuhuköm bahpih meubacut pih; teuma meunyoe jihnyan jipeubuet buet nyang jeuhet, jihnyan harôh teupoh maté." 53 Laju raja geuyue ureuëng laén geuyue jakcok Adonia nibak miseubah nyan. Dan teuka kheueh Adonia jijak meuhadab raja, dan laju jisujut dikeue gobnyan. Laju Raja geupeugah, "Jinoenyoe kajeuet gata jakwoe!"

1 Raja-Raja 2

1 Bak watée ajai gobnyan ka tô, Nabi Daud laju geuhôi Nabi Sulaiman, aneuëk agam geuh nyan, dan laju geubri peusan-peusan gobnyan nyang keuneulheueh. Nabi Daud geupeugah, 2 "Ka trok saát jih ulôn meuninggai donya nyoe. Bah kheueh gata yakén dan beurani. 3 Tapeubuet kheueh peue nyang geupeurintah lé TUHAN Po teu Allah gata. Tataát kheueh ubak banmandum huköm-huköm dan peurintah-peurintah nyang na teutuléh didalam Kitab Nabi Musa, deungon nyan teuma homantong nyang gata jak gata meuhase nibak peue mantong useuha gata. 4 Meunyoe gata taát ubak TUHAN, Gobnyan teuma geupeuteupat peue mantong nyang geupeujanji bahwa keuturonan ulôn nyang mat peurintah ateueh Israel, asai awaknyan deungon sipeunoh até dan sigeunab jiwa sabe seutia jitaát ubak peurintah TUHAN. 5 Na lom saboh hai teuk! Gata pasti teuingat peue nyang ka geupeubuet lé Yoab u ateueh ulôn deungon cara jipoh maté bandua droe peuwira Israel, awaknyan na kheueh Abner aneuëk Ner dan Amasa aneuëk Yeter. Ureuëng nyan jipoh maté awaknyoe bak watée damé, bukon lam keuadaan prang, keu jibalah seumupoh nyan nyang ka jipeubuet lam prang. Jihnyan jipoh maté ureuëng nyang hana meusalah teuma jinoenyoe ulôn kheueh nyang harôh tanggong banmandum buet jih nyan dan ulôn kheueh nyang meudeurita. 6 Lé sababnyan hai, aneuëk ulôn, gata harôh tacok tendakan ateueh jih nyan meunurot peue nyang gata anggab jroh; ulôn lakée bék gata peubiyeu jihnyan meuninggai deungon cara biasa. 7 Teuma keu aneuëk agam Barzilai nibak Gilead bah kheueh gata tapeusaneut jihnyan seucara gét-gét. Gata harôh tajamin awaknyan tieb-tieb uroe, sabab awaknyan ka jipeubuet nyang jroh keu ulôn bak watée ulôn peuplueng droe nibak aduen gata, Absalom. 8 Keuhai Simei aneuëk Gera di banda Bahurim didalam wilayah Benyamin, na cit peusan ulôn keu gata. Watée ulôn jak di Mahanaim, Simei nyan uroe jéh jikutok ulôn deungon keujam that. Teuma óh dudoe bak watée jihnyan teuka jijak tueng ulôn nibak Krueng Yordan, ulôn meusumpah ubak jihnyan deumi TUHAN bahwa ulôn hana ulôn peumaté jihnyan. 9 Teuma nyoe kheueh amanat lôn keu gata: Bék tapeubiyeu jihnyan beubaih nibak mubagoe huköman. Ulôn kuteupeue bahwa gata na kheueh ureuëng bijak sana; jadi, bahpi jihnyan ka tuha, ta useuha kheueh mangat jihnyan teuhuköm maté." 10 Óh ka lheueh geupeugah nyan hana treb teuma óh lheueh nyan Nabi Daud pih meuninggai donya dan laju teupeukubu nibak Banda Daud. 11 Gobnyan jeuet keuraja Israel treb jih na peuet ploh thon: tujoh thon gobnyan geuduek di Hebron, dan lhée ploh lhée thon di Yerusalem. 12 Óh lheueh Nabi Daud nyan meuninggai donya, laju geu ék Nabi Sulaiman jeuet keuraja keugeunantoe bapak geuh Nabi Daud. Kekuasaan Nabi Sulaiman sibagoe raja keubiet that-that kong. 13 Bak siuroe, Adonia geujak ubak Batsyeba. Geutanyong kheueh lé Batsyeba ubak gobnyan, "Peu kheueh gata saweue nyoe na meukeusut nyang keu gét?" "Beutôi," jaweueb Adonia. 14 Laju gobnyan geutamah lom, "Na sapeue-peue nyang ulôn keuneuk lakée nibak mak." "Peue nyan?" geutanyong lé Batsyeba. 15 Jaweueb lé Adonia, "Mangat Mak teupeue bahwa ulôn kheueh nyang seuharôh jih jeuet keuraja; nyang ka jiharab lé bansaboh nanggroe Israel. Teuma nyang jeuet na kheueh nyang laén; adoe ulôn nyang jeuet keu raja, kareuna TUHAN nyang meuheuet nyang lagée nyan. 16 Jinoenyoe na sapeue-peue nyang ulôn lakée, nyang ulôn lakéenyoe deungon bit-bit that ulôn meuharab lé poma bék neutulak." 17 "Peue nyang gata lakée nyan?" geutanyong lé Batsyeba ubak aneuëk geuhnyan. Geujaweueb lé Adonia, "Ulôn meulakée mangat poma neutem lakée ubak Raja Nabi Sulaiman mangat gobnyan geupeu idhin ubak ulôn lôn meukawen deungon si Abisag, aneuëk dara nibak Sunem nyan. Ulôn yakén Nabi Sulaiman hana geutulak peue nyang poma lakée nyan." 18 "Nyoe, gét kheueh," geujaweueb lé Batsyeba. "Ulôn teuma lôn jak meututo hainyan deungon raja keu gata." 19 Dan geujak kheueh laju Batsyeba ubak raja keu geujak peusampoe meukeusut até Adonia nyan. Raja Sulaiman laju geudong dan geuseumah laju ubak teuôt sira geusujut dikeue poma geuhnyan, óh lheuehnyan geujak duek lom u ateueh tahta keurajeuen geuh. Óh lheuehnyan geuyue laju ureuëng laén jijak mita kurusi mangat jipeuduek disiblaih u uneuen gobnyan mangat poma geuh nyan hase geuduek disinan. 20 Óh ka lheueh geuduek, geupeugah kheueh lé Batsyeba ubak Nabi Sulaiman aneuëk droe geuh nyan, "Maknyoe keuneuk meulakée nyang ubit that ubak gata. Poma meuharab dak jeuet bék kheueh gata tulak peue nyang mak lakée nyoe." "Peue nyang mak lakée nyan?" geutanyong lé Nabi Sulaiman. "Ulôn hana teuma lôn tuan tulak." 21 Geujaweueb lé Batsyeba, "Gata peuidhin kheueh keu Adonia, aduen gata nyan jimeukawen deungon Abisag." 22 "Pakon jeuet nyang nyan poma lakée ubak ulôn?" geutanyong lé Nabi Sulaiman. "Nyan saban cit deungon jilakée tahta keurajeuen nyoe ubak ulôn. Bukon kheueh gobnyan aduen ulôn? Dan lom Teungku Imeum Abyatar dan Yoab geudong blaih gobnyan!" 23 Óh ka lheueh geupeugah meunan geumeusumpah kheueh laju Nabi Sulaiman ubak TUHAN, "Bah kheueh ulôn nyoe keunong kutok nibak TUHAN, meunyoe ulôn hana ulôn huköm maté Adonia kareuna peue nyang ka geulakée nyan! 24 TUHAN ka geupeukukoh teumpat duek ulôn nibak tahta ureuëng syiek ulôn, Nabi Daud. TUHAN ka geupeutrok janji Gobnyan dan ka teuma geubri keurajeuen nyoe keu ulôn dan keuturonan ulôn. Ulôn meusumpah deumi TUHAN nyang udeb bahwa Adonia teuma meuninggai nibak uroenyoe cit teuma!" 25 Dan Nabi Raja Sulaiman laju geupeurintah ubak Benaya mangat jijak poh maté Adonia. 26 Óh lheueh nyan geupeugah kheueh lé Raja Nabi Sulaiman ubak Teungku Imeum Abyatar, "Tajak kheueh laju u gampông droe gata di Anatot. Gata ka patot teuhuköm maté, teuma nibak uroenyoe ulôn hana ulôn poh gata, kareuna bak watée gata mantong meusajan deungon ayah ulôn Nabi Daud, gata meusajan tarasa pakriban peudeh deurita nyan. Dan gata cit teuma nyang uroih Peuto Peujanjian TUHAN." 27 Dan Nabi Sulaiman pi geupeucat teuma Abyatar sibagoe teungku imeum. Deungon peue nyang ka geupeubuet lé Nabi Sulaiman nyan peue nyang ka geupeugah lé TUHAN di Silo keuhai keuturonan Teungku Imeum Eli ka jeuet keunyataan. 28 Yoab geudeungoe keuhai peue nyang ka teujadi nyan. Sampoe gobnyan ka jeuet keuteumakot sabab gobnyan geudong blaih Adonia. Teuma, yoh masa dilée gobnyan hana geudong blaih Absalom. Dan gobnyan laju geuplueng ubak Khimah TUHAN óh trok keunan laju geumat ujong-ujong miseubah. 29 Haba nyoe laju teupeusampoe ubak Raja Nabi Sulaiman. Dan Nabi Sulaiman laju geuyue Benaya mangat jijak poh maté Yoab. 30 Benaya jijak laju ubak Khimah TUHAN dan jipeugah ubak Yoab, "Raja geuyue gata tateubiet di sinan!" "Hán kutem," geupeugah lé Yoab, "ulôn keuneuk meuninggai disinoe." Benaya laju jigisa dan jipeugah laju hainyan ubak Raja Nabi Sulaiman. 31 Ban geudeungoe lagée nyan laju raja geupeugah, "Tajak kheueh dan tapeubuet kheueh peue nyang ka jipeugah nyan. Tapoh maté laju jihnyan dan óh lheueh nyan takubu laju u dalam jrat, mangat ulôn dan banmandum keuturonan ureuëng syiek ulôn hana meutanggong jaweueb le keuhai jipoh maté nyang jipeubuet lé Yoab ateueh ureuëng-ureuëng nyang hana meusalah. 32 TUHAN teuma geuhuköm gobnyan sabab le that jipoh ureuëng sampoe maté nyang hana geuteupeue mubacut pi lé ureuëng syiek ulôn. Abner peuwira Israel, dan Amasa peuwira Yehuda, ban dua droe ureuëng nyan hana meusalah. Awaknyan leubeh gét nibak Yoab nyan keudroe, teuma lé Yoab ka jipoh maté awaknyan. 33 Huköm sabab dua droe peuwira nyang maté na kheueh tanggong jaweueb Yoab dan keuturonan gobnyan keu siumu masa. Teuma banmandum keuturonan bapak ulôn nyang jeuet keuraja, sabe geubri beureukat lé TUHAN -- awaknyan meu untông." 34 Dan jijak kheueh laju Benaya ubak Khimah TUHAN óh ban trok keunan laju jipoh maté Yoab disinan. Dan Yoab nyang ka jeuet keu manyét nyan geukubu laju di rumoh gobnyan di luwa banda. 35 Óh lheueh nyan lé Raja Nabi Sulaiman laju geu baiát Benaya jeuet keu panglima prang keugeunantoe Yoab, dan Zadok geu baiát jeuet keu teungku imeum keugeunantoe Abyatar. 36 Óh ka lheueh nyan Raja Nabi Sulaiman laju geuhôi Simei dan geupeugah ubak gobnyan, "Tajak peugét kheueh laju rumoh keu droe gata di Yerusalem nyoe. Tatinggai kheueh di rumoh nyan dan bék gata teubiet nibak lam banda. 37 Meunyoe gata tajeuet teubiet dan gata jeumeurang aneuk Krueng Kidron, gata harôh teupoh maté; dan gata keudroe kheueh nyang harôh ta-tanggong buet nyang salah nyan." 38 "Get, Deulat Teungku Amphon," jaweueb Simei. "Ulôn kuturot peue nyang Teungku Amphon peurintah." Dan tinggai kheueh Simei di Yerusalem. 39 Óh ka lheueh na lhée thon jiteuka kheueh hai nyang lagée nyoe bagoe: Na dua droe namiet Simei jiplueng u Gat, ubak Raja Akhis bin Maakha. Watée ubak Simei teujak peusampoe keuhai nyan, gobnyan 40 laju jipasang peulana ateueh keuleudée dan laju jijak ubak Raja Akhis di Gat dan óh trok keunan laju jimita namiet jihnyan. Disinan laju meuteumé awaknyan dan jipeuwoe laju awaknyan ban dua. 41 Bak watée Nabi Sulaiman geuteupeue peue nyang ka jipeubuet lé Simei nyan, 42 gobnyan geuyue hôi laju Simei mangat jijak meuhadab dan geupeugah, "Ulôn ka ulôn peujeuet gata tameujanji deumi TUHAN bahwa gata hana tatinggai Yerusalem. Dan meunan cit di ulôn ka lheueh ulôn peu ingat ubak gata meunyoe gata tateubiet nibak Yerusalem, gata harôh maté. Lé sababnyan, gata ka tameujanji dan tatem taát ubak janji nyang ka ulôn peuritah nyan, bukon? 43 Teuma jinoenyoe pakon gata iengkeue janji gata nyan dan gata langgeh peurintah ulôn? 44 Gata tateupeue that-that banmandum buet gata nyang jeuhet ateueh ayah ulôn. Lé sababnyan TUHAN geuhuköm gata. 45 Teuma ulôn teubri beureukat dan keurajeuen ureuëng syiek ulôn teuma geupeukhong sampoe siumu masa." 46 Óh ka lheueh geupeugah nyang lagée nyan, raja laju geubri peurintah ubak Benaya dan jijak kheueh laju Benaya jijak poh maté Simei. Jinoenyoe Nabi Sulaiman ka geumat kuasa peunoh didalam keurajeuen gobnyan.

1 Raja-Raja 3

1 Raja Nabi Sulaiman geupeujeuet nanggroe Meusé sibagoe rakan gobnyan deungon geumeukawen ngon sidroe putroe raja nanggroe Meusé. Putroe nyan geuba lé Raja Nabi Sulaiman u banda Nabi Daud keu tinggai disinan sampoe meuligoe raja dan Baét TUHAN meunan cit kuta-kuta nyang na bansilingka Yerusalem seuleusoe teupeudong lom teuma. 2 Sabab Baét TUHAN gohlom teupeudong bak watée nyan, rakyat mantong jipeuseumah keureubeuen nibak meubagoe teumpat. 3 Nabi Sulaiman geugaséh TUHAN dan geuseutôt peutunyok-peutunyok nibak ayah geuh, teuma gobnyan mantong geusie dan geupeuseumah beulatang nibak meubagoe teumpat. 4 Teumpat iébadat nyang paleng meusyeuhu na di Gibeon. Nabi Sulaiman kayém that geupeuseumah keureubeuen nibak teumpat nyan. Nibak siuroe, lagée nyang ka-ka, gobnyan geujak lom keudeh. 5 Malam nyan TUHAN geupeuleumah droe ubak gobnyan lam lumpo dan geupeugah, "Nabi Sulaiman, lakée kheueh peue nyang gata lakée, nyang gata lakée nyan Ulôn jok keu gata!" 6 Nabi Sulaiman geujaweueb, "TUHAN, Droeneueh ka neutunyok bahwa Droeneueh biet-biet neugaséh that keu ayah lôn Nabi Daud, hamba Droeneueh nyan. Gobnyan get, jujoe lom seutia ubak Droeneueh. Dan sibagoe jaminan bahwa keusilanjut jih Droeneueh teutab neugaséh gobnyan, Droeneueh neujok ubak gobnyan sidroe aneuëk agam nyang jinoenyoe geumat keurajeuen geunantoe gobnyan. 7 Ya TUHAN, Po teu Allah ulôn, Droeneueh ka neuangkat ulôn jeuet keu raja keugeunantoe ureuëng syiek ulôn, bahpi ulôn nyoe mantong that muda gohlom lôn teupeue pakriban cara lôn peubuet peurintah. 8 Ulôn na lamkawan bansa nyang ka TUHAN piléh jeuet keu umat Droeneueh keudroe. Awaknyan na kheueh saboh bansa nyang rayeuk nyang hana teukira le jih. 9 Sabab nyan, ya TUHAN, neubri kheueh kira jih keu ulôn keubijaksanaan nyang ulôn peureulée mangat jeuet ulôn peurintah umat Droeneueh nyoe deungon ade dan mangat jeuet teupeubeda toh nyang jroh dan toh nyang jeuhet. Meunyoe hana lagéenyan, panena mungken ulôn hase lôn peurintah umat Droeneueh nyang raya nyoe?" 10 TUHAN galak deungon peue nyang ka geulakée lé Nabi Sulaiman nyan, 11 dan geupeugah ubak geuhnyan, "Sabab gata talakée keubijaksanaan mangat tamat peurintah deungon ade, dan bukon umu nyang panyang dan keukayaan keu droe gata keudroe atawa keuhai maté ateueh musoh-musoh gata, 12 maka peue nyang ka gata lakée nyan teuma Ulôn peupeunoh. Ulôn teuma Ulôn peujeuet gata leubeh bijaksana dan leubeh meu iéleumé peungeutahuan nibak soe mantong, bahpi nyan yoh watée ilée meunan cit nibak masa nyang teuma teuka. 13 Dan meunan cit peue nyang hana gata lakée nyan teuma Ulôn bri cit keu gata: siumu udeb gata kaya dan jihoreumat leubeh nibak raja nyang laén dipat mantong di ateueh bumoenyoe. 14 Dan meunyoe gata, lagée bapak gata Nabi Daud, gata taát ubak Ulôn dan taseutôt banmandum huköm-huköm Ulôn, Ulôn teuma Ulôn bri keu gata umu nyang panyang." 15 Óh ka jaga nibak teungéut nyan, Nabi Sulaiman laju geuteupeue bahwa TUHAN Allah ka geupeugah haba ubak gobnyan didalam lumpo. Dan geugisa kheueh laju gobnyan u Yerusalem dan geudong laju dikeue Peuto Peujanjian TUHAN dan disinan laju geupeuseumah keureubeuen nyang teutot dan keureubeuen peudamé. Óh lheuehnyan laju geupeuna khanuri keu peugawée gobnyan. 16 Bak siuroe, na dua droe ureuëng inong jeuhet jijak meuhadab ubak Nabi Sulaiman. 17 Sidroe lamkawan ureuëng inong nyan jipeugah, "Amphon Teungku Po Nyang Mulia, ulôn deungon ureuëng inong nyoe tinggai saboh rumoh. Hana ureuëng laén nyang na tinggai meusajan kamoe. Na meupadub watée nyang ka u likot, ulôn na lôn peulahé sidroe aneuëk agam. Dua uroe teuma óh lheueh nyan ureuëng inong nyoe pih jipeulahé teuma sidroe aneuëk agam. 19 Bak simalam teungoh kamoe mangat that teungéut, di ureuëng inong nyoe hana jisaja teuginton aneuëk jih nyan sampoe maté. 20 Teungoh malam di ulôn pi teungoh mangat that teungéut, ureuëng inong nyan jibeudôh laju jicok aneuëk ulôn nyang teungoh jiteungeuet nibak binéh geuniréng ulôn. Dan aneuëk ulôn nyan laju jipeu-éh nibak teumpat éh jih, dan aneuëk jih nyang ka maté nyan laju teuma jikeubah nibak geunireng ulôn. 21 Óh singoh beungoh, bak watée ulôn beudôh dan lôn keuneuk suleueng mom keu aneuëk ulôn nyan, ulôn ngieng aneuëk ulôn nyan ka maté. Óh ka lheueh ulôn peurati ngon lôn seulidek, deuh kheueh bahwa aneuëk nyang ka maté nyan bukon aneuëk ulôn." 22 "Sulet!" jipeugah lé ureuëng inong nyang laén nyan. "Nyang udebnyoe aneuëk agam ulôn seudangkan nyang maté nyan na kheueh aneuëk agam gata!" "Hán kutem!" jipeugah lé ureuëng inong nyang phon nyan. "Nyang ka maté nyoe na kheueh aneuëk agam gata, dan nyang udeb nyan na kheueh aneuëk agam ulôn!" Meunan kheueh awaknyan jimeudakwa dikeue Raja Nabi Sulaiman nyan. 23 Laju geupeugah lé Raja Nabi Sulaiman, "Gata nyoe bandua ta-éh maséng-maséng tameungaku bahwa aneuëk agam nyang mantong udebnyoe na kheueh aneuëk gata dan bukon nyang ka maté nyan." 24 Óh lheueh geupeugah lagéenyan Nabi Sulaiman laju geuyue ureuëng laén jijakcok peudeueng. 25 Óh lheueh nyan Nabi Sulaiman laju geupeurintah, "Gata koih laju jeuet dua khan aneuëk manyak nyan, óh lheueh nyan gata bagi laju keu awaknyan maséng-maséng sikhan sapo." 26 Ban jideungoe peurintah nyan di poma nyang sibeuna jih nibak aneuëk agam nyan laju geupeugah, "Amphon, Deulat Teungku Po, bék neupoh maté aneuëk manyak nyan. Neujok kheueh mantong keu inong nyan." Ureuëng inong nyan jipeugah lagée nyan sabab jihnyan lumpah jigaséh keu aneuëk jih nyan. Teuma di ureuëng inong nyang sidroe teuk nyan jipeugah, "Nyoe, neukoih mantong, bah kheueh meusidroe hana meuteumé nibak kamoe!" 27 Dan geupeugah kheueh lé Nabi Sulaiman, "Bék tapoh aneuëk manyak nyan! Tajok laju ubak ureuëng inong nyang phon nyan -- jihnyan kheueh mak nibak aneuëk manyak nyan." 28 Bak watée bansa Israel jideungoe keuhai keuputosan Nabi Sulaiman dalam peukara nyan, awaknyan meurasa that-that kagum ubak Nabi Sulaiman nyan. Sabab nyata kheueh teuma, bahwa Po teu Allah ka geubri keu gobnyan hikeumat mangat geupeubuet ade.

1 Raja-Raja 4

1 Nabi Sulaiman ka jeuet keuraja ateueh banmandum nanggroe Israel. 2 Nyoe kheueh peujabat-peujabat manyang nyang geuangkat lé Nabi Sulaiman: Teungku-teungku imeum: Zadok, Azarya aneuëk Zadok, Abyatar Keu seukeutaréh nanggroe: Elihoref dan Ahia, awaknyan na kheueh aneuëk-aneuëk Sisia Beundahara nanggroe: Yosafat aneuëk Ahilud Panglima prang: Benaya, aneuëk Yoyada Kepeungawas dumna bupati: Azarya, aneuëk Natan Keupeunaseuhat raja: Teungku Imeum Zabud, aneuëk Natan Nyang jeuet keu ulée rumoh tangga meuligoe: Ahisar Nyang jeuet keu ulée keureuja rodi: Adoniram, aneuëk Abda 7 Meunan cit di Nabi Sulaiman nyan geu angkat teuma dua blaih droe bupati nyang geupeutugaih bansaboh nanggroe Israel. Tugaih awaknyan na kheueh geupeusapat dalam wilayah gobnyan dumna bahan peunajoh keu peunajoh raja dan banmandum asoe meuligoe. Tieb-tieb bupati seucara meugantoe-gantoe meutanggong jaweueb ateueh hainyan nyang treb jih sibuleuen tieb-tieb thon. 8 Ban dua blaih droe bupati nyan jipimpén teuma lé sidroe gubunur. Nyoe kheueh nan-nan bupati dan wilayah keukuasaan awaknyan: Ben-Hur: di daerah gunong-gunong Efraim Ben-Deker: banda Makas, Saalbim, Bet-Semes, Elon, Bet-Hanan Ben-Hesed: banda Arubot, Sokho, dan banmandum daerah Hefer Ben-Abinadab, lakoe si Tafat aneuëk inong Nabi Sulaiman: ban siluroih daerah Dor Baana aneuëk Ahilud: banda Taanakh, Megido, dan banmandum daerah nyang tô ngon Bet-Sean, tô ngon banda Sartan disiblaih u seulatan banda Yizreel sampoe trok u banda Abel-Mehola dan banda Yokmeam. Ben-Geber: banda Ramot di Gilead, gampông-gampông nyang na di Gilead na kheueh atra kawöm Yair keuturonan Manasye, daerah Argob di Basan; banmandum nyan na 60 boh banda nyang raya nyang teupeukong deungon kuta dan palang-palang peurunggu nibak tieb-tieb pintoe geureubang jih nyan Ahinadab aneuëk si Ido: daerah Mahanaim, Ahimaas, lakoe Basmat aneuëk inong Nabi Sulaiman: daerah Naftali Baana aneuëk Husai: daerah Asyer, banda Alot Yosafat aneuëk Paruah: daerah Isakhar Simei aneuëk Ela: daerah Benyamin Geber aneuëk Uri: daerah Gilead, nyang yoh masa ilée jikuasa lé Sihon raja Amori, dan Og raja Basan. 20 Ureuëng Yehuda dan ureuëng Israel le jih na lagée anou dibinéh pasi. Bak awaknyan na peunajoh nyang seb dan ié jieb nyang meulimpah keu teupeuguna dan udeb awaknyan pih keubiet that makmu. 21 Tieb-tieb keuluwarga na lampôh anggô ngon lampôh bak ara. Siumu udeb Nabi Sulaiman rakyat bansaboh Yehuda dan Israel phon di Dan trok u Bersyeba udeb awaknyan keubiet that aman dan teuntram. Sabab banmandum raja nyang na tinggai disiblaih u barat Efrat jitaklhok ubak gobnyan, dan banmandum bansa nyang na bansikeulileng keurajeuen gobnyan jimeusabat deungon gobnyan. Tanoh nyang na disiblaih u barat Krueng Efrat phon di Tifsah nibak binéh Krueng Efrat sampoe laju u barat nibak banda Gaza di Filistin sampoe trok ubak bataih nanggroe Meusé, bansaboh nyan na kheueh ka geukuasa lé Nabi Sulaiman. Bansa-bansa nyang na disinan ka jitaklhok ubak gobnyan sira jibayeue upeti. Bahan peunajoh nyang geupeureulée lé Nabi Sulaiman tieb-tieb uroe na kheueh 5.000 arée teupông halôh, 10.000 arée teupông gasa, 10 boh leumô lam weue, 20 boh leumô di blang, dan 100 boh bubiri. Seulaén nibaknyan na lom rusa, kijang, menjangan dan cicém. 26 Nabi Sulaiman nyan na teuma 12.000 droe tantra meuguda dan 40.000 boh weue keu guda-guda nyang jitarek geuritan-geuritan gobnyan. 27 Seucara meugantoe-gantoe, nyang treb jih sibuleuen, tieb-tieb bupati geuseurah bahan peunajoh keu Raja Nabi Sulaiman dan keu mandum ureuëng nyang na meuteumé peunajoh di meuligoe, sampoe awaknyan hana kureueng, meusapeue pih. 28 Meunan cit tieb-tieb bupati nyan geubri cit teuma gandom dan jeurami keu banmandum guda Nabi Sulaiman, bah kheueh nyan guda geuniduek meunan cit deungon guda geuritan. Peunajoh beulatang nyan geuba ubak tieb-tieb weue guda seuduble nyang teupeureulée. 29 Po teu Allah geubri ubak Nabi Sulaiman hikeumat, dan peungeutahuan nyang luwa biasa, dan peungeurtian nyang cukob lhok. 30 Di Nanggroe-nanggroe timu dan di nanggroe Meusé hana ureuëng nyang leubeh carông seulaén gobnyan. 31 Gobnyan bit-bit ureuëng nyang paleng carông nibak banmandum ureuëng. Gobnyan leubeh nibak Etan ureuëng Ezrahi, Heman, Kalkol dan Darda aneuëk-aneuëk Mahol. Nan Nabi Sulaiman kameusyeuhu dipat mantong di nanggroe-nanggroe bansikeulileng nanggroe gobnyan. 32 Na 3.000 boh peupatah dan leubeh nibak siribée boh lagu nyanyoe nyang ka geukarang. 33 Gobnyan hase geupeugah haba deungon bubena bak kayée dan teunaman nyang laén -- nibak bak ceumara Libanon sampoe ubak naleueng hisop nyang na jitimoh nibak beuton-beuton batée. Meunan cit gobnyan hase geupeugah haba deungon dumna beulatang, lagée ngon miseu jih cicém, beulatang nyang jijak ngon pruet meunan cit deungon uengkot. 34 Dumna raja bansigom donya ka geudeungoe keuhai keubijaksanaan dan keuhebatan Nabi Sulaiman nyan sampoe ureuëng laén jikirém waki jih keu jijak deungoe gobnyan peugah haba.

1 Raja-Raja 5

1 Hiram, raja di nanggroe Tirus, sabena geumeusahabat deungon Raja Nabi Daud. Bak watée Hiram geudeungoe bahwa Nabi Sulaiman ka jeuet keu raja keugeunantoe Nabi Daud, bapak gobnyan, Hiram nyan laju geu utoih ureuëng droe geuh mangat jijak meurumpok deungon Nabi Sulaiman. 2 Meunan cit di Nabi Sulaiman pi laju geukirém peusan ubak Hiram, 3 "Raja Hiram Nyang Mulia! Teuntée Teungku neuteupeue bahwa ureuëng syiek ulôn Nabi Daud sabe geumuprang kareuna jiseurang lé musoh di nanggroe-nanggroe nyang na di silingka kamoe. Dan sabab TUHAN gohlom geubri meunang ateueh banmandum musoh gobnyan, gobnyan gohlom na watée geupeudong geudong teumpat iébadat ubak TUHAN Allah gobnyan. 4 Teuma jinoenyoe TUHAN Po teu Allah ulôn ka geubri keuteuntraman ateueh banmandum daerah keukuasaan ulôn. Ulôn ka hanale musoh, dan meunan cit hana teuma le musibah nyang keunong u ateueh nanggroe ulôn. 5 TUHAN ka geumeujanji nyang lagéenyoe ubak ureuëng syiek ulôn Nabi Daud, 'Aneuëk agam gata nyang teuma Ulôn angkat jeuet keuraja keugeunantoe gata teuma ji peugot geudong teumpat ji iébadat ubak Ulôn.' Kareuna nyan, Teungku Hiram Nyang Mulia, ulôn Nabi Sulaiman, ka ulôn cok keuputosan keuneuk lôn peugot geudong nyan. 6 TUHAN ka geumaklum bahwa lamkawan rakyat ulôn hana nyang carông jiteubang bak kayée lagée rakyat Teungku. Sababnyan, ulôn meuharab beuneutem kheueh Teungku neuyue ureuëng-ureuëng Teungku mangat jijak koih bubena bak ceumara Libanon keu ulôn. Rakyat ulôn teuma ulôn yue jak tulông awaknyan, dan padub mantong upah nyang Teungku lakée keu ureuëng-ureuëng Teungku nyan, nyan teuma ulôn bayeue." 7 Hiram galak geuh that-that bak watée geuteurimong haba nyan. Gobnyan geupeugah, "Pujoe kheueh TUHAN nibak uroenyoe, kareuna Gobnyan geubri keu Nabi Daud sidroe aneuëk agam nyang lumpah bijaksana keu jeuet keu raja ateueh bansa nyang raya nyan." 8 Dan Hiram pih geukirém laju jeunaweueb nyan ubak Nabi Sulaiman, "Ulôn ka ulôn teurimong haba peue nyang Teungku lakée nyan, dan ulôn ka siab ulôn peupeunoh peue nyang Teungku lakée. Ulôn teuma lôn keubah kayée ceumara Libanon dan kayée ceumara biasa nyang sisuai deungon Teungku lakée nyan. 9 Ureuëng-ureuëng ulôn teuma jiba kayée nyan jipeutreun nibak gunong Libanon u dalam laôt. Disinan kayée nyan awaknyan ikat jeuet keu rakét dan teuma jipeu hanyot lé awaknyan seutôt rot binéh panté paih deungon peue nyang Teungku lakée. Disinan rakét-rakét nyan laju ji reuloih óh lheuehnyan laju jijok ubak ureuëng Teungku mangat jiudeuha teuma óh dudo. Nibak pihak Teungku Amphon, ulôn lakée mangat Teungku Amphon neukeubah peunajoh keu ureuëng-ureuëng nyang na didalam meuligoe ulôn." 10 Teuma Hiram laju jibri ubak Nabi Sulaiman banmandum kayée Libanon dan kayée ceumara biasa nyang ka jipeureulée nyan. 11 Dan keu geubri makheun dumna asoe meuligoe Hiram nyan, tieb-tieb thon Nabi Sulaiman geuseurah ubak Hiram 322.500 kilogram gandom dan 4.400 arée minyéuk zaiton nyang aseuli. 12 TUHAN geupeutrok janji Gobnyan dan geubri hikeumat ubak Nabi Sulaiman. Hiram ngon Nabi Sulaiman na hubongan nyang paleng gét, dan awaknyan ban dua ka geupeuget saboh ikatan janji. 13 Raja Nabi Sulaiman laju geukrah 30.000 droe ureuëng agam nibak bansigom nanggroe Israel mangat jijakkeureuja buet rodi, 14 dan geu angkat Adoniram jeuet keu peungawas awaknyan. Nabi Sulaiman geubagi awaknyan jeuet dalam lhée boh kawan, maséng-maséng kawan nyan na siploh ribée droe. Ban lhée boh kawan seucara meugantoe-gantoe tinggai sibuleuen di Libanon dan dua buleuen di rumoh. 15 Dan Nabi Sulaiman geukrah teuma 80.000 droe mangat jijak peut batée di ateueh gunong dan 70.000 droe nyang angkot batée-batée nyang ka lheueh teu peut nyan. 16 Gobnyan geu angkat teuma 3.300 droe mando keu jijaga buet-buet nyan. 17 Ateueh peurintah gobnyan cit teuma awaknyan ji culek ngon jipeut batée raya dan nyang gét-gét keu keunaleueng Baét TUHAN. 18 Meunan kheueh cara jih ureuëng keureuja Nabi Sulaiman dan ureuëng keureuja Raja Hiram meunan cit deungon ureuëng-ureuëng nibak banda Gebal jipeusiab batée dan kayée mangat teupeugot Baét TUHAN nyan.

1 Raja-Raja 6

1 Nabi Sulaiman geupeuphon peugot Baét TUHAN nibak buleuen Ziw, na kheueh buleuen nyang keudua, bak thon nyang keu peuet keurajeuen gobnyan, 480 thon óh ka lheueh bansa Israel jitinggai nanggroe Meusé. 2 Ukoran Baét TUHAN di bagian dalam jih na kheueh lagéenyoe: panyang 27 metée, luwah 9 metée, dan manyang 13,5 metée. 3 Di bagian keue Baét TUHAN nyan na kheueh balée nyang panyang jih 4,5 metée dan luwah jih 9 metée, saban deungon luwah baét nyan. 4 Nibak bintéh beuton baét nyan na meuteumé ruhuéng-ruhuéng peuradeuen nyang luwah u dalam. 5 Ban sikeulileng bagian likot baét nyan, nibak bintéh beuton bagian luwa jih teupeugot teuma deungon bilek-bilek nyang meutingkat. Na lhée boh tingkat, nyang maséng-maséng manyang jih na 2,2 metée. 6 Bak tingkat nyang phon, luwah tieb-tieb kama jih 2,2 metée, bak tingkat nyang keu dua 2,7 metée dan nibak tingkat nyang keu lhée 3,1 metée. Beuton tingkat si umiyueb leubeh teubai nibak beuton nyang tingkat di ateueh, sampoe balok-balok bilek nyang teutamah nyan hase teuhubong deungon beuton Baét TUHAN deungon hana teupeuruhuéng bintéh beuton nyan. 7 Keu balok-balok nyan teuboh kayée ceumara Libanon. Pintoe kama-kama nyang teutamah di tingkat miyueb teuduek jih blaih u seulatan, dan keu tingkat dua ngon tingkat lhée na teuma reunyeuen pilin. Óh ka lheueh nyan Nabi Sulaiman laju geupasang langét-langét nibak baét nyan. Keunyan teuma gobnyan geupeuguna lom keu gaseue-gaseue dan papeuen jih nibak kayée ceumara Libanon. Seumantong Baét TUHAN nyan teungoh geu peugot, mubacut pih hana teudeungoe su palée nyang teuseukok keutak keutuk, meunan cit deungon su pato atawa peukakaih beuso nyang laén, sabab batée nyang teupeuguna keu teupeugot baét nyan ka teukeubah leubeh ilée bak watée mantong nibak tambang-tambang jih. Meunan kheueh Nabi Sulaiman geupeugot Baét TUHAN nyan sampoe seuleusoe. 11 Dan feureuman TUHAN ubak Nabi Sulaiman, 12 "Meunyoe gata ta-taát banmandum huköm dan peurintah Ulôn, Ulôn teuma Ulôn peubuet keugata peue nyang ka Ulôn peujanji nibak ureuëng syiek gata Nabi Daud. 13 Ulôn teuma tinggai didalam baét nyang gata peugot nyoe di teungoh-teungoh umat Ulôn bansa Israel. Ulôn hana teuma Lôn tinggai awaknyan." 14 Meunoe cara jih Nabi Sulaiman geupeuseuleusoe Baét TUHAN nyan: 15 Banmandum bintéh beuton dibagian dalam geulapek deungon kayée cemara Libanon, phon nibak aleue sampoe ubak langét-langét. Aleue jih teupeugot nibak kayée cemara biasa. 16 Didalam baét nyan, bagian u likot geupeugot cit kama deungon bintéh peumisah jih nibak kayée cemara cit, phon nibak aleue sampoe ubak langét-langét. Kama nyan geuboh nan Ruweueng Maha Suci; panyang ruweueng nyan na sikureueng metée. 17 Ruweueng nyang na dikeue Ruweueng Maha Suci nyan geupeunan teuma deungon Ruweueng Raya, dan panyang jih na 18 metée. 18 Bintéh beuton dibagian dalam bansaboh rumoh nyan geulapeh teuma deungon kayée cemara Libanon, sampoe batée-batée nyang na nibak bintéh beuton nyan meubacut pih hana leumah le. Lapesan nyan geuhias teuma deungon piasan nyang teu uke nibak boh labu dan gamba bungöng-bungöng nyang teungoh keumang. 19 Ruweueng Maha Suci nyang geupeugot didalam Baét TUHAN nyan geupeukhusos keu teumpat Peuto Peujanjian TUHAN. 20 Ruweueng nyan panyang jih, luwah dan manyang jih santeuet, sikureueng metée. Miseubah dikeue Ruweueng Maha Suci nyan geupeugot nibak bahan kayée cemara Libanon. Nibak babah pintoe rot teutamong u dalam ruweueng nyan geubinteueng teuma deungon ranté méuh. Banmandum bagian dalam Baét TUHAN nyan meunan cit deungon Ruweueng Maha Suci dan miseubah jih geuseupoh teuma deungon méuh aseuli. 23 Didalam Ruweueng Maha Suci nyan geukeubah teuma dua boh patong kerub nyang teupeugot nibak kayée zaiton, ban dua boh patong nyan manyang jih maséng-maséng na 4,4 metée; 24 ukoran dan bentuek jih saban. Maséng-maséng na dua boh sayeueb, tieb-tieb sayeueb nyan na 2,2 metée teuma panyang jih. Jiôh lamkawan dua ujong sayeueb maséng-maséng patong na 4,4 metée. 27 Ban dua boh patong nyan geukeubah meujandreng didalam Ruweueng Maha Suci sampoe siblah sayeueb nibak tieb-tieb patong nyan meureuntang tupéh ubak bintéh, dan sayeueb nyang laén sabe-sabe tupéh diteungoh-teungoh ruweueng nyan. 28 Ban dua boh patong kerub nyan geuseupoh cit deungon méuh. 29 Banmandum bintéh nyang na dibagian dalam Baét TUHAN geuhias deungon ukeran kerub-kerub, bak palem nyang teulukeh, dan bungöng-bungöng nyang teungoh keumang. 30 Aleue didalam ruweueng Baét TUHAN nyan banmandum geuseupoh deungon méuh. 31 Bak pintoe tamong u dalam Ruweueng Maha Suci geupasang teuma dua boh ôn pintoe nyang teupeugét nibak kayée zaiton. Nibak ambang pintoe di bagian ateueh meubantuek lingkong nyang tajam diteungoh-teungoh. 32 Ban dua boh ôn pintoenyan teuhiah teuma deungon ukeran kerub, bak palem dan bungöng-bungöng nyang teungoh keumang. Ôn pintoe, patong kerub dan ukeran bak-bak kayée palem, banmandum nyan geuhias deungon méuh. 33 Bak pintoe tamong u dalam ruweueng keue, na kheueh ruweueng raya, teupasang bingkée pintoe nyang teupeugét nibak kayée zaiton, hijih peuet sagoe panyang. 34 Meunan cit geupeugét dua boh ôn pintoe nibak kayée ceumara biasa, nyang maséng-maséng jeuet teulipat. 35 Nibak ôn-ôn pintoe nyang teuhias teuma deungon ukeran kerub, bak palem dan bungöng keumang. Banmandum nyang teu uke nyan teuseupoh deungon méuh. 36 Dikeue Baét TUHAN geupeugot teuma peulataran dalam. Peulataran nyan jikeulileng teuma lé bintéh beuton nyang meulapéh-lapéh: di ateueh tieb-tieb lhée lapéh batée, na saboh lapéh kayée ceumara Libanon. 37 Keunaleueng Baét TUHAN nyan geupasang nibak buleuen Ziw, na kheueh buleuen nyang keudua, bak thon nyang keu peuet dalam peumeurintahan Nabi Sulaiman. 38 Dan bak buleuen Bul, na kheueh buleuen nyang keu lapan, bak thon nyang keu siblaih dalam peumeurintahan gobnyan, barô kheueh seuleusoe Baét TUHAN nyan geupeugot lé Nabi Sulaiman, paih lagée nyang ka geureuncana. Treb jih teupeugot Baét TUHAN jipajoh watée na tujoh thon.

1 Raja-Raja 7

1 Nabi Sulaiman geupeugot cit meuligoe keu teumpat gobnyan. Meuligoe nyang teupeugot nyan jipajoh watée na lhée blaih thon. 2 Nibak meuligoe nyan Nabi Sulaiman geupeugot ruweueng nyang geuboh nan "Balée Uteuen Libanon". Ukoran jih: panyang 44 metée, luwah 22 metée, dan manyang 13,5 metée. Balée nyan na teuma lhée boh bareh taméh nyang teupeugot nibak kayée cemara Libanon; tieb saboh bareh na limong blaih boh taméh dan di ateueh jih geupasang gaseue-gaseue nibak kayée cemara Libanon. Seudangkan langét-langét jih meunan cit teupeugot nibak kayée nyang saban dan sampoe teutôb banmandum gaseue-gaseue nyan. 4 Bak bintéh wie dan uneuen balée nyan na teuma peuradeuen-peuradeuen: lhée boh bareh nibak bintéh nyang phon meuhadab keu deungon lhée boh bareh nibak bintéh nyang laén. Bingkée-bingkée pintoe dan peuradeuen jihnyan hijih peuet sagoe panyang. 6 Meunan cit Nabi Sulaiman geupeugot "Balée Pilar". Panyang balée nyan na 22 metée dan luwah jih 13,5 metée. Dikeue balée nyan na seuramoe nyang meupilar dan meureunyeuen. 7 Balée nyang laén na kheueh "Balée Tahta" nyang geupeunan cit deungon Balée Peungadelan. Baléenyoe phon nibak aleue sampoe gaseue-gaseue jih teupeugot nibak kayée cemara Libanon. Nibak balée nyoe kheueh Nabi Sulaiman geupeuputôh dumna peukara nyang jitamong ubak kantô peungadelan. 8 Teumpat tinggai Nabi Sulaiman geupeugot lagée geudong-geudong nyang laén dan meuteumé di peulataran nyang laén dilikot Balée Peungadelan. Keu peurumoh gobnyan, na kheueh putroe raja nibak nanggroe Meusé, lé Nabi Sulaiman geupeugot cit geudong nyang saban. 9 Banmandum bangunan nyan, jitamong cit peulataran nyang raya nyan, phon nibak sandi sampoe ubak bubong jih, geupeugot nibak batée nyang lagak-lagak. Batée-batéenyan geupeusiab nibak tambang-tambang batée, dan geukoih meunurot ukoran jih; bagian dalam dan bagian luwa jih geupeurata deungon gogajo. 10 Sandi nibak geudong nyan geupeugot nibak batée nyang rayeuk nyang meuhái yuem jih. Batée-batée nyan na nyang 3,5 metée panyang jih, dan na teuma nyang peuet metée. 11 Di ateueh jih nyan geupasang teuma batée-batée nyang laén meuhái yuem dan geukoih meunurot ukoran, laju geutob deungon kayée cemara Libanon. 12 Bintéh beuton peulataran meuligoe dan bintéh beuton peulataran Baét TUHAN dan meunan cit deungon beuton balée nyang na dibagian keue Baét TUHAN, maséng-maséng atranyan teupeuot nibak silapéh kayée cemara Libanon di ateueh tieb-tieb lhée lapéh batée. 13 Di Banda Tirus na sidroe ureuëng agam nyang nan jih Huram. Ureuëng nyan bit-bit that ahli dan meupeungalaman that lam hai jipeugot mubagoe macam barang peurunggu. Poe teumeureuhom ureuëng syiek gobnyan na kheueh ureuëng Tirus dan meunan cit keubit that carông lam hai jipeugot peue mantong nibak barang-barang peurunggu. Ma gobnyan nibak sukée Naftali. Raja Nabi Sulaiman ka geuyuejak ureuëng laén jijaktueng Huram mangat jitem teuka dan jeuet keu ulée banmandum buet-buet bak seumeugot barang peurunggu nyan. Dan teuka kheueh Huram dan jipeubuet laju peue nyang ka geupeusan lé Nabi Sulaiman nyan. 15 Huram laju geupeuget dua boh taméh peurunggu nyang maséng-maséng manyang jih na 8 metée, keulileng jih na 5,3 metée, dan teubai peurunggu nyan na 7,4 senti metée. Taméh-taméh nyan söh didalam jih. 16 Keu taméh-taméh nyan lé gobnyan laju geupeugot dua boh ulée taméh nibak peurunggu, maséng-maséng manyang jih na 2,2 metée 17 hijih meubungöng bakong dan manyang jih 1,8 metée. Tieb-tieb ulée taméh nyan geu hias teuma deungon dua boh bareh boh geulima nyang teupeuget nibak peurunggu. Banmandum nyan na dua reutoih boh geulima nibak tieb-tieb ulée taméh. Óh lheuehnyan Huram geupeugot teuma meunanyuem ranté nibak peurunggu dan laju geupeuduek atranyan di ateueh taméh-taméh nyan. Na tujoh boh meunanyuem ranté di ateueh tieb-tieb taméh, dan di ateueh meunanyuem ranté nyan na teuma saboh alas bulat bunda. Di ateueh alas bunda nyoe kheueh 21 ulée tieb-tieb taméh nyang meubantuek lagée bungöng bakong nyan geupasang nibak taméh-taméh nyan. Taméh-taméh nyan geukeubah dikeue pintoe tamong u Baét TUHAN -- saboh di siblaih u seulatan, dan nyang laén nyan di siblaih utara. Nyang di siblaih u seulatan geuboh nan Yakhin, dan nyang disiblaih utara geuboh nan Boas. Meunan kheueh cara jih Huram geupeuseuleusoe peuget taméh-taméh nyan. 23 Óh ka lheueh nyan Huram geupeugot lom saboh beujana peurunggu nyang bulat bunda, deungon ukoran jih na kheueh lagéenyoe: lhok jih 2,2 metée, garéh teungoh jih 4,4 metée dan silingka jih 13,2 metée. 24 Ban sikeulileng binéh luwa jih geuhias deungon dua bareh boh labu, nyang geucor meusigoe-sigoe deungon beujana nyan. 25 Beujana nyan geukeubah di ateueh rhueng dua blaih boh leumô peurunggu -- lhée boh meuhadab utara, lhée boh u seulatan, lhée boh ubarat dan lhée teuk u timu. 26 Teubai bejana nyan na 75 milimetée. Binéh jih lagée binéh cangkie nyang meulingkong uluwa nyang mireb lagée bungöng bakong nyang teungoh keumang. Beujana nyan hase jiteuen aso jih kira-kira 400.000 arée. 27 Meunan cit Huram geupeuget teuma siploh boh geuritan peurunggu, maséng-maséng panyang jih 1,8 metée, luwah jih 1,8 metée cit, dan manyang jih 1,3 metée. 28 Geuritan nyan teupeugot nibak papeuen-papeuen peuet sagoe nyang teupasang didalam bingkée. 29 Papeuen-papeuen nyan teuhias teuma deungon ukeran singa, leumô dan kerub. Nibak bingkée-bingkée jih -- di ateueh dan dimiyueb gamba-gamba singa dan leumô nyan -- teugantung teuma kayée meu uke bungöng meukarang. 30 Tieb-tieb geuritan nyan na teuma peuet boh ruda peurunggu deungon poros ruda jih nibak peurunggu cit. Nibak ban peuet boh sagoe geuritan nyan na teuma taméh ngon peuteuen baskom nyang teupeuget nibak peurunggu deungon hiasan keunarang bungöng disiblaih u luwa jih. 31 Dibagian ateueh ban peuet boh taméh sinumpang nyan teuhubong teuma lé saboh bingkée bulat keu ngon tumpang baskom jih. Taméh-taméh ngon peuteuen nyan meucula u ateueh nyang manyang jih na 44 seuntimetée di ateueh papeuen peuet sagoe nyan, dan 22 seuntimetée dimiyueb jih. Bak awai phon bingkée nyan na meu uke. 32 Manyang ruda-ruda jih na 66 seuntimetée; teuduek jih dimiyueb papeuen-papeuen. Poros ruda jih deungon geuritan jih na kheueh saboh bagian. 33 Ruda-ruda jih nyan saban deungon ruda geuritan prang; keulileng ruda, jari-jari jih, poros dan pusat jari-jari ruda jih nyan banmandum teupeuget nibak bahan peurunggu. 34 Na peuet boh taméh sinumpang nibak tieb-tieb sudut bagian miyueb geuritan nyan. Taméh-taméh nyan na kheueh meusaboh deungon geuritan nyan. 35 Ban keulileng bagian ateueh geuritan nyan na meubinéh nyang luwah jih 22 seuntimetée. Taméh sinumpang jih dan papeuen-papeuen banmandum nyan na kheueh meusaboh deungon geuritan nyan. 36 Taméh-taméh sinumpang dan papeuen-papeuen nyan teuhias deungon gamba kerub, singa dan bak kayée palem dipat mantong na teumpat nyang kosong keu nyan, meusajan deungon keunarang bungöng di seukeulileng nyan. 37 Meunan kheueh cara jih geuritan-geuritan nyan teupeugot. Banmandum saban rupa -- bantuek dan ukoran jih. 38 Meunan cit Huram geupeuget teuma siploh boh baskom raya, saboh baskom nyan keu saboh geuritan. Tieb saboh baskom nyan na garéh teungoh 1,8 metée dan jiteuen meunyoe teupaso ié 800 arée. 39 Dan Huram geukeubah teuma limong boh geuritan di seulatan Baét TUHAN, limong boh di siblaih si utara. Beujana peurunggu geukeubah teuma disudut siblaih teunggara. 40 Meunan cit di Huram geupeuget teuma kuali-kuali, seukob-seukob dan mangkok-mangkok. Óh ka lheueh nyan seuleusoe kheueh banmandum buet gobnyan keu Raja Nabi Sulaiman dan keu Baét TUHAN. Nyoe kheueh peuleungkapan nyang ka geupeugot nyan: Dua boh taméh raya Dua boh ulée taméh nyang meubantuek mangkok teukeubah di ateueh bandua boh taméh nyan Ranté nyang teumanyuem nyang teukeubah nibak tieb-tieb ulée taméh Peuet reutoih boh geulima peurunggu nyang teususon didalam dua boh banja disikeulileng ranté nyang teumanyuem nibak tieb-tieb ulée taméh Siploh boh geuritan Siploh boh baskom raya Beujana peurunggu Dua blaih boh leumô peurunggu keungon sinumpang beujana nyan Kuali-kuali, seukob-seukob dan mangkok-mangkok. Banmandum peuleungkapan keu Baét TUHAN nyan, nyang geupeugot lé Huram keu Raja Nabi Sulaiman, teupeugot nibak peurunggu dan teugeusok sampoe meukilat. 46 Raja laju geuyue peugot barang-barang nyan bak teumpat peungecoran logam lamkawan sukot dan Sartan di Pantôn Yordan. 47 Nabi Sulaiman hana geuyue timang barang peurunggu nyan, sabab jeumeulah jih lumpah that le. Jadi padubna brat barang nyan hana teuteupeue. 48 Meunan cit Raja Nabi Sulaiman nyan geuyue lom peugot peuleungkapan nyang laén nyang teupeugot nibak méuh keu Baét TUHAN. Nyoe kheueh peuleungkapan-peuleungkapan nyang teupeugot nyan: Miseubah Meuja keu teumpat keubah ruti nyang teupeuseumbah ubak Po teu Allah Siploh boh gaki panyöt nyang teukeubah dikeue Ruweueng Maha Suci, na kheueh limong boh di siblaih u seulatan dan limong boh disiblaih utara. Bungöng-bungöng Panyöt-panyöt Seupet-seupet Cangkie-cangkie Sulie ngon peulon panyöt Mangkok-mangkok Pireng-pireng keu dupa Pireng-pireng keuteumpat ngéue pui Engsel-engsel keu pintoe Ruweueng Maha Suci dan pintoe-pintoe luwa Baét TUHAN. 51 Óh ka lheueh seuleusoe geupeugot Baét TUHAN lé Raja Nabi Sulaiman nyan, laju geukeubah didalam Baét TUHAN nyan banmandum pirak, méuh, dan barang-barang nyang laén nyang ka geupeuseumah lé Nabi Daud ureuëng syiek gobyan ubak TUHAN.

1 Raja-Raja 8

1 Óh lheueh nibak nyan Nabi Sulaiman geuyue laju banmandum peumimpén sukée dan kawöm nibak bansa Israel geuyue jak ubak gobnyan di Yerusalem mangat jijak pinah Peuto Peujanjian TUHAN di Sion, banda Nabi Daud, u Baét TUHAN. 2 Dan jijak kheueh awaknyan banmandum bak Uroe Raya Jambo Ôn nibak buleuen Etanim. 3 Óh ka trok banmandum peumimpén nyan meusapat, lé teungku-teungku imeum laju geubeuôt Peuto Peujanjian nyan, 4 dan laju geuba u Baét TUHAN. Khimah TUHAN meunan cit banmandum peuleungkapan jih nyan pih geupinah laju u Baét TUHAN lé teungku-teungku imeum dan ureuëng Lewi. 5 Raja Nabi Sulaiman dan siluroih rakyat Israel laju meusapat dikeue Peuto Peujanjian TUHAN nyan dan laju geupeuseumah ubak TUHAN bubiri dan leumô nyang hana hase teukira jai jih. 6 Óh ka lheueh nyan lé teungku imeum laju geuba Peuto Peujanjian nyan u dalam Baét TUHAN dan geukeubah laju di miyueb patong-patong kerub nyang na dalam Ruweueng Maha suci. 7 Sayeueb patong-patong nyan meureuntang teutôb peutonyan dan kayée geunulam jih nyan. 8 Kayée geunulam nyan panyang that, sampoe ujong-ujong jih leumah teukalon phon dikeue Ruweueng Maha Suci. (Trok án uroenyoe kayée-kayée nyan mantong na disinan.) 9 Didalam Peuto Peujanjian nyan hana meusapeue pih seulaén batée. Batée-batée nyan ka geupeutamong u dalam peuto nyan lé Nabi Musa nyang geucok di Gunong Sinai, bak watée TUHAN geupeuna peujanjian deungon bansa Israel bak watée awaknyan lam meuneujak nibak nanggroe Meusé u nanggroe Kanaan. 10 Bak watée dumna teungku imeum geuteubiet nibak Baét TUHAN nyan hana teusangka-sangka baét nyan ka peunoh teutôb ngon awan. 11 Awan nyan muble-ble caya lé keu agongan keuhai teuka TUHAN sampoe bubena teungku imeum nyan hana hase le geutamong u dalam nyan keu geujak peubuet tugaih droe gobnyan. 12 Dan geumeudoá kheueh Nabi Sulaiman, geupeugah dalam doá nyan, "Droeneueh kheueh nyang puduek surya di ateueh langét, ya TUHAN. Teuma Droeneueh leubeh galak tinggai didalam awan nyang gulita. 13 Jinoenyoe ulôn peugot keu Droeneueh saboh geudong nyang meugah, keu teumpat tinggai Droeneueh siumu masa." 14 Óh ka lheueh geumeudoá, Raja Nabi sulaiman laju geupaleng ubak banmandum ba rakyat nyang teungoh teudong disinan, laju geulakée beureukat Po teu Allah keu awaknyan. 15 Geupeugah laju lé Nabi Sulaiman, "Masa ilée TUHAN ka neumeujanji ubak ureuëng syiek ulôn Nabi Daud, lagée nyoe neupeugah, 'Phon that Ulôn peuteubiet umat Ulôn Israel nibak nanggroe Meusé, bansaboh nanggroe Israel hana meusaboh banda pih nyang Ulôn piléh jeuet keu teumpat dipat harôh teupeugot rumoh keu teumpat iébadat ubak Ulôn. Teuma gata, hai Daud, Ulôn piléh mangat tapimpén umat Ulôn.' Teupujo kheueh TUHAN Allah Israel nyang ka geupeuteupat janji Geuhnyan!" 17 Lheueh nyan geupeugah lom lé Nabi Sulaiman lagéenyoe, "Ureuëng Syiek ulôn Nabi Daud ka gemeureuncana keu geupeudong baét teumpat iébadat ubak TUHAN Po teu Allah Israel. 18 Teuma TUHAN geupeugah ubak gobnyan, 'Meukeusut gata nyan jroh that. 19 Teuma, bukon gata, aneuëk gata kheueh nyang teuma peugot baét nyan.' 20 Jinoenyoe TUHAN ka geupeutrok janji Geuhnyan. Ulôn ka jeuet keu raja Israel keugeunantoe bapak ulôn, dan ulôn ka teuma ulôn peugot baét keuteumpat iébadat ubak TUHAN, Allah Israel. 21 Didalam Baét TUHAN nyan ka ulôn keubah teumpat keu Peuto Peujanjian nyang meuaso batée peujanjian TUHAN deungon indatu geutanyoe bak watée Gobnyan geuba awaknyan geupeuteubiet lam nanggroe Meusé." 22 Óh ka lheueh geupeugah nyan, dikeue rakyat nyang teuka keunan, Nabi Sulaiman laju geudong geumeuhadab ubak miseubah dan laju geubeuôt u ateueh bandua blaih jaroe gobnyan 23 dan geumeudoá, "TUHAN, Po teu Allah Israel! Dilangét atawa pih di ateueh bumoe hana nyang saban deungon Droeneueh ya TUHAN! Droeneueh neupeuteupat janji dan neutunyok gaséh seutia Droeneueh ubak umat Droeneueh nyang seutia dan taát deungon sipeunoh até keu Droeneueh. 24 Meunan cit Droeneueh ya TUHAN ka neupeutrok janji ubak ureuëng syiek ulôn Nabi Daud. Peue nyang ka TUHAN peujanji nyan nibak uroenyoe ka Droeneueh peubuet. 25 Dan meunan cit Droeneueh ka neumeujanji ubak bapak ulôn bahwa meunyoe keuturonan gobnyan biet-biet jitaát ubak Droeneueh lagée gobnyan, teuma sabe na nibak keuturonan gobnyan nyang jeuet keuraja ateueh bansa Israel. Jinoenyoe, ya TUHAN Allah Israel, neupeutrok kheueh teuma banmandum nyang ka TUHAN peujanji ubak bapak ulôn Nabi Daud hamba Droeneueh nyan. 27 Teuma, ya Allah, peu kheueh biet-biet Droeneueh neutem tinggai di ateueh bumoenyoe? Langét nyang luwah nyan pi hana seb teumpat keu Droeneueh, peu kheueh lom deungon rumoh iébadat nyang ulôn peugot nyoe! 28 Ya TUHAN, Allah ulôn, ulôn nyoe na kheueh hamba Droeneueh! Teuma neudeungoe kheueh kira jih ya TUHAN doá ulôn, dan neuteurimong kheueh doá ulôn nibak uroenyoe. 29 Seumoga uroe malam TUHAN peulara baét nyoe nyang ka TUHAN piléh sibagoe teumpat iébadat ubak Droeneueh. Meunan cit seumoga nibak teumpat tinggai Droeneueh di syeuruga TUHAN neudeungoe dan neupeu amphon ulôn meunan cit deungon umat Droeneueh pajan mantong kamoe jak meuhadab ubak baét nyoe dan kamoe meudoá ubak Droeneueh. 31 Meunyoe na sidroe-droe ureuëng jitudoh meusalah ateueh ureuëng laén dan laju jiba ubak miseubah Droeneueh didalam rumoh iébadat nyoe keu jijak meusumpah bahwa jihnyan hana meusalah, 32 ya, TUHAN, bah kheueh Droeneueh neudeungoe di syeuruga dan neupeuputôh peukara hamba Droeneueh nyan. Neuhuköm kheueh nyang meusalah nyang sadub deungon peue nyang jipeubuet dan neupeulheueh kheueh nyang hana meusalah. 33 Meunyoe umat Droeneueh Israel jipeutaloe lé musoh-musoh jih kareuna awaknyan meudesya, laju awaknyan jigisa ubak Droeneueh dan jihoreumat Droeneueh sibagoe TUHAN, óh lheueh nyan jijak ubak rumoh iébadat nyoe laju jisujut jilakée amphon ubak Droeneueh, 34 seumoga TUHAN neudeungoe awaknyan di syeuruga. Dan seumoga TUHAN neupeu amphon desya umat Droeneueh nyoe, dan neuba awaknyan neupeuwoe u nanggroe nyang ka TUHAN bri ubak indatu awaknyan. 35 Meunyoe umat Droeneueh meudesya ubak Droeneueh dan Droeneueh neuhuköm awaknyan deungon hana neupeutreun ujeuen laju awaknyan jimeutobat keu mandum desya-desya droe jih dan jihoreumat Droeneueh sibagoe TUHAN, óh lheuehnyan jimeuhadab u rumoh iébadat nyoe dan jimeudoá ubak Droeneueh, 36 bah kheueh nibak lam syeuruga TUHAN neudeungoe doá awaknyan. Dan neupeu amphon kheueh desya umat Droeneueh Israel dan raja awaknyan. Neupeurunoe kheueh awaknyan peue nyang beutôi. Óh ka lheueh nyan, ya TUHAN, neupeutreun kheueh ujeuen u nanggroe Droeneueh nyoe, nanggroe nyang TUHAN bri keu umat Droeneueh mangat jeuet keu hak milék jih siumu masa. 37 Meunyoe nanggroe nyoe teuka musém deuk atawa teuka bala peunyakét wabah, dan dumna sinaman habéh jipeurusak lé angén ngon keunong uroe nyang seu-uem, keunong hama atawa jipajoh lé daruet, atawa meunyoe umat Droeneueh nyoe jiprang lé musoh, atawa keunong peunyakét, 38 seumoga TUHAN neudeungoe doá awaknyan. Meunyoe na lamkawan umat Droeneueh nibak bansa Israel na nyang deungon seudeh até jimeudoá ubak Droeneueh sira jileueng paleuet ngon ulée jitangah sira jimeuhadab ubak rumoh iébadat nyoe, 39 bah kheueh TUHAN nyang tinggai teutab didalam syeuruga neudeungoe lom neupeu amphon dan neutulông awaknyan. Teuma Droeneueh kheueh ya TUHAN nyang neupasoe lam até manusia. Sabab nyan neupeusaneut kheueh soemantong ureuëng nyan nyang sisuai deungon peue nyang ka jipeubuet nyan, 40 mangat umat Droeneueh jitaát ubak Droeneueh sabe simantong awaknyan tinggai di nanggroe nyang ka TUHAN bri keu indatu kamoe. 41 Meunyoe na ureuëng aséng nibak nanggroe nyang jiôh jideungoe keuhai keubeusaran Droeneueh dan keuhai buet-buet nyang ajaéb nyang ka TUHAN peubuet keu umat Droeneueh, laju awaknyan jijak u rumoh iébadat nyoe keu jijak bri horeumat ubak Droeneueh dan jimeudoá ubak Droeneueh, 43 seumoga TUHAN nyang na tinggai didalam syeuruga TUHAN deungoe doá awaknyan dan neupeutrok doá jihnyan. Deungon na nyang lagéenyan teuma banmandum bansa nyang na di ateueh rhueng donya nyoe jituri TUHAN dan jitaát ubak TUHAN lagée umat Israel. Awaknyan teuma jiteupeue bahwa baét nyang ulôn peugot nyoe na kheueh teumpat keu meuiébadat ubak Droeneueh. 44 Meunyoe TUHAN neupeurintah umat Droeneueh nyoe keu jijak muprang jijak lawan musoh, dan dipat mantong kheueh awaknyan na tinggai, awaknyan jimeuhadab ubak banda nyang ka TUHAN piléh nyoe dan jimeudoá sira jimeuhadab u arah rumoh nyoe nyang ka ulôn peugot keu TUHAN, 45 seumoga didalam syeuruga TUHAN neudeungoe doá awaknyan, dan neupeumeunang keu awaknyan. 46 Meunyoe umat Droeneueh ka meudesya ubak Droeneueh -- sikeubit jih hana meusidroe pih nyang hana meudesya -- laju sabab lé TUHAN ka neubeungéh sampoe neupeubiyeu mantong awaknyan jipeutaloe lé musoh jih, dan laju jiba sibagoe tawanan ubak saboh nanggroe nyang jiôh atawa tô, 47 seumoga TUHAN neudeungoe doá awaknyan. Meunyoe nibak nanggroenyan awaknyan jitinggai desya-desya jih, dan jimeudoá ubak TUHAN sira jipeugah bahwa droe jih ka meudesya dan jipeubuet jeuhet, neudeungoe kheueh doá awaknyan, ya TUHAN. 48 Meunyoe di nanggroe nyan awaknyan deungon ikhlas dan biet-biet jitinggai desya-desya droe jih nyan, dan jimeudoá ubak TUHAN sira keue jih jimeuhadab ubak nanggroe nyoe nyang ka TUHAN bri ubak indatu kamoe, ukeue banda nyang ka TUHAN piléh dan rumoh iébadat nyang ka ulôn peugot keu TUHAN nyoe, 49 teuma nibak teumpat tinggai TUHAN di dalam syeuruga bah kheueh TUHAN neudeungoe doá awaknyan dan neugaséh keu awaknyan. 50 Neupeu amphon kheueh banmandum desya dan doraka awaknyan nyang ka jipeubuet teuhadab TUHAN, dan neupeujeuet kheueh bubena musoh awaknyan jipeusaneut awaknyan deungon jroh. 51 Awaknyan na kheueh umat TUHAN keudroe nyang ka TUHAN peuteubiet nibak nanggroe Meusé dinanggroe teumpat awaknyan jiseksa deungon jipeuázeb. 52 Seumoga Droeneueh, ya TUHAN Allah, sabe neungieng umat Droeneueh Israel meunan cit deungon raja jihnyan. Dan bah kheueh TUHAN neudeungoe doá awaknyan pajan mantong awaknyan jimeuhôi jimeulakée tulông ubak Droeneueh. 53 Droeneueh, ya TUHAN Po teu Allah, ka neupiléh awaknyan nibak mubagoe bansa mangat jeuet keu umat TUHAN keudroe, lagée nyang ka TUHAN peugah keudroe ateueh hamba droeneueh Nabi Musa, bak watée TUHAN neuba indatu kamoe TUHAN peuteubiet lam nanggroe Meusé." 54 Meunan kheueh cara jih Nabi Sulaiman geumeudoá sira geumeuteuôt dikeue miseubah dan deungon paleuet jaroe geuleueng u ateueh. Óh ka lheueh nyan gobnyan laju geudong 55 dan deungon su nyang meuleungkeng sira geudumpék geulakée beureukat Po teu Allah keu banmandum ureuëng nyang meusapat nyang na disinan, kheun gobnyan, 56 "Teupujo kheueh TUHAN nyang ka geubri keuteuntraman keu umat Gobnyan lagée nyang ka geupeujanji meulalu Nabi Musa hamba Gobnyan. Banmandum nyang gét-gét nyang ka geupeujanji ka geupeupeunoh. 57 Seumoga TUHAN Po teu Allah geutanyoe sabe na meusajan geutanyoe lagée Gobnyan ka lheueh meusajan deungon indatu geutanyoe. Seumoga Gobnyan hana geutinggai tanyoe. 58 Seumoga Gobnyan geupeujeuet geutanyoe sibagoe ureuëng-ureuëng nyang seutia ubak Gobnyan mangat geutanyoe sabe udeb meunurot nyang geukeuheundaki dan taát ubak banmandum huköm dan peurintah nyang ka geubri keu indatu geutanyoe. 59 Seumoga TUHAN, Po teu Allah geutanyoe, sabe geuingat ubak doá dan peumohonan nyang ka ulôn peusampoe nyoe ubak Gobnyan. Seumoga Gobnyan sabe geutunyok keumurahan Gobnyan ubak umat Israel dan raja jihnyan deungon cara geubri ubak awaknyan peue nyang awaknyan peureulée tieb-tieb uroe. 60 Deungon lagée nyan banmandum bansa di ateueh donya nyoe teuma jiteupeue bahwa TUHAN kheueh Poe teu Allah, hana TUHAN nyang laén. 61 Bah kheueh gatanyoe, umat Gobnyan sabe seutia ubak TUHAN, Po teu Allah geutanyoe dan taát ubak huköm-huköm dan peurintah-peurintah Gobnyan lagée nyang ka gata peubuet nibak uroenyoe." 62 Óh ka lheueh nyan Nabi Sulaiman dan banmandum ureuëng nyang na meugumpôi disinan laju geupeuseumah keureubeuen ubak TUHAN. 63 Keu keureubeuen peundamé Nabi Sulaiman keupeuseumah 22.000 boh leumô dan 120.000 boh bubiri. Meunan kheueh raja dan banmandum rakyat geupeuna upacara teureuseumi Baét TUHAN. 64 Uroenyan cit teuma Nabi Sulaiman geureuseumi bagian teungoh peulataran nyang na dikeue Baét TUHAN nyan. Óh ka lheueh nyan dipeulataran nyan gobnyan laju geupeuseumah keureubeuen nyang teutot, keureubeuen gandom dan gapah beulatang keu keureubeuen peudamé. Banmandum nyan geupeuseumah disinan sabab miseubah peurunggu nyan ubiet that keu banmandum nyang teupeuseumah nyan. 65 Di Baét TUHAN nyan Nabi Sulaiman dan banmandum umat Israel laju geupeuna peurayaan Jambo Ôn nyang treb jih tujoh uroe. Lumpah that jai jeumeulah ureuëng nyang meusapat disinan. Awaknyan teuka di jiôh na nibak Jalan Hamat di utara sampoe ubak bataih nanggroe Meusé di seulatan. 66 Dan bak uroe nyang keulapan lé Nabi Sulaiman laju geuyuewoe ureuëng ramé nyan. Awaknyan banmandum jipujo gobnyan laju jiwoe u rumoh droe maséng-maséng deungon até nyang peunoh geumbira, kareuna banmandum beureukat nyang ka geubri lé TUHAN ubak hamba Gobnyan Nabi Daud dan ubak bansa Israel umat Gobnyan.

1 Raja-Raja 9

1 Óh ka lheueh seuleusoe lé Nabi Sulaiman geupeudong Baét TUHAN meunan cit deungon meuligoe dan banmandum nyang teupeureulée keunyan, 2 TUHAN geupeuleumah droe lom ubak gobnyan lagée nyang ka teujadi di Gibeon. 3 TUHAN meufeureuman ubak gobnyan, "Doá gata ka Ulôn deungoe, dan deungon nyan rumoh nyang ka gata peudong nyan Ulôn kheun jinoenyoe ka jeuet keu teumpat khusos meuiébadat ubak Ulôn siumu masa. Ulôn sabe Lôn ngieng dan Ulôn jaga teumpatnyoe. 4 Meunyoe gata tameungabdi ubak Ulôn, deungon até nyang gleh dan jujoe lagée ureuëng syiek gata Nabi Daud, dan tataát ubak huköm-huköm dan peurintah Ulôn, 5 teuma Ulôn kupeutrok janji Ulôn ubak ureuëng syiek gata Nabi Daud bahwa aneuëk cucoe jihnyan treun meutreun sabe jimat peurintah ateueh Israel. 6 Teuma meunyoe gata atawa keuturonan gata jipeulikot Ulôn dan hana jitaát ubak huköm-huköm dan peurintah-peurintah Ulôn dan taseumah ilah-ilah nyang laén, 7 teuma Ulôn ku-use umat Ulôn Israel nibak nanggroe nyang ka Ulôn bri keu awaknyan. Meunan cit deungon rumoh nyoe teuma Ulôn tinggai nyang ka Ulôn peuteutab keu teumpat iébadat ubak Ulôn. Dipat nan-nan ureuëng Israel teuma jipeukém ngon jipeuhina. 8 Rumoh iébadatnyoe teuma jeuet keu saboh teumpat sinamon rumoh reuloih akhéjih soemantong ureuëng nyang jikalon teukeujot dan teumakot. Awaknyan teuma jipeugah, 'Pakon TUHAN geupeubuet lagéenyan ateueh rumoh nyoe?' 9 Lé ureuëng laén teuma jijaweueb, 'Kareuna awaknyan ka jitinggai TUHAN, Allah droe awaknyan, nyang geu intat indatu awaknyan jiteubiet nibak nanggroe Meusé. Awaknyan ka jiseumah ubak ilah-ilah nyang laén. Nyang kheueh jeuet TUHAN geupeutreun bala u ateueh droe awaknyan.' " 10 Nabi Sulaiman geupeudong Baét TUHAN dan Meuligoe raja nyan lam teumpo dua ploh thon. 11 Banmandum teupeugét nibak kayée ceumara Libanon dan kayée ceumara biasa meunan cit banmandum méuh nyang geupeureulée lé Nabi Sulaiman keu teupeugot nyan ka geubri lé Raja Hiram ubak gobnyan. Óh ka seuleusoe buet nyan geupeubuet, Raja Sulaiman laju geubri ubak Hiram dua ploh boh banda diwilayah Galilea. 12 Dan geujak kheueh Hiram geujak ngieng atranyan, teuma gobnyan hana galak deungon peue nyang ka geubri lé Nabi Sulaiman nyan. 13 Raja Hiram nyan laju geupeugah ubak Nabi Sulaiman, "Syedara ulôn, lagéenyoe kheueh banda-banda nyang neubri keu ulôn?" Nyang kheueh sabab jih daerah nyan sampoe án jinoe mantong geuhôi Kabul. 14 Leubeh nibak 4.000 kilo gram méuh nyang ka geukirém lé Hiram ubak Nabi Sulaiman. 15 Raja Nabi Sulaiman geupeuguna cara keureuja paksa keu teupeugot Baét TUHAN, meuligoe raja, bintéh beuton Yerusalem dan keu teuseubée tanoh diseulatan Baét TUHAN. Meunan cit gobnyan geupeuguna cara nyang saban keu geupeugot lom banda Hazor, Megido dan Gezer ( 16 Banda Gezer na kheueh banda nyang yohmasa ilée jiprang dan jipeutaloe lé raja Meusé, dan banmandum peunduduek banda nyan jipoh maté meunan cit deungon banda nyan jitot ngon apui sampoe hangoh. Óh lheueh nyan banda nyan laju geubri lé raja nanggroe Meusé keu putroe gobnyan sibagoe hadiah bak uroe meukawenan gobnyan deungon Nabi Sulaiman. 17 Dan Nabi Sulaiman kheueh nyang peuget lom banda nyan.) Deungon keureuja paksa cit teuma, Nabi Sulaiman geupeudong lom Bet-Horon-Hilir, 18 Baalat, Tamar di padang pasi Yehuda, 19 banda-banda teumpat cok beukai, meunan cit banda-banda keu pangkalan geuritan prang dan guda gobnyan. Banmandum reuncana peumbangunan di Yerusalem, Libanon dan siluroih wilayah keukuasaan gobnyan ka geulaksana. 20 Keu buet nyang teupaksa nyan Nabi Sulaiman laju geukrah ureuëng-ureuëng lam keuturonan Amori, Het, Feris, Hewi dan Yebus. Awaknyan na kheueh ureuëng-ureuëng keuturonan bansa Kanaan nyang hana hase jipoh habéh lé ureuëng Israel bak watée awaknyan jiduek bak nanggroenyan. Sampoe án uroenyoe keuturonan awaknyan mantong na teuma teutab jeuet keu namiet. 22 Ureuëng Israel hana geupeujeuet namiet lé Nabi Sulaiman; awaknyan geubri tugaih sibagoe tantra, peuwira, panglima, keumando geuritan prang, dan tantra pasokan meuguda. 23 Limong reutoih limong ploh droe peugawée geubri tugaih tanggong jaweueb ateueh ureuëng-ureuëng nyang jipeubuet keureuja paksa dalam meubagoe proyek peumbangunan Nabi Sulaiman. 24 Tanoh nyang na disiblaih seulatan Baét TUHAN laju geudo lé Nabi Sulaiman óh ka lheueh ureuëng bino gobnyan, na kheueh putroe raja nanggroe Meusé, geuminah nibak Banda Nabi Daud ubak meuligoe nyang ka geupeudong lé Nabi Sulaiman keu gobnyan. 25 Lhée thon sigoe Nabi Sulaiman geupeuseumah keureubeuen nyang teutot dan keureubeuen peudamé di ateueh miseubah nyang ka geupeudong nyan keu TUHAN. Meunan cit gobnyan geutot keumeunyan keu TUHAN. Meunan kheueh cara jih Nabi Sulaiman geupeuseuleusoe geupeugot Baét TUHAN. 26 Keu armada angkatan laôt gobnyan, Nabi Sulaiman laju geupeugot kapai-kapai di Ezion-Geber, tô ngon Elot dipanté Lhok Akaba, lam wilayah Edom. 27 Raja Hiram laju geukirém bubena aneuk kapai gobnyan nyang ka na peungalaman keu jijak meulayeue meusajan-sajan deungon awak kapai Nabi Sulaiman. 28 Ka lheueh awaknyan geuyue jak u nanggroe Ofir keu jijakcok 14.000 kilo gram méuh dan jiba atranyan ubak Nabi Sulaiman.

1 Raja-Raja 10

1 Ratu nanggroe Syeba geudeungoe Nabi Sulaiman meusyeuhu lumpah na. Teuma gobnyan laju geujak u Yerusalem keu geujak ujoe Nabi Sulaiman deungon soai-soai nyang sulet. 2 Ratu geujak deungon geuba sajan peungiréng nyang jai, dan unta nyang peunoh deungon wase reumpah-reumpah, batée peumata, meunan cit deungon méuh nyang lumpah jai. Watée gobnyan ka meurumpok ngon Nabi Sulaiman, lé ratu nyan laju geuteumanyong meubagoe hai nyang hase geupike. 3 Banmandum nyang jitanyong nyan hase geujaweueb lé Nabi Sulaiman, hana sapeuepi nyang payah nibak gobnyan. 4 Ratu nyan geukalon keudroe padub na áréh jih Nabi Sulaiman nyan. Meunan cit geukalon meuligoe nyang geupeudong lé Nabi Sulaiman, 5 cara jimeubuet peugawée-peugawée meuligoe, dan peukayan dinah meunan cit deungon rumoh-rumoh awaknyan. Meunan cit jikalon keudroe peunajoh dan ié jieb nyang teuhidang keu gobnyan, cara peulayan-peulayan nyan peutimang khanuri, dan keureubeuen-keureubeuen nyang geupeuseumah lé Nabi Sulaiman di Baét TUHAN. Banmandum nyang geukalon lé ratu nanggroe Syeba nyan teuhireuen-hireuen dan teuceungang luwa biasa. 6 Teuma geupeugah kheueh lé ratu nyan ubak Nabi Sulaiman, "Peue-peue nyang ka ulôn deungoe di nanggroe lôn keuhai Amphon dan keubijaksanaan Amphon beutôi banmandum! 7 Yoh masa ilée hana lôn patéh, teuma óh watée ka lôn ngieng keudroe ngon mata ulée lôn barô kheueh ulôn yakén ngon peucaya. Nyang sikeubit jih banmandum nyang ulôn deungon nyan nyang sibeuna jih hana meusiteungoh nyang ka ulôn ngieng bak saát nyoe. Deuh nyata bahwa bah kheueh keukayaan Amphon meunan cit deungon keubijaksanaan droeneueh leubeh le nibak nyang ulôn deungoe. 8 Meu-untông that-that peurumoh-peurumoh Amphon! Dan lumpah that bahgia banmandum peugawée-peugawée nyang jimeubuet keu Amphon sampoe mandum jeuet dideungoe nibak Amphon keudroe peue-peue mantong haba nyang bijaksana! 9 Teupujo kheueh TUHAN, Allah Amphon! Deungon teubaiát Amphon jeuet keu raja nanggroe Israel, nyan tanda jih TUHAN galak that keu Amphon. Hana habéh-habéh Gobnyan geugaséh keu bansa Israel; nyang kheueh sabab jih Gobnyan geubaiát Amphon jeuet keuraja awaknyan, mangat Amphon jeuet neupeudong huköm dan keuadelan." 10 Óh lheueh nyan ratu nanggroe Syeba nyan laju geuseurah ubak Nabi Sulaiman banmandum peue-peue nyang ka geuba, na kheueh leubeh 4.000 kilogram méuh dan jeumeulah nyang jai lagée batée peumata, meunan cit deungon mandum reumpah-reumpah nyang geuba geujok banmandum. Hántom nyang ka Nabi Sulaiman geuteurimong hadiah dubnyan jai lagée nyang ka geubri lé ratu nanggroe Syeba nyan. ( 11 Kapai-kapai Hiram nyang ba méuh keu Nabi Sulaiman nibak Ofir meunan cit na jiba jeumeulah nyan jai batée peumata dan kayée ceundana. 12 Kayée nyan geupeuguna lé Nabi Sulaiman keu geupeugét seuramoe-seuramoe nibak Baét TUHAN dan bak meuligoe raja; meunan cit keu geupeugét keucapi dan gambus keu ureuëng meunyanyoe. Kayée nyan na kheueh kayée ceundana nyang paleng gét nyang teuba u nanggroe Israel; hántom na le ureuëng jikalon kayée gét nyang lagée nyan.) 13 Seulaén hadiah-hadiah nyang ka geubri ubak Nabi Sulaiman nyan, geubri teuma lé gobnyan ubak ratu nibak nanggroe Syeba nyan peue nyang mantong geulakée. Óh lheueh nyan geuwoe kheueh ratu nyan ngon banmandum peungiréng gobnyan u nanggroe droe. 14 Tieb-tieb thon Nabi Sulaiman geuteurimong rab na 23.000 kilogram méuh, 15 gohlom teu itong laba-laba nibak meuniaga, meunan cit cukée-cukée bak saudaga-saudaga, raja-raja Arab dan gubunur-gubunur Israel. 16 Nabi Sulaiman geupeugét teuma na 200 boh peurisai rayeuk nyang teupeugét nibak méuh teumpeuen. Méuh nyang teupeuguna keu peurisai nyan na leubeh kureueng tujoh kilogram. 17 Meunan cit na teuma geupeugét 300 boh peurisai méuh nyang leubeh ubit. Méuh nyang teupeuguna keu tieb-tieb peurisai ubit nyan na leubeh kureueng dua kilogram, banmandum nyan méuh nyang teupeugét bak teumpeuen méuh. Mandum peurisai nyan geukeubah bak saboh balée nyang geuboh nan Balée Uteuen Libanon. 18 Dan na teuma geupeugét saboh kurusi keurajeuen nyang teulapéh ngon gadeng dan teuhias ngon méuh murni. 19 Kurusi nyan meujaroe, dan blaih wie ngon uneuen nyan na teuma patong nyang meu ulée singa. Siblaih ulikot kurusi nyan na patong meu ulée leumô. Kurusi nyan na teuma nam neuk reunyeuen. 20 Bak ujong wie dan ujong uneuen tieb-tieb aneuk reunyeuen nyan na teuma patong singa -- banmandum nyan na dua blaih boh. Hántom na kurusi keurajeuen nyang lagée nyan lam keurajeuen pat mantong. 21 Banmandum peukakaih teumpat jieb ié Nabi Sulaiman nyan teupeugét nibak méuh, dan banmandum peukakaih nyang teukeubah bak Balée Uteuen Libanon pih teupeugét nibak méuh murni. Hana nyang teupeugét nibak pirak, sabab bak jameuen Nabi Sulaiman pirak hana meuyuem. 22 Nabi Sulaiman na teuma kapai nyang raya nyang meulayeue meusajan ngon kapai-kapai Raja Hiram. Lhée thon sigoe kapai-kapai nyan jigisa jiba méuh, pirak, gadeng, buekréh dan cicém merak. 23 Nabi Sulaiman leubeh kaya dan leubeh bijaksana nibak raja toh mantong nyang na lam donya nyoe. 24 Banmandum ureuëng nyang na bansigom donya jiuseuha beu meuteumé meurumpok ngon Nabi Sulaiman keu jijak deungoe peungajaran nyang bijaksana nyang geubri lé Po teu Allah ubak gobnyan. 25 Awaknyan maséng-maséng teuka sira jiba hadiah keu Nabi Sulaiman. Awaknyan jibri barang-barang pirak, méuh, peukayan, peudeueng, reumpah-reumpah, guda dan bagal. Meunan kheueh tieb-tieb thon. 26 Meunan cit Nabi Sulaiman geupeudong angkatan prang atranyan na kheueh 1.400 geuritan prang dan 12.000 sidadu meuguda. Siladum geubri tugaih di Yerusalem dan siladum teuk geubri tugaih di meubagoe teumpat bak banda laén. 27 Bak jameuen keurajeuen Nabi Sulaiman, di Yerusalem pirak na kheueh lagée barang biasa saban ngon batée, dan kayée ceumara Libanon meulimpah ruwah saban cit lagée kayée ara biasa. 28 Meulalu raja-raja nyang mat kuasa, guda geupeuteuka nibak nanggroe Meusé dan Kilikia, 29 dan geuritan-geutiran prang geupeuteuka nibak nanggroe Meusé. Yum saboh guda 150 péng pirak, dan yum saboh geuritan prang 600 péng pirak. Óh lheueh nyan meulalu peungusaha-peungusa nyan cit teuma guda-guda dan geuritan-geuritan nyan geupeubloe lom ubak raja-raja Het dan raja-raja Siria.

1 Raja-Raja 11

1 Nabi Sulaiman le that geucinta ureuëng inong bansa aséng. Seulaén putroe raja nanggroe Meusé, Nabi Sulaiman geumeukawen cit deungon ureuëng inong Het, Moab, Amon, Edom dan Sidon. 2 TUHAN ka geupeurintah bahwa ureuëng Israel hana jeuet jimeukawen meujampu deungon bansa-bansa nyang laén, sabab lé awaknyan di ureuëng Israel bak saboh watée jiseumah ubak ilah-ilah nyang laén. Bahpi lagéenyan, Nabi Sulaiman teutab cit geumeukawen deungon ureuëng inong bansa laén. 3 Na 700 droe putroe ureuëng bansawan nyang geumeukawen lé Nabi Sulaiman, dan na teuma 300 droe gundek gobnyan. Kareuna peurumoh-peurumoh geuh nyan kheueh nyang teupeusabab Nabi Sulaiman geutinggai Po teu Allah, 4 akhé jih bak watée gobnyan ka tuha awaknyan meuhase jibujuk jiyue seumah ilah-ilah nyang laén. Nabi Daud, ureuëng syiek Nabi Sulaiman, gobnyan seutia ubak TUHAN Po teu Allah, teuma Nabi Sulaiman hana geuturot lagée ureuëng syiek geuh nyan. 5 Nabi Sulaiman geuseumah Asytoret, dewi bansa Sidon, dan meunan cit Molokh dewa nyang luat that nyang jiseumah lé bansa Amon. 6 Inan kheueh Nabi Sulaiman ka meudesya ubak TUHAN. Nabi Daud, bapak Nabi Sulaiman geuseutôt TUHAN deungon sipeunoh até, teuma Nabi Sulaiman hana geupeubuet nyang lagéenyan. 7 Di ateueh gunong siblaih u timu Yerusalem, Nabi Sulaiman laju geupeudong saboh teumpat seumah keu Kamos, dewa ureuëng Moab, dan keu Molokh, dewa ureuëng Amon -- ban dua nyan na kheueh dewa nyang lumpah luawat. 8 Meunan cit di Nabi Sulaiman geupeudong teumpat-teumpat dipat peurumoh gobnyan nibak bansa aséng hase jitot keumeunyan, dan jipeuseumah keureubeuen keu dewa-dewa awaknyan keudroe. 9 Ka dua goe, TUHAN Allah Israel geupeuleumah droe ubak Nabi Sulaiman dan geupeuingat gobnyan bahwa gobnyan hana jeuet geuseumah ilah nyang laén, teuma Nabi Sulaiman teutab hana geutaát ubak peue nyang ka geupeugah lé TUHAN nyan. Gobnyan pi laju geutinggai TUHAN, akhé jih TUHAN beungéh keu gobnyan. 11 Feureuman TUHAN, "Kareuna deungon sadar gata taiengkeue janji gata deungon Ulôn dan hana tataát ubak peurintah-peurintah Ulôn, teuma Ulôn Lôn tarek keurajeuen nyan nibak jaroe gata, dan Ulôn bri keu sidroe lamkawan peugawée gata. 12 Bahpi meunan, deumi ureuëng syiek gata Nabi Daud, hainyan hana Ulôn peubuet simantong gata udeb. Bak watée keurajeuen jimat lé aneuëk gata singoh, barô kheueh hainyan Ulôn peubuet. 13 Teuma bukon banmandum keurajeuen nyan Ulôn cok nibak nyan. Deumi hamba Ulôn Nabi Daud, dan deumi Yerusalem nyang ka Ulôn peujeuet keu banda Ulôn nyan, Ulôn teuma Lôn tinggai saboh sukée keu aneuëk gata." 14 Teuma TUHAN laju geupeujeuet Hadad, sidroe lamkawan keuturonan raja Edom, geupeujeuet keumusoh deungon Nabi Sulaiman. 15 Treb sigohlom nyan, óh ka lheueh Nabi Daud geupeutaklhok Edom, Yoab, panglima angkatan prang Nabi Daud, jijak u Edom keu jijak peukubu ureuëng-ureuëng gobnyan nyang maté dimideuen prang. Nam buleuen treb jih gobnyan dan aneuëk buah gobnyan tinggai di Edom. Dan lam watée nyang nam buleuen nyan gobnyan ka habéh geupoh dumna ureuëng agam nyang na disinan. 17 Teuma, Hadad nyang yohmasanyan mantong that muda, ka jiplueng u nanggroe Meusé meusigoe deungon napadub droe Edom nyang laén, peulayan-peulayan bapak gobnyan. 18 Awaknyan beurangkat nibak Midian, laju geujak u Paran. Disinan na meupadub droe nyang laén jipeusaho droe teuma deungon awaknyan, laju meusigoe sampoe u Meusé jijak meurumpok ngon raja Meusé. Raja Meusé nyan laju geubri rumoh meunan cit tanoh keuteumpat tinggai Hadad meunan cit deungon jaminan udeb. 19 Dan Hadad pih ka jeuet keurakan jroh raja, sampoe raja laju geujok paruih geuh keudroe, na kheueh adoe peureumaisuri Tahpenes mangat jeuet keu ureuëng binoe gobnyan. 20 Óh lheuehnyan peurumoh Hadad nyan laju jipeulahé sidroe aneuëk agam nyang jiboh nan Genubat. Aneuëknyoe jipeurayeuk lé peureumaisuri keudroe dan tinggai dimeuligoe meusajan deungon aneuëk-aneuëk agam raja nyang laén. 21 Bak watée Hadad geuteurimong haba bahwa Nabi Daud ka meuninggai donya, dan Yoab, panglima angkatan prang Israel meunan cit ka teuma meuninggai donya, geupeugah kheueh lé Hadad ubak raja Meusé, "Neupeu idhin kheueh ulôn keuneuk gisa u tanoh ié ulôn." 22 "Pakon?" geutanyong lé raja. "Peu kheueh gata na kureueng sapeue-peue disinoe, sampoe gata ta keuneuk woe u nanggroe gata?" "Ulôn hana kureueng meusapeue pih," geuseuôt lé Hadad, "teuma neupeubiyeu kheueh ulôn meujakwoe." Dan geuwoe kheueh Hadad u tanoh ié gobnyan. 23 Po teu Allah geupeugot teuma si Rezon, aneuëk Elyada, geupeumusoh deungon Nabi Sulaiman. Rezon na kheueh namiet nyang jipeuplueng droe nibak teungku di teumpat jih meukeureuja, nan teungku jih nyan na kheueh Raja Hadadezer di nanggroe Zoba. 24 Nabi Daud ka lheueh geupeutaloe Raja Hadadezer nyoe dan geupoh maté bubena rakan-rakan Hadadezer nibak Siria. Bak watée nyan Rezon jipeuplueng droe nibak Hadadezer dan laju jipeusapat bubena ureuëng jeuhet nyang laén óh lheueh nyan jihpi jeuet keu ulée geureumbolan. Jihnyan dan aneuëk buah jih laju jijak u Damsyik dan laju jitinggai di banda nyan. Disinan lé aneuëk buah droe jih laju jiangkat jeuet keuraja Siria. 25 Saban cit lagée Hadad, Raja Rezon pih geumeumusoh deungon Israel watée mantong udeb Nabi Sulaiman, dan laju jipeuna karu di nanggroe nyan. 26 Ureuëng laén nyang meubeurontak jilawan Nabi Sulaiman na kheueh sidroe lamkawan peugawée gobnyan nyang nan jih Yerobeam. Ureuëng nyan aneuëk Nebat nibak Zereda di Efraim. Ma jihnyan ka balée, nyang nan jih Zerua. 27 Nyang teukheun teuma nyoe na kheueh kisah keuhai Yerobeam nyang meubeurontak. Bak watée tanoh nyang disiblaih u seulatan Baét TUHAN teungoh teuseubée, dan bintéh beuton banda teungoh teupeuget, 28 dan si Yerobeam na cit teungoh meukeureuja disinan. Bak watée Nabi Sulaiman geukalon bahwa Yerobeam carông ngon jumot, gobnyan laju geubri keu ureuëng nyan tanggong jaweueb mangat jiawasi ureuëng nyang meukeureuja paksa di wilayah sukée Manasye dan Efraim. 29 Bak siuroe Yerobeam geuteubiet nibak Yerusalem. Nibak teungoh rot dipadang gobnyan geujak meurumpok lé Nabi Ahia nibak Silo nyang bak watée nyan nabi nyan geungui bajée jubah nyang barô. 30 Laju Ahia geusuit bajée jubah geuh nyan, dan geupriek-priek sampoe jeuet dua blaih krak. 31 Óh lheueh nyan geupeugah kheueh lé gobnyan ubak Yerobeam, "Tacok kheueh laju siploh krak keu droe gata, sabab TUHAN, Po teu Allah Israel, geupeugah meunoe ubak gata, 'Ulôn teuma Lôn reubot keurajeuen nyoe nibak Nabi Sulaiman, dan Ulôn bri siploh boh sukée keu gata. 32 Saboh sukée teuma teutab nibak Nabi Sulaiman, deumi hamba Ulôn Nabi Daud, dan deumi Yerusalem, nyang ka Ulôn piléh nibak banmandum nanggroe Israel jeuet keu banda Ulôn. 33 Ulôn teuma Lôn peubuet hainyan sabab Nabi Sulaiman ka jitinggai Ulôn dan jiseumah dewa-dewa, dewa nyang jiseumah nyan na kheueh: Asytoret, dewi bansa Sidon; Kamos, dewa bansa Moab; dan Milkom, dewa bansa Amon. Nabi Sulaiman hana jiturot lagée Ulôn kheun. Jihnyan bukon lagée ureuëng syiek jih Nabi Daud nyang taát ubak Ulôn dan jipeubuet banmandum peurintah-peurintah Ulôn. 34 Bahpi meunan Ulôn hana teuma Lôn cok banmandum keurajeuen nyan nibak droe jih nyan. Jihnyan teutab Ulôn bri kuasa simantong jih udeb. Hainyan Ulôn peubuet deumi hamba Ulôn Nabi Daud, nyang ka Ulôn piléh dan jitaát ubak banmandum huköm-huköm Ulôn dan peurintah-peurintah Ulôn. 35 Keurajeuen nyoe teuma Ulôn cok nibak aneuëk agam Nabi Sulaiman dan siploh boh sukée teuma Ulôn bri keu gata. 36 Teuma saboh sukée Ulôn peubiyeu nibak jihnyan, mangat jeuet sabena ureuëng nibak hamba Ulôn Nabi Daud nyang mat peurintah keu Ulôn di Yerusalem, banda nyang ka Ulôn piléh sibagoe teumpat iébadat ubak Ulôn. 37 Dan gata, Yerobeam, teuma Ulôn peujeuet keuraja Israel dan Ulôn bri idhin gata peurintah banmandum daerah nyang gata galak. 38 Meunyoe gata, lagée hamba Ulôn Nabi Daud, taát sipeunoh até ubak Ulôn dan udeb meunurot huköm-huköm Ulôn, dan gata peumangat até Ulôn deungon cara tapeubuet banmandum nyang Ulôn peurintah bak gata, teuma Ulôn teutab na sabe meusajan gata. Ulôn teuma Lôn peujeuet gata raja di Israel. Ulôn Lôn jamin bahwa keuturonan gata teuma jeuet keuraja di Israel keugeunantoe gata, saban cit lagée nyang ka Ulôn peubuet keu Nabi Daud. 39 Sabab Nabi Sulaiman ka meudesya, Ulôn teuma Ulôn huköm keuturonan Nabi Daud, teuma bukon siumu masa.' " 40 Bak watée habanyan sampoe ubak Nabi Sulaiman, gobnyan geu useuha geukeuneuk poh maté Yerobeam. Teuma Yerobeam laju geuplueng ubak Raja Sisak di nanggroe Meusé, dan laju geutinggai disinan sampoe Nabi Sulaiman meuninggai donya. 41 Kisah nyang laén keuhai Nabi Sulaiman, meunan cit keuhai banmandum nyang ka geupeubuet nyan dan keuhai iéleumé peungeutahuan ka teutuléh lam kitab Riwayat Udeb Nabi Sulaiman. 42 Peuet ploh thon treb jih Nabi Sulaiman geumat peurintah di Yerusalem ateueh banmandum nanggroe Israel. 43 Óh lheuehnyan gobnyan pih meuninggai donya dan laju geupeukubu di Banda Nabi Daud. Dan laju Rehabeam aneuëk agam gobnyan jeuet keuraja keugeunantoe gobnyan.

1 Raja-Raja 12

1 Rehabeam laju geujak u Sikhem, sabab banmandum rakyat Israel dibagian utara ka meugumpôi disinan jikeuneuk baiát gobnyan jeuet keuraja. 2 Bak watée nyan Yerobeam aneuëk Nebat mantong na di nanggroe Meusé sabab geupeuplueng droe nibak Nabi Sulaiman. Bak watée gobnyan geudeungoe keuhai Rehabeam, gobnyan laju geugisa u nanggroe Israel. 3 Rakyat dibagian utara jiundang Yerobeam, laju awaknyan meusigoe-sigoe jijak meuhadab ubak Rehabeam. Jipeugah lé awaknyan, 4 "Nabi Sulaiman ureuëng syiek Teungku Amphon ka geubri beuban nyang paleng geuhon u ateueh kamoe. Jinoenyoe meunyoe Teungku Amphon meuheuet keu beuban nyan dan neupeukureueng deurita kamoe, kamoe teuma meungabdi ubak teungku Amphon." 5 Geuseuôt lé Rehabeam, "Ulôn pike-pike ilée. Tajak kheueh keunoe lhée uroe teuk." Teuma jijakwoe kheueh banmandum ureuëng nyan. 6 Laju Rehabeam geulakée naseuhat ubak ureuëng-ureuëng patot nyang ka tuha-tuha nyang ka lheueh jeuet keu peunaseuhat Nabi Sulaiman, ureuëng syiek Rehabeam. "Pakriban ulôn harôh ulôn jaweueb keu ureuëng nyan?" geutanyong lé Rehabeam, "Peu naseuhat droeneueh nyoe keu ulôn?" 7 Awaknyan jijaweueb, "Meunyoe Teungku Amphon bit-bit na niet keuneuk meungabdi keu rakyat, neupeutrok kheueh peue nyang ka jilakée lé awaknyan, teuma awaknyan jimeungabdi ubak Teungku Amphon siumu masa." 8 Teuma naseuhat ureuëng-ureuëng tuha nyan hana geupako lé Rehabeam. Teuma di gobnyan laju geujak ubak ureuëng-ureuëng muda nyang santeuet umu deungon gobnyan dan nyang jinoenyoe jai that nyang bantu gobnyan. 9 Ubak awaknyan gobnyan geutanyong, "Peue naseuhat gatanyoe keu ulôn mangat lôn jaweueb rakyat nyang jilakée ulôn mangat hase ulôn peuphui beuban awaknyan?" 10 Awaknyan jijaweueb, "Meunoe kheueh nyang sigét jih Teungku Amphon peugah ubak awaknyan, 'Sileumoh-leumoh jih ulôn, ulôn mantong leubeh teuga nibak ayah lôn!' 11 Bapak ulôn geupeuseuôn beuban nyang keubit geuhon u ateueh baho gata, teuma ulôn nyang leubeh brat lom u ateueh gata. Gobnyan geuseunuét gatanyoe deungon peunyunuét, teuma ulôn lôn seunuét gata deungon peunyunuét nyang meuduro beuso!" 12 Lhée uroe teuma óh lheueh nyan Yerobeam dan banmandum ureuëng nyan jigisa lom jijak meuhadab ubak Raja Rehabeam, lagée nyang ka geupeurintah nyan. 13 Jiôh that meulawan deungon peue nyang ka geupeuruno lé ureuëng nyan, rakyat nyang teuka ubak gobnyan laju geusapa deungon gasa. 14 Lagée peue nyang ka jipeurunoe lé ureuëng-ureuëng muda, gobnyan geupeugah, "Bapak ulôn geupeuseuôn beuban ateueh gata nyang lumpah geuhon, teuma diulôn lôn peugeuhon leubeh brat lom beuban nyan. Meunan cit gobnyan geuseunuét gatanyoe deungon peunyunuét, teuma di ulôn lôn seunuét gatanyoe deungon peunyunuét nyang meuduro beuso!" 15 Peue nyang jilakée rakyat nyan hana geupako. Teuma nyan kheueh nyang geulakée lé TUHAN. Peue nyang ka geupeugah lé TUHAN meulalu Nabi Ahia di Silo keuhai Yerobeam aneuëk Nebat nyan harôh teujadi. 16 Bak watée rakyat jikalon bahwa raja hana geutem deungoe su rakyat geuh, awaknyan laju jitawök sira jikuk, "Hana peu tapako keu Nabi Daud dan keuturonan gobnyan! Awaknyan hántom na jipeubuet sapeue keu geutanyoe. Rakyat Israel, bohjak geutanyoe tawoe! Bah disinan Rehabeam nyan jiuroih droe jih keudroe!" Dan jijakwoe kheueh laju bubena rakyat Israel, 17 dan Rehabeam jeuet keuraja teuma ateueh wilayah Yehuda mantong. 18 Bahpi meunan Raja Rehabeam mantong cit geuyue Adoniram, sidroe lamkawan mando keureuja paksa, geuyue jak peuteunang rakyat. Teuma dirakyat laju jirhom Adonia nyan ngon aneuk batée sampoe maté. Ban geukalon hainyan Rehabeam bagaih-bagaih geujak ék u ateueh geuritan gobnyan, laju geupeuplueng droe u Yerusalem. 19 Phon saát nyan rakyat dibagian utara keurajeuen Israel jibeurontak ubak raja keuturonan Nabi Daud. 20 Bak watée jideungoe lé banmandum rakyat Israel bahwa Yerobeam ka geugisa nibak nanggroe Meusé, di rakyatnyan laju jiundang gobnyan ubak saboh teumpat meurokpakat laju jibaiát gobnyan jeuet keuraja Israel. Teuma rakyat nibak sukée Yehuda mantong nyang teutab seutia ubak keuturonan Nabi Daud. 21 Bak watée Raja Rehabeam ka sampoe u Yerusalem, laju gobnyan geupeusapat 180.000 droe tantra nyang teupiléh nibak sukée Yehuda dan Benyamin mangat jijak prang ureuëng Israel dan geupeupuléh keukuasaan gobnyan ateueh sukée-sukée bagian utara Israel. 22 Teuma Po teu Allah geuyue Nabi Semaya 23 mangat geujak peusampoe habanyoe ubak Rehabeam, dan ubak mandum sukée Yehuda dan Benyamin, 24 "Bék kheueh taprang syedara-syedara gata ureuëng Israel. Tawoe kheueh! Peue nyang ka teujadi nyan na kheueh meulakée Ulôn." Teuma awaknyan banmandum jiturot peurintah TUHAN, laju jijakwoe kheueh u rumoh jih maséng-maséng. 25 Óh ka jeuet keuraja Israel, Yerobeam laju geupeukong banda Sikhem didaerah meugunong-gunong Efraim, laju gobnyan tinggai disinan sikeujab. Óh lheuehnyan gobnyan geujaklom nibak teumpat nyan dan geupeukong teuma banda Pnuel. 26 Gobnyan geupike meunoe didalam até geuh, "Meunyoe rakyat teutab jijak u Yerusalem keu jijak peuseumah keureubeuen di Baét TUHAN lagée nyang ka jipeubuet lé awaknyan nibak saátnyoe, awaknyan teuma jigisalom jidong blaih Rehabeam, raja Yehuda, laju jipoh maté ulôn nyoe." 28 Óh ka lheueh geupeutimong hainyan, gobnyan laju geupeuget dua boh patong leumô nibak méuh, dan geupeugah laju ubak rakyat gobnyan, "Hai bansa Israel! Ka lumpah that treb gatanyoe tajak u Yerusalem keu tajak meuiébadat. Jinoenyoe, nyoe kheueh ilah-ilah gata nyang ka jipeuteubiet gata nibak nanggroe Meusé!" 29 Laju Yerobeam geukeubah saboh nibak leumô méuh nyan di Betel dan nyang saboh teuk di Dan. 30 Teuma phon saátnyan rakyat pih ka jipeubuet desya, sabab awaknyan jijak u Betel dan Dan keu jijak meuiébadat. 31 Meunan cit di Yerobeam geupeudong lom teumpat-teumpat iébadat nyang laén di pucak-pucak gunong, dan gobnyan geu angkat teuma teungku-teungku imeum nibak keuluwarga-keuluwarga nyang bukon sukée Lewi. 32 Óh lheueh nyan Yerobeam geukeubah teuma teungku-teungku imeum nyan di Betel mangat jimeutugaih disinan dan gobnyan keudroe geupeuseumah keureubeuen keu leumô-leumô méuh nyang ka geupeugot nyan. Laju gobnyan geupeuteuntée tanggai limong blaih buleuen nyang keulapan sibagoe uroe raya Israel, saban cit lagée uroe raya di Yehuda. Bak uroenyan Yerobeam geujak u Betel dan disinan laju geupeuseumah keureubeuen keu teupeuraya uroe raya nyang ka geupeuteuntée nyan.

1 Raja-Raja 13

1 Bak watéenyan na sidroe nabi di Yehuda. Nabi nyan geuyue lé TUHAN mangat geujak u Betel. Nabi nyan trok keunan bak watée Yerobeam teungoh geudong dikeue miseubah keu jipeuseumah keureubeuen. 2 Ateueh peurintah TUHAN geupeugah kheueh lé nabi nyan ubak miseubah nyan, "Hai miseubah, hai miseubah! Meunoe kheueh feureuman TUHAN, 'Sidroe aneuëk nyang teuma geuboh nan Yosia teuma lahé lam keuluwarga Nabi Daud. Di ateueh gata, hai miseubah, gobnyan teuma geupoh maté bubena teungku-teungku imeum nyang meutugaih di teumpat-teumpat iébadat keu dewa, dan nyang ka teuma jipeuseumah keureubeuen keu gata. Dan di ateueh gata cit teuma hai miseubah gobnyan teuma geutot bubena tuleueng-tuleueng manusia.' " 3 Geupeugah lom lé nabi nyan, "Miseubah nyoe teuma reuloih, dan abée nyang na di ateueh nyan teuma teupeuro meutabu. Nyan kheueh bukeuti jih bahwa ulônnyoe geuyue lé TUHAN." 4 Bak watée Yerobeam geudeungoe tutoe haba nyan, gobnyan laju geutunyok ateueh nabi nyan dan geupeugah sira geudumpék, "Drob ureuëng nyan!" Teuma bak saát nyan cit teuma jaroe Yerobeam ka jeuet keu keuboh ngon lapée sampoe jaroe geuhnyan hana hase le geutarek. 5 Miseubah nyan ngon hana teusangka-sangka reuloh meuhambo dan abée nyang na di ateueh nyan pi ka habéh rô meutabu uluwa, lagée nyang ka geupeugah lé nabi nyan ateueh peurintah TUHAN. 6 Dan geupeugah kheueh lé Raja Yerobeam ubak nabi nyan, "Neutulông kheueh meudoá ubak TUHAN Allah droeneueh keu ulôn. Neulakée kheueh geunaséh Gobnyan mangat jaroe ulôn nyoe hase geupeupuléh!" Nabi nyan pi laju geumeudoá ubak TUHAN, dan jaroe raja Yerobeam nyang ka lapée nyan pih ka puléh teuma lagée nyang ka. 7 Óh lheueh nyan raja laju geupeugah ubak nabi nyan, "Jak geutanyoe tajak makheun di rumoh ulôn, ulôn keuneuk bri hadiah keu droeneueh." 8 Geujaweueb lé nabi nyan, "Bahpi Teungku Amphon neubri keu ulôn siteungoh nibak keukayaan Teungku Amphon, ulôn hana ulôn seutôt keu lôn jak makheun atawa jak jieb ié di rumoh Teungku Amphon. 9 Ulôn meuteumé peurintah nibak TUHAN mangat bék lônjak makheun atawa jieb ié, dan hana teuma ulôn woe rot nyang ka ulôn jak yoh awai bunoe." 10 Meunan kheueh cara jih nabi nyan geujak rot nyang laén. 11 Bak watée nyan na sidroe nabi nyang ka that tuha, gobnyan tinggai di Betel. Aneuëk-aneuëk gobnyan laju jijak bri tée ubak gobnyan keuhai nabi nibak Yehuda nyan. Awaknyan jicalitra keuhai peue nyang ka geupeubuet di Betel nibak uroenyan, dan peue teuma nyang geupeugah ubak Raja Yerobeam. 12 Dan geutanyong kheueh lé nabi tuha nyan, "Nabi nyang teuka nibak Yehuda nyan rot nyang toh geucok bak watée gobnyan geuwoe?" Teuma awaknyan pih laju jipeugah rot toh geuwoe nabi nyan. 13 Laju gobnyan geuyue awaknyan jipasang peulana ateueh keuleudée gobnyan. Óh lheueh nyan gobnyan laju geu ék u ateueh keuleudée gobnyan dan laju geujak, 14 geutiyeub nabi nyang teuka nibak Yehuda nyan. Dan laju meurumpok ngon gobnyan dan geukalon nabi nyan teungoh geuduek dimiyueb bak kayée raya. "Peu kheueh droeneueh nyang nabi nibak Yehuda nyan?" geutanyong lé nabi tuha nyan. "Beutôi," geujaweueb lé ureuëng nyan. 15 "Bohjak tajak makheun di rumoh ulôn," geupeugah lé nabi tuha nyan. 16 Teuma geujaweueb lé nabi nibak Yehuda nyan, "Meuáh! ulôn hana jeuet lôn teurimong undangan bapak keu lôn jak makheun dirumoh bapak. Meunan cit ulôn hana teuma ulôn makheun atawa lôn jieb ié disinoe deungon bapak. 17 TUHAN ka geubri peurintah bak ulôn mangat bék lôn makheun atawa lôn jieb ié dan meunan cit bék teuma ulôn woe rot nyang ka lheueh ulôn jak." 18 Dan nabi tuha nibak Betel nyan pih laju geumeusulet ubak gobnyan, deungon geupeugah lagée nyoe, "Ulôn nyoe nabi cit lagée droeneueh nyoe. Meunan cit ateueh peurintah TUHAN sidroe malaikat ka geujak ubak ulôn geuyuejak tueng ngon geuyue peujamé droeneueh dirumoh ulôn." 19 Dan nabi nibak Yehuda nyan pih geupatéh laju geuseutôt u rumoh nabi tuha nyan dan óh trok keunan laju geumakheun deungon gobnyan. 20 Teungoh awaknyan geuduek sira geumakheun, TUHAN laju meufeureuman ubak nabi tuha nyan, 21 sampoe gobnyan geudôt nabi nibak Yehuda nyan sira geupeugah, "TUHAN geupeugah bahwa gata hana taát ubak Gobnyan. Gata hana tapeubuet peue nyang ka geupeurintah ubak gata. 22 Gata ka tawoe dan ka tamakheun ngon tajieb ié, padahai gata ka geutam keu tapeubuet hai nyang lagée nyan. Lé sababnyan gata teuma teupoh maté, dan manyét gata hana teuma teupeukubu didalam jrat keuluwarga gata." 23 Óh ka seuleusoe awaknyan geumakheun, nabi tuha nyan laju geupasang peulana ateueh guda nabi nibak Yehuda nyan, 24 dan geujak kheueh laju nabi nyan. Bak teungoh rot uh nabi nyan jiteugom lé singa, dan nabi nyan pi laju maté buet singa nyan. Manyét gobnyan ka teutiek di ateueh rot, dan keuleudée gobnyan mantong na teudong rab ngon manyét nyan. Singa nyan pi jidong disinan. 25 Bubena ureuëng nyang jijak rot nyan, leumah laju jikalon manyét dan singa nyan disinan. Laju awaknyan jijak u Betel dan jipeugah laju peue nyang ka awaknyan ngieng. 26 Bak watée nabi tuha nyan geudeungoe hai nyan, gobnyan laju geupeugah, "Pasti nyan nabi nyang hana taát ubak peurintah TUHAN! Nyang kheueh sabab jih TUHAN geukirém singanyan keu jijak teugom ngon jipoh maté gobnyan lagée nyang ka geupeugah lé TUHAN sigohlom nyan." 27 Dan geupeugah kheueh lé nabi tuha nyan ubak aneuëk-aneuëk gobnyan, "Tapasang laju peulana ateueh keuleudée ulôn." Óh ka lheueh geupasang ateueh keuleudée gobnyan, teuma gobnyan pih geujak laju. 28 Dan geukalon manyét nabi nibak Yehuda nyan mantong na teutiek disinan deungon keuleudée dan singa nyang mantong na teudong disinan. Singa nyan hana jiteugom keuleudée nyan, dan meunan cit hana teuma jipajoh manyét nyan. 29 Gobnyan laju geubeuôt manyét nyan dan geukeubah laju di ateueh keuleudée gobnyan, dan óh lheuehnyan geupeuwoe laju u Betel keu geujak peuba-e ngon geujak kubu. 30 Nabi tuha nyan keudroe nyang kubu manyét nyan nibak kubu keuluwarga gobnyan, laju gobnyan dan aneuëk-aneuëk geuh geupeuratok ngon geupeuba-e manyét nyan. Awaknyan geupeugah, "Keubiet that inseuh keu gata hai syedara ulôn, keubiet that-that kamoe inseuh!" 31 Óh lheuehnyan geupeugah lé nabi tuha nyan ubak aneuëk-aneuëk gobnyan, "Meunyoe singoh ulôn peulikot donya nyoe, tatanom kheueh ulôn nibak kubu dan bak binéh nabi nyan. 32 Peue nyang ka geupeugah ateueh peurintah TUHAN keu miseubah di Betel dan keu banmandum teumpat iébadat dibanda-banda Samaria pasti teuma teujadi." 33 Raja Yerobeam teutab hana geutem tinggai atawa geuboh buet gobnyan nyang jeuhet. Keu teu useuha teumpat-teumpat iébadat nyang ka geupeudong nyan, gobnyan teutab mantong geupiléh teungku imeum nibak keuluwarga-keuluwarga biasa. Soemantong nyang jitem, laju geuangkat jeuet keu teungku imeum. 34 Buet gobnyan nyang jeuhet nyan sampoe jeuet keusabab keuturonan gobnyan keunong bala dan hanco meuteung bayeueng hánmeuho saho.

1 Raja-Raja 14

1 Bak watéenyan aneuëk agam Yerobeam rhot ubak sakét. 2 Geupeugah kheueh lé Yerobeam ubak peurumoh geuh, "Gata meukeumah-keumah kheueh laju mangat tajak u Silo u rumoh Nabi Ahia nyang yoh watée ilée ka lheueh geupeugah bahwa ulôn teuma jeuet keuraja Israel. Teuma gata meunyamar kheueh mangat ureuëng laén hana jiteupeue soe gatanyan. 3 Taba kheueh keu gobnyan siploh boh ruti, bacut juadah dan meulisan saboh kaca. Gata tanyong kheueh ubak gobnyan peue nyang ka teujadi deungon Abia, aneuëk geutanyoe. Nabi nyan teuma geupeugah hainyan ubak gata." 4 Dan geujak kheueh laju ureuëng bino Yerobeam u rumoh Nabi Ahia di Silo. Nabi nyan hana hase le geumeungieng sabab mata geuh ka rabon lé sabab umu gobnyan tuha that. 5 Teuma TUHAN geupeugah ubak gobnyan bahwa peurumoh Yerobeam teungoh jijak ubak gobnyan keu jijak teumanyong keuhai aneuëk jih nyang sakét. Dan meunan cit TUHAN geupeugah ubak Nabi Ahia peue nyang harôh geupeugah teuma. Bak watée peurumoh Yerobeam trok keunan, gobnyan geupeujeuet droe siulah-ulah gobnyan ureuëng laén. 6 Teuma meunan Nabi Ahia geudeungoe su langkah gobnyan dibabah pintoe, gobnyan laju geupeugah, "Gata tamong laju keunoe u dalam, ulôn ka lôn teupeue bahwa gata na kheueh peurumoh Yerobeam. Bék meupura-pura, na haba nyang hana gét keu gata. 7 Tajakwoe kheueh laju dan tapeugah ubak Yerobeam bahwa nyoe kheueh nyang ka geupeugah lé TUHAN, Allah Israel, 'Gata ka Ulôn piléh lamkawan rakyat dan Ulôn peujeuet peunguasa ateueh umat Ulôn Israel. 8 Gata ka Ulônbri keurajeuen nyang Ulôn reubot nibak keuturonan Nabi Daud. Teuma gata hana lagée hamba Ulôn Nabi Daud. Jihnyan seutia that-that ubak Ulôn dan jitaát peue nyang Ulôn peurintah. Jihnyan jipeubuet peue nyang ka Ulôn angkée. 9 Teuma gata ka tapeubuet buet nyang leubeh rayeuk nibak buet jeuhet nyang ka jipeubuet lé awaknyan nyang ka jimat peurintah sigohlom gata. Gata tatinggai Ulôn dan tapeuteuka beungéh Ulôn deungon cara tapeugét beurala dan patong-patong nibak logam mangat teuseumah. 10 Lé sabab nyan Ulôn teuma Lôn peuteuka bala ateueh keuluwarga gata. Banmandum keuturonan gata nyang agam, peu kheueh mantong jabatan jih, jihnyan teupoh maté. Ulôn teuma Lôn peuhanco keuluwarga gata, saban cit lagée ureuëng nyang rhah najih atawa kutoran. 11 Anggota keuluwarga gata nyang maté didalam banda manyét jih jipajoh lé asée, dan nyang maté diluwa banda teuma jipajoh lé cicém. Ingat, Ulôn kheueh nyoe TUHAN nyang peugah haba!' " 12 Lheueh nyan Nabi Ahia geupeugah ubak peurumoh Yerobeam, "Nyang kheueh, jinoe tabeudôh dan tajakwoe kheueh laju! Bak watée gata tatamong u dalam banda, aneuëk gatanyan laju meuninggai donya. 13 Banmandum rakyat Israel teuma meukabong dan jijak kubu manyét nyan. Jih nyan kheueh sidroe lamkawan anggota keuluwarga Yerobeam nyang teukubu seucara teuhoreumat, sabab teuma jihnyan kheueh nyang meukeunong bak até TUHAN, Allah Israel. 14 Israel teuma geubri lé TUHAN sidroe raja nyang jeuet keugeunantoe nibak keuturonan Yerobeam sibagoe raja. Uroe jih ka sampoe! Phon watée nyoe 15 TUHAN teuma geuhuköm Israel sampoe meuhayak hayon lagée geulagah didalam ié. TUHAN teuma geuhila rakyat Israel nibak nanggroe nyang gét nyoe nyang ka geubri ubak nék indatu awaknyan. Gobnyan geupeu crebre awaknyan u meurandeh Krueng Efrat, sabab awaknyan ka jipeuteuka beungéh TUHAN deungon jipeugét patong-patong dewi Asyera. 16 TUHAN teuma geutinggai Israel sabab Yerobeam ka meudesya dan jeuet keu sabab ureuëng Israel ka meudesya cit teuma." 17 Óh ka lheuehnyan geujak woe kheueh peurumoh Yerobeam u Tirza. Bak watée gobnyan geutamong u rumoh geuhnyan, aneuëk gobnyan ka meuninggai. 18 Rakyat Israel pi laju meukabong dan laju jijak kubu lagée nyang ka geupeugah lé TUHAN meulalu Nabi Ahia, hamba Geuhnyan. 19 Kisah nyang laén keuhai Raja Yerobeam, na kheueh keuhai peumeurintahan gobnyan dan muprang nyang geupimpén, ka geucetet didalam kitab Seujarah Raja-raja Israel. 20 Dua ploh dua thon treb jih Yerobeam geumat peurintah sibagoe raja, óh lheueh nyan gobnyan meuninggai donya dan teukubu. Aneuëk gobnyan nyang nan jih Nadab geunantoe gobnyan sibagoe raja. 21 Bak watée Rehabeam, aneuëk Nabi Sulaiman, jeuet keuraja Yehuda, gobnyan ka meu umu peuet ploh sa thon. Gobnyan geumat peurintah tujoh blaih thon treb ji di Yerusalem. Nibak bansaboh nanggroe Israel teuma banda nyan kheueh nyang ka geupeukhusos lé TUHAN sibagoe teumpat iébadat ubak Gobnyan. Ma Rehabeam nyang nan Naama nibak bansa Amon. 22 Bansa Yehuda ka jipeubuet buet nyang jeuhet nibak mata TUHAN. Buet awaknyan meutamah-tamah beungéh TUHAN nibak banmandum nyang ka geupeubuet lé indatu awaknyan. 23 Di ateueh bukét-bukét dan dimiyueb bak kayée nyang raya-raya, awaknyan jipeugot teumpat-teumpat teuseumah beurala, dan jipeudong tugu-tugu meunan cit deungon patong-patong Asyera mangat jiseumah. 24 Di teumpat-teumpat nyang lagée nyan lé awaknyan laju jipeubuet buet meumukah sibagoe peuseumahan keu TUHAN. Dan di ureuëng agam pih jimeutugaih sibagoe ureuëng lunté. Ureuëng Yehuda jipeubuet banmandum buet nyang kuto dan luwat, mandum buet-buet nyan ka lheueh jipeubuet lé bansa-bansa nyang ka geu use lé TUHAN watée ureuëng Israel jitamong u dalam nanggroe nyan. 25 Bak thon nyang keulimong nibak peumeurintahan Rehabeam, na kheueh Sisak, raja nanggroe Meusé jijak prang Yerusalem. 26 Raja nyan laju jireupah banmandum barang nyang meuhái-meuhái yuem nyang na di dalam Baét TUHAN dan didalam meuligoe raja, meunan cit deungon peurisai-peurisai méuh nyang ka geupeugét lé Nabi Sulaiman. 27 Dan sibagoe geunantoe jih Raja Rehabeam laju geupeugét peurisai-peurisai peurunggu, dan geupeucaya peugét atra nyan ubak peuwira nyang jikawai pintoe geureubang meuligoe raja. 28 Pajan mantong raja geujak u Baét TUHAN, lé mandum peungawai laju jiba peurisai-peurisai nyan, óh lheuehnyan atranyan jipeuriwang laju ubak kama jaga. 29 Kisah nyang laén keuhai Raja Rehabeam ka teucetet di dalam kitab Seujarah Raja-raja Yehuda. 30 Bak watée peumeurintahan Rehabeam, sabe na prang lamkawan Rehabeam ngon Yerobeam. 31 Óh lheuehnyan Rehabeam meuninggai donya dan teukubu laju nibak kubu raja-raja di Banda Nabi Daud. Abiam, aneuëk gobnyan nyang agam, laju jiduek geunantoe sibagoe raja.

1 Raja-Raja 15

1 Bak thon nyang keulapan blaih watée peumeurintahan geumat lé Raja Yerobeam ateueh bansa Israel, Abiam jeuet keuraja Yehuda, 2 dan geumat peurintah nyan treb jih lhée thon di Yerusalem. Ma gobnyan nyang nan jih Maakha, aneuëk Abisalom. 3 Abiam geupeubuet desya lagée nyang ka geupeubuet lé ureuëng syiek gobnyan. Gobnyan hana sipeunoh até seutia ubak TUHAN Allah, meulaén that deungon Nabi Daud, nyang indatu geuh nyan. 4 Teuma, deumi Raja Nabi Daud, lé TUHAN, Po teu Allah nyang geuseumah lé Nabi Daud, ka geubri ubak Abiam sidroe aneuëk sibagoe geunantoe gobnyan mat peurintah di Yerusalem dan geupeuteuen banda nyan. 5 TUHAN geupeubuet nyang lagée nyan lé sabab Nabi Daud ka geupeu mangat até gobnyan. Nabi Daud hántom na geupeubeu-ah peue mantong nyang geupeurintah lé TUHAN, seulaén lam hai Uria ureuëng Het nyan. 6 Prang Rehabeam ngon Yerobeam nyang jipeuphon bak watée Rehabeam sampoe trok bak watée peumeurintahan Abiam. 7 Kisah nyang laén keuhai Abiam ka teucetet di dalam kitab Seujarah Raja-raja Yehuda. 8 Abiam pih hana treb teuma meuninggai donya dan laju teukubu nibak banda Nabi Daud. Asa aneuëk gobnyan jeuet keuraja keugeunantoe gobnyan. 9 Bak thon nyang keudua ploh nibak thon peumeurintahan Raja Yerobeam ateueh Israel, Asa jeuet keuraja Yehuda. 10 Gobnyan geumat peurintah na peuet ploh sa thon treb jih di Yerusalem. Nék gobnyan na kheueh Maakha, aneuëk Abisalom. 11 Saban cit lagée Nabi Daud, indatu gobnyan, Asa gét that carông geucok até TUHAN sampoe TUHAN that-that galak keu gobnyan. 12 Banmandum inong jeuhet nyang jimeutugaih nibak rumoh-rumoh teumpat teuseumah dewa ka habéh geuparôh, dan banmandum beurala nyang jikeubah lé raja-raja nyang mat peurintah sigohlom gobnyan ka geusampôh bansaboh nanggroe. 13 Nék gobnyan, si Maakha, ka geupeucat nibak tugaih jih sibagoe Ma suri, sabab lé jihnyan ka jipeugot patong beurala nyang cabui lom ngon kuto keu Asyera, dewi keusuboran. Asa laju geupeureubah beurala nyan dan laju geutot di Pantôn Kidron. 14 Bahpi hana banmandum teumpat seumah beurala geupeuhanco lé Asa, teuma gobnyan teutab seutia ubak TUHAN sipanyang udeb gobnyan. 15 Banmandum méuh dan pirak nyang ka geupeuseumah lé bapak gobnyan ubak TUHAN, laju geuba u Baét TUHAN, meunan cit teuma deungon méuh dan pirak, nyang geupeuseumah lé gobnyan keudroe. 16 Bak watée peumeurintahan Raja Asa di Yehuda dan Raja Baesa di Israel sabe na prang bandua raja nyan. 17 Baesa jiprang Yehuda dan geupeukong banda Rama keugeujak tôb rot teubiet tamong u Yehuda. 18 Lé sababnyan Raja Asa geucok banmandum méuh dan pirak nyang mantong na di Baét TUHAN dan meunan cit nyang na didalam meuligoe raja laju atra nyan geukirém u Damsyik ubak Benhadad raja Siria, aneuëk Tabrimon, ureuëng nyan na kheueh cucoe Hezion. Barang-barang nyan laju geukirém deungon peurantaraan napadub droe peujabat meuligoe, sira geupeusan nyang lagée nyoe, 19 "Jak kheueh geutanyoe tapeugét ngon taikat meusahabat lagée nyang ka geuikat lé ureuëng-ureuëng tuha geutanyoe. Meusajan deungon nyoe ulôn kirém méuh dan pirak sibagoe hadiah, dan ulôn meulakée ubak teungku beuneu peuputôh hubongan deungon Baesa raja Israel, mangat jihnyan jitarek lom pasokan jih didalam wilayah ulôn." 20 Benhadad laju situju deungon pakat nyan dan laju geuyue banmandum peurwira-peuwira gobnyan meusigoe deungon pasokan gobnyan jijak prang bubena banda-banda Israel. Laju jipeutaloe lé awaknyan Iyon, Dan, Abel-Bet-Maakha dan Kinerot nyang tô ngon Danau Galilea meunan cit banmandum wilayah Naftali. 21 Bak watée Baesa geudeungoe hainyan, gobnyan laju geupiôh geupeukong Rama. Gobnyan laju geujak u Tirza dan keu sikeujab watée hana geumuprang. 22 Óh ka lheueh nyan, banmandum ureuëng di bansaboh Yehuda hana keucuali laju geupeurintah lé Raja Asa keu jijak angkot batée ngon kayée nyang geupeuguna lé Baesa di Rama keu teupeuteuen ngon kong banda nyan. Bahan-bahan nyan geupeuguna lé Asa keu teupeukong banda Mizpa dan Geba, saboh banda didalam wilayah Benyamin. 23 Kisah nyang laén keuhai Raja Asa nyan na kheueh, keupahlawanan gobnyan dan banda-banda nyang geupeukong lé gobnyan, nyan ka teucetet lam kitab Seujarah Raja-raja Yehuda. Bak watée gobnyan ka tuha Asa keunong peunyakét nibak bandua blaih gaki geuh. 24 Asa meuninggai dan teukubu laju nibak jeurat raja-raja di banda Nabi Daud. Yosafat, aneuëk gobnyan nyang agam jeuet keuraja keugeunantoe gobnyan. 25 Bak thon nyang keudua yohmasa peumeurintahan Raja Asa ateueh Yehuda, Nadab aneuëk Yerobeam jeuet keuraja di Israel dan geumat peurintah dua thon treb jih. 26 Saban cit lagée ureuëng syiek geuh nyang ka geumat peurintah sigohlom nyan, gobnyan geupeubuet buet nyang jeuhet bak mata TUHAN lé sabab buet geuhnyan ureuëng Israel meudesya. 27 Baesa, aneuëk Ahia, nibak sukée Isakhar ka jimeukumplot keuneuk jak lawan Nadab, laju jipoh maté jihnyan. Bak watée nyan Nadab deungon pasokan geuh nyan teungoh jikeupong banda Gibeton di dalam wilayah Filistin. 28 Nyan na jih nibak thon nyang keulhée bak watée peumeurintahan Raja Asa ateueh Yehuda. Meunan kheueh Baesa jeuet keuraja Israel keugeunantoe Nadab. 29 Banmantong óh ka lheueh Baesa jeuet keuraja, gobnyan laju geupoh maté banmandum keuluwarga Yerobeam. Paih lagée peue nyang ka geupeugah lé TUHAN meulalu hamba Gobnyan, Nabi Ahia di Silo, deungan nyan teuma banmandum keuluwarga Yerobeam ka habéh teupoh maté, hana meusidroe pih nyang na tinggai. 30 Yerobeam meudesya dan lé sababnyan ureuëng Israel pi meudesya. Deungon lagée na Yerobeam ka geupeujeuet TUHAN meureuka nyang hana ngon peusa, nyan kheueh Allah nyang jiseumah lé ureuëng Israel. 31 Kisah nyang laén keuhai Nadab nyan ka teucetet didalam kitab Seujarah Raja-raja Israel. 32 Seudubna treb watée peumeurintahan Raja Baesa nibak Israel, prang sabe na hántom reuda Baesa deungon Raja Asa nibak Yehuda. 33 Bak thon nyang keulhée nibak thon peumeurintahan Raja Asa ateueh Yehuda, Baesa aneuëk Ahia ka jeuet keuraja ateueh bansaboh Israel. Gobnyan geumat peurintah di Tirza dua ploh peuet thon treb jih. 34 Saban cit lagée Raja Yerobeam nyang mat peurintah sigohlom nyan, Raja Baesa pih meudesya ubak TUHAN dan lé sabab nyan ureuëng Israel pih rhoh meudesya.

1 Raja-Raja 16

1 Dan feureuman TUHAN ubak Nabi Yehu aneuëk Hanani, "Gata peutrok ubak Baesa haba Ulôn nyoe, 2 'Yoh masa ilée gata sapeue hana jeuet, teuma gata ka Ulôn peujeuet keupeumimpén ateueh umat Israel. Jinoenyoe gata ka meudesya lagée Yerobeam dan lé nyan teuma jeuet keu sabab umat Ulôn Israel ka meudesya, lé sababnyan teuka meureuka Ulôn nyang hana teupeu amphon. 3 Lé sababnyan Ulôn teuma Lôn peuhabéh gata dan keuluwarga gata saban cit lagée nyang ka Ulôn peubuet ateueh Yerobeam. 4 Anggota keuluwarga gata nyang maté di banda jipajoh lé asée, dan awaknyan nyang maté diluwa banda teuma jipajoh lé cicém.' " 5 Peusan TUHAN ubak Baesa dan keuluwarga gobnyan geupeutrok lé Nabi Yehu sabab Baesa ka geupeubuet nyang jeuhet nibak mata TUHAN, Baesa jipeuteuka meureuka TUHAN nyang hana meuamphon, kon lé sabab jihnyan ka jipoh maté banmandum keuluwarga Yerobeam. Kisah nyang laén keuhai Baesa meunan cit jitamong keunan keupahlawanan gobnyan, atranyan ka teutuléh didalam kitab Seujarah Raja-raja Israel. Baesa meuninggai laju teupeukubu nibak jrat di Tirza. Ela, aneuëk agam gobnyan, baiát keugeunantoe gobnyan sibagoe raja. 8 Bak thon nyang keu dua ploh nam peumeurintahan Raja Asa ateueh Yehuda, Ela aneuëk Baesa ka jeuet keuraja ateueh Israel. Gobnyan geumat peurintah di Tirza dua thon treb jih. 9 Zimri, na kheueh sidroe lamkawan peuwira nyang jimat siteungoh nibak pasokan geuritan, jihnyan ka jimeukumplot keuneuk jaklawan Ela. Bak siuroe di Tirza, Ela jijieb ié kreueh nyang lumpahle sampoe gobnyan mabök di rumoh Arza, ulée rumoh tangga di meuligoe raja. 10 Laju Zimri jitamong dan jipoh maté si Ela, óh lheueh nyan gobnyan laju jeuet keuraja keugeunantoe Ela. Nyan jeuet jih bak thon nyang keudua ploh tujoh peumeurintahan Raja Asa ateueh Yehuda. 11 Hana treb óh ka lheueh Zimri jeuet keuraja, gobnyan laju geupoh maté banmandum keuluwarga Raja Baesa. Meunan cit banmandum waréh kawöm Baesa nyang agam meunan cit rakan-rakan keuluwarga gobnyan pih hana nyang tinggai bahpi meusidroe kong. 12 Paih lagée peue nyang ka geupeugah lé TUHAN keuhai Baesa meulalu Nabi Yehu, banmandum keuluwarga Baesa teupoh maté. 13 Baesa dan Ela, aneuëk gobnyan, jiseumah dewa-dewa dan lé sababnyan nyan ureuëng Israel jipeubuet desya. Lé nyan teuma, awaknyan ka jipeuteuka meureuka TUHAN, Allah nyang harôh jiseumah lé ureuëng Israel. 14 Kisah nyang laén keuhai Ela nyoe ka teucetet didalam kitab Seujarah Raja-raja Israel. 15 Bak thon nyang keudua ploh tujoh lam thon peumeurintahan Raja Asa ateueh Yehuda, Zimri nyang jeuet keuraja Israel dan geumat peurintah di Tirza nyang treb jih na tujoh uroe. Bak watéenyan tantra Israel teungoh jikeupong Gibeton, banda ureuëng Filistin. 16 Bak watée jideungoe lé awaknyan bahwa Zimri ka jimeukumplot jilawan raja dan jipoh maté rajanyan, bak uroenyan cit teuma nibak khimah droe awaknyan, awaknyan banmandum jibaiát Omri panglima awaknyan sibagoe raja Israel. 17 Óh lheueh nyan Omri dan pasokan gobnyan laju geutinggai Gibeton dan laju geujak keupong Tirza. 18 Bak saát Zimri geukalon bahwa banda nyan ka jireubot, gobnyan laju geutamong u dalam meuligoe dan laju geutot meuligoe nyan meusigoe deungon droe gobnyan, dan maté kheueh si Zimri nyan. 19 Nyan jeuet jih sabab geuh nyan ka geupeubuet buet nyang jeuhet nibak mata TUHAN. Saban cit lagée Raja Yerobeam, Zimri pih ka meudesya ubak TUHAN lé sabab nyan kheueh umat Israel ka meudesya ubak TUHAN. 20 Kisah nyang laén keuhai Zimri nyoe, jitamong cit keunan kumplotan peukhianat jih, nyan ka teucetet didalam kitab Seujarah Raja-raja Israel. 21 Lé sababnyan teuka kheueh karu ngon reutak lam bansa Israel sabab na nyang meuheuet mangat Tibni aneuëk Ginat nyang jeuet keuraja, teuma na cit nyang meuheuet Omri nyang jeuet keuraja. 22 Akhé jih awaknyan nyang jidong blah Omri nyang meunang. Tibni maté dan Omri jeuet keuraja. 23 Nyan na jih bak thon nyang keu lhée ploh sa bak watée peumeurintahan Raja Asa ateueh Yehuda. Omri geumat peurintah sibagoe raja ateueh Israel dua blaih thon treb jih. Dan nam thon bak awaiphon peumeurintahan gobnyan geumat peurintah di Tirza. 24 Teuma óh dudo gobnyan geubloe saboh gunong nyang yuem jih 6.000 péng pirak nibak sidroe ureuëng nyang nan jih Semer. Laju gobnyan geupeudong saboh banda di gunong nyan dan geuboh nan banda Samaria, meunurot nan Semer, atra hak milék nyang ka lumpah treb ateueh gunong nyan. 25 Omri geupeubuet desya-desya nyang leubeh rayeuk nibak nyang ka geupeubuet lé raja-raja nyang ka geumat peurintah sigohlom gobnyan. 26 Saban cit lagée Yerobeam, Omri meudesya sira teusabab ureuëng Israel pi meudesya dan teuseumah dewa. Lé sabab nyan TUHAN Allah nyang harôh jiseumah lé ureuëng Israel ka jeuet keumeureuka nyang hana peusa. 27 Kisah nyang laén keuhai Raja Omri dan peue mantong nyang ka geupeubuet nyan ka teucetet lam kitab Seujarah Raja-raja Israel. 28 Óh ka lheueh Omri nyan meuninggai dan teupeukubu di Samaria, Ahab aneuëk gobnyan teubaiát jeuet keuraja keugeunantoe ureuëng syiek geuh. 29 Bak thon nyang keu lhée ploh lapan bak watée peumeurintahan Raja Asa ateueh Yehuda, Ahab aneuëk Omri ka jeuet keuraja ateueh Israel dan geumat peurintah di Samaria na dua ploh dua thon treb jih. 30 Gobnyan pih ka geupeubuet desya-desya nyang lumpah rayeuk meunurot bak mata TUHAN nibak raja-raja nyang laén sigohlom gobnyan. 31 Gohlom seb cit nibak gobnyan udeb nyang peunoh deungon desya lagée nyang ka geupeubuet lé Raja Yerobeam, gobnyan pih geumeukawen deungon Izebel aneuëk Raja Etbaal di Sidon, dan gobnyan geumeu iébadat ubak Baal. 32 Gobnyan laju geupeudong rumoh iébadat di Samaria keu Baal, dan didalam rumoh iébadat nyan gobnyan laju geupeugét saboh miseubah keu dewa nyan. 33 Meunan cit gobnyan geupeugét patong Dewi Asyera. Gobnyan pi geupeubuet leubeh le desya nibak nyang ka geupeubuet lé raja Israel nyang laén nyang ka geumat peurintah sigohlom gobnyan. Lé sabab nyan gobnyan ka geupeuteuka meureuka TUHAN, Allah nyang harôh jiseumah lé ureuëng Israel. 34 Bak watée peumeurintahan geumat lé Ahab, banda Yerikho geupeudong lom teuma lé Hiel ureuëng Betel. Teuma lagée nyang ka teupeugah sigohlom nyan lé TUHAN meulalu Yosua aneuëk Nun, Hiel ka gadôh dua droe aneuëk gobnyan: Abiram nyang paleng tuha meuninggai donya bak watée Hiel geupasang dasai banda, dan segub nyang tulot meuninggai watée Hiel jipeuget pintoe-pintoe geureubang banda nyan.

1 Raja-Raja 17

1 Na sidroe nabi nyang nan geuh Elia. Nabi nyan asai geuh nibak Tisbe, saboh banda lam wilayah Gilead. Bak siuroe gobnyan geujak ubak Raja Ahab dan geupeugah, "Deumi TUHAN nyang udeb, Po teu Allah nyang jiseumah lé ureuëng Israel dan nyang ulôn peutimang, ulôn peugah ubak Teungku bahwa dua atawa lhée thon nyang ukeue nyoe hana jitreun iémbon atawa ujeuen meubacut pi, laén hai meunyoe ulôn nyang peugah nyan." 2 Óh ka lheueh nyan TUHAN geumeu feureuman ubak Elia, 3 "Gata tinggai laju teumpat nyoe, tajak laju u timu di meurandeh Krueng Yordan dan tamusöm laju disinan bak binéh aneuk Krueng Kerit. 4 Gata jeuet tajieb ié nibak aneuk krueng nyan, dan cicém gagak teuma Ulôn yue jijakba peunajoh keu gata." 5 Elia geuseutôt banmandum peue nyang geupeurintah lé TUHAN nyan, dan geujak laju ubak binéh aneuk Krueng Kerit laju geutinggai disinan. 6 Gobnyan geujieb nibak ié aneuk krueng nyan, dan geupajoh ruti dan uengkot sie nyang jiba lé cicém gagak tieb-tieb beungoh meunan cit tieb-tieb seupôt uroe. 7 Óh ka na meupadub na treb teuma, aneuk krueng nyan pi tho kreng sabab hanale ié. 8 Óh lheuehnyan TUHAN geupeugah ubak Elia, 9 "Jinoenyoe gata harôh tajak u banda Sarfat, banda nyan rab ngon Sidon dan gata tatinggai laju disinan. Ulôn ka Lôn yue sidroe ureuëng inong balée disinan mangat ureuëng inong nyan jibri makheun keu gata." 10 Dan geujak kheueh Elia u Sarfat. Óh watée ka trok bak pintoe geureubang banda nyan, deuh laju geukalon sidroe inong balée teungoh geukoih kayée apui. Laju geupeugah lé Elia ubak inong balée nyan, "Umi, neutulông cok bacut ié jieb keu ulôn." 11 Bak watée inong balée nyan teungoh geujak geujakcok ié jieb nyang geulakée nyan, Elia geutawök lom, "Umi, neuba sajan ngon ruti bacut." 12 Inong balée nyan geujaweueb, "Deumi TUHAN nyang udeb, Po teu Allah nyang geuseumah lé Bapak, ulôn meusumpah bahwa nibak ulôn hana mubacut pi ruti. Bak ulôn nyang na saboh reugam teupông gandom didalam cipe, dan na bacut minyéuk zaiton didalam kaca. Ulôn teungoh lôn peusapat kayée apui ngon meukeusut keuneuk jak taguen teupông nyang bacut nyan, mangat ulôn dan aneuëk ulôn jeuet teupajoh nyan. Nyang kheueh peunajoh kamoe nyang keuneulheuh; óh lheueh nyan kamoe teuma kamoe preh pajan mawôt teuka ateueh kamoe." 13 "Bék khawate ngon picek até neuh, hai umi meutuah!" kheun Elia ubak inong balée nyan, "Neujak laju umi neujak taguen peunajoh keu umi dan aneuëk umi. Teuma sigohlom nyan umi peugét ilée saboh ruti ubiet nibak teupông dan minyéuk nyan, dan neuba kheueh atranyan keunoe. 14 Sabab TUHAN, Po teu Allah nyang jiseumah lé ureuëng Israel, ka geupeugah bahwa pireng umi nyan teuma sabe peunoh dan meuaso deungon teupông, dan kaca minyéuk nyan sabe peunoh meuasoe minyéuk sampoe nibak watée jih TUHAN geukirém ujeuen jitreun u ateueh bumoe." 15 Dan geujak kheueh laju inong balée nyan geujak peubuet peue nyang ka geupeugah lé Elia. Dan awaknyan ban lhée droe kana teukeubah peunajoh nyang seb keu meu uroe-uroe treb jih. 16 Dan lagée nyang ka geupeugah lé TUHAN meulalu Elia, cipe nyan hana putôh-putôh meuaso sabe deungon teupông, dan kaca minyéuk nyan pih hántom tho deungon minyéuk didalam nyan. 17 Na padub treb teuma óh lheueh nyan aneuëk inong balée jiteuka deumam sampoe rhot ubak sakét. Maken treb sakét aneuëk nyan maken brat akhéjih aneuëk nyan pi meuninggai donya. 18 Laju geupeugah lé inong balée ma aneuëk nyang ka maté nyan ubak Elia, "Hamba Allah, pakon Bapak neupeubuet hainyoe ateueh ulôn? Peu kheueh Bapak neujak keunoe keu teujak teupeu ingat Po teu Allah keuhai desya-desya ulôn, sampoe aneuëk ulôn meuninggai donya?" 19 Geujaweueb lé Elia, "Neuba aneuëk nyan keunoe bak ulôn." Laju Elia geucok aneuëk agam nyan nibak ma jih, geuba laju aneuëk nyan u ruweueng ateueh, lam kama teumpat meunumpang Elia. Elia laju geupeuéh aneuëk nyan di ateueh teumpat éh, 20 laju geumeudoá deungon su nyang teuga, "Ya, TUHAN, Allah ulôn, pakon Droeneueh ya TUHAN neupeuteuka balanyoe u ateueh inong balée nyoe? Inong nyoe ka jibri meunumpang keu ulôn dan jinoenyoe Droeneueh cok teuma aneuëk gobnyan!" 21 Óh lheueh nyan na lhée goe Elia geudugom badan gobnyan di ateueh aneuëk nyang ka maté nyan, sira geumeudoá, "Ya, TUHAN, Allah ulôn, neupeu udeb kheueh aneuëk nyoe!" 22 TUHAN geudeungoe doá Elia; aneuëk nyan ka jipeuphon meunafáh dan laju udeb lom teuma. 23 Laju Elia geutreun nibak kama gobnyan sira geuba aneuëk nyan ubak ma droe jih dan geupeugah, "Umi, nyoe aneuëk Umi! Jihnyoe ka udeb lom!" 24 Inong balée nyan geujaweueb, "Jinoenyoe ka ulôn teupeue bahwa Bapak na kheueh sidroe Hamba Po teu Allah dan haba Bapak keubiet beutôi teuka nibak TUHAN!"

1 Raja-Raja 18

1 Na meupadub na treb teuma óh lheueh nyan, bak thon nyang keulhée teungoh musém khueng nyang tho kreng nyan, TUHAN geupeugah ubak Elia, "Tajak laju meuhadab ubak Raja Ahab, hana treble Ulôn teuma Lôn peutreun ujeuen." 2 Dan beurangkat kheueh Elia. Bak watée beuncana musém deuk ka biet-biet that parah di Samaria. 3 Lé sababnyan Ahab laju geuhôi Obaja keujijak meuhadab. (Obaja nyan kheueh ulée rumoh tangga meuligoe. Gobnyan sidroe ureuëng nyang beutôi-beutôi meuiébadat ubak TUHAN. 4 Bak watée Izebel jipoh maté bubena nabi-nabi TUHAN, Obaja nyoe geuteumé tulông na 100 droe nabi deungon cara geusöm awaknyan didalam guha -- 50 droe dalam saboh guha -- meunan cit geubri keu awaknyan peunajoh dan ié jieb.) 5 Ahab geupeugah ubak Obaja, "Jak tanyoe tajak jeulajah bansaboh nanggroe nyoe mangat tajak mita mata ié atawa krueng. Mungken geutanyoe hase ta teumé naleueng keu peunajoh guda dan bagal geutanyoe, dan mangat bék tapeumaté meusaboh pih nibak beulatang peulara geutanyoe." 6 Óh ka lheueh teubagi daerah nyang teuma jitamong nyan, awaknyan pih laju jijak. Ahab ubak saboh jurosan dan Obaja u jurosan nyang laén. 7 Bak teungoh rot ueh Obaja laju meurumpok deungon Elia. Óh ka geuturi bahwa nyang meurumpok nyan na kheueh Elia, Obaja laju geusujut keu geuhoreumat gobnyan dan sira geu tanyong, "Peu kheueh beutôi bahwa bapak nyoe Elia?" 8 "Beutôi, ulôn nyoe na kheueh Elia," geujaweueb lé Elia. "Jinoenyoe tajak peugah laju ubak raja gata bahwa ulôn kana disinoe." 9 Geujaweueb lé Obaja, "Peue salah ulôn sampoe Bapak neukeuneuk jok ulôn ubak Ahab mangat jeuet ulôn nyoe jipoh maté? 10 Deumi TUHAN nyang udeb, Po teu Allah nyang Bapak seumah, ulôn peugah bak saátnyoe bahwa raja geuyue ulôn jak mita Bapak dipat mantong beumeurumpok. Meunyoe bak saboh nanggroe nyang mat kuasa disinan geupeugah bahwa Bapak hana disinan, Ahab geulakée ubak peunguasa nanggroe nyan beujitem meusumpah bahwa Bapak bit-bit hana deuh disinan. 11 Dan jinoenyoe Bapak neuyue ulôn mangat lôntem jak ubak raja nyan dan lôn peugah laju bahwa Bapak na disinoe? 12 Meunyoe ulônjak nibak teumpat nyoe, Roh TUHAN mungken geuba Bapak u teumpat nyang hana ulôn teupeue! Dan meunyoe hainyoe ulôn peugah ubak Ahab bahwa Bapak na disinoe, óh lheueh nyan gobnyan hana meurumpok deungon Bapak, ka teuntée geuhnyan teuma geupoh maté ulôn. Neuteupeue kheueh hai Bapak, bahwa ulôn nyoe bit-bit ulôn meuiébadat ubak TUHAN phon yoh ubit kon! 13 Peu kheueh gohlom Bapak deungoe bahwa bak watée Izebel geupoh maté banmandum nabi-nabi TUHAN, ulôn nyang söm nibak awaknyan 100 droe didalam guha -- 50 droe dalam saboh guha -- dan ulôn bri keu awaknyan peunajoh meunan cit deungon ié jieb? 14 Jinoenyoe, pakon Bapak neuyue ulôn mangat lônjak peugah ubak raja bahwa Bapak kana disinoe? Gobnyan ka pasti ulôn nyoe geupoh maté!" 15 Geujaweueb lé Elia, "Deumi TUHAN Nyang Mahakuasa nyang ulôn peutimang, ulôn meujanji teuma ulôn jak keudroe keujak meuhadab raja bak uroenyoe cit teuma." 16 Dan geujak kheueh laju Obaja geujak meulapor ubak raja, dan Ahab pih geubeurangkat keu geujak meurumpok deungon Elia. 17 Bak watée Ahab geukalon Elia, Ahab geumeuhôi, "Nyoe kheueh ureuëng nyang peuna karu di Israel!" 18 "Ulôn bukon ureuëng peuna karu," geuseuôt Elia, "teuma Teungku Amphon keudroe nyang peuna karu. Teungku Amphon dan keuluwarga Amphon nyang peuna karu pajan dan dipat mantong. Deungon cara neuseumah beurala-beurala Baal, Teungku Amphon ka iengkeue peue nyang ka geupeurintah lé TUHAN. 19 Jinoenyoe, neupeurintah kheueh ubak banmandum rakyat Israel mangat jijak meurumpok ngon ulôn di Gunong Karmel. Neuba cit teuma ban peuet reutoih limong ploh nabi Baal dan peuet reutoih nabi Dewi Asyera nyang jibiaya lé peureumaisuri Izebel!" 20 Dan Ahab laju geukrah banmandum rakyat dan nabi-nabi Baal nyan u Gunong Karmel. 21 Lé Elia laju geupeurab ubak rakyat nyan dan geupeugah, "Trok án pajan gatanyoe banmandum teutab meudua até? Meunyoe TUHAN nyan Allah, seumah kheueh TUHAN! Meunan cit meunyoe Baal nyan Allah, seumah kheueh Baal!" Bubena rakyat nyang meusapat disinan seungab banmandum. 22 Óh lheueh nyan Elia geupeugah lom, "Lamkawan nabi-nabi TUHAN teuma ulôn kheueh nyang na mantong tinggai, padahai disinoe na 450 nabi Baal. 23 Jinoenyoe taba laju keunoe ubak ulôn duaboh leumô agam. Neuyue nabi-nabi Baal nyan jijakcok saboh dan yusie laju, óh lheueh nyan yue kôh-kôh laju dan keubah laju di ateueh kayée apui. Teuma awaknyan hana jeuet jipuhu apui disinan. Leumô nyang saboh teuk teuma ulôn peusiab nyang lagée nyan cit. Ulôn teuma lôn sie keudroe dan lôn kôh-kôh keudroe meunan cit ulôn teuma nyang keubah di ateueh kayée apui. Meunan cit di ulôn hana teuma ulôn peukab apui disinan. 24 Bah kheueh nabi-nabi Baal nyan jimeudoá ubak dewa-dewa droe jih, dan ulôn pih teuma ulôn meudoá ubak TUHAN. Nyang geujaweueb deungon geukirém apui, Gobnyan kheueh Po teu Allah." Banmandum rakyat jiseuôt deungon su nyang teuga, "Situju!" 25 Laju geupeugah lé Nabi Elia ubak nabi-nabi Baal nyan, "Sabab gatanyoe ramé that, cuba gata ilée nyang piléh leumô nyan dan gata peusiab laju. Teuma bék gata pekab apui nibak kayée nyan. Óh ka lheueh nyan gata meudoá kheueh ubak ilah gata." 26 Lé awaknyan laju jipiléh saboh leumô dan jipeusiab laju. Óh ka lheuehnyan awaknyan jimeudoá ubak Baal phon beungoh sampoe án cot uroe sira jiklik-klik ngon su nyang meutaga, "Neujaweueb kheueh kamoe, Baal!" Awakyan jipeubuet nyan sira hana piyoh-piyoh jimeulikak ngon jimeunari bansikeulileng miseubah droe jih nyan. Teuma hana teujaweueb meubacut pih. 27 Paih bak watée cot uroe timang Nabi Elia geupeu phon hina ngon geu ejek awaknyan, "Meudoá kheueh leubeh teuga lom! Jihnyan ilah, kon? Mungken jihnyan teungoh teumanueng, atawa jijak ukrueng cut. Atawa mungken jihnyan teungoh jijak-jak! Atawa mungken jihnyan teungoh teungéut, dan gata harôh gata peugo jihnyan!" 28 Nabi-nabi nyan jimeudoá leubeh teuga lom. Dan saban cit lagée nyang ka lazem jipeubuet lé awaknyan, badan droe jih laju jicuréh-curéh deungon mata peudeueng dan kapak sampoe darah jiteubiet meu cro-cro ro ateueh tanoh. 29 Meunan kheueh cara awaknyan hana jipiôh sampoe ka seupôt uroe lagée ureuëng jitamong jén. Teuma hana nyang jaweueb, dan hana nyang jitem pako. 30 Laju geupeugah lé Elia ubak banmandum rakyat nyan, "Gata peurab keunoe!" Awaknyan banmandum meugumpôi ban sikeulileng gobnyan, óh lheueh nyan gobnyan laju geupeugét miseubah TUHAN nyang ka reuloih. 31 Gobnyan laju geucok dua blaih neuk aneuk batée, tieb-tieb batée nyan teuwaki saboh lam dua blaih boh sukée keuturonan Nabi Yakub, nyan kheueh ureuëng nyang ka geuboh nan Israel lé TUHAN. 32 Deungon batée-batée nyan Elia laju geupeugot lom miseubah teumpat iébadat ubak TUHAN. Bansikeulileng miseubah nyan gobnyan laju geukueh lueng nyang lumpah rayeuk sampoe hase teupaso ié leubeh kureueng limong blaih arée ié. 33 Gobnyan laju geususon kayée apui di ateueh miseubah, dan leumô nyang saboh geukoih-koih dan geupeuduek laju di ateueh kayée nyan. Óh lheuehnyan gobnyan geupeugah, "Tapaso laju peuet boh guci ié beupeunoh, iényan gata ro u ateueh keureubeuen peuseumahan dan meunan cit u ateueh kayée jih." Óh ka lheueh geupeubuet lé awaknyan hainyan, 34 gobnyan laju geupeugah, "Sigoe teuk," dan awaknyan laju jipeubuet nyang lagée nyan lom. "Sigoe teuk," geupeugah lé Nabi Elia, dan awaknyan laju jipeubuet. 35 Dan ié nyan pih laju ji-ile bansikeulileng miseubah sampoe lueng nyan pih ka peunoh. 36 Óh ka trok bak watée teupeuseumah keureubeuen seupôt uroe, Nabi Elia geupeuto laju ubak miseubah dan geumeudoá, "Ya TUHAN, Allah nyang geuseumah lé Nabi Ibrahim, Nabi Ishaq dan Nabi Yakub, neupeunyata kheueh bak saátnyoe bahwa Droeneueh kheueh Po teu Allah di Israel, dan ulônnyoe na kheueh hamba Droeneueh. Meunan cit neupeunyata kheueh jinoenyoe bahwa peue nyang ulôn peubuet nyoe na kheueh ateueh peurintah Droeneueh. 37 Neujaweueb kheueh, ya TUHAN, jaweueb kheueh, mangat rakyat nyoe jiteupeue bahwa Droeneueh, ya TUHAN, na kheueh Po teu Allah, dan bahwa Droeneueh kheueh nyang peujeuet awaknyan jiwoe ubak Droeneueh." 38 Laju TUHAN geukirém apui di langét dan apui nyan laju jiliet sampoe hangoh keureubeuen nyan meunan cit deungon kayée apui nyan banmandum hangoh jitot lé apui, batée-batée nyan, tanoh jihnyan dan ié nyang na disikeulileng lueng nyan pih habéh teusampôh jipajoh lé apui nyan. 39 Bak watée jikalon lé rakyat hainyan, awaknyan banmandum reubah teudugom bak tanoh sira jipeugah, "TUHAN nyan Allah! Keubiet TUHAN nyan Allah!" 40 Dan geupeugah kheueh lé Nabi Elia, "Drob laju nabi-nabi Baal nyan! Bék tapeubiyeu meusidroe pih jiteumeuplueng!" Lé ureuëng ramé nyan pih laju jidrob nabi-nabi Baal nyan óh lheueh nyan jijok ubak Nabi Elia dan lé Nabi Elia nabi-nabi Baal nyan geuba laju ubak binéh Krueng Kison dan disinan laju geupoh maté banmandum awaknyan. 41 Óh lheueh nyan geupeugah kheueh lé Nabi Elia ubak Raja Ahab, "Jinoenyoe ka jeuet Teungku Amphon neujak makheun! Sabab sikeujab teuk jitreun ujeuen, su gogo dilangét ka teudeungoe." 42 Ban geudeungoe nyan Ahab laju geujak makheun, dan Nabi Elia pih geujak ék laju u ateueh Gunong Karmel. Disinan gobnyan laju geusujut deungon muka gobnyan jab bak tanoh nibak bandua blaih keurampang pha geuh. 43 Ubak peulayan gobnyan laju geupeugah, "Tajak ék laju u ateueh pucak gunong nyoe dan gata ngieng laju u laôt." Hamba nyan jijak ék laju, óh lheueh nyan jigisa sira jipeugah, "Hana deuh ulôn kalon sapeue ya Teungku po." Teuma lé Nabi Elia sampoe tujohgoe geuyue namiet geuhnyan mangat jiteungoh u pucak gunong geuyue jak ngieng peue nyang teuma leumah. 44 Teuma bak nyang keutujohgoe jih namiet nyan jigisa laju geupeugah, "Leumah ulôn ngieng na awan bube tapak jaroe jiteuka nibak arah laôt." Teuma Elia geupeugah lom ubak hamba geuh nyan, "Tajak peugah laju ubak Raja Ahab, yue ék laju gobnyan u ateueh geuritan geuh dan yuewoe bubagaih sigohlom gobnyan teuhalang lé ujeuen nyang raya jitreun sikeujab teuk." 45 Lam sikeujab mantong langét ka itam deungon reudok, dan angén badée pih teuka dan ujeuen teuga pih ka jitreun ban salamle. Ahab geuék laju u ateueh geuritan dan laju geujakwoe u Yizreel. 46 Bak watée nyan Nabi Elia meuteumé teunaga nibak TUHAN. Geucok jubah geuh laju geulipat u ateueh dan geuikat laju nibak keuieng laju geuplueng ukeue geutinggai Ahab sipanyang jalan akhé jih trok kheueh gobnyan ubak babah pintoe geureubang banda Yizreel.

1 Raja-Raja 19

1 Peue nyang ka geukalon nyan lé Raja Ahab laju geupeugah ubak peurumoh gobnyan Izebel, peue mantong nyang ka geupeubuet lé Nabi Elia, meunan cit pakriban Elia ka geupoh maté banmandum nabi-nabi Baal. 2 Lé Izebel geukirém laju haba ubak Nabi Elia lagéenyoe, "Seumoga bubena dewa geuhuköm ulôn, dan beugeupoh maté ulôn nyoe, meunyoe singoh beungoh bak watée nyang lagéenyoe ulôn hana ulôn huköm gata lagée gata nyang ka neuhuköm banmandum nabi-nabi Baal." 3 Ban geudeungoe haba nyan Nabi Elia teumakot that-that, dan gobnyan pih laju geuplueng mangat bék jipoh lé Izebel. Geujak laju ngon peulayan geuh u Bersyeba di Yehuda. Disinan gobnyan laju tinggai ngon peulayan geuh nyang seutia nyan, 4 dan deungon gaki geujak laju u padang pasi siuroe peunoh óh lheuehnyan geupiôh laju diyueb bak kayée rampak. Dimiyueb bak kayée nyan laju geuduek dan peurasaan gobnyan keuneuk maté mantong. Kheun gobnyan "Ulôn hana ék lôn teunle, ya, TUHAN. Neucok mantong nyawöng ulôn nyoe. Ulôn hana leubeh jroh nibak indatu ulôn!" 5 Óh ka lheueh geupeugah nyan Nabi Elia pi laju teuéh dimiyueb bak kayée nyan sampoe teungéut. Deungan hana teusangka-sangka teuka sidroe malaikat geujak mat gobnyan sira geupeugah, "Beudôh kheueh, hai Elia, dan jak makheun laju!" 6 Nabi Elia geukalon bansikeulileng, dan leumah laju geukalon rab ngon ulée gobnyan saboh ruti nyang ka lheueh teutot dan saboh calueng nyang ka meuaso ngon ié. Atranyan pih laju geumakheun meunan cit deungon ié laju geujieb, óh ka lheueh nyan jiéh lom. 7 Dan keu nyang keuduagoe malaikat TUHAN geuteuka ubak gobnyan sira geumat ngon geupeugah lé malaikat nyan, "Beudôh laju, hai Nabi Elia, jak laju makheun, mangat gata teuga dan hase tajaklom sabab langkah gata mantong that jiôh." 8 Meunan cit, lagée nyang ka geupeubuet buno, Nabi Elia pih geubeudôh laju geumakheun ngon geujieb ié. Dan óh lheuehnyan gobnyan pih ka teuga dan ka hase geujak peuet ploh uroe treb jih sampoe trok u Gunong Sinai, diteumpat Po teu Allah geupeugah droe. 9 Disinan Nabi Elia geumudom didalam guha. Lé TUHAN geupeugah ubak gobnyan, "Hai Elia, peue gata peubuet disinan?" 10 Geujaweueb lé Nabi Elia, "Nyoepat ulôn, Ya TUHAN, Allah Nyang Mahakuasa, ulôn sabe meukeureuja teuma keu Droeneueh keudroe. Teuma umat Israel ka ji iengkeue janji jih deungon Droeneueh. Awaknyan jijak reuloih bubena miseubah Droeneueh dan jipoh maté bubena nabi Droeneueh. Teuma ulôn kheueh nyang mantong tinggai, dan jinoenyoe pih awaknyan jikeuneuk poh ulôn!" 11 "Gata teupeubiet laju lam guha nyan," geupeugah lé TUHAN ubak gobnyan, "dan tadong kheueh jak meuhadab Ulôn di ateueh gunong." Dan TUHAN pih geujak rot nyan, jipeuphon lé angén bade nyang jipot tajam sampoe bukét-bukét beukah dan gunong-gunong batée pih hanco. Teuma TUHAN hana geupeuleumah droe nibak lam angén nyan. Óh ka lheueh angén nyan reuda, teuka teuma geumpa bumoe. Teuma lam geumpa nyan pih TUHAN hana cit geupeuleumah droe. 12 Óh ka lheueh nyan teuka teuma apui, meunan cit TUHAN pih hana geupeuleumah droe lam apuinyan. Óh ka lheueh nyan keuadaan kajeuet keuseungab, sungue hana teuleungo sapeue, dan laju teudeungoe saboh su nyang ubit teuma leumoh leumbot. 13 Bak watée geudeungoe lé Nabi Elia su nyan, ruman gobnyan laju geutôb ngon bajée jubah geuh, dan óh lheueh nyan laju geuteubiet dan geudong bak babah pintoe guha. Dan geudeungoe lom su nyang geupeugah, "Elia, peubuet peue gata disinoe?" 14 Geujaweueb lé Elia, "Ya TUHAN, Allah Nyang Mahakuasa, ulôn sabe meubuet teuma keu Droeneueh keudroe. Teuma umat Israel ka ji iengkeue janji jih deungon Droeneueh. Awaknyan ka jireuloh bubena miseubah-miseubah Droeneueh dan ka jipoh maté dumna nabi-nabi Droeneueh. Teuma ulôn kheueh nyang mantong tinggai, dan ulôn pih lé awaknyan jikeuneuk poh maté!" 15 TUHAN meufeureuman lom, "Gata woe kheueh u padang pasi tou ngon Damsyik! Óh lheuehnyan tajak kheueh laju u banda dan taro kheueh teuma minyéuk u ateueh ulée Hazael sibagoe tanda teubaiát jihnyan jeuet keuraja di Siria. 16 Dan tapeubuet cit lagéenyan ateueh Yehu aneuëk Nimsi, mangat jihnyan jeuet keuraja Israel. Dan ateueh Elisa aneuëk Safat nibak Abel-Mehola, mangat jihnyan jeuet keu nabi keugeunantoe gata. 17 Soemantong nyang hana jipoh maté lé Hazael, ureuëng nyan teuma jipoh lé Yehu, dan meunyoe na awaknyan nyang jiteumé peulheueh droe nibak Yehu nyan ureuëng nyan teuma jipoh maté lé Elisa. 18 Teuma na 7.000 droe di Israel ulôn peuseulamat, awaknyan na kheueh ureuëng-ureuëng nyang teutab seutia ubak ulôn dan hántom na jisujut jiseumah patong Baal atawa jicom patong nyan." 19 Dan geujak kheueh laju Nabi Elia geujak meurumpok ngon Elisa nyang bak watée meurumpok nyan Elisa teungoh geumeu úe diblang. Na dua blaih boh pasang leumô dikeue gobnyan dan Elisa keudroe geumeu úe deungon pasangan leumô nyang keuneulheuh. Bak watée Nabi Elia geuja dikeue Elisa, Nabi Elia laju geusuet bajée jubah geuh dan bajée nyan laju geuleueng nibak baho Elisa. 20 Dan Elisa geutinggai laju leumô-leumô gobnyan nyang mantong meukeumat nibak langái nyan laju geujak tiyeub Nabi Elia, óh ka tou deungon Nabi Elia geupeugah laju, "Neupeu idhin kheueh ulôn jak lakée droe ilée ubak ureuëng syiek ulôn, óh lheuehnyan ulôn teuma lôn seutôt Bapak." Geuseuôt Nabi Elia, "Jak kheueh. Ulôn hana lôn tam gata." 21 Óh geudeungoe habanyan Elisa geugisa laju ublang dan geujaksie laju banmandum leumô-leumô geuh nyan. Kayée langái nyang geupeuguna ngon meuúe laju geukoh-koh geutot laju sibagoe kayée apui ngon taguen sie-sie leumô nyang ka lheueh geusie nyan. Óh lheueh nyan uengkot sie nyang ka masak geutaguen nyan laju geubagi-bagi keu aneuëk buah gobnyan dan lé aneuëk buah geuh uengkot sie nyan laju jipajoh. Óh lheueh nyan Elisa laju geujak seutôt Nabi Elia dan jeuet laju keupeubantu gobnyan.

1 Raja-Raja 20

1 Bak siuroe, raja Siria nyang nan geuh Benhadad, laju geupeusapat banmandum tantra geuh meusajan deungon 32 droe raja nyang laén deungon geuritan prang nyang jitarek lé guda, dan óh lheueh nyan laju geukeupong banda Samaria. 2 Óh ka lheueh nyan geu kirém laju utosan geuh ubak Raja Ahab, raja ureuëng Israel di banda nyan deungon peusan geuh lagéenyoe, 3 "Raja Benhadad geulakée mangat gata tajok ubak gobnyan méuh, pirak, ureuëng-ureuëng binoe gata, dan aneuëk-aneuëk gata nyang teuga-teuga." 4 Geujaweueb lé Ahab, "Tajak peugah laju ubak Raja Benhadad bahwa ulôn ka lôn tem. Gobnyan jeuet geucok ulôn meunan cit deungon banmandum atra ulôn." 5 Óh lheueh nyan di ureuëng nyang ba haba nyan jigisa lom ubak Ahab sira jiba gaba nyang laén nibak Raja Benhadad. Meunoe geupeugah, "Ilée raja kamoe geulakée mangat gata tajok keu gobnyan méuh ngon pirak meunan cit deungon ureuëng binoe dan aneuëk-aneuëk gata. 6 Teuma jinoenyoe gobnyan geuyuejak peuwira-peuwira geuh keu jijak geuladah meuligoe gata dan rumoh-rumoh peugawée gata, dan geucok laju peue nyang geuanggab meuyuem. Awaknyan teuma geujak keunoe singoh beungoh kira-kira bak jeuem lagée nyoe." 7 Teuma Raja Ahab laju geuhôi banmandum peumimpén Israel dan geupeugah, "Neukalon keudroe bahwa ureuëng nyoe jikeuneuk peuceulaka geutanyoe. Jihnyan jituntot mangat ulôn jok ureuëng binoe ngon aneuëk-aneuëk ulôn meunan cit deungon méuh dan pirak ulôn, dan ulôn hana lôn tulak peue nyang jilakée nyan." 8 Bubena peumimpén rakyat nyan jipeugah, "Bék neupakoe jih nyan, Teungku Amphon! Bék neuseutôt peue nyang jilakée nyan." 9 Lé sababnyan Raja Ahab laju geujaweueb ubak utosan raja Benhadad nyan lagée nyoe, "Tajak peugah laju ubak Teungku Amphon raja gata nyan, bahwa ulôn situju peue nyang ka geulakée nyang phon, teuma nyang geulakée nyang keudua nyoe hana hase ulôn bri." Dan jijak kheueh laju utosan-utosan nyan, óh lheueh nyan jiriwang lom ubak Raja Ahab dan jipeugah, 10 "Raja kamoe teuma geukirém tantra nyang le that keu geujak peuhanco banda gata, sampoe abée nibak incik tutong banda gatanyan teuba geuba sampoe habéh deungon jaroe awaknyan. Gobnyan geumeusumpah bahwa bubena dewa geuhuköm, dan geupoh maté jihnyan, meunyoe gobnyan hana geupeubuet peue nyang ka geuyue nyan!" 11 Geujaweueb lé Raja Ahab, "Tajak peugah laju ubak Raja Benhadad nyan: Tantra nyang seujati lam tuboh jih ji ilée darah rasa bangga meunyoe ka lheueh jimuprang di mideuen juang, bukon sigohlom nyan." 12 Peue nyang ka geujaweueb lé Ahab nyan jijak peusampoe laju ubak Raja Benhadad bak watée gobnyan na meusajan deungon raja-raja nyang laén nyang jeuet keu sikutu gobnyan dan teungoh meuseunang peulalo até sira geujieb-jieb ié lam khimah-khimah geuhnyan. Ban geudeungoe habanyan Benhadad laju geupeurintah ubak mandum peuwira gobnyan mangat meusiab-siab keujijak prang banda Samaria. Dan awaknyan pih meusiab-siab lagée peurintah sang raja. 13 Dan lam watéenyan, na sidroe nabi geujak ubak Raja Ahab óh trok keunan laju geupeugah, " TUHAN meufeureuman: 'Na gata kalon tantra nyang dubnyan le? Ulôn teuma Lôn peumeunang gata ateueh awaknyan nibak uroenyoe. Gata teuma tateupeue bahwa Ulôn kheueh TUHAN.' " 14 "Soe nyang prang leubeh ilée?" geutanyong lé Raja Ahab. Nabi nyan geujaweueb, "Tantra nyang muda-muda, nyang iréng bubena ulée daerah. Meunan kheueh nyang ka geupeugah lé TUHAN." "Dan soe teuma nyang jeuet keupeumimpén nibak prang nyan?" geutanyong lé raja lom. "Teungku Amphon keudroe," geujaweueb lé nabi nyan teuma. 15 Dan Raja Ahab pih geukrah laju bubena tantra-tantra muda nyang jeuet keu peuiréng ulée-ulée daerah. Banmandum nyan na 232 droe tantra. Óh lheuehnyan gobnyan geupeubuet teuma nyang lagéenyan ateueh tantra Israel. Banmandum nyan na teuma 7.000 droe. 16 Seureubu nyan geupeuphon watée uroe paih watée Raja Benhadad dan ban lhée ploh dua raja-raja nyang laén nyang jeuet keusikutu gobnyan nyang mantong mabök sabab lumpah that jai geujieb ié kreueh lam khimah gobnyan. 17 Nyang maju phon-phon that na kheueh tantra-tantra muda nyan. Ureuëng-ureuëng nyang geuyue lé Benhadad keu jijakluem musoh laju jijak ba laporan ubak Raja Benhadad bah na saboh peureute tantra teungoh jijak jituju ubak khimah nibak arah Samaria. 18 Laju Benhadad geupeurintah mangat jeuet musoh nyan jidrob udeb-udeb, hana jipakoe peu kheueh awaknyan jiteuka keu jakmuprang atawa keu jijak meudamé. 19 Tantra muda nyang geukrah lé Raja Ahab nyan ka jipeuphon grak langkah di banda Samaria dan meunan cit dilikot awaknyan ji iréng teuma lé droe tantra Israel. 20 Di Tantra nyan maséng-maséng laju jipoh maté bubena musoh-musoh gobnyan. Di ureuëng Siria laju jiplueng, teuma hana jipeuleuh lé tantra Israel laju jitiyeub ho nyang jiplueng. Teuma Raja Benhadad jiteumé peulheueh droe, laju jiplueng deungon guda geuh dan meunan cit jiseutôt lé nameupadub droe tantra meuguda nyang laén. 21 Meunan cit di Raja Ahab geutajoe u mideuen prang laju geupeuhanco bube nyang na geuritan prang atra tantra Raja Benhadad dan meunan cit geupoh maté banmandum guda-guda jihnyan. Bak uroenyan ureuëng Siria jirasa taloe nyang lumpah rayeuk. 22 Óh lheuehnyan nabi nyan geujak laju ubak Raja Ahab dan geupeugah, "Jinoenyoe, nyang sigét jih neujakwo laju dan neupeukong droe dan neupeugét reuncana nyang matang, sabab raja Siria teuma teuka lom jijak prang bak musém seumi nyang teuma teuka." 23 Peuwira-peuwira Raja Benhadad jipeugah ubak Benhadad raja droe jih, "Ilah-ilah nyang jiseumah lé bansa Israel jimat kuasa di ateueh gunong-gunong, nyang kheueh sabab jih tanyoe hase jipeutaloe lé bansa nyan. Teuma geutanyoe pasti hase tapeutaloe awaknyan meunyoe geutanyoe tamuprang nibak darat nyang miyueb. 24 Nyang gét jih phon uroe nyoe Teungku Amphon neujak gantoe laju raja nyang lhée ploh dua droe nyan deungon peuwira-peuwira Teungku Amphon keudroe. 25 Óh lheuehnyan bahkheueh Teungku Amphon neukrah laju pasokan siduble pasokan nyang Teungku Amphon nyang ka jipeutaloe nyan, meunan cit beuna guda dan geuritan prang sidub nyang ka lheueh uroe jéh. Geutanyoe taprang bansa Israel nyan di ateueh darat nyang miyueb, dan goenyoe geutanyoe pasti meunang." Raja Benhadad situju, laju geuseutôt naseuhat peuwira-peuwira geuhnyan. 26 Bak musém seumi nyang teuka lom awaknyan laju geukrah tantra gobnyan laju geujak ubak banda Afek keu geujak prang bansa Israel. 27 Meunan cit di ureuëng Israel laju geupeuleungkap tantra gobnyan. Dan tantra Israel pi laju meugrak maju nyang teubagi lam duaboh pasokan dan jipeudong khimah meuhadab keue deungon ureuëng-ureuëng Siria nyan. Teubandeng ngon tantra Siria nyang meutabu bansaboh sampoe peunoh daerah nyan, pasokan Israel leumah jih lagée duaboh kawan kaméng mantong. 28 Dan teuka kheueh sidroe nabi ubak Raja Ahab dan geupeugah, "Nyoe kheueh feureuman lé TUHAN: 'Sabab ureuëng-ureuëng Siria jipike bahwa Ulôn meukuasa di ateueh gunong-gunong dan bukon di ateueh darat nyang dimiyueb, teuma Ulôn Lônbri meunang ateueh gata nibak prang ngon tantra awaknyan nyang bit-bit jai lumpah na nyan. Gata dan rakyat gata teuma jiteupeue bahwa Ulôn nyoe kheueh TUHAN.' " 29 Tujoh uroe treb jih ureuëng Siria dan ureuëng Israel teutab meuteun didalam khimah jih maséng-maséng nyang meuhadab keue. Bak uroe nyang keu tujoh barô kheueh jipeuphon maju dan jiprang ateueh tantra musoh. Nibak prang nyan lé ureuëng Israel jiteumé poh maté na 100.000 ureuëng Siria. 30 Ureuëng nyang hana keunong poh jiteumé plueng droe jih u banda Afek, teuma pageue beuton banda nyan pih reuloih teupuro sampoe jitimpok ateueh tantra nyang teungoh plueng nyan akhéjih maté na 27.000 droe. Meunan cit deungon Benhadad geupeuplueng droe u banda nyan dan laju geumusöm nibak saboh rumoh dalam kama bagian dalam. 31 Dumna peuwira jijak laju ubak gobnyan dan jipeugah, "Jipeugah lé gob bahwa raja-raja Israel nyan na kheueh raja nyang na bak gobnyan gaséh sayang. Kareuna nyan, neupeu idhin kheueh ubak kamoe kamoe jak meuhadab ubak raja Israel nyan deungon cara kamoe meungui deungon ija kroeng sibagoe rasa meunyeusai kamoe ateueh peue nyang ka kamoe peubuet nyan dan meunan cit kamoe ikat taloe nibak takue sibagoe tanda geutanyoe ka tatálhok. Deungon na lagée nyan mudah-mudahan rajanyan hana geupoh maté Teungku Amphon." 32 Dan awaknyan pi laju geungui ija kroeng dan meunan cit takue jih pih ji-ikat teuma, óh lheuehnyan jijak laju jak meuhadab ubak Raja Ahab dan jipeugah, "Amphon ya Delat Po, raja kamoe Benhadad na kheueh namiet Teungku Amphon. Gobnyan geulakée adak jeuet Teungku Amphon bék kheueh neupeumaté gobnyan." Geujaweueb lé Raja Ahab, "Peu kheueh jihnyan mantong udeb, syedara ulôn nyan?" 33 Keubiet bubena peuwira Raja Ahab nyan teungoh jipreh tanda nyang jroh nibak Raja Ahab. Dan, bak watée Ahab geupeugah "syedara", awaknyan langsong jijaweueb, "Beutôi, Benhadad na kheueh syedara Teungku Amphon." Laju geupeugah lom lé Raja Ahab, "Gata intat seukeujab jih nyan keunoe bak ulôn!" Bak watée Benhadad katrok keunan, lé Raja Ahab laju geupakat gobnyan jak ék geuritan. 34 Geupeugah laju lé Benhadad ubak gobnyan, "Ulôn teuma ulôn jokpulang keu Teungku banmandum banda-banda nyang ka geureubot lé bapak ulôn nibak bapak Teungku. Meunan cit di Teungku Amphon jeuet teuma neupeudong pusat niaga di banda Damsyik lagée nyang ka geupeubuet lé ureuëng syiek ulôn di Samaria." Geuseuôt lé Ahab, "Ateueh dasai janji Teungku nyan, ulôn teuma lôn peubeubaih Teungku." Óh lheuehnyan Ahab laju geupeugot janji deungon Benhadad dan óh ka seuleusoe nyan Benhadad pih geupeuleueh teuma. 35 Ateueh peurintah TUHAN, sidroe lamkawan nabi nibak seukeulompok nabi nyan laju geuyue poh gobnyan. Teuma nabi nyang geuyue nyan hana geutem. 36 Laju nabinyan geupeugah, "Sabab gata hana tataát ubak peurintah TUHAN, gata teuma jiruengkom ngon jiteugom lé singa bak watée gatawoe nibak teumpat." Biet that, hana treb óh ka lheueh geutinggai teumpat nyan, gobnyan laju jiruengkom dan jiteugom lé beulatang singa. 37 Óh lheuehnyan nabi nyan geujak teuma ubak ureuëng laén dan geupeugah, "Gata seupôt kheueh ulôn nyoe!" Teuma di ureuëng nyang geuyue seupôtnyan laju jipoh gobnyan sihabéh seuneuga sampoe nabi nyan luka. 38 Óh ka lheuehnyan nabi nyan laju geubalot muka geuh deungon siôn ija, mangat gobnyan bék jituri lé gob, laju geujak dong nibak binéh rot raya geupreh raja Israel liwat. 39 Bak watée raja nyan liwat, nabinyan laju geupeugah ubak gobnyan, "Paduka Nyang Mulia, bak watée ulôn teungoh muprang dimideuen prang, na sidroe tantra jiba ubak ulôn sidroe musoh nyang ka teudrob. Tantra nyan jipeugah, 'Jaga kheueh ureuëng nyoe beugét-gét. Meunyoe jihnyoe jiteumé plueng, gata harôh teupoh maté keugeunantoe jihnyan atawa teubayeue deungon 3.000 péng pirak.' 40 Teuma óh lheuehnyan watée ulôn teungoh that gabuek, ureuëng nyan laju jiplueng." Geujaweueb lé raja, "Gata ka taponih huköman gata keudroe. Lé sabab nyan, gata harôh tatanggong atranyan." 41 Dan nabinyan laju geubuka ija nyang teubalot nibak muka geuh nyan, óh lheueh nyan di raja pih laju geuturi bahwa ureuëng nyan na kheueh sidroe nabi. 42 Dan geupeugah kheueh lé nabi nyan ubak raja, "Nyoe kheueh nyang ka geupeugah lé TUHAN: 'Ureuëng nyang Ulôn peurintahkan mangat tapoh maté rupari gata peuleueh. Lé sabab nyan gata harôh maté sibagoe geunantoe jih. Tantra gata teuma hanco sabab ka gata peubiyeu sipa-i musoh jipeuplueng droe.' " 43 Raja geuwoe laju u Samaria deungon até nyang tunu dan beungéh.

1 Raja-Raja 21

1 Bak binéh meuligoe Raja Ahab di Yizreel na saboh lampôh anggô atra ureuëng laén nyang nan ureuëng po lampôh nyan Nabot. 2 Bak siuroe Raja Ahab geupeugah ubak Nabot ureuëng po lampôh nyan, "Tabri mantong keu ulôn lampôh anggô gatanyan, sabab lampôh nyan tô that deungon meuligoe ulôn. Ulôn meuheuet that keuneuk pula meubagoe-bagoe jeunéh gulée nibak lampôh nyan. Keu gata ulôn jok lampôh anggô nyang paleng gét sibagoe geunantoe jih, atawa meunyoe gata tem, ulôn bayeue péng deungon yuem nyang sisuai." 3 Jijaweueb lé Nabot, "Lampôh anggô nyoe atra pusa indatu ulôn. Deumi Allah, atranyoe hánjeuet ulôn bri ubak Teungku Amphon!" 4 Deungon até nyang seu-uem lom beungéh sabab geudeungoe peue nyang jipeugah lé Nabot ubak gobnyan nyan, raja geujakwoe laju u rumoh geuh laju geujak éh nibak peuratah geuh sira geupaleng muka geuh dan hana geutem pajoh bu. 5 Teuka laju Izebel ureuëng binoe gobnyan dan geutanyong laju ubak teungku lako peusabab gobnyan lam sikeujab mantong ka meu-ubah, "Pakon gata tunu? Dan pakon teuma hán neutem pajoh bu?" 6 Geujaweueb lé Raja Ahab, "Ulôn hana mangat até deungon si Nabot. Ulôn lakée jroh-jroh bak jih mangat lampôh anggô jih nibak binéh meuligoe geutanyoe nyoe jitem tuka ngon nyang laén nyang ulôn jok atawa ulôn bloe ngon yuem nyang meu-hai, teuma jih nyan hana jitem!" 7 "Droeneueh raja Israel, hai teungku meutuah," geupeugah lé Izebel. "Neubeudôh kheueh laju dan jak kheueh tapajoh bu. Peuleupie kheueh até droeneueh, ulôn teuma lônbri lampôh anggô si Nabot nyan keu teungku droe!" 8 Dan Izebel laju geutuléh surat ateueh nan raja meunan cit geucab laju deungon cab raja nibak surat nyan. Suratnyan laju geukirém ubak bubena peumimpén dan ureuëng-ureuëng patot di Yizreel. 9 Nyoe kheueh asoe surat nyan, "Neu peumaklum laju mangat rakyat jipuasa dan tayue laju awaknyan jimeusapat! Nibak rapatnyan tajok laju ubak Nabot teumpat duek nyang mulia. 10 Tayue kheueh teuma dua droe ureuëng jeuhet jijakduek meuhadab keue deungon Nabot nyan dan yue tudoh jihnyan bahwa ureuëng nyan ka jikutok Po teu Allah dan raja. Dan Óh lheuehnyan neuba laju jihnyan u luwa banda, dan neurhom laju jihnyan deungon batée sampoe maté!" 11 Peue nyang geupeurintah lé Izebel nyan laju jipeubuet lé dumna peumimpén dan lé tukoh masyarakat Yizreel. 12 Laju jipeumaklum lé awaknyan mangat rakyat jipuasa. Óh lheuehnyan laju jiyue ureuëng laén jimeugumpoi dan jiyue duek laju Nabot nibak teumpat nyang teuhoreumat. 13 Seudangkan dua droe ureuëng jeuhet nyan nyang ka jiduek meuhadab keue deungon Nabot, dan dikeue rakyatba nyan lé ureuëng jeuhet nyan jipeugah laju bahwa Nabot ka ji kutok Po teu Allah dan raja. Le sabab nyan Nabot nyan laju jiba uluwa banda dan óh ka trok u teumpat nyang teutuju Nabot nyan laju ji rhom ngon aneuk batée sampoe meuninggai. 14 Haba keuhai peue nyang ka jipeubuet ateueh Nabot nyan jipeusampoe laju ubak Izebel. 15 Ban geudeungoe lé Izebel habanyan laju gobnyan geupeugah ubak Raja Ahab, "Nabot ka maté. Jinoenyoe tajakcok laju lampôh anggô jihnyan nyang hana jitem peubloe keu droeneueh." 16 Raja Ahab laju geujakcok lampôh anggô nyan jeuet keuhak milék gobnyan. 17 Feureuman TUHAN ubak Nabi Elia, nabi nibak Tisbe nyan, 18 "Ahab, raja Samaria nyan bak saátnyoe jihnyan na di dalam lampôh anggô Nabot jikeuneukcok lampôh nyan jeuet keuhak milék jih. Lé sababnyan, tajak kheueh laju keudeh, 19 dan tapeugah laju ubak jihnyan bahwa Ulôn, TUHAN, Ulôn peugah lagéenyoe, 'Ka teupoh gob sampoe maté, teureupah teuma atra gobnyan! Lé sabab nyan darah gata teuma jilieh lé asée nibak teumpat asée-asée nyang ka jilieh darah si Nabot!' " 20 Bak watée Raja Ahab geukalon Nabi Elia, gobnyan laju geupeugah, "Hai musoh, akhé jih gata meurumpok cit ngon ulôn!" "Beutôi," geuseuôt Nabi Elia. "Sabab Teungku deungon paksa ka neupeubuet buet nyang lumpah jeuhet nibak mata TUHAN, 21 teuma nyoe kheueh nyang geuyue peusampoe lé TUHAN ubak Teungku, 'Ulôn teuma Lôn peuteuka bala u ateueh gata. Gata Ulôn kireuh, dan soe mantong ureuëng agam lam keuluwarga gata, tuha ngon muda, Ulôn sampôh di ateueh bumoe. 22 Keuluwarga gata jeuet lagée keuluwarga Raja Yerobeam aneuëk Nebat dan lagée keuluwarga Raja Baesa bin Ahia, sabab lé gata kheueh ka jeuet keu sabab ureuëng Israel jipeubuet desya sampoe jeuet keu sabab beungéh Ulôn nyang hana hase Ulôn peumeuáh le.' 23 Dan keuhai si Izebel, TUHAN geupeugah bahwa badan jihnyan jipajoh lé asée lam banda Yizreel. 24 Soemantong nibak anggota keuluwarga gata nyang maté dibanda teuma jipajoh lé asée, dan nyang maté diluwa banda teuma jipajoh lé cicém." 25 Hántom na ureuëng nyang deungon neukat jipeubuet buet nyang jeuhet nibak mata TUHAN lagée nyang ka geupeubuet lé Raja Ahab nyan. Banmandum buet nyang jeuhet nyan jiyue ngon jipeusuna lé ureuëng binoe jih si Izebel. 26 Raja Ahab ka geupeubuet desya-desya nyang lumpah hina: gobnyan ka geuseumah beurala lagée nyang ka jipeubuet lé ureuëng Amori, na kheueh ureuëng-ureuëng nyang ka geu-use lé TUHAN geuyue teubiet nibak nanggroe Kanaan bak watée ureuëng Israel jitamong u dalam nanggroenyan. 27 Óh ka seuleusoe Nabi Elia geupeugah habanyan, Ahab laju geupriek-priek peukayan gobnyan dan geungui laju ija kroeng sibagoe tanda meunyeusai, óh lheueh nyan laju geupuasa. Meunan cit bak watée geujak éh pih gobnyan hana leukang ngon ija kroeng bak badan geuh, dan meunyoe geujak-jak ié muka gobnyan deuh that masam sabe. 28 TUHAN meufeureuman lom uban Nabi Elia, 29 "Peu kheueh ka gata ngieng pakriban jinoenyoe si Ahab jipeumiyueb droe dikeue Ulôn? Lé sababnyan, Ulôn hana teuma Ulôn peuteuka bala meunyoe jihnyan mantong udeb. Bak watée keurajeuen aneuëk jih singoh barô kheueh balanyan Ulôn peuteuka u ateueh keuluwarga jih."

1 Raja-Raja 22

1 Na dua thon leubeh hana prang lé Israel deungon Siria. 2 Teuma nibak thon nyang keu lhée, Yosafat raja nanggroe Yehuda geujak saweue Raja Ahab di nanggroe Israel. 3 Sigohlom nyan Raja Ahab ka lheueh geu amanat ubak peuwira gobnyan, "Gata nyoe tateupeue bahwa banda Ramot di Gilead nyan na kheueh atra geutanyoe! Pakon geutanyoe hana tajeuet tareubot lom nibak raja Siria?" 4 Dan bak watée Yosafat teuka, geutanyong laju lé Raja Ahab, "Peu kheueh syedara neutem jak ngon kamoe keu tajak prang banda Ramot?" geujaweueb lé Yosafat, "Jroh that! Geutanyoe tajak meusajan-sajan. Tantra meuguda ulôn teuma jimeusaho deungon tantra meuguda droeneueh. 5 Teuma nyang gét jih tatanyong ilée ubak TUHAN." 6 Dan Raja Ahab laju geupeusapat na kira-kira 400 droe nabi dan laju geutanyong ubak nabi-nabi nyan, "Peu kheueh kamoe jeuet kamoe jak prang Ramot atawa bék?" "Jeuet!" seuôt awaknyan. "TUHAN geujok banda nyan keu Teungku Amphon." 7 Teuma Yosafat geutanyong lom, "Peu kheueh disinoe hana le nabi nyang laén nyang hase tateumanyong ubak TUHAN keu geutanyoe?" 8 Geujaweueb lé Raja Ahab, "Mantong na sidroe teuk, gobnyan na kheueh Nabi Mikha aneuëk Yimla. Teuma ulôn banci keu gobnyan, sabab hántom na geuramai sapeue-sapeue nyang gét keu ulôn; sabe nyang hana gét." "Ah, hánjeuet neupeugah meunan!" geu seuôt lé Yosafat. 9 Lé Raja Ahab laju geuhôi sidroe lamkawan peugawée meuligoe dan ubak ureuëng nyan geuyue jaktueng laju Nabi Mikha. 10 Bak watéenyan Raja Ahab dan Yosafat, nibak badan geuh mantong meukeumat peukayan keubeusaran, teungoh geuduek nibak kurusi keurajeuen rab ngon teumpat ceumeulo boh gandom bak binéh babah pintoe geureubang Samaria, dan dumna nabi pi ka teuka ubak gobnyan sira geupeugah ramaian gobnyan. 11 Na sidroe lamkawan nabinyan, nyang nan gobnyan Nabi Zedekia aneuëk Kenaana, sira geurawot lungké-lungké beuso dan geupeugah laju ubak Raja Ahab, "Nyoe kheueh nyang geupeugah lé TUHAN, 'Deungon lungké-lungké nyang lagéenyoe Teungku Amphon teuma neuheuntam Siria dan neupeuhanco awaknyan.' " 12 Banmandum nabi nyang laén situju lagée geupeugah lé Nabi Zedekia nyan dan geutamah peugah lom, "Jak seureubu laju Ramot, Teungku Amphon nyang meunang. TUHAN geupeumeunang ateueh Teungku Amphon." 13 Lam watéenyan, utosan nyang jakhôi Nabi Mikha, ka trok dan laju jipeugah ubak Nabi Mikha nyan, "Banmandum nabi nyang laén ka geuramai bahwa Raja Ahab teuma meunang lam prangnyoe. Ulôn meuharab adak jeuet bapak neuramai cit nyang gét lagée nyang ka geuramai lé nabi-nabi nyan." 14 Teuma geujaweueb lé Nabi Mikha, "Deumi TUHAN nyang udeb, ulôn teuma ulôn peugah peue nyang geupeugah lé TUHAN ubak ulôn!" 15 Óh watée Nabi Mikha ka trok ukeue Raja Ahab, lé raja laju geutanyong, "Peu kheueh jeuet ulôn dan Raja Yosafat kamoe jakprang Ramot, atawa bék?" "Jak prang kheueh," kheun Nabi Mikha. "Teuntée Teungku Amphon teuma meuhase. TUHAN teuma geubri meunang ateueh Teungku Amphon." 16 Geuseuôt Raja Ahab, "Meunyoe droeneueh peugahnyan deumi nan TUHAN, neupeugah kheueh nyang bit. Padubgoe droeneueh ulôn peuingat keuhai nyan?" 17 Geubalaih lé Nabi Mikha, "Deuh ulôn kalon tantra Israel ka meutabu beuba di gunong-gunong. Awaknyan lagée bubiri nyang hana ureuëng rabe, dan TUHAN geupeugah keuhai awaknyan, 'Ureuëng-ureuëng nyoe hana nyang pimpén. Bah kheueh awaknyan jiwoe deungon seulamat.' " 18 Dan geupeugah lom lé Raja Ahab ubak Yosafat, "Beutôi lagée ulôn peugah nyan bukon? Hántom na jiramai nyang gét-gét keu ulôn! Sabe nyang broek-broek!" 19 Geupeugah lom lé Nabi Mikha, "Jinoenyoe neudeungoe laju peue nyang ka geupeugah lé TUHAN! Deuh ulôn kalon TUHAN teungoh geuduek nibak tahta gobnyan di dalam syeuruga, dan banmandum malaikat gobnyan ka teudong bak binéh gobnyan. 20 Dan TUHAN pih laju geutanyong, 'Soe nyang ka trok até jijak peusuna Raja Ahab nyan mangat jihnyan jitem jak muprang dan maté di Ramot di Gilead?' Geujaweueb lé malaikat-malaikat nyan meulaén-laén. 21 Akhé jih teuka kheueh saboh roh. Rohnyan geupeurab laju ubak TUHAN dan geupeugah, 'Ulôn kheueh nyang jak ba peusuna keu gobnyan.' 22 'Pakriban cara jih?' geutanyong lé TUHAN. Rohnyan geujaweueb, 'Ulôn teuma lônjak dan lôn peujeuet banmandum Nabi Ahab nyan jimeusulet.' TUHAN geupeugah lom, 'Get, tapeubuet laju nyang lagéenyan, gata teuma meuhase tapeusuna jih nyan.' " 23 Lheueh nyan Nabi Mikha geupeugah lom, "Nyan, nyan kheueh nyang jeuet! TUHAN ka geupeujeuet nabi-nabi Teungku Amphon jimeusulet ubak Teungku Amphon sabab TUHAN ka geupeuteuntée bahwa Gobnyan teuma geupeutreun bala ateueh Teungku Amphon!" 24 Dan geupeurab kheueh Nabi Zedekia ubak Nabi Mikha óh bantrok keunan laju geutampa nibak muka geuh dan geupeugah teuma, "Panena mungken Roh TUHAN geutinggai ulôn dan geumeututoe deungon gata?" 25 Geujaweueb lé Nabi Mikha, "Eunteuk gata ngieng bukeuti jih bak watée gata tajak musöm nibak saboh kama." 26 "Droeb jihnyan!" geupeurintah lé Raja Ahab, "dan taba laju jihnyan ubak Amon, wali banda, dan ubak Pangeran Yoas. 27 Tayue peutamong ureuëng nyoe u dalam glab, dan bék leu-leu tabri peunajoh dan ié jieb jih sampoe ulôn woe deungon seulamat." 28 Geupeugah lé Nabi Mikha, "Meunyoe Teungku Amphon neugisa deungon seulamat, saban cit TUHAN hana geumeututoe meulalu ulôn! Banmandum nyang na teuka disinoe jeuet keusaksi." 29 Óh lheuehnyan lé Raja Ahab, raja ureuëng Israel nyan, dan Yosafat raja Yehuda geujak prang laju banda Ramot di Gilead. 30 Raja Ahab geupeugah ubak Yosafat, "Ulôn teuma meunyamar dan meusajan lôn muprang, teuma droeneueh bah kheueh tangui peukayan keubeusaran droeneueh." Meunan kheueh cara jih raja Israel geumeunyamar bak watée geujak maju u mideuen prang. 31 Bak watéenyan ban lhée ploh dua panglima pasokan prang Siria nyang meugeuritan prang ka jiteurimong peurintah mangat jijakprang na kheueh raja Israel mantong békle nyang laén. 32 Teuma, nibak watée awaknyan deuh jingieng Raja Yosafat, awaknyan banmandum jisangka bahwa nyan na kheueh raja Israel. Lé sabab nyan Raja Yosafat nyan laju jiseurang. Teuma Raja Yosafat laju geukliek, 33 dan lé panglima nyang lhée ploh dua droe nyan laju jiteupeue bahwa nyang jiheuntam nyan bukon kheueh raja Israel. Dan bak watée nyan cit teuma Raja Yosafat nyan hana jiprang le. 34 Dan ngon hana jisangka-sangka sidroe lamkawan tantra Siria jitimbak aneuk panah jih, aneuk panah nyang jitimbak nyan bukon jituju ubak sapeue-sapeue tujuan. Dan keubeutolan aneuk panah nyan paih keunong ateueh Raja Ahab dan beusot bajée prang gobnyan bak bagian sinambat. "Ulôn ka keunong timbak!" geupeugah lé Raja Ahab ubak ureuëng ba geuritan prang gobnyan. "Taputa laju dan taba ulôn uluwa daerah mideuen prang nyoe!" 35 Teuma sabab prang nyan mantong that-that hibat gohlom na tanda-tanda reuda. Raja Ahab teutab geudong sira geumeutumpang droe ubak geuritan ngon geumeuhadab ubak pasokan Siria. Darah gobnyan teutab ji ilé nibak teumpat nyang luka sampoe ka meulangue ubak aleue geuritan prang geuh. Dan óh watée uroe ka seupôt barô kheueh Raja Ahab nyan meuninggai donya. 36 Bak watée mata uroe karab jilhob banmandum pasokan Israel jipeurintah geuyuewoe u banda dan u daerah maséng-maséng, 37 Sabab raja ka meuninggai donya. Dan jijakwoe kheueh bubena tantra nyan dan jijak kubu kheueh teuma manyét Raja Ahab nyan di Samaria. 38 Bak watée geuritan prang geuh nyan teungoh teurhah ngon teupeu gleh nibak kulam Samaria, na ureuëng-ureuëng inong jeuhet teungoh jimanoe disinan, dan di asée pih laju jijak lieh darah nyang mantong na meukeumat nibak geuritan prang nyan, paih that lagée nyang ka geupeugah lé TUHAN. 39 Kisah nyang laén keuhai Raja Ahab nyan, keuhai meuligoe gadeng dan banmandum banda nyang ka geupeudong, atra nyan ka teucetet didalam kitab Seujarah Raja-Raja Israel. 40 Óh ka lheueh Ahab meuninggai donya, aneuëk gobnyan nyang nan jih Ahazia teubaiát jeuet keuraja keugeunantoe gobnyan. 41 Bak thon nyang keu peuet peumeurintahan Ahab raja Israel, Yosafat aneuëk Asa jeuet keu raja ateueh Yehuda. 42 Bak watéenyan gobnyan kameu-umu lhée ploh limong thon. Gobnyan geumat peurintah di Yerusalem dua ploh limong thon treb jih. Nan ma gobnyan Azuba binti Silhi. 43 Saban lagée Asa, bapak gobnyan, Yosafat geupeubuet buet peue nyang paleng jroh bak mata TUHAN. Bubena ureuëng lunté bahnyan inong jeuhet meunan cit agam lunté banmandum nyan habéh geusampôh teuma nyang na mantong meutugaih di teumpat-teumpat ureuëng seumah beurala nyang mantong tinggai nibak jamén Asa, bapak gobnyan. Teuma teumpat-teumpat seumuja nyan keudroe nyang hana geupeu hanco. Lé sababnyan kheueh di rakyat ba teutab mantong na jipeuseumah keureubeuen ngon jitot keumeunyan disinan. Yosafat laju geupeugét kapai-kapai Tarsis keungon jakcok méuh di Ofir, teuma banmandum kapai-kapai nyang teungoh meulayeue nyan hana jadeh jimeulayeue sabab ka rusak di Ezion-Geber. Raja Ahazia nibak Israel laju geupeutaba mangat jeuet aneuk kapai gobnyan jimeulayeue meusigoe-sigoe deungon aneuk kapai Yosafat, teuma lé Yosafat hana geutem dan geutulak peue nyang jilakée lé awaknyan bahpi gobnyan na hubongan nyang gét deungon raja Israel. Óh lheueh nyan Yosafat laju meuninggai dan teukubu laju di lampôh jrat raja-raja banda Nabi Daud. Yoram aneuëk gobnyan teu baiát jeuet keuraja keugeunantoe gobnyan. Kisah nyang laén keuhai Yosafat nyan, meunan cit keuhai keupahlawanan gobnyan dan bubena muprang nyang ka geupeubuet banmandum nyan na teucetet lam kitab Seujarah Raja-raja Yehuda. Bak jamén nyan di nanggroe Edom hana meuraja. Nyang mat peurintah disinan na kheueh sidroe ulée daerah. 51 Bak thon nyang keu tujoh blaih nibak keurajeuen Raja Yosafat nibak Yehuda, Ahazia bin Ahab ka jeuet keuraja di nanggroe Israel dan geumat peurintah ateueh Israel na dua thon treb jih. 52 Gobnyan meudesya ubak TUHAN sabab ka geuseutôt langkah bapak droe geuh meunan cit deungon langkah ma droe geuh dan langkah-langkah Raja Yerobeam, lé sabab buet awaknyan ureuëng Israel ka rhot u dalam jurang desya. 53 Gobnyan geuseumah Baal dan meungabdi ubak jih nyan. Dan saban cit lagée bapak gobnyan nyang ka geumat peurintah sigohlom nyan, gobnyan pih geupeuteuka meureuka TUHAN, Po teu Allah nyang jiseumah lé ureuëng Israel.

2 Raja-Raja 1

1 Óh ka lheueh meuninggai Ahab raja Israel, nanggroe Moab laju jipeubeudôh beurontak ateueh Israel. 2 Bak siuroe Raja Ahazia di Israel rhot nibak seuramoe tingkat ateueh meuligoe jih di Samaria, lé sababnyan gobnyan luka parah that. Lé sababnyan gobnyan laju geukirém sidroe keu jijak tanyong ubak Baal-Zebub, dewa banda Ekron di Filistin, peu kheueh gobnyan hase puléh atawa hana. 3 Teuma malaikat TUHAN geuyue ubak Elia, nibak Tisbe, mangat geujak meurumpok ngon utosan-utosan Raja Ahazia nyan mangat geupeugah lagée nyoe, "Peu kheueh di Israel hana Po teu Allah sampoe gata keuneuk tajak ubak Baal-Zebub, dewa banda Ekron nyan? 4 Jak peugah kheueh ubak raja bahwa TUHAN meufeureuman lagée nyoe, 'Gata hana puléh, gata teuma maté!' " Óh ka lheueh Elia seuleusoe geupeubuet peurintah TUHAN nyan, 5 jiwoe kheueh utosan-utosan nyan ubak raja, lé raja laju geutanyong, "Pakon gata woe?" 6 Awaknyan jijaweueb, "na sidroe ureuëng geujak meurumpok ngon kamoe, dan geuyuewoe kamoe mangat kamoe peutrok ubak Amphon bahwa TUHAN meufeureuman lagée nyoe ubak Amphon, 'Peu kheueh di Israel hana Po teu Allah, sampoe gata tajak lakée peutunyok ubak Baal-Zebub, dewa banda Ekron? Gata hana puléh, gata teuma maté!' " 7 "Pakriban hi ureuëng nyan?" geutanyong lé raja. 8 "Bajée jubah dan talo keuieng geuh kulét," jaweueb awaknyan. "O, nyan Elia!" jaweueb raja nyan. 9 Lheueh nyan lé raja laju geuyue sidroe peuwira meusajan deungon na limong ploh droe aneuëk buah geuhnyan geujak droeb si Elia. Peuwiranyan geujak dan laju meurumpok deungon Elia teungoh geuduek ateueh saboh bukét. "Hei hamba Allah," kheun peuwira nyan, "raja geupeurintah gata treun!" 10 "Meunyoe bit ulôn nyoe hamba Allah," jaweueb Elia, "bah kheueh apui jitreun nibak langét dan jitot sampoe habéh gata meusajan deungon aneuëk buah gata!" Watéenyan cit teuma jitreun apui dan laju jitot peuwira nyan meusajan deungon ban limong ploh droe aneuëk buah jih. 11 Dan raja geuyue teuma sidroe peuwira nyang laén meusajan deungon limong ploh droe aneuëk buah jih. Awaknyan jijak meurumpok dan jipeugah ubak Elia, "Hei, hamba Allah, raja geuyue treun gata jinoenyoe cit teuma!" 12 "Meunyoe ulôn nyoe keubit hamba Allah," jaweueb Elia, "bah kheueh apui jitreun dilangét dan jitot habéh gata meusajan deungon aneuëk buah gata!" Watéenyan cit teuma apui jitreun nyang teuka nibak Po teu Allah dan jitot habéh peuwira nyan meusajan deungon banlimong ploh droe aneuëk buah jih nyan. 13 Lheueh nyan raja geukirém lom sidroe peuwira meusajan deungon limong ploh droe aneuëk buah jih. Peuwira nyan ji-ék ateueh bukét dan meunan ka trok dikeue Elia laju jimeuteuot sira jikheun lagée nyoe, "Peuamphon kheueh kamoe, ya hamba Allah! Neuweuh kheueh keu ulôn dan aneuëk buah ulônnyoe. Bék kheueh kamoe nyoe neupoh maté! 14 Dua droe peuwira laén meusajan deungon aneuëk buah jih ka maté jipajoh lé apui nyang teuka di langét, teuma ulôn meulakée, neugaséh kheueh ulôn!" 15 Watéenyan cit teuma geupeugah kheueh lé malaikat TUHAN ubak Elia, "Bék teumakot! Seutôt kheueh jihnyan tatreun di ateueh bukét nyoe." Lé sababnyan geutreun kheueh Elia meusajan deungon peuwiranyan ubak raja. 16 Dan geupeugah lé Elia ubak raja, "TUHAN meufeureuman, 'Gata tayue ureuëng laén tajak lakée peutunyok ubak Baal-Zebub dewa banda Ekron sang-sang di Israel hana Po teu Allah nyang jeuet teumpat teumanyong. Lé sababnyan gata hana puléh, gata teuma maté!' " 17 Dan maté kheueh Ahazia lagée nyang geufeureuman lé TUHAN meulalu Nabi Elia. Sabab Ahazia hana aneuëk agam, lé sababnyan Yoram syedara jih jeuet keu raja keugeunantoe geuh. Nyan na kheueh nibak thon nyang keudua watée keurajeuen Yehoram bin Yosafat, raja Yehuda. 18 Kisah laén keuhai peue nyang jipeubuet lé Raja Ahazia na teucetet lam kitab Seujarah Raja-raja Israel.

2 Raja-Raja 2

1 Teuka kheueh watéejih TUHAN keuneuk beuôt Elia lam syeuruga deungon peurantaraan angén badée. Watéenyan Elia dan Elisa ka geutinggai Gilgal, 2 bak teungoh rot euh Elia geupeugah ubak Elisa, "Tinggai kheueh droeneueh disinoe. Ulôn geuyuejak lé TUHAN u Betel." Teuma Elisa geujaweueb, "Deumi TUHAN nyang udeb dan deumi nyawöng Bapak, ulôn hana lôn tinggai Bapak." Lé sababnyan awaknyan meusajan-sajan geujak trok u Betel. 3 Na saboh kawan nabi nyang na tinggai disinan geujak meurumpok ngon Elisa dan laju geutanyong, "Peu kheueh droeneueh teupeue bahwa uroenyoe amphon droeneueh nyan jitinggai droeneueh sabab gobnyan geubeuôt lé TUHAN?" "Nyoe, lôn teupeue," jaweueb Elisa. "Teuma, ka kheueh, bék teupeugah le keuhainyan." 4 Óh lheuehnyan geupeugah kheueh lé Elia ubak Elisa, "Tinggai kheueh gata disinoe, lôn geuyue lé TUHAN mangat lôn jak u Yerikho." Teuma Elisa geujaweueb, "Deumi TUHAN nyang udeb dan deumi nyawöng Bapak, ulôn hana lôn tinggai Bapak." Deungon nyan teuma awaknyan geujak lom trok u Yerikho. 5 Na saboh kawan nabi nyang na tinggai nibak teumpat nyan geujak meurumpok ngon Elisa dan geutanyong, "Peu kheueh droeneueh teupeue bahwa nibak uroenyoe amphon gata geubeuôt lé Po teu Allah dan geutinggai gata?" "Nyoe, lôntuan teupeue," jaweueb Elisa. "Teuma ka kheueh bék tapeugah le keuhai nyan." 6 Óh lheuehnyan geupeugah kheueh lé Elia ubak Elisa, "Tinggai droeneueh disinoe, ulôn geuyuejak lé TUHAN ubak Krueng Yordan." Teuma Elisa geujaweueb, "Deumi TUHAN nyang udeb dan deumi nyawöng Bapak, ulôn hana lôn tinggai Bapak." Lé sababnyan awaknyan geujak laju trok u Krueng Yordan, 7 dan na 50 droe nabi geuseutôt awaknyan. Laju Elia dan Elisa geupiôh bak binéh krueng, dan ban limong ploh droe nabi nyan geudong hana padubna jiôh nibak teumpat nyan. 8 Elia laju geusuet bajée jubah gobnyan, lheuehnyan geugulong dan ngon geunulong nyan laju geuseukok ateueh ié krueng nyan. Laju ié krueng nyan beukah jeuet keu dua boh bagi, lé sababnyan Elia ngon Elisa jeuet geujak ateueh teumpat nyang tho. 9 Watée ka trok u meurandeh, Elia laju geupeugah ubak Elisa, "Lakée kheueh peue nyang gata lakée ubak ulôn sigohlom lôn geubeuôt lé TUHAN dan lôn tinggai gata!" Geujaweueb lé Elisa, "Peuwaréh kheueh kuasa Bapak nyan keu ulôn, mangat jeuet ulôn nyoe keugeunantoe Bapak." 10 "Oh, nyan payah that," seuot Elia. "Teuma meunyoe droeneueh deuh tangieng ulôn watée ulôn geubeuôt lé TUHAN, peue nyang droeneueh lakée nyan geupeutrok. Meunyoe droeneueh hana takalon, nyang gata lakéenyan geutulak." 11 Sira jak, awaknyan bandua hana piôh-piôh geupeugah haba. Deungon hana teusangka-sangka na saboh geuritan meuapui nyang jitarék lé guda meuapui trok keunan laju jipeucre awaknyan bandua dan Elia laju jipeu-ék lam syeuruga lé angén badée. 12 Elisa geukalon dan laju geutawök, "Elia, Bapak lôn! Bapak lôn! Nyang lindong Israel nyang peukasa! Bapak ka hanale!" Dan gadôh kheueh Elia nibak mata Elisa. Deungon peudeh that Elisa laju geupriek bajée jubah geuh jeuet keudua boh bagi, 13 dan laju geucok bajée jubah Elia nyang rhot. Óh lheuehnyan gobnyan geugisa dan geudong nibak binéh Krueng Yordan, 14 laju geuseupôt bajée jubah Elia nyan ateueh ié sira geupeugah, "Dipat kheueh TUHAN, Po teu Allah Elia nyan?" Óh ka lheueh geuseukok bajée ateueh ié krueng nyan, krueng nyan laju beukah dua dan gobnyan pi laju geujak ateueh tanoh nyang ka tho nyan u meurandeh jeh. 15 Ban limong droe nabi nyang teuka di Yerikho nyan deuh jikalon peue nyang ka teujadi, awaknyan laju jipeugah, "Kuasa Elia ka jiminah ubak Elisa!" Awaknyan jijak ubak gobnyan dan laju jisujut dikeue Elisa 16 dan geupeugah lé awaknyan, "Kamoe na 50 droe, banmandum teuga-teuga. Lé sababnyan, jak geutanyoe tajak mita Elia gurée droeneueh nyan. Mungken Roh TUHAN ka geuba awaknyan u ateueh gunong atawa lam barieh laju jitinggai disinan." "Hana peue!" geujaweueb Elisa. 17 Teuma awaknyan hana piôh jipaksa sampoe gobnyan geutem teuma. Dan geujak kheueh ban 50 droe nabinyan geujak mita Elia nyang treb jih na lhée uroe, teuma awaknyan teutab hana meurumpok ngon gobnyan. 18 Laju awaknyan jigisa ubak Elisa nyang geupreh di Yerikho. "Kon ka lheueh lôn peugah bahwa gata hana peu tajak seutôt gobnyan?" kheun Elisa ubak awaknyan. 19 Na padub droe ureuëng nibak di Yerikho jijak ubak Elisa sira jipeugah, "Pak, lagée nyang Bapak kalon keudroe, banda nyoe jroh, teuma ié jih hana jroh sampoe jeuet keusabab ureuëng inong nyang teungoh mume rhot aneuëk jih." 20 "Cok kheueh laju cawan nyang mantong barô," kheun Elisa, "dan boh kheueh sira lam cawan nyan." Dan awaknyan laju jiba peue nyang geulakée Elisa nyan ubak gobnyan. 21 Laju geujak Elisa ubak mata ié dan sira nyang kana nyan laju geugeulawa lam mata ié nyan sira geupeugah, "Nyoe kheueh feureuman TUHAN: 'Ulôn peugleh ié nyoe mangat bék na le jeuet keusabab maté gob atawa rhot aneuëk lam pruet!' " 22 Phon watéenyan gleh kheueh iényan paih lagée peue nyang geupeugah lé Elisa. 23 Óh lheuehnyan geujak kheueh Elisa nibak Yerikho u Betel. Bak teungoh rot euh na saboh kawan aneuëk miet jiteubit nibak lam banda laju jihina ngon jipeukém-peukém gobnyan. "Hei ureuëng lapeueng ulée, teubit nibak teumpat nyoe!" kheun awaknyan sira jikuk-kuk. 24 Elisa geupaleng geukalon ateueh aneuëk nyan lheueh nyan laju geuseurapa jihnyan ateueh nan TUHAN. Watéenyan cit teuma dua boh cagée jiteubit lam tamah laju jirungkom dan jipriek-priek aneuëk mit nyan na peuet ploh dua droe lamkawan aneuëk mit nyan. 25 Elisa geubot lom langkah gobnyan dan geujak laju u Gunong Karmel, lheueh nyan geuwoe lom u Samaria.

2 Raja-Raja 3

1 Lam thon nyang keulapan blaih nibak keurajeuen Yosafat raja Yehuda, Yoram bin Ahab jeuet keu raja Israel dan geumat peurintah di Samaria dua blaih thon treb jih. 2 Gobnyan geupeubuet nyang jeuhet nibak mata TUHAN, teuma gobnyan hana saban jeuhet jih ngon Ahab dan Izebel, ureuëng syiek jih. Patong nyang jipeugét lé ayah jih keungon seumah Baal ka jipeutreun lé gobnyan. 3 Teuma, saban cit lagée raja Yerobeam bin Nebat nyang mat peurintah sigohlom geuh nyan, gobnyan pih jeuet keusabab ureuëng Israel meudesya dan hana piôh jipeubuet hainyan. 4 Raja Mesa asai Moab na geupeulara bubiri. Sibagoe cukée ubak raja Israel, tieb-tieb thon gobnyan geujok na 100.000 aneuëk bubiri meunan cit bulée bubiri nibak 100.000 boh bubiri agam. 5 Teuma óh ka lheueh Raja Ahab meuninggai donya, Mesa laju beurontak ateueh Israel. 6 Lé sababnyan Raja Yoram laju geutinggai Samaria geujak peusiab banmandum angkatan prang gobnyan. 7 Gobnyan geukirém peusan lagéenyoe ubak Raja Yosafat di Yehuda, "Raja Moab ka jibeurontak ateueh ulôn; tatem kheueh droeneueh tamuprang meusajan lôn talawan jihnyan?" "Gét," jaweueb Raja Yosafat. "Ulôn ngon aneuëk buah lôn meunan cit deungon pasokan meuguda kamoe jak meusajan droeneueh. 8 Rot toh kheueh tanyoe prang awaknyan?" "Tacok rot nyang teujak u padang pasi Edom," jaweueb Yoram. 9 Dan geujak kheueh Raja Yoram meusajan deungon raja Yehuda dan raja Edom. Óh ka lheueh geujak nyang treb jih na tujoh uroe, awaknyan ka habéh ié jieb, lé sababnyan pasokan awaknyan meunan cit deungon beulatang nyang ba barang awaknyan hana hase ji-jieb ié. 10 "Ka paloe geutanyoe!" kheun Raja Yoram. "TUHAN ka geureuncana keuneuk seurah geutanyoe nyang lhée droe nyoe ubak raja Moab!" 11 Seuôt Raja Yosafat, "Peu kheueh disinoe hana nabi nyang hase geutanyong tanyoe keuhai tanyoe ubak TUHAN?" Sidroe lamkawan peuwira tantra Raja Yoram jiseuôt, "Na Elisa bin Safat! Gobnyan ilée peumbantu Elia." 12 "Beutôi! TUHAN meufeureuman meulalu gobnyan," kheun Raja Yosafat. Dan geujak kheueh ban lhée droe raja nyan ubak Elisa. 13 "Keupeue neulakée tulông ubak lôn?" kheun Elisa ubak raja Israel nyan. "Jakmantong ubak nabi-nabi ureuëng syiek gata!" "Hana jeuet!" seuôt Yoram. "Sabab TUHAN kheueh nyang reuncana keugeujok kamoe ban lhée droenyoe ubak raja Moab." 14 Geujaweueb lé Elisa, "Deumi TUHAN nyang udeb, nyang ulôn peutimang, ulôn peugah ngon trok trang meunyoe kon lé sabab Raja Yosafat nyang ulôn horeumat, ulôn hana lôn peugét urosan deungon Teungku. 15 Jinoenyoe ba kheueh keunoe sidroe ureuëng peumeu-én keucapi." Teungoh ureuëng nyan jipeumeu-én keucapi jih, Elisa laju geukuasa lé Roh TUHAN, 16 lé sababnyan gobnyan geupeugah, "Nyoe kheueh nyang geukheun lé TUHAN: 'Kueh kheueh lueng-lueng di wadi nyoe. 17 Bahpi gata hana takalon ujeuen treun atawa angén pôt, teuma ié teutab na meulimpah-limpah lam wadi nyoe. Gata meusajan deungon beulatang nyang peudieng barang gata meuteumé ié nyang seb keu teujieb sipuih-puih jih.' " 18 Lheuehnyan geupeugah lom lé Elisa, "Teuma nyoe na kheueh peukara ubit nibak TUHAN. Gobnyan pi geubri teuma gata meunang ateueh ureuëng-ureuëng Moab. 19 Banmandum banda awaknyan nyang meupageue ngon kuta nyang gét-gét hase gata reuloih; banmandum bak kayée nyang muboh gata koih, banmandum mata ié awaknyan gata sumpai, dan banmandum ladang awaknyan nyang subô-subô nyang geulawa ngon batée sampoe rusak banmandum." 20 Óh singoh nyan, watée awaknyan teungoh jipeuna upacara keureubeuen beungoh, ji-ile kheueh ié nyang teuka di arah Edom sampoe peunoh wadi nyan. 21 Watée raja Moab jideungoe bahwa ban lhée raja nyan ka trok keuneuk jak prang jih, banmandum ureuëng -- bahnyan nyang tuha meunan cit nyang muda -- nyang ka-ek jigulam beude, laju jikrah dan jipeuduek nibak bataih nanggroe. 22 Óh singoh nyan, watée awaknyan jibeudôh beungoh, mata uroe laju meucahya ateueh ié teugeunang nyan sampoe deuh jih lagée darah. 23 Lé sababnyan awaknyan laju jikuk-kuk, "Darah! Pasti sipa-i-sipa-i nibak ban lhée boh pasokan nyan ka jimeupoh-poh sabe keudroe-droe! Jak geutanyoe tarampok khimah-khimah awaknyan!" 24 Teuma meunan ureuëng-ureuëng Moab nyan trok ubak khimah awaknyan, awaknyan laju jipoh sampoe jisurot lé pasokan Israel nyang laju maju jipeulet sira jipoh maté awaknyan 25 dan jireuloh bubena banda-banda awaknyan. Tieb-tieb ladang nyang subô nyang awaknyan liwat, laju jirhom lé awaknyan ngon batée. Akhé jih, banmandum ladang ka teutôb ngon batée. Meunan cit lé ureuëng-ureuëng Israel laju jisumpai bubena mata ié dan jikoh banmandum bak kayée nyang muboh. Nyang tinggai na kheueh banda Kir-Hareset, ma banda Moab. Akhéjih banda nyan pih jikeupong dan jirhom ngon batée lé peungumban-peungumban. 26 Watée ka sadar bahwa jihnyan hana mungken le meuteun, lé raja Moab laju jiba 700 droe tantra nyang ahli jipeuguna peudeueng, laju ji-useuha jiheuntam peutahanan raja Edom, teuma hana meuhase. 27 Lé sababnyan laju jicok putra mahkota jih, laju jikeureubeuen ateueh bintéh beuton sibagoe keureubeuen keu dewa Moab. Lé sababnyan takot kheueh teumakot ureuëng-ureuëng Israel, awaknyan laju jisurot pasokan jih nibak banda nyan dan laju jiwoe u nanggroe jih.

2 Raja-Raja 4

1 Nibak siuroe na sidroe inong balée nabi jijak ubak Elisa dan jipeugah, "Bapak, lakoe ulôn na meuninggai donya! Dan Bapak neuteupeue bahwa gobnyan pi ureuëng nyang paleng taát ubak Po teu Allah, teuma gobnyan na meu-utang bak sidroe-droe ureuëng. Jinoe ureuëng nyan jiteuka keuneuk jijakcok bandua droe aneuëk ulôn dan jipeujeuet aneuëk ulôn nyan keu namiet jih, nyan na kheueh sibagoe meunayeu utang meureuhom lakoe ulôn." 2 "Pakriban ulôn hase lôn tulông droeneueh?" geutanyong lé Elisa. "Nibak droeneueh peue nyang na dirumoh?" "Hana sapeuena," jaweueb inong balée nyan, "teuma nyang na na kheueh saboh kaca ubit minyéuk zaiton." 3 Geupeugah lé Elisa, "Neujak ngui sijai-jai jih kaca-kaca ubit nibak kawöm lingka droeneueh. 4 Óh lheuehnyan droeneueh meusajan deungon aneuëk-aneuëk droeneueh neutamong lam rumoh dan neutôb pintoe. Ro kheueh minyéuk nyang na lam kaca nyan u dalam kaca-kaca nyan, dan pinah kheueh laju nyang ka peunoh." 5 Dan jiwoe kheueh inong balée nyan u rumoh jih. Óh ka lheueh gobnyan ngon aneuëk-aneuëk jih jitamong dan jitôb pintoe rumoh, gobnyan laju jicok kaca ubit nyang meuasoe minyéuk zaiton nyan, laju geuro lam kaca-kaca nyang ka jijok lé aneuëk-aneuëk jih. 6 Óh ka lheueh kaca-kaca nyan meuasoe mandum, lé gobnyan geulakée lom saboh kaca teuk. "Ka habéh ma," jaweueb sidroe lamkawan aneuëk geuhnyan. Lé nyan teuma minyéuk nyan ka hana ji-ile le. 7 Óh lheueh nyan ma nyan laju jijak ubak Nabi Elisa, dan Elisa laju geupeugah, "Peubloe kheueh banmandum minyéuk nyan keu ngon bayeue utang droeneueh, dan nyang leubeh nyan kaseb keu beulanja droeneueh dan aneuëk-aneuëk droeneueh." 8 Di Sunem na tinggai sidroe inong kaya. Bak siuroe watée Elisa geujak u Sunem, lé ureuëng inong nyan laju jihôi gobnyan keugeujak makheun. Phon watéenyan pajan mantong Elisa na geujak u Sunem gobnyan geumakheun nibak rumoh inong kaya nyan. 9 Lheueh nyan jikheun kheueh lé inong kaya nyan ubak lakoe jih, "Ulôn peucaya bahwa bapak nyang kayém that geujak keunoe na kheueh biet-biet sidroe hamba Po teu Allah. 10 Bah kheueh tapeugét saboh kama nyang ubit nibak tingkat ateueh rumoh geutanyoe, dan tapeuleungkab deungon saboh teumpat éh, meuja dan kurusi, meunan cit panyöt mangat jihnyan jeuet ji-éh nibak teumpat nyan pajan mantong jihnyan jijak bak geutanyoe." 11 Nibak siuroe Elisa geujak lom u Sunem, watée gobnyan geu-ék u ateueh nibak kama gobnyan keuneuk meureuhat, 12 gobnyan laju geuyue ubak peulayan gobnyan nyang nan jih Gehazi, mangat jijak hôi ureuëng inong nyan. Watée inong nyan ka trok, 13 laju geupeugah lé Elisa ubak gobnyan Gehazi, "Tanyong bak gobnyan pakriban ulôn hase lôn bayeue meunayah gobnyan keugeutanyoe. Mungken gobnyan meuheuet mangat tanyoe tajak ubak raja atawa ubak panglima angkatan prang dan meututoe keuhai peureulée gobnyan." Ureuëng inong nyan geujaweueb, "Ulôn tinggai lamkawan waréh kawöm lôn dan lé sababnyan hana kureueng meusapeue pih." 14 Lé sababnyan geutanyong kheueh lé Elisa ubak Gehazi, "Meunyoe meunan, peu kheueh nyang jeuet lôn peubuet keu gobnyan?" Gehazi jijaweueb, "Gobnyan hana meu aneuëk, Pak, dan lakoe gobnyan ka tuha that." 15 "Hôi inong nyan keunoe," kheun Elisa. Ureuëng inong nyan teuka dan jidong bak babah pintoe. 16 Laju geupeugah lé Elisa ubak inong nyan, "Thon ukeue nyoe, bak watée nyang lagéenyoe, droeneueh ka neutingkue sidroe aneuëk manyak nyang agam." "Teungku, bék sulet!" kheun inong nyan. "Teungku nyan hamba Po teu Allah!" 17 Teuma beutôi kheueh peue nyang geupeugah lé Elisa. Thon lheueh nyan teuma, kira-kira bak watée nyang saban lé ureuëng inong nyan laju jipeulahé sidroe aneuëk agam. 18 Óh ka lheueh aneuëk nyan rayeuk, bak siuroe watée musém keumeukoh, aneuëk nyan meusajan ngon ureuëng keumeukoh jijak laju ubak ayah jih nyang na di ladang. 19 Deungon hana teusangka-sangka aneuëk nyan jiklik ubak ayah jih, "Adoh! Ulée lôn sakét that!" Jipeugah lé ayah aneuëk nyan ubak sidroe peulayan, "Taba laju aneuëk nyan ubak ma jih." 20 Lé peulayan nyan laju jiba aneuëk nyan ubak ma jih, dan lé ma aneuëk nyan laju jiwa aneuëk jihnyan. Teuma óh uroe ka seupôt aneuëk nyan pih meuninggai donya. 21 Lé ma aneuëknyan laju jiba aneuëk jihnyan u ateueh, ubak kama Elisa, laju jipeuéh aneuëk nyan ateueh teumpat éh. Óh lheuehnyan ma aneuëk nyan laju jiteubiet sira jitôb pintoe, 22 ureuëng inong nyan jijak hôi lakoe jih. Ureuëng nyan jipeugah, "Tayue kheueh sidroe peulayan mangat jijak keunoe deungon saboh keuleudée. Ulôn keuneuk jak jinoe cit teuma ubak Nabi Elisa, dan hana treb teuma bagaih ulôn gisa." 23 "Pakon jeuet jinoe gata jak?" geutanyong lé teungku lakoe jih. "Uroenyoe kon uroe Sabat dan kon teuma uroe raya Buleuen Barô." "Hana peue," jaweueb ureuëng nyan. 24 Óh ka lheueh gobnyan jipasang peulana ateueh keuleudée nyan, gobnyan laju jipeugah bak peulayan nyan, "Paroih kheueh laju keuleudée nyoe mangat tajam jijak; bék gata peukureueng plueng jih meunyoe hana ulôn yue." 25 Dan jijak kheueh ureuëng inong nyan ubak Gunong Karmel nibak teumpat Elisa. Phon dijiôh lé Elisa ka geukalon ureuëng inong nyan jijak bak gobnyan. Elisa laju geupeugah ubak Gehazi, "Ngieng kheueh, ma nyang di Sunem nyan jijak keunoe! 26 Bubagaih kheueh gatajak bak jihnyan dan gata tanyong laju pakriban keuadaan keuluwarga jih." "Banmandum jroh-jroh mantong," kheun ureuëng inong nyan ubak Gehazi. 27 Teuma watée katrok dikeue Elisa, gobnyan laju geusujut dan geuwa gaki Elisa. Gehazi keuneuk jikireuh inong nyan nibak gaki Elisa nyan, teuma Elisa laju geupeugah, "Peubiyeu mantong! Deuh jih inong nyoe seudeh lumpahna. Teuma TUHAN hana geupeugah sapeue ubak ulôn!" 28 Ureuëng inong nyan laju jipeugah, "Bapak, ulôn hana lôn lakée aneuëk nibak droeneueh. Ka lheueh lôn peugah ubak Bapak mangat bék neubri harapan nyang shoh keu ulôn nyoe." 29 Elisa geupaleng ubak Gehazi dan laju geupeugah, "Bubagaih, jakcok laju tungkat ulôn lheueh nyan tajak kheueh laju u rumoh ma nyoe. Bék gata piôh keu gata bri saleuem keusoe mantong nyang meurumpok ngon gata bak rot ueh. Meunyoe ureuëng laén jibeuôt saleuem ateueh gata, bék gata böih watée keugata jaweueb saleuem jih nyan. Meunan gata ka trok keunan, keubah kheueh laju tungkat ulôn ateueh tuboh aneuëk nyan." 30 Ureuëng inong nyan jipeugah, "Bapak Elisa! Deumi TUHAN nyang udeb dan deumi nyawöng Bapak, ulôn hana lôn tinggai Bapak!" Lé sababnyan geujak kheueh Elisa meusajan deungon ma nyan u rumoh jih. 31 Gehazi ka awai jijak nibak awaknyan keu jijak keubah tungkat Elisa ateueh tuboh aneuëk nyang ka meuninggai nyan, teuma hana meusu sibagoe tanda aneuëk nyan udeb. Dan lé sababnyan jijak kheueh Gehazi jijak meurumpok ngon Elisa dan laju jipeugah, "Aneuëk nyan hana jibeudôh." 32 Meunan ka trok u rumoh ureuëng inong nyan, Elisa geutamong keudroe lam kama nyan dan laju geukalon manyét aneuëk nyan ka teu-éh ateueh teumpat éh. 33 Elisa geutôb pintoe lheuehnyan laju geumeudoá ubak TUHAN. 34 Óh lheuehnyan gobnyan laju geudugom ateueh tuboh aneuëk nyan dan laju geupeurab babah, mata dan jaroe gobnyan ubak babah, mata ngon jaroe aneuëk nyan. Sabab gobnyan geupeubuet nyang lagée nyan bagoe, tuboh aneuëk nyan ka jeuet keu su-uem. 35 Elisa laju geubeudôh lheueh nyan geujak keudeh keunoe lam kama nyan, lheueh nyan geudugom lom ateueh tuboh aneuëk nyan. Akhé jih aneuëk nyan beureusen tujoh goe, dan laju jipeuhah mata jih. 36 Elisa geuyue laju ubak Gehazi mangat jijak tawök ma aneuëk nyan, dan watée ma aneuëk nyan ka jitamong, laju geupeugah lé Elisa ubak ma aneuëk nyan, "Nyoe aneuëk Ma." 37 Ma nyan laju jisujut dikeue Elisa dan lheuehnyan laju jiba aneuëk nyan peuteubiet u luwa. 38 Saboh watée jiteuka musém deuk nyang paleng hebat bansaboh nanggroe. Lé sababnyan Elisa geuwoe u Gilgal. Watée gobnyan teungoh geupeubeuet saboh kawöm nabi-nabi, gobnyan laju geuyue peulayan geuh mangat jijak cok saboh beulangöng nyang rayeuk lheueh nyan laju geutaguen peunajoh keu awaknyan. 39 Na sidroe nibak nabi-nabi nyan geuteubiet geujak u ladang keu geujak mita ôn-ôn gulée, dan laju meuteumé ngon saboh seunaman bak labu nyang udeb keudroe. Lé nabi nyan laju geupot boh-boh labu nyan nyang keubiet le that-that, atranyan laju geupeuwoe. Deungon hana geuteupeue boh peue nyan, lé nabi nyan laju geukoih-koih lheueh nyan laju geupeutamong lam beulangöng rayeuk nyan. 40 Óh ka masak, laju geujok-jok keu nabi-nabi nyang laén nyan. Teuma banmantong awaknyan jirasa peunajoh nyan, awaknyan laju jiklik-klik jimeuhôi Elisa, "Bapak, nyoe tuba!" Awaknyan hana jitem pajoh. 41 Lé sababnyan Elisa laju geuyue teupông bacut, atranyan laju geusipreuk lam beulangöng nyan, lheueh nyan gobnyan geupeugah, "Jok-jok lom peunajoh nyan." Biet that-that, peunajoh nyan ka hana le meubahya. 42 Bak saboh watée nyang laén, na sidroe ureuëng agam jijak nibak teumpat jih di Baal-Salisa. Ureuëng nyan jiba keu Elisa boh gandom nyang ban mantong teupot dan dua ploh boh ruti nibak gandom nyang phon-phon that jipot lam thon nyan. Elisa laju geuyue peulayan gobnyan mangat jijok-jok ruti nyan keu nabi-nabi nyan, 43 teuma lé peulayan nyang jipeugah, "Hana mungken seb keu sireutoih droe ureuëng!" Geujaweueb lé Elisa, "Tajok kheueh laju mangat awaknyan jeuet jipajoh, sabab TUHAN meufeureuman bahwa awaknyan teuma jimakheun dan óh lheueh jimakheun mantong na nyang leubeh." 44 Lé peulayan nyan laju jiweuk-weuk peunajoh nyan keu awaknyan, dan awaknyan banmandum hase jimakheun. Óh lheueh jimakheun mantong na tinggai lagée nyang geupeugah lé TUHAN.

2 Raja-Raja 5

1 Naaman na kheueh panglima angkatan prang Siria nyang paleng jicinta dan jihareuga lé raja Siria, sabab meulalu Naaman, TUHAN ka geupeumeunang ubak tantra Siria. Naaman na kheueh sidroe panglima nyang peukasa, teuma jihnyan na peunyakét kulét nyang lumpah parah. 2 Bak saboh watée Siria jijak heuntam nanggroe Israel. Lam prang nyan sidroe aneuëk dara Israel jidrob dan laju jiba sibagoe tawanan, óh lheuehnyan jeuet keupeulayan keupeurumoh Naaman. 3 Nibak siuroe jipeugah lé peulayan nyan ubak Pocut Po jih, "Pocut, meunyoe teungku amphon geujak meurumpok ngon nabi nyang na tinggai di Samaria, ka pasti nabi nyan geupeupuléh teungku po." 4 Watée Naaman geudeungoe hainyan, lé jihnyan laju jijak ubak raja dan jipeugah banmandum peue-peue nyang ka jipeugah lé aneuëk dara nyan. 5 Geupeugah lé raja, "Gét, jak kheueh ubak raja Israel, ulôn teuma lôn tuléh surat keu gobnyan." Dan jijak kheueh Naaman deungon jiba sajan 30.000 péng pirak, 6.000 péng méuh, dan 10 pasang peukayan nyang jroh-jroh. 6 Surat nyang geuba nyan asoe jih lagée nyoe: "Meulalu surat nyoe ulôn peuturi peuwira ulôn, nan jih Naaman ubak Teungku mangat Teungku neutem peupuléh peunyakét jih nyoe." 7 Watée raja Israel geubaca surat nyan, lé rajanyan laju jipriek-priek peukayan jih sabab teumakot, lheueh nyan geupeugah, "Mupalo, peue sabab raja Israel nyan jiyue bak ulôn mangat lôn peupuléh ureuëng nyoe? Ulôn bukon Po teu Allah nyang na kuasa keu lôn peu-udeb ngon lôn peumaté ureuëng laén! Pasti raja Siria nyan jimita gara-gara ngon ulôn!" 8 Nabi Elisa geudeungoe keuhai nyan, dan laju geukirém peusan nyang lagéenyoe ubak raja Israel, "Pakon jeuet yo? Yue kheueh ureuëng nyan mangat jijak ubak ulôn mangat jihnyan jiteupeue bahwa di Israel nyoe na sidroe nabi!" 9 Lé sababnyan geujak kheueh Naaman ngon geuritan guda jihnyan u rumoh Elisa, meunan trok laju jipiôh bak babah pintoe. 10 Elisa laju geukirém sidroe peulayan mangat jipeugah haba nyoe ubak Naaman, "Neujak kheueh Teungku jak manoe tujoh goe lam Krueng Yordan, óh lheueh nyan Teungku ka puléh lom teuma." 11 Banjideungoe meunan Naaman beungéh that laju jipeugah, "Ulôn pike gobnyan keudroe nyang teubiet geujak meurumpok ngon ulôn, dan geumeudoá ubak TUHAN, Allah geuh nyan, dan geugrak jaroe geuh nyan nibak teumpat nyang sakét bak tuboh lôn nyoe lheuehnyan laju ulôn nyoe ka puléh. 12 Krueng Abana dan Krueng Parpar di Damsyik leubeh gét nibak krueng toh mantong di Israel! Ulôn jeuet lôn manoe inan dan hase puléh!" 13 Teuma lé peulayan-peulayan nyan jipeurab bak ureuëng nyan dan jipeugah, "Teungku, meunyoe Teungku geuyue peubuet sapeue-sapeue nyang payah, ka pasti Teungku neupeubuet teuma. Peue teuk lom gobnyan geuyue Teungku neumanoe mangat jeuet puléh!" 14 Lé sababnyan jijak kheueh Naaman ubak Krueng Yordan, laju jitamong dan jipeuseunom droe lam krueng nyan na tujoh goe lagée nyang ka geuyue lé Elisa. Lheueh nyan Naaman pih ka puléh teuma. Tuboh jih ka sihat lom saban lagée tuboh aneuëk muda. 15 Lheueh nyan jihnyan meusajan ngon nyang iréng jih jijak laju ubak Elisa. "Jinoenyoe ka ulôn teupeue," kheun Naaman ubak Elisa, "bahwa bansaboh donya nyoe teuma na sidroe Allah, nyan kheueh Po teu Allah nyang jiseumah lé ureuëng Israel. Lé sababnyan, beuneutem kheueh lé Teungku neuteurimong meuneubri ulôn." 16 Geujaweueb lé Elisa, "Deumi TUHAN nyang udeb, nyang ulôn peutimang, ulôn hana lôn teurimong meuneubri peue-peue mantong." Naaman laju jipaksa mangat Elisa geutem teurimong meuneubri jih nyan, teuma Elisa teutab hana geutem teurimong. 17 Dan jipeugah lé Naaman, "Meunyoe Teungku hana cit neutem teurimong nyang ulôn bri nyoe, neupeu idhin kheueh ulôn lôn peuwoe tanoh nyang le jih sidub ék nyang jiba lé sipasang bagal. Sabab, phon jinoenyoe ulôn peuseumah keureubeuen na kheueh keu TUHAN mantong, dan kon keu ilah-ilah nyang laén. 18 Meunyoe teuma ulôn neujak meusigoe ngon raja keu teujak seumayang ubak kuil Rimon dewa Siria, seumoga TUHAN geupeu amphon ulôn." 19 Seuôt Elisa, "Tajak kheueh deungon seulamat." Dan Naaman pih laju jijak. Hana treb óh lheueh Naaman jijak, 20 Gehazi peulayan Elisa nyan, teupike keudroe jih, "Ah, keupeue jihnyan teupeu biyeu jijak deungon hana jibayeue sapeue? Nyang sikeubit jih amphon ulôn geuteurimong peue nyang jijok lé ureuëng Siria nyan! Deumi TUHAN nyang udeb, ulôn bah lôn jak tiyeub jihnyan dan hase lôn teumé sapeue-peue nibak jihnyan!" 21 Lé Gehazi laju jijak peulet Naaman. Watée jingieng lé Naaman na ureuëng teuka, jihnyan laju jitreun ateueh geuritan jih dan laju jipeugah, "Peue na peureulée?" 22 Jijaweueb lé Gehazi, "Meuáh Teungku, ulôn geuyue jak peutrok ubak Teungku bahwa banmantong na dua droe nabi teuka nibak gunong-gunong Efraim. Teungku lôn geulakée beuneubri 3.000 péng pirak dan dua boh pasang peukayan nyang gét keu bandua droe nabi nyan." 23 "Ka teuntée ulôn bri!" seuôt Naaman, dan jihnyan jipaksa mangat Gehazi jitem ba 6.000 péng pirak. Naaman laju jibungkoh péng nyan lam dua boh baluem, dan jicok dua boh pasang peukayan nyang gét-gét, banmandum nyan laju jijok ubak bandua droe peulayan jih, nyang jiyue jak leubeh awai nibak Gehazi. 24 Watée ka trok ubak bukét teumpat tinggai Elisa, Gehazi laju jicok péng ngon peukayan nyan nibak peulayan-peulayan Naaman, óh lheuehnyan laju jikeubah lam rumoh. Lheueh nyan peulayan-peulayan nyan jiyue jak woe, 25 lheueh nyan laju jitamong lom lam rumoh nyan. Geutanyong lé Elisa, "Pane kah jak?" "Hana lôn jak sahoe, Teungku Amphon!" jaweueb Gehazi. 26 Teuma Elisa geupeugah, "Até ulôn na disideh watée Naaman jitreun ateueh geuritan jih keujijak meurumpok ngon gata. Nyoe kon watée jih keuteumita péng dan keu teubloe lampôh zaiton, meunan cit lampôh anggô, bubiri dan leumô meunan cit namiet-namiet! 27 Sabab gata tateurimong meuneubri nyan, gata pih tateurimong teuma peunyakét Naaman. Lom pih keu siumu masa keuturonan gata pih teutab na jiteurimong peunyakét nyan!" Watée Gehazi jiteubiet nibak teumpat nyan, jihnyan laju keunong peunyakét kulét -- kulét jih ka jeuet keu putéh lagoena.

2 Raja-Raja 6

1 Nibak siuroe nabi-nabi nyang geudidek lé Elisa, apoh apah ubak gobnyan. Nabi-nabi nyan geupeugah, "Teumpat tinggai geutanyoe ubit that-that! 2 neupeu idhin kheueh keu kamoe meujakkoih bak kayée nyang tô ngon Krueng Yordan, dan geupeudong teumpat tinggai geutanyoe disinan." "Gét that," geujaweueb lé Elisa. 3 Sidroe lamkawan awaknyan jipaksa mangat Elisa geujak meusajan ngon awaknyan. Elisa geutem, 4 dan awaknyan pih laju jijak meusajan-sajan. Watée katrok bak binéh Krueng Yordan, jipeuphon kheueh awaknyan jijakkoh kayée. 5 Deungon hana jisaja mata pato sidroe lamkawan awaknyan rhot lam ié. "Pakon meunan hai Bapak!" jikuk lé awaknyan, "Nyan pato gob teungui sikeujab!" 6 "Dipat rhot jih?" geutanyong lé Elisa. Ureuëng nyan laju jitunyok teumpat jih, lé Elisa laju geureupang sikrak kayée lheueh nyan laju geurhon ubak teumpat nyan. Deungon nyan jitimue kheueh mata pato nyan ateueh muka ié. 7 Geupeugah lé Elisa, "Cok!" Ureuëng nyan laju jisunyueng jaroe jih dan laju jicok pato nyan. 8 Bak saboh watée Siria jimuprang deungon Israel. Óh ka lheueh meurokpakat ngon mandum panglima jih, raja Siria nyan laju jipeuteuntée bak teumpat toh awaknyan jipeudong khimah. 9 Teuma Elisa geukirém haba ubak raja Israel keu geupeuingat raja nyan mangat bék jijak ubak teumpat nyan, sabab lé ureuëng-ureuëng Siria ka lazem that jijak rot nyan. 10 Lé sababnyan raja Israel laju geupeuingat ubak ureuëng-ureuëng Israel nyang na tinggai rab-rab ngon teumpat nyan mangat awaknyan meujaga-jaga. Meunan kheueh Elisa meu-ulang-ulang geupeuingat raja. 11 Sabab hainyan keubiet sakét that até raja Siria, lé sababnyan teuma laju jihôi bubena peuwira jih lheuehnyan laju jitanyong, "Pasti lamkawan geutanyoe na nyang meukianat. Soe ureuëng jih? Peugah laju!" 12 Sidroe lamkawan peuwira nyan laju jijaweueb, "Hana meusidroe pih, wahe Teungku Po. Nabi Elisa kheueh ulée peukuron jih! Gobnyan kheueh nyang peugah ubak raja Israel peue nyang Teungku Po peugah nyan, bahpi nyan neupeugah lam kama éh." 13 "Jak seulidek kheueh dipat jihnyan," peurintah raja, "mangat jeuet hase ulôn drob jihnyan." Lé ureuëng laju jijak peugah ubak raja bahwa Elisa na di Dotan. 14 Lé raja Siria laju jikirém ubak teumpat nyan saboh kawan pasokan nyang rayeuk meunan cit deungon guda dan geuritan prang. Óh watée malam awaknyan ka trok ubak banda nyan dan banda nyan laju jikeupong. 15 Óh singoh nyan, banbeungoh that-that watée peulayan Elisa jibeudôh dan jiteubiet uluwa, laju deuh jikalon pasokan Siria ka jikeupong banda nyan leungkab deungon guda dan geuritan prang awaknyan. Lé sababnyan laju jiwoe ubak Elisa dan jipeugah, "Mupalo tanyoe, Teungku Po! Peue nyang harôh tapeubuet?" 16 "Bék takot," jaweueb Elisa. "Nyang dong blaih tanyoe leubeh le nibak nyang dong blaih awaknyan." 17 Lheueh nyan Elisa laju geumeudoá, "TUHAN, bah kheueh Droeneueh neubuka mata peulayan ulôn mangat jih nyan jeuet jikeumalon!" TUHAN geupeutrok doá Elisa dan watée peulayan geuhnyan jikeumalon, deuh jingieng gunong nyan peunoh deungon guda dan geuritan meuapui jikeulileng Elisa. 18 Watée ureuëng-ureuëng Siria nyan jijak prang gobnyan, Elisa laju meudoá, "TUHAN, peubuta kheueh mata bubena awaknyoe!" TUHAN geudeungoe doá Elisa, deungon nyan teuma awaknyan banmandum ka habéh buta. 19 Elisa geujak bak awaknyan sira geupeugah, "Gatanyoe ka sisat, nyoe kon banda nyang gata mita. Jak, seutôt ulôn, eunteuk ulôn intat gata ubak ureuëng nyang gata mita." Laju Elisa geuintat awaknyan u Samaria. 20 Watée awaknyan geutamong lam banda nyan, Elisa laju meudoá, "TUHAN, neupeubleuet kheueh mata awaknyan mangat awaknyan jeuet jimeungieng." TUHAN geudeungoe doá Elisa; Gobnyan geupeubleuet mata mandum awaknyan akhé jih awaknyan hase jimeungieng dan awaknyan banmandum hireuen watée jikalon bahwa awaknyan kana nibak banda Samaria. 21 Watée raja Israel geukalon ureuëng-ureuëng Siria nyan, lé raja nyan laju geutanyong, "Hei Elisa, peu kheueh awaknyan ulôn poh maté banmandum?" 22 "Bék," jaweueb Elisa, "Tantra nyang Amphon drob nibak mideuen prang pih hana Amphon poh maté, peue teuk lom nyang nyoe. Amphon jok kheueh keu awaknyan peunajoh ngon ié jieb, lheueh nyan bahkheueh awaknyan jiwoe lom ubak raja droe jih." 23 Lé sababnyan raja Israel laju geupeuna khanuri nyang paleng rayeuk keu awaknyan. Óh ka lheueh awaknyan jimakheun ngon jieb ié, gobnyan geuyue awaknyan jeuet jiwoe ubak raja Siria. Phon watéenyan ureuëng-ureuëng Siria ka jipiôh hana jiprang le nanggroe Israel. 24 Na padub watée teuma óh lheuehnyan lé Benhadad raja Siria laju jiba banmandum tantra jih keuneuk jijak prang Israel. Awaknyan laju jikeupong banda Samaria, 25 lé sabab prang nyan ka jiteuka deuk nyang paleng hebat lam banda, lé sababnyan teuma saboh ulée keuleudée ka meuyuem lapan ploh péng pirak, dan dua ôn ék cicém mirah pati yuem jih limong péng pirak. 26 Bak saboh saát watée raja teungoh geujak-jak ateueh beuton banda, na sidroe ureuëng inong laju jitawök, "Teungku Amphon, neutulông!" 27 Geujaweueb lé raja, "Meunyoe TUHAN hana geutulông gata, panena mungken ulôn hase lôn tulông gata? Nibak ulôn hana gandom atawa ié anggô! 28 Peue nyang gata peureulée?" Lé inong nyan jijaweueb, "Rakan ulôn nyoe ka jipadan ulôn mangat jeuet kamoe pajoh aneuëk ulôn leubeh ilée, óh singoh kamoe pajoh teuma aneuëk jihnyan. 29 Lé sababnyan laju kamoe taguen aneuëk ulôn dan kamoe pajoh. Teuma óh singoh nyan watée ulôn lakée mangat teutaguen teuma aneuëk jih, laju jijak söm!" 30 Watée geudeungoe meunan, lé raja laju geupriek peukayan gobnyan sabab seudeh that. Ureuëng-ureuëng nyang na jidong nibak binéh beuton nyan deuh jikalon bahwa bajée dalam gobnyan na kheueh ija krông. 31 Raja geudumpék, "Uroenyoe cit teuma Elisa harôh maté. Bah kheueh Po teu Allah geuhuköm ulôn sibrat-brat jih meunyoe Elisa nyan hana lôn poh maté!" 32 Lé raja laju geukirém sidroe ureuëng mangat jijak leubeh awai u rumoh Elisa. Nibak watéenyan Elisa na lam rumoh, dan na teuma meupadub droe ureuëng patot-patot teungoh meujamé lam rumoh nyan. Sigohlom trok utosan raja nyan u rumoh Elisa, Elisa laju geupeugah ubak ureuëng patot-patot nyan, "Ngieng kheueh! Tukang poh maté nyan jikirém ureuëng laén keuneuk jijak poh maté lôn. Meunyoe ureuëng nyan trok keunoe eunteuk, gata tôb laju pintoe dan bék gata peubiyeu jihnyan jitamong. Dilikot jih teuma teuka raja keudroe." 33 Elisa gohlom habéh geumeututoe, raja katrok keunan dan laju geupeugah, "Apoh apah nyoe na kheueh TUHAN nyang peutreun ateueh geutanyoe! Lé sababnyan keupeue guna jih ulôn meuharab lom geutulông lé Gobnyan?"

2 Raja-Raja 7

1 Elisa laju geujaweueb, "Deungoe kheueh feureuman TUHAN! Singoh beungoh, kira-kira watée jih lagée watée nyoe, deungon saboh péng pirak mantong ureuëng hase jibloe lhée kilo gandom nyang paleng jroh atawa nam kilo gandom jeunéh nyang laén." 2 Lé ajudan pribadi raja laju jijaweueb, "Panena mungken! Nyan mustahe, bahpi nibak watéenyoe TUHAN geupeutreun ujeuen raya di langét!" "Teuma gata ngieng hainyan teutab na, teuma gata hana tateumé pajoh atranyan meubacut pih," jaweueb Elisa. 3 Nibak uroe nyan na peuet droe ureuëng nyang keunong peunyakét kulét nyang lumpah parah jidong nibak babah pintoe geureubang banda Samaria. Awaknyan jimarit sabe keudroe-droe, "Keupeue guna jih tanyoe taduek-duek disinoe, peu kheueh tapreh maté? 4 Meunyoe tanyoe tatamong lam banda, tanyoe teuma maté lé sabab deuk; meunan cit meunyoe tanyoe tatinggai teutab disinoe, tanyoe maté cit. Bah kheueh tanyoe tajak ubak khimah-khimah ureuëng Siria. Sitan-tan jih tanyoe jipoh maté lé awaknyan. Teuma na cit keumungkenan tanyoe hana jipakoe sapeue." 5 Watée ka teuka seupôt awaknyan laju jijak ubak khimah-khimah ureuëng Siria, teuma awaknyan hana jikalon meusidroe ureuëng pih nibak teumpat nyan. 6 Sabab TUHAN ka geupeudeungoe ubak ureuëng Siria nyan su lagée su saboh pasokan musoh nyang meuguda dan meugeuritan keuneuk jijak prang awaknyan nyang lumpah rayeuk. Lé ureuëng-ureuëng Siria nyan jipike bahwa lé raja Israel ka jisiwa raja Het ngon raja Meusé meusajan ngon tantra awaknyan keuneuk jijak prang awaknyan. 7 Lé sababnyan, malam nyan cit teuma awaknyan jiplueng jijak peuseulamat droe, laju jitinggai khimah, guda, meunan cit deungon keuleudée awaknyan hana jipako le nibak khimah jihnyan. 8 Ban peuet droe ureuëng keunong peunyakét kulét nyan laju jidong bak binéh khimah-khimah nyan, dan laju jitamong lam saboh khimah. Awaknyan laju jimakheun ngon jijieb ié disinan, lheueh nyan jicok méuh, pirak meunan cit peukayan-peukayan atranyan laju jijak söm. Óh lheueh nyan awaknyan jigisa lom jijak cok teuma atra nyang na lam khimah laén. 9 Awaknyan jipeugah sidroe ubak nyang laén, "Buet tanyoe nyoe hana gét. Haba nyoe haba gét, dan hainyoe bah kheueh tajak bri tée! Meunyoe tapreh trok án singoh, pasti tanyoe geuhuköm. Bah kheueh tajak peugah hainyoe ubak meuligoe." 10 Lé sababnyan jigisa kheueh awaknyan u Samaria dan laju jitawök ubak ureuëng nyang kawai pintoe geureubang bandanyan, "Kamoe kalheueh kamoe jak ubak khimah-khimah ureuëng Siria, dan rupari hana ureuëng disinan. Guda ngon keuleudée awaknyan kamoe kalon mantong teuikat nibak teumpat jih, dan khimah-khimah jitinggai meunan mantong." 11 Lé ureuëng-ureuëng nyang kawai pintoe geureubang nyan laju jitawök jipeugah keuhai haba nyan, lé sababnyan teuma na ureuëng jipeugah hainyan ubak meuligoe raja. 12 Bak watée nyan uroe mantong malam, teuma raja geuteubiet cit nibak kama teumpat éh geuh dan laju geupeugah ubak bubena peugawée gobnyan, "Deungoe ulôn peugah! Ulôn kuteupeue reuncana ureuëng Siria nyan, jihnyan jiteupeue tanyoe nyoe teungoh jiteuka bala deuk, lé sababnyan awaknyan jitinggai khimah-khimah jih jijak musöm lam padang, guna keu jipanceng geutanyoe mangat tateubiet tajak mita peunajoh. Lheueh nyan awaknyan jikeupong tanyoe dan laju jiteumé duek lam banda nyan." 13 Sidroe peugawée raja laju jipeugah, "Teungku Amphon, tanyoe nyang mantong na lam banda nyoe, naseb tanyoe saban cit lagée naseb ureuëng nyang ka maté. Lé sababnyan bah kheueh tayue meupadub droe ureuëng mangat jijak pasang meulimong boh guda lamkawan guda-guda nyang mantong na, dan jijak ubak teumpat nyan keujijak kalon peue nyang ka teujadi." 14 Lé sababnyan awaknyan laju jipiléh meupadubdroe ureuëng, lé raja laju geuyue ubak ureuëng-ureuëng nyan mangat jiba dua boh geuritan prang keujijak seulidek peue nyang ka teujadi ateueh tantra Siria nyan. 15 Awaknyan jijak trok laju ubak Krueng Yordan. Bansipanyang rot euh awaknyan laju deuh jingieng peukayan-peukayan dan mubagoe jeunéh peukakaih nyang laén ka meutabu saboh saho. Banmandum nyan jitiek meunan mantong le tantra Siria watée awaknyan jipeuplueng droe. Lheueh nyan lé utosan-utosan nyan laju jiwoe jijak peugah hainyan ubak Po raja. 16 Ban jideungoe haba nyan bubena peunduduek Samaria laju jiplueng u luwa banda jijak reupah mandum khimah-khimah ureuëng Siria. Paih lagée peue nyang ka geupeugah lé TUHAN, jeuet kheueh lhée kilo gandom nyang jroh atawa nam kilo gandom jeunéh nyang laén, yuem jih na kheueh saboh péng pirak. 17 Keubeutolan nibak watéenyan ajudan pribadi raja meutugaih jikawai babah pintoe geureubang banda. Ureuëng nyan maté nibak teumpat nyan teugilo-gilo lé rakyat ba. Hainyan paih lagée nyang ka geupeugah lé Elisa ubak raja watée raja geujak ubak gobnyan. 18 Elisa ka lheueh geupeugah bahwa kira-kira bak watée lagée nyan óh singoh beungoh, lhée kilo gandom nyang paleng jroh atawa nam kilo gandom jeunéh nyang laén teuma jipeubloe di banda Samaria deungon yuem saboh péng pirak. 19 Dan nibak watéenyan ajudan pribadi raja ka lheueh jipeugah, "Panena mungken! Nyan mustahe, bahpih nibak watéenyoe TUHAN geupeutreun ujeuen raya dilangét!" Laju geujaweueb lé Elisa, "Singoh teuma gata ngieng hainyan teujadi, teuma gata hana hase gata rasa peunajoh nyan mubacut pih." 20 Dan nyan kheueh nyang keunong ateueh ureuëng nyan -- jihnyan maté teugilo-gilo bak babah pintoe geureubang.

2 Raja-Raja 8

1 Bak saboh watée TUHAN geupeutreun bala musém deuk lam nanggroe bansa Israel nyang treb jih na tujoh thon. Sigohlom bala nyan teuka le Elisa ka geupeugah hainyan ubak sidroe inong nibak Sunem nyang aneuëk geuhnyan ka geupeu udeb lom teuma nibak maté. Meunan cit lé Elisa ka geuyue ubak ureuëng inong nyan mangat jiminah deungon keuluwarga gobnyan u nanggroe laén. 2 Lé ureuëng inong nyan laju geupeubuet peue nyang ka geupeugah lé Elisa nyan ubak gobnyan, lé ureuëng inong nyan laju jijak u nanggroe Filistin keu jitinggai di nanggroe nyan. 3 Óh ka lheueh leupah watée tujoh thon nyan laju jiwoe lom u nanggroe Israel. Laju jijak meuhadab ubak raja mangat jeuet rumoh ngon ladang gobnyan geujok lom pulang lé raja. 4 Nibak watée nyan Gehazi namiet Elisa ka geulakée lé raja mangat jitem calitra buet-buet ajaéb nyang ka geupeubuet lé Elisa. 5 Dan paih that watée ureuëng inong nyang teuka nibak Sunem nyan jijak meuhadab ubak raja keu jijak peutrok nyang jilakée nyan, Gehazi watéenyan teungoh jicalitra ubak Po raja pakriban Elisa geupeu udeb sidroe aneuëk manyak nyang ka meuninggai donya. Lé sabab nyan laju jipeugah lé Gehazi, "Amphon delat po nyang mulia, nyoe kheueh ureuëng inong nyan, dan nyoe aneuëk jihnyan nyang ka geupeu udeb lom teuma lé Elisa!" 6 Lé raja laju geutanyong dan lé inong nyan laju jipeugah keuhai aneuëk jihnyan. Óh lheuehnyan lé raja laju geutawök sidroe peugawée gobnyan dan laju geupeurintah mangat banmandum atra ureuëng inong nyoe teupulang lom teuma, meunan cit banmandum yuem nibak hase ladang-ladang jih nyang tujoh thon nyan watée jihnyan mantong na diluwa nanggroe. 7 Nibak siwatée Elisa geujak u Damsyik. Watéenyan Raja Benhadad teungoh sakét, watée raja geudeungoe bahwa Elisa na di Damsyik, 8 lé raja nyan laju geupeugah ubak Hazael, sidroe peugawée gobnyan, "Gata jakba kheueh hadiah keu nabi nyan, lakée kheueh bak gobnyan mangat gobnyan geutanyong ubak TUHAN peu kheueh ulôn nyoe puléh atawa hana." 9 Hazael laju jijak cok 40 boh unta dan laju jipeudieng ateueh unta nyan meubagoe rupa hase banda Damsyik, lheueh nyan laju jijak ubak Elisa. Watée katrok ubak Elisa nyan, Hazael laju geupeugah, "Hamba droeneueh Raja Benhadad geuyue jak meuhadab keue droeneueh keugeuyue tanyong peu kheueh gobnyan puléh nibak sakét geuh atawa hana." 10 Geujaweueb lé Elisa, "TUHAN meufeureuman ubak ulôn bahwa raja nyan teuma meuninggai donya. Teuma gata peugah mantong ubak raja nyan bahwa gobnyan teuma puléh." 11 Lheueh nyan lé Elisa laju geupandang ateueh Hazael deungon geutatab muka jihnyan hana meukreb-kreb lé sababnyan teuma Hazael ka jeuet keugeulisah. Deungon hana teusangka-sangka Elisa laju geumo. 12 "Pakon Teungku Po neumo?" geutanyong lé Hazael. "Sabab lôntuan kuteupeue buet nyang jeuhet nyang tata peubuet ateueh Israel," kheun Elisa. "Gata teuma tatot banmandum banda-banda awaknyan nyang meupageue ngon kuta, gata poh maté ureuëng-ureuëng muda awaknyan nyang gét-gét, meunan cit gata ceukiek takue-takue aneuëk manyak dan gata plah pruet inong-inong nyang teungoh mume." 13 "Ah, panena mungken nyan, ulôn nyoe ureuëng nyang hana meuguna," jaweueb Hazael, "panena mungken nibak ulôn na kuasa nyang rayeuk meunan bagoe!" "TUHAN ka geutunyok ubak ulôn bahwa gata teuma jeuet keu Raja Siria," jaweueb Elisa. 14 Watée Hazael jiwoe lom ubak meuligoe. Laju jitanyong lé Raja Benhadad, "Peue geupeugah lé Elisa?" "Gobnyan geupeugah bahwa Teungku Po pasti puléh," jaweueb Hazael. 15 Teuma óh singoh nyan Hazael laju geucok sion ija silimbot, ija nyan laju jiceulob lam ié lheuehnyan laju jiteugon ateueh muka raja akhé jih raja nyan maté leumoh. Dan Hazael jeuet keu raja Siria keugeunantoe Raja Benhadad. 16 Yehoram bin Yosafat jeuet keu raja Yehuda bak watée Raja Yoram bin Ahab ka jimat peurintah ateueh Israel limong thon treb jih. 17 Nibak watée nyan Yehoram ka meu-umu lhée ploh dua thon, dan gobnyan geumat peurintah di Yerusalem na lapan thon treb jih. 18 Gobnyan geumeukawen ngon aneuëk Ahab, dan lagée nyang ka geupeubuet lé keuluwarga Ahab, gobnyan pi meudesya ubak TUHAN lagée raja-raja Israel nyang laén, 19 Teuma TUHAN hana geutem peubinasa Yehuda sabab Gobnyan ka geumeujanji ubak Nabi Daud hamba Gobnyan, bahwa keuturonan gobnyan teutab jeuet keu raja. 20 Nibak peumeurintahan Yehoram, Edom jibeurontak ateueh Yehuda dan laju jipeudong keurajeuen jih keudroe. 21 Lé sababnyan, geuteubiet kheueh Yehoram deungon banmandum geuritan prang gobnyan geujak u Zair. Óh trok keunan gobnyan laju jikeupong lé pasokan Edom, teuma óh watée malam teuka gobnyan meusajan deungon pang-pang gobnyan deungon pasokan meuguda gobnyan laju geuheuntam sampoe geuteumé tamong lamkawan pasokan musoh, akhé jih awaknyan laju jipeuplueng droe jiwoe u rumoh jih maséng-maséng. 22 Phon yoh watéenyan Edom hana jitem taklok le ubak Yehuda. Bak watéenyan cit teuma banda Libna pih jipeubeudôh beurontak. 23 Kisah nyang laén keuhai Yehoram teucetet lam kitab Seujarah Raja-raja Yehuda. 24 Gobnyan pih meuninggai donya dan laju teupeukubu lam lampôh jrat raja-raja lam Banda Nabi Daud. Ahazia aneuëk gobnyan jeuet keu raja keugeunantoe gobnyan. 25 Ahazia bin Yehoram jeuet keu raja Yehuda bak watée Raja Yoram bin Ahab ka jimat peurintah ateueh Israel dua blah thon treb jih. 26 Bak watéenyan Ahazia na meu-umu dua ploh dua thon, dan gobnyan geumat peurintah di Yerusalem sithon treb jih. Ma gobnyan nan jih Atalya, bin Raja Ahab dan cucoe Omri raja Israel. 27 Sabab lé meukawen nyan, Ahazia na hubongan keuluwarga deungon keuluwarga Raja Ahab. Ahazia meudesya ubak TUHAN saban lagée nyang ka jipeubuet lé keuluwarga Ahab. 28 Raja Ahazia meusajan-sajan jimuprang meusajan ngon Yoram raja Israel jilawan Hazael raja Siria. Awaknyan jimeuheuntam di Ramot, lam daerah Gilead. Yoram keunong dan luka nibak muprang nyan, 29 laju jiwoe lom u banda Yizreel mangat jeuet teupeu-ubat, dan Ahazia geujak ngieng gobnyan disinan.

2 Raja-Raja 9

1 Nibak watéenyan Nabi Elisa geutawök sidroe lamkawan nabi-nabi nyang gobnyan didek dan geupeugah, "Meukeumah-keumah kheueh mangat tajak u Ramot di Gilead, dan taba kheueh kaca nyang meuasoe minyéuk zaiton nyoe. 2 Watée gata katrok krudeh tamita kheueh Yehu bin Yosafat dan cucoe Nimsi. Pakat kheueh jihnyan ubak saboh bilek, 3 dan ro kheueh minyéuk zaiton nyoe ateueh ulée gobnyan, lheueh nyan gata peugah lagée nyoe, 'TUHAN meufeureuman bahwa Gobnyan geubaiát gata jeuet keu raja Israel.' Óh ka lheueh gata peubuet hainyan, gata tinggai kheueh laju teumpat nyan beureujang-reujang." 4 Nabi nyang muda nyan laju geujak u Ramot, 5 laju meurumpok ngon Yehu meunan cit bubena pang-pang nyang laén nyang teungoh meurokpakat disinan. Nabi nyan laju geupeugah, "Teungku Amphon, ulôn tuan lôn ba beurita keu Teungku Amphon." Geujaweueb lé Yehu, "Keu soe?" "Keu Teungku Amphon keudroe," seuôt nabi nyan. 6 Óh lheuehnyan awaknyan bandua laju geujak tamong lam rumoh, dan nabi muda nyan laju geuroe minyéuk zaiton ateueh ulée Yehu lheuehnyan laju geupeugah, "TUHAN Po teu Allah Israel meufeureuman, 'Ulôn baiát gata jeuet keu raja ateueh umat Ulôn Israel. 7 Gata teuma tapeubinasa keuluwarga amphon gata Ahab. Deungon lagéenyan Ulôn huköm Izebel nyang ka jipoh maté nabi-nabi Lôn dan hamba-hamba Ulôn nyang laén. 8 Banmandum keuluwarga dan aneuëk cucoe Ahab harôh maté. Tieb-tieb na ureuëng agam bahnyan nyang muda meunan cit nyang tuha teutab Ulôn peubinasa. 9 Keuluwarga jih teuma Lôn peusaneut lagée Lôn peusaneut keuluwarga Yerobeam dan keuluwarga Baesa, raja-raja Israel. 10 Izebel hana teupeukubu. Manyét jih teuma jipajoh lé asée di daerah Yizreel.' " Óh ka lheueh geupeugah banmandum nyan, nabi muda nyan geuteubiet dan laju geuplueng. 11 Yehu geugisa ubak rakan-rakan gobnyan, dan awaknyan laju jitanyong, "Peue na haba? Ureuëng peungoe nyan peue nyang jitem ngon droeneueh? " "Ah, gatanyoe ka tateupeue," jaweueb Yehu. 12 "Hana, kamoe hana kamoe teupeue!" jaweueb awaknyan, "Peugah kheueh laju mangat kamoe teupeu!" Jaweueb Yehu, " Gobnyan geupeusampoe peusan TUHAN bahwa ulôn geubaiát lé TUHAN jeuet keu raja Israel." 13 Watéenyan cit teuma rakan-rakan Yehu jisuet bajée jubah jih laju jileueng ateueh reunyeun dikeue Yehu, laju awaknyan jiyueb beureuguih sira jidumpek, "Yehu raja!" 14 Meunan kheueh Yehu meukomplot jijak lawan Raja Yoram nyang yoh watée nyan na di Yizreel. Yoram jijak keudeh keujijak meu-ubat ateueh luka-luka nyang keunong ateueh jih watée teujadi muprang di Ramot jilawan Hazael raja Siria. Yehu laju jipeugah ubak rakan-rakan jih bubena panglima, "Meunyoe gatanyoe situju ulôn jeuet keu raja, jaga kheueh mangat bék na meusidroe pih nyang teubiet nibak Ramot keu jijak peugah ubak ureuëng-ureuëng di Yizreel." 16 Óh lheuehnyan laju jiék ateueh geuritan prang jih dan jijak laju u Yizreel. Bak watéenyan Yoram gohlom that puléh, dan Ahazia raja Yehuda na disinan jijak kalon gobnyan. 17 Watée tukang kawai meunara banda Yizreel jikalon Yehu dan ureuëng-ureuëng jih teuka, laju jidumpek, "Na saboh kawan ureuëng teungoh jijak keunoe!" Geujaweueb lé Yoram, "Yue jak laju sidroe tantra meuguda mangat jiseulidek peu kheueh jihnyan rakan atawa lawan." 18 Deungon jipasang guda, jijak kheueh tantra nyan keujijak meurumpok ngon Yehu óh trok keunan laju jipeugah, "Raja kamoe keuneuk geuteupeue peu kheueh Teungku nyoe neujak keunoe sibagoe rakan." "Nyan kon urosan gata!" jaweueb Yehu. "Jak keunoe meusahoe kheueh ngon ulôn!" Lé tukang kawai meunara nyan jikalon tantra nyang jak meurumpok ngon kawan nyang teungoh jak nyan hana jigisa le. Lé tukang kawai meunara nyan laju jipeugah hainyan ubak raja, 19 lé raja laju jikirém lom tantra sidroe teuk tantra nyang laén. Lé tantranyoe pih jitanyong lagée nyang jitanyong bunoe ubak Yehu, lé Yehu geujaweueb lom lagée jeunaweueb bunoe, "Nyan kon urosan gata! Jak keunoe meusahoe kheueh ngon ulôn!" 20 Lé tukang kawai meunaranyan jipeugah bahwa tantra nyang teukirém bunoe katrok ubak kawan ureuëng jak nyan teuma hana cit jitem gisa. Lheueh nyan lé tukang kawai meunara nyan jipeugah lom, "Mungken peumimpén kawan nyang jak nyan Yehu, sabab watée jiba geuritan prang jih lagée ureuëng peungoe." 21 "Peusiab laju geuritan lôn," peurintah Raja Yoram. Geuritan pih laju jipeusiab, Yoram meusajan ngon Raja Ahazia jijak laju ubak Yehu, awaknyan maséng-maséng na lam geuritan jih keudroe. Awaknyan laju meurumpok ngon Yehu nibak ladang beukaih atra Nabot. 22 "Peu kheueh gata teuka keunoe sibagoe rakan?" tanyong Yoram ubak Yehu. Yehu geujaweueb, "Panena mungken sibagoe rakan, meunyoe disinoe mantong jai that dukon, dan mantong na nyang seumah beurala nyang jipeuphon lé Izebel ma gata nyan?" 23 "Nyoe ka jikianat, Ahazia!" kheun Yoram ngon su nyang teuga sira jipeuwet geuritan jih keuneuk jiplueng droe. 24 Yehu laju geutarek aneuk panah sihabéh sineuga laju jitimbak ateueh Yoram dan keunong laju bak rhueng beusot trok ubak jantong jih. Yoram laju reubah dan meuninggai donya lam geuritan jih. 25 Laju jipeugah lé Yehu ubak Bidkar ajudan jihnyan, "Peu kheueh mantong gata ingat, watée geutanyoe taék ateueh guda taseutôt Ahab, ayah Yoram? Bak watéenyan TUHAN meufeureuman ubak Ahab, 'Ulôn kuteupeue soe nyang poh maté Nabot dan aneuëk-aneuëk jih nyan baroe, dan Ulôn meujanji Ulôn huköm gata lam lampôh nyoe cit teuma.' " "Lé sababnyan," kheun Yehu lom ubak ajudan geuhnyan, "Jak tiek laju manyét Yoram nyan lam lampôh Nabot, mangat teujadi huköman Po teu Allah ateueh jihnyan." 27 Ahazia jikalon peue nyang ka teujadi, laju jipeuplueng geuritan jihnyan u banda Bet-Hagan. Yehu geupeucrok jihnyan dan laju geukuk ubak aneuëk buah gobnyan, "Peumaté laju jihnyan!" Awaknyan laju jipanah jihnyan sampoe luka nibak rot ueh nyang teutuju u Gur, bak binéh banda Yibleam. Teuma gobnyan meuhase jipeuplueng droe sampoe trok u Megido, dan disinan jihnyan laju meuninggai donya. 28 Peugawée-peugawée jihnyan nyang jijak cok manyét jihnyan laju jiba deungon geuritan jipeuwoe lom u Yerusalem, laju jipeukubu lam lampôh jrat raja-raja nibak Banda Nabi Daud. 29 Ahazia jeuet keu raja Yehuda watée Raja Yoram bin Ahab ka jipeurintah Israel nyang treb jih na siblaih thon. 30 Trok kheueh Yehu u Yizreel. Watée jideungoe lé Izebel keuhai peue nyang ka teujadi, jihnyan laju jisugot ôk jih dan jiboh cilak mata, lheuehnyan laju jiceungeuk u miyueb rot tingkab meuligoe. 31 Watée Yehu jitamong rot babah pintoe geureubang, Izebel jitawök, "Hai Zimri, tukang poh maté gob! Peue buet gata keunoe?" 32 Yehu laju geutangah ubak tingkab nyan, lheueh nyan geupeugah, "Soe nyang dong blaih lôn tuan?" Banjideungoe hainyan, na dua lhée droe peugawée meuligoe jingieng u miyueb. 33 Yehu geupeugah ubak awaknyan, "Rhom keunoe u miyueb inong nyan!" Laju lé awaknyan jirhom Izebel nyan u miyueb dan jigileng laju ngon ban geuritan laju darah ureuëng nyan jipeupo ubak beuton dan guda-guda geuritan nyan. 34 Laju Yehu geutamong lam meuligoe dan geumakheun. Lheuehnyan gobnyan geupeugah, "Ureuëng inong nyan keunong kutok. Bah pih meunan, jak kubu kheueh manyét jih sabab jihnyan na kheueh putroe raja." 35 Teuma watée ureuëng-ureuëng jijak cok manyét inong nyan keuneuk jitanom lam jrat, nyang na jiteumé lé awaknyan na kheueh bruek ulée, dan tuleueng-tuleueng jaroe ngon tuleueng gaki jih. 36 Óh lheueh hainyan jijak peugah ubak Yehu, geupeugah kheueh lé Yehu, "Nyoe ka lheueh geuramai lé TUHAN, watée Gobnyan geupeugah hainyan ubak Nabi Elia hamba Gobnyan: 'Manyét Izebel teuma jipajoh lé asée di daerah Yizreel, 37 dan seuh-seuh manyét nyan meutabu-tabu lagée ék beulatang sampoe hana meusidroe pih nyang hase jituri manyét soe nyan.' "

2 Raja-Raja 10

1 Raja Ahab na keuturonan tujoh ploh droe aneuëk cucoe di banda Samaria. Lé sababnyan Yehu geukirém surat u Samaria, ubak bubena wali aneuëk cucoe Ahab dan keu nyang mat kuasa meunan cit keu ureuëng-ureuëng patot nibak banda nyan. Asoe suratnyan lagéenyoe, 2 "Aneuëk cucoe Ahab na lam kawai gata, dan nibak gata na geuritan prang, guda, beude dan banda meukuta. Lé sababnyan, meunan surat nyoe ka gata teurimong, 3 piléh kheueh nyang paleng gét lamkawan aneuëk cucoe Ahab nyan dan baiát kheueh jihnyan jeuet keu raja, lheuehnyan meujuang kheueh tabila jih nyan." 4 Lé nyang mat kuasa di Samaria ka jiteuka teumakot. Awaknyan jipeugah lagéenyoe, "Raja Yoram dan Raja Ahazia pi hana hase jilawan Yehu, peue teuk lom geutanyoe!" 5 Lé sababnyan ulée meuligoe meunan cit walibanda meusajan deungon ureuëng-ureuëng patot lam masyarakat meunan cit lé bubena wali aneuëk cucoe Ahab nyan laju jikirém habanyoe ubak Yehu, "Kamoe taklok ubak Teungku Amphon dan kamoe peubuet peue-peue mantong nyang Teungku Amphon peurintah ubak kamoe. Kamoe hana kamoe baiát meusidroe pih jeuet keu raja. Peubuet kheueh peue nyang jroh meunurot nyang Amphon kalon." 6 Lé Yehu jikirém lom surat keu awaknyan, dan su suratnyan lagéenyoe, "Meunyoe gatanyoe tadong blaih ulôn, dan tatem seutôt peue-peue nyang ulôn peugah, tapoh maté kheueh mandum aneuëk cucoe Ahab nyan, dan singohnyan, watée nyang lagéenyoe, gataba kheueh ulée-ulée awaknyan ubak lôn di Yizreel." Bantujoh ploh droe aneuëk cucoe Ahab nyan na tinggai di rumoh-rumoh ureuëng patot lam banda Samaria, dan jipeulara lé awaknyan. 7 Watée ka jiteurimong surat Yehu nyan, lé ureuëng-ureuëng patot lam banda Samaria nyan, laju jipoh maté bantujoh ploh droe aneuëk cucoe Ahab dan ulée-ulée awaknyan laju jipaso lam raga lheuehnyan laju jikirém ubak Yehu di Yizreel. 8 Watée hainyan jijak peugah ubak Yehu, lé Yehu laju jipeurintah mangat mandum ulée-uléenyan jisuson jeuet keudua boh tumpok nibak babah pintoe geureubang banda, dan jipeubiyeu disinan trok án beungoh. 9 Banbeungoh that jiteubit kheueh Yehu jijak ubak babah pintoe geureubang dan laju jipeugah ubak ureuëng-ureuëng nyang kana meusapat disinan, "Ulôn kheueh nyang meukomplot lôn jaklawan Raja Yoram dan teupoh maté jih nyan; gatanyoe hana meusalah lam hainyoe. Teuma banmandum ureuëng nyoe kon ulôn nyang poh maté. 10 Nyoe kheueh bukeuti jih bahwa peue-peue nyang ka geupeugah lé TUHAN keuhai aneuëk cucoe Ahab ka lheueh teujadi. TUHAN ka geupeubuet peue nyang ka lheueh geupeugah meulalu Elia hamba Gobnyan." 11 Óh lheuehnyan Yehu jipoh maté banmandum waréh kawöm Ahab nyang laén nyang na tinggai di Yizreel, dan banmandum peugawée, rakan-rakan nyang tô, dan teungku-teungku imeum jih, hana meusidroe pi nyang geupeubiyeu udeb. 12 Yehu geutinggai Yizreel dan laju geujak u Samaria. Bak teungoh rot euh, nibak teumpat nyang teupeunan "Gampông-gampông tukang Meurabe", 13 gobnyan laju meurumpok deungon na padub droe syedara Ahazia raja Yehuda, lé gobnyan laju geutanyong, "Gatanyoe soe?" "Kamoe waréh kawöm Ahazia," jaweueb awaknyan. "Kamoe keuneuk jak u Yizreel keuneuk kamoe jak saweue banmandum waréh kawöm raja dan aneuëk cucoe Ratu Izebel." 14 "Droeb laju awaknyan udeb-udeb!" peurintah Yehu ubak aneuëk buah gobnyan. Dan watéenyan cit teuma banmandum awaknyan teudrob, lheuehnyan laju jijak poh maté bak binéh mon tho, banmandum nyan na peuet ploh dua droe. Hana meusidroe pih jipeubiyeu udeb. 15 Lheuehnyan Yehu geujak lom, bak teungoh rot gobnyan jisambot lé keuluwarga Yonadab bin Rekhab. Yehu laju geubri saleuem ateueh ureuëng nyan sira geupeugah, "Peu kheueh geutanyoe sapeue kheun? Peu kheueh gatatem tulông ulôn?" "Nyoe," jaweueb Yonadab. "Meunyoe meunan, jak geutanyoe tamumat jaroe," kheun Yehu. Awaknyan laju jimumat jaroe, Yehu geutulông Yonadab jiék ateueh geuritan jih, 16 sira geupeugah, "Jak ngon lôn dan takalon keudroe pakriban ulôn bit-bit lôn meubuet keu TUHAN." Dan awaknyan pi laju meusajan-sajan geu-ék geuritan geujak u Samaria. 17 Meunan trok keudeh Yehu laju jipoh maté banmandum syedara Ahab, hana meusidroe pih nyang na tinggai. Hainyan jeuet lagée peue nyang ka lheueh geupeugah lé TUHAN ubak Elia. 18 Yehu geuyue banmandum peunduduek Samaria mangat jimeusapat lheuehnyan laju geupeugah, "Raja Ahab kureueng that bit-bit geumeungabdi ubak Baal; ulôn leubeh bit-bit nibak jihnyan. 19 Lé sababnyan peusapat kheueh banmandum nabi Baal meunan cit nyang seumah Baal nyan dan imeum-imeum jih; meusidroe pih hana keucuali. Ulôn keuneuk peuseumah keureubeuen nyang rayeuk keu Baal. Soe nyang hana teuka teuhuköm maté." Rupari nyan na kheueh saboh siasat nibak Yehu mangat geupoh maté banmandum nyang seumah Baal. 20 Lheuehnyan Yehu geubri lom peurintah lagée nyoe: "Peuteuntée kheueh siuroenyan khusos keuteuseumah Baal!" Lé sababnyan mandum ureuëng laju jipeuteuntée uroe keuteupeuna acaranyan 21 dan Yehu laju geupeumaklum bansaboh nanggroe Israel. Nibak uroenyan teuka kheueh bubena nyang seumah Baal, hana meusidroe pi nyang na tinggai. Awaknyan jitamong lam kuil Baal sampoe ka peunoh geudong nyan phon dikeue trok u likot. 22 Yehu laju geupeurintah lom mangat jeuet lé nyang uroih peukayan-peukayan iébadat nibak kuil nyan jijok laju peukayan-peukayan nyan ubak ureuëng-ureuëng nyang keuneuk seumah Baal. Óh ka lheueh peurintah nyan jipeubuet mandum, 23 Yehu laju geutamong lam kuil Baal meusajan deungon Yonadab bin Rekhab, dan laju geupeugah ubak ureuëng-ureuëng nyang na disinan, "Jak ngieng kheueh deungon até-até that peu kheueh mandum nyang teuka nyoe ureuëng seumah Baal. Bék sampoe na disinoe ureuëng nyang seumah TUHAN." 24 Lheuehnyan Yehu ngon Yonadab geupeuseumah keureubeuen keu Baal. Diluwa geudong, Yehu ka geukeubah na 80 droe peungawai dan peuwira. Dan gobnyan pi ka geubri peurintah nyang lagéenyoe ubak awaknyan, "Gata harôh tapoh maté mandum awaknyan, dan soe mantong lamkawan gata tapeubiyeu sidroe ureuëng nyang hase jipeuplueng droe, ureuëng nyan pih teupoh maté!" 25 Meunan Yehu seuleusoe geupeuseumah keureubeuen, gobnyan geuteubiet dan geupeugah laju ubak peungawai dan peuwira-peuwira geuhnyan, "Tamong laju dan poh maté awaknyan banmandum. Bék tapeubiyeu meusidroe pih nyang hase jiteubiet!" Dan jitamong kheueh awaknyan deungon peudeueng ka teusut lam sarong, dan laju jipoh maté mandum ureuëng nyang na disinan, lheuehnyan manyét-manyét nyang ka teutiek-tiek nyan jitarék uluwa. Óh lheuehnyan awaknyan jitamong teuma lam kuil, 26 laju jipeuteubiet patong Baal dan jitot lam apui. 27 Patong nyan jipeuhanco meusigoe ngon geudong jih lheuehnyan teumpatnyan teupeujeuet keu teumpat toih ék sampoe nibak uroenyoe. 28 Meunan kheueh cara jih Yehu geupeu habéh bubena nyang seumah Baal di Israel. 29 Lé sababnyan TUHAN meufeureuman lagéenyoe ubak Yehu, "Banmandum nyang Ulôn peurintah ubak gata mangat gata peubuet ateueh keuturonan Ahab ka gata peubuet. Lé sababnyan Ulôn meujanji ubak gata bahwa aneuëk cucoe gata sampoe trok ubak keuturonan nyang keu peuet jeuet keu raja di nanggroe Israel." Teuma Yehu hana sipeunoh até geupeubuet huköm TUHAN, Po teu Allah Israel. Gobnyan geuseutôt peue nyang ka geupeubuet lé Yerobeam nyang rhot ureuëng Israel jipeubuet desya deungon cara jiseumah leumô méuh nyang jipeudong di Betel dan di Dan. 32 Bak watéenyan TUHAN ka geupeuphon peu-ubit daerah Israel. Hazael raja Siria jireubot banmandum daerah Israel 33 siblaih u timu Krueng Yordan sampoe u seulatan trok u banda Aroër nyang tô ngon Krueng Arnon, jitamong cit daerah Gilead dan Basan, teumpat tinggai sukée Gad, Ruben dan Manasye timu. 34 Kisah laén keuhai Yehu, jitamong cit keunan jasa-jasa keupahlawan gobnyan, ka teucetet lam kitab Seujarah Raja-raja Israel. 35 Yehu geumat peurintah sibagoe raja na 28 thon treb jih. Gobnyan meuninggai dan laju teupeukubu di Samaria. Dan Yoahas aneuëk gobnyan jeuet keuraja geunantoe gobnyan.

2 Raja-Raja 11

1 Watée Atalya geuteupeue bahwa aneuëk gobnyan Raja Ahazia, ka meuninggai donya, gobnyan laju geupeutreun peurintah mangat banmandum keuluwarga Ahazia teupoh maté. 2 Yoas, aneuëk Ahazia nyan pih rab keunong poh cit meusajan-sajan deungon aneuëk-aneuëk raja nyang laén, teuma gobnyan seulamat sabab jipeuseulamat lé Yoseba ma cut gobnyan. Yoas meusajan deungon ureuëng nyang peulara gobnyan jiba dan teusöm lam saboh kama teumpat éh nibak Baét TUHAN. 3 Nam thon treb jih Yoseba geupeulara aneuëk nyan lam Baét TUHAN watée Atalya geumat peurintah sibagoe ratu. 4 Nibak thon nyang keutujoh, banmandum uléebalang nyang kawai ratu meunan cit banmandum peungawai meuligoe geutawök lé Teungku Imeum Yoyada mangat jijak meurumpok ngon gobnyan di Baét TUHAN. Nibak teumpatnyan awaknyan laju geuyue meusumpah mangat jipeubuet nyang ka geureuncana lé gobnyan. Gobnyan laju geupeudeuh Yoas, aneuëk agam Raja Ahazia, ubak awaknyan, 5 dan lheuehnyan laju geubri peurintah nyang lagéenyoe, "Meunyoe gata tameutugaih nibak uroe Sabat, siper lhée nibak gata bah kheueh jimeutugaih nibak meuligoe, 6 siper lhée teuk jimeutugaih teuma bak babah pintoe Geureubang Sur, dan nyang leubeh nyan nibak babah pintoe geureubang likot peungawai-peungawai nyang laén. 7 Bandua boh reugu nyang lheueh meutugaih nibak uroe Sabat, bah kheueh jikawai nibak Baét TUHAN deungon peudeueng teusut lam sarong keuteulindong Raja Yoas. Gata harôh gata kawai gobnyan ho mantong nyang geujak, dan soemantong ureuëng nyang jicuba jikeuneuk peurab bak gata harôh gata poh maté." 9 Bubena uléebalang nyan jitaát banmandum peue-peue nyang ka geupeurintah lé Yoyada nyan dan laju jiba ubak gobnyan aneuëk buah jih nyang meutugaih dan nyang ka lheueh meutugaih nibak uroe Sabat nyan. 10 Yoyada laju geujok ubak uléebalang nyan kapak-kapak dan peurisai Raja Nabi Daud nyang teukeubah nibak Baét TUHAN. 11 Lé mandum peungawai, maséng-maséng deungon peudeung teusut lam sarong, laju jicok teumpat awaknyan bansikeulileng keu Baét TUHAN keu jikawai raja. 12 Óh lheueh nyan lé Yoyada laju geuba Yoas uluwa, laju geukeubah mahkota ateueh ulée gobnyan, dan geujok bak gobnyan kitab Huköm Allah. Yoas geubaiát sibagoe raja dan hainyan laju geupeumaklum ubak mandum rakyatba. Banmandum ureuëng jipok-pok jaroe sira jisurak, "Udeb raja!" 13 Ratu Atalya geudeungoe su seumeurak peungawai-peungawai meunan cit su rakyatba nyang meuhubo that. Teugeusa-geusa watéenyan cit jijak u Baét TUHAN, nibak teumpatnyan ureuëng ramé cit ka meuhudom. 14 Laju geukalon raja nyang barô nyan teungoh geudong bak babah pintoe Baét TUHAN nibak teumpat raja nyan teubaiát, jikeulileng lé uléebalang-uléebalang dan nyang yueb beureuguih. Banmandum rakyat seumurak meuhubo sira beureuguih teuyueb. Deungon bagaih that Atalya laju geupriek-priek peukayan gobnyan, lheuehnyan gobnyan sira geuplueng deungon geu klik-klik geupeugah lagéenyoe, "Khianat! Khianat!" 15 Yoyada hana geubri Atalya nyan teupoh maté meunyoe tô ngon Baét TUHAN, lé sababnyan gobnyan geupeugah ubak mandum uléebalang, "Jakba kheueh laju jihnyoe rot likot meulalu baresan peungawai dan gata poh maté mandum soe-soe mantong nyang jiuseuha jikeuneuk peuseulamat jihnyan." 16 Awaknyan laju jidrob Atalya, jiba laju ubak meuligoe. Disinan gobnyan laju jipoh maté dikeue babah pintoe Geureubang Guda. 17 Lé Imeum Yoyada geuyue laju ubak Raja Yoas dan rakyat mangat jipeugét peujanjian deungon TUHAN bahwa awaknyan beujeuet keu umat TUHAN. Meunan cit gobnyan geuyue ubak raja mangat geupeugét peujanjian deungon rakyat. 18 Óh lheueh rakyat jiseureubu dan jireuloh kuil Baal. Miseubah meunan cit deungon patong-patong jih teupeuhanco banmandum, dan Matan, imeum Baal jipoh maté laju dikeue miseubah-miseubah nyan. Yoyada geupeu tugaih ubak peungawai mangat jikawai Baét TUHAN, 19 dan laju gobnyan meusajan-sajan deungon banmandum uléebalang, meunan cit deungon banmandum peungawai droe raja dan peungawai meuligoe dan banmandum rakyat jijak peudendeng Raja Yoas nibak Baét TUHAN ubak meuligoe. Yoas geutamong rot pintoe Geureubang peungawai, laju jiduek ateueh singgahsana. 20 Banmandum rakyat mangat that até, banda pih ka aman dan Atalya ka jipoh maté. 21 Yoas meu-umu tujoh thon watée gobnyan jeuet keuraja Yehuda.

2 Raja-Raja 12

1 Nibak thon nyang keutujoh watée keurajeuen Yehu ateueh Israel, Yoas jeuet keu raja Yehuda. Gobnyan geumat peurintah di Yerusalem na peuet ploh thon treb jih. Ma gobnyan nan jih Zibya asai nibak banda Bersyeba. 2 Beureukat geudidek lé Teungku Imeum Yoyada, Yoas sipanyang udeb gobnyan geumeubuet nyang that-that mangat até TUHAN. 3 Teuma sayang that, teumpat teuseumah dewa hana geupeuhanco, lé sababnyan teuma rakyat teutab mantong jipeuseumah keureubeuen dan jitot keumeunyan nibak teumpat nyan. 4 Bak siuroe Yoas geutawök bubena teungku imeum dan geuyue ubak awaknyan mangat jikeubah péng nyang meuteumé nibak gob-gob peuseumah bak Baét TUHAN, bahnyan péng nyang jibayeue lé gob watée teupeuna keureubeuen, meunan cit péng nyang jijok léb ngon sukarela. 5 Tieb-tieb teungku imeum harôh meutanggong jaweueb ateueh péng nyang jipeuseumah nyan lé ureuëng nyang geulayaninyan. Péng nyan geupeuguna keungon peugét pat-pat nyang rusak nibak Baét TUHAN. 6 Trok ubak thon keu dua ploh lhée nibak peumeurintahan Yoas, lé teungku-teungku imeum gohlom cit geupeugét pat-pat nyang reuloh nibak Baét TUHAN. 7 Lé sababnyan Yoas laju geutawök Teungku Imeum Yoyada meusajan deungon imeum-imeum nyang laén, lheuehnyan geupeugah, "Pakon gatanyoe gohlom cit tapeugét Baét TUHAN? Phon uroenyoe gata hana teubri le takeubah péng nyang gata teurimong. Banmandum nyan harôh gata jok keu ngon peugét Baét TUHAN." 8 Teungku-teungku imeum situju keu hana geupeusapat le péng nibak rakyat, dan hana teuma meutanggong jaweueb ateueh teureuhab Baét TUHAN. 9 Yoyada laju geucok saboh kotak tutôb kotaknyan laju geupeuruhuéng, lheuehnyan geukeubah laju tô ngon miseubah blaih uneuen pintoe tamong Baét TUHAN. Banmandum péng nyang teupeuseumah di Baét TUHAN laju geupeutamong lam kotaknyan lé teungku-teungku imeum nyang meutugaih nibak babah pintoe tamong. 10 Tieb-tieb watée meunyoe kotaknyan ka le meuasoe ngon péng, lé seukeutaréh raja meusajan deungon Teungku Imeum Agong geujak keunan sira geuitong jeumeulah péng nyan, lheuehnyan barô kheueh geubungkoh. 11 Óh lheueh jeumeulah jih teucetet, péng nyan laju geujok ubak peungawas nyang peugét Baét TUHAN. Lé peungawas nyan laju jibayeue keu tukang kayée, tukang bangunan, 12 tukang batée dan tukang peut batée. Peungawas nyan cit teuma bloe kayée ngon batée, dan nyang atoe banmandum péng-péng teubiet keu teureuhab Baét TUHAN nyan. 13 Teuma péng nyan mubacut pih hana teupeuguna keuteupeugét cangkie-cangkie pirak, cambông, beureuguih, alat-alat panyöt atawa peukakaih nyang laén nibak méuh atawa pirak. 14 Banmandum geubayeue keu tukang-tukang dan geubloe bahan-bahan seumeungot nyang teupeureulée. 15 Bubena peungawas buet nyan jujoe that-that, deungon nyan hana peureulée teulakée laporan tanggong jaweueb péng nyan nibak awaknyan. 16 Péng nibak keureubeuen gantoe rugoe dan keureubeuen peuamphon desya hana teupeutamong lam kotaknyan. Péng nyan geujok keu teungku-teungku imeum. 17 Nibak watéenyan Hazael raja Siria jijak prang dan laju jireubot banda Gat. Dan kana niet keuneuk jijak prang Yerusalem teuma. 18 Lé sababnyan Yoas laju geukirém keu gobnyan péng sineuboh. Péng nyan geuteumé nibak banmandum atra peuseumahan nyang yoh watée ilée ka teujok keu TUHAN lé Yoas keudroe, dan lé Yosafat, Yoram meunan cit Ahazia, na kheueh raja-raja nyang mat peurintah sigohlom gobnyan. Meunan cit nibak mandum méuh lam kaih Baét TUHAN dan lam kaih meuligoe raja. Deungon nyan teuma Hazael hana jeuet jijak prang Yerusalem. 19 Lheuehnyan lé peugawée-peugawée keurajeuen Yehuda ka meukomplot jilawan Raja Yoas. Dua droe lamkawan awaknyan, na kheueh Yozakar bin Simeat, dan Yozabad bin Somer, jipoh Yoas bak saboh rumoh nyang jipeudong ateueh sinamon tanoh siblaih utimu Yerusalem, nibak rot treun u Sila. Yoas jikubu nibak lampôh jrat raja-raja nibak Banda Nabi Daud. Amazia aneuëk gobnyan jeuet keuraja geunantoe gobnyan. Kisah nyang laén keuhai Raja Yoas teucetet lam kitab Seujarah Raja-raja Yehuda.

2 Raja-Raja 13

1 Nibak thon nyang keudua ploh lhée watée peumeurintahan Yoas ateueh Yehuda, Yoahas aneuëk Yehu jeuet keuraja Israel, dan gobnyan geumat peurintah di Samaria tujoh blaih thon treb jih. 2 Lagée Raja Yerobeam nyang mat peurintah sigohlom nyan, Yoahas meudesya ubak TUHAN dan jeuet keusabab ureuëng Israel ka meudesya cit teuma. Gobnyan hántom na geutinggai buet-buet geuh nyang jeuhet nyan. 3 Lé sababnyan TUHAN meureuka ubak Israel deungon nyan teuma Gobnyan geupeubiyeu mantong Hazael raja Siria dan Benhadad aneuëk gobnyan, meu-ulang-ulang jipeutaloe Israel. 4 Lé sababnyan Yoahas meudoá ubak TUHAN, dan TUHAN geudeungoe doá geuhnyan, sabab TUHAN geukalon padubna keujam jih raja Siria jitindéeh ureuëng Israel. 5 TUHAN laju geubri keu ureuëng Israel sidroe peumimpén nyang peuleuh awaknyan nibak keukuasaan Siria deungon nyan teuma awaknyan udeb teuntram lom lagée nyang ka-ka. 6 Bahpi meunan ureuëng Israel teutab hana jipiôh-piôh jipeubuet desya nyang geupeuphon lé Raja Yerobeam. Awaknyan teutab jipeubuet desya-desya nyan, dan jipeubiyeu mantong patong Dewi Asyera teutab na di Samaria. 7 Angkatan prang Israel ka jipeuhanco le raja Siria deungon nyan teuma Raja Yoahas tinggai 50 boh pasokan meuguda, 10 boh geuritan prang, dan 10.000 droe sipa-i. 8 Kisah laén keuhai Raja Yoahas dan banmandum jasa keupahlawanan gobnyan ka teucetet lam kitab Seujarah Raja-raja Israel. 9 Gobnyan meuninggai dan teupeukubu di Samaria. Yoas aneuëk gobnyan jeuet keuraja keugeunantoe gobnyan. 10 Nibak thon nyang keu lhée ploh tujoh peumeurintahan Raja Yoas ateueh Yehuda, Yoas bin Yoahas jeuet keuraja Israel dan geumat peumeurintah di Samaria 16 thon treb jih. 11 Gobnyan pi meudesya ubak TUHAN sabab geuturot buet nyang jeuhet nibak Raja Yerobeam nyang ka jeuet keusabab ureuëng Israel jipeubuet desya. 12 Kisah nyang laén keuhai Raja Yoas, meunan cit keuhai keupahlawanan gobnyan lam prang teulawan Amazia raja Yehuda, ka teucetet lam kitab Seujarah Raja-raja Israel. 13 Yoas meuninggai dan teupeukubu nibak lampôh jrat raja-raja di Samaria. Yerobeam II aneuëk gobnyan jeuet keuraja keugeunantoe gobnyan. 14 Bak saboh watée Nabi Elisa sakét brat, dan Raja Yoas geuteuka geujak kalon gobnyan. Watée geukalon Elisa karab meuninggai, rajanyan laju geumo sira geupeugah, "Bapak lôn, Bapak lôn, nyang bila Israel nyang paleng rayeuk!" 15 "Cok kheueh busur ngon aneuk panah!" peurintah Elisa ubak gobnyan. Yoas laju geucok, 16 lheuehnyan lé Elisa geuyue meusiab-siab mangat jitimbak ngon aneuk panah nyan. Raja pih meusiab-siab, dan Elisa laju geukeubah jaroe gobnyan ateueh jaroe raja. 17 Lheuehnyan pakriban nyang ka geupeurintah lé nabi nyan, raja laju geupeuhah teungkab nyang meuhadab u Siria. "Timbak kheueh aneuk panah gata!" peurintah Nabi Elisa lom. Dan meunan óh lheueh raja geupeuleuh aneuk panah nyan, nabinyan laju geupeugah, "Gata kheueh panah TUHAN. Deungon panah nyan TUHAN teuma geupeutaloe Siria. Gata teuma tamuprang talawan Siria di Afek sampoe gata hase tapeutaloe awaknyan." 18 Elisa laju geuyue ubak Raja Yoas mangat geujakcok panah-panah gobnyan nyang laén dan laju geuseupôt atranyan ateueh tanoh. Raja geuseukok tanoh na lhée goe, lheuehnyan laju geupiôh. 19 Elisa beungéh that, dan laju geupeugah, "Nyang sikeubit jih gata seukok limong atawa nam goe, deungon nyan gata hase tapeuhanco bansa Siria. Teuma jinoe gata hase tapeutaloe awaknyan cit lhéegoe sagai." 20 Hana treb teuma óh lheuehnyan Elisa meuninggai donya dan laju teupeukubu. Nibak watéenyan geurombolan-geurombolan Moab lazem jih jiprang Israel sithon sigoe. 21 Nibak siuroe watée na meupadub droe ureuëng teungoh jipeukubu ureuëng maté, laju jikalon saboh kawan geurombolan Moab teungoh jijak. Dan awaknyan pih hana jipike panyang manyét ureuëng maté nyan jitiek meunan mantong lam jrat. Elisa laju geuplueng. Meunan manyét nyan tupéh ubak keurangka Elisa, manyétnyan laju udeb lheuehnyan laju jidong. 22 Lam watée keurajeuen Yoas nyan, Hazael raja Siria teutab ji-ienanya bansa Israel. 23 Teuma TUHAN geugaséh keu umat Gobnyan dan geupeu amphon awaknyan. Gobnyan hana geutem awaknyan jipeuranab ateueh rhueng bumoe, teuma Gobnyan geutulông awaknyan, deumi janji Gobnyan deungon Nabi Ibrahim, Nabi Ishaq dan Nabi Yakub. Trok ánjinoe Gobnyan teutab hana geutuwoe keu umat Gobnyan. 24 Óh lheuehnyan Hazael raja Siria meuninggai donya, dan Benhadad aneuëk gobnyan jeuet keuraja. 25 Dan Yoas raja Israel hase geupeutaloe Benhadad lhée goe dan teucok lom teuma banda-banda nyang ka jireubot le Benhadad watée peumeurintah jimat lé Raja Yoahas ayah Yoas.

2 Raja-Raja 14

1 Bak thon nyang keudua keurajeuen Yoas bin Yoahas ateueh Israel, Amazia bin Yoas jeuet keu raja Yehuda. 2 Bak watéenyan gobnyan na umu dua ploh limong thon, dan gobnyan geumat peurintah di Yerusalem dua ploh sikureueng thon treb jih. Ma gobnyan nan geuh Yoadan asai Yerusalem. 3 Amazia geupeubuet buet nyang paleng galak até TUHAN, teuma gobnyan kon lagée Nabi Daud, indatu gobnyan. Lagée ayah gobnyan, 4 gobnyan pi hana geupeuhanco teumpat-teumpat gob seumah dewa, lé sababnyan rakyat teutab mantong jipeuseumah keureubeuen sira jitor keumeunyan nibak teumpat nyan. 5 Meunan ka kong keurajeuen gobnyan, Amazia laju geuhuköm maté bubena peugawée nyang poh maté ayah gobnyan. 6 Teuma aneuëk-aneuëk peugawée-peugawée nyan hana geupoh, sabab gobnyan jiseutôt peurintah TUHAN nyang na teutuléh lam Kitab Nabi Musa, "Bék gata huköm maté ureuëng syiek jih lé sabab buet-buet nyang jeuhet nyang jipeubuet lé aneuëk-aneuëk jih, dan bék gata huköm maté aneuëk-aneuëk jih lé sabab buet nyang jeuhet nyang jipeubuet lé ureuëng syiek jih. Tieb-tieb ureuëng jeuet teuhuköm maté meunyoe buet nyang jeuhet nyan jipeubuet lé jihnyan keudroe." 7 Nibak saboh prang nyang paleng hebat, Amazia hase geupoh maté 10.000 droe sipa-i Edom di Pantôn Asin, dan hase geureubot banda Sela. Bandanyan laju geuboh nan Yokteel. Sampoe án jinoe banda nyan mantong nan jih Yokteel. 8 Óh lheuehnyan Amazia geukirém utosan ubak Yoas raja Israel keugeulakée mangat geutem lawan gobnyan di mideuen prang. 9 Teuma lé Raja Yoas laju geukirém haba lagéenyoe, "Bak saboh watée tamah meuduro nyang na lam gle Libanon jikirém haba lagéenyoe su keu bak ceumara, 'He bak ceumara, gata jok kheueh aneuëk dara gata keu aneuëk ulôn mangat jeuet keupeurumoh jih.' Teuma disinan meulintaih kheueh saboh beulatang uteuen nyang jibloh-bloh lam uteuen meuduro nyan. 10 Gata, Amazia, kajeuet keu cungkak, sabab gata ka tapeuloe ureuëng Edom. Lé sababnyan, kon kheueh meunang nyan kaseb keugata? Nyang sigét jih gata tinggai mantong lam rumoh! Keupeue guna jih tamita-mita pasai nyang jeuet keusabab gata meupalo meunan cit deungon rakyat gata?" 11 Teuma Amazia teutab hana jipako peue-peue nyang ka geupeugah lé Yoas raja Israel nyan. Lé sababnyan teuma, Raja Yoas meusajan deungon aneuëk buah gobnyan laju geujak u Bet-Semes di Yehuda laju geumuprang ngon Amazia nibak teumpat nyan. 12 Tantra Yehuda hase geupeutaloe dan banmandum tantra awaknyan jiplueng sira jiwoe u rumoh jih maséng-maséng. 13 Yoas laju geudroeb Amazia, lheuehnyan geujak laju u Yerusalem geujak reuloih beuton banda nyan nyang panyang jih leubeh kureueng na dua reutoih metée, phon nibak babah Pintoe Geureubang Efraim sampoe trok ubak babah Pintoe Geureubang Sagoe. 14 Banmandum méuh dan pirak meunan cit banmandum peukakaih nyang na lam Baét TUHAN, meunan cit banmandum atra beunda lam meuligoe, meusajan ngon na padubdroe sandra geuangkot lé Yoas u Samaria. 15 Kisah nyang laén keuhai Raja Yoas, meunan cit keuhai pahlawan gobnyan teulawan Amazia raja Yehuda ka teucetet lam kitab Seujarah Raja-raja Israel. 16 Yoas meuninggai donya dan teupeukubu nibak lampôh jrat raja-raja di Samaria. Yerobeam II aneuëk gobnyan jeuet keuraja keugeunantoe gobnyan. 17 Óh ka lheueh Yoas raja Israel meuninggai donya, Amazia raja Yehuda, mantong udeb 15 thon teuk. 18 Di Yerusalem na saboh komplot keuneuk poh maté Amazia. Lé sababnyan gobnyan geuplueng u Lakhis, teuma lé musoh-musoh gobnyan laju jipeucrok trok keudeh meunan meuteumé laju jipoh maté. Manyét gobnyan jiba ngon guda u Yerusalem, laju teupeukubu nibak lampôh jrat raja-raja di Banda Nabi Daud. Lé sababnyan rakyat Yehuda laju jibaiát Uzia, aneuëk agam Amazia jeuet keu raja awaknyan. Nibak watéenyan Uzia na umu 16 thon. Kisah nyang laén keuhai Raja Amazia na teucetet lam kitab Seujarah Raja-raja Yehuda. 22 Óh ka lheueh ayah gobnyan meuninggai donya, Uzia geureubot lom banda Elat dan geupeudong lom teuma. 23 Nibak thon nyang keulimong blaih watée peumeurintahan geumat lé Amazia bin Yoas ateueh Yehuda, Yerobeam II bin Yoas jeuet keu raja Israel, dan geumat peurintah di Samaria 41 thon treb jih. 24 Gobnyan meudesya ubak TUHAN, sabab geuseutôt buet nyang jeuhet nyang geupeubuet lé Raja Yerobeam I nyang ka geupeujeuet ureuëng Israel meudesya. 25 Yerobeam II nyoe kheueh nyang reubot lom banmandum bandum daerah Israel, phon nibak rot u Hamat di utara trok u Laôt Maté di seulatan. Nyan paih lagée janji TUHAN, Po teu Allah Israel, meulalu hamba Gobnyan Nabi Yunus bin Amitai ureuëng Gat-Hefer. 26 TUHAN geukalon padub na seungsara jih ureuëng Israel, dan hana meusidroe pi nyang tulông awaknyan. 27 TUHAN hana niet keuneuk geupeuhanco bansa Israel keu siumu masa, lé sababnyan gobnyan geutulông awaknyan meulalu Raja Yerobeam II. 28 Kisah nyang laén keuhai Raja Yerobeam II, keuhai keupahlawan gobnyan lam tieb-tieb mideuen prang dan pakriban gobnyan geureubot lom Damsyik meunan cit Hamat nibak Yehuda keu Israel, banmandum nyan na teucetet lam kitab Seujarah Raja-raja Israel. 29 Yerobeam II meuninggai donya dan laju teupeukubu nibak lampôh jrat raja-raja. Zakharia aneuëk agam gobnyan jeuet keuraja keugeunantoe gobnyan.

2 Raja-Raja 15

1 Nibak thon keu dua ploh tujoh geumat keurajeuen lé Raja Yerobeam II ateueh Israel, Uzia bin Amazia jeuet keu raja Yehuda. 2 Nibak watéenyan gobnyan meu-umu 16 thon dan geumat peurintah di Yerusalem 52 thon treb jih. Ma gobnyan asai geuh di Yerusalem nan geuh Yekholya. 3 Saban cit lagée ureuëng syiek gobnyan Uzia pi geupeubuet buet nyang lumpah that galak até TUHAN. 4 Teuma, sayang that, gobnyan hana geupeuhanco bubena teumpat gob seumah dewa, lé sababnyan rakyat teutab jipeuseumah keureubeuen dan jitot keumeunyan nibak teumpat nyan. 5 TUHAN geupeuteuka ateueh gobnyan peunyakét kulét nyang bit-bit parah, sampoe meuninggai donya peunyakét nyan teutab hana puléh. Gobnyan teupeuaséng nibak saboh rumoh dan teupeubeubaih nibak buet-buet gobnyan. Yotam aneuëk agam gobnyan geupeurintah rakyat sibagoe waki geuh. 6 Kisah nyang laén keuhai Raja Uzia ka teucetet lam kitab Seujarah Raja-raja Yehuda. 7 Uzia meuninggai donya dan teupeukubu nibak lampôh jrat raja-raja di Banda Nabi Daud. Yotam aneuëk agam gobnyan jeuet keu raja keugeunantoe gobnyan. 8 Nibak thon nyang keu lhée ploh lapan geumat keurajeuen lé Raja Uzia ateueh Yehuda, Zakharia bin Yerobeam II jeuet keu raja Israel nyang geumat peurintah di Samaria nam buleuen treb jih. 9 Saban lagée raja-raja nyang mat peurintah sigohlom nyan, gobnyan pi meudesya ubak TUHAN. Gobnyan geuseutôt buet nyang jeuhet nyang geupeubuet lé Raja Yerobeam I, nyang ka geupeujeuet Israel meudesya. 10 Salum bin Yabes meukomplot keuneuk jilawan Raja Zakharia, dan jipoh maté gobnyan di Yibleam, dan laju jeuet keuraja geunantoe gobnyan. 11 Deungon lagéenyan teuka kheueh peue nyang ka geupeujanji lé TUHAN ubak Raja Yehu bahwa aneuëk cucoe gobnyan sampoe ubak keuturonan nyang keupeuet teuma jeuet keu raja Israel. Kisah nyang laén keuhai Raja Zakharia, na teucetet lam kitab Seujarah Raja-raja Israel. 13 Nibak thon nyang keu lhée ploh sikureueng geumat keurajeuen lé Raja Uzia ateueh Yehuda, Salum bin Yabes jeuet keu raja Israel. Gobnyan geumat peurintah di Samaria cit sibuleuen 14 sabab Menahem bin Gadi jijak nibak Tirza u Samaria, laju jipoh maté Salum, dan jeuet keuraja geunantoe gobnyan. 15 Watée teungoh jijak nibak Tirza nyan, lé Menahem jipeuhanco sapansapa banda Tifsah meunan cit deungon daerah-daerah nyang na bansilingka nyan, meunan cit peunduduek nyang na disinan pi habéh geupoh hana nyang tinggai, sabab bandanyan hana jitem meunyeurah ubak geuhnyan, inong-inong mume nyang na lam bandanyan geuprah pruet. Kisah nyang laén keuhai Raja Salum, meunan cit keuhai komplotan gobnyan, ka teucetet lam kitab Seujarah Raja-raja Israel. 17 Nibak thon nyang keu lhée ploh sikureueng keurajeuen Raja Uzia ateueh Yehuda, Menahem bin Gadi jeuet keu raja Israel, dan geumat peurintah di Samaria na siploh thon treb jih. 18 Siumu udeb gobnyan meudesya ubak TUHAN sabab geuseutôt buet Raja Yerobeam I, nyang teupeujeuet ureuëng Israel meudesya. 19 Watée Pul raja Asyur jijak prang Israel, lé Menahem geujok keu gobnyan 34.000 kilogram pirak mangat gobnyan geutulông peukong keurajeuen Menahem ateueh Israel. 20 Cara Menahem meuteumé péng nyan na kheueh gobnyan geupaksa ureuëng-ureuëng kaya di Israel mangat jijok limong ploh péng pirak tieb-tieb ureuëng. Lé sababnyan Pul geutinggai nanggroe nyan dan geuwoe nanggroe geuh keudroe. 21 Kisah laén keuhai Raja Menahem na teucetet lam kitab Seujarah Raja-raja Israel. 22 Gobnyan meuninggai donya dan laju teukubu, dan Pekahya aneuëk gobnyan teubaiát jeuet keu raja geunantoe gobnyan. 23 Nibak thon keu limong ploh keurajeuen Raja Uzia ateueh Yehuda, Pekahya bin Menahem jeuet keu raja Israel dan geumat peurintah di Samaria dua thon treb jih. 24 Gobnyan meudesya ubak TUHAN sabab geuturot buet nyang jeuhet nyang geupeubuet lé Raja Yerobeam I, nyang peujeuet ureuëng Israel meudesya. 25 Sidroe lamkawan uléebalang gobnyan, na kheueh Pekah bin Remalya, jimeukumplot deungon ureuëng Gilead nyang le jih na 50 droe. Dan lam saboh kuta nibak meuligoe di Samaria awaknyan jipoh maté Pekahya meusajan ngon dua teuk nyang laén nyang nan jih Argob dan Arye. Lheuehnyan Pekah jeuet keuraja geunantoe Pekahya. 26 Kisah laén keuhai Raja Pekahya na teucetet lam kitab Seujarah Raja-raja Israel. 27 Nibak thon nyang keu limong ploh dua keurajeuen Raja Uzia ateueh Yehuda. Pekah bin Remalya jeuet keu raja Israel. Gobnyan geumat peurintah di Samaria 20 thon treb jih. 28 Gobnyan meudesya ubak TUHAN sabab gobnyan geuseutôt buet Raja Yerobeam I nyang geupeujeuet Israel ka meudesya. 29 Watée peumeurintah Pekah nyan, Tiglat-Pileser raja Asyur geureubot banda Iyon, Abel-Bet-Maakha, Yanoah, Kedes, Hazor, daerah Gilead, Galilea dan Naftali. Peunduduek nyang na disinan teuangkot cit sibagoe ureuëng keunong teuen u Asyur. 30 Bak thon nyang keudua ploh watée keurajeuen Raja Yotam bin Uzia ateueh Yehuda, Hosea bin Sela ka meukomplot keuneuk jilawan Raja Pekah dan laju jipoh maté gobnyan, lé sababnyan teuma geuhnyan laju jeuet keuraja keugeunantoe gobnyan. 31 Kisah nyang laén keuhai Raja Pekah ka teucetet lam kitab Seujarah Raja-raja Israel. 32 Nibak thon nyang keudua watée keurajeuen Raja Pekah bin Remalya ateueh Israel, Yotam bin Uzia jeuet keuraja Yehuda. 33 Nibak watéenyan gobnyan na umu 25 thon dan gobnyan geumat peurintah di Yerusalem 16 thon treb jih. Ma gobnyan Yerusa binti Zadok. 34 Yotam geumeubuet nyang paleng mangat até TUHAN, saban cit lagée ureuëng syiek gobnyan Raja Uzia. 35 Teuma sayang that, teumpat-teumpat gob seumah dewa hana geupeuhanco, lé sababnyan rakyat teutab jimeukeureubeuen dan jitot keumeunyan nibak teumpat nyan. Yotam kheueh nyang peudong babah Pintoe Geureubang Utara di Baét TUHAN. 36 Nibak peumeurintahan Yotam, TUHAN ka geupeuphon kirém Rezin raja Siria dan Pekah raja Israel keuteujak prang Yehuda. Kisah nyang laén keuhai Raja Yotam na teucetet lam kitab Seujarah Raja-raja Yehuda. 38 Gobnyan meuninggai donya dan teupeukubu nibak lampôh jrat raja-raja nibak Banda Nabi Daud. Ahas aneuëk gobnyan jeuet keuraja keugeunantoe gobnyan.

2 Raja-Raja 16

1 Nibak thon nyang keu tujoh blaih keurajeuen Raja Pekah bin Remalya ateueh Israel, Ahas bin Yotam jeuet keuraja Yehuda. 2 Watéenyan gobnyan na umu 20 thon dan gobnyan geumat peurintah di Yerusalem 16 thon treb jih. Gobnyan hana geuseutôt teuladan nyang gét nibak Nabi Raja Daud, indatu gobnyan, teuma nyang geupeubuet nyang hana galak até TUHAN, Po teu Allah gobnyan. 3 Gobnyan udeb lagée raja-raja Israel, dan geupeuseumah aneuëk gobnyan nyang agam sibagoe keureubeuen ubak dewa, meunurot keubiasaan brok ureuëng-ureuëng nyang ka geu-use lé TUHAN nibak nanggroe Kanaan watée ureuëng Israel jitamong lam nanggroe nyan. 4 Ahas geupeuseumah keureubeuen dan geutot keumeunyan nibak teumpat-teumpat gob seumah dewa di gunong-gunong dan jimiyueb-miyueb bak kayée nyang luhu. 5 Nibak watéenyan raja Edom jikuasa lom banda Elat dan jiuse ureuëng-ureuëng Yehuda nyang na tinggai disinan. Ureuëng-ureuëng Edom óh lheuehnyan teuka dan tinggai teutab di banda nyan trok nibak uroenyoe. Bak watéenyan cit teuma Rezin raja Siria dan Pekah raja Israel jijakprang dan jikeupong Yerusalem, teuma hana hase jipeutaloe Ahas. 7 Ahas geukirém utosan ubak Tiglat-Pileser raja Asyur deungon peusan lagéenyoe, "Ulôn namiet droeneueh nyang seutia; lé sababnyan, ulôn meulakée neuteuka dan neupeuseulamat kheueh ulôn nibak raja Siria dan raja Israel nyang teungoh jiprang ulôn." 8 Ahas geucok laju méuh ngon pirak nyang na lam Baét TUHAN, meunan cit deungon atra nyang na lam meuligoe geucok cit teuma, atranyan laju geukirém ubak raja Asyur sibagoe hadiah gobnyan. 9 Raja Tiglat-Pileser geuteurimong peue nyang geulakée lé raja Ahas nyan, deungon nyan teuma laju geuprang dan geureubot Damsyik. Bubena peunduduek banda nyan laju geudroeb dan geuba sibagoe ureuëng nyang teuteuen dan geuba laju u Kir, dan raja jih, na kheueh Raja Rezin, geupoh maté. 10 Watée Raja Ahas geujak u Damsyik keugeujak meurumpok ngon Raja Tiglat-Pileser, laju geukalon na miseubah lam banda nyan. Laju geukirém ubak Teungku Imeum Uria di Yerusalem cuntoh miseubah nyan deungon ukoran nyang paih dan teupeureunci that. 11 Lé sababnyan teuma Uria laju geupeudong saboh miseubah saban that lagée cuntoh meunan cit ukoran jih nyang ka geuteurimong nyan, atranyan seuleusoe sigohlom Ahas trok geugisa. 12 Watée Ahas ka trok nibak Damsyik, laju geukalon lé Ahas bahwa miseubah nyan ka seuleusoe. 13 Ateueh miseubah nyan laju geupeuseumah keureubeuen beulatang meunan cit deungon keureubeuen gandom. Meunan cit geuleng teuma keureubeuen ié anggô ngon keureubeuen darah nibak keureubeuen peudamé ateueh miseubah nyan. 14 Ahas geukalon bahwa miseubah peurunggu nyang teupeukhusos keu TUHAN nyang na teuduek lamkawan Baét TUHAN deungon miseubah gobnyan nyang barô. Lé sababnyan miseubah peurunggu nyan laju geupinah nibak keue Baét TUHAN u blaih utara miseubah gobnyan nyang barô. 15 Lheueh nyan laju geupeugah ubak Uria, "Peuguna kheueh miseubah ulôn nyang rayeuk nyoe keuteumpat keureubeuen beungoh ngon keureubeuen malam nyang geupeuseumah lé raja ngon rakyatba, dan rô disinan keureubeuen anggô nibak rakyat. Rô kheueh laju ateueh miseubah nyan darah mandum beulatang nyang teupeuseumah. Dan miseubah peurunggu nyang awai nyan bah kheueh ulôn nyang peuguna keungon lôn lakée peutunyok ubak areuwah-areuwah." 16 Uria geupeubuet banmandum peue-peue nyang geupeurintah lé raja nyan. 17 Lheueh nyan Ahas laju geureuloih geuritan-geuritan peurunggu nyang teupeuguna lam Baét TUHAN, dan geuleukang laju guci-guci nyang na bak geuritan nyan. Beujana peurunggu nyang rayeuk nyang na ateueh rueng dua blaih boh leumô peurunggu nyan geucok cit dan geukeubah laju ateueh keunaleueng batée. 18 Dan keu geupeumangat até raja Asyur, Ahas geureuloih teuma balairung raja nyang na lam Baét TUHAN, dan geutôb laju pintoe tamong nyang teupeukhusos keu raja. 19 Kisah laén keuhai Raja Ahas na teucetet lam kitab Seujarah Raja-raja Yehuda. 20 Ahas meuninggai dan teupeukubu nibak lampôh jrat raja-raja lam Banda Nabi Daud. Hizkia aneuëk gobnyan jeuet keuraja keugeunantoe gobnyan.

2 Raja-Raja 17

1 Nibak thon nyang keudua blaih keurajeuen Raja Ahas ateueh Yehuda, Hosea bin Ela jeuet keuraja Israel, dan gobnyan geumat peurintah di Samaria sikureueng thon treb jih. 2 Gobnyan meudesya ubak TUHAN, teuma desya gobnyan hana saban le jih ngon desya-desya raja-raja Israel nyang ka geumat peurintah sigohlom gobnyan. 3 Gobnyan jiprang dan jipeutaklok lé Salmaneser raja Asyur, lé sababnyan teuma gobnyan tieb-tieb thon harôh geubayeue upeti ubak raja Asyur nyan. 4 Teuma nibak saboh watée, Hosea geukirém utosan ubak So sidroe raja nanggroe Meusé keugeulakée bantu. Deungon nyan teuma Hosea hana geubayeue le upeti tieb-tieb thon keu raja Asyur. Watée Salmaneser jiteupeue buet Hosea nyan, le gobnyan laju geudroeb Hosea dan geupeutamong lam glab. 5 Óh lheuehnyan Salmaneser raja Asyur jijakprang Israel laju jikeupong Samaria. Bak thon nyang keu lhée banda nyan jikeupong, 6 -- na kheueh thon nyang keusikureueng keurajeuen Hosea -- Salmaneser jireubot Samaria. Bubena ureuëng Israel laju jiangkot u Asyur sibagoe tawanan prang. Siladum nibak awaknyan jikeubah di banda Halah, siladum teuk bak binéh Krueng Habor nibak wilayah Gozan, dan siladum teuk nibak banda-banda di nanggroe Madai. 7 Samaria taklok sabab ureuëng Israel ka meudesya ubak TUHAN, Po teu Allah awaknyan, nyang ka peuseulamat awaknyan nibak raja Meusé, dan geuba awaknyan peuteubiet nibak nanggroe nyan. Awaknyan jiseumah ilah-ilah laén 8 dan jiseutôt keubiasaan nyang jipeubuet lé bansa-bansa nyang ka geu-use lé TUHAN watée bansa Israel maju jijakprang bansa-bansa nyan. Bansa Israel jiseutôt adat istiadat nyang ka jipeuteutab lé raja-raja Israel, 9 dan jipeubuet hai-hai nyang hana geugalak lé TUHAN, Po teu Allah awaknyan. Awaknyan jipeudong teumpat-teumpat teuseumah dewa nibak banmandum banda awaknyan, bahnyan lam banda ubit meunan cit lam banda rayeuk. 10 Di ateueh tieb-tieb bukét, dan dimiyueb tieb-tieb bak kayée nyang luhu, awaknyan jipeudong tugu-tugu dan patong-patong Dewi Asyera. 11 Meunan cit awaknyan jitot keumeunyan nibak mandum miseubah keu dewa, lagée keubiasaan bansa-bansa nyang ka geu-use lé TUHAN nibak nanggroe Kanaan. Awaknyan jiseumah beurala, bahpi TUHAN ka geutam awaknyan. Banmandum buet-buet awaknyan nyang jeuhet ka jipeuteuka meureuka TUHAN. 13 TUHAN laju geukirém utosan-utosan dan nabi-nabi Gobnyan ubak umat Israel dan Yehuda keu geupeusampoe peuingat Gobnyan lagéenyoe: "Tapiôh kheueh bak buet nyang jeuhet dan gata taát kheueh ubak peurintah dan huköm nyang ka Ulôn bri ubak indatu gata dan ubak gata meulalu nabi-nabi, hamba-hamba Ulôn nyan." 14 Teuma Israel dan Yehuda hana jitem deungoe. Awaknyan kreueh ulée lagée indatu awaknyan nyang hana jipatéh ubak kheun TUHAN, Po teu Allah awaknyan. 15 Israel dan Yehuda hana jitem taát ubak peue-peue nyang geupeurintah lé TUHAN dan hana seutia ubak janji-janji nyang ka geupeugét ngon indatu gobnyan. Awaknyan hana jipako peue-peue nyang geuseugah lé TUHAN, teuma teutab jimeuiébadat ubak beurala-beurala nyang hana meuguna, deungon nyan teuma awaknyan keudroe pih ka hana meuguna. Awaknyan jiseutôt teuladan ubak bansa-bansa nyang na bansikeulileng awaknyan, bahpi TUHAN ka geutam. 16 Awaknyan ji-iengkeue ubak banmandum huköm TUHAN, Po teu Allah awaknyan, dan jipeugét dua boh leumô logam keu jiseumah. Awaknyan jipeugét patong Dewi Asyera, jiseumah bintang-bintang dan meuiébadat ubak Dewa Baal. 17 Awaknyan jipeuseumah aneuëk-aneuëk droe jih sibagoe keureubeuen nyang teutot keu dewa. Awaknyan jipeuguna iéleumé gaéb dan jilakée peutunyok ubak tabib-tabib nyang hase meugubongan ngon areuwah-areuwah. Awaknyan keubit jumot that bak jipeubuet hai-hai nyang hana meukeunong bak até TUHAN 18 lé sababnyan Gobnyan beungéh that-that ubak awaknyan dan hana geupakoe le keu awaknyan. Gobnyan ka geuböih awaknyan nibak tanoh nyang ka geubri keu awaknyan; nyang na tinggai na kheueh keurajeuen Yehuda. 19 Ureuëng-ureuëng Yehuda pih hana taát ubak huköm-huköm TUHAN, Po teu Allah awaknyan. Awaknyan jiseutôt buet-buet nyang lazem jipeubuet lé ureuëng Israel, 20 lé sababnyan teuma TUHAN hana geuaku le banmandum umat Israel. Gobnyan geuhuköm dan geujok awaknyan ubak musoh-musoh awaknyan nyang keujam. Gobnyan hana le geupakoe awaknyan, teuma geuböih awaknyan nibak tanoh nyang ka geujok keu awaknyan. 21 Óh ka lheueh TUHAN geupeupisah ureuëng Israel nibak Yehuda, ureuëng Israel laju geubaiát Yerobeam bin Nebat jeuet keuraja awaknyan. Dan Yerobeam geupeujeuet awaknyan jitinggai TUHAN dan geupeubuet desya-desya nyang rayeuk. 22 Awaknyan jiseutôt teuladan Yerobeam dan teutab jipeubuet banmandum desya nyang jipeubuet nyan, 23 akhé jih TUHAN hana geupakoe lé keu awaknyan, teuma geuböih awaknyan nibak tanoh nyang geujok keu awaknyan. Hainyan teujadi paih lagée peuingat TUHAN nyang geubri keu awaknyan meulalu hamba-hamba Gobnyan, nabi-nabi. Meunan kheueh ureuëng Israel jiba ubak teumpat böih di Asyur, dan disinan kheueh awaknyan tinggai sampoe uroenyoe. 24 Sibagoe geunantoe ureuëng Israel nyang ka jiba ubak teumpat böih nyan, raja Asyur laju geukeubah nibak banda-banda Samaria ureuëng Babel, Kuta, Awa, Hamat, dan Sefarwaim. Ureuëng-ureuëng nyan jiduek nibak banda-banda nyan dan tinggai teutab disinan. 25 Watée phon-phon that awaknyan tinggai disinan awaknyan hana jihoreumat TUHAN; nyang kheueh sababjih TUHAN geupeutreun singa-singa juah keujijab siladum nibak awaknyan. 26 Na ureuëng jijak peugah ubak raja Asyur bahwa ureuëng-ureuëng nyang geukeubah di banda-banda di Samaria hana jituri ubak huköm-huköm dewa nanggroe nyan. Nyang kheueh sabab jih dewa jipeutreun singa keujijak kab awaknyan. 27 Nyang kheueh sabab jih raja Asyur geupeurintah ubak sidroe teungku imeum lamkawan ureuëng tawanan nyang ka teuböih u Asyur, jikirém lom u Samaria. "Yue jihnyoe mangat jiwoe dan teutab tinggai di nanggroe nyan mangat jihnyan jeuet jipeurunoe ureuëng-ureuëng keuhai huköm-huköm dewa nanggroe nyan," kheun raja. 28 Dan sidroe teungku imeum Israel nyang jiangkot nibak Samaria u Asyur, laju jiwoe dan tinggai di Betel. Disinan gobnyan geupeurunoe rakyat pakriban cara jih teuseumah TUHAN. 29 Teuma ureuëng-ureuëng nyang tinggai di Samaria nyan teutab jipeugét beurala-beurala jih keudroe dan jikeubah lam kuil-kuil nyang ka jipeudong lé ureuëng Israel nyang yoh watée ilée tinggai di banda nyan. Tieb-tieb saboh kawöm jipeugét beurala keudroe nibak banda nyang awaknyan duek: 30 Ureuëng Babel jipeugét Dewa Sukot-Benot, ureuëng Kuta jipeugét patong Nergal, ureuëng Hamat patong Asima, 31 ureuëng Awa jipeugét patong Nibas dan Tartak, dan ureuëng Sefarwaim jipeuseumah aneuëk-aneuëk awaknyan sibagoe keureubeuen nyang teutot keu Dewa Adramelekh dan Anamelekh. 32 Seulaén jiseumah dewa-dewa nyan, awaknyan jiseumah cit TUHAN. Awaknyan jipiléh lamkawan droejih keudroe meubagoe ureuëng keumeutugaih sibagoe teungku imeum dan mangat jipeuseumah keureubeuen bak kuil-kuil beurala. 33 Teuma, awaknyan jiseumah TUHAN, dan jiseumah cit dewa-dewa awaknyan keudroe, lagée adat istiadat nyang na lam nanggroe awaknyan. 34 Trok nibak uroenyoe awaknyan mantong jipeubuet adat istiadat droe jih keudroe. Awaknyan hana meuiébadat ubak TUHAN dan hana teuma jitaát ubak huköm-huköm dan peurintah-peurintah nyang teubri ubak keuturonan Nabi Yakub, nyang teuboh deungon nan Israel. 35 TUHAN ka geupeugét peujanjian lagée teupeugah nyoe ngon umat Israel, "Bék meuiébadat ubak ilah-ilah nyang laén; bék sujut teuseumah awaknyan dan teupeutimang awaknyan, atawa teupeuseumah keureubeuen keu awaknyan. 36 Horeumat kheueh Ulôn, TUHAN, nyang ka teuba gata teupeuteubiet nibak nanggroe Meusé deungon kuasa nyang rayeuk; seumah kheueh Ulôn dan peuseumah kheueh keureubeuen keu Ulôn. 37 Taát kheueh ubak huköm-huköm dam peurintah-peurintah nyang ka Ulôn tuléh keu gata. Bék meuiébadat ubak ilah-ilah laén, 38 dan bék tuwoe ubak janji Ulôn deungon gata. 39 Taát kheueh ubak Ulôn, TUHAN Po teu Allah gata, deungon nyan Ulôn teuma Lôn peubeubaih gata nibak musoh-musoh gata." 40 Teuma peunduduek Samaria nyan teutab hana jitem deungoe awaknyan; awaknyan teutab jimumat ubak adat istiadat jih keudroe. 41 Teuma, awaknyan jiseumah TUHAN, teuma jiseumah cit beurala-beurala awaknyan. Trok ánjinoe pih keuturonan awaknyan mantong jipeubuet hainyan.

2 Raja-Raja 18

1 Nibak thon nyang keu lhée keurajeuen Raja Hosea bin Ela ateueh Israel, Hizkia bin Ahas jeuet keuraja Yehuda. 2 Bak watéenyan gobnyan nan umu 25 thon dan gobnyan geumat peurintah di Yerusalem 29 thon treb jih. Ma gobnyan na geuh Abia binti Zakharia. 3 Hizkia geupeubuet buet nyang paleng mangat até TUHAN saban lagée Raja Nabi Daud indatu gobnyan. 4 Gobnyan geupeuhanco bubena teumpat seumah dewa, dan geureuloih banmandum tugu-tugu dan geupeurusak patong-patong Dewi Asyera. Meunan cit geupeuhanco teuma uleue peurunggu nyang geupeugét lé Nabi Musa nyang teuboh nan Nehustan. Sabab, trok bak uroenyan ureuëng Israel mantong jitot keumeunyan dan jihoreumat ubak uleue peurunggu nyan. 5 Lamkawan bandum Raja Yehuda, bah nyang yoh gohlom meunan cit óh ka lheueh Hizkia, hana nyang lagée gobnyan. Gobnyan peucaya ubak TUHAN, Po teu Allah Israel, 6 dan seutia ubak Gobnyan. Hántom na gobnyan geulawan TUHAN. Banmandum peurintah TUHAN nyang geubri meulalu Nabi Musa, geutaát that lé Hizkia deungon bit-bit taát. 7 Nyang kheueh sabab jih TUHAN teutab geutulông gobnyan sampoe gobnyan meuhase lam peue-peue mantong useuha geuh. Gobnyan beurontak ateueh raja Asyur, dan hana geutem taklok ubak gobnyan. 8 Gobnyan geupeutaloe ureuëng Filistin, dan geureubot teumpat tinggai awaknyan, phon nibak gampông nyang paleng ubit sampoe ubak banda nyang paleng rayeuk, jitamong cit Gaza dan wilayah nyang na bansikeulileng nyan. 9 Nibak thon nyang keupeuet lam keurajeuen Hizkia, na kheueh thon nyang keutujoh keurajeuen Hosea ateueh Israel, Salmaneser raja Asyur jijak prang Israel dan jikeupong Samaria. 10 Óh ka lheueh jikeupong na lhée thon treb jih, Samaria rhot lam jaroe raja Asyur. Nyan na jih nibak thon nyang keunam keurajeuen Hizkia, dan thon nyang keu sikureueng keurajeuen Hosea. 11 Lheueh nyan Asyur laju jiba rakyat Israel u Asyur sibagoe ureuëng nyang teuteuen; siladum nibak awaknyan jipeuduek di banda Halah, siladum teuk tô ngon Krueng Habor lam wilayah Gozan, dan siladum teuk lam banda-banda di nanggroe Madai. 12 Samaria rhot sabab ureuëng Israel hana jitaát ubak TUHAN, Po teu Allah awaknyan. Awaknyan ji-iengkeue ubak janji nyang ka geupeugét lé TUHAN ngon awaknyan, dan awaknyan banmandum ji-iengkeue ubak peurintah Nabi Musa, hamba Gobnyan. Awaknyan hana jitem deungoe dan hana jitem seutôt. 13 Nibak thon nyang keu peuet blaih keurajeuen Hizkia raja Yehuda, banda-banda Yehuda nyang meupageue ngon kuta jiprang dan jipeutaloe lé Sanherib, raja Asyur. 14 Dan ubak Sanherib nyang na di Lakhis, lé Hizkia laju geukirém haba lagée nyoe, "Ulôn ka meusalah. Lé sababnyan, ulôn lakée, Amphon piôh kheueh bék Amphon prang le kamoe. Banmandum nyang Amphon lakée teuma kamoe bri." Sanherib jijaweueb bahwa Hizkia harôh geukirém keu gobnyan 10.000 kilogram pirak, dan 1.000 kilo gram méuh. 15 Lé sababnyan, banmandum méuh nyang na lam Baét TUHAN meunan cit nyang na lam kaih meuligoe geukirém lé Hizkia ubak Sanherib. 16 Méuh nyang na nibak pintoe-pintoe Baét TUHAN meunan cit nyang ka geupasang lé Hizkia nibak ambang-ambang pintoe nyan pih geucok dan geukirém ubak Sanherib. 17 Teuma raja Asyur nyan jikirém teuma saboh pasokan rayeuk that nyang na di Lakhis nyang pimpénan lhée droe peuwira manyang, na kheueh sidroe panglima, sidroe tukang peujieb ié, dan sidroe teuk ulée kawai raja. Óh ka trok lam banda nyan awaknyan laju jicok teumpat lam ladang, nyang teuboh nan Ladang Peunatu nyang tô that ngon lueng nyang ié ji-ile rot kulam nyang na di ateueh. 18 Lheuehnyan awaknyan jidumpek sira jitawök Raja Hizkia. Teuma lhée droe peugawée Hizkia jiteubit geujak meurumpok ngon awaknyan. Ban lhée droe peungawai nyan na kheueh Elyakim bin Hilkia ulée rumoh tangga meuligoe, Sebna, keurukon mulok neugahra, dan Yoah bin Asaf keurukon mulok meuligoe. 19 Sidroe lamkawan peuwira Asyur nyan jipeugah ubak awaknyan, "Jak peutrok kheueh laju ubak Hizkia haba raja Asyur lagéenyoe: 'Pakon gatanyoe tarasa droe teuh teuga? 20 Gata pike deungon haba hase gata gantoe siasat dan teunaga tantra? Soe kheueh nyang gata peubangga, sampoe gata tajeuet talawan Asyur? 21 Beutôi gata meuharab beujitulông lé Meusé, teuma hainyan saban cit deungon gata peuguna naleueng lakoe sibagoe tungkat; teuma tungkat nyan patah dan jaroe gata teutob. Meunan kheueh raja Meusé keu soe mantong meuharab ubak jihnyan.' " 22 Lheueh nyan jipeugah lom lé peuwira Asyur nyan, "Atawa mungken gata tapeugah bahwa gata meuharab ubak TUHAN, Po teu Allah gata? Watée Hizkia jipeurintah mangat jeuet ureuëng Yehuda dan Yerusalem beujimeuiébadat dikeue miseubah di Yerusalem, kon kheueh nyang jipeuhanco nyan miseubah dan teumpat-teumpat teuseumah ubak TUHAN keudroe? 23 Jinoe ateueh nan raja Asyur ulôn kujeuet meutaroh meunyoe keugata teujok 2.000 boh guda, pasti gata hana ureuëng sidubnyan le keu jipasang ateueh rhueng guda nyan! 24 Keu gata lawan peuwira kamoe nyang paleng ubit pih, gata kon imbang kamoe. Teuma gata teutab cit tameuharab nanggroe Meusé mangat jikirém bantuan geuritan prang dan pasokan meuguda! 25 Gata tapike kamoe prang dan kamoe peutaloe nanggroe deungon tan geutulông lé TUHAN? TUHAN keudroe kheueh nyang yue kamoe mangat kamoe jak prang dan kamoe peuhanco teuma!" 26 Lheueh nyan geupeugah lé Elyakim, Sebna, dan Yoah ubak peuwira nyan, "Teungku, neumeututoe mantong lam basa Aram ngon kamoe, kamoe muphom. Bék meututoe ngon basa Ibrani, eunteuk jideungoe lé rakyat nyang na ateueh beuton banda nyan." 27 Geuseuôt peuwira nyan, "Peu kheueh ubak gata dan raja gata mantong ulôn geukirém lé Asyur keuteupeu sampoe banmandum nyoe? Kon! Ulôn meututoe cit ubak rakyat nyang teungoh duek ateueh beuton nyan, nyang meusigoe deungon gata teuma tapajoh ék gata keudroe dan tajieb iék gata keudroe." 28 Óh lheuehnyan peuwira nyan jidong dan jidumpek lam basa Ibrani, "Deungoe kheueh nyoe peue nyang geupeugah lé raja Asyur: 29 'Bék tatem jipeungéut lé Hizkia; jihnyan hana hase jipeuseulamat gata. 30 Bék tadeungoe watée jibujuk keuteumeuharab ubak TUHAN. Bék gata pike TUHAN geupeuseulamat gata atawa geutam sipa-i Asyur keu jireubot banda gata. 31 Bék tadeungoe Hizkia. Ulôn raja Asyur, ulôn yue ubak gata mangat tateubiet nibak lam banda dan meunyeurah droe. Singoh jeuet gata pajoh boh anggô nibak lampôh gata keudroe, dan tapajoh boh ara nyang na nibak bak gata keudroe, dan gata jieb ié nyang na nibak mon gata keudroe, 32 sampoe ulôn kupinah gata ubak saboh nanggroe nyang saban ngon nanggroe gata keudroe. Disinan na lampôh anggô nyang jipeuhase anggô keu gata keudroe, dan na blang gandom nyang jipeuhase teupông gandom keu peunajoh gata. Lam nanggroe nyan na bak zaiton nyang le, minyéuk zaiton dan meulisan. Meunyoe gata taseutôt peue nyang ulôn yue ubak gata, gata teuma udeb, hana maté. Bék gata deungoe Hizkia! Jihnyan jipeungéut gata deungon jipeugah bahwa TUHAN teuma geupeuseulamat gata. 33 Peu kheueh ka lheueh na dewa bansa laén jipeuseulamat nanggroe jih nibak keukuasaan ulôn? 34 Dipat kheueh dewa-dewa nanggroe Hamat dan Arpad? Dipat kheueh dewa-dewa Sefarwaim, Hena, dan Iwa? Peu kheueh na nyang teuka jijak peuseulamat Samaria? 35 Dewa toh kheueh nyang ka lheueh jipeuseulamat nanggroe jih nibak keukuasaan ulôn? Panena mungken TUHAN hase geupeuseulamat Yerusalem?' " 36 Watée jideungoe nyan, peunduduek Yerusalem hana jijaweueb, sabab Raja Hizkia ka geupeurintah awaknyan seungab mantong. 37 Teuma, Elyakim, Sebna, dan Yoah geupriek peukayan gobnyan tanda seudeh that até, lheueh nyan laju geuwéh geujak peutrok ubak raja peue nyang ka jipeubuet lé uléebalang Asyur nyan.

2 Raja-Raja 19

1 Watée Raja Hizkia geudeungoe laporan nibak ban lhée droe ureuëng nyan, gobnyan laju geupriek peukayan geuh dan geungui laju peukayan ija krong sibagoe tanda seudeh, lheuehnyan laju geujak u Baét TUHAN. 2 Óh lheuehnyan gobnyan geukirém Elyakim, ulée meuligoe, Sebna, seukeutaréh neugahra, dan teungku-teungku imeum nyang ka tuha-tuha, awaknyan geuyue jak meurumpok ngon Nabi Yesaya bin Amos. Awaknyan pih geungui ija krong. 3 Nyoe kheueh peusan Raja Hizkia nyang awaknyan peugah ubak Nabi Yesaya, "Uroenyoe uroe meudukacita, tanyoe jihuköm dan jihina. Tanyoe lagée inong nyang keuneuk peulahé aneuëk teuma ka habéh teunaga. 4 Raja Asyur ka jikirém sidroe peuwira manyang jih keujijak hina Po teu Allah nyang udeb. Pat tateupeue TUHAN Allah ka geudeungoe peue nyang jihina lé awaknyan, teuma geuhuköm awaknyan nyang ka jipeugah haba nyan! Lé sababnyan meudoá kheueh ubak Po teu Allah keu ureuëng-ureuëng geutanyoe nyang mantong udeb." 5 Óh ka lheueh geuteurimong peusan nibak Raja Hizkia nyan, 6 Nabi Yesaya laju geuyue ubak utosan nyan mangat jipeutrok peusan gobnyan lagéenyoe su jih, "TUHAN meufeureuman, Teungku Amphon bék teumakot peue-peue nyang ka jipeugah lé hamba-hamba raja Asyur nyan bahwa TUHAN hana geupeuleuh geutanyoe. 7 TUHAN teuma geupeujeuet raja Asyur jideungoe haba angén sampoe akhé jih jihnyan jiwoe u nanggroe jih keudroe, dan di nanggroe jih raja nyan jipoh maté." 8 Peuwira Asyur nyan meuteumé haba bahwa raja jih ka jitinggai Lakhis dan teungoh jimuprang jilawan banda Libna, hana jiôh nibak teumpat nyan. Dan jijak kheueh peuwira nyan keudeh keujijak meurumpok ngon raja jih nyan. 9 Raja Asyur ka jiteumé haba bahwa pasokan Meusé dimiyueb pimpénan Tirhaka raja Sudan teungoh jijak keuneuk jijak prang awaknyan. Lé sababnyan raja Asyur laju jikirém surat ubak Raja Hizkia raja Yehuda. 10 Lagée nyoe asoe surat nyan, "Bék keunong peungét lé janji Po teu Allah gata nyang gata peubangga nyan bahwa gata hana rhot lam jaroe ulôn. 11 Gata katadeungoe bahwa toh mantong nanggroe nyang jiprang lé Asyur, jipeuhanco sapan sapa. Bék tapike gata hana keunong! 12 Watée indatu lôn geupeuhanco banda Gozan, Haran, dan Rezef, dan geupoh maté ureuëng Eden nyang na tinggai di Telasar, hana meusaboh pi nibak dewa-dewa awaknyan nyang meuhase jipeuseulamat awaknyan. 13 Dipat kheueh raja-raja banda Hamat, Arpad, Sefarwaim, Hena, dan Iwa?" 14 Hizkia geuteurimong surat nyan nibak utosan, laju geubaca surat nyan. Óh lheuehnyan gobnyan geujak u Baét TUHAN, dan geuleueng laju surat nyan dikeue TUHAN, 15 lheueh nyan laju geumeudoá, "TUHAN, Po teu Allah Israel, nyang meuseumanyam di ateueh kerub, Droeneueh sidroe-droe Allah nyang meukuasa ateueh banmandum keurajeuen ateueh rhueng bumoe. Droeneueh kheueh nyang cebta langét ngon bumoe. 16 TUHAN, neungieng kheueh ateueh kamoe peue nyang teungoh kamoe rasa nyoe. Deungoe kheueh banmandum nyang jihina lé Sanherib keu Droeneueh, Po teu Allah nyang udeb! 17 Kamoe banmandum meuteupeue, ya TUHAN, bahwa raja-raja Asyur ka jai that-that jipeuhanco bansa-bansa dan jipeuhanco nanggroe awaknyan. 18 Dewa-dewa awaknyan jitot dan jipeuhanco, sabab dewa-dewanyan sagai-sagai hana meukuasa. Awaknyan na kheueh nyang teupeugét nibak kayée dan batée nyang jipeugét lé manusia. 19 Ya TUHAN, Allah kamoe, peuleueh kheueh kamoe nibak ureuëng-ureuëng Asyur nyan, mangat banmandum bansa ateueh rhueng donya nyoe jiteupeue bahwa Droeneueh kheueh Allah nyang Esa." 20 Óh lheuehnyan Nabi Yesaya geukirém peusan ubak Raja Hizkia na kheueh teujaweueb ateueh doá raja. 21 TUHAN meufeureuman, "Banda Yerusalem jipeukém dan jihina gata, Sanherib. 22 Na kah teupeue soe nyang gata teunak ngon gata hina nyan? Ulôn, Allah Israel, na kheueh Allah nyang suci! Sombong that-that sikeub gata ateueh Ulôn. 23 Gata takirém utosan keu gata meututoe nyang buhak bahwa deungon le jih geuritan prang gata bahwa gata ka tapeutaklhok gunong-gunong nyang manyang di Libanon. Gata tapeusombong droe bahwa gata katakôh bak-bak kayée ceumara jih nyang paleng manyang dan paleng ceudah meunan cit teubloih lam uteuen-uteuen nyang paleng le. 24 Meunan cit gata peubangga bahwa nyang kueh mon dan teujieb ié di nanggroe-nanggroe aséng, dan meunan cit takheun bahwa sipa-i gata jibloh-bloh lam Krueng Nil sampoe tho kreng. 25 Peu kheueh gohlom na gata deungoe bahwa hainyan ka Ulôn reuncana yoh awai ilée? Dan jinoe hainyan Ulôn peubuet. Ulôn kheueh nyang jok keu gata keu gata peuhanco banda-banda meukuta sampoe tinggai rungka. 26 Ureuëng-ureuëng nyang tinggai disinan hana meudaya; awaknyan teukeujot dan teumakot raya. Awaknyan lagée naleueng di blang atawa naleueng nyang timoh ateueh bubong rumoh, nyang tho meunyoe teuyueb lé angén timu nyang seu-uem. 27 Teuma ulôn kuteupeue peue-peue mantong keuhai droe gata. Ulôn kuteupeue peue nyang gata peubuet dan ho nyang gata jak. 28 Ulôn kuteupeue bahwa gata beungéh that-that keu Ulôn, dan Ulôn ka Lôn deungoe keuhai sombong gata nyan. Jinoe Ulôn lat ceunawiét bak idong gata meunan cit babah gata Ulôn beukab ngon keukang, mangat jeuet gata Lôn tarek dan Lôn peuwoe lom rot jalan watée gata teuka." 29 Nabi Yesaya geukirém teuma peusan nyang lagée nyoe ubak Hizkia, "Nyoe kheueh nyang jeuet keu tanda nibak gata. Thon nyoe ngon thon ukeue manusia jipajoh wase gandom nyang timoh keudroe. Teuma óh lheuehnyan awaknyan jeuet jipula gandom dan anggô dan jipajoh keudroe hase jih. 30 Ureuëng Yehuda nyang mantong udeb teuma makmu lagée seunaman nyang lhok that ukeue jih dan jimuboh teuma. 31 Di Yerusalem dan di ateueh Gunong Sion na ureuëng-ureuëng nyang seulamat, sabab TUHAN ka geupeuteuntée bahwa hainyan teutab na. 32 Nyan kheueh nyang geupeugah lé TUHAN keuhai raja Asyur: 'Jihnyan hana jiteumé tamong u Yerusalem atawa jipeuleuh aneuk panah jih ubak banda nyan. Sipa-i-sipa-i nyang leungkab deungon peurisai hana nyang hase jitamong lam banda nyan, dan bansikeulileng nyan hana teuma teupeugét sineulob mangat jeuet teukeupong. 33 Raja Asyur teuma jiwoe rot jalan nyang jijak watée jiteuka, dan hana jiteumé tamong lam banda nyan. Ulôn, TUHAN, ka Lôn peugah haba. 34 Banda Yerusalem teuma Lôn bila dan Lôn lindong deumi keuhoreumatan Lôn keudroe dan deumi janji Ulôn deungon hamba Lôn Nabi Daud.' " 35 Malam nyan cit teuma Malaikat TUHAN geujak ubak khimah-khimah ureuëng Asyur, dan laju geupoh maté na 185.000 droe tantra. Óh singoh nyan banbeungoh that deuh laju manyét-manyét awaknyan ka teutiek-tiek disinan. 36 Lé sababnyan teuma jisurot kheueh Sanherib raja Asyur dan jiwoe u Niniwe. 37 Bak siuroe, watée jihnyan teungoh jimeuiébadat lam kuil Dewa Nisrokh, gobnyan laju jipoh maté ngon peudeueng lé Adramelekh dan Sarezer, aneuëk-aneuëk agam gobnyan. Óh lheuehnyan awaknyan laju jiplueng u nanggroe Ararat. Teuma, Esarhadon, aneuëk agam gobnyan nyang laén, jeuet keuraja keugeunantoe gobnyan.

2 Raja-Raja 20

1 Lam watéenyan Raja Hizkia rhot bak sakét jitimoh cumuét, sakét geuhnyan bit-bit brat that rab meuninggai donya. Nabi Yesaya bin Amos geujak saweue gobnyan dan geupeugah, "TUHAN geupeusan mangat Teungku Po neupeuberéeh banmandum urosan droeneueh, sabab Teungku Po hana jitem puléh. Hana treb le Teungku Po meuninggai donya." 2 Hizkia geupaleng bak beuton dan laju geumeudoá, 3 "TUHAN, ingat kheueh bahwa ulôn nyoe ka meungabdi ubak Droeneueh deungon seutia dan jujoe até. Ulôn sabe lôn useuha lôn seutôt peue kheun Droeneueh." Lheuehnyan Hizkia laju geumo meuweueh-weueh that. 4 Nabi Yesaya laju geutinggai Hizkia, teuma sigohlom gobnyan geuteubiet nibak leuen meuligoe, TUHAN geuyue gobnyan 5 woe ubak Hizkia, raja umat TUHAN, dan geupeutrok peusan nyoe, "Ulôn, TUHAN, Po teu Allah nyang jiseumah lé Nabi Daud indatu gata, ka Lôn deungoe doá gata dan Lôn kalon ié mata gata. Ulôn kupeupuléh gata, lusa gata tajak ubak Baét Ulôn. 6 Ulôn teuma Lôn tamah umu gata 15 thon teuk. Gata dan banda Yerusalem Ulôn peubeubaih nibak raja Asyur. Bandanyoe Ulôn lindong deumi keuhoreumatan Lôn keudroe dan deumi janji Ulôn deungon hamba Lôn Nabi Daud." 7 Lheueh nyan lé Nabi Yesaya laju geuyue labo boh ara nibak cumuét Raja Hizkia mangat gobnyan puléh. 8 Raja Hizkia geutanyong, "Peu kheueh tanda jih bahwa TUHAN geupeupuléh ulôn dan lusa ulôn jak u Baét TUHAN?" 9 Geujaweueb lé Nabi Yesaya, "TUHAN teuma geujok tanda ubak Teungku Po bahwa Gobnyan geupeupeunoh janji. Jinoenyoe, nyang toh kheueh nyang Teungku Po lakée: bubayang nibak peutunyok jeuem mata uroe nyang jipeugét le raja Ahas maju 10 garéh atawa jisurot 10 garéh?" 10 Geupeugah lé Hizkia, "Keuteupeugét bubayang nyan maju 10 boh garéh, mudah mantong. Lé sababnyan peugét kheueh jihnyan jisurot 10 boh garéh." 11 Nabi Yesaya laju geumeudoá ubak TUHAN, laju TUHAN geupeugét bubayang nyan jisurot 10 boh garéh nibak peutunyok jeuem mata uroe nyan. 12 Lam watéenyan raja Babel, na kheueh Merodakh-Baladan bin Baladan, jideungoe bahwa Raja Hizkia banpuléh nibak sakét. Lé sabab nyan gobnyan laju geukirém ureuëng geuh keujijak ba surat dan hadiah keu Hizkia. 13 Hizkia geusambot awaknyan dan laju geupeuleumah ubak awaknyan atra keukayaan gobnyan, lagée méuh, pirak, reumpah-reumpah dan minyéuk mangat bée, meunan cit banmandum peuleungkapan tantra. Hana meusapeue pih nyang teusöm bahnyan nyang na lam meuligoe meunan cit nyang na bansigom keurajeuen gobnyan, banmandum nyan geupeuleumah. 14 Óh lheuehnyan Nabi Yesaya meuhadab ubak raja Hizkia laju geutanyong, "Dipat teuka awaknyan? Peue jikheun lé awaknyan?" Geujaweueb lé Hizkia, "Awaknyan teuka nibak nanggroe Babel, nanggroe nyang jiôh that" 15 "Peue nyang jikalon lé awaknyan lam meuligoe?" geutanyong lé Nabi Yesaya lom. "Sigala-gala jih!" jaweueb Hizkia. "Hana meusapeue pih nyang na lam kaih beundahara meuligoe nyang hana ulôn peuleumah ubak awaknyan." 16 Laju geupeugah lé Nabi Yesaya ubak raja, "TUHAN meufeureuman bahwa 17 teuka watée jih banmandum keukayaan nyang na lam meuligoe gata meunan cit banmandum nyang ka jipeusapat lé indatu gata sampoe uroenyoe, jiba u Babel. Hana nyang tinggai. 18 Nibak aneuëk cucoe gata na nyang jicok dan jipeujeuet keu peugawée meuligoe keu jipeutimang raja Babel." 19 Geujaweueb lé Raja Hizkia, "Gét that cit peusan TUHAN nyang droeneueh peutrok keu ulôn." Gobnyan geujaweueb lagée nyan sabab geupike: "Asal keurajeuen ulôn teutab aman dan damé simantong ulôn udeb." 20 Kisah nyang laén keuhai Raja Hizkia, keuhai jasa-jasa keupahlawan gobnyan, dan pakriban gobnyan geupeugét kulam dan talo ié keuteupeuteuka ié lam banda, banmandum nyan na teucetet lam kitab Seujarah Raja-raja Yehuda. 21 Raja Hizkia meuninggai donya, lheueh nyan Manasye aneuëk gobnyan teubaiát jeuet keuraja keugeunantoe gobnyan.

2 Raja-Raja 21

1 Manasye na umu 12 thon watée gobnyan teubaiát jeuet keu raja Yehuda, dan gobnyan geumat keurajeuen di Yerusalem 55 thon treb jih. Ma gobnyan nan geuh Hefzibah. 2 Manasye ka meudesya ubak TUHAN, sabab geuseutôt buet-buet nyang jeuhet nyang jipeubuet lé bansa-bansa nyang geu-use lé TUHAN nibak nanggroe Kanaan watée ureuëng Israel jitamong lam nanggroe nyan. 3 Teumpat-teumpat gob seumah dewa nyang ka geupeuhanco lé Hizkia yah gobnyan geupeudong lom teuma. Gobnyan geupeudong miseubah-miseubah keu teumpat iébadat Baal, dan teupeugét patong Dewi Asyera, lagée nyang ka geupeubuet lé Ahab raja Israel, meunan cit Manasye geuseumah bintang-bintang. 4 TUHAN ka lheueh meufeureuman bahwa Yerusalem na kheueh teumpat Gobnyan teuka dan teumpat iébadat ubak Gobnyan, teuma disideh, di Baét TUHAN, Manasye ka geupeudong miseubah-miseubah keu dewa-dewa. 5 Nibak bandua boh leuen miseubah nyan geupeudong teuma miseubah-miseubah keu teumpat seumah ubak bintang-bintang. 6 Aneuëk gobnyan geupeuseumah teuma sibagoe keureubeuen nyang teutot. Manasye geupeubuet cit praktek-praktek meudukun, nujum tukang keumalon, iéleumé gaéb, dan geulakée peutunyok ubak areuwah-areuwah. Gobnyan bit-bit meudesya that ubak TUHAN lé sababnyan TUHAN beungéh that-that ateueh geuh nyan. 7 Lambang Dewi Asyera geukeubah teuma didalam Baét TUHAN, padahai keuhai teumpat nyan TUHAN ka geupeugah ubak Nabi Daud dan Nabi Sulaiman aneuëk gobnyan, "Baét Ulôn dan banda Yerusalem nyoe, nyang ka Ulôn piléh nibak ban dua blaih boh wilayah sukée Israel, na kheueh teumpat nyang ka Lôn peuteuntée sibagoe teumpat iébadat ubak Ulôn. 8 Dan meunyoe umat Israel jitaát banmandum ubak peurintah Ulôn dan jiseutôt banmandum huköm-huköm nyang ka jibri lé Nabi Musa hamba Ulôn keu awaknyan, teuma Ulôn hana Lôn peubiyeu awaknyan ji-use nibak nanggroe nyang ka Ulôn jok ubak indatu awaknyan." 9 Teuma ureuëng Yehuda hana taát ubak TUHAN, dan Manasye ka jeuet keusabab awaknyan jipeubuet desya nyang leubeh jeuhet nibak desya-desya nyang ka jipeubuet lé bansa-bansa nyang geu-use lé TUHAN nibak Kanaan watée umat Israel jitamong lam nanggroe nyan. 10 Lé sababnyan, meulalu nabi-nabi, hamba-hamba TUHAN, TUHAN meufeureuman, 11 "Raja Manasye jeuhet lumpah na. Buet jihnyan jiôh leubeh jeuhet nibak buet ureuëng Kanaan. Deungon beurala-beurala nyang jipeugét nyan, ka jeuet keusabab ureuëng Yehuda jipeubuet desya. 12 Lé sababnyan, Ulôn, TUHAN Po teu Allah nyang jiseumah lé umat Israel, Ulôn peuteuka bala nyang paleng rayeuk ateueh Yerusalem dan Yehuda dan soe-soe mantong ureuëng nyang jideungoe keuhai nyan teukeujot raya. 13 Yerusalem teuma Lôn huköm lagée Lôn huköm Samaria dan Ahab raja Israel dan banmandum keuturonan jihnyan. Yerusalem Ulôn sampôh gleh lagée pireng nyang teurhah dan teubalek. 14 Ureuëng nyang mantong tinggai disinan Ulôn peujeuet keu peunajoh keu musoh-musoh jih, nyang cok banmandum atra awaknyan dan jisampôh mandum bubena lam nanggroe awaknyan. 15 Banmandum nyan teuma Ulôn peubuet ateueh umat Lôn sabab awaknyan meudesya ubak Ulôn dan jipeubeudôh beungéh Ulôn yoh phon indatu awaknyan jiteubiet lam nanggroe Meusé trok ubak uroenyoe." 16 Seulaén jipeujeuet ureuëng Yehuda meudesya ubak TUHAN deungon cara jiseumah beurala, Manasye pi ka jipoh maté jai that-that ureuëng nyang hana meusalah lé sababnyan darah kamirah ji-ile dipat mantong di Yerusalem. 17 Kisah nyang laén keuhai Raja Manasye, dan desya-desya nyang geupeubuet nyan, ka teucetet lam kitab Seujarah Raja-raja Yehuda. 18 Manasye meuninggai donya dan teupeukubu laju nibak lampôh jrat meuligoe, na kheueh taman Uza. Amon aneuëk agam gobnyan teubaiát jeuet keu raja keugeunantoe gobnyan. 19 Amon na umu 22 thon watée gobnyan teubaiát jeuet keu raja Yehuda dan gobnyan geumat peurintah dua thon treb jih. Ma gobnyan nan geuh Mesulemet binti Harus, ureuëng Yotba. 20 Saban lagée ureuëng syiek geuh, gobnyan pi meudesya ubak TUHAN. 21 Gobnyan geuseutôt peue-peue nyang geupeubuet lé ureuëng syiek geuh, dan geuseumah beurala-beurala nyang geuseumah lé ureuëng syiek geuh. 22 Gobnyan hana udeb meunurot nyang geulakée lé TUHAN, dan nyang paloe gobnyan geutinggai TUHAN, Po teu Allah nyang jiseumah lé indatu geuh. 23 Peugawée-peugawée Raja Amon ka sipakat keuneuk poh maté gobnyan nibak meuligoe. 24 Teuma lé rakyat Yehuda jipoh maté ureuëng-ureuëng poh maté Raja Amon nyan, laju jibaiát Yosia aneuëk gobnyan jeuet keu raja. 25 Kisah laén keuhai Raja Amon na teucetet lam kitab Seujarah Raja-raja Yehuda. 26 Amon teupeukubu nibak lampôh jrat di taman Uza. Yosia aneuëk gobnyan teubaiát jeuet keu raja keugeunantoe gobnyan.

2 Raja-Raja 22

1 Yosia meu-umu lapan thon watée gobnyan teubaiát jeuet keu raja Yehuda, dan gobnyan geumat peurintah di Yerusalem 31 thon treb jih. Ma gobnyan nan geuh Yedida binti Adaya, asai Bozkat. 2 Yosia geupeubuet buet nyang keubiet galak até TUHAN. Gobnyan geuseutôt Raja Nabi Daud indatu gobnyan, dan geutaát banmandum huköm Po teu Allah deungon sipeunoh até. 3 Raja Yosia na sidroe seukeutaréh neugahra nyang nan jih Safan bin Azalya, cucoe Mesulam. Nibak thon nyang keulapan blaih keurajeuen Raja Yosia, lé raja laju geupeutreun titah ubak seukeutaréh geuh lagéenyoe su jih, "Gata jak kheueh laju ubak Teungku Imeum Agong Hilkia nibak Baét TUHAN, dan gata lakée kheueh ubak gobnyan mangat jibri laporan keuhai jeumeulah péng nyang ka geupeusapat lé imeum nyang meutugaih nibak babah pintoe tamong Baét TUHAN. 5 Yue gobnyan mangat geujok péng nyan ubak mando nyang kawai buet nibak Baét TUHAN. Awaknyan harôh geupeuguna péng nyan keungon bayeue upah 6 bubena utoh kayée, utoh bangunan, dan utoh batée sira teubloe kayée ngon batée nyang peureulée. 7 Mando-mando nyang kawai buet nyan jujoe-jujoe that, lé sababnyan hana peureulée teulakée laporan tanggong jaweueb teupeuguna péng nibak awaknyan." 8 Safan laju geujak peusampoe peurintah raja nyan ubak Hilkia, lé Hilkia laju geupeugah ubak Safan bahwa gobnyan ka meuteumé kitab huköm-huköm TUHAN nibak Baét TUHAN. Hilkia geujok laju kitab nyan ubak Safan, lé Safan laju geubeuet kitab nyan. 9 Óh lheueh nyan Safan geugisa lom ubak raja sira geupeugah bahwa péng nyang teukeubah nibak Baét TUHAN ka teucok dan ka jijok lé hamba raja ubak mandum peungawai nyang meutugaih nibak Baét TUHAN. 10 Óh lheuehnyan Safan geupeugah, "Hilkia geujok kitab nyoe ubak ulôn." Dan lé Safan laju geubeuet kitab nyan dikeue raja. 11 Meunan geudeungoe asoe kitab nyan, lé raja laju geupriek-priek peukayan gobnyan sabab seudeh that. 12 Dan raja laju geujok peurintah nyoe ubak Imeum Hilkia, Ahikam bin Safan, Akhbor bin Mikha, Safan seukeutaréh neugahra, dan Asaya ajudan raja: 13 "Jak kheueh tanyong ubak TUHAN keu ulôn dan keu banmandum rakyat Yehuda keuhai asoe kitab nyoe. TUHAN beungéh keu geutanyoe sabab indatu tanyoe hana geupeubuet peurintah-peurintah peue-peue nyang na teutuléh lam kitab nyoe." 14 Dan geujak kheueh Hilkia, Ahikam, Akhbor, Safan dan Asaya geujak lakée peutunyok ubak sidroe inong nyang nan geuh Hulda. Gobnyan sidroe nabiah nyang tinggai nibak saboh gampông barô di Yerusalem. Lakoe gobnyan nan geuh Salum bin Tikwa, cucoe Harhas; gobnyan tukang peusaneut peukayan iébadat di Baét TUHAN. Óh ka lheueh Hulda geudeungoe peue nyang jipeugah lé awaknyan, 15 lé gobnyan laju geuyue awaknyan mangat jigisa ubak po raja dan geupeusampoe peue nyang geupeugah lé TUHAN nyan: 16 "Ulôn teuma Lôn huköm Yerusalem dan banmandum peunduduek lagée nyang teutuléh lam kitab lagée nyang ka geubeuet lé raja. 17 Awaknyan ka jitinggai Ulôn dan jipeuseumah keureubeuen keu ilah-ilah nyang laén. Banmandum nyang awaknyan peubuet ka jipeubeudôh meureuka Ulôn. Ulôn beungéh keu Yerusalem, dan beungéh Ulôn nyan hana hase jipeuseungab. 18 Teuma keuhai Raja Yosia, nyoe kheueh peusan Lôn, TUHAN Allah Israel, 'Óh ka lheueh gata deungoe peue nyang teutuléh lam kitab nyan, 19 gata meunyeusai dan tapeumiyueb droe dikeue Ulôn. Ulôn ka Lôn ancam keu Lôn huköm Yerusalem dan peunduduek jih. Ulôn peujeuet banda nyan saboh peumandangan nyang keubit that teumakot, dan nan Yerusalem teuma Lôn peujeuet keu nan kutokan. Teuma watée gata deungoe keuhai ancaman lôn nyan gata tamoe dan gata priek peukayan gata sibagoe tanda gata seudeh. Ulôn ka Lôn deungoe doá gata, 20 lé sababnyan huköman ateueh Yerusalem hana Ulôn peurhot simantong gata na udeb. Gata teuma meuninggai deungon damé.' " Lheueh nyan geuwoe kheueh utosan-utosan nyan ubak Po raja dan laju geupeusampoe peusan nyan.

2 Raja-Raja 23

1 Raja Yosia geuhôi mandum peumimpén Yehuda dan Yerusalem. 2 Laju gobnyan geujak ngon awaknyan u Baét TUHAN, jiseutôt lé teungku-teungku imeum, lé nabi-nabi dan banmandum rakyat, bah nyang gasien meunan cit nyang kaya. Dikeue awaknyan mandum, bak binéh pilar nyang khusos keu raja, lheueh nyan raja laju geudong dan geubaca banmandum asoe kitab peujanjian nyang ka meuteumé nibak Baét TUHAN, lheueh nyan raja laju geupeugét peujanjian deungon TUHAN keu taát ubak Gobnyan, dan teupeubuet deungon sipeunoh até dan sigeunan jiwa banmandum peurintah dan huköm-huköm Gobnyan. Raja pi geumeujanji keu geupeupeunoh banmandum syarat-syarat peujanjian TUHAN ngon umat Gobnyan nyang na teutuléh lam kitab nyan. Banmandum rakyat meusajan-sajan jimeujanji keu jitaát ubak peujanjian nyan. 4 Óh lheueh nyan raja laju geubri peurintah ubak Teungku Imeum Agong Hilkia, keu teungku-teungku imeum peubantu dan keu peungawai-peungawai nyang meutugaih nibak babah pintoe Baét TUHAN, mangat teupeuteubit lam Baét TUHAN nyan mandum peukakah nyang teupeuguna keuteuseumah Baal, Dewi Asyera, dan bintang-bintang. Banmandum atranyan geutot lé Raja Yosia diluwa banda nyang tô ngon Pantôn Kidron, laju abée jih jiba u Betel. 5 Gobnyan geupeucat teungku-teungku imeum nyang ka jibaiát lé raja-raja Yehuda keu jimeutugaih nibak teumpat teuseumah dewa nyang na lam banda-banda Yehuda dan nyang na bansikeulileng Yerusalem; meunan cit keu teungku-teungku imeum nyang meutugaih jipeuseumah keureubeuen keu Baal, mata uroe, buleuen, planet dan bintang-bintang. 6 Patong Dewi Asyera laju teupeuteubiet lam Baét TUHAN, dan teuba laju u luwa banda nibak Pantôn Kidron. Disinan patong nyan laju teutot, adang jih teutôb sampoe halôh, dan abée jih laju teusipreuk ateueh jrat-jrat ureuëng maté. 7 Bilek-bilek nyang na lam Baét TUHAN nyang jipeuguna lé lunte-lunte kuil keujipeubuet lunte sibagoe peuseumahan keu dewa, nyan pih geupeuhanco. (Lam bilek nyan ureuëng-ureuëng inong jicumucôb ija keujingui watée jiseumah Dewi Asyera.) 8 Banmandum imeum nyang na tinggai lam banda-banda Yehuda geuyue lé Yosia mangat jijak u Yerusalem, dan meunan cit dipat mantong bansaboh Yehuda geupeukuto laju miseubah-miseubah dewa nibak teumpat imeum-imeum nyan ka jipeuseumah keureubeuen. Teungku-teungku imeum nyan hana jipeu idhin jipeuna iébadat di Baét TUHAN. Teuma awaknyan jeuet jipajoh ruti nyang hana meuragoe nyang teukeubah keu rakan-rakan awaknyan. Miseubah-miseubah nyang teupeukhusos keuteumpat peubuet seumah ubak dewa-dewa nyang tô ngon Geureubang Yosua, walibanda nanggroe nyan, laju teureuloih. Geureubang nyan na jih nibak blaih wie Geureubang Phon nibak rot tamong u banda. 10 Tofet, na kheueh teumpat teuseumah dewa di Pantôn Hinom, nyan pi teupeukuto. Deungon nyan hana le nyang hase jipeuseumah aneuëk-aneuëk jih sibagoe keureubeuen nyang teutot keu Dewa Molokh. 11 Banmandum guda nyang jipeukhusos lé raja-raja Yehuda keungon seumah ubak dewa mata uroe, nyan pi geuböih, dan geuritan-geuritan nyang teupeuguna watée teuseumah nyan laju geutot. (Geuritan-geuritan nyan na dileuen Baét TUHAN -- tô ngon babah pintoe geureubang -- hana jiôh nibak bilek-bilek teumpat tinggai Natan Melekh, sidroe ureuëng peugawée manyang.) 12 Miseubah-miseubah nyang jipeudong lé raja-raja Yehuda ateueh bubong nibak bilek-bilek Raja Ahas, nyan pi geupeuhanco. Meunan cit deungon miseubah-miseubah nyang jipeudong lé Raja Manasye nibak bandua boh leuen Baét TUHAN, geupeuhanco rata ngon tanoh lé Raja Yosia, atranyan laju geuböih u Pantôn Kidron. 13 Meunan cit deungon miseubah-miseubah nyang na nibak bagian timu Yerusalem, blaih u seulatan Bukét Keujeuhetan ka geupeunajih. Miseubah-miseubah nyan geupeudong lé Raja Nabi Sulaiman keu ngon seumah dewa-dewa nyang paleng luwat -- na kheueh Asytoret dewi bansa Sidon, Kamos dewa bansa Moab, dan Milkom dewa bansa Amon. 14 Tugu-tugu dewa dan patong Dewi Asyera laju geureuloih, dan tanoh teumpat tugu-tugu ngon patong-patong nyan teudong, laju geuseubée lé Yosia ngon tuleueng-tuleueng manusia. 15 Meunan cit gobnyan geupeurusak teumpat seumeumah di Betel nyang geupeudong lé Raja Yerobeam bin Nebat -- raja nyang ka jeuet keusabab ureuëng Israel jipeubuet desya. Lé Yosia laju geupeubeukah miseubah nibak teumpat seumah dewa nyan, dan laju geutot meusigoe ngon patong Dewi Asyera nyang na inan. 16 Óh lheuehnyan Yosia geupaleng, dan deuh laju geukalon na padum boh jrat di ateueh gunong. Lé gobnyan laju geuyue gob mangat jikueh kubu nyan, dan geupeuteubiet tuleueng-tuleueng nyang na disinan dan laju geutot nibak miseubah nyang teungoh tutong nyan. Meunan kheueh cara jih gobnyan geupeukuto miseubah nyan. Deungon nyan jeuet kheueh peue nyang ka geuramai lé nabi TUHAN yoh watée ilée, bak watée Raja Yerobeam geudong bak binéh miseubah nyan watée na saboh peurayaan. Óh lheueh nyan lé Raja Yosia geukalon lom na saboh teuk kubu nyang laén. 17 Laju gobnyan geutanyong, "Jrat soe nyoe?" Ureuëng-ureuëng Betel jijaweueb, "Nyan jrat sidroe nabi TUHAN nyang peureunah teuka keunoe nibak Yehuda, dan gobnyan geuramai hai-hai nyang ban mantong Teungku Amphon peubuet ateueh miseubah nyoe." 18 "Bék gata peukaru jrat nyan," peurintah raja. "Bah kheueh tuleueng-tuleueng gobnyan teutab na disinan, bék gata pinah!" Lé sabab nyan teuma tuleueng-tuleueng nabi nibak Yehuda nyan hana geupeukaru; meunan cit deungon tuleueng-tuleueng nabi nyang nibak Samaria nyang na teupeukubu disinan. 19 Nibak tieb-tieb banda di Israel, Raja Yosia geupeuhanco mandum teumpat-teumpat gobnyan seumah dewa nyang jipeudong lé raja-raja Israel, dan nyang ka jeuet keusabab TUHAN teuka meureuka. Peue nyang ka geupeubuet lé Raja Yosia di Betel, geupeubuet cit lagée nyan bagoe keu miseubah-miseubah laén nyang na bansaboh nanggroe Israel. 20 Banmandum teungku imeum nyang meutugaih nibak teumpat-teumpat gob seumah dewa geupoh maté ateueh miseubah teumpat teungku-teungku imeum nyan meutugaih. Dan nibak tieb-tieb miseubah nyan Yosia laju geutot bubena tuleueng-tuleueng manusia. Lheuehnyan barô kheueh geuwoe u Yerusalem. 21 Óh lheueh nyan Raja Yosia geupeurintah ubak rakyat mangat jipeuna uroe raya Paskah lagée nyang na teutuléh lam kitab Peujanjian deungon TUHAN, deungon lagéenyan awaknyan jihoreumat TUHAN, Po teu Allah awaknyan keudroe. 22 Yoh phon that bansa Israel jipeurintah lé pahlawan-pahlawan gohlom na raja Israel atawa raja Yehuda nyang jipeuraya uroe raya Paskah lagéenyan bagoe. 23 Teuma nibak thon nyang keulapan blaih keurajeuen Yosia nyan barô Paskah geupeuna lom di Yerusalem keu teuhoreumat TUHAN. 24 Keuteupeubuet huköm-huköm nyang teutuléh lam kitab nyang geuteumé lé Imeum Agong Hilkia nibak Baét TUHAN, banmandum tukang hôi areuwah dan tukang ramai geu-use lé Raja Yosia nyang na di Yerusalem dan nyang na bansaboh Yehuda, dan laju geuböih mandum dewa rumoh tangga, beurala, dan barang-barang nyang jipeuguna keuseumah ubak dewa-dewa. 25 Gohlom na raja lagée Raja Yosia nyang meungabdi ubak TUHAN deungon sipeunoh até geuh, dan hainyan geupeuleumah lam cara udeb dan buet-buet gobnyan, paih lagée banmandum huköm nyang na lam Kitab Nabi Musa. Óh ka lheueh Raja Yosia, hana le raja nyang lagée gobnyan. 26 Teuma buet Raja Manasye ka teupeubeudôh meureuka TUHAN ateueh Yehuda, dan beungéh Geuhnyan gohlom lon. 27 TUHAN meufeureuman, "Peue nyang ka Ulôn peubuet ateueh Israel, teuma Lôn peubuet cit ateueh Yehuda. Ureuëng Yehuda teuma Ulôn böih nibak nanggroe nyang ka Ulôn jok keu awaknyan. Ulôn teuma Lôn tulak Yerusalem, banda nyang Ulôn piléh, meunan cit Baét Ulôn nyoe, nyang meunurot kheun Ulôn jeuet keu teumpat iébadat ubak Ulôn." 28 Raja Yosia meuninggai watée geumuprang di Megido, gobnyan geujak prang Nekho, raja Meusé, nyang teungoh jimaju ngon pasokan jih keuneuk jijak tulông raja Asyur nibak binéh Krueng Efrat. Manyét Raja Yosia jicok lé tukang peungawai gobnyan laju jipeuwoe ngon geuritan u Yerusalem. Disinan gobnyan laju jipeukubu nibak lampôh jrat raja-raja. Lé rakyat Yehuda laju jipiléh dan jibaiát Yoahas aneuëk agam gobnyan jeuet keuraja keugeunantoe gobnyan. Kisah nyang laén keuhai Raja Yosia na teucetet lam kitab Seujarah Raja-raja Yehuda. 31 Yoahas na umu 23 thon watée gobnyan teubaiát jeuet keuraja Yehuda, dan gobnyan geumat keurajeuen di Yerusalem lhée buleuen treb jih. Ma gobnyan nan geuh Hamutal bin Yeremia asai nibak banda Libna. 32 Yoahas meudesya ubak TUHAN lagée indatu gobnyan. 33 Keurajeuen Yoahas tamat watée Nekho raja nanggroe Meusé jilawan gobnyan di Ribla, nibak daerah Hamat, dan jipaksa Yehuda mangat jibayeue upeti keu gobnyan nyang le jih 3.400 kilogram pirak dan 34 kilogram méuh. 34 Óh lheuehnyan Raja Nekho geubaiát aneuëk agam Yosia nyang nan jih Elyakim jeuet keuraja Yehuda, dan geu-ubah nan Elyakim jeuet keu Yoyakim. Yoahas jiwa u Meusé dan gobnyan meuninggai donya disinan. 35 Keu teubayeue upeti nyang jilakée lé raja Meusé, Raja Yoyakim geukuteb cukée nibak rakyat meunurot nyang ék jibayeue lé maséng-maséng ureuëng. 36 Yoyakim na umu 25 thon watée gobnyan jeuet keuraja Yehuda, dan gobnyan geumat keurajeuen di Yerusalem 11 thon treb jih. Ma gobnyan nan geuh Zebuda binti Pedaya asai nibak banda Ruma. 37 Yoyakim meudesya ubak TUHAN saban lagée indatu gobnyan.

2 Raja-Raja 24

1 Watée keurajeuen Raja Yoyakim, Nebukadnezar raja Babel jiprang dan jipeutaklok Yehuda. Na lhée thon treb jih Yoyakim tundok ubak Nebukadnezar, teuma óh lheueh nyan gobnyan beurontak. 2 TUHAN laju geukirém geurombolan ureuëng-ureuëng meuseunjata nibak bansa Babel, Siria, Moab dan Amon keuteujak lawan Yoyakim dan teupeubinasa Yehuda, paih lagée peue nyang ka teupeugah meulalu nabi-nabi, hamba-hamba Gobnyan. 3 Keubiet hainyan teuma teujadi, sabab TUHAN ka geupeugah bahwa Yehuda teuböih nibak nanggroe nyang geubri lé TUHAN keu awaknyan. Awaknyan teuböih sabab banmandum desya nyang ka jipeubuet lé Raja Manasye; 4 nyang phon-phon that sabab gobnyan jipoh maté ateueh ureuëng-ureuëng nyang hana meusalah. TUHAN hana geutem peuamphon Manasye sabab buet-buet geuhnyan. 5 Bansaboh daerah, phon nibak Krueng Efrat sampoe trok ubak bataih nanggroe Meusé di siblaih utara nyang jitamong lam wilayah keurajeuen raja Meusé, jikuasa lé raja Babel. Lé sababnyan raja Meusé hántom lé geuteubiet nibak nanggroe geuh keugeujak muprang. Kisah nyang laén keuhai Raja Yoyakim na teucetet lam kitab Seujarah Raja-raja Yehuda. Óh ka lheueh Yoyakim meuninggai donya, aneuëk agam gobnyan nyang nan geuh Yoyakhin teubaiát jeuet keuraja keugeunantoe gobnyan. 8 Yoyakhin na umu 18 thon watée gobnyan teubaiát jeuet keuraja Yehuda, dan gobnyan geumat peurintah di Yerusalem lhée buleuen treb jih. Ma gobnyan nan geuh Nehusta binti Elnatan, asai Yerusalem. 9 Saban lagée ureuëng syiek gobnyan, Yoyakhin pi meudesya ubak TUHAN. 10 Nibak watée keurajeuen Yoyakhin, pasokan Babel nyang jipimpén lé peuwira-peuwira Nebukadnezar, jimaju jijak prang Yerusalem, dan laju jikeupong banda nyan. 11 Teungoh banda nyan teukeupong, Nebukadnezar keudroe geujak u Yerusalem, 12 dan lé Raja Yoyakhin meusajan ngon ma gobnyan, aneuëk-aneuëk gobnyan, peuwira-peuwira gobnyan meunan cit deungon peugawée-peugawée meuligoe meunyeurah ubak Nebukadnezar. Lheueh nyan Yoyakhin geutawan. Hai nyan teujadi nibak thon nyang keulapan keurajeuen Nebukadnezar. 13 Banmandum peukakaih méuh nyang geupeugét lé Raja Nabi Sulaiman keu Baét TUHAN, jipeurusak lé Nebukadnezar. Dan mandum barang-barang nyang meuyuem lam Baét nyan dan nyang na lam meuligoe jiba laju u Babel. Hainyan na paih lagée nyang ka geupeugah lé TUHAN sigohlom nyan. 14 Raja Yoyakhin, ma gobnyan, peurumoh-peurumoh gobnyan, peugawée-peugawée gobnyan, dan peumimpén-peumimpén Yehuda -- banmandum na 7.000 droe ureuëng nyang paleng meusyeuhu -- jiteun dan jiba u Babel. Meunan cit ureuëng-ureuëng nyang malem-malem bak buet dan teumpeun beuso na 1.000 droe, banmandum ureuëng-ureuëng teuga dan beuhe-beuhe keu jijak muprang. Ureuëng-ureuëng keuturonan raja, dan ureuëng-ureuëng meusyeuhu pih jiba cit teuma ubak teumpat böih -- mandum nyan na 10.000 droe. Rab banmandum ureuëng nyang na di Yerusalem jiba sajan; nyang tinggai na kheueh rakyat nyang paleng gasien. 17 Óh lheuehnyan Nebukadnezar geubaiát Matanya, apha Yoyakhin, jeuet keu raja Yehuda, dan geugantoe nan geuh jeuet keu Zedekia. 18 Zedekia na umu 21 thon watée gobnyan teubaiát jeuet keu raja Yehuda. Gobnyan geumat keurajeuen di Yerusalem 11 thon treb jih. Ma gobnyan nan geuh Hamutal, binti Yeremia asai nibak banda Libna. 19 Saban lagée Raja Yoyakim, Raja Zedekia meudesya cit ubak TUHAN. 20 TUHAN meureuka that keu peunduduek Yerusalem dan keu ureuëng-ureuëng Yehuda lé sababnyan gobnyan hana geupakoe le keu awaknyan.

2 Raja-Raja 25

1 Óh lheuehnyan Zedekia beurontak ateueh Nebukadnezar raja Babel. Lé sababnyan Nebukadnezar deungon banmandum angkatan prang gobnyan teuka dan geujak prang Yerusalem bak tanggai siploh buleuen siploh nibak thon nyang keusikureueng keurajeuen Zedekia. Awaknyan jipeudong kuta diluwa banda, dan geupeudong beuton keuteukeupong, 2 dan hana piôh-piôh jikeupong banda nyan trok ubak thon nyang keu siblaih keurajeuen Zedekia. 3 Nibak tanggai sikureueng buleuen peuet thon nyan cit teuma watée bala musém deuk ka mupalo that sampoe rakyat ka hana le peunajoh meubacut pi, 4 kuta banda laju jidobrak lé musoh. Malam nyan, bahpi ureuëng Babel teungoh jikeupong banda nyan, banmandum sipa-i Yehuda laju jipeuplueng droe jikarat ubak Pantôn Yordan. Awaknyan jicok rot ueh meulalu taman meuligoe, laju jiteubiet rot babah pintoe geureubang nyang jipeuhubong nibak bandua boh beuton nibak teumpat nyan. 5 Teuma tantra Babel laju jipeucrok Raja Zedekia, dan laju jidrob nibak darat Yerikho. Banmandum aneuëk buah gobnyan ka habéh jiplueng jitinggai gobnyan. 6 Óh lheuehnyan Raja Zedekia jiba ubak Raja Nebukadnezar nibak banda Ribla, óh trok keunan laju geupeurhot huköman. 7 Aneuëk-aneuëk gobnyan jipoh maté dikeue mata gobnyan keudroe. Óh lheuehnyan Zedekia jicungke mata geuh, lheueh nyan laju jigari dan jiba u Babel. 8 Bak tanggai tujoh buleuen limong nibak thon nyang keu sikureueng blaih keurajeuen Nebukadnezar raja Babel, teuka kheueh u Yerusalem sidroe ureuëng nyang nan jih Nebuzaradan. Gobnyan na kheueh peunaseuhat dan panglima prang Nebukadnezar. 9 Nebuzaradan laju jitot Baét TUHAN, meuligoe raja, dan rumoh-rumoh banmandum ureuëng meusyeuhu nyang na di Yerusalem. 10 Dan banmandum aneuëk buah jih jireuloh ngon jipeuhanco beuton-beuton banda nyan. 11 Óh lheuehnyan rakyat nyang na mantong na lam banda, na kheueh ureuëng-ureuëng meubuet nyang malem nyang mantong na tinggai, ureuëng-ureuëng gasien dan ureuëng-ureuëng nyang ka jiplueng u blaih Babel, banmandum nyan jiba u Babel lé Nebuzaradan. 12 Teuma siladum rakyat nyang paleng gasien dan nyang hana sapeuena jitinggai di Yehuda dan jiyue meubuet bak lampôh-lampôh anggô dan blang-blang. 13 Taméh-taméh peurunggu dan geuritan-geuritan nyang na nibak Baét TUHAN meusajan-sajan deungon guci peurunggu laju jipeubeukah lé ureuëng Babel, dan banmandum peurunggu nyan jiangkot u nanggroe awaknyan. 14 Awaknyan pih jiangkot barang-barang nyang teupeugah nyoe: sekob-sekob, teumpat abée miseubah, peukakaih-peukakaih panyöt, cambông-cambông keu teumpat boh darah beulatang nyang teusie sibagoe keureubeuen, cambông-cambông keu ngon tot keumeunyan, dan banmandum barang peurunggu nyang laén nyang jipeuguna keu ngon upacara iébadat. 15 Barang-barang méuh dan pirak, jitamong cit keunan cambông-cambông ubit dan cipe-cipe keu ngeue apui nyan jicok lé Nebuzaradan keudroe. 16 Barang-barang peurunggu nyang ka geupeugét lé Raja Nabi Sulaiman keu Baét TUHAN, na kheueh bandua boh taméh, geuritan-geuritan dan guci rayeuk, banmandum nyan keubit that geuhon akhéjih hana hase teutimang. 17 Bandua boh taméh peurunggu nyan saban; maséng-maséng manyang jih 8 metée deungon saboh ulée taméh nibak peurunggu nyang manyang jih 1,3 metée. Bansilingka tieb-tieb ulée taméh nyan na meunanyuem deungon teuhiah boh geulima nibak peurunggu. 18 Seulaén nibaknyan, Nebuzaradan jidrob teuma Teungku Imeum Agong Seraya, meunan cit deungon Sefanya, teungku imeum sida, lhée droe nyang keumiet babah pintoe Baét TUHAN, banlimong droe peunaseuhat pribadi raja nyang mantong na tinggai lam banda, panglima, waki panglima tukang uroih administrasi tantra, dan 60 droe ureuëng rayeuk nyang laén. 20 Banmandum ureuëng nyan jiba ubak Raja Nebukadnezar di banda Ribla, 21 nibak wilayah Hamat. Disinan awaknyan jiseksa dan laju jipoh maté. Meunan kheueh ureuëng-ureuëng Yehuda jiangkot nibak nanggroe awaknyan keudroe dan jijak tiek ubak teumpat nyang teuböih. 22 Óh lheuehnyan Raja Nebukadnezar laju jibaiát Gedalya bin Ahikam dan cucoe nibak Safan, jeuet keu gubunur di Yehuda keu jipeurintah ateueh banmandum ureuëng nyang mantong tinggai disinan. 23 Watée peuwira dan tantra Yehuda nyang hana meunyeurah ubak Babel jideungoe keuhai teubaiát gubunur nyan, awaknyan banmandum jijak ubak Gedalya di Mizpa. Peuwira-peuwira nyan na kheueh Ismail bin Netanya, Yohanan bin Kareah, Seraya bin Tanhumet asai nibak banda Netofa, dan Yazanya asai nibak banda Maakha. 24 Geupeugah kheueh lé Gedalya ubak awaknyan banmandum, "Gata hana peureulée teumakot keu peujabat-peujabat Babel. Tinggai kheueh mantong di nanggroe tanyoe nyoe dan beujeuet kheueh keu hamba raja Babel. Ulôn tanggong gata teuma seulamat." 25 Teuma nibak buleuen tujoh thon nyan Ismail bin Netanya dan cucoe Elisama nyang mantong keuturonan raja, laju jijak meusajan ngon na 10 droe ureuëng u Mizpa. Awaknyan jiprang dan jipoh maté Gedalya meusajan ngon ureuëng Yehuda dan ureuëng Babel nyang na meusajan Gedalya nibak teumpat nyan. 26 Lé sababnyan, banmandum rakyat Yehuda, kaya meunan cit nyang gasien, meusajan-sajan deungon peuwira jiplueng u nanggroe Meusé sabab teumakot keu ureuëng Babel. 27 Nibak tanggai dua ploh tujoh buleuen dua blaih lam thon nyang keu lhée ploh tujoh óh ka lheueh Yoyakhin jiangkot u teumpat nyang teuböih, Ewil-Merodakh jeuet keu raja Babel. Nibak thon nyan cit teuma gobnyan geupeuleumah gaséh sayang ubak Yoyakhin, laju geupeubeubaih geuh nyan nibak rumoh glab, 28 dan geupeusaneut gobnyan deungon gét teuma. Yoyakhin geubri teumpat duek nyang leubeh manyang nibak raja-raja laén nyang meusajan teuböih u Babel. 29 Yoyakhin hana geusok peukayan rumoh glab dan ka lazem geumakheun lam meuligoe dan jibri péng keu udeb gobnyan siuroe-uroe.

1 Tawarikh 1

1 Sarakata indatu bansa Israel nibak Nabi Adam sampoe ubak Nabi Nuh nyang meuturot-turot na kheueh lagéenyoe:: Nabi Adam Set Enos Kenan Mahalaleel Yared Henokh Metusalah Lamekh Nabi Nuh Aneuëk agam Nabi Nuh na lhée droe: Sem, Ham dan Yafet. 5 Aneuëk-aneuëk agam Yafet na kheueh: Gomer, Magog, Madai, Yawan, Tubal, Mesekh dan Tiras. Awaknyan na kheueh indatu bansa-bansa nyang teupeugah meunurot nan awaknyan. 6 Keuturonan Gomer na kheueh ureuëng Askenas, Rifat dan Togarma. 7 Keuturonan Yawan na kheueh ureuëng Elisa, Spanyol, Siprus dan Rodes. 8 Aneuëk agam Ham na kheueh Kus, Meusé, Libia dan Kanaan. Awaknyan na kheueh indatu bansa-bansa nyang teupeugah meunurot nan awaknyan. 9 Keuturonan Kus na kheueh ureuëng Seba, Hawila, Sabta, Raema dan Sabtekha. Keuturonan Raema na kheueh ureuëng Syeba dan Dedan. ( 10 Kus na teuma meuaneuëk sidroe aneuëk agam nyang geuboh nan Nimrod, nyang jeuet raja nyang peukasa nyang phon-phon that di donya nyoe.) 11 Keuturonan Meusé na kheueh ureuëng Lidia, Anamim, Lehabim, Naftuhim, 12 Patrusim, Kasluhim, dan Kreta. Awaknyan kheueh indatu ureuëng Filistin. 13 Aneuëk-aneuëk Kanaan na kheueh Sidon, nyang paleng tuha, dan Het. Awaknyan na kheueh indatu bansa-bansa nyang teupeugah meunurot nan awaknyan. 14 Kanaan teupeugah cit indatu ureuëng Yebusi, Amori dan Girgasi, 15 Hewi, Arki, Sini, 16 Arwadi, Semari dan Hamati. 17 Aneuëk-aneuëk agam Sem na kheueh Elam, Asyur, Arpakhsad, Lud, Aram, Us, Hul, Geter dan Mesekh. Awaknyan na kheueh indatu bansa-bansa nyang teupeugah meunurot nan droe awaknyan. 18 Arpakhsad na kheueh bapak Selah, dan Selah bapak si Eber. 19 Eber na teuma geumeu aneuëk dua droe aneuëk agam; nyang tuha nan jih Peleg sabab nibak jamén jih bansa-bansa didonya teupeu jeumba-jeumba; nyang keudua nan jih Yoktan. 20 Keuturonan Yoktan na kheueh ureuëng Almodad, Selef, Hazar-Mawet, Yerah, 21 Hadoram, Uzal, Dikla, 22 Ebal, Abimael, Syeba, 23 Ofir, Hawila dan Yobab. 24 Silsilah indatu bansa Israel nibak Sem sampoe trok ubak Nabi Ibrahim meuturot-turot na kheueh lagée nyoe: Sem Arpakhsad Selah Eber Peleg Rehu Serug Nahor Terah Brahim (nyang meusyeuhu deungon nan Nabi Ibrahim) 28 Nabi Ibrahim na geumeu aneuëk dua droe nyang agam, na kheueh Nabi Ishaq dan Nabi Ismail. 29 Nyoe kheueh aneuëk-aneuëk Nabi Ismail: nyang paleng tuha nan jih Nebayot, óh lheueh nyan Kedar, Adbeel, Mibsam, 30 Misma, Duma, Masa, Hadad, Tema, 31 Yetur, Nafis dan Kedma. 32 Nabi Ibrahim na geupeulara gundek dan nan gundek nyan na kheueh Ketura. Nibak gundek geuh nyan lahé teuma napadub droe aneuëk agam dan lamkawan aneuëk-aneuëk geuh nyan na kheueh: Zimran, Yoksan, Medan, Midian, Isybak dan Suah. Yoksan na teuma geumeu aneuëk nyang agam dua nyang nan-nan aneuëk geuhnyan na kheueh: Syeba dan Dedan. 33 Meunan cit si Midian na teuma geumeu aneuëk meupadub droe nyang agam nyang geuboh nan maséng-maséng: Efa, Efer, Hanokh, Abida dan Eldaa. 34 Nabi Ishaq aneuëk Nabi Ibrahim na teuma geumeu aneuëk dua droe aneuëk agam, aneuëk-aneuëk geuhnyan na kheueh: Esau dan Nabi Yakub (nyang meusyeuhu deungon nan Israel). 35 Aneuëk-aneuëk agam Esau na kheueh Elifas, Rehuel, Yeus, Yaelam dan Korah. 36 Elifas na kheueh indatu nibak sukée Téman, Omar, Zefi, Gaetam, Kenas, Timna dan Amalek. 37 Rehuel na kheueh indatu nibak sukée Nahat, Zerah, Syama dan Miza. 38 Peunduduek aseuli nibak tanoh Edom na kheueh keuturonan aneuëk-aneuëk Seir, awaknyan na kheueh: Lotan, Syobal, Zibeon, Ana, Disyon, Ezer dan Disyan. Aneuëk-aneuëk agam Lotan na kheueh Hori dan Homam. Lotan na teuma sidroe syedara jih nyang inong nyang nanjih Timna. Aneuëk-aneuëk agam Syobal na kheueh: Alyan, Manahat, Ebal, Syefi dan Onam. Aneuëk-aneuëk agam Zibeon na kheueh: Aya dan Ana. Aneuëk Ana na kheueh Disyon, dan aneuëk Disyon na kheueh Hamran, Esyban, Yitran dan Keran. Aneuëk-aneuëk agam Ezer na kheueh Bilhan, Zaawan dan Yaakan. Aneuëk-aneuëk agam Disyan na kheueh Us dan Aran. 43 Sigohlom na raja nyang mat peurintah di nanggroe Israel, tanoh Edom jipeurintah meuturot-turot lé raja-raja nyang teupeugah nyoe: Bela aneuëk Beor nibak Dinhaba Yobab aneuëk Zerah nibak Bozra Husyam nibak daerah ureuëng Téman Hadad aneuëk Bedad nibak Awit (gobnyan kheueh nyang peutaloe ureuëng Midian dimideuen prang didaerah Moab), Samla nibak Masyreka Saul di Rehobot nibak binéh krueng Baal-Hanan aneuëk Akhbor Hadad di Pahi (peurumoh gobnyan na kheueh Mehetabeel, aneuëk Matred dan cucoe Mezahab). 51 Bansa Edom nyan na jitamong keunan keu sukée: Timna, Alya, Yetet, 52 Oholibama, Ela, Pinon, 53 Kenas, Téman, Mibzar, 54 Magdiel dan Iram, maséng-maséng meunurot nan ulée sukée.

1 Tawarikh 2

1 Aneuëk agam Nabi Yakub na dua blaih droe: Ruben, Simeon, Lewi, Yehuda, Isakhar, Zebulon, 2 Dan, Nabi Yusuf, Benyamin, Naftali, Gad, Asyer. 3 Aneuëk agam Yehuda na teuma limong droe. Nibak peurumoh geuh nyang nan jih Batsyua, ureuëng inong nibak Kanaan, lahé Er, Onan dan Sela; nibak peurumoh geuh nyang nan jih Tamar, na kheueh aneuëk meulintée gobnyan keudroe, lahé teuma Peres dan Zerah. Er aneuëk tuha Yehuda nyan lumpah jeuhet akai jih, sampoe TUHAN geupoh maté aneuëk nyan. 5 Peres na teuma geumeu aneuëk dua droe aneuëk agam, awaknyan na kheueh Hezron dan Hamul. 6 Zerah na teuma limong droe aneuëk agam: Zimri, Etan, Heman, Kalkol dan Dara. 7 Akhan aneuëk Karmi keuturonan Zerah, jipeuteuka bala ateueh Israel sabab gobnyan geucok barang nyang teureupah dalam prang nyang teupeu khusos keu Po teu Allah. 8 Aneuëk agam Etan na kheueh Azarya. 9 Hezron na geumeu aneuëk lhée droe aneuëk agam: Yerahmeel, Ram dan Kaleb. 10 Garéh keuturonan nibak Ram sampoe ubak Isai na kheueh lagéenyoe: Ram Aminadab Nahason (sidroe lamkawan tokoh sukée Yehuda) 11 Salmon Boas 12 Obed Isai 13 Aneuëk agam Isai na tujoh droe. Dan nyoe kheueh nan-nan awaknyan meunurot urotan umu: Eliab, Abinadab, Simea, 14 Netaneel, Radai, 15 Ozem, Nabi Daud. 16 Isai na teuma geumeu aneuëk dua droe aneuëk inong: Zeruya dan Abigail, Zeruya na teuma geumeu aneuëk lhée droe: Abisai, Yoab dan Asael. 17 Abigail geumeukawen teuma deungon Yeter keuturonan Nabi Ismail. Awaknyan na teuma sidroe aneuëk agam nyang geuboh nan Amasa. 18 Kaleb aneuëk Hezron geumeukawen deungon Azuba, dan nibak inong geuhnyan lahé teuma sidroe aneuëk inong nyang geuboh nan Yeriot. Yeriot nyoe na teuma geumeu aneuëk lhée droe: Yeser, Sobab, Ardon. 19 Óh ka lheueh Azuba meuninggai donya, Kaleb laju geumeukawen deungon Efrat dan nibak hase meukawen geuhnyan lahé teuma sidroe aneuëk agam nyang geuboh nan Hur. 20 Aneuëk agam Hur geuboh nan Uri dan cucoe gobnyan geuboh nan Bezaleel. 21 Bak watée Hezron ka meu umu 60 thon gobnyan geumeukawen teuma deungon syedara inong Gilead, aneuëk Makhir. Awaknyan meuteumé teuma sidroe aneuëk agam nyang geuboh nan Segub, 22 dan Segub na teuma sidroe aneuëk agam nyang geuboh nan Yair, dan Yair nyan na geukuasa 23 boh gampông didalam wilayah Gilead. 23 Teuma lé keurajeuen Gesur dan keurajeuen Aram jijak prang laju dan jipeutaloe na 60 boh gampông didalam wilayah nyan meunan cit deungon gampông-gampông ureuëng Yair ka keunong jiprang, gampông Kenat, meunan cit deungon gampông-gampông nyang ubit nyang na di silingka nyan. Banmandum ureuëng nyang na tinggai disinan na kheueh keuturonan Makhir ayah nibak Gilead. 24 Óh ka lheueh Hezron meuninggai donya, Kaleb aneuëk gobnyan jimeukawen deungon Efrat balée peurumoh bapak gobnyan. Aneuëk geuh nyang agam geuboh nan Asyur; dan nyan kheueh nyang peudong banda Tekoa. 25 Yerahmeel aneuëk tuha nibak Hezron na teuma geumeu aneuëk limong droe aneuëk agam: nyang paleng tuha nan jih Ram, Buna, Oren, Ozem dan Ahia. 26 Ram na teuma geumeu aneuëk lhée droe aneuëk agam: Maas, Yamin dan Eker. Yerahmeel na teuma ureuëng inong geuh nyang laén nyang meunan Atara; nibak awaknyan lahé teuma sidroe aneuëk agam nyang geuboh nan Onam. 28 Aneuëk agam si Onam nyan na teuma dua droe: Samai dan Yada. Dan Samai nyan pi na teuma geumeu aneuëk dua droe aneuëk agam, nyang geuboh nan Nadab dan Abisur. 29 Abisur jimeukawen teuma deungon Abihail dan aneuëknyan lahé teuma dua droe aneuëk agam; Ahban dan Molid. 30 Nadab aduen nibak Abisur na teuma geumeu aneuëk dua droe aneuëk agam nyan geuboh nan Seled dan Apaim, teuma Seled meuninggai donya hana jitinggai aneuëk agam meusidroe pih. 31 Apaim na kheueh ureuëng syiek nibak Yisei, Yisei ureuëng syiek Sesan, dan Sesan ureuëng syiek Ahlai. 32 Yada syedara Samai na teuma dua droe aneuëk agam nyang geuboh nan Yeter dan Yonatan. Teuma Yeter meuninggai donya hana geutinggai meusidroe aneuëk agam pi. 33 Yonatan na geumeu aneuëk dua droe aneuëk agam, Pelet dan Zaza. Awaknyan banmandum na kheueh keuturonan Yerahmeel. 34 Sesan hana aneuëk agam, nyang na aneuëk inong. Namiet gobnyan sidroe ureuëng nibak nanggroe Meusé nyang nan jih Yarha, 35 jipeukawen deungon sidroe lamkawan aneuëk gobnyan. Awaknyan na sidroe aneuëk agam nyang teuboh nan Atai. 36 Garéh keuturonan nibak Atai sampoe ubak Elisama nyang meuturot-turot na kheueh lagée nyoe: Atai Natan Zabad Eflal Obed Yehu Azarya Heles Elasa Sismai Salum Yekamya Elisama 42 Kaleb syedara Yerahmeel na sidroe aneuëk agam nyang geuboh nan Mesa. Jihnyan aneuëk tuha. Mesa na kheueh bapak Zif, Zif nyan bapak si Maresa, dan Maresa bapak si Hebron. 43 Hebron na teumé geumeu aneuëk peuet droe aneuëk agam: Korah, Tapuah, Rekem dan Sema. 44 Sema na kheueh bapak Raham. Cucoe Sema nan jih Yorkeam. Rekem aduen Sema na kheueh ureuëng syiek Samai; 45 Samai bapak si Maon, dan Maon ureuëng syiek si Bet-Zur. 46 Kaleb na teuma geupeulara gundek nyang nan geuh Efa. Awaknyan na lhée aneuëk agam nyang nan jih Haran, Moza dan Gazes. Dan Haran na cit aneuëk jih nyan nan jih Gazes. ( 47 Na sidroe ureuëng nyang nan gobnyan Yohdai na geumeu aneuëk nam droe aneuëk agam: Regem, Yotam, Gesan, Pelet, Efa dan Saaf.) 48 Kaleb na lom gundek nyang laén nyang nan jih Maakha. Deungon gundek geuhnyan Kaleb na teuma geumeu aneuëk dua droe aneuëk agam: Seber dan Tirhana; 49 óh lheuehnyan awaknyan meuteumé lom dua droe trek aneuëk agam nyang geuboh nan: Saaf dan Sewa. Saaf na kheueh nyang peudong banda Madmana, dan Sewa nyang peudong banda Makhbena dan Gibea. Kaleb na lom sidroe aneuëk inong nyang geuboh nan Akhsa. 50 Dan nyang seulanjut jihnyoe na kheueh keuturonan Kaleb: Hur na kheueh aneuëk tuha nibak Kaleb deungon peurumoh jih Efrat. Syobal aneuëk Hur na kheueh nyang peudong banda Kiryat-Yearim. 51 Salma aneuëk gobnyan nyang keudua na kheueh nyang peudong banda Betlehem; dan Haref aneuëk gobnyan nyang keulhée nyang peudong banda Bet-Gader. 52 Syobal nyang peudong banda Kiryat-Yearim na kheueh indatu ureuëng Haroë, indatu rab siteungoh peunduduek Menuhot, 53 dan indatu kawöm-kawöm nyang na tinggai di Kiryat-Yearim, na kheueh kawöm Yetri, Puti, Sumati dan Misrai. (Peunduduek banda Zora dan Esytaol na kheueh ureuëng-ureuëng nyang meuasai nibak kawöm nyang teupeugah nyan.) 54 Salma nyang peudong banda Betlehem na kheueh indatu ureuëng Netofa, ureuëng Atarot-Bet-Yoab, dan ureuëng Zori, na kheueh saboh nibak keudua kawöm nyang na tinggai di Manahti. 55 Dari kawöm Tirati, Simati dan Sukati nyang tinggai di banda Yabes na ureuëng-ureuëng nyang ahli dalam hai teumuléh dan seumaleun surat-surat nyang peunteng. Awaknyan na kheueh ureuëng-ureuëng Keni nyang jimeukawen deungon ureuëng Rekab.

1 Tawarikh 3

1 Aneuëk-aneuëk agam Nabi Daud nyang lahé di Hebron, meunurot urotan umu jih na kheueh: 4 Ban nam droe aneuëk agam Nabi Daud nyan lahé di Hebron di teumpat Nabi Daud geumat keurajeuen 7,5 thon treb jih. Di Yerusalem Nabi Daud geumat peurintah na 33 thon treb jih, 5 dan le that aneuëk agam gobnyan nyang lahé disinan. Deungon ureuëng binoe geuh nyang nan jih Batsyeba aneuëk Amiel, Nabi Daud na teuma 4 droe aneuëk agam nyang lahé di Yerusalem: Simea, Sobab, Natan dan Nabi Sulaiman. 6 Na cit sikureueng droe aneuëk agam gobnyan nyang laén: Yibhar, Elisua, Elifelet, 7 Nogah, Nefeg, Yafia, 8 Elisama, Elyada, dan Elifelet. 9 Seulaén awaknyan mantong na aneuëk-aneuëk agam Nabi Daud nyang laén nyang lahé nibak gundek-gundek geuh. Dan na cit sidroe aneuëk inong gobnyan nyang geuboh nan Tamar. 10 Silsilah Raja-raja Israel nibak Raja Nabi Sulaiman trok ubak Yosia na kheueh nyang teupeugah nyoe: Nabi Sulaiman, Rehabeam, Abiam, Asa, Yosafat, Yehoram, Ahazia, Yoas, Amazia, Uzia, Yotam, Ahas, Hizkia, Manasye, Amon dan Yosia. 15 Yosia na teuma geumeu aneuëk peuet droe aneuëk agam: Yohanan, Yoyakim, Zedekia dan Yoahas. 16 Yoyakim na teuma geumeu aneuëk dua droe aneuëk agam nyang geuboh nan Yoyakhin dan Zedekia. 17 Nyoe kheueh keuturonan Raja Yoyakhin, raja nyang jidroeb lé ureuëng Babel. Aneuëk geuh nyang agam na 7 droe: Sealtiel, 18 Malkhiram, Pedaya, Syenazar, Yekamya, Hosama dan Nedabya. 19 Pedaya na teuma dua droe aneuëk agam: Zerubabel dan Simei. Zerubabel na teuma dua droe aneuëk agam: Mesulam dan Hananya, dan sidroe aneuëk inong nyang geuboh nan Selomit. 20 Na lom limong droe aneuëk agam: Hasuba, Ohel, Berekhya, Hasaja dan Yusab-Hesed. 21 Hananya na teuma geumeu aneuëk dua droe aneuëk agam: Pelaca dan Yesaya. Yesaya na kheueh bapak si Refaya, Refaya bapak si Arnan, Arnan bapak Obaja, dan Obaja bapak Sekanya. 22 Sekanya na teuma jimeu aneuëk sidroe aneuëk agam nyang geuboh nan Semaya, dan Semaya na teuma geumeu aneuëk limong droe aneuëk agam nyang jiboh nan Hatus, Yigal, Bariah, Nearya dan Safat. 23 Aneuëk agam Nearya na teuma lhée droe: Elyoënai, Hizkia dan Azrikam. 24 Elyoënai na teuma jimeu aneuëk tujoh droe aneuëk agam: Hodawya, Elyasib, Pelaya, Akub, Yohanan, Delaya dan Anani.

1 Tawarikh 4

1 Teuma óh dudoe awaknyoe na kheueh siladum nibak keuturonan Yehuda: Peres, Hezron, Karmi, Hur dan Syobal. 2 Syobal na kheueh bapak nibak Reaya, Reaya bapak si Yahat. Yahat na teuma jimeu aneuëk dua droe aneuëk agam: Ahumai dan Lahad. Awaknyan na kheueh indatu nibak peunduduek banda Zora. 3 Aneuëk agam nyang tuha nibak Kaleb deungon peurumoh gobnyan nyang nan jih Efrat na kheueh Hur. Keuturonan Hur na kheueh nyang peudong banda Betlehem. Etam, Pnuel dan Ezer na kheueh aneuëk-aneuëk Hur. Etam na teuma jimeu aneuëk lhée droe aneuëk agam nyang nanjih Yizreel, Isma dan Idbas, dan sidroe aneuëk inong nyang nanjih Hazelelponi. Pnuel jipeudong banda Gedor dan Ezer jipeudong banda Husa. 5 Asyhur nyang peudong banda Tekoa na dua droe peurumoh, nan peurumoh jih nyan na kheueh Hela dan Naara. 6 Deungon Naara gobnyan na meuteumé peuet droe aneuëk agam: Ahuzam, Hefer, Temeni dan Ahastari. 7 Deungon Hela, Asyhur na teuma meuteumé lhée droe aneuëk agam: Zeret, Yezohar dan Etnan. 8 Anub dan Hezobeba na kheueh aneuëk agam Kos indatu kawöm keuturonan Aharhel aneuëk Harum. 9 Na sidroe ureuëng agam nyang nanjih Yabes; ureuëng nyan leubeh jihoreumat nibak syedara-syedara jih. Ureuëng nyan jiboh nan Yabes lé mak gobnyan, sabab mak gobnyan lumpah that meudeurita bak watée teupeulahé jihnyan. 10 Teuma Yabes jimeudoá ubak Po teu Allah nyang jiseumah lé ureuëng Israel, jipeugah, "Ya Allah, neubri kheueh beureukat keu ulôn, dan neupeuluwah kheueh kira jih wilayah ulôn. Neulindong kheueh ulôn dan neupeujiôh kheueh bala nibak ulôn mangat ulôn hana meudeurita." Dan doá Yabesnyan laju geuteurimong lé Po teu Allah. 11 Kelub syedara Suha na sidroe aneuëk agam nyang jiboh nan Mehir. Aneuëk Mehir nan jih Eston, 12 dan Eston na teuma lhée droe aneuëk agam, nan-nan aneuëk nyang lhée droe nyan na kheueh: Bet-Rafa, Paseah dan Tehina, nyang peudong banda Nahas. Keuturonan ureuëng-ureuëng nyan tinggai jih di banda Reka. 13 Kenas na teuma dua droe aneuëk agam: Otniel dan Seraya. Meunan cit Otniel na teuma jimeu aneuëk dua droe aneuëk agam, nan aneuëknyan na kheueh Hatat dan Meonotai. Aneuëk Meonotai na kheueh Ofra. 14 Aneuëk Zeraya na kheueh Yoab nyang peudong Pantôn Seumeuget. Banmandum peunduduek di pantôn nyan na kheueh ureuëng-ureuëng carông bak jipeuget buet jaroe. 15 Kaleb aneuëk Yefune na teuma lhée droe aneuëk agam: Iru, Ela dan Naam. Aneuëk Ela na kheueh Kenas. 16 Yahaleleel na jimeu aneuëk peuet droe aneuëk agam: Zif, Zifa, Tireya dan Asareel. 17 Aneuëk agam Ezra na teuma peuet droe: Yeter, Mered, Efer dan Yalon. Mered jimeukawen deungon Bica putroe raja nanggroe Meusé. Nibak hase meukawen nyan lahé teuma sidroe aneuëk inong nyang jiboh nan Miryam, dan dua droe aneuëk agam nyang jiboh nan Samai dan Yisba. Yisba na kheueh nyang peudong banda Estemoa. Mered meunan cit jimeukawen deungon sidroe ureuëng inong nibak sukée Yehuda; dan nibak hase jimeukawen nyan lahé lhée droe aneuëk agam: Yered nyang peudong banda Gedor, Heber nyang peudong banda Sokho, dan Yekutiel nyang peudong banda Zanoah. 19 Hodia jimeukawen teuma deungon syedara ureuëng inong Naham. Keuturonan awaknyan na kheueh indatu nibak kawöm Garmi dan kawöm Maakha. Kawöm Garmi nyan tinggai di banda Kehila, dan Kawöm Maakha tinggai di banda Estemoa. 20 Simon na teuma peuet droe aneuëk agam: Amnon, Rina, Benhanan dan Tilon. Yisei na teuma jimeu aneuëk dua droe aneuëk agam: Zohet dan Ben-Zohet. 21 Sidroe lamkawan aneuëk Yehuda nan jih Sela. Keuturonan jih na kheueh lagéenyoe: Er nyang peudong banda Lekha Lada nyang peudong banda Maresa Kawöm tukang tumpeun ija lineun di banda Bet-Asybea Yokim Peunduduek banda Kozeba Yoas Saraf nyang jimeukawen deungon ureuëng-ureuëng inong Moab dan óh lheuehnyan jigisa u Betlehem. Dafeutarnyan teukuteb nibak catetan awai. 23 Awaknyan banmandum jipeugöt kendi dan guci keuraja dan tinggai di banda Netaim dan Gedera. 24 Simeon na limong droe aneuëk agam: Nemuel, Yamin, Yarib, Zerah dan Saul. 25 Keuturonan Saul na kheueh lagéenyoe: Salum Mibsam Misma Hamuel Zakur Simei. 27 Simei na jimeu aneuëk 22 droe: 16 droe agam dan 6 droe inong. Teuma syedara-syedara Simei cut aneuëk jih. Keuturonan Simeon hana padub le lagée keuturonan Yehuda. 28 Sampoe ubak masa Raja Nabi Daud, keuturonan Simeon tinggai di banda-banda nyang teupeugah nyoe: Bersyeba, Molada, Hazar-Sual, 29 Bilha, Ezem, Tolad, 30 Betuel, Horma, Ziklag, 31 Bet-Markabot, Hazar-Susim, Bet-Biri dan Saaraim. 32 Meunan cit awaknyan tinggai nibak limong boh teumpat nyang laén, teumpat-teumpat nyan na kheueh: Etam, Ain, Rimon, Tokhen, Asan, 33 dan di gampông-gampông nyang tô-tô deungon teumpatnyan sampoe sijiôh banda Baal dibagian barat daya. Meunan kheueh catetan nyang na nibak keuturonan Simeon keuhai silsilah dan teumpat-teumpat tinggai awaknyan. 34 Nyang seulanjut jih nyoe na kheueh nan-nan ulée kawöm lam sukée Simeon: Mesobab Yamlekh Yosa aneuëk Amazia Yoël Yehu aneuëk Yosibya (Yosibya na kheueh aneuëk Seraya, cucoe Asiel), Elyoënai Yaakoba Yesohaya Asaya Adiel Yesimiel Benaya Ziza aneuëk Sifei (garéh silsilah nibak Sifei u ateueh na kheueh: Alon, Yedaya, Simri, Semaya). Kareuna keuluwarga-keuluwarga awaknyan hana putôh meutamah-tamah, 39 teuma awaknyan laju meusipreuk u barat sampoe trok bak binéh banda Gedor nyang teuduek nibak saboh pantôn. Di siblaih u timu pantônnyan lé awaknyan laju meurumpok ngon padang naleueng nyang suboe lom luwah dan teunang keu beulatang peulara awaknyan. Yoh masa ilée daerahnyan jikeumiet lé ureuëng-ureuëng Ham nyang udeb damé. 41 Bak jamén Hizkia raja Yehuda nyang keuturonan Simeon nyan jijak prang Gedor. Bube nyang na khimah-khimah peunduduek banda nyan ka habéh jipeuhanco sampoe teubayeung meunan cit deungon ureuëng Meunim, laju jiuse peunduduek disinan. Óh lheuehnyan awaknyan laju tinggai teutab disinan sabab le padang naleueng teumpat jimeurot beulatang peulara awaknyan. 42 Dimiyueb pimpénan aneuëk-aneuëk Yisei, na kheueh Pelaca, Nearya, Refaya dan Uziel, 500 droe anggota nyang laén dimiyueb sukée Simeon jiminah u Edom di siblaih u timu. 43 Awaknyan laju jipoh maté bubena ureuëng-ureuëng Amalek nyang na mantong tinggai disinan, dan óh lheuehnyan laju jitinggai teutab disinan phon watéenyan.

1 Tawarikh 5

1 Ruben na kheueh aneuëk tuha Nabi Yakub. Teuma sabab lé Ruben nyan ka jipeurusak ngon cara jimeumukah deungon sidroe gundek bapak jinyan, teuma hak jihnyan sibagoe aneuëk tuha laju geutarek dan geubri laju keu Nabi Yusuf. Dan bahpi lagéenyan teuma nyang paleng teuga lamkawan keuturonan Nabi Yakub kon keuturonan Nabi Yusuf teuma na kheueh keuturonan Yehuda. Meunan cit nyang paleng awai jeuet keuraja bansaboh nanggroe Israel na kheueh keuturonan Yehuda. 3 Ruben aneuëk tuha Nabi Yakub, na jimeu aneuëk peuet droe aneuëk agam: Henokh, Palu, Hezron dan Karmi. 4 Nyoe kheueh keuturonan-keuturonan Yoël: Semaya, Gog, Simei, Mikha, Reaya, Baal dan Beera. Beera na kheueh peumimpén sukée Ruben bak watée gobnyan jidroeb lé Tiglat-Pileser raja nibak nanggroe Asyur, dan laju jijak böih u teumpat nyang teuböih. 7 Lam silsilah na cit teucetet nan-nan ulée kawöm nyang teupeugah lom nyoe dalam sukée Ruben: Yeiel, Zakharia, 8 dan Bela aneuëk Azas, cucoe Sema nibak kawöm Yoël. Sukée Ruben tinggai di Aroër dan diwilayah nyang phon di Aroër sampoe u arah nyang trok u Nebo dan Baal-Meon. 9 Awaknyan lumpah le geupeulara beulatang peulara di daerah Gilead. Lé sabab nyan, awaknyan laju jijakduek u wilayah dibagian timu sampoe trok u padang pasi nyang meulinteung bansipanyang Krueng Efrat. 10 Bak jamén Raja Saul, sukée Ruben jijak prang dan geupeutaloe sukée Hagri disiblaih utimu Gilead, laju jiduek nibak nanggroe nyan. 11 Di siblaih utara wilayah sukée Ruben tinggai sukée Gad di tanoh Basan sampoe sijiôh Salkha disiblaih utimu. 12 Nibak sukée Gad nyan Yoël na kheueh indatu kawöm nyang paleng meusyeuhu, dan Safam na kheueh indatu nyang lumboi dua. Yaenai dan Safat na kheueh indatu nibak kawöm-kawöm nyang laén di Basan. 13 Ureuëng nyang laén didalam sukée Gad jitamong ubak tujoh boh kawöm nyang teupeugah lom nyoe: Mikhael, Mesulam, Syeba, Yorai, Yakan, Ziya dan Eber. 14 Awaknyan na kheueh keuturonan Abihail aneuëk si Huri. Urotan silsilah awaknyan phon di miyueb u ateueh lagée nyang teupeugah nyoe: Abihail, Huri, Yaroah, Gilead, Mikhael, Yesisai, Yahdo, Bus. 15 Ulée banmandum kawöm nyang ka teupeugah nyan na kheueh Ahi aneuëk Abdiel, cucoe Guni. 16 Awaknyan tinggai diwilayah Basan dan Gilead, dan banda-banda nyang na diwilayahnyan meunan cit nibak ban saboh padang naleueng nyang na di Saron. 17 Silsilah nyoe teupeugöt nibak jamén Yotam raja Yehuda dan Yerobeam raja Israel. 18 Di dalam sukée Ruben, sukée Gad dan sukée Manasye nyang na di siblaih u timu Yordan na 44.760 sipa-i nyang ka teulatih deungon get dan ka meupeungalaman lam hai cara teupeuguna alat prang nyang nan jih perisée, peudeueng dan aneuk gando. 19 Awaknyan jijak muprang ngon sukée Yetur, sukée Nafis dan Nodab, nyoe na kheueh sukée-sukée nyang na didalam bansa Hagri. 20 Tantra-tantra nyan jipeucaya ubak Po te Allah, dan jilakée tulông ubak Gobnyan, dan Po teu Allah laju geudeungoe peue nyang ka jilakée lé awaknyan dan laju geupeumeunang keu awaknyan ateueh ureuëng-ureuëng Hagri nyan dan sikutu awaknyan. 21 Sabab muprang nyan teujadi ateueh keuheundak Po teu Allah, lé sabab nyan lumpah jai musoh nyang jipoh maté lé awaknyan. Meunan cit nyang jiteumé teun na 100.000 droe, unta nyang jiteumé reupah na 50.000 boh, bubiri 250.000 boh jitamah lom ngon 2.000 boh keuleudée. Óh lheuehnyan awaknyan laju tinggai teutab di daerah nyan sampoe ubak masa bansa Israel teudrob ngon jiböih u teumpat nyang teuböih. 23 Siladum sukée Manasye na tinggai di wilayah Basan sampoe u utara seujiôh Baal-Hermon, Senir dan Gunong Hermon. Awaknyan maken treb maken le. 24 Nyoe kheueh ulée-ulée kawöm awaknyan: Hefer, Yisei, Eliel, Azriel, Yeremia, Hodawya dan Yahdiel. Awaknyan banmandum na kheueh sipa-i-sipa-i nyang beuhé ngon peukasa. 25 Ureuëng-ureuëng Israel hanale seutia ubak Po teu Allah nyang ka jiseumah lé indatu awaknyan. Awaknyan ka jitinggai Gobnyan dan jimeu iébadat ubak dewa-dewa bansa-bansa nyang ka geu use lé Po teu Allah nibak nanggroe Kanaan. 26 Lé sababnyan Allah laju geupeugrak até Pul raja Asyur, dan jijak kheueh laju geuhnyan geujak prang nanggroenyan. Pul meugah cit ngon nan Tiglat-Pileser. Dan di sukée Ruben, Gad dan sukée Manasye nyang na disiblaih u timu Yordan jiangkot sibagoe tawanan dan jijak böih u Halah, Habor, Hara dan ubak saboh teumpat nyang rab deungon Krueng Gozan. Disinan kheueh awaknyan tinggai teutab sampoe nibak uroenyoe.

1 Tawarikh 6

1 Lewi na geumeu aneuëk lhée droe aneuëk agam: Gerson, Kehat dan Merari. 2 Kehat na teuma jimeu aneuëk peuet droe aneuëk agam: Amram, Yizhar, Hebron dan Uziel. 3 Amram na teuma jimeu aneuëk dua droe aneuëk agam, awaknyan na kheueh Nabi Harun ngon Nabi Musa, dan sidroe aneuëk inong nyang geuboh nan Miryam. Nabi Harun na teuma peuet droe aneuëk agam: Nadab, Abihu, Eleazar dan Itamar. 4 Urotan silsilah Eleazar na kheueh nyang teutuléh nyoe: Pinehas, Abisua, 5 Buki, Uzi, 6 Zerahya, Merayot, 7 Amarya, Ahitub, 8 Zadok, Ahimaas, 9 Azarya, Yohanan, 10 Azarya (gobnyan meutugaih di Baét TUHAN nyang geupeugét lé Raja Nabi Sulaiman di Yerusalem), 11 Amarya, Ahitub, 12 Zadok, Salum, 13 Hilkia, Azarya, 14 Seraya, Yozadak. 15 Yozadak nyoe meusigoe jibeuôt dan laju jiba sajan ngon ureuëng Yehuda dan peunduduek Yerusalem nyang laén bak watée TUHAN geujak tiek awaknyan u nanggroe laén deungon peurantaraan Nebukadnezar. 16 Lewi na lhée droe aneuëk agam: Gerson, Kehat dan Merari. 17 Awaknyan maséng-maséng na jimeu aneuëk. Libni dan Simei na kheueh aneuëk-aneuëk Gerson; 18 Amram, Yizhar, Hebron dan Uziel na kheueh aneuëk-aneuëk Kehat. 19 Mahli dan Musi na kheueh aneuëk-aneuëk Merari. 20 Garéh keuturonan Gerson na kheueh: Libni, Yahat, Zima, 21 Yoah, Ido, Zerah, Yeatrai. 22 Garéh keuturonan Kehat na kheueh: Aminadab, Korah, Asir, 23 Elkana, Ebyasaf, Asir, 24 Tahat, Uriel, Uzia, Saul. 25 Elkana na teuma geumeu aneuëk dua droe aneuëk agam: Amasai dan Amihot. 26 Garéh keuturonan Amihot na kheueh: Elkana, Zofai, Nahat, 27 Eliab, Yeroham, Elkana. 28 Samuel na teuma geumeu aneuëk dua droe aneuëk agam: nyang tuha Yoël, dan Abia nyang tulot. 29 Garéh keuturonan Merari na kheueh: Mahli, Libni, Simei, Uza, 30 Simea, Hagia, Asaya. 31 Phon yoh watée Peuto Peujanjian teupinah u teumpat iébadat di Yerusalem, Nabi Daud laju geupiléh ureuëng-ureuëng nyang meutanggong jaweueb ateueh nyanyoe puja ngon pujo di Baét TUHAN. 32 Awaknyan jimeutugaih seucara meugantoe-gantoe di Khimah TUHAN bak watée yoh gohlom Nabi Sulaiman geupeudong Baét TUHAN. 33 Garéh silsilah ureuëng-ureuëng nyang geubri tugaih nyan na kheueh lagéenyoe: Nibak kawöm Kehat: Heman aneuëk Yoël. Gobnyan jeuet keupeumimpén keulompok meunyanyoe nyang phon. Garéh silsilah jih phon di miyueb sampoe u ateueh dan laju sampoe ubak Nabi Yakub na kheueh lagéenyoe: Heman, Yoël, Samuel, 34 Elkana, Yeroham, Eliel, Toah, 35 Zuf, Elkana, Mahat, Amasai, 36 Elkana, Yoël, Azarya, Zefanya, 37 Tahat, Asir, Ebyasaf, Korah, 38 Yizhar, Kehat, Lewi, Nabi Yakub. 39 Asaf na kheueh nyang jeuet keupeumimpén keulompok peunyanyoe nyang keudua. Garéh silsilah jih phon di miyueb u ateueh sampoe trok ubak Lewi na kheueh lagéenyoe: Asaf, Berekhya, Simea, 40 Mikhael, Baaseya, Malkia, 41 Etai, Zerah, Adaya, 42 Etan, Zima, Simei, 43 Yahat, Gerson, Lewi. 44 Etan na kheueh nyang jeuet keu peumimpén keulompok peunyanyoe nyang keu lhée; gobnyan nibak kawöm Merari. Garéh silsilah geuh phon di miyueb u ateueh akhé jih sampoe ubak Lewi na kheueh lagéenyoe: Etan, Kisi, Abdi, Malukh, 45 Hasabya, Amazia, Hilkia, 46 Amzi, Bani, Semer, 47 Mahli, Musi, Merari, Lewi. 48 Tugaih-tugaih nyang laén di rumoh iébadat geuseurah ubak rakan gobnyan nyang ureuëng Lewi cit teuma. 49 Nabi Harun dan keuturonan gobnyan meutugaih geutot keumeunyan, geupeuseumah keureubeuen nyang teutot di ateueh miseubah, geupeubuet peue mantong upacara di Ruweueng Maha Suci, dan geupeuseumah keureubeuen peusampôh desya umat Israel. Banmandum nyan jipeubuet lé awaknyan nyang paih deungon peutunyok-peutunyok nyang ka geubri lé Nabi Musa hamba Po teu Allah. 50 Nyoe kheueh garéh keuturonan Nabi Harun: Eleazar, Pinehas, Abisua, 51 Buki, Uzi, Zerahya, 52 Merayot, Amarya, Ahitub, 53 Zadok, Ahimaas. 54 Nyoe kheueh teumpat tinggai nyang teubri keu kawöm Kehat keuturonan Nabi Harun. Awaknyan jiteurimong jeumba nyang phon nibak tanoh nyang ka teupeuteuntée keu ureuëng Lewi. 55 Tanoh awaknyan na jitamong nibak banda Hebron diwilayah Yehuda, dan padang-padang naleueng nyang na bansilingka nyan. 56 Teuma lampôh-lampôh dan gampông-gampông nyang na di daerah silingka banda nyan teubri keu Kaleb aneuëk Yefune. 57 Keuturonan Nabi Harun meuteumé banda Hebron sibagoe banda suaka, Yatir, dan gampông-gampông nyang na nyang teupeugah lom nyoe meunan cit deungon padang naleueng: gampông Libna, Estemoa, Hilen, Debir, Asan, Bet-Semes. 60 Diwilayah sukée Benyamin awaknyan meuteumé teuma gampông-gampông nyang teupeugah lom nyoe meunan cit deungon padang naleueng jih: Geba, Alemet dan Anatot. Banmandum nyan na 13 boh gampông keu teumpat tinggai keuluwarga-keuluwarga awaknyan. 61 Siploh boh gampông sukée Manasye disiblaih u barat Krueng Yordan geubri deungon cara teu-undi keu keuluwarga-keuluwarga didalam kawöm Kehat nyang gohlom meuteumé tanoh. 62 Keuluwarga-keuluwarga dalam kawöm Gerson meuteumé teuma 13 boh gampông diwilayah sukée Isakhar, Asyer, Naftali dan Manasye nyang di Basan disiblaih u timu Krueng Yordan. 63 Meunan cit deungon keuluwarga-keuluwarga nyang na dalam kawöm Merari meuteumé 12 boh gampông deungon cara teu-undi di dalam gampông wilayah sukée Ruben, Gad dan Zebulon. 64 Meunan kheueh cara jih bansa Israel teubagi keu sukée Lewi gampông-gampông deungon padang naleueng jih keu teumpat tinggai awaknyan. 65 Gampông-gampông nyang na didalam wilayah sukée Yehuda, Simeon dan Benyamin nyang ka teupeugah nyan, meunan cit teubagi ngon cara teu-undi. 66 Di dalam wilayah sukée Efraim, siladum nibak keuluwarga-keuluwarga kawöm Kehat jiteurimong teuma gampông-gampông nyang teupeugah lom nyoe teutamah teuma deungon padang naleueng keuteumpat peumeurot beulatang peulara nyang tô-tô di sikeulileng nyan: 67 Sikhem, banda suaka digunong-gunong nyang na didalam wilayah nyan, Gezer, 68 Yokmeam, Bet-Horon, 69 Ayalon dan Gat-Rimon. 70 Didalam wilayah sukée Manasye nyang na disiblaih u barat Krueng Yordan awaknyan laju jiteurimong gampông Aner dan Bileam deungon padang naleueng nyang na tô-tô diban keulileng nyan. 71 Keuluwarga-keuluwarga kawöm Gerson meuteumé teuma gampông-gampông nyang teupeugah lomnyoe meunan cit teutamah teuma deungon padang naleueng nyang na tô-tô bansikeulileng nyan: Di wilayah sukée Manasye, di siblaih u timu Krueng Yordan: Golan di Basan dan Asytarot. 72 Diwilayah sukée Isakhar: Kedes, Daberat, 73 Ramot dan Anem. 74 Diwilayah sukée Asyer: Masal, Abdon, 75 Hukok dan Rehob. 76 Diwilayah sukée Naftali: Kedes di Galilea, Hamon dan Kiryataim. 77 Keuturonan Merari nyang gohlom meuteumé tanoh, meuteumé teuma gampông-gampông nyang teupeugah nyoe meunan cit deungon padang naleueng nyang na tô-tô bansikeulileng nyan: Diwilayah sukée Zebulon: Rimono dan Tabor. 78 Diwilayah sukée Ruben, disiblaih u timu Krueng Yordan nyang tô deungon Yerikho: Bezer di ateueh darat manyang, Yahas, 79 Kedemot dan Mefaat. 80 Diwilayah sukée Gad: Ramot di Gilead, Mahanaim, 81 Hesybon dan Yaezer.

1 Tawarikh 7

1 Isakhar na jimeu aneuëk 4 droe aneuëk agam: Tola, Pua, Yasub dan Simron. 2 Tola na teuma jimeu aneuëk 6 droe aneuëk agam: Uzi, Refaya, Yeriel, Yahmai, Yibsam dan Samuel. Awaknyan na kheueh ulée keuluwarga dalam kawöm Tola dan meusyeuhu sibagoe sipa-i-sipa-i nyang beuhé. Bak masa Nabi Daud, keuturonan awaknyan na jeumeulah jih 22.600 droe. 3 Uzi na sidroe aneuëk agam nyang teuboh nan Yizrahya. Yizrahya dan ban peuet droe aneuëk geuh nyang agam, nyang nan Mikhael, Obaja, Yoël dan Yisia na kheueh ulée kawöm. 4 Peurumoh-peurumoh dan aneuëk-aneuëk awaknyan lumpah that le deungon nyan keuturonan awaknyan hase jipeuna 36.000 droe ureuëng agam keujimeudinaih lam baresan tantra. 5 Meunurot dafeutar reuseumi, nibak banmandum keuluwarga dalam sukée Isakhar na meuteumé 87.000 droe ureuëng agam nyang peunoh syarat mangat jeuet jitamong tantra. 6 Benyamin na geumeu aneuëk lhée droe aneuëk agam: Bela, Bekher dan Yediael. 7 Bela na teuma aneuëk limong droe aneuëk agam: Ezron, Uzi, Uziel, Yerimot dan Iri. Awaknyan na kheueh ulée keuluwarga dalam kawöm droe jih dan meugah sibagoe sipa-i-sipa-i nyang beuhé ngon ceubeuh. Dalam dafeutar keuturonan awaknyan teucetet na 22.034 droe ureuëng agam nyang peunoh syarat keujeuet jitamong tantra. 8 Bekher na teuma jimeu aneuëk 9 droe aneuëk agam: Zemira, Yoas, Eliezer, Elyoënai, Omri, Yeremot, Abia, Anatot dan Alemet. 9 Awaknyan na kheueh ulée keuluwarga dalam kawöm droe jih. Meunurot dafeutar nyang reuseumi, nibak banmandum keuluwarga didalam keuturonan awaknyan na meuteumé 20.200 droe ureuëng agam nyang ka hase peunoh syarat keujeuet jitamong tantra. 10 Yediael na teuma jimeu aneuëk sidroe aneuëk agam nyang teuboh nan Bilhan. Bilhan nyan na teuma jimeu aneuëk 7 droe aneuëk agam: Yeus, Benyamin, Ehud, Kenaana, Zetan, Tarsis dan Ahisahar. 11 Awaknyan na kheueh ulée keuluwarga dalam kawöm droe jih maséng-maséng dan meugah that sibagoe sipa-i-sipa-i nyang beuhé ngon ceubeuh. Lam dafeutar keuturonan awaknyan na teucetet 17.200 droe ureuëng agam nyang peunoh syarat mangat jeuet meudinaih lam tantra. 12 Supim dan Hupim na kheueh keuturonan Ir. Husim na kheueh aneuëk nibak Dan. 13 Naftali na teuma jimeu aneuëk 4 droe aneuëk agam: Yahziel, Guni, Yezer dan Salum. Awaknyan na kheueh cucoe Bilha. 14 Manasye deungon gundek jih, sidroe ureuëng inong asai nibak Aram, na jimeu aneuëk dua droe aneuëk agam: Asriel dan Makhir. Aneuëk Makhir na kheueh Gilead. 15 Makhir jijak mita peurumoh keu si Hupim dan Supim. Nan ureuëng binoe Makhir na kheueh Maakha. Aneuëk Makhir nyang keudua na kheueh Zelafead, dan Zelafead hana teuma meu aneuëk agam, nyang na aneuëk inong. 16 Maakha peurumoh Makhir na jipeulahé dua droe aneuëk agam nyang teuboh nan Peres dan Seres; Peres na teuma jimeu aneuëk dua droe aneuëk agam nyang teuboh nan Ulam dan Rekem. 17 Ulam na teuma jimeu aneuëk sidroe aneuëk agam nyang teuboh nan Bedan. Nyan kheueh keuturonan Gilead aneuëk Makhir, cucoe Manasye. 18 Syedara nyang inong Gilead nan jih Molekhet na jimeu aneuëk lhée droe aneuëk agam: Isyhod, Abiezer dan Mahla. 19 Semida na teuma jimeu aneuëk 4 droe aneuëk agam: Ahyan, Sekhem, Likhi dan Aniam. 20 Efraim na jimeu aneuëk lhée droe: Sutelah, Ezer dan Elad. Garéh keuturonan Efraim rot Sutelah na kheueh Bered, Tahat, Elada, Tahat, Zabad, Sutelah. Ezer dan Elad ka jipoh maté lé gob bak watée jikeuneuk cue beulatang peulara peunduduek aseuli nanggroe Gad. 22 Ureuëng syiek awaknyan meukabong meu-uroe-uroe treb jih sampoe syedara-syedara gobnyan teuka jijak peumangat até ureuëng syiek jih nyan. 23 Óh lheuehnyan Efraim jimeujimak lom deungon ureuëng binoe droe jih, laju ureuëng inong nyan raya pruet dan lahé kheueh teuma sidroe aneuëk agam. Efraim geuboh nan aneuëk geuhnyan Beria, sabab bala nyang ka jiteurimong. 24 Efraim na cit aneuëk inong nyang geuboh nan Seera. Gobnyan kheueh nyang peudong banda-banda Bet-Horon Miyueb dan Bet-Horon Ateueh, meunan cit deungon banda Uza dan Seera. 25 Na lom sidroe teuk aneuëk agam Efraim, nyang geuboh nan Refah. Nyoe kheueh garéh keuturonan Refah nyan: Resef, Telah, Tahan, 26 Ladan, Amihud, Elisama, 27 Nun, Yosua. 28 Wilayah nyang geubri keu teumpat tinggai awaknyan na kheueh di Betel sampoe u Naaran disiblaih u timu, dan Geser di siblaih ubarat meunan cit deungon gampông-gampông nyang na tô-tô bansilingka banda nyan. Dalam wilayah nyan jitamong cit banda Sikhem dan Aya, meunan cit deungon gampông-gampông nyang na tô-tô ban sikeulileng nyan. 29 Keuturonan Manasye jikuasa banda Bet-Sean, Taanakh, Megido, Dor dan gampông-gampông nyang na ban sikeulileng nyan. Nyan kheueh banmandum daerah teumpat tinggai keuturonan Nabi Yusuf aneuëk Nabi Yakub. 30 Nyang tapeugah lom nyoe na kheueh keuturonan Asyer. Gobnyan na jimeu aneuëk 4 droe aneuëk agam: Yimna, Yiswa, Yiswi dan Beria dan sidroe teuk aneuëk inong nyang teuboh nan Serah. 31 Beria na teuma jimeu aneuëk dua droe aneuëk agam, awaknyan na kheueh Heber dan Malkiel nyang peudong banda Birzait. 32 Heber na teuma lhée droe aneuëk agam: Yaflet, Somer, Hotam, dan sidroe aneuëk inong, nyang teuboh nan Sua. 33 Meunan cit deungon Yaflet na teuma jimeu aneuëk lhée droe aneuëk agam: Pasakh, Bimhab dan Asywat. 34 Somer syedara Yaflet na teuma jimeu aneuëk 4 droe aneuëk agam: Ahi, Rohga, Yehuba dan Aram. 35 Hotam, syedara Yaflet nyang sidroe teuk, na teuma jimeu aneuëk 4 droe aneuëk agam: Zofah, Yimna, Seles dan Amal. 36 Keuturonan Sofah na kheueh Suah, Harnefer, Syual, Beri, Yimra, 37 Bezer, Hod, Sama, Silsa, Yitran dan Beera. 38 Keuturonan Yeter na kheueh Yefune, Pispa dan Ara. 39 Keuturonan Ula na kheueh Arah, Haniel, dan Rizya. 40 Nyan kheueh keuturonan Asyer. Awaknyan banmandum na kheueh ulée keuluwarga dan meusyeuhu sibagoe pahlawan-pahlawan nyang beuhé ngon ceubeuh dan peumimpén-peumimpén nyang raya. Dalam dafeutar keuturonan Asyer na teucetet 26.000 droe ureuëng agam nyang ka peunoh syarat mangat jeuet tamong tantra.

1 Tawarikh 8

1 Benyamin na geumeu aneuëk limong droe aneuëk agam. Meunurot urotan umu, awaknyan na kheueh: Bela, Asybel, Ahrah, 2 Noha dan Rafa. 3 Keuturonan Bela na kheueh Adar, Gera, Abihud, 4 Abisua, Naaman, Ahoah, 5 Gera, Sefufan dan Huram. 6 Keuturonan Ehud na kheueh Naaman, Ahia dan Gera. Awaknyan na kheueh ulée keuluwarga nyang yohmasa ilée tinggai di Geba. Teuma awaknyan ji use di Geba nyan, dimiyueb pimpénan Gera awaknyan laju jiminah u Manahat dan tinggai disinan. Gera na jimeu aneuëk dua droe aneuëk: Uza dan Ahihud. 8 Saharaim jitaleuk bandua droe peurumoh jih nyang nan Husim dan Baara. Óh lheuehnyan bak watée geuhnyan tinggai di daerah Moab, gobnyan laju meukawen deungon Hodes dan meuteumé tujoh droe aneuëk agam: Yobab, Zibya, Mesa, Malkam, 10 Yeus, Sokhya dan Mirma. Banmandum awaknyan ulée keuluwarga. 11 Deungon peurumoh jih nyan meunan Husim na teuma jimeu aneuëk dua droe aneuëk agam: Abitub dan Elpaal. 12 Aneuëk agam Elpaal na teuma lhée droe: Eber, Misam, Semed. Semed nyoe kheueh nyang peudong banda Ono dan banda Lod meunan cit deungon gampông-gampông nyang na ban sikeulileng nyan. 13 Beria dan Sema na kheueh ulée keuluwarga nyang tinggai di banda Ayalon dan jiuse peunduduek banda Gat. 14 Keuturonan Beria na kheueh Ahyo, Sasak, Yeremot, Zebaya, Arad, Eder, Mikhael, Yispa dan Yoha. 17 Keuturonan Elpaal na kheueh Zebaja, Mesulam, Hizki, Heber, 18 Yismerai, Yizlia dan Yobab. 19 Keuturonan Simei na kheueh Yakim, Zikhri, Zabdi, 20 Elyoënai, Ziletai, Eliel 21 Adaya, Beraya dan Simrat. 22 Keuturonan Sasak na kheueh Yispan, Eber, Eliel, 23 Abdon, Zikhri, Hanan, 24 Hanaya, Elam, Antotia, 25 Yifdeya dan Pnuel. 26 Keuturonan Yeroham na kheueh Samserai, Seharya, Atalya, 27 Yaaresya, Elia dan Zikhri. 28 Nyan kheueh ulée keuluwarga dan peumimpén-peumimpén nyang na teucetet didalam silsilah awaknyan. Awaknyan tinggai di Yerusalem. 29 Yeiel jipeudong banda Gibeon, óh lheuehnyan gobnyan laju tinggai di banda nyang jipeudong nyan. Ureuëng binoe jihnyan nyang nan Maakha, 30 dan awaknyan na jimeu aneuëk 10 droe aneuëk agam: Abdon nyang paleng tuha, óh lheueh nyan Zur, Kish, Baal, Ner, Nadab, 31 Gedor, Ahyo, Zakharia, 32 dan Miklot bapak Simea. Keuturonan awaknyan tinggai teutab di Yerusalem meusapat deungon keuluwarga-keuluwarga nyang laén nyang saboh kawöm deungon gobnyan. 33 Ureuëng syiek Raja Saul nan jih Kis dan nék geuh nan jih Ner. Saul na jimeu aneuëk 4 droe aneuëk agam: Yonatan, Malkisua, Abinadab dan Esybaal. 34 Yonatan na jimeu aneuëk sidroe aneuëk agam nyang jiboh nan Meribaal, ureuëng syiek si Mikha. 35 Mikha na teuma jimeu aneuëk 4 droe aneuëk agam: Piton, Melekh, Tahrea dan Ahas. 36 Aneuëk Ahas nyang nan Yoada na teuma lhée droe aneuëk agam: Alemet, Azmawet dan Zimri. Garéh keuturonan Zimri nyan na kheueh Moza, 37 Bina, Rafa, Elasa, Azel. 38 Azel na teuma jimeu aneuëk nam droe aneuëk agam: Azrikam, Bokhru, Ismail, Searya, Obaja dan Hanan. 39 Esek, syedara nyang agam nibak Azel, na teuma jimeu aneuëk lhée droe aneuëk agam: nyang tuha that nan jih Ulam, óh lheuehnyan Yeus dan Elifelet. 40 Aneuëk-aneuëk Ulam banmandum na kheueh sipa-i-sipa-i nyang gagah peukasa dan ureuëng timbak aneuk panah nyang paleng ahli. Aneuëk cucoe gobnyan nyang agam banmandum na 150 droe. Awaknyan banmandum na kheueh keuturonan nibak sukée Benyamin.

1 Tawarikh 9

1 Banmandum ureuëng Israel teudafeutar meunurot keuluwarga jihnyan maséng-maséng. Dafeutarnyan na teucetet didalam kitab Raja-raja Israel. Sibagoe huköman ateueh desya-desya nyang jipeubuet lé awaknyan, rakyat Yehuda laju jiangkot u teumpat nyang teuböih. 2 Lamkawan awaknyan nyang phon-phon that woe ubak tanoh milék droejih nyang na di banda-banda na kheueh ureuëng awam, teungku-teungku imeum, ureuëng Lewi dan utoh-utoh nyang meukeureuja di Baét TUHAN. 3 Siladum nibak sukée Yehuda, Benyamin, Efraim dan Manasye jigisa dan tinggai laju di Yerusalem. 4 Na 690 keuluwarga nibak sukée Yehuda nyang tinggai di Yerusalem, jitamong cit keunan keuturonan aneuëk-aneuëk Yehuda nyang nan jih Peres, Syela dan Zerah. Keuturonan Peres jipimpén lé Utai. Garéh keuturonan Utai phon di miyueb u ateueh na kheueh Utai, Amihud, Omri, Imri dan Bani. Keuturonan Syela jipimpén lé Asaya. Gobnyan na kheueh ulée keuluwarga. Keuturonan Zerah jipimpén lé Yeuel. 7 Ureuëng-ureuëng sukée Benyamin nyang na tinggai di Yerusalem na 956 keuluwarga. Ulée-ulée keuluwarga awaknyan na kheueh: Salu aneuëk Mesulam, cucoe Hodawya, buyut Hasenua Yibnia aneuëk Yeroham Ela aneuëk Uzi, cucoe Mikhri Mesulam aneuëk Sefaca, cucoe Rehuel, buyut Yibnia. 10 Teungku-teungku imeum nyang teukheun lom nyoe tinggai di Yerusalem: Yedaya, Yoyarib dan Yakhin Azarya aneuëk Hilkia, indatu jihnyan na kheueh Mesulam, Zadok, Merayot dan Ahitub. (Azarya na kheueh ulée peugawaée di Baét TUHAN.) Adaya aneuëk Yeroham; indatu jihnyan na kheueh Pasyhur dan Malkia. Masai aneuëk Adiel; indatu jihnyan na kheueh Yahzera, Mesulam, Mesilemit, Imer. 13 Teungku imeum nyang jeuet keu ulée keuluwarga, banmandum jih na 1.760 droe. Awaknyan carông that bak jipeubuet peue mantong buet di Baét TUHAN. 14 Ureuëng-ureuëng Lewi nyang teupeugah lom nyoe awaknyoe tinggai di Yerusalem: Semaya aneuëk Hasub; indatu jihnyan na kheueh Azrikam dan Hasabya nibak kawöm Merari Bakbakar, Heres dan Galal Matanya aneuëk Mikha; indatu jih na kheueh Zikhri dan Asaf Obaja aneuëk Semaya; indatu jihnyan na kheueh Galal dan Yedutun Berekhya aneuëk Asa, cucoe Elkana, gobnyan tinggai di daerah banda Netofa. 17 Tukang-tukang kawai Baét TUHAN nyang na tinggai di Yerusalem meusapat deungon keuluwarga jihnyan na kheueh: Akub, Talmon, Ahiman, dan Salum ulée kawai. 18 Sampoe nibak uroenyoe ureuëng-ureuëng nyang nibak kawöm awaknyan teubri tugaih keu jijakkawai Pintoe Geureubang Raja disiblaih u timu. Yoh masa ilée ureuëng-ureuëng nibak kawöm awaknyan teubri tugaih mangat jijak jaga pintoe-pintoe geureubang nyang teutuju ubak khimah-khimah ureuëng Lewi. 19 Nyang teubri tugaih keu teujaga nibak babah pintoe tamong u Baét TUHAN na kheueh Salum meusajan deungon ureuëng-ureuëng nyang sikawöm deungon jihnyan, nyan kheueh kawöm Korah. (Salum nyan na kheueh aneuëk Kore cucoe Ebyasaf.) Yoh masa ilée indatu awaknyan jipeubuet tugaih nyan bak watée awaknyan jipeutimang khimah-khimah TUHAN. 20 Pinehas aneuëk Eleazar -- seumoga TUHAN geulindong gobnyan! -- na peureunah jeuet keu ulée kawai awaknyan. 21 Zakharia aneuëk Meselemya meunan cit ureuëng nyang kawai pintoe geureubang Khimah TUHAN. 22 Banmandum nyang teupiléh keu teukawai babah pintoe geureubang na 212 droe. Awaknyan na teudafeutar meunurot gampông-gampông teumpat tinggai awaknyan. Indatu awaknyan teujok jabatan-jabatan nyan lé Raja Nabi Daud dan Nabi Samuel. 23 Phon watéenyan awaknyan dan keuturonan awaknyan teutab jeuet keu keuneumiet Pintoe Geureubang Baét TUHAN. 24 Na 4 boh pintoe: saboh di utara, saboh di seulatan, saboh di timu dan saboh teuk di barat. Nibak tieb-tieb saboh pintoenyan jipeuduek sidroe ureuëng Lewi nyang jeuet keu ulée jaga. 25 Waréh kawöm awaknyan nyang na tinggai di gampông-gampông, jibantu gobnyan seucara meugantoe-gantoe -- tieb-tieb sigoe siseun aleuhat treb jih. 26 Teuma ban peuet droe ulée jaga nyan teutab jimat tugaih seucara teutab. Awaknyan meutanggong jaweueb ateueh bilék-bilék nyang na di Baét TUHAN dan barang-barang nyang teukeubah disinan. 27 Awaknyan tinggai tô ngon Baét TUHAN, sabab awaknyan harôh jijaga rumoh nyan dan jibuka pintoe-pintoe geureubang bak tieb-tieb beungoh. 28 Ladum nibak ureuëng Lewi nyang laén meutanggong jaweueb ateueh peukakaih-peukakaih keu iébadat. Awaknyan kheueh nyang itong bak watée teupeuteubiet dan bak watée jijak pulang lom teuma. 29 Ladum awaknyan meutanggong jaweueb ateueh peurabot-peurabot iébadat, ateueh teupông, anggô, minyéuk zaiton, keumeunyan meunan cit deungon reumpah-reumpah. 30 Teuma nyang meutanggong jaweueb bak teujampu reumpah-reumpah nyan na kheueh teungku-teungku imeum. 31 Nyang meutanggong jaweueb ubak teupeugét peuseumahan nyang teupanggang bak apui sidroe lamkawan ureuëng Lewi nyang nan jih Matica, aneuëk tuha Salum nibak kawöm Korah. 32 Ureuëng-ureuëng nibak kawöm Kehat meutanggong jaweueb keu jipeusiab ruti sajian keu TUHAN bak tieb-tieb uroe Sabat. 33 Siladum ureuëng Lewi nyang laén meutugaih sibagoe ureuëng meuca-e meunyanyoe di Baét TUHAN. Ulée-ulée keuluwarga awaknyan tinggai nibak geudong-geudong di Baét TUHAN. Awaknyan hana teujok tugaih nyang laén, sabab awaknyan meutugaih uroe ngon malam. 34 Ureuëng-ureuëng nyang teupeugah di ateueh nyan na kheueh ulée-ulée keuluwarga Lewi meunurot garéh keuturonan awaknyan. Awaknyan na kheueh peumimpén-peumimpén nyang tinggai di Yerusalem. 35 Yeiel jipeudong banda Gibeon, laju gobnyan tinggai disinan. Ureuëng binoe geuh nyang nan jih Maakha, 36 dan aneuëk geuh nyang agam, nyang tuha nan jih Abdon; nyang laén na nyang nan Zur, Kish, Baal, Ner, Nadab, 37 Gedor, Ahyo, Zakharia dan Miklot, 38 ureuëng syiek Simea. Keuturonan awaknyan tinggai di Yerusalem meusapat deungon keuluwarga-keuluwarga nyang laén nyang sikawöm deungon awaknyan. 39 Bapak Raja Saul nan geuh Kish dan nék gobnyan nan geuh Ner. Saul na geumeu aneuëk 4 droe aneuëk agam: Yonatan, Malkisua, Abinadab, dan Esybaal. 40 Yonatan na teuma jimeu aneuëk nyang agam nyang jiboh nan Meribaal, ureuëng syiek si Mikha. 41 Mikha na teuma jimeu aneuëk 4 droe aneuëk agam: Piton, Melekh, Tahrea dan Ahas. 42 Aneuëk Ahas meunan Yoada na teuma jimeu aneuëk lhée droe aneuëk agam: Alemet, Asmawet dan Zimri. Garéh keuturonan Zimri na kheueh Moza, 43 Bina, Rafa, Elasa dan Azel. 44 Azel na teuma geumeu aneuëk 6 droe aneuëk agam: Azrikam, Bokhru, Ismail, Searya, Obaja dan Hanan.

1 Tawarikh 10

1 Ureuëng Filistin jimuprang deungon ureuëng Israel. Awaknyan jimeuheungko ngon jimeuheuntam nibak gunong-gunong Gilboa. Jai that-that ureuëng Israel nyang maté lam prang nyan, dan nyang na mantong tinggai jitamong cit keunan Raja Saul ngon aneuëk-aneuëk agam gobnyan laju geupeuplueng droe. 2 Teuma awaknyan jitiyeub rot likot lé ureuëng Filistin dan óh meurumpok lhée droe nibak aneuëk agam Raja Saul nyan laju jipoh maté, nyang keunong poh nyan na kheueh: Yonatan, Abinadab dan Malkisua. 3 Muprang nyan keubiet hebat that bak binéh Saul, dan gobnyan keudroe keunong aneuk panah musoh sampoe luka. 4 Dan geupeugah kheueh lé Saul ubak peumuda nyang ba seunjata gobnyan, "Tasuit kheueh laju peudeueng gata dan tatöb laju u ateueh ulôn mangat ulôn nyoe bék jipeumeu-én lé ureuëng Filistin nyang hana jituri keu TUHAN nyan." Teuma lé aneuëk mudanyan hana jitem töb Raja Saul sabab jihnyan teumakot that-that. Lé sabab nyan Raja Saul laju geucok peudeueng geuh keudroe laju geupeureubah droe geuh u ateueh peudeueng nyan. 5 Bak watée jikalon lé aneuëk muda nyan bahwa Raja Saul ka maté, dan gobnyan pih laju jipeureubah droe u ateueh peudeueng jih dan ureuëng nyan pih maté disinan. 6 Dan meuninggai kheueh Raja Saul meusajan deungon aneuëk agam gobnyan nyang lhée droe nyan, dan deungon lagée nyan habéh kheueh riwayat dinasti Raja Saul. 7 Bak watée banmandun ureuëng Israel nyang na tinggai di Pantôn Yizreel jideungoe bahwa tantra Israel ka jipeuplueng droe, meunan cit watée jideungoe Raja Saul deungon aneuëk-aneuëk gobnyan ka meuninggai donya, awaknyan laju jiplueng sira jitinggai banda-banda droe jih. Dan teuka laju ureuëng Filistin jijak duek nibak banda nyang ka teutinggai nyan. 8 Óh singoh beungoh bak watée ureuëng Filistin trok keunan keu jijak rampok bubena manyét-manyét nyang ka maté nyan, awaknyan laju meurumpok deungon Raja Saul meunan cit deungon ban lhée droe aneuëk agam gobnyan ka maté di gunong-gunong Gilboa. 9 Awaknyan laju jisut bajée prang nyang mantong meuleukek nibak badan Raja Saul, dan ulée gobnyan laju jikoh nibak takue sampoe putôh, dan uléenyan laju jiba. Óh lheuehnyan awaknyan laju jikirém utosan ubak bansaboh nanggroe ureuëng Filistin keu jijak peusampoe haba nyang jroh nyan ubak bansa dan dewa awaknyan. 10 Bajée prang Raja Saul jikeubah bak saboh kuil awaknyan, dan ulée gobnyan laju jigantung nibak rumoh si Dagon, dewa awaknyan. 11 Bak watée peunduduek Yabes di Gilead jideungoe peue nyang ka jipeubuet lé ureuëng Filistin teuhadab Raja Saul, 12 Ureuëng-ureuëng nyang paleng beurani lom beuhé ngon tungang laju jijakcok manyét Raja Saul dan aneuëk-aneuëk gobnyan, manyét nyan laju jiba u Yabes. Dan manyét nyan laju jipeukubu udalam jrat dimiyueb bak kayée nyang raya, óh lheuehnyan awaknyan laju jipuasa na tujoh uroe treb jih. 13 Raja Saul meuninggai sabab gobnyan hana seutia ubak TUHAN, dan hana geutaát ubak peue nyang ka geupeurintah lé TUHAN ubak gobnyan. Gobnyan hana geulakée peutunyok ubak TUHAN, teuma nyang geulakée na kheueh ubak areuwah-areuwah ureuëng maté. Lé sabab nyan TUHAN geuhuköm gobnyan dan geuseurah takhta gobnyan ubak Nabi Daud aneuëk Isai.

1 Tawarikh 11

1 Banmandum peumimpén bansa Israel jijak ubak Nabi Daud dan laju jipeugah lagéenyoe, "Kamoe nyoe rakan Teungku Amphon. 2 Phon yoh masa ilée, dan hainyoe kana phon yohmantong Raja Saul geumat peurintah ateueh kamoe, Teungku Amphon kheueh nyang pimpén tantra Israel pajan mantong awaknyan jimaju u mideuen prang. Lom teuma TUHAN Po teu Allah Teungku Amphon ka geumeujanji bahwa Teungku Amphon kheueh nyang pimpén umat Gobnyan dan jeuet keuraja awaknyan." 3 Dan óhban geudeungoe habanyan lé Nabi Daud laju geupeugét peujanjian deungon dumna peumimpén bansa Israel nyan. Lé awaknyan geulanték Nabi Daud jeuet keuraja Israel lagée nyang ka geupeujanji lé TUHAN meulalu Samuel. 4 Bak saboh watée Nabi Daud deungon bala tantra gobnyan geujak prang banda Yerusalem. Bak watéenyan banda nyan mantong nan jih Yebus, dan jiduek lé ureuëng Yebus, peunduduek aseuli banda nyan. 5 Ureuëng-ureuëng Yebus ka jipeugah ubak Nabi Daud, bahwa gobnyan hana mungken hase geutamong u dalam banda nyan. Teuma Nabi Daud meuhase geureubot kuta awaknyan nyang nan jih Sion. Bak watéenyan Nabi Daud ka geupeumaklum ubak aneuëk buah gobnyan bahwa ureuëng nyang phon that nyang poh ureuëng Yebus nyang kheueh nyang teuangkat jeuet keu panglima. Dan lé sababnyan Yoab kheueh nyang phon-phon that jak prang Yebus, gobnyan laju teuangkat jeuet keu panglima. (Mak Yoab nan jih Zeruya.) Óh ka lheueh geureupah kuta Sion, Nabi Daud laju tinggai disinan. Nyang kheueh sabab jih kuta nyan phon watéenyan geuboh nan, "Banda Daud". 8 Nabi Daud laju geupeudong lom banda nyan geupeuphon nibak teumpat nyang teupeumanyang deungon tanoh disiblaih utimu bukét; óh lheuehnyan peumbangunan nyan geulanjutkan teuma lé Yoab sampoe seuleusoe. 9 Nabi Daud maken treb maken teuga, sabab TUHAN Nyang Maha Kuasa nyang tulông gobnyan. 10 Nyoe kheueh nan-nan banmandum peuwira Nabi Daud nyang paleng meusyeuhu. Meusajan-sajan deungon banmandum rakyat Israel awaknyan ka jimeujuang mangat Nabi Daud jeuet keuraja lagée nyang ka geupeujanji lé TUHAN. Dan awaknyan hana putôh-putôh jisokong keurajeuen gobnyan. 11 Peuwira nyang awaiphon na kheueh Yasobam ureuëng Hakhmoni, geuhnyan geupimpén "Triwira". Na teujadi nibak saboh mideuen prang gobnyan geulawan 300 droe dan banmandum ureuëng nyan maté jiheuntam ngon kapak. 12 Ureuëng nyang keudua dalam Triwira nyan na kheueh Eleazar aneuëk si Dodo nibak kawöm Ahohi. 13 Dalam mideuen prang di Pas-Damim jimeujuang blaih Nabi Daud jilawan ureuëng Filistin. Bak watée tantra Israel ka jipeuphon peuplueng droe, geuhnyan dan aneuëk buah jih jimeuteun di teungoh-teungoh lampôh gandom dan disinan kheueh jimeu heungkoe meuhabéh-habéh deungon ureuëng Filistin. Laju TUHAN geupeumeunang nyang paleng rayeuk keu gobnyan. 15 Bak siuroe na 3 droe nibak 30 droe peuwira Nabi Daud nyang paleng meugah, jijak meurumpok deungon Nabi Daud di saboh teumpat nyang meukuta nibak saboh gunong batée nyang tô ngon binéh Guha Adulam. Bak watéenyan ureuëng Filistin jipeudong khimah di Pantôn Refaim, dan saboh pasokan nibak awaknyan laju jireubot Betlehem. 17 Nabi Daud gét that meucén keugampông droe geuh sira geupeugah, "Ah, meunyoe keu ulôn geubri lôn jieb ié nyang na didalam mon bak binéh pintoe geureubang di Betlehem." 18 Ban jideungoe habanyan, ban lhée droe peuwira nyan laju jiseureubu ubak khimah-khimah ureuëng Filistin dan laju jicrong ié nyang na didalam mon nyan, óh lheueh nyan ié nyang ka lheueh jicrong nyan laju jiba ubak Nabi Daud. Teuma Nabi Daud hana geutem jieb ié mon nyan, teuma laju geuro sibagoe geupeuseumah keu TUHAN. 19 Nabi Daud geupeugah, "Deumi Allah, ulôn hana ulôn jieb ié mon nyoe! Meunyoe iémon nyoe ulôn jieb, siulah-ulah saban cit lagée ulôn jieb darah ureuëng nyang ka jisabong nyawöng bak jijak cok ié nyoe!" Deungon nyan Nabi Daud meubacut pih hana geutem jieb ié mon nyan. Nyang kheueh jasa-jasa ban lhée droe peujuang nyang peukasa nyan. 20 Ban lhée ploh droe peuwira nyang paleng meusyeuhu nyan na cit teuboh nan nyang laén deungon nan "Tridasawira". Awaknyan jipimpén lé Abisai adoe Yoab. Ka lheueh jicang sampoe maté 300 droe deungon kapak jihnyan, dan kareuna nyan gobnyan meutamah meusyeuhu. Teuma geuhnyan hana saban hebat jih deungon Triwira nyan. 22 Na sidroe peuwira nyang meusyeuhu nyang laén nyang nan jih Benaya aneuëk Yoyada, ureuëng Kabzeel. Gobnyan lumpah ceubeuh ngon beurani. Dua droe pahlawan nyang paleng rayeuk nibak Moab ka jipoh maté. Ka lheueh teujadi bak siuroe nyang meusalju geuhnyan geutamong u dalam saboh guha óh trok lam guha nyan laju geupoh maté saboh singa nyang na didalam guha nyan. 23 Meunan cit gobnyan ka lheueh geupoh maté sidroe ureuëng nibak nanggroe Meusé nyang lumpah rayeuk badan jih; panyang ureuëng Meusé nyan leubeh dua metée. Ureuëng nyan meuseunjata kapak nyang paleng raya, teuma lé Benaya jilawan ureuëng nyan ngon kayée puntong. Kapak nyang na nibak jaroe ureuëng Meusé nyan geuteumé reubot dan ngon kapak nyan kheueh geupoh maté ureuëng Meusé nyan. 24 Nyan kheueh jasa-jasa Benaya, sidroe lamkawan Tridasawira. 25 Lamkawan nyan, Benaya kheueh nyang paleng meugah, teuma gobnyan hana saban hebat jih deungon Triwira. Nabi Daud laju geuangkat geuhnyan jeuet keu ulée peungawai pribadi. 26 Lheueh nyan nyoe na kheueh peuwira-peuwira nyang laén nyang paleng meusyeuhu: Asael adoe Yoab Elhanan aneuëk Dodo ureuëng Betlehem Samot ureuëng Harod Heles ureuëng Peloni Ira aneuëk Ikes ureuëng Tekoa Abiezer ureuëng Anatot Sibkhai ureuëng Husa Ilai ureuëng Ahoni Maharai ureuëng Netofa Heled aneuëk Baana ureuëng Netofa Itai aneuëk Ribai ureuëng Gibea diwilayah sukée Benyamin Benaya ureuëng Piraton Hurai ureuëng pantôn-pantôn Gaas Abiel ureuëng Araba Azmawet ureuëng Bahurim Elyahba ureuëng Saalbon Hasyem ureuëng Gizon Yonatan aneuëk Sage ureuëng Harari Ahiam aneuëk Sakhar ureuëng Harari Elifar aneuëk Ur Hefer ureuëng Mekherati Ahia ureuëng Peloni Hezrai ureuëng Karmel Naarai aneuëk Ezbai Yoël syedara Natan Mibhar aneuëk Hagri Zelek ureuëng Amon Naharai ureuëng Beerot, nyang ba sinjata Yoab Ira dan Gareb ureuëng Yetri Uria ureuëng Het Zabad aneuëk Ahlai Adina aneuëk Siza (sidroe tokoh lam sukée Ruben nyang na pasokan 30 droe) Hanan aneuëk Maakha Yosafat ureuëng Mitni Uzia ureuëng Asytarot Syama dan Yeiel, aneuëk-aneuëk Hotam, ureuëng Aroër Yediael dan Yoha, aneuëk-aneuëk Simri, ureuëng Tizi Eliel ureuëng Mahawim Yeribai dan Yosawya, aneuëk-aneuëk Elnaam Yitma ureuëng Moab Eliel, Obed dan Yaasiel ureuëng Mezobaya.

1 Tawarikh 12

1 Bak watée Nabi Daud geupeuplueng droe nibak Raja Saul, gobnyan geupeu aséng droe u Ziklag. Le that peujuang nyang seutia lom meupeungalaman jijak meugabong deungon gobnyan. 2 Awak nyang teuka nyan nibak sukée Benyamin saban cit lagée Raja Saul. Awaknyan carông that jitimbak aneuk panah meunan cit meunyoe jimeugeulawa -- bah kheueh nyan deungon jaroe uneuen meunan cit deungon jaroe wie. 3 Peumimpén awaknyan na kheueh Ahiezer dan Yoas aneuëk-aneuëk Semaa nibak Gibea. Nyoe kheueh nan-nan peujuang nyan: Yeziel dan Pelet aneuëk-aneuëk Azmawet Berakha dan Yehu ureuëng Anatot Yismaya ureuëng Gibeon, peujuang nyang meusyeuhu nyang jeuet keu sidroe lamkawan peumimpén keulompok "Tridasawira". Yeremia, Yehaziel, Yohanan dan Yozabad ureuëng Gedera Eluzai, Yerimot, Bealya, Semarya dan Sefaca ureuëng Harufi Elkana, Yisia, Azareel, Yoezer dan Yasobam nibak kawöm Korah Yoëla dan Zebaja aneuëk-aneuëk Yeroham ureuëng Gedor. 8 Bak watée Nabi Daud mantong na bak teumpat kuta gobnyan di padang pasi, le that-that peujuang nyang meusyeuhu dan meupeungalaman nibak sukée Gad teuka jijak meupeusaho droe deungon gobnyan. Awaknyan na kheueh peujuang-peujuang nyang lumpah carông jipeuguna peurisai dan kapak; awaknyan deuh jih ceubeuh-ceubeuh ngon beurani lagée singa dan grak awaknyan saban lagée rusa. 9 Nyoe kheueh nan-nan awaknyan nyang geususon meunurot pangkat: Ezer, Obaja, Eliab, Mismana, Yeremia, Atai, Eliel, Yohanan, Elzabad, Yeremia, Makhbanai. 14 Siladum nibak ureuëng-ureuëng Gad nyan na kheueh peuwira-peuwira manyang na aneuëk buah 1.000 droe; dan siladum teuk na kheueh peuwira-peuwira nyang na aneuëk buah 100 droe. 15 Ka lheueh teujadi nibak buleuen sa, bak watée Krueng Yordan teungoh jiék ié raya teuma peuwira-peuwiranyan laju jijak jeumeurang lam krueng nyan dan jiuse laju bubena peunduduek nyang na tinggai di pantôn-pantôn nyan bah kheueh nyan nyang na tinggai disiblaih utimu meunan cit nyang na tinggai disiblaih ubarat krueng nyan. 16 Bak saboh watée na saboh kawan ureuëng nibak sukée Benyamin dan sukée Yehuda jijak ubak kuta Nabi Daud. 17 Nabi Daud laju geujak meurumpok ngon awaknyan sira geupeugah, "Meunyoe gatanyoe tateuka sibagoe rakan keu tajak tulông ulôn, silakan tameugabong deungon kamoe. Kamoe sambot gatanyoe deungon sigala mangat até. Teuma meunyoe gatanyoe ngon niet nyang jeuhet takeuneuk khianat ulôn ubak musoh, bahpi ulôn hana lôn peubuet jeuhet ateueh gata, Po teu Allah nyang geuseumah lé indatu geutanyoe geuteupeue nyan, dan gobnyan teuma geuhuköm gata nyoe." 18 Sidroe lamkawan awaknyan, nyang nan jih Amasai, nyang óh dudo jeuet keupeumimpén keulompok nyang teuboh nan "Tridasawira", ka jikuasa lé Roh Po teu Allah laju jipeugah, "Daud, aneuëk Isai! kamoe banmandum kamoe tulông gata! Seumoga gata dan awaknyan nyang jibantu gata meuhase. Po teu Allah na blaih gata!" Dan ban geudeungoe habanyan Nabi Daud laju geusambot awaknyan dan geu baiát laju awaknyan jeuet keupeuwira gobnyan. 19 Bak watée Nabi Daud meusajan deungon ureuëng Filistin geujak prang Raja Saul, siladum nibak tantra sukée Manasye jijeumeurang blaih Nabi Daud. Nyang seubeuna jih Nabi Daud hana geubantu ureuëng-ureuëng Filistin nyan. Lé peumimpén Filistin jiyue woe gobnyan u Ziklag sabab awaknyan jitakot gobnyan geupaleng geudong blaih Raja Saul dan jikhianat awaknyan. 20 Nyoe kheueh nan-nan ureuëng peujuang nibak sukée Manasye nyang jidong blaih Nabi Daud bak watée gobnyan teungoh geujak u Ziklag: Adnah, Yozabad, Yediael, Mikhael, Yozabad, Elihu dan Ziletai. Maséng-maséng awaknyan na jiba tantra 1.000 droe. 21 Awaknyan na kheueh peujuang nyang paleng peukasa dan nyang tulông Nabi Daud geulawan geurombolan. Teuma óh dudo awaknyan ka jeuet keu peuwira-peuwira didalam angkatan prang Israel. 22 Rab tieb-tieb uroe na mantong ureuëng nyang jijak meugabong deungon Nabi Daud, dan hana treb óh lheuehnyan pasokan Nabi Daud ka lumpah rayeuk. 23 Bak watée Nabi Daud di Hebron le that-that peujuang nyang ka teulateh nyang jijak meugabong deungon gobnyan. Awaknyan jijak tulông gobnyan mangat gobnyan jeuet keuraja keugeunantoe Saul, paih lagée janji TUHAN. Jeumeulah awaknyan na kheueh lagéenyoe: nibak sukée Yehuda: 6.800 droe, leungkab deungon peurisai dan kapak. Nibak sukée Simeon: na 7.100 droe nyang ka teulateh. Nibak sukée Lewi: 4.600 droe. Aneuëk buah Yoyada jipimpén keuturonan Nabi Harun: na 3.700 droe. Kawöm syedara Zadok, ureuëng peujuang muda nyang beuhé ngon beurani: 22 droe -- banmandum nyan na kheueh ulée keuluwarga. Nibak sukée Benyamin (sukée Raja Saul): na 3.000 droe; nyang leubeh le nibak sukée Benyamin teutab seutia ubak Raja Saul. Nibak sukée Efraim: na 20.800 droe ureuëng nyang paleng meusyeuhu didalam kawöm jih maséng-maséng. Nibak sukée Manasye nyang na tinggai disiblaih ubarat Krueng Yordan: na 18.000 droe nyang jitunyok mangat jijak baiát Nabi Daud jeuet keuraja. Nibak sukée Isakhar: na 200 droe peumimpén meusajan deungon aneuëk buah gobnyan; peumimpén-peumimpén nyoe carông that jipeu teuntée peue nyang harôh jipeubuet lé rakyat Israel bak watée nyang paih. Nibak sukée Zebulon: na 50.000 droe nyang that-that carông jipeuguna peue mantong alat sinjata, dan siab keujijak muprang; awaknyan na kheueh ureuëng-ureuëng nyang seutia dan teupeucaya. Nibak sukée Naftali: na 1.000 droe peumimpén meusajan deungon 37.000 tantra nyang leungkab deungon peurisai dan kapak. Nibak sukée Dan: na 28.600 droe nyang ka teulateh. Nibak sukée Asyer: na 40.000 droe nyang ka siab keujijak muprang. Nibak sukée-sukée nyang na tinggai disiblaih u timu Krueng Yordan, na kheueh Ruben, Gad dan seubagian nibak sukée Manasye: 120.000 nyang that-that carông jingui mubagoe alat sinjata. 38 Banmandum peujuang nyan jijak laju u Hebron lam keuadaan siab muprang dan ka meuteukat keuneuk jibaiát Nabi Daud jeuet keuraja di bansaboh nanggroe Israel. Dan banmandum ureuëng Israel nyang laén pih ka si até keuneuk jipeubuet nyang lagéenyan. 39 Na lhée uroe treb jih peujuang-peujuang nyan tinggai disinan deungon Nabi Daud sira jimakheun peunajoh ngon ié jieb nyang ka teukeubah keu awaknyan lé ureuëng Israel nyang laén. 40 Nibak sukée-sukée utara nyang jiôh pi na kheueh nibak sukée Isakhar, Zebulon dan Naftali, awaknyan laju jijak sira jipasang keuleudée, unta, bagal, dan leumô nyang peunoh deungon barang peunajoh nyang teupeudieng di ateueh rhueng jih: lamkawan barang-barang peunajoh nyan na kheueh: teupông, boh ara, boh kismis, anggô dan minyéuk zaiton. Dan meunan cit awaknyan jiba sajan leumô ngon bubiri mangat teusie dan teupajoh. Banmandum nyan na kheueh sibagoe tanda padubna galak jih rakyat di banmandum nanggroe Israel.

1 Tawarikh 13

1 Raja Nabi Daud laju geupeuna pakat deungon banmandum peuwira gobnyan bah kheueh nyang na aneuëk buah 1.000 droe meunan cit nyang na aneuëk buah 100 droe. 2 Laju gobnyan geupeugah ubak banmandum peuwiranyan, "Meunyoe gatanyoe banmandum situju, dan geupeu idhin lé Po teu Allah geutanyoe, pakriban meunyoe ta kirém sidroe utosan ubak bubena teungku imeum dan ureuëng-ureuëng Lewi di gampông-gampông awaknyan, meunan cit ubak banmandum bansa geutanyoe nyang laén mangat tayue teuka awaknyan jijak meugumpôi deungon geutanyoe disinoe. 3 Óh lheuehnyan tajak cok laju Peuto Peujanjian Allah, nyang ka jipeubiyeu teutiek meunan mantong watée keurajeuen nanggroe geumat lé Raja Saul." 4 Banmandum ureuëng Israel nyang meugumpôi nyan galak that-that dan usuinyan jiteurimong seucara bulat. 5 Dan Nabi Daud laju geupeusapat rakyat Israel bansaboh nanggroe, phon nibak bataih di nanggroe Meusé di seulatan sampoe trok u Hamat di utara, mangat teujakcok Peuto Peujanjian TUHAN nyan nibak Kiryat-Yearim dan teuba laju u Yerusalem. 6 Dan Nabi Daud laju geujak meusajan deungon awaknyan u banda Baala, nyan kheueh Kiryat-Yearim, didalam wilayah sukée Yehuda mangat teujakcok Peuto Peujanjian Allah. Peuto nyan geuboh nan na kheueh "TUHAN nyang meutahta di ateueh Kerub". 7 Óh watée ka trok gobnyan u Baala, awaknyan laju jicok Peuto Peujanjian nyan lam rumoh Abinadab, dan jipeu-ék laju u ateueh geureubak peudati nyang mantong barô. Uza dan Ahyo ji-iréng geureubak peudati nyan rot likot, 8 seudangkan Nabi Daud dan banmandum bansa Israel laju geulikak ngon meunari sira geumeu ca-e ngon peunoh seumangat, keu geubri horeumat ubak Po teu Allah sira geuseukok keucapi, rapa-i, simbal dan beureuguih. 9 Bak watée awaknyan ka trok ubak teumpat ureuëng ceumeulo aneuk gandom atra si Kidon, leumô-leumô nyang teungoh jitarek geureubak nyan laju meugantoh, dan Uza laju jisunyueng jaroe jih sira jimat Peuto Peujanjian nyan mangat bék rhot bak tanoh. 10 Bak watéenyan cit teuma TUHAN beungéh keu Uza sabab buet jihnyan na kheueh sibagoe teuhina keu TUHAN. Dan Uza pih laju geupoh maté disinan lé TUHAN. Dan phon watéenyan teumpat nyan geuboh nan "Peres-Uza". Nabi Daud beungéh that-that sabab TUHAN ka geupeubinasa Uza. 12 Teuma Nabi Daud geutakot cit keu Po teu Allah sira geupeugah, "Jinoenyoe pakriban cara jih Peuto Peujanjian nyan mangat hase ulôn ba?" 13 Lé sababnyan Nabi Daud hana jeuet geuba Peuto Peujanjian TUHAN nyan u Yerusalem, teuma geukeubah mantong di rumoh Obed-Edom, ureuëng Gat. 14 Peuto nyan tinggai disinan na lhée buleuen treb jih dan TUHAN laju geubri beureukat keu keuluwarga Obed-Edom meunan cit deungon banmandum nyang na hareuta gobnyan.

1 Tawarikh 14

1 Raja Hiram nibak nanggroe Tirus geukirém duta-duta gobnyan ubak Nabi Daud, meunan cit deungon kayée ceumara Libanon dan tukang-tukang kayée meunan cit deungon tukang batée keujijak peugöt meuligoe. 2 Lé sabab nyan Nabi Daud meutamah yakén bahwa TUHAN ka geupeukong gobnyan sibagoe raja Israel dan geupeuteuga keurajeuen gobnyan keu keupeuntengan umat TUHAN. 3 Di Yerusalem Nabi Daud geumeukawen lom deungon napadub droe ureuëng inong, dan nibak ureuëng inong nyang geumeukawen nyan gobnyan na geumeu aneuëk lom. 4 Aneuëk-aneuëk agam gobnyan nyang lahé di Yerusalem na kheueh: Syamua, Sobab, Natan, Nabi Sulaiman, 5 Yibhar, Elisua, Elpelet, 6 Nogah, Nefeg, Yafia, 7 Elisama, Beelyada dan Elifelet. 8 Bak watée jideungoe lé ureuëng Filistin bahwa Nabi Daud ka teubaiát jeuet keuraja ateueh bansaboh nanggroe Israel, awaknyan laju jiteuka jikeuneuk jak drob gobnyan. Lé sababnyan Nabi Daud laju geuteubiet geujak muprang deungon ureuëng nyan. 9 Bak watée nyan ureuëng Filistin ka trok ubak Pantôn Refaim dan laju jireubot pantôn nyan. 10 Ban geudeungoe lagée nyan Nabi Daud laju geuteumanyong ubak Po teu Allah, "TUHAN, peu kheueh harôh ulôn prang ureuëng Filistin nyan? Dan peu kheueh TUHAN neupeumeunang keu ulôn?" "Nyoe, jak prang laju!" geujaweueb lé TUHAN. "Ulôn na blaih gata!" 11 Dan Nabi Daud deungon pasokan gobnyan laju geujak prang bubena ureuëng Filistin nyan di Baal-Perasim dan laju geupeutaloe awaknyan. Geupeugah kheueh lé Nabi Daud, "Allah ka geupeuguna ulôn mangat lôn jak heuntam peutahanan musoh lagée ié raya nyang jipeuhanyot peue mantong lam watée sikeujab." Nyang kheueh sabab jih teumpat nyan geuboh nan Baal-Perasim. 12 Bak watée pasokan Filistin ka jiplueng, awaknyan hana meuteumé jiba patong-patong beurala droe jih. Lé Nabi Daud laju geupeurintah bubena patong nyan geuyuetot banmandum. 13 Hana treb teuma óh lheuehnyan teuka lom ureuëng Filistin dan jireubot lom Pantôn Refaim. 14 Sigoeteuk Nabi Daud geulakée peutunyok ubak Po teu Allah, dan Po teu Allah laju geujaweueb, "Bék gata prang awaknyan rot nyoe, teuma tajak kheueh sira gata wet dan prang kheueh awaknyan rot meurandeh jéh, nyang tô ngon binéh bak kayée meureubo. 15 Meunyoe gata na deungoe su tapak lagée su ureuëng nyang teungoh mubareh di ateueh pucök-pucök bak kayée nyan, gata maju dan tapeurab kheueh laju, sabab Ulôn na Lôn jak dikeue gata keu Lôn jak peutaloe ureuëng Filistin." 16 Nabi Daud laju geupeubuet peue nyang ka geupeurintah lé Po teu Allah ubak gobnyan. Gobnyan dan pasokan geuh geuseupôt dan jisurot tantra Filistin phon nibak Gibeon sampoe trok u Gezer. 17 Lé sababnyan meugah kheueh nan Nabi Daud dipat mantong, dan TUHAN laju geupeutakot bubena bansa laén keu Nabi Daud.

1 Tawarikh 15

1 Nabi Daud laju geupeugöt rumoh-rumoh keu droe gobnyan di Banda Daud, dan geupeusiab teumpat keu Peuto Peujanjian Allah dan laju geupasang khimah keuteumpat Peuto nyan. 2 Nabi Daud geupeugah, "Teuma ureuëng Lewi mantong nyang jeuet beuôt Peuto Peujanjian TUHAN, sabab awaknyan kheueh nyang ka geupiléh lé TUHAN keu jiseuôn Peuto nyan dan jimeungabdi ubak Gobnyan siumu masa." 3 Lé nyan teuma Nabi Daud laju geutawök banmandum ureuëng Israel mangat jijak u Yerusalem mangat jijak pinah Peuto Peujanjian TUHAN u teumpat nyang ka geupeusiab. 4 Nabi Daud laju geuyue keuturonan Nabi Harun dan ureuëng Lewi mangat jimeusapat. 5 Dan nibak kawöm Kehat, sukée Lewi, teuka kheueh Uriel nyang jipimpén 120 droe. 6 Nibak kawöm Merari teuka teuma Asaya nyang jipimpén 220 droe. 7 Nibak kawöm Gerson teuka Yoël nyang jipimpén 130 droe. 8 Nibak kawöm Elsafan teuka teuma Semaya nyang jipimpén 200 droe. 9 Nibak kawöm Hebron teuka teuma Eliel nyang jiba 80 droe. 10 Nibak kawöm Uziel teuka teuma Aminadab nyang jiba 112 droe. 11 Lé Nabi Daud laju geurawok Teungku Imeum Zadok dan Teungku Imeum Abyatar dan ban nam droe ureuëng Lewi: Uriel, Asaya, Yoël, Semaya, Eliel dan Aminadab. 12 Kheun Nabi Daud ubak awaknyan, "Gatanyoe na kheueh peumimpén kawöm nibak sukée Lewi. Kareuna nyan, bah kheueh gata dan ureuëng-ureuëng Lewi nyang laén jijak peusuci droe mangat jeuet tapinah Peuto Peujanjian TUHAN, Allah Israel, u teumpat nyang ka ulôn seudia. 13 Bak waée Peuto nyan keu nyang keuphon that teupinah, gata hana disinan keu gataba. Lé sabab nyan, TUHAN, Po teu Allah geutanyoe, geuhuköm tanyoe sabab tanyoe taseumah Gobnyan hana beutôi lagée kheun Gobnyan." 14 Deungon nyan teuma, lé teungku imeum dan ureuëng Lewi laju jijak peugleh droe mangat jeuet jipinah Peuto Peujanjian TUHAN, Allah Israel. 15 Dan bak watée Peuto nyan teupinah, awaknyan laju jibeuôt u ateueh ulôn ngon kayée geunulam, nyan na kheueh meunurot peuratoran nyang ka geubri lé TUHAN meulalu Nabi Musa. 16 Dan meunan cit lé Nabi Daud geubri tugaih keu bak padubdroe peumimpén ureuëng Lewi nyan mangat jibri tugaih keu ureuëng nibak sukée jihnyan mangat jimeuca-e ngon jipeumeu-én lagu-lagu geumbira keu keucapi dan simbal. 17 Lamkawan keuluwarga-keuluwarga nyang meuca-e nyan, awaknyan geupiléh ureuëng-ureuëng nyang teupeugah lom nyoe keu jipeumeu-én simbal peurunggu: Heman aneuëk Yoël meusajan deungon kawöm syedara jih nyang nan Asaf aneuëk Berekhya, dan Etan aneuëk Kusaya nibak kawöm Merari. Keu teuiréng awaknyan dan teupeumeu-én keucapi ngon nada su nyang manyang jipiléh ureuëng-ureuëng Lewi nyang teupeugah nan jih lagéenyoe: Zakharia, Yaaziel, Semiramot, Yehiel, Uni, Eliab, Maaseya, dan Benaya. Keu ureuëng peumeu-én keucapi nyang meusu ngon nada nyang miyueb geupiléh teuma ureuëng-ureuëng Lewi nyang nan-nan gobnyan nyang teupeugah lom nyoe: Matica, Elifele, Mikneya, Azazya, dan dua droe ureuëng kawai Baét TUHAN, awaknyan na kheueh Obed-Edom dan Yeiel. 22 Kenaya teupiléh keu ureuëng nyang jeuet keu ulée ureuëng nyang meu-én musik nibak sukée Lewi nyan, sabab gobnyan na kheueh malem keuhai musik. 23 Berekhya dan Elkana meusajan deungon Obed-Edom dan Yehia teupiléh jeuet keu ureuëng kawai Peuto Peujanjian TUHAN. Teungku imeum nyang teupeugah lom nyoe: Sebanya, Yosafat, Netaneel, Amasai, Zakharia, Benaya dan Eliezer teupiléh keu ureuëng nyang yueb beureuguih dikeue peuto nyan. 25 Dan geujak kheueh laju Nabi Daud meusajan deungon peumimpén Israel dan peuwira-peuwira u rumoh Obed-Edom keu geujakcok Peuto Peujanjian nyan deungon geupeuna peurayaan nyang paleng meugah. 26 Na tujoh boh leumô agam dan tujoh boh teuma bubiri geupeuseumah keu Po teu Allah sabab Gobnyan ka geutulông ureuëng Lewi nyang beuôt Peuto Peujanjian nyan. 27 Bak watée nyan Nabi Daud geungui bajée jubah nyang teupeugöt nibak ija lineun nyang halôh, meunan cit deungon ureuëng nyang peumeu-én alat musik dan Kenaya peumimpén awaknyan dan ureuëng-ureuëng Lewi nyang beuôt Peuto Peujanjian nyan. Meunan cit deungon Nabi Daud geungui bajée Efod. 28 Banmandum umat Israel jijak iréng Peuto Peujanjian nyan sampoe u Yerusalem deungon su seumurak nyang meuhubo, su beureuguih, siruné, simbal dan su keucapi. 29 Bak watée Peuto nyan teungoh geuba jipeutamong u dalam banda, Mikhal putroe Raja Saul jicingék nibak peuradeuen dan deuh laju jikalon Nabi Daud teungoh geumeulikak ngon geumeunari nyang meusukaria. Lé Mikhal gét that luwat geungieng buet Nabi Daud nyan.

1 Tawarikh 16

1 Peuto Peujanjian nyan geukeubah didalam khimah nyang ka geuseudia lé Nabi Daud keu Peuto nyan. Laju awaknyan jipeuseumah keu Allah keureubeuen nyang teutot dan keureubeuen peudaméan. 2 Óh ka lheueh Nabi Daud seuleusoe geupeuseumah keureubeuen-keureubeuen nyan, lé gobnyan laju geubri beureukat keu rakyat ateueh nan TUHAN, 3 dan óh lheuehnyan geubagi-bagi laju peunajoh keu awaknyan banmandum. Soe mantong ureuëng nyang na disinan bah kheueh nyan ureuëng agam meunan cit ureuëng inong meuteumé jeumba sikrak uengkot sie panggang, ruti dan juadah kismis. 4 Nabi Daud geu baiát teuma na meupadubdroe Lewi keu jipimpén upacara iébadat ubak TUHAN, Allah Israel, dikeue Peuto Peujanjian nyan, deungon meunyanyoe dan seumah ngon pujo. 5 Asaf geupiléh sibagoe peumimpén nyang phon dan Zakharia sibagoe waki gobnyan. Yeiel, Semiramot, Yehiel, Matica, Eliab, Benaya, Obed-Edom dan Yeiel geubri tugaih keu jipeumeu-én alat keucapi. Seudangkan Asaf geubri tugaih keu teupeumeu-én simbal, 6 dan dua droe teungku imeum, na kheueh Benaya dan Yahaziel, geubri tugaih seucara teutab geuyueyueb beureuguih dikeue Peuto Peujanjian nyan. 7 Nyang kheueh phon-phon that Nabi Daud geubri tugaih keu Asaf dan rakan-rakan gobnyan mangat jeuet jimeuca-e lagée nyang teupujo keu TUHAN. 8 Meusyukoe kheueh ubak TUHAN tapeusampoe kheueh keubeusaran Gobnyan, tapeugah kheueh buet-buet Gobnyan ubak bansa-bansa. 9 Tameuca-e ngon tameunyanyoe kheueh puja ngon pujo ubak TUHAN, tapeusampoe kheueh peue mantong buet-buet Gobnyan nyang luwa biasa. 10 Gobnyan kheueh TUHAN Nyang Mahaesa; meusuka cita kheueh, sabab geutanyoe nyoe na kheueh milék Gobnyan; soemantong nyang jiseumah Gobnyan bah kheueh ji meusukaria ngon geumbira. 11 Lakée kheueh teunaga nibak Gobnyan, seumah kheueh Gobnyan bubekna reuda. 12 Hai keuturonan Nabi Yakub, hamba Po teu Allah! Hai keuturonan Israel, umat nyang ka geupiléh! Ingat kheueh banmandum buet nyang ajaéb nyang ka geupeubuet, bék kheueh tuwoe ubak peue nyang ka geupeuputôh. 14 TUHAN na kheueh Po teu Allah geutanyoe, keuputosan Gobnyan teutab teungui bansigom donya. 15 Gobnyan sabe geuingat ubak janji Gobnyan, janji Gobnyan teutab teungui keu siumu masa. 16 Peujanjian nyan ka lheueh geupeugöt deungon Nabi Ibrahim, dan óh lheuehnyan teuma deungon Nabi Ishaq, 17 laju geupeukong janjinyan deungon Nabi Yakub, jeuet keujanji nyang keukai keu umat Israel. 18 Kheun Gobnyan, "Tanoh Kanaan teuma Ulôn bri keu gata jeuet keuhak milék pusaka gata." 19 Yohmasa ilée umat TUHAN udeb lagée ureuëng aséng di nanggroe nyan jeumeulah awaknyan na bacut that-that. 20 Awaknyan jijak meurawöh nibak saboh bansa ubak bansa nyang laén, jiminah nibak saboh nanggroe ubak nanggroe nyang laén. 21 Teuma TUHAN hana geupeubiyeu soe mantong nyang jikeuneuk teugon awaknyan; deumi awaknyan, dumna raja-raja ka geupeuingat, 22 "Bék tapeukaru ureuëng-ureuëng nyang ka Ulôn piléh, bék tapeubuet buet nyang jeuhet ateueh nabi-nabi Ulôn." 23 Meuca-e ngon meutaseubéh kheueh keu TUHAN, hai bumoe nyoe banmandum, tieb-tieb uroe tajak peumaklum kheueh haba geumbira bahwa Gobnyan ka geupeuseulamat geutanyoe. 24 Tajak peugah kheueh keuagongan Gobnyan ubak mandum bansa, dan buet-buet Gobnyan nyang peukasa keu umat manusia. 25 Sabab TUHAN lumpah that raya dan lumpah teupujo; Gobnyan harôh tatakot beuleubeh nibak tatakot keu dewa. 26 Dewa-dewa bansa laén na kheueh patong beurala teuma TUHAN na kheueh nyang cebta angkasa raya. 27 Gobnyan peunoh deungon keuagongan dan keumuliaan, rumoh Gobnyan peunoh deungon kuasa dan suka cita. 28 Pujoe kheueh TUHAN, hai umat manusia! Pujoe kheueh keuagongan dan teunaga Gobnyan. 29 Pujoe kheueh nan Gobnyan nyang mulia, dan taba kheueh keureubeuen u baét Gobnyan. Seumah kheueh TUHAN deungon tangui peukayan iébadat! 30 Beuyo kheueh gata meunyoe dikeue Gobnyan, hai banmandum donya! Bumoe nyoe kukoih hán ék so guncang. 31 Hai langét ngon bumoe, meugeumbira kheueh! Tapeugah kheueh ubak bansa-bansa bahwa TUHAN nyan Raja! 32 Hai bakat ngon geulumbang di laôt meugeumuroh kheueh meusigoe ngon asoe jih! Meusukacita kheueh hai padang deungon banmandum seunaman! 33 Bak-bak kayée nyang na diglé teuma jiseumurak geumbira sabab TUHAN ka teuka keu geujak peurintah bumoe. 34 Meusyukoe kheueh ubak TUHAN sabab Gobnyan jroh that; geunaséh Gobnyan keukai dan abadi. 35 Tapeugah kheueh, "Ya Allah, Peuseulamat kamoe, neupeuseulamat kheueh kamoe nibak keukuasaan bansa-bansa dan neupeusapat kheueh kamoe lom mangat kamoe jeuet kamoe ucab syukoe dan kamoe pujoe nan Droeneueh nyang suci!" 36 Pujoe kheueh TUHAN, Allah Israel, phon saátnyoe sampoe siumu masa! awaknyan jipujoe TUHAN. 37 Óh lheuehnyan lé Raja Nabi Daud geubri tugaih keu Asaf dan ureuëng-ureuëng Lewi nyang laén mangat teutab jiuruih hai-hai nyang na sangkot paôt jih deungon iébadat di teumpat Peuto Peujanjian TUHAN teukeubah. Tieb-tieb uroe awaknyan harôh meutugaih disinan, 38 jitulông lé Obed-Edom aneuëk Yedutun, dan 68 droe nyang laén nyang saboh kawöm deungon gobnyan. Obed-Edom dan Hosa na kheueh nyang kawai babah pintoe geureubang. 39 Teuma Zadok dan teungku-teungku imeum nyang laén nyang geubri tugaih keu teutab teu-uroih iébadat di teumpat iébadat di Gibeon. 40 Tieb-tieb beungoh dan seupôt awaknyan harôh jipeuseumah keureubeuen nyang teutot di ateueh miseubah nyang sisuai deungon huköm-huköm nyang geubri lé TUHAN keu ureuëng Israel. 41 Teungku Imeum Zadok dan teungku-teungku imeum nyan deungon jitulông lé Heman dan Yedutun meunan cit deungon ureuëng-ureuëng nyang laén nyang khusos teupiléh keu ureuëng nyang meuca-e puja ngon pujo keu TUHAN sabab geunaséh Geuh nyang keukai dan abadi. 42 Meunan cit deungon Heman dan Yedutun jimeutugaih nibak beureuguih, simbal dan alat musik nyang laén nyang teupeumeu-én keu teuiréng ca-e ngon nyanyoe puja dan pujo nyan. Anggota-anggota kawöm Yedutun geubri tugaih mangat jikeumiet babah pintoe geureubang. 43 Óh ka lheueh nyan jiwoe kheueh mandum ureuëng u rumoh jih maséng-maséng. Meunan cit deungon Nabi Daud geujakwoe u rumoh geuh geujak saweue keuluwarga gobnyan.

1 Tawarikh 17

1 Óh ka lheueh Nabi Daud tinggai teutab nibak meuligoe gobnyan, bak siuroe gobnyan geutawök Nabi Natan u meuligoe geuh sira geupeugah, "Ngieng kheueh, ulôn nyoe tinggai didalam meuligoe nyang teupeugöt nibak kayée ceumara Libanon, seudangkan Peuto Peujanjian TUHAN teumpat jih na didalam khimah!" 2 Geujaweueb lé Nabi Natan, "Neupeubuet kheueh laju peue mantong nyang ka Teungku Amphon niet sabab Po teu Allah geutulông Teungku Amphon." 3 Teuma nibak malam nyan Allah meufeureuman ubak Nabi Natan, 4 "Gata jak kheueh dan tapeusampoe kheueh ubak hamba Ulôn Nabi Daud peusan Ulôn nyang lagéenyoe, 'Bukon gata nyang peudong baét keu Ulôn. 5 Phon that bansa Israel Ulôn peubeubaih nibak nanggroe Meusé sampoe nibak saátnyoe, hántom na Ulôn tinggai lam saboh-saboh baét. Teuma sabe Ulôn jak meurawöh ho-ho mantong dan tinggai Ulôn didalam khimah. 6 Bak watée Ulôn meurawöh meusajan deungon bansa Israel hántom na Ulôn teumanyong ubak peumimpén-peumimpén nyang ka Ulôn piléh, peue sabab jih awaknyan hana jipeudong meusaboh baét nyang teupeugöt nibak kayée ceumara Libanon keu Ulôn.' 7 Lé sabab nyan, hai Natan, tajak peugah kheueh laju ubak hamba Ulôn Nabi Daud nyan, bahwa Ulôn, TUHAN Nyang Mahakuasa, Lôn peugah ubak jihnyan, 'Gata ka Ulôn cok nibak buet gata sibagoe ureuëng rabe bubiri di padang naleueng, dan Ulôn beuôt jeuet keuraja ateueh umat Ulôn Israel. 8 Ulôn ka Ulôn tulông gata homantong nyang gatajak, dan somantong musoh gata habéh Ulôn peuranab bak watée gata muprang. Gata Ulôn peujeuet keu ureuëng nyang lumpah meusyeuhu lagée peumimpén-peumimpén nyang paleng raya di ateueh donya. 9 Keu umat Ulôn Israel ka lheueh Ulôn keubah teumpat mangat jeuet keutanoh ié awaknyan mangat awaknyan hase udeb teunang dan hana jipeukaru lé gob. Seumeunjak awaknyan jiteuka ubak tanoh nyoe yoh masa ilée, dan sigohlom awaknyan na raja, awaknyan sabe jiprang lé ureuëng-ureuëng nyang galak that ubak buet nyang karu. Teuma hainyan hana teujadi le. Ulôn meunjanjoe teuma Ulôn peutaloe banmandum musoh gata, dan Ulôn bri keuturonan keu gata. 11 Singoh, meunyoe ka sampoe ajai gata dan gata jitanom lam jrat indatu gata, sidroe lamkawan aneuëk agam gata teuma Ulôn baét jeuet keuraja. Jihnyan kheueh nyang peudong rumoh keu Ulôn. Kerajeuen geuhnyan teuma Ulôn peuteuga, dan keu siumu masa ureuëng nibak keuturonan geuhnyan kheueh nyang hase jeuet keuraja. 13 Ulôn teuma jeuet keu Bapak jih dan jihnyan teuma jeuet keu Aneuëk Ulôn. Ulôn teuma teutab Lôn peubuet nyang jroh ubak jihnyan sisuai ngon janji Ulôn. Janji Ulôn ubak jihnyan teutab Lôn mat, hana lagée nyang Ulôn peubuet ateueh Saul nyang ka Ulôn géesée nibak teumpat duek jih mangat gata jeuet keu raja. 14 Aneuëk agam gata nyang Ulôn piléh nyan teuma Ulôn peujeuet keuraja ateueh umat Ulôn dan keurajeuen Ulôn keu siumu masa, dan aneuëk cucoe gata truen meutruen teuma jimat keurajeuen sibagoe raja.' " 15 Nabi Natan geupeugah nyan banmandum ubak Nabi Daud peue nyang ka geupeugah lé Allah ubak gobnyan. 16 Dan geutamong kheueh laju Nabi Daud u dalam Khimah TUHAN. Óh trok keunan laju geuduek sira geumeudoá, "Ya Allah, TUHAN ulôn, ulôn dan keuluwarga ulôn hana patot lôn teurimong keubajekan nyang TUHAN tunyok keu kamoe lagée nyang ka-ka nyoe. 17 Teuma TUHAN ka neupeubuet leubeh nibak nyang ka; Droeneueh ka neupeugöt janji keuhai keuturonan ulôn keu masa nyang ukeue teuka. Nyang leubeh lom Droeneueh ka neupeusaneut ulôn sibagoe ureuëng rayeuk. 18 Peu kheueh lom nyang jeuet ulôn peugah keu Droeneueh, ya TUHAN Allah? Droeneueh neuteupeue peue mantong keuhai hamba Droeneueh nyoe, teuma Droeneueh teutab neubri peunghormatan keu ulôn. 19 Ateueh keuheundak Droeneueh keudroe dan keu keupeuntengan ulôn Droeneueh ka neupeubuet banmandum buet-buet nyang rayeuk nyoe deungon trok trang. 20 Teuma Droeneueh kheueh Allah, hana laén nyang na saban deungon Droeneueh. Kamoe meuteupeue hainyan sabab ka teubri tée phon yoh awai ilée. 21 Bansaboh bumoenyoe hana bansa nyang sa deungon bansa Israel. Israel na kheueh saboh bansa nyang ka TUHAN peubeubaih nibak jeuet keunamiet mangat jeuet keu umat Droeneueh nyang teupiléh. Banmandum buet nyang raya dan ajaéb nyang ka TUHAN peubuet keu awaknyan deungon nyan ka teupeujeuet nan TUHAN meutamah meusyeuhu bansaboh donya. Droeneueh ka neupeulheuh umat droeneueh nibak nanggroe Meusé, dan neukireueh bansa-bansa laén bak watée awaknyan jimaju u mideuen prang. 22 Bansa Israel ka neupeujeuet keu umat Droeneueh keudroe keu siumu masa. Dan Droeneueh ya TUHAN, ka jeuet keu Po teu Allah awaknyan. 23 Jinoenyoe, ya TUHAN Allah, ulôn meuharab neupeukong kheueh keu siumu masa janji nyang ka TUHAN peugah keuhai ulôn dan keuturonan ulôn. Ulôn meuharab neupeubuet kheueh laju janji nyang ka TUHAN peugah nyan. 24 Dipat mantong ureuëng ramé sabe jipeu agong nan Droeneueh sira jipeugah, 'TUHAN Nyang Mahakuasa na kheueh Allah ateueh Israel.' Keu siumu masa sidroe lamkawan keuturonan ulôn teuma TUHAN peujeuet jimat peurintah sibagoe raja. 25 Ulôn peubeurani droe ulôn lôn lakée doányoe u hazirat Droeneueh, ya Allah, sabab Droeneueh keudroe ka lheueh nepeugah ubak ulôn bahwa aneuëk cucoe ulôn truen meutruen teuma TUHAN peujeuet keuraja ateueh bansa nyoe. 26 Droeneueh, TUHAN, na kheueh Allah, dan hai nyang jroh nyan ka TUHAN peujanji keu ulôn. 27 Lé sabab, ulôn meuharab, bah kheueh neubri beureukat keuturonan ulôn mangat siumu masa awaknyan teutab jirasa geunaséh Droeneueh. Sabab, Droeneueh ka neubri beureukat keu umat Droeneueh, ya TUHAN, deungon nyan awaknyan teutab geubri beureukat keu siumu masa."

1 Tawarikh 18

1 Hana padubna treb teuma óh lheuehnyan Raja Nabi Daud laju geujak prang ureuëng Filistin sampoe taloe dan banda Gad geuteumé reubot meunan cit deungon gampông-gampông nyang na tô-tô disinan banmandum habéh geureupah. 2 Meunan cit deungon ureuëng Moab ka habéh geupeutaloe lé Nabi Daud seuhingga ureuëng Moab nyan jibayeue upeti keu gobnyan. 3 Óh lheueh nyan Nabi Daud laju geupeutaloe Hadadezer, nyang mat keurajeuen di Zoba tô ngon wilayah Hamat di nanggroe Siria. Bak watéenyan Hadadezer teungoh jijak keuneuk jak reupah wilayah nyang tô deungon pucok Krueng Efrat. 4 Lam prang nyan Nabi Daud geuteumé reubot 1.000 boh geuritan prang, dan geudroeb 7.000 droe sipa-i nyang meuguda meunan cit na 20.000 droe sipa-i nyang jijak ngon gaki. Dan banmandum guda ka geupeulapée, dan bacut mantong geutinggai seb keu 100 boh geuritan prang. 5 Ureuëng Siria dan Damsyik laju jikirém sipa-i keujijak tulông Raja Hadadezer, teuma lé Nabi Daud laju geupeutaloe awaknyan dan maté sipa-i musoh nyan na 22.000 droe. 6 Óh lheuehnyan awaknyan laju jipeudong khimah-khimah prang didalam wilayah awaknyan dan awaknyan taklok dan jibayeue upeti keu Nabi Daud nyan. TUHAN geupeumeunang Nabi Daud dipat mantong gobnyan geumuprang. 7 Tameng-tameng méuh nyang jingui lé sipa-i Raja Hadadezer banmandum nyan ka geureupah lé Nabi Daud laju geuba u Yerusalem. 8 Seulaén nibak nyan na lom geucok lé Nabi Daud peurunggu nyang lumpah le nibak Tibhat dan Kun, banda-banda nyang yohmasa ilée jikuasa lé Raja Hadadezer. (Teuma óh dudo peurunggu-peurunggu nyan geucok lé Nabi Sulaiman keu geupeugét beujana, dan taméh-taméh dan peukakaih-peukakaih iébadat di Baét TUHAN.) 9 Raja Tou di Hamat ka geudeungoe bahwa Nabi Daud ka geupeutaloe banmandum sipa-i Raja Hadadezer. 10 Dan gobnyan laju geu kirém Yoram aneuëk agam gobnyan mangat jijak peusampoe saleuem keu Raja Nabi Daud dan jipeugah seulamat ateueh gobnyan meunang, sabab Hadadezer ka kayém that jimuprang deungon Tou. Yoram jijak ubak Nabi Daud sira jiba méuh nyang lumpah that jai sibagoe hadiah, meunan cit deungon pirak dan peurunggu. 11 Raja Nabi Daud laju geupeuseumah banmandum nyan keu TUHAN mangat geupeuguna bak watée na upacara iébadat. Meunan cit geupeubuet ateueh barang-barang méuh dan pirak nyang ka geureupah nibak Hadadezer dan bansa-bansa nyangka geupeutaloe, bansa nyan na kheueh bansa Edom, Moab, Amon, Filistin dan Amalek. 12 Abisai (mak geuh nan Zeruya) jipeutaloe dan jipoh maté na 18.000 droe ureuëng Edom di Pantôn Asin 13 dan laju geupeudong khimah-khimah tantra bansaboh Edom. Deungon nyan teuma taklok kheueh ureuëng-ureuëng Edom ubak Raja Nabi Daud. TUHAN geubri meunang ateueh Nabi Daud dipat mantong na gobnyan geumuprang. 14 Meunan kheueh cara jih Nabi Daud geumat keurajeuen bansaboh Israel dan geujaga mangat rakyat gobnyan sabe jipeusaneut deungon ade dan gét-gét. 15 Nyoe kheueh nan-nan peujabat nyang geuangkat lé Nabi Daud: Panglima angkatan prang: Yoab aduen Abisai. Seukeutareh meuligoe: Yosafat aneuëk Ahilud. Teungku-teungku imeum: Zadok aneuëk Ahitub dan Ahimelekh aneuëk Abyatar. Seukeutareh nanggroe: Sausa. Ulée kawan tukang kawai pribadi raja: Benaya aneuëk Yoyada. Aneuëk-aneuëk agam Nabi Daud banmandum geumat jabatan nyang peunteng-peunteng didalam peumeurintahan.

1 Tawarikh 19

1 Hana padubna treb teuma óh lheuehnyan Nahas raja Amon meuninggai donya, dan Hanun aneuëk agam gobnyan teubaiát jeuet keuraja. 2 Laju geupeugah lé Nabi Daud, "Nahas na kheueh sahabat ulôn nyang seutia, jadi meunan cit sikeueb ulôn keu Hanun, aneuëk jihnyan." Lé sababnyan Nabi Daud laju geukirém utosan u nanggroe Amon mangat jijak peumangat até ateueh meuninggai ureuëng syiek gobnyan. Bak watée awaknyan ka trok u Amon, 3 lé peumimpén nanggroenyan geupeugah ubak Raja Hanun, "Bék kheueh na neupike lam até droeneueh hai Teungku bahwa Nabi Daud nyan geukirém utosan geuh keunoe geukeuneuk bri horeumat keu ureuëng syiek Teungku Amphon! Teuma gobnyan geukirém ureuëng geuhnyan keunoe na kheueh sibagoe mata-mata keu jijak seulidek nanggroe geutanyoe, mangat hase jireubot lé awaknyan!" 4 Ban jideungoe nariet peumimpén jih nyan, lé Raja Hanun laju geudroeb banmandum utosan Nabi Daud nyan, laju jicuko janggot awaknyan, jigunteng peukayan awaknyan sampoe ka paneuk tinggai éut punggong, dan óh lheuehnyan jiyuejak laju awaknyan. 5 Teuma awaknyan malée that-that meunyoe jiwoe, lé sababnyan awaknyan jijak laju u Yerikho. Bak watée hainyan jijak peugah ubak Nabi Daud, gobnyan geukirém peusan mangat utosan-utosan nyan tinggai mantong di Yerikho sampoe janggot awaknyan ka jitimoh lom teuma. 6 Dan Raja Hanun ngon ureuëng Amon nyang rakyat gobnyan barô kheueh jisada bahwa peue nyang ka jipeubuet nyan lé sababnyan Nabi Daud ka geumeumusoh ngon gobnyan. Kareunanyan awaknyan laju geukirém 34.000 kilogram pirak u daerah Mesopotamia Ateueh, meunan cit u Maakha dan Zoba di Siria mangat teusiwa 32.000 geuritan prang dan sipa-i meuguda. Dan teuka kheueh sipa-i raja Maakha deungon banmandum geuritan prang nyang ka teusiwa nyan dan jipeudong laju khimah rab ngon Medeba. Meunan cit deungon ureuëng Amon nyang teuka bansaboh nanggroe nyan keu jijak muprang. 8 Bak watée Nabi Daud geudeungoe hainyan, laju geukrah Yoab dan banmandum angkatan prang gobnyan jeuet jijaklawan musoh. 9 Di ureuëng Amon pi laju jiteubiet jijak ato baresan dibabah pintoe geureubang Raba, ma banda droe awaknyan, seudangkan raja-raja nyang ka trok keuneuk jijak tulông awaknyan, jiato teuma baresan jih didalam padang. 10 Yoab deuh jikalon bahwa gobnyan ka teuseupet lamkawan pasokan musoh dikeue dan dilikot. Lé sabab nyan gobnyan laju jipiléh tantra Israel nyang paleng gét mangat jipeuhadab keue deungon sipa-i Siria. 11 Nyang leubeh nibak nyang kana nyan tantra Israel geujok teuma keu Abisai adoe gobnyan, nyang jiato baresan nyang meuhadab keue deungon sipa-i Amon. 12 Yoab geupeugah ubak adoe geuh, "Meunyoe ulôn hana ék le lôn meuteun ateueh sipa-i Siria, beubagaih kheueh gata teuka tajak tulông ulôn. Seubalek jih, meunyoe gata hana ek le tameuhadab keu deungon sipa-i Amon, ulôn teuma lôn teuka lônjak tulông gata. 13 Tabah kheueh! Jak kheueh geutanyoe tajak muprang deungon beurani deumi bansa geutanyoe dan banda-banda Allah geutanyoe. Seumoga TUHAN geupeubuet peue nyang geukeuheundaki." 14 Yoab dan pasokan gobnyan geumaju laju u mideuen prang, akhéjih sipa-i Siria jiplueng. 15 Bak watée jikalon lé sipa-i Amon bahwa sipa-i Siria ka jipuplueng droe, awaknyan pih jiplueng nibak Abisai dan jisurot u dalam banda. Óh ka lheueh jiprang ureuëng Amon, Yoab laju geuwoe u Yerusalem. 16 Ureuëng Siria sada bahwa awaknyan ka jipeutaloe lé sipa-i Israel. Lé sababnyan awaknyan laju geuhôi sipa-i droe gobnyan nyang na di daerah siblaih u timu Krueng Efrat dan geuyue tantra gobnyan mangat jijakmuprang dimiyueb pimpénan Sobakh panglima angkatan prang Hadadezer raja Zoba. 17 Jideungoe hai nyang lagéenyan, Nabi Daud laju geupeusapat banmandum pasokan Israel, laju jijeumeurang u meurandeh Krueng Yordan dan jiato laju baresan gobnyan meuhadab keue deungon sipa-i Siria. Dan jimuprang kheueh awaknyan, 18 dan sipa-i Siria taloe sira jisurot kareuna jiheuntam lé tantra Israel. Nabi Daud dan pasokan gobnyan na geupeumaté 7.000 droe nyang mat keumudo geuritan prang dan 40.000 droe sipa-i nyang jak ngon gaki. Meunan cit deungon Sobakh panglima Siria nyan pih maté teupoh. 19 Bak watée raja-raja nyang jimat kuasa lé Hadadezer jikalon hainyan bahwa awaknyan ka jipeutaloe lé sipa-i Israel, awaknyan laju jilakée meudamé deungon Nabi Daud, dan taklok ubak gobnyan. Óh ka lheuehnyan lé ureuëng Siria hana jitem bantu le ureuëng Amon.

1 Tawarikh 20

1 Watée kateuka musém seumi lom, bak watée raja-raja lazem jih geujak u mideuen prang, Yoab laju jikrah sipa-i jih dan laju jireubot nanggroe Amon. Bak watéenyan Raja Nabi Daud teutab tinggai di Yerusalem, dan gobnyan hana röh sajan. Yoab dan sipa-i gobnyan laju geukeupong banda Raba, dan laju geuseurang dan geupeuhanco banda nyan. 2 Óh ka lheuehnyan Nabi Daud laju geuteuka dan geucok laju hareuta rampasan prang nyang lumpah le di banda nyan. Lamkawan barang-barang nyang geureupah nyan na mahkota raja Amon. Mahkotanyan brat jih na kira-kira 34 kilogram dan meutahta saboh peumata. Nabi Daud laju geucok peumata nyan dan geupasang laju nibak mahkota gobnyan. 3 Óh lheuehnyan Nabi Daud laju geuangkat peunduduek banda Raba dan geupaksa ureuëng nyan jimeukeureuja deungon jipeuguna gogajo, cangkoi dan pato. Hai nyan geupeubuet cit u ateueh banda-banda Amon nyang laén. Óh lheuehnyan Nabi Daud dan banmandum tantra gobnyan laju geugisa u Yerusalem. 4 Hana padubna treb teuma óh lheuehnyan teujadi prang lom deungon ureuëng Filistin di Gezer. Nibak saboh teumpat muprang nyan Sibkhai ureuëng Husa jiteumé poh maté sidroe ureuëng raya lagée gogasi nyang nanjih Sipa-i. Dan ureuëng Filistin pih laju taloe. 5 Nibak muprang nyang laén watée teulawan ureuëng Filistin, Elhanan aneuëk Yair jipoh maté sidroe ureuëng nyang nanjih Lahmi syedara Goliat ureuëng Gat. Go kapak Lahmi nyan na bube kayée tumpeun ija. 6 Meunan cit nibak muprang nyang laén nyang teujadi di Gat na sidroe ureuëng gogasi nyang aneuk jaroe nam neuk nibak tieb-tieb jaroe dan gaki jihnyan. Ureuëng nyan keuturonan rayeuk-rayeuk lagée gogasi jamén ilée. 7 Ureuëng nyan jipeuhina ureuëng Israel, lé sabab nyan ureuëng nyan geupoh maté lé Yonatan, aneuëk Simea aduen Nabi Daud. 8 Ban lhée droe ureuëng nyang geupoh maté lé Nabi Daud dan pasokan gobnyan na kheueh keuturonan gogasi di Gat.

1 Tawarikh 21

1 Iblih meuheut that jikeuneuk peuceulaka ureuëng Israel; kareuna nyan Iblih nyan laju jijak rayu Nabi Daud mangat geupeuna seunsus. 2 Dan geupeugah kheueh lé Nabi Daud ubak Yoab dan banmandum peuwira gobnyan, "Gata peuna kheueh seunsus bansaboh nanggroe Israel sampoe u gampông-gampông nyang jiôh, sabab ulôn keuneuk teupeue na padubdroe jeumeulah peunduduek bansa Israel nyoe." 3 Geujaweueb lé Yoab, "Seumoga TUHAN geupeulipat ganda rakyat Israel sampoe sireutoih goe nibak jeumeulah awaknyan nibak saát nyoe. Nyang Mulia, bukon kheueh ka jeulaih bahwa awaknyan jitaklok ubak Teungku Amphon? Keupeue harôh ta peuna seunsus? Singoh, sabab lé buet nyang salah nyan, banmandum bansa turot jitanggong akibat jih!" 4 Teuma raja teutab geumumat ubak peurintah geuh nyan, lé nyan Yoab jijak laju ban saboh nanggroe Israel, sampoe u tieb-tieb gampông nyang paleng jiôh, óh ka seuleusoe laju geugisa u Yerusalem, 5 dan geujak lapor laju ubak Raja Nabi Daud hase seunsus gobnyan nyan. Jeumeulah ureuëng agam nyang peunoh carat keu jeuet keu sipa-i na 1.100.000 droe di Israel dan 470.000 droe di Yehuda. 6 Teuma sukée Lewi dan sukée Benyamin hana jitamong lam jeumeulah nyan. Yoab hana geupeuna seunsus keu awaknyan sabab gobnyan hana galak jipeubuet peurintah raja nyan. 7 Po teu Allah hana galak Gobnyan keu seunsus nyan dan TUHAN laju geuhuköm ureuëng Israel. 8 Dan laju geumeu doá Nabi Daud ubak Po teu Allah, "Ya Allah, ulôn keubit that ka meudesya! Neupeu amphon kheueh ulôn, sabab buet ulôn nyan keubit that bangai." 9 TUHAN geupeugah ubak Nabi Gad, nyang jeuet keu peunghubong Nabi Daud ngon TUHAN. 10 "Tajak peugah kheueh laju ubak Nabi Daud bahwa Ulôn teuma Lônbri lhée boh mangat jipiléh. Peue mantong nyang jitem teuma Lôn peubuet." 11 Dan jijak kheueh Gad ubak Nabi Daud jijak peusampoe peue nyang ka geupeugah lé TUHAN ubak gobnyan, "Nyang toh nyang Teungku Amphon piléh: 12 Nanggroenyoe keunong musém deuk nyang treb jih na lhée thon, atawa Teungku Amphon neuplueng jilet-let lé musoh nyang treb jih na lhée buleuen, atawa bansaboh nanggroenyoe lhée uroe treb jih geuprang lé TUHAN deungon peudeueng gobnyan nyang sibagoe bala peunyakét, dan malaikat geuba mawöt ho-ho mantong. Neupeuputôh kheueh jinoenyoe peue nyang harôh ulôn peusampoe ubak TUHAN." 13 Geujaweueb lé Nabi Daud, "Adoh, cilaka ulôn nyoe! Teuma nibak jihuköm lé manusia, leubeh gét ulôn nyoe geuhuköm lé TUHAN, sabab Gobnyan rayeuk that gaséh sayang Geuh." 14 Akhéjih TUHAN laju geupeuteuka bala peunyakét ateueh Israel sampoe na 70.000 droe nyang meuninggai donya. 15 Óh lheuehnyan TUHAN geuyue ubak malaikat mangat teujak reuloih Yerusalem. Teuma bak watée malaikat nyan ka trok ubak teumpat ureuëng teungoh ceumeulo boh gandom atra Arauna ureuëng Yebus, TUHAN laju geu-ubah keuputosan Gobnyan keu geuhuköm bansa nyan. Gobnyan geupeugah ubak malaikat nyan, "Kaseb! Piôh!" 16 Nabi Daud leumah geukalon malaikat nyan meulayang-layang lamkawan langét ngon bumoe. Deungon peudeueng nibak jaroe, malaikat nyan ka siab keuneuk geujak peubinasa Yerusalem. Lé sababnyan Nabi Daud dan peumimpén-peumimpén rakyat, nyang bak watée nyan teungoh jisôk peukayan ija krông sabab tanda meunyeusai, laju geusujut ateueh tanoh. 17 Nabi Daud geumeudoá, "Ya, Allah, ulôn kheueh nyang salah. Ulôn kheueh ya TUHAN nyang yue seunsus nyan. Bansa nyoe meubacut pih hana meusalah! Ya TUHAN, Po teu Allah ulôn, neuhuköm kheueh ulôn dan keuluwarga ulôn, teuma neupeujiôh kheueh mala peutaka nyoe ateueh umat Droeneueh." 18 Laju malaikat TUHAN geuyue ubak Gad mangat jijak peusampoe ubak Nabi Daud bahwa gobnyan harôh geujak ék u ateueh teumpat ceumeulo gandom atra Arauna dan geupeudong miseubah di ateueh nyan. 19 Lé sababnyan geubeurangkat kheueh Nabi Daud nyang sisuai deungon peurintah TUHAN nyang ka geupeusampoe ubak gobnyan meulalu Gad. 20 Diteumpat jambo phui aneuk gandom nyan Arauna dan peuet droe aneuëk gobnyan nyang agam teungoh jiceumeulo boh gandom. Ban leumah jikalon malaikat nyan, ban peuet droe aneuëk Arauna nyan laju jiplueng jijak söm droe. 21 Bak watée Arauna jikalon Raja Nabi Daud nyang teuka ubak gobnyan, lé gobnyan laju geujak meurumpok ngon Nabi Daud sira geusujut dikeue nabi Allah nyan. 22 Geupeugah lé Nabi Daud ubak Arauna nyan, "Ulôn keuneuk peugöt miseubah diteumpat nyoe keu TUHAN, mangat balanyoe gadôh. Lé sababnyan gata peubloe kheueh tanoh nyoe keu ulôn. Gata peugah kheueh laju padub yuem jih, jeuet lôn bayeue." 23 "Ah, neucok mantong ya Teungku Amphon," jijaweueb lé Arauna, "dan neupeubuet kheueh laju peue nyang Teungku Amphon anggab nyan get. Nyoepat na leumô-leumô keureubeuen nyang teutot, dan keu kayée apui jih Teungku Amphon jeuet neungui papeuen-papeuen alat ceumeulo aneuk gandom nyoe. Meunan cit jeuet neucok aneuk gandom nyan keu peuseumahan. Banmandum nyan ulôn jok, bék neubayeue lé Teungku Amphon bahpi mubacut." 24 Teuma geujaweueb lé Nabi Daud, "Bék meunan! Ulôn keuneuk bayeue yuem jihnyoe deungon yuem nyang peunoh. Ulôn hana lôntem keureubeuen keu TUHAN peue nyang atra gata atawa sapeue-sapeue nyang ulôn teumé deungon cuma-cuma." 25 Dan Nabi Daud laju geubayeue keu Arauna deungon péng méuh nyang le jih na 600 keuteumpat nyan. 26 Lé Nabi Daud geupeudong laju saboh miseubah diteumpat nyan keu TUHAN, dan geupeuseumah laju keureubeuen nyang teutot dan keureubeuen peudamé. Óh lheueh nyan gobnyan geumeudoá ubak TUHAN dan TUHAN pih geudeungoe doá gobnyan sira geupeutron apui di langét dan apuinyan laju jilahiëb banmandum keureubeuen-keureubeuen nyan. 27 Óh lheuehnyan TUHAN laju geuyue malaikat nyan mangat geujak pasolom u dalam sarong peudeueng nyang ka teusuit nyan, dan malaikat nyan laju geupeubuet peue nyang ka geupeurintah lé TUHAN ubak gobnyan nyan. 28 Bak watée geungieng lé Nabi Daud bahwa TUHAN ka geujaweueb doá gobnyan sabab peue nyang ka geupeuseumah nyan, lé nyan teuma gobnyan geupeuseumah lom keureubeuen nibak miseubah nyan. 29 Bak watéenyan khimah TUHAN nyang geupeugöt lé Nabi Musa di padang pasi dan miseubah keu teumpat keureubeuen nyang teutot mantong na di teumpat iébadat di Gibeon. 30 Teuma Nabi Daud hana geujeuet geujak keudeh keu geujak meututoe deungon Po teu Allah, sabab gobnyan teumakot that-that keu peudeueng malaikat TUHAN.

1 Tawarikh 22

1 Lheueh nyan geupeugah lé Nabi Daud, "Diteumpat nyoe kheueh nyang harôh teupeudong Baét TUHAN Allah. Dan dimiseubah nyoe kheueh ureuëng Israel harôh jipeuseumah keureubeuen nyang teutot keu TUHAN." 2 Nabi Daud laju geuyue peusapat banmandum ureuëng aséng nyang na tinggai di nanggroe Israel, laju gobnyan geuyue jok buet keu awaknyan. Siladum nibak awaknyan geuyue peut batée keu teupeugöt Baét TUHAN. 3 Keu teupeugét labang ngon eunsée keu pintoe-pintoe geureubang Baét TUHAN nyan, laju geupeusapat beuso nyang le that lé Nabi Daud. Meunan cit deungon peurunggu le that cit geupeusapat, sabab le that atranyan ka hana hase le teutimang. 4 Ubak ureuëng Tirus dan Sidon geupeusan kayée ceumara Libanon nyang le that. 5 Banmandum nyang geukeureuja lé Nabi Daud nyan na kheueh kareuna gobnyan geupike lagéenyoe: "Ulôn harôh ulôn peusiab peue nyang paleng peureulée keu teupeudong Baét TUHAN. Sabab Nabi Sulaiman aneuëk agam ulôn mantong that muda dan gohlom na peungalaman, seudang Baét TUHAN nyang teuma teupeudong nyan harôh nyang gét meugah dan meusyeuhu bansaboh donya." Dan sigohlom Nabi Daud meuninggai donya, bahan bangunan nyang teupeureulée keu teupeudong Baét TUHAN ka seb le. 6 Nabi Daud laju geuhôi aneuëk agam gobnyan nyang nan Nabi Sulaiman nyan, dan bak aneuëk geuhnyan geupeurintah laju mangat Nabi Sulaiman nyan geutem peudong baét keu TUHAN Allah nyang jiseumah lé umat Israel. 7 Geupeugah lé Nabi Daud ubak Nabi Sulaiman aneuëk gobnyan nyan, "Hai aneuëk ulôn, katreb that-that ulôn naniet keuneuk peudong saboh rumoh keuteumpat ulôn horeumat TUHAN Allah ulôn. 8 Teuma lé TUHAN geupeugah ubak ulôn bahwa ulôn ka kayém that ulôn muprang dan ka ulôn poh maté ureuëng jai lumpah na. Lé sababnyan Gobnyan hana geubri idhin keu ulôn mangat lôn peudong baét keu Gobnyan. 9 Teuma pi meunan, Gobnyan ka geumeu janji ubak ulôn nyang geupeugah lagéenyoe: 'Gata meuteumé sidroe aneuëk agam nyang mat peurintah deungon aman teuntram, sabab Ulôn kutulông jihnyan sampoe hanale musoh nyang jijakprang jihnyan. Aneuëk nyan teuma teuboh nan Sulaiman sabab simantong jihnyan jimat keurajeuen, Ulôn teutab Ulôn bri keuteuntraman dan keuamanan bansaboh nanggroe Israel. 10 Aneuëk agam gatanyan kheueh nyang teuma peudong baét keu Ulôn. Jihnyan teuma jeuet keu aneuëk Ulôn dan Ulôn teuma jeuet keu bapak jih. Takhta keurajeuen Israel teutab nibak keuturonan jihnyan sampoe siumu masa.' " 11 Dan geupeugah lom lé Nabi Daud, "Jinoenyoe hai aneuëk ulôn, seumoga TUHAN Po teu Allah gata sabena meusajan gata dan geutulông gata. Dan seumoga gata meuhase tapeudong baét keu TUHAN lagée nyang ka geupeujanji nyan. 12 Dan mudah-mudahan TUHAN Po teu Allah gata geubri keu gata keubijaksanaan dan peungeurtian mangat jeuet tapeurintah ateueh Israel nyang paih deungon huköm-huköm Gobnyan. 13 Meunyoe gata tataát ubak banmandum huköm nyang ka geubri ubak Nabi Musa keu bansa Israel, teuma gata teutab meuhase. Gata harôh yakén dan gata jeuet. Bék tatakot keuhai peue mantong. 14 Keuhai Baét TUHAN nyan ulôn ka lôn meu-useuha bit-bit that mangat lôn jak peusapat 3.400 ton méuh dan leubeh nibak 34.000 ton pirak. Seulaén nibak nyan na peurunggu dan beuso nyang hana teuitong le jih. Meunan cit deungon kayée dan batée ka cit ulôn keubah, teuma gata harôh tatamah lom atra nyan. 15 Bak gata ramé ureuëng meukeureuja nyang jitem jakbuet. Na nyang jeuet jimeubuet bak tambang batée, na tukang kayée, tukang batée dan le lom tukang pade nyang carông jipeugét 16 méuh, pirak, peurunggu dan beuso. Gata peuphon kheueh laju phon saát nyoe! Seumoga TUHAN geutulông gata." 17 Dan Nabi Daud pih geukrah laju banmandum peumimpén Israel jijak tulông Nabi Sulaiman. 18 Geupeugah teuma lom, "TUHAN Po teu Allah gata ka geutulông gata, dan geubri damé ngon teuntram bansaboh nanggroe. Gobnyan ka geupeumungken ulôn sampoe hase ulôn peutaloe banmandum bansa nyang yoh watée ilée tinggai dinanggroe nyoe. Teuma jinoenyoe awaknyan ka taklok ubak gata dan ubak TUHAN. 19 Lé sabab nyan kheueh gata rameungabdi ubak TUHAN Po teu Allah gata deungon sigeunab jiwa raga gata. Neupeuphon kheueh peudong baét keu TUHAN, mangat Peuto Peujanjian Gobnyan dan banmandum peukakaih nyang laén nyang teupeungui khusos keu iébadat jeuet teukeubah disinan."

1 Tawarikh 23

1 Bak watée Nabi Daud ka tuha that-that gobnyan laju geubaiát Nabi Sulaiman jeuet keuraja Israel. 2 Raja Nabi Daud laju geupeusapat banmandum peumimpén ureuëng Israel, teungku-teungku imeum dan ureuëng Lewi, 3 lheuehnyan laju geu itong banmandum ureuëng agam Lewi nyang ka meu-umu lhée ploh thon u ateueh. Banmandum nyan na 38.000 droe. 4 Dan 24.000 droe lamkawan awaknyan geubri tugaih keu keujipeugöt Baét TUHAN, 6.000 droe geuyue uroih administrasi dan peukara-peukara di kantô peungadelan, 5 4.000 droe geubri tugaih bagian mando, dan 4.000 droe teuk bakbuet seumujoe ubak TUHAN deungon alat-alat musik nyang ka geukeubah. 6 Nabi Daud geubagi ureuëng Lewi nyan lam lhée boh keulompok meunurot kawöm awaknyan, na kheueh kawöm Gerson, Kehat dan Merari. 7 Gerson na jimeu aneuëk dua droe aneuëk agam: Ladan dan Simei. 8 Aneuëk agam si Ladan na teuma lhée droe: Yehiel, Zetam dan Yoël. 9 Awaknyan na kheueh ulée kawöm keuturonan Ladan. (Selomit, Haziel dan Haran na kheueh aneuëk agam Simei.) 10 Na peuet droe aneuëk agam Simei nyang meunurot umu meuturot-turot na kheueh: Yahat, Ziza, Yeus dan Beria. Keuturonan Yeus dan Beria hanale, jadi awaknyan teuanggab saboh kawöm. 12 Kehat na jimeu aneuëk peuet droe aneuëk agam: Amram, Yizhar, Hebron dan Uziel. 13 Amram na kheueh ureuëng syiek Nabi Harun dan Nabi Musa. (Nabi Harun dan keuturonan gobnyan keu siumu masa ka geupeu khusos keu geu-uroih peukakaih-peukakaih rumoh iébadat, geuyue tot keumeunyan keu TUHAN, geulayani TUHAN dan geubri beureukat keu rakyat ateueh nan TUHAN. 14 Aneuëk agam Nabi Musa hamba Po teu Allah nyan jitamong lam sukée Lewi.) 15 Nabi Musa na teuma geumeu aneuëk dua droe aneuëk agam, awaknyan na kheueh Gersom dan Eliezer. 16 Nyang jeuet keupeumimpén aneuëk-aneuëk Gersom na kheueh Sebuel. 17 Eliezer na geumeu aneuëk sidroe aneuëk agam nyang geuboh nan Rehabya. Teuma Rehabya na geumeu aneuëk le that. 18 Yizhar aneuëk Kehat nyang keudua, na jimeu aneuëk agam nyang jiboh nan Selomit; gobnyan na kheueh ulée kawöm. 19 Hebron aneuëk Kehat nyang keu lhée, na teuma jimeu aneuëk peuet droe aneuëk agam: Yeria nyang paleng tuha, Amarya, Yahaziel dan Yekameam. 20 Uziel, aneuëk Kehat nyang keu peuet, na jimeu aneuëk dua droe aneuëk agam: Mikha nyang paleng tuha, dan Yisia. 21 Merari na jimeu aneuëk dua droe aneuëk agam: Mahli dan Musi. Mahli na jimeu aneuëk dua droe aneuëk agam, Eleazar dan Kish, 22 teuma Eleazar meuninggai donya nyang hana jitinggai aneuëk agam bahnyan meusidroe pi; nyang na aneuëk inong nyang jimeukawen deungon syedara-syedara karong jih, na kheueh deungon aneuëk-aneuëk Kish. 23 Musi, aneuëk Merari nyang keudua, na teuma jimeu aneuëk lhée droe aneuëk agam: Mahli, Eder dan Yeremot. 24 Nyan kheueh nan-nan keuluwarga Lewi nyang na teucetet meunurot nan ulée kawöm dan keuluwarga gobnyan maséng-maséng. Awaknyan meu-umu dua ploh thon u ateueh dan meuteumé tugaih di Baét TUHAN. 25 Nabi Daud geupeugah, "TUHAN Po teu Allah Israel geubri keuteuntraman ubak umat Gobnyan, dan Gobnyan keudroe tinggai di Yerusalem keu siumu masa. 26 Lé sabab nyan, Khimah TUHAN dan banmandum peukakaih nyang teungui keu iébadat hanapeu geugulam lé ureuëng Lewi." 27 Deungon dasai nibak peurintah-peurintah nyang keuneuleuh nibak Nabi Daud nyan, banmandum ureuëng Lewi, meunyoe ka meu-umu 20 thon, harôh teudafeutar mangat jeuet meutugaih. 28 Awaknyan harôh jibantu teungku-teungku imeum keuturonan Nabi Harun bak watée jipeubuet upacara iébadat di Baét TUHAN, teupeulara peulataran-peulataran dan bilék-bilék di Baét TUHAN, meunan cit jijaga peue mantong nyang ka teupeukhusos keu TUHAN bék jeuet keu kuto. 29 Meunan cit awaknyan meutanggong jaweueb ateueh nyang teukheun lom nyoe: ruti nyang teupeuseumah keu Po teu Allah, teupông nyang teupeuguna keu ngon peuseumahan keu TUHAN, juadah lipeh nyang teupeugét dan hana keunong rago, keureubeuen nyang teupanggang, dan teupông nyang teujampu deungon minyéuk zaiton. Meunan cit tugaih awaknyan jitimang ngon jisukat peuseumahan-peuseumahan nyang teuba u Baét TUHAN. 30 Seulaén nibak nyan awaknyan harôh jimeuca-e ngon jimeuseulaweuet keu jipujoe TUHAN bak watée tieb-tieb beungoh dan tieb-tieb malam; 31 meunan cit pajan mantong na keureubeuen nyang teutot keu TUHAN nibak uroe Sabat, bak watée peurayaan bak Buleuen Barô, dan nibak peurayaan-peurayaan nyang laén. Keuhai jeumeulah ureuëng Lewi nyang harôh jimeutugaih bak tieb-tieb watée, nyan pi ka teupeugöt peuratoran jih. Keu siumu masa ureuëng Lewi harôh geupeubuet tugaih nyan. 32 Meunan cit ubak awaknyan teubri cit teuma tanggong jaweueb keu jipeulara Khimah TUHAN meunan cit deungon Baét TUHAN dan keu jibantu syedara-syedara awaknyan, na kheueh bubena teungku imeum keuturonan Nabi Harun, bak watée teupeuna iébadat di teumpat nyan.

1 Tawarikh 24

1 Nabi Harun na geumeu aneuëk peuet droe aneuëk agam: Nadab, Abihu, Eleazer dan Itamar. Nadab dan Abihu meuninggai leubeh ilée nibak ureuëng syiek jih dan hana jitinggai aneuëk meusidroe pih. Lé sabab nyan Eleazer dan Itamar syedara gobnyan jeuet keu teungku imeum. Nabi Daud geubagi keuturonan Nabi Harun lam keulompok-keulompok nyang meunurot tugaih awaknyan. Lam hai meubuet meukeulompok nyan Nabi Daud geubantu lé Zadok keuturonan Eleazer dan lé Ahimelekh keuturonan Itamar. 4 Keuturonan Itamar teubagi teuma jeuet lapan boh keulompok, seudangkan keuturonan Eleazer jeuet nam blaih boh keulompok, sabab didalam keuluwarga Eleazer leubeh le keuturonan nyang agam jeuet keu ulée keuluwarga. 5 Bah kheueh didalam keuturonan Eleazer meunan cit didalam keuturonan Itamar na peujabat-peujabat Baét TUHAN dan peumimpén-peumimpén agama, lé sababnyan peubagian tugaih jipeugöt deungon cara teu-undi. 6 Keuturonan Eleazer dan keuturonan Itamar meugantoe-gantoe jitarek undi, dan nan-nan awaknyan laju jicetet lé sidroe seukeutareh nyang nan jih Semaya aneuëk Netaneel ureuëng Lewi. Banmandum nyan jipeubuet dikeue raja meusajan deungon peugawée-peugawée gobnyan, Teungku Imeum Zadok, Ahimelekh aneuëk Abyatar meunan cit deungon ulée-ulée keuluwarga geulongan imeum dan ulée-ulée keuluwarga golongan Lewi. 7 Nyoe kheueh lumboi meunurot gileran tugaih nyang meuteumé dan meunurot nyang teu-undi keu ban dua ploh boh keulompok nyan: 1. Yoyarib 2. Yedaya 3. Harim 4. Seorim 5. Malkia 6. Miyamin 7. Hakos 8. Abia 9. Yesua 10. Sekhanya 11. Elyasib 12. Yakim 13. Hupa 14. Yesebeab 15. Bilga 16. Imer 17. Hezir 18. Hapizes 19. Petahya 20. Yehezkiel 21. Yakhin 22. Gamul 23. Delaya 24. Maazya 19 Nan-nan ureuëng nyang ka teupeugah nyan teucetet meunurot gileran awaknyan keu jitamong u dalam Baét TUHAN dan jipeubuet tugaih iébadat nyang ka geupeuteutab lé Nabi Harun, indatu awaknyan, nyang paih lagée peurintah TUHAN, Allah Israel. 20 Seulaén nibak nyan lam keuturonan ureuëng Lewi mantong jitamong keunan ulée-ulée keuluwarga nyang teupeugah seulanjut jihnyoe: Yehdeya, keuturonan Amram nibak garéh keuturonan Subael; Yisia, keuturonan Rehabya; Yahat, keuturonan Yizhar nibak garéh keuturonan Selomot; Yeria, Amarya, Yahaziel dan Yekameam aneuëk-aneuëk Hebron meunurot urotan umu jih; Samir, keuturonan Uziel nibak garéh keuturonan Mikha; Zakharia, keuturonan Uziel nibak garéh keuturonan Yisia syedara Mikha; Mahli, Musi dan Yaazia, keuturonan Merari. 27 Yaazia na jimeu aneuëk lhée droe aneuëk agam: Syoham, Zakur dan Hibri. 28 Mahli na teuma jimeu aneuëk dua droe aneuëk agam nyang teuboh nan Eleazar dan Kish. Eleazar hana jimeu aneuëk nyang agam, teuma Kish na jimeu aneuëk sidroe aneuëk agam nyang teuboh nan Yerahmeel. 30 Aneuëk agam Musi na lhée droe: Mahli, Eder dan Yerimot. Nyan kheueh keuluwarga-keuluwarga lam sukée Lewi. 31 Keu gileran tugaih awaknyan, tieb-tieb ulée keuluwarga meusajan deungon adoe jih nyang agam jitarek undi lagée nyang ka jipeubuet lé waréh kawöm awaknyan, na kheueh lé teungku-teungku imeum nibak keuturonan Nabi Harun. Watée teutarek undi nyan jipeusaksi lé Raja Nabi Daud meusajan deungon Zadok, Ahimelekh meunan cit deungon ulée-ulée keuluwarga nibak gulongan teungku-teungku imeum dan nibak gulongan ureuëng Lewi.

1 Tawarikh 25

1 Keu teupimpén upacara-upacara iébadat, Nabi Daud dan bandum peumimpén ureuëng Lewi laju geupiléh kawöm-kawöm Lewi nyang teupeugah nyoe: Asaf, Heman dan Yedutun. Awaknyan geubri tugaih keu jijak peusampoe peusan nibak Po teu Allah sira ji-iréng deungon su musik keucapi, rapa-i gambus dan simbal. Keu teupimpén iébadat deungon upacara jihnyan maséng-maséng, teupiléh teuma reugu-reugu nyang teupeugah nyoe: 2 Ban peuet droe aneuëk agam Asaf: Zakur, Yusuf, Netanya dan Asarela. Nyang jeuet keupeumimpén awaknyan na kheueh Asaf, nyang peusampoe peusan nibak Po teu Allah, meunyoe ka geubri tugaih lé raja. 3 Ban nam droe aneuëk agam Yedutun: Gedalya, Zeri, Yesaya, Simei, Hasabya dan Matica. Dimiyueb pimpénan ureuëng syiek awaknyan, awaknyan laju jipeusampoe peusan nibak Po teu Allah deungon musik keucapi, dan awaknyan jica-e deungon meurateb seumujoe meunan cit deungon teupeugah syukoe ubak TUHAN. 4 Ban peuet blaih droe aneuëk agam Heman na kheueh: Bukia, Matanya, Uziel, Sebuel, Yerimot, Hananya, Hanani, Eliata, Gidalti, Romamti-Ezer, Yosbekasa, Maloti, Hotir dan Mahaziot. 5 Heman na kheueh nabi pribadi raja. TUHAN geubri ban peuet blaih droe aneuëk agam nyan meunan cit lhée droe aneuëk inong ubak Heman kareuna TUHAN ka geumeujanji keu geubri keududuekan nyang teuhoreumat keu gobnyan. 6 Banmandum aneuëk Heman nyan jipeumeu-én musik simbal, keucapi dan rapa-i gambus dimiyueb pimpén ureuëng syiek gobnyan keudroe keu teuiréng upacara iébadat di Baét TUHAN. Asaf, Yedutun dan Heman meuteumé tugaih sisuai deungon nyang ka geutunyok lé raja. 7 Ban dua ploh peuet droe aneuëk agam awaknyan dan waréh kawöm awaknyan na kheueh ahli-ahli musik nyang ka teulateh. Awaknyan banmandum na 288 droe. 8 Keu teupeuteuntée gileran tugaih, awaknyan bandum jitarek undi -- bah kheueh nyan nyang muda meunan cit nyang tuha, bah kheueh nyan nyang kana peungalaman meunan cit nyang ban mantong meuruno. 9 Ban 288 droe nyan teubagi teuma u dalam 24 boh keulompok meunurot keuluwarga maséng-maséng. Tieb-tieb keulompok na 12 droe dimiyueb pimpénan sidroe. Nyoe kheueh urotan nan-nan awaknyan meunurot nyang ka teu-undi: 1. Yusuf nibak keuluwarga Asaf 2. Gedalya 3. Zakur 4. Yizri 5. Netanya 6. Bukia 7. Yesarela 8. Yesaya 9. Matanya 10. Simei 11. Azareel 12. Hasabya 13. Subael 14. Matica 15. Yeremot 16. Hananya 17. Yosbekasa 18. Hanani 19. Maloti 20. Eliata 21. Hotir 22. Gidalti 23. Mahaziot 24. Romamti-Ezer

1 Tawarikh 26

1 Nyoe na kheueh peumbagian tugaih keu ureuëng-ureuëng Lewi nyang jeuet keu nyang kawai Baét TUHAN. Nibak kawöm Korah jitunyok Meselemya aneuëk Kore nibak keuluwarga Ebyasaf. 2 Gobnyan na tujoh droe aneuëk agam nyang teudafeutar meunurot urotan umu: Zakharia, Yediael, Zebaja, Yatniel, 3 Elam, Yohanan, Elyoënai. 4 Lheuehnyan teutunyok teuma Obed-Edom. Gobnyan geubri beureukat lé Po teu Allah deungon 8 droe aneuëk agam nyang teudafeutar meunurot urotan umu: Semaya, Yozabad, Yoah, Sakhar, Netaneel, 5 Amiel, Isakhar dan Peuletai. 6 Semanya aneuëk tuha Obed-Edom na jimeu aneuëk 6 droe aneuëk agam: Otni, Refael, Obed, Elzabad, Elihu dan Semakhya; banmandum nyan na kheueh ureuëng-ureuëng peunteng dalam kawöm awaknyan sabab awaknyan gagah peukasa, nyang paleng meugah Elihu dan Semakhya. 8 Keuhai buet teukawainyan kawöm Obed-Edom teubri teuma 62 droe ureuëng agam nyang peukasa. 9 Kawöm Meselemya teubri teuma na 18 droe ureuëng nyang peukasa. 10 Nibak kawöm Merari teutunyok teuma Hosa. Gobnyan na peuet droe aneuëk agam: Simri (jihnyan bukon aneuëk tuha, teuma teuangkat jeuet keu peumimpén lé ureuëng syiek geuh), 11 Hilkia, Tebalya dan Zakharia. Banmandum nyan na 13 droe anggota keuluwarga Hosa nyang jeuet keu nyang kawai Baét TUHAN. 12 Ureuëng nyang kawai Baét TUHAN teubagi dalam keulompok-keulompok meunurot kawöm jih. Dan meunan cit keu awaknyan teubri cit tugaih-tugaih didalam Baét TUHAN saban lagée nyang ka teubri keu ureuëng Lewi. 13 Tieb-tieb kawöm bah kheueh nyan kawöm nyang rayeuk meunan cit deungon kawöm nyang ubit, teutarek undi mangat teuteupeue bak babah pintoe geureubang nyang toih awaknyan meuteumé tugaih. 14 Selemya meuteumé tugaih nibak babah pintoe geureubang di siblaih u timu. Nabi Zakharia aneuëk gobnyan, nyang sabe geubri naseuhat nyang jroh-jroh, meuteumé tugaih nibak babah pintoe geureubang di siblaih utara. 15 Obed-Edom meuteumé tugaih nibak babah pintoe di siblaih u seulatan seudangkan aneuëk-aneuëk gobnyan meuteumé tugaih teujaga gudang peuleungkapan. 16 Supim dan Hosa meuteumé tugaih nibak pintoe siblaih u barat dan pintoe geureubeng Syalekhet nyang na nibak rot nyang meusineungoh. Tugaih teukawai ka geuato lagéenyan bagoe deungon nyan sabe na ureuëng kawai di tieb-tieb babah pintoe geureubang. 17 Tieb-tieb uroe disiblaih u timu sabe na 6 droe peungawai, siblaih utara 4 droe dan siblaih u seulatan 4 droe. Meunan cit deungon gudang-gudang peuleungkapan na ureuëng jaga 4 droe: 2 droe tieb-tieb saboh gudang. 18 Nibak papilyun siblaih si ubarat na teuma meutugaih 4 droe peungawai nibak rot dan 2 droe tukang kawai nibak papilyun nyan keudroe. 19 Meunan kheueh cara jih teubagi tugaih kawai keu kawöm Korah dan kawöm Merari. 20 Ureuëng-ureuëng nyang laén lam sukée Lewi teujok tanggong jaweueb ateueh hareuta beunda Baét TUHAN dan ateueh gudang-gudang teumpat teukeubah nyang teupeuseumah-peuseumah keu Po teu Allah. 21 Na sidroe aneuëk agam Gerson nyang nan jih Ladan; gobnyan jipeutron na meupadub boh keulompok kawöm, jitamong cit keunan kawöm Yehiel aneuëk jihnyan. 22 Aneuëk-aneuëk Yehiel, nyang nan jih Zetam dan Yoël, teubri tanggong jaweueb ateueh gudang-gudang dan keuhai péng Baét TUHAN. 23 Keuturonan Amram, Yizhar, Hebron dan Uziel pi awaknyan meuteumé tugaih. 24 Sebuel nibak kawöm Gersom, aneuëk Nabi Musa, na kheueh nyang kawai hareuta beunda Baét TUHAN. 25 Gobnyan na hubongan keuluwarga deungon Selomit meulalu Eleazar syedara Gersom. Garéh keuturonan Eliezer sampoe ubak Selomit na kheueh lagéenyoe: Eliezer, Rehabya, Yesaya, Yoram, Zikhri, Selomit. 26 Selomit dan wareh kawöm jihnyan meutanggong jaweueb ateueh banmandum peuseumahan nyang geubri lé Nabi Daud, lé ulée-ulée keuluwarga, peumimpén-peumimpén kawöm, dan bubena peuwira-peuwira manyang. 27 Peue-peue nyang teujok nyan na kheueh siladum nibak hareuta nyang teureupah di mideuen prang dan awaknyan peuseumah khusos lam Baét TUHAN. 28 Paneuk haba, Selomit dan keuluwarga jihnyan meutanggong jaweueb ateueh peue mantong nyang ka teuseurah keu peuguna khusos lam Baét TUHAN, jitamong cit keunan keu peuseumahan-peuseumahan nyang teujok meulalu Nabi Samuel ka geubri lé Raja Saul, lé Abner aneuëk Ner, dan lé Yoab aneuëk Zeruya. 29 Keuturonan Yizhar, na kheueh Kenanya dan aneuëk-aneuëk gobnyan, teubri tugaih sibagoe administrasi nanggroe dan tugaih-tugaih nibak kantô peungadelan di Israel. 30 Peue mantong urosan keu agamaan dan urosan peumeurintahan di Israel bagian barat Krueng Yordan geuseurah ubak Hasabya, dan keu 1.700 droe waréh kawöm gobnyan: banmandum nyan na kheueh ureuëng-ureuëng meusyeuhu keuturonan Hebron. 31 Peumimpén keuturonan Hebron na kheueh Yeria. Bak thon nyang keupeuet ploh geumat keurajeuen lé Nabi Daud laju jipeuna seulidek keuhai keuturonan Hebron. Nibak hase teuseulidek nyan teunyata na sipa-i-sipa-i nyang peukasa nyang tinggai di Yazer didalam wilayah Gilead. 32 Peue mantong urosan keu agamaan dan peumeurintahan di Israel siblaih u timu Krueng Yordan -- na kheueh wilayah sukée Ruben, Gad dan siladum sukée Manasye -- teuseurah teuma ubak 2.700 ulée keuluwarga Yeria, banmandum nyan na kheueh ureuëng meusyeuhu nyang geupiléh lé Raja Nabi Daud.

1 Tawarikh 27

1 Urusan peumeurintah keurajeuen Israel lé ulée-ulée keuluwarga, peumimpén-peumimpén kawöm dan peuwira-peuwira. Tieb-tieb thon treb jih sibuleuen na saboh keulompok nyang meutugaih seucara meugantoe-gantoe dimiyueb pimpénan sidroe ulée. Maséng-maséng keulompok na 24.000 droe ureuëng. Nyoe kheueh na ulée keulompok nyang meutugaih keu tieb-tieb buleuen: Buleuen nyang keu phon: Yasobam aneuëk Zabdiel (geuhnyan anggota kawöm Peres sukée Yehuda). Buleuen keudua: Dodai, keuturonan Ahohi. Miklot na kheueh waki gobnyan. Buleuen nyang keulhée: Benaya aneuëk Imeum Yoyada; gobnyan jipimpén "Keulompok Tridasawira" (Amizabad aneuëk gobnyan na kheueh waki geuh). Buleuen nyang keu peuet: Aseal syedara Yoab (geunantoe gobnyan na kheueh Zebaja, aneuëk geuh). Buleuen nyang keulimong: Samhut, keuturonan Yizrah. Buleuen nyang keunam: Ira aneuëk Ikes, nibak banda Tekoa. Buleuen nyang keu tujoh: Heles, keuturonan Efraim nibak banda Peloni. Buleuen nyang keu lapan: Sibkhai nibak banda Husa (gobnyan anggota kawöm Zerah, sukée Yehuda). Buleuen nyang keu sikureueng: Abiezer nibak banda Anatot di wilayah sukée Benyamin. Buleuen nyang keu siploh: Maharai, keuturonan Zerah nibak banda Netofa. Buleuen nyang keu siblaih: Benaya nibak banda Piraton di wilayah sukée Efraim. Buleuen nyang keu dua blaih: Heldai keuturonan Otniel nibak banda Netofa. 16 Nyoe kheueh dafeutar nan-nan ulée sukée lam bansa Israel: Sukée & Ulée 23 Nabi Daud hana geupeukeunong seunsus ateueh ureuëng nyang meu-umu dimiyueb 20 thon, sabab TUHAN ka geumeujanji geukeuneuk peujeuet ureuëng Israel nyang le jih sidub bintang nyang na di langét. 24 Yoab aneuëk Zeruya ka geupeuphon peuna seunsus, teuma buet geuhnyan hana geupeuseuleusoe, sabab Po teu Allah ka geuhuköm ureuëng Israel, kareuna seunsus nyan. Nyang kheueh sabab jih awaknyan hana teucetet padub jeumeulah jih didalam kitab Raja Daud. 25 Nyoe kheueh dafeutar nan ureuëng nyang jeuet keupeunguroih hareuta milék raja: Gudang-gudang nyang na nibak meuligoe dan di Yerusalem: Azmawet aneuëk Adiel Gudang-gudang nyang na di luwa Yerusalem: Yonatan aneuëk Uzia Nyang meukeureuja di blang: Ezri aneuëk Kelub Nyang uroih lampôh-lampôh anggô: Simei nibak banda Rama Nyang uroih teumpat-teumpat teukeubah anggô: Zabdi nibak banda Syifmi Bak zaiton dan bak ara (nibak gaki peugunongan di siblaih ubarat): Baal-Hanan nibak banda Gederi Nyang uroih teumpat teukeubah minyéuk zaiton: Yoas Nyang uroih beulatang peulara nyang na di Padang Saron: Sitrai nibak banda Saron Nyang uroih beulatang peulara nyang na di pantôn-pantôn: Safat aneuëk Adlai Nyang uroih unta: Obil keuturonan Nabi Ismail Nyang uroih keuleudée: Yehdeya nibak banda Meronot Nyang uroih bubiri ngon kaméng: Yazis, ureuëng Hagri. 32 Apha Nabi Daud nyang nan geuh Yonatan, na kheueh sidroe peunaseuhat nyang carông lhom malém. Gobnyan dan Yehiel aneuëk Hakhmoni geubri tugaih tanggong jaweueb ateueh peundidikan aneuëk agam raja. 33 Ahitofel na kheueh peunaseuhat raja, dan Husai ureuëng Arki na kheueh nyang bri naseuhat dan rakan krab raja. 34 Óh ka lheueh Ahitofel meuninggai donya, gobnyan jigantoe lé Abyatar dan Yoyada aneuëk Benaya. Nyang jeuet keupanglima angkatan prang keurajeuen na kheueh Yoab.

1 Tawarikh 28

1 Nabi Daud geupeurintah mangat banmandum peumimpén Israel jimeusapat di Yerusalem. Jadi, bubena ulée sukée, bubena peujabat urosan peumeurintahan, bubena ulée kawöm, bubena ureuëng nyang kawai hareuta benda dan beulatang peulara sira aneuëk-aneuëk agam raja -- paneuk jih bubena ureuëng rayeuk nyang na didalam meuligoe, peuwira dan ureuëng peunteng, banmandum nyan meusapat di Yerusalem. 2 Nabi Daud geudong dikeue awaknyan dan laju geumariet, "Syedara-syedara ulôn nyang saboh bansa, deungoe kheueh nyoe! Ka treb that-that ulôn naniet keuneuk peudong saboh rumoh nyang peumanen keu teumpat Peuto Peujanjian, teumpat geugilo lé gaki TUHAN Allah geutanyoe. Ulôn ka lôn peugöt peusiapan mangat teupeudong saboh teumpat teuseumah Gobnyan. 3 Teuma TUHAN geutam ulôn bék lôn peubuet hai nyang lagéenyan sabab ulôn nyoe sidroe sipa-i nyang ka jai that ulôn peurö darah gob. 4 TUHAN, Po teu Allah nyang jiseumah lé Israel, ka geupiléh ulôn dan keuturonan ulôn mangat jeuet lôn mat peurintah ateueh Israel keu siumu masa. Keu teupeusiab sidroe peumimpén nyang teupiléh nibak sukée Yehuda, dan nibak sukée nyan Gobnyan geupiléh nibak keuluwarga ureuëng syiek ulôn. Dan nibak banmandum anggota keuluwarga ureuëng syiek ulôn nyan Gobnyan ka sipakat teupiléh ulôn dan geupeujeuet ulôn keuraja ateueh banmandum bansa Israel. 5 TUHAN ka geubri aneuëk nyang le keu ulôn dan nibak aneuëk nyang le nyan Gobnyan ka geupiléh Nabi Sulaiman keu jimat peurintah ateueh Israel, keurajeuen TUHAN nyoe. 6 TUHAN geupeugah lagéenyoe, 'Nabi Sulaiman aneuëk gata teuma jipeudong rumoh keu Ulôn. Jihnyan ka Ulôn piléh jeuet keu aneuëk Ulôn, dan Ulôn teuma jeuet keu bapak jih. 7 Meunyoe gobnyan deungon bit-bit geuturot keu huköm-huköm dan peurintah Ulôn lagée nyang ka jipeubuet nibak saát nyoe, Ulôn teuma Lôn peukong keurajeuen jihnyan keu siumu masa.' " 8 Dan geupeugah lom lé Nabi Daud lagéenyoe, "Lé sababnyan, jinoenyoe, hai rakyat ulôn, dikeue Po teu Allah geutanyoe dan dikeue meuhadab ngon banmandum Israel, umat TUHAN nyoe, ulôn meuharab bak gata deungon bit-bit taseutôt banmandum peue nyang ka geupeurintah lé TUHAN Allah geutanyoe. Deungon na lagée nyan gata teutab jeuet keupo nanggroe nyang gét nyoe dan tapeutron waresan keu keuturonan gata keu siumu masa." 9 Lheueh nyan ubak Nabi Sulaiman geupeugah teuma lé Nabi Daud, "Hai aneuëk ulôn, bah kheueh Po teu Allah nyang jiseumah lé ureuëng syiek gata nyoe, gata aku sibagoe Allah gata. Gata harôh tameungabdi ubak Gobnyan deungon até nyang gleh dan tuloih ikhlas. Sabab Gobnyan geuteupeue banmandum pikeran dan peue nyang tesureh lam até geutanyoe. Meunyoe gata tamita Gobnyan, Gobnyan teuma meurumpok deungon gata, teuma meunyoe gata tatinggai Gobnyan, Gobnyan teuma geutulak gata keu siumu masa. 10 Gata ingat kheueh beujroh-jroh bahwa TUHAN ka geupiléh gata keu tapeudong baét nyang khusos keu Gobnyan. Dan jinoenyoe gata peubuet kheueh banmandum peue nyang ka geupeurintah nyan deungon seumangat nyang meutaga." 11 Óh lheueh geupeugah nyan Nabi Daud laju geuseurah ubak Nabi Sulaiman reuncana bangunan Baét TUHAN, meunan cit deungon gudang-gudang jih, banmandum kama jih, dan Ruweueng Mahasuci gobnyan, teumpat teupeu amphon desya. 12 Meunan cit geujok lé Nabi Daud banmandum reuncana nyang ka geupike lé gobnyan keu peulataran-peulataran deungon kama-kama nyang na bansikeulileng nyan, meunan cit keu gudang-gudang peuleungkapan Baét TUHAN dan deungon gudang-gudang teumpat teukeubah keureubeuen-keureubeuen keu TUHAN. 13 Meunan cit geuseurah reuncana keuhai teupeukeulompok teungku-teungku imeum dan ureuëng-ureuëng Lewi, keuhai tugaih-tugaih nyang harôh awaknyan peubuet, na kheueh buet awaknyan di Baét TUHAN dan teupeulara banmandum peukakaih iébadat. 14 Meunan cit geubri teuma peutunyok-peutunyok pakriban cara jih teupeugét méuh dan pirak keu teupeugét peukakaih-peukakaih, 15 keu tieb-tieb panyöt dan gaki panyöt, 16 keu meuja-meuja nibak pirak, dan keu tieb-tieb meuja méuh keuteumpat ruti sajian ubak Po teu Allah. 17 Meunan cit keuhai peutunyok-peutunyok keuhai méuh aseuli nyang harôh teupeuguna keu teupeugét garpu, cambông dan buli-buli, keuhai le ngon dit jih méuh ngon pirak keu teupeugét pireng-pireng, 18 keuhai le jih méuh aseuli keu teupeugét miseubah keuteumpat teutot keumeunyan dan keu teupeugét geuritan keu patong-patong kerub deungon sayeub meulinteung di ateueh Peuto Peujanjian TUHAN. 19 Lé Nabi Daud geupeugah, "Banmandum nyan ka teucetet nyang paih deungon reuncana nyang ka teutuléh nyang ka geutunyok lé TUHAN ubak ulôn mangat ulôn peubuet reuncana nyan." 20 Óh lheueh nyan lé Nabi Daud geupeugah lom ubak aneuëk gobnyan Nabi Sulaiman, "Gata harôh yakén dan gata jeuet. Tapeuphon kheueh meubuet nyan dan gata bék yo mubacut pih keupeue mantong. TUHAN Allah nyang ulôn seumah geutulông gata. Allah hana geutinggai gata. Gobnyan teutab na sabe disampeng gata sampoe nyang gata peubuet nyan seuleusoe. 21 Peumbagian tugaih iébadat didalam Baét TUHAN ka geupeuteuntée lamkawan teungku imeum dan ureuëng Lewi. Ureuëng-ureuëng keureuja nyang carông dan ahli lam bideung jih maséng-maséng teuma geutulông gata deungon galak até, dan mandum peumimpén meunan cit deungon banmandum rakyat teuma jitaát ubak peue nyang gata peurintah."

1 Tawarikh 29

1 Laju geupeugah lé Nabi Daud ubak banmandum ureuëng nyang na meusapat disinan, "Nibak banmandum aneuëk agam ulôn, Nabi Sulaiman kheueh nyang geupiléh lé Po teu Allah. Teuma jihnyan mantong that putik gohlom na peungalaman, seudangkan buet-buet nyoe keubit that rayeuk. Lom teuma nyang teupeudong nyan bukon kheueh saboh meuligoe keu manusia, teuma na kheueh Baét keu TUHAN Allah. 2 Bahan-bahan keu baét nyan meunan cit deungon mubagoe macam peurabot jih ka ulôn keubah deungon sigala keumampuan ulôn. Nibak ulôn ka na lôn keubah méuh, pirak, peurunggu, beuso, kayée, batée-batée meuhareuga dan batée-batée peumata, meunan cit deungon batée-batée nyang meubagoe wareuna keu hiasan-hiasan dan lumpah that le batée pualam. 3 Dan sabab cinta ulôn keu Baét Po teu Allah ulôn ka teuma ulôn seurah pirak ngon méuh nibak hareuta milék ulôn keudroe: 4 méuh nyang paleng gét na 100 ton leubeh, dan pirak nyang aseuli leubeh kureueng na teuma 240 ton keu ngon seupoh nibak bintéh Baét TUHAN, dan keu beunda-beunda nyang harôh jipeubuet lé ureuëng teunaga ahli. Nyang kheueh, jinoenyoe solom nyang jitem bri peuseumahan keu TUHAN deungon sigala mangat até?" 6 Lé sababnyan, bubena ulée kawöm, ulée sukée, bubena peuwira dan nyang tanggong jaweueb hareuta milék raja geupeugah bahwa awaknyan pih na meuheut keuneuk bri sumbangan. 7 Lé awaknyan pi laju jibri nyang teupeugah lom nyoe, atranyoe keu ngon peugét Baét TUHAN: méuh 170 ton leubeh, pirak 340 ton leubeh, peurunggu rab na 620 ton, dan beuso 3.400 ton leubeh. 8 Ureuëng-ureuëng nyang na batée peumata jijok laju ubak Yehiel mangat teupeutamong lam kaih Baét TUHAN. (Yehiel na kheueh sidroe lamkawan ureuëng Lewi nibak kawöm Gerson.) 9 Rakyat jijok nyan deungon rela até keu TUHAN dan awaknyan galak that sabab ka le that nyang ka jipeuseumah. Meunan cit deungon Nabi Daud lumpah that galak até jih. 10 Dikeue rakyatba nyan Nabi Daud laju geupujo TUHAN. Gobnyan geupeugah, "Ya TUHAN Po teu Allah nyang geuseumah lé Nabi Yakub indatu kamoe, teupujo kheueh TUHAN siumu masa! 11 Droeneueh keubit rayeuk dan meukuasa, Droeneueh mulia, jaya dan agong. Peue mantong na di langét dan nyang na di ateueh bumoe na kheueh atra Droeneueh. Droeneueh raja nyang agong, nyang mat kuasa ateueh peue-peue nyang na. 12 Mandum keukayaan dan keumakmuran asai jih nibak Droeneueh; peue-peue mantong nyang na Droeneueh kuasa deungon teunaga dan keudaulatan Droeneueh; Droeneueh meukuasa hase neupeujeuet so mantong ureuëng jeuet keu ureuëng rayeuk dan teuga. 13 Jinoenyoe, Ya Allah kamoe, kamoe peugah syukoe ubak Droeneueh, dan kamoe pujo nan Droeneueh nyang agong. 14 Ulôn ngon rakyat ulôn nyang sikeubit jih hana meuhase kamoe jok sapeue keu Droeneueh, sabab peue mantong nyoe na kheueh atra Droeneueh dan peue nyang kamoe bri nyoe na kheueh atra Droeneueh cit teuma. 15 Droeneueh neuteupeue ya, TUHAN, saban cit lagée indatu kamoe, kamoe pih kamoe rasa udebnyoe saban lagée ureuëng jamé dan ureuëng aséng. Udeb kamoe lagée bubayang yohmasa ilée, dan kamoe hana jeuet kamoe tuwoe ubak maté. 16 Ya TUHAN, Allah kamoe, banmandum barang nyang muyuemnyoe kamoe peusapat disinoe keu teupeudong saboh baét keu Droeneueh mangat kamoe hase kamoe horeumat keu nan Droeneueh nyang suci. Teuma banmandum nyan kamoe teurimong nibak Droeneueh keudroe dan atranyan na kheueh atra Droeneueh keudroe. 17 Ulôn meuteupeue bahwa TUHAN neu ujoe até tieb-tieb manusia dan TUHAN neugalak keu até nyang gleh murni. Deungon até nyang tuloih ikhlas dan mangat até ulôn peuseumah banmandum nyoe keu Droeneueh. Ulôn ka lheueh ulôn ngieng pakriban umat Droeneueh nyang na meusapat disinoe jiba peuseumahan awaknyan keu Droeneueh deungon seunang até. 18 Ya TUHAN Allah, TUHAN nyang geuseumah lé Nabi Ibrahim, Nabi Ishaq dan Nabi Yakub, indatu kamoe, bah kheueh TUHAN neujaga mangat umat Droeneueh teutab cinta Droeneueh lagée nyang ka teujadi nibak uroenyoe dan neutulông kheueh mangat awaknyan siumu masa teutab seutia ubak Droeneueh. 19 Neubri kheueh keu Nabi Sulaiman, aneuëk agam ulôn, keuheundak nyang bit-bit mangat jeuet jiseutôt banmandum peurintah Droeneueh dan mangat jipeudong baét iébadat nyang peusiapan jih ka lheueh ulôn peubuet." 20 Óh ka lheueh geumeudoá nyang lagéenyan, Nabi Daud laju geupeugah ubak ureuëng ramé nyang na disinan, "Pujoe kheueh TUHAN Po teu Allah gata!" Teuma di ureuëng ramé nyan pih laju geumeurateb ngon jipujoe TUHAN, Allah nyang geuseumah lé indatu awaknyan. Lheuehnyan awaknyan laju jisujut sira jibri horeumat ubak TUHAN dan raja. 21 Uroe nyang laén awaknyan laju jisie beulatang peulara keu jipeuseumah sibagoe keureubeuen keu TUHAN, dan uengkot sie nyan laju geubagi-bagi keu rakyat. Seulaén nibak nyan na teuma 1.000 boh leumô agam, 1.000 boh bubiri agam dan 1.000 boh teuma bubiri muda nyang geusie dan geutot deungon sampoereuna di ateueh miseubah. Meunan cit awaknyan jipeuseumah teuma anggô nyang ka teupeuwajéb keu keureubeuen-keureubeuen nyan. 22 Bak uroenyan awaknyan jipajoh khanuri deungon galak dan mangat até dikeue Po teu Allah. Dan nyang keu duagoe jih awaknyan jipeumaklumkan Nabi Sulaiman sibagoe raja. Ateueh nan TUHAN, awaknyan laju geubaiát Nabi Sulaiman sibagoe raja dan Teungku Imeum Zadok geu baiát sibagoe teungku imeum. 23 Dan sibagoe geunantoe Nabi Daud ureuëng syiek gobnyan, Nabi Sulaiman geuduek nibak takhta nyang ka geupeuteutab lé TUHAN. Gobnyan na kheueh raja nyang ade lom carông dan jiseugan lé banmandum bansa Israel. 24 Banmandum peujabat keurajeuen dan tantra sampoe ubak aneuëk-aneuëk agam Nabi Daud nyang laén pih jiaku Nabi Sulaiman nyan sibagoe raja. 25 TUHAN ka geupeujeuet banmandum rakyat jikagom keu Raja Nabi Sulaiman dan geupeujeuet gobnyan keu raja nyang paleng hebat nibak raja tohmantong nyang ka lheueh jimat peurintah ateueh nanggroe Israel. 26 Nabi Daud aneuëk Isai geumat peurintah bansaboh nanggroe Israel 27 peuet ploh thon treb jih. Di Hebron na geumat peurintah nyang treb jih 7 thon dan di Yerusalem na 33 thon. 28 Gobnyan ureuëng kaya dan teuhoreumat dan meuninggai donya bak umu nyang ka seb tuha. Nabi Sulaiman aneuëk agam gobnyan jeuet keuraja keugeunantoe gobnyan. 29 Riwayat udeb Nabi Daud nibak phon sampoe akhé ka na teucetet didalam kitab Nabi Samuel, Nabi Natan dan Nabi Gad. 30 Didalam kitab nyan teucalitra keuhai peumeurintahan gobnyan, kuasa gobnyan dan peue mantong nyang na teujadi u ateueh droe gobnyan, ateueh Israel dan keurajeuen-keurajeuen nyang na tô-tô ngon nanggroe Israel.

2 Tawarikh 1

1 Nabi Sulaiman aneuëk agam Nabi Daud ka jeuet keuraja nyang lumpah that kong keududuekan gobnyan didalam keurajeuen Israel. TUHAN Po teu Allah gobnyan geubri beureukat keu gobnyan dan geupeujeuet gobnyan raja nyang paleng meukuasa. 2 Banmandum ulée pasokan nyang 1.000 dan nyang 100, banmandum peujabat peumeurintah, dan banmandum ulée keuluwarga Israel ka geupeurintah lé Nabi Sulaiman 3 keu jijak deungon gobnyan keu teumpat iébadat di Gibeon. Awaknyan jijak keudeh, kareuna disinan kheueh teumpat Khimah TUHAN nyang ka geupeugöt lé Nabi Musa hamba TUHAN nyan yoh watée gobnyan mantong na dipadang pasi. ( 4 Teuma Peuto Peujanjian TUHAN nyan mantong na di Yerusalem didalam khimah nyang ka geupeudong lé Nabi Daud keu Peuto nyan yoh watée geupinah atranyan nibak Kiryat-Yearim.) 5 Miseubah peurunggu nyang geupeugöt lé Bezaleel aneuëk si Uri, cucoe Hur, atranyan na cit meurumpok di Gibeon nyang teupeuduek dikeue Khimah TUHAN. Nabi Sulaiman dan banmandum rakyat geuh geumeu iébadat ubak TUHAN di teumpat nyan. 6 Dikeue khimah nyan raja laju geupeuseumah di ateueh miseubah peurunggu na 1.000 boh beulatang sibagoe keureubeuen nyang teutot leu TUHAN. 7 Bak malam nyan TUHAN Po teu Allah laju geupeuleumah droe Geuh ubak Nabi Sulaiman sira meufeureuman, "Hai Nabi Sulaiman, talakée kheueh ubak Ulôn peue nyang keuneuk gata lakée, nyan teuma Ulôn bri keu gata!" 8 Geujaweueb lé Nabi Sulaiman, "Ya Allah Po, Droeneueh ka lheueh neutunyok bahwa Droeneueh get that neugaséh ubak ureuëng syiek ulôn Nabi Daud, dan Droeneueh ka teuma neu baiát ulôn jeuet keuraja keugeunantoe gobnyan. 9 Jinoenyoe, ya TUHAN Allah, seumoga Droeneueh neupeuteupat janji Droeneueh ubak ureuëng syiek ulôn. Droeneueh ka neu baiát ulôn jeuet keuraja ateueh bansa nyang raya nyoe nyang hana teuitong jeumeulah jih. 10 Lé sababnyan neubri kheueh ubak ulôn keubijaksanaan dan iéleumé nyang ulôn peureulée mangat ulôn pimpén awaknyan. Meunyoe hán lagéenyan, pakriban mungken ulôn hase lôn peurintah umat Droeneueh nyang raya nyoe?" 11 Geujaweueb Po teu Allah ubak Nabi Sulaiman, "Peue nyang gata lakée nyan gét that. Gata hana talakée keukayaan atawa hareuta nyang meulimpah meunan cit deungon yuem nyang meusyeuhu atawa bumaté bube nyang na musoh-musoh gata atawa umu beupanyang keu gata keudroe, teuma nyang talakée keubijaksanaan dan iéleumé peungeutahuan mangat hase gata peurintah umat Ulôn nyang ka Ulôn peucaya ubak gata. 12 Sabab nyan keubijaksanaan dan iéleumé peungeutahuan Ulônbri keu gata. Seulaén nibaknyan Ulôn teuma Lônbri keu gata udeb leubeh makmu, leubeh kaya dan leubeh meusyeuhu nibak raja nyang toh mantong bah pih nyan raja yoh masa ilée meunan cit bak masa nyang teuma teuka." 13 Óh lheuehnyan Nabi Sulaiman laju geutinggai teumpat iébadat di Gibeon diteumpat nyang na Khimah TUHAN, laju geuwo u Yerusalem. Nibak teumpat nyan gobnyan geupimpén peumeurintahan ateueh Israel. 14 Gobnyan geuato laju ngon geupeuleungkab lom angkatan prang gobnyan deungon geutamah 1.400 boh geuritan prang dan 12.000 boh guda prang. Siladum nibak peuleungkapan prang nyan geukeubah di Yerusalem, dan nyang leubeh nibak nyan geukeubah di meubagoe banda. 15 Bak jamén keurajeuen Nabi Sulaiman, méuh ngon pirak na kheueh barang nyang ka lazem di Yerusalem, saban cit lagée aneuk batée; dan kayée ceumara Libanon nyang that-that le saban lagée kayée bak ara biasa. 16 Rot peudagang-peudagang nyang jibantu raja, guda jipeuteuka nibak nanggroe Meusé dan nanggroe Kewe, 17 dan geuritan-geuritan prang geupeuteuka nibak nanggroe Meusé cit, óh lheuehnyan geukirém teuma keu raja-raja di nanggroe Het dan raja-raja di nanggroe Siria deungon yuem 150 péng pirak keu yuem saboh guda, dan 600 péng pirak keuk yuem saboh geuritan prang.

2 Tawarikh 2

1 Nabi Sulaiman ka geucok keuputosan gobnyan geukeuneuk peudong Baét TUHAN, dan saboh meuligoe atra droe gobnyan. 2 Mangat meuhase buet geuh nyan laju geukrah 70.000 droe ureuëng keu nyang angkot bahan bangunan, 80.000 droe ureuëng nyang jak peut batée nibak gunong dan na 3.600 droe mando nyang kawai ureuëng keureuja nyan. 3 Nabi Sulaiman laju geukirém haba ubak Raja Hiram di Tirus, "Nyang sigét jih Teungku Amphon neujalen hubongan dagang deungon ulôn lagée nyang ka neupeubuet yoh masa ilée deungon ureuëng syiek ulôn Nabi Daud. Teungku Amphon ka neupeubloe keu gobnyan kayée ceumara Libanon keungon peudong meuligoe gobnyan. 4 Jinoenyoe ulôn keuneuk peudong saboh rumoh iébadat nyang khusos keu ulôn horeumat ubak TUHAN Allah ulôn. Di Baét nyan ulôn dan rakyat ulôn kamoe meuiébadat ubak Gobnyan sira kamoe tot dupa nyang meubagoe rupa bhée jih nyang haröm, meunan cit kamoe peuseumah ruti sajian keu Gobnyan seucara teutab. Meunan cit di baét nyan teuma kamoe peuseumah keureubeuen nyang teutot beungoh ngon malam, tieb-tieb uroe Sabat, uroe raya Buleuen Barô dan uroe-uroe khusos nyang laén mangat kamoe bri horeumat ubak TUHAN Allah kamoe. Sabab, Gobnyan ka geupeurintah mangat hainyan teutab teupeubuet keu siumu masa lé ureuëng-ureuëng Israel. 5 Ulôn meuharab beujeuet Baét TUHAN nyang ulôn peudong nyan na kheueh rumoh nyang paleng agong, sabab Po teu Allah kamoe jiôh leubeh agong nibak ilah nyang toh mantong nyang na di ateueh bumoe nyoe. 6 Teuma nyang seubeuna jih hana meusidroe ureuëng pi nyang hase jipeudong baét keu Po teu Allah, sabab banmandum angkasa raya hana seb rayeuk jeuet keuteumpat tinggai Gobnyan. Lé sababnyan, Baét TUHAN nyang hase ulôn peudong nyan paleng-paleng keu teumpat ulôn tot keumeunyan keu Po teu Allah! 7 Lé sabab nyan, bah kheueh Teungku Amphon neukirém keu kamoe sidroe ureuëng nyang carông jimeu-uke dan hase jipeugöt méuh, pirak, peurunggu, beuso, dan meunan cit carông jipeugöt ija ijo, ija ungu dan ija mirah. Ureuëng nyan teuma geumeukeureuja meusajan deungon ureuëng seumeugét laén nibak ureuëng Yehuda dan Yerusalem nyang ka geupiléh lé ureuëng syiek ulôn Nabi Daud. 8 Ulôn teupeue bahwa ureuëng nyang teubang kayée nibak nanggroe Teungku Amphon carông jikoh bak kayée, lé sababnyan gét that meunyoe Teungku neukirém keu ulôn meubagoe rupa kayée ceumara dan kayée ceundana nibak Libanon. Ulôn teuma ulôn kraih bubena ureuëng lôn mangat jijak tulông ureuëng-ureuëng Teungku Amphon, 9 mangat awaknyan jipeusiab kayée nyang le that. Sabab Baét TUHAN nyang keuneuk ulôn peudong nyan harôh nyang raya dan hibat. 10 Keu beukai ureuëng-ureuëng Teungku Amphon nyan teuma ulôn kirém ubak Teungku Amphon dua jeunéh gandom, maséng-maséng na 2.000 ton, ié anggô maséng-maséng na 400.000 arée dan minyéuk zaiton na 400.000 arée." 11 Sibagoe beunalah surat nyang geukirém lé Raja Nabi Sulaiman nyan laju geubalaih lé Raja Hiram lagéenyoe, "Sabab TUHAN geugaséh keu umat Gobnyan, Gobnyan ka geuangkat Teungku Po jeuet keuraja awaknyan. 12 Teupujoe kheueh TUHAN Po teu Allah Israel, nyang cebta langét ngon bumoe! TUHAN ka geubri keu Nabi Daud sidroe aneuëk nyang carông malem lom bijaksana, dan lhok iéleumé, nyang jinoenyoe teungoh geu-useuha keuneuk geupeudong saboh Baét TUHAN dan saboh meuligoe keu atra droe gobnyan. 13 Meusajan deungon nyoe ulôn kirém ubak Teungku Amphon sidroe ureuëng teunaga ahli nyang carông ligat, nyang nan jih Huram. 14 Ma ureuëng nyoe nibak sukée Dan, bapak jih ureuëng Tirus. Ureuëng nyoe carông jipeugét barang nibak méuh, pirak, peurunggu, beuso, batée dan kayée. Meunan cit jih nyan carông jipeugét ija ijo, ija ungu dan ija mirah, meunan cit deungon ija lineun. Peue mantong sinuké nyang teuculek hase geupeugöt meunurot mode peue mantong nyang teupeugah. Bah kheueh ureuëng nyan teujok tugaih keu jimeukeureuja meusapat deungon ureuëng-ureuëng Teungku Po, dan deungon ureuëng-ureuëng nyang ka meubuet keu Nabi Daud ureuëng syiek Teungku Po. 15 Jinoenyoe teungoh kamoe preh-preh neukirém bandua boh jeunéh gandom, anggô dan minyéuk zaiton nyang ka Teungku Po peujanji nyan. 16 Teuma kamoe jakteubang kayée ceumara di gunong-gunong Libanon sidub le nyang ka Teungku Po lakée, óh lheuehnyan kayée nyang ka lheueh teukoh nyan laju teuikat jeuet keurakét, dan teu peuanyot lam laôt sampoe trok u Yope. Disinan Teungku Po hase neu angkot u Yerusalem." 17 Raja Nabi Sulaiman laju geupeuna seunsus ateueh ureuëng aséng nyang na tinggai di nanggroe Israel, lagée nyang ka lheueh geupeuna lé Nabi Daud ureuëng syiek gobnyan. Teunyata óh lheueh geuseunsus na 153.600 droe ureuëng aséng. 18 Tujoh ploh ribée droe nibak awaknyan laju geubri tugaih mangat jijak angkot bahan-bahan bangunan, 80.000 droe teubri tugaih keu jijak peut batée nibak gunong-gunong, dan 3.600 droe geubri tugaih mangat jeuet keumando nyang kawai ureuëng meubuet nyan.

2 Tawarikh 3

1 Nabi Daud ka geucok keuputosan bahwa Baét TUHAN harôh geupeudong di Yerusalem nibak Gunong Muria di teumpat teulo boh gandom atra Arauna ureuëng Yebus. Teupeudong Baét TUHAN nyan geupeuphon lé Raja Nabi Sulaiman 2 bak buleuen nyang keu dua nibak thon nyang keu peuet bak watée peumeurintahan gobnyan. 3 Panyang Rumoh nyan 27 metée dan luwah jih 9 metée. 4 Panyang kama keue santeut deungon luwah Rumoh nyan, na kheueh 9 metée. Manyang jih 54 metée. Bagian dalam rumoh nyan teuseupoh deungon méuh aseuli. 5 Ruweueng nyang paleng phon geuboh deungon papeuen ceumara nyang paleng gét dan teulapéh teuma deungon méuh tuha. Bak lapesan méuh nyan na teuma gamba nyang meu-uke deungon bak mamplang dan gamba ranté. 6 Raja geuhias Baét nyan deungon batée peumata nyang lagak-lagak dan deungon méuh nyang geupeusan di nanggroe Parwaim. 7 Meunan cit méuh nyan geungui keu geulapek bintéh-bintéh beuton Baét TUHAN nyan, balok-balok jih, ambang-ambang pintoe jih dan pintoe-pintoe jih. Beuton-beuton nyan geu uké deungon gamba kerub. 8 Ruweueng dalam nyang geuboh nan Ruweueng Maha Suci panyang jih na 9 metée dan luwah jih na teuma 9 metée, saban cit deungon luwah Baét nyan. Dua ploh thon méuh geungui keu teulapéh bintéh beuton Ruweueng Maha Suci nyan 9 dan 570 gram méuh keu teupeugét labang. Meunan cit deungon beuton kama-kama di bagian ateueh pih teulapék deungon méuh. 10 Meunan cit lé raja geuyue teuma ubak ureuëng keureuja nyan mangat jipeugöt dua boh patong kerub nibak logam. Patong-patong nyan geulapéh cit deungon méuh dan geupasang sira geu ato meujandreng di Ruweueng Maha Suci meuhadab ubak pintoe. Tieb-tieb kerub nyan na teuma dua boh sayeueb, maséng-maséng panyang jih na 2,2 metée. Sayeueb-sayeueb nyan meukeumang lagée nyan bagoe sampoe ujong nyang saboh sare tupéh di ruweueng teungoh dan ujong nyang laén tupéh teuma ubak bintéh beuton di wie ngon uneuen. Jadi, sayeueb-sayeueb nyan meureuntang na 9 metée sidub luwah ruweueng nyan. 14 Keu Ruweueng Maha Suci nyan geupeugét teuma ija tutôb peuradeuen nibak ija lineun dan ija nyang laén nyang meuwareuna ijo, ungu dan mirah. Meunan cit ija gurden nyan teuhiah deungon gamba-gamba kerub. 15 Raja geupeugét teuma dua boh taméh nyang maséng-maséng manyang jih na 15,5 metée, laju atra nyan geukeubah dikeue Baét TUHAN. Tieb-tieb saboh taméh nyan na ulée taméh 2,2 metée. 16 Si u ateueh taméh-taméh nyan geuhiah teuma deungon hiasan nyang teupeugét nibak peurunggu, nyang saban deungon ranté nyang teumanyum deungon 100 boh deulima. 17 Taméh-taméh nyan geupeudong nibak binéh wie ngon uneuen pintoe rot tamong u dalam Baét TUHAN; nyang di siblaih seulatan geuboh nan Yakhin, dan nyang disiblaih utara geuboh nan Boas.

2 Tawarikh 4

1 Nabi Sulaiman geuyue peugöt teuma saboh miseubah peurunggu, nyang panyang ngon luwah jih maséng-maséng na 9 metée, dan manyang jih 4,5 metée. 2 Lé gobnyan geupeugöt teuma saboh beujana peurunggu nyang bulat meuglong, deungon ukoran jih na kheueh lagée nyoe: lhok jih 2,2 metée, garéh teungoh jih 4,4 metée, dan lingka jih 13,2 metée. 3 Ban sikeulileng binéh luwa jih teuhiah teuma deungon gamba leumô, nyang teucor meusajan-sajan deungon beujana nyan. 4 Beujana nyan geupeuduek di ateueh mandua boh rueng leumô peurunggu -- lhée boh meuhadab utara, lhée boh meuhadab u seulatan, lhée boh u barat, dan lhée boh u timu. 5 Teubai beujana nyan na 75 milimetée. Binéh jih saban deungon binéh cangkie nyang meuleungkong uluwa saban that lagée bungöng bakong nyang teungoh keumang. Beujana nyan hase jiteun asoe jih kira-kira 60.000 arée. 6 Meunan cit lé Nabi Sulaiman geupeugöt teuma 10 boh baskom raya, limong boh keu geukeubah disiblaih seulatan Baét TUHAN, dan limong boh teuk siblaih utara. Baskom-baskom nyan guna jih keuteumpat rhah uengkot-uengkot sié nyang ka teukoih-koih nyang teuma teutot sibagoe keureubeuen. Ié nyang jaga didalam beujana nyang raya nyan geuseudia keu teungku imeum nyang keuneuk rhah droe. 7 Meunan cit geupeugöt 10 boh gaki panyöt nibak méuh meunurot mode nyang ka teureuncana, dan 10 boh meuja. Banmandum gaki panyöt dan meuja nyan geukeubah di dalam rhueng utama lam Baét TUHAN -- maséng-maséng limong boh disiblaih wie, dan limong teuma disiblaih uneuen jih. Meunan cit geupeugét teuma na 100 boh mangkok méuh. 9 Meunan cit lé Nabi Sulaiman geupeugöt teuma saboh peulataran di dalam nyang geukeubah keu teungku-teungku imeum, dan saboh teuk peulataran luwa. Ôn pintoe nibak geureubang-geureubang nibak bandua boh peulataran nyan teulapéh teuma deungon peurunggu. 10 Beujana geupeuduek nibak sagoe teunggara Baét TUHAN. 11 Huram, nyang jeuet keu ulée banmandum tukang-tukang nyan, laju jipeugöt kuali-kuali, sudok-sudok dan mangkok-mangkok. Dan seuleusoe kheueh geuhnyan geupeugöt banmandum peuleungkapan Baét TUHAN nyang paih deungon janji geuh ubak Nabi Sulaiman. Nyoe kheueh nan-nan peuleungkapan nyang ka jipeugöt nyan: Dua boh taméh raya Dua boh ulée taméh nyang hijih lagée mangkok nyang teukeubah di ateueh bandua boh taméh nyan Meunanyuem ranté bak tieb-tieb taméh 400 boh deulima peurunggu nyang teususon lam dua boh deret bansikeulileng meunanyuem ranté nyang nibak tieb-tieb ulée taméh 10 boh geuritan 10 boh baskom raya Beujana peurunggu 12 boh leumô peurunggu nyang teutumpang nibak beujana nyan Kuali-kuali, sudok-sudok dan gareupu-gareupu Banmandum peuleungkapan nyan jipeugöt lé Huram keu Baét TUHAN, teupeugöt nibak peurunggu dan teugeusok sampoe meukilat. Banmandum nyang jipeugét lé Huram nyan na kheueh saban deungon peurintah Nabi Sulaiman. 17 Nabi Daud geuyue peugét barang-barang nyan nibak ureuëng nyang buet jih bagian peuhanco logam lamkawan Sukot dan Zereda di Pantôn Yordan. 18 Barang-barang nyang geuyue peugöt nyan lumpah that le, sampoe hana meusidroe ureuëng pih jiteupeue padub kilogram peurunggu nyang ka teupeuguna keunan. 19 Raja Sulaiman geuyue peugét lom nyang laén peukakaih-peukakaih nibak méuh aseuli keu Baét TUHAN. Nyoe kheueh nan-nan peukakaih nyang geuyue peugét nyan: Miseubah Meuja keu teumpat ruti sajian Banmandum gaki panyöt deungon panyöt jih nibak méuh tuha keu teupeuhu dikeue Ruweueng Maha Suci, nyang paih deungon reuncana Hiasan-hiasan nyang hijih lagée bungöng Panyöt-panyöt Seupet-seupet Alat keungon peugleh dah panyöt Cambông-cambông Piréng-piréng keu teumpat keumeunyan Piréng-piréng keu teumpat ngeue apui Banmandum pintoe rot tamong u Baét TUHAN meunan cit deungon pintoe Ruweueng Maha Suci teulapéh deungon méuh.

2 Tawarikh 5

1 Óh ka lheueh seuleusoe geupeudong Baét TUHAN nyan lé Nabi Sulaiman, laju geukeubah didalam gudang-gudang Baét TUHAN nyan banmandum méuh, pirak dan barang-barang nyang laén nyang ka geupeuseumah lé Nabi Daud ureuëng syiek gobnyan keu TUHAN. 2 Óh ka seuleusoe nyan lé Nabi Sulaiman laju geuyue banmandum peumimpén sukée dan kawöm nibak bansa Israel mangat jimeusapat di Yerusalem guna mangat teupinah Peuto Peujanjian TUHAN di Sion, Banda Nabi Daud u Baét TUHAN. 3 Dan jijak kheueh awaknyan banmandum paih nibak uroe raya Jambo Ôn. 4 Óh ka meusapat banmandum peumimpén nyan, di ureuëng-ureuëng Lewi laju geubeuôt Peuto Peujanjian TUHAN nyan, 5 dan laju geuba atranyan u Baét TUHAN. Meunan cit deungon Khimah TUHAN dan banmandum peuleungkapan jih nyang na didalam nyan geuba banmandum u Baét TUHAN lé teungku-teungku imeum dan ureuëng Lewi. 6 Raja Nabi Sulaiman dan mandum rakyat Israel ka meusapat dikeue Peuto Peujanjian nyan laju jipeuseumah ubak TUHAN bubiri dan leumô nyang hana hase teu itong le jih. 7 Óh lheueh nyan lé teungku-teungku imeum laju geupaso Peuto Peujanjian nyan u dalam Baét TUHAN dan jikeubah atra nyan di miyueb patong kerub didalam Ruweueng Maha Suci. 8 Sayeueb patong-patong nyan meureuntang sampoe teutob Peuto nyan meunan cit deungon kayée-kayée geunulam nyan. 9 Kayée geunulam nyan panyang lagoena, sampoe ujong-ujong jih leumah teukalon nibak Ruweueng Maha Suci, teuma hana deuh teukalon rot luwa. (Sampoe nibak uroenyoe kayée-kayée nyan mantong na disinan.) 10 Didalam Peuto Peujanjian nyan hana sapeuepi seulaén nyang na dua boh keupeng batée. Batée-batée nyan ka geupeutamong keunan lé Nabi Musa di Gunong Sinai. Bak watée TUHAN geupeugöt peujanjian deungon bansa Israel yoh watée awaknyan teungoh jijak nibak nanggroe Meusé u nanggroe Kanaan. 11 Banmandum teungku imeum nyang na disinan, nibak mandum keulompok, ka jipeusiab droe keu jijak ubak upacara nyan. Meunan cit banmandum ureuëng tukang meunyanyoe dan nyang peumeu-én alat musik lam sukée Lewi, na kheueh Asaf, Heman, Yedutun dan banmandum anggota kawöm awaknyan, ka jingui peukayan nibak ija lineun. Ureuëng-ureuëng Lewi nyan jidong nibak siblaih u timu miseubah sira jimat simbal dan keucapi. Meusajan awaknyan na teuma 120 droe teungku imeum nyang ka siab geuyueb beureuguih. Ca-e-ca-e ngon nyanyoe lé ureuëng biduan sampoe melawok deungon su iréngan musik teurumpét, simbal dan alat musik nyang laén. Nyoe kheueh tutoe haba puja ngon pujoe nyang awaknyan peuca-e keu TUHAN: "Pujoe kheueh TUHAN, sabab Gobnyan gét. Gaséh Gobnyan keukai abadi." Bak watée teungku-teungku imeum geuteubiet lam Baét TUHAN nyan, hana teusangka-sangka Baét nyan ka peunoh deungon cahya teuka TUHAN, sampoe awaknyan ka hana jeuet le jipeubuet upacara iébadat.

2 Tawarikh 6

1 Nabi Sulaiman geumeudoá, "Ya TUHAN, Droeneueh leubeh galak neutinggai didalam awan nyang seupôt. 2 Jinoe ulôn peudong keu Droeneueh geudong nyang meugah, keu teumpat tinggai Droeneueh siumu masa." 3 Óh lheueh geumeudoá, Nabi Sulaiman laju geupaleng ubak rakyat nyang teudong disinan, dan laju geulakée beureukat Allah keu awaknyan. 4 Geupeugah lé Nabi Sulaiman dalam munajab gobnyan ubak Allah, "Yoh masa ilée TUHAN ka neumeujanji ubak ureuëng syiek ulôn Nabi Daud lagée nyoe, 'Yoh phon that Ulôn peuteubiet umat Ulôn di nanggroe Meusé sampoe nibak uroenyoe, di nanggroe Israel hana meusaboh banda pih nyang Ulôn piléh keu jeuet keu teumpat teupeudong saboh rumoh iébadat keu Ulôn, dan hana meusidroe pi nyang Ulôn piléh mangat jeuet keupeumimpén umat Ulôn Israel. Teuma jinoenyoe Ulôn piléh Yerusalem sibagoe teumpat iébadat keu Ulôn. Dan gata hai Nabi Daud, Ulôn piléh mangat tapeurintah umat Ulôn.' Teupujoe kheueh Po teu Allah Israel nyang ka geupeuteupat janji geuh nyan!" 7 Lheuehnyan geupeugah lom lé Nabi Sulaiman, "Ureuëng syiek ulôn Nabi Daud ka geureuncana keuneuk geupeudong saboh rumoh iébadat ubak TUHAN Allah Israel. 8 Teuma TUHAN geupeugah ubak gobnyan, 'Meukeusut gata nyan jroh that. 9 Teuma, kon gata, aneuëk gata kheueh nyang peudong Baét Ulôn nyan.' 10 Jinoenyoe TUHAN ka geupeutrok janji Geuh. Ulôn ka jeuet keuraja Israel keugeunantoe ureuëng syiek ulôn, dan meunan cit di ulôn ka teuma ulôn peudong rumoh keu teumpat iébadat ubak TUHAN, Allah Israel. 11 Di dalam Baét TUHAN nyan ulôn keubah teumpat keu Peuto Peujanjian nyang asoe jih batée peujanjian TUHAN deungon umat Israel." 12 Nabi Sulaiman ka geupeugöt panggong peurunggu di teungoh-teungoh Baét TUHAN. Panyang ngon luwah jih na 2,2 metée, dan manyang jih na 1,3 metée. Dikeue rakyat nyang teuka keunan, Nabi Sulaiman laju geu-ék u ateueh panggong nyan, dan geudong geumeuhadab ubak miseubah. Banmandum ureuëng nyang na disinan deuh jikalon. Laju gobnyan geumeu teuôt, óh lheueh nyan geubeuôt ban dua blaih jaroe geuh sira geuleueng u langét laju geumeu doá, 14 "TUHAN, Po teu Allah Israel! Dilangét meunan cit di ateueh bumoe nyoe hana nyang hase lagée Droeneueh ya TUHAN! Droeneueh ka neupeutrok janji Droeneueh deungon cara ka neutunyok geunaséh Droeneueh keu umat Droeneueh nyang seutia lom taát deungon sipeunoh até keu Droeneueh. 15 Droeneueh ka neupeutrok janji Droeneueh ubak ureuëng syiek ulôn Nabi Daud. Peue nyang ka TUHAN peujanjinyan ka TUHAN peubuet nibak uroenyoe. 16 Meunan cit TUHAN ka neumeujanji ubak ureuëng syiek ulôn bahwa meunyoe keuturonan gobnyan bit-bit taát ubak huköm Droeneueh lagée gobnyan, teuma keu siumu masa sidroe lamkawan keuturonan gobnyan jimat peurintah lagée raja di Israel. Jinoenyoe, ya TUHAN Po teu Allah Israel, neupeutrok kheueh laju banmandum janji nyang ka TUHAN peujanji ubak bapak ulôn Nabi Daud, hamba Droeneueh nyan. 18 Teuma, ya Po teu Allah, peu kheueh beutôi-beutôi TUHAN neutem tinggai di ateueh bumoe nyoe di lamkawan manusia? Meunyoe tacok langét banmandum pih hana seb luwah keuteumpat Droeneueh, peue teuk lom deungon rumoh iébadat nyang ulôn peudong nyoe! 19 Ya TUHAN, Allah ulôn, ulôn hamba Droeneueh! Teuma, neudeungoe kheueh doá ulôn, dan neupeukabui kheueh peue nyang ulôn lakée. 20 Seumoga uroe ngon malam TUHAN neulindong baét nyoe nyang ka TUHAN piléh sibagoe teumpat iébadat keu Droeneueh. Seumoga teuma nibak teumpat tinggai TUHAN di syeuruga TUHAN neudeungoe dan neupeu amphon ulôn meunan cit desya umat Droeneueh Israel, pajan mantong kamoe meuhadab ubak baét nyoe dan kamoe meudoá ubak Droeneueh. 22 Meunyoe na sidroe ureuëng jitudoh meusalah ateueh ureuëng laén dan laju jiba ubak miseubah Droeneueh didalam Baét Droeneueh nyoe keu jimeusumpah bahwa jihnyan hana meusalah, 23 ya TUHAN bah kheueh TUHAN neudeungoe doá kamoe nyoe lam syeuruga dan neupeuputôh peukara hamba-hamba Droeneueh nyoe. Neu huköm kheueh nyang meusalah dan neupeubeubaih kheueh nyang hana meusalah. 24 Meunyoe umat Droeneueh Israel jipeutaloe lé musoh-musoh jih sabab awaknyan meudesya, laju jihnyan meunyeusai dan jihoreumat lom Droeneueh sibagoe TUHAN, óh lheuehnyan jijak ubak Baét Droeneueh nyoe sira jimeudoá jilakée amphon ubak Droeneueh, 25 seumoga TUHAN nyang na lam syeuruga neudeungoe awaknyan. Seumoga TUHAN neupeu amphon teuma banmandum desya umat Droeneueh nyoe, dan neupeuwoe awaknyan u nanggroe nyang ka TUHAN bri keu awaknyan dan keu indatu awaknyan. 26 Meunyoe umat Droeneueh meudesya ubak Droeneueh dan neuhuköm awaknyan deungon hana neupeutron ujeuen, laju awaknyan meunyeusai ngon jimeutobat ubak Droeneueh sira jihoreumat Droeneueh sibagoe TUHAN, óh lheuehnyan jijak meuhadab u Baét Droeneueh nyoe dan jimeudoá ubak Droeneueh, 27 ya TUHAN di syeuruga, neudeungoe kheueh awaknyan. Dan neupeu amphon kheueh desya-desya hamba-hamba Droeneueh umat Israel. Neupeuruno kheueh awaknyan mangat jipeubuet nyang beuna. Óh lheuehnyan, ya TUHAN, neupeutron kheueh ujeuen u nanggroe Droeneueh nyoe, nanggroe nyang ka TUHAN bri keu umat Droeneueh nyang ka jeuet keuhak milék jih keu siumu masa. 28 Meunyoe nanggroe nyoe teuka musém deuk atawa bala nyang parah that, atawa bubena seunaman jipeurusak lé angén seu-uem, hama atawa seurangga daruet, atawa meunyoe umat Droeneueh jiprang lé musoh, atawa jiseurang lé peunyakét, 29 seumoga TUHAN neudeungoe doá awaknyan. Meunyoe nibak umat Droeneueh Israel na nyang seudeh até jimeudoá ubak Droeneueh sira jileueng paleuet jaroe u langét jimeuhadab ubak Baét Droeneueh nyoe, 30 bah kheueh TUHAN nyang na lam syeuruga neudeungoe dan neupeu amphon awaknyan. Teuma Droeneueh kheueh nyang teupeue peue asoe até manusia. Sabab nyan neupeusaneut kheueh soemantong ureuëng nyan nyang sadub deungon buet jih, 31 mangat umat Droeneueh jitaát dan jitakot keu Droeneueh pajan mantong simantong awaknyan tinggai di nanggroe nyang ka TUHAN jok keu indatu kamoe. 32 Meunyoe ureuëng aséng nyang deungoe keuhai keu agongan dan teunaga Droeneueh, dan bahwa Droeneueh sabe lam siab keu neutulông, laju jihnyan jijak ubak Baét Droeneueh nyoe keu jijak meudoá ubak Droeneueh, 33 seumoga TUHAN nibak teumpat Droeneueh di syeuruga neudeungoe doá awaknyan dan neupeutrok peue nyang jilakée. Deungon na lagéenyan banmandum bansa nyang na di ateueh donya jituri Droeneueh dan jitaát ubak Droeneueh lagée umat Droeneueh Israel. Awaknyan teuma jiteupeue bahwa rumoh nyang ulôn peudong nyoe kheueh teumpat keujih iébadat ubak Droeneueh. 34 Meunyoe TUHAN neubri peurintah keu umat Droeneueh jijak muprang jak lawan musoh, dan dipat mantong kheueh awaknyan na, awaknyan jimeuhadab ubak banda nyang ka TUHAN piléh nyoe dan jimeudoá sira meuhadab keue baét nyoe nyang ka ulôn peudong keu Droeneueh, 35 seumoga Droeneueh nyang na didalam syeuruga neudeungoe doá awaknyan, dan neupeumeunang keu awaknyan. 36 Meunyoe umat Droeneueh jipeubuet desya ateueh Droeneueh -- nyang sikeubit jih hana meusidroe manusia pih nyang hana meudesya -- dan sabab beungéh Droeneueh neupeubiyeu mantong awaknyan jipeutaloe lé musoh dan laju jiba sibagoe tawanan ubak saboh nanggroe nyang jiôh atawa tô, 37 seumoga TUHAN neudeungoe doá awaknyan. Meunyoe nibak nanggroe nyan awaknyan jitinggai desya-desya jih, dan jimeudoá ubak Droeneueh sira jimeungaku bahwa droe jih nyan ka jipeubuet desya dan buet nyang jeuhet, neudeungoe kheueh doá awaknyan, ya TUHAN. 38 Meunyoe di nanggroe nyan awaknyan deungon ikhlas dan jujoe ka jitinggai desya-desya droe jih, dan jimeudoá ubak Droeneueh sira jimeuhadab u nanggroenyoe nyang ka TUHAN bri keu indatu kamoe, u arah banda nyang ka TUHAN piléh dan u rumoh iébadat nyang ka ulôn peudong keu Droeneueh nyoe, 39 teuma nibak lam syeuruga di teumpat TUHAN tinggai bah kheueh TUHAN deungoe doá-doá awaknyan dan neugaséh keu awaknyan. Neupeu amphon kheueh bubena desya umat Droeneueh. 40 Jinoenyoe, ya Allah ulôn, neungieng kheueh kamoe dan neudeungoe kheueh doá nyang jipeusampoe ubak Droeneueh nibak teumpat nyoe. 41 Neubeudôh kheueh jinoenyoe, ya TUHAN Po teu Allah! Dan meusajan deungon Peuto Peujanjian nyang teulambang sibagoe kuasa Droeneueh nyan bah kheueh TUHAN neutamong u dalam Baét Droeneueh nyoe dan neutinggai kheueh disinoe keu siumu masa. Neubri kheueh beureukat keumandum buet teungku-teungku imeum Droeneueh, dan seumoga banmandum umat Droeneueh mubahgia kareuna Droeneueh jroh that keu awaknyan. 42 TUHAN, Po teu Allah kamoe, bék kheueh neutulak raja nyang ka TUHAN piléh nyoe. Neuingat kheueh keugeunaséh Droeneueh nyang ka TUHAN bri keu hamba Droeneueh Nabi Daud."

2 Tawarikh 7

1 Óh ka lheueh geumeudoá lé Nabi Sulaiman, laju TUHAN geupeutron apui di langét jijak pajoh mandum keureubeuen nyang teupeuseumah keu Gobnyan. Dan bak watée nyan cit teuma cahya tanda TUHAN ka teuka hu trang muble-ble lam Baét TUHAN nyan, 2 lé sabab nyan teuma bubena teungku imeum hana hase jitamong keunan. 3 Bak watée ureuëng Israel leumah jikalon apui hu jitron nibak langét dan cahya tanda ka teuka TUHAN ka hu trang didalam Baét TUHAN nyan, awaknyan banmandum teudugom ateueh aleue laju jiseumah dan jipujo Allah, sabab Gobnyan jroh dan geunaséh Gobnyan keukai dan abadi. 4 Óh lheueh nyan lé Nabi Sulaiman dan banmandum ureuëng nyang na meumeusapat disinan jipeuseumah laju keureubeuen ubak TUHAN. 5 Keu keureubeuen nyang teutot Nabi Sulaiman geupeuseumah na 22.000 boh leumô dan 120.000 boh bubiri. Meunan kheueh cara jih raja dan banmandum rakyat jipeuna upacara keu teuseurah rumoh iébadat nyan ubak TUHAN. 6 Bubena teungku imeum geuyue dong nibak teumpat nyang ka teupeuteuntée keu awaknyan; meuhadab keue deungon ureuëng Lewi nyang teungoh jipujo TUHAN deungon alat-alat musik nyang ka lheueh geupeugöt lé Raja Nabi Daud, sira jimeunyanyoe deungon lagu "Geunaséh Gobnyan Keukai Abadi!" nyang saban lagée nyang ka geuyue lé Nabi Daud. Lé mandum teungku imeum geuyueb beureuguih seudangkan bubena rakyat jidong meureuti. 7 Dan óh lheuehnyan laju geuseurah lé Nabi Sulaiman ubak TUHAN bagian teungoh peulataran nyang na di rumoh iébadatnyan. Óh lheuehnyan gobnyan geupeuseumah disinan keureubeuen nyang teutot, keureubeuen gandom dan gapah beulatang keu keureubeuen peudamé. Banmandum nyan jipeuseumah disinan sabab miseubah peurunggu nyang ka lheueh teupeugot ubit that-that keu banmandum peuseumahan nyan. 8 Nabi Sulaiman dan banmandum rakyat Israel laju jipeuna peurayaan Jambo Ôn nyang treb jih na tujoh uroe. Gét that jai ureuëng nyang meusapat watée peurayaan nyan. Awaknyan teuka nibak daerah nyang jiôh di Jalan Hamat di utara sampoe ubak bataih nanggroe Meusé di seulatan. 9 Tujoh uroe treb jih awaknyan meusapat nibak peureusmian miseubah TUHAN, óh lheuehnyan na tujoh uroe teuk teuma keu peurayaan Jambo Ôn. Nibak uroe nyang keuneulheueh geupeuna teuma peurayaan peunutôb, 10 dan óh singoh beungoh nyan, bak tanggai 23 buleuen nyang keutujoh, Nabi Sulaiman laju geuyuewoe bubena ureuëng nyang teuka keunan. Awaknyan that-that galak ngon mangat até ateueh banmandum nyang jroh nyang ka jipeubuet lé TUHAN ubak bansa Israel umat Gobnyan, ubak Nabi Daud dan ubak Nabi Sulaiman. 11 Óh lheueh seuleusoe geupeudong Baét TUHAN ngon meuligoe lé Nabi Sulaiman, 12 lé TUHAN geupeuleumah droe lom ubak gobnyan nibak watée malam. Geupeugah lé TUHAN ubak gobnyan, "Doá gata ka Ulôn deungoe dan ka teuma Ulôn teurimong baét nyang gata peudong nyoe sibagoe teumpat teupeuseumah keureubeuen nyang khusos keu Ulôn. 13 Meunyoe lé Ulôn hana Ulôn peutron ujeuen dan Lôn kirém daruet keu jijak pajoh hase bumoe sampoe habéh dan Ulôn peuteuka bala peunyakét ateueh umat ulôn, 14 laju umat Ulôn nyang jingui nan Ulôn nyan jipeumiyueb droe, dan jimeudoá lom jiteuka ubak Ulôn keu jitinggai buet jih nyang jeuhet, teuma Ulôn nyang na tinggai di syeuruga Ulôn deungoe doá awaknyan. Ulôn teuma Lôn peuamphon dumna desya awaknyan dan Ulôn peujeuet nanggroe awaknyan makmu lom teuma. 15 Ulôn teutab Ulôn kalon Baét Ulôn nyoe dan siab Ulôn deungoe banmandum doá nyang jilakée nibak teumpat nyoe. 16 Banmandum nyan Ulôn peubuet sabab teumpat nyoe ka Ulôn piléh dan Ulôn peukhusos jeuet keuteumpat iébadat keu Ulôn keu siumu masa. Meunan cit Ulôn teuma Lôn kalon dan Ulôn lindong nyan siumu masa. 17 Meunyoe gata, lagée Nabi Daud ureuëng syiek gata, udeb meunurot kheun Ulôn dan taát ubak huköm-huköm Ulôn dan tapeubuet banmandum nyang Ulôn peurintah bak gata, 18 Ulôn teuma Ulôn peuteupat janji Ulôn nibak ureuëng syiek gata Nabi Daud bahwa sabe na sidroe aneuëk nibak keuturonan jihnyan nyang jeuet keuraja di nanggroe Israel. 19 Teuma meunyoe gata dan rakyat gata ji-iengkeue keu huköm-huköm dan peurintah Ulôn, dan jiseumah ubak ilah-ilah nyang laén, 20 Ulôn teuma Lôn peuteubit gata nibak nanggroe nyang ka Ulôn bri keu gata. Meunan cit Ulôn teuma Lôn tinggai baét nyoe nyang ka Ulôn peuteutab sibagoe baét iébadat keu Ulôn. Dipat mantong rumoh nyoe teuma jihina lé gob dan jipeukém. 21 Baét iébadat nyoe bak saátnyoe keubit that jihoreumat, teuma bak watée nyan soemantong ureuëng nyang na jijak rot nyan hireuen jikalon nyan. Awaknyan jipeugah, 'Pakon TUHAN geupeujeuet lagéenyan ateueh nanggroe dan rumoh nyoe?' 22 Laju lé ureuëng nyang keunong tanyong nyan teuma jijaweueb, 'Sabab awaknyan ka jitinggai TUHAN, Po teu Allah awaknyan, nyang ka geuintat indatu awaknyan jitinggai ngon jiteubiet nibak nanggroe Meusé. Awaknyan ka jiseumah dan meujanji seutia ubak ilah-ilah nyang laén. Nyang kheueh sabab jih TUHAN geupeutron bala nyoe ateueh awaknyan.' "

2 Tawarikh 8

1 Nabi Sulaiman geupeudong Baét TUHAN dan meuligoe raja nyan lam teumpo 20 thon. 2 Banda-banda nyang ka jijok lé Raja Hiram keu gobnyan geupeudong keula-i, dan geuyue tinggai laju ureuëng Israel disinan. 3 Dan geureubot teuma daerah Hamat dan Zoba 4 dan geupeukong banda Tadmor di padang pasi, dan laju geupeudong lom banmandum pusat peubeukalan di Hamat. 5 Banda Bet-Horon-Ateueh dan Bet-Horon-Miyueb geupeudong keula-i jeuet keubanda nyang meukuta deungon pintoe geureubang nyang meupalang pintoe. 6 Meunan cit geupeudong lom teuma banda Baalat, dan banmandum banda peubeukalan, dan banda-banda pangkalan geuritan prang sigoguih deungon guda jih. Banmandum reuncana teupeudong nyan di Yerusalem, Libanon dan banmandum wilayah keukuasaan gobnyan ka geupeubuet banmandum. 7 Banmandum keuturonan bansa Kanaan nyang hana jiteumé poh maté lé bansa Israel bak watée awaknyan jijakduek nibak banda nyan, banmandum ureuëng nyan geukraih lé Nabi Sulaiman keu geuyue keureuja paksa. Awaknyan na kheueh ureuëng Het, Amori, Feris, Hewi dan Yebus. Sampoe nibak uroenyoe keuturonan awaknyan jeuet keunamiet. 9 Ureuëng Israel hana geuyue keureuja paksa; awaknyan geubri tugaih sibagoe sipa-i, peuwira, keumeundan geuritan prang, dan sipa-i pasokan meuguda. 10 Dua reutoih limong ploh droe peugawée geujok tugaih tanggong jaweueb ateueh ureuëng-ureuëng nyang keureuja paksa lam meubagoe proyek peumbangunan. 11 Nabi Sulaiman laju geupinah peurumoh geuh, na kheueh putro raja nibak nanggroe Meusé, nibak banda Nabi Daud u rumoh nyang ka geupeudong keu gobnyan. Sabab Nabi Sulaiman geupike lagée nyoe, "Ureuëng binoe ulôn hana jeuet jitinggai nibak meuligoe Nabi Daud, raja Israel, sabab nibak teumpat Peuto Peujanjian TUHAN nyang ka lheueh teukeubah na kheueh teumpat suci." 12 Nabi Sulaiman geupeuseumah keureubeuen nyang teutot ubak TUHAN di ateueh miseubah nyang ka lheueh geupeudong dikeue Baét TUHAN. 13 Keureubeuen-keureubeuen nyan geupeuseumah meunurot huköm Nabi Musa keu tieb-tieb uroe raya: uroe Sabat, uroe raya Buleuen Barô, dan ban lhée boh uroe raya thon meuthon, na kheueh uroe raya Ruti nyang Hana Meurago, uroe raya Musém Seumupot, dan uroe raya Jambo Ôn. 14 Paih lagée peuratoran-peuratoran nyang ka geupeugöt lé Nabi Daud ureuëng syiek gobnyan, Nabi Sulaiman laju geu ato tugaih-tugaih tieb uroe keu mandum teungku imeum dan keu ureuëng Lewi nyang harôh jimeuca-e ngon meurateb puja dan pujoe keu TUHAN jibantu lé mandum teungku imeum lam hai teupeubuet upacara-upacara iébadat. Meunan cit deungon mandum ureuëng nyang kawai Baét TUHAN geubagi laju meureugu-reugu keu tieb-tieb pintoe geureubang, nyang sisuai lagée nyang ka geutunyok lé Nabi Daud hamba Allah nyan. 15 Banmandum peutunyok Nabi Daud ubak teungku imeum dan ureuëng Lewi keuhai gudang-gudang dan hai-hai nyang laén, banmandum nyan jiseutôt jisimak deungon gét that. 16 Deungon nyan teuma seuleusoe kheueh proyek peumbangunan nyang ka geureuncana lé Nabi Sulaiman. Banmandum buet nyan, phon nibak teukeubah keunaleueng sampoe seuleusoe teupeudong Baét TUHAN, ka jikeureuja deungon jroh that. 17 Óh ka lheueh nyan Nabi Sulaiman laju geujak u Ezion-Geber dan u Elot, banda-banda peulabuhan nyang na di lhok Akaba di nanggroe Edom. 18 Raja Hiram laju jikirém keu gobnyan kapai-kapai nyang jipeulayeue lé aneuëk buah Hiram keudroe meusigoe deungon aneuk kapai nyang ka meupeungalaman. Awaknyan jimeulayeue u nanggroe Ofir meusajan deungon aneuëk buah Nabi Sulaiman dan jicok disideh na 15.000 kilogram méuh laju atranyan jiba ubak Nabi Sulaiman.

2 Tawarikh 9

1 Na sidroe ratu nibak nanggroe Syeba, ratu nyan geudeungoe keuhai keumeugahan dan meusyeuhu Nabi Sulaiman. Lé sababnyan ratu nyan laju geujak u Yerusalem keuneuk jak ujoe Nabi Sulaiman nyan deungon cara geuseuéue nyang lumpah payah-payah. Gobnyan teuka deungon nameupadubdroe ureuëng patot-patot meunan cit ureuëng nyang iréng dan unta nyang peunoh teupeudieng deungon reumpah-reumpah, batée peumata dan le that-that lom méuh meutahta. Bak watée ka meurumpok deungon Nabi Sulaiman, ratu nyan laju geutanyong ngon sira geuseueu éue nyang hase geupike. 2 Banmandum nyang geutanyong nyan hase geujaweueb lé Nabi Sulaiman, hana meusaboh pi nyang tuwoe lé gobnyan. 3 Ratunyan ka deuh geungieng keudroe ngon mata ulée geuh pakriban bijaksana jih Nabi Sulaiman nyan. Meunan cit gobnyan geukalon meuligoe nyang geupeudong lé Nabi Sulaiman, 4 cara meukeureuja nyang jipeubuet lé peugawée-peugawée gobnyan nyang meutugaih nibak meuligoe, dan peukayan seuragam dan rumoh-rumoh awaknyan. Meunan cit ratu nyan geunging cara ureuëng peuhidang peunajoh, dan peukayan peulayan nyang peutimang ureuëng khanuri; meunan cit geunging teuma keureubeuen-keureubeuen nyang geupeuseumah lé Nabi Sulaiman di Baét TUHAN. Banmandum nyang ka geungieng lé ratu nibak nanggroe Syeba nyan teuhireuen-hireuen ngon tahé manté. 5 Dan geupeugah kheueh lé ratu nyan ubak Nabi Sulaiman, "Peue mantong nyang ka ulôn deungoe di tanoh ié ulôn keuhai Teungku Amphon dan keubijaksanaan Teungku Amphon, keubit beutôi that! 6 Yoh masa ilée hana lom ulôn patéh, teuma óh ka lheueh ulôn teuka dan lôn ngieng ngon mata ulée lôn keudroe barô kheueh lôn patéh. Nyang sikeubit jih peue mantong nyang ka ulôn deungoe nyan hana meusiteungoh pih nibak peue nyang ka ulôn ngieng bak saát nyoe. Deuh that keubijaksanaan dan keukayaan Teungku Amphon jiôh leubeh rayeuk nibak peue nyang ka jipeugah bak ulôn. 7 Keubit mubahgia that peugawée-peugawée nyang jipeutimang Teungku Amphon dan sabe jimeukeureuja keu Teungku Amphon sampoe hase jideungoe nibak Teungku Amphon keudroe banmandum ajaran nyang bijaksana! Teupujoe kheueh TUHAN, Allah Teungku Amphon! 8 Teupujoe kheueh TUHAN, Po teu Allah Amphon! Deungon teubaiát jih Teungku Amphon jeuet keuraja neumat peurintah ateueh Gobnyan, Gobnyan ka geutunyok padubna galak jih Gobnyan keu Teungku Amphon. Sabab Gobnyan geugaséh keu umat Israel nyang harab mangat umat Geuh nyan teutab na, teuma Gobnyan ka geuangkat Teungku Amphon jeuet keuraja awaknyan, mangat Teungku Amphon hase neupeudong huköm dan keuadelan." 9 Óh lheuehnyan ratu nanggroe Syeba nyan geupeujaroe ubak Nabi Sulaiman peue mantong hadiah nyang ka geuba, na kheueh leubeh nibak 4.000 kilogram méuh dan lam jeumeulah nyang le batée peumata meunan cit deungon reumpah-reumpah. Hana nyang ka-ka na lé Nabi Sulaiman geuteurimong reumpah-reumpah nyang meunan gét mutu jih lagée nyang ka geubri lé ratu nibak nanggroe Syeba nyan keu gobnyan. ( 10 Aneuëk buah Raja Hiram dan aneuëk buah Nabi Sulaiman nyang ba méuh nibak Ofir keu Nabi Sulaiman, na cit jiba sajan batée peumata dan kayée ceundana. 11 Kayée nyan geupeuguna lé Nabi Sulaiman keu teupeugét reunyeun di Baét TUHAN dan meuligoe gobnyan, dan meunan cit kayée nyan geupeuguna keu teupeugét keucapi dan gambus keu ureuëng nyang meuca-e. Gohlom na nyang ka-ka nyang lagéenyan bagoe di nanggroe Yehuda.) 12 Seulaén hadiah-hadiah balasan nyang geubri lé Nabi Sulaiman, Nabi Sulaiman geubri cit ubak ratu nibak nanggroe Syeba nyan peue mantong nyang geulakée. Óh lheueh nyan geuwo kheueh ratu nyan u nanggroe gobnyan meusajan deungon bubena ureuëng nyang jak ngon gobnyan. 13 Tieb-tieb thon Nabi Sulaiman sabe geuteurimong rab na 23.000 kilogram méuh, 14 gohlom teuitong bubena cukée nibak mandum saudaga dan ureuëng meukat. Meunan cit lé raja-raja arab dan gubunur Israel na cit geubri méuh dan pirak keu gobnyan. 15 Nabi Sulaiman na geupeugét 200 boh peurisai nyang raya nibak méuh nyang teuteumpah. Méuh nyan geubalot nibak tieb-tieb peurisai nyan na 7 kilogram. 16 Meunan cit gobnyan geupeugét teuma na 300 boh peurisai méuh nyang leubeh ubit. Méuh nyan geuboh nibak tieb-tieb peurisai ubit nyan na leubeh kureueng 3 kilogram, banmandum nyan nibak méuh nyang teuteumpah. Peurisai-peurisai nyan geukeubah nibak balée nyang geuboh nan Balée Uteuen Libanon. 17 Meunan cit lé Nabi Sulaiman na teuma geupeugöt saboh keurusi keurajeuen nyang raya nyang teupeugét nibak gadeng dan teuhias deungon méuh aseuli. 18 Keurusi nyan na meujaroe dan nibak tieb-tieb siblaih nyan na teuma patong singa. Dan keurusi nyan na teuma nam aneuk reunyeun, dan saboh teumpat gaki nyang teuseupoh deungon méuh. Teumpat peuduek gaki nyan teupeusaboh deungon keurusi jih. 19 Nibak tieb-tieb ujong wie ngon ujong uneuen tieb aneuk reunyeun keurusi nyan na patong singa -- banmandum nyan na 12 boh. Hana keurusi nyang lagée nyan bagoe nibak keurajeuen toh mantong. 20 Banmandum peukakaih ngon jieb ié Nabi Sulaiman teupeugöt nibak méuh, dan banmandum peukakaih nyang na nibak Balée Uteuen Libanon nyan pih teupeugöt nibak méuh aseuli. Bak jamén Nabi Sulaiman, pirak nyan hana yuem. 21 Nabi Sulaiman na teuma kapai raya nyang le nyang hase jimeulayeue didalam laôt raya meusapat deungon kapai-kapai Raja Hiram. Lhée thon sigo kapai nyan jiwo sira jiba méuh, pirak, gadeng, bukréeh dan cicém meurak. 22 Nabi Raja Sulaiman nyan leubeh kaya dan leubeh bijaksana nibak raja toh mantong nyang na di ateueh donya. 23 Banmandum ureuëng jiuseuha jijak peuto ubak Nabi Sulaiman keu jijak deungoe ajaran bijaksana nyang geubri lé Po teu Allah ubak gobnyan. 24 Awaknyan maséng-maséng jiteuka keu jijak jok hadiah ubak Nabi Sulaiman. Nyang jijok lé awaknyan na barang-barang méuh, pirak, peukayan, sinjata, reumpah-reumpah, guda dan bagal. Meunan kheueh nibak thon meugantoe thon. 25 Meunan cit di Nabi Sulaiman na teuma 4.000 boh weue guda dan geuritan gobnyan. Guda prang gobnyan na 12.000 boh. Siladum nibak nyan geukeubah di Yerusalem, dan siladum teuk nibak meubagoe banda pangkalan keu geuritan-geuritan prang gobnyan. 26 Gobnyan geumat kuasa ateueh banmandum wilayah geuh nyang meulinteung phon nibak Krueng Efrat sampoe u nanggroe Filistin dan ubak bataih nanggroe Meusé. 27 Nibak jamén keurajeuen Nabi Sulaiman, pirak nyan na kheueh barang biasa mantong di Yerusalem, saban lagée aneuk batée, dan kayée ceumara Libanon lumpah that le saban lagée kayée ara biasa. 28 Lé Nabi Sulaiman geupeutamong teuma guda di nanggroe Meusé dan nibak tieb-tieb nanggroe laén. 29 Kisah nyang laén keuhai Nabi Sulaiman phon nibak awai sampoe akhé ka teucetet lam kitab Riwayat Nabi Natan dan lam kitab Nubuatan Ahia ureuëng Silo, dan lam kitab Wahyu Nabi Ido, nyan na cit teutuléh kisah keurajeuen Yerobeam raja Israel. 30 Na peuet ploh thon treb jih Nabi Sulaiman geumat keurajeuen di Yerusalem ateueh banmandum nanggroe Israel. 31 Óh lheuehnyan Gobnyan meuninggai donya dan teupeukubu laju nibak lampôh jrat Banda Nabi Daud. Lé Rehabeam aneuëk gobnyan nyang agam teubaiát jeuet keuraja keugeunantoe gobnyan.

2 Tawarikh 10

1 Rehabeam jijak u Sikhem kareuna banmandum rakyat Israel ka meugumpôi disinan keuneuk jak bak teumpat lantek gobnyan jeuet keuraja. 2 Bak watéenyan Yerobeam aneuëk Nebat mantong na tinggai di Meusé sabab jipeuplueng droe nibak Nabi Sulaiman. Bak watée geuhnyan geudeungoe haba keuhai Rehabeam, gobnyan laju geugisa u Israel. 3 Rakyat nyang na di bagian utara jiundang Yerobeam, deungon awaknyan meusigoe-sigoe jijak meuhadab ubak Rehabeam. Kheun awaknyan, 4 "Nabi Sulaiman ureuëng syiek Teungku Amphon ka geupeubeuban nyang lumpah brat u ateueh kamoe. Meunyoe Teungku Amphon neupeuphui beuban kamoe dan neupeukureueng deurita kamoe, kamoe teuma tundok ubak Teungku Amphon." 5 Geujaweueb lé Rehabeam, "Ulôn harôh lôn pike leubeh ilée. Gata jak kheueh keunoe lom leubeh kureueng lhée uroe teuk." Dan geujak kheueh bubena ureuëng nyan. 6 Laju Rehabeam geulakée naseuhat ubak ureuëng-ureuëng patot atawa ureuëng-ureuëng syiek nyang ka lheueh jeuet keupeunaseuhat Nabi Sulaiman ureuëng syiek gobnyan. "Peue nyang harôh ulôn jaweueb keu awaknyan?" geutanyong lé Rehabeam. "Peue naseuhat gata nyoe?" 7 Jijaweueb lé awaknyan, "Meunyoe Teungku Amphon keuneuk peubuet nyang jroh keu rakyat, dan neupeugalak até awaknyan, tabri kheueh jeunaweueb nyang jroh teuma ubak awaknyan, awaknyan teuma seutia ubak Teungku Amphon sampoe án siumu masa." 8 Teuma peue nyang ka geunaseuhat lé ureuëng tuha nyan hana geupakoe lé Rehabeam. Seubalek jih, gobnyan laju geujak mita ureuëng aneuëk-aneuëk muda nyang santeut umu deungon gobnyan dan nyang saát nyan ka jeuet keupeumbantu gobnyan. 9 Ubak awak nyang muda nyan gobnyan geutanyong, "Peue naseuhat gatanyoe keu ulôn mangat ulôn jaweueb rakyat nyang jilakée mangat ulôn peuphui beuban awaknyan?" 10 Jijaweueb lé aneuëk muda-muda nyan, "Meunoe kheueh heundak jih Teungku Amphon peugah ubak awaknyan, 'Sileumoh-leumoh jih ulôn, ulôn mantong leubeh teuga nibak ayah lôn. 11 Ureuëng syiek ulôn ka geubri beuban nyang brat ateueh gata, teuma lé ulôn teuma ulôn bri teuma nyang leubeh brat keu gata. Gobnyan geuseunuet gata deungon peunyunuet, teuma ulôn seunuet gata ngon peunyunuet nyang meuduro beuso!' " 12 Lhée uroe óh lheuehnyan Yerobeam dan banmandum ureuëng nyan jijak lom teuma ubak Raja Rehabeam, lagée nyang ka lheueh geupeurintah lé gobnyan. 13 Meutulak likot deungon naseuhat ureuëng-ureuëng syiek, rakyat nyang teuka ubak gobnyan nyan, laju jisapa deungon cara gasa. 14 Paih deungon naseuhat ureuëng-ureuëng muda nyan, gobnyan geupeugah lom, "Ureuëng syiek ulôn geubri ubak gata beuban nyang brat, teuma ulôn kupeujeuet beuban nyan nyang leubeh brat nibak ban nyang ka. Gobnyan geuseunuet gata deungon peunyunuet, teuma ulôn lôn seunuet gata deungon peunyunuet nyang meuduro beuso!" 15 Peue nyang ka jilakée lé rakyat nyan hana jipeureumeuen. Teuma banmandum nyan na kheueh keuheundak TUHAN Po teu Allah. Peue nyang ka lheueh geupeugah lé TUHAN meulalu Nabi Ahia nibak Silo keuhai Yerobeam aneuëk Nebat harôh teujadi. 16 Bak watée rakyat Israel jikalon bahwa raja hana geutem deungoe awaknyan, awaknyan laju jikuk, "Hana kupakoe keu Nabi Daud dan keuturonan geuh nyan! Awaknyan hántom na jipeubuet sapeue keuk geutanyoe. Hai rakyat Israel, jak geutanyoe tajak woe! Bah kheueh disinan Rehabeam ji uroih droe jih keudroe!" Dan jijakwoe kheueh rakyat Israel u rumoh droe jih maséng-maséng, 17 dan Rehabeam jeuet keuraja na kheueh ateueh wilayah Yehuda. 18 Bahpi meunan Raja Rehabeam mantong cit geuyue Adoniram, sidroe ureuëng nyang jeuet keu mando nibak keureuja rodi, keu jijak peuteunang rakyat. Teuma lé rakyat jigeulawa gobnyan ngon aneuk batée sampoe maté. Rehabeam keudroe hase jipeuleuh seuhingga bagaih-bagaih geujak ék u ateueh geuritan gobnyan, dan geupeuplueng droe u Yerusalem. 19 Phon nibak saát nyan rakyat dibagian utara keurajeuen Israel sabe jibeurontak teuhadab raja-raja keuturonan Nabi Daud.

2 Tawarikh 11

1 Bak watée Raja Rehabeam ka trok u Yerusalem, gobnyan laju geupeusapat 180.000 droe tantra nyang paleng jroh nibak sukée Yehuda dan Benyamin keu jijak prang ureuëng Israel dan jipeupuléh keukuasaan jih ateueh sukée-sukée dibagian utara Israel. 2 Teuma TUHAN geuyue jak Nabi Semaya 3 mangat geujak peusampoe peusan nyoe ubak Rehabeam dan ubak mandum ureuëng nyang na didalam sukée Yehuda dan sukée Benyamin, 4 "Bék gatatem muprang deungon syedara gata ureuëng Israel. Jakwoe kheueh laju! Peue nyang ka teujadi nyan na kheueh keuheundak ulôn." Lé sababnyan awaknyan banmandum jiturot peurintah TUHAN dan hana jeuet jijak muprang deungon Yerobeam. 5 Rehabeam tinggai di Yerusalem dan geuyue laju ubak ureuëng laén jijak peudong kuta-kuta keu banda-banda nyang na diwilayah Yehuda dan Benyamin, banda-banda nyan na kheueh: 6 banda Betlehem, Etam, Tekoa, 7 Bet-Zur, Sokho, Adulam, 8 Gat, Mares, Zif, 9 Adoraim, Lakhis, Azeka, 10 Zora, Ayalon dan Hebron. 11 Gobnyan laju geupeukong banda-banda nyang ka meupageue ngon kuta nyan dan laju geujok tugaih sidroe ulée balang pasokan nibak tieb-tieb banda nyan. Maséng-maséng banda nyan ka teuma geupeuleungkab deungon peunajoh nyang seb, minyéuk zaiton dan ié anggô 12 meunan cit peurisai dan kapak. Deungon lagée nyan, wilayah Yehuda dan Benyamin teutab na lam keukuasaan gobnyan. 13 Teungku-teungku imeum dan ureuëng-ureuëng Lewi nibak bansaboh nanggroe Israel geujak laju meugabong deungon Rehabeam. 14 Ureuëng-ureuëng Lewi nyan laju geu tinggai blang naleueng dan tanoh droe geuh laju geuminah u Yehuda dan Yerusalem, sabab Yerobeam dan raja-raja nyang mat geunantoe gobnyan hana jibri idhin awaknyan jimeubuet sibagoe teungku imeum TUHAN. 15 Yerobeam laju jibaiát teungku-teungku imeum jih keudroe keu nyang layani di teumpat-teumpat teuseumah beurala dan keu jiseumah ubak jén-jén dan patong leumô nyang jipeugöt keudroe. 16 Ureuëng-ureuëng nibak banmandum sukée Israel nyang bit-bit keuneuk seumah TUHAN Po teu Allah Israel, jiminah u Yerusalem, jiseutôt ureuëng-ureuëng Lewi nyan mangat jeuet jipeuseumah keureubeuen keu TUHAN, Allah nyang jiseumah lé indatu awaknyan. 17 Deungon na lagée nyan keurajeuen Yehuda ka leubeh teuga. Lhée thon treb jih awaknyan jitulông peumeurintah Rehabeam aneuëk agam Nabi Sulaiman nyan, dan udeb lagée yoh masa keurajeuen Nabi Daud dan Nabi Sulaiman. 18 Rehabeam geumeukawen deungon Mahalat; ureuëng syiek Mahalat nyan nan jih Yerimot aneuëk agam Nabi Daud, dan ma jihnyan na kheueh Abihail aneuëk Eliab, cucoe Isai. 19 Awaknyan na jimeu aneuëk lhée droe aneuëk agam: Yeus, Semarya dan Zaham. 20 Óh lheueh nyan Rehabeam geumeukawen teuma deungon Maakha aneuëk Absalom. Awaknyan na teuma geumeu aneuëk peuet droe aneuëk agam: Abia, Atai, Ziza dan Selomit. 21 Rehabeam na geumeu inong 18 droe dan 60 droe gundek, 28 droe aneuëk agam, dan 60 droe aneuëk inong. Nibak banmandum peurumoh dan gundek geuhnyan, nyang paleng that geugaséh na kheueh Maakha. 22 Nyan kheueh sabab jih Abia aneuëk Maakha leubeh jigaséh nibak banmandum aneuëk-aneuëk gobnyan nyang laén, lé sababnyan teuma Abia kheueh nyang geupiléh keugeunantoe gobnyan jeuet keuraja. 23 Deungon bijaksana Rehabeam geubri tugaih-tugaih keu aneuëk-aneuëk geuh nyang agam dan geujok tugaih awaknyan nibak banda-banda nyang meupageue ngon kuta di bansaboh wilayah Yehuda dan wilayah Benyamin. Gobnyan geubri keu awaknyan peunajoh nyang meulimpah ruwah, dan geujok teuma ureuëng inong nyang le keu peurumoh awaknyan.

2 Tawarikh 12

1 Óh ka lheueh keududuekan Rehabeam sibagoe raja meutamah teuga, gobnyan dan banmandum umat Israel laju geupeutuwo ubak huköm TUHAN, 2 dan hana seutia ubak Gobnyan. Lé sababnyan TUHAN geuhuköm awaknyan. Bak thon nyang keulimong keurajeuen Rehabeam, Sisak raja di nanggroe Meusé jijak prang Yerusalem 3 deungon 1.200 geuritan prang, 60.000 sipa-i meuguda, dan lam jeumeulah sipa-i nyang hana teuitong le jih, jitamong cit keunan pasokan Libia, Suki dan Sudan. 4 Awaknyan laju jireubot banda-banda nyang meupageue kuta di Yehuda dan laju trok u Yerusalem. 5 Bak watée nyan Raja Rehabeam dan bubena ureuëng peumimpén Yehuda ka meusapat di Yerusalem sabab jipeuplueng droe nibak Sisak. Nabi Semaya geujak laju ubak awaknyan sira geupeugah, "Lagée nyoe kheueh geupeugah lé TUHAN, 'Gata nyoe ka tatinggai Ulôn, lé nyan bak saát nyoe Ulôn pih Lôn tinggai gata akhéjih gata jikuasa lé Sisak.' " 6 Raja dan dumna peumimpén geuaku bahwa awaknyan ka meudesya. Awaknyan laju jipeugah, "Peue nyang geupeubuet lé TUHAN nyan na kheueh ade." 7 Bak watée geukalon lé TUHAN bahwa awaknyan ka jipeumiyueb droe, TUHAN geupeugah lom ubak Nabi Semaya, meunoe geupeugah, "Sabab awaknyan ka jimeungaku keu desya droe jih, jinoe Ulôn hana Ulôn peupaloe le awaknyan. Ulôn deungon reujang Lôn tulông awaknyan; Yerusalem hana Lôn peuhanco. Bahpi meunan, Sisak 8 teuma jikuasa awaknyan, mangat awaknyan jiteupeu beuda jimeungabdi ubak Ulôn dan meungabdi ubak peunguasa-peunguasa donya." 9 Dan teuka kheueh Raja Sisak jijak prang Yerusalem dan jireubot laju barang-barang nyang meuhareuga nyang na meuteumé didalam Baét TUHAN dan di meuligoe raja, meunan cit deungon peurisai-peurisai méuh nyang geupeugét lé Nabi Sulaiman. 10 Keugeunantoe jih Rehabeam laju geupeugét peurisai-peurisai peurunggu, dan geupeucaya peugét atranyan ubak peuwira nyang kawai babah pintoe geureubang meuligoe. 11 Pajan mantong raja geujak u Baét TUHAN, lé ureuëng peungawai jiba peurisai-peurisai nyan, óh lheuehnyan atra nyan laju jipeuriwang ubak kama jaga. 12 Sabab raja geupeumiyueb droe dikeue TUHAN, dan meunan cit sabab mantong na hai-hai nyang jroh di Yehuda ngon nyan reuda kheueh meureuka TUHAN keu Rehabeam hana jeuet geupeupaloe raja nyan mubacut pih. 13 Rehabeam geumat peurintah di Yerusalem dan keukuasaan gobnyan sampoe rayeuk. Gobnyan meu umu 41 thon bak watée teu baiát jeuet keuraja, dan geumat peurintah na 17 thon treb jih di Yerusalem, banda nyang nibak mandum wilayah Israel geupiléh lé TUHAN mangat jeuet keu teumpat iébadat ubak Gobnyan. Nan ma Rehabeam na kheueh Naama asai di nanggroe Amon. 14 Rehabeam jipeubuet jeuhet sabab hana jiuseuha jipeubuet buet lagée kheun TUHAN. 15 Kisah keuhai Rehabeam awaiphon sampoe akhé dan silsilah gobnyan ka teucetet lam kitab Seujarah Nabi Semaya dan lam kitab Seujarah Nabi Ido. Lamkawan Rehabeam dan Yerobeam hana putôh na sabe prang. 16 Rehabeam meuninggai donya dan teukubu di lampôh jrat raja-raja Banda Nabi Daud. Abia aneuëk gobnyan nyang agam teubaiát jeuet keuraja keugeunantoe gobnyan.

2 Tawarikh 13

1 Bak thon nyang keulapan blaih masa keurajeuen Raja Yerobeam ateueh Israel, Abia jeuet keuraja di nanggroe Yehuda, 2 dan geumat peurintah na lhée thon treb jih di Yerusalem. Ma gobnyan nan jih Mikhaya aneuëk Uriel asai nibak banda Gibea. Óh lheueh nyan beureutoh kheueh prang Abia lawan Yerobeam. 3 Abia geukrah na 400.000 droe sipa-i, seudangkan Yerobeam na 800.000 droe sipa-i. 4 Bandua pasokan nyang ka meuhadab keue di daerah meugunong-gunong Efraim. Abia laju geu-ék u ateueh Gunong Zemaraim laju geuwok ubak Yerobeam dan ureuëng Israel, "Gata deungoe nyoe! 5 Gata tateupeue bahwa TUHAN, Allah Israel, ka geuikat janji deungon Nabi Daud bahwa gobnyan dan keuturonan geuh geumat peurintah ateueh Israel keu siumu masa. Janji nyan hana jeuet teupeubateue. 6 Bahpi meunan, Yerobeam aneuëk Nebat nyan jibeurontak ubak Nabi Sulaiman, raja jih keudroe. 7 Jihnyan laju jipeusapat saboh kawan ureuëng-ureuëng jeuhet nyang kureueng aja dan jipaksa keuheundak droe jih keudroe ubak Rehabeam aneuëk agam Nabi Sulaiman nyan, nyang yoh watéenyan mantong that muda dan hana peungalaman keu jiteuntang. 8 Jinoenyoe gata sangka gatanyoe banmandum hase talawan keukuasaan nyang geubri lé TUHAN ubak keuturonan Nabi Daud, sabab pasokan gata ramé dan nibak gata na leumô-leumô méuh nyang lé Yerobeam jipeujeuet sibagoe dewa gata. 9 Kon kheueh teungku-teungku imeum TUHAN nyang keuturonan Nabi Harun dan ureuëng-ureuëng Lewi ka gata use banmandum? Sibagoe geunantoe soemantong nyang meuheuet jeuet keu teungku imeum, asai ureuëng nyan hase jiba saboh leumô atawa tujoh boh bubiri, gata peujeuet imeum nyang kon Allah, sabab keubit lagéenyan kheueh cara bansa-bansa laén jiangkat teungku imeum droe jih. Teuma dikamoe hana kamoe peubuet nyang lagée nyan bagoe. 10 Kamoe teutab kamoe meungabdi ubak TUHAN Allah kamoe dan hana kamoe tinggai Gobnyan. Teungku-teungku imeum kamoe teutab nibak keuturonan Nabi Harun, dan ureuëng-ureuëng Lewi teutab geutulông awaknyan. 11 Tieb-tieb beungoh dan seupôt awaknyan jitot keumeunyan dan jipeuseumah keureubeuen nyang teutot keu TUHAN, dan geupeuna teuma ruti sajian. Tieb-tieb malam awaknyan geupeuhu panyöt-panyöt nyang geukeubah nibak gaki panyöt méuh. Kamoe teutab kamoe taát ubak peue-peue mantong nyang geupeurintah lé TUHAN, teuma gata ka tatinggai Gobnyan. 12 Peumimpén kamoe na kheueh Po teu Allah keudroe dan bubena teungku imeum Gobnyan na disinoe. Awaknyan ka siab keu geuyueb beureuguih sibagoe tanda keukamoe mangat teujak prang gata. Hai ureuëng Israel, bék kheueh gata lawan TUHAN, Po teu Allah indatu gata! Gata banmandum hana hase meunang!" 13 Nibak watéenyan Yerobeam laju jikirém siladum nibak pasokan jih keujijak pagab pasokan Yehuda rot likot, seudangkan siladum teuk jipagab awaknyan rot keue. 14 Óh watée jingieng lé pasokan Yehuda bahwa droe geuhnyan ka teupagab, awaknyan laju geukliek sira geulakée tulông ubak TUHAN. Lé teungku imeum laju geuyueb beureuguih, 15 lé pasokan Yehuda geudumpék prang dan laju geumaju ngaza, geupimpén lé Abia. Teungoh awaknyan muprang hana tuwoe geutawök, Po teu Allah dan laju geupeutaloe Yerobeam dan pasokan Israel 16 akhéjih awaknyan ka habéh jiplueng teung bayeueng hana meuteuntée. Allah ka geupeujeuet ureuëng Yehuda meunang dimideuen prang ateueh ureuëng Israel. 17 Keubit that rayeuk taloe nyang jideurita lé pasokan Israel dimideuen prang nyang jikeumando lé panglima Abia nibak pasokan Yehuda; na 500.000 droe sipa-i awaknyan nyang paleng beuhe maté dimideuen prang nyan. 18 Ureuëng Yehuda hase meunang, sabab awaknyan geubantu lé TUHAN, Allah indatu awaknyan. 19 Bak watée Abia geutiyeub pasokan Yerobeam, gobnyan laju geureubot banda-banda deungon na meupadubboh gampông nyang na tô-tô ngon banda nyang geureubot nyan. Banda-banda nyan na kheueh banda Betel, Yesana dan Efron. 20 Simantong na keurajeuen Abia, Yerobeam hana hase geupeu aman nanggroe gobnyan. Nyang Akhé jih Yerobeam nyan geupoh maté lé TUHAN. 21 Sikeubitjih, Abia seumaken meukuasa. Bak gobnyan na 14 droe peurumoh, 22 droe aneuëk agam dan 16 droe aneuëk inong. 22 Kisah nyang laén keuhai Abia, dan keuhai banmandum keuhai tutoe haba dan buet-buet gobnyan ka teucetet didalam kitab Seujarah Nabi Ido.

2 Tawarikh 14

1 Óh ka lheueh Raja Abia meuninggai donya dan ka teukubu nibak lampôh jrat raja-raja di Banda Nabi Daud, Asa aneuëk agam gobnyan jeuet keuraja keugeunantoe gobnyan. Dimiyueb peumeurintahan Raja Asa, nanggroe Yehuda aman ngon teuntram treb jih na siploh thon. 2 Asa keubit that galak até TUHAN Allah sabab gobnyan geupeubuet-buet nyang bit that meukeunong nibak TUHAN sabab ade dan jroh. 3 Gobnyan laju geukireuh dan geuböih banmandum miseubah bansa laén dan teumpat-teumpat ureuëng seumah beurala. Tugu-tugu dewa habéh geupeuhanco banmandum, dan taméh-taméh patong Dewi Asyera geupeureubah bak tanoh. 4 Rakyat Yehuda geuyue udeb meunurot keuheundak TUHAN, Allah indatu awaknyan, dan geuyue taát ubak ajaran-ajaran dan peurintah-peurintah Gobnyan. 5 Banmandum teumpat teuseumah beurala dan teumpat teutot keumeunyan banmandum ka habéh geutiek nibak banda-banda Yehuda. Deungon nyan teunang kheueh keurajeuen nyan dimiyueb peumeurintahan gobnyan, 6 akhé jih gobnyan ka hase geupeudong kuta-kuta keu banda-banda nyang na di Yehuda. Napadub thon treb jih hana teujadi prang sabab TUHAN kageubri keuadaan damé keu gobnyan. 7 Geupeugah lé Asa ubak rakyat Yehuda, "Bah kheueh geutanyoe tapeukong banda-banda deungon tapeugöt beuton-beuton bansikeulileng nyan dan meunara-meunara meunan cit deungon babah pintoe geureubang deungon palang-palang jih. Geutanyoe ka takuasa nanggroe nyoe sabab geutanyoe ka ta turot kheun Po teu Allah TUHAN geutanyoe. Gobnyan geujaga geutanyoe dan geupeulara keuamanan bansaboh nanggroe geutanyoe." Dan jipeuphon kheueh lé awaknyan jipeudong dan jimeubuet deungon gét that. 8 Tantra Raja Asa na 300.000 droe ureuëng Yehuda nyang na seunjata peurisai dan kapak, dan 280.000 droe nibak sukée Benyamin nyang meuseunjata peurisai, ali-ali dan panah. Awaknyan banmandum sipa-i nyang beurani, beuhe ngon teulatih. 9 Bak saboh watée na sidroe ureuëng Sudan nyang nan jih Zerah jiprang Yehuda deungon pasokan nyang lé jih na 1.000.000 droe dan 300 boh geuritan prang. Awaknyan jimaju sampoe trok u Maresa. 10 Dan geuteubiet kheueh Asa geujak lawan Zerah, dan bandua awaknyan geuato baresan di Pantôn Zefata nyang tô ngon Maresa. 11 Laju Asa geumeudoá ubak TUHAN Po teu Allah gobnyan, "TUHAN, Droeneueh kheueh nyang hase tulông kamoe nyang leumoh ateueh nyang teuga. Neutulông kheueh kamoe nibak saát nyoe, ya TUHAN Allah kamoe! Bak Droeneueh kamoe meusadeue dan ateueh nan Droeneueh kheueh kamoe jakmaju u mideuen prang kamoe lawan pasokan nyang le that jeumeulah jih nyoe. TUHAN, Droeneueh kheueh Allah kamoe. Bék neupeubiyeue Droeneueh jipeutaloe lé sidroe manusia." 12 Lheueh nyan Asa dan tantra Yehuda geujak prang sipa-i Sudan. TUHAN laju geupeutaloe sipa-i Sudan akhéjih awaknyan jiplueng teung bayeueng hánmeuho saho. 13 Asa dan pasokan gobnyan laju geupeulet sipa-i Sudan nyan sampoe trok u Gerar. Blah Sudan lumpah that jai nyang maté akhé jih sipa-i awaknyan hana meudaya sabab ka geupeuhanco lé TUHAN dan di tantra Yehuda pi lumpah that jai jireupah barang-barang awaknyan. Óh lheueh nyan tantra Yehuda geupeuhanco teuma banda-banda nyang na bansikeulileng Gerar, sabab TUHAN geupeujeuet peunduduek disinan jeuet keuteumakot. Tantra Yehuda jireupah banmandum banda nyan laju meuteumé barang-barang nyang jai that. 15 Dan meunan cit awaknyan jiprang teuma khimah-khimah ureuëng peulara beulatang, dan laju jiangkot bubiri deungon unta nyang jai lagoena. Óh lheueh nyan awaknyan jiwoe lom u Yerusalem.

2 Tawarikh 15

1 Roh Allah geukuasa ateueh Nabi Azarya aneuëk Oded, 2 sampoe gobnyan geujak meurumpok deungon Raja Asa dan geupeugah, "Hai Raja Asa, dan banmandum peunduduek Yehuda ngon peunduduek Benyamin! Neudeungoe kheueh nyoe! TUHAN lumpah that toe deungon gata meunyoe gata toe deungon Gobnyan. Meunyoe gata talakée peutunyok nibak TUHAN, Gobnyan teuma geubri peutunyok nyan keu gata. Teuma meunyoe gata hana tahiro ubak Gobnyan, Gobnyan pi hana geupako keu gata. 3 Treb lagoena Israel hana meungabdi ubak Allah nyang hak, hana teuma huköm-huköm nyang harôh jitaát, dan hana teuma teungku-teungku imeum nyang peuruno awaknyan. 4 Teuma meunyoe awaknyan ka meurumpok deungon keususahan, awaknyan laju jilakée tulông ubak TUHAN, Allah Israel. Awaknyan jilakée peutunyok Gobnyan dan TUHAN laju geupeukabui peue nyang jilakée nyan. 5 Bak masanyan ureuëng ramé hana hase jijak homantong deungon aman, sabab tieb-tieb nanggroe na teujadi karu nyang paleng raya. 6 Bansa nyang saboh jitindéeh bansa nyang laén, dan banda nyang saboh jitindéeh teuma banda nyang laén, banmandum nyan kareuna TUHAN Allah ka geupeuteuka karu nyang paleng raya ateueh awaknyan. 7 Teuma gata harôh kheueh tabah dan beurani. Useuha gata teuma meuhase." 8 Bak watée Asa geudeungoe tutoe haba Nabi Azarya aneuëk Oded nyan, teuka kheueh gurangsang gobnyan, seumangat geuh pi teuka hu lagée suwa. Laju gobnyan geureuloih ngon geupeuhanco banmandum beurala nyang na di nanggroe Yehuda dan di Benyamin, dan di banda-banda nyang ka lheueh geupeutaloe di gunong-gunong Efraim, lé gobnyan laju geupeugöt sampoe meusaneut miseubah TUHAN nyang na di dalam peulataran Baét TUHAN. 9 Le that-that ureuëng Efraim, Manasye, dan Simeon jimeugabong deungon Asa, dan tinggai diwilayah keurajeuen gobnyan, sabab awaknyan jikalon bahwa TUHAN geutulông awaknyan. Asa geuyue banmandum ureuëng nyan meusajan deungon ureuëng Yehuda dan Benyamin 10 meusapat di Yerusalem. Dan meusapat kheueh awaknyan nibak buleuen lhée thon nyang keulimong blaih keurajeuen Asa. 11 Bak uroenyan awaknyan jipeuseumah keu TUHAN na 700 boh leumô dan 7.000 boh bubiri, hase nyang jireubot dan jipeuwoe dimideuen prang. 12 Awaknyan jimeujanji ubak TUHAN bahwa deungon sipeunoh até dan jiwa awaknyan teuma udeb meunurot nyang geulakée lé Po teu Allah, TUHAN indatu awaknyan. 13 Soemantong, tuha atawa muda, ureuëng agam atawa ureuëng inong, nyang hana udeb meunurot nyang geu keuheundak lé TUHAN ureuëng nyan teuma geuhuköm maté. 14 Deungon su nyang meutaga awaknyan jimeusumpah ubak TUHAN bahwa awaknyan jimumat ubak janji nyan. Óh lheuehnyan awaknyan laju jiseumurak meuhubo sira jiyueb beureuguih. 15 Banmandum rakyat Yehuda geumbira sabab awaknyan ka jimeusumpah deungon sipeunoh até. Awaknyan galak that jimeu iébadat ubak TUHAN, dan TUHAN pih geuteurimong awaknyan. TUHAN laju geubri keu awaknyan keuadaan nyang aman teuntram diwilayah awaknyan. 16 Lheuehnyan Raja Asa laju geupeucat nék gobnyan nyang nan Maakha, nibak keududuekan jih sibagoe Nyak Putro sabab gobnyan ka jipeugot patong beurala nyang jeuhet ngon cabui keu Asyera, dewi keusuboran. Asa laju geureuloih dan geupeuhanco sampoe meukeupeng-keupeng patong nyan laju geujak tot di Pantôn Kidron. 17 Bahpi hana banmandum teumpat seumah beurala nyan nyang meutabu bansaboh nanggroe geuh geupeuhanco lé Asa, teuma gobnyan ka geupeuleumah ubak TUHAN keuseutiaan gobnyan sipanyang udeb geuh. 18 Banmandum méuh dan pirak meunan cit deungon barang-barang nyang laén hase nyang teureupah di mideuen prang atra ureuëng syiek gobnyan dan atra geuh keudroe banmandum nyan geukeubah di Baét TUHAN mangat jeuet keuhak milék TUHAN. 19 Sampoe nibak thon nyang keulhée ploh limong keurajeuen Asa hántomna muprang di nanggroe nyan.

2 Tawarikh 16

1 Bak thon nyang keu lhée ploh nam keurajeuen peumeurintahan Raja Asa ateueh Yehuda, Baesa raja Israel jijak prang Yehuda dan jipekong banda Rama keu ji ampeueng rot teubiet tamong u Yehuda. 2 Teuma lé Raja Asa laju geucok méuh dan pirak nibak peubeundaharaan Baét TUHAN dan meuligoe raja, atranyan laju geukirém u Damsyik ubak Benhadad raja nanggroe Siria sira geupeugah lagéenyoe, 3 "Jak geutanyoe ta ikat peusahabatan lagée nyang ka lheueh geupeubuet lé ureuëng syiek geutanyoe. Meusigoe deungon ulôn lôn kirém méuh dan pirak sibagoe hadiah, dan ulon lakée Teungku Amphon neupeuputôh hubongan deungon Baesa raja Israel, mangat lé gobnyan jitarek lom pasokan jih lam wilayah ulôn." 4 Benhadad situju that deungon pakat nyan laju geuyue bubena peuwira gobnyan meusajan deungon pasokan jih jijak prang mandum banda-banda di Israel. Awaknyan laju geupeutaloe Iyon, Dan, Abel-Bet-Maakha dan banmandum banda peubeukalan di Naftali. 5 Bak watée Raja Baesa jideungoe hainyan, laju jipiôh jipeukong Rama dan laju jitinggai banda nyan. 6 Lé Raja Asa laju geukrah banmandum ureuëng nyang na di Yehuda mangat jiangkot batée ngon kayée nyang jingui lé Raja Baesa di Rama keu teupeukong banda nyan. Bahan-bahan nyan geupeuguna lé Asa keungon peukong banda Geba dan Mizpa. 7 Bak watéenyan Nabi Hanani geujak ubak Raja Asa sira geupeugah lagéenyoe, "Kareuna gata meusadeue ubak raja Siria, dan kon ubak TUHAN, Po teu Allah gata, lé nyan gadôh kheueh keuseumpatan gata keu gata peutaloe tantra raja Israel. 8 Kon kheueh Sudan ngon Libia nyang na angkatan prang nyang teuga rayeuk dan le that geuritan prang dan pasokan meuguda? Bahpi meunan TUHAN geupeumeunang gata ateueh awaknyan, sabab gata tameusadeue ubak Gobnyan. 9 TUHAN geukawai banmandum bumoe mangat geubri teunaga Gobnyan keu ureuëng-ureuëng nyang seutia ubak Gobnyan. Gata ka tapeubuet buet nyang bangai that, sabab phon saátnyoe gata sabe tarasa muprang nyang hana reuda." 10 Ban jideungoe haba Nabi Hanani nyan, Raja Asa beungéh that-that laju jicok Nabi Hanani nyan jipeutamong lam glab. Bak watéenyan cit Asa jitindéeh na meupadub droe lamkawan rakyat geuhnyan. 11 Banmandum keujadian lam peumeurintahan Asa phon awai sampoe akhé ka teucetet lam kitab Seujarah Raja-raja Yehuda dan Israel. 12 Bak thon nyang keu lhée ploh sikureueng nibak peumeurintahan gobnyan, Raja Asa teuka peunyakét nyang lumpah parah bak bandua blaih gaki gobnyan. Bahpi ka lagéenyan gobnyan hana cit jilakée tulông ubak TUHAN, teuma ubak dokto. 13 Na dua thon teuma óh lheueh nyan gobnyan meuninggai donya. 14 Manyét gobnyan laju teuboh ramuan nyang teupeugot nibak reumpah-reumpah dan bée-bée haröm nyang seumeureubak, laju teupeukubu nibak lampôh jrat raja-raja di Banda Nabi Daud. Dan keu teubri keuhoreumatan ubak rakyat laju teupuhu apui unggun nyang lumpah rayeuk.

2 Tawarikh 17

1 Yosafat jeuet keuraja Yehuda teubaiát keugeunantoe Raja Asa ureuëng syiek gobnyan, dan gobnyan laju geupeukong droe keu geulawan Israel. 2 Lé gobnyan laju geubri tugaih ubak banmandum banda geuh nyang meupageue deungon kuta di Yehuda, dan didaerah luwa banda Yehuda, meunan cit di banda-banda nyang ka geureubot lé ureuëng syiek gobnyan di wilayah Efraim. 3 TUHAN geubri beureukat ubak Yosafat sabab gobnyan geuseutôt bakat ureuëng syiek geuh; gobnyan hana geuseumah Baal, 4 teuma geumeu iébadat ubak Allah. Gobnyan taát ubak peue mantong nyang geupeurintah lé Po teu Allah, dan udeb gobnyan hana lagée udeb raja-raja Israel nyang laén. 5 TUHAN geubri ubak Yosafat keududuekan nyang paleng kong sibagoe raja di Yehuda. Banmandum rakyat jibri laju hadiah-hadiah keu gobnyan dan gobnyan kajeuet keukaya dan jihoreumat. 6 Deungon keumauan nyang kreueh that gobnyan geutaát ubak peue mantong nyang geupeurintah lé TUHAN dan geupeuhanco banmandum teumpat-teumpat ureuëng seumah beurala dan patong-patong Dewi Asyera di Yehuda. 7 Bak thon nyang keulhée nibak keurajeuen gobnyan, lé geuhnyan laju geu kirém peujabat-peujabat manyang mangat jijak peuruno meubagoe huköm-huköm TUHAN di banda-banda Yehuda. Awaknyan na kheueh: Benhail, Obaja, Zakharia, Netaneel dan Mikha. 8 Awaknyan jipeungon lé sikureueng droe ureuëng Lewi dan dua droe teungku imeum. Ureuëng-ureuëng Lewi nyan na kheueh: Semaya, Netanya, Zebaja, Asael, Semiramot, Yonatan, Adonia, Tobia dan Tob-Adonia. Dan bandua droe teungku imeum nyan na kheueh Elisama dan Yoram. 9 Deungon jiba kitab Huköm-huköm TUHAN awaknyan laju jijak bansaboh nyan lam banda-banda Yehuda dan laju jipurunoe beuet rakyat diteumpat nyang jijak nyan. 10 TUHAN geupeujeuet banmandum keurajeuen nyang na tô-tô deungon keurajeuen Yehuda teumakot jimuprang deungon Raja Yosafat. 11 Nibak ureuëng Filistin awaknyan keubit jai that-that jiteurimong pirak dan hadiah-hadiah nyang laén, dan nibak ureuëng Arab jiteurimong teuma 7.700 boh bubiri dan 7.700 boh kaméng. 12 Meunan kheueh Yosafat maken treb maken meukuasa. Di bansaboh nanggroe Yehuda laju geupeudong kuta-kuta dan banda-banda peubeukalan. 13 Meunan cit laju geutamon peubeukalan nyang jai that di banda-banda nyan. Di Yerusalem gobnyan geupeuduek peuwira-peuwira nyang peukasa, 14 maséng-maséng deungon keusatuan meunurot kawöm jih. Adna na kheueh panglima keusatuan nibak kawöm-kawöm Yehuda. Gobnyan na geupimpén 300.000 droe tantra. 15 Ureuëng keudua na kheueh Yohanan; gobnyan jeuet keu ulée 280.000 droe tantra. 16 Ureuëng nyang keulhée na kheueh Amasia aneuëk Zikhri; gobnyan jeuet keu ulée 200.000 droe tantra. (Amasia na kheueh sidroe sukarelawan nyang jimeungabdi ubak TUHAN.) 17 Panglima keusatuan nibak kawöm-kawöm lam sukée Benyamin na kheueh Elyada, sidroe peujuang nyang that kha. Gobnyan geupimpén 200.000 droe tantra leungkab deungon panah dan peurisai. 18 Ureuëng keudua lam keusatuan nyoe na kheueh Yosabad; gobnyan geupimpén na 180.000 droe tantra nyang leungkab deungon sinjata. 19 Awaknyan kheueh nyang meutugaih di Yerusalem. Disampeng nyan, raja geupeuduek teuma keusatuan-keusatuan nyang laén nibak kuta-kuta diwilayah Yehuda.

2 Tawarikh 18

1 Watée Yosafat raja Yehuda ka kaya dan meusyeuhu, gobnyan laju geupeukawen sidroe lamkawan anggota keuluwarga gobnyan deungon anggota keuluwarga Ahab raja Israel. 2 Na padub thon teuma óh lheueh nyan Yosafat geujak saweu Ahab di banda Samaria. Keu geuhoreumat Yosafat dan rombongan gobnyan, Ahab laju geupeuna khanuri sira geuyue sie leumô ngon bubiri nyang le that-that. Lam keuseumpatan nyan Ahab laju jipakat Yosafat mangat teujakprang banda Ramot di Gilead. 3 Lé geuhnyan laju geutanyong, "Peu kheueh droeneueh neujak ngon kamoe tajak prang Ramot?" Geujaweueb lé Yosafat, "Gét that, sipa-i ulôn jimeugabong deungon sipa-i gata. Geutanyoe tamuprang meusajan-sajan. 4 Teuma nyang sigét jih tatanyong ilée ubak TUHAN." 5 Lé sababnyan Ahab laju geupeusapat kira-kira na 400 droe nabi dan jitanyong ubak nabi-nabi nyan, "Peu kheueh jeuet kamoe jak prang Ramot atawa hán jeuet?" "Jeuet!" jaweueb awaknyan. "Allah teuma geuseurah banda nyan keu Teungku Amphon." 6 Teuma Yosafat geumanyong lom, "Peu kheueh disinoe hana nabi nyang laén nyang hase geuteumanyong ubak TUHAN keu geutanyoe?" 7 Jaweueb Ahab, "Mantong na sidroe teuk, Nabi Mikha aneuëk Yimla. Teuma ulôn banci keu nabi nyan, sabab hántom na geuramai nyang jroh keu ulôn; sabe nyang hana jroh." "Ah, bék neupeugah meunan!" seuôt Yosafat. 8 Ahab laju geutawök sidroe peugawée meuligoe geuyue laju gobnyan bagaih-bagaih mangat jijak tueng Nabi Mikha. 9 Bak watéenyan Ahab ngon Yosafat, sira geungui peukayan keurajeuen, geuduek nibak keurusi keurajeuen di teumpat ceumeulo aneuk gandom di babah pintoe geureubang Samaria, watéenyan mandum nabi teuka geujak meuhadab dan geupeusampoe peue nyang geuramai lé nabi-nabi nyan. 10 Sidroe lamkawan nabi-nabi nyan, nyang nan geuh Zedekia bin Kenaana, jipeuget bintéh-bintéh beuton beuso lheueh nyan laju jipeugah ubak Ahab, "Nyoe kheueh nyang geupeugah lé TUHAN, 'Deungon lungkée-lungkée nyang lagée nyoe Teungku Po teuma geuheuntam Siria dan geupeuhanco awaknyan.' " 11 Banmandum nabi nyang laén situju dan geupeugah lagéenyoe, "Jak prang kheueh Ramot, Teungku Amphon meuhase. TUHAN geupeumeunang Teungku Amphon." 12 Lé utosan nyang jaktueng Nabi Mikha, laju jipeugah ubak Nabi Mikha nyan lagéenyoe, "Banmandum nabi nyang laén ka lheueh geuramai bahwa nyang meunang di mideuen prang na kheueh raja. Kira jih droeneueh hai Bapak neuramai kheueh nyang jroh lagée awaknyan." 13 Teuma geujaweueb lé Nabi Mikha, "Deumi TUHAN nyang udeb, ulôn teuma lôn peugah peue nyang geupeugah lé TUHAN ubak ulôn!" 14 Watée katrok Nabi Mikha keue Raja Ahab, geutanyong laju lé raja lagéenyoe, "Peu kheueh jeuet ulôn dan Yosafat kamoe jakprang Ramot atawa hánjeuet?" "Jakprang kheueh!" geuseuôt Mikha. "Teuntée Teungku Amphon teuma meuhase. TUHAN geupeumeunang keu Teungku Amphon." 15 Geujaweueb lé Ahab, "Meunyoe gata neupeugah haba ubak ulôn deumi nan TUHAN, neupeugah kheueh nyang beutôi. Padubgoe gata harôh ulôn peuingat keuhai nyan?" 16 Geujaweueb lé Mikha, "Leumah ulôn kalon tantra Israel ka teung bayeueng di gunong-gunong. Awaknyan lagée bubiri hana ureuëng rabe, dan TUHAN geupeugah keuhai awaknyan, 'Ureuëng-ureuëng nyoe hana nyang pimpén. Bah kheueh awaknyan jiwo deungon seulamat.' " 17 Geupeugah lé Ahab ubak Yosafat, "Beutôi lagée nyang ulôn peugah nyan, bukon? Hántom na teuramai nyang jroh-jroh meunyoe keu ulôn! Sabe nyang brok-brok!" 18 Mikha geupeugah lom lagée nyoe, "Jinoenyoe neudeungoe laju peue nyang geupeugah lé TUHAN! Leumah ulôn ngieng TUHAN teungoh geuduek nibak takhta Gobnyan di syeuruga, dan banmandum malaikat teudong meuato bakbinéh Gobnyan. 19 TUHAN geutanyong, 'Soe nyang bujuk Ahab mangat jihnyan jitem jakmuprang dan maté di Ramot di Gilead?' Geujaweueb lé malaikat-malaikat nyan meubeda-beda. 20 Akhé jih teuka saboh roh. Roh nyan jipeuto ubak TUHAN dan jipeugah, 'Ulôn kheueh nyang bujuk gobnyan.' 'Pakriban cara jih?' geutanyong lé TUHAN. 21 Roh nyan jijaweueb lagée nyoe, 'Ulôn teuma lônjak dan lôn peujeuet banmandum Nabi Ahab nyan jimeusulet.' TUHAN geupeugah, 'Gét, gata peubuet kheueh laju nyang lagée nyan, gata teuma meuhase tabujuk jih nyan.' " 22 Lheuehnyan Mikha geupeugah lom, "Nyan, nyang kheueh nyang teujadi! TUHAN ka geupeujeuet nabi-nabi Teungku Amphon jimeusulet ubak Teungku Amphon sabab TUHAN ka geupeuteuntée keu geupeurhot beuncana nyan ateueh Teungku Amphon!" 23 Dan geumaju kheueh Nabi Zedekia geujak peurab ubak Mikha óh karab tô bak Nabi Mikha nyan laju geutampa muka geuh sira geupeugah, 'Panena mungken Roh TUHAN geutinggai ulôn dan geumeu tutoe ngon gata?' 24 Geujaweueb lé Mikha, "Eunteuk neukalon keudroe bukeuti jih bak watée gata neutamong lam kama keu tajak musöm!" 25 "Drob laju ureuëng nyoe!" peurintah lé Raja Ahab, "dan jakba laju jihnyan ubak Amon, walibanda, dan ubak pangeran Yoas. 26 Tayue paso laju ureuëng nyoe bak awaknyan u dalam glab, dan gatabri keu ureuëng nyoe peunajoh meunan cit ié jib meubacut mantong sampoe ulôn woe keuno deungon seulamat." 27 Geupeugah lé Mikha, "Meunyoe Teungku Amphon neuwoe deungon seulamat, nyan saban cit TUHAN hana geupeugah haba rot ulôn. Banmandum nyang hadé disinoe jeuet keusaksi." 28 Óh lheueh nyan lé Ahab, raja Israel, dan Yosafat raja Yehuda geujak prang laju banda Ramot di Gilead. 29 Ahab geupeugah ubak Yosafat, "Ulôn kumeunyamar dan meusajan lôn muprang, teuma droeneueh neukeuneuk ngui peukayan keurajeuen droeneueh." Meunan kheueh raja Israel meunyamar bakwatée geujak u mideuen prang. 30 Bak watée nyan bubena panglima pasokan geuritan prang Siria ka jibri peurintah lé raja jihnyan mangat jijakprang raja Israel mantong. 31 Dan, watée awaknyan jingieng Raja Yosafat, awaknyan banmandum jisangka bahwa nyan na kheueh raja Israel. Lé sabab nyan awaknyan laju geuseurang gobnyan. Teuma Yosafat geudumpék, laju TUHAN Po teu Allah geutulông gobnyan, dan geupeuwet seurangan nyan u daerah laén. 32 Watée bubena panglima geuritan prang Siria jiteupeue bahwa nyan bukon raja Israel, awaknyan laju jipiôh seurangan ateueh gobnyan. 33 Keubeutulan sidroe lamkawan sipa-i Siria jitimbak aneuk panah jih dan jipeukeue ubak sasaran nyang hana teusaja. Rupari aneuk panah nyan paih keunong ateueh Ahab sampoe beusout bajée prang gobnyan paih bak sinambong jih. "Ulôn ka keunong!" geutawök lé Ahab ubak supe geuritan prang gobnyan, "Tapeuwet laju dan taba laju ulôn mangat tateubiet nibak mideuen prang nyoe!" 34 Teuma, sabab muprang nyan mantong meuhubo, Raja Ahab teutab geudong sira geumeutumpang lam geuritan geuhnyan geuhadab ubak sipa-i Siria. Watée mata uroe ka jilhob gobnyan pih meuninggai donya.

2 Tawarikh 19

1 Watée geuriwang deungon seulamat Yosafat raja Yehuda nyan u Yerusalem, 2 na sidroe nabi nyang nan geuh Yehu aneuëk Hanani geujak meuhadab ubak raja. Geupeugah lé nabi nyan ubak gobnyan, "Na kheueh patot lé Teungku Amphon neubantu ureuëng jeuhet dan neudong blah ureuëng nyang banci ubak TUHAN? Sabab buet Teungku Amphon nyang lagée nyan bagoe TUHAN beungéh that keu Teungku Amphon. 3 Bahpi meunan na cit nyang jroh nibak Teungku Amphon. Teungku Amphon ka neupeuhanco banmandum patong Dewi Asyera nyang jiseumah lé rakyat dan Teungku Amphon ka teuma neu useuha mangat udeb meunurot nyang geulakée lé Po teu Allah." 4 Raja Yosafat teumpat tinggai geuh di Yerusalem. Teuma gobnyan kayém geusaweue rakyat nibak tieb-tieb sagoe nanggroe geujakyue rakyat geuhnyan mangat jigisa meuhadab TUHAN, Allah indatu awaknyan. 5 Nibak tieb-tieb banda nyang pageue deungon kuta di Yehuda geubaiát laju sidroe hakém, 6 dan laju geupeurintah lagée nyoe ubak hakém-hakém nyan, "Tameubuet kheueh nyang ade ngon bijaksana, sabab gata tameuhakém nyan bukon ateueh nan manusia, teuma ateueh nan TUHAN. Gobnyan geukawai gata watée gata tapeuputôh peukara. 7 Gata harôh tatakot ubak TUHAN, dan tameubuet beu até-até, sabab TUHAN Po teu Allah geutanyoe geubanci that keu ureuëng nyang jipeubuet jeuhet, nyang dong brat siblah atawa keu ureuëng nyang teurimong sugok." 8 Meunan cit di Yerusalem, Yosafat geuangkat teuma hakém-hakém nibak kawöm ureuëng-ureuëng Lewi, teungku-teungku imeum dan tukoih-tukoih masyarakat. Hakém-hakém nyan harôh geupeuputôh peukara nyang meusangkot deungon peulanggaran Huköm TUHAN dan peukara-peukara nyang laén. 9 Ubak mandum hakém nyan Yosafat laju geubri peurintah nyang lagée nyoe, "Gata peubuet kheueh tugaih gata deungon taát ubak TUHAN. Gata turot kheueh peue mantong peurintah Gobnyan lam hai peue mantong nyang gata peubuet. 10 Meunyoe na rakan-rakan gata nibak banda nyang laén napeukara ureuëng poh gob sampoe maté. Nyang langga huköm ngon nyang undang-undang nyan, bah kheueh gata tabri peutunyok ubak awaknyan. Deungon na lagée nyan awaknyan hana meusalah ubak TUHAN, dan TUHAN hana teuma geubeungéh keu gata meunan cit ubak awaknyan. Gata peubuet kheueh laju peurintah nyoe, deungon nyan gata hana salah le. 11 Teungku Imeum Agong Amarya ulôn bri kuasa nyang paleng manyang ateueh banmandum peukara nyang na hubongan ngon huköm agama. Zebaja aneuëk Ismail, na kheueh gubunur Yehuda, ulôn bri kuasa nyang paleng manyang ateueh peukara nyang laén. Ureuëng-ureuëng Lewi meutanggong jaweueb mangat peue mantong keuputosan-keuputosan di kantô peungadelan jilaksana. Gata seutôt kheueh ubak peutunyok-peutunyok nyoe dan meubuet kheueh deungon teugaih. Seumoga TUHAN sabe na blah ureuëng nyang jipeubuet ade!"

2 Tawarikh 20

1 Na padubtreb teuma óh lheuehnyan sipa-i Moab dan Amon, meusajan deungon sipa-i sikutu awaknyan na kheueh sipa-i Meunim, laju jijak prang Yehuda. 2 Dan teuka kheueh ureuëng jiba haba ubak Raja Yosafat, "Keubit that jai sipa-i Edom nyang teuka di meurandeh Laôt Maté keuneuk jijak prang Teungku Amphon. Awaknyan ka jireubot Hazezon-Tamar." (Hazezon-Tamar na kheueh nan nyang laén keu En-Gedi.) 3 Yosafat teumakot that-that gobnyan laju meudoá geulakée peutunyok nibak TUHAN. Óh lheuehnyan gobnyan geupeutreun titah mangat rakyat banmandum jipuasa. 4 Nibak tieb-tieb banda di Yehuda bubena ureuëng laju jijak u Yerusalem jijak lakée tulông ubak TUHAN. 5 Awaknyan meusajan-sajan deungon peunduduek Yerusalem meusapat nibak seuramoe nyang barô di Baét TUHAN. Raja Yosafat laju geudong dikeue awaknyan, 6 dan laju geumeudoá deungon su nyang meutaga, "Ya TUHAN, Allah indatu kamoe! Droeneueh Allah di syeuruga dan neupeurintah ateueh mandum bansa nyang na di ateueh bumoe. Droeneueh meukuasa dan teuga; hana meusidroe pi nyang hase jilawan Droeneueh. 7 Droeneueh kheueh Allah kamoe. Bak watée umat Droeneueh, bansa Israel, jijak u nanggroe nyoe, Droeneueh use banmandum ureuëng nyang na tinggai di nanggroe nyoe. Laju TUHAN neubri nanggroe nyoe ubak keuturonan Nabi Ibrahim, sahabat Droeneueh, mangat jeuet keutanoh milék awaknyan siumu masa. 8 Awaknyan ka tinggai disinoe dan ka lheueh jipeudong saboh rumoh keuteumpat jiseumeumah ubak Droeneueh. Awaknyan jiteupeue, 9 bahwa meunyoe awaknyan meuteumé huköman sabab lé desya-desya awaknyan, dan awaknyan rhoh lam prang, ka keunong teuma deungon bala peunyakét, atawa teuka musém deuk, awaknyan hase jijak ubak Droeneueh dan jidong dikeue Rumoh Iébadat nyoe. Teungoh até awaknyan jiteuka gundah deungon teumakot, teuma awaknyan hase jimeudoá ubak Droeneueh, dan Droeneueh teuma neudeungoe dan neutulông awaknyan. 10 Jinoenyoe bansa Amon, Moab dan Edom jiseurang kamoe. Watée indatu kamoe geuteuka nibak nanggroe Meusé, Droeneueh hana neubri keu awaknyan jiduek bak nanggroe bansa-bansa nyan. Teuma indatu kamoe geucok rot meuwet dan hana geupeuhanco bansa Amon, Moab dan Edom nyan. 11 Jinoenyoe, lagéenyan kheueh tindakan bansa-bansa nyan ateueh kamoe. Awaknyan jikeuneuk use kamoe nibak nanggroe nyang ka TUHAN bri keu kamoe. 12 Droeneueh kheueh Allah kamoe! Huköm kheueh awaknyan, ya TUHAN, sabab kamoenyoe hana meudaya kamoe lawan sipa-i nyang jai that nyan, nyang keuneuk prang kamoe. Kamoe hana meuteupeue peue nyang harôh kamoe peubuet, sabab nyan, kamoe teuka ubak Droeneueh ya TUHAN kamoe lakée tulông." 13 Nibak watée nyan banmandum ureuëng agam Yehuda meusajan deungon peurumoh dan aneuëk-aneuëk jih ka habéh jidong dikeue Baét TUHAN. 14 Lamkawan ureuëng ramé nyan na sidroe ureuëng Lewi nyang nan jih Yahaziel. Gobnyan aneuëk Nabi Zakharia nibak kawöm Asaf lam garéh keuturonan Benaya, Yeiel, Matanya. Nibak saát nyan Yahaziel ka geukuasa lé Roh TUHAN, 15 dan gobnyan geupeugah, "Paduka Nyang Mulia dan Syedara-syedara banmandum nyang na disinoe. TUHAN geupeugah bahwa gata hana jeuet putôh asa atawa takot keu sipa-i nyang le nyan. Sabab nyang muprang kon gata, teuma Po teu Allah. 16 Singoh beungoh watée awaknyan jiteungoh rét nyang meusineungoh di Zis, gata prang kheueh awaknyan. Gata teuma meuhadab keue ngon awaknyan nibak ujong pantôn dikeue padang pasi nyang tô ngon Yeruel. 17 Gata hana peureulée tameuheungko nibak prang nyoe. Tajak kheueh u teumpat nyang ka geupeuteuntée keu gata dan tapreh mantong disinan. Gata teuma takalon TUHAN geupeumeunang gata. Hai peunduduek Yehuda dan Yerusalem, bék teumakot. Neutamong laju ubak mideuen prang nyan, TUHAN teuma geutulông gata!" 18 Lé nyan teuma geusujut kheueh Raja Yosafat. Dan banmandum rakyat pi jisujut cit lagée geuseumah TUHAN. 19 Lé ureuëng-ureuëng Lewi nibak kawöm Kehat dan kawöm Korah jidong laju, dan jiseumurak jipujo TUHAN, Allah Israel. 20 Óh singoh beungoh bansuboh that, rakyat laju jiteubiet dan jijak laju u padang pasi bak binéh Tekoa. Watée awaknyan keuneuk beurangkat, lé Yosafat laju geupeusan lagée nyoe ubak awaknyan, "Rakyat Yehuda dan Yerusalem! Peucaya kheueh ubak TUHAN Po teu Allah gata, teuma gata hase tapeuteun droe. Teurimong kheueh naseuhat nibak nabi-nabi gata, deungon na lagéenyan gata meuhase!" 21 Óh ka lheueh geumurok pakat deungon rakyat, lé raja laju geuyue ureuëng nyang meuca-e seucara meupadu geusok peukayan seuragam nyang lazem jih teungui watée upacara khusos lam agama. Ureuëng meuca-e nyang meupadu su nyan harôh jimeubaréh deungon lagak that dikeue baresan tantra sira meuca-e, "Pujoe kheueh TUHAN! Gaséh Gobnyan keukai abadi!" 22 Watée baresan meuca-e nyan ka jipeuphon seumurak sira meuca-e, TUHAN laju geupeuna karu lamkawan sipa-i musoh nyang teungoh jimuprang. 23 Sipa-i Amon dan Moab laju jiprang tantra Edom sampoe habéh hanco peue-peue nyang na. Óh lheueh nyan awaknyan jibalah prang sidroe deungon nyang laén deungon gagah beurani. 24 Bak watée tantra Yehuda ka trok ubak meunara jaga di padang pasi dan laju geukalon teumpat musoh, deuh laju geungieng manyét-manyét musoh nyang ka meutabu di ateueh tanoh. Hana meusidroe pi nibak sipa-i musoh nyan nyang na udeb. 25 Dan Yosafat deungon aneuëk buah gobnyan laju geujak reubot peue mantong nyang na atra musoh. Disinan meuteumé laju beulatang peulara nyang le that, peuleungkapan, peukayan, dan barang-barang nyang meuhái yuem jih. Óh ka lheueh geugumpôi barang-barang nyan na lhée uroe treb jih, mantong jai that barang-barang nyang laén nyang hana jicok, akhéjih teupaksa jitinggai disinan. 26 Bak uroe nyang keupeuet awaknyan banmandum ka meusapat di Pantôn Pujoe dan laju jipujoe TUHAN ateueh banmandum nyang ka jipeubuet. Nyang kheueh sabab jih pantôn nyan teuboh nan "Pantôn Sumujoe". 27 Óh lheueh nyan lé Yosafat geupimpén laju banmandum pasokan gobnyan geupeuwoe u Yerusalem deungon suka cita kareuna TUHAN ka geupeutaloe mandum musoh gobnyan. 28 Óh watée ka trok u banda, awaknyan laju jimeubaréh jijak u Baét TUHAN sira teuiréng deungon keucapi dan beureuguih. 29 Óh lheuehnyan keujadian nyan banmandum nanggroe nyang laén ka jiteuka takot watée jideungoe pakriban TUHAN geupeutaloe bubena musoh-musoh Israel. 30 Nyang kheueh sabab jih Yosafat geumat peurintah deungon aman teuntram, dan TUHAN geubri keu gobnyan keuadaan damé bansaboh nanggroe. 31 Yosafat jeuet keuraja Yehuda watée umu 35 thon, dan gobnyan geumat peurintah di Yerusalem 25 thon treb jih. Ma gobnyan nan jih Azuba aneuëk Silhi. 32 Saban cit lagée Asa ureuëng syiek gobnyan, Yosafat geupeubuet peue mantong nyang jroh nibak mata TUHAN. 33 Teuma teumpat-teumpat ureuëng seumah beurala hana geupeuhanco. Rakyat gohlom cit sipeunoh até jimeuiébadat ubak Allah indatu awaknyan. 34 Kisah nyang laén keuhai Yosafat, phon awai sampoe akhé keurajeuen gobnyan, na teucetet lam Riwayat Yehu Aneuëk Hanani, nyang na teutuléh didalam kitab Seujarah Raja-raja Israel. 35 Bak saboh watée Raja Yosafat di Yehuda nyan na geupeuna hubongan meusahabat deungon Ahazia raja Israel, nyang le that jipeubuet buet nyang jeuhet. 36 Di peulabuhan Ezion-Geber awaknyan jipeugöt laju kapai-kapai keungon meulayeue u Tarsis. 37 Teuma Nabi Eliezer aneuëk Dodawa di banda Maresa geupeuingat ubak Yosafat, meunoe geupeugah, "Sabab Teungku Amphon neupeuna hubongan meusahabat deungon Ahazia, TUHAN geupeuhanco buet Teungku Amphon." Dan watéenyan cit teuma hanco kheueh bubena kapai-kapai nyang ka lheueh geupeugöt nyan akhéjih geuhnyan hana hase le jimeulayeue.

2 Tawarikh 21

1 Yosafat meuninggai donya teukubu laju nibak lampôh jrat raja-raja di Banda Nabi Daud. Yehoram aneuëk agam gobnyan teubaiát jeuet keuraja keugeunantoe gobnyan. 2 Yehoram aneuëk agam Yosafat, raja Yehuda, meusyedara namdroe nyang agam, syedara-syedara geuhnyan na kheueh: Azarya, Yehiel, Zakharia, Azariahu, Mikhail, dan Sefaca. 3 Awaknyan meuteumé méuh nyang jai that, pirak dan barang-barang nyang meuhái yuem nyang laén nibak ureuëng syiek gobnyan, meunan cit maséng-maséng geubri teuma banda nyang meupageue ngon kuta di Yehuda. Teuma sabab Yehoram aneuëk agam nyang paleng tuha, jihnyan kheueh nyan ka geupeuteuntée lé Yosafat keu teubaiát jeuet keuraja. 4 Bak watée Yehoram teurasa keududuekan gobnyan sibagoe raja ka lumpah that teuga, laju gobnyan geuyue poh maté banmandum syedara geuh, meunan cit deungon meupadub droe peujabat manyang. 5 Yehoram jeuet keuraja watée meu-umu 32 thon, dan gobnyan geumat peurintah di Yerusalem 8 thon treb jih. 6 Gobnyan geuseutôt cara udeb Raja Ahab dan raja-raja Israel nyang laén, sabab gobnyan meukawen deungon sidroe lamkawan aneuëk inong Ahab. Gobnyan ka meudesya ubak TUHAN, 7 teuma TUHAN hana geutem peubinasa raja nyang nibak keuturonan Nabi Daud sabab TUHAN ka geumeujanji bahwa keuturonan Nabi Daud teutab jimat peurintah sibagoe raja. 8 Nibak peumeurintahan Yehoram, Edom laju beurontak ubak Yehuda dan laju jipeudong keurajeuen keudroe. 9 Sabab nyan Yehoram meunan cit deungon bubena panglima laju geuteubiet deungon geuritan-geuritan prang keu geujak seurang Edom. Awaknyan laju jikeupong lé pasokan Edom, teuma óh watée malam pasokan gobnyan geupeusak droe ubak pasokan Edom sira geupeuplueng droe. 10 Phon watéenyan Edom hana jitundok ubak Yehuda. Bak watée nyan cit teuma banda Libna pi jibeurontak. Banmandum nyan teujadi sabab Yehoram ka geutinggai TUHAN, Allah nyang geuseumah lé indatu gobnyan. 11 Seubalekjih lé gobnyan laju geupeudong teumpat-teumpat teuseumah beurala didaerah meugunong-gunong Yehuda, dan lé sabab nyan ka jeuet keusabab rakyat Yehuda dan Yerusalem meudesya ubak TUHAN. 12 Dan Yehoram laju meuteumé sipucok surat nyang geu tuléh lé Nabi Elia bak watée nabi nyan mantong udeb. Lagéenyoe su surat nyan, "TUHAN, Po teu Allah nyang geuseumah lé Nabi Daud, geuhuköm Teungku Amphon sabab Teungku Amphon hana neuseutôt langkah ureuëng syiek dan abusyiek Teungku Amphon. 13 Sikeubit jih, Teungku Amphon udeb lagée raja-raja Israel, dan lé sabab nyan rakyat Yehuda dan Yerusalem hana seutia ubak Po teu Allah. Teungku Amphon ka neujak buet lagée Raja Ahab dan geunantoe-geunantoe gobnyan. Teungku Amphon ka neupeumaté banmandum syedara Teungku Amphon, padahai awaknyan leubeh gét nibak Teungku Amphon. 14 Huköman nyang paleng brat nibak TUHAN teuma geupeutreun ateueh rakyat, aneuëk-aneuëk dan ureuëng-ureuëng binoe Teungku Amphon, dan geupeubinasa banmandum hareuta milék Teungku Amphon. 15 Teungku Amphon keudroe pih keunong peunyakét usus nibak uroe keu uroe peunyakét nyan meutamah brat!" 16 Bak watée nyan na ureuëng Filistin dan ureuëng Arab nyang tinggai bakbinéh teumpat tinggai ureuëng Sudan di daerah panté. TUHAN laju geupeugrak até ureuëng-ureuëng nyan mangat jijakprang Yehoram. 17 Awaknyan laju jiprang Yehuda, jimaju laju ubak meuligoe raja, laju jiba banmandum aneuëk dan peurumoh Yehoram sibagoe tawanan, nyang tinggai Ahazia aneuëk agam gobnyan nyang paleng tulot. 18 Óh ka lheueh banmandum keujadian nyan, TUHAN laju geuhuköm Yehoram deungon bala peunyakét usus nyang hana hase puléh. 19 Rab dua thon peunyakét nyan maken treb maken parah akhé jih deungon that-that meudeurita raja Yehoram pih meuninggai donya. Rakyat hana le jipeukab apui unggun sibagoe turot meuduka cita lagée nyang ka lheueh-lheueh awaknyan peubuet keu indatu awaknyan. 20 Hana meusidroe manusia pih nyang meunyeusai ateueh meuninggai gobnyan. Gobnyan teutanom di banda Nabi Daud, teuma hana di lampôh jrat raja-raja. Bak watée gobnyan jeuet keuraja, Yehoram meu umu 32 thon, dan gobnyan geumat peurintah di Yerusalem na 8 thon treb jih.

2 Tawarikh 22

1 Bak saboh watée lé saboh kawan ureuëng-ureuëng Arab, banmandum aneuëk agam Yehoram, seulaén Ahazia nyang tulot jipoh maté. Sabab nyan peunduduek Yerusalem jibaiát Ahazia jeuet keuraja keugeunantoe ureuëng syiek gobnyan. 2 Ahazia jeuet keuraja bak watée gobnyan meu umu 22 thon, dan gobnyan geumat peurintah di Yerusalem cit sithon. Meunan cit Ahazia udeb gobnyan saban cit lagée keuluwarga Raja Ahab, sabab Atalya ma gobnyan jipurunoe gobnyan mangat geupeubuet nyang jeuhet. Atalya na kheueh putro Raja Ahab, cucoe Omri raja Israel. 4 Ahazia ka meudesya ubak TUHAN lagée keuluwarga Ahab, sabab awaknyan kheueh nyang jeuet keupeunaseuhat gobnyan óh ka lheueh ayah gobnyan meuninggai donya. Peunaseuhat-peunaseuhat nyan kheueh nyang peuceulaka gobnyan. 5 Ateueh peue nyang ka jinaseuhat lé awaknyan, gobnyan laju geumeugabong deungon Yoram raja Israel keu geujakmuprang geulawan Hazael raja Siria. Awaknyan geumeu heungko di Ramot, daerah Gilead. Yoram keunong dan luka lam prang nyan, 6 laju gobnyan geugisa u banda Yizreel keu teupeu-ubat, dan Ahazia laju geujak ngieng gobnyan disinan. 7 Po teu Allah ka geupeuteuntée bahwa Ahazia teuma teuka ajai geuh watée geujak saweu Yoram. Lam kunjongan nyan Ahazia dan Yoram meurumpok laju lawan nibak sidroe ureuëng agam nyang nan jih Yehu aneuëk Nimsi, nyang ka geupiléh lé TUHAN keu geupeubinasa keuluwarga Raja Ahab. 8 Teungoh Yehu geupeubuet huköman TUHAN ateueh keuluwarga nyan, gobnyan laju meurumpok deungon saboh kawan ureuëng-ureuëng rayeuk Yehuda dan aneuëk keumuen-aneuëk keumuen Ahazia nyang roh sajan nibak kunjongan nyan. Lé Yehu laju geupoh maté awaknyan banmandum. 9 Óh lheuehnyan geuyue laju ureuëng laén jijak mita Ahazia nyang bak watée nyan teungoh geumusöm di Samaria. Óh meuteumé ngon Ahazia, gobnyan jiba laju ubak Yehu dan laju jipoh maté. Bahpi lagée nyan gobnyan geukubu cit lé awaknyan sabab awaknyan jihoreumat keu Raja Yosafat abusyiek gobnyan nyang meungabdi ubak TUHAN deungon sipeunoh até. Nibak keuluwarga Ahazia hana nyang hase jicok keurajeuen nyan. 10 Bak watée geuteupeue lé Atalya bahwa aneuëk gobnyan Raja Ahazia ka wafeuet, gobnyan laju geupeurintah bahwa banmandum keuluwarga raja nyang na di Yehuda teupoh maté. 11 Ahazia na sidroe syedara geuh nyang inong nan jih Yoseba, nyang meukawen deungon sidroe teungku imeum nan geuh Yoyada. Deungon seungab-seungab Yoseba geucok laju sidroe aneuëk agam Ahazia nyang nan jih Yoas lamkawan aneuëk-aneuëk raja nyang jikeuneukpoh maté lé Atalya. Aneuëk nyan meusajan deungon deundayang jih laju geusöm lam saboh bilék di Baét TUHAN. Meunan kheueh cara jih Yoseba geupeuseulamat aneuëk nyan sampoe hana jiteumé poh maté lé Atalya. 12 Na nam thon treb jih Yoas geusöm di Baét TUHAN dan Atalya teutab geumat keurajeuen sibagoe ratu.

2 Tawarikh 23

1 Bak thon nyang keutujoh Teungku Imeum Yoyada ka geucok keuputosan keuneuk meutindak. Gobnyan laju geumeupakat deungon limong droe peuwira, na kheueh Azarya aneuëk Yeroham, Ismail aneuëk Yohanan, Azarya aneuëk Obed, Maaseya aneuëk Adaya, dan Elisafat aneuëk Zikhri. 2 Awaknyan jijak laju u banmandum banda nyang na di Yehuda, dan laju jipeusapat bubena ureuëng Lewi dan banmandum ulée kawöm, banmandum awaknyan geuba u Yerusalem. 3 Awaknyan jikeubah laju di Baét TUHAN, dan geuikat janji deungon Yoas, aneuëk agam raja nyan. Yoyada geupeugah ubak awaknyan, "Nyoe kheueh aneuëk agam areuwah Raja Ahazia! Gobnyan jinoenyoe harôh geu-ék takhta, sabab TUHAN ka geumeujanji bahwa keuturonan Nabi Daud teutab geumat peurintah. 4 Nyoe kheueh nyang harôh geutanyoe peubuet: Meunyoe ka seuleusoe di teungku imeum dan ureuëng Lewi geumeutugaih nibak uroe Sabat, awaknyan hana jeuet geuwo. Siper lhée nibak awaknyan harôh tinggai dan geujaga pintoe-pintoe geureubang Baét TUHAN, 5 siper lhée teuk tinggai di meuligoe raja, dan nyang leubeh nibak nyan jijaga di babah Pintoe Geureubang Dasai. Banmandum rakyat harôh jimeugumpôi nibak leuen Baét TUHAN. 6 Hana meusidroe pih nyang jeuet jitamong u dalam geudong Baét TUHAN seulaén lé teungku imeum dan ureuëng Lewi nyang teungoh meutugaih. Awaknyan jeuet geutamong sabab awaknyan ka teupeukhusos keu TUHAN. Ureuëng-ureuëng nyang laén harôh jitaát ubak peue mantong nyang geupeugét peuratoran lé TUHAN dan tinggai diluwa. 7 Ureuëng-ureuëng Lewi harôh geudong meukeulileng ban silingka raja siab deungon peudeueng nyang ka teusuit didalam sarong, dan geukawai gobnyan ho mantong geuhnyan geujak. So nyang jiuseuha keuneuk jitamong u dalam Baét TUHAN, ureuëng nyan harôh teupoh maté." 8 Peurintah Yoyada nyan geupeubuet banmandum lé ureuëng-ureuëng Lewi dan rakyat Yehuda. Ureuëng-ureuëng nyang ka lheueh tugaih nibak uroe Sabat hana jeuet geuwo. Lé uléebalang peuwira ka hase geuato bah kheueh nyan keu ureuëng-ureuëng nyang ka seuleusoe meutugaih meunan cit keu ureuëng nyang ban teuka keuneuk meutugaih. 9 Keumandum uléebalang nyan Yoyada laju geubagi-bagi kapak dan peurisai atra Nabi Daud nyang na teukeubah di Baét TUHAN. 10 Meunan cit lé Yoyada geukeubah ureuëng-ureuëng gobnyan deungon peudeueng nyang ka siab teusuit lam sarong ban sikeulileng bagian keue Baét TUHAN mangat teulindong raja. 11 Óh lheuehnyan lé Yoyada laju geupeuteubiet Yoas u luwa, laju geupeuseuôn mahkota di ateueh ulée gobnyan, dan geuseurah ubak gobnyan kitab Huköm Po teu Allah. Meunan kheueh cara jih Yoas teubaiát jeuet keuraja. Óh lheuehnyan lé Teungku Imeum Yoyada deungon aneuëk-aneuëk gobnyan laju geuro minyéuk upacara peunobatan u ateueh Yoas, dan banmandum ureuëng nyang na disinan jikuk, "Udeb raja!" 12 Atalya geudeungoe rakyat sira jiseumurak jimeuhôi ngon ji pujoe-pujoe raja. Bagaih-bagaih geuhnyan geujak u Baét TUHAN nibak teumpat rakyatba ka meugumpôi disinan. 13 Deuh laju geungieng raja nyang barô nyan teudong di babah pintoe tamong u Baét TUHAN, nibak teumpat gobnyan teubaiát, jikeulileng lé bubena uléebalang dan ureuëng yueb beureuguih. Banmandum rakyat meusurak meuhubo sira jiyueb beureuguih, dan lé ureuëng peumeuén musik di Baét TUHAN geupeumeuriah lom peurayaan nyan deungon alat-alat musik geuh. Deungon até nyang peudeh Atalya laju geupriek peukayan gobnyan sira geukliek, "Khianat! Khianat!" 14 Yoyada hana geubri idhin Atalya teupoh maté dikeue Baét TUHAN, teuma gobnyan laju geupeugah ubak mandum uléebalang, "Gataba laju jihnyan rot baresan peungawai, dan tapoh maté laju somantong nyang jiuseuha jipeuseulamat gobnyan." 15 Awaknyan laju jidrob gobnyan, laju jiba ubak meuligoe. Disinan gobnyan laju jipoh maté dikeue pintoe Geureubang Guda. 16 Teungku Imeum Yoyada laju geupakat Raja Yoas dan banmandum rakyat geupeugöt peujanjian bahwa awaknyan teuma jeuet keu umat TUHAN. 17 Óh lheuehnyan awaknyan laju jijak seureubu dan jireuloh rumoh beurala Baal. Meunan cit deungon miseubah dan patong-patong nyang na disinan ka habéh geupeuhanco, dan si Matan, teungku imeum Baal nyan laju jipoh maté dikeue miseubah-miseubah nyan. 18 Lé Yoyada geujok tugaih ubak teungku-teungku imeum dan ureuëng Lewi mangat geu-uroih bubena buet di dalam Baét TUHAN meunurot peumbagian keureuja nyang ka geubagi lé Nabi Daud. Awaknyan harôh geupeuseumah keureubeuen nyang teutot ubak TUHAN -- nyang sisuai deungon huköm-huköm Nabi Musa -- deungon peurayaan dan ca-e-ca-e lagée nyang ka lheueh geuato lé Nabi Daud. 19 Nibak tieb-tieb babah pintoe geureubang Baét TUHAN, Yoyada laju geukeubah ulée balang keu nyang jaga mangat ureuëng nyang hana patot jiseumah TUHAN bék jitamong. 20 Bubena uléebalang, bubena tukoih masyarakat, mandum peujabat peumeurintah, dan banmandum rakyat jiseutôt Yoyada jijak arak Raja Yoas nibak Baét TUHAN ubak meuligoe. Awaknyan jitamong rot babah pintoe geureubang nyang paleng phon dan laju raja geuduek di ateueh singgahsana. 21 Siluroih rakyat geumbira, rakyat pi ka aman dan Atalya ka teuma teupoh maté.

2 Tawarikh 24

1 Yoas meu-umu 7 thon bak watée gobnyan jeuet keu raja Yehuda, dan gobnyan geumat peurintah di Yerusalem peuet ploh thon treb jih. Ma gobnyan nan geuh Zibya asai nibak banda Bersyeba. 2 Yoh mantong udeb Imeum Yoyada, Yoas geupeubuet hai-hai nyang galak até TUHAN. 3 Yoyada geupiléh dua droe ureuëng inong keupeurumoh Yoas, dan nibak awaknyan na geumeu aneuëk agam ngon aneuëk inong. 4 Óh ka geumat peurintah na padub watée treb jih, Yoas geucok keuputosan bahwa gobnyan keuneuk geupeu barô Baét TUHAN. 5 Bubena imeum dan ureuëng-ureuëng Lewi geupeurintah laju mangat geujak ubak peunduduek banda nyang na di Yehuda jeuet geupeusapat péng nibak rakyatba mangat jeuet hase teupeubarô Baét TUHAN tieb-tieb thon. Gobnyan geuyue ubak awaknyan bubagaih jijak peubuet peurintah nyan, teuma di ureuëng-ureuëng Lewi nyan jipeumeulét-meulét. 6 Lé sabab nyan gobnyan laju geutawök Imeum Yoyada, peumimpén awaknyan, laju geupeugah, "Nabi Musa hamba TUHAN nyan kon ka geuyue bayeue cukée bak rakyat mangat jeuet keubiaya Baét TUHAN? Jinoe, pakon ureuëng-ureuëng Lewi nyan hana Bapak paksa keu jijak peusapat cukée nibak rakyat di Yehuda dan Yerusalem?" ( 7 Ureuëng-ureuëng Atalya, inong jeuhet nyan, ka ji peurusak Baét TUHAN, dan lumpah that jai barang-barang nyang teupeukhusos keu Allah ka jipeuguna keu jiseumah Baal.) 8 Lé sabab nyan raja laju geupeurintah mangat jeuet ureuëng Lewi jipeugét saboh peuto péng dan atra nyan jikeubah bak babah pintoe geureubang Baét TUHAN. 9 Bansaboh nanggroe Yerusalem dan ngon nanggroe Yehuda laju geupeumaklum bahwa banmandum rakyat harôh jibayeue cukée keu TUHAN, lagée nyang ka geupeuwajéb lé Nabi Musa. 10 Deungon na maklumat nyan lumpah that galak até rakyat dan peumimpén-peumimpén awaknyan. Meuron-ron awaknyan jijak peutamong péng cukée lam peuto nyan. 11 Tieb-tieb uroe peuto-peuto nyan jiba lé ureuëng-ureuëng Lewi ubak peugawée raja keu teupareksa. Meunyoe peuto nyan ka peunoh seukeutareh nanggroe dan waki imeum Agong geupeuteubiet péng dan óh lheueh nyan peuto nyan geujak keubah lom ubak teumpat sot. Meunan kheueh nyang awaknyan peubuet tieb-tieb uroe, dan jai lumpah na péng nyang ka teupeusapat. 12 Óh lheueh nyan lé raja dan Yoyada péng nyang ka meusapat nyan laju geujok ubak nyang jeuet keu ulée bak seumeugét Baét TUHAN nyan. Laju lé ureuëng nyan geubayeue upah keu utöh batée, utöh kayée, dan utöh logam nyang seumeugétnyan. 13 Deungon na lagée nyan jipeuphon kheueh meubuet lé utöh-utöh nyan keu jipeugét Baét TUHAN. Awaknyan banmandum meubuet sampoe Baét TUHAN ka jeuet keukukôh dan lagak lagée nyang ka-ka. 14 Óh ka seuleusoe buet awaknyan, méuh dan pirak nyang mantong leubeh laju jiseurah ubak raja dan Yoyada. Laju méuh ngon pirak nyan geupeuguna keu teupeugét peukakaih-peukakaih Baét TUHAN, nyang teupeugét nyan na kheueh: alat-alat keu upacara iébadat, keu keureubeuen nyang teutot, piréng-piréng keu keumeunyan, dan cambông-cambông. Yohmantong udeb Imeum Yoyada, keureubeuen nyang teutot teutab teupeuseumah di Baét TUHAN. 15 Yoyada geubri panyang umu lé TUHAN sampoe 130 thon barô kheueh gobnyan meuninggai donya. 16 Gobnyan teupeukubu nibak jrat raja-raja di Banda Nabi Daud sibagoe peunghargaan jasa-jasa gobnyan ubak Po teu Allah, Baét TUHAN dan keu umat Israel. 17 Óh ka lheueh meuninggai Yoyada nyan, Yoas laju jibujuk ngon jirayu lé peumimpén-peumimpén Yehuda akhéjih gobnyan hana le geupako ubak ajaran-ajaran nyang geupeurunoe lé Yoyada. 18 Deungon na lagée nyan rakyat ka hana le ji iébadat di Baét TUHAN, Allah indatu awaknyan, nyang jiseumah na kheueh patong beurala dan patong-patong Dewi Asyera. Deungon lagée nyan awaknyan ka meudesya akhéjih Po teu Allah beungéh ubak Yehuda dan Yerusalem. 19 TUHAN laju geu kirém nabi-nabi keugeujak teugah awaknyan mangat jiwoe meungabdi ubak TUHAN, teuma rakyat teutab hana jitem deungoe. 20 Watée nyan teuka kheueh Roh Allah jitron jikuasa Nabi Zakharia aneuëk Imeum Yoyada. Nabi Zakharia geumeuhadab ukeue rakyat ba laju geupeugah, "TUHAN Po teu Allah meufeureuman, 'Pakon gata hana taát ubak peue-peue nyang Ulôn peurintah dan gata peuceulaka droe gata keudroe. Gata hana tapakoe ubak Ulôn, teuma di Ulôn pih hana Lôn pakoe ubak gata!' " 21 Teuma di rakyat bukon jideungoe teuma jimeurokpakat keuneuk jiheuntam Nabi Zakharia, meunan cit Raja Yoas pih roh lamkawan nyan. Gobnyan hana geuingat ubak jasa-jasa dan keuseutiaan Yoyada, ayah Nabi Zakharia nyan. Ateueh peurintah raja, Nabi Zakharia jigeulawa ngon batée sampoe maté di seuramoe Baét TUHAN. Watée keuneuk meuninggai, Nabi Zakharia geupeugah, "Seumoga TUHAN geukalon buet gata nyoe dan teuma geubalaih!" 23 Bak thon nyan cit teuma, watée musém meugantoe, sipa-i Siria jiprang Yehuda dan Yerusalem. Bubena peumimpén awaknyan habéh jipoh maté meunan cit atra ureuëng Yehuda ngon Yerusalem nyan habéh jicok sibagoe hareuta rampasan prang dan laju jiba u banda Damsyik. 24 Sipa-i Siria nyan hana le jeumeulah jih, cit bacut, teuma lé TUHAN geupeubiyeu awaknyan jipeutaloe tantra Yehuda nyang leubeh le dan rayeuk, sabab ureuëng Yehuda hana jipako ubak TUHAN Allah indatu awaknyan. Deungon cara nyan TUHAN ka geuhuköm Raja Yoas. 25 Raja Yoas luka brat that. Óh ka lheueh sidadu musoh jijak, dua droe peugawée gobnyan jimupakat. Awaknyan laju jipoh maté gobnyan bak teumpat éh geuh keudroe sibagoe beunalaih ateueh jipoh maté aneuëk Imeum Yoyada. Raja Yoas jikubu nibak Banda Nabi Daud, teuma kon lam lampôh jrat Raja-raja. ( 26 Ureuëng-ureuëng nyang mupakat keuneuk jijakpoh maté gobnyan na kheueh Zabad aneuëk Simeat ureuëng inong Amon, dan Yozabad aneuëk Simrit ureuëng inong Moab.) 27 Kisah keuhai aneuëk-aneuëk Yoas, keuhai ramaian-ramaian nyang hana gét keuhai gobnyan, keuhai pakriban gobnyan geupeugét Baét TUHAN, banmandum nyan ka teutuléh lam kitab Keuteurangan Kitab Raja-raja. Amazia, aneuëk agam Yoas, jeuet keu raja keugeunantoe ayah geuh.

2 Tawarikh 25

1 Amazia teubaiát jeuet keuraja watée umu geuh 25 thon, dan gobnyan geumat peurintah di Yerusalem 29 thon treb jih. Nan Ma gobnyan Yoadan asai Yerusalem. 2 Amazia geupeubuet buet nyang galak that até TUHAN, teuma buet nyang geupeubuet nyan siteungoh até. 3 Teuma meunan ka kong keududuekan gobnyan, laju geuhuköm maté bubena peugawée nyang kajipoh maté ureuëng syiek gobnyan. 4 Teuma aneuëk-aneuëk peugawée nyang geupoh maté nyan hana geupoh sabab gobnyan taát that ubak peurintah TUHAN lagée na teutuléh lam Kitab Nabi Musa lagéenyoe, "Bék neuhuköm maté ureuëng syiek sidroe-sidroe ureuëng sabab buet nyang jeuhet nyang jipeubuet lé aneuëk-aneuëk jih, dan bék teuma neuhuköm maté aneuëk-aneuëk jih sabab buet nyang jeuhet nyang jipeubuet lé ureuëng syiek jih. Somantong ureuëng jeuet teuhuköm maté meunyoe buet nyang jeuhet nyan jipeubuet keudroe." 5 Raja Amazia laju geupeusapat banmandum ureuëng nibak sukée Yehuda dan sukée Benyamin óh lheuehnyan geuyue dong meuriti meunurot kawöm maséng-maséng, geupimpén lé uléebalang keumeundan pasokan siribée dan uléebalang keumeundan pasokan sireutoih. Óh lheuehnyan geupiléh ureuëng-ureuëng nyang meu-umu 20 thon u ateueh nyang ék jimuprang dan carông jipeuguna kapak dan peurisai. Jeumeulah awaknyan na 300.000 droe. 6 Seulaén nibak tantra nyang kana geusiwa teuma na 100.000 droe sipa-i nyang laén nibak nanggroe Israel deungon yuem siwa jih kira-kira 3.400 kilogram pirak. 7 Teuma na sidroe nabi geujak ubak raja sira geupeugah lagée nyoe, "Bék gata cok hai raja sipa-i ureuëng Israel nyan, sabab TUHAN hana geutulông umat Israel nyang na di utara. 8 Teuma meunyoe tacok cit sipa-i Israel nyan, Po teu Allah geupeubiyeu Teungku Amphon taloe dimideuen prang bahpi sipa-i Teungku Amphon teuga lom ngon beurani. Sabab Allah mantong kheueh nyang meukuasa nyang bri taloe atawa meunang." 9 "Teuma pakriban deungon pirak nyang ka ulôn bri ubak awaknyan?" geutanyong lé Amazia. Geujaweueb lé nabi nyan, "TUHAN hase geujok pulang nyang laén keu Teungku Amphon nyang leubeh le nibak nyang ka neubri nyan!" 10 Lé sababnyan Amazia laju geupeuleuh sipa-i-sipa-i nyang ka geusiwa nyan dan geuyuewoe lom u nanggroe jih. Awaknyan pi laju jiwo, teuma deungon ié muka nyang beungéh that. 11 Amazia geupeubeurani droe dan geuba laju tantra gobnyan u Pantôn Asin. Disinan awaknyan laju jimeuheuengko sampoe maté 10.000 droe sipa-i Edom. 12 Siploh ribée droe nyang laén geudrob. Awaknyan nyang keunong drob nyan laju geuba u gunong batée di banda Sela óh trok keunan laju geurhom lam bariéh gunong akhéjih banmandum sipa-i nyan maté. 13 Teuma óh lheuehnyan sipa-i-sipa-i Israel nyang ka geuyuewoe lé Raja Amazia, dan hana geubri idhin keu jijak lamprang, laju jijak prang banda-banda Yehuda lamkawan Samaria dan Bet-Horon. Awaknyan laju jipoh maté na 3.000 droe ureuëng dan hareuta nyang na di sinan pi laju jireupah. 14 Óh ka lheueh geupeutaloe sipa-i Edom, Amazia laju geuwo sira geupeuwo patong-patong beurala atra Edom laju patong nyan geukeubah di Yehuda. Lé gobnyan geutot keumeunyan keu patong-patong nyan sira geuseumah. 15 Sabab buet geuhnyan sampoe TUHAN teuka meureuka. TUHAN laju geu kirém sidroe nabi ubak Raja Amazia. Nabi nyan geupeugah lagée nyoe, "Pakon Teungku Amphon neuseumah dewa bansa laén nyang ka teuntée dewa-dewa nyan hana hase jipeuseulamat bansa droe jih nibak keukuasaan Teungku Amphon?" 16 "Seungab," kheun Raja Amazia ubak nabi nyan sira geudot, "Meunyoe hana neutem seungab kamoe peumaté droeneueh! Hántom na kamoe baiát gata jeuet keu ureuëng bri naseuhat raja!" Lé sababnyan nabi nyan pi seungab, teuma sigohlom jih gobnyan geupeugah, "Jinoe ka ulôn teupeue bahwa TUHAN Po teu Allah geukeuneuk peubinasa Teungku Amphon kareuna buet Teungku Amphon nyan, sabab Teungku Amphon hana neupako naseuhat ulôn." 17 Amazia raja di nanggroe Yehuda nyan meusajan deungon peunaseuhat gobnyan ka geumeukumplot keuneukjak lawan ureuëng Israel. Gobnyan geukirém utosan ubak Yoas raja Israel, aneuëk Yoahas, cucoe Yehu, mangat geulawan gobnyan di mideuen prang. 18 Teuma lé Raja Yoas laju geubalaih haba lagée nyoe, "Bak saboh watée singoh seumak nyang meuduro nyang na di ateueh gunong-gunong Libanon jikirém tuntotan lagée nyoe keu bak kayée ceumara, 'Hai bak kayée ceumara, tabri kheueh aneuëk dara gata keu aneuëk ulôn mangat jeuet keupeurumoh jih.' Óh lheuehnyan lewat kheueh rét nyan saboh beulatang uteuen jijak gilo-gilo tamah meuduro nyan. 19 Gata, Amazia, raya that haba tapeugah gata ka tapeutaloe ureuëng Edom, teuma leubeh gét gata tatinggai mantong dirumoh. Keupeue tamita soai nyang na teupeuceulaka droe keudroe gata dan rakyat gata?" 20 Teuma lé Amazia, raja Yehuda nyan hana geupako mubacut pi haba nyang geupeugah lé Yoas raja Israel nyan. Dan keubit ka keuheundak Po teu Allah mangat Amazia teupeutaloe sabab gobnyan ka geuseumah patong beurala ureuëng Edom. 21 Sabab nyan Yoas laju geubeurangkat deungon aneuëk buah gobnyan u Bet-Semes dan laju geumuprang deungon Raja Amazia disinan. 22 Lam prang nyan sipa-i Yehuda laju taloe dan bubena sipa-i gobnyan habéh jipeuplueng droe jiwo u rumoh jih maséng-maséng. 23 Yoas laju geudrob Amazia geuba laju u Yerusalem, laju geureuloih banmandum bintéh beuton banda nyan nyang panyang jih leubeh kureueng na 200 metée, phon nibak babah Pintoe Geureubang Efraim trok u babah Pintoe Geureubang Sudut. 24 Banmandum méuh dan pirak meunan cit banmandum peukakaih nyang meuteumé di Baét TUHAN dan nyang na dimiyueb peungawasan Obed-Edom, meunan cit banmandum hareuta beunda meuligoe, meusajan deungon meupadubdroe sandeura jiba banmandum lé Yoas u Samaria. 25 Óh ka meuninggai donya Yoas raja Israel nyan, Amazia raja Yehuda mantong udeb 15 thon teuk. 26 Phon watéenyan Amazia geutinggai TUHAN, na ureuëng laén jimeukumplot keuneuk jipoh maté gobnyan di Yerusalem. Sabab nyan, gobnyan laju geuplueng u banda Lakhis, teuma lé musoh-musoh gobnyan laju jipeucrok keunan óh ban meuteumé laju jipoh maté. Manyét gobnyan jiba deungon guda u Yerusalem, laju jikubu nibak lampôh jrat raja-raja di Banda Nabi Daud. Kisah nyang laén keuhai Raja Amazia nyoe, sampoe ubak akhé keurajeuen gobnyan ka teucetet lam kitab Seujarah Raja-raja Yehuda dan Israel.

2 Tawarikh 26

1 Óh ka lheueh Amazia meuninggai donya, banmandum rakyat Yehuda jipiléh Uzia aneuëk agam gobnyan jeuet keu raja. Bak watée nyan Uzia nyan meu-umu 16 thon. Ma gobnyan na geuh Yekholya, inong Yerusalem. Uzia geumat peurintah di Yerusalem 52 thon treb jih. Gobnyan kheueh nyang reubot dan nyang peugot lom banda Elot. 4 Saban cit lagée ayah gobnyan, Uzia pi geupeubuet buet nyang that galak até TUHAN. 5 Nabi Zakharia na kheueh nyang bri naseuhat keuhai rohani gobnyan. Yohmantong Nabi Zakharia udeb, Uzia seutia that geumeu iébadat ubak TUHAN sampoe TUHAN geubri beureukat keu gobnyan. 6 Uzia geumuprang geulawan ureuëng Filistin. Laju geureuloh bubena beuton-beuton banda Gat, Yabne, dan Asdod, óh lheueh nyan laju geupeudong banda-banda nyang meubeuton bak binéh banda Asdod dan daerah laén di Filistin. 7 Po teu Allah geutulông gobnyan keu teupeutaloe bansa Filistin, dan ureuëng Arab nyang tinggai di Gur-Baal meunan cit deungon ureuëng Meunim. 8 Ureuëng Amon jibayeue cukée ubak Uzia. Gobnyan maken meukuasa akhéjih nan gobnyan maken meugah sampoe u nanggroe Meusé. 9 Keu teupeukong banda Yerusalem, Uzia laju geupeudong meunara di babah Pintoe Geureubang Sudut, Pintoe Geureubang Pantôn dan di teumpat wet beuton. 10 Meunan cit lé gobnyan geupeudong meunara-meunara meukuta di daerah padang, dan geukueh mon-mon nyang le sabab beulatang peulara gobnyan jai lumpah na, bah kheueh nyan di ateueh darat nyang manyang meunan cit ateueh darat nyang miyueb dibagian barat. Sabab gobnyan gét that geupeurati bak buet meutani, teuma gobnyan laju geubuka lampôh anggô bak daerah gunong-gunong ngon bak tanoh-tanoh nyang gumbo, banmandum buet geuhnyan geupeuguna ureuëng meubuet nyang ramé. 11 Meunan cit Uzia na tantra geuh nyang lumpah jai dan sabe lam siab pajan mantong keuneuk muprang. Tantra nyan na lam baresan-baresan nyang jeumeulah jih jicetet lé dua droe seukeutareh raja, awaknyan na kheueh Yeiel dan Maaseya dimiyueb pimpénan Hananya, sidroe nibak seutaf raja. 12 Banmandum angkatan prang nyan teubagi-bagi teuma lam padubboh bagian, bagian nyan na kheueh, 307.500 sipa-i jipimpén lé 2.600 uléebalang. Awaknyan banmandum na keumampuan nyang lumpah rayeuk keu jimuprang dan jitulông raja teupeutaloe musoh. 14 Uzia jipeuleungkab teuma sipa-i geuhnyan deungon peurisai, kapak, tupi waja, bajée beuso, ali-ali dan aneuk panah, meunan cit deungon batée pupo geulawa. 15 Di Yerusalem lé tumpeun-tumpeun nyang peugét sinjata gobnyan ka teuma jicibta saboh beunda pakriban cara teupeuleueh aneuk panah dan batée rayeuk lam meunara dan sagoe-sagoe beuton banda. Uzia meusyeuhu dipat mantong, dan gobnyan jeuet keu raja nyang lumpah that meukuasa sabab Po teu Allah geutulông gobnyan. 16 Óh ka Raja Uzia teuga, gobnyan ka jeuet keu raja nyang sombong, dan nyan kheueh jeuet keusabab gobnyan hanco. Gobnyan geuiengkeue ubak peurintah TUHAN Allah gobnyan sabab geutamong lam Baét TUHAN keu geujak tot keumeunyan ateueh miseubah keumeunyan. 17 Teuma di Imeum Azarya meusajan ngon 80 droe imeum nyang laén nyang teuga-teuga lom beuhe-beuhe geuseutôt gobnyan 18 keu geusanggah buet nyang lagée nyan. Awaknyan jipeugah, "Amphon Nyang Mulia! Amphon hana hak neutot keumeunyan keu TUHAN. Nyan tugaih imeum-imeum keuturonan Nabi Harun, sabab awaknyan kheueh nyang ka teupeukhusos bak buet lagée nyan. Bubagaih kheueh Amphon neutinggai teumpat nyang suci nyoe! Amphon ka neulawan TUHAN Allah, dan hana le meuteumé restu nibak Gobnyan." 19 Bak watée nyan Raja Uzia teungoh geudong bak binéh dupa Baét TUHAN deungon alat tot dupa bak jaroe gobnyan. Gobnyan laju beungéh ubak imeum-imeum nyan, dan deungon hana teusangka-sangka jiteuka peunyakét kulét nyang lumpah parah bak keunéng gobnyan. 20 Azarya dan imeum-imeum nyang laén geungieng ateueh gobnyan dan lumpah teukeujot, laju geupaksa mangat raja nyan geutinggai laju Baét TUHAN. Bagaih-bagaih gobnyan geuteubiet sabab TUHAN ka geuhuköm gobnyan. 21 Sampoe án meuninggai Raja Uzia nyan peunyakét gobnyan hana puléh-puléh. Gobnyan jipeuaséng bak saboh rumoh dan hana teupeu idhin le geutamong lam Baét TUHAN. Gobnyan ka teupeubeubaih nibak mandum tugaih-tugaih geuh, dan Yotam aneuëk agam gobnyan nyang mat peurintah ateueh rakyat sibagoe waki gobnyan. 22 Kisah nyang laén keuhai Raja Uzia, ka geucetet lé Nabi Yesaya aneuëk Amos. 23 Watée gobnyan meuninggai donya, Uzia teupeukubu bak tanoh binéh jrat raja-raja, teuma bukon bak jrat nyan keudroe, sabab gobnyan meupeunyakét nyang parah lumpah na. Yotam aneuëk gobnyan nyang agam jeuet keu raja geunantoe gobnyan.

2 Tawarikh 27

1 Yotam jeuet keu raja lam umu 25 thon, dan gobnyan geumat peurintah di Yerusalem 16 thon treb jih. Nan ma gobnyan na kheueh Yerusa aneuëk Zadok. 2 Yotam galak that até TUHAN lagée ayah gobnyan Uzia. Teuma gobnyan hana geutot keumeunyan bak Baét TUHAN lagée nyang geupeubuet lé ureuëng syiek geuh. Bahpi lagée nyan, rakyat teutab jipeubuet desya. 3 Yotam kheueh nyang peugot Pintoe Geureubang Utara di Baét TUHAN, dan nyang peukong beuton Yerusalem bak daerah nyang teupeugah Ofel. 4 Gobnyan nyang peudong banda-banda di gunong-gunong Yehuda dan kuta-kuta meunan cit deungon meunara-meunara lam gle. 5 Gobnyan geujak prang dan geupeutaloe raja Amon meusajan ngon sipa-i raja nyan, laju geupaksa ureuëng Amon beujibayeue cukée. Tieb-tieb thon lhée thon treb jih meuturot-turot awaknyan harôh jibayeue 3.400 kilogram pirak, dua jeunéh gandom, maséng-maséng 1.000 ton. 6 Yotam meutamah-tamah meukuasa sabab gobnyan taát ngon seutia ubak TUHAN Allah. 7 Hai-hai nyang laén lam peumeurintahan Yotam, keuhai muprang dan siasat-siasat jih, banmandum nyan ka teucetet lam kitab Seujarah Raja-raja Israel dan Yehuda. 8 Yotam meu-umu 25 thon bak watée gobnyan jeuet keu raja, dan gobnyan geumat peurintah di Yerusalem treb jih 16 thon. 9 Gobnyan meuninggai donya dan teukubu di banda Nabi Daud, dan aneuëk agam gobnyan nyang nan jih Ahas teubaiát jeuet keu raja geunantoe gobnyan.

2 Tawarikh 28

1 Ahas jeuet keu raja lam umu 20 thon, dan gobnyan geumat peurintah di Yerusalem 16 thon treb jih. Gobnyan hana geuseutôt teuladan nyang na bak Nabi Daud, indatu gobnyan, nyang geupeubuet buet nyang hana galak até TUHAN. 2 Gobnyan udeb lagée raja-raja Israel nyang geuyue ubak ureuëng laén mangat jiteupeugét patong-patong Baal nibak logam, 3 dan geutot keumeunyan di Pantôn Hinom. Aneuëk gobnyan nyang agam pih jipeuseumah sibagoe keureubeuen keu beurala, meunurot keubiasaan nyang brok nyang jipeubuet lé ureuëng nyang ka geu use lé TUHAN di nanggroe Kanaan watée ureuëng Israel jitamong lam nanggroe nyan. 4 Ahas geupeuseumah keureubeuen dan geutot keumeunyan bak teumpat-teumpat ureuëng seumah dewa bak gunong-gunong dan nibak bak kayée nyang luhu. 5 Sabab Raja Ahas meudesya, TUHAN Allah geupeubiyeu gobnyan jipeutaloe lé raja Siria dan lam jeumeulah nyang le ureuëng-ureuëng Yehuda nyan jiba u Damsyik sibagoe tawanan prang. Meunan cit TUHAN geupeubiyeu awaknyan jipeutaloe lé Raja Pekah aneuëk Remalya di Israel, nyang lam siuroe mantong jipoh maté 120.000 droe sipa-i Yehuda nyang beuhe-beuhe. TUHAN Po teu Allah indatu awaknyan geupeubiyeu banmandum nyan teujadi, sabab rakyat Yehuda hana jipako ubak TUHAN. 7 Aneuëk agam Ahas, nyang nan geuh Maaseya jipoh maté lé Zikhri sidroe peuwira Israel. Dan Zikhri nyan jipoh maté teuma Azrikam nyang urôh meuligoe raja, dan Elkana, jaroe uneuen raja. 8 Bahpi ureuëng-ureuëng Yehuda na kheueh saban ngon bansa Israel, teuma lé tantra Israel hana jipako teutab jiteun 200.000 droe ureuëng inong dan aneuëk manyak, laju jiangkot awaknyan u Samaria meusajan-sajan ngon barang-barang nyang jireupah di mideuen prang. 9 Na sidroe nabi TUHAN nyang nan geuh Oded tinggai bak banda Samaria. Bak watée tantra Israel jiwoe jiba ureuëng nyang teuteuen lam mideuen prang nibak Yehuda, Oded geujak meurumpok ngon awaknyan watée awaknyan keuneuk tamong lam banda. Nabi nyan geupeugah, "Gata nyoe ka gata peutaloe Yehuda sabab TUHAN Allah indatu gata beungéh keu awaknyan. Teuma TUHAN geudeungoe pakriban keujam jih gata watée gata poh maté sidadu Yehuda nyan. 10 Dan bak saát nyoe ureuëng-ureuëng Yerusalem dan Yehuda keuneuk gata peujeuet keu namiet-namiet gata! Peu kheueh hana gata teupeue bahwa gata pih ka gata peubuet desya teuhadab TUHAN Allah gata? 11 Deungoe lôn! Lamkawan ureuëng nyang gata teuen nyoe na röh syedara-syedara. Jadi, gata yue kheueh awaknyan mangat jiwoe. Meunyoe hán, TUHAN beungéh dan geuhuköm gata." 12 Na peuet droe ureuëng patot-patot nyang jeuet keupeumimpén bansa Israel jibeudôh, awaknyan na kheueh Azarya aneuëk Yohanam, Berekhya aneuëk Mesilemot, Yehizkia aneuëk Salum, dan Amasa aneuëk Hadlai, mandum awaknyan geulawan tantra nyang teungoh woe nyan. 13 Awaknyan geupeugah, "Bék gata ba mandum ureuëng nyang gata teun lam prang nyan keunoe! Geutanyoe ka meudesya ubak TUHAN, dan desya-desya geutanyoe ka jai lumpah na keu geuhuköm. Jinoenyoe gata keuneuk peubuet sapeue-sapeue nyang teutamah buet-buet geutanyoe nyang salah." 14 Teuma watée nyan cit teuma banmandum tantra nyan laju jijok bubena tawanan ngon barang-barang nyang jireupah ubak rakyat dan peumimpén-peumimpén jih. 15 Óh lheueh nyan ban peuet droe ureuëng patot-patot bansa Israel nyan laju geubeudôh dan geu-uroih bubena ureuëng tawanan nyan. Lé awak nyang peuet droe nyan geubagi-bagi laju peukayan wase reupahan lé sidadu Israel nyan ubak ureuëng-ureuëng nyang teuteun di mideuen prang nyan. Meunan cit awaknyan bagi sipatu, peunajoh dan ié jieb. Ureuëng nyang teuteuen nyang luka-luka laju geuboh ubat ngon minyéuk zaiton, nyang ka leumoh that watée jijak, geupeu ék ateueh keuleudée, dan barô kheueh banmandum ureuëng nyang teuteun nyan teuba u Yerikho, banda bak-bak kuruma, mangat jeuet jiwoe u gampông awaknyan di Yehuda. Óh ka lheueh nyan ureuëng Israel laju geuwoe u Samaria. 16 Ureuëng-ureuëng Edom jipeuphon prang lom Yehuda dan jiteuen laju ureuëng Yehuda nyang lumpah that jai. Sabab nyan lé Raja Ahas laju geulakée ubak Tiglat-Pileser, raja Asyur, mangat geukirém bantuan. 18 Bak watée nyan cit teuma di ureuëng-ureuëng Filistin teungoh jiprang banda-banda bak daerah gaki gunong siblaih ubarat, dan siblaih seulatan Yehuda. Awaknyan laju jireupah banda Bet-Semes, Ayalon, dan Gederot, meunan cit banda Sokho, Timna, dan Gomzo dan gampông-gampông nyang na bak binéh banda nyang lhée boh nyan, dan awaknyan pih laju tinggai teutab disinan. 19 Sabab Ahas raja Yehuda geutinggai laju TUHAN dan hana geupeurintah rakyat lagée nyang sibeuna jih, teuma TUHAN laju geupeutron keususahan ateueh Yehuda. 20 Raja Asyur nyan teuka bukon geujak tulông Ahas, teuma keu geujak peususah gobnyan. 21 Teupaksa Ahas geucok méuh di Baét TUHAN, nibak meuligoe, dan nibak rumoh-rumoh bubena peumimpén rakyat, laju geujok atranyan ubak raja Asyur. Teuma nyan pih hana meuguna nibak gobnyan. 22 Lam keuadaan nyang lumpah susah nyan, Ahas meutamah-tamah meudesya ubak TUHAN. 23 Gobnyan ka geupeuceulaka droe keudroe meunan cit rakyat droe geuh sabab ka geupeuseumah keureubeuen ubak dewa-dewa ureuëng Siria nyang ka jipeutaloe gobnyan. Gobnyan geupike meunyoe, "Dewa-dewa Siria ka jibantu raja-raja Siria, jadi meunyoe ulôn peuseumah keureubeuen ubak dewa-dewa nyan, mungken ulôn nyoe jitulông cit teuma." 24 Óh lheueh nyan gobnyan geucok banmandum peukakaih Baét TUHAN laju geupeuhanco. Óh lheueh nyan Baét TUHAN nyan pih jitôb, dan geupeudong laju miseubah-miseubah nyang lumpah jai bansaboh nanggroe Yerusalem. 25 Bak tieb-tieb gampông dan banda di Yehuda laju geupeudong teumpat seumah beurala keu teumpat tot keumeunyan lam dupa keu dewa-dewa bansa laén. Deungon lagée nyan, ka geupeujeuet TUHAN, Po teu Allah indatu gobnyan beungéh keu gobnyan. 26 Kisah nyang laén keuhai peumeurintahan gobnyan dan banmandum buet-buet gobnyan phon awai sampoe keuneuleuh ka teucetet lam kitab Seujarah Raja-raja Yehuda dan Israel. 27 Ahas meuninggai donya; dan teukubu di Yerusalem, teuma kon nibak lampôh jrat raja-raja. Hizkia aneuëk gobnyan jeuet keu raja keugantoe gobnyan.

2 Tawarikh 29

1 Hizkia jeuet keu raja Yehuda bak umu 25 thon, dan gobnyan geumat keurajeuen di Yerusalem 29 thon treb jih. Ma gobnyan nan geuh Abia aneuëk Zakharia. 2 Hizkia geupeubuet buet nyang lumpah galak até TUHAN lagée Nabi Daud indatu gobnyan. 3 Bak buleuen sa nibak thon nyang keuphon geumat keurajeuen, Hizkia laju geujak peuhah mandum pintoe Baét TUHAN dan geuyue laju ureuëng laén mangat jipeugét pat-pat nyang reuloh. 4 Imeum-imeum dan ureuëng-ureuëng Lewi geuyue meugumpôi bak seuramoe siblaih u timu Baét TUHAN, 5 gobnyan laju geumariet ngon awaknyan nyang na disinan. Gobnyan geupeugah lagée nyoe, "Gata, he ureuëng-ureuëng Lewi, harôh gata peukhusos droe keu TUHAN, dan gata peusuci Baét TUHAN, Po teu Allah indatu gata. Mandum nyang peukuto baét nyan harôh teu-use nibak teumpat nyan. 6 Indatu geutanyoe hana seutia ubak TUHAN Allah dan awaknyan geupeubuet buet-buet nyang hana galak até TUHAN. Awaknyan hana jipako Gobnyan dan hana teuma geupeureumeuen teumpat tinggai Gobnyan. 7 Awaknyan banmandum ka jitôb pintoe-pintoe Baét TUHAN dan jipeulon banmandum panyöt-panyöt nyang na disinan. Awaknyan hana jitot keumeunyan bak Baét TUHAN, dan hana jipeuseumah keureubeuen nyang teutot ubak Po teu Allah nyang geuseumah lé ureuëng Israel. 8 Ngon sabab nyan TUHAN deungon beungéh nyang luwa biasa laju geuhuköm ureuëng Yehuda dan Yerusalem. Deungon beungéh TUHAN nyang lagée nyan bagoe, banmandum ureuëng ka teukeujot dan teumakot nyang hán teukira. 9 Ureuëng-ureuëng syiek geutanyoe meuninggai lam mideuen prang, dan aneuëk peurumoh geutanyoe jicok laju jibak sibagoe tawanan prang. 10 Bak saát nyoe ulôn keuneuk peugét janji ngon TUHAN Po teu Allah Israel, mangat Gobnyan hana beungéh le ubak geutanyoe. 11 Aneuëk-aneuëk ulôn, bék kheueh gata preh-preh le, sabab gata kheueh nyang geupiléh lé TUHAN keu meungabdi ngon meu iébadat ubak Gobnyan meunan cit nyang tot keumeunyan dan nyang pimpén rakyat keu iébadat." 12 Ureuëng-ureuëng Lewi nyang teuka bak watée nyan na kheueh: Nibak kawöm Kehat: Mahat aneuëk Amasai, dan Yoël aneuëk Azarya Nibak kawöm Merari: Kish aneuëk Abdi, dan Azarya aneuëk Yehaleleel Nibak kawöm Gerson: Yoah aneuëk Zima, dan Eden aneuëk Yoah Nibak kawöm Elisafan: Simri dan Yeiel Nibak kawöm Asaf: Zakharia dan Matanya Nibak kawöm Heman: Yehiel dan Simei Nibak kawöm Yedutun: Semaya dan Uziel. 15 Óh lheueh nyan awaknyan laju geupeusapat ureuëng-ureuëng Lewi nyang laén, dan awaknyan banmandum geupeusuci droe. Óh ka lheueh nyan, sisuai deungon peue nyang geupeurintah lé raja banmandum imeum laju geutamong lam Baét TUHAN dan geupeuphon laju peusuci teumpat nyan meunurot huköm-huköm TUHAN. Banmandum nyang najih geupeuteubiet laju uluwa nibak leuen Baét TUHAN. Nibak sinan lé ureuëng Lewi laju geuba u Pantôn Kidron diluwa banda. 17 Buet nyan teupeuphon bak tanggai sa buleuen sa. Bak tanggai lapan awaknyan ka seuleusoe geupeusuci banmandum seuramoe Baét TUHAN sampoe ubak balée bagian keue jih. Óh lheueh nyan lapan uroe trek awaknyan geupeusuci geudong nyan bansaboh nyan sampoe trok tanggai 16 buleuen nyan. 18 Laju lé ureuëng-ureuëng Lewi nyan geujak peugah ubak Raja Hizkia, "Kamoe ka seuleusoe kamoe peugleh banmandum Baét TUHAN, meunan cit deungon miseubah teumpat tot keureubeuen, meuja keu ruti teuhidang, dan banmandum peukakaih nyang na bak teumpat nyan. 19 Meunan cit ka lheueh kamoe cok keula-i peukakaih-peukakaih nyang ka jitieb lé Raja Ahas bak watée gobnyan hana geupakoe le ubak TUHAN bak masa keurajeuen gobnyan. Banmandum peukakaih nyan ka kamoe peukhusos keula-i keu TUHAN, dan saátnyoe na dikeue miseubah." 20 Hana geupeutreb le Raja Hizkia laju geupeusapat banmandum ureuëng-ureuëng patot lam masyarakat, ngon awaknyan laju geujak u Baét TUHAN. 21 Keu keureubeuen peuamphon desya keu keuluwarga raja dan rakyat Yehuda, dan keu teupeusuci Baét TUHAN, awaknyan laju jiba 7 boh leumô agam, 7 boh bubiri agam, 7 boh aneuëk bubiri, dan 7 boh kaméng agam. Raja laju geuyue ubak imeum-imeum keuturonan Nabi Harun geupeuseumah beulatang-beulatang nyan ateueh miseubah sibagoe keureubeuen nyang teutot. 22 Leumô-leumô nyan laju teusie dan lé imeum-imeum laju geureutek darah-darah beulatang nyan ubak miseubah. Óh lheueh nyan hai nyang saban lagée nyan awaknyan peubuet cit ubak ban tujoh boh bubiri dan ban tujoh boh aneuëk bubiri nyan. 23 Akhé jih awaknyan geucok laju kaméng-kaméng nyan dan geuba laju ubak raja dan rakyat nyang teungoh meu-iébadat disinan, óh lheueh nyan banmandum awaknyan geupeuduek jaroe ateueh kaméng-kaméng nyan. 24 Óh lheueh nyan mandum kaméng nyan laju geusie lé imeum-imeum dan darah beulatang nyan laju geurö ateueh miseubah sibagoe keureubeuen peu amphon desya banmandum rakyat ba. Hai nyang lagée nyan awaknyan peubuet sabab raja ka geupeurintah mangat jipeuna keureubeuen nyang teutot dan keureubeuen peu amphon desya keu banmandum rakyat Israel. 25 Sisuai ngon peutunyok-peutunyok nyang ka geubri lé TUHAN ubak Nabi Daud meulalu Nabi Gad, nyang meubuet keu raja dan meulalu Nabi Natan, lé raja laju geupeuduek ureuëng-ureuëng Lewi nibak Baét TUHAN keu peumeuén keucapi dan gambus, 26 lagée nyang geupeuguna lé Nabi Daud. Meunan cit deungon imeum geukeubah nibak teumpat nyan deungon beureuguih. 27 Hizkia laju geubri tanda mangat upacara teupeuseumah keureubeuen teupeuphon. Teungoh keureubeuen teupeuseumah, di ureuëng laén ka geupeuphon meunyanyoe puja ngon pujoe ubak TUHAN, dan lé ureuëng nyang peumeuén musik laju jiyueb beureuguih dan ngon mubagoe alat geundrang nyang laén. 28 Raja Hizkia dan banmandum ureuëng nyang na disinan laju geusujut geuseumah TUHAN seudangkan ureuëng peumeuén musik hana geupiôh geupéh geudrang sira meunyanyoe sampoe án mandum keureubeuen nyang teutot nyan habéh mandum jipajoh lé apui. 30 Raja Hizkia ngon ureuëng-ureuëng patot laju geuyue ubak ureuëng-ureuëng Lewi mangat geumeunyanyoe ca-e puja ngon pujoe keu TUHAN nyang geukarang lé Nabi Daud ngon Nabi Asaf. Banmandum ureuëng geumeunyanyoe deungon ria geumbira sira meuteuôt geumeudoá geuseumah Po teu Allah. 31 Óh lheueh nyan Hizkia geupeugah, "Sabab gata bak saát nyoe ka teupeukhusos keu TUHAN, teuma sibagoe keureubeuen teurimong gaséh gata, gata banmandum harôh gata ba keureubeuen u Baét TUHAN." Dan mandum ureuëng nyang na teuka bak teumpat nyan geuba laju keureubeuen-keureubeuen geuh nyan, na teuma ngon galak droe geuba beulatang-beulatang keu teupeuseumah sibagoe keureubeuen nyang teutot. 32 Awaknyan na nyang ba 70 boh leumô agam, 100 boh bubiri, dan 200 aneuëk bubiri dan jipeuseumah laju nyan keu keureubeuen nyang teutot ubak TUHAN. 33 Meunan cit na awaknyan ba 600 boh leumô agam dan 3.000 boh bubiri keu teupeuseumah dan teupajoh meusajan lé mandum ureuëng nyang na teuka nibak teumpat nyan. 34 Imeum-imeum nyang ka geupeusuci droe cit bacut, hana séb teunaga nyang puliek kulét-kulét beulatang nyang ka lheueh teukeureubeuen nyan. Ulheueh sabab nyan laju geulakée bantu ubak ureuëng-ureuëng Lewi, sabab ureuëng Lewi leubeh seutia ubak peuratoran peusuci nyan. Awaknyan teutab geutulông sampoe ubak imeum nyang ka lheueh geupeusuci droe séb. 35 Seulaén keureubeuen nyang teutot, lé imeum-imeum geupeuseumah teuma gapah nibak keureubeuen teurimong gaséh nyang jimakheun lé rakyat. Meunan cit awaknyan jipeuseumah anggô nyang teurö meusajan ngon keureubeuen nyang teutot nyan. Meunan kheueh jeuet jih iébadat di Baét TUHAN teupeuna keula-i. 36 Teuma óh lheueh nyan galak that até Raja Hizkia ngon rakyat gobnyan sabab teupeuna nyan lam watée paneuk Po teu Allah ka geutulông awaknyan teupeubuet banmandum nyan.

2 Tawarikh 30

1 Peurayaan Paskah gohlom hase jipeuna lé rakyat bak watée lam buleuen sa nyan, sabab imeum-imeum nyang ka geupeusuci droe geuh cit bacut jeumeulah jih dan gohlom le ureuëng nyang meusapat di Yerusalem. Sabab nyan Raja Hizkia dan peugawée-peugawée gobnyan meunan cit peunduduek Yerusalem ka sipakat bahwa peurayaan Paskah nyan geupeuna bak buleuen dua, dan awaknyan banmandum galak that deungon reuncana nyan. Dan raja pih laju geukirém surat ubak mandum ureuëng bansaboh Israel dan Yehuda. Meunan cit ubak ureuëng Efraim dan Manasye. Banmandum bansa Israel nibak sukée Dan di siblaih utara troh u Bersyeba di seulatan, mandum awaknyan geu tawök u Baét TUHAN di Yerusalem keu teupeuraya Paskah dan teuhoreumat TUHAN Po teu Allah Israel lagée nyang ka teupeuteuntée lam huköm-huköm Nabi Musa. Gohlom na nyang Paskah teupeuraya lagée nyan. 6 Ateueh titah po teu raja ngon peugawée-peugawée gobnyan geukirém kheueh utosan-utosan bansaboh Yehuda dan Israel keu jijak ba surat-surat nyan nyang su jih lagée nyoe, "Hei rakyat Israel! Gata ka teuhinda nibak keukuasaan ureuëng Asyur. Jinoenyoe gata riwang kheueh laju jak peuhamba droe ubak TUHAN, Po teu Allah nyang geuseumah lé Nabi Ibrahim, Nabi Ishaq dan Nabi Yakub, mangat Gobnyan pih geutulông gata keula-i. 7 Bék kheueh lagée indatu gata dan ureuëng-ureuëng Israel nyang laén nyang hana seutia ubak TUHAN Po teu Allah awaknyan. Gata ka gata kalon keudroe pakriban brat jih Gobnyan geuhuköm awaknyan. 8 Bék kheueh kreueh ulée lagée awaknyan, teuma gata taát kheueh ubak TUHAN. Gata jak kheueh u Yerusalem, u Baét TUHAN Po teu Allah nyang ka geupeukhusos lé Po teu Allah keu Gobnyan keudroe siumu masa. Jak kheueh meuiébadat ubak Gobnyan mangat Gobnyan reuda beungéh Geuh ubak gata. 9 Meunyoe gata meuiébadat keula-i ubak TUHAN, teuma lé ureuëng nyang ba waréh kawöm gata sibagoe ureuëng nyang teuteuen, teuma na rasa inseuh dan jibri idhin awaknyan jiwoe keula-i. TUHAN Po teu Allah gata na kheueh Allah nyang jroh dan rasa gaséh sayang; Gobnyan teuma geuteurimong gata meunyoe gata tatem woe keula-i ubak Gobnyan." 10 Bak watée utosan-utosan nyang geukirém lé raja nyan geujak nibak banda u banda lam wilayah Efraim dan Manasye sampoe u utara nyang jiôh jih sampoe u wilayah sukée Zebulon, awaknyan laju jipeukém dan jihina. 11 Teuma, na cit ureuëng-ureuëng nibak sukée Asyer, Manasye, dan Zebulon nyang jitem teuka u Yerusalem. 12 Di Yehuda pih Po teu Allah geumeubuet dan geusaboh até rakyat keu beutôi-beutôi taát ubak keuheundak Po teu Allah deungon cara jiturot peue nyang ka geutitah lé po raja ngon peugawée-peugawée gobnyan. 13 Bak buleuen nyang keudua jai lumpah na rakyat meugumpôi di Yerusalem keu geupeuraya Uroe Raya Ruti Hana Meurago. 14 Miseubah-miseubah di Yerusalem nyang teupeuguna keu teupeuseumah keureubeuen dan teutot keumeunyan keu dewa-dewa, banmandum teucok dan teuböh lam Pantôn Kidron. 15 Bak tanggai peuet blaih buleuen nyan awaknyan laju geusie bubiri-bubiri keu jipeuseumah sibagoe keureubeuen Paskah. Lé imeum-imeum dan ureuëng-ureuëng Lewi nyang mantong najih, malée lumpah na. Awaknyan laju geupeusuci droe seuhingga barô kheueh jeuet geupeuseumah keureubeuen nyang teutot nibak Baét TUHAN. 16 Awaknyan maséng-maséng laju geucok teumpat bak Baét TUHAN meunurot huköm-huköm nyang ka na teutuléh lam kitab huköm-huköm Nabi Musa. Darah nyang na nibak beulatang keureubeuen nyan laju geujok lé ureuëng Lewi ubak imeum-imeum, laju atranyan awaknyan roe ateueh miseubah. 17 Jai that ureuëng nyang na teuka keunan gohlom geupeu suci droe, jadi awaknyan hana jeuet geusie bubiri keu keureubeuen Paskah. Ulheueh sabab nyan ureuëng-ureuëng Lewi kheueh nyang peubuet hai nyan keu awaknyan dan peuseumah atra nyan ubak TUHAN. 18 Seulaén nibak nyan, lamkawan ureuëng-ureuëng Efraim keudroe, Manasye, Isakhar, dan Zebulon, jai that-that nyang teuka hana geupeusuci droe teuleubeh dilée. Jadi, awaknyan nyang peuraya peurayaan Paskah nyan jai that nyang hana peunoh syarat. Ngon sabab nyan Raja Hizkia laju geumeu doá ubak Po teu Allah keu awaknyan, kheun gobnyan, 19 "TUHAN, Po teu Allah, nyang geupuja lé indatu kamoe, mudah-mudahan deungon gét até Droeneueh TUHAN ka neupeu amphon awaknyan nyang teungoh iébadat ubak Droeneueh ngon sipeunoh até, bah pih awaknyan gohlom jipeusuci droe." 20 TUHAN geudeungoe doá Raja Hizkia. Gobnyan geupeu amphon banmandum desya awaknyan, dan hana geuhuköm awaknyan. 21 Tujoh uroe treb jih, ureuëng-ureuëng nyang meusapat di Yerusalem nyan geupeuna peurayaan Ruti Hana Meurago. Tieb-tieb uroe ureuëng-ureuëng Lewi dan imeum-imeum hana putôh-putôh geupuja pujoe TUHAN deungon sunggoh-sunggoh. 22 Ureuëng-ureuëng Lewi nyan carông lumpah na geupimpén iébadat ubak TUHAN, seuhingga Hizkia geupujoe awaknyan. Óh ka lheueh tujoh uroe treb jih awaknyan geumakheun peunajoh bak teumpat peurayaan nyan dan geupeuseumah keureubeuen keu geupeugah teurimong gaséh ubak TUHAN, Allah indatu awaknyan, 23 awaknyan banmandum ka geucok peunutoh keu geupeutroh peurayaan nyan tujoh uroe trek. Laju lé awaknyan geupeuraya lom ngon peunoh suka ria. 24 Raja Hizkia geuseudeukah 1.000 boh leumô agam dan 7.000 boh bubiri. Peugawée-peugawée Hizkia geuseudeukah teuma 1.000 boh leumô agam dan 10.000 boh bubiri. Banmandum beulatang nyan geubri ubak rakyat keu jisie dan jipajoh. Ramé that imeum jipeusuci droe jih. 25 Rakyat Yehuda, imeum-imeum, ureuëng-ureuëng Lewi, dan ureuëng-ureuëng nyang teuka nibak utara, meunan cit deungon ureuëng-ureuëng aséng nyang ka tinggai treb teutab di Israel dan Yehuda, banmandum meurasa bahgia. 26 Banda Yerusalem meuriah that-that sabab seumeunjak masa Nabi Sulaiman aneuëk Nabi Daud, gohlom na nyang ka teujadi lagée nyan. 27 Imeum-imeum dan ureuëng-ureuëng Lewi geulakée laju beureukat TUHAN keu rakyat, dan nibak teumpat tinggai Gobnyan lam syeuruga Po teu Allah geudeungoe doá awaknyan dan geuteurimong peue nyang awaknyan lakée.

2 Tawarikh 31

1 Óh ka seuleusoe peurayaan nyan, banmandum rakyat laju jijak ubak tieb-tieb banda di Yehuda, dibanda-banda nyang jijak nyan jipeuhanco laju bubena tugu-tugu beurala, jipeuhanco ngon jipeureubah patong-patong nyang jipeudong keu Dewi Asyera, dan jipeuhanco bubena miseubah-miseubah dan teumpat-teumpat jiseumah beurala. Meunan cit hai nyang lagée nyan jipeubuet cit di teumpat-teumpat nyang laén di Yehuda, meunan cit di wilayah Benyamin, Efraim dan Manasye. Óh ka seuleusoe tugaih nyang mulianyan laju jiwoe u gampông droe jih maséng-maséng. 2 Raja Hizkia geupeuteutab lom reugu-reugu teungku imeum dan ureuëng-ureuëng Lewi meunurot peumbagian tugaih awaknyan. Tugaih-tugaih nyan na kheueh lagéenyoe: teupeuseumah keureubeuen nyang teutot dan keureubeuen peudamé, teupeutimang upacara iébadat di Baét TUHAN, dan teupujoe ngon teukheun teurimong gaséh nyang le-le ubak TUHAN di tieb-tieb teumpat didalam Baét TUHAN. 3 Nibak beulatang peulara gobnyan keudroe raja laju geusumbang keu keureubeuen nyang teutot tieb-tieb beungoh dan tieb-tieb seupôt, dan keu keureubeuen nyang teupeuseumah bak uroe Sabat, bak peurayaan Buleuen Barô, dan nibak peurayaan-peurayaan laén lagée nyang ka teupeuteuntée didalam huköm-huköm TUHAN. 4 Seulaén nibak nyan raja geupeurintah teuma ubak peunduduek Yerusalem mangat jiba peuseumahan jih maséng-maséng keu teungku imeum dan ureuëng Lewi, mangat jeuet awaknyan hase geucurah banmandum peuratian awaknyan khusos ubak peulayanan di Baét TUHAN lagée nyang na teutuléh didalam huköm-huköm TUHAN. 5 Óh ka lheueh peurintah nyan teupeumaklum, ureuëng Israel laju jiba u Baét TUHAN meuneubri-meuneubri hase bumoe jih nyang phon teucok, na kheueh teurigu, anggô, minyéuk zaiton, meulisan, dan hase bumoe nyang laén. Meunan cit awaknyan jiba teuma siper siploh bagian nibak atra milék droe jih. 6 Banmandum ureuëng nyang na tinggai di banda-banda di nanggroe Yehuda jiba siper siploh bagian nibak beulatang peulara jihnyan miseujih leumô dan bubiri awaknyan, dan meunan cit lam jeumeulah nyang le nibak peue-peue nyang jibri nyang laén, laju jipeuseumah banmandum nyan ubak TUHAN Allah awaknyan. 7 Peue-peue nyang jibrinyan ka trok jiteuka keunan phon nibak buleuen nyang keu lhée, dan laju teuka hana piôh-piôh sampoe nibak buleuen nyang keu tujoh. 8 Ban geungieng sumbangan nyan lumpah that le lé Raja Hizkia dan peugawée-peugawée gobnyan, laju gobnyan geupeumulia TUHAN dan geupujoe ureuëng Israel, umat Gobnyan. 9 Bak watée raja teungoh geumeututoe deungon bubena teungku imeum dan ureuëng Lewi keuhai sumbangan-sumbangan nyang ka teubri nyan, 10 Teungku Imeum Agong Azarya keuturonan Zadok geupeugah, "Yoh phon that rakyat ji intat peuseumahan-peuseumahan awaknyan u Baét TUHAN, kamoe banmandum hana meukureueng mubacut pi peunajoh, teuma jai that-that nyang leubeh, sampoe mantong that le peuseudiaan peunajoh kamoe. Banmandum nyan kamoe teurimong sabab TUHAN ka geubri beureukat keu umat Gobnyan." 11 Ateueh peue nyang ka geupeurintah lé raja, awaknyan laju jipeusiab gupok-gupok nibak binéh Baét TUHAN, 12 laju geukeubah banmandum peue nyang ka jibri lé rakyat meunan cit deungon peue nyang ka jipeuseumah lé rakyat lagée siper siploh nibak hareuta hase hareuta jihnyan u dalam gupok nyan. Na sidroe ureuëng Lewi nyang nan geuh Konanya, teubri tugaih jeuet keumando, dan Simei adoe gobnyan jeuet nyang bantu gobnyan. 13 Dimiyueb keumando gobnyan na 10 droe teuk ureuëng Lewi nyang laén nyang geubri tugaih, awaknyan na kheueh: Yehiel, Azazya, Nahat, Asael, Yerimot, Yozabad, Eliel, Yismakhya, Mahat, dan Benanya. Banmandum hainyan geupeuteutab ateueh peutunyok Raja Hizkia dan Teungku Imeum Agong Azarya. 14 Kore aneuëk Yimna, sidroe ureuëng Lewi nyang jeuet keu ulée kawai nibak babah Pintoe Geureubang Timu di Baét TUHAN, keu gobnyan geuseurah tanggong jaweueb mangat geuteurimong peue-peue nyang jibri lé ureuëng laén keu jipeuseumah ubak TUHAN, dan óh lheuehnyan laju geubagi-bagi. 15 Di banda-banda nyang laén di teumpat tinggai teungku-teungku imeum, Kore geubantu teuma lé ureuëng-ureuëng Lewi nyang laén, lamkawan nyang bantu nyan na kheueh: Eden, Minyamin, Yesua, Semaya, Amarya, dan Sekhanya. Bahan-bahan peunajoh nyan geupeu weuek sabe rata lamkawan sabe-sabe sukée Lewi bah kheueh nyan nyang tuha meunan cit nyang muda meunurot tugaih awaknyan. 16 Banmandum ureuëng agam nyang meu-umu lhée ploh thon u ateueh, nyang meuteumé tugaih tieb-tieb uroe di Baét TUHAN, meunan cit keu awaknyan geubri jeumba jih maséng-maséng meunurot tugaih dan meunurot reugu gobnyan. 17 Bubena teungku imeum teudafeutar meunurot kawöm gobnyan, dan ureuëng Lewi nyang meu-umu 20 thon u ateueh teudafeutar meunurot tugaih dan reugu gobnyan. 18 Awaknyan banmandum teudafeutar meusajan deungon aneuëk dan peurumoh, dan anggota-anggota nyang laén nyang na didalam rumoh tangga geuh, sabab awaknyan teupeuwajéb keu meusiab seudia tieb-tieb saát keu geulaksana tugaih-tugaih droe geuh nyang khusos keu TUHAN. 19 Lamkawan teungku-teungku imeum nyang na tinggai di banda-banda nyang ka teupeuteuntée keu keuturonan Nabi Harun, atawa di blang-blang nyang na di silingka banda nyan, geutunyok laju peutugaih-peutugaih mangat jiweuk-weuk bahan peunajoh keu banmandum ureuëng agam lam keuluwarga teungku imeum, dan keu tieb-tieb ureuëng nyang teudafeutar didalam sukée Lewi. 20 Lam bansaboh nanggroe Yehuda, Raja Hizkia geupeubuet buet nyang lumpah ade, jujoe, dan geupeu harok até TUHAN Allah gobnyan. 21 Gobnyan meuhase, sabab peue mantong nyang geupeubuet keu Baét TUHAN atawa mangat geutaát ubak banmandum huköm-huköm TUHAN, geupeujak banmandum deungon sipeunoh até dan deungon cinta geuh ubak TUHAN Po teu Allah.

2 Tawarikh 32

1 Óh ka lheueh Raja Hizkia geupeubuet hai-hai nyang teusangkot keuseutiaan gobnyan ubak TUHAN, Sanherib raja Asyur laju jiseurang Yehuda. Laju jikeupong banda-banda nyang meukuta dan jipeurintah laju pasokan geuh mangat teureubot kuta nyan. 2 Watée geuteupeue lé Raja Hizkia bahwa Raja Sanherib jikeuneuk seureubu Yerusalem, 3 gobnyan meusajan deungon peugawée geuh dan peurwira-peurwira gobnyan geucok keuputosan keu geutôb dumna teumpat ié diluwa banda deungon meukeusut mangat ureuëng-ureuëng Asyur hana meuteumé ié meunyoe awaknyan ka sampoe rab Yerusalem. Ramé that-that ureuëng nyang geukraih keu teujaktôb banmandum mata ié nyang ji-ile u luwa banda. 5 Dan raja pih laju geukeukong peurtahanan banda deungon cara teureuhab bintéh timbok jih, geuyue peudong meunara-meunara di ateueh nyan dan geuyue peugöt pageue timbok nyang laén di luwa banda. Seulaén nyan gobnyan geupeugöt teuma kuta nyang geupeudong di ateueh tanoh nyang teutamon di siblaih u timu bagian nyang ka treb banda Yerusalem. Meunan cit geuyue teuma peugöt nyang cukoble sinjata kapak dan peurisai. 6 Gobnyan laju geuangkat banmandum peurwira-peurwira keu jeuet keu ulée banmandum ureuëng agam nyang na didalam banda, dan geuyue awaknyan meugumpôi dipadang dikeue babah pintoe geureubang banda. Óh lheuehnyan geupeugah laju ubak awaknyan, 7 "Tabah kheueh dan yakén kheueh; bék kheueh neutakot ubak raja Asyur atawa ubak pasokan geuh nyan. Teunaga dipihak geutanyoe leubeh raya nibak nyang na dipihak awaknyan. 8 Bak awaknyan nyang na teunaga manusia, teuma nibak geutanyoe na TUHAN Po teu Allah nyang tulông geutanyoe didalam prang." Ban geudeungoe kheun raja droe geuh nyan, rakyat pih meutamah beurani. 9 Hana padubtreb teuma óh lheuehnyan bak watée pasokan Sanherib ka trok u Lakhis, gobnyan laju geukirém utosan ubak Raja Hizkia dan rakyat Yehuda di Yerusalem keu jijak peusampoe peusan nyang lagée nyoe, 10 "Ulôn Sanherib, raja nibak nanggroe Asyur, ulôn keuneuk teumanyong peue sabab jih gata lumpah that beurani keu teutab neutinggai di Yerusalem nyang teungoh teukeupong nyan. 11 Peu kheueh Hizkia neupeugah bahwa TUHAN Allah gatanyan teuma geupeuleueh gata nibak keukuasaan kamoe? Bék neupeucaya, bahwa TUHAN gata nyan geupeungeuet gata. TUHAN gatanyan teuma geupeubiyeu gata maté deuek lom ngon glaih hana geubri ié. 12 Gobnyan kheueh nyang peuhanco teumpat-teumpat iébadat dan miseubah-miseubah keu TUHAN, laju geuyue ureuëng Yehuda dan Yerusalem meuiébadat dan teutot dupa nibak saboh miseubah mantong. 13 Peu kheueh gata han neuteupeue peue nyang ka ulôn peubuet meunan cit nyang ka geupeubuet lé indatu ulôn teuhadab bansa-bansa nyang laén? Gohlom na peureunah dewa-dewa bansa nyang laén jipeulheueh bansa jih nibak keukuasaan raja Asyur! 14 Soe nibak awaknyan nyang ka na jipeubuet hai nyang lagéenyan? Hana mungken dewa gata bisa geupeuseulamat gata! 15 Bék neupeubiyeu raja gata nyan geupeungeuet dan geupeubodoh gata! Bék neupeucaya ubak geuh nyan! Sabab hana peureunah dewa bansa toih mantong sanggob jipeuleueh bansa jih nibak keukuasaan raja Asyur. Meunan cit ka pasti dewa gatanyan hana cit meuhase jipeulheueh gata!" 16 Mantong le haba nyang laén nyang geupeugah lé utosan raja Asyur nyan keu geuhina TUHAN Po teu Allah dan Raja Hizkia, hamba TUHAN nyan. 17 Meunan cit lé raja Asyur geutuléh surat nyang asoe jih geuteuntang TUHAN, Po teu Allah nyang geuseumah lé ureuëng Israel. Lagéenyoe asoe surat nyan, "Dewa-dewa sigala bansa laén hana hase jipeuleueh bansa jih nibak keukuasaan ulôn, meunan cit deungon dewa Hizkia nyan hana hase geupeulheueh bansa geuh nyan nibak keukuasaan ulôn." 18 Utosan-utosan raja Asyur geupeugah banmandum nyan dalam basa Ibrani keu geupeutakot ngon geupeupatah seumangat ureuëng-ureuëng Yerusalem nyang na di ateueh bintéh timbok banda, mangat awaknyan hase jireubot banda nyan deungon mudah. 19 Awaknyan geumeututoe keuhai Allah nyang jiseumah di Yerusalem saban cit lagée dewa-dewa nyang jiseumah lé bansa laén, na kheueh patong-patong nyang jipeugöt lé manusia. 20 Teuma geumeudoá kheueh Raja Hizkia dan Nabi Yesaya aneuëk Amos. Awaknyan geumeuhôi geulakée tulông ubak Po teu Allah. 21 Dan bak watéenyan cit teuma TUHAN geukirém sidroe malaikat Geuh dan lé malaikat nyan laju geupeumaté banmandum sipa-i ngon peurwira raja Asyur. Deungon lumpah that malée raja Asyur nyan laju jiwoe u nanggroe jih. Bak siuroe watée raja nyan teungoh na didalam rumoh dewa geuh, teuka kheueh keunan na papadubdroe nibak aneuëk gobnyan jijak poh maté raja Asyur nyan deungon peudeueng. 22 Meunan kheueh cara jih TUHAN geupeulheueh Raja Hizkia dan peunduduek Yerusalem nibak keukuasaan Sanherib raja Asyur nyang beuhe nyan, dan nibak musoh-musoh gobnyan nyang laén. TUHAN laju geubri ubak gobnyan keu-udeban nyang aman tanpa na soe peukaru nibak nanggroe-nanggroe teutangga gobnyan. 23 Ramé that-that ureuëng jijak u Yerusalem keu jijakba peuseumahan keu TUHAN dan keu Raja Hizkia, seuhingga seumeunjak watéenyan raja nyan ka jihoreumat lé meubagoe bansa. 24 Bak watéenyan Raja Hizkia ka srot ubak sakét. Peunyakét nyang teuka ubak gobnyan lumpah that parah seuhingga gobnyan karab meuninggai. Dan Raja pih geumeudoá, dan doá geuh nyan geudeungoe lé TUHAN, dan TUHAN pih laju geupeutron tanda ubak gobnyan bahwa raja nyan teuma puléh. 25 Teuma sabab gobnyan sombong, gobnyan hana geulakée teurimong gaséh ubak TUHAN ateueh puléh gobnyan nyang ka geubri lé TUHAN u ateueh geuh. Ulheueh sabab nyan TUHAN geubeungéh that ubak Yehuda dan Yerusalem. 26 Teuma bak akhé jih Raja Hizkia dan ureuëng-ureuëng Yerusalem geupeumiyueb droe geuh ubak TUHAN, teuma seumantong Raja Hizkia mantong udeb huköman nyan hana geupeurot u ateueh gobnyan. 27 Raja Hizkia jeuet keu ureuëng nyang lumpah kaya, dan jihoreumat lé ureuëng ramé. Gobnyan laju geupeugöt kama-kama keu geukeubah hareuta geuh, na kheueh: méuh, pirak, batée-batée peumata, reumpah-reumpah, peurisai dan barang-barang nyang meuyuem nyang laén. 28 Meunan cit gobnyan na geupeugöt gupok-gupok keuteumpat keubah barang-barang hase bumoe gobnyan, na kheueh: gandom, anggô, dan minyéuk zaiton; meunan cit weue-weue leumô dan keu weue-weue domba nyang cukoble. 29 Seulaén nibak nyan gobnyan geupeudong teuma banda nyang cukoble. Keukayaan nyang geubri lé Po teu Allah ubak gobnyan na meulimpah ruwah. 30 Raja Hizkia nyan kheueh nyang ampéuh mata ié Gihon, dan geupeu ilé ié jihnyan meulalu saluran nyang na dimiyueb tanoh u dalam banda Yerusalem. Peue mantong nyang geupeubuet lé Raja Hizkia meuhase banmandum. 31 Dan bak watée utosan-utosan nibak Babel teuka keu geujak tanyong ubak gobnyan keuhai keupuléh gobnyan nyang ajaéb nyan, TUHAN geupeubiyeu mantong ubak Raja Hizkia keu geumeutindak keudroe, mangat hase geu ujo até gobnyan. 32 Kisah nyang laén keuhai Raja Hizkia, dan keuhai cinta gobnyan ubak TUHAN na teucetet didalam kitab Wahyu nibak Allah ubak Nabi Yesaya aneuëk Amos, dan didalam kitab Seujarah Raja-raja Yehuda dan Israel. 33 Raja Hizkia meuninggai donya, laju teupeukubu nibak lampôh jrat raja-raja dibagian sineungoh. Banmandum rakyat Yehuda dan Yerusalem geubri peunghoreumatan nyang raya ubak gobnyan bak watée gobnyan meuninggai donya. Manasye aneuëk agam gobnyan teuangkat jeuet keuraja keugeunantoe gobnyan.

2 Tawarikh 33

1 Manasye meu-umu 12 thon watée gobnyan teubaiát jeuet keuraja di Yehuda dan gobnyan geumat peurintah na 55 thon treb jih. 2 Gobnyan keubit that meudesya ubak TUHAN, sabab gobnyan geuseutôt keubiasaan buet nyang jeuhet nyang jipeubuet lé bansa-bansa nyang ka geu use lé TUHAN di nanggroe Kanaan bak watée ureuëng Israel jitamong u dalam nanggroe nyan. 3 Teumpat-teumpat seumah beurala nyang ka geupeuhanco lé Raja Hizkia, ureuëng syiek gobnyan, geupeudong keula-i. Meunan cit gobnyan geupeudong miseubah-miseubah keu teumpat iébadat ubak Baal, dan gobnyan geupeugét teuma patong-patong Dewi Asyera, dan geuseumah bintang-bintang. 4 TUHAN ka lheueh geumeufeureuman bahwa Yerusalem nyan na kheueh teumpat meuiébadat ubak Gobnyan siumu masa, teuma disinan bak Baét TUHAN nyan, Manasye ka geupeudong miseubah-miseubah keuteumpat seumah dewa-dewa. 5 Meunan cit nibak ban dua boh leuen Baét TUHAN nyan laju geupeudong teuma miseubah keu teumpat seumah ubak bintang-bintang. 6 Aneuëk-aneuëk gobnyan geupeuseumah sibagoe keureubeuen nyang teutot di Pantôn Hinom. Meunan cit gobnyan geupeubuet praktek-praktek peu-ubat ureuëng laén sibagoe dukun, sibagoe nujum, iéleumé gaéb, dan geulakée peutunyok-peutunyok ubak areuwah-areuwah. Gobnyan ka meudesya that ubak TUHAN lé sabab nyan TUHAN lumpah that meureuka keu gobnyan. 7 Patong beurala na geukeubah di dalam Baét TUHAN, padahai keuhai teumpat nyan Po teu Allah ka lheueh geupeugah ubak Nabi Daud dan Nabi Sulaiman aneuëk gobnyan, "Baét Ulôn nyang na di Yerusalem nyoe, nyang ka Ulôn piléh nibak 12 wilayah sukée Israel, na kheueh teumpat nyang ka Ulôn peuteuntée sibagoe teumpat meuiébadat ubak Ulôn keu siumu masa. 8 Meunyoe umat Israel jitaát banmandum ubak peurintah Ulôn dan jiseutôt ubak huköm-huköm nyang ka geubri nibak Nabi Musa hamba Ulôn nyan keu awaknyan, teuma Ulôn hana Lôn peubiyeu awaknyan jiuse nibak nanggroe nyang ka Ulôn bri keu indatu awaknyan." 9 Sabab buet nyang jipeubuet lé raja Manasye nyang lagéenyan, sampoe rakyat Yehuda ka jipeubuet desya-desya nyang leubeh jeuhet nibak desya nyang jipeubuet lé bansa-bansa nyang ka geu use lé Po teu Allah di nanggroe Kanaan bak watée umat TUHAN jitamong u dalam nanggroe nyan. 10 TUHAN laju geuteugah Manasye dan rakyat gobnyan, teuma awaknyan hana jitem deungoe. 11 Sabab nyan TUHAN laju geupeuteuka bubena panglima sipa-i Asyur mangat jijak prang nanggroe Yehuda. Raja Manasye laju jidrob deungon seunawiét, laju jiranté jaroe dan jiba laju u Babel. 12 Lam peunderitaan geuh nyan laju geupeumiyueb droe ubak TUHAN Allah gobnyan, dan geumeudoá geulakée tulông ubak Allah. 13 Allah pih geupeukabui doá Manasye dan laju geupeuwoe gobnyan u Yerusalem keu geumat peurintah lom teuma. Sabab ka teujadi nyang lagée nyan bagoe Raja Manasye meutamah yakén bahwa TUHAN na kheueh Po teu Allah. 14 Óh lheueh nyan Manasye laju geupeumanyang bintéh beuton bagian luwa blaih utimu Banda Nabi Daud. Geupeuphon nibak saboh teumpat di pantôn bak binéh mata ié Gihon laju trok u utara sampoe nibak babah Pintoe Geureubang Uengkot dan bagian banda nyang nan jih Ofel. Dan nibak tieb-tieb banda nyang meukuta di Yehuda, disinan pih laju geupeuduek sidroe panglima. 15 Gobnyan laju geupeuhanco patong-patong beurala dewa bansa laén meunan cit deungon beurala-beurala nyang ka jikeubah di Baét TUHAN. Gobnyan laju geureuloih ngon geusungkét miseubah-miseubah beurala nyang na di bukét Baét TUHAN, dan diteumpat-teumpat nyang laén di Yerusalem. Banmandum atranyan laju geuba u luwa banda dan laju geutiek. 16 Óh lheuehnyan geupeugét teuma miseubah teumpat iébadat ubak TUHAN, laju geupeuseumah disinan keureubeuen nyang teutot dan keureubeuen syuko. Banmandum ureuëng Yehuda geukrah mangat jimeu iébadat ubak TUHAN Allah Israel. 17 Teuma rakyat mantong cit jipeuseumah keureubeuen diteumpat-teumpat seumeumah nyang laén, teuma peuseumahan nyan na kheueh keu TUHAN. 18 Kisah nyang laén keuhai Manasye, dan keuhai doá gobnyan ubak Po teu Allah, meunan cit deungon peusan-peusan Po teu Allah nyang geupeusampoe ubak gobnyan lé nabi-nabi ateueh nan TUHAN, Allah Israel, banmandum nyan ka teucetet didalam kitab Seujarah Raja-raja Israel. 19 Lam kitab Seujarah Nabi-nabi ka teucetet cit teuma doá Raja Manasye dan jaweueb Allah ateueh doá nyan, meunan cit kisah keuhai desya-desya gobnyan sigohlom gobnyan meutobat, teumpat-teumpat seumah beurala dan patong-patong Dewi Asyera nyang geupeugöt nyan, dan beurala-beurala nyang geuseumah nyan. 20 Raja Manasye laju meuninggai donya dan teukubu di lampôh jrat meuligoe. Amon aneuëk agam gobnyan jeuet keuraja keugeunantoe gobnyan. 21 Amon meu-umu 22 thon bak watée gobnyan teubaiát jeuet keuraja Yehuda, dan gobnyan geumat peurintah di Yerusalem na dua thon treb jih. 22 Saban cit lagée ureuëng syiek gobnyan dan gobnyan pi ka geupeubuet desya ubak TUHAN. Gobnyan geuseumah beurala-beurala nyang geuseumah lé ureuëng syiek gobnyan dan geupeuseumah keureubeuen ubak beurala-beurala nyan. 23 Teuma, meulaén deungon yah gobnyan, Amon hana geumeutobat lé ubak TUHAN; dan gobnyan leubeh meutamah desya nibak bapak geuh nyan. 24 Peugawée-peugawée Raja Amon ka jimeukumplot keuneuk jilawan gobnyan dan jipoh maté gobnyan di dalam meuligoe. 25 Teuma lé rakyat Yehuda laju jipoh maté ureuëng nyang poh Raja Amon nyan, lheuehnyan laju jibaiát Yosia aneuëk gobnyan jeuet keuraja.

2 Tawarikh 34

1 Yosia meu-umu 8 thon bak watée gobnyan teubaiát jeuet keuraja nanggroe Yehuda, dan gobnyan geumat peurintah di Yerusalem na 31 thon treb jih. 2 Gobnyan geujak buet deungon bit-bit dan meukeunong that nibak até TUHAN; gobnyan geuseutôt teuladan Nabi Daud indatu gobnyan, dan geutaát ubak banmandum huköm Po teu Allah deungon sipeunoh até. 3 Óh ka na 8 thon gobnyan jeuet keuraja, bak umu geuh nyang lumpah that muda, Yosia geupeuphon iébadat ubak Allah nyang geuseumah lé Nabi Daud indatu gobnyan. Na 4 thon teuma óh lheuehnyan laju geupeuphon peuhanco banmandum teumpat seumah beurala, patong-patong Dewi Asyera, dan beurala-beurala nyang laén. 4 Patong-patong dan beurala-beurala nyan banmandum geupeuhanco meukeupeng-keupeng lé aneuëk buah Raja Yosia dan laju abée jih geuhambo u ateueh jrat ureuëng-ureuëng nyang jipeuseumah keureubeuen ubak beurala-beurala nyan. Miseubah-miseubah Baal dan miseubah-miseubah dupa nyang na disinan laju geupeuhanco. 5 Óh lheuehnyan lé Yosia laju geutot di ateueh miseubah nyan tuleueng-tuleueng bubena teungku imeum nyang yoh watée udeb gobnyan geupeutimang beurala-beurala nyan. Deungon na lagéenyan gobnyan ka geupeujeuet Yerusalem dan Yehuda ka gét lom teumeu iébadat ubak TUHAN. 6 Hai nyang lagéenyan geupeubuet cit teuma di banda-banda dan didaerah-daerah nyang ka hanco diwilayah Manasye, Efraim, dan Simeon, sampoe u Naftali di utara. 7 Miseubah-miseubah dan patong-patong Asyera nyang na di seuluroih Keurajeuen Utara ka geureuloh lé Yosia, dan laju patong-patong nyan dan banmandum dupa teumpat tot keumeunyan geupeuhanco. Óh lheuehnyan geuwoe kheueh laju Yosia u Yerusalem. 8 Bak thon nyang keu lapan blaih watée peumeurintahan Raja Yosia, óh ka lheueh nyan gobnyan geusampôh sampoe habéh ureuëng-ureuëng seumah beurala di Baét TUHAN dan bansaboh nanggroe, lé gobnyan laju geukirém lhée droe ureuëng mangat jijak reuhab Baét TUHAN Allah. Ban 3 droe ureuëng nyan na kheueh Safan aneuëk Azalya, Maaseya gubunur Yerusalem, dan Yoah aneuëk Yoahas, sidroe peugawée manyang. 9 Ureuëng-ureuëng Lewi geujaga nibak babah Pintoe Baét TUHAN, laju geujok ubak Teungku Imeum Agong Hilkia, péng nyang ka lheueh geupeusapat. Péng nyan nibak ureuëng Efraim dan Manasye, dan nibak rakyat nyang laén di Keurajeuen Utara, meunan cit na nyang nibak rakyat Yehuda, Benyamin dan Yerusalem. 10 Péng nyan lé Teungku Imeum Agong Hilkia geujok laju ubak ureuëng nyang lhée droe nyang geubri tugaih keu jikawai ureuëng nyang reuhab Baét TUHAN. Lheuehnyan awaknyan laju geubri péng nyan 11 ubak utoih kayée dan tukang bangunan nyang harôh geubloe batée dan kayée keungon teureuhab geudong-geudong nyang ka teupeubiyeu rusak lé raja-raja Yehuda. 12 Ureuëng-ureuëng nyang keureuja nibak buet nyan bit-bit ureuëng nyang paleng teupat lom jujoe. Awaknyan jimando lé 4 droe ureuëng Lewi: Yahat dan Obaja nibak kawöm Merari, meunan cit deungon Zakharia dan Mesulam nibak kawöm Kehat. Ureuëng-ureuëng Lewi, nyang carông geumeuén musik, 13 geubri tugaih geukawai nyang angkot bahan-bahan, jeuet keu ulée buruh nyang meukeureuja nibak meubagoe macam buet, teukeureuja administrasi, dan keu ureuëng jaga babah pintoe. 14 Bak watée péng sumbangan nyan teupeuteubiet nibak teumpat teukeubah, lé Hilkia laju meuteumé kitab Huköm TUHAN, nyan kheueh huköm-huköm nyang geubri lé Allah ubak Nabi Musa. 15 Geupeugah kheueh lé Hilkia ubak Safan lagéenyoe, "Ulôn na meuteumé kitab Huköm TUHAN di Baét TUHAN," laju kitab nyan geujok ubak Safan. 16 Lé Safan jiteurimong laju kitab nyan, óh lheuehnyan jijak peugah laju ubak raja, "Banmandum nyang Teungku Amphon yue bak kamoe ka kamoe peubuet. 17 Kamoe ka lheueh kamoe cok péng nyang teukeubah di Baét TUHAN, dan kamoe jok keu bubena ureuëng meubuet disinan dan mando-mando jih." 18 Óh lheueh nyan geutamah lom, "Hilkia na geubri kitab nyoe ubak ulôn." Dan laju lé Safan jibeuet kitab nyan dikeue raja. 19 Ban geudeungoe asoe kitabnyan, lé raja laju geupriek-priek peukayan nyang na bak tuboh geuh sabab seudeh. 20 Lé Raja geubri peurintah nyang lagée nyoe ubak Hilkia, Ahikam aneuëk Safan, Abdon aneuëk Mikha, Safan seukeutareh nanggroe, dan Asaya ajudan raja, 21 "Tajak laju teumanyong ubak TUHAN keu ulôn dan keu ureuëng-ureuëng nyang mantong na di Israel dan Yehuda keuhai asoe kitab nyoe. TUHAN beungéh that keu geutanyoe sabab indatu geutanyoe hana geupeubuet peurintah-peurintah nyang na teutuléh lam kitab nyoe." 22 Dan geujak kheueh laju Hilkia, Ahikam, Abdon, Safan dan Asaya geulakée peutunyok ubak sidroe ureuëng inong nyang nan jih Hulda. Ureuëng inong nyan na kheueh sidroe nabi nyang tinggai di gampông-gampông barô di Yerusalem. Lakoe gobnyan nan geuh Salum aneuëk Tikwa, cucoe Harhas. Gobnyan na kheueh nyang uroih peukayan iébadat di Baét TUHAN. Óh ka lheueh Hulda geudeungoe keuteurangan awaknyan, 23 gobnyan geuyue awaknyan mangat jigisa ubak raja dan geuyue peusampoe peusan nyang lagéenyoe, "TUHAN, Po teu Allah nyang jiseumah lé ureuëng Israel geupeugah lagéenyoe, 24 'Ulôn teuma Lôn huköm Yerusalem dan banmandum peunduduek disinan deungon kutok-kutok nyang na teutuléh didalam kitab nyan nyang jibaca keu raja. 25 Awaknyan ka jitinggai Ulôn dan jipeuseumah keureubeuen ubak ilah-ilah nyang laén. Banmandum nyang ka jipeubuet lé awaknyan jipeuteuka meureuka Ulôn. Ulôn meureuka keu Yerusalem, dan beungéh Ulôn nyan hana hase jipeuseungab. 26 Teuma keuhai Raja Yosia keudroe, nyoe kheueh peusan Ulôn, TUHAN Po teu Allah Israel: Óh ka lheueh gata deungoe peue nyang teutuléh didalam kitab nyan, 27 gata meunyeusai dan tapeumiyueb droe dikeue Ulôn. Ulôn Lôn ancam dan Ulôn huköm Yerusalem dan peunduduek nyang na disinan, teuma bakwatée gata tadeungoe ancaman Ulôn nyan gata laju tamo dan tapriek laju peukayan nyang na nibak tuboh gata tanda gata lumpah that seudeh, Ulôn ka Ulôn deungoe doá gata, 28 lé sabab nyan huköman ateueh Yerusalem hana Ulôn peurhot simantong gata udeb. Gata teuma Ulôn peuidhin meuninggai deungon cara damé.' " Dan geuwoe kheueh utosan-utosan nyan ubak raja dan geupeusampoe laju peusan nyan. 29 Raja Yosia geutawök laju banmandum peumimpén Yehuda dan Yerusalem, 30 laju geujak deungon awaknyan u Baét TUHAN. Meusajan awaknyan na cit geuseutôt lé teungku imeum, ureuëng Lewi dan banmandum rakyat, bah kheueh nyan nyang gasien meunan cit nyang kaya. Dikeue awaknyan banmandum, bak binéh pilar nyang khusos keu raja, raja laju geudong dan geubaca laju deungon su nyang teuga banmandum asoe kitab peujanjian nyang ka meuteumé didalam Baét TUHAN. Óh lheueh nyan lé raja laju geupeuna peujanjian deungon TUHAN mangat geutaát ubak gobnyan dan teupeujak deungon sipeunoh até dan sigeunab jiwa banmandum huköm-huköm nyan, meunan cit geupeupeunoh banmandum syarat peujanjian TUHAN deungon umat Gobnyan nyang na teutuléh didalam kitab nyan. 32 Banmandum ureuëng Benyamin dan banmandum ureuëng laén nyang na di Yerusalem geuyue meujanji mangat geutaát ubak peuratoran nyan. Teuma ureuëng-ureuëng Yerusalem pih hana geubantah dan geutaát deungon sipeunoh até ubak peuratoran-peuratoran nyang na teutuléh lam kitab peujanjian nyan, na kheueh peujanjian lamkawan awaknyan deungon Allah indatu awaknyan. 33 Beurala-beurala nyang kuto nyang luwat, nyang na meurumpok di teumpat-teumpat nyang jitamong u dalam wilayah ureuëng Israel, banmandum nyan geupeuhanco lé Raja Yosia. Laju gobnyan geupeuwajéb ubak rakyat geuh geuyue meuiébadat ubak TUHAN, Allah indatu awaknyan keudroe. Dan simantong Yosia udeb, rakyat teutab seutia ubak TUHAN.

2 Tawarikh 35

1 Óh lheuehnyan Yosia laju geupeuna uroe raya Paskah di Yerusalem keu geuhoreumat ubak TUHAN. Bubiri keu peurayaan nyan geusie nibak tanggai 14 buleuen sa. 2 Lé Yosia laju geubagi tugaih di Baét TUHAN ubak teungku-teungku imeum peue-peue nyang harôh geupeubuet, dan gobnyan geumeuharab deungon peunoh harapan mangat jeuet buet nyang ka teubeuban ateueh teungku imeum nyan geukeureuja deungon jroh. 3 Ureuëng-ureuëng Lewi nyang ka teupeukhusos keu TUHAN, dan nyang jeuet keu gurée-gurée Israel nyoe teuma peurintah nibak Raja Yosia, "Takeubah kheueh Peuto Peujanjian TUHAN nyang suci nyan didalam Baét TUHAN nyang ka lheueh geupeudong lé Nabi Sulaiman aneuëk Nabi Daud. Hánjeuet le gatanyoe tapinah-pinah atranyan. Tapeutimang kheueh TUHAN Allah gata deungon umat Gobnyan bansa Israel. 4 Beusiab-siab kheueh di Baét TUHAN meunurot reugu gata maséng-maséng, nyang saban deungon peumbagian tugaih nyang ka geupeuteutab u ateueh gata lé Nabi Daud dan Nabi Sulaiman aneuëk gobnyan. 5 Gata ato kheueh reugu-reugu gata nyan beulagée nyan bagoe sampoe sabena nibak gata nyang hase teutulông tieb-tieb keulompok ureuëng Israel di Baét TUHAN. 6 Gata harôh tasie bubiri keu peurayaan Paskah. Lé sababnyan tapeusiab kheueh droe gata keu taseumah TUHAN, dan tapeusiab cit teuma keureubeuen-keureubeuen nyang harôh teupeuseumah keu TUHAN, deungon na nyang lagée nyan ureuëng-ureuëng Israel nyang laén hase jipeubuet peue nyang ka geupeurintah lé TUHAN meulalu Nabi Musa." 7 Dan meunan cit ureuëng-ureuëng nyang teuka nibak peurayaan Paskah nyan hase jipeuseumah keureubeuen ubak TUHAN, lé Raja Yosia laju geusumbang nibak beulatang peulara gobnyan keudroe na 30.000 boh bubiri, aneuëk bubiri dan kaméng muda, dan 3.000 boh leumô agam. 8 Meunan cit deungon peugawée Raja Yosia, di awaknyan pi jibri sumbangan ubak teungku-teungku imeum, dan keu ureuëng Lewi nibak banmandum rakyat. Peugawée-peugawée nyang geuseurah tanggong jaweueb keu Baét TUHAN, awaknyan na kheueh Teungku Imeum Agong Hilkia, dan Nabi Zakharia, na lom Yehiel, ban lhée droe awaknyan geubri ubak teungku imeum na 2.600 boh aneuëk bubiri dan kaméng muda teutamah teuma 300 boh leumô agam keu teupeuseumah nibak peurayaan nyan. 9 Bubena peumimpén ureuëng Lewi, na kheueh: Konanya, Semaya dan Netaneel syedara gobnyan, Hasabya, Yeiel, dan Yozabad, na jibri ubak ureuëng Lewi 5.000 boh aneuëk bubiri dan kaméng muda meunan cit na 500 boh leumô agam keu teupeuseumah lam peurayaan nyan. 10 Óh ka lheueh banmandum nyan siab keu peurayaan Paskah nyan, teungku-teungku imeum dan reugu-reugu ureuëng Lewi geucok laju teumpat di maséng-maséng teumpat lagée nyang ka geupeurintah lé raja. 11 Laju awaknyan geusie beulatang keu peurayaan Paskah nyan; ureuëng Lewi nyang puliek kulet dan teungku imeum nyang reutek darah beulatang nyan u ateueh miseubah. 12 Tieb-tieb keulompok keuluwarga nyang na teuka keunan meuteumé teuma saboh nibak beulatang-beulatang nyang teuma teupeuseumah sibagoe keureubeuen nyang teutot. Deungon na lagéenyan awaknyan ka hase jipeuseumah keureubeuen meunurot peuratoran nyang na teutuléh lam kitab Huköm Nabi Musa. 13 Dan lé ureuëng-ureuëng Lewi pi laju geupanggang sie keureubeuen nyan di ateueh apui, nyang saban deungon peuratoran, dan geureuboih keureubeuen-keureubeuen nyang khusos di dalam kuali, kanôt dan beulangong, óh lheuehnyan uengkot sie nyan bagaih-bagaih geujak bagi keu ureuëng ramé. 14 Óh ka lheueh seuleusoe nyan banmandum barô kheueh ureuëng-ureuëng Lewi geupeusiab peunajoh keu awaknyan keudroe dan keu teungku imeum keuturonan Nabi Harun. Sabab, sampoe trok án malam lé teungku imeum nyan hana geupiôh geupeuseumah laju beulatang-beulatang sibagoe keureubeuen nyang teutot, dan geutot gapah nibak beulatang-beulatang nyan. 15 Ureuëng-ureuëng ahli musik nibak kawöm Asaf lam sukée Lewi teutab na di teumpat tugaih geuh lagée nyang ka geupeuteuntée lé Nabi Daud keu awaknyan. Nyoe kheueh nan-nan awaknyan: Asaf, Heman, dan Yedutun, sidroe lamkawan nabi nyang meubuet keu raja. Ureuëng-ureuëng nyang kawai babah pintoe geureubang hana peureulée jitinggai teumpat tugaih jihnyan, sabab awaknyan hase geupeuraya Paskah di teumpat tugaih maséng-maséng deungon cara geubantu lé ureuëng-ureuëng Lewi nyang laén. 16 Bak uroenyan awaknyan geupeubuet laju peue-peue nyang ka geupeurintah lé Raja Yosia keu peurayaan Paskah nyan, meunan cit deungon peuseumahan-peuseumahan nibak miseubah. 17 Na tujoh uroe treb jih banmandum rakyat Israel nyan na trok keunan jipeuraya Paskah dan Khanuri Ruti Nyang Hana Meurago. 18 Paskah nyang lagéenyan hántom na geupeuna le yoh watée Nabi Samuel. Hana meusidroe pi nibak raja-raja nyang sigohlom nyan kana geupeuna Paskah lagée nyang ka lheueh geupeuna 19 lam thon nyang keulapan blaih keumat keurajeuen lé Yosia nyan, lé raja nyan keudroe meusajan deungon teungku-teungku imeum, ureuëng Lewi, ureuëng Yehuda dan ureuëng Israel, meunan cit deungon peunduduek Yerusalem. 20 Óh geupeubuet lé Raja Yosia banmandum buet nyan keu Baét TUHAN; Nekho raja nibak nanggroe Meusé laju jipimpén pasokan jih u mideuen prang di Karkemis tô nibak binéh Krueng Efrat. Raja Yosia geu-useuha geupeuteun awaknyan, 21 teuma Nekho laju geukirém haba nyang lagée nyoe ubak Raja Yosia, "Prang nyoe bukon teusangkot u ateueh gata, hai raja Yehuda! Ulôn teuka bukon keuneuk lôn jak lawan gata, teuma keu lôn jak lawan musoh-musoh ulôn, dan Allah ka geuyue nibak ulôn mangat lôn peubuet bubagaih. Allah na blaih ulôn, lé sabab nyan bék kheueh tatam Gobnyan, teuma gata geupeuhanco lé Gobnyan." 22 Teuma Yosia geumeukreueh keu geulawan awaknyan, dan hana geutem turot peue nyang geupeugah lé Po teu Allah meulalu Raja Nekho nyan. Yosia geumeunyamar dan laju geutamong u mideuen prang di ateueh daratan miyueb Megido. 23 Lam prang nyan Raja Yosia laju keunong aneuk panah. Dan lé gobnyan laju geupeurintah ubak namiet-namiet gobnyan mangat jipeuteubiet gobnyan nibak prang nyan sabab gobnyan ka luka nyang brat that. 24 Awaknyan laju jibeuôt gobnyan nibak lam geuritan prang geuh dan laju jipinah u dalam geuritan nyang laén nyang na disinan, óh lheuehnyan jiba laju u Yerusalem. Di sideh gobnyan meuninggai dan laju teupeukubu di lampôh jrat raja-raja. Banmandum rakyat Yehuda dan Yerusalem meukabong ateueh meuninggai gobnyan. 25 Dan Nabi Yeremia laju geukarang saboh ca-e nyang meuba-e keu Raja Yosia. Sampoe nibak uroenyoe ca-e nyan teutab na jipeuca-e di nanggroe Israel lé ureuëng meuca-e, bah kheueh nyan ureuëng agam meunan cit deungon ureuëng inong, nibak peu-ingat meukabong keu Raja Yosia nyan. Ca-e-ca-e nyan ka teupeutamong u dalam kumpolan ca-e-ca-e meuba-e nyang seudeh ngon meuratok nyang meuweuh-weuh. 26 Kisah nyang laén keuhai Raja Yosia, keuhai cinta gobnyan ubak TUHAN, dan keuhai taát gobnyan keu huköm-huköm TUHAN, 27 paneuk haba, keuhai riwayat udeb gobnyan phon awai sampoe akhé, atranyan ka teucetet lam kitab Seujarah Raja-raja Israel dan Yehuda.

2 Tawarikh 36

1 Rakyat Yehuda laju jipiléh ngon baiát Yoahas jeuet keuraja di Yerusalem keugeunantoe Raja Yosia, ureuëng syiek gobnyan. 2 Yoahas na umu 23 thon watée gobnyan jeuet keuraja di Yehuda, dan gobnyan geumat peurintah di Yerusalem 3 buleuen treb jih. 3 Nekho raja di nanggroe Meusé nyan laju jidrob dan jiba Yoahas u Meusé, dan óh lheuehnyan jiyue ubak Yehuda mangat jibayeue upeti nyang le jih 3.400 kilogram pirak dan 34 kilogram méuh, óh lheueh nyan teubaiát teuma Elyakim syedara Yoahas jeuet keuraja, dan geu-ubah nan Elyakim jeuet keu Yoyakim. Óh lheuehnyan Yoahas laju jiba u nanggroe Meusé. 5 Yoyakim na umu 25 thon bak watée gobnyan teubaiát jeuet keuraja Yehuda, dan gobnyan geumat peurintah di Yerusalem na 11 thon treb jih. Gobnyan ka meudesya ubak TUHAN Po teu Allah gobnyan. 6 Yoh watée Raja Nebukadnezar di nanggroe Babel jireubot Yehuda, gobnyan laju jidrob Yoyakim, dan jiba laju deungon jaroe teubeuleunggu u nanggroe Babel. 7 Siladum barang-barang nyang meuyuem nibak Baét TUHAN laju jirayueng lé Nebukadnezar dan laju jikeubah lam meuligoe jih di Babel. 8 Kisah nyang laén keuhai Yoyakim, meunan cit deungon buet-buet gobnyan nyang jeuhet dan buet-buet nyang kuto that, nyan ka teucetet lam kitab Seujarah Raja-raja Israel dan Yehuda. Yoyakhin aneuëk agam gobnyan teubaiát jeuet keuraja. 9 Yoyakhin na umu 18 thon watée gobnyan teuangkat jeuet keuraja Yehuda, dan gobnyan geumat peurintah di Yerusalem na 3 buleuen 10 uroe treb. Meunan cit gobnyan le that desya nibak TUHAN. 10 Bak watée meugantoe thon, Raja Nebukadnezar laju jiba Yoyakhin u nanggroe Babel sibagoe ureuëng nyang teuteun, dan barang-barang nyang meuhái yuem jih nyang na didalam Baét TUHAN banmandum jiba. Óh lheueh nyan Nebukadnezar laju jibaiát Zedekia, apha nibak Yoyakhin jeuet keuraja ateueh Yehuda dan Yerusalem. 11 Zedekia na umu 21 thon watée gobnyan teubaiát jeuet keuraja Yehuda. Gobnyan geumat peurintah di Yerusalem na 11 thon treb jih. 12 Meunan cit gobnyan le that desya ubak TUHAN Allah gobnyan. Gobnyan hana geutem peumiyueb droe ubak TUHAN dan hana teuma geutem seutôt peue nyang ka geupeugah lé Nabi Yeremia geuyue peusampoe peusan nibak TUHAN ubak gobnyan. 13 Raja Nebukadnezar ka jipaksa ubak Zedekia keu geumeusumpah deumi Allah bahwa gobnyan seutia ubak Nebukadnezar. Teuma ó lheuehnyan Zedekia geubeurontak ubak Nebukadnezar. Zedekia geumeukreueh ulée ubak TUHAN, Allah Israel. Gobnyan hana geutem tinggai desya-desya geuh dan hana geutem woe ubak TUHAN. 14 Seulaén nibak nyan, Baét TUHAN nyang ka geupeukhusos lé TUHAN keudroe, ka jipeukuto lé peumimpén-peumimpén Yehuda, teungku-teungku imeum, dan rakyat, sabab awaknyan jiseutôt meusajan ngon raja nyan geuseumah beurala ngon jiseutôt cara udeb nyang peunoh deungon desya nibak bansa-bansa nyang na nyan. 15 TUHAN, Allah indatu awaknyan, ka meu-ulang-ulang geukirém utosan Gobnyan mangat geupeuingat umat, sabab Gobnyan geuwéh ubak awaknyan dan keu Baét Gobnyan. 16 Teuma awaknyan hán jitem deungoe dan jipeumeuén utosan-utosan Po teu Allah nyan, dan geupeukém nabi-nabi nyang geu utoih lé Gobnyan lom hana jipako ubak peue nyang geupeugah. Akhé jih TUHAN hana saba le dan meureuka Gobnyan ateueh awaknyan ka lumpah that meuluab akhéjih hanale jalan rét jiteubiet keu awaknyan mangat teuhinda nibak huköman. 17 TUHAN laju geupeugrak até raja nibak nanggroe Babel mangat jiprang lé awaknyan. Rajanyan laju geupoh maté ureuëng Yehuda nyang mantong muda-muda, jitamong cit keunan keu awaknyan nyang na didalam Baét TUHAN. Gobnyan hana geusayang bahpi dan ubak meusidroe ureuëng pih, tuha atawa muda, agam atawa inong, ureuëng sakét atawa seuhat. Awaknyan banmandum geuseurah lé Po teu Allah ubak raja Babel. 18 Peukakaih-peukakaih nyang na di Baét TUHAN, dan barang-barang nyang meuhái-meuhái yuem jih, meunan cit deungon hareuta beunda raja dan peugawée gobnyan, banmandum nyan geureupah lé raja Babel nyan dan laju jiba u nanggroe Babel. 19 Gobnyan laju geureuloih sampoe hanco bintéh beuton banda Yerusalem, dan laju geutot banda nyan sampoe tutong, meunan cit deungon Baét TUHAN dan banmandum meuligoe meusajan deungon barang-barang nyang meuhái yuem nyang mantong na didalam meuligoe nyan. 20 Rakyat nyang hana keunong geudrob laju geuba u Babel. Disinan gobnyan jeuet keu hamba gobnyan dan keuturonan gobnyan sampoe ubak masa keurajeuen Persia meukuasa. 21 Meunan kheueh nyang teujadi peue nyang ka lheueh geupeugah lé TUHAN ubak Nabi Yeremia nyang bahwa nanggroe nyan teuma jeuet keupadang nyang tho kreng 70 thon treb sibagoe geunantoe thon-thon Sabat nyang hana geupako. 22 Bak thon nyang keuphon watée keurajeuen Kores, raja Persia, TUHAN laju geulaksana peue nyang ka lheueh geupeugah meulalu Nabi Yeremia. TUHAN laju geu peugrak até Kores mangat jipeuteubiet saboh peurintah nyang teubaca di bansaboh keurajeuen nanggroe. Asoe surat nyan na kheueh lagéenyoe: 23 "Nyoe kheueh peurintah Kores, raja nanggroe Persia! TUHAN, Po teu Allah nyang Mahakuasa dan nyang mat kuasa didalam syeuruga ka geupeujeuet ulôn raja bansigom donya, dan geubri tugaih ubak ulôn mangat ulôn peudong rumoh keu Gobnyan di Yerusalem di daerah Yehuda. Sababnyan, gata banmandum nyang jeuet keu umat Allah harôh tariwang keudeuh! Seumoga TUHAN Po teu Allah gata geulindong gata."

Ezra 1

1 Nibak thon nyang keu phon lam keurajeuen Kores, raja Persia TUHAN laju geupeubuet peue nyang ka lheueh geupeugah ubak Nabi Yeremia. TUHAN geupeumangat até Kores mangat jitem peuteubit saboh peurintah nyang jeuet teubaca di bansaboh nanggroe. Asoe surat nyan na kheueh lagée nyoe: 2 "Nyoe kheueh titah Kores, raja di nanggroe Persia. TUHAN, Allah nyang mat kuasa di syeuruga ka geupeujeuet ulôn raja di bansaboh donya, dan ka geubri tugaih keu ulôn mangat jeuet lôn peudong Baét iébadat keu Gobnyan di Yerusalem di daerah Yehuda. 3 Seumoga TUHAN Po teu Allah geulindong gata banmandum nyang ka jeuet keu umat Gobnyan. Gata banmandum harôh tawoe u Yerusalem dan tapeudong lom Baét TUHAN, Allah Israel, Allah nyang tinggai di Yerusalem. 4 Meunyoe na sidroe lamkawan umat Gobnyan di teumpat nyang teuböih nyoe nyang peureulée bantuan mangat hase geuwoe, dan kawöm silingka jih nyan harôh teubri bantuan nyan. Awaknyan harôh geubri keu ureuëng nyang woe nyan pirak dan méuh, keubeukai nibak rot ueh raya, meunan cit deungon beulatang nyang peudieng barang, dan meunan cit deungon peuseumahan-peuseumahan keu Baét TUHAN di Yerusalem." 5 Óh lheuehnyan bubena ulée kawöm nibak sukée Yehuda dan Benyamin, bubena teungku imeum dan ureuëng-ureuëng Lewi, dan somantong ureuëng nyang até jih ka geupeugrak lé Po teu Allah, laju jimeukeumaih-keumaih keu jijakwoe u Yerusalem dan jipeudong lom Baét TUHAN. 6 Banmandum kawöm lingka gobnyan meusajan-sajan jibantu sira jijok peue mantong bantuan nyang hase jibri, miseu jih lagée peukakaih-peukakaih pirak dan méuh, beukai nibak rot ueh, beulatang teumpat peudieng barang, dan hareuta beunda nyang laén dan peuseumahan-peuseumahan keu Baét TUHAN. 7 Raja Kores geupeuteubiet laju cambông-cambông dan cawan-cawan nyang yohmasa ilée teupeuguna dalam Baét TUHAN di Yerusalem. Barang-barang nyan ka jiangkot lé Raja Nebukadnezar dan jikeubah didalam kuil-kuil dewa gobnyan keudroe. 8 Kores geuseurah urosan beunda-beunda nyan ubak Mitredat, ulée peumbeundaharaan keurajeuen. Óh lheueh nyan Mitredat laju geupeugöt saboh dafeutar keuhai barang-barang nyan keu Sesbazar, gubunur Yehuda. 9 Nyoe kheueh dafeutar barang-barang nyan: 11 Banmandum nyan na jeumeulah jih 5.400 boh cambông méuh dan pirak teutamah teuma deungon barang-barang nyang laén. Banmandum nyan geuba lé Sesbazar bakwatée gobnyan dan ureuëng-ureuëng nyang teuböih laén geubeurangkat di Babel u Yerusalem.

Ezra 2

1 Ramé that-that lamkawan ureuëng nyang teuböih jitinggai Babel dan jiwoe u Yerusalem dan Yehuda, maséng-maséng u banda jih keudroe. Awaknyan ka udeb nibak teumpat nyang teuböih di Babel yoh phon that awaknyan jiangkot keudeh lé Raja Nebukadnezar. 2 Peumimpén-peumimpén awaknyan na kheueh Zerubabel, Yesua, Nehemia, Seraya, Reelaya, Mordekhai, Bilsan, Mispar, Bigwai, Rehum dam Baana. Nyoe kheueh dafeutar kawöm keuluwarga Israel, deungon jeumeulah ureuëng nibak tieb-tieb kawöm nyang ka jiwoe nibak teumpat nyang teuböih: 3 Kawöm keuluwarga Paros & -- & Sefaca & -- & Arah & -- & Pahat-Moab (keuturonan Yesua dan Yoab) & -- & Elam & -- & Zatu & -- & Zakai & -- & Bani & -- & Bebai & -- & Azgad & -- & Adonikam & -- & Bigwai & -- & Adin & -- & Ater (teuhôi cit deungon nan Hizkia) & -- & Bezai & -- & Yora & -- & Hasum & -- & Gibar & -- & 21 Ureuëng-ureuëng nyang indatu jih tinggai di banda-banda nyang teupeugah lom nyoe na kheueh: Netofa & -- & Anatot & -- & Asmawet & -- & Kiryat-Arim, Kefira dan Beerot & -- & Rama dan Gaba & -- & Mikhmas & -- & Betel dan Ai & -- & Nebo & -- & Magbis & -- & Elam nyang laén & -- & Harim & -- & Lod, Hadid dan Ono & -- & Yerikho & -- & Senaa & -- & 36 Nyoe kheueh teuma dafeutar waréh kawöm teungku-teungku imeum nyang jiwoe nibak teumpat nyang teuböih: Imer & -- & Pasyhur & -- & Harim & -- & 40 Kawöm keuluwarga Lewi nyang geuwo nibak teumpat nyang teuböih na kheueh lagéenyoe: Ureuëng nyang meuca-e di Baét TUHAN Ureuëng nyang jaga babah pintoe geureubang di Baét TUHAN 43 Nyoe kheueh dafeutar kawöm keuluwarga nyang meutugaih di Baét TUHAN nyang ka geuwoe nibak teumpat nyang teuböih: Ziha, Hasufa, Tabaot, Keros, Siaha, Padon, Lebana, Hagaba, Akub, Hagab, Samlai, Hanan, Gidel, Gahar, Reaya, Rezin, Nekoda, Gazam, Uza, Paseah, Besai, Asna, Meunim, Nefusim, Bakbuk, Hakufa, Harhur, Bazlut, Mehida, Harsa, Barkos, Sisera, Temah, Neziah dan Hatifa. 55 Kawöm keuluwarga deundayang Nabi Sulaiman nyang woe na kheueh lagéenyoe: Sotai, Soferet, Peruda, Yaala, Darkon, Gidel, Sefaca, Hatil, Pokheret-Hazebaim dan Ami. 58 Kawöm keuluwarga nyang meutugaih di Baét TUHAN dan ureuëng deundayang Nabi Sulaiman nyang woe nibak teumpat nyang teuböih na jeumeulah jih 392 droe. 59 Ureuëng-ureuëng nyang beurangkat nibak banda-banda di Tel-Melah, Tel-Harsa, Kerub, Adan dan Imer na jeumeulah 652 droe. Awaknyan banmandum ka jitamong kawöm keuluwarga Delaya, Tobia dan Nekoda, teuma awaknyan hana hase jipeudeuh bukeuti bahwa droe jih nyan na kheueh keuturonan bansa Israel. 61 Meunan cit deungon na padub boh kawöm nibak keuluwarga teungku imeum nyan hana teuma hase jipeuleumah bukeuti atawa hana jiteumé catetan keuhai indatu droe awaknyan, na kheueh kawöm keuluwarga Habaya, Hakos, dan Barzilai. (Indatu kawöm Barzilai jimeukawen deungon sidroe ureuëng inong nibak kawöm Barzilai di Gilead, dan óh lheuehnyan di gobnyan jipeuguna laju nan tuwan jih.) Sabab awaknyan hana hase jipeuleumah bukeuti soe indatu jihnyan, lé sababnyan teuma awaknyan hana hase teuteurimong sibagoe teungku imeum. 63 Gubunur nyang meutugaih di daerah Yehuda geutam awaknyan mangat bék jipajoh peunajoh nyang teupeuseumah ubak Po teu Allah, sampoe beuna sidroe teungku imeum nyang hase geubri peutunyok deungon cara teungui Urim dam Tumim. 64 Ureuëng-ureuëng nyang teuböih nyang ka jiwoe u nanggroe jih na jeumeulah 42.360 droe. Seulaén nibak nyan jeumeulah ureuëng peumbantu awaknyan na 7.337 droe dan ureuëng meuca-e na teuma 200 droe. Dan awaknyan na teuma jiba sajan beulatang-beulatang peulara awaknyan lagéenyoe: Bagal & -- & Unta & -- & Keuleudée & -- & 68 Watée ureuëng-ureuëng nyang teuböih nyan ka trok u Baét TUHAN di Yerusalem, na meupadubdroe peumimpén kawöm jijok laju peuseumahan keu galak droe mangat jeuet teupeudong lom Baét TUHAN. 69 Awaknyan jijok sumbangan meunurot keumampuan jih maséng-maséng dan hase jih na kheueh 500 kilogram méuh, 2.800 kilogram pirak, dan 100 boh bajée jubah keu teungku-teungku imeum. 70 Bubena teungku imeum, ureuëng-ureuëng Lewi dan siladum nibak rakyat jitinggai teutab di Yerusalem dan di banda-banda nyang rab deungon nyan. Ureuëng-ureuëng nyang tugaih jih meuca-e, ureuëng nyang tugaih jih jijaga babah pintoe Baét TUHAN dan ureuëng nyang meubuet di Baét TUHAN dan ureuëng-ureuëng Israel nyang leubeh nibak awaknyan jitinggai teutab di banda-banda teumpat tinggai indatu awaknyan yohmasa ilée.

Ezra 3

1 Bak buleuen nyang keutujoh, ureuëng-ureuëng Israel ka tinggai teutab di banda jihnyan maséng-maséng. Bak tanggai sa buleuen nyan awaknyan jimeusapat di Yerusalem, 2 laju lé Yesua bin Yozadak meunan cit deungon rakan-rakan gobnyan bubena teungku imeum dan Zerubabel aneuëk Sealtiel meunan cit deungon kawöm syedara gobnyan, jipeudong lom miseubah Po teu Allah Israel. Deungon na lagéenyan awaknyan ka jeuet jitot keureubeuen lom di ateueh miseubah nyan, nyang paih deungon peutunyok-peutunyok nyang na teutuléh didalam kitab Huköm Nabi Musa, hamba Allah nyan. 3 Bahpi awaknyan jitakot keu peunduduek nyang na di nanggroe nyan, teuma awaknyan teutab cit jipeudong miseubah nyan di teumpat phon teupeudong. Dan deungon na nyang lagéenyan awaknyan laju jipeuphon lom jipeuseumah keureubeuen nyang teutot, bah kheueh nyan óh watée beungoh meunan cit óh watée seupôt uroe. 4 Meunan cit awaknyan jipeuna Uroe Raya Jambo Ôn, nyang paih deungon peuratoran nyang ka teupeuteutab keu nyan; dan tieb-tieb uroe jipeuseumah keureubeuen nyang ka teupeuteutab nibak uroenyan. 5 Seulaén nibaknyan awaknyan seucara teuato jipeuseumah teuma keureubeuen nyang teutot meunan cit deungon keureubeuen Uroe Raya Buleuen Barô, dan keu banmandum uroe raya nyang laén nyang teupeuna keu teuseumah TUHAN. Meunan cit awaknyan jipeuseumah teuma keureubeuen keugalak até ubak TUHAN. 6 Bahpi Baét TUHAN gohlom teupeuphon peudong lom, teuma nibak tanggai sa buleuen tujoh rakyat ka jipeuphon tot keureubeuen keu TUHAN. 7 Rakyat laju jijok sumbangan péng guna keu upah utoih kayée ngon utoih batée. Meunan cit lé rakyat hana jituwoe jikirém peunajoh deungon ié jieb, meunan cit deungon minyéuk zaiton u banda-banda Tirus dan banda Sidon guna jih mangat teutuka deungon kayée ceumara Libanon nyang na di banda-banda nyan. Kayéenyan laju jiba u Yafo meulalu laôt. Banmandum nyan geupeubuet lé rakyat deungon na idhin nibak Kores, raja Persia. 8 Dan nibak buleuen nyang keudua, nibak thon nyang keudua óh ka lheueh ureuëng Israel jiwoe u Yerusalem, jipeuphon kheueh lé awaknyan jipeudong lom Baét TUHAN. Zerubabel, Yesua dan rakan-rakan gobnyan nyang saboh bansa, bubena teungku imeum, ureuëng Lewi, paneuk haba, banmandum ureuëng nyan beukaih nyang teuböih, banmandum meukeureuja. Ureuëng-ureuëng Lewi nyang meu-umu 20 thon u ateueh geutunyok mangat jeuet keumando nibak seumeugöt Baét TUHAN nyan. 9 Dan Yesua, ureuëng Lewi nyan, meusajan deungon aneuëk-aneuëk syedara gobnyan, dan meunan cit deungon Kadmiel deungon aneuëk-aneuëk gobnyan cit teuma (kawöm Hodawya) meusajan-sajan jikawai nibak teumpat teupeugöt Baét TUHAN nyan. Awaknyan jibantu lé ureuëng Lewi nibak kawöm Henadad. 10 Nibak watée ureuëng-ureuëng nyang meubuet bangunan ka jipeuphon peudong keunaleueng Baét TUHAN, lé teungku imeum nyang meupeukayan jubah sira geumat beureuguih nibak jaroe laju geucok teumpat maséng-maséng. Meunan cit deungon ureuëng-ureuëng Lewi nibak kawöm Asaf ka teudong disinan sira jimat nibak jaroe gobnyan maséng-maséng saboh gong ubit. Awaknyan laju geumeurateb sira jipuja pujo ubak TUHAN sisuai deungon peuratoran nyang ka geupeuteutab yoh mantong udeb Nabi Daud. 11 Rakyat jimeuca-e ngon nyanyoe puja dan pujo ubak TUHAN, sira jiulang-ulang nibak baréh keuneulheuh, meunoe kheueh su cae nyan, "TUHAN nyan lumpah that jroh; dan geunaséh Gobnyan keu Israel keukai dan abadi." Banmandum rakyat jiseumurak ngon geumbira sira jipujoe TUHAN, sabab keunaleueng Baét TUHAN ka jipeuphon keubah teuma. 12 Le that-that lamkawan teungku-teungku imeum, ureuëng-ureuëng Lewi, dan ulée-ulée kawöm nyang ka tuha-tuha umu jih ka lheueh jikalon Baét TUHAN yoh masa ilée. Yoh watée jingieng teupeuduek keunaleueng Baét TUHAN nyang na jinoe, laju jimo ba-e ngon su nyang teuga. Teuma ureuëng-ureuëng nyang laén nyang na teuka disinan jiseumurak meuhubo sabab geumbira mangat that até, 13 sampoe hana hase le teubeuda ureuëng mo deungon ureuëng seumurak. Su jih pih lumpah that meudeungkeng, sampoe teudeungoe jiôh nyang meutaga.

Ezra 4

1 Haba keuhai ureuëng-ureuëng nyang ka jiwoe nibak teumpat teuböih nyang teungoh jipeudong Baét TUHAN, Allah Israel, laju teudeungoe lé musoh ureuëng Yehuda dan Benyamin. 2 Sababnyan awaknyan laju jijak meurumpok deungon Zerubabel dan bubena ulée-ulée kawöm, óh ka meurumpok ngon awaknyan laju jiusui nyang lagéenyoe, "Tapeu idhin kheueh ubak kamoe mangat kamoe pih hase kamoe jak meusajan watée teupeudong Baét TUHAN nyan, sabab dikamoe pih meubakti ubak TUHAN Po teu Allah syedara, saban cit lagée syedara banmandum. Kamoe sabe kamoe peuseumah keureubeuen keu gobnyan yoh phon watée Esar-Hadon, raja Asyur nyang ba kamoe keunoe." 3 Teuma Zerubabel, Yesua dan ulée-ulée kawöm nyan geujaweueb, "Kamoe hana peureulée gata bantu keu kamoe peudong Baét TUHAN, Allah kamoe. Bah kheueh kamoe peudong keudroe lagée nyang geupeurintah lé Kores, raja Persia, ubak kamoe." 4 Óh lheuehnyan peunduduek nyang ka treb tinggai di nanggroe nyan ka jipeuphon peuleumoh seumangat ureuëng Yahudi dan jipeutakot-takot awaknyan mangat jeuet Baét TUHAN nyang teungoh jipeugöt nyan bék jeuet teupeugöt. 5 Awaknyan laju jisugok peujabat-peujabat peumeurintah Persia mangat geuyue piôh jipeugöt Baét TUHAN nyan dan geupeubateue reuncana ureuëng Yahudi nyan. Hainyan laju meulanjut simantong keurajeuen bak jaroe Raja Kores sampoe ubak keurajeuen geumat lé Raja Darius. 6 Bak awaiphon peumeurintahan Raja Ahasweros, musoh-musoh peunduduek Yerusalem dan Yehuda laju geutuléh surat gugatan. 7 Meunan cit nibak zamén keurajeuen Artahsasta, kaisar Persia, keujadian nyan meu-ulang lom: Bislam, Mitredat, Tabeel dan rakan-rakan awaknyan jituléh surat ubak raja. Suratnyan jituléh dalam basa Aram, dan harôh jiteujeumah bak watée geubaca. 8 Meunan cit lé Artahsasta na teuma geuteurimong surat keuhai Yerusalem. Suratnyan geukirém lé Gubunur Rehum dan Simsai seukeutareh propinsi dan jibantu lé rakan-rakan awaknyan, na kheueh lé hakém dan banmandum peujabat Persia nyang laén nyang asai jih nibak Erekh, Babel, dan Susan di nanggroe Elam, 10 meunan cit lé bansa-bansa laén nyang ka geuangkot lé Asnapar Nyang Agong dan jiyue tinggai teutab di banda Samaria dan di banda-banda nyang laén lam propinsi Efrat Barat. 11 Meunoe su surat nyan, "Ukeue nyang mulia Raja Artahsasta, nibak kamoe bubena hamba Teungku Amphon nyang tinggai di Efrat Barat. Saleuem. 12 Bah kheueh Teungku Amphon neumaklum, bahwa ureuëng Yahudi nyang ka jitinggai di wilayah-wilayah nyang laén didalam Keurajeuen Teungku Amphon, jinoenyoe jitinggai teutab di Yerusalem dan teungoh jipeudong lom banda nyang jeuhet dan galak that jibeurontak. Awaknyan ka jipeuphon lom jipeudong bintéh-bintéh beuton dan hana treb le ka seuleusoe jipeugöt atra nyan. 13 Meunyoe banda nyan ka seuleusoe jipeudong lom dan bintéh-bintéh beuton nyan ka lheueh jipeudong, peunduduek nyang na tinggai disinan hana jitemle jibayeue cukée, dan deungon na nyang lagéenyan hase nibak cukée keu keurajeuen akhé jih meukureueng. 14 Kamoe ka meu-utang budoe ubak Teungku Amphon dan hana ék kamoe ngieng meunyoe Teungku Amphon jipeurugoe, lé sababnyan, kamoe usui ubak Teungku Amphon, 15 mangat Teungku Amphon neuyue pareksa surat-surat peutinggai indatu Teungku Amphon. Nibak asoe surat tinggai nyan Teungku Amphon teuma neuteupeue bahwa banda Yerusalem keubit galak that jibeurontak dan yohphon ilée sabe jipeurugoe soemantong raja nyang mat peurintah ateueh propinsi nyan. Peunduduek disinan sabe payah that teupimpén. Nyang kheueh sabab jih banda nyan ka geupeuhanco. 16 Nyang kheueh, kamoe yakén that, meunyoe banda nyan jipeudong lom dan bintéh-bintéh beuton jipeudong teuma, Teungku Amphon hana meuhase le neukuasa propinsi Efrat Barat nyoe." 17 Raja laju geukirém jeunaweueb geuh lagéenyoe, "Keu Gubunur Rehum dan Simsai seukeutareh propinsi, meunan cit deungon rakan-rakan awaknyan nyang na tinggai di Samaria dan di banda-banda nyang laén nyang na tinggai di propinsi Efrat Barat. Saleuem. 18 Surat nyang ka lheueh gatanyoe kirém ka lheueh jiteujeumah dan jibaca dikeue ulôn. 19 Dan ateueh peurintah ulôn ka ulôn yue seulidek, dan keubit na bukeuti phon yoh jamén ilée Yerusalem sabe jilawan kuasa raja-raja dan le lamkawan peunduduek jih na kheueh peumbeurontak dan nyang kayém that ji peuna karu. 20 Ka lheueh lé raja-raja nyang peukasa geupeurintah ateueh propinsi Efrat Barat dan bansabohnyan dan jipeuna cukée ngon upeti. 21 Sabab nyan, tapeutreun kheueh peurintah mangat tayue piôh buet nyang teungoh jikeureuja lé awaknyan, mangat banda nyan bék jipeudong le sampoe ulôn peutron peurintah-peurintah nyang laén. 22 Tapeubuet laju peurintah nyang ka ulôn titah nyoe mangat bék meutamah geuhon le beuban ulôn!" 23 Meunan lheueh geubaca dikeue Rehum, Simsai dan rakan-rakan awaknyan surat nyang teuka nibak raja Artahsasta nyan, jijak laju awaknyan u Yerusalem dan jipaksa ureuëng Yahudi mangat bék jipeudong lé banda nyan. 24 Keuhai teupeubuet Baét TUHAN ka geupeupiôh dan hana jikeureuja sampoe nibak thon nyang keudua keurajeuen Darius raja Persia.

Ezra 5

1 Nibak watéenyan na dua droe nabi, maséng-maséng nan nabi nyan Nabi Hagai dan Nabi Zakharia bin Ido, ban dua nabi nyan ka geupeuphon peugah haba ateueh nan Po teu Allah Israel ubak ureuëng Yahudi nyang na tinggai di Yehuda dan Yerusalem. 2 Ban geudeungoe peusan dua droe nabi nyan Zerubabel bin Sealtiel dan Yesua bin Yozadak bagaih-bagaih jijak peudong lom Baét TUHAN di Yerusalem, geubantu lé bandua droe nabi nyan. 3 Teuma Tatnai, gubunur propinsi Efrat-Barat, meusajan deungon Syetar-Boznai dan rakan-rakan awaknyan bagaih-bagaih jijak u Yerusalem dan jitanyong ubak ureuëng Yahudi, "Soe ureuëng nyang yue gata sampoe gata peudong dan gata peuleungkab Rumoh Iébadat nyoe?" 4 Dan awaknyan jitanyong cit nan-nan ureuëng nyang ka jitulông peugöt Baét TUHAN nyan. 5 Teuma Po teu Allah teutab geupeurati dan geulindong peumimpén-peumimpén Yahudi nyan, deungon nyan lé peujabat-peujabat Persia hana jipeukaru sigohlom awaknyan jikirém surat ubak Darius dan geuteurimong jeunaweueb jih. 6 Nyoe kheueh laporan nyang awaknyan kirém ubak Raja. 7 "Ukeue nyang mulia Raja Darius. Seumoga Teungku Amphon neumat peurintah deungon seujahteura! 8 Kira jih Teungku Amphon neumaklum, bahwa kamoe ka kamoe jak u propinsi Yehuda, disinan kamoe kalon bahwa Baét TUHAN, Allah Nyang Raya, teungoh jipeudong lom deungon batée-batée nyang raya dan bintéh-bintéh beuton nyang meulapeh deungon kayée. Buet nyang jipeubuet bit-bit deungon that teuliti dan hana halangan sapeue. 9 Óh lheuehnyan kamoe tanyong ubak peumimpén bansa nyan, soe nyang ka jok idhin ubak awaknyan keu jipeudong lom Rumoh Iébadat nyan dan jipeuleungkab óh sampoereuna. 10 Meunan cit kamoe tanyong teuma nan-nan awaknyan mangat hase kamoe britée ubak Teungku Amphon soe mantong nyang jeuet keu ulée nibak buet nyan. 11 Jijaweueb lé awaknyan, 'Kamoe nyoe na kheueh hamba Po teu Allah nyang mat kuasa ateueh álam seumeusta. Kamoe teungoh kamoe peudong lom Baét TUHAN nyang teupeudong dan teupeuleungkab meuploh-ploh thon nyang ka lheueh lé sidroe raja Israel nyang agong. 12 Teuma lé sabab indatu kamoe ka geupeumeureuka ubak Po teu Allah nyang mat kuasa di syeuruga, nyang kheueh sabab jih Gobnyan geuseurah awaknyan ubak keukuasaan Neubukadnezar, raja Babel nibak keuturonan Kasdim. Raja nyan ka geupeuhanco Baét nyan dan laju geuangkot bansa kamoe u Babel. 13 Óh lheuehnyan Kores jeuet keuraja Babel dan nibak thon nyang phon lam peumeurintahan gobnyan, raja nyan laju geupeutreun peurintah mangat teupeudong lom Baét TUHAN nyan. 14 Dan kon nyan mantong, banmandum peukakaih-peukakaih méuh dan pirak nyang teupeuguna di dalam Baét TUHAN jijok pulang meunan cit nyang geucok di Yerusalem lé Nebukadnezar laju geupeutamong u dalam kuil di Babel. Peukakaih-peukakaih nyan geubri lé Raja Kores keu ureuëng nyan nan jih Sesbazar, nyang ka geuangkat jeuet keugubunur Yehuda. 15 Raja geuyue ubak gobnyan mangat jicok peukakaih-peukakaih nyan dan geuyue woe atra nyan u Baét TUHAN di Yerusalem, dan geuyue peudong lom Baét nyan. 16 Dan teuka kheueh laju Sesbazar u Yerusalem, laju geupeuduek sandi Baét TUHAN nyan. Yoh phon watéenyan sampoe án jinoe peumbangunan Baét TUHAN nyan teutab hana jipiôh, teuma gohlom cit seuleusoe.' 17 Meunyoe Teungku Amphon neubri idhin, kamoe usui mangat teuseulidek didalam surat arsib keurajeuen di Babel. Deungon na lagéenyan ka hase tateupeue peu kheueh beutôi na peurintah Raja Kores keu jipeudong lom Baét TUHAN di Yerusalem nyoe. Óh lheuehnyan kamoe lakée haba keuhai keuputosan Teungku Amphon keu peukara nyan."

Ezra 6

1 Óh lheuehnyan ateueh peurintah Raja Darius, laju teupeuna seulidek didalam surat arsib keurajeuen nyang na teukeubah di Babel. 2 Teuma catetan keuhai nyan bukon meuteumé di Babel, teuma di banda Ahmeta di daerah Media. Catetan nyan teutuléh nibak saboh geunulong surat nyang su jih lagéenyoe, 3 "Bak thon nyang keuphon nibak peumeurintahan Raja Kores, gobnyan geupeuteubiet peurintah mangat jeuet Baét TUHAN di Yerusalem teupeudong lom sibagoe teumpat ureuëng jiba peuseumahan dan teumpat tot keureubeuen. Manyang Baét nyan 27 metée dan luwah jih 27 metée cit. 4 Bintéh-bintéh jih harôh teupeugot lagée nyang teupeugah nyoe: di ateueh tieb-tieb lhée boh lapéh batée harôh teupasang silapéh kayée. Biaya jih jitanggong lé kaih keurajeuen. 5 Meunan cit deungon peukakaih-peukakaih méuh dan pirak nyang teupeuguna di Baét TUHAN dan nyang teucok di Yerusalem lé Raja Nebukadnezar dan geuangkot u Babel, nyan harôh teupeuriwang ubak teumpat jih lagée sot nyang ka." TUHAN nyan teupeugot laju 6 Óh lheuehnyan lé Raja Darius geukirém laju haba nyang lagéenyoe, "Ubak Tatnai, gubunur propinsi Efrat Barat, dan Syetar-Boznai, meunan cit keu bubena peujabat di Efrat Barat. Bék gata peukaru ureuëng-ureuëng Yahudi nyan, 7 dan bék teuma gatatam awaknyan meunyoe jipeugot Rumoh Iébadat droe jih. Peubiyeu mantong gubunur Yehuda dan peumimpén Yahudi jipeudong lom Rumoh nyan. 8 Lheueh nyan, ulôn peurintah ubak banmandum syedara mangat neutulông awaknyan nibak buet teupeudong lom bangunan nyan deungon cara lagéenyoe: Banmandum biaya bangunan harôh teucok nibak hase cukée nanggroe nyang teukuteb nibak rakyat di propinsi Efrat Barat dan gata bayeue bubagaih keu ureuëng-ureuëng nyan bék gata teun-teun. 9 Seulaén nibaknyan peue mantong nyang jipeureulée meunurot nyang geupeugah lé teungku imeum di Yerusalem, lagée miseujih geulakée leumô agam nyang mantong muda, bubiri agam dan aneuëk bubiri keu keureubeuen teupeuseumah ubak Po teu Allah nyang mat kuasa didalam syeuruga, meunan cit deungon gandom, sira, anggô dan minyéuk zaiton, nyan banmandum harôh tabri keu awaknyan tieb-tieb uroe dan hánjeuet gata peu ayéum-ayéum. 10 Gata peubuet kheueh banmandum nyan mangat awaknyan hase jipeuseumah keureubeuen nyang teupeugalak até Allah nyang na didalam syeuruga, dan mangat awaknyan jilakée beureukat keu ulôn dan keu banmandum aneuëk agam ulôn. 11 Ulôn peurintah teuma somantong ureuëng nyang jilanggeh ubak peurintah nyoe nibak rumoh ureuëng nyan teulot saboh taméh, teupeucincu nibak ujong jih, dan laju teutob ateueh tuboh ureuëng nyan sampoe maté. Dan rumoh nyan harôh teuma teureuloih óh lheuehnyan teupeujeuet keuteumpat böih blôh. 12 Seumoga Allah nyang ka geupiléh Yerusalem sibagoe teumpat teuseumah Gobnyan, geupeubinasa somantong raja atawa bansa nyang jijeuet iengkeue ubak peurintah nyoe dan jicuba jikeuneuk peuhanco Baét TUHAN di Yerusalem nyan. Ulôn, Raja Darius, ka ulôn peutron peurintah nyoe. Tapeubuet kheueh deungon sigét-gét jih." 13 Peue nyang ka geupeurintah lé Raja Darius nyan geupeubuet laju deungon até-até that lé Tatnai, gubunur Efrat Barat nyan, meunan cit lé Syetar-Boznai dan rakan-rakan gobnyan. 14 Geutulông teuma Nabi Hagai dan Nabi Zakharia, lé dumna peumimpén Yahudi laju geupeuseuleusoe geupeugot Baét TUHAN nyan. Awaknyan bagaih-bagaih geupeugot Baét TUHAN nyan paih lagée peurintah Allah Israel dan peurintah Kores, Darius dan Artahsasta, raja-raja Persia nyan. 15 Baét TUHAN nyan seuleusoe nibak tanggai lhée buleuen Adar bak thon nyang keunam keurajeuen Raja Darius. 16 Óh lheuehnyan, di ureuëng Israel deungon até nyang galak that-that, meunan cit di teungku imeum dan ureuëng-ureuëng Lewi dan banmandum ureuëng woe nyang ka lheueh teuböih jijak reuseumi Baét TUHAN nyan. 17 Bak watéenyan awaknyan jipeuseumah ubak TUHAN na 100 boh leumô agam, 200 boh bubiri agam dan na 400 boh aneuëk bubiri. Keu keureubeuen teupeu amphon desya, teupeuseumah teuma 12 boh kaméng agam, saboh sapo keu tieb-tieb sukée Israel. 18 Óh lheuehnyan keu teumeubuat lam Baét TUHAN awaknyan laju jisuson kawöm-kawöm teungku-teungku imeum meunan cit deungon ureuëng-ureuëng Lewi meunurot peuratoran nyang na teutuléh didalam kitab Nabi Musa. 19 Bak tanggai peuet blaih buleuen sa thon nyang óh lheueh nyan, ureuëng-ureuëng nyang ka jiwoe nibak teumpat teuböih, laju jipeuna peurayaan Paskah. 20 Banmandum teungku imeum dan ureuëng Lewi ka geupeuna upacara teupeugleh droe sampoe ka teuanggab gleh. Óh lheuehnyan di ureuëng-ureuëng Lewi laju geusie beulatang peulara keu keureubeuen Paskah keu teungku imeum, keu gobnyan keudroe dan banmandum ureuëng nyang beukaih teuböih nyang laén nyan teuma. 21 Banmandum keureubeuen nyan jipajoh lé ureuëng Israel nyang ka jiwoe nibak teumpat teuböih dan peunduduek nanggroe nyan nyang ka jitiek cara udeb nyang peunoh deungon desya dan jiteuka keujijak meubakti ubak TUHAN, Allah Israel. 22 Na tujoh uroe treb jih awaknyan deungon geumbira jipeuna Khanuri Ruti Nyang Hana Meurago. Awaknyan banmandum galak sabab TUHAN ka geupeujeuet raja Asyur meumurah até ubak awaknyan, sampoe geutem tulông awaknyan teupeudong lom Baét TUHAN, Allah Israel.

Ezra 7

1 Meuthon-thon teuma óh lheueh nyan, bak watée Artahsasta geumat peurintah sibagoe raja Persia, na sidroe ureuëng agam nyang nan geuh Ezra, gobnyan nibak keuturonan Teungku Imeum Agong Nabi Harun. Garéh keuturonan gobnyan phon di miyueb u ateueh na kheueh lagéenyoe: Ezra Seraya Azarya Hilkia 2 Salum Zadok Ahitub 3 Amarya Azarya Merayot 4 Zerahya Uzi Buki 5 Abisua Pinehas Eleazar Teungku Imeum Agong Nabi Harun 6 Ezra na kheueh sidroe ureuëng nyang malem dan gobnyan geuteupeue that keuhai Huköm nyang geupeutron lé TUHAN Po teu Allah Israel ubak Nabi Musa. Sabab Ezra geubri beureukat lé TUHAN Allah gobnyan, dan diraja pi hana geupeu kliet peue nyang geulakée lé gobnyan geujok laju. Bak thon nyang keutujoh geumat keurajeuen lé Raja Artahsasta, geujak kheueh Ezra nibak Babel u Yerusalem meusajan deungon saboh kawan ureuëng Israel nyang meubagoe ragam ureuëng jih, na teungku-teungku imeum, ureuëng Lewi, ureuëng meuca-e meunan cit deungon ureuëng nyang meutugaih nibak babah pintoe geureubang Baét TUHAN, dan ureuëng-ureuëng meukeureuja. 8 Awaknyan jitinggai Babel nibak tanggai sa buleuen sa dan deungon tulông Po teu Allah, trok kheueh awaknyan u Yerusalem deungon seulamat nibak tanggai sa buleuen limong. 10 Ezra ka geucurah sigala peuratian gobnyan ubak teuseulidek Huköm-huköm TUHAN, seulaén keu geupeubuet keudroe, geupeubeuet teuma huköm-huköm nyan ubak bansa Israel. 11 Nyoe kheueh dokumen nyang geubri lé Raja Artahsasta ubak Ezra, sidroe teungku imeum nyang malem keuhai Huköm. 12 "Nibak Raja Artahsasta keu Teungku Imeum Ezra, ureuëng nyang malem nibak Huköm Allah nyang mat kuasa di dalam syeuruga. 13 Ulôn peurintah bahwa banmandum teungku imeum, ureuëng Lewi dan ureuëng Israel nyang laén dipat mantong didalam keurajeuen ulôn, nyang na meuheuet keuneuk jak u Yerusalem, ulôn bri idhin jijak deungon Gata. 14 Sabab ulôn dan ban tujoh droe peunaseuhat ulôn teu utôh Gata u Yerusalem dan Yehuda mangat teujak seulidek keuadaan disinan dan teungieng peu kheueh Huköm Allah nyang ka teupeucaya keu Gata, bit-bit tataát. 15 Ulôn dan peunaseuhat ulôn keuneuk peuseumah méuh dan pirak ubak Allah Israel, Allah nyang tinggai di Yerusalem. Taba kheueh peuseumahan kamoe nyan. 16 Meunan cit taba kheueh teuma banmandum méuh dan pirak nyang ka Gata peusapat bansaboh nanggroe Babel dan peue mantong sumbangan bansa Israel meunan cit deungon teungku-teungku imeum gobnyan keu Baét TUHAN Allah awaknyan di Yerusalem. 17 Gata peuguna kheueh péng nyan deungon hemat mangat tateumé bloe leumô agam, bubiri agam, aneuëk bubiri, gandom dan anggô. Gata peuseumah kheueh banmandum nyan di ateueh miseubah Baét TUHAN di Yerusalem. 18 Pirak dan méuh nyang na mantong leubeh jeuet Gata peuguna keu Gata keudroe dan rakan-rakan Gata, nyang sisuai deungon keuheundak Po teu Allah Gata. 19 Gata jok kheueh ubak Allah di Yerusalem peue mantong peukakaih nyang geubri keu Gata keuteu seumayang di Baét Allah. 20 Dan peue mantong peureulée nyang laén di Baét TUHAN, jeuet Gata lakée nibak kaih keurajeuen. 21 Meunan cit keu banmandum nyang mat kaih keurajeuen di propinsi Efrat Barat, ulôn peurintah mangat jeuet peue mantong nyang geulakée lé Teungku Imeum Ezra, nyang that-that malem keuhai Huköm Allah nyang meukuasa lam syeuruga, gata jok laju ubak gobnyan beureujang-reujang, 22 dan sampoe trok ubak jeumeulah sidubnyoe le: pirak trok 3.400 kilogram, gandom 10.000 kilogram, ié anggô 2.000 arée, minyéuk zaiton 2.000 arée, dan sira sidub nyang teupeureulée. 23 Beu até-até dan ceureumat kheueh peue-peue mantong nyang geupeureulée lé Allah nyang mat kuasa lam syeuruga keu Baét Gobnyan, mangat jeuet Gobnyan hana geubeungéh keu ulôn atawa ubak ureuëng-ureuëng nyang mat peurintah óh lheueh ulôn. 24 Gata hana jeuet tacok cukée nibak teungku-teungku imeum, nibak ureuëng Lewi, nibak ureuëng nyang meuca-e, nyang jaga babah pintoe geureubang, nibak ureuëng keureuja, atawa baksoe mantong nyang na hubongan jih deungon Baét TUHAN. 25 Syedara ulôn Ezra, tapeuguna kheueh hikeumat nyang ka geubri lé Po teu Allah ubak Gata, dan Gata angkat kheueh peumimpén-peumimpén dan hakém-hakém mangat geupimpén banmandum ureuëng nyang na di propinsi Efrat Barat nyang udeb meunurot Huköm Allah Gata. Bah kheueh Gata peuruno banmandum Huköm nyan keu banmandum ureuëng nyang gohlom jiteupeue. 26 Somantong ureuëng nyang hana jitaát ubak Huköm-huköm Allah Gata, atawa ubak huköm nanggroe, ureuëng nyan harôh bubagaih teuhuköm maté, atawa teuböih beujiôh, atawa teusita hareuta beunda jih, atawa teupeutamong u dalam glab." 27 Laju geupeugah lé Ezra, "Pujoe kheueh TUHAN, Allah nyang geuseumah lé indatu geutanyoe! Allah ka geupeugrak até raja sampoe diraja nyan ka geubri peuratian nyang cukob raya mangat teupeudong lom Baét TUHAN di Yerusalem. 28 Deungon tulông Allah ulôn jigalak lé raja, lé peunaseuhat-peunaseuhat dan lé peujabat-peujabat nanggroe nyang meukuasa; TUHAN Allah ulôn ka geupeubeudôh seumangat ulôn, sampoe ulôn ka meuhase ulôn pakat ulée kawöm Israel nyang cukob le keu jitemwoe u Yerusalem."

Ezra 8

1 Nyoe kheueh dafeutar bubena ulée kawöm nyang ka teuböih u Babel dan jiwoe lom deungon ulôn, Ezra u Yerusalem nibak watée Artahsasta geumat peurintah sibagoe raja: 2 Gersom, nibak kawöm Pinehas Daniel, nibak kawöm Itamar Hatus bin Sekhanya, nibak kawöm Nabi Daud Nabi Zakharia nibak kawöm Paros, meusajan deungon 150 droe ureuëng agam nibak kawöm gobnyan (na catetan keuhai silsilah awaknyan) Elyoënai bin Zerahya, nibak kawöm Pahat-Moab, meusajan deungon 200 droe ureuëng agam Sekhanya bin Yahaziel, nibak kawöm Zatu, meusajan deungon 300 droe ureuëng agam Ebed bin Yonatan, nibak kawöm Adin, meusajan deungon 50 droe ureuëng agam. Yesaya bin Atalya, nibak kawöm Elam, meusajan deungon 70 droe ureuëng agam Zebaja bin Mikhael, nibak kawöm Sefaca, meusajan deungon 80 droe ureuëng agam Obaja bin Yehiel, nibak kawöm Yoab, meusajan deungon 218 droe ureuëng agam Selomit bin Yosifya, nibak kawöm Bani, meusajan deungon 160 droe ureuëng agam Zakharia bin Bebai, nibak kawöm Bebai, meusajan deungon 28 droe ureuëng agam Yohanan bin Hakatan, nibak kawöm Azgad, meusajan deungon 110 droe ureuëng agam Elifelet, Yehiel dan Semaya, nibak kawöm Adonikam, meusajan deungon 60 droe ureuëng agam (awaknyoe teuka jih óh dudo teuma) Utai dan Zabud, nibak kawöm Bigwai, meusajan deungon 70 droe ureuëng agam. 15 Banmandum kawöm nyan ulôn peusapat nibak binéh krueng nyang ié jih ji-ile u banda Ahawa, laju kamoe peudong khimah disinan nyang treb jih lhée uroe. Óh ka lheueh ulôn peureksa, teunyata na meupadubdroe teungku imeum lamkawan awaknyan, teuma hana meusidroe pi nyang na nibak sukée Lewi. 16 Laju ulôn hôi sikureueng droe lamkawan peumimpén, awaknyan na kheueh: Eliezer, Ariel, Semaya, Elnatan, Yarib, Elnatan, Zakharia, Mesulam dan na teuma dua droe gurée, na kheueh Yoyarib dan Elnatan. 17 Óh lheueh nyan ulôn yuejak awaknyan mangat jijak meurumpok deungon Ido, pang ulée masyarakat di Kasifya, deungon jilakée mangat Ido dan rakan-rakan jih ureuëng nyang meubuet di Baét TUHAN, jikirém ubak kamoe ureuëng-ureuëng nyang meubuet di Baét TUHAN. 18 Sabab murah até Po teu Allah, awaknyan geukirém ubak kamoe Serebya, ureuëng Lewi nyang malem nibak kawöm Mahli. Meusajan deungon gobnyan teuka cit teuma aneuëk miet dan syedara-syedara gobnyan, le jih na 18 droe. 19 Hasabya dan Yesaya nibak kawöm Merari, deungon dua ploh droe kawöm syedara gobnyan, geukirém cit keukamoe. 20 Di sampeng nyan na teuma 220 droe ureuëng nyang meukeureuja di Baét TUHAN nyang na teudafeutar nan-nan awaknyan. Indatu awaknyan yohmasa ilée ka geupeuteutab lé Nabi Daud dan bubena ureuëng rayeuk lam keurajeuen nanggroe keu jitulông ureuëng Lewi. 21 Dan nibak binéh Krueng Ahawa nyan ulôn peusapat dan banmandum awaknyan harôh jipuasa dan jipeumiyueb droe dikeue Po teu Allah. Kamoe meudoá mangat Po teu Allah geupimpén kamoe nibak rot ueh raya, dan geulindong kamoe, aneuëk-aneuëk kamoe dan banmandum hareuta milék kamoe. 22 Ulôn seugan keuneuk lakée tantra meuguda ubak raja keu teulindong kamoe nibak musoh bak rot ueh raya. Sabab ulôn ka lheueh ulôn peugah ubak gobnyan, bahwa Allah kamoe teuma geubri beureukat soe mantong nyang meubakti ubak Gobnyan dan geubanci meunan cit geuhuköm soe mantong ureuëng nyang hana seutia ubak Gobnyan. 23 Lé sababnyan kheueh kamoe puasa sira meudoá ubak Allah dan kamoe lakée peulindongan Gobnyan dan doá kamoe nyan pi geudeungoe. 24 Lamkawan teungku-teungku imeum nyang paleng meusyeuhu ka ulôn piléh 12 droe: Serebya, Hasabya dan na 10 droe teuk. 25 Óh lheuehnyan ulôn timang keu awaknyan pirak, méuh dan peukakaih-peukakaih nyang ka lheueh geusumbang lé raja, lé peunaseuhat meunan cit lé ureuëng-ureuëng rayeuk dan lé banmandum ureuëng Israel, mangat jeuet teupeuguna di dalam Baét TUHAN. Banmandum nyan ka lheueh ulôn jok ubak teungku-teungku imeum nyan. 26 Nyoe kheueh dafeutar sumbangan-sumbangan nyan: 100 boh peukakaih pirak & -- & méuh & -- & 20 boh cambông méuh & -- & 2 boh cambông peurunggu nyang paleng ceudah, nyang saban yuem jih deungon cambông méuh. 28 Ulôn peugah ubak teungku-teungku imeum nyan lagéenyoe, "Gatanyoe ka teupeukhusos keu TUHAN, Allah nyang geuseumah lé indatu geutanyoe, meunan cit deungon banmandum peukakaih pirak dan méuh nyang teusumbang ubak TUHAN nyan pi na kheueh khusos keu TUHAN. 29 Gata jaga kheueh beunda-beunda nyan beu jroh-jroh sampoe gata trok u Baét TUHAN. Watée gata ka trok keudeh, gata harôh tatimang beunda-beunda nyan, dan gata jok laju ubak pang ulée-pang ulée imeum dan peumimpén-peumimpén ureuëng Lewi, meunan cit ubak peumimpén-peumimpén ureuëng Israel nyang na di Yerusalem." 30 Óh lheueh nyan lé teungku-teungku imeum dan ureuëng-ureuëng Lewi nyan geuteurimong pirak, méuh dan peukakaih-peukakaih nyan keu teuba u Baét TUHAN di Yerusalem. 31 Nibak tanggai 12 buleuen nyang phon kamoe tinggai Krueng Ahawa dan kamoe beurangkat u Yerusalem. Nibak rot ueh nyan kamoe geulindong lé Po teu Allah nibak seurangan dan jihampeueng lé musoh. 32 Óh watée ka sampoe u Yerusalem, kamoe meureuhat na lhée uroe. 33 Óh lheuehnyan nibak uroe nyang keu peuet barô kheueh kamoe jak u Baét TUHAN, disinan laju kamoe timang pirak, méuh dan peukakaih-peukakaih nyan. Óh lheueh nyan barô kheueh kamoe jok ubak Teungku Imeum Meremot bin Uria sira geusaksi lé Eleazar bin Pinehas dan dua droe ureuëng Lewi, na kheueh Yozabad bin Yesua dan Noaja bin Binui. 34 Banmandum beunda nyan geu itong dan geutimang, laju geucetet deungon leungkab. 35 Bak uroenyan cit teuma banmandum ureuëng nyang ka jiwoe nibak teumpat teuböih nyan, jipeuseumah keureubeuen nyang teutot ubak Allah Israel. Awaknyan jipeuseumah 12 boh leumô agam keu banmandum Israel, 96 boh bubiri agam dan 77 boh aneuëk bubiri; seulaén nibak nyan na teuma 12 boh kaméng keu keureubeuen peu amphon desya keu awaknyan keudroe. Banmandum beulatang nyan geutot sibagoe keureubeuen keu TUHAN. 36 Dan dokumen nyang geubri lé raja keu awaknyan, geupeusampoe laju ubak bubena gubunur dan peujabat propinsi Efrat Barat. Dan peujabat-peujabat nyan laju geubri bantuan ubak rakyat mangat awaknyan teutab meuiébadat di Baét TUHAN.

Ezra 9

1 Óh ka seuleusoe banmandum nyan teupeubuet, na meupadubdroe ureuëng-ureuëng patot nibak bansa Israel jijak meuhadab ubak ulôn. Awaknyan jipeugah bahwa rakyat Israel, meunan cit deungon teungku-teungku imeum, dan ureuëng-ureuëng Lewi hana jipeuaséng droe nibak bansa-bansa nyang na tinggai di bansilingka nyan, awaknyan na kheueh bansa Amon, Moab, Meusé, Kanaan, Het, Feris, Yebus dan Amori. Dan di teungku imeum dan ureuëng-ureuëng Lewi pi lagéenyan cit jipeubuet. Awaknyan banmandum jipeubuet buet-buet nyang hina nyang jipeubuet lé bansa-bansa teukutok nyan. 2 Ureuëng agam nibak bansa Yahudi jimeukawen deungon ureuëng inong bansa laén, sampoe umat nyang ka geupeukhusos milék TUHAN ka hana aseuli le. Nyang paleng parah lom na kheueh nyang awai that jipeuphon buet lagéenyan na kheueh ureuëng-ureuëng patot dan peujabat Israel. 3 Ban lôn deungoe hai lagéenyan, ulôn keubit that banci dan seudeh sampoe ulôn priek-priek peukayan ulôn dan ulôn lot ôk dan janggot ulôn, óh lheuehnyan laju ulôn duek deungon até nyang hanco. 4 Ulôn teutab lôn duek nyang lagée nyan sampoe nibak gob jak peuseumah keureubeuen bak watée seupôt uroe. Óh lheuehnyan teuka kheueh ureuëng ramé jijak dong di silingka ulôn. Awaknyan banmandum teumakot sabab teuingat ubak ancaman Allah Israel ateueh desya ureuëng-ureuëng nyang ka jiriwang nibak teumpat nyang teuböih nyan. 5 Nibak watée keureubeuen seupôt uroe ka jipeuphon peuseumah, barô kheueh ulôn beudôh nibak teumpat ulôn meuseudeh nyan, dan deungon peukayan nyang ka beukaih-beukaih, laju ulôn sujut dan ulôn sunyung jaroe ubak TUHAN Allah ulôn. 6 Ulôn kheun, "Ya, Allah ulôn, ulôn nyoe keubit that malée ulôn beuôt ulée ulôn dikeue Droeneueh. Desya kamoe ka meutumpok-tumpok di ateueh ulée kamoe, ya TUHAN, sampoe ka meusampôh u langét manyang. 7 Phon nibak zamén indatu kamoe sampoe án jinoe, kamoe umat Droeneueh nyoe lumpah that raya desya ubak Droeneueh. Nyang kheueh sabab jih dikamoe nyoe, bubena na raja dan bubena teungku imeum kamoe ka jipeutaloe lé raja-raja nanggroe aséng. Kamoe jipoh maté, jireupah dan jiangkot sibagoe ureuëng nyang teuteun. Kamoe ka jipeuhina hana reuda, lagée nyang ka teujadi nibak uroenyoe. 8 Teuma bak saát nyoe, ya TUHAN Allah kamoe, Droeneueh banmantong neupeumurah até keu kamoe. Droeneueh ka neupeu beubaih na meupadubdroe lamkawan kamoe nyang ka jipeujeut keu namiet mangat hase kamoe udeb deungon meurdehka dan seujahteura di teumpat nyang khusos nyoe. TUHAN ka neubri keu kamoe udeb nyang barô. 9 Nibak watée kamoe mantong jeuet keu namiet ureuëng laén, TUHAN pi hana neutinggai kamoe. TUHAN ka neupeujeuet kamoe jigaséh ngon jisayang lé raja-raja Persia dan jipeu idhin udeb ngon jibri peudong lom Baét Droeneueh nyang ka tinggai rungka-rungka nyan. TUHAN ka neubri keu kamoe teumpat meulindong disinoe, di Yehuda dan Yerusalem. 10 Teuma bak saát nyoe, ya TUHAN, Allah kamoe, óh ka lheueh teujadi banmandum nyan, peue nyang hase kamoe peugah? Kamoe ka kamoe peubeuah tutoe haba TUHAN lom teuma, 11 nyang ka TUHAN bri keu kamoe meulalu nabi-nabi, hamba-hamba TUHAN. Awaknyan jijak britée ubak kamoe bahwa tanoh nyang keuneuk kamoe duek nyan hana nyang gleh sabab banmandum peunduduek jih phon nibak ujong sampoe ubak ujong ka jipeubuet kuto lom ngon keuji. 12 Nabi-nabi nyang tam kamoe bék meukawen meujampu deungon ureuëng nyan, atawa kamoe bantu awaknyan sampoe udeb seujahteura dan makmu. Meunyoe kamoe taát, kamoe teuma jeuet keuteuga dan kamoe pajoh hase tanoh nyan dan kamoe peutron keu ahli waréh kamoe sampoe siumu masa. 13 Kamoe ka meudesya dan ka kamoe iengkeue ubak huköm Droeneueh, dan TUHAN ka neuhuköm kamoe. Teuma kamoe teupeue, ya TUHAN Allah kamoe, bahwa huköman nyang TUHAN bri nyan hana brat nyang patot kamoe teurimong, dan kamoe mantong TUHAN peuseulamat. 14 Lé sababnyan, panena mungken kamoe peubeuah peurintah-peurintah Droeneueh dan kamoe meukawen meujampu deungon ureuëng-ureuëng nyang jeuhet nyan? Meunyoe hainyan mantong kamoe peubuet, ka pasti TUHAN meureuka nyang lumpah brat u ateueh kamoe sampoe TUHAN neupeuhanco kamoe jeuet keu abée dan hana TUHAN bri udeb keu kamoe bahpi meusidroe pi. 15 Ya TUHAN, Allah Israel, Droeneueh lumpah that ade, bahpi lagée nyan TUHAN teutab neubri keu kamoe udeb. Kamoe meungaku ateueh salah kamoe ubak Droeneueh; kamoe hana meuhak keu kamoe meuhadab u hadhirat Droeneueh."

Ezra 10

1 Teungoh Ezra geumeudoá sira geumo dan geumeungaku desya dikeue Baét TUHAN, le that-that ureuëng Israel jijak keunan keujijak meusapat, bah kheueh nyan ureuëng agam, meunan cit deungon ureuëng inong dan aneuëk miet. Awaknyan jidong meulingka sira jimo teuga-teuga. 2 Óh lheuehnyan Sekhanya bin Yehiel nibak kawöm Elam, jipeugah ubak Ezra, "Kamoe ka meudesya ubak TUHAN sabab ka kamoe meukawen deungon bansa aséng. Bahpi lagée nyan mantong na harapan keu ureuëng Israel. 3 Jak kheueh geutanyoe ta meusumpah ubak Po teu Allah, bahwa geutanyoe teuma ta use banmandum ureuëng inong nyan meunan cit deungon aneuëk-aneuëk jih nyan. Kamoe teuma kamoe seutôt bandum naseuhat droeneueh meunan cit naseuhat ureuëng laén nyang jihoreumat peurintah Allah. Dan kamoe teuma kamoe horeumat ubak Huköm Allah. 4 Droeneueh kheueh nyang wajéb nyang cok tindakan, kamoe teuma kamoe tulông droeneueh deungon sikeubit até. Neutindak kheueh deungon teugaih sampoe seuleusoe." 5 Lé sababnyan geupeuphon kheueh lé Ezra geucok tendakan. Gobnyan laju geuyue ubak teungku-teungku imeum ulée, ureuëng-ureuëng Lewi dan ureuëng-ureuëng Israel nyang laén mangat jimeusumpah bahwa awaknyan bit-bit jipeubuet usui nyang geupeusampoe lé Sekhanya nyan. 6 Óh ka lheueh awaknyan jimeusumpah, dan geujak kheueh laju Ezra nibak leuen Baét TUHAN dan geujak tamong u dalam teumpat tinggai Yohanan bin Elyasib meudom di sinan. Gobnyan hana geutem makheun meunan cit hana geujieb ié sabab pikeran geuh suntok that watée geupike keu pi-e ureuëng-ureuëng nyang teuböih nyan. 7 Óh lheuehnyan laju teutabu saboh maklumat nyang teupeumaklum u bansaboh Yerusalem dan Yehuda keu mandum ureuëng nyang ka jiwoe nibak teumpat jih teuböih, mangat jimeusapat di Yerusalem. 8 Barang gasoe hana jiteuka lam teumpo lhée uroe, keu ureuëng nyan teuma teucok banmandum hareuta jih dan keu ureuëng nyan hanale teuanggab sibagoe anggota masyarakat. Maklumat nyan jiteken lé peumimpén rakyat. 9 Óh ka na lhée uroe, nibak tanggai dua ploh buleuen sikureueng, banmandum ureuëng agam nyang na tinggai di daerah Yehuda dan Benyamin jijak u Yerusalem laju jimeusapat dileuen Baét TUHAN. Bak watéenyan ujeuen jitreun keubit that tajam. Banmandum ureuëng nyan yo meukot-kot sabab sijuek meunan cit sabab udara jih leupie that dan sabab peunteng jih meusapat disinan. 10 Óh lheuehnyan Ezra laju geudong dan geumeututoe ubak awaknyan. Gobnyan geupeugah, "Gatanyoe banmandum ka meudesya sabab lé gata ka leubeh meutamah desya ureuëng Israel sabab ka tameukawen deungon ureuëng inong bansa aséng. 11 Sabab nyan, tameungaku kheueh desya gata ubak TUHAN, Allah nyang geuseumah lé indatu geutanyoe, dan tapeubuet kheueh laju peue nyang hase teupeugalak até gobnyan. Beujiôh kheueh gata nibak ureuëng aséng nyang na tinggai di nanggroe geutanyoe dan ta use kheueh banmandum ureuëng binoe gata dan bansa aséng nyan." 12 Awaknyan banmandum meusigoe jijaweueb deungon su nyang meutaga, "Kamoe teuma kamoe seutôt naseuhat droeneueh." 13 Laju jipeugah lé awaknyan lom, "Teuma nyang na teuka keuno ramé that dan ujeuen pih jitôh lumpah teuga, kamoe hana ék kamoe dong diluwa nyang lagéenyoe. Dan nyoe bukon peukara nyang hase teupeuseuleusoe lam watée sa atawa dua uroe, sabab jai that-that nibak kamoe nyang rhoh lam desya nyoe. 14 Neupeu idhin kheueh keu peumimpén kamoe mangat jeuet gobnyan tinggai di Yerusalem dan geu uroih keuhai nyan. Lé tieb-tieb ureuëng nyang na tinggai di banda-banda kamoe, nyang na peurumoh jih nibak bansa aséng, bah kheueh jijak paih bak watée nyang ka teupeuteuntée, meusajan deungon bubena peumimpén dan bubena hakém banda awaknyan maséng-maséng. Deungon na lagée nyan Po teu Allah hana geubeungéh le keu geutanyoe sabab desya nyan." 15 Hana meusidroe pi nyang na usui keuhai geuhon reuncana nyan, seulaén Yonatan bin Asael dan Yahzeya bin Tikwa, jisukong teuma lé dua droe ureuëng Lewi, na kheueh Mesulam dan Sabetai. 16 Ureuëng-ureuëng nyang teuböih nyang ka geuwoe nyan teutab geukeuneuk peujak reuncana nyan, lé sabab nyan Teungku Imeum Ezra geupiléh laju na meupadub droe lamkawan ulée-ulée kawöm, laju geucetet nan-nan awaknyan. Bak tanggai sa buleuen siploh awaknyan geupeuphon sidang keu geuseulidék peukara nyan. 17 Lam teumpo lhée buleuen óh lheuehnyan barô kheueh meuhase geupeuseuleusoe geupareksa ateueh banmandum ureuëng agam nyang ka meukawen deungon ureuëng inong bansa aséng. 18 Nyoe kheueh dafeutar nan-nan ureuëng nyang meukawen deungon bansa aséng: Teungku-teungku Imeum, teudafeutar deungon kawöm: Kawöm Yesua deungon syedara-syedara gobnyan, aneuëk-aneuëk Yozadak: Maaseya, Eliezer, Yarib dan Gedalya. 19 Awaknyan meujanji jitaleuek peurumoh jihnyan, óh lheueh nyan laju jipeuseumah bubiri agam keu keureubeuen peuamphon desya awaknyan keudroe. 20 Kawöm Imer: Hanani dan Zebaja. 21 Kawöm Harim: Maaseya, Elia, Semaya, Yehiel dan Uzia. 22 Kawöm Pasyhur: Elyoënai, Maaseya, Ismail, Netaneel, Yozabad, dan Elasa. 23 Ureuëng-ureuëng Lewi: Yozabad, Simei, Kelaya (teuhôi cit deungon nan Kelita), Petahya, Yuda dan Eliezer. 24 Kawöm meuca-e: Elyasib Ureuëng nyang jaga pintoe geureubang Baét TUHAN: Salum, Telem dan Uri. 25 Ureuëng-ureuëng Israel nyang laén: Kawöm Paros: Ramya, Yezia, Malkia, Miyamin, Eleazar, Malkia dan Benaya. 26 Kawöm Elam: Matanya, Nabi Zakharia, Yehiel, Abdi, Yeremot dan Elia. 27 Kawöm Zatu: Elyoënai, Elyasib, Matanya, Yeremot, Zabad dan Aziza. 28 Kawöm Bebai: Yohanan, Hananya, Zabai dan Atlai. 29 Kawöm Bani: Mesulam, Malukh, Adaya, Yasub, Seal dan Yeramot. 30 Kawöm Pahat-Moab: Adna, Kelal, Benaya, Maaseya, Matanya, Bezaleel, Binui dan Manasye. 31 Kawöm Harim: Eliezer, Yisia, Malkia, Semaya, Simeon, Benyamin, Malukh dan Semarya. 33 Kawöm Hasum: Matnai, Matata, Zabad, Elifelet, Yeremai, Manasye dan Simei. 34 Kawöm Bani: Maadai, Amram, Uel, Benaya, Bedeya, Keluhu, Wanya, Meremot, Elyasib, Matanya, Matnai, Yaasai. 38 Kawöm Binui: Simei, Selemya, Natan, Adaya, Makhnadbai, Sasai, Sarai, Azareel, Selemya, Semarya, Salum, Amarya dan Yusuf. 43 Kawöm Nebo: Yeiel, Matica, Zabad, Zebina, Yadai, Yoël dan Benaya. 44 Banmandum awaknyan ka jimeukawen ngon inong nibak bansa aséng. Lé sababnyan, peurumoh-peurumoh nyan jitaleuek dan laju jiuse meusajan deungon aneuëk-aneuëk awaknyan.

Nehemia 1

1 Nyoe kheueh laporan Nehemia bin Hakhalya keuhai buet-buet gobnyan. Bak buleuen Kislew nibak thon nyang keu dua ploh geumat keurajeuen lé Raja Artahsasta sibagoe raja nanggroe Persia, ulôn, Nehemia, na di Susan, ma banda keurajeuen nanggroe. 2 Bak watée nyan, syedara ulôn, nyang nan jih Hanani, jiteuka nibak Yehuda deungon rakan jih na meupadub droe. Laju ulôn peugah ubak awaknyan keuhai keuadaan di Yerusalem dan keuadaan ureuëng-ureuëng Yahudi nyang ka jiwoe nibak teumpat nyang teuböih di Babel. 3 Laju jicalitra lé awaknyan bahwa ureuëng-ureuëng nyang beukaih teuböih di Babel nyang ka jiwoe u tanoh ié jih nyan, jinoe udeb lumpah that seungsara dan hana piôh jihina lé bansa-bansa aséng nyang na ban sikeulileng jih nyan. Lom teuma, bintéh-bintéh beuton banda Yerusalem mantong hanco meutabu beba hana meukri sakri dan meunan cit deungon pintoe-pintoe geureubang jih gohlom teureuhab yoh phon hanco watée jitot ngon apui nibak masa ilée. 4 Ban ulôn deungoe habanyan, di ulôn pih laju teuduek ngon leumoh sira ulôn mo. Meu uroe-uroe treb jih até ulôn seudeh. Ulôn pi laju puasa sira ulôn meudoá ubak Po teu Allah, 5 "Ya TUHAN, Allah nyang mat kuasa didalam syeuruga. Droeneueh na kheueh Allah nyang Raya dan kamoe meuhadab ubak Droeneueh deungon até nyang lumpah teumakot. Droeneueh ya TUHAN teutab seutia neumumat ubak janji Droeneueh keu ureuëng nyang cinta ubak Droeneueh dan jitaát ubak peurintah Droeneueh. 6 Neungieng kheueh ateueh ulôn ya TUHAN, dan neudeungoe kheueh doá nyang teungoh ulôn peu-ék u hadhirat Droeneueh uroe ngon malam deumi keu umat Israel, hamba-hamba Droeneueh nyan. Ulôn meungaku bahwa kamoe nyoe, umat Israel ka meudesya; ulôn dan indatu ulôn pi ka geupeubuet desya. 7 Kamoe ka doraka ubak Droeneueh ya TUHAN dan ka kamoe iengkeue ubak peue nyang ka TUHAN peurintah. Meunan cit di kamoe hana kamoe turot ubak huköm-huköm nyang ka TUHAN bri keu kamoe meulalu Nabi Musa hamba Droeneueh nyan. 8 Ya TUHAN, neuingat kheueh ubak tutoe haba Droeneueh nyang ka TUHAN peugah ubak Nabi Musa ateueh peurintah Droeneueh, nyang bahwa meunyoe kamoe, umat Israel, hana seutia ubak Droeneueh, kamoe teuma TUHAN peu crebre lamkawan bansa nyang laén. 9 Teuma meunyoe kamoe woe lom ubak Droeneueh dan kamoe taát ubak banmandum peurintah Droeneueh, teuma kamoe nyang ka TUHAN peu crebre nyan teuma TUHAN peusapat lom, bahpi kamoe nyoe na nyang di ujong bumoe. Laju lé TUHAN kamoe neupuwoe ubak teumpat nyang ka TUHAN piléh keu teumpat iébadat ubak Droeneueh. 10 TUHAN, kamoe nyoe na kheueh hamba-hamba Droeneueh, umat Droeneueh keudroe nyang ka TUHAN peuseulamat deungon kuasa dan teunaga Droeneueh nyang paleng hibat nyan. 11 Neudeungoe kheueh ya TUHAN doá ulôn dan doá banmandum hamba Droeneueh nyang laén, nyang jitem horeumat ubak Droeneueh. Neubri kheueh sunulông Droeneueh mangat jeuet nibak uroenyoe hamba Droeneueh nyoe meuhase meuteumé kamoe cok até jeuet keu geugaséh lé raja." Bak masanyan ulôn na kheueh nyang uroih ié jieb raja.

Nehemia 2

1 Nibak siuroe, na peuet buleuen teuma óh lheueh nyan, watéenyan buleuen Nisan, yoh watée Raja Artahsasta teungoh geumakheun, ulôn peuidang keugobnyan ié anggô deungon iémuka lôn krot. Gohlom na nyang ka-ka ulôn krot iémuka dikeue gobnyan lagée nibak uroe nyan. 2 Lé sabab nyan gobnyan geutanyong lagéenyoe, "Pakon gata deuh jih seudeh that, padahai gata hana sakét? Nyan pasti na sapeue-sapeue nyang hana trok gata pike." Ulôn teukeujot, 3 laju ulôn jaweueb, "Udeb kheueh Teungku Amphon siumu masa! Pakriban ulôn hana seudeh, meunyoe banda teumpat jrat indatu ulôn ka tinggai rungka, dan pintoe-pintoe geureubang jih pi ka hanco jipajoh lé apui." 4 Geutanyong lé Raja, "Teuma peue nyang gata meuheuet?" Didalam até ulôn meudoá ubak Po teu Allah nyang mat kuasa lam syeuruga, 5 laju ulôn peugah ubak gobnyan, "Meunyoe Teungku Amphon neutem dan neupeupeunoh peue nyang ulôn lakée, neuyuejak kheueh ulôn u tanoh Yehuda mangat ulôn jak peudong dong banda teumpat teupeukubu indatu ulôn." 6 Dan Raja nyang teungoh geuduek sira geuapet lé Pereumaisuri Ratu, geupeutrok laju peue nyang ulôn lakée. Gobnyan geutanyong padubna treb ulôn tinggai disideh dan pajan ulôn gisa, teuma ulôn peugah laju ubak gobnyan tanggai nyang ka ulôn peuteuntée. 7 Óh lheuehnyan ulôn lakée surat keu teungku gubunur di propinsi Efrat Barat, mangat jeuet lé gobnyan geupeumudah keu ulôn watée lôn jak u Yehuda. 8 Seulaén nibaknyan, na cit ulôn lakée surat keu Asaf, mando uteuen keurajeuen nanggroe, mangat lé gobnyan geupeuna kayée keuteupeugot babah pintoe geureubang kuta nibak binéh Baét TUHAN, dan keu bintéh beuton banda meunan cit deungon keu rumoh teumpat tinggai ulôn. Raja geukabui banmandum peue nyang ulôn lakée nyan, banmandum nyan na kheueh sabab Po teu Allah geutulông ulôn. 9 Meusigoe deungon napadub droe ulée balang dan tantra meuguda, nyang ateueh peurintah raja ji-iréng ulôn, dan ulôn beurangkat kheueh laju u Efrat Barat. Óh trok keunan surat nibak raja nyan laju ulôn peusampoe ubak gubunur. 10 Teuma bak watée Sanbalat, ureuëng Bet-Horon, dan Tobia, sidroe lamkawan peujabat di Amon, geudeungoe bahwa ulôn teuka deumi keu bansa Israel, awaknyan beungéh lumpahna. 11 Watée ka trok u Yerusalem, ulôn meureuhat na lhée uroe. 12 Seulawetnyan hana ulôn peugah bahpi mubaksoe mantong bahwa Allah ka geubri ilham keu ulôn mangat teupeudong lom banda Yerusalem. Óh malam singoh ulôn beudôh laju ulôn pakat napadub droe rakan mangat teujak u luwa banda. Seulaén keuleudée nyang ulôn giduek di ateueh rueng, hana kamoe ba beulatang nyang jeuet teu giduek nyang laén. 13 Uroe mantong malam, bak watée kamoe tinggai banda rot Pintoe Geureubang Pantôn di siblaih u barat. Kamoe jak laju u arah seulatan, ubak babah Pintoe Geureubang Blôh, rot Mata Ié Naga. Nibak rot ueh teungoh kamoe jaknyan hana tuwoe ulôn peureksa bintéh beuton banda dan ulôn ngieng teuma pintoe-pintoe geureubang nyang ka habéh jipajoh lé apui. 14 Óh lheueh nyan di bagian timu banda kamoe tuju laju u blaih utara, u babah Pintoe Geureubang Ié Rhot dan Kulam Raja. Teuma disinan hana rot jak keuleudée nyang ulôn pasang nyan, sabab lumpah that le rungka-rungka bangunan nyang reuloih. 15 Nyang kheueh jeuet, kamoe tron laju u Pantôn Kidron dan kamoe jak laju nibak malam nyan cit teuma, sira ulôn peureksa bintéh beuton banda. Óh lheueh nyan kamoe wet lom u banda rot babah Pintoe Geureubang Pantôn. 16 Hana meusidroe pih nibak peumuka rakyat nyan jiteupeue ho ulôn jak, dan peue nyang teungoh ulôn reuncana. Sabab sampoe nibak uroe nyan gohlom ulôn peugah sapeue ubak bansa droe ulôn, bah kheueh nyan ubak teungku-teungku imeum meunan cit ubak ureuëng-ureuëng patot, atawa ubak peugawée, dan soe mantong nyang teuma jitem meusajan keu teupeudong lom banda Yerusalem. 17 Teuma óh dudoe ulôn peugah ubak awaknyan, "Neungieng kheueh keuadaan geutanyoe nyang seungsara nyoe! Yerusalem ka tinggai rungka dan pintoe geureubang jih ka tinggai beukaih jipajoh lé apui. Jak kheueh geutanyoe tapeudong lom beuton-beuton banda Yerusalem mangat geutanyoe hana jihina le." 18 Laju ulôn calitra ubak awaknyan pakriban Allah geutulông ulôn dan peue nyang ka geupeugah lé raja ubak ulôn. Awaknyan jijaweueb, "Jak geutanyoe tajak peuphon peudong!" Laju meusiab-siab kheueh awaknyan jipeuphon keureuja. 19 Watée reuncana kamoe nyan ka jiteupeue lé Sanbalat, Tobia dan Gesyem, Sidroe lamkawan ureuëng Arab, awaknyan laju jipeukém sira jihina kamoe. Jipeugah lé awaknyan, "Peue nyang keuneuk gata peubuet nyan? Peu kheueh gatanyoe keuneuk beurontak ateueh po raja?" 20 Ulôn jaweueb lagée nyoe, "Allah nyang mat kuasa lam syeuruga teuma geupeujeuet buet kamoe nyoe meuhase. Kamoe nyoe na kheueh hamba-hamba Gobnyan dan kamoe teuma kamoe peuphon peudong. Teuma gatanyoe hana hak ateueh atra peue mantong bahpi mubacut di Yerusalem. Dan meunyoe na ureuëng nyang mariet keuhai Yerusalem, nan gata hana teuma teu-teuôh-teuôh."

Nehemia 3

1 Nyoe kheueh laporan keuhai pakriban beuton banda Yerusalem nyan teureuhab. Teungku Imeum Rayeuk Elyasib dan rakan-rakan gobnyan geupeudong lom babah Pintoe Geureubang Bubiri, geupasang ôn-ôn pintoe dan geupeukhusos laju keu TUHAN. Awaknyan geupeugét dan geupeukhusos bintéh beuton sampoe trok ubak Menara Sireutoih dan lom sampoe ubak Meunara Hananeel. 2 Seulaén nibak teungku-teungku imeum nyan, awaknyoe reuhab bintéh beuton banda meunan cit deungon pintoe-pintoe geureubang dan meunara-meunara jihnyan lam urotan jih na kheueh lagéenyoe: Ureuëng-ureuëng Yerikho, Zakur bin Imri Kawöm Senaa: Pintoe Geureubang Uengkot deungon balok-balok jih, ôn-ôn pintoe, bawôt-bawôt dan palang-palang jih. Meremot aneuëk Uria dan cucoe Hakos. Mesulam bin Berekhya dan cucoe Mesezabeel. Zadok bin Baana Peunduduek banda Tekoa (bubena peumuka banda nyan hana jitem peubuet buet nyang gasa). Yoyada bin Paseah dan Mesulam bin Besoja: Pintoe Geureubang Yesyana deungon balok-balok, ôn-ôn pintoe, bawôt-bawôt dan palang-palang jih. Melaca di Gibeon dan Yadon nibak Meronot. Ureuëng-ureuëng Gibeon dan ureuëng-ureuëng Mizpa: bintéh beuton sampoe ubak meuligoe gubunur Efrat Barat. Uziel, sidroe lamkawan ureuëng nyang carông di pande méuh, aneuëk Harhaya. Hananya, sidroe lamkawan nyang carông nibak jipeugot minyéuk mangat bée; sampoe ubak bintéh Beuton Luwah. Refaya bin Hur, nyang mat kuasa ateueh na saboh sagoe Yerusalem. Yedaya bin Harumaf: bintéh beuton nyang tô deungon rumoh gobnyan keudroe. Hatus bin Hasabneya Malkia bin Harim dan Hasub bin Pahat-Moab: beuton nyang seulanjut jih dan Meunara Apui. Salum bin Halohes, nyang mat kuasa ateueh siteungoh sagoe Yerusalem, jibantu lé aneuëk-aneuëk gobnyan nyang inong. Hanum dan peunduduek Zanoah: Pintoe Geureubang Pantôn meusigoe deungon ôn-ôn pintoe jih, bawôt-bawôt dan palang-palang jih. Meunan cit deungon bintéh beuton nyang panyang jih na 440 metée sampoe trok ubak Pintoe Geureubang Blôh. Malkia bin Rekhab, nyang mat kuasa di sagoe atawa diestrek Bet-Kerem: Pintoe Geureubang Blôh deungon ôn-ôn pintoe jih, bawôt-bawôt dan palang-palang jih. Salum bin Kolhoze, nyang mat kuasa di sagoe atawa diestrek Mizpa: Pintoe Geureubang Mata Ié deungon bubong, ôn-ôn pintoe, bawôt-bawôt dan palang-palang jih. Meunan cit deungon beuton Kulam Selah nyang rab deungon keubon meuligoe sampoe trok ubak reunyeuen-reunyeuen nyang teutron nibak Banda Nabi Daud. Nehemia bin Azbuk, nyang mat kuasa disagoe atawa diestrek Bet-Zur: nibak bintéh beuton sampoe ubak jrat keuluwarga Nabi Daud, kulam nyang teukueh dan tangsi. 17 Napadub boh bagian bintéh beuton nyang seulanjut jih jipeudong lé ureuëng-ureuëng Lewi nyang na teupeugah dalam urotan nyoe: Rehum bin Bani Hasabya, nyang mat kuasa ateueh siteungoh nibak diestrek Kehila. Bagian beuton keu diestrek gobnyan keudroe. Binui bin Henadad, nyang mat kuasa ateueh siteungoh diestrek Kehila. Ezer bin Yesua, nyang mat kuasa ateueh Mizpa: beuton nibak sagoe jalan dikeue geudong sinjata. Barukh bin Zabai: beuton nibak sagoe jalan sampoe trok ubak rumoh Teungku Imeum Rayeuk Elyasib. Meremot bin Uria dan cucoe Hakos: bagian beuton nibak babah pintoe rumoh Elyasib sampoe trok u ujong rumoh nyan. 22 Napadub boh bagian bintéh beuton nyang teupeugah lom nyoe geupeugöt lé teungku-teungku imeum nyang na rhoh lam urotan nyoe: Teungku-teungku imeum nyang na tinggai hana padubna jiôh nibak Yerusalem. Benyamin dan Hasub: beuton nyang na dikeue rumoh awaknyan. Azarya bin Maaseya aneuëk Ananya: beuton nyang na rab rumoh gobnyan. Binui bin Henadad: bintéh beuton nibak rumoh Azariah sampoe ubak sagoe beuton. Palal bin Uzai: bintéh beuton nibak sagoe beuton dan meunara meuligoe bagian ateueh, rab binéh peulataran rumoh rondo. Pedaya bin Paros: bintéh beuton sampoe trok dikeue Pintoe Geureubang Ié disiblaih utimu dan meunara teumpat jaga Baét TUHAN. (Hana padubna jiôh nibak teumpat nyan na daerah nyang nan jih Ofel, teumpat tinggai ureuëng jakbuet di Baét TUHAN.) 27 Na meupadub bagian bintéh beuton nyang seulanjut jih jipeugot lé ureuëng-ureuëng nyang teupeugah lam lumboi urot lagéenyoe: Warga banda Tekoa: bintéh beuton dikeue meunara teumpat jaga Baét TUHAN sampoe ubak daerah Ofel. Teungku-teungku imeum nyang na tinggai bak binéh Pintoe Geureubang Guda: bintéh beuton nyang meuhadab keue deungon rumoh maséng-maséng nibak geureubang nyan sampoe u arah utara. Zadok bin Imer: bintéh beuton nyang meuhadab keue deungon rumoh gobnyan. Semaya bin Sekhanya, nyang jaga babah Pintoe Geureubang Timu: bintéh beuton nyang meuhadab keue deungon rumoh gobnyan. Hanaya bin Selemya dan Hanun aneuëk Zalaf nyang keunam. Mesulam bin Berekhya: bintéh beuton nyang meuhadab keue deungon rumoh gobnyan. Malkia, sidroe lamkawan pande peuget méuh: bintéh beuton nyang trok ubak asrama nyang meukeureuja di Baét TUHAN dan rumoh-rumoh ureuëng meukat dikeue babah Pintoe Geureubang Mifkad dan sampoe ubak binéh kama ateueh nibak sagoe siblaih u timu laôt. Bubena pande méuh dan ureuëng meukat: bagian bintéh beuton nyang keuneuleuh, phon nibak kama ateueh nibak sagoe beuton sampoe trok ubak Pintoe Geureubang Bubiri.

Nehemia 4

1 Watée jideungoe lé Sanbalat bahwa kamoe ureuëng Yahudi teungoh kamoe reuhab bintéh beuton banda, gobnyan beungéh lumpah na dan laju jipeuhina kamoe. 2 Dikeue rakan-rakan jihnyan dan sipa-i Samaria, jipeugah lagéenyoe, "Peue nyang hase jipeubuet lé ureuëng Yahudi paleh nyan nyang hana hase jipeubuet sapeue? Peu kheueh awaknyan jikeuneuk peudong lom banda nyoe? Jipike lé jihnyan buet nyan hase lam siuroe, teuma deungon jipeuseumah keureubeuen? Peu kheueh deungon sinamon blôh nyang ka hangöh nyan jeuet jipeujeuet keubatée-batée beuton?" 3 Laju Tobia nyang na jidong nibak binéh gobnyan jiseuôt teuma, "Kalon kheueh bintéh beuton nyang awaknyan peudong! Asée uteuen pih hase jipeureubah!" 4 Dan ulôn pi meudoá ubak Po teu Allah, "Ya Allah Po, neudeungoe kheueh pakriban kamoe nyoe jihina! Neubalaih kheueh hinaan nyan u ateueh ulée awaknyan keudroe. Bah kheueh peue mantong nyang na hareuta milék awaknyan jireupah dan awaknyan keudroe teuangkot sibagoe ureuëng nyang teuteuen u nanggroe aséng. 5 Bék neupeu amphon buet awaknyan nyang jeuhet dan bék teuma neutuwoe keu desya awaknyan, sabab awaknyan ka jihina kamoe nyang teungoh seumeugot nyoe." 6 Kamoe pih hana meupiôh laju kamoe peugét bintéh beuton nyan, dan hana padubna treb teuma óh lheuehnyan banmandum bintéh beuton nyan ka lheueh teupeugot sampoe na siteungoh manyang jih, sabab rakyat jimeubuet deungon peunoh seumangat. 7 Bak watée Sanbalat, Tobia dan ureuëng-ureuëng nibak Amon dan Asdod meunan cit deungon ureuëng-ureuëng Arab jideungoe bahwa awak nyang peugot bintéh beuton Yerusalem nyan ka meutamah maju dan meunan cit deungon ruhuéng-ruhuéng nyang na nibak bintéh beuton nyan ka lheueh teudoe, awaknyan pi jiteuka beungéh hana teukira. 8 Awaknyan ka jimupakat keuneuk jijak prang banda Yerusalem deungon tujuan mangat hase karu. 9 Lé sababnyan, kamoe laju meudoá ubak Allah kamoe dan teujaga banda nyan uroe ngon malam. 10 Teuma lé ureuëng Yehuda laju jimeu ca-e deungon ca-e nyang putôh asa dan lagée nyoe kheueh su ca-e nyan: "Teunaga geutanyoe habéh keu taba muatan, seudangkan blôh mantong that le meutamon. Hana hase rasa jih geutanyoe meubuet nyang lagéenyoe tapeudong beuton banda nyoe." 11 Teungoh watée nyang lagée nyan musoh kamoe ka jireuncana keu jijak prang kamoe deungon hana teusangka-sangka, laju jipoh maté kamoe mangat buet nyang teungoh kamoe peubuet tinggai teubeungkalée. 12 Teuma ureuëng Yahudi nyang na tinggai tô ngon awaknyan, hana piôh jijak bak kamoe jijak peugah reuncana musoh kamoe nyan. 13 Lé sabab nyan, di ulôn pih laju ulôn bagi-bagi peudeueng, kapak dan panah keu rakyat, dan laju ulôn peuduek awaknyan meunurot kawöm jih nyan maséng-maséng dilikot bintéh beuton, meunan cit di teumpat-teumpat nyang gohlom seuleusoe teupeugot. 14 Bak watée ulôn ngieng rakyat teumakot that, laju ulôn peugah ubak awaknyan dan ubak banmandum ureuëng patot-patot ngon peumimpén-peumimpén, "Bék teumakot keu musoh! Ingat kheueh ubak TUHAN nyang teuga dan peukasa, dan meujuang kheueh keu kawöm syedara gata, aneuëk miet, ureuëng binoe dan rumoh gata!" 15 Musoh-musoh kamoe jideungoe bahwa reuncana droe jih nyan ka kamoe teupeue. Dan sada kheueh awaknyan bahwa Po teu Allah ka geupeugagal reuncana awaknyan. Óh lheuehnyan kamoe meugisa lom ubak buet dan kamoe peugot sampoe seuleusoe kamoe bintéh beuton nyan. 16 Teuma yoh phon uroenyan cit siteungoh nibak aneuëk buah ulôn nyang na jimeubuet, seudangkan nyang siteungoh teuk meujaga-jaga deungon peukayan bajée prang deungon sinjata kapak, peurisai dan panah. Bubena peumimpén rakyat teubri dukongan nyang peunoh keu rakyat 17 nyang teungoh jipeugét bintéh beuton nyan. Lé ureuëng nyang gulam bahan bangunan jimeubuet buet jih nyan deungon jaroe siblaih, seudang jaroe siblaih teuk jimat sinjata. 18 Utoih batée jimeubuet deungon peudeueng teusangkot nibak keuieng. Nyang yueb beureuguih tanda bahya, hana jiwéeh nibak binéh ulôn. 19 Dan ulôn peugah laju ubak rakyat, ureuëng patot dan ubak dumna peumimpén lagée nyoe, "Buet geutanyoe nyoe ka luwah sampoe ka jiôh, dan geutanyoe ka meutabu-tabu nibak bintéh beuton nyoe, sidroe ureuëng ka jiôh deungon nyang laén. 20 Lé sababnyan, meunyoe gata tadeungoe su beureuguih, gata meusapat kheueh bubagaih di bansikeulileng kamoe nyoe. Allah geutanyoe teuma geumuprang keu geutanyoe." 21 Meunan kheueh cara jih kamoe meubuet phon suboh buta sampoe jiteubiet bintang dilangét manyang. Siladum nibak rakyat jijak peugot bintéh beuton, seudangkan nyang laén jimeujaga-jaga deungon kapak nibak jaroe. 22 Yoh phon watée nyan mandum peutugaih deungon bubena peumbantu jihnyan, ulôn yue mudom di Yerusalem. Deungon na lagée nyan meunyoe uroe ka malam kamoe ka hase kamoe jaga banda dan watée uroe kamoe peugot beuton jih. 23 Ulôn keudroe, meunan cit deungon rakan-rakan ulôn, aneuëk buah dan peungawai-peungawai ulôn sabe lam keuadaan meupeukayan keureuja, bah kheueh nyan uroe meunan cit malam. Kamoe hana piôh lam keuadaan siab siaga, deungon sinjata nibak jaroe.

Nehemia 5

1 Na padubna treb teuma óh lheueh nyan le that ureuëng Yahudi, bah ureuëng agam meunan cit ureuëng inong, awaknyan ka jipeuphon apoh apah keuhai ureuëng-ureuëng saboh bansa ngon jih. 2 Na nyang peugah, "Aneuëk ulôn jai that, kamoe peureulée that gandom mangat jeuet udeb." 3 Na lom nyang peugah, "Ulôn teupaksa lôn peugala ladang, lampôh anggô dan rumoh kamoe keungon kamoe bloe gandom mangat bék kamoe nyoe maté deuk." 4 Dan na lom nyang peugah, "Kamoe ka kamoe meu-utang péng mangat jeuet kamoe peulunaih cukée keu ladang dan lampôh anggô kamoe nyang ka geupeuteuntée lé raja. 5 Kamoenyoe kon kheueh ureuëng Yahudi cit? Kon kheueh aneuëk kamoe saban cit lagée aneuëk Yahudi nyang laén? Bahpi meunan kamoe teupaksa kamoe peubiyeu aneuëk-aneuëk kamoe jeuet keu namiet. Dan na aneuëk dara kamoe nyang teupeubloe jeuet keu namiet. Kamoe hana meudaya sabab ladang dan lampôh anggô kamoe ka kamoe peugala." 6 Watée lôn deungoe apoh apah awaknyan, ulôn beungéh lagoena 7 dan lôn cok keuputosan mangat jeuet lôn cok tendakan. Laju ulôn seugah bubena peumimpén rakyat dan ureuëng patot-patot. Laju ulôn kheun, "Gata nyoe ka tatindéeh syedara-syedara gata keudroe!" Óh lheuehnyan ulôn peuna rapat umum mangat jeuet lôn peubuet keuhai nyan, 8 dan ulôn peugah, "Deungon sihabéh teunaga tanyoe katateuboih syedara geutanyoe ureuëng Yahudi nyang teupaksa jipeubloe droe jih ubak bansa aséng. Teuma jinoenyoe gata tapaksa awaknyan mangat jipeubloe droe jih keu gata, padahai gata pih ureuëng Yahudi!" Bubena peumimpén nyan hana geujaweueb meusikrak haba pih. 9 Lheueh nyan lôn peugah lom, "Buet gata nyan hana gét! Nyang sibeuna jih gata udeb deungon na rasa teumakot ubak Po teu Allah. Deungon na lagée nyan musoh geutanyoe nyang hana meutuhan nyan hana gata bri watée keu jihina tanyoe. 10 Ulôn keudroe, syedara-syedara lôn dan rakan-rakan lôn ka jimeu-utang péng dan gandom ubak rakyat. Kamoe hana kamoe lakée atra nyan lom teuma. 11 Bah kheueh gata pi gata sampôh bubena utang-utang rakyat nyang na nibak gata, bahnyan péng meunan cit gandom, meunan cit anggô dan minyéuk zaiton. Gata pulang kheueh laju jinoenyoe cit teuma bahnyan ladang, lampôh anggô, lampôh zaiton dan rumoh awaknyan!" 12 Lé peumimpén nyan geujaweueb, "Naseuhat nyan kamoe deungoe dan kamoe seutôt. Kamoe pulang atra awaknyan banmandum dan hana kamoe lakée beujibayeue lé awaknyan." Lheueh nyan laju ulôn hôi teungku-teungku imeum dan lôn yue meusumpah peumimpén-peumimpén nyan dikeue teungku-teungku imeum nyan, bahwa peue nyang ka awaknyan peugah nyan, bit-bit beujipeubuet. 13 Lheuehnyan ulôn ploh ija seulempang nyang na nibak keuieng lôn dan laju ulôn pôt sira lôn peugah, "Meunoe kheueh jeuet jih Po teu Allah geupôt keu tieb-tieb ureuëng nyang hana jipeuteupat janji jih. Ureuëng nyan teuma rhot meularat, rumoh dan banmandum atra beunda jih teuma geucok lé Po teu Allah!" Banmandum sidang nyang na nibak meusapat nyan jijaweueb, "Amin!" lheueh nyan laju jipujoe TUHAN. Dan deungon nyan teuma dumna peumimpén nyan jipeutrok janji jih. 14 Ulôn ka jeuet keu gubunur Yehuda 12 thon treb jih, phon nibak thon nyang keu dua ploh sampoe ubak thon lhée ploh dua lam keurajeuen Raja Artahsasta. Sidubnyan treb ulôn dan syedara-syedara lôn hántom na ulôn cok tunjangan ulôn sibagoe gubunur. 15 Gubunur-gubunur sigohlom ulôn, ka jeuet keu beuban nibak rakyat sabab awaknyan jilakée 40 péng pirak siuroe keu peunajoh dan anggô. Dan peugawée-peugawée awaknyan pih jiteugon rakyat. Teuma ulôn hana lôn peubuet nyang lagéenyan bagoe sabab ulôn teumakot keu Po teu Allah. 16 Banmandum teunaga ulôn, lôn peusaho mandum keu teupeudong lom bintéh beuton dan ulôn hana meuteumé tanoh meubacut pih sibagoe hase reuôh lôn, bahpi mandum peumbantu lôn meusajan-sajan jimeubuet nibak teupeudong beuton nyan. 17 Sireutoh limong ploh droe Yahudi dan bubena ureuëng-ureuëng patot awaknyan lôn peujamé jimakheun malam nibak rumoh lôn, gohlom teuitong jamé-jamé nibak bansa teutangga kamoe. 18 Tieb-tieb uroe ulôn keubah ateueh biaya lôn keudroe saboh leumô, nam boh bubiri nyang teumbon dan le that-that manôk nyang hana teukira. Disampeng nyan, tieb-tieb siploh uroe ulôn peuleungkab keuneubah ié anggô lôn. Bahpi ka meunan ulôn hana lôn lakée tujangan jabatan lôn sibagoe gubunur, sabab ulôn kuteupeue beuban rakyat ka geuhon that-that. 19 Ulôn meulakée ya Po teu Allah, ingat kheueh banmandum nyang ka ulôn peubuet keu bansa nyoe dan neubri kheueh beureukat keu ulôn nyoe.

Nehemia 6

1 Sanbalat, Tobia, Gesyem dan musoh-musoh kamoe nyang laén jideungoe bahwa kamoe karab seuleusoe kamoe peugét bintéh beuton, meunan seuleusoe banmandum ruhuéng-ruhuéng nyang na nibak beuton nyan kamoe sumpai, bahpi watée nyan kamoe gohlom seuleusoe kamoe pasang ôn-ôn pintoe nibak pintoe-pintoe geureubang banda. 2 Laju Sanbalat dan Gesyem jikirém undangan keu ulôn mangat ulôn teuka jakmeurumpok deungon gobnyan di saboh gampông di Pantôn Ono. Teuma hainyan ulôn teupeue bahwa awaknyan jikeuneuk peuceulaka ulôn. 3 Lé sabab nyan laju ulôn kirém jeunaweueb haba nyang lagéenyoe keu awaknyan, "Ulôn hana hase lôn teuka sabab teungoh ulôn keureuja buet nyang paleng peunteng. Buet ulôn nyan teuma teulanta meunyoe ulôn jak meurumpok deungon gata." 4 Sampoe trok peuet goe awaknyan jikirém surat undangan nyang saban keu ulôn, dan tieb-tieb goe teuma ulôn kirém jeunaweueb nyang saban keu awaknyan. 5 Watée nyang keulimong sidroe lamkawan aneuëk buah Sanbalat jijak dan jibri laju surat teubuka ubak ulôn 6 nyang asoe jih na kheueh lagéenyoe: "Gesyem ka jipeubeutôi bahwa na haba meusáh-sáh lamkawan bansa-bansa nyang na tô-tô bansikeulileng nyoe, nyang jipeugah bahwa Gata dan ureuëng Yahudi nyang laén ka jireuncana jikeuneuk beurontak, dan nyan kheueh sabab jih Gata tapeugot lom bintéh beuton nyan. Dan jipeugah lom lé jihnyan bahwa Gata keuneuk baiát droe jeuet keuraja Yehuda, 7 dan ka tatunyok napadub droe nabi keugeubaiát Gata jeuet keuraja di Yerusalem. Haba meusáh-sáh nyan ka pasti trok ubak raja. Sabab nyan, tateuka kheueh mangat tajak meurôk pakat keuhai nyan." 8 Teuma ulôn laju lôn kirém haba dan lôn jaweueb lagéenyoe, "Banmandum nyang Gata peugah nyan na kheueh haba sulet dan nariet nyan Gata atoe-atoe keudroe." 9 Awaknyan jicuba jipeutakot-takot kamoe mangat kamoe piôh meubuet nyang teungoh kamoe peubuet nyan. Ulôn laju meudoá, "Ya Allah, neupeu teuga kheueh ulôn!" 10 Bak watée nyan cit teuma, di ulôn laju ulônjak u rumoh Semaya bin Delaya dan cucoe Mehetabeel, sabab gobnyan hana watée geujak ubak ulôn. Geupeugah lé gobnyan lagée nyoe, "Jak geutanyoe dua tajak musöm u Baét TUHAN . Tagunci banmandum pintoe jih, sabab na ureuëng nyang jikeuneuk poh maté gata. Mungken nibak malam nyoe gata teuma jipoh maté." 11 Teuma ulôn jaweueb lagéenyoe, "Ulôn nyoe kon ureuëng gusuen, dan bukon ureuëng galak jipeuplueng droe peulom teujak musöm. Sibagoe ureuëng biasa ulôn hana jeuet ulôn tamong u dalam Baét TUHAN, teuma ulôn hase maté. Hana jeuet, ulôn hana lôntem!" 12 Óh ka lheueh ulôn timang-timang hainyan, barô kheueh ulôn sada bahwa peue nyang jipakat lé Semaya nyan kon teuka nibak Po teu Allah, teuma teuka nibak Tobia dan Sanbalat. Awaknyan bandua ka jisugok Semaya mangat jijak peusampoe nubuat nyan ubak ulôn. 13 Meukeusut awaknyan na kheueh mangat ulôn takot dan ulôn seutôt peue nyang jipeugah lé awaknyan sampoe ulôn peubuet desya. Deungon lagée nyan awaknyan ka meuteumé watée keu jipeubrok nan ulôn mangat ulôn jeuet keuboh bibi rakyat ba. 14 Ulôn meudoá ubak Po teu Allah, "Ya Allah Po, neuingat kheueh peue nyang ka jipeubuet lé Tobia dan Sanbalat nyan. Neu Huköm kheueh awaknyan! Meunan cit deungon nabiah nyang nan jih Noaja dan nabi-nabi nyang laén nyang jikeuneuk peutakot-takot ulôn." 15 Bintéh beuton nyang teupeuget nyan jipajoh watée sampoe 52 uroe, dan seuleusoe bak tanggai dua ploh limong buleuen Elul. 16 Yoh watée musoh-musoh kamoe lamkawan bansa nyang na bak binéh kamoe jideungoe hainyan, awaknyan jitakot gadôh iémuka, sabab banmandum ureuëng jiteupeue bahwa buet nyang teupeuget nyan na kheueh geutulông lé Po teu Allah. 17 Teungoh lagéenyan bubena peumimpén Yahudi mantong cit jipeugot surat sumurat deungon Tobia. 18 Jai that-that ureuëng Yahudi nyang meurakan deungon Tobia, sabab jih nyan meulintée Sekhanya bin Arah. Lom teuma Yohanan aneuëk Tobia, jimeukawen deungon aneuëk inong Mesulam aneuëk Berekhya. 19 Bahpi Tobia hana putôh-putôh jituléh surat ubak ulôn keu jipeutakot-takot ulôn, teuma bubena peumimpén Yahudi nyan jikheun-kheun dikeue ulôn mandum nyang gét-gét keu Tobia nyan. Teuma, banmandum nyang ulôn peugah, jijak peutrok ubak Tobia.

Nehemia 7

1 Óh ka seuleusoe bintéh beuton nyan teupeugot, laju ulôn yue mangat ôn-ôn pintoe jih teupasang. Laju lé ureuëng-ureuëng nyang jaga babah pintoe geureubang, ureuëng meu ca-e dan ureuëng-ureuëng Lewi ulôn yue teuma nibak tugaih gobnyan maséng-maséng. 2 Nyang mat peurintah ateueh banda Yerusalem ulôn seurah ubak syedara ulôn Hanani dan ubak Hananya, panglima kuta, sabab gobnyan leubeh nibak ureuëng laén, jitakot ubak TUHAN dan jeuet teupeucaya. 3 Ulôn kheun ubak awaknyan, "Pintoe geureubang Yerusalem barô jeuet teupeuhah meunyoe uroe ka beungoh dan harôh jeuet teutôb dan teupasang palang jih meunyoe ureuëng nyang keumiet seuleusoe tugaih watée seupôt nyan. Seulaén nibak nyan harôh teuma teutunyok ureuëng nyang keumiet nyang laén lamkawan peunduduek Yerusalem, siladum mangat jitinggai nibak rumoh jaga dan siladum teuk keu jikeulileng lamkawan rumoh awaknyan." 4 Yerusalem na kheueh banda nyang luwah teuma peunduduek jih cit bacut, dan gohlom le rumoh nyang ka teupeugot. 5 Lé sabab nyan Allah ka geubri ilham keu ulôn mangat lôn gumpôi rakyat dan bubena peumimpén meunan cit deungon peumuka-peumuka jih, mangat ulôn hase lôn itong awaknyan deungon dasai dafeutar silsilah awaknyan. Nibak keuseumpatan nyan ka ulôn teumé cetetan keuhai ureuëng nyang phon-phon that jiwoe nibak teumpat nyang teuböih. Lheueh nyan nyoe kheueh keuteurangan nyang ulôn teumé nibak catetan nyan: 6 Le lumpah na lamkawan ureuëng-ureuëng nyang teuböih jitinggai propinsi Babel dan jiwoe u Yerusalem dan Yehuda, maséng-maséng u banda jih keudroe. Awaknyan ka treb that udeb di teumpat nyang teuböih, di Babel, yoh phon awaknyan geuangkot keudeh lé Raja Nebukadnezar. 7 Peumimpén-peumimpén awaknyan na kheueh Zerubabel, Yesua, Nehemia, Azarya, Raamya, Nahamani, Mordekhai, Bilsan, Misperet, Bigwai, Nehum dan Baana. 8 Nyoe kheueh nan-nan dafeutar kawöm keuluwarga Israel, deungon jeumeulah ureuëng nibak tieb-tieb kawöm nyang jiwoe nibak teumpat nyang teuböih: Paros & -- & Sefaca & -- & Arakh & -- & Pahat-Moab (keuturonan Yesua dan Yoab) & -- & Elam & -- & Zatu & -- & Zakai & -- & Binui & -- & Bebai & -- & Azgad & -- & Adonikam & -- & Bigwai & -- & Adin & -- & Ater (na cit teuhôi Hizkia) & -- & Hasum & -- & Bezai & -- & Harif & -- & Gibeon & -- & 26 Ureuëng-ureuëng nyang indatu jihnyan tinggai di banda-banda nyang teupeugah lom nyoe meunan cit awaknyan ka jiwoe nibak teumpat nyang teuböih: Banda Betlehem dan Netofa & -- & Anatot & -- & Bet-Azmawet & -- & Kiryat-Yearim, Kefira dan Beerot & -- & Rama dan Gaba & -- & Mikhmas & -- & Betel dan Ai & -- & Nebo nyang laén & -- & Elam nyang laén & -- & Harim & -- & Yerikho & -- & Lod, Hadid dan Ono & -- & Senaa & -- & 39 Nyoe kheueh dafeutar kawöm keuluwarga teungku-teungku imeum nyang geuwoe nibak teumpat nyang teuböih: Yedaya (keuturonan Yesua) & -- & Imer & -- & Pasyhur & -- & Harim & -- & 43 Kawöm keuluwarga Lewi nyang geuwoe nibak teumpat nyang teuböih na kheueh: Yesua dan Kadmiel (keuturonan Hodewa) & -- & Nyang peumeuén musik di Baét TUHAN Nyang jaga babah pintoe geureubang di Baét TUHAN 46 Nyoe kheueh dafeutar kawöm keuluwarga nyang jijak buet di Baét TUHAN nyang jiwoe nibak teumpat nyang teuböih: Ziha, Hasufa, Tabaot, Keros, Sia, Padon, Lebana, Hagaba, Salmai, Hanan, Gidel, Gahar, Reaya, Rezin, Nekoda, Gazam, Uza, Paseah, Besai, Meunim, Nefusim, Bakbuk, Hakufa, Harhur, Bazlit, Mehida, Harsa, Barkos, Sisera, Temah, Neziah dan Hatifa. 57 Kawöm keuluwarga peulayan Nabi Sulaiman nyang geuwoe nibak teumpat nyang teuböih na kheueh: Sotai, Soferet, Perida, Yaala, Darkon, Gidel, Sefaca, Hatil, Pokheret-Hazebaim, Amon. 60 Jeumeulah banmandum keuturonan nyang jijak buet di Baét TUHAN dan peulayan Nabi Sulaiman nyang jiwoe nibak teumpat nyang teuböih na kheueh 392 droe. 61 Lamkawan ureuëng-ureuëng nyang beurangkat nibak banda-banda Tel-Melah, Tel-Harsa, Kerub, Adon dan Imer, na 642 droe nyang jitamong cit keunan kawöm Delaya, Tobia dan Nekoda; teuma awaknyan hana hase jijok bukeuti bahwa awaknyan na kheueh keuturonan Israel. 63 Meunan teuma lé teungku-teungku imeum hana cit jiteumé catetan keuhai indatu awaknyan. Kawöm-kawöm nyan na kheueh Habaya, Hakos dan Barzilai. (Sidroe lamkawan kawöm indatu nibak kawöm Barzilai jimeukawen deungon inong keuturonan kawöm Barzilai di Gilead dan óh lheuehnyan gobnyan jingui nan keuluwarga tuwan jihnyan.) Sabab awaknyan hana hase jijok bukeuti soe indatu gobnyan, teuma awaknyan hana jiteurimong sibagoe teungku imeum. 65 Gubunur daerah Yehuda jitam awaknyan bék jipajoh peunajoh nyang teupeuseumah keu Po teu Allah, sampoe na sidroe teungku imeum nyang hase jibri peutunyok deungon cara teungui Urim dan Tumim. 66 Ureuëng-ureuëng nyang teuböih nyang ka jiwoe u nanggroe gobnyan banmandum jeumeulah jih na 42.360 droe. Seulaén nibak nyan na cit peumbantu awaknyan deungon jeumeulah 7.337 droe dan ureuëng meunyanyoe na teuma jeumeulah jih 245 droe. Dan awaknyan na teuma jiba sajan beulatang-beulatang peulara, di lamkawan jih: Guda & -- & Bagal & -- & Unta & -- & Keuleudée & -- & 70 Ramé that lamkawan rakyat nyang jibri sumbangan keu biaya teureuhab Baét TUHAN: nibak Gubunur & -- & nibak ulée kawöm & -- & nibak ureuëng-ureuëng laén: & -- & 73 Bubena teungku imeum, ureuëng-ureuëng Lewi, dan ureuëng nyang jaga babah pintoe geureubang Baét TUHAN, ureuëng meuca-e, le nibak rakyat biasa, ureuëng nyang meubuet di Baét TUHAN, paneuk haba banmandum rakyat Israel, katinggai teutab di banda-banda dan gampông-gampông di Yehuda.

Nehemia 8

1 Bak buleuen nyang keutujoh ureuëng Israel ka tinggai teutab di banda jih maséng-maséng. Bak tanggai sa buleuen nyan awaknyan banmandum meugumpôi di Yerusalem, di leuen bagian keue Pintoe Geureubang Ié. Awaknyan jilakée mangat jeuet Kitab Huköm geujak cok lé Teungku Imeum Ezra, sidroe ureuëng malem lam hai Huköm nyang geubri lé TUHAN keu Israel meulalu Nabi Musa. 2 Laju lé Ezra geuba kitab nyan ukeue jeumaáh nyang kana disinan, jeumaáh nyan na kheueh ureuëng agam, ureuëng inong dan aneuëk miet nyang katrok umu keuhase jipuphom. 3 Óh lheueh nyan, phon beungoh sampoe trok án cot uroe, Ezra geubeuet Huköm nyan keu jeumaáh nyan, dan sidang jeumaáh pih ék jideungoe deungon peunoh peuratian. 4 Ezra geudong di ateueh peudium kayée nyang ka teuseudia keu acara nyan. Nibak blaih uneuen gobnyan jidong ureuëng-ureuëng nyang teupeugah nyoe: Matica, Sema, Anaya, Uria, Hilkia dan Maaseya; teuma nyang dong blaih wie gobnyan na kheueh: Pedaya, Misael, Malkia, Hasum, Hasbadana, Zakharia dan Mesulam. 5 Peudium teumpat geudong Ezra nyan leubeh manyang nibak ureuëng-ureuëng nyang na disinan, sampoe awaknyan banmandum hase jingieng ateueh Ezra. Hana treb óh ka lheueh geusalob kitab nyan lé Ezra, awaknyan banmandum jidong. 6 Laju geupeugah lé Ezra, "Pujoe kheueh TUHAN, Allah nyang rayeuk!" Banmandum rakyat laju jibeuôt jaroe jih manyang-manyang sira jijaweueb, "Amin, amin!" Laju awaknyan sujut jiseumah Po teu Allah. 7 Óh lheuehnyan di ureuëng ramé nyan laju jibeudôh sira jidong di teumpat droe jih maséng-maséng, dan lé siladum ureuëng Lewi nyang na disinan laju jipeutrang banmandum Huköm nyan ubak awaknyan. Nan-nan ureuëng Lewi nyan na kheueh: Yesua, Bani, Serebya, Yamin, Akub, Sabetai, Hodia, Maaseya, Kelita, Azarya, Yozabad, Hanan, dan Pelaya. 8 Awaknyan jiteujeumah Huköm Allah nyan nibak bagian deumi bagian sira jipeutrang sampoe rakyat hase jipuphom beuet nyan. 9 Watée jideungoe teubeuet Huköm, bubena rakyat teuharu sira jimo. Dan gubunur Nehemia dan Teungku Imeum Ezra nyang malem that nibak Huköm nyan, meunan cit deungon ureuëng-ureuëng Lewi nyang ka jipeutrang keuhai Huköm nyan, jipeugah laju ubak mandum rakyat lagéenyoe, "Uroe nyoe na kheueh uroe nyang khusos keu TUHAN, Allah gata, sababnyan bék kheueh gata seudeh atawa tamo. 10 Jinoenyoe tajak woe kheueh u rumoh gata maséng-maséng; tamakheun dan tajieb kheueh ié deungon mangat dan geumbira. Tajok kheueh siladum nibak peunajoh dan anggô gatanyan keu ureuëng nyang bit-bit peureulée. Uroe nyoe na kheueh uroe nyang khusos keu TUHAN, Allah geutanyoe, jadi, bék kheueh gata peususah até. Geumbira nyang geujok lé TUHAN keu gata nyan na kheueh mangat teupeuteuga gata." 11 Meunan cit deungon ureuëng-ureuëng Lewi carông that bak geucok até rakyat sira jipeugah meu-ulang-ulang lagée nyoe, "Bék ragoe até gata nibak uroe nyang khusos nyoe." 12 Dan jiwoe kheueh banmandum rakyat nyang na jijak keunan, óh trok u rumoh laju jimakheun ngon jijieb ié sira jibagi-bagi peunajoh keu ureuëng laén. Awaknyan banmandum galak ngon seunang até sabab ka jituóh puphom banmandum tafeuse nyang ka lheueh jibeuet nyan. 13 Óh singoh beungoh meusapat kheueh banmandum ulée-ulée kawöm, teungku-teungku imeum dan ureuëng-ureuëng Lewi, óh ka meusapat laju jijak ubak Ezra keuneuk jak tanyong deungon purunoe keuhai Huköm TUHAN. 14 Awaknyan na meuteumé bahwa lam Huköm nyang ka geubri lé TUHAN meulalu Nabi Musa, TUHAN geuyue umat Israel mangat jiduek lam jambo-jambo darurat sigohlom habéh Khanuri Jambo Ôn nyan. 15 Lé sabab nyan, bansaboh Yerusalem bah kheueh nyan di banda-banda meunan cit di gampông-gampông, awaknyan laju ji peumaklum peurintah nyoe, "Tajak kheueh laju u ateueh gunong tacok laju cabeueng-cabeueng kayée bak sala, bak zaiton, bak minyéuk, palma dan bak kayée nyang laén mangat teupeugot jambo nyang sisuai deungon peuratoran nyang na teutuléh lam Kitab Huköm." 16 Ban jideungoe peurintah nyang lagée nyan di rakyat pih laju jijak teungoh u ateueh gunong jijak koih bak kayée nyang teupeugah nyan. Awaknyan banmandum jipeudong jambo nyang bubong jih data di ateueh rumoh jih, nibak leuen rumoh droe jih, nibak leuen Baét TUHAN, nibak padang nyang rab deungon Pintoe Geureubang Ié dan nibak padang Pintoe Geureubang Efraim. 17 Banmandum rakyat nyang ka jiwoe nibak teumpat nyang teuböih nyan hana nyang tinggai banmandum jipeudong jambo-jambo darurat nyan dan jiduek disinan. Nyang kheueh phon that jipeubuet yohphon jamén Yosua bin Nun, dan banmandum awaknyan galak ngon mubahgia. 18 Na tujoh uroe treb jih teupeuna khanuri nyan. Tieb-tieb uroe bagian deumi bagian nyang na teutuléh lam Kitab Huköm Allah nyan geupeubeuet lé Ezra. Bak uroe nyang keulapan laju geutôb acara nyan, nyang paih deungon peuratoran Huköm.

Nehemia 9

1 Bak tanggai dua ploh peuet buleuen nyan cit teuma, rakyat Israel laju meugumpôi. Awaknyan laju geupuasa keu sibagoe tanda ka meunyeusai ateueh desya-desya nyang na nibak gobnyan. Awaknyan geupeu aséng droe nibak banmandum ureuëng aséng. Sibagoe tanda seudeh até, awaknyan geungui ija karong dan di ateueh ulée laju geutabu tanoh. Óh lheuehnyan awaknyan geudong dan geumeungaku banmandum desya nyang na nibak gobnyan dan desya nék indatu awaknyan. 3 Na kira-kira lhée jeuem, kitab Huköm TUHAN, Allah droe geuh nyan, geupeubeuet lé Ezra ubak awaknyan, dan na lhée jeuem seulanjut jih awaknyan geumeungaku ubak desya-desya droe gobnyan maséng-maséng. Óh ka lheuehnyan awaknyan laju geusujut geuseumah TUHAN, Allah. 4 Disinan na peudium keu ureuëng Lewi dan di ateueh peudium nyan geudong kheueh Yesua, Bani, Kadmiel, Sebanya, Buni, Serebya, Bani dan Kenani. Deungon su nyang meuleungkeueng awaknyan laju geumeudoá ubak TUHAN, Allah awaknyan. 5 Iébadat bak uroenyoe geupeuphon lé ureuëng-ureuëng Lewi nyang teupeugah seulanjut jihnyoe: Yesua, Kadmiel, Bani, Hasabneya, Serebya, Hodia, Sebanya dan Petahya. Awaknyan geupeugah lagéenyoe, "Neudong kheueh dan neupujoe kheueh TUHAN Allah geutanyoe! Pujoe kheueh Gobnyan siumu masa! Teupujoe kheueh nan Gobnyan nyang peunoh keumuliaan, nan nyang meusyeuhu, leubeh nibak sigala nyang teupujoe!" 6 Óh lheuehnyan rakyat Israel laju geumeudoá lagée nyoe, "Droeneueh kheueh TUHAN, ya TUHAN, Droeneueh kheueh Nyang Mahaesa; Droeneueh nyang peujeuet bintang dan banmandum angkasa raya, meunan cit deungon laôt dan bumoe dan peue mantong asoe jih, laju TUHAN bri udeb dan TUHAN peulara. Ubak Droeneueh peue mantong nyang mat kuasa di ateueh langét jiseumah sujut; awaknyan jitundok ubak Droeneueh sira meuteuôt. 7 Droeneueh kheueh TUHAN Allah, nyang Mahaesa. TUHAN piléh Nabi Ibrahim di teungoh-teungoh bansa gobnyan. Ur nyang na di Babel ka geutinggai, kareuna Droeneueh keudroe nyang pimpén gobnyan. Laju TUHAN bri ubak gobnyan nan nyang barô: Nabi Ibrahim, nyan kheueh nan gobnyan nyang TUHAN boh seujak yohnyan. 8 TUHAN kalon gobnyan nyang seutia ubak Droeneueh dan patuh. Laju TUHAN meujanji ngon gobnyan saboh janji nyang teugoih. Tanoh Kanaan, Het dan Amori, tanoh Feris, Yebus dan Girgasi, banmandum nyan keuneuk TUHAN jok ubak gobnyan; sibagoe teumpat tinggai banmandum keuturonan gobnyan. Óh lheuehnyan TUHAN peupeunoh, janji Droeneueh nyan ubak gobnyan, sabab Droeneueh ade dan seutia. 9 TUHAN ka neukalon indatu kamoe nyang udeb meularat yoh masa dilée; TUHAN ka neudeungoe indatu kamoe geumo bah kheueh nyan yoh di nanggroe Meusé meunan di Laôt Teberau. 10 Teuhadab raja di nanggroe Meusé ka TUHAN peubuet hai-hai nyang luwa biasa, meunan cit teuhadab peugawée dan rakyat nanggroe nyan, sabab TUHAN neuteupeue pakriban umat Droeneueh jipeusakét. Dan meusyeuhu kheueh nan Droeneueh sampoe nibak uroe nyoe. 11 Keu neupeugöt rét ueh keu umat Droeneueh, laôt TUHAN plaih; TUHAN peujeumeurang awaknyan rét lam laôt nyang tan basah. Ureuëng nyang let ka karam dalam laôt nyang lhok, lagée batée nyang karam lham laôt nyang seuram. 12 Deungon saboh awan nyang meugantueng TUHAN pimpén awaknyan meunyoe watée uroe. Dan meunyoe ka malam rét awaknyan TUHAN peutrang deungon taméh meu apui. 13 Nibak langét TUHAN peutron u ateueh Gunong Sinai, laju Droeneueh peugah haba deungon umat Droeneueh keudroe. TUHAN bri huköm, atoran dan peurintah nyang ade, beuna dan meufaidah. 14 Uroe Sabat nyang suci harôh jipeuraya, dan meulalu Nabi Musa huköm TUHAN bri. 15 Bak watée awaknyan deuk dan kureueng peunajoh, ruti nibak langét TUHAN peutron. Dan nibak batée nyang padeék, teuga ngon kreueh ié keu peupuleuh glaih TUHAN peuteuka. TUHAN yue awaknyan duek di ateueh tanoh nyang TUHAN peujanji ubak awaknyan deungon sumpah. 16 Teuma indatu kamoe sombong ngon manyang até; peurintah-peurintah Droeneueh hana geutaáti. 17 Awaknyan hana patuh, sigala nyang jroh nyang TUHAN bri ka geupeutuwo, dan banmandum buet nyang ajaéb nyang ka TUHAN peubuet ka gadôh dalam ingatan. Deungon até nyang sombong laju geupiléh sidroe keutua, keu geuba awaknyan u nanggroe Meusé, mangat jeuet keunamiet keula-i. Teuma Droeneueh ya Allah nyang teutab neupeumeuáh, panyang saba, murah até dan peunoh geunaséh. Geunaséh TUHAN keubit luwabiasa; TUHAN tan neutinggai awaknyan. 18 Awaknyan geupeugöt patong beurala nyang saban ngon leumô, laju awaknyan geupeugah, 'Nyoe kheueh Allah gata, nyang ka geuba gata nibak nanggroe Meusé, nibak peubudakan.' Ya Allah, Droeneueh keudroe nyang jipeuhina! 19 Teuma di guron nyan awaknyan hana cit TUHAN tinggai, kareuna Droeneueh nyang peunoh gaséh sayang. Taméh awan dan apui hana TUHAN tarek keula-i, peutunyok jalan awaknyan meunyoe uroe dan óh malam teuma. 20 Deungon kuasa Droeneueh nyang jroh TUHAN peurunoe awaknyan. Awaknyan geumakheun manna dan ié meuneujieb nyang sicukob jih. 21 Na peuet ploh thon dalam padang beulantara, teuma TUHAN teutab neupeuseb peue nyang jipeureulée. Peukayan awaknyan hantom na rusak, gaki awaknyan hana teuma sakét dan luka. 22 TUHAN bri ubak awaknyan keumeunangan nyang hibat ateueh keurajeuen nyang le dan bansa nibak bataih tanoh awaknyan. Hesybon nanggroe Raja Sihon, awaknyan kuasa; Basan nanggroe Raja Og, awaknyan reupah teuma. 23 TUHAN peujeuet keuturonan awaknyan lagée bintang nyang meutabu di langét ijo. TUHAN bri keu awaknyan tanoh keu teumpat tinggai, tanoh nyang ka TUHAN peujanji ubak indatu awaknyan. 24 Keuturonan awaknyan jipeusalah tanoh Kanaan; peunduduek disinan Droeneueh peutaloe. Umat Droeneueh neubri kuasa jimeutindak banalak droe teuhadab bansa-bansa Kanaan ngon raja teuma. 25 Umat Droeneueh geureubot kuta-kuta peutahanan tanoh nyang suboe ngon rumoh nyang peunoh keukayaan. Mon-mon dan mata-mata ié awaknyan reubot, lampôh anggô, bak zaiton dan boh-boh kayée nyang laén teuma. Awaknyan teumbon kareuna geupajoh peue nyang galak. Sigala nyang TUHAN bri nyang jroh-jroh awaknyan reusapi. 26 Teuma umat Droeneueh jibeurontak han jitaát ubak TUHAN, jipeubeuah huköm dan peurintah Droeneueh, jipoh maté nabi-nabi nyang bri naseuhat ubak awaknyan, dan nyang yue awaknyan jigisa ubak Droeneueh, Allah awaknyan. Ya TUHAN, tieb-tieb watée teuma Droeneueh jihina lé awaknyan, 27 teuma TUHAN seurah awaknyan ubak musoh droe nyang lumpah that keujam jikuasa ngon jitindéeh. Teuma dalam keususahan nyang cukob brat nyan, awaknyan laju jimeuhôi ubak Droeneueh jilakée bantu. Nibak dalam syeuruga TUHAN neudeungoe awaknyan; deungon peunoh geunaséh TUHAN neubri jaweueb. TUHAN kirém peumimpén dan pahlawan nyang peuleupah awaknyan nibak lawan. 28 Teuma bak watée nanggroe droe geuh ka aman lom, awaknyan hana jitakot jipeubuet desya keula-i. Teuma TUHAN bri teuma awaknyan ubak siteuru nyang tindéeh droe geuh deungon keujam. Teuma, bakwatée awaknyan ka insaf dan peunoh peunyeusalan, awaknyan jimeuhôi Droeneueh mangat neupeuseulamat. Teuma nibak dalam syeuruga TUHAN neudeungoe, dan TUHAN tulông meu ulang-ulang, sabab TUHAN neu weueh ubak awaknyan peunoh gaséh sayang. 29 TUHAN sapa awaknyan mangat ajaran Droeneueh jitem seutôt, teuma awaknyan jitulak huköm Droeneueh deungon deungki até. Padahai, meunyoe huköm Droeneueh jitem seutôt, pasti teuma teujamin dalam udeb. Awaknyan cukob kreueh ulée meunan cit deungon até bak lagée baja, hana jitem deungoe, dan hana teuma jitem taát ubak peurintah Droeneueh. 30 Habéh thon meugantoe thon deungon saba TUHAN teutab neupeu ingat ubak awaknyan; meulalu nabi-nabi, Roh Droeneueh neupeugah ubak awaknyan. Teuma umat Droeneueh nyan jitôb geulinyueng, laju TUHAN seurah awaknyan ubak bansa-bansa di seugala nanggroe. 31 Teuma kareuna geunaséh Droeneueh nyang raya hana teukira, awaknyan teutab hana TUHAN tinggai atawa TUHAN peuhanco. Meumang, Droeneueh kheueh TUHAN Allah nyang hana sa dalam álam nyoe; raya geunaséh Droeneueh, peunoh deungon seutia! 32 Ya Allah, Allah Po kamoe nyang paleng raya! Po teu Allah nyang akbar dan dahsyat lagoena! Deungon peunoh seutia TUHAN mumat ubak banmandum janji; janji TUHAN neupeupeunoh dan TUHAN laksana. Seumeunjak jamén raja Asyur jitindéeh kamoe sampoe nibak saát nyoe, lumpah that le deurita nyang kamoe álami. Dumna raja kamoe, teungku imeum, nabi dan dumna ureuëng patot, meunan cit deungon indatu dan rakyat, ka habéh meudeurita banmandum. Bék neutuwoe ubak banmandum deurita nyan! Bék kheueh teuma TUHAN peugadôh dalam ingatan Droeneueh! 33 Tindakan TUHAN ade, dan TUHAN huköm kamoe nyang meudesya; TUHAN teutab seutia bah pih kamoe ka peunoh deungon cela. 34 Nék indatu kamoe, raja, teungku imeum dan dumna ureuëng patot atawa peumuka, geulanggéuh ubak huköm Droeneueh dan geupeujayéh teuma. Peue mantong peurintah dan larangan nyang ka TUHAN bri, mubacut pih hana geupeuduli, dan meubacut hana geutem deungoe. 35 TUHAN bri dumna raja nyang mat keurajeuen ateueh umat Droeneueh, bak watée awaknyan tinggai di ateueh tanoh nyang luwah dan suboe nyang ka TUHAN bri. Teuma, awaknyan teutab hana geutem tinggai buet-buet nyang jeuhet, han geutem meungabdi ubak Droeneueh meunan cit deungon iébadat. 36 Teuma jinoenyoe, kamoe banmandum ka jeuet keu namiet nibak tanoh nyang ka TUHAN bri sibagoe pusaka. Tanoh nyoe suboe, ya TUHAN, peunoh deungon hase bumoe, nyang seuharôh jih kamoe nikmati. 37 Banmandum hase nyang meuteumé nibak tanoh nyoe harôh teubri ubak raja-raja nanggroe Bubena ureuëng mat kuasa nyan TUHAN angkat ateueh umat Droeneueh, sibagoe huköman desya kamoe teuhadab Droeneueh. Raja nyan jimat peurintah ban galak droe ateueh droe kamoe dan beulatang peulara nyang na atra kamoe. Sabab nyan kamoe jinoenyoe cukob meudeurita ya TUHAN, nyang peunoh deungon ázeub dan deurita!" 38 Deungon dasai sigala nyang ka teujadi nyan, kamoe rakyat Israel laju kamoe buet peujanjian nyang kukoih dan teutuléh, deungon teuboh cab dumna peumimpén kamoe, ureuëng-ureuëng Lewi, dan sidroe imeum kamoe.

Nehemia 10

1 Ureuëng nyang phon that teken nyan na kheueh Gubunur Nehemia bin Hakhalya. Óh lheueh nyan geuseutôt lé Zedekia. Óh lheuehnyan ureuëng-ureuëng nyang teupeugah nyoe: 2 Teungku-teungku imeum Seraya, Azarya, Yeremia, Pasyhur, Amarya, Malkia, Hatus, Sebanya, Malukh, Harim, Meremot, Obaja, Daniel, Gineton, Barukh, Mesulam, Abia, Miyamin, Maazya, Bilgal dan Semaya. 9 Ureuëng-ureuëng Lewi Yesua aneuëk Azanya, Binui keuturonan kawöm Henadad, Kadmiel, Sebanya, Hodia, Kelita, Pelaya, Hanan, Mikha, Rehob, Hasabya, Zakur, Serebya, Sebanya, Hodia, Bani dan Beninu. 14 Peumimpén-peumimpén bansa Paros, Pahat-Moab, Elam, Zatu, Bani, Buni, Azgad, Bebai, Adonia, Bigwai, Adin, Ater, Hizkia, Azur, Hodia, Hasum, Bezai, Harif, Anatot, Nebai, Magpias, Mesulam, Hezir, Mesezabeel, Zadok, Yadua, Pelaca, Hanan, Anaya, Hosea, Hananya, Hasub, Halohes, Pilha, Sobek, Rehum, Hasabna, Maaseya, Ahia, Hanan, Anan, Malukh, Harim dan Baana. 28 Kamoe, rakyat Israel, banmandum teungku imeum, ureuëng-ureuëng Lewi, ureuëng nyang jaga babah pintoe geureubang Baét TUHAN, ureuëng peumeuén musik dan ureuëng-ureuëng nyang meukeureuja di Baét TUHAN, meunan cit deungon peurumoh dan aneuëk-aneuëk kamoe nyang kaseb rayeuk keu jimuphom dan banmandum ureuëng nyang taát ubak huköm Allah dan ka jipeuaséng droe nibak bansa aséng nyang na tinggai di nanggroe kamoe. 29 Kamoe banmandum kamoe peugabong droe deungon bubena peumimpén kamoe dan kamoe meusumpah mangat hase udeb nyang sisuai deungon huköm Po teu Allah nyang ka geubri keukamoe deungon peurantaraan Nabi Musa, hamba Gobnyan. Seumoga Po teu Allah geukutok kamoe meunyoe kamoe meuiengkeue ubak janji nyan. Meunan cit kamoe meusumpah kamoe peubuet banmandum peurintah, huköm dan peuratoran TUHAN, Allah kamoe. 30 Dan kamoe meusumpah bahwa kamoe hana kamoe meukawen le deungon bansa aséng nyang na tinggai di nanggroe kamoe. 31 Meunyoe na bansa aséng nyang jikeuneuk peubloe gandom atawa barang peue mantong keu kamoe nibak uroe Sabat atawa uroe suci nyang laén, atranyan hana kamoe bloe. Nibak tieb-tieb thon nyang keutujoh, kamoe hana kamoe tron ublang dan meunan cit hana teuma kamoe jak tunggée utang. 32 Tieb-tieb thon kamoe maséng-maséng teutab kamoe seudeukah limong gram pirak keu anggaran beulanja Baét TUHAN. 33 Meunan cit kamoe teutab kamoe peuna peue-peue nyang peureulée keu iébadat di Baét TUHAN, lagée; ruti peuseumah, peuseumahan gandom tieb-tieb uroe, beulatang keu keureubeuen nyang teutot tieb-tieb uroe, peuseumahan suci nyang laén, keureubeuen-keureubeuen teupeu amphon desya Israel, dan peue mantong nyang teupeureulée keu Baét TUHAN. 34 Kamoe, banmandum rakyat, bubena teungku imeum dan ureuëng-ureuëng Lewi, kamoe tiek undi tieb-tieb thon keu teupeuteuntée kawöm nyang toh nyang harôh jikeubah kayée apui keu teupeuseumahan keureubeuen-keureubeuen keu TUHAN Allah kamoe, nyang na meunurot peuratoran Huköm. 35 Tieb-tieb thon teuma kamoe ba u Baét TUHAN hase gandom nyang phon teupot dan boh-boh kayée nyang phon-phon masak di ateueh bak kayée kamoe. 36 Meunan cit teuma kamoe ba aneuëk agam kamoe nyang tuha ubak teungku imeum di Baét TUHAN mangat teujok ubak Po teu Allah, nyang sisuai deungon peuratoran Huköm. Meunan cit kamoe bri teuma aneuëk leumô, aneuëk bubiri atawa aneuëk kaméng kamoe nyang phon lahé. 37 Meunan cit teuma kamoe ba ubak teungku imeum di Baét TUHAN gandom kamoe nyang ka kamoe cawoe nyang phon that teupot di ateueh bak jih tieb-tieb thon, meunan cit deungon peuseumahan-peuseumahan nyang laén lagée ié anggô, minyéuk zaiton, dan peue mantong boh-boh kayée. Peuseumahan-peuseumahan nibak hase blang kamoe teuma kamoe ba ubak ureuëng-ureuëng Lewi nyang jak kuteb peuseumahan-peuseumahan siper siploh di banda-banda tani. 38 Teuma beuna sidroe lamkawan teungku imeum keuturonan Nabi Harun nyang jeuet keu rakan ureuëng Lewi nyan meunyoe awaknyan meutugaih geujak kuteb peuseumahan siper siploh nyan. Dan siper siploh teuma nibak peuseumahan nyan harôh jiba lé ureuëng Lewi keu kama-kama keuneubah nyang na di Baét TUHAN. 39 Rakyat Israel dan ureuëng-ureuëng Lewi harôh teuma jiba sumbangan teutab lagée gandom, anggô, minyéuk zaiton ubak kama keuneubah di teumpat teukeubah alat-alat Baét TUHAN. Disinan cit teuma teumpat tinggai teungku imeum nyang teungoh meutugaih, ureuëng nyang jaga Baét TUHAN dan ureuëng meuca-e. Kamoe hana lalée le kamoe rawat Baét TUHAN kamoe.

Nehemia 11

1 Bubena peumimpén awaknyan tinggai teutab di Yerusalem dan rakyat jirhom undi keujipiléh saboh keuluwarga nibak tieb-tieb siploh boh keuluwarga nyang harôh tinggai di banda suci Yerusalem. Nyang hana teupiléh jeuet tinggai di banda-banda nyang laén. 2 Lamkawan awaknyan na nyang rila tinggai teutab di Yerusalem dan awaknyan jipujoe lé rakyat. 3 Di banda-banda laén, rakyat Israel, bubena teungku imeum, ureuëng-ureuëng Lewi, ureuëng nyang meukeureuja di Baét TUHAN, dan keuturonan ureuëng nyang peutimang Nabi Sulaiman awaknyan tinggai nibak tanoh-tanoh atra jih keudroe dan nibak banda-banda gobnyan keudroe. 4 Na meupadub droe lamkawan sukée Yehuda dan Benyamin tinggai di Yerusalem. Nyoe kheueh dafeutar nan-nan awaknyan: Anggota-anggota sukée Yehuda: Ataya bin Uzia dan cucoe Nabi Zakharia. Na padubdroe lamkawan indatu awaknyan na kheueh: Amarya, Sefaca dan Mahalaleel, Peres, Yehuda. Jeumeulah awaknyan na kheueh 468 droe nyang gagah peukasa. Maaseya bin Barukh dan cucoe Kolhoze. Na padubdroe lamkawan indatu awaknyan na kheueh: Hazaya, Adaya, Yoyarib, Nabi Zakharia, Syela, Yehuda. 7 Anggota-anggota sukée Benyamin: Salu bin Mesulam dan cucoe Yoëd. Na padubdroe lamkawan indatu awaknyan na kheueh: Pedaya, Kolaya, Maaseya, Itiel dan Yesaya. Gabai dan Salai. Awaknyan na kheueh kawöm syedara nyang rab ngon Salu. Banmandum nyan na jeumeulah jih 928 droe geupimpén lé 9 Yoël bin Zikhri dan waki gobnyan, Yehuda bin Hasenua. 10 Teungku-teungku imeum: Yedaya bin Yoyarib dan Yakhin. Seraya bin Hilkia dan cucoe Mesulam. Na padubdroe lamkawan indatu awaknyan na kheueh: Zadok, Merayot, Ahitub nyang jeuet keu Teungku Imeum Agong. 12 Banmandum nyan na 822 droe teungku imeum nyang meutugaih di Baét TUHAN. Adaya bin Yeroham dan cucoe Pelalya. Na padubdroe lamkawan indatu awaknyan na kheueh: Amzi, Zakharia, Pasyhur dan Malkia. 13 Ulée-ulée keuluwarga dalam kawöm nyan na jeumeulah jih 242 droe. Amasai bin Asareel dan cucoe Ahzai. Indatu gobnyan na kheueh: Mesilemot dan Imer. 14 Nibak kawöm nyoe na 128 droe pahlawan nyang beuhe dan gagah peukasa. Peumimpén awaknyan na kheueh Zabdiel, bin Gedolim. 15 Ureuëng-ureuëng Lewi: Semaya bin Hasub dan cucoe Azrikam. Indatu awaknyan na kheueh: Hasabya dan Buni. Sabetai dan Yozabad, ureuëng-ureuëng Lewi peunteng nyang kawai buet-buet di luwa Baét TUHAN. Matanya bin Mikha dan cucoe Zabdi, nibak keuturonan Asaf. Gobnyan na kheueh peumimpén ureuëng meuca-e keu doá syukoe. Bakbukya waki Matanya. Abda bin Samua dan cucoe Galal, nibak keuturonan Yedutun. Banmandum nyan na jeumeulah 284 droe. 19 Ureuëng nyang jaga babah pintoe geureubang: Akub, Talmon dan rakan-rakan awaknyan. Banmandum nyan na jeumeulah 172 droe. 20 Rakyat Israel, mandum teungku imeum dan ureuëng-ureuëng Lewi nyang na mantong leubeh, tinggai teutab di tanoh geuh nibak meubagoe banda di Yehuda. 21 Ureuëng nyang meubuet di Baét TUHAN tinggai teutab di bagian banda Yerusalem nyang nan jih Ofel. Awaknyan jimeubuet dimiyueb pimpénan Ziha dan Gispa. 22 Nyang kawai ureuëng Lewi nyang na tinggai di Yerusalem na kheueh Uzi bin Bani dan cucoe Hasabya. Indatu gobnyan na kheueh Matanya dan Mikha. Gobnyan jitamong ubak kawöm Asaf, nyang tugaih geuh bagian musik watée seumbahyang di Baét TUHAN. 23 Gileran tieb-tieb kawöm keu teu uroih musik di Baét TUHAN tieb-tieb uroe nyang ka teupeuteuntée meunurot peuratoran nyang geupeugot lé raja. 24 Petahya bin Mesezabeel nibak kawöm Zera dan sukée Yehuda, jeuet keu waki bansa Israel nibak meuligoe raja Persia. 25 Le that-that rakyat nyang tinggai di banda-banda nyang tô deungon blang gobnyan. Na meupadubdroe nibak sukée Yehuda tinggai di daerah lamkawan Bersyeba di siblaih seulatan dan Pantôn Hinom di siblaih utara. Awaknyan tinggai di banda-banda nyang teupeugah nyoe meunan cit deungon gampông-gampông nyang tô-tô bansikeulileng nyan: Kiryat-Arba, Dibon, Yekabzeel, Yesua, Molada, Bet-Pelet, Hazar-Sual, Bersyeba, Ziklag, Mekhona, En-Rimon, Zora, Yarmut, Zanoah, Adulam, Azeka, Lakhis. 31 Na papadub droe nibak sukée Benyamin tinggai di Geba, Mikhmas, Ai, Betel dan gampông-gampông nyang na tô-tô disinan, 32 di Anatot, Nob, Ananya, 33 Hazor, Rama, Gitaim, 34 Hadid, Zeboim, Nebalat, 35 Lod, Ono dan di Pantôn Tukang-tukang. 36 Na meupadub boh kawan ureuëng Lewi nyang yoh masa ilée tinggai di daerah Yehuda geuyue tinggai deungon ureuëng-ureuëng Benyamin.

Nehemia 12

1 Nyoe kheueh nan-nan teungku imeum dan ureuëng-ureuëng Lewi nyang ka geuwoe nibak teumpat nyang teuböih meusajan-sajan deungon Zerubabel bin Sealtiel dan deungon Teungku Imeum Agong Yesua: 2 Teungku-teungku Imeum: Seraya, Yeremia, Ezra, Amarya, Malukh, Hatus, Sekhanya, Rehum, Meremot, Ido, Ginetoi, Abia, Miyamin, Maaja, Bilga, Semaya, Yoyarib, Yedaya, Salu, Amok, Hilkia, dan Yedaya. Awaknyan na kheueh teungku-teungku imeum ulée nibak jamén Yesua. 8 Ureuëng-ureuëng Lewi: Peumimpén meuca-e syukoe: Yesua, Binui, Kadmiel, Serebya, Yehuda, dan Matanya. 9 Anggota paduan su nyang ba ca-e teujaweueb: Bakbukya, Uni dan rakan-rakan gobnyan saboh kawöm. 10 Nyoe kheueh garéh keuturonan Teungku Imeum Agong Yesua: Yesua, Yoyakim, Elyasib, Yoyada, 11 Yonatan, Yadua. 12 Nyoe kheueh dafeutar nyang jeuet keu ulée teungku-teungku imeum deungon kawöm gobnyan yoh watée Yoyakim meutugaih jeuet keu Teungku Imeum Agong: Teungku Imeum & Kawöm 22 Dafeutar keuhai ulée-ulée keuluwarga ureuëng Lewi dan keuluwarga teungku imeum ka lheueh teucetet watée jamén Teungku Imeum Agong nyang teupeugah nyoe: Elyasib, Yoyada, Yohanan dan Yadua. Catetan nyan seuleusoe bak watée Darius geumat peurintah sibagoe raja Persia. 23 Teuma keuhai ulée-ulée keuluwarga kawöm Lewi teuma na teucetet sampoe watée jamén Yonatan cucoe Elyasib. 24 Di miyueb pimpénan Hasabya, Serebya, Yesua, Binui dan Kadmiel, ureuëng-ureuëng Lewi laju teubagi u dalam keulompok-keulompok. Tieb-tieb watée na dua boh keulompok nyang meutugaih teupujoe TUHAN dan teubri syukoe ubak gobnyan deungon cara meubalaih-balaih peugah, nyan sisuai deungon peuratoran Nabi Raja Daud, hamba Po teu Allah nyan. 25 Ureuëng nyang jaga babah pintoe geureubang Baét TUHAN nyang geubri tugaih keu jikeumiet kama-kama teumpat keubah nyang tô ngon pintoe geureubang Baét TUHAN na kheueh: Matanya, Bakbukya, Obaja, Mesulam, Talmon dan Akub. 26 Awaknyan udeb nibak jamén Yoyakim bin Yesua dan cucoe Yozadak dan nibak jamén Gubunur Nehemia dan Teungku Imeum Ezra, ureuëng malem nibak Huköm nyan. 27 Nibak watée bintéh beuton banda Yerusalem teureusmi, bubena ureuëng Lewi teuhôi dipat mantong awaknyan tinggai, mangat awaknyan meusajan-sajan geupeumeuriah deungon ca-e-ca-e nyanyoe haba nyang syukoe, hana tinggai deungon alat musik gambus ngon keucapi. 28 Dan meugumpôi kheueh bubena ureuëng meuca-e nibak keuluwarga ureuëng Lewi nyan, bah kheueh nyan nyang na tinggai di daerah banda Yerusalem, meunan cit nyang na tinggai di banda-banda nyang na bak binéh Netofa, 29 nibak Bet-Gilgal, Geba dan Asmawet. 30 Banmandum teungku imeum dan ureuëng-ureuëng Lewi nyan geupeubuet upacara teupeugleh droe keudroe gobnyan óh lheuehnyan barô kheueh keu rakyat nyang le, keu pintoe-pintoe geureubang dan bintéh beuton banda. 31 Ulôn peusila bubena peumimpén Yehuda geuék u ateueh bintéh beuton mangat geuatoe dua boh keulompok nyang rayeuk nyang meubareh jikeulileng banda sira meuca-e deungon nyanyoe haba syukoe ubak Po teu Allah. Keulompok nyang phon jimeubareh di ateueh beuton, jituju u blaih uneuen, ubak Geureubang Blôh. 32 Hosaya geujak dilikot ureuëng nyang meuca-e, geuseutôt teuma lé siladum peumimpén Yehuda. 33 Banmandum teungku imeum nyang teukheun lom nyoe geujak teuma di likot awaknyan sira geuyueb beureuguih: Azarya, Ezra, Mesulam, Yehuda, Benyamin, Semaya dan Yeremia. Awaknyan geuseutôt teuma lé Zakharia bin Yonatan dan cucoe Semaya. Na padubdroe nibak indatu awaknyan na kheueh: Matanya, Mikha, Zakur nibak kawöm Asaf. 36 Di likot gobnyan geujak teuma anggota nibak waréh kawöm geuh, kawöm nyan na kheueh: Semaya, Azareel, Milalai, Gilalai, Maai, Netaneel, Yehuda dan Hanani. Awaknyan banmandum geuba alat-alat musik, saban that lagée nyang geupeumeuén lé Raja Nabi Daud, hamba Po teu Allah nyan. Teungku Imeum Ezra, ureuëng nyang lupah malem keuhai Huköm Allah nyan geujak nibak bagian ulée baresan nyan. 37 Óh ka trok nibak Pintoe Geureubang Ié Rhot awaknyan laju jiwet dan geuteungoh ubak reunyeuen Banda Nabi Daud, meulalu meuligoe Nabi Daud, laju geugisa ubak bintéh beuton Pintoe Geureubang Ié di siblaih u timu banda. 38 Keulompok ureuëng meuca-e nyang saboh kawan teuk geumeubareh di ateueh bintéh beuton jijak u blaih wie, dan ulôn kuseutôt awaknyan meusajan-sajan deungon siladum nibak rakyat. Kamoe meubareh meulalu meunara peutot apui sampoe ubak bintéh Beuton Luwah. 39 Dan kamoe jak laju meulalu Pintoe Geureubang Efraim, Pintoe Geureubang Awai, Pintoe Geureubang Uengkot, Meunara Hananeel dan Meunara Mea trok laju ubak Pintoe Geureubang Bubiri. Baresan kamoe laju meupiôh nibak babah Pintoe Geureubang Peunjagaan tô binéh Baét TUHAN. 40 Dan trok kheueh bandua boh keulompok ureuëng meuca-e nyan nibak binéh Baét TUHAN. Seulaén nibak bubena peumimpén nyang na didalam keulompok ulôn, 41 na cit geuseutôt lé teungku-teungku imeum nyang yueb beureuguih. Awaknyan na kheueh: Elyakim, Maaseya, Minyamin, Mikha, Elyoënai, Zakharia dan Hananya; 42 dilikot awaknyan jijak teuma Maaseya, Semaya, Eleazar, Uzi, Yohanan, Malkia, Elam dan Ezer. Ureuëng nyang meuca-e jimeu ca-e dimiyueb pimpénan Yizrahya. 43 Bak uroenyan le that keureubeuen nyang teupeuseumah ubak TUHAN. Rakyat meusukaria sabab Allah ka geupeujeuet awaknyan mubahgia. Meunan cit ureuëng inong dan aneuëk manyak meusajan-sajan meupeusta geumbira, dan su awaknyan nyang teungoh meugeumbira nyan teudeungoe sampoe óh jiôh. 44 Nibak watée nyan na meupadub droe ureuëng jibri tugaih keu jijak kawai kama teumpat keuneubah beukai na kheueh sumbangan-sumbangan keu Baét TUHAN, jitamong cit keunan peuseumahan siper siploh dan hase bumoe nyang phon teucok tieb-tieb thon. Lé ureuëng-ureuëng nyang kawai nyan wajéb geujak kuteb sumbangan nyan nibak masyarakat di blang atawa ladang awaknyan nyang na nibak binéh banda-banda. Óh lheuehnyan sumbangan nyang ka lheueh teukuteb nyan jijok laju ubak teungku-teungku imeum dan ureuëng-ureuëng Lewi, lagée kheun Huköm nyang ka na teutuléh. Di ureuëng-ureuëng Yehuda jihoreumat ubak teungku imeum dan ureuëng-ureuëng Lewi nyan, 45 sabab awaknyan nyang peubuet banmandum upacara peusuci dan upacara-upacara nyang laén nyang ka geupeurintah lé Po teu Allah. Di ureuëng-ureuëng nyang peumeuén alat musik dan di ureuëng nyang jaga babah pintoe geureubang Baét TUHAN meunan cit hana tuwoe laju jipeumeuén alat-alat nyan nyang ka jeuet keu tugaih awaknyan, nyan pi sisuai deungon peuratoran nyang ka geu atoe lé Raja Nabi Daud dan Nabi Sulaiman, aneuëk agam geuhnyan, 46 Yoh watée jamén Nabi Daud dan ahli musik Asaf, bubena ureuëng peunyanyoe ka jimeunyanyoe deungon lagu-lagu puja pujoe dan ca-e syukoe ubak Po teu Allah. 47 Nibak jamén Zerubabel dan meunan cit nibak jamén Nehemia, banmandum umat Israel jijok peuseumahan mangat hase teupeuseb nyang peureulée keu tieb-tieb uroe lé ureuëng meuca-e dan keu ureuëng nyang jaga babah pintoe geureubang Baét TUHAN. Rakyatpi jijok peuseumahan khusos keu ureuëng-ureuëng Lewi dan di ureuëng Lewi pi jibri teuma keu teungku imeum jeumba gobnyan nyang ka teupeuteuntée.

Nehemia 13

1 Nibak watée Huköm Nabi Musa nyan geubaca keu rakyat, meurumpok kheueh keuteurangan nyang lagéenyoe: 'Ureuëng Amon dan ureuëng Moab pakriban mantong hana jeuet jimeujampu deungon umat Po teu Allah; 2 sabab yohwatée umat Israel teungoh jijak jiteubiet lam nanggroe Meusé, bandua boh bansa nyan hana jitembri ié meunan cit deungon peunajoh keu bansa Israel nyan. Teuma lé awaknyan ka jisiwa Bileam mangat jikutôk bansa Israel, teuma Po teu Allah geutanyoe ka geu-ubah kutôk nyan jeuet keu beureukat.' 3 Watée jideungoe lé bansa Israel hai nyan, awaknyan laju geupeungkléeh banmandum bansa Israel nibak bansa nyan. 4 Sigohlom nyan Teungku Imeum Elyasib, nyang geubri tugaih mangat geukawai kama-kama teumpat beukai peunajoh nyang na di Baét TUHAN, geumeurakan nyang krab that-that deungon Tobia. 5 Elyasib geujok keu Tobia saboh kama nyang raya nyang sibeutôi jih teuseukeubah atranyan khusos keu teumpat teukeubah gandom peuseumahan, keumeunyan, alat-alat nyang teungui di Baét TUHAN, peuseumahan keu teungku-teungku imeum, siper siploh gandom, anggô, dan minyéuk zaiton, nyang teuma geubagi keu ureuëng-ureuëng Lewi, keu ureuëng nyang peumeuén musik dan keu ureuëng nyang jaga babah pintoe geureubang Baét TUHAN. 6 Watée hainyan teujadi, ulôn hana di Yerusalem, sabab, nibak thon nyang keu lhée ploh dua geumat keurajeuen lé Raja Artahsasta, raja nibak nanggroe Babel, ulônjak u Babel keu lônjak meulapor ubak raja. Barô kheueh napadub treb teuma óh lheuehnyan geubri idhin keu ulôn 7 keu lôn jakwoe u Yerusalem. Óh ka trok keunoe, ulôn teukeujot that bahwa Elyasib ka geujok keu Tobia saboh kama di Baét TUHAN. 8 Ulôn beungéh that-that dan banmandum barang Tobia nyan ulôn tiek uluwa. 9 Óh lheuehnyan laju ulôn yue mangat teupeuna upacara teupeugleh nibak kama-kama nyan. Óh lheuehnyan barô kheueh ulôn peuriwang keunan banmandum barang-barang peuseumahan gandom ngon keumeunyan meunan cit deungon alat-alat Baét TUHAN. 10 Seulaén nibaknyan, meurumpok teuma bahwa ureuëng nyang peumeuén alat musik dan ureuëng-ureuëng Lewi ka geutinggai Yerusalem dan geugisa u blang atawa lampôh ladang gobnyan maséng-maséng, sabab rakyat hana seb keubutuhan jih. 11 Dan laju ulôn doet bubena ureuëng-ureuëng patot sabab awaknyan ka geupeubiyeu Baét TUHAN teubeungkalée. Laju ulôn hôi lom ureuëng-ureuëng Lewi dan ureuëng nyang peumeuén musik nyan mangat jimeubuet lom teuma. 12 Óh lheuehnyan banmandum rakyat Israel ka jipeuphon lom jibri siper siploh nibak hase gandom, anggô, dan minyéuk zaiton, banmandum nyan teuba ubak kama-kama keuneubah beukai. 13 Laju ulôn bri tugaih keu ureuëng-ureuëng nyang teupeugah nyoe mangat jikawai beukai nyan: Teungku Imeum Selemya, Zadok sidroe lamkawan ureuëng nyang malem that nibak Huköm dan Pedaya ureuëng Lewi. Hanan bin Zakur dan cucoe Matanya ulôn bri tugaih keujitulông awaknyan. Ulôn kuteupeue bahwa ureuëng-ureuëng nyan jeuet teupeucaya dan teuma jeuet jiuroih meunagi bahan-bahan nyan keu rakan-rakan ngon keureuja awaknyan deungon jujoe. 14 Ya Allah ulôn, neuingat kheueh ubak banmandum nyang ka ulôn peubuet ateueh Baét Droeneueh dan peulayan gobnyan. 15 Watée nyan ulôn kalon bahwa nibak uroe Sabat na meupadubdroe ureuëng Yehuda teungoh jiplaih ié anggô. Na teuma ureuëng laén teungoh jipeudieng anggô, gandom, boh anggô, boh ara dan barang-barang laén di ateueh keuleudée jihnyan dan laju jiba u Yerusalem. Awaknyan ulôn tam bék jimeukat di Yerusalem. 16 Na meupadub droe ureuëng nibak Tirus nyang na tinggai di Yerusalem jiba uengkot dan meubagoe barang keuteumeukat u Yerusalem watée uroe Sabat, na kheueh keujipeubloe keu ureuëng Yahudi. 17 Laju ulôn teugah bubena peumimpén Yahuda sira ulôn peugah, "Peu kheueh hana gata sada bahwa gatanyoe ka tapeubuet buet nyang jeuhet sabab ka tapeukutoe uroe Sabat? 18 Lé sabab desya nyang lagée nyoe kheueh Allah ka geuhuköm indatu geutanyoe dan geupeuhanco banda nyoe. Peu kheueh watéenyoe gata keuneuk tamah meureuka Allah keu Israel deungon cara gata peukutoe uroe Sabat?" 19 Sabab nyan ulôn peurintah mangat jeuet bak watée awai uroe Sabat, na kheueh malam jeumaáh, pintoe-pintoe geureubang banda laju teujaktôb meunyoe uroe ka seupôt, dan hana jeuet teubuka sigohlom habéh uroe Sabat, bak uroe Satu malam. Meunan cit di ulôn laju ulôn peuduek aneuëk buah ulôn mangat jijaga pintoe geureubang nyan mangat watée uroe Sabat hana ureuëng nyang jiba barang nyang teumeukat u dalam banda. 20 Teuma na mantong sidroe dua ureuëng-ureuëng nyang meukat nyan jimudom di luwa bintéh beuton watée uroe jeumeuát malam. 21 Ulôn peugah ubak awaknyan, "Peucuma gata preh sampoe beungoh uroe disinan. Awas, meunyoe gata peubuet hainyan sigoe teuk, ulôn teuma lôncok tindakan nyang kreueh!" Yoh phon watée nyan di ureuëng meukat nyan hana jijakle meunyoe uroe Sabat. 22 Dan keu ureuëng-ureuëng Lewi ulôn yue laju upacara teupeugleh droe dan geujaga pintoe-pintoe geureubang keu geukawai mangat dumna ureuëng jihoreumat bak uroe Sabat. Ulôn meudoá, "Ya Allah, neuingat kheueh keu ulôn sabab hainyan cit teuma, dan neugaséh kheueh ulôn nyang sisuai deungon gaséh Droeneueh nyang raya." 23 Nibak watéenyan na cit ulôn kalon le lagoena ureuëng Yahudi ka jimeukawen deungon bansa Asdod, Amon dan Moab. 24 Siladum nibak aneuëk-aneuëk awaknyan hana muphom basa Yahudi, teuma basa Asdod dan basa aséng nyang laén. 25 Laju ulôn doet dan ulôn kutok awaknyan. Na nyang ulôn poh dan ulôn tarek ôk jih. Óh lheuehnyan ulôn yue awaknyan jimeusumpah deumi Allah bahwa awaknyan dan aneuëk-aneuëk awaknyan hanale jimeukawen meulawok. 26 Ulôn peugah, "Peu kheueh kon desya nyoe cit teuma nyang ka geupeubuet lé Nabi Sulaiman? Hana raja laén di ateueh donya nyang leubeh raya nibak gobnyan. Allah geusayang keugobnyan dan geubaiát gobnyan jeuet keuraja ateueh banmandum bansa Israel. Bahpi lagée nyan gobnyan pi ka keunong bujuk lé ureuëng-ureuëng inong bansa laén mangat geupeubuet desya. 27 Keubit that jeuhet buet gatanyan! Gata tajeuet that talawan Allah deungon cara gata meukawen deungon ureuëng inong nibak bansa aséng!" 28 Yoyada na kheueh aneuëk Teungku Imeum Agong Elyasib, teuma sidroe nibak aneuëk Yoyada jeuet keumeulintée Sanbalat di banda Bet-Horon. Lé sabab nyan Yoyada laju ulôn use di Yerusalem. 29 Lheuehnyan ulôn meudoá, "Ya Allah ulôn, neuingat kheueh pakriban ureuëng-ureuëng nyan jipeukutoe jabatan teungku imeum dan janji Droeneueh deungon teungku imeum dan ureuëng-ureuëng Lewi!" 30 Meunan kheueh cara jih ulôn peugleh bansa Israel nibak banmandum nyang aséng. Laju ulôn peuteutab peuratoran-peuratoran keu teungku imeum dan ureuëng-ureuëng Lewi, sampoe awaknyan maséng-maséng ka na tugaih droe. 31 Meunan cit ulôn atoe mangat jeuet nibak watée-watée nyang ka teupeuteuntée, kayée apui keu ngon tot keureubeuen nyang teupeuseumah hase teukeubah dan rakyat pi hase jiba peuseumahan hase bumoe nyang phon teupot. Akhé jih ulôn meudoá, "Allah ulôn, neuingat kheueh banmandum nyoe dan neubri kheueh beureukat keu ulôn."

Ester 1

1 Di Susan, ma banda Persia, Ahasyweros nyang mat peurintah sibagoe raja. Keurajeuen gobnyan na 127 boh propinsi, phon nibak India sampoe u Sudan. 3 Bak thon nyang keulhée geumat peurintah lé raja nyan, Raja Ahasyweros geupeuna khanuri nyang keubiet rayeuk nyang geu undang banmandum ureuëng-ureuëng rayeuk peugawée gobnyan. Panglima Persia dan Media jijak keunan, meunan cit deungon banmandum gubunur dan peujabat manyang lam keurajeuen geuh nyan teuka banmandum. 4 Na nam buleuen treb jih raja geupamer keukayaan meuligoe gobnyan dan keumeugahan meunan cit deungon keuagongan keurajeuen gobnyan. 5 Óh lheueh nyan raja geupeuna lom khanuri keu banmandum rakyat gobnyan nyang na Susan, bah kheueh nyan nyang kaya meunan cit deungon nyang gasien. Khanuri nyan treb jih na sigoe aleuhat peunoh nyang geupeuna nibak meuligoe raja nyan. 6 Nibak leuen meuligoe geupeungui deungon ija gurden nyang teupeugét nibak ija lineun wareuna ijo dan putéh, teuikat deungon talo lineun nyang halôh dan teusangkot nibak gleueng-gleueng pirak nyang teupasang nibak taméh-taméh nyang meubalot ngon pualam. Di miyueb nyan geukeubah teuma teumpeuen méuh dan teumpeuen pirak di ateueh aleue nyang meulapéh deungon pualam putéh, hablur mirah, kulét mutiara nyang meukilat dan batée pirus ijo. 7 Lé raja geuseudia teuma anggô nyang meulimpah ruwah nyang geuhidang didalam piala méuh nyang meubagoe rupa. 8 Ureuëng-ureuëng jamé nyang teuka keunan hana geubataih geubri ié anggô dan hana teuma geupaksa jijeueb ié anggô nyan. Raja ka geubri peurintah ubak peulayan meuligoe, mangat tieb-tieb jamé geupeutimang meunurot nyang geukeuheundaki maséng-maséng. 9 Meunan cit lé Wasti, peureumaisuri raja, geupeuna teuma khanuri keu sabe-sabe ureuëng inong didalam meuligoe. 10 Bak uroe nyang keutujoh, raja sira geujieb-jieb ié deungon galak dan mangat that até. Lé sababnyan nyan gobnyan laju geutawök tujoh droe peujabat khusos nyang jeuet keupeulayan pribadi gobnyan; awaknyan na kheueh Mehuman, Bizta, Harbona, Bigta, Abagta, Zetar dan Karkas. 11 Raja geuyue ubak awaknyan mangat jiba Ratu Wasti deungon mahkota keurajeuen di ateueh ulée ukeue gobnyan. Ratu Wasti nyan lumpah that lagak ceudah rupa, dan raja keuneuk geupamer peureumaisuri geuh nyan ubak dumna jamé dan ubak banmandum ureuëng rayeuk keurajeuen gobnyan. 12 Teuma watée peulayan nyan jipeugah hainyan ubak Ratu Wasti, ratu hana geutemjak, lé sababnyan raja beungéh lagoena. 13 Kajeuet keu lazem raja bahwa gobnyan keu geulakée peundapat bubena ureuëng malem keuhai huköm dan adat. Sababnyan laju geuhôi peunaseuhat gobnyan nyang leubeh jiteupeue peue nyang harôh jipeubuet meunyoe ka teujadi nyang lagéenyan. 14 Anggota peunaseuhat nyang paleng kayém geutawök lé raja keu jimeuhadab na kheueh: Karsena, Setar, Admata, Tarsis, Meres, Marsena dan Memukan. Awaknyan na kheueh peujabat-peujabat Persia dan Media nyang duek nibak keududuekan nyang paleng manyang didalam keurajeuen nanggroe. 15 Geupeugah lé raja ubak ban tujoh droe awaknyan, "Ulôn ka ulôn utôh peulayan-peulayan ulôn ubak Ratu Wasti mangat jijak meuhadab ubak ulôn. Teuma lé ureuëng binoe ulôn nyan hana jitem. Meunurot huköm, peue tindakan nyang harôh tacok ateueh ratu nyan?" 16 Dan jipeugah laju lé Memukan ubak raja dan ubak ureuëng rayeuk nyang na disinan, "Deungon na nyang lagéenyan, bukon Teungku Amphon mantong nyang ka geupeumalée lé Ratu Wasti, teuma banmandum peugawée Teungku Amphon, dan keu tieb-tieb ureuëng agam nyang na didalam keurajeuen nyoe! 17 Sabab peue nyang ka geupeubuet lé ratu nyan teuma jiteupeue lé banmandum ureuëng inong, dan awaknyan jianggab remeh keu lakoe jih maséng-maséng. Awaknyan teuma jipeugah bahwa Teungku Amphon ka neupeurintah Ratu Wasti keu geujak meuhadab, teuma lé ratu hana geutem teuka. 18 Deungon nyan, meunyoe na purumoh-purumoh ureuëng rayeuk nyang na didalam keurajeuen Persia dan Media geudeungoe hainyan, pasti awaknyan bagaih-bagaih jijak peugah ubak lakoe geuh maséng-maséng. Akibat jih na kheueh, ureuëng binoe jilawan peue nyang geupeurintah lé ureuëng lakoe dan ureuëng lakoe pi teuma geubeungéh keu ureuëng binoe. 19 Lé sabab nyan, kamoe meulakée mangat Teungku Amphon neucok peunutôh bahwa Ratu Wasti hana jeuet le geumeuhadab ubak Teungku Amphon. Keuputosan nyan harôh jeuet keu undang-undang keurajeuen nanggroe Persia dan Media, deungon nyan hana mungken le teutarek lom teuma. Óh lheuehnyan, neubri kheueh teumpat duek Ratu wasti keu ureuëng inong nyang laén nyang leubeh gét nibak gobnyan. 20 Meunyoe keuputosan Teungku Amphon nyan ka meugah bansaboh nanggroe nyang luwah nyoe, ka teuntée tieb-tieb ureuëng inong nyang ka meulakoe jihoreumat keu teungku lakoe jih, bah kheueh nyan ureuëng kaya meunan cit deungon ureuëng gasien." 21 Usui nyang geupeusampoe lé Memukan nyan geuanggok lé teungku raja dan ureuëng-ureuëng rayeuk nanggroe, dan lé raja laju geupeubuet keuputosan nyan. 22 Gobnyan laju geukirém surat peurintah ubak banmandum propinsi keurajeuen, lam basa dan tulésan nyang na di dalam propinsi nyan maséng-maséng. Peurintah nyan lagée nyoe su jih, bahwa didalam tieb-tieb rumoh tangga, teungku lakoe kheueh nyang jeuet keu panghulée, dan nyang cok keuputosan.

Ester 2

1 Na padub watée teuma óh lheuehnyan, bahpi raja ka hana beungéh le, gobnyan teutab mantong geupike buet Ratu Wasti dan tindakan nyang ka teucok ateueh jihnyan. 2 Sabab nyan peunaseuhat-peunaseuhat nyang paleng krab deungon raja laju jijok usui nyang lagée nyoe, "Nyang sigét jih tamita mantong aneuëk dara nyang lagak keu peurumoh Teungku Amphon. 3 Bah kheueh Teungku Amphon neu angkat peugawée-peugawée nibak banmandum propinsi lam keurajeuen nyoe mangat teumita aneuëk dara nyang lagak-lagak lom ceudah rupa lheuehnyan jiba laju ubak meuligoe inong di Susan nyoe. Hegai, peujabat khusos nyang jeuet keu ulée rumoh tangga meuligoe ureuëng inong, nyang uroih awaknyan dan gobnyan teuma nyang uroih ureuëng inong nyan mangat jeuet ceudah rupa. 4 Óh lheuehnyan, bah kheueh Teungku Amphon neupiléh toh aneuëk dara nyang lagak meunurot Teungku Amphon keu neucok keu ureuëng binoe, dan neupeujeuet jihnyan keugeunantoe Ratu Wasti." Raja situju that-that naseuhat nyan dan laju geupeubuet hai nyang lagée nyan. 5 Di banda Susan nyan na tinggai sidroe ureuëng Yahudi nyang nan gobnyan Mordekhai bin Yair. Gobnyan keuturonan Kis dan Simei nibak sukée Benyamin. 6 Mordekhai ka teuteuen yoh watée banda Yerusalem geupeutaloe lé Nebukadnezar, raja Babel. Mordekhai teuböih u Babel meusigoe deungon Yoyakin, raja Yehuda, dan le lom tawanan nyang laén. 7 Gobnyan na syedara karông, sidroe aneuëk dara nyang paleng ceudah rupa, deungon tuboh nyang meusigak, nyang teuhôi nan Ester, nan Ibrani geuh na kheueh Hadasa. Ureuëng syiek Ester ka meuninggai donya dan gobnyan geucok keu aneuëk angkat lé Mordekhai dan geupeulara sibagoe aneuëk droe geuh. 8 Óh lheueh peurintah raja teupeumaklum ubak mandum rakyat nanggroe, jai that-that aneuëk dara nyang meusapat di Susan meunan cit deungon Ester na lamkawan aneuëk-aneuëk dara nyan. Ester pih geuba laju ubak meuligoe raja dan geupeucaya ubak Hegai nyang jeuet keu ulée rumoh tangga meuligoe ureuëng inong. 9 Hegai hireuen that geungieng Ester dan gobnyan pih galak lumpah na keu aneuëk dara nyan. Deungon reujang that aneuëk dara nyan geupeungui ngon meubagoe alat-alat peuceudah rupa meunan cit deungon peunajoh nyang khusos teuma. Ester geupinah laju ubak bagian nyang paleng lagak didalam meuligoe nyan dan na teuma tujoh droe aneuëk dara nyang paleng carông ngon malem geubri tugaih mangat jijaga ngon ji useuha aneuëk dara nyan. 10 Ateueh naseuhat Mordekhai, Ester hana geubri tée bahwa gobnyan na kheueh sidroe ureuëng Yahudi. 11 Tieb-tieb uroe Mordekhai geujak-jak dikeue meuligoe ureuëng inong nyan keu geujak tanyong keuadaan Ester dan peue nyang teujadi ateueh aneuëk nyan. 12 Meunurot peuratoran, banmandum ureuëng inong teurawat keu teupeuceudah rupa na sithon treb jih: nam buleuen deungon minyéuk nyang teujampu deungon keumeunyan, dan nam buleuen nyang teuma óh lheuehnyan deungon minyéuk mangat bée nyang meubagoe rupa nyang ka teujampu. Óh lheueh nyan, tieb-tieb aneuëk dara meuteumé gileran jijak meuhadab ubak Raja Ahasyweros. 13 Bak watée sidroe aneuëk dara jijak meuhadab ubak raja, aneuëk dara nyan jeuet jingui peue mantong peukayan meunurot nyang jigalak. 14 Aneuëk dara nyan laju teuba u meuligoe raja óh watée uroe ka malam, dan óh singoh nyan teuba teuma ubak meuligoe nyang laén, dan jiuroih laju lé Saasgas, sidroe lamkawan peujabat nyang khusos jiuroih gundek-gundek raja. Aneuëk dara nyan hana le geumeuhadab ubak raja, laén hai meunyoe raja na meuheuet keu gobnyan deungon cara geuhôi nan gobnyan. 15 Teuma trok kheueh ubak gileran Ester geujak meuhadab ubak raja. -- Ester na kheueh aneuëk Abihail dan syedara karông Mordekhai nyang ka geuangkat Ester nyan sibagoe aneuëk gobnyan keudroe; Ester meumang jikagum lé soe mantong nyang pandang gobnyan. Bak watée gobnyan geujak meuhadab ubak raja, Ester jisok peukayan sisuai deungon nyang ka geutunyok dan naseuhat Hegai, nyang keu ulée meuligoe inong nyan. 16 Meunan kheueh jeuet jih, bak thon nyang keutujoh keurajeuen Ahasyweros bak buleuen nyang keu siploh, nyan kheueh buleuen Tebet, Ester jiba laju jak meuhadab ubak Raja Ahasyweros di meuligoe raja. 17 Aneuëk dara nyan lumpah geugalak dan geuharok lé raja leubeh nibak aneuëk-aneuëk dara nyang laén. Lé sabab nyan gobnyan lumpah that harok dan geucinta lé raja. Lé sababnyan teuma raja laju geupeuduek mahkota keurajeuen ateueh ulée Ester dan geupeujeuet gobnyan ratu keugeunantoe Ratu Wasti. 18 Óh lheuehnyan, raja laju geupeuna khanuri nyang lumpah raya sibagoe horeumat gobnyan keu Ester dan geu-undang banmandum peugawée meunan cit deungon ureuëng rayeuk gobnyan. Gobnyan laju geupeumaklum uroe pre bansaboh nanggroe dan geubagi-bagi laju hadiah nyang meulimpah ruah. 19 Nibak watéenyan Mordekhai ka geuangkat lé raja jeuet keu peugawée nanggroe. 20 Ester gohlom cit geupeugah droe bahwa geuhnyan na kheueh ureuëng Yahudi, sabab Mordekhai geutam gobnyan. Ester teutab geutaát ubak Mordekhai lagée geutaát yoh gobnyan mantong ubit dan jipeulara lé syedara karông gobnyan. 21 Nibak siuroe, watée Mordekhai teungoh meutugaih didalam meuligoe, na dua droe peujabat khusos raja, nyang nan jih Bigtan dan Teres, ka sipakat jikeuneuk poh maté Raja Ahasyweros, sabab awaknyan jibanci that-that keu raja nyan. 22 Reuncana awaknyan bandua geuteupeue lé Mordekhai dan gobnyan laju geujak peugah ubak Ester. Hana geuböih watée, Ester laju geupeugah ubak raja peue nyang ka geuteupeue lé Mordekhai nyan. 23 Peukara nyan laju geuseulidék, dan nyata kheueh peue nyang geupeugah lé Mordekhai nyan beutôi. Bandua awaknyan laju teuhuköm gantung. Sisuai deungon peurintah raja, peuristiwa nyan na teucetet didalam kitab keurajeuen nanggroe.

Ester 3

1 Na padubna treb teuma óh lheuehnyan Raja Ahasyweros geu baiát teuma Haman jeuet keu peudana meuntroe. Haman na kheueh aneuëk Hamedata nibak keuturonan Agag. 2 Raja geupeutron titah ubak mandum peugawée gobnyan mangat jihoreumat ubak Haman deungon cara jisujut dikeue gobnyan. Banmandum ureuëng taát ubak peurintah raja nyan, keucuali Mordekhai. 3 Peugawée-peugawée nyang laén nyang na didalam meuligoe jitanyong ubak Mordekhai nyan pakon gobnyan geu iengkeue titah raja, 4 dan tieb-tieb uroe awaknyan jipaksa Mordekhai nyan mangat geuturot peue nyang ka jeuet keu titah raja, teuma Mordekhai teutab hanageutem deungoe. Kheun Mordekhai ubak awaknyan, "Ulôn nyoe ureuëng Yahudi; ulôn hana jeuet ulôn sujut ubak manusia." Dan awaknyan pi laju jipeutrok hainyan ubak Haman sabab awaknyan keuneuk jiteupeue tindakan peue nyang harôh geucok keu Mordekhai. 5 Haman beungéh lumpah na watée jiteupeue Mordekhai hana jitem sujut ubak gobnyan. 6 Dan watée jiteupeue bahwa Mordekhai nyan na kheueh sidroe ureuëng Yahudi, laju jicok keuputosan keuneuk jihuköm Mordekhai, dan kon Mordekhai mantong, teuma keuneuk jipeubinasa banmandum ureuëng Yahudi nyang na di dalam nanggroe Persia. 7 Nibak thon nyang keudua blaih jimat keurajeuen lé Raja Ahasyweros, bak buleuen nyang keu sa, na kheueh buleuen Nisan, Haman laju geuyue rhom undi nyang nan jih "Purim" mangat geuteupeue uroe dan buleuen peue nyang paih keu geulaksana niet jih nyang jeuhet nyan. Teuma jicok kheueh tanggai lhée blaih buleuen dua blaih, nyan kheueh buleuen Adar. 8 Dan geupeugah kheueh laju lé Haman ubak raja, "Teungku Amphon nyang ulôn horeumat, na saboh bansa nyang ganje nyang ka meutabu di tieb-tieb propinsi keurajeuen nanggroe nyoe. Adat istiadat jihnyan meulaén that deungon bansa-bansa nyang laén. Awaknyan hana jitem patuh ubak huköm-huköm nyang na didalam keurajeuen nyoe. Jadi, nyang sigetjih Teungku Amphon bék neupeubiyeu ureuëng nyan jipeubuet ban galak droe. 9 Meunyoe Teungku Amphon hana meurasa brat, bah kheueh Teungku Amphon peuteubiet surat peurintah mangat tapeu habéh bansa nyan. Dan meunyoe Teungku Amphon neutem teurimong usui ulôn nyoe, ulôn pasti hase ulôn peutamong 340.000 kilogram pirak u dalam kaih Teungku Amphon." 10 Ban geudeungoe nyang lagéenyan, raja laju geusuit nibak jaroe gobnyan euncien nyang teungoh geungui guna keu geucab surat-surat maklumat nyang jipeuteubiet lé keurajeuen deungon reuseumi, dan atra nyan geujok laju ubak Haman, musoh nyang paleng rayeuk nibak bansa Yahudi. 11 Geupeugah lé raja ubak Haman, "Bansa nyan dan meunan cit deungon péng jih ulôn jok keu gata. Tapeubuet kheueh laju peue nyang gata ngieng gét ateueh awaknyan." 12 Dan nibak tanggai lhée blaih buleuen sa, Haman laju geuhôi seukeutareh raja. Ubak awaknyan laju geuyue tuléh surat nyang sisuai deungon peue nyang geupeurintah, óh lheueh nyan surat nyan jiteujeumah laju u dalam meubagoe basa dan jisalen u dalam mandum tulésan nyang na jipeuguna lam keurajeuen nyan. Surat nyan teutuléh ateueh nan Raja Ahasyweros dan teucab deungon euncien gobnyan, laju surat nyan geukirém deungon bagaih that ubak banmandum nyang mat kuasa, gubunur dan ureuëng-ureuëng rayeuk nyang na di tieb-tieb propinsi. Asoe surat nyan na kheueh peurintah raja bahwa bak tanggai lhée blaih buleuen Adar, banmandum bansa Yahudi, bah kheueh nyan nyang tuha meunan cit nyang muda, bah kheueh nyan ureuëng inong meunan cit deungon aneuëk manyak, awaknyan harôh teupoh maté hana amphon, dan hareuta beunda awaknyan teusita banmandum. 14 Peurintah nyan harôh teu peumaklum di tieb-tieb propinsi mangat banmandum ureuëng ka siab seudia nibak uroe nyang ka teupeu teuntée nyan. 15 Lé ureuëng upah raja laju jijak deungon bagaih-bagaih jijak intat surat-surat nyan ubak banmandum propinsi keurajeuen nanggroe. Ateueh titah raja, peurintah nyan teupeumaklum cit di Susan, ma banda Persia. Óh lheuehnyan raja dan Haman laju geuduek-duek sira geujieb ié anggô, teuma banda Susan ka karu bansalam le sabab haba nyan.

Ester 4

1 Watée geudeungoe lé Mordekhai peue nyang ka teujadi, laju geupriek-priek peukayan gobnyan óh lheuehnyan geusôk laju ija umpang teupông sibagoe tanda seudeh. Geucok abée geutabu laju u ateueh ulée gobnyan, óh lheuehnyan geujak rawon bansaboh banda sira geumo deungon su nyang nyareng dan seudeh that. 2 Watée ka trok dileuen meuligoe laju geupiôh, sabab ureuëng nyang ngui peukayan ija umpang teupông hana jeuet jitamong u dalam meuligoe. 3 Meunan cit di tieb-tieb propinsi nyang laén didalam keurajeuen nanggroe, bubena ureuëng Yahudi ka jimo ba-e deungon até nyang that-that seudeh óh lheueh jideungoe peurintah raja teupeumaklum ubak rakyat nanggroe. Awaknyan jipuasa, geumo dan apoh apah hana meuteuntée, dan le that-that lamkawan awaknyan jingui ija umpang teupông dan ji éh di ateueh abée. 4 Watée aneuëk-aneuëk dara deundayang dan dumna peujabat nyang khusos nyang peutimang Ratu Ester jilapor ubak gobnyan peue nyang teungoh geupeubuet lé Mordekhai, Ester seudeh lumpah na. Ratu laju geukirém peukayan ubak Mordekhai sibagoe geunantoe ija umpang teupông nyang geungui nyan, teuma Mordekhai hana geutem teurimong. 5 Óh lheuehnyan Ester laju geuhôi Hatah, sidroe lamkawan peujabat khusos nyang geubri tugaih lé raja mangat jipeutimang Ratu Ester. Ubak Hatah nyan geuyue jak seulidek ubak Mordekhai peue sabab gobnyan geupeusaneut droe nyang lagée nyan. 6 Dan geujak kheueh laju Hatah ubak Mordekhai di padang banda nibak babah pintoe geureubang meuligoe. 7 Mordekhai laju geucalitra ubak ureuëng nyan peue nyang ka teujadi dan padub na le péng pirak nyang ka jipeujanji lé Haman keu jipeutamong u dalam kaih raja, óh ka lheueh banmandum ureuëng Yahudi nyan jipeubinasa. 8 Dan lé Mordekhai geubri teuma ubak Hatah seunalen surat raja nyang ka geupeuteubiet di Susan nyang meuasoe peurintah keu teupeubinasa ureuëng Yahudi. Mordekhai laju geuyue Hatah jijak peusampoe ubak Ester dan jipeutrang peukaranyan ubak gobnyan, meunan cit keu jilakée mangat Ester geutem jak meuhadab ubak raja keugeulakée gaséh sayang ubak bansa gobnyan. 9 Dan geujak kheueh Hatah ubak Ester geupeusampoe peusan Mordekhai nyan ubak gobnyan. 10 Teuma lé Ester geuyuejak lom Hatah nyan ubak Mordekhai sira geupeusan lagée nyoe, 11 "Soe mantong ureuëng, bah kheueh nyan agam meunan cit nyang inong, meunyoe hana geutawök lé raja keujijak meuhadab gobnyan di leuen meuligoe, ureuëng nyan bah teuhuköm maté. Nyan na kheueh undang-undang keurajeuen nyang hana jeuet teubantah bahsoe mantong ureuëng jih phon nibak peujabat sampoe ubak rakyat nyang na di propinsi-propinsi, ka jiteupeue hainyan. Teuma na saboh jalan keu teuhinda nibak undang-undang nyan, jalan nyan na kheueh meunyoe raja geu sunyung tungkat méuh gobnyan ubak ureuëng nyan. Meunyoe nyan teujadi, ureuëng nyan teuma seulamat. Teuma kana sibuleuen nyoe ulôn hántom na geutawök lé raja." 12 Dan lé Hatah pi laju geujak peusampoe haba Ester nyan ubak Mordekhai. 13 Dan lé Mordekhai laju geukirém haba peuingat nyang lagée nyoe ubak Ester, "Bék neusangka gata leubeh aman nibak ureuëng Yahudi nyang laén, teuma sabab gata tinggai nibak meuligoe! 14 Ureuëng Yahudi pasti meuteumé tulông deungon cara peue mantong sampoe awaknyan seulamat. Teuma meunyoe gata teutab seungab mantong lam hai nyang lumpah mubahya nyoe, gata keudroe maté dan keuluwarga gata habéh riwayat jih. Pat tateupeue, mungken nyang teujadi bak saát-saát nyang lagée nyoe kheueh gata ka geupiléh jeuet keu ratu!" 15 Dan lé Ester laju geukirém haba nyoe ubak Mordekhai, 16 "Gata peusapat kheueh laju ureuëng Yahudi nyang na di Susan mangat jimeudoá keu ulôn. Bék gata makheun ngon tajieb ié treb jih lhée uroe lhée malam. Ulôn keudroe meunan cit deungon aneuëk-aneuëk dara deundayang ulôn teuma kamoe peubuet cit lagée nyan. Óh lheuehnyan ulôn teuma lônjak meuhadab ubak raja, bahpi nyan meulangga nibak undang-undang nanggroe. Meunyoe lé sabab nyan ulôn harôh maté, bah kheueh ulôn maté!" 17 Dan óh lheuehnyan geujak kheueh laju Mordekhai dan geupeubuet laju peue nyang geupeugah lé Ester nyan.

Ester 5

1 Bak uroe nyang keulhée puasa gobnyan, Ester laju geungui peukayan ratu, dan geujak laju uleuen meuligoe dan geudong laju dikeue seuramoe. Dan raja teungoh geuduek di ateueh tahta nyang meuhadab ubak pintoe nyan. 2 Óh watée geungieng ratu teungoh geudong diluwa, gobnyan teuka inséueh didalam até laju geusunyung tungkat méuh gobnyan ubak ratu. Dan geulangkah laju ukeue Ratu Ester sira geucukéh ujong tungkat méuh nyan. 3 Óh lheuehnyan geutanyong lé raja ubak sang ratu, "Peue na haba, hai Putroe ulôn? Peue nyang gata lakée? Peugah kheueh laju! Bahpi nyang gata lakée siteungoh nibak keurajeuen ulôn, atranyan ulôn jok keu gata." 4 Geujaweueb lé Ester, "Meunyoe teungku Amphon neutem, bah kheueh nibak malam nyoe Teungku Amphon dan Haman neujak ubak khanuri nyang ulôn peuna keu Teungku Amphon." 5 Raja geuyue ubak Haman beureujang jiteuka, mangat awaknyan meuteumé meusajan-sajan geujak pajoh khanuri Ester. Dan jijak kheueh awaknyan ubak teumpat khanuri nyang teungoh geulaksana lé Ester nyan. 6 Watée teungoh jieb ié anggô, raja geutanyong ubak ratu, "Jinoenyoe neupeugah kheueh laju peue nyang gata lakée. Peue nyang gata meuheuet ulôn bri, bahpi siteungoh nibak keurajeuen ulôn nyoe!" 7 Geujaweueb lé Ester, 8 "Meunyoe Teungku Amphon neujok peue nyang ulôn lakée nyoe, bah kheueh Teungku Amphon dan Haman neuteuka lom nibak khanuri nyang teuma ulôn peuna nibak malam singoh, eunteuk nibak khanuri nyan ulôn peugah peue nyang ulôn meuheuet nibak Teungku Amphon." 9 Haman jiwoe di rumoh Ratu Ester nyang banseuleusoe geupajoh khanuri deungon até nyang galak lagoena. Teuma óh trok nibak babah pintoe meuligoe leumah geungieng Mordekhai nyang hana geubeudôh nibak teumpat duek geuh geubri horeumat ubak gobnyan, lé sababnyan Haman beungéh that-that watée jikalon nyan. 10 Teuma teutab jipeuteuen droe dan jiwoe laju u rumoh. Óh ka trok gobnyan u rumoh geuyue laju rakan-rakan gobnyan dan geulakée Zeres, peurumoh gobnyan, mangat jitem duek-duek deungon awaknyan. 11 Dan nibak duek-duek nyan lé Haman laju jicok keuseumpatan keu jipeusombong droe dikeue awaknyan dan laju jipeuna beurakah ngon haba nyang manyang dikeue awaknyan, bah kheueh nyan keuhai keukayaan droe gobnyan, aneuëk-aneuëk agam jih nyang le, meunan cit deungon keududuekan peunteng nyang ka jiteurimong nibak raja, deungon pangkat jihnyan nyang jiôh leubeh manyang nibak peugawée-peugawée nyang laén. 12 Jipeugah lom lagée nyoe, "Bahpi Ratu Ester nyang geu undang nibak khanuri gobnyan na kheueh ulôn dan raja keu khanuri nyang geupeukhusos keu kamoe, dan malam singoh kamoe geutawök lom. 13 Teuma banmandum nyan hana peureulée keu ulôn, simantong deuh ulôn kalon Mordekhai, ureuëng Yahudi nyan, jiduek di babah pintoe meuligoe." 14 Ban jideungoe nyan peurumoh dan banmandum rakan-rakan gobnyan laju jipeugah lagée nyoe, "Neuyue mantong peugét taméh teumpat meugantung nyang manyang jih dua ploh dua metée. Dan óh singoh beungoh, bansuboh that-that neulakée kheueh idhin ubak raja mangat jeuet tagantung Mordekhai nibak taméh nyan. Deungon na lagée nyan droeneueh ka hase neujak ubak teumpat khanuri nyan deungon até nyang peunoh geumbira." Usui nyan jroh lagoena meunurot pikeran Haman, sabab nyan gobnyan laju geuyue ureuëng laén jijak peugot taméh gantungan nyan.

Ester 6

1 Bak malam nyan cit teuma raja hana hase geuéh, gobnyan apoh apah geulisah hana meuteuntée. Lé sabab nyan geuyue cok laju kitab catetan seujarah keurajeuen dan kitab nyan geuyue beuet laju ubak ureuëng laén. 2 Di dalam kitab nyang teungoh teubeuet nyan leumah laju saboh catetan nyang bahwa Mordekhai ka geulapor keuhai useuha Bigtan dan Teres dua droe peujabat nyang khusos geujaga kama raja, keu jikeuneuk poh maté raja. 3 Laju geutanyong lé raja ubak ureuëng nyang teungoh beuet kitab nyan, "Horeumat atawa balaih jasa peue nyang ka teujok ubak Mordekhai nyan?" Geujaweueb lé napadub droe deundayang raja, "Meusapeue pih hana geuteurimong lé Mordekhai, ya Teungku Amphon." 4 Laju geutanyong lom lé raja, "Soe lamkawan peugawée ulôn nyang na didalam meuligoe nibak watée nyoe?" Keubeutulan Haman banmantong jitamong uleuen meuligoe; keuhai Haman jijak keunan lé jihnyan keuneuk jaklakée ubak raja mangat teugantung Mordekhai nibak taméh nyang ka lheueh jiglong. 5 Laju jijaweueb lé deundayang raja nyang na disinan, "Haman na didalam meuligoe dan gobnyan leumah jih keuneuk meuhadab ubak Teungku Amphon." "Tayue tamong laju u dalam," kheun raja. 6 Óh ka lheueh Haman jitamong u dalam, laju geupeugah lé raja ubak Haman, "Na ureuëng nyang keuneuk ulôn bri peunghoreumatan nyang paleng raya. Peu kheueh nyang ulôn peubuet ateueh ureuëng nyan?" Geupike lé Haman, "Soe lom nyang geubri peung horeumatan nyang paleng rayeuk? Pasti nyan keu ulôn!" 7 Lé sabab nyan gobnyan geujaweueb, "Nyang paleng gét keu ureuëng nyan teupeungui peukayan keubeusaran nyang lazem jih Teungku Amphon ngui. Óh lheueh nyan guda Teungku Amphon teupeungui teuma deungon lambang-lambang keurajeuen. 9 Sidroe lamkawan ureuëng rayeuk nanggroe nibak keuturonan ulée balang harôh kheueh jijak peungui peukayan nyan ubak ureuëng nyang keuneuk Teungku Amphon bri peunghoreumatan nyan, dan laju jijakba keulileng nanggroe ureuëng nyan sira jiduek di ateueh guda Teungku Amphon rot padang banda. Ureuëng rayeuk nyan teuma jijak dikeue sira jitawök ngon jipeumaklum ubak rakyat, 'Meunoe kheueh meunyoe raja geubri peunghoreumatan keu ureuëng nyang geuhoreumat lé gobnyan!' " 10 Dan geupeugah kheueh lé raja ubak Haman, "Bagaih, tajakcok laju peukayan dan guda nyan dan tajok kheueh laju banmandum peunghoreumatan nyan ubak Mordekhai, ureuëng Yahudi nyan. Tapeubuet kheueh laju lagée nyang gata kheun bunoe, hana jeuet tapeukureueng bahpi meusapeue pi. Mordekhai nyan ka jeuet gata meurumpok jéhpat teungoh jiduek-duek di leuen meuligoe." 11 Dan Haman pih laju jijakcok peukayan dan guda óh lheuehnyan jijak peungui laju ubak Mordekhai, óh ka lheueh Mordekhai geuék u ateueh gudanyan, Haman laju jiba meukeulileng rot padang banda, sira jitawök-tawök ngon jipeumaklum ubak rakyat, "Ngieng kheueh, meunoe kheueh meunyoe raja ka geubri peunghargaan keu ureuëng nyang geuhoreumat lé gobnyan!" 12 Óh lheuehnyan Mordekhai laju geuriwang ubak babah pintoe geureubang meuligoe. Teuma Haman meudab-dab geujakwoe laju, sabab gobnyan lumpah that malée. Haman hana geutem ngieng ateueh ureuëng ramé sabab malée nyan hana hase geusöm, teuma gobnyan laju jisöm muka keu ureuëng nyang kalon u ateueh jihnyan. 13 Ubak peurumoh dan banmandum rakan-rakan Haman laju jicalitra peue nyang ka jipeubuet nyan. Óh lheuehnyan lé peurumoh gobnyan dan rakan-rakan gobnyan nyang carông-carông nyan geupeugah ubak Haman, "Droeneueh ka jipeuphon taloe teunaga deungon Mordekhai. Jihnyan ureuëng Yahudi dan droeneueh hana hase talawan jihnyan. Jihnyan pasti teuma jipeutaloe gata." 14 Teungoh awaknyan mantong meututoe deungon Haman, dumna peujabat meuligoe teuka deungon teugisa-gisa keuneuk jak intat Haman ubak khanuri nyang geupeuna lé Ester.

Ester 7

1 Dan keu nyang keudua goe jih raja dan Haman geumakheun dan geujieb ié meusajan-sajan deungon Ester. 2 Sira geujieb ié, raja geutanyong lom ubak Ester, "Hai, Peureumaisuri ulôn, peue nyang gata lakée? Gata peugah kheueh laju! Pasti ulônbri bahpi nyang gata lakée siteungoh nibak keurajeuen ulôn." 3 Geujaweueb Ratu Ester, "Meunyoe Teungku Amphon neutem, ulôn lakée mangat jeuet ulôn dan bansa ulôn hase udeb. 4 Sabab ulôn dan bansa ulôn ka jipeubloe keuneuk jipeu maté. Seukira jih kamoe jipeubloe keu jicok keunamiet, hainyan ulôn iemdroe dan hana ulôn peukaru Teungku Amphon. Teuma jinoenyoe kamoe jikeuneuk peubinasa dan jipeu habéh trok bak ukeue-ukeue jih!" 5 Dan geutanyong kheueh laju lé Raja Ahasyweros ubak Ratu Ester, "Soe nyang beuhe that jipeubuet lagée nyan? Dan dipat ureuëng nyan?" 6 Geujaweueb lé Ester, "Haman nyang paleng jeuhet nyoe kheueh musoh dan nyang iénanya kamoe!" Deungon teumakot nyang hana teukira Haman laju jingieng u ateueh raja dan Ratu Ester. 7 Raja beungéh lumpah na, laju geubeudôh geutinggai meuja dan laju geuteubiet uluwa, ubak leuen meuligoe. Haman jiteupeue bahwa raja ka geucok keuputosan keuneuk geuhuköm gobnyan, sabab nyan gobnyan teutab tinggai deungon Ratu Ester keu jilakée amphon mangat gobnyan hase geupeuseulamat. 8 Deungon rasa putôh asa Haman laju geupeureubah droe di ateueh kurusi Ratu Ester mangat jilakée amphon, teuma paih bak watéenyan cit teuma raja ka geugisa nibak lam taman meuligoe. Ban geu kalon Haman lagée nyan, laju geupeugah lé Raja, "Peue? Mantong cit jihnyan jijeut peukosa peureumaisuri ulôn, dikeue ulôn dan didalam meuligoe ulôn keudroe?" Dan haba nyan pih habéh geupeugah lé raja, napadub droe peujabat pi jitamong udalam dan laju jipeukulubong ulée Haman. 9 Dan jikheun laju lé Harbona, sidroe lamkawan peujabat nyan, "Teungku Amphon, nibak binéh rumoh Haman na saboh taméh gantungan nyang manyang jih dua ploh dua metée. Atranyan ka lheueh jipeudong lé Haman keuteumpat jigantung Mordekhai, ureuëng nyang ka jipeuseulamat nyawöng Teungku Amphon." Dan geupeurintah laju lé raja, "Jak gantung laju Haman nibak taméh nyan!" 10 Meunan kheueh riwayat Haman habéh teugantung nibak taméh nyang jikeuneuk gantung Mordekhai. Dan óh lheuehnyan reuda kheueh mureuka raja.

Ester 8

1 Bak uroenyan cit teuma Raja Ahasyweros geubri ubak Ratu Ester banmandum hareuta beunda Haman, musoh nyang paleng raya nibak ureuëng Yahudi nyan. Ester geujak peugah ubak raja bahwa Mordekhai syedara karông jih, dan yoh watée nyan Mordekhai geubri hak keu jijakmeuhadab ubak raja deungon hana teuhôi leubeh ilée. 2 Raja laju geusuit incien gobnyan nyang ban geucok lom nibak Haman geujok laju atranyan ubak Mordekhai. Dan Ester laju geuangkat teuma Mordekhai jeuet keu ureuëng nyang mat kuasa ateueh hareuta beunda Haman. 3 Óh ka lheueh nyan Ratu Ester geujak meuhadab lom ubak Raja. Gobnyan laju geusujut sira geumo dan geumeulakée mangat raja geupeubateue reuncana jeuhet nyang ka jiatoe lé Haman ateueh ureuëng Yahudi. 4 Raja laju geu sunyung tungkat méuh gobnyan ubak Ratu Ester, laju geubeudôh Ester sira geupeugah, 5 "Meunyoe Teungku Amphon neutembri ngon neugaséh keu ulôn, bah kheueh Teungku Amphon neupeuteubiet surat peurintah mangat neucabot lom surat-surat Haman nyang meuasoe peurintah geuyue peubinasa banmandum ureuëng Yahudi nyang na didalam keurajeuen nanggroe nyoe. 6 Pakriban mungken ulôn ngieng bansa dan kawöm syedara ulôn habéh banmandum jipeumaté?" 7 Dan geupeugah laju lé Raja Ahasyweros ubak Ratu Ester dan Mordekhai, "Beutôi, ulôn ka lheueh ulôn gantung Haman sabab jihnyan jikeuneuk peubinasa ureuëng Yahudi, dan hareuta beunda jih ka ulôn jok ubak Ester. 8 Teuma surat nyang ka lheueh jituléh ateueh nan raja meunan cit deungon cab raja, atranyan hana hase teutarek lom teuma. Teuma, gatanyoe ulôn peuidhin tatuléh surat keuhai bansa Yahudi, peue mantong nyang gata ngieng gét. Neutuléh kheueh surat nyan ateueh nan ulôn deungon gatacab deungon cab keurajeuen." 9 Bak uroenyan cit teuma, na kheueh bak tanggai 23 buleuen lhée, buleuen Siwan, Mordekhai laju jitawök banmandum seukeutareh raja dan jipeurintah ubak awaknyan mangat awaknyan jituléh surat keu banmandum gubunur, banmandum bupati dan banmandum ureuëng rayeuk nyang na tinggai di 127 boh propinsi, phon di India sampoe trok u Sudan. Surat-surat nyan teutuléh dalam basa dan tulesan nyang didalam propinsi nyan maséng-maséng. Meunan cit gobnyan geukirém teuma surat nyan ubak ureuëng Yahudi dalam basa dan tulésan Yahudi. 10 Surat-surat nyan banmandum geuteken lé Mordekhai ateueh nan Raja Ahasyweros dan geucab deungon cab keurajeuen nanggroe. Dan óh lheuehnyan lé Mordekhai laju geuyue ubak upah-upah keujijak peutrok banmandum surat nyan banmandum propinsi sira jipasang guda nyang bagaih plueng milék raja. 11 Surat nyan asoe jih na kheueh bahwa raja ka geupeu idhin ubak ureuëng Yahudi nyang na di tieb-tieb banda mangat meusajan baho meubaho teubila droe. Meunyoe awaknyan jiseurang lé bansa-bansa nyang na didalam propinsi toih mantong, awaknyan jeuet meulawan jipoh maté ureuëng nyang seurang droe jih meunan cit deungon purumoh dan aneuëk-aneuëk jihnyan; dan meunan cit awaknyan jeuet jisie musoh-musoh jihnyan sampoe habéh banmandum dan hareuta milék ureuëng nyan jeuet jireupah. 12 Peurintah nyan harôh teulaksana bansaboh nanggroe Persia bak uroe nyang ka jipeuteutab lé Haman keu jipoh maté bubena ureuëng-ureuëng Yahudi, bak tanggai lhée blaih buleuen dua blaih, buleuen Adar. 13 Surat peurintah nyan harôh teupeuteubiet sibagoe undang-undang dan teupeumaklum ubak mandum ureuëng nyang na di tieb-tieb propinsi mangat bansa Yahudi siab siaga jilawan musoh jihnyan meunyoe uroe nyang ka teupeuteuntée nyan ka trok. 14 Dan jijak kheueh laju bubena ureuëng upah nyan deungon jipasang ateueh rueng guda raja. Meunan cit di Susan ma banda nanggroe surat peurintah nyan teubaca. 15 Óh lheuehnyan Mordekhai geutinggai laju meuligoe sira geungui peukayan uléebalang nyang meuwareuna ijo dan putéh, jubah ungu nyang teupeugét nibak ija lineun nyang halôh dan mahkota méuh nyang lumpah lagak. Banda Susan jisumurak geumbira sabab harok that. 16 Di ureuëng Yahudi ka meurasa seunang ngon geumbira, bahgia dan bangga. 17 Meunan cit ditieb-tieb banda dan propinsi, dipat mantong surat peurintah raja nyan teupeumaklum, ureuëng-ureuëng Yahudi lumpah geumbira ngon harok that-that sira jipeugot khanuri sibagoe ucapan syukoe. Dan le that nibak peunduduek nyang jeuet keuwareuga bansa Yahudi, sabab awaknyan jitakot keu bansa nyan.

Ester 9

1 Akhé jih trok kheueh ubak tanggai lhée blaih buleuen Adar, nyan uroe nyang ka teupeuteuntée keuteupeubuet peurintah raja ateueh ureuëng-ureuëng Yahudi. Uroe nyan ka jipreh-preh lé musoh-musoh bansa Yahudi jikeuneuk kuasa ateueh bansa nyan. Teuma teunyata ureuëng Yahudi kheueh nyang peutaloe awaknyan. 2 Nibak tieb-tieb banda, ureuëng-ureuëng Yahudi jimeusapat dan geumeusaho keujilawan ureuëng nyang kana niet hana gét ateueh awaknyan. Dan deungon na peulawanan nibak ureuëng Yahudi nyan, teuma bansa-bansa dipat mantong na tinggai ka teuka yoe ngon teumakot nyang hana daya keu ureuëng Yahudi nyan sampoe hana meusidroe pih nyang jijeuet jilawan ureuëng Yahudi nyan. 3 Malah, banmandum ureuëng-ureuëng rayeuk nyang na di tieb-tieb propinsi, dumna gubunur, bupati dan peujabat nanggroe geusukong keu ureuëng Yahudi nyang teungoh jibri peulawanan nyan sabab awaknyan banmandum jitakot keu Mordekhai. 4 Bansaboh keurajeuen nanggroe dirakyatba jiteupeue bahwa Mordekhai nyan lumpah that meupeungaroih di dalam meuligoe dan treb bak treb seumakén meukuasa. 5 Meunan kheueh jeuet jih, bansa Yahudi ka hase jipeusaneut peue mantong ateueh musoh jihnyan, musoh jihnyan jiprang deungon peudeueng dan laju jipoh maté. 6 Di Susan, ma nanggroe keurajeuen, ureuëng Yahudi ka jipoh maté musoh jih na 500 droe. 7 Lamkawan nyan na siploh droe aneuëk agam Haman aneuëk Hamedata, musoh nyang paleng rayeuk nibak ureuëng Yahudi. Awaknyan na kheueh: Parsandata, Dalfon, Aspata, Porata, Adalya, Aridata, Parmasta, Arisai, Aridai dan Waizata. Teuma ureuëng Yahudi hana jireupah hareuta awaknyan. 11 Bak uroenyan cit teuma na ureuëng jijak meulapor ubak raja jipeugah keuhai sijeumeulah ureuëng nyang ka maté keunong poh di Susan. 12 Geupeugah lé Baginda ubak Ratu Ester, "Di Susan mantong jai that ureuëng Yahudi ka jipoh maté na 500 droe musoh, jitamong cit lamkawannyan ban siploh droe aneuëk-aneuëk Haman. Peue teuklom nyang na di propinsi-propinsi nyang laén! Aleh peue nyang jipeubuet lé awaknyan disideh! Lé sababnyan, peue lom nyang gata lakée nibak saát nyoe? Neupeugah laju, nyang gata lakée nyan pasti gata teumé!" 13 Geujaweueb lé Ester lagée nyoe, "Meunyoe Teungku Amphon neutem bri, bah kheueh ureuëng-ureuëng Yahudi nyang na tinggai teutab di Susan nyoe singoh beungoh neubri idhin lom jipeubuet lagée nyang ka jipeubuet nibak uroe nyoe. Lom teuma, manyét aneuëk-aneuëk Haman nyan teugantung ateueh taméh-taméh gantungan." 14 Dan di raja pih laju geupeutreun peurintah lagée nyang ka geulakée lé Ester; surat peurintah keu banda Susan laju geupeuteubiet dan manyét-manyét aneuëk Haman nyang siploh droe nyan laju jigantung. 15 Teuma, bak tanggai peuet blaih buleuen Adar, ureuëng-ureuëng Yahudi nyang na di Susan laju jimeusapat lom dan laju jipoh maté na 300 droe teuk di banda Susan nyan. Meunan cit goenyoe awaknyan hana cit jireupah hareuta beunda musoh. 16 Meunan cit deungon ureuëng-ureuëng Yahudi nyang na tinggai di propinsi-propinsi nyang laén diawaknyan pi ka meusapat sira jibila droe. Awak Yahudi nyan laju jipeutaloe musoh jihnyan dan na jipoh maté 75.000 droe nyang jibanci keu awaknyan. Meunan cit awaknyan hana jireupah hareuta milék ureuëng nyan. 17 Hainyan teujadi nibak tanggai lhée blaih buleuen Adar. Uroe nyang óh lheuehnyan teuma, bak tanggai peuet blaih, awaknyan hana jipoh maté meusidroe ureuëng pi, teuma jipeuraya uroe nyan deungon peunoh geumbira. 18 Teuma lé ureuëng-ureuëng Yahudi nyang na tinggai di banda Susan awaknyan jipeuraya uroe nyan na kheueh nibak tanggai limong blaih sibagoe uroe rayeuk, sabab awaknyan ka jipoh maté musoh tanggai lhée blaih dan peuet blaih, laju jipiôh bak tanggai limong blaih. 19 Nyan kheueh sabab jih ureuëng Yahudi nyang na tinggai di banda-banda nyang ubit jipeuingat tanggai peuet blaih buleuen Adar sibagoe uroe raya nyang peunoh geumbira, uroe jipeuna khanuri nyang lumpah geumbira sira saleng jibri hadiah nyang na hubongan ngon peunajoh. 20 Óh lheueh nyan lé Mordekhai laju geucetet banmandum keujadian nyan, dan geukirém laju surat ubak dumna ureuëng Yahudi nyang na tinggai bansaboh keurajeuen Persia, bah kheueh nyang jiôh, meunan cit nyang rab. 21 Asoe surat nyan na kheueh peurintah mangat teupeuraya tanggai peuet blaih dan limong blaih buleuen Adar tieb-tieb thon. 22 Sabab bak uroe-uroe nyang lagée nyan kheueh awaknyan jipeutaloe bubena musoh-musohjih, deungon nyan teuma keuhai peudeh ngon keupeudehan nyang lumpah that phet nyang rab jirasa meu-ubah jeuet keugeumbiraan dan keubahgiaan. Lé sabab nyan, awaknyan harôh jipeuraya uroe-uroe nyang lagée nyan khanuri dan peujamé ureuëng laén meunan cit saleng jibri peunajoh dan jijok seudeukah keu ureuëng gasien. 23 Ureuëng Yahudi jitaát banmandum peue nyang geupeurintah lé Mordekhai nyan dan meunan kheueh sabe sampoe peurayaan nyan ka jeuet keu adat nyang jipeuingat tieb-tieb thon. 24 Haman aneuëk Hamedata, keuturonan Agag, musoh nyang paleng rayeuk nibak ureuëng Yahudi, ka lheueh jitiek undi nyang teuboh deungon nan "Purim" guna jih na kheueh keu teupeuteutab uroe nyang jroh keu teupeuhabéh nyawöng ureuëng Yahudi; jihnyan ka lheueh jireuncana keu jipeu habéh bubena awaknyan. 25 Teuma Ester laju geujak meuhadab ubak raja, dan raja laju geubri peurintah nyang teutuléh nyang akhé jih banmandum reuncana jeuhet nyang ka jisuson lé Haman meubalaih u ateueh gobnyan keudroe, sampoe jihnyan dan aneuëk-aneuëk jihnyan teugantung nibak taméh geunantung. 26 Sabab nyan kheueh uroe-uroe raya nyan geuboh nan Purim. Surat Mordekhai dan peue mantong nyang ka ji álami lé ureuëng Yahudi, 27 meuakibat jih awaknyan jipeugöt peuratoran keu awaknyan keudroe, keu keuturonan awaknyan dan keu banmandum ureuëng nyang teuma jeuet keuwareuga bansa Yahudi. Meunurot peuratoran nyan awaknyan tieb-tieb thon wajéb jipeuraya ban dua uroe nyang ka geupeuteutab lé Mordekhai. 28 Meunan cit geupeuteutab lom bahwa keu siumu masa uroe-uroe Purim nyan harôh ji-ingat dan jipeuraya lé tieb-tieb keuluwarga ureuëng Yahudi nibak meubagoe angkatan di tieb-tieb propinsi dan tieb-tieb banda. 29 Disampeng nibaknyan, meusigoe deungon surat Mordekhai nyan; Ratu Ester aneuëk Abihail geutuléh teuma surat nyang keudua, nyang asoe jih teupeukong surat Mordekhai keuhai Purim nyan. 30 Surat nyan geukirém keu banmandum ureuëng Yahudi, dan seunalen nibak surat-surat nyan geukirém teuma ubak ban 127 boh propinsi nyang na didalam keurajeuen Persia nyang luwah nyan. Surat nyan geuiréng teuma deungon doá mangat jeuet bansa Yahudi sabe lam seujahtra dan mubahgia. 31 Meunan cit dalam surat nyan na teuma teuyue ubak ureuëng Yahudi mangat awaknyan dan keuturonan awaknyan sabe jipeuingat uroe-uroe Purim bak watée nyang teupat, lagée awaknyan nyang ka jipeuna uroe puasa dan uroe meukabong. Nyan kheueh asoe surat Mordekhai dan Ratu Ester. 32 Peurintah Ratu Ester nyang asoe jih keuhai peuratoran-peuratoran Purim, nyan na teucetet didalam kitab.

Ester 10

1 Raja Ahasyweros laju geupeuna keureuja paksa, bukon keu rakyat nyang na tinggai di daerah-daerah nyang nibak panté binéh laôt keurajeuen gobnyan mantong, teuma keunong cit ubak daerah-daerah nyang na tinggai di gampông-gampông ngon nyang na tinggai di tunong. 2 Banmandum buet-buet nyang rayeuk ngon hibat-hibat, dan meunan cit kisah nyang leungkab pakriban gobnyan geuangkat Mordekhai jeuet keupeujabat manyang lam keurajeuen nanggroe, nyan na teucetet didalam kitab seujarah raja-raja Persia dan Media. 3 Mordekhai, ureuëng Yahudi nyan teutab geuduek nibak jabatan nyang paleng manyang dimiyueb Raja Ahasyweros keudroe. Mordekhai jihoreumat dan jigalak lé ureuëng-ureuëng seubansa gobnyan. Gobnyan geumeujuang keu keuseulamatan dan geuseujahteraan bansa gobnyan dan banmandum keuturonan awaknyan.

Ayub 1

1 Na saboh teumpat nyang nan jih tanoh Us, disinan tinggai sidroe ureuëng agam nyang nan gobnyan Nabi Ayub. Nabi nyan hana geupiôh geuseumah Po teu Allah dan seutia that gobnyan ubak TUHAN. Nabi nyan sidroe ureuëng nyang gét budoe dan hana geupeubuet buet nyang jeuhet bahpi mubacut. 2 Nabi nyan na geumeu aneuëk tujoh droe aneuëk agam dan lhée droe aneuëk inong. 3 Seulaén nyan gobnyan na teuma geupeulara namiet nyang cukob le, na 7.000 boh bubiri, 3.000 boh unta, 1.000 boh leumô, dan 500 boh keuleudée. Paneuk haba, gobnyan na kheueh ureuëng nyang paleng kaya lamkawan peunduduek nyang laén di daerah Timu nyan. 4 Ban tujoh droe aneuëk agam Nabi Ayub nyan ka jeuet keulazem jipeuna khanuri di rumoh gobnyan maséng-maséng seucara meugantoe-gantoe. Bak khanuri nyan ban lhée droe aneuëk inong Nabi Ayub geu undang cit sajan, dan laju awaknyan geumakheun ngon geujieb ié meusigoe teuma. 5 Óh ka seuleusoe acara khanuri nyan, Nabi Ayub sabe geubeudôh éh beungoh-beungoh that dan geupeuseumah laju keureubeuen keu tieb-tieb aneuëk gobnyan mangat awaknyan geupeu amphon lé TUHAN. Sabab Nabi Ayub geupike lagée nyoe, jeuet mantong aneuëk-aneuëk geuh nyan ka meudesya jihina Allah ngon hana jisaja. 6 Bak siuroe geujak meuhadab kheueh makhlok-makhlok syeuruga ubak TUHAN, lamkawan nyan na cit jiseutôt lé si Iblih, jén tukang goda nyan. 7 TUHAN meufeureuman ubak awaknyan, "Pane gata nyoe?" Jijaweueb lé Iblih nyan, "Ulôn banmantong teuka nibak meurawôh ban sikeulileng bumoe." 8 Dan geutanyong laju lé TUHAN ubak si iblih nyan, "Peu kheueh gata na gata ngieng hamba Ulôn Nabi Ayub? Nibak bansaboh bumoe nyoe hana ureuëng nyang paleng seutia dan gét até seulaén Nabi Ayub nyan. Gobnyan jiseumah Ulôn dan hana mubacut pih na jipeubuet buet nyang jeuhet." 9 Teuma Jén peurayu nyan jijaweueb, "Ka teuntée Nabi Ayub nyan geuseumah Droeneueh sabab gobnyan meuteumé laba. 10 Gobnyan, keuluwarga dan banmandum keukayaan geuhnyan Droeneueh lindong. Meunan cit deungon peue mantong nyang geupeubuet TUHAN bri beureukat keu gobnyan, TUHAN bri beulatang peulara nyang le, sampoe seb watée geupeureulée padub mantong nyang teupeuguna lam nanggroe. 11 Teuma meunyoe banmandum keukayaan geuhnyan geucok lé TUHAN, ka pasti Nabi Ayub nyan seucara langsong geukutok Droeneueh!" 12 Dan feureuman TUHAN ubak Jén peugoda nyan, "Gét kheueh, meunyoe meunan, tapeubuet laju peue mantong nyang gata rasa patot ateueh hareuta Nabi Ayub nyan, asai bék gata peusakét nibak tuboh gobnyan!" Óh lheueh geupeugah nyan Peugodanyan pih laju jiwéh dikeue TUHAN. 13 Na padubna treb teuma óh lheuehnyan aneuëk-aneuëk Nabi Ayub teungoh jipeuna khanuri di rumoh aduen gobnyan nyang paleng tuha. 14 Dan deungon hana teusangka-sangka na sidroe namiet sira jiplueng u rumoh Nabi Ayub dan laju jipeugah lagée nyoe, "Delat Teungku Amphon, ureuëng Syeba ka teuka jijak prang kamoe bak watée leumô-leumô kamoe teungoh teumeu-ué didalam blang dan keuleudée-keuleudée kamoe teungoh jimurot naleueng nibak banéh nyan. Awaknyan ka jireupah banmandum beulatang-beulatang nyan, dan jipoh maté mandum namiet-namiet Teungku Amphon nyang na disinan. Teuma ulôn mantong nyang seulamat sampoe hase ulôn jak meulapor ubak Teungku Amphon." 16 Bak watée ureuëng nyan teungoh meututoe, teuka teuma namiet nyang keudua ubak gobnyan sira jipeugah, "Banmandum bubiri Teungku Amphon dan bubena ureuëng meurabe ka jitak lé geulanteue sampoe banmandum ka habéh maté. Teuma ulôn keudroe kheueh nyang seulamat nyang kheueh jeuet hase ulôn jak peugah ubak Teungku Amphon." 17 Gohlom habéh gaba gobnyan, ka trok teuma ureuëng nyang keu lhée jijak peusampoe haba nyang laén, "Na lhée boh pasokan peurampok Kasdim jijak reupah unta-unta Teungku Amphon dan dumna namiet Teungku Amphon ka habéh jipoh maté. Teuma ulôn mantong kheueh nyang seulamat teuma hase ulôn jak peugah hainyoe ubak Teungku Amphon." 18 Bak watée gobnyan mantong geupeugah haba, teuka teuma ureuëng laén jijak peusampoe haba nyang lagée nyoe, "Aneuëk-aneuëk Teungku Amphon teungoh geupeugöt khanuri di rumoh aneuëk teungku nyang tuha. 19 Hana teusangka-sangka teuka angén badée di arah padang pasi laju jibapo rumoh aneuëk teungku nyan sampoe reuloih teupeuro nibak tanoh dan banmandum aneuëk Teungku Amphon nyang na didalam rumoh nyan habéh maté. Teuma ulôn kheueh nyang seulamat nyang kheueh jeuet ulôn jak peusampoe hainyoe ubak Teungku Amphon." 20 Ban geudeungoe haba nyan banmandum awaknyan jidong Nabi Ayub sira geupriek-priek bajée gobnyan tanda meuduka cita. Ôk nyang na di ateueh ulée gobnyan laju geucuko, óh lheuehnyan laju geusujut 21 sira geupeugah, "Ulôn geupeulahé lé ma teulon, hana ulôn ba sapeue, dan meunan cit ulôn teuma maté hana sapeue nyang lôn teumeba. TUHAN ka geubri ubak ulôn, dan TUHAN teuma nyang cok lom hareuta geuh nyan. Teupujoe kheueh nan Droeneueh ya TUHAN!" 22 Lé sababnyan, bahpi Nabi Ayub ka geualami banmandum musibah bala nyang rhot ateueh gobnyan nyan, gobnyan teutab hana geupeubuet desya dan gobnyan deungon saba teutab geuseumah Po teu Allah ngon hana geupeusalah TUHAN bah mubacut pi.

Ayub 2

1 Malaikat-malaikat di syeuruga geujak meuhadab lom ubak TUHAN, dan Jén peugoda nyan na cit meusajan malaikat nyan. 2 Teuma TUHAN laju geutanyong ubak awaknyan, "Pane gata nyoe?" Jén peugoda nyan jijaweueb, "Ban lheueh ulôn jak meurawôh keudeh keunoe ban sikeulileng bumoe nyoe." 3 Geutanyong lom lé TUHAN, "Peu kheueh kalheueh gata ngieng hamba Ulôn Nabi Ayub? Bansaboh bumoe nyoe hana ureuëng nyang lagéenyan seutia dan jroh até. Gobnyan jiseumah Ulôn dan mubacut pi hántom na jipeubuet buet nyan jeuhet. Gobnyan mantong teutab seutia ubak Ulôn, bahpi gatanyoe ka tabujuk Ulôn mangat Ulôn peuceulaka Nabi nyan deungon hana alasan mubacut pi." 4 Teuma lé Jén peugoda nyan laju jijaweueb, "Nyawöng dan keuseuhatan leubeh meuyuém nibak hareuta. Manusia rila jikeureubeuen hareuta droe jih asai jihnyan teutab mantong hase udeb. 5 Seukira jih tuboh Nabi Ayub nyan TUHAN peutron peunyakét, ka pasti nabi nyan seucara langsong geukutok Droeneueh!" 6 Dan geupeugah kheueh lé TUHAN ubak Jén peugoda nyan, "Gét kheueh, tapeubuet kheueh laju ban meuheuet gata ateueh Nabi Ayub nyan, asai bék gata poh maté." 7 Dan ban jideungoe haba TUHAN nyang lagée nyan, Jén peugoda nyan laju jijak ubak Nabi Ayub, óh trok ubak gobnyan laju jipeutimoh cabok nyang cukob raya-raya bansaboh badan Nabi Ayub nyan phon nibak tapak gaki sampoe ubak ujong ulée gobnyan. 8 Óh lheueh nyan Nabi Ayub geujak duek laju ubak binéh sinamon blôh, disinan laju geugaro-garo cabok geuh nyan deungon sinuka kaca. 9 Geupeugah lé peurumoh Nabi Ayub ubak gobnyan, "Ka lagéenyoe bagoe keuadaan droeneueh ya Ayub, panena mungken lom droeneueh seutia ubak Po teu Allah? Jak laju, neukutok TUHAN nyan, óh lheuehnyan maté kheueh gata!" 10 Geujaweueb lé Nabi Ayub, "Gata neupeugah haba lagée ureuëng hana akai! Ék kheueh geutanyoe tateurimong nyang jroh-jroh mantong nibak Po teu Allah, meunyoe nyang hana gét tatulak?" Lé sababnyan, bahpi Nabi Ayub meugantoe-gantoe geurasa bala nyang keunong u ateueh geuh nyan, gobnyan teutab saba ngon hana geupeuteubiet meusikrek haba pi nyang teumeureuka ubak Po teu Allah. 11 Bala nyang keunong ateueh Nabi Ayub laju jideungoe lé lhée droe rakan gobnyan, awaknyan na kheueh Elifas asai nibak banda Téman, Bildad ureuëng Suah dan Zofar ureuëng Naamah. Awaknyan ka sipakat keuneuk jaksaweue sira jipeumangat até gobnyan. 12 Teuma bak watée jingieng lé awaknyan rot jiôh, awaknyan rab hana jituri le keu Nabi Ayub nyan. Awaknyan laju jimo ngon su nyang meuleungkeng sira jipriek-priek peukayan jih ngon jisipeuk abée ateueh ulée dan u ateueh manyang. 13 Tujoh uroe tujoh malam awaknyan jiduek nibak tanoh bak binéh Nabi Ayub, hana jimariet bahpi meusikrek haba pi, sabab awaknyan ka deuh jikalon pakriban brat bala nyang geudeurita lé Nabi Ayub nyan.

Ayub 3

1 Óh lheueh nyan Nabi Ayub geupeuphon peugah haba dan geukutok uroe gobnyan lahé, kheun gobnyan, 2 "Ya Allah, kutôk kheueh uroe ulôn lahé, dan malam yoh phon ulôn geukandong lé ma! 4 Ya Allah, peujeuet kheueh uroe nyan seupôt; sampôh kheueh nibak ingatan Droeneueh sampoe leunyab; bék kheueh Droeneueh peubiyeu teuma cahya meuble-ble nyang peupeungéh jihnyan. 5 Peujeuet kheueh uroe nyan itam ngon seupôt glab; seupôt glab, sapu suram; neutôb kheueh ngon awan dan mega, peupayông kheueh nibak cahya surya. 6 Bah kheueh malam nyan teupeugadôh nibak itongan thon dan buleuen; bék le ji-ingat, meunan cit bék teubileueng. 7 Bah kheueh malam nyan peunoh lé seupôt hana geumbira, dan hana teuma meusra. 8 Hei gata dukun-dukun dan nyang keundali Lewiatan, peurhot kheueh uroe nyan deungon sumpah dan kutôk; 9 bék sampoe bintang keujora meuble-ble cahya, bék peubiyeu cahya beungoh jiteubiet teuma! Bah kheueh malam nyan sia-sia mantong teupreh teuka jih uroe dan harapan nyang barô. 10 Teukutôk kheueh malam ceulaka watée ulôn geupeulahé lé ma, dan geupeubiyeu teutanggong seungsara. 11 Pakon ulôn hana maté lam pruet ma, atawa nyawöng lôn teusuet watée ulôn lahé? 12 Pakon ulôn geuwa lé ma dan geupangkée teuma, dan geupeumom nibak boh dada geuh? 13 Meunyoe watée nyan ulôn kuwoe ubak Po, teuma ulôn éh dan meureuhat deungon teunang, 14 lagée raja-raja dan nyang mat kuasa yoh watée ilée, nyang peudong lom meuligoe bak jamén purba. 15 Ulôn teu éh lagée aneuëk raja, nyang pasoe rumoh gobnyan deungon pirak keuncana. 16 Pakon ulôn hana lahé tanna le nyawöng mangat teu éh ulôn meusineunya dan teulena? 17 Disideh, lam kubu, ureuëng jeuhet hana jipeubuet jeuhet dan buruh nyang ka habéh teunaga hase jipeulheueh hék jih. 18 Meunan cit tawanan meurasa puih, beubaih nibak jidhot-dhot lé tukang jaga. 19 Disideh mandum ureuëng saban: nyang meusyeuhu dan nyang hana meugah. Bubena namiet meurdehka teuma óh dudoe. 20 Pakon manusia geupeubiyeu hana putôh-putôh udeb seungsara? Pakon trang geubri ubak nyang seudeh? 21 Awaknyan leubeh galak kubu nibak hareuta, teupreh-preh mawöt, teuma teutab hana teuka. 22 Keubahgiaan barô hase teurasa watée awaknyan ka maté dan teupeukubu. 23 Watée ukeue awaknyan geupeukeuleubông lé Po teu Allah, awaknyan geukeupông lé gobnyan rot meubagoe arah. 24 Gantoe jih pajoh, teuma ulôn apoh apah, hana piôh-piôh ulôn apoh apah. 25 Banmandum nyang ulôn gundah rhot ateueh lôn, banmandum nyang ulôn takot, jiheuntam ulôn. 26 Nibak ulôn hana nyang teuntram, ulôn meudeurita hana keuneulheueh."

Ayub 4

1 Dan meututoe kheueh Elifas, kheun gobnyan: "Nabi Ayub, peu kheueh gata tunu meunyoe ulôn peugah haba? Hana hase ulôn peuteun droe leubeh treb. 3 Jai that ureuëng ka neubri peungajaran, dan awaknyan nyang leumoh ka gata peuteuga. 4 Tutoe haba gata nyang teubri seumangat, teupeubeudôh ureuëng nyang meugantoh, leumoh dan keuweuet. 5 Teuma jinoe gata keudroe nyang keunong duka; gata teukeujôt dan rhot ubak putôh asa. 6 Bukon kheueh gata seutia ubak Po teu Allah; bukon kheueh udeb gata hana meucupa? Meunyoe meunan, ka patot kheueh gata yakén dan hana putôh asa. 7 Pike kheueh, peu kheueh na ureuëng nyang hana meusalah keunong bala dan musibah? 8 Ulôn kuteupeue nibak peungamatan bahwa ureuëng nyang meu-úe nibak buet jeuhet dan jitabu bijéh beuncana lagée seunaman, teuma jipot bala dan keusosahan! 9 Lagée angén badée, meunan kheueh meureuka Allah geupeubinasa awaknyan sampoe punah! 10 Ureuëng jeuhet jitaúm dan jeumeulang jeumeuloe, lagée singa awaknyan jeumeulueng. Teuma Po teu Allah geusumpai babah awaknyan dan geuwiet gigoe awaknyan. 11 Awaknyan maté lagée singa deuk sampoe aneuëk-aneuëk jih meucrebre hana meuteuntée. 12 Ka lheueh na wahyu trok ubak ulôn, lagée teusáh su jih halôh nibak punyueng lôn. 13 Teunget ulôn teupeukaru dan teugoe-goe lé sabab nyan, lagée meuteumé lumpo nyang brok óh malam buta. 14 Ulôn pih teukeujôt dan yo meugeunta; bansaboh tuboh lôn meuguncang, yo lumpah na. 15 Angén dirui jipôt bak muka lôn, dan jibeudôh kheueh bulée kudôk lôn. 16 Saboh bayangan teudong cot dikeue ulôn; ulôn pandang, teuma jihnyan hana lôn turi. Laju ulôn deungoe su teupeukaru sungue nyang seungab suasana, 17 'Mungken kheueh manusia hana meusalah dikeue Allah? Mungken kheueh jihnyan hana meucupa dikeue Allah? 18 Meunan cit hamba-hamba Allah lam syeuruga, hana hase jipeucaya lé Gobnyan. Meunan cit nibak malaikat-malaikat Gobnyan jiteumé salah dan cupa. 19 Peue teuklom makhlok nibak tanoh kliet makhlok abée nyang hase jipiret lagée ngengat! 20 Makhlok nyan udeb oh watée beungoh, laju maté teugageueng oh watée seunja, dan keu siumu masa jihnyan hana teuingat le. 21 Dan gadôh kheueh mandum nyang na nibak jih; gobnyan pih maté hana jiteumé akai budho.'

Ayub 5

1 Meulakée kheueh hei Nabi Ayub, peu kheueh na jeunaweueb? Malaikat toh nyang gata lakée tulông? 2 Teuma na kheueh ureuëng nyang bangai mantong nyang maté sabab lé sakét até. 3 Ka kheueh lôn kalon ureuëng bangai; udeb jih deuh jih kong lumpah na. Teuma ngon hana teusangka-sangka ulôn kutôk teumpat tinggai jih. 4 Lé sababnyan aneuëk-aneuëk jih hántom na meuteumé teumpat meulindong; hana nyang tem bila awaknyan nibak kantô mahkamah. 5 Peue nyang jipot lé awaknyan di ladang jih, habéh jipajoh lé ureuëng nyang deuk pruet jih. Meunan cit gandom nyang na bak teungoh tamah, habéh jipajoh lé ureuëng nyang duek. Atra milék dan keukayaan awaknyan ka jeuet keumeuneuluem ureuëng nyang grah keu hareuta. 6 Bukon nibak bumoe keujeuhetan teuka; bukon teuma nibak tanoh keusosahan jiteubiet. 7 Bukon! Teuma nibak manusia keudroe nyang peuteuka bala ateueh droe jih, lagée meuk bungöng apui nyang teuka nibak apui nyan keudroe. 8 Meunyoe ulôn lam keuadaan gata, ubak Po teu Allah ulôn meulakée. Ubak Gobnyan ulôn meungadu, dan ulôn seurah peukara lôn. 9 Cebtaan-cebtaan Po teu Allah luwabiasa; hana hase tapeuphom lé tanyoe keudroe. Mujizat-mujizat nyang geupeuget nyan, hana teubileueng dan hana habéh-habéh jih. 10 Gobnyan geupeutreun ujeuen ateueh bumoe; sampoe ladang ngon padang habéh bulut teuseuram. 11 Gobnyan kheueh Po teu Allah nyang peumanyang ureuëng miyueb, dan nyang peubahgia ureuëng nyang sosah 12 Geupeubateue reuncana ureuëng lisek, geupeurasat dan geudrob teuma ureuëng ceureudek, akhé jih banmandum useuha awaknyan hana jeuet keubuet, dan awaknyan keunong peunget lé akai jih keudroe. 14 Óh watée uroe awaknyan jitimpok lé seupôt, meugeue-meugeue lagée óh watée malam. 15 Teuma Po teu Allah geupeuseulamat; ureuëng gasien nibak maté, ureuëng miyueb nibak keunong tindéeh. 16 Jinoe na harapan teuma nibak ureuëng nyang hana sapeue na. Dan ureuëng jeuhet seungab tan jeuet jipeugah haba, sabab Po teu Allah ka geupeuseungab babah jih. 17 Untông kheueh gata meunyoe Po teu Allah geuseugah gata! Bék keucewa meunyoe Gobnyan geupeukeunong bala ateueh gata. 18 Sabab Po teu Allah nyang peusakét nyan, Gobnyan teuma nyang peu-ubat. Dan jaroe Gobnyan nyang geupoh, dan nyang peu-ubat teuma. 19 Meunyoe bahya teuka jiancam gata, sabe Gobnyan geupeuseulamat gata. 20 Meunyoe musém deuk teuka jiancam gata, gata hana maté lé sabab deuk. Meunyoe prang teuka meunan hebat jih, gata aman nibak maté. 21 Gata geujaga nibak fiteunah dan peusuna; gata hadab musibah ngon hana teumakot. 22 Meunyoe keujam ngon musém deuk trok jiteuka, gata teuma tabah dan teukém-kém geumbira. Gata hana meurasa teumakot dan gundah, watée gata hadab beulatang juah dan ganas. 23 Ladang nyang gata meu-uéu hana teuma meubatée; beulatang juah hana teuma jiteugom gata. 24 Gata teutab aman tinggai lam khimah gata; dan meunyoe gata pareksa bubiri-bubiri gata, banmandum seulamat hana kureueng sapeue. 25 Aneuëk cucoe gata hana ék teukira awaknyan jai that lagée naleueng lam padang. 26 Lagée gandom nyang ka masak, teupot óh trok bak watée, gata pih udeb seuhat sampoe óh watée tuha. 27 Hei Nabi Ayub, banmandum nyan ka kamoe pareksa. Haba nyan beutôi lé sababnyan teurimong kheueh mantong."

Ayub 6

1 Laju Nabi Ayub geujaweueb, "Seukira jih duka nestapa lôn teutimang geuhon jih, 3 pasti leubeh geuhon nibak anoe lam laôt raya. Lé sababnyan, bék hireuen meunyoe tutoe haba lôn kureueng até-até dan teugisa-gisa. 4 Panah nibak Nyang Mahakuasa teupeubeusoét tuboh lôn; racon jih jimeu éue bansaboh jiwa raga lôn. Keudahsyatan Po teu Allah keubiet teumakot raya, dan geuheuntam ulôn lagée pasokan lawan. 5 Keuleudée teuma puih meunyoe teujôk naleueng muda, meunan cit leumô meunyoe teujôk peunajoh mangat. 6 Teuma peunajoh tabeue, soe nyang hawa? Panena mungken putéh boh manok na rasa jih? 7 Hana galak ulôn cukéeh atra nyan; luwat ulôn meunyoe lôn pajoh nyan. 8 Pakon Po teu Allah beu ôe geudeungoe doá ulôn? Pakon hana geupakoe ubak meulakée lôn? 9 Kira jih Po teu Allah geutem peureumok tuboh lôn! Kira jih Gobnyan geujak buet dan geupoh maté lôn! 10 Nibak ulôn hainyan sibagoe hiboran; ulôn teuma meunari diteungoh deurita. Banmandum peurintah Po teu Allah Nyang Mahakudus ka ulôn taát dan lôn simak sabe. 11 Peue teunaga ulôn sampoe lôn mantong na? Peue harapan mangat meuteumé udeb nyang leubeh treb? 12 Lagée teunaga batée kheueh tuboh ulôn nyoe? Teupeuget nibak teumaga kheueh tuboh ulôn nyoe? 13 Habéh kheueh teunaga ulôn jak mita sinulông; nibak ulôn ka hana le nyang tulông. 14 Nibak deurita nyang lagée nyoe bagoe ulôn meuharab sahabat seujati. Aléh ulôn mantong teutab seutia atawa ka ulôn meulaloe Nyang Mahakuasa. 15 Teuma gata, hai rakan-rakan lôn, hana jeuet teupeucaya dan teupeubangga. Gata lagée krueng nyang habéh ié jih, watée ujeuen hántom jiteuka. 16 Gata lagée krueng nyang seungab dan kaku, sabab ka teutôb ngon salju dan ié beuku. 17 Reujang that watée ka trok musém khueng salju dan éeh nyan gadôh hana meubeukaih. Dimiyueb ié krueng ka jeuet keu tho, hanale meu ié dan tho kreng hana sapeue na. 18 Kafilah-kafilah sisat watée jijak mita ié; awaknyan meuwot-wot dan maté lam padang pasi. 19 Kafilah nyang teuka nibak Syeba dan nibak Tema jijak mita ié nyan dan meuharab that teuma. 20 Teuma harapan awaknyan sia-sia nibak binéh krueng nyang ka hana ié. 21 Lagée krueng, nyan kheueh gata, rakan lôn; gata surot dan teumakot takalon deurita lôn. 22 Pakon? Peu kheueh ulôn lakée sapeue-sapeue nibak droeneueh? Atawa lônyue gata jak sugok gob deumi keupeuntengan ulôn? 23 Peu kheueh ulôn lakée keuseulamatan dan teuteubôih nibak musoh nyang hana gaséh sayang? 24 Lé sababnyan, peurunoe kheueh lôn, tunyok kheueh salah ulôn! Ulôn teuma seungab dan lôn simak peue kheun droeneueh. 25 Tutoe haba nyang jujoe biet teupeusijuk até, teuma tutoe haba droeneueh nyang soh, hana meumakna! 26 Banmandum tutoe haba lôn, droeneueh anggab angén mantong; peucuma droeneueh jaweueb ulôn nyang ka putôh asa. 27 Meunan cit aneuëk yatem ngon meuntui droeneueh undi naseb jih, rakan krab droeneueh, droeneueh curiga mangat jeuet keukaya. 28 Cuba, ngieng kheueh ulôn; ék kheueh ulôn nyoe meusulet ubak droeneueh? 29 Bék meubuet hana ade, sada kheueh! Bék teunak ulôn, ulôn biet hana meusalah. 30 Peu kheueh nibak neupike ulôn nyoe meusulet, hana hase neupeubeda nyang get ngon nyang teucela?

Ayub 7

1 Manusia nyan lagée teupaksa meujuang; udeb jih brat lagée udeb sidroe ureuëng tung upah; 2 lagée namiet nyang rindu ubak teumpat meulindong; lagée buruh nyang jipreh gaji. 3 Habéh buleuen meugantoe buleuen udeb lôn hana tujuan; habéh malam meugantoe malam até ulôn peunoh keuseudehan. 4 Watée ulôn jak éh, malam meureuntang panyang; ulôn meucen that ubak reuneue, hana hase ulôn éh ngon teunang. 5 Tuboh ulôn peunoh ngon glang dan krak darah; kulét lôn luka dan jipeuteubiet danoh. 6 Udeb lôn nyang hana harapan nyan jijak laju ubak keuneulheueh, leubeh tajam nibak tumpeuen jijak peurahô jih. 7 Ingat kheueh, ya Allah, udeb lôn na kheueh nafáh nyang teuyueb; bahgia lôn gadôh, hana tinggai beukaih. 8 Jinoe Droeneueh neukalon ulôn -- teuma nyan hana treb. Meunyoe teuma ulôn Droeneueh mita, teuma ulôn ka hanale. 9 Lagée awan nyang reudôk dan laju gadôh, manusia pi maté, hana teuma jiwoe le. Banmandum ureuëng nyang ka lheueh jituri gobnyan, tuwoe ubak gobnyan dan hanale jiingat gobnyan. 11 Lé sababnyan ulôn hana jeuet lôn seungab droe! Rasa peudeh dan phet ulôn hana hase lôn peuseungab. Ulôn harôh lôn peugah haba, dan lôn peugah mandum asoe até lôn. 12 Pakon ulôn nyoe teutab Droeneueh kawai dan Droeneueh jaga? Peu kheueh ulôn nyoe naga laôt nyang meubahya? 13 Ulôn ku éh dan lôn ujoe peulheueh hek; ulôn mita nyang phui keu até ulôn nyang gundah gulana. 14 Teuma Droeneueh peutakot ulôn deungon lumpo; Droeneueh peuteuka lumpo brok dan khayalan. 15 Lé sababnyan ulôn leubeh galak jiceukiek laju maté nibak udeb deungon tuboh nyang peunoh deurita nyoe. 16 Ulôn hek dan bosan udeb; ulôn meuheuet that keu maté! Peubiyeu mantong ulôn sabab udeb ulôn hana meuguna. 17 Pakon manusia meunan that peunteng nibak Droeneueh? Pakon buet-buet jih Droeneueh kalon sabe? 18 Droeneueh seulidék jihnyan tieb-tieb beungoh, dan tieb-tieb watée jihnyan Droeneueh ujoe. 19 Pajan kheueh Droeneueh neupaleng nibak ulôn, sampoe hase ulôn úet ié ludah lôn? 20 Hei Tukang keumiet lôn, peu kheueh rugoe Droeneueh sabab lé desya lôn? Pakon Droeneueh peuguna ulôn sibagoe sinakat aneuk panah Droeneueh? Peue ka geuhon that ulôn nyoe jeuet keu beuban Droeneueh? 21 Peu kheueh hana hase Droeneueh neupeu amphon desya lôn? Peu kheueh hana mungken Droeneueh sampôh salah ulôn? Hana treble ulôn ka teu éh dalam jrat, dan meunyoe Droeneueh mita ulôn, ulôn hana meuteumé."

Ayub 8

1 Laju geupeugah lé Bildad, "Padubna teuk treb jih gata peugah meunan? Tutoe haba gata lagée angén pôt nyang meuhuéb-huéb. 3 Po teu Allah hántom na geupeukeuwieng keuadelan; hántom na nyang hana jadeh bak geupeudong nyang beuna. 4 Mungken aneuëk-aneuëk gata meudesya ubak Gobnyan, teuma ka pantaih kheueh awaknyan geuhuköm lé Gobnyan. 5 Teuma meunyoe ubak Gobnyan gata meupayong, neulakée beugaséh dan beugeupeu amphon, 6 meunyoe até gata jujoe hana meucupa, Po teu Allah teuma geutulông gata deungon sigra; dan sibagoe balasan, rumoh tangga gata teuma geupeupuléh lagée nyang ka-ka. 7 Keukayaan gata nyang gadôh nyan hana meumakna meunyoe teubandeng deungon peue nyang gata teumé teuma. 8 Ureuëng áreh yoh jamén ilée bah kheueh gata kalon, dan gata éue peungalaman indatu gata. 9 Udeb geutanyoe paneuk, tanyoe hana tateupeue sapeue; uroe-uroe geutanyoe lagée bubayang mantong. 10 Deungoe kheueh tutoe haba ureuëng áreh nyan leubeh ilée, awaknyan geujôk peulajaran nyoe ubak gata. 11 'Bak teumpat meu ié mantong hase jitimoh geulagah; ôn sikée teuma na meuteumé nibak tanoh bencah. 12 Meunyoe ié jih tho, geulagah nyan udeb layée, leubeh bagaih nibak naleueng nyang laén. Padahai mantong get dan gohlom trok watée, jihnyan teukoh dan teucok syeufeuát jih. 13 Meunan kheueh ureuëng nyang hana meutuhan. Jihnyan tuwoe ubak Po teu Allah, dan gadôh kheueh harapan. 14 Sikrek beuneueng nyang leumoh nyan kheueh keu jipeubangga; umpueng rambideuen jeuet keupeucayaan jih. 15 Peu kheueh kong eumpueng nyan meunyoe teucok keu teumpat meusadeue? Peu kheueh kong beuneueng nyan meunyoe teucok keu ngon mumat?' 16 Lagée naleueng lakoe, seugar kheueh ureuëng nyang hana meutuhan; watée keunong cahya mata uroe, jihnyan udeb suboe dan peunoh keubon. 17 Ukeue jih jipalet batée-batée bak tanoh; jiglông kong that, jihnyan hana mudah guyah. 18 Teuma, cuba, lôt kheueh jinoe bak naleueng lakoe nyan, dan sang-sang hántom na naleueng lakoe nyan disinan. 19 Biet, keuseunangan ureuëng jeuhet teuma nyan mantong; ureuëng laén teuka dan jigantoe gobnyan. 20 Teuma Po teu Allah hántom na geutinggai ureuëng nyang seutia, dan hántom na teuma geutulông ureuëng doraka. 21 Babah gata teuma geupeujeuet teukém, bibi gata meusurak-surak deungon geumbira. 22 Nyang banci gata meurasa malée dan meurasa droe miyueb, dan rumoh ureuëng jeuhet teuma geupeurusak sampoe hanco."

Ayub 9

1 Teuma Nabi Ayub geujaweueb, "Beutôi, ulôn kuteupeue, tutoe haba droeneueh nyan hana salah. Teuma, panena mungken manusia jimeupeukara ngon Allah dan ji peutaloe teuma? 3 Nibak siribée boh teumanyong nyang geutanyong lé Po teu Allah, meusaboh pih hana hase jijaweueb lé manusia. 4 Po teu Allah nyan keubiet that áreh dan meukuasa; soe nyang hase meuteun jilawan Gobnyan? 5 Po teu Allah geupinah gunong hana jiteupeue lé manusia, laju geupeudugom ngon balék lé meureuka dan beungéh Gobnyan. 6 Po teu Allah geupeutreun geumpa sampoe bumoe beuguncang, dan taméh ngon tumpang donya meuhayak keudeh keunoe. 7 Po teu Allah jeuet geutam mata uroe bék jiteubiet watée beungoh, dan geutam bintang-bintang bék jiteubiet óh watée malam. 8 Geuleueng angkasa hana jibantu lé gob; geugiloe-giloe rhueng naga laôt. 9 Geupasang bintang-bintang seulatan di langet manyang, meunan cit bintang Peurahô, bintang Beulantik dan bintang Kartika. 10 Hana hase tapeuphom banmandum buet Gobnyan, hana hase taitong padubna le mujizat-mujizat Gobnyan. 11 Gobnyan geujak rot keu lôn, teuma hana deuh lé ulôn; Gobnyan geujak bak binéh ulôn, teuma hana nyata nibak ulôn. 12 Meunyoe Gobnyan geureupah, soe nyang jeuet tan Gobnyan? Atawa jijeuet tanyong ubak Gobnyan, 'Hei, peue tapeubuet nyan?' 13 Po teu Allah hana geuteun-teun meunyoe beungéh dan seu uem até Geuh; bubena peumbantu Rahab pih taklok ubak Gobnyan. 14 Lé sababnyan, pakriban ulôn hase lôn bantah Gobnyan? Deungon tutoe haba peue ulôn hase lôn jaweueb Gobnyan? 15 Bahpi ulôn hana meusalah, peue daya lôn, seulaén lôn lakée geunaséh ubak Po teu Allah sibagoe hakém lôn? 16 Meunyoe Gobnyan geujaweueb watée ulôn meuhôi, ulôn ragu, peu kheueh Gobnyan ka geudeungoe su ulôn? 17 Gobnyan geupeureumok ulôn lam angén badée, dan geutamah deurita ulôn hana alasan. 18 Hana geupeubiyeu ulôn tarék nafáh bahpi meusikeujab; teuma geupeupeunoh ulôn deungon nyang phet nyang paleng hebat. 19 Peu kheueh harôh na teunaga ulôn meusajan Gobnyan? Teuma kalon, padubna hebat teunaga Gobnyan! Seukira jih ubak Gobnyan ulôn sunyueng gugatan, soe nyang jeuet teuhôi Gobnyan ubak kantô mahkamah? 20 Ulôn seutia hana lôn peubuet desya, teuma babah ulôn jipeugah nyang laén; tieb-tieb tutoe haba nyang jipeuget lé bibi lôn, sang-sang jipeusalah droe lôn keudroe. 21 Ulôn hana meusalah, teuma ulôn hana lôn pakoe. Ulôn ka bosan udeb. Nibak ulôn hanale nyang peunteng; nyang salah dan nyang beutôi, saban mantong naseb jih: Po teu Allah teuma geupeubinasa bandua nyan. 23 Meunyoe ureuëng nyang hana meusalah maté hana teusangka-sangka, Po teu Allah geukém mantong. 24 Bumoe geujok lé Po teu Allah ubak ureuëng doraka, dan hakém-hakém ka geupeujeuet buta banmandum. Po teu allah geupeubuet banmandum nyoe, meunyoe bukon Gobnyan soe lom? 25 Uroe-uroe lôn jijak deungon bagaih, laju gadôh hana teurasa mangat. 26 Lagée peurahô teungoh plueng, udeb ulôn jijak deungon sigra, lagée cicém kleueng seumama meunan kheueh tajam jih, jisamba musoh jih. 27 Meunyoe ulôn keuneuk teuseungéh dan teukém geumbira, meunyoe ulôn cuba lôn peutuwoe banmandum deurita, teuma duka ulôn jiteuka lom, jipeulet ulôn; sabab ulôn teupeue, Po teu Allah teutab geupeusalah ulôn. 29 Héuh, meunyoe lagée nyan, peue that lôn pakoe? 30 Hana sabon nyang hase jipeugadôh desya lôn! 31 Po teu Allah geupeuseunom ulôn lam aden nyang kutoe, sampoe peukayan ulôn pi jianggab ulôn nyang paleng luwat. 32 Seukira jih Allah nyan manusia, ulôn hase lôn jaweueb Gobnyan; laju kamoe jak meuhadab ubak kantô mahkamah keu kamoe jak peuseuleusoe mandum nyang jeuet keu dakwa. 33 Teuma nibak kamoe hana jaksa nyang hase peusidang kamoe bandua. 34 Seumoga Po teu Allah geupiôh geuhuköm ulôn dan geupeujiôh dahsyat Gobnyan nibak ulôn. 35 Ulôn hana takôt ubak Gobnyan dan ulôn peugah haba jinoenyoe, sabab ulôn kuturi até lôn keudroe.

Ayub 10

1 Ulôn bosan dan luwat deungon udeb lôn, nyang kheueh ulôn roe mandum keuhai phet jiwa lôn. 2 Ya Allah, bék kheueh ulôn Droeneueh peusalah; neupeutrang kheueh, pakon ulôn Droeneueh lawan. 3 Peue laba jih meunyoe Droeneueh teutindéeh lagée nyoe, dan neuböih hase buet Droeneueh keudroe? Peue laba jih meunyoe Droeneueh neusukong peundapat dan reuncana bubena ureuëng jeuhet? 4 Pandangan Droeneueh hana saban ngon pandangan manusia 5 dan umu Droeneueh hana saban paneuk ngon umu jih. 6 Meunyoe meunan, pakon Droeneueh soai banmandum desya lôn? Pakon Droeneueh peucrok banmandum salah ulôn? 7 Nyang sikeubiet jih Droeneueh neuteupeue dan sada, bahwa ulôn hana salah, teuma beutôi. Droeneueh neuteupeue bahwa meusidroe pih hana hase jipeuseulamat ulôn nibak jaroe Droeneueh. 8 Ulôn nyoe teupeujeuet nibak jaroe Droeneueh, masak jinoe Droeneueh keuneuk peubinasa ulôn? 9 Ingat, nibak tanoh kliet Droeneueh cebta ulôn! Pakon kheueh Droeneueh peujeuet lom ulôn jeuet keu abée? 10 Droeneueh peumungken ayah lôn jeuet keu ulôn, dan Droeneueh peurayeuk ulôn dalam pruet ma. 11 Tuboh ulôn Droeneueh peuget deungon rungka dan urat; tuleueng ulôn Droeneueh boh asoe dan kulét sinutôb. 12 Droeneueh bri keu ulôn udeb; Droeneueh gaséh ulôn, nyawöng ulôn Droeneueh jaga deungon Droeneueh peulara. 13 Teuma jinoenyoe ulôn teupeue bahwa seulawet nyan, seungab-seungab ka Droeneueh reuncana ulôn beuceulaka. 14 Droeneueh kawai ulôn pat tateupeue ulôn peubuet nyang salah mangat hase Droeneueh tulak keu Droeneueh bri peuamphon desya. 15 Meunyoe ulôn kupeubuet desya, teuma naseb ulôn keubiet meupaloe! Teuma meunyoe buet ulôn hana meucupa, teutab kheueh ulôn teuanggab lôn peubuet desya! Hana ulôn jeuet lôn beuôt ulée, sabab meurasa seudeh dan teuhina. 16 Meunyoe ulôn meuhase, bahpi hana padub na, Droeneueh let ulôn lagée singa. Dan Droeneueh tunyok lom kuasa Droeneueh, na kheueh keu Droeneueh peutakot ulôn. 17 Sabe Droeneueh jok saksi keu teulawan ulôn; dan seumaken rayeuk kheueh meureuka Droeneueh ateueh ulôn. Droeneueh krah bubena pasokan-pasokan barô keu jijak seurang dan jijak prang ulôn. 18 Pakon Droeneueh peubiyeu ulôn nyoe lahé ateueh rhueng donya? Leubeh get ulôn maté mantong sigohlom jingieng lé manusia! 19 Teuma sang-sang ulôn hántom na teupeulahé, sabab phon lam pruet ma laju teupeukubu. 20 Ah, hana treble ulôn teuma maté, lé sababnyan bah kheueh tinggai ulôn keudroe, mangat meuteumé ulôn rasa, watée ulôn nyang na mantong bacut nyoe. 21 Hana treble ulôn jak dan hana meugisa le, ubak nanggroe nyang seupôt dan teumakot raya, 22 nanggroe nyang seupôt, peunoh bubayang dan karu hán meuteuntée, dipat peungeuh saban deungon seupôt."

Ayub 11

1 Óh lheuehnyan Zofar jipeugah, "Hana kheueh haba sulet nyan teubri jeunaweueb? Peu kheueh ureuëng nyang jai that babah nyan teupeu beutôi? 3 Nabi Ayub, gata pike kamoe hana hase kamoe jaweueb gata? Gata pike kamoe seungab mantong sabab lé gata hina? 4 Meunurot anggapan gata tutoe haba gata nyan hana salah; meunurot anggapan gata gleh dikeue Po teu Allah. 5 Teuma, seumoga Po teu Allah keudroe geupeugah haba! 6 Dan seumoga gata geubri tée lé Gobnyan, bahwa hikeumat nyan jai that sagoe jih, dan hana hase jipeuphom lé manusia. Dan sada kheueh gata bahwa deurita gata hana padubna, teubandeng ngon huköman nyang gata teurimong. 7 Ék kheueh beutôi hakikat Allah hase gata seunom? Ék kheueh beutôi kuasa Gobnyan hase gata peuphom? 8 Kuasa Gobnyan leubeh manyang nibak angkasa; hana hase gata leugôt atawa gata kareue. Kuasa Gobnyan leubeh lhok nibak donya ureuëng maté, hana hase gata muphom mubacut pi. 9 Kuasa Po teu Allah leubeh luwah nibak donya nyoe, dan leubeh luwah nibak laôt nyang raya. 10 Meunyoe Gobnyan geudrob dan geuba gata ubak kantô mahkamah, dan soe nyang jeuet jitam buet Gobnyan? 11 Po teu Allah geuturi ubak ureuëng nyang galak meusulet; buet jeuhet awaknyan hana leukang nibak mata Gobnyan. 12 Meunyoe nang keuleudée kleut jipeulahé aneuëk keuleudée seu iet, barô kheueh ureuëng bangai jeuet keu carông. 13 Nabi Ayub, peugleh kheueh até gata, dan meunyeusai kheueh! Meudoá kheueh ubak Po teu Allah! 14 Peugleh kheueh desya nyang na bak até gata dan peujiôh kheueh buet jeuhet nibak rumoh gata! 15 Teuma gata jeuet tahadab ubak udeb deungon tabah dan hebat; gata teuma teudong cot dan hana peureulée tarasa apoh apah, 16 meunan cit deurita gata hanale gata ingat; lagée ié raya nyang ka surot, laju jituwoe lé gob. 17 Udeb gata teuma jeuet keu leubeh trang nibak watée uroe, dan saát-saát seupôt lam udeb gata lagée cahya mata uroe beungoh. 18 Gata teuma teugoh dan peunoh harapan; Po teu Allah teuma geulindong gata sampoe gata aman. 19 Gata hana teuma teumakot ubak musoh; jai that ureuëng teuma jilakée tulông ubak gata. 20 Teuma ureuëng jeuhet jipandang ubak bingöng, sabab nibak awaknyan hana nyang tulông. Saboh-saboh jih harapan awaknyan na kheueh mangat ajai beubagaih teuka."

Ayub 12

1 Nabi Ayub geujaweueb, "Beutôi kamoe nyoe sibagoe waki umat manusia. Meunyoe droeneueh maté, hikeumat pih maté cit teuma. 3 Ulôn pih manusia nyang meubudo basa; banmandum nyang droeneueh peugah nyan ka kamoe muphom. Lom teuma, soe nyang hana teupeue mandum nyan? Lé sababnyan, bék droeneueh pike droeneueh leubeh nibak ulôn! 4 Ulôn jipeukém lé rakan ngon sahabat, padahai ulôn nyoe beutôi dan hana meucupa. Yoh watée ilée Po teu Allah geujaweueb doá lôn, watée ulôn meuhôi lôn lakée tulông. 5 Droeneueh neuhina ureuëng ceulaka, seudangkan udeb neueh aman; ureuëng nyang karab rhot droeneueh poh lom teuma. 6 Teuma udeb meurampok hana teuancam; ureuëng nyang jijeuet lawan Po teu Allah, udeb aman. Padahai dewa nyang jeuet keu teumpat meusadeue awaknyan, na kheueh teunaga droe jih mantong. 7 Tanyong kheueh ubak cicém dan beulatang laén teuma droeneueh jibri peungajaran lé jihnyan. 8 Lakée kheueh keuteurangan ubak makhlok bumoe dan di laôt, teuma droeneueh tateurimong keuteurangan. 9 Soe nibak mandum nyan nyang hana sada, bahwa nyang cebta awaknyan na kheueh Po teu Allah keudroe? 10 Gobnyan nyang atoe udeb mandum makhlok nyang na; dan meukuasa ateueh tieb-tieb nyawöng manusia. 11 Lagée lidah lôn galak lôn rasa peunajoh nyang mangat, meunan kheueh teuma geulinyueng ulôn galak lôn deungoe tutoe haba. 12 Meunurot haba, hikeumat na bak ureuëng nyang panyang umu geuh, teuma hikeumat dan teunaga na nibak Po teu Allah mantong. Teuma, peungeurtian nyang na nibak ureuëng nyang ka tuha that, teuma peungeurtian dan wewenang na nibak Po teu Allah mantong! 14 Peue nyang geureuloh hana hasele teupeudong lom teuma soe nyang ka teudrob hana hasele teupeuleuh teuma. 15 Soe nyang lhob ié, teuma tô kreng banmandum nyan; gobnyan nyang peuleuh dan ji-ile, dan ié raya kheueh teuma nyang teuka! 16 Po teu Allah nyan teuga, tangkoh dan jaya! Soe nyang sulet dan tukang peunget gob na dimiyueb keukuasaan Gobnyan. 17 Geutarek hikeumat ubak peunguasa peumeurintahan, dan bubena peumimpén geupeujeuet bahan jipeukém lé gob. 18 Geuguleng raja dan geuteun awaknyan; 19 geuhina imeum-imeum dan ureuëng-ureuëng patôt. 20 Geutôb babah ureuëng faséh bak peugah haba, geutarek hikeumat nibak ureuëng-ureuëng tuha. 21 Geupeumalée ureuëng-ureuëng patôt dan meugah; geucok keudaulatan awaknyan nyang meukuasa. 22 Geupeutrang teumpat-teumpat nyang suram; geupeukeunong cahya ubak bubayang-bubayang hitam seupôt. 23 Bansa-bansa geupeujeuet meukeumang dan makmu, laju geupeubinasa awaknyan sampoe hanco. 24 Geupeujeuet bubena peumimpén rhot keu bingöng, akhéjih awaknyan jijak ho-ho mantong hana teuntée tujuan. 25 Awaknyan meugeue-meugeue lam seupôt glab, dan teuhuyong-huyong lagée ureuëng mabök bak jieb ié.

Ayub 13

1 Banmandum nyan ka lheueh lôn kalon dan lôn deungoe keudroe, dan biet-biet ulôn peuphom. 2 Peue nyang droeneueh teupeue, ulôn pih teupeue; bék tapike ulôn taloe ngon gata. 3 Teuma ulôn keuneuk peugah haba ngon Nyang Mahakuasa; ulôn keuneuk bila peukara ulôn dikeue Po teu Allah. 4 Sabab droeneueh tatôb-tôb bangai droeneueh nyan deungon tipée muslihat, hana ubah lagée dukun-dukun peuleusu. 5 Seukira jih droeneueh hana tapeugah haba, mungken gata teupeugah bijaksana. 6 Lé sababnyan deungoe kheueh bantah ulôn nyoe; kalon kheueh peumbelaan ulôn. 7 Peu kheueh deumi Allah droeneueh meusulet? Peu kheueh jeuet droeneueh meusulet keu keupeuntengan Gobnyan? 8 Peu kheueh jeuet droeneueh dong blah Po teu Allah, dan gata bila Gobnyan sibagoe peungacara? 9 Meunyoe Po teu Allah geupareksa droeneueh, peu kheueh get hase jih? Peu kheueh hase gata tipée Gobnyan lagée droeneueh tipée manusia? 10 Meunyoe droeneueh dong siblah, bahpi deungon seungab-seungab, gata teuma geuhuköm lé Po teu Allah deungon keujam. 11 Peu kheueh keuagongan Po teu Allah hana teukeujôt jiwa droeneueh? Peu kheueh deungon dahsyat Geuhnyan hana yo até droeneueh? 12 Banmandum naseuhat droeneueh lagée abée nyang hana meuguna; peumbelaan droeneueh lagée tanoh lumpôk nyang bagaih beukah. 13 Lé sababnyan seungab kheueh, bah kheueh ulôn peugah haba! Ulôn hana lôn pakoe pakriban mantong akibat jih! 14 Ulôn ka siab lôn peusabông nyawöng! 15 Ulôn neukad sabab ka putôh asa! Meunyoe Po teu Allah keuneuk poh maté lôn, ulôn meunyeurah mantong, teuma teutab lôn bila pi-e ulôn dikeue Gobnyan. 16 Mungken lé sabab beurani ulôn nyan ulôn seulamat, sabab ureuëng jeuhet hana jijeuet meuhadab Po teu Allah! 17 Jinoenyoe deungoe kheueh beuget-get tutoe haba lôn; simak kheueh nyang ulôn peutrang. 18 Peukara ka siab ulôn peutrok ubak kantô peungadelan; ulôn yakén, hana hase ulôn jipeusalah! 19 TUHAN, meunyoe Droeneueh teuka dan Neutudoh ulôn, ulôn teuma seungab dan lôn preh ajai lôn. 20 Teuma teurimong kheueh dua boh nyang ulôn lakée nyoe, mangat ulôn kujeuet meuhadab Droeneueh lom: 21 piôh kheueh Neuseksa ulôn, dan bék kheueh neupeutingkeh ulôn deungon keudahsyatan Droeneueh! 22 Mariet kheueh, teuma ulôn jaweueb. Atawa, bah kheueh ulôn meututoe, lheueh nyan bri kheueh balasan jih! 23 Padub na salah dan desya nyang ulôn peubuet? Banmandum nyang ulôn langgeh bah kheueh Droeneueh peugah! 24 Pakon Droeneueh peusie dan Neupeujiôh droe nibak ulôn? Peue sabab jih Droeneueh anggab ulôn nyoe sibagoe musoh Droeneueh? 25 Ulôn na kheueh ôn nyang lurôh lé sabab angén teuka, ék kheueh Neupeuyo ulôn! Ulôn na kheueh jumpung nyang tho dan layée, panena jeuet Neupeulet-peulet ulôn! 26 Droeneueh peuteuntée naseb nyang phet keu ulôn; Droeneueh balaih salah ulôn watée ulôn mantong muda. 27 Gaki ulôn Droeneueh ikat ngon ranté beuso; banmandum grak grik ulôn Droeneueh kawai. Meunan cit tapak gaki lôn, hana leukang nibak mata Droeneueh. 28 Lé sababnyan ulôn jeuet keurapôh lagée kayée nyang brôk; lagée ija jipajoh lé keuraleub, ulôn ka jeuet rapôh.

Ayub 14

1 Yoh phon lahé manusia nyan leumoh hana meudaya; udeb jih paneuk dan peunoh ngon deurita. 2 Jihnyan meukeumang dan layée lagée bungöng; gadôh lagée bubayang, dan laju gadôh hán teutuhoe. 3 Ya Allah, ék kheueh Droeneueh neutem ngieng ulôn, dan neupeuhadab ulôn ubak peungadelan Droeneueh! 4 Peu kheueh meuteumé manusia nyang meudesya jipeuteuka hai nyang sampoereuna? 5 Jeumeulah umu manusia ka Droeneueh peuteuntée; jeumeulah buleuen jih ka Droeneueh peupasti. Droeneueh peuteutab teuma bataih-bataih udeb jih; hana mungken jiliengkeue lé jihnyan. 6 Peubiyeu mantong kheueh jihnyan meureuhat, bék peukaru jihnyan; mangat jihnyan hase jinekmat udeb jih sampoe seuleusoe tugaih jih. 7 Mantong na harapan keu bak kayée nyang teuteubang; bak kayée nyan meutarôk lom, laju meucabeueng. 8 Bahpi lam tanoh ukeue jih jeuet keuleupôk, dan ukeue tunggai jih maté lé sabab brôk, 9 teuma meunyoe keunong ié, jihnyan timoh lom; lagée seunaman muda, tarôk-tarôk jih meutuneh lom. 10 Teuma meunyoe manusia maté, habéh kheueh riwayat jih; jihnyan meuninggai donya, laju ho jijak? 11 Lagée ié meuasab didalam mon, lagée ié krueng surot sampoe habéh ié jih, 12 meunan cit teuma manusia nyang ka meuninggai donya: jihnyan hana hase jibeudôh lom teuma. Jihnyan hana jaga meunyoe langet mantong na, hántom na le jibeudôh nibak teumpat éh jih. 13 Som kheueh lôn nibak donya ureuëng maté; lindong kheueh ulôn sampoe Droeneueh hana beungéh le. Teuma peuteuntée kheueh watée keu teuingat droe ulôn. 14 Sabab, meunyoe manusia maté, peu kheueh jihnyan hase udeb lom teuma? Uroe-uroe deumi uroe ulôn preh sabe sampoe watée phet lôn nyoe jijak teuma. 15 Teuma Droeneueh Neutawök ulôn, dan ulôn pih teuma lôn jaweueb; Droeneueh teuma neusayang lom ubak ulôn, makhlok nyang Droeneueh cebta. 16 Laju Neukawai tieb-tieb langkah lôn, teuma hanale Droeneueh kalon desya lôn. 17 Desya ulôn teuma Droeneueh peuamphon dan Droeneueh böih; salah ulôn yoh watée ilée teuma Droeneueh sampôh. 18 Teuma, gunong-gunong reuloh teupeurô meutabu beba, dan gunong batée nyang kong teuma teugéesée nibak teumpat jih. 19 Batée-batée teuma jikreh habéh lé ié nyang ile tajam; tanoh teuma jipeuhanyot lé ujeuen nyang teuga. Meunan kheueh Droeneueh peuhanco harapan manusia. 20 Droeneueh peutaloe jihnyan keu siumu masa; Droeneueh yue jihnyan beujijak dan Droeneueh ubah ruman jih. 21 Aneuëk-aneuëk jihnyan jeuet keu ureuëng mulia, teuma gobnyan hana geuteupeue. Dan meunyoe awaknyan ka jeuet keu hina, hana nyang peugah nyan ubak geuhnyan. 22 Teuma linu-linu tuboh geuhnyan nyang geurasa; teuma seudeh até geuh nyang geudeurita."

Ayub 15

1 Teuma Elifas geujaweueb, "Keubiet sulet that neuh Nabi Ayub, haba gatanyan keubiet hana meumakna! Hana ureuëng bijaksana nyang jaweueb lagée gata nyoe, hana jihnyan jibila droe jih keudroe deungon tutoe haba nyang hana meumakna. 4 Seukira jih haba gata nyan teuseutôt, hana meusidroe pih teumakot atawa meudoá ubak Po teu Allah lom. 5 Tutoe haba gata jeuet keu bukeuti bahwa gata meusalah, teuma keujeuhetan gata nyan gata tôb ngon meusilek lidah. 6 Hana peureulée gata lôn tudôh atawa lôn peusalah, sabab lé tutoe haba gata keudroe gata jigadu. 7 Gata pike gata manusia nyang phon teupeulahé? Peu kheueh na teuka watée gunong-gunong teucebta? 8 Peu kheueh gata deungoe Po teu Allah geupeuget reuncana Gobnyan? Peu kheueh teuma gata nyang na hikeumat manusia? 9 Peue-peue nyang gata teupeue, kamoe pih kamoe teupeue; peue-peue mantong nyang gata muphom, nyata teuma nibak kamoe. 10 Hikeumat nyoe kamoe teurimong nibak ureuëng nyang ka putéh ôk; awaknyan ka na sigohlom ayah gata teupeulahé! 11 Pakon hiboran Po teu Allah hana gata teurimong? Kamoe meututoe deungon saba dan leumoh leumbot ateueh nan Gobnyan. 12 Teuma gata ka jiék peuneng, mata gata hu meuble-ble; 13 gata beungéh ubak Po teu Allah dan gata bantah Gobnyan. 14 Peu kheueh mungken manusia sagai-sagai hana meusalah? Peu kheueh jihnyan jeuet teupeubeutôi dikeue Po teu Allah? 15 Meunan cit ubak malaikat pih Po teu Allah hana peucaya; awaknyan hana suci nibak keumalon Gobnyan. 16 Meunyoe manusia nyang jeuhet dan teunoda, nyang jijieb jeuhet lagée jijieb ié mantong. 17 Deungon Nabi Ayub, keu gata ulôn peutrang sapeue-sapeue, 18 nyang jipeurunoe lé ureuëng bijaksana ubak ulôn. Ajaran nyang jiteurimong nibak indatu jih, dan jipeutrok deungon leungkab ubak keuturonan geuh. 19 Watée nyan hana ureuëng jamé di nanggroe awaknyan; hana nyang peusisat awaknyan nibak Po teu Allah. 20 Ureuëng jeuhet nyang jitindéeh seusabe droe jih, teutab meurasa gundah sipanyang udeb jih. 21 Su-su nyang geureudam geureudum keubiet teupeutuloe punyueng awaknyan; watée saát nyang aman peurampok teuka jijak heuntam awaknyan. 22 Hana harapan nibak awaknyan jipeusie nibak seupôt, sabab peudeueng ngon poh maté awaknyan jipeulet bak tieb-tieb keuseumpatan. 23 Cicém-cicém nasar jipreh-preh watée awaknyan maté, cicém-cicém keuneuk jipajoh manyét awaknyan. Lé sababnyan sada kheueh jihnyan bahwa seupôt kheueh uroe ukeue awaknyan. 24 Beuncana lagée raja nyang peukasa, ka siab keuneuk jiteugom awaknyan. 25 Meunan kheueh naseb ureuëng nyang lawan Po teu Allah, dan jijeuet lawan Nyang Mahakuasa. 26 Deungon sombong jihnyan jiseureubu dan jilawan Po teu Allah; laju jibeuôt peurisée jih, jihnyan seumaloe jisurot. 28 Jihnyan tinggai di banda-banda nyang ka hanco keng keueng, nibak rumoh-rumoh nyang hana ureuëng po jih. Banda-banda nyan ka teupeuteuntée keu teutab jeuet keu banda nyang tinggai rungka-rungka. 29 Keukayaan ureuëng nyan teuma gadôh hana meubeukaih; hareuta beunda jih teuma habéh gleh sapan sapa. 30 Jihnyan hana teuhinda nibak seupôt nyang gulita; apui laju jipeuhangoh tarôk-tarôk jih. Jihnyan teuma hanco watée geuplôh ngon babah Po teu Allah. 31 Meunyoe jihnyan peucaya ubak nyang hana meuguna, keunong peunget kheueh jihnyan; dan imbalan nyang teuma jiteurimong, hana cit meuguna le. 32 Sigohlom trok watée jih, jihnyan teuma maté, lagée cabeueng layée nyang hana hase ijo le. 33 Jihnyan lagée bak anggô nyang lurôh boh jih, lagée bak zaiton nyang bungöng jih leukang bak tangke. 34 Ureuëng nyang jeuhet hana keuturonan; dan habéh tutông kheueh rumoh nyang jipeudong nibak hase péng sugok. 35 Nyan kheueh awaknyan nyang jireuncana buet jeuhet dan jipeubuet teuma; tipée muslihat sabe na teukandong lam até jih."

Ayub 16

1 Teuma Nabi Ayub geujaweueb, "Kayém that ulôn deungoe peundapat lagéenyan; peunghiboran droeneueh na kheueh seksaan nibak lôn. 3 Pajan kheueh haba sulet nyan droeneueh piôh? Peue nyang jeuet keurangsangan droeneueh nyang jeuet teujaweueb? 4 Seukira jih droeneueh nyan ulôn, dan ulôn droeneueh, ulôn pih jeuet lôn peugah haba saban lagée nyan. Ulôn peujai gata deungon tutoe haba; ulée ulôn teuma lôn asek-asek. 5 Até gata teuma lôn peukong deungon meubagoe anjuran; tutoe haba ulôn teuma teubri hiboran. 6 Meunyoe ulôn peugah haba, deurita ulôn hana reuda; meunyoe ulôn kuiem droe, peue teuma guna jih? 7 Po teu Allah, teupeujeuet ulôn aloh alah; banmandum keuluwarga ulôn habéh geupeubinasa. 8 Gobnyan geuteuntang dan geudrob ulôn. Jinoenyoe, pijuet ngon tho kheueh tuboh ulôn, dan keue ureuëng ramé, nyan kheueh bukeuti jih bahwa ulôn ka meudesya. 9 Deungon beungéh Po teu Allah geupriek-priek tuboh lôn; deungon biet-biet banci Gobnyan geupandang ulôn. 10 Ureuëng-ureuëng jihina ulôn deungon babah teuhah raya-raya; ulôn jiparan dan mieng ulôn jitampa. 11 Po teu Allah geujôk ulôn ubak ureuëng doraka; ulôn geupeurhot lam jaroe ureuëng doraka. 12 Yoh awai ilée udeb lôn teuntram dan bahgia, teuma Po teu Allah geuseurang ulôn deungon hana teusangka-sangka. Kudok ulôn geuteugom dan ulôn geutiek; geupeujeuet ulôn sasaran keu teumpat latehan. 13 Deungon hana weueh Gobnyan hana piôh geutimbak ulôn ngon panah, lé sababnyan, meuburée kheueh asoe pruet ulôn. 14 Gobnyan geuseureubu lagée sidroe peujuang, dan geupeuluka ulôn meu-ulang-ulang. 15 Ulôn sok ija kröng sibagoe tanda seudeh, dan lôn duek lam abée sabab ka geupeutaloe. 16 Ruman lôn mirah sabab lôn mo; peuleupuk mata lôn keumong dan ijo. 17 Teuma ulôn hana lôn peubuet nyang kreueh; deungon nyan trang kheueh doá lôn jujoe ubak TUHAN. 18 Hei bumoe, jeuhet ateueh ulôn bék kheueh teusöm; bék seungab geumeuciek ulôn lakée keuadelan. 19 Ulôn kuteupeue bahwa Nyang Bila ulôn na lam syeuruga; Gobnyan geubri keusaksian bahwa ulôn hana meudesya. 20 Ulôn jihina lé rakan-rakan lôn dan jipeukém; sira ulôn mo lôn meuhadab ubak Po teu Allah lôn lakée tulông. 21 Akh, kira jih Po teu Allah keudroe geubila ulôn dikeue Gobnyan, lagée sidroe ureuëng nyang rila jibila sahabat jih. 22 Thon-thon nyang na tinggai hanale; sikeujab treuk ulôn jak dan hana lôn woe le.

Ayub 17

1 Ajai lôn katoe that, nafáh lôn karab putôh; na kheueh jrat nyang tinggai keulôn. 2 Ureuëng laén jipeujeuet ulôn nyoe barang keu jipeukém; ulôn kalon padubna awaknyan jigeulawa ateueh ulôn haba meupansi. 3 Ulôn nyoe jujoe, ya Allah. Peucaya kheueh ubak ulôn! Soe kheueh lom nyang jitem peubeuna haba ulôn? 4 Droeneueh tôb até awaknyan sampoe hana jeuet jimeuphom; bék sampoe awaknyan jipeutaklok ulôn jinoenyoe. 5 Meunurot peupatah, soe nyang gadu rakan deumi keu laba, aneuëk-aneuëk jih keudroe teuma jiteurimong balaih. 6 Jinoenyoe ulôn jipansi ngon peupatah nyan; awaknyan teuka keujijak ludah muka ulôn. 7 Mata ulôn sapu sabab meudukacita; bansaboh tuboh lôn pijuet meurana. 8 Ureuëng nyang saleh teukeujôt dan hireuen; ureuëng nyang hana meusalah jianggab ulôn hana meutuhan. 9 Ureuëng nyang jroh dan nyang hana meusalah, seumaken yakén cara udeb jih meukeunong bak até Allah. 10 Teuma seukira jih gata mandum teuka keunoe, hana meusidroe ureuëng bijaksana pih nyang gata teumé. 11 Uroe-uroe lôn ka jijak laju, dan bateue kheueh mandum reuncana lôn; gadôh teuma mandum cita-cita lam até lôn. 12 Teuma rakan-rakan lôn jipeugah, 'Malam nyan uroe dan trang karab trok.' Teuma ulôn kuteupeue lam até lôn, bahwa teutab seupôt kheueh keuadaan lôn. 13 Teuma donya mawöt kheueh nyang ulôn harab, disideh kheueh ulôn éh lam seupôt. 14 Kubu ulôn lôn boh nan "Ayah lôn", dan glang-glang nyang pajoh tuboh lôn, lôn boh nan, "Ma" dan "Syedara lôn nyang inong". 15 Dipat kheueh harapan keu lôn; soe nyang kalon na bahgia keu ulôn? 16 Meunyoe ulôn kutreun lam donya ureuëng maté, ulôn ka hana harapanle."

Ayub 18

1 Teuma geujaweueb lé Bildad, "Hei Nabi Ayub, pajan kheueh gata habéh tapeugah haba? Seungab kheueh, dan deungoe kheueh jinoe kamoe keuneuk peugah haba. 3 Pakon gata anggab kamoe bangai, dan gata peusaban kamoe ngon leumô? 4 Beungéh gata teupeusakét droeneueh keudroe. Peu kheueh harôh deumi keupeuntengan gata nyan bumoe gadôh peunduduek jih, dan gunong-gunong teupinah nibak teumpat jih? 5 Panyöt ureuëng jeuhet pasti teupeulon; apui jih hántom nale teupeuhu. 6 Trang lam khimah jihnyan ka jeuet keu layoh; panyöt ngon peutrang nyan hanale hu meuble. 7 Langkah jihnyan nyang teugab jeuet teuhuyong-huyong; rancangan jihnyan keudroe jeuet keu sabab jihnyan meugantoh. 8 Jihnyan jijak lam taron, dan meucuét kheueh gaki jih. 9 Tumet jih meucarueh ngon jeunieb, lé sababnyan teudrob kheueh jihnyan. 10 Bak tanoh, teusöm talo taron; bak rot ueh, teuteuen jeunieb dan pikat. 11 Ureuëng jjeuhet teupeukeujot lé gli nyang teuka jeueb-jeueb sagoe; teumakot jiseutôt jih langkah deumi langkah. 12 Yoh ilée jihnyan teuga, jinoe jihnyan meurana; bala beuncana na meusajan jihnyan dipat mantong. 13 Kulét jih ka jipajoh lé peunyakét nyang paleng parah; jaroe ngon gaki jih kabrok meunanoh. 14 Jihnyan teucok lam khimah jih, bak jihnyan meurasa aman, laju teubahue keu teuba ubak maté. 15 Jinoe soe mantong jeuet tinggai lam khimah jih, dan disinan laju teusipreuk beulerang, ngon peumaté peunyakét jih. 16 Ukeue-ukeue jih tho kreng dan krôt-krôt; ranteng-ranteng jih tho dan keunyuét. 17 Jihnyan hanale gob uturi bah didalam meunan cit diluwa banda; hana meusidroe pih nyang mantong ingat nan jih. 18 Lam trang jihnyan teu-use lam seupôt; lam donya ureuëng udeb jihnyan teukireuh teuma. 19 Aneuëk meunan cit keuturonan nibak jihnyan hana; di gampông leuen jih hana meusidroe pih nyang tinggai. 20 Watée teudeungoe naseb jih, peunduduek di barat teukeujôt that, dan peunduduek di timu yo meugám-gám sabab teumakot. 21 Meunan kheueh naseb ureuëng doraka, awaknyan nyang hana jipakoe Po teu Allah."

Ayub 19

1 Teuma Nabi Ayub geujaweueb, "Pakon ulôn hana putôh neukheun sabe, dan gata seksa deungon tutoe haba? 3 Neu-ulang-ulang gata tahina ulôn, dan gata iénaya ulôn deungon hana rasa malée. 4 Meunyoe bit salah buet ulôn, nyan hana rugoe gata. 5 Gata pike droe gata leubeh get nibak ulôn; sosah ulônnyoe gata anggab nyan bukeuti ulôn salah. 6 Neuteupeue kheueh bahwa ulôn nyoe teungoh geuseksa lé Po teu Allah dan geudrob lam jeunieb Gobnyan. 7 Ulôn meulawan-lawan sabab keujam nyan, teuma hana meusiroe pih nyang kalon ulôn. "Dipat keuadelan," su ulôn kuk, teuma hana nyang deungoe ulôn. 8 Po teu Allah geutôb rot ulôn, ulôn hana hase lôn jak, juröng-juröng ulôn ka geupeujeuet seupôt buta. 9 Gobnyan geureupah mandum atra ulôn, dan nan get ulôn ka geupeurusak teuma. 10 Gobnyan geuheuntam ulôn rot meubagoe jurosan, lagée ureuëng jilôt ukeue nibak seunaman, laju geupeubiyeu layoh dan layée, meunan kheueh geucok banmandum harapan ulôn. 11 Meureuka Po teu Allah ateueh ulôn hu meuhuéb-huéb; ulôn geuanggab lagée musoh Gobnyan. 12 Pasokan Gobnyan jiseureubu hana hase teuampeueng; rot ulôn jak geuhalang-halang, dan khimah ulôn geukeupông. 13 Kawöm syedara lôn geupeujiôh nibak ulôn; ulôn jeuet keu ureuëng aséng nibak mandum rakan lôn. 14 Kawöm dan rakan lôn mandum jipeujiôh droe; rakan-rakan lôn hana jiingat le ubak ulôn. 15 Namiet ulôn nyang inong ka tuwoe, soe ulôn nyoe, amphon jih; jianggab ulôn nyoe sidroe ureuëng nyang gohlom jituri. 16 Ulôn tawök namiet lôn, teuma jihnyan hana jiseuôt, bahpi ulôn rayu jih nyan deungon su nyang leumoh leumbot. 17 Peurumoh lôn luwat jicöm nafáh nyan, syedara kandông lôn hana geutem peurab ubak lôn. 18 Ulôn jihina lé aneuëk miet bak rot ueh raya; meunyoe ulôn dong, ulôn jipeukém. 19 Jingieng ulôn, rakan krab ulôn meurasa yo; ulôn jitinggai lé awaknyan nyang ulôn gaséh. 20 Tuboh lôn tinggai kulét ngon balot tuleueng; rab mantong ulôn maté dan nyawöng lôn meulayang. 21 Hei rakan-rakan lôn, neugaséh kheueh keu lôn, sabab jaroe Po teu Allah geupoh ulôn. 22 Po teu Allah hana putôh geuteugon ulôn; pakon gata taseutôt Gobnyan? Peu kheueh gohlom puih gata taseksa? 23 Ah, kirajih tutoe haba lôn teucetet, deungon nyan sabe teuingat; 24 kirajih deungon beuso teupheut ateueh batée, mangat teutab meuteun siumu masa. 25 Ulôn kuteupeue bahwa lam syeuruga na nyang bila lôn; akhé jih Gobnyan teuka geujak tulông lôn. 26 Bahpi kulét lôn luka-luka dan bicah, teuma simantong ulôn na tuboh, teutab ulôn kalon Po teu Allah. 27 Deungon mata lôn keudroe Gobnyan teuma lôn kalon, nibak lôn keudroe Gobnyan jeuet keu sahabat. 28 'Pakriban cara jih tanyoe peudakwa jihnyan?' Gata neumita alasan keu gata mita peukara. 29 Teuma, jinoe, takot kheueh ubak peudeueng! Sabab Po teu Allah meureuka dan geuhuköm ureuëng meudesya; lé sababnyan neuteupeue kheueh lé gata, bahwa na Po teu Allah nyang peusidang manusia."

Ayub 20

1 Laju geujaweueb lé Zofar, "Hei Nabi Ayub, ulôn meurasa teusinggong tutoe gata nyan, jinoe ulôn keuneuk jaweueb haba gata nyan. 3 Tutoe haba gata nyan biet-biet meuhina that, teuma ulôn kuteupeue pakriban teujaweueb nyan. 4 Peu kheueh hana gata teupeue bahwa phon bak jamén purbakala, yoh phon that manusia geupeuduek ateueh rhueng donya, 5 mangat até ureuëng jeuhet teuma sikeujab mantong, dan keuseunangan ureuëng doraka siat mantong? 6 Bahpi keubeusaran jih trok u langet ijo, sampoe ulée jih meusampôh ngon awan, 7 teuma jihnyan teutab gadôh siumu masa, gadôh lam donya deungon cara nyang paleng hina. Ureuëng-ureuëng nyang ka lheueh meuturi ngon jihnyan, teuma jitanyong, "Hoi, hojijak ka?" 8 Jihnyan teuma gadôh lagée bubayang lumpo, gadôh lagée keumalon watée malam teuka. 9 Jihnyan hana deuhle bak mata; jihnyan hanale tinggai bak teumpat jih. 10 Nyang yoh ilée jicue nibak ureuëng nyang hana sapeue na harôh jigantoe lé aneuëk-aneuëk jih. 11 Bahpi jihnyan muda dan peukasa, teuma hana treble jihnyan ka jeuet keu abée hana meuguna. 12 Keubiet that maméh jeuhet nyang na lam babah jih! Rasa jih sayang that keu teu uét deungon sigra; sababnyan jikeubah mantong yueb lidah jih, mangat treb jirasa atra nyan. 14 Teuma peunajoh nyan meu-ubah lam pruet, jeuet keu racon nyang phet jiba mawöt. 15 Atra jih cue nyang jiuét nyan, teupaksa jiulée lom teuma; Po teu Allah geupeuteubiet lom lam pruet jih. 16 Ureuëng jeuhet teuma jijieb racon nyang ba beuncana, jihnyan teuma maté lé atranyan lagée jikab lé beulatang meubisa. 17 Hana jiteumé rasa minyéuk zaiton nyang meunanle meulimpah, atawa susu ngon meulisan nyang meulimpah ruah. 18 Banmandum laba jih harôh jijôk pulang; hase useuha jih hana teuma jirasa. 19 Sabab jihnyan jitindéeh dan hana jikalon ban ureuëng nyang gasien; dan jireupah rumoh-rumoh nyang kon jipeudong. 20 Sabab waba jih hana meubataih le, lé sababnyan jihnyan hana teuma jeuet keu puih. 21 Meunyoe jihnyan jimakheun banmandum jipeuhabéh, lé sababnyan keumakmuran jih hana teuma meuteun. 22 Watée ka trok bak punca makmu lam udeb jih, deurita dan malang teuka ateueh droe jih. 23 Watée jihnyan gabuek jipasoe pruet jih, Po teu Allah keubiet teuka meureuka dan laju geuhuköm jihnyan. 24 Meunyoe jihnyan jiplueng jipeusie nibak peudeueng baja, jihnyan teuma teupeuluka ngon panah teumaga. 25 Jihnyan keunong aneuk panah, sampoe jihnyan luka; ujong aneuk panah nyang meukilat beusoét lam tuboh jih, lé sababnyan teumakot laju teuka bansaboh até jih. 26 Hanco kheueh bubena hareuta nyang ka jikeubah; jihnyan meusajan mandum keuluwarga jih jipajoh lé apui nyang hana jipeuhu lé manusia. 27 Langét laju jisengkab buet jih nyang jeuhet; bumoe jibeudôh jilawan jihnyan. 28 Banmandum atra keukayaan jih habéh meuseunah, sabab beungéh Po teu Allah nyang hana teukira. 29 Nyan kheueh naseb ureuëng nyang durjana, naseb nyang ka geupeuteuntée lé Po teu Allah keu jihnyan."

Ayub 21

1 Nabi Ayub geujaweueb, "Deungoe kheueh peue nyang keuneuk ulôn peugah; teuma nyan nyang ulôn lakée sibagoe peunghiboran. 3 Idhin kheueh ulôn keugantoe peugah haba, óh lheuehnyan jeuet lom droeneueh neuhina! 4 Kon ngon manusia ulôn meudakwa, lé sababnyan hana peue meunyoe ulôn kureueng saba. 5 Pandang kheueh ulôn, deungon nyan droeneueh teuma teuceungang, droeneueh teuseupôk dan babah droeneueh seungab. 6 Meunyoe lôn pike keuadaan ulôn nyoe, yo kheueh ulôn sabab lé teumakot ngon gli. 7 Pakon ureuëng jeuhet geubri umu jih panyang le Po teu Allah, dan hareuta awaknyan hana putôh meutamah-tamah? 8 Awaknyan udeb keubiet that treb seuhingga jikalon aneuëk cucoe awaknyan ka jeuet keu rayeuk. 9 Rumoh tangga awaknyan aman seuntosa; Po teu Allah hana geupeutreun beuncana ateueh awaknyan. 10 Beulatang peulara awaknyan meukeumang le, dan hana aloh alah watée jimeu aneuëk. 11 Aneuëk-aneuëk ureuëng jeuhet jilumpat-lumpat deungon geumbira, lagée bubiri muda nyang meusukaria. 12 Jiseutôt lé su rapa-i, suleng dan su keucapi, awaknyan jai that meunyanyoe dan meulikak-likak. 13 Uroe-uroe jih jipeuhabéh lam keubahgiaan, dan awaknyan meuninggai peunoh keudaméan. 14 Padahai awaknyan jipeugah ubak Po teu Allah, "Peujiôh kheueh kanoe dan jak kheueh! Kamoe hana meupakoe dan hana peureulée kamoe muphom meukeusut dan keuheundak Droeneueh lam udeb kamoe." 15 Jipike lé awaknyan, "Teupeutimang Po teu Allah hana meuguna, dan meudoá ubak Gobnyan hana guna jih. 16 Bukon lé sabab teunaga tanyoe mantong, trok kheueh banmandum meukeusut dan tujuan tanyoe?" Teuma nibak ulôn sagai-sagai han seutuju deungon rot pikeran dan peundapat lagéenyan. 17 Peu kheueh ka lheueh panyöt ureuëng jeuhet teupeulon, dan awaknyan keunong bala dan malang jiteuka? Peu kheueh ka lheueh awaknyan geubeungéh lé Po teu Allah, sampoe awaknyan geuhuköm teuma? 18 Peu kheueh ka lheueh awaknyan lagée jeumpung dan abée nyang jiyueb lé angén badée dan angén jak? 19 Droeneueh neupeugah, "Aneuëk geuhuköm lé Allah sabab lé desya-desya ureuëng syiek jih." Teuma ulôn kupeugah: Ureuëng meudesya nyan kheueh nyang harôh geuhuköm lé Po teu Allah, mangat awaknyan sada bahwa sabab lé desya awaknyan, teuma Po teu Allah geukirém huköman Geuh. 20 Bah kheueh ureuëng meudesya jitanggong desya jih keudroe, bah kheueh jirasa meureuka Po teu Allah Nyang Mahamanyang. 21 Meunyoe manusia ka habéh watée jih udeb ateueh rhueng donya, peu kheueh mantong jipakoe aléh keuluwarga jih bahgia? 22 Peu kheueh hase manusia jipeurunoe Po teu Allah, seudang Po teu Allah keudroe nyang peuhakém makhlok lam syeuruga? 23 Na ureuëng nyang seuhat sipanyang udeb jih; jihnyan meuninggai deungon rasa puih dan leuga. Maté jih teunang deungon rasa bahgia, seudangkan tuboh jih mantong peunoh teunaga. 25 Teuma na cit nyang maté peunoh ngon phet, deungon hántomna jirasa pakriban nyan keubahgiaan. 26 Teuma lam jrat, awaknyan sabe-sabe teu-éh; jiparan lé ulat ngon glang. 27 Beutôi ulôn kuteupeue peue nyang droeneueh pike dan mandum buet jeuhet nyang droeneueh reuncana. 28 Droeneueh tanyong, "Dipat rumoh peunguasa nyang jipeubuet keureuja doraka?" 29 Gohlom droeneueh tanyong bak ureuëng nyang kayém jijak-jak? Peu kheueh hana droeneueh pateh haba nyang awaknyan peugah? 30 Kheun awaknyan, "Nibak uroe Po teu Allah geubri huköman, bubena ureuëng jeuhet geupeuseulamat." 31 Hana nyang peumasa-alah pi-e jihnyan; hana nyang balaih buet jih nyang jeuhet nyan. 32 Jihnyan teuba ubak jrat, dan teupeutamong lam kubu; jrat jih teujaga dan teu-uruih get that. 33 Meuribée ureuëng ji-iréng manyét jihnyan ubak kubu; deungon meulet-meulet tanoh pih teuseubée jihnyan. 34 Lé sababnyan, peunghiboran nyan soh hana meuguna dan banmandum jaweueb droeneueh nyan sulet!"

Ayub 22

1 Laju geupeugah kheueh lé Elifas, "Lamkawan umat manusia, hana meusidroe pih meuguna nibak Po teu Allah. Ureuëng nyang biet-biet meuakai budoe, na kheueh meuguna keu droe jih keudroe. 3 Peu kheueh na guna jih nibak Po teu Allah, meunyoe gata tapeubuet keuheundak Gobnyan? Peu kheueh na laba keu Gobnyan, meunyoe udeb gata sampoereuna? 4 Kon lé sabab teumakot gata ubak Po teu Allah, gata jitudoh dan jianggab meusalah, 5 teuma lé sabab jai that-that desya gata, dan keubiet jeuhet that buet ngon pi-e gata. 6 Meunyoe syedara gata hana hase jibayeue utang jih, gata reupah mandum peukayan jih. 7 Ureuëng nyang hék hana gata bri ié jieb, nyang deuk hana gata peutaba peunajoh. 8 Gata peuguna jabatan dan kuasa keu gata seta banmandum tanoh jih. 9 Bukon mantong gata hana tatulông inong-inong balée, teuma aneuëk yatem ngon meuntui pih gata tindéeh. 10 Lé sababnyan bansikeulileng gata, jinoe peunoh ngon peurangkab, dan deungon hana teusangka-sangka até gata peunoh ngon teumakot. 11 Uroe seumaken seupôt, hana hase gata keumalon; gata jirôh lé ié raya nyang paleng tajam. 12 Bukon kheueh Po teu Allah geutinggai bak langét nyang paleng manyang, dan geungieng u miyueb, ubak bintang-bintang nyang paleng manyang? 13 Teuma digata tatanyong, "Peue jiteupeue Gobnyan? Gobnyan na dimeurandeh awan dan hana hase geupeusidang tanyoe." 14 Gata tapike bahwa pandangan Gobnyan teutôb ngon awan dan bahwa teuma nibak bataih lamkawan langét ngon bumoe Gobnyan geujak? 15 Peu kheueh gata teutab keuneuk jak rot ueh nyang ka jipiléh lé ureuëng-ureuëng jeuhet? 16 Awaknyan teucok sigohlom trok watée jih maté, dan jipeuhanyot lé ié raya nyang teuka. 17 Awaknyan kheueh nyang jijeuet tulak Po teu Allah Nyang Mahakuasa, dan jipike Gobnyan hana hase geupeubuet sapeue ateueh awaknyan. 18 Padahai Po teu Allah nyang ka peujeuet awaknyan kaya! Keubiet ulôn hana muphom pikeran ureuëng doraka! 19 Ureuëng nyang jroh, teukém-kém peunoh geumbira, watée jikalon ureuëng jeuhet meuteumé huköman. 20 Banmandum atra ureuëng jeuhet ka hanco sapan sapa, dan apui teuka laju jitot habéh nyang na tinggai teusisa. 21 Nyan, Nabi Ayub, meudamé kheueh ngon TUHAN, mangat gata meuteumé keuteuntraman. Meunyoe nyan gata peubuet, pasti gata meuteumé laba. 22 Teurimong kheueh peue nyang geupeurunoe lé TUHAN ubak gata; keubah kheueh mandum nyan lam até gata. 23 Woe kheueh ubak TUHAN deungon miyueb até nyang jeuhet nyang na lam rumoh gata bah kheueh gata sampôh. 24 Böih kheueh méuh gata nyang paleng aseuli; rhom kheueh lam tuwie krueng nyang hana lé meu ié. 25 Bah kheueh Nyang Mahakuasa jeuet keu méuh gata, dan keu pirak gata nyang paleng lumbôi sa. 26 Lé sababnyan gata jeuet peucaya ubak Po teu Allah, dan gata teupeue bahwa Gobnyan punca bahgia gata. 27 Meunyoe gata meudoá, Gobnyan teuma geujaweueb gata, dan gata hase tapeuteupat banmandum janji gata. 28 Useuha gata teuma sabe meuhase, dan trang teuma meucahya lam udeb gata. 29 Ureuëng nyang sombong geupeumiyueb lé TUHAN, teuma nyang miyueb até teuma geupeuseulamat. 30 Po teu Allah teuma geutulông gata meunyoe gata hana meusalah, dan meunyoe gata tapeubuet keuheundak Gobnyan."

Ayub 23

1 Teuma Nabi Ayub geujaweueb, "Ulôn jeumeulueng-jeumeulueng ngon apoh apah ubak Po teu Allah; hana hase ulôn peuteun apoh apah. 3 Ah, rupari ulôn teupeue teumpat Gobnyan na, mangat ulôn jeuet lôn jak dan meurumpok ngon Gobnyan. 4 Dan ubak Gobnyan peukara lôn nyoe ulôn peuhadab, lam babah ulôn jiteubiet tutoe haba tuéng bila droe. 5 Ulôn keuneuk lôn teupeue peue nyang geupeugah, dan pakriban Gobnyan geujaweueb teuma. 6 Peu kheueh Gobnyan geupeudeuh kuasa Gobnyan ateueh ulôn? Hana! Gobnyan pasti geudeungoe tutoe haba lôn. 7 Ulôn hana meusalah dan hase lôn bila droe dikeue Gobnyan, deungon nyan ulôn teuma geupeugah beubaih keu siumu masa. 8 Ulôn mita Po teu Allah, di timu, barat, seulatan dan utara. teuma, dipat mantong Po teu Allah hana; dan ulôn hana hase meurumpok ngon Gobnyan. 10 Teuma Gobnyan geuteupeue banmandum rot ulôn meunan cit tieb-tieb langkah lôn. Meunyoe lagée méuh ulôn geu-ujoe, jeuet keu bukeuti bahwa até ulôn gleh. 11 Ulôn taát ubak Gobnyan deungon seutia; hántomna ulôn meusimpang nibak rot nyang ka geupeuteuntée. 12 Peurintah-peurintah Po teu Allah sabe ulôn taát, meulakée Gobnyan ulôn turot dan bukon keuheundak lôn keudroe. 13 Po teu Allah nyan hana meu-ubah; hana nyang hase jilawan Gobnyan. Gobnyan geupeubuet peue nyang geumeuhéut. 14 Gobnyan teuma geupeujak reuncana Gobnyan keu ulôn, dan mantong jai that reuncana Gobnyan nyang laén seulaén nyan. 15 Sabab teumakot ubak Gobnyan, yo kheueh ulôn; seumaken mandum nyan ulôn pike, seumaken teumakot kheueh ulôn. 16 Nyang Mahakuasa geupeuhanco banmandum keubeuranian ulôn. Ulôn teumakot lé sabab Po teu Allah, dan kon lé sabab seupôt buta, bahpi seupôt nyan jikeuliléng ulôn, dan jitôb rumon ulôn.

Ayub 24

1 Pakon Po teu Allah hana geupeuteutab uroe peusidangan, mangat ureuëng-ureuëng nyang turi Gobnyan meuteumé keuadelan? 2 Na ureuëng nyang jigéesée tanda bataih, mangat tanoh jih meutamah luwah. Awaknyan jicue kawan bubiri, dan jijak pasoe lam weue awaknyan keudroe. 3 Keuleudée atra aneuëk yatem ngon meuntui awaknyan baplueng; leumô sidroe inong balée, awaknyan cok sibagoe jaminan. 4 Awaknyan jipagab ureuëng gasien mangat jiteumé jeumba, lé sababnyan, teupaksa jijak musöm kheueh ureuëng gasien papa. 5 Nyang, ureuëng gasien nyan lagée keuleudée kleut nyang jimita eumpeun lam blang meuduro; teuma bak teumpat-teumpat nyan mantong nyang na peunajoh keu aneuëk-aneuëk awaknyan. 6 Blang ureuëng laén teupaksa awaknyan peubuet; boh anggô ureuëng jeuhet teupaksa awaknyan peusapat. 7 Jihnyan hana ija seulimbot dan peukayan ngon peuseu-uem tuboh óh watée malam. 8 Jihnyan basah lé ujeuen raya sideh di gunong, laju jipeurab bak gunong batée keu jimeuteudoh. 9 Ureuëng jeuhet jicok keu namiet aneuëk nyang hana ma ngon yah, dan jicok aneuëk manyak ureuëng gasien nyang meu-utang bak jih. 10 Ureuëng gasien jijak ngon hana sapeue na; jihnyan deuek teungoh jipot boh gandom lam blang. 11 Nibak zaiton jihnyan jipeugot minyéuk, dan nibak boh anggô, jipeugot ié jieb, teuma jihnyan keudroe jiteuka glaih lagée raya. 12 Di banda-banda teudeungoe su ureuëng aloh alah nyang ka payah that, ureuëng-ureuëng luka jiteumawök mangat jih teupeu-ubat, teuma Po teu Allah hana geudeungoe doá awaknyan; Gobnyan hana geutem pakoe awaknyan. 13 Na ureuëng nyang jitulak trang dan jicok keu musoh, awaknyan hana jituri dah hana jiseutôt rot jih. 14 Óh watée seuboh tukang poh maté gob jibeudôh nibak teumpat éh jih, laju jiteubiet jijak poh maté ureuëng gasien papa, dan watée uroe gohlom beungoh, jihnyan meuluém-meuluém lagée pancuri. 15 Ureuëng peubuet mukah jipreh-preh teuka watée seunja; laju jingui tutôb muka mangat gob hana jituri jihnyan. 16 Pancuri jibongka rumoh óh watée malam; óh watée uroe jipeusie nibak peungéueh dan jijak musöm. 17 Nibak jih, beungoh lumpah teumakot, teuma seupôt nyang hebat, keubiet galak that até jih." 18 Laju geupeugah lé Zofar, "Ureuëng jeuhet hanyôt lé ié beuna, tanoh atra milék jih geukutok lé Po teu Allah; lampôh anggô jih jinoe ka seungue; hanale nyang meubuet nibak lampôh nyan. 19 Lagée salju teusampôh lé keunong musém khueng dan mata uroe, meunan kheueh ureuëng meudesya jiúet lam donya ureuëng maté. 20 Ma jih keudroe geutuwoe ubak jih, dan glang-glang jijak seuba tuboh jih nyan. Nan jih ka hanale gob ingat; jihnyan teupeumeusunah lagée bak kayée nyang reubah. 21 Banmandum nyan jeuet na sabab jih nyan jitindéeh inong-inong balée, dan buet jih keujam that ubak ma nyang hana meu aneuëk. 22 Teuma Po teu Allah, ngon kuasa Gobnyan, geuparôh ureuëng peukasa. Po teu Allah geubeudôh dan geupoh, laju maté kheueh ureuëng doraka. 23 Po teu Allah geubri jih udeb aman seuntosa, teuma teukawai jihnyan hana piôh-piôh sabena. 24 Teuma sikeujab jihnyan udeb bahgia, teuma óh dudoe jijak keu siumu masa. Jihnyan layée lagée naleueng nyang hana meuguna; lagée aneuëk pade nyang teukoh nibak bak jih. 25 Soe kheueh nyang hase jibantah keunyataan nyan, atawa jisanggah keubeunaran nyang ulôn peugah?"

Ayub 25

1 Laju Bildad jijaweueb, "Po teu Allah nyan keubiet meukuasa; banmandum ureuëng harôh yo meukot-kot dikeue Gobnyan; Gobnyan kheueh nyang peulara keudaméan ngon keurajeuen Gobnyan lam syeuruga. 3 Peu kheueh hase teuitong malaikat nyang peutimang Gobnyan? Peu kheueh na teumpat nyang hana keunong ngon cahya Gobnyan? 4 Peu kheueh mungken manusia suci dikeue Po teu Allah? Mungken kheueh jihnyan aseuli nibak pandangan Gobnyan? 5 Nibak Po teu Allah, bahnyan buleuen pih hana trang, dan bintang geuanggab reudée. 6 Peue lom manusia, bah nyan glang, seurangga! Nibak mata Po teu Allah, jihnyan keubiet hana meuhareuga."

Ayub 26

1 Teuma Nabi Ayub geupeugah, "Keubiet carông that neubri sinulông ubak ulôn nyang leumoh dan lam payah nyoe! 3 Keubiet diet that naseuhat dan ajarannyan nyang ka droeneueh bri ubak ulôn, ureuëng nyang bangai! 4 Ubak soe kheueh haba droeneueh nyan teutuju? Soe nyang bri ilham droeneueh keu neumeututoe meunan bagoe?" 5 Jaweueb Bildad, "Ureuëng-ureuëng lam álam mawöt yo meugám-gám; ié dan nyang na disinan yo cit teuma. 6 Dikeue Po teu Allah, donya ureuëng maté teubuka, hana teutôb sampoe deuh teukalon lé Gobnyan. 7 Po teu Allah geuleueng langét, di ateueh laôt raya, dan geugantung bumoe bak ruweueng nyang hampa. 8 Geupasoe lam awan ngon ié nyang meulimpah-limpah, teuma awan nyan hana beukah sabab lé geuhon ié nyan. 9 Geusöm ruman buleuen pernama di meurandeh awan nyang ka geuleueng nyan. 10 Geugamba gareh meulingka ateueh muka laôt keu teupeu aséng trang nibak seupôt. 11 Meunyoe Gobnyan geudumpek ngon su nyang meutaga, taméh-taméh sinumpang langét yo meugám-gám. 12 Laôt raya geupeutaklok lé kuasa Gobnyan dan Rahab pih jipeurunoe lé carông Gobnyan. 13 Nafáh Gobnyan teusampôh langét sampoe gleh lagoena; jaroe Gobnyan geupoh naga nyang rab jiplueng. 14 Teuma mandum nyan sibagoe tanda kuasa Gobnyan; teuma haba meusáh-sáh nyang trok bak geulinyueng tanyoe Padubna nit peungeurtian tanyoe keuhai Po teu Allah dan hebat jih kuasa Gobnyan!"

Ayub 27

1 Nabi Ayub geupeugah lom haba geuh, kheun gobnyan, "Deumi Allah nyang udeb, nyang hana geubri keuadelan keu ulôn, 3 ulôn meusumpah: Simantong Po teu Allah geubri nafáh keu ulôn, simantong nyawöng na lam tuboh lôn, 4 bibi ulôn hana lôn peugah haba nyang sulet, lidah ulôn hana lôn peugah tipée daya. 5 Lé sababnyan, hana lôntem peugah bahwa droeneueh beutôi; trok án maté pi teutab ulôn peuteun bahwa ulôn hana meucupa. 6 Ulôn teutab lôn mumat ubak patuh ulôn, dan até nurani lôn pih teutab gleh sabe. 7 Seumoga musoh ulôn geuhuköm sibagoe nyang doraka, dan lawan ulôn geuseupôt sibagoe ureuëng doraka. 8 Peu kheueh na harapan keu ureuëng dursila bak watée Po teu Allah geutuntot jiwa jih? 9 Peu kheueh Po teu Allah geudeungoe su mo jih watée keusosahan rhot ateueh jih? 10 Nyang sikeubiet jih jihnyan jimeucen that ubak keuseunangan nibak Po teu Allah, dan meudoá ubak Gobnyan deungon hana meurasa hek. 11 Gata teuma lôn peurunoe keuhai padubna rayeuk jih kuasa Allah, ulôn britée ubak droeneueh keuhai reuncana Nyang Mahakuasa. 12 Teuma, gata mandum ka droeneueh ngieng keudroe. Lé sababnyan, pakon droeneueh bri naseuhat nyang hana meumakna?" 13 Dan geupeugah kheueh lé Zofar, "Meunoe kheueh cara jih Po teu Allah Nyang Mahakuasa geuhuköm ureuëng nyang zalem dan doraka. 14 Meunyoe aneuëk jih le, awaknyan teuma maté lam mideuen prang dan aneuëk cucoe jih teuma udeb sabe hana lam seb. 15 Syedara jih nyang mantong na, maté keunong bala, dan inong-inong balée awaknyan hana jipeuba-e ngon mo nyang gura. 16 Jeuet mantong pirak jih meutamon-tamon dan peukayan jih meususon-suson, 17 teuma pirak dan peukayan nyan banmandum teuma jeuet keu hak milék ureuëng nyang jujoe até jih. 18 Rumoh ureuëng jeuhet leumpôk lagée eumpueng rambideuen, rumoh sikeujab mantong lagée jambô sidroe tukang jaga. 19 Jihnyan jipeureubah droe lagée ureuëng kaya, teuma hainyan hana hase jiulang teuma, watée jihnyan jibeudôh nibak teumpat éh jih, ka gadôh dan sapan sapa kheueh atra keukayaan jih. 20 Keudahsyatan rhot lagée ié raya nyang teuka hana teusangka-sangka. Angén badée óh malam teuka laju jiyueb dan jitarek jihnyan mangat jijak. 21 Angén timu jibeuôt jihnyan, dan jisampôh jihnyan nibak rumoh jih. 22 Jihnyan jipeuron ngon hana rasa gaséh, dan teupaksa jiplueng jijak mita teumpat meulindong. 23 Reubah jih laju jisambot lé gob sira jipéh-péh jaroe; dipat mantong jihnyan meuteumé peuhinaan."

Ayub 28

1 Na teumpat tambang pirak nibak teumpat nyan pirak jiteumé; na teumpat méuh teupeugleh sampoe aseuli. 2 Beuso teukueh nibak lam tanoh; nibak batée teupeuliléeh teumaga. 3 Seupôt buta nyan meuhase jijak, teumpat nyang paleng lhok teuseulidék teuma. Disinan, lam seupôt glab nyan, ureuëng jijak mita meubagoe jeuneh batée. 4 Jiôh nibak teumpat nyang hana ureuëng duek, nyang gohlom na jigilo dan jijak rot nyan, ureuëng jimeubuet sira meugantung-gantung nibak taloe lam guha teureuwongan nyang seungue hana sapeue na. 5 Tanoh jipeuhase peunajoh keu manusia, teuma dimiyueb tanoh nyan cit teuma, banmandum geureuloh sira geubalek-balek sampoe asoe bumoe ka hana meuteuntée. 6 Batée lam tanoh na meungandong nilakandi, dan abée jih jeuet keu méuh aseuli. 7 Cicém kleung hana jituri rot jak keudeh, dan cicém nasar pih gohlom na jipo di ateueh nyan. 8 Gohlom na singa atawa beulatang laén jijak rot seungue nyang teutuju keudeh. 9 Ureuëng jikueh lam batée nyang padubna pih kreueh jih, jireuloh gunong trok ubak ukeue jih. 10 Watée jihnyan jipeuget rot peureulong lam gunong batée, laju meuteumé peumata nyang paleng meumutu. 11 Trok ubak asai mata ié jihnyan jikueh, laju jiteumé peue nyang teusöm. 12 Teuma dipat kheueh hikeumat nyang hase jimita? Dipat kheueh tanyoe jeuet tameurunoe mangat tanyoe muphom? 13 Hikeumat hana nibak teungoh-teungoh manusia; hana nyang teupeuyuem jih nyang sikeubiet jih. 14 Tuwie-tuwie laôt dan samudra jipeugah bahwa hikeumat hana bak jihnyan. 15 Hikeumat hana hase teutuka bahpi deungon méuh aseuli, dan deungon pirak pih hana hase teubloe. 16 Méuh dan peumata nyang paleng meuyuém hana hase jeuet keusaban yuem jih. 17 Méuh atawa ceureumén hana hase jeuet keubandengan jih, hana hase teubayeue ngon pot bungöng keuncana. 18 Hikeumat jiôh leubeh manyang yuem jih nibak merjan, kristal, atawa mutiara. 19 Batée topas nyang aseuli atawa méuh nyang aseuli, kureueng nilai jih nibak akai budo. 20 Dipat kheueh uboejih keubijaksanaan? Dipat kheueh geutanyoe hase tateumé peungeurtian? 21 Hana makhlok udeb nyang ka lheueh jikalon atra nyan, meunan cit cicém nyang po di manyang hana jikalon nyan. 22 Mawöt dan binasa pih jipeugah, awaknyan jideungoe haba nyang hana meupat punca. 23 Teuma Po teu Allah nyang teupeue dipat hikeumat nyan na, teuma Gobnyan nyang teupeue rot jak keunan, 24 sabab Gobnyan geukalon ujong-ujong bumoe; peue-peue mantong dimiyueb langét Gobnyan peurati. 25 Watée ubak angén geujôk teunaga, dan geupeuteutab bataih-bataih laôt raya; 26 watée geupeuteuntée teumpat ujeuen jitreun, dan rot nyang jijak kilat ngon gôgô; 27 bak watéenyan kheueh hikeumat geukalon, geu-ujoe nilai jih, lheueh nyan barô kheueh geubri reuseutu. 28 Po teu Allah meufeureuman ubak manusia, "Mangat meuteumé hikeumat, Po teu Allah harôh gata horeumat. Mangat meuteumé peungeurtian, keujeuhetan harôh gata peujiôh."

Ayub 29

1 Nabi Ayub geupeugah keuhai droe gobnyan, kheun gobnyan, 2 "Kira jih udeb lôn jeuet lom lagée yoh awai ilée, watée Po teu Allah geulindong ulôn. 3 Ulôn sabe geubri sinulông, geupeutrang watée lôn jak lam seupôt. 4 Nyan kheueh uroe-uroe keujayaan ulôn, watée Po teu Allah mantong krab ngon lôn dan peupayông rumoh lôn. 5 Watée nyan Nyang Mahakuasa mantong geudampeng ulôn, dan aneuëk-aneuëk lôn na bansilingka lôn. 6 Beulatang peulara lôn jai that jipeuhase susu. Jai that minyéuk jipeuhase lé bak-bak zaiton, bahpi teupula ateueh tanoh meubatée. 7 Meunyoe ureuëng-ureuëng patot lam banda geuduek meusajan, dan ulôn duek laju lamkawan awaknyan, 8 jisurot kheueh ureuëng-ureuëng muda, bagaih that óh ka lheueh lôn kalon awaknyan. Meunan cit ureuëng-ureuëng tuha geubeudôh ngon hikeumat; keu geubri horeumat. 9 Meunan cit ureuëng-ureuëng rayeuk geupiôh geupeugah haba, 10 dan ureuëng peunteng pi hana geupeugah haba. 11 Soe mantong hireuen that meunyoe jideungoe keuhai ulôn; soe nyang kalon ulôn, jipujoe keuhai jasa lôn. 12 Sabab, ulôn tulông ureuëng gasien nyang lakée tulông; ulôn tulông yatem ngon meuntui nyang hana bantu. 13 Ulôn jipujoe lé ureuëng nyang keubit that sosah, ulôn tulông inong-inong balée sampoe awaknyan aman. 14 Nyang ulôn peubuet nyan jujoe hana meucupa; ulôn peudong keuadelan dipat mantong na. 15 Keu ureuëng buta, ulôn nyoe jeuet keu mata jih keu ureuëng lapée, ulôn na kheueh gaki jih. 16 Keu ureuëng gasien, ulôn na kheueh ayah jih; keu ureuëng aséng, ulôn na kheueh peumbela jih. 17 Teuma kuasa ureuëng keujam, ulôn wiet sampoe patah, dan keureubeuen awaknyan ulôn peuseulamat. 18 Harapan ulôn na kheueh meuteumé umu nyang panyang, dan maté ngon teunang lam rumoh lôn keudroe. 19 Ulôn lagée bak kayée nyang udeb jih suboe dan timoh get, ukeue jih seb ié dan iémbon jipeubasah cabeueng jih. 20 Ulôn sabe jipujoe lé mandum ureuëng, dan hántom na teunaga lôn meukureueng. 21 Ureuëng-ureuëng mandum seungab, meunyoe ulôn teungoh bri naseuhat; banmandum nyang ulôn peugah awaknyan deungoe ngon mangat. 22 Óh ka lheueh ulôn peugah haba, hana le nyang peureulée teutamah; tutoe haba lôn jitamong lagée ié ujeuen. 23 Banmandum ureuëng jisambot tutoe haba lôn deungon peunoh geumbira, lagée peutani jisambot ujeuen treun watée musém bungöng. 24 Ulôn teuseunyum ubak awaknyan watée awaknyan putôh asa; ié muka lôn nyang bahgia teutamah seumangat awaknyan. 25 Ulôn kheueh nyang mat pimpénan, dan nyang cok mandum keuputôsan. Ulôn pimpén awaknyan lagée raja di teungoh pasokan jih, dan ulôn peumangat até awaknyan lam keuseudehan jih.

Ayub 30

1 Teuma jinoe ulôn jihina lé ureuëng nyang leubeh muda. Yoh watée ilée ureuëng syiek awaknyan ulôn ngieng hina keu jirabe bubiri lôn meusajan asée meurabe. 2 Nibak ulôn awaknyan hana meuguna sabab ka habéh teunaga. 3 Awaknyan duek dan meudeurita lagoena, sampoe jipajoh ukeue tho kreng bak guron nyang seungue. 4 Awaknyan jilôt tamah meuduro lam padang kasak kasek laju jimakheun bah kheueh ôn meunan cit ukeue jih. 5 Awaknyan jiuse deungon tengking lagée ureuëng jiuse pancuri. 6 Awaknyan tinggai lam guha-guha; ruhuéng-ruhuéng bak bintéh gunong jeuet keu rumoh awaknyan. 7 Lam uteun raya awaknyan jiklik-klik lagée beulatang, meukeulompok dimiyueb tamah meuduro lam gle. 8 Awaknyan hana nan meunan cit hana meuyuém, ureuëng-ureuëng ka teuparôh lam nanggroe jih. 9 Jinoe awaknyan teuka dan ulôn jipeukém teuma; nibak awaknyan, ulôn nyoe lelucon nyang hana meuhareuga. 10 Ulôn jingieng lé awaknyan hina ngon kutoe, meunan cit muka lôn jiludah teuma. 11 Lé sabab Po teu Allah geupeujeuet ulôn leumoh hana meudaya, awaknyan jipeupuih ban galak droe beungéh jihnyan. 12 Kawan awaknyan jiheuntam ulôn rot keue, dan keuhai rhot ulôn ka awaknyan reuncana. 13 Awaknyan jikoh rot ulôn keu jipeutaloe ulôn; hana meusidroe pih nyang halang watée awaknyan jiseureubu. 14 Lagée ié beuna awaknyan heuntam beuton kuta lôn; meusajan-sajan awaknyan teuka jijak tindéeh tuboh lôn. 15 Nyang paleng dahsyat ka peunoh bansaboh tuboh lôn; lagée jiyueb lé angén, yuem droe ulôn teupupoe teuma; lagée awan teungoh jak, gadôh kheueh keubahgiaan lôn. 16 Jinoenyoe rab maté ulôn; hana nyang phui keu deurita ulôn. 17 Óh watée malam mandum tuleueng lôn linu-linu; rasa sakét nyang jitôb-tôb hana jipiôh-piôh. 18 Po teu Allah geuteugom ulôn bak takue bajée lôn sampoe peukayan ulôn krôt-krôt bak tuboh lôn. 19 U dalam leuhôb ulôn geuseumpom, ulôn nyoe geupeujeuet lagée brôh nyang hana meuguna! 20 Ulôn meudoá ubak Droeneueh ya Allah, Droeneueh hana Neujaweueb; watée ulôn meudoá, Droeneueh hana Neupakoe. 21 Droeneueh Neupeusaneut ulôn deungon keujam, Droeneueh tindéeh ulôn deungon banmandum teunaga Droeneueh. 22 Droeneueh Neupeubiyeu angén jipupo ulôn sampoe meulayang; lam angén badée Droeneueh pôt keudeh keunoe droe ulôn. 23 Ulôn kuteupeue, Droeneueh ba ulôn ubak alam mawöt, ubak teumpat mandum nyang udeb teupeusapat keunan. 24 Keupeue Droeneueh seurang ureuëng nyang keunong bala, nyang hana hase jipeubuet sapeue seulaén jilakée beuteuweuh. 25 Bukon kheueh ulôn kumoe meusajan ngon ureuëng nyang sosah, dan lôn gaséh ureuëng nyang kureueng harta? 26 Ulôn meuharab bahgia dan trang, teuma aloh alah dan seupôt buta kheueh nyang teuka. 27 Ulôn teupriek-priek lé seudeh dan weuh lumpah na; uroe meugantoe uroe seumaken lé nyang lôn deurita. 28 Lam seupôt, hana cahya, ulôn jak keudeh keunoe; ulôn dong dikeue rakyat ba, lôn lakée tulông. 29 Su ulôn seudeh peunoh ngon weuh lagée jimo asée srigala dan cicém unta. 30 Kulét ka jeuet keu itam; tuboh lôn tutông lé sabab deumam. 31 Yoh watée ilée ulôn deungoe su musik geumbira, jinoe nyang na su ureuëng mo ba-e deungon duka.

Ayub 31

1 Deungon sumpah ulôn ka meujanji aneuëk dara muda hana lôn kalon deungon beurahi. 2 Peu kheueh nyang geupeubuet Po teu Allah ateueh geutanyoe? Pakriban kheueh geubalaih buet manusia? 3 Bala dan malang pasti teuka ubak ureuëng nyang peubuet jeuhet! 4 Po teu Allah teupeue banmandum buet ulôn; geukalon mandum langkah-langkah lôn. 5 Ulôn meusumpah bahwa gohlom na ulôn peubuet jeuhet; meunan cit gohlom na ulôn peunget gob. 6 Bah kheueh Po teu Allah geutimang ulôn ateueh céng nyang sah, deungon nyan Gobnyan geuteupeue bahwa ulôn hana meusalah. 7 Meunyoe seukira jih ulôn ka meusimpang nibak rot nyang beutôi, atawa até ulôn teutarek ubak hai nyang kuto, meunyoe jaroe lôn ka basah deungon desya, 8 deungon nyan bah kheueh ureuëng laén jipajoh peue nyang ulôn tabu, dan banmandum hase bumoe lôn hanco. 9 Meunyoe seukira jih ulôn teutarek ubak peurumoh teutangga lôn, dan deungon musöm-musöm, ulôn luem jihnyan rot likot pintoe, 10 deungon nyan bah kheueh peurumoh lôn jitaguen bu keu ureuëng laén; bah kheueh ateueh peuratah agam laén jihnyan éh. 11 Meunyoe desya nyang jeuhet nyan biet na lôn peubuet, ulôn ka patot lôn teurimong huköman. 12 Desya nyan jeuet keubinasa lagée apui neuraka, banmandum atra ulôn habéh tutông mandum. 13 Watée namiet ulôn aloh alah sabab hak jih ulôn peusalah, ulôn deungoe jihnyan dan lôn peusaneut jihnyan deungon até jujoe. 14 Meunyoe hana, pakriban ulôn meuhadab Po teu Allah? Peue nyang ulôn jaweueb watée Gobnyan teuka geujak peusidang ulôn? 15 Bukon kheueh Po teu Allah nyang cebta ulôn, meunan cit nyang cebta namiet-namiet lôn? 16 Gohlom na hana lôntem tulông ureuëng nyang gasien meuseukien. Atawa lôn peubiyeu inong-inong balée udeb lam keuadaan putôh asa. 17 Gohlom na ulôn peubiyeu aneuëk yatem ngon meuntui udeb jih duek, seudangkan ulôn keudroe seb lôn pajoh. 18 Yoh ubit awaknyan lôn peulara; siumu udeb lôn awaknyan ulôn bimbeng. 19 Meunyoe ulôn ngieng ureuëng nyang udeb jih lam kureueng, lumpah that gasien keu teubloe peukayan. 20 Ulôn peuliembôt jihnyan mangat seu-uem ngon ija wol nibak bubiri lôn keudroe, deungon lagéenyan jihnyan jipujoe ulôn deungon sipeunoh até. 21 Meunyoe ulôn ka lheueh lôn tindéeh yatem ngon meuntui, sabab yakén teuma peukara lôn meunang, 22 deungon nyan bah kheueh bandua blaih jaroe lôn patah sampoe jiminah nibak bahô ulôn. 23 Hana ulôn peubuet lagée nyan, sabab huköman Po teu Allah keubiet teumakot that até lôn. 24 Hántom na ulôn peubangga ngon hareuta lôn, 25 atawa ulôn peubangga atra keukayaan lôn. 26 Hántom na ulôn seumah mata uroe nyang meunan trang atawa buleuen nyang hu beuble-ble ceudah. 27 Hántom na ulôn teugoda lé atra nyan, atawa ulôn keucob jaroe lôn keu lôn horeumat jih. 28 Desya nyang lagéenyan bagoe patôt meuteumé huköman maté, sabab Po teu Allah Nyang Mahakuasa ka jiiengkeue. 29 Gohlom na ulôn meumangat-mangat até sabab musoh lôn meudeurita, atawa meuduka cita sabab jihnyan meuteumé ceulaka. 30 Ulôn hana meudoá keu beumaté musoh lôn; hántom na ulôn peubuet desya nyang lagéenyan bagoe. 31 Ureuëng-ureuëng nyang meubuet bak ulôn jiteupeue, bahwa soe mantong ulôn peujamé lam rumoh ulôn. 32 Rumoh lôn teuhah sabe keu ureuëng teungoh jak; hántom na ulôn peubiyeu awaknyan jiéh ateueh rot uh. 33 Ureuëng laén jisöm-söm desya jih, teuma ulôn hántom na lôn peubuet lagéenyan bagoe. 34 Peue jikheun lé gob hana lôn takot, dan jihina lé gob, hana lôn pakoe. Hántom na ulôn tinggai dirumoh dan seungab mantong, sabab teumakot keu jihina. 35 Peu kheueh hana ureuëng nyang jitem deungoe tutoe haba lôn? Ulôn meusumpah bahwa peue nyang lôn peugah beutôi mandum. Kira jih Nyang Mahakuasa geujaweueb mandum ulôn. 36 teuma deungon bangga ulôn lat bak bahô, dan sibagoe mahkota ulôn keubah ateueh ulée. 37 Teuma ulôn britée ubak Po teu Allah banmandum nyang ulôn peubuet; teuma ulôn hadab Geuhnyan deungon bangga dan ulée teudong cot. 38 Meunyoe seukira jih tanoh nyang ulôn meu-úe ka ulôn cue, dan ulôn reupah nibak po jih nyang seujati, 39 seukira jih hase jih habéh ulôn pajoh, dan peutani nyang pula nyan ulôn peubiyeu duek, 40 bah kheueh kon jeulai atawa gandom nyang timoh lam ladang, teuma tamah meuduro dan naleueng lakoe."

Ayub 32

1 Sabab Nabi Ayub yakén that-that ateueh keubeunaran droe gobnyan, lé sababnyan, ban lhée droe sahabat geuhnyan hana geutem jaweueb le. 2 Teuma disinan na sidroe ureuëng nyang nan geuh Elihu bin Barakheel, sidroe keuturonan Bus nibak kawöm Ram. Gobnyan hana hase geupeuteun beungéh geuh, sabab Nabi Ayub geupeubeutôi droe gobnyan keudroe dan geupeusalah Po teu Allah. 3 Meunan cit gobnyan beungéh ubak ban lhée droe sahabat Nabi Ayub sabab awaknyan hana hase jibantah tutoe haba Nabi Ayub, bahpi awaknyan jipeusalah Nabi Ayub. 4 Elihu ureuëng nyang paleng muda lamkawan awaknyan, lé sababnyan gobnyan geupreh sampoe seuleusoe mandum awaknyan meupeugah haba. 5 Óh ka lheueh geukalon bahwa ban lhée droe awaknyan hana hase geujaweueb, gobnyan jeuet keu beungéh, 6 dan laju geupeugah lagée nyoe, "Ulôn mantong muda, seudangkan droeneueh ka tuha, lé sababnyan ulôn teumakot dan ragu ulôn peugah peundapat lôn. 7 Ulôn pike, droeneueh kheueh nyang harôh peugah haba, nyang leubeh tuha bah kheueh geubagi hikeumat geuh. 8 Teuma nyang jôk hikeumat ubak manusia, na kheueh Roh Po teu Allah Nyang Mahakuasa. 9 Ureuëng jeuet keubijaksana, kon lé sabab umu jih ka tuha; ureuëng muphom nyang beutôi, kon lé sabab panyang umu jih. 10 Lé sababnyan, deungoe kheueh ulôn; idhin kheueh ulôn lôn peugah peundapat lôn. 11 Deungon saba ulôn deungoe watée droeneueh peugah haba, dan ulôn preh watée droeneueh neumita tutoe haba nyang bijaksana. 12 Ulôn simak deungon biet-biet that; ulôn deungoe droeneueh meuteumé keugagalan. Nyang salah nibak tutoe haba Nabi Ayub hana hase droeneueh jôk bukeuti. 13 Pakriban jeuet droeneueh peugah bahwa hikeumat ka droeneueh teumé? Sabab droeneueh teupaksa meunyeurah. Nyang hase jaweueb Nabi Ayub na kheueh Po teu Allah. 14 Ubak droeneueh kheueh Nabi Ayub peugah haba, dan bukon ubak ulôn, teuma ulôn hana lôn jaweueb lagée droeneueh. 15 Nabi Ayub, awaknyan bingöng dan hana hase geujaweueb; hana nyang jeuet awaknyan peugah. 16 Awaknyan jidong mantong, hana hase jimeututoe le. Peu kheueh harôh ulôn preh bahpi awaknyan ka ji-iem droe? 17 Hana, jinoe teuma ulôn jaweueb; peundapat ulôn, teuma ulôn peusampoe. 18 Hana saba le ulôn preh, hana hasele ulôn teun tutoe haba lôn. 19 Meunyoe ulôn seungab mantong, teuma beukah kheueh ulôn, lagée baluem nyang peunoh ngon ié anggô barô. 20 Ulôn harôh peugah haba, mangat até lôn teunang; ulôn harôh lôn peuhah babah lôn, dan ulôn bri jeunaweueb. 21 Hana ulôn bila soe mantong nibak meudakwa nyoe dan hana meusidroe pih nyang ulôn pujoe-pujoe. 22 Cara teubeuôt-beuôt pi, ulôn hana lôn teupeue, dan meunyoe ulôn kupeubuet lagéenyan, Po teu Allah deungon reujang geuhuköm ulôn.

Ayub 33

1 Jinoe, hei Nabi Ayub, deungoe kheueh deungon jroh that tutoe haba nyang keuneuk lôn peusampoe nyoe. 2 Ulôn ka siab seudia keuneuk meututoe lôn peugah haba. 3 Deungon ikhlaih até ulôn peugah haba; nyang ulôn peugah na kheueh nyang sibeuna jih. 4 Roh Po teu Allah ka geucebta ulôn dan geubri udeb ubak ulôn. 5 Lé sababnyan, meunyoe hase, jaweueb kheueh ulôn. Peusiab kheueh nyang bila keuteubila droe gata. 6 Nibak Po teu Allah, droeneueh dan ulôn hana meubeda nibak tanoh kliet tanyoe geupeuget. 7 Lé sababnyan, bék droeneueh takot ubak ulôn; ulôn hana niet keuneuk peutaloe droeneueh. 8 Nyang kheueh, óh ka lheueh lôn deungoe peue nyang droeneueh peugah, dan ulôn muphom peue nyang droeneueh meukeusut. 9 Droeneueh neupeugah, 'Ulôn gleh, hana lôn peubuet nyang geutam. Ulôn hana meucupa dan hana lôn peubuet nyang salah. 10 Teuma Po teu Allah geumita-mita alasan geulawan ulôn, dan geupeujeuet ulôn sibagoe musoh Geuh. 11 Gobnyan geuboh ranté bak gaki lôn; dan geukawai mandum grak grik lôn.' 12 Hei Nabi Ayub, peundapat droeneueh salah mandum! Sabab Po teu Allah leubeh rayeuk nibak manusia. 13 Pakon droeneueh tatudôh Allah bahwa Gobnyan hana geupakoe aloh alah manusia? 14 Po teu Allah geumeututoe deungon meubagoe cara, teuma hana meusidroe nyang tem pakoe tutoe haba Gobnyan. 15 Di ureuëng éh meusinyeunya óh watée malam, lam lumpo dan deuh teukalon, Po teu Allah geupeugah haba. 16 Po teu Allah geuyue awaknyan beujideungoe; geupeukeujôt awaknyan deungon geuseugah sabe. 17 Meukeusut jih mangat awaknyan jipiôh meudesya dan jitinggai buet jih nyang sombong. 18 Hana geupeubiyeu awaknyan rhot ubak hanco; geulindong awaknyan nibak maté. 19 Po teu Allah geuseugah ureuëng deungon geupeutreun peunyakét deungon nyan tuboh jih peunoh rasa sakét. 20 Nyang sakét nyan ka gadôh nafeusu pajoh bu, peunajoh nyang paleng mangat pi ka jeuet keu luwat. 21 Tuboh jih jeuet keu pijuet dan meurana, tuleueng-tuleueng jih deuh banmandum. 22 Gobnyan karab jiwoe u álam baka donya ureuëng maté karab that ubak jihnyan. 23 Mungken sidroe lamkawan siribée malaikat Allah nyang peuingat manusia nibak tugaih jih, teuma teuka teujak tulông jihnyan. 24 Deungon meuwéuh-wéuh malaikat nyan teuma geupeugah, 'Peuleuh kheueh jihnyan, hana jeuet jihnyan jitreun lam donya ureuëng maté. Nyoe péng ngon teubôh, mangat jihnyan beubaih lom teuma.' 25 Tuboh jih teuma jeuet keu teuga dan peukasa seugar lagée ureuëng muda. 26 Meunyoe jihnyan meudoá, Po teu Allah teuma geugaséh jihnyan, teuma jihnyan jipujoe Allah deungon geumbira dan Po teu Allah teuma geupeupuléh keuadaan jihnyan. 27 Teuma, dikeue ureuëng ramé jihnyan laju jipeugah, 'Nyang jeuhet ulôn anggab jroh, rayeuk that kheueh desya lôn, teuma Po teu Allah hana geuhuköm ulôn.' 28 Po teu Allah geutam ulôn bék ulôn jak lam donya ureuëng maté, deungon nyan ulôn mantong udeb sampoe án jinoe. 29 Deungon meuulang-ulang, Po teu Allah ka geupeubuet banmandum nyoe. 30 Mangat Gobnyan hase geupeuseulamat manusia dan geubri keubahgiaan lam udeb jih. 31 Lé sababnyan deungoe kheueh hei Nabi Ayub, pasang kheueh geulinyueng seungab kheueh, jinoe ulôn teuma nyang peugah haba. 32 Teuma meunyoe na nyang keuneuk droeneueh peugah, peugah kheueh laju; dan meunyoe droeneueh beutôi, ulôn teuma rila lôn aku nyan. 33 Teuma meunyoe hana, seungab kheueh dan deungoe kheueh ulôn, ulôn keuneuk peurunoe hikeumat ubak gata.

Ayub 34

1 Bukon kheueh droeneueh carông dan na ákai budo? Deungoe kheueh banmandum nyang ulôn peugah nyoe. 3 Ureuëng jiteupeue peunajoh mangat meunyoe ka jirasa, dan tutoe haba bijak meunyoe ka jideungoe. 4 Soai nyoe harôh tapeureksa laju tapeubicah meusajan teuma. 5 Kheun Nabi Ayub, 'Hana nyang salah nibak ulôn, teuma Po teu Allah hana geutem bri peue nyang ade keu ulôn. 6 Ulôn geuanggab meusulet, sabab ulôn peugah ulôn hana meudesya. Jinoe ulôn luka parah that, bahpi ulôn hana meusalah.' 7 Peu kheueh ka lheueh takalon ureuëng lagée Nabi Ayub nyoe? Jihnyan jihina Po teu Allah meuulang-ulang. 8 Jihnyan galak jimeurakan ngon ureuëng-ureuëng doraka meunan cit jimeungon deungon ureuëng-ureuëng durjana. 9 Gobnyan jipeugah, bahwa sia-sia mantong kheueh meunyoe jihnyan jiuseuha jipeubuet keuheundak Po teu Allah. 10 Hei ureuëng-ureuëng bijaksana, deungoe kheueh! Ék kheueh mungken Po teu Allah Nyang Mahakuasa geupeubuet salah? 11 Gobnyan geuganja manusia nyang sisuai deungon buet jih, geupeusaneut jihnyan sisuai deungon nyang jipeubuet. 12 Po teu Allah Nyang Mahakuasa hana geupeubuet nyang jeuhet; banmandum ureuëng geubri keuadelan. 13 Nibak soe kheueh Po teu Allah geuteurimong kuasa Geuh? Soe kheueh nyang peucaya bumoe nyoe ubak Gobnyan? 14 Miseujih Po teu Allah geutarek nyawöng manusia, dan geucok lom teuma nafáh udeb jih, 15 deungon nyan maté makhlok mandum nyang na nyawöng, dan manusia jeuet keu abée lagée seumula. 16 Nyan, meunyoe droeneueh áreh, simak kheueh nyan, pasang kheueh geulinyueng gata dan deungoe kheueh. 17 Peu kheueh Po teu Allah nyang ade dan peukasa nyan gata peusalah? Peue nibak neupike lé droeneueh Po teu Allah geubanci keuadelan? 18 Po teu Allah geuhuköm raja dan nyang mat kuasa meunyoe awaknyan jeuhet dan doraka. 19 Gobnyan hana geudong blah raja-raja, laju leubeh geupeunteng ureuëng kaya nibak si gasien meuseukien. Sabab awaknyan banmandum na kheueh cebtaan Gobnyan. 20 Watée teungoh malam, awaknyan hase maté deungon hana teusangka-sangka. Po teu Allah geuhuköm peunguasa dan awaknyan pi binasa; deungon mudah geupoh maté ureuëng peukasa. 21 Gobnyan geukawai udeb manusia, geukalon mandum meubagoe langkah Geuh. 22 Hana seupôt, pakriban mantong kheueh peukat jih, nyang hase teusöm manusia meudesya. 23 Hana peureulée Po teu Allah geupeuteuntée watée jih, manusia teuka keu geupeusidang lé Gobnyan. 24 Deungon hana geuseulidék dan geupeureksa Gobnyan geupeucat nyang mat kuasa dan geubaiát geunantoe jih. 25 Sabab, Gobnyan geuteupeue peue nyang awaknyan peubuet; teuma Gobnyan geugule dan geupeuhanco awaknyan óh watée malam. 26 Awaknyan geutampa sabab lé desya awaknyan, dikeue rakyat ba awaknyan geuhuköm teuma. 27 Sabab, awaknyan hana jitaát ubak keuheundak Gobnyan dan hana jipakoe mandum peurintah Gobnyan. 28 Lé sabab awaknyan jeuet ureuëng gasien aloh alah mo ba-e awaknyan geudeungoe lé Po teu Allah. 29 Meunyoe Po teu Allah geucok keuputôsan keu geuseungab mantong, hana meusidroe pih nyang jijeuet kheun keu Gobnyan. Meunyoe Gobnyan geusöm ruman Geuh, hana meusidroe pih meuhase meurumpok ngon Gobnyan. 30 Teuma bansa-bansa hana meudaya keu jiceugah teumindéeh jeuhet nyan meukuasa. 31 Hei Nabi Ayub, peu kheueh desya droeneueh ubak Po teu Allah ka droeneueh angkée? Peu kheueh ka droeneueh meujanji bahwa droeneueh hana meudesya le? 32 Peu kheueh ka droeneueh lakée mangat geutunyok salah droeneueh? Peu kheueh ka neumeusumpah bahwa droeneueh neupiôh nibak buet nyan? 33 Ék kheueh mungken Po teu Allah geupeutrok peue nyang gata lakée, óh ka lheueh buet Po teu Allah hana droeneueh situju? Jinoe, droeneueh nyang harôh cok keuputôsan, kon ulôn. Peugah kheueh peue peundapat droeneueh! 34 Banmandum ureuëng áreh ka pasti situju; ureuëng bijaksana nyang jideungoe ulôn teuma jipeugah 35 bahwa Nabi Ayub geumeututoe hana geumeuphom, dan bahwa nariet gobnyan hana meungandong areuti. 36 Meunyoe tutoe haba Nabi Ayub teutilek deungon get-get, deuh kheueh teukalon bahwa tutoe haba geuhnyan lagée ureuëng jeuhet. 37 Salah geuhnyan teutamah lom deungon saboh desya; gobnyan beurontak ubak Po teu Allah, dan geuhina Gobnyan dikeue geutanyoe.

Ayub 35

1 Hei Nabi Ayub, droeneueh keuliru meunyoe neupike bahwa nibak mata Po teu Allah droeneueh hana meusalah. 3 Droeneueh silab meunyoe neutanyong, peue peungaroh desya droeneueh teuhadab Gobnyan; dan peue laba jih nyang droeneueh teurimong meunyoe droeneueh hana neupeubuet desya. 4 Ulôn kheueh nyang jaweueb droeneueh meunan cit ubak rakan-rakan droeneueh nyan. 5 Kalon kheueh u langét dan éue kheueh padubna manyang jih awan-awan. 6 Meunyoe droeneueh meudesya, Po teu Allah hana teuma rugoe. Meunyoe salah droeneueh le, Gobnyan hana teuma teupeungaroh. 7 Deungoe teupeubuet nyang get, Po teu Allah hana droeneueh tulông. Keubiet, Gobnyan hana peureulée sapeue nibak droeneueh. 8 Teuma seusabe droeneueh nyang jipeurugoe lé desya-desya droeneueh. Gobnyan cit teuma nyang meu-untông lé jroh droeneueh nyan. 9 Ureuëng-ureuëng nyang jitindéeh teuma meurang-rang; awaknyan jiklik jilakée tulông. 10 Teuma bukon ubak Po teu Allah, nyang cebta jihnyan nyang jôk harapan watée awaknyan meuduka, 11 dan nyang jôk keu manusia ákai budo leubeh nibak cicém dan beulatang laén di ateueh bumoe. 12 Ureuëng-ureuëng teutindéeh nyan jitawök, teuma Po teu Allah seungab mantong sabab awaknyan jeuhet dan peunoh ngon sombong. 13 Sia-sia kheueh awaknyan jiklik habéh teunaga; Nyang Mahakuasa hana geukalon atawa geudeungoe awaknyan. 14 Hei Nabi Ayub, leubeh-leubeh lom meunyoe droeneueh neupeugah bahwa droeneueh hana neukalon Gobnyan, bahwa peukara droeneueh kana dikeue Gobnyan dan droeneueh neupreh-preh Gobnyan! 15 Neupike Po teu Allah hana geubri huköman dan hana geukalon nyang droeneueh langgeh. 16 Sia-sia mantong kheueh tutoe haba droeneueh neupeugah laju; nyata kheueh, droeneueh hana neuteupeue peue nyang droeneueh peugah.

Ayub 36

1 Deungoe kheueh sikeujab teuk dan saba kheueh, mantong na nyang keuneuk ulôn peugah deumi Allah. 3 Peungeutahuan lôn luwah; ulôn peuguna nyan keu ulôn bri bukeuti bahwa ade that nyang cebta ulôn. 4 Tutoe haba lôn hana nyang peuleusu; ureuëng nyang biet-biet áreh na dikeue droeneueh. 5 Po teu Allah nyan peukasa! Peue-peue mantong geumeuphom. Hana meusidroe pih nyang geupandang hina. 6 Ureuëng nyang meudesya hana geupeubiyeu udeb jih treb that, Gobnyan geubri keuadelan keu ureuëng nyang meudeurita. 7 Ureuëng nyang jujoe geupeurati sabe, geupeujeuet awaknyan meukuasa lagée raja-raja, deungon nyan awaknyan jihoreumat siumu masa. 8 Teuma meunyoe ureuëng teuranté ngon ranté beuso, meudeurita lé sabab buet jih keudroe, 9 teuma desya dan keuhai sombong awaknyan teuma geubuka lé Po teu Allah. 10 Geuyue awaknyan mangat jideungoe peuingat Gobnyan dan jitinggai buet nyang jeuhet nyang jipeubuet lé awaknyan. 11 Meunyoe awaknyan jiturot peue kheun Po teu Allah dan meubakti ubak Gobnyan, awaknyan udeb damé dan makmu sampoe akhé hayat jih. 12 Teuma meunyoe awaknyan hana jideungoe, awaknyan teuma maté lam bangai jih. 13 Ureuëng nyang hana meutuhan nibak jih jikeubah beungéh; bahle geuhuköm lé TUHAN, teutab hana jitem lakée tulông. 14 Awaknyan maté lam keuadaan payah lam umu mantong that muda, sabab udeb jih peunoh ngon hina. 15 Po teu Allah geupeurunoe manusia rot deurita, Gobnyan geupeuguna rot nyang sosah mangat jihnyan sada. 16 Po teu Allah ka geupeubeubaih droeneueh nibak nyang sulet that, deungon nyan droeneueh hase tanekmat keudaméan, dan meuja hidangan droeneueh peunoh ngon peunajoh. 17 Teuma jinoe sisuai deungon buet droeneueh nyang jeuhet, droeneueh tateurimong huköman jih. 18 Waspada kheueh, bék sampoe droeneueh teutipée ngon péng sugok; bék droeneueh jipeusisat lé sabab keukayaan. 19 Sia-sia mantong droeneueh meulakée beugeutem tulông, peucuma mantong banmandum teunaga dan upaya droeneueh. 20 Bék droeneueh hawa ubak malam nyang seupôt, saát jih bansa-bansa museunah dan leunyab. 21 Waspada kheueh, bék meupaleng ubak nyang doraka. Deurita droeneueh teumeukeusut mangat droeneueh tinggai nyang jeuhet. 22 Ingat kheueh, Allah nyan keubiet rayeuk that kuasa Gobnyan. Peu kheueh na gurée nyang hebat jih lagée Gobnyan? 23 Soe kheueh nyang hase jipeuteuntée rot keu Gobnyan atawa jijeuet tudôh Gobnyan geupeubuet salah? 24 Sabe Gobnyan jipujoe sabab lé karya Geuh, dan droeneueh pih patot taseuôn Gobnyan. 25 Banmandum ureuëng jikalon buet Gobnyan; teuma hana meusidroe pih nyang biet-biet muphom Gobnyan. 26 Po teu Allah keubiet mulia, hana hase tanyoe seunom keunan atawa taitong jeumeulah thon jih. 27 Po teu Allah nyang tarék ié ateueh bumoe jeuet keu awan laju geuubah teuma jeuet keu ié ujeuen. 28 Gobnyan geupeutron ujeuen rot langét manyang; laju geusibu ateueh umat manusia. 29 Hana meusidroe pih jimeuphom grak awan-awan dan su gogo di langét bak teumpat Po teu Allah tinggai. 30 Gobnyan geupeutrang banmandum langét deungon kilat, teuma dasai laôt teutab seupôt glab. 31 Nyan kheueh cara jih Gobnyan geupeu udeb bansa-bansa dan geujôk peunajoh nyang jai meulimpah. 32 Gobnyan geudrob kilat ngon jaroe Gobnyan dan geuyue kilat nyan jisama hoho nyang geupeurintah. 33 Su gogo sibagoe tanda bahwa angén badée reujang jiteuka, beulatang peulara pi jiteupeue bahwa angén badée reujang that jiteuka.

Ayub 37

1 Angén badée teupeujeuet até lôn yo meugeunta dan jantông lôn meugub-gub tajam. 2 Deungoe kheueh su Po teu Allah, hei gata banmandum; deungoe kheueh gôgô nyang teubiet lam babah Gobnyan. 3 Bansaboh langét, geupeuleuh laju kilat Gobnyan; geukirém geulanteue trok ubak ujông donya. 4 Óh lheueh nyan, teudeungoe su Gobnyan meudrub-drub, su meugah geulanteue dan gôgô; dan nibak teungoh su nyang meudumpek nyan, geulanteue meukilat jisama keudeh keunoe. 5 Sabab peurintah Po teu allah, laju mujizat teujadi, hai-hai nyang ajaéb nyang hana hase tapeuphom lé tanyoe. 6 Salju rhot ateueh bumoe ateueh peurintah Gobnyan; ujeuen keuncang jitron ateueh yue Gobnyan cit teuma. 7 Geupeupiôh buet manusia, mangat awaknyan jiteupeue bahwa Gobnyan teungoh keureuja. 8 Meunan cit beulatang kleut jitamong lam ruhuéng dan guha, dan jimusöm lam eumpueng jih. 9 Nibak seulatan jiteubiet angén badée dan rot utara hawa leupie nyang sijeuk lumpah na. 10 Nafáh Po teu Allah jeuet keu beuku muka ié nyang luwah, geu ubah jeuet keu éeh nyang kreueh. 11 Awan dimanyang geupeupeunoh ngon ié, dan awan meucahya geupeutrang ngon geulanteue. 12 Awan-awan jipo meulayang bansigom donya, ateueh peurintah Po teu Allah awan-awan nyan meugrak hoho mantong. 13 Po teu Allah geupeutron ujeuen keungon peubasah tanoh, atawa keu teuhuköm umat manusia; mungken teuma keu teupeuleumah bak awaknyan, padubna rayeuk geunaséh Gobnyan nyang teutab keu siumu masa. 14 Seungab kheueh sikeujab, hei Nabi Ayub, dan deungoe kheueh; kalon kheueh keuhai ajaéb-ajaéb Po teu Allah. 15 Peu kheueh neuteupeue pakriban Po teu Allah geubri aba-aba, sampoe kilat meuble-ble rot lam awan dan mega? 16 Peu kheueh neuteupeue pakriban awan-awan nyan meulayang-layang hase keuahlian Po teu Allah nyang hana ngon peusa? 17 Hana, droeneueh nyang neuteupeue keuhai aloh alah sabab lé seu-uem, meunyoe bumoe jipôt lé angén seulatan. 18 Peu kheueh hase gata lagée Po teu Allah nyang geubeunteueng cakrawala dan geupeukreueh lagée beuso tuangan atawa ceureumén? 19 Peurunoe kheueh kamoe peue nyang harôh kamoe peugah ubak Allah; hana nyang hase kamoe peutrang, pikeran kamoe hampa. 20 Hana lôntem lôn lakée meututoe ngon Po teu Allah, pat tateupeue bak Gobnyan na alasan keu geupeujeuet ulôn meubala. 21 Jinoe cahya langét keubiet that trang sampoe seulala mata; angén jipeugleh cuaca deungon jiyueb nyan. 22 Cahya lagée méuh teuka di utara, dan keumuliaan Po teu Allah keubiet kagom até geutanyoe. 23 Keubiet rayeuk that kuasa Po teu Allah geutanyoe; hana hase tanyoe tapeurab bak Gobnyan, Gobnyan jujoe dan ade sabe; hántom na Gobnyan geutindéeh manusia. 24 Nyang kheueh sabab jih Gobnyan patot teuhoreumat lé soe mantong, dan ureuëng nyang meungaku droe áreh, hana geupakoe lé Gobnyan."

Ayub 38

1 Óh lheueh nyan rot lam angén badée TUHAN meututoe ubak Nabi Ayub, lagée nyoe kheun Gobnyan: 2 "Soe gata nyan, sampoe gata jeuet ragu ubak hikeumat Ulôn deungon haba gata nyang bangai dan soh nyan? 3 Jinoe, lawan kheueh Ulôn sibagoe ureuëng agam, dan jaweueb kheueh peue-peue nyang Ulôn tanyong nyoe. 4 Peu kheueh gata ka lahé watée bumoe Ulôn peujeuet? Dan meunyoe gata biet-biet lhok peungeutahuan gata peugah laju! 5 Soe kheueh nyang peuteuntée luwah donya nyoe? Soe kheueh nyang ulue talo sineupat ubak gobnyan? Peu kheueh gata teupeue jaweueb jih? 6 Pakriban kheueh taméh-taméh ngon tumpang bumoe teudong cot? Soe nyang peuduek batée peunjuru donya deungon kukôh, 7 bak watée bintang-bintang beungoh meunyanyoe meusajan dan makhlok-makhlok syeuruga meusurak-surak geumbira. 8 Soe kheueh nyang tôb babah pintoe keu teuhampeueng laôt raya watée lam pruet bumoe jiteubiet meubok-bok ié jih? 9 Ulôn kheueh nyang peupayông laôt ngon awan dan nyang bungkôh nyan deungon seupôt buta. 10 Ulôn nyang peuteuntée bataih keue laôt raya dan deungon pintoe teupalang Ulôn hampeueng nyan. 11 Kheun Ulôn ubak jihnyan, 'Nyoe kheueh bataih jih, bék gata liengkeue! Disinoe kheueh umbak-umbak gata nyang teuga harôh jipiôh.' 12 Hei Nabi Ayub, peu kheueh ka lheueh gata bahpi meusigoe, gata yuejak teungoh malam? 13 Peu kheueh na gata yue mata uroe beungoh jimat bumoe dan gata kipaih ureuëng jeuhet nibak teumpat jih musöm? 14 Trang uroe teupeuleumah gunong dan pantôn lagée cab nibak tanoh kliet dan lipat nibak saboh jubah. 15 Trang uroe lumpah that peungeuh nibak ureuëng hana meutuhan, dan teupeuteun awaknyan bék jipeubuet nyang jeuhet lom. 16 Peu kheueh ka lheueh gata tron ubak asai ié laôt, jiôh lam tuwie jih? Peu kheueh ka lheueh gata jak-jak bak aleue laôt raya? 17 Peu kheueh ka lheueh lé gob jitunyok ubak gata pintoe geureubang dikeue álam mawöt nyang seupôt buta? 18 Peu kheueh hase gata duga padubna luwaih donya nyoe? Jaweueb kheueh meunyoe gata tateupeue. 19 Peu kheueh gata teupeue rot pat teuka trang, dan dipat nyang sibeuna jih punca seupôt? 20 Peu kheueh hase gata peuteuntée bataih seupôt ngon trang? Atawa teuyue awaknyan jiwoe óh ka lheueh jiteuka? 21 Teuntée gata hase, sabab gata ka tuha, dan watée donya teucebta, gata kana! 22 Peu kheueh ka lheueh gata saweue gudang-gudang Lôn teumpat salju dan ujeuen batée, 23 nyang Ulôn keubah keu watée teuka sosah, keu watée muprang dan uroe-uroe teungoh muprang? 24 Peu kheueh gata teupeue dipat teumpat mata uroe tinggai? Atawa rot pat asai angén timu na? 25 Soe kheueh nyang kueh luéng keu teumpat ié ujeuen raya dan nyang bri rot ueh keu gogo dan kilat? 26 Soe kheueh nyang peutron ujeuen lam padang beulantara, dan u ateueh tanoh nyang hana jikeumiet lé manusia? 27 Soe kheueh nyang sibu ngon ié ateueh bumoe nyang tho kreng dan meurana sampoe naleueng meutuneh mandum? 28 Peu kheueh ujeuen na ayah droe? Soe ayah nibak titek-titek iémbon? 29 Peu kheueh ié éeh na ma jih? Soe nyang peulahé iémbon beuku? 30 Soe nyang ubah ié jeuet keu batée, dan nyang peujeuet ié laôt keu kaku? 31 Peu kheueh hase ikat bintang Kartika gata beureukah? Atawa ranté bintang Belantik gata peuglah? 32 Peu kheueh hase gata bimbeng bintang-bintang tieb-tieb musém jih, dan bintang Peurahô rayeuk ngon ubit, gata peuteuntée rot jih? 33 Peu kheueh gata teupeue huköm-huköm di cakrawala? Dan peu kheueh hase gata teurab nyan lam donya? 34 Peu kheueh hase gata klik sira gata peurintah ubak awan, dan gata yue awan nyan jipeubulut gata ngon ié ujeuen? 35 Dan meunyoe gata yue geulanteue-geulanteue seumama keudeh keunoe, peu kheueh jihnyan teuka ubak gata sira jipeugah, "Ulôn, Amphon!"? 36 Bak soe jiteupeue lé cicém ibis pajan Krueng Nil meugeunang? Soe nyang britée manok agam bahwa ujeuen teuma jiteuka? 37 Soe kheueh nyang seb áreh keu ji-itong awan dan jibalek sampoe jitron ujeuen, 38 ujeuen nyang peukreueh abée sampoe jeuet meugeucai dan tanoh jeuet meuleukek-leukek teuma? 39 Peu kheueh hase gata peucrok beulatang laén keu uempeun singa-singa dan teupeutroe pruet aneuëk-aneuëk jih, 40 meunyoe awaknyan jimusöm lam guha atawa jibatom lam uempeueng jih? 41 Soe nyang tulông cicém gagak nyang deuk dan jijak keudeh keunoe jimita peunajoh soe kheueh teuma nyang tulông meunyoe aneuëk-aneuëk jih jirawôk Ulôn jilakée uempeuen.

Ayub 39

1 Peu kheueh gata teupeue pajan kaméng uteun jipeulahé lé ma jih? Peu kheueh na gata kalon rusa kleut jipeulahé aneuëk jih? 2 Peu kheueh gata teupeue padubna treb jihnyan raya pruet? Peu kheueh watée jitôh aneuëk hase gata itong? 3 Peu kheueh gata teupeue pajan beulatang nyan jipeukewieng tuboh jih, laju jipeulahé aneuëk-aneuëk jih? 4 Aneuëk-aneuëk jih meutamah rayeuk dan teuga lam padang beulantara; awaknyan jijak dan hana jiwoe le ubak nang-nang jih. 5 Soe nyang peuleuh keuleudée kluet lam gle? Soe nyang ploih taloe jih dan nyang peubiyeu jijak hoho nyang hawa? 6 Keu jihnyan Ulôn bri padang pasi sibagoe rumoh dan padang-padang sira keu teumpat tinggai jih. 7 Jihnyan jipeujiôh banda-banda dan teumpat-teumpat ramé, hana nyang hase peuseuiet jih dan nyang bri buet keu jih. 8 Padang naleueng di gunong teumpat jih meurot, jimita naleueng-naleueng ijo nyang na disinan. 9 Peu kheueh leumô kleut jitem meubuet keu gata? Peu kheueh jitem meudom lam weue gata? 10 Peu kheueh hase gata ikat jih dan jimeu-ue di blang gata? Peu kheueh hase gata yue jih jimeucreuen lam blang gata? 11 Peu kheueh hase gata peubangga teunaga jih nyang teuga, dan gata jok ubak jihnyan buet gata nyang brat? 12 Peu kheueh gata peucaya jihnyan jipeusapat hase keumeukoh gata, dan gata ba atranyan ubak teumpat peuneubahan gata? 13 Padubna bagaih jih jikipah sayeueb cicém unta! Teuma jipo cicém cangiriek hana hase jilawan. 14 Cicém unta jitoh boh ateueh tanoh, laju jitinggai; dan anoe kheueh nyang teuma karom boh jihnyan. 15 Jihnyan hana sada mungken ureuëng laén jigilo jih dan beulatang-beulatang kleut pih jigilo jihnyan. 16 Jihnyan meusikeub sang-sang aneuëk jih kon atra jih; jihnyan hana jipakoe meunyoe useuha jih sia-sia mantong. 17 Ulôn kheueh nyang jeuet jihnyan bangai dan bebal, hana Ulôn jok bak jih hikeumat dan akai. 18 Teuma meunyoe jihnyan jipeuphon plueng tajam, jihnyan hase jipeutaloe guda dan nyang pasang. 19 Hei Nabi Ayub, gata kheueh nyang jok teunaga ubak guda dan surai nyang meulambe-lambe bak kudok jih? 20 Peue gata nyang yue jih jilumpat lagée daruet, dan deungon nafáh jih teupeutakot-takot gob? 21 Jihnyan jikrok tanoh nibak pantôn deungon geumbira, dan deungon peunoh seumangat laju jingaza u mideuen prang raya. 22 Jihnyan hana muphom yo ngon teumakot; hana peudeueng nyang peujeuet jih jisurot. 23 Peudeueng nyang jimat lé nyang pasang, laju jimeusu meugrieng-grieng dan meuble-ble óh keunong cahya. 24 Deungon seumangat nyang ju guda nyan laju jiplueng; meunyoe beureuguih ka jimeusu hana ék le jipeuteun droe. 25 Guda nyan meu ou-ou watée jideungoe su beureuguih teuyueb rot jiôh teucom bak jih bhée meuprang nyang meuhubo. Jideungoe su dumpek dumna peuwira watée awaknyan geubri aba-aba. 26 Peu kheueh cicém kleung gata peurunoe jipo watée jihnyan jipo u seulatan deungon sayeueb meukeumang? 27 Peu kheueh peurintah gata nyang jiseutôt le cicém rajawali sigohlom jihnyan jipeuget uempueng jih bak gunong-gunong manyang? 28 Bak punca gunong batée laju jipeudong rumoh jih; ujong batée-batée nyang cincu jeuet keu kuta jih. 29 Rot disinan jihnyan laju jikawai u bansigom arah mata jih sesoe jiluem mangsa. 30 Dipat na nyang tiwaih, disinan kheueh jihnyan, dan darah mangsa jihnyan laju jijieb lé aneuëk-aneuëk jih.

Ayub 40

1 Hei Nabi Ayub, gata lawan Ulôn, Po teu Allah Nyang Mahakuasa; peu kheueh gatatem peutaloe droe atawa peu kheueh gatatem meubantah?" 3 Teuma geujaweueb lé Nabi Ayub ubak TUHAN, "Ulôn kumeututoe lagée ureuëng bangai ya TUHAN. Jeunaweueb peu kheueh nyang jeuet ulôn peugah? Hana sapeue na le nyang harôh lôn peugah. 5 Keubiet ka jai that nyang ka lheueh lôn peugah." 6 Laju rot lam angén badée TUHAN meufeureuman lom ubak Nabi Ayub. 7 Laju TUHAN meufeureuman ubak Nabi Ayub, "Hadab kheueh Ulôn sibagoe ureuëng agam, dan jaweueb kheueh banmandum nyang Ulôn tanyong nyoe. 8 Peu kheueh keuneuk gata iengkeue ubak keuadelan Lôn, dan gata peubeutôi droe gata deungon gata peusalah Ulôn? 9 Peu kheueh gata teuga lagée Ulôn? Peu kheueh hase su gata lagée su geulanteue saban ngon su Lôn? 10 Hias kheueh droe gata deungon keumeugahan dan keubeusaran, ngui kheueh keuagongan dan keujujoran. 11 Pandang kheueh awaknyan nyang cungkak até jih; peuju meudok-dok kheueh beungéh gata dan peumiyueb kheueh awaknyan. 12 Nyoe, pandang kheueh ureuëng nyang sombong dan peutundok kheueh jihnyan! Peureumok kheueh ureuëng jeuhet bak teumpat jih. 13 Kubu kheueh awaknyan banmandum lam abée; kurông kheueh awaknyan lam donya ureuëng maté. 14 Deungon nyan gata teuma Lôn pujoe sabab gata meunang deungon teunaga gata keudroe. 15 Ngieng kheueh Behemot, si beulatang gogasi; saban lagée gata, jihnyan pi cebtaan Ulôn. Naleueng-naleueng ka jeuet keu eumpeun jih, saban lagée leumô biasa. 16 Teuma kalon kheueh beuget-get teunaga lam tuboh jih dan teunaga nyang na nibak atot-atot jih. 17 Jipeudong ikue jih lagée bak aras, atot-atot pha jih kong-kong dan kreueh. 18 Tuleueng-tuleueng jih teuga lagée teumaga, gaki jih kong that saban lagée bak-bak baja. 19 Lamkawan banmandum makhlok Ulôn jihnyan kheueh nyang paleng hebat; teuma lé Nyang Cebta jihnyan mantong nyang hase peutaklok! 20 Nibak bukét-bukét teumpat beulatang kleut jimeu-euen-meuen ngon geumbira, timoh kheueh naleueng nyang jeuet keu eumpeun jih. 21 Jihnyan ji-éh dimiyueb tamah meuduro, lamkawan naleueng geulagah lam paya uyok jimusöm teuma. 22 Paya uyok meuduro jipeupayông jihnyan deungon bubayang-bubayang jih. Bak gandarusa nyang timoh bak binéh krueng habéh teutôb jihnyan. 23 Jihnyan hana yo bahpi Krueng Yordan tajam that ji ile, jihnyan teutab teunang bahpi ié jiheuntam muka jih. 24 Soe kheueh nyang jijeuet peubuta mata jih, laju jidrob jihnyan deungon teuikat babah jih?

Ayub 41

1 Peu kheueh hase gata droeb buya Lewiatan, teuma ngon saboh kawe eungkot? Peu kheueh hase lidah jih gata ikat ngon taloe-taloe peuikat? 2 Peu kheueh gata sôk idông jih ngon talo atawa ceunawiét beuso ubak reuheuéng jih? 3 Peu kheueh jihnyan jilakée ubak gata mangat teupeubeubaih? Atawa jimeurôk pakat ngon gata, jilakée beutagaséh keujih? 4 Peu kheueh mungken jipeuget janji situju ngon gata, dan jimeujanji sabe jipeutimang gata? 5 Peu kheueh mungken gata ikat jihnyan lagée cicém peulara, nyang teupeugalak namiet-namiet inong? 6 Peu kheueh mungken jihnyan teupeubloe lé neulayan-neulayan dan jibagi-bagi lamkawan ureuëng-ureuëng meukat? 7 Peu kheueh hase gata tôb kulét jih ngon kapak nyang mata jih lhée atawa gata geulawa jihnyan ngon mata leumbeng sampoe beusôt ulée jih? 8 Cukéeh kheueh jihnyan sigoe mantong, dan hanale gata ulang lagéenyan lom; meuheungko nyan hana gata tuwoe siumu masa. 9 Soe-soe mantong ureuëng nyang jikalon Lewiatan, ureuëng nyan jeuet keu leumoh dan laju rhot pansan. 10 Jihnyan juwah meunyoe teupeugoe nibak jih éh; hana meusidroe pih nyang jiheuet dong dikeue jih. 11 Soe nyang hase geutam jihnyan deungon hana meuteumé bala? Lam donya nyoe hana nyang hase jipeubuet hai nyan. 12 Jak kheueh gata deungoe Ulôn peugah keuhai anggota tuboh Lewiatan keuhai teunaga jih dan hi jih nyang gagah. 13 Hana meusidroe pih nyang hase jipriek bajée jih bagian luwa atawa jipeubeusôt bajée prang nyang jingui nyan. 14 Soe hase jipeuhah babah jih nyang kong that, meugigoe-gigoe nyang meunan gli dan teumakot that? 15 Lagée peurisée teususon, nyang kheueh rhueng jih meuleukek krab that, lagée batée kreueh jih. 16 Tindéeh meutindéeh, teuikat krab that, lé sababnyan angén pi hana hase jitamong keunan ngon seungab-seungab. 17 Peurisée nyan meunan kong that meusangkot ngon nyang laén, sampoe hana mungken teupeucrebre. 18 Watée Lewiatan nyan beureusen, meumeuk-meuk cahya jih; mata jih meukilat-kilat lagée jiteubiet cahya mata uroe beungoh. 19 Lidah apui jiteubiet meuhambô-hambô lam babah jih; meuk apui teupeupo-peupo keudeh keunoe. 20 Asab meukeubok jiteubiet lam idong jih, lagée asab kayée apui jiteubiet dimiyueb beulangöng. 21 Nafáh jih jipeuteubiet lagée ngeue apui; apui hu jiteubiet nibak babah jih. 22 Boh gôh jih meunan that teuga, lé sabab nyan banmandum teumakot dikeue jih. 23 Hana teumpat nyang leumoh nibak kulét jih; hana mungken beukah sabab kreueh jih lagée kreueh baja. 24 Até jih kong lagée batée, hana mungken bimbang kong dan kreueh lagée batée meugileng. 25 Meunyoe jihnyan jibeudôh, ureuëng nyang paleng teuga pih gadôh beurani; jipeujeuet hana meudaya sabab lumpah teumakot. 26 Hana peudeueng nyang hase jipeuluka tuboh jih; kapak, aneuk panah, atawa leumbeng hana hase jipeusakét jih. 27 Beuso jianggab halôh lagée naleueng dan teumaga jianggab lumpok lagée kayée meukulat. 28 Hana aneuk panah nyang hase jiparoh jihnyan; batée nyang teurhom ateueh jihnyan sang-sang lagée keunong jeumpung. 29 Gada jianggab siôn naleueng tho; beulatang nyan jikem meunyoe na ureuëng jigeulawa jih ngon leumbeng. 30 Sisek nibak pruet jih lagée péng-péng kaca nyang tajam ujông jih. Lagée alat peuneubah watée jikurek leuhôb dan jiprah dua. 31 Laôt jicawoe-cawoe sampoe rab lagée ié ju; lagée panci ngon taguen minyéuk nyang meukeuboh-keuboh. 32 Jihnyan jitinggai incik tapak gaki nyang meuble cahya, laôt jeuet jiubah lagée keuboh putéh hi jih. 33 Di ateueh bumoe hana ngon peusa ngon jih; makhlok nyang hana jituri teumakot, nyang kheueh jih nyan! 34 Beulatang nyang paleng meusyeuhu pih ji pandang hina; lamkawan beulatang juah, jih kheueh raja jih."

Ayub 42

1 Jaweueb Nabi Ayub ubak TUHAN, "Ulôn kuteupeue, ya TUHAN, bahwa Droeneueh Mahakuasa; Droeneueh hase neupeubuet peue mantong. 3 Droeneueh neutanyong pakon ulôn kujeuet ragu ubak hikeumat Droeneueh padahai ulôn keudroe hana lôn teupeue sapeue. Ulôn meututoe keuhai-hai nyang hana ulôn muphom, keuhai-hai nyang lumpah that ajaéb nibak ulôn nyoe. 4 Droeneueh neuyue ulôn deungoe watée Droeneueh peugah haba, dan ulôn jaweueb meunyoe Droeneueh teumanyong. 5 Yoh watée ilée, peungeutahuan ulôn keuhai Droeneueh ulôn deungoe nibak gob mantong, teuma jinoenyoe ulôn turi Droeneueh deungon meuhadab keue. 6 Lé sababnyan ulôn malée lôn ingat mandum tutoe haba lôn dan deungon meunyeusai ulôn duek lam abée." 7 Óh ka lheueh geumeututoe ubak Nabi Ayub, meufeureuman kheueh TUHAN ubak Elifas, "Ulôn beungéh ubak gata dan ubak bandua rakan gata, sabab gata hana tapeugah nyang sibeutôi jih keuhai droe Ulôn. Teuma namiet Lôn Nabi Ayub hana lagée nyan. 8 Jinoe, cok kheueh laju tujoh boh leumô agam dan tujoh boh bubiri agam, dan jak kheueh ubak Nabi Ayub. Óh lheueh nyan peuseumah kheueh laju nyan sibagoe keureubeuen nyang teutot keudroe gata. Nabi Ayub teuma meudoá keu gata dan doá jihnyan teuma Ulôn teurimong. Gata hana Ulôn peumalée, bahpi gata patot tateurimong huköman. Gata hana tapeugah nyang sibeutôi jih keuhai droe Ulôn, seudangkan Nabi Ayub jipeugah nyan." 9 Elifas, Bildad dan Zofar laju geupeubuet peue nyang geuyue lé TUHAN nyan, dan TUHAN geuteurimong doá Nabi Ayub. 10 Óh lheueh nyan, óh ka lheueh Nabi Ayub geumeudoá keu ban lhée droe rakan gobnyan, TUHAN geupeujeuet Nabi Ayub nyan kaya lom teuma dan geujôk keu gobnyan dua goe lipat nibak atra gobnyan yoh awai ilée. 11 Banmandum aduen dan syedara inong Nabi Ayub, meunan cit mandum rakan gobnyan nyang awai, teuka jijak saweue gobnyan dan laju jipeuna khanuri dirumoh gobnyan, awaknyan jipeugah turot meuduka cita ateueh mandum keusosahan nyang geupeutron lé TUHAN u ateueh gobnyan, dan jihibor gobnyan. Maséng-maséng lamkawan awaknyan laju jijôk sijeumeulah péng dan sineuk euncien méuh ubak Nabi Ayub. 12 Nabi Ayub geubri beureukat lé TUHAN deungon leubeh meulimpah nibak umu geuh nyang hana panyang le nyan, nibak watée gobnyan gohlom keunong musibah. Nabi Ayub na 14.000 boh kaméng ngon bubiri, 6.000 boh unta, 2.000 boh leumô, dan 1.000 boh keuleudée. 13 Gobnyan na geumeu aneuëk tujoh droe aneuëk agam dan lhée droe aneuëk inong. 14 Aneuëk inong nyang phon geuboh nan Yemima, nyang keudua Kezia, dan nyang tulot Kerenhapukh. 15 Bansaboh nanggroe nyan hana aneuëk dara nyang lagak lagée ban lhée droe aneuëk dara Nabi Ayub nyan. Awaknyan geujôk jeumba lam atra waresan ureuëng syiek jih, sadub ngon atra waresan syedara awaknyan nyang agam. 16 Óh ka lheueh nyan Nabi Ayub mantong udeb sireutoh peuet ploh thon treb jih, sampoe gobnyan hase geukalon cucoe-cucoe geuh dan aneuëk-aneuëk awaknyan. 17 Lheuehnyan laju meuninggai kheueh Nabi Ayub nibak umu ka tuha that.

Zabur 1

1 Mubahgia kheueh ureuëng nyang hana jiseutôt naseuhat ureuëng jeuhet, hana jicuntoh ureuëng meudesya dan hana jimeungon ngon ureuëng nyang jihina Allah, 2 teuma nyang galak jipeubuet peurintah TUHAN dan jizike atranyan uroe ngon malam. 3 Ureuëng nyang lagée nyan meuhase peue mantong nyang jipeubuet; ureuëng nyan lagée bak kayée nyang timoh nibak binéh krueng nyang jimuboh óh trok bak musém dan hántom na layée bubena ôn jih. 4 Tema, laén hai ngon ureuëng jeuhet: ureuëng nyan lagée sikéum nyang jipupot lé angén. 5 Ureuëng jeuhet geuhuköm lé Po teu Allah, hakém jihnyan dan geupeu aséng nibak umat gobnyan. 6 Sabab ureuëng nyang taát sabe geubimbéng dan geulindong lé TUHAN, teuma ureuëng nyang jeuhet jijak ubak keubinasaan.

Zabur 2

1 Pakon bansa-bansa didonya nyoe jipeubuet huru-hara dan sukée-sukée bansa jireuncana nyang hana meuguna? 2 Raja-raja donya beudôh sireuntak dan dumna ureuëng mat kuasa jimufakat jilawan TUHAN dan raja piléhan Gobnyan. 3 Peunguasa-peunguasa nyan jipeugah, "Jak tajak peupatah keukuasaan awaknyan dan ta reubot keumeurdehkaan geutanyoe!" 4 Nibak takhta TUHAN di syeuruga TUHAN geukém dan geu hina reuncana awaknyan. 5 Laju awaknyan geudhot deungon that beungéh, dan geupeukeujot teuma deungon meureuka Gobnyan. 6 Kheun Gobnyan, "Di Sion bukét Ulôn nyang suci ka Ulôn lantek raja nyang Ulôn piléh." 7 Kheun raja, "Ulôn keuneuk peumaklum peue nyang ka geupeuteutab lé TUHAN. Geupeugah lé Gobnyan ubak ulôn, 'Gata aneuëk agam Lôn, nibak uroenyoe Ulôn jeuet keu Bapak gata. 8 Lakée kheueh, teuma banmandum bansa Ulôn bri keu gata, dan bansaboh bumoe Ulôn peujeuet milék gata. 9 Awaknyan teuma gata wiet deungon tungkat beuso dan gata peubeukah lagée beulangong tanoh.' " 10 Lé sababnyan gata ngieng kheueh hai raja-raja, tapike kheueh nyan, hai peunguasa-peunguasa donya! 11 Meubakti kheueh ubak TUHAN deungon takeuwa, 12 sujut kheueh dikeue Gobnyan deungon yo nyang hana teukira, bék sampoe TUHAN jeuet keu beungéh dan gata geupeubinasa lam sikreb mata, sabab beungéh Gobnyan hu lagée apui deungon hana teusangka-sangka. Mubahgia kheueh ureuëng nyang jimeulindong ubak TUHAN!

Zabur 3

1 Zabur Nabi Daud, bak watée gobnyan geuplueng nibak Absalom, aneuëk gobnyan. 2 Ya TUHAN, keubit that le musoh ulôn, lumpah that le nyang prang ulôn! 3 Le that ureuëng nyang peugah bahwa Allah hana geutem tulông ulôn. 4 Teuma Droeneueh, ya TUHAN, na kheueh peurisai nyang lindong ulôn. Droeneueh bri keu lôn meunang, dan Droeneueh peurayeuk até ulôn. 5 Ulôn meulakée ubak TUHAN; nibak bukét Gobnyan nyang suci Gobnyan geujaweueb ulôn. 6 Ulôn teu-éh dan teungéut deungon teuntram, dan lôn beudôh lom, sabab TUHAN geutumpang ulôn. 7 Ulôn hana teumakot ubak meuribée droe lawan nyang jikeupong ulôn nibak meubagoe jurusan. 8 Neupeuseulamat kheueh ulôn, ya TUHAN Allah ulôn, neuhuköm kheueh dan neupeulapée kheueh banmandum lawan ulôn. 9 Nibak Droeneueh teuka sinulông, ya TUHAN, neutem kheueh bri beureukat u ateueh umat Droeneueh.

Zabur 4

1 Keu teupimpén kor. Deungon alat meu-én keucapi, Zabur Nabi Daud. 2 Ya Allah, Droeneueh kheueh nyang bila ulôn; neujaweueb kheueh meunyoe ulôn meuhôi. Bak watée ulôn susah, Droeneueh neutulông ulôn; jinoenyoe neugaséh kheueh ulôn dan deungoe kheueh doá ulôn. 3 Hai bubena manusia, padubna treb teuk gata tahina Allah ulôn? Trok án pajan gata tacinta nyang sia-sia dan tatiyeub nyang hana beuna? 4 Beutateupeue kheueh, TUHAN ka geupiléh keudroe Gobnyan sidroe ureuëng nyang geugaséh. TUHAN geudeungoe meunyoe ulôn meulakée ubak Gobnyan. 5 Yo meutôt-tôt sabab teumakot dan bék kheueh meudesya le. Gata pike-pike kheueh watée gata duek teumanung, dan watée ta-éh ateueh teumpat éh gata. 6 Gata peuseumah kheueh keureubeuen nyang beutôi dan tapeucaya kheueh ubak TUHAN. 7 Jai that-that ureuëng jiteumanyong, "Soe kheueh nyang bri beureukat keu geutanyoe?" Seumoga Droeneueh meukeunong nibak kamoe, ya TUHAN. 8 Droeneueh neupeujeuet até ulôn leubeh geumbira nibak ureuëng nyang meulimpah hase meugo jih. 9 Dan ulôn pi teu-éh dan teungéut deungon teuntram, sabab Droeneueh, ya TUHAN, neupeujeuet udeb ulôn nyoe aman!

Zabur 5

1 Keu teupimpén kor. Deungon alat peumeuén suleng. Zabur Nabi Daud. 2 Ya TUHAN, neudeungoe kheueh tutoe haba ulôn, neupeurati kheueh apoh apah ulôn. 3 Neudeungoe kheueh meulakée ulôn dan tulông kheueh ulôn, ya Raja ulôn dan Allah ulôn. 4 Sabab ubak Droeneueh kheueh ulôn meudoá, ya TUHAN, neudeungoe meulakée ulôn watée beungoh uroe. Ban beungoh ka ulôn ba peuseumahan ulôn dan ulôn preh TUHAN neujaweueb ulôn, ya TUHAN lôn. 5 Droeneueh kheueh ya Allah nyang hana galak ubak keujeuhetan; ureuëng jeuhet hana jeuet jimeurumpok ngon Droeneueh. 6 Droeneueh hana galak neungieng ureuëng nyang cungkak, Droeneueh banci keu ureuëng nyang peubuet jeuhet. 7 TUHAN peuhabéh dumna ureuëng nyang galak jipeugah haba nyang sulet, ureuëng nyang seumeungeut dan ureuëng nyang buet jih tukang poh maté ureuëng laén TUHAN pandang miyueb. 8 Teuma sabab lé gaséh TUHAN nyang rayeuk, ulôn hase lôn tamong u dalam Baét Droeneueh. Ulôn sujut u arah Baét Droeneueh nyang suci, dan ulôn seumah Droeneueh deungon khidmat. 9 Ya TUHAN, lumpah that le musoh ulôn! Neubimbéng kheueh ulôn mangat jeuet lôn peubuet keuheundak Droeneueh, dan neutunyok kheueh rot Droeneueh nyang harôh ulôn jak. 10 Sabab tutoe haba musoh ulôn hana jeuet teupeucaya; lam até awaknyan ka peunoh deungon reuncana jeuhet. Tutoe haba awaknyan maméh bantumpo lom lumpah maméh, teuma lam baten awaknyan ka peunoh deungon nyang brôk. 11 Huköm kheueh awaknyan, ya Allah, bah kheueh awaknyan binasa sabab reuncana droejih keudroe. Neu use kheueh awaknyan sabab desya jih nyang ka lumpah le, sabab awaknyan ka jibeurontak ubak Droeneueh. 12 Seumoga banmandum ureuëng nyang jimeulindong ubak Droeneueh meugeumbira dan meusuka ria siumu masa. Neulindong kheueh ya TUHAN ureuëng-ureuëng nyang jicinta Droeneueh, mangat awaknyan meusuka cita sabab Droeneueh. 13 Sabab TUHAN neubri beureukat keu ureuëng nyang seutia ubak Droeneueh, Droeneueh neulindong awaknyan deungon gaséh Droeneueh.

Zabur 6

1 Keu peumimpén kor. Deungon meuneuén keucapi. Meunurot lagu nyang keulapan. Zabur Nabi Daud. 2 TUHAN, bék kheueh neuheuntam ulôn lam beungéh Droeneueh. Bék neuhuköm ulôn lam apoh apah Droeneueh. 3 Neugaséh kheueh ulôn ya TUHAN, sabab ulôn ka habéh teunaga, peukong kheueh ulôn sabab ulôn apoh apah. 4 Até ulôn bingöng lumpah na; trok án pajan Droeneueh tinggai ulôn, ya TUHAN? 5 Neuriwang kheueh, TUHAN, dan peutuwoe kheueh ulôn, peuseulamat kheueh ulôn lé sabab geunaséh Droeneueh. 6 Sabab lam mawöt Droeneueh hana jiingat lé; hana nyang pujoe Droeneueh lam donya ureuëng maté. 7 Ulôn hék ngon leumoh sabab aloh alah; tieb-tieb malam ié mata lôn ji-ile sampoe basah teumpat éh lôn. 8 Mata ulôn rabon lé sabab seudeh, dan suram lé sabab musoh-musoh lôn. 9 Weéh kheueh, he ureuëng-ureuëng jeuhet, sabab TUHAN ka geudeungoe mo ba-e lôn. 10 TUHAN geudeungoe meulakée ulôn dan geuteurimong doá ulôn. 11 Mandum musoh teuma teukeujot dan malée dan laju jisurot ngon teuseungéh-seungéh.

Zabur 7

1 Nabi Daud geumoe ba-e, nyang geupeunyanyoe keu TUHAN sabab lé Kus, ureuëng Benyamin nyan. 2 Ya TUHAN Allah ulôn, ulôn meulindong ubak Droeneueh; neupeuseulamat dan neupeulheueh kheueh ulôn nibak banmandum ureuëng nyang jitiyeub ulôn. 3 Bék neupeubiyeu awaknyan lagée singa juah jiteugom ngon jitarek ulôn dan hana nyang tulông ulôn. 4 TUHAN, Allah ulôn, meunyoe na lôn peubuet ilat, lôn peubuet nyang jeuhet ateueh rakan, atawa lôn peurugoe lawan deungon hana alasan, meunyoe na ulôn peubuet nyang lagée nyan, 6 bah kheueh lôn jipeulet dan jidrob lé musoh, laju jipoh maté dan manyét ulôn jitinggai teutiek meunan mantong di ateueh tanoh. 7 Beudôh kheueh TUHAN teungoh neubeungéh, ya TUHAN, neulawan kheueh musoh ulôn nyang teungoh jilab nyan. Neubeudôh kheueh neujak tulông ulôn, sabab Droeneueh neulakée keuadelan. 8 Neupeusapat kheueh bansa-bansa nyang na sikeulileng Droeneueh, dan meukuasa kheueh ateueh awaknyan nibak takhta Droeneueh di syeuruga. 9 Droeneueh neuhakém umat manusia; neubri kheueh keu ulôn keuadelan, ya TUHAN, sabab ulôn nyoe hana salah. 10 Neupeupiôh kheueh buet nyang jeuhet nyang jipeubuet lé ureuëng doraka dan peuseulamat kheueh iman ureuëng nyang jroh, sabab Droeneueh Allah nyang ade, nyang hase neuseunom u dalam até dan pikeran manusia. 11 Nyang lindong ulôn na kheueh Allah nyang peuseulamat ureuëng nyang jujoe até. 12 Allah na kheueh hakém nyang paleng ade, nyang tieb-tieb saát geuhuköm ureuëng jeuhet. 13 Meunyoe pi-e awaknyan hana meu-ubah, geuhnyan ka siab deungon sinjata nyang hase jipeumaté. Laju Gobnyan geuasah peudeueng dan geureuntang laju deungon busur, laju geutimbak panah-panah nyang meu apui. 15 Ngieng kheueh, ureuëng jeuhet jireuncana keuneuk peubuet nyang jeuhet; jihnyan jiatoe reuncana nyang jeuhet dan buet teumipée. 16 Ureuëng nyang kueh uruek keu ureuëng laén, teuma akhé jih ureuëng nyan keudroe nyang rhot u dalam uruek nyan. 17 Lé sababnyan, ureuëng nyan geuhuköm deungon buet nyang jeuhet nyang jipeubuet keudroe jih, dan jiseksa lé buet jeuhet droe jih keudroe. 18 Ulôn meusyukoe ubak TUHAN sabab Gobnyan ade, ulôn meuca-e ngon meunyanyoe teupujo ubak TUHAN, Nyang Mahamanyang.

Zabur 8

1 Keu teupimpén kor. Meunurot lagu Gitit. Zabur Nabi Daud. 2 Ya TUHAN, Allah kamoe, kuasa Droeneueh meusyeuhu bansaboh bumoe! Keuagongan Droeneueh trok u langét 3 jipeuca-e lé aneuëk-aneuëk miet dan aneuëk manyak. Peumeurintahan Droeneueh teugoh hana ék so nyang yok-yok keu teupeuseungab musoh atawa lawan. 4 Watée lôn pandang langét nyan Droeneueh cebta, buleuen ngon bintang nyang Droeneueh pasang, 5 peu kheueh manusia nyan, sampoe Droeneueh peuingat, soe jihnyan, sampoe Droeneueh peulara? 6 Teuma, TUHAN beuôt jihnyan rab santeut deungon Allah, Droeneueh bri mahkota nibak jihnyan peunoh deungon keuagongan dan keuhoreumatan. 7 Droeneueh bri kuasa nibak jih nyan ateueh alam raya nyoe, banmandum nyang Droeneueh cebta neupeutundok keu jih nyan: 8 bubiri, leumô dan banmandum beulatang peulara nyang teupeulara, meunan cit deungon beulatang kleuet nyang lheueh di padang beulantara; 9 cicém-cicém dan uengkot-uengkot, banmandum makhluk nyang na udeb di dalam laôt. 10 Ya TUHAN, TUHAN kamoe, keuagongan Droeneueh meugah meusyeuhu bansaboh bumoe!

Zabur 9

1 Keu teupimpén kor. Meunurot lagu Mut-Laben. Zabur Nabi Daud. 2 Deungon sipeunoh até ulôn keuneuk peugah ucapan syukoe ubak Droeneueh, ya TUHAN, dan ulôn peusampoe karya Droeneueh nyang lumpah meugah nyoe. 3 Ulôn keuneuk meuseunang-seunang dan meusukaria kareuna Droeneueh, dan teupujo nan Droeneueh, TUHAN Nyang Mahamanyang. 4 Dikeue Droeneueh musoh ulôn laju jiriwang dan jipeuplueng droe; dan laju awaknyan reubah meugantoh dan maté laju diteumpat nyan. 5 Sabab Droeneueh neupeurintah sibagoe hakém nyang ade; TUHAN ka neubila peukara ulôn. 6 Droeneueh ka neuhuköm bansa-bansa dan neupeubinasa bubena ureuëng jeuhet; awaknyan laju teupeutuwoe keu siumu masa. 7 Musoh kamoe ka habéh jipoh ngon jipeubinasa, banda-banda awaknyan TUHAN peuhanco; hanale ureuëng nyang ji ingat keu banda nyan. 8 TUHAN geupeurintah keu siumu masa; Gobnyan geupeudong takhta Geuh keu geuhakém donya. 9 Gobnyan geupeurintah ubak bansa-bansa deungon peunoh keuadelan, dan geupeuhakém awaknyan deungon cara jujoe. 10 TUHAN nyan teumpat meupayong keu ureuëng nyang keunong tindéeh, dan teumpat meulindong óh trok watée keusosahan. 11 Ureuëng nyang jituri Droeneueh, jimeuharab ubak Droeneueh ya, TUHAN, ureuëng nyang jiseumah Droeneueh hana neupeubiyeu meunan mantong. 12 Pujoe kheueh TUHAN nyang mat peurintah di Sion! Neucalitra kheueh buet-buet Gobnyan ubak bansa-bansa! 13 Sabab Gobnyan geu ingat keu ureuëng nyang meudeurita dan hana geutuwo keuhai jiklik awaknyan; ureuëng nyang jipeubuet jeuhet laju geuhuköm. 14 Ngieng kheueh, musoh jipeuseungsara ulôn; neugaséh kheueh ulôn, ya TUHAN, neupeusie kheueh ulôn nibak beuncana mawöt, 15 mangat ulôn kupujo Droeneueh dikeue peunduduek Yerusalem. Ulôn teuma meusurak geumbira sabab Droeneueh neupeuseulamat ulôn. 16 Bansa-bansa nyang hana jituri Droeneueh ureuëng nyan rhot u dalam uruek nyang jikueh keudroe; awaknyan meucarueh nibak taron droejih keudroe. 17 TUHAN ka geupeugah droe Gobnyan sabab keuputosan Gobnyan ade. Ureuëng jeuhet sisat lé sabab buet nyang jipeubuet keudroe. 18 Mawöt na kheueh keuneuleuh nibak udeb ureuëng-ureuëng jeuhet, bansa-bansa nyang hana jipakoe ubak Po teu Allah. 19 Hana siumu masa ureuëng gasien geupeutuwo; kon teuma siumu masa ureuëng seungsara hana harapan. 20 Beudôh kheueh, TUHAN, neupeuhakém kheueh bansa-bansa, bék neupeubiyeu manusia jipeusombong droe jih keudroe. 21 Bah kheueh awaknyan jiteuka teumakot, ya TUHAN, dan jisadar bahwa droe jih nyan na kheueh manusia.

Zabur 10

1 Pakon Droeneueh jiôh, ya TUHAN dan neumusöm watée kamoe ka teuseupét? 2 Deungon sombong ureuëng jeuhet jitindéeh ureuëng gasien; bah kheueh awaknyan meucarueh lé taron jih keudroe. 3 Ureuëng jeuhet jipeugöt keuhai keuheundak jih nyang jeuhet, ureuëng seurakah jikutok dan jitolak TUHAN. 4 Ureuëng meudesya hana jipakoe ubak TUHAN, kareuna sombong jih laju jipike bahwa Allah nyan hana. 5 Ureuëng jeuhet meuhase peue-peue mantong nyang jiuseuha; jihnyan hana jituri ubak huköm TUHAN dan jipeureumeh banmandum lawan-lawan jih. 6 Jipeugah lam até jih, "Ulôn hana gagal, dan tron meutron lagée ureuëng nyang hana udeb lam jeuhet." 7 Jihnyan hana jipiôh jimeurapa, jiancam dan jiteumipée, tutoe haba jih peunoh deungon banci dan keujahatan. 8 Jihnyan jimusöm di gampông-gampông jikeuneuk jakpoh ureuëng nyang hana meusalah. Lagée singa jihnyan jimeuluem dilikot tamah jiluem jimata-mata ureuëng nyang hana meudaya. Jipagab ureuëng gasien diteumpat nyang seungue, laju jiruengköm dan jibahue sira jiba. 10 Laju jiteukui, ka siab keuneuk jiruengköm; laju jiseumpom ureuëng deungon cara keukeurasan. 11 Jipike, "Po teu Allah ka tuwoe dan hana geupakoe le; keu seulanjut jih Gobnyan hana geungieng ulôn!" 12 Beudôh kheueh, hai TUHAN, neuhuköm kheueh ureuëng jeuhet! Neu ingat kheueh ubak ureuëng nyang teutindéeh! 13 Pakon ureuëng jeuhet hana jipiôh jihina Allah dan jipike bahwa Allah hana teuma geuhuköm gobnyan? 14 Teuma Droeneueh nyata deuh neukalon; neungieng keuseungsaraan dan keusosahan, dan sabe lam keuadaan siab keu neutulông. Ureuëng nyang hana meudaya jiseurah droe jih ubak Droeneueh, Droeneueh sabe neutulông keu ureuëng gasien. 15 Neu wiet bupatah kheueh keukuasaan ureuëng jeuhet dan doraka; neuhuköm kheueh awaknyan sabab buet nyang jipeubuet sampoe jihnyan jeura. 16 TUHAN geumat peurintah siumu masa; bansa-bansa nyang hana jituri ubak Gobnyan teuma geusampôh di ateueh tanoh Geuh. 17 TUHAN, Droeneueh neudeungoe doá ureuëng hina dan neupeukong até ureuëng nyan. 18 Aneuëk yatem dan ureuëng nyang teutindéeh Droeneueh bila peukara jih, mangat hana ureuëng nyang jijeuet peutakot awaknyan.

Zabur 11

1 Keu teupimpén kor. Zabur Nabi Daud. 2 Sabab ureuëng jeuhet jireuntang busur laju jipasoe aneuk panah jih mangat jitimbak rot lam seupôt ateueh ureuëng nyang jujoe. 3 Meunyoe tata teureuteb masyarakat nyang hana teu atoe, ureuëng nyang jroh-jroh pih hana meudaya." 4 TUHAN na di Baét Gobnyan nyang suci, takhta Gobnyan na di dalam syeuruga. Gobnyan geungieng umat manusia dan geuteupeue mandum peue nyang jipeubuet lé awaknyan. 5 TUHAN geu ujoe ureuëng nyang gét dan ureuëng jeuhet, dan Gobnyan geubanci keu ureuëng nyang galak keu buet nyang jeuhet. 6 Ureuëng jeuhet geuhuköm deungon mala peutaka, deungon apui, beulerang dan angén nyang hase jipeuhangôh peue nyang na. 7 Sabab TUHAN nyan na kheueh jroh dan ade, Gobnyan geugaséh keu ureuëng nyang jipeubuet nyang gét; ureuëng jujoe teuma jikalon dan jituri TUHAN.

Zabur 12

1 Keu teupimpén kor. Meunurot lagée nyang keu lapan. Zabur Nabi Daud. 2 Tulông kheueh kamoe, ya TUHAN, sabab ka hanale ureuëng nyang jroh, ureuëng nyang seutia ubak Droneueh ka leunyab. 3 Awaknyan banmandum saléng jeuet keu ureuëng beuhak, saléng jiteumipée deungon tutoe haba nyang maméh. 4 Neupeupiôh kheueh tutoe haba nyang meurayu nyan, ya TUHAN, neudô kheueh babah ureuëng-ureuëng nyang raya haba, 5 nyang jipeugah, "Kamoe meukuasa deungon lidah kamoe! Peue mantong jeuet kamoe kheun, dan hana soe ureuëng nyang bisa jitham kamoe!" 6 Geupeugah lé TUHAN,"Ureuëng gasien geutindéeh dan ureuëng seungsara apoh apah. Maka bak saátnyoe cit teuma Ulôn teuka jakbri keuteuntraman nyang awaknyan rindu." 7 Janji TUHAN nyan khong ngon kukôn dan bisa teupeu tanggong jaweueb, lagée pirak nyang murni nyang bisa teu ujoe didalam apui. 8 Ureuëng jeuhet na lheueh meuwôt-wôt keudeuh keunoe han meuho saho, keujahatan jipujoe lé tieb-tieb ureuëng. Teutapi Droeneueh neulindong kamoe, ya TUHAN, neujaga kheueh kamoe nibak ureuëng-ureuëng jeuhet nyan.

Zabur 13

1 Keu teupimpém kor. Zabur Nabi Daud. 2 Sampoe án pajan Droeneueh tuwoe keu ulôn, ya TUHAN? Dan sampoe án pajan teuma Droneueh neusöm droe nibak ulôn? 3 Sampoe án pajan ulôn ku tanggong susah, dan até jih peudeh sipanyang uroe? Sampoe án pajan teuma ulôn nyoe jikuasa lé musoh? 4 Neungieng kheueh u ateueh ulôn, ya TUHAN Allah ulôn, neujaweueb kheueh doá ulôn. Neupeupuléh kheueh teunaga ulôn, dan bék kheueh neupeubiyeu ulôn nyoe maté. 5 Bék kheueh neupeubiyeu musoh ulôn jipeugah bahwa awaknyan ka jipeutaloe ulôn. Bék neupeubiyeu awaknyan jisurak ulôn. 6 Sabab ulôn nyang lôn peubangga na kheueh geunaséh Droeneueh, lé sabab nyan kheueh ulôn meusukaria sabab Droeneueh neupeuseulamat ulôn. Ulôn keuneuk meuca-e keu TUHAN, sabab Gobnyan ka geupeubuet nyang jroh keu ulôn!

Zabur 14

1 Keu teupimpén kor. Zabur Nabi Daud. 2 Lam syeuruga TUHAN geupandang umat manusia keu geumita ureuëng malém nyang seumah Gobnyan. 3 Teuma banmandum ureuëng ka meunyeuleweng dan beujat, hana meusidroe pih nyang jipeubuet nyang gét. 4 Feureuman TUHAN, "Peu kheueh hana sada di ureuëng-ureuëng jeuhet nyan? Awaknyan udeb ngon cara jireubot umat Ulôn dan hántom na jimeudoá keu Ulôn." 5 Ureuëng jeuhet teuma jiteuka yo ngon teumakot lagée that, sabab Allah geulindong ureuëng nyang taát ubak Gobnyan. 6 Ureuëng jeuhet jikeuneuk tam keu ureuëng gasien, teuma TUHAN jeuet keu peulindong awaknyan. 7 Seumoga di Sion teuka keuseulamatan keu Israel! Dan keuturonan Nabi Yakub meusuka cita meunyoe TUHAN ka geupeupuléh keuadaan umat Gobnyan.

Zabur 15

1 Zabur Nabi Daud. 2 Ureuëng nyang udeb nyang hana meucacat dan jipeubuet nyang jroh-jroh, dan deungon jujoe jipeugah nyang beuna; 3 nyang hana jitem fiteunah sabe keudroe-droe, hana jipeubuet jeuhet keurakan droe, dan hana jipeubrôk-brôk waréh lingka; 4 nyang jianggab hina ureuëng nyang geutulak lé Po teu Allah, teuma geuhoreumat ubak ureuëng nyang taqwa; nyang jipeuteupat janji, bahpi rugoe 5 dan jipeu utang péng deungon hana meubungöng; nyang han jitem teurimong péng sogok keu teupeurugoe ureuëng nyang hana salah.

Zabur 16

1 Zabur Nabi Daud. 2 Ulôn peugah, "Droeneueh kheueh TUHAN ulôn, keubahgiaan ulôn, hana nyang laén nyang leubeh nibak Droeneueh!" 3 Ulôn horeumat ureuëng-ureuëng suci di nanggroe nyoe; nyang ulôn harôk na kheueh tinggai meusajan awaknyan. 4 Bah kheueh ureuëng nyang jiseumah dewa-dewa meutamah-tamah seudeh jih. Ulôn hana lôntem meukeureubeuen keu dewa-dewa, bahpi nan dewa nyan hana lôntem kheun. 5 TUHAN, Droeneueh mantong nyang atra ulôn; Droeneueh neubri mandum nyang ulôn lakée, naseb ulôn na lam jaroe Droeneueh. 6 Lumpah that indah meuneubri Droeneueh keu ulôn, sampoe até ulôn harôk lumpah na! 7 Ulôn pujoe TUHAN nyang bri naseuhat keu ulôn; óh watée malam pi até ulôn jimeututoe ji peurunoe ulôn. 8 Ulôn sabe lam ingat ubak TUHAN; Gobnyan na sabe disampeng ulôn, lé sababnyan ulôn hana gundah. 9 Sababnyan, até ulôn harôk dan jiwa lôn meusurak, dan tuboh ulôn jimeureuhat deungon teuntram. 10 Sabab Droeneueh hana neupeubiyeu ulôn maté; ureuëng nyang neugaséh hana neupeubiyeu binasa. 11 Neutunyok keu ulôn rot nyang teujak ubak udeb; nibak Droeneueh ulôn meuteumé keugeumbiraan nyang meulimpah dan keubahgiaan keu siumu masa.

Zabur 17

1 Doá Nabi Daud. 2 Neu bila kheueh peukara ulôn sabab Droeneueh neuteupeue peue nyang beuna. 3 Meunyoe Droeneueh neu ujoe até ulôn dan neuteuka neujak seulidék ulôn óh watée malam, disinan Droeneueh meurumpok bahwa ulôn na kheueh nyang jujoe tulöih ikhlas; haba ulôn sisuai deungon pikeran ulôn. 4 Ulôn peubuet peue nyang Droeneueh peurintah ubak ulôn dan hana lôn jak rot kreueh nyang rugoe hana meulaba. 5 Ulôn sabe udeb meunurot nyang Droeneueh tunyok dan hana meusimpang nibak Droeneueh. 6 Ulôn meulakée ubak Droeneueh, ya Allah, sabab Droeneueh neujaweueb ulôn; ngieng kheueh ulôn dan neudeungoe kheueh tutoe haba ulôn. 7 Neutunyok kheueh geunaséh Droeneueh nyang luwa biasa nyan sabab Droeneueh peuseulamat ureuëng nyang meulindong nibak Droeneueh, bak binéh Droeneueh awaknyan aman nibak jiseurang lé musoh. 8 Neupeulara kheueh ulôn lagée aneuk mata Droeneueh, neusöm kheueh ulôn di miyueb sayeub Droeneueh 9 nibak jiseurang lé ureuëng jeuhet. Ulôn jikeupong lé musoh nyang jikeuneuk peumaté ulôn. 10 Nibak awaknyan hana jituri peue nyan gaséh sayang dan meunyoe jipeugah haba deungon sombong dan cungkak. 11 Awaknyan jimaju jilawan ulôn dan jijak paran ulôn, jimita keuseumpatan keuneuk jiseumpom ulôn. 12 Awaknyan lagée singa bueh nyang keuneuk ruengkôm mangsa jih, lagée singa muda nyang jilinteung nibak teumpat nyang teusöm. 13 Beudôh kheueh, ya TUHAN, neulawan kheueh musoh ulôn dan neupeutaloe kheueh awaknyan. Neupeuseulamat kheueh ulôn deungon peudeueng Droeneueh nibak jiseurang lé ureuëng jeuhet. 14 Neupeubeubaih kheueh ulôn nibak ureuëng nyang leuha nyang buet jitamon-tamon hareuta donya nyoe. Neuhuköm kheueh awaknyan deungon ázeub seungsara Droeneueh nyang ka Droeneueh keubah keu awaknyan. Meunan cit aneuëk cucoe awaknyan neuhuköm cit teuma. 15 Teuma ulôn-lôn pandang Droeneueh, sabab ulôn hana salah. Bak watée jaga nibak teungéut ulôn, teuka Droeneueh teupeujeuet até ulôn geumbira ria.

Zabur 18

1 Keu teupimpén kor. Zabur Nabi Daud, hamba TUHAN. Geupeuca-e ubak TUHAN watée Nabi Daud teupeuleuh nibak Saul dan nibak musoh-musoh gobnyan. 2 Ulôn cinta ubak Droneueh, ya TUHAN, Droeneueh kheueh teunaga ulôn. 3 TUHAN lagée kuta nyang kukoh teumpat ulôn meulindong. Allah ulôn lagée gunong batée teumpat ulôn meupayong. Lagée peurisai gobnyan geutôb ulôn, dan geujaga ulôn mangat aman hana gob peukaru pajan mantong. 4 Ulôn meulakée ubak TUHAN nyang patot teupujoe, Gobnyan geupeubeubaih ulôn nibak mandum musoh ulôn. 5 Ulôn ka jikeulileng lé bahya mawöt dan jipeunom lam ié raya keubinasaan. 6 Ulôn jikeulileng lé bahya mawöt, jeunieb mawöt kana dikeue ulôn. 7 Lam keuadaan ulôn nyang apoh apah ulôn meulakée ubak TUHAN, ulôn meudumpék ngon su meutaga ubak Allah lôn lakée tulông. Nibak Baét Geuh Gobnyan geudeungoe su ulôn dan geudeungoe peue nyang ulôn lakée. 8 Laju bumoe meuguncang meusu meu krab-krab, gaki-gaki gunong pih meuguncang ngon su nyang meukrab-krab teuma sabab Allah ka beungéh. 9 Jiteubiet asab lam ruhuéng idong Gobnyan, ngéue apui dan apui jiteubiet teuma lam babah Gobnyan. 10 Langét geuplah, laju geutron Gobnyan nibak teumpat nyan deungon awan nyang seupôt dimiyueb gaki Gobnyan. 11 Gobnyan geupoe di ateueh kerub; Gobnyan meulayang di ateueh sayeub angén. 12 Gobnyan geupeusöm droe lam seupôt that-that; awan ngon reudôk nyang teubai jijak keulileng Gobnyan. 13 Kilat dikeue Gobnyan, jiteubiet kheueh awan, ujeuen éeh dan apui. 14 Laju TUHAN lagée geulanteue di angkasa; Nyang Mahamanyang geupeudeungoe su droe Gobnyan. 15 Gobnyan laju geutimbak dumna aneuk-aneuk panah Geuh dan geupeu crebre musoh; geusama kilat meu ulang-ulang, lé sabab nyan sampoe awaknyan jipeuplueng droe. 16 Tanoh lam laôt jibeudôh meubura dan gaki bumoe pih teubuka watée TUHAN geudot musoh Gobnyan deungon meureuka. 17 Di ateueh TUHAN geu sunyueng jaroe Geuh; laju geumat ulôn dan geutarek lam tuwie ié nyang lhok. 18 Gobnyan geupeuseulamat ulôn nibak musoh nyang peukasa dan nibak ureuëng-ureuëng nyang jibanci ulôn, sabab awaknyan lumpah that teuga nibak ulôn. 19 Awaknyan jiseurang ulôn watée ulôn jitimpa lé beuncana, teuma TUHAN jeuet keu nyang tulông ulôn. 20 Gobnyan geupeubeubaih ulôn nibak bala bahya dan geupeuseulamat ulôn sabab Gobnyan geugaséh keu ulôn. 21 TUHAN geubalaih buet ulôn nyang beutôi; Gobnyan geubri beureukat keu ulôn sabab ulôn hana salah. 22 Ulôn taát ubak peurintah TUHAN dan hana lôn paleng nibak Allah ulôn. 23 Banmandum huköm Gobnyan ulôn deungoe, peurintah-peurintah Gobnyan hana ulôn peulaloe. 24 Gobnyan geuteupeue bahwa ulôn nyoe hana cacat ngon teucela dan geupeujiôh droe nibak keusalahan. 25 Teuma TUHAN geubalaih buet ulôn nyang beuna sabab Gobnyan geuteupeue ulôn nyoe hana meusalah. 26 TUHAN, Droeneueh seutia keu ureuëng nyang seutia dan jroh keu ureuëng nyang jroh. 27 Keu ureuëng nyang suci Droeneueh peugah Droeneueh suci, teuma ureuëng nyang jeuhet Droeneueh peujeuet keumusoh. 28 Ureuëng nyang miyueb até TUHAN peuseulamat, teuma ureuëng nyang sombong ngon cungkak Droeneueh peutundok. 29 Droeneueh puhu panyôt ulôn; TUHAN Allah ulôn nyang peu peungeuh ulôn nibak seupôt. 30 Droeneueh neupeuteuga ulôn mangat ulôn heuntam musoh; deungon tulông Allah ulôn peuhanco peutahanan awaknyan. 31 Buet Po teu Allah sampoereuna janji TUHAN jeuet teupeucaya. Gobnyan lagée peurisai keu mandum ureuëng nyang meulindong nibak Gobnyan. 32 Sabab TUHAN kheueh Po teu Allah; Allah mantong nyang jeuet keu nyang bila geutanyoe. 33 Gobnyan kheueh Allah nyang ka geupeuteuga ulôn dan nyang peusaneut rot ulôn aman. 34 Gobnyan nyang peuteuga gaki ulôn lagée gaki rusa, dan nyang jaga keuseulamatan ulôn di ateueh gunong-gunong. 35 Gobnyan nyang latih ulôn pakriban cara muprang, sampoe hase ulôn reuntang busur nyang paleng teuga. 36 TUHAN, Droeneueh kheueh nyang lindong dan peuseulamat ulôn, dan nyang tumpang ulôn deungon kuasa Droeneueh; ulôn hase meunang sabab tindakan Droeneueh. 37 Droeneueh jaga ulôn mangat ulôn bék keunong teun, dan ulôn hántom na reubah. 38 Laju ulôn tiyeub musoh lôn dan lôn peutaloe awaknyan, dan pantang lôn surot sampoe awaknyan banmandum binasa. 39 Ulôn seumpom awaknyan sampoe hana hasele jibeudôh, awaknyan reubah hana meudaya dimiyueb gaki ulôn. 40 Neubri ubak lôn teunaga mangat hase lôn muprang, dan beumeunang ateueh musoh-musoh lôn. 41 Sampoe musoh lôn neuyue plueng nibak ulôn; dan soemantong ureuëng nyang jibanci ubak ulôn TUHAN neupeubinasa. 42 Awaknyan jikliek ngon jiteumawök, teuma hana nyang hase tulông, awaknyan jimeulakée ubak TUHAN, teuma Gobnyan hana geutem jaweueb. 43 Awaknyan ulôn peureumok lagée abée nyang jipot lé angén, dan ulôn sampôh lagée leuhôb nibak binéh rot ueh raya. 44 Droeneueh neupeubeubaih ulôn nibak kawöm nyang doraka, dan neupeujeuet ulôn keupeunguasa ateueh bansa-bansa; bansa-bansa nyang hana lôn turi jeuet namiet lôn. 45 Ureuëng-ureuëng aséng tundok ubak ulôn dan jitaát watée jideungoe peue nyang lôn peurintah. 46 Beuhe awaknyan ka gadôh; awaknyan yo dan jiteubiet lam kuta jih. 47 TUHAN udeb! Teupujoe kheueh nyang bila lôn! Peu agong kheueh keubeusaran Allah nyang peuseulamat lôn! 48 Gobnyan geubri keulôn meunang ateueh musoh lôn; bansa-bansa geupeutaklok dikeue ulôn, 49 geupeuseulamat ulôn nibak lawan-lawan lôn. keujam. 50 Lé sababnyan ulôn peuagong Droeneueh lamkawan bansa-bansa, dan ulôn meunyanyoe lagu puja ngon pujoe keu Droeneueh. 51 Po teu Allah geupeumeunang nyang paleng rayeuk ateueh raja Gobnyan, Gobnyan teutab geugaséh keu ureuëng nyang ka geupiléh, na kheueh Nabi Daud deungon keuturonan gobnyan keu siumu masa.

Zabur 19

1 Keu teupimpén kor. Zabur Nabi Daud. 2 Langét dimanyang jipeugah keuagongan Allah, dan cakrawala jijak peusampoe karya Gobnyan. 3 Uroe nyang keu sa jijak peusampoe ubak uroe nyang seulanjut jih; malam nyang sa jijak peukisah ubak malam nyang singoh nyan teuma. 4 Hana nyang mariet atawa jimupoh cakra, hana su nyang na teudeungoe. 5 Teuma seruan Gobnyan meuguncang bansaboh donya, sampoe peusan nyan ubak tieb-tieb ujong bumoe. TUHAN geupeugöt rumoh di langét keu sang surya, 6 bak watée beungoh sang surya nyan jiteubiet lagée teungku linto agam nyang geuteubiet lam kama gobnyan, lagée pahlawan nyang geumbira geupeuphon jak geubot langkah gobnyan. 7 Gobnyan geulisi langét phon nibak ujong u ujong; hana nyang hana keunong nibak seu-uem gobnyan. 8 Huköm TUHAN nyan sampoereuna, teupeuseugar jiwa. Peurintah TUHAN jeuet teupeucaya, teubri hikeumat keu ureuëng nyang seudeurhana. 9 Peuratoran TUHAN nyan teupat, keubit that teupeugalak até. Peue nyang geupeuteutab lé TUHAN nyan murni, sampoe ureuëng laén hase jipuphom. 10 Meubakti ubak TUHAN nyan gét, hana piôh keu siumu masa. Huköm TUHAN nyan beutôi dan ade banmandum. 11 Huköm TUHAN leubeh meuyuém nibak méuh murni, dan leubeh maméh nibak meulisan nyang aseuli. 12 Hamba Droeneueh geupeu ingat lé banmandum nyan; upah nyang paleng raya teupeuna keu ureuëng nyang taát. 13 Hana nyang hase peusada keuhai sisat jihnyan; TUHAN, neupeubeubaih kheueh ulôn nibak buet salah nyang teusöm. 14 Neupeujiôh kheueh ulôn nibak desya nyang teusaja, bék neupeubiyeu ulôn jikuasa lé awaknyan. Teuma ulôn jeuet keu ureuëng hana meucupa, dan beubaih nibak peulanggaran nyang brat. 15 Seumoga tutoe haba dan pikeran ulôn meukeunong nibak Droeneueh, ya TUHAN, nyang lindong dan nyang teubôh ulôn!

Zabur 20

1 Keu teupimpén kor. Zabur Nabi Daud. 2 Seumoga TUHAN geujaweueb droeneueh bak watée meukarat, dan seumoga kuasa Allah Nabi Yakub geulindong gata! 3 Seumoga Gobnyan geukirém bantuan nibak Baét Gobnyan, dan geujak tulông gata nibak Bukét Sion. 4 Seumoga Gobnyan ingat keu banmandum nyang gata peuseumah, dan galak deungon banmandum keureubeuen nyang gata tot. 5 Seumoga Gobnyan geubri peue mantong nyang gata meuheuët, dan geupeu jeuet banmandum reuncana gata meuhase. 6 Dan kamoe meusurak geumbira sabab gata meunang, dan teuangkat bupanji keu teupujoe Po teu Allah geutanyoe. Seumoga TUHAN geupeukabui banmandum nyang gata lakée. 7 Jinoenyoe barô kheueh ulôn teupeue bahwa TUHAN geubri keumeunangan ateueh raja nyang geupiléh. TUHAN geujaweueb gobnyan di syeuruga nyang suci; lé kuasa TUHAN gobnyan meuteumé meunang nyang paleng raya. 8 Na ureuëng nyang jipeu deng-deng geuritan prang jih, dan na teuma nyang jipeu deng-deng guda jih. Teuma geutanyoe nyang tapeu deng-deng ngon ta andalkan na kheueh TUHAN, Allah geutanyoe. 9 Awaknyan teuma meugantoh dan reubah, teuma geutanyoe ta beudôh teudong nyang kukoh. 10 Ya TUHAN, neubri kheueh keumeunangan ateueh raja, jaweueb kheueh kamoe watée kamoe meuhôi Droeneueh.

Zabur 21

1 Keu teupimpén kor. Zabur Nabi Daud. 2 Ya TUHAN, raja harok that sabab Droeneueh ka neupeukong gobnyan; gobnyan meusuka cita sabab meunang nyang Droeneueh bri! 3 Droeneueh ka neupeupeunoh keuheundak até gobnyan, dan ka neubri peue nyang geulakée lé gobnyan. 4 Droeneueh teuka ubak gobnyan deungon beureukat nyang meulimpah, dan neupeungui mahkota méuh ateueh ulée gobnyan. 5 Gobnyan geulakée udeb, laju neubri keu gobnyan, dan panyang umu keu siumu masa. 6 Sabab sinulông Droeneueh gobnyan ka jeuet keu ureuëng nyang lumpah teuhoreumat, neupeu jeuet gobnyan meusyeuhu dan meugah that. 7 Neubri beureukat keu gobnyan lam tieb-tieb watée; keuhai teuka Droeneueh sampoe jeuet gobnyan peunoh deungon suka cita. 8 Raja geumeuharab ubak TUHAN Nyang Mahamanyang, gobnyan sabe lam aman sabab gobnyan na kheueh geunaséh TUHAN. 9 Gobnyan teuma geudrob banmandum musoh geuh, dan geuteun banmandum ureuëng nyang banci Gobnyan. 10 Gobnyan teuka lagée apui nyang hu meu ble-ble keu teupeuhanco awaknyan. 11 Nibak keuturonan awaknyan hana nyang tinggai bahpi meusaboh, raja teuma geupeutaloe awaknyan bube nyang na. 12 Meunyoe awaknyan jipeuget reuncana jijak lawan raja, tipée muslihat awaknyan hana meuhase. 13 Gobnyan geutimbak aneuk panah geuh, sampoe awaknyan jigisa dan jiplueng laju. 14 Kamoe pujoe Droeneueh ya TUHAN, sabab rayeuk lumpah na kuasa Droeneueh, kamoe meuca-e ngon meunyanyoe sira kamoe pujoe keupeukasaan Droeneueh.

Zabur 22

1 Keu teupimpén kor. Meunurot lagu: Rusa óh watée beungoh. Zabur Nabi Daud. 2 Allah ulôn, ya Allah lôn, pakon Droeneueh neutinggai ulôn? Ulôn meuhôi, teuma Droeneueh teutab jiôh dan hana neutulông ulôn. 3 Ya Allah ulôn, ulôn meuhôi óh watée uroe, teuma Droeneueh seungab mantong. Óh watée malam ulôn meudoá, até ulôn teutab meutampo-tampo. 4 Teuma Droeneueh na kheueh Raja Nyang Mahasuci, nyang jipujoe-pujoe lé Israel. 5 Indatu kamoe meuharab that ubak Droeneueh, awaknyan meuharab, dan Droeneueh neupeuseulamat awaknyan. 6 Awaknyan jimeulakée ubak Droeneueh dan peuseuliseh nibak meubagoe bala; awaknyan meuharab dan hana neupeukeucewa. 7 Teuma ulôn nyoe na kheueh glang, bukon manusia, jiteuoh-teuoh ngon jihina lé rakyatba. 8 Banmandum ureuëng nyang kalon ulôn jihina lôn, jipeuhirôt bibi dan jipeu asek ulée. 9 Kheun awaknyan, "Bah kheueh jihnyan jipeubangga TUHAN, mangat TUHAN geupeuseulamat jihnyan, meunyoe TUHAN galak keu jihnyan!" 10 Droeneueh kheueh nyang peuteubiet ulôn lam pruet ma, dan nyang peujeuet ulôn aman lam pangkée po ma. 11 Yoh phon lahé u donya nyoe, naséb ulôn na dalam jaroe Droeneueh, dan yoh mantong ulôn na lam pruet ma, Droeneueh kheueh Allah ulôn. 12 Bék kheueh jiôh, sabab bahya ka tô that-that, dan hana nyang tulông lôn. 13 Lagée kawan banteng, musoh jijak udom ulôn, lagée banteng klét di Basan awaknyan jikeupong ulôn. 14 Awaknyan jipeukeue ulôn deungon babah jih teuhah, lagée singa nyang teumauém dan jiteumeugöm. 15 Teunaga ulôn habéh lagée ié nyang rho, banmandum tuleueng ulôn leukang nibak sandi jih, até ulôn meuliléh saban lagée lilen. 16 Rukuéng ulôn tho kreng lagée pempeng kaca, lidah ulôn meuleukek nibak langét-langét babah lôn. TUHAN, neutinggai ulôn di ateueh abée lagée ureuëng nyang ka maté. 17 Ulôn jikeupong lé geurombolan ureuëng jeuhet; lagée kawan asée awaknyan jiudom ulôn, sira teutob jaroe ngon gaki. 18 Banmandum tuleueng ulôn hase lôn itong, musoh jingieng ateueh ulôn sibagoe tuntonan. 19 Awaknyan jibagi-bagi peukayan ulôn, dan ji rhom undi ateueh jubah lôn. 20 Teutapi Droeneueh, bék kheueh jiôh, ya TUHAN, neuteuka bubagah neutulông ulôn, sabab Droeneueh kheueh teunaga ulôn. 21 Neupeusie kheueh nyawöng ulôn nibak mata peudeueng, dan neupeuseulamat kheueh ulôn nibak jiteugom lé asée. 22 Ulôn hana meudaya, neupeulheueh kheueh ulôn nibak luengkée banteng dan nibak babah singa. 23 Buet Droeneueh nyan ulôn calitra ubak bubena syedara ulôn; nibak rapat umat Droeneueh ulôn puja-pujoe Droeneueh. 24 Pujoe kheueh Gobnyan, hai ureuëng-ureuëng taqwa! Peu agong kheueh Gobnyan, hai banmandum keuturonan Nabi Yakub! Sujut kheueh ubak Gobnyan, hai banmandum keuturonan Israel! 25 Sabab Gobnyan hana geupandang hina keu ureuëng nyang teuseupet, dan hana geuanggab remeh keuseungsaraan jihnyan. Gobnyan hana geupaleng nibak ureuëng nyan, teuma geudeungoe meunyoe jilakée tulông ubak Gobnyan. 26 Di teungoh ureuëng ramé nyang meusapat teutab ulôn pujoe Droeneueh, sabab banmandum nyang ka Droeneueh peubuet. Dikeue umat nyang taqwa ulôn peuseumah keureubeuen nyang ka ulôn peujanji. 27 Ureuëng gasien teuma jimakheun sampoe troe; ureuëng nyang teuka ubak TUHAN teuma jipujoe Geuhnyan. Seumoga gata seujahteura siumu masa! 28 Banmandum bansa teuma ji-ingat ubak TUHAN dan teuma jiriwang ubak Gobnyan, banmandum sukée bansa teuma jisujut jiseumah Gobnyan. 29 Sabab TUHAN kheueh nyang mat kuasa, Gobnyan nyang mat peurintah ateueh bansa-bansa. 30 Banmandum ureuëng rayeuk teuma jisujut dikeue Gobnyan, dan banmandum manusia fana teuma jisujut jiseumah Gobnyan. 31 Angkatan-angkatan nyang teuka dudoe meubakti ubak TUHAN, ureuëng nyan teuma jipeusampoe tron-meutron. 32 Ubak bansa nyang lahé dudoe teuma jipeusampoe bahwa TUHAN ka geupeuseulamat umat Gobnyan.

Zabur 23

1 Zabur Nabi Daud. 2 Gobnyan geupeu éh ulôn di ateueh blang naleueng nyang ijo. Dan geubimbéng ulôn ubak ié nyang teunang. 3 Geubri keulôn teunaga nyang barô, dan geupapah ulôn ubak rot nyang beuna, nyang sisuai deungon janji Gobnyan. 4 Bahpi ulôn rhot lam barieh nyang seupôt, teuma diulôn hana lôn takot keubahya, sabab Droeneueh nyang jeuet keungon ulôn. Droeneueh neulindong ulôn lagée ureuëng meurabe jijaga bubiri jih deungon tungkat dan gada. 5 Droeneueh nyang keubah khanuri keu ulôn dikeue mata lawan ulôn. Droeneueh neusambot ulôn lagée jamé nyang mulia. Droeneueh nyang peuhidang keu ulôn ié jieb nyang lazat meulimpah ruah. 6 Ulôn teupeue Droeneueh jroh keu ulôn, dan sabe neugaséh keu ulôn. Teuma ulôn jeuet tinggai di Baét Droeneueh, simantong ulôn udeb.

Zabur 24

1 Zabur Nabi Daud. 2 Gobnyan nyang peuduek dasai jih di ateueh laôt, dan nyang peudong di ateueh ié nyang lhók. 3 Soe kheueh nyang jeuet ék u ateueh Bukét TUHAN, dan tamong u dalam Baét Gobnyan? 4 Ureuëng nyang hana meucupa pikeran dan buet jih, nyang hana jimeusumpah peuleusu dan hana jiseumah beurala. 5 Ureuëng nyan kheueh nyang teuma geubri beureukat dan geupeuseulamat lé TUHAN, dan Allah keudroe nyang peugah hana meusalah. 6 Meunan kheueh ureuëng nyang teuka meuhadab Allah, nyang teuka jijak seumah Allah Nabi Yakub. 7 Neubuka kheueh rayeuk-rayeuk geureubang tuha, mangat geutamong Raja nyang mulia. 8 Soe kheueh Raja nyang mulia nyan? Gobnyan kheueh TUHAN nyang peukasa; TUHAN nyang peunoh kuasa, nyang meujaya dimideuen prang ngaza. 9 Peuhah kheueh beurayeuk geureubang tuha, mangat geutamong Raja nyang mulia. 10 Soe kheueh Raja nyang mulia nyan? TUHAN Nyang Mahakuasa, Gobnyan kheueh Raja nyang mulia!

Zabur 25

1 Zabur Nabi Daud. doá, 2 ya Allah lôn, ulôn peucaya ubak Droeneueh! Bék neupeubiyeu ulôn nyoe jipeumalée, dan jisurak lé musoh-musoh lôn. 3 Ureuëng nyang meukhianat ubak Droeneueh teuma geupeumalée, teuma nyang peucaya ubak Droeneueh hana teuma geupeukeucewa. 4 Neutunyok kheueh keuheundak Droeneueh keu ulôn, ya TUHAN, neupeugah kheueh peue nyang harôh ulôn peubuet. 5 Neupeurunoe kheueh dan neubimbéng kheueh ulôn mangat udeb lôn nyoe sisuai deungon keuheundak Droeneueh, sabab Droeneueh kheueh Allah nyang peuseulamat ulôn, nyang jeueb-jeueb watée ulôn meuharab ubak Droeneueh. 6 Ingat kheueh keubaiékan dan geunaséh Droeneueh, ya TUHAN, nyang TUHAN tunyok yoh lôn watée awaiphon. 7 Neupeu amphon kheueh desya dan keusalahan masa muda lôn, ingat kheueh ulôn nyang sisuai deungon gaséh dan keubaiékan Droeneueh. 8 Sabab TUHAN na kheueh gét dan ade, Gobnyan geutunyok rot keu ureuëng nyang sisat. 9 TUHAN geubimbéng ureuëng nyang miyueb até, dan geupeurunoe awaknyan keuheundak Gobnyan. 10 Ureuëng nyang taát ubak peujanjian dan huköm Gobnyan, geupeutimang deungon gaséh dan seutia. 11 TUHAN, neupeu amphon kheueh ulôn nyang sisuai deungon janji Droeneueh, sabab raya that keusalahan ulôn. 12 TUHAN geupeurunoe keu ureuëng nyang taqwa rot nyang harôh awaknyan jak. 13 Awaknyan teuma teutab udeb makmu, aneuëk cucoe awaknyan teuma jiteurimong tanoh pusaka. 14 TUHAN na kheueh sahabat ureuëng nyang taqwa Gobnyan geupeugah meukeusut Geuh keu awaknyan. 15 Mata ulôn teutab teuarah ubak TUHAN, sabab Gobnyan nyang peuseulamat ulôn nibak mara bahya. 16 Neupandang kheueh ulôn, dan gaséh kheueh keu ulôn, sabab Gobnyan geupeuseulamat ulôn nibak bahya. 17 Keusosahan até ulôn seumaken meutamah neupeubeubaih kheueh ulôn nibak teuseupet nyoe. 18 Neungieng kheueh seungsara dan keusosahan lôn, dan neupeu amphon kheueh banmandum desya-desya ulôn. 19 Neungieng kheueh padubnale musoh-musoh lôn; awaknyan that-that jibanci keu ulôn. 20 Neujaga dan neupeuseulamat kheueh ulôn, mangat ulôn hana meuteumé malée. Sabab ulôn meulindong ubak Droeneueh. 21 Seumoga keubaiékan dan keujujoran nyang kawai ulôn, sabab ulôn meuharab ubak Droeneueh. 22 Ya Allah, neupeubeubaih kheueh umat Droeneueh nibak banmandum keugundahan.

Zabur 26

1 Zabur Nabi Daud. 2 Neuseulidek kheueh ulôn, ya TUHAN, dan neu ujoe kheueh ulôn, neupeureksa kheueh nyang lôn meuheuet dan pikeran lôn. 3 Ulôn sabe ingat keu geunaséh Droeneueh, dan teutab seutia ubak Droeneueh. 4 Ulôn hana lôntem meusapat ngon ureuëng tukang teumipée, atawa lôn meungon deungon ureuëng munafék. 5 Ulôn banci keu kawan ureuëng nyang jipeubuet jeuhet, kawöm nyang jeuhet ulôn peusie. 6 Ulôn rhah jaroe lôn tanda hana meusalah, dan ulônjak keulileng miseubah Droeneueh, ya TUHAN, 7 sira lôn meuca-e ngon nyanyoe syuko, dan lôn peusampoe buet-buet Droeneueh nyang lumpah kagom. 8 Ulôn cinta ubak Baét Droeneueh, ya TUHAN, teumpat Droeneueh tinggai deungon peunoh keuagongan. 9 Bék neupoh ulôn meusajan ureuëng nyang meudesya, atawa neutarek nyawöng lôn meusigoe ngon ureuëng nyang galak jiroe darah gob. 10 Awaknyan hana jipiôh jipeubuet jeuhet, dan sabe siab jiteurimong sugok. 11 Teuma ulôn udeb deungon até nyang jujoe, neugaséh kheueh dan neupeubeubaih kheueh ulôn. 12 Teuma aman kheueh ulôn nibak mara bahya, ulôn teuma lôn pujoe TUHAN nibak teumpat umat Gobnyan meusapat.

Zabur 27

1 Zabur Nabi Daud. 2 Meunyoe lôn jiheuntam lé ureuëng jeuhet nyang keuneuk peumaté lôn, awaknyan kheueh nyang meugantoh dan reubah. 3 Bahpi ulôn jikeupong lé pasokan nyang raya, teuma ulôn hana teumakot. Bahpi beureutoh prang jilawan lôn, ulôn teutab meuharab. 4 Teuma sapeue nyang ulôn lakée ubak TUHAN, dan nyoe kheueh nyang ulôn harab: Tinggai teutab di Baét TUHAN simantong ulôn udeb, mangat lôn rasa pakriban gét TUHAN keu ulôn dan lôn lakée bimbéngan Gobnyan. 5 TUHAN geulindong ulôn watée ulôn ka meukarat; Gobnyan geusöm ulôn didalam Baét Geuh, dan geu beuôt ulôn u ateueh gunong batée. 6 Jinoenyoe ulôn ka meunang ateueh musoh nyang na bansilingka lôn; teuma deungon surak nyang meuhubo ulôn peuseumah keureubeuen syuko di Baét Droeneueh; ulôn keuneuk meuca-e dan lôn pujoe TUHAN. 7 Ya TUHAN, deungoe kheueh meunyoe ulôn meulakée ubak Droeneueh, neugaséh kheueh keu ulôn dan neujaweueb kheueh lôn! 8 Droeneueh meufeureuman, "Teuka kheueh jak seumah ulôn." Ulôn jaweueb, "Ulôn deungon reujang lôn teuka, ya TUHAN; 9 bék kheueh neumusöm nibak ulôn." 10 Bahpi ayah ngon ma geutinggai ulôn, teuma Allah teutab neupeulara ulôn. 11 Neutunyok kheueh bak ulôn keuheundak Droeneueh, ya TUHAN, neubimbéng kheueh ulôn bak jalan nyang beuna, sabab musoh ulôn le lumpah na. 12 Bék neujok ulôn ubak nafeusu lawan ulôn, nyang seurang ulôn deungon duseuta dan jiancam teuma. 13 Ulôn yakén teuma lôn rasa keubaíekan TUHAN lam udeb lôn lam donya nyoe. 14 Meuharab kheueh ubak TUHAN, peukong kheueh dan peuteutab kheueh até droeneueh; nyoe, meuharab kheueh ubak TUHAN.

Zabur 28

1 Zabur Nabi Daud. 2 Neudeungoe kheueh peue nyang ulôn lakée meunyoe ulôn ka lôn kliek lôn lakée tulông, dan lôn beuôt jaroe lôn meuhadab u Baét Droeneueh nyang suci. 3 Bék neupeubinasa ulôn meusajan deungon ureuëng doraka, meusajan ureuëng nyang jipeubuet jeuhet. Meunyoe jipeugah haba awaknyan deungon ramah lom sopan, teuma até awaknyan peunoh deungon nyang kuto dan nyang jeuhet. 4 Huköm kheueh awaknyan sabab buet droe jih nyang lagée nyan, sabab buet nyang jeuhet nyang jipeubuet lé awaknyan. Neuhuköm kheueh awaknyan nyang sisuai deungon buet nyang jipeubuet lé droe jih nyan; bri kheueh awaknyan huköman nyang sisuai. 5 Awaknyan hana jipeureumen peue nyang geupeubuet lé TUHAN, atawa peue nyang geupeubuet lé Gobnyan. Teuma Gobnyan geuhuköm awaknyan, dan geupeubinasa awaknyan keu siumu masa. 6 Teupujoe kheueh TUHAN, sabab Gobnyan ka geudeungoe peue nyang ulôn lakée. 7 TUHAN peulindong dan nyang bila ulôn, ulôn peucaya ubak Gobnyan. Gobnyan geutulông dan nyang peu mangat até ulôn, ulôn pujoe Gobnyan deungon ca-e dan nyanyoe syuko. 8 TUHAN geubri teunaga keu umat Gobnyan, Gobnyan geubila dan geupeuseulamat raja nyang geupiléh lé Gobnyan keudroe. 9 Peuseulamat kheueh umat Droeneueh, ya TUHAN, neubri beureukat kheueh keu ureuëng-ureuëng milék Droeneueh. Beujeuet kheueh lagée sidroe ureuëng meurabe keu awaknyan, dan neujaga kheueh awaknyan keu siumu masa.

Zabur 29

1 Zabur Nabi Daud. 2 Pujoe kheueh nan TUHAN nyang mulia neuseumah kheueh Gobnyan deungon teungui peukayan iébadat. 3 Allah nyang agong meusu lagée geulanteue di ateueh laôt, su Gobnyan meugeunta di ateueh laôt raya. 4 Su TUHAN teudeungoe, peunoh kuasa dan keumeugahan. 5 Su TUHAN sampoe reubah bubena bak kayée, dan patah bak kayée ceumara Libanon. 6 Gunong Libanon geupeujeuet sampoe meulumpat lagée aneuëk leumô, dan Gunong Siryon jimeugluéng lagée aneuëk banteng. 7 Su TUHAN sampoe jiteubiet kilat muble ji seumama. 8 Su TUHAN sampoe meuhayak padang pasie, dan TUHAN geuguncang padang pasie Kades. 9 Su TUHAN sampoe meuyok-yok bak-bak kayée beurangan, dan luröh bubena ôn-ôn kayée di gle; dan di Baét TUHAN umat Gobnyan jimeuhôi, "Pujoe kheueh TUHAN!" 10 TUHAN meukuasa ateueh ié raya, Gobnyan meukuasa sibagoe Raja keu siumu masa. 11 Seumoga TUHAN geubri teunaga keu umat Gobnyan, dan geupeujeuet awaknyan seujahteura.

Zabur 30

1 Zabur Nabi Daud. Ca-e keu teureuseumi Baét Allah. 2 Ulôn pujoe Droeneueh, ya TUHAN, sabab Droneueh ka neupeuseulamat ulôn dan hana neupeubiyeu musoh ulôn jisurak lôn. 3 TUHAN Allah ulôn, ulôn meuhôi Droeneueh lôn lakée tulông, dan Droeneueh neupeupuléh ulôn. 4 Droeneueh nyang peuseuliseh ulôn nibak álam mawöt, dan peu udeb ulôn nibak lamkawan ureuëng-ureuëng maté. 5 Meuca-e kheueh lagu puja ngon pujoe keu TUHAN, hai umat Gobnyan nyang seutia, dan meusyuko kheueh ubak Nyang Mahasuci. 6 Sabab TUHAN geubeungéh na kheueh sikeujab, meunyoe nyang jroh-jroh sabe na siumu masa. Bak watée malam sabe ulôn mo, teuma beungoh uroe ulôn meugeumbira. 7 Watée meurasa aman ulôn peugah, "Ulôn hana soe peutaloe!" 8 Sabab Droeneueh gét that até keu ulôn, ya TUHAN, Droeneueh peujeuet ulôn lagée gunong nyang kukoh. Teuma óh lheueh nyan Droeneueh neumusöm nibak ulôn, dan ulôn jiteuka teumakot. 9 Ubak Droeneueh, ya TUHAN, ulôn meulakée, ubak TUHAN ulôn meuharab, 10 "Keupeue guna jih nibak Droeneueh meunyoe ulôn maté dan jipeutron u dalam kubu? Peu kheueh mungken ureuëng maté jipujoe Droeneueh dan jijak peusampoe keuhai seutia Droeneueh? 11 Deungoe kheueh, ya TUHAN, dan neugaséh kheueh keu ulôn. TUHAN tulông kheueh ulôn!" 12 Mo ulôn nyang meuba-e ka neu-ubah jeuet keu meunari nyang geumbira, neucok keuseudehan ulôn dan neupeupeunoh lôn deungon suka cita. 13 Dan ulôn hana kutem iem droe; ulôn meuca-e lagu seumujoe keu Droeneueh, ya TUHAN Allah lôn, dan meusyuko ubak Droeneueh keu siumu masa!

Zabur 31

1 Keu teupimpén kor. Zabur Nabi Daud. 2 Ubak Droeneueh ulôn meulindong, ya TUHAN, bék neupeubiyeu ulôn nyoe jipeukeucewa. Peuseulamat kheueh ulôn deumi keuadelan Droeneueh 3 deungoe kheueh ulôn dan peubeubaih kheueh ulôn deungon sigra. Neupeujeuet kheueh keu ulôn lagée gunong batée teumpat ulôn meulindong, lagée kuta nyang khong, diteumpat nyan ulôn seulamat. 4 Nyoe, Droeneueh lagée gunong batée dan kuta nyang khong keu ulôn! Neubimbéng kheueh ulôn nyang sisuai deungon janji Droeneueh. 5 Neupeulheueh kheueh ulôn nibak taron nyang jipasang keu ulôn, sabab Droeneueh kheueh teumpat ulôn meulindong. 6 U dalam jaroe Droeneueh ulôn seurah droe; Droeneueh peubeubaih ulôn, ya TUHAN, Allah nyang seutia. 7 Ureuëng nyang seumah beurala Droeneueh banci; teuma ulôn teutab peucaya ubak TUHAN. 8 Ulôn geumbira dan meusukaria sabab Droeneueh teutab neugaséh keu ulôn. Droeneueh neungieng deurita ulôn dan neupakoe that keu apoh apah lôn. 9 Droeneueh hana neupeubiyeu ulôn jiteun lé musoh, teuma neupeubiyeu ulôn, lôn jak deungon beubaih. 10 Neugaséh kheueh ulôn, ya TUHAN, sabab ulôn lam keusosahan; mata ulôn peudeh sabab laloe lôn mo, jiwa raga lôn meurana. 11 Udeb lôn habéh lam peundeuritaan, dan thon-thon lôn rasa lam apoh apah. Teunaga lôn meukureueng sabab buet lôn nyang jeuhet, dan tuleueng-tuleueng lôn sampoe rapoh. 12 Ulôn habéh jipeukém lé banmandum musoh lôn, meunan cit lé dumna kawöm silingka. Banmandum rakan lôn teukeujot watée jingieng keuadaan lôn, dan awaknyan jiplueng meunyoe meurumpok deungon lôn nibak rot ueh raya. 13 Ulôn jipeutuwoe lagée jituwoe keu ureuëng maté, dan jipeujeuet lagée barang nyang jitiek hana meuguna. 14 Dipat mantong na keusosahan; ulôn deungoe jimeusáh-sáh lé musoh lôn. Awaknyan ka sipakat jilawan ulôn, dan jipeugöt reuncana keu jijak poh ulôn. 15 Teuma ulôn meuharab ubak Droeneueh, ya TUHAN, sabab Droeneueh kheueh Allah ulôn. 16 Droeneueh sabe neupeulara ulôn; neupeuseulamat kheueh ulôn nibak musoh-musoh lôn, dan nibak ureuëng-ureuëng nyang jilet-let lôn. 17 Seumoga Droeneueh jeuet nibak hamba Neuh; neupeuseulamat kheueh ulôn sabab gaséh Droeneueh. 18 Bék neupeubiyeu ulôn meuteumé malée, ya TUHAN, sabab ulôn meulakée ubak Droeneueh. Bah kheueh ureuëng jeuhet neupeumalée, dan deungon seungab-seungab jitron u dalam donya ureuëng maté. 19 Neusumpai kheueh babah bubena ureuëng nyang sulet nyang deungon sombong jipeuhina ureuëng jujoe. 20 Padubna le meulimpah-limpah keubaiékan Droeneueh nyang Droeneueh keubah keu ureuëng taqwa! Soe mantong ureuëng jingieng keubaiékan nyang Droeneueh peubuet, keu ureuëng nyang meulindong ubak Droeneueh. 21 Droeneueh söm awaknyan lam lindongan Droeneueh lé siasat ureuëng jeuhet; neujaga awaknyan lam lindongan Droeneueh ateueh peue nyang jitudoh lé lawan. 22 Teupujoe kheueh TUHAN! Nyang lumpah that hebat geunaséh Gobnyan keu ulôn, watée ulôn jikeupong dan jiseurang. 23 Teungoh lôn bingong lôn sangka TUHAN geuböih ulôn nibak hadirat Gobnyan. Teuma Gobnyan ka geudeungoe peue nyang ulôn lakée watée ulôn meulakée ubak Gobnyan. 24 Cinta kheueh TUHAN, hai banmandum umat Gobnyan, TUHAN geulindong ureuëng nyang seutia. Teuma ureuëng nyang cungkak ngon sombong geuhuköm lé Gobnyan deungon ázeub nyang hana teukira. 25 Peuteuga dan peukong kheueh até gata, gata banmandum nyang meuharab ubak TUHAN!

Zabur 32

1 Zabur Nabi Daud. Ca-e peulajaran. 2 Mubahgia kheueh ureuëng nyang buet jih jeuhet hana geu itong lé TUHAN, dan nyang hana galak teumipée. 3 Simantong ulôn hana lôn aku desya lôn, ulôn meurana sabab apoh apah tieb-tieb watée. 4 Uroe malam Droeneueh neuteugon ulôn, ya TUHAN, teunaga lôn habéh lagée meuadée lam uroe kha. 5 Laju lôn aku desya ulôn ubak Droeneueh, keusalahan lôn hana nyang ulôn söm. Ulôn peuputôh ulôn aku hainyan nibak Droeneueh, dan Droeneueh neupeu amphon banmandum desya ulôn. 6 Sababnyan tieb-tieb ureuëng nyang salah nyang sigetjih bék putôh-putôh jimeudoá óh watée jihnyan jirasa ka meukarat, dan meunyoe teuka ié beuna laju teuka keusosahan, ureuëng nyan hana keunong ié raya. 7 Droeneueh kheueh teumpat ulôn musöm, neupeubeubaih ulôn nibak apoh apah. Teuma lôn meusurak kareuna geumbira, sabab Droeneueh ka neupeuseulamat ulôn. 8 TUHAN meufeureuman, "Ulôn teuma Lôn tunyok rot nyang harôh gata jak, gata Lôn bimbeng dan Lôn bri naseuhat. 9 Bék lagée guda nyang hana meuakai, nyang harôh teukeundali deungon keukang dan talo mangat jitem jak." 10 Ureuëng meudesya meutumpôk-tumpôk jitimpok deungon seungsara; teuma ureuëng nyang meuharab ubak TUHAN teutab geupeulindong lé geunaséh Gobnyan. 11 Hai ureuëng-ureuëng saléeh, meugeumbira kheueh dan meusuka cita kheueh sabab peue nyang ka geupeubuet lé TUHAN. Meusurak geumbira, hai banmandum ureuëng nyang jujoe até!

Zabur 33

1 Hai ureuëng-ureuëng saléeh, meusurak geumbira kheueh sabab peue nyang ka geupeubuet lé TUHAN; patot that lé ureuëng jujoe jipujoe-pujoe. 2 Meusyukoe kheueh ubak TUHAN deungon keucapi, meuca-e kheueh keu Gobnyan deungon ji-iréng lé irama musik. 3 Neu ca-e kheueh lagu nyang barô keu TUHAN, peumeu én kheueh keucapi deungon beujroh-jroh dan meusurak kheueh deungon geumbira! 4 Banmandum peue nyang geukheun lé TUHAN jeuet teupeucaya; Gobnyan seutia ubak peue mantong nyang geupeubuet. 5 Gobnyan geucinta ubak keujujoran dan keuadelan; bansaboh bumoe peunoh deungon gaséh Gobnyan. 6 TUHAN geubri peurintah, teuma langét pi teucebta; mata uroe, buleuen dan bintang geupeujeuet deungon sabda Gobnyan. 7 Banmandum ié laôt geugumpôi bak saboh teumpat, samudra nyang raya laju geuteun bak saboh beudongan. 8 Bah kheueh bansaboh bumoe jitakot keu TUHAN dan peunduduek donya jihoreumat Gobnyan. 9 Sabab Gobnyan meusabda, laju banmandum geupeujeuet; Gobnyan geubri peurintah, teuma banmandum nyan hase na. 10 TUHAN geupeu bateue peue nyang jireuncana lé bansa-bansa, niet awaknyan laju geusampôh rata. 11 Teuma reuncana TUHAN teutab meuteun, reuncana Gobnyan teutab na sipanyang jamén. 12 Mubahgia kheueh bansa nyang jiaku TUHAN sibagoe Allah jih, mubahgia kheueh umat nyang geupiléh lé Gobnyan jeuet keuhak milék Gobnyan! 13 Didalam syeuruga TUHAN geukalon u miyueb, dan Gobnyan geukalon banmandum umat manusia. 14 Nibak takhta Gobnyan TUHAN geupeurati banmandum makhluk nyang tinggai di ateueh bumoe. 15 Gobnyan kheueh nyang peusaneut até awaknyan, dan geuteupeue peue mantong nyang jipeubuet lé awaknyan. 16 Raja hana hase meunang deungon le tantra, sipa-i hana seulamat sabab le teunaga jih. 17 Guda hana hase teucok keubangga mangat jeuet keumeunang, teunaga jih nyang rayeuk hana hase teupeuseulamat droe jih. 18 TUHAN geujaga ureuëng-ureuëng nyang taqwa nyang meuharabkan geunaséh Gobnyan. 19 Gobnyan geupeuseulamat awaknyan nibak mawöt, dan geupeu udeb awaknyan bak watée musém deuk. 20 Teuma geutanyoe meuharab ubak TUHAN, Gobnyan kheueh nyang tulông dan nyang bila geutanyoe. 21 Geutanyoe meusukaria sabab Gobnyan dan peucaya ubak nan Gobnyan nyang suci. 22 Seumoga kamoe teutab Droeneueh gaséh, ya TUHAN, sabab kamoe meuharab ubak Droeneueh mantong.

Zabur 34

1 Zabur Nabi Daud, bak watée gobnyan pura-pura hana waraih pikeran dikeue Abimelekh, sampoe gobnyan jiuse dan laju geujak. 2 Ulôn keuneuk meusyukoe ubak TUHAN tieb-tieb watée, dan hana piôh-piôh lôn pujoe Gobnyan. 3 Ulôn keuneuk meubangga droe sabab buet TUHAN; seumoga ureuëng nyang teutindéeh ngon teuseupet jideungoe dan meugeumbira. 4 Agong kheueh TUHAN meusajan deungon ulôn, jak meusajan-sajan ta peumulia nan Gobnyan. 5 Ulôn meudoá ubak TUHAN, dan Gobnyan geujaweueb, dan geupeuleuh ulôn nibak banmandum teumakot. 6 Ureuëng teuseupet ngon teutindéeh meuharab ubak Gobnyan dan meugeumbira, awaknyan hana alasan keujeuet keumalée. 7 Ureuëng manglang jimeuhôi dan TUHAN geujaweueb, geupeubeubaih awaknyan nibak banmandum nyang teuseupet. 8 Malaikat TUHAN geukawai ureuëng nyang taqwa, dan geupeubeubaih awaknyan nibak banmandum bahya. 9 Rasa kheueh keudroe pakriban get jih TUHAN, mubahgia kheueh ureuëng nyang meulindong ubak Gobnyan. 10 Horeumat kheueh TUHAN, hai kawöm umat Gobnyan, sabab ureuëng taqwa hana kureueng meusapeue pi. 11 Singa-singa pih deuk sabab kureueng peunajoh; teuma ureuëng nyang seumah TUHAN hana kureueng sapeue pih. 12 Deungoe kheueh, hai aneuëk-aneuëk banmandum, ulôn peurunoe gata pakriban cara teuhoreumat TUHAN. 13 Peu kheueh na meuheuët mangat panyang umu dan tanékmat nyang gét-gét? 14 Bék tapeuteubiet tutoe haba nyang jeuhet, dan bék tagalak keu tipée muslihat. 15 Peujiôh kheueh nyang jeuhet, dan peubuet kheueh nyang jroh, useuha kheueh peudaméan deungon habéh sineuga. 16 TUHAN teutab jingieng ateueh ureuëng saléeh, Gobnyan geudeungoe meunyoe awaknyan jikliek jilakée tulông. 17 Teuma ureuëng nyang jipeubuet jeuhet geulawan lé Gobnyan, meunyoe awaknyan maté, bagaih that awaknyan geupeutuwoe. 18 Meunyoe ureuëng saléeh nyang meuhôi, TUHAN geudeungoe, dan geupeuseulamat awaknyan nibak banmandum nyang salah. 19 TUHAN tô that ubak ureuëng nyang peu-ubit até; Gobnyan geupeuseulamat ureuëng nyang ka patah seumangat. 20 Lé that peundeuritaan ureuëng nyang jroh-jroh, teuma TUHAN geupeubeubaih awaknyan nibak banmandum nyan. 21 Tuboh jih teutab geujaga lé TUHAN, nibak tuleueng jihnyan hana meusikrak pih nyang na geupeupatah. 22 Ureuëng jeuhet teuma maté sabab buet jih nyang jeuhet, ureuëng nyang jibanci keu ureuëng saléeh teuma geuhuköm. 23 TUHAN geupeuseulamat hamba-hamba Gobnyan; nyang meulindong nibak Gobnyan hana teuma geuhuköm.

Zabur 35

1 Zabur Nabi Daud. 2 Neucok kheueh utar-utar dan peurisai Droeneueh, dan neubeudôh kheueh jak tulông ulôn. 3 Beuôt kheueh leumbeng dan kapak Droeneueh keu neulawan ureuëng nyang tiyeub ulôn. Neupeugah kheueh ubak ulôn bahwa Droeneueh nyang peuseulamat lôn. 4 Bah kheueh ureuëng nyang keuneuk poh maté lôn neupeutaloe dan neupeumalée. Bah kheueh ureuëng nyang meusapat dan mupakat jijak lawan lôn surot kheueh lam keuadaan bingong. 5 Bah kheueh awaknyan geupeulet lé malaikat TUHAN, lagée sikéum angén tampo. 6 Bah kheueh awaknyan jipeulet lé malaikat TUHAN nibak jalan nyang seupôt dan glue. 7 Teusia payah mantong awaknyan jiteun taron keu ulôn, atawa jikueh uruek keuneuk jijak droeb ulôn. 8 Bah kheueh awaknyan keunong binasa deungon hana jisangka-sangka. Bah kheueh awaknyan meucarueh lam taron jih keudroe laju reubah dan binasa. 9 Teuma ulôn meusurak-surak sabab lé TUHAN, até ulôn galak ngon geumbira kareuna Gobnyan geupeuseulamat ulôn. 10 Deungon sikeubit jih ulôn peugah, "TUHAN, Droeneueh hana bandeng deungon peue mantong Droeneueh teupeu sa! Droeneueh neupeu lheueh nyang leumoh nibak nyang teuga, nyang gasien dan seungsara nibak keunong tindéeh." 11 Saksi-saksi nyang jeuhet jibeudôh jijak lawan ulôn, dan jitudoh ulôn lôn peubuet hai-hai nyang hana lôn teupeue. 12 Jroh nibak ulôn awaknyan balaih ngon nyang jeuhet; ulôn ngob lam putôh asa. 13 Watée awaknyan deumam, ulôn lumpah seudeh dan hana hase ulôn makheun; laju lôn meudoá sira lôn teukui ulée, 14 lagée lôn meudoá keu sidroe syedara atawa keu rakan lôn nyang paleng krab. Ulôn teukui ulôn mo keu awaknyan, siulah-ulah ulôn meukabong keu ma lôn keudroe. 15 Teuma bak watée ulôn sosah, awaknyan galak, dan meukawan-kawan jiparan ulôn. Awaknyan jijak lagée ureuëng capiek keu jihina lôn. 16 hana putôh-putôh awaknyan jihina sidroe ureuëng lapée, dan jingieng ateueh lôn deungon pandangan banci. 17 Trok án pajan, ya TUHAN, trok án pajan Droeneueh teuma neukalon mantong? Neupeuseulamat kheueh ulôn nibak jiseurang lé awaknyan, neupeusie kheueh nyawöng ulôn nibak singa-singa nyan. 18 Teuma ulôn meusyukoe ubak Droeneueh diteungoh umat Droeneueh, dan lôn pujoe nan Droeneueh di teumpat awaknyan meugumpôi. 19 Bék neupeubiyeu ulôn jipeumeu én lé ureuëng nyang musoh ngon lôn deungon hana sabab. Bék neupeubiyeu ulôn jisurak lé ureuëng nyang banci keu ulôn deungon hana sabab. 20 Haba awaknyan hana ramah; awaknyan jipeugot reuncana keuneuk teumipée ateueh ureuëng nyang udeb rukon bahgia. 21 Awaknyan jikliek-kliek u ateueh ulôn sira jipeugah bahwa awaknyan ka lheueh jikalon peue nyang ulôn peubuet. 22 Teuma Droeneueh, ya TUHAN, ka lheueh neukalon; bék kheueh neuiem droe, ya TUHAN, bék kheueh jiôh nibak ulôn. 23 Beudôh kheueh neubila peukara ulôn, ya Allah ulôn dan TUHAN lôn, tulông kheueh ulôn! 24 Neubila kheueh ulôn, sabab Droeneueh ade, ya TUHAN Allah lôn, bék neupeubiyeu musoh jisurak ulôn. 25 Bék neupeubiyeu awaknyan jimariet lam até, "Syuko, geutanyoe ka tapeu habéh nyawöng jih. Meukeusut até geutanyoe ka geupeupeunoh!" 26 Bah kheueh ureuëng nyang harôk jikalon seungsara lôn jeuet keu bingong dan meuteumé malée. Bah kheueh ureuëng nyang jipeusombong droe keulôn geuhina dan geupeumalée. 27 Seumoga ureuëng nyang keuneuk ngieng ateueh ulôn geupeubeuna meusurak dan meugeumbira. Seumoga awaknyan meu ulang-ulang jipeugah, "Keubit lumpah that agong TUHAN! Gobnyan meuharab beuseulamat hamba Geuh!" 28 Dan ulôn teuma lôn jak peugah keuadelan Droeneueh, dan lôn pujoe Droeneueh sipanyang uroe.

Zabur 36

1 Keu teupimpén kor. Nibak Nabi Daud, hamba TUHAN. 2 Desya jimariet lam reulong até ureuëng jeuhet, jihnyan meubacut pi hana jitakot ubak Po teu Allah. 3 Jihnyan jianggab droe jih nyan lumpah hebat, sampoe hana jitée droe bahwa droe jihnyan salah raya, dan hana teubanci. 4 Tutoe haba jih jeuhet dan peunoh tipée daya, jihnyan hanale jipeubuet nyang jroh-jroh dan bijaksana. 5 Sira ji-éh di ateueh teumpat éh pi jipeugöt reuncana keuhai buet nyang jeuhet nyang harôh jipeubuet; peue mantong buet jih hana nyang jroh, nyang jeuhet hana jitulak. 6 TUHAN, geunaséh Droeneueh meulambong manyang sampoe u langét, dan keuseutiaan Droeneueh sampoe trok bak awan. 7 Keubaiékan Droeneueh meujulang manyang santeut éuet gunong, dan keuadelan Droeneueh lhok éuet tuwi laôt nyang raya; manusia dan beulatang Droeneueh peulara, ya TUHAN. 8 Hana ék teukira gaséh Droeneueh, ya Allah Po manusia jimusöm dimiyueb sayeub Droeneueh. 9 Awaknyan puih deungon peunajoh nyang na meulimpah di Baét Droeneueh, dan deungon ié jieb nibak krueng Droeneueh sampoe puléh grah. 10 Droeneueh kheueh panghulée udeb mandum makhluk, lam trang Droeneueh kamoe kalon trang. 11 Seumoga Droeneueh teutab neugaséh keu ureuëng nyang jituri Droeneueh, dan neupeubuet nyang jroh ubak ureuëng nyang jujoe até. 12 Bék neupeubiyeu ulôn jiseurang lé ureuëng cungkak, ya TUHAN, atawa jiuse lé ureuëng jeuhet. 13 Ngieng kheueh, ureuëng nyang jipeubuet buet nyang jeuhet ka reubah, awaknyan reubah teugageueng sampoe hana hasele jibeudôh.

Zabur 37

1 Nibak Nabi Daud. salah. 2 Sabab awaknyan lagée naleueng nyang gadôh, dan layée lagée seunaman nyang ijo. 3 Peucaya kheueh ubak TUHAN, dan peubuet kheueh nyang jroh, tinggai kheueh di nanggroe nyan dan meupi-e kheueh nyang seutia. 4 Mita kheueh keubahgiaan ubak TUHAN, Gobnyan geupeupuih até gata. 5 Peujok kheueh udeb gata ubak TUHAN, meuharab kheueh ubak Gobnyan, Gobnyan pasti keutulông gata. 6 Gobnyan geupeugah keuseutiaan gata lagée trang, dan keujujoran gata lagée uroe peungéuh. 7 Preh kheueh TUHAN deungon até nyang teunang, tapreh kheueh deungon saba sampoe Gobnyan geucok tendakan. Bék geulisah sabab ureuëng laén nyang meuhase lam udeb, atawa nyang jipeubuet tipée muslihat. 8 Bék bagaih beungéh dan seu-uem até, nyang lagée nyan bagaih that meuteumé bala. 9 Sabab ureuëng nyang jipeubuet jeuhet geupeuhanco, teuma ureuëng nyang meuharab ubak TUHAN, nyan kheueh nyang jeuet keuwaréh tanoh nyan. 10 Ureuëng jeuhet reujang gadôh, meunyoe teumita, ureuëng nyan ka hanale. 11 Ureuëng nyang miyueb até nyan kheueh nyang jeuet keuwaréh tanoh nyan, dan jirasa udeb makmu nyang meulimpah. 12 Ureuëng jeuhet jireuncana nyang jeuhet ateueh ureuëng gét, dan jingieng ateueh ureuëng nyan deungon rasa banci. 13 Teuma lé TUHAN geupeukém ureuëng jeuhet nyang lagée nyan, sabab Gobnyan geuteupeue bahwa ureuëng nyang lagée nyan ajai jih ka tô that-that. 14 Ureuëng jeuhet jisuet peudeueng lam sarông dan aneuk panah pi laju jitimbak keu jipoh maté ureuëng gasien dan ureuëng seungsara, keu teusie ureuëng nyang udeb jih jroh. 15 Teuma ureuëng jeuhet nyan teutôb deungon peudeueng jih keudroe, dan aneuk panah awaknyan laju geuwiet meukan. 16 Barang nyang na bacut atra ureuëng nyang jroh leubeh meuyuém nibak barang atra ureuëng jeuhet nyang meulimpah ruah. 17 Sabab kuasa ureuëng jeuhet teuma geuwiet sampoe patah lé TUHAN, teuma ureuëng nyang gét teutab geulindong. 18 TUHAN geujaga udeb ureuëng saléeh, atra pusaka awaknyan teutab keu siumu masa. 19 Bak watée meukarat awaknyan hana teuma meudeurita, bak watée musém deuk awaknyan geupeuseb deungon peunajoh. 20 Teuma, meunyoe ureuëng jeuhet teutab geupeubinasa, musoh TUHAN teuma gadôh lagée bungöng nyang na timoh di dalam blang, awaknyan teuma gadôh lam asab. 21 Ureuëng jeuhet watée jingui atra gob hana jipulang, teuma ureuëng gét-gét jijok deungon sigala mangat até. 22 Ureuëng nyang geubri beureukat lé TUHAN teuma jeuet keuwaréh tanoh nyan, teuma ureuëng nyang geukutok lé Gobnyan teuma geu use. 23 TUHAN geubimbéng ureuëng nibak rot nyang harôh geulalu, Gobnyan geupeukong ureuëng nyang udeb jih teutab meukeunong bak até Gobnyan. 24 Meunyoe rhot, ureuëng nyan hana that meubahya, sabab TUHAN geumat jaroe ureuëng nyan. 25 Watée ulôn muda sampoe ka tuha lagée nyoe, gohlom na ulôn kalon ureuëng nyang jroh geutinggai lé TUHAN, atawa aneuëk cucoe ureuëng nyan jeuet keu ureuëng geumadée. 26 Gobnyan sabe geubri pinjam dan geujok mantong, dan aneuëk-aneuëk gobnyan jeuet keubeureukat keu geuhnyan. 27 Tinggai laju buet jeuhet, dan peubuet laju buet nyang jroh, dan keu siumu masa keuturonan gata jeuet keu ureuëng nyang tinggai teutab nibak tanoh nyan. 28 Sabab TUHAN geucinta ubak buet nyang ade dan gét, ureuëng nyang seutia ubak Gobnyan hana geupeubiyeu jihnyan teulanta. Gobnyan geulindong ureuëng nyan sampoe siumu masa, dan keuturonan ureuëng jeuhet teuma geupeuhanco. 29 Ureuëng saléeh jeuet keu waréh nibak tanoh nyan, dan tinggai teutab disinan keu siumu masa. 30 Ureuëng gét meunyoe jipeugah haba gét that bijaksana, gobnyan sabe jujoe nibak tutoe haba. 31 Huköm Po teu Allah na teukeubah lam até gobnyan, gobnyan hana meusimpang nibak huköm nyan. 32 Ureuëng jroh-jroh sabe jiluem lé ureuëng jeuhet nyang jimita keuseumpatan mangat jipoh maté. 33 teuma TUHAN hana geupeubiyeu ureuëng nyan rhot lam jaroe musoh, atawa jihuköm watée jipeusidang. 34 Meuharab kheueh ubak TUHAN dan taát kheueh ubak peurintah Gobnyan, teuma Gobnyan geuangkat gata jeuet keu waréh nibak tanoh nyan; gata teuma tangieng ureuëng jeuhet geupeubinasa. 35 Ulôn ka lheueh lôn ngieng ureuëng jeuhet nyang galak meusulet ngon raya haba; jihnyan lagée bak kayée nyang luhu ngon ukeue nyang lhok. 36 Watée ulôn jak, jihnyan ka hanale, lôn mita jihnyan, teuma hánmeuho saho dan hana meurumpok. 37 Neungieng kheueh ateueh ureuëng nyang jroh dan jujoe até; ureuëng nyang galak keu damé, nibak ureuëng nyan na masa ukeue nyang jroh. 38 Teuma ureuëng nyang meudesya geupeubinasa; keuturonan awaknyan geupeuhanco. 39 TUHAN geupeuseulamat ureuëng saléeh, dan geulindong awaknyan óh watée teuseupet. 40 Gobnyan geutulông dan geupeuseulamat awaknyan, dan geupeusie awaknyan nibak ureuëng-ureuëng jeuhet, sabab awaknyan jimeulindong ubak Gobnyan.

Zabur 38

1 Zabur Nabi Daud watée geupeuseumah keureubeuen peuingat. 2 TUHAN, bék kheueh neuhuköm ulôn watée Droeneueh beungéh, dan bék neuseksa ulôn watée Droeneueh mureuka. 3 Aneuk panah Droeneueh nyang neu timbak ateueh ulôn sampoe beusot dan luka tuboh lôn, dan jaroe Droeneueh keubit that brat meuteugon bak tuboh ulôn. 4 Ulôn sakét brat sabab Droeneueh beungéh; hana nyang seuhat nibak tuboh lôn sabab desya lôn. 5 Ulôn ngob lam ié raya keusalahan lôn, beuban desya lôn lumpah that geuhon meuginton u ateueh ulôn. 6 Luka meucabok nyang na nibak ulôn ka meunanoh dan meubée khéub, sabab ulôn ka lôn peubuet nyang bangai. 7 Ulôn meuteukui dan meubungkok, sipanyang uroe ulôn ruman lôn krot dan seudeh. 8 Deumam ngon seu-uem lagée apui keunong bak tuboh lôn, hana nyang seuhat nibak tuboh lôn. 9 Ulôn ka reumok hanco meukeupeng dan teunaga lôn pi habéh, ulôn apoh apah sabab até lôn gundah. 10 TUHAN, Droeneueh neuteupeue peue mantong nyang ulôn meuhéut, apoh apah ulôn hana nyang teusöm nibak Droeneueh. 11 Jantong lôn yo meugám-gám, teunaga lôn gadôh, dan mata ulôn ka jeuet keu rabon. 12 Kawöm dan rakan ulôn jiwéeh sabab peunyakét nyang na nibak ulôn, meunan cit kawöm keurabat ulôn jipeujiôh lôn. 13 Ureuëng nyang keuneuk poh maté lôn ka jijak teun taron; dan nyang keuneuk peuceulaka lôn laju jiancam keuneuk poh ulôn. 14 Teuma ulôn lagée ureuëng tulo nyang hana teudeungoe sapeue, dan lagée ureuëng kalu nyang hana hase peugah haba. 15 Keubit, ulôn saban that lagée ureuëng nyang hana hase teudeungoe sapeue, dan lé sababnyan hana ulôn bantah sapeue. 16 Teuma ulôn meuharab ubak Droeneueh, ya TUHAN, dan Droeneueh, TUHAN Allah lôn, neujaweueb ulôn. 17 Bék neupeubiyeu musoh ulôn galak jingieng ulôn nyang susah lagée nyoe bagoe, dan bék neupeubiyeu awaknyan rayeuk haba meunyoe ulôn ka guyah. 18 Ulôn rab reubah, hana piôh ulôn sakét sabe. 19 Ulôn meungaku mandum desya lôn; até ulôn gundah watée lôn pike keusalah lôn. 20 Ureuëng-ureuëng nyang jimeumusoh ngon ulôn ramé dan teuga-teuga, awaknyan jibanci that ubak cara udeb lôn. 21 Ureuëng nyang jibalah buet nyang jroh deungon nyang jeuhet jimeumusoh ngon lôn sabab ulôn lôn peubuet nyang jroh. 22 Ya TUHAN, bék neutinggai ulôn, bék neujiôh nibak ulôn, ya Allah lôn. 23 Neuteuka kheueh bubagaih neutulông ulôn, ya TUHAN nyang peuseulamat ulôn.

Zabur 39

1 Keu teupimpén kor. Zabur Nabi Daud. Keu Yedutun. 2 Ulôn pike, "Ulôn lôntem jaga droe mangat bék meudesya deungon lidah lôn. Ulôn hán lôntem peugah haba simantong ureuëng jeuhet mantong tô." 3 Ulôn seungab siribée basa, sampoe teupeurugo droe lôn keudroe. Dan deurita nyang ulôn rasa teurasa meutamah brat; 4 ulôn teuginton deungon gundah nyang paleng hebat. Maken lôn pike, até ulôn seumaken susah; dan akhé jih ulôn peugah kheueh lagée nyoe, 5 "TUHAN, neupeugah kheueh, pajan ajai ulôn nyoe mangat jeuet lôn teupeue padub na paneuk jih umu ulôn." 6 Padub na paneuk nyang ka teuntée umu lôn! Keu Droeneueh jangka udeb lôn nyang hana meumakna. Keubit, manusia nyoe lagée jiprôh lé nafáh, 7 udeb jih meunan mantong lagée bubayang. Banmandum buet gabuek jihnyan sia-sia hana meuguna; jihnyan jitamon hareuta, teuma hana jiteupeue soe nyang peuguna atranyan. 8 Jinoenyoe, peue nyang harôh ulôn preh, ya TUHAN? Ubak Droeneueh kheueh peue nyang ulôn harab. 9 Neupeulheueh kheueh ulôn nibak banmandum desya-desya lôn, bék neupeubiyeu ulôn jeuet barang hinaan lé ureuëng bangai. 10 Ulôn seungab lôn iemdroe babah lôn gampet hana lôntem peugah haba, sabab Droeneueh kheueh nyang heungko ulôn. 11 Neucok kheueh huköman Droeneueh nibak ulôn nyoe, sabab ulôn rab maté neuheuntam lé Droeneueh. 12 Manusia sabab lé buet jih nyang salah; neuhuköm dan neuheuntam lagée kamoe Droeneueh peuhanco peue nyang meuyuém nibak jihnyan. Keubit, manusia lagée jiprôh lé nafáh mantong. 13 Deungoe kheueh doá ulôn, ya TUHAN, neungieng kheueh meulakée ulôn; bék neuseungab mantong meunyoe ulôn mo. Lagée banmandum indatu ulôn, teuma sikeujab mantong ulôn meunumpang ubak Droeneueh. 14 Bék neupeukaru ulôn, mangat ulôn jeuet keumangat bahpi bacut kong, sigohlom ulônjak dan hana lôn gisa le.

Zabur 40

1 Keu teupimpén kor. Zabur Nabi Daud. 2 Deungon saba ulôn preh-preh TUHAN tulông; laju Gobnyan geupakoe ulôn dan geudeungoe peue nyang ulôn lakée. 3 Gobnyan geutarek ulôn nibak uruek nyang paleng meubahya, dan nibak luhôb paya. Gobnyan geukeubah ulôn di ateueh bukét batée, deungon nyan langkah ulôn mantab. 4 Gobnyan geupeuruno ulôn meuca-e ngon lagu barô, lagu seumujoe keu Allah geutanyoe. Jai that ureuëng nyang ngieng Gobnyan dan laju jiteuka teumakot, dan laju jipeucaya ubak TUHAN. 5 Mubahgia kheueh ureuëng nyang peucaya ubak TUHAN, nyang hana jiseutôt jiseumah dewa-dewa, atawa jilakée tulông ubak ureuëng nyang sombong. 6 TUHAN, padubna le cebtaan Droeneueh keu kamoe, ya TUHAN Allah ulôn, Droeneueh hana sa ngon peue mantong teupeu sa! Jai lumpah na reuncana Droeneueh nyang keubit takjob keu kamoe, hana mungken teucalitra banmandum nyan. 7 Peuseumahan dan keureubeuen nyang teuhidang hana Droeneueh galak, meunan cit keureubeuen nyang teutot dan keureubeuen peusampôh desya nyan pih hana Droeneueh tunggée. Teuma Droeneueh ka neubri keu ulôn geulinyueng nyang hase ulôn deungoe su Droeneueh. 8 Laju ulôn peugah, "Nyoe kheueh ulôn, didalam kitab meugulong na teutuléh keu ulôn: 9 Ulôn harok ulôn peubuet keuheundak Droeneueh, ya Allah, huköm Droeneueh ulôn keubah didalam até." 10 Lam rapat dipat mantong na meugumpôi umat Droeneueh ulôn peugah haba geumbira bahwa Droeneueh ka neupeuseulamat kamoe. Deungon hana lôn piôh-piôh hainyan ulôn peusampoe, Droeneueh neuteupeue banmandum nyan, ya TUHAN. 11 Haba keuhai seulamat nyan hana ulôn keubah lam até, nyang neutulông dan keuseutiaan Droeneueh sabe ulôn peugah. Didalam kawan umat Droeneueh nyang meusapat hana ulôn iemdroe, teuma ulôn peusampoe geunaséh dan keuseutiaan Droeneueh. 12 TUHAN, bék kheueh neupiôh neugaséh keu ulôn; neulindong kheueh ulôn sabe deungon gaséh dan seutia Droeneueh. 13 Ulôn jikeupong lé malapeutaka nyang le, jeumeulah jih hana ék teuitong. Ulôn jitiyeub lé desya-desya lôn sampoe ulôn hana hase lôn keumalon. Jeumeulah jih leubeh le nibak ôk nyang na di ateueh ulée lôn, sabab nyan ulôn jeuet keu putôh asa. 14 Ya TUHAN, neupeuseulamat kheueh ulôn, beubagaih kheueh ya TUHAN, neujak tulông ulôn! 15 Bah kheueh ureuëng nyang keuneuk peumaté ulôn teupeu taloe dan jiplueng lagée ureuëng bingong. Bah kheueh ureuëng nyang jisurak keuhai ulôn nyang malang teupoh lom sampoe jisurot dan teuhina. 16 Bah kheueh ureuëng nyang peukém ulôn teukeujot dan malée. 17 Seumoga banmandum ureuëng nyang jiseumah Droeneueh meusukacita dan meugeumbira, dan banmandum yang jicinta ubak seulamat nyang teuka nibak Droeneueh hana piôh jipeugah, "Keubit agong that kheueh TUHAN!" 18 Ulôn nyoe gasien dan leumoh, teuma TUHAN geupeurati ulôn. Droeneueh kheueh nyang tulông dan peuseulamat ulôn, bék meulet, ya TUHAN lôn!

Zabur 41

1 Keu teupimpén kor. Zabur Nabi Daud. 2 Mubahgia kheueh ureuëng nyang na jipakoe keu ureuëng nyang leumoh hana meudaya; TUHAN teuma geutulông ureuëng nyan watée jih lam keuadaan teuseupet. 3 TUHAN teuma geulindong dan geupeulara ureuëng nyan, Gobnyan geubri bahgia di ateueh bumoe, dan hana geuseurah ureuëng nyan lam jaroe musoh jih. 4 TUHAN teuma geutulông ureuëng nyan watée jihnyan sakét, dan geupeupuléh lom ureuëng nyang sakét nyan. 5 Kheun ulôn, "Ulôn ka meudesya ubak Droeneueh, ya TUHAN, neugaséh kheueh ulôn dan neupeupuléh kheueh ulôn." 6 Musoh ulôn jipeugah nyang jeuhet keuhai ulôn, meukeusut awaknyan mangat ulôn nyoe maté dan jituwo lé gob. 7 Ureuëng nyang jak saweue ulôn hana jujoe dan ikhlas até jih. Awaknyan jijak peusapat haba brôk keuhai ulôn, laju jijak peugah ho mantong ban siseun lingka. 8 Banmandum nyang jibanci keu lôn jimeusáh-sáh; awaknyan jipeugah hai nyang paleng brôk keuhai ulôn. 9 Kheun awaknyan, "peunyakét ureuëng nyan parah that, jihnyan hana mungken jibeudôh le." 10 Meunan cit rakan nyang paleng krab nyang ulôn peucaya, ureuëng nyang pajohbu meusajan ngon ulôn, nyan pih ka jihina lôn. 11 neugaséh kheueh keulôn, ya TUHAN, neupeupuléh kheueh ulôn, mangat ulôn hase lôn balaih buet nyang jeuhet nibak siteuru ulôn. 12 Meunyoe ulôn hana jipeutaloe lé musoh lôn, barô kheueh lôn teupeue bahwa Droeneueh neubila ulôn. 13 Droeneueh neutulông ulôn sabab ulôn jujoe, dan neupeujeuet ulôn udeb meusajan ngon Droeneueh keu siumu masa. 14 Pujoe kheueh TUHAN, Allah Israel! Pujoe kheueh Gobnyan phon saát nyoe dan siumu masa!

Zabur 42

1 Keu teupimpén kor. Ca-e peulajaran kawöm Korah. 2 Lagée rusa jihawa keu ié krueng, meunan kheueh jiwa lôn rindu ubak Droeneueh, ya Allah. 3 Ulôn rindu ubak Allah nyang udeb, pajan ulôn jeuet lônjak meuiébadat di Baét Gobnyan? 4 Uroe malam lalée ulôn mo, na kheueh ié mata peunajoh ulôn. Sipanyang uroe musoh lôn jitanyong, "Dipat Allah gata?" 5 Até ulôn peudeh meunyoe teuingat yohmasa ilée, watée ulôn jak ubak Baét TUHAN meusajan ngon ureuëng nyang jipeuna peurayaan. Ulôn lônjak dikeue arak-arakan deungon seumurak nyang meuhubo dan ca-e ngon lagu puja dan pujoe. 6 Pakon até ulôn seudeh ngon geulisah? Ulôn meuharab ubak Po teu Allah. Teuma ulôn meusyuko lom ubak Gobnyan, ubak Allah lôn dan nyang peuseulamat ulôn. 7 Nibak tanoh teumpat teuböih nyoe até ulôn ka hanco ngon reumok, sababnyan ulôn ingat ubak TUHAN. Jiwa lôn hanyot u dalam arus keuseudehan, ulôn ka jiba lé ié raya keukacauan; lagée su umbak ié grob nibak Krueng Yordan nibak Gunong Hermon dan Gunong Mizar. 9 Seumoga TUHAN geutunyok geunaséh Gobnyan óh watée uroe, mangat watée malam ulôn hase meuca-e, dan meudoá ubak Allah mata ié udeb lôn. 10 Ulôn peugah ubak Allah, nyang bila ulôn, "Pakon Droeneueh neutuwoe keu ulôn? Pakon ulôn nyoe harôh meudeurita, sabab jiteugom lé musoh-musoh lôn?" 11 Até lôn hanco meukeupeng-keupeng sabab jipeuhina lé musoh. Awaknyan hana piôh jiteumanyong, "Dipat Allah gata?" 12 Pakon até lôn seudeh dan geulisah? Ulôn meuharab ubak Po teu Allah. Teuma ulôn meusyuko lom ubak Gobnyan, ubak Allah lôn nyang ka geupeuseulamat ulôn.

Zabur 43

1 Neubri kheueh keuadelan keu ulôn, ya Allah, neuprah kheueh hak ulôn ateueh bansa nyang doraka. Peubeubaih kheueh ulôn nibak ureuëng jeuhet dan nyang teumipée. 2 Droeneueh kheueh, Allah peulindong ulôn; pakon Droeneueh neutinggai ulôn? Pakon ulôn harôh meudeurita sabab jiteugom lé musoh-musoh lôn? 3 Neupeugah kheueh keuseutiaan Droeneueh mangat teupeu peungeuh dan teubimbéng ulôn, mangat jeuet ulôn jakwoe u Sion, bukét Droeneueh nyang suci dan u Baét teumpat tinggai Droeneueh. 4 Teuma ulôn peukeue ubak miseubah Allah, meuhadab Allah pucak keubahgiaan lôn. Ulôn teuma meuca-e dan lôn peumeuén keucapi, keulôn pujoe Droeneueh, ya Allah, Allah ulôn. 5 Pakon até ulôn seudeh dan geulisah? Ulôn meuharab ubak Allah, dan ulôn meusyukoe lom ubak Gobnyan, ubak Allah lôn dan nyang ka peuseulamat ulôn.

Zabur 44

1 Zabur kawöm Korah. Ca-e peulajaran. Keu teupimpén kor. 2 Ya Allah, kamoe ka lheueh kamoe deungoe keudroe kisah nyang geucalitra lé indatu kamoe keuhai karya nyang hebat nyang Droeneueh peubuet bak jamén ilée. 3 Droeneueh keudroe nyang use bansa-bansa mangat jeuet umat Droeneueh tinggai teutab di nanggroe awaknyan. Bansa-bansa nyang laén Droeneueh peuceulaka, teuma umat Droeneueh neupeubiyeu meukeumang meu aneuëk cucoe. 4 Tanoh nyan kon jireubot lé awaknyan deungon peudeueng; dan bukon deungon teunaga jih keudroe awaknyan meunang, teuma deungon kuasa dan cahya teuka Droeneueh, sabab Droeneueh neugaséh keu umat Droeneueh. 5 Droeneueh kheueh Raja ulôn dan Allah lôn, nyang bri meunang keu umat Droeneueh. 6 Deungon kuasa Droeneueh kamoe peutaloe bubena musoh kamoe, dan kamoe peutaklok ureuëng-ureuëng nyang jiseurang kamoe. 7 Sabab ulôn hana ulôn peuguna aneuk panah lôn, meunan cit ngon peudeueng hana hase jipeuseulamat ulôn. 8 Teuma Droeneueh kheueh nyang ka peuseulamat kamoe nibak mandum musoh kamoe, dan neupeutaloe mandum ureuëng nyang jibanci kamoe. 9 Teuma kamoe sabe kamoe peumeugah Droeneueh, dan hana putôh-putôh kamoe meusyuko ubak Droeneueh. 10 Teuma jinoenyoe Droeneueh ka neutinggai kamoe dan neupeubiyeu kamoe jipeutaloe. Droeneueh hanale neumaju lam baresan kamoe. 11 Neupeubiyeu kamoe meunan mantong kamoe peuplueng droe nibak musoh kamoe, dan awaknyan ban galak droe habéh jireupah hareuta kamoe. 12 Neupeubiyeu kamoe jisie lagée jisie kaméng, dan neupeu crebre kamoe lamkawan bansa-bansa. 13 Neupeubloe umat Droeneueh deungon yuem nyang hana hareuga, dan hana meuteumé laba bahpi sikada. 14 Neupeujeuet kamoe barang hinaan lé ureuëng lingka kamoe jipeukém jipeuayang sira jihina. 15 Neupeujeuet kamoe barang jipansi lé bansa-bansa; sira jiasek ulée awaknyan jihina kamoe. 16 Siuroe seupôt ulôn jirapa, lôn tanggong malée dan peuteubai muka, 17 sabab lôn deungon jiejek sira jihina nibak babah musoh nyang jitroh dam. 18 Banmandum nyan ka jipeurhot u ateueh kamoe bahpi kamoe hana meutuwoe ubak Droeneueh atawa kamoe khianat janji kamoe deungon Droeneueh. 19 Até kamoe hana kamoe iengkeue ubak Droeneueh; dan peurintah Droeneueh hana teuma kamoe peujayéh. 20 Teuma trok até Droeneueh neutinggai kamoe didalam seupôt; kamoe hana meudaya lamkawan beulatang juah. 21 Meunyoe seukirajih kamoe hanale kamoe seumah Po teu Allah, teuma kamoe meudoá ubak ilah nyang laén, 22 nyang kamoe peubuet nyan pasti geuteupeue lé Po teu Allah, sabab Gobnyan geuteupeue banmandum rahsia até kamoe. 23 Deumi Droeneueh kamoe hana putôh-putôh teuancam lé mawöt, dan jipeusaneut kamoe lagée bubiri nyang teusie. 24 Beudôh kheueh, ya TUHAN! Pakon Droeneueh neuteungéut? Beudôh kheueh! Bék neutulak kamoe lagéenyoe siumu masa. 25 Pakon Droeneueh neumusöm, dan neutuwoe ubak seungsara dan keusosahan kamoe? 26 Kamoe reubah hanco meukeupeng di ateueh tanoh, teuéh teunyue di dalam abée sabab kamoe taloe. 27 Beudôh kheueh dan neuteuka kheueh neutulông kamoe, peuseulamat kheueh kamoe sabab gaséh Droeneueh.

Zabur 45

1 Zabur kawöm Korah. Ca-e gaséh. Keu peumimpén kor. Meunurot paduan nada: Bungöng bakong. 2 Tutoe haba nyang maméh jiteubiet lam babah ulôn, ulôn peuseumah ca-elôn keu raja. Lagée gensée sidroe pujangga nyang malem, lidah lôn kasiab ulôn meuca-e. 3 Droeneueh nyang paleng lagak lamkawan mandum manusia, tutoe haba droeneueh peunoh deungon nyang jroh lom mubahgia, sababnyan droeneueh geubri beureukat lé Po teu Allah keu siumu masa. 4 Neulat peudeueng droeneueh nibak keuieng, hai raja peukasa, droeneueh lumpah that agong dan seumarak! 5 Maju kheueh deungon gagah neutuju ubak keujayaan jak peujuang keubeunaran dan keuadelan nyang leumoh leumbot; deungon teunaga nyang na nibak gata reubot kheueh keumeunangan nyang raya! 6 Panah gata nyang tajam sampoe peureulong jantong até musoh gata, bansa-bansa reubah meusumpom dikeue gaki gata. 7 Allah geubri kuasa keu gata mangat hase tamat peurintah, kuasa gata meuteun siumu masa; deungon ade rakyat gata tapeurintah. 8 Meunan cit gata tacinta ubak nyang beuna nyang tabanci keu nyang jeuhet; sabab nyan, Allah, Allah gata ka geupiléh gata, dan geupeubahgia gata leubeh nibak raja-raja nyang laén. 9 Peukayan gata meubée meuhalak deungon bée mur, gaharu dan ceundana; ureuëng nyang meu-én musik nyang na di meuligoe gadeng peubuet até gata lumpah bahgia. 10 Lamkawan deundayang meuligoe disinan na putroe-putroe raja. Blah uneuen takhta geudong pereumaisuri deungon piasan méuh murni. 11 Hai Putroe, deungoe kheueh ulôn peugah nyoe, tapeutuwoe kheueh ubak bansa dan waréh kawöm gata. 12 Deungon lagak dan ceudah nyang na nibak gatanyan até raja sampoe teupikat, gobnyan teungku gata, tundok kheueh ubak geuhnyan. 13 Peunduduek Tirus jiba peuseumahan keu gata; ureuëng kaya jiuseuha jicok até gata. 14 Putroe raja geutamong deungon peunoh seumarak, gawon nyang geungui meusulam deungon méuh. 15 Deungon peukayan nyang meubagoe wareuna gobnyan jijakba meuhadab raja, ji-iréng lé bubena aneuëk dara, dan rakan-rakan jih, meunan cit awaknyan keu raja. 16 Sira jiseumurak ngon subra dan geumbira bak watée teuintat dan peutamong u dalam meuligoe raja! 17 Droeneueh, raja ulôn, teuma meuteumé aneuëk agam nyang le mangat jiduek nibak takhta indatu gata. Awaknyan teuma tapeujeuet keu ureuëng nyang mat kuasa ateueh bansigom bumoe. 18 Deungon ca-e nyoe ulôn peumaklum gata tron meutron dan bansa-bansa teuma jipujoe gata siumu masa

Zabur 46

1 Zabur kawöm Korah. Keu peumimpén kor. Deungon ca-e Alamot. 2 Allah na kheueh nyang lindong dan teunaga geutanyoe; Gobnyan sabe lam siab dan mampu geutulông pajan mantong geutanyoe meukarat. 3 Teuma geutanyoe hana teumakot, bahpi bumoe nyoe meuhayak, dan gunong-gunong karam lam laôt raya; 4 bahpi laôt jipôt lé geulumbang raya, dan bukét ngon gunong geuhayon keunong heungko gobnyan. 5 Na alue ié krueng ji-ile nyang that galak banda Allah, teumpat tinggai Allah Nyang Mahamanyang. 6 Allah tinggai teutab disinan, teuma bandanyan hana hanco; gobnyan teuma geutulông watée beungoh uroe nyang ceudah. 7 Su Allah lagée geulanteue, dan bumoe teuma hanco meutabu; bansa-bansa yo ngon teukeujot, keurajeuen-keurajeuen nanggroe teuma reuloh. 8 TUHAN Nyang Mahakuasa na sajan geutanyoe, Allah Nabi Yakub geulindong geutanyoe. 9 Jak keunoe, ngieng kheueh peue nyang teungoh geupeubuet lé TUHAN; padubna hireuen meuneubuet Gobnyan di ateueh bumoe! 10 Gobnyan nyang peureuda prang bansigom donya, gando dan leumbeng habéh geupeuhanco, meunan cit mandum peurisai bulat ka habéh geutot. 11 Feureuman Gobnyan, "Peupiôh prang nyan; beutateupeue kheueh, Ulôn nyoe Allah, Ulônnyoe agong lamkawan bansa-bansa, dan agong bansaboh bumoe." 12 TUHAN Nyang Mahakuasa na meusajan geutanyoe, Allah Nabi Yakub nyang lindong geutanyoe.

Zabur 47

1 Zabur kawöm Korah. Keu peumimpén kor. 2 Seumurak dan gata péeh paleuet kheueh deungon geumbira, hai banmandum bansa! Pujoe kheueh Allah deungon seumurak nyang meuhubo! 3 Sabab TUHAN Nyang Mahamanyang na kheueh nyang paleng dahsyat, Raja Agong nyang mat kuasa bansigom bumoe. 4 Gobnyan nyang jok keugeutanyoe ateueh bubena bansa, dan nyang peujeuet geutanyoe hase takuasa ateueh mandum sukée-sukée bansa. 5 Gobnyan nyang piléh keugeutanyoe tanoh pusaka nyang tanyoe peureulée, keubanggaan bansa nyang geusayang. 6 Allah ka geu-ék ateueh takhta Gobnyan, teu-iréng ngon su seumurak nyang meuhubo lom su sangka kala. 7 Meuseulaweuet seumujoe kheueh keu Po teu Allah, ca-e kheueh dan seulaweuet kheueh puja ngon pujoe keu raja geutanyoe! 8 Allah na kheueh Raja ateueh banmandum bumoe, pujoe kheueh Gobnyan deungon ca-e seulaweuet nyang peunoh deungon seuni! 9 Allah geuduek di ateueh takhta Gobnyan nyang suci; Gobnyan geupeurintah ateueh bansa-bansa. 10 Bubena peumimpén bansa habéh meusaho sibagoe umat Po teu Allah nyang geupujoe lé Nabi Ibrahim. Sabab Allah na kheueh Raja sigala raja, Gobnyan lumpah that agong dan mulia.

Zabur 48

1 Zabur kawöm Korah. 2 Keubit that agong TUHAN dan lumpah teupujoe di Banda Allah geutanyoe, di bukét nyang suci. 3 Sion, Bukét Allah meujulang peureumai banda Raja Agong nyang lumpah gurangsang bansaboh bumoe. 4 Allah tinggai didalam puri nyang indah, dan teunyata Gobnyan sidroe kheueh peulindong gobnyan. 5 Ngieng kheueh, raja-raja geumeusapat; awaknyan teuka keuneuk jijak seureubu. 6 Teuma, banteukalon bukétnyan, awaknyan teuceungang ka tahé manté; awaknyan teukeujot dan laju jiplueng deungon teubingong-bingong. 7 Disinan awaknyan yo meutot-tot teumakot dan sakét, lagée ureuëng inong nyang keuneuk peulahé aneuëk, 8 lagée kapai nyang hanco jipupo lé angén badée raya. 9 Lagée nyang tanyoe deungoe, jinoe ka deuh takalon, di Banda TUHAN Nyang Mahakuasa. Banda nyan na kheueh Banda Allah geutanyoe, Gobnyan geubila bandanyan keu siumu masa. 10 Di dalam Baét Droeneueh kamoe manueng sira meurateb keu gaséh Droeneueh, ya Allah. 11 Nan Droeneueh meusyeuhu dan teupujoe bansaboh bumoe, Droeneueh neumat peurintah deungon ade. 12 Bah kheueh rakyat Sion dan Yehuda jimeusurak sabab geumbira, sabab Droeneueh neuhuköm lawan awaknyan. 13 Keulileng kheueh Sion, wet-wet kheueh nibak banda nyan, dan neuitong kheueh padubna meunara nyang na disinan. 14 Peurati kheueh nibak bintéh beuton jih, dan peureksa kheueh kuta jih, mangat gata hase tacalitra nibak keuturonan gata: 15 "Gobnyan kheueh Allah, Allah geutanyoe keu siumu masa, Gobnyan teuma geupimpén geutanyoe sampoe keukai abadi."

Zabur 49

1 Zabur kawöm Korah. Keu peumimpén kor. 2 Deungoe kheueh, hai sigala bansa, pasang kheueh geulinyueng hai peunduduek donya, 3 bah kheueh nyan ureuëng seudeurhana, meunan cit ngon ureuëng nyang meugah raya, bah kheueh nyan ureuëng gasien, meunan cit keu ureuëng kaya. 4 Ulôn teuma lôn meututoe ngon haba nyang bijaksana, pikeran ulôn lhok lumpah na. 5 Ulôn teuma lôn simak pribasa, dan lôn peutrang makna jih sira lôn peumeuén keucapi. 6 Ulôn hana teumakot watée ulôn ka jiseupet, watée ulôn jikeupong lé musoh nyang jeuhet. 7 Awaknyan bandum jimeubangga ngon atra keukayaan, dan jipeusombong droe ngon atra jih nyang kaya. 8 Nyang sikeubiet jih hana meusidroepi nyang hase jipeuseulamat syedara jih, atawa jibayeue yuem teutuboh syedara jih nyan ubak Po teu Allah. 9 Peue mantong nyang jibri meuneujok jih nyan hana teuma séb; keubit that meuhái yuem teutuboh nyawöng syedara jih nyan, 10 mangat jihnyan teupeusie nibak maté dan jeuet udeb siumu masa. 11 Hana, jihnyan teuma jingieng keudroe bahwa ureuëng bijaksana pih teuma binasa. Ureuëng bangai mandum binasa, dan jitinggai atra jih le keu ureuëng laén. 12 Awaknyan teuma jitinggai lam jrat siumu masa; nyan kheueh teumpat tinggai awaknyan sampoe akhé masa, bah kheueh yoh watée ilée jihnyan luwah that tanoh. 13 Manusia hana hase udeb sabe lam makmu; saban lagée beulatang, ureuëng nyan teuma binasa. 14 Meunan kheueh naseb ureuëng nyang peubangga droe jih, dan watée ukeue ureuëng nyang puih ngon tutoe haba. 15 Lagée bubiri, awaknyan ka teupeuteuntée keu maté; mawöt teuma jeuet keu ureuëng nyang rabe awaknyan. Ban seuboh buta awaknyan ka jipeutaloe lé ureuëng jujoe; tuboh awaknyan nyang gagah ka jeuet keubrok lam donya ureuëng maté, jiôh that nibak teumpat tinggai nyang mewáh. 16 Teuma Po teu Allah geupeu lheueh ulôn, Gobnyan teuma geupeuleukang ulôn nibak keukuasaan mawöt. 17 Bék teumakot meunyoe na sidroe ureuëng ka jeuet keukaya, dan hareuta jih meutamah le. 18 Sabab watée ureuëng nyan maté hana sapeue pih nyang jiba, atra jih nyan hana jiba lam kubu meusajan droe. 19 Meunan cit meunyoe na sidroe ureuëng nyang meu untông lam udeb jih, dan ji pujoe-pujoe sabab ureuëng nyan meuhase lam udeb nyoe, 20 ureuëng nyan pih jiseutôt indatu jih nyang ka awai di alam baka ubak teumpat nyang seupôt glab siumu masa. 21 Manusia hana hase udeb sabe lam keuméwahan, saban lagée beulatang, jihnyan pih teuma maté.

Zabur 50

1 Zabur Asaf. 2 Phon di Sion, banda nyang paleng tari, Allah teuka meucahya muble-ble. 3 Allah geutanyoe teuka dan hana geutinggai seungab, awai teuka apui nibak Gobnyan nyang hu jimeuéue lagée jilieh-lieh, dan jikeulileng lé angén badée nyang lumpah teuga. 4 Gobnyan geutawök laju langét ngon bumoe mangat jipeusaksi lé awaknyan bahwa Gobnyan teungoh geupeuna sidang nibak teumpat teusidang umat Gobnyan. 5 Feureuman Gobnyan, "Gata peusapat laju banmandum umat Ulôn nyang ka ji-ikat janji deungon Ulôn, dan teupeukong janjinyan deungon keureubeuen nyang teusie." 6 Langét laju jipeugah bahwa Allah geupeusidang umat Gobnyan, dan bahwa Gobnyan keudroe nyang jeuet keuhakém jih. 7 "Deungoe kheueh, hai umat Ulôn, Ulôn keuneuk peugah haba, Israel, Ulôn keuneuk meusaksi keugata; Ulôn nyoe Allah, Po teu Allah gata. 8 Bukon sabab lé keureubeuen gata Ulôn tudoh gata; keureubeuen nyang gata teutot sabena dikeue Ulôn. 9 Ulôn hana peureulée leumô nyang na didalam weue gata, atawa kaméng nyang na didalam kawan beulatang peulara gata; 10 sabab banmandum beulatang nyang na di dalam uteuen na kheueh atra Ulôn, dan beulatang peulara nyang na di ateueh gunong meureubée le jih. 11 Banmandum cicém nyang na di ateueh gunong nyan pih atra Ulôn, dan banmandum makhluk nyang na udeb didalam blang beulantara. 12 Meunyoe Ulôn deuk, hana peureulée Ulôn peugah ubak gata, sabab bumoe banmandum asoe jihnyan na kheueh milék Ulôn. 13 Ulôn hana Lôn makheun uengkot sie leumô agam, meunan cit hana teuma Ulôn jieb darah kaméng agam. 14 Peuseumah kheueh keureubeuen ucapan syuko keu Po teu Allah, tapeutrok kheueh janji gata ubak Nyang Mahamanyang. 15 Meulakée kheueh ubak Ulôn bak watée gata meukarat, teuma Ulôn kupeuleuh gata, dan gata teuma tapujoe Ulôn." 16 Teuma ubak ureuëng jeuhet TUHAN geupeugah meunoe, "Gata hana hak tapeugah keuhai huköm Ulôn, dan kheun-kheun keuhai peujanjian Ulôn. 17 Sabab gata hana tatem teurimong nyang Ulôn peugah, dan tatulak peue mantong nyang Ulôn peurintah. 18 Meunyoe deuh gata ngieng sidroe ureuëng ceumucue, laju gata seutôt deungon ureuëng nyan, dan gata meurakan deungon ureuëng-ureuëng nyang galak jipeubuet zina. 19 Babah gata sabe tapeugah nyang jeuhet-jeuhet, dan sabe siab deungon tipée muslihat gata. 20 Hana piôh gata fiteunah syedara gata, dan taupat ngon tapeubrok-peubrok syedara kandong gata. 21 Nyan kheueh nyang gata peubuet, teuma Ulôn seungab mantong, teuma gata pike Ulôn nyoe lagée gata. Dan bak saátnyoe Ulôn kurapa gata, dan banmandum nyan Ulôn peujeuet keunyata keugata. 22 Simak kheuehnyoe, hai gata nyang tuwoe ubak Po teu Allah; jaga kheueh bék sampoe Ulôn peubinasa gata, dan hana ureuëng nyang hase jipeuseulamat gata. 23 Ureuëng nyang peuseumah syukoe sibagoe keureubeuen, ureuëng nyan kheueh nyang jihoreumat Ulôn; dan keu ureuëng nyan teupeusiab rot ueh keu ureuëng nyan Ulôn tunyok keuhai seulamat nibak ulôn."

Zabur 51

1 Keu teupimpén kor. Zabur nyang geutuléh lé Nabi Daud 2 watée gobnyan ka lheueh geudot lé Nabi Natan sabab geumeumukah deungon Batsyeba. 3 Neugaséh kheueh keu ulôn ya Allah, sabab Droeneueh teutab neugaséh, neusampôh kheueh desya ulôn sabab gaséh sayang Droeneueh nyang raya. 4 Neu rhah kheueh peue mantong buet ulôn nyang jeuhet; neupeugleh kheueh ulôn nibak banmandum desya-desya lôn. 5 Sabab ulôn meungaku ubak buet-buet ulôn nyang salah, desya lôn sabe lôn ingat. 6 Ubak Droeneueh, ubak Droeneueh mantong ulôn meudesya, dan ulôn peubuet peue nyang Droeneueh anggab jeuhet. Dan kapatot Droeneueh neuhuköm ulôn, ade that keuputosan Droeneueh. 7 Nyang sikeubit jih, ulôn nyoe jeuhet yoh phon ulôn u na ateueh donya nyoe, dan na desya yoh phon na lam pruet ma. 8 Droeneueh neulakée até nyang jujoe; peupeunoh kheueh baten ulôn deungon hikeumat Droeneueh. 9 Peugleh kheueh ulôn, teuma ulôn jiteuka suci; pumanö kheueh ulôn, teuma ulôn leubeh putéh nibak gapeueh. 10 Bah kheueh ulôn deungoe haba suka cita, mangat até nyang ka Droeneueh peurumok nyoe geumbira lom teuma. 11 Paleng kheueh wajah Droeneueh nibak desya ulôn, dan neusampôh kheueh bubena salah lôn. 12 Cebta kheueh até nyang gleh lom murni keu ulôn, ya Allah, neupeubarô kheueh até ulôn deungon seumangat nyang tabah. 13 Bék kheueh ulôn nyoe neutiek dikeue Droeneueh, dan bék kheueh neucok roh Droeneueh nyang suci nyang na nibak ulôn nyoe. 14 Neupeujeuet kheueh ulôn nyoe mangat geumbira lom sabab keuhai seulamat nyang na nibak Droeneueh, neubri kheueh keu ulôn até nyang reula mangat lôn taát ubak Droeneueh. 15 Dan ulôn teuma lôn peurunoe peurintah Droeneueh ubak ureuëng nyang meudesya, mangat awaknyan jiwoe lom ubak Droeneueh. 16 Peuseuliseh kheueh ulôn nibak mawöt, ya Allah nyang peuseulamat ulôn, dan deungon até nyang geumbira teuma ulôn jak peugah ho-ho mantong keuhai keuadelan Droeneueh. 17 Ya TUHAN, neutulông kheueh ulôn mangat jeuet lôn peugah haba, dan ulôn teuma lôn pujo-pujo Droeneueh. 18 Droeneueh hana neuharôk keu keureubeuen nyang teusie; meunyoe ulôn peuseumah keureubeuen nyang teutot, Droeneueh hana neugalak. 19 Keureubeuen keu Po teu Allah na kheueh até nyang reumok reundam, até nyang tundok dan meutobat hana Droeneueh tulak. 20 Ya Allah, neutunyok kheueh keubaiékan Droeneueh ubak Sion, neupeudong kheueh lom bintéh-bintéh beuton Yerusalem. 21 Teuma Droeneueh neutem teurimong keureubeuen nyang layak, keureubeuen nyang teutot dan keureubeuen nyang mantong gét leumô agam teuma teukeureubeuen di ateueh meuja miseubah Droeneueh.

Zabur 52

1 Keu teupimpén kor. Ca-e-ca-e nyang geupeuruno lé Nabi Daud, 2 bak watée Doëg, ureuëng Edom, teuka jijak peugah ubak Saul bahwa Nabi Daud ka trok u rumoh Abimelekh. 3 Hai ureuëng teuga, pakon gata tapeusombong ateueh keujeuhetan gata ateueh ureuëng nyang geugaséh lé Po teu Allah? 4 Sipanyang uroe buet teumipée dan tareuncana keuhai buet jeuhet; lidah gata lagée sikin cuko nyang tajam. 5 Gata leubeh tacinta keu nyang jeuhet nibak nyang jroh, dan leubeh galak tameusulet nibak tapeugah haba nyang beuna. 6 Deungon tutoe haba gata, gata tapeungeut gob dan tapeusakét até ureuëng laén! 7 Teuma ingat kheueh gata geupeubinasa lé Po teu Allah keu siumu masa; gata geudrob dan geubahua nibak rumoh gata, dan laju geupeumaté lam donya ureuëng udeb. 8 Ban jingieng nyan, ureuëng saléeh laju teuka teumakot, dan laju jipeukém gata sira jipeugah, 9 "Nyan kheueh ureuëng jih nyang hán jitem meulindong ubak Po teu Allah, teuma jimeuharab keukayaan nyang meulimpah dan jimita keuamanan ubak barang rampasan." 10 Teuma ulôn nyoe lagée bak zaiton nyang ijo didalam Baét Allah. Ulôn peucaya bahwa Allah teutab geugaséh keu siumu masa. 11 Ulôn sabe keuneuk meusyuko ubak Droeneueh dikeue umat Droeneueh ulôn peusampoe keubaíekan Droeneueh.

Zabur 53

1 Keu teupimpén kor. Meunurot ca-e: Mahalat. Ca-e-ca-e peungajaran Nabi Daud. 2 Ureuëng bangai jikheun lam até jih. "Allah nyan hana." Buet awaknyan jeuhet dan kuto; hana nyang jipeubuet nyang jroh. 3 Lam syeuruga TUHAN geupandang umat manusia, ureuëng jimita ureuëng carông nyang seumah Gobnyan. 4 Teuma banmandum ureuëng ka meunyeuleweng dan beujat hana meusidroe pih nyang jipeubuet nyang jroh. 5 Geupeugah lé TUHAN, "Peu kheueh hana sadar ureuëng-ureuëng jeuhet nyan? Awaknyan udeb sira jireupah umat ulôn, dan hántom na jimeudoá ubak ulôn." 6 Ureuëng jeuhet teumakot that-that, padahai hana ureuëng nyang peutakot jihnyan, sabab Allah geupeuhambo tuleueng ureuëng nyang keupong gata; awaknyan ka geutulak lé Po teu Allah, teuma gata tapeutaloe awaknyan. 7 Nibak Bukét Sion teuka kheueh kira jih keuseulamatan keu Israel. Dan keuturonan Nabi Yakub meusukacita meunyoe TUHAN geupeupuléh keuadaan umat Gobnyan.

Zabur 54

1 Keu teupimpén kor. Deungon iréngan keucapi. Ca-e peungajaran Nabi Daud, 2 bak watée ureuëng Zifi teuka jijak peugah ubak Saul, "Nabi Daud geumusöm di teumpat kamoe." 3 Ya Allah, peuseulamat kheueh ulôn sabab kuasa Droeneueh, neubri kheueh keuadelan keu ulôn sabab teunaga Droeneueh. 4 Deungoe kheueh nyang ulôn lakée, ya Allah, sudi kheueh neudeungoe tutoe haba lôn. 5 Sabab ureuëng aséng jibeudôh jijak prang ulôn, ureuëng sombong jikeuneuk poh maté lôn, awaknyan hana jipakoe ubak Po teu Allah. 6 Teuma Allah na kheueh nyang tulông lôn; TUHAN na kheueh nyang bila lôn. 7 Gobnyan geuhuköm musoh lôn deungon keujeuhetan awaknyan keudroe, dan geupeubinasa awaknyan sabab Gobnyan seutia bak ulôn. 8 Deungon rila até ulôn peuseumah keureubeuen keu Droeneueh, dan meusyukoe ubak Droeneueh sabab Droeneueh gét, ya TUHAN. 9 Droneueh ka neupeulheueh ulôn nibak mandum nyang susah, dan lôn ngieng musoh lôn ka teupeutaloe.

Zabur 55

1 Keu teupimpén kor. Deungon peumeuén keucapi. Ca-e peungajaran Nabi Daud. 2 Ya Allah, neudeungoe kheueh doá ulôn, bék neupaleng nibak peue nyang ulôn lakée. 3 Neungieng kheueh ulôn dan neujaweueb kheueh ulôn, ulôn hanco sabab keusosahan lôn. 4 Até ulôn susah hana meuteuntée sabab jiancam lé musoh dan jitindéeh lé ureuëng jeuhet. Sabab awaknyan nyang peususah udeb ulôn, dan deungon jibeungéh jimeumusoh deungon ulôn. 5 Até ulôn lumpah geulisah, mawöt nyang lumpah teumakot nyan jeuet keuhantu lam tuboh lôn. 6 Badan lôn peunoh deungon yo dan teumakot nyang hana reuda, jiteugon teuma deungon peurasaan nyang gamang. 7 Ah, meunyoe bak lôn na sayeub lagée cicém mirah pati, ulôn po jakmita teumpat nyang teunang. 8 Nyoe, ulôn teuma lôn po sampoe óh jiôh, laju lôn tinggai diteungoh padang pasie. 9 Ulôn bagah-bagah lônjak mita teumpat meuceu teuhadab angén badée ngon puteng beuliong. 10 Ya TUHAN, neupeubingong kheueh dumna musoh lôn, neupeukirôh kheueh watée awaknyan jipeugah haba, sabab dibanda ulôn ngieng gob meupake dan ureuëng meulo. 11 Uroe malam awaknyan jikeulileng, jipeubuet nyang jeuhet dan jijak peukaru keudeh keunoe. 12 Dipat mantong na peunghancoran; seumeungeut teumeugom hana hase teupeugra di jeueb-jeueb keudée. 13 Meunyoe musoh nyang teunak ulôn, hainyan mantong ék ulôn teun. Meunyoe lawan nyang hina ulôn, mantong ék ulôn musöm nibak lawan nyan. 14 Teuma, na kheueh droeneueh, rakan ulôn, sahabat lôn, rakan lôn nyang paleng krab nyang khianat lôn. 15 Yoh masa ilée tanyoe meurakan paleng that krab, dan tajak iébadat meusajan-sajan u Baét TUHAN. 16 Bah kheueh musoh lôn maté meudab-dab dan udeb-udeb jitron u lam donya ureuëng maté, sabab keujeuhetan na di rumoh awaknyan, lamkawan awaknyan. 17 Teuma ulôn meulakée ubak Po teu Allah, TUHAN geupeuseulamat ulôn. 18 Uroe malam ulôn apoh apah dan ulôn mo, dan Gobnyan geudeungoe su ulôn. 19 Gobnyan nyang peuseulamat ulôn nibak jiprang lé musoh, nyang teuka meukawan-kawan jiparan ulôn. 20 Allah nyang mat peurintah nibak keukai teuma geudeungoe ulôn dan geupeutaloe awaknyan. Sabab awaknyan hana jitem tobat, dan hana jitakot ubak Po teu Allah. 21 Beukaih rakan lôn jijak prang rakan-rakan awaknyan, awaknyan ji iengkeue ubak janji jih. 22 Tutoe haba jih aloh meubujuk rayu, teuma lam até jih na jikeubah banci. Tutoe haba jih leumoh leumbot, teuma lagée teutôb deungon peudeueng nyang tajam. 23 Jok kheueh khawate gatanyan ubak TUHAN, dan Gobnyan geutulông gata; sabab ureuëng jujoe hana geupeubiyeu taloe. 24 Teuma Droeneueh, ya Allah, neukurong awaknyan u dalam uruek nyang paleng lhok. Ureuëng seumeunget dan tukang ro darah ureuëng nyan hana trok siteungoh pih nibak umu jihnyan. Teuma ulôn peucaya ubak Droeneueh.

Zabur 56

1 Keu teupimpén kor. Meunurot lagu: Mirah pati nyang seungab kalu, di daerah nyang jiôh. Zabur Nabi Daud bak watée ureuëng Filistin jidrob gobnyan di Gat. 2 Neugaséh kheueh bak ulôn, ya Allah, sabab ulôn nyoe ka jiprang, hana putôh-putôh ulôn nyoe jiteugom sabe lé musoh-musoh lôn. 3 Sipanyang uroe nyoe jigilo-gilo sabe lé lawan-lawan lôn; jai that-that nyang meumusoh keu ulôn, ya Allah Nyang Mahamanyang. 4 Bak watée ulôn teumakot, ulôn meuharab ubak Droeneueh. 5 Ulôn pujoe Allah sabab peue nyang ka geupeujanji; ulôn peucaya ubak Gobnyan, teuma ulôn hana teumakot, manusia hana meudaya keu ulôn. 6 Siuroe suntok musoh jipeukaru peukara ulôn, hana putôh-putôh jiuseuha keuneuk peuceulaka ulôn. 7 Awaknyan meusapat diteumpat nyang teusöm, jikalon peue mantong nyang ulôn peubuet, dan jimita keuseumpatan keu jipeumaté ulôn. 8 Peu kheueh na keuseulamatan keu buet jeuhet awaknyan? Neupeubinasa kheueh awaknyan watée Droeneueh teungoh beungéh, ya Allah! 9 Droeneueh neu itong uroe-uroe peungeumbaraan lôn, dan neuteupeue padubna jeumeulah ié mata lôn; peu kheueh nyan hana neu itong? 10 Bak uroe ulôn meulakée ubak Droeneueh, musoh teuma teupoh sampoe jisurot, sabab ulôn teupeue Allah geudong blah ulôn. 11 Ulôn pujoe TUHAN Allah, sabab peue nyang Gobnyan peujanji. 12 Ulôn peucaya ubak Gobnyan, teuma ulôn hana teumakot, manusia hana meudaya teuhadab ulôn. 13 Ulôn kupeutrok janji ubak Droeneueh, ya Allah, dan lôn peuseumah keureubeuen syukoe ubak Droeneueh. 14 Sabab Droeneueh neupeuseuliseh ulôn nibak mawöt, neujaga ulôn jeuet bék reubah. Nyang kheueh ulôn hase udeb lam lindongan Allah, dalam cahya nyang teupeutrang keu banmandum nyang udeb.

Zabur 57

1 Keu teupimpén kor. Meunurot lagu: Bék peumuseunah. Zabur Nabi Daud, bak watée gobnyan geuplueng u dalam guha keu geupeusie nibak Saul. 2 Neugaséh kheueh keu ulôn, ya Allah, neugaséh kheueh bak ulôn, sabab bak Droeneueh kheueh ulôn meulindong. Dimiyueb sayeub Droeneueh ulôn musöm, sampoe angén badée nyang teungoh jipot meubura jipiôh reuda. 3 Ulôn meulakée ubak Allah Nyang Mahamanyang, ubak Allah nyang meubuet keu ulôn. 4 Nibak lam syeuruga Gobnyan geujaweueb dan geupeuseulamat lôn; Gobnyan geupeutaloe bubena ureuëng nyang teugom lôn. Allah geutunyok bahwa Gobnyan seutia ubak ulôn, dan hana geupiôh geugaséh keu ulôn. 5 Ulôn jiparan ngon jikeupong lé musoh, awaknyan lagée singa bueh nyang jiseuba manusia. Gigo awaknyan lagée kapak dan aneuk panah, lidah awaknyan lagée peudeueng nyang tajam. 6 Ya Allah, neutunyok kheueh keu agongan Droeneueh di langét manyang, dan keumuliaan Droeneueh di ateueh bumoe. 7 Musoh lôn ka jipasang taron keu ulôn, dan jipeupatah seumangat ulôn. Awaknyan jikueh uruek bak rot ueh lôn, teuma awaknyan keudroe nyang rhot lam uruek nyan. 8 Ulôn peucaya peunoh, ya Allah, ulôn peucaya peunoh, ulôn kutem meuca-e dan lôn pujoe Droeneueh. 9 Hai beudôh kheueh, jiwa ulôn! Hai beudôh kheueh rapa-i dan keucapi! Ulôn keuneuk peubeudôh fajar. 10 TUHAN, ulôn keuneuk meusyuko ubak Droeneueh lamkawan bansa-bansa ulôn keuneuk meuca-e lagu seumujoe keu Droeneueh lamkawan umat manusia. 11 Sabab gaséh Droeneueh raya sampoe u langét manyang, dan gaséh seutia Droeneueh sampoe ubak awan. 12 Ya Allah, neutunyok kheueh keuagongan Droeneueh di langét, dan keumuliaan Droeneueh di ateueh bumoe.

Zabur 58

1 Keu teupimpén kor. Meunurot ca-e: Bék peumuseunah. Zabur Nabi Daud. 2 Hai bubena peunguasa, peu kheueh ade keuputosan gata nyan? Peu kheueh gata jujoe bak watée gata peuhakém manusia? 3 Hánjeuet, gata reuncana nyang jeuhet, dan tapeubuet keukeurasan di nanggroe nyoe. 4 Ureuëng jeuhet ka sisat yoh mantong lam pruet ma awaknyan ka jiteumipée watée jihnyan ka lahé. 5 Awaknyan meuracön lagée uleue meubisa, dan jisumpai punyueng jih lagée uleue kobra nyang tulo 6 nyang hana teudeungoe su pawang nyang carông, atawa su ureuëng meurajah nyang malem. 7 Ya Allah, neuwiet kheueh gigo-gigo awaknyan, neulot kheueh tarieng singa-singa muda nyan, ya TUHAN. 8 Bah kheueh awaknyan gadôh lagée ié paseung nyang teungoh jiék, lagée aneuk panah nyang ka tumpoi mata. 9 Bah kheueh awaknyan lagée sipot nyang meuliléh meujantang jeuet keu geuneuhéut, lagée aneuëk manyak maté sigohlom jingieng peungéuh. 10 Sigohlom teupeusadar, awaknyan ka binasa, lagée tamah meupaya nyang mantong ijo dan gohlom raya habéh jipupo lé angén, siulah-ulah nyan na kheueh sinaman tho. 11 Jikalon ureuëng jeuhet teuhuköm, ureuëng jujoe lumpah galak, dan teu rhah gaki jih lam darah nyang doraka. 12 Ureuëng ramé jipeugah, "Biet ureuëng nyang jroh meuteumé pahala, keubit, na Po teu Allah nyang jeuet keuhakém di ateueh bumoe."

Zabur 59

1 Keu teupimpén kor. Meunurot lagu: Bék peumuseunah. Zabur Nabi Daud, bak watée Saul geuyue ureuëng laén jak kawai rumoh gobnyan sabab jikeuneuk poh maté gobnyan. 2 Ya Allah ulôn, peuseulamat kheueh ulôn nibak bandum musoh lôn, neulindong kheueh ulôn nibak ureuëng nyang keuneuk jak seurang ulôn. 3 Neupeulheuh kheueh ulôn nibak ureuëng nyang keuneuk peubuet jeuhet, neupeusie kheueh ulôn nibak ureuëng-ureuëng nyang keuneuk poh maté lôn. 4 Ngieng kheueh, awaknyan ka jihampeueng keuneuk jipoh maté lôn, ureuëng-ureuëng keujam meusaho keuneuk lawan lôn; padahai kon sabab ulôn ka lôn peubuet desya atawa ulôn peubuet peulanggaran, ya TUHAN. 5 Meunan cit kon teuma sabab salah lôn, awaknyan meudab-dab dan meusiab-siab. 6 Beudôh kheueh, Allah Nyang Mahamanyang, tulông kheueh ulôn. Ya Allah Israel, neukalon keudroe. Beudôh kheueh dan neuhuköm kheueh bansa-bansa, bék neugaséh keu ureuëng jeuhet nyang meukhianat. 7 Bak watée uroe ka sinja awaknyan jiwo lom teuma, meuôe-ôe lagée asée sira jikeulileng banda. 8 Hana jipiôh awaknyan nariet meupansi sira meuhina; tutoe haba awaknyan tajam lagée mata peudeueng, jipike lé awaknyan hana nyang deungoe peue nyang jipeugah nyan. 9 Teuma Droeneueh neupeukém awaknyan, ya TUHAN, banmandum bansa nyan Droeneueh peuhina. 10 Droeneueh kheueh teunaga ulôn, ulôn meuharab that ubak Droeneueh, Droeneueh teumpat ulôn meungungsé, ya Allah. 11 Sabab keubaíekan Allah kheueh, Gobnyan teuka ubak ulôn, Gobnyan geupeubiyeu mantong lôn kalon bubena musoh lôn teupeutaloe. 12 Bék kheueh neupoh maté awaknyan, ya TUHAN, mangat bansa ulôn hana jituwoe. Peu crebre kheueh dan neupeutaloe kheueh awaknyan deungon kuasa Droeneueh, ya TUHAN peulindong ulôn. 13 Sabab awaknyan meudesya deungon tutoe haba jih keudroe; bah kheueh awaknyan meucarueh deungon meubagoe keusombongan jih, sabab awaknyan galak that jiseurapa dan meusulet ngon haba nyang hana beuna. 14 Peubinasa kheueh awaknyan lam beungéh Droeneueh, ya Allah, peubinasa kheueh awaknyan sampoe án habéh. Dan tieb-tieb ureuëng jiteupeue bahwa Allah geupeurintah Israel, dan peumeurintah Gobnyan luwah jimeu éue bansaboh bumoe. 15 Óh watée sinja awaknyan jigisa, meuôe-ôe lagée su asée sira jikeulileng banda. 16 Awaknyan jimeurawoh keudeh keunoe sira jimita uempeuen, dan laju jimeurawöng meunyoe pruet jih hana troe. 17 Teuma di ulôn meuca-e keuhai teunaga Droeneueh; tieb-tieb beungoh ulôn meuca-e deungon su nyang nyareng keuhai gaséh dan seutia Droeneueh. Sabab Droeneueh kheueh teumpat ulôn peusiblah droe, teumpat ulôn meulindong bak watée susah. 18 Ya Allah, teunaga lôn, ulôn meuca-e lagu puja ngon pujoe ubak Droeneueh, sabab Droeneueh kheueh teumpat ulôn meulindong. Ya Allah, geunaséh ulôn.

Zabur 60

1 Keu teupimpén kor. Meunurot lagu: Bungöng bakong keusaksian. Zabur peungajaran nibak Nabi Daud, 2 bak watée gobnyan geujak prang ureuëng Aram-Mesopotamia dan ureuëng Aram-Zoba, dan bak watée Yoab geuwoe dan geupeutaloe 12.000 droe ureuëng Edom di Pantôn Asin. 3 Droeneueh neutulak kamoe, ya Allah, dan neupeubiyeu kamoe jipeutaloe lé awaknyan. Droeneueh beungéh keu kamoe; jinoenyoe neupeupuléh kheueh kamoe. 4 Droeneueh neuguncang bumoe sampoe crah; neupeugét kheueh nyang ka beukah-beukah, sabab bumoe guyah. 5 Neupeubiyeu umat Droeneueh jirasa deurita nyang keubit that brat; kamoe mumang meuayon-ayon lagée ureuëng mabök. 6 Neupeuingat ubak ureuëng nyang taqwa, jeuet awaknyan meusiliseh nibak mara bahya. 7 Peuseulamat kheueh kamoe deungon kuasa Droeneueh, neujaweueb kheueh doá kamoe, mangat ureuëng-ureuëng nyang Droeneueh gaséh teupeuseulamat. 8 Nibak teumpat tinggai Gobnyan nyang suci Po teu Allah geupeugah, "Ulôn keuneuk seumurak dan Ulôn weuek-weuek tanoh Sikhem; Pantôn Sukot Ulôn undi. 9 Gilead dan Manasye na kheueh atra Ulôn, Efraim tupi waja Lôn, dan Yehuda tungkat keurajeuen Lôn. 10 Teuma Moab na kheueh teumpat Ulôn rhah gaki, Ulôn meusurak keumeunangan ateueh Filistea. Ubak Edom Ulôn rhom seulôb Lôn sibagoe tanda bahwa jihnyan na kheueh atra Ulôn." 11 Soe nyang ba ulôn u Edom? Soe nyang peu taktéh ulôn u banda nyang meukuta nyan? 12 Ya Allah, peu kheueh Droeneueh hana neuseutôt meusajan kamoe? Peu kheueh Droeneueh hana neumaju meusajan tantra kamoe? 13 Tulông kheueh kamoe ateueh musoh kamoe, sabab bantuan manusia hana meuguna. 14 Meusajan Allah, geutanyoe gagah peukasa, Gobnyan kheueh nyang peutaloe bubena musoh geutanyoe.

Zabur 61

1 Keu teupimpén kor. Deungon peumeuén keucapi. Nibak Nabi Daud. 2 Deungoe kheueh doá ulôn, ya Allah, deungoe kheueh nyang ulôn lakée. 3 Jiôh nibak rumoh ulôn meulakée ubak Droeneueh, sabab ulôn putôh asa. aman, teumpat nyang lumpah that manyang nibak ulôn; 4 sabab Droeneueh kheueh teumpat ulôn meulindong, peutahanan nyang paleng kong ateueh musoh lôn. 5 Bah kheueh ulôn siumu udeb lôn meunumpang nibak Khimah Droeneueh, mangat lôn aman dimiyueb sayeub Droeneueh. 6 Sabab Droeneueh ka neudeungoe janji ulôn, ya Allah, dan neubri bak lôn milék pusaka ureuëng nyang taqwa. 7 Seumoga raja panyang umu, jeuet gobnyan hase udeb tron meutron. 8 Seumoga gobnyan geumat peurintah keu siumu masa sibagoe raja nyang neupiléh, ya Allah, lindong kheueh geuhnyan deungon gaséh dan seutia Droeneueh. 9 Dan ulôn hana putôh lôn meuca-e lagu puja dan pujoe keu Droeneueh, sira lôn peutrok janji lôn nibak uroe ubak uroe.

Zabur 62

1 Keu teupimpén kor. Meunurot: Yedutun. Zabur Nabi Daud. 2 Deungon teunang jiwa lôn preh Po teu Allah, nibak Gobnyan mantong nyang na keuseulamatan lôn. 3 Dan Gobnyan nyang lindong dan peuseulamat lôn, Gobnyan nyang bila ulôn, sabab nyan ulôn hana guyah. 4 Trok án pajan gata banmandum taprang gob nyang ka lagée bintéh singét dan bintéh beuton nyang karab reuloh? 5 Gata na niet keuneuk tapeureubah gobnyan nibak keududuekan gobnyan nyang manyang. Gata galak that tapeugah haba beurakah; deungon babah gata, gata bri beureukat, teuma lam até gata takutok. 6 Deungon teunang jiwa ulôn preh Po teu Allah, nibak Gobnyan mantong kheueh ulôn na seulamat. 7 Dan Gobnyan nyang lindong dan peuseulamat lôn; Gobnyan nyang bila lôn, sabab nyan ulôn hana guyah. 8 Gobnyan kheueh Allah nyang bri keu ulôn seulamat dan keuhoreumatan, Gobnyan kheueh peulindong lôn nyang bila lôn nyang teuga. 9 He bansa lôn, meuharab kheueh ubak Allah tieb-tieb watée; sintong kheueh asoe até gata ubak Gobnyan, sabab Gobnyan teumpat geutanyoe meulindong. 10 Manusia nyoe na kheueh lagée nafáh nyang teuprôh, cut rayeuk saban mantong hana meuhareuga. Meunyoe teutimang, awaknyan teunyata phui leubeh phui nibak nafáh nyang teubiet rot idong atawa babah. 11 Bék taharab bak hase atra gob nyang teucok deungon cara teupeutakot, dan bék teuma tapeumeugah droe deungon hase atra teureupah. Bahkan meunyoe keukayaan gata meutamah-tamah, bék teuma até gata meuleukek nibak hareutanyan. 12 Na padubgoe ulôn deungoe Po teu Allah geupeugah haba bahwa keukuasaan na kheueh meuasai nibak Gobnyan, 13 dan bahwa Gobnyan teutab na geunaséh.

Zabur 63

1 Zabur Nabi Daud, bak watée gobnyan mantong di padang pasi guron Yehuda. 2 Ya Allah, Droeneueh kheueh Allah lôn, ulôn mita dan ulôn rindu that ubak Droeneueh. Lagée tanoh nyang tho kreng nyang glah keuneuk jieb ié, meunan kheueh ulôn nyang glah ubak Droeneueh. 3 Bah kheueh ulôn pandang Droeneueh rot Baét Droeneueh, dan lôn ngieng teunaga ngon keuagongan Droeneueh. 4 Geunaséh Droeneueh leubeh meuyuém nibak udeb, sababnyan kheueh ulôn pujoe Droeneueh. 5 Siumu udeb ulôn meusyukoe ubak Droeneueh; ulôn beuôt jaroe ubak Droeneueh sira lôn meudoá. 6 Ulôn pujoe Droeneueh sira lôn seumurak ngon geumbira, sabab Droeneueh neupeupueh jiwa ulôn saban rasa jih lagée lôn pajoh peunajoh nyang lazat. 7 Watée ulôn éh nibak teumpat éh; ulôn ingat ubak Droeneueh, si malam beungoh ulôn meu dhike ubak Droeneueh, 8 sabab Droeneueh ka neutulông ulôn; dimiyueb sayeub Droeneueh ulôn meuca-e deungon geumbira. 9 Ulôn mat Droeneueh nyang lumpah that kong, jaroe Droeneueh neutumpang ulôn. 10 Teuma ureuëng-ureuëng nyang keuneuk peumaté lôn ureuëng nyan jitron u lam donya ureuëng maté. 11 Awaknyan maté dimideuen prang, dan bangke jih jeuet keupeunajoh beulatang bueh. 12 Raja geumbira sabab peutulôngan lé Po teu Allah; ureuëng nyang meubudok deumi Po teu Allah jimeusukaria, teuma babah ureuëng meusulet geusumpai.

Zabur 64

1 Keu teupimpén kor. Zabur Nabi Daud. 2 Ya Allah, neudeungoe kheueh doá ulôn bak watée ulôn jiteuka susah, peuseulamat kheueh nyawöng lôn nibak musoh nyang keujam. 3 Lindong kheueh ulôn nibak kawan ureuëng nyang doraka, dan nibak reuncana licek ureuëng-ureuëng jeuhet. 4 Awaknyan jipeujeuet lidah jih tajam lagée mata peudeueng, dan jipeulheueh haba nyang keujam saban sa ngon aneuk panah. 5 Nibak teumpat jimusöm awaknyan laju jitabu calitra nyang hana beuna, hana jitakot-takot laju jipiteunah ureuëng nyang hana meusalah. 6 Awaknyan jimumat kong that ubak niet nyang jeuhet, dan jimeurok pakat keuneuk jipasang peurangkab; jisangka lé awaknyan hana ureuëng nyang kalon. 7 Awaknyan jireuncana buet nyang jeuhet, dan jipeugah, "Kamoe ka kamoe peugot reuncana nyang keubit ceureudek." Até dan budho manusia keubit that lhok, hana hase ureuëng seunom lam até nyan. 8 Teuma Allah geutimbak aneuk panah Gobnyan ateueh awaknyan, dan bak saát nyan cit awaknyan keunong dan luka. 9 Awaknyan binasa sabab tutoe jih keudroe; soemantong nyang kalon jihnyan meu asek ulée. 10 Dan banmandum ureuëng jiteuka teumakot; awaknyan laju jipike buet Po teu Allah dan jijak peusampoe peue nyang ka jipeubuet. 11 Dan banmandum ureuëng jroh-jroh geumbira sabab peue nyang geupeubuet lé TUHAN. Awaknyan meulindong ubak Gobnyan; banmandum ureuëng jujoe jipeumegah droe.

Zabur 65

1 Keu teupimpén kor. Zabur Nabi Daud. Lagu. 2 Patot kheueh kamoe pujoe Droeneueh di Sion, ya Allah, dan kamoe peupeunoh janji kamoe ubak Droeneueh. 3 Sabab Droeneueh nyang peukabui doá; banmandum ureuëng jijak ubak Droeneueh sabab ka meudesya. 4 Desya-desya lôn lumpah that geuhon nibak ulôn, teuma Droeneueh kheueh nyang peu amphon. 5 Mubahgia kheueh ureuëng nyang Droeneueh piléh, dan neutawök mangat jitinggai di Baét Droeneueh. Kamoe neupeupueh deungon peue mantong nyang gét di Baét Droeneueh, teumpat tinggai Droeneueh nyang suci. 6 Droeneueh neujaweueb kamoe deungon cara neubri bak kamoe keumeunangan, neupeubuet hai-hai nyang ajaéb guna keu neupeuseulamat kamoe! Droeneueh kheueh harapan banmandum bansa sampoe u laôt nyang jiôh. 7 Deungon teunaga Droeneueh neupeujeuet gunong-gunong, keu neutunyok kuasa Droeneueh nyang peukasa. 8 Droeneueh peureuda laôt nyang meubura-bura dan umbak geulumbang nyang meualon-alon, dan Droeneueh peuseungab bansa-bansa nyang teungoh karu. 9 Banmandum peunduduek bumoe teumakot dan horeumat óh jikalon buet-buet Droeneueh nyang hebat. Banmandum bumoe phon di timu trok u barat meusurak geumbira sabab Droeneueh nyang yue meunan. 10 Tanoh nyan Droeneueh peulara dan neu peutron ujeuen, dan tanoh nyan neupeujeuet gumbô ngon subô jeuet na hase jih meulimpah ganda. Meunan cit deungon bubena krueng-krueng neupasoe deungon ié nyang peunoh meuruwah, dan neupeuna teuma gandom keu peunajoh awaknyan, nyoe, meunan kheueh cara jih Droeneueh keubah atra keu peunajoh awaknyan. 11 Meunan cit Droeneueh peujeuet lueng-lueng ié nyang le dan neusiram tanoh-tanoh nyang meugicai-gicai sampoe án basah. Tanohnyan Droeneueh nyang peugumbô deungon ié ujeuen, dan neujamin tarôk-tarôk jih sampoe jitimoh subô. 12 Lé sabab jroh Droeneueh teuma, tieb-tieb thon neupeuna musém keumeukoh; bak watée Droeneueh teuka, watéenyan kana keulimpahan. 13 Di dalam padang pasie ka peunoh deungon kaméng bubiri, banmandum bukét meusuka ria. 14 Dalam blang-blang naleueng nyang luwah ka peunoh meuasoe deungon bubiri nyang teungoh jimeurot, meunan cit deungon bubena pantôn ka peunoh deungon lampôh gandom. Banmandum meusurak dan meuca-e deungon peunoh geumbira.

Zabur 66

1 Keu teupimpén kor. Saboh lagu. bumoe! 2 Meuca-e kheueh dan peu agong kheueh nan Gobnyan, peumulia kheueh Gobnyan deungon lagu zike puja ngon pujoe. 3 Tapeugah kheueh ubak Po teu Allah, "Keubit lumpah that kagom buet Droeneueh! Musoh jitundok ubak Droeneueh peunoh deungon teumakot, sabab kuasa Droeneueh nyang lumpah raya. 4 Bansaboh bumoe jisujut jiseumah Droeneueh, awaknyan jimeuca-e ngon jimeunyanyoe jipujoe nan Droeneueh." 5 Teuka kheueh dan ngieng kheueh buet Allah, keubit that hireuen karya-karya Gobnyan di teungoh-teungoh manusia! 6 Laôt hase geubah jeuet keu tanoh tho, indatu kamoe geujeumeurang laôt nyan deungon tapak gaki. Dan kamoe geumbira that sabab buet Droeneueh nyan. 7 Gobnyan geumat peurintah deungon peukasa keu siumu masa. Bansa-bansa geukawai, mangat peumbeurontak hana hase jipeusombong droe ateueh Gobnyan. 8 Pujoe kheueh Allah kamoe, hai bansa-bansa, talakée kheueh pujoe gatanyan ubak Gobnyan! 9 Gobnyan ka geujaga kamoe mangat teutab udeb, dan hana geupeubiyeu kamoe nyoe reubah. 10 Ya Allah, Droeneueh ka neu ujoe kamoe lagée ureuëng jiseupoh pirak didalam apui. 11 Neupeubiyeu kamoe reubah u dalam jeunieb, dan neupeudieng beuban nyang lumpah geuhon. 12 Neupeubiyeu kamoe jigilo-gilo lé musoh; kamoe laju ngob lam ié raya dan apui nyang hu meubara. Teuma jinoenyoe kamoe ka lheueh neuba u teumpat nyang makmu. 13 Ulôn lônba keureubeuen nyang teutot u Baét Droeneueh dan lôn peuteupat janji lôn ubak Droeneueh, 14 janji nyang ulôn peugah bak watée ulôn dalam keusosahan. 15 Ulôn peuseumah ubak Droeneueh keureubeuen nyang teutot nibak beulatang nyang teupiléh, kaméng bubiri dan leumô agam, asab jipo manyang u langét. 16 Teuka kheueh dan deungoe kheueh, hai ureuëng nyang taqwa, ulôn peugah peue nyang ka geupeubuet lé Allah keu ulôn. 17 Ulôn ka lôn meuhôi lôn lakée tulông ubak Gobnyan; jinoenyoe ulôn meuca-e lagu pujoe keu Gobnyan. 18 Meunyoe ulôn galak lôn pike keu buet nyang jeuhet, pasti TUHAN hana geutem deungoe peue nyang ulôn peugah. 19 Teuma Po teu Allah ka geudeungoe ulôn, Gobnyan that geupakoe peue nyang ulôn lakée. 20 Ulôn pujoe Allah sabab Gobnyan hana geutulak doá ulôn, hana teuma geupiôh geusayang keu ulôn.

Zabur 67

1 Keu teupimpén kor. Deungon peumeuén keucapi. Zabur. 2 Seumoga Po teu Allah geugaséh dan geubri beureukat keu geutanyoe, seumoga Gobnyan geupandang tanyoe deungon murah até. 3 Ya Allah, seumoga keuheundak Droeneueh jituri lé gob bansaboh bumoe, dan keuseulamatan Droeneueh jipeusampoe ubak banmandum bansa. 4 Seumoga bansa-bansa jipujoe Droeneueh, ya Allah Po, seumoga banmandum bansa meusyukoe ubak Droeneueh. 5 Seumoga banmandum bansa meusurak geumbira, dan jimeuca-e deungon peunoh geumbira. Sabab Droeneueh neumat peurintah deungon ade dan neubimbéng tieb-tieb bansa nyang na di ateueh bumoe. 6 Seumoga bansa-bansa jipujoe Droeneueh, ya Allah Po, seumoga banmandum bansa jimeusyukoe ubak Droeneueh. 7 Tanoh ka jibri hase, Po teu Allah, Allah geutanyoe ka geubri beureukat keu geutanyoe. 8 Po teu Allah ka geubri beureukat keu geutanyoe; seumoga Gobnyan jihoreumat bansigom donya!

Zabur 68

1 Keu teupimpén kor. Zabur Nabi Daud. 2 Allah geubeudôh geujak peu crebre bubena musoh Gobnyan, ureuëng nyang banci Gobnyan laju jiplueng dikeue Gobnyan. 3 Allah geu use mangat awaknyan jijak, lagée asab nyang teuplôh laju gadôh. Lagée lilen nyang meuliléh lam apui, meunan kheueh ureuëng jeuhet teusampôh dikeue Po teu Allah. 4 Teuma ureuëng saléeh meusukacita dan meugeumbira, awaknyan jiseumurak geumbira dikeue Po teu Allah. 5 Meuca-e kheueh keu Allah, dan pujoe kheueh nan Gobnyan, peusiab laju jalan raya keu Gobnyan nyang geuduek lam keundeuraan awan. Nan Gobnyan TUHAN -- meuseunang-seunang kheueh dikeue Gobnyan! 6 Po teu Allah nyang tinggai di Baét Gobnyan nyang suci na kheueh ureuëng syiek aneuëk yatem dan nyang bila inong balée. 7 Meunan cit Allah geubri teumpat tinggai keu ureuëng-ureuëng nyang udeb jih seudeh; Gobnyan geupeubeubaih ureuëng nyang teuteuen lam peunjara sampoe awaknyan bahgia. Teuma keu ureuëng nyang jilawan TUHAN harôh jiduek nibak tanoh nyang hana hase udeb sapeue. 8 Ya Allah, watée Droeneueh neubimbéng umat Droeneueh geujak geuliwat rot jalan nyang tho kreng, 9 bumoe meuayon, ujeuen jitoh dikeue Droeneueh, sabab teuka Po teu Allah Sinai, Allah Israel. 10 Deungon meulimpah Droeneueh peutron ujeuen, dan neupeupuléh tanoh Droeneueh nyang tho kreng. 11 Dan umat Droeneueh pih laju tinggai teutab disinan; lam keubaiékan Droeneueh, ya Allah, Droeneueh neupeulara ureuëng gasien. 12 TUHAN geubri peurintah, dan laju di ureuëng inong jijakba haba: 13 "Raja-raja dan pasokan jihnyan ka habéh jiplueng!" Awaknyan jiplueng lagée cicém mirah pati nyang jipo meutaga. Di ureuëng inong dirumoh laju geubagi-bagi, pirak deungon méuh nyang ka jitinggai. Bahpi le that nyang hana jitamong lam prang, umat Po teu Allah ka meuteumé meunang. 15 Watée Nyang Mahakuasa geunyerak raja-raja disinan, jitron kheueh salju di ateueh Gunong Salmon. 16 Gunong Basan na kheueh gunong nyang hebat, gunong nyan pucak jih le that. 17 Pakon nibak pucak droeneueh nyang le nyan droeneueh neupandang deungon ceumburu ubak Bukét Sion nyang ka geupiléh lé Allah keu teumpat tinggai Gobnyan? TUHAN tinggai disinan keu siumu masa. 18 Deungon geuritan nyang teuga-teuga nyang le jih meuploh-ploh ribée boh Allah teuka di teungoh-teungoh awaknyan nyang peunoh deungon keuagongan. 19 TUHAN geuék u teumpat nyang paleng manyang; jai that tawanan nyang geuba sajan. Gobnyan geuteurimong peuseumahan lamkawan manusia dan lamkawan kawöm nyang beurontak pih; mangat awaknyan tinggai meusajan deungon TUHAN Allah. 20 Pujoe kheueh TUHAN, sabab Gobnyan kheueh Allah nyang peuseulamat geutanyoe; nibak uroe u uroe Gobnyan geu seuôn beuban geutanyoe. 21 Allah geutanyoe na kheueh TUHAN nyang peuseulamat geutanyoe, Gobnyan nyang peubeubaih geutanyoe nibak mawöt. 22 Allah pasti geupeureumok ulée musoh Geuh, dan ureuëng-ureuëng nyang hana putôh udeb didalam desya. 23 Feureuman TUHAN, "Hai umat Lôn, Ulônba musoh gata nibak Basan Ulôn ba awaknyan lom lam laôt raya, 24 mangat gata tarhah gaki gata deungon darah awaknyan, dan asée-asée gata jijak lieh sipueh-pueh jih." 25 Banmandum ureuëng jikalon pawai keumeunangan Droeneueh, ya Allah, Allah ulôn, Raja lôn, jiarak u teumpat tinggai Gobnyan. 26 Dikeue that jijak ureuëng-ureuëng meulagu, dilikotnyan teuma jijak ureuëng peumeuén keucapi; diteungoh-teungoh jijak aneuëk-aneuëk dara nyang peh rapa-i; meunoe kheueh ca-e dan lagu awaknyan: 27 "Pujoe kheueh Allah lamkawan himponan umat Gobnyan, Pujoe kheueh TUHAN, hai banmandum keuturonan Nabi Yakub!" 28 Benyamin, sukée nyang paleng ubit, jijak dikeue that, óh lheuehnyan laju deuh meurön-rön bubena peumuka Yehuda dilikot gobnyan deuh teuma bubena peumuka Zebulon dan Naftali. 29 Allah gata geutuntot teunaga gata; ya Allah, neupeukong kheueh peue nyang ka Droeneueh peubuet keu kamoe. 30 Raja-raja jiba peuseumahan ubak Droeneueh di Baét Droeneueh di Yerusalem. 31 Neudumpék kheueh nanggroe Meusé, beulatang bueh nyan di teungoh geulagah. Neuteugah kheueh bansa-bansa, kawan banteng nyan deungon aneuëk-aneuëk jih, nyang saléng jimeu bloh-bloh mangat meuteumé pirak. Allah geupeu crebre bansa-bansa nyang galak keu prang. 32 Ureuëng-ureuëng rayeuk nanggroe Meusé jiteuka jijak ba teumaga; ureuëng Sudan meugageh-gageh jiba bungöng jaroe ubak Po teu Allah. 33 Meuca-e kheueh ubak Allah, hai banmandum keurajeuen nanggroe, meuca-e kheueh nyanyian puja-pujoe keu TUHAN, 34 keu Gobnyan nyang geulintéh angkasa purbakala. Deungoe! TUHAN meufeureuman, su Gobnyan meugeunta deungon dahsyat. 35 Aku kheueh kuasa Allah nyang meudelat ateueh Israel, kuasa Gobnyan trok u langét. 36 Keubit that takjob Allah geutanyoe watée Gobnyan geuteubiet di teumpat tinggai Geuh. Allah Israel geubri kuasa dan teunaga ubak umat Gobnyan.

Zabur 69

1 Keu teupimpén kor. Meunurot lagu: Bungöng Bakong. Nibak Nabi Daud. 2 Peuseulamat kheueh ulôn, ya Allah, sabab ié ka jiék trok bak takue lôn. 3 Ulôn meusuruek lam paya nyang lhok, hana teumpat ulôn meugilo. Ulôn ngob lam ié nyang lhok, jipeuhanyöt lé geulumbang paseueng nyang raya. 4 Ulôn meuhôi-meuhôi sampoe án hék dan rukuéng ulôn sampoe tho kreng. Mata lôn peudeh lôn preh bantuan Allah. 5 Ureuëng nyang banci ulôn hana alasan, leubeh le nibak ôk nyang na ateueh ulée lôn. Di ureuëng-ureuëng teuga keuneuk peubinasa lôn; awaknyan jiseurang ulôn deungon fiteunah nyang keuji. Bak ulôn jipaksa ulôn jokpulang hareuta nyang kon hareuta lôn reupah. 6 Ya Allah, Droeneueh neuteupeue buet-buet ulôn nyang salah desya ulôn hana nyang teusöm nibak Droeneueh. 7 Bék neupeubiyeu ulôn teupeuteuka malée ya Allah lôn ateueh ureuëng-ureuëng nyang meuharab ubak Droeneueh, ya TUHAN, Allah Nyang Mahakuasa. Bék neupeubiyeu ulôn teupeuteuka nista ateueh ureuëng-ureuëng nyang jiseumah Droeneueh, ya Allah Israel! 8 Sabab lé Droeneueh kheueh ulôn jipeujayéh ngon jihina, dan sabab Droeneueh kheueh ulôn jiseurapa. 9 Ulôn jeuet lagée ureuëng aséng nibak kawöm syedara lôn, lagée ureuëng luwa nibak cutda adoe lôn. 10 Seumangat lôn hu meuháb-háb sabab cinta lôn keu Baét Droeneueh, hinaan dan seurapa ureuëng nyang jihina Droeneueh ka keunong ateueh ulôn. 11 Ulôn meuba-e ngon puasa, teuma awaknyan jihina lôn. 12 Ulôn ngui ija krong sibagoe tanda ulôn meuduka cita, teuma awaknyan jipansi ulôn. 13 Ulôn jeuet keu boh bibi gob dipat mantong na ureuëng meugumpôi ngon meuhudom, dan nyanyoe ureuëng-ureuëng mabök na kheueh keuhai ulôn. 14 Teuma ulôn meudoá ubak Droeneueh, ya TUHAN, ya Allah, neujaweueb kheueh ulôn bak watée nyang get. Tulông kheueh ulôn sabab geunaséh Droeneueh nyang raya dan sabab keuseutiaan Droeneueh. 15 Bék kheueh neupeubiyeu ulôn ngob buhuek di dalam paya, peuseulamat kheueh ulôn nibak ureuëng-ureuëng nyang banci ulôn dan nibak ié nyang lhok. 16 Bék neupeubiyeu ulôn jipeuhanyöt lé geulumbang paseueng, dan lam bak teungoh laôt atawa jiseubée dalam uruek. 17 Jaweueb kheueh ulôn, ya TUHAN, sabab Droeneueh get dan teutab neugaséh keu ulôn. Neutem kheueh meupaleng ubak ulôn sabab raya that geunaséh Droeneueh ubak ulôn. 18 Bék kheueh neumusöm nibak hamba Droeneueh nyoe, sabab ulôn sosah, bubagaih kheueh neutulông lôn. 19 Teuka kheueh neupeuseulamat ulôn, neupeubeubaih kheueh ulôn nibak banmandum musoh-musoh lôn. 20 Droeneueh neuteupeue pakriban awaknyan jirapa ngon jihina ulôn nyoe Droeneueh neungieng banmandum musoh ulôn. 21 Peunghinaan nyang jikheun lé awaknyan jeuet keusabab ulôn jeuet keu ureuëng patah até, dan lé sabab nyan ulôn putôh asa. Ulôn mita gaséh sayang, teuma sia-sia, ulôn mita peunghibur, nyan pi hana lôn teumé. 22 Dan keu ulôn jijok tuba jeuet teupajoh; watée ulôn grah, keu ulôn jibri ié cuka. 23 Bah kheueh peujamé awaknyan jeuet keu bala, dan jeuet keupeurangkab keu jamé-jamé awaknyan. 24 Bah kheueh mata awaknyan jeuet keubuta dan ruéng likot awaknyan jeuet keuleumoh. 25 Neurö kheueh beuhabéh beungéh Droeneueh nyan ateueh awaknyan, bah kheueh awaknyan keunong lé meureuka Droeneueh nyang hu meutaga. 26 Bah kheueh peukhimahan awaknyan seungue ngon seungab, dan khimah-khimah awaknyan hana ureuëng nyang keumiet. 27 Sabab awaknyan ji iénanya ureuëng nyang Droeneueh huköm, dan jipeugah-peugah keu ureuëng-ureuëng nyang Droeneueh seksa. 28 Bah kheueh salah awaknyan meutamah le; bék neupeubeutôi awaknyan. 29 Bah kheueh nan awaknyan teusampôh lam kitab ureuëng udeb; dan hana teucatet lam dafeutar ureuëng jujoe. 30 Teuma ulôn teutindéeh dan sakét that, beuôt kheueh ulôn, ya Allah, dan peuseulamat kheueh ulôn. 31 Dan ulôn kupujoe Allah deungon lagu dan nyanyoe, lôn peuagong Gobnyan deungon zike dan syukoe. 32 Nyan leubeh geugalak lé TUHAN nibak keureubeuen leumô, keureubeuen leumô agam nyang raya. 33 Ban jingieng nyang lagée nyan, ureuëng nyang teutindéeh lumpah geumbira, ureuëng nyang seumah Allah rayeuk that até. 34 Sabab TUHAN geudeungoe su ureuëng gasien; Gobnyan hana geupeubiyeu umat Gobnyan nyang na didalam peunjara. 35 Pujoe kheueh Allah, hai langét dan bumoe, laôt dan banmandum makhluk nyang na didalam nyan. 36 Gobnyan geupeuseulamat Yerusalem dan geupeudong lom banda-banda Yehuda. Umat TUHAN tinggai teutab disinan; tanoh nyan jeuet keuhak milék awaknyan. 37 Aneuëk cucoe awaknyan jeuet keuwaréh; ureuëng-ureuëng nyang cinta ubak TUHAN nyang tinggai disinan.

Zabur 70

1 Keu teupimpén kor. Nibak Nabi Daud, bak watée teupeuseumah keureubeuen peuingat. 2 Ya Allah, peuseulamat kheueh ulôn, TUHAN, bubagaih kheueh neujak tulông lôn! 3 Bah kheueh ureuëng nyang keuneuk poh maté lôn nyan neupeutaloe dan jiplueng sabab ka bingong. Bah kheueh ureuëng nyang jisurak keuhai malang ulôn nyan teupoh jisurot dan teuhina. 4 Bah kheueh ureuëng nyang jipeukém ulôn nyan jeuet keuteukeujot dan malée. 5 Seumoga banmandum ureuëng nyang jiseumah Droeneueh meusuka cita dan meugeumbira; dan banmandum ureuëng nyang jicinta keuseulamatan nibak Droeneueh hana putôh jipeugah, "Keubit agong that TUHAN!" 6 Ulôn nyoe gasien dan leumoh; teuka kheueh bubagaih, ya Allah. Droeneueh kheueh nyang peuseulamat dan nyang tulông lôn, bék meulet, ya TUHAN.

Zabur 71

1 Bak Droeneueh ulôn meulindong, ya TUHAN, bék neupeubiyeu ya TUHAN, ulôn nyoe jipeumalée. 2 Peulheueh kheueh ulôn, sabab Droeneueh ade, deungoe kheueh dan peuseulamat kheueh ulôn. 3 Neupeujeuet kheueh keu ulôn lagée gunong batée teumpat ulôn tinggai, nyang mudah ulôn jak keunan tieb-tieb watée. Sabab Droeneueh ka neupeuputôh keu neupeuseulamat ulôn, Droeneueh kheueh teumpat ulôn meulindong dan teumpat lôn meuceue. 4 Ya Allah lôn, neupeuseuliseh kheueh ulôn nibak mara bahya, nibak kuasa ureuëng-ureuëng jeuhet nyang lalem dan keujam. 5 Sabab Droeneueh kheueh harapan ulôn, ya TUHAN, TUHAN, ulôn peucaya ubak Droeneueh yoh phon umu lôn mantong muda. 6 Simantong lôn udeb ulôn meusadeu ubak Droeneueh; Droeneueh kheueh nyang lindong ulôn yoh phon ulôn geupeulahé lé ma lé sababnyan ulôn sabe lôn pujoe Droeneueh. 7 Udeb ulôn jeuet keuteuladan keu ureuëng le, sabab Droeneueh kheueh peulindong ulôn nyang paleng teuga. 8 Ulôn sabe lôn pujoe Droeneueh, sipanyang uroe ulôn jak peugah keuagongan Droeneueh. 9 Bék kheueh neutiek ulôn watée ulôn ka tuha lagée nyoe bék teuma neutinggai ulôn meunyoe teunaga ulôn ka habéh, 10 sabab musoh-musoh lôn jipeugah sabe, ureuëng-ureuëng yang keuneukpoh maté lôn jimeukumplot. 11 Kheun Awaknyan, "Jihnyan ka geutinggai lé Po teu Allah; jak tatiyeub dan tadrob jihnyan, sabab hana soele nyang peuseulamat jih nyan." 12 Bék kheueh Droeneueh jiôh nibak ulôn, ya Allah, Allah lôn, neutulông kheueh ulôn deungon sigra. 13 Bah kheueh ureuëng nyang prang ulôn neupeumalée dan neusampôh nibak muka bumoe. Meunan cit bah kheueh ureuëng nyang keuneuk peuceulaka ulôn jiteuka bingong dan bansaboh tuboh jih keunong hina. 14 Teuma ulôn sabe meuharab ubak Droeneueh, dan seumaken le lôn pujoe Droeneueh. 15 Tieb uroe sabe ulôn calitra buet-buet Droeneueh nyang ade, dan keuseulamatan nibak Droeneueh nyang hana teukira. 16 Ulôn pujoe buet-buet Droeneueh nyang peukasa, ya TUHAN Allah, ulôn peumeusyeuhu keuadelan Droeneueh, keuadelan Droeneueh mantong. 17 Ya Allah, Droeneueh kheueh nyang peurunoe ulôn yoh phon ulôn nyoe mantong muda, sampoe án jinoe ulôn kisah buet Droeneueh nyang takjob luwa biasa nyan. 18 Ya Allah, bék kheueh neutinggai ulôn, sampoe ulôn tuha dan putéh ôk nibak ulée, mangat hase ulôn peusampoe kuasa dan keupeukasaan Droeneueh nyang luwa biasa ubak keuturonan kamoe nyang teuka. 19 Ya Allah, keuadelan Droeneueh manyang santeut éut langét; rayeuk that kheueh buet-buet Droeneueh; hana nyang hase jipeusabe droe jih saban lagée ngon Droeneueh? 20 Droeneueh neubri keu ulôn peundeuritaan nyang lumpah brat, teuma Droeneueh neupeupuléh teunaga ulôn dan neupeubeudôh ulôn dalam jrat. 21 Droeneueh neupeujeuet ulôn leubeh teuhoreumat, dan neuhibô ulôn lom. 22 Ulôn keuneuk pujoe Droeneueh deungon rapa-i gambus, sabab Droeneueh seutia, ya Allah. Ulôn keuneuk meuca-e lagu seumujoe keu Droeneueh, ya Allah, deungon alat meuneuén keucapi, ya Allah suci Israel. 23 Ulôn seumurak deungon peunoh suka cita, sira ulôn meuca-e lagu seumujoe keu Droeneueh. Jiwa raga lôn jimeuca-e deungon geumbira, sabab Droeneueh ka neupeuseulamat ulôn. 24 Siuroe suntok ulôn peusampoe keuadelan Droeneueh, sabab ureuëng-ureuëng nyang keuneuk peuceulaka ateueh droe ulôn awaknyan ka geupeutaloe lom geupeumalée.

Zabur 72

1 Nibak Nabi Sulaiman. 2 Seumoga gobnyan geupeuhakém umat Droeneueh meunurot huköm, dan geupeulaku ureuëng nyang teuseupet deungon ade. 3 Kira jih nanggroe kamoe makmu dan seujahteura, dan na keuadelan keu banmandum bansa. 4 Seumoga raja geubila hak kawöm jeulata, geutulông ureuëng gasien dan geupeuhabéh soe mantong nyang teugom awaknyan. 5 Seumoga gobnyan teutab meuteun tron meutron simantong na mata uroe dan buleuen. 6 Seumoga gobnyan lagée ujeuen nyang jitron di teungoh padang, dan lagée ujeuen teuga tron nyang ji-ile u dalam blang. 7 Seumoga keuadelan meukeumang keu siumu masa, dan keumakmuran meulimpah simantong na buleuen. 8 Keurajeuen gobnyan meutamah luwah nibak laôt saboh u laôt nyang laén, meulinteueng nibak timu sampoe u barat. 9 Peunduduek nyang na tinggai di padang pasi tundok ubak gobnyan dan musoh jisujut dikeue gaki gobnyan. 10 Raja-raja Tarsis dan pulo-pulo teuma jiba peuseumahan keu gobnyan. Raja-raja Arab dan Etiopia meunan cit teuka jiba upeti. 11 Banmandum raja nyang laén sujut dikeue gobnyan, meubagoe bansa jeuet keu namiet gobnyan. 12 Sabab gobnyan geupeuleupah ureuëng nyang leumoh teutindéeh hana meudaya, dan ureuëng gasien nyang jimeuhôi ngon meulakée ubak gobnyan. 13 Gobnyan lumpah geugaséh keu ureuëng gasien dan rakyat jeulata, dan geupeuseulamat udeb ureuëng nyang meularat. 14 Gobnyan geupeubeubaih awaknyan nibak ureuëng nyang seupet dan nyang peubuet gasa ateueh ureuëng nyan, sabab udeb awaknyan keubit meuhareuga nibak gobnyan. 15 Udeb kheueh baginda raja! Seumoga ubak gobnyan geupeuseumah méuh nibak nanggroe Arab. Seumoga gobnyan meudoá tieb-tieb watée dan sabe geureustu doá geuh nyan. 16 Seumoga gandom meulimpah ruwah bansaboh nanggroe dan bukét ngon gunong gobnyan peunoh deungon hase bumoe. Seumoga tanoh gobnyan gumbô lagée Gunong-gunong Libanon, dan peunduduek banda gobnyan meutamah-tamah lagée naleueng nyang timoh lam padang. 17 Seumoga nan raja ji ingat sabe siumu masa, dan meusyeuhu meutamah-tamah simantong na mata uroe. Seumoga bansa-bansa nyang laén jilakée beureukat lagée gobnyan, dan banmandum ureuëng jipeugah gobnyan mubahgia. 18 Teupujoe kheueh TUHAN, Allah Israel! Teuma Gobnyan nyang peubuet hai-hai nyang meupeusona. 19 Teupujoe kheueh nan Gobnyan nyang agong keu siumu masa; seumoga bansaboh bumoe peunoh deungon keumuliaan Gobnyan! 20 Seukian kheueh doá-doá Nabi Daud, bin Isai.

Zabur 73

1 Zabur Asaf. 2 Teuma ulôn ka bimbang, keupeucayaan lôn rab gadôh meulayang, 3 sabab ulôn ceumburu keu ureuëng cungkak, watée ulôn ngieng untông nyang jroh bak ureuëng jeuhet. 4 Sabab awaknyan hana keunong peunyakét nyang meudeurita, badan awaknyan teuga-teuga. 5 Bak awaknyan hana jitanggong rasa susah, hana teuma keunong malang lagée ureuëng laén. 6 Nyang kheueh sabab nyan awaknyan meusikeub sombong, dan sabe jimeubuet deungon keujam. 7 Nibak até awaknyan teupeupeunoh keujeuhetan, awaknyan gabuek deungon buet-buet nyang jireuncana jeuhet. 8 Buet awaknyan jipeuhina gob sira jiupat, dan deungon sombong jiancam keu ji tindéeh. 9 Awaknyan ji-iengkeue sira jiseurapa Allah nyang na didalam syeuruga, dan jimeusulet keu ureuëng nyang na di ateueh bumoe, 10 sampoe le that umat Allah nyang jimeupaleng ubak awaknyan, dan jipeucaya ubak tutoe haba awaknyan. 11 Jipeugah lé awaknyan, "Allah hana geuteupeue, Nyang Mahamanyang hana muphom sapeue." 12 Meunan kheueh keuadaan ureuëng jeuhet; udeb jih teunang, dan hareuta jih meutamah-tamah. 13 Sia-sia mantong ulôn jaga até gleh; hana meuguna ulôn peujiôh ngon desya. 14 Sabab siuroe suntok ulôn keunong lé malang; tieb-tieb beungoh ulôn nyoe keunong seksa. 15 Meunyoe ulôn peugah meunan, ulôn meukhianat bak angkatan aneuëk-aneuëk Droeneueh. 16 Teuma watée ulôn useuha mangat hase lôn puphom, hainyan keubit that payah nibak ulôn. 17 Akhé jih ulôn tamong u dalam Baét Allah, disinan kheueh barô lôn teupeue ngon muphom pakriban susah jih udeb ureuëng-ureuëng jeuhet nyan. 18 Droeneueh peuduek awaknyan ateueh rot nyang glue, dan neupeubiyeu awaknyan reubah binasa. 19 Lam sikleb mata awaknyan ka hanco, lumpah that ázeub keusosahan awaknyan. 20 Lagée lumpo nyang gadôh óh beungoh uroe; bak watée Droeneueh beudôh, ya TUHAN, awaknyan pi gadôh. 21 Watée ulôn meurasa tunu dan até ulôn lagée keunong tôb, 22 ulôn bangai dan hana meuphom, ulôn lagée beulatang dikeue Droeneueh. 23 Teuma ulôn teutab rab deungon Droeneueh, Droeneueh nyang mat jaroe uneuen lôn. 24 Neubimbéng ulôn deungon naseuhat, dan neuteurimong ulôn deungon keuhoreumatan bak laén watée. 25 Peue nyang atra ulôn lam syeuruga seulaén Droeneueh? Seulaén Droeneueh hana nyang ulôn harab di ateueh bumoe nyoe. 26 Bahpi jiwa raga lôn meutamah leumoh, Droeneueh kheueh teunaga ulôn, ya Allah; Droeneueh kheueh banmandum atra ulôn keu siumu masa. 27 Ureuëng nyang jitinggai Droeneueh jihnyan teuma meupalo, Droeneueh peubinasa ureuëng nyang hana seutia ubak Droeneueh. 28 Teuma nibak ulôn keubit that jroh jeueb-jeueb watée na bak bineh Allah, TUHAN Allah ulôn peujeuet keu teumpat meulindong lôn, mangat hase ulôn peusampoe banmandum buet-buet Gobnyan.

Zabur 74

1 Ca-e peulajaran Asaf. keudroe? 2 Ingat kheueh umat Droeneueh nyang ka neupiléh phon yoh ilée, bansa nyang Droeneueh peumeurdehka mangat jeuet keu milék Droeneueh. Ingat kheueh keu Bukét Sion, nyang ka Droeneueh peujeuet teumpat tinggai Droeneueh. 3 Neugiloe kheueh teumpat nyang ka meujeuet keu rungka-rungka, banmandum nyang na di Baét Droeneueh ka habéh jipeuhanco lé musoh durjana. 4 Musoh-musoh Droeneueh jiklik-klik ngon jiseumurak di Baét Droeneueh, dan jipeudong bupanji keumeunangan di Baét Droeneueh. 5 Awaknyan lagée ureuëng teubang kayée nyang teungoh ayon pato jih, keu jijak koh bak-bak kayée nyang na didalam gle. 6 Banmandum kayée nyang meu uke ka habéh jipeuhanco nyang jiseukok deungon pato dan palée. 7 Awaknyan jitot Baét Droeneueh sampoe habéh jab dan rata ngon tanoh; dan jipeukuto teumpat Droeneueh teuseumah. 8 Awaknyan jikeuneuk peutaklok kamoe sampoe habéh, dan jitot habéh teumpat iébadat nyang na di nanggroe nyoe. 9 Nabi-nabi dan tanda-tanda nyang ajaéb hana deuh le, dan hana meusidroe pi jiteupeue trok án pajan hainyoe sabe lagée nyoe. 10 Trok án pajan, ya Allah, musoh jihina Droeneueh? Peu kheueh siumu masa awaknyan jihina nan Droeneueh? 11 Pakon teuma Droeneueh hana neutulông le kamoe? Pakon neupeulheueh jaroe nibak kamoe? 12 Yoh awaiphon Droeneueh kheueh raja lôn, ya Allah, Droeneueh kheueh nyang peuseulamat kamoe? 13 Deungon teunaga nyang dahsyat laôt hase neuplah, dan bubena ulée-ulée naga laôt pi ka habéh neupeubeukah. 14 Meunan cit neupeureumok bubena ulée Lewiatan dan neupeujeuet jihnyan peunajoh beulatang di padang pasi. 15 Droeneueh kheueh nyang peuteubiet mata ié dan peu ile ié krueng; dan krueng nyang raya Droeneueh nyang peutho. 16 Droeneueh kheueh nyang peujeuet uroe ngon malam, dan nyang peuteuntée teumpat mata uroe dan buleuen. 17 Droeneueh kheueh nyang peuteutab bataih-bataih bumoe, nyang peujeuet musém khung dan musém ujeuen. 18 Ingat kheueh pakriban musoh jihina Droeneueh, ya TUHAN, bansa nyang hana jituri Droeneueh jihujat nan Droeneueh. 19 Bék neuseurah umat Droeneueh nyang hana meudaya ubak jaroe musoh nyang keujam. Dan Bék kheueh keu siumu masa neupeutuwoe naseb umat Droeneueh nyang malang. 20 Ingat kheueh janji nyang ka neupeuget deungon kamoe, sabab ureuëng jipeubuet buet keukeurasan di tieb-tieb teumpat nyang seupôt di nanggroe nyoe. 21 Bék neupeubiyeu ureuëng nyang keunong teugom jipeumalée lé awaknyan, seumoga ureuëng nyang seungsara dan gasien jipujoe Droeneueh. 22 Beudôh kheueh ya Allah, neuplah kheueh peukara Droeneueh! Sabab siuroe suntok Droeneueh jihina lé ureuëng-ureuëng nyang hana peucaya ubak Droeneueh. 23 Bék tuwoe ubak dumpék musoh-musoh Droeneueh, kiroh ngon karu lawan-lawan Droeneueh nyang seumaken teuga!

Zabur 75

1 Keu teupimpén kor. Meunurot lagu: Bék peumuseunah. Makmur Asaf. Lagu. 2 Kamoe seumah Droneueh, ya Allah, kamoe meusyukoe ubak Droeneueh dan kamoe peusampoe karya Droeneueh nyang luwa biasa nyoe. 3 Allah geupeugah, "Bak watée nyang ka Ulôn peuteuntée, Ulôn Lôn meuhakém deungon seuade-ade jih. 4 Meunyoe bumoe meuguncang lagée geumpa deungon banmandum peunduduek nyang na di ateueh bumoe nyan Ulôn kheueh nyang peukong taméh-taméh jih." 5 Keu ureuëng nyang raya haba, Ulôn peugah, jeuet bék le jipeugah nyang lagée nyan. 6 Dan ubak ureuëng jeuhet, mangat békle meusikeub cungkak. Bék péh-péh dada peubangga droe atawa peugah haba deungon sombong nyang hana meuguna. 7 Sabab peunghakéman hana teuka di timu atawa barat meunan cit bukon teuma di utara atawa seulatan. 8 Teuma Po teu Allah keudroe kheueh nyang jeuet keuhakém, Gobnyan nyang peumiyueb nyang sidroe dan Gobnyan teuma nyang peumanyang nyang laén. 9 Beungéh TUHAN saban lagée piala nibak jaroe gobnyan, piala nyan meuasoe ié anggô nyang kreueh. Allah nyang tunggeng asoe jih, banmandum ureuëng jeuhet nyang na di ateueh bumoe harôh jijieb ié nyan sampoe habéh. 10 Teuma ulôn teutab lôn peusampoe Allah Nabi Yakub, lôn meuca-e lagu puja ngon pujoe keu Gobnyan. 11 Gobnyan nyang wiet sampoe patah teunaga ureuëng jeuhet, di ureuëng nyang jroh meutamah teuga.

Zabur 76

1 Keu teupimpén kor. Deungon iréngan keucapi. Zabur Asaf. Lagu. 2 Po teu Allah meusyeuhu di Yehuda; Nan Gobnyan meusyeuhu ngon meugah di Israel. 3 Yerusalem na kheueh teumpat tinggai Gobnyan; Bukét Sion teumpat tinggai Gobnyan. 4 Disinan Gobnyan geupeuhanco banmandum alat prang, banmandum panah meukilat, peurisai dan peudeueng. 5 Keubit that agong Droeneueh, dan ceumeurlang, leubeh nibak gunong-gunong purba kala. 6 Ureuëng-ureuëng nyang beuhe ngon ceubeuh ka habéh geureupah; awaknyan teuéh dan hana jibeudôh le. Sipa-i-sipa-i nyang gagah peukasa ka gadôh teunaga jih. 7 Banmandum guda dan ureuëng pasang ateueh guda nyan habéh rhot dan maté, deungon dumpék Droeneueh, ya Allah Nabi Yakub! 8 Keubit luwa biasa Droeneueh! Meunyoe Droeneueh beungéh, soe nyang hase meuteun? 9 Di langét neupeugah keuputosan Droeneueh; bumoe teumakot dan seungab. 10 Watée Droneueh beudôh keuneuk neuhakém keu neupeuseulamat ureuëng nyang meudeurita di ateueh bumoe. 11 Ureuëng-ureuëng nyang paleng juah ngon jeuhet pih jipujoe Droeneueh, dan nyang mantong beungéh laju jijak cok ija krong tanda meukabong. 12 Peutrok kheueh janji gata ubak TUHAN Allah gata, bah kheueh banmandum bansa nyang na tinggai rab jiba peuseumahan keu Po teu Allah nyang jitakot. 13 Gobnyan nyang peupatah seumangat ureuëng mat kuasa; bubena raja jiteuka yo keu Gobnyan.

Zabur 77

1 Keu teupimpén kor. Meunurot: Yedutun. Zabur Asaf. 2 Deungon su meuleungkeng ulôn meuhôi ubak Po teu Allah; deungon meuleungkeng ulôn meulakée, dan Gobnyan geudeungoe ulôn. 3 Watée ulôn meukarat ulôn meudoá ubak TUHAN; simalam suntok ulôn leueng paleuet ngon meudoá hana reuda, teuma até ulôn hánjitem teuhibo. 4 Meunyoe ulôn ingat Po teu Allah, ulôn aloh alah, meunyoe ulôn teumanung, até lôn seumaken leusu. 5 TUHAN geupeujeuet ulôn hana hase teungéut meunyoe ka malam, ulôn geulisah sampoe hana hase lôn peugah haba. 6 Ulôn pike uroe-uroe nyang ka lheueh, ulôn ingat-ingat dan lôn manueng thon-thon nyang u likot. 7 Watée malam sabe lôn pike, dan jitanyong lam até, 8 "Peu kheueh siumu masa TUHAN geutulak dan hana geutem deungoe le? 9 Peu kheueh Gobnyan ka geupiôh geugaséh kamoe? Dan peu kheueh Gobnyan hana geutem le geupeupeunoh janji? 10 Peu kheueh ka tuwoe Allah keu gaséh sayang? Dan peu kheueh Gobnyan ka beungéh sampoe ka hanale rasa weueh?" 11 Laju ulôn peugah, "Nyoe kheueh nyang jeuet keupeunyakét até ulôn, bahwa Nyang Mahamanyang hana meukuasa le." 12 Ulôn keuneuk peuingat buet-buet Droeneueh, ya TUHAN, lôn ingat keuajaéban-keuajaéban Droeneueh yoh masa ilée. 13 Ulôn keuneuk manueng peue mantong nyang ka Droeneueh peubuet, dan ulôn pike karya-karya Droeneueh nyang hebat. 14 Ya Allah, peue mantong buet Droeneueh na kheueh suci, soe kheueh nyang na rayeuk jih saban ngon Allah kamoe? 15 Droeneueh kheueh nyang ka neupeubuet banmandum buet nyang ajaéb, kuasa Droeneueh ka neupeuleumah ubak bansa-bansa. 16 Deungon meubagoe teunaga Droeneueh neupeubeubaih umat Droeneueh, keuturonan Nabi Yakub dan Nabi Yusuf. 17 Meunyoe jingieng Droeneueh, ya Allah, ié pi jiteuka yo, meunan cit, deungon tuwie ié laôt jiteuka yo nyang hana teukira. 18 Awan jipeutron ujeuen, geulanteue ngon gogo hana reuda; kilat muble-ble jiseumama keudeh keunoe. 19 Geulanteue jimeusu ban salamle, dan kilat muble-ble jiseumama, bumoe meuguncang ngon meusu meukrab-krab. 20 Droeneueh neujak rot lam umbak, neujeumeurang laôt, teuma bakat Droeneueh hana teutinggai. 21 Lagée ureuëng meurabe Droeneueh tunton umat Droeneueh, deungon peurantaraan Nabi Musa dan Nabi Harun.

Zabur 78

1 Lagu-lagu peulajaran Asaf. 2 Ulôn keuneuk peugah peupatah dan misé umpama, dan ulôn peusaheh hiém yoh masa ilée, 3 hai-hai nyang kamoe deungoe dan kamoe teurimong, nyang jikisah lé indatu kamoe. 4 Kamoe hana kamoe söm sibagoe rahsia keuhai nyan ubak aneuëk-aneuëk kamoe; kamoe keuneuk peugah hainyan ubak angkatan óh lheueh kamoe keuhai kuasa TUHAN dan karya-karya Gobnyan nyang raya, dan buet-buet Gobnyan nyang ajaéb. 5 Ubak bansa Israel Gobnyan geubri huköm Geuh, dan ubak keuturonan Nabi Yakub peurintah Gobnyan. Gobnyan geuyue indatu geutanyoe mangat geupeurunoe hainyan keu aneuëk-aneuëk awaknyan, 6 mangat angkatan nyang lheueh nyan jituri Gobnyan, dan geupeusampoe teuma ubak aneuëk-aneuëk awaknyan. 7 Deungon na lagée nyan awaknyan pih jitroh harapan ubak Allah, dan hana jituwoe ubak buet Gobnyan, dan sabe lam taát ubak peurintah Gobnyan, 8 mangat awaknyan hana lagée indatu awaknyan, nyang galak ubak beurontak dan bak buet doraka; angkatan nyang guyah iman jih, dan hana seutia ubak Po teu Allah. 9 Sukée Efraim nyang meuseunjata panah dan busur, laju jiplueng bak watée teungoh muprang. 10 Awaknyan jiliengkeue peujanjian Allah ngon awaknyan, dan hana jitem taát deungon huköm Gobnyan. 11 Awaknyan tuwoe deungon buet-buet Gobnyan, dan hai-hai nyang ajaéb nyang geupeuleumah ubak awaknyan. 12 Dikeue indatu awaknyan, Allah geupeugôt buet ajaéb di nanggroe Meusé, di ateueh darat Zoan. 13 Gobnyan geuplah laôt, laju geupeujeumeurang awaknyan; ié laôt nyan geupeudong lagée ié lam kulam. 14 Gobnyan geupeuintat awaknyan deungon awan jeuet keupayong bak watée uroe dan deungon apui hu bak watée malam. 15 Gobnyan geuprah gunong batée di padang pasi, dan geubri ié jieb bak awaknyan nyang meulimpah ruwah. 16 Bukét batée geupeurintah beu jiteubiet ié, dan laju ié ji ile lagée ié krueng. 17 Teuma awaknyan sabe meudesya ubak Allah, di padang guron nyan awaknyan beurontak ubak Nyang Mahamanyang. 18 Awaknyan jisaja ji ujoe Allah, deungon cara jilakée peunajoh nyang jihawa. 19 Awaknyan jilawan Po teu Allah sira jipeugah, "Peu kheueh hase Allah geubri keu geutanyoe peunajoh di padang pasi? 20 Keubit beutôi Gobnyan geuseukok gunong batée nyang kreueh, sampoe jiteubiet ié lam batée nyan deungon kancang that. Teuma peu kheueh Gobnyan hase geukeubah ruti keu awaknyan dan geubri uengkot sie keu umat Gobnyan?" 21 Ban geudeungoe nyang lagée nyan, Allah beungéh lumpah na dan laju geuseurang awaknyan deungon apui hu; beungéh Gobnyan ateueh awaknyan meutamah-tamah, 22 sabab awaknyan hana jipeucaya ubak Allah, ubak kuasa Gobnyan nyang hase geupeuseulamat awaknyan. 23 Bahpi meunan Gobnyan geupeurintah ubak langét jeuet jibuka bubena babah pintoe langét nyan. 24 Laju Gobnyan geupeutron gandom lam syeuruga, manna keu peunajoh awaknyan. 25 Gobnyan geubri keu awaknyan peunajoh nyang meulimpah; awaknyan jimakheun ruti malaikat. 26 Meunan cit Gobnyan geuyue pôt angén timu; meunan cit lé kuasa Gobnyan angén seulatan pi laju jipôt. 27 Gobnyan geupeutron laju cicém-cicém keu umat Geuh, jeumeulah jih na lagée anou di pasi nyang hana teukira. 28 Geupeurhot laju cicém-cicém nyan nibak khimah-khimah di seukeulileng teumpat awaknyan tinggai. 29 Dan jimakheun kheueh laju awaknyan sampoe án troe, sabab Po teu Allah ka geubri peue nyang jilakée lé awaknyan. 30 Teuma bahpi ka na nyang lagée jilakée nyan, teuma nafeusu awaknyan gohlom cit meurasa pueh; jadi, teungoh awaknyan mantong jimakheun, 31 Po teu Allah beungéh that-that dan geulawan awaknyan; laju geupoh maté bubena ureuëng-ureuëng Israel nyang mantong muda-muda dan peukasa. 32 Bahpi meunan umat Gobnyan teutab meudesya, buet-buet nyang ajaéb nyang ka geupeuleumah teutab hana jitem peucaya. 33 Dan Allah laju geupeuhabéh udeb awaknyan lagée nafáh, thon-thon awaknyan jipeuhabéh dalam keuadaan teumakot. 34 Pajan mantong Allah geupoh maté napadub droe lamkawan awaknyan, nyang laén meunyeusai dan laju jiwoe ubak Gobnyan. 35 Awaknyan laju ji ingat bahwa Allah na kheueh nyang lindong gobnyan, dan bahwa Nyang Mahamanyang nyang peuseulamat awaknyan. 36 Teuma awaknyan jimeusulet bak Gobnyan, peue-peue mantong nyang jipeugah lé awaknyan na kheueh sulet bandum. 37 Awaknyan hana seutia ubak Gobnyan dan hana jimumat ubak peujanjian Gobnyan. 38 Teuma Allah geugaséh dan geupeu amphon umat Gobnyan, dan hana geupeubinasa awaknyan. Ka kayém that Gobnyan geupeuteun beungéh Geuh, dan hana geupeutrok mureuka Gobnyan. 39 Gobnyan geuingat bahwa awaknyan na kheueh makhluk nyang fana, lagée angén lalu dan hana jiriwang le. 40 Ka kayém that awaknyan jibeurontak keu Gobnyan, dan jipeusakét até Gobnyan watée di padang pasi. 41 Meu ulang-ulang awaknyan jiujoe Po teu Allah, jipeususah Nyang Kudus, Allah Israel. 42 Awaknyan hana ji ingat ubak keukuasaan Gobnyan, nibak uroe awaknyan geupeubeubaih nibak musoh, 43 bak watée Gobnyan geupeugöt buet-buet nyang ajaéb di nanggroe Meusé, dan mujizat-mujizat dipadang Zoan. 44 Krueng-krueng awaknyan geu ubah jeuet keudarah, sampoe awaknyan hana hase jijieb ié krueng nyan. 45 Gobnyan geuseksa awaknyan deungon lalat nyang jai, dan geupeubiyeu tanoh awaknyan jipeumuseunah lé cangguek. 46 Gobnyan geupeutron ulat deungon daruet, nyang jipeuhabéh hase panen dan hase ladang. 47 Gobnyan geupeurusak bak anggô awaknyan deungon ujeuen batée, dan bak-bak ara awaknyan deungon iémbon beuku. 48 Gobnyan geupeubiyeu ujeuen es rhot jitimpok ateueh beulatang peulara awaknyan, dan geulanteue jisama bubena beulatang peulara awaknyan. 49 Gobnyan geupeulheuh banmandum beungéh Geuhnyan nyang hu meuháb-háb deungon cara geuyuejak saboh pasokan malaikat mawöt nyang peujeuet awaknyan putôh asa. 50 Gobnyan hana geupeuteun beungéh Geuh nyan atawa geuweueh inseh ateueh udeb awaknyan, teuma geupeubinasa udeb awaknyan deungon peunyakét sampar. 51 Gobnyan laju geupoh maté aneuëk agam nyang tuha lam tieb-tieb keuluwarga ureuëng Meusé. 52 Gobnyan geupimpén umat Geuh lagée kawan bubiri, dan geupeutakteh awaknyan meulalu padang pasi. 53 Dalam bimbéngan Gobnyan awaknyan aman dan hana teumakot, dan musoh awaknyan ka habéh ngob lam laôt. 54 Laju umat Gobnyan geuba ubak tanoh nyang suci, ubak gunong-gunong nyang geureubot keudroe. 55 Dikeue umat Gobnyan laju geu use bubena peunduduek nyang na disinan laju geubagi-bagi nanggroe nyan keu mandum sukée bansa Israel, umat Gobnyan, sampoe awaknyan hase jitinggai nibak khimah-khimah musoh. 56 Teuma awaknyan beurontak dan jiujoe Po teu Allah Nyang Mahamanyang, peurintah-peurintah Gobnyan hana jitaát. 57 Awaknyan meukhianat lagée indatu droe jih, dan hana hase teupeucaya lagée aneuk panah nyang keuwieng. 58 Awaknyan jilawan Allah deungon teumpat seumah beurala, dan jipeujeuet Gobnyan ceumeuru deungon patong-patong awaknyan. 59 Ban geungieng nyan, Po teu Allah lumpah beungéh, dan geutulak awaknyan meuntah-meuntah. 60 Gobnyan geutinggai khimah Geuh di Silo, teumpat tinggai Gobnyan lamkawan manusia. 61 Gobnyan geupeubiyeu Peuto Peujanjian Geuh jiteun; lambang keumuliaan Gobnyan jireubot lé lawan. 62 Gobnyan beungéh ubak umat Geuh, milék pusaka Gobnyan, dan geupeubiyeu awaknyan jipoh ngon jicang maté deungon peudeueng. 63 Peumuda-peumuda awaknyan jipajoh lé apui; hana nyang tem meukawen deungon aneuëk-aneuëk dara awaknyan. 64 Teungku-teungku imeum awaknyan jipoh maté deungon peudeueng, inong-inong balée awaknyan hana hase jimo ba-e. 65 Teuma TUHAN geubeudôh lagée ureuëng ban beudôh éh, lagée ureuëng teuga nyang ban lheueh jieb ié anggô. 66 Gobnyan laju geuseupôt sampoe jisurot bubena lawan Gobnyan, dan geupeutaloe awaknyan keu siumu masa. 67 Teuma Gobnyan geutulak keuturonan Nabi Yusuf dan hana geupiléh sukée Efraim. 68 Nyang geupiléh na kheueh sukée Yehuda, dan Bukét Sion nyang geucinta. 69 Gobnyan geupeudong Baét Geuh lagée Baét Geuh nyang na di dalam syeuruga, dan lagée bumoe, khong ngon kukoh keu siumu masa. 70 Gobnyan geupiléh Nabi Daud hamba Geuh nyan, dan geucok gobnyan nibak kawan beulatang peulara, 71 nibak teumpat gobnyan peulara nang bubiri, keu geurabe Israel umat Gobnyan. 72 Nabi Daud geupeulara awaknyan deungon jujoe dan ikhlas, dan geubimbéng awaknyan deungon áref dan bijak sana.

Zabur 79

1 Zabur Asaf. 2 Manyét namiet-namiet Droeneueh ka jitinggai lé awaknyan jeuet keupeunajoh cicém-cicém nyang po di manyang. Manyét-manyét geunaséh Droeneueh jipeubiyeu mantong disinan jeuet keupeunajoh beulatang kleut. 3 Nibak mandum banda Yerusalem darah awaknyan rô lagée ié ile; hana ureuëng nyang jitem tanom awaknyan u dalam jrat. 4 Kamoe jeuet keubahan hinaan lé bansa-bansa silingka, awaknyan jipeukém dan jicemoh kamoe. 5 Ya TUHAN, peu kheueh siumu masa Droeneueh beungéh keu kamoe, dan ceumburu Droeneueh hu seu-uem lagée apui raya? 6 Neupeurhot kheueh beungéh Droeneueh nyan u ateueh bansa-bansa nyang hana jituri keu Droeneueh, dan u ateueh keurajeuen-keurajeuen nyang hana meubakti ubak Droeneueh. 7 Sabab awaknyan ka jipeubinasa umat Droeneueh, dan jipeuhanco teumpat tinggai awaknyan. 8 Bék neuhuköm kamoe sabab desya nyang geupeubuet lé indatu kamoe. Neugaséh kheueh keu kamoe jinoenyoe cit teuma, sabab kamoe ka putôh asa. 9 Tulông kheueh kamoe ya Allah, nyang peuseulamat kamoe, neupeu amphon kheueh desya-desya kamoe dan neupeubeubaih kheueh kamoe deumi keuhoreumatan Droeneueh keudroe. 10 Bék neupeubiyeu bansa laén jiteumanyong keuhai kamoe, "Dipat Allah awaknyan?" Bah kheueh kamoe ngieng peumbalasan ateueh bansa-bansa nyang jeuet keu ureuëng poh hamba-hamba Droeneueh. 11 Neudeungoe kheueh apoh apah ureuëng nyang na didalam tahanan; seumoga ureuëng-ureuëng nyang teupeuteuntée keu maté teupeubiyeu udeb sabab kuasa Droeneueh. 12 Ya TUHAN, neubalaih kheueh bansa-bansa nyan tujoh go lipat sabab banmandum peuhinaan awaknyan ateueh Droeneueh. 13 Teuma kamoe sibagoe umat Droeneueh, bubiri nyang Droeneueh rabe, teuma meusyukoe ubak Droeneueh siumu masa, dan kamoe pujoe Droeneueh tron meutron nibak keuturonan kamoe.

Zabur 80

1 keu teupimpén kor. Meunurot lagu: Bungöng Bakong. Zabur keusaksian Asaf. 2 Ya Geumbala nyang rabe Israel, deungoe kheueh nyoe, Droeneueh nyang pimpén keuturonan Nabi Yusuf sibagoe kawan. Droeneueh nyang duek meutakhta di ateueh kerub, teuka kheueh deungon geumilang 3 dikeue Efraim, Benyamin dan Manasye. Tunyok kheueh keukuasaan Droeneueh keu kamoe, dan teuka kheueh neujak peuseulamat kamoe. 4 Ya Allah, neupeupuléh kheueh kamoe; pandang kheueh kamoe deungon até nyang murah, mangat kamoe seulamat. 5 Ya TUHAN, Allah Nyang Mahakuasa, Trok án pajan Droeneueh neubeungéh kamoe, bahpi umat Droeneueh meudesya? 6 Neubri keu kamoe mo nyang hana reuda sibagoe peunajoh, ié mata nyang rô meulimpah sibagoe ié jieb kamoe. 7 Neupeubiyeu bansa-bansa teutangga jimeudakwa keuhai tanoh kamoe dan bubena musoh-musoh kamoe ka habéh jikém sabab galak. 8 Ya Allah Nyang Mahakuasa, neupeupuléh kheueh kamoe; neungieng kheueh kamoe deungon murah até, mangat kamoe seulamat. 9 Umat Droeneueh lagée bak anggô nyang Droeneueh pinah di nanggroe Meusé. Bansa-bansa nyang laén Droeneueh use, laju neupula bak kayée nyan di nanggroe awaknyan. 10 Droeneueh nyang keubah tanoh keu awaknyan; teuma jihnyan meu-ukeue lhok u dalam bumoe dan meulinteueng bansaboh nanggroe. 11 Gobnyan nyang peupayong bubena bukét-bukét, dan deungon cabeueng-cabeueng jih nyan hase teutôb bak kayée aras nyang raya-raya. 12 Ranteng jih meunyue ngon meujulue trok u Laôt Teungoh, dan pucok-pucok jih trok ubak Krueng Efrat. 13 Ya Allah, pakon neureuloh pageue jih, sampoe soe mantong ureuëng nyang jijak disinan ka hase jipot boh jih? 14 Bui uteuen jijak seuba sampoe rusak, dan beulatang nyang didalam padang pih jijak pajoh atra nyan. 15 Ya Allah Nyang Mahakuasa, neuteuka kheueh lom, neungieng kheueh rot syeuruga dan neukalon kheueh umat Droeneueh. 16 Neupeuseulamat kheueh umat nyang lagée bak anggô nyang ka Droeneueh pula keudroe, dan tarok bak anggô nyang ka Droeneueh peujeuet kukoh. 17 Musoh ka jiteubang dan laju jitot ngon apui; bah kheueh awaknyan neupeubinasa lé beungéh Droeneueh. 18 Neulindong kheueh ureuëng nyang ka Droeneueh piléh, aneuëk manusia nyang neupeukong keu Droeneueh. 19 Teuma kamoe hanale kamoe paleng nibak Droeneueh; neujaga kheueh udeb kamoe, teuma kamoe meupujoe Droeneueh. 20 Ya TUHAN Allah Nyang Mahakuasa, neupeupuléh kheueh kamoe, neupandang kheueh kamoe deungon murah até, mangat kamoe seulamat.

Zabur 81

1 Keu teupimpén kor. Meunurot lagu: Gitit. Nibak Asaf. 2 Meuca-e kheueh nyanyoe puja ngon pujoe ubak Po teu Allah, teunaga geutanyoe, meusurak kheueh deungon geumbira keu Allah Nabi Yakub. 3 Tapéh kheueh rapa-i, dan peuphon kheueh musik, peutek kheueh gambôh dan keucapi deungon su meualon-alon. 4 Yeub kheueh beureuguih watée uroe raya geutanyoe, bak watée khanuri buleuen barô dan buleuen peunoh. 5 Sabab hai nyang lagéenyan na kheueh saboh lamkawan peuratoran di Israel, dan saboh nibak meubagoe peurintah Allah Nabi Yakub. 6 Gobnyan geupeujeuet saboh peuratoran keu bansa Israel, bak watée gobnyan geumaju jak lawan bansa Meusé. 7 "Ulôn ka Lôn beuôt beuban di ateueh ulée gata, dan Lôn peulheuh raga seumeuôn nyang na bak jaroe gata. 8 Lam aloh alah gata meulakée, dan Ulôn peuseulamat gata. Ulôn jaweueb gata nibak geulanteue teumpat Ulôn musöm, Ulôn ujoe gata nibak mata ié Meriba. 9 Deungoe kheueh Ulôn peuingat nyoe, hai umat Ulôn, Israel, meunyoe gata tatem deungoe Ulôn! 10 Bék na lamkawan gata jimeu ilah ubak ilah nyang laén, bék kheueh taseumah ubak ilah aséng. 11 Ulôn kheueh TUHAN Allah gata, nyang tunton gata peuteubiet lam nanggroe Meusé. Watée gata deuk Ulôn bri peunajoh. 12 Teuma umat Ulôn hana jitem deungoe peue nyang Ulôn peugah, Israel hana jitem taát ubak ulôn. 13 Sabab nyan Ulôn peubiyeu jihnyan jeuet keu ureuëng kreueh ulée; bah kheueh awaknyan jiseutôt keuheundak jih keudroe. 14 Ah, meunyoe umat Ulôn jitem deungoe peue nyang Ulôn peugah, meunyoe awaknyan jitem taát ubak Ulôn, 15 teuma Ulôn deungon sigra Lôn peutaklok musoh awaknyan, dan Ulôn peutaloe banmandum lawan awaknyan. 16 Ureuëng nyang banci teuma Lôn peutaklok, awaknyan teuhuköm keu siumu masa. 17 Teuma umat Ulôn kujok peunajoh gandom nyang teupiléh, dan Ulôn peutroe deungon meulisan rimba."

Zabur 82

1 Zabur Asaf. 2 "Bék le peusidang gob ngon cara ilat, dan bék dong blaih ureuëng jeuhet. 3 Bila kheueh aneuëk yatem ngon ureuëng hana meudaya, jok kheueh keuadelan keu ureuëng gasien dan seungsara. 4 Peubeubaih kheueh ureuëng nyang leumoh dan hana meudaya, peuhinda kheueh awaknyan nibak jaroe ureuëng jeuhet. 5 Gata hana keunong sapeue, bangai dan sisat, lé sabab gata, tata tereuteb masyarakat hana meuteuntée le. 6 Ulôn peugah bahwa gata ilahi dan gata banmandum aneuëk-aneuëk Allah Nyang Mahamanyang. 7 Teuma gata teutab maté lagée manusia, lagée tieb-tieb ureuëng rayeuk, gata pih teutab maté." 8 Teuka kheueh ya Po teu Allah, peusidang kheueh donya, sabab banmandum bansa na kheueh atra Droeneueh.

Zabur 83

1 Zabur Asaf: saboh lagu. 2 Ya Allah, bék kheueh neuiem droe, bék neupangkée jaroe dan seungab mantong. 3 Kalon kheueh, musoh Droeneueh ka jibeudôh, ureuëng-ureuëng nyang jibanci bak Droeneueh ka beurontak. 4 Awaknyan ka jimupakat ngon jipeuget reuncana nyang licek keuneuk jilawan umat Droeneueh; dan jimeurok pakat jijak lawan ureuëng-ureuëng nyang Droeneueh lindong. 5 Kheun awaknyan, "Jak geutanyoe tajak peuhanco bansa Israel, mangat nan awaknyan hana ji ingat le." 6 Bansa-bansa ka meusaho saboh pakat, dan meusikutu jilawan Droeneueh: 7 bansa Edom dan Ismail, ureuëng-ureuëng Moab dan Hagar; 8 bansa Gebal, Amon dan Amalek, bansa Filistea meunan cit deungon peunduduek Tirus. 9 Meunan cit Asyur ka jimeugabong deungon awaknyan, jeuet keu gaki jaroe keuturonan Lot. 10 Neupeusaneut kheueh awaknyan lagée ureuëng Midian, lagée Sisera dan Yabin di Krueng Kisyon, 11 nyang ka jipeubinasa di Endor, dan jeuet keu baja ateueh tanoh. 12 Neupeusaneut kheueh peumimpén awaknyan lagée Oreb dan Zeeb, peutundok kheueh peunguasa awaknyan lagée Zebah dan Salmuna, 13 sabab awaknyan ka jipeugah, "Jak geutanyoe tajakduek bak tanoh teumpat tinggai Allah." 14 Ya Allah, neusipeuek kheueh awaknyan lagée abée meutabu ngon meuhambô, lagée jeumpung nyang jiyueb lé angén. 15 Lagée apui hu nyang teungoh tutông uteuen, apui nyang hu habéh hangöh gunong-gunong. 16 Neutiyeub kheueh awaknyan ngon angén badée Droeneueh, dan neupeukeujot kheueh awaknyan deungon angén badée Droeneueh. 17 Ya TUHAN, bah kheueh awaknyan teuhina, mangat awaknyan jiaku keukuasaan Droeneueh. 18 Bah kheueh awaknyan siumu masa sabe lam malée dan teumakot nyang hana teukira, dan bah kheueh awaknyan maté lam keuhinaan. 19 Seumoga awaknyan jiteupeue bahwa Droeneueh kheueh Nyang Mahamanyang, TUHAN, nyang mat kuasa ateueh bansigom bumoe.

Zabur 84

1 Keu teupimpén kor. Meunurot lagu: Gitit. Zabur kawöm Korah. 2 Keubit that mangat teumpat tinggai Droeneueh, Ya Allah Nyang Mahakuasa! 3 Até ulôn lumpah that rindu ubak Baét Droeneueh, jiwa raga lôn meusurak geumbira keu Allah nyang udeb. 4 Bahpih cicém tulô meuteumé rumoh dan cicém geulayang saboh uempueng, teumpat cicém nyan jikeubah aneuëk jih bak bineh miseubah Droeneueh, ya TUHAN Nyang Mahakuasa, Raja lôn dan Allah lôn. 5 Keubit that bahgia ureuëng nyang tinggai di Baét Droeneueh, dan jimeuca-e nyanyoe pujo keu Droeneueh tieb-tieb watée. 6 Mubahgia kheueh ureuëng nyang meuteumé teunaga nibak Droeneueh, dan nyang na niet jijak ziarah u Gunong Sion. 7 Teungoh awaknyan jijak rot Pantôn Baka, teumpatnyan awaknyan ubah sampoe jeuet keu mata ié, ujeuen nyang phon ié jih meulimpah deungon beureukat. 8 Teunaga awaknyan seumaken meutamah, watée teungoh jijak u Sion, ubak teumpat Allah banmandum dewata jipeuleumah droe. 9 Deungoe kheueh doá ulôn, ya TUHAN Allah Nyang Mahakuasa, neudeungoe kheueh, ya Allah Nabi Yakub. 10 Jok kheueh beureukat ubak raja kamoe, ya Allah, neulindong kheueh ureuëng nyang ka Droeneueh piléh. 11 Leubeh get siuroe di Baét Droeneueh nibak siribée uroe di teumpat laén. Ulôn kupiléh jeuet keu ureuëng jaga babah pintoe di Baét Allah ulôn nibak tinggai di rumoh ureuëng jeuhet. 12 Sabab TUHAN Allah peulindong geutanyoe dan raja nyang agong, nyang geuanugeurah keu geutanyoe geunaséh dan keuhoreumatan. Gobnyan hántom geutulak peue mantong meunyoe nyang jroh ateueh ureuëng nyang udeb jih hana meunoda. 13 Ya TUHAN Nyang Mahakuasa, mubahgia kheueh ureuëng nyang peucaya ubak Droeneueh.

Zabur 85

1 Keu teupimpén kor. Zabur kawöm Korah. 2 Droeneueh meukeunong ubak tanoh Droeneueh, ya TUHAN, keuadaan Israel ka neupeupuléh. 3 Droeneueh ka neupeu amphon bubena desya umat Droeneueh; neupeumeuáh banmandum keusalahan jih. 4 Awaknyan hanale neubeungéh; meureuka Droeneueh nyang luwa biasa nyan neutarek lom teuma. 5 Peupuléh kheueh kamoe, ya Allah nyang peuseulamat kamoe, bék neuseksa le lam udeb kamoe. 6 Peu kheueh keu siumu masa Droeneueh neubeungéh kamoe, dan teutab neubeungéh tron meutron? 7 Neupeu kong kheueh kamoe lom jeuet kamoe umat Droeneueh nyoe meugeumbira sabab lam tulôngan Droeneueh. 8 Neutunyok kheueh bahwa Droeneueh teutab neugaséh kamoe, ya TUHAN, neubri kheueh keu kamoe keuseulamatan nibak Droeneueh. 9 Ulôn deungoe peue nyang geupeugah lé TUHAN Allah; Gobnyan ka geupeujanji keuseulamatan keu tanyoe, umat Gobnyan, asai geutanyoe hana taulang bak tapeubuet desya. 10 Keubit, Gobnyan siab seudia geupeuseulamat ureuëng nyang taqwa, Allah nyang agong tinggai di nanggroe geutanyoe. 11 Gaséh dan keuseutiaan meurumpok, keuadelan dan damé saléng meuwa-wa. 12 Keuseutiaan manusia jitimoh ateueh bumoe, dan keuadelan Allah teuka di langét. 13 TUHAN geukaronya nyang jroh-jroh, dan tanoh geutanyoe jiteubiet hase. 14 Keuadelan awai teuka nibak TUHAN, dan jipeusiab jalan keu Gobnyan.

Zabur 86

1 Doá Nabi Daud. ulôn, sabab ulôn gasien dan leumoh. 2 Jaga kheueh udeb lôn, sabab Droeneueh neugaséh ulôn, neupeuseulamat kheueh hamba Droeneueh nyang peucaya ubak Droeneueh. 3 Droeneueh kheueh Allah lôn, neugaséh kheueh ulôn, ya TUHAN, sabab siuroe seupôt ulôn meudoá bak Droeneueh. 4 TUHAN, neupeumangat kheueh até hamba Droeneueh nyoe, sabab ubak Droeneueh kheueh ulôn sintong asoe até lôn. 5 Droeneueh jroh, ya TUHAN, dan galak neupeu amphon ureuëng nyang lakée amphon ubak Droeneueh, ureuëng nyang meudesya ubak Droeneueh teutab neugaséh ngon neusayang deungon gaséh nyang meulimpah. 6 Deungoe kheueh doá ulôn, ya TUHAN, deungoe kheueh meulakée lôn nyang ulôn lakée tulông. 7 Bak watée ulôn meukarat teutab lôn meudoá ubak Droeneueh, sabab Droeneueh neujaweueb ulôn. 8 Ya TUHAN, hana TUHAN nyang laén nyang sa deungon Droeneueh, hana nyang hase jipeubuet lagée Droeneueh peubuet. 9 Banmandum bansa nyang Droeneueh peujeuet teuma teuka, ya TUHAN, keu jiseumah Droeneueh dan jipujoe keuagongan Droeneueh. 10 Sabab Droeneueh peukasa dan neupeubuet buet-buet nyang ajaéb, teuma Droeneueh kheueh Allah. 11 Peurunoe kheueh keuheundak Droeneueh ubak ulôn, ya TUHAN, mangat jeuet ulôn seutôt deungon seutia; neupeujeuet kheueh ulôn keu ureuëng taqwa deungon sipeunoh até. 12 Ulôn meusyukoe ubak Droeneueh deungon seupeunoh até, ya TUHAN, Allah ulôn; ulôn keuneuk pujoe keubeusaran Droeneueh sampoe siumu masa. 13 Sabab Droeneueh teutab neugaséh ubak ulôn deungon geunaséh nyang raya; Droeneueh ka neupeulheueh nyawöng ulôn nibak maté. 14 Ya Allah, ureuëng sombong jibeudôh jijak prang ulôn, saboh kawan ureuëng keujam keuneuk peumaté ulôn; awaknyan hana jipakoe keu Droeneueh. 15 Teuma Droeneueh, ya TUHAN, Allah nyang peungaséh dan peunyayang, saba, peunoh geunaséh dan seutia. 16 Neungieng kheueh dan neugaséh kheueh ulôn, neupeuteuga kheueh dan peuseulamat kheueh ulôn, sabab lagée ma ulôn, ulôn meubakti ubak Droeneueh. 17 Neubri kheueh ubak ulôn tanda jroh Droeneueh, ya TUHAN, mangat ureuëng nyang banci keu ulôn neupeumalée, meunyoe awaknyan ngieng Droeneueh neutulông dan neuhibô ulôn.

Zabur 87

1 Zabur kawöm korah, saboh lagu. 2 Nibak banmandum banda Israel, Yerusalem nyang paleng geusayang. 3 Deungoe kheueh, hai banda Allah, hai-hai nyang paleng takjob nyang teupeugah keuhai gata: 4 "Meusé dan Babel Ulôn peutamong lam dafeutar bansa-bansa nyang taát ubak Ulôn. Meunan cit Filistea, Tirus dan Sudan jitamong lam kiraan peunduduek Yerusalem." 5 Ubak Sion ureuëng laén jipeugah, bahwa banmandum bansa jitamong cit keunan warga jih, dan bahwa Nyang Mahamanyang geupeukong jihnyan. 6 TUHAN geupeutamong bansa-bansa dalam dafeutar peunduduek Yerusalem. 7 Awaknyan jilikak ngon jimeuca-e, "Sion na kheueh teumpat asai lôn!"

Zabur 88

1 Lagu. Zabur kawöm Korah. Keu teupimpén kor. Meunurot lagu: Mahalat Leanot. Ca-e peungajaran Heman, ureuëng Ezrahi. 2 Ya TUHAN, Allah nyang peuseulamat ulôn, óh watée uroe ulôn meulakée ubak Droeneueh, dan óh watée malam ulôn meuhadab ubak Droeneueh. 3 Seumoga doá ulôn trok ubak Droeneueh, neudeungoe kheueh nyang ulôn lakée nyoe. 4 Ulôn keunong lé apoh apah nyang paleng le; mawöt ka teupreh di babah pintoe. 5 Ulôn lagée ureuëng nyang jipeutron u babah pintoe jrat, ureuëng nyang ka habéh teunaga. 6 Ulôn jitinggai lamkawan ureuëng maté, lagée ureuëng keunong poh, teuéh didalam jrat, lagée ureuëng nyang ka neutuwoe hana neuingat mubacut pi, ureuëng nyang hana Droeneueh tulông le. 7 Droeneueh neugeulawa ulôn u dalam uruek nyang paleng lhok, u dalam jrat nyang lhok dan seupôt buta. 8 Beungéh Droeneueh nyan teuteugon ulôn deungon geuhon that, ulôn hanco teuginton deungon meureuka Droeneueh. 9 Neupeujiôh rakan-rakan lôn nibak ulôn, dan neupeujeuet ulôn ureuëng nyang luwat nibak awaknyan. Ulôn meukuröng dan hana hase lôn teubiet, 10 mata ulôn jeuet keureudok sabab seungsara. Tieb-tieb uroe ulôn meulakée ubak Droeneueh, ya TUHAN, dan lôn meudoá deungon jaroe teunyue ngon paleuet meulinteueng. 11 Peu kheueh Droneueh neupeuget keuajaéban keu ureuëng maté? Peu kheueh awaknyan jibeudôh dan jipujoe Droeneueh? 12 Peu kheueh geunaséh Droeneueh nyan jipeugah cit lam jrat, dan keuseutiaan Droeneueh di teumpat keubinasaan? 13 Peu kheueh na nyang teupeue keuajaéban Droeneueh didalam seupôt, atawa keujroh Droeneueh di nanggroe teumpat ureuëng nyang geupeutuwo? 14 Teuma ulôn lakée tulông Droeneueh, ya TUHAN, tieb-tieb beungoh ulôn lakée doá ubak Droeneueh. 15 Ya TUHAN, pakon Droeneueh neutulak ulôn? Pakon neupaleng wajah Droeneueh nibak ulôn? 16 Yoh ubit kon ulôn seungsara dan sabe jiluem lé mawöt, ulôn lumpah that payah lôn tanggong huköman Droeneueh. 17 Beungéh Droeneueh nyan nyang luwa biasa teupeuhanco ulôn; dan seurangan Droeneueh nyang hebat teupeubinasa ulôn. 18 Siuroe seupôt beungéh Dreoneueh nyan lagée ié raya nyang jikeulileng di geuniréng ulôn, jikeupong ulôn rot meubagoe arah. 19 Rakan-rakan lôn nyang paleng rab nyan pih ka Droeneueh peujiôh nibak ulôn, tinggai seupôt buta nyang jeuet keu rakan ulôn.

Zabur 89

1 Ca-e peulajaran Etan, ureuëng Ezrahi. 2 Gaséh sayang Droeneueh, ya TUHAN, lôn keuneuk zike siumu masa, keuseutiaan Droeneueh lôn peusampoe tron meutron. 3 Sabab ulôn kuteupeue gaséh Droeneueh nyan na kheueh keukai abadi, keuseutiaan Droeneueh kukoh lagée langét. 4 Droeneueh ka neupeugah, "Ulôn ka lheueh Lôn peugét janji deungon ureuëng nyang Ulôn piléh; Ulôn ka lheueh Lôn meusumpah yoh Nabi Daud, hamba Ulôn: 5 'Takhta gata Ulôn peuteuen keu siumu masa, tron meutron aneuëk cucoe gata teuma jiduek disinan.' " 6 Sidang nyang na lam syeuruga geupujoe buet-buet Droeneueh nyang ajaéb, dan geupeutrok keuseutiaan Droeneueh, TUHAN. 7 Di langét hana nyang saban deungon Droeneueh, ya TUHAN, dan hana teuma makhluk lam syeuruga nyang sa deungon Droeneueh. 8 Droeneueh jihoreumat lé mandum nyang suci, dan that-that jitakot leubeh nibak banmandum nyang na disikeulileng Droeneueh. 9 TUHAN, Allah Nyang Mahakuasa, soe kheueh nyang na lagée teuga dan teunaga Droeneueh nyan? Droeneueh seutia lam hai peue mantong ya TUHAN. 10 Droeneueh nyang kuasa laôt nyang meugeulora raya, dan nyang peureuda umbak dan geulora samudra. 11 Rahab, naga laôt, Droeneueh peureumôk dan Droeneueh poh maté, deungon jaroe nyang teuga Droeneueh peutaloe bubena musoh Droeneueh. 12 Langét dan bumoe na kheueh atra Droeneueh, donya dan peue mantong asoe jih na kheueh cebtaan Droeneueh. 13 Droeneueh kheueh nyang peujeuet utara dan seulatan, Gunong Tabor dan Hermon meusurak geumbira keu Droeneueh. 14 Padubna raya kuasa Droeneueh, ya TUHAN, dan padub na hebat teunaga Droeneueh! 15 Keuadelan dan huköm na kheueh dasai keurajeuen Droeneueh, gaséh dan keuseutiaan na kheueh nyata lam peue mantong nyang Droeneueh peubuet. 16 Mubahgia kheueh bansa nyang meuiébadat deungon geumbira, nyang udeb lam cahya teuka Droeneueh, ya TUHAN. 17 Siuroe sabe awaknyan meusuka cita dan teutab teuga, lé sabab keubaiékan Droeneueh. 18 Droeneueh ka neubri keu kamoe meunang nyang gilang geumilang, sabab jroh Droeneueh kamoe nyoe meunang. 19 Sabab nyang lindong kamoe na kheueh ureuëng nyang Droeneueh piléh, ya TUHAN; raja kamoe na kheueh milék Allah Kudus Israel. 20 Yoh watée ilée lam saboh keumalon, Droeneueh neupeugah ubak hamba Droeneueh nyang seutia, "Ulôn kalheueh Lôn tulông sidroe pahlawan, sidroe ureuëng nyang ka Ulôn piléh nibak rakyat nyang ka Ulôn beôt deureujat jih. 21 Ulôn ka lheueh meurumpok ngon Nabi Daud, hamba Ulôn nyan, dan Ulôn baiát jih nyan ngon minyéuk upacara. 22 Teunaga Ulôn sabe teulindong jih, kuasa Ulôn teupeuteuga jih. 23 Jihnyan hana hase jipeutaloe lé musoh, dan hana teuma jitindéeh lé ureuëng jeuhet. 24 Banmandum musoh jih Ulôn peubinasa, Ulôn poh maté soemantong nyang banci keujih. 25 Ulôn teutab Ulôn gaséh keujih dan teutab seutia keujihnyan, dan Lôn peujeuet jihnyan seumaken meukuasa. 26 Keurajeuen jih Ulôn peuluwah, phon di Laôt Teungoh sampoe ubak Krueng Efrat. 27 Jihnyan teuma jipeugah ubak Ulôn, 'Droeneueh kheueh Ureuëng syiek ulôn, Po teu Allah ulôn, peulindong dan nyang peuseulamat ulôn.' 28 Ulôn teuma Lôn peujeuet jihnyan putra Ulôn nyang tuha, nyang paleng agong lamkawan banmandum raja. 29 Jihnyan teutab Ulôn gaséh keukai ngon abadi, janji Ulôn deungon jihnyan teutab kong. 30 Takhta jihnyan teutab Ulôn peuteuen simantong langét na di ateueh bumoe, tron meutron aneuëk cucoe jihnyan teutab jiduek disinan. 31 Teuma meunyoe keuturonan jih nyang iengkeue huköm, dan hana udeb meunurot peurintah Ulôn, 32 meunyoe awaknyan hana jipakoe peue nyang ka Ulôn peuteutab dan jipeujayéh peuratoran Ulôn, 33 awaknyan Ulôn huköm deungon peunyeunuét sabab nyang ji iengkeue nyan, dan Ulôn peurhot deungon beuncana sabab desya-desya jihnyan. 34 Teuma keu Nabi Daud teutab ulôn gaséh, dan jihnyan hana ji iengkeue ubak keuseutiaan Lôn. 35 Peujanjian Ulôn deungon jihnyan hana Ulôn peubateue, nibak janji Lôn hana meusaboh pi nyang Ulôn tarek lom. 36 Teuma sigoe keu siumu masa Ulôn meusumpah deumi nan Ulôn nyang suci; ulôn hana Lôn meusulet ubak Nabi Daud. 37 Takhta jihnyan teutab meuteun simantong mata uroe na di ateueh langét, tron meutron sampoe ubak aneuk cucoe nyang duek dan nyang mat keureujeuen. 38 Keurajeuen jihnyan teutab na lagée buleuen, saksi seutia di awan-awan." 39 Teuma jinoenyoe Droeneueh neubeungéh keu raja, Droeneueh tiek dan neutulak ureuëng nyang ka Droeneueh piléh. 40 Neupeubateue peujanjian Droeneueh deungon hamba Droeneueh, mahkota gobnyan ka neugeulawa u dalam luhôb. 41 Droeneueh peuhanco dumna bintéh beuton banda gobnyan, kuta-kuta gobnyan neupeujeuet keu puyeng-puyeng nyang meutabu keudeh keunoe. 42 Somantong ureuëng nyang jijak rotnyan laju jireupah hareuta milék gobnyan, gobnyan jeuet keu ureuëng teuhina nibak kawöm silingka gobnyan. 43 Droeneueh neupeumeunang musoh-musoh gobnyan, dan neupeujeuet banmandum lawan gobnyan jimeusuka ria. 44 Meunan cit deungon sinjata gobnyan neupeujeuet hana meuguna, Droeneueh hana neutulông gobnyan watée lam prang. 45 Neupeu akhé kuasa gobnyan nyang seumarak, dan takhta gobnyan neureupah neutiek ateueh tanoh. 46 Droeneueh neupeupaneuk masa muda gobnyan, dan teutôb gobnyan deungon malée nyang hana teukira. 47 Trok án pajan Droeneueh neumusöm, ya TUHAN? Trok án pajan beungéh Droeneueh nyan hu meuháb-háb lagée apui raya? 48 Neu ingat kheueh keu ulôn padubna paneuk jih udeb nyoe, neucebta manusia sibagoe makhluk udeb nyang fana. 49 Soe kheueh nyang hase udeb sabe dan hana maté? Soe kheueh nyang hase teupeusie nibak ázeub kubu? 50 Ya TUHAN, dipat kheueh tanda gaséh Droeneueh nyan nyang seumula, nyang ka Droeneueh peujanji ubak Nabi Daud deumi keuseutiaan Droeneueh? 51 Ingat kheueh ya TUHAN, pakriban hamba Droeneueh nyoe jihina ngon jiseurapa, ulôn jai that-that lôn tanggong hinaan nibak bansa-bansa. 52 Musoh-musoh Droeneueh jihina raja nyang Droeneueh piléh, ya TUHAN, jihina gobnyan homantong gobnyan jak. 53 Pujoe kheueh TUHAN keu siumu masa. Beujeuet kheueh lagéenyan! Amin!

Zabur 90

1 Doá Nabi Musa, hamba Po teu Allah. 2 Sigohlom gunong-gunong Droeneueh cebta, dan sigohlom bumoe ngon donya nyoe Droeneueh peugöt, Droeneueh kheueh Allah nyang keukai, nyang hana awai dan hana akhé. 3 Droeneueh kheueh nyang yue manusia mangat geuriwang ubak sai geuh, jeuet keu abée lagée awai nyang ka. 4 Nibak Droeneueh siribée thon nyan lagée siuroe, uroe baroe nyang ka liwat; lagée saboh gileran jaga bak watée malam. 5 Droeneueh peuhanyöt kamoe; kamoe nyoe lagée meulumpo, lagée naleueng nyang teungoh timoh; 6 óh watée beungoh jihnyan timoh dan meukeumang, teuma laju layée óh watée seupôt uroe. 7 Kamoe teukeujot deungon beungéh Droeneueh nyan, dan habéh binasa lé meureuka Droeneueh. 8 Droeneueh keubah salah kamoe dikeue Droeneueh, desya kamoe nyang musöm ka leumah lé Droeneueh. 9 Udeb kamoe paneuk sabab Droneueh beungéh, thon-thon kamoe meulalu lagée nafáh nyang teupröh. 10 Masa udeb kamoe na kheueh tujoh ploh thon, dan meunyoe kamoe teuga, na lapan ploh thon. Teuma na kheueh apoh apah dan deurita yang kamoe teumé; óh ka lheueh udeb nyang paneuk, kamoe pih leunyab. 11 Soe kheueh nyang hase jiteupeue keuhai meureuka Droeneueh nyan nyang meunan dahsyat, atawa sadar that keu akibat beungéh Droeneueh nyan? 12 Peusadar kheueh kamoe keuhai paneuk jih dalam udeb nyoe mangat kamoe jeuet keu ureuëng nyang meubudo basa. 13 Ya TUHAN, sampoe án pajan Droeneueh neubeungéh keu kamoe? Neugisa kheueh dan neugaséh kheueh ubak hamba-hamba Droeneueh nyoe. 14 Neupeulimpah kheueh geunaséh Droeneueh ateueh kamoe tieb-tieb beungoh, ya TUHAN, jeuet kamoe geumbira dan sabe kamoe meuca-e ngon meulagu simantong kamoe udeb. 15 Neubri kheueh keu kamoe keubahgiaan nyang seuimbang deungon peundeuritaan nyang kamoe tanggong nibak thon-thon nyang seungsara. 16 Neutunyok kheueh karya Droeneueh keu kamoe namiet-namiet Droeneueh, dan kuasa Droeneueh nyang seumarak ubak keuturonan kamoe. 17 Ya TUHAN Allah kamoe, neubri kheueh beureukat keu kamoe, jeuet peue mantong buet nyang kamoe peubuet meuhase.

Zabur 91

1 Ureuëng nyang meulindong nibak Nyang Mahamanyang, dan tinggai dalam naungan Nyang Mahakuasa, 2 jeuet jipeugah ubak TUHAN, "Droeneueh kheueh nyang bila dan lindong ulôn, Allah lôn, ubak Droeneueh kheueh ulôn peucaya." 3 Gobnyan geupeuleupah gata nibak bala nyang teusöm, dan nibak peunyakét nyang jiba mawöt. 4 Gobnyan geupeupayong gata deungon sayeub Geuh, sampoe gata aman dalam naungan Gobnyan; keuseutiaan Gobnyan lagée peurisai nyang teulindong gata. 5 Gata hanapeu tatakot keuhai bahya bak watée malam, atawa jiseurang ngon hana teusangka-sangka bak watée uroe; 6 meunan cit keuhai beuncana nyang teuka bak watée seupôt, atawa keuhancoran nyang teuka watée teungoh uroe. 7 Bahpi na siribée droe nyang maté bak binéh gata, dan siploh ribée droe blaih uneuen gata, teuma gata keudroe hana cidra. 8 Meunyoe gata tapandang ban sikeulileng gata, disinan deuh takalon ureuëng jeuhet keunong peumbalasan. 9 Sabab gata tapeujeuet TUHAN nyang bila gata, Nyang Mahamanyang tapeujeuet nyang lindong gata. 10 Dan gata hana keunong beuncana, rumoh gata hana jiteuka bala. 11 Po teu Allah geuyue jaga ubak malaikat Gobnyan keuhai gata, geulindong gata homantong nyang gata jak. 12 Awaknyan geubeuôt gata ateueh paleuet jaroe geuh, jeuet gaki gata hana meugantoh deungon batée. 13 Gata taliengkeue uleue dan singa, tagilo singa muda dan uleue meubisa. 14 Feureuman TUHAN, "Ureuëng nyang jicinta ubak Ulôn Lôn peuseulamat, nyang jiaku Ulôn Lôn peulindong. 15 Meunyoe ureuëng nyang jimeulakée ubak Ulôn, peue nyang jilakée nyan Ulôn bri. Óh watée jihnyan meukarat ka meusak, Ulôn tulông jihnyan; jihnyan Lôn sangga nibak bahya dan Ulôn bri keuhoreumatan. 16 Jihnyan Lôn peupueh deungon umu nyang panyang, dan Ulôn peuseulamat."

Zabur 92

1 Ca-e ngon nyanyoe keu uroe Sabat. 2 Keubit jroh that teupeugah syuko ubak Droeneueh, ya TUHAN, dan teupujoe Droeneueh, Allah Nyang Mahamanyang; 3 teujak peugah gaséh Droeneueh bak watée beungoh, dan keuseutiaan Droeneueh bak watée malam, 4 sira teutarek gitar nyang siploh krek taloe, teuiréng teuma deungon gambus dan keucapi. 5 Sabab buet Droeneueh keubit galak até ulôn, ulôn meuca-e geumbira sabab karya Droeneueh. 6 Padub na raya buet-buet Droeneueh, ya TUHAN, Padub na lhok pikeran-pikeran Droeneueh! 7 Ureuëng bangai hana hase jipuphom, dan ureuëng bingong hana hase muphom. 8 Jeuet mantong ureuëng doraka timoh lagée naleueng nyang subô, dan ureuëng jeuhet meutamah kaya dan makmu; teuma awaknyan teupeubinasa banmandum hana nyang tinggai bahpi meusidroe, 9 sabab Droeneueh, TUHAN, meukuasa siumu masa. 10 Kamoe meuteupeue bahwa musoh Droeneueh teupeuhabéh banmandum, ya TUHAN, banmandum ureuëng jeuhet teupeu crebre. 11 Droeneueh nyang peujeuet teunaga lôn lagée teunaga banteng kleuet, dan neubri beureukat ubak ulôn deungon keubahgiaan. 12 Deuh ulôn ngieng musoh-musoh ulôn nyang taloe, ureuëng-ureuëng nyang ka jibeudôh jilawan ulôn, reuncana-reuncana jeuhet awaknyan ka lheueh ulôn deungoe. 13 Ureuëng jujoe meutarok lagée bak kuruma, dan jitimoh rampak lagée bak ceumara di Libanon. 14 Awaknyan lagée bak kayée nyang teupula di Baét TUHAN, dan meukeumang di Baét Allah geutanyoe, 15 bak kayée nyang mantong jimuboh óh watée tuha, teutab ijo dan seugar. 16 Nyan kheueh bukeuti jih bahwa TUHAN ade; Gobnyan nyang bila ulôn, hana nyang curang nibak Gobnyan.

Zabur 93

1 TUHAN na kheueh raja; Gobnyan geungui peukayan keuagongan dan teunaga. Bumoe jidong nyang kong hana hase guyang. 2 Takhta Droeneueh kukoh yoh awai mula, nibak nyang keukai, Droeneueh na. 3 Dasai laôt raya jipeuteuga su jih, ya TUHAN, samudra jipeuteuga su umbak jih. 4 Teuma TUHAN nyang meukuasa di dalam syeuruga, leubeh hebat nibak geulora samudra, dan leubeh teuga nibak umbak nyang meuguncang. 5 TUHAN, huköm Droeneueh keukai dan abadi, Baét Droeneueh suci sipanyang masa.

Zabur 94

1 Ya Allah, Droeneueh kheueh Allah nyang hase tueng bila, neutunyok kheueh balasan Droeneueh, ya TUHAN. 2 Beudôh kheueh, ya Hakém bansaboh bumoe, neuhuköm kheueh ureuëng cungkak nyang sisuai deungon peue nyang ka jipeubuet. 3 Ya TUHAN, sampoe án pajan ureuëng jeuhet jimeugeumbira? Trok án pajan, ya TUHAN? 4 Awaknyan jipeugah haba nyang gasa, dan jipeusombong droe deungon buet nyang jeuhet nyang jikeureuja. 5 Awaknyan jiteugon umat Droeneueh, ya TUHAN, dan jipeureumok ureuëng-ureuëng yang neupiléh. 6 Awaknyan jipoh maté inong balée ngon aneuëk yatem ngon muntui dan ureuëng aséng nyang na tinggai di nanggroe nyoe. 7 Kheun awaknyan, "TUHAN hana geukalon, Allah Nabi Yakub hana geungieng." 8 Hai bansa ulôn, bék kheueh gata bangai that, meurunoe kheueh tangui akai gata! 9 Po teu Allah nyang peugöt geulinyueng, peu kheueh Gobnyan hana geudeungoe? Gobnyan nyang peugöt mata, peu kheueh Gobnyan hana geukalon? 10 Gobnyan nyang peurunoe bubena bansa-bansa, peu kheueh Gobnyan hana geuhuköm? Gobnyan nyang peujeuet keugurée banmandum ureuëng, peu kheueh hana iéleumé peungeutahuan? 11 TUHAN geuluek banmandum pikeran manusia, Gobnyan geuteupeue banmandum sia-sia beulaka. 12 Mubahgia kheueh ureuëng nyang Droeneueh didek, ya TUHAN, ureuëng nyang Droeneueh peurunoe banmandum huköm-huköm Droeneueh. 13 Droeneueh peuteunang jihnyan watée uroe-uroe jiteuka bala, sampoe jikueh uruek keu jijak drob ureuëng-ureuëng jeuhet. 14 Sabab TUHAN hana geutinggai umat Gobnyan; Gobnyan hana teupeubiyeu ban atra milék pusaka Gobnyan. 15 Dan huköm geupeudong lom dipeungadelan, banmandum ureuëng jujoe jidukong. 16 Soe nyang bila ulôn ateueh ureuëng doraka? Soe nyang nyang dong blaih ulôn keuteujak lawan ureuëng nyang peubuet jeuhet? 17 Meunyoe TUHAN hana geutulông ulôn, ulôn minah ubak donya ureuëng maté. 18 Watée ulôn pike bahwa ulôn reubah, geunaséh Droeneueh, TUHAN, sampoe ulôn hase teudong kukoh. 19 Meunyoe até ulôn gundah ngon apoh apah, Droeneueh nyang hibô dan peugeumbira. 20 Droeneueh hana meurakan ngon hakém-hakém nyang jeuhet, nyang jirancang keujeuhetan meunurot huköm jih. 21 Awaknyan sipakat jijak lawan ureuëng jujoe, dan jihuköm maté ureuëng nyang hana salah. 22 Teuma TUHAN na kheueh nyang bila lôn, Allah ulôn nyang jeuet keupeulindong lôn. 23 Gobnyan geuhuköm ureuëng jeuhet nyang sisuai deungon buet nyang jeuhet nyan, dan geupeuseungab awaknyan sabab desya jih. TUHAN Po teu Allah geutanyoe geupeuseungab awaknyan.

Zabur 95

1 Jak kheueh geutanyoe ta meuca-e ngon meunyanyoe keu TUHAN, meusurak geumbira kheueh keu nyang peuseulamat geutanyoe! 2 Jak geutanyoe tameuhadab ubak Gobnyan deungon ca-e lagu syukoe, meusurak geumbira keu Gobnyan deungon ca-e puja dan pujoe. 3 Sabab TUHAN na kheueh Allah nyang agong, Raja peukasa nyang hase geuatasi banmandum dewa. 4 Gobnyan hase geukuasa bagian nyang paleng lhok nyang na didalam bumoe, dan pucak-pucak gunong pi atra Gobnyan. 5 Gobnyan nyang kuasa laôt, sabab Gobnyan nyang peujeuet laôt nyan, dan darat pi buet jaroe Gobnyan. 6 Jak geutanyoe ta sujut ta seumah Gobnyan, ta meuteuôt dikeue TUHAN, nyang cebta geutanyoe. 7 Sabab Gobnyan Allah geutanyoe, geutanyoe umat nyang geupeulara, lagée bubiri nyang geurabe. 8 "Bék kreueh ulée lagée indatu gata di Meriba, lagée yoh masa awaknyan di Masa, nibak padang pasi. 9 Di teumpat nyan awaknyan ji ujoe Ulôn, bahpi ka lheueh jingieng buet nyang Ulôn keureuja. 10 Peuet ploh thon treb jih Ulôn luwat keu awaknyan; Kheun Ulôn: Keubit, bansa nyan hana seutia! Awaknyan hana jipakoe peue-peue mantong nyang Ulôn peurintah. 11 Dan Ulôn meusumpah teungoh Ulôn beungéh, awaknyan hana jiteumeu tamong u dalam nanggroe nyan keu jiteumé meureuhat meusajan Ulôn."

Zabur 96

1 Meuca-e kheueh ngon lagu barô keu TUHAN! Meuca-e kheueh keu TUHAN, hai banmandum bumoe! 2 Meuca-e kheueh keu TUHAN dan pujoe kheueh Gobnyan; tieb-tieb uroe tajak peusampoe kheueh haba geumbira bahwa Gobnyan ka geupeuseulamat geutanyoe. 3 Calitra kheueh keu agongan Gobnyan ubak bansa-bansa, dan buet-buet Gobnyan nyang peukasa keu umat manusia. 4 Sabab rayeuk kheueh TUHAN, dan lumpah teupujoe Gobnyan, harôh teutakot leubeh nibak meubagoe dewa. 5 Dewa-dewa bansa laén na kheueh patong beurala, teuma TUHAN na kheueh nyang cebta angkasa raya. 6 Ateueh Gobnyan teutôb bandum deungon keuagongan dan keumuliaan, Baét Gobnyan peunoh deungon kuasa dan keu indahan. 7 Pujoe kheueh TUHAN, hai umat manusia, pujoe kheueh keuagongan dan teunaga Gobnyan! 8 Pujoe kheueh nan Gobnyan nyang mulia, dan ba kheueh keureubeuen u dalam Baét Gobnyan. 9 Seumah kheueh TUHAN sira tangui peukayan iébadat! Beuyo kheueh dikeue Gobnyan, hai bansaboh donya! 10 Tabri tée kheueh keu bansa-bansa, "TUHAN nyan Raja! Bumoe kukoh hana hase gob gokgok; Gobnyan peusidang bansa-bansa deungon ade." 11 Meugeumbira kheueh, hai langét deungon bumoe! Meugeumuroh kheueh, hai laôt deungon banmandum asoe jih! 12 Meusuka cita kheueh, hai blang meunan cit banmandum sinaman! Bak-bak kayée nyang na didalam uteun meusurak geumbira. 13 Sabab TUHAN geutron geujak peurintah di ateueh bumoe, Gobnyan geupeusidang bansa-bansa deungon ade dan jujoe.

Zabur 97

1 TUHAN na kheueh Raja! Patot that bumoe meugeumbira, dan bubena pulo meusuka cita. 2 Gobnyan jikeulileng lé awan dan seupôt luwa biasa; keuadelan dan huköm na kheueh azas peumeurintah Gobnyan. 3 Apui hu jimeu éue dikeue Gobnyan, habéh hangöh bubena musoh nyang na bansilingka Gobnyan. 4 Kilat Gobnyan trang bansaboh donya, bumoe yoe meugám-gám óh jikalon Gobnyan. 5 Meunan gunong-gunong meuliléh lagée lilen nyang tijoh dikeue TUHAN, dikeue TUHAN, nyang mat kuasa bansaboh bumoe. 6 Langét jijak peugah keuhai keuadelan, dan bandum bansa jikalon keuadelan Gobnyan. 7 Soemantong ureuëng nyang seumah beurala geupeumalée, nyang peubangga ubak barang-barang nyang hana meuguna; banmandum dewa teuma jisujut dikeue TUHAN. 8 Peunduduek Sion dan banda-banda nyang na di Yehuda galak lumpah na watée jideungoe keuputosan TUHAN. 9 Sabab Droeneueh, ya TUHAN, nyang mat kuasa bansaboh bumoe; Droeneueh agong leubeh nibak dewa toh mantong. 10 Hai gata nyang cinta ubak TUHAN, banci kheueh keu nyang jeuhet! Sabab TUHAN geulindong banmandum umat Gobnyan, Gobnyan nyang peubeubaih ureuëng laén nibak kuasa ureuëng nyang doraka. 11 Trang ka jiteubiet ubak ureuëng nyang jujoe até, dan suka cita ubak ureuëng nyang jujoe. 12 Meugeumbira kheueh, hai ureuëng-ureuëng nyang jujoe até sabab peue nyang ka geupeubuet lé TUHAN, dan meusyukoe kheueh ubak Po teu Allah nyang suci.

Zabur 98

1 Zabur. 2 TUHAN geupeumaklum keuhai Gobnyan meunang; Gobnyan geujak peugah keuadelan ubak bansa-bansa. 3 Gobnyan geuingat geunaséh dan keuseutiaan Geuh ubak Israel, umat Gobnyan. Banmandum bansa nyang na di ateueh bumoe ka deuh jikalon Allah geutanyoe meunang. 4 Meusurak geumbira kheueh keu TUHAN, hai bansaboh bumoe! Pujoe kheueh TUHAN deungon nyanyoe dan ca-e sira meusurak geumbira. 5 Meuca-e kheueh lagu seumujoe keu TUHAN, sira peutek keucapi. 6 Yeub kheueh beureuguih ngon sangka kala, meusurak kheueh keu TUHAN, Raja geutanyoe. 7 Meugeumuroh kheueh hai laôt meunan cit deungon banmandum asoe jih bumoe dan banmandum nyang na didalam nyan. 8 Bah kheueh krueng-krueng jipéh paleuet, dan bukét-bukét meusurak geumbira dikeue TUHAN. 9 Sabab Gobnyan geuteuka keu geujak peuhakém bumoe; meunan cit bansa-bansa geupeusidang deungon ade dan beuna.

Zabur 99

1 TUHAN na kheueh Raja; bansa-bansa nyang nyang jideungoe nyan yo meutot-tot. Gobnyan geuduek meutakhta di ateueh kerub, bumoe meuguncang lagée geumpa. 2 TUHAN meukuasa that-that di Sion; Gobnyan agong ék geupeutaloe banmandum bansa. 3 Bah awaknyan jipujoe nan Gobnyan nyang agong ngon mulia. Kudus kheueh Gobnyan! 4 Keukuasaan keu Droeneueh, Raja nyang cinta ubak huköm; Droeneueh ka neupeudong keubeunaran; Droeneueh neupeujak huköm dan keuadelan di Israel. 5 Peumanyang kheueh TUHAN Po teu Allah geutanyoe, sujut kheueh dikeue takhta Gobnyan. Kudus kheueh Gobnyan! 6 Nabi Musa dan Nabi Harun jitamong cit keunan sibagoe teungku-teungku imeum, Samuel salah sidroe nyang meudoá keu Gobnyan. Awaknyan jimeulakée ubak TUHAN, dan Gobnyan laju geujaweueb. 7 Nibak taméh awan Gobnyan geumeututoe ubak awaknyan, awaknyan taát bak mandum huköm dan peurintah Gobnyan. 8 Ya TUHAN Allah kamoe, Droeneueh neujaweueb peue nyang jilakée lé umat Droeneueh; ubak awaknyan Droeneueh na kheueh Allah nyang neutem peu amphon desya, bahpi awaknyan Droeneueh huköm sabab buet nyang salah nyang jipeubuet. 9 Peuteupat kheueh TUHAN Po teu Allah geutanyoe, dan seumah kheueh Gobnyan di bukét Gobnyan nyang suci, sabab kudus kheueh TUHAN Allah geutanyoe.

Zabur 100

1 Zabur keu keureubeuen syukoe. bumoe! 2 Meu iébadat kheueh ubak TUHAN deungon até nyang peunoh geumbira, meuhadab kheueh ukeue Gobnyan deungon ca-e dan lagu nyang ceuria! 3 Ingat kheueh bahwa TUHAN nyan na kheueh Allah. Gobnyan nyang cebta geutanyoe dan geutanyoe nyoe na kheueh atra Gobnyan; geutanyoe umat Gobnyan, bansa nyang geupeulara. 4 Tamong kheueh rot pintoe geureubang deungon ca-e lagu syuko, udalam peulataran Gobnyan deungon ca-e lagu puja ngon pujoe. Meusyuko kheueh ubak Gobnyan dan pujoe kheueh Gobnyan! 5 Sabab TUHAN jroh; geunaséh Gobnyan keu siumu masa, dan keuseutiaan Gobnyan tron meutron.

Zabur 101

1 Zabur Nabi Daud. 2 Ulôn keuneuk kalon cara udeb nyang hana meucupa. Pajan kheueh Droeneueh neuteuka ubak ulôn? 3 keujeuhetan hana ulôn peubiyeu. Ulôn banci nibak buet ureuëng murtad, dan hana lôntem meu urosan deungon awaknyan. 4 Ulôn hán lôntem peubuet curang dan hán lôntem rhoh jampu bak buet nyang jeuhet. 5 Ureuëng nyang galak ba peusuna deungon cara seungab-seungab ureuëng nyan ulôn peubinasa. Ureuëng nyang sombong dan manyang até ureuëng nyang lagée nyan hana ulôn peubiyeu. 6 Ulôn galak ubak ureuëng nyang seutia ubak Po teu Allah; ureuëng nyang lagée nyan jeuet jitinggai di baét ulôn. Ureuëng nyang udeb lam keuadaan gleh hana meucupa ureuëng nyang lagéenyan jeuet jipeutimang ulôn. 7 Ureuëng teumipée hana jeuet jitinggai di baét ulôn; ureuëng nyang galak sulet jihnyan hana meuteun dikeue ulôn. 8 Phon nibak uroe ubak uroe ulôn peuhanco ureuëng-ureuëng jeuhet nyang na di nanggroe nyoe. Banmandum ureuëng nyang jipeubuet buet nyang jeuhet ureuëng nyan ulôn sampôh gleh nibak Banda TUHAN.

Zabur 102

1 Doá ureuëng seungsara nyang dalam keuadaan hék ngon leusu apoh apah ubak TUHAN. 2 Ya TUHAN, deungoe kheueh doá ulôn, bah kheueh meuhôi ulôn nyoe trok ubak Droeneueh. 3 Bék neupaleng nibak ulôn meunyoe ulôn jiteuka susah. Neudeungoe kheueh meunyoe ka ulôn meuhôi, dan neujaweueb kheueh doá ulôn. 4 Udeb ulôn nyoe ya TUHAN, deungon sikeujab gadôh lagée asab; dan tuleueng-tuleueng ulôn seu-uem tutông lagée apui. 5 Ulôn hék ngon leusu lagée naleueng tho, dan hana nafeusu keu lôn pajoh bu. 6 Ulôn meurang-rang deungon su nyang nyareng; badan lôn pijuet ka tinggai kulét ngon balot tuleueng. 7 Ulôn lagée cicém undan nyang na dipadang pasi, dan lagée kleung keutôk-tôk nyang tinggai bak teumpat rungka bangunan nyang seungue. 8 Ulôn hana hase lôn éh, ya TUHAN, lagée cicém keuseupian di ateueh bubông rumoh. 9 Siuroe seupôt musoh jihina ulôn; nan ulôn jipeujeuet keu kutok lé ureuëng nyang beungéh keu ulôn. 10 Abée nyang ulôn pajoh lagée lôn makheun ruti, ié nyang ulôn jieb meulawok deungon ié mata, 11 sabab Droeneueh ka neubeuôt dan neutiek ulôn nibak beungéh Droeneueh nyang luwa biasa. 12 Udeb ulôn jijak lagée bubayang óh uroe seupôt; dan ulôn jeuet keulayée lagée ôn naleueng nyang keunong uroe. 13 Teuma Droeneueh, ya TUHAN, Raja keu siumu masa, teutab ji ingat tron meutron. 14 Droeneueh neubeudôh dan neugaséh ubak Sion, watée jih ka trok keu teubalaih gaséh ubak jihnyan. 15 Sabab hamba-hamba Droeneueh jisayang keu jihnyan, bahpi jihnyan ka jeuet keubarang rungka-rungka. Awaknyan meurasa gaséh keu jihnyan, bahpi jihnyan ka jeuet keu abée. 16 Kuasa TUHAN teutab jitakot lé bansa-bansa; dan keuagongan Gobnyan teutab jigalak lé bubena raja-raja, 17 meunyoe TUHAN ka geupeudong lom Sion, dan geubeudôh dalam keuagongan Gobnyan. 18 Gobnyan geudeungoe doá umat Geuh nyang meularat, dan hana geutulak peue nyang jilakée lé awaknyan. 19 Tuléh kheueh banmandum peue nyang geupeubuet lé TUHAN keu angkatan nyang teuma teuka, jeuet bansa nyang gohlom lahé hase jipujoe Gobnyan. 20 TUHAN geupandang rot teumpat Geuh nyang manyang, rot lam syeuruga Gobnyan geukalon u bumoe 21 mangat geudeungoe apoh apah ureuëng lam peunjara dan geupeubeubaih ureuëng nyang teuhuköm maté. 22 Dan nan Gobnyan jipeugah di Sion, dan Gobnyan jipujoe-pujoe di Yerusalem, 23 watée bansa-bansa dan keurajeuen nanggroe jimeuhimpon keu meungabdi ubak TUHAN. 24 TUHAN geupeupatah teunaga ulôn watée ulôn mantong muda, dan geupeupaneuk umu ulôn. 25 Laju ulôn peugah, "Ya Allah, bék kheueh neucok nyawöng ulôn nibak siteungoh udeb ulôn." 26 yoh masa ilée Droeneueh neupeujeuet bumoe; meunan cit deungon langét na kheueh karya nyata Droeneueh. 27 Banmandum nyan teuma habéh, teuma Droeneueh teutab na; banmandum nyan jeuet keu useueng lagée peukayan. Droeneueh neutiek atranyan lagée bajée tuha, dan banmandum óh lheuehnyan sapan sapa. 28 Teuma Droeneueh teutab saban, udeb Droeneueh hana keuneulheueh. 29 Aneuëk cucoe kamoe udeb deungon teuntram, dan sabe aman lam lindongan Droeneueh.

Zabur 103

1 Nibak Nabi Daud 2 Pujoe kheueh TUHAN, hai jiwa lôn, bék tuwoe ubak bandum nyang jroh nibak Gobnyan! 3 Gobnyan nyang peuamphon banmandum desya gata, nyang peupuléh banmandum peunyakét gata, 4 Gobnyan nyang peubeubaih nyawöng gata lam jrat, nyang bri keu gata geunaséh nyang meulimpah-limpah. 5 Gobnyan nyang peupueh udeb gata deungon banmandum nyang jroh, sampoe gata awet muda lagée cicém rajawali. 6 TUHAN nyang peujak huköm dan keuadelan keu mandum ureuëng nyang keunong iénanya. 7 Gobnyan nyang peuna reuncana keu Nabi Musa dan buet-buet keu bansa Israel. 8 Sabab TUHAN na kheueh peungaséh dan peunyayang, Gobnyan panyang saba dan geunaséh Gobnyan meulimpah. 9 Gobnyan hana geudot hana putôh-putôh, dab hana geubeungéh siumu masa. 10 Gobnyan hana geuhuköm geutanyoe nyang sisuai deungon desya geutanyoe, atawa geubalaih geutanyoe nyang sipadan deungon salah tanyoe. 11 Teuma simanyang langét di ateueh bumoe, bubenyan kheueh geunaséh Gobnyan keu ureuëng nyang taqwa. 12 Sijiôh timu nibak barat, sidubnyan kheueh geuböih dumna desya-desya geutanyoe. 13 Lagée sidroe ayah nyang geugaséh keu aneuëk-aneuëk gobnyan, meunan kheueh TUHAN geugaséh keu ureuëng nyang taqwa. 14 Sabab TUHAN geuteupeue geutanyoe teupeugét nibak peue, dan Gobnyan geuingat bahwa geutanyoe na kheueh nibak abée. 15 Manusia udeb jih paneuk na miseu naleueng; jihnyan meukeumang lagée bungöng nyang timoh di ladang; 16 meunyoe jiyueb lé angén, leunyab kheueh sibungöng nyan, dan teumpat jihpi hana teutuho le. 17 Teuma TUHAN teutab geugaséh ubak ureuëng nyang taqwa, keuhai jroh Gobnyan teutab hana putôh tron meutron 18 keu ureuëng nyang jimumat ubak janji Gobnyan, dan deungon seutia jitem peubuet peurintah Gobnyan. 19 TUHAN geumat peurintah di syeuruga, Gobnyan raja nyang mat peurintah ateueh meubagoe rupa. 20 Pujoe kheueh TUHAN, hai malaikat-malaikat nyang peukasa, nyang jideungoe jipeubuet peurintah Gobnyan. 21 Pujoe kheueh TUHAN, hai banmandum makhluk nyang na di syeuruga, banmandum hamba Gobnyan nyang jipeubuet keuheundak Gobnyan. 22 Pujoe kheueh TUHAN, hai banmandum cebtaan nibak mandum wilayah keukuasaan Gobnyan. Pujoe kheueh TUHAN, hai jiwa lôn!

Zabur 104

1 Pujoe kheueh TUHAN, hai jiwa lôn! Padubna agong Droeneueh, ya TUHAN Allah ulôn! Droeneueh nyang sôk peukayan keumeugahan dan keumuliaan, 2 dan meuseulimbot cahya. Droeneueh nyang leueng langét ban lagée khimah, 3 dan neupeudong Baét Droeneueh di ateueh ié langét. Awan-awan neupeujeuet keu geuritan Droeneueh, Droeneueh neuduek ateueh sayeub angén. 4 Angén neupeujeuet keu utosan Droeneueh, dan kilat jeuet keupeulayan Droeneueh. 5 Deungon kong that bumoe nyoe neupasang nibak tapak jih, sampoe hana guyah siumu masa. 6 Droeneueh nyang peulimbot nyan deungon laôt samudra nyang raya, dan ié jih sampoe meugeunang trok ubak pucak-pucak gunong. 7 Watée neudumpék, ié nyan laju ji ile, ji ile deungon tajam sabab su Droeneueh nyang geumuroh. 8 Ié ji ile meulalu gunong-gunong sampoe u pantôn, u teumpat nyang Droeneueh keubah keu ié nyan. 9 Droeneueh nyang peuteuntée bataih-bataih nyang hánjeuet jilalu lé ié nyan, mangat ié nyan bék jigisa meugeunang di ateueh bumoe. 10 Droeneueh teuma nyang peuhah mata ié di pantôn-pantôn, aneuk-aneuk krueng laju ji ile lam luengkiek bukét-bukét, 11 keu hase jijieb ié mandum beulatang nyang na di dalam blang, dan peu puléh glah bubena keuleudée didalam glé. 12 Bak binéh krueng nyan bubena cicém jijak peugöt uempueng; dan cicém-cicém nyan laju jimeusu lamkawan ôn-ôn kayée nyan. 13 Nibak langét neupeutron ujeuen di ateueh gunong, dan bumoe peunoh deungon hase karya Droeneueh. 14 Droeneueh nyang peutimoh naleueng keu peunajoh beulatang, dan keu manusia meubagoe rupa sinaman. Dan awaknyan jeuet jiseumula, 15 dan teupeuhase ié anggô nyang lazat rasa. Meunan cit deungon minyéuk zaiton nyang teupeujeuet muka jih meucahya, dan peunajoh nyang hase teubri nibak jih teunaga. 16 Bak-bak kayée TUHAN jitoh lé ujeuen nyang meulimpah bak kayée ceumara Libanon nyang jipula keudroe. 17 Di ateueh kayée nyan jimeu uempueng kheueh meubagoe cicém, cicém ranggung jimeu uempueng di ateueh pucok jih. 18 Gunong-gunong nyang manyang jeuet keu teumpat tinggai kaméng uteuen; dan peulandok jimusöm di miyueb batée kareueng. 19 Droeneueh nyang peujeuet buleuen sibagoe tanda watée, dan mata uroe jiteupeue pajan saát jihnyan jilôb. 20 Meunyoe Droeneueh neupeutron seupôt, maka uroe laju jeuet keu malam, dan banmandum beulatang uteuen laju jijak meulata. 21 Singa-singa muda laju jitauém jijak mita uempeuen, jilakée peunajoh nyang geuseudia lé Po teu Allah. 22 Meunyoe mata uroe ka jiteubiet, beulatang-beulatang nyan laju jimusöm dan teu-éh nibak teumpat gobnyan musöm. 23 Dan watée nyan kheueh jiteubiet manusia jijak meukeureuja, dan laju jimeubuet sampoe mata uroe seunja. 24 Padub na le karya Droeneueh, ya TUHAN, banmandum neupeujeuet deungon bijak sana; bumoe nyoe peunoh deungon cebtaan Droeneueh. 25 Kalon kheueh laôt nyang luwah meureuntang, deungon makhluk cut rayeuk hán ék teukira. 26 Di sinan kapai-kapai jimeulayeu, dan Lewiatan, naga laôt nyang Droeneueh cebta jimeuén-meuén. 27 Awaknyan banmandum jimeuharab bak Droeneueh, mangat meuteumé peunajoh trok watée. 28 Droeneueh nyang bri, dan awaknyan nyang peusapat, Droeneueh nyang keubah banmandum nyan, dan awaknyan nyang makheun sampoe án troe. 29 Meunyoe Droeneueh neupaleng, awaknyan teumakot that-that; meunyoe Droeneueh cok nafáh awaknyan, awaknyan banmandum binasa, dan jiwoe lom jeuet keu abée lagée asai mula. 30 Teuma meunyoe awaknyan Droeneueh bri nafáh, awaknyan neupeujeuet; Droeneueh neubri udeb barô keu bumoe. 31 Seumoga keu agongan TUHAN teutab siumu masa! Dan seumoga Gobnyan geumbira deungon peue nyang ka geucebta! 32 Gobnyan geupandang bumoe dan dibumoe nyan laju jiteuka yo, dan gunong-gunong laju geumat, di gunong nyan pi jiteubiet asab. 33 Ulôn keuneuk meuca-e keu TUHAN simantong nyawöng didalam badan, dan meunyanyoe ngon meuca-e keu TUHAN simantong ulôn geubri udeb. 34 Seumoga nyanyoe lôn nyoe meukeunong nibak até Gobnyan, sabab Gobnyan kheueh até ulôn nyoe hase geumbira. 35 Bah kheueh ureuëng meudesya gadôh di ateueh bumoe, dan bah kheueh ureuëng jeuhet habéh binasa.

Zabur 105

1 Meusyukoe kheueh ubak TUHAN, jak peusampoe kheueh keubeusaran Gobnyan, calitra kheueh buet Gobnyan ubak bansa-bansa. 2 Meuca-e kheueh lagu pujoe keu TUHAN, jak peusampoe kheueh bandum karya Gobnyan nyang luwa bisa nyan. 3 Gobnyan kheueh TUHAN Nyang Mahasuci; meusuka cita kheueh sabab geutanyoe atra Gobnyan, banmandum nyang keuneuk seumah bah kheueh meugeumbira. 4 Lakée kheueh teunaga ubak Gobnyan, dan seumah kheueh Gobnyan mantong. 5 Hai keuturonan Nabi Ibrahim, hamba Gobnyan, dan keuturonan Nabi Yakub, ureuëng nyang geupiléh, ingat kheueh banmandum buet ajaéb nyang ka geupeubuet, dan bék neutuwoe ubak peue nyang ka geupeuputôh lé Gobnyan. 7 TUHAN na kheueh Allah geutanyoe, keuputosan Gobnyan wajéb teutaát bansaboh donya. 8 Gobnyan sabe geuingat ubak janji nyang ka geupeugah, janji Gobnyan teutab na keu siumu masa. 9 Peujanjian nyan geupeugét deungon Nabi Ibrahim, dan óh lheuehnyan deungon Nabi Ishaq; 10 laju geupeukong deungon Nabi Yakub, sampoe jeuet keujanji nyang keukai keu umat Israel. 11 Kheun Gobnyan, "Tanoh Kanaan Ulôn bri keu gata, jeuet keuhak milék pusaka gata." 12 Yoh masa dilée umat Po teu Allah udeb sibagoe ureuëng aséng disinan dan jeumeulah awaknyan pih na bacut. 13 Awaknyan meurawôh nibak saboh bansa ubak bansa nyang laén, dan geuminah nibak nanggroe nyang saboh ubak nanggroe nyang laén. 14 Teuma TUHAN hana geupeubiyeu soemantong nyang teugom awaknyan; dan deumi awaknyan, raja-raja nanggroe geupeuingat lé Gobnyan, 15 "Bék cuba-cuba peukaru ureuëng-ureuëng piléhan ulôn nyan, dan bék peubuet nyang jeuhet ateueh nabi-nabi ulôn!" 16 TUHAN geupeutron bala deungon musém deuk di nanggroe nyan, dan bubena peuseudiaan peunajoh ka habéh geucok mandum. 17 Teuma Gobnyan geuyue sidroe ureuëng beuawai jijak nibak awaknyan, Yusuf, nyang ka jipeubloe sibagoe hamba sahaya. 18 Gaki ureuëng nyang ji ikat deungon beuleunggu, dan takue ureuëng nyan jililet deungon ranté beuso. 19 Akhé jih teujadi kheueh peue nyang ka lheueh geuramai, jihnyan geupeubeutôi lé feureuman TUHAN. 20 Dan raja nibak nanggroe Meusé, nyang mat kuasa ateueh bansa-bansa, geupeubeubaih ureuëng nyan lam glab. 21 Keu gobnyan geubri tugaih yue uruih meuligoe, dan geubri kuasa ateueh banmandum hareuta beunda gobnyan; 22 meunan cit wewenang keu geu ato dumna peugawée raja, dan geupimpén kawöm nyang tuha-tuha. 23 Óh lheueh nibaknyan Nabi Yakub laju geujak u nanggroe Meusé dan geutinggai teutab disinan sibagoe ureuëng aséng. 24 TUHAN laju geutamah umat Gobnyan meutamah le, sampoe awaknyan leubeh teuga nibak lawan jih. 25 Gobnyan laju geu ubah até ureuëng Meusé mangat awaknyan jibanci keu umat TUHAN, dan jipeusaneut hamba-hamba Gobnyan deungon cara nyang curang hana teukira. 26 Óh lheuehnyan laju geu peutron Nabi Musa hamba Geuh dan Nabi Harun ureuëng nyang ka geupiléh. 27 Di Nanggroe Meusé awaknyan laju geupeubuet buet-buet nyang ajaéb, buet-buet nyang raya nibak TUHAN, 28 dan awaknyan taát ubak peurintah Gobnyan. Óh lheueh nyan TUHAN geupeujeuet laju nanggroe nyan seupôt buta. 29 Krueng awaknyan ka geu ubah jeuet keu darah, sampoe banmandum uengkot nyang na disinan ka habéh maté. 30 Cangguek-cangguek meuraja lela di nanggroe awaknyan, dan le that-that nyang jitamong u dalam meuligoe raja. 31 Ateueh peurintah Allah jiteuka teuma lalat, dan jamok-jamok ka meurön-rön bansaboh nanggroe. 32 Gobnyan laju geupeutron ujeuen es keugeunantoe ujeuen ié, dan geupeutron kilat sambong meusambong nyang jiseumama keudeuh keunoe. 33 Meunan cit Gobnyan laju geupeureubah bubena bak anggô deungon bak ara, dan banmandum bak kayée awaknyan habéh geupeureubah teung bayeueng sapan sapa. 34 Ateueh peurintah Gobnyan, teuka kheueh daruet, jeumeulah daruet nyan lumpah that jai hana teukira jeumeulah jih. 35 Daruet nyan habéh jiseuba mandum seunaman nyang na di ladang, dan jipajoh habéh banmandum hase bumoe. 36 Óh lheueh nyan Gobnyan laju jipoh maté tieb-tieb aneuëk agam nyang tuha nyang na dalam keuluwarga ureuëng Meusé. 37 Óh lheuehnyan bansa Israel laju geu intat keudeh uluwa, nyang jiba sajan awaknyan na kheueh méuh deungon pirak; banmandum awaknyan lam keuadaan seuhat dan teuga-teuga. 38 Ureuëng Meusé ka jiteuka rasa teumakot ngon yo hana ngon peusa, awaknyan galak that watée ureuëng Israel jijak jitinggai nanggroe nyan. 39 Lé Allah laju geuleueng awan di ateueh ulée umat Gobnyan sibagoe payong, dan apui hu sibagoe suwa óh watée malam teuka. 40 Awaknyan jimeulakée, laju Gobnyan geupeutron cicém puyoh, keu awaknyan geubri ruti nyang geupeutron lam syeuruga sampoe án troe. 41 TUHAN geuplah laju gunong batée, laju jiteubiet ié nyang ji ile lagée aneuk krueng di teungoh-teungoh padang pasi. 42 Sabab TUHAN geuingat that ubak janji Gobnyan keu Nabi Ibrahim, hamba Geuhnyan. 43 Dan laju geu intat umat Gobnyan deungon geumbira, ureuëng-ureuëng nyang geupiléh deungon seumurak ria. 44 Tanoh atra bansa-bansa laén laju geubri keu awaknyan, dan lampôh ngon ladang awaknyan laju geujok keu umat nyang ka geupeuleupah nyan, 45 deungon harapan jeuet umat Geuh jitaát ubak huköm-huköm Gobnyan dan jiseutôt peue nyang geupeurintah lé Gobnyan.

Zabur 106

1 Pujoe kheueh TUHAN! 2 Soe nyang hase jipeugah keuhai keuhebatan TUHAN, dan jipujoe nyang layak patot keu Gobnyan? 3 Mubahgia kheueh ureuëng nyang taát ubak peurintah-peurintah Gobnyan, dan hántom na salah lam tindakan Geuhnyan. 4 Ingat kheueh keu ulôn, ya TUHAN, deumi keujroh Droeneueh nibak umat Droeneueh keudroe, dan neutulông kheueh ulôn meunyoe Droeneueh neupeuseulamat awaknyan. 5 Seumoga deuh ulôn ngieng keumakmuran ureuëng-ureuëng nyang neupiléh dan meusuka cita meusajan umat Droeneueh. Seumoga ulôn meubangga dan meugeumbira meusajan ureuëng nyang ka jeuet keuhak milék Droeneueh. 6 Kamoe ka meudesya lagée indatu kamoe; kamoe ka kamoe peubuet jeuhet dan doraka ubak Droeneueh. 7 Watée mantong di nanggroe Meusé indatu kamoe hana geumuphom; karya Droeneueh nyang lumpah hebat nyan hana geumeuphom. Awaknyan ka tuwoe ubak geunaséh Droeneueh nyang meulimpah ruwah, dan bak binéh Laôt Geulagah awaknyan geumeubeurontak ubak Nyang Mahamanyang. 8 Teuma TUHAN teutab geupeuseulamat awaknyan deumi keu droe Geuh keudroe, mangat keupeukasaan Gobnyan jeuet keunyata. 9 Ateueh peurintah Gobnyan Laôt Geulagah tho kreng, laju Gobnyan geuba umat Geuh jijak rot laôt nyang ka tho hana le meu ié, lagée geujak didalam padang pasi. 10 Deungon na lagée nyan awaknyan ka geupeuseulamat nibak musoh dan lawan, dan geupeubeubaih awaknyan nibak kuasa musoh. 11 Teuma ié laôt nyang raya nyan laju meukab lom teuma, bubena lawan-lawan awaknyan ka habéh ngob lam laôt nyan; hana meusidroe pih nibak lawan-lawan awaknyan nyang na tinggai. 12 Óh lheuehnyan barô kheueh umat Gobnyan jipeucaya ubak janji nyang ka geupeugah laju jimeu zike sira meuca-e lagu pujoe keu TUHAN. 13 Teuma óh lheuehnyan awaknyan laju tuwoe ubak buet TUHAN, jimeubuet lom ban galak droe deungon hana jilakée naseuhat ubak Gobnyan. 14 Di teungoh padang pasi awaknyan jiteuka nafeusu, laju jiujoe Po teu Allah. 15 Gobnyan laju geubri peue nyang jilakée lé awaknyan, teuma meunan cit geupeutron bala peunyakét nyang jiseurang awaknyan. 16 Di padang pasi nyan awaknyan laju teuka iri até ubak Nabi Musa meunan cit ubak Nabi Harun hamba Gobnyan nyang suci. 17 Óh lheueh nyan bumoe pih laju beukah dan laju teu uét Datan, laju teutôb Abiram meusajan ngon keuluwarga gobnyan habéh mandum. 18 Óh lheuehnyan apui nyang raya laju jitron jijak sama keulompok awaknyan, habéh tutông hangöh banmandum nyang doraka ubak Gobnyan. 19 Di ateueh Gunong Sinai awaknyan laju jipeugôt aneuëk bubiri nibak méuh, dan laju jiseumah patong tuangan nyang jipeuget keudroe. 20 Awaknyan laju jituka Allah nyang agong deungon patong leumô nyang jirot naleueng. 21 Awaknyan ka tuwoe ubak Allah nyang ka peuseulamat droe jih Allah nyang ka geupeubuet hai-hai nyang raya di nanggroe Meusé. 22 Keubit lumpah that dahsyat buet-buet nyang ka geupeubuet di nanggroe nyan, dan luwa biasa tindakan Gobnyan di Laôt Geulagah. 23 Dan Allah jiteuka niet keuneuk geupeubinasa awaknyan, teuma bagaih-bagaih geutam lé Nabi Musa, ureuëng nyang ka geupiléh lé Gobnyan. Nabi Musa jeuet keu ureuëng nyang dong teungoh keu awaknyan, sampoe Allah nyang ka that beungéh nyan hase reuda. 24 Óh lheuehnyan awaknyan laju jitulak nanggroe nyang ceudah nyan, sabab hana jipatéh ubak janji Po teu Allah. 25 Awaknyan jimeudaleh dalam khimah droe jih dan hana jitem deungoe le su TUHAN. 26 Teuma deungon geumeusumpah Gobnyan geumeujanji geupeu habéh awaknyan di padang pasi nyang raya. 27 Keuturonan awaknyan geuböih lamkawan bansa-bansa dan geupeu crebre di nanggroe-nanggroe aséng. 28 Óh lheuehnyan di Peor awaknyan jiseumah teuma Baal, dan jipajoh keureubeuen nyang jipeuseumah keu dewa-dewa. 29 Buet nyang lagée nyan sampoe jiteuka beungéh TUHAN nyang luwa biasa, sampoe awaknyan habéh jiseurang lé bala peunyakét nyang hana teukira. 30 Teuma Pinehas laju geubeudôh geujak huköm bubena nyang meusalah, deungon na nyang lagée nyan jipiôh kheueh peunyakét nyang lumpah meupalo nyan. 31 Buet jih nyang lagée nyan geuanggab sibagoe jasa nyang raya keu gobnyan, dan ji ingat siumu masa. 32 Meunan cit nibak mon-mon Meriba TUHAN geubeungéh keu awaknyan, dan Nabi Musa keudroe lumpah sosah sabab ulah buet awaknyan. 33 Sabab buet awaknyan até gobnyan meutamah tunu, sampoe gobnyan geumeututoe deungon hana seumike. 34 Bansa-bansa nyang laén hana geupeuhanco, lagée nyang geupeurintah lé TUHAN. 35 Awaknyan meujampu deungon bansa-bansa nyan, dan jiseutôt peue nyang jipeubuet lé ureuëng nyang hana jituri Allah. 36 Dan awaknyan laju jiseumah beurala-beurala, dan nyan kheueh jeuet keusabab keuhancoran awaknyan. 37 Awaknyan jikeureubeuen aneuëk-aneuëk droe jih keu beurala-beurala Kanaan. 38 Meunan cit awaknyan jipeurô darah ureuëng-ureuëng nyang meusalah, darah aneuëk-aneuëk gobnyan keudroe, keu jikeureubeuen ubak beurala; sampoe nanggroenyan ka jipeurusak. 39 Sabab buet-buet awaknyan nyang lagéenyan awaknyan ka jeuet keu kuto, dan hana seutia ubak Po teu Allah. 40 Dan beungéh TUHAN pi laju hu lagée apui keu awaknyan, Gobnyan ka glak deungon atra Geuh keudroe. 41 Dan geujok kheueh awaknyan keu bansa-bansa, geupeubiyeu mantong awaknyan jikuasa lé musoh. 42 Laju awaknyan jitindéeh lé musoh-musoh jih keudroe, dan jipeutaklok dimiyueb kuasa awaknyan. 43 Meu ulang-ulang TUHAN geupeubeubaih awaknyan, teuma awaknyan teutab galak bak buet beurontak, sampoe awaknyan habéh binasa nibak desya-desya jih keudroe. 44 Teuma TUHAN geudeungoe cit apoh apah awaknyan, dan Gobnyan teutab geukalon sosah awaknyan. 45 Deumi awaknyan Gobnyan teuingat keu janji nyang ka geupeugah dan geugaséh keu awaknyan sabab geunaséh Geuh nyang raya. 46 Gobnyan laju geupeujeuet awaknyan beujigaséh lé mandum ureuëng nyang jiteun awaknyan. 47 Peuseulamat kheueh kamoe, ya TUHAN kamoe, neupeusapat kheueh kamoe lamkawan bansa-bansa, mangat kamoe jeuet meusyukoe dan kamoe pujoe nan Droeneueh nyang suci. 48 Pujoe kheueh TUHAN, Allah Israel, phon saátnyoe dan siumu masa. Bah kheueh banmandum ureuëng jipeugah, "Amin!"

Zabur 107

1 "Meusyukoe kheueh ubak TUHAN sabab Gobnyan get, geunaséh Gobnyan keukai dan abadi." 2 Tapeugah kheueh nyan meu ulang-ulang, hai gata nyang ka geupeuseulamat nibak keusosahan. 3 Gata ka geupeusapat di nanggroe aséng, di timu dan barat, utara dan seulatan. 4 Na nyang meurawôh di padang beulantara, dan hana jitupat rot u teumpat tinggai di banda. 5 Awaknyan laju jiteuka deuk ngon glaih dan ka gadôh banmandum harapan. 6 Dalam keusosahan nyan awaknyan jimeulakée ubak TUHAN, dan TUHAN pi laju geupeubeubaih awaknyan lam keuadaan meurana. 7 Gobnyan geubimbéng awaknyan rot nyang teupat ubak teumpat tinggai nyang na di banda. 8 Ka pantaih kheueh awaknyan meusyukoe ubak TUHAN sabab geunaséh Gobnyan, dan sabab karya-karya Gobnyan nyang lumpah kagom keu manusia. 9 Sabab Gobnyan geupeupuih glaih ureuëng tho rukuéng, dan geupeulimpah ureuëng nyang deuk deungon peue mantong atra nyang get. 10 Na nyang teukurong didalam seupôt, ureuëng peunjara nyang meudeurita dalam beuleunggu beuso, 11 sabab awaknyan ka jibeurontak ubak Po teu Allah dan hana jipakoe peurintah Nyang Mahamanyang. 12 Gobnyan geupeureumok até awaknyan deungon cara jimeubuet nyang brat; awaknyan reubah dan hana nyang tulông. 13 Lam keuadaan sosah awaknyan jitawök ubak TUHAN, dan Gobnyan geupeubeubaih awaknyan nibak meukarat. 14 Gobnyan geuba awaknyan geupeuteubit nibak lam seupôt, dan geupeupatah beuleunggu awaknyan. 15 Ka pantaih awaknyan jilakée syukoe ubak TUHAN sabab gaséh Gobnyan, sabab buet-buet Gobnyan keubit that hireuen nibak manusia. 16 Sabab Gobnyan geupeureubah bubena pintoe teumaga, dan geupeureumok bubena palang beuso. 17 Na nyang bangai dan meudeurita sabab desya-desya awaknyan, dan jiseksa sabab salah awaknyan keudroe. 18 Awaknyan luwat ubak meubagoe peunajoh, ajai awaknyan ka tô that. 19 Lam keuadaan sosah awaknyan jimeuhôi ubak TUHAN, dan Gobnyan geupeubeubaih awaknyan nibak teuseupet nyan. 20 Gobnyan geupeupuléh awaknyan deungon peurintah Gobnyan, dan geupeusie awaknyan nibak uruek jrat. 21 Patot that awaknyan jilakée syukoe ubak TUHAN sabab geunaséh Gobnyan, sabab buet-buet Gobnyan nyang jipeuteuka hireuen nibak manusia. 22 Bah kheueh awaknyan jilakée syukoe deungon jiba peuseumahan, dan jipeusampoe buet Gobnyan deungon lagu-lagu geumbira. 23 Na lom nyang jiharöng laôt ngon kapai, keu jijak mita nafeukah lam laôt nyang luwah. 24 Awaknyan jikalon buet-buet TUHAN, karya nyang ajaéb lam laôt raya. 25 Ateueh peurintah Gobnyan teuka kheueh angén badée dan jipeuteuka geulumbang-geulumbang raya. 26 Kapai-kapai teubeuôt sampoe manyang, laju jiseumpom ateu laôt raya. Ureuëng-ureuëng ka gadôh beuhe jihadab bahya nyang bubenyan raya. 27 Awaknyan mumang dan meuhapit-hapit lagée ureuëng mabök nyang gadôh akai. 28 Meunyoe teungoh susah awaknyan jimeulakée ubak TUHAN, dan Gobnyan laju geupeulheueh awaknyan nibak keuseudehan. 29 Angén puteng beuliong nyang teungoh jipot meunan hebat geuyue seungab, dan umbak ié laôt nyang raya pi ka seungab ngon reuda. 30 Awaknyan galak that sabab angén raya ka hana le; dan geuba laju awaknyan ubak peulabohan nyang geutuju. 31 Patot that awaknyan meusyukoe ubak TUHAN sabab geunaséh Gobnyan, dan sabab buet-buet Gobnyan nyang hireuen bak manusia. 32 Awaknyan laju jijak peugah keudeh keunoe keuhai keu agongan TUHAN lamkawan umat Gobnyan, dan jipujoe Gobnyan lam majeulis kawöm tuha. 33 Krueng-krueng nyang meu ié laju geu ubah jeuet keu padang pasi dan mata ié ka jeuet keutanoh nyang tho. 34 Tanoh nyang subô ngon gumbô geupeujeuet keu tanoh nyang masen, sabab buet nyang jeuhet nyang jipeubuet lé ureuëng-ureuëng nyang tinggai disinan. 35 Padang pasi nyang tho kreng laju geu ubah jeuet keu kulam ié, dan tanoh tho jiteubiet mata ié. 36 Ureuëng-ureuëng deuk laju geupeuduek disinan; dan awaknyan laju jipeudong banda keu teumpat tinggai awaknyan. 37 Blang ngon ladang awaknyan laju geutabu bijéh dan meunan cit jipula deungon bak anggô, dan laju jipeusapat hase nyang meulimpah ruwah. 38 TUHAN geujok keu awaknyan aneuëk nyang le, meunan cit deungon beulatang peulara awaknyan pi meukeumang biak lumpah bagaih le. 39 Teuma awaknyan jipeutaloe dan tinggai bacut sabab seungsara dan keunong iénanya nyang keujam. 40 TUHAN laju geupeuhina ngon cara geupeumiyueb bubena ureuëng mat kuasa awaknyan, dan geuyue awaknyan jimeurawoh dipadang luwah nyang hana rot. 41 Teuma ureuëng gasien laju geupeulheueh nibak keusosahan awaknyan, dan keuluwarga awaknyan meutamah laju lagée bubiri. 42 Ureuëng jujoe jingieng nyan dan galak that, teuma ureuëng jeuhet laju geuyue iemdroe hana jeuet jipeugah haba. 43 Seumoga ureuëng nyang bijaksana jipike hainyan banmandum dan jiaku bahwa TUHAN teutab geugaséh.

Zabur 108

1 Ca-e. Zabur Nabi Daud. 2 Ulôn peucaya that, ya Allah, ulôn keuneuk meuca-e dan lôn pujoe Droeneueh. Hai beudôh kheueh, jiwa ulôn! 3 Hai beudôh kheueh gambus dan keucapi! Ulôn keuneuk peuteubit fajar. 4 TUHAN, ulôn keuneuk peugah syukoe ubak Droeneueh lamkawan bansa-bansa. Ulôn keuneuk meuca-e lagu pujoe keu Droeneueh lamkawan umat manusia. 5 Sabab gaséh Droeneueh rayeuk sampoe trok u langét manyang dan seutia Droeneueh sampoe nibak awan di angkasa. 6 Ya Allah, neutunyok kheueh keuagongan Droeneueh di langét, dan keumuliaan Droeneueh bansaboh bumoe. 7 Peuseulamat kheueh kamoe deungon kuasa Droeneueh, dan neujaweueb kheueh doá kamoe, mangat ureuëng-ureuëng nyang neugaséh hase seulamat. 8 Nibak teumpat tinggai Gobnyan nyang suci Po teu Allah geupeugah, "Ulôn keuneuk seumurak dan Ulôn bagi-bagi tanoh Sikhem, Pantôn Sukot teuma Ulôn undi. 9 Gilead dan Manasye na kheueh atra Ulôn, Efraim tupi beuso Lôn, dan Yehuda tungkat keurajeuen Lôn. 10 Teuma Moab na kheueh teumpat Ulôn rhah gaki; Ulôn meusurak keumeunangan ateueh Filistea. Keu Edom Ulôn geulawa seulob Lôn, sibagoe tanda bahwa jihnyan na kheueh atra Ulôn." 11 Soe nyang ba ulôn u Edom? Soe teuma nyang peutakteh ulôn ubak banda nyang meukuta nyan? 12 Ya Allah, peu kheueh Droeneueh hana neujak meusajan deungon kamoe? Dan peu kheueh Droeneueh hana neumaju meusigoe deungon tantra kamoe? 13 Neutulông kheueh kamoe ateueh musoh, sabab bantuan manusia hana meuguna. 14 Meusapat deungon Allah, geutanyoe gagah peukasa; Gobnyan kheueh nyang peutaloe musoh geutanyoe.

Zabur 109

1 Keu teupimpén kor. Zabur Nabi Daud. 2 Sabab ulôn jiseurang lé ureuëng jeuhet dan tukang teumipée nyang jitabu haba-haba nyang hana beuna keuhai ulôn. 3 Awaknyan jiseurang ulôn deungon tutoe haba nyang peunoh deungon banci, dan jiseurang ulôn deungon hana alasan. 4 Awaknyan jitudoh ulôn, bahpi di ulôn lôn gaséh keu awaknyan, dan ka lheueh ulôn meudoá keu awaknyan. 5 Awaknyan jibalaih keubaiékan ulôn deungon buet nyang jeuhet, dan geunaséh ulôn deungon banci. 6 Baiát kheueh sidroe ureuëng jeuhet mangat jisidang jihnyan, bah kheueh jihnyan jipeudakwa lé lawan-lawan jih. 7 Bah kheueh jihnyan ji adili dan jipeugah meusalah, dan bah kheueh doá jihnyan jianggab desya. 8 Bah kheueh udeb jih bagaih akhé, dan jabatan jihnyan jicok lé ureuëng laén. 9 Bah kheueh aneuëk-aneuëk jihnyan jeuet keu aneuëk yatem, dan perumoh jihnyan jeuet keu inong balée. 10 Bah kheueh aneuëk-aneuëk jihnyan jeuet keu aneuëk jak geumadée keudeh keunoe, dan jiuse nibak inciek-inciek rumoh jih nyang reuloh. 11 Bah kheueh banmandum atra jih jisita lé ureuëng jak tunggée utang, dan hase jeureh payah jihnyan jireupah lé ureuëng laén. 12 Bék na ureuëng nyang get até deungon jihnyan, atawa jiweueh keu aneuëk-aneuëk nyang na jitinggai. 13 Bah kheueh banmandum keuturonan jihnyan habéh jipeubinasa, dan nan jih jipeutuwoe lé ureuëng teuka dudoe teuma. 14 Bah kheueh buet nyang jeuhet nyang ka jipeuget lé indatu jihnyan teutab geuingat lé TUHAN, dan desya ma jihnyan hana geutem sampôh. 15 Bah kheueh desya jihnyan teutab geuingat lé TUHAN, dan hana ureuëng nyang na ingat keu jihnyan ateueh bumoe nyoe. 16 Sabab ureuëng nyan hántom na ji ingat keu jitunyok gaséh sayang. Jihnyan ji iénanya ureuëng gasien dan seungsara, dan jipoh ureuëng yang hana meudaya. 17 Geuhnyan galak that jikutok; bah kheueh jihnyan keudroe nyang keunong kutok! Jihnyan hana galak teubri beureukat, bah kheueh hana beureukat keu jih nyan! 18 Nibak jih meunyoe kutok nyan na kheueh buet nyang ka lazem, saban lagée ureuëng ngui peukayan. Bah kheueh kutok nyan meuliléh lagée ié nyang rô nibak badan jih, dan lagée minyéuk u dalam tuleueng-tuleueng jihnyan. 19 Bah kheueh deungon kutok nyan teupeukeulubong jihnyan lagée peukayan, dan sabe na meulilet bak gobnyan lagée talo keuieng. 20 TUHAN, neupeurhot kheueh huköm nyan ateueh ureuëng nyang tudoh ulôn, dan ateueh ureuëng nyang jimariet jeuhet keuhai ulôn. 21 Teuma neutulông kheueh ulôn nyang sisuai deungon janji Droeneueh, ya TUHAN Allah ulôn, peuseulamat kheueh ulôn sabab keubaiékan dan geunaséh Droeneueh. 22 Sabab ulôn gasien lom seungsara, dan até ulôn luka nyang cukob lhok. 23 Ulôn rab gadôh lagée bubayang óh watée seupôt, dan ulôn jipôt lagée jipeucrok daruet dalam blang raya. 24 Teuôt ulôn yo meugok-gok sabab puasa, dan badan ulôn pijuet ngon tho nyang na tinggai tuleueng ngon kulét. 25 Ureuëng nyang kalon jihina lôn sira ji asek-asek ulée. 26 Tulông kheueh ulôn, ya TUHAN Allah lôn, peuseulamat kheueh ulôn, nyang sisuai deungon geunaséh Droeneueh. 27 Teuma musoh lôn jiteupeue bahwa nyan na kheueh buet Droeneueh, bahwa Droeneueh kheueh, TUHAN nyang peubuet nyan. 28 Bahpi awaknyan jikutok ulôn, seumoga Droeneueh neubri beureukat keu ulôn. Bahpi awaknyan jibeudôh, teuma awaknyan teutab meuteumé malée; teuma seumoga ulôn, hamba Droeneueh, Droeneueh jok keugeumbiraan. 29 Bah kheueh ureuëng-ureuëng nyang tudoh ulôn peunoh ngon seulimbot keuhinaan, dan rasa malée teutôb awaknyan lagée teutôb ngon bajée jubah. 30 Ulôn keuneuk pujoe TUHAN deungon su nyang nyareng, ulôn peumeusyeuhu Gobnyan lamkawan umat manusia. 31 Sabab Gobnyan geubila dan geupeuseulamat ureuëng gasien nibak awaknyan nyang peurhot huköman maté u ateueh jihnyan.

Zabur 110

1 Zabur Nabi Daud. 2 Nibak Sion TUHAN geupeuluwah keurajeuen gata; dan meukuasa kheueh ateueh musoh-musoh gata! 3 Bak watée uroe gata teuka deungon kuasa, nibak bukét nyang suci, rakyat gata jimaju deungon suka rela. Lagée iémbon dibeungoh uroe, di ureuëng-ureuëng muda jijak ubak gata. 4 Deungon meusumpah TUHAN ka geumeujanji, Gobnyan hana geutarek le, "Droeneueh kheueh imeum keu siumu masa, lagée Melkisedek." 5 TUHAN na disiblaih uneuen gata, meunyoe Gobnyan ka teuka beungéh, bubena raja habéh geupeutaloe. 6 Gobnyan geuhuköm bansa-bansa, sampoe manyét-manyét manusia meulampa-lampa. Gobnyan geupeubinasa banmandum ureuëng nyang mat kuasa bansaboh muka bumoe. 7 Raja geujieb ié lam krueng nyang na bak binéh jalan, óh lheueh nyan geupeuteuga lom, gobnyan meunang.

Zabur 111

1 Pujoe kheueh TUHAN! 2 Keubit that ajaéb nubuatan-nubuatan TUHAN, patot jiseulidek lé ureuëng-ureuëng nyang galak ubak hainyan. 3 Buet TUHAN agong dan teupujoe, dan keuadelan Gobnyan keukai dan abadi. 4 TUHAN nyan peungaséh dan peunyayang, Gobnyan geupeubuet buet-buet nyang takjob dan kagom luwa biasa, mangat geutanyoe teutab ta ingat ubak peue nyang ka geupeubuet nyan. 5 Gobnyan geubri rezeki keu ureuëng nyang taqwa, dan sabe ji ingat ubak peujanjian Gobnyan. 6 Gobnyan ka geutunyok kuasa Geuh ubak umat Gobnyan, deungon geubri keu awaknyan tanoh pusaka bansa-bansa. 7 TUHAN ade dan seutia lam banmandum tindakan Gobnyan, peue mantong peurintah Gobnyan jeuet teupeucaya. 8 Huköm Gobnyan meuteun siumu masa, geubri lam keubeunaran dan keuadelan. 9 Gobnyan geupeubeubaih umat droe Geuh, dan geupeuna peujanjian keukai deungon awaknyan. Gobnyan kheueh TUHAN nyang suci dan peukasa! 10 Soe mantong nyang keuneuk jeuet keu ureuëng bijaksana ureuëng nyan harôh jihoreumat TUHAN, Gobnyan geubri peungeurtian keu banmandum ureuëng nyang taát. Teupujoe kheueh TUHAN siumu masa!

Zabur 112

1 Pujoe kheueh TUHAN! 2 Aneuëk-aneuëk jihnyan jeuet keu ureuëng nyang mat kuasa di nanggroe nyoe, keuturonan ureuëng nyang gét geubri beureukat. 3 Keuluwarga ureuëng nyan teuma kaya dan makmu, dan ureuëng nyan seujahteura siumu masa. 4 Trang teutab meucahya didalam seupôt keu ureuëng nyang jujoe, dan keu ureuëng nyang ade, peungaséh dan peunyayang. 5 Mubahgia kheueh ureuëng nyang murah até dan jitem peu utang keu ureuëng laén dan jujoe lam peue mantong urosan. 6 Ureuëng nyang gét hana gagal; jihnyan ji ingat lé gob siumu masa. 7 Gobnyan hana teumakot meunyoe na ureuëng laén jijak peusampoe haba nyang brôk, até ureuëng nyan teugoh dan teutab sabab ji meuiman ubak TUHAN. 8 Ureuëng nyan hana gundah atawa teumakot, sabab jihnyan yakén musoh jihnyan geupeutaloe. 9 Ureuëng nyan jibagi ngon geu weuek-weuek hareuta jih, dan jibri seudeukah keu ureuëng gasien; jihnyan sabe jipeubuet nyang jroh, sabab nyan jihnyan meukuasa dan jihoreumat lé gob. 10 Ureuëng jeuhet nyang ngieng ureuëng nyan jiteuka beungéh; awaknyan jikab-kab gigo sabab banci. Dan awaknyan pi laju binasa; harapan awaknyan gadôh keu siumu masa.

Zabur 113

1 Pujoe kheueh TUHAN! 2 Nan Gobnyan jipeumeusyeuhu, bak saát nyoe dan siumu masa. 3 Phon di timu sampoe u barat nan TUHAN harôh teupujoe. 4 TUHAN meukuasa ateueh beubagoe bansa, keuagongan Gobnyan hase teukawai langét, 5 Soe nyang sa lagée TUHAN Allah geutanyoe? Gobnyan meutakhta di teumpat nyang manyang. 6 Teuma Gobnyan geupeuteukui droe keu geupandang langét dan bumoe. 7 Ureuëng gasien geuangkat lam abée, dan ureuëng meularat nibak lam abée. 8 Awaknyan geupeuduek sapat meusaho deungon peunguasa, meusajan deungon bansawan nibak umat Gobnyan. 9 Gobnyan geubri aneuëk-aneuëk keu peurumoh nyang éue, geupeujeuet jihnyan ma nyang mubahgia dan teuhoreumat di rumoh droe jih keudroe.

Zabur 114

1 Bak watée bansa Israel jiteubiet lam nanggroe Meusé, watée keuturonan Nabi Yakub geutinggai nanggroe aséng, 2 TUHAN geupeujeuet Yehuda teumpat suci Gobnyan, Israel geupeujeuet keuteumpat wilayah keukuasaan Gobnyan. 3 Laôt Geulagah ban jikalon Gobnyan laju jiplueng, Krueng Yordan jipiôh ji ile. 4 Gunong-gunong meulumpat lagée kaméng, dan bukét-bukét jigrob-grob lagée aneuëk bubiri. 5 Pakon hai laôt, sampoe gata plueng, dan pakon teuma Krueng Yordan jipiôh ji ile? 6 Peue sabab jih gata lumpat-lumpat hai gunong-gunong, dan gata grob-grob hai bukét-bukét? 7 Hai bumoe, beuyo kheueh gata dikeue TUHAN, dikeue Allah Nabi Yakub, 8 nyang ubah batée kareueng jeuet keu kulam ié, dan gunong batée jeuet keu mata ié.

Zabur 115

1 Bukon kamoe, ya TUHAN, bukon kamoe, teuma Droeneueh mantong nyang harôh teupujoe, sabab Droeneueh seutia dan teutab na gaséh sayang. 2 Pakon bansa-bansa harôh jipeugah, "Dipat Allah awaknyan?" 3 Allah geutanyoe na di syeuruga, Gobnyan geupeubuet peue nyang geugalak. 4 Beurala awaknyan teupeugét nibak méuh dan pirak, nyang jipeugot deungon jaroe manusia. 5 Bak awaknyan na babah, teuma hana hase jimarit, dan na mata, teuma hana hase jimeungieng. 6 Bak awaknyan na geulinyueng, teuma hana hase meudeungoe, dan meunan cit na idong, teuma hana hase jimeucöm. 7 Bak awaknyan na jaroe, teuma hana hase meuraba, dan na gaki, teuma hana hase jijak, dan hana su nyang hase jiteubiet lam ruekueng jih. 8 Seumoga meunan kheueh naseb ureuëng-ureuëng nyang jipeubuet nyan, dan banmandum ureuëng nyang peucaya ubak gobnyan. 9 Hai Israel, meuharab kheueh ubak TUHAN, Gobnyan kheueh nyang tulông dan nyang lindong gata. 10 Hai teungku-teungku imeum, meuharab kheueh ubak TUHAN, Gobnyan kheueh nyang tulông dan nyang lindong gata. 11 Hai banmandum ureuëng nyang taqwa, meuharab kheueh ubak TUHAN, Gobnyan kheueh tulông dan nyang lindong gata. 12 TUHAN geu ingat ubak geutanyoe dan geubri beureukat ubak geutanyoe, Gobnyan geubri beureukat umat Israel dan banmandum teungku imeum keuturonan Nabi Harun. 13 Gobnyan geubri beureukat keu ureuëng-ureuëng nyang taqwa, bah kheueh nyan ubit meunan cit nyang raya. 14 Seumoga TUHAN geubri anugeurah aneuëk nyang le, keu gata dan keuturonan gata. 15 Seumoga gata geubri beureukat lé TUHAN, nyang cebta langét dan bumoe! 16 Langét na kheueh atra TUHAN mantong, teuma bumoe geubri keu manusia. 17 TUHAN hana jipujoe lé ureuëng maté, dan lé ureuëng nyang ka jitron u teumpat nyang seungue. 18 Teuma geutanyoe nyang mantong udeb meusyukoe kheueh ubak Gobnyan, phon saát nyoe sampoe siumu masa.

Zabur 116

1 Ulôn ku cinta TUHAN, sabab Gobnyan geudeungoe ulôn dan geupakoe peue nyang ulôn lakée. 2 Gobnyan geudeungoe ulôn, pajan mantong ulôn meulakée ubak Gobnyan. 3 Ulôn teuancam bahya mawöt; mawöt nyang lumpah bahya nyan jiseureugab ulôn, sampoe ulôn that-that apoh apah dan teumakot nyang hana teukira. 4 Dan ulôn laju meulakée ubak TUHAN, "Ya TUHAN, ulôn meulakée, peuseulamat kheueh ulôn!" 5 TUHAN nyan peungaséh dan ade; Po teu Allah geutanyoe peunoh deungon gaséh sayang. 6 TUHAN geupeulara ureuëng-ureuëng udeb seudeurhana; watée ulôn hana meudaya Gobnyan geupeuseulamat ulôn. 7 Ulôn peuteunang até lôn, sabab TUHAN gét deungon ulôn. 8 TUHAN ka geupeusie ulôn nibak maté; geupeumangat até lôn dan hana geupeubiyeu ulôn reubah. 9 Dan ulôn jeuet lôn rasa udeb dalam donya nyoe, dalam lindong TUHAN. 10 Ulôn teutab peucaya, bahpi ulôn peugah, "Ulôn lumpah that teuteugon ngon meudeurita." 11 Dalam keuadaan bingong ulôn peugah, "Hana meusidroe pi nyang jeuet teupeucaya." 12 Peue nyang ulôn jok ubak TUHAN keu lôn balaih keujroh Gobnyan ubak ulôn? 13 Ulôn lônba peuseumahan ié anggô ubak TUHAN sibagoe rasa syukoe ateueh peutulôngan Gobnyan. 14 Ulôn lôn peupeunoh janji lôn ubak Gobnyan dikeue banmandum umat Gobnyan. 15 TUHAN lumpah that geugaséh ngon geusayang keu maté sidroe-droe ureuëng nyang geugaséh. 16 Ulôn nyoe hamba Droeneueh, ya TUHAN, saban lagée ma ulôn, dilôn pi meubakti ubak Droeneueh Droeneueh ka neupeulheueh ulôn nibak lam glab. 17 Ulôn kuba keureubeuen syukoe ukeue Droeneueh, sira lôn ba doá ubak Droeneueh. 18 Ulôn kupeupeunoh janji ulôn ubak TUHAN, dikeue banmandum umat Gobnyan 19 nyang na meuhimpon dikeue seuramoe Baét TUHAN, di teungoh banda Yerusalem.

Zabur 117

1 Pujoe kheueh ubak TUHAN, hai banmandum bansa, agong kheueh Gobnyan, hai banmandum sukée bansa! 2 Sabab raya that geunaséh TUHAN keu geutanyoe dan seutia Gobnyan teutab siumu masa.

Zabur 118

1 Meusyukoe kheueh ubak TUHAN sabab Gobnyan jroh, Geunaséh Gobnyan keukai dan abadi. 2 Bah kheueh ureuëng Israel jipeugah, "Geunaséh Gobnyan keukai abadi." 3 Bah kheueh di teungku-teungku imeum geupeugah, "Geunaséh Gobnyan keukai abadi." 4 Bah kheueh banmandum ureuëng nyang taqwa geupeugah, "Geunaséh Gobnyan keukai abadi." 5 Dalam keuadaan meukarat ulôn meulakée ubak TUHAN; laju Gobnyan geujaweueb dan geubalaih ulôn. 6 Ulôn hana yo sabab TUHAN na meusajan ngon ulôn, manusia hana meudaya dikeue ulôn. 7 TUHAN na meusajan ulôn keu geutulông lôn, ulôn ku ngieng musoh ulôn nyang geupeutaloe. 8 Leubeh gét meulindong ubak TUHAN, nibak teupeu bangga keu manusia. 9 Leubeh gét meulindong nibak TUHAN, nibak meuharab ubak bansawan. 10 Jai that musoh di keulileng ulôn; deungon kuasa TUHAN, awaknyan habéh mandum ulôn peutaloe. 11 Awaknyan jikeupong ulôn rot jeueb-jeueb peunjuru; deungon kuasa TUHAN, awaknyan habéh ulôn peutaloe. 12 Lagée unou awaknyan jiparan sikeulileng ulôn; deungon kuasa TUHAN, awaknyan habéh ulôn peutaloe. Lam sikleb siklab awaknyan habéh teupeulon lagée apui hu nyang teungoh teutot tamah meuduro. 13 Ulôn jiseurang luwa biasa dan sampoe rab reubah, teuma TUHAN na nyang tulông ulôn. 14 TUHAN na kheueh teunaga ulôn dan pujaan ulôn, Gobnyan ka geupeuseulamat ulôn. 15 Deungoe kheueh surak keumeunangan di teungoh khimah-khimah umat Gobnyan, "TUHAN ka geupeubuet buet nyang peukasa! 16 Kuasa TUHAN geupeumeunang geutanyoe! TUHAN geupeubuet buet nyang peukasa." 17 Ulôn hana maté, teuma ulôn teutab udeb, keu lôn jak peusampoe karya TUHAN. 18 TUHAN ka geuseksa ulôn deungon brat dan kreueh, teuma Gobnyan hana geuseurah ulôn ubak mawöt. 19 Buka kheueh ulôn nyoe babah pintoe geureubang Baét TUHAN, jeuet hase lôn tamong dan lôn peugah syukoe ubak Gobnyan. 20 Nyoe kheueh babah pintoe geureubang TUHAN, teuma ureuëng jujoe nyang jeuet jak rot nyan. 21 Ulôn kupujoe Droeneueh, sabab Droeneueh neukabui doá ulôn; Droeneueh ka neubri keu ulôn keumeunangan. 22 Batée nyang jitiek lé utoh-utoh bangunan, batée nyan ka jeuet keu batée peunjuru. 23 Nyan kheueh buet TUHAN, keubit kagom luwa biasa nibak geutanyoe. 24 Nyoe kheueh uroe nyang geupeuteuntée lé TUHAN; jak geutanyoe ta peuraya deungon geumbira. 25 Kamoe lakée, ya TUHAN, peuseulamat kheueh kamoe, ya TUHAN, neubri kheueh keu kamoe keumeunangan! 26 Teubeureukati kheueh gobnyan nyang teuka ateueh nan TUHAN, kamoe bri beureukat gata di Baét TUHAN. 27 TUHAN na kheueh Allah, Gobnyan peumurah até keu geutanyoe. Maju kheueh meurarak deungon ranteueng nibak jaroe, dan keulileng kheueh nibak miseubah TUHAN. 28 Droeneueh Allah ulôn, ulôn meusyukoe ubak Droeneueh, Allah ulôn, ulôn keubit that kagom ubak Droeneueh. 29 Meusyukoe kheueh ubak TUHAN sabab Gobnyan gét, geunaséh Gobnyan keukai dan abadi.

Zabur 119

1 Mubahgia kheueh ureuëng nyang udeb jih hana meucupa dan taát ubak huköm-huköm TUHAN. 2 Mubahgia kheueh ureuëng nyang jiseutôt peurintah Gobnyan, dan deungon sigeunab até ji useuha jituri TUHAN. 3 Mubahgia kheueh ureuëng nyang udeb meunurot keuheundak TUHAN, dan hana jipeubuet buet nyang jeuhet. 4 Droeneueh neubri keu kamoe huköm Droeneueh, ya TUHAN, mangat kamoe peubuet deungon seutia. 5 Seumoga ulôn deungon até nyang tegoh ulôn seutôt peuratoran-peuratoran Droeneueh. 6 Meunyoe ulôn peurati banmandum peurintah Droeneueh, ulôn hana neupeumalée. 7 Meunyoe ulôn meurunoe keuputosan Droeneueh nyang ade, teuma ulôn lôn pujoe Droeneueh deungon situloh até. 8 Ulôn lôntem taát ubak huköm Droeneueh, bék kheueh sagai-sagai neutinggai ulôn. 9 Ureuëng muda hase jipeuteun udeb jih hana meucupa meunyoe jihnyan udeb nyang sisuai deungon peurintah Droeneueh. 10 Deungon sipeunoh até ulôn meu useuha lôn turi Droeneueh, dan bék neupeubiyeu ulôn nyoe meusimpang nibak peurintah Droeneueh. 11 Ajaran Droeneueh ulôn keubah didalam até, mangat ulôn bék meudesya keu Droeneueh. 12 Ulôn pujoe Droeneueh, ya TUHAN, neupeurunoe kheueh ulôn peue nyang Droeneueh teutabkan. 13 Deungon su nyang nyareng ulôn peumaklum banmandum huköm nyang Droeneueh bri. 14 Ulôn geumbira lôn seutôt banmandum peue nyang Droeneueh peurintah, saban lagée ulôn keubah meubagoe rupa hareuta. 15 Ulôn kutem meurunoe banmandum keuputosan Droeneueh, dan ulôn simak banmandum peue nyang Droeneueh tunyok. 16 Peue nyang ka Droeneueh peuteutab jeuet até ulôn lumpah galak; ajaran Droeneueh keubit hana hase ulôn peutuwoe. 17 Bah kheueh Droeneueh meumurah até keu hamba Droeneueh nyoe, mangat ulôn teutab udeb dan jeuet keu ureuëng nyang taát ubak ajaran Droeneueh. 18 Neupeubleut kheueh mata kamoe jeuet hase kamoe keumalon ajaran nyang lumpah hebat dalam huköm Droeneueh. 19 Dan keu sikeujab ulôn tinggai di ateueh donya nyoe, bék kheueh neusöm huköm Droeneueh nibak ulôn. 20 Até lôn sakét tanggong rindu, ya TUHAN, ulôn keuneuk teupeue huköm Droeneueh jeueb-jeueb watée. 21 Droeneueh nyang sapa ureuëng nyang sombong, dan nyang kutok ureuëng nyang meusimpang nibak ajaran Droeneueh. 22 Neupeulheueh kheueh ulôn nibak peunghinaan dan seurapa awaknyan, sabab ulôn kupeubuet peuratoran Droeneueh. 23 Bahpi lé peunguasa ka jimeukumplot jilawan ulôn, hamba Droeneueh nyoe teutab meurateb dan teutanung nyang ka Droeneueh teutabkan. 24 Peuratoran-peuratoran Droeneueh jeuet keu naseuhat ulôn nyang lumpah mangat dan galak até ulôn. 25 Ulôn ka teuéh didalam abée; neupeupuléh kheueh udeb lôn nyang sisuai deungon janji Droeneueh. 26 Ulôn meungaku nibak buet ulôn, sababnyan Droeneueh neujaweueb ulôn; neupeurunoe kheueh ulôn peue nyang ka Droeneueh teutabkan. 27 Neutulông kheueh ulôn mangat jeuet lôn puphom banmandum huköm-huköm Droeneueh, ajaran Droeneueh nyang lumpah kagom nyan teutab ulôn tanueng. 28 Jiwa ulôn ka hanco meukeupeng-keupeng keunong keusosahan, neupeukong kheueh ulôn nyang sisuai deungon janji Droeneueh. 29 Neupeujiôh kheueh ulôn nibak rot nyang sisat, ya TUHAN lôn, sabab keujroh Droeneueh, neupeurunoe kheueh ulôn deungon huköm Droeneueh. 30 Ulôn kalheueh lôn piléh mangat jeuet keu ureuëng taát, peurintah Droeneueh sabe ulôn ingat-ingat. 31 Ulôn ka lôn seutôt peue mantong peuratoran-peuratoran Droeneueh, ya TUHAN, bék neupeubiyeu ulôn meuteumé malée. 32 Deungon sigala seunang até ulôn lôn turot ubak peurintah Droeneueh, sabab Droeneueh kheueh ulôn nyoe meutamah meuphom. 33 TUHAN, neupeurunoe kheueh ulôn peue makna keuteutapan-keuteutapan Droeneueh, mangat ulôn jeuet lôn seutôt sampoe án akhé. 34 Neupeujeuet kheueh ulôn mangat muphom ubak huköm Droeneueh jeuet lôn taát, dan ulôn peubuet deungon sipeunoh até. 35 Seumoga ulôn lôn mumat teugoh ubak peurintah Droeneueh, sabab nyan kheueh nyang ulôn harok. 36 Neubri kheueh keu ulôn hasrat keu lôn taát ubak peurintah Droeneueh, leubeh nibak meuheuet beujeuet keu ureuëng kaya. 37 Neujaga kheueh ulôn mangat bék lôn tiyeub nyang hana meuguna, neubri kheueh keu ulôn udeb nyang sisuai deungon keuheundak Droeneueh. 38 Neupeukong kheueh hamba Droeneueh nyoe janji Droeneueh, nyang Droeneueh bri keu ureuëng nyang taát ubak Droeneueh. 39 Neupeujiôh kheueh peunghinaan nyang ulôn takot, ya TUHAN, sabab keubit that gét banmandum huköm Droeneueh. 40 Neubri kheueh keu ulôn udeb barô, sabab Droeneueh ade, ulôn meuheuet that ulôn taát ubak keuputosan-keuputosan Droeneueh. 41 Ya TUHAN, neutunyok kheueh padub na Droeneueh neugaséh keu ulôn, neupeuseulamat kheueh ulôn nyang sisuai deungon janji Droeneueh. 42 Dan ka hase ulôn jaweueb ureuëng nyang hina ulôn, sabab ulôn nyang ulôn peubangga na kheueh tutoe haba Droeneueh. 43 Neutulông kheueh ulôn mangat hase ulôn peugah nyang beuna, sabab ulôn meuharab ubak keuputosan Droeneueh. 44 Ulôn keuneuk mumat ubak huköm Droeneueh, keu siumu masa. 45 Teuma ulôn udeb deungon beubaih, sabab lôn useuha lôn patuh ubak tutoe Droeneueh. 46 Peuratoran Droeneueh ulôn peusampoe ubak raja-raja, deungon lagée nyan ulôn hana meuteumé malée. 47 Keuseunangan ulôn na kheueh ulôn peubuet peurintah Droeneueh, sabab ulôn cinta ubak peuratoran nyan. 48 Ulôn horeumat dan lôn cinta ubak peurintah Droeneueh, nyang ka Droeneueh teutabkan teuma ulôn reunuengkan. 49 Ingat kheueh janji Droeneueh ubak hamba Droeneueh nyoe, janji nyang neubri harapan keu ulôn. 50 Nyoe kheueh nyang peulalo ulôn lam peundeuritaan, bahwa janji Droeneueh nyan teuba ulôn ubak udeb. 51 Ureuëng sombong luwa biasa jihina ulôn, teuma ulôn teutab hana meusimpang nibak huköm Droeneueh. 52 Ulôn teuingat ubak huköm Droeneueh yoh masa dilée, dan teuhibo kheueh até ulôn, ya TUHAN. 53 Ulôn beungéh that keu ureuëng jeuhet, sabab awaknyan jitinggai huköm Droeneueh. 54 Simantong udeb lôn nyang paneuk di ateueh bumoe, nyang Droeneueh teutabkan ulôn peujeuet keu ca-e ngon lagu-lagu pujoe. 55 Óh watée malam ulôn ingat ubak Droeneueh, ya TUHAN, huköm Droeneueh teutab ulôn mat. 56 Ulôn meuteumé bahgia sabab ulôn taát ubak peurintah-peurintah Droeneueh. 57 Droeneueh mantong nyang ulôn harab, ya TUHAN lôn, ulôn meujanji lôn peubuet ajaran Droeneueh. 58 Deungon sigeunab até ulôn meulakée gaséh sayang Droeneueh, neugaséh kheueh lôn nyang sisuai deungon janji Droeneueh. 59 Ulôn ka habéh pike keuhai pi-e lôn, dan lôn meujanji lôn taát ubak peuratoran Droeneueh. 60 Ulôn meudab-dab dan hana ulôn preh, keu ulôn peujak peurintah Droeneueh. 61 Ureuëng jeuhet jipasang taron keu ulôn, teuma ulôn teutab hana lôn tuwoe ubak huköm Droeneueh. 62 Di teungoh malam ulôn beudôh di teumpat éh keu lôn jak pujoe Droeneueh, sabab keuputosan-keuputosan Droeneueh nyang ade. 63 Ulôn meurakan deungon banmandum ureuëng nyang taqwa, dan banmandum ureuëng nyang jipeubuet peurintah Droeneueh. 64 Bumoe peunoh deungon gaséh Droeneueh, ya TUHAN, neupeurunoe kheueh ulôn keuhai nyang TUHAN peuteutabkan. 65 Droeneueh ka neupeupeunoh janji Droeneueh, ya TUHAN, dan neupeubuet nyang jroh keu hamba Droeneueh. 66 Neubri kheueh keu ulôn hikeumat dan iéleumé peungeutahuan, sabab ulôn peucaya ubak peue mantong peurintah Droeneueh. 67 Sigohlom teuhuköm, ulôn meunyimpang, jinoenyoe ulôn mumat ubak peurintah Droeneueh. 68 Sabab Droeneueh jroh dan neupeubuet nyang get, neupeurunoe kheueh ulôn keuhai keuputosan-keuputosan Droeneueh. 69 Ureuëng sombong jipeusuna ulôn, teuma ulôn deungon sipeunoh até lôn taát ubak keuputosan Droeneueh. 70 Ureuëng-ureuëng nyan hana jimuphom, teuma nibak ulôn huköm Droeneueh na kheueh nyang peumangat até. 71 Bit get that Droeneueh neuhuköm ulôn, jeuet ulôn turi ubak keuteutapan-keuteutapan Droeneueh. 72 Nibak ulôn huköm Droeneueh leubeh meuyuém nibak banmandum méuh dan pirak nyang na di ateueh donya. 73 Droeneueh kheueh nyang peujeuet dan nyang beuntuk ulôn, neubri kheueh keu ulôn peungeurtian jeuet hase ulôn meurunoe peurintah-peurintah Droeneueh. 74 Ureuëng taqwa galak meunyoe jikalon ulôn, sabab ulôn meuharab ubak janji Droeneueh. 75 Ulôn kuteupeue bahwa keuputosan Droeneueh na kheueh ade, ya TUHAN, Droeneueh ka neuhuköm ulôn sabab keuseutiaan Droeneueh. 76 Seumoga geunaséh Droeneueh jeuet teuhibo ulôn, paih lagée janji Droeneueh ubak hamba Droeneueh. 77 Neugaséh kheueh ulôn, teuma ulôn teutab udeb, sabab huköm Droeneueh teupeugalak até ulôn. 78 Bah kheueh ureuëng sombong meuteumé malée, sabab ka jipeusuna ulôn, teuma ulôn teutab lôn ba dalam teunung keuhai peurintah-peurintah Droeneueh. 79 Seumoga ureuëng taqwa geujak ubak ulôn, banmandum nyang jituri keu peuratoran-peuratoran Droeneueh. 80 Seumoga até ulôn hana meusimpang nibak keuteutapan Droeneueh, jeuet ulôn bék meuteumé malée. 81 Até ulôn lumpah that rindu ubak keuseulamatan nibak Droeneueh; lé sababnyan ulôn meuharab ubak janji Droeneueh. 82 Mata ulôn peudeuh sabab teubleut sabe bak lôn preh-preh neupeupeunoh janji Droeneueh, ulôn peugah, "Pajan kheueh Droeneueh neuhibô ulôn?" 83 Kulét ulôn ka krot-krot lagée uempang anggô nyang useung, teuma keuteutapan Droeneueh teutab hana ulôn peutuwoe. 84 Sampoe án pajan hamba Droeneueh nyoe jimeusaba? Pajan Droeneueh neuhuköm ureuëng-ureuëng nyang jiteuyeub ulôn? 85 Ureuëng nyang hana jitaát ubak huköm Droeneueh, ka jikueh uruek keuneuk jijeubak ulôn. 86 Banmandum huköm Droeneueh hase teupeutanggong jaweueb, neutulông kheueh ulôn, sabab ulôn jitiyeub hana alasan. 87 Awaknyan rab jiteumé jipoh ulôn, teuma ulôn teutab hana lôn peutuwoe ubak peurintah Droeneueh. 88 Peuseulamat kheueh ulôn sabab Droeneueh teutab neugaséh, mangat ulôn hase lôn taát ubak huköm Droeneueh. 89 TUHAN, sabda Droeneueh teutab kong siumu masa, dan keukai ngon abadi di syeuruga. 90 Keuseutiaan Droeneueh teutab meuteun nibak zamén u zamén, Droeneueh nyang peudong bumoe sampoe teutab na. 91 Banmandum nyang na jinoe, na kheueh sabab peurintah Droeneueh, sabab awaknyan banmandum na kheueh hamba-hamba Droeneueh. 92 Meunyoe huköm Droeneueh bukon pangkai keugeumbiraan ulôn, ka pasti ulôn ka maté lam seungsara lôn. 93 Sipanyang masa ulôn hana lôn kalon ban nibak peurintah Droeneueh, sabab deungon nyan Droeneueh peu udeb ulôn. 94 Peuseulamat kheueh ulôn, sabab ulôn nyoe na kheueh atra Droeneueh, ulôn ka meu useuha ulôn taát ubak peurintah Droeneueh. 95 Ureuëng jeuhet ka jipreh-preh jikeuneuk poh maté lôn, teuma ulôn teutab lôntem kalon ubak huköm Droeneueh. 96 Ka leumah lôn kalon bahwa nyang sampoereuna pi teubataih, teuma peurintah Droeneueh kheueh nyang sampoereuna. 97 Padub na ulôn cinta ubak huköm Droeneueh; hainyan teutab ulôn pike ngon lôn zike sipanyang uroe. 98 Ulôn sabe teuingat ubak peurintah Droeneueh, nyang teupeujeuet ulôn leubeh bijaksana nibak musoh-musoh lôn. 99 Peungeurtian ulôn leubeh nibak peungeurtian gurée-gurée lôn, sabab ulôn teutab lôn reunueng ngon lôn pike ubak peurintah-peurintah Droeneueh. 100 Ulôn leubeh muphom nibak ureuëng-ureuëng nyang ka syiek, sabab ulôn teutab lôn mumat ubak keuputosan-keuputosan Droeneueh. 101 Ulôn peusie peue mantong buet atawa pi-e nyang jeuhet, mangat ulôn teutab taát ubak ajaran Droeneueh. 102 Ulôn teutab hana lôn peujayéh nibak huköm Droeneueh, sabab Droeneueh kheueh nyang peurunoe ulôn. 103 Keubit that maméh jih tutoe haba Droeneueh, rasa jih leubeh maméh nibak meulisan. 104 Huköm-huköm Droeneueh teubri ulôn ubak peungeurtian, lé sababnyan ulôn teutab lôn banci ubak buet-buet nyang curang. 105 Sabda Droeneueh na kheueh panyöt tanglong keu tieb-tieb langkah lôn, cahya nyang trang nibak jalan lôn. 106 Nyang ulôn peujanji deungon sumpah lôn teupati, keu lôn mumat nibak keuputosan Droeneueh nyang ade. 107 Ulôn lumpah seungsara, ya TUHAN, neujaga kheueh udeb lôn nyang sisuai deungon janji Droeneueh. 108 Teurimong kheueh doá syukoe ulôn, ya TUHAN, dan neupeurunoe kheueh ulôn deungon huköm-huköm Droeneueh. 109 Ulôn sabe lôn peusabông nyawöng, teuma ulôn teutab hana lôn tuwoe nibak huköm Droeneueh. 110 Ureuëng jeuhet jiteun taron keu ulôn, teuma ulôn teutab hana meusimpang nibak keuputosan Droeneueh. 111 Peurintah Droeneueh na kheueh pusaka ulôn siumu masa, sababnyan até ulôn teutab geumbira. 112 Ulôn meuheuet keu lôn taát nibak keuteutapan Droeneueh, sampoe akhé hayat lôn. 113 Ulôn teutab lôn cinta nibak huköm-huköm Droeneueh, ulôn banci ubak ureuëng nyang hana seutia deungon sipeunoh até ubak Droeneueh. 114 Droeneueh kheueh nyang bila dan peulindong lôn, ulôn meuharab ubak janji Droeneueh, 115 Hai ureuëng jeuhet, beujiôh kheueh nibak ulôn! Ulôn keuneuk taát ubak peurintah Po teu Allah. 116 Neupeukong kheueh ulôn nyang sisuai deungon janji Droeneueh mangat ulôn teutab udeb, bék neupeubiyeu udeb ulôn keucewa lam harapan. 117 Tumpang kheueh ulôn mangat ulôn seulamat, dan sabe ulôn peurati nibak peurintah Droeneueh. 118 Droeneueh neutulak ureuëng nyang meunyimpang nibak peue nyang ka Droeneueh teutabkan, dan sia-sia mantong tipée muslihat awaknyan. 119 Banmandum ureuëng jeuhet neuanggab lagée blôh, lé sababnyan ulôn cinta ubak peuratoran-peuratoran Droeneueh. 120 Ulôn yo that-that sabab teumakot ubak Droeneueh, até ulôn yo ubak keuputosan Droeneueh. 121 Ulôn ka lôn peubuet nyang ade dan beuna, bék kheueh neuseurah ulôn ubak jaroe musoh. 122 Meujanji kheueh bahwa Droneueh teutab neutulông ulôn, bék neupeubiyeu ulôn jiteugom lé ureuëng-ureuëng nyang angkoh dan sombong. 123 Mata ulôn peudeh bak ulôn preh bantuan Droeneueh nyang peuseulamat lôn, ulôn preh peumbeubaihan nyang Droneueh peujanji. 124 Peusaneut kheueh ulôn nyang sisuai deungon gaséh Droeneueh, dan neupeurunoe kheueh ulôn nibak keuteutapan Droeneueh. 125 Ulôn hamba Droeneueh, peujeuet kheueh ulôn mangat meuphom, mangat ulôn leubeh muphom peurintah Droeneueh. 126 TUHAN, ka trok saát jih Droeneueh meutindak, sabab le that ureuëng nyang jiliengkeue keuhai huköm Droeneueh. 127 Peurintah-peurintah Droeneueh ulôn cinta leubeh nibak méuh, dan leubeh nibak méuh nyang murni. 128 Sabab nyan ulôn udeb sisuai deungon banmandum peutunyok Droeneueh; buet nyang sirong teutab ulôn banci. 129 Banmandum peuratoran nyang Droeneueh peuna keubit lumpah that kagom, dan banmandum peuratoran nyan ulôn taát sipeunoh até. 130 Meunyoe teupeutrang, ajaran Droeneueh teubri trang nyang luwa biasa, dan teubri peungeurtian keu ureuëng seudeurhana. 131 Nafáh ulôn meuhák-meuhák, sabab rindu ubak peurintah Droeneueh. 132 Neupaleng kheueh ubak ulôn dan neugaséh kheueh keu ulôn, saban lagée neugaséh ubak ureuëng nyang cinta ubak Droeneueh. 133 Peuteugab kheueh langkah ulôn nyang sisuai deungon janji Droeneueh, bék neupeubiyeu ulôn jikuasa lé keujeuhetan. 134 Peubeubaih kheueh ulôn nibak ureuëng-ureuëng nyang tindéeh ulôn, mangat ulôn hase lôn taát ubak peurintah Droeneueh. 135 Neubri kheueh beureukat ubak ulôn deungon teuka Droeneueh, dan neupeurunoe kheueh ulôn keuhai keuputosan Droeneueh. 136 Ié mata ulôn ile lagée ié krueng, sabab huköm Droeneueh hana jitaáti. 137 Droeneueh ade, ya TUHAN, banmandum huköm Droeneueh teupat. 138 Peurintah-peurintah nyang Droeneueh bri, ade dan jeuet teupeubangga. 139 Beungéh ulôn hu lagée apui lam tuboh lôn sabab musoh ulôn ka jituwoe ubak ajaran Droeneueh. 140 Janji Droeneueh kong dan jeuet teupeucaya, ulôn lumpah cinta ubak janji nyan. 141 Ulôn nyoe ureuëng ubit dan hina teuma, teuma ajaran Droeneueh teutab hana lôn kalon ban. 142 Keuadelan Droeneueh meuteun keu siumu masa, dan huköm Droeneueh sabe beuna. 143 Ulôn rhot bak meularat dan keusosahan, teuma keuputosan Droeneueh keubit mangat that até lôn. 144 Peuratoran Droeneueh sabe ade; neubri kheueh keu ulôn peungeurtian mangat ulôn jeuet udeb. 145 Deungon sigeunab até ulôn meulakée ubak Droeneueh; neujaweueb kheueh ulôn, ya TUHAN, ulôn keuneuk taát ubak peurintah Droeneueh. 146 Ulôn meulakée ubak Droeneueh; peuseulamat kheueh ulôn, ulôn keuneuk mumat ubak peuratoran Droeneueh. 147 Banseuboh buta ka ulôn beudôh dan laju lôn lakée tulông; ulôn meuharab ubak janji Droeneueh. 148 Simalam beungoh ulôn meujaga, keu lôn pike sira lôn tanung ajaran Droeneueh. 149 Deungoe kheueh ulôn sabab geunaséh Droeneueh, ya TUHAN, neujaga kheueh udeb lôn sabab keuadelan Droeneueh. 150 Ureuëng nyang tiyeub ulôn ka tô that, awaknyan deungon meukeusut jeuhet dan hana jipakoe ubak huköm Droeneueh. 151 Teuma Droeneueh tô, ya TUHAN, peue mantong peurintah Droeneueh na kheueh beuna. 152 Phon yoh ilée ka ulôn teupeue keuhai ajaran-ajaran Droeneueh, bahwa atranyan ka Droeneueh peuteutab keu siumu masa. 153 Neungieng kheueh peundeuritaan ulôn dan neupeuseulamat kheueh ulôn, sabab ulôn hana lôn kalon ban keuhai huköm Droeneueh. 154 Neubila kheueh peukara ulôn dan neupeubeubaih kheueh ulôn; peuseulamat kheueh ulôn nyang sisuai deungon janji Droeneueh. 155 Ureuëng jeuhet hana teupeuseulamat, sabab hana jitaát ubak keuteutapan Droeneueh. 156 Keubit raya that gaséh sayang Droeneueh, ya TUHAN, peuseulamat kheueh ulôn nyang sisuai deungon keuadelan Droeneueh. 157 Jai that ureuëng jimeumusoh dan jitiyeub ulôn, ya TUHAN, teuma ulôn teutab hana lôn kalon ban ubak peuratoran Droeneueh. 158 Ulôn banci ubak peungkhianat-peungkhianat nyan, sabab awaknyan hana jiseutôt ubak ajaran Droeneueh. 159 Neukalon kheueh pakriban ulôn cinta ubak peurintah Droeneueh, ya TUHAN, neupeuseulamat kheueh ulôn sabab gaséh sayang Droeneueh. 160 Banmandum feureuman Droeneueh na kheueh beutôi, ya TUHAN, peue mantong huköm Droeneueh nyang ade teutab keu siumu masa. 161 Ureuëng-ureuëng nyang meukuasa jipeu crok ulôn hana alasan, teuma nyang ulôn takot na kheueh ubak huköm Droeneueh. 162 Sabab janji Droeneueh ulôn teutab dalam geumbira, lagée sidroe-droe ureuëng nyang meuteumé hareuta. 163 Banmandum nyang sulet ulôn banci, teuma meunyoe huköm Droeneueh teutab ulôn cinta. 164 Hana putôh-putôh lôn peugah syukoe ubak Droeneueh, ya TUHAN, sabab huköm Droeneueh nyang ade dan beuna. 165 Ureuëng nyang jicinta ubak huköm Droneueh, ureuëng nyan teutab aman dan teuntram, hana nyang hase linteung ureuëng nyang cinta ubak huköm Droeneueh nyan. 166 Ulôn kupreh keuseulamatan nibak Droeneueh, ya TUHAN, Peue mantong peurintah Droeneueh teutab ulôn keureuja. 167 Ulôn teutab taát ubak peue mantong peuratoran Droeneueh, dan lôn cintanyan deungon sigeunab até. 168 Ulôn teutab patuh ubak peurintah dan nyang Droeneueh tunyok, ya TUHAN, sabab Droeneueh nyang kalon peue mantong nyang ulôn peubuet. 169 Seumoga nyang ulôn lakée nyoe sampoe ubak Droeneueh, ya TUHAN lôn, neubri kheueh ubak ulôn peungeurtian, nyang sisuai deungon keuheundak Droeneueh. 170 Bah kheueh peue nyang ulôn lakée nyoe trok ubak Droeneueh, peuseulamat kheueh ulôn nyang sisuai deungon janji Droeneueh. 171 Ulôn keuneuk pujoe Droeneueh mantong, ya TUHAN, sabab Droeneueh nyang peurunoe ulôn keuhai keuteutapan Droeneueh. 172 Ulôn keuneuk meuca-e keuhai janji Droeneueh, ya TUHAN, sabab peue mantong nyang Droeneueh peurintah na kheueh ade. 173 Seumoga Droeneueh sabe rila neutulông ulôn, sabab ulôn ka lôn piléh teutab lôn seutôt ubak peuratoran Droeneueh. 174 Até ulôn meuharabkan keuseulamatan nibak Droeneueh, ya TUHAN, huköm Droeneueh keubit that mangat até ulôn. 175 Bah kheueh ulôn udeb, mangat ulôn hase lôn pujoe Droeneueh, ya TUHAN lôn, seumoga deungon keuputosan-keuputosan Droeneueh nyan hase teutulông ulôn. 176 Ulôn ka sisat lagée bubiri nyang gadôh, ya TUHAN, dan neuteuka kheueh, neumita kheueh hamba Droeneueh nyoe, sabab ulôn hana lôn kalon ban peue mantong peurintah-peurintah Droeneueh.

Zabur 120

1 Lagu ziarah. TUHAN, dan Gobnyan laju geujaweueb ulôn. 2 Ya TUHAN, neupeuseulamat kheueh ulôn, nibak ureuëng sulet dan teumipée. 3 Hai ureuëng teumipée, peue nyang geupeubuet lé Po teu Allah ateueh gata? Deungon peue Gobnyan geuhuköm gata? 4 Deungon aneuk panah nyang tajam atra sidroe ureuëng peujuang, deungon ngeu apui nyang hu meubura! 5 Cilaka kheueh ulôn sabab harôh ulôn udeb meusajan gata; hana beda jih lagée tinggai di Mesekh, atawa lamkawan ureuëng Kedar. 6 Ka treb that ulôn tinggai lamkawan ureuëng nyang hana galak keudamé. 7 Meunyoe ulôn peugah haba keuhai damé, awaknyan jimeuheut keu muprang.

Zabur 121

1 Lagu ziarah. 2 Nyang tulông ulôn teuka nibak TUHAN nyang peujeuet langét ngon bumoe. 3 Gobnyan hana geupeubiyeu gata reubah, nyang lindong gata sabe geujaga. 4 Sikeubit jih, nyang lindong Israel nyan hántom na teungéut mata. 5 TUHAN geujaga gata, Gobnyan sabe na dibinéh gata geukeumiet gata. 6 Gata hana sakét sabab mata uroe óh watée uroe peungeuh, atawa sabab lé buleuen óh watée malam. 7 TUHAN geulindong gata nibak mara bahya, Gobnyan geukeumiet gata mangat udeb gata seulamat. 8 Gobnyan geulindong gata watée gata teuka dan tajak, phon saát nyoe dan siumu masa.

Zabur 122

1 Lagu ziarah Nabi Daud. ulôn, "Jak geutanyoe tajak u Baét TUHAN!" 2 Jinoenyoe kamoe katrok bak babah pintoe geureubang banda Yerusalem. 3 Yerusalem nyang teupeudong sibagoe banda teususon rapi dan ceudah. 4 Nibak banda nyoe kheueh sukée-sukée bansa jiteuka, sukée-sukée bansa piléhan TUHAN, keu meusyukoe ubak Gobnyan nyang sisuai deungon peurintah Gobnyan. 5 Disinoe kheueh raja-raja keuturonan Nabi Daud geupeusidang rakyat gobnyan. 6 Meudoá kheueh keu keuseujahtraan Yerusalem: "Seumoga banmandum ureuëng nyang cinta keu gata seujahteura. 7 Seumoga na damé didalam wilayah gata, dan teuntram didalam kuta-kuta gata." 8 Deumi kawöm keurabat dan sahabat ulôn ulôn peugah, "Seumoga gata seujahteura!" 9 Deumi Baét TUHAN, Po teu Allah geutanyoe, ulôn meudoá mangat gata mubahgia.

Zabur 123

1 Lagu ziarah. 2 Lagée sidroe namiet jimeugantung ubak amphon jih, dan sidroe namiet ureuëng inong ubak po cut jih, meunan kheueh kamoe preh Droeneueh, ya TUHAN Allah kamoe, sampoe Droeneueh neugaséh keu kamoe. 3 Neugaséh kheueh kamoe, ya TUHAN, neugaséh kheueh keu kamoe, sabab kamoe ka lumpah that le keunong hina. 4 Kaseb kamoe nyoe ji peuhina ngon jipeujayéh lé ureuëng-ureuëng kaya, dan ji cemoh lé ureuëng-ureuëng sombong.

Zabur 124

1 Lagu ziarah Nabi Daud. TUHAN hana geudong blaih geutanyoe? Hai Israel, neujaweueb kheueh lagée nyoe: 2 "Meunyoe TUHAN hana geudong blaih geutanyoe bak watée geutanyoe jiprang lé lawan, 3 dan geutanyoe ka jiuét udeb-udeb, lé beungéh awaknyan nyang hana teukira. 4 Dan geutanyoe ka jipeuhanyöt lé ié raya, dan teugeunang didalam ié; 5 dan geutanyoe ka habéh maté sabab ngob dalam geulumbang ié nyang raya meuputa-puta." 6 Jak geutanyoe ta peugah syukoe ubak TUHAN, sabab Gobnyan hana geupeubiyeu geutanyoe jipeuhabéh lé lawan. 7 Geutanyoe lagée cicém nyang lheueh lam taron peumburu, tarön nyan ka putôh, dan geutanyoe pi lheueh! 8 Nyang tulông geutanyoe teuka jih nibak TUHAN nyang cebta langét ngon bumoe.

Zabur 125

1 Lagu ziarah. 2 Lagée gunong-gunong nyang jilindong Yerusalem, meunan kheueh TUHAN geulindong umat Gobnyan phon saátnyoe sampoe siumu masa. 3 Ureuëng jeuhet hana siumu masa jimat kuasa ditanoh pusaka ureuëng jujoe, mangat ureuëng nyang jroh hana jiseutôt jipeubuet jeuhet. 4 Ya TUHAN, neupeuget kheueh nyang jroh keu ureuëng nyang jroh, keu ureuëng nyang jujoe até. 5 Teuma ureuëng nyang jipeubuet jeuhet bah kheueh teutab geuhuköm lé TUHAN meusajan ngon jeuhet jih.

Zabur 126

1 Lagu ziarah. Yerusalem, geutanyoe lagée ureuëng meulumpo! 2 Geutanyoe hana putôh-putôh takém sira meuca-e geumbira sampoe di bansa-bansa nyang laén jipeugah, "TUHAN ka geupeubuet hai-hai nyang lumpah hebat keu awaknyan!" 3 Bit TUHAN ka geupeubuet hai-hai nyang paleng hebat keu geutanyoe! Sababnyan kheueh geutanyoe meusuka cita ngon meugeumbira! 4 Ya TUHAN, neupeubeubaih kheueh keuadaan kamoe, lagée krueng nyang tho meu ié lom óh watée ujeuen teuka. 5 Seumoga ureuëng teumabu sira jimo, jimupot deungon surak geumbira. 6 Ureuëng jijak tabu bijéh lam blang jih, sira jimo meutreb-treb roe ié mata. Bak watée jiwoe jimeuca-e deungon nyanyoe geumbira sira jipuwoe hase blang nyang jipot teuma.

Zabur 127

1 Lagu Nabi Sulaiman. geutanyoe, sia-sia kheueh mandum peungawai jimeujaga. 2 Sia-sia mantong meubuet brat teujak mita nafeukah, beudôh éh banseuboh buta dan watée jak éh ka malam jula; sabab TUHAN geuseudia keu ureuëng nyang geugaséh, seudang awaknyan mantong jiéh. 3 Aneuëk-aneuëk manyak na kheueh hareuta nyang geubri lé Po teu Allah, nyang sikeubit jih, awaknyan na kheueh anugeurah Gobnyan. 4 Aneuëk-aneuëk agam nyang meuteumé yoh mantong muda saban lagée aneuk panah nyang na nibak jaroe keusatria. 5 Mubahgia kheueh ureuëng nyang jikeubah peuseudiaan panah-panah nyang lagée nyan! Jihnyan hana teupeutaloe, watée jihadab musoh di kantô peungadelan.

Zabur 128

1 Lagu ziarah. 2 Gata tamakheun nibak hase nyang gata keureuja, udeb makmu dan seujahteura. 3 Peurumoh gata lagée bak anggô nyang subô didalam rumoh gata. Aneuëk-aneuëk gata lagée tarôk bak zaiton di seukeulileng meuja gata. 4 Meunan kheueh TUHAN geubri beureukat keu ureuëng nyang taqwa. 5 Seumoga di Sion TUHAN geubri beureukat u ateueh gata. Seumoga gata takalon Yerusalem nyang makmu sipanyang udeb gata! 6 Seumoga gata panyang umu, dan neukalon aneuëk cucoe gata!

Zabur 129

1 Lagu ziarah. musoh gata phon yoh masa muda gata. 2 "Ulôn ji iénanya lé musoh yoh phon muda lôn, teuma awaknyan hana hase jipeutaloe ulôn; 3 awaknyan jipeuluka nyang lumpah lhok nibak rueng ulôn, lagée ureuëng meu ué jipeuget alue-alue nyang panyang didalam blang. 4 Teuma TUHAN nyang ade ka geubalaih ulôn nibak cok keunamiet." 5 Bah kheueh soemantong ureuëng nyang banci ubak Sion geupeutaloe dan geuheuntam sampoe jisurot. 6 Bah kheueh awaknyan lagée naleueng di ateueh bubông nyang bagaih that tho sigohlom timoh; 7 hana ureuëng nyang jitem jak koh naleueng nyan, atawa ji ikat dalam beureukah. 8 Ureuëng nyang liwat disinan hana jipeugah, "Seumoga gata geubri beureukat lé TUHAN, kamoe peubeureukat gata dalam nan TUHAN."

Zabur 130

1 Lagu ziarah. 2 TUHAN, neudeungoe kheueh seruan ulôn, neupeurati kheueh nyang ulôn lakée ubak Droeneueh. 3 Meunyoe Droeneueh hana neupiôh teutab neu ingat desya kamoe, ya TUHAN, soe kheueh nyang hase meuteun? 4 Teuma Droeneueh neutem peuamphon, jeuet manusia jitem taqwa. 5 Di ulôn kupreh TUHAN tulông, janji Gobnyan nyang ulôn harabkan. 6 Ulôn rindu ubak TUHAN, leubeh nibak sidroe ureuëng meurondo nyang rindu ubak mata uroe beungoh. 7 Meuharab kheueh ubak TUHAN, hai umat Gobnyan, sabab Gobnyan teutab geugaséh ubak gata, dan sabe lam siab geupeuseulamat gata. 8 Gobnyan geupeubeubaih geutanyoe nibak peue mantong keusalahan geutanyoe.

Zabur 131

1 Lagu ziarah Nabi Daud. 2 Nyang sikeubit jih, até ulôn teunang dan teuntram; lagée aneuëk manyak nyang ban habéh jiphiék mom, teungéut teunang dalam pangkée ma jih, lagée nyan kheueh teunang jih até ulôn. 3 Meuharab kheueh ubak TUHAN, hai umat Gobnyan, phon saát nyoe dan siumu masa.

Zabur 132

1 Lagu ziarah. 2 Bék tuwoe seumayang ubak Droeneueh, ya TUHAN, keu kaôy gobnyan ubak Droeneueh Nyang Mahateuga, Allah Nabi Yakub. 3 Kheun Gobnyan, "Ulôn hana lôn meureuhat di rumoh ulôn atawa lôn teungéut ateueh teumpat éh ulôn, 5 sigohlom lôn peuna baét keu Po teu Allah Nabi Yakub, teumpat tinggai keu TUHAN Nyang Mahateuga." 6 Di Betlehem na ta deungoe keuhai Peuto Peujanjian, óh lheuehnyan laju meurumpok di padang Yaar. 7 Jak kheueh geutanyoe tajak u teumpat tinggai TUHAN, dan ta seumah Gobnyan dikeue takhta Geuh. 8 Teuka kheueh dan tinggai kheueh di Baét Droeneueh, ya TUHAN, meusajan deungon Peuto Peujanjian, lambang kuasa Droeneueh. 9 Seumoga umat Droeneueh meusurak geumbira, dan banmandum teungku imeum Droeneueh sabe udeb meunurot nyang Droeneueh lakée. 10 Deumi Nabi Daud, hamba Droeneueh, bék kheueh neutulak raja nyang Droeneueh piléh. 11 TUHAN ka geumeusumpah ubak Nabi Daud; Gobnyan hana geu iengkeue ubak janji Gobnyan. Feureuman Gobnyan, "Sidroe lamkawan aneuëk gata Ulôn baiát jeuet keuraja mangat jimat peurintah geunantoe gata. 12 Meunyoe aneuëk-aneuëk gata seutia ubak peujanjian Ulôn, dan jitaát ubak peurintah-peurintah Ulôn, dan keu siumu masa keuturonan awaknyan jigantoe gata sibagoe raja." 13 Sabab TUHAN ka geupiléh Sion; Gobnyan geulakée nyan keu teumpat tinggai Gobnyan. 14 Geupeugah lé Gobnyan, "Disinoe kheueh teumpat tinggai Ulôn keu siumu masa, Ulôn keuneuk mat peurintah nibak teumpat nyoe. 15 Peue mantong nyang jipeureulée Ulôn bri deungon meulimpah, ureuëng-ureuëng jihnyan nyang gasien Ulôn bri makheun sampoe án troe. 16 Teungku-teungku imeum jih jipeuleumah keuseulamatan nibak ulôn; umat jihnyan meuca-e dan meusurak geumbira. 17 Disinoe sidroe lam keuturonan Nabi Daud Lôn baiát jeuet keuraja; peumeurintah jihnyan Ulôn peukong. 18 Keurajeuen jih sabe dalam seujahteura, teuma banmandum musoh-musoh jihnyan meuteumé malée."

Zabur 133

1 Lagu ziarah Nabi Daud. 2 Nyan na kheueh lagée minyéuk mangat bée nyang meuhái yuem nyang teurô u ateueh ulée Nabi Harun, laju jitron ubak takue bajée gobnyan. 3 Atawa lagée iémbon di Gunong Hermon, nyang jitron u bukét-bukét Sion. Disinan kheueh TUHAN geupeutron beureukat Gobnyan, keu udeb siumu masa.

Zabur 134

1 Lagu ziarah. TUHAN, banmandum nyang meubakti di Baét Gobnyan watée malam. 2 Beuôt jaroe gata u ateueh teumpat suci, dan pujoe kheueh TUHAN! 3 Seumoga nibak Sion gata geubri beureukat lé TUHAN, Allah nyang cebta langét dan bumoe!

Zabur 135

1 Pujoe kheueh TUHAN! 2 nyang meubakti di Baét TUHAN di teumpat tinggai Allah geutanyoe. 3 Pujoe kheueh TUHAN, sabab Gobnyan gét, dan pujoe kheueh nan Gobnyan, sabab Gobnyan murah até. 4 Gobnyan geupiléh Nabi Yakub keu droe Gobnyan, dan umat Israel geupeujeuet keu hak milék Gobnyan. 5 Sabab ulôn teupeue bahwa TUHAN nyan na kheueh keubit that raya, Gobnyan agong leubeh nibak dewa peue nyang na. 6 Gobnyan hase geupeubuet peue mantong nyang geugalak, di langét dan di ateueh bumoe, di laôt dan di samudra nyang lhok. 7 Nibak ujong bumoe Gobnyan geupeutron awan, dan geupeujeuet laju kilat keu geupeutron ujeuen. Óh lheuehnyan laju geupeurintah ubak angén mangat jiteubiet nibak teumpat jih teugumpôi. 8 Di Nanggroe Meusé Gobnyan geupoh maté banmandum aneuëk nyang tuha bah kheueh nyan aneuëk manusia meunan cit deungon aneuëk beulatang. 9 Disinan le that geupeubuet buet nyang ajaéb dan tanda keu geuhuköm raja meunan cit banmandum peugawée raja. 10 Gobnyan geupeubinasa bansa nyang le, dan geupoh maté raja-raja peukasa: 11 Sihon raja Amori dan Og raja Basan, dan banmandum raja di nanggroe Kanaan. 12 Laju nanggroe awaknyan geujok jeuet keuhak milék Israel, umat Gobnyan. 13 Ya TUHAN, Droeneueh teutab jijak peugah, dan nan Droeneueh ji ingat lé banmandum keuturonan, 14 sabab Droeneueh neubri keuadelan ubak umat Droeneueh, dan neugaséh banmandum hamba Droeneueh. 15 Beurala awaknyan teupeuget nibak méuh dan pirak, nyang jipeuget lé jaroe manusia. 16 Bak awaknyan na babah, teuma babah jihnyan hana hase jipeugah haba, na mata, teuma matanyan hana hase jikeumalon. 17 Bak awaknyan na ôn punyueng, teuma geulinyueng jihnyan hana hase meudeungoe, dan nibak lam babah jihnyan hana hase jiteubiet nafáh. 18 Seumoga meunan kheueh naseb ureuëng-ureuëng nyang jipeubuet nyan, dan nyang peucaya ubak jihnyan. 19 Pujoe kheueh TUHAN, hai umat Israel, pujoe kheueh Gobnyan, hai teungku-teungku imeum Allah! 20 Pujoe kheueh TUHAN, hai ureuëng-ureuëng Lewi, dan pujoe kheueh Gobnyan, hai gata banmandum nyang taqwa. 21 Pujoe kheueh TUHAN di Sion, di Yerusalem teumpat tinggai Gobnyan.

Zabur 136

1 Meusyukoe kheueh ubak TUHAN, sabab Gobnyan gét; geunaséh Gobnyan keukai dan abadi. 2 Meusyukoe kheueh ubak Allah Nyang Mahamanyang; geunaséh Gobnyan keukai dan abadi. 3 Meusyukoe kheueh ubak TUHAN Nyang Maharayeuk; geunaséh Gobnyan keukai dan abadi. 4 Teuma Gobnyan nyang peugét buet-buet nyang ajaéb nyang raya luwa biasa; geunaséh Gobnyan keukai dan abadi. 5 Deungon keubijaksanaan Gobnyan geupeujeuet langét; geunaséh Gobnyan keukai dan abadi. 6 Gobnyan nyang leueng bumoe di ateueh ié; geunaséh Gobnyan keukai dan abadi. 7 Gobnyan nyang peujeuet beunda-beunda nyang peutrang langét; geunaséh Gobnyan keukai dan abadi; 8 mata uroe keu jikuasa uroe; geunaséh Gobnyan keukai dan abadi; 9 geupeujeuet buleuen ngon bintang keu jikuasa malam, geunaséh Gobnyan keukai dan abadi. 10 Geupoh maté aneuëk-aneuëk tuha bansa Meusé; geunaséh Gobnyan keukai dan abadi. 11 Israel geupeuteubiet uluwa nibak nanggroe Meusé; geunaséh Gobnyan keukai dan abadi. 12 deungon jaroe nyang teuga dan peukasa; geunaséh Gobnyan keukai dan abadi. 13 Laôt Geulagah geuprah dua; geunaséh Gobnyan keukai dan abadi; 14 Israel umat Gobnyan geuba u meurandeh laôt; geunaséh Gobnyan keukai dan abadi. 15 Teuma raja nanggroe Meusé dan sipa-i jih nyan habéh geupeukaram u dalam geunaséh Gobnyan keukai dan abadi. 16 Geupimpén umat Gobnyan geujak rot padang pasi; geunaséh Gobnyan keukai dan abadi. 17 Geupeutaloe banmandum raja-raja nyang peukasa; geunaséh Gobnyan keukai dan abadi; 18 geupoh maté banmandum raja-raja nyang meusyeuhu; geunaséh Gobnyan keukai dan abadi; 19 Sihon, raja Amori; geunaséh Gobnyan keukai dan abadi; 20 dan Og, raja Basan; geunaséh Gobnyan keukai dan abadi. 21 Nanggroe awaknyan laju geucok geubri laju ubak umat Gobnyan; geunaséh Gobnyan keukai dan abadi; 22 jeuet keuhak milék Israel hamba Gobnyan; geunaséh Gobnyan keukai dan abadi. 23 Gobnyan hana geutuwoe ubak geutanyoe watée geutanyoe geupeutaloe; geunaséh Gobnyan keukai dan abadi. 24 Geupeubeubaih geutanyoe nibak jaroe musoh; geunaséh Gobnyan keukai dan abadi. 25 Tieb-tieb makhluk udeb geubri makheun; geunaséh Gobnyan keukai dan abadi. 26 Meusyukoe kheueh ubak Allah nyang mat kuasa ateueh langét; geunaséh Gobnyan keukai dan abadi.

Zabur 137

1 Nibak binéh-binéh krueng Babel kamoe duek-duek dan kamoe mo meuba-e watée teuingat keu Sion. 2 Nibak bak-bak kayée gandarusa di nanggroe nyan kamoe gantung keucapi kamoe. 3 Ureuëng-ureuëng nyang teun kamoe jiyue kamoe meuca-e keu awaknyan. Dan ureuëng-ureuëng nyang teugom dan seupet kamoe jiyue bak kamoe meuca-e lagu nyang geumbira, "Meuca-e kheueh keu kamoe lagu-lagu nibak Sion!" 4 Mungken di nanggroe aséng kamoe meuca-e keu TUHAN? 5 Bah kheueh ulôn hana hase le meuca-e meunyoe ulôn tuwoe keu droeneueh, Yerusalem! 6 Bah kheueh ulôn hana hase le meuca-e meunyoe ulôn tuwoe bak droeneueh dan hana lôn peujeuet droeneueh keuharok ulôn! 7 Ya TUHAN, neuingat kheueh ubak peundeuritaan ureuëng Edom watée Yerusalem teupeuhanco. Awaknyan jipeugah, "Peuhanco laju, peuhanco laju sampoe habéh rata!" 8 Hai Babel, gata teupeubinasa! Mubahgia kheueh ureuëng nyang jibalaih keu gata keujeuhetan nyang gata peubuet ateueh kamoe. 9 Mubahgia kheueh ureuëng nyang jicok aneuëk-aneuëk manyak gata dan laju jitiek u bukét batée!

Zabur 138

1 Nibak Nabi Daud. Droeneueh, deungon sipeunoh até lôn. Dikeue banmandum dewata ulôn meunyanyoe puja ngon pujoe ubak Droeneueh. 2 Ulôn teukui ngon lôn peukeu ubak Baét Droeneueh nyang suci sira lôn pujoe nan Droneueh, sabab Droeneueh seutia dan sabe neugaséh kamoe. Droeneueh leubeh peunténg ubak janji nyang ka Droneueh peugét nibak peundapat gob keuhai Droeneueh. 3 Watée ulôn teumawök Droeneueh, laju neujaweueb, peukong kheueh até lôn mangat lôn jeuet keu ureuëng nyang beurani. 4 Banmandum raja nyang na ateueh bumoe nyoe jipujoe Droeneueh, ya TUHAN, sabab awaknyan ka jideungoe janji Droeneueh. 5 Awaknyan meunyanyoe keuhai buet Droeneueh dan keuhai keuagongan Droeneueh nyang raya. 6 Droeneueh lumpah mulia, ya TUHAN lôn, teuma nyang hina teutab Droeneueh peulara, ureuëng sombong hana hase jipeusöm droe nibak Droeneueh. 7 Watée ulôn rhot bak apoh apah, Droeneueh nyang peuteun udeb ulôn. Droeneueh nyang lawan musoh lôn nyang teungoh beungéh dan Droeneueh peuseulamat ulôn ngon kuasa Droeneueh. 8 Droeneueh neupeupeunoh janji ubak ulôn; bék kheueh neupiôh neukalon ateueh umat Droeneueh.

Zabur 139

1 Keu teupimpén kor. Zabur Nabi Daud. neuturi keu ulôn. 2 Droeneueh neuteupeue peue mantong nyang ulôn peubuet; rot jiôh Droeneueh ka neutuóh pikeran ulôn. 3 Droeneueh deuh neungieng ulôn, bah kheueh watée ulôn meukeureuja meunan cit watée ulôn meureuhat, Droeneueh neuteupeue peue mantong nyang ulôn peubuet. 4 Dan sigohlom ulôn peugah haba, Droeneueh neuteupeue peue nyang keuneuk ulôn peugah. 5 Droeneueh neukeulileng ulôn rot meubagoe peunjuru, dan Droeneueh lindong ulôn deungon kuasa Droeneueh. 6 Lumpah that lhok nibak ulôn iéleumé Droeneueh nyan, hana hase jimat lé pikeran ulôn. 7 Hoe kheueh nyang hase ulôn jak mangat hase teupeusi nibak kuasa Droeneueh? Dan hoe teuma hase ulôn plueng mangat jiôh nibak Droeneueh? 8 Meunyoe ulangét nyang ulôn ék, Droeneueh pih ka na disinan, meunyoe ulôn éh didalam mawöt, disinan pih na Droeneueh. 9 Meunyoe ulôn po rot ufúk timu atawa lôn tinggai seungab di ujong barat nyang paleng jiôh, 10 disinan pih Droeneueh na neutulông ulôn; disinan cit teuma jaroe Droeneueh neubimbéng ulôn. 11 Meunyoe ulôn lakée mangat seupôt jitôb jikeuleubong ulôn, dan trang nyang na di seukeulileng ulôn jeuet keu malam, 12 teuma nyang seupôt nyan hana seupôt nibak Droeneueh; malam nyan trang lagée uroe, dan seupôt nyang lagée trang. 13 Droeneueh neucebta tieb-tieb bagian nibak tuboh ulôn, dan neubantuek ulôn didalam pruet ma lôn. 14 Ulôn lôn pujoe Droeneueh sabab ulôn luwa biasa! Peue mantong nyang Droeneueh peubuet keubit ajaéb dan meungagomkan, ulôn biet-biet insaf. 15 Watée tuleueng-tuleueng ulôn teupeujeuet, deungon teuato teukarang óh get dalam pluet ma ulôn, seudangkan ulôn timoh disinan seucara rahsia, ulôn hana teusöm nibak Droeneueh. 16 Droeneueh deuh neungieng ulôn watée lôn mantong na dalam pluet ma; banmandum nyan ka teucatet didalam kitab Droeneueh; uroe-uroe jihpi ka teupeuteuntée sigohlom sapeue pi teupeuphon. 17 Padub na sulet jih pikeran Droeneueh nibak ulôn, ya Allah, dan padub na le jeumeulah jih! 18 Meunyoe lôn itong, leubeh le nibak ano nyang na di panté; meunyoe ulôn beudôh nibak teumpat éh, mantong na watée ulôn pike keu Droeneueh. 19 Bah kheueh ureuëng jeuhet Droeneueh peuhanco, ya Po teu Allah, neupeujiôh kheueh ureuëng peurô darah nyan nibak ulôn! 20 Awaknyan jipeugah nyang jeuhet keuhai Droeneueh, dan jimeusumpah peuleusu keuhai banda-banda Droeneueh. 21 Ya TUHAN, ulôn banci keu ureuëng nyang banci Droeneueh, até ulôn tunu keu ureuëng nyang lawan Droeneueh! 22 Awaknyan lôn banci luwa biasa, dan ulôn anggab sibagoe musoh nyang paleng raya. 23 Neuseulidek kheueh ulôn, ya Allah, neuseunom kheueh lam até lôn, neu ujoe kheueh ulôn dan neuteupeue kheueh pikeran ulôn. 24 Neungieng kheueh aleh na nyang jeuhet nibak tuboh lôn, dan neubimbéng kheueh ulôn bak jalan nyang keukai.

Zabur 140

1 Keu teupimpén kor. Zabur Nabi Daud. 2 Neupeulheueh kheueh ulôn nibak ureuëng jeuhet, ya TUHAN, neujaga kheueh ulôn nibak ureuëng nyang jipeubuet buet jeuhet ateueh ulôn. 3 Awaknyan ka jireuncana buet nyang jeuhet didalam até, dan tieb-tieb uroe sabe jipeuna dakwa ngon dakwe. 4 Lidah awaknyan lagée lidah uleue nyang meubisa, tutoe haba awaknyan lagée bisa uleue maté iku. 5 Ya TUHAN, neulindong kheueh ulôn nibak kuasa ureuëng jeuhet, neujaga kheueh ulôn nibak ureuëng nyang jikeuneuk peubuet buet nyang jeuhet dan keuneuk jipeu rhot ulôn. 6 Ureuëng nyang cungkak deungon cara seungab-seungab ka jipasang taron jikeuneuk carueh ulôn, dan jireuntang jareng keuneuk drob ulôn. Ban sipanyang jalan awaknyan ka jiteun jeunieb guna keuneuk jijeubak ulôn. 7 Ya TUHAN, ulôn peugah: Droeneueh kheueh Allah ulôn, neudeungoe kheueh doá dan nyang ulôn lakée. 8 TUHAN, Allah ulôn, nyang peuseulamat ulôn nyang paleng teuga, Droeneueh ka neulindong ulôn watée dimideuen prang. 9 Bék kheueh neupeukabui peue nyang jilakée lé ureuëng jeuhet, ya TUHAN, dan bék kheueh neupeubiyeu reuncana awaknyan meuhase. 10 Bék neupeubiyeu musoh ulôn hase meunang; bah kheueh tutoe haba nyang jeuhet nyang awaknyan peugah keunong ateueh awaknyan nyang ba fiteunah u ateueh ulôn. 11 Bah kheueh awaknyan teugeulawa deungon ngéue apui, dan teugeulawa u dalam uruek mawöt, sampoe ka hana hase jiteubiet le. 12 Bah kheueh nyang jipeubuet keukeurasan rhot lé mala peutaka, dan bék kheueh neupeubiyeu ureuëng ba fiteunah jeuhet keu ureuëng tinggai di ateueh bumoe. 13 Ulôn lôn teupeue Droeneueh neubri keuadelan ubak ureuëng nyang teuteugon, dan neubila peukara keu ureuëng gasien. 14 Ureuëng nyang jujoe jipujoe Droeneueh, ya TUHAN, awaknyan tinggai teutab meusapat deungon Droeneueh.

Zabur 141

1 Zabur Nabi Daud. Droeneueh. 2 Neuteurimong kheueh doá ulôn sibagoe peuseumahan dupa, dan jaroe ulôn nyang meureuntang sibagoe keureubeuen malam. 3 Ya TUHAN, neujaga kheueh babah ulôn dan neuawasi kheueh bibi ulôn. 4 Neupeujiôh kheueh ulôn nibak niet dalam até keu teupeubuet jeuhet, Bék neupeubiyeu ulôn meugabong deungon ureuëng nyang doraka dan meusajan-sajan pajoh bu dalam khanuri awaknyan. 5 Meunyoe na sidroe ureuëng jroh jisapa ulôn, dan deungon jujoe ji heuntam ulôn, nyan na kheueh lagée minyéuk nyang paleng gét nibak ulôn. Seumoga hainyan hana ulôn tulak, sabab hana lôn piôh ulôn meudoá keu lôn lawan awaknyan. 6 Meunyoe nyang mat kuasa nibak awaknyan teugeulawa u dalam reuleueng-reuleueng batée, awaknyan jiaku bahwa tutoe haba ulôn na kheueh beuna. 7 Tuleueng-tuleueng geutanyoe geuhambo bak binéh jrat lagée sineuk batée nyang geupeuhanco ateueh tanoh. 8 Teuma ulôn teutab meuharab ubak Droeneueh, ya TUHAN Allah ulôn, bék neupeubiyeu ulôn nyoe maté, sabab ulôn meulindong ubak Droeneueh. 9 Lindong kheueh ulôn nibak taron nyang ka meucarueh bak takue lôn, dan nibak peurangkab banmandum ureuëng jeuhet nyan. 10 Bah kheueh awaknyan reubah u dalam taron jih keudroe, dan seumoga ulôn teutab seulamat.

Zabur 142

1 Lagu peungajaran Nabi Daud, bak watée gobnyan didalam guha. 2 Deungon su nyang nyareng ulôn meuhôi ubak TUHAN; deungon su nyang meulantak ulôn meulakée bantuan Gobnyan. 3 Dikeue Gobnyan ulôn apoh apah; ulôn peugah laju peue mantong keusosahan lôn ubak Gobnyan. 4 Watée ulôn karab putôh asa, Droeneueh ya TUHAN neuteupeue peue nyang harôh ulôn peubuet. Bak rot nyang harôh ulôn jak, musoh deungon seungab-seungab ka jiteun taron keu ulôn. 5 Watée ulôn paleng u sampeng, deuh lôn kalon hana bantuan keu ulôn. Hana nyang lindong ulôn, atawa nyang jitem pako ubak droe ulôn. 6 Ulôn meulakée ubak Droeneueh, ya TUHAN, Droeneueh kheueh teumpat ulôn meulindong, Droeneueh mantong nyang ulôn peureulée lam udeb nyoe. 7 Neudeungoe kheueh nyang ulôn lakée nyoe, ya TUHAN, sabab ulôn lumpah that seungsara. Neupeuseulamat kheueh ulôn nibak musoh-musoh lôn, sabab awaknyan lumpah that teuga nibak ulôn. 8 Neupeulheueh kheueh ulôn lam glab, ya TUHAN, dan lamkawan umat Droeneueh meusapat ulôn lôn pujoe nan Droeneueh, sabab Droeneueh ka peubuet nyang jroh keu ulôn.

Zabur 143

1 Zabur Nabi Daud. 2 Ulôn nyoe hamba Droeneueh, bék kheueh neupeusidang ulôn, sabab hana ureuëng nyang hana meusalah ubak Droeneueh. 3 Musoh ulôn ka jipeulet dan jipeutaloe ulôn, dan jipeutamong ulôn u dalam glab nyang seupôt buta; sampoe ulôn nyoe ka jeuet lagée ureuëng nyang ka treb that maté. 4 Ulôn ka patah seumangat, ya TUHAN, até ulôn ka bingong that. 5 Watée lôn ingat uroe-uroe nyang ka leupah; watée lôn pike banmandum buet Droeneueh, ulôn tanueng banmandum karya Droeneueh. 6 Ulôn meudoá ubak Droeneueh deungon jaroe nyang teuleueng meureuntang; lagée tanoh nyang ka tho kreng, jiwa ulôn rindu that ubak Droeneueh. 7 Neujaweueb kheueh ulôn deungon sigra, ya TUHAN, sabab ulôn ka putôh asa. Bék kheueh neumusöm nibak ulôn, mangat ulôn hana lagée ureuëng laén nyang ka jitron u álam mawöt. 8 Tieb-tieb beungoh neupeu ingat kheueh ulôn keu geunaséh Droeneueh, sabab ubak Droeneueh kheueh ulôn meuharab. Neutunyok kheueh bak ulôn rot nyang ulôn jak, sabab ubak Droeneueh kheueh ulôn meudoá. 9 Ulôn teuka keuneuk jak meulindong ubak Droeneueh, ya TUHAN, neupeulheueh kheueh ulôn nibak musoh-musoh lôn. 10 Neupeurunoe kheueh ulôn jeuet lôn peubuet meulakée Droeneueh, sabab Droeneueh kheueh Allah ulôn. Droeneueh gét that até, ya TUHAN, dan neubimbéng ulôn bak rot nyang rata. 11 Peuseulamat kheueh ulôn nyang sisuai deungon janji Droeneueh, ya TUHAN, deumi keuget Droeneueh, neupeulheueh kheueh ulôn nibak meularat. 12 Deumi geunaséh Droeneueh neupeuhanco kheueh banmandum musoh ulôn, dan neupeubinasa kheueh banmandum nyang teugon ulôn, sabab ulôn nyoe na kheueh hamba Droeneueh.

Zabur 144

1 Nibak Nabi Daud. 2 Gobnyan kheueh nyang tulông dan nyang bila ulôn, nyang peuseulamat ulôn di teumpat ulôn meupayong. Gobnyan peulindong ulôn, dan teumpat ulôn peuaséng droe, bansa-bansa nyang laén geupeutaklok ubak ulôn. 3 TUHAN, peu kheueh manusia, sampoe Droeneueh kalon jihnyan? Soe kheueh jihnyan sampoe Droeneueh neupakoe jihnyan? 4 Manusia nyan lagée angén prôh, dan lagée bubayang nyang liwat, meunan kheueh udeb jih. 5 Ya TUHAN, neupeuhah kheueh langét Droeneueh dan neutron kheueh, neucukéeh kheueh gunong-gunong jeuet meuasab. 6 Neupeulheueh kheueh kilat Droeneueh jeuet musoh habéh crebre. dan neutimbak kheueh aneuk panah Droeneueh mangat awaknyan yo meukot-kot. 7 Neu sunyueng kheueh jaroe Droeneueh lam syeuruga, dan neupeulheueh kheueh ulôn nibak ié raya. Neupeuseulamat kheueh ulôn nibak kuasa ureuëng aséng 8 nyang harok bak haba sulet dan galak bak meusulet, dan ji meusumpah peuleusu. 9 Ulôn lôn meuca-e lagu nyang barô keu Droeneueh, ya Allah, dan lôn peutek keucapi sira meuca-e. 10 Droeneueh nyang bri meunang keu raja-raja, dan neupeubeubaih Nabi Daud hamba Droeneueh. 11 Neupeusie kheueh ulôn nibak mata peudeueng ureuëng zalem; dan neupeuseulamat kheueh ulôn nibak kuasa ureuëng aséng nyang galak meusulet dan teumipée, dan jimeusumpah peuleusu. 12 Seumoga aneuëk-aneuëk agam geutanyoe yoh masa muda jih lagée sinaman nyang teungoh rayeuk. Seumoga aneuëk-aneuëk inong geutanyoe lagée taméh jeulita, nyang teuhias di jeueb-jeueb taméh meuligoe. 13 Seumoga gupok-gupok geutanyoe peunoh meuasoe deungon sigala bago hase bumoe. Seumoga bubiri-bubiri nyang na di padang geutanyoe jitôh aneuëk meuploh-ploh ribée. 14 Seumoga leumô-leumô geutanyoe meukeumang le dan hana nyang gadôh atawa maté. Seumoga hana teudeungoe le su ureuëng kliek nyang pilu ngon seungsara nibak jalan-jalan banda geutanyoe. 15 Mubahgia kheueh bansa nyang lagée nyan, dan mubahgia kheueh umat nyang Allah jih TUHAN!

Zabur 145

1 Pujoe nibak Nabi Daud. lôn, dan lôn pujoe Droeneueh siumu masa. 2 Tieb-tieb uroe ulôn keuneuk meusyukoe ubak Droeneueh, dan lôn peumulia Droeneueh siumu masa. 3 Sabab TUHAN agong dan lumpah teupujoe, keubeusaran Droeneueh hana soe ék seunom. 4 Tron meutron ureuëng laén teutab jipujoe peue nyang Droeneueh peubuet dan jijak peusampoe keubeusaran Droeneueh. 5 Awaknyan jijak peugah keuagongan dan keumuliaan Droeneueh, karya Droeneueh nyang luwa biasa ulôn tanung. 6 Awaknyan jijak peusampoe buet-buet Droeneueh nyang dahsyat, keubeusaran Droeneueh ulôn peumaklum. 7 Ureuëng laén jimeututoe keuhai keuget Droeneueh dan jimeuca-e keuhai Droeneueh nyang ade. 8 TUHAN nyan peungaséh dan peunyayang, treb jiteuka beungéh dan sabe na geunaséh. 9 Gobnyan murah até ubak soe mantong, dan geugaséh banmandum ubak peue mantong nyang ka geucebta. 10 Banmandum nyang Droeneueh cebta jipujoe Droeneueh, ya TUHAN, banmandum umat Droeneueh meusyukoe ubak Droeneueh. 11 Awaknyan jiagong keukuasaan Droeneueh sibagoe Raja, dan jicalitra kupeukasaan Droeneueh, 12 mangat banmandum ureuëng jiteupeue buet Droeneueh nyang raya, dan keurajeuen Droeneueh nyang mulia dan seumarak. 13 Peumeurintahan Droeneueh teutab siumu masa, keukuasaan Droeneueh teutab meuteun tron meutron. 14 TUHAN geutulông ureuëng nyang dalam keusosahan, Gobnyan geupeudong ureuëng nyang teutukui. 15 Banmandum makhluk udeb jimeuharab ubak Droeneueh; Droeneueh jok keu awaknyan peunajoh óh trok bak watée. 16 Droeneueh nyang peupeunoh banmandum peue nyang jipeureulée lé awaknyan, sampoe awaknyan hana kureueng bahpi meusapeue pi. 17 TUHAN ade dalam peue mantong nyang geupeubuet dan peunoh gaséh dalam peue mantong nyang geukeureuja. 18 Gobnyan tô that ubak ureuëng nyang jimeuhôi Gobnyan, dan jimeulakée ubak Gobnyan deungon até nyang jujoe. 19 Gobnyan geupeu mangat até keu ureuëng-ureuëng nyang taqwa; Gobnyan geudeungoe awaknyan meuhôi dan geupeuseulamat awaknyan. 20 Gobnyan geulindong soemantong ureuëng nyang cinta keu Gobnyan, teuma ureuëng jeuhet banmandum geupeubinasa. 21 Ulôn keuneuk pujoe TUHAN sipanyang watée, seumoga banmandum makhluk Gobnyan jipujoe nan TUHAN keu siumu masa.

Zabur 146

1 Pujoe kheueh TUHAN! Hai jiwa ulôn, pujoe kheueh TUHAN! 2 Ulôn keuneuk pujoe TUHAN simantong ulôn udeb dan meuca-e keu Po teu Allah simantong ulôn na. 3 Bék kheueh meuharab ubak peunguasa, ubak ureuëng nyang hana hase jipeuseulamat manusia. 4 Meunyoe awaknyan maté, awaknyan jigisa jeuet keutanoh; bak uroenyan cit teuma peue mantong reuncana awaknyan habéh teusampôh sapan sapa. 5 Mubahgia kheueh ureuëng nyang jipeubangga TUHAN Allah jih mantong, dan na TUHAN Nabi Yakub nibak droe jih sibagoe peunulông jihnyan. 6 Gobnyan nyang peujeuet langét dan bumoe, laôt dan banmandum asoe jih; Gobnyan teutab seutia siumu masa. 7 Gobnyan geubila hak ureuëng nyang keunong teugon, dan geubri makheun keu ureuëng deuk. 8 dan geupeu jeuet ureuëng buta hase jikeumalon. Gobnyan geupeudong ureuëng nyang reubah, dan geugaséh keu ureuëng nyang jujoe. 9 Gobnyan geulindong ureuëng-ureuëng aséng; Gobnyan geutulông inong balée dan aneuëk yatem ngon muntui, teuma reuncana ureuëng jeuhet teutab geupeugagal. 10 TUHAN nyan na kheueh Raja keu siumu masa. Hai Sion, Po teu Allah gata meukuasa siumu masa dan sigala abad.

Zabur 147

1 Pujoe kheueh TUHAN! sabab jroh that teupujoe Gobnyan, dan keubit galak keu teumeuca-e lagu seumujoe keu Gobnyan! 2 TUHAN geupeupuléh Yerusalem; ureuëng-ureuëng nyang ka teuböih geupeuwoe lom teuma. 3 Gobnyan geupeupuléh ureuëng nyang ka patah até, dan geubalot bubena luka-luka awaknyan. 4 Gobnyan nyang peuteuntée padubna jeumeulah bintang di langét ijo, dan maséng-maséng bintang nyan Gobnyan boh nan. 5 Keubit raya dan hebat TUHAN geutanyoe, keubijaksanaan Gobnyan hana teuhingga. 6 Gobnyan nyang peudong ureuëng nyang keunong teugon, teuma ureuëng jeuhet Gobnyan nyang tiek ateueh tanoh. 7 Meuca-e kheueh deungon lagu puja ngon pujoe ubak TUHAN, peumeuén kheueh keucapi keu Allah geutanyoe. 8 Gobnyan kheueh nyang lheueng awan di langét manyang; Gobnyan nyang peutron ujeuen ateueh bumoe, dan nyang peutimoh naleueng jitimoh di ateueh bukét. 9 Gobnyan nyang bri uempeuen keu beulatang, dan keu aneuëk cicém gagak nyang meuciéb-ciéb jimeuhôi ma. 10 Keusukaan TUHAN bukon kheueh bak guda nyang teuga; dan bukon cit teuma ubak peujuang nyang gagah beurani. 11 TUHAN harok ubak ureuëng nyang taqwa, dan ubak ureuëng nyang teutab meuharab geunaséh ubak Gobnyan. 12 Pujoe kheueh TUHAN, hai Yerusalem! Pujoe kheueh Allah gata, hai Sion! 13 Sabab Gobnyan nyang peukong pintoe-pintoe geureubang gata, dan nyang bri beureukat keu peunduduek gata. 14 Gobnyan nyang jaga daerah gata jeuet teutab aman, dan nyang peutroe gata deungon boh gandom nyang paleng gét. 15 Gobnyan nyang bri peurintah ubak bumoe, dan haba Gobnyan bagaih that jipeubuet laju. 16 Gobnyan nyang peutron salju nyang putéh lagée gapeueh, dan nyang peuhambo iémbon kreueh lagée abée. 17 Gobnyan nyang peutron ujeuen éeh lagée batée keurikée; hana ureuëng nyang ék jiteun nibak leupie ngon sijuek nyan. 18 Dan ateueh peurintah Gobnyan éeh nyan pi caye; laju geuyueb angén, dan ié pih laju ji ile. 19 Gobnyan nyang peusampoe peusan Geuh ubak umat Gobnyan, keuputosan dan huköm Gobnyan keu umat nyang ka geupiléh. 20 Hai lagéenyan hana geupeubuet ubak bansa-bansa laén, awaknyan hana jituri ubak huköm-huköm Gobnyan.

Zabur 148

1 Pujoe kheueh TUHAN! pujoe kheueh Gobnyan! 2 Pujoe kheueh TUHAN hai banmandum malaikat Gobnyan, dan pujoe kheueh Gobnyan, hai banmandum tantra syeuruga! 3 Pujoe kheueh TUHAN, hai mata uroe ngon buleuen, dan pujoe kheueh Gobnyan, hai bintang-bintang nyang hu ble-ble cahya! 4 Pujoe kheueh Gobnyan, hai langét nyang paleng manyang, dan pujoe kheueh Gobnyan, hai ié nyang na di ateueh langét! 5 Bah kheueh awaknyan banmandum jipujoe nan TUHAN, sabab banmandum geupeujeuet ateueh peurintah Gobnyan. 6 Gobnyan nyang peuteuntée teumpat awaknyan maséng-maséng, keuteutapan Gobnyan meulaku keu siumu masa. 7 Pujoe kheueh TUHAN, hai banmandum asoe bumoe, hai naga-naga laôt dan banmandum samudra raya; 8 hai kilat dan ujeuen éeh, salju dan awan, angén kancang nyang jiturot peurintah TUHAN! 9 Pujoe kheueh Gobnyan, hai bukét-bukét dan gunong-gunong, bak kayée nyang muboh meubagoe rupa dan banmandum gle; 10 banmandum beulatang peulara dan beulatang kleut, banmandum beulatang meulata dan cicém-cicém! 11 Pujoe kheueh TUHAN, hai raja-raja dan meubagoe bansa, ureuëng bansawan dan banmandum ureuëng mat kuasa; 12 banmandum aneuëk muda ngon aneuëk dara, ureuëng tuha dan ureuëng muda. 13 Bah kheueh awaknyan banmandum jipujoe nan TUHAN, sabab nan Gobnyan leubeh agong nibak banmandum nan; keuagongan Gobnyan ék teuatasi langét ngon bumoe. 14 Gobnyan ka geupeukong bansa Geuh, sampoe Gobnyan jipujoe-pujoe lé umat Geuh, Israel umat nyang paleng geusayang.

Zabur 149

1 Pujoe kheueh TUHAN! 2 Meusuka cita kheueh hai Israel, sabab Peucebta gata; meugeumbira kheueh, hai meududuek Sion sabab Raja gata! 3 Pujoe kheueh nan Gobnyan deungon meubagoe likak dan tari, dan pujoe kheueh Gobnyan deungon keucapi dan rapa-i! 4 TUHAN geutung keu umat Gobnyan; Gobnyan geubri meunang keu ureuëng nyang miyueb até. 5 Bah kheueh umat Allah meusuka ria sabab keujayaan Gobnyan, dan meuca-e geumbira simalam suntok. 6 Bah kheueh awaknyan jipujoe Po teu Allah deungon su nyang meutaga, sira jimat peudeueng nyang ka teu asah 7 keu geubalaih bansa-bansa, dan geuhuköm sukée-sukée bansa; 8 keu geubeuleunggu raja-raja, dan geubôh ranté ubak bubena peunguasa awaknyan; 9 keu teuhuköm bansa-bansa ateueh peurintah Allah. Nyan kheueh keumeunangan umat nyang geugaséh.

Zabur 150

1 Pujoe kheueh TUHAN! 2 Pujoe kheueh Gobnyan sabab buet-buet Gobnyan nyang peukasa. Pujoe kheueh Gobnyan sabab keuagongan Gobnyan nyang raya. 3 Pujoe kheueh Gobnyan deungon su beureuguih, pujoe kheueh Gobnyan deungon gambus dan keucapi! 4 Pujoe kheueh Gobnyan deungon rapa-i dan likak ngon tari, dan pujoe kheueh Gobnyan deungon keucapi dan suleng. 5 Pujoe kheueh Gobnyan deungon ceracap nyang su meudeunteng, dan pujoe kheueh Gobnyan deungon su canang nyang meudeuntang. 6 Bah kheueh banmandum makhluk udeb jipujoe TUHAN.

Amsal 1

1 Nyoe kheueh peutuah-peutuah nibak Nabi Sulaiman, aneuëk Nabi Daud, raja Israel. 2 Tujuan jih na kheueh keuteutulông ureuëng mangat jiteupeue pakriban beujeuet keu ureuëng bijaksana, dan teuteupeue tata teureuteb udeb meunan cit hase teumeuphom ungkapan-ungkapan nyang teuseume makna nyang lhôk. 3 Peutuah-peutuah nyoe teupeurunoe pakriban ureuëng hase udeb deungon bijaksana, jujoe, ade dan beuna. 4 Ureuëng nyang hana peungalaman geupeuruno trok ubak ureuëng nyan na pikeran nyang tajam, dan ureuëng muda geupeuruno mangat hase jeuet keu ureuëng carông dan hase jiseumike seucara dewasa. 5 Deungon na peutuah-peutuah nyoe di ureuëng bijaksana pi meutamah peungeutahuan gobnyan, dan ureuëng nyang ka meupeundidekan teuma meuteumé bimbéngan. 6 Deungon na nyang lagée nyan awaknyan ka hase geuseunom makna nyang teusöm nyang na didalam peutuah dan geumeuphom tutoe haba ureuëng bijaksana dan masalah-masalah nyang jitanyong lé awaknyan. 7 Keu meuteumé iéleumé seujati, nyang phon-phon that harôh na rasa horeumat dan teumakot ubak TUHAN. Ureuëng bangai hana jihareuga hikeumat dan hana teuma jitem teupeuruno. 8 Simak kheueh peue nyang geupeugah lé ayah dan ma gata ubak gata, aneuëk ulôn, 9 sabab peue-peue nyang geupeuruno lé awaknyan keu gata jeuet keumeutamah pi-e jroh gata lagée hiasan ulée dan taloe takue keu teupeu lagak ruman gata. 10 Meunyoe ureuëng meudesya jibujuk gata, aneuëk ulôn, bék kheueh gata turot bujuk awaknyan. 11 Meunyoe awaknyan jipeugah, "Jak, geutanyoe tajak mita ureuëng nyang paran gobnyan. Keu gura-gura, jak geutanyoe taseurang ureuëng nyang hana meusalah. 12 Jinoenyoe awaknyan udeb lam keuadaan seunang dan seuhat, teuma singoh awaknyan jeuet keu ureuëng lagée siteungoh maté. 13 Tacok barang-barang awaknyan nyang meuyuem, mangat rumoh geutanyoe peunoh meuasoe deungon hareuta nyang teureupah. 14 Jak seutôt keunoe! Eunteuk hase nyang tacue nyan ta weuk beu ade!" 15 Bék kheueh taseutôt deungon ureuëng-ureuëng nyang na lagée nyan, hai aneuëk ulôn! Tapeujiôh nibak ureuëng nyan. 16 Awaknyan hana hase tinggai seungab sigohlom buet nyang jeuhet jikeureuja. Awaknyan meuheut bubagaih-bagaih keuneuk poh maté. 17 Dicicém pih hana jitamong lam taron nyang teuteun meureuntang dikeue mata jih, 18 teuma di ureuëng nyang jeuhet nyan jiteun taron keu droe jih keudroe -- taron nyang teuma teupeuceulaka awaknyan. 19 Keubit that, ureuëng-ureuëng nyang mita nafeukah deungon cara jeuhet teuma jibayeue deungon nyawöng jih keudroe. 20 Deungoe kheueh! Hikeumat jimeuhôi dijrot-jrot dan jikuk-kuk sira jikliek-kliek didalam padang ngon blang! 21 Jimeuhôi di babah-babah pintoe geureubang dan di teumpat-teumpat nyang ramé: 22 "Hai ureuëng-ureuëng beubal! Trok án pajan gata teutab lagée nyan? Pajan trok watée jih gata tapiôh tapeubeuah peungeutahuan dan tatulak peulajaran? 23 Deungoe kheueh ulôn watée ulôn sapa gata, teuma keu gata teuma ulôn peugah asoe até lôn dan ulôn peurunoe peungeutahuan ulôn. 24 Gata ka ulôn tawök, teuma gata tulak dan hana tapako. 25 Banmandum naseuhat ulôn gata peujayéh dan nyang ulôn teugah gata tulak. 26 Lé sabab nyan, meunyoe gata meuteumé bala, ulôn teuma lôn peukém gata. Meunyoe gata jiteuka teumakot, ulôn teuma lôn hina gata. 27 Nyoe, ulôn teuma lôn hina gata gundah dan meudeurita sabab kakeunong lé beuncana nyang teuka lagée angén badée raya. 28 Bak watéenyan gata tatawök ulôn, teuma nyang gata hôi nyan hana ulôn seuôt. Gata tamita ulôn homantong teuma nyang gata mitanyan teutab hana meurumpok deungon ulôn. 29 Gata lagée ureuëng nyang hántom meuteumé deungon iéleumé peungeutahuan, dan beu-o gata taát ubak TUHAN. 30 Gata hántom tatem teurimong bah meubacut pi naseuhat-naseuhat ulôn atawa tasimak ubak nyang ulôn teugah. 31 Lé sabab nyan, gata teuma tarasa keudroe akibat nibak buet-buet gata dan reuncana-reuncana gata nyang brok. 32 Ureuëng nyang hana peungalaman ureuëng nyan teuma maté sabab jipeujayéh ulôn, dan ureuëng bangai teuma hanco sabab hana jipako keu ulôn. 33 Teuma ureuëng nyang jideungoe ulôn jihnyan teupeulara. Ureuëng nyan udeb deungon aman hana peureulée meurasa teumakot."

Amsal 2

1 Teurimong kheueh ajaran-ajaran ulôn, hai aneuëk ulôn, dan ingat kheueh sabe naseuhat-naseuhat ulôn keu gata. 2 Gata simak kheueh peue nyang bijak sana dan useuha gata peuphom atra nyan. 3 Nyoe, aneuëk ulôn, useuha kheueh mangat na pikeran nyang tajam dan talakée kheueh peungeurtian. 4 Mita kheueh nyan lagée ureuëng mita méuh, dan tiyeub kheueh nyan lagée ureuëng tiyeub hareuta nyang na didalam tanoh. 5 Deungon na lagée nyan gata teuma tateupeue peue areuti jih teumakot ubak TUHAN dan gata teuma meuteumé peungeutahuan keuhai Po teu Allah. 6 TUHAN kheueh nyang bri hikeumat; nibak Gobnyan kheueh manusia meuteumé peungeutahuan dan peungeurtian. 7 Keu ureuëng nyang jujoe hana meucila, geubri peutulôngan dan peulindongan. 8 TUHAN geujaga ureuëng-ureuëng nyang peubuet ade, dan geulindong ureuëng nyang cinta ubak Gobnyan. 9 Meunyoe gata taseutôt ulôn, gata tateupeue peue nyang ade, jujoe dan jroh. Gata tateupeue cit teuma pakriban cara jih gata harôh udeb. 10 Gata teuma jeuet keu ureuëng nyang bijaksana, dan peungeutahuan gata teuma teupeumangat até gata. 11 Peungeurtian dan ceureudek gata teuma peulindong gata, 12 dan teutam gata mangat bék seutôt cara udeb nyang hana gét, dan teupeujiôh droe gata nibak ureuëng-ureuëng babah jih kutoe ngon jeuhet. 13 Awaknyan hana jitem seutôt cara udeb nyang gét; awaknyan jicok rot nyang seupôt dan peunoh deungon desya. 14 Awaknyan teuma meuteumé mangat nibak buet awaknyan nyang jeuhet. 15 Awaknyan jeuhet dan cara udeb awaknyan sirong. 16 Gata, aneuëk ulôn, teuma hase tatulak bujukan awaknyan nyang jeuhet nyang jiuseuha jipakat gata deungon tutoe haba nyang maméh. 17 Inong nyan hana seutia ubak lakoe jih dan ka jituwo janji droe jih ubak Allah. 18 Meunyoe gata tajak u rumoh jihnyan saban cit gata teungoh tajak ubak maté. Tajak keudeh saban cit deungon tajak u teumpat ureuëng maté. 19 Ureuëng nyang ka jijak ubak gobnyan hana nyang jijak ubak rot keu-udeban. 20 Lé sababnyan, hai aneuëk ulôn, taseutôt kheueh teuladan ureuëng nyang jroh, dan udeb kheueh meunurot keuheundak Po teu Allah. 21 Sabab, ureuëng nyang udeb meunurot keuheundak Po teu Allah, nyan kheueh ureuëng jujoe até, awaknyan kheueh nyang tinggai di nanggroe nyang ka geupeujanji lé TUHAN. 22 Teuma, ureuëng jeuhet dan meudesya geu-geulawa uluwa lé Po teu Allah nibak nanggroe nyan, lagée naleueng nyang teulot nibak tanoh.

Amsal 3

1 Bék kheueh tuwoe gata deungon peue nyang ka ulôn peurunoe keu gata, hai aneuëk ulôn. Ingat kheueh sabe ubak peurintah ulôn, 2 mangat umu gata panyang dan udeb gata pih seujahteura. 3 Bah kheueh gata teutab peucaya dan seutia ubak Po teu Allah meunan cit seusabe gata. Ingat kheueh nyan dan takeubah kheueh lam até gata, 4 mangat gata geugalak dan geuhareuga lé Po teu Allah dan manusia. 5 Peucaya kheueh ubak TUHAN deungon sipeunoh até gata, dan bék kheueh gata peubangga peungeurtian gata keudroe. 6 Ingat kheueh ubak TUHAN ateueh peue mantong nyang gata peubuet, dan Gobnyan teuma geutunyok keu gata keuhai udeb nyang leubeh sampoereuna. 7 Bék kheueh gata anggab droe gata leubeh carông nibak nyang seubeuna jih; taát kheueh ubak TUHAN dan peujiôh kheueh nyang jeuhet. 8 Buet gatanyan teuma jeuet keu ubat nibak gata nyang teupeupuléh badan gata dan teupeuseugar baten gata. 9 Horeumat kheueh TUHAN deungon jalan tapeuseumah keureubeuen nyang leubeh gét nibak peue mantong hareuta gata dan hase tanoh gata, 10 teuma gupok-gupok gata peunoh deungon gandom, dan ié anggô gata teuma meulimpah-limpah sampoe hana seb teumpat keu teukeubah ié anggô nyang le nyan. 11 Meunyoe TUHAN geuheuntam gata, hai aneuëk ulôn, teurimong kheueh nyan sibagoe peuingat keu gata, dan bék kheueh até gata meuhôb deungon geupeubuet ateueh gata nyang lagée nyan. 12 TUHAN geuseunuét ureuëng nyang geucinta nyan, saban cit lagée sidroe ayah geuseunuét aneuëk gobnyan nyang lumpah geugaséh. 13 Meu-untông that ureuëng nyang jeuet bijaksana dan meuteumé peungeurtian. 14 Untông jih leubeh raya nibak peue nyang jiteumé nibak pirak, dan leubeh meuyuem nibak méuh. 15 Hikeumat jih leubeh meuhareuga nibak batée peumata; banmandum nyang gata lakée hana nyang hase jipeusaban deungon nyan. 16 Hikeumat nyang teubri keu gata na kheueh umu nyang panyang, kaya dan horeumat. 17 Hikeumat udeb gata seunang ngon mangat dan seujahteura. 18 Ureuëng nyang jimumat kong that ubak hikeumat teuma jirasa udeb nyang seujati dan bahgia. 19 Deungon hikeumat, TUHAN geucebta bumoe; deungon akai budo Gobnyan geuleueng langét nibak teumpat Gobnyan. 20 Deungon iéleumé peungeutahuan Gobnyan laju geupeugöt kulam-kulam mata ié di miyueb tanoh beukah dan laju ji ile ié nyan meunan cit deungon awan dilangét jiro ié ujeuen u ateueh bumoe. 21 Sabab nyan, tamumat kheueh ubak hikeumat dan ubak peutimbangan nyang paih, hai aneuëk ulôn! Bék sagai-sagai atranyan tapeuleuh le, 22 teuma udeb gata teupeulara -- indah dan mangat ngon seunang hana teukira. 23 Gata teuma tajak deungon aman, dan hana meugantoh. 24 Gata teuma tajak éh deungon hana teurasa teumakot, gata ta teungét meuseuneunya simalam beungoh hana nyang peukaru gata. 25 Hana peureulée gata teumakot keuhai bala nyang teuka deungon hana teusangka-sangka lagée angén badée, nyang jilanda ateueh ureuëng-ureuëng jeuhet. 26 TUHAN teuma geujaga gata. Gobnyan hana geupeubiyeu gata meusuruek u dalam jeunieb. 27 Meunyoe gata na keumampuan keu tapeubuet nyang jroh ateueh ureuëng nyang peureulée ubak keubaíekan gata, bék kheueh gata tulak keu gata peubuet hai nyang jilakée nyan. 28 Bék kheueh tayue seusabe gata jipreh sampoe óh singoh beungoh, meunyoe bak saát nyoe gata hase tatulông jihnyan. 29 Bék kheueh gata reuncana sapeue-peue nyang hase teupeurugo seusabe gata nyang tinggai rab deungon gata dan jipeucaya ubak gata. 30 Bék meudakwa deungon hana sabab ngon sidroe-droe ureuëng nyang ureuëng nyan hántom na jipeubuet salah keu gata. 31 Bék kheueh picek até gata keu ureuëng nyang jipeuguna keukeurasan, dan bék taturot pi-e ureuëng nyan. 32 Sabab TUHAN geubanci keu ureuëng nyang jipeubuet jeuhet, teuma Gobnyan krab deungon ureuëng nyang teupat udeb jih. 33 TUHAN geukutok ureuëng jeuhet, teuma geubri beureukat keu rumoh ureuëng nyang taát ubak Gobnyan. 34 TUHAN geubanci keu ureuëng nyang manyang até, teuma geubri beureukat keu ureuëng nyang miyueb até. 35 Ureuëng bijaksana teuma meutamah haröm nan jih, seudangkan ureuëng bangai seumaken teucela.

Amsal 4

1 Hai aneuëk-aneuëk ulôn, deungoe kheue naseuhat ureuëng syiek gata! Simak kheueh nyan, teuma gata jeuet keu ureuëng áréh. 2 Nyang ulôn peurunoe keu gata nyoe gét, sabab nyan bék kheueh gata anggab phui ubak gobnyan. 3 Watée ulôn mantong ubit, aneuëk tunggai ureuëng syiek ulôn, 4 ulôn geupeuruno lé ureuëng syiek lôn. Gobnyan geupeugah lagée nyoe, "Ingat kheueh ubak naseuhat-naseuhat ulôn, bék kheueh sagai-sagai gata tuwoe. Peujak kheueh peue nyang ulôn bri peutunyok, mangat udeb gata bahgia. 5 Beujeuet kheueh keu ureuëng nyang bijaksana dan carông! Ingat kheueh sabe ubak naseuhat-naseuhat ulôn dan bék kheueh taböih jiôh-jiôh." 6 Hareuga kheueh hikeumat, teuma hikeumat teulindong gata; cinta kheueh jihnyan teuma jihnyan teutab geucinta gata mangat teutab aman. 7 Hai nyang peunteng nyang harôh gata peubuet phon-phon that na kheueh ta useuha beujeuet keu ureuëng bijaksana. Peue mantong nyang gata tiyeub, nyang phon na kheueh gata useuha beumeuteumé peungeurtian. 8 Seuôn kheueh hikeumat, teuma gata jipeumulia lé Gobnyan. Wa kheueh jihnyan, teuma jihnyan geupeuteuka horeumat keu gata. 9 Gobnyan teuma geubri keu gata keunarang bungöng nyang gét keu jeuet mahkota gata. 10 Deungoe kheueh ulôn, hai aneuëk ulôn! Simak kheueh beu jroh-jroh naseuhat ulôn nyoe, teuma umu gata panyang. 11 Ulôn ka lôn peurunoe hikeumat keu gata dan lôn tunyok cara udeb nyang beuna. 12 Meunyoe gata udeb nyang lagéenyan, teuma gata hana teuhalang watée tajak, dan hana meugantoh watée taplueng. 13 Ingat kheueh sabe keu ajaran nyang ka tateurimong nibak ulôn. Jaga kheueh nyan beugöt-göt, sabab deungon ajaran nyan gata teuma meuhase. 14 Bék taseutôt cara udeb ureuëng jeuhet, dan bék teuma tacuntoh buet-buet awaknyan. 15 Bék kheueh gata peupeunoh peuratian gata keu awaknyan. Peujiôh kheueh awaknyan dan tajak kheueh laju! 16 Ureuëng jeuhet hana hase jiéh sigohlom jiteumé peubuet buet nyang brok. Dan awaknyan hana teungét sigohlom jipeuceulaka ureuëng laén. 17 Keujeuhetan dan keukeujaman na kheueh lagée peunajoh dan ié jieb nibak awaknyan. 18 Rot ureuëng jeuhet seupôt lagée seupôt malam nyang gulita. Awaknyan meugantoh dan reubah hana soe teupeue. Seubalek jih, rot nyang geujak lé ureuëng jroh na kheueh lagée jiteubiet mata uroe; maken treb maken trang, akhé jih ka trang peungéh meuble-ble. 20 Simak kheueh haba ulôn nyoe! Dan deungoe kheueh naseuhat ulôn. 21 Bék kheueh tatiek nyan, teuma takeubah kheueh lam até gata. 22 Ureuëng nyang jipeuphom nyan teuma udeb dan jeuet keu seuhat. 23 Jaga kheueh até gata beugöt-göt, sabab até gata nyan kheueh nyang peuteuntée rot udeb gata. 24 Bék kheueh tacuba-cuba gata meututoe deungon nariet nyang sulet dan hana beutôi. Peujiôh kheueh nariet beurakah nyang sulet dan tutoe haba nyang meukeusut jih gata peusisat ureuëng laén. 25 Bah kheueh ruman gata meucahya sibagoe tanda keujujoran até gata; hana peureulée gata meulakon siulah-ulah na udeueng dilikot batée. 26 Pike kheueh beugét-gét sigohlom tapeubuet, teuma gata meuhase peue mantong nyang gata useuha. 27 Peujiôh kheueh nyang jeuhet, dan udeb kheueh deungon jujoe. Dan bék kheueh meusigopih meusimpang nibak rot nyang beuna.

Amsal 5

1 Aneuëk ulôn, deungoe kheueh ulôn! Simak kheueh keubijaksaan ulôn dan peungeurtian nyang ulôn peurunoe keu gata, 2 mangat gata tateupeue pakriban harôh taba droe dan tameututoe lagée ureuëng nyang na iéleumé. 3 Inong jeuhet, babah jih maméh lagée meulisan dan tutoe haba jih meumikat até, 4 teuma meunyoe banmandum nyan ka seuleusoe, nyang na tinggai na kheueh nyang phet dan deurita. 5 Gata geuhila u dalam donya ureuëng maté; rot nyang teujak teupeukeu ubak mawöt. 6 Jihnyan hana teutab nibak rot nyang teupeukeu ubak udeb; deungon hana jiteupeue bahwa jihnyan ka meusimpang nibak rot nyan. 7 Sabab nyan, hai aneuëk-aneuëk ulôn, deungoe tutoe haba lôn dan bék kheueh gata peubiyeu meunan mantong. 8 Peujiôh kheueh ureuëng inong nyang lagée nyan! Dan rumoh jih pih bék gata peuto. 9 Meunyoe gata meungon ngon inong nyan, gata teuma gadôh keuhoreumatan gata dan nyawöng gata teuma teutarek bak watée gata mantong muda lé ureuëng nyang hana rasa gaséh sayang. 10 Hareuta keukayaan gata teuma habéh jipajoh lé ureuëng laén, dan hase jeuréh payah gata jeuet keu atra milék ureuëng laén nyang hana gata turi. 11 Akhé jih gata jiteuka tunu, meunyoe tuboh gata ka habéh jipajoh lé peunyakét. 12 Laju gata geupeugah, "Ah, keupeue lôn banci keu naseuhat? Dan pakon ulôn hana lôntem ji teugah? 13 Ulôn hana lôntem deungon gurée-gurée lôn dan hana lôntem lôn seutôt gobnyan. 14 Hana teusangka-sangka ulôn nyoe ka hana yuem dimata masyarakat." 15 Lé sababnyan, beuseutia dan tagaséh kheueh keu peurumoh gata keudroe dan tabri kheueh cinta keubino gata mantong. 16 Hana guna gata mita nekmat nibak ureuëng nyang bukon peurumoh gata. 17 Nekmat nyan khusos keu gata dan peurumoh gata, kon deungon ureuëng laén. 18 Sabab nyan, bahkheueh gata beumeubahgia deungon peurumoh gata keudroe; mita kheueh nekmat nibak aneuëk dara nyang ka gata meugatib -- 19 aneuëk dara nyang lagak jeulita dan lincah lagée rusa. Bah kheueh tuboh jih nyang lagak nyan sabe lam keuadaan pungoe gila dan asmara jih sampoe teumabök-mabök gata. 20 Keupeue guna meuheut keu inong laén, hai aneuëk ulôn? Keupeue gata meumukah deungon inong dajéue? 21 TUHAN deuh geukalon peue mantong nyang jipeubuet lé manusia. Ho mantong manusia nyan jijak TUHAN teutab geukawai. 22 Desya ureuëng jeuhet lagée jeunieb peurangkab nyang teucarueh ureuëng nyan keudroe. 23 Jihnyan maté sabab hana jiteurimong naseuhat. Sabab bangai nyan nyang ba jihnyan ubak hanco.

Amsal 6

1 Aneuëk ulôn, mungken gata na tameujanji ubak sidroe-droe ureuëng keugata tanggong utang jih. 2 Dan jeuet mantong gata ka meucarueh deungon tutoe haba gata dan teupeurangkab deungon janji gata keudroe. 3 Meunyoe beutôi meunan, aneuëk ulôn, gata kana lam keukuasaan ureuëng nyan. Teuma nyoe kheueh cara jih mangat gata hase tateubiet: bubagaih gatajak ubak ureuëng nyan; lakée kheueh deungon peunoh harab mangat jihnyan jitem peuleueh gata. 4 Bék kheueh tajak éh ilée, dan bék tapiôh hék. 5 Peuleueh kheueh droe gata nibak peurangkab nyan lagée cicém atawa rusa jipeuleueh droe nibak ureuëng let. 6 Ureuëng beu-o harôh jikalon cara udeb sidom dan jimeurunoe nibak sidom nyan. 7 Sidom hana peumimpén, hana teuma peunguasa dan nyang kawai, 8 teuma teungoh mantong musém keumeukoh di sidom-sidom nyan jipeusapat beukai keu jikeubah watée teuka musém deuk. 9 Sampoe ánpajan sibeu-o nyan jitem éh? Dan pajan kheueh jihnyan jitem beudôh? 10 Jihnyan jiduek mantong deungon jaroe lam pangkée sira jipiôh, dan laju jipeugah, "Ah, ulôn jak éh sikeujab, ulôn teungéut that mata." 11 Teuma, watée jihnyan teungoh teungéut nibak teumpat éh, jihnyan laju teuka lé bala kureueng atra dan gasien nyang teuka lagée peurampok meusinjata. 12 Ureuëng jeuhet dan ureuëng kureueng aja jimeusulet dipat-pat mantong. 13 Jihnyan jimeuén mata dan jipeugöt isyarat keu teumipée. 14 Pikeran jih nyang brok ka peunoh deungon reuncana jeuhet dan jipeuteuka dakwa meudakwa dipat-pat mantong. 15 Banmandum nyan na kheueh rhot ubak sabab keuceulakaan nyang rhot ateueh droe jih keudroe deungon hana teusangka-sangka, dan jihnyan hanco banmandum. 16 Na tujoh boh peukara nyang geubanci lé TUHAN dan hana jeuet geupeubiyeu meunan mantong: Sikeub nyang sombong, babah nyang peugah haba sulet, jaroe nyang jipoh maté ureuëng nyang hana meusalah, utak nyang jireuncana hai-hai nyang jeuhet, gaki nyang bagaih-bagaih jijak ubak buet nyang jeuhet, saksi nyang hana jipiôh-piôh jimeusulet, dan ureuëng-ureuëng nyang jipeuteuka musoh lamkawan rakan deungon rakan. 20 Aneuëk ulôn, tapeubuet kheueh laju peue nyang geupeurintah lé ureuëng syiek gata, dan bék tuwoe ubak peue nyang ka geunaseuhat lé ma gata. 21 Ingat kheueh sabe ubak tutoe haba gobnyan dan takeubah kheueh nyan lam até. 22 Ajaran-ajaran gobnyan teubimbéng gata nibak rot ueh raya, nyang jaga gata óh watée malam, dan nyang bri peutunyok nibak gata óh watée gata tabeudôh. 23 Peutunyok-peutunyok nyang teuka nibak ureuëng syiek gata na kheueh lagée panyöt tanglong nyang hu trang meucahya; geuteugah gata na kheueh teutunyok keu gata pakriban cara udeb nyang jroh. 24 Deungon na nyang lagéenyan gata ka geupeujiôh nibak ureuëng-ureuëng inong jeuhet, dan nibak jirayu nyang meubisa keu peurumoh ureuëng laén. 25 Bék kheueh gata teugoda lé ceudah dan lagak ureuëng nyan, dan bék kheueh teupikat deungon mata awaknyan nyang peurayu. 26 Inong jeuhet si tukang mukah hase teusiwa deungon bu saboh pireng, teuma meunyoe meumukah deungon peurumoh gob harôh teubayeue deungon nyawöng. 27 Peu kheueh na ureuëng nyang hase jiwa apui deungon hana tutong bajée jih? 28 Dan peu kheueh na ureuëng nyang hase jigilo ngéue apui deungon hana tutong gaki jih? 29 Banmandum nyan saban bahya jih lagée meumukah deungon peurumoh ureuëng laén. Soemantong nyang peubuet nyan hana teupeusie nibak huköman. 30 Meunyoe ureuëng jijak cua peunajoh, bahpi sabab deuk, ureuëng nyan teuma teuhina. 31 Dan meunyoe ureuëng nyan keunong drob ureuëng nyan harôh jibayeue lom tujoh goe lipat; deungon nyan ureuëng nyan harôh gadôh banmandum hareuta milék jih keudroe. 32 Teuma pakriban kheueh deungon ureuëng agam nyang meuzina? Ureuëng nyan ka jireuloh droe jihnyan keudroe! Bangai that-that ureuëng nyan! 33 Ureuëng nyan teuma teuseuksa dan jihina. Nan jihnyan teuma ka kutoe sampoe siumu masa. 34 Sabab, deungon na nyang jipeubuet lagée nyan lakoe ureuëng inong nyan ka jeuet keu ureuëng ceumuru, sampoe beungéh silakoe nyan meutamah-tamah ju. Dan meunyoe jihnyan jibalaih dam, nibak ureuëng nyan ka hana le rasa gaséh sayang. 35 Ureuëng nyan hana hase teubujuk deungon péng; hadiah nyang le sidub toh mantong hana hase teupeureuda beungéh ureuëng nyan. Indonesia

Amsal 7

1 Ingat kheueh tutoe haba ulôn, hai aneuëk ulôn, dan bék tuwoe ubak peue nyang ka ulôn peugah bak gata. 2 Seutôt kheueh ubak naseuhat-naseuhat ulôn mangat gata udeb bahgia. Dan taseutôt kheueh ajaran ulôn beujroh-jroh lagée gata jaga aneuk mata keudroe. 3 Ingat kheueh ubak ajaran-ajaran nyang ka ulôn peurunoe nyan, dan takeubah kheueh lam até sanubari gata. 4 Anggab kheueh hikeumat sibagoe syedara gata dan peungeutahuan sibagoe sahabat gata nyang paleng rab nibak gata. 5 Deungon hikeumat teuma teupeujiôh gata nibak ureuëng inong jeuhet, nibak ureuëng inong nyang meurayu deungon tutoe haba nyang maméh. 6 Bak siuroe ulôn kalon rot tingkab rumoh lôn. 7 Deuh laju ulôn ngieng ramé that aneuëk muda nyang mantong ijo-ijo; teuma khusos jih ulôn ngieng sidroe nyang bangai lamkawan awaknyan. 8 Óh seupôt uroe watée jih karab malam, aneuëk muda nyan lôn ngieng jijak-jak tô deungon tikongan nibak rot nyang teujak ubak rumoh sidroe ureuëng inong. 10 Ureuëng inong nyan na kheueh sidroe inong nyang hana ék jiduek di rumoh. Siat-at inong nyan ka deuh bak binéh rot, óh lheuehnyan ka leumah teuma nibak binéh padang, atawa jidong sira jipreh nibak simpang rot. Peurangoe jih beurani that dan hana jiteupeue malée. Óh lheuehnyan ulôn kalon inong nyan jiteubiet deungon peukayan inong lunte, laju jipeurab ubak aneuëk muda nyang bangai nyan deungon reuncana nyang lisyek. 13 Inong nyan laju jiwa aneuëk mudanyan sira jicöm. Deungon hana malée laju jipeugah, 14 "Uroenyoe ulôn harôh lôn bayeue kaôy lôn, dan keu nyan ulôn ka lheueh lôn peuseumah keureubeuen. 15 Nyang kheueh sabab jih ulôn teubiet keulôn mita gata, mangat gata tamakheun di rumoh lôn. Jinoenyoe ka meurumpok ulôn deungon gata! 16 Teumpat éh ulôn ka lôn peungui deungon ija sipre nyang meubagoe wareuna nibak nanggroe Meusé, 17 dan ka ulôn boh minyéuk mangat bée mur, ceundana dan kayée maméh. 18 Jinoe, jak geutanyoe ta meucumbu dan ta nekmat asmara geutanyoe simalam suntok. 19 Lakoe ulôn hana di rumoh, gobnyan teungoh geujak u teumpat nyang jiôh. 20 Meusajan gobnyan péng le that geuba, dan hana geuwoe lam dua aleuhad nyoe." 21 Meunan kheueh cara jih inong jeuhet nyan jirayu peumuda nyan deungon meubagoe rayuan nyang lumpah meumikat sampoe teugoda kheueh aneuëk muda nyan. 22 Hana panyang pike laju jiseutôt inong jeuhet nyan lagée leumô jihue bak teumpat sie dan lagée ureuëng huköman nyang teungoh jiba mangat jiteurimong huköm nyang teukeubah keu ureuëng bangai; 23 sikeujab teuk aneuëk panah teuma teupeubeusôt lam até jih. Lagée cicém jipo jijak ubak taron, meunan kheueh peumuda nyan hana jisada bahwa nyawöng jih teungoh teu ancam. 24 Lé sababnyan, hai aneuëk-aneuëk lôn, deungoe kheueh ulôn. Dan simak kheueh kheueh naseuhat-naseuhat ulôn. 25 Bék tapeubiyeu inong nyang lagéenyan jipikat até gata; dan bék tajak tamita jihnyan, 26 sabab jihnyan ka jipeuhanco udeb ureuëng agam nyang le. Hana teu itong le jih nyang ka binasa sabab lé inong nyan. 27 Meunyoe teujak u rumoh inong nyan saban cit teucok rot nyang panék ubak maté. Indonesia

Amsal 8

1 Deungoe, keubijaksanaan jimeuhôi-meuhôi, hikeumat teubeuôt su. 2 Geudong dibukét-bukét bak binéh jalan, dan nibak simpang-simpang rot raya. 3 Dipintoe geureubang, bak rot tamong u dalam banda, disinan kheueh teudeungoe su gobnyan. 4 "Hai, umat manusia, keu gata deungoe lôn peugah; tieb-tieb insan nyang na di ateueh bumoe, simak kheueh nyang ulôn tawök nyoe! 5 Gata nyang gohlom na peungalaman, meurunoe kheueh mangat na pikeran nyang tajam; dan gata nyang beubal, meurunoe kheueh mangat insaf. 6 Simak kheueh tutoe ulôn nyoe, sabab banmandum teupat dan mutu jih gét. 7 Nyang ulôn peugah, beutôi banmandum, sabab ulôn banci keu haba sulet. 8 Tutoe haba ulôn jujoe banmandum, hana saboh pih nyang na meupalet atawa salah. 9 Keu ureuëng malém, haba ulôn nyoe beutôi, nibak ureuëng nyang áreh, haba ulôn nyan teupat. 10 Peuyuem kheueh naseuhat ulôn leubeh nibak pirak nyang aseuli, dan leubeh peu-peunteng kheueh peungeutahuan leubeh nibak méuh aseuli. 11 Ulôn kheueh hikeumat, leubeh meuyuem nibak beulian; hana hase teubandeng deungon peue mantong nyang gata lakée. 12 Ulôn kheueh hikeumat; nibak ulôn na peungeurtian, keubijaksanaan dan peungeutahuan. 13 teuhoreumat TUHAN nyang makna jih teubanci keu nyang jeuhet; dan ulôn hana galak keusombongan dan keu angkohan. Ulôn banci ubak tingkah laku nyang jeuhet dan tutoe haba tipée muslihat. 14 Ulôn kheueh nyang bri ilham. Dan ulôn cit teuma nyang wujud hainyan. Ulôn ceureudek dan teuga teuma. 15 Raja-raja ulôn tulông mangat geupeujak buet peumeurintah, nyang mat kuasa ulôn tulông jipeudong keuadelan. 16 Sabab jasa ulôn, bubena ureuëng rayeuk dan bubena bansawan jimat peurintah dan jipeubuet keuadelan. 17 Ulôn lôn gaséh keu awaknyan nyang galak keu ulôn; nyang mita ulôn teuma meurumpok ngon lôn. 18 Nibak ulôn na teukeubah keukayaan meunan cit keuhoreumatan dan keumakmuran. 19 Nyang gata teumé nibak ulôn leubeh nibak méuh aseuli; dan leubeh meuyuem nibak pirak nyang aseuli. 20 Ulôn kuseutôt rot keuadelan, ulôn bôt langkah bak jalan keujujoran. 21 Ureuëng nyang jigaséh keu ulôn, ulôn peujeuet keu ureuëng kaya; dan ulôn peupeunoh rumoh jihnyan deungon hareuta beunda. 22 Ulôn geucebta lé TUHAN sibagoe nyang keu phon, ulôn kheueh hase karya Gobnyan nyang paleng phon yoh masa ilée. 23 Ulôn geupeugét yoh phon that jeuet jamén, yoh awaiphon, sigohlom bumoe geucebta. 24 Ulôn lahé sigohlom teucebta samudera raya, sigohlom na asai mata ié. 25 Ulôn lahé sigohlom gunong-gunong geupeudong lé Gobnyan, dan sigohlom bukét-bukét geupeudong lagée nyang kana, 26 sigohlom TUHAN geucebta bumoe dan padang-padang nyang kana, dan sigohlom geucebta sigumpai tanoh nyang paleng phon. 27 Ulôn kalon keudroe watée langét geuleueng di manyang, dan cakrawala geureuntang di ateueh laôt raya, 28 yoh watée TUHAN geukeubah di angkasa, dan geupeuhah asai-asai samudera, 29 yoh watée Gobnyan geupeurintah ubak ié laôt mangat bék jilewat ubak bataih-bataih nyang kana. Disinan pih na ulôn teuka yoh watée lapek bumoe geukeubah sinan. 30 Ulôn na di sampéng Gobnyan sibagoe aneuëk nyang paleng geusayang lé Gobnyan, tieb-tieb uroe ulôn kheueh keubahgiaan Gobnyan; sabe ulôn meuén-meuén dikeue Gobnyan. 31 Ulôn meuseunang-seunang di ateueh bumoe Gobnyan, dan meurasa bahgia lamkawan manusia. 32 Lé sababnyan, deungoe kheueh ulôn, hai ureuëng muda! Taturot kheueh peutunyok ulôn, teuma gata bahgia. 33 Teurimong kheueh peutuwah dan jeuet kheueh keu ureuëng bijaksana, bék kheueh gata anggab phui hainyan. 34 Mubahgia kheueh ureuëng nyang jideungoe ulôn nyang tieb-tieb uroe jiduek sira jipreh di babah pintoe rumoh ulôn, dan meujaga-jaga nibak pintoe geureubang teumpat tinggai lôn. 35 Soe nyang meuteumé ulôn, ureuëng nyan jiteumé udeb, keu ureuëng nyan TUHAN geugalak. 36 Soe nyang hana meuteumé deungon ulôn, ureuëng nyan ka jipeurugoe droe jih keudroe; ureuëng nyang jibanci keu ulôn, ureuëng nyan jicinta keu mawöt." Indonesia

Amsal 9

1 Hikeumat ka teupeudong rumoh, dan teupeudong ban tujoh boh taméh jih. 2 Gobnyan ka geusie beulatang peulara keu khanuri, geu ulah ié anggô dan jiseudia hidangan. 3 Peulayan-peulayan nyang inong jiyuejak mangat tamawök-mawök nibak teumpat nyang manyang di banda, 4 "Soe-soe ureuëng nyang hana peungalaman, cuba jak keunoe!" Keu ureuëng nyang hana meuakai budoe, hikeumat jipeugah, 5 "Jak keunoe tamakheun peunajoh ulôn dan ié anggô nyang ka ulôn useuha. 6 Tinggai laju nyang bangai, mangat gata udeb bahgia. Ta seutôt kheueh jalan ureuëng áreh." 7 Meunyoe ureuëng nyang hana jitem teupeurunoe tatunyok laju salah jih, gobnyan teuma geupeukém gata. Meunyoe ureuëng jeuhet gata beungéh, jihnyan jiteunak gata. 8 Bék gata rapa ureuëng nyang hana jitem teupeurunoe, jihnyan jibanci keu gata. Teuma meunyoe ureuëng bijaksana gata tunyok buet jih nyang salah, ureuëng nyan teuma jihareuga gata. 9 Meunyoe ureuëng bijaksana gata jok naseuhat, ureuëng nyan jeuet keu ureuëng nyang leubeh bijaksana. Dan meunyoe ureuëng nyang taát ubak Allah gata peurunoe, iéleumé peungeutahuan ureuëng nyan teuma meutamah. 10 Mangat jeuet keu ureuëng bijaksana, nyang phon-phon that ureuëng nyan harôh na rasa horeumat dan teumakot ubak TUHAN. Meunyoe gata taturi Nyang Mahasuci, gata teuma meuteumé peungeurtian. 11 Hikeumat teubri keu gata umu nyang panyang. 12 Meunyoe hikeumat kana nibak gata, gata keudroe nyang meu untông. Teuma meunyoe hikeumat gata tulak, gata keudroe teuma nyang rugoe. 13 Ureuëng bangai na kheueh lagée inong teuga that meurapa nyang hana peungalaman dan hana jiteupeue malée. 14 Teumpat jih na kheueh di babah pintoe rumoh jih atawa dibabah pintoe geureubang banda. 15 Nibak teumpat nyan laju jitawök ubak ureuëng-ureuëng nyang na liwat. Ureuëng nyang jujoe até jibujuk teuma, 16 "Jak keunoe tapiôh, hai gata banmandum nyang gohlom na peungalaman!" Dan keu ureuëng nyang meuakai budho gobnyan jipeugah, 17 "Jai that nyang teucua rasa jih maméh that, dan makheun sira teumusöm-musöm leubeh mangat lom." 18 Awaknyan nyang jeuet keu eumpeun jihnyan hana jiteupeue bahwa ureuëng nyang saweue jihnyan ka meuteumé ajaijih diteumpat nyan; dan awak nyang ka jitamong u dalam rumoh jihnyan, jinoenyoe kana didalam donya ureuëng maté. Indonesia

Amsal 10

1 Nyoe kheueh peutuah-peutuah Nabi Sulaiman: Aneuëk nyang bijaksana na kheueh keubanggaan ureuëng tuha; aneuëk nyang bangai jipeususah até ma jih. 2 Keukayaan nyang jiteumé deungon cara jeuhet hana meuteumé laba; teuma seubalek jih, keujujoran nyang ba ureuëng nyan ubak keuseulamatan. 3 TUHAN hana geupeubiyeu ureuëng jroh-jroh deuk; teuma Gobnyan geupeuteun-peuteun ureuëng jeuhet mangat jeuet di ureuëng jeuhet nyan hana jiteumé nyang jimeuheut. 4 Ureuëng beu-oe teuma rhot ubak gasien; ureuëng jumot teuma meuteumé kaya. 5 Ureuëng bijaksana jipeusapat hase panen trok bak musém, teuma ureuëng nyang keureuja jih ji-éh mantong watée musém keumeukoh nyan teuka, teuma jiteuka malée keudroe jih keudroe. 6 Ureuëng nyang jroh teuma meuteumé beureukat. Buet nyang keujam na teusöm dilikot tutoe haba ureuëng jeuhet. 7 Keunangan keu ureuëng nyang jroh meuteumé beureukat, teuma di ureuëng jeuhet bagaih that teupeutuwoe. 8 Ureuëng nyang carông, galak geuteurimong naseuhat; ureuëng nyang mariet jih bangai teuma rhot bak sisat. 9 Ureuëng nyang jujoe udeb jih aman; ureuëng nyang galak peungéut gob rhot jih keunong tipée. 10 Soe nyang söm keubeunaran, ureuëng nyan jiteuka keusosahan; soe nyang galak réekéeh deungon troh-trang, ureuëng nyan kaji useuha keuseujahteuraan. 11 Tutoe haba ureuëng nyang gét teupeujeuet udeb bahgia, teuma dilikot tutoe haba ureuëng jeuhet na teusöm até nyang brok. 12 Deungke ngon banci asai teuka dakwa meudakwi; cinta dan gaséh sayang teupeu amphon mandum keusalahan. 13 Ureuëng nyang pikeran jih tajam jimeututoe deungon haba nyang bijaksana; teuma ureuëng nyang bangai peureulée teupeu jra. 14 Ureuëng nyang bijaksana geuhimpon iéleumé peungeutahuan; teuma meunyoe ureuëng bangai jipeugah haba, jihnyan jikawé keuceulakaan. 15 Atra keukayaan teupeulindong si ureuëng kaya, dan udeb meularat teupeuhanco si ureuëng gasien. 16 Meunyoe teupeubuet nyang jroh, upah jih na kheueh udeb bahgia; meunyoe teupeubuet desya, akibat jih leubeh le lom desya. 17 Soe nyang jipakoe keu nyang teuseugah ureuëng nyan udeb seujahteura, soe nyang hántem jimeungaku buet nyang salah ureuëng nyan kana lam bahya. 18 Ureuëng nyang jisöm banci lam droe jih, ureuëng nyan na kheueh teumipée. Dan ureuëng nyang jitabu fiteunah na kheueh bangai. 19 Seumaken le teupeugah haba, seumaken le keumungkenan jih meudesya; ureuëng nyang hase jikeundali lidah jih na kheueh ureuëng bijaksana. 20 Tutoe haba ureuëng nyang jroh lagée pirak aseuli; boh pikeran ureuëng jeuhet hana meuyuem meubacut pi. 21 Tutoe haba ureuëng nyang jroh, jeuet keu beureukat keu ureuëng ramé; teuma bangai ureuëng nyang bangai saban kajipoh droe jih keudroe. 22 Sabab beureukat TUHAN mantong kheueh manusia hase kaya; keureuja nyang brat hana hase teutamah hareuta. 23 Ureuëng bangai galak that jipeubuet salah; teuma ureuëng bijaksana galak geumita hikeumat. 24 Ureuëng jujoe bagaih that meuteumé peue nyang jikeuheundak; ureuëng jeuhet meuteumé peue nyang paleng jitakot. 25 Meunyoe angén badée teuka, teusampôh kheueh ureuëng jeuhet; teuma ureuëng jujoe teutab teugoh siumu masa. 26 Bék meuyue bak ureuëng beu-oe, jihnyan jipeutunu ureuëng nyang yue, lagée cuka jipeu seungke gigo atawa asab jipeu peudeh mata. 27 Horeumat kheueh TUHAN, teuma gata udeb nyang treb; ureuëng jeuhet maté sigohlom watée jih teuka. 28 Harapan ureuëng nyang jroh mangat jihnyan udeb bahgia; harapan ureuëng jeuhet shoh hana sapeuena. 29 TUHAN geulindong ureuëng jujoe, teuma geujok bala keu ureuëng nyang peubuet jeuhet. 30 Ureuëng nyang jujoe udeb aman seujahteura; ureuëng jeuhet hana tinggai nibak tanoh pusaka. 31 Ureuëng jujoe jipeugah haba deungon tutoe nyang bijaksana; ureuëng jeuhet geucöb babah jih. 32 Tutoe haba ureuëng jujoe keubit leupie that até; dan tutoe haba ureuëng jeuhet sabe lam sakét até.

Amsal 11

1 TUHAN geubanci keu ureuëng nyang jipeuguna céng nyang curang teuma Gobnyan galak keu ureuëng peuguna céng nyang pas lom teupat. 2 Ureuëng nyang sombong teuma geuhina; dan ureuëng nyang miyueb até teuma bijaksana. 3 Ureuëng nyang jroh jitunton lé keujujoran jih; ureuëng galak meusulet teuma geupeuhanco deungon sulet jihnyan. 4 Meunyoe teuhadap ubak mawöt, hareuta beunda hanale meumakna; dan udeb gata teuma seulamat meunyoe gata jujoe até. 5 Rot udeb ureuëng jroh jipeurata lé keujujoran, teuma ureuëng jeuhet jiba droe jih ubak keuhancoran. 6 Ureuëng jujoe seulamat sabab até jihnyan teupat; dan ureuëng nyang hana jeuet teupeucaya, meusuruek lé waba jih keudroe. 7 Meunyoe ureuëng jeuhet nyang meuninggai donya, harapan ureuëng nyan pih maté; meuharab ubak teunaga droe keudroe hana meumakna. 8 Ureuëng saleh teupeusie nibak susah; dan ureuëng jeuhet meuteumé susah nyang hana teukira. 9 Tutoe haba ureuëng jeuhet keubit binasa; dan hikeumat ureuëng nyang jroh hase teupeu seulamat. 10 Banda jeuet keuramé meunyoe ureuëng jujoe meuteumé reuzeki; dan rakyat meusurak geumbira meunyoe ureuëng jeuhet nyang maté. 11 Reuseutu nibak ureuëng jujoe teupeuceudah banda; dan tutoe haba ureuëng jeuhet teupeureuloh teuma. 12 Teuhina ureuëng laén na kheueh buet nyang paleng bangai; ureuëng nyang na akai budho, hana jipeugah haba sapeue. 13 Ureuëng nyang ba haba angén ureuëng nyan hana hase jisöm rahsia, teuma ureuëng nyang jeuet teupeucaya ureuëng nyan hase jisöm rahsia peukara. 14 Bansa hanco meunyoe hana peumimpén nyang pimpén; seumaken le peunaseuhat, seumaken teujamin keuseulamatan. 15 Meujanji teubayeue utang ureuëng laén nyan tanda jih teupeu teuka bala; leubeh gét hana teulibat lam hai nyan mangat jeuet aman. 16 Ureuëng inong nyang jroh budho meuteumé keuhormatan; ureuëng keujam jipeusapat keukayaan. 17 Ureuëng nyang gét até keubit meu-untông droe keudroe jih; teuma ureuëng keujam keubit that rugoe keudroe jih nyan. 18 Untông ureuëng jeuhet na kheueh untông nyang seumu; dan untông ureuëng nyang jipeubuet nyang jroh na kheueh untông nyang seujati. 19 Soe nyang taát jipeubuet nyang gét, ureuëng nyan teuma udeb bahgia; soe nyang jimeukreueh keujipeubuet nyang jeuhet ureuëng nyan teungoh jijak ubak mawöt. 20 TUHAN geubanci that keu ureuëng nyang até jih jeuhet, teuma jigaséh that keu ureuëng nyang udeb hana meucupa. 21 Ureuëng jeuhet pasti meuteumé huköman; dan ureuëng nyang jroh teuma seulamat. 22 Lagak sidroe ureuëng inong nyang hana meubudoe saban lagée euncien méuh jipeusok bak idong bui. 23 Keuheundak ureuëng nyang jroh sabe meuhase nyang jroh, teuma nyang hase jiharab lé ureuëng jeuhet na kheueh beungéh. 24 Na ureuëng nyang galak that jijok seudeukah, teuma ureuëng nyan meutamah kaya, teuma na ureuëng nyang galak meuhemat, jihnyan meutamah gasien ngon papa. 25 Ureuëng nyang le jitem jok meutamah keulimpahan, dan ureuëng nyang galak jitulông teuma jitulông cit teuma. 26 Soe mantong ureuëng nyang jitamon barang ureuëng nyan teuma jikutok lé ureuëng laén, teuma ureuëng nyang jipeubloe jihnyan teupujoe. 27 Soe nyang rajin jipeubuet nyang jroh, ureuëng nyan teuma jigalak lé ureuëng ramé; dan soe ureuëng nyang galak jimita buet jeuhet, keu ureuëng nyan jipeurhot lé sosah. 28 Soe nyang meubangga deungon hareuta ureuëng nyan luroh lagée ôn kayée tuha; dan ureuëng nyang saleh meukeumang lagée tarôk kayée muda. 29 Ureuëng nyang jipeususah rumoh tangga jih, nibak ureuëng nyan teuma gadôh peue-peue nyang na. Ureuëng bangai teuma jipeutimang ureuëng bijaksana. 30 Ureuëng nyang saleh teuma teujamin lam udeb jih; dan ureuëng nyang bijaksana meutamah-tamah nyang seutôt jihnyan. 31 Meunyoe lam donya nyoe ureuëng nyang jroh pih meuteumé balasan, ka pasti ureuëng jeuhet dan meudesya meuteumé huköman.

Amsal 12

1 Ureuëng nyang cinta keu iéleumé peungeutahuan ureuëngnyan galak meunyoe teuseugah; teuma ureuëng nyang hana galak teuseugah na kheueh ureuëng bangai. 2 Ureuëng nyang jroh geugalak lé TUHAN, teuma ureuëng nyang peuna nyang jeuhet jiteurimong huköman. 3 Hana meusidroe ureuëng pih nyang hase jaya deungon buet jeuhet; teuma ureuëng jujoe teutab teuga, hana hase meuguncang. 4 Ureuëng binoe nyang jroh na kheueh keubanggaan dan keubahgiaan lakoe jih, teuma peurumoh nyang jipeumalée lakoe na kheueh peunyakét tuleueng nyang jikurek trok lam sum-sum. 5 Ureuëng jujoe nyang jipike na kheueh hai-hai nyang gét; seudangkan ureuëng jeuhet jireuncana tipée daya. 6 Tutoe haba ureuëng jeuhet meumatékan; meunyoe tutoe haba ureuëng jujoe teuba ubak seulamat. 7 Ureuëng jeuhet reubah dan binasa deungon hana beukaih; teuma ureuëng nyang jroh teutab teuga tron meutron. 8 Ureuëng jipujoe sisuai deungon keubijaksanaan jihnyan; dan ureuëng nyang teuhina sisuai teuma deungon bangai jih. 9 Leubeh gét jeuet keu rakyat ubit asai na buet, nibak meulagak lagée ureuëng rayeuk padahai kureueng peunajoh. 10 Ureuëng nyang jroh jihiro keubeulatang peulara jih; teuma di ureuëng jeuhet jiseksa. 11 Ureuëng meutani nyang jimeubuet brat bak jihnyan le that peunajoh, teuma ureuëng peuhabéh watée droe nibak hai-hai nyang hana meuguna na kheueh ureuëng bangai. 12 Ureuëng jeuhet meuheut meuteumé keulaba nibak ureuëng doraka; di ureuëng gét-gét lagée bak kayée nyang hana putôh jimubôh. 13 Ureuëng jeuhet meucarueh ngon tutoe haba nyang brok nyang ka jipeugah; di ureuëng nyang gét meuseuliseh nibak keupayahan. 14 Tieb-tieb ureuëng meuteumé keunaleueng nyang sisuai deungon tutoe haba dan buet jihnyan; maséng-maséng teubri upah nyang sisuai deungon peue nyang jipeubuet. 15 Ureuëng bangai meurasa droe jih hántom na salah, teuma ureuëng bijaksana jitem deungoe naseuhat. 16 Meunyoe ureuëng bangai teusinggong, nibak watée nyan cit teuma jipeugah até jih sakét that; teuma ureuëng bijaksana hana jipako meunyoe jirapa. 17 Deungon teupeugah nyang beuna, ureuëng jipeudong keuadelan; deungon meusulet, ureuëng jipeuna keuhana adelan. 18 Mariet nyang hana meuteuntée hase teupeuluka até lagée teusôk deungon peudeueng; dan tutoe haba nyang bijaksana lagée ubat nyang bagaih puléh watéenyan cit teuma. 19 Sulet teuma deuh lam sikleb mata, teuma tutoe haba nyang beutôi teutab na siumu masa. 20 Ureuëng nyang jireuncana buet nyang jeuhet galak keu nyang hana ade; ureuëng nyang jiuseuha bak buet nyang jroh teuma meuteumé bahgia. 21 Ureuëng nyang jroh hana teuma keunong musibah; dan di ureuëng jeuhet sabe lam keuadaan sosah. 22 TUHAN geubanci keu ureuëng nyang galak meusulet; teuma Gobnyan galak keu ureuëng nyang jujoe. 23 Ureuëng bijaksana hana geupeuleumah droe iéleumé peungeutahuan jih; teuma di ureuëng bangai jipeugah-peugah haijih nyang bangai nyan. 24 Sabab keureuja brat hana jitem meunyeurah sampoe ureuëng nyan hase jimat kuasa; meunyoe beu-o teupaksa ureuëng nyan jeuet keuhamba. 25 Rasa khawate teupeutah seumangat, teuma tutoe haba nyang ramah nyan kheueh nyang peurayeuk até. 26 Ureuëng nyang jroh leubeh meu-untông nibak teutangga jihnyan; ureuëng jeuhet sisat sabab buet nyang jeuhet nyang jikeureuja. 27 Meunyoe beu-o-beu-o hana hase peue nyang teucita-cita lam até; deungon meukeureuja brat ureuëng nyan jiteumé keukayaan. 28 Ureuëng nyang jiseutôt bak jalan nyang beuna teuma udeb bahgia; dan ureuëng nyang jiseutôt nibak jalan nyang jeuhet jipeukeu ubak mawöt.

Amsal 13

1 Aneuëk nyang áreh jisimak meunyoe ureuëng syiek jih teungoh bri peutuah; teuma di ureuëng sombong hánjitem teurimong nyang meunyoe teutam. 2 Tutoe haba ureuëng nyang jroh jipeuteuka laba; teuma ureuëng nyang hana jujoe galak ubak buet nyang keujam. 3 Ureuëng nyang até-até nibak tutoe haba meuteumé aman lam udeb jih; teuma ureuëng nyang jipeugah haba ban galak droe teuma rhot ubak malang. 4 Ureuëng beu-oe le that nyang jilakée teuma hana meusapeue pih nyang na jiteumé; teuma ureuëng nyang keureuja brat teutab jiteumé peue-peue nyang geukeuheundaki. 5 Ureuëng nyang jujoe jibanci that keu haba sulet; tingkah laku ureuëng jeuhet keubit malée dan cilaka. 6 Keujujoran teulindong keu ureuëng nyang udeb geuh teupat; jeuhet jipeuhanco ureuëng nyang meudesya. 7 Na ureuëng nyang meulagak kaya, padahai hana meuhareuta; na ureuëng nyang meulagak gasien, padahai kaya that. 8 Ureuëng kaya harôh jipeuteubiet péng mangat udeb jih aman; teuma ureuëng gasien beubaih nibak ancaman. 9 Ureuëng nyang malém lagée cahya nyang hu trang; teuma di ureuëng jeuhet lagée panyöt lon hana meucahya. 10 Ureuëng nyang angkoh nyang jipeuhase na kheueh dakwa-dakwi; ureuëng nyang bijaksana geutem teurimong ajaran. 11 Keukayaan nyang jiteumé deungon mudah bagaih meukureueng; teuma hareuta nyang jipeusapat bacut deumi bacut bagaih meutamah le. 12 Meunyoe harapan hana teupeupeunoh, baten hase meurana; meunyoe nyang teukeuheundak teukabui, até keubit bahgia. 13 Ureuëng nyang anggab enteng ajaran TUHAN, jipeuceulaka droe jih keudroe; teuma ureuëng nyang taát ubak huköm Po teu Allah teuma meuteumé upah. 14 Ajaran ureuëng bijaksana lagée mata keubahgiaan; meunyoe jiteuka ancaman, ajaran nyan nyang peuseulamat. 15 Ureuëng meubudoe basa teuma teusanjong; teuma ureuëng nyang hana jeuet teupeucaya meuteumé udeb susah. 16 Ureuëng nyang bijaksana seumike ilée sigohlom jipeubuet; ureuëng bangai jipeugah-peugah keuhai jih nyang bangai. 17 Ureuëng nyang teuyuejak nyang hana até-até jipeuteuka bala; teuma utosan nyang hase teupeucaya teujamin jihnyan meuhase. 18 Ureuëng nyang hánjitem teudidek jihnyan jeuet keu ureuëng gasien dan hina; teuma ureuëng nyang jideungoe naseuhat jihoreumat lé gob. 19 Alangkah gét jih meuteumé peue nyang jikeuheundak! Ureuëng bangai hánjitem meupaleng nibak buet jeuhet. 20 Ureuëng nyang meungon ngon ureuëng bijaksana, teuma jeuet keu ureuëng bijaksana; teuma ureuëng nyang jimeurakan deungon ureuëng bangai, teuma meuteumé bala. 21 Ureuëng meudesya sabe jitiyeub-tiyeub lé nyang malang teuma ureuëng nyang gét sabe meuteumé keubahgiaan. 22 Ureuëng nyang gét jipeuwaréh keukayaan keu aneuëk cucoe jih; teuma keukayaan ureuëng nyang meudesya teukeubah keu ureuëng nyang jujoe udeb jih. 23 Tanoh nyang shoh jeuet meuhase peunajoh nyang le keu ureuëng gasien; teuma lé sabab hana ade jeuet keusabab tanoh nyan hana teupeubuet le. 24 Hana teutem poh aneuëk, saban cit hana teugaséh keu aneuëk nyan; meunyoe cinta, harôh tajeuet tapoh aneuëk nyan. 25 Ureuëng nyang gét sabe lam keuadaan seb, teuma ureuëng jeuhet sabe lam keuadaan kureueng.

Amsal 14

1 Rumoh tangga jipeudong lé keubijaksanaan ureuëng inong, teuma jipeureuloh lé keubangai jih nyan keudroe. 2 Ureuëng nyang jujoe teumakot keu TUHAN Allah; dan ureuëng nyang udeb jih hana jujoe jihina Gobnyan. 3 Sabab sombong jih, di ureuëng bangai galak that jjipeurayeuk droe; dan ureuëng bijaksana teuma geulindong deungon tutoe haba geuh keudroe. 4 Meunyoe hana leumô, hase diblang hana sapeuena; deungon teunaga leumô, hase di blang nyang teukoh teuma meulimpah. 5 Saksi nyang jujoe sabe jipeugah haba nyang beuna; dan saksi nyang hana hase teupeucaya pajan mantong jipeugah haba duseuta. 6 Ureuëng sombong hana jeuet keu ureuëng bijaksana, teuma ureuëng carông jimeurunoe deungon mudah. 7 Bék kheueh meurakan deungon ureuëng bangai; hana nyang hase jipeurunoe keu gata. 8 Ureuëng bijaksana geuteupeue pakriban harôh meutindak, dan ureuëng bangai keunong peungéut sabab bangai jih keudroe. 9 Ureuëng bangai hana jipako peu kheueh desya jih geupeu amphon atawa hana; dan ureuëng nyang jroh meuheut that beu geupeu amphon desya gobnyan. 10 Sakét ngon seunang teukeubah didalam kalbu; ureuëng laén hana jiteumé rasa meusajan teuma. 11 Rumoh ureuëng nyang jroh teutab kong dan kukoih; dan rumoh ureuëng jeuhet teuma reuloh. 12 Na rot ueh nyang deuh jih teupat, teuma akhé jih rot nyan teujak ubak mawöt. 13 Lam kém-kém mungken na teumo; dan geumbira hase keuneulheuh deungon keuseudehan. 14 Ureuëng jeuhet teuma jipôt keudroe boh nibak hase jeuhet jih nyan, dan ureuëng nyang jroh jipôt teuma boh nyang jroh nyan. 15 Ureuëng bangai jipeucaya ubak tieb-tieb tutoe haba gob, dan ureuëng nyang jroh ngon bijaksana jimeubuet deungon até-até. 16 Ureuëng meubudoe basa sabe lam waspada dan geupeujiôh nibak buet nyang jeuhet, teuma di ureuëng bangai bagaih that ji-ék pitam, laju jirasa droe jih aman. 17 Ureuëng nyang galak keu beungéh jimeubuet bangai; dan ureuëng nyang bijaksana jimeusikeub saba. 18 Ureuëng nyang hana peungalaman teuma jeuet keu ureuëng bangai; dan ureuëng bijaksana teuma meutamah iéleumé peungeutahuan. 19 Ureuëng jeuhet jitundok ubak ureuëng nyang teupat até, keu jilakée mangat jihnyan geutem gaséh. 20 Ureuëng gasien hana jigalak bahpi lé rakan-rakan jih keudroe; teuma meunyoe ureuëng kaya ramé that-that sahabat gobnyan. 21 Soemantong ureuëng nyang jihina ureuëng laén, nyan ka jipeubuet desya; dan soe nyang jroh até ubak ureuëng gasien, teuma mubahgia. 22 Soe nyang peugöt nyang jroh, teuma teupeucaya dan meuteumé horeumat; dan soe nyang reuncana buet nyang jeuhet ureuëng nyan kana di jalan nyang sisat. 23 Nibak tieb-tieb useuha na laba; deungon tutoe haba nyang hana meuasoe sampoe ureuëng laén rhot bak gasien. 24 Ureuëng bijaksana jipujoe sabab keubijaksanaan gobnyan; dan ureuëng bangai meusyeuhu teuma sabab bangai jih nyan. 25 Meunyoe na sidroe saksi jipeugah nyang beuna, ureuëng nyan ka geupeuseulamat nyawöng; meunyoe gobnyan geumeusulet, gobnyan ka meukhianat ubak seusabe keudroe-droe. 26 Ureuëng nyang taqwa ubak TUHAN ureuëng nyan jiteuka teuntram, dan keuluwarga gobnyan teuma na peulindongan. 27 Taqwa ubak TUHAN na kheueh panghulée keubahgiaan; dan rot keu teupeusie nibak maté. 28 Meusyeuhu raja na nibak jeumeulah rakyat gobnyan; meunyoe hana rakyat, po raja hana hase geumeukuasa. 29 Ureuëng bijaksana hana bagaih beungéh; dan ureuëng bangai hana hase jipeuteun droe. 30 Até nyang mangat tuboh pih seuhat; até nyang kuéuh lagée peunyakét nyang jiba maté. 31 Soe nyang peubuet nyang jroh keu ureuëng gasien, ureuëng nyan ka jihoreumat ubak Po teu Allah; dan soe nyang teugom ureuëng leumoh, saban cit ureuëng nyan ka jihina peuncebta gobnyan. 32 Ureuëng jeuhet binasa sabab buet jih nyang jeuhet, dan ureuëng jroh teulindong sabab keuhai jujoe jihnyan. 33 Hikeumat sabe na nibak ureuëng nyang meubudoe; teuma teutindéeh nibak pikeran ureuëng bangai. 34 Keuadelan dan keubaíekan teubeuôt martabat bansa, teuma deungon desya sampoe bansa nyan jeuet keuhina. 35 Raja galak keu peugawée nyang carông; teuma gobnyan hana geubeungéh keu peugawée nyang hana hase jipeujak tugaih.

Amsal 15

1 Deungon teujaweueb nyang ramah, beungéh nyang kana nyan hase reuda; meunyoe teujaweueb nyang peudeh teupeubeudôh beungéh nyang hana teukira. 2 Tutoe haba ureuëng bijak trok bak peungeutahuan meunarek até; teuma tutoe haba ureuëng bangai asoe jih na kheueh keubodohan. 3 TUHAN geungieng banmandum nyang teujadi di jeueb-jeueb teumpat; Gobnyan geupeurati banmandum nyang gét dan nyang jeuhet. 4 Tutoe haba nyang jroh meutamah seumangat, dan tutoe haba nyang peudeh teupeuleumoh hasrat. 5 Ureuëng bangai jipeujayéh naseuhat ureuëng syiek droe jih, dan di ureuëng bijak geudeungoe meunyoe teuseugah. 6 Di rumoh ureuëng nyang jroh na hareuta nyang le; dan keukayaan ureuëng jeuhet leunyab deungon beuncana. 7 Tutoe haba ureuëng bijaksana peunoh deungon iéleumé peungeutahuan, teuma pikeran ureuëng bangai hana nyang lagéenyan. 8 TUHAN geuteurimong doá ureuëng jroh, teuma Gobnyan geubanci ubak keureubeuen ureuëng jeuhet. 9 TUHAN geubanci ubak cara udeb ureuëng doraka, teuma Gobnyan geugaséh keu ureuëng nyang jiuseuha jipeubuet keuheundak Gobnyan. 10 Ureuëng nyang jipeubuet nyang jeuhet teuma geuseksa; dan ureuëng nyang hana jitem teuteugah teuma maté. 11 TUHAN geuteupeue donya ureuëng maté dan seulok beulok jih; panena mungken pikeran manusia jisöm nibak Gobnyan? 12 Ureuëng nyang galak jihina gob ureuëng nyan hana galak teu teugah; jihnyan beu-oe jilakée naseuhat ubak ureuëng bijaksana. 13 Meunyoe até sabe geumbira muka ureuëng nyan meucahya; teuma meunyoe até nyang seudeh seumangat hase patah. 14 Ureuëng bijaksana geujak mita iéleumé peungeutahuan; teuma ureuëng bangai laloe deungon keubodohan. 15 Ureuëng muram harôh jimeujuang lam udeb jih, teuma ureuëng nyang riang sabe dalam bahgia. 16 Leubeh gét bacut hareuta geutakot ubak TUHAN, nibak hareuta nyang le teuma sabe lam keuadaan gundah. 17 Leubeh gét pajoh gulée teuma meusigoe deungon cinta gaséh, nibak teupajoh uengkot sie nyang mangat teuma meusajan deungon rasa banci. 18 Ureuëng nyang bagaih beungéh nibak ureuëng nyan bagaih that jipeudong dakwa, teuma ureuëng nyang saba nibak ureuëng nyan jiba damé. 19 Ureuëng beu-oe sabe lam keuadaan susah; teuma di ureuëng jujoe hana geurasa sulet. 20 Aneuëk nyang bijaksana, keubit that galak até ureuëng syiek jih; teuma aneuëk nyang bangai hana jihareuga keu ma jih. 21 Bangai na kheueh keuseunangan keu ureuëng beubal, di ureuëng bijaksana udeb geuh teupat. 22 reuncana hase gagai, meunyoe hana teupike-pike; dan reuncana meuhase, meunyoe le ureuëng bri naseuhat. 23 Tutoe haba nyang teupeugah paih bak watée jih, teupeuteuka suka cita. 24 Ureuëng nyang bijaksana geuseutôt rot nyang meusineungoh nyang teujak ubak udeb; kon rot nyang meutreun nyang teutuju ubak maté. 25 TUHAN geureuloh rumoh ureuëng nyang manyang até, teuma tanoh atra sidroe inong balée teutab geulindong. 26 TUHAN geubanci that ubak reuncana nyang jeuhet; teuma tutoe haba nyang jroh keubit galak that até Gobnyan. 27 Soe nyang mita laba nyang hana haleue, ureuëng nyan ka jipeuhanco keuluwarga jih keudroe. Dan nyang banci ubak péng sugok, ureuëng nyan teuma udeb bahgia. 28 Ureuëng nyang jroh jipike ilée meunyoe jimeututoe; dan di ureuëng jeuhet jipeugah haba hai-hai nyang kutoe. 29 TUHAN geudeungoe meunyoe ureuëng jroh nyang meudoá, teuma Gobnyan hana geupako keu ureuëng doraka. 30 Ruman nyang geumbira keubit teupeu mangat até, dan haba nyang jroh keubit teupeu seugar jiwa. 31 Ureuëng nyang jipako ubak teuseugah ureuëng nyan na kheueh jitamong ubak ureuëng nyang bijaksana. 32 Ureuëng nyang hana jitem deungoe naseuhat, ureuëng nyang lagéenyan hana jihareuga keu droe jih keudroe; dan ureuëng nyang jitem teurimong meunyoe teuseugah, ureuëng nyan jeuet keu ureuëng nyang meubudoe basa. 33 Teumakot ubak TUHAN na kheueh dasai peundidekan nyang jroh; dan keuhormatan awai nibak keumiyueb até.

Amsal 16

1 Manusia jeuet jipeugöt reuncana, teuma Po teu Allah nyang bri keuputosan. 2 Tieb-tieb buet ureuëng nyan mungken gét nibak pandangan jih keudroe, teuma TUHAN kheueh nyang nilai meukeusut até ureuëng nyan. 3 Peucaya kheueh ubak TUHAN banmandum reuncana gata, teuma gata meuhase peue mantong nyang gata reuncana. 4 Peue mantong nyang geupeugöt lé TUHAN na tujuan jih; dan tujuan nibak ureuëng jeuhet na kheueh keubinasaan. 5 Banmandum ureuëng sombong geubanci lé TUHAN; Gobnyan hana geupeubiyeu awaknyan teuhinda nibak huköman. 6 Ureuëng nyang seutia ubak Po teu Allah ureuëng nyan meuteumé peungamphonan; dan ureuëng nyang taqwa teuma teuhinda nibak bandum nyang jeuhet. 7 Meunyoe gata hase tapeugalak até TUHAN, musoh-musoh gata teuma geupeujeuet keurakan gata. 8 Leubeh gét meuhase bacut deungon cara jujoe, nibak meupéng le deungon cara hana ade. 9 Manusia hase jipeugét reuncana, teuma nyang peuteuntée jalan udeb ureuëng nyan na kheueh Po teu Allah. 10 Raja geuteurimong kuasa nibak Po teu Allah, lé nyan, gobnyan hana salah tieb-tieb keuputosan gobnyan. 11 TUHAN geumeuharab manusia nyan jujoe meunyoe jimeuniaga, meunan cit lam hai ukoran dan timbangan. 12 Nibak ureuëng mat kuasa, meubuet jeuhet na kheueh saboh hai nyang paleng kutoe, sabab peurintah gobnyan teuga ngon kong kareuna ade. 13 Keuteurangan nyang beutôi keubit that galak nibak peunguasa, dan gobnyan geugaséh keu ureuëng nyang jipeubuet jujoe. 14 Meunyoe raja ka beungéh na kheueh lagée saboh haba keuhai huköman maté; teuma di ureuëng nyang bijaksana jiuseuha jipeureuda. 15 Keuhai jroh até raja na kheueh geupeuteuka udeb seujahteura, lagée awan jipeutron ujeuen meunyoe musém uroe. 16 Meuteumé hikeumat leubeh gét nibak meuteumé méuh; meuteumé iéleumé peungeutahuan leubeh meuyuem nibak meuteumé pirak. 17 Ureuëng jroh-jroh jipeujiôh droe nibak ureuëng jeuhet; dan ureuëng nyang jipakoe cari udeb jih, jilindong droe jih keudroe. 18 Ureuëng sombong meuakibat ubak keuhancoran; dan keuangkohan meuakibat ubak reuloh. 19 Leubeh gét miyueb até dan hana meuhareuta, nibak teuseutôt deungon ureuëng sombong dan teunekmat hareuta nyang jireupah lé awaknyan. 20 Peurati kheueh peue nyang teupeurunoe keu gata, teuma gata meuteumé nyang paleng jroh. Peucaya kheueh ubak TUHAN, teuma gata bahgia. 21 Ureuëng bijaksana teuturi nibak pikeran jih nyang tajam; cara jih peugah haba nyang meunarek, dan tutoe haba jih nyang keubit meunarek até. 22 Keubijaksanaan na kheueh pangkai keubahgiaan udeb ureuëng meubudoe; dan ureuëng bangai jiseksa lé bangai jihnyan keudroe. 23 Pikeran ureuëng meubudoe tutoe haba jih bijaksana, dan nyang peurunoe seumaken teupeuyakén teuma. 24 Nariet nyang ramah lagée meulisan; maméh nyúm jih dan teupeuseuhat badan jih. 25 Na rot ueh nyang leumah jih sulu, teuma akhé jih rot ueh nyan teujak ubak mawöt. 26 Meuheut keuneuk seumajoh teudorong ureuëng jimeu useuha; sabab pruet droe jih, gobnyan teupaksa meukeureuja. 27 Ureuëng jeuhet ji useuha keu jipeuceulaka seusabe keudroe-droe; tutoe haba jih jeuhet lagée ngéue apui nyang hu meutaga. 28 Ureuëng nyang curang jipeuteuka dakwa-dakwi; tukang peusuna hase jipeucre sahabat nyang krab. 29 Ureuëng keujam jipeungét bubena rakan-rakan jih, dan jiba awaknyan u dalam bahya. 30 Até-até kheueh keu ureuëng nyang jiseunyum dan jimeuén mata, ureuëng nyan teungoh jireuncana buet nyang jeuhet didalam até jih. 31 Ureuëng nyang jujoe geu anugeurah umu nyang panyang; ôk putéh gobnyan lagée mahkota nyang geumilang cahya. 32 Hana bagaih beungéh leubeh jroh nibak na kuasa; teukuasa droe leubeh jroh nibak teukuasa bansa. 33 Mangat jiteupeue naseb, manusia jitiek undi, teuma nyang peuteuntée jaweueb jih na kheueh TUHAN keudroe.

Amsal 17

1 Leubeh gét saboh suéb bu teuma na keuteuntraman, nibak peunajoh nyang mangat-mangat teuma meudakwa hana reuda. 2 Namiet nyang carông teuma meukuasa ateueh aneuëk nyang jipeugöt malée; dan jiteurimong waresan saban deungon syedara-syedara aneuëk nyan. 3 Méuh dan pirak teu-ujoe deungon apui, teuma até manusia geu-ujoe lé TUHAN. 4 Ureuëng jeuhet jiseutôt saran nyang jipeugah lé ureuëng jeuhet, dan ureuëng meusulet galak that jideungoe haba feusuna. 5 Soe nyang hina ureuëng gasien ngon papa, saban cit jihnyan ka jihina Po teu Allah nyang cebta jihnyan. Soe nyang geumbira ateueh ureuëng nyan keunong bala, ureuëng nyan pasti meuteumé huköman. 6 Keubanggaan ureuëng nyang ka tuha na kheueh aneuëk cucoe gobnyan; keubanggaan aneuëk miet na kheueh ureuëng syiek jih. 7 Ureuëng teuhoreumat hana patot jipeugah haba sulet; dan ureuëng bangai hana pantaih jipeugah haba nyang meuhareuga. 8 Na nyang sangka deungon péng sugok hase jipeubuet buet nyang ajaéb; deungon péng sugok peue mantong hase teulaksana. 9 Meunyoe na meuheut jigalak lé gob, peumeuáh kheueh salah nyang jipeubuet lé gob. teupeubeudôh-beudôh keusalahan nyan teupeuputôh meusahabat. 10 Sigoe keunong teugah leubeh meumakna keu ureuëng nyang meubudoe nibak sireutoih goe keunong seunuét keu ureuëng bangai. 11 Ureuëng jeuhet sabe jipeuna buet nyang jeuhet, teuma mawöt nyang teuka ateueh jihnyan sibagoe utosan nyang keujam. 12 Leubeh gét meurumpok deungon nang cagée nyang gadôh aneuëk jih, nibak meurumpok ngon ureuëng bangai nyang gabuek sabe deungon bangai jih nyan. 13 Soe nyang balaih nyang gét deungon nyang jeuhet, nyang jeuhet pih hana hase teupeuteubiet nibak rumoh gobnyan. 14 Teupeu phon meudakwa na kheueh lagée ureuëng peuhah babah ié; sabab nyan surôt kheueh sigohlom meudakwa nyan teupeuphon. 15 TUHAN geubanci keu ureuëng nyang peubeutôi ureuëng doraka, dan nyang peusalah ureuëng nyang hana meusalah. 16 Sia-sia mantong ureuëng bangai jipeuhabéh péng jak mita hikeumat, sabab jihnyan hana pikeran nyang seuhat. 17 Sidroe sahabat sabe seutia keu rakan, teuma sidroe syedara meusajan jitanggong keusosahan. 18 Ureuëng nyang meujanji beujeuet jihnyan keu ureuëng nyang tanggong utang rakan jih na kheueh ureuëng nyang bangai. 19 Ureuëng nyang galak keudesya, ureuëng nyan galak jimeudakwa. Ureuëng nyang raya babah bak peugah haba, na kheueh jimita keuhancoran. 20 Sidroe ureuëng teumipée hana mubahgia, dan ureuëng deungon lidah meucabeueng meuteumé bala. 21 Meunyoe meuteumé aneuëk nyang bangai nyan na kheueh keuseudehan; dan jeuet keu ureuëng syiek nyang bangai hana teubri keugeumbiraan. 22 Até nyang geumbira na kheueh mangat seuhat tuboh; teuma até nyang sabe meurana na kheueh keu teupeu patah seumangat. 23 Sidroe hakém nyang jeuhet, jiteurimong sugok seucara rahsia dan nibak hakém nyang lagée nyan hana jipeujak keuadelan. 24 Tujuan ureuëng nyang na peungeurtian na kheueh keu meuteumé hikeumat, teuma tujuan ureuëng bangai hana meuteuntée. 25 Aneuëk nyang bangai jipeususah ureuëng syiek jih, dan jipeuseudeh até ma jih. 26 Hana patot teupeurhot deunda keu ureuëng nyang hana meusalah; dan hana teuma patot teutindéeh keu ureuëng nyang jroh budo. 27 Ureuëng nyang tajam pikeran jih, hana le jipeugah haba. Ureuëng nyang bijaksana sabe lam teunang. 28 Sidroe ureuëng bangai pih jipike carông dan bijaksana meunyoe jihnyan jipeuseungab droe sira jitôb babah hana jitem peugah haba.

Amsal 18

1 Ureuëng nyang ji peuaséng droe nibak ureuëng laén ureuëng nyan nyang jipike na kheueh keudroe jih mantong; asai na meuteumé peundapat ureuëng laén teutab jibantah. 2 Ureuëng bangai hana galak teubri peungeurtian; nyang jimeuheut na kheueh jipeugah asoe até jih mantong. 3 Desya dan hina jijak meu jandreng; meunyoe ka keunong ceula, ka pasti keunong hina. 4 Haba gob jeuet keu sumber keubijaksanaan, lhôk lagée samudera raya, leupie lagée ié nyang ile. 5 Hana gét teudong blaih ureuëng doraka dan teutindéeh ureuëng nyang hana salah. 6 Meunyoe ureuëng bangai jipeugah haba, jihnyan jipeuphon gara-gara mangat meudakwa dan jilakée seunuét. 7 Tutoe haba ureuëng bangai jipeuhanco droe jih keudroe; jicarueh droe deungon haba jih. 8 Feusuna mangat rasa jih; lé ureuëng laén galak jiuét. 9 Ureuëng nyang lalée nibak tugaih jih saban brok jih deungon ureuëng nyang galak peurusak. 10 TUHAN nyan lagée meunara nyang kukoih; keunan kheueh ureuëng jujoe jijak dan meuteumé teumpat nyang aman. 11 Teuma lé ureuëng kaya jisangka hareuta jih kheueh nyang hase peuseulamat droe jih lagée bintéh beuton nyang manyang dan kukoih jikeulileng banda. 12 Ureuëng nyang sombong teuma reubah, dan ureuëng nyang miyueb até teuma jihoreumati. 13 Teujaweueb sigohlom teudeungoe na kheueh nyang bangai dan teucila. 14 Lé meulakée keu-udeb, manusia hase jitanggong peundeuritaan; gadôh keuheundak nyan, gadôh teuma peue mantong harapan. 15 Ureuëng meubudoe sabe graih keu iéleumé peungeutahuan; dan ureuëng bijaksana sabe meuharab ubak ajaran. 16 Hadiah teubuka jalan dan teu intat ureuëng ubak ureuëng-ureuëng rayeuk. 17 Nyang mariet phon that nibak sidang peungadelan sabe deuh jih beutôi, teuma peue nyang jipeugah nyan teu-ujoe meunyoe ka trok lawan. 18 Deungon undian, meudakwa nyan hase teupiôh, dan meumusoh deungon peunguasa pih hase teupeureuda. 19 Syedara nyang ka teupeusakét até jih leubeh payah teupeutoe nibak banda nyang kukoih; meudakwa lagée palang geureubang banda nyang meukuta. 20 Keu tutoe haba nyang ka jipeugah na akibat nyang harôh jirasa. 21 Lidah na kuasa keu jipeuseulamat udeb atawa teupeurusak nyan; ureuëng laén harôh jitanggong akibat nyang ka jipeugah nyan. 22 Ureuëng nyang ka jimeukawen, nibak jihnyan na untông; peurumoh na kheueh karonya TUHAN. 23 Ureuëng gasien jimeulakée deungon sopan; di ureuëng kaya geujaweueb deungon su nyang meudhot. 24 Na sahabat nyang hana seutia, dan na teuma nyang leubeh rab nibak syedara.

Amsal 19

1 Leubeh gét ureuëng gasien nyang teupat udeb jih, nibak ureuëng bangai nyang galak jimeusulet. 2 Bahpi jeumôt that, meunyoe hana iéleumé peungeutahuan nyang lagée nyan hana meuguna; ureuëng nyang buet jih meudab-dab jai that jipeubuet salah. 3 Manusia jipeurugoe droe jih keudroe lé sabab bangai jihnyan, óh lheuehnyan jipeusalah TUHAN ateueh hai nyan. 4 Ureuëng kaya, rakan jihnyan sabe meutamah; teuma di ureuëng gasien sabe jitinggai lé rakan droejih. 5 Ureuëng nyang meusulet di kantô peungadelan, hana teuma tinggai lé huköman. 6 Tieb-tieb ureuëng jiuseuha jicok até ureuëng peunteng; dan banmandum ureuëng jitem meurakan ngon ureuëng dermawan. 7 Ureuëng gasien jipeujayéh lé syedara jih, peuteuk lom lé rakan jihnyan. Pakriban mantong jihnyan jiuseuha, jihnyan hana hase jipakat awaknyan. 8 Soe nyang tiyeub iéleumé peungeutahuan, ureuëng nyan tanda jigaséh keudroe jihnyan; dan soe mantong nyang ji-ingat ubak peue nyang ka jimeurunoe, ureuëng nyan teuma mubahgia. 9 Ureuëng nyang meusulet di kantô peungadelan pasti teuma geuhuköm dan geupeubinasa. 10 Hana patot sidroe ureuëng bangai udeb jih meuwáh, dan hana teuma patot sidroe namiet jijok peurintah keu peunguasa. 11 Ureuëng bijaksana hase jipeuteun meunyoe jihnyan beungéh. Ureuëngnyan teupujoe sabab hana jipakoe gob laén nyang salah ateueh jihnyan. 12 Meunyoe raja beungéh lagée su singa teuma-uëm; dan meunyoe raja gét lagée ié mbon nyang basah nibak meubagoe rupa sinaman. 13 Aneuëk nyang bangai jipeuhanco ureuëng syiek jih. Peurumoh nyang galak meukröb-kröb lagée ié meutreb-treb nyang hana putôh-putôh. 14 Rumoh dan hareuta hase meuteumé nibak ureuëng syiek, teuma peurumoh nyang bijaksana na kheueh karonya nibak TUHAN. 15 Meuayéum-ayéum teupeujeuet ureuëng jiteungét meusineunya, dan akhé jih ureuëng beu-oe nyan ka jiteuka deuk. 16 Ureuëng nyang taát ubak peurintah Allah teuma seulamat, dan ureuëng nyang hana jihareuga keu peurintah nyan teuma maté. 17 Ureuëng nyang tulông ureuëng gasien saban lagée ureuëng bri pinjaman ubak TUHAN; singoh TUHAN geubalaih teuma. 18 Peuteureuteb laju aneuëk gata simantong na harapan; meunyoe hana, saban cit gata meuharab ubak keuhancoran. 19 Bah kheueh ureuëng nyang bagaih beungéh jirasa keudroe akibat jih. Meunyoe gata tatulông jihnyan, gata teuma tatamah beungéh gobnyan. 20 Meunyoe gata galak meurunoe dan tadeungoe naseuhat, singoh gata jeuet keu ureuëng nyang meuhikeumat. 21 Manusia le that reuncana, teuma keuputosan TUHAN kheueh nyang teulaksana. 22 Sifeuet nyang teuharab nibak sidroe-droe ureuëng na kheueh keuseutiaan. Leubeh gét jeuet keu ureuëng gasien nibak jeuet keu ureuëng sulet. 23 Horeumat kheueh TUHAN, udeb gata teuma mubahgia; gata teuma puih dan beubaih nibak bala. 24 Na ureuëng nyang beu-oe nyang bit-bit beu-oe; jisuleueng peunajoh lam babah jih mantong hánjitem. 25 Meunyoe ureuëng sombong teuhuköm, ureuëng nyang hana peungalaman jeuet keu peulajaran. Meunyoe ureuëng meubudoe teu seugah gobnyan teuma meutamah bijaksana. 26 Aneuëk nyang ji iénanya dan ji use ureuëng syiek jih, na kheueh aneuëk nyang that-that jipeumalée dan aneuëk doraka. 27 Aneuëk ulôn, meunyoe gata hana tatem meurunoe le, gata teuma tuwoe deungon peue nyang ka gata meurunoe. 28 Ureuëng nyang jitem bri keusaksian nyang peuleusu, saban cit jihnyan ka jipeubeuáh huköm; peuceulaka ureuëng laén, mangat rasajih nibak ureuëng jeuhet. 29 Ureuëng bangai nyang manyang até pasti teupoh.

Amsal 20

1 Sabab lé ié kreueh sampoe jeuet ureuëng laén kureueng aja dan karu deungon kirôh. Bangai that ureuëng nyang jieb ié nyan sampoe mabök. 2 Meunyoe raja jiteuka murka lagée su singa teuma-uëm; nyang peubeudôh beungéh gobnyan saban cit jipeuceulaka droejih keudroe. 3 Teuma ureuëng bangai kheueh nyang galak jimeudakwa; sikeueb nyang teupujoe na kheueh jipeujiôh nibak meudakwa. 4 Ureuëng meutani nyang beu-oe hana jijak buet u blang óh trok bak watée; akhé jih óh ka trok musém keumeukoh jihnyan hana hase meusapeue pih. 5 Asoe até ureuëng ibarat iémon nyang lhôk; teuma hase jiseub lé ureuëng nyang na peungeurtian. 6 Jai that ureuëng nyang meungaku droe jih na kheueh rakan, teuma nyang beutôi-beutôi seutia payah that meuteumé. 7 Aneuëk-aneuëk manyak meu-untông that meunyoe na ureuëng syiek nyang jroh dan udeb nyang teupat. 8 Meunyoe raja geuduek nibak keurusi peungadelan, gobnyan hase geukalon banmandum nyang jeuhet. 9 Peuna ureuëng nyang hase jipeugah, "Até ulôn gleh, ulôn ka beubaih nibak desya?" 10 Timbangan dan ukoran nyang curang atranyan hana geuharôk lé TUHAN. 11 Nibak buet aneuëk hase tateupeue peu kheueh pi-e jihnyan gét atawa teupat. 12 Geulinyueng mangat teudeungoe dan mata mangat keumalon, banduanyan TUHAN kheueh nyang cebta. 13 Ureuëng nyang teuga that éh rhot jih ubak gasien. Dan ureuëng nyang bit-bit jijakbuet nibak ureuëng nyan jai that peunajoh. 14 Ureuëng mublo sabe apoh-apah keuhai meuhái yuem. Teuma óh ka lheueh jibloe, gobnyan bangga ateueh yuem nyang jiteumé. 15 Tutoe haba nyang meungandong iéleumé peungeutahuan, leubeh meuyuem nibak méuh dan beulian. 16 Soe nyang jitem tanggong utang ureuëng laén, hana salah teucok atra ureuëng nyan sibagoe jaminan janji ureuëng nyan. 17 Hareuta hase teupeungét gob, phon-phon that lazat rasa jih, teuma óh lheuehnyan barô kheueh teurasa lagée rasa batée keurikée. 18 Reuncana meuhase deungon na peutimbangan; lé sababnyan, bék kheueh meujuang deungon hana reuncana nyang masak. 19 Ureuëng nyang galak jiupat ureuëng laén, ureuëng nyan hana hase jisöm rahsia; dan bék kheueh tameungon deungon ureuëng nyang le that jipeugah haba. 20 Ureuëng nyang seurapa ngon jikutok ureuëng syiek jih, udeb ureuëng nyan teuma leunyab saban lagée panyöt nyang lon nibak malam nyang seupôt buta. 21 Atra nyang phon-phon mudah jiteumé dan bagaih, akhé jih teunyata kon beureukat. 22 Bék kheueh tabalaih keujeuhetan deungon keujeuhetan; peucaya kheueh ubak TUHAN, Gobnyan kheueh nyang tulông gata. 23 Neuraca dan batée na kheueh céng nyang curang hai nyang lagéenyan hana geugalak lé TUHAN. 24 TUHAN ka geupeuteuntée rot udeb manusia di ateueh donya nyoe; nyang kheueh sabab jih manusia hana hase jimuphom rot udeb jih keudroe. 25 Pike kheueh beujroh-jroh sigohlom teubri keureubeuen ubak TUHAN. Jeuet mantong gata meunyeusai óh uroe dudoe. 26 Raja nyang bijaksana geuteupeue soe ureuëng nyang jeuhet; gobnyan teuma geuhuköm awaknyan hana geubri amphon. 27 Até nurani manusia na kheueh trang nibak TUHAN, nyang teusentée bansaboh baten manusia. 28 Meunyoe raja geupeurintah deungon gaséh, jujoe, dan ade, deungon nyan rajanyan teutab meukuasa. 29 Ureuëng muda teukagum sabab teunaga jihnyan, dan ureuëng tuha teuhoreumat sabab ôk gobnyan nyang ka putéh. 30 Na kalajih peungalaman nyang pheut teusampôh keujeuhetan, dan teupeugleh até manusia.

Amsal 21

1 Saban lagée TUHAN geu atoe ié krueng mangat ile meunurot galak Gobnyan, meunan cit cara jih Gobnyan geubimbéng pikeran raja. 2 Tieb-tieb buet gob gét meunurot pandangan jih keudroe, teuma TUHAN kheueh nyang nilai meukeusut até jihnyan. 3 Buet-buet nyang ade dan beuna leubeh galak nibak TUHAN nibak peue mantong keureubeuen peuseumahan. 4 Ureuëng jeuhet nyan meudesya, sabab jikuasa lé keu angkohan dan keusombongan. 5 Reuncana ureuëng bit-bit teuba ubak keulimpahan; meutindak deungon teugeusa-geusa meuakibat kureueng. 6 Kaya nyang jiteumé deungon cara hana jujoe atranyan bagaih gadôh dan bagaih teuba ureuëng nyan u dalam jrat. 7 Ureuëng jeuhet hana jitem seutôt nibak huköm; jihnyan teuseuksa lé keujam jih keudroe. 8 Ureuëng meusalah, meuwet-wet jalan jih; dan ureuëng nyang gét sabe jujoe lam udeb jih. 9 Tinggai bak sagoe pageue leubeh mangat nibak tinggai meusapat deungon peurumoh nyang galak meudakwa. 10 Ureuëng jeuhet sabe jimeuheuet keuneuk peubuet nyang jeuhet; ateueh somantong ureuëng nyan hana rasa gaséh sayang. 11 Huköm keu ureuëng ceumeubie jeuet keupeulajaran keu ureuëng nyang hana peungalaman. Meunyoe ureuëng meubudoe basa teuseugah, jihnyan teuma meutamah bijaksana. 12 Allah Nyang Maha ade geuteupeue peue nyang teungoh teujadi lam rumoh ureuëng doraka. Gobnyan teuma jipeurhot awaknyan sampoe awaknyan binasa. 13 Soe nyang hana jitem deungoe apoh-apah ureuëng nyang kureueng hana sapeuena ureuëng lagéenyan hana geungieng meunyoe jihnyan teuma jilakée tulông. 14 Keu teupeuiem beungéh dan geungeun, bri kheueh hadiah seucara seungab-seungab. 15 Meunyoe keuadelan teupeujak, teuma ureuëng nyang gét meurasa seunang, dan ureuëng jeuhet meurasa teuancam. 16 Ureuëng nyang hana jitem seutôt cara udeb ureuëng meubudoe, ureuëng nyang lagéenyan pasti trok ubak donya ureuëng maté. 17 Ureuëng nyang galak keu meuseunang-seunang teuma teutab lam keuadaan kureueng; dan ureuëng nyang galak keu meupoya-poya hana jitem kaya. 18 Meunyoe masyarakat geuhuköm lé TUHAN, nyan kon ureuëng jroh, teuma ureuëng jeuhet nyang meuteumé sosah. 19 Leubeh gét tinggai dipadang beulantara, nibak tinggai deungon peurumoh nyang galak meukröb-kröb dan beungéh-beungéh. 20 Ureuëng nyang bijaksana teutab udeb lam makmu dan kaya; teuma ureuëng nyang bangai jipeuboros hareuta jih. 21 Soe nyang meu-useuha mangat keuadelan dan cinta gaséh teulaksana, teuma meuteumé keuseujahteuraan, keuhoreumatan dan umu nyang panyang. 22 Ureuëng nyang ceureudek hase jireupah banda nyang jijaga lé tantra nyang peukasa; awaknyan laju jireuloh kuta-kuta nyang ji peubangga. 23 Mangat teupeusie nibak nyang sosah, bah kheueh beu até-até meunyoe meututoe. 24 Ureuëng sombong dan manyang até galak keubuet meu-upat dan kureueng aja. 25 Ureuëng beu-oe nyang hánjitem jakbuet; ka jipoh droe jih deungon keuheundak droe jih. 26 Siuroe seupôt nyang na jipike keuhai peue nyang jilakée. Sikeubit jih, ureuëng nyang teupat udeb jih hase jibri deungon keulimpahan. 27 TUHAN hana galak deungon peuseumahan ureuëng doraka, leubeh-leubeh meunyoe jipeuseumah nyan deungon meukeusut nyang teucela. 28 Keusaksian ureuëng sulet hana teupeucaya; teuma tutoe haba ureuëng nyang jiteupeue meubagoe hai peukara, teuma teuteurimong. 29 Ureuëng jujoe yakén keudroe gobnyan; ureuëng jeuhet meumuka teubai. 30 Hana nyang carông, ceureudek atawa keubijaksanaan nyang hase meuteun dikeue TUHAN. 31 Bahpih muprang jipeuleungkab deungon guda prang, nyang peuteuntée meunang, na kheueh TUHAN.

Amsal 22

1 Nan nyang jroh leubeh meuyuem nibak hareuta nyang le; jigaséh lé gob leubeh gét meunyoe jijok méuh ngon pirak. 2 Ureuëng kaya dan ureuëng gasien bak awaknyan na saboh hai nyang saban: TUHAN kheueh nyang cebta awaknyan bube nyang na. 3 Ureuëng bijaksana jipeusie meunyoe na jingieng bahya; di ureuëng bangai jijak laju akhé jih keunong bahya. 4 Ureuëng nyang taqwa ubak TUHAN dan jipeumiyueb droe, ureuëng nyan meuteumé bahgia, makmu dan jihoreumat lé gob. 5 Jeunieb ngon taron na meuteumé bak rot ueh ureuëng nyang jeuhet; peujiôh kheueh mandum nyan meunyoe gata keuneuk seulamat. 6 Peurunoe kheueh ubak sidroe aneuëk cara udeb nyang patot keu aneuëk nyan, dan sampoe án tuha aneuëk nyan teuma udeb lagée nyang ka teupeurunoe nyan. 7 Ureuëng gasien jikuasa lé ureuëng kaya; ureuëng meu-utang jikuasa lé ureuëng nyang peu-utang. 8 Ureuëng nyang tabu buet nyang jeuhet jipöt beuncana; akhé jih kuasa jih keu jimeutindak ban galak droe teuma gadôh hán mupat rimba. 9 Ureuëng nyang jroh até geubri beureukat lé TUHAN, sabab jihnyan jipeuweuek reuzeki ngon ureuëng nyang papa. 10 Use kheueh ureuëng nyang galak meuhina, dan piôh kheueh meudakwa dakwi, meunan cit mupake dan bék na le ngon hina meuhina. 11 Ureuëng nyang galak bak buet nyang jujoe ngon nyang maméh tutoe haba, ureuëng nyang lagée nyan teuma jeuet keu rakan raja. 12 Deungon teupeugah sulet ureuëng nyang jeuhet, TUHAN geujaga iéleumé nyang beutôi teutab teupeulara. 13 Ureuëng beu-oe galak jiduek dirumoh; ureuëng nyang lagée nyan jipeugah, "Na singa diluwa, ulôn meuhase jiteugöm bak rot ueh raya." 14 Jirayu lé inong lunte nyan na kheueh taron; ureuëng nyang ka geubri meureuka lé TUHAN meusuruek u dalam nyan. 15 Ka sipatöt jih aneuëk-aneuëk manyak jipeubuet hai-hai nyang bangai, teuma ngon awe jeuet teusunuet aneuëk nyan mangat pi-e jih meu-ubah. 16 Soe nyang keuneuk jeuet keukaya ngon cara teuteugon ureuëng gasien dan jibri hadiah ubak ureuëng kaya bak akhé masa jihnyan teuma meukarat. 17 Deungoe nyoe, ulôn teuma lôn peurunoe keugata haba meutuah ureuëng áréh! Simak kheueh nyang lôn peurunoe nyoe. 18 Mangat gata udeb meunyoe peue nyang ulôn peurunoe nyoe gata keubah lam até. Sabab deungon lagée nyan gata ka siab pajan mantong atra nyan gata peuguna. 19 Ulôn peurunoe gata bak saát nyoe sabab ulôn meuharab gata peuseumah keupeucayaan gata nyan ubak TUHAN. 20 Lhée ploh boh haba meutuah ka ulôn tuléh keu gata -- haba-haba meutuah nyang teukandong iéleumé peungeutahuan dan naseuhat nyang jroh; 21 dan nyang teuma peurunoe keu gata peue nyang beutôi-beutôi beuna. Teuma-teuma, meunyoe gata jitanyong, jeuet gata jaweueb nyang paih. 22 Bék kheueh gata peurugoe ureuëng gasien, sabab jih nyan leumoh hana meudaya; dan bak kantô peungadelan bék kheueh gata peukosa hak ureuëng nyang hana meudaya. 23 Sabab, TUHAN teuma geubila peukara ureuëng nyan dan geutarek nyawöng ureuëng nyang teugon awaknyan. 24 Bék kheueh meurakan ngon ureuëng nyang bagaih jiék darah dan bagaih beungéh. 25 Singoh gata teuma gata peubuet lagée jipeubuet nyan, dan hana hase lé gata peugadôh buet nyang ka lazem nyan. 26 Bék kheueh meujanji keu gata angkée utang ureuëng laén. 27 Singoh meunyoe gata hana hase gata bayeue utang nyan, teumpat éh gata pih jicok teuma. 28 Bék sagai-sagai gata pinah bataih tanoh nyang ka geupatok lé indatu gata yoh masa dilée. 29 Peu kheueh ka lheueh gata kalon ureuëng nyang carông jipeubuet buet jih? Ureuëng nyan teuma jibri buet bak meuligoe raja-raja, bukon bak rumoh ureuëng biasa.

Amsal 23

1 Meunyoe gata taduek tamakheun deungon ureuëng rayeuk, ta ingat kheueh soe geuhnyan. 2 Meunyoe gata na nafeusu makheun nyang raya, tapeuteun kheueh hasrat gatanyan. 3 Bék leuha keuhai peunajoh nyang mangat nyang jihidang lé awaknyan, barang kali jihnyan keuneuk jeubak gata. 4 Bék tauseuha meususah payah tatiyeub kaya. Peubateu kheueh niet gatanyan. 5 Sabab, dalam sikeujab mantong hareuta gata hase leunyab, siulah-ulah jihnyan meusayeub dan jipo u manyang lagée cicém rajawali. 6 Bék tamakheun meusajan deungon ureuëng kliet. Bék teuma meuharab ubak peunajoh nyang lazat. 7 Sabab, jihnyan geupeugah, "Jak tamakheun; silakan neutamah lom," padahai meukeusut jih bukon lagéenyan. Jihnyan meubabah maméh, teuma até gobnyan laén. 8 Eunteuk peue nyang ka gata uét dan ulée lom, dan banmandum tutoe haba gata nyang maméh keu gobnyan hana meuguna. 9 Bék tabri naseuhat keu ureuëng bangai; jihnyan hana jihareuga naseuhat gata. 10 Bék sagai-sagai tapinah bataih tanoh waresan atawa tacok tanoh aneuëk yatém piatu. 11 Sabab, TUHAN na kheueh peumbila nyang paleng teuga dan Gobnyan kheueh nyang bila awaknyan geulawan gata. 12 Peurati kheueh ajaran gurée gata dan meurunoe kheueh beule-le. 13 Bék seugan-seugan gata didek aneuëk-aneuëk gata. Meunyoe gata seunuét aneuëk gatanyan deungon awe, aneuëk nyan hana maté, 14 Teuma jihnyan teutab seulamat. 15 Aneuëk ulôn, ulôn galak lumpah na meunyoe gata bijaksana. 16 Ulôn bangga meunyoe meurumpok ngon gata deungon mariet ngon tutoe haba nyang teupat. 17 Bék kheueh iri até ubak ureuëng meudesya. Taát kheueh sabe ubak Po teu Allah 18 mangat masa ukeue gata teujamin, dan harapan gata hana gadôh. 19 Deungoe kheueh, aneuëk ulôn! Beujeuet kheueh keu ureuëng bijaksana. Simak kheueh beu bit-bit cara udeb gata. 20 Bék kheueh ta meurakan deungon ureuëng mabök atawa ureuëng leuha, 21 sabab awaknyan teuma jeuet keu ureuëng gasien. Meunyoe gata lale ta-éh mantong, teuma hana treble gata tangui peukayan nyang ka meujurée teupriék-priék beukah jih. 22 Taát kheueh ubak ureuëng syiek gata; sabab, meunyoe hana gobnyan gata pih hana di ateueh donya nyoe. Meunyoe ma gata ka tuha, peuleumah kheueh bahwa gata tasayang keu gobnyan. 23 Ajaran nyang beutôi, hikeumat, didekan dan peungeurtian -- banmandum nyan patot teubloe, teuma lumpah that meuhái keu teupulo. 24 Sidroe ureuëng syiek bahgia that meunyoe na aneuëk gobnyan meubudoe basa nyang gét; dan gobnyan teuma bangga meunyoe aneuëk gobnyan bijaksana. 25 Seumoga bapak ngon ma gata bangga keu gata; dan seumoga bahgia kheueh ureuëng inong nyang ka geupeulahé gata. 26 Simak kheueh beu gét-gét dan cuntoh kheueh ubak cara udeb lôn nyoe, hai aneuëk ulôn! 27 Inong jeuhet nyang meuluntée na kheueh peurangkab nyang mubahya. 28 Awaknyan jihadang lagée meureupah dan jipeujeuet le that-that ureuëng agam beujipeubuet zina. 29 Peu kheueh tateupeue peue nyang teujadi keu ureuëng nyang jieb ié anggô nyang le that, dan kayém ji-jihák ié kreueh? Ureuëng nyan seungsara dan meudeurita. Ureuëng nyan sabe meudakwa dan apoh-apah. Mata jih mirah dan badan jih luka-luka, padahai banmandum nyan hase jipeusie. 31 Bék kheueh tapeubiyeu ié anggô jigoda gata, bahpih warna jih meunarek dan leumah jih meucahya didalam glah dan ji ile deungon nekmat jitamong u dalam rukueng. 32 Óh singoh beungoh gata ka lagée jicatuék lé uleue meubisa. 33 Mata gata meukunang-kunang, pikeran gata hana meuteuntée dan babah gata hana piôh tameututoe nyang hana meupat uram ujong jih. 34 Gata meurasa lagée di ateueh ujong tiang kapai di teungoh laôt; ulée gata mumang dan gata meuhapit-hapit keudeh keunoe. 35 Laju gata teuma tapeugah, "Rupa jih ulôn nyoe ka jipoh dan jitampa lé gob, teuma hana hase lôn ingat peue nyang ka teujadi. Aduh, mata ulôn teungét that-that! Ulôn peureulée lôn jieb ié lom teuma!"

Amsal 24

1 Bék kheueh iri até keu ureuëng jeuhet, dan bék teuma na niet tameurakan deungon awaknyan. 2 Nyang jipike lé awaknyan na kheueh nyang keujam-keujam dan jimeuteuôh peue nyang sifeuet jih ceulaka. 3 Rumoh tangga teubina deungon hikeumat dan peungeurtian. 4 Dan meunyoe kana peungeutahuan, teuma kama-kama nyan teupasoe deungon leungkab ngon barang-barang nyang indah. 5 Ureuëng bijaksana leubeh meuwibawa nibak ureuëng teuga; dan iéleumé peungeutahuan leubeh peunteng nibak teunaga. 6 Sabab sigohlom teujak muprang harôh na reuncana nyang matang leubeh ilée, dan seumaken le naseuhat, seumaken raya keumungkenan keu meunang. 7 Ureuëng bangai hana hase jiseulami lam hikeumat, ureuëng nyan hana hase geupeugah sapeue meunyoe ureuëng teungoh jipeugah hai-hai nyang peunteng. 8 Ureuëng nyang sabe jireuncana buet nyang jeuhet, ureuëng nyan teupeunan tukang peuna karu. 9 Tieb-tieb siasat ureuëng nyang bangai na kheueh desya. Ureuëng nyang sabe buet jih jiupat ureuëng laén, ureuëng nyan hana jigalak lé gob. 10 Meunyoe gata putôh asa lam keuadaan gawat, teuma gata na kheueh ureuëng nyang leumoh. 11 Bék ragu-ragu tapeuleueh ureuëng nyang ka jipeu rhot huköman maté; dan peuseulamat kheueh ureuëng nyang teungoh jigireng ubak taméh gantungan. 12 Jeuet mantong gata peugah, "Nyan bukon urusan lôn." Teuma Allah nyang kawai gata. Gobnyan geuteupeue dan geu adili pikeran gata. Gobnyan geubalaih manusia meunurot buet ureuëng nyan. 13 Aneuëk ulôn, tajiéb kheueh madu, sabab nyan gét. Lagée meulisan nibak uempueng uno, maméh keu teuphiék, 14 meunan cit deungon hikeumat gét that keu jiwa gata. Meunyoe gata bijaksana, gét that masa ukeue gata. 15 Bék lagée ureuëng jeuhet nyang ka sipakat jijak reupah rumoh ureuëng jujoe dan jireubot rumoh gobnyan. 16 Sabab, bahpi ureuëng jujoe rhot sampoe napadubgoe, sabe gobnyan geubeudôh lom. Teuma seubalek jih, ureuëng jeuhet teuma hanco meutabu lé malapeutaka. 17 Bék galak até gata meunyoe musoh gata meuteumé ceulaka, dan bék geumbira meunyoe jihnyan reubah. 18 Sabab, pasti TUHAN geungieng buet gatanyan dan geunilai lé Gobnyan jeuhet, laju hanale geuhuköm musoh gatanyan. 19 Bék geungéuen atawa iri até keu ureuëng jeuhet. 20 Ureuëng jeuhet hana masa ukeue dan hana teuma harapan. 21 Aneuëk ulôn, takot kheueh ubak TUHAN, dan horeumat kheueh ubak raja. Dan bék seutôt-seutôt deungon ureuëng nyang nyang lawan geuhnyan. 22 Ureuëng nyang lagéenyan hanco lam sikreb mata, sabab beuncana nyang geupeutron lé Allah atawa raja bukon kheueh hai nyang ubit. 23 Ureuëng Áréh na geupeugah lagée nyoe: Hakém hana jeuet brat siblaih. 24 Meunyoe ureuëng salah geupeugah hana salah, teuma hakém nyang lagéenyan jikutok dan geuseurapa lé ureuëng ramé. 25 Teuma hakém nyang geuhuköm ureuëng salah teuma mubahgia dan jihoreumat lé gob. 26 Jaweueb nyang paih na kheueh tanda meusahabat seujati. 27 Bék kheueh tapeudong rumoh tangga sigohlom gata peusiab lampôh atawa ladang gata dan na mata hareukat gata. 28 Bék kheueh tatem jeuet keusaksi keu ureuëng laén meunyoe hana alasan nyang patot; meunan cit bék kheueh tameusulet keuhai gobnyan. 29 Bék kheueh tapeugah, "Ulôn teuma lôn balaih keu gobnyan peue nyang ka jipeubuet ateueh ulôn!" 30 Kalheueh ulôn jak rot lampôh anggô dan ladang ureuëng bangai. 31 Nyang na deuh lôn ngieng disinan na kheueh seunaman nyang meuduro dan naleueng lakoe. Pageue beuton jihpi ka teupeuroe sabab reuloh. 32 Óh ka lheueh ulôn ngieng dan ulôn tanueng hainyan, laju lôn teumé peulajaran lagéenyoe: 33 Deungon teugantuek dan lôn éh sikeujab, deungon lônduek meupangké jaroe dan lôn meureuhat sikeujab mantong, 34 kureueng dan gasien teuka jiseurang lagée peurampok nyang na seunjata.

Amsal 25

1 Seulanjut jih nyoe na meupadubboh peutuah nyang laén nibak Nabi Sulaiman nyang geusalen lé peugawée-peugawée di meuligoe Hizkia, raja Yehuda. 2 Allah teupeu agong sabab peue nyang geurahsia lé Gobnyan; dan raja teuhoreumat sabab peue nyang hase geupeutrang lé gobnyan. 3 Lagée laôt nyang lhôk dan langét nyang manyang, meunan kheueh pikeran raja nyang hana hase taluek. 4 Peugréh kheueh leubeh ilée pirak nibak sanga jih, barô kheueh nyang indah jeuet teubantuek lé jaroe seuniman. 5 Kiréueh kheueh keudeh peunaseuhat-peunaseuhat jeuhat lam meuligoe, barô kheueh peumeurintah kukoih lé keuadelan. 6 Meunyoe meuhadab raja bah kheueh gata peumiyueb até, bék meulagak lagée ureuëng nyang meukeududukan manyang. 7 Leubeh gét teuyue ék u teumpat nyang leubeh teuhoreumat nibak teuyuejok teumpat gata keu ureuëng nyang leubeh meupangkat. 8 Bék kheueh teugisa-gisa taba peukara u kantô peungadelan; sabab, meunyoe óh dudoe gata teubukeuti na salah peuelom nyang hase gata peubuet? 9 Meunyoe salah faham ngon rakan gata, peuseuleusoe kheueh deungon ureuëng nyan mantong, teuma rahsia ureuëng laén bék kheueh gata buka. 10 Sabab, eunteuk gata jicab sibagoe ureuëng cubrée babah dan nan gata kutoe siumu masa. 11 Peundapat nyang jipeugah deungon teupat sampoe nibak watée jih lagée boh kayée méuh lam pingan pirak. 12 Sapa ureuëng áreh keu ureuëng nyang jitem deungoe, lagée euncien méuh atawa piasan keuncana. 13 Utosan nyang seutia, teupeujeuet nyang utoh jihnyan galak até, saban lagée iéleupie nibak ureuëng mupot padé diblang. 14 Janji-janji nyang hana sampoe, saban lagée awan dan angén nyang hana jipeutron ujeuen. 15 Keusabaran meusajan deungon tutoe haba nyang ramah jeuet teupeuyakén ureuëng nyang mat kuasa, dan teupeuhanco banmandum peulawanan. 16 Bék tapajoh meulisan sampoe jai that; singoh gata jeuet keumuak. 17 Bék kheueh kayém-kayém that tajak u rumoh jiran teutangga gata, treb bak treb jihnyan bosan laju jibanci keu gata. 18 Teumudoh deungon peuleusu hase teupeumaté, lagée peudeueng, palée atawa panah nyang tajam. 19 Peucaya keu peukhianat bak masa keusosahan saban that lagée meumomoh deungon gigo nyang guyah atawa teumeujak deungon gaki nyang lapée. 20 Meuca-e keu ureuëng nyang teungoh seudeh lagée teupeulon dalam cuaca nyang sijuek ngon leupie lagée teuroe ié cuka nibak luka jih. 21 Meunyoe musoh gata deuk, tabri kheueh bak jihnyan peunajoh; dan meunyoe jihnyan glah tho ngon rukueng, tabri kheueh bak jihnyan ié jieb. 22 Deungon na lagéenyan ka tapeujeuet musoh gatanyan malée dan TUHAN teuma geubri beureukat keu gata. 23 Angén nyang jipot nibak utara pasti jipeutron ujeuen; meunan cit deungon haba keuhaba pasti jipeuteuka beungéh. 24 Tinggai bak sagoe pageue leubeh mangat nibak tinggai saboh rumoh deungon peurumoh nyang galak jipeudong dakwa. 25 Teuteurimong haba nyang jroh nibak nanggroe nyang jiôh saban lagée teujieb iéleupie óh watée dahaga. 26 Ureuëng nyang gét nyang jipeutaloe droe nibak ureuëng doraka saban that lagée mata ié ceukoe atawa mon nyang kutoe. 27 Hana gét teujieb meulisan lumpah that le, meunan cit hana gét peugah haba nyang le deungon seumeujo. 28 Ureuëng nyang hana hase jikuasa droe jih saban that lagée banda nyang ka reuloh kuta jih.

Amsal 26

1 Lagée ujeuen watée musém khueng, dan salju di musém uroe, meunan cit teuma pujian keu ureuëng bangai nyang hana pantaih. 2 Lagée cicém po dan meulayang-layang di udara, meunan cit deungon kutokan hana hase keunong ateueh ureuëng nyang hana meusalah. 3 Keuleudée harôh teupeungui keukang, dan guda harôh teuseunuët, meunan cit deungon ureuëng bangai harôh teupoh. 4 Ureuëng nyang jaweueb peue nyang jitanyong lé ureuëng bangai, saban cit bangai jih deungon ureuëng nyang teumanyong nyan. 5 Teumanyong nyang bangai harôh teujaweueb deungon nyang bangai teuma, mangat ureuëng teumanyong nyan sadar bahwa jihnyan hana carông lagée nyang jisangka nyan. 6 Teuyue bak ureuëng bangai keuteukirém beurita, saban cit lagée teuwiet gaki droe dan teumita ceulaka. 7 Lagée ureuëng lapée jipeuguna gaki gobnyan, meunan kheueh ureuëng bangai nyang peugah peutuah. 8 Teupujoe ureuëng nyang hana iéleumé peungeutahuan, saban cit lagée teuikat batée nyang kong that nibak jepretan. 9 Lagée ureuëng mabök jicungké duroe lam jaroe jih, meunan kheueh ureuëng bangai nyang jipeugah peutuah. 10 Soe nyang jok buet keu ureuëng bangai atawa soemantong ureuëng jihnyan jipeurugoe ureuëng ramé. 11 Lagée asée jigisa ubak muntah jih, meunan kheueh ureuëng bangai nyang geu-ulang keu bangai nyan. 12 Ureuëng nyang bangai sigoe mantong leubeh gét nibak ureuëng nyang jianggab droe jihnyan carông. 13 Ureuëng beu-oe galak that tinggai di rumoh; jihnyan geupeugah, "Na singa diluwa, ulôn hase jiruengköm nibak rot raya." 14 Lagée ôn pintoe meuputa nibak ensée jih, meunan kheueh ureuëng beu-oe jipeubalek-balek droe jih di ateueh teumpat éh. 15 Na ureuëng nyang beu-oe hana tanggong-tanggong; teupeusueb peunajoh lam babah droe jih mantong hana jitem. 16 Ureuëng beu-oe jianggab droe jihnyan leubeh meuhikeumat nibak tujoh droe ureuëng nyang jijok jeunaweueb nyang paih. 17 Ureuëng nyang peujampu droe bak ureuëng meudakwa nyang kon urosan jihnyan saban that lagée ureuëng nyang drob asée pungoe nibak punyueng jih. 18 Ureuëng nyang teumipée, laju jipeugah, "Ulôn meu ayang mantong deungon gata," saban that lagée ureuëng pungoe nyang jimeuén deungon sinjata meubahya. 20 Meunyoe kayée ka habéh, apui pih lon; meunan cit meunyoe ureuëng panyang babah ka hanale, meudakwa pih ka seuleusoe. 21 Lagée adang dan kayée sampoe apui teutab hu; meunan kheueh ureuëng nyang galak meudakwa seutôt suasana. 22 Feusuna nyan mangat that rasa jih; dan gob galak ji-uët atranyan. 23 Lagée beulangong tanoh nyang teuseupoh deungon pirak, meunan kheueh ureuëng nyang maméh bak babah, teuma até jih jeuhet. 24 Ureuëng banci maméh that tutoe haba jih teuma até jih peunoh deungon tipée daya. 25 Bahpi jihnyan ramah, bék kheueh bagaih tapeucaya; sabab rasa banci ka jikuasa nibak até jih. 26 Bahpih jihnyan jisöm banci jihnyan, banmandum ureuëng teuma jingieng buet jih nyang jeuhet nyan. 27 Soe nyang kueh uruek keu ureuëng laén, ureuëng nyang kueh nyan teuma meusuruek u dalam uruek nyan. Soe nyang gule batée mangat batéenyan jitimpok ateueh ureuëng laén, ureuëng nyan teuma jitimpok keudroe lé batée nyan. 28 Teupeungeut ureuëng laén saban cit deungon teubanci. Babah nyang maméh teupeuteuka bala.

Amsal 27

1 Bék raya haba keuhai uroe singoh, sabab gata hana tateupeue peue nyang teuma teujadi sikeujab teub. 2 Bék tapujoe droe gata keudroe; bah kheueh ureuëng laén nyang peubuet hai lagéenyan. 3 Batée dan anoe nyan mantong phui, meunyoe teubandeng deungon sakét até nyang jipeuteuka lé ureuëng bangai. 4 Beungéh nyan keujam dan teupeuhanco peue nyang na, teuma meunyoe meuhadab ngon tukang ceumburu soe nyang ék teuen? 5 Leubeh gét teuseugah nyang trang-trang nibak gaséh nyang hana teupeugah. 6 Rakan jiseumeupoh deungon cinta, teuma musoh jipangkée deungon bisa. 7 Meunyoe pruet troe, meulisan pih jitulak; teuma meunyoe deuk, nyang phet pih teurasa mangat. 8 Ureuëng nyang jitinggai rumoh droejih nyan, lagée cicém nyang jitinggai uempueng jih. 9 Lagée minyéuk mangat bée dan bée-bée nyang haröm jipeumangat até, meunan kheueh teuma keuhai gét rakan jipeumangat jiwa. 10 Bék tuwoe ubak rakan gata atawa ubak rakan ureuëng syiek gata. Teungoh gata meularat bék kheueh talakée tulông ubak syedara gata; waréh lingka nyang tô leubeh meuguna nibak syedara gata nyang jiôh. 11 Hai aneuëk ulôn bah kheueh gata bijaksana, mangat jeuet ulôn seunang dan hase teujaweueb meunyoe jirapa. 12 Ureuëng bijaksana geupeusie meunyoe ka geukalon bahya; di ureuëng bangai jijak laju bahpi jitimpa lé bala. 13 Soe nyang tem tanggong utang ureuëng laén, patot teucok hareuta milék ureuëng nyan sibagoe barang jaminan. 14 Soe mantong meunyoe mantong seuboh jibeuot saleuem ubak rakan jihnyan deungon su nyang teuga, hai nyang lagéenyan teuanggab jiucab laknat. 15 Peurumoh nyang galak meudakwa lagée su ujeuen nyang jitron siuroe suntok. 16 Hana mungken jihnyan teuyue seungab, lagée angén hana hase teupeuteun dan minyéuk hana hase teureugam. 17 Lagée toh baja teuasah baja, meunan cit teuma manusia jimeurunoe ubak seusabe droe jih. 18 Soe nyang peulara bak kayée, teuma jipajoh boh jih. Deundayang teuma jihareuga meunyoe jipeumanja teungku droe jih. 19 Lagée ié nyang jipoh cahya ateueh ruman gata, meunan kheueh até gata nyang jitunyok soe droe gata. 20 Lam donya ureuëng maté, sabe na teumpat; meunan kheueh nafeusu manusia hana bataih. 21 Méuh dan pirak teu ujoe lam tungkée apui; dan ureuëng jituri nibak sikeueb jih keupujoe-pujoe. 22 Bahpi ureuëng bangai jipoh galak droe, nyang bangai jihnyan teutab hana teuma gadôh. 23 Peulara kheueh beulatang peulara gata beujroh-jroh, 24 sabab keukayaan hana teuma keukai, bahkan kuasa keu teupeurintah pih hana teutab siumu masa. 25 Naleueng di blang dan di gunong teukoh dan teugumpôi keu beulatang peulara gata, teuma óh lheuehnyan ka jitimoh naleueng nyang barô. 26 Nibak bulée-bulée bubiri gata, gata hase meuteumé peukayan, dan nibak péng yuem kaméng-kaméng gata nyang ka teupeubloe gata hase tabloe tanoh nyang barô. 27 Nibak kaméng-kaméng gata nyang laén gata hase meuteumé susu keu droe gata dan keuluwarga gata meunan cit keu peulayan-peulayan gata.

Amsal 28

1 Ureuëng jeuhet jiplueng hana ureuëng nyang tiyeub jihnyan, teuma ureuëng jujoe beuhe lagée singa. 2 Meunyoe bansa meudesya, peunguasa meugantoe-gantoe; meunyoe peumimpén bijaksana, bansa teuma meuteun dan teutab jaya. 3 Peunguasa nyang jitindéeh ureuëng gasien, lagée ujeuen teuga nyang hana pirang dan jipeurusak hase panen. 4 Soe nyang peumeuén huköm, jidong blaih ureuëng jeuhet; dan soe nyang taát ubak huköm jilawan ureuëng jeuhet. 5 Keuadelan hana jipaham lé ureuëng doraka, teuma ureuëng nyang seumah TUHAN muphom that-that keuhai nyan. 6 Leubeh gét ureuëng gasien nyang jujoe até nibak ureuëng kaya nyang jeuhet até. 7 Peumuda nyang taát ubak huköm na kheueh ureuëng nyang bijaksana. Teuma ureuëng nyang meurakan deungon ureuëng royal jipeumalée ureuëng syiek jih. 8 Soe nyang jeuet keukaya sabab jicok riba dan jikuet laba nyang si le-le jih, keukayaan jihnyan teuma rhot ubak ureuëng nyang na gaséh sayang keu ureuëng gasien. 9 Meunyoe gata hana taát ubak huköm Allah, Po teu Allah pih meurasa muák keu doá-doá gata. 10 Soe nyang bujuk ureuëng jujoe mangat jipeubuet jeuhet, ureuëng nyan keudroe ka rhot u dalam peurangkab. Ureuëng nyang gleh ngon murni até jih teuma geubri beureukat sampoe bahgia. 11 Ureuëng kaya sabe meurasa droe gobnyan bijaksana, teuma ureuëng gasien nyang na budoebasa jiteupeue soe nyang sibeuna jih gobnyan. 12 Meunyoe ureuëng nyang jroh nyang mat kuasa, banmandum ureuëng laén galak raya, teuma meunyoe ureuëng jeuhet nyang mat peurintah dumna rakyat jijak musöm. 13 Soe nyang peusöm desya ureuëng nyan hana meu-untông. Dan soe nyang jiangkée droe dan jitinggai desya nyan, ureuëng nyan geugaséh lé TUHAN. 14 Horeumat kheueh TUHAN pajan mantong, teuma gata meuteumé bahgia. Meunyoe gata talawan Gobnyan, gata meuteumé cilaka. 15 Ureuëng jeuhet nyang mat kuasa ateueh ureuëng nyang pa-pa, lagée singa nyang jitauém ateueh cagée nyang meunyeurang. 16 Peunguasa nyang jitindéeh ureuëng laén, nyang lagée nyan hana akai nyang seuhat; peunguasa nyang geubanci ubak buet nyang jeuhet teuma geumat peurintah meuthon-thon. 17 Sidroe ureuëng tukang poh maté ureuëng laén meurasa droe jipeulet sabe sampoe ureuëng nyan maté; hana meusidroe pih nyang hase jipeuteun jihnyan. 18 Ureuëng nyang udeb gleh hana meucupa, teuma seulamat. Dan ureuëng nyang keuwieng-keuwot udeb jih, teuma reubah. 19 Peutani nyang meubuet brat nibak ureuëng laén seb peunajoh; dan ureuëng nyang jiböih-böih watée jihnyan meukureueng. 20 Ureuëng nyang jujoe geubri beureukat lé TUHAN, teuma ureuëng nyang meuheut beubagaih kaya hana teupeusie nibak huköman. 21 Hana gét teupeubeuda-beuda manusia; teuma na cit hakém nyang geutem peubuet jeuhet teuma mangat meuteumé péng sikada. 22 Ureuëng nyang leuha meuheut that beubagaih kaya; dan ureuëng nyan hana sada bahwa gasien nyang brat bagaih jiteuka ateueh ureuëng nyan. 23 Ureuëng nyang jitem ureuëng laén akhé jih leubeh meuyuém nibak ureuëng jok pujoe. 24 Soe nyang ceumeucue atra ureuëng syiek jihnyan dan geupeugah nyan hana meudesya, ureuëng nyan saban deungon pancuri-pancuri nyang laén. 25 Soe nyang peupeunteng droe keudroe nibak ureuëng nyan jipeuteuka dakwa-dakwi; dan gata leubeh meu untông meunyoe gata peucaya ubak TUHAN. 26 Soe nyang peubeuna peundapat jih keudroe, nibak ureuëng nyan hana meuakai nyang seuhat. Dan soe nyang jiseutôt ajaran ureuëng nyang bijaksana teuma seulamat. 27 Soe nyang jitem bri keu ureuëng gasien jinoe jihnyan hana meukureueng, dan soe nyang tôb mata ateueh ureuëng gasien, jihnyan keunong kutokan. 28 Meunyoe ureuëng jeuhet jimat kausa, rakyat jijak musöm; teuma meunyoe ureuëng jeuhet binasa, ureuëng nyang ade teuma jipimpén deungon leuluasa.

Amsal 29

1 Soe nyang teutab meubangkang meunyoe teubri naseuhat, saboh saát jihnyan hanco hana hase teupeugét le. 2 Meunyoe ureuëng ade nyang mat peurintah, rakyat geumbira. Teuma meunyoe ureuëng jeuhet nyang mat kuasa, rakyat meudeurita. 3 Soe nyang galak ubak hikeumat, keubit galak that até ayah jih. Dan soe nyang meungon deungon inong jeuhet ka jimeupoya deungon péng jih. 4 Meunyoe peunguasa geupakoe ubak keuadelan, nanggroe gobnyan teuma kukoih. Teuma meunyoe jihnyan nyang peunteng keu péng mantong, teuma nanggroe gobnyan hase reuloh. 5 Soe nyang jisanjong sabe keudroe-droe jih, jipasang taron keudroe jih keudroe. 6 Ureuëng jeuhet ka meucuét deungon desya jih, ureuëng jujoe meurasa mangat dan bahgia. 7 Ureuëng nyang jroh jiteupeue hak ureuëng nyang leumoh, teuma ureuëng jeuhet hana jipeuphom keuhai nyan. 8 Ureuëng nyang galak meu upat hase jipeuhanco banda, teuma ureuëng bijaksana jipeuteuntram suasana. 9 Meunyoe ureuëng bijaksana dan ureuëng bangai jimeupeukara, ureuëng bangai nyan jilab beungéh dan jikém sampoe jipeuteuka karu nyang hana meuteuntée. 10 Ureuëng nyang jujoe até jibanci lé ureuëng nyang graih keu darah, teuma jilindong lé ureuëng nyang jroh. 11 Ureuëng bangai meunyoe beungéh trang-trang hana jilob-lob, teuma ureuëng bijaksana raya that saba dan geupeuteun beungéh gobnyan. 12 Meunyoe peunguasa geudeungoe keu haba sulet, peugawée gobnyan teuma jeuet keu ureuëng jeuhet banmandum. 13 Sidroe ureuëng gasien dan ureuëng nyang tindéeh ureuëng gasien nyan na keusamaan; keu bandua awaknyan TUHAN geubri mata keu jikeumalon cahya udeb. 14 Meunyoe raja geubila hak ureuëng leumoh, meuthon-thon rajanyan hase geumat peurintah. 15 Deungon teudidek dan teutegah manusia nyan hase jeuet keu bijaksana. Aneuëk nyang sabe teupeupumoh peue nyang jilakée teuma jipeumalée ma jih. 16 Meunyoe ureuëng jeuhet nyang mat kuasa, peulanggaran meuningkat. Teuma ureuëng jujoe jiteumé kalon keuhancoran ureuëng jeuhet. 17 Didek kheueh aneuëk gata, teuma gobnyan geubri keuteuntraman keu gata, dan jeuet keuhiboran keu gata. 18 Bansa nyang hana meuteumé bimbéngan nibak TUHAN jeuet keubansa nyang peunoh deungon karu. Mubahgia kheueh manusia nyang taát ubak huköm TUHAN. 19 Sidroe namiet hana hase teupeurunoe deungon tutoe kata. Jihnyan muphom, teuma hana jisimak. 20 Leubeh le harapan nibak ureuëng bangai, nibak ureuëng nyang jipeugah haba hana jipike-pike. 21 Namiet nyang teupeumanja yohphon muda, akhé jih jeuet keu ureuëng kreueh ulée. 22 Ureuëng nyang bagaih beungéh teupeusabab manusia jai that nyang meudakwa dan meudesya. 23 Ureuëng sombong teuma geupeumiyueb; dan ureuëng nyang miyueb até teuma geupujoe. 24 Ureuëng nyang meukeureuja sajan deungon pancuri, saban cit geubanci ubak droe keudroe. Meunyoe jihnyan troh-trang di kantô peungadelan, jihnyan geupeurhot huköman. Teuma ureuëng nyan seungab mantong, ureuëng keunong kutokan Allah. 25 Teumakot ubak peundapat ureuëng laén, akibat jih na kheueh keusosahan. Peucaya ubak TUHAN, teuma gata aman. 26 Jai that ureuëng nyang jimita muka ubak peunguasa, teuma nyang bri keuadelan, na kheueh TUHAN mantong. 27 Ureuëng nyang gét hana galak keu ureuëng jeuhet; dan di ureuëng jeuhet jibanci keu ureuëng gét.

Amsal 30

1 Nyoe kheueh tutoe-tutoe haba nyang geupeugah lé Agur bin Yake nibak Masa: "Ulôn hék that, ya Allah, ulôn hék that! Habéh kheueh teunaga ulôn! 2 Ulôn nyoe bangai lagée beulatang; hana peungeurtian. 3 Hántom na ulôn meurunoe hikeumat, dan meubacut pih hana lôn teupeue keuhai Allah. 4 Manusia toh kheueh nyang ka lheueh geu-ék tron u syeuruga? Peu kheueh ka lheueh jireugam angén lam peleuet jaroe jihnyan, dan jibungkoih ié lam bajée jihnyan, atawa jipeuteutab bataih-bataih donya? Soe kheueh jihnyan, soe teuma aneuëk jihnyan? Pasti Droeneueh neuteupeue! 5 Allah geupeutrok ban janji Gobnyan. Dan Gobnyan lagée peurisai keu banmandum nyang teuka meulindong ubak Gobnyan. 6 Meunyoe gata tatamah peue nyang geupeugah, Gobnyan teuma geuteugah gata dan keujok bukeuti bahwa gata sulet." 7 "Ya Allah, ulôn lakée sigohlom ulôn maté, neubri kheueh keu ulôn dua hai nyoe. 8 Bék sampoe ulôn peugah haba nyang jeuhet dan duseuta, dan bék neupeubiyeu ulôn gasien atawa kaya. Neubri kheueh keu ulôn teuma peue nyang ulôn peureulée. 9 Sabab, meunyoe ulôn ka kaya, mungken ulôn teuma lôn peugah bahwa ulôn hana peureulée keu Droeneueh. Dan meunyoe ulôn gasien, mungken ulôn ceumeucue sampoe nan Droeneueh nyang mulia hase teupeukuto." 10 Bék peusuna sidroe namiet keu teungku jih, teuma gata jipeusumpah dan jianggab gata salah. 11 Na ureuëng nyang ji peusumpah ureuëng syiek jih dan hana jihareuga keu ma jih. 12 Na ureuëng nyang jianggab droe jih suci padahai jih nyan kutoe lumpah na. 13 Na ureuëng meurasa droe jih jroh lumpah na -- dan hana tanggong gét jih! 14 Na ureuëng jimita hareukat seucara keujam; deungon muka nyang meuhöb dan jipaksa ureuëng gasien ngon ureuëng leumoh mangat jibri hareuta jihnyan keu awaknyan. 15 Lintah darat na dua droe aneuëk; ban dua jih jiboh nan "Keu ulôn!" Na peuet hai nyang hántom na puih: 16 Donya ureuëng maté, ureuëng inong nyang hántom peulahé aneuëk, tanoh nyang tho kréng nyang hawa keu ié ujeuen, dan apui nyang jimeulieh sira jimeuéue keudeh keunoe. 17 Ureuëng nyang ceubéb ayah droe jih dan ma jih nyang ka tuha, ureuëng nyang lagée nyan patot that teugeulawa uluwa mangat matajih jicatuék lé cicém gagak dan manyét jih jipajoh lé cicém rajawali. 18 Na peuet hai nyang paleng payah nibak ulôn keumeuhase teupeuphom: 19 cicém rajawali nyang jipo di manyang, uleue nyang jimeuéue di ateueh batée kareung, kapai nyang meulayeue di teungoh laôt, dan sijudo aneuëk muda ngon aneuëk dara nyang teungoh meucinta. 20 Nyoe kheueh siasat sidroe ureuëng inong nyang hana seutia keu lakoe jih: Óh ka lheueh jimeumukah, jimakheun dan laju jilab babah jihnyan, óh lheuehnyan jipeugah, "Ulôn hana lôn peubuet sapeue!" 21 Na peuet hai nyang payah teuteurimong bansigom donya: 22 Sidroe namiet nyang jeuet keuraja, sidroe ureuëng bangai nyang meuteumé peue mantong nyang jilakée, 23 sidroe ureuëng inong nyang meuteumé meukawen padahai inong nyan hana jigalak lé ureuëng laén, sidroe namiet ureuëng inong nyang meuhase jireubot keududuekan pocut jih. 24 Di ateueh bumoenyoe na peuet macam beulatang ubit teuma carông that-that, na kheueh: 25 Sidom, beulatang nyang hana teuga, teuma jiteupeu keubah peunajoh jih óh watée musém khueng teuka. 26 Peulandok, beulatang nyang leumoh, teuma jiteupeu peugét uempueng di ateueh bukét batée. 27 Daruet, beulatang nyang hana meuraja, teuma jiteupeu doeng meubaréh meuato banja. 28 Cicak, beulatang nyang hase teudrob deungon jaroe, teuma beulatang nyan na meuteumé di meuligoe raja. 29 Na teuma peuet hai nyang lumpah meukeunong meunyoe teungieng cara jihjak, na kheueh: 30 Singa, beulatang nyang paleng teuga lamkawan banmandum beulatang dan hana yo ubak peue mantong; 31 kaméng agam, manok agam nyang watée jijak ulée teudong, dan jeuet keuraja dikeue rakyat jih. 32 Meunyoe lé sabab bangai gata deungon sombong gata reuncana buet-buet nyang jeuhet, awaih! 33 Sabab, meunyoe gata tawot ié susu, nyang gata peuhase na kheueh meunteuga. Meunyoe gata taseukok idong ureuëng laén, laju jiteubiet darah. Meunyoe gata tapeuteuka beungéh, gata jitamong lam meudakwa.

Amsal 31

1 Nyoe kheueh tutoe haba nyang geupeugah lé ibunda Lemuel, raja Masa keu aneuëk gobnyan, 2 "Aneuëk ulôn, boh até ma, nyang ulôn peulahé sibagoe jeunaweueb ateueh doá lôn. Peu kheueh nyang jeuet ulôn peubuet keu gata? 3 Bék kheueh teuböih-böih teuga gata atawa peuhambo teunaga gata keu ureuëng inong. Ka le that raja nyang hanco sabab ureuëng inong. 4 Ingat kheueh, Lemuel! Jijieb ié anggô dan tagie ubak minuman kreueh, hana pantaih hai nyang lagéenyan keu ureuëng mat kuasa. 5 Sabab, meunyoe raja geujieb ié kreueh, gobnyan tuwoe ubak huköm dan hana geupakoe keu ureuëng leumoh. 6 Ié kreueh nyan na kheueh keu ureuëng nyang meurana dan nyang seudeh até. 7 Awaknyan jijieb keu jipeutuwoe ubak gasien dan keusosahan droe keudroe jih. 8 Bila kheueh awaknyan nyang hana hase jibila droe jih keudroe. Dan lindong kheueh banmandum hak ureuëng nyang hana meudaya. 9 Meujuang kheueh keu awaknyan, dan beujeuet kheueh keu hakém nyang ade. Lindong kheueh hak ureuëng gasien dan ureuëng nyang teutindéeh." 10 Peurumoh nyang carông payah meuteumé; gobnyan leubeh meuyuem nibak intan beulian. 11 Ureuëng lakoe hana kureueng sapeue, sabab jipeuduek keupeucayaan keu ureuëng binoe. 12 Inong nyan hántom jipeubuet jeuhet keu teungku lakoe; sipanyang umu jihnyan geupeubuet nyang jroh keu teungku lakoe. 13 Geuhnyan jumot that geupeusapat rami dan bulée bubiri dan laloe meubuet bak teumpat teunun. 14 Di jiôh jihnyan jiba peunajoh, lagée nyang ka jipeubuet lé kapai-kapai niaga. 15 Ban seuboh buta jihnyan ka jibeudôh jijak taguen bu keu keuluwarga jih, dan laju jibagi-bagi tugaih nibak peulayan-peulayan jihnyan. 16 Jihnyan jijak mita tanoh saboh keubeueng umong dan laju jibloe; dan jipula laju saboh lampôh anggô nibak wase jihnyan. 17 Jihnyan jipeusiab droe jih keujimeubuet si habéh teunaga. 18 Jihnyan jiteupeue bahwa peue mantong nyang jipeubuet nyan meulaba that; jihnyan jimeubuet trok teungoh malam. 19 Beuneung teubalot dan ija jicôb laju. 20 Jihnyan hana kriét keu ureuëng nyang hana seb; dan gobnyan gét até keu ureuëng nyang peureulée teutulông. 21 Geuhnyan hana khawate meunyoe jiteuka meusém sijuek, sabab bajée seu-uem ka geukeubah keu keuluwarga gobnyan. 22 Geuhnyan keudroe nyang peugét tika peureumadani; peukayan gobnyan nibak ija lineun ungu nyang meuwah. 23 Lakoe jihnyan na kheueh ureuëng meusyeuhu -- sidroe lamkawan ureuëng nyang jeuet keu peumimpén banda. 24 Jihnyan jipeugét peukayan dan taloe keuieng laju jijak peubloe ubak ureuëng meukat. 25 Jihnyan meuwibawa dan jihoreumat lé gob; dan hana khawate keuhai uroe singoh. 26 Meunyoe jipeugah haba leumoh leumbot; tutoe haba jihnyan bijaksana. 27 Jihnyan sabe rajin meubuet dan geupakoe urosan rumoh tangga droe. 28 Jihnyan jihareuga lé banmandum aneuëk droe, dan geupujoe lé lakoe droe. 29 "Jai that ureuëng inong nyang jroh," geupeugah lé teungku lakoe jih, "teuma droeneueh kheueh nyang paleng jroh nibak awaknyan banmandum." 30 Ruman nyang maméh hana hase teupeucaya, dan ruman ceudah teuma gadôh; teuma ureuëng inong nyang taát ubak TUHAN patot that meuteumé pujoe. 31 Balaih kheueh peue mantong nyang jroh; jihnyan inong nyang patot teuhoreumat dipat mantong na!

Peungkhotbah 1

1 Tutoe haba nyang na dalam kitab nyoe asai jih nibak ureuëng seumike, aneuëk agam Nabi Daud, nyang geugantoe Nabi Daud jeuet keu raja di Yerusalem. 2 Si seumike geupeugah: Banmandum nyan sia-sia dan hana meuguna! Udeb nyan peucuma, banmandum nyan hana areuti. 3 Siumu udeb geutanyoe ta meukeureuja, ta prah reuôh. Teuma, toh hase jih nyang bisa ta peubangga? 4 Keuturonan nyang sa teuka dan keuturonan nyang laén leunyab, teuma donya nyoe teutab saban mantong. 5 Mata uroe mantong jiteubiet dan mantong cit ji lhôb. Deungon hék nyang leumoh jigisa u teumpat jih seumula, laju óh singoh nyan jiteubiet keula-i. 6 Angén jipot u seulatan, laju jiyueb u utara; angén nyan meuputa-puta, laju jigisa teuma. 7 Banmandum ié krueng ji ile u laôt, teuma laôt han cit jitem peunoh. Ié laôt nyan jigisa u pucok krueng, laju jitron keula-i u kuawala. 8 Peue-peue mantong ka habéh bosan dan bosan nyan hana sanggob teupeugah le. Mata geutanyoe hana troe-troe bak ta pandang; dan geulinyueng geutanyoe hana puih-puih bak jideungoe. 9 Peue nyang ka lheueh teujadi, teuma teujadi keula-i. Peue nyang ka lheueh teupeubuet, teuma jipeubuet keula-i. Hana na sisuatu nyang barô di ateueh donya nyoe. 10 Na ureuëng nyang geupeugah, "Kalon kheueh atranyoe barô!" Nyang sibeuna jih atranyan kana sigohlom geutanyoe lahé. 11 Ureuëng hana ji ingat keujadian masa nyang dilée. Meunan cit deungon keujadian masa jinoe dan singoh, hana teuma ji ingat lé ureuëng masa nyang teuma teuka. 12 Ulôn, Si Seumike, lôn mat peurintah di Yerusalem sibagoe raja ateueh Israel. 13 Ulôn meuteukat keu lôn seulidek dan lôn meurunoe deungon bijaksana peue mantong nyang teujadi di ateueh donya nyoe. Naseb nyang geukeubah lé Po teu Allah keu geutanyoe keubiet peudeh lumpah na. 14 Ulôn kheueh nyang kalon peue mantong buet manusia di ateueh donya nyoe. Peucaya kheueh, banmandum nyan sia-sia, lagée useuha teutiyeub angén. 15 Nyang keuwieng hana hase teupeuteupat, dan nyang hana hán jeuet teu itong. 16 Ulôn pike, "Ulôn nyoe ka jeuet keu ureuëng peunteng dan áreh, jiôh leubeh áreh nibak banmandum ureuëng nyang mat peurintah di Yerusalem sigohlom na ulôn. Ulôn leuthat lôn gumpôi peungeutahuan dan iéleumé." 17 Teuma ulôn ka meuteukat keu lôn teupeue beuda jih lamkawan peungeutahuan dan keubodohan, lamkawan keubijaksanaan dan nyang bangai. Teuma teunyata ulôn nyoe lagée lôn tiyeub angén. 18 Sabab, seumaken le hikeumat geutanyoe, seumaken le teuma nyang tanyoe gundah. Seumaken le iéleumé peungeutahuan geutanyoe, seumaken le teuma nyang tanyoe susah.

Peungkhotbah 2

1 Ulôn ka lôn peuputôh keu lôn peumangat droe mantong mangat lôn teupeue peue keubahgiaan nyan. Teuma mandum nyan pih sia-sia. 2 Ulôn meutamah sadar bahwa kém nyan na kheueh keubodohan dan keuseunangan hana meuguna. 3 Jidorong lé keuheundak ulôn keu jeuet keucarông, ulôn ka neukat lôn meuseunang-seunang sira lôn jieb ié anggô dan meupesta pora. Ulôn sangka nyan kheueh cara nyang paleng gét keu manusia keu jinékmat udeb gobnyan nyang paneuk di ateueh bumoe nyoe. 4 Buet-buet nyang raya ka lheueh ulôn peubuet. Ulôn peudong rumoh-rumoh keu ulôn. Ulôn peugét taman-taman lampôh-lampôh nyang ulôn pula deungon bak anggô dan sigala macam bak kayée nyang jeuet pajohboh. 6 Ulôn kueh kulam-kulam keu lôn peuile ié u dalam taman dan lampôh-lampôh nyan. 7 Nibak ulôn lethat lôn peulara namiet bah kheueh nyan ulôn bloe meunan cit nyang peulahé di rumoh ulôn. Beulatang peulara ulôn jiôh leubeh le nibak beulatang soemantong nyang ka lheueh tinggai di Yerusalem. 8 Ulôn gumpôi banmandum méuh dan pirak hase seumeumah nibak raja-raja di nanggroe-nanggroe nyang ulôn jajah. Ureuëng meuca-e agam dan inong sunggoh that galak até ulôn deungon ca-e-ca-e nyang awaknyan ba. Meunan cit ulôn peulara inong-inong seulir sidub toh mantong nyang ulôn keuheundaki. 9 Sunggoh, ulôn leubeh rayeuk nibak soemantong nyang ka lheueh jitinggai di Yerusalem, dan hikeumat ulôn pih teutab unggul. 10 Peue mantong nyang ulôn meuhéut, ulôn peupueh. Hántomna ulôn teundroe ulôn keu lôn nékmat keuseunangan peue mantong. Ulôn bangga ateueh sigala hase jeureh payah ulôn, dan nyan kheueh upah ulôn. 11 Teuma óh lheuehnyan ulôn seulidek peue mantong buet ulôn, dan banmandum jeureh payah ulôn keu lôn peuseuleusoe karya-karya lôn nyan, teuma sadar kheueh ulôn bahwa banmandum nyan hana meumakna sama seukali. Useuha lôn nyan sia-sia lagée teutiyeub angén mantong. 12 Pakriban kheueh mantong sidroe raja teuma bisa jipeubuet peue nyang ka geupeubuet lé raja-raja nyang ka awai nibak gobnyan. Laju di ulôn pih lôn peuphon pike: Peue areuti jih jeuet keu áreh atawa bangai atawa bodoh? 13 Meumang, ulôn teupeue, "Hikeumat leubeh gét nibak keubodohan, lagée trang pih leubeh gét nibak seupôt buta. 14 Ureuëng áreh bisa geukalon arah nyang geutuju; ureuëng bodoh lagée geujak meuraba-raba." Teuma ulôn teupeue cit bahwa naseb nyang sirupa teuma jitimpa bak awaknyan bube nyang na. 15 Teuma ulôn pike, 'Naseb nyang jitimpa nibak ureuëng bodoh teuma lôn teurimong cit teuma. Jadi, keupeue guna jih sigala hikeumat ulôn?' Laju ulôn peuputôh bahwa hikeumatnyan meumang hana meuguna meubacut pih. 16 Ureuëng nyang bodoh teuma bagaih that jupeutuwoe, teuma ureuëng nyang na hikeumat pih hana teuma ji ingat-ingat. Treb bak treb geutanyoe banmandum teuma gadôh nibak ingatan. Geutanyoe mandum harôh maté, bah kheueh nyan ureuëng nyang áreh meunan cit deungon ureuëng bangai. 17 Sababnyan udebnyoe hana areuti le nibak ulôn, laén pihan. Banmandum nyan sia-sia; ulôn ka lôn tiyeub angén mantong. 18 Banmandum hase nyang ulon peubuet dan nyang ulôn teumé hana meuguna nibak ulôn, sabab atranyan harôh ulôn tinggai keu ureuëng nyang ulôn gantoe. 19 Dan panena ta teupeue peu kheueh jihnyan áreh atawa bodoh? Teuma pakriban kheueh mantong jihnyan harôh jeuet keuwaréh ateueh hareuta ulôn nyan nyang ka ulôn teumé simantong ulôn udeb di ateueh donya nyoe beureukat jeureh payah dan hikeumat ulôn. Jadi, nyan pih sia-sia hana meuguna. 20 Jinoenyoe ulôn meunyeusai ka ulôn meukeureuja deungon brat. 21 Sabab manusia meukeureuja brat deungon geungui sigala hikeumat, peungeutahuan dan keuahlian gobnyan keu meuteumé sisuatu. Teuma bak akhé jih gobnyan harôh geutinggai meunan mantong sigala hase jeureh payah gobnyan ubak ureuëng nyang meubacut pih hana jiteubit reuôh keu hareutanyan. Jadi, nyan pih sia-sia, lom teuma sunggoh hana ade! 22 Siumu udeb manusia meukeureuja brat dan meususah payah; laju pat hase jeureh payah gobnyan nyang bisa geupeubangga? 23 Peue mantong nyang geupeubuet seumantong gobnyan udeb, jiba deurita dan sakét até nibak droe gobnyan. Bak watée malam pih até gobnyan meutampo-tampo. Jadi, banmandum nyan sia-sia hana meuguna. 24 Hana nyang leubeh gét nibak manusia seulaén geumakheun, jieb ié dan geunékmat peuhase nyang ka geupeubuet nyan. Ulôn sadar bahwa nyan pih atra nyang geubri lé Po teu Allah. 25 Soe kheueh nyang bisa geumakheun dan meuseunang-seunang hana Po teu Allah? 26 Po teu Allah geubri hikeumat, peungeutahuan dan keubahgiaan ubak ureuëng nyang jipeuseunang até gobnyan. Teuma ureuëng meudesya geuyue peubuet jak mita hareukat dan jitamon hase jih keu jijôk ubak ureuëng nyang peugalak até Allah. Jadi, banmandum nyan sia-sia lagée ureuëng jitiyeub angén.

Peungkhotbah 3

1 Peue mantong nyang na di ateueh donya nyoe ka geupeuteuntée lé Po teu Allah. 2 Po teu Allah nyang peuteuntée keu peulahé dan Gobnyan teuma nyang peuteuntée keu peumaté, watée keu seumula dan watée keu teubot, 3 watée keu poh maté dan watée keu peupuléh, watée keu teurombak dan watée keu teupeudong. 4 Allah teuma nyang peuteuntée keu mo meuba-e dan watée keu teukém-kém, watée keu meuratok dan watée keu meulikak, 5 watée nyang jeuet meuagam dan watée nyang han jeuet keu meuagam, watée keu meupaluek dan watée keu peuteun droe. 6 Po teu Allah teuma nyang peuteuntée watée keu meuteumé dan watée keu geumadôh, watée keu teumabong dan watée keu peuhabéh, 7 watée keu teupriék dan watée keu teucöb, watée keu peuseungab droe dan watée keu peugah haba. 8 Allah cit teuma nyang peuteuntée watée keu geunaséh dan watée keu teubanci, watée keu jakmuprang dan watée keu meudamé. 9 Peu kheueh hase sigala jeureh payah geutanyoe? 10 Ulôn lôn teupeue bahwa Allah geubri beuban nyang paleng brat ubak geutanyoe. 11 Gobnyan nyang peuteuntée watée nyang paleng teupat nibak peue mantong. Gobnyan geubri ubak geutanyoe hasrat mangat ta teupeue uroe ukeue, teuma geutanyoe hana sanggob ta peuphom buet-buet Po teu Allah nibak awai trok óh akhé. 12 Ulôn lônteupeue bahwa nibak geutanyoe hana nyang leubeh gét nibak meugeumbira dan ta rasa nékmat udeb seupanyang umu geutanyoe. 13 Nyang sigöt jih geutanyoe nyang ta makheun dan nyang tajieb na kheueh nibak hase nyang ta useuha nibak hase reuoh geutanyoe keudroe. Nyan kheueh meuneubri Po teu Allah. 14 Ulôn lônteupeue bahwa banmandum meuneubuet Allah teuma teutab na siumu masa. Manusia hana bisa jitamah atawa jipeukureueng bah meubacutpih. Dan Po teu Allah geupeubuet nyang lagéenyan mangat geutanyoe ta takot ubak Gobnyan. 15 Nyang jinoe nyang ka teujadi, kalheueh teujadi yoh awai dilée. Nyang teuma na, ka treb that na. Po teu Allah geupeuteuntée mangat nyang ka teujadi, teujadi kheueh. 16 Na lom nyang ulôn ngieng di ateueh donya nyoe: nyang toh seuharôh jih na keuadelan dan keubaíekan, disinan na keujeuhetan. 17 Ulôn pike, Po teu Allah teuma geupeusidang ureuëng nyang jipeubuet nyang jroh meunan cit deungon nyang jeuhet, sabab tieb-tieb hai dan tieb-tieb tindakan teuma teujadi nibak watée nyang ka geupeuteuntée lé Po teu Allah. 18 Keusimpulan ulôn na kheueh: Po teu Allah geu ujoe geutanyoe keu geutunyok bahwa naseb geutanyoe hana meubeuda deungon naseb beulatang. 19 Pakriban kheueh mantong, naseb manusia dan beulatang na kheueh saban. Nyang saboh teuma maté, meunan cit deungon nyang laén. Bandua nyan na kheueh sabe-sabe makhluk Gobnyan. Jadi, manusia hana leubeh meu untông nibak padoe beulatang, sabab keu banduanyan udebnyan na kheueh sia-sia. 20 Awaknyan jijak saho tujuan nibak teumpat nyang saban. Awaknyan meuasai nibak abée teuma jiwoe ubak abée. 21 Geutanyoe han tateupeue, peu kheueh areuwah manusia jiék u ateueh atawa areuwah beulatang jitron u dalam tanoh. 22 Sababnyan ulôn sadar bahwa hana nyang leubeh gét nibak manusia nibak padoe geupeuguna hase keureuja gobnyan. Seulaén nibaknyan hana nyang bisa geupeubuet. Hana mungken gobnyan geuteupeue peue nyang teuma teujadi óh ka lheueh gobnyan maté.

Peungkhotbah 4

1 Óh lheuehnyan ulôn ngieng keula-i sigala nyang hana ade di ateueh donya nyoe. Ureuëng-ureuëng nyang keunong tindéeh jimo meuba-e dan hana ureuëng laén nyang jitem tulông ureuëng nyan. Hana meusidroe pih nyang jitem tulông, sabab ureuëng nyang tindéeh nyan na kuasa nyang paleng raya. 2 Ulôn iri lôn ngieng ureuëng nyang ka treb meuninggai donya kareuna awaknyan leubeh mubahgia nibak ureuëng nyang mantong udeb. 3 Teuma nyang leubeh mubahgia lom na kheueh ureuëng-ureuëng nyang gohlom lahé, sabab awaknyan gohlom jikalon keujeuhetan nyang jipeubuet lé manusia di ateueh donya nyoe. 4 Meunan cit ulôn teupeue bahwa manusia geujakbuet nyang cukob brat, teuma kareuna iri até watée geungieng atra kawöm silingka. Banmandum nyan sia-sia mantong lagée useuha teutiyeub angén. 5 Ureuëng bodoh nyang jiduek jipangkée tuboh dan jipeubiyeu droe jih maté kareuna deuk. 6 Mungken nyan beutôi, teuma leubeh gét bacut hareuta deungon keuteunangan até nibak padoe keureuja brat deungon dua jaroe dan teutiyeub angén. 7 Mantong na nyang sia-sia dalam udeb nyoe. 8 Na ureuëng nyang udeb sidroe khong hana meu aneuëk, meunan cit hana syedara. Bahpih meunan, ureuëng nyang meukeureuja brat han geupiôh-piôh dan até gobnyan hantom na puah deungon hareuta nyang kana. Keu soe kheueh ureuëng nyan meukeureuja trok bulut deungon reuoh dan geutulak peue mantong keuseunangan? Nyang lagéenyan pih sia-sia, dan saboh cara udeb nyang seungsara. 9 Meunyoe dua droe leubeh meu untông nibak sidroe. Meunyoe awaknyan geujak meubuet, hase jih leubeh gét. 10 Meunyoe nyang sidroe reubah nyang laén hase geutulông. teuma meunyoe nyang sidroe reubah, padahai gobnyan sidroe, cilaka kheueh gobnyan, kareuna hana ureuëng nyang tulông gobnyan. 11 Bak malam nyang sijuek ngon leupie, meunyoe na dua droe geuéh leubeh meu untông meunyoe saleng geupeurapat badan mangat sabe na meuteumé seu uem, teuma pakriban ureuëng hase seu uem meunyoe gobnyan sidroe mantong? 12 Meunyoe dua droe ureuëng geujak meusajan hase geutangkeh seurangan musoh, teuma meunyoe sidroe khong geujak mudah jipeutaloe lé lawan. Lhée krek talo nyang teuputa jeuet keusaboh, payah that bak teupeuputôh. 13 Ureuëng gasien hase jeuet keuraja, dan sidroe ureuëng nyang teuteun hase geuminah geuduek bak takhta. Teuma meunyoe umu ka tuha that raja nyan teulalu bangai keu geuteurimong naseuhat, teuma naseb gobnyan leubeh brok nibak naseb peumuda nyang gasien teuma carông. 15 Meunyoe lôn pike keuhai ureuëng banmandum di ateueh donya nyoe, teuma sadar kheueh ulôn bahwa lamkawan awaknyan pasti na sidroe aneuëk muda nyang teuma jeuet keugeunantoe raja. 16 Rakyat nyang geupimpén bisa mantong han ék teuitong ramé jih, teuma óh ka lheueh gobnyan geujak, hana ureuëng nyang lakée teurimong gaséh ji ingat jasa gobnyan. Meumang, banmandum nyan sia-sia lagée teutiyeub angén. 17 Beu até-até kheueh meunyoe neujak u Baét TUHAN. Leubeh gét neujak keunan keu meurunoe nibak padoe neujak peuseumah keureubeuen, lagée nyang geupeubuet lé ureuëng-ureuëng nyang bodoh. Awaknyan hana bisa jipeubeda nyang toh nyang beuna dan nyang toh nyang salah.

Peungkhotbah 5

1 Neupike kheueh sigohlom gata peugah haba, dan bék teulalu bagaih neumeujanji ubak Po teu Allah. Gobnyan na di dalam syeuruga dan gata na di ateueh bumoe, jadi, meuhemat kheueh deungon tutoe haba gata. 2 Seumaken tunu hanmeuóh pikeran, seumaken raya keumungkenan meuteumé lumpo nyang brok. Maken leu neupeugah haba, seumaken le neupeuteubiet tutoe haba nyang bodoh. 3 Jadi, meunyoe gata neumeujanji ubak Po teu Allah, neupeuteupat kheueh janji droeneueh nyan beurijang-rijang. Gobnyan hana galak ubak ureuëng nyang meulaku bangai. Sababnyan, peuteupat kheueh janji gata. 4 Leubeh gét bék neupeugöt janji nibak padoe neumeujanji teuma hana neupeuteupat janji droeneueh nyan. 5 Bék kheueh kareuna tutoe haba gata, meusabab jih gata srot u dalam desya, seuhingga gata teupaksa neupeugah ubak teungku imeum nyang geupeutimang TUHAN, bahwa gata silab neupeugah janji. Keu peue neupeujeuet Po teu Allah beungéh ubak gata seuhingga geupeuhanco banmandum peue-peue nyang ka gata peubuet? 6 Lagée toh leu that lumpo nyan hana areuti, meunan kheueh teuma leuthat tutoe haba nyang hana meuguna. Teuma teumakot kheueh ubak TUHAN. 7 Bék neuhireuen meunyoe neungieng peunguasa geutindéeh ureuëng gasien, geureupah hak ureuëng nyan dan hana geubri ubak awaknyan keuadelan. Tieb-tieb peugawée geulindong lé atasan gobnyan dan bandua nyan geulindong lé peujabat nyang leubeh manyang pangkat gobnyan. 8 Bahkan udeb rajapih meugantung nibak hase panen. 9 Ureuëng nyang teu péng-péng, hantom na seb péng geuhnyan; ureuëng nyang pungo nibak hareuta, hantom na puih deungon laba. Banmandum sia-sia mantong. 10 Maken le hareuta sidroe-droe ureuëng maken le teuma ureuëng nyang harôh geubri makheun. Hana untông jih nibak peumilék nyan keukayaan nyan, gobnyan nyang geuteupeue na kheueh bahwa gobnyan ureuëng kaya. 11 Sidroe-droe ureuëng nyang tueng upah bisa mantong hantom na seb peunajoh, teuma si than-than jih ureuëng nyan bisa geuéh deungon sineunya. Seubalék jih, sidroe ureuëng kaya nyan hareuta gobnyan meulimpah ruwah, seuhingga ureuëng nyan hana geuéh kareuna até geuh susah. 12 Ulôn kalon di ateueh donya nyoe na sisuatu nyang cukob seudeh: Sidroe ureuëng geutamon hareuta keu masa watée jiteuka musém deuk. 13 Teuma hareuta gobnyan gadôh kareuna na sisuatu keumalangan, seuhingga hana nyang bisa geubri sibagoe hareuta waresan ubak aneuëk-aneuëk gobnyan. 14 Geutanyoe watée lahé dalam pruet ma teulon bulat hana meuleukek meusikrek beunéueng pih nibak tuboh; meunan cit óh watée ta tinggai donya nyang fana nyoe, hana taba sapeue pih nibak sigala hareuta nyang ka hék tanyoe useuha. 15 Nyan sunggoh that seudeh! Tanyoe tajak lagée watée geutanyoe jinoe tateuka. Han tateupeue hék geutanyoe bak ta tiyeub angén, dan peue hasejih? 16 Sipanyang udeb, tanyoe meugeu-meugeu didalam seupôt, tanyoe meususah payah, gundah, tunu dan sakét até. 17 Teuma barô kheueh lôn muphom bahwa nyang paleng gét na kheueh makheun, jieb ié dan ta nékmati hase useuha geutanyoe seumantong tanyoe udeb nyang paneuk nyoe nyang ka geubri lé Po teu Allah ubak geutanyoe; nyan kheueh naseb geutanyoe. 18 Meunyoe sidroe-droe ureuëng geuteurimong keukayaan dan hareuta beunda nibak Po teu Allah, dan ureuëng nyan geubri idhin geunékmati keukayaan geuhnyan, harôh kheueh gobnyan meurasa meusyuko dan geunékmati sigala hase useuha gobnyan. Nyan na kheueh atra nyang geubri cit lé Po teu Allah. 19 Po teu Allah geupeupeunoh até ureuëng nyan deungon peunoh keugeumbiraan, teuma gobnyan hana gundah geupike ubak udeb nyang paneuk nyoe.

Peungkhotbah 6

1 Ulôn kalon lom nyang hana ade nyang cukob parah di ateueh donya nyoe. 2 Na kala jih Po teu Allah geubri keukayaan, keuhoreumatan dan hareuta beunda ubak sidroe-droe ureuëng, seuhingga hana le nyang geulakée. Teuma Po teu Allah hana geubri ureuëng nyan geunékmati banmandum keukayaan geuh nyan. Seubalék jih, ureuëng nyang hana geuturi teuma geunékmati keukayaan nyan. Jadi, banmandum nyan sia-sia dan cukob seudeh. 3 Bahpih sidroe ureuëng na geumeu aneuëk sampoe sireutôh droe dan udeb gobnyan treb umu gobnyan pih sampoe ka tuha lagoena, teuma meunyoe gobnyan hana meurasa bahgia dan hana teuma geuteumé teukubu dalam jrat nyang pantaih, teuma meunurot peundapat ulôn, aneuëk manyak nyang ban lahé laju maté leubeh gét naseb jih nibak ureuëng tuha nyan. 4 Sabab, nibak aneuëk manyak nyan hana masaalah peu kheueh jihnyan teupeulahé atawa hana; jihnyan jijak u dalam seupôt, dan laju bagaih that jituwoe lé gob. 5 Hantom na jikalon cahya mata uroe, dan jihnyan gohlom cit muphom peue areuti jih udeb nyoe, seuhingga jihnyan bisa teuéh deungon teuntram. 6 Dan nyan leubeh gét nibak ureuëng nyang udeb dua reutôh thon, teuma hantom na geurasa bahgia. Bukon kheueh bandua awaknyan geujak u teumpat nyang sirupa? 7 Manusia geumeubuet na kheueh keu makheun, teuma gobnyan hantom na meurasa puih. 8 Jadi, peu kheueh untông ureuëng árif meunyoe teubandeng deungon ureuëng bodoh? Dan peue teuma guna jih meunyoe ureuëng gasien meupie nyang gét di teungoh-teungoh masyarakat? 9 Banmandum nyan sia-sia lagée ureuëng jitiyeub angén. Leubeh gét geutanyoe puih deungon peue nyang na nibak geutanyoe nibak padoe ta meuharab ubak nyang leubeh le. 10 Peue mantong nyang na, atranyan ka na phon yoh masa dilée. Geutanyoe tateupeue bahwa manusia hana bisa geubantah ureuëng nyang leubeh teuga nibak jihnyan. 11 Seumaken treb gobnyan geubantah, seumaken hana areuti tutoe haba gobnyan, dan gobnyan hana meuteumé laba sapeue pih. 12 Pakriban manusia bisa geuteupeue peue nyang paleng gét nibak gobnyan didalam udeb gobnyan nyang paneuk dan hana meuguna, dan nyang liwat lagée bubayang? Pakriban sidroe ureuëng bisa geumeuphom peue nyang teuma teujadi di ateueh donya nyoe óh ka lheueh gobnyan meuninggai donya?

Peungkhotbah 7

1 Nan nyang meubhée harom leubeh gét nibak minyéuk nyang yuem jih meuhái; dan uroe keumatéan leubeh gét nibak padoe uroe teupeulahé. 2 Leubeh gét teujak u rumoh duka nibak padoe teujak u rumoh khanuri. Sabab deungon na nyang lagée nyan sabe teuingat bahwa manusia nyoe sabe ji luem lé mawöt. 3 Seudeh leubeh gét nibak padoe teukém-kém. Bah kheueh iérupa krot, asai até teutab leuga. 4 Ureuëng bodoh hana geupiôh geutiyeub keuseunangan; dan ureuëng áreh sabe geupike ubak maté. 5 Leubeh gét geuseugah lé ureuëng nyang meubudo, nibak padoe jipujoe lé ureuëng nyang payah muphom. 6 Kém ureuëng bodoh hana areuti, lagée su duro jipajoh lé apui. 7 Meunyoe ureuëng áreh jiteumipée; bangai that buet geuh nyang lagéenyan; meunyoe ureuëng nyang geuteurimong péng suleueng, rusak kheueh watak ureuëng nyan. 8 Leubeh gét akhé saboh peukara nibak padoe awai nibak nyan; leubeh gét meusaba nibak padoe teulalu bangga. 9 Bék bagaih that jiék pitam; ureuëng bodoh mantong nyang na troh dam. 10 Bék na nyang teumanyong, 'Pakon yoh jamén dilée leubeh gét nibak padoe jamén jinoe?' Teuma ureuëng bangai nyang teumanyong nyang lagée nyan. 11 Ureuëng udeb seuharôh jih meuhikeumat; nilai hikeumat saban deungon hareuta waresan; 12 saban teuma deungon péng nyang geubri ureuëng nyang meurasa aman. Peue lom deungon peungeutahuan keuhai hikeumat! Soe nyang atra nyan teuma seulamat. 13 Ngieng kheueh meuneubuet Po teu Allah. Sabab soe kheueh nyang sanggob peuteupat peue nyang ka geupeukiwieng lé Po teu Allah? 14 Jadi, geumbira ria kheueh meunyoe gata teungoh meu untông. Teuma meunyoe gata jitimpa lé bala, bék kheueh neutuwoe bahwa Allah kheueh nyang bri bandua nyan. Geutanyoe han tateupeue peue nyang teujadi seulanjut jih. 15 Udeb ulôn nyoe hana meuguna, teuma seudubtreb ulôn nyan ulôn ngieng nyang seulanjut jih nyoe: Na kala jih ureuëng nyang jroh meuteumé bala, bahpih ureuëng nyan saleh. Na kala jih ureuëng jeuhet panyang umu geuh, bahpih ureuëng nyan hana teudoh udeb lam desya. 16 Bék kheueh teulalu gét dan bék kheueh teuma teulalu bijaksana. Peue guna jih teupoh droe? 17 Bék cit teuma lumpah that jeuhet dan bék teuma teulalu bangai. Keupeue maté sigohlom watée? 18 Neupeujiôh kheueh nibak bandua nyan. Meunyoe geutanyoe teumakot ubak Po teu Allah, pasti geutanyoe meuhase deungon jroh. 19 Hikeumat geupeujeuet peumilék jih meutamah peukasa nibak padoe siploh droe peunguasa di saboh banda. 20 Di ateueh bumoe nyoe hana ureuëng nyang sampoereuna; hana nyang sabe geupeubuet nyang jroh dan hantom na meudesya. 21 Bék kheueh galak that neudeungoe nariet-nariet ureuëng laén nyang hana mupat ulée uboe jih, panena tateupeue gata teungoh jiseurapa lé sidroe peulayan. 22 Gata keudroe pih gata sadari bahwa ureuëng laén pih ka lheueh gata seurapa. 23 Banmandum nyan ulôn ujoe ngon hikeumat lôn. Teuma seumaken lôn mita hikeumat nyan, seumaken jiôh nibak ulôn. 24 Soe nyang bisa meuteumé mita areuti nibak udeb nyoe? Teulalu lhok keu bisa jimeungeurti! 25 Teuma ulôn sunggoh meuruno dan lôn mita peungeutahuan, mangat meuteumé hikeumat dan jaweueb nyang paih ateueh peue mantong nyang geutanyong. Ulôn kucuba bisa muphom bahwa desya nyan na kheueh keubodohan, dan keujeuhetan na kheueh keuneukatan. 26 Ulôn ka meuteumé bahwa ureuëng inong leubeh phet nibak mawöt. Cinta ureuëng inong bak lagée jeu dan jeunieb nyang ka siab keuneuk drob mansa jih. Lam pangkée jih lagée taron nyang meucarueh khong that. Ureuëng nyang geupeubuet keuheundak Po teu Allah teuhinda nibak taron nyan, teuma ureuëng meudesya pasti teuma geutawan. 27 Kalon, geupeugah lé Sang seumike: Banmandum nyan ulôn teumé, watée langkah deumi langkah lôn jakmita jaweueban. 28 Mantong cit ulôn mita jeunaweueb nyang laén, teuma nyang ulôn mitanyan hana meuteumé. Lamkawan siribée droe, na meurumpok sidroe ureuëng agam nyang ulôn horeumat. Teuma lamkawan awaknyan hana ureuëng inong nyang bisa lôn hareuga. 29 Nyoe mantong kheueh nyang ulôn teumé: Po teu Allah geupeujeuet geutanyoe seudeurhana dan biasa. Teuma geutanyoe keudroe nyang peujeuet droe keudroe geutanyoe jeuet keurumit dan payah lom meucarueh-carueh ngon meucawo-cawo.

Peungkhotbah 8

1 Alangkah mangat jih ureuëng bijaksana. Gobnyan geutuóh jaweueb ateueh peukara peue mantong. Deungon hikeumat gobnyan teuseunyum ngon geumbira, seuhingga iémuka gobnyan leumah bahgia. 2 Patuh kheueh meunyoe raja geubri peurintah, dan bék neupeugét janji nyang teugeusa-geusa ubak Po teu Allah. 3 Raja bisa mantong geumeutindak seukeuheundak gobnyan, meunyoe gobnyan hana geugalak, leubeh gét peujiôh laju nibak gobnyan. 4 Raja meutindak deungon wibawa; hana nyang beurani jibantah gobnyan! 5 Ureuëng nyang taát ubak gobnyan, teuma aman dan seuntosa; ureuëng áreh geuteupeue pajan pakriban dan dipat teutaát ubak raja. 6 Keu sigala sisuatu na watée dan cara jih keudroe, teuma bacut sagai nyang tanyoe meungeurti! 7 Hana meusidroe manusia pih jiteupeue peue naseb gobnyan nyang teungoh teupreh-preh, dan hana nyang bisa geupeugah peue nyang teuma teujadi. 8 Hana meusidroe nyang hase geupeuteun dan geupeupreh bahpih sikeujab meunyoe maté nyang ka trok watée. Nyan na kheueh peujuangan nyang hanjeuet geupeusie, hanjeuet gobnyan teuhinda nibak atranyan, bahpih deungon tipée dan daya upaya. 9 Banmandum nyoe ulôn kalon watée ulôn peurati banmandum keujadian di ateueh donya nyoe. Na kala jih manusia geungui kuasa droe gobnyan keu geupeuceulaka sabe keudroe-droe. 10 Ka lheueh ulôn kalon ureuëng jeuhet maté laju jiseubée dalam tanoh. Teuma watée ureuëng laén ka geuwoe nibak teumpat ureuëng jeuhet nyan teutanom, awaknyan laju jipujoe ureuëng nyan nibak teumpat ureuëng nyan geupeubuet buet nyang jeuhet. Jadi, nyang lagéenyan pih sia-sia. 11 Pakon mudah that manusia geupeubuet buet nyang jeuhet? Kareuna huköman kon watée nyan laju geubri nibak ureuëng nyan. 12 Bahpih meureutôh-reutôh buet nyang jeuhet nyang ka geupeubuet lé manusia meudesya, ureuëng nyan teutab udeb dan panyang umu jih. Teuma, soenyang taát ubak Po teu Allah, pasti udeb ureuëng nyan mudah sigala. 13 Seubalék jih, ureuëng jeuhet le that meuteumé keusuletan. Udeb ureuëng nyan bagaih that jijak lagée bubayang. Ureuëng nyan teuma maté bak umu nyang muda kareuna jihnyan hana taát ubak Tuhan droe. 14 Teuma banmandumnyan haba sulet hanjeuet peucaya. Ngieng kheueh peue nyang ka teujadi di ateueh donya; Na ureuëng malém nyang geuhuköm lagée geuhuköm ureuëng doraka, na ureuëng jeuhet nyang geupeulaku lagée ureuëng saleh. Jadi, nyan pih sia-sia hana meuguna. 15 Keusimpulan ulôn na kheueh manusia harôh meugeumbira. Kareuna dalam udeb gobnyan di ateueh donya nyoe hana keuseunangan nyang laén nibak gobnyan, seulaén makheun, jieb ié dan meusuka ria. Nyan mantong nyang jeuet geurasa di teungoh-teungoh ié reuôh gobnyan, seumantong udeb nyang geubri lé Po teu Allah ubak Gobnyan. 16 Watée ulôn meu useuha mangat meuteumé hikeumat, dan ulôn peurati peue mantong nyang na teujadi di ateueh donya nyoe, teuma jiteuka kheueh keusadaran ulôn bahwa bahpih geutanyoe meususah payah uroe malam hana tapiôh, 17 geutanyoe hanmampu ta peuphom keuheundak Po teu Allah. Pakriban mantong ta useuha, hana mungken atranyan hase ta peuphom. Ureuëng áreh geuteupeue bahwa gobnyan geuteupeue, nyang sibeuna jih gobnyan hana geuteupeue.

Peungkhotbah 9

1 Banmandum nyan ulôn pike deungon sunggoh-sunggoh. Allah geuatoe udeb ureuëng nyang jroh dan bijaksana, meunan meunyoe ureuëng nyan geubanci dan geucinta. Hana ureuëng laén nyang geuteupeue peue nyang teuma teujadi óh uroe laén. 2 Meumang, naseb ureuëng nyang saban jitimpa teuma ubak ureuëng laén: Ureuëng jujoe meunan cit deungon beujat, ureuëng göt meunan cit deungon ureuëng jeuhet, ureuëng nyang gleh meunan cit deungon ureuëng nyang kutoe, ureuëng nyang geupeuseumah keureubeuen meunan cit deungon nyang hana. Ureuëng nyang göt hana leubeh mujur nibak ureuëng nyang meudesya, ureuëng nyang meubodok saban mantong deungon ureuëng nyang hangeutem meubudok. 3 Jadi, naseb nyang lagéenyan jitimpa ubak awaknyan banmandum. Dan nyan saboh hai nyang cukob seudeh lagée toh nyang ka teujadi peue mantong di ateueh donya. Seumantong udeb até manusia nyan peunoh deungon keujeuhetan, dan pikeran gobnyan pih peunoh deungon keubodohan. Dan hana teusangka-sangka ureuëngnyan pih laju maté. 4 Teuma seumantong hayat jikandong badan, seulamanyan teuma mantong na harapan. Bukon kheueh asée nyang udeb leubeh bahgia nibak singa nyang than meunyawöng? 5 Seuhana-hana jih, ureuëng udeb geuteupeue bahwa ajai ka teupreh-preh gobnyan, seudangkan ureuëng maté than geuteupeue sapeue. Nibak ureuëng nyan hana uengkoh atawa imbalan nyang laén, dan nan ureuëng nyan ka teupeu tuwoe. 6 Rasa cinta, banci atawa nafeusu, banmandum nyan maté meusigoe ngon gobnyan. Ureuëng nyan hana geucokle bagian peue mantong nyang na ateueh peue mantong nyang na keujadian di ateueh donya. 7 Jak, pajoh laju dan meugeumbira kheueh, neujieb kheueh laju ié anggô gata deungon suka cita. Nibak Allah hana geubeungéh, malah geugalak teuma. 8 Bah kheueh iémuka gata meucahya dan geumbira. 9 Rasa kheueh udebnyoe deungon peurumoh nyang gata gaséh seumantong gata udeb deungon sia-sia, nyang geubri lé Po teu Allah ubak gata di ateueh donya. Neunékmat kheueh tieb-tieb uroe bahpih hana meuguna. Sabab upah jeureh payah gata nyang kheueh atranyan mantong. 10 Neupeubuet kheueh peue mantong tugaih gata deungon habéh seuneuga. Sabab euntrek hanale pikeran atawa keureuja. Hana iéleumé atawa hikeumat dalam donya ureuëng maté. Dan keudeh kheueh gata teuma neujak. 11 Di dalam donya nyoe na lom nyang ulôn kalon: meutunang plueng hana sabe-sabe jimeunang lé ureuëng nyang bagaih plueng, meunan cit dimideuen prang hana sabe-sabe meunang nibak ureuëng nyang teuga. ureuëng bijaksana hana sabe-sabe meuteumé mata hareukat. Dan ureuëng carông hana sabe-sabe meuteumé keukayaan. Meunan cit di ureuëng ahli hana sabe-sabe jeuet keu ureuëng meusyeuhu. Sabab soemantong jeuet mantong jitimpa lé naseb nyang sial. 12 Manusia hana geuteupeue pajan masa jih sampoe. Lagée cicém nyang keunong taron dan uengkot nyang keunong lam jeu, meunan kheueh manusia jitimpa lé bala nibak saát nyang hana teuduga. 13 Seulanjut jihnyoe na saboh cuntoh nyang teupat pakriban ureuëng geuhareuga nibak hikeumat: 14 Na saboh banda ubit nyang peunduduek disinan hana padubna. Nibak siuroe na sidroe raja raya geujak heuntam banda nyan. Banda nyan laju geukeupong dan ka siab-siab keuneuk geudobrak bintéh kutanyan. 15 Di dalam bandanyan na tinggai sidroe ureuëng gasien nyang cukob bijaksana. Ureuëng gasien nyang bijaksananyan meuhase geupeuseulamat banda nyan. Teuma kareuna gobnyan gasien, jasa gobnyan laju jipeutuwoe dan hana meusidroe pih nyang na teuingat ubak gobnyan. 16 Jadi, beutôi kheueh peundapat ulôn bahwa hikeumat leubeh nibak teunaga. Bahpih meunan, hikeumat ureuëng gasien hana geupakö. Tutoe haba ureuëngnyan hana nyang geutem peurati. 17 Leubeh gét teudeungoe tutoe haba nyang teunang nibak sidroe ureuëng nyang meuiéleumé nibak padoe dumpék sidroe ureuëng nyang mat kuasa di teungoh-teungoh kawan ureuëng bangai. 18 Hikeumat leubeh meuguna nibak sinjata, teuma nila saboh titek habéh rusak susu saboh beulangong.

Peungkhotbah 10

1 Lé sabab bangke lalat hase jipeukhiéng saboh kaca minyéuk mangat bée, lé sabab bacut nyang mangai hase teupeugadôh hikeumat nyang manyang. 2 Ka sipatot jih meunyoe ureuëng áreh geupeubuet nyang jroh, dan ureuëng bangai jipeubuet nyang jeuhet. 3 Nyang bangai deuh teukalon nibak mandum grak grik jih. Dan ubak mandum ureuëng jipeuleumah keuhai bangai jihnyan. 4 Meunyoe gata geubeungéh lé nyang mat kuasa, bék kheueh gata lakée piôh keu gata meubuet. Bahpi salah gata nyan rayeuk, gata geupeumeuáh meunyoe teunang dan saba. 5 Na keujeuhetan laén nyang ulôn kalon lam donya, na kheueh buet meunyeleweng lé nyang mat kuasa. 6 Ureuëng bangai geubri jabatan nyang mulia, teuma di ureuëng meusyeuhu hana meuteumé sapeue. 7 Ka lheueh lôn kalon namiet-namiet jipasang guda di ureuëng bansawan geujak ngon gaki lagée namiet teuma. 8 Soe nyang kueh uruek, ureuëng nyan rhot lam uruek nyan; soe nyang tulak beuton teuma jikab lé uleue meubisa. 9 Soe nyang meubuet bak tambang batée, teuma meuantôk dan luka. Soe nyang plah kayée, rayeuk keumungken meuteumé cidra. 10 Meunyoe parang gata tumpôi dan hana gata asah, gata harôh meukeureuja deungon leubeh meususah payah. Peuguna kheueh akai seuhat gata, dan peuget kheueh reuncana leubeh ilée. 11 Meunyoe jikab lé uleue sigohlom teupeuseuiét ngon doá-doá, deungon nyan pawang uleue hanale meumakna. 12 Tutoe haba ureuëng bijaksana teupeujeuet jihnyan jihoreumat lé gob, teuma ureuëng bangai binasa lé sabab tutoe haba jihnyan keudroe. 13 Gobnyan jipeuphon ngon haba sulet mantong, óh keuneulheueh nibak nyan tutoe haba jih lagée ureuëng pungoe. 14 Beutôi, ureuëng bangai teuga that jipeugah haba. Uroe dudoe teusöm keu geutanyoe mandum. Hana nyang hase jiramai keujadian óh ka lheueh tanyoe hanale. 15 Teuma ureuëng bangai nyang hana jituho rot woe u rumoh jih, jihnyan jimeubuet brat that hana jipiôh-piôh teuma. 16 Ceulaka kheueh nanggroe nyang raja jih muda balia, dan ureuëng-ureuëng rayeuk nanggroe simalam beungoh meupesta pora. 17 Mubahgia kheueh nanggroe nyang raja jih meuwibawa, nyang ureuëng rayeuk nanggroe nyan jimakheun óh trok bak watée, hana galak mabök-mabök dan carông geujaga droe. 18 Bubông rumoh teuma tireh meunyoe hana teupeudab, dan keuneulheueh jih rumoh nyan lumpôk lé sabab teuh beu-o. 19 Pesta teupeujeuet gob jikém-kém, dan lé sabab anggô teupeujeuet gob riang geumbira. Teuma peureulée na péng keu teubayeue atra nyan. 20 Bék kheueh ta upat raja, bah pi lam até. Bék teuma ta upat ureuëng kaya, bahpi lam bilek teumpat éh droe. Mungken na saboh cicém jideungoe peue nyang gata kheun nyan, laju jijak peutrok ubak nyang gata upat nyan.

Peungkhotbah 11

1 Pula kheueh péng gata nibak useuha di luwa nanggroe. Pasti gata meuteumé untông óh singoh dudoe. 2 Pula kheueh modal gata nibak meubagoe bidang niaga; mita kheueh useuha beucukob le. Sabab manusia peureulée waspada, sigohlom musibah teuka meunimpa. 3 Ho mantong keu jih bak kayée nyan reubah, bak kayée nyang ka reubah nyan teutab teuéh nibak teumpatnyan. Meunyoe awan ka meusapat ié sampoe ka brat, teuma ujeuen pih jitoh u bumoe deungon teuga jih. 4 Soe nyang preh sampoe angén dan cuaca peungéuh sampoereuna, hana teuma geupula dan hana geupot hase jih disinan. 5 Po teu Allah nyang peugöt peue mantong nyang na, dan manusia hana geutuóh peuphom tindakan Gobnyan; meunan cit ureuëngnyan hana geutuóh peuphom keuhai udeb nyang barô didalam pruet ma. 6 Sipreuék kheueh bijéh gata bak watée beungoh dan bék kheueh neupiôh óh malam uroe. Sabab geutanyoe than ta teupeue sineupreuék nyang toh bijéh nyang timoh jroh. Barang kali bandua bohnyan jitimoh deungon sampoereuna. 7 Cahya mata uroe teupeujeuet gob sampoe bahgia; alangkah galakjih meunyoe meuteumé teunékmati. 8 Heundak kheueh gata meusyuko meunyoe gata meutamah umu. Teuma neuingat, bahpih gata treb neu udeb di ateueh bumoe nyoe, masa gata dialam mawöt leubeh treb lom teuma. Jadi, peue nyang keuneuk harab lom teuma? Banmandumnyan peucuma dan sia-sia. 9 Rasa dan nékmat kheueh masa muda gata, hai ureuëng muda! Meugeumbira kheueh seulagi gata mantong remaja. Peupeunoh kheueh peue mantong hasrat jiwa gata, dan neupeujak kheueh peue mantong nyang na teuniet lam até gata. Teuma neuingat, Po teu Allah nyang na didalam syeuruga, nyan kheueh nyang peusidang peue mantong nyang gata peubuet yoh masa gata mantong didalam donya. 10 Neu use kheueh khawate dan nyang susah nyang na didalam até gata, sabab masa muda gata bagaih that meulalu.

Peungkhotbah 12

1 Ingat kheueh ubak peuncebta gata seumantong gata muda, sigohlom sampoe ubak thon-thon nyang peunoh seungsara. Bak masanyan gata teuma neupeugah, "Udeb ulôn hana bahgia." 2 Meunyoe ka trok ubak saátnyan mata gata hana le trang, seuhingga maté kheueh sinar surya, buleuen ngon bintang. Awan nyang reudök ka jiba ujeuen, teutab na deungon gata sibagoe ancaman. 3 Jaroe gata yo meukot-kot dan hana le teubri peulindongan. Gaki gata nyang teugab teuma guyah han na teunaga. Gigoe gata hana le leungkab sabab ka teuloh sampoe than jeuet le neumomoh peunajoh. Mata gata kabur sampoe ka suram meunyoe neukeumalon. 4 Su nyang riôh ngon ramé nibak jalan raya teudeungoe bak geulinyueng gata lamkawan na deungon tan. Su musik ngon su kilang rab-rab hana teudeungoe. Gata hana jeuet neuéh sineunya. Deungon su kicoan cicém pih gata teujaga nibak teumpat éh. 5 Gata teumakot neuteungoh nibak teumpat nyang manyang dan harôh neujak bacut-bacut. Ôk nyang na di ateueh ulée gata ka putéh dan gaki gata nyang na gata hua watée neubot langkah. Teuma gadôh kheueh peue mantong hajat dan keuinginan. Geutanyoe tajak u teumpat tinggai geutanyoe nyang paleng akhé, ureuëng ramé meuseudeh dan geumeuratok ngon geumo ba-e sipanyang jalan raya. 6 Ranté pirak teuma putôh meukhan-khan; panyöt méuh srot laju beukah; talo tima putôh dan rusak; guci ié hanco meutabu beba. 7 Tuboh geutanyoe teuma geuwoe keula-i, jeuet keu abée di ateueh bumoe. Nafáh keu udeban geutanyoe teuma jiwo ubak Po teu Allah. Gobnyan kheueh nyang bri sibagoe anugrah. 8 Kheun ulôn, meumang banmandum nyan sia-sia, banmandum nyan peucuma, hana areuti bahpih sikada. 9 Sang seumike nyan áreh dan bijaksana. Sabab nyan kheueh geupeurunoe ubak umat peue mantong iéleumé gobnyan. Jai nyang geumeurunoe laju gobnyan geu ujoe keubeunaran iéleumé nyan. 10 Gobnyan geu useuha beumeuteumé tutoe haba nyang teuhibur, dan tutoe haba nyang geutuléh nyan na kheueh jujoe. 11 Tutoe haba ureuëng áreh nyan na kheueh lagée tungkat tajam sidroe ureuëng meurabe, tungkat nyang geungui keu geulindong dumna bubiri gobnyan. Kumpolan amsal dan naseuhat, lagée labang nyang meukeumat óh kong. Banmandum nyan na kheueh atra nyang geubri lé Po teu Allah teuma, nyang rabe geutanyoe nyang than na dua. 12 Aneuëk ulôn, keuhai saboh hai gata harôh waspada. Teumuléh kitab hantom na akhé, dan meunyoe lumpah that le meuruno jipeuhék jiwa ngon raga geutanyoe. 13 Óh ka lheueh banmandum nyan ulôn peutimang, nyoe kheueh keusimpulan nyang na ulôn teumé. Teumakot kheueh ubak Po teu Allah dan taát kheueh ubak peue nyang geupeurintah, sabab keu nyan kheueh manusia nyoe geucebta lé Gobnyan. 14 Po teu Allah teuma geupeusidang peue mantong nyang geutanyoe peubuet; bah kheueh nyan nyang jroh meunan cit deungon nyang brok, bahkan nyang teusöm pih teuma.

Seulaweut Agong 1

1 Seulaweut Agong nyang geucebta lé Nabi Sulaiman. Inong 2 Neucöm kheueh ulôn deungon bibi gata; cinta droeneueh leubeh nékmat nibak anggô! 3 Droeneueh haröm meubhée meuhalak, nan droeneueh lagée minyéuk mangat bhée nyang ro meuruwah; sabab nyan kheueh dumna aneuëk dara jigalak ubak droeneueh! 4 Beurijang kheueh geutanyoe, ya raja ulôn, neuba kheueh ulôn udalam kama droeneueh. Kareuna droeneueh kamoe banmandum meusukaria, dan kamoe pujoe cinta droeneueh leubeh nibak anggô; pantaih kheueh dumna aneuëk dara jicinta ubak droeneueh! 5 Bah kheueh itam, teuma ulôn nyoe ceudah, hai putroe-putroe Yerusalem; itam lagée khimah-khimah Kedar, teuma lagak ngon ceudah lagée tirée-tirée nyang na di meuligoe Nabi Sulaiman! 6 Bék neukalon nibak kulet ulôn nyang itam, sabab ulôn tutong deungon cahya mata uroe. Aduen-aduen ulôn geubeungéh nibak ulôn, dan geuyue ulôn jak meubuet nibak lampôh anggô; ulôn ka hana le watée keu lôn useuha droe keudroe ulôn. 7 Neupeugah kheueh, hai geunaséh ulôn, dipat droeneueh neurabe dumna domba-domba gata, dipat neupeuéh jihnyan óh watée uroe ka seupôt? Masakan ulôn lagée ureuëng peungeumbara lamkawan kawan bubiri atawa domba rakan-rakan gata? Agam 8 Ék kheueh gata hana neutupat teumpat tinggai jih, hai inong ceudah lamkawan ureuëng inong nyang laén? Neuseutôt laju bakat bubiri domba, dan neurabe kheueh dumna kaméng-kaméng gata nyang tô deungon khimah ureuëng meurabe. 9 Geunaséh ulôn, gata lagée guda inong nyang jitarék geuritan raja nanggroe Meusé. 10 Mieng gata lagak deungon piasan nyang teupeungui, takue gata indah watée teupeungui talo takue peumata. 11 Kamoe peugöt piasan méuh keu gata, deungon manek-manek pirak disök disinan. Inong 12 Teungoh raja lôn mantong nibak teumpat éh, haröm bhée nyang mangat lazat lagoena. 13 Geunaséh ulôn na lagée mur mangat bhée jih, watée geupeureubah droe ateueh dada lôn. 14 Geunaséh ulôn siumpama sibak-bak bungöng gaca di lampôh-lampôh anggô En-Gedi. Agam 15 Gata gagah ngon jeulita, hai geunaséh ulôn nyang maméh, luwa biasa gata ceudah nibak mata lôn! Mata gata lagée cicém mirah pati. Inong 16 Droeneueh gagah, sayang, sunggoh that gagah droeneueh nibak mata lôn! Teu éh-éh geutanyoe ateueh naleueng nyang ijo. 17 Bak kayée aras jeuet keutaméh rumoh geutanyoe, dan bak kayée ceumara jeuet keu langét-langét jih.

Seulaweut Agong 2

1 Ulôn nyoe na kheueh bungöng mawar nibak Saron, bungöng bakong di leumbah-leumbah. Agam 2 Lagée bungöng bakong nyang na di teungoh tamah meuduro, meunan kheueh umpama geunaséh ulôn nyang na di teungoh putroe-putroe. Inong 3 Lagée bak apel nyang na di teungoh bak-bak kayée di gle, meunan kheueh geunaséh ulôn nyang na di teungoh-teungoh ureuëng agam. Ulôn galak lôn meuceu dimiyueb nyan, dan bôh-bôh jihnyan sunggoh maméh that rasa. 4 Dimiyuebnyan ulôn jak u ruweueng pesta, pandangan gobnyan ubak lôn peunoh deungon rasa cinta. 5 Neupeuteuga kheueh ulôn deungon meulisan bôh anggô, dan peuseugar kheueh ulôn deungon bôh apel, sabab ulôn sakét asmara. 6 Jaroe wie gobnyan geupeusadeu nibak ulée lôn, dan jaroe uneuen gobnyan geuwa nibak lôn. 7 Meujanji kheueh, hai putroe-putroe Yerusalem, deumi rusa-rusa nyang na di padang beulantara, bahwa gata hana tapeukaru cinta, sampoe jihnyan teupeupuih teuma. Inong 8 Deungoe! Geunaséh ulôn teuka! Jihnyan lagée aneuëk rusa. Jigrob-grob di gunong-gunong, jilumpat-lumpat di bukét-bukét. Kalon, disiblah bintéh jihnyan jidong, deungon mata jih seso jimita; jimeuluem nibak kisi-kisi peuradeun. 10 Deungoe, geunaséh ulôn geupeugah haba ubak ulôn. Agam Teuka kheueh hai maméh ulôn, jak kheueh keunoe hai jeulita lôn! 11 Kalon, musém leupie ngon sijuek ka meulalu, dan musém ujeuen pih ka hanale. 12 Dilampôh sigala bungöng pih ka keumang; musém keumeukoh pih ka teuka; su leuek kutru ka teudeungoe bak tanoh geutanyoe. 13 Bak ara ka jipeuphon meubôh, dan bak anggô pih ka meubungöng deungon bhée nyang meuhubo. Teuka kheueh maméh ulôn, jak kheueh keunoe jeulita lôn. 14 Hai cicém mirah pati lôn nyang na di luengkiek-luengkiek batée, nibak teumpat musöm di barieh-barieh batée nyang meucula, bah kheueh ulôn ngieng rupa gata, dan lôn deungoe su gata, sabab rupa gata ceudah, su gata nyang meureudu. 15 Jak drob kheueh rubah-rubah nyan, rubah-rubah ubit nyang jipeurusak lampôh anggô, sabab lampôh anggô kamoe teungoh meukeumang. Inong 16 Geunaséh ulôn atra ulôn, dan ulôn na kheueh atra gobnyan, gobnyan nyang rabe dumna bubiri dan domba-domba geuh keudroe di teungoh-teungoh bungöng bakong 17 sampoe dipöt angén beungoh nyang peugadôh seupôt bak watée malam. Neugisa kheueh geunaséh ulôn, lagée rusa, lagée aneuëk rusa nyang na di peugunongan Beter.

Seulaweut Agong 3

1 Malam-malam lam peuratah teumpat éh lôn, dalam lumpo ulôn mita geunaséh lôn; ulôn mita gobnyan, teuma sia-sia. 2 Ulôn keuneuk beudôh dan jak wét-wét lam banda, ulôn tamong bak mandum jalan dan jurong-jurong jih. Ulôn keuneuk jakmita jantong até lôn; ulôn mita gobnyan, teuma sia-sia. 3 Ulôn meurumpok deungon ureuëng nyang teungoh meurondo dalam banda, laju lôn tanyoeng, "Peu kheueh na neungieng jantong até lôn?" 4 Ban mantong ulôn tinggai awaknyan, meurumpok ngon jantong até lôn. Laju ulôn mat gobnyan, dan han lôn peuleueh le sampoe lôn ba gobnyan u rumoh ma lôn, u bilek ureuëng nyang peulahé ulôn. 5 Meujanji kheueh, hai putroe-putroe Yerusalem, deumi rusa-rusa nyang na didalam padang, bahwa gata hana teuma neupeukaru cinta, sampoe gobnyan geupeupuih teuma. Inong 6 Peu kheueh nyan nyang teuka nibak padang pasi, lagée asab nyang meugumpai? Mangat bhée jih lagée bhée mur dan keumeunyan, dan beudak-beudak mangat bhée nibak ureuëng meukat. 7 Ngieng, nyan tandu Nabi Sulaiman, jikeulileng lé namploh droe ureuëng nyang teuga-teuga lom peukasa, ureuëng-ureuëng peukasa nibak Israel, 8 nyang ka meupeungalaman di mideuen prang. Awaknyan banmandum na geuba peudeueng nyang meugantung nibak keuieng siab geuhadab jiseurang légob bak watée malam. 9 Nabi Sulaiman geupeugöt keu droe gobnyan saboh tandu, nibak kayée nyang paleng meumutu. 10 Taméh jih teupeugöt nibak pirak, teumpat meusadeu jih teupeugöt teuma nibak méuh. Teumpat duek gobnyan warna jih ungu, teucöb sulam deungon galak até lé putroe-putroe Yerusalem. 11 Teubiet kheueh, hai putroe-putroe Sion, jak ngieng kheueh Raja Nabi Sulaiman deungon mahkota nyang geupeungui lé ma droe gobnyan, bak uroe gobnyan meukawen, nibak uroe gobnyan meusukaria.

Seulaweut Agong 4

1 Gata ceudah jeulita, maméh ulôn, sunggoh that, gata ceudah jeulita. Mata gata nyang leumah di balék jilbab lagée mata cicém mirah pati; ôk lagée di ateueh ulée lagée kawan kaméng nyang teungoh tron nibak bukét-bukét Gilead. 2 Gigo gata putéh lagée kawan bubiri nyang ban teucuko dan teupeumanö; meupasang-pasang lagée aneuëk-aneuëk bubiri meukeumbeu, musaboh pih hana nyang gadôh. 3 Bibi gata lagée sikrek talo pita mirah, dan lumpah rancak babah gata. Mieng gata lagée bôh geulima nyang teuprah, teusöm gét that di balék jilbab gata. 4 Takue gata lagée meunara Nabi Daud, nyang teupeugöt keu teumpat simpan sinjata. Talo takue gata saban that lagée siribée peurisai, gada para pahlawan banmandum nyang na. 5 Bôh mom gata lagée dua bôh aneuëk rusa, aneuëk keumbeu rusa nyang teungoh rot naleueng lamkawan bungöng-bungöng bakong. 6 Meuhéut that ulôn keuneuk jak ubak gunong mur, nibak bukét keumeunyan, sampoe jiyueb angén seuboh, nyang jipeusampôh seupôt watée malam. 7 Gata ceudah lumpah na, maméh ulôn, hana nyang teucila nibak gata. 8 Jak geutanyoe tatron nibak Libanon, dara barô lôn, jak geutanyoe tatron nibak Libanon. Tron kheueh nibak pucak Amana, nibak pucak Senir dan Hermon, teumpat tinggai rimueng tutul dan singa. 9 Gata neutawan até ulôn, adek lôn sayang, dara barô bang, gata neutawan até lôn deungon keunalon mata gata, deungon peumata indah nyang na bak talo takue gata. 10 Padubna nékmat cinta gata, wahai adek lôn, dara barô bang, jiôh leubeh nékmat nibak ié anggô. Minyéuk gata meubhée meuhayak, leubeh mangat bhée nibak meubagoe rupa reumpah-reumpah nyang na. 11 Maméh that tutoe haba gata, dara barô lôn, lagée maméh meulisan murni dan susu. Peukayan gata meubhée haröm lagée Gunong Libanon. 12 Geunaséh ulôn na kheueh lampôh nyang meupageu timbok, lampôh meutimbok, dan mata ié gunci. 13 Disinan na jitimoh bak-bak kayée geulima, deungon bôh-bôh jih nyang paleng leuzat. Bungöng gaca dan bungöng narwastu, 14 narwastu, kunyét, kayée maméh dan teubée, deungon meubagoe rupa bak keumeunyan. Mur dan gaharu, deungon meubagoe rupa reumpah nyang ka teupiléh. 15 Mata ié nyang nibak lampôh lôn jipeuhayon ié nyang udeb nyang ji ile nibak Libanon! Inong 16 Beudôh kheueh, hai angén utara, bapot kheueh, hai angén seulatan! Neupot kheueh nibak lampôh lôn, mangat bhée jih nyang mangat nyan jipo meuhayak. Seumoga geunaséh ulôn geujak u lampôh gobnyan, dan geupajoh bôh-bôh kayée nyang leuzat.

Seulaweut Agong 5

1 Ulôn kujak u lampôh lôn, adoe teusayang, dara barô lôn, ulôn gumpôi mur dan reumpah-reumpah lôn; ulôn makheun uempueng unö dan meulisan lôn, ulôn jieb susu dan ié anggô lôn. Ureuëng-ureuëng inong Makheun dan jieb kheueh ié, hai rakan-rakan lôn, neujieb kheueh sampoe án mabök asmara. Inong 2 Ulôn teungéut, teuma até ulôn teutab meujaga. Deungoe kheueh geunaséh ulôn jikeutok pintoe. Agam Peuhah kheueh pintoe, adoe ulôn boh até aduen, mirah pati lôn, pujaan até lôn; ulée lôn basah kareuna keunong iémbon, dan ôk lôn ka peunoh deungon titek-titek iémbon malam. Inong 3 Bajée ulôn ka lheueh ulôn sut; peu kheueh bajée nyan lôn sök lom? Gaki ulôn ka lheueh ulôn rhah, peu kheueh lôn peukuto lom? 4 Meugám-gám yo até lôn kareuna geunaséh ulôn geureugam sinumpang pintoe. 5 Teuma teubeudôh kheueh ulôn keuneuk peuhah pintoe keu geunaséh lôn. Mur ka tijoh nibak jaroe dan ruweueng-ruweueng jaroe lôn, sampoe ánbasah teumpat mumat bak gunci pintoe. 6 Ulôn peuhah pintoe keu geunaséh lôn, teuma gobnyan ka geugisa dan geujak keulai. Ulôn lumpah that meucen ubak su gobnyan; lôn mita gobnyan, teuma sia-sia. Ulôn hôi nan gobnyan, teuma gobnyan teutab hana geuseuôt. 7 Ulôn jiteumé lé ureuëng nyang teungoh meurondo dalam banda; laju ulôn jipôh lé awaknyan sampoe ulôn luka, ija seulendang lôn jicok lé awaknyan deungon paksa. 8 Meujanji kheueh, hai putroe-putroe Yerusalem, meunyoe gata meurumpok deungon geunaséh ulôn, neupeugah kheueh ubak gobnyan, bahwa ulôn keunong peunyakét cinta. Ureuëng-ureuëng inong 9 Peu kheueh geunaséh gata meuleubeh nibak geunaséh-geunaséh nyang laén, hai dara maméh nyang paleng jeulita? Peu kheueh geunaséh gata meuleubeh nibak geunaséh-geunaséh nyang laén, seuhingga droeneueh neuyue nibak kamoe meujanji? Inong 10 Geunaséh ulôn gagah dan tampan, leubeh lagak nibak ureuëng nyang siploh ribée droe. 11 Ulée gobnyan lagée méuh, méuh nyang aseuli, ôk nibak ulée gobnyan patah manyang dan itam, saban lagée itam cicém gagak. 12 Mata gobnyan lagée mata mirah pati nibak mata ié, cicém mirah pati nyang manou deungon ié susu, teuduek dibinéh kulam. 13 Mieng gobnyan lagée lampôh reumpah nyang paleng mangat bhée, bibi gobnyan lagée bungöng bakong nyang ro meutrab-trab mur aseuli. 14 Jaroe gobnyan gagah, meu euncien méuh deungon peumata, tuboh gobnyan lagée batée gadeng nyang meutatah batée nilam. 15 Gaki gobnyan lagée taméh-taméh marmer nyang putéh, deungon sandi méuh nyang murni. Potrom badan gobnyan lagak lagée gunong geumunong nyang na di Libanon, dan anggon jih sa lagée bak kayée aras. 16 Lumpah that maméh tutoe haba gobnyan, peue mantong nyang na nibak gobnyan sangat meunarek. Meunan kheueh geunaséh dan sahabat ulôn, hai putroe-putroe Yerusalem!

Seulaweut Agong 6

1 Ho geunaséh até gata jijak, hei dara-dara jroh rupa? Ho geunaséh até gata jijak, mangat kamoe meusajan-sajan jak mita teuma? Inong 2 Geunaséh ulôn ka geujak u lampôh gobnyan, nibak lampôh reumpah-reumpah keu geujak rabe domba-domba u lampôh, dan geupot bungöng-bungöng bakong. 3 Ulôn milék geunaséh lôn, dan gobnyan na kheueh milék ulôn, gobnyan geurabe domba-domba di teungoh-teungoh bungöng bakong. Agam 4 Gata lagak, hai maméh ulôn, lagée lagak banda Yerusalem, dan lagée ceudah banda Tirzah. Gata sunggoh teupeusona, lagée kawöm sipa-i deungon bupanji nyang na geuba sureuta. 5 Paleng kheueh wajah gata nibak ulôn, sabab pandangan gata nyan sunggoh bingong nibak ulôn. Ôk di ateueh ulée gata lagée saboh kawan kaméng nyang teungoh tron nibak bukét-bukét Gilead. 6 Gigo gata putéh bak lagée kawan domba nyang ban teucuko dan teupeumanö; meujudo-judo lagée aneuëk-aneuëk domba keumbeu, meusaboh pih hana nyang gadôh. 7 Bibi gata lagée bôh geulima teuprah dua, nyang teusöm di balék jilbab gata. 8 Bahpih na namploh droe peureumaisuri, dan lapan ploh droe gundek, dan aneuëk-aneuëk dara nyang ramé lumpah na, 9 teuma saboh mantong mirah pati lôn, idaman lôn, aneuëk tunggai nyang paleng geusayang lé ma. Aneuëk-aneuëk dara geukalon dan geupujo gobnyan, dan dumna peureumaisuri dan gundek kagum ubak gobnyan. 10 Soe kheueh geuhnyan nyang teuka lagée mata uroe beungoh nyang mantong meureukah, gagah lagée buleuen peunoh, ceurah lagée sang surya? Geuhnyan sunggoh meupeusona, lagée kawan sipa-i deungon bupanji nyang geuba sireuta. 11 Ulôn kujak u lampôh keunari, lôn jak ngieng bungöng-bungöng keumang nyang na di miyueb leumbah; aléh bak anggô ka jimeupucok, dan bak geulima ka meubungöng. 12 Ulôn lumpah that rindu nibak cinta gata, saban lagée lôn rindu keuneuk ék nibak geuritan prang meusajan deungon para bansawan. Ureuëng-ureuëng inong 13 Meunari ngon meulikak kheueh, hai aneuëk dara Sulam, meuputa-puta kheueh, mangat kamoe kagum nibak gata. Inong Keupeue gata keuneuk pandang nibak ulôn, seudangkan ulôn na lôn meulikak di teungoh baresan ureuëng meunonton?

Seulaweut Agong 7

1 O aneuëk dara nyang anggon, maméh lumpah na gaki gata watée neujak deungon seulobnyan. Likok pha gata lagée saboh piasan, meuneuget sidroe seuniman. 2 Pusar gata lagée cawan nyang bulat nyang hantom na kureueng meubacutpih anggô meujampu. Pruet gata lagée aneuk gandom nyang meutamon, jikeulileng lé bungöng-bungöng bakong. 3 Boh mom gata lagée dua boh aneuëk rusa, rusa nyang meukeumbeu dua. 4 Takue gata lagée meunara gadeng. Mata gata lagée kulam-kulam nyang na di Hesybon, tô nibak babah pintoe geureubang Batrabim. Boh idong gata lagée meunara di Gunong Libanon, nyang meuhadab ubak banda Damsyik. 5 Ulée gata lagée bukét Karmel; ôk gata nyang teukeupang dua lagée leumbayong, cukob teupeusona sampoe ubak sidroe raja. 6 Sunggoh gagah jeulita, gata, nyang teucinta lamkawan nyang jiharök. 7 Tuboh gata anggon lagée bak keuruma, boh mom gata na kheueh gugusan nibak bohjihnyan. 8 Meuhéut that ulôn keuneuk éuk nibak kayée keurumanyan, dan laju meuteumé dumna boh-boh jih. Kira jih boh mom gata lagée gugusan boh anggô, nafáh gata mangat lagée bhée boh apel, 9 babah gata maméh lagée maméh ié anggô! Inong Bah kheueh anggô nyan ji ile ubak geunaséh lôn, deungon hana putôh-putôh jih; dan teupeubeudôh cinta asmara, meunan nibak ureuëng-ureuëng nyang teungoh éh. 10 Ulôn milék geunaséh ulôn, gobnyan meuharab ulôn. 11 Jak geutanyoe tajak u padang, hai geunaséh lôn, dan ta meudöm diladang di teungoh-teungoh bak bungöng gaca. 12 Jak geutanyoe ban beungoh tajak u lampôh, dan ta kalon peu kheueh bak anggô ka meupucôk, dan bungöng jih ka keumang; peu kheueh bak geulima ka meubungöng. Disinan teuma lôn bri cinta ulôn ubak droeneueh. 13 Bak arak mangat bhée lagée bhée jih, nibak binéh pintoe geutanyoe na meubagoe boh nyang leuzat-leuzat, nyang ka treb teupot dan nyang barô; atranyan banmandum ulôn keubah keu gata, geunaséh ulôn.

Seulaweut Agong 8

1 Ah, seukira jih gata syedara kandong lôn, nyang peureunah neumom nibak ma ulôn, pasti droeneueh ulôn cöm meunyoe meurumpok nibak jalan raya, hana ureuëng nyang hina ulôn. 2 Droeneueh teuma lônba u rumoh ma ulôn, mangat droeneueh jeuet neupeuruno ulôn. Droeneueh teuma ulôn bri neujieb ié anggô mangat bhée, dan ié bôh geulima. 3 Jaroe wie droeneueh neutumpang ulôn, dan jaroe uneuen gata neupaluek ulôn. 4 Meujanji kheueh, hai putroe-putroe Yerusalem, bahwa gata hana neupeukaru cinta, sampoe jihnyan teupeupueh teuma. Ureuëng-ureuëng inong 5 Soe kheueh nyan nyang teuka nibak padang pasi, jimeusadeu nibak geunaséh jih? Inong Lôn peugo gata di miyueb bak apel, teumpat gata teukandong dan teupeulahé. 6 Peujeuet kheueh ulôn keu bôh até gata, dan bék neupaluek ureuëng laén seulaén ulôn; kareuna cintanyan saban ngon teunaga mawöt, dan nafeusu meukuasa lagée keumatéan. Hu jih lagée apui hu nyang hu meuhüb-hülub wa biasa. 7 Ié nyang le hana hase jipeulon cinta, dan ié raya hana hase jipeuhanyöt atranyan teuma. Meunyoe sidroe-droe ureuëng geubri banmandum hareuta gobnyan keu geubloe cinta, pasti peunghinaan nyang geuteumé teuma. Syedara-syedara agam ureuëng inong 8 Bak kamoe na sidroe adoe nyang inong nyang mantong ubit bôh mom nibak dada jih. Peue nyang harôh kamoe peubuet keu adoenyan meunyoe na ureuëng teuka geujak seulangke adoe kamoe nyan? 9 Seu andai jihnyan na kheueh saboh beuton timbok, teuma kamoe peudong saboh meunara pirak di ateueh nyan. Seu andai jihnyan saboh gapura, teuma kamoe böh palang deungon kayée ceumara. Inong 10 Ulôn nyoe na kheueh saboh bintéh timbok, dan bôh mom bak dada ulôn nyang jeuet keumeunara. Geunaséh ulôn geuteupeue bahwa nibak gobnyan kheueh ulôn mubahgia. Agam 11 Nabi Sulaiman na lampôh anggô di Baal-Hamon; lampôh geuhnyan geuseurah ubak ureuëng nyang jaga. Maséng-maséng awaknyan geubayeue deungon siribée péng keu hasenyan, 12 dan meuteumé dua reutôh keu jeureh payah gobnyan. Bah kheueh péng nyan keu gata, Nabi Sulaiman, dan keu ureuëng nyang jaga nibak lampôh gata. Teuma lampôh anggô lôn, na kheueh atralôn keudroe, na dikeue ulôn. 13 Hai, ureuëng keumiet lampôh, rakan-rakan jikeuneuk deungoe su gata; peudeungoe kheueh nyan ubak ulôn! Inong 14 Geunaséh ulôn, neuteuka kheueh lagée rusa, lagée aneuëk rusa di peugunongan Beter.

Nabi Yesaya 1

1 Kitab nyoe meuasoe peusan-peusan keuhai Yehuda dan Yerusalem nyang geupeugah lé Po teu Allah ubak Nabi Yesaya, aneuëk Amos, bak watée Uzia, Yotam, Ahas dan Hizkia geumat peurintah di Yehuda. 2 Deungoe kheueh hai langét, peurati kheueh hai bumoe! TUHAN meufeureuman, "Aneuëk-aneuëk nyang ka Ulôn peulara jibeurontak teuhadab Ulôn. 3 Leumô jituri nibak ureuëng po jih, keuleudée jituri ubak teumpat peunajoh nyang ka geuseudia keujih lé amphon droe jih. Teuma umat Ulôn Israel hana jituri; awaknyan hana jimuphom." 4 Cilaka kheueh gata bansa nyang meudesya, ureuëng-ureuëng nyang beujat dan jeuhet! Gata ka meusireuk lé desya-desya gata. Gata ka tatulak TUHAN dan tapeulikot Po teu Allah Nyang Mahasuci nyang harôh gata seumah. 5 Pakon gata hana tapiôh bak neumeutuleh lageh? Peu kheueh gatatem teuhuköm leubeh brat lom? Ulée gata ka peunoh deungon cabok-cabok, até dan pikeran gata sakét. 6 Phon bak ulée sampoe trok ubak tapak gaki hana nyang seuhat nibak tuboh gata. Gata ka peunoh deungon keumong-keumong, luhok nyang meujeuen-jeuen dan cabok-cabok nyang luka. Luka-luka gatanyan gohlom teupeugléh atawa teubalot, meunan cit hana teuma teupeu ubat deungon minyéuk. 7 Nanggroe gata ka teupeubinasa; banda-banda nyang na di nanggroe gata ka habéh tutông kareuna teutot. Dikeue mata gata ureuëng aséng jicok tanoh gata dan jipeuhanco peue-peue nyang na. 8 Yerusalem mantong nyang tinggai, teuma seubagoe banda nyang ka teukeubok dan hana meudaya, lagée jambo di lampôh anggô atawa gubuk di lampôh timon. 9 Seuandai jih TUHAN Nyang Mahakuasa hana geupeukeunong meupadub droe nibak geutanyoe, geutanyoe banmandum ka habéh binasa, lagée Sodom dan Gomora. 10 Yerusalem bubena peumimpén dan bansa gata ka jeuet lagée ureuëng Sodom dan Gomora. Deungoe kheueh peue nyang geufeureuman lé TUHAN ubak gata; peurati kheueh peue nyang geupeuruno lé Po teu Allah geutanyoe. 11 TUHAN meufeureuman, "Neusangka Ulôn nyoe galak that ubak banmandum keureubeuen nyang hana putôh-putôh tapeuseumah keu Ulôn? Ulôn bosan deungon bubiri-bubiri keureubeuen teutot gata dan gapah aneuëk leumô gata. Darah leumô agam, bubiri dan kaméng hana Lôn galak. 12 Soe nyang yue gata taba banmandum peuseumahan nyan bak watée gata tateuka meuiébadat ubak Ulôn? Soe teuma nyang yue gata meuwot-wot di Baét Suci Lôn? 13 Peucuma mantong taba peuseumahan gata nyan. Ulôn muak deungon bhée jih. Ulôn banci dan hán ék Lônteun Lôn kalon gata peuna uroe raya Buleuen Barô, uroe-uroe Sabat dan uroe-uroe raya meunan cit nibak rapat-rapat keuagamaan. Banmandum nyan gata noda deungon desya-desya gata dan ka jeuet keubeuban nibak Ulôn; Ulôn ka hék that Ulôn tanggong nyan. 15 Meunyoe gata tabeuôt jaroe gata keu gata meudoá, doá gata nyan hana Lôntem deungoe, sabab deungon jaroe gatanyan gata ka le that tapoh maté gob. 16 Tajak rhah kheueh droe gata nyan sampoe gleh. Tapeupiôh banmandum buet nyang jeuhet nyang gata peubuet nyan. Dan békle tapeubuet jeuhet, 17 meurunoe kheueh tapeubuet nyang jroh. Peudong kheueh keuadelan dan peugleh kheueh peunindasan; tabri kheueh ubak aneuëk yatém ngon meuntui hak droe jih dan tabila kheueh peukara inong balée." 18 TUHAN meufeureuman, "Jak tapeubéeréeh peukara nyoe. Bahpi gata mirah leumbayong sabab desya-desya gata, gata teuma Ulôn rhah putéh gleh lagée gapeueh. Bahpi desya-desya gata le dan brat, gata teuma Lôn peu amphon deungon peunoh. 19 Meunyoe gata tatem taát ubak Ulôn, gata teuma tarasa banmandum nyang jroh-jroh nyang na jipeuhase lé nanggroe gata. 20 Teuma meunyoe gata talawan Ulôn, gata maté dimideuen prang. Ulôn, TUHAN, ka Lôn peugah haba." 21 Banda nyang yoh masa ilée seutia, bak saát nyoe ka lagée inong jeuhet! Ilée banmandum peunduduek jih ade dan jujoe, teuma bak saát nyoe ka jiduek lé tukang-tukang peumaté gob. 22 Yerusalem, masa ilée gata lagée pirak, teuma bak saát nyoe ka hana meuyuem le. Masa ilée gata lagée anggô nyang lazat, teuma saát nyoe na kheueh ié nyang le. 23 Bubena peumimpén gata peubeurontak dan gaki jaroe pancuri; awaknyan galak jiteurimong hadiah dan péng sogok. Awaknyan hanajitem bila yatém ngon meuntui di kantô peungadelan; hánjitem deungoe inong-inong balée nyang jak meungadu. 24 Sabab nyan TUHAN Nyang Mahakuasa, Po teu Allah Israel meufeureuman: "Hai, musoh-musoh Lôn, Ulôn teuma Lôn balah dam ubak gata, sampoe hana tapeususah le Ulôn. 25 Ulôn cok tindakan ateueh gata. Lagée ureuëng nyang asah logam, gata Ulôn asah; peue mantong nyang kuto teuma Ulôn tiek nyang na meuleukek nibak gata. 26 Keu gata Ulôn joklom hakém-hakém dan peunaseuhat lagée yoh masa ilée. Dan Yerusalem geuboh nan banda nyang ade dan seutia." 27 TUHAN ade, dan Gobnyan geupeuseulamat Yerusalem dan ureuëng-ureuëng nyang meunyeusai. 28 Teuma ureuëng-ureuëng nyang meudesya nyang jibeurontak teuhadab Gobnyan geupeubinasa, dan banmandum nyang tinggai Gobnyan geupeumuseunah. 29 Awaknyan meuteumé malée sabab jiseumah bak-bak kayée dan jipeukhusos lampôh-lampôh keu dewa-dewa. 30 Awaknyan teuma jeuet lagée bak kayée raya nyang layée ôn, dan lagée lampôh nyang hana ile ié. 31 Lagée jeurami tutông nyang keunong meuek bungöng apui, meunan cit deungon ureuëng-ureuëng meukuasa teuma geupeubinasa lé buet-buet jeuhet awaknyan keudroe, dan hana nyang hase jipeupiôh keuhancoran nyan.

Nabi Yesaya 2

1 Nyoe kheueh peusan Po teu Allah keuhai Yehuda dan Yerusalem nyang geuteurimong lé Nabi Yesaya bin Amos: 2 Bak uroe-uroe nyang teuma teuka bukét teumpat Baét TUHAN manyang meulambong dan teudong cot di ateueh gunong-gunong dan bukét-bukét. Banmandum bansa meuron-ron jijak keunan, 3 awaknyan banmandum jipeugah, "Jak geutanyoe taék u Bukét TUHAN, u baét Allah Israel. Gobnyan teuma geupeurunoe keu geutanyoe peue nyang harôh geutanyoe peubuet. Geutanyoe ta seutôt jalan Gobnyan, sabab ajaran TUHAN teuka nibak Yerusalem, Gobnyan geumeututoe nibak Sion." 4 Gobnyan geupeuhakém lamkawan bansa-bansa, dan geupeuputôh peukara lamkawan sukée-sukée bansa. langai, dan kapak geupeujeuet keu sikin meugunteng. Bansa-bansa hana le saleng jipeu phon seurang, dan hana teuma meusiab-siab keuneuk jak muprang. 5 Hai, keuturonan Nabi Yakub, jak geutanyoe tajak didalam trang TUHAN! 6 Ya Allah, Droeneueh ka neutinggai umat Droeneueh, keuturonan Nabi Yakub! Sabab dipat mantong di nanggroe nyoe ureuëng laén jingui iéleumé gaéb nyang meuasai di timu dan di Filistin. Bubena ureuëng-ureuëng ka jicuntoh adat istiadat ureuëng aséng. 7 Nanggroe jihnyan peunoh deungon pirak dan méuh, dan hareuta beunda gobnyan hana teukira. Guda gobnyan lumpah that jai, dan geuritan gobnyan hana teu itong jeumeulah jih. 8 Jeueb-jeueb sago na patong beurala, dan awaknyan jiseumah patong-patong nyang jipeugét keudroe. 9 Soe mantong ureuëng teuma geuhina dan geupeumiyueb yuem droe ureuëng nyan. Bék neupeu amphon awaknyan, ya TUHAN! 10 Awaknyan teuma jitamong u dalam guha-guha di bukét kareueng, atawa jikueh uruek didalam tanoh mangat teuhinda nibak meureuka TUHAN dan nibak kuasa Gobnyan nyang mulia. 11 Ureuëng sombong geupeuhina dan ureuëng angkoh geupeutundok. Teuma TUHAN keudroe nyang geupeu agong. 12 Nibak uroenyan TUHAN Nyang Mahakuasa teuma geupeuhina banmandum ureuëng nyang peumanyang droe dan geuhuköm ureuëng nyang sombong meunan cit deungon nyang angkuh. 13 Bak-bak kayée ceumara nyang manyang di Libanon dan banmandum bak kayée raya di Basan geupeubinasa. 14 Gunong-gunong dan bukét-bukét nyang meusyeuhu geupeurata ngon tanoh. 15 Meunara-meunara nyang manyang dan bintéh-bintéh beuton kuta geureuloh rata. 16 Kapai-kapai nyang paleng raya dan paleng lagak geupeukaram. 17 Ureuëng sombong teuma geupeuhina, dan ureuëng angkoh geupeutundok teuma. Teuma TUHAN sidroe nyang teupeu mulia. 18 Beurala-beurala teuma gadôh sapan sapa. 19 Bak watée TUHAN geubeudôh dan geuyok-yok bumoe, ureuëng ramé teuma jitamong u dalam guha-guha di bukét-bukét kareueng atawa jijak kueh uruek di dalam tanoh mangat teuhinda nibak meureuka TUHAN dan nibak kuasa Gobnyan nyang mulia. Meunyoe uroe nyan ka trok jiteuka, beurala-beurala pirak dan méuh nyang awaknyan peugöt dan seumah nyan laju jitinggai meunan mantong keu tikoih dan cicém simantong. 22 Nyang kheueh, bék kheueh meuharab ubak manusia nyang fana, sabab jihnyan hana hareuga.

Nabi Yesaya 3

1 Sikeubit jih, TUHAN Nyang Mahakuasa geucok di Yerusalem dan Yehuda peue mantong peuseudiaan peunajoh dan ié meuneujieb. Meunan cit banmandum ureuëng nyang awaknyan peubangga: 2 dumna pahlawan dan peureute tantra, hakém, nabi, tukang ngieng kutika dan tukang bri naseuhat, 3 peuwira, ureuëng patot-patot dan ahli peutimang nanggroe, tukang sihe dan tukang ngieng kutika. 4 TUHAN teuma geu angkat aneuëk-aneuëk muda jeuet keu peumimpén rakyat, dan awaknyan jimat peurintah ban galak droe. 5 Ureuëng-ureuëng sabe keudroe-droe saleng jitindéeh. Ureuëng muda jianggab remeh ubak ureuëng tuha, dan aneuëk miet ji anggab remeh ubak ureuëng rayeuk. 6 Bak masanyan di ureuëng teuma jitunyok sidroe nibak kawöm syedara jih dan jipeugah ubak ureuëng nyan, "Cuma gata nyang na peukayan nyang pantaih; sabab nyan jeuet kheueh keu peumimpén kamoe bak jamén nyang peunoh keususahan nyoe." 7 Teuma gobnyan teuma jijaweueb, "Ulôn kon tabib! Meunan cit nibak ulôn hana peunajoh dan peukayan. Bék neuyue ulôn jeuet keu peumimpén bansa!" 8 Beutôi, Yerusalem ka rhot! Yehuda ka reuloh! Sabab banmandum tutoe haba dan buet awaknyan jilawan TUHAN dan jilawan keukuasaan Gobnyan. 9 Sikeueb awaknyan nyang sombong deuh teukalon keujeuhetan droe jih. Trang-trang awaknyan meudesya lagée Sodom yoh masa ilée. Cilaka kheueh awaknyan! Awaknyan jipeuteuka cilaka ateueh droe jih keudroe. 10 TUHAN meufeureuman, "Tajak peusampoe kheueh ubak ureuëng nyang taát ubak Ulôn bahwa awaknyan bahgia dan seulamat. Awaknyan jiteumé rasa hase jeureh payah droe jih keudroe. 11 Teuma cilaka kheueh ureuëng jeuhet! Ateueh awaknyan teuma geupeusaneut lagée awaknyan ka jipeulaku ateueh ureuëng laén. 12 Umat Ulôn teuma jitindéeh lé tukang pajoh riba dan ji prah lé lintah darat. umat Ulôn jipeusisat lé peumimpén-peumimpén droe jih sampoe hana jiteupeue le rot nyang harôh awaknyan jak." 13 TUHAN ka siab keu geugugat dan adili umat Gobnyan. 14 TUHAN meutindak sibagoe hakém ateueh peumimpén umat Gobnyan. Nyoe kheueh tudohan TUHAN keu awaknyan: "Gata nyoe kheueh nyang reupah hase lampôh-lampôh anggô; rumoh gata ka peunoh deungon barang nyang gata reupah nibak ureuëng-ureuëng gasien. 15 Pakon gata tindéeh umat Ulôn dan talakée deungon paksa hareuta ureuëng gasien? Ulôn TUHAN Nyang Mahamanyang dan Mahakuasa ka Ulôn peugah haba." 16 TUHAN meufeureuman, "Sombong that inong-inong Yerusalem! Awaknyan geunit, galak meuén mata dan watée jijak deungon angkoh. Langkah jih jipeugöt-peugöt, dan meuklieng-klieng su gleueng-gleueng gaki jih. 17 Teuma Ulôn huköm awaknyan; ulée awaknyan Lôn peupeunoh deungon kude dan harôh teucuko." 18 Teuma teuka watée jih TUHAN geucok nibak inong-inong Yerusalem peue mantong piasan nyang awaknyan peubangga: ikat ulée, gleueng gaki, dan talo takue, 19 gleueng jaroe, jilbab, 20 tudong ulée, jimat-jimat nyang na bak jaroe dan bak keuieng, 21 euncien dan keurabu idong, 22 peukayan khanuri nyang lagak-lagak, gaon mantel, dompet, 23 bajée lipéh, peukayan lineun, ikat tajue dan keurudong panyang. 24 Jinoenyoe awaknyan jingui wangi wangian, eunteuk awaknyan meubhée khéueb ngon khiéng. Talo keuieng awaknyan nyang halôh teuma teugantoe deungon talo tambang nyang gasa. Ulée awaknyan nyang meuôk gagah teuma teucuko habéh. Peukayan awaknyan nyang gagah-gagah teuma teugantoe deungon nyang brök dan tuha-tuha. Jinoenyoe awaknyan lagak ngon ceudah; eunteuk hi awaknyan ka brök sabab ka teuboh cab. 25 Ureuëng agam, meunan cit nyang beuhe ngon teuga-teuga, teuma maté dimideuen prang. 26 Di babah-babah pintoe geureubang banda ureuëng ramé teuma meukabong sira meuratok ngon jimo ba-e, dan banda nyan keudroe jeuet lagée ureuëng inong nyang ka teupeulon nyang teuduek nibak tanoh.

Nabi Yesaya 4

1 Bak watée nyan na tujoh droe ureuëng inong teuma jimat sidroe ureuëng agam sira jipeugah, "Neupeu idhin kheueh keukamoe meungaku bahwa droeneueh nyoe sibagoe lakoe kamoe, mangat kamoe hana meutanggong ayeb ngon malée kareuna hana kamoe meukawen. Peunajoh dan peukayan jeuet kamoe tanggong keudroe." 2 Teuma trok watée jih TUHAN geupeujeuet tieb-tieb seunaman dan bak kayée jitimoh sampoe rayeuk dan indah di nanggroe nyoe. Nibak uroenyan ureuëng Israel nyang seulamat meurasa geumbira dan bangga sabab le hase panen jihnyan. 3 Tieb-tieb ureuëng nyang na teutinggai di Yerusalem, ureuëng-ureuëng nyang geupiléh lé Po teu Allah keu teupeuseulamat, ureuëng nyan teuma teupeugah suci. 4 Deungon kuasa Gobnyan, TUHAN geupeusidang dan geupeumurni umat Gobnyan. Gobnyan geupeugléh Yerusalem nibak darah ureuëng-ureuëng nyang teupoh di banda nyan. 5 Laju di ateueh Bukét Sion dan banmandum ureuëng nyang meusapat disinan TUHAN laju geupeujeuet awan yoh watée uroe, meunan cit deungon asab dan hu trang óh watée malam. Po teu Allah keudroe deungon kuasa Gobnyan teuma geupeupayong bansaboh banda nyan. 6 Gobnyan teuma geupeupayong nibak mata uroe criet óh watée uroe, dan geupeujeuet nyan teumpat meuceu watée ujeuen raya dan angén badée.

Nabi Yesaya 5

1 Deungoe kheueh ca-e ulôn nyoe keuhai lampôh anggô rakan ulôn. Sahabat ulôn na lampôh anggô nibak sineuron bukét nyang subo. 2 Gobnyan keudroe nyang cangkoi tanoh jih dan nyang böh mandum batée-batée. Laju geupula anggô piléhan geupeudong teuma meunara ronda. Geukueh laju saboh uruek teumpat prah ié anggô gobnyan, laju gobnyan geupreh boh anggô nyan masak, teuma hase jih boh anggô nyang masam. 3 Teuma jinoenyoe rakan Ulôn nyan geupeugah, "Gata banmandum, peududuek Yerusalem dan Yehuda, peusidang kheueh lampôh anggô Lôn ngon Ulôn. 4 Peue lom nyang harôh Ulôn peubuet teuma gohlom Ulôn peubuet keu lampôh anggô Lôn nyan? Pakon boh masam nyang ji muboh, dan bukon boh nyang gét lagée nyang Ulôn harabkan? 5 Meunoe Lôn peubuet ateueh lampôh anggô Lôn nyan: Pageue nyang na sikeulileng lampôh nyan Ulôn lot, bintéh beuton nyang peupayong nyan Ulôn reuloh, laju Ulôn peubiyeu beulatang bueh jijak peuhanco dan jigilo-gilo. 6 Ulôn teuma Lôn peubiyeu jitimoh bak kayée kleut. Bak anggô nyang na disinan hana Ulôn gunteng, dan hana teuma Ulôn böh naleueng. Dan Ulôn kalon banmantong jiseubée lé seumak meuduro dan naleueng, meunan cit awan-awan Ulôn tam jipeutron ujeuen u ateueh nyan." 7 Sabab lampôh anggô TUHAN Nyang Mahakuasa na kheueh umat Israel, dan ureuëng-ureuëng Yehuda na kheueh bak anggô nyang geupula. Nibak awaknyan Gobnyan geumeuharab keuadelan, teuma nyang na na kheueh keulaleman. Gobnyan meuharab awaknyan jipeudong keubeunaran, teuma nyang na na kheueh jikliek jilakée keuadelan. 8 Cilaka kheueh gata nyang bloe rumoh-rumoh dan nyang seurobot ladang-ladang keu tatamoh atra milék gata! Hana treb le habéh kheueh teumpat keu ureuëng laén dan gata kheueh nyang na tinggai di nanggroe nyan. 9 Ulôn deungoe TUHAN Nyang Mahakuasa meusumpah, "Rumoh-rumoh nyang raya dan lagak-lagak nyoe banmandum Lôn peusöh nibak nyang keumiet rumoh nyan. 10 Hase bumoe gata Lôn peugagal, lampôh anggô nyang luwah na siploh heta teuma jipeuhase siploh arée ié anggô. Sireutoh arée bijéh teuma jipeuhase siploh arée gandom." 11 Cilaka kheueh gata! Phon beungoh sampoe án malam buet gata hana tapiôh tajieb ié kreueh dan sampoe mabök-mabök hana meuteuntée. 12 Nibak khanuri-khanuri nyang gata peuna na teudeungoe su keucapi, su gambus, rapa-i dan su suleng dan minuman anggô. Teuma gata hana tapakoe ubak karya TUHAN dan peue nyang geupeubuet lé Gobnyan. 13 Sabab nyan umat Ulôn nyang hana jiteupeue sapeue teuma teupeuron jijak lagée tawanan. Bubena peumimpén dan rakyat teuma maté sabab deuk dan grah. 14 Guha mawöt ka teuhah luwah-luwah keuneuk jiuét ureuëng-ureuëng meugah di Yerusalem meusajan deungon rakyat nyang ramé-ramé geupeuna khanuri. 15 Soe mantong ureuëng nyan geubri malée, dan nyang sombong geupeuhina. 16 Teuma TUHAN Nyang Mahakuasa geutunyok keubeusaran Gobnyan deungon cara geupeubuet peue nyang beuna. Gobnyan teuma geupeuleumah keusucian Geuhnyan deungon cara geupeusidang bansa Gobnyan. 17 Nibak banda nyang ka reuloh aneuëk-aneuëk kaméng dan domba jimeurot deungon naleueng sibagoe peunajoh jih nyang hana putôh. 18 Cilaka kheueh gata nyang meudesya hana putôh-putôh! 19 Kheun gata, "Bah kheueh TUHAN Allah kudus Israel bagaih meutindak! Bah kheueh Gobnyan geulaksana reuncana Geuhnyan, mangat geutanyoe deuh takalon dan ta teupeue." 20 Cilaka kheueh gata nyang taputa balek nyang jroh dan nyang jeuhet, nyang seupôt dan nyang trang, nyang phet dan nyang maméh! 21 Cilaka kheueh nyang neuanggab droe bijaksana dan carông! 22 Cilaka kheueh gata nyang hebat jieb ié anggô! Gata ceubeueh dan hebat meunyoe harôh neujampu ié kreueh! 23 Teuma mangat meuteumé péng sugok, gata tapeubeubaih ureuëng meusalah, dan gatatam ureuëng nyang hana meusalah mangat meuteumé keuadelan. 24 Gata ka tulak ajaran TUHAN Nyang Mahakuasa, dan tahina peumeurintah Po teu Allah kudus Israel. Sabab nyan, lagée jumpueng dan naleueng tho nyang habéh tutông jipajoh lé apui, meunan cit deungon ukeu-ukeu gata habéh brök, bungöng-bungöng gata habéh tho dan habéh jitampo lé angén. 25 TUHAN beungéh keu bansa Gobnyan. Gobnyan ka siab keuneuk geuhuköm awaknyan. Gunong-gunong teuma meuguncang; manyét-manyét meutabu beba lagée bröh nibak rot raya. Teuma TUHAN mantong geubeungéh dan teutab geuhuköm. 26 TUHAN geuhôi bansa nyang jiôh dan awaknyan teuma teuka deungon bagaih! 27 Awaknyan sabe siab jak lam prang dan hana jiteupeue keu hék. Awaknyan hántom na ji-éh atawa teungéut mata. 28 Aneuk panah gobnyan tajam dan busur gobnyan ka siab keu geutimbak. Gukée guda gobnyan kreueh lagée kreueh batée meu apui, dan ruda geuritan gobnyan meuputa lagée angén badée puteng beuliong. 29 Bubena peureute tantra gobnyan jitaúm lagée su singa nyang banmantong si ruengköm mangsa, laju jipeuplueng, dan hana soe nyang hase jipeuleuh nyan. 30 Bak uroe nyan bansaboh nanggroe Israel teudeungoe su dumpék meuhadu ngaza di mideuen prang lagée su deru di laôt raya. Ngieng kheueh, bansaboh nanggroe nyan seupôt dan peunoh keuseusakan. Trang ka jeuet keu seupôt buta.

Nabi Yesaya 6

1 Bak thon Raja Uzia meuninggai donya, ulôn deuh lôn ngieng TUHAN. Gobnyan geuduek di ateueh takhta Geuh nyang manyang dan mulia. Jubah Gobnyan teutôb banmandum Baét TUHAN. 2 Ban sikeulileng Gobnyan na teudong makhluk-makhluk nyang hu lagée apui, maséng-maséng na nam boh sayeub. Dua böh sayeub teutôb nibak muka, dan dua teutôb teuma nibak badan jih, dan dua boh sayeub teuk geupeuguna keungon po. 3 Awaknyan jiteumawök sabe keudroe-droe: "Kudus, kudus, kudus. Kudus kheueh TUHAN Nyang Mahakuasa. Bumoe peunoh keuhaderan Gobnyan nyang mulia." 4 Deungon su awaknyan nyang meugeunta sampoe sandi Baét TUHAN meusu meu kruk-kruk, dan Baét TUHAN nyan keudroe ka peunoh deungon asab. 5 Laju ulôn peugah, "Mupalo, hana harapan keu ulôn, sabab babah ulôn ka kuto ngon desya, dan ulôn tinggai di lamkawan bansa nyang lagée nyan cit teuma. Bahpi meunan, deungon mata ulée lôn keudroe ulôn ka lôn ngieng Raja, TUHAN Nyang Mahakuasa!" 6 Óh lheuehnyan saboh lamkawan makhluk nyan laju jipo ubak ulôn sira jiba ngéue apui nyang geucok deungon sineupet nibak miseubah. 7 Laju geupeutupéh bibi ulôn deungon ngéue apui nyan sira geupeugah, "Ngéue apui nyoe ka tupéeh nibak bibi gata. Jinoenyoe salah gata ka geusampôh dan desya ka geupeu amphon lé TUHAN." 8 Óh lheueh nyan laju lôn deungoe su TUHAN nyang geupeugah, "Soe nyang Ulôn utus? Soe nyang jeuet keu ureuëng ba haba geutanyoe?" Laju ulôn jaweueb, "Nyoe kheueh ulôn. Utus kheueh ulôn!" 9 Laju Gobnyan geuyue ubak ulôn beulôn jakba peusan nyoe ubak umat: "Gata teuma sabe tadeungoe, teuma hana muphom. Gata sabe tasimak, teuma hana tateupeue peue nyang teuma teujadi." 10 Laju geupeugah kheueh lé Gobnyan ubak ulôn, "Peutumpôi kheueh pikeran ureuëng-ureuëng nyan, peutulo laju geulinyueng awaknyan dan peubuta laju mata jih nyan, mangat awaknyan bék deuh jikeumalon dan bék teuma jeuet jimeudeungoe atawa jimuphom, laju gisa ubak ulôn dan puléh teuma lagée ban nyang ka." 11 Laju ulôn tanyong, "Padub na treb keuadaan nyoe teuma teujadi, TUHAN?" Jaweueb Gobnyan, "Sampoe banda-banda jeuet keu rungka deungon hana ureuëng keumiet, rumoh-rumoh hana jiduek le, dan tanoh tinggai jeuet keukosong dan maté, 12 peunduduek banda-banda nyan teuma Ulôn use u teumpat nyang jiôh, sampoe banmandum tanoh nyan ka jeuet keuseungue. 13 Anmeunyoe na mantong sidroe nyang tinggai lamkawan siploh droe di nanggroe nyan, ureuëng nyan pih teupeubinasa. Teuma lagée bak beuringén meunyoe teuteubang mantong na tinggai peureudée jih, meunan cit teuma mantong na tinggai sidroe-dua nibak bansa nyan nyang jeuet keu peumulaan umat nyang suci."

Nabi Yesaya 7

1 Raja Ahas na kheueh aneuëk agam Yotam dan cucoe Uzia. Bak watée gobnyan geumat peurintah ateueh Yehuda, beureutoh kheueh prang. Rezin raja Siria, dan Pekah aneuëk agam Remalya raja Israel, teuka geujak seurang Yerusalem. Teuma awaknyan hana hase geureubot banda nyan. 2 Watée raja Yehuda geudeungoe bahwa pasokan Siria ka jitamong u dalam wilayah Israel sibagoe sikutu, gobnyan dan bansa geuh lumpah teumakot, sampoe awaknyan yo bansalam le lagée bak kayée jipupöt lé angén. 3 TUHAN meufeureuman ubak Nabi Yesaya, "Gata ba kheueh laju aneuëk gata Syear Yasyub dan tajak kheueh laju meurumpok deungon Raja Ahas. Gata teuma meurumpok deungon gobnyan nibak ujong aneuëk lhueng kulam di bagian ateueh, di teumpat ureuëng peugét binatu meukeureuja. 4 Tapeugah laju ubak raja bahwa gobnyan harôh siab siaga dan sabe dalam teunang. Gobnyan bék teumakot atawa bingong. Keuhai beungéh Raja Pekah dan Raja Rezin deungon tantra gobnyan ureuëng-ureuëng Siria hana leubeh meubahya nibak dua bôh puntong tungô apui nyang meuasab. 5 Siria ka jimeukumplot deungon Israel dan raja jih nyan. 6 Awaknyan jikeuneuk jak prang Yehuda dan jipeutakot-takot peunduduek disinan mangat jidong ubak gobnyan, laju geuangkat aneuëk agam Tabel jeuet keuraja. 7 Teuma Ulôn, TUHAN, nyang peugah bahwa hainyan hana teuma teujadi, 8 sabab Siria nyan hana leubeh teuga nibak Damsyik ma banda jih, dan Damsyik hana leubeh teuga nibak Raja Rezin. Seudangkan dalam watée nam ploh limong thon, Israel teuma beukah meukeupeng sampoe hana ék meuteun sibagoe bansa. 9 Israel hana leubeh teuga nibak Samaria, ma banda jih, dan Samaria hana leubeh teuga nibak Raja Pekah. Meunyoe gata hana bit-bit peucaya ubak ulôn, pasti gata hana hase tameuteun." 10 TUHAN geupeusampoe lom peusan nyang laén ubak Ahas: 11 "Lakée kheueh mangat TUHAN Allah gata geubri saboh tanda keu gata, aléh nibak donya ureuëng maté nyang na di miyueb atawa nibak langét nyang na di ateueh." 12 Ahas geujaweueb, "Ulôn hana kutem lôn lakée tanda. Ulôn hana kutem lôn ujo TUHAN." 13 Laju geupeugah lé Nabi Yesaya, "Meunyoe meunan, deungoe kheueh nyoe hai keuturonan Nabi Raja Daud! Peu kheueh hana seb ta ujoe saba manusia, sampoe gata ta ujoe saba Po teu Allah ulôn nyan? 14 Jinoenyoe, TUHAN keudroe teuma geubri tanda keu gata: Sidroe aneuëk dara nyang mume teuma jipeulahé sidroe aneuëk agam nyang geuboh nan Imanuel. 15 Bak watée gobnyan ka seb rayeuk ka hase geucok keuputosan keudroe, nanggroe nyan teuma makmu. 16 Sabab sigohlom saát nyan sampoe, bandua boh nanggroe nyang geumat peurintah lé raja-raja nyang gata takot nyan teuma jitinggai dan söh. 17 TUHAN teuma geupeuteuka raja Asyur, laju gata dan bandum keuluwarga gata meunan cit deungon rakyat gata teuma geurasa uroe-uroe nyang peunoh deungon susah leubeh dahsyat deungon peue nyang ka lheueh gata rasa phon yoh beukah keurajeuen Israel dan Yehuda. 18 Bak masanyan TUHAN geutawök ureuëng Meusé dan ureuëng Asyur, laju bandua boh bansa nyan teuka lagée lalat dan uno nyang meukeureumon nibak leumbah-leumbah nyang lhok dan luengkiek-luengkiek batée kareueng. Awaknyan teuma jitôb banmandum tamah meuduro dan tieb-tieb teumpat nyang meunaleueng. 20 TUHAN geusiwa raja Asyur keu geupeubuet ateueh Israel lagée tukang mupo nyang jimupo habéh banmandum naleueng dan bulée nyang na nibak badan. 21 Bak masa nyan, meunyoe na sidroe ureuëng jipeulara saboh leumô muda dan dua boh kaméng mantong, 22 ié mom nyang jipeuhase lé beulatang peulara nyan leubeh nibak séb keu ureuëng-ureuëng nyang na mantong teusisa di nanggroe nyan. Keubit, awaknyan teuma jijieb ié susu dan madu. 23 Bak watée nyan, lampôh-lampôh anggô nyang maséng-maséng teupula siribée bak anggô dan nyang meuyuem siribée péng pirak, jitimoh lé tamah meuduro. 24 Ureuëng nyang jak keunan harôh jiba busur dan panah, sabab bansaboh nanggroe nyan ka peunoh deungon tamah meuduro. 25 Dan daerah gunong-gunong nyang kanyoe jiuseuha dan jipula seunaman, nyan pi ka peunoh deungon tamah meuduro, sampoe soe mantong hana jijeuet jak u gunong nyan. Tanoh nyan teuma meuguna teumpat jimeurot leumô dan bubiri."

Nabi Yesaya 8

1 TUHAN meufeureuman ubak ulôn, "Tacok kheueh laju saboh batée tuléh nyang raya, tuléh laju deungon hurof-hurof nyang jeulaih: 'Meureupah nyang Tangkaih, Peurampokan nyang Bagaih'. 2 Tawök kheueh sibagoe saksi dua droe nyang jeuet teupeucaya, awaknyan na kheueh Teungku Imeum Uria dan Zakharia, aneuëk Yeberekhya." 3 Na padub watée óh lheueh nyan peurumoh lôn mume. Bak watée aneuëk kamoe lahé, TUHAN geupeugah ubak ulôn, "Taboh laju nan aneuëk nyan, 'Peureupah nyang Tangkaih, Peurampokan nyang Bagaih.' 4 Sabab, sigohlom aneuëk nyan seb rayeuk keu jipeugah 'Bapak' dan 'Ma', banmandum keukayaan Damsyik dan banmandum barang reupasan Samaria teuma ji angkot ubak raja Asyur." 5 TUHAN meufeureuman lom ubak ulôn, 6 Kheun Gobnyan, "Bansa nyoe jitulak ié nyang lintong nibak aneuk Krueng Syiloah, dan galak deungon Raja Rezin dan Raja Pekah. 7 Sabab nyan Ulôn, TUHAN, teuma Lôn peuteuka raja Asyur dan banmandum tantra gobnyan keu jijak prang Yehuda. Awaknyan teuma maju lagée Krueng Efrat nyang meuluab-luab dan habéh jipeubanjie banmandum tabéng-tabéng jih nyan. 8 Awaknyan jilanda Yehuda lagée ié raya nyang ngöb trok ét takue dan jipeungöb peue-peue nyang na." Po teu Allah na meusajan ngon geutanyoe! Sayeub Gobnyan nyang meureutang geupeupayong nanggroe geutanyoe. 9 Meuhimpon kheueh deungon yo, hai banmandum bansa! Deungoe kheueh hai ujong-ujong bumoe! Meusiab-siab kheueh mangat tajak muprang, teuma deungon até nyang yo! Nyoe, meusiab-siab kheueh, teuma deungon rasa nyang yo! 10 Peugöt kheueh reuncana, teuma banmandum hana meuhase. Cok kheueh keuputosan, teuma hana meuguna, sabab Po teu Allah na meusajan deungon kamoe. 11 Ulôn geukuasa lé TUHAN dan geubri peuingat mangat bék ulôn seutôt jalan nyang jilalu lé bansa nyan. Kheun Gobnyan, 12 "Bék neu anggab kumplotan peue nyang ji anggab lé awaknyan kumplotan, dan bék teumakot ubak hai-hai nyang teuma jitakot lé awaknyan. 13 Ingat kheueh bahwa Ulôn TUHAN Nyang Mahakuasa na kheueh suci. Teuma keu Ulôn kheueh nyang harôh gata takot. 14 Lé sabab Ulôn nyoe keubit that suci, ulôn jeuet keu batée nyang meugantoh nibak rakyat Yehuda dan Israel, dan nyang jeuet keupeurangkab peunduduek Yerusalem. 15 Jai lumpah na ureuëng nyang reubah meugantoh dan teukeunong luka. Awaknyan meusireuk u dalam peurangkab." 16 Gata nyoe, murit-murit ulôn harôh teukeubah dan tapeulara peusan-peusan nyang ka geubri lé Po teu Allah ubak ulôn. 17 TUHAN ka geusöm droe nibak keuturonan Nabi Yakub, umat Gobnyan, teuma ulôn peucaya dan meuharab ubak Gobnyan. 18 Nyoe kheueh ulôn dan aneuëk-aneuëk nyang geubri lé TUHAN ubak ulôn. TUHAN Nyang Mahakuasa nyang mat peurintah di Bukét Sion, geu kirém kamoe jeuet keutanda keu umat Israel. 19 Teuma ureuëng-ureuëng laén geuyue lakée nibak gata peutunyok keu tabib nyang meusáh-sáh ngon babah jih nyang meumet-met. Ureuëng-ureuëng nyan teuma jipeugah, "Bukon kheueh geutanyoe patot talakée peutunyok ubak areuwah-areuwah deumi keupeuntengan ureuëng udeb?" 20 Jaweueb kheueh lagée nyoe, "Deungoe kheueh ajaran TUHAN! Ureuëng nyang hana meututoe deungon ajaran nyan, nibak ureuëng nyan hana teukeubah harapan." 21 Ureuëng-ureuëng nyang malang dan deuk teuma meuwot-wot di nanggroe nyan. Sabab jih nyan deuk, awaknyan beungéh-beungéh sampoe jiseurapa raja dan Po teu Allah droe jih. Ho mantong awaknyan jipandang, u ateueh, 22 atawa u miyueb, awaknyan hana leumah sapeue keucuali keuseusakan dan seupôt buta dan keusuraman nyang luwa biasa. Awaknyan teuma jiböih ubak teumpat seupôt nyan. 23 Teuma kon siumu masa nanggroe gata jirasa keuseusakan. Daerah nyang jirasa lé sukée-sukée Zebulon dan Naftali ka lheueh geuanggab miyueb lé TUHAN. Teuma keu masa nyang teuma ukeue, Gobnyan geubri horeumat nibak banmandum wilayah phon di Laôt Teungoh u timu trok u meurandeh Krueng Yordan, dan trok u Galilea nyang jiduek lé ureuëng aséng.

Nabi Yesaya 9

1 Bansa nyang udeb lam seupôt jikalon cahya nyang trang. Nyang tinggai lam bubayang maté jipeupungéh lé cahya trang. 2 TUHAN, neujok keu awaknyan sukacita nyang rayeuk, Droeneueh peujeuet awaknyan jikém ngon seumurak nyang meuhubo. Awaknyan galak that até sabab Droeneueh jroh, lagée ureuëng nyang meusukaria watée jipeusapat hase panen, atawa jibagi-bagi hase teucue. 3 Droeneueh ka tacok beuban jih nyang geuhon dan kayée geunulam bak bahô gobnyan. Droeneueh ka neupeutaloe bansa nyang jeuhet nyan nyang tindéeh umat droeneueh. Saban lagée jamén nyang kalheueh watée Droeneueh peutaloe tantra Midian. 4 Sipatu tantra nyang su jih grab grub dan bajée jih nyang meulabo ngon darah, teuma habéh jipajoh lé apui. 5 Sidroe aneuëk ka lahé keugeutanyoe; keugeutanyoe ka geujok sidroe aneuëk agam. Gobnyan teuma jeuet keupeumimpén geutanyoe. Gobnyan teuboh nan: "Peunaseuhat Bijaksana", "Allah Peukasa", "Bapak Keukai", "Raja Damé". 6 Gobnyan geumat peurintah sibagoe raja keuturonan Nabi Daud, keurajeuen gobnyan rayeuk lumpah na. Nanggroe gobnyan sabe damé seujahteura; peumeurintah gobnyan dasai jih nibak huköm dan keuadelan jinoe sampoe siumu masa. TUHAN Nyang Mahakuasa pasti geulaksana. 7 TUHAN ka geupeurhot huköman ateueh Israel. 8 Banmandum bansa Israel dan peunduduek Samaria teuma jiteupeue bahwa TUHAN kheueh nyang peubuet banmandum nyan. Jinoenyoe awaknyan sombong dan manyang até. Kheun awaknyan, 9 "Geudong-geudong nyang teupeuget nibak batée bata ka reuloh, teuma kamoe keuneuk peugét geudong-geudong barô nyang teupeuget nibak batée. Bak-bak ara ka teukoih, teuma kamoe gantoe ngon kayée ceumara Libanon nyang paleng gét." 10 TUHAN ka geupeugrak musoh awaknyan keu jilawan awaknyan. 11 Bansa Siria siblaih u timu dan bansa Filistin di barat jireubot Israel. Teuma TUHAN mantong beungéh dan teutab geuhuköm. 12 Bansa Israel gohlom cit meunyeusai bahpih ka geuhuköm lé TUHAN Nyang Mahakuasa; awaknyan gohlom cit meutobat ubak Gobnyan. 13 Lé sababnyan lam siuroe mantong TUHAN geuhuköm bubena peumimpén Israel dan rakyat jih. Gobnyan geuköih dan geuböih ulée ngon ikue jih. 14 Ulée jih na kheueh ureuëng patot-patot dan ureuëng nyang teuhoreumat, ikue jih na kheueh nabi-nabi nyang geupeurunoe gob deungon ajaran nyang sisat. 15 Bubena peumimpén rakyat nyan ka jipeusisat dan jipeucawoe rakyat. 16 Bansa nyan ka murtad dan beujat that dan mandum tutoe haba awaknyan jeuhet. Lé sababnyan lamkawan peumuda hana nyang geutuwoe lé TUHAN. Gobnyan hana geugaséh keu inong balée dan yatém ngon meuntui. Teuma TUHAN mantong beungéh dan teutab geuhuköm. 17 Jeuhet bansa nyan tutông lagée apui dan jihangöh bubena tamah nyang meuduro. Hu jih lagée gle uteun nyang tutông nyang meuhúb-húb dan meukeubok asab. 18 TUHAN Nyang Mahakuasa beungéh that-that, dan huköman gobnyan lagée apui nyang hu meuháb-háb dan bana nyan na kheueh kayée jih nyang geutot sampoe habéh. Hana meusidroe pih nyang jigaséh syedara jih. 19 Bansaboh nanggroe nyan manusia krôt ié muka dan jipajoh peue-peue mantong nyang jeuet jipajoh, teuma teutab hana meurasa troe. Dan jipajoh rakan-rakan jih keudroe! 20 Ureuëng Manasye dan ureuëng Efraim saleng jimuprang, dan laju meusajan-sajan jilawan Yehuda. Teuma TUHAN mantong beungéh dan teutab geuhuköm.

Nabi Yesaya 10

1 Ceulaka kheueh gata nyang tapeugét huköm-huköm nyang hana ade keu tatindéeh bansa Ulôn. 2 Deungon cara nyang lagée nyan gata ka tateun ureuëng gasien mangat meuteumé hak dan keuadelan, dan tareupah milék inong balée dan aneuëk yatém ngon meuntui. 3 Peue nyang gata peubuet bak uroe Po teu Allah geuhuköm gata? Peue daya gata bak uroe Gobnyan geupeuteuka beuncana nibak nanggroe nyang jiôh? Bak soe gata talakée tulông? Dipat gata söm keukayaan gata nyan? 4 Naseb gata teuma jipoh maté lam prang atawa ji iréng sibagoe tawanan. Teuma TUHAN mantong beungéh dan teutab geuhuköm. 5 TUHAN meufeureuman, "Ceulaka kheueh Asyur! Asyur Ulôn peuguna sibagoe peunyunuét dan puntong kayée sibagoe alat ngon poh keu ureuëng-ureuëng nyang keunong nibak beungéh Lôn. 6 Ulôn kirém Asyur keujiseurang bansa Ulôn nyang murtad dan nyang jipeujeuet Ulôn nyoe beungéh. Ulôn kukirém Asyur keujijak reubot dan jiceumeucue dan jigilo-gilo bansa Ulôn lagée abée di ateueh jalan." 7 Teuma raja Asyur ka na reuncana geuh keudroe. Gobnyan ka teukat keuneuk geupeuguna cara kreueh dan teupeubinasa bansa nyang le. 8 Jih nyan jipeusombong droe, sira jipeugah lagée nyoe, "Pang-pang ulôn banmandum raja-raja! 9 Ulôn reupah banda-banda Kalno dan Karkemis, Hamat dan Arpad. Meunan cit ulôn reupah banda-banda Samaria dan Damsyik. 10 Ulôn peutaloe banmandum banda-banda nyang jiseumah beurala nyang leubeh meukuasa nibak nyang na di Yerusalem dan Samaria. 11 Samaria dan bubena beurala nyang na disinan ka ulôn peubinasa. Nyang saban lagée nyan ulôn peubuet di Yerusalem deungon banmandum beurala nyang jiseumah disinan." 12 Teuma TUHAN meufeureuman, "Meunyoe nyang keuneuk Ulôn peubuet di Bukét Sion dan di Yerusalem nyan ka seuleusoe, Ulôn huköm raja Asyur sabab keusombongan dan keu angkuhan jih nyan." 13 Raja leupah haba, jipeugah lagée nyoe, "Banmandum nyan ulôn peubuet deungon kuasa lôn keudroe. Ulôn bijaksana dan carông. Ulôn sampôh bataih-bataih lamkawan bansa-bansa, dan ulôn reupah peuseudiaan awaknyan. Lagée banteng ulôn bloh-bloh ngon lôn gilo-gilo ureuëng-ureuëng nyang mat peurintah. 14 Bansa-bansa nyang na di ateueh donya lagée uempueng cicém; deungon mudah hareuta awaknyan ulôn cok, lagée ureuëng jikuet boh cicém nyang tinggai didalam uempueng. Hana sayeub nyang meukeupak-keupak, hana nyang peuhah babah jih atawa meuciéb-ciéb." 15 Teuma TUHAN meufeureuman, "Peu kheueh jeuet kapak jipeubangga droe keu ureuëng nyang peuguna nyan? Peu kheueh gogajo leubeh peunteng nibak ureuëng nyang peuguna atra nyan? Bukon kayée puntong nyang beuôt ureuëng, teuma ureuëng kheueh nyang beuôt puntong kayée." 16 Sabab ureuëng Asyur ka jipeusombong droe, TUHAN Nyang Mahakuasa teuma geupeuteuka bala peunyakét keu geuhuköm peuwira-peuwira nyang gagah-gagah. Awaknyan keunong deumam nyang lumpah seu-uem lagée apui nyang tutông hana jipiôh-piôh. 17 Po teu Allah Nyang Mahasuci, Cahya Israel, jeuet lagée apui hu nyang lam siuroe habéh teutot peue-peue nyang na, meunan cit seumak-seumak meuduro. 18 Gle ijo nyang raya dan ladang-ladang nyang subo di nanggroe Asyur teupeubinasa bube nyang na, lagée ureuëng sakét nyang meurana sampoe maté. 19 Bak-bak kayée tinggai bacut teuk, lé sababnyan di aneuëk miet pih ka hase ji itong bak kayée nyang tinggai nyan. 20 Watée jih teuma trok bansa Israel hana le jigantung naseb droe ubak bansa peunguasa nyang rab jipeubinasa awaknyan, teuma ubak TUHAN, Allah kudus Israel. 21 Nyang mantong na tinggai cit bacut sagai nibak bansa Israel nyan teuma jimeutobat ubak Allah nyang peukasa. 22 Bahpi ureuëng Israel jinoenyoe sadub le jih deungon ano di binéh pasi, teuma napadub droe mantong nyang na jigisa. Huköman TUHAN ka tô that-that, dan meumang pantaih dan ade bansa nyan teupeubinasa. 23 Nyoe, bansaboh nanggroe teuma geupeuhanco lé TUHAN Nyang Mahakuasa; nyan kheueh keuputosan TUHAN, nyang hana jeuet teu ubah le. 24 TUHAN Nyang Mahakuasa meufeureuman ubak umat Gobnyan di Sion, "Bék teumakot ubak ureuëng Asyur, bahpi awaknyan jitindéeh dan ji éulanya gata lagée nyang jipeubuet lé ureuëng Meusé yoh masa ilée. 25 Lam watée nyang paneuk keuhai beungéh Ulôn ubak gata teupiôh, laju awaknyan Ulôn peubinasa. 26 Ulôn TUHAN Nyang Mahakuasa, Lôn seunuét awaknyan deungon peunyunuét, lagée Lôn seunuét ureuëng Midian di gunong batée Oreb. Asyur Lôn huköm, saban lagée Ulôn huköm Meusé. 27 Bak watée nyan Ulôn kupeubeubaih gata nibak jitindéeh lé ureuëng Asyur, dan awaknyan hana meukuasa ateueh gata." 28 Sipa-i Asyur ka jireubot banda Ayat. Awaknyan ka jiliwati Migron! Peubeukalan awaknyan jitinggai di Mikhmas! 29 Awaknyan ka leupah jijeumeurang dan jimeudom di Geba! Peunduduek banda Rama yo that-that, dan peunduduek Gibea, banda Raja Saul, ka jipeuplueng droe. 30 Meudumpék kheueh, hai peunduduek Galim! Deungoe kheueh peunduduek Laisya! Jaweueb kheueh, peunduduek Anatot! 31 Peunduduek Madmena dan Gebim habéh jiplueng jijak meungungsi. 32 Uroenyoe musoh na di banda Nob, dan disinan awaknyan jireugam boh sininju u arah Bukét Sion, u banda Yerusalem. 33 TUHAN Nyang Mahakuasa geupeuhanco awaknyan lagée cabeueng kayée nyang teuköh nibak bakjih. Nyang paleng meugah dan nyang paleng manyang lamkawan nyan geukoh dan teupeureubah. 34 TUHAN geupeureubah awaknyan lagée bak kayée di teungoh gle nyang teuteubang deungon pato. Bahpi awaknyan teuga lagée bak kayée nyang paleng hebat di Libanon, awaknyan reubah cit sapan sapa!

Nabi Yesaya 11

1 Keuturonan Raja Nabi Daud lagée bak kayée nyang ka teu teubang. Teuma siladum nibak utom jih jitimoh tarok nyang barô, meunan cit teuma deungon keuturonan Nabi Daud teuka sidroe raja. 2 Kuasa TUHAN geubimbéng gobnyan, geupeujeuet gobnyan meubudho dan bijaksana, áref bak geucok keuputosan dan geulaksana; geuteupeue ubak keuheundak Po teu Allah dan taqwa ubak Gobnyan. 3 Keusukaan gobnyan na kheueh taát ubak TUHAN. Gobnyan hana geupeusidang gob lagée teungieng sikeujab atawa dasai nibak nariet gob peusampoe. 4 Ureuëng gasien geupeuhakém deungon ade, ureuëng nyang hana meudaya geubila deungon jujoe; ureuëng meusalah geuhuköm meunurot peurintah Gobnyan, ureuëng jeuhet geusampôh habéh. 5 Gobnyan meutindak deungon ade dan seutia nibak peue mantong. 6 Srigala teuma tinggai meusajan deungon bubiri, rimueng tutul jiéh meusajan bak binéh kaméng. Aneuëk leumô jimeurot naleueng meusajan deungon aneuëk singa, dan aneuëk miet nyang jeuet keu tukang rabe awaknyan. 7 Leumô jimeurot naleueng deungon cagée, aneuëk-aneuëk jih bandua jiéh meusapat meusaho teuma. Singa jimakheun jumpueng saban lagée leumô. 8 Bahkan sidroe aneuëk manyak hana teuma jikab meunyoe jimeuén tô bak binéh uleue meubisa. 9 Di Sion, Bukét Suci Po teu Allah, hana nyang jeuhet atawa nyang peurusak. Nanggroe peunoh deungon iéleumé peungetahuan keuhai Po teu Allah, Lagée ié nyang peunoh bansaboh laôt. 10 Watée jih trok sidroe raja nibak keuturonan Nabi Daud jeuet keupusat peuratian bansa-bansa. Awaknyan teuka ubak gobnyan, dan teumpat tinggai gobnyan jipujo-pujo. 11 Bak uroe nyan TUHAN sigoeteuk geupeuguna kuasa Gobnyan dan geupuwoe lom umat nyang na mantong teusisa di Asyur dan nanggroe Meusé, di nanggroe-nanggroe Patros, Sudan dan Elam, di Babel, Hamat dan pulo-pulo nyang jiôh. 12 TUHAN geupeuék saboh bupanji keu bansa-bansa. Nyan kheueh tanda jih Gobnyan geupeusapat bansa Israel dan Yehuda nyang meutabu bansaboh peunjuru bumoe dan geuba awaknyan puwoe lom teuma. 13 Keurajeuen Israel hana le picek até keu Yehuda, dan Yehuda hana teuma jimeumusoh deungon Israel. 14 Awaknyan meusajan-sajan teuma jijak seurang ureuëng Filistin di barat dan geureupah banmandum bansa-bansa di timu. Awaknyan teuma jipeutaklok bansa Edom dan Moab, dan bansa Amon teuma tundok ubak awaknyan. 15 TUHAN teuma geupeutho Lhok Suez. Gobnyan geupeuteuka angén su-eum sampoe Krueng Efrat jeuet keu tujoh boh bak ié nyang deue, dan soe mantong ureuëng hase jijeumeurang deungon seulob bak gaki. 16 Keu umat nyang na mantong tinggai teusisa teuma na rot ueh raya keurot teubiet nibak Asyur, lagée yoh masa Israel jiteubiet lam nanggroe Meusé.

Nabi Yesaya 12

1 Teuma teuka saát jih gata meuca-e: "TUHAN, ulôn meusyuko ubak Droeneueh, kareuna Droeneueh neuhibur ulôn. Yoh masa ilée Droeneueh neubeungéh keu ulôn, teuma jinoe ka reuda beungéh Droeneueh. 2 Keubit, Po teu Allah nyan geupeuseulamat ulôn, ulôn peucaya ubak Gobnyan. Ulôn hana teumakot, sabab Gobnyan nyang peuteuga ulôn. Nyang peuseulamat ulôn na kheueh Po teu Allah, keu Gobnyan ulôn meuca-e. 3 Lagée ié leupie nyang teupeugeumbira ureuëng nyang teungoh glah, meunan kheueh gata meusuka ria, sabab geupeuseulamat lé Po teu Allah." 4 Teuma teuka watée jih gata tapeugah, "Meusyuko kheueh ubak TUHAN, dan seumah kheueh Gobnyan. Neubritée kheueh keu bansa-bansa keuagongan dan peue mantong buet Geuhnyan. 5 Meuca-e kheueh keu TUHAN, sabab Gobnyan nyang ka geupeubuet buet ajaéb nyang lumpah le. Bah kheueh bansaboh donya jideungoe keuhai buet Gobnyan. 6 Meusurak geumbira kheueh hai peunduduek Sion, meuca-e kheueh deungon geumbira. Allah kudus Israel keubit mulia, Gobnyan na di teungoh-teungoh gata."

Nabi Yesaya 13

1 Nyoe kheueh feureuman Allah, nyang geuteurimong lé Yesaya bin Amos keuhai Babel: 2 Peuék kheueh bupanji prang di ateueh cot bukét nyang ueh! Tawök kheueh ubak mandum tantra, dan apit laju jaroe gata u ateueh mangat awaknyan jiseureubu pintoe-pintoe geureubang nyang angkuh nyan. 3 TUHAN ka geutawök bubena peujuang nyang geupiléh. Awaknyan peukasa, peucaya droe dan jeuet teupeubangga. TUHAN geubri tugaih ubak awaknyan keu geuhuköm ureuëng nyang keunong nibak beungéh Gobnyan. 4 Deungoe kheueh su nyang riôh ngon karu nibak gunong-gunong, lagée su ureuëng meugumpôi nyang ramé that. Deungoe kheueh karu keurajeuen-keurajeuen dan bansa-bansa nyang teungoh meugumpôi. TUHAN Nyang Mahakuasa geujak peureksa pasokan prang. 5 Awaknyan teuka nibak nanggroe-nanggroe jiôh nibak ujong u ujong bumoe. Lam beungéh Geuhnyan TUHAN geungui awaknyan keu jipeubinasa bansiluroh bumoe. 6 Meuba-e kheueh, sabab uroe TUHAN ka tô lumpah na, nyan kheueh uroe keubinasaan nyang geupeuteuka lé TUHAN Nyang Mahakuasa. 7 Tieb-tieb ureuëng meurasa lapée jaroe dan gadôh keubeuranian jih. 8 Awaknyan banmandum jiteuka lé rasa teumakot nyang hebat, dan meuleungiék sabab rasa sakét lagée ureuëng inong teungoh toh aneuëk. Awaknyan saleng meumandang sabe keudroe-droe deungon rasa teumakot, ruman awaknyan mirah sabab malée. 9 Uroe TUHAN teuma teuka, dan nibak uroe nyan TUHAN geupeupueh rasa beungéh Gobnyan dan meureuka Gobnyan nyang cukob hebat. Bumoe jeuet keu padang nyang ueh, dan tieb-tieb ureuëng meudesya binasa. 10 Tieb-tieb bintang dan gugusan bintang teuma jipiôh meucahya; mata uroe seupôt watée jiteubiet, dan buleuen hana meucahya le. 11 TUHAN meufeureuman, "Ulôn kuhuköm donya sabab keujeuhetan jih nyan, dan ureuëng-ureuëng jeuhet sabab desya-desya jihnyan. Tieb-tieb ureuëng sombong Lôn peuhina, ureuëng angkoh dan keujam Lôn huköm. 12 Ureuëng nyang geupeuseulamat na bacut that, awaknyan leubeh jareueng nibak méuh murni. 13 Ulôn peujeuet langét yo meugám-gám dan bumoe geugok-gok nibak teumpat jih watée uroe Ulôn, TUHAN Nyang Mahakuasa, Lôn tunyok keubeungéh Ulôn. 14 Ureuëng aséng nyang na tinggai di Babel meucrebre jiplueng u nanggroe jih maséng-maséng. Awaknyan lagée rusa plueng nyang jitiyeub lé peumburu, atawa lagée kawan bubiri nyang hana ureuëng rabe. 15 Soe mantong nyang keunong drob teutôb sampoe maté. 16 Awaknyan teuma jikalon aneuëk-aneuëk manyak droe jih dan teupeureumok, rumoh-rumoh awaknyan jireupah dan peurumoh-peurumoh awaknyan jipeukosa." 17 TUHAN meufeureuman, "Ulôn teuma Lôn krah bansa Madai keu jijak seurang Babel. Awaknyan hana hase ji sugok deungon pirak dan méuh. 18 Deungon busur dan panah jih awaknyan jipoh maté dumna ureuëng-ureuëng muda. Awaknyan hana jigaséh keu aneuëk manyak dan hana jiwéueh keu aneuëk droe. 19 Nibak banmandum keurajeuen nanggroe, Babel nyan nyang paleng lagak dan jeuet keubanggaan peunduduek disinan. Teuma Ulôn, TUHAN, Lôn peuhanco atranyan, lagée nyang ka Ulôn peubuet ateueh Sodom dan Gomora. 20 Hana meusidroe pih nyang na tinggai disinan. Hana ureuëng Arab peugeumbara nyang jipasang khimah di teumpat nyan, dan hana teuma ureuëng meurabe nyang jiba kaméng ngon bubiri jih mangat jimeurot disinan. 21 Teumpat nyan jitinggai lé beulatang-beulatang kleut. Cicém hantu jipeugot uempueng nibak rumoh-rumoh awaknyan, dan cicém unta tinggai disinan. Kaméng-kaméng uteuen teuma jimeulikak-likak di teungoh-teungoh bangunan nyang reuloh. 22 Su jimeudroh asée uteuen ngon su srigala meugeunta nibak puri-puri dan meuligoe-meuligoe Babel. Watée keuhancoran jih karab sampoe dan watée jih hana teutunda le."

Nabi Yesaya 14

1 TUHAN teuma geugaséh keu Israel umat Gobnyan, dan geupiléh awaknyan lom jeuet keu milék Gobnyan. Gobnyan teuma geupeuduek lom awaknyan di nanggroe-nanggroe droe jih. Ureuëng aséng teuma teuka laju jijak meugabong deungon awaknyan. 2 Jai that bansa jitulông bansa Israel mangat jiwoe lom u nanggroe nyang ka geubri lé TUHAN keu awaknyan, dan disinan teuma bansa-bansa nyan jipeuhamba droe ubak bansa Israel. Israel teuma jiteun ureuëng-ureuëng nyang ka lheueh jiteuen awaknyan yoh masa ilée dan jipeurintah ateueh ureuëng-ureuëng nyang ka lheueh jipeurintah geuh nyan. 3 TUHAN teuma geupeubeubaih bansa Israel nibak sakét dan deurita, dan nibak buet nyang brat nyang jipaksa ateueh awaknyan. 4 Meunyoe TUHAN geupeubuet nyang lagée nyan, awaknyan jipeuhina raja Babel lagée nyoe, "Raja nyang keujam ka rhot! Jih nyan hana hase le jiteugom gob. 5 TUHAN ka geupeu habéh masa peumeurintahan raja-raja nyang jeuhet 6 nyang deungon beungéh jiteugom bansa-bansa dan hana putôh-putôh ji iélanya awaknyan. 7 Akhé jih bansaboh donya aman dan teuntram, dan tieb-tieb ureuëng geumeuca-e geumbira. 8 Bak aron dan bak ceumara Libanon meugeumbira sabab raja nyang keujam nyan rhot, dan óh ka lheueh jihnyan jijak, hana le nyang yue teubang awaknyan! 9 Donya ureuëng maté meuron-ron jijak sambot raja Babel nyan. Dan jaga kheueh areuwah-areuwah ureuëng nyang yoh watée ilée jimat kuasa di ateueh bumoe, dan areuwah bubena raja geubeudôh nibak takhta awaknyan. 10 Awaknyan banmandum jimeuhôi ubak ureuëng nyan, 'Hei! Jinoenyoe gata ka lagée kamoe, leumoh dan hana meudaya! 11 Yoh masa ilée gata jihoreumat lagée musik keucapi, teuma jinoenyoe ka na di teumpat seungue lam donya ureuëng maté. Ulat-ulat jeuet keu peuratah gata dan glang-glang jeuet keu seulimbot gata.' 12 Hei raja Babel, yoh masa ilée gata bintang beungoh nyang ceumeurlang, teuma jinoenyoe ka rhot nibak langét! Yoh masa ilée gata peutaloe bubena bansa, teuma bak saát nyoe ka geurhom lam tanoh. 13 Gata tapeusak droe ta-ék u langét dan takeubah takhta gata di ateueh bintang nyang paleng manyang! Gata pike gata hase taduek sibagoe raja di ateueh gunong siblaih utara, di teumpat dewa-dewa meusapat. 14 Gata tapeugah, bahwa gata ta-ék ateueh nyang paleng manyang di dalam awan dan jeuet lagée Nyang Mahamanyang. 15 Padahai gata taseumpom u dalam nyang paleng lhok nibak donya ureuëng maté. 16 Awaknyan na disinan teuma jingieng dan jipandang gata. Awaknyan jitanyong, 'Peue beutôi nyoe ureuëng jih nyang peuyok-yok bumoe dan jipeuyo mandum keurajeuen? 17 Peu kheueh jihnyan nyang peuhanco bubena banda-banda dan nyang ubah donya jeuet keu padang pasi? Gobnyan nyoe kheueh nyang hántom jipeuleuh tawanan atawa jipeubiyeu awaknyan jiwoe?' 18 Banmandum beukaih raja-raja jitanom lam jrat deungon seumarak di teumpat makam jihnyan maséng-maséng, 19 teuma gata hana meukubu; manyét gata geutiek lagée tarök nyang jitulak, jiseubée deungon manyét-manyét peujuang nyang maté di mideuen prang, dan jigeulawa meusahoe ngon awaknyan u dalam guha batée, lagée bangke nyang teugilo-gilo. 20 Gata ka tapeubinasa nanggroe gata dan tapôh maté bansa gata keudroe. Lé sababnyan gata hana teukubu lagée raja-raja nyang laén. Hana meusidroe pih lam keuluwarga gata nyang hase jipeuseulamat. 21 Pôh mupôh maté sigra jipeuphon! Aneuëk-aneuëk agam gata teuma maté sabab desya indatu awaknyan. Hana meusidroe pih lamkawan awaknyan jimat peurintah di ateueh bumoe atawa jipeugöt banda-banda." 22 TUHAN Nyang Mahakuasa meufeureuman, "Ulôn teuma Lôn seurang Babel dan Lôn peuhanco banmandum. Hana meusidroe pih nyang Lôn peuseulamat, bahkan aneuëk-aneuëk manyak pih hana Lôn peu udeb. Ulôn, TUHAN, ka Lôn peugah haba. 23 Babel Ulôn peujeuet keu paya uyok teumpat tinggai meubagoe cicém hantu. Babel Ulôn sampôh sampoe gleh. Ulôn, TUHAN Nyang Mahakuasa, ka Lôn peugah haba." 24 TUHAN Nyang Mahakuasa meusumpah: "Nyang ka Ulôn reuncana nyan pasti teulaksana. 25 Ureuëng Asyur di Israel nanggroe Ulôn, teuma Ulôn peubinasa, dan nyang na nibak gunong-gunong Lôn teuma Lôn gilo-gilo. Ulôn peubeubaih bansa Ulôn nibak jitindéeh dan beuban nyang jipaksa ateueh awaknyan lé ureuëng Asyur. 26 Nyoe kheueh reuncana Ulôn keu donya; jaroe Ulôn meureuntang keu Lôn huköm bansa-bansa." 27 TUHAN Nyang Mahakuasa ka geupeuputôh mangat jipeubuet lagée nyan. Gobnyan geureuntang jaroe Geuh keu geuhuköm, dan hana meusidroe pih hana nyang hase jipeuteun Gobnyan. 28 Nyoe kheueh peusan nyang geu-umum nibak thon Raja Ahas meuninggai donya. 29 Hei bansa Filistin, kayée puntong nyang teupeuguna keu teuseukok gata ka patah. Teuma bék kheueh gata geumbira, sabab meunyoe saboh uleue nyang maté, uleue nyang leubeh jeuhet lom teuka keugeunantoe, dan boh uleue watée ceh lahé aneuëk naga meusayeub. 30 Gata keunong musém deuk nyang parah that, dan banmandum ureuëng nyang mantong tinggai geupôh maté. Dan teuma, ureuëng nyang paleng gasien lamkawan umat TUHAN meuteumé peunajoh, dan ureuëng-ureuëng nyang hana meudaya udeb deungon aman seuntosa. 31 Meuba-e kheueh, dan meudumpék kheueh talakée tulông, hai banda-banda Filistin! Bah kheueh gata banmandum yo sabab teumakot! Awan abée meukeubok di utara sibagoe tanda musoh teuma teuka; hana nyang gasuen lamkawan awaknyan. 32 Peue jaweueb jih nyang tanyoe peusampoe ubak utosan-utosan nyang teuka nibak bansa Filistin? Geutanyoe teuma ta peugah ubak awaknyan bahwa TUHAN ka geupeudong Sion, dan umat Gobnyan nyang meudeurita teuma meuteumé peulindongan disinan.

Nabi Yesaya 15

1 Nyoe kheueh peusan TUHAN keuhai Moab. Banda Ar dan Kir geupeuhanco dalam watée simalam, dan nanggroe Moab jeuet keu langang. 2 Peunduduek Dibon jiteungoh gunong jijakmo di teumpat seumeumah dewa-dewa. Peunduduek Moab deungon rasa seudeh geupeuba-e banda Nebo dan Medeba. Awaknyan jicuko ôk dan janggot sibagoe tanda meuduka. 3 Ureuëng-ureuëng nibak jalan jingui ija krong tanda meukabong; ureuëng meuba-e ngon jimo di tanoh lapang dan di ateueh bubông rumoh. 4 Ureuëng Hesybon dan Eleale jimo meu ong-ong, dan su awaknyan teudeungoe sampoe u Yahas. Dan bubena sipa-i yo meugám-gám; awaknyan ka gadôh ceubeueh. 5 Ulôn sayang that keu Moab! Peunduduek disinan jimeungungsi u banda Zoar dan u Eglat-Selisia. Na nyang teungoh jalan u Luhit sira jimo; na nyang plueng u Horanaim sira jikliek-kliek sabab kakeunong bala. 6 Ié Krueng Nimrim dan naleueng nyang timoh bak binéh nyan ka tho kreng, hana le sinaman timoh nyang ijo. 7 Ureuëng-ureuëng jijeumeurang aneuk krueng Haarabim dan jiuseuha jipeuseulamat peue mantong hareuta beunda jih nyang na. 8 Dipat mantong nibak bataih Moab teudeungoe su ureuëng kliek ngon teumawök. Moba-e nyan teudeungoe di Eglaim dan Beer-Elim. 9 Di Dibon ié krueng ka jeuet keumirah sabab meulawok deungon darah. Dan Po teu Allah teuma geupeuteuka lom hai-hai nyang leubeh dahsyat ateueh ureuëng-ureuëng nyang na disinan. Algojo tukang kôh takue nyang jikirém teuma jipoh maté banmandum ureuëng Moab nyang mantong udeb.

Nabi Yesaya 16

1 Di banda Sela di padang pasi, bansa Moab jikirém aneuëk bubiri sibagoe hadiah keu peunguasa di Yerusalem. 2 Ureuëng-ureuëng Moab jipreh bakbinéh Krueng Arnon sira jijak-jak hana meuteuntée sabab bingong lagée cicém-cicém nyang teu paroh lam uempueng. 3 Awaknyan jipeugah ubak bansa Yehuda, "Tapeugah kheueh laju peue nyang harôh kamoe peubuet. Tapeujeuet kheueh keu kamoe teumpat meuceu nyang teudoh watée teuka mata uroe nibak uroe kha, dan bah kheueh kamoe tinggai dimiyueb naungan gata. Kamoe nyoe peungungsi; tasöm kheueh kamoe dan bék kheueh neukhianat kamoe. 4 Idhin kheueh keukamoe mangat kamoe meunumpang di nanggroe gata. Neulindong kheueh kamoe ateueh ureuëng-ureuëng nyang keuneuk peubinasa kamoe." (Peunindasan dan peumbinasaan teuma na akhé, dan ureuëng-ureuëng nyang peuhanco dan nyang teugöm nanggroe Israel teuma leunyab. 5 Óh lheuehnyan sidroe lamkawan keuturonan Nabi Daud teuma jeuet keu raja, dan gobnyan geupeurintah bansa geuh nyan deungon gaséh dan seutia. Gobnyan geupeudong keuadelan dan bagaih meutindak keu geupeubuet nyang beutôi.) 6 Bansa Yehuda jipeugah, "Kamoe ka kamoe deungoe keuhai keusombongan bansa Moab. Kamoe meuteupeue bahwa awaknyan angkoh dan cungkak. Haba awaknyan na kheueh haba beurakah nyang hana meumakna." 7 Sabab nyan bah kheueh bansa Moab saleng meuba-e. Bah kheueh awaknyan jimo meunyoe teuingat peunajoh mangat nyang kayém awaknyan makheun di banda Kir-Hareset. Bah kheueh awaknyan putôh asa dan apoh apah. 8 Ladang-ladang nyang tho di Hesybon dan lampôh-lampôh anggô Sibma ka geupeubinasa, lampôh-lampôh nyang lazem jih jipeuhase anggô nyang paleng gét keu nyang mat kuasa bansa dan teupeujeuet awaknyan mabök. Yoh ilée lampôh-lampôh anggô nyan luwah sampoe u banda Yaezer; dan u timu sampoe u padang pasi, dan disiblaih u barat trok u meurandeh Laôt Maté. 9 Jinoenyoe ulôn peuba-e keubak anggô Sibma lagée ulôn peuba-e Yaezer. Ulôn peutijoh ié mata keu Hesybon dan Eleale, sabab hase bumoe jih ranab jipeuhabéh lé musoh. 10 Hana meusidroe pih nyang geumbira nibak ladang-ladang nyang subo nyan. Hana nyang meudumpék seumurak atawa nyang meuca-e di lampôh anggô. Hana nyang prah ié anggô keu jipeugöt ié anggô. Ulôn ka lôn peupiôh surak geumbira awaknyan. 11 Até ulôn teukliek dan hanco meukeupeng-keupeng watée ulôn ngieng keuadaan Moab dan Kir-Heres. 12 Ureuëng Moab meususah payah jijak teungoh u ateueh bukét keureubeuen nibak teumpat iébadat awaknyan keuji meudoá, teuma meusapeue hana meuhase. 13 Nyan kheueh peusan yoh masa ilée geubri lé TUHAN ubak Moab. 14 Dan jinoenyoe TUHAN meufeureuman: "Paih lhée thon teuk, peue mantong keukayaan nyang jipeubangga lé Moab teuma leunyab. Rakyat jih nyang le nyan tinggai bacut dan leumoh hana meudaya."

Nabi Yesaya 17

1 TUHAN meufeureuman, "Damsyik hana le lagée banda, teuma na kheueh rungka-rungka nyang meutumpok-tumpok. 2 Banda-banda di Siria jitinggai keu siumu masa dan jeuet keu teumpat kawan beulatang peulara; hana meusidroe pih nyang jiteujeuet paröh. 3 Israel gadôh teumpat meulindong dan Damsyik gadôh keumeurdehkaan jih. Ureuëng Siria nyang na mantong tinggai sidroe sapat udeb lam keuhinaan saban that lagée ureuëng Israel. Ulôn, TUHAN Nyang Mahakuasa, ka Lôn peugah haba." 4 TUHAN meufeureuman lom, "Teuma trok watée jih keujayaan Israel habéh, dan keumakmuran jih leunyab. 5 Israel jeuet lagée ladang di Refaim nyang ka habéh teupot boh gandom jih, dan teuma nyang na tinggai cit bacut. 6 Lagée bak zaiton nyang ka habéh teupot boh jih, dan nyang na tinggai napadub boh sagai nibak ujong deuen, meunan cit di Israel bacut sagai ureuëng nyang na seulamat. Ulôn, TUHAN, Allah Israel, ka Lôn peugah haba." 7 Nibak uroenyan ureuëng ramé jiulang lom jak lakée tulông ubak Peuncebta jihnyan, Po teu Allah kudus Israel. 8 Awaknyan hana meuharab le ubak hase buet jaroe jih keudroe, na kheueh miseubah-miseubah teumpat tot keumeunyan, dan patong-patong Dewi Asyera. 9 Nibak uroenyan, banda-banda Israel nyang kong peutahanan jih jeuet keu rungka nyang seungue ngon seungab, saban that lagée banda-banda nyang jitinggai lé ureuëng Hewi dan Amori bak watée awaknyan jiplueng nibak ureuëng Israel. 10 Israel, gata ka tatuwoe ubak Po teu Allah nyang peuseulamat dan peulindong gata lagée gunong batée nyang kukoh. Seubalek jih, gata ka tapula lampôh-lampôh keu dewa-dewa. 11 Teuma bahpi sinaman nyan laju jitimoh tarok dan meubungöng bak uroe gata pula nyan, teuma teutab hana meuhase sapeue. Nyang na na kheueh keususahan dan rasa sakét nyang hana jitem gadôh. 12 Bansa-bansa nyang teuga teungoh kiröh; su jih meugrum-grum lagée su umbak ié laôt nyang meutaga-taga. 13 Awaknyan maju lagée ié raya nyang tajam that. Teuma Po teu Allah geu ancam awaknyan, laju awaknyan jipeuplueng droe sampoe án jiôh. Awaknyan geupeucrok lagée sikéum jiyueb lé angén di lereng bukét, atawa lagée abée jiyueb lé angén badée. 14 Watée uroe ka meugleb laju teuka ubak awaknyan teumakot nyang paleng hebat, teuma óh karab trok watée beungoh awaknyan ka gadôh. Nyan kheueh naseb tieb-tieb ureuëng nyang reupah geutanyoe.

Nabi Yesaya 18

1 Nibak saboh nanggroe di meurandeh krueng Sudan na teudeungoe su sidom mirah nyang meu ié-ié. 2 Nibak nanggroe nyan teuka kheueh duta-duta jijak meulayeue u dalam Krueng Nil deungon peuraho-peuraho sikée. Hei, utosan-utosan nyang áref, tajak woe kheueh bubagaih u nanggroe gata nyang na bansipanyang krueng-krueng nyan. Taba kheueh saboh peusan keu bansa gata nyang teuga ngon peukasa, ureuëng-ureuëng gata nyang panyang-panyang dan meukulet halôh dan jitakot lé gob bansaboh donya. 3 Hei, gata banmandum nyang tinggai di ateueh bumoe! Ngieng kheueh meunyoe bupanji-bupanji ka teupeu-ék di pucak gunong-gunong! Deungoe kheueh meunyoe beureuguih ka teupeumeusu! 4 TUHAN meufeureuman ubak ulôn, "Di teumpat tinggai Ulôn nyang na di ateueh, Ulôn kukalon u miyueb deungon teunang dan ceurah, lagée teunang iémbon nyang hi lagée malam nyang seu-uem dan musém mupot, dan lagée peungéuh mata uroe óh watée uroe. 5 Sigohlom musém kayée jimuboh, watée bungöng jih ka lurôh dan boh anggô gohlom masak di ateueh bak, Sudan jipeuhanco lé musoh, mudah jih lagée sikin nyang teureulek ranteng-ranteng ateueh bak anggô. 6 Manyét-manyét tantra jih jitinggai mantong disinan dan jeuet keu peunajoh cicém-cicém watée musém khueng, dan beulatang juwah watée musém leupie." 7 Teuma trok saát jih bubena peuseumahan teupeusampoe ubak TUHAN Nyang Mahakuasa nibak nanggroe nyan nyang na bansipanyang krueng-krueng ile nyan, nibak bansa jih nyang teuga ngon peukasa, nibak ureuëng-ureuëng jihnyan nyang panyang-panyang dan meukulet halôh dan jitakot lé gob bansaboh donya. Awaknyan teuma teuka u Bukét Sion, ubak teumpat TUHAN Nyang Mahakuasa teuseumah.

Nabi Yesaya 19

1 Nyoe kheueh peusan keuhai nanggroe Meusé. TUHAN geujak u Meusé deungon keundeuraan awan nyang bagaih. Dumna beurala-beurala di nanggroe Meusé nyan ka habéh yo dikeue Gobnyan dan di ureuëng-ureuëng Meusé pih ka cut até. 2 TUHAN meufeureuman, "Ulôn kupeubeudôh prang syedara di nanggroe Meusé: syedara jilawan syedara, teutangga lawan teutangga, banda lawan banda dan keurajeuen lawan keurajeuen. 3 Ulôn kupeubateue peue mantong nyang jireuncana lé Meusé dan Lôn peupatah seumangat awaknyan. Awaknyan jilakée tulông ubak beurala-beurala, jilakée naseuhat dan peutunyok ubak tabib-tabib dan ubak roh-roh. 4 Nanggroe Meusé nyan Ulôn jok lam jaroe sidroe raja nyang zalem nyang peurintah awaknyan deungon keujam. Ulôn, TUHAN Nyang Mahakuasa, ka Lôn peugah haba." 5 Ié Krueng Nil jisurot dan treb bak treb laju tho. 6 Lhueng-lhueng meubée khiéng watée ié jih seumaken habéh. Geulagah dan naleueng jeuet keu layée. 7 Banmandum seunaman nyang na di seutôt binéh Krueng Nil teuma jeuet keu tho dan habéh jipeupo lé angén. 8 Dumna neulayan nyang lazemjih jikeumawe ngon jimeujeue disinan apoh apah sira jimeuratok ngon jimo ba-e sabab kawe dan jeue awaknyan hana meuguna le. Bubena ureuëng ban teumpeuen putôh asa; 9 awaknyan dan kuli nyang tung upah meuseudeh até dan patah meuseumangat. 11 Bit-bit bangai that banmandum peumimpén-peumimpén banda Zoan! Ureuëng Meusé paleng bijaksana bak jijok naseuhat nyang bangai! Jijeuet that lé awaknyan jipeugah ubak raja bahwa droe jihnyan keuturonan ureuëng-ureuëng malem dan keuturonan raja-raja bak jamén purbakala! 12 Wahai, raja Meusé, dipat kheueh peunaseuhat-peunaseuhat teungku amphon nyang carông-carông nyan? Mungken awaknyan jiteupeue peue nyang geureuncana lé TUHAN Nyang Mahakuasa keu nanggroe Meusé. 13 Bubena peumimpén Zoan dan Memfis na kheueh ureuëng-ureuëng bangai. Awaknyan kon meupimpén, teuma jipeusisat bansa droe jih keudroe. 14 TUHAN kheueh nyang peujeuet awaknyan mangat jitembri naseuhat nyang bingong nyan. Akibat jih, nanggroe Meusé salah hánkeunong, dan meuapit-apit lagée ureuëng mabök nyang meusireuk dan reubah ateueh muntah droe jih keudroe. 15 Di nanggroe Meusé hana le ureuëng nyang mantong meudaya, bah kheueh nyan nyang mat kuasa meunan cit deungon rakyat biasa, bah kheueh nyan ureuëng peunteng meunan cit ureuëng awam. 16 Teuma teuka watéejih bansa Meusé nyan lagée ureuëng inong nyang gusuen dan teumakot. Awaknyan yo meugám-gám meunyoe jikalon TUHAN Nyang Mahakuasa geureuntak jaroe Gobnyan keu geuhuköm awaknyan. 17 Tanoh Yehuda ka jeuet keugeumpa nibak ureuëng Meusé pajan mantong watée awaknyan teupeuingat ubak keuputosan TUHAN Nyang Mahakuasa keuhai awaknyan keudroe. 18 Bak watée nyan basa Ibrani jipeuguna di limong boh banda di nanggroe Meusé. Ureuëng-ureuëng disinan jibeuôt sumpah deumi nan TUHAN Nyang Mahakuasa. Saboh lamkawan banda nyan geuboh nan "Banda Mata uroe". 19 Bak watée nyan di pusat nanggroe Meusé na saboh miseubah keu TUHAN, dan nibak bataih nyan na teuma saboh taméh batée nyang teupeukhusos keu TUHAN. 20 Miseubah dan taméh nyan na kheueh sibagoe lambang keuhai teuka TUHAN Nyang Mahakuasa di nanggroe Meusé. Meunyoe bansa nyan jiteugom ngon jitindéeh, dan awaknyan jimeuhôi jilakée tulông ubak TUHAN, Gobnyan geukirém sidroe-droe ureuëng keu teupeuseulamat awaknyan. 21 TUHAN geupeugah droe ubak bansa Meusé, dan awaknyan teuma jituri dan jiseumah Gobnyan, sira jiba keureubeuen ngon peuseumahan ubak Gobnyan. Awaknyan jimeujanji ubak Gobnyan deungon meusumpah dan jipeubuet teuma. 22 TUHAN geuheuntam bansa Meusé, teuma óh lheuehnyan geupeupuléh teuma. Awaknyan jiwoe ubak TUHAN, dan Gobnyan geudeungoe doá awaknyan dan geupeupuléh teuma. 23 Bak watée nyan na rot raya bataih nanggroe Meusé deungon Asyur. Peunduduek nibak bandua boh nanggroe nyan jiwoe lom rot ueh nyan dan awaknyan meuiébadat meusajan-sajan teuma. 24 Bak watée nyan Israel saban keududukan jihnyan deungon Meusé dan Asyur, dan ban lhée boh bansa nyan jeuet keubeureukat keu bansaboh donya. 25 TUHAN Nyang Mahakuasa teuma geubri beureukat keu awaknyan deungon feureuman, "Ulôn bri beureukat keu gata, hai Meusé umat Ulôn, Asyur cebtaan Ulôn, dan Israel umat nyang Ulôn piléh."

Nabi Yesaya 20

1 Ateueh peurintah Sargon, raja Asyur, panglima sipa-i Asyur laju jijak prang Asdod, saboh banda atra ureuëng Filistin. 2 Lhée thon sigohlom nyan, TUHAN geuyue Yesaya bin Amos geuyue ploih sipatu dan ija krong nyang teungoh jingui. Gobnyan geuturot peue nyang teuyue nyan dan gobnyan geujak deungon teulon dan hana sok seulob. 3 Watée banda Asdod jikeupong, TUHAN meufeureuman, "Hamba Ulôn Yesaya ka lhée thon teulon dan hana meuseulob. Nyoe kheueh tanda peue nyang teujadi deungon nanggroe Meusé dan Sudan. 4 Raja Asyur teuma geuteun ureuëng-ureuëng nyang na nibak bandua boh nanggroe nyan dan awaknyan jigiréng deungon teulon. Tuha ngon muda, bandum jijak hana meubajée dan lapek gaki deungon punggong awaknyan deuh teulon, sibagoe peuhinaan keu nanggroe Meusé. 5 Ureuëng-ureuëng nyang peubangga Sudan dan meunan cit jimeubangga deungon Meusé ureuëng nyan meuteumé keucewa dan harapan jih hanco. 6 Bak watée nyan, ureuëng-ureuëng nyang na tinggai di sipanyang pante jipeugah, 'Ngieng kheueh peue nyang teungoh teujadi ateueh bansa nyang teungoh gata peubangga keu jilindong geutanyoe nibak raja Asyur. Panena mungken geutanyoe seulamat?' "

Nabi Yesaya 21

1 Nyoe kheueh peusan keuhai Babel: Lagée su angén badée nyang meusié-sié jipupöt di padang pasi, meunan kheueh watée teuka beuncana di nanggroe nyang dahsyat. 2 Ulôn meuteumé keumalon keuhai keujadian-keujadian nyang lumpah teumakot; keuhai peukhianatan dan peumbinasaan. Maju kheueh, hei sipa-i Elam, sureubu kheueh! Hei sipa-i Madai, keupông kheueh! Po teu Allah geupeuseuleusoe bandum peundeuritaan nyang jipeusabab lé Babel. 3 Deungon na keumalon nyan sampoe jeuet ulôn bingong ka hana deuh lôn meungieng atawa teudeungoe sapeue. Ulôn teumakot that dan sakét lumpah na, lagée sidroe ureuëng inong nyang teungoh meulahé aneuëk. 4 Até ulôn geulisah ngon apoh apah; deungon rasa hayut sampoe ulôn yo meugám-gám. Malam nyang ulôn meucén teuma teuba ubak teumakot. 5 Meunan cit ulôn kalon khanuri peujamé nyang ka jipeusiab; teumpat duek keumandum undangan pih ka teukeubah. Awaknyan laju jimakheun deungon jijieb ié. Hana teusangka-sangka teudeungoe peurintah: "Hei bubena peuwira! Peusiab laju peurisée gata!" 6 Laju TUHAN meufeureuman ubak ulôn, "Tajak peuduek laju sidroe ureuëng jaga dan tayue jihnyan meulapor peue nyang ka jikalon. 7 Meunyoe jihnyan na jikalon pasokan meuguda teuka meudua-dua, pasokan nyang duek ateueh keuleudée dan unta, nyan harôh tangieng beugét-gét." 8 Óh lheuehnyan ureuëng jaga nyan jitawök, "Teungku, ulôn ka lôn meujaga tieb-tieb uroe, uroe ngon malam." 9 Kalon, jehpat, nyan kheueh awaknyan! Pasokan meuguda nyang teuka meudua-dua. Óh lheueh nyan di ureuëng jaga nyan laju jipeugah, "Babel ka rhot! Patong-patong nyang jipuja lé awaknyan ka habéh hanco meutabu beba ateueh tanoh." 10 Bansa ulôn Israel! Gata ka jigilo-gilo dan jibloh-bloh lagée aneuk-aneuk gandom. Jinoenyoe ulôn peusampoe ubak gata haba jroh nyang ulôn deungoe nibak TUHAN Nyang Mahakuasa, Allah Israel. 11 Nyoe kheueh peusan keuhai Edom. Na ureuëng teumawök ubak ulôn di Edom, "Hei, ureuëng meujaga, peu kheueh mantong treb malam nyoe? Padub jeuem teuk sigohlom beungoh?" 12 Jaweueb ulôn, "Beungoh jiteuka, teuma meunan cit deungon malam. Meunyoe keuneuk teumanyong, teuka kheueh tatanyong lom." 13 Nyoe kheueh peusan keuhai Arab: Hei, ureuëng Dedan, kafilah-kafilah gata jipeudong khimah lam tamah meupaya tanoh Arab. 14 Hei peunduduek tanoh Tema, tabri kheueh ié jieb keu ureuëng-ureuëng nyang graih nyang jijak ubak gata, dan tabri kheueh peunajoh keu ureuëng meungungsi. 15 Sabab awaknyan ka jipeuplueng droe nibak mata peudeueng nyang ka teusut lam sarong, nibak busur nyang ka teulentur, dan nibak prang nyang teungoh meuhubô. 16 Laju TUHAN meufeureuman ubak ulôn, "Paih sithon teuk keujayaan sukée-sukée Kedar teuma habéh. 17 Ureuëng-ureuëng Kedar nyang mat aneuk panah na kheueh ureuëng nyang paleng peukasa. Teuma cibacut sagai nibak awaknyan nyang na seulamat. Ulôn, TUHAN Allah Israel ka Lôn peugah haba."

Nabi Yesaya 22

1 Nyoe kheueh peusan keuhai Pantôn Keumalon: Hei, peunduduek Yerusalem, pakon gata banmandum ta-ék u ateueh bubông rumoh? 2 Hana patot banmandum banda meupesta dan meusurak geumbira. Sabab peujuang-peujuang gata nyang maté lam prang nyoe kon maté sabab jimuprang. 3 Bandum panglima gata jipeuplueng droe dan jiteun sigohlom awaknyan hase jitimbak aneuk panah. Meunan cit bandum ureuëng gata nyang beuhe dan tungang meuteumé cit jiteun bahpi ka jiplueng jiôh. 4 Bék tapako keu ulôn; bah kheueh ulôn nyang peuba-e ureuëng-ureuëng nibak bansa lôn nyang ka maté. Bék cuba-cuba tapeuiem ngon tapeumangat até lôn. 5 Beutôi, TUHAN Nyang Mahamanyang dan Mahakuasa ka geupeuteutab uroe nyoe sibagoe uroe karu, teukeujot dan huru hara di Pantôn Keumalon. Bintéh-bintéh beuton banda ka habéh jipeuhanco. Dumpék su ureuëng lakée tulông meudeungong di ateueh-ateueh bukét. 6 Ureuëng Siria jiteuka deungon guda dan geuritan prang, ureuëng Elam meusinjata busur dan aneuk panah, seudangkan ureuëng Kir jipeusiab laju peurisée jihnyan. 7 Pantôn-pantôn nyang gumbô dan subo di Yehuda ka peunoh deungon geuritan prang. Pasokan meuguda ka siab di pintoe-pintoe geureubang Yerusalem. 8 Mandum peutahanan Yehuda reuloh. Bak masanyan, gata tapeureksa alat-lat prang di gudang sinjata. 9 Gata le that tateumé ngieng reutak-reutak di timbok banda Yerusalem nyang peureulée teupeugöt. Gata tapeureksa mandum rumoh-rumoh nyang na di Yerusalem, tareulöh napadub boh lamkawan nyan dan tacok batée jihnyan keu tapeugöt keu bintéh-bintéh beuton banda. Keu gata peusapat ié, 11 gata laju tapeugot kulam lam banda dan tatampong ié nibak kulam awai. Teuma gata hana tapeurati Po teu Allah nyang ka treb that geureuncana banmandum nyan, dan nyang teupeusabab nyan teujadi. 12 Bak watée nyan TUHAN Nyang Mahamanyang dan Mahakuasa geuyue ubak gata tamo ngon tameuba-e, tacuko ôk ateueh ulée dan gata sok ija krông. 13 Teuma sikeubit jih, gata meuseunang-seunang dan meupesta. Gata neusie leumô dan bubiri, gata makheun uengkot sie dan tajieb ié anggô sira gata tawök, "Jak geutanyoe ta makheun dan ta jieb ié, sabab singoh geutanyoe ka maté!" 14 TUHAN Nyang Mahamanyang dan Mahakuasa geupeugah droe ubak ulôn sira geukheun, "Keubit, keujeuhetan awaknyan hana teuma Ulôn peuamphon sampoe awaknyan maté. Ulôn, TUHAN, ka Lôn peugah haba." 15 TUHAN Nyang Mahamanyang dan Mahakuasa geuyue ubak ulôn mangat lôn jak meurumpok ngon Sebna, nyang jeuet keu ulée rumoh tangga meuligoe, mangat lôn peugah ubak gobnyan peusan TUHAN nyoe, 16 "Gata pike gatanyoe soe? Peue hak gata sampoe gata jakpheuet keudroe jrat gata di bukét batée? 17 Awaih, Ulôn kutiek gata sampoe jiôh. Gata Lôn teugöm dan Lôn gulong-gulong laju Lôn guleng lagée boh ban u nanggroe nyang raya. Disideh gata maté bak binéh geuritan-geuritan keubanggaan gata. Gata ka tapeukuto nan keuluwarga teungku amphon gata. 19 Sabab nyan gata Lôn peucat nibak jabatan gata dan Lôn peutron pangkat gata nyang manyang. 20 Bak watée nyan Ulôn tawök hamba Ulôn Elyakim bin Hilkia. 21 Peukayan meupangkat dan talo keuieng gata Lôn peungui keu gobnyan. Peue mantong keukuasaan gata teuma ulôn jok ubak gobnyan. Gobnyan jeuet keu bapak keu peunduduek Yerusalem dan Yehuda. 22 Gobnyan meukuasa peunoh dimiyueb raja keuturonan Nabi Daud. Gobnyan geumat gunci keurajeuen. Meunyoe gobnyan nyang peuhah, hana ureuëng nyang hase jitôb, dan meunyoe gobnyan nyang tôb, hana teuma ureuëng nyang hase jipeuhah. 23 Gobnyan Ulôn bri keududuekan nyang kong lagée pasak nyang meukeumat kong that nibak bintéh beuton. Mandum keuluwarga gobnyan jihoreumat sabab lé gobnyan. 24 Teuma kawöm keurabat dan tanggongan jih nyan jeuet keubeuban bagi gobnyan. Syedara jihnyan jipeusadeue droe ubak gobnyan, lagée kanot dan beulangong meugantung-gantung nibak pasak. 25 Meunyoe nyan teujadi, laju pasak nyang teuglong deungon kong that teuma lheueh dan rhot. Dan nyan kheueh keuneulheuh kawöm keuluwarga dan mandum ureuëng nyang jipeusadeue droe ubak gobnyan. Ulôn, TUHAN, ka Lôn peugah haba."

Nabi Yesaya 23

1 Nyoe kheueh peusan keuhai Tirus. Hai neulayan-neulayan Tarsis nyang harong laôt raya, meuba-e kheueh! Watée meulayeue woe di Siprus, ubak gata teubri tée bahwa banda Tirus ka hanco. Peulabohan dan rumoh-rumoh gata ka jeuet keu rungka-rungka. 2 Aloh alah kheueh, hai peunduduek nyang tinggai di seutôt binéh pasi, saudaga-saudaga Sidon! Sabab lazem jih gata neukirém ureuëng u meurandeh laôt keu jak bloe peubloe gandom Meusé dan keu teujak meukat deungon meubagoe bansa. 4 Hei banda Sion, keuhoreumat gata ka gadôh! Laôt raya nyang lhok hana jiaku gata le, jipeugah, "Ulôn hántom lom lôn meu aneuëk, hántom lom lôn peurayeuk aneuëk agam atawa aneuëk inong." 5 Dan ureuëng nanggroe Meusé pih teukeujot dan geumpa meunyoe jideungoe bahwa Tirus ka teupeubinasa. 6 Moba-e kheueh, dan meungungsi kheueh u Tarsis, hai peunduduek binéh pasi! 7 Kalon kheueh banda gata Tirus nyang ka na phon yoh ilée. Nyoe kheueh banda nyang lazem jih meuseunang-seunang? Nyoe kheueh banda nyang lazem jih geukirém ureuëng u meurandeh laôt keujijak meuranto disinan? 8 Bukon kheueh saudaga-saudaga jih kawöm bansawan nyang paleng jihoreumat di ateueh bumoe? Soe nyang cok peunutôh keu teupeurhot Tirus, banda nyang paleng meukuasa nyoe? 9 TUHAN Nyang Mahakuasa, Gobnyan kheueh nyang cok keuputosan nyan. Gobnyan nyang peuputôh mangat geupeuhabéh keusombongan peunduduek geuh ateueh peue mantong hase nyang ka awaknyan teumé, dan teupeumiyueb ureuëng-ureuëng nyang teuhoreumat di ateueh bumoe. 10 Tajak meubuet laju u ladang gata, hai peunduduek Tarsis, sabab bengkée kapai ka hana le. 11 TUHAN ka geuleueng jaroe Gobnyan di ateueh laôt dan geuguleng bubena keurajeuen nanggroe. Gobnyan nyang bri peurintah mangat jeuet kuta-kuta Funisia teupeumuseunah banmandum. 12 Feureuman TUHAN, "Hei banda Sidon! Gata hana meuseunang-seunang le. Peunduduek gata teutegon ngon teutindéeh. Bahpi awaknyan meungungsi u Siprus, awaknyan teutab hana aman." ( 13 Bukon bansa Asyur, na kheueh bansa Babel nyang peubiyeu banda Tirus jikuasa lé beulatang buih. Awaknyan kheueh teuma nyang peudong meunara-meunara teukeupong, nyang peureulöh kuta-kuta jih dan jipeujeuet banda nyan meurungka-rungka.) 14 Meuba-e kheueh, hai peulaôt-peulaôt! Banda nyang gata peubangga ka habéh hanco. 15 Teuma teuka watée jih Tirus jipeutuwo nyang treb jih tujoh ploh thon, sadub deungon umu sidroe raja. Meunyoe ka liwat watée nyan, Tirus teuma jeuet lagée inong jeuhet lagée lam ca-e nyoe: 16 Jakcok kheueh keucapi, keulileng kheueh banda, hai inong jeuhet malang nyang teupeutuwo! Peutek kheueh keucapi, meuca-e kheueh lom, mangat gata ji ingat lom teuma. 17 Óh ka habéh watée nyang tujoh ploh thon nyan, TUHAN teuma geupeu ingat ubak Tirus dan geupeu mungken jihnyan jipeubuet buet nyang ka awai ilée. Gobnyan meuniaga deungon mandum keurajeuen di ateueh muka bumoe. 18 Laba dan upah nyang jiteurimong hana jikeubah, teuma jipeuseumah ubak TUHAN. Ureuëng-ureuëng nyang seumah TUHAN jipeuguna péng nyan keu jibloe bahan peunajoh nyang jipeureulée.

Nabi Yesaya 24

1 TUHAN geupeubinasa bumoe, sampoe bumoe nyan ka jeuet keu tandus dan seungue. Gobnyan geubalek muka bumoe nyan dan peunduduek disinan geupeu crebre. 2 Banmandum ureuëng teuma jirasa naseb nyang saban: teungku-teungku imeum dan rakyat, namiet nyang teubloe dan amphon-amphon, nyang meubloe dan nyang peubloe, nyang pinjam dan nyang jôk pinjam, nyang kaya dan nyang gasien. 3 Bumoe teung bayeung dan geupeuhanco. TUHAN ka meufeureuman, dan hainyan pasti teujadi. 4 Bumoe nyoe jeuet keu to dan layée, bansaboh donya meurana. Meunan cit langét dan bumoe pih meurana meusajan teuma. 5 Bumoe ka jeuet keu kuto sabab peunduduek disinan ka habéh ji iengkeue ubak mandum peurintah Allah, ji ubah peue-peue nyang ka geupeuteutab dan ji iengkeue ubak janji nyang ka geupeugét deungon awaknyan keu siumu masa. 6 Sabab nyan kheueh TUHAN ka geukutok bumoe dan geuhuköm peunduduek disinan sabab buet jih keudroe. Awaknyan geutot sampoe hangöh dan bacut sagai nyang na seulamat. 7 Bak anggô udeb meurana dan ié anggô payah that meuteumé. Ureuëng nyang yoh masa ilée galak até bak saát nyoe ka seudeh. 8 Su peutek keucapi nyang riang hana teudeungoe le, su péh rapa-i nyang geumbira pih ka hana le. Dan su ureuëng nyang subra meusukaria nyan pi ka seungab. 9 Hana le ureuëng jieb anggô sira meuca-e, dan hana le nyang peuturot lazat deungon ié kreueh. 10 Bansaboh banda ka karu; mandum pintoe rumoh teugunci sabab nyang duek dirumoh nyan teumakot raya. 11 Ureuëng-ureuëng ramé ka jimeu kuk-kuk bak rot ueh raya sabab ié anggô ka hana le. Hana le keugeumbiraan di nanggroe nyan keu siumu masa. 12 Banda ka hanco meukeupeng-keupeng, dan pintoe-pintoe geureubang pih ka teung bayeung hana le meuguna. 13 Nyan kheueh nyang teujadi bansaboh bumoe di tieb-tieb bansa. Saban haijih lagée musém pot boh kayée, watée boh zaiton teupot sampoe habéh dan boh anggô nyang keu neulheuh teupot di ateueh bak. 14 Ureuëng-ureuëng nyang seulamat meuca-e geumbira. Ureuëng di barat jipeusampoe keuhai keu agongan TUHAN 15 dan ureuëng di timu jipujoe Gobnyan. Peunduduek di binéh pasi jipeu agong TUHAN, Po teu Allah Israel. 16 Phon ujong bumoe teudeungoe su ca-e seumeujo keu Israel, bansa nyang taát. Teuma ceulaka kheueh ulôn! Ulôn meurana! Peungkhianat teutab mantong jikhianat, dan awaknyan seumaken meukianat. 17 Deungoe kheueh, hai banmandum peunduduek bumoe! Keugeumparan, peurangkab dan taron jipreh-preh gata. 18 Ureuëng nyang jipeuplueng droe nibak keugeumparan rhot lam peurangkab, dan ureuëng nyang hana keunong lam peurangkab teuma keunong taron. Ujeuen raya jitöh di langét, dan bumoe pih meuhayak. 19 Bumoe crah, reumok dan guyah. 20 Ban bumoe meuapit-apit lagée ureuëng mabök, dan meuhayak lagée jambo lam angén badée raya. Bumoe teupeuro sabab desya nyang brat. Jih nyan hanco dan hana meubeudôh le. 21 Bak watée nyan TUHAN geuhuköm ureuëng nyang mat kuasa angkasa raya dan raja-raja di ateueh bumoe. 22 Awaknyan jigumpôi meusajan-sajan lagée tahanan di dalam uruek, dan geurhom u dalam glab sampoe watée teuhuköm. 23 Buleuen jeuet keuseupôt dan mata uroe pih hana le meucahya, sabab TUHAN Nyang Mahakuasa geumat peurintah sibagoe raja. Gobnyan geumat peurintah di Yerusalem, di ateueh Bukét Sion, dan geutunyok keu angongan Gobnyan ubak banmandum peupimpén umat Gobnyan.

Nabi Yesaya 25

1 TUHAN, Droeneueh kheueh Allah ulôn, lôn peuagong Droeneueh dan lôn pujoe nan Droeneueh. Sabab karya-karya Droeneueh keubit that takjub; Droeneueh nyang reuncana phon yoh ilée, dan neupeubuet deungon seutia. 2 Banda nyan ka neupeuhanco; banda meukuta nyan ka jeuet keu rungka-rungka. Meuligoe nyang jipeudong lé ureuëng aséng ka habéh hanco, dan hana jipeudong le keu siumu masa. 3 Droeneueh jipujoe lé bansa-bansa nyang teuga, dan jitakot di banda-banda bansa-bansa nyang keujam. 4 Sabab Droeneueh jeuet keuteumpat meu-ungsé keu ureuëng nyang leumoh, teumpat nyang aman nibak ureuëng gasien watée meukarat. Droeneueh kheueh peulindong nibak angén badée, teumpat meupayong lé uroe criet nyang meutala. beuliong watée ujeuen teuka, 5 lagée angén seu-uem bak tanoh nyang tho kreng. Teuma Droeneueh neupeujeuet musoh kamoe hana jeuet jipeuhah babah, neupeupiôh su ureuëng-ureuëng keujam nyang meudumpék, lagée meupayong bak awan nyang teupeugadôh tutông uroe tarek. 6 Di Bukét Sion, TUHAN Nyang Mahakuasa geupeusiab peujamuan keu banmandum bansa di ateueh donya. Gobnyan geuhidang peunajoh nyang paleng lazat dan ié anggô nyang teupiléh. 7 Di ateueh bukét nyan, Gobnyan teusalôb awan keuseudehan nyang teupeukeulubong bubena bansa. 8 TUHAN Nyang Mahakuasa geupeubinasa mawöt keu siumu masa! Gobnyan geusampôh ié mata di tieb-tieb muka, dan geupeujiôh keuhinaan nyang jitanggong lé umat Gobnyan bansaboh bumoe. TUHAN ka geumeufeureuman, dan hainyan pasti teujadi. 9 Bak watée nyan ureuëng laén jipeugah, "Sikeubit jih, Gobnyan kheueh Po teu Allah geutanyoe; Gobnyan kheueh nyang ta preh-preh, mangat geutanyoe geupeuseulamat. Beutôi that, nyoe kheueh TUHAN; Gobnyan kheueh nyang ta preh-preh. Jinoenyoe tanyoe seumurak meuhubô, sabab Gobnyan ka geupeuseulamat geutanyoe." 10 TUHAN geulindong Bukét Sion, teuma Moab geu gilo-gilo lagée jumpueng lam teumpat bröh. 11 Peunduduek disinan jisunyueng jaroe Lagée ureuëng keuneuk meulangue. Teuma TUHAN geupeuhina keu angkohan awaknyan sampoe awaknyan hana meudaya. 12 Kuta-kuta Moab meunan cit deungon beuton-beuton jih nyang manyang-manyang geureulöh dan laju geutiek u ateueh tanoh sampoe hanco meuabée.

Nabi Yesaya 26

1 Bak uroenyan ureuëng laén jimeuca-e deungon ca-e nyoe di tanoh Yehuda: "Alangkah kong jih banda geutanyoe; Po teu Allah keudroe nyang peudong beuton jih, disinoe geutanyoe seulamat. 2 Peuhah kheueh laju bubena babah pintoe geureubang, mangat jitamong bansa nyang seutia, bansa nyang jitem peubuet keuheundak Allah jih. 3 TUHAN, Droeneueh nyang bri damé dan seujahteura keu ureuëng nyang kong até, sabab ureuëng nyan peucaya ubak Droeneueh. 4 Peucaya kheueh ubak TUHAN mantong, sabab TUHAN Allah sabe geulindong geutanyoe. 5 TUHAN geuhina ureuëng nyang cungkak; Gobnyan nyang peuhanco banda awaknyan nyang meukuta, dan geupeurata deungon tanoh. 6 Ureuëng-ureuëng gasien dan ureuëng seungsara teuma jigilo-gilo ureuëng nyan." 7 Ureuëng jujoe jijak ateueh jalan nyang teupat, sabab Droeneueh, TUHAN, geurinteh jalan keu jihnyan. 8 Kamoe seutôt keuputosan Droeneueh, ya TUHAN, dan kamoe meupreh-preh Droeneueh; Droeneueh kheueh nyang kamoe pujoe dan teumpat kamoe peulaboh até kamoe nyang rindu. 9 Jiwa ulôn teutab rindu ubak Droeneueh meunyoe malam ka teuka, até ulôn meuharab Droeneueh óh watée beungoh. Meunyoe Droeneueh neupeu hakém bumoe nyoe bak saboh saát, peunduduek donya teuma jiteupeue peue nyang beuna. 10 Bahpi ureuëng jeuhet jipeusaneut deungon jroh that, jihnyan teutab hana jimeurunoe peue nyang beuna. Di nanggroe huköm pih jihnyan jipeubuet jeuhet, dan hana jitem angkée kuasa TUHAN. 11 TUHAN, Droeneueh ka siab neuhuköm musoh Droeneueh, teuma awaknyan hana jiteupeue. Bah kheueh awaknyan malée teusipu-spu jingieng geunaséh Droeneueh keu umat Droeneueh. Bah kheueh awaknyan habéh hana tinggai meusidroe lé huköman nyang Droeneueh keubah keu awaknyan. 12 TUHAN, Droeneueh nyang peugot kamoe seujahteura; peue mantong nyang kamoe peubuet, Droeneueh kheueh nyang peubuet nyan keu kamoe. 13 Kamoe ka lheueh jikuasa lé amphon-amphon nyang laén, teuma teutab Droeneueh kheueh nyang kamoe aku, ya TUHAN, Allah kamoe! 14 Awaknyan ka meuninggai dan hana udeb le, areuwah jih hana jibeudôh le. Sabab awaknyan ka habéh neupeubinasa dan neusampôh nibak ingatan. 15 Droeneueh ka neulipat ganda kamoe nyoe, umat Droeneueh, ya TUHAN, dan neupeuluwah wilayah kamoe, lé nyan kheueh Droeneueh teupeu agong. 16 Droeneueh ka neuhuköm kamoe; watée meuseupet kamoe meupaleng ubak Droeneueh, dan meudoá ubak Droeneueh, ya TUHAN 17 Lagée ureuëng inong keuneuk peulahé aneuëk áh éuh teubot-bot ngon teuleuntek-leuntek bak geupeuteun sakét, meunan kheueh kamoe nyoe, dikeue Droeneueh, ya TUHAN. 18 Kamoe raya pruet dan teubot-bot sabab sakét, teuma sapeue hana kamoe peulahé; hana kamoe bri keuseulamatan keu donya, dan hana teuma teutamah peunduduek jih. 19 Umat Droeneueh nyang maté teuma udeb lom, manyét-manyét awaknyan teuma jibeudôh lom. Ureuëng nyang ka teukubu lam tanoh jibeudôh sira jiseumurak ngon meuhubo. Lagée iémbon nyang peuseugar bumoe, Droeneueh neupeu udeb umat Droeneueh nyang ka treb maté. 20 Tamong kheueh u dalam rumoh gata, hai bansa ulôn, dan gata tôb kheueh pintoe gata. Neumusöm kheueh meu sikeujab sampoe meureuka TUHAN ka reuda. 21 TUHAN teuma geutron nibak teumpat Gobnyan meutahta di dalam syeuruga keu geuhuköm peunduduek bumoe kareuna desya awaknyan keudroe. Poh gobnyan maté nyang awaknyan peubuet deungon musöm-musöm teuma geupeuleumah. Tanoh hana le geuseubée ubak ureuëng-ureuëng nyang maté keunong poh.

Nabi Yesaya 27

1 Bak masa nyan TUHAN geupeuguna peudeueng Gobnyan nyang khong dan tajam keu geuhuköm Lewiatan, uleue nyang meuglong-glong dan meupalet-palet nyan, dan keu teupoh maté naga laôt. 2 Bak watée nyan TUHAN teuma meufeureuman, "Meuca-e kheueh keuhai lampôh anggô Lôn nyang ceudah. 3 Ulôn, TUHAN, nyang jaga nyan; tieb-tieb watée Ulôn jak siram, uroe malam Ulôn jaga, mangat bék na ureuëng peukaru. 4 Ulôn hana meurasa beungéh le. Seukira jih na naleueng atawa tamah nyang meuduro, Ulôn teuma basmi, dan Lôn tot sampoe habéh bube nyang na. 5 Teuma meunyoe musoh-musoh umat Lôn jimita peulindongan nibak Ulôn, bah kheueh awaknyan meudamé deungon Ulôn, bit, meudamé kheueh deungon Ulôn." 6 Nibak watée nyang teuma teuka, bansa Israel teuma jeuet lagée bak kayée nyang meu ukeue dan meukeumang, dan peunoh di ateueh muka bumoe deungon boh-boh nyang na nibak jih nyan. 7 TUHAN geuhuköm umat Gobnyan hana saban brat jih lagée Gobnyan geuhuköm bansa-bansa nyang jimeumusoh awaknyan. Gobnyan hana geupoh maté umat Geuh lagée Gobnyan geupoh maté musoh Geuh. 8 TUHAN geuhuköm umat Gobnyan deungon cara geuböih awaknyan u nanggroe laén. Gobnyan geu use awaknyan deungon angén jeuhet nyang teuka di timu. 9 Teuma desya-desya bansa Israel nyan barô kheueh hase geusampôh meunyoe miseubah dewa-dewa geugileng sampoe halôh lagée teugileng gapu. Bubena dupa dan lambang dewi Asyera geupeuhanco sampoe rata. 10 Banda nyang meukuta nyan ka jeuet keu seungue dan jitinggai lagée blang beulantara nyang kosong. Kawan beulatang peulara jimeurot naleueng nyang na disinan sira jipiôh dan bubena ôn-ôn nibak deun-deun kayée. 11 Meunyoe ranteng-ranteng jih singoh ka tho kreng dan patah, laju jijak bubena ureuëng inong jicok ranteng kayée nyan jeuet keu kayée apui. Bansa nyan hana muphom sapeue, Po teu Allah geucebta nyan hana teuma geugaséh awaknyan. 12 Bak watée nyan TUHAN laju geupeusapat bansa Gobnyan phon sidroe ubak sidroe di Krueng Efrat sampoe trok u bataih nanggroe Meusé. Gobnyan geupeu aséng awaknyan lagée ureuëng nyang ji peuaséng aneuk gandom lam sikéum jih. 13 Watée nyan geuyueb beureuguih raya keu teutawök mandum ureuëng Israel nyang geuböih di Asyur dan di Meusé. Awaknyan jiteuka u Yerusalem keujijak seumah TUHAN nibak bukét Gobnyan nyang suci.

Nabi Yesaya 28

1 Ceulaka kheueh banda nyang ka jeuet keubanggaan bubena ureuëng mabök Israel! Keu indahan jih ka jeuet keu layée lagée keunarang bungöng nyang na lagée ateueh ulée awaknyan. Cilaka kheueh banda nyang teudong cot óh manyang bak teungoh pantôn nyang subo, keubanggaan ureuëng-ureuëng nyang mabök siteungoh maté. 2 TUHAN geu kirém sidroe ureuëng nyang teuga dan peukasa. Teuka lagée angén badée meusajan deungon ujeuen es, lagée ujeuen raya dan ié raya nyang jipeuhanyot peue-peue nyang na. Deungon that beungéh Gobnyan geusumpom awaknyan ateueh tanoh. 3 Keubanggaan peumimpén-peumimpén nyang mabök nyan teuma geugilo-gilo. 4 Banda awaknyan nyang meugah ngon meusyeuhu nyang ka phon layée nyan teuma leunyab. Naseb jih lagée naseb boh ara nyang masak sigohlom trok bak musém; meunan jikalon, laju jipot dan jipajoh. 5 TUHAN Nyang Mahakuasa geupeujeuet keunarang bungöng nyang ceudah keu umat Gobnyan nyang na mantong tinggai sidroe-droe teuk. 6 TUHAN geubri rasa seudeh keu mandum hakém, dan keubeuranian keu ureuëng-ureuëng nyang meutugaih jijaga banda nibak jiprang lé musoh. 7 Meunan cit bubena nabi-nabi dan teungku-teungku imeum ka habéh mabök sabab lumpah that le jijieb ié anggô dan ié arak. Awaknyan watée jijak badan jih ka meu ayon-ayon dan gaki jih meugantoh-gantoh sabab pikeran awaknyan ka hana meuteuntée. Nabi-nabi ka hana le hase geukeumalon peue nyang geubri hai-hai nyang jeuet geungieng lé Po teu Allah ateueh awaknyan. Meunan cit di teungku-teungku imeum ka hana le hase geupeuputôh peukara-peukara nyang jipeuhadab ubak awaknyan. 8 Ateueh meuja awaknyan ka peunoh deungon muntah, sa ka hana le teumpat nyang gleh. 9 Awaknyan meupeukeran ubak ulôn, laju jipeugah, "Geupike gobnyan soe nyang geupeuruno? Soe teuma nyang peureulée nyang peutrang hai nyan? Geupike lé gobnyan geutanyoe nyoe aneuëk manyak nyang barô teusapih? 10 Ci neupike ék kheueh beutôi Gobnyan geupeurunoe geutanyoe sira geu peuija hurof deumi hurof, haba deumi haba, kalimat deumi kalimat." 11 Meunyoe gata hana tatem deungoe ulôn, TUHAN teuma geukirém ureuëng aséng mangat jijak peurunoe gata keuhai logat ganje dan basa aséng. 12 TUHAN geupeutaba teumpat peuniyôh keu gata banmandum, teuma gata hántatem deungoe Gobnyan. 13 Lé sababnyan kheueh TUHAN geupeurunoe gata hurof deumi hurof, haba deumi haba dan kalimat deumi kalimat. Dan watée gatajak gata reubah meulinteung sampoe luhok, teucarueh dan keunong teun. 14 Deungoe kheueh peue nyang geufeureuman lé TUHAN, hai ureuëng-ureuëng peuhina nyang mat peurintah rakyat di Yerusalem! 15 Gata tapeugah bahwa gata ka lheueh tapeugét peujanjian deungon mawöt dan tapeugét peusitujuan deungon donya ureuëng maté. Gata ka meurasa pasti bahwa beuncana nyang teuka nyan hana keunong ateueh gata, sabab gata tapeuguna tipée muslihat mangat teulindong droe keudroe gata. 16 Lé sabab nyan, TUHAN Nyang Mahamanyang laju geumeu feureuman lagée nyoe, "Ulôn teuma kupeuduek dasai nyang khong dan kukôh di Sion; sineuk batée keunaleueng nyang meuyuem deungon tulesan: 'Soe nyang peucaya teuguh, hana jimeunyeurah taloe.' 17 Keuadelan Ulôn peujeuet talo peu-uko, dan keujujoran Ulôn peujeuet keu talo sineupat." Ujeuen batée jisampôh gleh banmandum sulet nyang gata peubangga. Ié raya jipeuhanyot teumpat musöm gata. 18 Peujanjian gata deungon mawöt dan peuseutujuan gata deungon donya ureuëng maté nyan geupeubateue, dan meunyoe beuncana nyan teuka, gata hanco teugilo-gilo. 19 Gata jiteuka malang hana piôh-piôh nyang harôh tatanggong tieb-tieb uroe, beungoh, uroe dan malam. Gata yo ngon teumakot meunyoe gata muphom peusan Po teu Allah. 20 Gata lagée ureuëng nyang keuneuk teungéut ateueh peuratah nyang kureueng panyang keu teumpat peunyue droe. Dan ija seulimbot gata pih kureueng luwah keu keusilimbot gata. 21 TUHAN geubeudôh lagée Gunong Perazim. Gobnyan meujuang lagée di Pantôn Gibeon mangat peubuet meukeusut Gobnyan, meukeusut nyang ganje nibak manusia! Gobnyan geulaksana buet Gobnyan nyang luwabiasa. 22 Ulôn ka lheueh lôn deungoe keuputosan Po teu Allah Nyang Mahamanyang dan Mahakuasa keu peuhanco bansaboh nanggroe. Bék tapeujayeh tutoe haba peuingat nyang ulôn peusampoe nyoe. Eunteuk jeuet keu leubeh sulet nibak gata keutapeusie droe! 23 Deungoe kheueh tutoe haba lôn, simak kheueh peue nyang ulôn peusan. 24 Sidroe ureuëng tani hana sabe-sabe jimeu ué, ceumangkôi dan jimeumpoe tanoh droe jih mangat jipula. 25 Meunyoe tanoh jihnyan ka siab, ureuëngnyan laju jitabu bijéh, miséue jih jintan itam dan jintan putéh. Gobnyan jipula dua macam gandom meubareh meuatoe, dan nibak binéh nyan seunaman laén. 26 Ureuëng nyan jiteupeue cara teupeubuet atranyan, sabab ka geupeurunoe lé Po teu Allah jih. 27 Ureuëng nyan hana jingui eretan ceumeulo keu teulô jintan itam dan ruda geurubak keu teuguleng jintan putéh. Keu nyan jipeuguna reunong nyang ámpong. 28 Watée teulô boh gandom, boh gandom nyang teulô nyan hana kayém that jiseupôt sampoe án hanco. Bukon lagée nyan! Ureuëng nyan jiteupeue cara ceumeulo nyang paih deungon cara jipeu ék geurubak u ateueh nyan deungon hana jipeuhanco aneuk-aneuk gandom nyan. 29 Keubijaksanaan nyan teuka jih nibak TUHAN Nyang Mahakuasa. Bandum reuncana TUHAN bijaksana dan sabe meuhase.

Nabi Yesaya 29

1 Ceulaka kheueh banda Yerusalem nyang jipeunan miseubah Allah! Ceulaka kheueh banda teumpat Nabi Daud peudong khimah! Bah kheueh thon-thon gantoe meugantoe deungon peurayaan-peurayaan. 2 Teuma Po teu Allah geupeuteuka beuncana ateueh banda nyan, sampoe ureuëng ramé meurang-rang dan apoh-apah. Bansaboh banda ka lagée miseubah nyang bulut meulabo deungon darah. 3 Po teu Allah geuseurang banda nyan dan geukeupong rot meubagoe peunjuru. 4 Yerusalem ka lagée banda hantu nyang jiuseuha keu jipeudeungoe su gobnyan rot lam tanoh, su nyang reudok teuka lam abée. 5 Teuma banda ureuëng aséng nyang keujam gadôh lagée abée atawa lagée sikéum nyang jipöt lé angén. Deungon sikreb-sikreb dan hana teusangka-sangka. 6 TUHAN Nyang Mahakuasa geupeubeubaih banda nyan deungon angén badée dan geumpa bumoe nyang lumpah dahsyat. Gobnyan geupeutron angén puteng beuliong dan apui hu meuháb-háb sira jimeulieh keudeh keunoe. 7 Laju banmandum pasokan aséng nyang seurang banda Yerusalem, teuma banda miseubah Po teu Allah nyan, banmandum nyang keupong dan nyang heuntam banda nyan, teuma gadôh lagée lumpo watée malam. 8 Bansa-bansa nyang meusapat keuneuk jiseurang Yerusalem lagée ureuëng deuk nyang meulumpo teungoh jimakheun, laju jibeudôh deungon pruet söh, atawa lagée ureuëng nyang lumpah that glah nyang meulumpo teungoh jijieb ié, laju jibeudôh deungon rukueng jih nyang tho. 9 Hana putôh teuhireuen-hireuen dan jipet mata lagée ureuëng buta! Jeuet kheueh gobnyan keu ureuëng mabök, teuma bukon lé sabab jijieb ié anggô. Jijak laju ngon badan meu apit-apit, teuma bukon lé sabab jijieb ié arak. 10 TUHAN geupeujeuet gata teungéut mata dan gata-éh deungon sineunya. Gobnyan nyang tôb mata bubena nabi dan geupeupayong mata ureuëng nyang keumalon. 11 Makna tieb-tieb nyang teukalon teusöm keu gata, lagée kitab nyang teuséegée. Meunyoe kitab nyan teuba ubak sidroe-droe ureuëng nyang jeuet geubeuet mangat gobnyan geubeuet keu gata, gobnyan teuma jipeugah bahwa geuhnyan hana carông, sabab kitab nyan ka teuséegée. 12 Meunyoe jiba ubak ureuëng nyang buta hurof, ureuëng nyan teuma jijaweueb bahwa jihnyan hana jeuet meubaca. 13 TUHAN meufeureuman, "Ureuëng-ureuëng nyan jiseumah Ulôn deungon tutoe haba, teuma até awaknyan jiôh nibak Ulôn. Agama awaknyan teuma peuratoran manusia nyang jiapai mantong. 14 Lé sababnyan awaknyan Ulôn peukeujot deungon Lôn heuntam meu-ulang-ulang. Ureuëng nyang bijaksana teuma jeuet keubangai, dan banmandum iéleumé nyang na nibak awaknyan hana meuguna." 15 Ceulaka kheueh ureuëng nyang jiuseuha jipeusöm-söm reuncana jih nyan ubak TUHAN! Awaknyan jimeubuet deungon seungab-seungab, dan jipeugah hana meusidroe na kalon atawa nyang teupeu peue nyang awaknyan peubuet. 16 Peue mantong jiputa balek lé awaknyan. Toh kheueh nyang leubeh peunteng, tukang beulangong atawa tanoh kliet? Peu kheueh mungken nyang teupeugét jipeugah keu nyang peugét jihnyan, "Bukon droeneueh nyang peugét ulôn"? Atawa peu kheueh carông jipeugah lé beunda nyan ubak jihnyan, "Gata hana jeuet sapeue"? 17 Na peupatah nyang su jih lagée nyoe, "Hana treb le gle ka jeuet keu tanoh teumpat meulampôh, dan tanoh lampôh nyan jigisa lom jeuet keu tanoh gle." 18 Bak watée nyan di ureuëng tulo hase jideungoe tutoe haba nibak saboh kitab nyang teubaca, dan ureuëng buta nyang yoh awaikon bunoe ka udeb di dalam seupôt teuma hase jikeumalon. 19 Ureuëng-ureuëng gasien dan hina geurasi lom keubahgiaan nyang ka geubri lé Po teu Allah kudus Israel. 20 Nyan kheueh keuneulheuh ureuëng-ureuëng nyang tindéeh ureuëng laén dan jihina Po teu Allah. Po teu Allah teuma geupeubinasa mandum ureuëng meudesya, 21 ureuëng nyang galak buet fiteunah, ureuëng nyang tam mangat ureuëng jeuhet bék teuhuköm, dan ureuëng nyang peutabu haba-haba sulet mangat ureuëng jujoe bék meuteumé keuadelan. 22 Sabab nyan, TUHAN, Po teu Allah Israel nyang peubeubaih Nabi Ibrahim, jinoe geupeugah, "Bansa Ulôn, gata hana jihina le dan wajah gata hana pucat le sabab malée. 23 Sabab watée gata ngieng aneuëk-aneuëk gata nyang Ulôn bri keu gata, teuma gata meungaku bahwa Ulôn kheueh Po teu Allah nyang kudus Israel. Gata tahoreumat Ulôn dan tatakot keu Ulôn. 24 Ureuëng bangai jimeurunoe muphom dan ureuëng nyang sabe tunu teuma galak teupeurunoe."

Nabi Yesaya 30

1 TUHAN meufeureuman, "Ceulaka kheueh bubena peumimpén Yehuda, sabab awaknyan jibeurontak keu Ulôn. Awaknyan jiseutôt reuncana nyang kon teuka nibak Ulôn. Awaknyan jiteken peujanjian nyang hana sisuai deungon keuheundak Ulôn. Dan meutumpok-tumpok kheueh desya awaknyan. 2 Awaknyan jijak u nanggroe Meusé deungon hana jilakée keuputosan Lôn. Awaknyan meulindong di nanggroe Meusé dan meuharab geutulông lé raja Meusé. 3 Teuma raja nyan jibri keucewa keu awaknyan, dan peulindongan nyang jiharab di Meusé nyan gagal. 4 Bahpi utosan-utosan Yehuda ka trok u banda-banda Zoan dan Hanes di nanggroe Meusé, 5 mandum ureuëng teuma jiteuka malée sabab ka jimeuharab ubak bansa nyang hana meuguna nibak awaknyan. Nyang awaknyan teumé bukon kheueh laba atawa sinulông, teuma na kheueh peunghinaan." 6 Meunoe kheueh feureuman TUHAN keuhai beulatang-beulatang nyang na tinggai nibak tanoh seulatan, "Bubena utosan jipeudieng u ateueh keuleudée dan unta awaknyan deungon hadiah-hadiah, laju jijak rot daerah nyang peunoh deungon mara bahya nyang jikeumiet lé singa, uleue meubisa dan naga meusayeub. Hadiah-hadiah nyan awaknyan peuseumah ubak saboh bansa nyang toh bansa nyan hana ék jitulông awaknyan. 7 Bantuan nanggroe Meusé peucuma mantong. Sabab nyan nanggroe Meusé nyan Ulôn gala nan, 'Naga nyang hana meubahya'." 8 Po teu Allah geupeurintah ubak ulôn mangat ulôn cetet buet-buet nyang jeuhet nyang jipeubuet lé umat Gobnyan lam saboh kitab sibagoe peuingat keu siumu masa. 9 Sabab, awaknyan bansa nyang paleng galak beurontak ubak Po teu Allah, galak meusulet dan hana jitem deungoe ajaran TUHAN. 10 Awaknyan jipeugah ubak dumna nabi, "Neutôb babah droeneueh! Bék neupeugah ubak kamoe peue nyang beuna, teuma nyang jeuet neupeugah ubak kamoe na kheueh peue nyang kamoe tem deungoe. Bah kheueh kamoe teutab udeb lam meukhayal. 11 Jak wéh kheueh laju, dan neucok kheueh rot laén. Bék neupeukaru kamoe deungon Allah kudus Israel." 12 Sababnyan Po teu Allah kudus Israel laju geumeufeureuman lagée nyoe, "Gata tatulak haba Ulôn dan tapeubangga deungon buet teumindéeh dan teumipée. 13 Sabab nyan gata meusalah. Gata lagée bintéh beuton nyang manyang nyang ka reutak phon di ateueh sampoe u miyueb; deungon hana neusangka-sangka gata teuma teupuroe. 14 Gata reumok lagée beulangong tanoh nyang hanco meukeupeng-keupeng, sampoe lamkawan pempeng-pempeng nyan ka hana jeuet le keu ngon cok ngéue apui lam sinungkée atawa keu teutimok ié lam kulah." 15 TUHAN Nyang Mahamanyang, Po teu Allah kudus Israel, meufeureuman keu umat Gobnyan lagée nyoe, "Tobat kheueh dan teutab kheueh lam keuadaan teunang, teuma gata Lôn peuseulamat. Peucaya kheueh ubak Ulôn deungon até nyang teuntram, teuma gata Lôn bri teunaga." Teuma gata teutab hana tatem! 16 Malah gata tapeugét reuncana mangat tapeuplueng droe nibak musoh deungon keundeuraan guda nyang bagaih plueng. Gét that! Keubit gata singoh harôh taplueng! Gata pike guda gatanyan ka bagaih that jiplueng, padahai ureuëng-ureuëng tiyeub gata jiôh leubeh bagaih jiplueng. 17 Siribée droe teuma jiplueng watée jikalon ancaman sidroe kong musoh, dan ancaman na limong droe gata banmandum ka habéh taplueng. Lam pasokan gata nyang na tinggai saboh taméh bandera di ateueh pucak bukét. 18 Bahpih lagée nyan, TUHAN geupreh-preh watéejih keu geutunyok gaséh sayang Gobnyan keu gata. Gobnyan siab seudia keu geugaséh gata. Sabab TUHAN na kheueh Po teu Allah nyang peubuet peue nyang paih. Mubahgia kheueh ureuëng nyang meuharab ubak Gobnyan. 19 Hai gata nyang tinggai di Yerusalem, gata hana tamo sabe. TUHAN na gaséh sayang, dan deungon bagaih geujaweueb gata meunyoe gata lakée tulông ubak Gobnyan. 20 TUHAN geubri keu gata masa teu-ujoe nyang lumpah brat keugeupeurunoe gata. Teuma jinoenyoe Gobnyan keudroe nyang dampeng gata sampoe gata tarasa keuhaderan Gobnyan. 21 Meunyoe gata meusimpang nibak rot, dilikot gata teuma teudeungoe su nyang jipeugah, "Nyoe kheueh jalan gobnyan; seutôt kheueh jalan nyoe." 22 Patong-patong beurala gata nyang meulapéh deungon pirak dan méuh teuma gata tiek lagée tatiek kotoran, sira tapeugah, "Wéuh keudeh bék tô binéh ulôn!" 23 Meunyoe gata tasipreuk bijéh, TUHAN teuma geupeutron ujeuen mangat bijéh nyan timoh dan jipeuhase panen nyang meulimpah. Dan keu beulatang peulara gata teuma geupeuna blang naleueng nyang luwah that. 24 Leumô agam dan keuleudée nyang meu-ué blang gata teuma jipajoh peunajoh beulatang nyang paleng jroh nyang teupeuna seucara khusos. 25 Bak uroe kuta-kuta musoh gata nyan teukeupong dan ureuëng-ureuëng awaknyan teupoh maté, tieb-tieb gunong dan bukét teuma ji ile ié nyang jiteubiet lam gunong dan bukét nyan lagée aneuëk-aneuëk krueng. 26 Buleuen meucahya peungéh lagée mata uroe, dan mata uroe jeuet tujoh goe leubeh peungéh nibak buleuen nyan, lagée peungéh tujoh uroe teupeusapat jeuet keu siuroe. Bandum nyan jeuet jih bak uroe TUHAN geubalot dan geupeu ubat luka-luka umat Gobnyan nyang ka geupeu jra. 27 Keukuasaan dan keuagongan TUHAN leumah jih rot jiôh. Apui dan sab nyan tanda jih Gobnyan ka meureuka. Gobnyan geupeugah haba deungon awaknyan, dan tutoe haba Gobnyan seu-uem ngon tutông lagée apui hu. 28 Geukirém angén leubeh awai nibak Gobnyan lagée ié raya ngöb éuet takue nyang jipeuhanyot peue-peue nyang na. Gobnyan geupeubinasa bansa-bansa, dan geupeugagal reuncana-reuncana awaknyan nyang jeuhet. 29 Teuma gata, hai umat Po teu Allah, meugeumbira dan meuca-e lagée watée malam peurayaan agama. Gata teuma meuduka cita lagée iréng-iréngan suleng nyang jituju ubak Baét TUHAN, nyang bila Israel. 30 TUHAN geupeudeungoe su Gobnyan nyang agong, dan tieb-tieb ureuëng teuma jirasa kuasa Gobnyan nyang luwabiasa. Meunyoe Gobnyan beungéh jiteuka apui nyang jipeuhangöh peue-peue nyang na, ujeuen raya, ujeuen batée dan angén badée. 31 Ureuëng Asyur teukeujot ngon yo meugám-gám watée jideungoe su TUHAN dan jirasa huköman Gobnyan keubit brat that. 32 Teungoh awaknyan jirasa sakét badan sabab jisunuet ban galak droe, umat TUHAN meuseunang-seunang sira jideungoe su musik geundrang dan keucapi. Allah keudroe teuma geumuprang geulawan Asyur. 33 Phon yoh awaikon ka geuseudia apui teumpat tot raja Asyur. Teumpat nyang lhok dan luwah, asoe jih na kheueh kayée apui nyang meutamon-tamon. TUHAN teuma geupeukab apui nyan deungon cara geuyueb nafáh Gobnyan lagée krueng-krueng belerang.

Nabi Yesaya 31

1 Ceulaka kheueh ureuëng nyang jak u nanggroe Meusé keu jilakée tulông! Awaknyan nyang jipeubangga na kheueh angkatan tantra Meusé deungon pasokan meuguda dan guda jihnyan nyang teuga-teuga dan geuritan jih pih le that. Teuma awaknyan hana peucaya ubak TUHAN, Po teu Allah kudus Israel dan hana jilakée tulông ubak Gobnyan. 2 TUHAN bijaksana dan geuteupeue peue geupeubuet. Laju lé Gobnyan geupeutron beuncana dan geulaksana ancaman Gobnyan keu geuhuköm ureuëng jeuhet dan ureuëng nyang tulông awaknyan. 3 Ureuëng Meusé na kheueh manusia, bukon Po teu Allah. Guda awaknyan makhluk biasa, hana meusifeuet ilahi. Meunyoe TUHAN nyang meutindak, bansa nyang tulông nyan meugantoh dan bansa nyang jitulông teuma reubah. Dan bandua bansa nyan teuma binasa. 4 TUHAN meufeureuman ubak ulôn, "Lagée singa meungöm-ngöm keu jipeuteun mangsa jih dan hana hase jipeutakot deungon su meudumpék lé kawanan ureuëng meurabe nyang jikrah jak lawan jihnyan, meunan cit teuma Lôn muprang Ulôn peuteun Bukét Sion. 5 Lagée saboh cicém nyang meukeupak-keupak sayeub jih di dalam uempueng keu jilindong mandum aneuëk-aneuëk jih, meunan cit Ulôn, TUHAN Nyang Mahakuasa Lôn lindong, Lôn bila dan Lôn peuseulamat Yerusalem." 6 TUHAN meufeureuman lom, "Hai bansa Israel, gata ka talawan Ulôn dan ka meudesya ubak Ulôn. Teuma jinoenyoe, tagisa kheueh laju ubak Ulôn! 7 Teuma trok watée jih gata böih banmandum patong-patong beurala nyang teupeugét nibak pirak dan méuh nyang gata peugét keudroe deungon peunoh desya. 8 Asyur teupeubinasa bak watée prang teuka, teuma kon deungon teunaga manusia. Ureuëng Asyur jiplueng nibak mideuen prang, dan aneuëk-aneuëk muda awaknyan jipeujeuet keunamiet. 9 Raja awaknyan geuplueng sabab teumakot, dan bubena peuwira teukeujot raya, sampoe awaknyan jitinggai bupanji-bupanji prang." TUHAN ka geupeugah haba, TUHAN nyang teuseumah dan teuhoreumat deungon keureubeuen nyang teutot di Yerusalem.

Nabi Yesaya 32

1 Kalon kheueh, teuma trok watée jih sidroe raja geumat peurintah deungon ade dan peumimpén bansa jipeujak keuadelan. 2 Awaknyan maséng-maséng lagée teumpat meupayong nibak angén dan badée. Awaknyan lagée ié krueng nyang ji ile di teungoh-teungoh padang pasi, lagée payong batée nyang raya di teungoh padang nyang geursang. 3 Ureuëng nyang hase jimeungieng hana jipet mata, dan nyang hase meudeungoe teuma geusimak. 4 Ureuëng nyang yoh masa ilée teuburu nafeusu teuma meutindak deungon saba dan peunoh meungeureuti. Ureuëng nyang watée jimeututoe gagab teuma glaih nariet jih watée jipeugah haba. 5 Ureuëng bangai hana le teuanggab horeumat, dan ureuëng teumipée hana teupeugah jujoe. 6 Ureuëng bangai jipeugah haba nyang bangai dan jipeuna reuncana nyang jeuhet. Peue mantong nyang jipeubuet atawa geupeugah na kheueh meuhina keu Po teu Allah. Hántom na jibri makheun keu ureuëng deuk atawa jibri ié keu ureuëng glah. 7 Dan sidroe ureuëng teumipée nyang jipike buet-buet nyang jeuhet. Pakriban cara jimita akai keu ji-iélanya ateueh ureuëng gasien deungon tutoe haba nyang sulet dan jitam awaknyan keu jicok hak jih keudroe. 8 Teuma ureuëng nyang jroh ákai budoe jih nyang jireuncana na kheueh hai-hai nyang jroh dan jimeubuet nyang jroh teuma. 9 Deungoe kheueh, hai ureuëng-ureuëng inong nyang udeb gata mangat, beubaih nibak hai-hai nyang susah! 10 Jinoenyoe gata jeuet meurasa aman, teuma kira-kira sithon teuk gata putôh asa, sabab hase panen boh anggô gagal, dan meunan cit deungon hase bumoe nyang laén hana sapeue na. 11 Trok bak saát nyoe gata mangat udeb, beubaih nibak meubagoe nyang susah. Teuma bak watée nyoe, teuka kheueh yo sabab teumakot! Suet kheueh laju peukayan gata dan ikat laju ija krong nibak keuieng gata. 12 Peuba-e kheueh ladang-ladang gata nyang gumbô ngon subo dan lampôh-lampôh anggô gata nyang jimuboh le, 13 sabab tanoh bansa ulôn jitimoh lé tamah meupaya dan tamah meuduro. Nyoe, peumo ba-e kheueh rumoh-rumoh gata teumpat gob meuseunang-seunang ngon peulalée até dan banda nyang peunoh deungon ureuëng ramé! 14 Meunan cit meuligoe teuma jitinggai ma banda nyang ramé ka jeuet keuseungue ngon seungab. Bukét dan meunara-meunara teumpat ureuëng meujaga ka teupeurata deungon tanoh keu siumu masa. Keuleudée-keuleudée nyang kleut meunan cit deungon bubiri-bubiri beubaih jijak keudeh keunoe dan jimeurot naleueng nyang na jitimoh disinan. 15 Teuma sigoe teuk Po teu Allah teuka deungon kuasa Gobnyan. Dan padang pasie jeuet keu ladang-ladang nyang subo, dan ladang-ladang jeuet lagée uteuen. 16 Bansaboh nanggroe na keujujoran dan keuadelan. 17 Tieb-tieb ureuëng jipeubuet peue nyang beuna, sampoe na keuseujahteuraan dan keuteuntraman siumu masa. 18 Umat Po teu Allah beubaih nibak keususahan udeb di teumpat nyang aman dan teuntram. 19 Lumpah that bahgia gata banmandum sabab na ié nyang seb keu seunaman gata, dan beulatang peulara gata jeuet jimeurot dipat mantong deungon aman. Teuma musoh gata jeuet lagée uteuen nyang jisiram lé ujeuen batée dan banda awaknyan teupeuhanco.

Nabi Yesaya 33

1 Ceulaka kheueh musoh-musoh geutanyoe! Awaknyan meurampok bahpi hana keunong reupah, dan meukhianat bahpi hana soe khianat, awaknyan keudroe jeuet keu ureuëng keunong rampak dan peukhianatan. 2 Ya TUHAN, geugaséh kheueh keu kamoe. Droeneueh kheueh harapan kamoe. Neulindong kheueh kamoe tieb-tieb uroe dan peuseulamat kheueh kamoe watée kamoe lam keuadaan meukarat. 3 Meunyoe Droeneueh neubeudôh dan neupeudeungoe su Droeneueh nyang meugrum-grum, bansa-bansa teuma jiplueng teung bateyeung meucrebre hana meuho saho. 4 Lagée daruet nyang po meukawan jiseureubu dan jireupah hareuta awaknyan. 5 TUHAN lumpah that jujoe; Gobnyan geukuasa peue-peue nyang na. Gobnyan geupeudong huköm dan keuadelan di Yerusalem 6 dan geubri aman ubak umat Gobnyan. Hareuta nyang peuseulamat awaknyan na kheueh keubijaksanaan dan iéleumé dan horeumat ubak TUHAN. 7 Ureuëng-ureuëng nyang beuhe ngon tungang jikliek-kliek geulakée tulông; bubena utosan nyang jiuseuha keuneuk peudamé laju jimo deungon wéueh até. 8 Rot-rot ueh raya lumpah meubahya sampoe ka habéh seungue; hana ureuëng nyang na jijak nibak rot-rot nyan. Janji nyang ka teupeugöt ji iengkeue dan mupakat nyang situju jitulak teuma. Hana le nyang na jipakoe. 9 Nanggroe jitinggai ka seungue seungab. Gle-gle Libanon ka layée, dan Pantôn Saron nyang gumbô ngon subo ka jeuet keupadang pasi. Di Basan dan di Gunong Karmel ôn-ôn kayée ka habéh luroh. 10 TUHAN meufeureuman ubak bansa nyan, "Jinoenyoe Ulôn beudôh dan Lôn peubuet mangat Lôn tunyok keukuasaan Lôn. 11 Reuncana gata sia-sia, dan peue mantong nyang gata peubuet hana meuguna. Beungéh gatanyan lagée apui nyang tatot droe gata keudroe. 12 Gata lagée batée kareueng nyang teutot keu teupeujeuet keu gapu; dan lagée tamah meuduro nyang teuköh dan teutot u lam apui. 13 Bah kheueh banmandum ureuëng nyang tô meunan cit nyang jiôh jideungoe keuhai buet Ulôn dan jiaku keuhai keukuasaan Lôn." 14 Ureuëng-ureuëng meudesya di Sion jiteuka yo sabab teumakot. Kheun awaknyan, "Keuputosan Po teu Allah lagée apui nyang hu meuhuéb-huéb siumu masa. Peu kheueh mungken na nyang ék peuteun droe lam apui nyang jipeuhangöh peue-peue nyang na nyan?" 15 Gata ék tapeuteun droe meunyoe gata meututoe dan tapeubuet nyang beuna. Bék tamita laba deungon cara tapaksa talakée atra ureuëng gasien, bék tateurimong péng sugok. Bék taseutôt deungon ureuëng nyang na lam até jih jikeuneuk jakpoh maté ureuëng laén atawa buet-buet nyang jeuhet nyang laén. 16 Dan gata teuma teulindong dan aman, siulah-ulah gata kana lam kuta nyang teuga. Peunajoh dan ié jieb kana teukeubah keu gata. 17 Teuma teuka watée jih gata takalon sidroe raja nyang mat peurintah deungon seumarak ateueh nanggroe nyang meulienteung u meubagoe arah. 18 Teumakot gata bube nyang ka lheueh keu ureuëng nyang kuteb cukée, nyang jeuhet dan mando ureuëng aséng nyang ka tinggai keunangan mantong. 19 Gata hana le tangieng ureuëng aséng nyang biadab nyang meututoe u dalam basa nyang hana gata teupeue. 20 Ngieng kheueh bansa Sion, teumpat geutanyoe ta peuraya khanuri-khanuri agama. Ngieng kheueh Yerusalem! Keubit aman that banda nyan keu teumpat tinggai, lagée khimah nyang hántom teupinah, patok jih nyang hántom teubot dan taloe jih hántom na putôh. 21 TUHAN teuma geupeukalon keuagongan Gobnyan keu geutanyoe. Geutanyoe udeb nibak binéh krueng nyang leubeh luwah, nyang hana hase jimeulayeue lé kapai musoh. 22 Peue mantong nyang na peuleungkapan nyang na nibak kapai awaknyan hana meuguna; layeue-layeue jihnyan hana hase teupeukeumang! Banmandum keukayaan pasokan musoh tanyoe reupah, dan jeumeulah jih lumpah that le, sampoe ureuëng laén pih meuteumé jeumba. TUHAN keudroe nyang jeuet keuraja geutanyoe; Gobnyan teuma geumat peurintah, geupeudong huköm dan geupeuseulamat geutanyoe nibak musoh. 24 Hana meusidroe pih di nanggroe geutanyoe apoh apah lé sabab sakét, dan banmandum desya geupeu amphon.

Nabi Yesaya 34

1 Jak kheueh meusapat, hai bansa-bansa, dan deungoe kheueh. Bah kheueh bansaboh bumoe dan mandum nyang udeb teuka dan jideungoe. 2 TUHAN beungéh ubak mandum bansa dan banmandum pasokan awaknyan. Gobnyan geuhuköm dan geupeubinasa awaknyan. 3 Manyét-manyét awaknyan nyang meutabu beuba hana ji kubu, teuma jipeubiyeu mantong disinan sampoe án brok dan mubée khiéng. Gunong-gunong mirah sabab keunong darah awaknyan. 4 Mata uroe, buleuen dan bintang-bintang teuma hanco. Langét geugulong lagée geugulong keureutah. Bintang-bintang rhot u bumoe lagée ôn kayée nyang lurôh di cong bak. 5 TUHAN ka geupeusiab peudeueng Gobnyan lam syeuruga, dan jinoenyoe peudeueng nyan keunong teuma ateueh bansa Edom nyang ka geupeurhot huköman dan geupeubinasa. 6 Peudeueng TUHAN meulabo deungon darah dan habéh peusiliek deungon gapah awaknyan, saban lagée darah dan gapah beulatang keureubeuen. Sabab TUHAN geupeuna keureubeuen di Bozra, dan geupeuna seumeusie seucara rayeuk-rayeuk di tanoh Edom. 7 Manusia-manusia teuma maté lagée leumô kleut dan leumô muda. Nanggroe awaknyan mirah keunong darah dan meulabo deungon gapah. 8 Nyan kheueh saát jih TUHAN geubila Sion dan geubalaih musoh-musoh Gobnyan. 9 Krueng-krueng Edom meu-ubah jeuet keu ter, dan tanoh disinan jeuet keu beulerang. Akhé jih bansaboh nanggroe ka hu lagée ter. 10 Uroe malam hu nyan hana lon, dan asab meukeupong nyang jiteubiet disinan siumu masa. Tanoh nyan teuma jitinggai mantong meunan deungon söh dan tho kreng sampoe tron meutron, dan hana meusidroe manusia pih nyang jak nibak tanoh nyan. 11 Cicém undan dan landak tinggai disinan, meunan cit deungon cicém hantu tok dan cicém gagak tinggai disinan. TUHAN geupeujeuet tanoh nyan hana meuteuntée dan söh lagée yoh gohlom geucebta. 12 Hana raja nyang peurintah nanggroe nyan, dan mandum peumimpén ka sapan sapa. 13 Puri-puri dan banda-banda nyang meukuta jitimoh lé tamah meuduro naleueng nyang panyang, dan jikeumiet lé asée uteuen dan cicém unta. 14 Beulatang juah meuwot-wot ban galak droe di dalam nyan; hantu-hantu jimeusu seôt seumeuôt, dan hantu malam jimita teumpat keu jipiôh. 15 Di teumpat nyan uleue meubisa jimeu uempueng, jitöh boh, laju jikaröm dan jipeulara bubena aneuëk-aneuëk jih nyang ka ceh. Meunan cit deungon cicém ujeuen jipeugöt uempueng jih disinan deungon judoe jih maséng-maséng. 16 Mita kheueh dan beuet kheueh lam Kitab TUHAN: Hana meusidroe pih nibak banmandum makhluk nyan gadôh atawa meucre deungon judo jih. Sabab meunan kheueh peurintah TUHAN, dan Gobnyan keudroe nyang peusapat awaknyan. 17 TUHAN kheueh nyang weuek nanggroe nyan lamkawan awaknyan dan maséng-maséng jiteurimong jeumba jih. Awaknyan tinggai disinan keu siumu masa, dan tanoh nyan jeuet keuhak milék awaknyan tron meutron.

Nabi Yesaya 35

1 Padang pasi dan tanoh tho teuma meugeumbira, bungöng-bungöng teuma keumang dipadang beulantara. 2 Padang pasi meukeumang deungon bagaih that, dan meudeundang deungon ca-e ria. Keugagahan jih lagée gunong Libanon, seri jih lagée Pantôn Karmel dan Saron. Dan tieb-tieb ureuëng jikalon kuasa TUHAN, dan keuagongan Allah geutanyoe. 3 Peuteuga kheueh jaroe nyang leumoh, peukong kheueh teuôt nyang guyah. 4 Peugah kheueh ubak nyang cut até, "Peukhong kheueh até gata, bék teumakot, Po teu Allah gata teuka geuhuköm musoh, Gobnyan teuka geujak peuseulamat gata." 5 Watée nyan ureuëng buta teuma jeuet jikeumalon, dan ureuëng tulo hase jimeudeungoe. 6 Ureuëng lapée jeuet jigrob-grob lagée rusa, ureuëng kalu meusurak geumbira. Sabab mata ié jiteubiet meubok-bok di padang pasi, krueng ji ile dipadang gle raya. 7 Pasi nyang seu-uem jeuet keu kulam, tanoh nyang tho kreng jeuet keu teumpat mata ié. Teumpat nyang yoh awaiphon ji keumiet lé asée uteuen, teuma jitimoh lé geulagah dan bak sikée. 8 Di sideh na rot ueh raya, "Rot teujak ubak keuseulamatan" nan jih. Ureuëng meudesya hana jijak rot nyan, ureuëng bangai hana jipeuseusat keu ureuëng nyang jak rot nyan. 9 Nibak teumpatnyan hana singa, atawa beulatang juah nyang laén. Ureuëng ramé nyang geupeuseulamat lé TUHAN teuma jijak disinan. 10 Ureuëng ramé nyang ka geupeuleuh lé TUHAN teuma jijakwoe; awaknyan jitamong u dalam banda Yerusalem sira meusurak geumbira, ruman awaknyan meucahya sabab galak that ngon harôk nyang abadi. Awaknyan meugeumbira dan meusuka ria; seudeh dan apoh apah habéh ka hana le.

Nabi Yesaya 36

1 Nibak thon nyang keu peuet blaih watée geumat peurintah lé Hizkia raja Yehuda, banda-banda Yehuda nyang meukuta laju jiprang dan jipeutaloe lé Sanherib, raja Asyur. 2 Óh lheuehnyan gobnyan geu kirém peuwira manyang di Lakhis u Yerusalem deungon tantra nyang raya keu jituntut mangat Raja Hizkia geutaklok. Awaknyan laju trok ubak banda nyan dan geucok teumpat nibak ladang nyang geuboh nan Ladang Peunatu, rab bak binéh lhueng nyang ié jih ji ile nibak kulam bagian ateueh. 3 Óh lheueh nyan teuma jiteuka laju lhée droe peugawée Raja Hizkia jijak meurumpok deungon peuwira Asyur nyan. Ban lhée droe peugawée nyan na kheueh Elyakim bin Hilkia ulée rumoh tangga meuligoe, Sebna seukeutaréh nanggroe, dan Yoah bin Asaf, seukeutaréh meuligoe. 4 Peuwira Asyur geupeugah ubak awaknyan, "Gata peusampoe laju ubak Raja Hizkia haba raja Asyur nyoe, 'Pakon gata meurasa droe gata teuga? 5 Gata pike deungon tutoe haba mantong meuhase teugantoe siasat dan teunaga tantra? Soe kheueh ureuëng nyang gata harab sampoe gata hana teumakot talawan Asyur? 6 Gata keubit meuharab that beuji bantu lé Meusé, teuma nyan saban deungon tacok bak naleueng lakoe sibagoe tungkat; -- teuma tungkat nyan patah dan jaroe gata teutôb. Meunan kheueh raja nanggroe Meusé keu banmandum ureuëng nyang meuharab ubak jihnyan.' " 7 Lheuehnyan geupeugah lom lé peuwira Asyur nyan, "Atawa barang kali gata tapeugah bahwa gata meuharab ubak TUHAN Allah gata? Bak watée Hizkia geupeurintah ureuëng Yehuda dan Yerusalem ji-iébadat dikeue miseubah di Yerusalem, bukon kheueh nyang jipeuhanco nyan miseubah dan teumpat-teumpat teuseumah TUHAN keudroe? 8 Jinoenyoe ulôn ateueh nan raja Asyur lôn tem meutaroh bahwa meunyoe gata geubri dua ribée boh guda, ka pasti nibak gata hana ureuëng nyang sidubnyan le keu jigiduek ateueh guda nyang dua ribée boh nyan. 9 Keu teulawan peuwira Asyur nyang paleng cut pih gata bukon kheueh lawan jih. Teuma gata teutab cit tameuharab ubak bansa Meusé mangat jikirém geuritan prang dan pasokan meuguda! 10 Gata pike kamoe jakprang dan kamoe peutaloe nanggroe gata meunyoe hana geutulông lé TUHAN? TUHAN keudroe kheueh nyang yue ubak kamoe mangat teuprang dan teupeuhanco banmandum nyan." 11 Laju geupeugah lé Elyakim, Sebna dan Yoah keu peuwira Asyur nyan, "Hai teungku, neumeututoe mantong lam basa Aram deungon kamoe, kamoe muphom. Bék neungui basa Ibrani, eunteuk jiteupeue lé rakyat di ateueh beuton banda nyan." 12 Geuseuôt lé peuwira Asyur nyan, "Peu kheueh keu gata dan raja mantong ulôn nyoe geukirém lé raja Asyur mangat teupeusampoe banmandum nyoe? Ulôn kumariet cit ubak rakyat nyang duek di ateueh bintéh beuton nyoe, nyang meusigoe deungon gata teuma jipajoh ék jih keudroe dan ji-jieb iék jih keudroe." 13 Óh lheueh nyan peuwira manyang nyan jidong laju jimeututoe lam basa Ibrani ngon su nyang meutaga, "Deungoe nyoe peue nyang geupeugah lé raja Asyur, 14 'Bék gata tem jipeungét lé Raja Hizkia! Jihnyan hana hase jipeuseulamat gata! 15 Bék gata deungoe peue-peue mantong nyang jirayu mangat jimeuharab ubak TUHAN. Bék gata pike TUHAN geupeuseulamat gata atawa gata tam sidadu Asyur jireupah banda gata. 16 Bék gata deungoe Hizkia nyan! Ulôn, raja Asyur lôn lakée ubak gata mandum mangat gata tundok. Meunyoe gata ka tatundok, gata jeuet tapajoh boh anggô nyang na lam lampôh gata keudroe, dan gata pajoh boh ara nyang na lam bak gata keudroe, meunan cit gata jieb ié nyang na lam mon gata keudroe, 17 sampoe trok ubak watée gata ulôn pinah bak saboh nanggroe nyang saban ngon nanggroe gata keudroe. Nibak teumpat nyan na lampôh anggô nyang jipeuhase anggô keu gata, dan ladang gandom nyang jipeuhase teupông keu peunajoh gata. 18 Bék gata deungoe Hizkia! Jihnyan jipeungét gata deungon jipeugah TUHAN geupeuseulamat gata. Peu kheueh ka lheueh dewa bansa laén nyang peuseulamat nanggroe jih nibak keukuasaan lôn? 19 Dipat kheueh dewa-dewa nanggroe Hamat dan Arpad? Dipat kheueh dewa-dewa Sefarwaim? 20 Peu kheueh na nyang teuka jipeuseulamat Samaria? Dewa toh nyang ka lheueh jipeulheueh nanggroe jih nibak keukuasaan lôn? Panena hase TUHAN geupeuseulamat Yerusalem!' " 21 Peue nyang jideungoe nyan peunduduek Yerusalem hana nyang jaweueb, sabab Raja Hizkia ka geupeurintah mangat awaknyan seungab mantong. 22 Teuma Elyakim, Sebna dan Yoah laju geupriek peukayan awaknyan tanda seudeh, óh lheueh nyan geujak peugah laju ubak raja peue nyang ka jipeugah lé peuwira Asyur nyan.

Nabi Yesaya 37

1 Watée Raja Hizkia geudeungoe laporan nibak ban lhée droe awaknyan, gobnyan laju geupriek peukayan geuh dan geungui laju ija krông tanda seudeh, lheueh nyan laju geujak u Baét TUHAN. 2 Lheueh nyan gobnyan geukirém Elyakim ulée meuligoe, Sebna seukeutaréh neugahra dan teungku-teungku imeum nyang na pangkat mangat geujak meurumpok ngon Nabi Yesaya, bin Amos. Awaknyan pih jingui ija krông. 3 Nyoe kheueh peusan Hizkia nyang awaknyan peusampoe ubak Nabi Yesaya, "Uroenyoe uroe dukacita; tanyoe jihuköm dan jihina. Tanyoe lagée inong nyang keuneuk peulahé aneuëk, teuma ka habéh teunaga. 4 Raja Asyur ka jikirém peuwira manyang jih keujijak hina Po teu Allah nyang udeb. Pat tateupeue TUHAN Po teu Allah ka geuteupeue nyang jihina nyan dan keuneuk geuhuköm awaknyan nyang hina Geuhnyan! Lé sababnyan meudoá kheueh ubak Po teu Allah keu ureuëng-ureuëng geutanyoe nyang mantong udeb." 5 Óh ka lheueh jiteurimong peusan nibak Raja Hizkia nyan, 6 Yesaya laju geuyue ubak ureuëng nyang geukirém lé Hizkia nyan mangat jipeusampoe jaweueb nyan, "TUHAN meufeureuman, teungku po bék teumakot peue nyang jipeugah lé namiet-namiet Asyur nyan bahwa TUHAN hana hase geupeulheuh geutanyoe. 7 TUHAN keuneuk geupeujeuet raja Asyur mangat jikalon saboh haba angén sampoe jihnyan jiwoe u nanggroe jih keudroe, dan jihnyan disideh jipoh maté." 8 Peuwira manyang Asyur nyan meuteumé haba bahwa raja jih ka jitinggai Lakhis dan teungoh jimuprang jilawan Libna, hana padubna jiôh nibak teumpat nyan. Dan jijak kheueh keudeh keu jijak meurumpok ngon raja jih nyan. 9 Raja Asyur ka jiteurimong haba bahwa pasokan Meusé dimiyueb pimpénan Tirhaka nibak Sudan teungoh jijak keu jijak prang awaknyan. Lé sababnyan raja Asyur laju jikirém surat ubak Hizkia, 10 raja Yehuda. Lagéenyoe asoe surat nyan, "Bék keunong peunget ubak janji Allah nyang gata peubangga nyan bahwa gata hana rhot lam jaroe lôn. 11 Gata ka tadeungoe bahwa tieb-tieb nanggroe nyang jiprang lé raja Asyur habéh jipeuhanco banmandum. Bék gata sangka gata hase teupeulheueh droe. 12 Watée indatu lôn geupeuhanco banda Gozan, Haran dan Rezef, dan geupoh maté bubena ureuëng-ureuëng Eden nyang na tinggai di Telasar, hana meusaboh pih nibak dewa-dewa awaknyan nyang hase jipeuseulamat awaknyan. 13 Dipat kheueh raja-raja banda Hamat, Arpad, Sefarwaim, Hena dan Iwa?" 14 Hizkia geuteurimong suratnyan nibak ureuëng-ureuëng utosan dan geubaca teuma. Lheuehnyan gobnyan geujak u Baét TUHAN dan geuleueng laju surat nyan dikeue TUHAN, 15 laju geumeudoá, kheun jihnyan, 16 "TUHAN Nyang Mahakuasa, Allah Israel, nyang na geuduek di ateueh kerub, Droeneueh kheueh sidroe sagai Po teu Allah nyang meukuasa ateueh banmandum keurajeuen nyang na ateueh bumoe nyoe. Droeneueh kheueh nyang cebta langét ngon bumoe. 17 TUHAN, neungieng kheueh kira jih peue nyang teungoh teujadi ateueh kamoe. Deungoe kheueh banmandum nyang jihina lé Sanherib keu Droeneueh, Allah nyang udeb. 18 Kamoe banmandum teupeue, TUHAN, bahwa raja-raja Asyur le that jipeubina bansa-bansa dan jipeuhanco nanggroe awaknyan. 19 Meunan cit dewa-dewa awaknyan jitot dan jipeuhanco, sabab dewa-dewanyan meubacut pih hana meukuasa. Jihnyan na kheueh patong nyang teupeuget nibak kayée dan batée nyang jipeuget lé manusia. 20 Nyoe, TUHAN Allah kamoe, peulheuh kheueh kamoe nibak ureuëng-ureuëng Asyur nyan, mangat lé mandum bansa ateueh rhueng donya nyoe jiteupeue bahwa Droeneueh kheueh sagai-sagai TUHAN." 21 Lheueh nyan Yesaya geukirém peusan ubak Raja Hizkia bahwa nyan na kheueh sibagoe geujaweueb ateueh doá raja, 22 TUHAN meufeureuman, "Banda Yerusalem jipeukém dan jihina gata, Sanherib! 23 Peu kheueh gata teupeue soe nyang gata teunak-teunak dan gata hina nyan? Ulôn, Po teu Allah Israel, Allah nyang suci. 24 Gata takirém utosan sira tapeugah haba nyang sulet bahwa deungon le geuritan prang gata, gata ka tapeutaklok gunong-gunong manyang di Libanon. Gata tapeusombong droe bahwa gata ka tateubang bak-bak kayée ceumara jihnyan nyang paleng manyang dan paleng ceudah, dan gata bloh-bloh lam uteuen-uteuen nyang paleng jai. 25 Meunan cit gata peubangga droe bahwa gata kueh mon dan gata jieb ié nyang na di nanggroe-nanggroe aséng, dan bubena tantra gata jigilo-gilo ié Krueng Nil sampoe tho. 26 Peu kheueh gohlom na gata deungoe bahwa banmandum nyan ka lheueh Lôn reuncana yoh awaikon ilée? Dan jinoenyoe Ulôn peubuet hainyan. Ulôn kheueh nyang jok keugata kuasa mangat hase gata peutaklhok banda-banda meukuta mangat jeuet keu rungka-rungka. 27 Ureuëng-ureuëng nyang tinggai disinan hana meudaya; awaknyan teukeujot dan teumakot that. Awaknyan lagée naleueng lam padang atawa naleueng nyang timoh ateueh bubông rumoh, nyang tho meunyoe jiyueb lé angén timu nyang seu-eum. 28 Teuma Ulôn kuteupeue banmandum keuhai droe gata. Ulôn kuteupeue peue nyang gata peubuet dan ho nyang gata jak. Ulôn kuteupeue bahwa beungéh that-that keu Ulôn, 29 dan Ulôn ka Lôn deungoe keuhai beungéh dan sombong gata nyan. Jinoe Ulôn pasang cinawíet nibak idong gata dan keukang bak babah gata, mangat gata Ulôn tarek dan Lôn puwoe rot jalan nyang gata jak dan gata teuka." 30 Meunan cit Yesaya geukirém peusan nyang lagéenyoe bagoe ubak Hizkia, "Nyoe kheueh nyang teuma jeuet keu tanda nibak gata. Thon nyoe dan thon ukeue gob jipajoh gandom nyang timoh keudroe. Teuma óh lheuehnyan awaknyan hase jipula gandom dan anggô dan jirasa hase jih. 31 Ureuëng Yehuda nyang mantong udeb jihnyan makmu lagée seunaman nyang lhok that ukeue jih dan jipeuhase boh. 32 Di Yerusalem dan di ateueh Gunong Sion teuma na ureuëng-ureuëng nyang seulamat, sabab TUHAN nyang Mahakuasa ka geupeuteuntée bahwa hainyan teuma teujadi. 33 Nyoe kheueh feureuman TUHAN keuhai raja Asyur; 'Jihnyan hana jiteumé tamong lam banda Yerusalem atawa jitimbak aneuk panah lam banda nyan. Tantra-tantra nyang peurisée hana nyang jipeurab ubak banda nyan, dan bansikeulileng hana teuma jipeuget ateung-ateung teumpat teukeupong. 34 Raja Asyur teuma jiwoe rot euh watée jiteuka, deungon hana jitamong lam banda nyan. Ulôn, TUHAN, ka Lôn peugah haba. 35 Banda Yerusalem teuma Lôn bila dan Ulôn lindong deumi keuhoreumatan Lôn keudroe dan deumi janji Ulôn deungon hamba Lôn Nabi Daud.' " 36 Malam nyan cit teuma malaikat TUHAN teuka ubak khimah-khimah ureuëng Asyur dan laju geupoh maté na 185.000 droe tantra. Óh singoh nyan banbungoh that-that manyét-manyét awaknyan ka meutabu beba. 37 Lé sababnyan jisurot kheueh Sanherib, raja Asyur, dan jiwoe u Niniwe. 38 Nibak siuroe, watée jihnyan teungoh iébadat lam kuil Dewa Nisrokh, jihnyan laju jipoh maté ngon peudeueng lé Adramelekh dan Sarezer, aneuëk-aneuëk jih nyang agam. Lheueh nyan awaknyan jiplueng u Ararat. Lé sababnyan Esarhadon, aneuëk agam jihnyan nyang laén, jeuet keuraja keugeunantoe jihnyan.

Nabi Yesaya 38

1 Watée nyan Hizkia teungoh keunong deumam laju rhot bak sakét dan rab meuninggai donya. Nabi Yesaya bin Amos, geujak meurumpok ngon gobnyan sira geupeugah, "TUHAN meufeureuman Teungku Amphon geuyue peubéeréeh banmandum urosan, sabab Teungku Amphon hana harapan puléh. Hana treb le Teungku Amphon meuninggai donya." 2 Hizkia laju geupaleng ubak bintéh beuton, laju geumeudoá, 3 "TUHAN, ingat kheueh bahwa ulôn nyoe ka lôn meungabdi ubak Droeneueh deungon seutia dan até nyang jujoe. Ulôn sabe lôn useuha lôn seutôt keuheundak Droeneueh." Laju Hizkia geumo meuweueh-weueh. 4 Óh ka leupah Yesaya geujak, TUHAN geuyue gobnyan 5 mangat geugisa ubak Hizkia dan peugah laju peusan nyoe, "Ulôn, TUHAN, Po teu Allah nyang jiseumah lé Nabi Daud indatu gata. Ka Ulôn deungoe doá gata dan ka Lôn ngieng ié mata gata. Ulôn keuneuk tamah umu gata limong blaih thon teuk. 6 Gata dan banda Yerusalem Ulôn peuleuh nibak raja Asyur. Banda nyoe teutab Ulôn lindong." 7 Geujaweueb lé Yesaya, "Nyoe kheueh tanda nyang geubri lé TUHAN ubak Teungku Amphon nyang bahwa Gobnyan geupeuteupat janji Geuh. 8 Nibak sinunyök jaröm jeuem mata uroe meuneugét Raja Ahas, TUHAN geupeugöt bubayang jih nyan teusuröt siploh boh gareh." Dan jisurot kheueh bubayang nyan siploh boh gareh. 9 Óh lheueh Hizkia puléh, laju gobnyan geutuléh ca-e pujian nyang lagée nyoe: 10 "Ulôn peugah, bansiteungoh umu ulôn harôh lôn jak, jak peuhabéh udeb lôn nyang mantong tinggai ubak donya ureuëng maté. 11 Ulôn peugah, ulôn hana le lôn ngieng TUHAN di ateueh bumoe, atawa lôn kalon manusia ateueh donya nyoe. 12 Nyawöng lôn putôh, dan trok kheueh ajai ulôn, lagée khimah ureuëng meurabe nyang teureuloh; lagée ija nyang teuköh nibak alat teutenun; lôn pike Po teu Allah geupeuhabéh masa udeb lôn. 13 Simalam beungoh ulôn kliek-kliek sabab sakét, lagée jih tuleueng ulôn nyoe jipeureumok lé saboh singa; lôn pike Po teu Allah geupeuhabéh masa udeb lôn. 14 Su ulôn seumaken paro dan leumoh, lagée cicém leuek ulôn nyoe apoh apah. Mata ulôn hék sabab hana lôn piôh lôn tangah u langét, TUHAN, neupeulheueh kheueh ulôn nibak keususahan nyoe. 15 Peue nyang jeuet ulôn peugah? Nyoe na kheueh buet TUHAN; ulôn hana jeuet lôn éh sabab lôn seudeh. 16 Ya TUHAN, neubri kheueh keu-ulôn udeb deungon haba dan buet Droeneueh, bah kheueh lôn nyoe udeb keu Droeneueh mantong. 17 Peudeh ulôn nyoe beumeu ubah jeuet keu teuntraman, Droeneueh peuseulamat ulôn nibak bahya; desya-desya ulôn ka Droeneueh peu amphon bube nyang na. 18 Di álam mawöt hana nyang pujoe Droeneueh, ureuëng maté hana meuteumé jiharab keuseutiaan Droeneueh. 19 Teuma ureuëng udeb nyang pujoe Droeneueh, lagée nyang ulôn peubuet nibak uroe nyoe. Ureuëng syiek-syiek geucalitra ubak aneuëk geuh padub na seutia jih Droeneueh, ya TUHAN. 20 TUHAN, Droeneueh ka neupeupuléh ulôn, teuma kamoe meuca-e kamoe pujoe Baét Droeneueh deungon cara kamoe peutek keucapi, sipanyang udeb kamoe." 21 Lé Yesaya laju geuyue ubak gob mangat jiramah boh ara laju geuyue siliek ubak cumuet Hizkia mangat puléh. 22 Raja Hizkia geutanyong, "Peu kheueh tanda jih bahwa TUHAN geupeupuléh ulôn dan bahwa ulôn jeuet lôn jak u Baét TUHAN lom?"

Nabi Yesaya 39

1 Kira-kira bak watée nyan, raja nibak nanggroe Babel, nyang nan geuh Merodakh Baladan bin Baladan, jideungoe bahwa Raja Hizkia ban puléh sakét. Teuma lé gobnyan laju geuyuejak ureuëng droe geuh ubak Raja Hizkia keu jipeusampoe surat dan hadiah keu Raja Hizkia nyan. 2 Hizkia geusambot utosan nyan deungon seunang até dan geutunyok laju ubak awaknyan peue-peue nyang na hareuta keukayaan gobnyan, na kheueh méuh dan pirak, reumpah-reumpah dan minyéuk mangat bée, dan banmandum peuleungkapan tantra gobnyan. Hana meusapeue pi di dalam meuligoe dan bansaboh keurajeuen gobnyan nyang hana geupeuleumah ubak awaknyan. 3 Óh lheuehnyan Nabi Yesaya laju geumeuhadab ubak Raja Hizkia dan geutanyong, "Pané teuka awaknyan banmandum? Dan peue jipeugah lé awaknyan?" Geujaweueb lé Hizkia, "Awaknyan teuka nibak Babel, nanggroe nyang paleng jiôh." 4 "Peue nyang jikalon lé awaknyan didalam meuligoe?" geutanyong lé Yesaya lom. "Peue-peue nyang na," geujaweueb lé Hizkia. "Hana barang nyang na didalam beundahara meuligoe nyang hana ulôn peuleumah ubak awaknyan." 5 Laju geupeugah lé Yesaya ubak raja, "TUHAN Nyang Mahakuasa meufeureuman, 6 'Teuma trok saát jih banmandum keukayaan nyang na dalam meuligoe droeneueh, dan nyang ka geugumpôi lé indatu droeneueh trok nibak uroe nyoe, jiangkot u Babel. Hana nyang tinggai. 7 Nibak aneuëk cucoe droeneueh na nyang jicok dan jipeujeuet keu peugawée didalam meuligoe keu jipeutimang raja Babel.' " 8 Geujaweueb lé Raja Hizkia, "Jroh that peusan TUHAN nyang droeneueh peusampoe ubak ulôn." Gobnyan geujaweueb lagée nyan sabab geupike: "Asai keurajeuen ulôn aman dan damé simantong ulôn udeb."

Nabi Yesaya 40

1 Meunoe kheueh feureuman Allah, "Hibur kheueh, hibur kheueh bansa Ulôn! 2 Teunang kheueh até hai ureuëng Yerusalem, tapeugah kheueh laju bahwa masa jipeujeuet keu namiet manusia ka trok bak akhé. Keusalahan awaknyan ka Ulôn peu amphon, banmandum desya awaknyan ka Ulôn huköm sampoe dua goe lipat." 3 Na su nyang jimeuhôi, "Peusiab kheueh rot di padang pasi keu TUHAN. Peuteupat kheueh jalan raya di padang beulantara keu Po teu Allah geutanyoe! 4 Tieb-tieb pantôn harôh kheueh teutôb, gunong dan bukét teupeusabe rata. Tanoh meubukét jeuet keurata, dan nyang meuwet-wet teupeu licen. 5 Dan keuagongan TUHAN teuma teupeugah; banmandum umat manusia jikalon. Keubit, TUHAN keudroe ka geumeujanji!" 6 Na su nyang teupeugah, "Jak peugah kheueh!" Laju ulôn tanyong, "Peue nyang harôh ulôn peugah?" "Tapeugah kheueh bahwa manusia nyan lagée naleueng, lagée bungöng nyang cit siat sagai keu indahan jih. 7 Naleueng ka jeuet keu tho dan bungöng pih ka jeuet keu mala, meunyoe TUHAN geupeuyueb angén nyang seu eum. Keubit, bansa nyan lagée naleueng. 8 Neuleueng ka jeuet keu tho dan bungöng ka jeuet keu mala, teuma sabda Po teu Allah geutanyoe keukai siumu masa." 9 Jak ék kheueh u ateueh gunong nyang paleng manyang, dan peusampoe kheueh haba nyang gét ubak Yerusalem! Meudumpék kheueh deungon su nyang nyareng, dan peusampoe kheueh haba gét ubak Sion! Peugah kheueh ubak banda-banda Yehuda bahwa Po teu Allah awaknyan teuma teuka! 10 Ngieng, TUHAN Allah teuka deungon kuasa keu meutindak deungon peukasa. Ji-iréng lé ureuëng-ureuëng nyang ka geupeubeubaih lé Gobnyan. 11 Lagée ureuëng meurabe nyang peulara kawan beulatang Geuh; Gobnyan keudroe nyang peusapat awaknyan. Aneuëk-aneuëk bubiri geutiengkue teuma, deungon leumoh leumbot Gobnyan geu peutatéeh nang-nang beulatang Geuh. 12 Soe nyang ék ukoe laôt raya deungon sineupa jaroe jih, dan nyang ukoe angkasa deungon jeungkai jih? Soe nyang sukat tanoh bumoe deungon sunukat atawa nyang timang gunong dan bukét deungon ceng? 13 Soe nyang pimpén TUHAN, atawa nyang peurunoe Gobnyan sibagoe peunaseuhat? 14 Ubak soe TUHAN geuteumanyong mangat meuteumé peungeutahuan dan peungeurtian? Soe nyang bri peutunyok ubak Gobnyan keu meutindak deungon teupat? 15 Meunyoe bak TUHAN, bansa-bansa nyoe na kheueh lagée si titiek ié didalam tima, lagée sianeuk abée nibak neuraca; pulo-pulo saban phui jih deungon abée nyang ubit. 16 Banmandum beulatang nyang na didalam uteuen Libanon hana séb mangat teupeu jeuet keu keureubeuen nyang teutot; bak-bak jih citbacut that keu teupeu jeuet keu kayée apui. 17 Banmandum bansa hana meumakna nibak Gobnyan, sang-sang hana atra nyan dikeue Gobnyan. 18 Lé sababnyan deungon soe gata takeuneuk peusaban Po teu Allah? Soe nyang ta-anggab saban deungon Gobnyan? 19 Gobnyan bukon lagée patong nyang jipeugöt lé manusia, patong nyang meulapeh deungon méuh dan meulapek pirak. 20 Ureuëng nyang hana ék jibloe méuh atawa pirak, laju geupiléh kayée nyang hana mudah rusak. Gobnyan geumita utoh nyang ahli mangat jipeugöt patong nyang hana bagaih goyang. 21 Ék kheueh gata hana tateupeue dan hana tadeungoe, dan hana teubri tée ubak gata yoh awaikon ilée? Ék kheueh gata hana tapeuphom phon yoh awai pakriban awai jih jeuet donya? 22 Nyang cebta nyan na geuduek meutahta di ateueh bumoe nyang bulat, peunduduek jih leumah ubit that lagée daruet. Gobnyan geuleueng langét lagée geuleueng ija, dan geupasang nyan lagée ureuëng peudong khimah keu teumpat tinggai. 23 Gobnyan geupeujeuet ureuëng mat kuasa hana meudaya, dan ureuëng-ureuëng rayeuk ka gadôh keukuasaan jih. 24 Awaknyan lagée seunaman muda nyang ban jipeuphon timoh nibak ukeue jih. Meunyoe TUHAN geupeuteuka angén, awaknyan habéh tho dan jipupo lagée jumpueng. 25 Soe nyang gata anggab saban deungon Po teu Allah Nyang Mahakudus? Deungon soe gata keuneuk peusaban Gobnyan? 26 Pandang kheueh u langét, dan peurati kheueh! Soe nyang cebta bintang-bintang nyan? Gobnyan nyang atoe awaknyan lagée pasokan, Gobnyan geuteupeue padubna jeumeulah awaknyan banmandum, dan geutawök maséng-maséng deungon nan geuh nyan. Hana meusaboh pi nyang gadôh, sabab raya that kuasa TUHAN! 27 Lé sababnyan, hai Israel, pakon gata apoh apah, sang-sang TUHAN Po teu Allah gata hana geuteupeue gata lam susah? Sang-sang Gobnyan hana geupakoe ubak naseb gata, dan hana geungieng peue hak gata? 28 Ék kheueh mungken gata hana tateupeue dan hana tadeungoe? TUHAN kheueh Po teu Allah nyang keukai, nyang cebta bansaboh bumoe. Gobnyan hántom na geurasa hék atawa leumoh; pikeran Gobnyan hana ék soe uko. 29 Gobnyan nyang peuteuga ureuëng nyang hék, geubri seumangat keu ureuëng nyang hana meudaya. 30 Ureuëng-ureuëng muda ka jeuet keu hék dan leusu aneuëk-aneuëk remaja reubah meugantoh. 31 Teuma ureuëng nyang meuharab ubak TUHAN mantong, ureuëng nyan teuma meuteumé teunaga barô. Awaknyan lagée cicém siwah nyang jipo manyang deungon teunaga sayeub jih. Awaknyan jiplueng dan hana meunyuem hék, awaknyan jijak dan hana jeuet keu leusu.

Nabi Yesaya 41

1 Feureuman Allah, "Seungab kheueh dan deungoe kheueh Ulôn, hai peunduduek nanggroe-nanggroe nyang jiôh. Meusiab-siab kheueh mangat teuka ubak kantô peungadelan, maju kheueh dan sunyueng kheueh peukara gata. Jak geutanyoe ta meusidang meusajan, keu teupeuputôh soe nyang beuna dan soe teuma nyang salah. 2 Soe kheueh nyang peugrak peunguasa di timu, dan nyang bri bak jihnyan meunang hana putôh-putôh? Soe nyang peujeuet gobnyan geupeutaloe bubena bansa, dan geupeutaklok bubena raja keu gobnyan? Deungon peudeueng gobnyan sampoe awaknyan meutabu lagée abée, deungon panah gobnyan awaknyan ka habéh meuhambô lagée jeumpueng jiyueb lé angén. 3 Gobnyan laju geutiyeub dan maju hana nyang lienteung; langkah gobnyan bagaih, watée geujak lagée rab-rab hana keunong bumoe. 4 Soe kheueh nyang peubuet banmandum nyan? Soe kheueh nyang peuteuntée jalan jih seujarah? Ulôn, TUHAN, Ulôn kheueh nyang phon that, dan teutab na sampoe án uroe pagée. 5 Peunduduek nanggroe-nanggroe nyang jiôh deuh geukalon peue nyang ka Ulôn peubuet. Awaknyan teukeujot dan yo meugám-gám ngon teumakot, laju meusapat meusajan dan jiteuka. 6 Banmandum ureuëng jiteumanyong sabe keudroe-droe, dan saleng teupeukong até. 7 Tukang kayée jipeukong até si tukang méuh, ureuëng nyang peulipeh logam deungon palée jipujoe ureuëng nyang teungoh meunempa di ateueh landasan. Geupeugah, 'Gét lagoena buet jaroe gata'; laju geupeukong deungon labang mangat bék guyang. 8 Teuma gata, Israel, hamba Ulôn, umat nyang Ulôn piléh, gata keuturonan Ibrahim, sahabat Ulôn. 9 Gata ka Ulôn cok nibak ujong-ujong bumoe, Ulôn tawök nibak teumpat-teumpat nyang jiôh. Kheun Ulôn, 'Gata kheueh, hamba Ulôn; Ulôn hana Lôn tulak nyang Ulôn piléh.' 10 Bék teumakot, sabab Ulôn na meusajan gata, bék gundah, sabab Ulôn na kheueh Po teu Allah gata. Gata Ulôn peukong dan Ulôn tulông, Ulôn peutakteh deungon jaroe Ulôn nyang jaya. 11 Ngieng kheueh, banmandum ureuëng nyang beungéh ubak gata, teuma teupeutaloe dan teuseungéh-seungéh. Ureuëng-ureuëng nyang lawan gata, teuma binasa dan habéh teusampôh. 12 Gata tamita ureuëng-ureuëng nyang teuntang droeneueh, teuma awaknyan hana meurumpok ngon droeneueh. Ureuëng-ureuëng nyang muprang deungon gata jinoenyoe ka binasa dan ka habéh gadôh han meuho saho. 13 Sabab Ulôn, TUHAN, Allah gata, nyang mat jaroe uneuen gata; Ulôn peugah, 'Bék takot, Ulôn teuma Lôn tulông gata.' " 14 Feureuman TUHAN, "Bék takot, Israel, bahpih gata ubit dan leumoh. Ulôn kheueh TUHAN nyang tulông gata, Nyang Mahakudus, Po teu Allah Israel na kheueh nyang peuseulamat gata. 15 Ngieng kheueh, gata Ulôn peujeuet lagée papeuen peungirek, nyang barô, tajam dan meugigo dua banja. Gata tangirek gunong-gunong dan tapeuhanco; bukét-bukét gata peujeuet lagée sikéum. 16 Gata teuma tatampo awaknyan, laju awaknyan jipupo lé angén dan geureutök lé angén badée. Gata teuma meugeumbira kareuna Ulôn, TUHAN, dan meubangga kareuna Ulôn, Allah Israel. 17 Meunyoe bansa Ulôn nyang malang nyan jijak mita ié, dan takue awaknyan tho sabab glaih, teuma Ulôn, TUHAN, Lôn jaweueb doá awaknyan; Po teu Allah Israel hana geutinggai umat Gobnyan. 18 Ulôn peujeuet krueng-krueng nyang ié jih jeuet ji ile bak bukét-bukét nyang ueh; mata ié jiteubiet di ateueh darat. Padang pasi Lôn peujeuet keu mon nyang meu ié; mata ié jiteubiet nibak tanoh nyang tho kreng. 19 Padang pasi Lôn pula ngon bak ceumara, bak zaiton, bak murad dan bak akasia. Padang beulantara Lôn peujeuet keu uteuen, uteuen eru, beurangan dan uteuen ceumara. 20 Dan mandum ureuëng jikalon dan jiteupeue bahwa Ulôn, TUHAN, nyang peubuet mandum nyan. Awaknyan teuma jisimak dan muphom, Po teu Allah kudus Israel nyang peujeuet nyan sampoe teujadi." 21 TUHAN, raja Israel, geupeugah ubak dewa-dewa, "Jak gadu laju peukara gata, dan peugah laju alasan-alasan jih! 22 Teuka kheueh, dan ramai kheueh peue nyang teuma teujadi, mangat singoh kamoe teupeue peue akhé jih. Tapeugah kheueh keujadian-keujadian yoh masa ilée, tapeutrang laju makna jih mangat kamoe simak. 23 Tapeugah kheueh peue nyang teuma teujadi, mangat kamoe teupeue bahwa gata beutôi ilahi. Peubuet kheueh laju nyang meuguna atawa nyang rugo, mangat kamoe tahe mante watée teungieng nyan. 24 Nyang sikeubit jih, gata dan buet-buet gata nyan hana, dan ureuëng-ureuëng nyang pujoe gata luwat lumpah na. 25 Ulôn ka Lôn grak sidroe ureuëng di timu: Ulôn tawök jihnyan mangat jijak prang rot utara. Bubena nyang mat kuasa geugilo-gilo lagée geubloh lam leuhôb, lagée ureuëng peugét beulangong tanoh jibloh-bloh lam tanoh kliet. 26 Soe lamkawan gata nyang ka tapeubuet lagée nyan sampoe kamoe jeuet kamoe peubeuna? Teuma lamkawan gata hana nyang tabri tée, hana ureuëng nyang na deungoe gata tapeugah haba. 27 Ulôn, TUHAN, nyang paleng awai Ulôn peugah ubak Sion; Ulôn nyang kirém ureuëng ba haba gét u Yerusalem. 28 Watée Lôn mita lamkawan dewa-dewa, hana meusidroe pih nyang hase jibri peutunyok, dan hana nyang jeuet jijaweueb. 29 Beutôi, dewa-dewa nyan hana meuguna, awaknyan na kheueh patong tuangan nyang hana meudaya, dan hana hase jipeubuet sapeue."

Nabi Yesaya 42

1 Feureuman TUHAN, "Nyoe kheueh hamba Ulôn nyang Ulôn tulông ureuëng nyang Ulôn piléh nyang peugalak até Ulôn. Ulôn ka Lôn bri kuasa ubak jihnyan, mangat jiba keuadelan ubak meubagoe bansa. 2 Jihnyan hana jikliek atawa jidumpék deungon su nyang meudeungkeng, su jihnyan hana teudeungoe nibak rot ueh raya. 3 Trieng nyang ka leunuet hana jigeuwiet, panyöt nyang hu meukléb-kléb hana teuma jipeulon. Deungon seutia jihnyan jipeugah nyang beuna, 4 deungon hana bimbang atawa putôh asa, sampoe keuadelan jipeudong di ateueh bumoe. Nanggroe-nanggroe nyang jiôh jirindu keu ajaran jihnyan." 5 TUHAN Po teu Allah geucebta dan geuleueng langét; Gobnyan nyang peugöt bumoe deungon banmandum asoe nyang na didalam nyan. Gobnyan nyang bri keu manusia nafáh dan nyawöng mangat manusia nyan jeuet jiudeb. Dan Gobnyan geupeusan haba nyoe ubak hamba Geuh, 6 "Ulôn, TUHAN, nyang hôi dan nyang bri tugaih keu gata mangat gata peujak keuadelan. Gata Ulôn bimbeng dan Lôn peulara mangat jeuet keu peujanjian deungon umat manusia, dan trang keu banmandum bansa. 7 Mangat teupeubleuet mata ureuëng buta, dan peubeubaih manusia nibak glab nyang seupôt. 8 Ulôn kheueh TUHAN, dan nyan kheueh nan Ulôn; keu agungan Ulôn hana Lôn bri ubak barang gasoe ureuëng; dan meusyeuhu Ulôn hana teuma Ulôn bri keu patong. 9 Jinoenyoe nyang Ulôn ramai ka jeuet keu nyataan; Ulôn keuneuk Lôn bri tée hai-hai nyang barô; sigohlom nyan teujadi, ka Ulôn peugah ubak gata." 10 Meuca-e kheueh lagu nyan barô keu TUHAN, pujoe kheueh Gobnyan, hai banmandum bumoe! Meugeumuroh kheueh, hei laôt dan banmandum asoe jih, meunan cit nanggroe nyang jiôh dan banmandum asoe jih nyang na disinan. 11 Bah kheueh padang pasi dan banda-banda jipujoe TUHAN, bah kheueh peunduduek Kedar jipujoe Gobnyan! Bah kheueh peunduduek banda meusurak meuhubô, dan jimeuhôi-meuhôi di pucak gunong! 12 Bah kheueh awaknyan jipeuagong TUHAN, dan jipeumeusyeuhu Gobnyan di nanggroe-nanggroe nyang jiôh. 13 TUHAN geumaju ngaza lagée sidroe pahlawan, lagée sidroe tantra peunoh seumangat meunyoe jimuprang. Gobnyan nyang beuôt dumpék dalam prang, dan geupeuleumah keu-unggolan Gobnyan ubak lawan. 14 Po teu Allah meufeureuman, "Ka treb that Ulôn iem droe; Ulôn seungab dan Ulôn teundroe. Bak saát nyoe ka trok watée jih keu Lôn meubuet, Ulôn keuneuk kliek lagée inong nyang keuneuk peulahé aneuëk. 15 Gunong dan bukét Lôn peujeuet ueh dan tandus, banmandum seunaman Lôn peulayée. Pantôn-pantôn krueng Lôn ubah jeuet keu padang pasi, banmandum danau Lôn peuto kreng. 16 Bansa Ulôn nyang buta Lôn bimbeng meulalu rot nyang hana awaknyan teupeue; awaknyan teuma Lôn tunton bak jalan-jalan nyang hana awaknyan turi. Seupôt buta Lôn peujeuet trang keu awaknyan, dan jalan nyang keuwieng keuwot Lôn peurata. Nyan kheueh nyang Lôn peubuet keu awaknyan, dan nyan pasti Lôn laksana. 17 Ureuëng nyang peucaya keu patong beurala dan jiaku nyan sibagoe ilah awaknyan, nyan teuma teuhina dan teupeumalée." 18 TUHAN meufeureuman, "Deungoe kheueh, he ureuëng-ureuëng klo! Ngieng kheueh, he ureuëng-ureuëng buta! 19 Soe kheueh nyang leubeh buta nibak Israel namiet Ulôn? Soe kheueh nyang leubeh klo nibak utosan Lôn? 20 Israel, le nyang gata ngieng, teuma hana gata pako, geulinyueng gata teubuka, teuma hana gata deungoe." 21 TUHAN geutem peuseulamat nyan; Gobnyan geutem mangat huköm Geuh jihoreumat dan jipeu agong. 22 Teuma bansa nyan ka habéh jireupah; awaknyan jiteun di dalam-dalam kama di miyueb tanoh, dan jibeukab lam glab. Awaknyan jeuet keu ureuëng nyang keunong reupah, dan hana nyang teuka jijak tulông. 23 Soe lamkawan gata nyang tatem deungoe hai nyoe, dan tasimak keu silanjut jih? 24 Soe kheueh nyang jok Israel mangat jireupah? Bukon kheueh TUHAN keudroe? Ubak Gobnyan kheueh tanyoe meudesya, geutanyoe hana udeb meunurot peurintah Gobnyan dan hana ta turot peue nyang geupeurunoe. 25 Dan Gobnyan geupeujeuet geutanyoe meureuka nyang lumpah hebat, dan meudeurita sabab muprang nyang luwabiasa. Beungéh Gobnyan sampoe seu-uem di Israel lagée apui, teuma geutanyoe hana tasadar, dan hana meurunoe nibak nyang geutanyoe rasa.

Nabi Yesaya 43

1 Israel, meunoe kheueh feureuman TUHAN, "Ulôn kheueh nyang peujeuet dan nyang peugét gata, bék teumakot, gata pasti Lôn peuseulamat! Ulôn ka Lôn hôi gata deungon nan gata, gata na kheueh milék Ulôn. 2 Meunyoe gata neujeumeurang ié, Ulôn teuma na meusajan gata, gata hana teuma karam dipat mantong gata meuteumé susah. Meunyoe meulalu apui, gata hana teuma angöh, cubaan-cubaan nyang brat hana teuma ceulaka gata. 3 Sabab Ulôn kheueh TUHAN, Po teu Allah gata, Allah kudus Israel, Nyang Peuseulamat gata. Meusé Ulôn bri sibagoe seuneuboh gata, Sudan dan Syeba sibagoe geunantoe gata. 4 Gata na meuyuem bak mata Lôn, Ulôn hareuga dan Lôn gaséh ubak gata; teuma Ulôn bri manusia sibagoe geunantoe gata, bansa-bansa sibagoe geunantoe nyawöng gata. 5 Bék teumakot, sabab Ulôn Lôn lindong gata. 6 Ulôn peurintah ubak utara dan seulatan, mangat awaknyan bubagaih jipeu lheueh laju. Bah aneuëk-aneuëk gata nyang agam jiwoe nibak jiôh, dan aneuëk-aneuëk gata nyang inong jiwoe nibak tieb-tieb ujong bumoe. 7 Sabab awaknyan banmandum ka teuhôi ateueh nan Ulôn, awaknyan Ulôn cebta keu ji peuagong Ulôn." 8 Po teu Allah meufeureuman, "Yue kheueh peuleumah droe ukeue bansa Ulôn nyang buta, bahpi na meumata; nyang klo, bahpi na ôn punyueng. 9 Yue kheueh banmandum bansa jimeugumpôi dan banmandum sukée jimeuhimpon. Soe kheueh lamkawan dewa-dewa awaknyan ka jibri tée peue nyang teujadi nibak saát nyoe? Soe teuma lamkawan nyan hase geuramai masa ukeue? Bah kheueh saksi-saksi awaknyan jijak ukeue, dan jibri bukeuti bahwa awaknyan beuna, mangat mandum jideungoe awaknyan geupeugah haba, bahwa meumang lagée nyan! 10 He umat Ulôn, gata kheueh saksi-saksi Ulôn, gata Ulôn piléh jeuet keu hamba-hamba Lôn, mangat neuturi Ulôn dan peucaya ubak Ulôn, dan neupeu phom bahwa Ulôn kheueh Po teu Allah. Ulôn Po teu Allah Nyang Mahaesa, hana nyang laén sigohlom dan óh ka lheueh Ulôn. 11 Ulôn keudroe TUHAN, seulaén nibak Lôn hana nyang peuseulamat gata. 12 Ulôn ka lheueh Lôn peugah ubak gata, Ulôn kheueh nyang peuseulamat gata, dan bukon ilah aséng nyang na di teungoh-teungoh gata; gata nyang jeuet keu saksi-saksi Lôn. Dan Ulôn, Ulôn nyoe Po teu Allah, 13 keu siumu masa Ulôn nyoe teutab Po teu Allah. Hana nyang hase geupeuleueh droe nibak kuasa Ulôn, atawa jihalangai reuncana Ulôn." 14 TUHAN peuseulamat gata, Nyang Kudus Israel geupeugah, "Deumi gata, Ulôn kirém sipa-i u Babel, dan Ulôn dobrak palang-palang pintoe peunjara; surak meuhubo di ureuëng Kasdim ulôn ubah jeuet jimo bae. 15 Ulôn kheueh TUHAN, Po teu Allah gata nyang kudus, Raja gata, nyang cebta gata, he Israel!" 16 TUHAN ka geupeugöt saboh jalan meulalu laôt, meulalu ié nyang meubok-bok meubura. 17 Gobnyan nyang yue peuwira dan sipa-i-sipa-i gobnyan u mideuen prang, dan awaknyan maju deungon geuritan meuguda. Teuma awaknyan reubah, han hase geubeudôh le, awaknyan matée lagée dah panyöt nyang lon. 18 TUHAN meufeureuman, "Hana guna neuingat masa nyang ka lheueh, peucuma neukeunang nyang ka-ka lewat. 19 Ngieng kheueh, Ulôn peubuet sisuatu nyang barô; jinoenyoe ka teupeuphon, peu kheueh han neukalon? Ulôn teuma Lôn peugét jalan dipadang pasi, dan krueng-krueng dalam gle beulantara. 20 Beulatang kleut teuma ji peuagong Ulôn; dan asée srigala dan cicém unta jipujoe Ulôn sabab Ulôn nyang peu ile ié di padang pasi, dan krueng-krueng di padang beulantara keu Lôn bri ié jieb ubak umat nyang ka Lôn piléh. 21 Awaknyan kheueh bansa nyang Ulôn beutuek keu droe Lôn keudroe, mangat jeuet geujak peusampoe puja ngon pujo keu Ulôn." 22 TUHAN meufeureuman, "Teuma gata Israel, hana neuseumah Ulôn, dan hana le meubakti ubak Ulôn. 23 Gata hana le neuba domba sibagoe keureubeuen nyang teutot, hana neuhoreumat Ulôn deungon peuseumahan gata. Padahai Ulôn hana Lôn peubeuban gata deungon keureubeuen, atawa Lôn peususah gata deungon Lôn tuntut keumeunyan. 24 Gata han neubloe dupa mangat bhée keu Ulôn, hana neupeupueh Ulôn deungon gapah keureubeuen nyang gata sie. Seubalek jih gata neupeubeuban Ulôn deungon desya-desya nyang gata peubuet, dan neupeususah Ulôn deungon buet-buet gata nyang salah. 25 Teuma ulôn Allah nyang sampôh desya gata, Ulôn peu amphon gata kareuna meunan kheueh sifeuet Ulôn; Ulôn hana Lôn ingat-ingat ubak desya gata. 26 Ingat kheueh ubak Ulôn, jak geutanyoe tajak ubak kantô peungadelan, peugah laju peukara gata mangat jeuet deuh bahwa gata na kheueh beuna. 27 Indatu gata nyang phon-phon that ka meudesya, dumna peumimpén ka meubeurontak teuhadab Ulôn, 28 imeum-imeum gata ka jipeukuto Rumoh Ulôn. Teuma Israel Ulôn seurah keu jipeuhina, keuturonan Nabi Yakub Ulôn peubiyeu jipeubinasa."

Nabi Yesaya 44

1 TUHAN meufeureuman, "Deungoe kheueh, he Nabi Yakub hamba Ulôn, he Israel, umat nyang Ulôn piléh! 2 Ulôn kheueh TUHAN nyang peujeuet gata, nyang peujeuet gata phon lam rahim ma, dan nyang tulông gata. Bék teumakot, gata kheueh hamba Ulôn, umat nyang Ulôn piléh lom nyang Ulôn gaséh. 3 Sabab Ulôn teuma Lôn peu tijöh ié bak tanoh nyang tho, dan nyang peu ile ié krueng-krueng bak tanoh nyang geursang. Ulôn kubri kuasa keu keuturonan gata, dan nyang bri beureukat keu aneuëk cucoe gata. 4 Awaknyan teuma udeb subo lagée naleueng nibak binéh ié, lagée bak gandarusa nyang timoh nibak binéh krueng. 5 Sidroe deumi sidroe teuma meungaku droe jih sibagoe milék Ulôn, dan teuka meugabong deungon keuturonan Nabi Yakub. Maséng-maséng jituléh bak paleuet jaroe jih: Milék TUHAN, dan jipeugah droe jihnyan anggota umat Allah." 6 Nyoe kheueh feureuman TUHAN Nyang Mahakuasa, Raja dan peulindong Israel, "Ulôn Po teu Allah Nyang Mahaesa, nyang awai dan nyang akhé. 7 Soe kheueh nyang na lagée Lôn? Yue kheueh jih nyan jimeungaku! Bah kheueh jihnyan jibri tée dan jibri bukeuti ubak Ulôn! Soe nyang ka ramai masa ukeue phon awai sampoe akhé jamén? 8 Bansa Ulôn, bék teumakot atawa teukeujot; kon kheueh phon yoh ilée sampoe án jinoe Ulôn ka lheueh Lôn ramai peue nyang teuma teujadi? Gata nyoe kheueh saksi-saksi Lôn. Peulindong nyang laén hana dan hana Lôn turi." 9 Ureuëng-ureuëng nyang peugot patong beurala nyan hana meuguna, dan dewa-dewa nyang awaknyan pujoe nyan hana meufaedah. Ureuëng-ureuëng nyang seumah patong nyan buta dan hana jiteupeue sapeue, sabab nyan awaknyan meuteumé malée. 10 Sia-sia kheueh teupeugét patong tuangan dan jiseumah nyan sibagoe dewa! 11 Beutôi, banmandum ureuëng nyang seumah patong teuma meuteumé malée. Ureuëng nyang peugét patong nyan manusia biasa. Yue kheueh awaknyan teuka meusajan-sajan; pasti awaknyan teumakot dan malée. 12 Teumpeuen beuso laju jicok sikrek logam dan jipeugot laju atra nyan didalam apui dan jiseukok deungon palée. Buet nyan jipeubuet deungon habéh teunaga nyang na nibak ureuëng nyan. Teungoh geumeubuet, gobnyan jiteuka deuk, glaih, dan hék. 13 Tukang kayée jiukoe kayée. Tukang nyan jigamba pola deungon gapu, jiuke nyan deungon alat-alat dan jipeujeuet nyan keu patong manusia nyang gagah, laju atranyan jikeubah didalam rumoh. 14 Barang kali kayée nyang jipeuguna nyan asai jih nibak bak ceumara, bak aron atawa bak kayée sala nyang jiteubang lam uteuen. Mungken cit jihnyan jipula bak salam laju jipreh ujeuen jitöh sampoe bak salam timoh. 15 Siladum nibak kayée nyan ji peujeuet keu kayée apui keu alat meu adeueng meunan cit teumpat tot ruti dan teu panggang uengkot sie, dan puih kheueh até jihnyan. Ureuëng nyan meu adeueng dan jipeugah, "Bit mangat that dan seu-uem! Bit galak that deungon apui nyoe!" Leubeh kayée nyan jipeuguna keu teupeugét patong. Laju jiteukui jiseumah nyan dan meudoá, "Droeneueh kheueh ilah ulôn, peuseulamat kheueh ulôn!" 18 Bit bangai that ureuëng-ureuëng nyang lagée nyan! Awaknyan ka jipet mata dan até awaknyan sampoe hana muphom sapeue. 19 Utöh patong nyan hana sampoe jipike, "Kayée nyan siladum ulôn tot, dan adang jih ulôn ngui keu lôn tot ruti dan lôn panggang uengkot sie keupeunajoh lôn. Laju kayée nyang leubeh nyan ulôn peugét patong. Jadi jinoenyoe ulôn seumah sikrak kayée!" 20 Buet nyang lagée nyan saban cit deungon jipajoh abée. Ureuëng nyan ka jipeusisat lé pikeran jih nyang bangai, sampoe jihnyan ka han hase le teutulông. Jihnyan hana hase jiaku bahwa patong nyang mantong na nibak jaroe jih nyan na kheueh alat teumipée nyang hana meuguna., Peucebta dan Peuseulamat 21 TUHAN meufeureuman, "Ingat kheueh banmandum nyoe, he Israel, sabab gata kheueh hamba Ulôn. Ulôn nyang peujeuet gata, dan gata hamba Ulôn, Israel, Ulôn hana tuwoe keugata! 22 Salah gata nyan Ulôn use lagée awan, desya gata Ulôn sampôh lagée sagôb. Woe kheueh ubak Ulôn, sabab Ulôn ka Lôn peubeubaih gata!" 23 Meusurak kheueh ngon geumbira, he langét, meusurak geumbira kheueh, he bagian nyang na dalam bumoe! Meusurak kheueh deungon geumbira, he gunong-gunong! meunan cit deungon uteuen dan tieb-tieb bak kayée nyang na lam nyan! Sabab TUHAN ka geutunyok keuagongan Gobnyan deungon cara geuteuboih Israel umat Gobnyan. 24 Meunoe kheueh feureuman TUHAN nyang peuseulamat gata nyang peujeuet gata yohphon lam rahim ma, "Ulôn kheueh TUHAN nyang peujeuet peue-peue nyang na, nyang sidroe mantong Lôn leueng langét, dan hana nyang tulông Lôn peujeuet bumoe. 25 Ulôn kheueh nyang peubateue peue-peue nyang ji ramai lé tukang ramai, dan nyang peubeuáh bubena tukang-tukang tanueng. Tutoe haba ureuëng carông Ulôn sangga, keubijaksanaan awaknyan Ulôn peujeuet keubuet nyang bangai. 26 Ulôn kheueh nyang peukong tutoe haba hamba Ulôn, dan nyang peubuet reuncana nyang jipeugah lé utosan Lôn, Ulôn peugah bahwa Yerusalem teukeumiet lom, dan banda-banda Yehuda Lôn peudong lom; rungka-rungka jih teupeupuléh teuma. 27 Ulôn kheueh nyang peugah ubak tuwie ié laôt: Surot kheueh! Ulôn keuneuk peutö banmandum krueng gata. 28 Ulôn kheueh nyang peugah ubak Kores, 'Gata kheueh nyang peurintah keu Ulôn, dan peubuet peue mantong nyang Ulôn meuhéut. Peurintah kheueh mangat Yerusalem geupeudong lom, dan Baét TUHAN geupeuduek keunaleueng jih.' "

Nabi Yesaya 45

1 TUHAN ka geupiléh Kores jeuet keu raja; gobnyan geutunyok mangat hase jipeutaloe bansa-bansa dan keujiwiet keukuasaan raja-raja. TUHAN geupeuhah pintoe-pintoe geureubang keu gobnyan, hana meusaboh pih nyang tinggai teutôb. Ubak gobnyan TUHAN meufeureuman, 2 "Ulôn kupeusiab rot keu gata; gunong dan bukét Lôn peurata, pintoe-pintoe teumaga Ulôn peuhanco, dan palang-palang beuso Ulôn wiet. 3 Dan keu gata Ulôn bri hareuta keukayaan nyang mantong teusöm, mangat gata tateupeue bahwa Ulôn kheueh, TUHAN, Allah Israel, nyang ka tawök gata deungon nan gata. 4 Gata Ulôn tawök dan Ulôn boh nan gala, bahpi gata hana taturi Ulôn. Lôn bri tugaih keugata tatulông bansa Israel hamba Ulôn, sabab awaknyan bansa nyang Ulôn piléh. 5 Ulôn kheueh TUHAN, hana nyang laén, Ulôn nyoe Po teu Allah Nyang Mahaesa. Keu gata ka Lôn bri sinjata, bahpi gata hana taturi Ulôn. 6 Banmandum nyang Ulôn peubuet nyan mangat phon di timu sampoe u barat mandum ureuëng jiteupeue bahwa Ulôn kheueh TUHAN, hana ilah nyang laén seu laén Ulôn. 7 Ulôn kheueh nyang peujeuet trang dan seupôt, Ulôn nyang peuteuka beureukat dan bala. Ulôn kheueh TUHAN nyang peubuet banmandum nyan. 8 Di ateueh langét Ulôn peutron nyang meunang lagée ujeuen, bumoe jipeuhah droe keu jiteurimong ié ujeuen nyan, laju jipeutimoh keuseulamatan dan keubeubaihan; dan Ulôn TUHAN nyang peujeuet nyan sampoe teujadi." 9 Ceulaka kheueh ureuëng nyang jimeubantah deungon peucebta jihnyan; jihnyan lagée beulangong nyang lawan ureuëng nyang peugöt jihnyan. Peu kheueh tanoh kliet nyan jitanyong ubak ureuëng nyang peugét beulangong nyan, "Peue nyang teungoh neupeubuet nyan?" Peu kheueh beulangong nyan apoh apah bahwa nyang peugét jihnyan hana jeuet sapeue? 10 Ceulaka kheueh ureuëng nyang jipeugah ubak ureuëng syiek jih, "Pakon ulôn nyoe geupeulahé lagée nyoe bagoe?" 11 TUHAN, Po teu Allah Kudus Israel meufeureuman, "Tanyong kheueh ubak Ulôn keuhai masa ukeue gata. Teuma bék tatanyong keuhai aneuëk-aneuëk Ulôn, atawa tayue ubak Ulôn teupeugét sapeue-sapeue. 12 Ulôn kheueh TUHAN nyang peujeuet bumoe, dan nyang cebta manusia mangat jiduek di ateueh bumoe nyan. Deungon kuasa Ulôn laju Lôn leueng langét, dan Lôn peurintah bak mata uroe, bak buleuen dan bak mandum bintang-bintang. 13 Ulôn kheueh nyang peugrak Kores mangat jipeubuet meukeusut Ulôn dan jipeudong keuadelan. Ulôn kupeurata banmandum jalan nyang jijak. Gobnyan geupeudong lom banda Ulôn Yerusalem dan geupeuleueh umat Ulôn nyang teutawan, hana teusuab dab hana teuma teubayeue." TUHAN Nyang Mahakuasa ka geupeugah haba. 14 TUHAN meufeureuman ubak Israel, "Gatacok kheueh keudroe hase seunaman tanoh Meusé dan laba nibak nanggroe Sudan. Ureuëng-ureuëng Syeba nyang beuhe ngon gagah jeuet keu hakmilék gata; Awaknyan jijak dilikot gata deungon jaroe teubeuleunggu. Awaknyan jisujut dan meungaku; 'Po teu Allah beutôi-beutôi na lamkawan gata; hana ilah laén seulaén Gobnyan! 15 Po teu Allah nyang peuseulamat Israel na kheueh Allah nyang geusöm droe. 16 Banmandum ureuëng nyang jipeugét patong beurala; teuma geupeumalée dan geuhina. 17 Teuma Israel geupeuseulamat lé TUHAN; keuseulamatan awaknyan teutab meuteun. Gata hana geupeumalée dan jihina sampoe siumu masa.' " 18 TUHAN kheueh nyang cebta langét, Gobnyan kheueh Po teu Allah! Gobnyan kheueh nyang peujeuet dan nyang bentuek bumoe, nyang peujeuet bumoe nyan khong ngon kukoih dan teutab teudong. Gobnyan hana geupeujeuet teumpat nyang seungue seunyab, teuma teumpat keuteumpat tinggai. Gobnyan kheueh nyang peugah haba, "Ulôn kheueh TUHAN, dan hana TUHAN nyang laén seulaén Ulôn. 19 Ulôn hana Lôn peugah haba deungon seungab-seungab, atawa seucara rahsia. Ulôn hana Lôn yue umat Ulôn Israel jijak mita Ulôn deungon peucuma. Ulôn, TUHAN, Lôn peugah haba nyang beuna, dan nyang bri tée peue-peue nyang beutôi." 20 TUHAN meufeureuman, "Meugumpôi kheueh dan teuka kheueh meusajan-sajan, gata banmandum nyang hana keunong lamkawan bansa-bansa! Bangai that ureuëng nyang jiseuôn-seuôn patong kayée, dan meudoá ubak dewa-dewa nyang hana hase jipeuseulamat jihnyan. 21 Ba laju peukara gata, peugah laju bukeuti-bukeuti jih, dan, bah kheueh awaknyan jimeupakat meusajan-sajan. Soe kheueh nyang peugah hai nyan dan nyang bri tée phon yoh masa ilée? Peu kheueh kon Ulôn, TUHAN? Hana ilah nyang laén, seulaén Ulôn. Ulôn kheueh Po teu Allah nyang ade nyang bri seulamat, hana nyang laén seulaén Ulôn! 22 He, banmandum ureuëng nyang tinggai di ateueh bumoe, meupaleng kheueh ubak Ulôn mangat gata Lôn peuseulamat, sabab Ulôn nyoe Po teu Allah, hana nyang laén! 23 Ulôn ka Lôn meujanji, dan janji Ulôn nyan hana bateue; deumi Ulôn keudroe Ulôn meusumpah: Tieb-tieb ureuëng nyang jimeuteuôt dikeue Ulôn, dan lam basa jih nyan keudroe meujanji seutia ubak Ulôn. 24 Ureuëng ramé teuma jipeugah, 'Keuadelan dan teunaga na nibak TUHAN!' Banmandum ureuëng banci keu Ulôn ureuëng nyan jijak ubak Ulôn dan laju meuteumé malée. 25 Teuma keuturonan Nabi Yakub teupeuseulamat, dan awaknyan jipujoe Ulôn, TUHAN.

Nabi Yesaya 46

1 Nyoe akhé riwayat dewa-dewa Babel; yoh watée ilée patong Bel dan Nebo jiseumah, teuma bak saát nyoe ka jiseumah di ateueh beulatang, jeuet keu beuban keu beulatang nyang hék. 2 Patong-patong nyan hana hase jitulông nyang seuôn droe jih, awaknyan keudroe teuangkot sibagoe ureuëng keunong teuen. Nyan kheueh akhé riwayat awaknyan. 3 Deungoe kheueh Ulôn, he keuturonan Nabi Yakub, gata banmandum nyang na teutinggai nibak umat Lôn. Ulôn ka Lôn peulara gata yoh phon gata lahé u donya. 4 Ulôn nyoe teutab Po teu Allah gata sampoe án tuha gata; dan teutab Lôn jaga gata sampoe gata putéh ôk nibak ulée. Ulôn nyang peujeuet gata dan teutab Lôn jaga gata, Ulôn kutulông dan Lôn peuseulamat gata. 5 Deungon soe gata keuneuk peusaban Ulôn? Peu kheueh na nyang jeuet teupeusaban deungon Lôn? 6 Ureuëng jipeuhah dompet dan laju jiruwah méuh, dan jitimang pirak jihnyan deungon ceng. Gobnyan jijok upah keu tukang méuh mangat jitem peugét patong beurala, laju jiseumah patong nyang jipeugét keudroe. 7 Patong nyan laju jilabang dan jikeubah bak teumpat jih, ureuëng nyan jidong disinan dan hana jeuet jiminah. Meunyoe ureuëng meudoá ubak jihnyan, lé jihnyan hana jijaweueb, dan hana jipeuseulamat jihnyan nibak keususahan. 8 Ingat kheueh dan peutimang kheueh, he ureuëng-ureuëng doraka! 9 Ingat kheueh keujadian-keujadian yoh masa ilée; meungaku kheueh bahwa Ulôn nyoe Po teu Allah, dan hana nyang laén, Ulôn Allah, dan hana nyang na lagée Ulôn. 10 Phon yoh awai Ulôn peugah hai-hai nyang dudoe, phon yoh ilée ka Ulôn ramai peue-peue nyang teujadi. Kheun Ulôn: Keuputosan Ulôn teuma teulaksana, keuheundak Ulôn pasti Ulôn peubuet! 11 Ulôn tawök laju sidroe peunguasa di timu laju jiteuka lagée saboh cicém juwah keujijak peubuet keuputosan Ulôn. Peue nyang Ulôn peugah pasti Ulôn peubuet, peue nyang Ulôn reuncana pasti Ulôn keureuja. 12 Deungoe kheueh Ulôn, he ureuëng-ureuëng cungkak, gata nyang sangka bahwa meunang nyan mantong jiôh. 13 Ulôn kupeuto uroe peubeubaihan, keuseulamatan nyang Ulôn jok hana teutunda le. Ulôn teuma Lôn peuseulamat Yerusalem dan Ulôn bri horeumat keu Israel."

Nabi Yesaya 47

1 TUHAN meufeureuman, "Hei Babel, tron kheueh nibak keurajeuen gata, dan gata duek kheueh ateueh abée. Muso ngon maméh lagée yoh ilée ka hana le nibak gata. 2 Gileng kheueh teupông deungon batée; peuhah kheueh tôb ulée gata, salob kheueh ija rok sampoe leumah beuteh gata, dan jeumeurang kheueh bubena krueng. 3 Ureuëng laén jingieng gata nyang teulon, jihina ngon jipeumalée. Ulôn kubalaih dam ateueh gata, dan hana meusidroe pi nyang na Lôn tinggai." 4 Po teu Allah nyang suci bansa Israel geupeubeubaih geutanyoe, nan Gobnyan TUHAN Nyang Mahakuasa. 5 TUHAN meufeureuman ubak Babel, "Seungab kheueh, dan tamong kheueh laju lam seupôt buta. Gata hana le teupeugah 'Ratu keurajeuen-keurajeuen.' 6 Yoh masa ilée Ulôn beungéh ubak umat Lôn, awaknyan hana le Lôn anggab atra milék Ulôn. Laju awaknyan Ulôn seurah ubak gata, dan gata pi hana tagaséh keu awaknyan, sampoe nyang ka tuha-tuha gata teugon deungon keujam hán peue takira. 7 Gata tapike jeuet keu ratu siumu masa, dan hana gata insaf atawa gata pike peukeuneu lheueh nyang teujadi. 8 Sabab nyan deungoe kheueh Ulôn, hei gata nyang galak tatiyeub keuseunangan! Gata pike udeb gata aman, dan hana nyang lagée gata. Gata pike gata hana jeuet keu inong balée, dan keuturonan gata hana binasa. 9 Teuma sikeujab mantong, lam siuroe, mandua hai nyan sigoe guih teujadi. Bah kheueh tapeuguna sihe ngon nurajah mubisa, lakoe gata ngon aneuëk gata teutab teucok cit teuma. 10 Gata tapike aman bak buet nyang jeuhet gata, gata pike buet nyang jeuhet gata hana geungieng nyata. Gata ka jipeusisat lé keubijaksanaan dan iéleumé peungetahuan gata, gata pike hana nyang lagée gata. 11 Teuma gata keunong bala, iéleumé sihe gata hana kuasa jipeusie droe. Ubak gata jiteuka lé bala ngon haro hara, dan hana hase gata sangga. Binasa nyan teuka ngon ban sikreb mata, dan hana gata sangka sigohlom nyan teuka. 12 Gata pike mantong bak nurajah dan iéleumé sihe gata, nyang peususah gata yoh masa ubit sampoe ka rayeuk gata. Pat tateupeue nyan meuguna nibak gata, keu teupeutakot banmandum musoh gata. 13 Gata payah that sabab jai lumpah na nariet peuingat. Gata yue laju bubena tukang meuramai nyan teuka jijak peuseulamat gata; awaknyan nyang ka lheueh jiseulidek jeueb-jeueb sagoe langét, dan jimurunoe keuhai bintang-bintang, dan ubak tieb-tieb buleuen barô jiramaikan peue nyang ka jeuet keu naséb gata. 14 Kalon, awaknyan lagée jumpueng nyang teungoh jipajoh lé apui; hana hase jipeuseulamat droe jih keudroe! Apui hu nyan lumpah that seu-uem nibak awaknyan, kon apui seu-uem teumpat meuadeueng. 15 Nyan kheueh guna jih bandum tukang ramai nibak gata nyang peususah gata phon yoh masa ubit gata; maséng-maséng awaknyan jijak jitinggai gata; hana nyang teuka jijak tulông gata."

Nabi Yesaya 48

1 Deungoe kheueh nyoe, he keuturonan Nabi Yakub, keuturonan Yehuda nyang teungui nan Israel, gata peugah gata meungaku Po teu Allah Israel, dan tameusumpah ateueh nan TUHAN. Teuma peue nyang gata peugah nyan hana nyang jujoe. 2 Bahpi meunan, gata taaku deungon bangga bahwa gata peunduduek banda nyang suci; dan bahwa gata meusadeue ubak Allah Israel nyang teupeugah TUHAN Nyang Mahakuasa. 3 TUHAN meufeureuman, "Deungoe kheueh, he Israel! Peue nyang ka teujadi yoh masa ilée, hai nyan ka treb that Ulôn bri tée; peue nyang Ulôn peugah, bagaih that Lôn peubuet dan Ulôn peujeuet bak keunyataan. 4 Ulôn ku teupeue bahwa gata kreueh that até, kreueh ulée dan meu-ulée batée. 5 Dan yoh ilée ka lheueh Ulôn ramai; sigohlom teujadi, ka lheueh Ulôn bri tée, mangat gata bék tapeugah, bahwa nyan na kheueh buet-buet nyang jipeubuet lé patong beurala gata. 6 Banmandum nubuat Ulôn nyang gata deungoe ka teujadi; gata harôh taaku bahwa buet Ulôn nyan beuna. Bak saát nyoe Ulôn bri tée hai-hai nyang barô, rahsia-rahsia nyang gohlom gata teupeue. 7 Barô jinoenyoe Ulôn peugah, dan bukon yoh masa ilée; gohlom na peureunah gata deungoe keuhai nyang nyan, mangat gata hana jeuet tapeugah, bahwa gata tateupeue banmandum nyan. 8 Ulôn ku teupeue bahwa gata hana jeuet teupeucaya, yoh phon masa ilée gata ka meusyeuhu sibagoe ureuëng doraka. Sabab nyan kheueh hana gata teupeue, hana meusikrak haba pih nyang na trok ubak punyueng gata. 9 Ulôn kupeuteun-peuteun ubak beungéh Lôn mangat nan Ulôn jipeumeusyeuhu. Ulôn peuteun nyan keudroe gata, mangat gata hana jipeubinasa. 10 Ulôn kupujoe gata lam apui peundeuritaan, lagée pirak nyang teutot murni lam sinungkée apui. 11 Nyan Ulôn peubuet deumi keudroe-droe Lôn, sabab Ulôn hana Lôn peubiyeu nan Ulôn jipeukuto; keumuliaan Ulôn hana Lôn bagi deungon soemantong." 12 TUHAN meufeureuman, "Deungoe kheueh he Israel, umat nyang Ulôn tawök, Ulôn nyoe teutab Po teu Allah gata. Ulôn kheueh nyang awai phon, dan Ulôn teuma nyang paleng akhé. 13 Jaroe Ulôn nyang peuduek phon dasai bumoe dan nyang lheueng dumna cakrawala. Meunyoe Ulôn tawök nan jihnyan, awaknyan bagaih that jiteuka. 14 Meugumpôi kheueh gata banmandum dan deungoe kheueh nyoe! Lamkawan dewa-dewa hana nyang ramai bahwa ureuëng nyang Ulôn piléh jigeuseurang Babel; jihnyan jipeubuet peue nyang Ulôn lakée. 15 Ulôn kheueh nyang peugah dan nyang tawök jihnyan, nyang bimbeng jihnyan, sampoe jih nyan meuhase. 16 Peurab kheueh beutoe bak Ulôn dan deungoe kheueh nyoe, phon yoh ilée Ulôn peugah haba troh trang; dan tutoe haba Lôn sabe Ulôn peujeuet bak keunyataan." Jinoenyoe TUHAN Po teu Allah geu kirém ulôn dan geubri bak ulôn kuasa keudroe. 17 Kheun Allah kudus Israel, Peuseulamat gata, "Ulôn kheueh TUHAN Po teu Allah gata, nyang peurunoe gata peue nyang meuguna keudroe gata, dan nyang bimbeng gata nibak jalan nyang harôh gata jak. 18 Seukira jih gata tapeurati bubena peurintah-peurintah Ulôn, dan keuseujahteuraan gata lagée krueng nyang hántom tho, dan keumujuran gata nyan lagée umbak di laôt nyang hántom jipiôh. 19 Keuturonan gata le jih lagée ano dipante; Ulôn kujamin awaknyan hana jipeubinasa." 20 Jak kheueh dan taplueng kheueh di Babel, jak peumaklum kheueh haba nyoe hoho mantong. Peusampoe kheueh deungon seumurak nyang geumbira; "TUHAN ka geupeuseulamat Israel, hamba Gobnyan! 21 Watée Gobnyan geubimbéng awaknyan meulalu padang nyang tho kreng, awaknyan hana teurasa grah. TUHAN geuprah gunong batée dan dalam batée nyan laju jiteubiet ié, nibak batée nyan Gobnyan geupeu ile laju ié keu awaknyan. 22 Hana keuseulamatan keu ureuëng jeuhet," meunan kheueh geupeugah lé TUHAN.

Nabi Yesaya 49

1 Deungoe kheueh ulôn, he nanggroe-nanggroe nyang jiôh tasimak kheueh tutoe haba lôn nyoe. TUHAN geuhôi ulôn sigohlom ulôn geupeulahé lé ma, Gobnyan ka geupiléh ulôn yoh ulôn mantong lam pruet ma. 2 Gobnyan geupeujeuet tutoe haba lôn tajam lagée mata peudeueng, deungon jaroe Gobnyan keudroe geulindong ulôn. Gobnyan nyang peujeuet ulôn lagée aneuk panah nyang teuasah, dan geukeubah didalam sarông mangat jeuet teupeuguna. 3 Feureuman Gobnyan ubak ulôn, "Gata kheueh hamba Ulôn; Ulôn teuma jipeumulia sabab lé gata." 4 Teuma di ulôn ku peugah, "Hék ngon payah ulôn peucuma mantong; lôn peuhabéh teunaga ulôn deungon sia-sia!" Teuma dilôn yakén TUHAN teutab geubila hak ulôn, Po teu Allah geubalaih keulôn meunurot nyang ulôn peubuet. 5 Sigohlom lahé, ulôn ka geutawök lé TUHAN jeuet keuhamba Gobnyan, mangat teupeusapat banmandum umat Israel, mangat awaknyan jiwoe ubak Gobnyan. TUHAN geupeujeuet ulôn teuhoreumat, Po teu Allah na kheueh teunaga ulôn. 6 TUHAN meufeureuman ubak ulôn, "Tugaih nyang leubeh raya ka teupreh gata, he hamba Lôn; gata kon mantong tapulang keuturonan Nabi Yakub nyang mantong na tinggai sidroe-dua, dan nyang peupuléh keubeusaran sukée-sukée Israel, teuma Ulôn peujeuet trang keu bansa-bansa, mangat jeuet bansaboh donya teupeuseulamat." 7 Po teu Allah Nyang Mahakudus nyang peuseulamat Israel geupeugah ubak ureuëng nyang lumpah teuhina, dan nyang jibanci lé bansa-bansa dan nyang jeuet keunamiet lé nyang mat kuasa, "Raja-raja teuma jikalon buet-buet ulôn; awaknyan jibeudôh jihoreumat ulôn. Meunan cit lé bubena peunguasa teuma jikalon, laju jisujut sira jiseumah." geupeujanji. 8 TUHAN meufeureuman ubak umat Gobnyan, "Watée Ulôn meukeuheundak, Ulôn jaweueb; bak uroe Ulôn peuseulamat, Ulôn ku tulông gata. Gata Ulôn lindong dan Ulôn jaga, dan Ulôn peujeuet peujanjian keu bansa-bansa. Ulôn puléh nanggroe nyang seungue seungab jeuet keutanoh pusaka keu teumpat tinggai. 9 Ureuëng nyang jipeunjara Ulôn yue teubiet; nyang na lam seupôt Ulôn ba u teumpat trang. Bahpi dibukét nyang lapeueng awaknyan hana kureueng sapeue, bansipanyang rot na teukeubah peunajoh. 10 Awaknyan hana grah atawa deuk, dan hana teuma keunong mata uroe criet dipadang pasi. Sabab Ulôn, nyang sayang keu awaknyan, teuma bimbeng awaknyan dan nyang ba awaknyan ubak asai mata ié. 11 Ulôn nyang peugöt rot ueh meulalu gunong-gunong, banmandum rot ueh raya teuma Lôn peusabe rata. 12 Nibak teumpat nyang jiôh umat Ulôn ka habéh jiteuka, di utara, barat dan Sinim di seulatan." 13 Meuca-e kheueh he langét di manyang, meusurak kheueh he bumoe di miyueb, he banmandum gunong, meusurak kheueh geumbira! Sabab TUHAN geuteuka geujak hibur umat Gobnyan, Gobnyan geugaséh ubak umat Geuh nyang keunong iénanya. 14 Teuma peunduduek Yerusalem jipeugah, "TUHAN ka geutinggai geutanyoe, TUHAN geutanyoe ka geutuwoe keu geutanyoe." 15 TUHAN geujaweueb sira geupeugah, "Peu kheueh mungken sidroe ma jituwoe keu aneuëk jih, dan hana jigaséh keu aneuëk droe jihnyan? Bahpi aneuëk nyan jituwoe keu ma jih, Ulôn teuma Lôn tuwoe keu gata! 16 Yerusalem, Ulôn sabe lam ingat ubak gata; nan gata Lôn uke lam paleuet jaroe Lôn. 17 Ureuëng-ureuëng nyang peudong gata deungon reujang jiteuka, dan nyang ka jipeuhanco gata deungon bagaih jiwéh laju. 18 Ngieng kheueh dan pandang kheueh ban sikeulileng gata, rakyat gata ka meugumpôi dan jijak ubak gata. Deumi Ulôn, Allah nyang udeb, Ulôn peugah, sunggoh, gata bangga deungon peunduduek gata, lagée dara barô inong nyang bangga deungon piasan nyang meuleukek nibak tuboh. 19 Nanggroe gata nyang tho kreng lom ngon seungue seungab, bak saátnyoe ka jeuet keusampiek nibak ureuëng-ureuëng nyang keuneuk tinggai disinan. Dan ureuëng-ureuëng nyang keuneuk peubinasa gata, ka jijak jiôh nibak gata. 20 Aneuëk-aneuëk nyang lahé di nanggroe aséng teuma jipeugah ubak gata, 'Nanggroe nyoe lumpah that sampiek nibak ulôn, neubri kheueh teumpat mangat jeuet lôn tinggai disinoe.' 21 Dan gata teuma tapeugah lam até, 'Soe kheueh nyang peulahé aneuëk-aneuëk nyan keu ulôn? Bukon kheueh ulôn ka gadôh aneuëk-aneuëk lôn, dan hana hase le jipeulahé aneuëk? Ulôn ka jiböih dan ka jikireueh dan laju jitinggai sidroe kong. Jadi rot pane aneuëk-aneuëk nyan, dan soe nyang peurayeuk awaknyan?' " 22 TUHAN Nyang Mahamanyang geupeugah ubak umat Gobnyan, "Ulôn kubri tanda keu bansa-bansa dan awaknyan jipulang aneuëk-aneuëk gata; aneuëk-aneuëk gata nyang agam jitingkue, dan aneuëk-aneuëk gata nyang inong jigulam ateueh bahô. 23 Raja-raja jeuet lagée bapak nibak gata, dan ratu-ratu sibagoe ma. Awaknyan jisujut jihoreumat gata dan jipeumiyueb droe dikeue gata. Dan gata tateupeue bahwa Ulôn nyoe na kheueh TUHAN; ureuëng nyang meuharab ubak Ulôn hana Lôn peukeucewa." 24 Gata tatanyong, "Peu kheueh mungken jarahan jireupah bak jaroe pahlawan, atawa tawanan jireupah lam reugam ureuëng keujam?" 25 TUHAN geujaweueb, "Nyan kheueh nyang teuma teujadi. Tawanan bubena pahlawan jireupah lom. Jarahan ureuëng keujam teureupah lom. Sabab Ulôn keudroe nyang lawan musoh gata; Ulôn kupeuseulamat aneuëk-aneuëk gata. 26 Ulôn kupeujeuet musoh gata mabök darah, sampoe awaknyan jimupoh sabe keudroe-droe. Dan banmandum umat manusia jiteupeue, bahwa Ulôn, TUHAN, Peuseulamat gata; Nyang Mahateuga, Po teu Allah Nabi Yakub, nyang teuboh gata."

Nabi Yesaya 50

1 TUHAN meufeureuman ubak bani Israel, "He umat Ulôn, gata pike ulôn ku use gata lagée sidroe ureuëng lako jiuse peurumoh jih? Meunyoe meunan, dipat surat taleuek jih? Gata pike Ulôn nyoe kupeubloe gata, lagée sidroe ayah jipeubloe aneuëk jih ubak ureuëng nyang tunggée utang? Kon! Gata jiteun dan jitiek, sabab desya dan buet nyang jeuhet gata keudroe! 2 Pakon nibak umat Lôn hana meusidroe pih nyang na jijaweueb, watée Ulôn teuka Lôn jakhôi awaknyan? Peu kheueh awaknyan seungab mantong sabab jisangka Ulôn hana hase Lôn peulheueh dan Lôn peuseulamat awaknyan? Nyang sikeubit jih, ateueh peurintah Lôn laôt nyan hase tho kreng, krueng-krueng Ulôn peujeuet keupadang pasi, dan bubena uengkot habéh maté dan mubée banga. 3 Langét Lôn peujeuet itam seupôt ngon glab, teuma Ulôn tôb lagée ija kabông." 4 TUHAN Nyang Mahamanyang geupeurunoe ulôn peugah haba, mangat tutoe ulôn jeuet teupeukhong ureuëng nyang laéueh. Tieb-tieb beungoh Gobnyan geupeubeudôh hasrat ulôn mangat lôn deungoe ajaran Gobnyan keu ulôn. 5 TUHAN geubri keu ulôn peungeurtian; ulôn hana beurontak atawa meupaleng nibak Gobnyan. 6 Ulôn jok rueng lôn keu ureuëng nyang seunuét ulôn; dan mieng ulôn keu ureuëng nyang bot janggot lôn. Ulôn hana lôn peupaleng muka watée ulôn jihina dan jiludah teuma. 7 Sabab TUHAN Po teu Allah geutulông ulôn, sabab nyan ulôn hana geubri malée. Ulôn peukhong até lôn mangat tabah; ulôn teupeue ulôn hana geupeumalée. 8 Sabab Po teu Allah rab, Gobnyan nyang peugah bahwa ulôn hana meusalah. Soe nyang keuneuk meubantah deungon lôn? Jak geutanyoe ta teubiet meusajan-sajan. Soe nyang keuneuk lawan ulôn? Yue kheueh ureuëng nyan jipeurab ubak ulôn. 9 Keubit, TUHAN Nyang Mahamanyang geubila lôn, soe ureuëng nyang jijeuet peugah ulôn nyoe meusalah? Banmandum nyang tudoh ulôn nyan teuma leunyab lagée ija brok nyang jipajoh lé keuraleub. 10 He gata nyang horeumat TUHAN, dan nyang deungoe tutoe haba hamba Gobnyan, rot ueh nyang gata jak mungken seupôt, dan hana cahya nyang jipeutrang keu gata; teuma peucaya kheueh ubak TUHAN; meusadeue kheueh ubak Allah gata. 11 He gata nyang keuneuk peuceulaka ureuëng laén, gata teuma geupeuceulaka lé reuncana gata keudroe. TUHAN kheueh nyang peubuet nyan sampoe teujadi, gata geuseksa nyang paleng hebat.

Nabi Yesaya 51

1 TUHAN meufeureuman, "Deungoe kheueh Ulôn, hei gata nyang keuneuk teupeuseulamat dan gata jak ubak Ulôn jak lakée tulông. Ingat kheueh gunong batée bak teumpat gata teupeuet, dan bak ruhuéng batée di teumpat gata teukueh. 2 Ingat kheueh ubak indatu gata Nabi Ibrahim dan Sara nyang peulahé gata; watée Ulôn hôi Nabi Ibrahim, jihnyan hana meu-aneuëk; laju Lôn bri beureukat dan Lôn keuturonan nyang le ubak jihnyan. 3 Hei Yerusalem, Ulôn teuma kujôk hiburan keu gata, dan mandum nyang tinggai nibak rungka-rungka gata. Padang-padang gata nyang tho kreng Lôn peujeuet keu lampôh bungöng, saban lagée Eden keubon Ulôn nyang subo. Bak teumpat nyan ureuëng meusurak meuhubo ngon meusukaria dan meunyanyoe syuko ngon su nyang meutaga. 4 Simak kheueh su Ulôn nyoe hei bansa Ulôn, deungoe kheueh tutoe haba Lôn hei umat Lôn. Ulôn jok peungajaran Lôn keu bansa-bansa, huköm-huköm Lôn jeuet keutrang lam udeb awaknyan. 5 Seulamat nyang Ulôn bri ka rab that-that; watée meunang Ulôn karab teuka. Ulôn keudroe Lôn peurintah bansa-bansa. Nanggroe-nanggroe nyang jiôh teuma jipreh-preh Ulôn sira jiharab buet Ulôn nyang luwabiasa. 6 Tangah kheueh u langét dan ngieng kheueh u bumoe; langét teuma gadôh lagée asab dan bumoe teuma useueng lagée bajée tuha, mandum peunduduek jih maté lagée jamôk nyang hán meuguna. Teuma seulamat nyang Ulôn bri teutab siumu masa, dan keuhai meunang Ulôn hana keuneulheuh. 7 Deungoe kheueh Ulôn, hei bansa Lôn, gata tateupeue peue nyang beuna; ajaran Lôn teukeubah lam até gata. Bék teumakot meunyoe gata jihina lé manusia, bék yo meunyoe gata jiseurapa lé awaknyan. 8 Awaknyan teuma binasa dan habéh, lagée peukayan jipajoh lé keuraleub dan ija bulée bubiri meunan cit keuraleub seuba. Teuma keuseulamatan nyang Ulôn bri teutab na siumu masa, keuhai Ulôn meunang teutab na tron meutron sipanyang masa." 9 Neujak kheueh keunoe ya TUHAN, neutulông kamoe, peuseulamat kheueh kamoe ngon kuasa Droeneueh. Beudôh kheueh lagée yoh masa ilée watée Droeneueh neupeuhanco Rahab dan neutôb naga laôt sampoe maté. 10 Droeneueh kheueh nyang peutho laôt, ié laôt barollah nyang lhok lumpah na. Droeneueh nyang peugét rot lam ié laôt nyan, mangat ureuëng-ureuëng Droeneueh peuseulamat jeuet jijeumeurang. 11 Teuma, ureuëng-ureuëng nyang geupeubeubaih lé TUHAN jiwoe awaknyan jitamong u Yerusalem deungon surak meubura ruman awaknyan meucahya sabab galak ngon geumbira. Awaknyan jiseumurak galak meuhubo, seudeh ngon apoh apah habéh teusampôh. 12 TUHAN meufeureuman, "Ulôn kheueh nyang bri hiburan ubak gata. Pakon gata takot keu manusia nyang fana, ubak manusia nyang jitiek lagée naleueng? 13 Ék kheueh tuwoe gata keu TUHAN nyang cebta gata nyang leueng langét dan nyang peuduek keunaleueng bumoe? Pakon siuroe seupôt gata yo keu ureuëng beungéh tukang teumeugom nyang ka siab-siab jipeuhabéh gata? Nyang sikeubit jih meungamok awaknyan hana lut ateueh gata 14 Bubena ureuëng nyang teuteun reujang teupeu lheueh; awaknyan hana kureueng peunajoh, dan hana teuma maté jipeutamong lam jrat. 15 Sabab Ulôn kheueh TUHAN Po teu Allah gata, nyang peuteuka geulumbang raya lam laôt sampoe umbak jih meutaga-taga. Nyang Mahakuasa na kheueh nan Ulôn. 16 Ulôn kheueh nyang leueng langét dan nyang peuduek keunaleueng bumoe. Ulôn peugah ubak Sion: Gata kheueh umat Ulôn; Ulôn nyang bri peungajaran Lôn ubak gata dan Lôn lindong gata ngon kuasa Lôn." 17 Beudôh kheueh hei Yerusalem, beudôh kheueh! Huköman nyang geupeu rhot lé TUHAN ateueh gata sabab beungéh Gobnyan keu gata, teuma nyan ka gata peujak sampoe seuleusoe. 18 Nibak peunduduek gata hana nyang bimbeng gata, nibak nyang tinggai gata hana nyang tunton gata. 19 Ateueh gata rhot dua boh beuncana; akibat prang nanggroe gata hanco binasa dan rakyat gata maté sabab lé deuk. Hana nyang gaséh atawa nyang bri hiburan. 20 Bak tieb-tieb ujong rot ureuëng-ureuëng gata reubah ka habéh teunaga lagée rusa nyang keunong taron. Ateueh awaknyan rhot beungéh TUHAN, dan keunong dhot bak Allah gata. 21 Deungoe kheueh hei ureuëng-ureuëng nyang teuteugon, nyang meuputa-puta lagée ureuëng mabök! 22 Meunoe kheueh feureuman TUHAN, TUHAN Allah gata nyang bila gata, "Ázeb seungsara Ulôn bri teungoh teuka beungéh Lôn, teuma Lôn cok lom nibak gata. Beungéh Ulôn teuma seungab, dan gata hana peureulée gata tanggong seungsara. 23 Ázeb seungsara nyan Ulôn bri keu ureuëng nyang iénanya gata, nyang ka lheueh jiyue éh gata ateueh tanoh, dan jigilo-gilo gata, siulah-ulah gata rot raya gobnyan jak."

Nabi Yesaya 52

1 Beudôh kheueh, he Yerusalem, Beudôh kheueh! Peukhong kheueh até gata! Dan tasök kheueh laju peukayan keubeusaran gata! He Yerusalem, banda nyang suci, ureuëng kuto hana jitamong le rot babah pintoe geureubang gata. 2 Beudôh kheueh nibak lam abée, he Yerusalem, geureutok kheueh abée nyang na meuleukek nibak gata. Peulheueh kheueh ranté nyang na teuikat bak takue gata, hé peunduduek Sion nyang keunong teun! 3 TUHAN meufeureuman ubak umat Gobnyan, "Gata jipeubloe deungon cuma-cuma, trok bak saát gatapi geupeuleueh deungon cuma-cuma. 4 Yoh masa ilée gata tajak u nanggroe Meusé dan tinggai disinan sibagoe ureuëng aséng. Óh lheuehnyan Asyur laju ji prah gata hana alasan. 5 Jinoenyoe peue urosan Ulôn disinoe? Ureuëng Babel jiteun gata meunan mantong. Awaknyan nyang tindéeh gata deungon sombong dan hana putôh-putôh jihina Ulôn. 6 Sabab nyan gata teuma ta aku keudroe bahwa Ulôn nyoe na kheueh Po teu Allah, dan bak watée nyan gata tateupeue bahwa Ulôn kheueh nyang peugah haba ubak gata." 7 Keubit galak that óh lôn ngieng ka teuka utosan; awaknyan jijak jilintaih gunong-gunong sira jiba haba gét, haba seujahteura, bri tée keuseulamatan keu Sion; kheun gobnyan, "Allah gata na kheueh Raja!" 8 Deungoe dumpék geumbira peungawai banda, awaknyan seumurak meuhubo meusabe rata! Sabab deungon mata ulée keudroe awaknyan geukalon TUHAN geuriwang u Sion. 9 Meusurak meuhubô kheueh, he rungka-rungka Yerusalem, sabab TUHAN geuhibur umat Gobnyan dan geupeubeubaih Yerusalem. 10 TUHAN geupeuleumah keukuasaan Gobnyan dikeue meubagoe bansa. Dan bansaboh bumoe teuma jikalon keudroe keuseulamatan nibak Po teu Allah geutanyoe. 11 Jak wéeh laju keudeh! Tinggai kheueh disinan banda Babel, he gata nyang taba peukakaih Baét Allah! Bék kheueh tacukéh barang nyang kuto; tapeugleh kheueh droe gata sigohlom tajak. 12 Gata hana teugisa-gisa watée tabôt langkah, dan hana lagée ureuëng nyang jipeuplueng droe. Sabab TUHAN teuma geubimbéng gata; Po teu Allah Israel geubimbéng gata nibak sigala peunjuru. 13 TUHAN meufeureuman, "Sikeubit jih, hamba Ulôn teuma meuhase; jihnyan jisanjong dan teupeumanyang. 14 Yoh watée ilée jai that ureuëng teukeujot óh watée jingieng jihnyan, ruman jihnyan jipeurusak sampoe hana deuh le lagée hi manusia. 15 Teuma bak watéenyoe le that bansa nyang teuhireuen-hireuen, dan bubena raja-raja nanggroe ka kalu lidah sabab ka tahe. Awaknyan jikalon dan jimuphom, nyang sigohlom nyan hana awaknyan teupeue."

Nabi Yesaya 53

1 Bansa nyan jijaweueb, "Soe patéh ubak peue nyang ka kamoe deungoe? Ubak soe nyang ka geupeugah kuasa TUHAN? 2 TUHAN meuharab hamba Gobnyan nyan lagée tarôk kayée nyang timoh bak tanoh nyang tho kreng. Hana nyang lagak nibak jih nyan óh ta eu rupa; dan hana nyang teutarek até keutameuheuet atranyan. 3 Tanyoe tahina dan tapeujiôh gobnyan, ureuëng nyang kaseb seungsara dan kajra jitanggong deurita nyang phet. Hana meusidroe pih nyang jitem kalon gobnyan, dan geutanyoe keudroe pih hana tatem pakoe ubak gobnyan. 4 Nyang sibeuna jih peunyakét geutanyoe kheueh nyang geutanggong lé gobnyan, seungsara geutanyoe kheueh nyang geudeurita, padahai geutanyoe ta sangka peundeuritaan gobnyan kheueh huköman Po teu Allah keu geuhnyan. 5 Teuma geuhnyan geupeuluka sabab desya-desya geutanyoe, geupeujra sabab buet jeuhet geutanyoe, Gobnyan teuhuköm mangat geutanyoe teupeuseulamat sabab lé darah Gobnyan geutanyoe geupeupuléh. 6 Geutanyoe banmandum ka sisat lagée bubiri nyang sisat, maséng-maséng teumita rot geuh keudroe. TUHAN ka geupeurhot ateueh jihnyan buet jeuhet geutanyoe banmandum. 7 Gobnyan teuseksa deungon keujam, teuma geutanggong nyan deungon saba. Babah Gobnyan hana geupeugah sapeue lagée aneuëk bubiri nyang teuba ubak teumpat si atawa lagée nang bubiri nyang teungoh teucuko bulée. 8 Gobnyan jiteun dan jiba u kantô peungadelan, laju ji iréng dan jihuköm maté. Hana ureuëng nyang tem pako keu naseb geuhnyan; gobnyan maté sabab desya bansa geutanyoe. 9 Gobnyan jikubu meusajan deungon ureuëng jeuhet; jrat gobnyan di teungoh-teungoh ureuëng kaya, bahpi gobnyan hántom na geupeubuet buet nyang jeuhet, dan hántom na geuteumipée." 10 TUHAN meuhéut bahwa gobnyan harôh meudeurita, dan geupeujok droe sibagoe keureubeuen peuamphon desya. Lé sababnyan gobnyan panyang umu dan geuteumé ngieng keuturonan geuh meulalu gobnyan keuheundak TUHAN teulaksana. 11 Lé sababnyan TUHAN meufeureuman, "Óh ka seuleusoe meudeurita seungsara, jihnyan teuma mubahgia dan pueh. Hamba Ulôn nyan, nyang jipeumangat that até Ulôn, ka jitanggong huköman nyang lumpah that le; deumi jihnyan Ulôn kupeuamphon awaknyan. 12 Deungon rila jihnyan jiseurah udeb jih dan jitamong bak itongan ureuëng jeuhet. Jihnyan jiseuôn desya ureuëng ramé dan jimeudoá mangat awaknyan teupeuamphon. Dan Ulôn bri keujihnyan ureuëng ramé sibagoe hadiah, dan jihnyan meuteumé jeumba meusajan deungon ureuëng-ureuëng nyang beuna."

Nabi Yesaya 54

1 Yerusalem, yoh watée ilée gata lagée inong malée, nyang hana hase teupeulahé aneuëk. Teuma bak saát nyoe meusurak kheueh, dan meuca-e kheueh deungon geumbira! Sabab aneuëk-aneuëk gata jai lumpah na, leubeh le nibak aneuëk ureuëng inong nyang hántom jitinggai lé lakoe. 2 Peuluwah kheueh laju khimah-khimah teumpat tinggai gata; tasambat kheueh laju bubena talo teumalo dan peukong kheueh laju bubena bajo! 3 Gata teuma meutamah luwah wie ngon uneuen, peunduduek gata teuma jitinggai nibak tanoh bansa-bansa dan jiduek laju bak banda-banda nyang bak watéenyoe ka tinggai seungue. 4 Bék teumakot, gata hana teupeu malée; hana teuma teuhina dan teuseungéh-seungéh. Gata teuma tatuwoe ubak hana seutia gata yoh watée muda; hana teuingat le ubak keuseupian gata sibagoe ureuëng balée. 5 Nyang cebta gata lagée teungku lakoe nibak gata, Po teu Allah kudus Israel na kheueh nyang bri seulamat keu gata. TUHAN Nyang Mahakuasa, nyan kheueh nan Gobnyan, Gobnyan Po teu Allah nyang mat kuasa bansaboh donya. 6 Israel, gata lagée sidroe peurumoh muda nyang seudeh sabab jitinggai lé teungku lakoe. teuma Po teu Allah keutawök gata lom dan geupeugah, 7 "Teuma sikeujab mantong Ulôn tinggai gata; deungon peunoh gaséh sayang gata Ulôn cok lom teuma. 8 Sikeujab sagai Ulôn meupaleng nibak gata sabab beungéh Ulôn nyan hana ngon peusa. teuma deungon geunaséh nyang abadi Ulôn gaséh keu gata." Meunan kheueh geupeugah lé Po teu Allah Peuseulamat gata. 9 "Lagée masa Nabi Nuh Ulôn meujanji bahwa ié raya hana le meuganong di ateueh bumoe, meunan cit bak saát nyoe Ulôn meujanji bahwa Ulôn hana beungéh atawa Lôn ancam gata lom. 10 Bahpi gunong-gunong dan bubena bukét meuguncang, Ulôn hana Lôn piôh Lôn gaséh gata. Peujanjian damé Lôn teutab Ulôn mat sabe." kheun TUHAN nyang geugaséh gata. 11 TUHAN meufeureuman, "He Yerusalem banda nyang malang, gata hana meudaya dan hana nyang hibur. Dasai-dasai gata teumalon keubah lom, deungon batée-batée nyang meuhareuga. 12 Kuta-kuta Lôn peudong deungon bintéh deulima, babah-babah pintoe geureubang deungon batée peumata, beuton-beuton gata nibak ratna mutu manikam. 13 Bandum peunduduek gata jeuet keu murit Lôn, dan awaknyan teuma makmu seujahteura. 14 Gata teupeudong ateueh dasai keuadelan, teupeujiôh nibak meubagoe nyang teumakot dan peunindasan. 15 Meunyoe gata jiseureubu, kon kheueh Ulôn nyang yue, dan soe mantong nyang seurang gata jihnyan rhot. 16 Ulôn kheueh nyang cebta utôh beuso nyang kipah apui teumpeuen seunjata. Ulôn kheueh nyang peujeuet tantra nyang ngui sinjata nyan keu teupeumaté gob. 17 Teuma tieb-tieb seunjata nyang teu teumpeuen keujilawan gata, atranyan hana meuhase. Dan tieb-tieb tudohan nibak kantô peungadelan teuma gata bukeuti bahwa nyan na kheueh salah. Ulôn jok hadiah nyan kheueh meunang keu hamba-hamba Lôn," meunan kheueh feureuman TUHAN.

Nabi Yesaya 55

1 TUHAN meufeureuman, "Jak kheueh keunoe gata bandum nyang glaih ngon tho rukueng, tajieb kheueh, ié ka teukeubah. Teuka kheueh gata nyang hana meupéng, teurimong kheueh gandom nyang hana peubayeue, dan pajoh kheueh! Meunan cit ngon ié anggô dan ié susu ka teukeubah, teurimong kheueh deungon cuma-cuma. 2 Keupeue tabloe peue-peue mantong nyang hana puih, dan tajak buet keu peue nyang hana hase jipeutroe? Seutôt kheueh peurintah Ulôn, teuma gata tamakheun nyang jroh, dan tarasa kheueh hidangan nyang lazat. 3 Deungoe kheueh, he bansa Lôn, tajak kheueh ubak Ulôn, gata teuma Lôn bri udeb seujati. Deumi geunaséh dan seutia nyang Ulôn jok keu Nabi Daud, Ulôn kuikat janji nyang keukai deungon gata. 4 Sikeubit jih, jihnyan Ulôn peujeuet keu peumimpén dan panglima, saksi nibak kuasa Lôn keu bansa-bansa. 5 Gata teuma ta tawök bansa-bansa aséng, dan awaknyan jijak laju ubak gata, deumi Ulôn, TUHAN Po teu Allah gata, Allah kudus Israel, sabab Ulôn ka Lôn peu agong gata." 6 Tawoe kheueh ubak TUHAN simantong na meuteumé; tahôi kheueh Gobnyan simantong Gobnyan rab. 7 Bah kheueh ureuëng jeuhet jipeujroh nibak udeb jih, dan jiubah jalan pikeran nyang na, bah kheueh jihwoe ubak TUHAN, mangat meuteumé gaséh sayang Gobnyan. Bah kheueh jihnyan jipaleng ubak geutanyoe, sabab TUHAN geupeuamphon deungon sigala murah até. 8 TUHAN meufeureuman, "Pikeran Lôn kon pikeran gata, dan rot Ulôn kon rot gata. 9 Sidubna manyang langét di ateueh bumoe, éuet nyan kheueh manyang jih pikeran Ulôn ateueh pikeran gata, dan rot ulôn di ateueh rot gata. 10 Lagée ujeuen jitron di langét, dan hana jigisa, teuma habéh basah bumoe, tanoh gumbô dan seunaman pih timoh, jibri hase keu teutabu dan teupajoh, 11 meunan cit deungon tutoe haba nyang Ulôn peugah hana jiriwang ubak Ulôn deungon sia-sia, teuma meuhase teupeubuet peue nyang Ulôn lakée, dan meuteumé peue mantong nyang Ulôn lakée. 12 Gata tatinggai Babel deungon sukacita, dan ji intat uluwa deungon seulamat. Gunong dan bukét meugeumbira dan meusurak ria, bak-bak kayée nyang na di blang jipok-pok jaroe. 13 Bak kayée ceumara jeuet keugantoe tamah meuduro, dan seunaman bungöng jeuet geunantoe tamah meupaya. Banmandum nyan na mangat Ulôn jipeumeusyeuhu; sibagoe tanda abadi nyang hana gadôh."

Nabi Yesaya 56

1 TUHAN meufeureuman ubak umat Gobnyan, "Peubuet kheueh peue nyang ade dan nyang paih deungon huköm Lôn. Sabab hana treb le Ulôn teuka Lôn jak peuseulamat gata dan keuadelan Lôn kupeudeh teuma. 2 Ulôn jok beureukat keu ureuëng nyang peupeunoh keu uroe Sabat dan hana jipeukutoe uroe Sabat nyan. Ureuëng nyang hana peubuet buet nyang jeuhet ureuëng nyan Ulôn peusaneut deungon jroh that." 3 Ureuëng aséng nyang meusapat deungon umat TUHAN hana jeuet jipeugah, "TUHAN hana geu idhin ulôn kuseumah Gobnyan meusajan deungon umat Geuh." Ureuëng nyang teugasi hana jeuet jiseumike "Ulôn hana hase jeuet keu wareuga umat TUHAN, sabab ulôn hana hase lôn peutron keuturonan." 4 TUHAN meufeureuman ubak awaknyan, "Meunyoe gata tapatéh keu uroe Sabat, dan meunyoe gata seutia ubak peujanjian Lôn dan tapeubuet peue nyang galak até Ulôn, 5 teuma nan gata teuingat lam Baét Lôn dan lamkawan bansa Ulôn. Nyang lagée nyan leubeh gét nibak na aneuëk-aneuëk miet inong dan agam. Keu gata Ulôn bri nan nyang abadi nyang hana jituwoe lé gob." 6 TUHAN meufeureuman ubak ureuëng-ureuëng aséng nyang ka jitamong lam itongan umat TUHAN, nyang jicinta TUHAN dan meubakti ubak Gobnyan, nyang jihoreumat keu uroe Sabat dan seutia ubak peujanjian Gobnyan, 7 "Gata Lôn ba u Sion, nibak bukét Lôn nyang suci, dan Ulôn bri keugeumbiraan di rumoh iébadat Lôn. Keureubeuen-keureubeuen nyang gata peuseumah di miseubah Lôn teuma Lôn teurimong. Baét Lôn teuma jipeugah rumoh doá keumeubagoe bansa." 8 Meunoe kheueh feureuman TUHAN Nyang Mahamanyang nyang intat Israel jiwoe nibak teumpat nyang teuböih, "Ulôn kuba ureuëng-ureuëng nyang laén keujimeusapat deungon awaknyan nyang ka meusaho." 9 TUHAN geuyue ubak bansa-bansa jiteuka lagée beulatang buah keujijak teugöm umat Gobnyan. 10 Feureuman TUHAN, "Peumimpén-peumimpén bansa Lôn na kheueh ureuëng-ureuëng buta! Awaknyan hana jiteupeue sapeue. Awaknyan lagée asée kalu nyang hana jeuet jimeudroh, teuma jiéh mantong dan meulumpo. Mangat that-that awaknyan jiéh! 11 Awaknyan lagée asée leuha nyang hana troe-troe. Peumimpén-peumimpén nyan hántom na muphom. Maséng-maséng jipeubuet ban galak droe dan jimita laba jih keudroe. 12 Ureuëng-ureuëng mabök nyan jipeugah, 'Jak geutanyoe ta jieb anggô dan tajieb sipuih-puih até! Singoh leubeh gét nibak uroe nyoe!' "

Nabi Yesaya 57

1 Ureuëng nyang gét dan nyang saleh meuninggai donya, hana nyang muphom atawa jitem kalon jih nyan. Óh ka maté, ureuëng nyan geupeujiôh nibak bala dan jimeureuhat deungon damé. 3 Teuma gata, he kawöm nyang meudesya, teuka kheueh mangat teuadili! Gata hana leubeh get nibak tukang sihe, ureuëng nyang galak nibak buet mukah dan lunte! 4 Soe kheueh nyang gata peukém? Soe kheueh teuma nyang gata hina? Kon kheueh gatanyan keuturonan ureuëng sulet dan peumbeurontak? 5 Gata taseumah dewa-dewa keusubôran deungon tapeubiyeu droe keudroe gata anyöt lam nafeusu di miyueb bak-bak kayée keuramat gata. Gata takubu aneuëk-aneuëk gata nibak pantôn krueng, lam luengkiek-luengkiek batée. 6 Lé sababnyan ka pantaih gata peusapat batée-batée nyang licen nibak teumpat nyan. Nyan kheueh jeumba gata! Ubak batée-batée nyan teuma gata leng ié anggô dan tapeuseumah gandom. Gata pike Ulôn nyoe galak keubanmandum nyan? 7 Gata tajak u pucak-pucak gunong keutajak peuseumah keureubeuen dan tapeupuih nafeusu beureuhi gata. 8 Gata keubah patong-patong gata nyang dajeue bak babah-babah pintoe rumoh gata. Gata ka tatinggai Ulôn. Gata ka tasuet peukayan gata dan laju ta-ék ubak teumpat éh nyang luwah deungon geunaséh gata nyang gata jok upah mangat jitem éh deungon gata, laju gata peupuih nafeusu gata. 9 Gata tabôh minyéuk dan bée-bée haröm nyang meuhalak, laju tajak seumah dewa Molokh. Gata kirém utosan u nanggroe-nanggroe nyang paleng jiôh, trok ubak donya ureuëng maté. 10 Hana tapike keu hék dan putôh asa gata hana tapiôh tajak mita dewa-dewa. Gata pike awaknyan hase jijok seumangat barô, sampoe gata hántom leumoh. 11 TUHAN meufeureuman, "Soe kheueh dewa-dewa nyan nyang jipeujeuet gata teumakot, sampoe gata meusulet dan hana taingat keu Ulôn? Peu kheueh gata hana taseumah le Ulôn kareuna Ulôn ka treb that Lôn iem droe? 12 Teuma Ulôn bri tée ubak gata; keusalehan gata nyan na kheueh peuleusu, dan banmandum buet gatanyan hana meuguna keu droe gata. 13 Meunyoe gata takliek ngon teumawök, bah kheueh patong-patong nyan nyang peuseulamat gata! Awaknyan teuma gadôh jipupo lé angén dan leunyab deungon saboh nafáh nyang teuprôh! Teuma ureuëng nyang meulindong nibak Ulôn teuma jeuet keuwaréh nanggroe nyan dan jiseumah Ulôn di Baét Lôn." 14 Po teu Allah meufeureuman, "Peugét kheueh dan peusiab kheueh rot keu umat Lôn, kireueh kheueh keudeh peue-peue nyang na rintangan." 15 Sabab meunoe kheueh feureuman Allah Nyang Mahamanyang dan kudus, nyang meukuasa keusiumu masa, "Ulôn tinggai di teumpat nyang manyang dan suci, teuma meunan cit lamkawan ureuëng-ureuëng nyang miyueb até dan nyang meunyeusai ubak desya-desya jihnyan, keu teupeupuléh seumangat dan harapan awaknyan. 16 Kon keusiumu masa Lôn peusalah umat Ulôn; dan hana sabe-sabe Ulôn beungéh, mangat awaknyan bék patah seumangat, padahai Ulôn kheueh nyang peu udeb awaknyan. 17 Desya serakah awaknyan nyang peujeuet Ulôn nyoe beungéh, sababnyan awaknyan Lôn huköm dan ulôn tinggai. Teuma awaknyan kreueh that ulée dan teutab jipiléh rot jih keudroe. 18 Ulôn ka lheueh Lôn ngieng pi-e awaknyan, teuma awaknyan teutab Lôn peupuléh cit teuma. Ulôn Lôn bimbeng dan Lôn tulông awaknyan dan peumangat até ureuëng nyang meuduka. 19 Ulôn Lôn bri keuteuntraman keu banmandum ureuëng, bah kheueh nyang tho meunan cit nyang jiôh-jiôh. Ulôn kupeupuléh umat Lôn. 20 Teuma ureuëng jeuhet na kheueh lagée laôt nyang meugeulumbang hántom na reuda. Ié laôt nyang ile nyan laju jipeuron brôh dan leuhôb. 21 Hántom na teuntram nibak ureuëng meudesya."

Nabi Yesaya 58

1 TUHAN meufeureuman, "Neudumpék kheueh seuhabéh teunaga! Jakbri tée kheueh ubak umat Lôn desya-desya awaknyan. 2 Awaknyan jiseumah Ulôn tieb-tieb uroe, dan meuhéut jikeuneuk teupeue keuheundak Ulôn, siulah-ulah awaknyan ka jipeubuet buet nyang gét, dan seutia ubak huköm Lôn. Awaknyan jipeugah bahwa awaknyan galak jiseumah Ulôn dan jimeuharab ubak huköm Lôn nyang ade." 3 Bansa nyan jitanyong, "Keupeue guna jipuasa meunyoe TUHAN hana geukalon? Keupeue guna geutanyoe ta peumiyueb droe meunyoe Gobnyan hana geungieng keu geutanyoe?" TUHAN meufeureuman, "Sikeubit jih, teungoh gata tapuasa, gata tamita laba keudroe dan tapeuras ureuëng-ureuëng nyang gata upah. 4 Teungoh puasa, gata meupake dan tameulo dan meutindak deungon keukeurasan. Tapike deungon cara lagée gata puasanyan sampoe teugrak até Lôn mangat Lôn deungoe doá-doá gata? 5 Meunyoe gata puasa, gata seksa droe gata keudroe; gata peutukui ulée gata lagée ôn naleueng. Gata lheueng ija krong dan tasipreuk abée, dan ta-éh di ateueh nyan. Peu kheueh nyan nyang gata peugah puasa? Tapike Ulôn galak deungon buet gata nyang lagée nyan? 6 Nyoe kheueh puasa nyang Ulôn lakée: Gata peulheueh kheueh laju beuleunggu peunindasan dan beuban keuadelan, dan tapeubeubaih kheueh ureuëng-ureuëng nyang teutindéeh. 7 Gata weuek kheueh meunajoh gata deungon ureuëng-ureuëng nyang teungoh deuk, teurimong kheueh ureuëng-ureuëng geulandangan di rumoh gata. Tajok kheueh peukayan ubak ureuëng teulon, dan bék tatulak syedara gata nyang peureulée teutulông. 8 Dan trang meucahya keugata lagée mata uroe beungoh, dan luka-luka gata teuma bagaih puléh. Ulôn na meusajan gata keu Lôn peuseulamat gata. Deungon na Ulôn teuka gata teulindong nibak rot toh mantong teuka bahya. 9 Watée tameudoá, Ulôn teuma Lôn kabui doá nyang gata lakée nyan. Meunyoe gata tameuhôi Ulôn, Ulôn teuma Lôn jaweueb. Békle tatindéeh sabe keudroe-droe gata, piôh kheueh buet meumusoh dan meufeuteunah. 10 Tajok kheueh makheun keu ureuëng-ureuëng nyang deuk dan tatulông kheueh ureuëng-ureuëng nyang teutindéeh. Meunyoe gata tapeubuet nyang lagée nyan, dan seupôt glab nyang na ban sikeulileng gata jeuet keu peungéuh lagée uroe. 11 Ulôn sabe Lôn bimbeng gata dan Lôn peutroe gata bak tanoh nyang tho kreng; Ulôn teutab Lôn peulara gata mangat teutab seuhat dan teuga. Gata teuma jeuet lagée seunaman nyang seb ié jih, lagée mata ié nyang hántom na tho-tho. 12 Banda nyang ka treb that reuloh nyang ka tinggai ruengka-ruengka teuma gata peudong lom di ateueh tapak nyang awai, gata teubôh nan 'Bansa nyang peudong lom bintéh-bintéh meubeuton dan tapeusaneut rumoh-rumoh nyang ka hanco.' " 13 TUHAN meufeureuman, "Horeumat kheueh keu uroe Sabat sibagoe ureuëng TUHAN. Bék tapakoe ubak keupeuntengan droe gata keudroe watée uroenyan. Peuraya kheueh uroe nyan sibagoe uroe nyang bahgia; horeumat kheueh uroe TUHAN deungon cara hana tajak keudeh keunoe; dan meunan cit bék sagai tajak buet atawa meututoe haba nyang hana meuguna. 14 Dan gata geumbira sabab meungabdi ubak Ulôn. Ulôn teuma Lôn peujeuet gata teuhoreumat bansaboh donya. Gata teuma udeb seunang deungon tanoh pusaka nibak Nabi Yakub, indatu gata. Ulôn, TUHAN ka Lôn peugah haba."

Nabi Yesaya 59

1 Bék tapike TUHAN leumoh that keu geupeuseulamat gata, atawa kroe that hana geudeungoe meulakée gata. 2 Sabab buet gata nyang jeuhet nyan kheueh lé Gobnyan hana geudeungoe watée gata meudoá ubak Gobnyan. Desya-desya gata kheueh nyang peujiôh gata nibak Po teu Allah. 3 Gata salah sabab meusulet dan tapeubuet jeuhet, dan tapeubuet keukeurasan dan tapoh ureuëng sampoe maté. 4 Gata tagadu peukara hana alasan dan tameuhakém deungon hana ade. Gata meusulet dan tapeuandal nyang sia-sia; gata tapeugét reuncana keu tapeuceulaka ureuëng laén dan tapeubuet buet nyang jeuhet. 5 Reuncana-reuncana gata nyang jeuhet teuba mawöt lagée boh uleue meubisa. Meunyoe boh uleue nyan teupeubeukah, jiteubiet kheueh uleue lam boh nyan. Reuncana nyan meubacut pih hana meuguna nibak gata, lagée peukayan nyang teuteunun lam uempueng laba-laba! 7 Gata hana piôh-piôh tareuncana nyang jeuhet, dan meuhéut deungon bagaih teulaksana. Hana ragu-ragu laju gata poh maté ureuëng-ureuëng nyang hana meusalah. Ho mantong nyang gata jak, gata ka tatinggai nyang reuloh-reuloh dan keubinasaan. 8 Gata hana tauseuha udeb nyang rukon, dan bandum buet gata hana nyang ade. Rot gata meupalet-palet, dan ureuëng nyang seutôt rot gata nyan hana mubahgia. 9 Bansa nyan jipeugah ubak Po teu Allah, "Jinoenyoe ka kamoe teupeue pakon Droeneueh hana neupeuseulamat kamoe nibak ureuëng-ureuëng nyang tindéeh kamoe. Kamoe mupreh-preh peungéuh, teuma nyang na seupôt tulo. 10 Kamoe meuraba-raba lagée ureuëng buta; cot uroe timang kamoe meugantoh lagée teungoh malam; lamkawan ureuëng udeb kamoe lagée ureuëng maté. 11 Kamoe teumakot that dan seudeh hana teukira; kamoe jak mita keuadelan; teuma teutab hana; kamoe meuharabkan keuseulamatan, teuma teutab sia-sia. 12 Lumpah that le keujeuhetan kamoe ubak Droeneueh; desya-desya kamoe teupeusalah kamoe. Kamoe bit-bit that kamoe sadar keujeuhetan nyang kamoe peubuet, dan kamoe teupeue desya-desya kamoe. 13 Kamoe kamungkie dan beurontak ubak TUHAN, dan hana kamoetem seutôt Po teu Allah kamoe. Kamoe ka kamoe tindéeh ureuëng laén dan ka meunyeuleweng; pikeran kamoe sisat, dan tutoe haba kamoe sulet. 14 Huköm nyang ade ka teukireueh, dan keuadelan ka teupeujiôh. Keujujoran ka jipeubeuáh lamkawan ramé, dan keutulosan ka jitiek bak binéh. 15 Hana le ureuëng nyang jujoe, dan soe nyang peujiôh bak buet nyang jeuhet, jihnyan keudroe ka jeuet keu keureubeuen keujeuhetan." TUHAN ka geukalon, dan Gobnyan hana galak ubak keuadelan nyang ka hana le. 16 Gobnyan hireuen bahwa hana nyang teuka dan hana teuma nyang bila. Dan Gobnyan laju geupeuguna kuasa Geuh keudroe keu geupeuseulamat dan geubri keu awaknyan keumeunangan. 17 Gobnyan geupeuguna keuadelan dan keuseulamatan sibagoe bajée beuso dan tupi waja. Gobnyan kana teukat keu geupeupuléh keuadaan dan geubalaih keuhana adelan. 18 Gobnyan geubalaih musoh-musoh Geuh nyang sisuai deungon buet awaknyan keudroe. Meunan cit bansa-bansa nyang na di pulo-pulo nyang jiôh hana geutinggai nibak keunong huköm Gobnyan. 19 Kuasa dan keuagongan Gobnyan teuma jitakot lé soemantong ureuëng phon ditimu meunan cit di barat. Gobnyan teuma teuka lagée ié krueng nyang tajam ji ile nyang jipeuteuka lé angén badée raya. 20 TUHAN meufeureuman ubak umat Gobnyan, "Ulôn teuma teuka u Yerusalem Ulôn jak peuseulamat gata bandum nyang meutobat nibak desya-desya gata. 21 Ulôn peugét peujanjian deungon gata: Gata Ulôn bri kuasa Lôn dan ajaran Ulôn keu siumu masa. Peurunoe kheueh ubak aneuëk-aneuëk gata mangat awaknyan pih jeuet jipeurunoe tron meutron phon saát nyoe trok siumu masa."

Nabi Yesaya 60

1 Beudôh kheueh dan beujeuet kheueh keu trang, he Yerusalem, sabab trang keuseulamatan gata ka teuka; Allah geupeu peungeuh gata deungon keumuliaan Gobnyan. 2 Bumoe habéh teutôb deungon seupôt, bansa-bansa pi ka habéh keunong seupôt buta; teuma trang TUHAN geudong ateueh gata, cahya keuteuka Gobnyan ka jeuet keunyata di ateueh gata. 3 Bansa-bansa nyang laén laju jijak meuron-ron ubak trang gata, raja-raja teutarek lé cahya nyang teubiet keu gata. 4 Ngieng kheueh peue nyang ka teujadi ban seukeulileng gata; rakyat meuhimpon keujijakwoe ubak gata. Aneuëk-aneuëk gata nyang agam teuka di jiôh, aneuëk-aneuëk gata nyang inong teutiengkue. 5 Ban tangieng nyan gata hireuen dan ruman gata meucahya; gata teuharu dan rayeuk that até. Hareuta bansa-bansa laju jiba ubak gata, keukayaan di meurandeh laôt teuka meulimpah ubak gata. 6 Nanggroe gata habéh jihudôm lé unta nyan le, awaknyan teuka di Midian dan Efa. Di Syeba le jiba lé ureuëng méuh ngon keumeunyan, sira jipujoe buet TUHAN. 7 Kaméng bubiri Kedar jiba keu gata bubiri agam nibak Nebayot kateukeubah keu iébadat gata. Keureubeuen nyan keubit that galak até TUHAN Gobnyan jipeuramé Baét Gobnyan nyang peunoh keuagongan. 8 Peu kheueh nyan nyang meulayang lagée awan lagée cicém mirah pati nyang teungoh po jiwoe bak cintra? 9 Nyan kheueh kapai-kapai nyang teuka meusaôh meuasoe umat Po teu Allah teupeuwoe di nanggroe jiôh. Pirak dan méuh na jiba sajan keu teupujoe TUHAN Allah gata; keu Po teu Allah Israel Nyang Mahasuci, nyang peujeuet umat Gobnyan teuhoreumati. 10 TUHAN meufeureuman ubak Yerusalem, "Ureuëng aséng jipeudong lom bintéh beuton gata, dan bubena raja jipeutimang gata. Yoh masa ilée Ulôn huköm gata bak watée Ulôn teungoh teuka beungéh, teuma watée nyoe Ulôn ka teuka gaséh sayang. 11 Uroe malam babah pintoe geureubang gata teutab teuhah, mangat hareuta keukayaan bansa-bansa laén jijak intat ubak gata, meunan cit deungon raja-raja awaknyan sibagoe tawanan. 12 Bansa dan keurajeuen nanggroe nyang hanajitem tundok ubak gata, bansa dan keurajeuen nanggroe nyan binasa dan gadôh sapan sapa. 13 Keubanggaan uteuen Libanon jiangkot ubak gata kayée bak beurangan, bak ceumara dan bak aron keuteupeudong Baét Lôn meutamah seumarak, dan teupeulagak teumpat meugiloe Lôn. 14 Aneuëk-aneuëk miet nyang tindéeh gata jijak sujut, nyang ka lheueh jihina gata jitundok, gata teuboh nan 'Banda TUHAN', 'Sion, Banda Allah Kudus Israel'. 15 Gata hana jitinggai dan jibanci, dan hana jipeubiyeu seungue ngon seungab. Gata Ulôn peujeuet keubanggaan nyang abadi, teumpat meugeumbira siumu masa. 16 Gata jipeulara lé bansa-bansa dan lé raja-raja, lagée sidroe ma geupeulara aneuëk gobnyan. Dan barô kheueh gata teupeue bahwa Ulôn nyoe na kheueh TUHAN, Peuseulamat gata, dan bahwa Po teu Allah Israel nyang teuga nyang peuleueh gata. 17 Ulôn ba méuh sibagoe geunantoe peurunggu, dan pirak sibagoe geunantoe beuso. Ulôn jok peurunggu sibagoe geunantoe kayée, dan beuso sibagoe geunantoe batée. Nanggroe gata Lôn peujeuet aman dan teuntram, dan jipeurintah deungon cara ade. 18 Hana le haba keuhai keukeurasan di nanggroe gata, keuhai nyang hanco dan nyang reuloh di wilayah gata. Lagée bintéh beuton nyang kukôh Ulôn lindong gata, dan gata tapujoe Ulôn sibagoe nyang peuseulamat gata. 19 Gata hana peureulée jipeutrang lé mata uroe óh watée uroe, dan hana peureulée jipeutrang lé buleuen óh watée malam. Sabab Ulôn TUHAN nyang peu peungeuh abadi keu gata, Ulôn peutrang gata deungon keuagongan Lôn. 20 Keu gata na mata uroe nyang hántom ji lôb, dan buleuen nyang hántom ubit. Sabab Ulôn TUHAN nyang peutrang gata siumu masa masa meuseudeh gata teuma habéh. 21 Peunduduek gata jijak buet deungon beutôi, awaknyan meuteumé nanggroe keu siumu masa. Awaknyan lagée kayée teugasi nyang Lôn pula keudroe, keu Ulôn jiteupeue keuagongan Lôn. 22 Meunan cit lé keuluwarga nyang ubit ngon hina teuma jeuet keu bansa nyang raya dan teuga. Ulôn TUHAN bagaih meutindak, bak saát nyang teupat."

Nabi Yesaya 61

1 Kuasa TUHAN Nyang Mahamanyang na nibak ulôn; Gobnyan nyang piléh dan nyang kirém ulôn keu lôn jakba haba gét ubak ureuëng gasien dan peupuléh ureuëng nyang ka hanco até; keu lôn jakpeugah ubak ureuëng nyang teuteuen bahwa awaknyan deungon sigra teupeubeubaih, dan ubak ureuëng-ureuëng nyang na lam glab bahwa awaknyan laju teupeulheueh. 2 Gobnyan geuyue bak ulôn mangat lôn jak peusampoe haba bahwa ka trok watéejih TUHAN geupeuseulamat; keu geuhibur banmandum nyang meuduka cita, dan teubalah bandum musoh-musoh awaknyan; 3 keu teubri keugeumbiraan dan suka cita keu ureuëng nyang teungoh seudeh dan keunong musibah; keuteu ubah seudeh awaknyan jeuet keu ca-e puja ngon pujoe. Awaknyan teuma jeuet lagée bak kayée nyang geupula lé TUHAN keudroe. Awaknyan jipeubuet nyang jroh dan nyang beuna, dan TUHAN jipeuagong teuma. 4 Awaknyan jipeudong banda-banda nyang ka treb that reuloh dan jipeudong teumpat-teumpat nyang ka treb that seungue. 5 He, bansa lôn, ureuëng aséng teuma jipeutimang gata; awaknyan jirabe beulatang nyang gata peulara dan jijak buet nibak blang ngon lampôh anggô gata. 6 Gata jibôh nan hamba Po teu Allah dan jibôh nan imeum TUHAN geutanyoe. Gata tarasa keukayaan bansa-bansa laén dan gata bangga sabab hareuta awaknyan. 7 Sabab gata ka meuteumé malée dua goe lipat, meunan cit ngon noda dan hinaan ka jeuet keu bagian lam udeb gata, dan gata meuteumé hareuta waresan dua goe lipat di nanggroe gata dan meuteumé suka cita nyang abadi. 8 TUHAN meufeureuman, "Ulôn cinta that ubak keuadelan dan Lôn banci that ubak buet nyang jeuhet ngon peunindasan. Ulôn kujok upah gata deungon seutia, dan teuikat janji nyang abadi deungon gata. 9 Keuturonan gata meusyeuhu bansigom donya, jituri lé meubagoe bansa. Dan banmandum ureuëng jingieng nyan jiangkée teuma, bahwa bansa nyoe Ulôn bri beureukat." 10 Jaweueb Yerusalem, "Ulôn galak that até sabab TUHAN, até lôn meusukacita sabab Po teu Allah. Lagée teungku linto agam dan dara barô inong nyang jingui piasan meubagoe rupa, meunan kheueh TUHAN geupeungui keu ulôn bajée seulamat dan meunang. 11 Lagée bijéh nyang ka teusipreuk, teuma timoh jeuet keusinaman, meunan kheueh TUHAN Po teu Allah geupeutimoh seulamat dan banmandum bansa jipujoe Gobnyan."

Nabi Yesaya 62

1 Deumi Yerusalem ulôn kupeugah haba, meunan cit deumi Sion ulôn hana lôn iemdroe, sampoe jihnyan geupeuseulamat dan meunang meucahya lagée suwa óh malam teuka. 2 He Yerusalem, bansa-bansa jingieng gata meunang, raja-raja geukalon keubeusaran gata. Gata geubôh nan deungon nan nyang barô, TUHAN keudroe nyang bôh nan gata nyan. 3 Gata jeuet lagée mahkota nyang gagah bak jaroe TUHAN, mahkota keurajeuen bak jaroe Allah gata. 4 Nan gata kon le 'Nyang jitinggai', nanggroe gata kon le 'Nyang keuseupian'. Gata teupeugah, 'Nyang Geusayang lé Po teu Allah', dan nanggroe gata geuboh nan, 'Nyang ka Meugatib', sabab TUHAN galak that keu gata, Gobnyan lagée teungku lakoe keu nanggroe gata. 5 Lagée sidroe aneuëk muda nyang meukawen ngon sidroe aneuëk dara, meunan kheueh Peuncebta gata meukawen deungon gata. Lagée sidroe teungku linto galak that até óh geukalon peurumoh droe, meunan kheueh Po teu Allah teuma geugalak keu gata. 6 Bak bintéh beuton Yerusalem ulôn keubah ureuëng tantra nyang jaga; uroe ngon malam awaknyan hana jeuet tinggai seungab, teuma harôh ji-ingat ubak Po teu Allah ubak janji nyang ka geupeubuet lé Gobnyan. 7 Awaknyan hana jeuet jipeubiyeu jihnyan seungab mantong sigohlom Gobnyan geupeudong lom Yerusalem, dan geupeujeuet nyan meusyeuhu bansaboh bumoe. 8 TUHAN ka geumeujanji ngon geumeusumpah dan teuma geupeubuet deungon kuasa Gobnyan; "Ulôn hana Lônjôk le gandom gata keu musoh ureuëng aséng hana le jijieb ié anggô nyang ka gata useuha deungon susah payah. 9 Teuma gata nyang ka gata peusapat hase panen, teuma tamakheun hase nyan sira tapujoe TUHAN; dan gata tapot boh anggô, tajieb ié jihnyan nibak seuramo Baét Ulôn." 10 He peunduduek Yerusalem, teubiet kheueh rot pintoe geureubang, peusiab laju rot ueh keu ureuëng-ureuëng nyang woe. Neupeugöt laju rot ueh raya, takireueh laju bubena batée, tapeudong laju bupanji-bupanji keu bansa-bansa. 11 TUHAN geubri peusan nyang lagée nyoe ubak banmandum peunjuru bumoe, "Tapeugah laju ubak peunduduek Sion, 'Ngieng, TUHAN nyang bri seulamat ka trok geuteuka! Gobnyan ji iréng lé ureuëng-ureuëng nyang ka geupeubeubaih lé Gobnyan.' " 12 Awaknyan teuma geuboh nan: 'Umat suci'; 'Umat Nyang geupeuseulamat lé TUHAN'. yerusalem teuma geupeugah 'Banda nyang geurayu lé TUHAN', 'Banda nyang hanale geutinggai lé TUHAN'.

Nabi Yesaya 63

1 "Soe kheueh geuhnyan nyang teuka nibak Bozra di Edom? bajée gobnyan mirah, peukayan gobnyan seumarak; watée geujak gagah ngon peukasa." TUHAN "Ulôn kheueh TUHAN nyang hase Lôn peuseulamat dan teuka deungon haba keumeunangan." Tukang jaga 2 "Pakon peukayan droeneueh mirah that lagée nyan, lagée bajée ureuëng prah ié boh anggô?" TUHAN 3 "Sidroe Lôn mantong kutamong u teumpat teu prah ié anggô lamkawan umat Lôn hana nyang tulông Lôn. Bansa-bansa Lôn gilo-gilo watée Ulôn teungoh teuka beungéh, lagée Lôn gilo-gilo ateueh boh anggô. Darah awaknyan meusipreuk sampoe bulut keunong bajée Lôn, dan meulabo bansaboh peukayan Lôn. 4 Ulôn ka lheueh Lôn reuncana uroe peue awaknyan Lôn balaih, dan watée Lôn peubeubaih umat Lôn. 5 Ulôn jakmita, teuma hana nyang tulông, Ulôn hireuen pakon hana nyang tulông. Laju teunaga Lôn keudroe nyang tulông Ulôn, deungon beungéh Lôn nyan nyang tulông Lôn. 6 Nibak beungéh Ulôn nyang meutaga nyan, laju Lôn gilo-gilo bubena bansa-bansa; Lôn peubinasa bubena awaknyan, dan darah awaknyan Ulôn rô meujeue-jeue ateueh tanoh." 7 Ulôn keuneuk jak peugah geunaséh TUHAN dan lôn pujoe Gobnyan sabab nyang geupeubuet. Deungon meulimpah gaséh Gobnyan geubri beureukat keu umat, sabab Gobnyan na gaséh sayang dan geunaséh Gobnyan hana keuneulheueh. 8 TUHAN meufeureuman, "Keubit, awaknyan na kheueh umat Lôn, aneuëk-aneuëk miet nyang hana keucewa." Teuma Geuhnyan jeuet keu nyang Peuseulamat awaknyan, 9 Geuhnyan keudroe keunong keususahan awaknyan. TUHAN hana geukirém utosan atawa duta; Gobnyan keudroe kheueh nyang peubeubaih awaknyan sabab geunaséh dan balaih gaséh Gobnyan. Gobnyan sabe geupeulara awaknyan phon yoh ilée. 10 Teuma awaknyan beurontak keubit that peudeh até TUHAN. Dan Gobnyan laju geubalek jeuet keu musoh awaknyan Gobnyan keudroe nyang jak lam prang geulawan awaknyan. 11 Dan awaknyan teuingat ubak jamén ilée, jamén Nabi Musa, hamba TUHAN. Awaknyan jitanyong, "Dipat kheueh TUHAN nyang ka geupeujak bubena peumimpén umat Gobnyan rot laôt? Dipat kheueh TUHAN Nyang ka geubri kuasa Gobnyan keu awaknyan? 12 Dipat kheueh TUHAN nyang geudampeng Nabi Musa deungon jaroe Gobnyan nyang teuga dan peukasa, nyang geuprah ié dikeue awaknyan mangat nan Geuhnyan meusyeuhu siumu masa? 13 Dipat kheueh TUHAN nyang ka geupeujak awaknyan geuba rot lam laôt nyang lhok? Lagée guda rot padang pasi, awaknyan hántom meugantoh." 14 TUHAN geuba awaknyan bak teumpat seumiyôh, lagée beulatang peulara nyang ji-iréng jijak peumeurot ubak naleueng diblang. Meunan kheueh cara jih Gobnyan geubimbéng umat Gobnyan, mangat nan Gobnyan jipeumulia. 15 Ya TUHAN, neungieng kheueh rot lam syeuruga, nibak teumpat tinggai Droeneueh nyang suci dan mulia. Dipat kheueh gaséh dan peukasa Droeneueh? Dipat kheueh keurahiman dan gaséh sayang Droeneueh? Bék kheueh neupeuteun nyan nibak kamoe. 16 Kon kheueh Droeneueh Bapak kamoe? Nabi Ibrahim dan Nabi Yakub hana geuturi kamoe. Teuma Droeneueh, ya TUHAN, na kheueh Bapak kamoe, Peuseulamat kamoe phon yoh watée ilée. 17 Ya TUHAN, pakon neupeubiyeu kamoe nyoe sisat? pakon Droeneueh neupeukreueh até kamoe sampoe kamoe hana teumakot ubak Droeneueh? Neugisa kheueh deumi hamba-hamba Droeneueh, deumi umat Droeneueh, milék pusaka Droeneueh. 18 Pakon neupeubiyeu musoh jigilo-gilo lam Baét Droeneueh, dan ureuëng laén jijak peukuto bukét Droeneueh nyang suci? 19 Droeneueh neupeubuet ateueh kamoe, siulah-ulah Droeneueh hántom na meukuasa ateueh kamoe; dan siulah-ulah kamoe nyoe hántom na jeuet keu umat Droeneueh.

Nabi Yesaya 64

1 Teukuwak kheueh langét dan neutron kheueh laju, ya TUHAN, neupeujeuet kheueh bubena gunong-gunong meuhayak ngon meuguncang dikeue Droeneueh, 2 lagée apui hu bak kayée sampoe ié ateueh sinungkée pih hase ju. Neupeuleumah kheueh kuasa Droeneueh ubak musoh-musoh Droen, sampoe bubena bansa yo meugám-gám dikeue Droeneueh. 3 Ka lheueh neupeubuet buet-buet nyang luwa biasa, nyang hana kamoe sangka-sangka. Droeneueh neutron, dikeue Droeneueh bube na gunong ka meuguncang. 4 Hántom na lom nyang deungoe, dan gohlom na nyang kalon bahwa seulaén Droeneueh, na ilah nyang meutindak, nibak ureuëng nyang meuhak ubak jihnyan. 5 Droeneueh nyang sambot ureuëng nyang jujoe dan nyang udeb meunurot keuheundak Droeneueh. Droeneueh beungéh keukamoe, teuma kamoe teutab meudesya beutôi yoh phon ilée kamoe meusalah. 6 Kamoe banmandum na kheueh ureuëng nyang ka kuto, meunan cit buet kamoe nyang jroh pih ka ceumar ngon kuto. Kamoe gadôh sabab buet kamoe nyang jeuhet lagée ôn nyang layée jipupôt lé angén. 7 Hana nyang meudoá keu kamoe, atawa nyang lakée tulông ubak Droeneueh, sabab Droeneueh neusöm ruman Droeneueh nibak kamoe, dan neupeubiyeu kamoe jipeubinasa lé desya-desya kamoe. 8 Teuma Droeneueh, ya TUHAN, na kheueh Bapa kamoe, kamoe nyoe tanoh kliet, dan Droeneueh nyang peugét kamoe; kamoe banmandum na kheueh peuneugét jaroe Droeneueh. 9 Lé sababnyan bék kheueh kamoe nyoe neubeungéh that, ya TUHAN, bék le neuingat-ingat keudesya kamoe; ngieng kheueh, kamoe nyoe umat Droeneueh. 10 Banda-banda Droeneueh nyang suci ka lagée padang pasi, Yerusalem ka jeuet lagée padang pasi nyang seungue. 11 Baét Po teu Allah nyang suci dan agong teumpat indatu kamoe geupujoe-pujoe Droeneueh, nyan pih ka habéh tutông deungon apui; bandum teumpat nyang kamoe galak ka habéh reuloh jeuet keu rungka-rungka. 12 Droeneueh deuh neungieng banmandum nyan, ya TUHAN, pakon kheueh Droeneueh neuseungab mantong? Peu kheueh Droeneueh neupeubiyeu kamoe meudeurita nyang leubeh peudeh?

Nabi Yesaya 65

1 TUHAN meufeureuman, "Ulôn siab Lôn jaweueb umat Lôn, teuma awaknyan hana meudoá ubak Ulôn. Ulôn ka siab meunyoe awaknyan jijak meurumpok deungon Ulôn, teuma awaknyan hana jitem jak mita Ulôn. Bansa nyan hana jitem tawök Lôn, bahpi Ulôn ka siab Lôn jaweueb: Nyoe kheueh Ulôn! 2 Ulôn sabe lam siab Lôn sambot umat Ulôn, teuma awaknyan galak that bak buet nyang beurontak. Bansa nyan jipeubuet buet nyang jeuhet dan jiseutôt reuncana jih keudroe. 3 Awaknyan hana putôh-putôh jipeuteuka beungéh Ulôn sabab jipeuseumah keureubeuen bak lampôh-lampôh keu dewa-dewa dan jitot keumeunyan nibak miseubah-miseubah jihnyan. 4 Óh watée malam awaknyan jijak ubak guha-guha dan bak kubu-kubu ureuëng maté keujijak lakée naseuhat ubak areuwah-areuwah. Awaknyan jipajoh sie bui dan ji-jieb kuwah uengkot sie nyang hareuem. 5 Awaknyan jipeugah, 'Jak kheueh beujiôh keudeh, bék tupéeh ngon kamoe, sabab kamoe nyoe suci dan teumeungkréeh nibak gata!' Ulôn hana ék Lôn teun óh Lôn ngieng pi-e awaknyan! Beungéh Ulôn nyoe keu awaknyan lagée apui nyang hana jitem lon. 6 Huköman keu awaknyan ka teutuléh dikeue Ulôn. Keubit, Ulôn hana Lôn kalon ban. Ulôn kubalaih buet nyang jeuhet awaknyan 7 sabab desya awaknyan dan desya indatu awaknyan. Awaknyan jihina Ulôn deungon cara jitot keumeunyan keu dewa-dewa di teumpat seumujoe di ateueh bukét. Ulôn kubalaih awaknyan nyang sisuai deungon buet awaknyan yoh watée ilée." 8 TUHAN meufeureuman, "Boh anggô nyang mantong na ié jih hana teutiek, teuma teupeujeut keu ié anggô. Meunan cit deungon bansa Lôn hana Lôn peubinasa banmandum, sabab lamkawan awaknyan mantong na meungabdi keu Ulôn. 9 Na siladum ureuëng Israel nibak sukée Yehuda Lôn bri beureukat, dan keuturonan awaknyan meuteumé tanoh gunong Ulôn. Ureuëng-ureuëng nyang ka Lôn piléh nyang meungabdi ubak Ulôn nyan kheueh nyang tinggai disinan. 10 Umat Lôn jiseumah Ulôn; bubiri dan leumô awaknyan jirot naleueng di tanoh data Saron dan di Pantôn Akhor. 11 Teuma bukon meunan naseb ureuëng-ureuëng nyang jitinggai Ulôn, nyang hana jipako ubak Sion, bukét Lôn nyang suci, nyang peuseumah sajian ubak Gad dan Meni, dewa-dewa keubeuruntongan dan naseb. 12 Gata bandum maté sibagoe keureubeuen keukeurasan. Sabab, watée Ulôn hôi, gata hana tajaweueb, dan watée Ulôn marit, gata hana tadeungoe. Gata leubeh talawan Ulôn dan tameubuet keubuet nyang jeuhet. 13 Nyang sikeubit jih, ureuëng nyang seumah Ulôn jimakheun, teuma di gata deuk hana tateumé pajoh sapeue. Awaknyan ji-jieb ié, teuma di gata grah tho rukueng. Awaknyan meugeumbira, teuma di gata meuteumé malée. 14 Nyang sikeubit jih, awaknyan seumurak geumbira, di gata tamo deungon peudeh. 15 Ureuëng-ureuëng nyang Ulôn piléh jicok nan gata sibagoe teukutôk: "Seumoga TUHAN Nyang Mahamanyang geupoh maté gata lagée awaknyan!" Teuma ureuëng nyang taát ubak Ulôn teuma Ulôn bri nan nyang barô. 16 Soe mantong ureuëng nyang na di nanggroe nyan nyang jilakée beureukat, teuma jilakée beureukat nibak Po teu Allah nyang seutia. Soe mantong ureuëng nyang keuneuk meubudok, jimeubudok deumi nan Po teu Allah nyang seutia. Sabab peundeuritaan nyang watée ilée ka gadôh dan ka jipeutuwoe." 17 TUHAN meufeureuman, "Ulôn kupeugét langét nyang barô dan bumoe nyang barô. Keujadian-keujadian nyang ka lheueh teujadi yoh masa ilée teupeutuwoe dan hana teuingat le. 18 Meugeumbira kheueh dan meusukaria kheueh keu siumu masa sabab peue nyang Ulôn cebta. Ulôn cebta Yerusalem nyang barô nyang peunoh keugeumbiraan, dan peunduduek disinan meusuka ria. 19 Ulôn keudroe meugeumbira sabab Yerusalem, dan gurangsang sabab ureuëng disinan. Nibak banda nyan ka hana le ureuëng mo ba-e, dan hana ureuëng teumawök jilakée tulông. 20 Aneuëk-aneuëk manyak hana nyang maté yoh watée ubit, dan ureuëng tuha trok ubak umu nyang leubeh syiek. Ureuëng nyang meu umu trok sireutoh thon teuanggab muda, dan nyang maté sigohlom trok dub umunyan teuanggab nyan na kheueh huköman Lôn. 21 Ureuëng teuma jipeudong rumoh dan jiduek keudroe lam rumoh nyan; di ureuëng laén hana jiduek di rumoh nyan. Awaknyan jipula bak anggô lam lampôh dan jirasa keudroe ié anggô jih nyan; di ureuëng laén hana ji-jieb ié anggô nyan. Umat Ulôn panyang umu lagée bak kayée, dan jirasa keudroe hase reuôh jihnyan. 23 Bandum nyang awaknyan peubuet teuma na hase, dan aneuëk-aneuëk awaknyan hana maté meudab-dab. Awaknyan dan keuturonan awaknyan Lôn bri beureukat keu siumu masa. 24 Sigohlom awaknyan jilakée, ka Ulôn jaweueb; sigohlom lheueh awaknyan meudoá, doá awaknyan ka Ulôn peukabui. 25 Asée srigala dan aneuëk bubiri meusajan-sajan jimeurot naleueng; singa jipajoh jeumpueng saban lagée leumô, dan uleue ka hana meubahya le. Bansaboh bukét Lôn nyang suci, hana le nyang rugoe atawa jipeubuet jeuhet."

Nabi Yesaya 66

1 TUHAN meufeureuman, "Langét na kheueh takhta Lôn, dan bumoe teumpat Lôn meugilo. Dan rumoh nyang lagée peu kheueh nyang keuneuk gata peudong keu Ulôn, dan teumpat peu kheueh nyang keuneuk gata peujeuet keu teumpat tinggai Lôn? 2 Alam raya nyoe na kheueh buet jaroe Lôn, dan banmandum nyan teupeujeuet. Teuma nyang Ulôn galak na kheueh ubak ureuëng nyang miyueb até, nyang meunyeusai keumandum desya-desya jih, nyang teumakot dan taát ubak Ulôn. 3 Teuma bansanyan jipeubuet ban galak droe jih; awaknyan galak meu iébadat meunurot cara nyang luwat hana teukira. Nibak awaknyan hana beuda jih; teukeureubeuen leumô agam dan teukeureubeuen manusia, teukeureubeuen aneuëk bubiri dan teuwiet takue asée; teupeu seumah gandom dan teukeureubeuen darah bui, teutot keumeunyan dan teuseumah patông. 4 Sababnyan Ulôn pih Lôn peubuet ban galak droe dan Lôn peurhot ateueh awaknyan beuncana-beuncana nyang awaknyan takot. Sabab bak watée Ulôn tawök, hana nyang seuôt; watée Ulôn peugah haba, hana nyang deungoe. Awaknyan leubeh galak jilawan Ulôn dan jipeubuet nyang jeuhet." 5 Deungoe kheueh peue nyang geufeureuman lé TUHAN, he gata nyang takot dan taát ubak Gobnyan, "Sabab gata seutia ubak Ulôn, na lamkawan bansa gata nyang jibanci keu gata, dan hana jitem meurakan deungon gata. Awaknyan jihina ngon jipeuwayang gata sira jipeugah, 'Bah kheueh TUHAN geutunyok keu agongan Gobnyan, mangat jeuet kamoe ngieng gata geumbira.' Teuma awaknyan keudroe kheueh nyang meuteumé malée. 6 Deungoe! Na su karu ngon subra di dalam banda; na su nibak Baét Lôn; nyan kheueh su Ulôn nyang teungoh Lôn balaih musoh! 7 Banda suci Lôn lagée sidroe ma nyang jipeulahé aneuëk sigohlom teuleunteuk teubot sabab sakét; nyang jipeulahé aneuëk agam sigohlom jirasa sakét meu aneuëk. 8 Soe nyang ka na deungoe hai nyang lagée nyan? Dan soe nyang ka lheueh kalon keujadian nyang lagée nyan? Teuma bansa Israel ka lahé bak watée Sion ka teurasa sakét meu aneuëk. 9 Bék tasangka Ulôn ba umat Lôn sampoe bak saát keulahéran dan hana teupeubiyeu awaknyan teupeu lahé." Meunan kheueh geupeugah lé TUHAN. 10 Meusuka cita kheueh meusajan Yerusalem, he banmandum ureuëng nyang cinta jihnyan. Gata nyang meuduka sabab gobnyan, jinoenyoe ka jeuet meugeumbira ria. 11 Gata teuma tarasa keumakmuran jihnyan, lagée sidroe aneuëk manyak jijieb mom nibak ma jih. 12 Sabab TUHAN meufeureuman, "Gata Ulôn bri keuseujahteuraan lagée ié krueng nyang teungoh ile; keukayaan bansa-bansa laén teuma jiba ubak gata lagée ié krueng nyang teungoh boh bah. Gata lagée aneuëk manyak nyang teungoh geupeumom dan geutiengkue lé ma jih, dan geugusuek-gusuek lam pangkée gobnyan. 13 Ulôn kuhibur gata di Yerusalem, lagée sidroe ma geu hibur aneuëk gobnyan. 14 Watée tangieng nyan, gata meugeumbira, dan meutamah seuhat ngon teuga lagée naleueng nyang mantong muda. Dan hamba-hamba Lôn jirasa keukuasaan Lôn dan musoh-musoh Lôn jirasa ubak beungéh Lôn." 15 Keubit, TUHAN teuka meusigoe ngon apui; Gobnyan nyang supée keudroe geuritan Geuhnyan tajam jiplueng lagée angén badée, keu geupeusak beungéh Geuhnyan, dan geudumpék deungon su nyang meutaga. 16 Sabab bandum ureuëng nyang meuteumé salah teuma geuhuköm deungon apui dan peudeueng, dan jai that-that nyang geuhuköm maté. 17 TUHAN meufeureuman, "Soe mantong ureuëng nyang jijak peugleh droe óh lheueh nyan jijak meukawan-kawan u lampôh-lampôh keu dewa-dewa dan jimeu iébadat keu dewa-dewa nyan, ureuëng nyan leunyab meusajan deungon ureuëng nyang pajoh sie bui dan tikoih dan peunajoh nyang laén nyang kuto ngon luwat lumpah na. 18 Ulôn kuteupeue pikeran dan buet-buet awaknyan. Ulôn teuka keu Lôn jak peusapat bubena ureuëng nibak meubagoe bansa. Bak watée awaknyan meugumôi, awaknyan jikalon kuasa Lôn. 19 Ulôn teuma Lôn keubah saboh tanda lamkawan awaknyan. Teuma citbacut sagai nibak awaknyan nyang Ulôn peuseulamat. Awaknyan Lôn kirém ubak bansa-bansa di nanggroe-nanggroe jiôh nyang gohlom na jideungoe keuhai Ulôn atawa jikalon keuagongan dan kuasa Lôn: u Tarsis, Libia dan Lidia deungon ureuëng-ureuëng nyang ka carông dan lisek that bak jitimbak aneuk panah, u Tubal dan Yunani. Awaknyan jidakwahkan keubeusaran Lôn di teungoh bansa-bansa nyan. 20 Nibak nanggroe-nanggroe nyan awaknyan teuma jiba lom syedara-syedara gata seubansa sibagoe hadiah keu Ulôn. Awaknyan jiba bandum ureuëng nyan ubak bukét Lôn nyang suci di Yerusalem deungon keundeuraan guda, keuleudée dan unta, dan deungon geuritan meunan cit geurubak peudati, lagée nyang ka lazem jipeubuet lé ureuëng Israel jiba u Baét TUHAN peuseumahan gandom lam wadah nyang gleh. 21 Siladum lamkawan awaknyan Ulôn peujeuet keu teungku imeum dan ureuëng Lewi. 22 Lagée langét barô dan bumoe barô teuma meuteun sabab kuasa Lôn, meunan cit deungon keuturonan gata dan nan gata teutab tinggai. 23 Tieb-tieb Buleuen Barô dan tieb-tieb uroe Sabat bansaboh umat manusia teuma teuka keu jiseumah Ulôn di Yerusalem. 24 Watée beurangkat, awaknyan jikalon manyét ureuëng-ureuëng nyang ka beurontak keu Ulôn. Ulat nyang pajoh bangke awaknyan hana maté-maté, dan apui nyang tot awaknyan hana teuma lon-lon; saboh pandangan nyang lum teumakot ngon yo keu banmandum manusia."

Nabi Yeremia 1

1 Kitab nyoe meuasoe tutoe haba Nabi Yeremia bin Hilkia, gobnyan na kheueh sidroe lamkawan teungku imeum di banda Anatot di wilayah Benyamin. 2 TUHAN meufeureuman ubak Nabi Yeremia bak thon nyang keu lhée blaih geumat keurajeuen lé Yosia bin Amon raja di nanggroe Yehuda. 3 Óh ka lheueh nyan TUHAN geupeugah lom ubak gobnyan meu ulang-ulang, phon bak jamen peumeurintahan Yoyakim bin Yosia sampoe ubak thon nyang keu siblaih keurajeuen Zedekia bin Yosia. Bak buleuen nyang keulimong nibak thon nyan cit teuma peunduduek Yerusalem jiangkot ubak teumpat nyang teuböih. 4 TUHAN meufeureuman ubak ulôn, 5 "Sigohlom Lôn cebta gata lam pluet ma gata, dan sigohlom gata lahé u ateueh rhueng donya nyoe, Ulôn ka Lôn piléh dan Lôn baiát gata mangat jeuet keu nabi keu bansa-bansa." 6 Laju lôn jaweueb, "Ya TUHAN Nyang Mahamanyang, ulôn hana carông lôn peugah haba sabab ulôn nyoe mantong muda that." 7 Teuma TUHAN geujaweueb, "Bék tapeugah gata mantong muda that. Meunyoe Ulôn nyang kirém gata ubak soe mantong, gata harôh tajak, dan banmandum nyang Ulôn yue gata peugah, nyan harôh gata peusampoe ubak awaknyan. 8 Bék teumakot keu awaknyan, sabab Ulôn na meusajan gata keu Lôn jak lindong gata. Ulôn, TUHAN, ka Lôn peugah haba!" 9 Óh lheueh nyan TUHAN laju geusunyueng jaroe Gobnyan, dan geumat laju babah ulôn sira geupeugah, "Deungoe kheueh dan jak peusampoe kheueh tutoe haba nyang Ulôn peugah nyoe. 10 Uroe nyoe Ulôn bri ubak gata kuasa ateueh bansa-bansa dan keurajeuen-keurajeuen nanggroe -- kuasa keu gata peureubah dan peuhanco, keu taguleng dan tapeubinasa, keu tapeudong dan tapula." 11 TUHAN meufeureuman lom ubak ulôn, "Peue nyang gata ngieng, he Yeremia?" Laju lôn jaweueb, "Cabeueng bak kayée badam, TUHAN ." 12 "Beutôi that," geupeugah lé TUHAN, "Ulôn jaga mangat banmandum nyang Ulôn peugah jeuet keunyataan." 13 Laju TUHAN geutanyong lom ubak ulôn, "Peue lom nyang gata ngieng?" Laju lôn jaweueb, "Di siblaih utara na lôn kalon beulangöng dan asoe jih nyang na lam nyan teungoh ju meubura dan rab reubah u arah keunoe." 14 TUHAN meufeureuman, "Di utara malapeutaka teuma teuka dan banmandum asoe nanggroe nyoe habéh keunong. 15 Ulôn teuma Lôn yue banmandum bansa nyang na di siblaih utara jiteuka keujijak kuasa Yerusalem. Bintéh-bintéh beuton nyang na bansiseun lingka banda nyoe meunan cit deungon pintoe-pintoe geureubang jih dan banmandum banda nyang na di Yehuda teuma awaknyan reupah. 16 Ulôn kuhuköm umat Lôn, sabab awaknyan ka meudesya dan jipeulikot Lôn. Awaknyan ka jipeuseumah keureubeuen ubak ilah-ilah nyang laén, dan jipeugét patong-patong beurala keu jiseumah. 17 Meusiab-siab kheueh, Yeremia! Tajak kheueh dan peusampoe kheueh ubak awaknyan, banmandum nyang ka Ulôn peurintah ubak gata. Bék takot keu awaknyan, mangat gata bék Ulôn peujeuet leubeh teumakot lom meunyoe meuhadab keue deungon awaknyan. 18 Deungoe kheueh! Gata teuma jilawan lé peunduduek nanggroe nyoe, na kheueh lé raja-raja Yehuda, peujabat peumeurintah, teungku-teungku imeum, dan rakyat. Teuma nibak uroe nyoe Ulôn bri keu gata teunaga mangat talawan awaknyan. Gata teuma jeuet lagée banda nyang meukuta nyang kukôh, lagée taméh beuso dan beuton teumaga. Awaknyan hana meuhase jipeutaloe gata, sabab Lôn na meusajan gata dan Lôn lindong gata. Ulôn, TUHAN, ka Lôn peugah haba."

Nabi Yeremia 2

1 TUHAN geuyue peumaklum haba nyoe ubak banmandum ureuëng nyang na di Yerusalem, "Hei, Israel, teutab Lôn ingat pakriban gata seutia yoh gata mantong muda; padub na rayeuk cinta gata watée geutanyoe meubuleuen madu. U padang pasi Lôn jak gata seutôt meulalu daerah nyang hana teupula sapeue. 3 Israel, gata atra Ulôn keudroe, boh até Lôn nyang Ulôn gaséh. Ulôn peutron bala nyang raya u ateueh mandum ureuëng nyang peusabab gata meupaloe seungsara, ulôn TUHAN, ka Lôn peugah haba." 4 Deungoe nyoe feureuman TUHAN, hei gata keuturonan Nabi Yakub, sukée-sukée Israel! 5 TUHAN Meufeureuman, "Peue nyang ka jipeubuet lé sidroe lamkawan indatu gata ateueh Ulôn, sampoe jih nyan jikianat Lôn? Awaknyan jitiyeub beurala nyang hana meuhareuga dan akhé jih awaknyan keudroe nyang ka jeuet keuhina. 6 Ulôn hana jipakoe; Ulôn, nyang ka Lôn tunton gata bak rot ueh raya, dan nyang ba awaknyan jiteubiet nibak nanggroe Meusé rot padang pasi, daerah tandus nyang lumpah le keuwieng keuwot jih, meunan cit tho dan mubahya -- padang nyang hana ureuëng duek dan hana teuma ureuëng jak! 7 U nanggroe subô Ulôn intat awaknyan mangat jirasa peue-peue mantong nyang gét nibak teumpat nyan. Teuma bak teumpat nyan tanoh Ulôn ka awaknyan peukuto dan atra Ulôn awaknyan peujeuet sapeue-sapeue nyang lumpah kuto. 8 Lé imeum-imeum hana nyang teumanyong dipat Ulôn TUHAN jihnyan. Ureuëng nyang mat huköm pih hana jituri soe Ulôn nyoe, nyang mat kuasa beurontak ateueh Ulôn. Ateueh nan Baal nabi-nabi jipeugah haba, dan jiseumah beurala nyang hana meuguna." 9 TUHAN meufeureuman, "Jinoenyoe umat Ulôn Lôn ba lam peukara lom, dan keuturonan jih Ulôn peusidang. 10 Jak kheueh laju sipanyang panté Siprus siblaih ubarat, kirém kheueh ureuëng laén u timu nibak nanggroe Kedar, peureksa kheueh disinan deungon teuliti, peu kheueh ka lheueh taujadi hai nyang saban? 11 Gohlom na teujadi saboh bansa jituka ilah jih bah kheueh nyan bukon Allah nyang sibeuna. Teuma, umat Ulôn ka jituka Lôn, keubanggaan awaknyan deungon sapeue-sapeue nyang hana hase jipeugét sapeue. 12 Lé sabab nyan, hei langét, meuguncang kheueh! Tahe mante dan beuyo kheueh! 13 Umat Ulôn ka jipeubuet dua macam desya; awaknyan ka jipeulikot Ulôn, nyang bri mata ié, teunaga udeb manusia; awaknyan jipeugét keu droejih kulam beusöt nyang hán hase jipeuteun ié jih." 14 "Israel kon namiet, bukon teuma keuturonan namiet nyang teubloe. Teuma pakon jihnyan ka jeuet keu mangsa lawan jih? 15 Musoh jih jitaúm ateueh jih lagée su singa, tanoh jih teupeujeuet keu tandus dan papa, banda-banda jih habéh hangöh jiliet lé apui, teupeubiyeu teulanta hana ureuëng duek. 16 Hei Israel, ôk bak ulée gata teugunténg lé ureuëng Memfis dan ureuëng Tahpanhes. 17 Buet gata keudroe nyang jeuet keusabab mandum nyang teujadi nibak droe gata, sabab bak watée gata Ulôn tunton bak rot ueh raya, gata peulikot Ulôn TUHAN Po teu Allah gata. 18 Peue laba jih gata jak u Meusé? Keuneuk jak jieb ié Krueng Nil? Peue laba jih gata jak u Asyur? Keuneuk jak jieb ié Krueng Efrat? 19 Buet jeuhet gata keudroe nyang huköm droe gata, gata teuseksa sabab tatulak Ulôn, Po teu Allah gata. Jinoenyoe rasa keudroe padubna phet dan peudeh meunyoe Ulôn gata peulikot dan hana gata horeumat, Ulôn, TUHAN Allah gata ka Lôn peugah haba; Ulôn TUHAN Po teu Allah Nyang Mahamanyang dan Mahakuasa." 20 TUHAN meufeureuman, "Ka treb that gata hana tameungabdi ubak Ulôn; hana gata taát atawa taseumah Ulôn. Di ateueh tieb-tieb bukét nyang manyang meulambong, dan dimiyueb tieb-tieb bak kayée nyang luhu ôn gata seumah dewa-dewa keusuboran. 21 Gata Lôn pula lagée bak anggô nyang Ulôn piléh nibak bijéh nyang get. Teuma jinoenyoe gata meu-ubah, ka jeuet keuseunaman kleut dan hana meuguna. 22 Bahpi gata manoe deungon gata bôh sabon nyang le, nyang noda-noda salah gata nyan mantong deuh Ulôn kalon. 23 Gata jeuet tapeugah bahwa gata hana kuto, dan tapeugah lom bahwa Baal hántom na gata seumah! Ngieng kheueh pi-e gata di pantôn, ingat buet jeuhet gata dan aku kheueh nyan! Gata lagée unta inong nyang teungoh teuka gurangsang. jiplueng keudeh keunoe hana teukeundali, 24 laju jitamong lam padang pasi nyang sungue. Jihnyan hana hase teupeuteun meunyoe teungoh teuka gurangsang. Nyang meuheuet keujih nyan hana teumita-mita, sabab nibak musém meuagam jihnyan sabe jipeujok droe. 25 Israel, bek kheueh gata plueng tatiyeub-tiyeub dewa, dan bék kheueh gata plueng tatawök awaknyan, eunteuk gaki gata cidra dan rukueng gata tho sabab teuka glaih. 'Hana, ulôn hana mungken lôn gisa,' kheun gata, 'sabab ulôn cinta ubak dewa-dewa, dan lôn tem seutôt awaknyan.' " 26 TUHAN meufeureuman, "Lagée pancuri meurasa malée meunyoe keunong drob, meunan kheueh gata mandum teurasa malée, he ureuëng Israel, raja-raja dan peujabat-peujabat gata, imeum dan nabi-nabi gata! 27 Gata teuma jipeumalée, sabab ngon sikrak kayée gata tawök bapak dan ngon sineuk batée gata tawök ma. Gata kon tajak ubak Ulôn, teuma gata tinggai Ulôn. Teuma meunyoe ka teuka sosah, Ulôn kheueh nyang gata tawök mangat Lôn jak peuseulamat gata. 28 Dipat kheueh beurala-beurala nyang gata peugét nyan? Meunyoe gata meuteumé sosah, yue kheueh bak jihnyan mangat jipeuseulamat gata, meunyoe jihnyan hase! Hei Yehuda, dewa-dewa gata le jih sidub banda-banda gata! 29 Peu kheueh hana gata galak keuhai Ulôn sampoe gata talawan Ulôn? 30 Sia-sia mantong gata Lôn huköm, sabab gata hana tatem teurimong teuseugah. Lagée singa nyang teungoh beungéh, meunan kheueh gata tapoh maté bubena nabi-nabi gata. 31 Hei umat Israel, deungoe kheueh tutoe haba Lôn nyoe. Peu kheueh ka lheueh Lôn nyoe lagée padang pasi keu gata atawa lagée tanoh nyang seupôt glab hana deuh sapeue? Teuma pakon gata peugah gata keuneuk beubaih, dan hana tatem le gisa bak Ulôn? 32 Peu kheueh na aneuëk dara nyang tuwoe ubak piasan jih, atawa dara barô inong nyang tuwoe keubajée peunganten jih? Teuma gata katreb that tatuwoe keu Ulôn -- yoh watée nyang hana teuitong treb jih. 33 Gata keubit that carông ta ato siasat keu gata peukeunong até geunaséh-geunaséh até gata. Inong jeuhet nyang paleng jeuhet pih mantong hase jimeurunoe bak gata! 34 Peukayan gata teunoda lé darah ureuëng gasien dan ureuëng nyang hana meusalah, kon lé darah pancuri nyang keunong drob. Bahpi meunan, 35 gata tapeugah bahwa gata hana salah, bahwa Ulôn hana beungéh le ubak gata. Teuma, Ulôn TUHAN, Lôn huköm gata sabab gata tapeugah bahwa gata hana salah. 36 Bagaih that gatajak ubak dewa-dewa bansa laén keugata lakée tulông! Gata pasti keucewa lé nanggroe Meusé, saban lagée gata keucewa ubak Asyur. 37 Gata tatinggai nanggroe Meusé sabab keucewa dan malée. Ulôn, TUHAN, ka Lôn tulak awaknyan nyang gata peubangga; gata hana meuteumé laba sapeue nibak awaknyan."

Nabi Yeremia 3

1 TUHAN meufeureuman, "Meunyoe sidroe ureuëng inong nyang ka meulako jitaleuk lé teungku lakoe jih, laju ureuëng inong nyan geumeukawen deungon ureuëng agam laén, deungon nyan beukaih lakoe inong nyan hana jeuet le jicok ureuëng inong nyan keu peurumoh jih, sabab hainyan jeuet keurusak nibak nanggroe nyoe. Gata he Israel, ka le that geunaséh até gata, ék kheueh jeuet bak saát nyoe gata keuneuk riwang ubak Ulôn! 2 Cuba tangah u ateueh, u pucak-pucak bukét! Bak teumpat toh kheueh disinan nyang gohlom gata gilo tajak meumukah? Lagée ureuëng Arab di padang pasi, meunan kheueh gata taduek bak binéh jalan tapreh-preh ureuëng nyang jitem jakmeuén cinta. Gata ka tapeukuto nanggroe nyoe deungon buet meumukah dan buet gata nyang jeuhet nyang laén. 3 Nyang kheueh sabab jih ié ujeuen hana jitron di langét, meunan cit ujeuen bak musém seumi hanajitem teuka. Gata saban that deungon simeumukah, dan hana meumalée meubacut pih. 4 Bak watée gata aloh-alah nyan gata peugah ubak Ulôn bahwa Ulôn ureuëng syiek gata, bahwa Ulôn sayang keugata yoh gata mantong ubit. 5 Meunan cit gata peugah bahwa Ulôn hana mungken Lôn beungéh keugata hana putôh-putôh. Nyan kheueh nyang gata peugah, he Israel, teuma gata teutab gata peubuet cit buet-buet nyang jeuhet nyang hase gata peubuet." 6 Bak masa keurajeuen Raja Yosia, TUHAN meufeureuman lagée nyoe ubak ulôn, "Peu kheueh ka lheueh gata ngieng peue nyang jipeubuet lé Israel, inong nyang hana seutia nyan? Jihnyan ka jitinggai Ulôn dan jimeuagam ngon jimeumukah di ateueh tieb-tieb bukét nyang manyang dan dimiyueb tieb-tieb bak kayée nyang rampak. 7 Ulôn pike óh lheueh jihnyan jipeubuet banmandum nyan, jihnyan jigisa ubak Ulôn. Teuma jihnyan hana jigisa, teuma jijak meumukah. Nyang kheueh sabab jih Ulôn taleuek dan Lôn use jihnyan. Yehuda, syedara Israel, nyang hana seutia nyan, jikalon banmandum nyan, teuma jihnyan teutab hana teumakot. Dan jihnyan meusajan-sajan keunan jeuet keu lunte, 9 dan meubacut pih hana meurasa malée. Jihnyan meumukah sabab nyang jiseumah batée dan bak kayée, sampoe nanggroe nyoe jeuet keu kuto. 10 Óh ka lheueh jipeubuet banmandum nyan, Yehuda nyang hana seutia nyan jiriwang ubak Ulôn teuma deungon pura-pura, sabab até jihnyan hana jujoe, Ulôn, Po teu Allah, TUHAN, ka Lôn peugah haba." 11 Óh lheueh nyan TUHAN geubri tée ubak ulôn bahwa bahpi Israel ka jipeulikot Gobnyan, teuma Israel teunyata leubeh gét nibak Yehuda nyang hana seutia nyan. 12 TUHAN geuyue ubak ulôn keulôn peusampoe hainyoe ubak Israel, "He Israel nyang hana seutia, tawoe kheueh ubak Ulôn! Ulôn peunoh deungon gaséh sayang dan hana siumu masa Ulôn beungéh gata. 13 Meungaku mantong bahwa gata ka meusalah dan beurontak teuhadab TUHAN, Allah gata. Meungaku kheueh mantong bahwa di miyueb tieb-tieb bak kayée nyang luhu gata ka tapeusampoe cinta gata ubak ilah-ilah bansa laén, dan hana ta-taát ubak peue-peue nyang Ulôn peurintah. Ulôn, TUHAN, ka Lôn peugah haba." 14 TUHAN meufeureuman, "He umat nyang hana seutia, tawoe kheueh ubak Ulôn! Gata na kheueh milék Ulôn. Ulôn ku cok gata, sidroe nibak tieb-tieb banda, dua droe nibak tieb-tieb kawöm, dan Lôn puwoe gata keudeuh u Bukét Sion. 15 Ulôn kujok ubak gata peumimpén-peumimpén nyang taát ubak Ulôn. Awaknyan jipimpén gata deungon peunoh bijaksana dan peunoh peungeurtian. 16 Dan meunyoe gata ka meutamah le di nanggroe nyoe, ureuëng laén hana jipeugah-peugah le keuhai Peuto Peujanjian Lôn. Awaknyan hana teuma jipike atawa ji ingat le, dan awaknyan hana jipeureulée le keu Peuto Peujanjian nyan atawa jipeugét nyang laén sibagoe geunantoe. 17 Bak watée nyan banda Yerusalem jiboh nan, 'Takhta TUHAN', dan meubagoe bansa teuma meusapat di banda nyan keu jiseumah Ulôn. Awaknyan hana jiseutôt le peue nyang jikheun lé até droe jih nyang jeuhet nyan. 18 Israel meugabong deungon Yehuda, dan meusajan-sajan teuka di nanggroe nyang teuböih di siblaih utara. Awaknyan teuma jiwoe u nanggroe nyang ka Ulôn bri sibagoe tanoh pusaka keu indatu gata." 19 TUHAN meufeureuman, "Israel, Ulôn meuhéut keuneuk teurimong gata sibagoe aneuëk Lôn, dan Lôn bri ubak gata nanggroe nyang that-that mangat, nanggroe nyang paleng jroh bansigom donya. Ulôn meuhéut gata hôi Ulôn nyoe bapak, dan hana taplueng nibak Ulôn. 20 Teuma lagée peurumoh nyang hana seutia, gata pih hana seutia ubak Ulôn. Ulôn, TUHAN ka Lôn peugah haba." 21 Di ateueh pucak-pucak gunong na teudeungoe su nyang subra; nyan na kheueh su umat Israel nyang teungoh mo dan jimeulakée, sabab awaknyan ka meudesya, dan tuwoe ubak TUHAN Po teu Allah jih keudroe. 22 He gata banmandum nyang ka tuwoe ubak TUHAN, tawoe kheueh! Gobnyan teuma geupeupuléh gata, dan geupeujeuet gata seutia. Gata tapeugah, "Nyoe, jinoenyoe kamoe keuneuk jak ubak TUHAN, sabab Gobnyan na kheueh Po teu Allah kamoe. 23 Sia-sia mantong kamoe meusajan-sajan kamoe jak seumah beurala di ateueh pucak-pucak gunong nyang lambong! Peutulôngan keu Israel teuka nibak TUHAN Allah kamoe. 24 Teuseumah ubak Baal, beurala nyang keubit that malée nyan sampoe kamoe kajeuet geumadôh nibak aneuëk-aneuëk kamoe, meunan cit deungon beulatang peulara kamoe lagée leumô dan bubiri kamoe, na kheueh peue-peue mantong nyang ka geu-useuha lé indatu kamoe yohphon jamén ilée. 25 Dan, bah kheueh kamoe nyang tanggong malée keuhai atranyoe, dan bah kheueh kamoe jeuet keu ureuëng hina. Sabab, kamoe dan indatu kamoe ka meudesya ubak TUHAN Po teu Allah kamoe, dan hántom na taát ubak peue nyang ka geupeurintah lé Gobnyan."

Nabi Yeremia 4

1 TUHAN meufeureuman, "Umat Israel, meunyoe gata keuneuk tagisa, tawoe kheueh ubak Ulôn. Taböih kheueh leubeh ilée beurala-beurala nyang Ulôn banci nyan, dan seutia kheueh ubak Ulôn. 2 Meunyoe gata meusumpah deumi nan Ulôn dan gata udeb jujoe ade dan beuna, dan bandum bansa jilakée ubak Ulôn mangat ubak awaknyan pih Ulôn bri beureukat, dan awaknyan teuma jipujo Ulôn." 3 TUHAN meufeureuman ubak peunduduek Yehuda dan Yerusalem, "Tapeubuet kheueh laju tanoh gata nyang gohlom teupeubuet; bék kheueh tatabu bijéh bak teumpat seunaman nyang timoh meuduro. 4 Tamat kheueh janji gata deungon Ulôn, TUHAN gata, dan peu khusos kheueh droe gata nyan keu Ulôn, he peududuek Yehuda dan Yerusalem. Meunyoe hana, beungéh Ulôn meutamah-tamah dan tutong lagée apui nyang hana hase teupeulon lé soe mantong. Banmandum nyan keunong u ateueh gata sabab buet-buet gata nyang jeuhet." 5 Yueb kheueh beureuguih bansaboh nanggroe! Teumawök kheueh deungon su nyang glah dan nyareng. Gatayue kheueh peunduduek Yehuda dan Yerusalem jiplueng ubak banda-banda nyang meukuta. 6 Tunyok kheueh rot u Sion, bukét TUHAN, bubagaih kheueh meungungse, bék seungab mantong. TUHAN teungoh geupeutron mala peutaka dan keuhancoran nyang raya teuka di utara. 7 Lagée singa jiteubiet nibak teumpat jimusöm meunan kheueh teuma ka jijak bandum nyang peupunah bansa-bansa nyang teuka keuneuk jak poh habéh bubena Yehuda. Banda-banda Yehuda teuma jeuet keu rungka-rungka saboh teumpat nyang hana jikeumiet lé manusia. 8 Sabab nyan, tamo dan meuba-e kheueh, tasôk kheueh ija krong tanda meuduka. Sabab beungéh TUHAN nyang seu-uem lagée apui hu gohlom cit surot di Yehuda. 9 TUHAN meufeureuman, "Nibak uroenyan raja-raja dan peujabat-peujabat rhot seumangat; teungku-teungku imeum yo meugram-gram dan nabi-nabi teukeujot lumpah na." 10 Laju ulôn peugah, "TUHAN Nyang Mahamanyang, Droeneueh ka neutipée ureuëng Yehuda dan peunduduek Yerusalem! Droeneueh neupeugah bahwa na damé, padahai bak saátnyoe nyawöng kamoe teuancam ngon peudeueng." 11 Saat jih teuma trok ureuëng Yehuda dan peunduduek Yerusalem meuteumé haba bahwa angén seu-uem nyang teuka rot padang pasi teungoh jipot ubak awaknyan. Angén nyan bukon angén biasa nyang jipupo sikhém, 12 teuma na kheueh angén badée nyang teuka ateueh peurintah TUHAN keudroe keu teupeu rhot huköman u ateueh umat Gobnyan. 13 Kalon musoh teuka lagée awan. Geuritan-geuritan prang lagée angén badée, guda-guda jih nyan leubeh bagah nibak cicém rajawali. Wah, tanyoe ceulaka! Tanyoe binasa! 14 Yerusalem, taböih kheueh nyang jeuhet nyang na nibak até gata mangat gata geupeuseulamat. Trok án pajan pikeran-pikeran nyang jeuhet nyan keuneuk gata keubah lam até gata? 15 Di banda Dan, dan di gunong-gunong Efraim ka teuka utosan-utosan nyang jiba haba brok. 16 Awaknyan jipeuingat bansa-bansa dan jibri tée ubak peunduduek Yerusalem bahwa musoh teungoh teuka di nanggroe nyang jiôh. Awaknyan jidumpék deungon prang teuhadab banda-banda Yehuda 17 dan jikeupong Yerusalem lagée ureuëng keumiet ladang. Banmandum nyan teujadi sabab bansa Yehuda ka beurontak ubak TUHAN. TUHAN ka geupeugah haba. 18 Yehuda, gata keudroe kheueh nyang peuteuka beuncana nyan u ateueh droe gata. Cara udeb gata dan buet-buet gata nyang peusabab banmandum peundeuritaan nyan teutôb-tôb até gata. 19 Padub na até lôn seungsara, han ék le lôn teuen meudeurita. Ulôn hana hase lôn peuteunang droe jantong lôn meudok-dok lam dada, sabab lôn deungoe beureuguih jimeusu dan dumpék prang su meutaga. 20 Beuncana teuka hana putôh-putôh sampoe hanco bansigom nanggroe. Hana teusangka-sangka khimah lôn jipeurusak, ija-ija jih habéh jipriek-priek. 21 Sampoe án pajan harôh lôn kalon ureuëng jimuprang udeb maté? Sampoe án pajan harôh lôn deungoe su beureuguih meutaga-taga? 22 TUHAN meufeureuman, "Bangai lumpah na umat Ulôn nyan, awaknyan hana jituri Ulôn. Awaknyan lagée aneuëk-aneuëk manyak nyang beubal hana meuguna hana jipeuphom meubacut teuma; malem nibak buet jeuhet, gagal bak buet nyang jroh." 23 U arah bumoe mata lôn pandang, leumah jih söh dan geursang, u arah langét lôn tangah, wahai, hana nyang meucahya. 24 Lôn kalon gunong dan bukét-bukét nyang lambong meuguncang-guncang hebat lumpah na. 25 Lôn kalon, hana manusia, cicém pih ka jipo banmandum. 26 Tanoh nyang subô ka jeuet keu guron nyang tho, banda-banda hanco ka jeuet keu rungka-rungka, sabab TUHAN beungéh raya ubak umat Gobnyan. ( 27 TUHAN geupeugah bahwa bansigom donya jeuet keu padang pasi, teuma Gobnyan hana geupeuhanco banmandum nyan.) 28 Bumoe wéueh até, langét seupôt buta. TUHAN ka geupeugah haba dan hana geu ubah reuncana Gobnyan. Gobnyan ka geucok keuputosan dan hana geusurot bahpi silangkah. 29 Teudeungoe su riôh ngon subra pasokan meuguda dan pasokan peumanah, dan soe mantong ureuëng laju jiplueng deungon nafáh meuseungak-seungak. U dalam gle awaknyan jipeulueng droe, dan bukét-bukét batée laju jilisi. Banmandum banda ka jeuet keuseungue, hana ureuëng nyang jitem tinggai bak teumpat nyan le. 30 He Yerusalem, gata ka jitinggai dan hana hase tapeubuet sapeue! Keupeue guna jih gata ngui bajée mirah dan tahias droe ngon méuh dan pirak, dan ta uke mata deungon cilak? Hana guna gata peulagak droe, sabab mandum geunaséh gata ka hana jitueng le keu gata, malah awaknyan jimeuheuet keuneuk bôt nyawöng gata. 31 Na lôn deungoe su ureuëng apoh apah nyang lumpah wéueh lagée su inong nyang keuneuk peulahé aneuëk; lagée inong muda nyang jipeulahé aneuëk phon, meunan kheueh su jimoe Yerusalem nyang meusak nafáh. Jaroe jihnyan meugawang-gawang dan jihnyan apoh-apah, "Ceulaka kheueh ulôn -- ulôn keuneuk jipoh maté lé musoh!"

Nabi Yeremia 5

1 He peunduduek Yerusalem, taja-jak kheueh nibak jalan-jalan nyang na di banda gata! Mita kheueh dipat mantong, dan ngieng kheueh ngon mata ulée gata keudroe. Peureksa kheueh nibak padang-padang banda peu kheueh na meusidroe ureuëng nyang jujoe nyang jiuseuha seutia ubak Po teu Allah. Meunyoe na, TUHAN geupeu amphon keu Yerusalem. 2 Gata tapeugah bahwa gata taseumah TUHAN, padahai gata hana meuniet nyang lagée nyan. 3 Nyang sikeubit jih nyang geulakée lé TUHAN na kheueh keuseutiaan. TUHAN geuseunuet gata, teuma gata hana tapako. Gobnyan geupeureumok gata, teuma gata hana tatem geupeuruno. Gata kreueh that ulée, dan hana tatem meutobat ubak desya-desya gata. 4 Ulôn kupike, "Ah, awaknyan na kheueh rakyat jeulata nyang hana jiteupeue sapeue. Awaknyan meutindak bangai, sabab hana jiteupeue peue nyang geulakée dan nyang geutuntot lé TUHAN Po teu Allah nibak awaknyan. 5 Bah kheueh ulôn jak ubak ureuëng-ureuëng rayeuk, dan lôn meututoe deungon awaknyan. Pasti awaknyan jiteupeue peue nyang geulakée dan geu tuntot lé TUHAN Allah nibak awaknyan." Teuma, awaknyan banmandum hana cit jitem geupeurintah lé TUHAN; awaknyan hán jitem taát ubak Gobnyan. 6 Nyang kheueh sabab jih awaknyan jikeuneuk poh maté lé singa-singa nyang na di dalam uteun, jipriek-priek lé srigala nyang na di padang pasi. Rimueng tutul meuwot-wot keudeh keunoe jijak mita uempeun rab binéh-binéh banda awaknyan, dan soe mantong ureuëng nyang jiteubiet laju jiteugöm. Banmandum nyan teujadi sabab awaknyan ka le that meudesya, dan hana teukira le jipeulikot Po teu Allah. 7 TUHAN meufeureuman, "Keupeue Ulôn harôh Lôn peuamphon banmandum desya-desya umat Lôn? Awaknyan ka jitinggai Ulôn dan jiseumah nyang kon Po teu Allah. Ulôn nyang bri peunajoh ubak awaknyan sampoe awaknyan troe, teuma awaknyan teutab jipeubuet jinah, dan kayém that jijak saweue rumoh-rumoh inong lunte. 8 Awaknyan lagée guda agam nyang teumbon dan teuga nafeusu beureuhi jih; maséng-maséng jimeuheuet ubak peurumoh rakan jih. 9 Peu kheueh hana pantaih Ulôn huköm bansa nyang lagée nyan dan Lôn balaih peue nyang ka jipeubuet lé awaknyan? 10 Ulôn Lôn kirém musoh keu jijak cacah lampôh anggô awaknyan, teuma kon keuteupeu habéh. Ulôn ku yue musoh-musoh nyan keujigunteng carang-carang anggô awaknyan, sabab carang-carang nyan kon atra Lôn. 11 Umat Israel dan Yehuda bit-bit that ka jikhianat Ulôn. Ulôn, TUHAN, ka Lôn peugah haba." 12 Umat TUHAN jipeugah nyang hana beutôi keuhai TUHAN. Awaknyan jipeugah, "Ah, Gobnyan hana geupeubuet sapeue ateueh geutanyoe. Geutanyoe hana keunong bala dan hana teuma ta rasa prang meunan cit hana tarasa deuk. 13 Anggab kheueh nabi-nabi nyan angén jak, sabab peusan TUHAN hana bak awaknyan." 14 Laju TUHAN Nyang Mahakuasa meufeureuman ubak ulôn, "He Yeremia, sabab awaknyan ka jipeugah haba nyang lagée nyan, awaknyan keunong bala nyang meunurot awaknyan hana teujadi. Ulôn kupeujeuet tutoe haba Lôn lagée apui hu lam babah gata. Bansa nyoe jeuet lagée kayée nyang teutot, dan apui nyan jitot awaknyan sampoe habéh." 15 He bansa Israel, TUHAN teungoh geupeuteuka saboh bansa di nanggroe nyang jiôh keujijak prang gata. Bansa nyan ka na yoh awai ilée, basa jih hana gata teupeue. Awaknyan teuga lumpah na, 16 dan ureuëng-ureuëng timbak aneuk panah awaknyan gagah dan beuhe; awaknyan jipoh maté ureuëng laén hana gaséh sayang. 17 Awaknyan jipeuhabéh bubena hase tanoh dan peunajoh gata dan aneuëk-aneuëk gata jipoh maté. Beulatang peulara lagée leumô ngon bubiri gata jisie lé awaknyan, meunan cit deungon lampôh-lampôh anggô dan bak ara jikôh jipeuranab sampoe habéh. Banda-banda nyang meukuta nyang gata peubangga jipeuhanco sapan sapa. 18 TUHAN meufeureuman, "Bahpi lagée nyan, bak watéenyan umat Ulôn hana Lôn peubinasa. 19 Teuma meunyoe awaknyan jitanyong pakon Ulôn peubuet banmandum nyan ateueh awaknyan, tapeugah kheueh he Yeremia, bahwa lagée tôh awaknyan jitinggai Ulôn di nanggroe awaknyan keudroe keujijak meungabdi ubak dewa-dewa bansa laén, meunan cit awaknyan jeuet keu namiet ureuëng-ureuëng aséng di nanggroe laén." 20 TUHAN geuyue bak ulôn mangat lôn peutrok haba nyoe ubak keuturonan Nabi Yakub nyang tinggai di Yehuda, 21 "Deungoe kheueh nyoe, he gata ureuëng bodoh dan bangai! Nibak gata na mata teuma hana tameungieng, na geulinyueng teuma hana tadeungoe! 22 Ulôn kheueh TUHAN; pakon gata hana teumakot keu Ulôn? Nyang sikeubitjih gata yo keu Ulôn! Ulôn kheueh nyang peujeuet panté sampoe jeuet keubataih laôt nyang hana hase jilewat keu siumu masa. Laôt jeuet meugeulora dan geulumbang jeuet meungamuk, teuma hana jeuet jiliwat bak bataih nyang ka Lôn peuteuntée nyan. 23 Teuma gata teutab kreueh ulée dan teutab talawan Lôn; gata ka meunyeuleweng dan tatinggai Ulôn. 24 Hántom na taingat keu tahoreumat Ulôn, padahai Ulôn kheueh nyang kirém ujeuen, bah kheueh bak awai meunan cit bak akhé musém ujeuen. Dan Ulôn cit nyang bri keugata musém keumeukoh óh trok bak thon. 25 Teuma desya-desya gata nyan kheueh nyang peuhalang banmandum nyang gét nyan sampoe hana tateumé rasa. 26 He umat Lôn, lamkawan gata na ureuëng-ureuëng nyang jeuhet. Lagée ureuëng nyang jipreh taron teungoh teupasang keu teujak drob cicém, meunan kheueh awaknyan jipasang taron keu jijak drob manusia. 27 Lagée ureuëng jak jeue cicém sampoe cicém nyang jiteumé nyan laju jipasoe lam cintra, meunan kheueh teuma awaknyan jipasoe lam rumoh jih peunoh deungon barang-barang hase teumipée. Meunan kheueh awaknyan jeuet keu ureuëng meukuasa dan kaya-kaya, 28 lom teumbon ngon makmu. Keujeuhetan awaknyan ka hana le bataih. Awaknyan hana le jimeubuet ade ubak peukara aneuëk-aneuëk yatém ngon meuntui, dan hana jibila hak ureuëng-ureuëng nyang keunong tindéeh. 29 Teuma, Ulôn, TUHAN, Lôn huköm awaknyan deungon buet jih banmandum nyan; Ulôn kubalaih peue-peue nyang ka jipeubuet lé bansa nyoe. 30 Sapeue-sapeue nyang luwabiasa dan teumakot that-that meunan cit gli that teujadi di nanggroe nyoe: 31 nabi-nabi geuseumeungeut, sulet, teungku-teungku imeum jipeutimang umat meunurot keuheundak droe jih keudroe dan gata umat Ulôn galak ubak hai nyang lagée nyan. Teuma peue nyang gata peubuet meunyoe trok bak uroe akhé?"

Nabi Yeremia 6

1 Tajak kheueh meungungse, he ureuëng-ureuëng Benyamin! Tinggai laju Yerusalem! Tayueb beureuguih di Tekoa, dan gata peuhu apui sibagoe tanda isyarat di Bet-Kerem! Beuncana dan peutaka nyang paleng raya teuka nibak utara. 2 Banda Sion gagah lumpah na, teuma TUHAN teutab geupeuhanco banda nyang ceudah nyan; 3 ureuëng-ureuëng matkuasa meukhimah disinan deungon sipa-i jih. Ban silingka banda awaknyan pasang khimah-khimah, maséng-maséng nibak teumpat nyang jigalak. 4 Awaknyan jipeugah, "Jak geutanyoe, meusiab kheueh tajak prang Yerusalem! Jak geutanyoe tajak seureubu teungoh mantong uroe nyoe!" Teuma awaknyan jipeugah, "Wah, ka teulat! Uroe ka jipeuphon seupôt, bubayang ka deuh panyang-panyang. 5 Bah kheueh geutanyoe prang bak watée malam, dan ta peuhanco bubena kuta-kuta banda nyan." 6 TUHAN Nyang Mahakuasa ka geupeurintah ubak peunguasa-peunguasa nyan mangat jijak koh bak-bak kayée dan jipeudong laju bukét-bukét peutahanan mangat jikeupong Yerusalem. TUHAN meufeureuman, "Banda nyoe Lôn huköm sabab lam banda nyan ka le that jipeubuet peunindasan. 7 Lagée mata ié teutab jipeuteubiet ié nyang jeureunéh, meunan kheueh banda nyan teutab jipeuhase keujeuhetan. Teuma haba keuhai keukeurasan dan peurampokan mantong nyang na Ulôn deungoe di banda nyan; luka-luka ngon peunyakét Lôn kalon dipat mantong. 8 He peunduduek Yerusalem, bah kheueh banmandum nyang phet-phet nyan jeuet keupeuingat nibak gata! Bék sampoe Ulôn tinggai gata dan Lôn peujeuet banda gata nyan lagée padang pasi nyang hana jikeumiet lé gob." 9 TUHAN Nyang Mahakuasa meufeureuman ubak ulôn, "Israel teucukoe sampoe habéh lagée bak anggô nyang ka habéh teupot boh jih. Lé sababnyan, teungoh mantong na watée, peuseulamat kheueh nyang mantong na tinggai." 10 Ulôn jaweueb, "TUHAN, ubak soe nyang harôh lôn peugah haba, dan soe nyang harôh ulôn peuingat? Awaknyan kreueh that ulée dan hánjitem pakoe peue nyang ulôn peugah. Awaknyan jipeukém dan jibanci ubak peusan Droeneueh nyang ulôn peusampoe keu awaknyan. 11 Keuhai beungéh Droeneueh keu awaknyan meunan cit lam até lôn ju lagée ngéue apui, TUHAN! Payah that keu teupeuteun nyan." Laju TUHAN meufeureuman, "Taba kheueh laju meuhôb gata nyan ubak aneuëk miet nyang na jimeu-éun bak rot-rot euh dan u ateueh awak-awak muda nyang teungoh meugumpôi-gumpôi, agam dan inong teuma teudrob, dan ureuëng nyang syiek pih hana teutinggai. 12 Rumoh awaknyan teujok keu ureuëng laén, meunan cit deungon ladang-ladang dan peurumoh-peurumoh awaknyan. Peunduduek nanggroe nyoe Lôn huköm. 13 Awaknyan banmandum, cut rayeuk jimita laba deungon cara nyang hana jujoe. Meunan cit nabi dan teungku imeum pi jipeungét gob. 14 Luhok ngon luka-luka umat Ulôn jianggab lé awaknyan luka ubit nyang hana meubahya, 'Ah, hana peue-peue nyan,' kheun awaknyan, 'banmandum gét dan aman.' Padahai meubacut pih hana. 15 Seuharôh jih awaknyan malée sabab ka jipeubuet banmandum nyang hina nyan. Teuma awaknyan teubai muka dan hana jiteupeue keu malée. Kareuna nyan awaknyan rhot lagée ureuëng laén; habéh kheueh riwayat awaknyan meunyoe Lôn huköm jihnyan. Ulôn TUHAN, ka Lôn peugah haba." 16 TUHAN meufeureuman ubak umat Gobnyan, "Gatadong kheueh nibak simpang-simpang rot, dan ngieng kheueh beujroh-jroh! Gata tanyong kheueh rot-rot nyang awai phon, dan nyang toh nyang paleng jroh lamkawan nyan. Taseutôt kheueh jalan nyan, mangat gata udeb teunang." Teuma awaknyan jipeugah, "Hana kamoe tem, kamoe hana peureulée kamoe seutôt rot ueh nyan!" 17 Laju TUHAN meu ulang-ulang geubaiát ureuëng-ureuëng jaga keuteupeu ingat ubak awaknyan beujideungoe su isyarat nyang teuyueb deungon beureuguih. Teuma umat jipeugah, "Kamoe hana watée keu kamoe deungoe nyan." 18 Sabab nyan TUHAN meufeureuman, "Deungoe nyoe, he bansa-bansa! Gata harôh tateupeue peue nyang teuma teujadi ateueh umat Lôn. 19 Ngieng kheueh, he bumoe! Umat Lôn hán jitem deungoe ajaran Ulôn dan hana taát ubak Ulôn. Sibagoe akibat nibak peue nyang ka jirancang lé awaknyan Ulôn peutron mala peutaka u ateueh awaknyan. 20 Keupeue guna jih keumeunyan nyang jiba lé awaknyan keu Ulôn nibak Syeba, atawa reumpah-reumpah di nanggroe nyang jiôh? Hana Lôn galak kuteurimong peuseumahan awaknyan. Dan hana galak Ulôn ubak peuseumahan keureubeuen-keureubeuen nyang teutot nibak awaknyan. 21 Ulôn teuma Lôn peusabab mandum awaknyan meugantoh dan reubah. Ayah dan aneuëk, rakan dan teutangga banmandum binasa." 22 TUHAN meufeureuman, "Saboh bansa nyang teuga teungoh jijak rot nanggroe nyang jiôh di utara. Awaknyan teuka keu jijak muprang. 23 Sinjata awaknyan panah ngon kapak; awaknyan keujam dan hán jituri amphon. Lagée su laôt nyang meugeulora meunan kheueh su tapak-tapak guda awaknyan nyang teungoh jipeuplueng deungon kancang jitiyeub keujijak peuhanco Yerusalem." 24 Ban jideungoe haba nyan, peunduduek Yerusalem laju hana meudaya. Awaknyan jiceukam lé peurasaan teumakot hana teukira, dan meudeurita lagée ureuëng inong nyang keuneuk peulahé aneuëk. 25 Awaknyan hana jijeuet tron u jalan atawa jijak u blang, sabab dipat mantong na musoh nyang meusinjata jiteumimbak ban galak droe. 26 TUHAN meufeureuman ubak umat Gobnyan, "Tangui laju ija krong óh lheuehnyan balek-balek laju lam abée. Meukabông kheueh dan meuba-e kheueh deungon peudeh lagée ureuëng nyang teungoh jipeumo aneuëk tunggai jih nyang maté, sabab ureuëng nyang peubinasa gata teuma jiseurang gata meudab-dab." 27 Laju TUHAN geupeugah ubak Yeremia, "Ujoe kheueh umat Ulôn, lagée gata ujoe logam. Seulidek kheueh tabaiát awaknyan! 28 Awaknyan banmandum beurontak nyang kreueh-kreueh ulée, lagée kreueh peurunggu dan beuso. Awaknyan meupeurangoe brok dan jijak ho-ho mantong nyang jitabu na kheueh haba feusuna nyang jipeubrok-brok ureuëng laén. 29 Beuso nyang teutot ka seu-uem that, teuma mék-mék logam hán cit jitem meulileh dan gadôh. Peucuma mantong umat Ulôn hana putôh-putôh teu ujoe keu teupeumurni, sabab ureuëng-ureuëng jihnyan nyang jeuhet hana ji use. 30 Awaknyan teuboh nan pirak nyang teuböih, sabab Ulôn, TUHAN, ka Lôn böih awaknyan."

Nabi Yeremia 7

1 TUHAN geuyue jak ulôn u Baét Gobnyan dan geuyuedong bak babah pintoe geureubang nyang jijak lé ureuëng Yehuda nyang teuka jijak seumayang. Gobnyan geuyue bak ulôn mangat lôn peumaklum peusan Gobnyan lagéenyoe keu awaknyan, "Ubah kheueh laju pi-e ngon cara udeb gata, dan Ulôn, TUHAN, Nyang Mahakuasa, Allah Israel Lôn idhin gata teutab tinggai disinoe. 4 Bék peucaya ubak ureuëng teumipée nyang jipeugah, 'Geutanyoe aman, sabab nyoe Baét TUHAN. Keubit nyoe Baét TUHAN!' 5 Ubah kheueh cara udeb gata dan pi-e gata. Peubuet kheueh nyang ade sidroe ngon nyang laén. 6 Bék le gata tindéeh ureuëng aséng, aneuëk yatém ngon meuntui dan inong-inong balée. Bék poh maté ureuëng hana meusalah di nanggroe nyoe. Bék seumah ilah-ilah laén, sabab hainyan teupeubinasa gata. 7 Meunyoe gata ta-ubah cara udeb gata dan pi-e gata dan tapiôh hana le tapeubuet banmandum nyan, Ulôn ku idhin gata teutab tinggai di nanggroe nyoe nyang ka Ulôn bri sibagoe tanoh pusaka ubak indatu gata. 8 Teuma, nyang sikeubitjih, sia-sia mantong gata peucaya ubak tutoe haba nyang sulet. 9 Gata taceumeucue, tapoh maté gob, meumukah, jeuet keusaksi nyang sulet, peuseumah keureubeuen keu Baal, dan gata seumah dewa-dewa nyang hana gata turi. 10 Óh lheueh banmandum nyan gata peubuet, gata tajak meuhadab Ulôn di sinoe, di Baét Ulôn keudroe, dan tapeugah, 'Kamoe aman!' Óh lheueh nyan gata peubuet lom buet gata nyang jeuhet nyan. 11 Peu kheueh gata anggab Baét Ulôn nyoe uempueng peurampok? Banmandum buet gata ka Ulôn kalon. 12 Tajak laju u Silo, banda nyang ilée Ulôn piléh jeuet keu teumpat iébadat ubak Ulôn. Ngieng kheueh peue nyang ka Ulôn peujeuet keu teumpat nyan sabab desya umat Ulôn Israel. 13 Bahpi ka meu ulang-ulang Lôn peugah haba ubak gata, gata teutab cit hán tatem deungoe. Gata tapeubuet banmandum desya nyan, dan hana taseuôt meunyoe Ulôn hôi. 14 Nyang kheueh, Baét Ulôn nyang gata peubangga nyan, dan teumpat nyang Ulôn bri keu indatu gata dan ubak gata nyoe teuma Ulôn peujeuet lagée Silo yoh masa ilée. 15 Gata Lôn use dikeue Ulôn lagée nyang ka lheueh Lôn use kawöm syedara gata, umat Israel." 16 TUHAN meufeureuman, "He Yeremia, bék kheueh neumeudoá keu ureuëng-ureuëng nyoe. Bék neulakée tulông atawa neumeudoá keu awaknyan; bék neupaksa Ulôn, sabab Ulôn hán kutem deungoe nyang teulakée nyan. 17 Gata ka neungieng keudroe peue nyang awaknyan peubuet di banda-banda Yehuda dan rot-rot di Yerusalem! 18 Aneuëk-aneuëk manyak jipeusapat kayée apui, di ureuëng agam jipeuhu apui, dan di ureuëng inong jilawok teupông keu teupeugét juadah keu dewi nyang awaknyan boh nan Ratu Syeuruga. Dan keu teupeusakét até Ulôn awaknyan jipeuseumah cit ié anggô keu ilah-ilah nyang laén. 19 Teuma nyang sikeubitjih, kon Ulôn nyang awaknyan peusakét, teuma droe jih keudroe sampoe awaknyan malée. 20 Ulôn, TUHAN Nyang Mahamanyang, Lôn peuteuka meureuka Ulôn nyang luwabiasa u ateueh rumoh iébadat nyoe, ateueh manusia dan beulatang, meunan cit ateueh bak-bak kayée dan hase bumoe. Beungéh Ulôn meutamah-tamah ju lagée apui nyang hán hase teupeulon." 21 TUHAN meufeureuman, "He umat Lôn, gata tateupeue bahwa keureubeuen nyang gata tot di ateueh miseubah harôh teutot sampoe habéh, dan keureubeuen nyang laén jeuet gata pajoh. Teuma Ulôn, TUHAN meufeureuman, hanapeue, jeuet tapajoh banmandum nyan! 22 Bak watée Ulôn ba indatu gata Lôn peuteubiet nibak nanggroe Meusé, Ulôn hana Lôn bri keu awaknyan peuratoran keuhai keureubeuen nyang teutot atawa keureubeuen-keureubeuen nyang laén. 23 Teuma Ulôn peurintah ubak awaknyan mangat awaknyan jitaát ubak Ulôn mangat Ulôn beujeuet keu Po teu Allah awaknyan, dan awaknyan jeuet keu umat Lôn. Ulôn yue bak awaknyan mangat udeb meunurot nyang Ulôn peurintah mangat awaknyan mubahgia. 24 Teuma awaknyan hánjitem deungoe dan hánjitem simak hainyan. Awaknyan nyang jiseutôt peue nyang jikheun lé até jih keudroe nyang kreueh dan jeuhet nyan. Awaknyan kon meutamah jroh teuma meutamah jeuhet leubeh nibak nyang ka. 25 Yoh phon indatu gata jiteubiet lam nanggroe Meusé sampoe nibak uroenyoe Ulôn sabe Lôn kirém hamba-hamba Lôn, nabi-nabi, keu gata. 26 Teuma hana nyang jitem deungoe atawa nyang tem simak. Gata meutamah kreueh ulée dan jeuhet leubeh nibak indatu gata." 27 Óh lheueh nyan TUHAN meufeureuman lom, "Lé sababnyan, he Yeremia, bahpi gata bri tée banmandum nyan ubak umat Lôn, awaknyan hana jipako tutoe haba gata. Bahpi gata tawök awaknyan, awaknyan teutab hán jitem seuôt. 28 Lé sababnyan, peugah kheueh ubak awaknyan bahwa awaknyan na kheueh saboh bansa nyang hánjitem taát ubak Ulôn, TUHAN, Po teu Allah awaknyan. Awaknyan hánjitem meuruno ubak huköman nyang ka jirasa keudroe. Keuseutiaan ubak Ulôn ka habéh, dan hana teupeugah le." 29 TUHAN meufeureuman, "Wahe peunduduek Yerusalem, meukabông kheueh! Koh kheueh ôk gata dan tiek kheueh keudeh! Meuca-e kheueh deungon ca-e meuba-e diateuh gle-gle gunong-gunong, sabab Ulôn, TUHAN, teungoh mureuka dan ka Lôn tulak gata banmandum nyan. 30 Ureuëng Yehuda ka jipeubuet buet nyang jeuhet. Beurala-beurala awaknyan nyang that Lôn banci ka jikeubah lam Baét Lôn, sampoe Baét Ulôn nyan ka jeuet keukuto. 31 Saboh miseubah nyang nan jih Tofet ka awaknyan peudong di Pantôn Hinom keu jipeuseumah aneuëk-aneuëk awaknyan sibagoe keureubeuen nyang teutot. Padahai Ulôn hántom Lôn yue ubak awaknyan mangat jipeubuet hai nyang lagée nyan, hántom na hai nyang lagéenyan teupike lam até Lôn. 32 Sababnyan, trok saát jih teumpat nyan hana le teuboh nan Tofet atawa Pantôn Hinom, teuma Pantôn Teumpat Seumeusie. Tanoh nyan teuma jeuet keu lampôh jrat sabab hana teumpat nyang laén. 33 Manyét-manyét awaknyan jeuet keupeunajoh cicém atawa beulatang buih nyang laén, hana ureuëng nyang jijeuet seugah. 34 Nanggroe nyoe jeuet keu padang tandus. Su keugeumbiraan dan su ureuëng meukeureuja meukawen Lôn peupiôh di banda-banda Yehuda atawa di jalan-jalan Yerusalem.

Nabi Yeremia 8

1 Bak masanyan tuleueng-tuleueng raja dan peujabat-peujabat peumeurintahan di Yehuda, meunan cit deungon tuleueng-tuleueng teungku-teungku imeum, nabi dan peunduduek Yerusalem nyang laén teupeuteubiet lam jrat awaknyan, 2 kon keu teupeusapat atawa teuseubée lom, teuma teupeubiyeu mantong teutiek-tiek ateueh tanoh sibagoe blôh nyang hana hareuga. Tuleueng-tuleueng awaknyan meutabu dan meusiseue dikeue mata uroe, buleuen dan bintang nyang awaknyan peudewa, awaknyan cinta, peutimang, seumah dan lakée peutunyok. 3 Dan ureuëng-ureuëng nyang mantong udeb nibak bansa nyang jeuhet nyoe nyang ka Ulôn peucre bre ho-ho mantong leubeh galak maté nibak udeb. Ulôn, TUHAN Nyang Mahakuasa, ka Lôn peugah haba." 4 TUHAN meufeureuman ubak ulôn geuyue peusampoe nyang lagée nyoe keu umat Gobnyan, "Meunyoe na ureuëng reubah, teuntée ureuëng nyan jibeudôh lom, dan meunyoe na ureuëng nyang sisat nibak rot ueh raya, teuntée ureuëng nyan jiwoe lom. 5 Teuma pakon gata, hai umat Lôn, hana putôh-putôh meunyeuleweng dan tatinggai Ulôn? Gata tamumat khong that nibak beurala gata, dan hán tatem woe ubak Ulôn! 6 Ulôn ka Lôn deungoe gét-gét, teuma gata hana tamariet lagée nyang sibeuna jih. Hana meusidroe pih nibak gata teulah bak buet jih nyang jeuhet. Hana nyang peugah, 'Peue salah ulôn?' Gata banmandum taseutôt rot droe gata keudroe lagée guda nyang teungoh maju dalam mideuen prang. 7 Cicém cang iriek pih jiteupeue watée jih keujiwoe; teukukur, cicém ujeuen dan cicém pala pih jiteupeue pajan masa jih jijak jiminah teumpat. Teuma gata, nyang umat Lôn, hana taturi huköm-huköm nyang Ulôn bri ubak gata. 8 Beuhe that gata peugah bahwa gata bijaksana, dan tateupeue huköm-huköm Lôn! Cuba gata kalon pakriban huköm-huköm Lôn nyan jiubah lé ureuëng-ureuëng nyang malem agama nyang curang! 9 Ureuëng nyang malem-malem nyang na di lamkawan gata teuma teupeumalée. Awaknyan gadôh akai dan teujeubak. Awaknyan hánjitem teurimong peue nyang Ulôn naseuhat; jinoenyoe, keubijaksanaan peu kheueh nyang mantong na nibak awaknyan? 10 Sababnyan Ulôn kubri lampôh awaknyan keu toke tanoh nyang laén, dan peurumoh awaknyan keu ureuëng laén. Awaknyan banmandum, cut rayeuk, jimita laba deungon jalan nyang hana jujoe. Meunan cit nabi dan teungku imeum pih jipeungét gob. 11 Luka-luka nibak umat Lôn jianggab lé awaknyan luka-luka bacut sagai. 'Ah, hana peue-peue nyan,' jipeugah lé awaknyan, 'banmandum gét-gét dan aman.' Padahai meubacut pih kon lagée nyan. 12 Meunurot Lôn, sikeubit jih gata malée sabab tapeubuet bandum nyang hina nyan! Teuma gata teubai muka dan hana tateupeue keu malée. Sababnyan gata rhot lagée ureuëng nyang ka rhot; habéh kheueh riwayat gata meunyoe Ulôn huköm gata. 13 Meuharab that Ulôn keuneuk peusapat umat Lôn lagée ureuëng jipeusapat hase tanoh jihnyan. Teuma, umat Lôn lagée bak anggô dan bak ara nyang hana muboh, dan ôn-ôn jih pih habéh layée. Nyang kheueh sabab jih lôn bri keu ureuëng aséng teuka dan jikuasa nanggroe awaknyan. Ulôn, TUHAN, ka Lôn peugah haba." 14 "Pakon geutanyoe hana tapeugot sapeue?" jipeugah lé umat Po teu Allah. "Jak geutanyoe meusajan-sajan tajak meungungse ubak banda-banda nyang na kuta, mangat tanyoe maté disinan. TUHAN Po teu Allah geutanyoe ka geupeuputôh bahwa geutanyoe harôh binasa. Gobnyan ka geubri keu geutanyoe racön jeuet tajieb sabab geutanyoe meudesya ubak Gobnyan. 15 Sia-sia mantong geutanyoe taharab damé dan masa teupeupuléh, sabab nyang na, na kheueh keukerasan. 16 Musoh ka trok u banda Dan; su geunta guda awaknyan ka teudeungoe, dan bansaboh nanggroe ka teumakot. Musoh teuka keu jijak peuhanco banmandum nanggroe geutanyoe, meunan cit deungon banda geutanyoe dan banmandum peunduduek geutanyoe." 17 "Ngieng kheueh!" kheun TUHAN. "Jinoenyoe Ulôn kirém uleue-uleue lamkawan gata mangat jijak kab gata, uleue meubisa nyang hana hase deungon teurajah." 18 Até ulôn lagée teu ireh-ireh dan lumpah that seudeh, nestapa lôn hana teu-ubat. 19 Deungoe kheueh, bansaboh nanggroe ka meudeungong geumeuciek bansa lôn nyang teumanyong, "Peu kheueh hana le TUHAN di Sion? Dipat kheueh raja geuhnyan jinoe?" Geujaweueb lé TUHAN, raja awaknyan, "Pakon gata sujut ubak dewa-dewa nyang meubacut pih hana meuguna? Pakon gata peusakét até Ulôn deungon cara taseumah beurala-beurala?" 20 Umat Israel jimeuhôi, "Musém keumeukoh dan musém jidong khueng jinoenyoe ka hana le, teuma geutanyoe gohlom cit seulamat." 21 Até lôn reumok sabab bansa lôn brat that sakét; ulôn meukabông dan apoh apah. 22 Peu kheueh geurangan jih nyang jeuet keusabab sampoe bansa lôn jinoenyoe gohlom cit puléh? Peu kheueh bansaboh Gilead, hana dokto atawa ubat?

Nabi Yeremia 9

1 Keubit gét that meunyoe lam ulée lôn peunoh deungon ié lagée lam mon, dan mata lôn lagée mata ié nyang hana putôh-putôh ji teubiet ié! Teuma ulôn hase lôn mo ba-e uroe ngon malam, lôn peuba-e ureuëng-ureuëng nyang saboh bansa deungon lôn nyang ka jipoh lé lawan. 2 Meunyoe di padang pasi hase lôn teumé teumpat meudom keu ureuëng nyang teungoh jijak jiôh! Teuma ulôn kutinggai bansa lôn, dan lôn jak keudeh mangat jiôh nibak awaknyan. Awaknyan ka jikhianat banmandum nyan, saboh kawan ureuëng nyang hana seutia, 3 dan sabe lam siab keuji meusulet. Bansaboh nanggroe, nyang beuna hana meukuasa, teuma nyang hana jujoe nyan nyang meuraja lela. 4 Keu rakan, soe mantong ureuëng harôh waspada dan syedara droepi hana jeuet teupeucaya. Sabab, lagée Nabi Yakub meunan kheueh deungon awaknyan, maséng-maséng jipeungét syedara jih. Soe mantong ureuëng jijak ho nyang galak keujijakba fiteunah dan haba dusta. 5 Banmandum saléng teumipée, hana nyang jujoe bak peugah haba. Babah awaknyan ka lazem jipeugah nyang sulet, awaknyan hana hase jitinggai desya nyang ka na. Keukeujaman deumi keukeujaman, teumipée deumi teumipée hana putôh-putôh jipeubuet lé awaknyan, awaknyan meubacut pih hana jiteurimong TUHAN. 7 Sabab nyan TUHAN Nyang Mahakuasa geupeugah, "Lagée beuso, umat Ulôn Lôn ujoe mangat awaknyan jeuet keumurni. Peue lom nyang jeuet Ulôn peubuet keu umat Lôn nyang ka jipeubuet buet nyang jeuhet? 8 Tutoe haba awaknyan lumpah that meubahya, hase jipeumaté lagée aneuk panah nyang meubisa. Tutoe-tutoe haba awaknyan sulet mandum. Nariet awaknyan maméh ngon meunarek, teuma nyang sikeubit jih awaknyan jipasang taloe taron. 9 Ék kheueh nyoe ateueh bansa nyang lagée nyoe hana Lôn peurhot huköman nyang paih? Ulôn balaih buet-buet awaknyan; Ulôn, TUHAN, ka Lôn peugah haba!" 10 Ulôn, Yeremia lôn peugah, "Ulôn keuneuk mo meuba-e dan meukabông sabab blang naleueng di guron dan di gunong-gunong nyang ka tho kreng dan hana jijak lé gob. Su beulatang peulara hana teudeungoe le, cicém-cicém dan beulatang-beulatang nyang laén pih ka habéh jiplueng sapan sapa." 11 TUHAN ulôn geupeugah, "Yerusalem Lôn peujeuet keu rungka-rungka teumpat jimusöm asée uteuen. Banda-banda Yehuda jeuet keuseungue, teumpat nyang hana le ureuëng tinggai." 12 Laju ulôn tanyong, "TUHAN, pakon nanggroe nyoe neupeubiyeu tho kreng lagée padang pasi sampoe hana ureuëng nyang na jak rot nyan? Peu kheueh na nyang leubeh carông keu jimuphom banmandum nyoe? Ubak soe kheueh nyang jeuet ulôn bri peunjeulasan mangat jihnyan hase jipeusampoe ubak ureuëng laén?" 13 Geujaweueb lé TUHAN, "Nyan teujadi sabab umat Lôn hana le jipakoe keu ajaran-ajaran nyang ka Ulôn bri ubak jihnyan. Awaknyan hana taát ubak Ulôn, dan han jitem turot ubak peue nyang Ulôn peurintah. 14 Awaknyan kreueh that ulée dan jiseumah beurala-beurala Baal lagée nyang ka jipeurunoe lé indatu awaknyan. 15 Sabab nyan, deungoe kheueh peue nyang Ulôn, TUHAN Nyang Mahakuasa, Allah Israel, Lôn peubuet: keu umat Lôn Lôn bri seunaman nyang lumpah phet watée jipajoh dan racön mangat jijieb. 16 Awaknyan Lôn tabu lamkawan bansa-bansa nyang laén nyang hana jituri lé awaknyan meunan cit lé indatu awaknyan. Hana putôh-putôh Ulôn kirém keu awaknyan sipa-i-sipa-i nyang jijak prang awaknyan dan Ulôn peubinasa awaknyan sampoe án habéh." 17 TUHAN Nyang Mahakuasa meufeureuman ubak umat Gobnyan, "Tangieng kheueh peue nyang teungoh teujadi di nanggroe nyoe, dan beubagaih kheueh tajak tawök ureuëng meuba-e. Tayue kheueh awaknyan beujijak keunoe dan tayue meuca-e laju lagu meudukacita." 18 Ureuëng Yehuda jipeugah, "Neuyue laju awaknyan beubagaih jimeuca-e, lagu meukabông keu geutanyoe banmandum, mangat ié mata geutanyoe meuleng-leng ro nibak bibi." 19 Di Sion na teudeungoe su ureuëng mo ba-e, "Geutanyoe binasa dan lumpah brat jipeumalée. Nanggroe geutanyoe deungon brat até tanyoe tinggai disinoe, dan rumoh-rumoh geutanyoe habéh hanco pangpo hánmeuho saho." 20 Ulôn peugah, "Deungoe kheueh tutoe haba TUHAN, he ureuëng inong banmandum! Keu aneuëk-aneuëk dara gata tapeuruno laju ca-e mo ba-e, keu rakan-rakan gata ca-e dukacita. 21 Mawöt ka jitamong rot peuradeuen, ka jitamong lam meuligoe; laju jiteugöm aneuëk-aneuëk miet nyang na bak rot dan ureuëng-ureuëng muda nyang na lam blang raya. 22 Manyét-manyét ka reubah meulampa di jeueb-jeueb sagoe lagée broh-broh nyang meutabu di ateueh tanoh; lagée gandom nyang ka teukôh laju jitinggai hana jihiro dan hana le jipeusapat lom teuma. Nyan kheueh Peusan TUHAN nyang harôh ulôn peusampoe." 23 TUHAN meufeureuman, "Ureuëng áref hana jeuet bangga sabab keubijaksanaan jihnyan, ureuëng teuga sabab teunaga jihnyan, dan ureuëng kaya sabab hareuta jihnyan. 24 Soe nyang keuneuk meubangga keuhai sapeue-peue, harôh kheueh jimeubangga bahwa jih jituri dan jimuphom Ulôn; bahwa jihnyan jiteupeue Ulôn na gaséh keu siumu masa, dan Ulôn peudong huköm dan keuadelan di ateueh rhueng donya. Banmandum nyan keubit that galak até Ulôn. Ulôn, TUHAN, nyang peugah hainyan." 25 TUHAN meufeureuman, "Teuma trok watéejih Ulôn huköm ureuëng nanggroe Meusé, Yehuda, Edom, Amon, Moab, dan peunduduek padang pasi nyang jigunteng paneuk ôk gobnyan. Awaknyan banmandum teupeukatan saban lagée ureuëng Israel, teuma bah kheueh awaknyan meunan cit deungon bansa Israel jipeusaneut saban cit lagée ureuëng-ureuëng nyang hana meukatan, sabab awaknyan hana jitaát ubak peujanjian nyang teupeulambang nibak meukatan nyan."

Nabi Yeremia 10

1 He umat Israel, deungoe kheueh peusan TUHAN ubak gata. 2 Gobnyan meufeureuman, "Bék taseutôt keubiasaan bansa-bansa laén, dan bék yo gata watée takalon tanda-tanda nyang na di langét nyang lumpah jitakot lé bansa-bansa nyan. 3 Adat istiadat bansa-bansa nyan meubacut pi hana meuguna. Awaknyan jijak teubang bak-bak kayée di uteun, dan laju jiyue peubuet ubak utôh kayée deungon alat beujeuet keupatong beurala. 4 Óh lheuehnyan patong beurala nyan laju jipeungui deungon méuh dan pirak, laju jipeukong deungon labang mangat bék reubah. 5 Patong-patong beurala nyan na kheueh lagée patong-patong ureuëng pura-pura nyang na di lampôh-lampôh timon. Awaknyan hana jeuet jipeugah haba, dan hana hase jibot langkah, dan harôh teubeuôt. Bék teumakot keu awaknyan, sabab awaknyan hana hase jipeubuet jeuhet ateueh gata; meunan cit deungon jipeubuet nyang jroh nyan pi hana hase." 6 TUHAN Nyang mulia, Droeneueh hana ngon peusa, teutab agong dan peunoh kuasa. 7 Soe mantong nyang hanjitem taqwa ubak Droeneueh, raja sigala bansa? Keubit, Droeneueh patot that teuhoreumat. Nibak bandum nyang carông lamkawan bansa-bansa nibak bandum raja-raja awaknyan, hana meusidroe pih nyang jeuet teupeusaban deungon Droeneueh, ya TUHAN. 8 Awaknyan banmandum bangai sabab dewa awaknyan na kheueh kayée nyang hana meuguna, dan hana jeuet jipeuruno nyang meumanfaát. 9 Jihnyan teulapeh deungon méuh dan pirak nyang teuba di Tarsis dan banda Ufas, banmandum buet jaroe bubena seuniman dan pande méuh. Peukayan awaknyan nibak ija ungu tuha dan ungu muda, nyang jipeubuet lé ureuëng ahli teumpeun deungon seusama. 10 Teuma, Droeneueh, ya TUHAN, Po teu Allah nyang beutôi, Allah nyang bri udeb, raja keukai. Meunyoe Droeneueh beungéh, bumoe nyoe meuhayon, dan meunyoe Droeneueh teuka geungeuen dumna bansa hán ék jiteun. ( 11 Gata he umat, harôh tabri tée ubak awaknyan bahwa dewa-dewa nyang hana jicebta langét dan bumoe nyan geupeubinasa. Awaknyan leunyab nibak muka bumoe.) 12 TUHAN geucebta bumoe deungon kuasa Gobnyan, geupeugét donya deungon hikeumat, dan geuleueng langét deungon ákai budoe Geuh. 13 Teuma deungon geubri peurintah, meudeungong kheueh ié di cakrawala. Nibak meubagoe ujong bumoe geupeuteuka awan, dan geupeujeuet kilat meuble cahya didalam ujeuen, dan geukirém angén bak teumpat teukeubah. 14 Ban geukalon banmandum nyan, teuka kheueh sadar manusia, bahwa jihnyan bangai dan hana peungeurtian. Bubena pande méuh lumpah that malée, sabab patong beurala nyang jipeugét nyan peuleusu dan hana teuma meunyawöng. 15 Beurala-beurala nyan hana meuguna, patot that teu peukém dan jihina. Óh ka trok bak watée jih awaknyan teuma binasa. 16 Po teu Allah Nabi Yakub hana lagée beurala-beurala nyan; Gobnyan nyang cebta peue-peue nyang na. Nan Gobnyan na kheueh TUHAN Nyang Mahakuasa; Gobnyan ka geupiléh Israel jeuet keu umat Gobnyan. 17 He Peunduduek Yerusalem, gata jikeupong! Sabab nyan, meukeumah kheueh laju! 18 Goenyoe TUHAN geu-geulawa banmandum bansa Yehuda u teumpat nyang teuböih; gata banmandum geupeuhanco sapan sapa. Nyan kheueh peusan TUHAN. 19 Peunduduek Yerusalem laju jiteumawök, "Kamoe ka habéh luka ngon luhok hana jitem puléh. Yoh watée ilée kamoe pike bahwa deurita nyoe ék kamoe tanggong, rupari hana. 20 Khimah kamoe habéh rusak, dan talo-talo jih ka habéh putôh banmandum. Hana le nyang hase jipeudong khimah dan jipasang ija-ija jih, sabab aneuëk-aneuëk miet ka habéh jijak." 21 Laju lôn jaweueb, "Bangai that peumimpén-peumimpén geutanyoe nyan. Awaknyan hana jilakée peutunyok ubak TUHAN, nyan kheueh sabab jih awaknyan hana meuhase, dan geutanyoe ka meutabu keudeh keunoe. 22 Deungoe kheueh! Na lôn deungoe haba bahwa na saboh bansa di utara jipeuteuka keususahan ubak geutanyoe. Buet sipa-i jih sampoe bubena banda-banda di Yehuda ka habéh seungue dan hana le ureuëng duek nibak banda-banda nyan. Bubena asée-asée uteun ka habéh jimusöm disinan." 23 TUHAN, lôn kuteupeue hana meusidroe pih nyang meukuasa jipeuteuntée nasib jih atawa jikeundali jalan udeb jih. 24 Neuseunuet kheueh kamoe, ya TUHAN, teuma bék deungon peunyeunuet nyang sakét hana teukira. Dan bék teuma neuhuköm kamoe meunyoe Droeneueh teungoh lam beungéh, sabab, meunyoe lagée nyan, ka pasti kamoe nyoe binasa banmandum. 25 Neuba kheueh meuhôb Droeneueh u ateueh bansa-bansa nyang hana jiaku Droeneueh dan nyang hánjitem meubakti ubak Droeneueh. Sabab awaknyan ka jipeubinasa bubena umat Droeneueh dan jipeuhanco nanggroe kamoe.

Nabi Yeremia 11

1 TUHAN meufeureuman ubak ulôn, 2 "Gata simak kheueh syarat-syarat peujanjian nyang Ulôn peugét deungon umat Lôn. Neubri tée kheueh ubak ureuëng Yehuda dan peunduduek Yerusalem 3 bahwa Ulôn, TUHAN Po teu Allah Israel, Lôn kutok soe mantong ureuëng nyang hana jitem taát ubak syarat-syarat peujanjian Lôn nyan. 4 Janji nyan ka Ulôn peuna deungon indatu awaknyan bak watée awaknyan Ulôn ba peuteubiet di nanggroe Meusé, nanggroe nyang lagée nuraka nibak awaknyan. Ulôn yue awaknyan mangat taát ubak Ulôn dan jipeubuet peue mantong nyang ka Ulôn peurintah. Jinoenyoe ka cit Ulôn peugah ubak ureuëng Yehuda dan ubak peunduduek Yerusalem bahwa meunyoe awaknyan taát ubak Ulôn, awaknyan jeuet keu umat Lôn dan Ulôn jeuet keu Allah awaknyan. 5 Meunyoe awaknyan jipeubuet banmandum nyan, Ulôn Lôn peuteupat janji Lôn ubak indatu awaknyan bahwa nanggroe nyang subô dan makmu, nyang bak saát nyoe awaknyan duek nyan, Ulôn jok keu awaknyan." Ulôn jaweueb, "Gét, TUHAN." 6 Laju TUHAN meufeureuman ubak ulôn, "Tajak kheueh u banda-banda nyang na di Yehuda, dan ubak rot-rot nyang na di Yerusalem. Peutrok kheueh peusan Lôn nyoe ubak ureuëng-ureuëng nyang na disinan. Tayue bak awaknyan jipeurati dan jitaát ubak syarat-syarat peujanjian Lôn. 7 Bak watée Ulôn kuba indatu awaknyan peuteubiet lam nanggroe Meusé, deungon teugaih Ulôn peuingat ubak awaknyan mangat jitaát ubak Ulôn. Sampoe nibak uroenyoe pih Ulôn teutab Lôn peuingat umat Lôn keuhai nyang nyan, 8 dan ulôn yue awaknyan jitaát ubak peujanjian Lôn nyan, teuma awaknyan teutab hánjitem deungoe dan hán jitem taát. Dan awaknyan teutab kreueh ulée dan jeuhet lagée uroe jeh. Sabab nyan peue mantong huköman nyang na teutuléh lam peujanjian nyan ka Ulôn peu rhot u ateueh awaknyan." 9 Óh lheueh nyan TUHAN meufeureuman lom ubak ulôn, "Ureuëng Yehuda dan peunduduek Yerusalem ka jimupakat keu jilawan Ulôn. 10 Awaknyan ka jipeubuet desya nyang ka jipeubuet lé indatu awaknyan nyang hana jitem taát ubak Ulôn, awaknyan jiseumah ilah-ilah nyang laén dan hán jitem turot peue nyang Ulôn peurintah. Bah kheueh nyan Israel meunan cit deungon Yehuda ka ji iengkeue ubak peujanjian nyang ka Lôn peugét deungon indatu awaknyan. 11 Lé sababnyan, Ulôn, TUHAN, Ulôn peuingat bahwa Lôn peutron beuncana u ateueh awaknyan dan awaknyan hana hase jipeusiblah droe. Meunyoe awaknyan jiteumawök jilakée tulông ubak Ulôn, hainyan hana Lôn deungoe. 12 Laju lé ureuëng Yehuda dan peunduduek Yerusalem jijak lakée tulông ubak ilah-ilah nyang laén nyang awaknyan pujoe deungon cara jipeuseumah keureubeuen. Ilah-ilah nyan hana cit hase jipeuseulamat awaknyan bak watée beuncana nyan teuka. 13 Ilah-ilah ureuëng Yehuda ramé that, le jih na sidub banda-banda awaknyan keudroe. Peunduduek Yerusalem jipeudong miseubah-miseubah jai jih na sidub le rot-rot nyang na di Yerusalem keu jipeuseumah keureubeuen ubak Dewa Baal. 14 Sababnyan, Yeremia, bék kheueh tameudoá keu awaknyan dan neulakée tulông ubak Ulôn keu awaknyan! Meunyoe awaknyan lam keuadaan susah dan jilakée tulông ubak Ulôn, Ulôn teutab hana Lôn tem deungon awaknyan." 15 TUHAN meufeureuman, "Umat Ulôn nyang Ulôn gaséh ka jipeubuet hai-hai nyang jeuhet. Awaknyan hana meuhak na di Baét Ulôn. Awaknyan jisangka bahwa deungon na jipeugét janji-janji, dan deungon jipeuseumah beulatang, awaknyan hase jipeuteun malapeutaka. Peu kheueh deungon lagée nyan awaknyan hase seunang? 16 Ka lheueh Lôn boh nan awaknyan bak zaiton nyang rampak, jai that jimuboh deungon boh nyang jroh-jroh. Teuma, bak saát nyoe, deungon geumuroh nyang hebat teuma Ulôn tot bube na ôn jih dan Ulôn wiet banmandum ranteng jih. 17 Ulôn kheueh nyang peudong Israel dan Yehuda, Ulôn, TUHAN Nyang Mahakuasa. Teuma, jinoenyoe ka Ulôn reuncana keu Lôn peuteuka beunca u ateueh awaknyan. Sabab awaknyan keudroe kheueh nyang jeuet keusabab banmandum nyan, sabab awaknyan ka geupeubuet nyang jeuhet, na kheueh deungon cara jipeuseumah keureubeuen keu Baal sampoe Ulôn beungéh." 18 TUHAN geubri tée ubak Ulôn keuhai reuncana jeuhet musoh-musoh Lôn ateueh Ulôn. 19 Ulôn lagée bubiri nyang hana curiga jiba ubak teumpat jisie takue. Ulôn hana Lôn teupeue bahwa Ulôn kheueh nyang jeuet keusasaran reuncana jeuhet awaknyan. Awaknyan jipeugah, "Jak takoh bak kayée nyoe simantong bak kayée nyan jitem muboh; ta teubang beuhabéh mangat nan jih jituwoe lé gob." 20 Laju lôn meudoá, "Ya TUHAN Nyang Mahakuasa, Droeneueh kheueh hakém nyang ade; Droeneueh kheueh nyang ujoe pikeran dan até ureuëng. Hai ulôn nyoe lôn seurah ubak Droeneueh. Seumoga ulôn meuteumé lôn kalon Droeneueh balaih buet-buet awaknyan." 21 Ureuëng-ureuëng nyang na di banda Anatot meuharab that mangat ulôn maté. Awaknyan jipeugah, "Meunyoe gata hana cit tapiôh tapeugah sabe peusan-peusan TUHAN ubak kamoe, gata kamoe poh maté." 22 Sababnyan, TUHAN Nyang Mahakuasa geupeugah, "Ulôn Lôn huköm awaknyan! Ureuëng-ureuëng muda awaknyan maté dimideuen prang, aneuëk-aneuëk awaknyan maté sabab deuk. 23 Ulôn ka Lôn peuteuntée watée jih keu Lôn peuteuka bala u ateueh ureuëng-ureuëng Anatot, dan meunyoe watée huköman awaknyan ka teuka, hana meusidroe pih nyang tinggai."

Nabi Yeremia 12

1 "Meunyoe ulôn ba peukara lôn ukeue Droeneueh, ya TUHAN, teuntée kheueh teubukeuti bahwa Droeneueh kheueh nyang beutôi. Teuma ulôn meuheuet cit lôn keuneuk tanyong ubak Droeneueh keuhai keuadelan: Pakon ureuëng jeuhet makmu? Pakon ureuëng nyang hana jujoe nyang meuhase? 2 Droeneueh pula awaknyan lagée seunaman, laju awaknyan meu ukeue, timoh, dan jimuboh. Awaknyan sabe jimariet nyang jroh-jroh keuhai Droeneueh, teuma lam até, awaknyan nyang seubeuna jih hana jipako ubak Droeneueh. 3 Teuma Droeneueh, ya TUHAN, neuturi ulôn. Droeneueh neukalon peue nyang ulôn peubuet, dan Droeneueh neuteupeue pakriban peurasaan até lôn keu Droeneueh. Neuhila kheueh ureuëng-ureuëng jeuhet nyan mangat jiteubiet uluwa, neuba kheueh awaknyan lagée bubiri ubak teumpat sie. Jaga kheueh awaknyan sampoe trok bak watée awaknyan teusie. 4 Na padub treb teuk nanggroe nyoe tho kreng, dan naleueng jih layée nibak tieb-tieb ladang? Cicém dan beulatang nyang laén habéh maté sabab keujeuhetan bansa kamoe. Awaknyan jipeugah, bahwa ulôn hana lôn kalon nasib awaknyan." 5 TUHAN meufeureuman, "Yeremia, meunyoe gata jeuet keu hék neumeulet-let ngon manusia, panena mungken gata meulet-let deungon guda? Meunyoe bak tanoh nyang aman gata teumakot, peu kheueh nyang gata peubuet meunyoe gata ka na di padang meupaya di binéh Yordan? 6 Gata ka jikianat bahkan lé kawöm syedara gata keudroe; awaknyan meusajan-sajan jiseurang gata. Bék kheueh tapatéh ubak awaknyan, bahpi tutoe haba awaknyan maméh." 7 TUHAN meufeureuman, "Teumpat tinggai Lôn hana le Lôn hiro pako, nanggroe nyang ka jeuet keu hak milék Lôn ka Ulôn tinggai, dan umat Lôn nyang Ulôn gaséh ka Ulôn seurah ubak musoh-musoh jih. 8 Umat nyang ka Lôn pileh jilawan Ulôn; lagée singa nyang na lam gle meunan kheueh awaknyan jiteuma-uem ateueh Ulôn. Nyang kheueh sabab jih Ulôn banci keu awaknyan. 9 Awaknyan lagée cicém nyang jipeucrok lé kleung di jeueb-jeueb sagoe. Tawök kheueh bubena beulatang uteun mangat meusajan jijak peu habéh awaknyan. 10 Le that peunguasa aséng nyang ka jipeurusak lampôh anggô Lôn dan jigilo-gilo ladang-ladang Lôn. Nanggroe Ulôn nyang lagak ka jiubah jeuet keu padang pasi nyang seungue. 11 Bit, óh ulôn ngieng awaknyan jipeujeuet nanggroe Ulôn teumpat nyang seungue nyang lumpah seudeh. Banmandum ka teulanta, hana ureuëng nyang jitem pakoe. 12 Di siblaih padang pasi di gunong-gunong, ureuëng laén jijak keu meureupah. Ulôn laju Lôn peuteuka prang keu teupeurusak bansigom nanggroe sampoe hana meusidroe pih nyang hase udeb lam damé. 13 Umat Ulôn jitabu gandom, teuma nyang jipot na kheueh duro. Awaknyan meususah payah teuma useuha jihnyan sia-sia. Ulôn lumpah that beungéh sampoe hase panen awaknyan gagal." 14 TUHAN meufeureuman, "Nyoe kheueh peusan Ulôn keuhai nanggroe-nanggroe teutangga Israel nyang ka jipeurusak nanggroe nyang ka Ulôn bri keu umat Lôn Israel. Lagée seunaman nyang ji bôt bak tanoh, meunan kheueh ureuëng jeuhet nyan Lôn peuteubiet lam nanggroe awaknyan keudroe, dan Yehuda Lôn peulheuh lam reugam awaknyan. 15 Teuma óh ka lheueh awaknyan teupeuteubiet, Ulôn Lôn sayang lom keu awaknyan; tieb-tieb bansa Lôn ba lom u nanggroe jih keudroe. 16 Meunyoe awaknyan deungon sipeunoh até jitem teurimong agama umat Ulôn dan jitem meusumpah deungon jipeugah, 'Deumi TUHAN nyang udeb,' -- lagée yoh ilée awaknyan jipeurunoe umat Ulôn jimeusumpah deumi Baal -- teuma awaknyan pih jitamong cit lam umat Ulôn dan jeuet keu makmu. 17 Teuma bansa nyang hánjitem turot peue nyang Ulôn peugah, bansa nyan Lôn lôt lagée seunaman dan Lôn peuhanco sapan sapa. Ulôn, TUHAN, ka Lôn peugah haba."

Nabi Yeremia 13

1 TUHAN meufeureuman ubak ulôn geuyue jak bloe ija krong paneuk nibak lineun dan geuyuengui ija nyan ubak ulôn, teuma ija nyan hana jeuet ulôn ceulob lam ié. 2 Dan laju ulôn jak bloe ija lineun paneuk nyan, óh lheueh nyan laju lôn ngui. 3 Óh lheueh nyan TUHAN meufeureuman lom ubak ulôn lagée nyoe, 4 "Tajak kheueh laju ubak Krueng Efrat, dan tasöm laju ija krong paneuk nyan lam luengkiek batée." 5 Dan lagée nyang ka geupeurintah lé TUHAN nyan laju ulôn jak peubuet hainyan deungon ulôn söm ija krong paneuk nyan nibak Krueng Efrat. 6 Napadub treb teuma óh lheuehnyan TUHAN geuyue lom ubak ulôn mangat lônjak lom ubak Krueng Efrat keu lôn jakcok ija krong paneuk nyan. 7 Dan laju lôn jak keunan dan lôn peuteubiet laju ija krong paneuk nyang ka ulôn söm nyan. Dan teunyata ija nyan ka lumpok, dan meubacutpi hana jeuet ngui le. 8 Laju TUHAN meufeureuman lom ubak ulôn, kheun Gobnyan, 9 "Meunan kheueh cara jih Ulôn peubuet ateueh ureuëng Yehuda dan peududuek Yerusalem. Ulôn kupeuhanco sombong ngon angkôh awaknyan nyang ka lewat bataih nyan. 10 Bansa nyang jeuhet nyoe lumpah that kreueh ulée dan hánjitem taát ubak Ulôn. Awaknyan jimeuiébadat dan meubakti ubak ilah-ilah nyang laén. Nyang kheueh sabab jih awaknyan jeuet lagée ija krong paneuk nyang hana meuguna nyan. 11 Lagée ija krong paneuk nyang teu ikat khong that nibak keuieng ureuëng nyang ngui, meunan kheueh Ulôn meuharab beujeuet ureuëng Israel dan Yehuda teu ikat krab that nibak Ulôn. Deungon lagéenyan awaknyan jeuet keu umat Lôn nyang teupeujeuet nan Ulôn teupujoe dan jihoreumat. Teuma, awaknyan hánjitem seutôt Ulôn." 12 TUHAN Po teu Allah meufeureuman ubak ulôn, "Yeremia, neupeusampoe laju peusan Ulôn ubak ureuëng Israel bahwa tieb-tieb guci teumpat anggô harôh jipasoe peunoh deungon ié anggô. Awaknyan jijaweueb, 'Ék kheueh hana kamoe teupeue bahwa tieb-tieb guci harôh peunoh teupaso ngon ié anggô?' 13 Dan tapeugah kheueh ubak awaknyan bahwa ureuëng-ureuëng di nanggroe nyoe, raja-raja keuturonan Nabi Daud, dumna imeum, nabi, dan banmandum peunduduek Yerusalem Lôn pasoe peunoh deungon anggô sampoe mabök. 14 Laju awaknyan Lôn antok sidroe ngon nyang laén. Tuha ngon muda Lôn peubuet bandum lagée nyan hana Lôn bri amphon. Awaknyan Lôn peubinasa hana Lôn wéueh. Ulôn, TUHAN, ka Lôn peugah hana." 15 He umat Israel, TUHAN ka geupeugah haba! Bék sombong, deungoe peue nyang geupeugah! 16 TUHAN Po teu Allah gata harôh gata peu agong sigohlom Gobnyan geupeuteuka seupôt, dan gaki gata meugantoh nibak gunong-gunong, sigohlom trang nyang gata harab geuubah nyan jeuet keu seupôt. 17 Meunyoe gata beu oe tadeungoe nyan, ulôn kumo deungon seungab-seungab. Deungon rasa seudeh ngon pilu lôn peuba-e keu angkôhan gata. Ié mata lôn roe meulangue sabab umat TUHAN jiangkot sibagoe ureuëng nyang teuteun. 18 TUHAN meufeureuman ubak ulôn, "Yue laju raja dan peureumaisuri jitron nibak takhta jih, sabab mahkota gobnyan nyang tari ka rhot nibak ulée. 19 Banda-banda Yehuda di bagian seulatan teungoh jikeupong, dan hana ureuëng nyang hase ji heuntam keupongan nyan. Banmandum ureuëng Yehuda ka geuangkot u teumpat nyang teuböih." 20 TUHAN meufeureuman ubak peunduduek Yerusalem, "Ngieng kheueh nyoe! Musoh-musoh gata teungoh jijak nibak utara! Dipat kheueh ureuëng nyang harôh gata lindong dan nyang that-that gata peubangga nyan. 21 Peue nyang gata peugah meunyoe ureuëng-ureuëng nyang gata peubuet ateueh jih sibagoe ureuëng tawanan gata jipeutaloe dan jikuasa ateueh gata? Pasti gata meurasa sakét lagée ureuëng inong nyang teungoh peulahé aneuëk. 22 Mungken gata teumanyong lam até pakon banmandum nyan rhot u ateueh gata, pakon peukayan gata jipriek-priek dan gata jipeukosa. Tateupeue kheueh bahwa nyan teujadi sabab desya gata ka lumpah that raya. 23 Peu kheueh hase ureuëng itam teu ubah hi kulet jih jeuet keu ureuëng putéh, atawa rimueng teupeugadôh kureng jih? Teuntée hana! Meunan kheueh deungon gata nyang ka lazem tapeubuet jeuhet hana mungken tapeubuet nyang jroh. 24 Ulôn kupeucrebre gata lagée sikeum nyang jiyueb lé angén di padang pasi. 25 Nyan kheueh naseb gata nyang ka Ulôn peuteuntée sabab gata ka tatuwoe keu Ulôn, dan ka tapeucaya ubak ilah-ilah nyang peuleusu. 26 Ulôn keudroe kupriék peukayan nyang na nibak gata mangat gata teulon ngon malée. 27 Ulôn ka Lôn ngieng gata tapeubuet hai-hai nyang Lôn banci. Ulôn ka Lôn ngieng gata tatiyeub ilah-ilah nyang laén di bukét dan di ladang, lagée sidroe ureuëng agam nyang pungoe ubak peurumoh ureuëng laén dan lagée guda agam meunafsu keu guda inong. Peunduduek Yerusalem, ceulaka kheueh gata! Pajan gata beubaih nibak banmandum keujeuhetan?"

Nabi Yeremia 14

1 TUHAN meufeureuman ubak ulôn keuhai musém khueng nyang lumpah brat, 2 "Yehuda meuseudeh até banda-banda jihnyan karab maté. Ureuëng-ureuëng jihnyan habéh teuéh ateueh tanoh dan apoh apah. Yerusalem jikliek-kliek jilakée bantu. 3 Bubena peulayan di ureuëng kaya jiyue jak mita ié pat-pat nyang na; ubak mon jijak laju awaknyan teuma bubena ié ka habéh tho hana sapat na. Dan sôh kheueh ié lam calueng nyang awaknyan puwoe lom teuma. Deungon bimbang dan putôh asa awaknyan malée dan jitôb muka. 4 Ujeuen hana jitron dan tanoh ka tho ngon crah-crah; bubena na ureuëng tani ka jitôb muka sabab jihnyan lumpah that keucewa. 5 Neleueng ka hana le, sabab nyan nang rusa ka jiwéeh. Aneuëk nyang ban jipeulahé jitinggai disinan nibak padang beulantara. 6 Bak pucak gunong keuleudée kleut ka teudong teupana, mata jih layoh sabab naleueng hana sapat na; beulatang nyan meuhák-meuhák lagée asée srigala. 7 Umat Ulôn jiteumawök, 'TUHAN, bahpi desya kamoe jitudôh kamoe teuma neutulông kheueh kamoe lagée janji Droeneueh. Droeneueh ka kamoe tinggai meu ulang-ulang; bit-bit, kamoe meudesya that ubak Droeneueh. 8 Droeneueh sidroe harapan Israel hana le nyang laén, nyang peuseulamat kamoe nibak bala. Teuma pakon Droeneueh lagée ureuëng jamé di nanggroe kamoe, lagée sidroe musafe nyang piôh simalam laju jijak lom teuma? 9 Pakon Droeneueh lagée ureuëng bingong; lagée pahlawan nyang hana hase teutulông? Teuma, pasti Droeneueh na diteungoh kamoe, ya TUHAN! Kamoe nyoe umat Droeneueh, bék kheueh kamoe nyoe Droeneueh tinggai!' " 10 Keuhai bansa nyan TUHAN meufeureuman, "Ulôn hana harok ubak ureuëng-ureuëng nyan nyang galak that jipeuplueng droe nibak Ulôn, dan hánjitem jikuasa droe. Ulôn hana tuwoe ubak buet nyang salah nyang awaknyan peubuet, Ulôn kuhuköm awaknyan sabab desya nyang jipeubuet." 11 TUHAN meufeureuman ubak ulôn, "Bék talakée Ulôn mangat Lôn tulông awaknyan. 12 Bahpi awaknyan jipuasa, Ulôn teutab hana Lôn tem peue nyang jilakée tulông lé awaknyan; dan bahpi awaknyan jipeuseumah ubak Ulôn keureubeuen nyang teutot dan keureubeuen gandom, Ulôn teutab hana galak deungon awaknyan. Seubalek jih, Ulôn kupeuhabéh awaknyan deungon prang, deuk, dan bala peunyakét." 13 Laju ulôn peugah, "Ya TUHAN Nyang Mahamanyang, Droeneueh neuteupeue nabi-nabi ka geupeugah ubak rakyat bahwa hana prang atawa musém deuk, sabab Droeneueh ka neumeujanji bahwa di nanggroe nyoe sabe lam keuadaan damé." 14 Teuma TUHAN geujaweueb, "Nabi-nabi nyan ka jiba haba sulet ateueh nan Ulôn; Ulôn hana Lôn yue awaknyan, dan hana teuma Ulôn bri peurintah atawa Lôn peugah haba ubak awaknyan. Nyang deuh-deuh nyang ka lheueh awaknyan kalon nyang ji calitra lé awaknyan atranyan bukon bak Ulôn; awaknyan jiramai hai-hai nyang hana meuguna dan haba nyan jikarang lé awaknyan keudroe. 15 Awaknyan jipeugah ateueh nan Ulôn bahwa nanggroe nyoe hana le prang atawa musém deuk, padahai Ulôn hana Lôn yue awaknyan mangat jipeugah lagée nyan. Ulôn, TUHAN, Lôn peugah ubak gata, Yeremia, peue nyang Ulôn peubuet ateueh nabi-nabi nyang hana Ulôn kirém nyan. Ulôn kupeumaté awaknyan deungon prang dan musém deuk nyang luwa biasa. 16 Ureuëng-ureuëng nyang ka jiteurimong ramaian-ramaian awaknyan, ureuëng nyan pi Ulôn poh maté deungon cara nyang saban. Manyét awaknyan jigeulawa ateueh rot-rot raya di Yerusalem dan hana ureuëng nyang kubu awaknyan. Meunan kheueh naseb awaknyan dan aneuëk bino awaknyan. Teuma Lôn peujeuet awaknyan jirasa akibat buet nyang jeuhet nyang awaknyan peubuet keudroe." 17 TUHAN geuyue bak ulôn mangat lôn bri tée ubak umat Gobnyan keuhai seudeh lôn. Ulôn harôh lôn peugah lagée nyoe, "Bah kheueh ulôn mo ba-e hana piôh-piôh, uroe ngon malam ié mata ile hana reuda. Sabab bansa Lôn luka parah dan lumpah meudeurita. 18 Meunyoe Ulôn jak u padang, leumah Lôn kalon manyét-manyét teutiek-tiek akibat prang. Lam banda Ulôn kalon deurita, manusia-manusia karab maté akibat deuk nyang hana peunajoh. Nabi dan teungku imeum jipeubuet keuwajéban hana muphom peue nyang awaknyan peubuet." 19 TUHAN, Peu kheueh ka lheueh Yehuda neutulak hana nyang tinggai dan peunduduek Sion Droeneueh banci? Pakon kreueh that-that neuseupôt kamoe sampoe kamoe hana puléh le? Sia-sia mantong kamoe mita damé, hana meuguna kamoe meuharab bupuléh badan, sabab nyang na na kheueh keukerasan. 20 TUHAN, ubak Droeneueh mantong kamoe ka meudesya. Kamoe meungaku desya kamoe keudroe dan desya indatu kamoe. 21 Ingat kheueh ubak janji Droeneueh, bék kheueh kamoe neupeuhina; janji Droeneueh deungon kamoe bék kheueh neupeubateue. Yerusalem teumpat takhta Droeneueh nyang mulia, bék kheueh Droeneueh hina. 22 Dewa-dewa bansa-bansa hana hase jipeutron ujeuen u ateueh bumoe. Meunan cit deungon langét hana meuhase jipeutron ujeuen ngon kuasa jih keudroe. Droeneueh mantong kheueh harapan kamoe, ya TUHAN. Droeneueh nyang peubuet banmandum nyan sampoe teujadi.

Nabi Yeremia 15

1 TUHAN meufeureuman ubak ulôn, "Ulôn hana Lôn gaséh keu bansa nyoe, bahpi Nabi Musa dan Samuel jidong disinoe keu jilakée gaséh sayang Lôn keu awaknyan. Yue wéeh keudeh bansa nyoe, Ulôn hánkutem Lôn kalon awaknyan! 2 Meunyoe awaknyan jitanyong ubak gata ho awaknyan harôh jijak, jaweueb kheueh lagée nyoe, 'TUHAN meufeureuman, nyang geupeuteuntée keumaté sabab sakét bah kheueh ureuëng nyan maté sabab sakét. Nyang ka geupeuteuntée mangat maté di mideuen prang bah kheueh ureuëng nyan maté di mideuen prang nyan. nyang ka teupeuteuntée maté sabab deuk bah kheueh ureuëng nyan maté sabab deuk! Nyang ka geupeuteuntée ureuëng nyan harôh teudrob, bah kheueh ureuëng nyang teu angkot sibagoe ureuëng teuteun!' 3 Ulôn, TUHAN, ka Lôn peuteuntée bahwa peuet boh huköman nyang lumpah teumakot rhot ateueh awaknyan: awaknyan maté dimideuen prang, manyét awaknyan jihua lé asée, jipajoh lé cicém, dan jipeuhabéh lé beulatang juah. 4 Ulôn kupeujeuet banmandum bansa di ateueh donya teumakot ngon yo watée jingieng awaknyan. Banmandum nyan Ulôn peubuet sabab buet Manasye bin Hizkia di Yerusalem watée jeuet keuraja Yehuda." 5 TUHAN meufeureuman, "He peunduduek Yerusalem, soe nyang gaséh keu gata? Soe kheueh nyang jitem meuseudeh deungon gata? Soe kheueh nyang jitem piôh jiteumanyong keuadaan gata? 6 Gata ka tatulak dan tatinggai Ulôn, sabab nyan Ulôn beuôt jaroe Lôn keu Lôn peuhanco gata, sabab Ulôn ka hék that Ulôn peuteuen mangat Ulôn bék beungéh. 7 Bak tieb-tieb banda di nanggroe nyoe gata Ulôn böih lagée jeumpueng. Bahpi gata na kheueh umat Lôn teuma Ulôn teutab Lôn peubinasa gata dan aneuëk-aneuëk gata sabab gata hana tatem ubah cara udeb gata. 8 Nanggroe gata peunoh jikeumiet lé inong balée, leubeh le nibak anoe di panté. Manusia-manusia Lôn poh maté yoh jih mantong muda sampoe ma awaknyan udeb meudeurita. Óh watée uroe Ulôn peuteuka ateueh awaknyan sidroe ureuëng nyang ba beuncana sampoe binasa sampoe awaknyan teumakot ngon apoh apah. 9 Sidroe ma nyang gadôh tujoh droe aneuëk agam sampoe pansan ngon meusak nafáh. Uroe-uroe udeb gobnyan ka meutamah seupôt, gobnyan meurasa jihina dan jipeumalée. Musoh-musoh gata Ulôn yue jijak peumaté nyang na mantong udeb lamkawan gata. Ulôn, TUHAN, ka Lôn peugah haba." 10 Sial that ulôn nyoe! Keupeue guna jih ma ulôn geupeulahé lôn? Ngon soe mantong ureuëng nyang na di nanggroe nyoe ulôn harôh meudakwa dan meutuléh lagéh. Bahpi ulôn hántom lôn ngui atra gob atawa lôn peungui atra lôn ubak gob, teuma ulôn teutab jikutok lé bandum ureuëng. 11 TUHAN, meunyoe ulôn keubit hana lôn peubuet tugaih ulôn deungon beutôi, dan hana lôn bila musoh-musoh lôn dikeue Droeneueh bak watée awaknyan meuteumé beuncana dan susah, bah kheueh kutokan awaknyan beutôi-beutôi teujadi. ( 12 Hana meusidroe ureuëng pi hase jiwiet beuso, leubeh lom beuso di utara nyang ka teuseupôh deungon teumaga.) 13 TUHAN meufeureuman ubak ulôn, "Ulôn kukirém musoh mangat jijak kuet keukayaan dan hareuta umat Lôn sibagoe huköman ateueh desya-desya nyang ka jipeubuet lé awaknyan bansaboh nanggroe. 14 Di nanggroe aséng nyang hana awaknyan turi, Ulôn Lôn peujeuet awaknyan namiet musoh-musoh awaknyan, sabab beungéh Ulôn ka ju ngon hu lagée apui nyang meuháb-háb hánjitem lon." 15 Laju ulôn peugah, "TUHAN, Droeneueh neuteupeue. Ingat kheueh dan neutulông kheueh ulôn. Balaih kheueh awaknyan nyang jitiyeub dan jitindéeh ulôn. Bék kheueh saba that keu awaknyan sampoe awaknyan singoh meuteumé jipoh maté lôn. Ingat kheueh, sabab Droeneueh kheueh ulôn nyoe jihina. 16 Droeneueh neupeugah haba ubak ulôn, dan ulôn deungoe peue-peue mantong nyang Droeneueh peugah. Ulôn milék Droeneueh, ya TUHAN Po teu Allah Nyang Mahakuasa, sababnyan bandum tutoe haba Droeneueh cukob mangat dan bahgia até ulôn. 17 Ulôn hana rhoh lamkawan ureuëng-ureuëng nyang meuseunang-seunang sira meuwayang hana meuteuntée. Sabab lôn taát ubak Droeneueh, teuma ulôn jak peu aséng droe deungon peurasaan nyang beungéh. 18 Pakon ulôn hana piôh meudeurita? Pakon cabôk ulôn meutamah parah hana jitem puléh-puléh? Peu kheueh na meukeusut nibak Droeneueh neupeukeucewa ulôn lagée ié krueng nyang tho watée musém khueng?" 19 TUHAN geujaweueb, "Meunyoe gata tagisa, Ulôn teurimong gata. Gata jeuet keu hamba Lôn lom. Meunyoe gata tapeusampoe hai-hai meuguna dan kon haba beurakah, teuma gata jeuet keu nabi Ulôn lom. Ureuëng-ureuëng laén jijak lom ubak gata, dan hana peureulée gata nyang jak ubak awaknyan. 20 Gata Lôn peujeuet kuta peurunggu keu awaknyan. Awaknyan jiprang gata, teuma hana hase gata jipeutaloe. Ulôn teutab na meusajan gata keu Lôn lindong dan Lôn peuseulamat gata. 21 Ulôn teuma Lôn peubeubaih gata nibak keukuasaan ureuëng-ureuëng jeuhet nyang keujam. Ulôn, TUHAN, ka Lôn peugah haba."

Nabi Yeremia 16

1 TUHAN meufeureuman lom ubak ulôn, geupeugah, 2 "Bék meukawen dan tameu aneuëk di teumpat nyoe. 3 Teuma Ulôn peugah ubak gata peue nyang teujadi deungon aneuëk-aneuëk nyang lahé di sinoe dan deungon ureuëng syiek jih. 4 Awaknyan maté keunong peunyakét nyang jiba mawöt, dan awaknyan maté di mideuen prang atawa maté lé sabab deuk. Hana meusidroe ureuëng pi nyang jipeuba-e atawa nyang tem peukubu awaknyan lam jrat. Manyét awaknyan meutabu lagée pupuk tanoh, dan jipajoh lé cicém meunan cit lé beulatang juah. 5 Bék kheueh tajak u rumoh ureuëng nyang teungoh meuduka, Yeremia. Bék meukabông keusoe mantong. Ulôn hana Lôn bri beureukat le keu umat Ulôn deungon keuseujahteuraan, dan meunan cit hana teuma Lôn tunyok rasa wéueh ngon sayang ubak awaknyan. 6 Ureuëng kaya dan ureuëng gasien di nanggroe nyoe maté hana ureuëng nyang jak kubu awaknyan. Hana meusidroe ureuëng pih nyang jitem seksa droe atawa jicukô ôk jih sibagoe tanda meukabông keu awaknyan. 7 Meunan cit hana ureuëng nyang jitem bri khanuri keu teupeumangat até ureuëng nyang teungoh meukabông nyan. Hana ureuëng nyang jitem meuduka cita meunan cit deungon ureuëng nyang maté ayah ngon ma jihnyan. 8 Bék tatamong lam rumoh ureuëng nyang teungoh khanuri. Bék makheun atawa tajieb ié ngon ureuëng nyan. 9 Deungoe kheueh peue nyang Ulôn, TUHAN Nyang Mahakuasa, Allah Israel, keuneuk peugah ubak gata. Su nyang geumbira dan suka cita dan meuriah jih bak khanuri ureuëng meukawen Lôn peupiôh deungon sigra. Hai nyan jikalon lé ureuëng-ureuëng nyang udeb bak jamén gata nyoe. 10 Meunyoe gata tapeutrok banmandum nyoe ubak awaknyan, mungken awaknyan jitanyong keupeue Ulôn keuneuk huköm awaknyan deungon huköman nyang kreueh. Awaknyan jitanyong peue keusalahan dan desya awaknyan ateueh Lôn, TUHAN Po teu Allah awaknyan. 11 Tapeugah laju ubak awaknyan bahwa Ulôn meufeureuman lagée nyoe, 'Indatu gata ka jitinggai Ulôn keujijak seumah dan meu iébadat ubak ilah-ilah nyang laén. Awaknyan jipeubeuáh Ulôn dan hana jitem taát ubak peue-peue nyang ka Lôn boh peuratoran. 12 Teuma gata tapeubuet nyang leubeh jeuhet nibak nyang ka. Gata kreueh ulée dan nyang taseutôt kheun gata keudroe nyang jeuhet nyan. Gata hana tatem taát ubak Ulôn. 13 Sabab nyan, gata Lôn use nibak nanggroe nyoe dan Ulôn böih bak saboh nanggroe nyang lumpah that aséng nibak gata dan nibak indatu gata. Disinan gata meu iébadat uroe malam ubak ilah-ilah laén, dan Ulôn hana Lôn wéueh meubacut pih keu gata.' " 14 TUHAN meufeureuman, "Teuma teuka watée jih manusia hana le jimeubudôk deumi nan Ulôn, Po teu Allah nyang udeb, nyang ba umat Israel jiteubiet lam nanggroe Meusé, 15 teuma deumi Ulôn, Po teu Allah nyang udeb, nyang ka Lôn ba umat Israel Lôn peuteubiet lam saboh nanggroe di utara dan nibak banmandum nanggroe nyang laén di teumpat awaknyan ka lheueh Ulôn peucrebre. Awaknyan Lôn puwoe lom ubak tanoh ié jih keudroe, nanggroe nyang ka Ulôn bri keu indatu awaknyan." 16 TUHAN meufeureuman, "Ulôn keuneuk tawök neulayan nyang ramé mangat jijak drob bubena ureuëng nyoe. Óh lheueh nyan Lôn tawök ureuëng teumiyeub nyang le mangat jipeucrok awaknyan nyang na di tieb-tieb gunong dan bukét, dan di guha-guha bukét batée. 17 Ulôn kalon banmandum nyang awaknyan peubuet. Hana nyang teusöm nibak Ulôn; meunan cit desya-desya awaknyan ka lheueh Ulôn kalon. 18 Desya dan keujeuhetan awaknyan Lôn balaih deungon huköman dua goe lipat, sabab awaknyan ka jipeukuto nanggroe Ulôn deungon beurala nyang le. Beurala-beurala nyan hana meunyawöng saban cit lagée manyét." 19 TUHAN, Droeneueh kheueh nyang lindong ulôn dan nyang bri teunaga keu ulôn; Droeneueh nyang tulông ulôn watée ulôn lam susah. Bansa-bansa di meubagoe ujong bumoe jijak ubak Droeneueh sira jipeugah, "Nibak indatu kamoe na ilah peuleusu nyang meubacut pih hana meuguna. 20 Peu kheueh hase manusia jipeugot ilah jih keudroe? Teuntée hana! Nyang jipeugot nyan pasti bukon Po teu Allah." 21 "Sabab nyan," kheun TUHAN, "goe nyoe Ulôn ku peujeuet bansa-bansa mangat jirasa keukuasaan dan teunaga Ulôn mangat jeuet keu siumu masa awaknyan jiteupeue bahwa Ulôn kheueh TUHAN."

Nabi Yeremia 17

1 TUHAN meufeureuman, "He bansa Yehuda, desya gata ka teu uke bak até gata dan bak bandum sagoe-sagoe miseubah gata deungon beuso meumata pensée nibak intan. 2 Ureuëng-ureuëng gata jimeu iébadat ubak miseubah-miseubah nyang taméh-taméh beurala nyang ka teupeudong keu Dewi Asyera di tieb-tieb bak kayée nyang leuhu, di pucak-pucak bukét, 3 dan di gunong-gunong nyang na di luwa banda. Sabab banmandum teumpat seumah beurala nyang ka gata peudong bansaboh nanggroe dan sabab banmandum desya nyang ka gata peubuet, dan Ulôn Lôn peujeuet musoh-musoh gata jiangkot banmandum hareuta dan keukayaan gata. 4 Gata teupaksa tajok tanoh nyang ka Ulôn bri keu gata, dan Ulôn kupeujeuet gata tameungabdi ubak musoh gata bak nanggroe nyang banmandum aséng nibak gata. Peue nyang Ulôn peubuet banmandum nyan sabab beungéh Ulôn hán ék Lôn teun le lagée apui nyang hu be raya dan hana hase teupeulon le." 5 TUHAN meufeureuman, "Meunyoe ureuëng jitinggai Ulôn, TUHAN jihnyan, dan jimeuharab ubak manusia dan jimeusadeue ubak teunaga manusia nyan, teuma Ulôn kuhuköm ureuëng nyan. 6 Ureuëng nyan lagée seunaman nyang timoh lam padang, bak tanoh nyang tho, seungue seungab dan meusira teuma, hántom na jirasa gét. 7 Teuma ureuëng nyang meuharab ubak Ulôn, ureuëng nyan Lôn bri beureukat hana reuda. 8 Ureuëng nyan lagée bak kayée nyang timoh binéh krueng nyang ié krueng nyan sabe ji ile; ukeue bak kayée nyan jimeu éue trok lam ié. Hana jitakot musém keunong khueng, ôn-ôn kayée nyan sabe ijo. Bahpi nanggroe habéh tho sabab musém khueng, bak kayée nyan hana yo sabab kayée nyan hántom putôh bak jimuboh. 9 Até manusia hana nyang hase gob duga, paleng licek nibak peue nyang na dan lumpah that parah deungon peunyakét. 10 Ulôn, TUHAN, nyang seulidek até, baten manusia Ulôn nyang ujoe. Tieb-tieb ureuëng Lôn balaih sisuai deungon pi-e nyang ji peubuet, dan Lôn peusaneut sisuai deungon buet nyang jikeureuja." 11 Lagée cicém nyang keumaröm teuma nyang jikaröm nyan kon boh droe jih, meunan kheueh ureuëng nyang hana jujoe meuteumé hareuta. Bak umu nyang salah layeue ureuëng nyan teuma gadôh banmandum hareuta. Nibak akhé udeb ureuëng nyan teubukeuti bahwa ureuëng nyan ureuëng nyang paleng bangai hana meu areuti. 12 Baét TUHAN geutanyoe lagée takhta nyang mulia, di gunong nyang manyang seujak seumula. 13 TUHAN, Droeneueh kheueh harapan Israel, umat Droeneueh; bandum nyang tinggai Droeneueh teuma jeuet keu malée. Awaknyan teuma teusampôh di ateueh bumoe dan jijak ubak donya ureuëng nyang maté. Sabab, Droeneueh mata ié udeb ka jitinggai lé awaknyan, ya TUHAN. 14 TUHAN, peupuléh kheueh ulôn, teuma ulôn jeuet keu seuhat. Peuseulamat kheueh ulôn, teuma ulôn seulamat. Droeneueh kheueh mantong nyang ulôn peumulia! 15 Ureuëng jipeugah ubak ulôn, "Dipat banmandum ancaman TUHAN nyan? Bah kheueh jinoe geulaksana!" 16 Teuma, ya TUHAN, hántom na ulôn peukarat ubak Droeneueh mangat Droeneueh neupeuteuka ceulaka ateueh awaknyan. Meunan cit deungon ulôn hana teuma lôn meuharab mangat awaknyan jiteuka beuncana. Droeneueh neuteupeue nyan, TUHAN. Droeneueh neuteupeue peue nyang ulôn pengah. 17 Bék kheueh Droeneueh jeuet keu sapeue-peue nyang teupeutakot até ulôn. Droeneueh teumpat lôn meungungse pajan mantong ulôn meuteumé bala. 18 Seumoga nyang peucrok dan nyang teugom ulôn, Droeneueh peumalée dan Droeneueh peupeunoh deungon teumakot. Teuma bék kheueh lagée nyan neupeubuet u ateueh ulôn, ya TUHAN. Peuteuka kheueh balanyan u ateueh awaknyan sampoe awaknyan hanco binasa. 19 TUHAN meufeureuman ubak ulôn, "Yeremia, tajak kheueh laju ubak babah Pintoe Geureubang Rakyat nyang jijak lé raja-raja Yehuda meunyoe awaknyan jiteubiet tamong lam banda. Meunan cit tajak kheueh laju ubak babah pintoe geureubang nyang laén nyang na di Yerusalem. 20 Tapeusampoe kheueh peusan Ulôn ubak raja-raja dan ubak banmandum ureuëng Yehuda meunan cit ubak banmandum peunduduek Yerusalem nyang na jijak rot babah-babah pintoe nyan. 21 Tapeugah kheueh laju lagée nyoe: 'Meunyoe gata hana tatem maté, bék kheueh ta-angkot barang bak uroe Sabat, atawa tapeutamong rot pintoe-pintoe geureubang Yerusalem. 22 Bék tameubuet atawa taba barang peue mantong nyang na lam rumoh gata nibak uroe Sabat. Peukhusos kheueh uroe nyan keu Ulôn lagée nyang ka Ulôn peurintah ubak indatu gata. 23 Teuma indatu gata hánjitem deungoe atawa hánjitem pakoe peue nyang Ulôn peugah. Awaknyan kreueh ulée hán jitem taát atawa teuseugah. 24 Taát kheueh ubak bandum peurintah Lôn. Bék taba barang peue mantong rot babah pintoe geureubang banda nyoe nibak uroe Sabat. Teupeukhusos kheueh, uroe Sabat keu Ulôn, dan bék kheueh tapeubuet peue mantong nibak uroe nyan. 25 Meunyoe gata bit-bit tapeujak peue mantong nyang Ulôn peurintah nyan, teuma raja-raja dan peujabat-peujabat nyang mat peurintah lagée Nabi Daud jitamong ubak babah pintoe geureubang banda Yerusalem. Awaknyan meusajan deungon ureuëng Yehuda dan meunduduek Yerusalem, teuma jipasang ateueh geuritan guda, sampoe banda Yerusalem jeuet keuramé nyang luwabiasa. 26 Ureuëng-ureuëng laén teuma teuka di meubagoe banda Yehuda, dan di gampông-gampông nyang na nibak binéh-binéh banda Yerusalem; awaknyan teuka di wilayah Benyamin, di daerah gaki bukét, dan daerah gunong-gunong, dan di Yehuda bagian seulatan. Awaknyan jiba u Baét Lôn beulatang-beulatang keureubeuen, bah kheueh nyang teutot meunan cit nyang hana, meunan cit deungon peuseumahan gandom dan keumeunyan dan peuseumahan syukoe. 27 Banmandum nyan teujadi meunyoe gata taát ubak Ulôn dan tapeu khusos uroe Sabat keu Ulôn. Bék gataba barang peue mantong rot babah pintoe geureubang Yerusalem nibak uroe nyan. Meunyoe gata taiengkeue ubak peue-peue nyang ka Ulôn peurintah nyan, pintoe-pintoe geureubang Yerusalem meunan cit deungon meuligoe-meuligoe jihnyan teuma Ulôn tot sampoe habéh dan apui nyan hana meuhase teupeu maté.' "

Nabi Yeremia 18

1 TUHAN meufeureuman ubak ulôn, 2 "Tajak kheueh laju u rumoh tukang beulangöng; disinan Lôn peusampoe peusan Lôn ubak gata." 3 Dan laju ulôn jak u rumoh tukang beulangöng nyan dan lôn ngieng tukang nyan teungoh geumeubuet ngon alat peugét beulangöng. 4 Meunyoe beulangöng nyang teungoh geupeuget nyan kureueng sampoereuna, laju jipeugét lom jeuet keu beulangöng nyang laén nyang sisuai deungon nyang jimeuheuet. 5 Lé TUHAN geuyue ubak ulôn mangat lôn jak peugah ubak umat Israel, 6 "He umat Lôn, hana mungken Ulôn hana hase Lôn peubuet ateueh gata lagée tukang beulangöng nyan jipeubuet ngon tanoh kliet? Lagée tanoh kliet nyang na lam jaroe tukang beulangöng, meunan kheueh teuma gata lam jaroe Lôn. 7 Meunyoe bak saboh watée Ulôn peuputôh keu Lôn tarek, Lôn reulôh dan Lôn peuhanco saboh bansa atawa keurajeuen, 8 laju bansa nyan meutobat ubak desya jih, teuma Ulôn peubateue niet Ulôn nyan. 9 Teuma, meunyoe Ulôn ka Lôn peuputôh keu Lôn peudong atawa Lôn peukong saboh bansa atawa keurajeuen, 10 teuma óh dudoe bansa nyan hana taát ubak Ulôn laju geupeubuet nyang jeuhet, teuma niet Ulôn nyan Lôn peubateue." 11 TUHAN meufeureuman ubak ulôn, "Jinoenyoe, tapeugah kheueh ubak ureuëng-ureuëng Yehuda dan peunduduek Yerusalem bahwa Ulôn teungoh Lôn peugot reuncana keu Lôn lawan awaknyan, dan Lôn peusiab huköman keu awaknyan. Tayue kheueh ubak awaknyan mangat jipiôh cara udeb awaknyan nyang meudesya dan jipeugot pi-e dan buet jihnyan. 12 Teuma awaknyan jijaweueb, 'Keupeue guna jih? Kamoe teutab kamoe seutôt keuheundak kamoe keudroe! Kamoe maséng-maséng teutab kamoe peubuet peue nyang jikheun lé até kamoe nyang jeuhet!' " 13 TUHAN meufeureuman, "Tanyong kheueh ubak tieb-tieb bansa peu kheueh ka lheueh na hai nyang lagée nyoe. Umat Israel ka jipeubuet sapeue-sapeue nyang lumpah meubahya! 14 Hántom na gadôh salju nibak gunong Libanon. Hántom na ié leupie nyang ile di gunong nyang jeuet keu tho. 15 Teuma umat Lôn ka jituwo Ulôn, dan jitot keumeunyan keu beurala. Awaknyan meugantoh bak jalan yoh watée ilée nyang harôh awaknyan jak, laju meusimpang bak rot nyang gohlom rata. 16 Nanggroe nyoe ka jipeujeuet lé awaknyan teumpat nyang cukob gli, dan siumu masa jeuet keubahan ceuloóh gob. Banmandum ureuëng nyang jak rot nyan jiasek ulée sabab meurasa gli. 17 Lagée abée nibak iémbon angén timu, meunan kheueh umat Lôn kusipreuk dikeue musoh. Meunyoe bala ka trok jiteuka, Ulôn kupeulikot awaknyan dan hana Lôn tulông awaknyan!" 18 Na ureuëng jipeugah, "Jak geutanyoe ta meukomplot tajak lawan Yeremia. Kon jih mantong nyang jeuet jipeugah haba keu Po teu Allah. Sabe na teungku imeum nyang hase geubri peulajaran, na ureuëng bijaksana nyang hase geubri naseuhat; dan na nabi nyang hase geupeusampoe ubak geutanyoe peusan-peusan Po teu Allah. Jak tagadu jihnyan ubak kantô peungadelan dan hana ta deungoe tutoe haba jihnyan." 19 Dan laju lôn meudoá, "TUHAN, deungoe kheueh doá ulôn; neungieng kheueh peue nyang jipeugah lé musoh keuhai ulôn! 20 Peu kheueh patot buet nyang jroh jibalaih ngon buet nyang jeuhet? Teuma awaknyan ka jikueh uruek mangat Ulôn rhot lam uruek nyan. Ingat kheueh bahwa Ulôn ka lôn bila awaknyan dikeue Droeneueh, jeuet Droeneueh bék neubeungéh keu awaknyan. 21 Teuma bak saát nyoe, TUHAN, bah kheueh aneuëk-aneuëk awaknyan maté sabab deuk atawa maté di mideuen prang. Bah kheueh ureuëng-ureuëng inong awaknyan jeuet keu inong balée sabab teungku lakoe jih ka gadôh meunan cit deungon aneuëk nyang ka hana le; bah kheueh kawöm agam maté sabab jiteuka bala peunyakét dan ureuëng muda maté di mideuen prang. 22 Neuyue kheueh peurampok teuka deungon hana jisangka-sangka u rumoh awaknyan, sampoe awaknyan jikliek deungon teumakot. Awaknyan ka jikueh uruek mangat ulôn rhot lam uruek nyan, dan awaknyan ka jipasang taron keuneuk jidrob ulôn. 23 Teuma Droeneueh, TUHAN, neuteupeue banmandum nyang awaknyan reuncana keuneuk jipeuhabéh nyawöng ulôn. Sabab nyan, bék neupeu amphon awaknyan; bék neusampôh keusalahan awaknyan. Seupôt kheueh awaknyan sampoe reubah. Meutindak kheueh keu awaknyan watée Droeneueh beungéh."

Nabi Yeremia 19

1 TUHAN geuyue ubak ulôn mangat lôn jak bloe kendi, dan teupakat meupadub droe peumimpén bansa dan meupadub droe teungku-teungku imeum nyang ka tuha-tuha, 2 mangat jijak meusajan-sajan deungon awaknyan u Pantôn Hinom rot babah Pintoe Geureubang Beling. Disinan harôh lôn peumaklum peue nyang ka geupeusan ubak ulôn. 3 Ulôn harôh ku peugah lagée nyoe, "He Raja-raja Yehuda dan peunduduek Yerusalem! Deungoe kheueh nyoe, peue nyang Ulôn, TUHAN Nyang Mahakuasa, Allah Israel, keuneuk peugah ubak gata. Ulôn keuneuk peuteuka bala nyang raya u ateueh teumpat nyoe sampoe ureuëng nyang deungoe nyan mandum teukeujot. 4 Hai nyan Ulôn peubuet sabab bansa nyan ka jitinggai Ulôn. Awaknyan ka jipeukuto teumpat nyoe deungon cara jipeuseumah keureubeuen keu dewa-dewa nyang aséng nibak awaknyan, nibak indatu awaknyan dan nibak raja-raja Yehuda. Meunan cit awaknyan ka jipaso teumpat nyoe deungon darah ureuëng-ureuëng nyang hana meusalah. 5 Awaknyan jipeudong miseubah keu Baal keu jipeuseumah aneuëk-aneuëk awaknyan sibagoe keureubeuen nyang teutot, padahai Ulôn hántom na Lôn yue bak awaknyan nyang lagée nyan, teuma hántom na hai lagée nyan nyang na teupike lam pikeran Lôn. 6 Sabab nyan, teuka watée jih teumpat nyoe hana le teupeunan Tofet atawa Pantôn Hinom, teuma na kheueh Pantôn Ceumeucang. 7 Di teumpat nyoe Ulôn kupeubateue banmandum reuncana ureuëng Yehuda dan peunduduek Yerusalem. Awaknyan Lôn peubiyeu jipeutaloe lé musoh-musoh awaknyan dan jipoh maté di mideuen prang. Manyét awaknyan Lôn peubiyeu jipajoh lé cicém dan beulatang juah. 8 Ulôn kupeuteuka mala peutaka nyang luwa biasa u ateueh banda nyoe sampoe soe mantong ureuëng nyang liwat disinan teukeujot dan gli. 9 Musoh jikeupong banda nyoe, dan ji useuha jipoh maté peunduduek nyang na disinan. Watée jikeupong nyan bit hebat that, sampoe ureuëng-ureuëng nyang na lam banda nyoe saléng jipajoh rakan-rakan jih, dan na nyang pajoh aneuëk-aneuëk awaknyan keudroe." 10 Óh lheueh nyan TUHAN geuyue bak ulôn jeuet lôn peubeukah kendi nyan dikeue ureuëng-ureuëng nyang seutôt ulôn. 11 Ulôn harôh lôn peugah ubak awaknyan bahwa TUHAN Nyang Mahakuasa meufeureuman lagée nyoe, "Bansa dan banda nyoe Lôn peuhanco lagée kendi nyang beukah nyan sampoe hana jeuet le teupeuguna. Awaknyan jikubu manyét-manyét droe jih di Tofet, sabab ka hana le teumpat teukubu manyét-manyét nyan. 12 Banda nyoe deungon peunduduek jihnyan Lôn peujeuet lagée Tofet. 13 Banmandum rumoh di Yerusalem dan banmandum raja-raja Yehuda jeuet keu kuto lagée Tofet; sabab ateueh bubông rumoh-rumoh nyan manusia ka jitot keumeunyan keu dewa-dewa di langét, dan jipeuseumah anggô keu dewa-dewa nyang laén." 14 Laju ulôn tinggai Tofet, teumpat ulôn geuyue peusampoe peusan TUHAN. Laju ulôn jak ubak seuramoe Baét TUHAN dan lôn dong disinan, laju ulôn peugah bak bandum ureuëng, 15 bahwa TUHAN Nyang Mahakuasa, Allah Israel, meufeureuman lagée nyoe, "Sabab gata kreueh ulée dan hántatem deungoe sapeue, teuma Ulôn kupeuteuka u ateueh banda nyoe dan u ateueh banmandum gampông nyang nibak binéh-binéh nyoe banmandum reuncana nyang ka Ulôn reuncana."

Nabi Yeremia 20

1 Teungku Imeum Pasyhur bin Imer na kheueh mando nyang kawai Baét TUHAN. Watée jideungoe ulôn peumaklum banmandum nyan, 2 laju jipeurintah mangat lôn nyoe jiseupôt ngon jipasông bak babah Pintoe Geureubang Benyamin, geureubang blaih ateueh di Baét TUHAN. 3 Óh beungoh singoh watée Pasyhur jipeulheueh ulôn lam pasông, laju lôn peugah ubak gobnyan, "Nan nyang geubri lé TUHAN keu gata kon Pasyhur, teuma 'Timbak gob jeub-jeub sagoe'. 4 TUHAN keudroe geupeugah, 'Gata Lôn peujeuet tukang teumimbak keu gata keudroe dan keu rakan-rakan gata. Gata tangieng awaknyan jipoh maté lé musoh-musoh awaknyan. Banmandum ureuëng Yehuda Lôn peubiyeu jikuasa lé raja Babel; siladum nibak awaknyan jiba u Babel sibagoe ureuëng teutawan, nyang leubeh nibaknyan jipoh maté. 5 Meunan cit musoh awaknyan Lôn peubiyeu jibloh dan jiangkot u Babel bandum keukayaan banda nyoe, meunan cit banmandum hareuta milék jih, dan barang-barang pusaka raja-raja Yehuda. 6 Dan gata, Pasyhur, meusajan deungon bandum keuluwarga gata teudrob dan teuangkot u Babel. Disideh gata maté dan jikubu; meunan cit deungon banmandum rakan gata nyang ka jideungoe haba-haba gata nyang sulet.' " 7 TUHAN, Droeneueh neubujuk ulôn dan ulôn ka keunong bujuk. Droeneueh leubeh teuga nibak ulôn dan ka neupeutundok ulôn. Ulôn jipeuhina lé tieb-tieb ureuëng, jipeuhina phon beungoh trok seupôt. 8 Tieb-tieb ulôn peugah haba, harôh lôn tawök seuhabéh teunaga, "Keukeujaman! Beuncana!" TUHAN, ulôn jihina tieb-tieb watée, sabab lôn peusampoe peusan Droeneueh. 9 Teuma meunyoe jikheun lé até lôn, "Bah kheueh TUHAN nyan ulôn peutuwoe, hán kutem le lôn peugah haba ateueh nan Gobnyan," dan peusan Droeneueh lagée apui nyang hu meuháb-háb lam até sanubari. Ka lôn cuba peuteun, teuma teunyata hana kuasa nibak ulôn. 10 Teudeungoe su ureuëng meusáh-sáh jeub-jeub sagoe, "Teumakot meuraja lela! Jak talapor jihnyan ubak nyang meukuasa!" Meunan cit banmandum rakan krab ulôn ka jipreh-preh ulôn rhot. Jipeugah lé awaknyan, "Kadang deungon bujukan, jihnyan hase tapeutaloe, mangat jeuet hase ta balaih dam keu jihnyan." 11 Teuma, Droeneueh, ya TUHAN, neudong blah ulôn; Droeneueh lumpah teuga lom lumpah that kha. Awaknyan nyang tiyeub dan nyang tindéeh ulôn reubah dan hana meudaya. Awaknyan meuteumé malée siumu masa, dan bateue kheueh bandum reuncana awaknyan. Keuhai hina awaknyan teu ingat sabe. 12 Teuma, ya TUHAN, Nyang Mahakuasa, deungon ade neu ujoe manusia; Droeneueh neuteupeue até dan pikeran awaknyan. Sabab nyan neupeu idhin kheueh bak ulôn lôn ngieng Droeneueh neubalah buet nyang jeuhet nibak musoh sabab ubak Droeneueh lôn seurah peukara ulôn. 13 Meuca-e kheueh ubak TUHAN dan pujoe kheueh Gobnyan, sabab Gobnyan nyang peulheueh ureuëng nyang teuteugon nibak kuasa ureuëng doraka. 14 Teukutôk kheueh uroe ulôn lahé! Bah kheueh keunong hina saát ulôn geupeulahé lé ma. 15 Meunan cit beuteukutôk kheueh ureuëng nyang ba beurita sampoe jeuet ureuëng syiek lôn lumpah geumbira, watée teubri tée ubak gobnyan, "Droeneueh meuteumé sidroe aneuëk agam!" 16 Bah kheueh ureuëng nyang ba haba nyan saban lagée banda-banda nyang geupeuhanco lé TUHAN deungon hana geuweueh. Bah kheueh jideungoe su kliek nyang sakét bak watée beungoh, dan dumpék su muprang watée cot uroe. 17 Sabab gobnyan hana geupoh maté lôn watée ulôn mantong lam pruet ma, mangat ulôn teutab geukandong lé ma dan lam rahim gobnyan jeuet keulôn sibagoe kuburan. 18 Pakon ulôn harôh lahé lam donya nyoe? Peu kheueh keu deurita dan meususah payah? Dan mangat udeb lôn jijak laju teutab lam malée?

Nabi Yeremia 21

1 Zedekia raja di nanggroe Yehuda geukirém ubak ulôn Teungku Imeum Pasyhur bin Malkia, dan Teungku Imeum Zefanya bin Maaseya. Gobnyan geuyue ubak awaknyan mangat jipeutrok ubak ulôn nyang geulakée nyoe, 2 "Neulakée kheueh peutunyok ubak TUHAN keu geutanyoe, sabab Nebukadnezar raja Babel deungon pasokan jihnyan teungoh geukeupong banda nyoe. Mungken TUHAN geupeuna keu ajaéban keu geutanyoe, dan geupaksa Nebukadnezar jitarék surot pasokan jih." 3 Laju TUHAN meufeureuman ubak ulôn, dan ulôn laju lôn yue ubak ureuëng-ureuëng nyang jikirém nyan 4 mangat jijak peugah ubak Zedekia bahwa TUHAN, Po teu Allah Israel, geupeugah lagée nyoe, "Zedekia, Ulôn ku peutaloe pasokan gata nyang teungoh meu heungko jilawan raja Babel dan pasokan jihnyan. Sinjata-sinjata tantra gata Lôn tumpok di teungoh-teungoh banda. 5 Ulôn keudroe nyang jak prang gata deungon habéh teunaga dan deungon beungéh nyang hana amphon. 6 Peunduduek banda nyoe Lôn poh maté; bah kheueh nyan manusia meunan cit deungon beulatang teuma maté sabab bala peunyakét nyang luwabiasa. 7 Gata dan banmandum peugawée gata dan ureuëng-ureuëng nyang teuhinda di mideuen prang, deuek dan wabah peunyakét, banmandum Lôn peubiyeu jidrob lé Raja Nebukadnezar dan lé musoh-musoh nyang keuneuk drob gata. Nebukadnezar jipeu maté gata banmandum deungon hana amphon dan hana gaséh sayang. Ulôn, TUHAN, ka Lôn peugah haba." 8 Laju TUHAN geuyue ubak ulôn mangat lôn peugah lagée nyoe ubak umat Gobnyan, "Deungoe kheueh nyoe! Ulôn, TUHAN, Lôn yue piléh bak gata saboh piléhan: rot nyang teujak ubak udeb, atawa rot nyang teujak ubak maté. 9 Tieb-tieb ureuëng nyang na tinggai lam banda ureuëng nyan teuma maté lé sabab prang, deuek atawa sabab wabah peunyakét. Teuma awaknyan nyang jiteubiet keujijak seurah droe ubak ureuëng Babel nyang teungoh jiprang banda nyoe, teuhinda dan hana teupoh maté. 10 Ulôn ka Lôn peuputôh keuteupeuhanco banda nyoe, dan hana Lôn wéueh. Banda nyoe teuseurah ubak raja Babel; raja nyan nyang tot banda nyoe sampoe habéh hana tinggai meusapeue pih. Ulôn, TUHAN, ka Lôn peugah haba." 11 TUHAN meufeureuman ubak ulôn geuyue peusampoe peusan nyoe ubak keuluwarga raja Yehuda, keuturonan Nabi Daud: "Deungoe kheueh peue nyang Ulôn, TUHAN, peugah. Gata useuha kheueh mangat keuadelan beuna tapeujak tieb-tieb uroe. Tapeulheueh kheueh ureuëng nyang jipraih ngon jitindéeh nibak keukuasaan ureuëng nyang praih ngon nyang tindéeh nyan. Meunyoe hana, buet nyang jeuhet nyang gata peubuet nyan meutamah beungéh lé Ulôn lagée apui hu nyang hana hase teupeulon." 13 Óh lheueh nyan TUHAN geupeugah ubak Yerusalem, "He Yerusalem! Teuduek gata leubeh manyang nibak pantôn-pantôn nyang na ban sikeulileng gata. Gata lagée bukét batée nyang meucula bak padang nyang rata, teuma Ulôn kulawan gata. Gata neupeugah bahwa hana meusidroe nyang hase jijak prang gata atawa nyang heuntam kuta-kuta gata, 14 teuma Ulôn Lôn huköm gata sabab buet gata. Meuligoe gata Ulôn tot, dan peue-peue mantong nyang na nibak binéh nyan tutong hana nyang tinggai. Ulôn, TUHAN, ka Lôn peugah haba."

Nabi Yeremia 22

1 TUHAN geuyuejak ulôn ubak meuligoe raja Yehuda, keuturonan Nabi Daud, mangat lôn jak peutrok feureuman TUHAN keu raja, dan ubak banmandum peugawée raja nyan, meunan cit banmandum peunduduek Yerusalem. Nyoe kheueh haba TUHAN keu awaknyan, 3 "Tapeubuet kheueh nyang ade dan jujoe. Tapeu lheueh kheueh ureuëng nyang jipraih ngon jitindéeh nibak keukuasaan ureuëng nyang praih ngon nyang tindéeh nyan. Bék tapeubuet nyang jeuhet ateueh ureuëng aséng, aneuëk yatém ngon meuntui, atawa inong balée. Bék kheueh tapoh maté ureuëng nyang hana meusalah nibak teumpat nyoe. 4 Meunyoe gata bit-bit tapeujak banmandum peue-peue nyang Ulôn peurintah nyan, teuma raja-raja nyang mat peurintah lagée Nabi Daud geutamong bak pintoe-pintoe geureubang meuligoe nyoe. Awaknyan meusajan deungon bubena peugawée dan rakyat jiduek ateueh geuritan dan ateueh guda. 5 Teuma meunyoe gata hana tataát ubak peue-peue nyang Ulôn peurintah, Ulôn meusumpah bahwa meuligoe nyoe jeuet keu rungka. Ulôn, TUHAN, ka Lôn peugah haba. 6 Nibak Ulôn meuligoe raja Yehuda lagak that, saban lagak jih lagée tanoh Gilead dan gunong-gunong Libanon; teuma teumpat nyan Lôn peujeuet lagée padang pasi nyang hana jiduek lé manusia. 7 Teuma Lôn kirém ureuëng laén jijak peuhanco banmandum nyan. Awaknyan teuma jiba patoe, dan jireuloh banmandum taméh-taméh jih nyang lagak nyang teupeugot nibak bak kayée ceumara Libanon. Laju atra nyan lé awaknyan jirhom lam apui. 8 Óh lheueh nyan jai that ureuëng aséng jijak rot nyan dan geuteumanyong sabe keudroe-droe jih pakon, Ulôn, TUHAN, ka meucok tendakan lagée nyan ateueh banda nyang lagak nyan. 9 Lé ureuëng laén bandum jijaweueb bahwa banmandum nyan teujadi sabab gata ka taiengkeue peujanjian gata deungon Ulôn, Po teu Allah gata, dan ka taseumah dan meu iébadat ubak ilah-ilah nyang laén." 10 He ureuëng Yehuda, bék meuduka sabab Raja Yosia nyang maté. Tapeuba-e kheueh keu Yoahas aneuëk jihnyan nyang agam sabab jihnyan ka jiba jiôh dan hana jipeuwoe le. Tanoh tumpah darah jihnyan hana jikalon le. 11 Keuhai Yoahas, bin Yosia nyan, nyang jeuet keu raja Yehuda keugeunantoe ureuëng syiek jih, TUHAN meufeureuman lagée nyoe, "Jihnyan ka jijak disinoe, dan hana geugisa le. 12 Jihnyan meuninggai di teumpat nyang teuböih, dan hana jingieng le nanggroe nyoe." 13 Ceulaka kheueh nyang jipeudong rumoh jihnyan deungon hana keuadelan, dan jipeuluwah rumoh nyan deungon hana jujoe. Ceulaka kheueh jihnyan nyang jiyue gob mubuet hana jijok upah. 14 Ceulaka cit teuma ureuëng nyang peugah, "Teuma lôn peudong meuligoe nyang raya deungon bilek-bilek nyang luwah di tingkat ateueh," laju bak meuligoe nyan jipeugot peuradeuen deungon bingkée nibak kayée ceumara Libanon, dan jicet mirah teuma. 15 Deungoe kheueh he Raja Yoyakim! Meunyoe gata tapeudong meuligoe ngon kayée ceumara Libanon nyang paleng gét, peu kheueh nyan sibagoe bukeuti bahwa gata raja nyang leubeh gét nibak raja-raja laén? Cuba ingat ubak ureuëng syiek gata: Gobnyan geurasa udeb nyang bahgia dan meuhase lam peue mantong useuha jih, sabab jihnyan sabe teupat dan jujoe dan jipeusidang peukara nyang gasien deungon ade. Lagée nyan kheueh seuharôh jih buet ureuëng nyang jituri ubak TUHAN. 17 Teuma gata, Yoyakim, laén. Gata nyang tamita keu untôngan pribadi. Gata tapoh maté ureuëng nyang hana meusalah, dan tatindéeh rakyat gata deungon keujam. 18 Sabab nyan keuhai Yoyakim raja Yehuda, bin Yosia, TUHAN meufeureuman lagée nyoe, "Maté jihnyan hana jipeumo ba-e; hana nyang peugah, 'Aduh, rakan lôn, aduh.' Hana nyang meuduka atawa jitawök, 'Wéueh that teungku amphon!' 19 Yoyakim jihue dan jigeulawa u luwa pintoe geureubang Yerusalem, lagée nyang jipeubuet lé ureuëng laén keu bangke keuleudée." 20 TUHAN meufeureuman, "He peunduduek Yerusalem, tajak kheueh laju u Libanon dan u Basan, dan meudumpék kheueh disinan. Gata tawök kheueh bak gunong-gunong Moab, sabab banmandum sikutu gata ka teupeutaloe. 21 Ulôn ka Lôn peugah haba ubak gata watée keuadaan gata gét, teuma gata hana tatem deungoe. Keubit meunan kheueh peurangoe ngon pi-e gata phon yoh ilée sampoe án jinoe; hántom na tatem taát ubak Ulôn. 22 Lé sabab nyan, bubena peumimpén gata gadôh lagée abée jiyueb lé angén. Sikutu-sikutu gata teuba lagée tawanan, dan banda gata jipeuhina ngon jipeumalée sabab buet gata nyang jeuhet. 23 Gata tinggai deungon aman sabab jikeulileng lé taméh-taméh bak kayée ceumara Libanon, teuma singoh, meunyoe gata rhot bak sakét, gata meudeurita lagée ureuëng inong peulahé aneuëk." 24 TUHAN meufeureuman ubak Raja Yoyakhin, bin Yoyakim raja Yehuda, "Deumi Ulôn, Allah nyang udeb, Ulôn peuteugaih bahpi gata nibak Ulôn lagée euncien meupatri nibak jaroe uneuen Lôn, teuma gata Lôn cabot 25 dan Ulôn jôk ubak ureuëng-ureuëng nyang gata takot dan nyang keuneuk poh maté gata. Gata Lôn jôk ubak Nebukadnezar raja Babel, meusajan deungon aneuëk buah gobnyan. 26 Gata dan ma gata Lôn use dan Ulôn böih u nanggroe nyang kon tanoh ié gata, dan disinan gata maté. 27 Gata keubit that tarindu ubak nanggroe nyoe, teuma gata hana tagisa." 28 Ulôn Yeremia lôn peugah, "Peu kheueh Raja Yoyakhin ka jeuet lagée beulangöng beukah nyang teuböih dan hana jigalak le? Nyang kheueh sabab jih jihnyan dan aneuëk-aneuëk jihnyan geu use dan geuböih u nanggroe nyang aséng nibak awaknyan?" 29 Wahe nanggroe lôn, deungoe kheueh peue nyang geupeugah lé TUHAN, 30 "Ureuëng nyang ka geupeuteuntée gadôh aneuëk-aneuëk jihnyan dan sabe gagal lam udeb jih. Nibak keuturonan jihnyan hana nyang meuhase jimat peurintah di Yehuda sibagoe raja keuturonan Nabi Daud. Ulôn, TUHAN, ka Lôn peugah haba."

Nabi Yeremia 23

1 TUHAN Po teu Allah Israel meufeureuman, "Ceulaka kheueh gata he dumna peumimpén nyang peu binasa dan nyang peu crebre umat Ulôn! Gata sikeubit jih tapeulara umat Ulôn, teuma hainyan hana gata peubuet; gata peubiyeu awaknyan meutabu dan jipeuplueng droe. Jinoenyoe Ulôn kuhuköm gata sabab buet gata nyang jeuhet. 3 Teuma umat Ulôn nyang na mantong tinggai sidroe sapat Lôn peusapat nibak nanggroe-nanggroe teumpat awaknyan Lôn böih. Awaknyan Lôn puwoe lom u tanoh ié droe jih dan keuturonan awaknyan meutamah le. 4 Ulôn kuangkat peumimpén nyang peulara awaknyan. umat Lôn hana teuma teumakot le atawa yo; hana meusidroe pih nibak awaknyan gadôh. Ulôn, TUHAN, ka Lôn peugah haba." 5 TUHAN meufeureuman, "Teuma teuka watée jih, Ulôn Lôn baiát sidroe raja nyang ade nibak keuturonan Nabi Daud. Raja nyan jimat peurintah deungon bijaksana, dan jipeubuet peue-peue nyang ade dan beuna bansaboh nanggroe. 6 Meunyoe jihnyan jipeurintah, ureuëng Yehuda seulamat, dan ureuëng Israel udeb deungon aman. Raja nyan jihôi 'TUHAN nyang peuseulamat geutanyoe.' 7 Teuma trok watée jih, manusia hana le jimeusumpah deumi Ulôn, Allah nyang udeb, nyang ba umat Israel jiteubiet lam nanggroe Meusé, 8 teuma deumi Ulôn, Po teu Allah nyang udeb, nyang ka Lôn ba umat Israel jiteubiet lam saboh nanggroe di utara, dan nibak bandum nanggroe laén dipat awaknyan ka Ulôn peu crebre. Awaknyan teuma tinggai di tanoh ié jih keudroe." 9 Nyoe kheueh peusan ulôn keuhai nabi-nabi: Até lôn hanco dan ulôn yo. TUHAN dan tutoe Gobnyan nyang suci teupeujeuet ulôn nyoe lagée ureuëng mabök nyang keubit that le lôn jieb ié anggô. 10 Nanggroe tanyoe peunoh deungon ureuëng-ureuëng nyang hana seutia ubak TUHAN. Awaknyan udeb lam keuadaan jeuhet dan jipeusalah guna keukuasaan nyang na nibak awaknyan. Sabab kutokan TUHAN, naleueng di blang ka habéh tho dan bansaboh nanggroe meuduka cita. 11 TUHAN meufeureuman, "Nabi dan teungku imeum hana jitem taát ubak Ulôn, meunan cit di Baét Lôn ka meurumpok dan Lôn ngieng keudroe awaknyan jipeubuet jeuhet. 12 Sabab nyan, rot awaknyan glue dan seupôt, sampoe meugantoh dan reubah. Ulôn kupeuteuka ceulaka u ateueh awaknyan, meunyoe ka trok watée jih Lôn huköm awaknyan. Ulôn, TUHAN, ka Lôn peugah haba. 13 Desya nabi-nabi Samaria ka lheueh Ulôn ngieng. Awaknyan jipeugah haba ateueh nan Baal, dan jipeuseusat Israel, umat Ulôn. 14 Teuma di Yerusalem Ulôn kalon nabi-nabi jipeubuet buet nyang leubeh jeuhet nibak nyang ka. Awaknyan meusulet dan meumukah, dan jisukong ureuëng nyang jipeubuet jeuhet, dan hana meusidroe pi jitem meutobat. Nibak Ulôn awaknyan banmandum jeuhet saban lagée peunduduek Sodom dan Gomora." 15 TUHAN Nyang Mahakuasa meufeureuman, "Teuma Ulôn bri ubak nabi-nabi di Yerusalem nyan seunaman nyang phet keujipajoh dan ié tuba keuji jieb, sabab buet awaknyan ka teupeusabab ureuëng-ureuëng laén bansaboh nanggroe hana jihoreumat keu Ulôn." 16 Keu peunduduek Yerusalem, TUHAN Nyang Mahakuasa geupeugah, "Bék tadeungoe peue-peue nyang jipeugah lé nabi-nabi nyang sabe geubri harapan nyang hampa. Awaknyan jipeusampoe khayalan jih keudroe dan bukon peue nyang Ulôn peusan. 17 Ubak dumna manusia nyang hánjitem deungoe tutoe haba Lôn, awaknyan sabe jipeugah, 'Gata seulamat.' Dan ubak tieb-tieb manusia nyang kreueh ulée, ureuëng nyan jipeugah, 'Gata hana meuteumé ceulaka.' " 18 Jinoe ulôn peugah, "Hana meusidroe pih nibak nabi-nabi nyan jiteupeue peue nyang na lam pikeran TUHAN. Hana nibak awaknyan nyang ka lheueh jideungoe dan jimuphom reuncana-reuncana Gobnyan; meunan cit hana nyang simak atawa nyang tem deungoe tutoe haba Gobnyan. 19 Meunyoe TUHAN geubeungéh lagée angén badée nyang meungamuk kancang habéh teusampôh bubena nyang na ureuëng-ureuëng nyang jeuhet. 20 Beungéh Gobnyan hana reuda sigohlom banmandum nyang geureuncana teulaksana. Óh singoh dudoe umat TUHAN geumuphom hainyan deungon nyata." 21 TUHAN meufeureuman, "Bit that nabi-nabi nyan, padahai awaknyan hana Ulôn yue. Ateueh nan Ulôn awaknyan jipeutrok haba, padahai hana peusan nyang Ulôn bri keu awaknyan. 22 Meunyoe awaknyan jiteupeue peue nyang na lam pikeran Lôn, teuntée kheueh awaknyan ka jipeutrok ubak umat Lôn peue mantong nyang ka Ulôn peugah. Teuma umat Ulôn meutobat nibak desya-desya dan pi-e jih nyang jeuhet. 23 Ulôn Po teu Allah nyang na dipat mantong, kon bak saboh teumpat mantong. 24 Hana meusidroe pih nyang hase jipeusöm droe nibak pandangan Lôn, sabab Ulôn na dipat mantong: bah kheueh dalam syeuruga meunan cit di ateueh bumoe. 25 Banmandum nyang jipeugah lé nabi-nabi nyan ka Ulôn teupeue. Ateueh nan Ulôn awaknyan meusulet bahwa peusan Ulôn ka geuteurimong meulalu lumpo. 26 Trok án pajan nabi-nabi nyan keuneuk jipeuseusat umat Ulôn deungon haba nyang jikarang keudroe? 27 Awaknyan pike deungon lumpo-lumpo nyang jipeugah nyan, umat Ulôn hase tuwo ubak Ulôn lagée indatu awaknyan jituwoe bak Ulôn dan jiseumah Baal. 28 Nabi nyang meulumpoe seuharôh jih jipeugah, 'Nyoe na kheueh lumpo.' Teuma Nabi nyang meuteumé peusan nibak Ulôn harôh jipeusampoe peusan nyan deungon sibeuna. Gandom hana jeuet teupeusabe deungon jeumpueng. 29 Tutoe Lôn lagée apui, dan lagée palée nyang hase teupeuhanco batée! 30 Ulôn kulawan banmandum nabi nyang ka jipeutrok peusan nibak seusabe rakan jih, laju jijak peugah bahwa nyan peusan Ulôn. 31 Meunan cit Ulôn lawan nabi-nabi nyang jipeutrok tutoe jihnyan keudroe, laju jipeugah bahwa nyan teuka nibak Ulôn. 32 Ulôn, TUHAN, Lôn lawan nabi-nabi nyan nyang peutrok lumpo-lumpo jihnyan nyang peunoh deungon haba sulet. Awaknyan jipeuseusat umat Ulôn deungon tutoe haba nyang beurakah. Ulôn hana Lôn yue ubak nabi-nabi nyan. Awaknyan meubacut hana meuguna keu umat Lôn. Ulôn, TUHAN, ka Lôn peugah haba." 33 TUHAN meufeureuman, "Yeremia, meunyoe sidroe nibak umat Lôn, atawa sidroe nabi atawa teungku imeum jiteumanyong bak gata, 'Peue peusan TUHAN?' Gata harôh tajaweueb, 'Gata na kheueh beuban TUHAN; sabab nyan gata harôh teuböih.' 34 Meunyoe sidroe lamkawan umat Lôn atawa nabi atawa teungku imeum mantong jipeugah hai 'beuban TUHAN, dan jihnyan dan keuluwarga jihnyan Lôn huköm. 35 Sikeubit jih, soemantong ureuëng nyang keubiet jiteumanyong ubak rakan jihnyan dan ubak keuluwarga jihnyan, 'Peu kheueh jaweueb TUHAN?' Atawa 'Peue nyang geupeugah lé TUHAN?' 36 Awaknyan hana jeuet le jipeugah 'beuban TUHAN'. Meunyoe mantong na nyang peugah istilah nyan, Ulôn ku peujeuet peusan Ulôn bit-bit beuban ateueh jihnyan. Ureuëng nyang peugah 'beuban TUHAN' ureuëng nyan na kheueh ka jiputa balek tutoe haba Lôn, Po teu Allah awaknyan, Allah nyang udeb, TUHAN Nyang Mahakuasa. 37 Awaknyan teuma habanyan jeuet jipeugah ubak nabi-nabi, 'Peu kheueh jaweueb TUHAN keu gata? Peu kheueh nyang geupeugah lé TUHAN?' 38 Meunyoe na nyang hana taát ubak peurintah Lôn, dan mantong geungui istilah 'beuban TUHAN', 39 Ulôn kucok awaknyan, laju Lôn geulawa jiôh-jiôh, bah kheueh awaknyan meunan cit banda nyang nyang ka Ulôn jok keu awaknyan dan indatu awaknyan. 40 Ulôn kupeujeuet awaknyan malée dan hina siumu masa dan naseb awaknyan hana jituwoe lé gob."

Nabi Yeremia 24

1 Saboh watée óh ka lheueh Yoyakhin bin Yoyakim raja Yehuda meusajan deungon peujabat peumeurintah Yehuda, dumna ureuëng tukang seumeuget dan banmandum ureuëng nyang malem nibak buet jiba lé Nebukadnezar raja Babel, dan jicok sibagoe tawanan di Yerusalem u Babel, TUHAN geujok saboh keumalon ubak ulôn. Ulôn kalon na dua boh raga nyang meuasoe deungon boh ara teupeuduek dikeue Baét TUHAN. 2 Raga nyang phon meuasoe boh ara nyang gét-gét, lagée boh ara hase nyang phon, seudangkan raga nyang keu dua meu asoe boh ara nyang brok-brok, sampoe hana jeuet teupajoh. 3 Laju TUHAN meufeureuman ubak ulôn, "Yeremia, peue nyang gata kalon?" Laju lôn jaweueb, "Boh ara, TUHAN. Nyang gét-gét lumpah gét, dan nyang brok-brok lumpah brok sampoe hana jeuet teupajoh." 4 Dan TUHAN meufeureuman lom, 5 "Ureuëng nyang ka Lôn peubiyeu jiba u Babel nyan Lôn anggab lagée boh ara nyang gét-gét nyoe; sabab nyan, Ulôn, TUHAN, Po teu Allah Israel, Lôn peusaneut awaknyan deungon gét. 6 Ulôn kujaga awaknyan dan Lôn peuwoe lom awaknyan u nanggroe nyoe. Ulôn kupeudong, kon Lôn peureuloh awaknyan; Ulôn kupula, kon Lôn cabot awaknyan. 7 Ulôn kubri ubak awaknyan hasrat mangat jipeuphom bahwa Ulôn kheueh TUHAN. Dan awaknyan jeuet keu umat Lôn, dan Ulôn jeuet keu Allah awaknyan, sabab awaknyan jigisa ubak Ulôn deungon sipeunoh até. 8 Teuma Zedekia raja Yehuda, meunan cit deungon bubena peujabat nyang rab deungon jihnyan, dan ureuëng Yerusalem nyang na mantong tinggai sidroe-droe sapat nyang mantong tinggai di nanggroe nyoe dan nyang ka jiminah u nanggroe Meusé, awaknyan banmandum lon peujeuet lagée boh ara nyang brok-brok nyoe, nyang hana jeuet teupajoh. Ulôn, TUHAN, ka Lôn peugah haba. 9 Ulôn kupeuceulaka awaknyan lagéenyan bagoe sampoe banmandum bansa nyang na bansigom donya nyoe jeuet teumakot. Dipat mantong awaknyan Ulôn tabu, awaknyan ji hina, jipeujeuet keu bahan jipeukém lé gob dan jiceuleuóh. Nan awaknyan jingui sibagoe kutokan. 10 Ulôn kupeuteuka prang u ateueh awaknyan, deuk, dan bala peunyakét sampoe awaknyan banmandum maté dan hana nyang tinggai di nanggroe nyoe nyang ka Ulôn jok keu awaknyan dan indatu awaknyan."

Nabi Yeremia 25

1 Bak thon nyang keu peuet óh ka lheueh Yoyakim bin Yosia jeuet keu raja Yehuda, ulôn meuteumé peusan nibak TUHAN keuhai banmandum bansa Yehuda. Bak watée nyan thon nyang keu phon óh ka lheueh Nebukadnezar jeuet keu raja Babel. 2 Ulôn peugah ubak banmandum bansa Yehuda dan peunduduek Yerusalem, 3 "Treb jih na dua ploh lhée thon, phon thon nyang keu lhée blaih peumeurintahan Yosia bin Amon ateueh Yehuda, trok ubak uroe nyoe TUHAN ka geupeugah haba ubak ulôn dan hántom na ulôn peulalée ubak gata peue nyang ka geupeugah. Teuma lé gata teutab hana tapako. 4 Meunan cit lé TUHAN hana putôh-putôh geukirém ubak gata nabi-nabi nyang hamba-hamba Gobnyan, teuma gata teutab hana tatem deungoe dan tapako awaknyan. 5 Awaknyan geuyue ubak gata mangat gata tinggai cara udeb gata nyang jeuhet, dan buet-buet gata nyang meudesya, mangat gata teutab jeuet tatinggai di nanggroe nyoe nyang ka geubri lé TUHAN ubak gata dan ubak indatu gata seubagoe hak milék pusaka. 6 Nabi-nabi nyan jitam gata taseumah atawa tameu iébadat ubak ilah-ilah nyang laén. Awaknyan jitam gata taseumah beurala-beurala nyang gata peugét keudroe, sabab nyang gata peubuet lagée nyan TUHAN keubit that meureuka. Meunyoe gata taturot peue nyang ka geupeurintah lé TUHAN nyan, Gobnyan hana geuhuköm gata. 7 Teuma TUHAN keudroe geupeugah bahwa gata hana tatem deungoe Gobnyan. Teuma seubalek jih gata tapeutamah beungéh TUHAN sabab beurala-beurala gata nyan. Gata keudroe kheueh nyang peuteuka huköman Gobnyan u ateueh droe gata keudroe. 8 Sabab gata hana tatem deungoe tutoe haba Gobnyan, teuma TUHAN Nyang Mahakuasa geupeugah, 9 'Ulôn kutawök banmandum bansa nyang na di utara, meunan cit deungon hamba Lôn, Nebukadnezar raja di nanggroe Babel. Awaknyan Ulôn kraih keujijak muprang deungon Yehuda dan peunduduek jihnyan dan banmandum bansa nyang na tinggai rab-rab disinan. Bansa Yehuda meusajan deungon bansa-bansa teutangga jihnyan Lôn peubinasa dan Lôn peuhanco keu siumu masa. Ureuëng-ureuëng nyang ngieng hainyan teukeujot dan meurasa gli. Ulôn, TUHAN, ka Lôn peugah haba. 10 Su-su awaknyan nyang teukém-kém ria ngon riôh dan ramé-ramé di rumoh ureuëng khanuri Lôn peupiôh. Awaknyan hana minyéuk keu jitot panyöt, dan gandom awaknyan teuma habéh. 11 Bansaboh nanggroe nyoe Lôn peubiyeu hanco dan seungue. Bansa-bansa nyang na bansikeulileng nyan jimeungabdi ubak raja Babel tujoh ploh thon treb jih. 12 Óh lheueh nyan Ulôn kuhuköm bansa Babel dan raja jihnyan sabab desya nyang jipeubuet lé awaknyan. Nanggroe Babel Lôn reulôh dan Lôn peubiyeu hanco siumu masa. 13 Babel Lôn huköm deungon banmandum beuncana nyang ka Ulôn reuncana keu bansa-bansa nyang ka Ulôn bri tée meulalu Yeremia -- na kheueh banmandum reuncana nyang teucetet lam kitab nyoe. 14 Buet-buet ureuëng Babel Lôn balaih; awaknyan jipeubudak lé raja-raja nyang raya dan lé bansa-bansa nyang laén.' " 15 TUHAN, Po teu Allah Israel, meufeureuman ubak ulôn, "Tacok kheueh saboh glah anggô nyoe nyang ka lheueh Lôn paso ngon anggô beungéh Lôn. Taba kheueh laju ubak meubagoe bansa ho-ho mantong gata Ulôn kirém, dan tayue ubak awaknyan mangat jijieb ié anggô nyoe. 16 Meunyoe awaknyan ka jijieb ié anggô nyan, awaknyan laju mumang meuayon-ayon dan gadôh akai watée prang Ulôn peuteuka ubak awaknyan." 17 Dan laju lôn teurimong glah anggô nyan nibak jaroe TUHAN, dan laju ulôn jak ubak meubagoe bansa bak teumpat TUHAN ka geu kirém ulôn, laju ulôn peujeuet awaknyan beujijieb ié anggô nyan. 18 Yerusalem dan banmandum banda nyang na di Yehuda, meusajan raja-raja dan peujabat-peujabat disinan, bandum ulôn bri ié anggô nyan jijieb, sampoe awaknyan ka jeuet lagée padang nyang tandus dan lumpah meubahya. Sampoe nibak uroe nyoe nan awaknyan teungui sibagoe nan teukutok. 19 Nyoe kheueh dafeutar nan-nan ureuëng laén nyang harôh jijieb nibak glah anggô TUHAN nyan: raja Meusé deungon bandum peugawée dan peujabat-peujabat gobnyan; banmandum ureuëng Meusé dan ureuëng aséng nyang na di nanggroe Meusé; bandum raja di nanggroe Us; banmandum raja banda-banda Filistin di Askelon, Gaza, Ekron; banmandum ureuëng nyang mantong udeb di Asdod; bandum ureuëng Edom, Moab, dan Amon; banmandum raja di Tirus dan Sidon; banmandum raja nyang na tinggai bak binéh Laôt Teungoh; banda-banda Dedan, Tema, dan Bus; banmandum ureuëng nyang jigunteng paneuk ôk gobnyan; banmandum raja Arab; banmandum raja sukée-sukée meujampu nyang na tinggai di padang pasi; banmandum raja di Zimri, Elam, dan Madai; banmandum raja di utara, jiôh dan tho, sidroe deumi sidroe. Banmandum bansa nyang na bansigom donya harôh jijieb ié anggô nyan. Dan ureuëng nyang keuneulheueh nyang jieb ié anggô nyan na kheueh raja Babel. 27 TUHAN meufeureuman lom ubak ulôn, "Tapeugah kheueh ubak bandum awaknyan, bahwa Ulôn, TUHAN Nyang Mahakuasa, Allah Israel, nyang yue awaknyan jijieb ié nyan sampoe mabök dan muntah-muntah. Ulôn peujeuet awaknyan reubah dan hana jeuet jibeudôh le sabab muprang nyang Ulôn peuteuka ateueh awaknyan. 28 Dan meunyoe awaknyan hánjitem teurimong glah nyan nibak jaroe gata keu jijieb ié anggô nyan, tapeugah kheueh laju bahwa TUHAN Nyang Mahakuasa nyang peurintah hai lagée nyan. 29 Ulôn kupeuphon peuhanco nyan bak banda Lôn keudroe. Bék sampoe awaknyan jisangka bahwa awaknyan hana teuhuköm. Awaknyan pasti teuhuköm sabab Ulôn Lôn peuteuka prang ateueh meubagoe bansa bansigom bumoe nyoe. Ulôn, TUHAN Nyang Mahakuasa ka Lôn peugah haba. 30 Banmandum nyang Ulôn peugah ubak gata, he Yeremia, harôh kheueh gata peusampoe. Tapeugah kheueh ubak awaknyan, 'Su TUHAN meudeungong lam syeuruga; nibak teumpat tinggai nyang suci Gobnyan geumeusu meu grum-grum geulawan umat Gobnyan. Banmandum peunduduek bumoe teudeungoe su Gobnyan geumeudumpék lagée su ureuëng keureuja bak teumpat prah ié anggô. 31 Trok bak ujong bumoe su Gobnyan meudeungong; TUHAN geupeugét peukara keu bansa-bansa. Banmandum ureuëng jiba bak sidang dan nyang jeuhet geuhuköm maté.' " 32 TUHAN Nyang Mahakuasa meufeureuman, "Di ujong trok bak ujong bumoe teudeungoe su angén badée nyang nyang meugrum-grum; beuncana rhot ateueh bansa-bansa sidroe deumi sidroe." 33 Bak uroe nyan manyét-manyét nyang ka geupoh lé TUHAN habéh meugageueng ngon meusipreuk bansigom bumoe. Awaknyan hana nyang peumo ba-e, hana teuma ureuëng nyang jitem jakcok keu jijak kubu lam jrat, teuma jipeubiyeu mantong nibak tanoh lagée sinamon bröh. 34 Ho gata banmandum peumimpén, ho gata dumna nyang rabe umat! Gata mo ba-e kheueh beuhabéh seuneuga! Meubalek-balek kheueh lam abée, sabab ka trok watée jih gata teupoh maté, dan nyang hánkeunong geupeu crebre. Gata lagée beujana nyang meuhái yuem nyang rhot dan beukah. 35 Gata pasti hana lheueh. 36 Gata apoh apah dan tamo ba-e deungon peudeh sabab TUHAN dalam keuadaan beungéh Gobnyan nyang luwa biasa sampoe habéh binasa banmandum bansa gata dan geupeuhanco nanggroe gata nyang aman nyan. 38 Lagée singa nyang jiteubiet lam uruek, meunan kheueh TUHAN geuteubiet geujak huköm umat. Keukeujaman prang dan meureuka TUHAN ka teu ubah nanggroe nyoe jeuet keu padang pasi.

Nabi Yeremia 26

1 Watéenyan cit teuma óh ka lheueh Yoyakim bin Yosia jeuet keu raja Yehuda, 2 TUHAN meufeureuman ubak ulôn, "Gata dong laju bak seuramoe Baét Ulôn dan mariet kheueh ngon peunduduek Yehuda nyang teuka jijak meuiébadat keunan. Tapeusampoe kheueh ubak awaknyan banmandum nyang Ulôn peurintah ubak gata mangat teujok keu awaknyan. Bék peukureueng bahpi meubacut pi. 3 Mungkin bansa nyan jitem deungoe, laju jipiôh jipeubuet jeuhet, sampoe ulôn peubateue niet Ulôn keuneuk peuhanco awaknyan nyang saban ngon buet awaknyan nyang jeuhet." 4 TUHAN meufeureuman ubak ulôn geuyue peusampoe haba nyang lagée nyoe ubak awaknyan, "Ulôn, TUHAN, ka Lôn peurintah mangat gata taát ubak Ulôn dan tapeujak banmandum huköm-huköm nyang ka Ulôn bri keu gata. 5 Gata harôh tawoe tajak deungoe peue nyang ka geupeugah lé hamba-hamba Lôn, bubena nabi hana putôh-putôh Ulôn kirém ubak gata. Teuma gata teutab hana tatem deungoe peue nyang geupeugah lé nabi-nabi nyan. 6 Meunyoe gata teutab meubantah, rumoh iébadat nyoe Lôn peujeuet lagée Silo, seuhingga bubena bansa ateueh rueng donya jipeuguna nan Yerusalem nyoe sibagoe kutokan." 7 Banmandum nyang ulôn peugah di Baét TUHAN nyan jideungoe lé banmandum teungku imeum, bubena nabi dan rakyat. 8 Watée nyan cit óh ka lheueh lôn peusampoe banmandum peusan TUHAN lagée nyang ka geupeurintah ubak ulôn nyan, awaknyan laju jidrob ulôn sira ji kliek-kliek "Gata harôh maté! 9 Beuhe that gata peugah ateueh nan TUHAN bahwa Baét Gobnyan nyoe jeuet lagée Silo, dan bahwa banda nyoe geupeuhanco dan jeuet keu teumpat nyang hana ureuëng duek le." Laju ulôn jihudöm lé ureuëng ramé. 10 Watée peujabat-peujabat peumeurintah Yehuda jideungoe peue nyang ka teujadi, awaknyan bagaih-bagaih jiteubiet nibak meuligoe raja dan jijak u Baét TUHAN, dan jiduek bak babah Pintoe Geureubang Barô. 11 Bubena teungku-teungku imeum dan nabi-nabi geupeugah ubak rakyat, "Ureuëng nyoe patot that teuhuköm maté sabab gobnyan ka geupeuteubiet haba nyang jilawan banda geutanyoe nyoe. Gata keudroe ka tadeungoe." 12 Laju ulôn peugah lagée nyoe, "TUHAN kheueh nyang yue ubak ulôn mangat lôn peusampoe peusan keuhai Baét TUHAN dan banda nyoe lagée nyang gata deungoe. 13 Sabab nyan ubah kheueh cara udeb gata dan buet-buet gata; taát kheueh ubak TUHAN Po teu Allah gata, mangat Gobnyan geupeubateue niet Gobnyan keu geupeuceulaka gata. 14 Keuhai droe ulôn, bit na lam kuasa gata keu tapeubuet peue mantong meunurot nyang gata galak. 15 Teuma ingat, meunyoe gata tapoh maté lôn, gata dan peunduduek banda nyoe tatanggong buet nyang salah ateueh tapeu maté ureuëng nyang hana meusalah. Sabab, TUHAN kheueh nyang yue ulôn keulôn jakba peuingat keu gata." 16 Dan bubena peujabat peumeurintah jipeugah ubak teungku-teungku imeum dan nabi-nabi nyan, "Ureuëng nyoe jimeututoe ateueh nan TUHAN Po teu Allah geutanyoe; hana patot ureuëng nyoe tahuköm maté." 17 Óh ka lheueh nyan na meupadub droe lamkawan peumimpén bansa jimaju ukeue sira jipeugah ubak ureuëng-ureuëng nyang na meusapat disinan, 18 "Watée Hizkia jeuet keu raja Yehuda, Nabi Mikha nibak Moresyet geupeutrok ubak rakyat haba nyoe nibak TUHAN Nyang Mahakuasa, 'Sion teumeu-ué lagée teumeu-ué blang, Yerusalem jeuet lagée sinamon bangke rumoh nyang reuloh, dan bukét Baét TUHAN jeuet lagée uteun.' 19 Teuma Raja Hizkia dan ureuëng Yehuda hana geupoh maté Mikha. Hizkia geutakot ubak TUHAN dan geulakée geugaséh lé Gobnyan. Dan TUHAN geutarek lom peue nyang ka geupeugah keu geupeuceulaka awaknyan. Dan bak saát nyoe, rab geutanyoe tapeuteuka ceulaka ateueh droe geutanyoe keudroe." 20 Na cit ureuëng laén jimeututoe jipeuceulaka banda dan bansa nyoe ateueh nan TUHAN, lagée nyang ulôn peubuet. Ureuëng nyan nan jih Uria bin Semaya asai di Kiryat-Yearim. 21 Bak watée Raja Yoyakim meusajan deungon peuwira-peuwira gobnyan dan banmandum peujabat peumeurintah jideungoe peue nyang jipeugah lé Uria nyan, raja meu-useuha keuneuk poh maté gobnyan. Teuma Uria jideungoe haba nyan laju teuka teumakot dan jiplueng u nanggroe Meusé. 22 Teuma Raja Yoyakim jiyue ubak Elnatan bin Akhbor meusajan deungon napadub droe ureuëng laén u nanggroe Meusé dan jiyue cok Uria. 23 Laju Uria nyan jiba lom ubak Raja Yoyakim. Óh lheueh nyan raja geuyue poh maté jihnyan, dan manyét nyan geuyue böih bak lampôh jrat umum. 24 Teuma bak saát nyoe beureukat geutulông lé Ahikam bin Safan, ulôn, Yeremia hana jiseurah ubak rakyat keu jipoh maté.

Nabi Yeremia 27

1 Hana treb óh lheueh Zedekia bin Yosia jeuet keu raja Yehuda, TUHAN geuyue ubak ulôn 2 mangat lôn peugot talo-talo nibak kulet dan krah takue nibak kayée, dan teupasang laju atranyan bak takue lôn. 3 Meunan cit Gobnyan geuyue ubak ulôn jak peusampoe peusan Gobnyan ubak raja Edom, Moab, Amon, Tirus dan Sidon, deungon peurantara utosan-utosan awaknyan nyang ka teuka u Yerusalem keu teujak saweue Raja Zedekia. 4 Ulôn harôh lôn bri tée ubak awaknyan bahwa TUHAN Nyang Mahakuasa, Po teu Allah Israel, meufeureuman, 5 "Deungon kuasa Lôn nyang raya dan deungon teunaga Lôn Ulôn ka Lôn cebta bumoe dan manusia meunan cit deungon banmandum beulatang, dan Ulôn jeuet Ulôn jok ubak soe mantong nyang Ulôn galak. 6 Ulôn kheueh nyang jok banmandum bansa nyoe lam keukuasaan hamba Lôn, Nebukadnezar, raja Babel. Dan beulatang pih ka Lôn jok ubak jihnyan mangat jeuet jikuasa. 7 Banmandum bansa jimeungabdi ubak jihnyan, ubak aneuëk agam jih, dan ubak cucoe jih sampoe ubak saát jih nanggroe jihnyan rhot. Bak masanyan bansa Babel meungabdi ubak bansa-bansa nyang teuga dan raja-raja rayeuk. 8 Bansa atawa keurajeuen nyang hánjitem taklok ubak Nebukadnezar Lôn huköm deungon prang, deuk, dan bala peunyakét, sampoe akhé jih bansa nyan taklok ubak gobnyan. 9 Bék kheueh tadeungoe nabi-nabi atawa somantong nyang hana gata taklok ubak raja Babel, bahpi awaknyan meungaku ka jiteurimong peutunyok lam lumpo, roh-roh halôh, atawa deungon jingui teunaga gaéb. 10 Awaknyan jipeungéut gata sampoe gata kajiba trok án jiôh nibak nanggroe gata. Ulôn ku use gata nibak nanggroe gata dan gata binasa. 11 Teuma bansa nyang jitem taklok dan jitem meungabdi ubak raja Babel Lôn peubiyeu tinggai di tanoh ié jih keudroe, dan jiseumuga keudroe disinan, Ulôn, TUHAN, ka Lôn peugah haba." 12 Ubak Zedekia raja Yehuda, ulôn, Yeremia, ulôn peugah hai nyang saban. Ulôn peugah, "Meunyeurah kheueh ubak raja Babel. Taát kheueh ubak raja nyan dan ubak bansa nyan, mangat Teungku raja seulamat. 13 TUHAN ka meufeureuman bahwa bansa nyang hana taklok ubak raja Babel maté di mideuen prang, keunong deuk, atawa bala peunyakét. Pakon Teungku raja dan rakyat neutem maté seucara lagée nyan? 14 Bék neudeungoe nabi-nabi nyang geutam Teungku raja taklok ubak raja Babel, sabab awaknyan jipeungéut Teungku raja. 15 Awaknyan jipeugah bahwa jimeututoe nyan na kheueh ateueh nan TUHAN, teuma nyang bit awaknyan jimeusulet. TUHAN keudroe geupeugah bahwa Gobnyan hana geukirém awaknyan. Sabab nyan Gobnyan geupeu crebre dan geupeubinasa Teungku raja meusigoe ngon nabi-nabi nyang meusulet bak Teungku raja." 16 Óh lheueh nyan ulôn bri tée ubak teungku-teungku imeum dan ubak banmandum rakyat bahwa TUHAN meufeureuman lagée nyoe, "Bék tadeungoe nabi-nabi nyang jipeugah hana treb le barang-barang nyang na di Baét Ulôn jiba lom nibak di Babel. Awaknyan sulet. 17 Bék tadeungoe peue nyang jikheun lé awaknyan! Meunyeurah kheueh ubak raja Babel, mangat gata seulamat. Keupeue banda nyoe jipeuhanco? 18 Meunyoe awaknyan keubit beutôi nabi, dan ka jiteurimong peusan nibak Ulôn, pasti awaknyan jinoe jilakée bak Lôn, TUHAN Nyang Mahakuasa, mangat barang-barang nyang mantong na di Baét Lôn dan bak meuligoe raja di Yerusalem hana teu angkot u Babel. 19 Sabab Ulôn, TUHAN Nyang Mahakuasa, Po teu Allah Israel, ka Lôn peuputôh bahwa banmandum atra nyan teu angkot u Babel, dan teutab tinggai disinan sampoe án Ulôn kalon lom teuma. Bak watée nyan barô kheueh Ulôn ba lom u teumpat nyoe. Ulôn, TUHAN, ka Lôn peugah haba." Barang-barang nyang mantong na di Baét TUHAN nyan na kheueh: taméh-taméh, beujana peurunggu, geuritan-geuritan, dan napadub macam barang nyang laén atra Baét TUHAN. Barang-barang nyan hana rhoh teuba u Babel, bak watée Yoyakhin bin Yoyakim raja Yehuda meunan cit deungon ureuëng patot-patot masyarakat Yehuda dan Yerusalem teuba u Babel lé Raja Nebukadnezar.

Nabi Yeremia 28

1 Thon nyan cit teuma bak buleuen limong thon nyang keu peuet geumat keurajeuen lé Raja Zedekia, Hananya bin Azur, sidroe nabi di banda Gibeon, geumarit ngon ulôn bak Baét TUHAN. Dikeue teungku-teungku imeum dan banmandum rakyat gobnyan geupeugah ubak ulôn 2 bahwa TUHAN Nyang Mahakuasa, Po teu Allah Israel, geupeugah lagée nyoe, "Keukuatan raja Babel ka Lôn peupatah. 3 Dalam watée dua thon nyoe Ulôn kupeuriwang barang-barang nibak Baét Lôn, nyang ka ji angkot u Babel lé Raja Nebukadnezar. 4 Meunan cit Ulôn ba lom Yoyakhin bin Yoyakim raja Yehuda, meusajan deungon banmandum rakyat Yehuda nyang ka jiba u Babel. Ulôn, TUHAN, ka Lôn peugah haba." 5 Dan dikeue banmandum teungku-teungku imeum dan banmandum rakyat nyang jidong dikeue Baét TUHAN nyan, laju lôn peugah ubak Hananya, 6 "Gét that! Mudah-mudahan mantong ramaian gata nyan jeuet keunyataan, dan TUHAN beutôi-beutôi geuba lom di Babel barang-barang Baét TUHAN meusajan deungon banmandum ureuëng nyang ka teuböih disideh. 7 Teuma gata, Hananya, dan gata bandum, he rakyat, deungoe kheueh nyoe: 8 Nabi-nabi sigohlom masa geutanyoe ka geuamai bahwa muprang, mala peutaka, dan bala peunyakét keunong ateueh bansa-bansa dan keurajeuen nanggroe nyang teuga-teuga. 9 Teuma nabi nyang geuamai keuadaan damé, teuma jeuet teu aku sibagoe nabi nyang beutôi-beutôi geu kirém lé TUHAN, meunyoe ramaian-ramaian gobnyan jeuet keunyataan." 10 Lé Hananya laju geureubot gandoe nyang meugantung bak takue lôn dan laju geuwiet gandoe nyan. 11 Dikeue banmandum rakyat nyang teuka keunan bak watée nyan gobnyan geupeugah, "TUHAN meufeureuman bahwa meunoe kheueh cara Gobnyan geuwiet gandoe nyang jipasang lé Raja Nebukadnezar nibak takue jeueb-jeueb bansa; TUHAN teuma geupeubuet nyan lam watée dua thon nyoe." Óh lheueh nyan, ulôn pih lôn jak. 12 Hana padub treb teuma óh lheueh keujadian nyan, TUHAN geuyue bak ulôn 13 jak ubak Hananya jeuet lôn peugah lagée nyoe, "TUHAN geupeugah bahwa gata jeuet mantong tawiet gandoe kayée, teuma Gobnyan geugantoe deungon gandoe beuso. 14 TUHAN Nyang Mahakuasa, Allah Israel, meufeureuman bahwa Gobnyan geupeungui gandoe beuso nibak takue banmandum bansa-bansa nyoe, dan awaknyan meungabdi ubak Nebukadnezar, raja Babel. TUHAN meufeureuman cit bahwa beulatang juah pi jiseurah ubak keukuasaan Nebukadnezar." 15 Banmandum nyan ulôn peutrok ubak Hananya, laju lôn peugah lom, "Deungoe kheueh nyoe, he Hananya! TUHAN hana geu kirém gata; gata ka tapeujeuet bansa nyoe jipeucaya ubak tutoe haba nyang dusta. 16 Sabab nyan kheueh TUHAN geupeugah bahwa gata geusampôh di ateueh bumoe. Thon nyoe cit teuma gata maté, sabab gata ka tayue bansa nyoe jilawan TUHAN." 17 Dan bak thon nyoe cit teuma nibak buleuen nyang keu tujoh, Hananya meuninggai donya.

Nabi Yeremia 29

1 Ulôn tuléh surat keu teungku-teungku imeum, nabi-nabi, peumimpén-peumimpén bansa nyang mantong udeb, dan keu banmandum ureuëng laén nyang jiangkot di Yerusalem u Babel lé Nebukadnezar. 2 Surat nyan ulôn tuléh óh ka lheueh Raja Yoyakhin, ma gobnyan, peugawée-peugawée meuligoe, peujabat-peujabat peumeurintahan Yehuda dan Yerusalem, dumna peungrajin, dan bandum ureuëng carông nibak buet ji angkot ubak teumpat nyang teuböih. 3 Ulôn titeb surat nyoe ubak Elasa bin Safan, dan Gemarya bin Hilkia nyang geukirém lé Zedekia raja Yehuda ubak Nebukadnezar raja Babel. Asoe surat nyan su jih lagée nyoe, 4 "Meunoe kheueh feureuman TUHAN Nyang Mahakuasa, Po teu Allah Israel keu banmandum ureuëng nyang ka geuböih nibak Yerusalem u Babel: 5 'Teutab kheueh tinggai disinan. Peudong kheueh laju rumoh-rumoh gata. Puga kheueh lampôh dan pajoh kheueh hase jih. 6 Meukawen kheueh mangat gata meuteumé aneuëk, dan bah kheueh teuma aneuëk-aneuëk gata jimeukawen mangat awaknyan pih meuteumé aneuëk. Jeumeulah gata harôh meutamah le dan hana jeuet kureueng. 7 Meubuet kheueh keuseujahteuraan banda-banda teumpat gata Ulôn böih. Meudoá kheueh ubak Ulôn keu keupeuntengan banda-banda nyan, sabab meunyoe banda-banda nyan makmu, gata pih makmu cit. 8 Ulôn, TUHAN, Nyang Mahakuasa, Allah Israel, Lôn peuingat gata mangat bék sampoe jipeungéut lé nabi-nabi nyang na tinggai lamkawan gata atawa lé soemantong nyang jipeugah bahwa awaknyan carông jiramai soai masa ukeue. Bék tapeureumeun ubak peue-peue nyang awaknyan meulumpo. 9 Awaknyan jingui nan Ulôn keu jicalitra keugata keu hai-hai nyang hana beutôi. Ulôn hana Lôn yue awaknyan. Ulôn, TUHAN, ka Lôn peugah haba.' 10 TUHAN meufeureuman, 'Pajan watée jih ka geunab masa tujoh ploh thon keu Babel, Ulôn kukalon gata lom teuma, dan Lôn peuteupat janji Lôn keu Lôn puwoe gata nibak teumpat nyoe. 11 Bukon kheueh Ulôn nyang leubeh teupeue reuncana-reuncana Ulôn keu gata? Reuncana-reuncana nyan kon Lôn peuceulaka gata, teuma keuseujahteuraan gata dan keu Lôn bri ubak gata masa ukeue nyang peunoh harapan. 12 Teuma gata talakée tulông ubak Ulôn. Gata teuka tajak meudoá ubak Ulôn, dan Ulôn kujaweueb doá gata. 13 Gata mita Ulôn dan meurumpok deungon Lôn, sabab gata mita deungon sipeunoh até. 14 Beutôi, gata meurumpok deungon Lôn. Gata Lôn peusapat lamkawan tieb-tieb bansa dan nibak tieb-tieb nanggroe teumpat gata jipeu crebre dan jiböih. Gata Lôn ba lom u nanggroe asai gata nyoe dan Lôn peupuléh keuadaan gata. Ulôn, TUHAN, ka Lôn peugah haba.' 15 Meunurot gata, TUHAN ka geubri keugata nabi-nabi di Babel. 16 Deungoe kheueh peue nyang geufeureuman lé TUHAN keuhai raja nyang mat peurintah nibak saát nyoe, na kheueh raja keuturonan Nabi Daud, dan keuhai peunduduekan banda nyoe, na kheueh waréh kawöm gata nyang hana teuba nibak teumpat böih meusajan ngon gata. 17 TUHAN Nyang Mahakuasa meufeureuman, 'Ulôn ku peuteuka prang, musém deuk, dan bala peunyakét u ateueh awaknyan. Awaknyan Lôn peusaneut lagée boh-boh ara nyang ka that brok sampoe hana jeuet le teupajoh. 18 Awaknyan Lôn peucrok sabe deungon muprang, musém deuk dan bala peunyakét sampoe banmandum bansa bansigom donya meurasa gli watée jikalon keuadaan awaknyan. Dipat mantong awaknyan Ulôn peucrebre, ureuëng laén meurasa gli dan teumakot óh watée jikalon peue nyang ka teujadi ateueh awaknyan. Awaknyan jihina, dan nan awaknyan sabe jingui sibagoe nan nyang geukutok lé TUHAN . 19 Banmandum nyan teujadi ateueh awaknyan, sabab awaknyan hana jiseutôt peusan Ulôn nyang hana putôh-putôh Ulôn peusampoe ubak awaknyan meulalu nabi-nabi hamba Ulôn. Awaknyan han jitem peureumeuen ubak peusan Ulôn nyan. 20 Dan gata banmandum nyang ka Ulôn böih u Babel, deungoe kheueh peue nyang Ulôn, TUHAN, peugah.' 21 TUHAN Nyang Mahakuasa, Po teu Allah Israel, ka geumeututoe keuhai Ahab bin Kolaya, dan keuhai Zedekia bin Maaseya nyang ka jipeuguna nan TUHAN keu jipeusampoe ubak gata hai-hai nyang hana beutôi. TUHAN geupeugah bahwa Gobnyan teuma geuseurah awaknyan ubak keukuasaan Nebukadnezar raja Babel, nyang poh maté awaknyan dikeue mata gata. 22 Dan meunyoe ureuëng-ureuëng nyang ka geu angkot nibak Yerusalem u Babel keuneuk jikutok sidroe-droe ureuëng, awaknyan jipeugah, 'Seumoga TUHAN geupeu jeuet gata lagée Zedekia dan Ahab, nyang ka jitot udeb-udeb lé raja Babel.' 23 Meunan kheueh naseb awaknyan sabab ka jipeubuet desya-desya raya di Israel: awaknyan ji meumukah, dan jingui nan TUHAN keuhai-hai nyang hana beutôi. Nyan meulawan deungon keuheundak TUHAN . Gobnyan geuteupeue peue nyang awaknyan peubuet, dan gobnyan keudroe jeuet keusaksi geulawan awaknyan. TUHAN ka geupeugah haba." 24 TUHAN Nyang Mahakuasa, Po teu Allah Israel geubri peusan ubak ulôn keu Semaya ureuëng Nehelam, sabab Semaya ka jikirém surat ateueh nan jih keudroe ubak banmandum peunduduek Yerusalem, ubak Teungku Imeum Zefanya bin Maaseya, dan banmandum teungku imeum nyang laén. Dalam surat nyan Semaya geutuléh lagée nyoe keu Zefanya: 26 "TUHAN ka geu baiát gata jeuet keu teungku imeum geunantoe Yoyada, dan jinoenyoe gata peujabat manyang di Baét TUHAN. Tugaih gata na kheueh mangat gata peurintah tieb-tieb ureuëng pungoe, nyang meungaku droe jih nyan nabi, ranté laju ngon ranté beuso nibak takue jih. 27 Teuma pakon gata hana meutindak ateueh Yeremia ureuëng Anatot nyan nyang ka jipeujeuet droe lagée nabi teuhadab bansa geutanyoe? 28 Ureuëng nyang lagée nyan babah jih harôh teugunci, sabab jihnyan jipeugah ubak ureuëng-ureuëng geutanyoe nyang na di Babel bahwa awaknyan mantong treb tinggai disideh. Dan sabab nyan, kheun gobnyan, awaknyan harôh jipeudong rumoh dan jipuga blang dan jipajoh hase jih." 29 Surat nyan geubaca lé Teungku Imeum Zefanya keu ulôn. 30 Sabab nyan kheueh TUHAN geuyue ubak ulôn 31 lôn kirém haba keuhai Semaya keu bandum ureuëng Israel nyang ka teuböih di Babel. Nyoe su haba nyan, "Semaya ka jimariet deungon gata siulah-ulah jihnyan nabi; padahai, Ulôn, TUHAN, hana Ulôn yue jih nyan. Sabab jih nyan ka jipeujeuet gata tapeucaya keu haba nyang sulet, 32 dan sabab jihnyan ka jiyue gata talawan Ulôn, teuma Ulôn kuhuköm jih nyan dan keuturonan jih. Hana meusidroe pi lamkawan awaknyan teutinggai di teungoh-teungoh kamoe keu jingieng hai-hai nyang jroh nyang Ulôn peubuet keu banmandum umat Ulôn. Ulôn, TUHAN, ka Lôn peugah haba."

Nabi Yeremia 30

1 TUHAN, Po teu Allah Israel meufeureuman ubak ulôn, "Tatuléh kheueh dalam saboh kitab banmandum nyang ka Ulôn peugah ubak gata. 3 Sabab teuka watée jih Ulôn peupuléh keuadaan umat Ulôn Israel dan Yehuda. Ulôn kuba lom awaknyan u nanggroe nyang ka Ulôn jok keu indatu awaknyan. Nanggroe nyan awaknyan jicok lom. Ulôn, TUHAN, ka Lôn peugah haba." 4 TUHAN meufeureuman keu umat Israel dan Yehuda, 5 "Ulôn ka Lôn deungoe geumeuciek ureuëng nyang yo meugum-gum geumeuciek ureuëng nyang teumakot nyang hana nibak jihnyan keudaméan. 6 Ci kheueh tapike dan taseulidek! Peu kheueh mungken ureuëng agam jipeulahé aneuëk? Meunyoe meunan, pakon na Lôn ngieng soe mantong ureuëng agam ruman jihnyan masam ngon pucat dan jipicet pruet jihnyan deungon jaroe lagée ureuëng inong keuneuk peulahé aneuëk? 7 Uroe nyang luwa biasa ka trok jiteuka, uroe nyang hana bandeng jih. Nibak umat Lôn, nyan kheueh uroe nyang paleng gundah; teuma awaknyan Lôn peuseulamat." 8 TUHAN Nyang Mahakuasa meufeureuman lom ubak umat Gobnyan, "Meunyoe ka trok nibak uroe nyan, gandoe nyang teupeungui bak kudok gata Ulôn wiet, dan beuleunggu gata Lôn ploih. Gata hana jeuet le keu namiet ureuëng aséng. 9 Gata meungabdi ubak Ulôn, TUHAN Po teu Allah gata, dan ubak sidroe keuturonan Nabi Daud nyang Lôn angkat sibagoe raja. 10 Umat Ulôn Israel, bék kheueh teumakot! Hamba Ulôn Nabi Yakub, bék kheueh yo! Gata dan keuturonan gata Lôn peuseulamat di nanggroe jiôh, di teumpat gata keunong teun. Gata teuma tawoe dan tinggai di nanggroe gata deungon aman. Gata udeb deungon teuntram; hana nyang peureulée gata takot. 11 Ulôn teuka dan gata Lôn peuseulamat. Bansa-bansa, teumpat gata Ulôn peucrebre bandum nyan Lôn peubinasa, teuma gata hana Lôn peubuet lagée nyan. Bit gata hana tuwoe keu huköman teuma huköman nyang Lôn peu rhot ateueh gata na kheueh ade dan sisuai deungon nyang teupeuteuntée. Ulôn, TUHAN, ka Lôn peugah haba." 12 TUHAN meufeureuman ubak umat Gobnyan: "Peunyakét gata lumpah that parah, luka gata nyan hana ubat jih. 13 Hana meusidroe pih nyang jitem peupuléh peunyakét gata, hana ubat keu cumuet-cumuet gata, hana harapan gata jeuet keupuléh. 14 Bandum geunaséh gata ka tuwoe ubak gata; awaknyan hana jitem le pike keuhai droe gata. Lagée musoh ka jiseurang dan jihuköm gata deungon keujam, sabab desya gata nyang ka le dan raya that salah gata. 15 Bék kheueh le apoh apah keuhai luka-luka gata, sabab nibak gata hana le harapan jeuet keu puléh. Gata Ulôn huköm nyang lagée nyan sabab desya gata nyang ka lumpah le dan salah gata nyang lumpah raya. 16 Teuma jinoe banmandum nyang uét gata teumajiuét, dan bandum musoh gata teuma jiangkot u teumpat nyang teuböih. Ulôn nyang tindéeh keu ureuëng nyang tindéeh gata, Ulôn kureubot bak ureuëng nyang reupah gata. 17 Bahpi musoh gata jipeugah, 'Sion ka jiböih, dan hana nyang tem kalon,' teuma gata Lôn peujeuet seuhat lom, dan luka-luka gata Lôn peu ubat teuma." 18 TUHAN meufeureuman lom: "Gata, umat Lôn teuma Lôn gaséh dan Lôn peupuléh keuadaan gata di tanoh ié gata keudroe. Yerusalem teupeudong keulai, dan meuligoe disinan teureuhab lom teuma. 19 Peunduduek disinan jipujo Ulôn deungon meuca-e, dan seumurak meuhubo deungon geumbira. Ulôn peujeuet awaknyan jihoreumat lé ureuëng laén dan hana jihina, dan jeumeulah awaknyan meutamah le. 20 Bansa gata Lôn peujeuet jaya lagée yoh masa dilée, dan jidong lom sibagoe umat Lôn. Banmandum nyang teugom awaknyan Lôn huköm habéh. 21 Raja nyang peurintah gata asai gobnyan nibak bansa gata. Deungon beubaih jihnyan jipeurab bak Ulôn meunyoe jih nyan Lôn tawök meuhadab bak Ulôn. Sabab soe kheueh nyang jijeuet meuhadab Ulôn ateueh keuheundak jih keudroe? Gata teuma jeuet keu umat Lôn dan Ulôn jeuet keu Allah gata. Ulôn, TUHAN, nyang peugah nyan." 23 Beungéh TUHAN lagée angén badée, lagée angén puteung beuliyong nyang tajam meutaga sampoe habéh jisampôh bubena ureuëng jeuhet, dan hana reuda sigohlom banmandum reuncana Gobnyan teulaksana. Óh uroe dudoe umat Gobnyan barô sadar keuhai nyan.

Nabi Yeremia 31

1 TUHAN meufeureuman, "Teuma trok watée jih Ulôn jeuet keu Allah banmandum sukée Israel, dan awaknyan jeuet keu umat Lôn. 2 Dipadang pasi Ulôn peuleumah gaséh sayang Lôn ubak awaknyan nyang ka teuhinda nibak mawöt. Watée umat Israel jimita keuteunangan, 3 phon rot jiôh ka Lôn peuleumah droe ubak awaknyan. He umat Israel, yoh dilée sabe Lôn peuleumah gaséh sayang Lôn bak gata, dan óh lheuehnyan teuma teutab Lôn tunyok gaséh sayang Lôn keu gata. 4 Bansa gata Lôn peujaya lagée yoh masa ilée. Sigoe teuk gata tacok rapa-i, dan meunari ngon meulikak deungon geumbira. 5 Gata tapuga lampôh anggô di gunong-gunong Samaria, dan ureuëng nyang pula jipot hase. 6 Keubit, trok watée jih bubena peungawai banda jitamawök di gunong-gunong Efraim, 'Jak geutanyoe ta ék u Sion, ubak TUHAN Allah geutanyoe.' " 7 TUHAN meufeureuman, "Meuca-e kheueh nyang geumbira keu Israel, he umat Lôn -- bansa nyang phon nibak meubagoe bansa. Meuca-e kheueh kidung pujian, dan jak peugah kheueh: 'TUHAN ka geupeuseulamat nyang mantong tinggai umat Gobnyan.' 8 Di utara Ulôn ba awaknyan lom; Lôn peusapat awaknyan nyang na bansigom bumoe. Ureuëng buta dan ureuëng lapée jijak deungon awaknyan, meunan cit deungon ureuëng inong nyang ban lheueh peulahé aneuëk dan inong nyang ka brat mume. Awaknyan banmandum jiteuka lom lam jeumeulah nyang le u nanggroe nyoe. 9 Awaknyan jijak sira ié mata jirô nyang hana putôh-putôh, Ulôn hibor dan Lôn bimbeng awaknyan. Ulôn ba awaknyan meulalu rot nyang le ié ile, rot nyang rata mangat awaknyan hana meugantoh. Bak ureuëng Israel, Ulôn nyoe lagée ureuëng syiek jih; Efraim na kheueh aneuëk agam Lôn nyang tuha." 10 TUHAN meufeureuman, "Deungoe kheueh he bansa-bansa! Peutrok kheueh peusan Ulôn nyoe u meurandeh laôt: Umat Ulôn nyang ka Lôn peucrebre Lôn peusapat dan Lôn peulara lagée ureuëng meurabe bubiri nyang sabe jijaga. 11 Umat Israel ka Lôn peuseulamat, dan Lôn peubeubaih nibak bansa nyang kha. 12 U Bukét Sion awaknyan jiteuka deungon ié muka nyang meucahya, sira meuca-e riang geumbira sabab bandum nyang Ulôn bri keu awaknyan, na kheueh gandom, minyéuk, anggô, leumô dan bubiri. Awaknyan lagée keubon nyang seb meu ié, dan hana nyang kureueng bah meusikada. 13 Bak watée nyan aneuëk-aneuëk dara jimanari ngon meulikak deungon até galak lumpah na. Ureuëng tuha ngon ureuëng muda sabe-sabe lam bahgia, sabab Ulôn kuhibur awaknyan. Duka awaknyan Lôn ubah jeuet keu galak, seudeh awaknyan Lôn ubah jeuet keu bahgia. 14 Bubena teungku imeum Lôn peupuih deungon peunajoh nyang meulimpah; dan peue mantong nyang jipeureulée lé umat Lôn Ulôn bri. Ulôn, TUHAN, nyang peugah haba." 15 TUHAN meufeureuman, "Di Rama na teudeungoe su ureuëng mo ba-e, dan apoh apah nyang meujampu peudeh ngon pilu. Rahel jipeuba-e aneuëk-aneuëk gobnyan, lé geuhnyan hana geutem teupeuiém sabab awaknyan ka hana le. 16 Neuiem laju nibak tamo dan sampôh laju ié mata gata! Hana sia-sia jeureh payah gata keu aneuëk-aneuëk gata. Keu gata na ganjaran, aneuëk-aneuëk gata jiwoe di nanggroe lawan. 17 Na harapan keu gata keu masa ukeue; aneuëk-aneuëk gata jiwoe u gampông droe. 18 Ulôn deungoe umat Israel jimeututoe peunoh keuseudehan, 'Ya TUHAN, kamoe nyoe lagée beulatang nyang gohlom teupeuseu iet teuma neulateh kamoe mangat taát, dan jinoenyoe kamoe ka siab keu kamoe woe ubak Droeneueh. Jadi, neuba kheueh kamoe lom teuma, ya TUHAN, Po teu Allah kamoe. 19 Droeneueh ka kamoe peulikot, teuma buet kamoe nyan ka meunyeusai nibak kamoe. Óh ka lheueh Droeneueh neuhuköm kamoe, ulée kamoe meuteukui sabab lumpah that seudeh. Kamoe malée dan ka jeuet keuhina sabab ka meudesya yoh mantong muda.' 20 Israel, gata aneuëk nyang Ulôn sayang that, aneuëk teucinta, boh até Lôn. Pajan mantong gata Lôn ancam sabe Lôn ingat ubak gata deungon rindu. Gata Lôn peusaneut deungon peunoh gaséh sayang. 21 Tatanda kheueh rot-rot ueh raya, taglong kheueh pancang-pancang atawa rambu-rambu tamita kheueh rot ueh nyang ka gata jak yoh masa dilée. He Israel, tawoe kheueh! Woe kheueh ubak banda-banda gata nyang phon. 22 Trok án pajan gata harôh ragu-ragu, he bansa nyang hana seutia ubak Ulôn? Ulôn ka Lôn cebta sapeue-peue nyang barô di ateueh donya, sapeue lamkawan nyang ganje -- lagée ganje ureuëng inong nyang jilindong agam." 23 TUHAN Nyang Mahakuasa Allah Israel meufeureuman, "Meunyoe umat Lôn ka Lôn peujaya lagée yoh masa dilée, teuma di nanggroe Yehuda dan di gampông-gampông teudeungoe bak Lôn ureuëng jipeugah, 'Seumoga TUHAN geubri beureukat keu bukét suci di Yerusalem teumpat tinggai nyang khusos keu Gobnyan.' 24 Ureuëng tinggai di Yehuda dan di gampông-gampông jihnyan. Disinan na ureuëng meutani ngon ureuëng peulara leumô dan bubiri. 25 Ureuëng nyang hék Lôn peupuléh, dan nyang leumoh sabab ka deuk Lôn peutro. 26 Bak masanyan ureuëng-ureuëng nyan jipeugah, 'Óh ka lheueh lôn éh teungét deungon mangat that, tuboh lôn meurasa leuga.' 27 Ulôn, TUHAN, Lôn peugah trok masa jih nanggroe Israel dan Yehuda Ulôn peupeunoh ngon manusia dan beulatang. 28 Lagée yoh masa ilée Ulôn ka Lôn jaga awaknyan mangat óh lheueh nyan Ulôn tarek lom, Lôn reuloh dan Lôn peuhanco awaknyan, meunan cit Ulôn jaga awaknyan mangat Ulôn peukong dan Lôn peubeudôh awaknyan lom teuma. 29 Bak watée nyan ureuëng hana jipeugah le, 'Ureuëng tuha jipajoh boh kayée nyang masam, gigo aneuëk geuhnyan nyang teurasa seungke,' 30 teuma soe nyang pajoh boh kayée masam, ureuëng nyan keudroe kheueh nyang seungke gigo. Tieb-tieb manusia maté kareuna desya jih keudroe." 31 TUHAN meufeureuman, "Teuma teuka watée jih Ulôn peugot janji nyang barô ngon umat Israel dan Yehuda. 32 Teuma janji nyan kon lagée janji nyang Ulôn peugot ngon indatu awaknyan watée awaknyan Ulôn tunton jiteubiet di nanggroe Meusé. Bahpi Ulôn nyoe lagée sidroe ureuëng lakoe nibak awaknyan, teuma awaknyan ji iengkeue janji Ulôn ngon awaknyan. 33 Nyoe kheueh peujanjian barô nyang ulôn peugot ngon umat Israel: Huköm-huköm Lôn kukeubah didalam baten awaknyan, dan Ulôn tuléh bak até awaknyan. Ulôn jeuet keu Po teu Allah awaknyan, dan awaknyan jeuet keu umat Lôn. 34 Hana peureulée meusidroe pih nibak awaknyan jipeuruno sabe keudroe-droe mangat jituri keu TUHAN. Sabab awaknyan banmandum, cut rayeuk, jituri Ulôn. Nyang salah-salah bak awaknyan ateueh Ulôn Lôn peutuwoe, desya-desya awaknyan Lôn peuamphon. Ulôn, TUHAN, ka Lôn peugah haba." 35 Mata uroe geupeujeuet lé TUHAN keuteupeu peungéuh uroe; buleuen dan bintang-bintang keuteupeu peungéuh malam. Laôt geugawoe sampoe jibeudôh gulumbang, TUHAN Nyang Mahakuasa, nyan kheueh nan Gobnyan. 36 TUHAN meujanji, "Simantong huköm alam gohlom meu-ubah Israel teutab na sibagoe bansa. 37 Seukira jih saboh saát langét hase teu ukoe, dan bak até bumoe hase teutilek, bak watée nyan kheueh Israel Lôn tulak sabab bandum buet awaknyan nyang jeuhet. Ulôn, TUHAN, ka Lôn peugah haba." 38 TUHAN meufeureuman, "Teuma trok masa jih bansaboh Yerusalem teupeudong lom sibagoe banda Lôn, di Meunara Hananeel trok bak babah Pintoe Geureubang Sagoe. 39 Phon disinan gareh bataih jih teutuju u Bukét Gareb, laju teuwet bak Guha. 40 Bansigom pantôn nyan, nyang teupeuguna keu jrat dan teumpat tiek blôh, dan banmandum ladang bak binéh Krueng Kidron sampoe trok bak babah Pintoe Geureubang Guda u arah timu, teupeukhusos keu Ulôn. Banda Yerusalem hana geureuloh le atawa geupeuhanco."

Nabi Yeremia 32

1 Bak thon nyang keu siploh keurajeuen Zedekia raja Yehuda, na kheueh thon nyang keulapan blaih keurajeuen Nebukadnezar raja Babel, TUHAN meufeureuman ubak ulôn. 2 Bak watéenyan tantra raja Babel teungoh jiprang Yerusalem. Ulôn jiteun bak seuramoe meuligoe raja 3 lé Raja Zedekia sabab jitudôh ka lôn peumaklum bahwa TUHAN meufeureuman lagéenyoe, "Raja Babel Lôn peubiyeu jipeutaklhok dan jiduek lam banda nyoe, 4 dan Raja Zedekia hana teuhinda. Gobnyan jijok ubak raja Babel, dan meuhadab raja nyan jimeututoe keudroe ngon gobnyan. 5 Óh lheuehnyan Zedekia teuma jiba u Babel dan tinggai disinan sampoe trok watée Lôn huköm jihnyan. Bahpi jihnyan jiprang ureuëng Babel, jihnyan teutab hana hase. Ulôn, TUHAN, ka Lôn peugah haba." 6 TUHAN meufeureuman ubak lôn 7 bahwa Hanameel, aneuëk agam apa lôn Salum, jiteuka keu jilakée mangat lôn tem bloe tanoh jih di Anatot lam wilayah Benyamin. Sabab, ulôn kheueh syedara jih nyang rab nyang hak bloe tanoh nyan. 8 Dan paih lagée nyang ka geupeugah lé TUHAN, teuka kheueh Hanameel bak ulôn bak seuramoe meuligoe, dan jilakée mangat lôn tem bloe tanoh jih. Lé sabab nyan ulôn yakén that bahwa TUHAN bit-bit ka meututoe ubak ulôn. 9 Lé sababnyan ulôn bloe tanoh nyan bak Hanameel deungon yuem tujoh blaih péng pirak. Ulôn hôi bubena saksi dan dikeue awaknyan laju lôn teken surat bloe tanoh nyan, laju ulôn tempée segée dan lôn timang péng jih. 11 Lheueh nyan ulôn cok surat bloe tanoh nyan nyang ka teuboh segée dan meuasoe ngon syarat-syarat meunan cit deungon keuteuntuan-keuteuntuan nyang laén. Dan lôn cot teuma seunalen surat nyang hana meusegée, 12 dan bandua surat nyan laju ulôn jok ubak Barukh bin Neria cucoe Mahseya. Ulôn jok atranyan dikeue Hanameel dan saksi-saksi nyang ka jiteken surat-surat nyan, dan dikeue ureuëng-ureuëng nyang teungoh duek nibak seuramoe nyan. 13 Dikeue awaknyan banmandum ulôn peugah ubak Barukh, 14 "TUHAN Nyang Mahakuasa, Po teu Allah Israel, geupeurintah mangat gata cok bandua surat nyoe, bah nyang aseuli meunan cit nyang seunalen jih, dan teupeutamong lam saboh beulangöng teumbikar mangat treb jiteun. 15 TUHAN Nyang Mahakuasa, Po teu Allah Israel, geupeubah bahwa rumoh, tanoh, dan lampôh anggô teuma jibloe peubloe lom lam nanggroe nyoe." 16 Óh ka lheueh surat-surat bloe peubloe nyan ulôn jok ubak Barukh, laju lôn meudoá, 17 "TUHAN Nyang Mahamanyang, Droeneueh kheueh nyang cebta langét ngon bumoe deungon kuasa dan keumampuan Droeneueh nyang rayeuk. Hana meusapeue pi nyang payah nibak Droeneueh. 18 Droeneueh neutunyok gaséh abadi ubak meuribée-ribée ureuëng, teuma Droeneueh pih neuhuköm ureuëng laén sabab desya ureuëng syiek jih. Droeneueh Allah nyang agong dan peukasa; nan Droeneueh TUHAN Nyang Mahakuasa. 19 Reuncana-reuncana Droeneueh hebat that, dan buet-buet Droeneueh ajaéb; Droeneueh neukalon banmandum nyang jipeubuet lé manusia, dan neubalaih awaknyan nyang sipadan deungon buet awaknyan. 20 Yoh watée ilée Droeneueh peubuet buet-buet nyang ajaéb dan luwabiasa di nanggroe Meusé, dan trok án jinoe mantong teutab neupeubuet, bah lamkawan ureuëng Israel meunan cit lamkawan ureuëng bansa laén. Lé sabab nyan jinoe Droeneueh meugah dipat mantong. 21 Deungon kuasa dan teunaga Droeneueh nyang rayeuk Droeneueh neuba umat Israel jiteubit lam nanggroe Meusé. Droeneueh neupeubuet buet-buet ajaéb dan mujizat-mujizat nyang luwabiasa dan keujadian-keujadian nyang teupeuyo musoh. 22 Nanggroe nyang jroh dan subô Droeneueh jok keu awaknyan lagée nyang ka Droeneueh peujanji ubak indatu awaknyan. 23 Teuma watée awaknyan teuka u nanggroe nyoe keuneuk jireubot atranyan, awaknyan hana taát ubak peue-peue nyang Droeneueh peurintah, dan hana udeb meunurot peue-peue nyang ka Droeneueh peurunoe. Banmandum nyang Droeneueh peurintah ubak awaknyan hana meusapeue pih nyang jipeubuet lé awaknyan. Lé sababnyan Droeneueh peutreun banmandum bencana nyoe ateueh awaknyan. 24 Ureuëng-ureuëng Babel ka jipeudong beuton-beuton kuta ban sikeulileng banda keuneuk jireubot banda nyan, dan jinoenyoe awaknyan laju jiprang. Muprang, deuk, dan bala peunyakét nyang jeuet keusabab banda nyoe rhot lam jaroe awaknyan. Droeneueh neukalon bahwa banmandum nyang neupeugah nyan ka jeuet keunyata. 25 Bahpi meunan, ya TUHAN Nyang Mahamanyang, Droeneueh kheueh nyang yue ulôn mangat lôn bloe tanoh nyoe dikeue saksi-saksi, bah pi sikeujab teuk banda teuma jireubot lé bansa Babel." 26 Óh lheueh nyan TUHAN meufeureuman ubak ulôn, 27 "Ulôn kheueh TUHAN, Allah banmandum ureuëng. Hana nyang payah nibak Ulôn. 28 Banda nyoe Lôn peubiyeu jikuasa lé Nebukadnezar raja Babel meusajan ngon pasokan jih. Awaknyan teuma jireubot banda nyoe, 29 dan jitot sampoe habéh meusajan deungon rumoh-rumoh nyang ka jipeuteuka beungéh Ulôn, sabab di ateueh bubông-bubông rumoh nyan awaknyan jitot keumeunyan keu Baal dan jileng ié anggô keujipeuseumah ubak dewa-dewa. 30 Yoh awai that phon seujarah awaknyan, ureuëng Israel dan ureuëng Yehuda ka jipeujeuet Ulôn sampoe hana galak. Awaknyan ka jipeuteuka beungéh Ulôn deungon buet-buet awaknyan nyang jeuhet. 31 Yoh phon banda nyoe jipeupeudong, peunduduek banda nyoe ka jipeujeuet Ulôn beungéh that-that, Ulôn ka Lôn cok keuputosan keu Lôn peubinasa awaknyan, 32 sabab mandum buet nyang jeuhet nyang jipeubuet lé ureuëng Yehuda dan Yerusalem meusajan deungon raja-raja, peujabat peumeurintah, teungku-teungku imeum dan nabi-nabi awaknyan. 33 Awaknyan ka jitinggai Ulôn bahpi Ulôn ka Lôn sabe Lôn peurunoe awaknyan, awaknyan teutab hana jitem deungoe dan hana insaf. 34 Dan nyang jipeudong keu teumpat iébadat ubak Ulôn nyan pih ka jipeukuto lé awaknyan dan jikeubah beurala-beurala nyang luwat that lé awaknyan di teumpat nyan. 35 Awaknyan jipeudong miseubah-miseubah keu dewa Baal di Pantôn Hinom, dan jipeuseumah aneuëk awaknyan keu dewa Molokh. Padahai, Ulôn hántom lom yue bak awaknyan mangat jipeubuet lagée nyan bagoe, dan hana teuka lam pikeran Lôn bahwa awaknyan jipeubuet hai nyang kuto lagéenyan teuma dan jeuet keusabab ureuëng Yehuda meudesya." 36 TUHAN, Po teu Allah Israel meufeureuman ubak lôn, "Yeremia, bansa Israel jipeugah bahwa muprang, deuk dan wabah peunyakét teupeusabab banda nyoe rhot lam jaroe raja Babel. Jinoenyoe, deungoe kheueh peue nyang Ulôn peugah. 37 Ulôn teuma Lôn peusapat bansa nyoe nibak mandum nanggroe teumpat awaknyan Ulôn peucrebre sabab beungéh Ulôn dan geungeuen Ulôn keu awaknyan. Awaknyan teuma Ulôn ba lom u teumpat nyoe dan Lôn peumungken tinggai disinoe deungon aman. 38 Awaknyan jeuet keu umat Lôn, dan Ulôn jeuet keu Allah awaknyan. 39 Ulôn kujok keu awaknyan saboh tujuan udeb: na kheueh, jihoreumat Ulôn siumu masa; hainyan teuba nyang jroh keu awaknyan mandum, dan keu keuturonan awaknyan. 40 Ulôn kupeugot janji nyang keukai ngon awaknyan. Ulôn hana Lôn piôh Lôn peubuet nyang jroh keu awaknyan. Ulôn kupeujeuet awaknyan takot dan jihoreumat Ulôn deungon sipeunoh até mangat awaknyan hana jipeujiôh Ulôn. 41 Ulôn galak Lôn peubuet nyang jroh ke awaknyan, dan Lôn peujeuet awaknyan tinggai teutab di nanggroe nyoe keu siumu masa. 42 Lagée toh Ulôn ka Lôn peutreun bala ateueh bansa nyoe, meunan kheueh teuma Ulôn jok banmandum nyang jroh lagée nyang ka Lôn peujanji keu awaknyan. 43 Ureuëng jipeugah bahwa nanggroe nyoe ka jeuet keu padang pasi nyang hana jitinggai lé manusia dan beulatang, dan nanggroe nyoe ka rhot lam jaroe bansa Babel. Teuma Ulôn peugah saboh watée ladang-ladang jibloe peubloe lom lam nanggroe nyoe; 44 surat bloe peubloe teuma jiteken, jisegée, dan jipeuget lé saksi-saksi. Nyan teuma teujadi lam wilayah Benyamin, lam gampông-gampông lam wilayah Yerusalem, lam banda-banda Yehuda, lam banda-banda di daerah gunong-gunong, di daerah gaki gunong-gunong, dan di Yehuda seulatan. Bansanyoe Lôn peupuléh keuadaan jih di nanggroe nyoe. Ulôn, TUHAN, ka Lôn peugah haba."

Nabi Yeremia 33

1 Watée ulôn mantong keunong teun nibak seuramoe, ulôn meuteumé peusan nibak TUHAN 2 nyang peujeuet bumoe dan nyang peugét dan nyang keubah bak teumpat jih. Gobnyan geupeugah, 3 "Meulakée kheueh ubak Ulôn, teuma Ulôn Lôn seuôt; Lôn bri tée ubak gata hai-hai nyang ceudah dan nyang kagum nyang gohlom gata teupeue. 4 Meuligoe raja Yehuda dan rumoh-rumoh di banda Yerusalem ka jireuloh keu jipeukong kuta dan ji prang lé musoh. Teuma, Ulôn, TUHAN, Allah Israel, Lôn peugah bahwa, 5 hana guna teulawan ureuëng Babel, deungon teupeubuet nyan banda nyoe ka peunoh deungon bangke ureuëng-ureuëng nyang Lôn poh maté watée Lôn beungéh dan geungeuen Ulôn ubak awaknyan. Ulôn hana meuhéut le Lôn kalon banda nyoe, sabab ureuëng-ureuëng banda nyoe ka jipeubuet buet nyang jeuhet. 6 Teuma saboh saát singoh Ulôn Lôn peupuléh keuadaan banda nyoe dan peunduduek banda nyoe keudroe; awaknyan teuga lom teuma. Ulôn kubri ubak awaknyan keuseujahteuraan dan keuamanan nyang meulimpah. 7 Yehuda dan Israel Lôn peujaya lagée yoh masa dilée dan awaknyan teudong lom lagée umat Lôn. 8 Ulôn Lôn peugleh awaknyan nibak sigala desya nyang jipeubuet lé awaknyan ateueh Ulôn; desya-desya dan doraka awaknyan Lôn peuamphon. 9 Yerusalem jeuet keu geumbiraan dan keubanggaan Ulôn. Sigala bansa bansigom donya teumakot dan yo lom teuma jihoreumat Ulôn, meunyoe geudeungoe peue-peue mantong nyang jroh nyang ka Lôn peubuet ateueh peunduduek Yerusalem, dan keuhai keumakmuran nyang ka Ulôn bri keu peunduduek banda nyan." 10 TUHAN meufeureuman, "Manusia jipeugah bahwa teumpat nyoe lagée padang pasi, hana ureuëng atawa beulatang nyang na tinggai disinan. Peue nyang jikheun lé awaknyan meumang beutôi, sabab banda-banda di Yehuda dan rot-rot di Yerusalem ka söh banmandum; hana manusia atawa beulatang nyang na tinggai disinan. 11 Teuma di teumpat-teumpat nyan teudeungoe lom su keugeumbiraan, su ureuëng kém jeub-jeub sagoe dan su ureuëng ramé bak teumpat khanuri meukawen. Teuma teudeungoe lom su ureuëng meuca-e lé ureuëng-ureuëng nyang jiba keureubeuen syukoe u rumoh Lôn. Awaknyan jipeugah, 'Meusyukoe kheueh ubak TUHAN Nyang Mahakuasa, sabab Gobnyan jroh dan geunaséh Gobnyan keukai dan abadi.' Nanggroe nyoe Lôn peumakmu lom lagée nyang ka-ka. Ulôn, TUHAN, ka Lôn peugah haba." 12 TUHAN Nyang Mahakuasa meufeureuman, "Nanggroe dan banda-banda nyang lagée padang pasi nyoe hana jikeumiet lé manusia dan beulatang. Bahpi lagée nyan, óh singoh dudoe na lom padang-padang naleueng teumpat ureuëng meurabe bubiri. 13 Di banda-banda di daerah gunong-gunong, bak gaki-gaki gunong, daerah Yehuda seulatan, dan di wilayah Benyamin meunan cit di gampông-gampông nyang na bak-bak binéh Yerusalem, dan di gampông-gampông Yehuda, lé ureuëng-ureuëng meurabe nyan ji itong bubiri-bubiri jihnyan. Ulôn, TUHAN, ka Lôn peugah haba." 14 TUHAN meufeureuman, "Teuma trok saát jih Ulôn peuteupat janji nyang ka Lôn peugot ngon Israel dan Yehuda. 15 Bak watée nyan na sidroe ureuëng nyang ade nibak keuturonan Nabi Daud Lôn piléh jeuet keu raja. Raja nyan jipeubuet peue nyang ade dan beutôi bansaboh nanggroe. 16 Ureuëng Yehuda dan peunduduek Yerusalem teupeuseulamat dan udeb aman. Banda Yerusalem teuboh nan, 'TUHAN Peuseulamat geutanyoe'. 17 Ulôn, TUHAN, meujanji sabe na sidroe lamkawan keuturonan Nabi Daud nyang jeuet keu raja Israel; 18 sabe na teungku-teungku imeum nibak keuturonan sukée Lewi nyang jipeutimang Ulôn dan jipeuseumah keureubeuen beulatang, gandom dan keureubeuen nyang teutot." 19 TUHAN meufeureuman ubak ulôn, "Ulôn ka Lôn ikat janji deungon uroe dan malam, mangat uroe ngon malam sabe teuka bak watée jih; peujanjian nyan hana binasa meunyoe hana teupeuna. 21 Meunan cit Ulôn ka Lôn ikat janji ngon hamba Ulôn Nabi Daud, bahwa nibak keuturonan geuhnyan sabe na sidroe lamkawan nyang jeuet keu raja; dan Ulôn ka cit Lôn ikat peujanjian ngon teungku-teungku imeum keuturonan Lewi bahwa awaknyan sabe jipeutimang Ulôn. Janji-janji nyang ka teupeuna nyan hana jeuet teusampôh. 22 Ulôn Lôn tamah keuturonan hamba Ulôn Nabi Daud dan teungku-teungku imeum sukée Lewi, sampoe jeumeulah awaknyan ka sadub le lagée anoe bak binéh pasi dan sadub ngon bintang di langét nyan hana hase teu itong." 23 TUHAN meufeureuman ubak ulôn, 24 "Peu kheueh ka takalon peue nyang jipeugah lé gob keuhai Israel dan Yehuda? Awaknyan jipeugah bahwa Ulôn ka Lôn böih bandua boh bansa nyan. Nyang kheueh sabab jih awaknyan jikalon hina ateueh umat Lôn, dan hana le jianggab awaknyan sibagoe saboh bansa. 25 Teuma lagée Ulôn nyoe, TUHAN, ka geupeugot saboh peungikat deungon uroe dan malam, dan geupeugot huköm nyang atoe langét dan bumoe. 26 Meunan cit Ulôn teutab Lôn mat bak janji Lôn ngon keuturonan Nabi Yakub dan ngon hamba Ulôn Nabi Daud. Sidroe lamkawan keuturonan Nabi Daud Lôn piléh keu jimat peurintah ateueh keuturonan Nabi Ibrahim, Nabi Ishaq, dan Nabi Yakub. Ulôn balaih gaséh ngon umat Lôn, dan Lôn peujeuet awaknyan makmu lom teuma."

Nabi Yeremia 34

1 Watée Nebukadnezar raja Babel deungon angkatan prang geuh nyang jipeukong lé pasokan-pasokan nibak meubagoe bansa dan nanggroe nyang taklok ubak gobnyan teuka geujak seurang Yerusalem dan banda-banda nyang na nibak binéh nyan, TUHAN geupeugah ubak ulôn. 2 Gobnyan geuyue mangat lôn jak ubak Zedekia raja Yehuda, dan lôn peugah lagée nyoe, "Ulôn, TUHAN, Po teu Allah Israel, Lôn seurah banda nyoe ubak raja Babel dan raja Babel nyan jitot banda nyoe. 3 Gata hana teupeusie, dan jidrob jiseurah ubak raja nyan. Gata meurumpok dan tamariet keudroe deungon gobnyan, laju gata tajak u Babel. 4 Teuma deungoe tutoe haba Lôn nyoe keuhai gata, Zedekia! Gata hana maté lam prang, 5 teuma maté deungon teuntram. Dan lagée nyang ka jipeubuet lé rakyat jitot keumeunyan watée jipeutron lam jrat indatu gata nyang mat peurintah sigohlom gata, meunan cit teuma rakyat jitot keumeunyan keu gata. Awaknyan meukabông dan jipeugah, 'Aduh! Raja kamoe ka hana le!' Ulôn, TUHAN, ka Lôn peugah haba." 6 Dan haba TUHAN nyan ulôn peusampoe ubak Raja Zedekia di Yerusalem, 7 watée raja Babel teungoh geuprang banda nyoe. Awaknyan jiprang cit banda Lakhis dan Aseka, dua boh banda nyang meupageu ngon kuta nyang mantong meuteun di Yehuda, 8 Raja Zedekia dan peunduduek Yerusalem jipeuna peujanjian keu jipeubeubaih 9 namiet-namiet Ibrani awaknyan, bah kheueh nyan nyang agam meunan cit nyang inong mangat hana jeuet meusidroe pi nibak bansa Israel nyang peunamiet ureuëng seubansa jihnyan. 10 Banmandum rakyat dan bandum peujabat peumeurintah nyang ka jipeugot janji keuteupeu beubaih namiet-namiet awaknyan dan hana teuma jipeujeuet keu namiet le, beutôi-beutôi geupeulheueh namiet-namiet awaknyan. 11 Teuma óh dudoe awaknyan ka meu-ubah pikeran, laju jicok lom namiet-namiet nyan, dan jipaksa jeuet keu namiet lom. 12 Dan TUHAN, Po teu Allah Israel, meufeureuman bak ulôn kupeugah lagée nyoe, "Bak watée Lôn ba indatu gata Lôn peuteubiet nibak nanggroe Meusé dan Lôn peubeubaih awaknyan nibak peubudakan, Ulôn ka Lôn peugot peujanjian deungon awaknyan. 14 Ulôn peugah bahwa banmandum namiet Ibrani nyang ka jipeutimang nam thon treb jih, harôh teupeumeurdehka bak akhé thon nyang keutujoh. Teuma indatu gata hángeutem kalon atawa geudeungoe peue nyang Ulôn peugah nyan. 15 Napadub uroe nyang ka lheueh gata ta ubah pi-e gata dan tapeubuet nyang meukeunong bak até Lôn. Gata banmandum situju keu tapeubeubaih namiet-namiet seubansa gata, dan tapeugot peujanjian deungon Ulôn didalam Baét Lôn. 16 Peujabat-peujabat peumeurintahan Yehuda dan Yerusalem meusajan deungon bubena peugawée meuligoe, teungku-teungku imeum dan banmandum nyang kawai tanoh gata ka jipeusah peujanjian nyan deungon jisie leumô, jikôh jeuet keu dua boh bagi, dan laju jijak di teungoh-teungoh bagian dua boh bagi nyan. Teuma óh lheueh nyan gata meu ubah pikeran dan tahina Ulôn. Namiet-namiet nyang ka lheueh gata peubeubaih nyang sisuai deungon keuheundak awaknyan, gata cok lom dan gata paksa mangat jeuet keu namiet lagée nyang ka-ka. Sabab nyan, Ulôn, TUHAN, Lôn peugah bahwa gata ka taiengkeue peurintah Ulôn, dan hana tataát syarat-syarat nyang ka lheueh teupeugot, sabab gata hana tapeu beubaih seusamoe gata bansa Israel. Nah jinoenyoe bah kheueh Ulôn bri keubeubaihan keu gata: keubeubaihan keu maté di mideuen prang atawa lé bala peunyakét atawa lé keunong deuk. Ulôn Lôn peujeuet gata lagée gata tapeusaneut ateueh leumô nyang gata sie nyan. Ulôn Lôn peujeuet meubagoe bansa ateueh rueng donya jeuet keuteumakot dan gli peue nyang ka Ulôn peubuet u ateueh gata. 20 Ulôn Lôn seurah gata ubak musoh nyang keuneuk poh maté gata. Manyét gata jipajoh lé cicém dan beulatang juah. 21 Zedekia raja Yehuda dan bandum peujabat peumeurintah Lôn seurah ubak ureuëng-ureuëng nyang keuneuk poh maté awaknyan. Ulôn Lôn seurah awaknyan ubak sipa-i Babel, nyang jinoenyoe ka jitinggai gata. 22 Ulôn Lôn bri aba-aba mangat awaknyan jigisa u banda nyoe, laju jiseurang, jireupah, dan jitot banda nyan. Banda-banda Yehuda Lôn peujeuet lagée padang pasi nyang hana jikeumiet lé manusia. Ulôn, TUHAN, ka Lôn peugah haba."

Nabi Yeremia 35

1 Bak watée Yoyakim bin Yosia jeuet keu raja Yehuda, TUHAN meufeureuman ubak ulôn, 2 "Tajak peugah haba kheueh ngon kawöm Rekhab. Taba kheueh awaknyan bak saboh bilek di Baét Lôn, dan tabri kheueh ié anggô keu awaknyan." 3 Dan dilôn pih laju lôn jak tawök bandum kawöm Rekhab, awaknyan na kheueh Yaazanya (aneuëk sidroe ureuëng nyang nan Yeremia bin Habazinya) meusajan bandum syedara jihnyan dan aneuëk-aneuëk jihnyan nyang agam. 4 Ulôn laju lôn ba awaknyan u Baét TUHAN u dalam bilek murit-murit Nabi Hanan bin Yigdalya. Bilek nyan teupeuduek di ateueh ruweueng Teungku Imeum Maaseya bin Salum, rab bak binéh bilek peujabat-peujabat nyang laén. Maaseya na kheueh peugawée manyang nyang tugaih gobnyan geukawai pintoe-pintoe Baét TUHAN. 5 Óh lheueh nyan laju ulôn keubah dikeue ureuëng-ureuëng Rekhab nyan piala-piala nyang peunoh meuasoe ngon ié anggô, dan glah-glah ié. Laju ulôn peugah ubak awaknyan, "Silakan neujieb." 6 Teuma awaknyan jijaweueb, "Kamoe hana kamoe jieb anggô. Indatu kamoe Yonadab bin Rekhab geutam kamoe dan keuturonan kamoe bék teujieb ié anggô. Nyang teutam nyan teutab na siumu masa. 7 Kamoe hana jeuet kamoe meulampôh, dan meunan cit hana jeuet kamoe puga atawa kamoe milék lampôh anggô. Siumu udeb, kamoe hana teuma jeuet kamoe peudong rumoh. Kamoe harôh tinggai didalam khimah, mangat jeuet kamoe tinggai teutab bak tanoh nyoe sibagoe ureuëng aséng. 8 Bandum nyang geupeurintah lé Yonadab ubak kamoe ka kamoe taát. Siumu udeb, kamoe, aneuëk dan peurumoh kamoe hana jeuet kamoe jieb ié anggô. 9 Kamoe hana kamoe peudong rumoh keu teumpat tinggai kamoe, teuma kamoe tinggai lam rumoh khimah. Meunan cit nibak kamoe hana lampôh anggô, ladang atawa bijéh gandom keu teupula. Paneuk jih, banmandum nyang geupeurintah lé indatu kamoe Yonadab nyan, kamoe taát sipeunoh até. 11 Teuma watée Raja Nebukadnezar geujak prang nanggroe nyoe, kamoe cok keuputosan kamoe plueng nibak sipa-i Babel dan sipa-i Siria, dan kamoe meungungse u Yerusalem. Nyang kheueh sabab jih bak saát nyoe kamoe tinggai disinoe." 12 Laju TUHAN, Nyang Mahakuasa, Po teu Allah Israel, geuyuejak ulôn ubak ureuëng Yehuda dan Yerusalem, dan geuyue peusampoe peusan TUHAN nyoe ubak awaknyan, "Ulôn, TUHAN, Lôn teumanyong pakon gata hana tatem deungoe Ulôn, dan hana neutem turot peue-peue nyang Ulôn peurintah ubak gata. 14 Yonadab geularang keuturonan gobnyan jijieb ié anggô, dan awaknyan taát ubak peue nyang teutam nyan. Sampoe án uroenyoe hana meusidroe pih nibak awaknyan nyang na jijieb ié anggô. Teuma Ulôn hana putôh-putôh Lôn mariet deungon gata, dan gata teutab hántatem deungoe. 15 Hana putôh-putôh Ulôn kirém keu gata hamba Ulôn nabi-nabi, dan awaknyan ka geunaseuhat gata jeuet tapiôh tapeugot peurangoe gata dan tapiôh tapeubuet jeuhet. Awaknyan geupeuingat gata mangat bék taseumah ilah-ilah nyang laén dan hana meungabdi ubak awaknyan, mangat gata sabe jeuet tatinggai di nanggroe nyoe nyang ka Ulôn jok ubak gata dan ubak indatu gata. Teuma gata hán tatem peureumeuen dan hán tatem deungoe. 16 Keuturonan Yonadab taát ubak peue-peue nyang geupeurintah lé indatu gobnyan, teuma gata hán tatem taát ubak Ulôn. 17 Sabab nyan, Ulôn, TUHAN, Nyang Mahakuasa, Po teu Allah Israel, Lôn peuteuka u ateueh gata -- ureuëng Yehuda dan Yerusalem -- meubagoe beuncana nyang ka Lôn peuteuntée keu gata, lagée nyang ka Ulôn peugah. Hainyan Ulôn peubuet sabab gata hana tatem deungoe peue nyang Ulôn peugah meunyoe Ulôn mariet deungon gata, dan gata hana tatem jaweueb watée Ulôn hôi gata." 18 Laju ulôn peugah ubak ureuëng-ureuëng kawöm Rekhab bahwa TUHAN Nyang Mahakuasa, Po teu Allah Israel, meufeureuman lagée nyoe, "Gata ka taát ubak indatu gata Yonadab; bandum peurintah gobnyan ka gata turot dan gata peubuet. 19 Sabab nyan, Ulôn, TUHAN, Nyang Mahakuasa, Po teu Allah Israel, meujanji bahwa nibak keuturonan Yonadab bin Rekhab sabe na ureuëng agam nyang peutimang Ulôn."

Nabi Yeremia 36

1 Bak thon nyang keupeuet óh ka lheueh Yoyakim bin Yosia jeuet keuraja Yehuda, TUHAN meufeureuman ubak ulôn, 2 "Tacok kheueh laju saboh kitab meugulong, dan tuléh kheueh disinan bandum nyang ka Ulôn peugah ubak gata keuhai Israel dan Yehuda, dan keuhai sigala bansa. Tuléh kheueh banmandum peue-peue nyang Ulôn peugah yoh phon that Ulôn meututoe ubak gata bak masa keurajeuen Raja Yosia sampoe nibak uroe nyoe. 3 Mungken ureuëng Yehuda jipiôh jipeubuet jeuhet meunyoe awaknyan jideungoe meubagoe bala nyang Lôn peu rhot ateueh awaknyan. Teuma Ulôn Lôn peu amphon desya dan buet jeuhet awaknyan." 4 Sabab nyan ulôn hôi Barukh bin Neria dan lôn calitra ubak gobnyan peue-peue nyang ka geufeureuman lé TUHAN ubak ulôn. Dan Barukh laju geutuléh banmandum lam kitab meugulong nyan. 5 Óh lheueh nyan laju lôn bri peurintah lagée nyoe ubak gobnyan, "Bak ulôn hana geubri tamong le lam Baét TUHAN. 6 Sabab nyan, meunyoe ka trok uroe jih manusia jipuasa, gata harôh tajak keudeh, dan tabaca laju ngon su nyang teuga bandum nyang ka ulôn calitra ubak gata, mangat awaknyan jideungoe banmandum peue-peue nyang ka geupeugah lé TUHAN ubak ulôn. Tapeubuet kheueh laju nyan bak teumpat nyang cocok dan meuteumé jideungoe lé ureuëng nyang na di Baét TUHAN, jitamong cit keunan ureuëng Yehuda nyang teuka nibak banda-banda awaknyan keudroe. 7 Mungken sabab nyan awaknyan jimeudoá ubak TUHAN, dan meutobat nibak banmandum desya awaknyan nyang jeuhet. TUHAN beungéh lumpah na ubak awaknyan dan geuancam awaknyan." 8 Dan Barukh laju geubaca banmandum tutoe haba TUHAN di Baét TUHAN, lagée nyang ka lôn bri tugaih ubak gobnyan. 9 Bak buleuen sikureueng bak thon keulimong geumat keurajeuen lé Yoyakim raja Yehuda, rakyat jipuasa mangat meuteumé gaséh sayang nibak TUHAN. Peunduduek Yerusalem dan ureuëng-ureuëng nyang teuka di banda-banda di Yehuda, bandum jipuasa. 10 Laju lé Barukh geubeuet laju peue nyang teutuléh lam kitab meugulong peue-peue mantong nyang ka ulôn peugah, dan banmandum manusia jideungoe. Beuet nyan jibeuet dalam Baét TUHAN bak kantô Gemarya, bin Safan seukeutaréh neugahra. Kantô nyan teuduek jih bak peulataran siblah u ateueh, tho ngon rot teutamong bak babah Pintoe Geureubang Barô di Baét TUHAN. 11 Mikhaya bin Gemarya dan cucoe Safan jideungoe Barukh geubeuet tutoe TUHAN nibak kitab meugulong nyan. 12 Laju gobnyan jijak ubak meuligoe, u kantô seukeutaréh nanggroe. Disinan bandum peujabat teungoh geupeuna rapat. Delaya bin Semaya, Elnatan bin Akhbor, Gemarya bin Safan, Zedekia bin Hananya, Elisama sidroe seukeutaréh, dan peujabat-peujabat nyang laén na disinan. 13 Mikhaya geubri tée ubak awaknyan, banmandum nyang geubaca lé Barukh di Baét TUHAN. 14 Laju lé bandum peujabat nyan jikirém Yehudi (Yehudi nyan na kheueh aneuëk Netanya, cucoe Selemya, dan buyut Kusyi) ubak Barukh deungon peurintah mangat jijak sira jiba ubak awaknyan kitab meugulong nyang ka geubeuet nyan. Dan Barukh laju geuba kitab nyan. 15 "Silakan taduek," kheun awaknyan, "tabeuet kheueh laju kitab meugulong nyan dikeue kamoe." Dan Barukh pi laju jibeuet. 16 Óh ka seuleusoe gobnyan geubaca kitab meugulong nyan, awaknyan saléng meungieng-ngieng sabe keudroe-droe deungon peurasaan nyang gundah dan laju awaknyan jipeugah ubak Barukh, "Kamoe harôh kamoe lapor hainyoe ubak raja." 17 Óh lheueh nyan awaknyan jitanyong, "Ci tapeugah ubak kamoe pakriban cara droeneueh tuléh banmandum nyoe. Peu kheueh Yeremia nyang calitra ubak gata?" 18 "Beutôi, tieb-tieb haba nyang na teutuléh disinoe ka geubaca lé Yeremia ubak ulôn, dan laju lôn tuléh deungon daweut bak kitab meugulong nyoe," jaweueb Barukh. 19 "Gata dan Yeremia harôh tasöm. Bék sampoe na ureuëng teupeu teumpat musöm gata nyan," kheun awaknyan. 20 Lé dumna peujabat nyan jikeubah kitab meugulong nyan lam bilek Elisama, seukeutaréh nyan, óh lheuehnyan laju jijak meuhadab ubak raja dan geulapor laju banmandum nyang ka geudeungoe nyan. 21 Lé raja geuyue ubak Yehudi mangat geucok kitab meugulong nyan. Óh ka lheueh geucok bak bilek Elisama, Yehudi laju geubaca dikeue raja dan ubak bandum peujabat nyang na bansikeulileng raja nyan. 22 Bak watée nyan buleuen sikureueng, dan raja teungoh geuduek sira meu adeueng bak binéh apui di meuligoe musém sijuek gobnyan. 23 Meunan Yehuda seuleusoe jibeuet lhée atawa peuet boh bareh, raja laju geukoh bagian nyan deungon sikin ubit dan laju jitiek u dalam apui. Meunan kheueh jipeubuet hana piôh sampoe habéh kitab meugulong nyan jipajoh lé apui. 24 Bahpi Elnatan, Delaya, dan Gemarya geulakée ngon meuharab that mangat raja bék geutot kitab meugulong nyan, teuma raja nyan teutab hán geutem meulakée awaknyan. Bah kheueh raja meunan cit peujabat nyang ka jideungoe asoe kitab nyan hana teumakot atawa na rasa meunyeusai. 26 Raja meunan cit geupeurintah aneuëk agam gobnyan, nyang meunan Yerahmeel, meusajan deungon Seraya bin Azriel dan Selemya bin Abdeel, mangat jidrob ulôn dan Barukh seukeutaréh lôn. Teuma TUHAN geusöm kamoe. 27 Óh ka lheueh geutot lé raja Yoyakim kitab meugulong nyang ulôn calitra ubak Barukh nyan, laju TUHAN geuyue bak ulôn 28 mangat lôn jakcok kitab meugulong nyang laén, dan teutuléh bandum lagée nyang ka teutuléh lam kitab meugulong nyang phon. 29 TUHAN geuyue bak ulôn jak peugah lagée nyoe ubak raja, "Gata ka tatot kitab meugulong nyan, dan gata tatanyong ubak Yeremia pakon gobnyan geutuléh bahwa raja Babel teuka dan geupeuhanco nanggroe nyoe dan geupoh maté bandum peunduduek disinan meusigoe ngon beulatang-beulatang nyang na di nanggroe nyan. 30 Sabab nyan, Ulôn, TUHAN, Lôn peugah ubak gata, he Raja Yoyakim, bahwa hana meusidroe pih nibak keuturonan gata jimat keurajeuen sibagoe raja keuturonan Nabi Daud. Manyét gata jirhom uluwa, jipoh lé kha bak watée uroe, dan iémbon leupie óh watée malam. 31 Gata, keuturonan gata, dan bubena peujabat gata Lôn huköm sabab desya-desya nyang gata peubuet. Ulôn teuma Lôn peuteuka u ateueh gata bandum bala nyang ka Lôn ancam ubak gata, sabab bah kheueh gata meunan cit deungon peunduduek Yerusalem dan Yehuda hana jihiroe bak ancaman-ancaman nyang Ulôn peugah." 32 Teuma laju ulôn cok geunulong kitab nyang barô, dan ulôn jok ubak Barukh seukeutaréh lôn. Laju lé jihnyan jituléh banmandum nyang ka lôn calitra ubak jihnyan, na kheueh asoe geunulong kitab nyang phon teutamah deungon napadubboh peusan nyang laén nyang na hubongan deungon nyan.

Nabi Yeremia 37

1 Bak watée Nebukadnezar raja Babel geupeucat Yoyakhin aneuëk Yoyakim, lé geuhnyan laju jibaiát Zedekia bin Yosia jeuet keu raja Yehuda. 2 Teuma bah kheueh Zedekia meunan cit deungon peujabat banmandum dan rakyat jih hana jiturot peurintah TUHAN nyang geubri meulalu ulôn. 3 Raja Zedekia geuyue jak Yukhal bin Selemya, dan Teungku Imeum Zefanya bin Maaseya mangat jilakée mangat lôntem meudoá ubak TUHAN Po teu Allah keu keupeuntengan bansa. 4 Bak watée nyan ulôn gohlom jipeutamong u dalam glab dan mantong beubaih lôn meugrak lamkawan rakyat. 5 Sipa-i Babel teungoh geukeupong Yerusalem, teuma watée awaknyan jideungoe bahwa sipa-i Meusé ka jibeudôh di nanggroe Meusé keuneuk jijak muprang, awaknyan laju jisurot. 6 TUHAN, Po teu Allah Israel geuyue ubak ulôn 7 mangat lôn peugah lagée nyoe ubak utosan Raja Zedekia: "Tapeugah kheueh laju ubak Zedekia, 'Sipa-i Meusé nyang teungoh jijak keunoe keuneuk tulông gata, teuma jigisa, dan jiwoe. 8 Laju lé ureuëng Babel jiriwang dan jiprang banda nyoe, dan banda nyoe jipeutaloe dan laju jitot sampoe habéh. 9 Ulôn, TUHAN, Lôn peuingat gata, mangat bék tapeungéut droe gata sira tapike bahwa ureuëng Babel ka jijak hana jigisa le. Sabab awaknyan pasti geugisa. 10 Seukira jih gata tapeutaloe banmandum sipa-i Babel dan nyang tinggai na kheueh sipa-i nyang luka-luka parah didalam khimah-khimah awaknyan, teuma awaknyan jibeudôh dan jitot sampoe habéh banda nyoe.' " 11 Sipa-i Babel jisurot di Yerusalem sabab sipa-i Meusé ka meugrak jituju u banda nyan. 12 Dan ulôn laju lôn tinggai Yerusalem dan lônjak u wilayah Benyamin keu lôn teurimong jeumba waresan lôn nibak tanoh milék keuluwarga. 13 Teuma watée ulôn ka trok bak babah Pintoe Geureubang Benyamin, keumandan sipa-i nyang meutugaih disinan jiteun ulôn dan jipeugah, "Gata keuneuk plueng blah ureuëng Babel!" (Peuwira nyan nan jih Yeria; jihnyan aneuëk Selemya dan cucoe Hananya.) 14 Laju lôn jaweueb, "Nyan hana beutôi! Ulôn hana niet lôn plueng ubak musoh." Teuma Yeria hana jitem deungoe. Ulôn laju jidrob dan jiba ulôn jak meuhadab ubak peujabat peumeurintah. 15 Awaknyan beungéh that keu ulôn, dan jipeurintah ulôn nyoe jiseunuet dan jikuröng di rumoh Yonatan, seukeutaréh neugahra. Rumoh nyan ka jipeujeuet keu peunjara. 16 Ulôn jipeutamong lam saboh kulam dimiyueb tanoh, dan treb that jiteun disinan. 17 Óh lheueh nyan lé Raja Zedekia geuyue sidroe ureuëng mangat jiba ulôn meuhadab ubak gobnyan di meuligoe. Disinan seucara rahsia gobnyan geuteumanyong ubak ulôn peu kheueh na peusan nibak TUHAN. "Na," jaweueb ulôn. Laju lôn tamah lom, "Teungku Raja teuma jiseurah ubak raja Babel." 18 Óh ka lheueh nyan ulôn teumanyong lagée nyoe, "Peue buet ulôn nyang jeuhet ateueh Teungku Amphon atawa ateueh peujabat Teungku Amphon meunan cit ateueh rakyat Teungku Amphon, sampoe Teungku Amphon neupeutamong ulôn u dalam glab? 19 Dipat bandum nabi Teungku Amphon nyan nyang jipeugah bahwa raja Babel hana jiprang Teungku Amphon dan nanggroe nyoe? 20 Jinoe, Teungku Amphon nyang mulia, neutem kheueh nyang ulôn lakée nyoe. Bék kheueh neukirém lom ulôn dalam glab di rumoh Yonatan nyan, eunteuk ulôn maté disinan." 21 Dan lé Raja Zedekia geupeurintah mangat ulôn jipeutamong lam glab nibak seuramoe meuligoe. Dan ulôn tinggai disinan, dan tieb-tieb uroe jijok ruti nibak teumpat ruti teuböih sampoe peuseudiaan ruti nibak banda nyan habéh banmandum.

Nabi Yeremia 38

1 TUHAN meufeureuman bak ulôn jak peusampoe peusan nyoe ubak rakyat, "Banda nyoe ulôn jok keu sipa-i Babel, dan awaknyan jipeutaloe. Barang sigasoe nyang tinggai didalam banda ureuëng nyan maté di mideuen prang, atawa rhot bak deuk dan wabah peunyakét. Teuma barang sigasoe jiteubiet dan geuseurah droe ubak ureuëng Babel, ureuëng nyan hana teupoh maté dan nyawöng ureuëng nyan seulamat." Sefaca bin Matan, Gedalya bin Pasyhur, Yukhal bin Selemya, dan Pasyhur bin Malkia jideungoe banmandum nyang ulôn peugah nyan. 4 Dan jijak kheueh bubena peujabat nyan ubak raja dan jipeugah, "Ureuëng nyoe harôh teuhuköm maté. Sabab, deungon geupeugah lagée nyan jihnyan ka jipeuleumoh seumangat sidadu dan ureuëng laén nyang mantong tinggai di banda nyoe. Ureuëng nyan hana jitulông rakyat, teuma jipeuceulaka awaknyan." 5 Geujaweueb lé Raja Zedekia, "Get! Tapeubuet kheueh ateueh gobnyan nyang sisuai deungon keuheundak gata, ulôn hana hase lôn tam gata." 6 Ban jideungoe haba nyan lé awaknyan laju jicok ulôn dan geupeutron deungon taloe u dalam mon tho atra Malkia aneuëk agam raja, mon nyan teuduek jih bak binéh seuramoe meuligoe. Mon nyan hana meuié, nyang na leuhob, dan ulôn tamong dalam leuhob nyan. 7 Bak watée nyan na sidroe ureuëng Sudan jimeukeureuja bak meuligoe raja. Nan ureuëng nyan Ebed-Melekh. Ureuëng nyan jideungoe bahwa ulôn ka jipeutamong lam mon nyan. Bak watée raja teungoh geupimpén rapat bak babah Pintoe Geureubang Benyamin, 8 Ebed-Melekh jijak ubak raja dan laju geupeugah lagée nyoe, 9 "Amphon Deulat Teungku Po, nyang jipeubuet lé awaknyan hana get. Awaknyan ka jipeutamong Nabi Yeremia u dalam mon; gobnyan pasti maté sabab deuk dalam mon nyan, sabab peunajoh ka habéh lam banda nyoe." 10 Laju lé raja geupeurintah ubak Ebed-Melekh, "Taba kheueh lhée droe ureuëng dan tapeuteubiet laju Nabi Yeremia dalam mon nyan sigohlom gobnyan maté." 11 Dan jijak kheueh Ebed-Melekh deungon ban lhée ureuëng nyan bak gudang meuligoe, dan jicok laju ija-ija tuha disinan, laju ija-ija nyan jipeutron deungon taloe ubak ulôn didalam mon. 12 Ebed-Melekh jiyue peutamong ija-ija nyan lam gitiek lôn sibagoe ganja, mangat taloe nyan hana sakét watée keunong lôn. Dan di ulôn laju lôn seutôt peue-peue nyang ka jipeurintah lé Ebed-Melekh. 13 Dan awaknyan laju jitarék ulôn u ateueh, jipeuteubiet lam mon nyan. Óh ka lheueh nyan ulôn laju jiteuen nibak seuramoe meuligoe raja nyan. 14 Bak watée nyang laén, Raja Zedekia geuyue ureuëng jeuet jiba ulôn meuhadab gobnyan di babah pintoe geureubang nyang keu lhée nibak Baét TUHAN. Gobnyan geupeugah ubak ulôn, "Ulôn keuneuk teumanyong bak gata, dan gata harôh tajaweueb troh trang. Bék tasöm-söm." 15 Laju lôn jaweueb, "Meunyoe ulôn peugah nyang beutôi, pasti Teungku Amphon neupeurhot huköman maté ateueh ulôn; dan meunyoe ulôn bri naseuhat, Teungku Amphon hánneutem deungoe naseuhat nyan." 16 Raja Zedekia deungon seungab-seungab geumeujanji ubak ulôn, kheun gobnyan, "Deumi Allah nyang udeb, Po teu Allah nyang bri udeb ubak geutanyoe, ulôn meusumpah bahwa ulôn hana lôn peumaté gata atawa lôn jok gata ubak ureuëng-ureuëng nyang keuneuk poh maté gata." 17 Laju ulôn peugah ubak Zedekia bahwa TUHAN Nyang Mahakuasa, Allah nyang jiseumah lé ureuëng Israel, meufeureuman lagée nyoe, "Meunyoe gata taseurah droe ubak peujabat-peujabat raja Babel, gata hana jipoh maté, dan banda nyoe pih hana jitot, gata dan keuluwarga gata teuma seulamat. 18 Teuma meunyoe gata hana tatem taklok, banda nyoe rhot lam jaroe ureuëng Babel. Awaknyan jitot banda nyoe sampoe habéh, dan gata hana jituwoe." 19 Geujaweueb lé Raja, "Ulôn takot keu ureuëng-ureuëng bansa geutanyoe nyang ka jiplueng blah ureuëng Babel. Pat tateupeue ulôn jiseurah ubak awaknyan dan jiseksa." 20 "Nyan hana teujadi," jaweueb ulôn, "Teungku Amphon hana jiseurah ubak awaknyan. Ulôn meulakée deungon meuharab that mangat Teungku Amphon neuturot peue nyang geupeugah lé TUHAN; eunteuk banmandum béeréeh, dan Teungku Amphon hana jipoh maté. 21 Teuma meunyoe Teungku Amphon hán neutem seurah droe, TUHAN ka geupeuleumah ubak ulôn peue nyang teujadi. 22 Dalam keumalon ulôn nyan deuh ulôn ngieng banmandum ureuëng inong nyang mantong na lam meuligoe Yehuda jigireng uluwa ubak peujabat-peujabat raja Babel. Sira jijak, awaknyan geupeugah, 'Raja ka jipeudaya, lé rakan-rakan rab jihnyan, dan jikuasa lé awaknyan. Jinoe, óh ka lheueh gaki gobnyan meusuruek dalam leuhob, awaknyan bandum jisurot.' " 23 Ulôn peugah lom, "Bandum aneuëk peurumoh Teungku Amphon jiba uluwa ubak ureuëng Babel. Teungku Amphon keudroe pih hana teupeusie nibak awaknyan. Teungku Amphon jidrob lé raja Babel, dan banda nyoe jitot sampoe habéh." 24 Laju geupeugah lé Zedekia, "Bék neupeugah bak soe mantong keuhai geutanyoe meututoe nyoe, mangat nyawöng gata hana teuancam. 25 Meunyoe lé peujabat-peujabat jideungoe bahwa ulôn ka lôn peugah haba deungon gata, awaknyan jiteuka dan jitanyong ubak gata keuhai nariet geutanyoe. Awaknyan meujanji hana jipeu maté gata, meunyoe gata calitra banmandum ubak awaknyan. 26 Tapeugah mantong bahwa gata tabujuk ulôn mangat ulôn hana lôn kirém le gata u dalam glab dan maté disinan." 27 Hana treb óh lheueh nyan bandum peujabat jiteuka dan jitanyong ubak ulôn. Ulôn peugah ubak awaknyan pakriban nyang ka geupeugah lé raja ubak ulôn. Deungon lagée nyan awaknyan hana jeuet jipeubuet sapeue ateueh ulôn sabab hana meusidroe pih nyang teupeue peue nyang ka ulôn mariet deungon raja. 28 Ulôn teutab geuteun bak seuramoe meuligoe sampoe trok bak uroe Yerusalem jireupah lé musoh.

Nabi Yeremia 39

1 Bak buleuen nyang keu siploh thon keu sikureueng geumat keurajeuen lé Zedekia di Yehuda, Nebukadnezar raja Babel deungon banmandum angkatan prang jih jiteuka dan jijak prang Yerusalem. 2 Bak tanggai sikureueng buleuen peuet thon nyang keu siblaih geumat keurajeuen lé Raja Zedekia, bintéh beuton banda gobnyan jiheuntam ngon jidobrak lé musoh, 3 dan Yerusalem jireubot. Dan banmandum peujabat-peujabat raja Babel jiteuka dan jijak duek bak babah Pintoe Geureubang Teungoh. Lamkawan awaknyan na sidroe ureuëng nyang nan jih Nergal Sarezer, Samgar Nebo, Sarsekim ulée rumoh tangga meuligoe, Nergal Sarezer Rabmag dan peuwira-peuwira laén. 4 Bak watée Raja Zedekia dan bandum tantra gobnyan geukalon bandum nyang teungoh teujadi nyan, awaknyan meu useuha jipeuplueng droe rot Pantôn Yordan malam nyan cit teuma. Awaknyan geucok rot taman meuligoe, laju geuteubiet meulalu pintoe geureubang nyang peuhubông bandua boh beuton di teumpat nyan. 5 Teuma sipa-i Babel laju jipeucrok awaknyan dan jidrob laju Zedekia bak darat Yerikho. Óh lheueh nyan gobnyan laju jiba meuhadab Raja Nebukadnezar di banda Ribla di daerah Hamat, nibak teumpatnyan kheueh jihnyan jipeurhot huköman maté. 6 Dan dibanda nyan cit teuma aneuëk-aneuëk gobnyan jipoh maté dikeue mata gobnyan, dan bandum peujabat peumeurintah Yehuda pih jipoh maté. 7 Óh lheueh nyan Zedekia laju jicungké mata geuh, dan laju jicarueh jaroe geuh dan laju jiba u Babel. 8 Dan lé ureuëng-ureuëng Babel nyang laén laju jitot meuligoe raja dan rumoh-rumoh rakyat, dan jireuloh bubena beuton Yerusalem. 9 Akhé jih rakyat nyang mantong na tinggai di banda, meusajan ngon ureuëng-ureuëng nyang plueng u pihak Babel, laju jiangkot u Babel lé Nebuzaradan, keumandan pasokan Babel. 10 Siladum nibak rakyat nyang paleng gasien hana sapeue na, laju jitinggai di Yehuda dan jijok lampôh anggô dan ladang. 11 Raja Nebukadnezar ka jiyue bak Nebuzaradan, keumandan pasokan gobnyan, jipeuteubiet peurintah nyang su jih lagée nyoe: 12 "Tajak mita laju dipat Yeremia, dan tajaga kheueh gobnyan beu jroh-jroh. Bék tapeubuet sapeue ateueh gobnyan; dan tapeubuet kheueh peue nyang geulakée." 13 Dan lé Nebuzaradan meusajan deungon dua droe peuwira manyang gobnyan, Nebusyazban dan Nergal-Sarezer dan banmandum peuwira Babel nyang laén, 14 laju jijak cok ulôn nibak seuramoe meuligoe. Laju ulôn jijok ubak Gedalya bin Ahikam dan cucoe Safan, nyang intat ulôn woe deungon seulamat. Dan tinggai kheueh ulôn di teungoh-teungoh rakyat. 15 Watée ulôn mantong dalam glab nibak seuramoe meuligoe, TUHAN geuyue ubak ulôn 16 jak peugah ubak Ebed-Melekh ureuëng Sudan nyan bahwa TUHAN Nyang Mahakuasa, Po teu Allah Israel, geupeugah lagée nyoe, "Lagée nyang ka Ulôn peugah yoh masa dilée, Ulôn Lôn peuteuka ateueh banda nyoe beuncana, dan kon keumakmuran. Gata takalon hainyan teujadi. 17 Teuma, Ulôn, TUHAN, Lôn lindong gata. Gata hana jiseurah ubak ureuëng-ureuëng nyang gata takot. 18 Gata hana jipoh maté, sabab Ulôn Lôn peuseulamat gata. Nyawöng gata seulamat sabab gata tameusadeue ubak Ulôn. Ulôn, TUHAN, nyang peugah haba."

Nabi Yeremia 40

1 TUHAN meufeureuman ubak ulôn óh ka lheueh Nebuzaradan, keumeundan pasokan nyan, jipeubeubaih ulôn di Rama. Ulôn ka jiba keudeuh lam keuadaan jaroe teugari meusajan deungon bandum ureuëng laén nibak Yerusalem dan Yehuda nyang teungoh jiangkot sibagoe tawanan u Babel. 2 Keumeundan nyan jitawök ulôn keudroe dan jipeugah, "TUHAN Allah gata ka geuancam keuneuk geupeuhanco nanggroe nyoe. 3 Jinoenyoe hainyan ka geulaksana, sabab nyan bansa gata ka meudesya dan hana taát ubak Gobnyan. 4 Jinoenyoe ulôn peulheueh gari nyoe nibak jaroe gata dan ulôn peubeubaih gata. Meunyoe gata tatem, gata jeuet taseutôt u Babel, dan ulôn lôn peulara gata. Teuma meunyoe gata hana tatem, hana peue-peue. Bansaboh nanggroe gata beubaih tajak ho mantong nyang gata galak." 5 Sigohlom jijak, Nebuzaradan jipeugah lagée nyoe, "Meunyoe tatem, gata jeuet tagisa ubak Gedalya bin Ahikam dan cucoe Safan, nyang ka jiangkat lé raja Babel jeuet keu gubunur di banda-banda Yehuda. Gata jeuet tinggai deungon gobnyan di teungoh-teungoh rakyat, atawa tajak ho-ho mantong nyang galak até gata." Laju gobnyan geubri beukai peunajoh dan hadiah ubak ulôn, dan laju jipeulheueh ulôn. 6 Ulôn jak laju ubak Gedalya di Mizpa, dan tinggai deungon gobnyan lamkawan rakyat nyang jitinggai di nanggroe Yehuda. 7 Raja Babel ka geuangkat Gedalya jeuet keu gubunur di Yehuda keu geumat peurintah ateueh bandum ureuëng nyang mantong tinggai di Yehuda, na kheueh ureuëng-ureuëng paleng gasien. Siladum nibak peuwira dan sidadu Yehuda nyang hana meunyeurah ubak Babel, jideungoe keuhai teuangkat Gedalya nyan. 8 Dan Ismael bin Netanya, Yohanan bin Kareah, Seraya bin Tanhumet, dan aneuëk-aneuëk Efai nibak Netofa, dan Yezanya nibak Maakha jijak deungon ureuëng-ureuëng awaknyan ubak Gedalya di Mizpa. 9 Gedalya geupeugah ubak awaknyan, "Gata hana peureulée takot keu meunyeurah ubak ureuëng Babel. Tinggai kheueh mantong di nanggroe geutanyoe nyoe, dan jeuet kheueh keunamiet raja Babel. Ulôn tanggong gata nyoe seulamat. 10 Tinggai kheueh bak banda-banda nyang gata harok, dan hana salah tapeusapat dan takeubah anggô, boh-boh kayée meunan cit ngon minyéuk zaiton. Ulôn keudroe tinggai di Mizpa dan jeuet keuwaki rakyat meunyoe ureuëng-ureuëng Babel jijak keunoe." 11 Seulanjut jih bandum ureuëng Israel nyang tinggai di Moab, Amon, Edom, dan nanggroe-nanggroe laén, jideungoe bahwa raja Babel ka geubri idhin siladum ureuëng Israel tinggai di Yehuda, dan bahwa gobnyan ka geuangkat Gedalya jeuet keu gubunur. 12 Sabab nyan awaknyan jitinggai laju teumpat-teumpat dipat awaknyan ka jipeu crebre, laju jigisa u Yehuda. Awaknyan geujak ubak Gedalya di Mizpa, dan jigumpôi anggô nyang cukob le meunan cit deungon meubagoe rupa boh kayée. 13 Óh lheueh nyan, Yohanan dan bandum peuwira nyang hana meunyeurah ubak musoh, jijak ubak Gedalya di Mizpa 14 dan jipeugah, "Peu kheueh tateupeue bahwa Baalis raja Amon ka jiyue bak Ismael keuneuk jijak poh gata?" Teuma Gedalya hana geupateh keu haba nyan. 15 Dan deungon seungab-seungab jipeugah kheueh lé Yohanan ubak Gedalya, "Bah kheueh ulôn jakpoh maté Ismael; hana meusidroe pih nyang teupeue soe ureuëng poh Ismael nyan. Pakon gobnyan teupeubiyeu jijakpoh gata? Nyang lagée nyan rhot bak akibat bandum ureuëng Yehuda nyang ka meugumpôi disinoe deungon gata, meucrebre lom, dan hainyan teupeuhanco banmandum rakyat nyang mantong na tinggai di Yehuda." 16 Teuma geujaweueb lé Gedalya, "Bék! Nyang gata peugah keuhai Ismael nyan hana beutôi!"

Nabi Yeremia 41

1 Bak buleuen tujoh thon nyan Ismael bin Netanya dan cucoe Elisama jijak meusajan ngon siploh droe ureuëng nyang laén u Mizpa keuneuk meurumpok ngon Gedalya. (Ismael na kheueh sidroe ureuëng keuturonan raja, dan sidroe lamkawan peuwira manyang keurajeuen nanggroe.) Dan awaknyan banmandum jimakheun meusajan, 2 Ismael dan ban siploh droe rakan jihnyan laju jisuet peudeueng lam sarong dan laju jicang Gedalya sampoe maté, gubunur nyang geuangkat lé ureuëng Babel. 3 Meunan cit lé Ismael jipoh maté bandum ureuëng Yehuda nyang na meusajan ngon Gedalya di Mizpa, dan banmandum tantra Babel nyang keubeutulan na disinan. 4 Uroe seulanjut jih, sigohlom Gedalya nyang ka teupoh maté jiteupeue lé gob, 5 teuka kheueh lapan ploh droe ureuëng di Sikhem, Silo, dan Samaria. Awaknyan ka jicukô janggot, jipriek peukayan, dan geucureh-cureh badan jih keudroe. Awaknyan jiba gandom dan keumeunyan keuneuk jipeuseumah di Baét TUHAN. 6 Dan jiteubiet kheueh Ismael di Mizpa dan jijak meurumpok laju deungon awaknyan, sira jimoe, laju jipeugah, "Jak geutanyoe tajak ngieng Gedalya." 7 Sigra óh ka lheueh awaknyan trok di teungoh-teungoh banda, Ismael dan rakan-rakan gobnyan ka jipeuphon poh awaknyan. Teuma siploh droe lamkawan awaknyan jipeugah ubak Ismael, "Bék tapoh maté kamoe! Bak kamoe mantong na dua macam gandom, meunan cit deungon minyéuk zaiton, dan meunisan. Banmandum kamoe söm di luwa banda." Sabab nyan kheueh Ismael hana jipoh awaknyan, teuma nyang laén teutab jipoh maté dan manyét-manyét awaknyan jitiek lam mon. 9 Mon nyan na kheueh mon nyang raya nyang geukueh lé Raja Asa bak watée gobnyan jiprang lé Baesa raja Israel. 10 Óh lheueh nyan Ismael laju jidrob banmandum putroe raja nyang mantong tinggai di Mizpa nyang ka jiseurah lé Nebuzaradan ubak peungawas Gedalya. Ismael jiteun awaknyan dan laju jijak ngon awaknyan u jurusan wilayah Amon. 11 Yohanan bin Kareah dan bandum peuwira nyang na meusajan ngon awaknyan jideungoe keuhai keujeuhetan Ismael. 12 Dan awaknyan meusajan ngon aneuëk buah awaknyan jitiyeub laju gobnyan, dan meurumpok ngon jihnyan bak binéh kulam raya Gibeon. 13 Ban jingieng Yohanan meusajan ngon peuwira-peuwira nyan teungoh teuka, bubena ureuëng nyang jiteun lé Ismael galak that até, 14 laju geugisa dan geuplueng lamkawan Yohanan. 15 Teuma Ismael dan lapan droe aneuëk buah jihnyan jiteumé peulheueh droe, dan laju jiplueng u nanggroe Amon. 16 Óh lheueh nyan Yohanan dan peuwira-peuwira gobnyan geugumpôi laju bubena sidadu, ureuëng inong, aneuëk-aneuëk manyak, dan bandum peugawée meuligoe nyang jiteun lé Ismael óh ka lheueh jipoh maté Gedalya. 17 Awaknyan bandum teumakot keu ureuëng Babel, sabab Ismael ka jipoh maté Gedalya nyang geuangkat lé raja Babel jeuet keu gubunur di nanggroe nyan. Jadi, awaknyan jipeuplueng droe u nanggroe Meusé. Bak teungoh rot ueh, awaknyan laju jipiôh di Kimham karab ngon Betlehem.

Nabi Yeremia 42

1 Óh lheueh nyan, bandum ureuëng, ubit dan rayeuk, meusajan ngon peuwira-peuwira, jitamong cit keunan Yohanan bin Kareah dan Azarya bin Hosaya jijak 2 ubak ulôn dan jipeugah, "Pak, lagée nyang Bapak ngieng keudroe, kamoe nyoe dilée le, teuma saát nyoe tinggai bacut teuk. Kamoe meuharab mangat Bapak neutem meudoá keu kamoe ubak TUHAN Allah nyang Bapak seumah. Meudoá kheueh keukamoe nyang mantong tinggai sidroe dua nyoe, 3 mangat TUHAN Po teu Allah geutunyok ubak kamoe ho nyang harôh kamoe jak dan peue nyang harôh kamoe peubuet." 4 Laju ulôn jaweueb, "Get kheueh, meunyoe meunan. Ulôn teurimong peue nyang gata lakée nyan. Ulôn meudoá ubak TUHAN Po teu Allah geutanyoe, dan peue mantong nyang Gobnyan jaweueb, teuma lôn peugah ubak gata; sapeue pih hana lôn söm keu gata." 5 Awaknyan geupeugah ubak ulôn, "Kamoe lakée Bapak neumeudoá ubak TUHAN Allah tanyoe, sabab kamoe ka kamoetem taát ubak gobnyan, mangat keuadaan kamoe jeuet keu get. Jadi, get atawa brok peusan TUHAN nyan, kamoe teutab kamoe seutôt. Bah kheueh TUHAN jeuet keusaksi nyang jujoe dan seutia teuhadab kamoe, meunyoe kamoe hana kamoe turot banmandum peurintah nyang TUHAN bri ubak kamoe meulalu Bapak." 7 Na siploh uroe teuma óh lheueh nyan TUHAN meufeureuman ubak ulôn. 8 Dan laju ulôn hôi Yohanan meunan cit deungon peuwira-peuwira gobnyan dan bandum ureuëng laén nyang teuka meusajan deungon gobnyan. 9 Ulôn peugah ubak awaknyan, "Gata tayue ulôn mangat lôn peusampoe nyang gata lakée ubak TUHAN, Allah Israel. Nyoe, TUHAN ka geupeugah, 10 'Meunyoe tatem teutab tinggai di nanggroe nyoe, Ulôn Lôn angkat gata, bukon Ulôn peu rhot; Ulôn Lôn peudong gata, kon Ulôn reuloh. Ulôn seudeh that-that sabab ka Lôn peuteuka beuncana ateueh gata. 11 Bék le tatakot bak raja Babel nyan. Ulôn na di teungoh-teungoh gata keu Lôn tulông dan Lôn peulheueh gata nibak keukuasaan jih nyan. 12 Sabab na gaséh sayang bak gata, Ulôn Lôn peujeuet raja Babel jigaséh keu gata dan jibri idhin keu gata mangat jeuet gata woe. Ulôn, TUHAN, ka Lôn peugah haba.' " 13 Teuma gata nyang mantong tinggai di Yehuda bék kheueh meubangkang keu TUHAN Allah gata dan bék tapeugah, "Kamoe hana kamoe tem tinggai di nanggroe nyoe. Kamoe keuneuk jak u nanggroe Meusé dan kamoe tinggai disinan. Di nanggroe Meusé nyan kamoe hana le kamoe rasa prang, hana le kamoe deungoe su beureuguih nyang teuhôi kamoe keuteujak ngaza, dan hana teuma kamoe deurita keunong deuk." Meunyoe gata tameukreueh até keu tajak u nanggroe Meusé dan tatinggai disinan, nyoe kheueh peusan TUHAN Nyang Mahakuasa, Allah Israel, keu gata: 16 "Muprang dan deuk nyang gata takot nyan teuma jitiyeub gata sampoe u nanggroe Meusé, dan gata maté di nanggroe nyan. 17 Bandum ureuëng nyang jimeukreueh keujijak u nanggroe Meusé dan tinggai disinan ureuëng nyan maté di mideuen prang, atawa maté sabab keunong deuk dan keunong bala peunyakét. Hana meusidroe pi nyang teupeusie nibak beuncana nyang Ulôn peuteuka ateueh awaknyan; banmandum maté. 18 Lagée Ulôn, TUHAN, Po teu Allah Israel Lôn peuteuka beungéh dan geungeuen Ulôn u ateueh peunduduek Yerusalem, meunan cit teuma Lôn peuteuka geungeuen Ulôn ateueh gata nyang tajak u Meusé. Ureuëng laén gli jikalon gata; gata jihina, dan nan gata jipeuguna sibagoe kutokan. Gata hana takalon tanoh ié gata nyoe masa nyang teuma teuka." 19 Laju ulôn peugah lom, "TUHAN ka geupeurintah mangat gata nyang na mantong tinggai sidroe sapat di Yehuda hana gata jak u nanggroe Meusé. Sabab nyan ulôn peuingat ubak gata saát nyoe 20 bahwa gata ka tapeubuet keusalahan nyang paleng raya. Gata lakée mangat ulôn meudoá ubak TUHAN Po teu Allah geutanyoe keu gata, dan gata meujanji mangat gata peubuet bandum nyang geupeugah lé TUHAN. 21 Jinoenyoe ulôn ka lôn peusampoe peusan TUHAN Allah geutanyoe ubak gata, teuma gata hana tatem seutôt peusan nyan. 22 Sabab nyan, ingat kheueh: di nanggroe nyang meuhéut gata keuneuk jak dan tinggai teutab disinan, gata maté dimideuen prang, atawa sabab keunong deuk atawa bala peunyakét."

Nabi Yeremia 43

1 Feureuman TUHAN, Allah Israel, nyang harôh ulôn peusampoe ubak rakyat ka ulôn peutrok banmandum. 2 Lé Azarya bin Hosaya dan Yohanan bin Kareah dan bandum ureuëng laén nyang sombong nyan jipeugah ubak ulôn, "Gata sulet. TUHAN Allah kamoe hana geuyue bak gata keu gata tam kamoe mangat bék kamoe jak dan tinggai teutab di nanggroe Meusé. 3 Barukh bin Neria nyan kheueh nyang yue gata mangat ta lawan kamoe, mangat ureuëng Babel jikuasa kamoe dan jiteumé piôh kamoe u Babel." 4 Bah Yohanan meunan cit deungon bandum peuwira dan rakyat hana jitem turot peurintah TUHAN keu tinggai di Yehuda. 5 Yohanan dan bandum peuwira nyan geuba u Meusé soe mantong ureuëng nyang mantong na tinggai di Yehuda, dan meunan cit bandum ureuëng nyang ka geuwoe nibak nanggroe laén teumpat awaknyan meusipreuk. 6 Agam, inong, aneuëk-aneuëk manyak, dan putroe-putroe raja nyang geuseurah lé Nebuzaradan ubak peungawasan Gedalya, jitamong ulôn dan Barukh, bandum geuba u Meusé. 7 Awaknyan jilawan peurintah TUHAN, dan jijak u nanggroe Meusé sampoe jiôh trok u banda Tahpanhes. 8 Disinan TUHAN geupeugah ubak ulôn, 9 "Tacok kheueh batée-batée dan seubée kheueh lam tanoh dikeue pintoe tamong u geudong peumeurintah banda nyan. Useuha kheueh mangat ureuëng-ureuëng Yehuda jikalon peue nyang gata peubuet nyan. 10 Laju tapeugah ubak awaknyan bahwa Ulôn, TUHAN Nyang Mahakuasa, Allah Israel, Lôn peuteuka hamba Ulôn Nebukadnezar raja Babel, u teumpat nyan. Dan di ateueh batée-batée nyang gata seubée lam tanoh nyan, jihnyan jipeupeudong takhta jih dan jipeudong khimah keurajeuen jihnyan. 11 Nebukadnezar teuma teuka dan jipeutaloe Meusé. Dan ureuëng-ureuëng nyang ka teupeuteuntée keu maté sabab bala peunyakét, ureuëng nyan maté sabab peunyakét. Awaknyan nyang ka geupeuteuntée teuangkot sibagoe ureuëng keunong teun, teuangkot sibagoe ureuëng keunong teun, nyang ka teupeuteuntée keu maté dimideuen prang, maté di mideuen prang. 12 Ulôn Lôn peuhu apui di kuil-kuil dewa-dewa Meusé, dan raja Babel geutot banmandum patong beurala nyang na bak kuil-kuil nyan atawa jiangkot u nanggroe gobnyan. Lagée sidroe ureuëng meurabe nyang jipeugleh bajée gobnyan nibak gutée, meunan kheueh raja Babel geusampôh habéh nanggroe Meusé laju geujak lom deungon hana ureuëng nyang jijeuet peukaru. 13 Tugu-tugu beurala nyang na di Heliopolis di nanggroe Meusé, teuma geupeuhanco, dan kuil-kuil dewa-dewa Meusé geutot habéh jeuet keu abée."

Nabi Yeremia 44

1 TUHAN meufeureuman ubak ulôn keubandum ureuëng Israel nyang tinggai di Meusé, nyang na di banda Migdol, Tahpanhes, Memfis, dan di daerah seulatan. 2 Nyoe kheueh feureuman TUHAN Nyang Mahakuasa, Po teu Allah Israel, keu awaknyan, "Gata keudroe ka gata kalon beuncana nyang Ulôn peu rhot ateueh Yerusalem dan banmandum banda laén di Yehuda. Sampoe saát nyoe pih banda-banda nyan mantong dalam keuadaan hanco dan hana ureuëng tinggai. 3 Hai nyan teujadi sabab ureuëng disinan meudesya, sampoe jipeuteuka beungéh Ulôn. Awaknyan jipeuseumah keureubeuen dan meubakti ubak dewa-dewa nyang gohlom jiseumah lé awaknyan keudroe, lé gata dan indatu gata. 4 Ulôn hana putôh-putôh Lôn kirém ubak gata hamba-hamba Ulôn nabi-nabi, nyang peusampoe ubak gata mangat bék jipeubuet buet nyang Ulôn banci. 5 Teuma gata hana tatem deungoe dan hana tatem simak. Gata hana tatem piôh tapeubuet nyang jeuhet, deungon cara gata peuseumah keureubeuen ubak dewa-dewa. 6 Nyang kheueh sabab jih Ulôn peutron beungéh dan meureuka Ulôn ateueh banda-banda di Yehuda dan rot-rot raya di Yerusalem. Banmandum Ulôn tot sampoe ka jeuet keu rungka-rungka dan tandus lagée nyang ka takalon bak saát nyoe. 7 Dan jinoe, Ulôn, TUHAN Nyang Mahakuasa, Po teu Allah Israel, Lôn tanyong pakon gata peubuet hai nyang teupeu teuka bala nyang raya ateueh gata. Peu kheueh gata keuneuk peubinasa banmandum ureuëng -- agam, ureuëng inong, aneuëk miet dan aneuëk manyak -- sampoe hana meusidroe pih nibak bansa gata nyang tinggai? 8 Keupeue gata peubuet hai-hai nyang teupeu teuka beungéh Ulôn? Gata tateuka dan tatinggai di nanggroe Meusé, nanggroe nyang aséng nibak gata, laju gata seumah beurala dan tapeuseumah keureubeuen keu dewa-dewa nanggroe nyan! Peu kheueh gata takeuneuk peuhanco droe gata keudroe mangat gata jihina lé sigala bansa di ateueh donya nyang nan gata jipeuguna sibagoe kutokan? 9 Peu kheueh gata ka tuwoe ubak sigala keujeuhetan nyang jipeubuet di tanoh Yehuda dan nibak rot-rot raya di banda Yerusalem lé indatu gata, lé raja-raja Yehuda dan peurumoh-peurumoh awaknyan, meunan cit gata dan peurumoh gata? 10 Teuma trok bak uroe nyoe gata hana tapeumiyueb droe. Gata hana tahoreumat Ulôn dan hana udeb meunurot huköm nyang Ulôn bri ubak gata dan ubak indatu gata. 11 Sabab nyan, Ulôn, TUHAN Nyang Mahakuasa, Allah Israel, Lôn lawan gata dan Lôn peuhanco bansaboh Yehuda. 12 Dan meunyoe na nibak ureuëng Yehuda nyang mantong na tinggai sidroe sapat nyang na meuhéut keuneuk jak cit u nanggroe Meusé keuji tinggai disinan, awaknyan binasa banmandum. Awaknyan bandum, cut rayeuk, maté di Meusé dimideuen prang atawa sabab keunong deuk. Ureuëng laén meurasa gli watée jikalon awaknyan dan jihina awaknyan. Nan awaknyan jipeuguna sibagoe kutokan. 13 Lagée Ulôn huköm Yerusalem, meunan cit teuma Lôn huköm awaknyan nyang tinggai di nanggroe Meusé. Awaknyan maté dimideuen prang, sabab keunong deuk atawa keunong bala peunyakét. 14 Di ureuëng Yehuda nyang na mantong tinggai sidroe sapat, nyang ka jijak u nanggroe Meusé keu tinggai teutab disinan, hana meusidroe pi tinggai atawa udeb. Hana meusidroe pih lamkawan awaknyan jiwoe u Yehuda, bahpi hainyan jiharab that. Bit, hana nyang woe teukeucuali napadub droe ureuëng peungungsi." 15 Laju jijak kheueh ureuëng ramé nyang jai that ubak ulôn, awaknyan na kheueh bandum ureuëng agam nyang ka jiteupeue bahwa ureuëng binoe gobnyan jipeuseumah keureubeuen keu dewa-dewa, dan bandum ureuëng inong nyang teungoh jidong disinan, jitamong cit keunan ureuëng Israel nyang tinggai di Patros, blaih seulatan Meusé. Awaknyan jipeugah ubak ulôn, 16 "Kamoe hán kamoe tem deungoe peue-peue nyang droeneueh peugah ubak kamoe ateueh nan TUHAN. 17 Mandum nyang ka kamoe meujanji, kamoe peubuet cit teuma. Kamoe teutab kamoe peuseumah keureubeuen ubak Ratu Syeuruga, dan teurô ié anggô sibagoe peuseumahan keu geuhnyan lagée nyang teupeubuet di banda-banda Yehuda dan di rot-rot raya di Yerusalem lé indatu kamoe, lé raja-raja dan peujabat-peujabat peumeurintah kamoe dan kamoe keudroe. Bak watée nyan nibak kamoe na peunajoh nyang seb, kamoe makmu, dan hana kureueng meusapeue pi. 18 Teuma watée kamoe piôh kamoe peuseumah keureubeuen ubak Ratu Syeuruga, dan hana le kamoe rô ié anggô sibagoe peuseumahan keu gobnyan, nibak kamoe ka kureueng meubagoe jeunéh; ureuëng-ureuëng kamoe maté di mideuen prang atawa keunong deuk." 19 Óh lheueh nyan lé ureuëng-ureuëng inong nyan jipeugah, "Bak lakoe kamoe ka jeuet kamoe peugot ruti nyang hijih lagée Ratu Syeuruga dan kamoe tot keureubeuen meunan cit kamoe peuseumah ié anggô keu dewa kamoe nyan." 20 Keu bandum ureuëng agam dan ureuëng inong nyang jijaweueb lagée nyan, ulôn peugah meunoe, 21 "Peu kheueh gata sangka TUHAN hana geuteupeue atawa ka geutuwoe keu keureubeuen-keureubeuen nyang jipeuseumah di banda-banda Yehuda dan nibak rot-rot raya di Yerusalem lé indatu gata, lé raja-raja dan peujabat-peujabat gata, meunan cit lé rakyat nanggroe nyoe dan lé gata keudroe? 22 TUHAN hán ék geuteuen le geukalon gata tapeuseumah keureubeuen-keureubeuen ubak ilah-ilah nyang laén. Buet gata nyan jeuhet dan hina. Gata ka meudesya ubak TUHAN dan hana taát ubak peue-peue nyang Gobnyan peurintah. Sabab nyan saát nyoe cit teuma nanggroe gata ka hanco sampoe ka hana jeuet teupeuguna le, dan nan jihnyan jipeuguna sibagoe kutokan. Ureuëng nyang kalon nyan meurasa gli." 24 Laju ulôn bri tée ubak bandum ureuëng nyan, nyang phon that ubak ureuëng inong nyang na disinan, bahwa TUHAN Nyang Mahakuasa geupeugah lagée nyoe keu ureuëng-ureuëng Yehuda nyang duek di nanggroe Meusé, "Gata dan peurumoh-peurumoh gata ka jimeusumpah keu Ratu Syeuruga bahwa gata tatot keureubeuen dan tapeuseumah ié anggô keujih nyan. Janji gata nyan ka gata peutrok. Jadi, gét kheueh! Tapeubuet kheueh laju peue nyang gata peujanji nyan! 26 Teuma bak saát nyoe deungoe kheueh peue nyang Ulôn peugah ubak gata, he ureuëng Israel di nanggroe Meusé; Ulôn, TUHAN, meusumpah deumi nan Ulôn nyang agong bahwa gata hana Lôn bri idhin tapeuguna nan Ulôn keu gata ikat sapeue-peue janji. Gata hana jeuet tapeugah, 'Ulôn meusumpah deumi Po teu Allah nyang udeb!' 27 Ulôn meu useuha mangat gata keunong bala dan hana bahgia, sampoe gata maté banmandum, bah kheueh dimideuen prang meunan cit lé sabab keunong bala peunyakét. 28 Teuma napadub droe sagai nyang seulamat dan jiwoe u Yehuda nibak Meusé. Dan bandum ureuëng Yehuda nyang na di Meusé jikalon peu kheueh buet awaknyan atawa haba Ulôn nyang jeuet keunyataan. 29 Ulôn Lôn peutron bala ateueh gata nibak teumpat nyoe keu Lôn bukeuti keugata bahwa huköm nyang Ulôn reuncana keu gata, beutôi-beutôi teujadi. 30 Hofra raja nanggroe Meusé Lôn seurah ubak musoh-musoh nyang keuneuk peumaté jihnyan, saban lagée Ulôn seurah Zedekia raja Yehuda ubak Nebukadnezar raja Babel, musoh jihnyan nyang keuneuk peumaté jihnyan."

Nabi Yeremia 45

1 Bak thon nyang keupeuet geumat keurajeuen lé Yoyakim bin Yosia ateueh Yehuda, Barukh jituléh peue nyang ulôn calitra ubak jihnyan. Laju ulôn peusampoe ubak jih 2 haba TUHAN, Allah Israel. TUHAN meufeureuman, "Barukh, 3 gata tunu até lagée nyoe, 'Ah, sial that ulôn nyoe! Sosah gata jai that-that, dan TUHAN geutamah lom deungon peundeuritaan. Ulôn ka hék apoh apah, hana keuteunangan meubacut pih!' 4 He Barukh! Ulôn, TUHAN, teungoh geureuloh nyang ka geupeuget, dan teungoh Lôn bôt nyang ka Lôn pula. Bansigom donya Ulôn peubuet lagée nyan. 5 Pakon gata tateupeu istimewa? Bék meunan, Barukh! Banmandum umat manusia Lôn huköm deungon bala, teuma keuhai gata, sihana-hana jih gata seulamat. Homantong gatajak, gata teutab udeb. Ulôn, TUHAN ka Lôn peugah haba."

Nabi Yeremia 46

1 TUHAN Meufeureuman ubak ulôn keuhai bansa-bansa, 2 teupuphon deungon Meusé. Gobnyan geubri tée ubak ulôn keuhai sipa-i Nekho raja Meusé, nyang jipeutaloe di Karkemis bak binéh Krueng Efrat lé Nebukadnezar raja Babel bak thon nyang keupeuet keurajeuen Yoyakim, raja Yehuda. Nyoe kheueh nyang geupeugah lé TUHAN keuhai nyan, 3 "Peuwira-peuwira Meusé laju jidumpék siaga ubak pasokan jih, 'Asah laju kapak! Sök laju bajée beuso dan kupiah baja! Peusiab laju peurisai dan tatamong laju lam baresan! Gata, pasokan meuguda, peungui laju peulana! Pasang laju ateueh rhueng guda gata, dan jak laju maju ngaza u mideuen prang!' 5 Teuma, Ulôn, TUHAN, Lôn kalon awaknyan jisurot ngon teumakot. Sipa-i-sipa-i awaknyan habéh teupeutaloe, dan laju jiplueng sira ngon teumakot hana jingieng meubacut pih ulikot. 6 Nyang lisek hana hase jipeuplueng droe, dan nyang peukasa hana tinggai nibak musoh. Awaknyan meu antok dan reubah di utara, dan bak binéh Krueng Efrat nyan keudroe. 7 Soe kheueh ureuëng nyan nyang ji ék lagée Krueng Nil, lagée krueng nyang ji ék ié beuna sampoe bak binéh? Nyan kheueh nanggroe Meusé. Jipeugah lé gobnyan, 'Ulôn lôn beudôh dan Lôn kuasa bumoe. Ulôn peubinasa banda-banda meunan cit ngon peunduduek disinan. 9 Kah plueng kheueh, he guda! Meugrak kheueh, he geuritan! Maju kheueh, he pahlawan nyang ba peurisai di Sudan dan Libia. Meunan cit deungon gata, he nyang akhli-akhli timbak aneuk panah nibak nanggroe Lidia.' " 10 Teuma, ulôn, Yeremia lôn peugah, nyoe kheueh uroe TUHAN Allah Nyang Mahamanyang dan Mahakuasa; bak uroe nyan gobnyan geutueng bila ateueh banmandum musoh-musoh Gobnyan. Peudeueng Gobnyan geucang awaknyan sampoe óh troe, dan geujieb darah awaknyan sampoe án puih. Nibak uroenyoe TUHAN Nyang Mahakuasa, geusie keureubeuen-keureubeuen Gobnyan di utara, nibak binéh Krueng Efrat nyan. 11 He peunduduek Meusé, tajak kheueh u Gilead keu tajak mita ubat! Teuma, bahpi lagée nyan hana ubat nyang hase jipeupuléh gata. 12 Keuadaan gata nyang lumpah malée nyan ka jiteupeue lé bansa-bansa. Su dumpék gata teudeungoe bansigom donya. Sidadu nyang sidroe meugantoh bak sidadu nyang laén; akhé jih bandum awaknyan reubah meujo-jo di ateueh bumoe. 13 Watée Nebukadnezar raja Babel geujak prang nanggroe Meusé, TUHAN meufeureuman ubak ulôn, kheun Gobnyan, 14 "He Yeremia, peumaklum kheueh laju haba nyoe lom di banda-banda nanggroe Meusé, na kheueh di Memfis, Migdol dan Tahpanhes, 'Meusiab kheueh keu teupeuteun droe sabab banmandum hareuta gata geupeu habéh lam prang raya! 15 Pakon Apis, dewa gata nyang teuga nyan ka jipeu plueng droe? Sabab TUHAN ka geupeutaloe awaknyan!' 16 Jai that sipa-i gata meugantoh dan reubah. Awaknyan jimariet sabe keudroe-droe, 'Jak geutanyoe tawoe ubak bansa droe mangat geutanyoe teuhinda nibak peudeueng musoh.' 17 Tagala nan barô keu raja Meusé: 'Si tukang peuriôh nyang jipeuliwat keuseumpatan.' 18 Ulôn Allah Nyang udeb, Ulôn raja, TUHAN Nyang Mahakuasa. Lagée Gunong Tabor nyang leubeh manyang lamkawan gunong-gunong nyang laén, dan Gunong Karmel nyang meucugok ateueh ié laôt, lagée nyan kheueh teunaga gobnyan nyang teuka geujak prang gata. 19 Meusiab-siab kheueh, he peunduduek Meusé, keu geuteun dan geuba! Memfis jeuet keu rungka-rungka -- teumpat nyang seungue sabab hana ureuëng duek. 20 Nanggroe Meusé lagée aneuëk leumô nyang teumbon, teuma jipeukaru lé lalat raya di utara. 21 Meunan cit sipa-i-sipa-i nyang jisiwa hana meudaya lagée aneuëk leumô nyang teumbon that. Awaknyan hana hase meuteun. Bandum jigisa dan jiplueng jeuet seulamat. Uroe huköman keu awaknyan ka trok teuka; ka watée jih awaknyan keunong bala. 22 Sipa-i Meusé laju jiplueng peusiblah droe deungon babah meuhah-meuhah lagée su uleue, sabab sipa-i musoh ka meutamah tho. Awaknyan jiheuntam sipa-i Meusé deungon pato lagée ureuëng keuneuk teubang kayée 23 dan teucah uteun nyang seumak nyang hana hase teutamong rot nyan. Sipa-i musoh hán ék teuitong jai jih, leubeh le nibak daruet. Ulôn, TUHAN, Lôn peugah. 24 Peunduduek Meusé jipeumalée, sabab jipeutaloe lé bansa siblah utara. Ulôn, TUHAN, ka Lôn peugah haba." 25 TUHAN Nyang Mahakuasa, Po teu Allah Israel, meufeureuman, "Ulôn Lôn huköm Amon, dewa nibak Tebe, meusigoe deungon banmandum Meusé deungon dewa-dewa dan raja-raja jih nyan. Raja Meusé dan bandum ureuëng nyang jipeumeugah ateueh gobnyan 26 Lôn seurah ubak Nebukadnezar raja Babel deungon sipa-i jihnyan nyang keuneuk poh maté jihnyan. Teuma óh lheueh nyan, Meusé na ureuëng duek lagée ban nyang ka. Ulôn, TUHAN, ka Lôn peugah haba." 27 "Umat Israel, bék kheueh teumakot! Hamba Lôn, Nabi Yakub, bék kheueh yo! Gata dan keuturonan gata Lôn peuseulamat di nanggroe jiôh, di teumpat gata jiteun. Gata teuma tawoe dan tinggai di nanggroe gata deungon aman. Gata udeb deungon teuntram; hana nyang peureulée gata takot. 28 Lé sababnyan, bék kheueh teumakot, he umat Lôn, Ulôn teuka Lôn jak peuseulamat gata. Bansa-bansa, teumpat gata Ulôn peu crebre, bandum Lôn peubinasa, teuma gata hana Lôn peubuet nyang lagée nyan. Beutôi gata hana teupeusie nibak huköman teuma huköman Ulôn ateueh gata na kheueh ade nyang paih lagée reuncana. Ulôn, TUHAN, ka Lôn peugah haba."

Nabi Yeremia 47

1 Sigohlom raja Meusé jiseurang Gaza, TUHAN meufeureuman ubak ulôn keuhai nanggroe Filistin. 2 TUHAN geupeugah, "Kalon kheueh, ié ji ile di utara dan meulimpah lagée ié krueng nyang teungoh raya jilanda nanggroe meunan cit ngon asoe jih, banda-banda meusigoe ngon peunduduek jih. Ureuëng jikliek jilakée tulông dan bandum rakyat jimo ba-e. 3 Awaknyan jideungoe su deurab langkah guda, su geuritan jak nyang krak kruk, dan keureutak keureutok su ruda jih. Ureuëng tuha jeuet keuleumoh dan hana le jipike keu aneuëk droe. 4 Ka trok watée jih bansa Filistin teupeubinasa bandum, sampoe Sirus dan Sidon hana meuteumé le bantuan. Ulôn, TUHAN, Lôn peubinasa bandum ureuëng Filistin nyang mantong tinggai nibak Kreta. 5 Ureuëng Gaza rhot ubak seudeh nyang rayeuk; peunduduek Askelon seungab meubisu. Sampoe án pajan ureuëng Filistin nyang mantong tinggai hana putôh meuduka? 6 Gata tadumpék, 'Sampoe án pajan gata meunyeurang, he peudeueng TUHAN? Tamong kheueh lom lam sarong gata dan tinggai kheueh disinan deungon teunang!' 7 Teuma peu kheueh jih nyan meuteumé teunang, meunyoe Ulôn ka Lôn peurintah jih nyan keujijak prang Askelon dan peunduduek binéh panté?"

Nabi Yeremia 48

1 Nyoe kheueh feureuman TUHAN Nyang Mahakuasa, Po teu Allah Israel keuhai Moab, "Ceulaka kheueh peunduduek Nebo, banda jih ka reuloh! Kiryataim ka jireubot, dan kuta jih nyang khong ka jipeuhanco, lé sababnyan peunduduek inan ka jeuet keu malée; 2 leunyab kheueh keubanggaan Moab. Musoh ka jireubot Hesybon dan disinan awaknyan ka jireuncana keuneuk jipeuleunyab banmandum bansa Moab. Su-su nyang riyoh di banda Madmen teupeupiôh, sabab banda nyan keuneuk jiprang lé sipa-i. 3 Deungoe kheueh! Peunduduek Horonaim jimeudumpék, 'Keubinasaan! Keuhancoran!' 4 Moab ka museunah! Su jikliek aneuëk-aneuëk manyak awaknyan teudeungoe sampoe u Zoar. 5 Deungoe kheueh su ureuëng mo nibak jalan teu ék u Luhit, dan su ureuëng meuba-e nibak jalan teutron u Horonaim. 6 Kheun awaknyan, 'Bagaih! Peuseulamat laju nyawöng gata! Plueng laju lagée keuleudée kleut di padang pasi!' 7 Moab! Gata peusombong droe deungon keu tangkasan dan keukayaan gata. Teuma jinoenyoe gata keudroe jipeutaloe. Kamos, dewa gata, meusigoe ngon teungku imeum dan bubena peujabat ji angkot u teumpat nyang teuböih. 8 Banmandum banda hanco, hana meusaboh pi nyang na tinggai. Pantôn dan tanoh data nyang miyueb banmandum museunah. Ulôn, TUHAN, ka Lôn peugah haba. 9 Peudong kheueh batée nisan keu Moab, sabab hana treb le nanggroe nyan geupeuhanco sapan sapa. Banda-banda nyang na disinan reuloh dan hana meusidroe pi nyang na tinggai disinan." 10 Teukutok kheueh ureuëng nyang hana jipeubuet tugaih nyang geuyue lé TUHAN deungon biet-biet. Teukutok kheueh nyang hana jisuet peudeueng jijak cang musoh sampoe maté. 11 TUHAN meufeureuman, "Phon yoh ilée Moab udeb jih aman. Hántom lom jihnyan teuba u teumpat nyang teuböih. Jihnyan lagée ié anggô nyang teupeubiyeu jidu dan hántom teuleng lam teumpat anggô nyang laén. Anggô jihnyan mantong mangat bée dan mangat. 12 Teuma, trok watée jih Ulôn yue mangat Moab teu leng lagée ié anggô, dan teumpat-teumpat ié anggô nyan teupeusöh dan teupeu beukah. 13 Moab teuma keucewa ubak Kamos, dewa awaknyan, saban lagée ureuëng Israel keucewa ubak Betel nyang awaknyan peubangga nyan. 14 Pakriban ureuëng agam Moab jijeuet peugah, 'Kamoe pahlawan, tantra peukasa nyang ka lheueh teu-ujo lam mideuen prang?' 15 Moab dan banda-banda gobnyan ka teupeuhanco, dan awak-awak muda awaknyan nyang jroh-jroh ka jipoh maté. Ulôn ka Lôn peugah haba. Ulôn raja, TUHAN Nyang Mahakuasa. 16 Mala peutaka keu Moab ka trok bak babah pintoe, hana treb le gobnyan hanco. 17 He gata nanggroe-nanggroe teutangga Moab nyang tateupeue keuhai meusyeuhu gobnyan, meukabông kheueh keu gobnyan! Tapeugah laju, 'Moab hana le meukuasa, keubeusaran dan teunaga gobnyan ka leunyab!' 18 He peunduduek Dibon, tatron kheueh nibak teupat gata nyang teuhoreumat; taduek kheueh bak tanoh dan ateueh abée. Sabab nyang peurusak Moab nanggroe gata ka trok jiteuka, dan geupeuhanco banmandum kuta gata. 19 Gata nyang tinggai di Aroër, dong kheueh bak binéh rot dan kalon kheueh! Tanyong kheueh ubak awaknyan nyang jipeu plueng droe, dan kalheueh, 'Peu kheueh nyang ka teujadi?' 20 Awaknyan jijaweueb, 'Moab ka rhot dan ka jeuet keuhina, kareuna nyan peumo ba-e kheueh geuhnyan. Peumaklum laju ban sipanyang Krueng Arnon bahwa Moab ka hanco.' " 21 "Huköman ka geupeu rhot u ateueh banda-banda di daerah dataran manyang: ateueh Holon, Yahas, Mefaat, 22 Dibon, Nebo, Bet-Diblataim, 23 Kiryataim, Bet-Gamul, Bet-Meon, 24 Keriot dan Bozra. Bandum banda Moab, jiôh dan rab, ka geuhuköm. 25 Teunaga Moab ka geuwiet, dan keukuasaan jihnyan ka geupeuhanco. Ulôn, TUHAN, ka Lôn peugah haba." 26 TUHAN meufeureuman, "Jakpeumabök kheueh Moab nyan, sabab jihnyan jipeusombong droe keu Ulôn. Jihnyan meuguleng-guleng dalam muntah jih, dan jipeukém lé ureuëng ramé. 27 Bukon kheueh yoh masa ilée Israel ka jipeukém lé si Moab dan jipeugah keudeh keunoe siulah-ulah awaknyan ka teudrob basah meusigoe ngon pancuri-pancuri? 28 Gata peunduduek Moab, tatinggai kheueh laju banda-banda gata dan tajak duek kheueh bak bukét-bukét batée lagée cicém mirah pati jipeugot uempueng bak binéh-binéh reuleueng. 29 Gata sombong that! Ulôn Lôn deungoe padub na sombong, manyang até, cungkak, dan leuha that gata! 30 Ulôn, TUHAN, Lôn teupeue keu angkohan gata. Tutoe gata kosong beulaka, dan buet gata hana areuti. 31 Sabab nyan Ulôn Lôn mo ngon su meutaga keu gata banmandum dan keu ureuëng-ureuëng nyang na di Kir-Heres, ma banda gata. 32 Ulôn leubeh Ulôn peumo bak peunduduek Sibma nibak peunduduek Yaezer. Banda Sibma lagée seunaman anggô nyang pucôk-pucôk jih jimeu éue sampoe u meurandeh Laôt Maté seujiôh Yaezer. Teuma bak saát nyoe boh-boh musém khueng dan boh anggô jih ka geupeumusnah bube nyang na. 33 Su seumurak nyang meuhubo sabab geumbira ka hana le teudeungoe di nanggroe Moab nyang subô. Ulôn peujeuet ié anggô jipiôh ji ile di teumpat ureuëng prah anggô; hana le ureuëng nyang peugot anggô dan meusurak geumbira. 34 Ureuëng di Hesybon dan Eleale jimo meu ué-ué sampoe su mo jihnyan teudeungoe trok u Yahas, dan teudeungoe cit teuma lé ureuëng-ureuëng di Zoar trok bak Horonaim dan Eglat-Selisia. Awaknyan jimo sabab ié bak aneuk Krueng Nimrim pi ka habéh tho. 35 Ulôn Lôn peujeuet ureuëng Moab jipiôh ji tot keureubeuen nibak teumpat-teumpat awaknyan seumeumah dan Lôn peupiôh awaknyan jipeuseumah keureubeuen ubak dewa-dewa awaknyan. Ulôn, TUHAN, ka Lôn peugah haba. 36 Bandum keukayaan Kir-Heres dan bansaboh Moab ka leunyab. Ulôn seudeh that watée Lôn kalon keuadaan awaknyan; Ulôn lagée ureuëng yueb suleng deungon lagu nyang duka. 37 Awaknyan banmandum ka jicukô ôk bak ulée meunan cit deungon janggot jicukô teuma, jisie jaroe, dan jingui ija krong tanda seudeh. 38 Di ateueh banmandum pagu rumoh dan tanoh lapang nyang na teudeungoe su ureuëng mo ba-e. Sabab Moab ka Ulôn peubeukah lagée guci nyang hana teupeuguna le. 39 Moab ka teupeuhanco meukeupeng-keupeng! Padubna malée jih Moab! Jihnyan jimo sabab ka teupeuhina dan ka jeuet keu peuneukém lé bansa-bansa laén nyang na bansiseunlingka jih. Ulôn, TUHAN ka Lôn peugah haba." 40 TUHAN meufeureuman, "Lagée cicém kleung seumama sayeub meukeumang, lagée nyan kheueh na saboh bansa teuka jijak sama Moab. 41 Banda-banda dan kuta jihnyan jireupah dan sipa-i jih jiteuka teumakot lagée ureuëng inong keuneuk peulahé aneuëk. 42 Moab hanco dan hana le lagée hi saboh bansa, sabab awaknyan jipeusombong droe ateueh Ulôn. 43 Awaknyan jipeuhadab keu deungon teror, uruek dan taron. 44 Ureuëng nyang peuplueng droe nibak keunong timbak rhot u dalam uruek, dan nyang teubiet lam uruek nyan keunong drob lam taron. Bandum nyan teujadi bak saát nyang ka Ulôn peuteuntée keu teupeuhanco Moab. 45 Kawöm peungungsi nyang hana meudaya jijak mita peulindongan u Hesybon, teuma banda nyan teungoh tutong dan meuligoe Raja Sihon pih teungoh jilahiéb lé apui. Apui ka habéh jipajoh nibak bataih dan gunong-gunong Moab, nanggroe ureuëng-ureuëng nyang galak bak muprang. 46 Ceulaka kheueh Moab! Peunduduek jihnyan nyang jiseumah Dewa Kamos ka jipeubinasa, dan aneuëk-aneuëk awaknyan jiangkot sibagoe tawanan. 47 Teuma óh dudoe Ulôn kupeupuléh keuadaan nanggroe Moab. Ulôn, TUHAN, ka Lôn peugah haba!" Nyan kheueh nyang geupeubuet lé TUHAN ateueh Moab.

Nabi Yeremia 49

1 Nyoe kheueh feureuman TUHAN keuhai Amon, "Pakon tanoh sukée Gad jireupah jiduek lé ureuëng-ureuëng nyang seumah Dewa Milkom? Peu kheueh ka hana le ureuëng Israel nyang bila daerah nyan? 2 Teuma teuka saát jih Ulôn peujeuet peunduduek Raba, ma banda nanggroe Amon nyan, jideungoe su-su dumpék lam mideuen prang. Banda nyan jeuet keu rungka-rungka dan gampông-gampông nyang na bak-bak binéh nyan tutong sampoe habéh. Dan lé Israel laju jicok tanoh gobnyan nyang ka jireupah yoh masa dilée lé awaknyan. 3 Hei ureuëng Hesybon, gata mo kheueh sabab banda Ai ka habéh hanco! Hei ureuëng-ureuëng inong banda Raba, moba-e kheueh! Gata ngui kheueh ija krong sibagoe tanda gata seudeh. Gata plueng kheueh keudeh keunoe lagée ureuëng nyang ka peunoh deungon bingong. Milkom dewa gata nyan teuangkot ubak teumpat nyang teuböih meusigoe ngon imeum-imeum dan peujabat peumeurintah jih nyan! 4 Hei gata nyang hana seutia! Pakon gata peubangga droe deungon leumbah-leumbah gata nyang subô? Peue sabab jih gata peubangga ngon hareuta keukayaan gata? Pakriban mungken gata peugah bahwa hana meusidroe pi nyang jijeuet jak prang gata? 5 Ateueh gata Lôn peutron nyang keujam-keujam nyang teuka tieb-tieb sagoe, gata taplueng, maséng-maséng gata useuha peuseulamat droe keudroe, dan hana le nyang peusapat gata. 6 Teuma óh watée laén, keuadaan Amon Lôn peupuléh teuma. Ulôn, TUHAN, ka Lôn peugah haba." 7 Nyoe kheueh nyang geufeureuman lé TUHAN Nyang Mahakuasa keuhai Edom, "Peu kheueh ureuëng Edom nyan hana jeuet jiseumike nyang bijaksana? Peu kheueh ureuëng-ureuëng nyang bri naseuhat awaknyan hana jibri le naseuhat ubak awaknyan? Peu kheueh ka hana habéh teusampôh banmandum keubijaksanaan awaknyan! 8 Hei peunduduek Dedan, gisa dan plueng kheueh laju! Jak musöm laju. Ulôn Lôn peuhanco keuturonan Esau, sabab ka trok bak watée awaknyan Ulôn huköm. 9 Meunyoe ureuëng jijak pot boh anggô, sabe na nyang jitinggai, dan meunyoe ureuëng ceumucue jiteuka bak watée malam, jihnyan jicok peue nyang jigalak. 10 Teuma, Ulôn Lôn sampôh gleh banmandum nyang na nibak keuturonan Esau dan Ulôn peugah rahsia teumpat awaknyan musöm; Awaknyan ka hana jeuet le jipusöm droe. Ureuëng Edom meusajan ngon mandum syedara dan waréh lingka jih, banmandum nyan ka teupeubinasa, hana meusidroe pi nyang na tinggai. 11 Hei Edom! tinggai kheueh mandum aneuëk yatém gata ubak Ulôn, Ulôn kupeulara awaknyan. Bah kheueh mandum inong balée gata jipeucaya keu Ulôn. 12 Ureuëng nyang sibeuna jih hana patot teuhuköm pih, nyan pih keunong huköm, deungon na lagée nyan peu kheueh hana patot gata teuhuköm? Pasti gata teuhuköm! 13 Ulôn meusumpah deumi nan Ulôn keudroe bahwa banda Bozra jeuet keuteumpat nyang lumpah teumakot dan hana le ureuëng duek dan jitinggai lé gob. Teumpat nyan jipeukém lé gob laju jiboh nan teumpat nyan deungon nan jih sibagoe nan teukutôk. Banmandum gampông nyang na sikeulileng nyan jeuet keu rungka-rungka siumu masa. Ulôn, TUHAN ka Lôn peugah haba." 14 Ulôn, Yeremia lôn peugah, "Hei Edom, ulôn ka lôn teurimong saboh haba nibak TUHAN. Gobnyan ka geukirém utosan ubak bansa-bansa keu geuyue ubak awaknyan mangat jipeusapat sidadu jeuet siab-siab keuneuk jak prang gata. 15 TUHAN geupeujeuet gata leumoh dan hina lé gob. 16 Gata keunong peungéut lé sombong gata. Hana nyang teumakot keu gata lagée nyang gata sangka. Gata tinggai lam luengkiek-luengkiek batée, jiôh bak pucak gunong. Teuma bah kheueh nyan gata peugét rumoh bak pucak nyang paleng manyang, saban manyang lagée eumpueng cicém siwah. TUHAN geupeutron gata nibak teumpat nyan. TUHAN kheueh nyang peugah banmandum nyan." 17 TUHAN meufeureuman, "Bala peutaka nyang rhot ateueh Edom luwa biasa teumakot jih sampoe soe mantong ureuëng nyang jak rot nyan teukeujot dan teumakot. 18 Lagée Sodom dan Gomora geupeumusnah meusajan ngon gampông-gampông nyang na sikeulileng nyan, meunan cit deungon Edom. Hana meusidroe manusia pih nyang na tinggai disinan. Ulôn, TUHAN, ka Lôn peugah haba. 19 Lagée singa jiteubiet lam gle raya bak binéh Krueng Yordan dan jijak laju ubak padang naleueng teumpat bubiri teungoh meurot, meunan kheueh Ulôn teuka dan Lôn peujeuet ureuëng Edom jiplueng nibak nanggroe awaknyan keudroe ngon hana teusangka-sangka. Laju di Ulôn Lôn piléh sidroe peumimpén keu jimat keurajeuen ateueh bansa nyan. Soe kheueh nyang jeuet teupeusaban ngon Ulôn? soe kheueh nyang jijeuet mupeukara ngon Ulôn? Peu kheueh na peumimpén nyang hase jilawan Ulôn? 20 Sabab nyan, deungoe kheueh peue nyang ka Ulôn reuncana teuhadab ureuëng Edom, dan peue nyang keuneuk Ulôn peubuet teuhadab peunduduek banda Téman. Aneuëk-aneuëk awaknyan pi jitarék jiba, dan banmandum ureuëng teuka teumakot. 21 Meunyoe Edom ka rhot, teudeungoe su kiroh nyang lumpah gli dan teumakot sampoe bansigom donya teurasa meuguncang; su-su ureuëng klik ngon ureuëng teumawök nibak peunduduek nyang na disinan teudeungoe sampoe u Laôt Gelagah. 22 Lagée cicém siwah nyang jiseumama ngon sayeub jih nyang keumang meukeupak-keupak, meunan kheueh musoh teuka dan laju jisama Bozra. Bak uroe nyan sidadu Edom teuka teumakot lagée ureuëng inong keuneuk peulahé aneuëk." 23 Nyoe kheueh feureuman TUHAN keuhai Damsyik, "Peunduduek banda Hamat dan Arpad khawate ngon apoh apah sabab jideungoe haba brok nyan. Até awaknyan susah that meutampo-tampo lagée gulumbang di laôt raya. 24 Peunduduek Damsyik ka jeuet keuleumoh, dan laju jiplueng sabab teumakot. Awaknyan lumpah sakét dan meudeurita lagée ureuëng inong keuneuk peulahé aneuëk. 25 Banda nyang meusyeuhu dan sabe lam geumbira nyan saát nyoe ka jeuet keuseungue hana ureuëng duek. 26 Bak uroe nyan bubena peumuda awaknyan teuma maté bak rot-rot ueh raya lam banda awaknyan, dan banmandum sidadu awaknyan jipeuhanco. 27 Beuton-beuton Damsyik Ulôn tot, dan meuligoe-meuligoe Raja Benhadad Ulôn sampôh. Ulôn, TUHAN Nyang Mahakuasa, ka Lôn peugah haba." 28 Nyoe kheueh feureuman TUHAN keuhai sukée Kedar dan daerah-daerah keukuasaan Hazor, nyang ka jireubot lé Raja Nebukadnezar raja nanggroe Babel, "Hei Nebukadnezar, jak prang laju sukée Kedar dan gata peubinasa mandum ureuëng-ureuëng nyang na siblaih utimu! 29 Gata reupah mandum beulatang peulara awaknyan lagée bubiri, unta dan khimah-khimah awaknyan deungon bandum asoe jih nyang na lam khimah nyan, dan dumpék kheueh ateueh awaknyan, 'Yo jiteuka ateueh gata di jeub-jeub sagoe!' 30 Hei gata ureuëng Hazor! Ulôn, TUHAN, meufeureuman: Bubagaih kheueh tajak peu aséng droe, dan gata musöm. Nebukadnezar raja Babel ka jireuncana keuneuk jijak prang gata. Raja nyan jipeugah, 31 'Jak maju! Jak tajak prang ureuëng-ureuëng nyang meurasa aman dan teuntram nyan. Banda awaknyan hana teulindong sabab hana pintoe geureubang dan hana teuma meupalang.' " 32 TUHAN meufeureuman ubak Nebukadnezar, "Reupah laju mandum unta dan banmandum beulatang peulara awaknyan! Ureuëng-ureuëng nyang ôk jigunteng paneuk nyan Lôn peutabu beba saboh saho. Ulôn teuma Lôn peutron bala peutaka ateueh awaknyan nibak jeueb-jeueb sagoe. 33 Hazor teulanta siumu masa dan jeuet keuteumpat simusöm asée uteun. Hana meusidroepi nyang na tinggai bak teumpat nyan. Ulôn, TUHAN, ka Lôn peugah haba." 34 Hana treb óh ka lheueh Zedekia jeuet keu raja di nanggroe Yehuda, TUHAN Nyang Mahakuasa meufeureuman ubak ulôn keuhai nanggroe Elam. 35 TUHAN meufeureuman, "Ulôn Lôn peumaté banmandum ureuëng-ureuëng nyang carông timbak aneuk panah nyang peujeuet Elam teuga lumpah na. 36 Ulôn Lôn yueb angén ubak Elam nibak tieb-tieb jurusan, dan Ulôn peutabu beba peunduduek jih nyan ho-ho mantong sampoe hana meusaboh nanggroe pih nyang hana jiteuka lé ureuëng-ureuëng meungungse di nanggroe Elam nyan. 37 Ulôn Lôn peujeuet ureuëng Elam jitakot ubak musoh nyang keuneuk poh maté awaknyan. Ulôn that-that beungéh ubak awaknyan dan Lôn peuhanco awaknyan. Teuma Lôn kirém sidadu nyang peutaloe awaknyan dan awaknyan sampoe habéh hana tinggai. 38 Raja-raja dan peujabat-peujabat awaknyan Lôn peuhanco sapan sapa, dan bak nanggroe awaknyan Lôn peudong takhta Lôn. 39 Teuma óh dudoe, keuadaan Elam Lôn peupuléh teuma. Ulôn, TUHAN, ka Lôn peugah haba."

Nabi Yeremia 50

1 Nyoe kheueh peusan TUHAN ubak ulôn keuhai banda Babel dan peunduduek disinan, 2 "Pasang kheueh tanda dan peumaklum kheueh ubak bansa-bansa bahwa Babel ka rhot! Bék tasöm-söm hai nyan! Merodakh dewa awaknyan ka teupeuhanco, dan patong-patong nyang cabul ka beukah meusipreuk hán meuho saho, meunan cit deungon beurala-beurala awaknyan lumpah teuhina. 3 Na saboh bansa di utara teuka jijak prang Babel dan geupeu got nanggroe nyan jeuet keupadang pasi. Manusia dan beulatang jiplueng, dan hana le nyang jitem tinggai di teumpat nyan." 4 TUHAN meufeureuman, "Bak watée nyan ureuëng Israel dan Yehuda teuka meusajan-sajan sira jimo, jimita Ulôn, Allah awaknyan. 5 Awaknyan jitanyong rot jak u Sion, dan jijak kheueh laju u jurusan nyan. Awaknyan jipeugot peujanjian nyang abadi deungon Ulôn, dan teutab jimumat nibak janji nyan. 6 Umat Ulôn ibarat bubiri nyang ka jipeusisat lé ureuëng-ureuëng nyang rabe bubiri nyan di gunong-gunong. Awaknyan jimeurawoh di gunong nyang saboh ubak gunong nyang laén dan hana jituho le dipat rumoh jih keudroe. 7 Awaknyan jiprang dan jiseksa lé bandum nyang meurumpok deungon awaknyan. Musoh-musoh umat Lôn jipeugah, 'Peue nyang tanyoe peubuet, hana salah, sabab ureuëng-ureuëng nyan ka meudesya ubak TUHAN. Indatu awaknyan peucaya ubak TUHAN, Jadi nyang seuharôh jih awaknyan pih teutab seutia ubak Gobnyan.' 8 He umat Israel, taplueng kheueh nibak Babel! Gata kheueh phon-phon that harôh tajak, mangat nyang laén jeuet jiseutôt di likot. 9 Ulôn Lôn krah seujeumeulah bansa nyang teuga-teuga di utara mangat awaknyan jiprang Babel. Awaknyan teuma jiatoe baresan keu jimeuheungko jilawan Babel dan jipeutaloe awaknyan. Awaknyan na kheueh peumanah-peumanah ahli nyang panah awaknyan hántom na meusie. 10 Babel jireupah, dan di ureuëng reubot nyan jicok peue-peue nyang na ban galak até. Ulôn, TUHAN, ka Lôn peugah haba." 11 TUHAN meufeureuman, "He ureuëng Babel, gata tareupah umat Ulôn. Gata taglob-glob geumbira lagée guda nyang meuringkik, dan lagée leumô nyang teungoh rhot naleueng. 12 Teuma gata jeuet keu bansa nyang paleng hana meumakna di lamkawan bansa-bansa. Banda gata keudroe nyang raya nyan jihina dan jipeumalée. Nanggroe gata jeuet keu padang guron nyang tho kreng. 13 Sabab Ulôn beungéh, Babel jeuet keu puyeng-puyeng dan hana ureuëng nyang tinggai disinan. Bandum nyang jak rot nyan teukeujot dan gli. 14 He gata ureuëng-ureuëng peumanah! Atoe kheueh laju baresan gata mangat takeupong dan taprang Babel. Timbak kheueh bandum aneuk panah gata u arah Babel, sabab jihnyan ka meudesya ubak Ulôn. 15 Seumurak kheueh ngon dumpék prang ban sikeulileng banda nyan! Jinoenyoe Babel ka meunyeurah. Bintéh-bintéh beuton banda nyan ka teudobrak dan teureuloh. Ulôn teungoh Lôn tueng balaih ateueh Babel. Sabab nyan peusaneut kheueh awaknyan lagée jipeubuet ateueh ureuëng-ureuëng laén. 16 Bék tapeubiyeu ureuëng jiseumula atawa jimupot di nanggroe nyan. Banmandum ureuëng aséng nyang na tinggai di nanggroe nyan jiwoe u nanggroe jih, sabab awaknyan teumakot ubak tantra nyang jijak prang." 17 TUHAN meufeureuman, "Ureuëng Israel lagée kawan bubiri nyang jitiyeub dan jipeu crebre lé singa. Phon-phon that jiseurang lé raja Asyur, laju lé Nebukadnezar raja Babel nyang jikreh trok bak tuleueng-tuleueng jih. 18 Sabab nyan, Ulôn, TUHAN Nyang Mahakuasa, Po teu Allah Israel, Lôn huköm Raja Nebukadnezar dan nanggroe jihnyan saban lagée Lôn huköm raja Asyur. 19 Ulôn Lôn peuriwang ureuëng Israel u nanggroe awaknyan keudroe. Awaknyan teuma jipajoh nibak hase tanoh Gunong Karmel dan daerah Basan. Awaknyan teupeutro nibak hase tanoh di daerah Efraim dan Gilead. 20 Bak masanyan Israel dan Yehuda gleh nibak meubagoe desya, sabab Ulôn Lôn peuamphon ureuëng-ureuëng nyang ka Lôn peuseulamat. Ulôn, TUHAN, ka Lôn peugah haba." 21 TUHAN meufeureuman ubak saboh bansa di utara, "Prang kheueh laju peunduduek Merataim dan Pekod. Peumaté dan peubinasa laju awaknyan. Peubuet kheueh laju peurintah Ulôn. Ulôn, TUHAN, ka Lôn peugah haba." 22 Su ureuëng muprang get that subra lam nanggroe, dan teujadi kheueh keuhancoran nyang paleng raya. 23 Bansigom donya jipéh ngon palée lé Babel sampoe hanco, teuma bak saát nyoe palée nyan keudroe ka patah dua! Banmandum bansa teukeujot peue nyang ka jideungoe keuhai nanggroe nyan. 24 TUHAN meufeureuman, "He Babel, gata talawan Ulôn, sabab nyan gata meucaruéh lam taron nyang Ulôn teun keu gata, teuma gata hana tateupeue keuhai nyan. 25 Gudang sinjata Lôn ka lheueh Lôn peuhah, dan deungon beungéh laju Lôn peuteubiet bubena sinjata nyang na didalam nyan, sabab Ulôn TUHAN Nyang Mahamanyang dan Mahakuasa harôh Lôn peubuet tugaih di Babel. 26 Prang kheueh Babel rot jeueb-jeueb arah, dan dobrak kheueh bubena gudang-gudang gandom awaknyan! Tamon kheueh barang-barang teureupah nyan lagée gata tamon gandom! Dan museunah kheueh laju nanggroe nyan! Bék na nyang tinggai! 27 Poh kheueh banmandum sipa-i awaknyan! Peumaté kheueh awaknyan! Ceulaka kheueh bansa Babel! Ka trok watée jih awaknyan teuhuköm!" ( 28 Ureuëng nyang plueng u Yerusalem di Babel laju geucalitra pakriban TUHAN Po teu Allah geutanyoe geubalaih buet ureuëng Babel ateueh Baét TUHAN.) 29 TUHAN meufeureuman, "Tayue kheueh bak ureuëng mat aneuk panah jak jeuet jijak prang Babel. Krah kheueh laju tieb-tieb ureuëng nyang carông meumanah. Keupong kheueh banda nyan dan bék tapeubiyeu meusidroe pih jipeulheueh droe. Balah kheueh bandum nyang jipeubuet dan peusaneut kheueh ateueh jih nyan nyang sisuai deungon buet jih, sabab jihnyan ka meutindak kureueng aja keu Ulôn, Nyang Mahasuci, Po teu Allah Israel. 30 Bak uroenyan peumuda-peumuda awaknyan maté meugageueng bak rot-rot ueh lam banda droe jih, dan bandum sipa-i awaknyan teupeuhanco. Ulôn, TUHAN, ka Lôn peugah haba. 31 He Babel, gata keubit that manyang até! Sabab nyan Ulôn, TUHAN Nyang Mahamanyang, Po teu Allah Nyang Mahakuasa, Lôn lawan gata. Ka watée jih gata Ulôn huköm. 32 Bansa gata nyang manyang até nyan meugantoh dan reubah. Hana meusidroe pi nyang tulông gata keu tabeudôh. Banda-banda gata Ulôn tot, dan peue-peue mantong nyang na di sikeulileng nyan Lôn peuranab." 33 TUHAN Nyang Mahakuasa geupeugah, "Israel dan ureuëng Yehuda teuteugon. Bandum nyang teuen awaknyan jijaga rapat that dan hán jitem peulheueh. 34 Teuma Ulôn nyang peuseulamat awaknyan teuga, nan Ulôn TUHAN Nyang Mahakuasa. Ulôn keudroe kheueh nyang peujuang peukara awaknyan dan nyang ba damé u ateueh bumoe. Teuma ateueh ureuëng Babel Lôn peuteuka harôk hara dan teumakot nyang lumpah raya." 35 TUHAN meufeureuman, "Binasa kheueh Babel meusajan ngon rakyat dan peujabat peumeurintah meunan cit deungon kawöm ceureudek carông awaknyan! 36 Binasa kheueh Nabi-nabi Babel! Awaknyan meusulet dan bangai. Binasa kheueh sipa-i Babel nyang peurkasa! Padubna teumakot jih awaknyan! 37 Hanco kheueh guda dan geuritan prang awaknyan! Binasa kheueh sidadu-sidadu nyang jisiwa! Padubna leumoh jih awaknyan! Museunah kheueh keukayaan Babel! Jak geue laju bube na hareuta beunda awaknyan! 38 Peutho kheueh banmandum krueng dan blang awaknyan! Sabab Babel peunoh deungon beurala-beurala nyang lumpah teumakot, nyang peujeuet mandum nyang pujoe nyan sampoe pungoe. 39 Sabab nyan Babel jeuet keu teumpat jén-jén dan areuwah-areuwah jeuhet meunan cit deungon cicém-cicém unta. Keu siumu masa hana le ureuëng nyang jitem tinggai disinan. 40 Lagée nyang ka Ulôn peuhanco Sodom dan Gomora meunan cit deungon gampông-gampông nyang na si keulileng nyan, meunan cit teuma Ulôn peuhanco Babel. Hana meusidroe pih na nyang tinggai disinan. Ulôn, TUHAN, ka Lôn peugah haba. 41 Saboh bansa nyang teuga teungoh meugrak keunoe di nanggroe jiôh di utara. Awaknyan jijak meusajan deungon raja nyang ramé keu jijak muprang. 42 Awaknyan meusinjata panah dan kapak; awaknyan keujam hana rasa gaséh sayang. Lagée su ié laôt meu grum-grum umbak meunan kheueh su langkah guda awaknyan nyang teungoh meugrak maju jijak prang Babel. 43 Ban jideungoe haba nyan, raja Bebel laju hana meudaya. Jihnyan laju jiteugon lé peurasaan teumakot, dan meudeurita lagée ureuëng inong nyang keuneuk peulahé aneuëk. 44 Lagée singa teuka lam tamah raya nibak binéh Krueng Yordan dan jijak laju ubak padang teumpat bubiri teungoh rot naleueng, meunan kheueh Ulôn, TUHAN, teuka Lôn peujeuet ureuëng Babel jiplueng nibak banda awaknyan deungon hana teusangka-sangka. Laju Ulôn piléh sidroe ureuëng peumimpén nyang mat kuasa ateueh bansa nyan. Soe kheueh nyang jeuet teupeusa deungon Ulôn? Soe kheueh nyang jijeuet peugot peukara deungon Ulôn? Peu kheueh na peumimpén nyang hase jilawan Ulôn? 45 Sabab nyan, deungoe kheueh laju peue nyang ka Ulôn reuncana ateueh banda Babel, dan peue nyang keuneuk Ulôn peubuet keu peunduduek disinan. Aneuëk-aneuëk awaknyan pih jihila jiyue wéeh, dan bandum ureuëng teumakot luwa biasa. 46 Meunyoe Babel ka rhot, teudeungoe su nyang kiroh luwa biasa sampoe bansigom donya meuguncang; su-su ureuëng kliek nibak peunduduek disinan jideungoe lé bansa-bansa laén."

Nabi Yeremia 51

1 TUHAN meufeureuman, "Ulôn kukirém angén peureuloh nyang jipôt u arah Babel dan u arah peunduduek jihnyan. 2 Teuma Lôn kirém ureuëng-ureuëng aséng nyang peuhanco Babel lagée angén jipupôt kulet gandom. Bak uroe malapeutaka nyan awaknyan jiprang nanggroe nyan rot meubagoe arah dan laju jisampôh sampoe gleh. 3 Bék kheueh tabri keuseumpatan ubak sipa-i jitimbak aneuk panah jihnyan atawa jipeubangga bak peukayan prang nyang geungui nyan. Aneuëk-aneuëk muda awaknyan bék teupeubiyeu udeb. Peuhanco bandum bubena sipa-i jihnyan! 4 Awaknyan luka parah dan maté teutiek-tiek bak rot-rot ueh raya lam banda awaknyan keudroe. 5 Ulôn, TUHAN, Po teu Allah Nyang Mahakuasa, Allah Kudus Israel, hana Lôn tinggai Israel dan Yehuda, bahpi awaknyan ka meudesya ubak Ulôn. 6 Peuseulamat kheueh droe gata! Taplueng kheueh laju nibak Babel, bék sampoe gata röh teupeu maté lé sabab desya awaknyan! Sabab nyoe kheueh saát jih Ulôn balaih keujeuhetan Babel, dan Lôn huköm jihnyan nyang sisuai deungon buet nyang jipeubuet. 7 Babel yoh masa bunoe lagée glah méuh nyang Ulôn mat dan nyang peujeuet bansigom donya mabök. Bansa-bansa jijieb ié anggô lam glah nyan, sampoe awaknyan ka jeuet keupungoe. 8 Teuma ngon hana teusangka-sangka Babel ka rhot dan beukah. Peumo ba-e kheueh jih nyan, dan mita kheueh ubat keu luhok-luhok jih nyan! Mungken jih nyan jitem puléh. 9 Ureuëng aséng nyang na tinggai disinan jimariet sabe keudroe-droe, 'Tanyoe ka ta useuha ta tulông Babel, teuma teulat! Leubeh get ta tinggai nanggroe nyoe dan tawoe u nanggroe geutanyoe maséng-maséng. TUHAN ka geuhuköm Babel deungon kreueh that, dan geupeuhanco sapan sapa.' " 10 Umat TUHAN geupeugah, "TUHAN ka geutunyok bahwa geutanyoe na kheueh blah nyang beuna. Jak kheueh tajak u Yerusalem dan ta calitra disideh peue nyang ka geupeubuet lé TUHAN Po teu Allah geutanyoe." 11 TUHAN ka geuhasut raja-raja Media, sabab Gobnyan keuneuk peuhanco Babel. Nyan kheueh cara jih Gobnyan keuneuk geubalaih ureuëng-ureuëng nyang keuneuk reulôh rumoh Gobnyan. Lé peuwira-peuwira pasokan ngaza geubri peurintah, "Asah laju aneuk panah! Dan peusiab laju peurisai! 12 Bri kheueh tanda keuteuprang bintéh-bintéh beuton Babel. Peukong kheueh peunjagaan. Keubah laju peungawai. Peusiab laju peunyeurgapan." TUHAN ka geupeubuet peue nyang geureuncana keu ureuëng Babel. 13 Nanggroe nyan kaya lumpah na dan jai that krueng disinan, teuma masa udeb jih ka habéh; akhé udeb jih ka trok bak masa. 14 TUHAN Nyang Mahakuasa geumeusumpah deumi droe Gobnyan keudroe bahwa Gobnyan geukirém ureuëng sadub le jih deungon daruet keu teuprang Babel, dan awaknyan jiseumurak deungon surak keumeunangan. 15 TUHAN geucebta bumoe deungon kuasa Gobnyan, geupeugét donya deungon hikeumat Gobnyan, dan geubinteueng langét deungon akai budho Gobnyan. 16 Dan deungon geubri peurintah, dan ji ile kheueh ié nibak cakrawala. Di ujông-ujông bumoe geupeuteuka awan, dan geupeuteubiet kilat meuble-ble cahya nibak lam ujeuen, dan geukirém angén di teumpat teukeubah. 17 Ban jingieng nyang lagée nyan teuka kheueh sadar manusia, bahwa jihnyan ureuëng bangai nyang hana peungeurtian. Bube na ureuëng teumpeun méuh ka gadôh muka, sabab patong beurala nyang jipeugot nyan peuleusu dan hana meunyawöng. 18 Beurala-beurala nyan hana meuyuem, patôt ji ejek dan jihina teuma. Meunyoe ka trok watée jih, awaknyan binasa. 19 Allah Nabi Yakub hana lagée beurala-beurala nyan; Gobnyan nyang cebta peue-peue nyang na. Nan Gobnyan na kheueh TUHAN Nyang Mahakuasa; Gobnyan ka geupiléh Israel jeuet keu umat Geuh. 20 TUHAN meufeureuman, "Babel, gata lagée palée, sinjata Ulôn keu teujak lam prang. Gata Ulôn peuguna keu teuheuntam bansa-bansa dan keurajeuen-keurajeuen nanggroe. 21 Gata Lôn peuguna keu peuhanco guda dan nyang pasang guda nyan, meunan cit deungon geuritan dan nyang jeuet keu supe geuritan nyan, 22 Gata Lôn peuguna keu tapeumaté ureuëng agam dan ureuëng inong, meunan cit nyang tuha dan nyang muda, aneuëk dara dan aneuëk muda. 23 Gata Lôn peuguna keu tapoh maté ureuëng meurabe dan beulatang nyang jirabe nyan, peutani dan leumô ngon meu ué tanoh jih nyan, peunguasa dan peuwira-peuwira manyang." 24 TUHAN meufeureuman, "Tangieng kheueh keudroe pakriban jinoenyoe Ulôn balaih ubak Babel dan peunduduek jihnyan bandum keujeuhetan nyang awaknyan peubuet ateueh Yerusalem. 25 He Babel, gata lagée gunong nyang teupeuhanco bansigom donya. Teuma Ulôn, TUHAN, Lôn lawan gata. Gata Lôn tarek dan Lôn guleng dan Lôn peubiyeu tutong jeuet keu abée. 26 Hana meu sineuk batée pi nibak rungka-rungka reuloh gata nyan nyang teupeuguna keujeuet teupeudong lom teuma. Gata jeuet lagée padang pasi keu siumu masa. Ulôn, TUHAN, ka Lôn peugah haba." 27 "He raja di utara! Tabri kheueh tanda keu teujak prang! Tayueb laju beureuguih mangat bubena bansa jideungoe! Krah laju bubena bansa mangat jijak prang Babel! Tayue kheueh keurajeuen Ararat, Mini dan Askenas jijak prang. Baiát kheueh sidroe panglima keu jipimpén sureubu nyan. Krah kheueh laju guda nyang sadub le jih deungon kawan daruet. 28 Peusiab laju bubena bansa mangat jimaju u mideuen prang jak lawan Babel. Tawök laju raja-raja Media meusajan deungon peunguasa-peunguasa dan peumuka-peumuka awaknyan meunan cit deungon tantra nibak bandum nanggroe nyang awaknyan kuasa. 29 Bumoe meuyok-yok dan meuguncang sabab Ulôn teungoh Lôn reuncana keuneuk peujeuet Babel keu padang nyang tandus nyang hana jikeumiet lé manusia. 30 Sipa-i Babel ka jipiôh bak jimuprang dan tinggai bak kuta-kuta. Awaknyan ka gadôh beuhe jiteuka gusuen nyang hana meudaya. Bubena babah pintoe geureubang banda ka jipeujo, dan bubena rumoh ka habéh jitot. 31 Bubena utosan laju jiplueng meu ikôt-ikôt keu geujak peugah ubak raja Babel bahwa banda gobnyan ka jiprang rot jeueb-jeueb arah. 32 Teumpat jeumeurang ka jiduek lé musoh, dan kuta-kuta peutahanan ka habéh jitot. Sipa-i Babel ka habéh bingong. 33 Hana treb le awaknyan ka teupeutaloe dan ji gilo-gilo lé musoh lagée ji brôh-brôh ateueh gandom bak teumpat ceumeulo. Ulôn, TUHAN, Nyang Mahakuasa, Po teu Allah Israel, ka Lôn peugah haba." 34 Yerusalem jipeuhanco dan jipajoh habéh lé raja Babel; gobnyan jipeusöh banda nyan lagée jipeusöh kaca hana meuasoe. Lagée saboh beulatang raksasa, jihnyan jiuét Yerusalem dan jipasoe lam pruet jih deungon peue mantong nyang jroh nibak banda nyan, laju séueh jih jiböih jiôh. 35 He peunduduek Sion, peugah kheueh laju, "Seumoga Babel keunong keukeujaman lagée nyang ka jipeubuet ateueh geutanyoe!" Peunduduek Yerusalem, peugah kheueh laju, "Seumoga Babel jitimpa lé peundeuritaan lagée nyang ka keunong ateueh geutanyoe!" 36 Sabab nyan TUHAN geupeugah ubak peunduduek Yerusalem, "Ulôn kupeujuang peukara gata dan Lôn balaih buet-buet nyang ka jipeubuet lé musoh gata ateueh gata. Bubena mata-mata ié dan krueng-krueng di Babel Lôn peutô. 37 Nanggroe nyan jeuet keuteumpat sinamon rungka, teumpat jimusöm asée uteuen. Manusia meurasa gli watée ji kalon hai nyang lagée nyan, dan hana meusidroe pi nyang jitem tinggai nibak nanggroe nyan. 38 Ureuëng Babel jiteuma uem lagée su singa, dan jikeumaröm lagée aneuëk singa. 39 Nafeusu makheun awaknyan meutamah teuga, Ulôn ku peusiab peunajoh keu awaknyan, dan Lôn peujeuet awaknyan mabök dan mumang sampoe teuéh hana jibeudôh-beudôh le. 40 Awaknyan Ulôn ba keu teusie lagée aneuëk bubiri, kaméng dan bubiri agam. Ulôn, TUHAN, ka Lôn peugah haba." 41 TUHAN meufeureuman, "Babel nyang jipujoe bansigom donya ka teureubot dan ka jiduek! Keubiet that gli nanggroe nyan nibak bansa-bansa laén. 42 Ié laôt meulimbak ji-ék u Babel; geulumbang raya meu deungöng-deungöng jiheuntam nanggroe nyan. 43 Banda-banda nyang na di nanggroe nyan ka jeuet keu teumpat nyang leumpah gli ngon teumakot, lagée padang pasi nyang tho kreng han na sapeue. Hana ureuëng nyang jitem tinggai atawa jijak rot nyan. 44 Bel, dewa nanggroe Babel, Lôn huköm. Teuma Lôn peujeuet jihnyan jijok pulang peue nyang ka jicok. Bubena bansa hana jiseumah le ubak jih nyan. Bintéh-bintéh beuton Babel ka habéh reuloh. 45 Sabab nyan plueng kheueh di sinan, he umat Israel! Peuseulamat kheueh droe gata nibak beungéh Ulôn nyang teungoh ju. 46 Bék kheueh teumakot atawa gundah sabab nariet meusáh-sáh nyang gata deungoe. Tieb-tieb thon meutabu nariet nyang meubagoe rupa -- haba keuhai keukeujaman di dalam nanggroe dan keuhai raja-raja nyang jimuprang sidroe deungon nyang laén. 47 Peucaya kheueh, saát jih teuma teuka dan Lôn huköm beurala-beurala Babel. Bansaboh nanggroe nyan jihina, dan bandum peunduduek disinan teupoh maté. 48 Peue-peue mantong nyang na di langét dan di bumoe jiseumurak geumbira meunyoe Babel rhot lam jaroe bansa di utara nyang teuka keu jijak peuhanco jih nyan. 49 Lumpah that jai ureuëng bansigom donya ka maté teupoh sabab Babel, teuma jinoenyoe Babel rhot deumi ureuëng Israel nyang maté teupoh. Ulôn, TUHAN, ka Lôn peugah haba." 50 TUHAN meufeureuman ubak ureuëng Israel di Babel, "Gata ka teuhinda nibak keunong poh maté! Lé sababnyan, tajak kheueh jinoenyoe! Bék tapreh le! Bahpi gata jiôh nibak rumoh, ingat kheueh ubak Ulôn, TUHAN gata, dan keu Yerusalem. 51 Gata geupeugah, 'Kamoe jihina dan jipeumalée; kamoe ka gadôh muka sabab ureuëng-ureuëng aséng ka jiduek di tieb-tieb ruweueng suci dalam Baét TUHAN.' 52 Nyoe, simak kheueh peue-peue nyang Ulôn peugah nyoe. Teuma teuka saát jih Ulôn huköm beurala-beurala Babel. Bansaboh nanggroe nyan teudeungoe su ureuëng meuáh meuéuh sabab luhok ngon luka nyang lumpah parah. 53 Bahpi Babel hase ji ék u langét dan jipeugot kuta nyang hantrok teujak, Ulôn teutab Lôn kirém ureuëng jijak peurusak atranyan. Ulôn, TUHAN, ka Lôn peugah haba." 54 TUHAN meufeureuman, "Deungoe kheueh! Di Babel manusia jigeumeuciek dan jimoe seudeh sabab keuhancoran nyang teujadi di nanggroe nyan. 55 Ulôn teungoh Lôn peuhanco Babel dan Lôn peupiôh su-su nyang subra di teumpat ureuëng ramé awaknyan. Musoh teuka lagée geulumbang nyang meu ué-ué, dan sipa-i awaknyan laju jiseureubu deungon dumpék prang nyang meutaga. 56 Awaknyan teuka keu jijak reuloh Babel, jidrob bubena sipa-i dan jiwiet laju sinjata sipa-i nyang teudrob nyan. Ulôn kheueh TUHAN nyang huköm keujeuhetan, dan Babel Lôn balaih nyang sisuai deungon buet jih. 57 Ulôn kupeumabök bubena peujabat peumeurintah Babel -- bubena ureuëng patôt-patôt, peumimpén dan sipa-i. Awaknyan hana jibeudôh-beudôh le, teuéh siumu masa. Ulôn ka Lôn peugah haba, Ulôn kheueh raja, Ulôn TUHAN Nyang Mahakuasa. 58 Bintéh beuton Babel nyang kukôh-kukôh Lôn peuhanco sampoe ka jeuet rata deungon tanoh. Pintoe geureubang jihnyan nyang manyang-manyang Lôn tot habéh. Sia-sia mantong jeureh payah bansa-bansa, sabab bandum hase nyang jiuseuha habéh tutong jipajoh lé apui. Ulôn, TUHAN, Nyang Mahakuasa, ka Lôn peugah haba." 59 Peungawai pribadi Raja Zedekia na kheueh Seraya bin Neria cucoe Mahseya. Bak thon nyang keupeuet geumat keurajeuen lé Zedekia raja Yehuda, Seraya geuseutôt Zedekia u Babel. Teuma laju ulôn bri keu gobnyan saboh tugaih. 60 Bandum bala nyang rhot ateueh Babel dan hai-hai nyang laén nyang meukeunaan deungon nanggroe nyan ka ulôn tuléh dalam saboh kitab meugulong. 61 Laju ulôn peugah ubak Seraya, "Óh ka lheueh gata trok u Babel, tauseuha kheueh mangat bandum nyang na teutuléh dalam kitab nyoe hase tabeuet keu ureuëng-ureuëng nyang na disinan. 62 Óh lheueh nyan meudoá kheueh lagée nyoe, 'TUHAN, Droeneueh ka neupeugah bahwa banda nyoe neupeuhanco sampoe habéh bah kheueh nyan manusia meunan cit deungon beulatang ranab sapan sapa, dan teumpat nyoe jeuet keu padang pasi siumu masa.' 63 Óh ka lheueh gata beuet asoe kitab nyoe ubak ureuëng-ureuëng nyan, taikat kheueh laju batée nibak kitab nyoe, dan geulawa kheueh laju u teungoh-teungoh Krueng Efrat, 64 sira tapeugah, 'Meunoe kheueh teuma teujadi deungon Babel. Nanggroe nyoe karam dan hana meuampông le sabab bala nyang geupeu rhot lé TUHAN ateueh nanggroe nyan.' " tutoe haba Yeremia nyan sampoe óh nyoe.

Nabi Yeremia 52

1 Zedekia na umu dua ploh sa thon watée gobnyan jeuet keu raja Yehuda. Gobnyan geumat peurintah di Yerusalem siblaih thon treb jih. Ma gobnyan nan geuh Hamutal binti Yeremia asai banda Libna. 2 Saban cit lagée Raja Yoyakim, Raja Zedekia meudesya cit ubak TUHAN. 3 TUHAN beungéh that ubak peunduduek Yerusalem dan ureuëng Yehuda sampoe geu-use bandum awaknyan dan hana geulindong le awaknyan. Zedekia beurontak keu Nebukadnezar, raja Babel, 4 Lé sabab nyan Nebukadnezar deungon banmandum angkatan prang jih jijak prang Yerusalem bak tanggai siploh buleuen siploh bak thon nyang keusikureueng keurajeuen Zedekia. Awaknyan jipeudong kuta di luwa banda, jipeudong beuton teumpat keupong musoh 5 dan laju geukeupong banda nyan sampoe trok bak thon nyang keusiblaih keurajeuen Zedekia. 6 Bak tanggai sikureueng buleuen peuet bak thon nyan cit teuma, watée musém deuk ka meunan hebat sampoe rakyat hana le peunajoh bah meupacut pi, 7 beuton banda laju jiheuntam lé musoh. Malam nyan, bahpi ureuëng Babel teungoh jikeupong banda nyan, bandum tantra Yehuda ka habéh jiplueng jituju ubak Pantôn Yordan. Awaknyan jicok rot taman meuligoe, laju jiteubiet rot pintoe geureubang nyang meusambong deungon bandua beuton nyang na di teumpat nyan. 8 Teuma tantra Babel laju jicrok Raja Zedekia, dan jiteumé droe gobnyan nibak darat Yerikho. Bandum aneuëk buah gobnyan laju jiplueng jitinggai gobnyan. 9 Óh lheueh nyan Raja Zedekia laju jiba ubak Raja Nebukadnezar di banda Ribla di daerah Hamat, dan laju jipeurhot huköman maté. 10 Meunan cit nibak banda nyan teuma aneuëk-aneuëk gobnyan jipoh maté dikeue mata gobnyan, dan bandum peujabat peumeurintah Yehuda pih jipoh maté. 11 Óh lheueh nyan Zedekia laju jicungke mata jih, laju jibeuleunggu dan jiba u Babel. Disideh gobnyan jipeutamong u dalam glab, dan hántom na geuteubiet disinan sampoe gobnyan meuninggai donya. 12 Bak tanggai siploh buleuen limong thon nyang keu sikureueng blaih keurajeuen Raja Nebukadnezar raja Babel, teuka kheueh u Yerusalem sidroe ureuëng nyang nan geuh Nebuzaradan. Ureuëng nyan na kheueh peunaseuhat dan peungawai pribadi Nebukadnezar. 13 Nebuzaradan laju jitot Baét TUHAN, meuligoe raja, dan bandum rumoh ureuëng-ureuëng meusyeuhu di Yerusalem. 14 Dan banmandum aneuëk buah jihnyan jijak reuloh bubena beuton-beuton banda nyan. 15 Óh lheueh nyan rakyat nyang mantong na tinggai di banda nyan, na kheueh ureuëng peukeurja akhli nyang mantong na sidroe-droe teuk, ureuëng-ureuëng gasien, dan ureuëng-ureuëng nyang ka jiplueng u blah Babel, bandum nyan ji angkot u Babel lé Nebuzaradan. 16 Teuma siladum rakyat nyang paleng gasien nyang hana sapeue na, jitinggai di Yehuda, dan jiyue meubuet lampôh anggô dan nibak ladang-ladang. 17 Taméh-taméh peurunggu dan geuritan-geuritan di Baét TUHAN meunan cit deungon beujana peurunggu laju jipeubeukah lé ureuëng Babel, dan bandum peurunggu nyan jiangkot u nanggroe droe jih. 18 Meunan cit awaknyan jiangkot barang-barang nyoe: sudok-sudok, teumpat-teumpat abée miseubah, peukakaih-peukakaih panyöt, cambông-cambông teumpat teun darah beulatang nyang teusie keu keureubeuen, cambông-cambông teumpat tot keumeunyan, dan bandum barang peurunggu nyang laén nyang teupeuguna keu upacara iébadat. 19 Barang-barang méuh dan pirak, meunan cit deungon cambông-cambông ubit dan teumpat ngéue apui, cambông-cambông teumpat darah beulatang nyang teusie keu keureubeuen, teumpat abée, gaki panyöt, cambông-cambông keu teumpat keumeunyan, dan cambông-cambông teumpat leng ié anggô keu peuseumahan, bandum nyan jicok lé Nebuzaradan keudroe. 20 Barang-barang peurunggu nyang jipeugot lé Raja Nabi Sulaiman keu Baét TUHAN, na kheueh bandua boh taméh, geuritan-geuritan, beujana dan bandua blaih boh leumô nyang meutumpang bak beujana nyan, bandum nyan brat-brat that, sampoe hana teutimang le. 21 Bandua boh taméh peurunggu nyan saban: maséng-maséng manyang jih 8 metée, lingka jih 5,3 metée, dan bak teungoh jihnyan kosong. Teubai peurunggu nyan na 75 milimetée. Di ateueh tieb-tieb taméh nyan na ulée taméh nyang manyang jih 2,2 metée. Ban sikeulileng ulée-ulée taméh nyan na piasan boh geulima nyang teumanyum, bandum nyan teupeugot nibak peurunggu. 23 Boh geulima bak meunanyum di tieb-tieb ulée nyan na sireutoh boh, teuma nyang deuh di miyeub na kheueh sikureueng ploh nam boh. 24 Seulaén nibak nyan, Nebuzaradan jidrob teuma Teungku Imeum Agong Seraya, Zefanya, wakie gobnyan, lhée droe nyang jaga babah pintoe Baét TUHAN, 25 ban tujoh droe nyang bri naseuhat pribadi raja nyang mantong na dalam banda, panglima, wakie panglima nyang atoe administrasi sipa-i, dan nam ploh droe ureuëng rayeuk nyang laén. 26 Banmandum ureuëng nyan jiba ubak Raja Nebukadnezar di banda Ribla, 27 di wilayah Hamat. Di teumpat nyan awaknyan jiseksa dan laju jipoh maté. Meunan kheueh ureuëng-ureuëng Yehuda jiangkot nibak nanggroe awaknyan dan jiba u teumpat nyang teuböih; 28 banmandum nyan na 4.600 droe. Nebukadnezar jiangkot awaknyan lam ronde-ronde lagée teupeugah nyoe: 3.023 droe bak thon nyang keutujoh keurajeuen gobnyan, 832 droe di Yerusalem bak thon nyang keu lapan blaih keurajeuen gobnyan, dan 745 droe ji angkot lé Nebuzaradan bak thon nyang keudua ploh lhée jimat keurajeuen lé Nebukadnezar. 31 Bak tanggai dua ploh limong buleuen dua blaih bak thon nyang keu lhée ploh tujoh óh ka lheueh Yoyakhin teuangkot u teumpat nyang teuböih, Ewil-Merodakh jeuet keu raja Babel. Bak thon nyan cit teuma gobnyan jipeuleumah gaséh sayang jih ubak Yoyakhin, dan jipeulheueh gobnyan lam glab, 32 meunan cit jipeusaneut gobnyan deungon gét-gét. Yoyakhin jibri keududukan nyang leubeh manyang nibak raja-raja nyang laén nyang rhoh cit teuböih u Babel. 33 Gobnyan jibri idhin jigantoe peukayan nyang teusok lam glab deungon peukayan biasa dan keu siumu masa gobnyan jeuet geu makheun lam meuligoe, dan tieb-tieb uroe jijok péng keu keupeuntengan udeb gobnyan.

Peumo Ba-E 1

1 Padub na seungue Yerusalem nibak saát nyoe, banda nyang dilée ramé lumpah na. Yohmasa dilée jitée meugah keu meubagoe bansa, bak saát nyoe ka jeuet lagée inong balée. Yoh masa dilée banda nyang paleng teupujoe, jinoe ka teupeujeuet lagée namiet nyang hana meuguna. 2 Simalam suntok jimo ngon seudeh, ié mata jih rho meuleng-leng tijoh nibak mieng. Hana meusidroe pi nibak geunaséh jih nyang jitem peulalo. Gobnyan jikhianat lé rakan-rakan jih nyang ka teubalék jeuet keu lawan. 3 Peunduduek Yehuda jitinggai nanggroe jih, sabab jipeunamiet dan lumpah seungsara. Jinoe awaknyan tinggai lamkawan bansa-bansa hana meuteumpat nyang na teubri damé seujahteura. Musoh jikeupong awaknyan bak watée awaknyan meudeurita. 4 Bak uroe raya hana meusidroe pih nyang na teuka u Baét Allah. Dara-dara nyang meuca-e disinan ka meudeurita, dan Teungku-teungku Imeum ka apoh apah. Hana leumah ureuëng nibak babah-babah pintoe geureubang, banda di Sion ka peunoh deungon keuseudehan. 5 Musoh-musoh gobnyan ka meujaya sabab ka hase jikuasa gobnyan. TUHAN nyang peujeuet awaknyan meudeurita, sabab lumpah that le desya gobnyan. Peunduduek jihnyan ka habéh teuteun, dan teuangkot ubak teumpat nyang teuböih. 6 Keujayaan banda Yerusalem na kheueh kisah masa nyang ka treb. Bubena peumimpén disinan ka jeuet keuleumoh lagée rusa nyang ka deuk that. Awaknyan hana meudaya watée jitiyeub lé musoh. 7 Óh ka lheueh reuloh dan seungsara, Yerusalem teuingat masa nyang ka treb, watée mantong le hareuta; pakriban peunduduek rhot bak jaroe musoh, dan hana meusidroe pih nyang teuka jijak tulông. Lawan-lawan gobnyan jikém-kém mantong óh jikalon awaknyan ka reuloh. 8 Yerusalem ka jipeukuto droe jih keudroe deungon cara jipeubuet desya nyang le dan kutoe. Bandum nyang ilée jihoreumat gobnyan, jinoe jihina sabab teukalon jihnyan ka teulon. Gobnyan apoh apah, sabab ka gadôh ié muka. 9 Keuhai kutoe jihnyan deuh peungeuh teukalon teuma jihnyan hana jipakoe peue nyang teujadi ateueh droe jih keudroe. Keubit that hebat keuhancoran gobnyan, teuma hana meusidroe pih nyang jitem peumangat até gobnyan. Dan gobnyan geulakée gaséh sayang nibak TUHAN, sabab musoh-musoh gobnyan ka habéh meunang. 10 Bandum hareuta beunda gobnyan ka habéh jireupah lé dumna musoh. Gobnyan deungon seudeh geukalon awaknyan jitamong lam Baét Po teu Allah, buet nyang that geutam lé TUHAN keu ureuëng-ureuëng nyang bukon umat Gobnyan. 11 Deungon meususah payah peunduduek gobnyan jimita hareukat; barang nyang meuhái-meuhái yuem nibak awaknyan jituka deungon ruti, mangat awaknyan teutab udeb dan bék maté. Yerusalem jimeuhôi, "Ya TUHAN, neungieng kheueh ulôn, neukalon kheueh sigala peundeuritaan lôn." 12 "He ureuëng-ureuëng nyang teungoh jak bak rot ueh raya, kalon kheueh dan ngieng kheueh! Peu kheueh na seksa nyang raya jih ube nyang lôn deurita bak saát nyoe, seksa nyang ka geupeurhot lé TUHAN u ateueh ulôn, sabab beungéh Gobnyan nyang paleng raya nyan? 13 Di ateueh langét geupeutron apui nyang lumpah seu uém dan sampoe tutông lam baten lôn. Geupasang taron dikeue ulôn nyang jeuet keusabab ulôn reubah. Laju geupeubiyeu lôn disinan sidroe khong sampoe meudeurita siuroe suntok. 14 Geucok bandum desya ulôn, laju geuikat ka jeuet keusaboh, dan geugantung ubak takue lôn, dan geuhôn atranyan ka leumoh ulôn. TUHAN geujok ulôn ubak musoh; ulôn hana meudaya lôn lawan awaknyan. 15 TUHAN geuanggab hina bandum pahlawan lôn nyang beuhe ngon gagah. Geukrah banmandum sipa-i mangat bandum ureuëng muda lôn habéh binasa. Gobnyan geugilo-gilo bansa lôn sampoe hanco, lagée ureuëng nyang teungoh prah ié boh angggô. 16 Nyang kheueh sabab jih ié mata ulôn rô meutreb-treb, hana ureuëng nyang bri seumangat dan peumangat até. Bansa ulôn ka habéh gadôh peue-peue nyang na, sabab musoh leubeh meukuasa. 17 Ulôn beuôt jaroe lôn lakée tulông, teuma hana ureuëng nyang jitem peumangat até. Rot jeueb-jeueb sagoe TUHAN, geukirém musoh; awaknyan teuka jijak prang ulôn. Ulôn jipeusaban lagée brôh nyang hana meuguna, barang nyang paleng luwat di teungoh-teungoh awaknyan. 18 Teuma TUHAN kheueh nyang paleng beutôi, sabab peurintah Gobnyan ka ulôn iengkeue. Deungoe kheueh ulôn he bansa-bansa, kalon kheueh ulôn lam deurita. Bubena ureuëng muda dan aneuëk dara nanggroe lôn ka habéh jiteun, dan laju jiangkot ubak teumpat nyang teuböih. 19 Ulôn tawök bandum rakan-rakan nyang krab deungon ulôn teuma awaknyan jikhianat lôn. Bubena Teungku Imeum dan peumimpén bansa banmandum ka habéh maté bak rot-rot ueh banda. Bak watée jimita peunajoh keu jipeuteun nyawöng. 20 O, TUHAN! Neungieng kheueh ulôn, até ulôn gundah ngon karu, hanco sabab doraka ulôn yoh masa ilée. Bak rot-rot ueh raya na ureuëng jipoh maté, dalam rumoh na nyang maté. 21 O, TUHAN! Neudeungoe kheueh apoh apah lôn, hana ureuëng nyang jitem peumangat até lôn. Musoh-musoh ulôn galak ngon geumbira, sabab Droeneueh nyang peujeuet ulôn ceulaka. Neupeuteuka kheueh uroe nyang Droeneueh peujanji nyan; neupeujeuet kheueh awaknyan meudeurita saban lagée ulôn. 22 Neungieng kheueh bandum buet jeuhet awaknyan, dan neupeusaneut kheueh ateueh awaknyan lagée Droeneueh peusaneut ateueh ulôn, sabab bandum desya nyang ulôn peubuet ateueh Droeneueh. Ulôn áh éuh meurang-rang lam deurita, até ulôn seudeh dan meurana."

Peumo Ba-E 2

1 TUHAN geucok tendakan lam beungéh Gobnyan, Sion habéh geutôb deungon seupôt. Keuagongan Israel nyang manyang trok u langét, ka geugeulawa u ateueh bumoe. Bak saát TUHAN meureuka, baét Gobnyan di Sion pih hana geupakoe. 2 Tieb-tieb blang naleueng nyang na di nanggroe Yehuda, bandum geupeuhanco hana rasa wéueh. Lam beungéh Gobnyan laju geupeusak sampoe reuloh kuta-kuta nyang teulindong nanggroe nyan. Keurajeuen nyan meusajan deungon peumimpén ji geupeu rhot laju sampoe ka jeuet keuhina. 3 Lam beungéh Gobnyan nyang hu lagée apui nyan, teunaga Israel geupeupatah. Watée geutanyoe jiseurang lé lawan, Gobnyan hán geutem tulông. Lagée apui nyang hu meubura habéh jipeuranab peue-peue nyang na, meunan kheueh TUHAN beungéh keu bandum geutanyoe. 4 Lagée musoh, Gobnyan geulinteueng beude Geuh dan geupeukeu aneuk panah Gobnyan ateueh geutanyoe. Bandum ureuëng nyang jipeu galak até geutanyoe, habéh geupeumaté lé Gobnyan. Gobnyan geupeu hambo beungéh Geuh lagée apui hu u dalam banda Yerusalem nyoe. 5 TUHAN ka jeuet lagée musoh; Gobnyan geuseunuét Israel sampoe reuloh. Gobnyan geupeuhanco bubena kuta meunan cit deungon meuligoe, dan geupeujai seudeh ngon inseuh keu Yehuda. 6 Gobnyan geupeuhanco rumoh Geuh keudroe teumpat umat Geuh meusapat jak seumah Gobnyan. Gobnyan nyang peujeuet manusia tuwoe bak uroe Sabat dan uroe-uroe raya. Sabab TUHAN lumpah that beungéh, Teungku Imeum dan raja ka geutulak teuma. 7 TUHAN geutulak miseubah Gobnyan nyang paleng suci, dan geutinggai Baét Gobnyan keudroe; geupeubiyeu musoh jipeureuloh bubena bintéh beuton gobnyan. Bak teumpat geutanyoe ilée meuiébadat dan peugot khanuri, musoh seumurak sabab ka meujaya. 8 TUHAN ka geucok peunutôh bahwa bintéh-bintéh beuton Sion harôh teureuloh. Bintéh-bintéh beuton nyan ka geusipat, mangat banmandum hase teupeuhanco. Bintéh-bintéh beuton dan meunara-meunara, bak saát nyoe ka jeuet keu rungka banmandum. 9 Pintoe-pintoe geureubang ka meuseubée ngon tanoh, bandum palang-palang pintoe nyan ka habéh patah; raja dan peujabat peumeurintah bandum na di teumpat nyang teuböih. Huköm TUHAN ka hana jipeurunoe le; dan nabi hana le geuteurimong wahyu nibak TUHAN. 10 Bubena tuha-tuha peut nyang na didalam banda ka seungab keudroe sira geuduek didalam tanoh; awaknyan geutabu abée di ateueh ulée, dan geungui ija kröng tanda meuduka. Meunan cit di aneuëk-aneuëk dara jitukui ulée trok bak tanoh. 11 Mata ulôn keumong sabab ulôn mo nyang hana piôh, jiwa lôn meurana hán ék teukira. Até lôn hanco óh lôn ngieng keuhancoran bansa; lôn ngieng aneuëk miet dan aneuëk manyak habéh pansan bak rot-rot banda. 12 Deungon leumoh dan hék awaknyan jimo sira jilakée peunajoh dan ié jieb nibak ma jih. Lagée ureuëng nyang luka, awaknyan reubah meusumpom bak rot-rot ueh raya laju meuninggai lam pangkée ma teucinta. 13 O, Yerusalem, banda Sion nyang teucinta, rungka-rungka reuloh gata na be laôt raya. Peu kheueh nyang jeuet ulôn peugah keu ulôn bri peulalo até? Sabab, hántom na nyang meudeurita nyang sa lagée gata. Keubit that hana nyang hase peupuléh keuadaan gata. 14 Nyang geupeusampoe lé nabi-nabi keu gata, na kheueh seumeungéut dan sulet nyang hana teukira. Awaknyan hántom jipeugah keuhai desya gata, lé sabab nyan gata hántom meutobat. Sikeubit jih nyang jipeusampoe lé awaknyan ubak gata haba-haba nyang sulet nyang peumangat até. 15 Bandum ureuëng nyang jijak rot nyan jipeubeub gata, sabab gata ka hanco bube nyang na. Awaknyan jiasek-asek ulée sira jipeugah, "Nyan kheueh banda nyang paleng tari, banda keubanggaan donya?" 16 Bandum musoh gata jipandang bak muka gata deungon rasa banci, awaknyan jipeukém gata deungon deungon kém nyang meuhina. Awaknyan jipeugah, "Banda nyan ka kamoe peuhanco! Akhé jih trok cit saát jih nyang ka kamoe preh-preh!" 17 TUHAN ka geupeubuet ancaman Gobnyan nyang yoh masa ilée ka geureuncana dan geupeuingat ubak geutanyoe. Geutanyoe geupeuhanco ngon hana rasa inseuh, dan keu musoh geubri keumeunangan. Gobnyan geupeujeuet awaknyan galak that watée jingieng geutanyoe ka rhot. 18 He bintéh-bintéh beuton Yerusalem, teumawök kheueh ubak TUHAN! Rô kheueh ié mata lagée ié krueng nyang ile uroe ngon malam bék kheueh taiém-iém nibak tamo, sampoe badan gata jiteuka hék! 19 Beudôh kheueh meulang-ulang simalam suntok keu takliek tarô asoe até gata ubak TUHAN. Lakée kheueh mangat Gobnyan na rasa gaséh sayang keu aneuëk-aneuëk gata nyang teungoh deuk dan pansan bak tieb-tieb rot ueh nyang meukilok. 20 TUHAN, neungieng kheueh dan neupeurati kheueh ubak awaknyan nyang Droeneueh seksa nyan! Peu kheueh na nyang ka neupeulaku nyang lagée nyan? Ma jipajoh aneuëk droe jih nyang paleng jisayang, teungku imeum dan nabi ka jipoh lam Baét Droeneueh nyang suci. 21 Tuha muda ka habéh maté teugageueng ateueh rot raya, aneuëk muda ngon aneuëk dara ka habéh maté bak ujong peudeueng. Bak uroe Droeneueh beungéh nyan, laju neuköh takue awaknyan hana meurasa inseuh. 22 Droeneueh neu undang musoh-musoh nyang kamoe takot keu jipeugot khanuri nyang paleng keujam ban silingka kamoe. Awaknyan jipoh mandum nyang kamoe peulara dan nyang kamoe gaséh. Nibak uroe Droeneueh beungéh, hana meusidroe pih nyang hase jipeuplueng droe.

Peumo Ba-E 3

1 Ulôn kheueh ureuëng nyang ka lôn rasa udeb seungsara, sabab teuginton ngon beungéh Po teu Allah. 2 Maken jiôh ulôn teuhila u dalam seupôt nyang hana deuh sapeue. 3 Ulôn geupoh meuleuböb-leuböb hana geupiôh, hana rasa gaséh bansipanyang uroe. 4 Gobnyan geupeujeuet tuboh lôn ka habéh luka luhok-luhok, dan tuleueng-tuleueng ulôn ka habéh patah. 5 Gobnyan geupeupeunoh ulôn deungon duka dan deurita. 6 Ulôn geupaksa tinggai dalam seupôt lagée ureuëng nyang maté bak jamén ilée. 7 Deungon beuleunggu nyang kong laju geu ikat ulôn, sampoe ka hana le rot lôn teubiet. 8 Laju ulôn kliek lôn lakée tulông, teuma Po teu Allah hán geutem deungoe. 9 Gobnyan laju geulinteueng rot ulôn jak deungon beuton-beuton batée. 10 Lagée cagée meuluem Gobnyan geupreh lôn, lagée singa Gobnyan geulinteueng ulôn. 11 Geutiyeub ulôn sampoe meusimpang bak binéh jalan, laju ulôn geuteugöm ngon geupriek-priek geutinggai sinan. 12 Lom geureuntang busur Gobnyan, dan geupeujeuet ulôn teumpat timbak aneuk panah Gobnyan. 13 Aneuk panah Gobnyan ka beusöt nibak tuboh lôn sampoe trok teutôb nibak jantong lôn. 14 Si uroe seupôt ulôn jipeukém lé bandum ureuëng, dan geupeujeuet keubahan gob pansi haba. 15 Teuma nyang phet nyang geubri keu ulôn keu peunajoh dan nyang ulôn jieb. 16 Muka ulôn geupreu-preu ubak tanoh, dan gigo ulôn geu antôk ubak batée sampoe patah. 17 Ka treb that hántom lôn rasa udeb seujahteura; katuwoe ulôn pakriban udeb bahgia. 18 Nibak ulôn ka hana le meusyeuhu, Gadôh kheueh harapan ulôn ubak TUHAN. 19 Ulôn pike keuhai meurawöh dan keuhai nyang malang lagée lôn jieb ié tuba nyang lumpah that phet. 20 Hana putôh-putôh hai nyan ulôn pike, sampoe baten ulôn ka teuteugon hana meuguna. 21 Bahpi meunan harapan ulôn jibeudôh lom, watée lôn ingat hai nyoe: 22 Geunaséh TUHAN keukai abadi, rakhmat Gobnyan hántom na habéh, 23 sabe barô tieb-tieb beungoh keubit that TUHAN seutia lagoena! 24 TUHAN na kheueh hareuta ulôn hana nyang laén. Sabab nyan kheueh, ulôn meuharab ubak Gobnyan. 25 TUHAN gét that keu ureuëng nyang meuharab ubak Gobnyan, dan ubak ureuëng nyang mita Gobnyan. 26 Lé sababnyan, bah kheueh tanyoe preh deungon teunang sampoe TUHAN trok geujak bri peutulôngan; 27 bah kheueh tanyoe meurunoe jeuet keutabah bak watée geutanyoe mantong muda. 28 Watée TUHAN geubri peundeuritaan, bah kheueh geutanyoe taduek keudroe deungon seungab. 29 Bah kheueh geutanyoe ta peumiyueb droe dan meunyeurah, sabab mungken harapan mantong na. 30 Bahpi jitampa dan jirapa, bah kheueh banmandum nyan tanyoe teurimong. 31 Sabab, TUHAN hana geutulak geutanyoe siumu masa. 32 Óh ka lheueh Gobnyan geubri peundeuritaan, nibak gobnyan pih na gaséh sayang, sabab Gobnyan teutab geugaséh keu geutanyoe deungon geunaséh nyang hana bataih. 33 Gobnyan hana deungon rila até geupeubiyeu geutanyoe meudeurita dan seudeh. 34 Meunyoe jiwa geutanyoe teuteugon didalam glab, 35 Meunyoe geutanyoe gadôh hak nyang geubri lé TUHAN, 36 sabab keuadelan geuputa balék, pasti kheueh TUHAN geuteupeue dan geupeurati. 37 Meunyoe TUHAN hana geugalak keu sapeue-sapeue, pasti manusia hana hase jipeugét sapeue keu nyan. 38 Gét dan brok teutab jipeujak na kheueh ateueh peurintah TUHAN. 39 Pakon manusia harôh apoh apah meunyoe jihnyan teuhuköm sabab desya-desya jih keudroe? 40 Bah kheueh geutanyoe tatilek udeb geutanyoe, dan tawoe bak TUHAN Allah di dalam syeuruga. Jak kheueh geutanyoe ta peuhah até dan meudoá, 42 "Kamoe meudesya dan beurontak ubak Droeneueh, ya TUHAN, dan Droeneueh hán neubri keuamphonan. 43 Kamoe Droeneueh peulet Droeneueh poh maté, gaséh sayang ka teusöm lam beungéh Droeneueh. 44 Meureuka Droeneueh lagée awan nyang teubai that sampoe hana hase jilhob lé doá-doá kamoe. 45 Kamoe ka neupeujeuet lagée brôh nyang hana meuguna nibak mata bansigom donya. 46 Kamoe jihina lé bandum musoh dan jipeukém-peukém kamoe; 47 Kamoe ka keunong lé keuceulakaan dan keuhancoran, dan udeb lam bahya dan teumakot nyang hán teukira. 48 Ié mata lôn ji ile lagée ié krueng sabab bansa ulôn ka habéh hanco. 49 Ulôn teuma lôn mo hana piôh-piôh, 50 sampoe Droeneueh, ya TUHAN di syeuruga, neungieng kamoe. 51 Até ulôn ka jeuet keuseudeh kamoe ngieng naséb ureuëng inong di banda kamoe. 52 Lagée cicém, ulôn jitiyeub lé musoh nyang hana keudaléeh neubanci ulôn. 53 U dalam mon nyang tô kreng, awaknyan jitiek ulôn udeb-udeb laju jiseubée ulôn ngon aneuk batée. 54 Ié ji-ék sampoe trok bak ulée lôn, dan ulôn pike, -- 'Habéh kheueh riwayat lôn!' 55 Ya TUHAN, ulôn meulakée ubak Droeneueh, nibak tuwie mon nyang lhok nyan. 56 Ulôn meuharab nyang that-that bék kheueh neusumpai geulinyueng Droeneueh keu nyang ulôn lakée mangat Droeneueh neutulông ulôn. Dan doá ulôn Droeneueh deungoe, dan Droeneueh teuka neujak peutoe; Droeneueh neupeugah, 'Bék yo.' 58 Droeneueh teuka neupeujuang peukara ulôn, ya TUHAN, nyawöng ulôn ka Droeneueh peuseulamat. 59 Droeneueh neungieng buet nyang jeuhet nyang jipeubuet ateueh ulôn, reuncana jeuhet musoh nyang banci ulôn. Sabab nyan, ya TUHAN, neubila kheueh peukara ulôn. 61 Droeneueh, TUHAN, neudeungoe ulôn jihina; Droeneueh neuteupeue bandum reuncana awaknyan. 62 Awaknyan jipeubiyeu ulôn siuroe seupôt. keu jipeuceulaka ulôn, awaknyan jipeugét reuncana nyang kutoe. 63 Phon beungoh trok án malam, ulôn jipeujeuet keubarang nyang jipeukém. 64 Huköm kheueh awaknyan, nyang sisuai deungon buet jih, ya TUHAN. 65 Kutok kheueh awaknyan, dan neupeubiyeu kheueh awaknyan tinggai dalam keuadaan putôh asa. 66 Peulét kheueh dan peubinasa kheueh awaknyan banmandum sampoe awaknyan teusampôh habéh lam donya."

Peumo Ba-E 4

1 Méuh nyang hu muble-ble ka jeuet keu mala batée-batée Baét Allah ka meutabu bak rot ueh raya. 2 Yoh masa ilée peumuda remaja banda Sion lagée méuh nyang meuhái yuem, teuma bak saát nyoe ka jipeujeuet lagée beujana tanoh nyang hana hareuga. 3 Seudangkan, nang srigala jipeumom aneuëk-aneuëk jih teuma umat ulôn keujam that lagée cicém unta nyang lheueh di padang. 4 Aneuëk-aneuëk manyak nyang hana teubri mom, sampoe maté sabab ka glaih. Aneuëk-aneuëk manyak jilakée makheun, teuma hana ureuëng nyang jitem bri. 5 Awaknyan nyang ka lazém jimakheun peunajoh nyang mangat-mangat, dan udeb lam keumeuwahán, jinoe jimeuéue jijakmita peunajoh dalam sinamon blôh, dan maté deuk teugageueng bak rot-rot ueh raya. 6 Umat ulôn ka geuhuköm leubeh brat nibak peunduduek Sodom nyang lam sikréb mata hanco lé jaroe Po teu Allah deungon hana tindakan manusia. 7 Yoh masa ilée bubena peumimpén kamoe na kheueh gleh-gleh lagée gapeueh nyang putéh beureuseh. Awaknyan teugab dan teuga, seugar bugar dan seuhat-seuhat. 8 Teuma bak saát nyoe muka awaknyan leubeh itam nibak jeulaga habéh teugageueng bak rot ueh raya hana meusidroe manusia pih nyang na jituri. Kulét awaknyan ka habéh krot nibak tuleueng-tuleueng, lagée kayée nyang tô kreng hana meuguna. 9 Awaknyan seungsara dan maté bacut-bacut, sabab mubacut pih ka hana le peunajoh nyang teukeubah; nyang maté dimideuen prang, leubeh meu-untông nibak nyang maté sabab keunong deuk. 10 Keubit that yo teumakot ngon gli beuncana nyan nyang rhot ateueh umat lôn sampoe ma-ma nyang até geuh leumoh geureuboh aneuëk droe geuh keudroe mangat na meuasoe pruet. 11 TUHAN geupeuteuka beungéh Gobnyan dan geutot banda Sion sampoe rata deungon tanoh. 12 Di lamkawan raja-raja dan peunduduek donya hana meusidroe pih nyang peucaya bahwa pintoe-pintoe geureubang Yerusalem hase jitamong lé musoh dumna. 13 Teuma bandum nyan ka teujadi, sabab desya bubena teungku imeum dan nabi-nabi. Awaknyan ka jisintong darah, nibak ureuëng nyang hana meusalah. 14 Lagée ureuëng buta nyang meuwot-wot bak rot ueh raya meunan kheueh peumimpén-peumimpén banda Yerusalem. Peukayan awaknyan kutoe keunong darah sampoe hana meusidroe pih nyang tem jakmat awaknyan. 15 Ureuëng laén jipeugah, "Wéueh nibak teumpat nyoe! Gata najih, bék tamat kamoe!" Dan jijak kheueh awaknyan dan jimeurawoh bak saboh bansa bak bansa nyang laén, teuma hán jibri tinggai teutab lé soe mantong. 16 TUHAN hana le geupakoe umat Geuh keudroe; Gobnyan keudroe nyang peucrebre awaknyan dan geupeujeuet teungku-teungku imeum hana le jihareuga; dumna peumimpén hana le nyang gaséh. 17 Mata kamoe ka kamoe pandang, kamoe preh bantuan nyang hántom na teuka. Nyang kamoe harab peutulôngan saboh bansa, nyang seubeuna jih hana jeuet geubri sapeue. 18 Kamoe hana hase kamoe teubiet ubak rot raya, sabab sabe ji luem lé lawan. Seuneuleuh udeb kamoe karab sileumpah, sabab uroe-uroe udeb kamoe ka geunab. 19 Ureuëng-ureuëng nyang peucrok kamoe bagaih lumpah na jiôh leubeh bagaih nibak cicém siwah po. Awaknyan jitiyeub kamoe di gunong, dan jilinteueng kamoe di padang pasi. 20 Awaknyan jidrob raja nyang geupiléh lé TUHAN, ureuëng nyang kamoe peubangga sibagoe nyang geubri udeb, dan nyang peupayong teuhadab lawan. 21 He bansa Edom dan Us, takém laju, meugeumbira kheueh, teungoh mantong jeuet tapeugeumbira! Bala teuma teuka cit ateueh gata dan sabab ka mabök gata peulon droe keudroe gata. 22 Sion ka jipeubuet huköman ateueh jih nyan ateueh desya-desya nyang ka jipeubuet; jinoe kamoe hana geupeubiyeu lé TUHAN dan hana geuba le ubak teumpat nyang teuböih. Teuma gata, he Edom, geuhuköm lé TUHAN. Desya-desya gata teusalob bubena nyang na.

Peumo Ba-E 5

1 Ingat kheueh, ya TUHAN, peue nyang teujadi di ateueh kamoe, Neungieng kheueh kamoe nyang hina. 2 Hareuta waresan kamoe rhot lam jaroe ureuëng laén, rumoh-rumoh kamoe ka jiduek lé ureuëng aséng. 3 Ureuëng syiek kamoe ka jipoh lé musoh; saátnyoe ma kamoe ka jeuet keu inong balée, dan kamoe ka jeuet keu aneuëk piatu nyang hana le du. 4 Ié jieb dan kayée apui harôh kamoe bloe. 5 Lagée beulatang, kamoe jipaksa keureuja brat, kamoe hék, hana jibri watée keu meureuhat. 6 Kamoe jak geumadée u nanggroe Meusé, kamoe lakée peunajoh di Asyur. 7 Indatu kamoe ka meudesya, jinoe awaknyan ka hana le; teuma kamoe harôh meudeurita, sabab desya-desya awaknyan. 8 Kamoe jipeurintah lé ureuëng-ureuëng nyang hana leubeh nibak namiet; hana nyang meukuasa jipeulheuh kamoe nibak awaknyan. 9 Di luwa banda, ureuëng peumaté gob meuwot-wot ban saboh nyan; nyawöng kamoe teuancam watée kamoe teubiet jak mita peunajoh. 10 Kamoe meudeurita sabab ka deuk, seuhingga kulét kamoe seu uém lagée ngeue apui. 11 Ureuëng-ureuëng inong nyang na di Sion ka jipeukosa, aneuëk-aneuëk dara jinoda di gampông-gampông Yehuda. 12 Peumimpén-peumimpén kamoe jidrob dan jigantung, ureuëng-ureuëng tuha kamoe ka hana le jisanjong. 13 Ureuëng-ureuëng muda kamoe jipaksa jakmeubuet bak teumpat geumileng, aneuëk-aneuëk agam kamoe teuginton deungon geunulam kayée sampoe pansan. 14 Ureuëng tuha-tuha hana le meugumpôi bak babah pintoe geureubang banda, su musik hana le teudeungoe lamkawan ureuëng muda. 15 Kamoe ka gadôh keubahgiaan; tari ngon likak ka meu ubah jeuet meukabong nyang duka. 16 Keubanggaan kamoe ka hana le, kamoe ceulaka sabab ka meudesya. 17 Gunong Sion ka seungue dan ka jitinggai le gob; disinan asée uteuen meuraja lela. Sabab nyan até kamoe reumok dan hanco, laju kamoe mo ba-e sampoe mata keumalon kamoe ka jeuet keu sapu. 19 Teuma Droeneueh, ya TUHAN, teutab meukuasa, Droeneueh nyang mat peurintah siumu masa. 20 Ék kheueh patot neutinggai kamoe treb that-that? Peu kheueh mungken neutuwoe bak kamoe siumu masa? 21 Ya TUHAN, neuba kheueh kamoe meugisa ubak Droeneueh; kamoe meungwoe ubak Droeneueh! Neupeupuléh kheueh keuadaan kamoe lagée awaiphon. 22 Atawa ka neuböih kamoe hán neupeuduli le? Hana meubataih beungéh Droeneueh keu kamoe?

Yehezkiel 1

1 Bak tanggai nyang keu limong buleuen nyang keu peuet bak thon nyang keu lhée ploh, bak thon nyang keulimong seumeunjak Raja Yoyakhin jiba u teumpat nyang teuböih, ulôn, Teungku Imeum Yehezkiel bin Busi, na nibak binéh Krueng Kebar di Babel meusajan deungon ureuëng-ureuëng nyang teuböih nibak ureuëng Yahudi laén. Hana teusangka-sangka langét teuhah dan ulôn meuteumé lôn kalon keuhai Po teu Allah. Ulôn deungoe TUHAN meufeureuman ubak ulôn dan laju lôn rasa teuga that kuasa Gobnyan. 4 Ulôn tangah laju ulangét dan deuh ulôn kalon angén badée teungoh jipot nibak utara. Geulanteue jiseumama keudeuh keunoe nibak sinamon awan nyang paleng raya, dan langét nyang na nibak banéh nyan peungéuh meucahya. Dalam kilat nyang meuble-ble nyan leumah sapeue-sapeue nyang meukilat lagée peurunggu. 5 Di teungoh-teungoh awan nyan, deuh lôn kalon peuet boh kerub, na kheueh makhluk udeb nyang rab saban ngon manusia, 6 teuma maséng-maséng na peuet boh rupa dan dua boh pasang sayeueb. 7 Gaki jih teupat dan meukilat lagée peurunggu nyang teucane. Jaroe gaki jih meugukée lagée gukée banteng. 8 Seulaén peuet boh rupa dan dua pasang sayeueb nyan, awaknyan na teuma jaroe manusia dimiyueb tieb-tieb sayeueb. 9 Sijudoe sayeueb nibak tieb-tieb makhluk nyan meukeumang dan phon di ujong trok bak ujong sayeueb nyan tupéh teuma deungon sayeueb makhluk nyang laén, sampoe ban peuet boh makhluk nyan ka teubina sagoe peuet. Meunyoe meugrak, maséng-maséng makhluk nyan meugrak teupat ukeue sira jibalek tuboh jih. 10 Tieb-tieb makhluk nyan rupa jih meulaén-laén; nyang rupa jih lagée ureuëng na dikeue, rupa nyang lagée singa na blaih si uneuen, rupa lagée banteng blaih wie, dan waja raja wali si blaih u likot. 11 Sipasang sayeueb nibak tieb-tieb makhluk nyan teupeukeumang u ateueh sampoe tupéh ujong tieb-tieb sayeueb makhluk nyang laén nyang na disiblaih nyan, dan sipasang sayeueb teuk teulipat teutôb tuboh jih. 12 Maséng-maséng makhluk nyan meuhadab ubak peuet boh jurosan sigoe guih, sampoe awaknyan jeuet jijak homantong nyang jigalak deungon tuboh hana teuputa. 13 Bak teungoh makhluknyan na sapeue-sapeue nyang leumah jih lagée ngeue apui atawa suwa apui nyang hu meugrak-grak hana piôh. Apuinyan meu kléb-kléb dan jiteubiet meuek jeuet keu kilat geulanteue. 14 Makhluk-makhluk nyan keudroe meugrak-grak keudeh keunoe nyang bagaih jih lagée kilat. 15 Teungoh lôn kalon bandum nyan, ulôn ngieng teuma na peuet boh ruda di ateueh tanoh, saboh ruda nibak sampéng tieb-tieb makhluk nyan. 16 Ban peuet boh ruda nyan saban dan meukilat lagée batée peumata, dan maséng-maséng na saboh teuk ruda nyang laén nyang meulinteung di teungoh-teungoh nyan. 17 Deungon lagée nyan ruda-ruda nyan hase jituju bak peuet boh arah. 18 Keulileng-keulileng ruda nyan peunoh deungon mata. 19 Makhluk-makhluk nyan jijak homantong nyang jihawa, dan ruda-ruda nyan sabe jiseutôt, sabab jikuasa lé makhluk-makhluk nyan. Pajan mantong makhluk-makhluk nyan meugrak jiék u ateueh atawa jipiôh, ruda-ruda nyan sabe jiseutôt meusajan awaknyan. 22 Di ateueh tieb-tieb ulée makhluk nyan na teuma meubinteung sapeue-sapeue lagée kubah nyang teupeugét nibak kristal nyang hu meucahya. 23 Di miyueb kubah nyan tieb-tieb makhluknyan jireuntang teuma sipasang sayeueb jih u arah makhluk nyang na siblaih jih nyan, seudangkan sayeueb jih nyang sipasang teutôb tuboh jih. 24 Meunyoe makhluk nyan jipo, teudeungoe bak ulôn su sayeueb jih nyang meukeupak-keupak; su jih lagée su ié rhot, lagée su deurab langkah pasokan sipa-i nyang raya, lagée su Po teu Allah Nyang Mahakuasa. Meunyoe makhluknyan jipiôh bak jipo, laju jilipat sayeueb jih, 25 teuma di ateueh kubah nyang di ateueh ulée awaknyan, mantong teudeungoe su makhluk nyan. 26 Di ateueh kubah nyan na sapeue-sapeue nyang saban lagée takhta nibak batée nilam, dan di ateueh nyan na jiduek sapeue-peue nyang leumah jih lagée manusia. 27 Bagian ateueh nyan leumah jih meucahya lagée peurunggu di teungoh-teungoh apui hu. Bagian miyueb jih meucahya trang muble-ble, 28 dan meuwareuna warni lagée peulangi. Nyan kheueh trang meucahya nyang teutunyok ubak keuhaderan TUHAN.

Yehezkiel 2

1 Ban lôn kalon nyang lagée nyan, ulôn laju reubah meudugöm ateueh tanoh. Laju lôn deungoe su nyang geupeugah, "He manusia fana, beudôh kheueh. Ulôn keuneuk peugah haba deungon gata." 2 Watée su nyan ulôn deungoe, jitamong kheueh Roh Po teu Allah badan lôn, dan geupeudong ulôn. Óh lheueh nyan lôn deungoe lom su nyan geupeugah, 3 "He manusia fana, gata Lôn kirém ubak ureuëng-ureuëng Israel nyang beurontak jilawan Ulôn. Awaknyan beurontak lagée indatu awaknyan keudroe. 4 Awaknyan kreueh ulée dan hana jihoreumat Ulôn. Gata Ulôn kirém ubak awaknyan mangat tapeusampoe keu awaknyan peue-peue nyang Ulôn, TUHAN Allah Nyang Mahamanyang peugah keu awaknyan, 5 peue jitem deungoe lé awaknyan atawa hana; nyang peunteng, awaknyan harôh jiteupeue bahwa na nabi lamkawan awaknyan. 6 Teuma gata, he manusia fana, bék tatakot keu peumbeurontak nyan, atawa ubak peue mantong nyang jipeugah lé awaknyan. Awaknyan jilawan dan jihina gata, siulah-ulah gata udeb lamkawan kala meubisa. Bahpi meunan, bék teumakot. 7 Peutrok kheueh bandum peusan Ulôn nyoe ubak awaknyan, boh jitem deungoe lé awaknyan atawa hana. Ingat kheueh bahwa awaknyan na kheueh peumbeurontak-peumbeurontak. 8 He manusia fana, deungoe kheueh peue nyang Ulôn peugah ubak gata. Bék kheueh taseutôt peumbeurontak nyan. Peuhah kheueh babah gata dan pajoh kheueh peue nyang Ulôn bri ubak gata." 9 Óh lheueh nyan ulôn kalon jaroe nyang teusunyueng ubak ulôn. Dalam jaroe nyan na kitab meugulong, 10 nyang teutuléh nibak bandua binéh jih. Laju geupeuhah geunulong nyan dan disinan teutuléh ratapan, apoh apah dan rintihan.

Yehezkiel 3

1 Allah meufeureuman, "He manusia fana, pajoh kheueh kitab meugulong nyoe, óh lheueh nyan jak kheueh dan mariet kheueh ubak ureuëng-ureuëng Israel." 2 Laju ulôn peuhah babah lôn dan Po teu Allah laju geusuleueng kitab meugulong nyan lam babah lôn mangat lôn pajoh. 3 Kheun Gobnyan, "He manusia fana, pajoh kheueh! Pasoe kheueh pruet gata ngon kitab meugulong nyoe." Dan kitab nyan pi laju lôn pajoh rasa jih maméh lagée meulisan. 4 Po teu Allah meufeureuman lom, "He manusia fana, tajak kheueh laju ubak ureuëng-ureuëng Israel dan peusampoe kheueh peue mantong peusan Ulôn keu awaknyan. 5 Keu awaknyan kheueh gata Lôn kirém, dan bukon keu bansa nyang basa jih sulet, aséng dan hana muphom. Meunyoe kheueh gata Ulôn kirém ubak bansa nyang lagée nyan, awaknyan jideungoe tutoe haba gata. 7 Teuma bansa Israel hana jitem deungoe gata, bahpi Ulôn keudroe pih hana jipako. Awaknyan bandum kreueh-kreueh ulée dan galak bak meulawan. 8 Jinoenyoe gata Lôn peujeuet kreueh ulée dan gigéh lagée awaknyan cit teuma. 9 Gata Ulôn peujeuet kukôh lagée batée kareueng dan kreueh lagée intan. Bék kheueh tatakot ubak peumbeurontak nyan." 10 Lheuehnyan Po teu Allah geupeugah, "He manusia fana, ngieng kheueh beu gét-gét dan ingat kheueh peue nyang Ulôn peugah nyoe ubak gata. 11 Tajak kheueh ubak bansa gata nyang na tinggai di teumpat nyang teuböih nyan, dan peusampoe kheueh peue nyang Ulôn, TUHAN Nyang Mahamanyang peugah ubak awaknyan, peu kheueh jitem deungoe lé awaknyan atawa hana." 12 Laju Roh Allah geubeuôt ulôn dan dilikot ulôn teudeungoe su geumuroh nyang jipeugah, "Pujoe kheueh keumuliaan TUHAN di syeuruga!" 13 Lôn deungoe su sayeueb makhluk nyan saléng meuantok, dan su meukrab-krab ruda-ruda nyan nyang nyareng lagée su geumpa bumoe. 14 Keukuasaan TUHAN nyang peujeuet ulôn lumpah that hebat, dan bak watée ulôn geubeuôt lé Roh Gobnyan, até ulôn meurasa phet dan seu uem. 15 Dan trok kheueh ulôn ubak teumpat tinggai ureuëng nyang teuböih di Tel Abib nibak binéh Krueng Kebar. Na tujoh uroe treb jih ulôn tinggai disinan; ulôn teumanueng-manueng lé bandum nyang banmantong lôn deungoe dan lôn kalon nyan. 16 Óh ka lheueh tujoh uroe, TUHAN geupeugah ubak ulôn, 17 "He manusia fana, gata Ulôn angkat jeuet keu ureuëng kawai bansa Israel. Tapeusampoe kheueh ubak awaknyan haba peuingat nyang Ulôn bri nyoe. 18 Meunyoe Ulôn peugah bahwa sidroe peunjahat maté, teuma gata hana tapeuingat bak awaknyan mangat awaknyan jiubah pi-e jih sampoe jihnyan seulamat, teuma jihnyan maté mantong lagée ureuëng nyang meudesya, dan tanggong jaweueb ateueh maté jih nyan jitunggée nibak gata. 19 Meunyoe gata tapeuingat ureuëng jeuhet nyan dan ureuëng nyan hán jitem piôh jipeubuet jeuhet, jihnyan maté lagée ureuëng meudesya, teuma gata keudroe seulamat. 20 Meunyoe sidroe ureuëng nyang jroh jipeuphon peubuet desya, dan jihnyan Ulôn peuhadab deungon bahya, teuma jihnyan maté meunyoe gata hana tapeuingat jihnyan. Jihnyan maté sabab desya-desya jihnyan keudroe, dan buet-buet jih nyang jroh nyang ka jipeubuet hana Ulôn ingat. Teuma tanggong jaweueb ateueh maté ureuëng nyan Lôn tunggée nibak gata. 21 Meunyoe ureuëng nyang jroh nyan gata peuingat mangat bék jipeubuet desya, dan jihnyan jiturot naseuhat gata, teuma jihnyan hana Lôn huköm dan gata seulamat." 22 Ulôn rasa teuga that TUHAN teuka dan ulôn deungoe Gobnyan geupeugah ubak ulôn, "Beudôh kheueh dan jak kheueh laju u pantôn. Disinan Ulôn keuneuk peugah haba deungon gata." 23 Dan ulôn jak kheueh u pantôn, dan disinan deuh lôn kalon cahya meukilat tanda teuka TUHAN lagée nyang ka lheueh lôn kalon bak binéh Krueng Kebar. Laju ulôn reubah teudugöm di ateueh tanoh, 24 teuma Roh Po teu Allah geutamong dan geupeudong ulôn. TUHAN meufeureuman ubak ulôn, "Tawoe kheueh dan takurong droe gata didalam rumoh. 25 He manusia fana, gata ji-ikat ngon talo sampoe hana hase tateubiet dan hana jeuet meurumpok deungon gob. 26 Ulôn Lôn peujeuet lidah gata kalu sampoe gata hana hase tapeuingat bansa peumbeurontak nyoe. 27 Teuma, meunyoe Lôn meututoe deungon gata lom dan Lôn peuwirang mangat gata hase meutoe lom, gata harôh tapeusampoe peue nyang Ulôn, TUHAN Nyang Mahamanyang peugah ubak awaknyan. Siladum nibak awaknyan jideungoe, teuma siladum teuk hana, sabab awaknyan keubit bansa nyang beurontak."

Yehezkiel 4

1 Po teu Allah meufeureuman, "He manusia fana, tacok kheueh laju sineuk batée bata, keubah laju dikeue gata dan gareh laju ateueh batée nyan gamba banda Yerusalem. 2 Laju tagamba cara teukeupong banda nyan, deungon paret-paret, sinamon-sinamon tanoh, khimah-khimah dan alat-alat ngon pok bansikeulileng beuton nyan. 3 Tacok kheueh panci beuso dan anggab kheueh nyan sibagoe bintéh beuso; keubah kheueh panci nyan lamkawan gata dan banda Yerusalem. Óh lheueh nyan meuhadab kheueh ubak banda nyan siulah-ulah gata kheueh nyang keupong banda nyan. Nyan jeuet keulambang keu bansa Israel. 4 Óh lheueh nyan ta-éh kheueh meugeunireueng blaih siwie, dan Ulôn kupeurhot salah bansa Israel nyan ateueh gata. Na 390 uroe gata teuéh lagée nyan dan meudeurita seungsara sabab salah awaknyan. Siuroe gata teuéh lagée nyan teupeulambang sithon huköman bansa Israel. 6 Óh lheueh nyan, taéh kheueh meugeunireueng blaih uneuen dan tarasa kheueh huköman ateueh buet salah Yehuda peuet ploh uroe treb jih, si uroe teupeulambang sithon huköman awaknyan. 7 Pandang kheueh teukeupong Yerusalem. Geupai kheueh boh sineunju gata ateueh banda nyan dan peusampoe kheueh peusan Ulôn keuhai huköman ateueh awaknyan. 8 Gata Lôn ikat sampoe hana hase tabalek tuboh gata nibak wie u uneuen atawa seubalek jih sampoe teukeupong banda nyan seuleusoe. 9 Jinoenyoe, tacok kheueh gandom, jeulai, kacang mirah, kacang polong, sekoi dan gandom halôh. Jampu kheueh banmandum nyan dan peugét kheueh ruti. Nyan kheueh peunajoh gata nyang treb jih 390 uroe gata gata teuéh sihéuet u blaih wie nyan. 10 Ruti nyan harôh gata weuek beuade sampoe tieb-tieb uroe gata makheun 230 gram. Leubeh nibaknyan hana jeuet. 11 Meunan cit deungon ié jieb gata teubataih, nyang jeuet dua cangkie siuroe. 12 Tapeuhu kheueh apui deungon ék manusia keu kayée jih. Panggang kheueh ruti gata ateueh apui nyan dan tapajoh kheueh ruti nyan dikeue ureuëng ramé." 13 TUHAN meufeureuman, "Meunan kheueh cara jih ureuëng Israel singoh jipajoh peunajoh nyang geutam lé huköm Nabi Musa, bak watée awaknyan Ulôn böih u nanggroe-nanggroe aséng." 14 Teuma ulôn jaweueb, "Ya amphon, TUHAN Nyang Mahamanyang! Phon yoh ubit sampoe saát nyoe hántom lom lôn peukutoe droe deungon peunajoh bangke beulatang atawa séueh nyang jipajoh lé beulatang buih. Hántom lôn pajoh peunajoh nyang teuanggab hareuem." 15 Dan Po teu Allah meufeureuman, "Gét kheueh, sibagoe geunantoe ék manusia, gata jeuet tapajoh ék leumô keu ngon tot ruti gata." 16 Óh lheueh nyan Gobnyan meufeureuman lom, "He manusia fana, Ulôn kupeuhanco gudang teumpat keubah peunajoh di Yerusalem. Deungon gundah dan khawate manusia jibataih peunajoh nyang awaknyan pajoh dan ié nyang awaknyan jieb. 17 Awaknyan putôh asa sabab ka habéh peunajoh dan ié jieb, akhé jih awaknyan maté sabab desya-desya jih keudroe."

Yehezkiel 5

1 TUHAN meufeureuman, "He manusia fana, tacok kheueh peudeueng nyang tajam dan cukô kheueh beuhabéh janggot dan ôk gata ngon peudeueng nyan. Óh lheueh nyan jak timang kheueh ôk nyan nibak ceng dan taweuek kheueh mangat jeuet lhée boh bagi. 2 Siper lhée harôh gata tot di teungoh-teungoh banda nyan óh lheueh nyan akhéjih banda nyan gata keupong. Siper lhée teuk harôh gata tak ngon peudeueng gata sirang takeulileng banda nyan. Dan siper lhée nyang keuneulheueh harôh gata sipreuk u ateueh, laju Ulôn kutiyeub ngon peudeueng Lôn. 3 Tatinggai bacut ôk nyan dan tabungkôh lam ija lipat jubah gata. 4 Óh lheueh nyan tacok bacut nibak ôk nyan, tageulawa laju u dalam apui dan tapeubiyeu mantong ôk nyan hangöh. Nibak teumpat nyan apui jimeuéue bansaboh bansa Israel." 5 TUHAN Nyang Mahamanyang meufeureuman, "Kalon, nyoe kheueh Yerusalem. Banda nyoe Ulôn keubah bak pusat donya, deungon nanggroe-nanggroe laén ban sikeulileng nyan. 6 Teuma Yerusalem ka jitulak peurintah Ulôn dan teunyata leubeh jeuhet nibak bansa-bansa laén, dan leubeh hana taát nibak nanggroe-nanggroe nyang na di sikeulileng nyan. Yerusalem ka ji iengkeue peue-peue nyang Lôn peurintah dan hánjitem taát ubak huköm-huköm Lôn." 7 TUHAN Nyang Mahamanyang meufeureuman, "He Yerusalem, deungoe kheueh nyoe! Gata hana tataát peue-peue nyang Ulôn peurintah meunan cit ubak huköm-huköm Lôn; gata leubeh meubantah nibak bansa-bansa nyang laén nyang na di seukeulileng gata, dan ka gata seutôt adat istiadat bansa-bansa nyan. 8 Teuma Ulôn, TUHAN Nyang Mahamanyang, bak saát nyoe Ulôn peugah bahwa Ulôn na kheueh musoh gata. Gata Lôn huköm dikeue bansa-bansa laén. 9 Sabab bandum buet gata Lôn banci, peunduduek gata Lôn huköm nyang leubeh brat nyang gohlom na Lôn peubuet dan hana Lôn peubuet le. 10 Ureuëng syiek teuma jipajoh aneuëk jih keudroe dan si aneuëk jipajoh ureuëng syiek jihnyan. Meunan kheueh awaknyan Ulôn huköm, dan nyang mantong udeb Lôn peucrebre ubak meubagoe jurosan. 11 Ulôn na kheueh Allah nyang udeb, TUHAN Nyang Mahamanyang, dan nyoe kheueh tutoe haba Lôn: Sabab gata ka tapeukutoe Baét Ulôn deungon sigala buet gata nyang jeuhet dan luwat nyan, Ulôn Lôn peuhanco gata hana amphon. 12 Siper lhée nibak peunduduek gata maté keunong bala peunyakét dan beuncana musém deuk nyang meulanda banda. Siper lhée teuk teuheuntam deungon peudeueng di luwa banda, dan siper lhée teuk Lôn sipreuk u jeueb-jeueb sagoe dan Lôn tiyeub-tiyeub deungon peudeueng. 13 Gata tarasa pakriban hebat jih beungéh dan silab Ulôn sampoe Ulôn puih. Óh lheueh bandum nyan teujadi, gata yakén bahwa Ulôn, TUHAN, ka Lôn peugah haba ubak gata sabab Ulôn meureuka ateueh gata nyang hana seutia. 14 Gata jeuet keu rungka-rungka nyang hana meuguna dan bansa-bansa nyang na bansikeulileng gata ji hina gata; tieb-tieb ureuëng nyang jijak rot nyan jipeujiôh droe nibak gata. 15 Meunyoe Ulôn beungéh dan geungeuen keu gata dan Lôn huköm gata, bandum bansa nyang na di seukeulileng gata jirasa gli. Awaknyan jihina gata dan luwat óh jingieng gata. 16 Ulôn Lôn peuranab bubena peunajoh keuneubah nyang gata keubah dan Lôn peubiyeu peunduduek gata keunong deuk. Awaknyan jirasa pakriban sakét jih meunyoe deuk, lagée aneuk panah tajam nyang peureulong beusôt dan jipeubinasa gata. 17 Seulaén beuncana deuk nyan Lôn peutron teuma bala peunyakét, keukeujaman dan prang keu jipeumaté peunduduek gata, dan beulatang-beulatang juah mangat jipeumaté aneuëk-aneuëk awaknyan. Ulôn, TUHAN, ka Lôn peugah haba."

Yehezkiel 6

1 TUHAN meufeureuman ubak ulôn, "He manusia fana, pandang kheueh gunong-gunong Israel, dan peusampoe kheueh peusan Ulôn keuhai huköman keu awaknyan. 3 Yue kheueh bak awaknyan beujideungoe dan jisimak peue nyang Ulôn, TUHAN Nyang Mahamanyang peugah ubak gunong-gunong nyan, meunan cit ubak bukét-bukét, barieh-barieh dan pantôn-pantôn. Beutôi, Ulôn kirém peudeueng keu Lôn peuhanco teumpat-teumpat seumah beurala. 4 Miseubah-miseubah awaknyan teureuloh dan dupa-dupa awaknyan teupeubeukah. Bandum ureuëng nyang na disinan teupeumaté dikeue beurala jihnyan. 5 Ulôn kupeujeuet manyét-manyét ureuëng Israel meutabu beba; dan tuleueng-tuleueng awaknyan Lôn peuhambô dikeue miseubah nyan. 6 Bandum banda Israel teupeuhanco, bandum miseubah dan beurala awaknyan hanco meutabu beba, dupa-dupa awaknyan meutabu teueng bayeueng hán meuho saho dan peue-peue mantong nyang awaknyan peugét gadôh. 7 Dipat mantong na ureuëng nyang teupoh maté, dan awaknyan nyang mantong udeb jiteupeue bahwa Ulôn kheueh TUHAN. 8 Teuma bacut sagai lamkawan awaknyan nyang Lôn peuseuleuseh nibak mawöt dan awaknyan Lôn peusiseu sidroe saho lamkawan bansa-bansa; 9 disideh awaknyan udeb di teumpat nyang teuböih. Laju awaknyan teuingat ubak Ulôn dan muphom bahwa Ulôn ku huköm meunan cit Lôn hina awaknyan sabab até awaknyan hana seutia ubak Ulôn. Awaknyan ka jitinggai Ulôn dan jipiléh beurala sibagoe geunantoe Ulôn. Laju awaknyan luwat deungon droe jih keudroe sabab bandum keujeuhetan dan keukeujian nyang ka awaknyan peubuet. 10 Dan awaknyan jiteupeue bahwa Ulôn kheueh TUHAN dan bahwa bandum peuingat nyang Ulôn bri bukon ancaman-ancaman beulaka." 11 TUHAN Nyang Mahamanyang meufeureuman, "Beuseudeh kheueh! Meuba-e kheueh! Tamo kheueh beu meuwéueh-wéueh sabab bandum keujeuhetan dan keukeujian nyang ka jipeubuet lé bansa Israel. Awaknyan maté lé sabab prang, deuk dan bala peunyakét. 12 Awaknyan bandum jirasa beungéh nyang raya that nibak Ulôn. Ureuëng-ureuëng nyang jiôh di teumpat nyang teuböih rhot keusakét dan laju maté; nyang tô maté dimideuen prang, dan nyang tinggai maté sabab lé deuk. 13 Manyét-manyét awaknyan meutabu beuba lamkawan beurala nyang na bansikeulileng miseubah, teugageueng di tieb-tieb bukét nyang manyang, dan nibak pucak tieb-tieb gunong, di miyueb tieb-tieb bak kayée nyang rampak dan bak kayée nyang raya; éuet haba, dipat mantong awaknyan jitot keureubeuen keu beurala awaknyan. Dan somantong ureuëng jiteupeue bahwa Ulôn kheueh TUHAN. 14 Nyoe, Ulôn Lôn beuôt jaroe Ulôn dan Lôn peuhanco nanggroe awaknyan, sampoe ka jeuet keusungue nyang hana ureuëng, phon di Guron Seulatan trok ubak banda Ribla di utara. Nibak teumpat-teumpat jiduek lé ureuëng Israel, hana meusaboh pih nyang geupeuseulamat. Dan jiteupeue kheueh bandum ureuëng bahwa Ulôn kheueh TUHAN."

Yehezkiel 7

1 TUHAN meufeureuman ubak ulôn, 2 "He manusia fana, Ulôn, TUHAN Nyang Mahamanyang, keuneuk peugah haba nyoe keu tanoh Israel: Nyoe kheueh keuneulheuh riwayat keu nanggroe nyoe!" 3 TUHAN meufeureuman, "He Israel, jinoenyoe ka trok watée gata habéh umu. Gata tarasa meureuka Ulôn. Gata Ulôn adili sipadan ngon buet gata nyang kutoe. 4 Ulôn hana Lôn gaséh atawa Lôn bri amphon keu gata. Ulôn kuhuköm gata sipadan deungon bandum buet nyang keuji nyang ka gata peubuet. Dan tateupeue kheueh lé gata bahwa Ulôn kheueh TUHAN." 5 Nyoe kheueh nyang geupeugah lé TUHAN Nyang Mahamanyang ubak bansa Israel, "Bala deumi bala jiteuka ateueh gata. 6 Jinoenyoe bandum ka keuneulheuh. Nyoe kheueh keuneulheuh gata. Hana harapan le nibak gata. 7 Bandum ka page keu gata, he bansa nyang tinggai nibak tanoh nyoe. Jinoe hana le khanuri-khanuri bak miseubah-miseubah di gunong-gunong, nyang na na kheueh karu sabe nyang hana reuda. 8 Hana treb le gata tarasa meureuka Ulôn nyang paleng teumakot. Gata Ulôn adili sipadan ngon buet nyang gata peubuet. Teuma Lôn balaih ateueh gata mandum buet nyang kuto. 9 Ulôn hana Lôn gaséh atawa Lôn bri amphon ubak gata. Ulôn kuhuköm gata sipadan deungon buet nyang kuto nyang ka gata peubuet. Dan barô kheueh gata teupeue bahwa Ulôn kheueh TUHAN dan Ulôn kheueh nyang huköm gata." 10 Uroe kiamat keu bansa Israel ka trok jiteuka. Keujeuhetan meuraja lela. Keusombongan ka trok bak puncak jih. 11 Keukeujaman meuakibat jih leubeh le keujeuhetan. Bandum keukayaan, keuagongan dan keujayaan awaknyan habéh hana meubeukaih. 12 Watée jih reujang teuka, uroe jih ka tô lumpah na! Ureuëng nyang bloe dan ureuëng peubloe hana meuteumé laba le, sabab huköman Po teu Allah rhot ateueh bandum manusia. 13 Hana ureuëng meukat nyang bagaih meurumpok lom peue nyang ka jipeubloe, sabab meureuka Po teu Allah rhot ateueh soemantong. Ureuëng nyang jeuhet hana seulamat. 14 Beureuguih jimeusu dan bandum ureuëng ka siab-siab. Teuma hana meusidroe pih nyang na jak u mideuen prang, sabab meureuka Po teu Allah rhot ateueh bandum manusia. 15 Bak rot-rot ueh raya lam banda na muprang, di rumoh-rumoh na bala peunyakét dan musém deuk. Soemantong nyang na di luwa banda maté di mideuen prang, dan nyang tinggai lam banda keunong peunyakét dan deuk. 16 Siladum teupeusie nibak mawöt dan jipeuplueng droe u gunong-gunong. Disinan awaknyan jeuet lagée cicém leuek nyang teuparôh di pantôn-pantôn; bandum meurang-rang sabab desya-desya awaknyan keudroe. 17 Somantong ureuëng leumoh jaroe dan guyah teuôt. 18 Awaknyan jingui ija krông dan bansaboh tuboh jih yo meugám-gám. Ulée awaknyan teucukoe ôk dan awaknyan teupeumalée. 19 Méuh dan pirak awaknyan böih bak rot raya lagée geutiek bröh, sabab bak uroe TUHAN teuka beungéh nyang luwa biasa nyan, méuh dan pirak nyan hana hase jipeuseulamat awaknyan, teuma ka jijeurumus awaknyan u dalam desya. Awaknyan hana hase jipeuguna nyan keu jipeupuih nafeusu atawa keu jipeutroe pruet awaknyan keudroe. 20 Yoh masa ilée awaknyan bangga deungon peumata nyang ceudah, teuma sabab awaknyan jipeuguna keu jipeugét beurala-beurala nyang lumpah luwatnyan, laju TUHAN geupeujeuet hareuta awaknyan keu sapeue-sapeue nyang lumah teumakot ngon gli. 21 TUHAN meufeureuman ubak bansa Israel, "Ulôn Lôn peubiyeu ureuëng-ureuëng aséng jijak reupah hareuta gata. Ureuëng-ureuëng jeuhet jireubot atra gata dan jipeukuto gata. 22 Ulôn hana Lôn tulông meunyoe Baét Ulôn jipeurusak dan jipeukuto lé peurampok-peurampok. 23 Bansaboh nanggroe ka jeuet keukaru ka-ák ka-ôk; dipat mantong na ureuëng teupoh maté dan keukeujaman. 24 Bansa-bansa nyang paleng juah Lôn peuteuka keu jijak duek bak rumoh-rumoh gata. Ureuëng-ureuëng nyang gata anggab hebat nyang paleng peukasa yo watée bansa-bansa nyan Ulôn peubiyeu jipeuhanco teumpat-teumpat iébadat gata. 25 Awaknyan keunong lé keuseudehan dan putôh asa, laju jimita keudaméan, teuma hana jiteumé. 26 Mala peutaka dan haba brok hana putôh-putôh teuka u ateueh awaknyan. Gata meudoá mangat bubena Nabi geutem ngieng kutika, teuma awaknyan hana hase. Meunan cit bubena teungku imeum hana kuasa peue nyang harôh geupeurunoe keu umat, dan dumna peumimpén ka habéh naseuhat. 27 Raja meuba-e, putra mahkota putôh asa dan rakyat yo sabab teumakot. Ulôn Lôn huköm gata nyang sisuai deungon peue nyang ka gata peubuet dan Lôn peusidang gata lagée gata nyang ka tapeusidang ureuëng laén. Dan barô kheueh gata teupeue bahwa Ulôn nyoe na kheueh TUHAN."

Yehezkiel 8

1 Bak tanggai limong buleuen nam bak thon nyang keunam kamoe jiböih u teumpat laén, peumimpén-peumimpén ureuëng nyang teuböih Yehuda nyan jijak u rumoh lôn dan jiduek-duek meusajan ngon ulôn. Ngon hana teusangka-sangka keukuasaan TUHAN Nyang Mahamanyang ka geukuasa bansaboh badan lôn. 2 Laju ulôn tangah dan deuh laju ulôn ngieng na nyang saban lagée manusia. Phon bak keuieng jih sampoe u miyueb deuh jih lagée apui, dan nibak keuieng u ateueh deuh jih lagée meukiwieng-kiwieng lagée peurunggu nyang teuasah. 3 Gobnyan laju geu sunyueng sapeue-peue nyang saban lagée jaroe, laju jihila ôk ulôn. Óh lheueh nyan lam deuh lôn kalon nyan, ulôn laju jibeuôt manyang-manyang u ateueh manyang lé Roh Allah dan laju jiba u Baét TUHAN di Yerusalem, bak babah pintoe tamong seuramoe dalam nyang na di siblaih utara. Nibak teumpat nyan na meuteumé patong beurala nyang jipeuteuka meureuka Po teu Allah. 4 Dan leumah laju ulôn ngieng trang bandrang nyang muble-ble cahya sibagoe tanda TUHAN Allah Israel ka geuteuka, saban lagée nyang ulôn ngieng watée ulôn na bak binéh Krueng Kebar. 5 Po teu Allah meufeureuman ubak ulôn, "Hei manusia fana, pandang kheueh u arah utara." Ulôn seutôt, blaih miseubah bak binéh rot tamong, deuh laju ulôn kalon beurala nyang teupeusabab Po teu Allah beungéh lagoe na. 6 Allah meufeureuman ubak ulôn, "Hei manusia fana, gata ngieng kheueh peue nyang teungoh teujadi? Gata ngieng kheueh laju pakriban buet-buet nyang luwat nyang ka jipeubuet lé ureuëng Israel, nyang peujiôh Ulôn nibak Baét Lôn! Jak keunoe, Ulôn tunyok ubak gata hai-hai nyang leubeh kuto lom." 7 Óh lheueh nyan laju geuba ulôn ubak babah pintoe tamong leuen bagian keue dan laju geupeuleumah saboh ruhuéng bak beuton nyan. 8 Kheun Gobnyan, "Hei manusia fana, peurayeuk kheueh ruhuéng nyoe." Óh ka lheueh ulôn peubuet, laju deuh lôn ngiéng saboh pintoe. 9 Kheun Gobnyan ubak ulôn, "Tamong kheueh dan kalon kheueh buet-buet nyang kutoe dan luwat lumpah na nyang jipeubuet lé awaknyan bak teumpat nyan." 10 Ulôn pih lôn tamong dan laju lôn ngiéng. Bintéh-bintéh kama nyan peunoh teu uke ngon mubagoe rupa ukeran uleue dan beulatang-beulatang hareuem nyang laén, meunan cit mubagoe ukeran beurala nyang jipujoe lé ureuëng-ureuëng Israel. 11 Na tujoh ploh droe peumimpén bansa Israel nyang na disinan, jitamong cit keunan Yaazanya bin Safan. Maséng-maséng awaknyan jimat saboh dupa keumeunyan nyang meuasab. 12 Allah meufeureuman ubak ulôn, "Hei manusia fana, gata kalon peue nyang jipeubuet lé peumimpén-peumimpén Israel deungon cara seungab-seungab? Awaknyan jimeu iébadat lam kama nyang peunoh beurala deungon alasan bahwa Ulôn ka Lôn tinggai nanggroe nyoe dan hana Lôn kalon peue nyang jipeubuet nyan." 13 Laju TUHAN geutanyong ubak ulôn, "Gata takalon buet nyang jipeubuet lé awaknyan leubeh luwat nibak nyang ka." 14 Teuma laju geuba ulôn ubak babah pintoe geureubang Baét TUHAN dan geupeuleumah laju ubak ulôn ureuëng-ureuëng inong nyang teungoh jipeumo ba-e Dewa Tamus nyang ka maté. 15 TUHAN meufeureuman ubak ulôn, "Hei manusia fana, peu kheueh na gata ngieng hai nyan? Mantong jai that-that hai-hai nyang luwat lumpah na." 16 Laju geuba ulôn ubak seuramoe Baét TUHAN. Bak binéh pintoe rot tamong lam ruweueng suci, lamkawan miseubah dan jurong, na dua ploh limong droe. Awaknyan jipeulikot ruweueng suci, dan laju jisujut u arah timu jiseumah mata uroe teubiet. 17 TUHAN meufeureuman ubak ulôn, "Hei manusia fana, peu kheueh gata ngieng nyan? Ureuëng-ureuëng Yehuda nyoe hana puih meunyoe jipeubuet hai-hai nyang luwat nyan dan jipeubuet lom hai-hai nyang hana meuprikeumanusiaan bansaboh nanggroe. Awaknyan pih hana yo sapeue jipeubuet hai nyang lagée nyan bak teumpat nyoe, lam rumoh Ulôn nyang jipeujeuet Ulôn meutamah beungéh ubak jihnyan. Ngieng kheueh pakriban awaknyan jihina Ulôn ngon cara nyang paleng jeuhet! 18 Awaknyan jiteumeurasa pakriban sakét keunong meureuka Ulôn nyang brat! Ulôn hana kupeumeuáh dan Lôn peu amphon awaknyan. Bahpi awaknyan jimeudoá ngon cara jidumpék dan su nyang kreueh dan teuga ubak Ulôn, teuma di Ulôn teutab hana Lôn deungoe doa awaknyan!"

Yehezkiel 9

1 Óh lheueh nyan ulôn deungoe teuma Po teu Allah geumeuhôi, "Tajak kheueh keunoe he ureuëng-ureuëng nyang peujak huköman Lôn ateueh banda nyoe. Taba kheueh sinjata-sinjata gata." 2 Deungon meusigoe that teuka keunan nam droe ureuëng rot luwa geureubang Utara Baét TUHAN, maséng-maséng awaknyan jiba sinjata. Meusajan ngon awaknyan na ureuëng nyang jisôk peukayan ija lineun bak jaroe jih na jiba sajan alat teumuléh. Awaknyan jitamong dan jidong bak binéh miseubah peurunggu. 3 Laju cahya muble-ble nyang meutanda keuhaderan Allah Israel, jiteubiet cahya lam kerub-kerub, laju jiminah nibak teumpat jih nyang phon ubak babah pintoe tamong Baét TUHAN. Dan TUHAN laju geutawök ureuëng nyang meupeukayan ija lineun nyan sira geupeugah, 4 "Tajak laju ubak jeueb-jeueb sagoe banda dan taboh kheueh tanda nibak keuneng soe mantong ureuëng nyang meurasa seudeh dan susah sabab bandum buet nyang lumpah luwat nyang jipeubuet nibak banda nyan." 5 Ulôn deungoe Po teu Allah meufeureuman ubak ureuëng-ureuëng nyang laén, "Seutôt kheueh gobnyan ho-ho nyang geujak bansaboh sagoe banda dan peumaté kheueh bubena ureuëng ngon hana amphon. 6 Peumaté kheueh bandum ureuëng agam dan ureuëng inong, tuha dan muda, ureuëng tuha dan aneuëk manyak. Teuma bék tacukéeh meusidroe pih nyang na tanda bak keuneng. Phon disinoe, nibak Baét Ulôn nyoe." Dan awaknyan laju jipeuphon tugaih jih keudroe deungon cara jipoh maté bandum peumimpén Israel nyang teungoh jidong di Baét TUHAN. 7 Po teu Allah geupeugah ubak awaknyan, "Peukuto kheueh Baét Ulôn nyoe! Peupeunoh kheueh bandum leuen Baét nyan deungon manyét-manyét manusia. Peuphon kheueh laju!" Dan awaknyan laju jijak poh maté ureuëng-ureuëng nyang na didalam banda. 8 Watée teupoh maté ureuëng-ureuëng lam banda nyan teungoh teujadi, ulôn na disinan sidroe mantong. Laju lôn sujut dan lôn meulakée, "Ya TUHAN Nyang Mahamanyang, beungéh that Droeneueh keu Yerusalem sampoe neupoh maté bandum ureuëng nyang mantong na di Israel nyoe?" 9 Geujaweueb lé Po teu Allah, "Ureuëng-ureuëng Israel dan Yehuda ka jipeubuet desya nyang keubit rayeuk. Awaknyan ka jipeumaté manusia jeueb-jeueb sagoe, dan Yerusalem jipeukutoe deungon keujeuhetan. Awaknyan jipeugah bahwa Ulôn, TUHAN, ka Lôn tinggai nanggroe nyoe sampoe hana hase teukalon buet-buet nyang jipeubuet. 10 Ulôn hana Lôn gaséh awaknyan. Teuma Lôn peubuet ateueh awaknyan peue-peue nyang ka jipeubuet ateueh ureuëng laén." 11 Óh lheueh nyan ureuëng nyang meupeukayan lineun nyan geugisa geujak meulapor ubak TUHAN, kheun gobnyan, "Bandum peurintah TUHAN ka teukeureuja."

Yehezkiel 10

1 Laju ulôn kalon ubak kubah nyang na di ateueh ulée kerub-kerub nyan, dan lôn ngieng sapeue-peue nyang lagée takhta batée nilam. 2 Óh lheueh nyan Po teu Allah geupeugah ubak ureuëng nyang sôk peukayan lineun nyan, "Lhob kheueh laju lam ruweueng ruda-ruda nyang na di miyueb kerub-kerub nyan, dan cok laju saboh reugam ngeue apui. Dan sipreuk kheueh ngeue apui nyan u ateueh banda." Gobnyan jiturot, dan di ulôn ku ngieng hainyan. 3 Watée ureuëng nyan jitamong, kerub-kerub nyan teungoh jidong di siblaih seulatan Baét TUHAN. Na sigumpai awan ka peunoh lam seuramoe dalam dan bansaboh Baét TUHAN. 4 Cahya nyang muble-ble sibagoe tanda TUHAN ka teuka keunan leumah jiteubiet dalam kerub-kerub nyan dan laju jiminah ubak babah pintoe tamong lam Baét TUHAN, sampoe seuramoe nyan ka peungéuh ngon trang bandrang nyang meucahya. 5 Su sayeueb kerub-kerub nyan watée jikeupak teudeungoe ubak seuramoe luwa, lagée su Po teu Allah Nyang Mahakuasa. 6 Óh ka lheueh TUHAN geuyue bak ureuëng nyang sok peukayan lineun nyan saboh reugam ngeue apui lam ruweueng ruda dimiyueb kerub-kerub nyan, ureuëng nyan tamong dan jidong digeunireng saboh lamkawan ruda-ruda nyan. 7 Dan laju saboh lamkawan kerub nyan jipeutamong jaroe jih u dalam apui nyang na lamkawan awaknyan, dan jicok laju napadub krék ngeue apui nyan, dan ngeue apui nyang ka jicok nyan jijok laju ubak ureuëng nyang sok peukayan lineun nyan. Ureuëng nyan laju jiteurimong óh lheueh nyan jibeudôh di sinan laju jijak. 8 Deuh ulôn kalon bahwa dimiyueb sayeueb tieb-tieb kerub nyan na sapeue-peue nyang hi jih saban ngon jaroe manusia. 9 Meunan cit deuh ulôn kalon bahwa tieb-tieb kerub nyan maséng-maséng na saboh ruda disampéng. Ban peuet boh ruda nyan saban, dan hu muble-ble lagée peumata indah. Maséng-maséng na saboh teuk ruda laén nyang meulienteueng di teungoh-teungoh nyan. 11 Deungon lagée nyan kerub-kerub nyan jeuet jijak bak peuet jurosan. Awaknyan jeuet jijak homantong nyang awaknyan galak, deungon hana jiputa tuboh jih nyan. 12 Bansaboh tuboh awaknyan, rhueng jihnyan, jaroe jih, sayeueb jih dan ruda-ruda pih peunoh deungoe mata. 13 Ulôn deungon bahwa ruda-ruda nyan teuboh nan, "puteueng beuliong". 14 Tieb-tieb kerub nyan hi jih meulaén-laén. Hi nyang phon na kheueh lagée banteng, nyang keudua hi manusia, nyang keu lhée hi singa, dan nyang keu peuet hi cicém siwah. 15 Kerub-kerub nyan kheueh nyang ulôn ngieng ilée nibak binéh Krueng Kebar. Pajan mantong keurub-kerub nyan jimeugrab atawa jipeukeumang sayeueb jihnyan, ji-ék u manyang atawa jipo maju atawa jipiôh, ruda-ruda nyan sabe jiseutôt, sabab jikuasa lé kerub-kerub nyan. 18 Laju lé cahya muble-ble nyang tanda jih keuteuka TUHAN jitinggai laju babah pintoe tamong u Baét TUHAN dan jiminah u ateueh keurub-kerub nyan. 19 Ulôn ngieng kerub-kerub nyan jipeukeumang sayeueb jih laju jipo jitinggai tanoh, dan ruda-ruda jihnyan pih jijak sajan. Laju awaknyan jipiôh bak binéh pintoe geureubang Baét TUHAN nyang na di siblaih u timu, seudangkan cahya muble-ble teutab na ateueh awaknyan. 20 Ulôn laju teuingat bahwa nyan kheueh keurub-kerub nyang yoh masa dilée ulôn kalon na dimiyueb Po teu Allah Israel, bak binéh Krueng Kebar. 21 Kerub-kerub nyan maséng-maséng na peuet macam hi, dua pasang sayeueb, dan meunan cit sapeue-peue lagée jaroe manusia dimiyueb sayeueb-sayeueb jihnyan. 22 Ruman awaknyan saban cit lagée nyang ka ulôn ngieng nibak binéh Krueng Kebar. Maséng-maséng jijak teupat ukeue.

Yehezkiel 11

1 Laju ulôn geubeuôt lé Roh Po teu Allah dan geuba laju ubak babah pintoe geureubang siblaih Timu Baét TUHAN. Disinan na ulôn kalon 25 droe, lamkawan awaknyan na meuteumé peumimpén bansa, ureuëng nyan na kheueh Yaazanya bin Azur dan Pelaca bin Benaya. 2 Po teu Allah meufeureuman ubak ulôn, "He manusia fana, nyoe kheueh ureuëng-ureuëng nyang jireuncana keuneuk peubuet nyang jeuhet di banda nyoe dan jijok naseuhat nyang sisat hana ngon peusa. 3 Lé sabab nyan tapeusampoe kheueh peusan Ulôn keuhai huköman keu awaknyan, he manusia fana. Sabab awaknyan jipeugah, 'Hana treb le rumoh-rumoh nyoe ta peudong lom. Banda nyoe na kheueh beulangöng dan geutanyoe bandum na kheueh uengkot sie didalam beulangöng nyan. Geutanyoe aman nibak apui hu nyang meuháb-háb sabab jilindong lé beulangöng nyoe.' " 5 Óh lheuehnyan Roh TUHAN ka peunoh lam ulôn, dan ulôn geuyue lé TUHAN mangat lôn peugah ubak umat Israel, "He bansa Israel, Ulôn kuteupeue peue nyang gata peugah dan nyang gata reuncana. 6 Keubiet that le manusia nyang ka gata peumaté, sampoe rot-rot didalam banda ka peunoh ngon manyét manusia. 7 Sabab nyan, Ulôn, TUHAN Nyang Mahamanyang, Lôn peugah ubak gata: Beutôi, banda nyoe na kheueh beulangöng, teuma uengkot sie nyang na didalam nyan bukon kheueh gata, teuma manyét ureuëng-ureuëng nyang ka teupoh maté! Teuma di gata Lôn use neuteubiet nibak banda nyoe! 8 Peu kheueh gata teumakot keu peudeueng? Teuma Lôn kirém ureuëng nyang ba peudeueng keujijak prang gata. 9 Gata Lôn ba dan Lôn peuteubiet lam banda dan Lôn seurah ubak ureuëng aséng. Ulôn ka Lôn peurhot huköman maté ateueh gata. 10 Gata maté dimideuen di nanggroe gata keudroe, teuma neuteupeue kheueh lé gata bahwa Ulôn kheueh TUHAN. 11 Lé sababnyan, gata hana aman lam banda nyoe, hana lagée uengkot sie lam beulangöng. Ulôn Lôn peucrok dan Lôn huköm gata dipat mantong gata na lam nanggroe Israel. 12 Dan barô kheueh gata teupeue bahwa Ulôn kheueh TUHAN dan gata Ulôn huköm sabab ka gata iengkeue bak peuratoran-peuratoran Lôn dan hana gata pakoe peurintah-peurintah Lôn deungon cara gata seutôt huköm bansa-bansa nyang na di seukeulileng gata." 13 Teungoh lôn peugah haba nyan, hana teusangka-sangka Pelaca reubah laju maté. Dan ulôn pih laju lôn sujut dan meulakée, "Óh, TUHAN Nyang Mahamanyang! Peu kheueh banmandum nyang na tinggai sidroe sapat ureuëng Israel nyoe keuneuk neupeumaté?" 14 TUHAN meufeureuman lom ubak ulôn, 15 "He manusia fana, gata dan rakan-rakan gata nyang na di teumpat nyang teuböih teungoh jeuet keuboh nariet lé peunduduek Yerusalem. Kheun awaknyan, 'Ureuëng-ureuëng nyang teuböih nyan lumpah that jiôh nibak Yerusalem keujijak iébadat ubak TUHAN. Tanoh Israel ka geubri lé TUHAN keu geutanyoe.' 16 Sabab nyan, peusampoe kheueh peusan Ulôn nyoe ubak rakan-rakan gata nyang na di teumpat nyang teuböih, bahwa Ulôn kheueh nyang ba awaknyan di jiôh lamkawan bansa-bansa nyang Lôn peusipreuk awaknyan di nanggroe-nanggroe nyan. Teuma teungoh awaknyan mantong na disinan, Ulôn kupeungon awaknyan. 17 Ulôn, TUHAN Nyang Mahamanyang, Ulôn peugah bahwa Ulôn Lôn gumpôi awaknyan nibak nanggroe-nanggroe di teumpat awaknyan teusipreuk, laju Lôn jok pulang tanoh Israel ubak awaknyan. 18 Meunyoe awaknyan jiwoe, awaknyan geuböih bandum beurala nyang kuto dan nyang luwat that nyang awaknyan teumé. 19 Awaknyan Lôn bri até nyang barô dan budho basa nyang barô teuma. Até awaknyan nyang kreueh lagée batée Ulôn cok dan Lôn gantoe ngon até nyang taát ubak ulôn. 20 Dan awaknyan taát ubak peuratoran-peuratoran Lôn dan seutia jiseutôt bandum peurintah Ulôn. Awaknyan jeuet keu umat Lôn dan Ulôn jeuet keu Allah awaknyan. 21 Teuma ureuëng-ureuëng nyang galak jiseumah beurala nyang kuto dan nyang luwat that nyan, Lôn huköm sabab pi-e awaknyan nyang jeuhet nyan." Meunan kheueh feureuman TUHAN Nyang Mahamanyang. 22 Kerub-kerub nyan ka jipeuphon po meunan cit deungon ruda-ruda nyan jiseutôt sajan. Cahya muble-ble nyang keutanda teuka Allah Israel na di ateueh awaknyan. 23 Óh lheueh nyan cahya nyang muble-ble nyan laju jitinggai Yerusalem dan jiminah ubak gunong siblaih utimu banda nyan. 24 Lam keumalon nyan, Roh Po teu Allah geubeuôt ulôn dan geupeuriwang ulôn ubak ureuëng-ureuëng nyang teuböih di Babel. Óh lheueh nyan gadôh kheueh nyang teukalon nyan. 25 Laju ulôn calitra ubak ureuëng-ureuëng nyang teuböih peue-peue mantong nyang ka geupeuleumah lé TUHAN ubak ulôn.

Yehezkiel 12

1 TUHAN meufeureuman lom ubak ulôn, kheun Gobnyan, 2 "He manusia fana, gata tinggai lamkawan kawöm peumbeurontak. Bak awaknyan na mata, teuma hana jimeungieng; na geulinyuéng, teuma hana jeuet meudeungoe, sabab awaknyan galak bak buet beurontak. 3 Sabab nyan, he manusia fana, teungoh uroe mantong peungéuh, peukemah laju barang-barang gata dan peutamong laju dalam bingkih ija lagée lazém nyang ka jipeubuet lé ureuëng nyang teuböih. Sigohlom malam teuka, tinggai kheueh laju rumoh gata trang-trang lagée ureuëng nyang teuba u teumpat nyang teuböih. Peuruhuéng kheueh laju bintéh rumoh gata deungon jikalon lé kawöm peumbeurontak nyan, dan taba laju bingkih barang gatanyan tapeutamong rot ruhuéng nyang ka gata peubeusôt bak bintéh rumoh gata dan peuteubiet laju. Gulam kheueh bingkih nyan ateueh bahoe gata. Beurangkat kheueh lam seupôt buta; tatôb kheueh mata gata sampoe gata hana deuh rot nyang teungoh tajak nyan. Bah kheueh silurôh bansa Israel jikalon bandum peue nyang gata peubuet nyan, mangat jeuet keupeu ingat nibak awaknyan, barang kali awaknyan insaf bahwa droe awaknyan keudroe na kheueh peumbeurontak." 7 Laju ulôn peubuet peurintah TUHAN ubak ulôn. Bak uroe nyan cit teuma, watée mantong uroe, laju lôn peukeumah barang-barang lôn dalam saboh bingkih ija, lagée nyang ka lazém geupeubuet lé ureuëng meungungse. Watée uroe ka jipeuphon malam, laju lôn peugét ruhuéng ngon jaroe lôn bak bintéh rumoh lôn keudroe, óh lheuehnyan laju lôn teubiet lam rumoh nyan. Deungon jingieng lé bandum ureuëng nyang na disinan, bingkih ija nyan lôn gulam bak bahô lôn, óh lheueh nyan laju ulôn jak. 8 Óh singoh beungoh TUHAN meufeureuman ubak ulôn, meunoe geupeugah, 9 "He manusia fana, bansa Israel, bansa peumbeurontak nyan ka jitanyong ubak gata peue nyang teungoh gata peubuet. 10 Sabab nyan peusampoe kheueh ubak awaknyan peue nyang Ulôn, TUHAN Nyang Mahamanyang peugah ubak awaknyan. Peusan Lôn nyan teutuju ubak raja nyang na di Yerusalem, dan mandum peunduduek banda nyan. 11 Peutrang kheueh bahwa peue nyang gata peubuet nyan na kheueh lambang peue nyang teujadi ateueh awaknyan, na kheueh: awaknyan jeuet keu ureuëng nyang teuböih dan ureuëng teutawan. 12 Lam seupôt butanyan raja awaknyan jigulam bingkih ija jih di ateueh bahô jih dan laju jijak. Ureuëng-ureuëng nyang laén jipeugét ruhuéng nibak bintéh mangat awaknyan hase jiteubiet. Gobnyan jitob mata jih mangat nék leumah rot nyang teungoh jijak nyan. 13 Teuma Ulôn kutiek jeue mangat awaknyan hase ulôn drob. Laju awaknyan Ulôn ba u banda Babel, dan disinan awaknyan maté hana jiteumé kalon banda nyan. 14 Bandum nyang na tinggai lam meuligoe jitamong cit keunan bandum peunaseuhat dan peungawai pribadi raja nyan Ulôn peucrebre u jeueb-jeueb jurosan. Awaknyan Lôn tiyeub dan Ulôn poh maté. 15 Watée awaknyan Ulôn peucrebre lamkawan bansa laén di nanggroe-nanggroe aséng, awaknyan jiteupeue bahwa Ulôn kheueh TUHAN. 16 Na bacut nibak awaknyan Lôn peuseulamat nibak mideuen prang, nibak keunong deuk, dan nibak bala peunyakét, mangat lamkawan bansa-bansa aséng nyan awaknyan sadar bahwa awaknyan ka jipeubuet nibak buet nyang paleng kuto. Dan awaknyan jimeungaku bahwa Ulôn kheueh TUHAN." 17 TUHAN meufeureuman ubak ulôn, "He manusia fana, beuyo kheueh gata bak watée gata pajoh bu, dan beumeutot-tot kheueh sabab gata teumakot bak watée gata tajieb ié. 19 Peusampoe kheueh ubak mandum bansa, peue nyang Ulôn, TUHAN Nyang Mahamanyang peugah ubak peunduduek Yerusalem nyang mantong tinggai ditanoh awaknyan. Awaknyan yo watée jipajoh bu dan yo meukot-kot watée jijieb ié. Tanoh awaknyan jeuet keu tandus, sabab bandum ureuëng nyang na tinggai disinan hana putôh-putôh geuiengkeue huköm. 20 Banda-banda nyang jinoenyoe peunoh deungon peunduduek teupeuhanco dan ladang-ladang jeuet keu guron. Dan jiteupeue kheueh lé awaknyan bahwa Ulôn kheueh TUHAN." 21 TUHAN meufeureuman ubak ulôn, "He manusia fana, pakon ureuëng Israel galak jipeugah-peugah pribasa nyoe: 'Masa meugantoe, teuma nubuat-nubuat hana ántom teujadi'? 23 Nah, peutrok kheueh ubak awaknyan bahwa Ulôn, TUHAN Nyang Mahamanyang, Ulôn jaweueb lagée nyoe: Pribasa nyan Lôn peugadôh, sampoe hana le jipeugah-peugah di Israel. Sibagoe geunantoe peugah laju ubak awaknyan lagée nyoe, 'Masa jih ka trok, dan tieb-tieb nubuat teuma teujadi.' 24 Di Israel hana na le keumalon dan ramaian peuleusu, 25 Ulôn, TUHAN Nyang Mahamanyang Lôn mariet bak bansa Israel, dan bandum nyang Ulôn peugah pasti teujadi, hana teupeue eunteuk singoh le. Deungoe kheueh hé kawöm peumbeurontak! Watée masa udeb gata Lôn peubuet bandum nyang Ulôn peurintah ubak gata. Ulôn, TUHAN Nyang Mahamanyang ka Lôn peugah haba." 26 Feureuman TUHAN ubak ulôn, 27 "He manusia fana, ureuëng-ureuëng Israel jipeugah bahwa keumalon dan nubuat gata barô kheueh jeuet jiôh bak uroe nyang teuma teuka. 28 Sabab nyan, peugah kheueh ubak awaknyan, bahwa Ulôn, TUHAN Nyang Mahamanyang, Lôn peugah: Bandum nyang Ulôn peugah pasti jadéh na, hana teupeu eunteuk singoh le. Ulôn, TUHAN Nyang Mahamanyang ka Lôn peugah haba!"

Yehezkiel 13

1 TUHAN meufeureuman ubak ulôn, 2 "He manusia fana, tateunak kheueh nabi-nabi Israel nyang jipeugah ramai keunarang jih keudroe. Yue kheueh awaknyan mangat jideungoe peue nyang Ulôn peugah." 3 TUHAN Nyang Mahamanyang meufeureuman, "Ceulaka kheueh nabi-nabi nyang bangai nyan! Ilham jihnyan meuteumé nibak khayalan jih keudroe dan keumalon jihnyan peuleusu mandum. 4 He Israel, nabi-nabi gata nyan hana meuguna, saban cit lagée asée-asée srigala nyang udeb di teungoh-teungoh rungka banda. 5 Awaknyan hana jikeumiet teumpat-teumpat bintéh beuton nyang reuloh, dan meunan cit hana jipeugét bintéh-bintéh beuton nyang reuloh nyan. Jadi, Israel hana hase teupeuteun meunyoe beureutoh prang bak uroe Ulôn, TUHAN teuka geujak bri huköman. 6 Nyang jikalon-kalon lé awaknyan na kheueh peuleusu dan ramaian-ramaian awaknyan sulet. Awaknyan meungaku jiba peusan nibak Ulôn, padahai Ulôn hántom na Lôn utos awaknyan. Pakriban mungken awaknyan jiharab bak ramaian jih nyang teuma teujadi? 7 Ulôn, TUHAN Nyang Mahamanyang Lôn peugah ubak awaknyan, 'Keumalon-keumalon nyan peuleusu dan ramaian-ramaian nyan sulet mandum. Gata tapeugah bahwa bandum nyan na kheueh peusan Ulôn, padahai Ulôn hántom na Lôn peugah haba ubak gata! Sabab nyan Ulôn jeuet keu lawan gata. 9 Ulôn Lôn huköm gata, he nabi-nabi nyang peugah ramaian sulet dan nyang meukhayal keumalon-keumalon nyang hana beutôi! Gata hana jeuet le tabri keuputosan bak sidang-sidang umat Ulôn. Nan-nan gata teuceue nibak dafeutar marga Israel, dan gata hana teutuwoe le u tanoh ié gata. Teuma barô kheueh tateupeue bahwa Ulôn kheueh TUHAN Nyang Mahamanyang. 10 He Nabi-nabi peuleusu! Gata ka tapeusisat umat Ulôn deungon tapeugah bahwa banmandum aman dan béeréeh. Padahai mubacut pih hana! Umat Ulôn ka jipeudong timbok-timbok batée bata nyang guruek watée jipasang, óh lheuehnyan gata teuka tajak heuntam. 11 He nabi-nabi peuleusu! Beuton gata reuloh. Ulôn Lôn peutron ujeuen keuncang. Bintéh beuton nyan jiheuntam lé angén badée dan jitingkeh lé ujeuen es 12 sampoe reuloh, dan somantong ureuëng jitanyong keupeue guna jih bintéh beuton nyan teucet ngon gapu.' " 13 TUHAN Nyang Mahamanyang meufeureuman, "Watée beungéh Lôn nyan, Ulôn Lôn peutron angén badée, ujeuen keuncang dan ujeuen éh keu teupeuhanco bintéh beuton nyan. 14 Ulôn ka naniét keuneuk peureuloh bintéh beuton nyang gata cét ngon gapu nyan, Lôn peuteung bayeueng sampoe nyang tinggai keunaleueng mantong. Bintéh beutonnyan jitimpok dan jipeumaté gata banmandum. Dan barô kheueh gata teupeue bahwa Ulôn kheueh TUHAN. 15 Bintéh beutonnyan dan nyang ka tagapu nyan tarasa hebat jih beungéh Ulôn. Óh lheuehnyan Lôn peugah ubak gata bahwa bintéh beuton nyan gadôh leunyab, saban lagée gata boh gapu, 16 nabi-nabi peuleusu! Gata taramai bahwa Yerusalem aman dan béeréeh, padahai mubacut pi hana!" Meunan kheueh feureuman TUHAN Nyang Mahamanyang. 17 TUHAN meufeureuman, "Jinoenyoe, he manusia fana, tangieng kheueh ureuëng-ureuëng nyang meulagak lagée nabiah lamkawan bansa gata. Teunak kheueh awaknyan, 18 dan peusampoe kheueh peue nyang Ulôn, TUHAN Nyang Mahamanyang peugah ubak awaknyan: 'Ceulaka kheueh gata! Gata peugét keu bandum ureuëng gleueng meujimat dan tudông-tudông sakeuti mangat ureuëng nyang ngui atranyan meuteumé hase jikuasa udeb ureuëng laén. Gata keuneuk meukuasa ateueh udeb maté umat Ulôn, dan kuasa nyan gata ngui deumi keupeuntengan gata keudroe. 19 Gata ka gata hina Ulôn dikeue umat Lôn keudroe deungon harapan mangat meuteumé napadub ôn jeulai dan padub boh ruti. Ureuëng-ureuëng nyang hana meusalah, gata poh maté seudangkan ureuëng nyang seuharôh jih maté gata peubiyeu udeb. Laju gata peungéut umat Ulôn dan awaknyan peucaya ubak gata.' " 20 TUHAN Nyang Mahamanyang meufeureuman ubak ureuëng-ureuëng inong nyang meulagak lagée nabiah nyan, "Ulôn banci bak gleueng-gleueng jimat nyang gata ngui keu gata kuasa ateueh udeb maté umat Ulôn. Gleueng-gleueng nyan Lôn seuntak bak jaroe gata, dan ureuëng-ureuëng nyang gata kuasa Lôn peubeubaih. 21 Tudông-tudông sakeuti gata Ulôn priek, dan umat Ulôn Lôn peujiôh nibak peungaroh jeuhet gata siumu masa. Dan barô kheueh gata teupeue bahwa Ulôn kheueh TUHAN. 22 Ureuëng-ureuëng nyang jroh nyang hana jitem gata peubuet sapeue ateueh jih, gata peujeuet cut até deungon sulet gata nyan. Ureuëng-ureuëng jeuhet gata peujeuet raya até mangat teutab meudesya dan hana teupeu udeb phon saát nyoe. 23 Jinoenyoe ka kheueh habéh keumalon-keumalon peuleusu dan ramaian-ramaian buhak. Ulôn peuseulamat umat Lôn nibak peungaroh jeuhet gata. Dan barô kheueh gata teupeue bahwa Ulôn kheueh TUHAN."

Yehezkiel 14

1 Na meupadub droe nibak peumimpén bansa Israel jijak meuhadab ubak ulôn keu jiteumanyong keuheundak TUHAN. 2 Dan meufeureuman TUHAN ubak ulôn, 3 "He manusia fana, ureuëng-ureuëng nyoe ka jipeucaya droe ubak beurala-beurala sampoe awaknyan ka rhot u dalam desya. Ék kheueh Ulôn jitanyong lé awaknyan? 4 Sabab nyan, tapeugah kheueh ubak awaknyan bahwa Ulôn, TUHAN Nyang Mahamanyang Lôn peusan lagée nyoe, 'Tieb-tieb ureuëng Israel nyang ka jipeucaya droe ubak beurala dan geupeubiyeu droe jihnyan rhot u dalam desya, óh lheueh nyan laju geujak lakée naseuhat ubak sidroe nabi, hainyan Lôn jaweueb keudroe deungon jeunaweub nyang patot keu beurala-beurala jih nyang le nyan! 5 Bandum beurala nyan ka jipeujiôh umat Ulôn nibak Ulôn, teuma mudah-mudahan deungon na Lôn jaweueb nyang lagée nyan umat Lôn jiwoe ubak Ulôn.' 6 Neupeugah cit teuma ubak ureuëng Israel, bahwa Ulôn, TUHAN Nyang Mahamanyang Lôn peugah ubak awaknyan, 'Meutobat kheueh nibak banmandum desya gata, dan tatinggai kheueh beurala-beurala gata nyang luwat that nyan.' 7 Tieb-tieb ureuëng Israel atawa ureuëng aséng nyang na tinggai lamkawan bansa Israel, nyang jipeujiôh Ulôn dan jipeucaya droe jih ubak beurala, laju jilakée naseuhat ubak sidroe nabi, nyan Lôn jaweueb keudroe. 8 Ulôn kulawan jihnyan dan Lôn peujeuet jihnyan sibagoe cuntoh keu nyang laén. Ulôn Lôn peuaséng jihnyan nibak umat Lôn, dan barô kheueh jiteupeue lé umat Lôn bahwa Ulôn kheueh TUHAN. 9 Meunyoe sidroe nabi ka jipeungéut sampoe jijaweueb nyang salah, Ulôn kheueh nyang peungéut gobnyan. Ulôn, TUHAN Allah Nyang Mahamanyang Lôn peuaséng jihnyan nibak ureuëng-ureuëng Israel. 10 Bah kheueh nabi nyan meunan cit deungon awaknyan nyang lakée naseuhat jihnyan, meuteumé huköman nyang saban. 11 Bandum nyan Ulôn peubuet mangat ureuëng Israel bék le jipeujiôh Ulôn dan bék teuma jipeukutoe droe deungon desya. Deungon lagée nyan awaknyan jeuet keu umat Lôn, dan Ulôn jeuet keu Allah awaknyan." Ulôn, TUHAN Nyang Mahamanyang ka Lôn peugah haba. 12 TUHAN meufeureuman ubak ulôn, "He manusia fana, 13 meunyoe saboh nanggroe meudesya dan hana seutia ubak Ulôn, Ulôn kuhuköm nanggroe nyan. Ulôn peuhanco keuneubah peunajoh awaknyan, Lôn peutron bala dan musém deuk meunan cit Ulôn peumaté bubena manusia dan beulatang. 14 Bahpi Nabi Nuh, Nabi Danel dan Nabi Ayub na tinggai di teumpat nyan, dan keugét awaknyan ban lhée nyang hase jipeuseulamat na kheueh nyawöng jih keudroe. Ulôn, TUHAN Nyang Mahamanyang ka Lôn peugah haba. 15 Jeuet mantong Ulôn peuteuka beulatang-beulatang juah keu jiteugöm peunduduek nanggroe nyan, sampoe daerah nyan ka jeuet keu teumpat nyang paleng meubahya dan hana meusidroe manusia pih nyang ji jeuet jak keunan. 16 Bahpi Nabi Nuh, Nabi Danel, dan Nabi Ayub tinggai disinan, dan deumi Ulôn, Allah nyang udeb, TUHAN Nyang Mahamanyang, awaknyan hana meuhase jipeuseulamat soe mantong, bahpi aneuëk awaknyan keudroe pih hana meuhase jipeuseulamat. Teuma awaknyan keudroe mantong nyang seulamat, dan nanggroe nyan jeuet keu padang pasi. 17 Jeuet mantong Lôn peutron prang u nanggroe nyan, dan Lôn kirém sinjata-sinjata nyang ampuh keu teupeubinasa bah kheueh nyan manusia meunan cit beulatang. 18 Dan bahpi ban lhée droe awaknyan tinggai disinan, teuma deumi Ulôn, Allah nyang udeb, TUHAN Nyang Mahamanyang, awaknyan hana meuhase jipeuseulamat soe mantong, meunan cit aneuëk awaknyan keudroe pih hana. Teuma awaknyan keudroe mantong kheueh nyang seulamat. 19 Jeuet mantong Ulôn peutron bala peunyakét u nanggroe nyan, dan Lôn peuju beungéh Ulôn keu jihnyan sampoe manusia meunan cit beulatang teuma binasa. 20 Dan bahpi Nabi Nuh, Nabi Danel dan Nabi Ayub tinggai disinan, teuma deumi Ulôn, Allah nyang udeb, TUHAN Nyang Mahamanyang, awaknyan hana hase jipeuseulamat soe mantong, bahpi aneuëk awaknyan keudroe. Teuma awaknyan keudroe mantong nyang seulamat sabab keugét awaknyan." 21 TUHAN Nyang Mahamanyang meufeureuman, "Ulôn Lôn peu rhot ban peuet boh huköman Lôn ateueh Yerusalem keu teupeuranab bah kheueh nyan manusia meunan cit deungon beulatang. Huköman nyan na kheueh: prang, bala deuk, beulatang buih dan wabah peunyakét. 22 Meunyoe na nyang hase jipeulheueh droe dan hase jipeuseulamat aneuëk-aneuëk jih keudroe, tangieng kheueh awaknyan meunyoe awaknyan jijak ubak gata. Kalon kheueh pakriban jeuhet jih awaknyan, dan gata sadar dan paih that peue nyang ka Lôn peubuet keu Lôn huköm Yerusalem. 23 Dan gatapih muphom bahwa bandum nyang Ulôn peubuet nyan na alasan. Ulôn, TUHAN Nyang Mahamanyang ka Lôn peugah haba."

Yehezkiel 15

1 TUHAN meufeureuman ubak ulôn, 2 "He manusia fana, peue keuleubehan kayée anggô ngon kayée laén dalam gle? Peu kheueh keuleubehan bak anggô nibak bak kayée dalam gle? 3 Peu kheueh jeuet kayée nyan teupeuguna keu teupeugét sapeue-sapeue beunda? Peu kheueh jeuet teupeugét ceunawiét keuteumpat gantung peukakaih? 4 Hana meuguna seulaén keukayée apui. Dan meunyoe bandua ujong jih habéh tutong, dan bagian teungoh jih pih jeuet keu arang, peu kheueh mantong meuguna? 5 Hana le! Dan sigohlom teutot, ka hana jeuet ngui le. Peue lom óh ka lheueh tutong dan jipeuhangöh lé apui!" 6 Sabab nyan TUHAN Nyang Mahamanyang geupeugah, "Lagée bak kayée anggô nyang teucok dalam gle laju teutot, meunan cit teuma Lôn peusaneut ateueh peunduduek Yerusalem! 7 Ulôn Lôn huköm awaknyan. Bahpi awaknyan ka teupeusie nibak apui, teuma apui cit teuma nyang tot awaknyan. Dan barô kheueh gata teupeue bahwa Ulôn kheueh TUHAN. 8 Awaknyan hana seutia ubak Ulôn, sabab nyan, tanoh nyan Lôn peujeuet keu padang pasi. Ulôn, TUHAN Nyang Mahamanyang ka geupeugah haba."

Yehezkiel 16

1 TUHAN meufeureuman lom ubak ulôn, 2 "He manusia fana, tunyok kheueh bak Yerusalem buet-buet nyang kuto nyang ka jipeubuet." 3 TUHAN Nyang Mahamanyang geuyue ubak ulôn mangat lôn jak peusampoe peusan nyoe ubak Yerusalem, "He Yerusalem, gata lahé bak tanoh Kanaan. Ureuëng syiek gata nyang agam ureuëng Amori dan ma gata ureuëng Het. 4 Bak watée gata lahé hana ureuëng nyang koh talo pusat gata, atawa nyang pumanö gata, atawa teuboreh gata ngon sira, atawa nyang peulimbot gata deungon ija. 5 Hana meusidroe pi nyang na gaséh keu gata sampoe jitem peubuet hai-hai nyang lagée nyan keu gata. Watée gata lahé, hana nyang wéueh keu gata, dan gata jitiek di lam ladang. 6 Óh lheuehnyan Lôn jak rot nyan dan leumah laju Lôn kalon gata meulawan-lawan lam darah gata nyang roe meujeu-jeu, teuma Ulôn hana Lôn peubiyeu gata maté. 7 Ulôn cok ié laju Ulôn rhah darah nyang meulabo bak tuboh gata. Lôn geusok kulét gata ngon minyéuk zaiton. Lôn peurayeuk gata lagée sinaman nyang subô. Gata bagaih that raya, seuhat dan manyang seumampai, dan jeuet keusidroe inong muda. Boh mom gata ka jipeuphon buntok dan ôk gata panyang, teuma gata teulon hana sapeue na. Watée Lôn jak rot nyan lom, deuh Lôn kalon bahwa ka trok watée gata keu meucinta. Ulôn leueng bajée jubah Lôn bak tuboh gata nyang teulon, dan Lôn meujanji cinta Ulôn ubak gata. Nyoe, Lôn ikat janji meukawen deungon gata, dan gata jeuet keumilék Ulôn. Ulôn, TUHAN Nyang Mahamanyang ka Lôn peugah haba. 10 Óh lheuehnyan Ulôn peusampoe ubak gata ija gaon nyang meukasab, sipatu nibak kulét nyang paleng halôh, ikat ulée nibak ija lineun dan jubah sutra. 11 Ulôn peungui gata deungon peumata, talo takue dan gleueng-gleueng nyang tari. 12 Ulôn jôk keugata euncien meu idong, keurabu dan mahkota nyang gagah. 13 Meunan kheueh gata teupeungui méuh dan pirak; peukayan gata teupeugét nibak ija lineun dan sutra meukasab. Gata jeuet neupajoh ruti dan teurigu nyang gét, deungon meulisan dan minyéuk zaiton. Ceudah ngon gagah gatanyan hana ngon peusa dan gata jeuet keu ratu. 14 Sigala bansa jipujoe keu lagak gata nyang rupawan, dan Ulôn kheueh nyang ka peujeuet gata gagah hana ngon peusa. Ulôn, TUHAN Nyang Mahamanyang ka Lôn peugah haba. 15 Teuma gata salah peuguna keu ceudehan gata dan nan gata nyang meusyeuhu. Gata éh ngon agam toh mantong nyang na jijak. 16 Siladum nibak peukayan gata tapeuguna keu teuhias teumpat seumah beurala gata. Gata jeuet keu inong jeuhet dan tabri tuboh gata keu tieb-tieb ureuëng agam. 17 Nibak piasan méuh dan pirak nyang Ulôn bri ubak gata, atranyan gata peugét patong-patong ureuëng agam, laju gata peubuet meumukah deungon patong nyan. 18 Gata peungui ubak patong-patong nyan peukayan meukasab nyang ka Ulôn bri ubak gata. Gata peuseumah ubak awaknyan minyéuk zaiton dan dupa nyang ka gata teurimong nibak Ulôn. 19 Ulôn bri keu gata peunajoh nibak teupông teurigu nyang paleng gét, madu dan minyéuk zaiton nyang paleng aseuli. Teuma bandum nyan gata peuseumah ubak beurala-beurala nyan keu gata peugalak até awaknyan. Ulôn, TUHAN Nyang Mahamanyang ka Lôn peugah haba. 20 Óh lheueh nyan gata peuseumah aneuëk-aneuëk geutanyoe, agam dan inong, jeuet keu keureubeuen keu beurala-beurala nyan. Peu kheueh gohlom seb bahwa gata hana seutia ubak Ulôn? 21 Peu kheueh harôh tacok aneuëk-aneuëk Ulôn dan gata keureubeuen awaknyan keu beurala nyan? 22 Lam udeb gata nyang lumpah kuto sibagoe inong jeuhet nyan, mubacutpi hana gata ingat masa yoh ubit gata, watée teulon dan meugawang-gawang lam darah gata nyang meubayak nyan." 23 TUHAN Nyang Mahamanyang meufeureuman, "Ceulaka kheueh gata! Lumpah ceulaka! Gata ka tapeubuet bandum keujeuhetan nyan. 24 Lom teuma, diteungoh-teungoh banda dan nibak tieb-tieb binéh rot raya gata peudong teumpat-teumpat seumah beurala dan meulunte. 25 Gata ka tapeukutoe keulagak gata. Tuboh gata tapeutaba ubak soe mantong ureuëng agam nyang na teuka, dan hana piôh-piôh tapeubuet mukah. 26 Nanggroe Meusé, teutangga gata nyang raya nafeusu jihnyan, ka gata peungon bak teumpat éh. Gata tasaja meulunte mangat Ulôn bagaih beungéh. 27 Jinoenyoe Ulôn cok tendakan keu Lôn huköm gata dan Ulôn cok beureukat nyang ka Ulôn bri keu gata. Lôn jok gata ubak ureuëng-ureuëng Filistin nyang banci keu gata dan nyang bosan jikalon pi-e gata nyang kuto nyan. 28 Teuma nibak gata gohlom cit meurasa puih; sabab nyan kheueh gata tiyeub-tiyeub ureuëng Asyur. Gata jeuet keu mukah awaknyan, teuma hántom cit puih nibak awaknyan. 29 Óh lheuehnyan laju gata jeuet keu mukah ureuëng Babel, bansa meukat nyan. Teuma awaknyan pi hana hase jipeupuih gata." 30 TUHAN Nyang Mahamanyang meufeureuman, "Bandum nyan ka gata peubuet lagée inong lunte nyang hana meumalée. 31 Bak teungoh-teungoh banda dan di tieb-tieb rot raya gata peudong teumpat-teumpat seumah beurala dan teumpat meulunte. Teuma gata kon kheueh lagée lunte biasa nyang jimita péng. 32 Gata lagée sidroe peurumoh nyang jikhianat lakoe droe jih dan jipeubuet jeuhet ngon agam laén. 33 Sidroe inong lunte sabe meuteumé meunayeue, teuma seubalek jih gata kheueh nyang bri hadiah keu geunaséh-geunaséh gata, dan gata rayu awaknyan deungon péng mangat awaknyan jitem teuka dipat mantong keu jijak éh deungon gata. 34 Gata inong lunte nyang laén nibak inong-inong nyang laén. Hana nyang paksa gata jeuet keu lunte. Gata hana teubayeue. Bit, gata laén nibak nyang laén." 35 He Yerusalem, inong lunte, deungoe kheueh peue nyang geufeureuman lé TUHAN Nyang Mahamanyang, "Gata ka tasuet bajée gata, dan sibagoe lunte gata jok droe gata ubak geunaséh-geunaséh dan beurala-beurala gata nyang lumpah luwat nyan. Aneuëk-aneuëk gata tapoh maté dan gata keureubeuen keu beurala-beurala nyan. 37 Sabab nyan, bandum mantan geunaséh gata Lôn peusapat, bah kheueh nyang gata galak meunan cit nyang gata banci. Awaknyan jidong jihudöm gata bansieseun lingka dan jisuet banmandum peukayan gata, sampoe awaknyan hase jingieng tuboh gata nyang ka teulon nyan. 38 Gata Lôn huköm sabab meumukah dan peumaté gobnyan nyang ka peubuet nyan. Nibak beungéh dan meureuka Ulôn nyan, gata Lôn huköm maté. 39 Gata Ulôn jok ubak geunaséh-geunaséh gata keudroe, dan awaknyan jireuloh bandum teumpat gata meumukah dan seumah beurala. Banmandum peukayan dan piasan gata awaknyan reupah, sampoe gata ka teulon lheueh. 40 Awaknyan jiyue geulawa gata bak ureuëng ramé ngon aneuk batée, dan jicang-cang tuboh gata deungon peudeueng. 41 Awaknyan jitot bubena rumoh gata dan jiyue bak ureuëng inong jak peusaksi gata teuhuköm. Meunan kheueh cara jih Lôn peupiôh gata meumukah. Gata hana jibagi-bagi le hadiah keu geunaséh-geunaséh gata. 42 Barô kheueh óh lheueh bandum nyan teujadi beungéh Ulôn reuda, dan Ulôn jeuet teunang lom. Ulôn hana beungéh le atawa ceumuru. 43 Ulôn ku huköm gata sabab gata hana taingat pakriban Lôn useuha gata bak watée gata mantong muda. Gata tapeu jeuet Ulôn beungéh deungon bandum pi-e gata nyang jeuhet nyan. Pakon bandum pi-e gata nyang kuto ngon luwat nyan mantong gata tamah lom ngon buet meumukah? Ulôn TUHAN Nyang Mahamanyang ka Lôn peugah haba." 44 TUHAN meufeureuman, "He Yerusalem, di ureuëng ramé jipeukeunong pribasa nyoe keu gata, 'Lagée ma jih, meunan cit ngon aneuëk inong jih.' 45 Beutôi, gata na kheueh aneuëk inong ma gata. Geuhnyan banci keu lakoe jih dan keu aneuëk jih keudroe. Gata saban that lagée syedara-syedara gata nyang inong nyang banci keu lakoe dan aneuëk-aneuëk jihnyan. Gata dan syedara gata, dan banda-banda nyang na ban seukeulileng gata ma jih ureuëng Het dan ayah ureuëng Amori. 46 Cutda gata na kheueh Samaria di utara deungon bandum gampông. Dan adoe gata na kheueh Sodom di seulatan deungon banmandum gampông nyang disinan. 47 Peu kheueh ka puih gata deungon cara taseutôt langkah awaknyan dan taturot buet awaknyan nyang kuto nyan? Gohlom! Hana treb le gata leubeh jeuhet lom nibak awaknyan. 48 Deumi Ulôn, Po teu Allah nyang udeb, kheun TUHAN Nyang Mahamanyang, syedara gata Sodom deungon gampông-gampông na disinan gohlom na lom jipeubuet jeuhet lagée gata peubuet nyan ngon gampông-gampông gata. 49 Sodom dan gampông-gampông disinan sombong sabab makmu ngon peunajoh nyang le teukeubah lom teuma meuteumé udeb ngon teunang dan damé. Teuma awaknyan hana jitem ngieng ureuëng gasien ngon ureuëng papa. 50 Awaknyan sombong dan kreueh ulée, dan jipeubuet hai-hai nyang Ulôn banci, sabab nyan awaknyan Ulôn peuhanco lagée nyang ka lheueh gata kalon keudroe. 51 Bit Samaria jeuhet, teuma desya jih hana siparoe nibak desya-desya gata. Pi-e gata jiôh leubeh jeuhet. Syedara-syedara gata nyang inong siulah-ulah hana meusalah meunyoe teubandeng deungon gata. Gata harôh teurasa malée dan hina!" 53 TUHAN meufeureuman ubak Yerusalem, "Sodom dan Samaria meunan cit deungon gampông-gampông awaknyan Lôn peumakmu lom. Óh ka lheuehnyan, barô kheueh gata Lôn peumakmu lom teuma. 54 Deungon lagée nyan gata malée ubak droe gata keudroe, dan keuhinaan gata teutunyok ubak bubena syedara gata padubna gét naseb awaknyan. 55 Awaknyan dan gampông-gampông jeuet keumakmu lom, meunan cit deungon gata dan gampông-gampông gata. 56 Kon kheueh gata ka lheueh tapeukém Sodom watée gata mantong sombong dan buet jeuhet gata nyan gohlom leumah? 57 Bak saát nyoe gata saban cit lagée Sodom; gata ka jeuet keubahan jipeukém lé ureuëng Edom, ureuëng Filistin dan wareh lingka gata nyang laén nyang banci keu gata. 58 Gata harôh meudeurita sibagoe akibat buet gata nyang kuto dan luwat nyan. Ulôn, TUHAN ka Lôn peugah haba." 59 TUHAN Nyang Mahamanyang meufeureuman, "Gata Lôn peujeuet nyang sipadan deungon buet gata, sabab gata ka ta iengkeue bak sumpah gata dan taliuengkeu peujanjian Ulôn deungon gata. 60 Teuma Ulôn Lôn ikat peujanjian nyang ka Ulôn peugôt deungon gata bak watée gata mantong muda dan Lôn peugét peujanjian deungon gata nyan na kheueh keu siumu masa. 61 Gata teuingat keu buet-buet gata dan meurasa malée watée mandum syedara-syedara gata Ulôn peuriwang ubak gata. Awaknyan Lôn peujeuet lagée aneuëk-aneuëk gata, bahpi hainyan hana roh bak peujanjian Ulôn deungon gata. 62 Ulôn Lôn peugét peujanjian nyang barô deungon gata. Teuma barô kheueh tateupeue lé gata bahwa Ulôn kheueh TUHAN. 63 Ulôn Lôn peumeuáh banmandum salah gata, teuma gata hana tuwoe dan gata meurasa malée keu tapeugah peue mantong. Ulôn, TUHAN Nyang Mahamanyang ka Lôn peugah haba."

Yehezkiel 17

1 TUHAN Meufeureuman ubak ulôn, 2 "He manusia fana, calitra laju ubak ureuëng-ureuëng Israel miseu umpama-miseu umpama nyoe, 3 nyang Ulôn, TUHAN Nyang Mahamanyang keuneuk peusampoe ubak awaknyan: Na kheueh saboh cicém rajawali nyang paleng raya nyang meubulée lagak dan meusayeueb luwah dan Lôn teuga. Cicém nyan jipo u gunong Libanon, laju jiwiét sibak pucok ceumara, 4 laju atranyan jipeupo sira jiba jikeubah laju bak banda dagang nyang ramé. 5 Óh lheuehnyan laju jicok sibak seunaman nyang mantong muda nibak tanoh Israel, dan laju jipula bak tanoh ladang nyang subô, nyang hántom kureueng ié. 6 Seunaman nyan jeuet keu bak anggô nyang jitimoh miyueb teuma jimeuéue luwah. Cabeueng-cabeueng jih jipeukeu ubak cicém rajawali nyan, dan ukeu-ukeu jih meusinom khong that dalam tanoh. Bak anggô nyan rampak lumpah na. 7 Teungoh watée nyan na teuma saboh teuk cicém rajawali raksasa nyang laén; sayeueb jih luwah dan bulée jih teubai. Laju diba anggô nyan jipeukeu ukeu-ukeu dan cabeueng-cabeueng jih ubak cicém rajawali nyan deungon harapan mangat cicém rajawali nyan jitem jok keu jihnyan leubeh le lom ié nibak nyang ka na lam ladang nyan. 8 Padahai bak anggô nyan ka teupula bak tanoh nyang subô deungon ié nyang meulimpah, sampoe bak anggô nyan jiteubiet ôn nyang rampak, jimuboh nyang le, dan jeuet keu bak anggô nyang gét. 9 Dan, Ulôn, TUHAN Nyang Mahamanyang, lôn teumanyong: Peu kheueh hase bak anggô nyan udeb dan meukeumang? Peu kheueh hán jilot lé cicém rajawali nyang phon habéh deungon ukeu-ukeu jih, jiluroh boh jih, jiwiet deuen-deuen jih dan jipeubiyeu jihnyan layée? Hana peureulée teunaga atawa bansa nyang le nyang peukasa keu teulot bak kayée nyan sampoe habéh ngon ukeu-ukeu jih. 10 Beutôi jih nyan ka teupula kong that, teuma peu kheueh jih nyan meuhase jitimoh sabe dan meukeumang? Peu kheueh jihnyan hana layée meunyoe jiyueb lé angén timu? Peu kheueh jihnyan hana tô diteumpat jihnyan teupula?" 11 TUHAN meufeureuman ubak ulôn, 12 "Tanyong kheueh laju ubak ureuëng-ureuëng beurontak nyan, peu kheueh awaknyan jipeuphom makna miseu umpama nyan. Jak peutrok laju ubak awaknyan bahwa raja Babel ka jiteuka u Yerusalem, dan jiangkot raja Yehuda meunan cit deungon ureuëng-ureuëng rayeuk banda nyan u Babel. 13 Laju gobnyan jipiléh sidroe lamkawan keuluwarga raja Yehuda nyan, jipeugét peujanjian deungon jih nyan, dan jiyue jihnyan meusumpah seutia ubak gobnyan. Raja Babel nyan jisandra ureuëng-ureuëng peunteng, 14 mangat keurajeuen Yehuda nyan hana jibeudôh le, dan keu teujamin bahwa peujanjian nyan beutôi-beutôi teupeuna. 15 Teuma lé raja Yehuda jibeurontak sira jikirém utosan u nanggroe Meusé mangat meuteumé guda dan tantra nyang le. Peu kheueh jihnyan meuhase? Peu kheueh jihnyan teupeubiyeu seulamat? Hana mungken jihnyan ji-iengkeue ubak peujanjian meunyoe hana teupeukeunong huköman! 16 Deumi Ulôn, Po teu Allah nyang udeb, TUHAN Nyang Mahamanyang, raja Yehuda maté di Babel, sabab jihnyan ka ji iengkeue bak sumpah jih keudroe dan ji-iengkeue peujanjian jihnyan deungon raja Babel nyang ka jipeuduek jihnyan u ateueh takhta. 17 Dan bala tantra Meusé nyang hebat nyan, hana hase jitulông jihnyan nibak jiseureubu ureuëng-ureuëng Babel nyang jipeugét sinamon-sinamon tanoh dan jikueh got-got keu geupeumaté ureuëng nyang le. 18 Sabab jihnyan ka jilingkeue sumpah dan peujanjian jih nyan, dan jihnyan hana hase jipeuplueng droe. 19 Deumi Ulôn, Allah nyang udeb, TUHAN Nyang Mahamanyang, raja Yehuda Lôn huköm sabab ka jilingkeue peujanjian jihnyan deungon raja Babel, padahai jihnyan ka jimeusumpah ateueh nan Ulôn keu jipeupeunoh janji. 20 Ulôn Lôn tiek jeue mangat Lôn drob jihnyan. Jihnyan Ulôn ba u Babel dan Lôn huköm disinan, sabab jihnyan hana seutia ubak Ulôn. 21 Sipa-i jihnyan nyang paleng gét maté dimideuen prang, dan nyang meuhase jipeuplueng droe Ulôn peu crebre u jeueb-jeueb ujong. Dan barô kheueh jiteupeue lé umat Lôn bahwa Ulôn, TUHAN ka Lôn peugah haba." 22 Nyoe kheueh feureuman TUHAN Nyang Mahamanyang, "Nibak bak ceumara nyang manyang, Ulôn pot pucok jih laju Ulôn wiét sikrak cabeueng jih nyang muda; Lôn pula cabeueng nyan bak gunong manyang meusampôh awan. 23 Bak gunong nyang paleng manyang di Israel, cabeueng kayée nyan Ulôn pateng. Disinan kayée nyan meutarök, dan óh lheueh nyan jimuboh teuma, laju jeuet keubak ceumara nyang meusyeuhu meugah. Meubagoe jeuneh cicém jimeu eumpueng didalam nyan dan jimeuceu dimiyueb lindongan nyan. 24 Bandum bak kayée lam nanggroe muphom bahwa Ulôn kheueh TUHAN. Kayée nyang manyang Ulôn koh; kayée nyang miyueb Ulôn peujeuet jitimoh manyang. Kayée nyang luhu Lôn peutho kreng; dan bak kayée nyang tho Ulôn peutimoh tarôk dan meukeumang. Ulôn, TUHAN, ka Lôn peugah haba, bandum tutoe haba Lôn teuma teulaksana."

Yehezkiel 18

1 TUHAN meufeureuman ubak ulôn, 2 "Pakon pribasa nyoe sabe jipeugah-peugah di nanggroe Israel? 'Ureuëng tuha jipajoh boh anggô nyang masam rasa jih, teuma aneuëk-aneuëk manyak kheueh nyang singke gigo.' 3 Deumi Ulôn, Allah nyang udeb, TUHAN Nyang Mahamanyang, pribasanyan hana teupeugah di nanggroe Israel. 4 Nyawöng tieb-tieb ureuëng na kheueh atra Ulôn, bah kheueh nyan nyawöng ureuëng tuha meunan cit nyawöng aneuëk jihnyan. Ureuëng nyang meudesya, jihnyan kheueh nyang maté. 5 Miseu jih na ureuëng nyang gét, ade dan jujoe. 6 Ureuëng nyan hana jiseumah beurala ureuëng Israel atawa geupajoh keureubeuen nyang teupeuseumah ubak teumpat seumuja dewa-dewa. Gobnyan hántom jirayu peurumoh ureuëng laén atawa geuéh sajan ngon ureuëng inong nyang teungoh meuhé. 7 Jihnyan hántom jiteumipée atawa meureupah atra ureuëng laén. Barang-barang jaminan ureuëng nyang meu utang keu gobnyan sabe jijok pulang óh ka trok bak watée. Ureuëng nyang deuk jibri peunajoh dan ureuëng nyang hana meubajée, jijok peukayan. 8 Gobnyan hántom na jipeu utang ureuëng laén deungon cara geucok bungöng. Gobnyan hánjitem peubuet buet nyang jeuhet dan bak tieb-tieb na meudakwa jihnyan jibri keuputosan nyang jujoe. 9 Ureuëng jipatuh peue nyang Ulôn peurintah dan jitaát banmandum ubak huköm-huköm Lôn. Ureuëng nyang lagéenyan kheueh nyang jujoe dan teutab udeb. Ulôn, TUHAN Nyang Mahamanyang ka geupeugah haba. 10 Teuma miseu jih ureuëng nyan na aneuëk jih nyang tukang meurampok, peumaté gob, dan jipeubuet buet nyang jeuhet nyang laén 11 nyang hántom jipeubuet lé ayah jihnyan simantong ayah geuh nyan udeb lam donya. Jihnyan jipajoh keureubeuen peuseumahan di teumpat-teumpat teupujoe dewa-dewa. Gobnyan jigoda dan geumeumukah ngon peurumoh ureuëng laén. 12 Gobnyan galak jipeungét ureuëng gasien, meurampok, dan jisita barang jaminan ureuëng nyang meu utang ubak jihnyan. Jihnyan jijak bak kuil-kuil ureuëng nyang hana jituri keu TUHAN dan jiseumah beurala nyang kutoe luwabiasa. 13 Ureuëng nyan jijok keu ureuëng nyang meu utang bak jihnyan deungon meubungöng. Peu kheueh ureuëng nyang lagée nyan udeb? Hana! Ureuëng ka jipeubuet bandum buet-buet nyang lumpah kuto nyan, dan jihnyan teuma maté! Maté ureuëng nyan na kheueh akibat buet-buet nyang jipeubuet lé ureuëng nyan keudroe. 14 Miseu jih lom ureuëng nyang peubuet buet nyang jeuhet nyan na jimeu aneuëk, dan aneuëk nyan jikalon bandum buet nyang jipeubuet lé ureuëng syiek jih, teuma aneuëk nyan hana jiseutôt lagée nyang jipeubuet lé ureuëng syiek jih nyan. 15 Aneuëk nyan hana jitem seumah beurala ureuëng Israel, atawa jipajoh keureubeuen peuseumahan di teumpat seumujoe dewa-dewa. Jihnyan hántom na jirayu peurumoh ureuëng laén, 16 atawa jiteugon dan jireupah soe mantong. Barang jaminan ureuëng nyang meu utang bak jihnyan sabe jijok pulang lagée sot teuma. Ureuëng nyang deuk jijok peunajoh dan ureuëng nyang hana peukayan jibri bajée. 17 Jihnyan hántom na jipeubuet jeuhet dan jipeu utang ureuëng laén deungon meubungöng. Jihnyan taát ubak huköm-huköm Lôn dan patuh ubak peurintah Ulôn. Aneuëk nyan hana maté ngon sabab desya-desya ayah jihnyan. Teuma teutab udeb. 18 Seubalek jih, ureuëng syiek jihnyan nyang galak keu buet teumipée, meurampok dan jipeubuet buet nyang jeuhet nyang laén, teuma maté ngon sabab desya-desya jih nyan keudroe. 19 Teuma na ureuëng nyang teumanyong pakon aneuëk nyan hana meusajan jitanggong akibat desya-desya ayah jihnyan. Jaweueb jih na kheueh lagée nyoe, sabab aneuëk nyan gét dan jujoe. Jihnyan taát ubak huköm-huköm Lôn dan jipeubuet bandum nyan deungon seutia, dan jihnyan teutab udeb. 20 Ureuëng nyang jipeubuet desya, ureuëng nyan kheueh nyang maté. Aneuëk hana harôh jitanggong akibat desya nyang jipeubuet lé ureuëng syiek jih; seubalek jih, ayah pi hana harôh jitanggong akibat nibak desya-desya nyang jipeubuet lé aneuëk jihnyan. Ureuëng nyang jroh meuteumé ganjaran nyang jroh sabab buet jihnyan nyang jroh. Dan ureuëng nyang jeuhet meudeurita akibat nibak buet jih nyang jeuhet nyan. 21 Meunyoe sidroe ureuëng jeuhet hana le jipeubuet desya, dan ka jipeuphon taát ubak huköm-huköm Lôn, dan jipeubuet buet-buet nyang gét dan beutôi, ureuëng nyan hana maté. 22 Bandum desya ureuëng nyan Lôn peuamphon; ureuëng nyan udeb, sabab jipeubuet nyang beutôi. 23 Peu kheueh tapike Ulôn, TUHAN Nyang Mahamanyang galak meunyoe ureuëng nyang jeuhet maté? Meubacut pih hana! Ulôn meuharab mangat ureuëng nyan jitinggai bandum desya-desya jihnyan mangat jihnyan teutab udeb. 24 Teuma meunyoe sidroe ureuëng nyang jroh hana jipeubuet le buet nyang jroh, teuma ka jipeuphon peubuet buet nyang jeuhet dan banmandum buet nyang luwat hán ék teukira, nyang lazém jih jipeubuet lé ureuëng jeuhet, peu kheueh jih teutab udeb? Hana! Nibak buet-buet jih nyang gét nyan, hana meusapeue pih teu ingat lom. Gobnyan maté sabab buet jih nyang meudesya dan hana seutia ubak Ulôn. 25 Mungken na nyang peugah lagée nyoe, 'Buet TUHAN nyan keuliru.' Deungoe kheueh, he ureuëng Israel! Peu kheueh keuliru tindakan Ulôn? Gata kheueh nyang keuliru. 26 Meunyoe ureuëng nyang jroh hana jipeubuet le nyang gét, teuma ka jipeuphon peubuet nyang jeuhet, gobnyan maté, sabab buet nyang jeuhet nyang ka jipeubuet lé gobnyan. 27 Teuma meunyoe ureuëng nyang jeuhet hana le jipeubuet desya teuma ka jipeuphon peubuet nyang beutôi dan gét, jaweueb jih na kheueh seulamat. 28 Ureuëngnyan ka sadar bandum salah jihnyan laju jipiôh jipeubuet desya. Deungon lagée nyan jihnyan hana maté, teuma teutab udeb. 29 Dan gata, he ureuëng Israel, gata peugah bahwa tendakan TUHAN nyan keuliru. Peu kheueh keuliru tendakan Ulôn, he Israel? Hana! Gata kheueh nyang keuliru!" 30 TUHAN Nyang Mahamanyang, meufeureuman, "He ureuëng-ureuëng Israel, Ulôn kupeusidang somantong ureuëng nyang paih deungon buet jih. Meutobat kheueh nibak desya-desya gata. Bék tapeubiyeu desya gata jipeuhanco droe gata keudroe. 31 Piôh laju bandum buet nyang jeuhet nyang gata peubuet dan bah kheueh até dan pikeran gata jeuet keu barô. Pakon gata harôh maté? 32 Ulôn hana galak meunyoe sidroe ureuëng maté. Tinggai kheueh bandum desya-desya gata jeuet gata teutab udeb. Ulôn, TUHAN Nyang Mahamanyang ka Lôn peugah haba."

Yehezkiel 19

1 Po teu Allah geuyue bak ulôn lôn peuca-e ratok nyoe keu dua droe pangeran Israel: 2 Ma gata lagée singa inong nyang hayeue dan luwa biasa. Gobnyan nyang peurayeuk aneuëk-aneuëk jih keudroe lamkawan singa-singa nyang peukasa. 3 Saboh lamkawan aneuëk jihnyan laju jipeurunoe pakriban cara jih teumita mangsa. Dan jeuet kheueh jihnyan keu singa raya nyang teugöm dan nyang pajoh manusia. 4 Bansa-bansa nyang deungoe keuhai jih nyan laju meugumpôi keu jijak drob singa raya nyan. Singa nyan laju jijeubak lam uruek óh lheuehnyan jidrob, laju jihue u nanggroe Meusé deungon ceunawiét. 5 Sia-sia mantong nang singa nyan jipreh-preh aneuëk; laju jiteupeue dan gadôh kheueh harapan keu aneuëk teucinta. Dan aneuëk jihnyan nyang laén jilateh lom jeuet keu singa nyang buih dan peukasa. 6 Aneuëk singa nyan ka jeuet keu rayeuk dan jimeurakan ngon singa-singa nyang laén. Laju jimeurunoe jimita mangsa, dan jeuet keu singa nyang makheun manusia. 7 Kuta-kuta laju jiheuntam, banda-banda jipeuhanco. Bandum peunduduek nanggroe yo meugám-gám jideungoe tauém singa nyan sampoe meugeunta. 8 Teuma bansa-bansa nyang lam wilayah keulileng nyan jiseureugab jihnyan rot meubagoe jurosan. Jicok ngon jeue laju jitiek keuneuk drob singa buih nyan, dan singa nyan pih meucarueh lam peurangkab awaknyan. 9 Laju jipeutamong lam uempueng singa, jiba laju u nanggroe Babel meuhadab raja. Singa nyan jijaga kong that mangat tauém jih bék teudeungoe le di ateueh bukét-bukét Israel nyang manyang. 10 Ma gata lagée bak anggô nyang ceudah nyang timoh di lampôh bak binéh aneuk krueng. Bak anggô nyan ka jeuet keu rampak dan jimuboh sabab ié disinan na meulimpah ruwah. 11 Cabeueng jih kong, hana mudah teuwiet gagah meunyoe teucok keu tungkat keurajeuen. Pucak jih manyang meulambong rab sampoe u dalam awan. Jihnyan jihoreumat lé bandum ureuëng sabab timoh jih manyang dan ôn jih rampak. 12 Teuma kayée nyan jibot lé jaroe-jaroe nyang beungéh, óh lheuehnyan jiseumpom ateueh tanoh. Watée jipot Angén Timu, sampoe habéh tho boh jih nyang gét. Cabeueng jih patah, ka jeuet keu tho laju teutot. 13 Jinoenyoe jihnyan teupula di padang pasie, bak tanoh nyang tho lom hana meu ié. 14 Bak anggô nyan laju jilieh lé apui hu nyang teungoh jimeu éue; cabeueng dan boh jih habéh tutong. Cabeueng jih jinoe hana teunaga; hana mungken teupeu jeuet keu tungkat keurajeuen. Nyan kheueh ratok nyang meu ulang-ulang nyang jipeu ca-e lé umat.

Yehezkiel 20

1 Bak tanggai siploh buleuen limong, bak thon nyang keutujoh masa kamoe teupeu aséng di teumpat nyang teuböih, na papa dub droe peumimpén Israel jijak meurumpok ubak ulôn keu jilakée peutunyok TUHAN. Óh ka lheueh awaknyan jiduek dikeue ulôn, 2 ulôn deungoe TUHAN meufeureuman ubak ulôn, 3 "He manusia fana, tapeugah kheueh ubak peumimpén-peumimpén nyan dan tapeugah laju bahwa Ulôn, TUHAN Nyang Mahamanyang geupeugah lagée nyoe, 'Tajeuet that gata lakée peutunyok ubak Ulôn! Deumi Ulôn, Allah nyang udeb, Ulôn hana kutem gata lakée peutunyok lé gata! Ulôn, TUHAN Nyang Mahamanyang ka Lôn peugah haba.' " 4 "He manusia fana, peu kheueh ka siab gata peusidang awaknyan? Dan, peubuet laju! Peu ingat kheueh bak awaknyan peue-peue mantong keukeujian nyang ka jipeubuet lé indatu awaknyan. 5 Peusampoe kheueh peue nyang Ulôn peugah nyoe. Ulôn ka Lôn piléh Israel dan Lôn baiát sumpah keu awaknyan. Di nanggroe Meusé, Ulôn peugah droe ubak awaknyan sira Lôn kheun, 'Ulôn kheueh TUHAN Allah gata.' 6 Bak watée nyan Ulôn meusumpah Lôn ba awaknyan u luwa nanggroe nyang Ulôn piléh keu awaknyan. Nanggroe nyan kaya dan subô, tanoh nyang paleng gét bansigom donya. 7 Ulôn yue awaknyan mangat jitiek banmandum patong-patong nyang lumpah luwat nyang awaknyan galak nyan, dan Ulôn tam awaknyan bék jijak peukuto droe deungon jiseumah beurala-beurala di Meusé, sabab Ulôn kheueh TUHAN Po teu Allah awaknyan. 8 Teuma awaknyan jilawan Ulôn dan hana jitem deungoe Ulôn. Awaknyan hana jitem böih patong-patong beurala nyang kutoe ngon luwat nyan dan meunan cit hana jitem piôh jiseumah beurala-beurala Meusé nyan. Bak watée awaknyan mantong disideh, Ulôn ka siab keuneuk peusampoe beungéh Ulôn keu awaknyan. 9 Teuma Ulôn hana Lôn peubuet, mangat nan Ulôn hana jihina lé bansa-bansa di teumpat awaknyan tinggai. Sabab dikeue bansa-bansa nyan, ka lheueh Ulôn peumaklum bahwa bansa Israel Lôn peuteubiet lam nanggroe Meusé. 10 Laju Ulôn ba awaknyan peuteubiet nibak nanggroe Meusé teujak u padang pasi. 11 Disinan Ulôn jok keu awaknyan peurintah-peurintah Ulôn dan Lôn peuruno bak awaknyan huköm-huköm Lôn nyang harôh awaknyan peubuet, sabab ureuëng nyang taát ubak huköm nyan teutab udeb. 12 Ulôn yue bak awaknyan mangat jihoreumat uroe Sabat sibagoe tanda peujanjian Ulôn ngon awaknyan, keuteupeu ingat bak awaknyan bahwa Ulôn kheueh TUHAN, ka Lôn peu khusos awaknyan keu Ulôn. 13 Teuma di padang pasi nyan cit teuma awaknyan jilawan Ulôn. Awaknyan ji iengkeue peue-peue nyang Ulôn peurintah, dan jitulak huköm-huköm nyang Ulôn bri nyang teujamin bahwa ureuëng nyang taát ubak huköm-huköm nyan teutab udeb. Awaknyan ka jipeukutoe that uroe Sabat. Sabab nyan, di padang pasi nyan Ulôn ka siab keuneuk Lôn peusampoe beungéh Ulôn nyang hana teukira brat jih keu awaknyan dan Lôn peuranab awaknyan banmandum. 14 Teuma bandum nyan hana Lôn peubuet deumi keuhoreumatan nan Ulôn, mangat nan Ulôn hana jihina lé bansa-bansa nyang ka jikalon Lôn peuteubiet bansa Israel di nanggroe Meusé. 15 Di padang pasi nyan cit Ulôn ancam bahwa bansa Israel hana Ulôn peutamong ubak tanoh nyang ka teukeubah keu awaknyan, tanoh nyang kaya dan subô dan nyang paleng gét bansigom donya. 16 Ancaman nyan Ulôn peugah sabab awaknyan jianggab remeh peu-peu nyang Ulôn peurintah, ji iengkeue huköm-huköm Lôn dan jipeukutoe uroe Sabat. Awaknyan leubeh galak jiseumah beurala-beurala jih keudroe. 17 Teuma óh lheueh nyan Ulôn wéueh keu awaknyan, sampoe awaknyan hana jadeh Ulôn poh di padang pasi nyan. 18 Sikeubit jih ureuëng-ureuëng muda nyang na lamkawan awaknyan Ulôn naseuhat lagée nyoe, 'Bék kheueh taseutôt peue-peue mantong peuratoran nyang jipeugét lé indatu gata. Bék taseutôt keubiasaan awaknyan dan bék teuma tapeukutoe droe gata keudroe deungon cara taseumah beurala-beurala awaknyan. 19 Ulôn kheueh TUHAN, Allah gata, taát kheueh ubak huköm-huköm dan peurintah Ulôn. 20 Horeumat kheueh keu uroe Sabat mangat jeuet keutanda peujanjian Ulôn deungon gata, mangat jeuet keu peuingat ubak gata bahwa Ulôn kheueh TUHAN Allah gata.' 21 Teuma angkatan muda nyan pih jipeu kreueh jungka keu Ulôn. Awaknyan ji iengkeue keu huköm-huköm Lôn dan jianggab kon bandum peue-peue nyang ka Ulôn peurintah keu jih nyan, Ulôn nyang jamin bahwa ureuëng nyang taát ubak huköm Lôn teutab udeb. Awaknyan jipeukutoe uroe Sabat. Sabab nyan kheueh Ulôn ka siab keuneuk peusak höéb ngon beungéh nyang hana ngon peusa keu awaknyan nyang na di padang pasi nyan dan Lôn poh maté awaknyan banmandum. 22 Teuma bandum nyan hana Lôn peubuet mangat nan Ulôn bék jihina lé bansa-bansa nyang ka jikalon Lôn peuteubiet bansa Israel lam nanggroe Meusé. 23 Dipadang pasi nyan cit teuma Ulôn meusumpah bahwa Ulôn Lôn peucrebre awaknyan bansigom donya, 24 sabab awaknyan ka jianggab hana peurintah-peurintah Ulôn, jilingkeue huköm-huköm Lôn, jipeukutoe uroe Sabat, dan teutab jiseumah dewa-dewa nyang jipujoe lé indatu awaknyan keudroe. 25 Óh lheueh nyan Ulôn jok ubak awaknyan huköm-huköm nyang hana gét dan peurintah-peurintah nyang hana hase teubri udeb. 26 Ulôn peubiyeu awaknyan jipeukutoe droe deungon keureubeuen-keureubeuen nyang jipeubuet keudroe, dan aneuëk-aneuëk agam jih keudroe nyang tuha pi awaknyan keureubeuen. Deungon cara nyan Ulôn huköm awaknyan mangat awaknyan jiteupeue bahwa Ulôn kheueh TUHAN. 27 Meunan kheueh, hé manusia fana, peutrok laju keu ureuëng Israel, peue nyang Ulôn, TUHAN Nyang Mahamanyang peugah ubak awaknyan: Nyoe cuntoh nyang laén nyang teutunyok pakriban indatu gata jihina Ulôn dan hana seutia ubak Ulôn. 28 Ulôn ba awaknyan bak tanoh nyang ka Lôn meujanji ubak awaknyan. Watée awaknyan jikalon bukét-bukét nyang manyang dan bak-bak kayée nyang rampak, awaknyan jipeuseumah keureubeuen bak teumpat nyan. Awaknyan jipeujeuet Ulôn beungéh sabab keureubeuen-keureubeuen nyang teutot dan peuseumahan anggô awaknyan. 29 Ulôn peugah ubak awaknyan, 'Teumpat-teumpat manyang peue nyang gata saweue nyan?' Dan phon uroenyan teumpat nyan geuboh nan 'Teumpat-teumpat manyang'. 30 Dan peusampoe kheueh ubak ureuëng Israel peue nyang Ulôn, TUHAN Po teu Allah Nyang Mahamanyang peugah ubak awaknyan. 'Pakon gata peubuet desya-desya lagée nyang ka jipeubuet lé indatu gata? Lagée awaknyan, gata taseutôt cit beurala-beurala nyang kutoe ngon luwat nyan. 31 Dan sampoe án uroenyoe pih gata peukutoe droe gata deungon cara gata ba peuseumahan dan tatot aneuëk-aneuëk gata keudroe sibagoe keureubeuen keu beurala-beurala. Dan mantong cit tajeuet lakée peutunyok nibak Ulôn? Deumi Ulôn, Po teu Allah nyang udeb, TUHAN Nyang Mahamanyang, gata hana Lôn idhin talakée peutunyok ubak Ulôn. 32 Gata keuneuk peusaban ngon bansa-bansa laén dan peunduduek nanggroe nyang jiseumah bak-bak kayée dan batée. Teuma keuheundak gata nyan hana meuhase.' " 33 "Deumi Ulôn, Allah nyang udeb, TUHAN Nyang Mahamanyang, gata Ulôn peuingat bahwa deungon beungéh Ulôn nyan, gata Lôn peurintah deungon kreueh dan teugaih sampoe gata rasa keudroe kuasa Ulôn. Gata Lôn peusapat dan Lôn ba lom u jeueb-jeueb nanggroe di teumpat gata nyang ka Ulôn peucrebre. 35 Laju gata Ulôn ba ubak 'Guron Bansa-bansa'. Disinan gata Ulôn peusidang meuhadab muka, 36 lagée nyan nyang ka Ulôn peubuet teuhadab indatu gata di Guron Sinai. Ulôn, TUHAN Nyang Mahamanyang ka Lôn peugah haba. 37 Gata Lôn peusaneut deungon gasa dan kreueh mangat gata taát ubak peujanjian Ulôn. 38 Bubena ureuëng beurontak dan ureuëng jeuhet Lôn peuaséng di teungoh-teungoh gata. Awaknyan Ulôn ba nibak nanggroe-nanggroe nyang jinoenyoe na awaknyan tinggai dan hana Lôn idhin jigisa u tanoh Israel. Teuma barô kheueh gata teupeue bahwa Ulôn kheueh TUHAN." 39 TUHAN Nyang Mahamanyang geupeugah, "He ureuëng-ureuëng Israel, jinoenyoe teuseurah ubak gata. Bék tapiôh tapeubuet desya deungon beurala-beurala gata! Teuma ingat kheueh bahwa óh ka lheueh nyan gata harôh tataát Ulôn dan hana le tapeukutoe nan Ulôn nyang suci deungon taba peuseumahan ubak beurala-beurala gata nyan. 40 Sabab di tanoh Israel, bak pucak gunong Ulôn nyang suci, gata bandum, bansa Israel taseumah Ulôn. Disinan Ulôn teuma galak keu gata dan Lôn tem teurimong keureubeuen-keureubeuen nyang gata peuseumah, peue-peue nyang gata peuseumah nyang paleng gét dan meuneubri-meuneubri gata nyang paleng khusos. 41 Óh ka lheueh gata Ulôn peuteubiet nibak nanggroe-nanggroe teumpat gata teupeu crebre, Ulôn Lôn peusapat gata dan Lôn teurimong bandum keureubeuen gata nyang teutot. Dan barô kheueh jiteupeue lé bandum bansa bahwa Ulôn kheueh Po teu Allah Nyang Mahakudus. 42 Meunyoe gata ka Ulôn peuwoe lom u tanoh Israel, tanoh nyang Ulôn peujanji keu indatu gata, barô kheueh gata teupeue bahwa Ulôn kheueh TUHAN. 43 Disinan gata teuingat bandum buet-buet nyang lumpah luwat dan kutoe nyang ka jipeukutoe droe gata keudroe. Dan gata bosan taingat bandum buet nyang jeuhet nyan. 44 Meunyoe gata ka Lôn peusaneut nyang lagée nyan deumi keuhoreumatan nan Ulôn, dan bukon sipadan deungon pi-e gata nyang brok meunan cit pi-e gata nyang jeuhet, tateupeue kheueh lé gata ureuëng Israel bahwa Ulôn kheueh TUHAN. Ulôn TUHAN Nyang Mahamanyang ka Lôn peugah haba." 45 TUHAN meufeureuman ubak ulôn, lagée nyoe, 46 "He manusia fana, takalon kheueh u siblaih seulatan. Teugaih kheueh tanoh seulatan dan beungéh kheueh bak uteuen-uteuen disinan. 47 Tayue kheueh bak uteuen nyang disinan peue nyang Ulôn, TUHAN Nyang Mahamanyang peugah keu awaknyan, 'Deungoe kheueh! Ulôn Lôn peuhu apui nyang jipeututong bandum bak kayée nyang na nibak gata, bah kheueh nyan kayée tho meunan cit deungon kayée udeb. Apui nyang hu meuhuéb-huébnyan hana hase teupeulon. Apui nyan jimeu éue nibak seulatan u utara, dan bandum manusia jirasa keu seu uém apui nyan. 48 Awaknyan sadar bahwa Ulôn, TUHAN ka Lôn peuhu apui nyan, dan hana meusidroe pi nyang hase peulon apui nyan.' " 49 Teuma ulôn Yehezkiel ulôn peugah hainyan hana lôn harök dan lôn peugah, "TUHAN Nyang Mahamanyang, bék tayue ulôn peugah hainyan! Bandum ureuëng ka apoh apah sabab ulôn galak lôn peugah haba deungon miseu umpama sampoe payah teupuphom."

Yehezkiel 21

1 TUHAN meufeureuman ubak ulôn, kheun Gobnyan, 2 "He manusia fana, kutôk kheueh Yerusalem. Kutôk kheueh teumpat-teumpat iébadat nyang na disinan. Peuingat kheueh tanoh Israel, 3 bahwa Ulôn, TUHAN, Lôn peugah lagée nyoe, 'Ulôn nyoe musoh gata. Ulôn Lôn suet peudeueng lam saröng dan Lôn cang bumaté gata bube nyang na, bah kheueh nyan nyang jeuhet meunan cit nyang jroh. 4 Deungon peudeueng Lôn kulawan bandum ureuëng di utara sampoe seulatan. 5 Dan bandum ureuëng jiteupeue bahwa Ulôn, TUHAN, Lôn suet peudeueng Lôn dan hana Lôn pasoe lam saröng le.' 6 He manusia fana, Meu óe-óe kheueh dan apoh apah kheueh dikeue ureuëng Israel, siulah-ulah gata patah até dan putôh asa. 7 Meunyoe awaknyan jitanyong pakon gata áh éuh, peugah kheueh laju bahwa gata seudeh sabab haba nyang teuma teuka. Deungon na haba nyan teuka yo lam até awaknyan, jaroe awaknyan leumoh, dan teuöt awaknyan yo meugám-gám, awaknyan patah seumangat. Keubit that watée jih ka teuka, dan bandum nyan teujadi. Ulôn TUHAN Nyang Mahamanyang ka Lôn peugah haba." 8 TUHAN meufeureuman ubak ulôn, 9 "He manusia fana, meuramai kheueh! Jak bri tée kheueh ubak dumna ureuëng bahwa Ulôn, TUHAN, Lôn peugah lagée nyoe, 'Na sikrak peudeueng, peudeueng nyang teugeusok dan teuasah. 10 Peudeueng nyan teuasah mangat jeuet teupeumaté peue nyang na, teu uet óh gleh mangat meukilat. Nibak umat Lôn hana le keugeumbiraan sabab bandum peu ingatan dan huköman awaknyan anggab hana. 11 Peudeueng nyan teuasah mangat siab óh watée teupeuguna laju jijok bak sidroe-sidroe ureuëng tukang seumeusie. 12 He manusia fana, meuratok kheueh dan tameuhôi kheueh! Sabab peudeueng nyan ka siab jilawan umat Lôn. Bandum peumimpén Israel meusajan silurôh bansa jitob lé peudeueng nyan sampoe binasa. Teuma tapéh kheueh dada gata ngon até nyang gulana, 13 sabab Ulôn teungoh Lôn ujoe umat Lôn, meunyoe awaknyan hán jitem ubah peurangoe, bandum nyan teujadi ateueh awaknyan.' 14 Nyan, he manusia fana, meuramai kheueh. Péh kheueh paleuet jaroe gata, sibagoe tanda keu peudeueng nyan keu teupeuphon seumeusie. Peudeueng nyan lumpah teumakot. 15 Peudeueng nyan ka jipeujeuet bansa Ulôn gadôh ceubeueh jih dan reubah meugantoh. Di Ulôn ancam banda awaknyan ngon peudeueng nyan nyang meuble-ble lagée kilat, dan nyang ka siab keu peumaté. 16 He peudeueng nyang tajam, ceumeucang kheueh u uneuen dan ublah wie, dan ho homantong nyang gata galak. 17 Ulôn Lôn péh cit paleuet jaroe, laju beungéh Ulôn seungab. Ulôn, TUHAN, ka Lôn peugah haba." 18 TUHAN meufeureuman ubak ulôn, kheun Gobnyan, 19 "He manusia fana, gamba kheueh dua boh rot nyang jeuet jijak lé raja Babel nyang teungoh jiba peudeueng gobnyan. Bandua boh rot nyan harôh meuuboe nibak nanggroe nyang saban; rot nyang saboh teutuju u Raba, banda Amon; nyang saboh teuk u Yerusalem, banda meu kuta di Yehuda. Peugöt kheueh papeuen peutunyok rot dipat rot nyan ka jipeuphon meucabeueng. 21 Raja Babel laju geudong bak papeuen peutunyok rot ueh nyan. Mangat jiteupeue rot nyang toh nyang harôh jijak, laju lé raja Babel nyan jilakée peutunyok bak beurala-beurala jihnyan, jiguncang panah dan jipeureksa até beulatang nyang ban lheueh jikeureubeuen. 22 Teunyata panah nyang teucok bak jaroe jihnyan teutunyok arah u Yerusalem! Nyan tanda jih raja harôh jiprang banda Yerusalem, jidumpék prang meuhubo dan jiyue sipa-i jihnyan mangat jisuson alat-alat peundobrak, geuyue pasang bak pintoe-pintoe geureubang Yerusalem, geuyue tamon tanoh jeuet keu kuta teukeupong dan geuyue khueh lhueng-lhueng. 23 Peunduduek Yerusalem hana jipeucaya bahwa awaknyan keunong seurang, sabab awaknyan ka jipeugét janji deungon Babel. Teuma ramaian nyoe teupeu ingat ubak awaknyan bahwa awaknyan teudrob ngon sabab desya-desya awaknyan keudroe. 24 Ulôn, TUHAN Nyang Mahamanyang Lôn peugah ubak awaknyan, 'Desya-desya gata ka teuteupeue dan bandum ureuëng jiteupeue bahwa gata meusalah. Keujeuhetan gata nyan leumah bak tieb-tieb buet gata. Jinoenyoe ka trok watée jih gata teuhuköm dan gata Lôn seurah ubak musoh gata.' 25 Dan ubak raja Israel Ulôn peugah, 'He raja nyang jeuhet dan doraka! Watée keu teuhuköm gata nyang keuneulheueh ka tô that. 26 Ulôn, TUHAN Nyang Mahamanyang ka Lôn peugah haba. Peuhah kheueh mahkota gata dan peulheueh kheueh seureuban gata. Jinoenyoe, keuadaan ka meu ubah. Beuôt kheueh keududuekan ureuëng gasien dan bri kheueh bak awaknyan kuasa! Peutron kheueh dumna peunguasa nibak martabat jih! 27 Banda nyoe Lôn peuhanco sapan sapa, sampoe dipat mantong na rungka-rungka. Teuma hainyan barô kheueh teujadi meunyoe ureuëng nyang Ulôn piléh keu teuhuköm banda nyoe ka teuka. Keu ureuëng nyan Ulôn jok banda nyoe.' " 28 "He manusia fana, meuramai kheueh! Jak peugah kheueh ubak ureuëng Amon nyang ka jihina Israel, bahwa Ulôn, TUHAN Nyang Mahamanyang Lôn peugah, 'Sipucok peudeueng ka siab keu teumeucang; peudeueng nyan ka teuasah meuble-ble lagée kilat, mangat jeuet siab keu teupeumaté. 29 Nyang deuh gata ngieng nyan na kheueh peuleusu, dan ramaian nyang gata peugah nyan na kheueh buhak dan sulet. Gata jeuhet dan doraka, dan saát keu teuhuköm gata nyang keuneulheueh ka tô that. Peudeueng nyan jikoh takue gata. 30 He ureuëng Amon, peutamong kheueh peudeueng gata nyan dalam saröng! Gata Lôn peusidang di teumpat gata teucebta dan teupeulahé. 31 Ulôn Lôn peulheueh u ateueh gata beungéh Ulôn nyang hana ngon peusa. Dan gata Ulôn jok ubak ureuëng-ureuëng keujam nyang ka teulateh keu jipeubinasa. 32 Gata habéh tutong jipajoh lé apui. Darah gata rô di nanggroe gata keudroe, dan hana meusidroe pih nyang na mantong teuingat keu gata. Ulôn, TUHAN ka Lôn peugah haba.' "

Yehezkiel 22

1 TUHAN meufeureuman ubak ulôn, kheun Gobnyan, 2 "He manusia fana, peu kheueh ka siab gata tapeusidang banda nyang peunoh deungon ureuëng peumaté jihnyan. Tunyok kheueh ubak jihnyan bandum buet jihnyan nyang kutoe dan luwat nyan." 3 TUHAN Nyang Mahamanyang geuyue bak ulôn jak peusampoe nyang lagée nyoe ubak Yerusalem, "Gata meusalah sabab ka ta poh maté jai that nibak peunduduek gata keudroe, dan ka teupeukutoe droe gata deungon cara teuseumah beurala-beurala nyang gata peugét keudroe, sabab nyan kheueh watée teuhakém gata ka tô that dan riwayat gata sigra meu akhé. Gata Ulôn peubiyeu jeuet keu bahan hinaan dan jipeukém lé bansa-bansa dan bandum nanggroe. 5 Gata jipeukém-peukém dan jihina lé nanggroe-nanggroe nyang jiôh dan tô sabab gata hana piôh-piôh taiengkeue ubak huköm dan peuratoran. 6 Banmandum peumimpén Israel nyang jipeubangga na kheueh teunaga jih keudroe dan jipeubuet seumeupoh maté teuhadab ureuëng laén. 7 Hana meusidroe pih nibak peunduduek gata geuhoreumat ureuëng syiek jih. Gata tatipée ureuëng aséng dan tacok laba nibak keususahan inong balée dan aneuëk yatim ngon muntui. 8 Teumpat-teumpat iébadat keu Ulôn gata peukutoe dan uroe Sabat hana gata pakoe. 9 Lamkawan peunduduek gata na ureuëng-ureuëng ba peusuna nyang galak that bak buet peusuna keu ureuëng laén mangat ureuëng nyang keunong peusuna nyan teuhuköm maté. Na teuma nyang pajoh uengkot sie nyang ka teukeureubeuen keu beurala. Na lom nyang galak jipeubuet mukah. 10 Na nyang jigoda dan jimeumukah ngon ma uei jih, na cit ngon ureuëng inong nyang teungoh teuka he, 11 peurumoh ureuëng laén atawa ngon meulintée jih atawa adoe jihnyan nyang laén ma. 12 Na teuma nyang jeuet keu ureuëng peumaté gob cara teubayeue, lintah darat dan nyang pajoh ureuëng-ureuëng seubansa jih keudroe. Awaknyan banmandum ka jituwoe keu Ulôn. Ulôn, TUHAN Nyang Mahamanyang ka Lôn peugah haba. 13 Teuma bak saát nyoe Ulôn Lôn heuntam bube na peurampok dan tukang peumaté gob. 14 Peu kheueh mantong tajeuet atawa mantong teuga gata keu tabeuôt jaroe gata óh ka lheueh seuleusoe Lôn huköm gata? Ulôn, TUHAN Nyang Mahamanyang ka Lôn peugah haba dan Ulôn Lôn peubuet peue nyang ka Ulôn peugah. 15 Ulôn Lôn peucrebre peunduduek gata u jeueb-jeueb nanggroe dan bansa, dan Ulôn Lôn peupiôh buet gata nyang jeuhet nyan. 16 Gata jihina lé bansa-bansa laén, dan barô kheueh gata teupeue bahwa Ulôn kheueh TUHAN." 17 TUHAN meufeureuman ubak ulôn, 18 "He manusia fana, ureuëng-ureuëng Israel nyan hana meuguna nibak Ulôn. Awaknyan ibarat bröh logam nyang meujampu, lagée teumaga, timah, beuso dan timah itam nyang na leubeh óh ka lheueh pirak teupeu gleh didalam apui. 19 Dan bak watée nyoe, Ulôn, TUHAN Nyang Mahamanyang, Ulôn peugah ubak awaknyan bahwa awaknyan saban lagée logam nyang hana meuguna nyan. Lagée toh rabok pirak, peurunggu, beuso, timah itam dan timah putéh teupeutamong lam sinungkée apui keu teupeu gleh, meunan cit teuma awaknyan Lôn peusapat dan Ulôn ba u Yerusalem. Beungéh Ulôn nyang luwa biasa nyan Lôn peuhanco awaknyan lagée apui jipeuhanco rabok-rabok logam. 21 Nyoe, Ulôn Lôn peusapat awaknyan di Yerusalem, Lôn peuhu apui beungéh Ulôn dimiyueb awaknyan, sampoe awaknyan hanco meudeudak. 22 Lagée pirak nyang teupeuhanco lam sinungkée apui, meunan kheueh awaknyan teupeuhanco di Yerusalem. Dan barô kheueh jiteupeue lé awaknyan bahwa Ulôn, TUHAN, ka Lôn peulheueh beungéh Ulôn ateueh awaknyan." 23 TUHAN meufeureuman lom ubak ulôn, kheun Gobnyan, 24 "He manusia fana, jak peugah ubak ureuëng Israel bahwa tanoh droe jih nyan kutoe, dan sababnyan Ulôn beungéh dan Lôn huköm. 25 Bubena peumimpén awaknyan lagée singa nyang teuma uém óh ka lheueh jiteugöm mangsa. Awaknyan tukang peumaté rakyat, jireupah bandum hareuta dan keukayaan nyang jiteumé sabab nyan le lumpah na ureuëng inong nyang jeuet keu balée. 26 Bandum teungku imeum Israel jilingkeue ubak huköm-huköm Lôn dan jipeukutoe bandum beunda nyang teupeu khusos keu Ulôn. Awaknyan hana jibeda nyang toh nyang haleue dan nyang toh teuma nyang hareuem. Meunan cit awaknyan hana jipeurunoe rakyat mangat jipeubeda nyang toh nyang gleh dan nyang toh teuma nyang kutoe meunurot peuratoran agama. Awaknyan hana jipeureumeun keu uroe Sabat. Deungon lagée nyan Ulôn ka jihina lé bansa Israel. 27 Peujabat-peujabat peumeurintah awaknyan lagée srigala nyang jipriek priek mangsa jih. Awaknyan jipeumaté manusia simata-simata jimita untông. 28 Bandum nabi jisöm-söm bubena desya-desya nyan; awaknyan lagée ureuëng cét bintéh beuton nyang kuto. Keumalon-keumalon awaknyan peuleusu, meunan cit deungon ramaian-ramaian awaknyan hana beutôi. Awaknyan meungaku bahwa peusan nyang awaknyan peusampoe na kheueh meuasai nibak TUHAN Nyang Mahamanyang, padahai Ulôn meubacut pih hana Lôn peugah haba bak awaknyan. 29 Ureuëng-ureuëng kaya jitipée gob meurampok. Awaknyan jipeubuet ateueh ureuëng gasien ban galak droe dan jicok laba bak ureuëng aséng. 30 Lamkawan ureuëng Israel nyan, Ulôn mita ureuëng nyang carông jipeudong bintéh beuton, atawa jidong bak teumpat-teumpat nyang bintéh beuton jih reuloh keu teupeuteun nanggroe nyan meunyoe Ulôn keuneuk peuhanco lam ju meudok-dok beungéh Ulôn; teuma hana meusidroe pih nyang meurumpok ngon Lôn. 31 Sabab nyan bak saátnyoe Ulôn peulheueh beungéh Ulôn nyan ateueh awaknyan, dan lagée apui Ulôn peubinasa awaknyan ngon bandum buet awaknyan. Ulôn TUHAN Nyang Mahamanyang ka Lôn peugah haba."

Yehezkiel 23

1 TUHAN meufeureuman ubak ulôn, kheun Gobnyan, 2 "He manusia fana, na dua droe ureuëng inong, adoe aduen. 3 Yoh masa muda, awaknyan tinggai di nanggroe Meusé. Di nanggroe Meusé nyan awaknyan bandua ka gadôh peurawan, laju awaknyan jeuet keu inong lunte. 4 Nyang tuha nan jih Ohola; jihnyan teupeulambang keu Samaria. Adoe jih teuhôi nan Oholiba; jihnyan teupeulambang keu banda Yerusalem. Ulôn meukawen ngon awaknyan laju meuteumé aneuëk bak bandua inong nyan. 5 Bahpi Ohola ka jeuet keu peurumoh Lôn, jihnyan teutab meulunte, dan that-that gurangsang jipeutimang geunaséh-geunaséh jih di Asyur. 6 Awaknyan na kheueh tantra nyang sok peukayan seuragam mirah ungu, ureuëng bansawan dan peujabat-peujabat manyang; bandum nyan na kheueh peuwira-peuwira pasokan meuguda nyang ruman jih gagah-gagah. 7 Deungon ureuëng-ureuëng rayeuk nyan kheueh Ohola meumukah. Lom teuma that-that gurangsang beureuhi inong nyan, jipeukutoe teuma droe jih deungon jiseumah beurala-beurala nyang jiseumah lé awaknyan. 8 Inong nyan teutab hana jipiôh jipeubuet jeuhet lagée nyang ka jipeubuet di nanggroe Meusé, diteumpat inong nyan gadôh peurawan jih. Yoh masa ubit jih, inong nyan ka jipeuéh dan jipeusaneut lagée inong meumukah. 9 Sabab nyan kheueh Ulôn jok jihnyan ubak geunaséh-geunaséh jih, ureuëng-ureuëng Asyur nyang lumpah jirindu nyan. 10 Jihnyan jipeulon lé awaknyan deungon gasa, laju jipoh maté ngon peudeueng, dan aneuëk-aneuëk inong nyan jireupah. Dipat mantong naseb inong nyan jeuet keu boh bibie kawöm hawa. 11 Oholiba, adoe inong nyan jikalon keujadian nyan, teuma jihnyan leubeh meunafeusu jipeubuet mukah nyan nibak Ohola. 12 Meunan cit di Oholiba gét that jimeuharab ubak ureuëng-ureuëng Asyur nyan, na kheueh peumuda-peumuda gagah nibak pasokan meuguda, ureuëng bansawan dan peujabat manyang, dan sipa-i nyang sok seuragam mirah ungu nyan. 13 Ulôn ngieng keudroe bahwa Oholiba paleng jeuhet, saban lagée poda jih. 14 Maken treb Oholiba seumaken beujat. Jihnyan lumpah teutarek ubak gamba-gamba nyang meu uke nibak bintéh, dan nyang teuwareuna deungon cét lagée darah mirah. Gamba-gambanyan teupeulambang peuwira-peuwira Babel deungon talo keuieng nyang ceudah dan seureuban nyang meujuntée. 16 Watée Oholiba jikalon gamba-gamba nyan, laju teuka beureuhi dan gurangsang jihnyan luwabiasa dan jihnyan laju jikirém undangan ubak peuwira-peuwira nyan di Babel. 17 Dan teuka kheueh awaknyan dan jiéh ngon inong nyan. Awaknyan jinoda inong nyan luwabiasa sampoe inong nyan teuka luwat keu awaknyan. 18 Óh lheueh nyan deungon trang-trang inong nyan jimeujinah dan jimeumukah sira jipeukalon droe dikeue ureuëng ramé. Ulôn luwat that Lôn kalon inong nyan, saban cit lagée Ulôn luwat keu poda jih. 19 Maken treb maken kayém jipeubuet mukah, hana beuda jih yoh jihnyan jimeumukah yoh inong nyan mantong di nanggroe Meusé. 20 Inong nyan lumpah beureuhi keu ureuëng agam nyang ju nafeusu gurangsang jih, dan nyang geujolak nafeusu beureuhi jih sabe rayeuk lagée nafeusu guda agam. ( 21 He Oholiba, gata keuneuk ulang lom buet jeuhet nyan nyang gata peubuet yoh gata mantong muda, watée ureuëng Meusé meucumbu rayu deungon gata.)" 22 TUHAN Nyang Mahamanyang meufeureuman, "He Oholiba, gata ka bosan deungon geunaséh-geunaséh gata, teuma Ulôn Lôn peusuna awaknyan jeuet awaknyan beungéh keu gata dan jikeupong gata. 23 Ulôn kugumpôi dan Ulôn ba bandum geunaséh gata nyang na di Babel, Pekod, Soa, Koa, Asyur, meunan cit deungon ureuëng-ureuëng Kaldea. Ulôn ba keu gata peumuda-peumuda gagah nyang meupangkat manyang, bansawan, peujabat peunteng dan peuwira-peuwira pasokan meuguda. 24 Awaknyan jijakprang gata rot utara deungon tantra nyang raya, deungon geuritan-geuritan prang dan geuritan nyang ba beukai. Deungon teulindong ngon peurisai dan tupi-tupi waja, awaknyan jikeupong gata. Teuma Lôn peubiyeu awaknyan jihuköm gata meunurot huköm-huköm nyang na bak awaknyan keudroe. 25 Sabab Ulôn beungéh keu gata, Lôn peubiyeu awaknyan jipeubuet ateueh gata deungon keujam. Idong dan ôn punyueng gata awaknyan koh dan aneuëk-aneuëk gata jicok dan jitot udeb-udeb. 26 Gata jipeulon dan piasan-piasan gata jireupah. 27 Meunan kheueh Ulôn kupeupiôh nafeusu beureuhi gata dan bandum buet mukah nyang ka gata peubuet yoh phon gata mantong di nanggroe Meusé. Gata hana meuharab le ubak beurala toh mantong atawa teuingat ubak Meusé." 28 TUHAN Nyang Mahamanyang meufeureuman, "Ulôn Lôn seurah gata ubak ureuëng-ureuëng nyang paleng gata luwat dan nyang gata banci. 29 Sabab awaknyan banci keu gata, bandum hase jeureh payah gata jireupah lé awaknyan. Gata jitinggai teulon bulat hana meuija meusiurat beuneueng lagée inong lunte nyang jitonton lé ureuëng ramé. Nafeusu beureuhi dan buet cabui gata nyan kheueh 30 nyang peuteuka hase nyang brok nyoe keu gata. Gata jeuet keulunte keu bansa-bansa, dan tapeukutoe droe gata deungon beurala-beurala awaknyan. 31 Gata taseutôt pi-e poda gata, lé sabab nyan gata Ulôn huköm deungon huköman nyang saban." 32 TUHAN Nyang Mahamanyang meufeureuman, "Asoe cangkie poda gata harôh gata jieb. Cangkie nyan raya dan lhok. Asoe cangkie nyan peunoh meu asoe ejekan dan hinaan, nyang harôh gata tanggong nibak tieb-tieb ureuëng. 33 Cangkie poda gata Samaria, asoe jih teumakot dan hanco nyang hana teukira. Óh ka lheueh gata jieb bandum asoe jih gata mabök dan meudeurita. Dan deungon péng-péng cangkie nyang beukah meurabok nyan gata tapriek-priek dada gata. Ulôn, TUHAN Nyang Mahamanyang ka Lôn peugah haba." 35 TUHAN Nyang Mahamanyang meufeureuman, "Sabab gata ka tuwoe bak Ulôn dan tapeulikot Ulôn, gata meudeurita akibat nafeusu beureuhi gata dan lunte gata." 36 TUHAN meufeureuman ubak ulôn, "He manusia fana, peu kheueh ka siab teupeuhuköm Ohola dan Oholiba? Sapa kheueh awaknyan keuhai keujeuhetan nyang ka awaknyan peubuet. 37 Awaknyan ka jipeubuet meumukah dan jipeumaté gob; awaknyan ka jimeumukah ngon beurala-beurala dan jipoh maté aneuëk-aneuëk Ulôn nyang awaknyan peulahé. Aneuëk-aneuëk nyan ka awaknyan peuseumah ubak beurala-beurala awaknyan. 38 Dan bukon nyan mantong. Awaknyan ka teuma jipeukutoe Baét Ulôn dan uroe Sabat nyang ka Lôn peuteutab nyan. 39 Bak uroe awaknyan jipeumaté aneuëk-aneuëk Ulôn dan jipeuseumah keu beurala-beurala, bandua droe aduen adoe nyan geuteuka u Baét Lôn dan laju jipeukutoe Baét Ulôn nyan! 40 Dan awaknyan jikirém undangan keu ureuëng-ureuëng agam di nanggroe nyang jiôh, dan ureuëng nyang teu undang nyan laju jiteuka. Keu teusambot jamé nyang teu undang nyan, bandua adoe aduen nyan laju jimanoe, jiboh cilak mata sira jingui piasan-piasan. 41 Laju awaknyan jiduek ateueh teumpat duek nyang ceudah. Dikeue jihnyan na saboh meuja hidangan nyang peunoh deungon meubagoe rupa peunajoh, hana keutinggalan dupa dan minyéuk zaiton nyang ka Ulôn jok keu awaknyan. 42 Di luwa teudeungoe su ureuëng ramé nyang lumpah subra teungoh jipeupueh até ban galak droe. Ureuëng-ureuëng nyan ka ji undang jeuet jiteuka nibak padang pasi. Awaknyan jipeusök gleueng bak jaroe ureuëng inong adoe aduen nyan, dan jipeuseuôn mahkota-mahkota nyang lagak ateueh ulée awaknyan. 43 Laju Lôn pike, 'Peu kheueh mantong jitem awaknyan geumeuén cinta ngon inong jeuhet nyang ka layée sabab buet meumukah nyan?' 44 Ngon cara meugantoe-gantoe awaknyan jijak ubak Ohola dan Oholiba, bandua inong lunte nyang ka beujat nyan. 45 Teuma, ureuëng-ureuëng saléh geupeu huköm ureuëng inong adoe aduen nyan ateueh dasai buet meumukah dan seumupoh maté, sabab awaknyan biet-biet meusalah." 46 TUHAN Nyang Mahamanyang meufeureuman, "Jak tawök kheueh laju saboh kawan ureuëng mangat jijak reupah dan jiseksa bandua ureuëng inong lunte nyan. 47 Bah kheueh awaknyan jigeulawa ngon batée dan jicang deungon peudeueng. Bah kheueh aneuëk-aneuëk awaknyan jitak-tak dan rumoh-rumoh awaknyan jitot. 48 Bansaboh nanggroe Lôn peuhanco bandum buet-buet nyang jeuhet lagée nyan. Tendakan Ulôn nyan jeuet keu peuingat keu bandum ureuëng inong mangat bék jipeubuet jeuhet lagée dua droe inong adoe aduen nyan. 49 He Ohola dan Oholiba, ulôn kuhuköm gata sabab gata meumukah dan taseumah beurala. Dan barô kheueh gata teupeue bahwa Ulôn kheueh TUHAN Nyang Mahamanyang."

Yehezkiel 24

1 Bak tanggai siploh, buleuen siploh, bak thon nyang keu sikureueng lam masa kamoe geuböih u teumpat aséng, TUHAN meufeureuman ubak ulôn, 2 "He manusia fana, cetet kheueh tanggai uroe nyoe, sabab uroenyoe raja Babel geupeuphon keupong Yerusalem. 3 Ulôn, TUHAN, na saboh miseu keu tapeusampoe ubak umat Lôn nyang galak beurontak: Leng laju ié u dalam ayan peuduek laju ateueh apui. 4 Peutamong laju eungkot sie lam ayan nyan sie nyang paleng gét mutu jih; asoe bahô dan asoe pa meunan cit ngon tuleueng-tuleueng nyang le sumsum jih. 5 Peuguna kheueh uengkot sie bubiri nyang teumbon dan muda tamah kheueh peuseudiaan kayée apui. Bah kheueh ju dan meubok-bok ié jih reuboh kheueh uengkot sie nyan meunan cit ngon tuleueng-tuleueng jih." 6 TUHAN Nyang Mahamanyang meufeureuman, "Ceulaka kheueh banda nyang peunoh deungon ureuëng poh peumaté manusia! Bandanyan lagée beulangöng meugeuratan nyang hántom na teu uet. Uengkot sie nyang ka na lam nyan teupeuteubiet sikrak-krak, sampoe hana meusikrak pi nyang na tinggai. 7 Di banda nyan teujadi ureuëng poh gob sampoe maté, teuma darah ureuëng nyang keunong poh nyan hana rô ateueh bumoe, teuma ateueh batée kreueh, sampoe hana hase teuseubée. 8 Darah nyan Ulôn peubiyeu disinan sampoe leumah teukalon dan teutueng bila." 9 TUHAN Nyang Mahamanyang meufeureuman, "Ceulaka kheueh banda nyang peunoh ngon tukang peumaté manusia nyan! Ulôn keudroe nyang atoe kayée mangat Lôn tot. 10 Tamah kheueh kayée jih! Kipah kheueh apui jih! Rebôh kheueh asoe jih! Jak tiek kheueh kuah jih. Tot kheueh tuleueng-tuleueng jih! 11 Jinoenyoe keubah kheueh kanöt peurunggu nyang soh nyan ateueh apui dan bah kheueh disinan sampoe tutong dan hu mirah meubara. Óh lheueh geuratan jih tutong, beulangöng nyan gleh lom meunurot peuratoran agama. 12 Teuma hana bandum geuratan jih habéh jipajoh lé apui. 13 He Yerusalem, buet-buet gata nyang jeuhet dan beujat nyan ka tapeukutoe badan gata keudroe. Ulôn ka Lôn ujoe Lôn peugleh gata, teuma hana meuguna, sabab gata teutab kutoe. Gata hana gleh le sampoe Ulôn peulheuh beungéh Ulôn u ateueh gata. 14 Ulôn, TUHAN Nyang Mahamanyang ka Lôn peugah haba. Ka trok saát jih nibak Ulôn keu meutindak. Ulôn hana Lôn tuwoe keu desya gata dan hana teuma Lôn peu amphon dan Lôn gaséh gata. Gata Lôn huköm nyang sisuai deungon buet gata. Ulôn, TUHAN Nyang Mahamanyang ka Lôn peugah haba." 15 TUHAN meufeureuman ubak ulôn, "He manusia fana, deungon meudadak Ulôn cok ureuëng nyang paleng gata cinta. Teuma digata hana jeuet tameuratok tamo ba-e, atawa tapeubiyeu ié mata gata meuleng-leng. 17 Bék sampe mo gata nyang meusök-meusök nyan teudeungoe uluwa. Bék kheueh watée tajak hana tatôb ulée, atawa hana meulapek gaki, sibagoe ureuëng nyang meukabong, bék teuma gata tôb muka gata, dan bék tapajoh ruti meukabong." 18 Ban seuboh that Ulôn mariet ngon bansa nyan dan watée malam peurumoh Ulôn meuninggai donya. Óh singoh beungoh laju Ulôn peubuet peue nyang ka geupeurintah ubak Ulôn. 19 Rakyat jiteumanyong, "Pakon Bapak peubuet lagée nyoe? Peue guna jih keu kamoe?" 20 Laju ulôn peugah ubak awaknyan, "TUHAN geuyue bak ulôn 21 geuyue jak peugah peusan nyoe ubak gata: Gata tapeubangga teunaga Baét TUHAN. Gata galak tapandang dan tasaweue sabe, teuma TUHAN geupeukutoe rumoh Gobnyan. Dan anggota-anggota keuluwarga gata nyang mantong muda, nyang na tinggai di Yerusalem, teuma jipoh maté dimideuen prang. 22 Laju gata tapeubuet lagée nyang lôn peubuet bak saát nyoe. Gata hana tatôb muka gata atawa tapajoh ruti meukabong. 23 Gata hana tajak ngon hana teutôb ulée atawa meulapek gaki, hana meuratok atawa tamo ba-e. Gata seumaken meurana sabab desya-desya gata; gata apoh apah keudroe keu ureuëng laén. 24 Dan ulôn, Yehezkiel jeuet keucuntoh nibak gata; gata teuma tapeubuet lagée nyang ulôn peubuet bak saát nyoe. TUHAN geupeugah bahwa meunyoe hainyoe teujadi, gata tateupeue bahwa Gobnyan kheueh TUHAN Nyang Mahamanyang." 25 TUHAN meufeureuman ubak ulôn, "Nyan, he manusia fana, Ulôn cok nibak awaknyan Baét Ulôn nyang kong nyan, nyang ka jeuet keubanggaan dan keuseunangan awaknyan, dan nyang awaknyan pandang dan jisaweue ngon galak até. Laju Lôn cok cit teuma aneuëk-aneuëk awaknyan. 26 Bak uroe Ulôn peubuet hai nyang lagée nyan, sidroe nyang hase teupeusie nibak keubinasaan nyan teuma teuka, dan geupeusampoe haba nyan ubak gata. 27 Bak uroenyan cit teuma gata jeuet tapeugah haba lom dan hana kalu le. Laju gata tamariet deungon ureuëng nyan. Meunan kheueh gata jeuet keutanda keu awaknyan; dan barô kheueh jiteupeue lé awaknyan bahwa Ulôn kheueh TUHAN."

Yehezkiel 25

1 TUHAN meufeureuman ubak ulôn, 2 "He manusia fana, kutok kheueh nanggroe Amon. 3 Yue kheueh bak bansa nyan peue nyang Ulôn, TUHAN Nyang Mahamanyang peugah ubak awaknyan, 'Gata galak takalon Baét Ulôn jipeukutoe dan tanoh Israel jipeurusak dan bansa Yahudi jiböih u teumpat aséng. 4 Lé sabab nyan gata Lôn peubiyeu jipeutaloe lé sukée-sukée bansa nibak guron timu. Awaknyan jipeudong khimah-khimah di nanggroe gata laju teutab tinggai disinan. Awaknyan jipajoh boh-boh kayée dan jijieb ié susu beulatang peulara gata. 5 Banda Raba Lôn ubah jeuet keu teumpat rabe unta, dan bansaboh nanggroe Amon Lôn peujeuet keu teumpat rabe bubiri. Dan barô kheueh gata teupeue bahwa Ulôn kheueh TUHAN.' " 6 TUHAN Nyang Mahamanyang meufeureuman, "Gata tapéh peleut jaroe sira meulikak ria. Gata anggab phui tanoh Israel. 7 Lé sabab nyan gata Lôn peujok ubak bansa-bansa nyang le nyang rampok dan reupah bandum atra milék gata. Gata Lôn peubinasa lagée nyan bagoe, sampoe hana le jeuet keu saboh bansa dan hana teuma na nanggroe keudroe. Dan neuteupeue kheueh lé gata bahwa Ulôn kheueh TUHAN." 8 TUHAN Nyang Mahamanyang meufeureuman, "Moab jipeugah bahwa Yehuda nyan saban cit lagée bansa-bansa laén. 9 Lé sabab nyan banda-banda nyang jipeuteun bataih nanggroe Moab Lôn peubiyeu jiprang lé musoh meunan cit deungon banda-banda nyang paleng ceudah, banda-banda nyan na kheueh: Bet-Yesimot, Baal-Meon dan Kiryataim. 10 Ulôn kupeubiyeu sukée-sukée bansa di guron Timu jipeutaloe Moab meusajan ngon nanggroe Amon, sampoe Moab ka hana le jeuet keu saboh bansa. 11 Ulôn kuhuköm Moab, dan barô kheueh jiteupeue lé awaknyan bahwa Ulôn kheueh TUHAN." 12 TUHAN Nyang Mahamanyang meufeureuman, "Bansa Edom ka jipeubuet salah nyang paleng raya sabab ka jipeubuet keujam ateueh bansa Yehuda, sabab jibalah dam. 13 Sababnyan Ulôn peumaklum bahwa Ulôn kuhuköm Edom dan Lôn peumaté tieb-tieb manusia dan bubena beulatang nyang na disinan. Bansaboh nanggroe nyan, phon di banda Téman sampoe trok u banda Dedan, Ulôn peujeuet seungue seungab; rakyat nyang na disinan maté dimideuen prang. 14 Bansa Ulôn Israel Ulôn peuguna keu teubalah dam ateueh Edom, dan Edom teupeusaneut deungon dahsyat nyang sipadan ngon beungéh Ulôn. Edom jiteupeue pakriban rasa jih jeuet keusasaran beungéh Ulôn. Ulôn, TUHAN Nyang Mahamanyang ka Lôn peugah haba." 15 TUHAN Nyang Mahamanyang meufeureuman, "Ureuëng-ureuëng Filistin ka jibalaih dam deungon keujam ateueh musoh treun meutreun awaknyan dan jipeubinasa awaknyan deungon peunoh banci. 16 Sababnyan Ulôn peumaklum Lôn prang ureuëng-ureuëng Filistin dan Lôn peuranab awaknyan. Tieb-tieb ureuëng nyang na mantong tinggai di sitot binéh panté Filistin Lôn poh maté. 17 Ulôn kuhuköm awaknyan deungon brat dan Lôn peulheuh dam Lôn sampoe puih. Meunyoe awaknyan jirasa beungéh Ulôn, jiteupeue kheueh lé awaknyan bahwa Ulôn kheueh TUHAN."

Yehezkiel 26

1 Bak tanggai sa buleuen teuteuntée bak thon keu siblaih masa kamoe teuböih, TUHAN meufeureuman ubak ulôn, kheun Gobnyan, 2 "He manusia fana, peunduduek Tirus ka meusurak-surak sira jipeugah, 'Yerusalem ka hanco! Meugah banda nyan lamhai meuniaga ka hana le! Banda nyan ka hana jeuet le keusiteru tanyoe!' " 3 TUHAN Nyang Mahamanyang meufeureuman, "Ulôn nyoe musoh gata, he Tirus! Ulôn Lôn ba bansa nyang le mangat jijak prang gata, dan awaknyan teuka lagée umbak ié di laôt. 4 Awaknyan jipeuhanco bintéh-bintéh beuton gata dan jipeureubah bubena meunara gata. Bandum tanoh nyang na disinan Lôn sampôh akhéji nyang tinggai na kheueh sianeuk batée tho di teungoh laôt. 5 Bubena neulayan jiadée jeue ateueh batée nyan. Ulôn TUHAN Nyang Mahamanyang ka Lôn peugah haba. Tirus teuma jeuet keu uempeun lé bansa-bansa nyang le. 6 Awaknyan jireupah dan jipoh maté bube nyang na peunduduek di banda-banda ateueh tanoh darat Tirus. Dan barô kheueh jiteupeue lé peunduduek Tirus bahwa Ulôn kheueh TUHAN." 7 TUHAN Nyang Mahamanyang meufeureuman, "Ulôn kuba Raja Nebukadnezar di nanggroe Babel mangat jijak prang gata, he Tirus. Raja nyang paleng teuga nyan teuka rot utara deungon tantra nyang raya, deungon guda nyang le dan geuritan-geuritan prang meunan cit pasokan meuguda. 8 Bubena peunduduek di sigala banda nyang na ateueh tanoh darat teupoh maté watée muprang nyan. Musoh jikueh lueng-lueng teumpat meuteun, jiseubée bubena beuton meugunong-gunong dan jisuôn peurisai-peurisai raya nyang jipeuguna lé awaknyan keu jilawan gata. 9 Awaknyan jitulak bintéh-bintéh timbok gata deungon alat tulak dan jipeuhanco bubena meunara gata deungon bak-bak beuso. 10 Guda-guda awaknyan jai that-that, sampoe óh jibot langkah jipeupo abée habéh teutôb ateueh-ateueh gata. Su meugrum-grum pasokan meuguda nyang jitarek geuritan jiba bahan beukai dan geuritan prang meugeunta bak bintéh-bintéh beuton gata watée awaknyan jiliwat rot babah-babah pintoe geureubang nyang jitamong lam banda nyang ka jeuet keu rungka-rungka nyan. 11 Pasokan meuguda nyan jiseureubu di jalan-jalan gata dan jipeumaté peunduduek gata deungon peudeueng awaknyan keudroe. Tugu-tugu gata nyang meugah dan kong nyan jireuloh. 12 Musoh-musoh gata nyan jireupah bandum keukayaan dan barang meukat gata. Awaknyan jipeuhanco beuton-beuton gata dan jireuloh banmandum rumoh-rumoh gata nyang meuwáh. Óh lheueh jireuloh awaknyan jicok batée-batée jih, papeuen-papeuen dan tanoh jih, laju jigeulawa lam laôt. 13 Ulôn kupeuseungab bandum ca-e-ca-e gata dan musik keucapi gata. 14 Nyang na Ulôn tinggai na kheueh si aneuk batée nyang tandus, teumpat ureuëng neulayan jiadée jeue-jeue jih. Banda nyan hana teupeudong le. Ulôn, TUHAN Nyang Mahamanyang ka Lôn peugah haba." 15 TUHAN Nyang Mahamanyang geupeugah ubak banda Tirus, "Peunduduek daerah panté yo ngon teumakot watée jideungoe su gata kliek nyang ka taloe dan su peudeh ngon sakét ureuëng-ureuëng nyang teungoh jicang dan jikoh takue. 16 Teukalon naseb gata nyan, raja-raja nyang na bak binéh laôt jibeudôh ateueh takhta, sira jisuet bajée keurajeuen dan bajée awaknyan nyang meukasab, laju jiduek ngon badan yo nibak tanoh. Awaknyan lumpah teumakot meubacutpih hana teunang. 17 Óh lheuehnyan awaknyan jibaca ca-e peutron lam jrat lagéenyoe keu gata: Ka kheueh habéh hanco banda nyang teupujoe! Bandum kapai nyang na disinan habéh teusampôh lam laôt raya. Peunduduek disinan nyang awaiphon meukuasa lam laôt habéh teumakot dumna ureuëng panté. 18 Jinoe, bak uroe gata jipeutaloe, bubena peunduduek pulo habéh yo meugeunta. Teukeujot kheueh awaknyan banmandum watée jingieng gata hanco nyang hana teukira." 19 TUHAN Nyang Mahamanyang meufeureuman, "Ulôn peujeuet gata seungue ngon seungab lagée banda nyang hana peunduduek. Ulôn kupeulam gata ngon ié nibak tuwie laôt raya. 20 Laju gata Lôn kirém lam donya ureuëng maté mangat meusaho ngon ureuëng-ureuëng jamén ilée. Lôn peubiyeu gata tinggai teutab lam donya ureuëng maté nyan, di teungoh rungka-rungka abadi, meusapat-sapat ngon ureuëng maté. Dan tanoh gata hana le ureuëng duek, dan gata hana teukira lamkawan ureuëng udeb. 21 Gata Lôn peujeuet cuntoh nyang lumpah gli dan teumakot, dan nyan kheueh keuneulheuh riwayat gata. Ureuëng ramé jimita gata, teuma gata hana meurumpok. Ulôn TUHAN Nyang Mahamanyang ka Lôn peugah haba."

Yehezkiel 27

1 TUHAN Nyang Mahamanyang meufeureuman ubak ulôn, "He manusia fana, meuca-e kheueh lagée peutron lam jrat nyoe keu Tirus, banda bak binéh nyang meuniaga ngon bandum peunduduek binéh panté: He Tirus, deungon sombong gata peugah, 'Gagah ulôn peusampoereuna!' 4 Nibak gata laôt raya tapeuniet rumoh. Gata tapeudong lagée kapai nyang ceudah. 5 Bintéh gata kayée aras Gunong Hermon taméh layeue gata kayée ceumara di Libanon. 6 Keu keunayôh gata teupeugét nibak kayée raya di Basan. Geuladak gata teupeugét nibak kayée ceumara, nibak pulo-pulo Siprus asai jih, piasan jihnyan takhta gadeng nyang meuhái hareuga. 7 Layeue dan tanda teuturi gata nibak lineun Meusé? deungon meubagoe kasab teusulam. Keubit halôh that keubahan-bahan khimah gata, ija asai nanggroe Siprus nyang meuwareuna ungu. 8 Keunayôh gata nibak Sidon dan Arwad. Aneuëk buah gata keudroe ureuëng-ureuëng peulaôt carông. 9 Utöih-utöih kayée nyang peugét kapai gata na kheueh ureuëng-ureuëng peungrajin asai Gebal. Nibak tieb-tieb nanggroe kapai-kapai jiteuka keuneuk jipeuna hubongan niaga. 10 Sipa-i sipa-i asai nanggroe Persia, Lidia dan Libia jitamong tentra gata. Awaknyan jigantung peurisai dan tupi waja bak timbok-timbok banda gata. Awaknyan ka jitulông jipeutaloe musoh-musoh dan jipeutamah meusyeuhu gata. 11 Sipa-i sipa-i asai Arwad jijaga bak beuton-beuton gata; meunara-meunara jikawai lé ureuëng-ureuëng asai Gamad. Peurisai awaknyan meugantung meureuti bak bintéh-bintéh beuton gata. Awaknyan kheueh nyang peuleungkab keu gagah gata. 12 Gata tapeubloe barang-barang niaga gata nyang meulimpah-limpah nyan u nanggroe Spanyol, sibagoe meunayeue jih gata teurimong pirak, beuso, timah putéh dan timah itam. 13 Gata meuniaga di Yunani, di Tubal, dan di Mesekh, dan sibagoe meunayeue jih gata teurimong bak awaknyan namiet-namiet dan barang-barang nibak peurunggu. 14 Gata tatuka barang-barang gata ngon guda geuritan, guda pasang dan bagal nibak Bet-Togarma. 15 Meunan cit peunduduek Rodus na cit meuniaga deungon gata dan peunduduek daerah binéh pasi jibloe cit barang niaga gata deungon gadeng dan kayée itam. 16 Bubena ureuëng meukat asai Siria jibloe barang-barang meuneukat gata dan hase-hase gata nyang jai meulimpah nyan. Awaknyan jibayeue ngon peumata nibak batée zamrud, ija mirah ungu, ija meusulam, ija lineun halôh, peumata nyang teupeuget nibak batée koral dan batée mirah deulima. 17 Yehuda dan Israel jituka barang niaga gata deungon gandom, meulisan, minyéuk zaiton dan reumpah-reumpah. 18 Peunduduek Damsyik jibloe barang niaga gata dan hase-hase gata dan jibayeue ngon anggô asai Helbon, bulée bubiri asai Sahar, beuso tempa dan reumpah-reumpah. 20 Peunduduek Dedan jibayeue barang-barang gata deungon ija-ija peulana 21 Ureuëng Arab dan peunguasa tanoh Kedar jibloe barang-barang gata ngon aneuëk bubiri, bubiri agam dan kaméng. 22 Keu teubloe barang-barang gata bubena ureuëng meuniaga asai Syeba dan Raema jiba peumata-peumata, méuh dan reumpah-reumpah nyang paleng gét. 23 Banda-banda Haran, Kane, Eden, saudaga-saudaga asai Syeba, banda-banda Asyur dan Kilmad, bandum nyan meuniaga deungon gata. 24 Awaknyan jipeubloe keu gata peukayan meuwáh, ija mirah ungu, ija meukasab, peureumadani-peureumadani nyang meubagoe curak, dan talo teumalo nyang kong-kong. 25 Barang niaga gata nyan teu angkot deungon kapai-kapai raya nyang meulayeue meuiréng-iréng. Gata lagée kapai nyang geuhon teupeudieng barang, kapai nyang meulayeue lam laôt raya. 26 Ureuëng meudayong jiba gata u teungoh laôt. Gata jiheuntam angén timu nyang teuka deungon keujam. 27 Peue-peue mantong barang niaga gata nyang gata peudieng lam kapai nyan, bandum peulaôt dan aneuëk buah gata, bandum tukang kayée dan saudaga gata, bandum sipa-i nyang na lam kapai nyan, bandum awaknyan gadôh dan lam bak watée gata lam. 28 Peulaôt-peulaôt jikliek-kliek sira teumawök sabab teumakot su geumeuciek awaknyan meudeungöng sampoe teudeungoe u panté-panté bak binéh pasie. 29 Jinoe kapainyan ka jitinggai, bandum peulaôt gata jiteungoh u panté. 30 Awaknyan jipeuba-e naseb gata, apoh apah, áh éuh jimeuratok deungon pilu. Awaknyan jisipreuk abée ateueh ulée dan jibalek-balek lam abée tanda meuduka. 31 Deumi gata awaknyan rila jicukô ôk bak ulée, jingui ija kröng peunoh duka cita. Awaknyan jimo seudeh ngon jimeuratok dan jipeuba-e naseb gata. 32 Laju awaknyan jimeuca-e saboh lagu teupeukubu lam jrat, 'He Tirus, soe kheueh imbang gata? Tirus, di laôt jinoe gata ka kalu. 33 Watée laôt raya gata arông deungon barang peunoh meuasoe, gata peupeunoh nyang jipeureulée lé bansa-bansa; raja-raja pih gata peukaya. 34 Jinoe gata ka lam, hanco lam tuwie laôt lhok. Bandum aneuëk buah gata dan barang-barang gadôh meusajan gata lam laôt raya.' 35 Bandum ureuëng nyang na tinggai bak binéh panté yo ngon teumakot watée jiingat keu naseb gata. Meunan cit raja-raja awaknyan teumakot raya; teumakot ngon gli deuh teukalon bak muka awaknyan. 36 Gata ka gadôh seungab sapan sapa. Bubena ureuëng meuniaga bansigom donya ka jeuet keu yo sabab teumakot jirasa naseb nyang lagée nyan teuma."

Yehezkiel 28

1 TUHAN meufeureuman ubak ulôn, 2 "He manusia fana, jak peusampoe kheueh ubak raja Tirus, peue nyang Ulôn, TUHAN Nyang Mahamanyang peugah ubak gobnyan, 'Deungon sombong gata anggab droe gata dewa nyang meutahta di teungoh-teungoh laôt. Jeuet mantong gata meulagak lagée dewa, teuma ingat kheueh, gata na kheueh manusia biasa. 3 Tapike gata leubeh carông nibak Danel, sampoe hana rahsia nyang teusöm nibak gata. 4 Gata peuguna hikeumat dan peungeurtian gata keu gata peusapat hareuta, méuh dan pirak. 5 Keubit beutôi, gata carông tameuniaga dan saátnyoe ka kaya ijo, dan deungon kaya gatanyan sampoe gata ka jeuet keu ureuëng sombong!' " 6 TUHAN Nyang Mahamanyang meufeureuman ubak Tirus, "He Tirus, sabab gata ta anggab droe saban lagée Po teu Allah, Ulôn kukirém tantra aséng nyang lumpah keujam jijak prang gata. Awaknyan jipeuhanco bandum keumeugahan nyang ka gata teumé beureukat hikeumat dan peungeurtian gata. 8 Gata jipeumaté dan jikubu lam laôt. 9 Deungon nyan, meunyoe trok saát jih, peu kheueh mantong gata peugah bahwa gata Po teu Allah? Dikeue ureuëng-ureuëng tukang peumaté gata, deuh kheueh disinan bahwa gata na kheueh manusia biasa. 10 Gata maté lagée ureuëng hina sabab jipoh maté lé ureuëng aséng nyang hana jituri keu Po teu Allah. Ulôn, TUHAN Nyang Mahamanyang ka Lôn peugah haba." 11 TUHAN meufeureuman lom ubak ulôn, kheun Gobnyan, 12 "He manusia fana, peuba-e dan meuratok kheueh keu raja Tirus. Peusampoe kheueh peue nyang Ulôn, TUHAN Nyang Mahamanyang peugah keu jihnyan, 'Gata ka lheueh jeuet keu lambang keusampoereuna; yoh dilée gata keubit bijaksana dan gagah! 13 Teumpat tinggai gata di Eden, taman Po teu Allah. Peukayan gata teupeungui ngon meubagoe rupa peumata: batée deulima dan intan, topas, batée pirus, batée yakut, ratna, ceumpaka, batée nilam, zamrud dan batée alkali mirah. Meunan cit deungon piasan méuh gata le. Bandum atra nyan teupeugét keu gata bak uroe gata teucebta. 14 Malaikat nyang keujam dan teumakot Lôn peuduek disinan keu jikeumiet gata. Gata tinggai di ateueh gunong Lôn nyang suci dan tajak-jak di teungoh-teungoh batée peumata nyang muble-ble cahya. 15 Peurangoe gata sampoereuna yohphon gata teucebta sampoe gata tapeuphon peubuet jeuhet. 16 Gata laloe ngon bloe peubloe, dan nyan kheueh nyang ba gata ubak buet nyang jeuhet dan desya. Teuma Ulôn use gata di gunong Lôn nyang suci, dan malaikat nyang keumiet gata jiparôh gata nibak teungoh-teungoh peumata nyang muble-ble cahya nyan. 17 Ruman gata nyang ceudah teupeujeuet gata sombong dan meusyeuhu gata nyang meugah nyan meuakibat jih gata bangai. Sababnyan gata Ulôn seumpom bak tanoh dan Lôn peujeuet keupeu ingat keu raja-raja nyang laén.' " 18 TUHAN meufeureuman, "He Tirus, gata ka tapeukutoe teumpat-teumpat iébadat gata sabab buet-buet nyang salah dan ilat nyang gata peubuet watée blo publo. Sababnyan kheueh Ulôn tot gata sampoe habéh rata ngon tanoh. Bandum ureuëng nyang ngieng ateueh gata nyang jikalon na kheueh abée. 19 Gata ka gadôh tandeuh le siumu masa. Bandum bansa nyang ka jituri gata ka jeuet keu yo sabab teumakot keujirasa nyang lagée nyan." 20 TUHAN meufeureuman ubak ulôn, 21 "He manusia fana, takutok kheueh banda Sidon. 22 Jak peusampoe kheueh ubak peunduduek disinan bahwa Ulôn TUHAN Nyang Mahamanyang Lôn peugah ubak awaknyan, 'Ulôn nyoe musoh gata, he Sidon. Ureuëng ramé jipujoe ulôn sabab buet Ulôn keu gata. Bak watée Lôn huköm peunduduek gata, awaknyan jiteupeue bahwa Ulôn kheueh TUHAN nyang suci. 23 Ulôn kupeuteuka bala peunyakét, dan Lôn peubiyeu darah ji ile bak rot-rot gata. Gata jiprang lé musoh rot jeueb-jeueb sagoe, dan peunduduek gata teupoh maté. Dan barô kheueh gata teupeue bahwa Ulôn kheueh TUHAN.' " 24 TUHAN meufeureuman, "Nanggroe-nanggroe nyang ka lheueh jihina Israel, hana le jeuet keu duro lam asou nyang peususah Israel. Awaknyan sadar bahwa Ulôn kheueh TUHAN Nyang Mahamanyang." 25 TUHAN Nyang Mahamanyang meufeureuman, "Ulôn ku peusapat ureuëng-ureuëng Israel di nanggroe nyang jiôh di teumpat awaknyan ka Lôn peu crebre, dan bandum bansa jiteupeue bahwa Ulôn nyoe suci. Bansa Israel teuma jiduek lom bak tanoh awaknyan keudroe, tanoh nyang ka Ulôn jok bak hamba Lôn Nabi Yakub. 26 Awaknyan udeb deungon aman disinan dan jipeudong rumoh-rumoh meunan cit jipeugét lampôh anggô. Ulôn ku huköm bandum kawöm silingka awaknyan nyang ka jihina awaknyan, deungon nyan Israel ka jeuet keu aman. Dan barô kheueh jiteupeue lé awaknyan bahwa Ulôn kheueh TUHAN Allah awaknyan."

Yehezkiel 29

1 Bak tanggai dua blaih buleuen siploh, bak thon nyang keusiploh kamoe teuböih, TUHAN meufeureuman ubak ulôn, 2 "Hei manusia fana, gata dhot kheueh bansa Meusé nyan. Gata peugah kheueh ubak jihnyan bahwa nanggroe nyan dan rakyat jih teuma teuhuköm." 3 TUHAN Nyang Mahamanyang geuyue ubak ulôn keu lônjak peusampoe peusan nyoe ubak raja nanggroe Meusé, "Ulôn nyoe musoh gata, hei buya gogasi nyang teu-éh bak teungoh krueng. Haba gata beurakah gata peugah bahwa Krueng Nil na kheueh atra gata dan gata kheueh nyang peugét nyan. 4 Ulôn kugantung ceunawiét bak geuheueng gata dan Lôn peuleukék eungkot-eungkot nibak sisek gata. Teuma gata laju Ulôn tarék nibak Krueng Nil nyan deungon mandum eungkot nyang meuleukék bak sisek gata nyan. 5 Óh lheueh nyan gata dan mandum eungkot gata nyan laju Lôn geulawa u padang pasi. Tuboh gata meuseumpom bak tanoh dan teugageueng disinan. Hana meusidroepi nyang jitem peukubu gata. Tuboh gata Ulôn jok keu cicém-cicém dan beulatang-beulatang nyang laén jeuet jipajoh. 6 Teuma barô kheueh jiteupeue lé banmandum rakyat Meusé bahwa Ulôn kheueh TUHAN." TUHAN meufeureuman, "Hei bansa Meusé! Ureuëng Israel meuharab that-that beugata tulông, teuma nyang deuh gata na kheueh lagée tungkat nyang leumoh hana meudaya. 7 Watée awaknyan jimeusadeue ubak gata, gata patah dan gata culok gitiék awaknyan, laju rhung awaknyan meukilah. 8 Lé sabab nyan, TUHAN Nyang Mahamanyang, geupeugah ubak gata, bahwa Ulôn Lôn kirém tantra keu jijak prang gata deungon peudeueng, dan jipoh maté peunduduek meunan cit beulatang nyang gata peulara. 9 Nanggroe Meusé jeuet keutanoh nyang sungue hana meu ureuëng. Teuma beutateupeue kheueh bahwa Ulôn kheueh TUHAN." TUHAN meufeureuman, "Hei raja Nanggroe Meusé! Sabab gata peugah bahwa Krueng Nil nyan na kheueh atra gata lom teuma gata kheueh nyang khueh krueng nyan, 10 teuma Ulôn ka jeuet keu musoh gata, dan musoh Krueng Nil gata. Bansaboh nanggroe Meusé Lôn peujeuet keutanoh nyang sungue phon nibak banda Migdol di utara sampoe u banda Aswan siblaih seulatan, sampoe trok u bataih Sudan. 11 Hana manusia atawa beulatang nyang na jak keunan. Peuet ploh thon treb jih hana ureuëng nyang tinggai disinan. 12 Ulôn kupeujeuet nanggroe Meusé nyang sungue that-that meunyoe tabandeng ngon nanggroe-nanggroe laén nyang sungue, nanggroe Meusé kheueh nyang paleng sungue. Peuet ploh thon treb jih banda-banda nyang na lam nanggroe Meusé jeuet keu banda-banda nyang sungue nyang tinggai na kheueh rungka-rungka dan jiôh leubeh parah nibak rungka-rungka banda pat mantong. Bansa nanggroe Meusé Lôn peujeuet keu peungungse nyang minah nibak nanggroe jih. Awaknyan meutabu jeub-jeub nanggroe dan tinggai lamkawan bansa laén." 13 TUHAN Nyang Mahamanyang meufeureuman, "Hei bansa Meusé, óh ka habéh peuet ploh thon nyan, gata Ulôn ba lom u nanggroe bak teumpat gata nyang ka lheueh meutabu. 14 Gata Lôn peupuléh dan Lôn yue tinggai di nanggroe Meusé blah seulatan, tanoh asai gata. Disinan gata tapeudong keurajeuen nyang leumoh, 15 keurajeuen nyang paleng leumoh bansigom donya. Ulôn Lôn peujeuet gata leupah leumoh sampoe gata hana jeuet gata peurintah bansa-bansa nyang laén atawa gata peusombong droe keu awaknyan. 16 Israel hana jilakée tulông le ubak gata. Naseb gata hei bansa Meusé teuma teuingat bansa Israel padubna silab jih jipeubangga bansa Meusé nyan, lagée nyang ka lheueh jipeubuet. Teuma jiteupeue kheueh lé Israel bahwa Ulôn kheueh TUHAN Nyang Mahamanyang." 17 Bak tanggai sa buleuen sa bak thon nyang keu dua ploh tujoh masa kamoe teuböih, TUHAN meufeureuman ubak ulôn, 18 "Hei manusia fana, Raja Nebukadnezar di nanggroe Babel jijak prang Tirus. Jihnyan jipeurintah ubak mandum tantra jih mangat jiseuôn beuban nyang geuhon nyan, sampoe ulée awaknyan ka jeuet keu lapeueng dan bahô awaknyan ka teupuliek, teuma bah kheueh raja meunan cit tantra jihnyan hana meuteumé wasé sapeue nibak nanggroe nyan. 19 Sabab nyan, Ulôn TUHAN Nyang Mahamanyang Ulôn peugah: Tanoh nanggroe Meusé Ulôn jok keu Raja Nebukadnezar. Jihnyan jireupah peue-peue nyang na di sinan dan laju jiba banmandum keukayaan nanggroe Meusé nyan sibagoe upah keu sidadu jihnyan. 20 Tanoh nanggroe Meusé Ulôn bri keujih nyan sibagoe tanda jasa, sabab tantra jih ka jimeubuet keu Ulôn. Ulôn, TUHAN Nyang Mahamanyang ka Lôn peugah haba. 21 Pakriban hai nyan teujadi, Ulôn kupeujeuet bansa Israel keu bansa nyang teuga, dan jeuet keumungken gata, Yehezkiel, gata peugah haba deungon beubaih sampoe soe mantong ureuëng jeuet jideungoe gata. Teuma barô kheueh jiteupeue lé awaknyan bahwa Ulôn kheueh TUHAN."

Yehezkiel 30

1 TUHAN meufeureuman lom, kheun Gobnyan, 2 "He manusia fana, meuramai kheueh dan peugah kheueh ubak bansa Meusé peue nyang Ulôn TUHAN Nyang Mahamanyang peugah ubak awaknyan. Meulakée kheueh dan meuratok kheueh lagée nyoe: Adoh hai ma! Uroe TUHAN ka tô that! Gobnyan sigra geucok tendakan. Uroenyan seupôt dan meuawan, uroe bansa-bansa jiteurimong huköman. 4 Bala nyang raya rhot ateueh nanggroe Sudan. Di nanggroe Meusé na prang raya. Manyét-manyét reubah meugageueng; bansaboh nanggroe geureupah dan geupeujeuet keu rungka-rungka. 5 Lam prang nyan na cit nyang maté bubena sipa-i teusiwa di Sudan, Lidia, Libia, Arab, Kub dan na bansa Ulôn keudroe." 6 TUHAN Nyang Mahamanyang meufeureuman, "Nibak Migdol di utara sampoe u Aswan di seulatan, bandum meurakan ngon nanggroe Meusé teuma maté di mideuen prang. Dan sipa-i Meusé nyang sombong nyan hanco hán meuho saho. Ulôn TUHAN Nyang Mahamanyang ka Lôn peugah haba. 7 Nanggroe nyan jeuet keu nanggroe seungue, seungue nibak nanggroe seungue nyang laén, dan banda-banda di nanggroe teuma jeuet keu rungka-rungka. 8 Meunyoe Ulôn ka Lôn tot nanggroe Meusé dan Lôn poh maté bandum rakan jihnyan, barô kheueh jiteupeue bahwa Ulôn kheueh TUHAN. 9 Meunyoe uroe nyan ka trok, dan nanggroe Meusé ka habéh hanco, Ulôn kukirém utosan-utosan deungon bubena kapai keu teupeukeujot ureuëng Sudan nyang hana curiga nyan, teuma awaknyan teumakot. Beutôi, uroe nyan teuma teuka!" 10 TUHAN Nyang Mahamanyang meufeureuman, "Ulôn Lôn peuguna Raja Nebukadnezar di nanggroe Babel jeuet jipeuhanco banmandum keukayaan nanggroe Meusé. 11 Nebukadnezar meusajan ngon sipa-i jihnyan nyang hana rasa gaséh sayang jiteuka dan jipeuhanco bandum tanoh nyan. Awaknyan jiprang nanggroe Meusé deungon peudeueng, dan manyét-manyét meuteung bayeueng bansaboh nanggroe nyan. 12 Ulôn kukirém Krueng Nil dan Lôn jok bandum nanggroe Meusé ubak ureuëng-ureuëng jeuhet. Keu ureuëng aséng teuma Ulôn yue peuhanco bandum nanggroe nyan. Ulôn, TUHAN, ka Lôn peugah haba." 13 TUHAN Nyang Mahamanyang meufeureuman, "Ulôn ku peuhanco bandum beurala dan dewa-dewa nyang na di Memfis. Hana le raja di nanggroe Meusé. Banmandum peunduduek disinan Lôn peujeuet keu teumakot. 14 Bansaboh nanggroe Meusé blaih seulatan seungue seungab dan banda Soan di utara Ulôn tot. Tebe ma banda nyan Lôn huköm, 15 dan keukayaan disinan Lôn peuranab. Ulôn ku peuleueh beungéh Ulôn keu Pelusium, banda nyang jeuet keu kuta Meusé, 16 dan banda nyan meudeurita that. Beutôi, Ulôn Lôn tot nanggroe Meusé. Bintéh-bintéh beuton banda Tebe reuloh dan banda nyan jipeuron lé ié raya. 17 Ureuëng-ureuëng muda nibak banda Heliopolis dan banda Bubastis maté dimideuen prang, dan ureuëng-ureuëng inong teuma teudrob. 18 Bak watée ulôn peu habéh keudaulatan Meusé dan Ulôn cok kuasa jihnyan nyang that jipeubangga nyan, Tahpanhes peunoh deungon seupôt dan ureuëng-ureuëng inong nyang na disinan teudrob. 19 Meunan kheueh Ulôn huköm nanggroe Meusé, dan barô kheueh jiteupeue lé awaknyan bahwa Ulôn kheueh TUHAN." 20 Bak tanggai tujoh buleuen sa bak thon nyang keu siblaih masa kamoe teuböih, TUHAN meufeureuman ubak ulôn, 21 "He manusia fana, Ulôn ka Ulôn wiét jaroe raja Meusé, dan hana ureuëng nyang balot jaroe raja nyan atawa nyang urot jaroe nyan jeuet bagaih puléh dan teuga lom mangat hase jimat peudeueng lagée nyang ka ka. 22 Ulôn TUHAN Nyang Mahamanyang Lôn peugah: Ulôn nyoe musoh raja Meusé, dan bandua blah jaroe jihnyan Ulôn wiét, bah kheueh nyang mantong teuga meunan cit nyang ka lheueh patah. Dan peudeueng nyan rhot nibak jaroe jihnyan. 23 Ulôn kupeu crebre ureuëng Meusé bansigom donya. 24 Laju Lôn peuteuga jaroe raja Babel, dan Lôn peureugam peudeueng Lôn lam jaroe raja nyan. Teuma jaroe raja Meusé Ulôn wiét sampoe rajanyan meurang-rang dan maté dikeue raja Babel, musoh jihnyan. 25 Beutôi, raja Meusé kupeuleumoh, dan raja Babel Lôn peuteuga. Meunyoe peudeueng Lôn ka Ulôn bri keu jihnyan, dan laju jiayon peudeueng nyan u nanggroe Meusé, awaknyan teuma jiteupeue bahwa Ulôn kheueh TUHAN. 26 Ulôn kupeusiseue ureuëng-ureuëng Meusé bansigom donya. Dan barô kheueh jiteupeue lé awaknyan bahwa Ulôn kheueh TUHAN."

Yehezkiel 31

1 Bak tanggai sa buleuen lhée thon nyang keu siblaih watée kamoe teuböih, TUHAN meufeureuman ubak ulôn, 2 "He manusia fana, tapeusampoe kheueh peusan Ulôn nyoe ubak raja Meusé dan bandum bansa jihnyan: Keubit that hebat keubeusaran gata! Hana nyang hase jibandeng deungon gata! 3 Gata lagée bak ceumara Libanon nyang gagah peunoh cabeueng nyang rampak dan ceudah. Bak jih tupat dan sulu pucok jih meusampôh awan. 4 Ceumara nyan timoh sabab ié jih séb. Krueng nyang na dimiyueb tanoh jibri peunajoh, jiseuram bandum ukeu jih, dan sampoe basah bak-bak kayée laén. 5 Sabab ié hántom na kureueng, timoh jih subô, cabeueng jih raya dan panyang. Nibak bandumnyan na bak kayée didalam uteuen, kayée nyan kheueh nyang paleng lambong meusampôh awan. 6 Meubagoe cicém jimeu eumpung bak ranteng cabeueng. Beulatang kleut jimeu aneuëk dimiyueb kayée ceumaranyan. Bandum bansa meugah di ateueh donya jiduek jimeureului diyueb kayée nyan. 7 Kayée ceudah keu teupandang; bak jih sulu cabeueng jih panyang. Ukeue jih meuseubée jiôh lam bumoe sampoe trok bak mata ié lam tanoh. 8 Bak bak kayée ceumara nyang na di Eden, nyan na kheueh taman Po teu Allah hana jeuet teupeusaban deungon geuhnyan. Hana bak ceumara nyang hase teupeusaban, hana bak kayée nyang lagée nyan panyang cabeueng jih. Beutôi that, di taman Po teu Allah hana bak kayée nyang saban lagée nyan. 9 Ulôn kheueh nyang peujeuet kayée nyan ceudah rupawan deungon cabeueng-cabeueng jih nyang panyang rampak meusigak. Bandum bak kayée di taman Po teu Allah meurasa ceumuru keu kayée nyan. 10 Sababnyan, Ulôn TUHAN Nyang Mahamanyang, Ulôn peugah ubak gata peue nyang teuma teujadi ateueh bak kayée nyang pucok jih sampoe meusampôh awan nyan. Sabab seumaken lambong, seumaken sombong teuma jih nyan. 11 Dan Ulôn tulak jihnyan dan Ulôn jok bak peunguasa aséng, nyang peujra jihnyan sisuai deungon keujeuhetan nyang jipeubuet. 12 Sipa-i aséng nyang keujam dan hana amphon nyan jikoh dan jipeubiyeu disinan. Ranteng jih nyang ka patah rhot meutabu ateueh bandum gunong dan pantôn di nanggroe nyan. Bandum bansa nyang na tinggai dimiyueb nyan jijak jitinggai jihnyan. 13 Cicém-cicém teuka dan laju jidong ateueh bak kayée nyang ka reubah nyan, dan bubena beulatang kleut laju jibloh-bloh ateueh deun kayée nyan. 14 Bandum nyan teujadi mangat phon saát nyoe, hana le bak kayée nyang timoh manyang lagée nyan; hana le pucok kayée nyang meusampôh awan bahpi meuteumé ié nyang meulimpah ruwah. Bandum harôh maté lagée manusia fana, dan meusapat ngon ureuëng-ureuëng nyang ka jitron lam donya ureuëng maté." 15 Meunoe kheueh feureuman TUHAN Nyang Mahamanyang, "Meunyoe bak kayée nyan ka jitron lam donya ureuëng maté, Ulôn yue ubak ié nyang na dimiyueb tanoh mangat meuganong sibagoe tanda meukabong. Ulôn kupeuteun ié krueng nyang tajam ji ile dan Ulôn doe aneuk-aneuk krueng. Lé sabab bak kayée nyan ka maté, Ulôn kupeutron seupôt glab ateueh gunong-gunong Libanon dan Lôn peulayée bandum bak kayée lam gle. 16 Watée bak kayée nyan Lôn peutron lam donya ureuëng maté, su rhot bak kayée nyan teukeujot bubena bansa-bansa. Bandum bak kayée nyan di Eden dan bak-bak kayée nyang teupiléh di Libanon nyang meuteumé ié meulimpah ruwah, dan nyang ka jitron u bumoe nyang paleng miyueb galak lumpah na deungon reubah ka bak kayée nyan. 17 Awaknyan ji-iréng lam donya ureuëng maté dan meusapat ngon awaknyan nyang ka rhot leubeh ilée. Dan banmandum nyang ka jiduek dimiyueb bak kayée nyan yoh masa ilée geupeusiseu lamkawan bansa-bansa. 18 Bak kayée nyan teupeulambang keu raja nanggroe Meusé dan bansa gobnyan. Hana bak kayée di Eden nyang meunan manyang dan mulia. Teuma bak saát nyoe lagée bak-bak kayée di Eden nyan cit teuma, bak kayée nyan teuma jitron lam donya ureuëng maté dan meusapat ngon awaknyan nyang hana jituri keu Po teu Allah dan deungon awaknyan nyang maté di mideuen prang. Ulôn, TUHAN Nyang Mahamanyang ka Lôn peugah haba."

Yehezkiel 32

1 Bak tanggai sa buleuen dua blaih bak thon nyang keudua blaih masa kamoe teuböih, TUHAN meufeureuman ubak ulôn, 2 "He manusia fana, tabri kheueh peuingat nyang paleng kreueh keu raja nanggroe Meusé. Tapeusampoe kheueh peusan Lôn nyoe ubak jihnyan, 'Gata meulagak lagée singa muda lamkawan bansa-bansa, teuma nyang sibeuna jih gata bacut saho lagée buya nyang meulangue didalam ié. Gaki gata teupeuceuko dan teupeukutoe bubena krueng. 3 Bak watée bansa-bansa meusapat, Lôn drob gata deungon jeue Ulôn, dan Lôn peubiyeu bansa-bansa nyan jihila gata ateueh darat. 4 Gata Lôn seumpom ateueh tanoh meunan cit bandum cicém dan beulatang peulara gata Ulôn yue jijak pajoh gata. 5 Laju gunong-gunong dan pantôn-pantôn Lôn peupeunoh ngon bangke gata nyang ka brôk nyan. 6 Darah gata Lôn peurö sampoe habéh basah gunong-gunong dan habéh peunoh bubena krueng. 7 Bak watée gata Lôn peubinasa, langét Lôn peukulubong dan bintang-bintang Lôn peumala. Mata uroe Ulôn söm dilikot awan dan buleuen hana meucahya. 8 Beutôi, bandum peungéuh nyang na di langét Lôn peulon, dan bumoe Lôn peujeuet keu seupôt buta. Ulôn, TUHAN Nyang Mahamanyang ka Lôn peugah haba. 9 Bak watée Ulôn peusampoe haba keuhai keuhancoran gata bak nanggroe-nanggroe nyang gohlom gata turi, jai that bansa laén meukarat lagoena. 10 Beutôi, Ulôn ku hapiet peudeueng Ulôn dan Lôn peutaloe gata. Raja-raja laén dan bansa-bansa laén jikalon tindakan Ulôn nyan ateueh gata. Bak watée nyan awaknyan yo ngon teumakot dan yo meugám-gám sabab jitakot maté.' " 11 TUHAN Nyang Mahamanyang meufeureuman ubak raja Meusé, "Peudeueng raja Babel jihapiet ateueh gata. 12 Sipa-i sipa-i nibak bansa-bansa nyang keujam Ulôn yue suet peudeueng awaknyan dan jiheuntam bandum rakyat gata. Rakyat gata dan bandum peue-peue mantong nyang gata peubangga hanco meukeupeng-keupeng. 13 Beulatang peulara gata Lôn reupang ngon peudeueng bak binéh krueng teumpat jih jieb ié. Bah kheueh nyan beulatang meunan cit manusia hana jipeuceukoe le ié krueng nyan. 14 Dan bubena krueng nyang na di nanggroe gata Lôn peujeureunéh dan Lôn peu ile ié jih deungon teunang. Ulôn, TUHAN Nyang Mahamanyang ka Lôn peugah haba. 15 Meunyoe nanggroe Meusé ka Lôn peujeuet keu saboh padang pasi nyang seungue, dan Ulôn peubinasa bandum nyang na tinggai disinan, awaknyan jiteupeue bahwa Ulôn kheueh TUHAN. 16 Peuingat nyang kreuehnyoe jeuet keu ca-e meukabong. Kawöm inong nibak bansa-bansa laén meuca-e sibagoe tanda meukabong keu nanggroe Meusé dan banmandum rakyat jihnyan. Ulôn, TUHAN Nyang Mahamanyang ka Lôn peugah haba." 17 Tanggai dua blaih buleuen keu sa bak thon nyang keu dua blaih masa kamoe teuböih, TUHAN meufeureuman lom ubak ulôn, 18 "He manusia fana, meukabong kheueh keu rakyat Meusé. Kirém kheueh awaknyan lam donya ureuëng maté meusajan-sajan ngon nanggroe nyang teuga nyang laén. 19 Tapeugah kheueh ubak awaknyan, 'Tapike lé gata gata nyang paleng ceudah? Gata teuma tatron lam donya ureuëng maté, dan jipeu-éh lamkawan ureuëng nyang hana jituri keu Po teu Allah.' 20 Bansa Meusé maté meusajan ngon ureuëng nyang maté dimideuen prang. Saboh peudeueng ka siab keu teucang maté awaknyan banmandum. 21 Pahlawan-pahlawan nyang gagah beurani dan ureuëng-ureuëng nyang muprang blah bansa Meusé jisambot deungon seunang até ateueh jiteuka ureuëng Meusé u dalam donya ureuëng maté. Awaknyan jiseumurak lagée nyoe, 'Ureuëng-ureuëng nyang hana jituri keu Po teu Allah nyan ka maté di mideuen prang. Jinoenyoe awaknyan jijak keunoe keu jijak éh disinoe!' 22 Asyur ji-éh disideh, jikeulileng lé jrat-jrat sipa-i jihnyan. Awaknyan bandum ka maté dimideuen prang. Jrat awaknyan na dibagian nyang paleng lhok lam donya ureuëng maté. Yoh watée mantong udeb, awaknyan jiteupeuteuka teumakot ateueh rhueng donya. 24 Elam na disideh deungon jrat sipa-i jih na bansikeulileng jih. Hana teupeusunat, awaknyan bandum maté dimideuen prang, laju jitron lam donya ureuëng maté dan harôh jitanggong malée meusajan ngon ureuëng-ureuëng nyang ka awai maté nibak muprang nyan. 26 Mesekh dan Tuban na disinan, jikeulileng lé jrat-jrat sipa-i jihnyan. Hana teupeusunat, awaknyan bandum maté dimideuen prang. Yoh watée mantong udeb, awaknyan jipeuteuka teumakot di ateueh donya. 27 Awaknyan hana meuteumé teupeukubu seucara horeumat lagée pahlawan bak jamén dilée nyang jitron lam donya ureuëng maté deungon sinjata leungkab. Pahlawan-pahlawan nyan teupeukubu deungon peudeueng dimiyueb ulée dan peurisai di ateueh dada. Watée jihnyan mantong udeb, pahlawan-pahlawan nyan keubit that peukasa sampoe habéh teumakot banmandum ureuëng. 28 Meunan kheueh ureuëng Meusé teupeukubu dan teupeu éh lamkawan ureuëng nyang hana jituri bak Po teu Allah dan maté dimideuen prang. 29 Edom na disideh deungon bandum raja dan peunguasa. Yoh masa dilée awaknyan na tantra-tantra nyang teuga, teuma bak saát nyoe awaknyan teu-éh lam donya ureuëng maté meusajan ngon ureuëng maté nyang laén nyang hana jituri bak Po teu Allah. 30 Bandum pangeran nyang na di utara na disinan, meunan cit teuma ngon ureuëng-ureuëng Sidon. Yohmasa dilée keukuasaan awaknyan lumpah jitakot lé gob, teuma bak saát nyoe awaknyan ka teupeumalée hana teupeusunat watée jitron lam donya ureuëng maté meusajan-sajan ngon ureuëng nyang maté dimideuen prang. Disinan awaknyan teu éh dan jitanggong ayeb meusajan-sajan ngon ureuëng nyang tron lam donya ureuëng maté. 31 Meunyoe raja Meusé dan sipa-i jihnyan ka trok lam donya ureuëng maté dan jikalon bandum ureuëng nyang ka maté di mideuen prang nyan, awaknyan meurasa teuhibô. Ulôn, TUHAN Nyang Mahamanyang ka Lôn peugah haba. 32 Ulôn kheueh nyang jeuet keusabab raja Meusé teupeuteuka teumakot keu ureuëng-ureuëng nyang udeb, teuma lamkawan sipa-i jihnyan maté dan teupeuéh meusajan-sajan ngon ureuëng nyang hana jituri keu Po teu Allah dan dan maté dimideuen prang. Ulôn TUHAN Po teu Allah Nyang Mahamanyang ka Lôn peugah haba."

Yehezkiel 33

1 TUHAN meufeureuman lom ubak ulôn, kheun Gobnyan, 2 "He manusia fana, tapeugah kheueh ubak bansa gata bahwa meunyoe Ulôn ka Lôn peuteuka prang ateueh saboh nanggroe, nyoe kheueh nyang teuma teujadi. Peunduduek nanggroe nyan geupiléh lamkawan awaknyan keudroe sidroe ureuëng jaga. 3 Meunyoe ureuëng jaga nyan jikalon na musoh teuka, lé jihnyan laju jipeumusu tanda bahya jeuet bandum ureuëng meujaga-jaga. 4 Barang sigasoe na jideungoe su tanda bahya nyan teuma hana jipakoe, dan musoh teuka laju jipoh maté ureuëng nyan, dan jihnyan laju maté, nyan sabab salah jih keudroe. Meunyoe ureuëng nyan jipakoe bak su bahya nyan, pasti ureuëng nyan seulamat. 6 Teuma meunyoe ureuëng jaga nyan na jikalon musoh ka jiteuka teuma hana jipeumusu tanda bahya, laju lé musoh jipoh maté ureuëng-ureuëng nyang meudesya nyan, tanggong jaweueb ateueh maté awaknyan Lôn tuntot bak ureuëng nyan. 7 He manusia fana, gata Lôn baiát jeuet keu ureuëng kawai bansa Israel. Tajak peusampoe kheueh ubak awaknyan haba peuingat nyoe: 8 Meunyoe Ulôn peugah bahwa sidroe ureuëng jeuhet maté, teuma gata hana tapeuingat ureuëng nyan jeuet jihnyan jiubah pi-e jih sampoe jihnyan seulamat, dan jihnyan maté mantong lagée ureuëng meudesya. Teuma tanggong jaweueb ateueh maté jihnyan Lôn tunggée bak gata. 9 Meunyoe gata tapeuingat ureuëng jeuhet nyan dan jihnyan hana jitem piôh jipeubuet jeuhet, ureuëng nyan maté sibagoe ureuëng meudesya, teuma gata keudroe seulamat." 10 TUHAN meufeureuman ubak ulôn, "He manusia fana, ta ulang kheueh ubak ureuëng Israel haba awaknyan nyoe, 'Kamoe meurana sabab teupeubeuban deungon desya dan keujeuhetan kamoe. Pakriban kamoe meuteumé udeb?' 11 Peugah kheueh ubak awaknyan bahwa deumi Ulôn, Po teu Allah nyang udeb, TUHAN Nyang Mahamanyang, Ulôn hana galak meunyoe ureuëng jeuhet maté; seubalek jih Ulôn harök jitinggai desya-desya jih mangat jihnyan teutab udeb. He bansa Israel, tapiôh kheueh tapeubuet jeuhet! Pakon gata keuneuk maté? 12 Nah, he manusia fana, tapeugah kheueh ubak ureuëng Israel bahwa meunyoe ureuëng nyang jroh-jroh jipeubuet desya, dan buet jih nyang gét nyang ka jipeubuet yoh masa ilée hana hase geutulông jihnyan. Meunyoe ureuëng jeuhet jipiôh jipeubuet desya, ureuëng nyan hana teuhuköm, dan meunyoe ureuëng nyang jroh jipeubuet desya, ureuëng nyan hana teupeuseulamat. 13 Jeuet mantong Ulôn ka Lôn meujanji keu Lôn peuseulamat ureuëng-ureuëng nyang jroh, teuma meunyoe ureuëng nyan ka jipeuphon jipeubuet desya dan meuharab bahwa jihnyan teupeuseulamat sabab buet jih nyang gét yoh masa dilée nyan, ureuëng nyan keuliru. Ulôn hana Lôn ingat le buet nyang gét nyang ka jipeubuet nyan dan jihnyan maté sabab desya-desya jih keudroe. 14 Jeuet mantong Ulôn ka Lôn peuingat ureuëng-ureuëng jeuhet bahwa jihnyan maté. Teuma meunyoe jihnyan jipiôh jipeubuet desya dan jipeuphon peubuet peue nyang jroh dan beuna, miseu jih ureuëng nyan jijok pulang barang nyang jipeugadée lé gob, atawa barang nyang ka jicue dan jitaát ubak huköm-huköm nyang teuba jihnyan ubak udeb, dan jihnyan hana maté. 16 Ulôn hana Lôn ingat le desya-desya nyang ka jipeubuet, dan jihnyan udeb sabab jipeubuet peue nyang beuna dan gét. 17 Teuma bansa nyan jipeugah bahwa tindakan Ulônnyan hana ade. 18 Sigoe teuk Ulôn peugah bahwa meunyoe ureuëng nyang gét ka jipeuphon jipeubuet nyang jeuhet, ureuëng nyan maté sabab buet jihnyan. 19 Meunyoe ureuëng nyang jeuhet jipiôh jipeubuet desya, dan ka jipeuphon peubuet peue nyang gét dan beuna, ureuëng nyan udeb ngon buet jihnyan. 20 Bahpi lagée nyan bansa Israel jipeugah cit bahwa tindakan Ulôn nyan hana ade. Bit, Ulôn Lôn peusidang awaknyan maséng-maséng meunurot buet nyang ka jipeubuet nyan." 21 Bak tanggai limong buleuen siploh, bak thon nyang keudua blaih masa kamoe teuböih, sidroe ureuëng nyang hase lheueh di Yerusalem teuka dan jijak peugah ubak ulôn bahwa banda nyan ka rhot. 22 Bak malam sigohlom awaknyan teuka, ulôn ka lôn rasa kuasa TUHAN. Jadi watée ureuëng nyan jijak ubak ulôn, ulôn ka jeuet lôn peugah haba dan babah lôn hana le kalu. 23 TUHAN meufeureuman ubak ulôn, 24 "He manusia fana, ureuëng-ureuëng nyang tinggai nibak rungka-rungka banda nyang reuloh di tanoh Israel nyan jipeugah, 'Nabi Ibrahim meuteumé bandum tanoh nyoe, padahai gobnyan cit sidroe. Geutanyoe nyoe jai that jeumeulah jih, jadi tanoh nyoe jeuet keu atra geutanyoe.' " 25 Sabab nyan TUHAN Nyang Mahamanyang geuyue ubak ulôn jak peusampoe peusan nyoe ubak awaknyan, "Gata tapajoh uengkot sie nyang na mantong meudarah; gata taseumah beurala dan tapeubuet buet peu maté gob. Ceubeueh that gata peugah tanoh nyoe atra milék gata. 26 Gata meubangga ngon peudeueng gata. Tindakan gata kuto lumpah na. Gata banmandum tapeubuet buet meumukah. Peu kheueh mantong cit gata aku bahwa tanoh nyoe atra milék gata? 27 Deumi Ulôn, Po teu Allah nyang udeb, TUHAN Nyang Mahamanyang, ureuëng-ureuëng nyang tinggai di rungka-rungka banda nyan maté keunong poh. Awaknyan tinggai di padang-padang luwah dan jipajoh lé beulatang buih. Awaknyan jimusöm bak gunong-gunong dan guha-guha awaknyan maté sabab keunong bala peunyakét. 28 Nanggroe nyan Lôn peujeuet padang pasi nyang sungue, dan keukuasaan nyang awaknyan peubangga nyan habéh. Gunong-gunong nyang na di Israel jeuet keusungue seunyab sampoe hana meusidroepi nyang na ureuëng jijeuet jak rot nyan. 29 Bak watée Ulôn kuhuköm bansa-bansa nyan sabab desya-desya awaknyan dan Lôn peujeuet nanggroe nyan sungue seunyab, barô kheueh jiteupeue lé awaknyan bahwa Ulôn kheueh TUHAN." 30 TUHAN meufeureuman, "Hei manusia fana, gata ka jeuet keu boh nariet ureuëng nyang saboh bansa ngon gata watée awaknyan meurumpok bak beuton-beuton banda atawa bak binéh-binéh babah pintoe rumoh. Awaknyan jipeugah sabe keudroe-droe, 'Jak tadeungoe peue nyang geupeugah lé TUHAN nibak uroe nyoe.' 31 Awaknyan jijak meurôn-rôn dan sibagoe umat Lôn awaknyan jiduek jideungoe tutoe haba gata, teuma peue nyang gata peurintah nyan hana awaknyan peubuet. Bak bibi awaknyan jipeugah tutoe haba cinta teuma lam até awaknyan nyang jipike keuhai laba. 32 Gata jianggab sidroe ureuëng meunyanyi ca-e-ca-e cinta nyang meusu meu-alon dan carông gata peumeu én keucapi. Beutôi awaknyan jideungoe tutoe haba gata teuma hana jipeubuet lagée kheun gata. 33 Banmandum nyang gata peugah nyan teujadi, dan meunyoe watée nyan ka teuka, awaknyan jiteupeue bahwa ka lheueh na sidroe nabi lamkawan awaknyan."

Yehezkiel 34

1 TUHAN meufeureuman ubak ulôn, 2 "He manusia fana, tadhot kheueh raja-raja Israel, dan tapeusampoe kheueh peue nyang Ulôn, TUHAN Nyang Mahamanyang peugah ubak awaknyan, 'Ceulaka kheueh gata, he tukang-tukang meurabe Israel. Gata nyang tapike keupeuntengan droe keudroe gata, bukon keupeuntengan bubiri-bubiri gata. 3 Ié mom jih gata jieb, bulée-bulée jih gata cok keupeukayan, dan bubiri-bubiri nyang paleng teumbon gata sie dan gata pajoh. Gata hántom gata urôh bubiri-bubiri gata. 4 Bubiri-bubiri nyang leumoh hana gata peulara, nyang sakét hana gata peu ubat, nyang luka hana gata balot, nyang sisat dan gadôh hana gata mita dan gata puwoe lom. Teuma bandum bubiri gata nyan gata peusaneut deungon keujam. 5 Sabab hana tukang meurabe, bubiri-bubiri nyan ka meucrebre dan jeuet keupeunajoh beulatang buih. 6 Dan bubiri-bubiri Lôn jeuet jimeurawoh di bukét-bukét nyang lambong dan digunong-gunong. Awaknyan meutabu bansigom muka bumoe, hana meusidroepi nyang tem kalon atawa jijak mita bubiri nyan. 7 Nyan, tukang-tukang meurabe, deungoe kheueh peue nyang Ulôn, TUHAN Nyang Mahamanyang peugah ubak gata: 8 Deumi Ulôn, Po teu Allah nyang udeb, tangieng kheueh! Bubiri-bubiri Ulôn ka jiteugöm dan jipajoh lé beulatang buih, sabab hana nyang tem rabe bubiri-bubiri nyan. Gata tukang-tukang meurabe Lôn nyang hana gata pakoe bubiri-bubiri Ulôn nyan. Nyang gata pike na kheueh droe gata keudroe mantong, kon keu keupeuntengan bubiri-bubiri gata. 9 Dan, deungoe kheueh nyoe, hé tukang-tukang meurabe, 10 Ulôn, TUHAN Nyang Mahamanyang Lôn peugah ubak gata, bahwa Ulôn nyoe musoh gata. Bubiri-bubiri Ulôn nyan Ulôn cok lom nibak gata dan hana le Lôn peucaya keu gata; gata hana le Lôn bri idhin nyang tapike keu keupeuntengan gata keudroe. Bubiri-bubiri Ulôn kulakée peuseulamat ubak gata sampoe bubiri nyan hana le jeuet keu peunajoh gata.' " 11 TUHAN Nyang Mahamanyang meufeureuman, "Ulôn keudroe nyang jak mita bubiri Ulôn dan Lôn nyang peulara bubiri-bubiri nyan, 12 lagée sidroe tukang meurabe jimita dan jipeusapat bubiri jihnyan nyang ka meucrebre laju jipeulara bubiri-bubiri nyan. Awaknyan Lôn puwoe nibak jeub-jeub sagoe teumpat awaknyan meutabu bak uroe nyang seupôt dan sial nyan. 13 Awaknyan Lôn peuteubiet nibak jeub-jeub bansa dan nanggroe-nanggroe aséng, laju Lôn peusapat dan Lôn puwoe u nanggroe jih keudroe. Awaknyan Lôn rabe di gunong-gunong dan di pantôn-pantôn Israel dan Lôn paroih awak u padang naleueng nyang mangat. 14 Keubit, Ulôn Lôn bri padang naleueng nyang subô di gunong-gunong dan di pantôn-pantôn tanoh Israel. Disinan jihnyan meureuhat dan jimeurot naleueng deungon puih até dan aman. 15 Ulôn keudroe jeuet keu tukang meurabe bubiri-bubiri Lôn dan Lôn keubah teumpat meureuhat keu jihnyan; Ulôn, TUHAN Nyang Mahamanyang ka Lôn peugah haba. 16 Nyang gadôh Lôn mita, nyang sisat Lôn puwoe, nyang luka Lôn balot, nyang sakét Lôn peu ubat; teuma nyang teumbon dan teuga Lôn peubinasa, sabab Ulôn tukang meurabe nyang Lôn peubuet peue nyang gét. 17 Deungoe kheueh, he bubiri-bubiri Lôn! Ulôn TUHAN Nyang Mahamanyang Lôn peugah ubak gata bahwa Ulôn Lôn peusidang gata maséng-maséng dan Lôn peungkréeh nyang gét nibak nyang jeuhet, bubiri-bubiri nibak kaméng-kaméng. 18 Lamkawan gata na nyang hana puih deungon tapeu habéh naleueng-naleueng nyang paleng gét, teuma tagilo-gilo naleueng nyang hana jirot! Jijieb ié nyang jeureunéh dan jipeucikoe ié nyang hana jijieb! 19 Bubiri-bubiri Ulôn nyang laén harôh jimeurot naleueng nyang ka jigilo-gilo dan ji jieb ié nyang ka jipeuciko. 20 Sabab nyan, Ulôn, TUHAN Nyang Mahamanyang Ulôn peugah ubak gata, he bubiri-bubiri nyang teumbon, bahwa Ulôn teuka jeuet keu hakém keu bubiri nyang teuga dan bubiri nyang leumoh. 21 Gata tapeusak droe dan tapok-pok bubiri nyang sakét sampoe bubirinyan teuparôh lam kawan. 22 Teuma Ulôn keudroe Lôn peuseulamat bubiri-bubiri Lôn, mangat jihnyan hana le jipeusaneut ateueh bubiri nyan deungon keujam. Ulôn teuma Lôn peusidang bubiri-bubiri Lôn saboh deumi saboh dan Lôn peuaséng bubiri nyan nibak nyang gét deungon nyang jeuhet. 23 Ulôn ku baiát sidroe raja nyang saban lagée hamba Ulôn Nabi Daud, mangat jeuet keu tukang rabe awaknyan sidroe mantong, dan gobnyan jipeulara awaknyan. 24 Ulôn, TUHAN, jeuet keu Po teu Allah awaknyan, dan raja nyang lagée hamba Ulôn Nabi Daud nyan jeuet keu peunguasa awaknyan. Ulôn, TUHAN ka Lôn peugah haba. 25 Ulôn kupeugét peujanjian deungon awaknyan, nyang jamin keuamanan awaknyan. Ulôn ku use bandum beulatang buih nyang na bansaboh nanggroe, sampoe bubiri-bubiri Ulôn jeuet jitinggai deungon aman di padang-padang dan jiéh di dalam gle. 26 Ulôn Lôn bri beureukat ubak awaknyan dan Lôn bri idhin ubak awaknyan tinggai bak-bak binéh bukét Lôn nyang suci. Ubak awaknyan Ulôn peutron ujeuen meunyoe awaknyan peureulée keu ujeuen. 27 Bak-bak kayée jimuboh, ladang-ladang jipeuteubiet wasé, dan bandum ureuëng tinggai deungon aman bak tanoh jih keudroe. Meunyoe ranté nyang ikat umat Lôn ka Lôn peuputôh dan awaknyan ka Lôn peubeubaih nibak ureuëng-ureuëng nyang peunamiet awaknyan, dan jiteupeue kheueh lé awaknyan bahwa Ulôn kheueh TUHAN. 28 Awaknyan hana le jireupah lé bansa-bansa nyang hana jituri Ulôn, atawa jiteugöm lé beulatang buih. Awaknyan udeb deungon seujahteura, dan hana meusidroe ureuëng nyang peujeuet awaknyan teumakot lom. 29 Ulôn kupeusubô mandum ladang awaknyan sampoe ka hana le musém keunong deuk di nanggroe nyan. Awaknyan hana jihinale lé bansa-bansa laén. 30 Dan barô kheueh jiteupeue lé bandum ureuëng bahwa Israel nyan na kheueh umat Ulôn dan Ulôn nyang lindong awaknyan. Ulôn, TUHAN Nyang Mahamanyang ka Lôn peugah haba. 31 Beutôi that, gata kheueh kawan bubiri Lôn nyang Ulôn bri makheun. Gata na kheueh umat Ulôn, dan Ulôn kheueh Po teu Allah gata. Ulôn, TUHAN Nyang Mahamanyang ka Lôn peugah haba."

Yehezkiel 35

1 TUHAN meufeureuman ubak ulôn, 2 "He manusia fana, kutok kheueh nanggroe Edom. 3 Jak peusampoe kheueh ubak peunduduek disinan peue nyang Ulôn TUHAN Nyang Mahamanyang peugah ubak awaknyan, 'Ulôn nyoe musoh gata, he peunduduek gunong-gunong Edom! Tanoh gata Lôn peujeuet seungue seungab hana ureuëng keumiet, dan banda-banda gata jeuet keu rungka-rungka. Dan tateupeue kheueh lé gata bahwa Ulôn kheueh TUHAN. 5 Yoh dilée kon gata meumusoh ngon Israel dan tapeubiyeu awaknyan jicang-cang yoh watée awaknyan keunong lé beuncana sibagoe huköman keuneulheuh ateueh desya awaknyan. 6 Lé sabab nyan, deumi Ulôn, Allah nyang udeb, TUHAN Nyang Mahamanyang, mawöt na kheueh naseb gata, dan gata hana hase lheueh nibak nyan. Gata ka meusalah sabab ka tapeubuet dan tapoh maté gob, dan teupoh maté nyan pih jitiyeub gata. 7 Banda-banda nyang na di gunong-gunong Edom teuma Lôn peuseungue dan soe mantong ureuëng nyang jak di banda nyan Ulôn poh maté. 8 Gunong-gunong Ulôn peupeunoh ngon manyét-manyét gata, bukét dan pantôn Lôn peupeunoh ngon bangke ureuëng maté dimideuen prang. 9 Nanggroe gata Lôn peujeuet keupadang beulantara siumu masa, dan banda-banda hana jikeumiet lé manusia. Dan tateupeue kheueh lé gata bahwa Ulôn kheueh TUHAN. 10 Gata tapeugah Yehuda dan Israel deungon tanoh jihnyan maséng-maséng na kheueh atra gata, dan bahwa gata tacok keuhak milék atranyan bahpi Ulôn, TUHAN, na kheueh Po teu Allah awaknyan. 11 Sababnyan, deumi Ulôn, Po teu Allah nyang udeb, TUHAN Nyang Mahamanyang, Ulôn kubalaih dam ateueh gata, sabab gata beungéh, bingiék dan banci keu umat Lôn. Awaknyan jiteupeue bahwa gata Lôn huköm ngon sabab buet gata ateueh awaknyan. 12 Dan tateupeue kheueh lé gata bahwa Ulôn, TUHAN, ka Lôn deungoe peunghinaan gata watée gata peugah: Gunong-gunong Israel ka jeuet keuseungue seungab dan jijok jeuet keu uempeun geutanyoe. 13 He bansa Edom, rata raya babah dan tameututoe deungon sombong keu Ulôn. Ulôn ka Lôn deungoe banmandum nyan. 14 Ulôn, TUHAN Nyang Mahamanyang Lôn peugah: Bansaboh donya galak watée bansaboh nanggroe gata Ulôn peujeuet keupadang nyang seungue seungab, 15 saban lagée gata galak watée takalon Israel milék Ulôn, jeuet keu seungue seungab. Gunong-gunong Seir, dan bansaboh tanoh Edom seungue seungab. Dan bandum ureuëng jiteupeue bahwa Ulôn kheueh TUHAN.' "

Yehezkiel 36

1 TUHAN meufeureuman, "He manusia fana, tajak mariet kheueh ubak gunong-gunong Israel dan tayue awaknyan beujideungoe amanat TUHAN Nyang Mahamanyang, 2 'Watée bansa-bansa nyang na seukeulileng nyan jijak prang dan jireubot gata, awaknyan ka jihina bansaboh Israel. Deungon galak that awaknyan jipeugah bahwa saátnyoe bukét-bukét purbakala nyan ka jeuet keumilék awaknyan. Sabab nyan, he gunong-gunong dan bukét-bukét, aneuk-aneuk krueng dan pantôn-pantôn, he banda-banda nyang ka jeuet keu rungka dan nyang ka jitinggai lé ureuëng po jih lom jireupah dan jihina lé bansa-bansa nyang na seukeulileng awaknyan, deungoe kheueh peue nyang geupeugah lé TUHAN Nyang Mahamanyang ubak gata: Deungon ju dan seu uem watée beungéh Ulôn laju Ulôn dhot dan Ulôn seugah bansa-bansa seukeulileng gata khusos jih bansa Edom, sabab awaknyan deungon galak dan meusikeub meuhina, ka jireubot tanoh Ulôn dan jireupah bandum blang-blang naleueng Lôn. Jinoenyoe Ulôn beungéh dan Lôn heuntam ban galak droe sabab bansa-bansa nyan ka lumpah that meuhina dan jipeujayeh gata. 7 Ulôn, TUHAN Nyang Mahamanyang Lôn meusumpah bahwa bansa-bansa nyang di seukeulileng gata nyan keunong hina teuma. 8 Teuma keu gata Ulôn peugah he gunong-gunong Israel, bak-bak kayée meutarök dan jimuboh keu umat Lôn Israel nyang katô that watée jiwoe. 9 Ulôn kudong blah gata he Israel, dan Ulôn Lôn bri keupastian bahwa tanoh gata jicatok lom dan jitabu bijéh. 10 Ulôn Lôn tamah jeumeulah umat Lôn Israel. Awaknyan tinggai di banda-banda dan jipeudong lo banmandum rungka jih nyang ka reuloh. 11 Peunduduek dan beulatang peulara gata Lôn tamah, sampoe ka meutamah le, leubeh jai nibak yoh awai, dan awaknyan meu aneuëk cucoe nyang le. Awaknyan udeb disinan lagée yoh awai dan Ulôn peujeuet keumakmu, lagée gohlom na gata rasa. Dan jiteupeue kheueh lé awaknyan bahwa Ulôn kheueh TUHAN. 12 Umat Ulôn Israel, Lôn puwoe mangat jiduek bak nanggroe jih lom. Tanoh nyan jeuet keu hak milék awaknyan keudroe dan sabe na teubri hase sampoe aneuëk-aneuëk awaknyan ka hana maté sabab keunong deuk. 13 Ulôn, TUHAN Nyang Mahamanyang Lôn peugah: Keubit beutôi tanoh nyoe teuboh nan gala tukang pajoh manusia dan tukang reupah aneuëk-aneuëk miet -- bansa nyang tinggai bak tanoh nyan. 14 Teuma phon saát nyoe tanoh nyoe hana le jipajoh manusia atawa teureupah aneuëk-aneuëk awaknyan. Ulôn TUHAN Nyang Mahamanyang ka Lôn peugah haba. 15 Hana peureulée lé tanoh nyoe jideungoe jihina lé bansa-bansa atawa jitanggong hinaan gob. Tanoh nyoe hana teupeumaté le ureuëng nyang tinggai disinan. Ulôn, TUHAN Nyang Mahamanyang kalon peugah haba.' " 16 TUHAN meufeureuman ubak ulôn, 17 "He manusia fana, bak watée ureuëng-ureuëng Israel tinggai di nanggroe jihnyan keudroe, awaknyan ka jipeukutoe deungon buet jih keudroe dan pi-e awaknyan. Buet awaknyan nyang lagée nyan ka Ulôn anggab hareuem, lagée ureuëng inong nyang teungoh teuka he. 18 Beungéh Ulôn nyang lumpah jai keu awaknyan sabab awaknyan ka jipoh maté manusia nyang le that-that bak tanoh nyan dan jipeukutoe teuma deungon beurala-beurala jih keudroe. 19 Awaknyan Ulôn huköm nyang sisuai deungon cara udeb dan pi-e awaknyan keudroe, laju awaknyan Ulôn peucrebre u nanggroe-nanggroe aséng. 20 Ho mantong awaknyan jijak, sabe jipeukutoe nan Ulôn nyang suci. Sabab lé ureuëng ramé jipeugah lagée nyoe, 'Bansa nyoe na kheueh umat Po teu Allah, teuma awaknyan harôh jitinggai tanoh nyang geubri lé Po teu Allah keu awaknyan.' 21 Ulôn inseueh that sabab nan Ulôn nyang suci ka jipeukutoe lé ureuëng-ureuëng Israel ho-ho mantong nyang awaknyan jak. 22 Lé sabab nyan, jak peusampoe kheueh peue nyang Ulôn, TUHAN Nyang Mahamanyang peugah ubak bansa Israel, 'Peue nyang Lôn peubuet teuma na kheueh kon ngon sabab gata, he ureuëng-ureuëng Israel, teuma lé sabab nan Ulôn nyang suci, nyang ka gata peukutoe ho-ho mantong gata jak. 23 Ulôn Lôn tunyok keusucian nan Ulôn nyang rayeuk nyan, nan nyang ka lheueh gata peukutoe lamkawan bansa, dan jiteupeue kheueh lé awaknyan bahwa Ulôn kheueh TUHAN. Ulôn, TUHAN Nyang Mahamanyang ka Lôn peugah haba. Ulôn Lôn peuguna gata jeuet tapeuleumah ubak bansa-bansa bahwa Ulôn nyoe suci, TUHAN Nyang Mahasuci. 24 Nibak tieb-tieb bansa dan nanggroe, gata Lôn peusapat dan Ulôn puwoe ubak tanoh gata keudroe. 25 Óh ka lheuehnyan gata Ulôn reuték deungon ié jeureunéh, mangat gata gleh nibak bandum beurala gata dan nibak peue-peue mantong nyang ka jipeuayeub nan gata. 26 Teuma ubak gata Ulôn bri até nyang barô dan pikeran nyang barô. Até gata nyang kreueh lagée batée nyan Lôn gantoe ngon até nyang taát. 27 Roh Ulôn Lôn peutreun lam até gata dan gata Lôn jaga mangat gata udeb meunurot huköm-huköm Lôn dan tataát peue-peue nyang Ulôn peurintah. 28 Dan gata tatinggai bak tanoh nyang ka Ulôn bri keu indatu gata. Gata teuma jeuet keu umat Lôn dan Ulôn pih jeuet keu Allah gata. 29 Gata Lôn peuleupah nibak peue-peue mantong nan gata nyang ka meucupa. Ulôn Lôn bri peurintah ubak gandom mangat timoh deungon subô sampoe gata hanale keunong deuk. 30 Ulôn Lôn tamah bubena bak kayée gata mangat udeb subô dan meunan cit hase blang gata Lôn tamah meulipat ganda, sampoe gata hanale keunong deuk nyang teupeubrok nan gata bak mata bansa-bansa. 31 Gata teuingat keu pi-e gata nyang jeuhet dan buet gata nyang hana pantaih nyan, laju gata bosan keudroe gata keudroe sabab desya-desya dan keukeujian gata nyan. 32 Ingat kheueh he Israel, bahwa bandum nyan Ulôn peubuet kon sabab gata. Gata harôh meurasa malée dan hina sabab pi-e gata. Ulôn TUHAN Nyang Mahamanyang ka Lôn peugah haba.' " 33 TUHAN Nyang Mahamanyang meufeureuman, "Óh ka lheueh gata Ulôn peugleh bandum desya gata, gata Lôn peuidhin tinggai di banda-banda gata lom, dan tapeudong lom rungka-rungka nyang ka hanco nyan. 34 Yoh masa ilée ureuëng-ureuëng nyang jak rot ladang-ladang gatanyan jikalon padubna tandus jih tanoh nyan, teuma Ulôn Lôn peujamin mangat tapeubuet lom tanoh nyang tho nyan. 35 Dan bandum ureuëng jeuet keuhireuen, sabab tanoh nyang yoh awai tandus nyan jinoe ka jeuet keu Taman Eden, dan banda-banda nyang yoh awai seungue, hanco dan ka jeuet keu rungka-rungka, bak saátnyoe ka jeuet keu banda-banda nyang paleng khong kuta peutahanan jih dan peunduduek pi meutamah le. 36 Dan bansa-bansa silingka nyang mantong na disinan, jiteupeue bahwa Ulôn, TUHAN ka geupeudong lom banda-banda nyang ka hanco, dan teupeubuet keulai blang-blang nyang ka jeuet tandus. Ulôn, TUHAN, ka Lôn peugah haba dan pasti atranyan Ulôn keureuja." 37 TUHAN Nyang Mahamanyang meufeureuman, "He bansa Israel, ubak gata ka Ulôn bri idhin lom talakée tulông ubak Ulôn; Ulôn kutamah jeumeulah gata lagée kawan bubiri. 38 Banda-banda nyang bak saátnyoe ka hanco, saboh saát peunoh ureuëng duek disinan saban lagée Yerusalem watée uroe-uroe raya yoh masa ilée, peunoh deungon bubiri-bubiri nyang jipeuseumah. Dan tateupeue kheueh lé gata bahwa Ulôn kheueh TUHAN."

Yehezkiel 37

1 Ulôn lumpah teurasa kuasa TUHAN, dan roh Gobnyan nyang ba ulôn geupeutron u pantôn nyang peunoh deungon tuleueng-tuleueng. 2 Ulôn geutunton lé TUHAN meuwet-wet bak pantôn nyan, dan ulôn kalon bahwa bansaboh pantôn nyan meusiseu bubena tuleueng nyang lumpah le dan ka tho-tho. 3 TUHAN geutanyong ubak ulôn, "He manusia fana, peu kheueh mungken tuleueng-tuleueng nyoe udeb lom?" Ulôn jaweueb, "TUHAN Nyang Mahamanyang, teuma Droeneueh kheueh nyang teupeue." 4 Laju TUHAN geuyue ubak ulôn jak peusampoe peusan Gobnyan ubak tuleueng-tuleueng nyang ka tho nyan, 5 "Ulôn TUHAN Nyang Mahamanyang Ulôn yueb nafáh lam tuboh gata mangat gata udeb lom. 6 Ulôn peuduek urat dan asoe ubak gata dan Lôn balot gata deungon kulét. Gata Ulôn bri nafáh mangat udeb. Dan tateupeue kheueh lé gata bahwa Ulôn kheueh TUHAN." 7 Laju ulôn Yehezkiel ulôn mariet ubak tuleueng-tuleueng nyan sisuai ngon peurintah TUHAN. Dan teungoh ulôn peugah haba, laju teudeungoe su meukrub-krub, sabab tuleueng-tuleueng nyan ka jipeuphon meusambat tuleueng nyang saboh deungon nyang laén. 8 Teungoh ulôn kalon hai nyang teungoh teujadi nyan, tuleueng-tuleueng nyan ka jipeuphon meu urat dan meuasoe meunan cit deungon kulét ka meuleukék teuma tuboh nyan gohlom na meunafáh. 9 Po teu Allah meufeureuman ubak ulôn, "He manusia fana, mariet kheueh ubak angén. Tapeugah kheueh bahwa Ulôn, TUHAN Nyang Mahamanyang Lôn peurintah ubak angén nyan mangat teuka rot meubagoe arah, jeuet jiprôh nafáh ubak tuboh-tuboh nyang maté nyan sampoe tuboh-tuboh nyang teu-éh nyan udeb lom teuma." 10 Dan ulôn meututoe sisuai deungon peurintah TUHAN dan angén pih laju teuka rot meubagoe arah dan laju teuyueb nafáh u dalam tuboh-tuboh nyan dan tuboh nyang ka teuyueb nafáh nyan laju udeb óh lheuehnyan laju jidong. Jeumeulah awaknyan lumpah that jai, séb keu teubina saboh pasokan tantra nyang raya. 11 Po teu Allah meufeureuman ubak ulôn, "He manusia fana, tuleueng-tuleueng nyoe teupeulambang ubak bansa Israel. Awaknyan apoh apah bahwa awaknyan tho kreng hana harapan dan uroe ukeue. 12 Sabab nyan meuramai kheueh ubak umat Ulôn Israel nyan bahwa Ulôn, TUHAN Nyang Mahamanyang Lôn peuhah pintoe jrat awaknyan. Ulôn Lôn peuteubiet awaknyan disinan dan Lôn peuwoe awaknyan u tanoh Israel. 13 Óh ka lheueh Lôn peubuet banmandum nyan, umat ulôn jiteupeue bahwa Ulôn kheueh TUHAN. 14 Ulôn Lôn yueb nafáh lam tuboh awaknyan keu teupeu udeb awaknyan, laju awaknyan Lôn bri idhin jitinggai di nanggroe jih keudroe. Dan jiteupeue kheueh lé awaknyan bahwa Ulôn kheueh TUHAN. Ulôn TUHAN ka Lôn peugah haba dan pasti Lôn peubuet nyang Ulôn peugah nyan." 15 TUHAN meufeureuman lom ubak ulôn, 16 "He manusia fana, tacok kheueh laju saboh tungkat dan tatuléh kheueh laju haba nyang lagée nyoe nibak tungkat nyan, 'Keurajeuen Yehuda'. Dan tacok kheueh teuma saboh tungkat nyang laén, dan tatuléh kheueh di ateueh jih: 'Keurajeuen Israel'. 17 Óh lheuehnyan tamat kheueh bandua boh tungkat nyan sampoe ujong bandua tungkat nyan meusaho jeuet keusaboh tungkat. 18 Meunyoe bansa gata jitanyong makna jih, 19 tapeugah kheueh ubak awaknyan bahwa Ulôn, TUHAN Nyang Mahamanyang Lôn cok tungkat nyang teupeulambang Israel dan Lôn peusaho ngon tungkat nyang teupeulambang Yehuda. Bandua boh tungkat Lôn peusaho sampoe meusaboh dan Ulôn reugam lam jaroe Lôn. 20 Tamat kheueh bandua boh tungkat nyan dan tapeuleumah kheueh ubak bansa nyan. 21 Laju tapeugah kheueh ubak awaknyan bahwa Ulôn, TUHAN Nyang Mahamanyang Lôn cok banmandum bansa Ulôn nibak nanggroe-nanggroe ho mantong awaknyan nyang ka jijak. Awaknyan Lôn peusapat dan Ulôn puwoe lom u nanggroe awaknyan keudroe. 22 Awaknyan Lôn peujeuet keusaboh bansa di tanoh nyan, di gunong-gunong Israel. Awaknyan jipeurintah lé sidroe raja, dan hana teubagi le jeuet dua bansa atawa dua keurajeuen. 23 Awaknyan hana le jipeukutoe droe deungon jipeubuet desya dan jiseumah ubak beurala-beurala nyang luwat dan najih nyan. Ulôn kupeubeubaih awaknyan nibak bandum buet nyang meunyeuleweng nyang meusabab awaknyan jikhianat Ulôn. Ulôn Lôn peusuci awaknyan; awaknyan jeuet keu umat Lôn, dan Ulôn jeuet keu Allah awaknyan. 24 Awaknyan teupeusaboh dimiyueb sidroe raja lagée Raja Nabi Daud nyang mat peurintah siumu masa. Deungon seutia awaknyan jitaát ubak huköm-huköm Lôn. Dan keu siumu masa awaknyan meunan cit deungon keuturonan awaknyan jitinggai nibak tanoh nyan, tanoh nyang Ulôn bri keu Nabi Yakub dan jiduek lé indatu awaknyan. 26 Ulôn Lôn peugét saboh peujanjian deungon awaknyan nyang teujamin keuamanan awaknyan sampoe keukai dan abadi. Ulôn Lôn bri beureukat dan Lôn tamah jeumeulah awaknyan. Bak tanoh awaknyan Lôn peudong Rumoh Ulôn nyang teutab disinan siumu masa. 27 Ulôn tinggai meusajan awaknyan, dan Ulôn teuma jeuet keu Po teu Allah awaknyan dan awaknyan jeuet keu umat Lôn. 28 Meunyoe Rumoh Ulôn ka na lamkawan awaknyan siumu masa, barô kheueh jiteupeue lé bansa-bansa nyang laén bahwa Ulôn kheueh TUHAN, ka Lôn piléh Israel jeuet keu umat Lôn keudroe."

Yehezkiel 38

1 TUHAN meufeureuman ubak ulôn, 2 "He manusia fana, takutok kheueh Gog raja agong di nanggroe Mesekh dan Tubal di tanoh Magog. 3 Tapeugah kheueh ubak jihnyan bahwa Ulôn, TUHAN Nyang Mahamanyang, na kheueh musoh jih. 4 Ulôn kupeuwet jihnyan, Lôn pasang ceunawiét nibak geuhéum jih, dan Lôn peuteubiet jihnyan bandum deungon pasokan nyang meupeukayan seuragam nyan. Tieb-tieb sidadu jiba peurisai dan peudeueng. 5 Raja ji-iréng lé sipa-i-sipa-i asai Persia, Sudan dan Libia, maséng-maséng jiba peudeueng dan tupi waja. 6 Bandum peujuang nibak nanggroe-nanggroe Gomer dan Bet-Togarma di utara, jimaju meusajan ngon jihnyan, dan le bansa nyang laén jiseutôt sajan. 7 Tayue kheueh bak jihnyan mangat meusiab-siab dan tapeurintah kheueh ubak banmandum tantra nyang meugabong ngon jihnyan jeuet siab-siab jipreh peurintah nibak gobnyan. 8 Kira-kira padubthon teuk jihnyan Lôn peurintah mangat jijakprang saboh nanggroe deungon peunduduek nyang ka meusapat jiwoe nibak bansa-bansa nyang le dan nyang óh lheueh nyan tinggai seungab di nanggroe nyang aman. Gog jiduek bak gunong-gunong Israel nyang ka treb that seungue dan nyang ka jeuet keu rungka-rungka, teuma nyang saátnyoe jiduek lé rakyat nyang udeb deungon damé. 9 Jihnyan dan sipa-i jihnyan meunan cit deungon sipa-i nyang le nyang jeuet ji-iréng jihnyan teuka jijak prang lagée angén badée dan teutôb banmandum nanggroe lagée awan." 10 TUHAN Nyang Mahamanyang meufeureuman ubak Gog, "Bak saátnyan gata tapeugét reuncana nyang jeuhet. 11 Gata tapeuputôh keu taseureubu nanggroe nyang hana meukuta nyan, nyang toh peunduduek jih udeb deungon aman dan teuntram di banda-banda nyang hana meukuta dan hana alat-alat peutahanan. 12 Gata tarampok dan tareupah hareuta peunduduek di banda-banda nyang yoh dilée ka tinggai rungka-rungka. Peunduduek disinan nyang teugumpôi nibak meubagoe bansa, bak saátnyoe ka le hareuta dan beulatang peulara dan awaknyan tinggai bak pusat donya. 13 Peunduduek Syeba dan Dedan meunan cit deungon ureuëng meukat nyang na di banda-banda nanggroe Spanyol jitanyong ubak gata lagéenyoe, 'Peu kheueh gata takrah tantra teuma keu tareupah dan tarampok méuh, pirak, beulatang peulara, dan hareuta beunda, dan gata angkot banmandum nyan?' " 14 Sababnyan TUHAN Nyang Mahamanyang geukirém ulôn keu lôn jak peusampoe ubak Gog haba nyoe, "Justru bak saát umat Ulôn Israel udeb deungon aman dan teuntram, gata teuka tajak prang. 15 Gata tajak nibak teumpat gata tinggai, jiôh di utara, ji iréng lé pasokan tantra nyang raya dan hebat, bandum nibak pasokan meuguda dan meubagoe macam bansa. 16 Laju gata prang umat Ulôn Israel lagée angén badée jiheuntam bumoe. Meunyoe watée jih ka sampoe, gata Lôn kirém keu gata duek bak tanoh Lôn. Deungon lagéenyan Lôn meulalu gata, he Gog, bansa-bansa jiteupeue soe Ulôn nyoe, na kheueh Po teu Allah nyang suci. 17 Kon kheueh keuhai gata Ulôn yoh dilée Lôn peugah haba meulalu hamba-hamba Lôn nabi Israel? Awaknyan ka jiramai bahwa bak masa nyang teuma teuka Ulôn kuyue sidroe ureuëng keu jiseurang Israel. Ulôn, TUHAN Nyang Mahamanyang ka Lôn peugah haba." 18 TUHAN Nyang Mahamanyang meufeureuman, "Teuma hana treb óh lheueh Gog jiseurang Israel, Ulôn jilab beungéh. 19 Dan deungon beungéh that Ulôn peuteubiet ancaman, bahwa nibak uroenyan na geumpa bumoe nyang keubit hebat di nanggroe Israel. 20 Bandum uengkot dan cicém, bandum beulatang rayeuk dan ubit, dan bandum ureuëng di ateueh bumoe yo meugám-gám keu Ulôn. Gunong-gunong reuloh, barieh-barieh gunong teupurö dan bandum bintéh beuton hanco. 21 Laju Gog Lôn peukeujot deungon sigala macam beuncana. Ulôn, TUHAN Nyang Mahamanyang ka Lôn peugah haba. Aneuëk buah jihnyan saléng meuhéuntam deungon peudeueng. 22 Jihnyan Lôn huköm deungon bala peunyakét dan darah saléng jipeuroe. Ujeuen raya dan ujeuen és, apui dan beulerang Lôn sintong ateueh jihnyan dan sipa-i jihnyan dan ateueh bansa nyang laén nyang ka meusaho deungon jihnyan. 23 Deungon na lagée nyan Lôn tunyok ubak sigala bansa bahwa Ulôn nyoe agong dan suci. Dan jiteupeue kheueh lé awaknyan bahwa Ulôn kheueh TUHAN."

Yehezkiel 39

1 TUHAN Nyang Mahamanyang meufeureuman, "He manusia fana, taancam kheueh Gog, raja agong di nanggroe Mesekh dan nanggroe Tubal, dan tapeugah ubak jihnyan bahwa Ulôn nyoe na kheueh musoh jih. 2 Ulôn Lôn peuwet jihnyan, dan Lôn ba jihnyan Lôn peuteubiet nibak daerah jiôh di utara, u gunong-gunong Israel. 3 Disinan Lôn seukok busur jihnyan sampoe lheueh nibak jaroe wie jih, dan Ulôn peulheueh aneuk-aneuk panah jihnyan nibak jaroe uneuen jihnyan. 4 Di ateueh gunong-gunong nyang na di Israel, Gog meusajan ngon bandum sidadu jihnyan dan sikutu jihnyan maté, dan manyét-manyét awaknyan Ulôn bri ubak bubena cicém dan meulatang buih jeuet jipajoh. 5 Sipa-i-sipa-i nyan reubah dan maté teugageueng di ladang-ladang. Ulôn, TUHAN Nyang Mahamanyang ka Lôn peugah haba. 6 Ulôn Lôn peuteuka apui sampoe habéh tutong di tanoh Magog di binéh-binéh panté, di teumpat peunduduek jihnyan udeb deungon aman. Dan jiteupeue kheueh lé awaknyan bandum bahwa Ulôn kheueh TUHAN. 7 Teuma lamkawan ureuëng Israel, Lôn peumaklum nan Ulôn nyang suci, dan nan Ulôn nyan hana lé jipeukutoe. Dan jiteupeue kheueh lé bansa-bansa bahwa Ulôn kheueh TUHAN, Po teu Allah suci di Israel." 8 TUHAN Nyang Mahamanyang meufeureuman, "Uroe nyang Ulôn peugah nyan teuma teuka. 9 Peunduduek banda-banda di Israel jiteubiet meurön-rön keu jijak peusapat bandum sinjata nyang ka jitinggai, atra nyan na kheueh, peurisai dan peudeueng, panah dan aneuk panah teutamah lom ngon tungkat seumeupoh. Bandum awaknyan peujeuet keu kayée apui, dan nyan seb keu tujoh thon. 10 Jadi, awaknyan hana peureulée jipeusapat kayée apui di ladang atawa jiteubang kayée lam gle, sabab sinjata-sinjata nyang jitinggai nyan lumpah that jai teucok keukayée apui. Awaknyan jirampok dan jireupah atra ureuëng-ureuëng nyang ka lheueh meurampok dan jireupah atra awaknyan. Ulôn, TUHAN Nyang Mahamanyang ka Lôn peugah haba." 11 TUHAN meufeureuman, "Meunyoe bandumnyoe ka teujadi, Ulôn Lôn jok ubak Gog tanoh keu lampôh jrat di Israel, di Pantôn rot jeumeurang nyang teumpat jih siblaih utimu rot Laôt Maté. Disinan kheueh Gog ngon bandum sipa-i jihnyan teukubu, dan pantôn nyan teupeunan, 'Pantôn Pasokan Gog'. 12 Tujoh buleuen treb jih ureuëng-ureuëng Israel mehmoh jipasoe lam jrat manyét-manyét nyan mangat tanoh bék kutoe le. 13 Bandum peunduduek nanggroe jimeuseuraya jitanom lam jrat manyét-manyét nyan; dan keunyan awaknyan jiteurimong tanda peunghargaan bak uroe keumeunangan Ulôn. Ulôn, TUHAN Nyang Mahamanyang ka Lôn peugah haba. 14 Óh lheueh tujoh buleuen nyan ka habéh, napadubdroe ureuëng jibri tugaih keujijak rawöh bansaboh nanggroe nyan jijak mita manyét-manyét nyang na mantong teutinggai teugageueng bak tanoh, dan meunyoe na, laju jipasoe lam jrat manyét nyan jeuet nanggroe nyan gleh nibak nyang kutoe. 15 Watée jimita manyét-manyét nyan, tieb-tieb na jiteumé tuleueng manusia, awaknyan jijok tanoh bak binéh nyan, mangat lé tukang-tukang kubu manyét jikalon nyan dan jipeukubu tuleueng nyan di Pantôn Pasokan Gog. 16 Deungon caranyan, tanoh nyan ka teupeugleh nibak nyang kutoe. (Óh uroe dudoe, nibak pantôn nyan teuma na banda nyang nan jih saban deungon Pasokan Gog.)" 17 TUHAN Nyang Mahamanyang meufeureuman ubak ulôn, "He manusia fana, tatawök kheueh bandum cicém dan beulatang nyang laén, jeuet jiteuka rot patmantong jeuet jijak pajoh keureubeuen nyang Ulôn keubah keu awaknyan. Ulôn teuma Lôn peuna khanuri nyang paleng rayeuk bak gunong-gunong Israel, disinan awaknyan meuteumé jipajoh uengkot sie dan ji-jieb darah. 18 Awaknyan meuteumé jipajoh manyét-manyét pahlawan, dan ji-jieb darah nyang mat-mat kuasa ateueh rhueng donya. Bubena pahlawan dan nyang mat kuasa nyan teupoh maté lagée teupoh maté kaméng-kaméng agam atawa aneuëk-aneuëk kaméng, atawa banteng-banteng teumbon. 19 Óh ka lheueh Lôn peumaté ureuëng-ureuëng nyan lagée keureubeuen, cicém-cicém dan beulatang-beulatang nyang laén jijak pajoh bandum gapah nyan sampoe án troe meugeureu ôb, dan ji-jieb darah sampoe mabök. 20 Nibak meuja Lôn awaknyan jeuet jipeutroe pruet deungon banmandum guda dan nyang duek ateueh gudanyan dan deungon bandum peujuang. Ulôn, TUHAN Nyang Mahamanyang ka Lôn peugah haba." 21 TUHAN meufeureuman, "Ulôn Lôn ngieng keumuliaan Lôn keu bansa-bansa. Awaknyan bandum jikalon pakriban Ulôn peuguna keukuasaan Lôn keu Lôn peubuet keuputosan-keuputosan nyang ade. 22 Phon saátnyan ureuëng Israel jiteupeue bahwa Ulôn kheueh TUHAN Allah awaknyan. 23 Dan bandum bansa insaf bahwa ureuëng Israel teukirém u teumpat nyang teuböih sabab desya awaknyan ateueh Ulôn. Awaknyan ka Ulôn tinggai dan Lôn peubiyeu meunan mantong jipeutaloe lé musoh dan jipeumaté dimideuen prang. 24 Ulôn peubuet ateueh awaknyan nyang lagée nyan na kheueh sisuai deungon buet nyang kutoe dan nyang jeuhet nyang ka jipeubuet lé awaknyan, dan laju Ulôn tinggai awaknyan." 25 TUHAN Nyang Mahamanyang meufeureuman, "Teuma bak saátnyoe Ulôn Lôn gaséh umat Israel keuturonan Nabi Yakub, dan Lôn peujeuet awaknyan makmu lom. Deungon lagéenyan teutab Lôn jaga mangat nan Ulôn teutab jihoreumat. 26 Meunyoe awaknyan tinggai lom deungon teunang di nanggroe jih keudroe, dan hana meusidroe pih nyang peutakot awaknyan, teuma awaknyan tuwoe pakriban awaknyan ka jipeumalée ngon sabab ka jikhianat Ulôn. 27 Ulôn Lôn peuwoe lom awaknyan nibak nanggroe-nanggroe musoh awaknyan keudroe, dan keusucian Lôn leumah ubak bandum bansa ngon sabab buet Ulôn nyan. 28 Dan jiteupeue kheueh lé umat Lôn bahwa Ulôn kheueh TUHAN Po teu Allah awaknyan. Sabab Ulôn kheueh nyang ka kirém awaknyan u teumpat nyang teuböih, teuma Ulôn nyang ka puwoe awaknyan ubak nanggroe awaknyan keudroe, dan hana Lôn tinggai meusidroepih awaknyan disinan. 29 Ulôn Lôn sintong roh Ulôn ateueh bansa Israel, dan hana Lôn tinggai awaknyan lagée nyang ka-ka. Ulôn, TUHAN Nyang Mahamanyang ka Lôn peugah haba."

Yehezkiel 40

1 Watéenyan tanggai siploh buleuen sa, bak thon nyang keu dua ploh limong masa kamoe teuböih, peuet blaih thon óh ka lheueh Yerusalem teupeutaloe, laju ulôn rasa kuasa TUHAN, dan laju ulôn geuba. 2 Bak saboh keumalon, Po teu Allah geuba ulôn ubak tanoh Israel dan geupeuduek ulôn bak gunong nyang manyang. Dikeue ulôn leumah lôn kalon saboh keulompok bangunan nyang rab saban ngon saboh banda. 3 Ulôn geuba keunan dan deuh ulôn ngieng sidroe ureuëng agam nyang meucahya lagée peurunggu geudong bak binéh pintoe geureubang. Bak jaroe gobnyan geumat talo sineupat nibak lineun meunan cit ngon kayée sineupat. 4 Ureuëng agam nyan geupeugah ubak ulôn, "He manusia fana, deungoe kheueh beugét-gét dan simak kheueh peue-peue mantong nyang ulôn peuleumah ubak gata, sabab keunyan kheueh gata teuba keunoe. Tapeugah kheueh ubak bansa Israel bandum nyang teuma gata kalon." 5 Laju ulôn kalon Baét TUHAN nyang jikeulileng lé bintéh beuton. Ureuëng agam nyan geupeuphon uko beuton nyan ngon kayée seunupat nyang panyang jih na lhée metée. Teunyata teuma bahwa bintéh beuton nyan manyang jih lhée metée dan teubai jih pih lhée metée. 6 Óh lheuehnyan gobnyan geujak ubak babah pintoe geureubang nyang meuhadab utimu, gobnyan laju geuék ateueh reunyeun dan óh ka trok u ateueh, laju geu uko ambang pintoe nyan, luwah jih lhée metée. 7 Dilikot geureubang nyan na saboh jurong dan bak maséng-maséng binéh jih na meuteumé lhée boh kama jaga. Bandum kama saban rayeuk jih; bantuek jih peuet boh sagoe, dan panyang tieb-tieb binéh jih na lhée metée. Bintéh-bintéh beuton bataih tieb-tieb kama saban teubai jih, na kheueh dua siteungoh metée. Jurong nyan panyang jih na lhée metée teuk dan teutuju bak ruweueng raya meuhadab u Baét TUHAN. Di ureuëng agam nyan laju geu sipat ruweueng raya nyan dan teunyata luwah jih na peuet metée; teuduek jih bak ujong babah pintoe geureubang, siblaih udalam, na kheueh nyang paleng rab ngon Baét TUHAN. Beuton-beuton nyang meuhadab ubak bagian Baét TUHAN, teubai jih na simetée. 11 Óh lheuehnyan di ureuëng agam nyan laju geu sipat luwah bagian jurong di babah pintoe geureubang; na nam siteungoh metée, dan meunan cit luwah babah pintoe geureubang nyan na limong metée. 12 Dikeue kama-kama jaga nyang ukoran jih lhée kali lhée metée nyan, na beuton miyueb nyang manyang jih siteungoh metée, dan teubai jih na teuma siteungoh metée. 13 Laju lé ureuëng agam nyan geu sipat teuma jiôh nibak beuton likot saboh kama jaga sampoe trok bak beuton likot kama jaga di meurandeh, na kheueh 12,5 metée. 14 Meunan cit lé ureuëng agam nyan geu sipat ruweueng raya nyan: panyang jih siploh metée. Pintoe ruweueng nyan teutuju ubak seuramoe Baét TUHAN 15 Jiôh jih nibak pintoe geureubang blah luwa trok ubak beuton ruweueng rayeuk nyang meuhadab ubak u Baét TUHAN na kheueh 25 metée. 16 Bak beuton likot dan bintéh bataih kama-kama nyan na peuradeun-peuradeun ubit. Beuton bagian dalam nyang meuhadab ubak jurong, teuculek ngon meubagoe rupa ukeran bak palem. 17 Óh lheuehnyan lé ureuëng agam nyan geuba ulôn meulalu babah pintoe geureubang ubak peulataran Baét TUHAN. Bak binéh beuton luwa ban seukeulileng Baét TUHAN nyan teupeugét 30 boh kama. Dikeue kama-kama nyan na aleue batée 18 nyang teukeulileng bandum peulataran nyan. Peulataran luwa leubeh miyueb nibak peulataran dalam. 19 Disinan na babah pintoe geureubang nyang laén nyang teumpat jih leubeh manyang dan nyang teutuju ubak peulataran dalam. Ureuëng agam nyan geusipat jiôh lamkawan bandua pintoe geureubang nyan: 50 metée. 20 Óh lheueh nyan di ureuëng agam nyan geusipat teuma babah pintoe geureubang siblaih utara nyang teutuju ubak seuramoe dalam. 21 Di babah pintoe geureubang nyan, ban lhée boh kama jaga bak maséng-maséng binéh jurong nyan, bintéh-bintéh beuton bataih nyan meunan cit deungon ruweueng raya nyan, bandum nyan saban ukoran jih deungon nyang na di siblaih utimu. Bandum jurong geureubang nyan panyang jih 25 metée dan luwah jih 12,5 metée. 22 Meunan cit deungon ruweueng raya, peuradeun-peuradeun nyan, dan ukeran-ukeran bak palem jih saban deungon nyang na disiblaih utimu. Tujoh beuk aneuëk reunyeun nyang teutuju ubak babah pintoe geureubang nyan, dan bak ujong nyan na ruweueng raya nyang meuhadab ubak seuramoe luwa Baét TUHAN. 23 Meuhadab keue deungon babah pintoe geureubang utara, na ruweueng laén nyang teutuju ubak peulataran dalam, saban lagée nyang na di siblaih geureubang timu. Ureuëng agam nyan geusipat jiôh lamkawan bandua geureubang nyan: 50 metée. 24 Laju óh lheuehnyan, ureuëng agam nyan geuba ulôn ubak babah pintoe seulatan dan laju geu uko. Teunyata pintoe geureubang nyan saban deungon geureubang-geureubang nyang laén. 25 Peuradeun-peuradeun nyang na disinan saban deungon nyang na bak babah babah pintoe geureubang nyang laén. Panyang jurong geureubang nyan 25 metée, dan luwah jih 12,5 metée. 26 Tujoh neuk reunyeun nyang teutuju ubak geureubang nyan dan ruweueng rayeuk jih pih na nibak ujong, meuhadab ubak peulataran Baét TUHAN. Beuton-beuton nyang na bagian dalam nyang meuhadab ubak jurong, teuhias deungon ukeran-ukeran bak palem. 27 Disinan na cit pintoe geureubang nyang teutuju ubak peulataran dalam. Ureuëng agam nyan geusipat jiôh lamkawan bandua boh geureubang nyan na: 50 metée. 28 Lheueh nyan, ureuëng agam nyan geuba ulôn meulalu babah pintoe geureubang seulatan laju teutamong ubak peulataran dalam. Gobnyan laju geusipat geureubang seulatan nyan, dan ukoran jih saban deungon ukoran-ukoran pintoe geureubang di luwa. 29 Kama-kama jaga gobnyan, ruweueng rayeuk geuhnyan, dan beuton-beuton nyang na didalam nyan saban rayeuk jih deungon nyang na nibak babah-babah pintoe geureubang nyang laén. Kama-kama bak babah pintoe geureubang nyoe pih na meupeuradeun-peuradeun. Jurong geureubang nyan panyang jih 25 metée dan luwah jih 12,5 metée. 31 Teuma ruweueng rayeuk jih meuhadab ubak peulataran luwa. Beuton-beuton bagian dalam nyang meuhadab ubak jurong, meunan cit na teu uke deungon ukeran-ukeran bak palem. Lapan neuk reunyeun nyan teutuju ubak pintoe geureubang nyan. 32 Óh ka lheueh nyan ureuëng agam nyan geuba ulôn meulalu babah pintoe geureubang timu laju teutamong ubak leuen bagian dalam. Ureuëng agam nyan laju geusipat geureubang nyan deungon sineupat nyang saban deungon ukoran-ukoran babah pintoe geureubang nyang laén. 33 Kama-kama jaga, bintéh-bintéh beuton nyang na disinan dan ruweueng rayeuk ukoran jih lagée nyang na bak babah-babah pintoe geureubang nyang laén. Nibak kama-kama nyan dan bak ruweueng rayeuk nyan na peuradeun-peuradeun. Panyang jurong geureubang nyan na 25 metée dan luwah jih 12,5 metée. 34 Ruweueng rayeuknyan meuhadab ubak peulataran luwa. Beuton-beuton bagian dalam nyang meuhadab ubak jurong, teu uke deungon ukeran-ukeran bak palem. Lapan neuk reunyeun teutuju ubak pintoe geureubang nyan. 35 Akhé jih ureuëng agam nyan geuba ulôn ubak geureubang utara. Gobnyan laju geusipat babah pintoe geureubang nyan dan ukeran jih saban deungon babah-babah pintoe geureubang nyang laén. 36 Meunan cit deungon kama-kama jaga jih, bintéh-bintéh beuton dalam dan ruweueng rayeuk jih saban deungon nyang na nibak babah-babah pintoe geureubang nyang laén. Nibak kama-kama jih dan nibak ruweueng-ruweueng rayeuk jih na peuradeun-peuradeun. Panyang jurong geureubang nyan na 25 metée dan luwah jih 12,5 metée. 37 Meunan cit deungon ruweueng keue jih meuhadab ubak peulataran luwa. Beuton-beuton bagian dalam nyang meuhadab ubak jurong, teu uke deungon ukeran-ukeran bak kayée palem. Na lapan neuk reunyeun nyang teutuju ubak babah pintoe geureubang nyan. 38 Di peulataran luwa na saboh kama seunamah nibak geureubang dalam siblaih utara. Nibak kama seunamah nyan na saboh pintoe rot jak ubak ruweueng rayeuk. Disinan kheueh teumpat rhah beulatang-beulatang keu keureubeuen nyang teutot. 39 Di ruweueng raya nyan, na peuet boh meuja, dua boh di tieb-tieb binéh jih. Di ateueh meujanyan kheueh teumpat sie beulatang keu keureubeuen nyang teutot atawa keureubeuen peuamphon desya atawa lom keureubeuen gantoe rugoe. 40 Diluwa ruweueng rayeuk nyan na lom peuet boh meuja, dua boh di tieb-tieb binéh geureubang utara nyan. 41 Jadi, bandum nyan na lapan boh meuja teumpat sie keureubeuen: peuet boh didalam, dan peuet teuk diluwa peulataran. 42 Ban peuet boh meuja nibak kama seunamah nyang teupeuguna keu teupeusiab keureubeuen nyang teutot teupeut nibak batée. Meujanyan manyang jih siteungoh metée, seudangkan bagian ateueh jih meusagoe peuet, panyang dan luwah jih maséng-maséng na lhée seuper peuet metée. Di ateueh meuja nyan teukeubah peukakaih keu sie beulatang keureubeuen. 43 Teuma nibak meuja-meujanyan na meubinéh nyang luwah jih 75 milimetée. Bandum uengkot sie nyang teuma teukeureubeuen teukeubah ateueh meuja-meuja nyan. 44 Óh lheuehnyan lé ureuëng agam nyan laju geuba ulôn ubak peulataran dalam. Disinan na dua boh bangsal, nyang saboh bak sampéng geureubang utara dan meuhadab u seulatan, seudangkan nyang saboh teuk disampéng babah pintoe geureubang seulatan dan meuhadab u utara. 45 Ureuëng agam nyan geupeugah ubak ulôn bahwa bangsal nyang meuhadab u seulatan nyan teukeubah keu teungku-teungku imeum nyang meutugaih di Baét TUHAN, 46 seudangkan bangsal nyang meuhadab u utara teukeubah keu teungku imeum nyang meutugaih nibak mezbah. Bandum teungku imeum nyan harôh nibak keuturonan Zadok. Sabab nibak sukée Lewi nyang na nibak keuturonan Zadok nyang jeuet meuhadab TUHAN keu teulayani Gobnyan dalam iébadat. 47 Ureuëng agam nyan laju geusipat bagian peulataran dalam. Bentuek jih meusagoe peuet: panyang dan luwah maséng-maséng na 50 metée. Baét TUHAN nyan na di siblaih ubarat, dan dikeue nyan na saboh mezbah. 48 Óh lheueh nyan lé ureuëng agam nyan geuba ulôn u ruweueng keu Baét TUHAN deungon teuék papadub neuk reunyeun. Gobnyan laju geusipat ruweueng tamong; luwah jih na tujoh kali dua siteungoh metée, deungon bintéh-bintéh bandua binéh nyan teubai sa siteungoh metée. Di wie uneuen jih na pilar. Ruweueng keue nyan keudroe panyang jih na siploh metée dan luwah jih na nam metée.

Yehezkiel 41

1 Ureuëng agam nyan laju geuba ulôn bak kama teungoh, nyang teuboh nan Teumpat Nyang Suci. Gobnyan laju geusipat jurong nyang teutuju keunan: panyang jih na lhée metée, 2 dan luwah jih limong metée. Bintéh bandua binéh jih teubai jih na dua siteungoh metée. Óh lheuehnyan laju geu sipat Teumpat Nyang Suci nyan: panyang jih na 20 metée dan luwah jih 10 metée. 3 Óh lheuehnyan ureuëng agam laju geutamong lam kama dalam. Gobnyan laju geusipat jurong nyang teutuju keunan: panyang jih na simetée, luwah jih lhée metée, dan bintéh bandua boh binéh jih teubai jih lhée siteungoh metée. 4 Laju gobnyan keusipat teuma kama nyan: bantuek jih timang peuet sagoe, panyang dan luwah jih maséng-maséng siploh metée. Óh lheueh nyan ureuëng agam nyan geupeugah ubak ulôn, "Nyoe kheueh Teumpat Nyang Mahasuci." 5 Óh ka lheuehnyan di ureuëng agam nyan laju geusipat beuton dalam Baét TUHAN: teubai jih lhée metée. Bak bintéh beuton silingka Baét TUHAN nyan na kama-kama nyang luwah jih maséng-maséng dua metée. 6 Kama-kama nyan meutingkat lhée dan bak tieb-tieb tingkat na 30 boh kama. Bintéh timbok luwa di tieb-tieb tingkat leubeh lipeh nibak beuton nyang na di tingkat dimiyueb, seuhingga kama-kama nyan jeuet teususon deungon hana teupeuruhuéng bintéh beuton Baét TUHAN nyan. 7 Rot luwa, bintéh beuton Baét TUHAN nyan deuh jih saban teubai jih nibak miyueb sampe trok u ateueh. Bak bintéh timbok luwa nibak Baét TUHAN, disiblaih uluwa kama-kama nyan, na dua boh reunyeun nyang raya, deungon nyan jeuet teu ék phon tingkat sa trok ubak tingkat dua dan lhée. 8 Bintéh luwa nibak kama-kama nyan teubai jih na dua siteungoh metée. Bangunan nyan na pintoe nyang teutuju ubak kama-kama siblaih utara Baét TUHAN, dan pintoe laén nyang teutuju ubak kama-kama siblaih seulatan. Ban sikeulileng Baét TUHAN na seuramoe nyang luwah jih dua siteungoh metée; teuduek jih lhée metée ateueh tanoh, dan teupeugét saban manyang jih deungon pondasi kama-kama nibak beuton Baét TUHAN. Lamkawan seuramoe dan geudong-geudong nyang geupeuguna lé teungku-teungku imeum, na manjue nyang luwah jih siploh metée, di wie uneuen Baét TUHAN. 12 Dimeurandeh peulataran siblaih ubarat, na bangunan rayeuk nyang panyang jih 45 metée dan luwah jih 35 metée, dan teubai bintéh-bintéh jih dua siteungoh metée. 13 Ureuëng agam nyang geusipat panyang jih Baét TUHAN: 50 metée. Rot siblah ulikot Baét TUHAN sampoe trok ubak beuton likot bangunan rayeuk disiblaih ubarat nyan jiôh jih na cit 50 metée. 14 Bagian keue nibak Baét TUHAN nyang meuhadab utimu deungon peulataran di wie ngon uneuen jih, luwah jih na cit 50 metée. 15 Ureuëng agam nyan keusipat cit bangunan nyang rayeuk nyang meuhadab peulataran siblaih ubarat: luwah jih 50 metée, meunan cit deungon bintéh-bintéh wie ngon uneuen jih. Ruweueng-ruweueng di Baét TUHAN, ruweueng bagian keue, Teumpat Nyang Suci, dan Teumpat Nyang Mahasuci, 16 teuhias deungon bingkée kayée, phon aleue sampoe ubak peuradeun-peuradeun jih. Peuradeun-peuradeun nyan jeuet teutôb deungon tirée. 17 Bandum bintéh bagian dalam teuhias deungon meubagoe rupa ukeran 18 bak palem dan kerub, sibak bak palem lamkawan tieb-tieb dua kerub. Kerubnyan na teuma dua boh rupa, 19 saboh rupa manusia nyang meuhadab ubak bak palem siblaih si uwie, dan rupa singa nyang meuhadab ubak bak palem siblaih si uneuen. Mubagoe rupa ukeran nyan na meuteumé nibak Baét TUHAN, 20 phon nibak aleue sampoe ubak bagian ateueh pintoe. 21 Taméh-taméh pintoe nibak Teumpat Nyang Suci bantuek jih peuet sagoe timang. Dikeue Teumpat Nyang Mahasuci na sisuatu nyang leumah jih lagée mezbah nyang teupeugét nibak kayée. 22 Manyang jih sa siteungoh metée dan luwah jih simetée. Sudut-sudut jih, lapék jih dan bintéh jih teupeugét nibak kayée. Ureuëng agam nyan geupeugah ubak ulôn, "Nyoe kheueh meuja nyang na dikeue keuhaderan TUHAN." 23 Bak ujong jurong nyang teutuju u Teumpat Nyang Suci na saboh pintoe, meunan cit bak ujong jurong nyang teutuju ubak Teumpat Nyang Mahasuci. 24 Pintoe-pintoe nyan na dua ôn pintoe nyang teuhah bak teungoh. 25 Pintoe-pintoe di Teumpat Nyang Suci teuhias deungon ukeran-ukeran bak palem dan kerub-kerub, lagée bak bintéh-bintéh jih. Bak muka ruweueng keue na kheueh siblaih siuluwa, na tirée nyang teupeugét nibak kayée. 26 Bak bandua binéh bintéh sampéng nyan na peuradeun-peuradeun, dan bintéh jih teuhias deungon ukeran bak palem.

Yehezkiel 42

1 Óh lheuehnyan ureuëng agam nyan laju geuba ulôn ubak peulataran luwa dan geutunton ulôn ubak bangunan nyang laén di siblaih utara Baét TUHAN, hana jiôh nibak bangunan rayeuk di siblaih barat Baét TUHAN nyan. 2 Bangunan nyan panyang jih limong ploh metée, dan luwah jih dua ploh limong metée. 3 Saboh sagoe nibak bangunan nyan meuhadab ubak seuramoe nyang luwah jih siploh metée nyan, seudangkan sagoe nyang laén meuhadab ubak aleue batée bak peulataran luwa. Bangunan nyan meutingkat lhée; tieb-tieb tingkat meujulue leubeh udalam nibak tingkat miyueb jih. 4 Dikeue kama-kama nyan, disiblaih udalam na jurong nyang luwah jih limong metée dan panyang jih limong ploh metée. Pintoe-pintoe jih meuhadab u utara. 5 Kama-kama bak tingkat ateueh leubeh sampiek nibak kama-kama nyang na di miyueb, sabab jurong-jurong nyang na dikeue kama-kama di ateueh nyan leubeh luwah nibak nyang na dimiyueb jih. 6 Kama-kama nyan meutingkat lhée teuma hana jitumpang lé taméh-taméh lagée bak geudong-geudong di teungoh leuen. 7 Siteungoh nibak tingkat miyueb, panyang jih dua ploh limong metée na kheueh beuton mantong, seudangkan nibak bagian nyang laén, meunan cit panyang jih na dua ploh limong metée, teupeugét kama-kama. Bak tingkat nyang paleng ateueh na kama-kama ban sipanyang geudong nyan. 9 Di miyueb kama-kama nibak ujong timu bangunan nyoe, dan nibak uram beuton, na saboh pintoe nyang teutuju ubak peulataran luwa. Nibak binéh seulatan rot Baét TUHAN, na bangunan nyang saban, teuduek jih hana jiôh nibak bangunan siblaih ubarat. 11 Dikeue kama-kama nyan na saboh jurong nyang saban lagée jurong siblaih utara. Ukoran jih saban, mode jih pih saban, dan pintoe-pintoe jih pih saban. 12 Dimiyueb kama-kama siblaih seulatan, nibak ujong timu bak uram beuton, na cit saboh pintoe. 13 Ureuëng agam nyan geupeugah ubak ulôn, "Bandua bangunan nyan suci. Disinan, teungku-teungku imeum nyang jeuet meuhadab ubak keuhaderan TUHAN, teupajoh keureubeuen-keureubeuen nyang paleng suci. Meunan cit disinan awaknyan harôh geukeubah keureubeuen-keureubeuen nyang paleng suci, atra nyan na kheueh: keureubeuen gandom dan keureubeuen peuamphon desya atawa keureubeuen gantoe rugoe. 14 Meunyoe teungku-teungku imeum nyan ka seuleusoe meutugaih bak Baét TUHAN, dan geu keuneuk jak ubak peulataran luwa, peukayan khusos nyang awaknyan ngui watée geupeubuet iébadat harôh awaknyan tinggai nibak kama-kama nyan. Awaknyan harôh geungui peukayan laén, óh ka lheuehnyan barô kheueh awaknyan jeuet geujak ubak teumpat rakyat meugumpôi." 15 Óh ka seuleusoe geu uko lé ureuëng agam nyan bangunan Baét TUHAN bagian si udalam, gobnyan laju geupeuteubiet uluwa ulôn rot geureubang timu, laju geusipat bagian keulileng Baét TUHAN. 16 Deungon tungkat sineupat jih gobnyan laju geusipat binéh siblaih utimu: 250 metée. 17 Óh lheuehnyan gobnyan laju geusipat binéh siblaih utara, binéh siblaih seulatan, dan binéh siblaih ubarat; tieb-tieb binéh panyang jih saban, na kheueh 250 metée. 20 Deungon nyan, daerah Baét TUHAN teuduek jih ateueh saboh keubeueng tanoh peuet sagoe tamang, deungon ukoran 250 nibak tieb-tieb binéh. Bideueng tanoh nyan jikeulileng lé saboh bintéh beuton keu teupeung kréeh daerah nyang khusos keu TUHAN nibak daerah nyang keu umum.

Yehezkiel 43

1 Óh lheuehnyan lé ureuëng agam nyan geuba ulôn ubak pintoe geureubang nyang meuhadab utimu, 2 dan disinan kheueh ulôn kalon teuka rot arah timu cahya muble-ble sibagoe tanda keuhaderan Po teu Allah Israel. Su Po teu Allah teudeungoe lagée su ié laôt raya nyang meutaga, dan bumoe hu meuble-ble sabab cahya keuhaderan Allah. 3 Nyang deuh teungieng nyan saban lagée nyang ka lheueh ulôn kalon bak watée Po teu Allah teuka keu geujak peuhanco Yerusalem, dan lagée nyang ka lheueh lôn kalon nibak Krueng Kebar. Laju ulôn peureubah droe dan ulôn sujut. 4 Cahya muble-ble nyan meugrak-grak meulalu geureubang timu dan laju jitamong udalam Baét TUHAN. 5 Roh TUHAN geuangkat ulôn dan geuba ulôn ubak peulataran dalam; disinan ulôn kalon Baét TUHAN ka habéh peunoh jigöm lé cahya keuhaderan TUHAN. 6 Watée ureuëng agam nyan mantong geudong bak binéh ulôn, laju lôn deungoe TUHAN meufeureuman ubak ulôn, 7 "He manusia fana, nyoe kheueh takhta Ulôn. Disinoe kheueh Ulôn tinggai di teungoh-teungoh umat Israel dan Lôn mat peurintah ateueh awaknyan siumu masa. Bah kheueh awaknyan, meunan cit deungon raja-raja awaknyan, hana le jipeukutoe nan Ulôn nyang suci deungon jiseumah beurala atawa deungon cara teupeukubu manyét raja-raja awaknyan di teumpat nyoe. 8 Yoh masa ilée raja-raja awaknyan jipeugét ambang-ambang pintoe meuligoe awaknyan disampéng ambang-ambang dan taméh-taméh pintoe Baét Ulôn, sampoe teuma na saboh bintéh mantong lamkawan nyan. Awaknyan ka jipeukutoe nan Ulôn nyang suci deungon buet nyang jipeubuet lé awaknyan nyang kutoe dan luwat nyan. Sababnyan kheueh awaknyan Ulôn peubinasa lam beungéh ulôn nyang hana teukira. 9 Teuma phon saátnyoe awaknyan harôh jipiôh jiseumah beurala dan jipinah manyét-manyét raja jihnyan. Óh ka lheuehnyan, Ulôn teuma tinggai lamkawan awaknyan keu siumu masa." 10 Laju TUHAN meufeureuman lom, "He manusia fana, tajak peugah kheueh ubak umat Lôn Israel keuhai Baét Ulôn nyoe, dan yue kheueh ubak awaknyan mangat jiseulidek rancangan jihnyoe. Tapeujeuet kheueh awaknyan beu malée sabab banmandum desya nyang jipeubuet. 11 Dan óh ka lheueh awaknyan malée sabab buet-buet nyang ka jipeubuet nyan, tapeutrang kheueh rancangan Baét Lôn nyoe ubak awaknyan: phon nibak mode jih, pintoe-pintoe tamong dan pintoe teubiet jih, susonan bangunan jih, bandum peuratoran dan huköm-huköm jih. Tuléh kheueh bandum nyan keu awaknyan mangat awaknyan jeuet jikalon dan jipeurati dan hase jiatoe bandum nyan, dan jitaát bandum peuratoran nyan. 12 Nyoe kheueh sifeuet khas nibak Baét TUHAN: Bandum daerah nyang na di seukeulileng bak pucak gunong na kheueh suci that." 13 Nyoe kheueh ukoran mezbah meunurot ukoran nyang teupeuguna keu teu uko Baét TUHAN. Bansikeulileng mezbah na saboh paret nyang lhok jih siteungoh metée dan luwah jih pih na siteungoh metée, deungon bibie bak binéh luwa jih na manyang siper peuet metée. 14 Nibak paret sampoe ubak rot miseubah nyang paleng miyueb, manyang jih simetée. Bagian teungoh na manyang dua metée, dan siteungoh metée leubeh sampiek nibak keulileng gaki miseubah. Bagian keu lhée, na kheueh pucak miseubah, meunan cit siteungoh metée leubeh sampiek nibak keulileng bagian teungoh nyan. 15 Bagian keu lhée nyoe na kheueh teumpat tot keukeureubeuen; manyang jih dua metée. Nibak banpeuet boh sudut jih na bagian nyang meujulue lagée lungkée. 16 Pucak miseubah nyan hiji peuet sagoe timang; tieb-tieb binéh ukoran jih nam metée. 17 Bagian teungoh jih meusagoe peuet, tieb-tieb binéh ukoran jih tujoh metée, deungon saboh binéh bak binéh luwa nyang manyang jih siper peuet metée. (Luwah paret jih siteungoh metée.) Bak binéh siblaih utimu na reunyeun nyang teutuju u pucak mezbah. 18 TUHAN Nyang Mahamanyang meufeureuman ubak ulôn, "He manusia fana, deungoe kheueh peue nyang Ulôn peugah ubak gata. Meunyoe miseubah nyan ka lheueh teupeudong, gata harôh tabaiát deungon cara tatot keureubeuen di ateuehnyan dan tasipreuk darah keureubeuen u ateueh miseubah nyan. 19 Teungku Imeum keuturonan Zadok nibak sukée Lewi mantong nyang jeuet jak ubak hadirat Lôn keu jijak peubuet iébadat. Ulôn, TUHAN Nyang Mahamanyang nyang peurintah hainyan. Tajok kheueh ubak awaknyan saboh leumô agam nyang mantong muda sibagoe keureubeuen teusampôh desya. 20 Tacok kheueh bacut darah jih dan tasiliék kheueh laju ubak lungkée-lungkée bak ban peuet boh sagoe pucak miseubah nyan, meunan cit ubak sagoe-sagoe bagian teungoh jih meunan cit ban seukeulileng binéh miseubah nyan. Deungon caranyan kheueh gata peusuci miseubahnyan dan gata peukhusos atranyan keu Ulôn. 21 Óh lheuehnyan, tacok kheueh laju leumô agam keu teusampôh desya nyan, dan tatot kheueh bak teumpat nyang ka teupeuteuntée, na kheueh diluwa lingkongan suci Baét TUHAN. 22 Óh singoh nyan gata harôh takeureubeuen saboh kaméng agam nyang hana meucacat keu keureubeuen peu amphon desya. Neupeugleh kheueh miseubah nyan deungon darah kaméng nyan, saban lagée nyang gata peusaneut ngon leumô agam nyang muda nyan. 23 Meunyoe ka seuleusoe hai nyan gata peubuet, tacok kheueh saboh leumô agam muda dan saboh kaméng agam muda, bandua boh beulatang nyang hana cacat cupa, 24 óh lheuehnyan taba kheueh laju ubak Ulôn. Lé teungku-teungku imeum harôh kheueh geusipréuk sira ateueh beulatang nyan bandua dan tatot atranyan mangat jeuet keu keureubeuen keu Ulôn. 25 Tieb-tieb uroe nyang treb jih tujoh uroe, gata harôh neukeureubeuen saboh kaméng, leumô agam muda, dan kaméng agam keu keureubeuen peu amphon desya. Beulatang-beulatang nyan hana jeuet cacat bahpi meubacut. 26 Tujoh uroe treb jih lé teungku-teungku imeum harôh jipeuna upacara peuntahbisan mezbahnyan dan jipeusiab nyan keu jeuet teupeuguna. 27 Óh ka seuleusoe tujoh uroe nyan habéh, lé teungku-teungku imeum harôh geupeuphon peuseumah ateueh miseubah nyan keureubeuen nyang teutot dan keureubeuen peudamé keu umat. Dan Ulôn galak deungon gata banmandum. Ulôn, TUHAN Nyang Mahamanyang ka Lôn peugah haba."

Yehezkiel 44

1 Óh lheuehnyan lé ureuëng agam nyan geuhue lom ulôn ubak pintoe geureubang luwa di siblaih utimu lingkongan Baét TUHAN. Pintoe geureubang nyan teutôb, 2 TUHAN meufeureuman ubak ulôn, "Pintoe geureubang nyoe harôh teutab teutôb dan hana jeuet teupeuhah. Hana meusidroepi nyang jeuet tamong keunan, sabab Ulôn, TUHAN Po teu Allah Israel, ka Lôn tamong u Baét Lôn meulalu babah pintoe geureubang nyoe. Jadi babah pintoe geureubang nyoe harôh teutab teutôb. 3 Teuma lé peunguasa nyang mat peurintah nanggroe jeuet jijak ubak teumpat nyan keu jipajoh peunajoh suci dikeue Ulôn. Gobnyan harôh jitamong rot ruweueng rayeuk dan jigisa rot nyan cit lom." 4 Óh lheuehnyan lé ureuëng agam nyan geuba ulôn ubak pintoe geureubang utara nyang meuhadab ngon Baét TUHAN. Ulôn peurati, dan ulôn kalon Baét TUHAN nyan ka peunoh deungon cahya muble-ble sibagoe tanda TUHAN teuka. Laju ulôn peureubah droe dan lôn sujut, 5 dan TUHAN meufeureuman ubak ulôn, "He manusia fana, tangieng kheueh beugét-gét peue nyang gata kalon dan peue nyang gata deungoe. Ulôn kupeugah ubak gata banmandum peuratoran dan huköm keuhai Baét Ulôn nyoe. Tacetet kheueh beugét-gét soe-soe nyang teubri idhin jitamong lam Baét Ulôn nyoe dan soe-soe teuma nyang hana teubri tamong. 6 Tapeugah kheueh ubak umat Israel nyang galak bak buet beurontak nyan bahwa Ulôn, TUHAN Nyang Mahamanyang, hán Lôn peubiyeu le awaknyan jipeubuet kutoe. 7 Awaknyan ka jipeukutoe Baét Ulôn, sabab teungoh darah dan gapah keureubeuen jipeuseumah ubak Ulôn, awaknyan jipeu idhin jitamong udalam ureuëng-ureuëng aséng nyang hana meusunat, dan nyang hana taát ubak Ulôn. Deungon buet-buet awaknyan nyang kutoe dan luwat nyan, awaknyan ka ji-iengkeue peujanjian Ulôn deungon awaknyan. 8 Bukon jih awaknyan keudroe nyang peubuet upacara-upacara suci lam Baét Lôn, teuma ureuëng-ureuëng aséng nyang awaknyan bri tugaih keu jipeubuet bandum nyan. 9 Ulôn, TUHAN Nyang Mahamanyang, Ulôn peumaklum bahwa ureuëng aséng nyang hana meusunat dan ureuëng nyang hana taát ubak Ulôn, ureuëng nyang lagée nyan hana jeuet jitamong lam Baét Lôn. Hainyan keunong cit teuma ubak ureuëng aséng nyang tinggai teutab lamkawan bansa Israel." 10 TUHAN meufeureuman ubak ulôn, "Ulôn kuhuköm bubena ureuëng Lewi nyang meusajan-sajan ngon ureuëng-ureuëng Israel nyang laén, ka jitinggai Ulôn dan jiseumah beurala. 11 Di dalam Baét Lôn, awaknyan teuma jeuet jipeutimang Ulôn sabagoe peugawée dan nyang jaga pintoe geureubang. Awaknyan jeuet jisie bubena beulatang keu keureubeuen nyang teutot dan keureubeuen peuseumahan, dan awaknyan wajéb jilayani umat. 12 Teuma sabab awaknyan ka jipeubuet upacara seumah beurala keu bansa Israel, dan deungon caranyan ka jihila bansa nyan udalam desya, dan, Ulôn, TUHAN Nyang Mahamanyang, meusumpah bahwa awaknyan harôh teuhuköm. 13 Awaknyan hana jeuet le jipeutimang Ulôn sibagoe teungku imeum atawa jicukéeh peue-peue nyang suci nibak Ulôn, atawa jitamong ubak teumpat Nyang Mahasuci. Nyan kheueh huköman ateueh buet-buet nyang kutoe nyang ka awaknyan peubuet. 14 Jinoe awaknyan Ulôn bri tugaih keu jipeubuet buet-buet nyang geuhon dan gasa nyang peureulée jipeubuet di Baét Ulôn." 15 TUHAN Nyang Mahamanyang meufeureuman, "Bak watée bansa Israel jitinggai Ulôn, teungku-teungku imeum Lewi nibak keuturonan Zadok teutab seutia jipeutimang Ulôn di Baét Ulôn. Sababnyan awaknyan kheueh nyang jinoe harôh jipeutimang Ulôn dan jimeuhadab ukeue Ulôn keu jipeuseumah gapah dan darah nibak keureubeuen nyang na. 16 Teuma awaknyan mantong nyang jeuet tamong u Baét Lôn, jipeutimang Ulôn di miseubah Lôn, dan jipimpén seumayang di Baét Ulôn. 17 Bak watée awaknyan jitamong bak pintoe geureubang teutuju ubak peulataran dalam, awaknyan harôh jisôk peukayan lineun. Hana jeuet awaknyan ngui peukayan nyang teupeugét nibak ija wol meunyoe teungoh meutugaih bak peulataran dalam, atawa didalam Baét Ulôn. 18 Mangat hana seu uém dan meureuôh, awaknyan harôh jisök peukayan ija lineun ngon bék jingui talo keuieng, dan ikat ulée lineun. 19 Meunyoe awaknyan jijak ubak leuen bagian luwa, diteumpat umat teungoh meugumpôi, teungku-teungku imeum nyan harôh jisuet peukayan dinaih droe jih didalam kama-kama suci Baét Ulôn, laju jisôk peukayan laén, mangat peukayan khusos nyan hana teupeuceulaka umat. 20 Di teungku-teungku imeum hana jeuet jicukoe habéh ôk nibak ulée jihnyan, atawa jipeubiyeu ôk jihnyan panyang. Ôk nyan harôh teukoh paneuk meunurot atoran nyang ka teupeuteutab. 21 Awaknyan hana jeuet ji-jieb ié anggô meunyoe keuneuk tamong u peulataran dalam. 22 Di teungku-teungku imeum jeuet jimeukawen ngon aneuëk-aneuëk dara Israel nyang mantong peurawan atawa beukaih inong balée nibak teungku imeum. Awaknyan hana jeuet jimeukawen ngon inong nyang jitaleuek lé lakoe. 23 Lé teungku-teungku imeum harôh jipeurunoe ubak umat Lôn mangat jeuet jipeubeda nyang toh nyang khusos keu Ulôn dan nyang toh nyang hana jeuet, nyang toh nyang gleh meunurot agama dan nyang toh teuma nyang kutoe. 24 Meunyoe teuka meulaén waham lam hai huköm, awaknyan harôh peuseuleusoe sisuai deungon huköm-huköm Lôn. Awaknyan harôh jipeuna khanuri-khanuri keu agama, meunurot atoran-atoran dan huköm-huköm Lôn, dan jihoreumat uroe Sabat sibagoe uroe nyang khusos keu Ulôn. 25 Sidroe teungku imeum hana jeuet jipeukutoe droe ngon cara jimat manyét, teukeucuali manyét ureuëng syiek jihnyan, aneuëk jihnyan, syedara jihnyan nyang agam atawa syedara jihnyan nyang inong nyang gohlom meukawen. 26 Óh ka lheueh jihnyan gleh lom, jihnyan harôh jipreh tujoh uroe teuk, 27 laju jijak ubak peulataran bagian dalam Baét ulôn, dan jipeuseumah keureubeuen keu jipeugleh droe jihnyan mangat jihnyan jeuet meutugaih lom di Baét Lôn. Ulôn, TUHAN Nyang Mahamanyang ka Lôn peugah haba. 28 Lé teungku-teungku imeum jiteurimong jabatan imeum nyan sibagoe bagian nibak awaknyan nibak peue nyang ka Ulôn bri ubak Israel salen meusalen. Awaknyan hana jeuet jicok keumilék peue-peue mantong nyang na di Israel: Ulôn kheueh hareuta awaknyan. 29 Awaknyan harôh udeb nibak peuseumahan gandom, keureubeuen teusampôh desya, dan keureubeuen geunantoe rugoe; dan peue-peue mantong nyang ka jipeukhusos keu Ulôn, atranyan harôh teubri keu awaknyan. 30 Ubak teungku-teungku imeum harôh teubri bagian nyang paleng gét nibak peue-peue mantong hase panen nyang phon-phon that teucok, dan nibak peue mantong nyang teupeuseumah ubak Ulôn. Pajan mantong bansa Israel jipeugét ruti, teuma ruti nyang phon that na kheueh keu teungku-teungku imeum. Dan Ulôn Lôn bri beureukat keu rumoh-rumoh bansa Israel. 31 Cicém dan beulatang-beulatang nyang laén nyang maté keudroe, atawa nyang jiteugöm lé beulatang buih, atranyan hana jipajoh lé teungku-teungku imeum."

Yehezkiel 45

1 Sigohlom tanoh nyan teuwéuek-wéuek jeuet keutanoh pusaka keu tieb-tieb sukée, harôh teuwéuek saboh bulueng keu TUHAN. Tanoh nyan panyang jih harôh 12,5 kilometée, dan luwah jih 10 kilometée. Bansaboh daerahnyan teupeumaklum suci. 2 Keu Baét TUHAN teupeuna nibak tanoh nyan siladum nyang meusagoe peuet, ukoran jih 250 metée tieb-tieb binéh jih, dan jikeulileng lé padang nyang luwah jih 25 metée dan disinan kheueh harôh teupeudong Baét TUHAN. 3 Siladum nibak tanoh nyan, nyang panyang jih 12,5 kilo metée, dan luwah jih 5 kilometée harôh teukeubah keu teupeudong Baét TUHAN, na kheueh daerah nyang paleng suci. 4 Tanoh nyan suci, dan teukeubah keu teungku-teungku imeum nyang meutugaih jipeuna seumayang di Baét TUHAN. Siladum nibak tanohnyan jeuet keu teumpat rumoh awaknyan, dan siladum teuk keu Baét TUHAN. 5 Siteungoh teuk nibak tanoh nyan 12,5 kilometée kali 5 kilometée harôh teukeubah keu ureuëng-ureuëng Lewi nyang geumeubuet di Baét TUHAN. Diteumpat nyan teupeudong banda-banda dan awaknyan jeuet tinggai disinan. 6 Disampéng tanoh nyang suci nyan, harôh teupeung kréeh saboh keubeueng tanoh nyang panyang jih dua blaih siteungoh kilo metée dan luwah jih dua siteungoh kilometée, keu saboh banda nyang jeuet tinggai disinan soemantong nibak bansa Israel. 7 Keu ureuëng peunguasa nyang mat peurintah harôh cit teukeubah tanoh. Tanoh nyan meureuntang nibak bataih barat daerah nyang teupeukhusos keu TUHAN nyan, sampoe ubak Laôt Teungoh, dan nibak bataih timu nyang teupeukhusos nyan, sampoe ubak bataih timu nanggroe nyan. Jadi panyang jih saban deungon panyang saboh bulueng tanoh nyang teubri ubak sukée-sukée Israel. 8 Tanoh nyan jeuet keumilék peunguasa nyang mat peurintah bak tanoh Israel, mangat hana jitindéeh le ateueh umat Lôn, teuma teubri daerah nyang leubeh nyan jeuet keuhak milék sukée-sukée Israel. 9 TUHAN Nyang Mahamanyang meufeureuman, "Ka seb kheueh nyan desya-desya gata, he peunguasa Israel! Tapeupiôh kheueh buet gata nyang ban galak droe tatindéeh rakyat nyan. Tapeubuet kheueh peue nyang beuna dan ade. Bék sagai-sagai use umat Ulôn nibak tanoh awaknyan. Ulôn, TUHAN Nyang Mahamanyang nyang peurintah nyan ubak gata. 10 Peuguna kheueh céung dan sinukat nyang beuna: 11 Saboh efa keu teusukat bahan nyang tho harôh saban asoe jih deungon saboh bat keu teusukat bahan caye. Patok harôh kheueh saboh homer. Deungon nyan, sinukat-sinukat nyan harôh lagée nyoe: 1 homer = 10 efa = 10 bat. 12 Boh céng gata harôh lagée nyoe: 1 syikal = 20 gera 1 mina = 60 syikal 13 Nyoe kheueh dasai ukoran keu teupeuteutab peuseumahan-peuseumahan: gandom: 1/60 bagian nibak hase panen gata jawawut: 1/60 bagian nibak hase panen gata minyéuk zaiton: 1/100 bagian nibak hase bak-bak kayée. (Sukat kheueh meunurot bat: 10 bat = 1 homer = 1 kor) bubiri: saboh bubiri nibak tieb-tieb 200 boh. Gata harôh tapeuseumah keureubeuen gandom, keureubeuen nyang teutot, dan keureubeuen peudaméan, mangat desya-desya gata teupeu amphon. Ulôn, TUHAN Nyang Mahamanyang nyang bri peurintah keu nyan. 16 Bandum peunduduek nanggroe nyan harôh jiba peuseumahan-peuseumahan nyan ubak peunguasa nyang mat peurintah di Israel. 17 Jihnyan kheueh nyang wajéb bloe beulatang peulara keu keureubeuen nyang teutot dan bahan-bahan keu keureubeuen gandom dan keureubeuen anggô keu banmandum bansa Israel bak uroe-uroe raya, Peurayaan Buleuen Barô, uroe-uroe Sabat dan uroe-uroe raya laén. Jihnyan harôh jipeuduek keureubeuen peu amphon desya, keureubeuen gandom, keureubeuen nyang teutot, dan keureubeuen peudaméan keu teulakée amphon keu bansa Israel." 18 TUHAN Nyang Mahamanyang meufeureuman ubak umat Gobnyan, "Bak tanggai sa buleuen sa, gata harôh tapeugleh Baét Ulôn deungon cara tapeuseumah saboh leumô agam muda nyang hana cacat. 19 Teungku imeum harôh jicok darah nibak keureubeuen peu amphon desya nyan, laju jisampôh ubak taméh-taméh pintoe Baét Ulôn, meunan cit ubak ban peuet sagoe miseubah, dan ubak taméh-taméh pintoe geureubang nyang teutuju ubak peulataran dalam. 20 Tapeubuet kheueh lagée nyan bak tanggai tujoh buleuen nyan, keu tieb-tieb ureuëng nyang ka meudesya deungon hana jisaja atawa ngon sabab hana jiteupeue. Deungon cara lagée nyan gata tajaga keusucian Baét Ulôn. 21 Bak tanggai peuet blaih buleuen sa, gata harôh tapeuna Khanuri Paskah. Tujoh uroe treb jih bandum ureuëng harôh jipajoh ruti nyang hana meuragoe. 22 Bak uroe nyang keuphon, peunguasa nyang mat peurintah harôh jipeuseumah saboh leumô agam keu keureubeuen peu amphon desya keudroe jihnyan dan keu banmandum rakyat. 23 Teungoh peurayaan nyang treb jih tujoh uroe nyan, tieb-tieb uroe jihnyan harôh jipeuseumah ubak TUHAN tujoh boh leumô agam dan tujoh boh bubiri agam nyang hana meucacat, laju teutot atranyan bulat-bulat. Tieb-tieb uroe jihnyan harôh teuma jipeuseumah saboh kaméng agam keu keureubeuen peu amphon desya. 24 Seulaén nyan, harôh teuma jipeuseumah gandom 17,5 arée keu tieb-tieb leumô agam meunan cit lhée arée minyéuk zaiton keu tieb-tieb bubiri agam. 25 Bak Khanuri Jambo Ôn, nyang teupeuphon tanggai limong blaih buleuen tujoh, tieb-tieb uroe nyang treb jih tujoh uroe peunguasa harôh jipeuseumah keureubeuen-keureubeuen nyang saban, na kheueh keureubeuen peuamphon desya, keureubeuen nyang teutot, dan keureubeuen gandom ngon minyéuk zaiton."

Yehezkiel 46

1 TUHAN Nyang Mahamanyang meufeureuman, "Pintoe geureubang timu nyang teutuju ubak peulataran dalam harôh teutab teutôb nyang treb jih nam uroe keureuja. Pintoe geureubang nyan barô kheueh jeuet teupeuhah bak uroe Sabat dan Peurayaan Buleuen Barô. 2 Bak uroe-uroe nyan peunguasa harôh geutamong meulalu peulataran luwa dan meulalu ruweueng raya laju geudong bak binéh taméh geureubang, dan di teungku-teungku imeum geupeuseumah keureubeuen nyang teutot dan keureubeuen peudamé nibak peunguasa. Bak babah pintoe geureubang nyan gobnyan harôh geusujut dan geuseumah TUHAN, óh lheuehnyan laju geujak. Óh lheueh nibaknyan sampoe án malam, geureubang nyan hana jeuet teutôb. 3 Dikeue geureubang nyan cit teuma, banmandum rakyat harôh jisujut jiseumah TUHAN tieb-tieb uroe Sabat dan Peurayaan Buleuen Barô. 4 Bak uroe Sabat peunguasa harôh geupeuseumah ubak TUHAN keureubeuen nyang teutot nyang maséng-maséng na kheueh: nam boh aneuëk bubiri dan saboh bubiri agam, banmandum nyang hana cacat. 5 Meusigoe ngon bubiri agam nyan harôh teupeuseumah teuma keureubeuen gandom nyang le jih 17,5 arée, dan meusajan deungon tieb-tieb aneuëk bubiri, harôh teupeuseumah keureubeuen gandom nyang le jih lagée nyang teulakée. Tieb-tieb keureubeuen gandom harôh meusigoe deungon lhée arée minyéuk zaiton. 6 Bak Peurayaan Buleuen Barô bahan nyan harôh kheueh saboh leumô agam, nam boh aneuëk bubiri, dan saboh bubiri agam, banmandum nyan nyang hana meucupa bahpi meubacut. 7 Meusigoe deungon tieb-tieb leumô agam dan kaméng agam, jihnyan harôh jipeuseumah gandom nyan le jih 17,5 arée, dan meusigoe deungon tieb-tieb aneuëk bubiri, padub mantong meunurot nyang geulakée. Tieb-tieb keureubeuen gandom meusigoe deungon peuseumahan lhée arée minyéuk zaiton. 8 Meunyoe peunguasa keuneuk iébadat di Baét Ulôn, jihnyan harôh jitamong meulalu ruweueng raya, dan watée jiwoe meulalu rot nyan cit lom. 9 Sikeubit jih, meunyoe bak uroe-uroe rayeuk rakyat jiteuka jijak meuiébadat ubak TUHAN, teuma awaknyan nyang jitamong meulalu pintoe geureubang utara, watée jiwoe harôh meulalu pintoe geureubang seulatan óh ka lheueh awaknyan seuleusoe meuiébadat. Dan awaknyan nyang tamong meulalu pintoe geureubang seulatan, watée jiwoe harôh meulalu babah pintoe geureubang utara. Ubak bandum ureuëng nyan teutam hanjeuet jijak rot watée jitamong; awaknyan harôh jiwoe meulalu babah pintoe geureubang nyang na di meurandeh. 10 Peunguasa harôh jitamong u Baét TUHAN meusigoe-sigoe deungon rakyat dan jiwoepi harôh meusigoe teuma. 11 Bak uroe-uroe khanuri dan peurayaan, meusigoe deungon leumô agam dan bubiri agam harôh teuma teupeuseumah gandom nyang le jih 17,5 arée, dan meusigoe deungon tieb-tieb aneuëk bubiri, padub mantong meunurot nyang jikeuheundaki lé ureuëng nyang meuiébadat. Tieb-tieb keureubeuen gandom harôh meusigoe deungon lhée arée minyéuk zaiton. 12 Meunyoe peunguasa keuneuk jibri peuseumahan keugalak até ubak TUHAN, bah kheuehnyan keureubeuen nyang teutot meunan cit deungon keureubeuen peudamé, babah pintoe geureubang timu nyang teutuju ubak leuen dalam harôh teupeuhah keu gobnyan. Ureuëng nyan harôh jipeuseumah keureubeuen nyan deungon cara nyang saban lagée nyang jipeubuet bak uroe Sabat, teuma meunan jihnyan ka jiwoe, babah pintoe geureubang nyan harôh teutôb lom." 13 TUHAN meufeureuman, "Tieb-tieb uroe watée beungoh, saboh aneuëk bubiri nyang meu umu sithon dan nyang hana meucacat meubacutpi harôh teupeuseumah keu keureubeuen nyang teutot ubak TUHAN. 14 Seulaén nibaknyan, tieb-tieb beungoh harôh teupeuseumah teuma dua kilogram gandom dan si arée minyéuk zaiton mangat teulawok deungon gandom nyan. Nyan kheueh keureubeuen gandom nyang tieb-tieb uroe harôh teupeuseumah ubak TUHAN; atoran nyan teutab teupeubuet keu siumu masa. 15 Tieb-tieb beungoh, harôh teupeuseumah sabe ubak TUHAN; saboh aneuëk bubiri, keureubeuen gandom dan minyéuk zaiton." 16 TUHAN Nyang Mahamanyang geupeurintah, kheun Gobnyan, "Meunyoe peunguasa nyang mat peurintah jibri siladum nibak tanoh pusaka nyan ubak sidroe lamkawan aneuëk jihnyan nyang agam, tanoh nyan ka jeuet keuhak milék aneuëk agam jihnyan dan ka jeuet keuhareuta keuluwarga. 17 Teuma meunyoe peunguasa nyan jibri siladum nibak tanoh jihnyan keu sidroe lamkawan namiet jihnyan, tanoh nyan jeuet lom hak milék peunguasa nyan nibak Thon Teujok Pulang. Tanohnyan na kheueh atra milék jihnyan dan teuma jihnyan ngon aneuëk-aneuëk agam jih mantong nyang jeuet kuasa ateueh tanoh nyan keu siumu masa. 18 Peunguasa nyan hana jeuet jicok mubacut pih nibak hareuta pusaka rakyat jih. Teuma tanoh jihnyan keudroe nyang jeuet jijok ubak aneuëk-aneuëk agam jihnyan sampoe hana meusidroe pih nibak umat Ulôn hase jipeu crebre nibak hak milék jihnyan." 19 Óh lheuehnyan lé ureuëng agam nyan laju geuba ulôn meulalu babah pintoe di sampéng pintoe geureubang, ubak kama-kama suci nyang meuhadab u utara. Kama-kama nyan teukeubah keu teungku-teungku imeum. Ureuëng agam nyan geutunyok ubak ruweueng bak ujong siblaih ubarat, 20 dan geupeugah, "Nibak teumpat nyoe lé bandum teungku imeum harôh jireubôh keureubeuen peusampôh desya dan keureubeuen gantoe rugoe dan jitot keureubeuen gandom, mangat na bahpi bacut nibak keureubeuen-keureubeuen nyang suci nyan hana teuba ubak peulataran luwa sampoe akibat jih teupeuceulaka rakyat." 21 Óh lheueh nyan ulôn geuba teuma ubak peulataran luwa dan geupeuleumah ubak ulôn bahwa nibak ban peuet boh sagoe jih, maséng-maséng na peulataran nyang leubeh ubit, panyang jih 20 metée dan luwah jih 15 metée. 23 Tieb-tieb leuen nyan jikeulileng lé beuton batée, dan nibak beuton nyan na sinungkée-sinungkée. 24 Kheun ureuëng agam nyan ubak ulôn, "Nyoe kheueh dapu-dapu teumpat peulayan-peulayan Baét TUHAN jireubôh keureubeuen-keureubeuen nyang jipeuseumah lé rakyat."

Yehezkiel 47

1 Ureuëng agam nyan geuba lom ulôn ubak babah pintoe tamong u Baét TUHAN. Leumah lôn kalon ié teungoh ji ile rot miyueb pintoe nyan u arah timu, lagée Baét TUHAN pih meuhadab u timu. Ié nyan ji ile rot miyueb ambang pintoe Baét TUHAN bagian seulatan meulalu sisi seulatan nibak mezbah. 2 Óh lheueh nyan lé ureuëng agam nyang geupeuteubiet ulôn meulalu babah pintoe geureubang utara dan geutunton ulôn ubak geureubang timu. Krueng ubit nyan ji ile nibak sisi seulatan geureubang nyan. 3 Teungoh teusipat ngon tungkat seuneupat gobnyan, ureuëng agam nyan geuba laju ulôn seutôt talo krueng nyan arah utimu nyang jiôh jih na 500 metée, laju geuyue ulôn mangat lôn jeumeurang. Nibak teumpatnyan ié cit éuet mata gatôk. 4 Óh lheuehnyan gobnyan geusipat 500 metée teuk, dan di teumpat nyan ié jih na éuet teuôt. Gobnyan geusipat 500 metée teuk, dan ié jih na éuet keuieng. 5 Geusipat lom sigoe teuk nyang jiôh jih 500 metée, dan disinan ié jih lumpah that lhok keu teubloh teujak ngon tapak. Meunyoe ureuëng keuneuk jeumeurang harôh kheueh jimeulangue. 6 Laju geupeugah lé ureuëng nyan ubak ulôn, "He manusia fana, takalon kheueh nyoe beujroh-jroh." Óh lheuehnyan gobnyan geuba lom ulôn teujak seutôt talo krueng, 7 dan ulôn kalon bahwa bak bandua binéh krueng nyan jai that jitimoh bak kayée. 8 Ureuëng nyan geupeugah ubak ulôn, "Krueng nyoe ji ile utimu meulalu nanggroe nyoe dan meulalu Pantôn Krueng Yordan teutuju u Laôt Maté. Meunyoe ié jih trok u dalam Laôt Maté, ié laôt nyang masen nyan geugantoe ngon ié tabeue. 9 Ho mantong ié krueng nyan ji ile, disinan cit teuma na meuteumé meubagoe macam uengkot dan beulatang laén. Ié Laôt Maté geupeujeuet jeuet keu ié tabeue, dan homantong ié nyan ji ile, disinan na udeb. 10 Nibak mata-mata ié di En-Gedi sampoe trok ubak mata-mata ié di En-Eglaim, tieb-tieb bagian binéh jih ramé that deungon ureuëng-ureuëng neulayan nyang geu ade jeue gobnyan nibak teumpat nyan. Beubagoe macam uengkot na didalam ié nyan, lagée nyan na lam Laôt Teungoh. 11 Teuma ié nyang na lam-lam rawa dan paya-paya bansipanyang panté nyan hana jeuet keutabeue, teuma teutab jeuet keu sumber sira. 12 Ban sipanyang krueng nyan timoh meubagoe macam bak kayée muboh. Ôn kayée nyan hántom na layée, dan boh-boh kayée nyan hántom na habéh. Bak bak kayée nyan jimuboh boh kayée nyang barô tieb-tieb buleuen, sabab ié nyang ile disinan na kheueh ié nibak Baét TUHAN. Boh-boh kayée nyan jeuet keupeunajoh dan ôn-ôn kayée nyan meuguna jeuet keu ubat." 13 TUHAN Nyang Mahamanyang meufeureuman, "Nyoe kheueh bataih-bataih tanoh nyang teubagi-bagi ubak bandua blaih sukée Israel. Sukée Yusuf jiteurimong dua bagian. 14 Ulôn ka Lôn meusumpah bahwa tanoh nyan Ulôn bri ubak indatu gata. Sabab nyan, tacok kheueh tanoh nyan dan neubagi kheueh deungon ade lamkawan gata. 15 Bataih rot utara teupeuphon di Laôt Teungoh teutuju utimu sampoe u banda Hetlon, u arah Hamat, laju u banda Zedad, 16 u Berota dan Sibraim (banda-banda nyan teuduek jih lamkawan banda Damsyik dan banda Hamat), óh lheuehnyan u banda Hazar-Enan, dibataih banda Hauran. 17 Jadi, bataih siblaih utara teupeuphon rot Laôt Teungoh sampoe utimu, u banda Hazar-Enan; dan daerah Damsyik dan Hamat na di siblaih utara bataih nyan. 18 Bataih siblaih utimu teutuju u seulatan, nibak saboh teumpat lamkawan Damsyik dan daerah Hauran. Jadi, Krueng Yordan na kheueh bataih lamkawan tanoh Israel di siblaih ubarat dan Gilead siblaih utimu, sampoe trok u Tamar di Panté Laôt Maté. 19 Bataih disiblaih seulatan teutuju ubarat daya, nibak Tamar ubak mata ié Kades-Meriba, laju ubarat laôt sipanyang bataih nanggroe Meusé sampoe u Laôt Teungoh. 20 Bataih siblaih ubarat teupeuget lé Laôt Teungoh, laju teutuju u utara ubak saboh teumpat di siblaih ubarat rot tamong u Hamat. 21 Taweuek kheueh tanoh nyan seusabe gata, meunurot sukée-sukée Israel; 22 dan tanoh nyan na kheueh atra gata keu siumu masa. Ureuëng-ureuëng aséng nyang tinggai teutab lamkawan gata, dan na aneuëk-aneuëk nyang lahé disinan, harôh meuteumé cit bulueng nibak atranyan. Awaknyan harôh teuanggab sibagoe warga nyang peunoh nibak bansa Israel, dan awaknyan harôh turot teu undi mangat jeuet meuteumé tanoh watée teupeuna peumbagian di lamkawan sukée-sukée Israel. 23 Tieb-tieb peunduduek aséng harôh teubri tanoh meusajan ngon sukée Israel dipat mantong awaknyan tinggai. Ulôn, TUHAN Nyang Mahamanyang ka Lôn peugah haba."

Yehezkiel 48

1 Bataih tanoh siblaih utara meubuju utimu, phon di Laôt Teungoh u arah banda Hetlon, rot tamong u Hamat, banda Hazar-Enan, sampoe ubak bataih lamkawan banda Damsyik dan banda Hamat. Sukée-sukée seulanjut jihnyoe maséng-maséng harôh meuteumé saboh jeumba nibak tanoh nyang luwah bak bataih timu teutuju ubarat sampoe u Laôt Teungoh, dalam urotan jih na kheueh lagée nyoe phon di barat trok u seulatan: Dan Asyer Naftali Manasye Efraim Ruben Yehuda 8 Bagian seulanjut jih nibak tanoh nyan harôh teupeung kréeh keu teupeuguna khusos. Panyang jih harôh 12,5 kilometée nibak bataih utara sampoe u seulatan. Bataih-bataih timu dan barat harôh saban panyang jih deungon jeumba-jeumba nyang geubri ubak sukée-sukée Israel. Baét TUHAN teupeudong nibak bagian nyan. 9 Siladum nibak daerah nyan teupeukhusos keu TUHAN, na kheueh saboh keubeueng tanoh di bagian pusat, panyang jih 12,5 kilometée dan luwah jih 10 kilometée. 10 Bak bagian teungoh tanoh nyan teupeudong Baét TUHAN. Keu teungku-teungku imeum harôh meuteumé bagian nibak daerah nyang suci nyan. Jeumba awaknyan na kheueh 12,5 kilometée phon nibak binéh timu sampoe u bagian barat, dan limong kilometée nibak binéh utara u seulatan. 11 Daerah nyang khusos nyan teuma jeuet keu hakmilék teungku-teungku imeum keuturonan Zadok. Awaknyan ka jipeutimang TUHAN deungon seutia dan bukon lagée ureuëng Lewi nyang saboh sukée deungon awaknyan, nyang sajan jipeubuet desya deungon ureuëng-ureuëng Israel nyang laén. 12 Sabab nyan ubak keuturonan Zadok harôh teubri tanoh khusos disampéng tanoh nyang teubri ubak ureuëng Lewi. Dan tanoh khusos nyan keubit that suci. 13 Tanoh ureuëng-ureuëng Lewi nyan panyang jih 12,5 kilometée rot timu ubarat, dan luwah jih 5 kilometée rot utara u seulatan dan teuduek jih sare meuatoe deungon tanoh teungku-teungku imeum. 14 Sijingkai pih nibak tanoh nyan hana jeuet awaknyan peubloe atawa awaknyan tuka; bagian nyang paleng jroh nibak tanoh Israel hana jeuet teupinah lam jaroe ureuëng laén, sabab tanoh nyan ka teupeukhusos keu TUHAN dan jeuet keuhak milék jihnyan. 15 Di siblaih seulatan tanoh khusos nyan, mantong na tinggai nyang panyang jih 12,5 kilometée, dan luwah jih dua siteungoh kilometée. Bagian nyan hana suci dan jeuet geupeuguna lé rakyat keu teumpat tinggai dan keu blang naleueng, dibagian teungoh jih harôh teupeudong saboh banda. 16 Banda nyan harôh meubantuek peuet sagoe timang, tieb-tieb binéh jih harôh na ukoran dua siper peuet kilometée. 17 Bansikeulileng banda nyan harôh na tanoh luwah nyang luwah jih 125 metée. 18 Di siblaih utimu dan barat banda nyan na tanoh luwah nyang luwah jih maséng-maséng limong kali dua siteungoh kilometée. Bandua boh teumpat tanoh luwah nyan harôh teupeuguna keu teumpat meutani lé peunduduek banda. 19 Ureuëng-ureuëng di bandua sukée Israel nyang tinggai nibak bandua banda nyan jeuet jimubuet nibak tanohnyan. 20 Lé sabab nyan, bansaboh daerah nyan, meunan cit deungon tanoh nyang khusos dan tanoh keu banda, bantuek jih peuet sagoe timang deungon ukoran 12,5 kilometée tieb-tieb saboh sagoe. 21 Tanoh disiblaih ubarat dan siblaih utimu di daerah khusos nyang teukeubah keu Baét TUHAN, lé teungku-teungku imeum, ureuëng Lewi dan banda nyan keudroe, na kheueh keu peunguasa nyang mat peurintah. Di siblaih utimu tanoh nyan luwah jih meubataih sampoe utimu, dan siblaih ubarat sampoe u Laôt Teungoh, dan teuduek jih lamkawan tanoh Yehuda ngon tanoh Benyamin. 23 Tanoh nyang na disiblaih seulatan nibak daerah nyang khusos nyan, na kheueh keu sukée-sukée nyang laén. Luwah tanoh nyan phon nibak bataih timu u arah barat trok laju u Laôt Teungoh, dan teubagi meunurot susonan nyoe di utara sampoe u seulatan na kheueh: Benyamin Simeon Isakhar Zebulon Gad 28 Di siblaih seulatan tanoh Gad na meuteumé peubatasan nyang phon di barat daya Tamar liwat mata ié Kades-Meriba, laju u arah barat laôt sibuju peubatasan nanggroe Meusé sampoe u Laôt Teungoh. 29 TUHAN Nyang Mahamanyang meufeureuman, "Meunan kheueh tanoh nyan harôh teuwéuek-wéuek keu sukée-sukée Israel." 30 Babah pintoe tamong u banda Yerusalem banmandum na dua blaih boh. Ban peuet boh bintéh beuton jih maséng-maséng na ukoran dua siper peuet kilometée, dan na lhée boh pintoe geureubang. Tieb-tieb saboh pintoe geureubang teuboh nan meunurot nan sidroe lamkawan sukée bansa Israel. Babah-babah pintoe geureubang nyang na siblaih utara geuboh nan Ruben, Yehuda dan Lewi; babah-babah pintoe geureubang nibak bintéh beuton siblaih utimu geuboh nan Yusuf, Benyamin, dan Dan; nyang na nibak beuton seulatan geuboh nan Simeon, Isakhar dan Zebulon; seudangkan nyang na disiblaih ubarat geuboh nan Gad, Asyer, dan Naftali. 35 Bandum bintéh beuton nyan panyang jih sikureueng kilometée. Dan phon saátnyoe geuboh nan banda nyan lé ureuëng: "TUHAN NA DISINAN!"

Daniel 1

1 Lhée thon óh ka lheueh Raja Yoyakim geumat peurintah ateueh Yehuda, Nebukadnezar raja nanggroe Babel, laju jiseureubu ateueh banda Yerusalem dan jikeupong banda nyan. 2 TUHAN geubri idhin ubak jih jeuet jipeutaloe Raja Yoyakim dan jireupah siladum nibak barang-barang nyang meuhareuga di Baét TUHAN. Ureuëng-ureuëng nyang teuteuen, laju jiba ubak kuil dewa jihnyan di Babel, dan barang-barang meuhareuga nyang jireupah nyan, laju jikeubah didalam gudang-gudang kuil nyan. 3 Óh lheuehnyan lé raja laju geubri peurintah ubak Aspenas, ulée rumoh tangga meuligoe, keu teupiléh lamkawan ureuëng-ureuëng Israel nyang teuteuen kira-kira napadub droe peumuda keuturonan raja atawa nyang meudarah bansawan. 4 Awaknyan harôh kheueh peumuda-peumuda nyang hana meucacat bahpi meubacut. Awaknyan harôh nyang ceudah, meupeundidekan manyang, carông dan iéleumé peungeutahuan gobnyan luwah dan pantaih jimeutugaih lam meuligoe. Aspenas harôh jipeurunoe keu awaknyan meubaca dan teumuléh lam basa Babel. 5 Lé Raja geupeuteuntée cit teuma bahwa peunajoh dan ié jieb keu awaknyan harôh saban deungon nyang jipeuguna lé keuluwarga raja. Óh ka lheueh geulateh nyang treb jih na lhée thon, awaknyan harôh jimeuhadab ubak raja mangat geuteurimong tugaih lam meuligoe. 6 Lamkawan peumuda-peumuda nyan na cit disinan Daniel, Hananya, Misael dan Azarya, banmandum nyan nibak sukée Yehuda. 7 Lé ulée rumoh tangga meuligoe laju jigantoe nan-nan awaknyan lagée nyoe: Beltsazar, Sadrakh, Mesakh dan Abednego. 8 Deungon tulông Allah, Daniel lumpah jigaséh lé Aspenas. Daniel kana teukat hana geupeukutoe droe gobnyan deungon peunajoh dan ié anggô nyang na lam meuligoe raja, sabab nyan gobnyan geulakée ubak Aspenas mangat jeuet geumita peunajoh nyang laén. 10 Sabab jitakot ubak raja, jipeugah lé Aspenas lagée nyoe, "Raja keudroe ka geupeuteutab peunajoh dan ié jieb gata, jadi meunyoe meunurot peundapat jihnyan gata leumah jih kureueng seuhat nibak peumuda-peumuda nyang laén, pasti ulôn geupoh maté." 11 Óh lheuehnyan Daniel laju geumeupakat hainyan deungon peungawai nyang geujok tugaih lé Aspenas keu jipeutimang Daniel dan ban lhée droe rakan jihnyan. Jipeugah lé Daniel, 12 "Neu ujoe kheueh kamoe paleng kureueng siploh uroe; neubri kheueh ubak kamoe gulée-gulée dan ié keu peunajoh dan nyang kamoe jieb. 13 Óh ka lheueh siploh uroe, neubandeng kheueh ruman kamoe deungon ruman-ruman peumuda nyang jipajoh peunajoh nyang geujok lé raja, dan óh lheuehnyan neucok kheueh laju peunutoh meunurot nyang droeneueh tilek." 14 Peungawai nyan situju dan laju ji-ujoe awaknyan nyang treb jih siploh uroe. 15 Óh ka watée nyang siploh uroe nyan habéh, awaknyan deuh jih leubeh seuhat dan teuga nibak bandum peumuda nyang ka meuteumé peunajoh nibak meuja raja. 16 Phon saát nyan lé peungawai nyan hana le jihidang peunajoh dan ié jieb nyang geubri lé raja, teuma ka séb deungon gulée-gulée dan ié mantong. 17 Po teu Allah geujok ubak ban peuet droe peumuda nyan hikeumat keu ahlian lam hai keususasteraan dan iéleumé. Seulaén nibaknyan ubak Daniel geubri teuma keu ahlian mangat jeuet geupeutrang keuhai keumalon dan makna lumpo. 18 Bak akhé thon nyang keu lhée nyang ka geupeuteuntée lé raja nyan, Aspenas laju geuba bandum peumudanyan keu jijak meuhadab ubak Raja Nebukadnezar. 19 Óh ka lheueh geuseu eue ubak awaknyan bandum, lé raja laju geuteumé nibak Daniel, Hananya, Misael dan Azarya leubeh nibak nyang laén lam hai peue mantong. Dan geupeuphon kheueh lé awaknyan meutugaih dalam meuligoe raja. 20 Pajan mantong raja geupeugah keuhai masaalah nyang peureulée teupeutrang dan peutimbangan, laju deuh geukalon bahwa naseuhat dan peundapat ban peuet droe peumuda nyan siploh goe leubeh gét nibak naseuhat dan peundapat bandum peuramai dan ahli meurajah nyang na lam keurajeuen gobnyan. 21 Daniel teutab meutugaih lam meuligoe sampoe Raja Koresy nibak Persia jipeutaklok Babel.

Daniel 2

1 Bak simalam, dua thon óh ka lheueh Raja Nebukadnezar geumat peurintah, gobnyan meulumpo. Lumpo geuhnyan keubit jipeususah that até geuh, sampoe gobnyan hana hase le geuéh. 2 Lé sabab nyan laju geutawök ureuëng peuramai, ahli meurajah, tabib dan ureuëng-ureuëng nyang na iéleumé, mangat jiboh makna lumpo geuhnyan nyan. 3 Watée awaknyan jidong dikeue gobnyan, raja laju geupeugah, "Ulôn meulumpo, dan até lôn susah that sabab meuhéuet that beulôn teupeue makna lumpo nyan!" 4 Awaknyan laju jijaweueb lam basa Aram, "Udeb kheueh Teungku Amphon siumu masa! Neupeugah kheueh lumpo nyan ubak kamoe, mangat jeuet kamoe peutrang makna lumpo nyan." 5 Geujaweueb lé Raja, "Ulôn ka lheueh ulôn cok keuputosan nyang lagée nyoe: Gata harôh tapeugah lumpo nyan ubak ulôn, meunan cit deungon makna jih. Meunyoe gata hana hase, gata teukoh-koh dan rumoh gata teureuloh. 6 Teuma meunyoe gata hase, ubak gata ulôn bri hadiah nyang ceudah-ceudah dan peunghoreumatan nyang raya. Nah, tapeugah kheueh laju lumpo ulôn nyan deungon makna jih!" 7 Jijaweueb lom lé awaknyan, "Teungku peugah dilée lumpo nyan ubak kamoe, óh lheuehnyan barô kheueh kamoe peutrang makna jih." 8 Ban geudeungoe nyang lagée nyan raja laju geujaweueb, "Paih that lagée nyang ulôn duga. Gata nyang na neu ulue-ulue watée mantong, sabab gata tateupeue bahwa 9 ulôn na meukeusut keuneuk lôn huköm gata banmandum deungon cara nyang saban meunyoe gata hana hase tapeutrang makna lumpo nyan ubak ulôn. Gata ka tameupakat mangat ulôn nyoe hana piôh-piôh gata peungéuet dan tapeumeuén ulôn deungon harapan bahwa ulôn ku ubah peue-peue nyang ka lôn peuputôh. Nah, tapeugah kheueh laju makna lumpo nyan, teuma ulôn kuteupeue bahwa gatapih hase tapeutrang makna lumpo nyan." 10 Banmandum ahli nujum nyan jijaweueb, "Bansigom donya nyoe hana nyang teupeue peue nyang Teungku Amphon lakée. Dan hántom na sidroe raja, padubna rayeuk dan mulia raja nyan, geulakée hai nyang lagée nyan ubak sidroe peuramai, nyang ahli meurajah, dan ureuëng-ureuëng meuiéleumé bak meuligoe gobnyan. 11 Teungku Amphon neulakée sapeue-sapeue nyang paleng payah. Hana meusidroe pi nyang hase jipeupeunoh teukeucuali lé dewa-dewa, teuma awaknyan hana tinggai lamkawan manusia." 12 Ban geudeungoe lagée nyan raja beungéh lumpah na dan laju geupeutron titah mangat teupoh maté bubena ureuëng-ureuëng carông nyang na di Babel. 13 Laju peurintah nyan geupeumaklum, dan banmandum ureuëng nyang malem dan nyang carông, hana tuwoe cit keu Nabi Daniel dan rakan-rakan gobnyan jikeuneuk poh maté. 14 Dan Daniel laju geujak meurumpok ubak Ariokh, peumimpén peungawai raja, nyang ka siab jilaksana huköman maté nyan. Deungon até-até that 15 Daniel laju geutanyong ubak ureuëng nyan, pakon raja ka geupeuteubiet peurintah nyang kreueh luwa biasa nyan. Ariokh laju jipeugah ubak Daniel peue nyang ka teujadi. 16 Deungon pantaih Daniel laju geujak meuhadab ubak raja dan geulakée beugeubri watée mangat jeuet geupeutrang makna lumpo nyan. 17 Nyang geulakée lé Daniel nyan geubri lé raja, laju Daniel geuwoe u rumoh dan geupeugah laju hainyan ubak Hananya, Misael dan Azarya. 18 Geuyue laju ubak awaknyan mangat geumeudoá ubak Po teu Allah di syeuruga jeuet Po teu Allah beuna gaséh sayang ubak awaknyan dan geutem peuleumah makna lumpo nyan. Deungon lagée nyan awaknyan hana teuhuköm maté meusajan ngon ureuëng-ureuëng patot nyang laén. 19 Malamnyan cit teuma Po teu Allah geupeuleumah makna lumpo nyan ubak Daniel nibak saboh keumalon. Dan Daniel laju geupujoe Po teu Allah di syeuruga, 20 kheun gobnyan, "Allah nyan bijaksana dan peukasa, teupujo kheueh Gobnyan siumu masa! 21 Gobnyan kheueh nyang peuteutab musém dan masa, dan nyang peu rhot ngon nyang angkat peunguasa. Gobnyan kheueh nyang bri keubijaksanaan, dan nyang anugeurah peungeurtian. 22 Gobnyan kheueh nyang peugah rahsia nyang paleng lhok dan Gobnyan geuteupeue peue mantong nyang teujadi didalam seupôt. Gobnyan peunoh ngon cahya trang. 23 Ya Allah, nyang geupujoe lé indatu lôn, Droeneueh lôn pujoe dan lôn peumulia. Sabab neubri ubak ulôn hikeumat dan teunaga. Peue nyang kamoe lakée ka Droeneueh peupeunoh. Dan jeunaweueb ubak raja ka Droeneueh tunyok." 24 Óh lheuehnyan Daniel laju geujak ubak Ariokh nyang ka geubri tugaih keu jipoh maté bandum ureuëng-ureuëng patot nyang na di Babel. Geupeugah lé Daniel ubak Ariokh nyan, "Bék tapeumaté bandum ureuëng-ureuëng patot nyan. Taba kheueh ulôn jak meuhadab ubak raja, sabab ulôn keuneuk jak peugah ubak Po raja makna lumpo nyan." 25 Deungon pantaih that Ariokh laju jiba Daniel meuhadab ukeue Raja Nebukadnezar sira jipeugah, "Ulôn ka meuteumé lamkawan ureuëng-ureuëng Yahudi nyang teuböih sidroe ureuëng nyang hase geuteupeue makna lumpo Teungku Amphon." 26 Dan geupeugah kheueh lé raja ubak Daniel nyang geuhôi cit deungon nan Beltsazar, "Peu kheueh hase tapeutrang lumpo ulôn dan maknajih?" 27 Geujaweueb lé Daniel, "Hana ureuëng meuiéleumé, ahli meurajah, ahli meuramai dan ahli keu soai bintang-bintang nyang hase jipeugah hainyan ubak Teungku Amphon. 28 Teuma di syeuruga na Po teu Allah nyang peugah banmandum rahsia, dan Gobnyan ka geubri tée ubak Teungku Amphon peue nyang teujadi óh uroe dudoe. Bak saát nyoe, neupeu idhin kheueh ubak ulôn jeuet lôn peutrang makna lumpo dan nyang deuh lôn kalon nyang Teungku Amphon teurimong watée neuéh nyan. 29 Watée Teungku Amphon teungoh neuéh, Teungku Amphon meulumpo keuhai jamén nyang teuma teuka. Allah nyang singkab bandum rahsia geupeuleumah ubak Teungku Amphon peue nyang teujadi. 30 Rahsia nyoe ka geupeugah ubak ulôn bukon ulôn nyoe leubeh carông nibak soemantong, teuma mangat Teungku Amphon jeuet neuteupeue makna lumpo Teungku Amphon dan neumuphom teuma keuhai asoe até Teungku Amphon keudroe. 31 Nyoe kheueh keumalon nyang Teungku Amphon ngieng: Dikeue Teungku Amphon na saboh patong! Patong nyan lumpah raya, dan meukilat-kilat teuma ruman jih lumpah that teumakot. 32 Ulée jih teupeugét nibak méuh aseuli, dada dan jaroe jih nibak pirak, keuieng dan boh punggong jih nibak teumaga, 33 pha jih nibak beuso dan gaki jih siladum nibak beuso dan siladum teuk nibak tanoh kliet. 34 Watée Teungku Amphon teungoh neupandang ateueh nyan, na sianeuk batée raya leukang bak binéh reuleung, batée nyan leukang hana soe nyang cukéh, dan batée nyan rhot laju jitimpok ateueh gaki patong nyan nyang teupeugét nibak beuso dan tanoh kliet nyan, sampoe reumok. 35 Bak watée nyan cit teuma bandum patong nyan reuloh dan jeuet keusinamon beuso, tanoh kliet, teumaga, pirak, dan méuh nyang hanco meurabok lagée abée bak teumpat teupéh aneuk gandom watée musém uroe kha. Seunamon nyan habéh jipupoe jipot lé angén, sampoe hana tinggai beukaih mubacutpi. Teuma batée nyang peureubah patong nyan ka rayeuk na bube gunong sampoe ka peunoh bansigom bumoe. 36 Nyan kheueh lumpo Teungku Amphon, dan bak saátnyoe lôn peutrang teuma makna jih. 37 Nyang Mulia Teungku Amphon na kheueh raja sigala raja; Teungku Amphon kheueh nyang paleng meukuasa. Po teu Allah di syeuruga ka geubri ubak Teungku Amphon keurajeuen nyoe, keukuasaan, teunaga dan keuagongan. 38 Teungku Amphon geupeujeuet keupeunguasa ateueh bagian donya nyang na peunduduek dan ateueh meubagoe cicém dan beulatang nyang laén. Teungku Amphon keudroe na kheueh ulée méuh nibak patong nyan. 39 Teuma óh ka lheueh keurajeuen Teungku Amphon trok bak akhé masa, teuma teuka keurajeuen laén nyang hana saban rayeuk jih lagée keurajeuen Teungku Amphon. Óh lheuehnyan teuka kheueh keurajeuen nyang keu lhée nyang teulambang ubak bagian nibak teumaga keu patong nyan, nyang kuasa bansigom donya. 40 Seulanjut jih teuma teuka keurajeuen nyang keu peuet, nyang teuga jih lagée teunaga beuso. Dan lagée beuso nyang teupeureumok dan teupeuhanco peue-peue nyang na, meunan kheueh teuma keurajeuen nyang keu peuet nyoe teupeureumok dan teupeuhanco keurajeuen-keurajeuen nyang laén. 41 Gaki dan jaroe-jaroe patong nyang teupeugot siladum nibak tanoh kliet dan siladum teuk nibak beuso nyan, nyan na kheueh sibagoe peutunyok bahwa bak saboh saát teuma keurajeuen nyan teuma teubagi-bagi. Keurajeuen nyan na cit teunaga jih sabab tanoh kliet nyan na meujampu deungon beuso. 42 Jaroe-jaroe gaki nyang siladum teupeugot nibak beuso dan siladum nibak tanoh kliet nyan makna jih bahwa na bagian keurajeuen nyang teuga dan na cit nyang leumoh. 43 Beuso meujampu ngon tanoh kliet nyan, nyan makna jih bahwa keurajeuen nyan jiuseuha jipeukong droe deungon cara jipeuna meukawen meujampu, teuma useuha nyang lagée nyan sia-sia, lagée beuso nyang hana hase meusinyawöng deungon tanoh kliet. 44 Bak masa peurintah raja-raja nyan, Po teu Allah nyang na di syeuruga geupeudong saboh keurajeuen nyang meuteun siumu masa dan nyang hana hase jipeutaloe lé bansa toh mantong. Keurajeuen nyan geupeuhanco sampoe meurabok bubena keurajeuen nyang laén. 45 Bukon kheueh ka neukalon lé Teungku Amphon bahwa deungon hana jimat lé manusia pih, si aneuk batée lheueh nibak reuleung laju rhot dan keunong dan reumok ateueh patong nibak beuso, teumaga, tanoh kliet, pirak dan méuh nyan? Po teu Allah nyang akbar geupeugah ubak Teungku Amphon peue nyang singoh teujadi. Lumpo nyan jeuet teupeucaya dan peue-peue nyang ka lôn peutrang nyoe na kheueh teupat." 46 Laju geusujut kheueh Raja Nebukadnezar dikeue Daniel dan geubri peurintah mangat Daniel jihoreumat dan ubak gobnyan teupeuseumah keureubeuen nyang teutot dan peuseumahan-peuseumahan nyang laén. 47 Geupeugah lé Raja, "Beutôi, Daniel, Allah gata paleng rayeuk lamkawan Allah nyang laén. Gobnyan na kheueh nyang mat kuasa ateueh banmandum raja, dan nyang peutrang bubena rahsia. Ulôn kuteupeue hainyan sabab gata ka hase tapeutrang makna lumpo ulôn nyoe." 48 Óh lheuehnyan Daniel geubri keududuekan nyang manyang, geuanugeurah hadiah nyang jai dan nyang ceudah ngon lagak-lagak, dan laju geuangkat jeuet keugubunur Babel, dan geupeujeuet teuma keupeumimpén nyang manyang ateueh bandum peunaseuhat meuligoe. 49 Teuma ateueh geulakée lé Nabi Daniel, raja laju geuseurah peumeurintahan propinsi Babel nyan ubak Sadrakh, Mesakh dan Abednego, seudangkan Daniel keudroe tinggai lam meuligoe raja.

Daniel 3

1 Bak saboh watée Raja Nebukadnezar geupeugöt saboh patong méuh nyang manyang jih na 27 metée dan luwah jih rabna 3 metée. Patong nyan laju geupeudong nibak tanoh pantôn Dura di propinsi Babel. 2 Óh lheuehnyan lé raja laju geutawök banmandum raja wilayah, bubena gubunur, bubena bupati, peunaseuhat neugahra, beundahara, hakém, nyang malem huköm, dan bandum ulée daerah keu jiteuka nibak upacara teureuseumi patong nyang ka geupeudong nyan. 3 Óh ka habéh bandum awaknyan jiteuka dan ka jidong dikeue patong nyan, 4 lé ajudan raja jipeuphon meulakée deungon su nyang meuleungkeng, "He bandum syedara nibak meubagoe bansa, sukée bansa dan basa! Deungoe kheueh peurintah raja nyoe: 5 Meunyoe beureuguih ka jimeusu, laju jiseutôt lé suleng, keucapi, reubab, gambus, serdam, dan alat-alat musik nyang laén, syedara-syedara banmandum harôh neusujut neuseumah patong méuh nyang ka geupeudong lé Raja Nebukadnezar. 6 Soe mantong nyang hana taát ubak peurintah nyoe, ureuëng nyan langsong teurhom lam apui nyang hu meubura-bura." 7 Teuma teudeungoe alat-alat musiknyan teupeumusu, bubena ureuëng nibak meubagoe bansa, sukée bansa dan basa, laju jisujut dan jiseumah patong méuh nyan. 8 Na padub droe ureuëng Babel jipeuguna keuseumpatan nyan keuneuk jipeuceulaka ureuëng Yahudi. 9 Awaknyan jipeugah ubak Raja Nebukadnezar, "Udeb kheueh Teungku Amphon siumu masa! 10 Teungku Amphon keudroe ka neupeutron peurintah bahwa hana treb óh lheueh alat-alat musik teupeumusu, bandum ureuëng harôh sujut dan jiseumah ubak patong méuh nyan, 11 dan barang sigasoe nyang hana patuh ubak peurintah nyan ureuëng nyan teurhom lam sinamon apui nyang teungoh hu meubura-bura. 12 Teuma na padubdroe ureuëng Yahudi nyang ka Teungku Amphon yuemat peurintah propinsi Babel jianggab hana ubak peurintah Teungku Amphon nyan. Awaknyan na kheueh Sadrakh, Mesakh dan Abednego. Ureuëng-ureuëng nyan hana jitem puja ilah-ilah Teungku Amphon dan hana teumé jitem seumah ubak patong-patong nyang Teungku Amphon peudong." 13 Ban geudeungoe haba nyan raja beungéh lumpah na, laju geupeutron peurintah mangat ban lhée droe ureuëng nyan meuhadab gobnyan. 14 Raja geutanyong ubak awaknyan, "He Sadrakh, Mesakh dan Abednego! Peu kheueh beutôi gata hana tatem seumah ilah-ilah ulôn dan hana teuma tatem sujut ubak patong-patong méuh nyang ka ulôn peudong nyan? 15 Deungoe kheueh, bak saátnyoe peu kheueh gata ka tatem sujut dan taseumah ubak patong nyan watée musik teungoh jimeusu? Meunyoe gata hana tatem, gata langsong teurhom lam seunamon apui nyang teungoh hu meubura. Dan dewa nyang toh kheueh nyang hase peuseulamat gata nibak kuasa lôn?" 16 Sadrakh, Mesakh dan Abednego geujaweueb, "Teungku Amphon nyang mulia, kamoe hana kamoe cuba bila droe. 17 Meunyoe Allah nyang kamoe seumah hase geupeuseulamat kamoe lam apui nyang teungoh hu meubura-bura nyan dan nibak kuasa Teungku Amphon, hainyan pasti geupeubuet lé Gobnyan. 18 Teuma meunyoe hainyan hana geupeubuet, bah kheueh Teungku Amphon maklum bahwa kamoe hana kamoe pujoe dewa Teungku Amphon dan hana teuma kamoe seumah patong méuh nyang ka Teungku Amphon peudong nyan." 19 Dan teuka kheueh beungéh nyang hana ngon peusa nibak Raja Nebukadnezar ubak Sadrakh, Mesakh, dan Abednego, sampoe ruman gobnyan ka jeuet keuseudong. Gobnyan laju geupeutron peurintah mangat seunamon apui teupeuhu tujoh goe leubeh seuéum nibak nyang ka-ka. 20 Laju lé gobnyan geuyue ubak na padub droe ureuëng nyang teuga-teuga lamkawan sipa-i gobnyan keu teuikat Sadrakh, Mesakh dan Abednego, dan laju geurhom awaknyan u dalam seunamon apui nyang teungoh hu meubura-bura nyan. 21 Dan watée nyan cit teuma ban lhée droe ureuëng nyan teuikat krab lam keuadaan meupeukayan leungkab, na kheueh deungon bajée keumeja, jubah, tupi dan peukayan nyang laén, laju jirhom lam apui nyang teungoh hu meubura-bura nyan. 22 Sabab peurintah raja nyan lumpah that kreueh, dan seunamon apui hu nyan ka teupeuseuéum luwa biasa dan deungon hu apui nyan ka habéh maté ureuëng-ureuëng nyang beuôt Sadrakh, Mesakh dan Abednego bak binéh seunamon apui. 23 Meunan kheueh, ban lhée droe ureuëng nyang teuikat nyan rhot udalam apui nyang teungoh hu meutaga nyan. 24 Ban geukalon nyang lagée nyan Raja Nebukadnezar lumpah teukeujot. Gobnyan laju geubeudôh bagaih-bagaih dan geutawök laju ubak peugawée-peugawée gobnyan, "Bunoe ban lhée droe awaknyan ka geutanyoe beureukah ngon talo dan teugeulawa awaknyan lam apui teungoh hu nyan?" Awaknyan jijaweueb, "Beutôi, Teungku Amphon." 25 Geuseuôt lé raja, "Teuma pakon leumah ulôn kalon na peuet droe ureuëng teungoh geujak-jak dalam apui hu nyan? Awaknyan hana teuikat dan meubacutpi hana keunong sapeue. Dan nyang keu peuet nyan ruman geuh lagée dewa." 26 Laju lé Nebukadnezar geupeurab ubak pintoe seunamon apui nyan dan geupeugah, "Sadrakh, Mesakh dan Abednego, namiet-namiet Po teu Allah Nyang Mahamanyang! Neuteubiet kheueh lam seunamon apui nyan!" Dan geuteubiet kheueh laju awaknyan. 27 Bandum waki raja, bandum gubunur, bupati, dan peugawée-peugawée nyang laén laju jikeulileng ban lhée droe awaknyan dan deuh jikalon bahwa awaknyan meubacut pi hana jilieh lé apui. Ôk awaknyan hana angöh, dan peukayan awaknyan hana tutong, dan bée asabpih hana nibak awaknyan. 28 Laju geupeugah kheueh lé raja, "Pujoe kheueh Po teu Allah nyang jiseumah lé Sadrakh, Mesakh dan Abednego. Gobnyan ka geu utus malaikat Geuh keu geupeuseulamat ban lhée droe namiet Gobnyan nyang peucaya ubak Gobnyan. Awaknyan ka ji iengkeue ubak peurintah ulôn dan leubeh galak maté nibak jitem seumah atawa jipujoe ubak dewa-dewa toh mantong keucuali Po teu Allah awaknyan keudroe. 29 Sabab nyan ulôn peurintah soe mantong ureuëng nibak bansa, sukée bansa atawa basa toh mantong, nyang jipeuhina Po teu Allah nyang jiseumah lé Sadrakh, Mesakh dan Abednego, ureuëng nyan teukoh-koh dan rumoh-rumoh ureuëng nyan teureuloh dan teupeujeuet keusinamon rungka. Sabab, hana dewa nyang hase jipeubuet lagée nyang ka geupeubuet lé Po teu Allah nyan." 30 Óh ka lheueh nyan lé raja laju geupeu ék pangkat Sadrakh, Mesakh dan Abednego, sampoe awaknyan ka jeuet keupeujabat-peujabat manyang di propinsi Babel.

Daniel 4

1 Nyoe kheueh peungumuman Raja Nebukadnezar nyang geukirém ubak ureuëng-ureuëng nibak meubagoe bansa, sukée bansa dan basa bansigom donya: "Saleuem seujahteura! 2 Ulôn keuneuk calitra keuhai keuajaéban dan mukjizat nyang ka geupeubuet lé Po teu Allah Nyang Mahamanyang ubak ulôn. 3 Keubit that rayeuk mukjizat nyang ka geupeubuet! Keubit that hebat buet ajaéb nyang ka geupeuna! Allah teuma jeuet keu raja siumu masa. Gobnyan meukuasa sipanyang masa." 4 Ulôn tinggai deungon seujahteura dalam meuligoe lôn dan udeb deungon meuwáh. 5 Teuma nibak simalam ulôn teungoh teungéuet, ulôn meulumpo dan leumah ulôn kalon nyang gundah that até ulôn. 6 Laju ulôn tawök bubena ureuëng-ureuëng carông nyang na di Babel mangat jipeutrang ubak ulôn makna lumpo nyan. 7 Teuma watée bandum peuramai, ahli meurajah, ureuëng-ureuëng meuiéleumé dan ureuëng-ureuëng malem bagian bintang teuka dan ulôn peugah lumpo ulôn nyan ubak awaknyan, hana meusidroe pih nibak awaknyan nyang hase jipeutrang makna lumpo ulôn nyan. 8 Akhé jih teuka kheueh Daniel nyang geuhôi cit Beltsazar lagée nan dewa lôn. Daniel ka peunoh deungon roh dewa-dewa nyang suci. Laju ulôn calitra lumpo ulôn nyan ubak gobnyan, kheun ulôn, 9 "He, Beltsazar, peumimpén ureuëng-ureuëng meuiéleumé, ulôn kuteupeue bahwa gata ka teupeupeunoh deungon roh dewa-dewa nyang suci, sampoe hana rahsia nyang teusöm nibak gata. Deungoe kheueh lumpo ulôn nyoe, dan neupeutrang kheueh makna jih. 10 Bak watée ulôn teungoh lôn éh, leumah ulôn kalon sibak bak kayée nyang timoh di teungoh-teungoh bumoe. 11 Bak kayée nyan manyang lumpah na; bak jih raya dan kong. Pucok jih meusampôh langét, sampoe leumah jikalon lé bandum ureuëng di ateueh bumoe. 12 Ôn-ôn kayée nyan jroh dan boh jih jai lumpah na, séb keu jipajoh lé manusia bansigom donya. Beulatang-beulatang kleut teuéh-éh dimiyueb kayée nyan dan cicém-cicém jimeu eumpung nibak cabeueng jih. Dan bandum makhluk udeb jeuet jipajoh boh kayée nyan. 13 Watée ulôn teungoh lôn tanueng ubak nyang leumah teukalon nyan, deuh ulôn kalon malaikat TUHAN teungoh geutron lam syeuruga; gobnyan leumah siaga dan waspada. 14 Deungon su nyang nyareng gobnyan geupeugah, 'Teubang kheueh laju bak kayée nyan dan takoh-koh kheueh cabeueng-cabeueng jih, peuluröh kheueh bubena ôn kayée nyan dan tahambo kheueh bubena boh jih. Use kheueh bubena beulatang nyang teuéh-éh dimiyueb kayée nyan dan cicém-cicém nyang meu eumpung ateueh cabeueng jih. 15 Teuma bah kheueh utöm jih tinggai didalam tanoh. Ikat kheueh ngon ranté beuso dan teumaga dan tinggai kheueh laju di padang naleueng. Bah kheueh jih jipumanö lé iémbon, dan udeb meusajan ngon beulatang-beulatang dan sinimoh-sinimoh. 16 Bah kheueh ákai manusia jih meu ubah jeuet keu ákai beulatang treb jih na tujoh thon. 17 Nyan kheueh keuputosan kamoe malaikat-malaikat nyang waspada dan siaga. Meukeusut kamoe na kheueh mangat ureuëng-ureuëng dipat mantong jiaku, bahwa Po teu Allah Nyang Mahamanyang meukuasa ateueh keurajeuen manusia dan keurajeuen nyan geubri keu soe mantong nyang geupiléh, bahpi keu ureuëng nyang hana meuguna meubacut pi!' 18 He Beltsazar, nyan kheueh lumpo ulôn. Jinoenyoe neupeugah kheueh makna jih ubak ulôn. Hana meusidroepi nibak ureuëng patot-patot nyang na di keurajeuen ulôn hase jipeugah nyan ubak ulôn, teuma meunyoe droeneueh hase, sabab droeneueh ka peunoh deungon roh dewa-dewa nyang suci." 19 Ban geudeungoe nyang lagée nyan, Daniel nyang geuhôi cit deungon nan Beltsazar, teukeujot dan teuceungang na padub saát. Dan ulôn, Raja Nebukadnezar teupeugah ubak gobnyan, "Beltsazar, bék kheueh gata gundah sabab teuka lumpo dan makna jih nyan." Geujaweueb lé Beltsazar, "Teungku Amphon, alangkah gét jih meunyoe keujadian-keujadian nyang geuramai lé lumpo nyan rhot ateueh musoh-musoh Teungku Amphon dan bukon Teungku Amphon. 20 Bak kayée nyang Teungku Amphon kalon nyan panyang lumpah na, dan pucok jih meusampôh awan, dan leumah jikalon lé bandum manusia di ateueh bumoe. 21 Ôn-ôn jih gét-gét dan boh jih jai lumpah na sampoe bandum manusia nyang tinggai di ateueh donya meuteumé jipajoh. Beulatang-beulatang kleut jeuet jimeupayong dimiyueb kayée nyan, dan cicém-cicém jeuet jimeu uempung di ateueh cabeueng jih. 22 Ya, Teungku Amphon, Droeneueh kheueh bak kayée nyang manyang dan khong nyan. Keubeusaran Teungku Amphon meutamah sampoe trok ulangét dan keukuasaan Teungku Amphon meuluwah sampoe trok u ujong bumoe. 23 Lé Teungku Amphon leumah cit neukalon sidroe malaikat geutron nibak syeuruga sira geupeugah, 'Neukoh kheueh bak kayée nyoe dan neuböih kheueh keudeh, teuma utöm jih bah kheueh neupeubiyeu mantong tinggai didalam tanoh. Ikat kheueh deungon ranté beuso dan teumaga dan tinggai kheueh laju bak padang naleueng. Bah kheueh jihnyan basah keunong iémbon dan udeb meusajan-sajan deungon beulatang-beulatang nyang treb jih na tujoh thon.' 24 Teungku Amphon, nyoe kheueh makna nyang deuh neukalon nyan, dan nyoe kheueh nyang ka geupeuputôh lé Po teu Allah TUHAN Nyang Mahamanyang keuhai Teungku Amphon keudroe. 25 Teungku Amphon teuma jiuse nibak masyarakat nyang nan jih manusia dan udeb lamkawan beulatang nyang na di padang. Na tujoh thon treb jih Teungku Amphon neupajoh naleueng lagée leumô dan neuéh dalam blang raya, sampoe Teungku Amphon habéh basah deungon iémbon. Óh lheueh nyan Teungku Amphon neuaku bahwa Po teu Allah Nyang Mahamanyang meukuasa ateueh keurajeuen manusia, dan keurajeuen nyan geubri ubak soemantong nyang geupiléh. 26 Bubena malaikat geupeurintah mangat utöm bak kayée nyan teupeubiyeu mantong tinggai lam tanoh. Nyan tanda jih bahwa Teungku Amphon neumat kuasa lom óh ka lheueh Teungku Amphon neuaku bahwa Po teu Allah geukuasa bansigom donya. 27 Sabab nyan get kheueh Teungku Amphon neuseutôt naseuhat ulôn. Bék kheueh Teungku Amphon meudesya le, teuma neupeubuet kheueh peue nyang gét dan ade, dan neugaséh kheueh keu ureuëng gasien. Deungon lagée nyan Teungku Amphon teutab bahgia." 28 Bandum nyan teujadi ateueh droe ulôn, Raja Nebukadnezar. 29 Dua blaih buleuen teuma óh lheueh nyan, bak watée ulôn teungoh lôn jak-jak lam taman bak tingkat ateueh lam meuligoe ulôn di Babel, 30 ulôn peugah, "Kalon kheueh, keubit that gagah banda Babel! Ulôn kheueh nyang peugot banda nyan sampoe jeuet keu ma banda neugahra sibagoe bukeuti keukuasaan dan teunaga ulôn, keuagongan dan keubeusaran ulôn!" 31 Ulôn gohlom lheueh lôn meututoe watée ulôn deungon su di langét, "Raja Nebukadnezar, deungoe kheueh nyoe! Keukuasaan gata sibagoe raja ka geucok lam jaroe gata. 32 Gata teu use lamkawan manusia, dan udeb deungon beulatang-beulatang nyang na dipadang. Tujoh thon treb jih gata tarot naleueng keupeunajoh gata saban that lagée leumô. Óh ka lheueh nyan gata ta-aku bahwa Po teu Allah Nyang Mahamanyang meukuasa ateueh keurajeuen manusia dan keurajeuen nyan geubri ubak soe mantong nyang geupiléh." 33 Bak saát nyan cit teuma, tutoe haba nyan jeuet keunyataan. Ulôn, Nebukadnezar teu use lamkawan manusia dan teurot naleueng lagée leumô. Tuboh ulôn habéh basah ngon iémbon, ôk bak ulée ka jeuet keupanyang lagée bulée kleung, dan gukée ulôn ka panyang lagée gukée cicém. 34 Watée nyang tujoh thon nyan ka habéh, laju ulôn tangah ulangét, dan teuka kheueh laju keusadaran ulôn. Dan laju ulôn pujoe Po teu Allah Nyang Mahamanyang. Ulôn sanjong dan lôn peumulia Gobnyan nyang udeb keukai nyan. "Allah teuma jeuet keu raja siumu masa. Gobnyan meukuasa sipanyang masa. 35 Bansa-bansa nyang na ateueh rhueng donya hana meumakna. Po teu Allah nyang kuasa malaikat di syeuruga dan peunduduek bumoe. Hana meusidroe pi nyang ék jilawan keuheundak Gobnyan, hana ureuëng nyang jijeuet teumanyong peue nyang geupeubuet." 36 Watée keusadaran ulôn ka jiwoe lom ubak ulôn, dan keubeusaran, keuagongan dan meusyeuhu nyang meugah keurajeuen ulôn geupeugisa ubak ulôn. Ulôn jisambot lé peuwira ulôn dan lé bandum ureuëng rayeuk ulôn, dan ulôn geupuwoe ubak keurajeuen ulôn, dan keuagongan ulôn jeuet jih leubeh raya nibak nyang ka lheueh na dilée. 37 Dan nibak saátnyoe ulôn, Nebukadnezar lôn pujoe, ulôn peumanyang dan lôn peumulia Raja Syeuruga. Peue mantong nyang geupeubuet na kheueh beuna dan ade, dan Gobnyan hase geupeumiyueb ureuëng nyang sombong.

Daniel 5

1 Bak siuroe Raja Belsyazar geu undang na siribée droe ureuëng rayeuk keu geujak bak khanuri gobnyan nyang meuwáh, dan jieb-jieb ié anggô. 2 Teungoh awaknyan jijieb ié anggô nyan, Belsyazar laju geupeurintah geuyue cok cambông-cambông méuh dan pirak, nyang ka geureubot lé Nebukadnezar, ureuëng syiek gobnyan, di dalam Baét TUHAN di Yerusalem. Meukeusut Raja Belsyazar nyan na kheueh mangat bubena ureuëng rayeuk, peurumoh-peurumoh jih, gundek-gundek jih dan gobnyan keudroe, jijieb ié ngon cambông-cambông nyan. 3 Deungon bagaih that bandum cambông-cambông nyan teuba ubak gobnyan, laju awaknyan banmandum jijieb ié anggô lam cambông-cambông nyan. 4 Sira jieb-jieb ié anggô nyan awaknyan hana putôh-putôh jipujoe-pujoe dewa nyang teupeuget nibak méuh, pirak, teumaga, kayée dan batée. 5 Ngon hana teusangka-sangka leumah laju jaroe manusia nyang teungoh teumuléh sapeue-peue bak bintéh meuligoe nibak teumpat nyang paleng trang keunong cahya panyöt, deungon nyan lé raja deuh geukalon deungon nyata. 6 Gobnyan jeuet keuteumakot muka geuh pucat hana meudarah sampoe teuôt gobnyan yo meuguncang. 7 Deungon su nyang meudumpék laju geulakée ubak ahli nujum, ahli meurajah dan ahli bagian bintang laju geutawök dan geupeusapat. Watée awaknyan ka trok, laju geupeugah lé raja, "Barang sigasoe nyang hase baca tulésan nyan dan jipeugah makna jih ubak ulôn, keu ureuëng nyan ulôn bri peukayan keurajeuen jubah ungu dan talo takue méuh sibagoe peunghoreumatan. Seulaén nibaknyan keu ureuëng nyan lôn angkat jeuet keupeunguasa nyang keu lhée dalam keurajeuen ulôn." 8 Bubena ureuëng nyang patôt-patôt laju jiseuk ukeue, teuma hana meusidroe pih lamkawan awaknyan nyang hase jibaca tulésan nyan atawa jipeugah makna jih ubak raja. 9 Raja Belsyazar meutamah-tamah gundah dan muka geuh pucat lom; meunan cit bubena ureuëng rayeuk gobnyan ka jeuet keubingong. 10 Teudeungoe su raja geudumpék dan su ureuëng-ureuëng rayeuk gobnyan, ma nibak raja laju geutamong udalam ruweueng khanuri. Gobnyan laju geupeugah, "Udeb kheueh Teungku Amphon siumu masa! Teunang kheueh até Amphon dan bék kheueh pucat le. 11 Sabab lam keurajeuen Teungku Amphon na sidroe ureuëng agam nyang ka peunoh deungon roh dewa-dewa nyang suci. Bak masa keurajeuen nanggroe geumat lé ureuëng syiek Teungku Amphon, ureuëng nyan teubukeuti nibak ureuëng nyan na keuahlian, peungeurtian dan hikeumat, nyang saban deungon hikeumat dewa-dewa. Ureuëng syiek Teungku Amphon Raja Nebukadnezar ka geuangkat ureuëng nyan jeuet keupeumimpén bubena ahli tanueng, ahli meurajah, ureuëng-ureuëng meuiéleumé dan ahli iéleumé bintang. 12 Ureuëng nyan luwa biasa carông dan bijaksana lom teuma malem bak geutapeuse makna lumpo, geupeutrang rahsia dan geuboh makna hai-hai nyang sulet. Nan ureuëng nyan Daniel, teuma lé raja geuboh nan Beltsazar. Jak tawök kheueh ureuëng nyan. Gobnyan geupeugah ubak Amphon peu makna jih tulésan nyan." 13 Deungon bagaih that Daniel laju geuba jak meuhadab ubak raja. Laju lé raja geuteumanyong ubak gobnyan, "Peu kheueh gata Daniel, ureuëng Yahudi nyang teuböih, nyang ka geuangkot lé ayah lôn nibak tanoh Yehuda? 14 Ulôn deungoe gata peunoh deungon roh dewa-dewa nyang suci, dan bahwa nibak gata na keuahlian, peungeurtian, dan hikeumat nyang luwa biasa. 15 Bubena ureuëng patot-patot dan ahli-ahli meurajah ka jicuba baca tulésan nyoe dan jipeugah makna jih ubak ulôn. Teuma awaknyan hana hase. 16 Ban mantong ulôn deungoe bahwa gata jeuet tapeutrang bandum rahsia tapeuglah soai-soai nyang payah. Meunyoe gata hase tabaca tulésan nyoe dan tapeugah makna jih ubak ulôn, keu gata ulôn jok peukayan keurajeuen jubah ungu dan talo takue méuh sibagoe peunghoreumatan. Seulaén nibak nyan gata lôn angkat jeuet keupeunguasa nyang keu lhée dalam keurajeuen ulôn." 17 Geujaweueb lé Daniel, "Teungku Amphon hana peureulée neubri bandum hadiah nyan keu ulôn, neujok mantong keu ureuëng laén. Ulôn kubeuet tulésan keu Teungku Amphon dan ulôn peugah teuma makna jih. 18 Po teu Allah Nyang Mahamanyang geupeujeuet ureuëng syiek Teungku Amphon Raja Nebukadnezar, jeuet keu raja agong dan geubri ubak gobnyan keubeusaran meusyeuhu nyang hana teukira. 19 Gobnyan rayeuk lumpah na, sampoe bubena ureuëng nibak meubagoe bansa, sukée bansa, dan basa, yo ngon teumakot keu gobnyan. Meunyoe gobnyan keuneuk peumaté gob, laju geupoh maté ureuëng nyan. Meunyoe gobnyan keuneuk geupeuseulamat sidroe-droe ureuëng, laju geupeuseulamat ureuëng nyan. Gobnyan nyang peumanyang atawa nyang peumiyueb soe mantong nyang geugalak. 20 Teuma watée gobnyan ka jeuet keu ureuëng sombong, kreueh ulée dan keujam, gobnyan laju geutunggeng nibak keukuasaan geuh akhéjih gobnyan ka gadôh keuagongan. 21 Gobnyan geu use lam masyarakat manusia dan akai gobnyan ka jeuet lagée akai beulatang. Gobnyan udeb deungon keuleudée di dalam gle, geurot naleueng lagée leumô dan geuéh lam padang halalah sampoe habéh basah keunong iémbon. Akhé jih gobnyan geuaku bahwa Po teu Allah Nyang Mahamanyang meukuasa ateueh keurajeuen manusia dan keurajeuen nyan geubri ubak soe mantong nyang geupiléh. 22 Teuma aneuëk agam gobnyan, nyan kheueh Teungku Amphon keudroe, hana neutem peumiyueb droe, bahpi Teungku Amphon hai nyan neuteupeue bandum. 23 Teungku Amphon neupeumanyang droe ubak TUHAN di syeuruga dan neujeuet neuyue peutamong cambông-cambông nyang ka teureupah di Baét TUHAN. Laju lé Teungku Amphon ngon ureuëng rayeuk-rayeuk Teungku Amphon, dumna peurumoh dan gundek-gundek Teungku Amphon neujieb ié anggô lam cambông-cambông nyan. Teungku Amphon neupujoe-pujoe dewa-dewa nyang teupeugét nibak méuh, pirak, teumaga, beuso, kayée dan batée, dewa-dewa nyang hana leumah jimeungieng meunan cit deungon meudeungoe atawa hana muphom meusapeue. Teungku Amphon hana neuhoreumat ubak Po teu Allah nyang peuteuntée udeb atawa maté Teungku Amphon dan nyang peuteutab rot udeb Teungku Amphon. 24 Nyang kheueh sabab jih Po teu Allah geukirém jaroe nyan mangat teutuléh peusan Gobnyan. 25 Nyoe kheueh tulésan nyan, 'Teuitong, teuitong, teutimang, teubagi.' 26 Dan nyoe kheueh makna jih: Teuitong, masa peumeurintahan Teungku Amphon ka geuitong lé Po teu Allah dan geupeu akhé; 27 Teutimang, Teungku Amphon ka geutimang dan hana puih até; 28 Teubagi; Keurajeuen Teungku Amphon geupeuweuek dua keu ureuëng Media dan Persia." 29 Deungon bagaih that Belsyazar geupeurintah ubak peugawée-peugawée gobnyan mangat jipeungui ubak Daniel jubah ungu dan jipeungui nibak takue Daniel deungon ranté méuh. Laju gobnyan geubaiát Daniel jeuet keupeunguasa nyang keu lhée dalam keurajeuen gobnyan. 30 Bak malam nyan cit teuma Belsyazar raja Babel nyan teupoh maté.

Daniel 6

1 Óh ka lheueh Belsyazar teupoh maté, Darius ureuëng Media geureubot takhta keurajeuen, bak watée nyan gobnyan meu umu nam ploh dua thon. 2 Darius geubagi keurajeuen gobnyan jeuet jih sireutoih dua ploh boh propinsi nyang maséng-maséng jipeurintah lé sidroe gubunur. 3 Daniel dan dua droe ureuëng nyang laén geubaiát jeuet keu ureuëng nyang kawai bubena gubunur nyan mangat raja bék jipeurugoe. 4 Dan bak saát nyan cit leumah nyata bahwa buet Daniel leubeh gét nibak buet-buet nyang jipeubuet lé bandum gubunur dan peungawas-peungawas nyang laén. Sabab nyan, raja kana niet keuneuk geubaiát gobnyan jeuet keu peunguasa bansiluroh keurajeuen nanggroe. 5 Teuma lé gubunur-gubunur nyan jimita laju nyang salah-salah Daniel nibak tugaih peumeurintahan, teuma nyang jimita lé awaknyan hana meuhase, sabab Daniel seutia dan jujoe dan hana geupeubuet nyang laloe atawa buet nyang salah peue mantong. 6 Laju awaknyan jipeugah, "Geutanyoe hase tateumé buet nyang salah nyang geupeubuet lé Daniel lam hai nyang na hubongan ngon agama gobnyan." 7 Óh lheuehnyan jijak kheueh awaknyan meuhadab ubak raja seucara seureuntak sira jipeugah, "Ya Teungku Amphon Raja Darius, udeb kheueh Teungku Amphon siumu masa! 8 Kamoe banmandum nyang kamoe atoe bandum keurajeuen Droeneueh, bah kheueh bandum peungawas, bandum gubunur, waki gubunur dan peujabat-peujabat nyang laén, ka meupakat keu teu usui mangat Teungku Amphon neupeuteubiet surat peurintah nyang harôh jitaát deungon bit-bit. Nyang gét jih Teungku Amphon neupeurintah nyang treb jih lhée ploh uroe hana meusidroe pih nyang jeuet jijak peusampoe peumohonan ubak sidroe lamkawan dewa atawa manusia, seulaén ubak Teungku Amphon keudroe. Barang sigasoe nyang iengkeue ubak peurintah nyan ureuëng nyan teurhom udalam guha singa. 9 Kamoe meulakée deungon meuharab that mangat Teungku Amphon neuteken surat peurintah nyan mangat jeuet keu undang-undang Media dan Persia nyang hana jeuet teutarek le." 10 Dan lé Raja Darius laju geuteken surat peurintah nyan. 11 Watée Daniel geudeungoe keuhai nyan, geuwoe laju gobnyan u rumoh geuh keudroe. Kama gobnyan nyang na ditingkat ateueh na peuradeun-peuradeun nyang meuhadab u Yerusalem. Dan lagée nyang ka-ka, gobnyan meudoá ubak Allah dan geupujoe Gobnyan lhée goe siuroe deungon cara geumeuteuôt dikeue peuradeun-peuradeun nyang teuhah nyan. 12 Bak watée musoh-musoh Daniel jingieng Daniel teungoh meudoá ubak Allah gobnyan, 13 jijak kheueh bandum awaknyan meuhadab ubak raja laju jigadu Daniel nyang teungoh seumayang nyan. Awaknyan jipeugah, "Kon kheueh Teungku Amphon ka neuteken surat peurintah nyang teutam bandum ureuëng nyang treb jih lhée ploh uroe nyoe teupeusampoe peumohonan ubak sapeue-sapeue dewa atawa manusia seulaén ubak Teungku Amphon mantong? Dan lom teuma, barang sigasoe nyang iengkeue ubak peurintah nyan teurhom lam guha singa?" Geujaweueb lé Raja, "Beutôi, dan peurintah nyan ka jeuet keu undang-undang di Media dan Persia nyang hana jeuet teutarek le." 14 Laju geupeugah lé awaknyan ubak raja, "Daniel, na sidroe ureuëng teuböih nibak Yehuda, hana jipakoe Teungku Amphon dan jianggab hana peue nyang ka Teungku Amphon peurintah. Gobnyan meudoá lhée goe tieb-tieb uroe." 15 Ban geudeungoe haba nyan raja laju seudeh dan khawate, sampoe gobnyan geumita ákai mangat Daniel seulamat. Sampoe trok án seupôt uroe raja mantong geuseumike. 16 Óh lheuehnyan ureuëng-ureuëng nyan jiriwang lom ubak raja dan jipeugah, "Teungku Amphon, bah kheueh Teungku Amphon neuingat meunurot undang-undang Media dan Persia, peurintah nyang ka geupeuteubiet lé raja hana jeuet teu ubah-ubah." 17 Dan akhé jih raja geupeurintah laju teujak drob Daniel dan teurhom laju u dalam guha singa. Geupeugah lé raja ubak Daniel, "Seumoga Po teu Allah gata nyang seutia gata seumah nyan geu tulông gata." 18 Óh ka lheuehnyan sianeuk batée raya laju jipeuduek bak babah pintoe guha nyan, dan raja laju geucab batée nyan deungon cab keurajeuen dan cab ureuëng rayeuk-rayeuk, sampoe hana meusidroe pih nyang jeuet peulheueh Daniel nibak singa-singa nyan. 19 Óh lheuehnyan geuwoe kheueh laju raja ubak meuligoe. Gobnyan hana geutem makheun atawa teupeumangat até. Dan simalam beungoh gobnyan hana jeuet geuéh. 20 Óh watée ka suboh geubeudôh kheueh laju raja dan geujak laju ubak guha singa, 21 óh ka trok gobnyan ubak guha nyan, geuteumawök kheueh laju deungon su nyang gundah, "He Daniel hamba Po teu Allah nyang udeb! Peu kheueh Allah gata nyang gata seumah deungon seutia nyan ka hase geupeuseulamat gata nibak singa-singa nyan?" 22 Dan teudeungoe kheueh laju su Daniel nyang geujaweueb lagée nyoe, "Udeb kheueh Teungku Amphon siumu masa! 23 Allah ulôn ka geukirém malaikat keu geujak tôb babah-babah singa nyang na dalam guha nyan sampoe bandum singa nyan hana jipakoe ulôn. Allah ka geupeuseulamat ulôn sabab Gobnyan geuteupeue bahwa ulôn hana lôn peubuet salah keu Gobnyan dan keu Teungku Amphon." 24 Hana bayang galak até raja dan gobnyan laju geupeurintah mangat Daniel teupeuteubiet lam guha nyan. Óh ka lheueh peurintah nyan teulaksana, teunyata bahwa hana meubacut pih tuboh Daniel teuluka, sabab gobnyan peucaya ubak Po teu Allah. 25 Óh lheueh nyan raja geupeutron peurintah mangat ureuëng nyang ka jigadu Daniel sampoe Daniel teupasoe lam guha singa teudrob. Laju awaknyan meusajan deungon aneuëk peurumoh jih geugeulawa lam guha singa nyan, gohlom trok awaknyan bak babah pintoe guha nyan, singa-singa nyan laju jiteugöm awaknyan dan jimomoh ngon jipeuhanco bandum tuleueng-tuleueng awaknyan. 26 Óh lheuehnyan Raja Darius laju geukirém surat ubak ureuëng-ureuëng nibak meubagoe bansa, sukée bansa dan basa di bansigom donya, "Saleuem seujahteura! 27 Ulôn peurintah ubak bandum ureuëng nyang na dalam keurajeuen ulôn mangat teumakot dan horeumat ubak Po teu Allah nyang geuseumah lé Daniel! Gobnyan na kheueh raja nyang udeb siumu masa, sampoe akhé jamén Gobnyan geumat peurintah. Keurajeuen Gobnyan hana mungken binasa. Keukuasaan Gobnyan hana pajan habéh. 28 Gobnyan nyang peuseulamat dan nyang peubeubaih, nyang peubuet mukjizat dan buet nyang ajaéb di langét meunan cit ateueh bumoe. Daniel ka teupeuseulamat, nibak jiteugöm lé singa-singa." 29 Meunan kheueh Daniel teutab na keududuekan nyang manyang simantong peumeurintah Darius dan peumeurintahan Koresy, ureuëng Persia nyan.

Daniel 7

1 Bak simalam, bak thon nyang phon Belsyazar jeuet keu raja di Babel, ulôn, Daniel meulumpo dan meuteumé keumalon. Lumpo nyan ulôn cetet dan laporan keuhai nyang deuh ulôn kalon nyan na kheueh lagée nyoe: Angén badée jipôt rot meubagoe arah dan deungon na angén tajam nyan meuakibat jih na angén badée lam laôt raya. 3 Óh lheueh nyan na peuet boh beulatang raksasa jiteuka rot lam ié, nyang saboh meubeda deungon nyang laén. 4 Meulatang nyang phon ruman jih lagée singa, teuma na meusayeub cicém garuda. Watée ulôn pandang ateueh beulatang nyan, hana teusangka-sangka sayeub jih teulot dan leukang; beulatang nyan teubeuôt nibak tanoh dan teudong ateueh dua blaih gaki lagée manusia, laju geubri akai manusia. 5 Beulatang nyang keudua ruman jih lagée cagée. Beulatang nyan jidong deungon gaki likot, dan bak babah lam ruweueng gigo jih na jiba lhée krak tuleueng rusôk. Ulôn deungoe su nyang jipeugah ubak beulatang nyan, "Jak, pajoh kheueh laju uengkot sie sidub toh nyang gata galak!" 6 Teungoh ulôn ngieng dan ulôn peurati atranyan, teuka kheueh beulatang nyang laén. Ruman jih lagée rimueng tutul, teuma dilikot jih na peuet boh sayeub cicém, dan beulatang nyan na ulée jih peuet boh. Beulatang nyan leumah jih meuwibawa. 7 Watée teungoh lôn pandang beulatang nyan, teuka teuma beulatang nyang keu peuet. Beulatang nyan lumpah teuga dan dahsyat dan lumpah teumakot. Deungon gigoe jih nyang raya dan kreueh lagée beuso, beulatang nyan hase jipeureumok dan jipajoh bubena mangsa jih, laju jigilo-gilo nyang mantong tinggai. Meubeda deungon beulatang-beulatang nyang sigohlom jih, jihnyan meulungkée siploh. 8 Teungoh lôn peurati nibak lungkée-lungkée nyan, deungon hana teusangka-sangka saboh lungkée teuk jitimoh di teungoh-teungoh lungkée nyan. Lungkée nyan ubit, teuma hase jipeusak dan ék teubot ban lhée boh lungkée-lungkée nyang ka awai timoh nyan. Lungkée ubit nyan na meumata lagée mata manusia dan na meubabah nyang jimeututoe ngon haba nyang sombong. 9 Teungoh ulôn kalon hana piôh-piôh, na padub boh takhta teungoh teukeubah. Dan lé Gobnyan nyang udeb keukai laju jiduek ateueh saboh nibak takhta-takhta nyan. Peukayan Gobnyan dan ôk Gobnyan putéh gleh lagée gapeueh. Takhta Gobnyan deungon ruda nyan hu meuble-ble lagée apui hu, 10 dan apui laju jimeu éue nibak takhta nyan. Meuribée-ribée ureuëng jijak peutimang Gobnyan, dan meujuta ureuëng ka teudong dikeue Gobnyan. Óh lheuehnyan geupeuphon kheueh sidang peungadelan, dan kitab-kitab pih laju geupeuhah. 11 Watée ulôn teungoh lôn kalon atra nyan, teutab mantong ulôn deungoe lungkée ubit nyan jipeugah haba deungon sombong jih. Óh lheuehnyan beulatang nyang keu peuet nyan jipoh maté, dan bangke jih jigeulawa udalam apui sampoe habéh tutong. 12 Beulatang-beulatang nyang laén ka geutarek keukuasaan jih, teuma awaknyan geubri udeb sampoe ubak watée nyang ka geupeu teuntée. 13 Nibak keumalon ulôn malam nyan, ulôn kalon sapeue-sapeue nyang saban lagée manusia. Gobnyan geuteuka deungon jikeulileng lé awan laju jijak ubak Gobnyan nyang udeb keukai dan jipeuturi keu jihnyan. 14 Gobnyan geubri keuhoreumatan dan keukuasaan sibagoe raja, sampoe ureuëng-ureuëng nibak meubagoe bansa, sukée bansa dan basa meungabdi ubak Gobnyan. Keukuasaan Gobnyan meuteun siumu masa, peumeurintahan Gobnyan hana teuguleng. 15 Nyang deuh-deuh nyang ulôn kalon nyan até ulôn meutamah bingöng dan geulisah. 16 Laju ulôn peurab ubak sidroe ureuëng nyang na teungoh jidong disinan dan ulôn lakée keuteurangan keuhai banmandum nyan. Dan digobnyan geupeugah bube nyang na. 17 Geupeugah lé gobnyan lagée nyoe, "Ban peuet boh beulatang raksasa nyan na kheueh meumakna peuet boh keurajeuen nyang teuka u ateueh bumoe. 18 Teuma umat Po teu Allah Nyang Mahamanyang geuteurimong hak keu geupeurintah dan peumeurintahan Gobnyan keukai siumu masa." 19 Óh lheuehnyan ulôn keuneuk teupeue makna beulatang nyang keu peuet nyan, nyang meulaén deungon nyang laén; nyang lumpah teumakot dan nyang peuhanco nyang priek mangsa jih deungon gukée teumaga dan gigo beuso jih, dan jigilo-gilo séuh-séuh nyang leubeh jipajoh. 20 Ulôn keuneuk lôn teupeue cit keuhai ban siploh boh lungkée nibak ulée jih dan keuhai lungkée ubit nyang teuka dudoe laju jitarek sampoe teubôt lhée boh lungkée nyang phon-phon nyan. Lungkée ubit nyan na mata dan babah nyang meututoe deungon sombong jih. Lungkée ubit nyan leubeh teumakot nibak lungkée-lungkée nyan laén. 21 Watée ulôn teungoh lôn ngieng atranyan, lungkée nyan laju jimuprang jilawan umat Po teu Allah dan jipeutaloe awaknyan. 22 Óh lheueh nyan Gobnyan nyang udeb keukai nyan teuka laju geubri keuputosan dan geupeubeuna umat Po teu Allah Nyang Mahamanyang. Watée jih ka trok awaknyan jiteurimong kuasa keu jimat peurintah. 23 Nyoe kheueh keuteurangan nyang ulôn teumé, "Beulatang nyang keu peuet nyan na kheueh keurajeuen nyang keu peuet nyang teuma teudong di ateueh bumoe dan meulaén deungon keurajeuen-keurajeuen nyang laén. Keurajeuen nyan jipeuhanco dan jiuét banmandum bumoe dan jigilo-gilo séuh-séuh nyang tinggai. 24 Ban siploh boh lungkée nyan na kheueh siploh droe raja nyang mat peurintah keurajeuen nyan. Óh lheueh nyan na sidroe raja nyang laén teuma teuka; gobnyan meulaén that deungon raja-raja nyang phon-phon that, dan gobnyan geupeutalo lhée droe raja. 25 Gobnyan jimeututoe jilawan Allah Nyang Mahamanyang dan jiteugöm umat Allah. Jihnyan jiuseuha dan jiubah huköm-huköm dan khanuri-khanuri agama umat Allah, dan awaknyan jimeukuasa nyang treb jih na lhée thon siteungoh. 26 Dan peungadelan syeuruga laju geumeusidang dan geutarek keukuasaan gobnyan dan geupeuhanco gobnyan sampoe habéh sapan sapa. 27 Kuasa dan keubeusaran meubagoe keurajeuen nyang na di ateueh bumoe geubri ubak umat Po teu Allah Nyang Mahamanyang. Kuasa awaknyan keu teupeurintah hana keuneulheueh dan bandum peunguasa nyang na di ateueh bumoe meungabdi awaknyan deungon taát." 28 Óhnoe kheueh laporan nyoe. Ulôn lumpah geulisah sampoe muka lôn pucat, teuma hainyan hana meusidroe pih ulôn bri tée keuhai banmandum nyan.

Daniel 8

1 Bak thon nyang keu lhée geumat peurintah lé Raja Belsyazar, ulôn meuteumé keumalon nyang keudua. 2 Lam keumalon nyan leumah ulôn kalon droe keudroe ulôn na di propinsi Elam, di Susan, ma banda Persia. Ulôn kudong bak binéh Krueng Ulai, 3 dan bak binéh krueng nyan leumah ulôn ngieng saboh bubiri agam nyang na dua boh lungkée panyang, nyang saboh leubeh panyang dan leubeh barô nibak nyang laén. 4 Ulôn ngieng bubiri agam nyan jimupok u arah barat, utara dan seulatan. Hana meusaboh beulatang pih nyang meuteun jihadab jihnyan atawa teupeusie nibak kuasa jihnyan. Jihnyan jimeubuet ban galak droe dan ka jeuet keu sombong. 5 Teungoh ulôn pandang atra nyan, leumah ulôn ngieng saboh kaméng agam teungoh jiplueng-plueng siblaih ubarat di ateueh bumoe. Kaméng nyan jiplueng luwa biasa tajam jih sampoe gaki jih hana keunong ateueh bumoe. Nibak bandua neuk mata jih na saboh lungkée nyang meunyolok. 6 Kaméng agam nyan laju jipeutô ubak bubiri agam nyang deuh lôn kalon bak binéh krueng nyan, laju jipeucrok ubak jih nyan deungon buih that. 7 Ulôn kalon kaméng agam nyan jiheuntam bubiri agam deungon beungéh dan ceubeueh nyang luwa biasa, sampoe bubiri agam nyang keunong pok nyan patah bandua boh lungkée jih. Bubiri agam nyan hana meudaya keu jilawan. Bubiri nyan teutiek bak tanoh dan laju jigilo-gilo, dan hana meusidroe ureuëng pih nyang tem peugla. 8 Kaméng agam nyan meutamah rayeuk. Teuma bak watée jihnyan ka trok ubak pucak keukuasaan jih, patah kheueh lungkée jih nyang raya nyan, dan laju nibak teumpat nyan timoh peuet boh lungkée nyang meunyolok, maséng-maséng jitunyok ubak arah nyang meubeda. 9 Nibak saboh lamkawan lungkée nyan jitimoh teuma saboh lungkée ubit, nyang meutamah rayeuk dan keukuasaan jih meutamah luwah u arah seulatan, u arah timu dan ubak tanoh nyang ceudah. 10 Lungkée nyan meutamah rayeuk sampoe ka seb teuga keu jiheuntam tantra syeuruga na kheueh bintang-bintang, dan na meupadub boh lamkawan nyan ji geulawa ubak tanoh dan jigilo-gilo. 11 Dan jihnyan jilawan panglima tantra syeuruga, hana jipeubuet le keureubeuen peuseumahan tieb-tieb uroe nyang teupeuseumah ubak panglima nyan, dan jireuloh rumoh iébadat keu jihnyan. 12 Dan ureuëng-ureuëng disinan ka jipeuphon meudesya dan hana le jipeuseumah keureubeuen-keureubeuen nyang teupeuwajéb nyan. Dan iébadat nyang beutôi ka jitiek bak tanoh. Lungkée nyan meuhase peue-peue mantong nyang jipeubuet. 13 Óh lheueh nyan ulôn deungoe su malaikat geupeugah ubak nyang laén, "Sampoe padub treb kheueh nyang teukalon nyang leumah nyan na sabe? Sampoe án pajan desya rayeuk nyan teugantoe keureubeuen uroe-uroe? Sampoe án pajan tantra syeuruga dan rumoh iébadat nyan jigilo-gilo?" 14 Ulôn deungoe malaikat nyang sidroe teuk geujaweueb, "Trok 1.150 uroe trek. Sidubnyan treb keureubeuen seupôt dan keureubeuen beungoh hana jipeuseumah. Óh ka lheuehnyan barô kheueh rumoh iébadat teupeupuléh lom." 15 Bak watée ulôn teungoh lôn useuha keu lôn peuphom makna nyang teukalon nyan, hana teusangka-sangka ka teudong dikeue ulôn nyang saban that lagée manusia. 16 Teudeungoe su nyang teumawök meurandeh Krueng Ulai, kheun su nyang teudeungoe nyan, "He Jibrail, neupeutrang kheueh laju ubak gobnyan peue nyang ka deuh jikalon." 17 Laju lé Jibrail nyang geudong dikeue ulôn geupeurab laju ubak ulôn. Ulôn lumpah teumakot sampoe ulôn rhot dan reubah. Geupeugah lé Jibrail ubak ulôn, "He manusia fana, gata harôh tateupeue bahwa nyang ka deuh neukalon nyan na kheueh sibagoe tanda akhé jamén." 18 Teungoh gobnyan geupeugah haba, ulôn laju reubah dan pansan. Teuma gobnyan laju geumat ulôn dan geutulông peudong lom. Laju gobnyan geupeugah, 19 "Ulôn kubritée bak gata peue nyang teuma teujadi akibat Po teu Allah beungéh. Sabab nyang deuh gata kalon nyan sibagoe tanda akhé jamén. 20 Bubiri agam nyang gata kalon nyan, nyang na meulungkée dua boh, sibagoe lambang keurajeuen Media dan Persia. 21 Kaméng agam nyan sibagoe lambang keurajeuen Yunani, dan lungkée nyang meusudok nibak bandua mata jih nyan nyang kheueh raja awaknyan nyang keuphon. 22 Ban peuet boh lungkée nyang timoh óh ka lheueh lungkée nyang phon nyan patah, nyan sibagoe tanda bahwa keurajeuen Yunani teubagi-bagi jeuet peuet boh keurajeuen, teuma meusaboh keurajeuen pih hana nyang teuga lagée keurajeuen nyang phon. 23 Watée karab meu akhé nibak keurajeuen-keurajeuen nyan, meunyoe keujeuhetan karab trok bak pucak jih, teuma teuka sidroe raja nyang paleng kreueh ulée, dan carông teumipée. 24 Raja teuma jeuet keu ureuëng nyang paleng teuga, teuma kon lé sabab teunaga jih keudroe. Raja nyan jipeuteuka keubinasaan nyang teumakot that dan peue mantong nyang jipeubuet sabe meuhase. Raja jipeubinasa ureuëng-ureuëng peukasa dan umat Po teu Allah. 25 Sabab raja nyan licek, tieb-tieb geuteumipée sabe meuhase. Raja nyan jipeusombong droe, dan hana teupeuingat leubeh ilée gobnyan geupeubinasa ureuëng ramé. Dan jihnyan jijeuet lawan Raja Nyang Maharayeuk. Teuma gobnyan teupeuhanco deungon hana teunaga manusia. 26 Nyang deuh teukalon keuhai keureubeuen seupôt ngon beungoh nyang ka teupeutrang ubak droeneueh nyan, beutôi-beutôi teuma teujadi. Teuma bandum nyan teujadi bakmasa ukeue nyang mantong jiôh; lé sababnyan bék tacalitra ubak soe mantong." 27 Óh lheuehnyan ulôn meurasa leumoh laju rhot bak sakét napadub uroe treb jih. Óh lheueh nyan laju lôn beudôh dan lôn peubuet tugaih-tugaih ulôn keu raja. Teuma ulôn geulisah óh ulôn pike ubak nyang deuh-deuh ulôn kalon nyan dan hana hase ulôn peuphom.

Daniel 9

1 Nibak thon nyang keuphon geumat peurintah lé Darius ureuëng Media, bin Ahasyweros ateueh keurajeuen Babel, ulôn Daniel, ulôn beuet-beuet kitab-kitab agama, ulôn seumike ngon ulôn tanueng bahwa meunurot nyang geu kheun lé TUHAN ubak Nabi Yeremia, banda Yerusalem teutab reuloih nyang treb jih tujoh ploh thon. 3 Laju ulôn meudoá deungon bit-bit ubak TUHAN Po teu Allah, dan ulôn lakée gaséh sayang Gobnyan. Ulôn puasa dan ulôn ngui ija kröng sira ulôn duek ateueh abée. 4 Banmandum desya bansa lôn ulôn meungaku dikeue Po teu Allah. Kheun ulôn, "TUHAN Allah, Droeneueh lumpah that rayeuk, dan kamoe horeumat ubak Droeneueh. Droeneueh sabe neupeuteupat ubak janji Droeneueh dan neutunyok gaséh Droeneueh nyang abadi keu awaknyan nyang gaséh keu Droeneueh dan jipeubuet peue nyang Droeneueh peurintah. 5 Kamoe ka meudesya, ya Allah, kamoe ka kamoe peubuet nyang jeuhet, dan kamoe peubuet buet nyang salah. Kamoe ka kamoe beurontak dan kamoe iengkeue ubak peurintah Droeneueh dan kamoe ka meusimpang nibak peuratoran-peuratoran Droeneueh. 6 Kamoe hana kamoe deungoe nyang geupeugah lé nabi-nabi, hamba-hamba Droeneueh nyan, nyang ka geumeututoe ateueh nan Droeneueh ubak raja-raja kamoe. 7 Ya TUHAN, tindakan Droeneueh sabe teupat dan ade, teuma kamoe sabe kamoe peuteuka malée ateueh droe kamoe, na kheueh kamoe nyang bandum tinggai di Yudea dan di Yerusalem dan bandum ureuëng nyang saboh bansa deungon kamoe nyang ka Droeneueh peusiseu u nanggroe-nanggroe nyang jiôh dan nyang rab sabab awaknyan hana seutia ubak Droeneueh. 8 Raja-raja kamoe, bubena peumimpén kamoe dan indatu kamoe ka jipeubuet hai-hai nyang lumpah that malée dan ka meudesya ubak Droeneueh, ya TUHAN. 9 Droeneueh peunoh amphonan dan gaséh sayang, bahpi kamoe ka kamoe lawan Droeneueh. 10 Kamoe hana teudeungoe su Droeneueh, ya TUHAN Po teu Allah kamoe, watée neuyue ubak kamoe udeb meunurot huköm-huköm nyang ka neubri ubak kamoe meulalu nabi-nabi, hamba-hamba Droeneueh nyan. 11 Bansaboh Israel ka ji-iengkeue ubak huköm-huköm Droeneueh dan hana jitem deungoe su Droeneueh. Kamoe meudesya ubak Droeneueh, dan lé sabab nyan Droeneueh peurhot ateueh kamoe kutokan nyang teutuléh lam Kitab Nabi Musa, hamba Droeneueh. 12 Droeneueh meutindak teupat that lagée nyang ka Droeneueh peujanji ubak kamoe dan ubak peunguasa kamoe. Yerusalem ka Droeneueh huköm leubeh kreueh nibak banda toh mantong nyang na ateueh donya nyoe. 13 Peue mantong mala peutaka nyang ka teutuléh lam huköm Nabi Musa ka neupeurhot ateueh kamoe. Teuma bahpi meunan, ya TUHAN Po teu Allah kamoe, kamoe mantong cit kamoe tulak keu teupeugalak até Droeneueh. Kamoe teutab hana kamoetem tinggai desya-desya kamoe dan hana teuma kamoetem peurati ubak bandum ajaran-ajaran Droeneueh. 14 Droeneueh, ya TUHAN Allah kamoe, ka neuhuköm kamoe deungon bala nyang ka Droeneueh peusiab keu kamoe; tindakan Droeneueh sabe teupat dan ade, teuma kamoe hana kamoe deungoe su Droeneueh. 15 Ya, TUHAN Po teu Allah kamoe, Droeneueh ka neutunyok kuasa droeneueh deungon cara neuba umat Droeneueh neupeuteubiet nibak nanggroe Meusé, dan kuasa Droeneueh nyan mantong teutab teuingat. Kamoe ka meudesya dan kamoe peubuet buet nyang salah. 16 Droeneueh ka neubila kamoe bak jamén ilée, sabab nyan kheueh bék kheueh neubeungéh le keu Yerusalem, banda Droeneueh keudroe, bukét Droeneueh nyang suci. Lé sabab desya kamoe dan keujeuhetan indatu kamoe, teuma bandum ureuëng nyang na di silingka kamoe jikalon miyueb ateueh Yerusalem dan ateueh umat Droeneueh. 17 Ya Allah kamoe, deungoe kheueh doá dan nyang kamoe lakée. Peupuléh kheueh baét Droeneueh nyang ka jipeuhanco nyan, neupeugét kheueh mangat banmandum ureuëng jiteupeue bahwa Droeneueh kheueh Allah. 18 Deungoe kheueh kamoe, ya Allah, pandang kheueh kamoe dan neungieng kheueh peundeuritaan kamoe meunan cit deungon banda nyang rusak nyang jikheun deungon nan Droeneueh. Kamoe meudoá ubak Droeneueh bukon meusabab jasa-jasa kamoe, teuma na kheueh Droeneueh nyang peunoh gaséh sayang. 19 TUHAN, deungoe kheueh kamoe, peuamphon kheueh kamoe, peurati kheueh kamoe dan meutindak kheueh bubagaih! Bék kheueh treb-treb, mangat bandum ureuëng jiteupeue bahwa Droeneueh kheueh Allah. Sabab Yerusalem dan umat Droeneueh na kheueh milék Droeneueh nyang aula." 20 Ulôn hana putôh meudoá dan lôn meungaku ubak desya lôn dan desya bansa lôn Israel, dan lôn lakée ubak TUHAN Allah lôn keu teupeupuléh rumoh Gobnyan nyang suci. 21 Teungoh ulôn meudoá, Jibrail nyang ka ulôn ngieng dalam keumalon ulôn nyang masa ilée nyan, geupo ubak ulôn. Watée keujadian nyan ureuëng laén teungoh jipeuseumah keureubeuen seupôt. 22 Laju lé Jibrail geupeugah lagée nyoe, "He Daniel, ulôn keuneuk tulông gata keu lôn peutrang makna ramaian nyan. 23 Watée gata tapeuphon meudoá ubak Po teu Allah, Gobnyan geubri jaweueb. Ulôn teuka lônjak peusampoe sabab Gobnyan geugaséh keu gata. Nah, deungoe kheueh beugét-gét watée ulôn peutrang makna nyang teukalon nyan. 24 Tujoh goe tujoh ploh thon na kheueh masa nyang geupeuteutab lé Po teu Allah keu teupeubeubaih bansa gata dan banda gata nyang suci nyan nibak desya dan keujeuhetan. Banmandum desya geupeu amphon dan keuadelan nyang keukai geupeudong, dan nyang teukalon dan ramaian nyan jeuet keunyataan, dan Baét TUHAN nyang suci nyan teubakti lom ubak TUHAN. 25 Cetet kheueh dan peuphom kheueh nyoe: Tujoh goe tujoh thon teuma jijak, phon saát geupeuteubiet peurintah keu teupeudong lom Yerusalem, sampoe teuka sidroe peumimpén nyang geutunyok lé Po teu Allah. Nyang treb jih tujoh goe nam ploh dua thon rot-rot dan kuta-kuta Yerusalem teuma teupeugöt lom, teuma masa nyan peunoh keusosahan. 26 Bak akhé masanyan peumimpén piléhan Allah nyan teupoh maté, padahai jihnyan hana meusalah. Dan teuka kheueh tantra sidroe raja nyang teuga, laju geupeuhanco banda Yerusalem meunan cit ngon Baét TUHAN. Akhé jamén nyan teuka lagée ié raya nyang jiba prang dan keuhancoran, lagée nyang ka geupeuteutab lé Po teu Allah. 27 Raja nyan geupeugét peujanjian nyang kong deungon ureuëng ramé nyang treb jih na tujoh thon. Watée diteungoh-teungoh masanyan, gobnyan geupeupiôh soe-soe nyang peuna keureubeuen dan peuseumahan. Óh lheuehnyan sapeue-peue nyang lumpah teumakot dan gli that nyang teupeugah Keujeuhetan nyang peuhanco teuma teukeubah di Baét TUHAN dan teutab na disinan sampoe gobnyan nyang keubah disinan jitingkeh lé keubinasaan nyang ka geupeuteutab lé Po teu Allah keu gobnyan."

Daniel 10

1 Bak thon nyang keu lhée geumat peurintah lé Koresy ateueh nanggroe Persia, na saboh peusan geupeugah ubak Daniel alias Beltsazar. Peusan nyan beutôi, teuma lumpah payah keu teupeuphom. Watée teu useuha keu teupeu phom Daniel geuteurimong keuteurangan keuhai makna peusan nyan lam saboh keumalon. 2 Bak watée nyan ulôn teungoh meutapa lhée seun aleuhat peunoh. 3 Teungoh watée nyang lagée nyan hana ulôn pajoh peunajoh nyang mangat atawa pi eungkot sie; hana ulôn jieb anggô, meunan cit hana ulôn seugöt ôk. 4 Bak tanggai dua ploh peuet buleuen nyang keuphon nibak thon nyan, ulôn teungoh ulôn dong bak binéh Krueng Tigris nyang raya nyan. 5 Ulôn tangah u langét, laju leumah ulôn kalon sidroe ureuëng nyang geungui peukayan nibak ija lineun dan talo keuieng nibak méuh murni. 6 Tuboh ureuëng nyan meucahya muble-ble lagée peumata, ruman gobnyan trang lagée cahya kilat, dan mata gobnyan hu muble-ble lagée apui hu. Jaroe dan gaki gobnyan meukilat lagée teumaga nyang teugeusok, dan su gobnyan teudeungoe lagée su ureuëng subra. 7 Teuma ulôn keudroe nyang na ngieng nyang teukalon nyan. Ureuëng-ureuëng nyang na jak meusajan ngon ulôn hana jingieng, teuma awaknyan teumakot laju jiplueng sira jimusöm. 8 Nyang na tinggai disinan teuma ulôn sidroe, sira ulôn peurati nyang teukalon deungon teukeujot nyan. Ulôn ka hana meudaya le dan ruman ulôn laju pucat. 9 Watée ulôn deungoe su gobnyan, laju ulôn reubah dan pansan sampoe teudugöm ateueh tanoh. 10 Óh lheuehnyan na jaroe nyang mat ulôn dan laju ulôn beudôh sira meutumpang nibak jaroe dan teuôt ulôn. 11 Malaikat nyan geupeugah ubak ulôn, "Daniel, gata geugaséh lé Po teu Allah. Beudôh kheueh neudong dan neudeungoe kheueh tutoe haba lôn nyoe beugét-gét. Ulôn nyoe ka geuyue jak ubak gata." Watée geupeugah hainyan ubak ulôn, laju ulôn dong sira teuôt lôn yo meugám gám. 12 Laju geupeugah lé Malaikat nyan ubak ulôn, "Daniel, bék kheueh teumakot. Allah ka deungoe doá gata yoh uroe phon gata cok keuputosan keu tapeumiyueb droe gata mangat bijaksana. Ulôn ka teuka sibagoe jak jaweueb doá gata. 13 Malaikat peulindong keurajeuen Persia geulawan ulôn nyang treb jih dua ploh sa uroe. Laju Malaikat Mikail, sidroe lamkawan peumimpén-peumimpén malaikat, teuka geujak tulông ulôn. Ulôn tinggai gobnyan disideh, di Persia. 14 Ulôn teuka keu lôn peujeuet gata bumuphom peue nyang singoh teujadi ateueh bansa gata. Nyang deuh teukalon nyoe keuhai uroe ukeue." 15 Watée gobnyan geupeugah hai nyan, ulôn tukui dan hana jeuet lôn peugah haba. 16 Óh lheuehnyan malaikat nyang saban deungon manusia nyan geusunyueng jaroe gobnyan laju geucukéeh nibak bibie ulôn. Ulôn peugah ubak gobnyan, "Teungku, nyang deuh ulôn kalon nyoe keubit lumpah teumakot sampoe ulôn hana meudaya meubacut pih. 17 Ulôn lagée sidroe namiet nyang teudong dikeue Amphon jih. Panena mungken ulôn peugah haba ubak Teungku Amphon? Teunaga ulôn ka hana le dan nafáh ulôn ka meusak." 18 Dan sigoe teuk gobnyan geucukéeh ulôn, dan laju teurasa teunaga ulôn meutamah. 19 Gobnyan geupeugah, "Allah geugaséh keu gata, sabab nyan bék kheueh gundah dan teumakot, jak keunoe, beuteuga kheueh!" Teungoh geupeugah hai nyang lagée nyan, ulôn teurasa leubeh teuga lom dan lôn peugah, "Neumariet laju, Amphon, Amphon ka neutamah teunaga ulôn." 20 Laju gobnyan geujaweueb, "Peu kheueh tateupeue pakon ulôn jak ubak gata? Meukeusut jih na kheueh lôn keuneuk peugah ubak gata peue nyang teutuléh didalam Kitab Keubeunaran. Jinoenyoe ulôn harôh lôn gisa jak lawan malaikat peulindong di Persia. Óh lheuehnyan malaikat peulindong Yunani teuma teuka. Hana nyang tulông ulôn seulaén Mikail, malaikat peulindong Israel, nanggroe gata.

Daniel 11

1 Gobnyan kheueh nyang bri tugaih keu geutulông dan geubila ulôn bak thon nyang keuphon geumat peurintah lé Darius ureuëng Media nyan. 2 Dan peue nyang ulôn peugah ubak gata na kheueh beuna." Malaikat nyan geupeugah, "Lhée droe raja teuk nyang peurintah Persia, jiseutôt lé raja nyang keupeuet nyang leubeh kaya nibak nyang laén. Bak pucak keukuasaan dan keukayaan jihnyan, jihnyan teuma meuadu teunaga deungon keurajeuen Yunani. 3 Óh lheuehnyan teuka sidroe raja nyang peukasa. Gobnyan jimat peurintah keurajeuen nyang lumpah raya dan jipeubuet ban galak droe. 4 Teuma nibak pucak keujayaan jihnyan, keurajeuen jihnyan beukah dan teubagi-bagi jeuet keudua bagian. Raja-raja nyang kon keuturonan gobnyan jimat peurintah sibagoe geunantoe, dan awaknyan hana saban teuga lagée jihnyan. 5 Raja nanggroe seulatan jeuet keuteuga. Teuma sidroe lamkawan panglima-panglima awaknyan leubeh teuga nibak raja nyan, dan jihnyan jimat peurintah keurajeuen nyang leubeh raya. 6 Na padub thon óh lheueh nyan raja nanggroe seulatan jipeuna pakat mangat jeuet keureuja sama deungon raja di nanggroe utara dan jipeukawen putroe jihnyan deungon raja utara nyan. Teuma keureuja sama nyan hana treb meuteun, dan putroe nyan jipoh maté, meunan cit deungon lakoe dan aneuëk gobnyan dan namiet-namiet gobnyan nyang ka geu intat gobnyan. 7 Hana treb teuma óh lheueh nyan, ureuëng nyang saboh keuluwarga deungon putroe nyan jeuet keuraja. Gobnyan jiprang raja nanggroe utara, jiseureubu kuta raja nyan dan jipeutaloe. 8 Bak watée jihnyan jigisa u nanggroe Meusé, na jiba sajan patong dewa musoh jihnyan dan peukakaih méuh dan pirak nyang ka jipeuseumah keu dewa nyan. Na padub thon treb jih jihnyan hana jiprang raja nanggroe utara. 9 Óh lheuehnyan raja nanggroe utara jiseureubu raja nanggroe seulatan, teuma raja hase jihampeung sampoe jisurot dan jiwoe u nanggroe jih keudroe. 10 Laju aneuëk-aneuëk agam raja nanggroe utara meusiab-siab keuneuk jimuprang dan jilateh pasokan tantra nyang raya. Sidroe lamkawan awaknyan jimaju jiseureubu lagée ié raya. Nibak seureubu nyang keudua nyan laju jiheuntam kuta musoh. 11 Dan beungéh kheueh raja nanggroe seulatan, dan gobnyan maju u mideuen prang geulawan raja nanggroe utara. Jihnyan meuhase jipeutaloe pasokan tantra nyang leubeh raya nyang jikrah lé raja nanggroe utara. 12 Óh lheuehnyan jihnyan bangga sabab meunang di mideuen prang nyan dan lom teuma sabab ka jai that jipoh maté musoh, teuma jihnyan hana meukuasa sabe. 13 Keu nyang keu dua goe jih raja nanggroe utara geupeuna lom pasokan nyang raya, leubeh raya nibak pasokan nyang phon. Meunyoe watée jih ka teuka, jihnyan meugrak maju deungon pasokan nyang raya dan peuleungkapan nyang lumpah le. 14 Dan jai that ureuëng nyang beurontak ateueh nanggroe seulatan. Dan na meupadub droe nyang keujam nibak bansa gata, Daniel, beurontak teuma sabab awaknyan ka jingieng sapeue-peue nyang deuh teukalon. 15 Óh lheuehnyan raja nanggroe utara jikeupong saboh banda nyang meupageu ngon kuta dan laju meuteumé jireubot. Tantra nanggroe seulatan hana hase jipeuteun droe, dan pasokan-pasokan nyang piléhan jihnyan pih hana le jilawan. 16 Raja nanggroe utara nyan jipeubuet ban galak droe deungon hana meuteumé peulawan meubacut pi. Jihnyan pi jiteumé duek bak tanoh nyang ceudah dan jikuasa tanoh nyan banmandum nyang na. 17 Óh lheuehnyan raja nanggroe utara jipeusiab banmandum tantra keu jijak prang nanggroe seulatan. Dan deungon meukeusut keuneuk kuasa bandum keurajeuen musoh jihnyan, geuhnyan jipeuna peusitujuan deungon rajanyan dan jipeukawen aneuëk inong jih deungon raja nanggroe Meusé nyan; teuma reuncana jihnyan nyan hana meuhase. 18 Óh ka lheueh nyan jihnyan jijak prang bansa-bansa nyang na bak binéh laôt, dan jai that nyang jipeutaloe. Teuma na sidroe peumimpén nanggroe aséng jiseutob buet meuhina nyang jipeubuet nyan, dan teuma jibalaih peuhinaan nyan keu gobnyan. 19 Raja nanggroe utara nyan jigisa ubak kuta-kuta jih keudroe, teuma raja nyan teupeutaloe dan hana le haba keuhai jihnyan. 20 Raja nyan jigantoe lé sidroe raja nyang laén nyang jiyue peugawée jihnyan nyang keujam keu jiyue kuteb cukée deungon paksa mangat jeuet teutamah keukayaan keurajeuen jih. Lam watée nyang paneuk raja nyan teupoh maté, bukon seucara trang-trang dan bukon teuma dimideuen prang." 21 Malaikat nyan geupeugah lom, "Raja nyang seulanjut jih nyang mat peurintah di nanggroe utara na kheueh sidroe ureuëng nyang hina nyang hana hak jeuet keuraja. Teuma raja nyan teuka deungon hana teusangka-sangka dan jireubot keududuekan raja ngon tipée daya. 22 Bandum tantra nyang lawan jihnyan, bah kheueh nyan Teungku Imeum Agong keudroe, habéh jisampôh dan ranab bube nyang na. 23 Raja jikhianat keu janji-janji jih nyang ban sagai jimeujanji deungon bansa-bansa laén. Dan raja nyan seumaken teuga, bahpi raja nyan jimat peurintah ateueh nanggroe nyang ubit. 24 Deungon licek raja nyan jiseureubu daerah-daerah nyang gumbô dan subô tanoh jih, bak watée jidueb nibak tanoh nyang jireupah nyan meurasa aman disinan. Jihnyan laju jipeubuet peue nyang gohlom jipeubuet lé indatu jih keudroe. Laju jibagi-bagi keu bandum ureuëng-ureuëng nyang dukông jih peue-peue mantong barang nyang jireupah dan keukayaan nyang jiteumé di mideuen prang. Jihnyan jipeugét siasat keu jiprang teumpat-teumpat nyang meukuta, teuma watée jih karab that keuneuk habéh. 25 Óh lheuehnyan deungon beuhe laju jibina tantra nyang raya keu jijak prang raja-raja di nanggroe seulatan nyang ka geusiab-siab teuma keuneuk jilawan jihnyan deungon tantra nyang teuga dan raya lumpah na. Teuma raja nanggroe seulatan hana hase jipeuteun droe sabab jihnyan jikhianat. 26 Peunaseuhat-peunaseuhat jihnyan nyang paleng rab deungon jihnyan teuma teupeurhot jihnyan. Jai that-that tantra jihnyan nyang jipoh maté, dan tantra jihnyan teuma jisampôh gleh. 27 Óh lheuehnyan bandua droe raja nyan jiduek nibak saboh meuja dan jimakheun meusajan, teuma awaknyan na meukeusut jeuhet, dan awaknyan saléng meusulet. Teuma reucana awaknyan gagal sabab masa jih gohlom teuka. 28 Óh lheuehnyan raja nanggroe utara jiwoe u nanggroe jih deungon meubagoe jeunéh barang nyang jireupah di mideuen prang. Jihnyan ka bulat até keu jipeuhanco agama nyang jipaluek lé umat Po teu Allah. Jihnyan meubuet ban galak droe óh ka puih até jih barô kheueh jiwoe u nanggroe jih keudroe. 29 Na padub treb teuma óh lheueh nyan jihnyan jijak prang nanggroe seulatan lom, teuma akibat jih laén nibak kali nyang phon. 30 Sabab ureuëng-ureuëng Roma deungon kapai-kapai prang gobnyan teuka nibak Siprus dan jijak prang jihnyan, sampoe jihnyan ka teuka teumakot. Laju lé jihnyan jiwoe deungon beungéh lagoena dan ji useuha keu jipeuhanco agama umat Allah. Jihnyan jiseutôt naseuhat awaknyan nyang ka murtad nibak agama nyan. 31 Laju raja nyan jikirém pasokan-pasokan nyang jipeukuto Baét TUHAN. Awaknyan jisampôh keureubeuen uroe-uroe dan geupeudong sapeue-peue nyang keubit teumakot nyang teupeugah Keujeuhetan nyang jipeuhanco. 32 Dan deungon tipée daya raja nyan jibujuk ureuëng-ureuëng nyang jitinggai agama droe jih, mangat jitem tulông jihnyan. Teuma ureuëng-ureuëng taát ubak Po teu Allah jijeuet lawan raja nyan. 33 Ureuëng-ureuëng bijaksana nyang pimpén rakyat jipeujeuet rakyatba mangat muphom. Teuma keu na padub watée treb jih, na padub droe lamkawan awaknyan maté keunong poh jisabab lé prang atawa sabab tutong ngon apui, dan napadub droe teuk jireupah dan jiteuen. 34 Dan watée seumeupoh maté nyan teungoh teujadi, umat Allah meuteumé bacut bantuan, teuma jai that ureuëng meugabong deungon awaknyan na kheueh keu keupeuntengan awaknyan keudroe. 35 Siladum nibak peumimpén nyang bijaksana nyan teupoh maté, teuma nyan na kheueh ujian keu umat sampoe awaknyan jeuet keu ureuëng murni. Hainyan trok hana putôh-putôh sampoe akhé jamén, na kheueh jamén nyang ka geupeuteutab lé Po teu Allah. 36 Raja nanggroe utara jipeubuet ban galak até jih. Deungon sombong raja nyan jipeugah bahwa jihnyan leubeh rayeuk nibak dewa toh mantong, dan leubeh rayeuk nibak Allah Nyang Mahamanyang. Raja nyan hase jipeugah meunan sampoe meureuka Po teu Allah habéh. Sabab peue nyang ka geupeuteutab lé Po teu Allah harôh teupeubuet leubeh dilée. 37 Raja nyan hana jipakoe ubak dewa toh mantong nyang jiseumah lé indatu awaknyan, meunan cit ateueh dewa nyang jiseumah lé ureuëng inong. Raja nyan hana jipeureumeun ubak dewa-dewa nyan sabab jianggab droe jihnyan leubeh rayeuk nibak awaknyan. 38 Sikeubitji, raja nyan jihoreumat ubak dewa nyang gohlom sagai jiseumah lé indatu jihnyan, nyan kheueh dewa peulindong kuta-kuta. Raja nyan jipeuseumah méuh, pirak, peumata dan peuseumahan-peuseumahan meuwáh nyang laén keu dewa nyang gohlom sagai jiseumah lé indatu jihnyan. 39 Raja nyan jipiléh ureuëng-ureuëng nyang seumah dewa aséng, keu jijak prang kuta-kuta nyang teuga. Soemantong nyang peucaya ubak dewa nyan jibri keuhoreumatan nyang raya dan keududuekan nyang manyang meusajan ngon tanoh sibagoe upah. 40 Meunyoe akhé keukuasaan raja nanggroe utara karab sampoe, raja nanggroe seulatan jiprang jihnyan. Laju lé raja nanggroe utara jibalaih prang nyan deungon hebat that. Raja nyan jikrah geuritan prang nyang lumpah jai, guda dan kapai prang. Jihnyan jiseureubu lagée ié raya, jai that nanggroe nyang jiteumé reupah laju jiduek. 41 Meunan cit tanoh nyang ceudah hana tinggai nyan pih geuseureubu, dan meuploh-ploh ribée manusia jipoh maté. Teuma keurajeuen-keurajeuen Edom, Moab dan bagian nyang paleng peunteng nibak nanggroe Amon seulamat. 42 Bak watée jihnyan jiduek ubak keurajeuen-keurajeuen nyan, keurajeuen Meusé pih hana tuwoe. 43 Jihnyan jireupah hareuta di nanggroe Meusé miseu jih méuh dan pirak meunan cit deungon hareuta laén nyang paleng meuyuem. Raja nyan jitulông lé ureuëng Libia dan Sudan. 44 Laju teuka haba di timu dan utara nyang lumpah teukeujot raja nyan, sampoe raja nyan jimuprang leubeh gura dan hana teukira manusia nyang jipoh maté. 45 Dan raja nyan jipeudong khimah keurajeuen jihnyan di lamkawan laôt dan gunong teumpat Baét TUHAN. Teuma óh lheueh nyan raja nyan maté dan hana meusidroe pih nyang tulông gobnyan."

Daniel 12

1 Malaikat nyang geungui peukayan lineun nyan geupeugah lom, "Bak saát nyan teuka malaikat rayeuk nyan nan geuh Mikail peulindong bansa gata. Óh lheueh nyan na masa nyang sulet nyang hana bandeng yoh phon that na bansa-bansa. Teuma bandum ureuëng nibak bansa gata nyang nan jihnyan teutuléh lam Kitab Allah, geupeuseulamat. 2 Jai that lamkawan awaknyan nyang ka maté udeb lom; siladum jirasa udeb nyang keukai, dan siladum teuk jirasa keuhinaan dan keubinasaan nyang keukai teuma. 3 Dumna peumimpén nyang bijaksana meucahya lagée cahya langét. Dan awaknyan nyang ka geupeurunoe ureuëng ramé peue nyang gét dan nyang ade, meucahya lagée bintang di langét keu siumu masa." 4 Laju geupeugah lom lé malaikat ubak ulôn, "Daniel, tatôb kheueh kitab nyan phon saát nyoe, dan tacab kheueh ngon segée mangat teutab teutôb sampoe akhé jamén. Ramé ureuëng jicuba seulidek peue nyang teungoh teujadi. Teuma useuha nyan sia-sia mantong." 5 Óh lheuehnyan ulôn ngieng dua droe ureuëng agam. Nyang sidroe jidong bak binéh krueng rot blaih nyoe, dan nyang laén bak binéh rot blaih jéh. 6 Nyang sidroe jitanyong ubak ureuëng dong nyang leubeh rab deungon pucok krueng, "Pajan kheueh keujadian-keujadian nyang ajaéb nyoe meuakhé?" 7 Ureuëng nyang laén nyan laju jibeuôt bandua blaih jaroe gobnyan ulangét. Ulôn deungoe ureuëng nyan jimeudok deumi Po teu Allah nyang keukai dan jipeugah, "Keujadian-keujadian nyan teuka nyang treb jih na lhée siteungoh thon. Óh ka lheueh keujadian ji iénanya ateueh umat Allah nyang keuneulheueh, teuma tamat kheueh teuma keujadian-keujadian nyang ajaéb nyan." 8 Bandum nyang geupeugah nyan beutôi na lôn deungoe, teuma ulôn hana lôn peuphom. Laju ulôn teumanyong, "Amphon, pakriban bandum nyoe keuneulheueh?" 9 Gobnyan geujaweueb, "Tajak kheueh jinoe, he Daniel, sabab tutoe haba nyoe harôh teusöm dan teurahsia trok bak akhé jamén. 10 Ramé ureuëng ji ujoe dan jipeu gleh. Awaknyan nyang jeuhet hana jimuphom dan teutab jipeubuet jeuhet; teuma awaknyan nyang bijaksana nyang muphom. 11 Nibak masa keureubeuen uroe-uroe nyan teupeupiôh dan sapeue-peue nyang lumpah gli ngon teumakot nyang jipeugah Keujeuhetan nyang jipeuhanco nyan teupeudong, jipajoh watée 1.290 uroe. 12 Mubahgia kheueh awaknyan nyang tinggai sampoe bak uroe nyang keu 1.335. 13 Gata Daniel, seutia kheueh sampoe bak akhé. Gata meuninggai, teuma tabeudôh keu tateurimong upah gata bak akhé jamén."

Hosea 1

1 Nyoe kheueh peusan nyang geubri lé TUHAN ubak Hosea bin Beeri bak masa keurajeuen Yehuda meuturot-turot geupeurintah lé Raja Uzia, Yotam, Ahas, dan Hizkia, dan keurajeuen Israel geupeurintah lé Yerobeam bin Yoas. 2 Watée TUHAN phon-phon geumeufeureuman ubak bansa Israel deungon peurantaraan ulôn, TUHAN geupeugah, "Hosea, tameukawen kheueh deungon sidroe ureuëng nyang galak bak buet meumukah, dan aneuëk-aneuëk gata jeuet cit lagée jih nyan. Umat Ulôn saban lagée peurumoh gata nyan; awaknyan hana seutia ubak Ulôn, dan jitinggai Ulôn." 3 Dan laju ulôn meukawen deungon sidroe inong nyang nan jih Gomer bin Diblaim. Óh lheueh nyan lahé kheueh aneuëk kamoe nyang phon, sidroe aneuëk agam. 4 TUHAN meufeureuman ubak Ulôn, "Taboh nan aneuëk gata nyan Yizreel sabab hana treb le ulôn kuhuköm raja Israel sabab Yehu indatu jihnyan ka jipoh maté ureuëng laén, di Yizreel Ulôn ku peutamat peumeurintahan keuturonan Yehu. 5 Bak masa nyan di Pantôn Yizreel Ulôn kupeuhanco teunaga tantra Israel." 6 Óh lheuehnyan peurumoh lôn nyan jipeulahé aneuëk kamoe nyang keudua, aneuëk nyang lahé nyan na kheueh inong. TUHAN meufeureuman ubak ulôn, "He Hosea, taboh nan aneuëk gata nyan 'Nyang Hana Geugaséh', sabab Ulôn hana le Lôn gaséh ubak bansa Israel, dan meubacutpi hana Lôn peuamphon awaknyan. 7 Teuma bansa Yehuda Lôn gaséh. Ulôn, TUHAN, Po teu Allah awaknyan, Lôn peuseulamat awaknyan, teuma bukon deungon muprang, meunan cit bukon deungon peudeueng atawa aneuk panah atawa guda meusajan ngon nyang giduek ateueh guda nyan." 8 Óh ka lheueh aneuëk kamoe nyang keudua nyan teupeucre jimom, peurumoh ulôn nyan laju raya pluet lom dan jipeulahé aneuëk agam. 9 TUHAN meufeureuman ubak ulôn, "Taboh nan aneuëk gata nyan, 'Bukon Umat Lôn', sabab ureuëng Israel bukon umat Lôn, dan Ulôn bukon Allah awaknyan." 10 Bansa Israel le jih lagée anoe lam laôt, sampoe hana sanggob teusukat atawa teu itong. Jinoenyoe Allah geupeugah ubak awaknyan, "Gata bukon umat Ulôn," teuma trok saát jih Gobnyan geupeugah ubak awaknyan, "Ulôn kheueh Allah nyang udeb dan gata na kheueh aneuëk-aneuëk Ulôn!" 11 Bansa Yehuda dan bansa Israel geupeusaboh lom. Awaknyan jiangkat sidroe peumimpén, dan awaknyan meukeumang dan makmu lom di nanggroe awaknyan keudroe. Keubit, uroe Yizreel jeuet keu uroe nyang raya!

Hosea 2

1 Sabab nyan meuhôi kheueh seusabe gata deungon nan "Umat Allah" dan "Geunaséh TUHAN." 2 TUHAN meufeureuman, "He aneuëk-aneuëk Ulôn, ma gata bukon peurumoh Lôn le, dan Ulôn bukon lakoe gobnyan. Sabab nyan, jak peukara kheueh jihnyan mangat jihnyan bék le jipeubuet mukah dan bék le jimeujeuhet. 3 Meunyoe jihnyan teutab jimeulunté, Ulôn kusuet peukayan jih mangat jihnyan teulon lagée watée jihnyan lahé lam pluet ma. Teuma Lôn peujeuet jihnyan lagée tanoh nyang tho kreng, dan jihnyan maté sabab grah ngon tho rukueng. 4 Gatanyoe, aneuëk-aneuëk jihnyan, hana Lôn gaséh; gatanyoe lahé nibak inong jeuhet. 5 Ma gata inong jeuhet nyang hana meumalée. Jihnyan jipeugah, 'Ulôn teuma lôn jak ubak geunaséh-geunaséh lôn nyang bri keu ulôn peunajoh dan ié meuneujieb, wol dan ija lineun, minyéuk zaiton dan ié anggô.' 6 Sabab nyan, Ulôn Lôn kuröng jihnyan deungon tamah meuduro, dan Ulôn tôb rot jijak ngon pageue beuton. 7 Jihnyan teuma jitiyeub geunaséh-geunaséh jih, teuma hana trok ubak awaknyan. Jihnyan jimita awaknyan, teuma hana meurumpok deungon awaknyan. Sababnyan laju jipeugah, 'Ulôn ku woe ubak lakoe lôn nyang phon; ilée keuadaan ulôn leubeh gét nibak saát nyoe.' 8 Ma gata hántom na jiaku bahwa Ulôn kheueh nyang bri gandom, anggô, minyéuk zaiton, dan bandum méuh pirak nyang geungui keu jiseumah Baal nyan. 9 Sabab nyan, bak musém keumeukoh Ulôn tarek bandum nyang ka Ulôn bri, nyan kheueh gandom dan anggô, meunan cit deungon wol dan ija lineun nyang Ulôn bri keu peukayan jih. 10 Teuma Lôn peulon jihnyan dikeue banmandum geunaséh jih. Hana meusidroe pih nibak awaknyan nyang hase jipeulheuh jihnyan nibak keukuasaan Lôn. 11 Bandum khanuri nyang jipeuna lé jihnyan Lôn peupiôh, bah kheueh nyan khanuri sithon sigoe meunan cit khanuri sibuleuen sigoe dan uroe-uroe Sabat; Paneuk haba, bandum peurayaan keuagamaan jihnyan. 12 Ulôn Lôn peuhanco bubena bak anggô dan bak-bak ara nyang meunurot jihnyan na kheueh upah peulayanan jihnyan ubak geunaséh jih. Teuma Lôn ubah lampôh-lampôh anggô dan lampôh-lampôh ara jihnyan jeuet keu uteuen; beulatang-beulatang buih jipeurusak. 13 Ulôn Lôn huköm jihnyan sabab uroe-uroe nyang geupeuguna keu jitot keumeunyan keu Baal, dan jimeusolek deungon piasan jih keu jitiyeub geunaséh-geunaséh jihnyan, laju jituwoe ubak Ulôn hana jiingat meubacut pih. Ulôn, TUHAN, ka Lôn peugah haba." 14 TUHAN meufeureuman, "Sabab nibak uroenyan Ulônba jihnyan u padang pasi; disideh jihnyan Lôn bujuk deungon tutoe haba cinta. 15 Lampôh-lampôh anggô jihnyan Lôn pulang ubak jihnyan, dan Pantôn Keususahan Lôn peujeuet keu pintoe peungharapan. Di teumpat nyan jihnyan jisambot Ulôn lagée yoh jihnyan mantong muda, watée jihnyan ban jiteubiet nibak nanggroe Meusé. 16 Laju jihnyan jipeugah Ulôn lakoe droe, dan bukon le Baal jih. 17 Ulôn hana Lôn idhin le keujih jipeugah-peugah nan Baal, sampoe lé ureuëng ramé teuma jituwoe ubak nan nyan. 18 Bak watée nyan Ulôn kupeuna peujanjian deungon meubagoe jeunéh beulatang jeuet lé beulatang-beulatang nyan bék le jipeukaru umat Ulôn. Ulôn kupeupiôh bubena prang dan Ulôn kireueh bube na alat-alat prang di nanggroe umat Ulôn nyan, dan Lôn peujeuet awaknyan udeb deungon aman dan teuntram. 19 He Israel, gata Lôn peujeuet keu peurumoh Lôn, peurumoh nyang sah keu siumu masa. Gata Lôn gaséh dan Lôn cinta sabe; Ulôn kupeubuet jujoe dan seutia. 20 Lagée nyang ka Ulôn peujanji, gata Lôn meukawen, gata ta aku Ulôn sibagoe TUHAN gata keudroe. 21 Bak watée nyan, meunyoe umat Ulôn Israel jimeu doá, doá nyan Lôn deungoe. Di ateueh langét Lôn peutron ujeuen sampoe bumoe jipeuhase gandom, anggô dan minyéuk zaiton. 23 Teuma Lôn peujeuet umat Ulôn udeb seujahteura dan tinggai teutab di nanggroe jih keudroe. Keu awaknyan nyang teuboh nan, 'Nyang Hana Teugaséh' teuma Lôn tunyok bahwa awaknyan Ulôn gaséh, dan keu awaknyan nyang teuboh nan 'Bukon Umat Ulôn' teuma Ulôn peugah 'Gata Umat Ulôn'. Awaknyan teuma jijaweueb lagée nyoe, 'Droeneueh kheueh Allah kamoe.' "

Hosea 3

1 TUHAN meufeureuman ubak ulôn, "Tajak kheueh lom dan tameucinta kheueh ngon sidroe ureuëng inong nyang galak jipeubuet mukah. Cinta kheueh inong nyan lagée Ulôn kucinta ureuëng Israel bahpi awaknyan jitinggai Ulôn dan jiseumah ilah-ilah laén dan galak jipeuseumah kue kismis keu beurala." 2 Dan ulôn bayeue limong blaih péng pirak dan 150 kilo gram gandom beu meuteumé ureuëng inong nyan. 3 Ulôn peugah ubak jih bahwa jihnyan harôh jipreh ulôn keu watée nyang treb. Seudub nyan treb watée jih ureuëng nyan hana jeuet jipeubuet mukah atawa jijak meulunte, dan ulôn pih hana lôn peurab ubak jihnyan. 4 Meunan kheueh hai jihnyan deungon bansa Israel; treb that jihnyan harôh udeb hana meuraja atawa peumimpén, hana keureubeuen atawa tugu-tugu keuramat, hana beurala atawa jimat-jimat nyang jipeugah rahsia masa ukeue. 5 Teuma teuka masa jih bansa Israel jiwoe ubak TUHAN Allah jih keudroe, dan ubak raja jih keudroe nibak keuturonan Nabi Daud. Laju awaknyan teumakot dan horeumat ubak TUHAN, dan jiteurimong beureukat-beureukat nyang geubri.

Hosea 4

1 TUHAN na peukara deungon peunduduek nanggroe nyoe. He Israel, tadeungoe peue nyang geupeugah lé Gobnyan, "Di nanggroe nyoe hana keuseutiaan atawa gaséh sayang, dan peunduduek nanggroe nyoe hana jiaku Ulôn sibagoe Allah. 2 Awaknyan meusumpah teuma hana jipeubuet lagée nyang jimeusumpah nyan; awaknyan meusulet, tukang poh maté gob, ceumucue, dan tukang meumukah. Keujeuhetan meutamah-tamah, dan jipoh maté gob sabena hántom reuda. 3 Sabab nyan nanggroe nyoe jeuet keu nanggroe nyang tho, dan peue-peue mantong nyang udeb disinan maté. Meubagoe jeunéh beulatang nyang na di manyang, darat, dan laôt binasa." 4 TUHAN meufeureuman, "He teungku-teungku imeum, bék kheueh na nyang peusalah atawa beungéh keu umat Lôn, sabab gata kheueh nyang Ulôn peusalah! 5 Uroe malam gata peubuet buet nyang salah, meunan cit teuma deungon dumna nabi. Sabab nyan Ulôn Lôn peubinasa Israel, ma gata. 6 Gata, he teungku-teungku imeum, hana tapakoe keu Ulôn, dan umat Lôn pih hana jipakoe keu Ulôn sampoe awaknyan ceulaka. Gata tatulak ajaran-ajaran Ulôn. Lé sababnyan, Ulôn pih Lôn tulak gata, dan aneuëk-aneuëk gata hana Ulôn angkée sibagoe teungku-teungku imeum Lôn. 7 Seumaken gata meutamah le, seumaken meutamah meudesya gata ubak Ulôn, he teungku-teungku imeum! Sabab nyan keuadaan gata Lôn ubah; gata hana jihoreumat lé gob, teuma jihina. 8 Gata ka jeuet keukaya sabab desya-desya umat Ulôn, sabab nyan kheueh gata meuharab mangat awaknyan teutab meudesya sabe. 9 Dan gata meudeurita saban lagée rakyat! Ulôn Lôn huköm gata nyang sisuai deungon buet gata. 10 Gata tapajoh nibak keureubeuen-keureubeuen nyang jipeuseumah, teuma gata teutab deuk. Gata taseumah dewa-dewa keusuboran, teuma peunduduek gata teutab hana meutamah, sabab gata ka tatinggai Ulôn keu taseumah ilah-ilah nyang laén." 11 TUHAN meufeureuman, "He umat Lôn, bah kheueh anggô nyang treb meunan cit anggô nyang barô ka teupeugadôh keumampuan gata keu gata seumike seucara seuhat. 12 Gata lakée naseuhat ubak sikrak kayée! Sikrak tungkat jipeugah ubak gata peue nyang gata keuneuk teupeue! Gata lagée sidroe binoe nyang jeuet keu lunte; gata tatinggai Ulôn dan tapeujok droe ubak ilah-ilah laén. 13 Bak teumpat-teumpat seumah beurala di pucak-pucak bukét dan gunong, gata tapeuseumah keureubeuen, dan tatot keumeunyan dimiyueb bak-bak kayée raya nyang rampak disideh sabab teumpat nyan reului. Teuma peu kheueh akibat jih? Aneuëk-aneuëk dara gata ka jeuet keu inong lunte dan meulintée-meulintée gata nyang inong ka jimeumukah! 14 Teuma Ulôn hana Lôn huköm buet awaknyan, sabab gata keudroe pi tajak ubak inong-inong lunte nyang meubuet di kuil-kuil, dan meusajan deungon awaknyan gata tapeuseumah keureubeuen keu dewa, keubit beutôi that ungkapan nyoe: 'Bansa nyang hana peungeurtian keuhai Allah bansa nyan reulôh.' 15 He gata ureuëng Israel, gata hana seutia ubak Ulôn! Teuma, Ulôn harab Yehuda hana jipeubuet buet nyang salah nyang sa! Bék meuiébadat di Gilgal atawa di Betel. Bék tameusumpah disinan deumi nan TUHAN nyang udeb. 16 Gata, he ureuëng Israel, lumpah that kreueh ulée! Pakriban Ulôn hase Lôn rabe gata lagée bubiri di blang naleueng?" 17 Umat Israel ka teugoda deungon beurala. Sabab nyan tapeubiyeu kheueh awaknyan. 18 Óh ka lheueh mabök sabab ka le that ji-jieb ié anggô, awaknyan meulunte ban galak droe. Awaknyan leubeh galak teuhina nibak teuhoreumat. 19 Sabab nyan awaknyan gadôh lagée angén ploih. Awaknyan meuteumé malée sabab keureubeuen-keureubeuen nyang awaknyan peuseumah keu dewa-dewa.

Hosea 5

1 TUHAN meufeureuman, "Deungoe kheueh, he bandum teungku imeum! Simak kheueh, he ureuëng Israel! Deungoe kheueh, he ureuëng-ureuëng keuturonan raja! Huköman ka teupeurhot u ateueh gata. Sabab, nyang sibeuna jih gata tameuhakém deungon ade, teuma ka teubalek gata jeuet lagée peurangkab di Mizpa, lagée taron di Gunong Tabor, 2 dan lagée uruek nyang lhok di Sitim. Sabab nyan Ulôn ku huköm gata banmandum! 3 Ulôn Lôn teupeue peue-peue mantong keuhai gata, he Israel! Hana mungken gata söm sapeue-peue nibak Ulôn. Gata taseumah beurala dan hanale seutia ubak Ulôn. Sabab nyan, ureuëng-ureuëng gata hana patot le jiseumah Ulôn." 4 Keujeuhetan nyang jipeubuet lé ureuëng-ureuëng Israel meuakibat jih awaknyan hana hase jiwoe ubak Allah jih keudroe. Awaknyan ka jiteugöm lé jiseumah ubak beurala, sampoe awaknyan ka hanale jipakoe ubak TUHAN. 5 Keusombongan bansa Israel leumah deungon nyata, dan jeuet keubukeuti keusalahan awaknyan. Sabab desya awaknyan meuakibat jih awaknyan meuantok dan reubah, dan bansa Yehuda meusajan rhot deungon awaknyan. 6 Awaknyan jijak mita TUHAN deungon jiba bubiri dan leumô keu keureubeuen, teuma bandum nyan hana meuguna. Sabab TUHAN ka geutinggai awaknyan, dan awaknyan hana hase meurumpok ngon Gobnyan. 7 Awaknyan hana seutia ubak TUHAN; aneuëk-aneuëk awaknyan bukon aneuëk-aneuëk Gobnyan. Sabab nyan, hana treb le awaknyan teupeubinasa meusajan deungon ladang-ladang jih keudroe. 8 Yueb kheueh beureuguih di Gibea! Tapeumeusu tanda teutawök jak muprang di Rama! Peumaklum tanda dumpék prang di Betel! Jak, he ureuëng Benyamin, maju kheueh u mideuen prang! 9 Israel binasa, sabab ka trok uroe jih keu teuhuköm awaknyan. Deungoe kheueh, he rakyat Israel, hainyan pasti teujadi. 10 TUHAN meufeureuman, "Ulôn beungéh sabab peumimpén-peumimpén Yehuda ka jihéuntam Israel dan jireubot tanoh awaknyan. Sabab nyan Ulôn Lôn peurhot huköman u ateueh awaknyan lagée ié raya. 11 Israel jiteugon; awaknyan ka gadôh hak ateueh tanoh droe, sabab gobnyan jimeukreueh jilakée tulông ubak nyang sibeuna jih hana hase jitulông awaknyan. 12 Nyan kheueh jeuet Ulôn keuneuk peuhanco bansa Israel, dan Lôn peubinasa ureuëng Yehuda. 13 Bansa Israel dan bansa Yehuda jisadar ubak keuadaan gobnyan nyang brok, teuma Israel laju jijak u Asyur keu jilakée tulông ubak raja agong. Teuma rajanyan hana hase jitulông atawa jipeugét keuadaan awaknyan. 14 Lagée singa buih meurungköm, meunan kheueh Ulôn Lôn seurang ureuëng Israel dan Yehuda. Ulôn keudroe nyang leumeueh dan priek-priek awaknyan, óh lheuehnyan laju Ulôn tinggai disinan. Meunyoe Ulôn nyang bahue awaknyan mangat jijak, hana meusidroe nyang hase peulheueh awaknyan. 15 Umat Ulôn Lôn tinggai sampoe awaknyan kaseb meudeurita sabab desya-desya jih keudroe, laju jijak mita Ulôn. Mungken lam peundeuritaan jihnyan, awaknyan ji-useuha jak meurumpok ngon Ulôn."

Hosea 6

1 Ureuëng-ureuëng Israel jipeugah, "Jak geutanyoe tawoe ubak TUHAN. Gobnyan kheueh nyang peusakét geutanyoe, teuma Gobnyan cit nyang peupuléh, Gobnyan nyang peuluka, teuma Gobnyan cit nyang balot luka-luka geutanyoe. 2 Lam dua atawa lhée uroe nyoe Gobnyan geupeupuléh tanyoe, dan geutanyoe udeb didalam lindongan Gobnyan. 3 Sabab nyan jak kheueh geutanyoe ta useuha beubeutôi-beutôi taturi ubak TUHAN. Gobnyan pasti teuka ubak geutanyoe lagée teuka mata uroe beungoh, dan lagée ujeuen tron nyang basah bumoe bak akhé musém ujeuen." 4 Teuma TUHAN meufeureuman, "He Israel dan Yehuda! Peue nyang harôh Lôn peugét keu gata? Cinta gata ubak Ulôn bagaih gadôh lagée sagob atawa iémbon di beungoh uroe. 5 Nyang kheueh sabab jih Ulôn kirém nabi-nabi Lôn keu jipeusampoe ubak gata peue nyang ka Ulôn peuputôh bahwa gata harôh teuhuköm dan teupeubinasa. Nyang Ulôn lakée ubak gata nyata dan trang; 6 Ulôn leubeh galak gata taturi Ulôn dan sabe tagaséh keu Ulôn, nibak gata tatot dan tapeuseumah keureubeuen ubak Ulôn. 7 Teuma lagée di Adam, gata taiengkeue janji gata ubak Ulôn. 8 Gilead na kheueh banda nyang peunoh deungon peujahat dan tukang poh maté. 9 Teungku-teungku imeum di banda nyan lagée saboh kawan peurampok nyang jilinteueng ureuëng nyang jak. Nibak jalan nyang teutuju u teumpat suci di Sikhem pi jilinteueng dan jipoh gob sampoe maté! Bandum buet nyang jeuhet nyan awaknyan peubuet deungon jisaja. 10 Di Israel na Ulôn ngieng sapeue-peue nyang lumpah teumakot; umat Ulôn jipeukutoe droe jihnyan deungon jiseumah beurala. 11 Keuhai gata, he ureuëng Yehuda, Ulôn ka Lôn peuteutab watée jih keu Lôn huköm gata sabab buet nyang gata peubuet."

Hosea 7

1 TUHAN meufeureuman, "Tieb-tieb na niet keuneuk Lôn peupuléh umat Ulôn Israel dan Lôn peugét beujroh keuadaan awaknyan. Teuma nyang Ulôn ngieng na kheueh keujeuhetan-keujeuhetan dan desya-desya awaknyan. Awaknyan saléng teumipée, awaknyan jitamong lam rumoh gob jijak ceumucue, dan awaknyan meurampok bak rot-rot ueh raya. 2 Hana teupike meubacut pih lam pikeran awaknyan bahwa Ulôn Lôn ingat bandum buet nyang jeuhet nyan. Teuma desya-desya awaknyan ka peunoh dalam tuboh awaknyan deungon nyata deuh Ulôn kalon." 3 TUHAN meufeureuman, "Deungon tipée daya dan buet-buet nyang jeuhet rakyat ji useuha jipeugalak até raja dan peujabat-peujabat peumeurintah. 4 Awaknyan bandum peukhianat dan ureuëng nyang hana seutia. Banci awaknyan lagée apui lam sinungkée nyang hana jiproh lé ureuëng peugét ruti sigohlom teupông ruti nyang jilawok nyan siab keu teutot. 5 Bak uroe khanuri raja, awaknyan jipeujeuet raja dan peujabat-peujabat gobnyan ji-jieb ié anggô sampoe mabök dan jipeubuet hai-hai nyang bangai. Akhé jih raja meuseunang-seunang deungon bandum ureuëng peukhianat nyan. 6 Lagée apui lam sinungkée meunan kheueh niet jeuhet dan beungéh awaknyan lagée ngeue apui nyang hu simalam suntok, dan óh beungoh uroe hu apui nyan ka jeuet keu apui hu nyang keubit mubahya. 7 Watée nafeusu beungéh nyan, awaknyan laju jipeumaté peumimpén-peumimpén droe jih. Bandum raja awaknyan ka jipoh maté meuturot-turot. Teuma bahpi lagée nyan keuadaan ka lumpah that brok, dan meusidroepi hana meudoá ubak Ulôn keu jilakée tulông." 8 TUHAN meufeureuman, "Bansa Israel meusikutu ngon bansa-bansa nyang na di sikeulileng jihnyan, deungon nyan awaknyan ka jeuet lagée ruti nyang masak siblaih. 9 Awaknyan hana sadar bahwa deungon meusikutu deungon bansa-bansa nyan kheueh, jiteuka gadôh teunaga awaknyan. Akhé jih riwayat awaknyan ka rab that, teuma awaknyan teutab hana jiteupeue. 10 Keuangkohan ureuëng Israel leumah deungon nyata dan jeuet keubukeuti keusalahan bahwa awaknyan meusalah. Bahpi bandum nyan ka teujadi, awaknyan hana cit jimita Ulôn atawa jiwoe ubak Lôn, TUHAN Allah awaknyan. 11 Israel keudeh keunoe lagée cicém mirah pati nyang bangai. Phon-phon ureuëng-ureuëng jih jilakée tulông ubak Meusé, óh lheueh nyan awaknyan jiplueng ubak Asyur! 12 Teuma tieb-tieb watée awaknyan jijak, Ulôn kuteun jareng dan Lôn drob awaknyan lagée sidroe ureuëng jidrob cicém. Ulôn Lôn huköm awaknyan sabab buet-buet nyang jeuhet nyang awaknyan peubuet ka Lôn teupeue. 13 Cilaka awaknyan, sabab awaknyan ka jitinggai Ulôn. Awaknyan hanco sabab ka jilawan Ulôn. Ulôn na niet keuneuk peuseulamat awaknyan, teuma iébadat awaknyan ubak Ulôn pura-pura nyang hana meuguna. 14 Awaknyan hana bit-bit meudoá ubak Ulôn. Meunyoe awaknyan meudoá, awaknyan jiseumpom droe ateueh teumpat éh, dan geumeuba-e lagée nyang jipeubuet lé ureuëng-ureuëng nyang hana peucaya ubak Ulôn. Meunyoe awaknyan jimeudoá keu jilakée gandom dan anggô, awaknyan jipeuluka droe lagée nyang jipeubuet lé ureuëng-ureuëng nyang seumah dewa. Awaknyan bit-bit that jilawan Ulôn! 15 Bahpi Ulôn nyang peurayeuk dan nyang peuteuga awaknyan, teuma awaknyan meukomplot jilawan Ulôn. 16 Awaknyan teutab hana jipiôh jiseutôt dewa-dewa nyang meubacutpi hana meukuasa. Awaknyan hana hase teuandal lagée aneuëk panah nyang kendur. Peumimpén-peumimpén awaknyan jipeugah haba deungon sombong, sabab nyan awaknyan maté diujong peudeueng, dan jipeukém lé ureuëng-ureuëng Meusé."

Hosea 8

1 TUHAN meufeureuman, "Peumeusu laju tanda bahya! Musoh jijak prang nanggroe Ulôn lagée kleueng jiseumama! Umat Ulôn ka iengkeue peujanjian Lôn deungon awaknyan, dan jilawan ajaran-ajaran nyang Lôn peurunoe. 2 Bahpi awaknyan jipeugah Ulôn nyoe Allah awaknyan, dan jipeugah bahwa awaknyan na kheueh umat Lôn nyang jituri keu Ulôn, 3 teuma awaknyan hana jitem teurimong peue nyang gét. Lé sabab nyan awaknyan jipeucrok lé musoh-musoh jih keudroe. 4 Umat Ulôn jipiléh raja hana jitanyong ubak Ulôn leubeh dilée. Awaknyan jibaiát peumimpén hana jilakée situju Ulôn leubeh dilée. Awaknyan jicök méuh dan pirak atra jih keudroe laju jipeugét patong beurala nyang meuakibat jih keuhancoran nibak awaknyan keudroe. 5 Ulôn banci keu leumô méuh nyang jiseumah lé peunduduek Samaria. Ulôn beungéh lumpah na keu awaknyan. Sampoe ánpajan awaknyan jipeukutoe droe keudroe deungon jiseumah beurala? 6 Leumô méuh nyang jiseumah di Samaria nyan na kheueh peuneugét pande-pande méuh Israel! Nyan bukon Allah, dan harôh teupeuhanco! 7 Umat Ulôn jitabu angén teuma jihnyan harôh jipot badée! Ladang gandom awaknyan hán jitem kunéng, teuma hana teupeuhase teupông keu peunajoh. Teuma meunyoe ladang nyan jitem cit kunéng, teuma gandom jihnyan jipeuhabéh lé bansa-bansa laén. 8 Lagée beulangöng nyang beukah, meunan kheueh Israel hana le meuguna, dan ka jeuet keu bansa nyang biasa lagée bansa-bansa laén. 9 Lagée keuleudée kleuet nyang meulawan, meunan kheueh ureuëng-ureuëng Israel jiseutôt kheun até jih keudroe. Awaknyan jilakée bantu ubak Asyur, dan jibloe syedara ubak bansa-bansa laén. 10 Teuma lagée nyan Ulôn Lôn peusapat dan Lôn huköm awaknyan. Hana treb le awaknyan apoh apah sabab sakét hanapat peugah, meunyoe awaknyan jitindéeh lé raja Asyur. 11 Maken jai miseubah nyang jipeudong lé ureuëng Israel keu teusampôh desya, maken le teuma teumpat keu jipeubuet desya. 12 Ulôn teumuléh peulajaran lumpah le keu awaknyan, teuma bandum nyan awaknyan tulak sabab jianggab hana sangkot paot deungon awaknyan. 13 Awaknyan galak jipeuseumah keureubeuen keu Ulôn, dan jipajoh sie keureubeuen nyan, teuma di Ulôn, TUHAN, hana galak deungon keureubeuen-keureubeuen nyan. Saátnyoe Lôn peuingat desya awaknyan dan Lôn huköm awaknyan ngon sabab desya-desya nyan; Ulôn Lôn kirém lom awaknyan u nanggroe Meusé! 14 Ureuëng Israel jipeudong meuligoe-meuligoe, teuma awaknyan tuwoe ubak peuncebta jih keudroe. Ureuëng Yehuda jipeule banda-banda meukuta, teuma Ulôn Lôn peutron apui mangat teutot habéh bubena meuligoe dan banda-banda awaknyan."

Hosea 9

1 He bansa Israel, bék kheueh tapeuraya le uroe-uroe raya gata lagée bansa-bansa laén. Gata ka tatinggai Allah gata dan hana seutia ubak Gobnyan. Di tieb-tieb teumpat ceumeuloe aneuk gandom, gata tapeubloe droe sibagoe inong lunte ubak Dewa Baal, dan galak tateurimong gandom nyang gata anggab sibagoe upah dewa nyan keu gata! 2 Teuma hana treb le gata kureueng gandom dan minyéuk zaiton, dan anggô pi teuma habéh. 3 Gata, he bansa Israel, hana teutab tinggai bak tanoh nyang geubri lé TUHAN keu gata. Gata harôh tagisa u nanggroe Meusé, dan harôh tapajoh peunajoh hareuem di Asyur. 4 Di nanggroe-nanggroe nyan gata hana meuteumé tapeuseumah anggô dan keureubeuen beulatang keuteupeu galak até TUHAN. Tieb-tieb ureuëng nyang pajoh peunajoh gata jeuet keukutoe, lagée peunajoh nyang teupajoh watée upacara teupeutron bak jrat ureuëng maté. Peunajoh nyan meuguna keu teupeutroe pruet gata; meubacutpi hana nyang teuba u Baét TUHAN keu teupeuseumah disinan. 5 Bak uroe-uroe raya agama keu teuhoreumat TUHAN, gata hana hase tapeubuet sapeue keu teupeuraya uroe nyan. 6 Meunyoe bala ka teuka, dan gata teuba u nanggroe laén, teuma nyang na tinggai di teungoh gata jigumpôi lé ureuëng-ureuëng Meusé keu jipoh maté dan jikubu di Memfis! Naleueng dan duroe jitimoh mangat jeuet teutôb teumpat-teumpat eunciek rumoh gata dan barang-barang pirak gata nyang meuhareuga. 7 Ka trok watée jih keu teuhuköm, watée keu jiteurimong balasan ateueh bandum nyang ka jipeubuet. Israel teuma jirasa hai nyan! Gata tapeugah, "Nabi nyang jikuasa lé roh nyoe na kheueh nabi bangai! Pungoe gobnyan!" Gata tapeugah lagée nyan sabab gata banci lumpah na ubak ulôn dan desya gata lumpah raya. 8 Po teu Allah geukirém ulôn sibagoe nabi keu teupeuingat gata umat Gobnyan, teuma ho-ho nyang ulôn jak, gata tauseuha keuneuk carueh ulôn lagée cicém. Bak nanggroe atra Po teu Allah keudroe, kamoe bubena nabi jicok keumusoh lé rakyat ba. 9 Lumpah that jeuhet meuneubuet gata lagée nyang ka lheueh jipeubuet lé gob di Gibea. Po teu Allah geupeuingat keusalahan gata, dan geuhuköm gata sabab desya gata. 10 TUHAN meufeureuman, "Watée Ulôn phon-phon that meurumpok ngon Israel, até Ulôn lumpah harök lagée ureuëng meuteumé boh anggô dipadang pasi. Watée Ulôn phon-phon Ulôn ngieng indatu gata, Ulôn galak lagée ureuëng meuteumé hase phon that nibak boh ara. Teuma, watée awaknyan jijak ubak Gunong Peor, awaknyan jipeuphon seumah Baal, sampoe awaknyan ka jeuet keukutoe lagée dewa nyang awaknyan cinta nyan. 11 Keumeugahan Israel jipupo gadôh lagée cicém; hana nyang raya pruet, dan hana aneuëk-aneuëk manyak nyang jipeulahé. 12 Teuma bahpi na aneuëk-aneuëk manyak nyang jipeulahé dan jipeurayeuk, awaknyan Ulôn cok; hana meusidroepi nyang Lôn peubiyeu udeb. Cilaka kheueh gata, he bansa Israel, meunyoe Ulôn ka Lôn tinggai gata!" 13 TUHAN, deuh ulôn ngieng aneuëk-aneuëk manyak awaknyan jitiyeub-tiyeub dan jipoh maté. 14 Peu kheueh nyang harôh ulôn lakée ubak gata keu ureuëng-ureuëng nyan? Tapeujeuet kheueh ureuëng-ureuëng inong awaknyan keu inong balui! Tapeujeuet kheueh awaknyan bubék jeuet jipeumom aneuëk manyak jih keudroe! 15 TUHAN meufeureuman, "Bandum keujeuhetan awaknyan phon di Gilgal. Disinan kheueh phon that Ulôn banci keu awaknyan. Sabab buet awaknyan nyang jeuhet, Ulôn Lôn use awaknyan nibak nanggroe Lôn nyoe. Ulôn hana Lôn gaséh le keu awaknyan; bandum peumimpén awaknyan ka jilawan Ulôn. 16 Ureuëng Israel Lôn huköm. Awaknyan jeuet lagée seunaman nyang hana muboh, dan nyang ukeue-ukeue jih ka habéh tho. Awaknyan hana meu aneuëk; teuma bahpi awaknyan na aneuëk, Ulôn poh maté aneuëk-aneuëk nyang jipeulahé lé awaknyan." 17 Po teu Allah nyang lôn peutimang nyan teuma geutulak umat Gobnyan, sabab awaknyan hana jitem deungoe Gobnyan. Awaknyan jijak meurawoh lamkawan bansa-bansa.

Hosea 10

1 Israel lagée bak anggô nyang jimuboh le. Seumaken meutamah keukayaan jih, seumaken le teuma miseubah nyang jipeudong. Seumaken makmu, seumaken gét teuma jipeugot tugu-tugu beurala nyang jiseumah. 2 Ureuëng-ureuëng nyang até jih brok, bak saátnyoe harôh jitanggong akibat desya nyang ka jipeuna. Po teu Allah geupeuhanco miseubah awaknyan, dan geureuloh bandum tugu-tugu beurala awaknyan. 3 Hana treb le awaknyan jipeugah, "Geutanyoe hana raja sabab geutanyoe hana tatakot ubak TUHAN. Keupeue guna jih sidroe raja keu geutanyoe?" 4 Awaknyan raya haba dan jipeugét janji peuleusu lom ji-ikat janji nyang hana meuguna. Huköm jiputa balek deungon nyan keuhana adelan meuraja lela lagée jitimoh seunaman meuracon bak ladang nyang na teucatok. 5 Peunduduek banda Samaria teumakot; awaknyan dan teungku-teungku imeum nyang jilayani leumô méuh di Betel nyan seudeh dan jimo ba-e sabab banmandum keumeugahan beurala awaknyan ka habéh hanco. 6 Beurala nyan teuangkot u Asyur sibagoe hadiah ubak raja agong. Israel jiseutôt reuncana nyang teupeujeuet awaknyan meuteumé malée dan teuhina. 7 Samaria hanco dan raja jih jiba lagée sikrak kayée nyang jipeuhanyöt lé ié. 8 Kuil-kuil dibukét Betel teumpat ureuëng Israel jiseumah beurala, geupeuhanco. Duro dan naleueng timoh bak miseubah awaknyan. Laju awaknyan jidumpék ubak gunong-gunong, "Tatôb kheueh kamoe!" dan ubak bukét-bukét, "Timpok kheueh ateueh kamoe!" 9 TUHAN meufeureuman, "Seumeunjak keujadian di Gibea, ureuëng Israel gohlom cit jipiôh jipeubuet desya jilawan Ulôn. Sabab nyan di Gibea awaknyan Lôn peurhot cit deungon prang. 10 Ulôn Lôn prang ureuëng-ureuëng nyang meudesya nyan, dan Lôn huköm awaknyan. Bansa-bansa laén meusikutu jilawan awaknyan, dan awaknyan geuhuköm sabab desya awaknyan nyang le nyan. 11 Yoh masa ilée Israel lagée leumô muda nyang teulatih deungon gét, dan nyang galak jiloe boh gandom. Ulôn hana peureulée Lôn pasang gandar nibak bahoe jih nyang gagah nyan. Teuma bak saát nyoe Ulôn ka Lôn peuputôh keu Lôn paksa awaknyan jikeureuja brat. Yehuda Ulôn yue meu ué, dan Israel Ulôn yue meugarée. 12 Ulôn peugah, 'He Israel! Jak puga kheueh ladang barô keu droe gata, tabu kheueh bijéh keuadelan, dan tapot kheueh beureukat nyang jipeuhase lé keusunggohan cinta gata ubak Ulôn. Sabab, ka watée jih gata mita Ulôn, TUHAN gata. Ulôn teuka dan Lôn peutron beureukat ubak gata lagée ié ujeuen.' 13 Teuma di gata tapeubuet nyang seubalek jih; nyang gata useuha na kheueh keujeuhetan, dan tapot nyang hana ade. Gata ka tapajoh boh-boh nyang jipeuhase lé sulet gata." TUHAN meufeureuman lom, "He bansa Israel, sabab gata tapeubangga ubak geuritan-geuritan prang nyang na nibak gata dan sidadu-sidadu gata nyang le, 14 dan rakyat gata rhot lé muprang, dan bandum kuta gata geupeuhanco. Keuadaan jih teujadi lagée bak uroe Raja Salman geupeubinasa banda Bet-Arbel dimideuen prang, dan geugileng bubena ma dan aneuëk-aneuëk jihnyan. 15 Nyan kheueh nyang teujadi nibak gata, he peunduduek Betel, sabab gata ka tapeubuet keujeuhetan nyang raya. Bak watée mata uroe beungoh teungoh jiteubiet, watée nyan cit óh muprang ka teupeuphon, raja gata maté."

Hosea 11

1 TUHAN meufeureuman, "Ulôn kusayang Israel yoh jih mantong ubit, Lôn tawök aneuëk Ulôn nyan jeut jiteubiet lam nanggroe Meusé. 2 Teuma seumaken Lôn hôi aneuëk Ulôn nyan seumaken jipeujiôh Lôn. Jihnyan jiba keureubeuen dan jitot keumeunyan keu Baal dan dewa-dewa nyang laén. 3 Padahai Ulôn kheueh nyang peurunoe Israel beujeuet jijak, dan nyang wa jihnyan deungon gaséh sayang. Ulôn kheueh nyang rawat jihnyan teuma jihnyan hana jitem aku. 4 Deungon sigala gaséh sayang Lôn, Ulôn peurab jihnyan ubak Ulôn. Banmandum peundeuritaan jihnyan Ulôn peuphui, dan deungon murah até Ulôn bri makheun. 5 Ureuëng-ureuëng Israel nyan hana jitem woe ubak Ulôn, sabab nyan awaknyan harôh jigisa u nanggroe Meusé, dan bansa Asyur nyang peurintah ateueh jihnyan. 6 Muprang nyang gunjak teuka sampoe u dalam banda-banda awaknyan, babah-babah pintoe geureubang jipeurusak, dan umat Ulôn jipeubinasa. Hai nyan teujadi sabab awaknyan ka jiseutôt kheun até jih keudroe, 7 dan jimeukreueh jikeuneuk tinggai Ulôn. Teuma awaknyan keunong teugöm, teuma hana nyang peubeubaih awaknyan bahpi awaknyan jikliek jilakée tulông." 8 TUHAN meufeureuman, "He Israel, hana mungken gata Lôn peubiyeu atawa Ulôn tinggai. Peu kheueh mungken gata Ulôn peuhabéh lagée Adma? Atawa Ulôn peusaneut lagée Zeboim? Hana trok até Lôn peubuet nyang lagée nyan, sabab cinta Ulôn lumpah that raya keu gata! 9 Gata hana Lôn huköm watée Ulôn teungoh beungéh; gata hana Lôn peuhanco le. Sabab Ulôn Allah, kon manusia. Ulôn, Nyang Kudus, na meusajan gata, dan hana Ulôn beungéh le keu gata." 10 TUHAN meufeureuman, "Umat Ulôn jiseutôt Ulôn meunyoe Ulôn teumauém lagée su singa sampoe habéh yo musoh awaknyan. Umat Ulôn bagaih-bagaih teuka nibak siblaih ubarat keu jiseumah Ulôn. 11 Nibak nanggroe Meusé awaknyan bagaih that teuka lagée cicém po, dan di Asyur lagée kawan mirah pati. Laju awaknyan Ulôn ba lom u rumoh jih keudroe. Ulôn, TUHAN, nyang peugah haba."

Hosea 12

1 TUHAN meufeureuman, "Bansa Israel jikeulileng Ulôn deungon meusulet dan tipée daya; bansa Yehuda teutab jilawan Ulôn, Allah Nyang Kudus dan seutia. 2 Peue mantong nyang jipeubuet lé ureuëng Israel phon beungoh trok án malam hana meuguna dan sifeuet jih jipeuhanco lagée angén timu. Keucurangan dan keukeujaman meutamah-tamah lamkawan awaknyan. Awaknyan jipeugét janji deungon Asyur dan jiba minyéuk u nanggroe Meusé sibagoe tanda meusahabat." 3 TUHAN na peukara ngon bansa Yehuda; Gobnyan cit nyang huköm Israel sabab peurangoe awaknyan keudroe. Gobnyan geubalaih buet awaknyan. 4 Phon mantong lam pruet ma, Nabi Yakub indatu awaknyan ka jiseurobot Esau syedara jih nyang meukeumbeue; dan óh ka rayeuk, Nabi Yakub meukulo-kulo ngon Po teu Allah. 5 Gobnyan meukulo meugasui deungon sidroe malaikat, dan gobnyan meunang. Laju gobnyan geumo dan geulakée beureukat. Óh lheuehnyan di Betel, Po teu Allah geujak ubak Nabi Yakub indatu geutanyoe nyan, dan geumariet deungon gobnyan. 6 Po teu Allah nyan na kheueh TUHAN Nyang Mahakuasa. Nan Gobnyan na kheueh TUHAN. Deungon nan nyan kheueh Gobnyan lakée ureuëng iébadat ubak Gobnyan. 7 Sabab nyan, he gata keuturonan Nabi Yakub, peucaya kheueh ubak Allah gata dan tawoe kheueh ubak Gobnyan. Udeb kheueh deungon peunoh gaséh dan keujujoran, dan tapreh kheueh deungon saba sampoe Allah gata meutindak. 8 TUHAN meufeureuman ubak bansa Israel, "Gata ilat lagée ureuëng Kanaan; ureuëng-ureuëng meukat dan gata galak tapeungét langganan teuh keudroe deungon timbangan nyang hana beuna. 9 'Geutanyoe bak saátnyoe ka kaya,' kheun awaknyan. 'Geutanyoe meulaba! Hana meusidroe pih jeuet jitudoh bahwa keukayaan nyang ta gumpôi nyoe seucara hana jujoe.' 10 Teuma Ulôn, TUHAN Allah gata, nyang ba gata teupeuteubiet lam nanggroe Meusé, Lôn peujeuet gata tinggai lom bak khimah-khimah lagée yoh masa ilée watée Ulôn jak meurumpok deungon gata di padang-padang pasi. 11 Ulôn ka Lôn peugah haba ubak nabi-nabi, dan Ulôn bri keumalon nyang le keu awaknyan. Meulalu awaknyan ka Ulôn bri reuncana-reuncana Ulôn keu gata, umat Ulôn, 12 bahpi lagée nyan mantong na cit nyang seumah beurala di Gilead, dan jipeuseumah leumô ateueh miseubah di Gilgal. Teuma awaknyan nyang seumah beurala nyan maté, dan miseubah-miseubah di Gilgal nyan jeuet keuseunamon batée di ladang-ladang." 13 Nabi Yakub indatu geutanyoe geuplueng u Mesopotamia, dan jeuet meuteumé geumeukawen disinan, laju gobnyan geupeuhamba droe ubak ureuëng di nanggroe nyan dan sira geurabe bubiri-bubiri awaknyan. 14 Laju TUHAN geukirém sidroe nabi mangat jiba ureuëng Israel jeuet jiteubiet nibak jiboh keunamiet di nanggroe Meusé, dan geukawai awaknyan. 15 Ureuëng nyan ka jipeujeuet TUHAN beungéh raya; awaknyan patot teuhuköm sabab buet awaknyan nyang jeuhet nyan. TUHAN teuma geuhuköm awaknyan lé sabab awaknyan ureuëng laén pih ka jihina Gobnyan.

Hosea 13

1 Yoh masa ilée sukée Efraim teuhoreumat sampoe meunyoe na peurintah nibak sukée nyan, sukée-sukée laén nyang na di Israel teumakot that. Teuma sukée Efraim raya that desya lé sabab jiseumah dewa Baal, sabab nyan awaknyan teuma teusampôh. 2 Sampoe án saátnyoe ureuëng-ureuëng nyan na di Efraim nyan hana putôh jipeubuet desya; awaknyan jipeugét patong-patong pirak keu teuseumah -- patong nyang jireuncana lé akai manusia dan ji uke lé jaroe manusia. Awaknyan jipeugah, "Peuseumah laju keureubeuen ubak patong-patong nyoe!" Bit gura that, manusia jicöm patong aneuëk leumô! 3 Lé sabab nyan ureuëng-ureuëng nyan teusampôh lagée sagob atawa iémbon di beungoh uroe. Awaknyan lagée abée jumpung nyang jiyueb lé angén di teumpat teloe aneuk gandom, dan lagée asab nyang teubiet nibak sulie. 4 TUHAN meufeureuman, "Ulôn kheueh TUHAN Allah gata, nyang ba gata peuteubiet nibak nanggroe Meusé. Gata hana le Allah teuh nyang laén seulaén Ulôn. Ulôn kheueh sidroe kong nyang hase peuseulamat gata. 5 Bak tanoh nyang tho di padang pasi, Ulôn kheueh nyang jaga gata. 6 Teuma óh ka lheueh gata kana di nanggroe nyang jroh, dan gata troe dan puih até, gata ka jeuet keu ureuëng angkôh dan ka tuwoe ubak Ulôn. 7 Lé sabab nyan Ulôn ku rungköm gata lagée singa teumeugöm. Lagée rimueng tutul Ulôn kulinteueng gata bak rot ueh raya. 8 Ulôn Lôn seurang gata lagée cagée nyang ka gadôh aneuëk. Ulôn Lôn priek-priek gata. Lagée singa Ulôn Lôn teugöm gata bak teumpat gata, dan lagée beulatang kleut Ulôn Lôn priek-priek gata. 9 Ulôn kupeuhanco gata, he bansa Israel! Dan soe kheueh nyang hase tulông gata? 10 Gata talakée raja dan peumimpén, teuma dipat kheueh awaknyan bandum jinoenyoe? Peu kheueh hase awaknyan jipeuseulamat rakyat gata? 11 Deungon beungéh Ulôn jok raja keu gata, dan deungon geungéuen Ulôn tarek awaknyan lom teuma." 12 TUHAN meufeureuman, "Desya dan keusalahan Israel ka teucetet, dan catetan nyan ka Lôn keubah. 13 Israel na watée keu udeb, teuma awaknyan bangai lumpah na sampoe hana jicok keuseumpatan nyan. Jihnyan lagée aneuëk manyak nyang sikeujab teuk lahé teuma hánjitem teubiet lam pluet ma. 14 Bansa nyoe hana Lôn peuseulamat nibak kuasa donya ureuëng maté. He maté, sipreuk kheueh laju bala gata! Tapeubuet kheueh buet gata nyang hanco dan meubahya nyan! Ulôn hanale jimat gaséh keu bansa nyoe. 15 Bahpi Israel makmu lagée naleueng nyang subô, teuma Ulôn kukirém angén timu nyang seu uem di padang pasi. Angén nyan jipeutho bandum mata ié dan mon-mon meumata, sampoe teusampôh kheueh bandum nyang meuhareuga.

Hosea 14

1 Samaria harôh teuhuköm sabab jibeurontak jilawan Ulôn. Rakyat jihnyan maté dimideuen prang; aneuëk-aneuëk manyak awaknyan teugileng, dan ureuëng-ureuëng inong nyang mume teuplah pruet jih." 2 Tawoe kheueh ubak TUHAN Allah gata, he bansa Israel! Lé sabab desya gata ka meusabab gata meugantoh dan reubah. 3 Tawoe kheueh ubak TUHAN dan tapeusampoe kheueh doá nyoe sibagoe peuseumahan gata keu Gobnyan, "TUHAN, peuamphon bubena desya kamoe, dan teurimong kheueh doá kamoe nyoe, dan kamoe teuma kamoe pujoe Droeneueh lagée nyang ka kamoe meujanji. 4 Asyur hana hase jipeuseulamat kamoe, dan guda prang hana sanggob jitulông kamoe. Kamoe hana kamoe peugah le ubak patong-patong nyang kamoe peugét keudroe bahwa patong nyan Allah kamoe. Ya TUHAN, Droeneueh neugaséh ubak ureuëng-ureuëng nyang hana ubak soe nyang jeuet awaknyan meubangga." 5 TUHAN meufeureuman, "Umat Ulôn nyang meunyeuleweng, Ulôn cok lom dan Ulôn gaséh sipeunoh até; awaknyan hana Ulôn beungéh le. 6 Ubak ureuëng Israel Ulôn lagée ujeuen nyang peubasah tanoh nyang ka tho kreng. Awaknyan teuma meukeumang lagée bungöng keupula dan lagée bak ceumara nyang lhok ukeue. 7 Awaknyan udeb dan meutamah lagée seunaman nyang meutarok dumpat nyang na, lagée bak zaiton nyang ceudah rupa mangat bée lagée bak ceumara! 8 Awaknyan jiwoe ubak Ulôn dan tinggai lam lindongan Lôn. Deungon bagaih awaknyan meutamah makmu, lagée gandom nyang timoh bak ladang nyang subô dan lagée bak anggô. Lagée ié anggô Libanon nan awaknyan meutamah meusyeuhu. 9 Ureuëng Israel geuböih bubena patong beurala jih keudroe; awaknyan Ulôn peulara dan Ulôn kabui banmandum doá. Lagée bak kayée nyang sabe jimeuôn rampak, Ulôn Lôn peupayong awaknyan. Ulôn kheueh punca banmandum beureukat awaknyan. Ulôn, TUHAN, ka Lôn peugah haba." 10 Seumoga bandum ureuëng nyang bijaksana jipeuphom peue-peue mantong nyang teutuléh lam nyoe, dan jisimak beujroh-jroh. Peutunyok-peutunyok nibak TUHAN na kheueh beuna, dan ureuëng nyang saleh udeb meunurot peutunyok nyan. Teuma ureuëng meudesya jipeujayéh mantong peue-peue nyang na teutuléh nyan sampoe awaknyan meugantoh dan reubah.

Yoël 1

1 Nyoe kheueh peurintah TUHAN ubak Yoël, bin Petuel. 2 Deungoe kheueh, he dumna tuha-tuha; simak kheueh, bandum ureuëng di Yehuda. Peu kheueh ka lheueh hainyoe teujadi bak jamén gata, atawa bak jamén indatu gata? 3 Calitra kheueh hainyan ubak aneuëk-aneuëk gata; mangat awaknyan jipeusampoe ubak aneuëk-aneuëk jihnyan calitra nyan. Keuturonan óh lheueh nyan harôh jideungoe teuma, dan jipeutrok ubak keuturonan seulanjut jih teuma. 4 Kawan daruet nyang hana teukira jeumeulah jih, jidong bak bubena ladang dan laju jipajoh bubena asoe ladang nyan. Peue nyang na jitinggai lé kawan daruet nyoe, laju jipeuhabéh lé kawan daruet nyang laén. 5 He bubena ureuëng mabök, beudôh kheueh! He bubena tukang jieb ié kreueh, tamo kheueh! Sabab anggô nyang barô ka geureupah lam babah gata. 6 Pasokan daruet jijak seurang nanggroe geutanyoe; awaknyan teuga dan hana teukira jai jih, gigoe jih tajam lagée tarieng singa inong. 7 Habéh jiheuntam bubena bak anggô geutanyoe, dan bak ara geutanyoe, nyang na tinggai cit ubô mantong. Bak-bak kayée nyan habéh jipuliek kulét lé kawan daruet nyan, sampoe deuen-deuen jih ka habéh putéh. 8 Mo ba-e kheueh, he umat, lagée aneuëk dara nyang seudeh nyang jipeuba-e tunangan geunaséh até teucinta. 9 Gandom dan anggô ka habéh gadôh lam Baét TUHAN. Dan meukabong kheueh bubena teungku imeum, nyang seutia geupeutimang TUHAN. 10 Ladang-ladang ban saát nyoe ka habéh hanco. Tanoh meukabong; sabab hanco kheueh bubena gandom, tho kheueh bubena boh anggô, dan habéh kheueh minyéuk zaiton. 11 He peutani, mo ba-e kheueh! He ureuëng meubuet bak lampôh anggô, tamo kheueh! Sabab gandom, jeulai dan bandum hase panen habéh ranab. 12 Bak-bak kayée muboh nyang na di padang ka habéh tho: bak anggô, apel, ara, keuruma dan delima. Dan rakyat pih hana le geumbira. 13 He bubena teungku imeum nyang meubuet bak miseubah, tangui kheueh ija kröng, dan mo ba-e kheueh. Tamong kheueh lam Baét TUHAN jeuet takliek simalam beungoh, sabab hana keureubeuen anggô dan gandom nibak Allah gata. 14 Peurintah laju umat gata mangat jipuasa, peumaklum laju bahwa na rapat raya! Jak undang kheueh bubena peumimpén dan nyang patot-patot dan bandum peunduduek Yehuda, mangat jijak u Baét Allah, keu jijak teumawök jak lakée tulông ubak Gobnyan. 15 Uroe TUHAN ka tô that, uroe nyang lumpah teumakot dan gli; saát Nyang Mahakuasa geupeuteuka keuhancoran. 16 Peunajoh ka habéh binasa nyang na dikeue mata geutanyoe di Baét Allah geutanyoe ka hanale surak geumbira. 17 Bijéh maté bak tanoh nyang tho. Hana gandom keu teukeubah, dan bubena gupôk ka habéh soh dan habéh reuloh. 18 Beulatang peulara ka éh óh dan apoh apah; ka hana le blang naleueng teumpat roet uempeuen. Meunan cit ngon kawan bubiri habéh meurana. 19 Ulôn lakée tulông ubak Droeneueh, ya TUHAN sabab bubena blang naleueng ka habéh geursang bubena bak kayée pih ka habéh tho dan maté siulah-ulah ka apui seuba. 20 Meunan cit deungon bubena beulatang kleut nyang na uteun jitawök Droeneueh jilakée tulông. Awaknyan hana hase jipeupuih rukueng, sabab bubena krueng ka habéh tho.

Yoël 2

1 Yueb kheueh beureuguih, peumusu tanda bahya bak bukét Sion nyang suci, teumpat tinggai Po teu Allah. Beu yo kheueh, he peunduduek Yehuda! Sabab Uroe TUHAN ka tô dan bagaih teuka. 2 Uroe nyan seupôt tulo, peunoh ngon sagob nyang suram. Sipa-i daruet ka habéh teuka lagée awan nyang meulinteueng ateueh gunong-gunong. Hai nyang lagée nyan gohlom na nyang ka-ka, dan hana teu-ulang siumu masa. 3 Lagée apui hu meuhuéb-huéb habéh tutong peue-peue nyang na awaknyan peuhanco bubena seunaman. Sigohlom nyan, nanggroe nyang lagée Eden, taman TUHAN, óh ka lheuehnyan, lagée padang pasi nyang tho kreng. Hana meusapeue pih nyang na tinggai, hana nyang tuwoe nibak jiseurang nyan. 4 Ruman awaknyan lagée guda; óh watée jiplueng lagée guda dimideuen prang. 5 Awaknyan jiglob-glob bak pucak gunong-gunong, su jih lagée su gram grum geuritan ngaza dan lagée kráb kriéb apui hu nyang teungoh teutot merang. Awaknyan meubareh lagée pasokan peukasa, nyang siab maju u mideuen ngaza. 6 Watée awaknyan jiseureubu, bandum ureuëng yo meugám-gám, bandum ruman ka jeuet keupucat hana meucahya. 7 Lagée pahlawan, awaknyan jiseurang, dan jiék bak beuton lagée peujuang. Awaknyan meubareh lapang trok ukeue, hana jiwet dan ji ubah ulée. 8 Awaknyan hana meusak-sak, watée jijak bak rot jih keudroe. Meusajan-sajan watée jipeu jo ngon jiheuntam peutahanan, hana hase baresan awaknyan jipeupiôh. 9 Awaknyan jiseureubu u dalam banda, dan jiplueng-plueng ateueh beuton jih. Awaknyan jiék u rumoh-rumoh; lagée ureuëng ceumucue, awaknyan tamong rot tingkab. 10 Teungoh awaknyan jimaju, bumoe meugeumpa, dan langét pih meugeunta. Laju seupôt kheueh mata uroe dan buleuen, dan cahya bintang-bintang ka gadôh teuma. 11 Su TUHAN lagée su geulanteue, geubri aba-aba, ubak angkatan prang Gobnyan. Padubna rayeuk jeumeulah angkatan prang geuh! Padubna teuga tantra nyang peubuet peurintah Gobnyan! Keubit luwa biasa dan hebat Uroe TUHAN! Hana meusidroepi hase jipeuteuen droe. 12 TUHAN meufeureuman, "Teuma bak saát nyoe, tawoe kheueh ubak ulôn deungon sipeunoh até, sira puasa, meuratok dan mo ba-e. 13 Priek kheueh até gata dan bék peukayan gata." Meupaleng kheueh ubak TUHAN Po teu Allah gata. Gobnyan panyang saba dan peunoh gaséh sayang murah até dan peunoh rasa inseueh. Galak geupeu amphon dan hana harôk ubak geupeujak huköman. 14 Mungken TUHAN Allah gata meu ubah pikeran, dan geubri beureukat keu gata deungon peunoh keulimpahan. Sampoe gata hase tapeuseumah keureubeuen anggô dan gandom keu TUHAN Po teu Allah gata. 15 Tayueb kheueh beureuguih di Sion, gunong Po teu Allah, peumaklum kheueh uroe puasa, tapeuna kheueh rapat raya. 16 Tapeusapat kheueh bubena rakyat, takrah kheueh laju bubena umat. Tayue kheueh teuka ureuëng tuha-tuha, aneuëk-aneuëk miet meunan cit ngon manyak. Dan bahpi linto barô nyang ban meukawen harôh tayue jak ngon dara barô. Tayue kheueh bak awaknyan mangat jitinggai kama-kama jihnyan. 17 Tayue kheueh ubak teungku-teungku imeum nyang peutimang TUHAN, jimo nibak lamkawan miseubah dan seuramo keue, sira jipeugah, "Tasayang kheueh keu umat Droeneueh, ya TUHAN; bék tapeubiyeu atra Droeneueh jeuet keucupa," sampoe bansa-bansa laén jipansi dan jipeugah, "Dipat Allah awaknyan?" 18 Laju TUHAN geukalon tanoh Gobnyan, dan geugaséh umat Gobnyan. 19 Gobnyan geujaweueb awaknyan lagée nyoe, "Bak saát nyoe keu gata banmandum Ulôn bri: gandom, anggô dan minyéuk zaiton keu peunajoh, mangat gata bandum teupeutroe. Ulôn hana Lôn peubiyeu gata jihina atawa jipeukém lé bansa-bansa. 20 Pasokan daruet di utara Lôn use, ladum Lôn paroih u padang pasi. U Laôt Maté Ulôn peusak baresan keue jih, lam Laôt Teungoh Lôn tulak baresan likot jih. Bubena bangke awaknyan mubée khiéng. Awaknyan Lôn peubinasa sabab ka jiseksa gata. 21 Bék teumakot, he ladang, peugalak kheueh até gata; ingat hai nyang raya geupeubuet lé TUHAN keu gata! 22 He bubena beulatang, bék kheueh picék até. Blang-blang naleueng bak saát nyoe ka jitimoh ijo. Deungon jai that bak-bak kayée ka jimuboh, boh-boh anggô dan boh ara meuseué ruwah. 23 He rakyat Sion, meugeumbira kheueh! Meusuka ria dan meusurak kheueh! Sabab sigala banmandum nyang get nibak TUHAN Allah gata. Bak musém luroh geubri ujeuen nyang seb keu gata. Bak musém leupie ujeuen geupeutron, meunan cit bak musém seumi lagée nyang ka-ka. 24 Dan gandom teupasoe lom lam teumpat teupeuphui; ié anggô dan minyéuk zaiton meulimpah nibak teumpat peuneurah. 25 Ulôn Lôn gantoe bandum atra gata nyang rugoe bak thon-thon watée kawan daruet jipajoh hase panen gata. Sabab Ulôn kheueh nyang kirém pasokan daruet nyan keu gata. 26 Gata seb peunajoh dan meurasa trou. TUHAN Po teu Allah gata tapeumulia, sabab keu gata le geupeubuet keuajaéban. Umat ulôn hana jeuet le keubahan ejekan! 27 Dan barô kheueh gata teupeue, Israel, bahwa Ulôn na lamkawan gata, dan bahwa Ulôn, TUHAN, na kheueh Allah gata. Hana Allah nyang laén, seulaén Ulôn keudroe. Umat Ulôn hana teupeumalée le!" 28 "Óh ka lheueh nyan singoh bandum ureuëng Lôn peulimpah deungon roh Ulôn. Dan aneuëk gata bah kheueh nyang agam meunan cit deungon nyang inong jipeusampoe peusan-peusan Ulôn; ureuëng tuha-tuha nyang na lamkawan gata jimeulumpo nyang deuh teukalon teubri keu peumuda dan aneuëk dara. 29 Bak watée nyan roh Ulôn Lôn bri teuma u ateueh peulayan-peulayan bah kheueh nyang agam meunan cit keu nyang inong." 30 Dilangét ngon bumoe Lôn peuna buet ajaéb nyang le. Teuma na meutak ngon meucang sampoe darah ro meujeue-jeue hana teukira, apui hu dan asab nyang meukubok-kubok. 31 Mata uroe jeuet keuseupôt dan buleuen jeuet keumirah lagée darah. Bandum nyan teujadi sigohlom uroe TUHAN teuka, uroe nyang dahsyat dan lumpah teumakot! 32 Teuma barang sigasoe nyang meulakée ubak peutulôngan TUHAN, ureuëng nyan geubri seulamat. TUHAN meufeureuman, "Di Yerusalem ureuëng-ureuëng nyang Ulôn piléh seulamat."

Yoël 3

1 TUHAN meufeureuman, "Bak watée nyan Yerusalem dan Yehuda Lôn piléh keuhai makmu jih. 2 Banmandum bansa Lôn peusapat dan Ulôn ba u Pantôn Mahkamah. Laju Ulôn peusidang awaknyan disinan ateueh keujeuhetan nyang ka jipeubuet ateueh umat Lôn sabab awaknyan ka jiweuek-weuek tanoh Israel dan umat Lôn awaknyan böih u jeueb-jeueb nanggroe. 3 Awaknyan jitiek undi mangat jeuet jipeuteutab soe nyang meuteumé ureuëng nyang teuteuen. Awaknyan jipeubloe aneuëk dara dan peumuda keu jipeujeuet keunamiet nyang hana meuguna. Dan péng nyan awaknyan peuguna keu inong lunte dan ji-jieb ié anggô. 4 Pakriban keuneuk gata peusaneut ateueh Ulôn nyoe, he Tirus, Sidon dan bandum wilayah Filistin? Peu kheueh gata keuneuk balaih dam ateueh Ulôn? Nah, teurimong kheueh balaih Ulôn nyang teuka lagée kilat. 5 Méuh dan pirak Ulôn ka gata reupah, dan hareuta Ulôn nyang paleng meuyuem ka gata angkot bak kuil gata. 6 Peunduduek Yehuda dan Yerusalem gata ba jiôh nibak nanggroe jih keudroe; óh lheuehnyan gata peubloe bak bansa Yunani. 7 Jinoenyoe Ulôn peuteubiet awaknyan nibak teumpat-teumpat nyang ka gata peubloe, dan Ulôn Lôn balaih keujeuhetan gata ateueh awaknyan. 8 Aneuëk gata nyang agam dan nyang inong Lôn peubloe ubak peunduduek Yehuda, nyang kana jipeubloe lom ubak Syeba, nanggroe nyang lumpah jiôh. Ulôn, TUHAN, ka Lôn peugah haba. 9 Peumaklum kheueh maklumat nyoe ubak bansa-bansa: Meusiab kheueh keu teujak muprang dan pupok teunaga! Takrah kheueh bubena ahli silek dan pahlawan; peusapat laju bandum tantra, dan maju kheueh! 10 Mata langai gata jeuet keu peudeueng, dan sikin gunteng gata jeuet keu alat teumeutôb. Dan ureuëng leumoh harôh jipeugah, 'Ulôn hase meujuang lagée tantra!' 11 Jak, tateuka kheueh deungon bagaih, he bansa-bansa nibak meubagoe peunjuru! Meusapat kheueh di pantôn nyan." Ya, TUHAN, neuyue kheueh tantra Droeneueh jak seurang awaknyan! 12 TUHAN meufeureuman lom, "Bubena bansa harôh meusiab-siab dan tajak u Pantôn Mahkamah. Disinan Ulôn TUHAN Lôn peusidang bansa-bansa teutangga umat Lôn. 13 Awaknyan jeuhet that; tacah kheueh awaknyan lagée gandom masak di blang. Gilo-gilo kheueh awaknyan lagée boh anggô lam peuneurah sampoe anggô nyan peunoh meulimpah uluwa. 14 Meuribée-ribée droe ureuëng di Pantôn Mahkamah. Sabab disinan Uroe TUHAN reujang teuka. 15 Mata uroe dan buleuen ka jeuet keuseupôt, dan bintang-bintang ka hana le cahya." 16 TUHAN geuteumauém di Sion, gunong Gobnyan; nibak Yerusalem lagée su geulanteue su Gobnyan. Langét dan bumoe meuguncang lé sabab Gobnyan. Teuma TUHAN teutab geubila dan geulindong Israel umat Gobnyan. 17 "He Israel, jinoe gata tateupeue, bahwa Ulôn kheueh TUHAN Allah gata. Ulôn tinggai di Sion, gunong Ulôn nyang suci. Dan Yerusalem pih jeuet keu banda Ulôn nyang suci, ureuëng aséng hana jitamong le. 18 Bak masanyan gunong-gunong ka peunoh ngon lampôh anggô. Beulatang peulara jimeurot naleueng bak bukét-bukét nyang subô. Krueng-krueng nyang na di Yehuda hántom habéh ié ji ile. Na saboh krueng ji ile rot Baét TUHAN, dan jipeubasah Pantôn Akasia deungon ié nyang nyaman. 19 Nanggroe Meusé jeuet keu gurön nyang tho kreng, dan Edom jeuet keu padang tandus, nyang hana jiduek lé manusia. Sabab awaknyan ka jiseurang ureuëng Yehuda, dan jipoh maté peunduduek nanggroe nyang hana meusalah. 20 Keu darah awaknyan teuma Lôn tueng bila, nyang peumaté awaknyan maté Ulôn cang. Teuma Yehuda dan Yerusalem sabe na ureuëng duek, dan bak gunong Sion teutab Ulôn duek."

Amos 1

1 Amos na kheueh sidroe ureuëng tukang rabe bubiri asai di banda Tekoa. Gobnyan jeuet keu nabi watée nanggroe Yehuda jipeurintah lé Raja Uzia, dan Israel jipeurintah lé Raja Yerobeam, bin Yoahas. Dua thon sigohlom teuka geumpa bumoe, Po teu Allah geupeugah ubak Amos hai-hai keu Israel. 2 Nyoe kheueh nyang geupeugah lé Amos, "TUHAN geuta uém di Bukét Sion, su Gobnyan meugeumpa bansaboh Yerusalem. Blang-blang naleueng ka tho kreng, naleueng nyang na bak Gunong Karmel ka tho jeuet teucok keusuwa." 3 TUHAN meufeureuman, "Peunduduek Damsyik ka le that goe jipeubuet desya, ngon sababnyan Ulôn ka pasti Lôn huköm awaknyan. Awaknyan jipeusaneut ateueh ureuëng Gilead keubit that keujam, 4 sababnyan Ulôn kirém apui ubak meuligoe Raja Hazael, dan Ulôn tot habéh bubena kuta Raja Benhadad. 5 Bube na babah pintoe geureubang Damsyik Lôn peurusak, dan peunduduek Pantôn Awen Lôn sampôh gleh di teumpat tinggai awaknyan. Peunguasa Bet-Eden Lôn peutron nibak takhta, dan peunduduek Siria teutawan dan teuangkot u nanggroe Kir." 6 TUHAN meufeureuman, "Peunduduek Gaza ka meu ulang-ulang jipeubuet desya, sababnyan Ulôn pasti Lôn huköm awaknyan. Awaknyan ka jirayueng saboh bansa banmandum, dan jipeubloe sibagoe namiet ubak Edom. 7 Lé sababnyan Ulôn kukirém apui ubak beuton-beuton Gaza, dan Ulôn tot habéh bubena kuta. 8 Peunduduek meunan cit deungon peunguasa banda Asdod dan Askelon Lôn kireuh. Banda Ekron Lôn huköm, dan bandum ureuëng Filistin nyang na tinggai Lôn peubinasa." 9 TUHAN meufeureuman, "Peunduduek Tirus ka le that goe jipeubuet desya, sabab nyan Ulôn pasti Lôn huköm awaknyan. Awaknyan ka jiangkot saboh bansa banmandum ubak teumpat nyang teuböih, dan jipeujaroe ubak Edom; awaknyan ka ji-iengkeue peujanjian meurakan. 10 Lé sababnyan Ulôn Lôn kirém apui ubak beuton-beuton Tirus dan Ulôn tot habéh bandum kuta awaknyan." 11 TUHAN meufeureuman, "Peunduduek Edom ka le that goe geupeubuet desya, lé sababnyan Ulôn pasti Lôn huköm awaknyan. Deungon hana rasa gaséh sayang, awaknyan ka jiprang ureuëng Israel, syedara-syedara awaknyan. Awaknyan laju beungéh, dan teutab jitroh dam. 12 Lé sababnyan, Ulôn Lôn kirém apui u banda Téman, dan Ulôn tot habéh bubena kuta Bozra." 13 TUHAN meufeureuman, "Bansa Amon ka le that goe jipeubuet desya, lé sababnyan Ulôn pasti Lôn huköm awaknyan. Watée jimuprang keu jipeuluwah wilayah jih, awaknyan jiprah bubena pruet inong mume di Gilead. 14 Sabab nyan, Ulôn Lôn kirém apui ubak beuton-beuton banda Raba, dan Ulôn tot habéh bubena kuta nyan. Bak watée nyan teuma teudeungoe su kiroih ureuëng muprang, dan muprang nyan meuhubô lagée su angén badée. 15 Raja awaknyan dan peujabat-peujabat peumeurintah awaknyan teuangkot u teumpat nyang teböih. Ulôn, TUHAN, ka Lôn peugah haba."

Amos 2

1 TUHAN meufeureuman, "Peunduduek Moab ka le that goe jipeubuet desya, sababnyan Ulôn pasti Lôn huköm awaknyan. Awaknyan jihina Raja Edom nyang ka maté nyan, deungon jikueh jrat gobnyan dan jicok bubena tuleueng-tuleueng gobnyan laju jitot sampoe jeuet keu abée. 2 Sabab nyan, Ulôn Lôn kirém apui u nanggroe Moab, dan Ulôn tot sampoe habéh bubena kuta Keriot. Ureuëng Moab maté lamkawan ureuëng muprang nyang teungoh meugasui, watée beureuguih teungoh teuyueb, dan dumpék prang teungoh subra. 3 Peunguasa Moab dan bandum peujabat peumeurintah jihnyan Lôn poh maté." 4 TUHAN meufeureuman, "Ureuëng Yehuda ka le that goe jipeubuet desya, lé sabab nyan Ulôn pasti Lôn huköm awaknyan. Awaknyan ji-iengkeue ubak peue-peue nyang ka Lôn peurintah dan hana jipakoe peue-peue nyang ka Ulôn peurunoe. Awaknyan ka jipeusisat lé ilah-ilah nyang laén nyang jiseumah lé indatu awaknyan. 5 Lé sabab nyan, Ulôn Lôn kirém apui u Yehuda dan Ulôn tot sampoe habéh bubena kuta di Yerusalem." 6 TUHAN meufeureuman, "Ureuëng Israel ka le that goe jipeubuet desya, lé sabab nyan Ulôn pasti Lôn huköm awaknyan. Ureuëng jujoe nyang hana hase jipulang nyang jimeu-utang bak awaknyan, ka awaknyan peubloe jeuet keu namiet. Meunan cit ngon buet awaknyan ateueh ureuëng gasien nyang hana hase geubayeue utang jihnyan, bahpi utang jihnyan na bacut sidub yuem sipasang seulob gaki. 7 Awaknyan jiteugöm ureuëng leumoh nyang hana meudaya, dan jikireuh ureuëng gasien. Ayah dan aneuëk jimeumukah ngon inong nyang sa, sampoe ka jipeukuto nan Ulôn nyang suci. 8 Tieb-tieb na teumpat iébadat, ureuëng-ureuëng jiéh deungon bajée nyang awaknyan cok sibagoe jaminan utang nibak ureuëng gasien. Di Baét Allah awaknyan, awaknyan jiéb ié anggô nyang awaknyan cok nibak ureuëng nyang meu-utang bak awaknyan. 9 Bahpi lagée nyan, he umat Lôn, keu gata kheueh Ulôn peubinasa ureuëng Amori nyang manyang lagée bak arön dan kong lagée bak sala. 10 Gata ka Ulôn peuteubiet lam nanggroe Meusé, dan Ulôn ba sira Lôn peutatéh rot padang pasi peuet ploh thon treb jih. Tanoh ureuëng Amori ka Ulôn jok keu gata jeuet keu nanggroe gata keudroe. 11 Ulôn ka Lôn piléh napadub droe lamkawan aneuëk gata mangat jeuet keu nabi, dan napadub droe nibak ureuëng muda gata jeuet keu Nazir. Peu kheueh nyan hana beutôi, he ureuëng Israel? Ulôn, TUHAN, ka Lôn peugah haba. 12 Teuma gata jok keu ureuëng Nazir ji-jieb ié anggô, lé sababnyan teupeujeuet awaknyan ji-iengkeue ubak janji. Dan gata tatam bak nabi-nabi tapeusampoe peusan Ulôn. 13 Bak saátnyoe gata Ulôn teugöm trok bak tanoh, sampoe gata meurang-rang lagée geuritan nyang brat ngon aneuk gandom. 14 Ureuëng nyang teuga plueng pih hana lheueh; ureuëng teuga gadôh teunaga jih, dan ureuëng peukasa hana hase jipeuseulamat droe jih keudroe. 15 Ureuëng campen timbak aneuk panah hana meuteun, ureuëng bagaih plueng hana hase jipeuplueng droe, dan ureuëng pasang guda hana tinggai. 16 Nibak uroenyan tantra nyang paleng beuhe pih jitinggai sinjata jihnyan, laju jiplueng. Ulôn, TUHAN ka Lôn peugah haba."

Amos 3

1 Deungoe kheueh feureuman TUHAN nyoe, he bansa Israel nyang ka geupeuteubiet di nanggroe Meusé lé TUHAN! TUHAN meufeureuman, 2 "Nibak banmandum bansa nyang na dalam donya nyoe, bansa gata mantong nyang Ulôn turi dan Ulôn peurati. Nyang kheueh sabab jih desya gata raya, dan Ulôn pasti Lôn huköm gata." 3 Peu kheueh mungken dua droe ureuëng jijak meusaho hana mupakat leubeh ilée? 4 Peu kheueh singa nyang na lam uteuen jiteumauém, meunyoe singa nyan gohlom meuteumé uempeuen? Peu kheueh aneuëk singa jiteumauém meunyoe jih gohlom jiteumé teugöm meusapeue pi? 5 Peu kheueh cicém jitamong lam cintra, meunyoe taron hana teuteuen? Peu kheueh cintra teutôb meunyoe hana nyang teudrob? 6 Peu kheueh manusia hana yo meunyoe jideungoe su beureuguih prang? Mungken kheueh saboh banda keunong beuncana, meunyoe TUHAN hana geukeuheundak? 7 TUHAN Nyang Mahamanyang hántom na geupeubuet sapeue-peue meunyoe hana geupeugah reuncana Gobnyan ubak bandum nabi, hamba-hamba Gobnyan. 8 Meunyoe singa ka jiteumauém, soe kheueh ureuëng nyang hana teumakot? Meunyoe TUHAN Allah ka geupeugah haba, soe kheueh nyang jeuet geuiem droe dan hana jipeumaklum peusan TUHAN nyan? 9 Peumaklum kheueh nyoe ubak ureuëng-ureuëng nyang tinggai di meuligoe Meusé dan Asdod, "Meusapat kheueh bak gunong-gunong nyang na bansikeulileng Samaria, dan tangieng kheueh harok hara nyang raya dan ureuëng paksa gob nyang jipeubuet disinan." 10 TUHAN meufeureuman, "Ureuëng-ureuëng nyan jipasoe meuligoe-meuligoe jih nyang jiteumé nibak buet paksa dan keukeujaman. Lom teuma awaknyan meubacutpi hana jiteupeue jipeubuet jujoe. 11 Deungon sabab nyan nanggroe awaknyan jikeupông lé musoh, kuta awaknyan jipeuhanco dan meuligoe-meuligoe awaknyan jireupah. 12 Lagée sidroe ureuëng meurabe nyang jiteumé lom sipasang gaki dan saboh cue ôn punyueng bubiri jih nyang ka jiteugöm lé singa, meunan cit deungon peunduduek Samaria na bacut sagai nyang na tinggai bak saátnyoe mangat geuéh-éh ateueh kasô nyang leumiek." 13 TUHAN Allah Nyang Mahakuasa dan nyang Mahamanyang meufeureuman, "Ngieng kheueh jinoe, dan peuingat kheueh ubak keuturonan Nabi Yakub. 14 Bak uroe Ulôn huköm ureuëng Israel sabab desya jihnyan, Ulôn kupeuhanco bubena miseubah-miseubah di Betel. Tieb-tieb miseubah teupeupatah ujong-ujong jih sampoe rhot bak tanoh. 15 Rumoh-rumoh keu musém sijuek dan rumoh-rumoh meureuhat watée musém khueng Lôn peuhanco. Rumoh-rumoh nyang teupeungui deungon gadeng reubah; bandum rumoh nyang rayeuk hanco.

Amos 4

1 Deungoe kheueh, he inong-inong Samaria nyang meutamah teumbon lagée leumô-leumô teumbon di Basan! Gata tatindéeh ureuëng leumoh, gata teugöm ureuëng gasien, dan tatuntut jeuet lakoe gata sabe jipeuna ié kreueh keu gata! 2 Ulôn, TUHAN Nyang Mahamanyang na kheueh TUHAN nyang suci, dan Ulôn ka meujanji bahwa singoh teuhila deungon ceunawiét; gata bandum lagée eungkot bak mata kawe. 3 Gata teuhila u arah Hermon dan teurhom uluwa, maséng-maséng rot lungkiek beuton nyang rab. Ulôn, TUHAN ka Lôn peugah haba." 4 TUHAN Nyang Mahamanyang meufeureuman, "He umat Israel! Tajak kheueh laju ubak teumpat iébadat di Betel, dan tapeubuet kheueh desya di teumpat nyan! Tajak kheueh u Gilgal, dan tapeubuet kheueh desya ban galak até gata! Silakan tapeuseumah keureubeuen tieb-tieb beungoh, dan taba siper siploh nibak mandum hase gata tieb-tieb lhée uroe! 5 Jeuet mantong tapeuseumah ruti sibagoe teurimong gaséh gata ubak Ulôn, dan jeuet mantong ta peugah haba nyang kon-kon bahwa gata ka taba sinamah peuseumahan! Pasti nyan kheueh nyang galak gata peubuet! 6 Ulôn kheueh nyang peutron bala musém deuk u ateueh bandum banda gata, teuma gata hana tawoe ubak Ulôn. 7 Ulôn kupeuteun bék jitron ujeuen watée seunaman gata lumpah that peureulée keu ié. Ulôn nyang peutron ujeuen ateueh banda nyang saboh dan hana bak banda nyang laén. Blang nyang saboh meuteumé ié ujeuen töih, teuma blang nyang laén tho kreng. 8 Nibak napadub boh banda, peunduduek disinan nyang ka leumoh sabab grah tho ngon rukueng, jimita ié bak banda nyang laén, teuma ié disinan hana seb. Bahpi lagée nyan, gata hana cit tawoe ubak Ulôn. 9 Ulôn nyang peutron angén seu uém dan nyang kirém peunyakét nyang peurusak seunaman dan lampôh-lampôh anggô gata. Bak-bak ara, dan bak-bak zaiton gata ka habéh jiseuba lé daruet. Bahpi ka lagée nyan gata hana cit tawoe ubak Ulôn. 10 Ulôn kirém bala peunyakét ubak gata lagée nyang ka Lôn kirém di nanggroe Meusé. Ureuëng-ureuëng muda gata Ulôn peumaté dimideuen prang, dan guda-guda gata jireupah. Ulôn nyang pasoe khimah-khimah gata deungon bangke-bangke nyang bée jih khiéng lumpah na. Bahpi ka lagée nyan, gata teutab hana tatem woe ubak Ulôn. 11 Siteungoh nibak gata Ulôn peubinasa lagée nyang ka Lôn peubinasa Sodom dan Gomora. Nyang mantong udeb lamkawan gata na kheueh lagée kayée puntong nyang teucok dalam apui. Bahpi lagée nyan, gata hana cit tawoe ubak Ulôn. 12 Lé sabab nyan, he umat Israel, Ulôn Lôn huköm gata. Dan meusiab-siab kheueh tahadab huköman nyang Lôn peurhot ateueh gata!" 13 Gunong dan angén, TUHAN kheueh nyang cebta; reuncana Gobnyan geupeugah ubak manusia. Gobnyan nyang peujeuet uroe ngon malam; di ateueh pucak-pucak gunong bumoe Gobnyan geujak. TUHAN Allah Nyang Mahakuasa, nyan kheueh nan Gobnyan.

Amos 5

1 Deungoe kheueh he umat Israel! Ulôn keuneuk meuca-e keu gata saboh ca-e duka: 2 Ka rhot Israel nyang mantong peurawan, jihnyan hana geubeudôh le! Di ateueh tanoh jih keudroe jihnyan teupeubiyeu, hana nyang tulông jihnyan keu jidong lom teuma. 3 TUHAN Nyang Mahamanyang meufeureuman, "Na saboh banda di Israel laju geukrah siribée droe tantra, teuma nyang na woe lom cit sireutoh droe; banda nyang laén jikrah teuma sireutoh droe, nyang na woe lom cit siploh droe." 4 TUHAN meufeureuman ubak umat Israel, "Tawoe kheueh ubak Ulôn, teuma gata meuteumé udeb. 5 Bék tajak u Bersyeba dan keu tajak seumayang. Bék tamita Ulôn di Betel, sabab Betel hanco. Meunan cit bék teuma tajak u Gilgal, sabab peunduduek banda nyan teuangkot u teumpat nyang teuböih." 6 Tawoe kheueh ubak TUHAN, teuma gata meuteumé udeb. Meunyoe gata hana tagisa ubak Gobnyan, Gobnyan teuka lagée apui jimeuéue dan geutot habéh ureuëng Israel. Di Betel hana meusidroe pih nyang hase jipeulon apui nyan. 7 Meupaloe kheueh gata, gata nyang puta balek keuadelan dan nyang peukosa hak ureuëng laén! 8 TUHAN Nyang peujeuet bintang-bintang di langét -- bintang Belantik dan bintang Kartika. Gobnyan nyang ubah seupôt jeuet keu peungéuh dan uroe jeuet keu malam; ié lam laôt geurô ateueh darat. Nyang peubuet bandum nyan nan Gobnyan na kheueh TUHAN. 9 Gobnyan nyang peubinasa ureuëng mat kuasa meusajan ngon peutahanan awaknyan. 10 Gata tabanci keu ureuëng nyang ade nyang jilawan keu hana adelan dan keu ureuëng nyang peugah haba beuna di kantô mahkamah. 11 Gata tatindéeh ureuëng gasien dan gandom gobnyan gata reupah. Ngon sabab nyan gata hana tinggai didalam rumoh-rumoh gata nyang meuwáh, nyang ka gata peudong nyan. Gata hana tajieb ié anggô nibak lampôh anggô nyang gata pula. 12 Ulôn kuteupeue padub na rayeuk keujeuhetan gata dan padub na le desya gata. Gata tatindéeh ureuëng nyang jroh; gata teurimong sogok dan tapeubiyeu ureuëng gasien dipeusaneut hana ade di kantô peungadelan. 13 Lé sabab buet gata nyan, teuma ureuëng-ureuëng nyang bijaksana leubeh get seungab mantong bak masa nyang jeuhet lagée nyan. 14 Useuha kheueh tapeubuet nyang jroh dan bék tapeubuet jeuhet, jeuet gata udeb. Dan TUHAN Allah Nyang Mahakuasa bit-bit tinggai lamkawan gata lagée nyang gata peugah. 15 Banci kheueh keu nyang jeuhet, dan cinta kheueh ubak nyang gét, dan tapeudong kheueh keuadelan. Mungken TUHAN geugaséh keu ureuëng-ureuëng nyang na tinggai nibak bansa Israel. 16 TUHAN Allah Nyang Mahakuasa meufeureuman, "Nibak rot-rot banda, ureuëng ramé jimo ba-e dan apoh apah sabab seudeh. Dan bube na peutani jitawök mangat jimo meusajan ureuëng-ureuëng nyang jibayeue keu jipeuratok ureuëng maté. 17 Nibak bansaboh lampôh anggô, ureuëng ramé meuratok sabab Ulôn teuka dan Lôn huköm gata. Ulôn, TUHAN, ka Lôn peugah haba." 18 Ceulaka that gata nyang meuharab uroe TUHAN! Keupeue guna jih uroe nyan nibak gata? Uroe nyan na kheueh uroe nyang seupôt, kon uroe nyang peungéuh keu gata. 19 Keuadaan jih lagée ureuëng nyang peuplueng droe nibak babah singa, teuma meurumpok deungon cagée. Atawa lagée ureuëng nyang woe u rumoh dan meutumpang ngon jaroe bak beuton, laju jicatuek lé uleue! 20 Uroe TUHAN keubit geupeuteuka seupôt, kon peungéuh -- uroe reudôk nyang keulabée. 21 TUHAN meufeureuman, "Ulôn banci dan luwat Lôn kalon peurayaan-peurayaan agama gata! 22 Meunyoe gata taba keureubeuen nyang teutot dan keureubeuen gandom, Ulôn hana Lôn teurimong. Ulôn hana Lôn teurimong beulatang-beulatang gata nyang teumbon-teumbon nyan nyang gata peuseumah keu Ulôn sibagoe keureubeuen peudamé. 23 Peupiôh laju ca-e-ca-e gata nyang jipeukroe ôn punyueng nyan; Ulôn hana Lôn tem teurimong peumeuéun keucapi gata. 24 Leubeh gét, meu useuha kheueh mangat keuadelan ji ile lagée ié, dan keujujoran lagée ié krueng nyang hántom tho. 25 He umat Israel, watée Ulôn tunton gata rot padang pasi peuet ploh thon treb jih, Ulôn hana Lôn lakée peuseumahan dan keureubeuen nibak gata. 26 Teuma bak saát nyoe gata taseumah Sakut nyang gata anggab raja gata nyan, dan Kewan, bintang nyang gata peudewa nyan. Lé sabab nyan arca-arca nyang ka gata peugét nyan harôh gata angkot keudroe. 27 Meunyoe Ulôn Lôn böih gata bak saboh nanggroe nyang leubeh jiôh nibak Damsyik. Ulôn, TUHAN Nyang nan Allah Nyang Mahakuasa ka Lôn peugah haba."

Amos 6

1 Ceulaka kheueh gata nyang udeb meuwáh di Sion, dan gata nyang meurasa aman di Samaria -- gata he tokoh-tokoh masyarakat bansa Israel nyang istimewa nyoe, gata nyang lazem jih jikunjong lé rakyat keu jilakée tulông! 2 Tajak kalon kheueh di Kalne, dan tajak kheueh laju u banda Hamat nyang raya nyan, óh lheuehnyan u banda Gat di Filistin. Tapike lé gata banda-banda nyan leubeh gét nibak Yehuda dan Israel? Peu kheueh wilayah awaknyan leubeh raya nibak wilayah gata? 3 Gata tameukreueh bahwa uroe kiamat mantong jiôh, teuma buet-buet gata teuma teupeubagaih jiteuka uroe nyang lumpah keujam nyan. 4 Ceulaka kheueh gata nyang taéh ateueh peuratah nyang meuwáh-meuwáh dan takhanuri deungon sie leumô dan sie bubiri nyang muda! 5 Gata galak tacebta lagu atawa ca-e lagée nyang jipeubuet lé Nabi Daud, dan gata tapeumeuén ca-e-ca-e nyan deungon keucapi. 6 Gata tajieb ié anggô lam glah nyang peunoh meuasoe, dan gata tapeuguna minyéuk mangat bée nyang paleng gét, teuma gata hana meuseudeh até ateueh keuhancoran Israel. 7 Lé sabab nyan gata kheueh nyang phon-phon that teuangkot u teumpat nyang teuböih. Khanuri-khanuri dan khanuri peujamé gata teuma meu akhé. 8 Deungon teugaih TUHAN Allah Nyang Mahakuasa dan Mahamanyang ka geupeu ingat lagée nyoe, "Ulôn banci ubak keu angkohan umat Israel; Ulôn hana galak deungon meuligoe-meuligoe awaknyan nyang meuwáh. Ma banda awaknyan meusajan deungon bandum nyang na didalam nyan Lôn jok keu musoh." 9 Meunyoe mantong na siploh droe jimusöm didalam rumoh, awaknyan pih maté. 10 Sidroe anggota keuluwarga nyang meutugaih ji uroih jipeutamong lam jrat, teuma teuka dan jiba keuluwa manyét keurabat jihnyan. Ureuëng nyan jitawök ubak ureuëng nyang na di likot rumoh nyan, "Peu kheueh mantong na nyang udeb seulaén gata?" Dan laju teudeungoe jijaweueb, "Hana!" Anggota keuluwarga nyang meutugaih jipeukubu manyét nyan teuma jipeugah, "Bék peugah haba le! Geutanyoe hana jeuet ta kheun nan TUHAN." 11 Meunyoe TUHAN geubri peurintah, rumoh-rumoh raya dan ubit geupeuhanco. 12 Peu kheueh hase guda jiplueng bak bukét batée? Peu kheueh na ureuëng jimeu ué laôt deungon leumô? Teuma gata ka taputa balek keuadelan jeuet keuracön meubisa, dan nyang beuna ka jeuet keusalah. 13 Gata raya haba tapeugah gata ka tapeutaloe Lodebar. Meunan cit gata peugah, "Kamoe seb teuga keu kamoe reubot Karnaim." 14 TUHAN Po teu Allah Nyang Mahamanyang dan Mahakuasa keudroe geupeugah, "Umat Israel, Ulôn Lôn kirém tantra nibak saboh bansa aséng keu jijak prang nanggroe gata. Awaknyan geuteugom gata rot u Hamat di utara sampoe ubak Pantôn Araba di seulatan."

Amos 7

1 Ulôn meuteumé saboh keumalon nibak TUHAN Nyang Mahamanyang. Ulôn kalon Gobnyan geucebta saboh kawan daruet nyang lumpah le bak watée ureuëng seuleusoe jikoh naleueng keu raja, dan naleueng barô ka jitimoh lom. 2 Daruet-daruet nyan rab habéh bandum jipajoh bubena seunaman nyang timoh nibak tanoh. Laju ulôn peugah, "TUHAN Nyang Mahamanyang, neupeu amphon kheueh umat Droeneueh! Awaknyan lumpah that ubit dan leumoh, pakriban mungken awaknyan jimeuteun?" 3 TUHAN laju geu ubah reuncana Gobnyan dan geupeugah, "Nyang gata kalon nyan hana teuma teujadi." 4 Ulôn meuteumé lom saboh keumalon nibak TUHAN Nyang Mahamanyang. Deuh ulôn kalon Gobnyan ka geumeusiab-siab keu geuhuköm umat Gobnyan deungon apui. Apui nyan habéh jilieh laôt raya dimiyueb bumoe dan ka jipeuphon peuhangöh ladang. 5 Laju ulôn peugah, "Ya TUHAN Po teu Allah, neupeupiôh kheueh kira jih apui hu nyan! Umat Droeneueh lumpah ubit dan leumoh, pakriban mungken awaknyan jimeuteun?" 6 Laju TUHAN geu ubah reuncana Gobnyan lom dan geupeugah, "Nyang nyoe pih hana teujadi." 7 Ulôn meuteumé lom saboh keumalon laén nibak TUHAN. Ulôn ngieng Gobnyan geudong bak binéh beuton nyang teupeudong deungon teupeuguna talo sineupat teudong cot. Bak jaroe Gobnyan geumat talo sineupat nyan keu geukalon peu kheueh beuton nyang teudong cot atawa hana. 8 Gobnyan geutanyong ubak ulôn, "Peue nyang na gata kalon, Amos?" Laju lôn jaweueb, "Talo sineupat teudong cot, ya TUHAN." Laju TUHAN meufeureuman, "Ulôn peuguna talo sineupat nyoe na kheueh keu Lôn tunyok bahwa umat Ulôn lagée beuton nyang hana sulu. Ulôn hana Lôn ubah reuncana Ulôn, Ulôn pasti Lôn huköm awaknyan. 9 Teumpat-teumpat nyang teupeuguna lé keuturonan Nabi Ishaq keu meuiébadat teupeuhanco. Teumpat-teumpat suci ureuëng Israel teureuloh. Ulôn Lôn peuranab bubena keuturonan Raja Yerobeam." 10 Amazia, teungku imeum di Betel, geukirém laporan nyang lagée nyoe ubak Yerobeam raja Israel, "Amos teungoh meugumpôi ngon rakyat geulawan Teungku Amphon. Tutoe haba gobnyan nyang geupeusuna rakyat jeuet keusabab nanggroe nyoe hanco. 11 Gobnyan geupeugah bahwa teungku amphon maté di mideuen prang, dan ureuëng Israel pasti teuangkot u teumpat nyang teuböih, jiôh nibak nanggroe jih keudroe." 12 Dan Amazia laju geupeugah ubak Amos, "He Nabi, neuwoe kheueh u Yehuda! Meukeutubah kheueh disideh. Bah kheueh awaknyan nyang jok nafeukah keu droeneueh! 13 Bék le neukeutubah di Betel. Banda nyoe khusos keu raja, dan teumpat iébadat nasional." 14 Geujaweueb lé Amos, "Ulôn kon nabi sabab jabatan. Nyang sibeuna jih ulôn ureuëng peulara beulatang dan tukang pot boh ara. 15 Teuma TUHAN geucok ulôn bak teumpat lôn keureuja, dan geuyue bak ulôn jak peusampoe peusan Gobnyan ubak ureuëng Israel. 16 Teuma lé sabab nyan deungoe kheueh peue nyang geupeugah lé TUHAN ubak gata. Sabab gata tatam ulôn meukeutubah lôn keuhai bansa Israel. 17 TUHAN meufeureuman bahwa peurumoh gata jeuet keu inong lunte bak rot-rot ueh raya di dalam banda, dan aneuëk-aneuëk gata geupoh maté di mideuen prang. Tanoh gata teuweuek-weuek keu ureuëng laén, dan gata keudroe maté bak nanggroe gob nyang hana jituri TUHAN. Peunduduek Israel pasti teuangkot u teumpat nyang teuböih, jiôh nibak nanggroe jih keudroe."

Amos 8

1 Ulôn meuteumé lom saboh keumalon nibak TUHAN Nyang Mahamanyang. Leumah ulôn ngieng saboh raga nyang meuasoe meubagoe boh kayée nyang ka masak. 2 TUHAN geutanyong, "Peue nyang gata kalon, Amos?" Ulôn jaweueb, "Saboh raga nyang meuasoe meubagoe rupa boh kayée nyang ka masak." Geujaweueb lé TUHAN, "Watée jih ka masak keu umat Israel. Ulôn hana teuma Lôn ubah le reuncana Ulôn dan pasti Ulôn huköm awaknyan. 3 Bak uroenyan ca-e ngon nyanyi di meuligoe jeuet keu mo ba-e. Jeueb-jeueb sagoe ka teugageueng manyét-manyét nyang ka teuböih deungon seungab-seungab." 4 Deungoe kheueh, he gata nyang teugön ureuëng gasien di nanggroe nyoe sampoe awaknyan binasa! 5 Gata tamariet deungon droe keudroe gata, "Ah, treb that mantong uroe-uroe peurayaan nyang teungoh na nyoe. Geutanyoe ka meuhét that keuneuk tapeubloe lom gandom-gandom nyang na nibak geutanyoe, teuma peurayaan nyan hana pajan seuleusoe. Pajan kheueh uroe Sabat habéh, mangat geutanyoe jeuet tapeuphon meukat lom? Geutanyoe ka meuhét that keuneuk ceumatut, teumipée deungon sinukat, dan tapeubuet ilat ngon céng timbangan. 6 Gandom nyang rusak hase tapeubloe ngon yuem nyang meuhái. Geutanyoe tamita ureuëng gasien nyang hana hase jibayeue utang keu geutanyoe, bahpi utang jihnyan cit dubyuem sipasang seulob, dan tanyoe bloe ureuëng gasien nyan jeuet keu namiet geutanyoe." 7 TUHAN, Allah bansa Israel, ka geumeusumpah, "Ulôn meubacutpi hana Lôn tuwoe nibak buet awaknyan nyang jeuhet nyan. 8 Bumoe meugeunta, dan bandum ureuëng susah até. Bansaboh nanggroe meuguncang dan meuhayak keudeh keunoe lagée Krueng Nil. 9 Teuma teuka watée jih Ulôn peujeuet mata uroe jilob teungoh cot uroe dan bumoe jeuet keuseupôt bak watée uroe. Ulôn, TUHAN Nyang Mahamanyang, ka Lôn peugah haba. 10 Peurayaan-peurayaan gata Lôn peujeuet keu uroe meukabong, dan ca-e ngon nyanyi gata jeuet keu mo ba-e. Ulôn Lôn peujeuet gata tacukoe ôk gata dan tangui ija krong tanda meuduka cita. Gata jeuet lagée ayah ngon ma nyang jipeumo ba-e sabab ka maté aneuëk jih nyang tunggai. Uroenyan keuneulheuh deungon seudeh nyang hana teukira." 11 TUHAN Nyang Mahamanyang meufeureuman, "Teuma teuka watée jih Ulôn peutron bala musém deuk di nanggroe nyoe. Manusia deuk, teuma kon deuk sabab peunajoh. Manusia grah, teuma kon grah lé sabab ié. Awaknyan deuk ngon grah lé peusan Lôn. 12 Manusia meurawoh di utara trok u seulatan dan di timu u barat mangat jiteumé peusan Ulôn, teuma awaknyan hana meurumpok. 13 Bak uroenyan Bahpi aneuëk-aneuëk muda nyang seuhat-seuhat pih pansan sabab grah. 14 Ureuëng-ureuëng nyang meusumpah deumi beurala Samaria deungon jipeugah, 'Deumi dewa bansa Dan', atawa 'Deumi Dewa Bersyeba' -- teuma reubah dan hana jibeudôh-beudôh le."

Amos 9

1 Deuh ulôn ngieng TUHAN geudong bak binéh miseubah. Lé Gobnyan geubri peurintah lagée nyoe, "Taseukok kheueh beu habéh teunaga ulée-ulée taméh di Baét Ulôn mangat bansaboh seuramoe meuguncang. Peureubah laju taméh-taméh nyan ateueh ulée manusia. Awaknyan nyang hana maté Lôn poh di mideuen prang. Hana meusidroe pi nyang hase jipeuplueng droe, hana meusidroe pi nyang na tinggai. 2 Bahpi awaknyan jisöm droe bak donya ureuëng maté, Ulôn nyang hila awaknyan. Bahpi awaknyan jirak u langét, Ulôn peutron awaknyan di langét nyan. 3 Meunyoe awaknyan jimusöm bak pucak Gunong Karmel, Ulôn nyang mita dan nyang drob awaknyan. Meunyoe awaknyan jimusöm lam tuwie ié laôt, Ulôn nyang peurintah bak naga laôt mangat ji palet awaknyan. 4 Meunyoe awaknyan jidrob lé musoh, Ulôn nyang peurintah mangat awaknyan jipoh maté. Ulôn meuteukat keu Lôn peubinasa awaknyan, dan hana Lôn tulông awaknyan." 5 Bumoe meuhayak dan peunduduek meuduka, sabab geucukéh lé TUHAN Nyang Mahamanyang dan Mahakuasa. Lagée Krueng Nil paseueng ék dan paseueng tron meunan kheueh awaknyan ji-ék dan laju rhot. 6 TUHAN geupeudong Baét Gobnyan jiôh di angkasa, di ateueh bumoe geupasang langét sibagoe kubah, dan ié lam laôt laju geu ruwah ateueh darat, nyang peubuet bandum nyan nan Gobnyan na kheueh TUHAN! 7 TUHAN meufeureuman, "He umat Israel, Ulôn kalon ureuëng Sudan saban lagée Ulôn ngieng gata. Ulôn ka Lôn ba ureuëng Filistin nibak Kreta dan ureuëng Siria nibak Kir saban lagée Ulôn ba gata nibak Meusé. 8 Ulôn, TUHAN Nyang Mahamanyang, teungoh Lôn ngieng-ngieng keurajeuen Israel nyang meudesya nyoe, dan Lôn sampôh ateueh muka bumoe. Teuma keuturonan Nabi Yakub hana bandum Ulôn peubinasa. Ulôn, TUHAN ka Lôn peugah haba. 9 Ulôn bri peurintah dan Lôn tampo bansa Israel lagée ureuëng tampo gandom dalam jiée. Keu teukireueh bandum nyang hana meuguna lamkawan awaknyan, Ulôn Lôn kocok awaknyan lamkawan bansa-bansa. 10 Ureuëng-ureuëng meudesya lamkawan umat Ulôn jipeugah, 'Allah hana geupeubiyeu tanyoe rhot lé bala.' Teuma, nyang sibeuna jih awaknyan teupoh maté dimideuen prang." 11 TUHAN meufeureuman, "Teuma teuka saát jih Ulôn Lôn peupuléh keurajeuen Nabi Daud. Saát nyoe keurajeuen nyang ka jeuet lagée rumoh nyang reuloh. Teuma bintéh-bintéh beuton jihnyan Lôn peugét dan Lôn peudong lom sampoe jeuet lagée nyang ka-ka. 12 Ureuëng Israel jikuasa nanggroe Edom nyang mantong tinggai dan bandum bansa yoh masa ilée atra Ulôn. Ulôn, TUHAN, ka Lôn peugah haba dan hai nyan Lôn laksana." 13 TUHAN meufeureuman, "Teuma teuka watée jih gandom jitimoh bagaih that sampoe musém keumeukoh hántom reuda. Bak anggô timoh lumpah that jai sampoe manusia hana putôh-putôh jipeugét ié anggô. Ié anggô jililéeh di gunong-gunong dan ji ile nibak bukét-bukét. 14 Ulôn Lôn peujeuet umat Lôn Israel makmu lom teuma. Awaknyan jipeudong lom banda-banda jih keudroe nyang ka reuloh, laju awaknyan tinggai disinan. Awaknyan jipula lampôh-lampôh anggô, dan ji-jieb ié anggô nyan. Awaknyan jimeulampôh sira jipula meubagoe seunaman, dan jipajoh hase lampôh jihnyan. 15 Ulôn Lôn keubah umat Ulôn bak nanggroe nyang ka Ulôn bri keu awaknyan. Awaknyan hana teutarek le nibak teumpat nyan. Ulôn, TUHAN Allah awaknyan ka Lôn peugah haba."

Obaja 1

1 Nyoe kheueh ramaian Obaja; gobnyan geupeusampoe peusan TUHAN Nyang Mahamanyang keuhai bansa Edom: TUHAN ka geukirém utosan Gobnyan ubak bansa-bansa, dan geutanyoe ka tadeungoe peusan nyang geuba lagée nyoe, "Meusiab kheueh keu tajak muprang! Jak kheueh tabeurangkat tajak prang Edom." 2 Dan ubak Edom TUHAN meufeureuman, "Gata Lôn peujeuet leumoh, sampoe jihina lé bandum bansa. 3 Gata keunong peungét lé até gata nyang sombong. Ma banda gata na kheueh gunong batée nyang kong; teumpat tinggai gata bak pucak gunong nyang manyang. Lé sabab nyan gata tapike, Soe nyang hase peurhot ulôn? 4 Bahpi rumoh gata tapeugét manyang lagée uempueng cicém rajawali, dan santeut manyang ngon bintang-bintang dilangét, gata pasti Lôn peurhot. 5 Pancuri atawa peurampok nyang teuka bak watée malam, teuma jicok nyang jigalak. Ureuëng nyang pot boh anggô di lampôh, sabe jipeuleubeh meupadub boh. Teuma gata geusampôh gleh lé musoh-musoh gata. 6 He keuturonan Esau, gata jigeuladah dan hareuta gata nyang teusöm pi jireupah. 7 Gata jitipée lé sikutu-sikutu gata, dan ji use nibak nanggroe gata. Gata jipeutaloe lé sahabat-sahabat gata, jijeubak lé ureuëng nyang makheun meusajan ngon gata. Awaknyan jitanyong-tanyong keuhai droe gata, 'Dipat jikeubah carông jih nyan?' 8 Bak uroe Ulôn huköm Edom, ureuëng-ureuëng awaknyan nyang bijaksana habéh Ulôn peubinasa. Dan bandum hikeumat awaknyan gadôh, hana meubeukaih. 9 Bubena peujuang di Téman teumakot, dan bandum sipa-i Edom maté." 10 "Gata ka tapeubuet keujam ateueh syedara-syedara gata keuturonan Nabi Yakub. Sababnyan gata binasa, dan jikheun lé gob siumu masa. 11 Gata tadong bak teumpat nyang jiôh, bak uroe musoh geupeujo pintoe Yerusalem dan jipeutaloe banda nyan. Gata seungab mantong watée awaknyan jiangkot bandum keukayaan Yerusalem laju jiweuek-weuek sabe keudroe-droe. Gata saban jeuhet jih deungon musoh nyan. 12 Hana patot gata galak ateueh naseb malang ureuëng Yehuda dan meugeumbira bak uroe syedara gatanyan binasa. Hana pantaih gata raya haba watée awaknyan susah. 13 Hana patot gata tatamong lam banda umat Lôn, dan tasurak ureuëng-ureuëng nyang teungoh meudeurita, peulom tareupah hareuta beunda awaknyan bak uroe awaknyan keunong malang! 14 Hana patot gata tadong bak simpang rot, keu tahampeueng ureuëng-ureuëng nyang teungoh jipeuplueng droe nibak musoh, atawa jiseurah awaknyan ubak lawan bak uroe awaknyan keunong keususahan." 15 "Keubit, ka tô that uroe jih, Ulôn, TUHAN, Lôn peusidang bansa-bansa. Peue nyang jipeubuet Edom teuma teubalaih ateueh jihnyan. Jihnyan jirasa peue nyang ka jipeubuet. 16 Di ateueh gunong Lôn nyang suci umat Ulôn ka ji-jieb ié jieb nyang teupeulambang ubak huköman. Teuma ié jieb keu bansa-bansa di ateueh bumoe nyoe leubeh phet nibak nyan. Huköman nyan hana hase awaknyan peusie. Ié nyan harôh jijieb lé awaknyan sampoe habéh, óh lheuehnyan awaknyan leunyab hana beukaih." 17 "Teuma bak Gunong Sion, na nyang seulamat, dan gunong nyan jeuet keu teumpat nyang khusos keu Ulôn. Dan keuturonan Nabi Yakub jiteumé lom tanoh pusaka awaknyan. 18 Umat Ulôn Israel jeuet lagée apui nyang jitot habéh keuturonan Esau, lagée apui nyang jilahiéb habéh jeumpung di blang. Hana meusidroe pi nibak keuturonan Esau na tinggai. Ulôn, TUHAN, ka Lôn peugah haba! 19 Ureuëng-ureuëng Yehuda seulatan jireupah Edom. Ureuëng-ureuëng nibak gunong-gunong siblaih u barat jipeutaloe wilayah Filistin. Sukée Benyamin jireupah Gilead, dan Israel umat Ulôn jikuasa bandum Efraim dan Samaria. 20 Ureuëng Israel Utara jiwoe nibak teumpat nyang teuböih dan jiduek di Fenisia sampoe u Zarfat. Ureuëng-ureuëng Yerusalem nyang teuböih di Sardis, jiwoe dan jicok laju banda-banda di bagian seulatan Yehuda. 21 Peunduduek Yerusalem nyang jaya jiprang Edom dan geupeutaklok banda nyan. Dan Ulôn TUHAN Lôn peurintah sibagoe raja."

Yunus 1

1 Bak siuroe, TUHAN geumariet ngon Nabi Yunus, bin Amitai. 2 Feureuman Gobnyan, "Tajak kheueh u Niniwe, banda nyang raya nyan, keu teupeutakot banda nyan, sabab Ulôn teupeue bahwa peunduduek disinan jeuhet lumpah na." 3 Teuma Nabi Yunus geujak u arah laén guna geupeujiôh TUHAN Gobnyan geujak u Yopa, dan keubeutulan na geungieng kapai keuneuk meulayeue u Spanyol. Óh ka lheueh geubayeue ungkoih kapai, laju geujak meusajan aneuk kapai nyan u Spanyol, mangat gobnyan jiôh nibak TUHAN 4 Nabi Yunus geutreun ubak teumpat nyang paleng miyueb dan laju geuéh disinan sampoe teungét hana geutée droe. Óh lheuehnyan TUHAN laju geupeuteuka angén raya u ateueh laôt, laju jipôt angén badée nyang lumpah teuga, dan angén raya nyan laju jiheuntam kapai nyan sampoe karab hanco. Bubena aneuk kapai lumpah teumakot sira jiklik-klik jilakée tulông, maséng-maséng ubak dewa jih keudroe. Keu teupeukureueng bahya jeuet bék ngob kapai nyan, bubena asoe kapai nyan laju jitiek lam laôt. 6 Watée nahkoda kapai nyan jitron u miyueb, laju jikalon Nabi Yunus mantong teungéut disinan. Dan laju jipeugah, "Trok até gata mantong teungéut kapai dalam keuadaan lagée nyoe! Beudôh! Meudóa kheueh ubak dewa gata jeuet geutulông. Pane tateupeue gobnyan geugaséh ubak geutanyoe sampoe geutanyoe hana binasa." 7 Óh ka lheueh Nabi Yunus dan nakhoda nyan geuék u ateueh, lé keulasi kapai nyan jimariet sabe keudroe-droe, "Jak, tatiek undi mangat tateupeue soe nyang salah sampoe geutanyoe keunong lé bala nyoe!" Awaknyan laju jitiek undi, dan nyang keunong na kheueh nan Nabi Yunus. 8 Laju jipeugah lé awaknyan ubak Nabi Yunus, "Peu kheueh beutôi sabab lé gata teujadi bala nyoe? Gata rot pane? Bansa peue? Dan pakon gata na disinoe?" 9 Geujaweueb lé Nabi Yunus, "Ulôn ureuëng Ibrani. Nyang lôn seumah TUHAN, Allah syeuruga, nyang cebta laôt dan darat." 10 Óh lheuehnyan laju geucalitra pakriban gobnyan geupeuplueng droe nibak TUHAN. Ban jideungoe lagée nyan bubena keulasi kapai meutamah teumakot, dan jipeugah ubak Nabi Yunus nyan, "Bitnyoe lancang that buet gata nyan!" 11 Teungoh jipeugah nyan angén badée maken meutamah raya, laju lé keulasi kapai jitanyong lom ubak gobnyan, "Peue nyang harôh kamoe peubuet ateueh gata mangat angén badée nyoe jipiôh?" 12 Geujaweueb lé Nabi Yunus, "Neutiek kheueh ulôn dalam laôt, pasti angén badée nyoe jipiôh. Sabab bak saát nyoe ka ulôn teupeue, bahwa sabab ulon kheueh angén badée nyang luwa biasa nyoe jitimpa ateueh droeneueh." 13 Teuma lé awak kapai nyan mantong jiuseuha seuhabéh teunaga keu jidayong kapai nyan ateueh darat. Teuma angén badée teutab meutamah raya, seuhingga useuha nyang ka geupeubuet lé awaknyan sia-sia beulaka. 14 Sabab nyan awaknyan geumeulakée ubak TUHAN, "Ya, TUHAN, kamoe lakée, bék kheueh kamoe neupeubinasa ngon sabab kamoe cok nyawöng ureuëng nyang hana jipeubuet meusapeue pih nyang salah ubak kamoe. Ya TUHAN, Droeneueh ka neupeubuet peue nyang Droeneueh keuheundaki." 15 Laju awaknyan jirhom Nabi Yunus u dalam laôt. Dan bak saát nyan cit angén badée nyan jipiôh hana le meubura. 16 Bubena keulasi kapai nyan ka teuka teumakot nyang luwa biasa ubak TUHAN, dan óh ka trok bak darat, awaknyan laju geupeuseumah keureubeuen ngon jimeujanji meubagoe-bagoe rupa ubak TUHAN. 17 Dan bak watée nyan TUHAN laju geukirém saboh eungkot yée nyang paleng raya jeuet yée nyan jijak uét Nabi Yunus. Dan tinggai kheueh Nabi Yunus dalam pluet eungkot nyan lhée uroe lhée malam treb jih.

Yunus 2

1 Lam pruet eungkot nyan, Nabi Yunus geumeudoá ubak TUHAN Allah gobnyan. Lagée nyoe doá gobnyan, 2 "Ya TUHAN, lam keususahan lôn ulôn meulakée ubak Droeneueh dan Droeneueh neujaweueb ulôn. Nibak lam donya ureuëng maté ulôn lakée tulông ubak Droeneueh, nyang ulôn lakée Droeneueh deungoe dan Droeneueh peurati. 3 U teumpat nyang lhok ulôn Droeneueh rhom, sampoe trok lam tuwie laôt raya. Disinan ié tajam jikeulileng lôn, umbak dan geulumbang jiseumpom ulôn. 4 Lam até lôn laju lôn peugah: TUHAN ka geu use ulôn nyoe dikeue Gobnyan. Hana ulôn ngieng le baét teumpat tinggai Gobnyan nyang suci. 5 Ié laôt jiék trok bak bibi lôn, samudra raya ka habéh ngob bansaboh tuboh lôn, ganggang laôt habéh jibalot bansaboh ulée lôn. 6 Ulôn grob trok lam barieh gunong, lam álam nyang pintoe geureubang jih teugunci sampoe akhé jamén. Nyawöng ulôn hék ngon leumoh lam tuboh, laju ulôn ingat dan lôn meulakée ubak Droeneueh. Dan trok kheueh doá ulôn ubak Droeneueh, udalam Baét Droeneueh nyang suci. Laju neupeuteungöh ulôn nibak lam laôt, ya TUHAN Allah ulôn! 8 Ureuëng seumah beurala nyang sia-sia, jitinggai Droeneueh dan hana le seutia. 9 Teuma ulôn meuca-e lagu puja ngon pujoe keu Droeneueh dan ulôn peuseumah keureubeuen keu Droeneueh. Meubagoe janji lôn peubuet. Droeneueh kheueh TUHAN nyang peuseulamat." 10 Óh lheueh nyan, ateueh peurintah TUHAN, lé uengkot yée raya nyan, laju jiulée Nabi Yunus bak binéh panté.

Yunus 3

1 Keu nyang keu dua goe jih TUHAN geumeututoe ubak Nabi Yunus. 2 Feureuman Gobnyan, "Tajak kheueh u Niniwe, banda raya nyan, dan tapeusampoe kheueh ubak rakyat jihnyan, peusan nyang Ulôn bri ubak gata." 3 Teuma Nabi Yunus laju taát ubak TUHAN dan geujak laju u Niniwe, saboh banda nyang raya lumpah na; sampoe habéh watée lhée uroe keu teujak lam banda nyan. 4 Nabi Yunus laju geutamong lam banda nyan dan óh ka lheueh geujak siuroe suntok, gobnyan laju geupeuphon keutubah, kheun gobnyan, "Peuet ploh uroe teuk, Niniwe hanco!" 5 Peunduduek Niniwe peucaya ubak peusan Allah nyan. Bandum rakyat ka jicok keuputosan keu jipuasa, dan bandum ureuëng, bah kheueh nyan nyang rayeuk meunan cit deungon nyang ubit, jingui ija kröng sibagoe tanda bahwa awaknyan ka meunyeusai ubak banmandum desya nyang ka jipeubuet. 6 Watée raja Niniwe jideungoe haba nyan, deungon reujang that laju jitron nibak takhta gobnyan. Laju geusuet bajée jubah nyang teungoh geungui dan deungon pantaih laju geutuka deungon ija kröng, dan geuduek laju ateueh abée. 7 Dan gobnyan laju geupeumaklum maklumat nyang lagée nyoe, "Peurintah nyoe geupeuteubiet di Niniwe ateueh keuputosan raja dan bandum meuntroe: Bandum ureuëng, leumô, bubiri dan bandum beulatang peulara nyang laén geutam bék ji makheun dan jieb ié. 8 Manusia dan beulatang harôh jingui ija kröng. Sibagoe tanda meunyeusai, dan bandum ureuëng harôh meudoá deungon bit-bit ubak Po teu Allah. Awaknyan harôh jipeugét pi-e jih nyang jeuhet dan buet-buet jih nyang peunoh ngon desya. 9 Mungken Po teu Allah geu ubah niet Gobnyan dan hana beungéh le sampoe geutanyoe hana jadeh binasa!" 10 Po teu Allah geukalon bandum buet awaknyan; Gobnyan geukalon bahwa awaknyan ka jitinggai bandum pi-e droe jih nyang jeuhet. Dan Gobnyan laju geu ubah keuputosan geuh, dan hana jadeh geu huköm awaknyan.

Yunus 4

1 Nabi Yunus meubacut pih hana galak deungon hai nyan; bahkan gobnyan jeuet keubeungéh. 2 Laju gobnyan meudoá, "Ya TUHAN, kon ka lheueh lôn peugah sigohlom ulôn beurangkat nibak rumoh lôn yoh masa dilée, bahwa Droeneueh pasti nepeugét lagée nyoe? Nyan kheueh sabab jih ulôn langsong ulôn peuplueng droe u Spanyol! Ulôn kuteupeue bahwa Droeneueh Allah nyang peunyayang dan peugaséh, panyang saba, leumoh leumbot, dan sabe siab keu neu ubah reuncana huköman. 3 Jinoenyoe, ya TUHAN, bah kheueh ulôn maté mantong, sabab leubeh gét ulôn maté nibak padoe udeb." 4 Geujaweueb lé TUHAN, "Gata hana alasan neubeungéh nyang lagée nyan." 5 Óh lheuehnyan Nabi Yunus laju geujak u bagian timu banda, dan geuduek laju disinan. Gobnyan geupeudong saboh jambo dan laju geumeuceue lam jambo nyan, sira geupreh peue nyang teuma teujadi di banda Niniwe. 6 Teuma TUHAN Allah laju geupeutimoh sibak seunaman nyang jimeuéue seuhingga seunimoh nyan laju jipeupayong Nabi Yunus sampoe gobnyan harok that até. Meumang, Nabi Yunus harok lumpah na deungon seunaman nyan. 7 Teuma óh singoh nyan watée seuboh buta, Po teu Allah laju geupeujeuet saboh glang dan glang nyan laju jijak kab ukeu seunaman nyan, sampoe seunaman nyan laju layée. 8 Óh mata uroe ka jibleuet, Po teu Allah laju geupeutron angén nyang lumpah seu úem nyang teuka jih nibak arah timu. Nabi Yunus rab pansan sabab jipoh lé uroe nyang seu úem lagée nuraka nyan, siulah-ulah ulée gobnyan lagée tutong keunong apui. Gobnyan ka jeuet keu putôh asa dan meuharab bubagaih maté. Kheun Nabi Yunus nyan, "Leubeh gét ulôn maté mantong nibak padoe udeb!" 9 Teuma Po teu Allah geupeugah ubak gobnyan, "Gata hana patot seudeh lagée nyan ngon sabab seunaman nyan!" Jaweueb Nabi Yunus, "Pakon hana? Ka patot ulôn beungéh sampoe án maté." 10 Laju geupeugah lé TUHAN ubak Nabi Yunus, "Seunaman nyoe timoh simalam mantong, dan óh singoh beungoh seunaman nyan layée; gata meubacut pih hana neupula dan neupeulara. Bahpih lagée nyan gata meurasa seudeh sabab ka layée. 11 Hana mungken Ulôn hana meurasa seudeh watée Lôn pike ubak Niniwe, banda nyang raya nyan. Sabab seulaén beulatang-beulatang nyang hana teuitong nyan, disinan na cit meuteumé leubeh nibak 120.000 droe aneuëk miet nyang gohlom hase geupeubeda peue nyang jroh dan peue nyang jeuhet."

Mikha 1

1 Mikha asai geuh di banda ubit nyang nan jih Moresyet. Bak masa nanggroe Yehuda geupeurintah meuturot-turot lé Raja Yotam, Ahas dan Hizkia, Mikha geuteurimong peusan TUHAN keuhai Samaria dan Yerusalem. 2 Deungoe kheueh he bansa-bansa! Simak kheueh, he peunduduek bansaboh donya! TUHAN Nyang Mahamanyang teuka sibagoe saksi geulawan gata bube nyang na! Deungoe kheueh Gobnyan peugah haba di Baét Gobnyan nyang suci di Syeuruga. 3 Gobnyan geutron nibak teumpat Geuh nyang suci dan geujak-jak di ateueh pucak-pucak gunong di bumoe. 4 Gunong-gunong hanco dimiyueb tapak gaki Geuh lagée lilen lam apui nyang teungoh hu; tanoh nyan teupeurô jitamong lam barieh, lagée ié di ateueh bukét ji ile u miyueb. 5 Bandum nyan teujadi sabab ureuëng Israel meudesya dan beurontak ubak Allah. Soe kheueh nyang jeuet keu sabab Israel meudesya? Bukon kheueh Samaria ma banda gobnyan keudroe? Soe kheueh nyang peusabab Yehuda geuseumah beurala? Peu kheueh bukon Yerusalem keudroe? 6 Nyang kheueh sabab jih TUHAN meufeureuman, "Ulôn Lôn peujeuet Samaria sinamon rungka di padang, dan teumpat manusia pula bak anggô. Rungka-rungka banda nyang reuloh nyan Ulôn tiek lam barieh pantôn, dan sandi-sandi rungka nyan Ulôn kueh teuma. 7 Patong-patong jihnyan nyang meyuém Lôn peuhanco, dan tieb-tieb beunda nyang teujôk ubak ureuëng-ureuëng inong nyang meutugaih bak kuil Ulôn tot, dan bandum beurala nyang na disinan Lôn peubinasa. Barang-barang nyan na kheueh hase iébadat ubak dewa keusuboran. Jinoe bandum nyan jiangkot lé musoh-musoh keu peuseumahan syukoe ubak dewa-dewa jihnyan." 8 Sabab nyan kheueh, ulôn, si Mikha, lumpah peudeuh até dan apoh apah. Ulôn lôn jak hana ngon peukayan badan teulon dan hana teuma meuseulob sibagoe tanda pakriban seudeh jih até ulôn nyoe. Ulôn meuranggong lagée su asée uteuen dan meuông-ông lagée su cicém unta. 9 Sabab luka-luka Samaria hana hase teupeu ubat, dan Yehuda keunong naseb nyang saban. Peutaka ka trok u Yerusalem, pintoe geureubang tanoh ié bansa ulôn. 10 Bék kheueh tapeugah ubak musoh-musoh geutanyoe di Gat keuhai musibah geutanyoe; bék teuma tapeubiyeu awaknyan jikalon gata nyang teungoh mo. He peunduduek Bet-Le-Afra, meugule-gule kheueh lam abée sibagoe tanda putôh asa! 11 Gata bandum peunduduek Safir, tajak kheueh laju u teumpat nyang teuböih ngon hana tangui peukayan dan deungon peurasa malée! Ureuëng-ureuëng Zaanan hana jijeuet teubiet nibak banda. Su kliek peunduduek Bet-Haezel sibagoe tanda keu gata bahwa disinan ka hana le peulindongan. 12 Peutaka nyang teuka nibak TUHAN ka trok bak babah pintoe geureubang Yerusalem! Lé sabab nyan, hana mungken ureuëng Marot jimeuharab gata tulông. 13 Gata peunduduek Lakhis, tapasang kheueh guda bak geuritan prang! Gata tacuntoh desya-desya nyang jipeubuet di Israel sampoe lé sabab nyan Yerusalem pih ka meudesya. 14 Jinoenyoe he ureuëng Yehuda gata gadôh banda Moresyet-Gat. Raja-raja Israel hana meuteumé bantuan le nibak banda Akhzib. 15 He ureuëng Maresya, TUHAN geuseurah gata ubak musoh nyang keuneuk peutundok banda gata. Peumimpén-peumimpén Israel nyang meukuasa jimusöm lam guha-guha di Adulam. 16 He ureuëng Yehuda, takoh kheueh ôk gata sibagoe tanda meukabong keu aneuëk-aneuëk gata nyang gata gaséh. Tacuko kheueh ôk bak ulée gata sampoe nyang tinggai cit bruek ulée saban lagée cicém nyang pajoh bangke, sabab bandum aneuëk-aneuëk gata teuangkot u teumpat nyang teuböih.

Mikha 2

1 Ceulaka kheueh ureuëng-ureuëng nyang reuncana bak buet nyang jeuhet teungoh jiéh-éh bak teumpat éh óh watée malam, laju jilaksana óh watée beungoh sabab awaknyan na teunaga keu jipeubuet nyan. 2 Meunyoe awaknyan jikeuneuk beuna saboh lampôh, laju jireupah atra gob. Meunyoe awaknyan keuneuk na saboh rumoh, atra gob geureupah mantong. Bah kheueh atra meunan cit keuluwarga, hana nyang aman. 3 Sabab nyan TUHAN meufeureuman, "Ulôn nyang reuncana bala ceulaka ateueh gata, sampoe gata hana tinggai. Bak watée nyang naas nyan gata hana carông le tajak-jak deungon sombong. 4 Naseb gata jipeuguna lé gob sibagoe nariet teumimplak, dan awaknyan jipeugöt ca-e meukabong nyang lagée nyoe, 'TUHAN ka geucok lom nanggroe kamoe nyoe dan laju geujok ubak ureuëng nyang teuen kamoe. Kamoe ka hanco hana le meuguna.' " 5 Lé sabab nyan, meunyoe ka trok watée jih nanggroe nyan geujok lom ubak umat TUHAN, hana meusidroe pih nibak gata nyang teurimong bulueng gobnyan. 6 Ureuëng-ureuëng laén jikeutubah ubak Ulôn, kheun gobnyan, "Bék takeutubah ubak kamoe. Bék takeutubah keuhai banmandum nyan. Kamoe hana meuteumé malée. 7 Bék tapike umat Israel ka geukutok lé TUHAN! TUHAN hana geupeubuet hai-hai nyang lagée nyan. Gobnyan hántom na gadôh saba. Bukon kheueh Gobnyan geumariet deungon ramah ubak ureuëng-ureuëng nyang jipeubuet nyang beuna?" 8 Geujaweueb lé TUHAN, "Gata kheueh nyang prang umat Ulôn lagée musoh. Ureuëng nyang gisa di mideuen prang deungon harapan meuteumé aman di rumoh jih keudroe, padahai disinan gata preh keuneuk gata reubot rumoh gobnyan. 9 Inong-inong lamkawan umat Ulôn gata use di rumoh nyang jicinta, dan gata reupah sabe beureukat nyang Ulôn bri keu aneuëk-aneuëk awaknyan. 10 Beudôh kheueh dan tajak laju keudeh; disinoe ka hana aman le. Ngon sabab lé desya-desya nyang rayeuk nyan ka jeuet keusabab geupeutron bala nyang lumpah gli u ateueh teumpat nyoe. 11 Gata meuharab ubak nabi nyang galak meusulet dan teumipée dan ji-amai bahwa nibak gata teuma na ié anggô dan ié kreueh meulimpah ruwah." 12 TUHAN meufeureuman, "He umat Israel nyang na mantong teutinggai! Gata pasti Lôn peusapat dan Ulôn peusaho lagée bubiri nyang teungoh woe lam weue. Lagée blang naleueng nyang peunoh deungon bubiri, meunan cit teuma nanggroe gata peunoh lom ngon ureuëng ramé. 13 Ulôn Lôn peuhah rot ueh dan Ulôn ba gata nibak teumpat nyang teuböih. Gata tadabrak babah-babah pintoe geureubang dan tajak ho galak droe. Ulôn, TUHAN keudroe, na kheueh Raja gata. Dan Ulôn Lôn pimpén gata mangat teupeuteubiet nibak peunjara."

Mikha 3

1 Deungoe kheueh, he gata banmandum peunguasa-peunguasa Israel! Sibeuna jih gata tateupeue peue nyang ade, 2 teuma gata tabanci ubak nyang jroh, dan galak ubak nyang jeuhet. Bansa ulôn gata puliek udeb-udeb, dan gata priek-priek asoe nyang meuleukek nibak tuleueng-tulueueng awaknyan. 3 Gata pajoh bansa ulôn. Kulet jih gata priek-priek dan tuleueng jih gata peuhanco. Gata koh-koh awaknyan lagée gata koh uengkot sie keu tapasoe lam beulangöng. 4 Teuma teuka watée jih gata takliek talakée tulông ubak TUHAN, teuma hana geutem jaweueb. Gobnyan hana geudeungoe peue-peue nyang gata meudoá, sabab gata ka tapeubuet hai nyang jeuhet. 5 Bansa ulôn geupeungéut lé nabi-nabi nyang geuramai nyang get keu ureuëng nyang tem bri péng, teuma geumeumusoh ngon ureuëng nyang hán jitem bri péng. Keu nabi-nabi nyang lagée nyan, TUHAN meufeureuman, 6 "He nabi, watée gata ka rab habéh; mata uroe gata teungoh jilob. Gata hana le tateumé kalon nyang deuh-deuh teungieng nyang teupeugah ubak reuncana-reuncana Ulôn. Gata hana neuteumé le taramai peue-peue mantong." 7 Ureuëng-ureuëng nyang ramai uroe ukeue meuteumé malée sabab peue-peue nyang jiramai nyan hana trok ban jilakée. Awaknyan bandum meuteumé malée sabab Po teu Allah hana geujaweueb awaknyan. 8 Teuma keuhai droe ulôn nyoe, TUHAN ka geupasoe ulôn deungon roh Gobnyan dan kuasa Gobnyan. Ubak ulôn geubri peungeurtian keuhai keuadelan, dan meunan cit keubeuranian keu lôn peugah ubak ureuëng Israel desya-desya nyang ka jipeubuet. 9 Deungoe kheueh tutoe haba lôn nyoe, he gata peunguasa Israel nyang banci ubak keuadelan dan nyang puta balek keubeunaran. 10 Gata tapeudong Yerusalem, banda Po teu Allah, nyang meudasai ubak poh meupoh maté dan keuhana adelan. 11 Peunguasa-peunguasa banda geumat peurintah mangat meuteumé péng teusulueng, imeum-imeum geupeurunoe huköm TUHAN mangat na gaji, dan nabi-nabi geulakée peutunyok ubak Po teu Allah mangat meuteumé péng -- laju awaknyan banmandum geupike TUHAN na blah awaknyan. Awaknyan jipeugah, "TUHAN na lamkawan geutanyoe; geutanyoe hana keunong bala bahya." 12 Sabab keujeuhetan gata nyan, Sion jimeu ué lagée blang, Yerusalem jeuet keusinamon rungka, dan Bukét Baét TUHAN jeuet keu uteuen beulantara.

Mikha 4

1 Bak uroe-uroe nyang teuka bukét, teumpat Baét TUHAN, teuma teudong cot dan manyang meulambong leubeh nibak gunong-gunong dan bukét-bukét. Meubagoe bansa meurön-rön jijak keunan. 2 awaknyan bandum jipeugah, "Jak geutanyoe ta ék u bukét TUHAN ubak Baét Allah Israel! Gobnyan geupeurunoe geutanyoe peue nyang harôh tanyoe peubuet. Geutanyoe ta seutôt rot Gobnyan sabab ajaran TUHAN teuka nibak Yerusalem; di Sion Gobnyan geumariet ubak umat Geuh." 3 TUHAN geupeuputôh peukara lamkawan bansa-bansa, lamkawan nanggroe-nanggroe nyang teuga, nyang jiôh meunan cit nyang rab. Awaknyan geuba bak teumpeuen peudeueng-peudeueng jih keudroe mangat jeuet keu mata langai dan kapak-kapak awaknyan beujeuet keu sikin meugunteng. Bansa-bansa ka hana le jeuet keu bansa peunyeurang, hana cit meusiab-siab keu jijak muprang. 4 Tieb-tieb ureuëng udeb aman dan seujahteura di teungoh lampôh anggô dan lampôh ara; hana ureuëng nyang peutakot-takot gobnyan, nyan kheueh janji TUHAN Nyang Mahakuasa. 5 Tieb-tieb bansa di ateueh bumoe jiseumah dan taát ubak dewa jih keudroe. Teuma geutanyoe taát ubak TUHAN Allah geutanyoe dan taseumah Gobnyan siumu masa. 6 TUHAN meufeureuman, "Teuma teuka watée jih Ulôn Lôn peusapat bubena ureuëng nyang Ulôn huköm, awaknyan nyang meudeurita bak teumpat nyang teuböih. 7 Awaknyan ka lapée dan jiôh di gampông droe. Teuma, nibak ureuëng-ureuëng nyang na mantong teutinggai nyan Ulôn Lôn peuphon saboh keuturonan nyang barô. Awaknyan jeuet keubansa nyang rayeuk dan teuga. Ulôn Lôn peurintah awaknyan di Bukét Sion keu siumu masa." 8 Dan gata Yerusalem, teumpat Po teu Allah geujaga umat Gobnyan lagée ureuëng meurabe jijaga kawan bubiri jih, gata jeuet lom sibagoe ma banda keurajeuen gata lagée yoh awai phon. 9 Pakon gata tamo ba-e teuga-teuga? Pakon gata meudeurita lagée ureuëng inong nyang keuneuk peulahé aneuëk? Peu kheueh sabab gata hana meuraja, dan peunaseuhat-peunaseuhat gata ka habéh maté? 10 He peunduduek Yerusalem, teubôt-bôt kheueh dan apoh apah kheueh lagée ureuëng inong keuneuk peulahé aneuëk! Sabab, bak saát nyoe gata harôh tatinggai banda dan gata tinggai di padang. Gata harôh tajak u Babel, teuma disinan TUHAN geupeulheueh gata nibak musoh-musoh gata. 11 Jai lumpah na bansa ka meugumpôi keuneuk jak seurang gata, he Yerusalem! Awaknyan jipeugah, "Yerusalem harôh teupeuhanco! Kamoe ngieng banda nyan ka jeuet keu bangke!" 12 Teuma bansa-bansa nyan hana jiteupeue peue nyang teungoh geureuncana lé TUHAN. Awaknyan hana jisadar bahwa awaknyan teungoh jipeusapat keu teuhuköm, saban lagée gandom nyang teugumpôi keu teujak lo. 13 TUHAN meufeureuman, "He peunduduek Yerusalem, tajak kheueh dan tagilo-gilo kheueh bubena musoh-musoh gata! Ulôn Lôn peujeuet gata leubeh teuga lagée leumô nyang meulungkée beuso dan meugukée teumaga. Gata tapeuhanco bansa nyang le, dan keukayaan nyang awaknyan teumé nibak hase teureupah teuma gata peuseumah ubak Ulôn, TUHAN seumeusta álam." 14 He peunduduek Yerusalem, talakée kheueh deungon meuharab that mangat TUHAN geutulông gata! Geutanyoe teungoh jikeupông! Musoh teungoh jiprang bubena peumimpén Israel!

Mikha 5

1 TUHAN meufeureuman, "He Betlehem Efrata, gata saboh banda nyang paleng ubit di Yehuda! Teuma nibak gata Lôn peubeudôh sidroe peunguasa keu Israel nyang asai asui jih phon jamén dilée." 2 Dan, TUHAN geupeubiyeu umat Gobnyan jikuasa lé musoh-musoh awaknyan keudroe sampoe ubak ureuëng inong nyang ka geupeunteuntée mangat jeuet keusidroe ma peunguasa nyang ka geupeulahé Gobnyan. Óh ka lheueh nyan ureuëng-ureuëng nyang saboh bansa ngon gobnyan nyang mantong na di teumpat nyang teuböih geupeusaho lom deungon bansa awaknyan. 3 Meunyoe peunguasa nyan ka teuka, Gobnyan jipeurintah umat Gobnyan deungon teunaga dan keukuasaan nibak Po teu Allah jih keudroe. Umat Geuh udeb deungon aman, sabab bandum ureuëng bansigom donya jiaku keubeusaran Gobnyan, 4 dan Gobnyan geubri keudaméan. Meunyoe tantra Asyur jiseureubu nanggroe geutanyoe dan jiheuntam peutahanan geutanyoe, tanyoe ta krah bubena peumimpén-peumimpén geutanyoe nyang paleng khong keu geujak prang awaknyan. Peumimpén-peumimpén geutanyoe nyan geupeutaloe Asyur deungon teunaga sinjata, dan geupeuseulamat geutanyoe nibak jaroe awaknyan. 6 Ureuëng Israel nyang mantong tinggai jeuet lagée iémbon nyang leupie nibak TUHAN keu bansa-bansa, dan lagée ujeuen tron ateueh seunaman. Awaknyan meusadeue ubak Po teu Allah, dan bukon ubak manusia. 7 Ureuëng Israel nyang mantong tinggai lamkawan bansa-bansa teuma jeuet lagée singa lamkawan beulatang-beulatang uteuen atawa lamkawan bubiri di blang naleueng. Singa nyan jitamong u lamkawan bubiri sira jigilo-gilo dan jipriek-priek; hana ureuëng nyang hase jipeulheueh bandum bubiri nyan. 8 Israel jipeutaloe bubena musoh dan bandum awaknyan jipeuhanco. 9 TUHAN meufeureuman, "Bak watée nyan teupeuranab bandum guda gata, dan teupeubinasa bandum geuritan prang gata. 10 Banda-banda nyang meukuta di nanggroe gata Lôn peuhanco, dan bandum kuta gata Lôn peudata ngon tanoh. 11 Jimat-jimat gata Lôn peuranab dan bandum tukang ramai gata Ulôn kireuh uluwa. 12 Ulôn Lôn peuhanco bubena patong gata meunan cit deungon tugu-tugu keuramat gata; gata hana le taseumah beunda-beunda nyang jipeugot lé jaroe gata keudroe. 13 Tugu-tugu Dewi Asyera di nanggroe gata Ulôn peureubah, dan banda-banda gata nyang meukuta Lôn peuhanco. 14 Lam beungéh Ulôn nyang lagée ié ju nyan Ulôn Lôn balaih bandum keujeuhetan bandum bansa nyang hana taát ubak Ulôn."

Mikha 6

1 Deungoe kheueh peue nyang geutudoh lé TUHAN keu Israel. Beudôh kheueh, ya TUHAN, dan neujok kheueh peungaduan Droeneueh! Bah kheueh gunong dan bukét jideungoe peue nyang keuneuk Droeneueh peugah. 2 He gunong-gunong, he dasar bumoe, deungoe kheueh peungaduan TUHAN! Gobnyan na peukara deungon Israel umat Gobnyan dan geutunton awaknyan. 3 TUHAN meufeureuman, "He umat Ulôn, peue nyang ka Ulôn peubuet ateueh gata? Lam hai peu kheueh Ulôn peususah gata? Jaweueb kheueh Ulôn! 4 Gata ka Ulôn ba Lôn peuteubiet nibak nanggroe Meusé, dan Ulôn peubeubaih nibak jipeujeuet keu namiet; Ulôn ka Lôn kirém Nabi Musa, Nabi Harun, dan Maryam keu jipimpén gata. 5 Umat Ulôn, ingat kheueh peue nyang jireuncana lé Balak raja Moab ateueh gata, dan peue nyang jijaweueb lé Bileam bin Beor keu jihnyan. Ingat kheueh peue nyang teujadi watée teujak lamkawan peukhimahan deungon Sitim dan Gilgal. Meunyoe gata neuingat keu bandum nyan, gata tateupeue peue nyang ka Ulôn peubuet keu Lôn peuseulamat gata." 6 Peu kheueh nyang harôh tapeuseumah ubak TUHAN, Po teu Allah nyang na di syeuruga, meunyoe geutanyoe tajak meuiébadat ubak Gobnyan? Peu kheueh harôh taba leumô muda nyang paleng gét keu tapeuseumah sibagoe keureubeuen nyang teutot ubak Gobnyan? 7 Peu kheueh TUHAN galak meunyoe geutanyoe taba meuribée-ribée bubiri atawa minyéuk zaiton nyang meulimpah? Dan peu kheueh harôh tapeuseumah ubak Gobnyan aneuëk geutanyoe nyang tuha sibagoe sineuboh ateueh desya-desya nyang geutanyoe peubuet? 8 Hana! TUHAN ka geupeugah ubak geutanyoe peue nyang paleng gét. Nyang geulakée ubak geutanyoe na kheueh mangat geutanyoe tapeubuet nyang ade, sabe geutanyoe amai cinta dan gaséh sayang, dan deungon miyueb até udeb meusaboh ngon Po teu Allah. 9 Lumpah bijaksana keu tatakot ubak TUHAN. Gobnyan geutawök ubak peunduduek banda, "Deungoe kheueh, he gata nyang meusapat di banda! 10 Di rumoh ureuëng-ureuëng jeuhet na hareuta nyang jiteumé deungon cara teumipée. Awaknyan jipeuguna sinukat nyang peuleusu, buet nyang paleng Ulôn banci. Ureuëng nyang peubuet lagée nyan Lôn huköm. 11 Hana mungken Ulôn peuamphon ureuëng nyang peuguna sinukat peuleusu? 12 Ureuëng-ureuëng kaya nyang na di banda gata jitindéeh ureuëng gasien, dan gata banmandum ureuëng buhak. 13 Bak saát nyoe Ulôn ka Lôn peuphon seukok dan Lôn peuhanco gata sabab desya-desya gata. 14 Gata teuma tamakheun, teuma hana jitem tro -- teuma teutab deuk. Gata ta angkot barang-barang, teuma hana hase tapeu aman. Peue mantong nyang gata peu aman Lôn peuhanco dimideuen prang. 15 Gata tatabu gandom, teuma hana tapot hase jih. Gata tapeugöt minyéuk nibak boh zaiton, teuma hana tateumé ngui minyéuk zaiton nyan. Gata taprah ié boh anggô, teuma hana tajieb. 16 Bandum nyan teujadi sabab gata taseutôt buet-buet nyang jeuhet nibak Raja Omri dan aneuëk jihnyan, nyan kheueh Raja Ahab. Gata taseutôt cara-cara awaknyan. Sabab nyan Ulôn Lôn hanco gata, dan gata jipeubeb dan jihina lé sigala bansa."

Mikha 7

1 Cilaka ulôn! Ulôn lagée ureuëng deuk nyang lôn jak pot boh kayée óh hana le musém jimuboh. Ka hana le jimuboh kayée di ateueh bak. Boh anggô dan boh ara nyan pih ka habéh jipot. 2 Ureuëng jujoe ka hana le lam nanggroe, ureuëng nyang seutia ubak Po teu Allah ka hana meurumpok le. Tieb-tieb ureuëng jipreh keuseumpatan keu geupeu maté ureuëng laén. Maséng-maséng jiteun jeunieb keusabe keudroe-droe. 3 Bandum ureuëng malem that bak buet jeuhet. Peujabat dan hakém geulakée péng sogok, dan ureuëng patot-patot geupaksa keuheundak droe, meunan kheueh awaknyan ka sipakat bulat bak buet nyang hina. 4 Nyang paleng gét dan paleng jujoe lamkawan awaknyan pih lagée tamah meuduroe nyang hana meuguna. Ka watée jih Po teu Allah geuhuköm umat Gobnyan lagée nyang ka geupeuingat ubak awaknyan meulalu nabi-nabi. Bak saátnyoe ka jipeubeudôh karu lamkawan awaknyan keudroe. 5 Bék tapatéh ubak kawöm lingka gata, dan bék teuma meusadeue ubak rakan. Beu até-até kheueh ngon tutoe haba gata bahpi nyang deungoe nyan peurumoh gata keudroe. 6 Sabab, bak masa nyang lagée nyoe anggota keuluwarga saléng meumusoh: aneuëk agam jihina ureuëng syiek jih keudroe, aneuëk inong jilawan ma jih, dan meulintée nyang inong jimeudakwa ngon tuwan jih keudroe. 7 Teuma geutanyoe meuharab ubak TUHAN; deungon peunoh keuyakénan tanyoe preh Po teu Allah geutanyoe. Gobnyan geudeungoe doá geutanyoe dan geupeuseulamat geutanyoe. 8 Hana alasan nibak musoh-musoh geutanyoe keu meuseunang-seunang ateueh keuhancoran geutanyoe. Sabab bahpi geutanyoe rhot, geutanyoe tabeudôh lom teuma. Bak saátnyoe geutanyoe na lam seupôt, teuma TUHAN geupeutrang geutanyoe. 9 Geutanyoe ka meudesya ubak TUHAN, sabab nyan bak saát nyoe geutanyoe harôh tarasa beungéh Gobnyan. Teuma hana treb le Gobnyan geubila geutanyoe dan geubri keuadelan ubak geutanyoe. Gobnyan geuba geupeuteubiet geutanyoe ubak nyang peungéueh; geutanyoe ta rasa keudroe bahwa Gobnyan geupeuseulamat geutanyoe. 10 Yoh masa ilée musoh jihina geutanyoe sira jipeugah, "Dipat kheueh TUHAN, Allah gata nyan?" Teuma bak saát nyoe awaknyan jikalon peue nyang geupeubuet lé TUHAN keu geutanyoe, dan awaknyan meuteumé malée. Geutanyoe takalon musoh-musoh geutanyoe nyan geupeutaloe dan geubloh-bloh lagée leuhôb bak rot ueh raya. 11 He Yerusalem! Ka trok watée jih gata peudong lom bintéh-bintéh beuton banda gata. Bak uroe nyan wilayah gata teupeuluwah. 12 Ureuëng-ureuëng gata jigisa ubak gata dipat -- di Asyur di siblaih utimu, di nanggroe Meusé di siblaih seulatan, di daerah Krueng Efrat, di meurandeh laôt dan nibak gunong-gunong nyang jiôh. 13 Teuma bumoe jeuet keu tho kreng sabab buet nyang jeuhet nyang jipeubuet lé peunduduek bumoe nyan. 14 Ya TUHAN, neurabe kheueh umat Droeneueh, umat nyang Droeneueh piléh. Awaknyan tinggai teu aséng di uteuen raya, bak teungoh tanoh nyang subô gumbo. Bah kheueh awaknyan meuteumé peunajoh bak blang naleueng Basan dan Gilead lagée yoh jamén dilée. 15 Neupeugöt kheueh buet nyang ajaéb keu kamoe, ya TUHAN, lagée nyang ka TUHAN peugöt yoh masa ilée bak watée Droeneueh neupeuteubiet kamoe di nanggroe Meusé. 16 Bansa-bansa jikalon hai nyan dan meuteumé malée sabab jisada bandum teunaga awaknyan hana areuti meubacut pi. Awaknyan gadôh ákai sampoe hana jeuet jimariet atawa jimeudeungoe. 17 Awaknyan geumeu éue nibak tanoh lagée uleue. Deungon teumakot dan yo meugám-gám awaknyan jiteubiet lam kuta teumpat jimeuteun, laju jijak ubak Droeneueh, ya TUHAN Po teu Allah kamoe. 18 Hana Allah nyang lagée Droeneueh, ya TUHAN, nyang peuamphon desya umat piléhan Droeneueh nyang mantong na tinggai. Hana keu siumu masa Droeneueh beungéh; sikeubit jih, Droeneueh galak neubri cinta Droeneueh nyang hana meubataih nyan. 19 Droeneueh neubalaih gaséh lom ubak kamoe dan neu peuamphon kamoe. Desya-desya kamoe Droeneueh gilo-gilo dan Droeneueh geulawa lam laôt raya! 20 Ubak umat Droeneueh, keuturonan Nabi Ibrahim dan Nabi Yakub, Droeneueh neutunyok keuseutiaan Droeneueh dan cinta Droeneueh nyang hana meubataih nyan lagée nyang Droeneueh peujanji ubak indatu kamoe yoh masa ilée.

Nahum 1

1 Nyoe kheueh peusan Po teu Allah keuhai Niniwe. Peusan nyan geupeudeuh deungon keumalon nyang geubri ubak Nahum, sidroe nabi nyang meuasai nibak Elkos. 2 TUHAN Allah hana ngon peusa, ureuëng nyang lawan Gobnyan pasti meuteumé huköman. Deungon meureuka Gobnyan nyang hana teukira, Gobnyan geubalaih dam keu awaknyan. 3 Beutôi TUHAN, hana bagaih beungéh; teuma Gobnyan lumpah that meukuasa dan barang sigasoe nyang peubuet salah hana geupeubeubaih nibak huköman. 4 Gobnyan geuancam laôt dan geupeutho hana meu ié, bubena ié krueng ka habéh geupeutho. Gunong Karmel dan padang-padang di Basan ka jeuet keu tô kreng dan di libanon bubena bungöng ka habéh layée. 5 Gunong-gunong ka habéh yo dikeue Gobnyan; dan bukét pih ka habéh caye bube nyang na. Meunyoe TUHAN teuka, bumoe meuhayak, donya dan bandum peunduduek disinan ka habéh yo. 6 Soe nyang ék peuteuen meunyoe TUHAN meureuka? Hana nyang hase tuwoe meunyoe Gobnyan nyang meureuka? Gobnyan nyang peusak hôb nyang hu meubura batée hanco dan jeuet keu abée dikeue Gobnyan. 7 TUHAN nyan gét, Gobnyan geulindong umat Geuh bak watée susah, Gobnyan geujaga ureuëng nyang meulindong ubak Gobnyan. 8 Lagée ié raya teuka nyang jipeurön peue nyang na, geupeuhanco bandum musoh-musoh Gobnyan. Awaknyan nyang jijeuet jilawan Gobnyan laju geuheuntam deungon mawöt sampoe binasa. 9 Reuncana peue mantong nyang gata peugét talawan TUHAN, pasti meuteumé keugagalan. Di Gobnyan hana geubalaih dam sampoe dua goe ubak musoh-musoh Gobnyan. 10 Gata geutot lagée jumpung nyang tho kreng lagée tamah meuduro nyang meucaruéh hana meuteuntée. 11 Nibak gata, he Niniwe, ka teuka sidroe ureuëng nyang peunoh deungon reuncana jeuhet. Ureuëng nyan jipeugét reuncana keu jilawan TUHAN. 12 Dan feureuman TUHAN ubak Israel, umat Gobnyan, "Bahpi ureuëng-ureuëng Asyur nyan teuga dan jai jeumeulah jih, teuma awaknyan teupeuhanco laju gadôh. He bansa Ulôn, Ulôn ka Lôn peujeuet gata meudeurita, teuma hainyan hana Lôn peubuet le. 13 Jinoenyoe Lôn peu habéh keukuasaan Asyur ateueh gata, dan Lôn peuputôh ranté nyang teuikat bak gata." 14 Nyoe kheueh keuputosan TUHAN keuhai bansa Asyur, "Awaknyan hana le keuturonan keu geunantoe bansa. Patong-patong beurala nyang na didalam kuil-kuil dewa awaknyan, Lôn peuhanco. Lampôh jrat keu bansa Asyur teungoh Lôn peusiab, sabab awaknyan hana meuguna meunyoe udeb!" 15 Kalon, sidroe utosan teungoh teuka nyang jijak rot ateueh gunong-gunong, jiba haba gét, haba keumeunangan. He bansa Yehuda, peuraya kheueh uroe raya gata dan tapeulheueh kheueh kaôi gata ubak Po teu Allah. Nanggroe gata hana le jijajah lé ureuëng jeuhet. Awaknyan ka geupeuhanco bube nyang na.

Nahum 2

1 He Niniwe, deungoe kheueh nyoe! Nyang keuneuk peurusak gata ka trok jiteuka! Jaga kheueh kuta-kuta peutahanan! Jaga kheueh teuma bubena rot! Meusiab kheueh keu tajak muprang. ( 2 Keubit, TUHAN geupeupuléh keumeugahan Israel, mangat jeuet lagée yoh ilée, sigohlom jireubot lé musoh-musoh jihnyan.) 3 Peurisai musoh wareuna jih mirah, dan seuragam awaknyan lagée darah. Musoh ka siab keuneuk jirungköm. Lagée apui, beuso geuritan jihnyan meukilat. Bandum guda awaknyan jilumpat-lumpat. 4 Bak rot ueh, bubena geuritan jijak deungon beubaih. Nibak padang, awaknyan jimeulet-let. Deuh jih lagée suwa nyang hu meuble-ble, jimeulet tajam lagée geulanteue. 5 Bubena peuwira jimeuhôi maju; awaknyan meugantoh-gantoh watée jiseureubu. 6 Babah pintoe ié banmandum krueng ka habéh teuhah, dan subra kheueh bansaboh meuligoe! 7 Ratu ka hase jidrob, deundayang jihnyan áh éuh dan jimo ba-e, awaknyan apoh apah lagée cicém leuek, dan jipeh-peh dada sabab meuduka. 8 Rakyat Niniwe jiplueng meuhambo, lagée ié jiteubiet bak seuneulob nyang hanco. Na teudeungoe su meudumpék, "Piôh, piôh!" teuma hana nyang jitem woe lom. 9 Reupah kheueh bandum méuh dan pirak awaknyan! Hareuta nyang na bak banda nyoe keubit meulimpah ruwah! 10 Niniwe ka hanco, seungue dan tho kreng. Até ka jeuet keutabeue sabab teumakot. Teuôt ka jeuet keuleumoh dan yo meukot-kot. Muka bandum ureuëng ka jeuet keupucat dan masam. 11 Dipat kheueh banda nyan bak saát nyoe? Banda nyang lagée guha teumpat singa meu uempueng? Teumpat aneuëk-aneuëk singa teubri makheun, teumpat tujuan singa agam dan singa inong, teumpat nyang aman keu aneuëk-aneuëk jih. 12 Yoh masa ilée disinan singa jiteugöm mangsa jih, dan jipriek-priek disinan keu inong dan aneuëk-aneuëk jih. Lam uempueng singa nyan ka habéh peunoh deungon uengkot-uengkot sie hase jipeucrok lé singa nyan. 13 "Ulôn nyoe musoh gata," geupeugah lé TUHAN Nyang Mahakuasa. "Geuritan-geuritan gata Ulôn tot habéh. Sipa-i gata maté dimideuen prang, dan Ulôn kucok peue-peue mantong nyang ka gata cok bak ureuëng laén. Peue-peue nyang jituntut lé bandum utosan gata hana teudeungoe le."

Nahum 3

1 Ceulaka kheueh banda nyoe nyang peunoh deungon sulet dan seumeupoh maté; peunoh ngon barang rampasan atawa barang jarahan. 2 Deungoe kheueh su peunyenuet dan grak-gruk su ruda, grak langkah guda plueng dan geuritan meuguncang. 3 Pasokan meuguda jiseurang peunoh seumangat, peudeueng meuble-ble dan kapak meukilat. Ureuëng nyang maté manyét meugule hán ék teukira, manyét awaknyan meugageueng dan meutamon sapan sapa, watée jijak ureuëng meugantoh meuhila. 4 Niniwe lunte nyan teungoh geubri huköman. Ceudah jihnyan gagah lumpah na. Jai that bansa nyang ka jisihe, dan jibujuk ngon rayuan. 5 TUHAN Nyang Mahakuasa meufeureuman, "He Niniwe, gata Lôn seksa! Ija nyang meulekek nibak gata Ulôn suet dikeue bansa nyang ramé, deungon nyan ayéb gata jikalon lé awaknyan. 6 Ulôn peujeuet gata lagée barang nyang kutoe dan luwat, dan Lôn geulawa gata deungon kutoran; Lôn peujeuet gata bahan tontonan. 7 Nyang kalon gata jipeujiôh droe dan jipeugah, 'Niniwe nyang na tinggai na kheueh rungka-rungka beulaka! Soe nyang seutôt meuseudeh deungon jihnyan? Hana ureuëng nyang jitem bri hiboran keu jihnyan.' " 8 He Niniwe, hana mungken gata leubeh gét nibak Tebe, ma banda nanggroe Meusé? Tebe nyan teuduek jih bak binéh krueng nyang lindong jihnyan sibagoe bintéh beuton. Nyoe, Krueng Nil nyan kuta peutahanan jih. 9 Tebe jimat peurintah ateueh Sudan dan Meusé, dan kuasa jihnyan hana meubataih; Libia dan Put na kheueh sahabat jih. 10 Bahpi lagée nyan, peunduduek Tebe jiteun dan ji angkot u teumpat nyang teuböih. Di tieb-tieb simpang-simpang rot, aneuëk-aneuëk jihnyan jipoh sampoe maté. Bubena ureuëng rayeuk awaknyan jibeuleunggu deungon ranté dan jijok-jok keu ureuëng-ureuëng nyang teun awaknyan. 11 He Niniwe, gata pih pansan sabab mabök. Gata pih ta useuha jeuet teuhinda nibak musoh-musoh gata. 12 Bandum kuta gata jeuet lagée bak ara nyang peunoh deungon boh nyang masak. Meunyoe bak ara nyan teuguncang, bubena boh jih rhot lam babah ureuëng nyang keuneuk pajoh boh ara nyan. 13 Tantra-tantra gata leumoh lagée ureuëng inong dan nanggroe gata meubacut pih hana meudaya jihadab musoh. Apui jipeuhangöh bubena palang pintoe geureubang gata. 14 Cröng kheueh ié keu takeubah simantong gata jikeubok, dan tapeukong kheueh kuta-kuta gata! Ta bloh-bloh kheueh lam leuhob keu teupeugét batée bata, dan peusiab kheueh acuwan-acuwan keu teucetak batée bata nyan! 15 Peue mantong nyang gata peubuet, sia-sia mantong, sabab gata pasti habéh hangöh teutot atawa maté dimideuen prang. Gata teusampôh lagée hase ladang jipajoh lé daruet. Gata meutamah jai lagée kawan daruet! 16 Ureuëng-ureuëng meukat gata leubeh le nibak bintang di langét! Teuma bak saát nyoe awaknyan teusampôh hana meubeukaih, lagée daruet nyang jikeupak sayeub dan laju jipo sampoe gadôh. 17 Bubena ureuëng rayeuk dan peujabat gata lagée kawan daruet nyang meulindong ubak beuton-beuton óh teuka sijuek. Teuma óh ka lheueh mata uroe jiteubiet, jihnyan laju jipo dan gadôh; hana meusidroe nyang teupeue ho awaknyan jijak. 18 He raja nanggroe Asyur! Bubena gubunur gata ka maté, dan bubena bupati gata ka teuéh siumu masa. Rakyat gata ka meu crebre digunong-gunong, dan hana meusidroe pih nyang hase jiba awaknyan jipeuwoe lom teuma. 19 Cidra gata hana hase teupeu ubat, dan luka-luka gata hana hase teupeupuléh. Bandum ureuëng nyang deungoe haba keuhai keuhancoran gata jipeh paleuet sabab harok raya. Sabab bandum ureuëng ka meudeurita sabab keujeuhetan gata nyang hana keuneulheuh nyan.

Habakuk 1

1 Nyoe peusan nyang geupeusampoe lé TUHAN ubak Nabi Habakuk. 2 Ya TUHAN, sampoe án pajan ulôn harôh meulakée tulông? Pajan Droeneueh neudeungoe dan neupeuseulamat kamoe nibak jitindéeh lé gob? 3 Pakon Droeneueh peubiyeu ulôn ngieng keujeuhetan nyang meunan le? Trok até Droeneueh neukalon peulanggaran nyang meunan jai? Dipat mantong na keuhancoran dan keukeurasan, dan ureuëng meulo dan peuseuliseh paham. 4 Huköm jianggab hana dan keuadelan hántom na jipeudong. Ureuëng jeuhet leubeh teuga ateueh ureuëng nyang jujoe, dan keuadelan jiputa balek. 5 Óh lheueh nyan TUHAN meufeureuman ubak umat Gobnyan, "Ngieng kheueh bansa-bansa bansilingka gata, teuma gata hireuen dan teuceungang. Sabab bak jamén gata Ulôn Lôn peubuet peue-peue mantong, nyang hana gata peucaya meunyoe teuma teucalitra ubak gata. 6 Bansa Babel nyang beuhe dan ganah nyan Lôn peujeuet keu bansa nyang meukuasa. Awaknyan meubareh keujiteubiet nibak nanggroe jihnyan dan jijeulajah bansigom donya keu teupeutaklok bansa-bansa laén. 7 Dipat mantong awaknyan jipeuteuka teumakot; deungon sombong awaknyan jitulak bandum huköm teukeucuali nyang sisuai deungon keuheundak awaknyan keudroe. 8 Guda awaknyan leubeh bagaih jiplueng nibak rimueng tutul, dan leubeh ganah nibak asée srigala nyang deuk. Pasokan meuguda awaknyan jiteuka nibak nanggroe-nanggroe nyang leubeh jiôh; awaknyan jiteuka lagée kleung seumama. 9 Sipa-i awaknyan jiseureubu keu jipeubuet buet nyang keujam, bandum ureuëng yo watée jikalon awaknyan jiteuka. Tawanan awaknyan hana ék teukira jeumeulah jih. 10 Awaknyan jihina raja-raja dan jipeukém bubena peugawée manyang. Jianggab hana tieb-tieb kuta, dan jitamon tanoh laju geureupah kuta nyan. 11 Dan lagée angén plueng jibeurangkat kheueh ureuëng-ureuëng nyang peudewa teunaga jih keudroe." 12 TUHAN, yoh ilée Droeneueh na kheueh Po teu Allah, Droeneueh Allah ulôn nyang suci dan keukai. TUHAN, Allah ulôn dan peulindong ulôn, bansa Babel nyan Droeneueh piléh dan Droeneueh peujeuet peukasa ji jihuköm kamoe. 13 Teuma pakriban Droeneueh ék neungieng ureuëng-ureuëng jeuhet nyang keujam nyan? Kon kheueh Droeneueh lumpah that suci keu neupandang keujeuhetan? Bukon kheueh Droeneueh meurasa luwat watée neukalon keuhana adelan? Jadi, pakon Droeneueh seungab mantong watée ureuëng saleh jipeuhanco lé ureuëng doraka? 14 Pakon manusia Droeneueh anggab lagée uengkot lam laôt, dan lagée sidom mirah nyang hana peumimpén? 15 Bansa Babel jidrob ureuëng-ureuëng deungon kawe, siulah-ulah awaknyan uengkot. Ureuëng-ureuëng nyan jibahue u dalam jeue dan bansa Babel mesukaria deungon hase awaknyan. 16 Óh lheuehnyan jeue nyan awaknyan seumah dan awaknyan bri peuseumahan keureubeuen, sabab, deungon jeue nyan awaknyan ka meuteumé rezeki nyang meulimpah ruwah dan ka jeuet keu makmu. 17 Ék kheueh awaknyan hana piôh-piôh jisuet peudeueng lam sarong dan geupeumaté bansa-bansa ngon hana amphon?

Habakuk 2

1 Ulôn keuneuk ék ubak meunara teumpat jaga lôn, dan ulôn preh peue nyang keuneuk geupeugah lé TUHAN ubak ulôn, dan pakriban jaweueb Gobnyan ateueh keuluhan ulôn. 2 TUHAN geujaweueb ulôn lagée nyoe, "Uke kheueh deungon nyata ateueh keupéng tanoh kliét, peue nyang Ulôn peugah ubak gata, mangat jeuet teubaca deungon mudah. 3 Cetet kheueh nyan, sabab bak saát nyoe gohlom watée jih. Teuma watée jih reujang teuka, dan peue nyang Ulôn tanyong ubak gata pasti teujadi. Bahpi leumah jih mantong treb, teuma tapreh mantong! Saát nyan pasti teuka dan hana teupeupreh le. 4 Dan ingat kheueh: ureuëng nyang jeuhet hana seulamat, teuma ureuëng nyang peubuet keuheundak Po teu Allah udeb sabab keuseutiaan jihnyan ubak Allah." 5 Keukayaan nyan sabe teupeungéut jihnyan. Ureuëng nyang leuha nyan angkuh dan geulisah. Lagée mawöt, mawöt nyan pih hántom na puih; bansa deumi bansa laju jireubot. 6 Teuma bandum nyang jipeutaklok nyan jipansi dan ji ejek-ejek jihnyan. Awaknyan jipeugah, "Teukutok kheueh gata sabab tatamon barang nyang bukon atra gata! Padub na treb teuk gata peukaya droe deungon cara tapaksa ureuëng-ureuëng nyang meu utang ubak gata keu teubayeue utang awaknyan?" 7 Teuma deungon hana gata sadar, gata nyang ka tapeutaklok ureuëng laén, jimeu utang cit teuma dan tapaksa mangat jibayeue bungöng. Musoh-musoh gata teuka sampoe gata teumakot luwa biasa. Awaknyan jireupah hareuta gata! 8 Gata ka tareupah atra bansa-bansa nyang jai, teuma bansa-bansa nyang hana keunong gata reupah jireupah gata, sabab seumeupoh maté nyang ka gata peubuet, dan sabab keukeujaman ateueh nanggroe-nanggroe, banda-banda dan peunduduek nyang na disinan. 9 Teukutok kheueh gata! Gata tapeukaya keuluwarga gata deungon laba nyang gata teumé seucara keujam, mangat rumoh gata keudroe aman dan teupeusie nibak keususahan dan beuncana. 10 Teuma reuncana gata nyan meuteumé malée nibak keuluwarga gata. Deungon tareupah bansa-bansa nyang le, gata ka tapeurugoe droe gata keudroe. 11 Dan batée-batée nyang na bak beuton jilakée jikutok gata, dan taméh-taméh rumoh jiseumurak jipeumaklum meulakée nyan. 12 Teukutok kheueh gata! Gata tapeudong banda ateueh dasai keujeuhetan dan tapeudong nyan deungon teupoh maté. 13 Bansa-bansa nyang gata peutaklok meususah payah hana meuguna, dan peue-peue nyang gata peudong habéh jiuét lé apui. Bandum nyan na kheueh keuheundak TUHAN Nyang Mahakuasa. 14 Teuma lagée laôt nyang peunoh deungon ié, meunan cit deungon bumoe peunoh deungon iéleumé peungeutahuan keuhai TUHAN dan kuasa Gobnyan. 15 Teukutok kheueh gata! Gata tahina dan tapeumalée kawöm teutangga gata; tapeusaneut ateueh awaknyan teuhoyong-hoyong lagée ureuëng mabök. 16 Bak saát nyoe ka kheueh trok watée jih gata teupeumalée, dan bukon keu teuhoreumat. Keuhoreumatan gata meu ubah jeuet keulaknat. TUHAN geupaksa gata tajieb ié nibak lam cambông nyang meuasoe huköman keu gata. Gata tajieb dan meuhapit-hapit. 17 Gata takoh bak-bak kayée di uteuen Libanon, dan bak saát nyoe gata keudroe nyang teukoh. Gata tapoh maté bubena beulatang awaknyan, dan bak saát nyoe beulatang-beulatang nyan nyang peutakot gata. Bandum nyan teujadi sabab seumeupoh maté dan keukeujaman nyang ka gata peubuet ateueh bandum nanggroe, banda-banda dan peunduduek-peunduduek jih. 18 Teukutok kheueh gata! Gata tapeugah ubak kayée sikrak, "Beudôh kheueh!" atawa ubak sineuk batée rayeuk, "Beudôh kheueh!" Peu kheueh hase saboh patong jipeugah sapeue-peue ubak gata? Jeuet mantong patong nyan meulapeh ngon méuh dan pirak, teuma meunyoe nyawöng teutab hana nibak patong nyan. Keupeue guna jih patong beurala? Nyan na kheueh buet manusia beulaka. Dan nyang gata teumé nibak patong nyan na kheueh dusta. Sia-sia kheueh keupeucayaan ureuëng peugöt beurala ubak buet jaroe droe jih, nyang hana jeuet jipeugah haba nyan. 20 TUHAN na lam Baét Gobnyan nyang suci; bah kheueh bandum ureuëng di muka bumoe ji-iem droe dikeue Gobnyan.

Habakuk 3

1 Nyoe kheueh doá Habakuk: 2 Ya TUHAN, ulôn deungoe keuhai buet-buet Droeneueh, teuma rasa khitmat sampoe peunoh lam até lôn. Kira jih buet nyang rayeuk nyan Droeneueh ulang lom dan Droeneueh peuleumah bak jamén kamoe nyoe. Bah kheueh kamoe nyoe Droeneueh gaséh bahpi Droeneueh seu uem até. 3 Droeneueh Allah Nyang Mahasuci teuka di Téman, Droeneueh teuka di gunong-gunong Paran. Langét peunoh ngon keuagongan Droeneueh; bumoe peunoh ngon puja dan pujoe ubak Droeneueh. 4 Droeneueh teuka ngon cahya muble-ble, lam jaroe Droeneueh jiteubiet cahya geumilang, disinan kheueh neusöm kuasa Droeneueh. 5 Neuyue peunyakét jijak dikeue Droeneueh dan mawöt jiseutôt dilikot Droeneueh. 6 Meunyoe Droeneueh neupiôh, bumoe meugeunta; meunyoe Droeneueh neupandang, bansa-bansa teukeujot raya. Gunong-gunong nyang abadi habéh teuprah-prah; bukét-bukét nyang keukai pih jipeumiyueb droe, bak bukét-bukét nyan kheueh Droeneueh neujak yoh phon jamén purba. 7 Ulôn ngieng rakyat Kusyan ka teuka teumakot, dan ureuëng Midian yo ngon teuôt. 8 Ya TUHAN, sabab laôt kheueh Droeneueh jiék darah? Atawa sabab krueng-krueng kheueh Droeneueh reujang beungéh? Neuék lam awan sibagoe guda dan geuritan prang, watée umat Droeneueh neupeumeunang. 9 Aneuk beude Droeneueh ka neukeubah, dan panah Droeneueh ka siab keu neutimbak. Laju bumoe Droeneueh prah sampoe jeuet na padub boh krueng. 10 Teungieng ubak Droeneueh, gunong-gunong meuguncang nibak langét jitron ujeuen lagée teuro. Ié nyang na dimiyueb tanoh meugrum-grum jimeusu, geulumbang meugulong-gulong dan meubura-bura. 11 Cahya aneuk-aneuk panah Droeneueh jiplueng ngon bagaih, kapak Droeneueh muble-ble meukilat-kilat, dan jipiôh kheueh mata uroe dan buleuen di teumpat droe. 12 Deungon beungéh that Droeneueh laju neurawoh bansaboh bumoe; bansa-bansa neugilo-gilo deungon seu uem até. 13 Droeneueh neulangkah maju keu neupeubeubaih umat Droeneueh dan keu neupeuseulamat raja nyang Droeneueh piléh. Neuheuntam sampoe reubah peumimpén ureuëng durjana, Droeneueh sampôh habéh bubena murit jih awaknyan. 14 Panah-panah Droeneueh teutimbak sampoe beusot peumimpén pasokan lawan watée sipa-i awaknyan teuka nyang teuga lagée angén badée, mangat kamoe jipeu crebre. Awaknyan jikém-kém deungon galak lagée ureuëng nyang deungon seungab-seungab jiteugom ureuëng nyang hana sapeuena. 15 Deungon guda Droeneueh neubloh-bloh lam samudra raya dan laôt yang putéh meukuboh busa. 16 Ban teudeungoe nyan, até ulôn meudok-dok dan bibi ulôn yo meumet-met. Ulôn ka jeuet keuleumoh hana teunaga, gaki ulôn meugantoh, dipat mantong ulôn jak. Ulôn lôn preh deungon teunang huköman Po teu Allah ateueh ureuëng nyang seurang. 17 Bahpi bak ara hana jimeuboh dan bak anggô hana anggô jih, bahpi musém pot boh zaiton hana meuhase dan hase gandom di ladang lumpah keucewa, bahpi bubiri-bubiri maté banmandum dan uempueng-uempueng beulatang peulara hana meuasoe, 18 ulôn geumbira sabe, sabab Droeneueh TUHAN Po teu Allah nyang peuseulamat lôn. 19 Droeneueh neubri keu lôn teunaga lagée gaki rusa, gaki ulôn neupeuteuga. Droeneueh neubimbéng ulôn jeuet aman watée ulôn jak bak gunong-gunong.

Zefanya 1

1 Zefanya na kheueh aneuëk Kusyi. Urotan silsilah geuh rot miyueb u ateueh na kheueh Kusyi, Gedalya, Amazia dan Raja Hizkia. Nyoe kheueh feureuman TUHAN ubak Zefanya bak watée Raja Yosia bin Amon geumat peurintah ateueh Yehuda. 2 TUHAN meufeureuman, "Ulôn Lôn peuranab peue-peue nyang na di ateueh bumoe: 3 bandum manusia dan beulatang, meunan cit deungon cicém dan uengkot. Ureuëng jeuhet Lôn peuhabéh. Bandum umat manusia Lôn peubinasa, hana meusidroepi Lôn peubiyeu udeb. Ulôn, TUHAN, ka Lôn peugah haba. 4 Ulôn Lôn huköm peunduduek Yerusalem dan bansaboh Yehuda. Séuh-séuh nyang seumah Baal Lôn peuranab nibak teumpat-teumpat nyan. Imeum-imeum nyang peutimang Baal jipeutuwoe hana ji ingat le. 5 Ulôn Lôn sampôh gleh soe-soe mantong nyang ék ateueh bubong keu jijak seumah mata uroe, buleuen dan bintang-bintang. Meunan cit Lôn peuranab teuma awaknyan nyang seumah Ulôn dan meusumpah seutia ubak Ulôn, teuma jimeusumpah cit ateueh nan Dewa Milkom. 6 Ulôn Lôn peubinasa awaknyan nyang hana jijak ubak Ulôn atawa jilakée bimbéngan Ulôn dan nyang ka jitinggai Ulôn dan hana jitem le jiseutôt Ulôn." 7 Uroe TUHAN ka rab that-that, bak uroe nyan Po teu Allah meutindak; sabab nyan, peuseungab droe kheueh dikeue Gobnyan. TUHAN teungoh meusiab-siab keuneuk geujak cang umat Gobnyan lagée keureubeuen peuseumahan dan Gobnyan ka geu undang bubena musoh-musoh Yehuda. 8 "Nibak uroe teucang-cang nyan," feureuman TUHAN, "Ulôn Lôn huköm bubena ureuëng rayeuk, bubena aneuëk agam raja-raja, dan bandum ureuëng nyang jiseutôt tata cara ureuëng aséng. 9 Ulôn Lôn huköm bandum ureuëng nyang meu iébadat lagée ureuëng nyang hana jituri ubak Ulôn, dan nyang ceumucue dan nyang peumaté gob keu teupeupeunoh rumoh majikan awaknyan deungon atra rampasan." 10 "Nibak uroe nyan," meunan kheueh feureuman TUHAN, "teudeungoe su ureuëng mo bak pintoe Geureubang Uengkot. Su ureuëng mo ba-e teudeungoe di gampông-gampông barô, dan su reulôh ngon reule nyang gram-grum teudeungoe di bukét-bukét. 11 Meuratok kheueh dan tamo kheueh watée gata deungoe nyan, he peunduduek banda nyang na di bagian miyueb, sabab bandum ureuëng meukat dan ureuëng-ureuëng peu-utang péng ka maté keunong poh! 12 Bak watée nyan Ulôn Lôn cok suwa, dan Lôn peuteung bayeueng banda Yerusalem. Teuma Lôn huköm peunduduek nyang acuh mantong dan nyang puih deungon droe jih keudroe, dan nyang jimike bahwa Ulôn, TUHAN nyang hántom na meutindak meunoe meudeh. 13 Atra awaknyan teureupah dan rumoh-rumoh awaknyan geupeuhanco. Awaknyan jipeudong rumoh, teuma hana jiduek bak rumoh nyan. Awaknyan ji-useuha jibuka lampôh anggô teuma hana ji-jieb ié anggô nyan." 14 Uroe peunghakéman TUHAN ka tô that-that, nyoe, ka tô that, dan teuka deungon sigra. Uroe nyan peunoh deungon keupeudehan, sampoe sipa-i-sipa-i nyang paleng hebat pih jikliek-kliek sabab putôh asa! 15 Uroe nyan uroe beungéh meubeungéh, keusuletan dan keususahan, uroe keuhancoran dan peuhancoran, uroe seupôt glab dan keusuraman, uroe nyang paleng seupôt dan meusagôb. 16 Siuroe suntok nyang teudeungoe su beureuguih dan dumpék muprang nibak peujuang-peujuang nyang jiprang banda-banda meukuta dan meunara-meunara manyang. 17 TUHAN meufeureuman, "Ulôn Lôn peuteuka beuncana nyang le that ateueh umat manusia, sampoe awaknyan meuraba-raba lagée ureuëng buta. Awaknyan ka meudesya ubak Ulôn, dan bak saát nyoe darah awaknyan teusintong lagée ié, dan manyét-manyét awaknyan ka habéh brok di ateueh tanoh." 18 Bak uroe nyang lumpah gli nyan TUHAN geupeuleumah beungéh Gobnyan, dan bandum méuh dan pirak awaknyan hana hase jipeuseulamat awaknyan keudroe. Bansaboh bumoe hanco meukeupeng-keupeng nyang jitot lé apui beungéh Gobnyan. Deungon sikleb siklab laju geutarek peue-peue nyang meunyawöng ateueh bumoe nyoe.

Zefanya 2

1 He bansa-bansa nyang hana meumalée, sada kheueh 2 sigohlom gata layée dan mala lagée bungöng! Insaf kheueh sigohlom trok uroe meureuka TUHAN, dan u ateueh gata jitimpok lé murka TUHAN nyang hu lagée apui nyan. 3 Tagisa kheueh ubak TUHAN, he bandum ureuëng nyang miyueb até di nanggroe nyoe, dan bandum ureuëng nyang taát ubak peue-peue nyang geupeurintah. Meutindak kheueh meunurot nyang geutem lé TUHAN, dan peumiyueb kheueh droe gata dikeue Gobnyan. Pat tateupeue gata teupeusie nibak huköman bak uroe TUHAN geupeuleumah beungéh Gobnyan. 4 Di banda Gaza hana meusidroe pih nyang geupeuseulamat. Askelon teuma seungue hana nyang keumiet. Peunduduek Asdod geu use nibak saboh seurangan nyang meudadak watée uroe peungéuh dan peunduduek Ekron geuyue wéeh nibak banda jih keudroe. 5 Teukutok kheueh gata, he ureuëng Filistin, bansa nyang tinggai bansipanyang pante. TUHAN ka geupeuteutab huköman keu gata. Gobnyan geupeubinasa gata, hana meusidroe pi nibak gata nyang na tinggai. 6 Daerah gata nyang rab ngon laôt jeuet keu blang naleueng; jambô-jambô ureuëng meurabée dan geurupoh-geurupoh bubiri jipeudong disinan. 7 Peunduduek Yehuda nyang meuhase jipeulheuh droe, jiduek bak daerah gata nyan. Awaknyan jirabée beulatang peulara nibak tanoh nyan, dan óh watée malam awaknyan jiéh di rumoh-rumoh ureuëng Askelon. Sabab TUHAN, Po teu Allah awaknyan teuma geulindong awaknyan lom dan geupeujeuet awaknyan udeb makmu lagée nyang ka-ka. 8 TUHAN Nyang Mahakuasa meufeureuman, "Ka Ulôn deungoe bansa-bansa Moab dan Amon jihina dan jipeubeb umat Ulôn. Awaknyan jipoh cakra ngon raya haba teuma jireupah tanoh umat Lôn. 9 Deumi Ulôn nyang udeb, Allah bansa Israel, Ulôn Lôn sampôh gleh Moab dan Amon lagée Sodom dan Gomora. Nanggroe-nanggroe nyan peunoh deungon mon-mon sira dan rungka-rungka abadi nyang jitimoh lé tamah meupaya. Umat Ulôn nyang teupeusie teuma jireupah peunduduek awaknyan, dan jireupah tanoh awaknyan." 10 Meunan kheueh peunduduek Moab dan Amon geuhuköm sabab awaknyan sombong dan angkuh, dan meunan cit sabab awaknyan ka jihina umat TUHAN Nyang Mahakuasa. 11 TUHAN geupeujeuet awaknyan teumakot. Gobnyan geupeuhanco bubena dewa-dewa nyang na di ateueh bumoe. Laju banmandum bansa meuiébadat ubak TUHAN, maséng-maséng di nanggroe gobnyan keudroe. 12 Meunan cit deungon peunduduek Sudan geuhuköm maté lé TUHAN. 13 Sabab nyan TUHAN geupeuguna kuasa Gobnyan keu geupeuhanco Asyur. Banda Niniwe teuma geupeujeuet seungue ngon seungab dan gurön nyang tho kreng. 14 Disinan kawan beulatang nyang meubagoe rupa ji éh-éh dan meureuhat. Kleng-kleng keutok-tok jipeugöt uempueng nibak teumpat nyan dan jiklik-klik ateueh peuradeuen. Cicém ak-ak jimeukröb-kröb bak babah pintoe. Kayée ceumara nyang na nibak bangunan-bangunan nibak banda nyan habéh teusuet. 15 Nyan kheueh nyang teujadi nibak banda nyang ria geumbira nyan dan nyang anggab droe jihnyan aman dan teuntram. Peunduduek disinan jipike bahwa banda jihnyan nyang paleng rayeuk di dalam donya. Keubit that seungue daerah nyan, hana nyang keumiet seulaén beulatang-beulatang uteuen nyang meu uempueng disinan! Soe mantong ureuëng nyang jijak rot banda nyan teukeujot dan teumakot raya.

Zefanya 3

1 Teukutok kheueh Yerusalem, banda beujat nyang galak beurontak ubak TUHAN dan nyang teugöm peunduduek jih keudroe! 2 Ceulaka kheueh banda nyang hán jitem teurimong peuingat TUHAN, dan hana teuma jitem deungoe peue-peue nyang geuseugah, nyang hana jiseurah naseb jih ubak TUHAN, dan hana jilakée tulông ubak Gobnyan! 3 Ureuëng-ureuëng rayeuk banda nyan lagée singa nyang teumauém. Hakém-hakém awaknyan lagée asée srigala nyang deuk; awaknyan keubit that leuha sampoe meusikrek tuleueng pi hana jitinggai keusingoh beungoh. 4 Nabi-nabi awaknyan hana rasa tanggong jaweueb dan hana jeuet teupeucaya; bubena teungku imeum jipeukuto peue nyang teupeu khusos keu TUHAN dan jiputa balek huköm-huköm Allah deumi keu laba awaknyan keudroe. 5 Teuma TUHAN mantong na di banda nyan; Gobnyan sabe geupeubuet nyang beutôi dan hántom na nyang salah. Tieb-tieb beungoh Gobnyan pasti geubri keuadelan ubak umat Geuh. Teuma, ureuëng nyang hana jituri ubak keuadelan di banda nyan teutab jipeubuet jeuhet dan hana meumalée. 6 TUHAN meufeureuman, "Ulôn ka jai that Lôn peuhabéh bansa-bansa; banda-banda awaknyan Ulôn peuhanco, meunan cit deungon beuton-beuton dan meunara-meunara awaknyan Ulôn peujeuet keu rungka-rungka. Banda-banda awaknyan seungue hana nyang keumiet dan rot-rot nyang na dalam banda nyan seungue. 7 Ulôn pike, 'Jinoenyoe pasti umat Ulôn jihoreumat Ulôn dan jipateh ubak peue-peue nyang Ulôn peugah. Teuntée kheueh awaknyan ji-ingat ubak peulajaran nyang ka Ulôn peuruno keu awaknyan.' Teuma nyang deuh Lôn kalon, awaknyan jipeubuet jeuhet leubeh bak nyang ka. 8 Teuma awaih! Preh mantong uroe jih Ulôn beudôh sibagoe nyang meungadu. Sabab ka Lôn peuputôh keu Lôn peusapat bansa-bansa dan keurajeuen-keurajeuen guna keu Lôn peurhot meureuka Ulôn ateueh awaknyan. Bansaboh bumoe habéh tutong ngon apui beungéh Ulôn. 9 Teuma óh lheueh nyan Ulôn ubah até bansa-bansa nyan, sampoe awaknyan jimeudoá ubak Ulôn mantong, dan hana ubak ilah-ilah nyang laén. Bansa-bansa nyan mandum jitaát ubak Ulôn. 10 Meunan cit nibak Sudan nyang jiôh, umat Ulôn nyang meucrebre jijak dan jipeuseumah keureubeuen keu Ulôn. 11 Bak watée nyan, he umat Lôn, gata hana peureulée malée sabab ka tabeurontak ubak Ulôn. Ulôn Lôn use soe-soe mantong ureuëng nyang sombong dan angkuh, dan gata hana ta beurontak le ateueh Ulôn di bukét Ulôn nyang suci. 12 Disinan teuma Lôn peubiyeu tinggai teutab saboh bansa nyang miyueb até, nyang meuharab ubak Lôn tulông. Awaknyan jeuet tinggai disinan. 13 Ureuëng Israel nyang na mantong tinggai, hana jipeubuet jeuhet le ateueh soe mantong; awaknyan hana meusulet le dan hana teuma jiteumipée. Awaknyan makmu dan seujahteura, dan hana meurasa teumakot keu soe mantong." 14 He Israel, meusurak kheueh dan meuca-e! He Yerusalem, meugeumbira kheueh deungon sipeunoh até! 15 Sabab TUHAN ka geupiôh geuhuköm gata; Gobnyan ka geu use bandum musoh gata. Gata geulindong lé raja Israel, TUHAN gata keudroe. Bak saát nyoe gata hana peureulée lé meurasa takot. 16 Teuma teuka watée ureuëng-ureuëng jipeugah, "He Yerusalem, bék kheueh teumakot dan tabeue até. 17 Gata geulindong lé TUHAN Allah gata nyang peukasa. Gata meunang sabab kuasa Gobnyan. TUHAN geumbira dan meusuka cita sabab gata, dalam gaséh Gobnyan geubri ubak gata udeb barô. 18 Sabab gata, gobnyan meucaé geumbira lagée ureuëng nyang teungoh khanuri." Kheun TUHAN, "Malapeutaka nyang jiancam gata ka Ulôn peugadôh. keuhinaan gata ka Ulôn sampôh. 19 Watée jih teuma teuka nyang teugöm gata Lôn peuhanco, dan ureuëng lapée Lôn peuseulamat; bandum ureuëng nyang teuböih Ulôn peuwoe lom teuma. Keuhinaan awaknyan Ulôn ubah jeuet keuhoreumatan; dipat mantong, bahpi bansigöm bumoe, awaknyan jipeumulia dan jipujoe. 20 Watée jih teuma teuka, peunduduek gata nyang meutabu beba Lôn peuwoe lom. Gata Ulôn peumeusyeuhu bansigöm bumoe, dan keumakmuran gata Lôn peupuléh lom." TUHAN ka geupeugah haba.

Hagai 1

1 Bak thon nyang keudua geumat keurajeuen lé Raja Darius ateueh Persia, bak tanggai sa buleuen nyang keu nam, TUHAN meufeureuman deungon peurantara Nabi Hagai. Peusan TUHAN nyan geutuju ubak Zerubabel bin Sealtiel, gubunur Yehuda, dan ubak Imeum Agong Yosua bin Yozadak. 2 TUHAN Nyang Mahakuasa meufeureuman ubak Hagai, "Bansa nyoe jipeugah bahwa gohlom watée jih keu teupeudong lom Baét Ulôn." 3 Óh lheuehnyan deungon peurantaraan Nabi Hagai, TUHAN meufeureuman ubak umat Gobnyan, 4 "He umat Ulôn, peu kheueh ka watée jih nibak gata keu tinggai dalam rumoh nyang kong dan kukôh, seudangkan Baét Ulôn mantong tinggai rungka-rungka? 5 Cuba, tangieng kheueh keuadaan gata! 6 Gata ka tatabu bijéh jai lumpah na, teuma sayang that, nyang teupot cit bacut. Bak gata na peunajoh, teuma hana seb keu teupeutroe pruet gata. Bak gata na anggô, teuma hana seb keu teupeupuih até gata. Bak gata na peukayan, teuma hana seb keu teupeu seu-uem tuboh gata. Dan upah nyang jiteurimong lé kawöm buruh hana seb keu teusambong udeb awaknyan. 7 Peu kheueh hana sada gata, pakon hai nyan teujadi? 8 Jinoenyoe, taék kheueh u bukét-bukét keu tajak cok kayée, laju peudong kheueh rumoh Ulôn; teuma Ulôn meurasa galak dan Ulôn jiseumah lom deungon cara nyang beuna. Cuba, tangieng kheueh keuadaan gata! 9 Gata neuharab hase panen nyang meulimpah ruwah, teuma sayang that nyang gata teumé cit bacut that; laju hase panen gata nyan tapeuwoe, teuma bandum nyan Ulôn ploih, sampoe habéh jiba lé angén. Pakon Ulôn peubuet nyan? Jaweueb jih na kheueh: Sabab Baét Ulôn mantong tinggai rungka-rungka, seudang di gata bandum gigéeh that tapeudong rumoh gata maséng-maséng. 10 Nyan kheueh sabab jih ujeuen hana jitem tron sampoe hana seunaman nyang jitem timoh. 11 Ulôn ka Lôn peuteuka musém khueng ateueh tanoh dan bukét-bukét, ateueh ladang-ladang gandom dan lampôh-lampôh anggô meunan cit ateueh lampôh-lampôh zaiton, dan ateueh banmandum seunimoh nibak tanoh nyoe, meunan cit ateueh manusia dan beulatang dan peue-peue mantong nyang gata useuha." 12 Óh lheueh nyan Zerubabel dan Yosua dan bandum umat Israel nyang ka geuwoe lom nibak teumpat nyang teuböih di Babel, jitaát bandum peue-peue nyang geupeugah lé Hagai, utosan TUHAN nyan. Awaknyan jipeubuet peue nyang geupeurintah lé TUHAN ubak awaknyan, sabab teumakot ubak TUHAN. 13 Laju lé Hagai geupeusampoe ubak rakyat peusan TUHAN bahwa TUHAN ka geumeujanji teuma geulindong awaknyan. 14 Meunan kheueh TUHAN geugrak até Gubunur Zerubabel, Teungku Imeum Agong Yosua dan bandum ureuëng nyang woe nibak teumpat nyang teuböih, mangat awaknyan bandum jigisa jak peudong Baét TUHAN Nyang Mahakuasa, Po teu Allah awaknyan. 15 Awaknyan jipeuphon meubuet tanggai dua ploh peuet, buleuen nam nibak thon nyang keudua masa keurajeuen peumeurintah Raja Darius.

Hagai 2

1 Bak tanggai dua ploh sa, buleuen tujoh bak thon nyang cit teuma, TUHAN meufeureuman lom meulalu Nabi Hagai. 2 TUHAN geuyue ubak Hagai mangat geumariet ngon Gubunur Zerubabel, Teungku Imeum Agong Yosua, meunan cit ubak rakyat keu geupeusampoe peusan nyoe, 3 "Peu kheueh mantong lamkawan gata nyang na taingat pakriban meugah jih Baét Ulôn nyoe yoh masa ilée? Jinoenyoe pakriban keuadaan jih. Meunurot peundapat gata? Bukon kheueh meubacut pih hana le meuguna? 4 Bahpi meunan, bék kheueh putôh asa, he gata bandum! Bék kheueh tapiôh tapeubuet nyan, sabab Ulôn teutab Lôn tulông gata. 5 Watée tateubiet lam nanggroe Meusé, Ulôn ka Lôn meujanji sabe Lôn lindong gata. Dan bak saát nyoe pih Ulôn mantong Lôn lindong gata. Lé sababnyan, bék yo gata. 6 Lam watée nyang tô Ulôn Lôn gok-gok langét ngon bumoe, darat dan laôt. 7 Bandum bansa Lôn peutakot dan hareuta beunda awaknyan jiba keunoe, sampoe Baét Ulôn peunoh deungon hareuta keukayaan awaknyan. 8 Bandum méuh dan pirak nyang na lam donya nyoe na kheueh atra Ulôn. 9 Baét Ulôn nyang barô leubeh lagak nibak Baét Ulôn nyang awai, dan disinoe Ulôn Lôn bri damé dan keumakmuran keu bansa Lôn." TUHAN Nyang Mahakuasa ka geupeugah haba. 10 Bak tanggai dua ploh peuet buleuen sikureueng bak thon nyang keudua geumat keurajeuen lé Raja Darius, TUHAN Nyang Mahakuasa meufeureuman lom ubak Nabi Hagai. 11 Kheun Gobnyan, "Lakée kheueh keuputosan ubak teungku-teungku imeum keuhai soai nyoe: 12 Meunyoe na ureuëng nyang jicok saboh cue uengkot sie nibak keureubeuen nyang jipeuseumah ubak TUHAN, laju jipeuwoe sira jipasoe lam lipat bajée jubah, dan óh lheueh nyan deungon bajée jubah jih laju jicukéeh ruti atawa peue-peue nyang na peunajoh nyang teupeumasak, atawa anggô, atawa minyéuk zaiton, atawa peunajoh peue mantong, peu kheueh bandum nyan jeuet keusuci lom?" Watée Hagai geuseuéue hai nyan, bubena teungku imeum geujaweueb, "Hana." 13 Óh lheueh nyan Hagai geutanyong lom, "Meunyoe na ureuëng nyang jeuet keukutoe sabab jicukéeh manyét, dan óh lheueh nyan ureuëng nyan laju jicukéeh ubak sapeue-sapeue peunajoh nyan, peu kheueh peunajoh nyan ka jeuet keukutoe teuma?" Bandum teungku imeum geujaweueb, "Nyoe, beutôi that!" 14 Óh lheueh nyan Hagai geupeugah lom, "TUHAN meufeureuman bahwa peuratoran nyan keunong cit ateueh umat Israel di nanggroe nyoe dan ateueh peue-peue mantong nyang awaknyan peuhase. Lé sababnyan, peue nyang awaknyan peuseumah ateueh miseubah nyoe na kheueh kutoe." 15 TUHAN meufeureuman, "Cuba, ngieng kheueh peue nyang ka teujadi sigohlom uroe nyoe, sigohlom Baét Ulôn nyoe teupeugöt! Pakriban kheueh keuadaan gata bak watée nyan? 16 Gata ka lheueh takalon sinamon gandom dan tasangka meuteumé 200 kilogram gandom, teuma nyang na 100 kilogram mantong. Gata tajak keu tatimok 100 arée anggô dalam tong anggô, teuma nyang na cit 40 arée. 17 Ulôn ka Lôn peutreun angén seu-uem dan ujeuen batée keu teupeuhanco bubena seunaman gata, teuma gata teutab hana tatem woe ubak Ulôn. 18 Nibak uroe nyoe, tanggai dua ploh peuet buleuen sikureueng, sandi Baét Ulôn ka seuleusoe teupeuduek! Ngieng kheueh peue nyang teujadi phon saát nyoe. 19 Bahpi hana le gandom nyang tinggai, dan bak anggô, bak ara, bak deulima dan bak zaiton gohlom jimuboh, teuma phon saát nyoe Ulôn Lôn bri beureukat keu gata!" 20 Bak uroe nyan cit teuma, na kheueh tanggai dua ploh peuet buleuen sikureueng, TUHAN geubri peusan nyang keudua ubak Hagai, 21 mangat geupeutrok ubak Gubunur Zerubabel. Feureuman TUHAN, "Hana treb le langét dan bumoe Lôn gok-gok, 22 keurajeuen-keurajeuen nanggroe Ulôn peureubah dan kuasa awaknyan Ulôn peuhanco. Geuritan-geuritan prang meunan cit deungon ureuëng nyang jeuet keu supe geuritan prang nyan Lôn tunggeng sampoe meubalek-balek; bandum guda teuma maté ureuëng-ureuëng nyang pasang ateueh guda nyan saleng jipoh-mupoh. 23 Bak uroe nyan, gata Zerubabel, hamba Ulôn, Ulôn baiát mangat tamat peurintah ateueh nan Ulôn. Sabab gata kheueh nyang ka Ulôn piléh." TUHAN Nyang Mahakuasa ka geupeugah haba.

Zakharia 1

1 Bak buleuen keu lapan bak thon keu dua geumat keurajeuen lé Raja Darius ateueh Persia, TUHAN geupeusampoe peusan nyoe ubak ulôn, Nabi Zakharia bin Berekhya dan cucoe Ido. 2 TUHAN geupeurintah ulôn mangat lôn peugah lagée nyoe ubak umat Gobnyan, "Bak jamén dilée Ulôn, TUHAN Nyang Mahakuasa, lumpah beungéh keu indatu gata. 3 Teuma saát nyoe Ulôn peugah ubak gata: Tawoe kheueh ubak Ulôn, dan Ulôn pi Lôn gisa ubak gata. 4 Bék lagée indatu gata. Yoh masa ilée nabi geupeusampoe peusan Ulôn ubak awaknyan jeuet awaknyan bék nale jipeubuet jeuhet dan jipeubuet desya. Teuma awaknyan hana jipeureumen dan hana jitem taát ubak Ulôn. 5 Dipat kheueh indatu gata dan nabi-nabi nyan bak saát nyoe? Awaknyan ka hana le. 6 Meulalu nabi-nabi hamba-hamba Ulôn nyan, Ulôn peusampoe peurintah-peurintah dan peuingat-peuingat nibak Lôn keu indatu gata. Teuma awaknyan teutab hana jipakoe sampoe awaknyan harôh jitanggong akibat jih. Laju awaknyan meunyeusai dan meungaku bahwa Ulôn, TUHAN Nyang Mahakuasa, ka Lôn huköm awaknyan nyang sisuai deungon keusalahan awaknyan keudroe, dan sisuai teuma deungon nyang ka Ulôn peuteuntée." 7 Bak tanggai dua ploh peuet buleuen Syebat, nyan kheueh buleuen siblaih, bak thon nyang keudua masa keurajeuen Raja Darius, TUHAN geupeusampoe peusan Gobnyan ubak ulôn. Bak saboh keumalon bak watée malam, 8 deuh ulôn kalon malaikat TUHAN geugiduek ateueh saboh guda mirah. Gobnyan geupiôh bak saboh pantôn di teungoh-teungoh bak kayée murad. Dilikot gobnyan na teuma teudong padubboh guda nyang laén, na nyang mirah, nyang mirah jambée dan nyang putéh. 9 Laju ulôn tanyong ubak gobnyan, "Teungku Po, peu kheueh makna jih banmandum nyoe?" Gobnyan geujaweueb, "Teuma ulôn tunyok makna jih ubak gata. 10 Awaknyan geukirém lé TUHAN keu jipeureksa bumoe." 11 Bandum guda nyan jilapor ubak malaikat, "Kamoe ka kamoe jeulajah bansaboh muka bumoe, teunyata donya nyoe teunang dan teuntram." 12 Laju malaikat nyan geupeugah, "TUHAN Nyang Mahakuasa, tujoh ploh thon treb jih Droeneueh teumeureuka ubak Yerusalem dan banda-banda nyang na di Yehuda. Trok án pajan Droeneueh teutab beungéh dan hana neupeu amphon awaknyan?" 13 TUHAN geujaweueb ubak malaikat nyan deungon tutoe haba nyang teuhibô, 14 dan malaikat nyan geuyue bak ulôn keu lôn peusampoe peue nyang ka geupeugah lé TUHAN Nyang Mahakuasa, "Ulôn lumpah Lôn gaséh dan lumpah prihatin keu banda Yerusalem, banda Ulôn nyang suci. 15 Teuma Ulôn lumpah beungéh keu bansa-bansa nyang meurasa aman dan teuntram. Sabab watée Ulôn Lôn peuteun beungéh Ulôn nyan ateueh umat Lôn, bansa-bansa nyan jitamah peundeuritaan ateueh umat Ulôn. 16 Bak saát nyoe Ulôn kugisa u Yerusalem keu Lôn jak peu amphon banda nyan. Baét Ulôn jipeudong lom dan banda Yerusalem geupeupuléh lom teuma." 17 Malaikat nyan geuyue lom ubak ulôn keu lôn peusampoe peusan nyoe lagée nyoe, "TUHAN Nyang Mahakuasa meujanji bahwa banda Gobnyan jeuet keumakmu lom dan bahwa sigoe teuk Gobnyan geutulông Yerusalem dan geuaku sibagoe atra milék Gobnyan keudroe." 18 Nibak keumalon nyang laén, deuh ulôn kalon peuet boh lungkée leumô. 19 Laju ulôn tanyong ubak malaikat nyang ka geumariet ubak ulôn, "Peu kheueh makna jih lungkée-lungkée nyan?" Gobnyan geujaweueb, "Lungkée-lungkée nyan na kheueh sibagoe lambang keurajeuen-keurajeuen nyang teuga nyang peucrebre peunduduek Yehuda, Israel dan Yerusalem." 20 Laju TUHAN geupeuleumah ubak ulôn peut droe utoh beuso nyang ba palée. 21 Laju lôn tanyong, "Peue meukeusut awaknyan jiteuka keunoe?" Laju geujaweueb, "Keuneuk teugok-gok dan keu teuguleng bansa-bansa nyang ka jipeuhanco meukeupeng-keupeng Yehuda dan jipeu crebre peunduduek jihnyan."

Zakharia 2

1 Nibak keumalon nyang seulanjut jih leumah ulôn ngieng sidroe ureuëng agam bak jaroe jihnyan jimat talo sineupat. 2 "Ho keuneuk jak?" lôn tanyong. "Keuneuk jak uko Yerusalem," jaweueb jih, "Ulôn keuneuk teupeue padub na panyang dan luwah banda nyan." 3 Óh lheueh nyan ulôn ngieng malaikat nyang ka lheueh geu mariet deungon ulôn nyan, geulangkah ukeue, dan sidroe lamkawan malaikat nyang laén laju geumeurumpok ngon gobnyan. 4 Malaikat nyang phon geupeugah ubak malaikat nyang keudua, "Neujak kheueh bubagaih ubak peumuda nyan, dan neukheun laju bak jihnyan bahwa Yerusalem peunoh ngon manusia dan beulatang peulara sampoe hana mungken le teupeugét beuton ban silingka nyan. 5 TUHAN ka geumeujanji bahwa Gobnyan keudroe nyang jeuet keu bintéh beuton apui nyang jikeulileng banda nyan keu teulindong Gobnyan tinggai disinan lam bandum kuasa dan keuagongan Gobnyan." 6 TUHAN meufeureuman ubak umat Gobnyan, "Ulôn ka Lôn peucrebre gata u meubagoe peunjuru. Teuma bak saát nyoe he ureuëng-ureuëng nyang teuböih, taplueng kheueh nibak Babel dan tawoe kheueh u Yerusalem. 8 Soe mantong nyang prang gata, saban cit ka jiprang boh até Lôn." Teuma TUHAN Nyang Mahakuasa geuyue bak ulôn keu lôn peusampoe peusan nyoe ubak bansa-bansa nyang ka jireubot umat Gobnyan, 9 "TUHAN keudroe geulawan gata! Dan gata jireupah lé beukaih namiet-namiet gata keudroe. Meunyoe hai nyan teujadi, gata tateupeue bahwa TUHAN Nyang Mahakuasa ka geuyue bak ulôn." 10 TUHAN meufeureuman, "Meuca-e kheueh deungon geumbira he peunduduek Yerusalem! Ulôn tinggai lamkawan gata!" 11 Bak masanyan jai that-that bansa jimeuhadab ubak TUHAN mangat jeuet keu umat Gobnyan. Gobnyan tinggai lamkawan gata, dan gata tateupeue bahwa TUHAN geukirém ulôn ubak gata. 12 Sigoe teuk bahwa Yehuda jeuet keu milék khusos TUHAN bak tanoh Gobnyan nyang suci, dan Yerusalem jeuet keu banda nyang paleng geusayang. 13 Tinggai kheueh gata banmandum dikeue TUHAN! Sabab Gobnyan ka geubeurangkat nibak teumpat Geuh tinggai di syeuruga.

Zakharia 3

1 Nibak keumalon nyang laén, TUHAN geupeuleumah ubak ulôn Teungku Imeum Agong Yosua teungoh geudong dikeue malaikat TUHAN. Di siblaih Yosua, jidong kheueh Jén nyang ka siab keuneuk jitudoh gobnyan. 2 Malaikat TUHAN geupeugah ubak Jén nyan, "Seumoga TUHAN geuhuköm gata he Jén! Bah kheueh TUHAN nyang geusayang keu Yerusalem geuhuköm gata. Ureuëng nyoe lagée tungô kayée nyang teutarek lam apui hu." 3 Yosua geudong disinan sira geungui peukayan nyang lumpah kutoe. 4 Dan geupeugah kheueh lé malaikat nyan ubak peubantu-peubantu gobnyan nyang na di syeuruga, "Neutiek kheueh peukayan kutoe nyang jingui lé ureuëng nyoe." Dan ubak Yosua gobnyan geupeugah, "Desya gata ka ulôn böih, keu gata lôn jôk peukayan nyang barô." 5 Laju gobnyan geupeurintah ubak peubantu-peubantu geuh keu geuyue peungui seureuban nyang gleh bak ulée Yosua. Awaknyan jiturot mantong dan óh ka lheueh nyan awaknyan laju jipeungui peukayan nyang barô nyan ubak gobnyan deungon geukawai lé malaikat TUHAN. 6 Óh lheueh nyan malaikat nyan geupeusampoe haba TUHAN ubak Yosua, 7 "Meunyoe gata tapatuh ubak huköm-huköm Ulôn dan tapeubuet tugaih-tugaih nyang Ulôn bri keu gata, teuma keu seulanjut jih gata jeuet keu peumimpén di dalam Baét Lôn dan ta uroih peulataran disinan. Ulôn Lôn deungoe doá-doá gata, lagée Ulôn deungoe doá bandum malaikat nyang na bak binéh Ulôn. 8 Deungoe kheueh he Imeum Agong Yosua, meunan cit gata teungku-teungku imeum nyang jeuet keu rakan gobnyan, gata bandum na kheueh lambang keu masa ukeue nyang gét. Bak masanyan Ulôn Lôn kirém hamba Ulôn nyang teuboh nan 'Sang Tunas'. 9 Ulôn peuduek bak binéh Yosua si aneuëk batée nyang meusagoe tujoh nyang Lôn uke deungon tulesan-tulesan. Dalam siuroe mantong Ulôn böih desya nibak nanggroe nyoe. 10 Meunyoe uroe nyan ka teuka, tieb-tieb ureuëng jitawök kawöm silingka gobnyan keu jiteuka dan jirasa damé dan seuntosa di teungoh-teungoh lampôh-lampôh anggô dan bak bak ara gata."

Zakharia 4

1 Malaikat nyang ka geuteuka ubak ulôn nyan geujak lom laju geupeugoe ulôn lagée geupeugoe ureuëng teungét, 2 "Peue nyang gata kalon?" geutanyong lé gobnyan. "Saboh gaki panyöt nyang teupeugét nibak méuh," jaweueb ulôn. "Bak ujong bagian ateueh na teumpat minyéuk, dan ban sikeulileng nyan na teuma tujoh boh panyöt, nyang maséng-maséng na tujoh boh teumpat dah. 3 Nibak blaih wie dan uneuen gaki panyöt nyan na dua bak zaiton." 4 Óh lheueh nyan laju lôn tanyong ubak malaikat nyan, "Peue nyang teupeulambang lé beunda-beunda nyan, Teungku Po?" 5 "Peu kheueh hana gata teupeue?" geutanyong lé gobnyan ubak ulôn. "Hana Teungku Po," jaweueb ulôn. 6 Malaikat nyan geuyue ulôn jak peusampoe ubak Zerubabel peusan TUHAN nyoe, "Bukon deungon teunaga tantra dan bukon teuma deungon teunaga gata keudroe gata meuhase, teuma na kheueh deungon Roh Ulôn. 7 Bahpi nyang meulinteueng na bube gunong, nyan teukireuh dikeue gata. Gata tapeudong lom Baét Ulôn, dan bak saát gata tapeuduek batée nyang keuphon bak teumpat nyan, di ureuëng ramé jipeugah, 'Ah, lagak lagoena!' " 8 Laju teuka lom peusan nyang laén nibak TUHAN. 9 Lagée nyoe geupeugah lé Gobnyan, "Zerubabel ka jipeuduek sandi Baét Ulôn, dan gobnyan geupeuseuleusoe banmandum bangunan Baét nyan. Meunyoe nyan teujadi, umat Ulôn jiteupeue bahwa Ulôn kheueh nyang ka kirém gata he Zakharia ubak awaknyan. 10 (10a)Na nyang anggab remeh peuristiwa nyoe. Teuma awaknyan jikalon Zerubabel jipeugét peumbangunan Baét Ulôn, dan awaknyan geumbira that." 11 Óh lheueh nyan ulôn tanyong lom ubak gobnyan, "Peue teuma makna jih bandua bak zaiton si blaih u wie dan uneuen gaki panyöt nyan? 12 Peue teuma makna jih bandua cabeueng zaiton bak sampeng bandua boh pipa méuh nyang jeuet keuteumpat ji ile minyéuk zaiton nyan?" 13 Geuseuôt lé gobnyan ubak ulôn, "Peu kheueh hana gata teupeue?" "Hana, Teungku Amphon," jaweueb ulôn. 14 Gobnyan pi geupeugah, "Nyan na kheueh dua droe ureuëng nyang ka geupiléh lé TUHAN Po teu álam seumeusta dan geutunyok mangat teulayani Gobnyan."

Zakharia 5

1 Deuh ulôn kalon lom, dan goe nyoe deuh ulôn ngieng saboh kitab meugulong nyang jipo di manyang. 2 Malaikat nyan geutanyong peue nyang ulôn kalon. Jaweueb ulôn, "Na saboh kitab meugulong nyang jipo di manyang. Panyang jih sikureueng metée dan luwah jih na peuet siteungoh metée." 3 Laju gobnyan geupeugah ubak ulôn, "Lam kitab meugulong nyan na teutuléh kutokan keu banmandum nanggroe nyoe. Bak saboh halaman teutuléh tieb-tieb pancuri teupeuteubiet lam nanggroe nyoe. Dan bak halaman nyang laén teutuléh teuma bahwa soe mantong ureuëng nyang meusumpah peuleusu nyan pih teupeuteubiet. 4 TUHAN Nyang Mahakuasa meufeureuman bahwa kutokan nyan rhot u ateueh rumoh tieb-tieb pancuri dan rumoh tieb-tieb ureuëng nyang meusumpah peuleusu. Rumoh-rumoh nyan teutab keunong kutokan nyang na tinggai cit rungka-rungka." 5 Malaikat nyan teuka lom dan geupeugah, "Ngieng! Na lom nyang teuka!" 6 "Peue nyan?" ulôn tanyong. Geujaweueb lé gobnyan, "Saboh raga. Nyan kheueh lambang desya keu banmandum nanggroe nyoe." 7 Raga nyan na tutôb jih nyang teupeugét nibak timah. Teungoh ulôn ngieng-ngieng atra nyan, sinutôb nyan teubeuôt dan teunyata didalam raga nyan na sidroe ureuëng inong nyang teungoh jiduek. 8 Malaikat nyan geupeugah, "Ureuëng inong nyoe sibagoe lambang keujeuhetan." Laju geuteugon lom ureuëng inong nyan udalam raga dan laju geutôb babah raga nyan. 9 Ulôn ngieng teuma u ateueh dan deuh teuma ulôn kalon dua droe ureuëng inong teungoh jipo u ateueh ulôn. Bak awaknyan na sayeueb nyang kukoh lagée sayeueb cicém cang iriek. Raga bunoe awaknyan cok dan laju jibapo. 10 Laju ulôn tanyong ubak malaikat nyan, "Ho jiba lé cicém cang iriek raga nyan?" 11 Geujaweueb lé gobnyan, "U Babel, disinan awaknyan jipeudong kuil keu jihnyan. Meunyoe kuil nyan ka seuleusoe, keurajeuen nyan jipeuduek keu jiseumah."

Zakharia 6

1 Ulôn meuteumé lom keumalon nyang laén. Goenyoe deuh ulôn ngieng peuet boh geuritan prang jiteubiet nibak dua boh gunong peurunggu. 2 Geuritan-geuritan nyan jitarek lé guda nyang dua-dua boh saboh geuritan, nyang phon that guda mirah, nyang keudua guda itam, 3 nyang keu lhée guda putéh dan nyang keu peuet guda meubalang. 4 Laju ulôn tanyong ubak malaikat-malaikat nyan, "Teungku Amphon, peue makna jih bandum geuritan prang nyoe?" 5 Gobnyan geujaweueb, "Awaknyan jijak ubak peuet jurosan óh ka lheueh meuhadab TUHAN seumeusta álam. 6 Geuritan prang nyang jitarek lé guda itam jijak u Babel siblaih utara. Guda putéh jituju ubarat dan guda balang u nanggroe seulatan." 7 Watée guda nyang meubalang nyan jiteubiet, awaknyan leumah hana saba keu jijak peureksa bumoe. Malaikat nyan geupeugah, "Tajak kheueh laju tapeureksa bumoe!" Laju jijak kheueh awaknyan. 8 Óh lheueh nyan malaikat nyan geumeuhôi ulôn, "Guda nyang jijak u Babel nyan ka teupeureuda beungéh TUHAN." 9 TUHAN geubri peusan nyoe ubak ulôn. 10 Kheun Gobnyan, "Cok kheueh laju peuseumahan nyang jipeuseumah lé Heldai, Tobia dan Yedaya, na kheueh ureuëng-ureuëng nyang ban jiwoe nibak teumpat nyang teuböih di Babel. Taba kheueh laju beubagaih peuseumahan awaknyan u rumoh Yosia bin Zefanya. 11 Nibak méuh dan pirak nyang jibri lé awaknyan, peugét kheueh saboh mahkota dan keubah kheueh laju ateueh ulée Teungku Imeum Agong Yosua bin Yozadak. 12 Jak peutrok ubak awaknyan bahwa Ulôn, TUHAN Nyang Mahakuasa meufeureuman, 'Ureuëng nyang teupeugah Sang Tunas, meuhase diteumpat jih tinggai dan jihnyan jipeudong lom Baét TUHAN. 13 Jihnyan kheueh nyang teuma peudong Baét Ulôn dan jiteurimong keuhoreumatan lagée sidroe raja, dan jihnyan jimat peurintah ateueh rakyat jih. Sidroe teungku imeum jidampeng jihnyan dan awaknyan meubuet meusajan deungon rukon.' 14 Mahkota nyan jikeubah di Baét Ulôn keu teupeuingat Heldai, Tobia, Yedaya, dan Yosia. 15 Ureuëng-ureuëng ramé teuka nibak teumpat nyang jiôh dan jitulông peudong lom Baét Ulôn. Meunyoe teupeudong Baét Ulôn nyan ka seuleusoe, awaknyan jiteupeue bahwa Ulôn kheueh TUHAN Nyang Mahakuasa ka Ulôn kirém gata ubak awaknyan. Bandum nyan teujadi meunyoe awaknyan bit-bit jiseutôt ubak peue-peue nyang Ulôn peurintah, TUHAN Po teu Allah awaknyan keudroe."

Zakharia 7

1 Bak tanggai peuet buleuen Kislew, na kheueh buleuen sikureueng, bak thon nyang keu peuet geumat keurajeuen lé Raja Darius, TUHAN geupeusan lom ubak ulôn. 2 Peunduduek Betel ka jikirém Sarezer dan Regem-Melekh meunan cit aneuk buah awaknyan u Baét TUHAN Nyang Mahakuasa keujijak lakée beureukat Gobnyan. 3 Dan awaknyan jiyue cit tanyong ubak imeum-imeum dan bubena nabi, lagée nyoe, "Peu kheueh mantong peureulée kamoe peuba-e ateueh keuhancoran Baét TUHAN deungon puasa tieb-tieb buleuen keulimong lagée nyang ka kamoe peubuet meuthon-thon treb jih?" 4 Nyoe kheueh peusan TUHAN nyang teuka ubak ulôn. 5 Feureuman Gobnyan, "Tapeusampoe kheueh ubak bandum peunduduek nanggroe nyoe dan ubak teungku-teungku imeum, bahwa puasa dan meuba-e nyang awaknyan peubuet bak buleuen keulimong dan keutujoh nyang treb jih tujoh ploh thon nyoe kon kheueh peunghoreumatan bak Ulôn. 6 Meunan cit watée awaknyan teungoh jimakheun dan jijieb ié, awaknyan jijak peupueh até jih keudroe." 7 Nyan kheueh nyang geupeugah lé TUHAN meulalu nabi-nabi bak jamén dilée bak watée Yerusalem mantong geuduek dan peunduduek disinan makmu. Bak watée nyan ureuëng hana tinggai di gampông-gampông dan bak-bak binéh banda mantong teuma cit bagian seulatan dan bak gaki-gaki bukét di siblaih ubarat. 8 TUHAN Nyang Mahakuasa geubri peusan nyoe ubak ulôn, 9 "Meuthon-thon nyang ka lheueh Ulôn bri peurintah lagée nyoe ubak umat Lôn, 'Gata harôh tapeubuet ade, beuna gaséh sayang dan jroh até ateueh seusabe gata. 10 Bék kheueh tatindeh ureuëng inong balée, aneuëk-aneuëk yatem ngon muntui, ureuëng-ureuëng aséng nyang na tinggai teutab di teungoh-teungoh gata, atawa soe mantong nyang dalam keuadaan susah. Dan bék teuma tareuncana nyang jeuhet ateueh sabe keudroe-droe gata.' 11 Teuma umat Ulôn kreueh that ulée mubacutpi hana jitem deungoe; awaknyan jisumpai geulinyueng jih keudroe mangat bék teudeungoe sapeue. 12 Awaknyan jipeukreueh até jih keudroe sampoe kreueh lagée batée. Ulôn beungéh that sabab hana jiturot peue-peue nyang ka Lôn peurunoe ubak awaknyan deungon peurantaraan nabi-nabi nyang ka u likot. 13 Ulôn hana Lôn jaweueb doá awaknyan, sabab awaknyan pih hana jitem deungoe watée Ulôn peugah haba. 14 Lagée angén badée, ka Ulôn sampôh awaknyan sampoe awaknyan teupaksa tinggai di nanggroe-nanggroe aséng. Tanoh nyang gumbô dan subô nyan ka tinggai seungue dan ka jeuet keu tanoh nyang tandus."

Zakharia 8

1 TUHAN Nyang Mahakuasa geubri peusan nyoe ubak ulôn, 2 "Ulôn meuheut that keuneuk Lôn tulông Yerusalem sabab Ulôn lumpah Lôn gaséh keu peunduduek disinan, dan sabab geunaséh Ulôn nyan, até Lôn seueum keu musoh-musoh banda nyan. 3 Ulôn Lôn woe u Yerusalem, banda Ulôn nyang suci nyan. Yerusalem jituri lé gob sibagoe banda nyang seutia, dan Bukét TUHAN Nyang Mahakuasa teuhôi nan Bukét Suci. 4 Lam padang banda Yerusalem, jiduek-duek lom abusyiek-abusyiek dan nék-nék inong nyang ka tuha that-that dan watée jijak-jak teupaksa jimeutungkat. 5 Rot-rot nyang na lam banda peunoh lom deungon aneuëk-aneuëk manyak nyang teungoh ji meuén-meuén. 6 Hainyan mungken mustahe nibak ureuëng-ureuëng nyang mantong udeb nibak bansa nyoe, teuma hana mustahe nibak Ulôn. 7 Ulôn Lôn peuseulamat bansa Ulôn di nanggroe-nanggroe teumpat awaknyan ka teuangkot, 8 dan Ulôn ba awaknyan lom di timu dan barat, akhéji awaknyan tinggai lom di Yerusalem. Awaknyan teuma jeuet keu umat Ulôn dan Ulôn jeuet keu Allah awaknyan. Ulôn Lôn peurintah awaknyan deungon seutia dan ade." 9 TUHAN meufeureuman ubak umat Gobnyan, "Peukong kheueh até gata! Bak saát nyoe tadeungoe tutoe haba nyang ka lheueh geupeugah lé nabi-nabi bak watée keunaleung teupeuduek, keu teupeudong lom Baét Ulôn. 10 Sigohlom masanyan hana nyang hase jisiwa teunaga manusia atawa beulatang, dan hana nyang meurasa aman nibak jipeukaru lé musoh. Ulôn ka Lôn pupok sidroe lamkawan ureuëng deungon nyang laén. 11 Teuma bak saátnyoe ureuëng-ureuëng nyang mantong udeb nibak bansa nyoe Lôn peusaneut meubeda deungon nyang ilée. 12 Awaknyan jitabu bijéh deungon damé. Bak-bak anggô awaknyan jimuboh, tanoh awaknyan jipeuteubit hase, dan ujeuen jitron deungon meulimpah ruwah. Bandum beureukat nyan Ulôn bri keu ureuëng-ureuëng nyang mantong udeb nibak bansa nyoe. 13 He peunduduek Yehuda dan Israel! Yoh masa dilée, meunyoe na ureuëng-ureuëng aséng saléng jikutok, awaknyan jipeugah, 'Seumoga bala nyang rhot ateueh Yehuda dan Israel nyan pih rhot u ateueh gata!' Teuma Ulôn Lôn peuseulamat gata, dan bubena ureuëng-ureuëng aséng nyan jipeugah sabe keudroe-droe, 'Seumoga beureukat nyang geupeutron ateueh Yehuda dan Israel, atrapi beujitron ateueh droe gata!' Sababnyan peukong kheueh até gata dan bék kheueh teumakot!" 14 TUHAN Nyang Mahakuasa meufeureuman, "Watée indatu gata jipeujeuet Ulôn sampoe beungéh, laju Ulôn cok peunutoih bahwa awaknyan harôh Ulôn huköm deungon leubeh brat. Ulôn hana Lôn ubah peue nyang ka Ulôn peuputôh nyan, dan teutab Ulôn laksana. 15 Teuma bak saát nyoe Ulôn keuneuk bri beureukat keu peunduduek Yerusalem meunan cit keu peunduduek Yehuda. Lé sabab nyan, bék kheueh teumakot. 16 Nyoe kheueh peurintah-peurintah nyang harôh gata peubuet: Meunyoe tameututoe, peugah kheueh nyang beutôi ubak sabe keudroe-droe gata. Tabri kheueh keuputosan nyang ade dan nyang teuba ubak damé. 17 Bék kheueh tareuncana nyang jeuhet ubak sabe keudroe-droe gata. Bék kheueh meusumpah peuleusu. Ulôn banci keu nyang sulet dan keuhana adelan meunan cit ubak buet poh mupoh." 18 TUHAN Nyang Mahakuasa geubri peusan nyoe ubak ulôn keu umat Gobnyan, 19 "Puasa nyang jipeubuet bak buleuen nyang keu peuet, keu limong, keu tujoh, dan keu siploh nyan jeuet keu peurayaan-peurayaan nyang peunoh kegeumbiraan dan keuseunangan keu peunduduek Yehuda. Cinta kheueh ubak keubeunaran dan keudaméan!" 20 TUHAN Nyang Mahakuasa meufeureuman, "Masa jih teuma teuka peunduduek nyang na lam banda-banda nyang laén jijak u Yerusalem. 21 Peunduduek di banda nyang saboh jipeugah ubak peunduduek banda nyang laén, 'Jak geutanyoe tajak seumah TUHAN Nyang Mahakuasa dan talakée beureukat Gobnyan. Seutôt kheueh deungon kamoe!' 22 Dan jai that-that bansa nyang teuga-teuga dan kha-kha jiteuka u Yerusalem keu jijak seumah Ulôn TUHAN Nyang Mahakuasa dan jilakée beureukat Ulôn. 23 Bak uroe-uroe nyang lagée nyan na siploh droe ureuëng aséng jijak ubak sidroe ureuëng Yahudi dan jipeugah lagée nyoe, 'Kamoe meuheut that keuneuk na laba lagée gata; sabab na kamoe deungoe bahwa Po teu Allah geubri beureukat keu gata.' " TUHAN Nyang Mahakuasa ka geupeugah haba.

Zakharia 9

1 Nyoe kheueh peusan TUHAN. Gobnyan ka geucok keuputosan keuneuk geuhuköm nanggroe Hadrakh dan banda Damsyik. Bukon sukée-sukée Israel mantong, teuma ma kota Siria na kheueh atra TUHAN. 2 Hamat nyang meubataih deungon Hadrakh nyan pih atra Gobnyan, meunan cit deungon banda-banda Tirus dan Sidon deungon banmandum keuahlian peunduduek disinan. 3 Tirus ka jipeudong kuta-kuta keu droe jih dan jitamon méuh keubit that jai meunan cit ngon pirak nyang le jih hana teukira sampoe ka lagée barang biasa nyang meusipreuk bansaboh rot lagée anou dan leuhob bak rot ueh raya. 4 Teuma lé TUHAN geupeujeuet awaknyan gasien. Bandum keukayaan nyang na dalam banda nyan geutiek u dalam laôt dan banda nyan keudroe habéh jipajoh lé apui. 5 Banda Askelon dan Gaza jingieng atra nyan laju jiteuka teumakot. Meunan cit deungon Ekron jikalon keudroe dan ka gadôh bandum nyang jiharab. Gaza gadôh raja jih, dan Askelon jeuet keuseungue hana nyang keumiet. 6 Asdod jiduek lé bansa-bansa nyang meujampu lawok. TUHAN meufeureuman, "Ureuëng Filistin nyang sombong nyan Lôn peuranab. 7 Awaknyan hana jipajoh le uengkot sie nyang mantong meudarah atawa peunajoh laén nyang teutam. Bandum ureuëng nyang mantong na tinggai jeuet keu umat Lôn dan jianggab sibagoe siladum nibak sukée Yehuda. Ekron jeuet keu anggota umat Ulôn, lagée ureuëng Yebus bak jamén ilée. 8 Ulôn kujaga tanoh Lôn dan Ulôn linteueng bandum pasokan aséng nyang keuneuk jak rot nyan. Ulôn hana Lôn peu idhin le ubak ureuëng-ureuëng nyang teugöm ureuëng laén jijak jajah umat Ulôn. Sabab peundeuritaan awaknyan ka lheueh Lôn kalon." 9 He peunduduek Sion, meugeumbira kheueh! He peunduduek Yerusalem, meusurak kheueh! Ngieng kheueh! Raja gata teuka ngon peunoh keumeunangan! Gobnyan raja nyang ade nyang ba seulamat. Deungon até nyang miyueb gobnyan geuteuka geupasang keuleudée, saboh keuleudée nyang muda. 10 TUHAN meufeureuman, "Geuritan-geuritan prang di Efraim Ulôn tiek, bandum guda nyang na di Yerusalem Lôn peuranab dan bubena aneuk panah Lôn peuhanco. Raja gata jipeumaklum damé keu bansa-bansa. Nibak laôt nyang saboh u laôt nyang laén gobnyan geumat kuasa, phon di Krueng Efrat trok ubak ujong donya." 11 TUHAN meufeureuman ubak umat Gobnyan, "Deumi janji nyang ka Lôn peuna deungon gata, meujanji nyang ka teupeusah deungon darah keureubeuen peuseumahan, teuma Lôn peubeubaih rakyat gata nyang meudeurita bak teumpat nyang teuböih lagée ureuëng nyang teukurong dalam mon hana meuié. 12 Tawoe kheueh he ureuëng-ureuëng nyang teuböih, bak saát nyoe gata kana harapan. Tawoe kheueh ubak teumpat gata meureului, Ulôn teutab Lôn bri beureukat keu gata. Deungoe kheueh: Dua goe lipat gata Lôn bri beureukat sabab banmandum deurita nyang ka gata rasa. 13 Yehuda Lôn peuguna sibagoe panah pahlawan, dan Israel sibagoe aneuk panah nyang siab keu teutimbak. Peunduduek Sion Ulôn peuguna sibagoe peudeueng; deungon peudeueng nyan ureuëng-ureuëng Yunani Lôn heungko." 14 TUHAN geupeuleumah droe ubak umat Gobnyan, lagée kilat bubena aneuk panah Gobnyan geutimbak laju. TUHAN Nyang Mahamanyang geuyueb beureuguih tanda geujak prang laju jijak maju lam angén badée di seulatan. 15 Umat Gobnyan pasti geubri peulindongan, sampoe banmandum musoh hase awaknyan peutaloe. Lagée su ureuëng kuk nyang mabök jijieb ié kreueh, meunan dumpék awaknyan di mideuen prang. Lagée darah keureubeuen nyang teurô u ateueh miseubah, meunan kheueh darah musoh awaknyan ka habéh rô. 16 Meunyoe uroe nyan ka teuka, TUHAN geupeuseulamat umat Gobnyan, lagée ureuëng meurabe jijaga bubiri jih nibak bahya. Awaknyan meucahya nibak tanoh TUHAN, lagée peumata mahkota nyang hu muble-ble. 17 Keubit that jroh tanoh TUHAN singoh teuma, keubit that ceudah dan jroh lumpah na! Bak teumpat nyang anggô dan gandom jitimoh luhu, teupeujeuet peumuda ngon dara meutamah teuga.

Zakharia 10

1 Meunyoe musém khueng teuka, lakée kheueh ujeuen ubak TUHAN. Dan TUHAN geupeusapat awan nyang peuteuka reudok, dan geupeutron ujeuen raya sampoe bubena ladang ka jibeudôh ijo dan mangat badan keu bandum manusia. 2 Di ureuëng-ureuëng laén jijak mita peutunyok ubak beurala-beurala dan ubak tukang-tukang ramai nasib gob, teuma jaweueb-jaweueb nyang awaknyan teurimong na kheueh haba sulet dan buet seumeunget mandum. Na nyang peutrang keuhai lumpo, teuma nyang jipeutrang lé awaknyan na kheueh keuji peusisat gata, dan piasan nyang geubri lé awaknyan hana meuguna. Sabab nyan rakyat ka meucrebre lagée bubiri hana ureuëng rabe. Awaknyan meurana sabab hana soe nyang pimpén. 3 TUHAN meufeureuman, "Ulôn beungéh lumpah ubak ureuëng mat kuasa nyang pimpén ateueh umat Lôn, dan awaknyan Lôn huköm. Teuma peunduduek Yehuda na kheueh atra Ulôn, dan Ulôn, TUHAN Nyang Mahakuasa Lôn peulara awaknyan. Awaknyan Lôn peujeuet keuguda prang nyang paleng peukasa keu Ulôn. 4 Lamkawan awaknyan Lôn piléh peunguasa, peumimpén, dan panglima nyang peurintah ateueh umat Lôn." 5 Peunduduek Yehuda meunang lagée peujuang-peujuang nyang jigilo-gilo musoh lagée jibloh-bloh lam leuhob ateueh rot raya. Awaknyan meujuang sabab Ulôn, TUHAN geutulông awaknyan, dan pasokan musoh nyang giduek guda geupeutaloe lé awaknyan banmandum. 6 "Peunduduek Yehuda Lôn peuteuga, umat Israel Lôn peuseulamat. Ulôn peuwoe awaknyan lom u nanggroe jih keudroe sabab Ulôn sayang keu awaknyan. Teuma Lôn peusaneut awaknyan lagée bansa nyang hántom na Ulôn iengkeue. Ulôn kheueh TUHAN Allah awaknyan, bandum doá awaknyan Ulôn deungoe lom. 7 Umat Israel jeuet lagée pahlawan nyang teuga, lagée ureuëng nyang jieb ié anggô, awaknyan geumbira. Keuturonan awaknyan phon nibak jamén trok bak jamén hana jituwoe keu peumeunang nyang Ulôn bri nyoe. Awaknyan meusuka cita sabab buet nyang Lôn peubuet keu awaknyan. 8 Umat Ulôn Lôn tawök dan Ulôn peusaho sampoe habéh meusapat. Awaknyan Lôn peubeubaih dan Lôn peujeuet leubeh bak nyang ka. 9 Bahpi Ulôn sipreuk awaknyan lamkawan bansa-bansa, awaknyan teutab ji-ingat keu Ulôn nibak teumpat awaknyan tinggai. Awaknyan seulamat, meunan cit deungon aneuëk-aneuëk jih dan jiwoe meusigo-sigo u nanggroe jihnyan keudroe. 10 Di Meusé dan Asyur, awaknyan Ulôn peuwoe. Bak nanggroe jih keudroe awaknyan Ulôn keubah. Meunan cit Ulôn ba awaknyan u Gilead dan u Libanon, dan ban sibuju nanggroe ka peunoh deungon awaknyan. 11 Meunyoe awaknyan jijeumeurang laôt nyang payah, Ulôn, TUHAN nyang seupôt ateueh ié nyang meugulong meugulumbang; teuma tuwie Krueng Nil nyan tho hana meu ié bahpi meusitijoh. Bansa Asyur nyang sombong geupeuhina, dan nanggroe Meusé nyang peukasa ka gadôh keukuasaan. 12 Ulôn Lôn peukong umat Ulôn, awaknyan taát dan meubakti ubak Ulôn.

Zakharia 11

1 He Libanon, tapeuhah kheueh bubena pintoe gata, mangat jeuet apui jitot bubena bak aras gata! 2 He bak kayée daru, meuba-e kheueh, sabab ka reubah bubena bak aron, bak kayée nyang ceudah-ceudah ka habéh reubah. He bak-bak kayée raya nyang na di Basan, tamo kheueh. Sabab bubena uteun-uteun nyang raya ka habéh teuteubang rata ngon tanoh. 3 Deungoe kheueh mo ba-e nyang mat kuasa ka habéh teusampôh keujayaan awaknyan! Deungoe su teumauem singa-singa nyang na lam gle; sabab ka habéh rusak teumpat tinggai awaknyan ban sipanyang Krueng Yordan. 4 TUHAN Po teu Allah meufeureuman ubak ulôn, "Neupeugot kheueh siulah-ulah gata tukang meurabe nyang rabe bubiri nyang keuneuk teusie. 5 Lé ureuëng nyang bloe jipoh maté bubena bubiri nyan deungon hana meuteumé huköman. Awaknyan nyang peubloe sie bubiri nyan jipeugah, 'Teupujoe kheueh TUHAN! Jinoenyoe geutanyoe meutamah kaya!' Tukang-tukang meurabe nyan hana meurasa inséuh keu bubiri-bubiri nyang jipeulara keudroe. 6 Ulôn hana le Lôn weueh keu soe mantong di nanggroe nyoe. Ulôn keudroe Lôn seurah bandum peunduduek nyoe ubak bandum peunguasa. Awaknyan jipeuhanco nanggroe nyoe, dan Ulôn hana Lôn reubot keukuasaan awaknyan." 7 Ulôn, Nabi Zakharia, laju geubri upah lé toke-toke bubiri keu lôn rabe bubiri-bubiri nyang keuneuk teusie. Bak ulôn na dua krek tungkat; nyang saboh ulôn boh nan "Keumurahan" dan nyang saboh teuk lôn boh nan "Ikatan". Óh lheueh nyan barô kheueh lôn peuphon jaga dan lôn peulara bubiri-bubiri nyan. 8 Ban lhée droe ureuëng meurabe nyang banci keu ulôn nyan geuhabéh saba ulôn. Awaknyan ulôn use lam watée si buleuen. 9 Óh lheueh nyan laju lôn peugah ubak bubiri nyang meukawan nyan, "Ulôn hana kutem le lôn rabe gata. Nyang keuneuk maté bah kheueh maté, dan nyang keuneuk binasa bah kheueh binasa. Dan nyang mantong tinggai bah kheueh saléng tameukrok-krok sabe keudroe-droe gata sampoe maté." 10 Laju tungkat nyang lôn boh nan, "Kemurahan" nyan ulôn cok laju ulôn wiet sibagoe tanda ka bateue peujanjian nyang ka geupeugot lé TUHAN deungon bandum bansa. 11 Bak uroe nyan cit teuma peujanjian nyan teupeubateue. Banmandum toke-toke bubiri nyan jikawai ulôn, awaknyan sada bahwa TUHAN teungoh geumeututoe meulalu peue-peue nyang ulôn peubuet. 12 Laju ulôn peugah ubak awaknyan, "Meunyoe Teungku-teungku situju, tabri kheueh upah keu ulôn; meunyoe hana, hana peue." Laju lé awaknyan jijok keu ulôn lhée ploh péng pirak sibagoe upah lôn. TUHAN meufeureuman ubak ulôn, "Peutamong laju péng nyan dalam kaih Baét Ulôn." Dan laju ulôn peutamong ban lhée ploh péng pirak nyan u dalam kaih Baét TUHAN. Teuma dub nyan kheueh peunghargaan awaknyan keu ulôn! 14 Óh ka lheueh nyan laju ulôn wiet tungkat ulôn nyang keudua, tungkat nyang ulôn boh nan "Ikatan", teuma bicah kheueh peusatuan Yehuda ngon Israel. 15 Dan meufeureuman kheueh TUHAN ubak ulôn, "Tapeubuet kheueh sigoe teuk siulah-ulah gata tukang meurabe, teuma goenyoe sibagoe tukang meurabe nyang hana gét. 16 Sabab Ulôn Lôn bri tugaih sidroe tukang meurabe keu jirabe kawan bubiri Lôn, teuma jihnyan hana jipakoe keu bubiri nyang gadôh; jihnyan hana jimita bubiri nyang sisat, dan hana teuma jipeu-ubat bubiri nyang luka, meunan cit hana teuma jibri makheun keu bubiri nyang mantong udeb. Teuma jihnyan keudroe jipajoh sie bubiri nyang paleng teumbon dan jilot gukée beulatang nyan. 17 Teukutok kheueh tukang meurabe nyang hana meuguna nyan! Jihnyan ka jitinggai kawan bubiri jih keudroe. Deungon prang teupeu habéh keukuasaan jihnyan. Jaroe jihnyan jeuet keu leumoh dan mata blaih uneuen jihnyan jeuet keubuta."

Zakharia 12

1 Nyoe kheueh peusan TUHAN keuhai Israel. TUHAN nyang leueng langét, nyang cebta bumoe dan nyang bri udeb keu manusia, feureuman TUHAN, 2 "Ulôn Lôn peujeuet Yerusalem lagée piala nyang meuasoe ié anggô; nanggroe-nanggroe teutangga jihnyan teuma jijeb ié anggô nyan dan laju mumang meuhapit-hapit lagée ureuëng mabök. Dan meunyoe Yerusalem jikeupông, banda-banda di nanggroe Yehuda nyang na mantong tinggai, nyan pih jikeupông. 3 Teuma meunyoe uroe nyan ka teuka, Ulôn Lôn peujeuet Yerusalem lagée batée nyang geuhon; bansa toh mantong nyang jicuba-cuba jibeuôt batée nyan meuteumé bala. Bandum bansa di ateueh donya meusaho jijak prang Yerusalem. 4 Bak uroe nyan bandum guda Lôn peujeuet bingong dan ureuëng-ureuëng nyang giduek ateueh guda nyan Ulôn peupungoe, peunduduek Yehuda Lôn kawai, teuma bandum guda musoh Ulôn peubuta. 5 Laju lé keuluwarga-keuluwarga Yehuda jimariet lam até, 'TUHAN Nyang Mahakuasa kheueh nyang bri teunaga keu umat Gobnyan nyang tinggai di Yerusalem.' 6 Bak uroe nyan bubena keuluwarga Yehuda Lôn peujeuet lagée apui lam sinamon kayée atawa suwa nyang hu dimiyueb beurekah-beurekah gandom; awaknyan jipeubinasa bansa-bansa nyang na bansikeulileng jih. Teuma peunduduek Yerusalem teutab tinggai didalam banda deungon aman. 7 Ulôn, TUHAN, nyang phon-phon that Lôn peumeunang keu sipa-i Yehuda, mangat keuhoreumatan nyang jiteurimong lé keuturonan Nabi Daud dan peunduduek Yerusalem hana leubeh nibak keuhoreumatan nyang jiteurimong lé peunduduek Yehuda nyang laén. 8 Bak uroe nyan Ulôn Lôn lindong peunduduek Yerusalem; dan nyang paleng leumoh pih lamkawan awaknyan teuga lagée Nabi Daud. Awaknyan jibina lé keuturonan Nabi Daud lagée lé malaikat Lôn, dan lagée lé Ulôn keudroe. 9 Bak uroe nyan Ulôn Lôn peubinasa tieb-tieb bansa nyang jicuba-cuba jijak prang Yerusalem. 10 Óh lheueh nyan keuturonan Nabi Daud dan peunduduek Yerusalem Ulôn jok até nyang harok ubak jipeubuet gaséh sayang dan galak jimeudoá. Awaknyan jipandang jihnyan nyang ka jitôb dan jipeumo ba-e lagée ureuëng peuba-e aneuëk tunggai jih nyang ka maté. Awaknyan jimeuratok meuweueh-weueh, lagée ureuëng nyang ka gadôh aneuëk tuha. 11 Bak uroenyan na meuratok nyang paleng hebat di Yerusalem, lagée jipeuratok Hadad-Rimon di Pantôn Megido. 12 Dan tieb-tieb keuluwarga nyang na di nanggroe nyan jipeuratok maséng-maséng keudroe; keuluwarga keuturonan Nabi Daud, keuluwarga keuturonan Natan, keuluwarga keuturonan Lewi, keuluwarga keuturonan Simei, dan bandum keuluwarga nyang laén. Tieb-tieb keuluwarga jimo ba-e droe jih keudroe, di ureuëng-ureuëng agam nibak tieb keuluwarga jimeuratok teuaséng nibak ureuëng inong."

Zakharia 13

1 TUHAN Nyang Mahakuasa meufeureuman, "Bak uroe nyan jiteubiet saboh mata ié keu teupeusuci keuturonan Nabi Daud dan peunduduek Yerusalem nibak desya dan jiseumah beurala nyang ka awaknyan peubuet. 2 Bak uroe nyan Lôn sampôh bubena nan-nan beurala nibak tanoh nyoe, sampoe hana meusidroe pih nyang na teu ingat. Bandum ureuëng nyang jiaku droe jih nabi Lôn use meusajan ngon awaknyan nyang na jitamong roh jeuhet. 3 Dan meunyoe mantong na ureuëng nyang jipeugah bahwa jihnyan jipeusampoe peusan, ayah ngon ma jih keudroe jipeugah ubak jihnyan bahwa jihnyan harôh teuhuköm maté, sabab nyang jipeugah nyan na kheueh beurakah. Meunyoe ureuëng nyan teutab aku droe teutab sibagoe nabi, jihnyan jitob sampoe maté lé yah ngon ma jih keudroe. 4 Nibak uroe nyan, bubena nabi meurasa malée keu meutindak sibagoe nabi. Awaknyan hana jingui peukayan nabi keu jimeusulet dan jipeubangga nyang deuh-deuh jikalon. 5 Sikeubit jih, awaknyan jipeugah, 'Ulôn bukon nabi. Ulôn sidroe peutani nyang meubuet bak ladang siumu udeb.' 6 Dan meunyoe na ureuëng teumanyong ubak gobnyan, 'Peue luka nyang na bak dada gata nyan?', jihnyan jijaweueb, 'Ulôn keunong luka nyoe di rumoh rakan lôn.' " 7 TUHAN Nyang Mahakuasa meufeureuman, "Beudôh kheueh, he peudeueng, dan jak prang kheueh tukang meurabe nyang meukeureuja keu Ulôn! Peumaté kheueh jihnyan, dan bubena bubiri meucrebre. Ulôn teuma Lôn jakprang umat Ulôn, 8 dan bansaboh nanggroe dua per lhée nibak peunduduek disinan maté. 9 Siper lhée nyang na seulamat. Dan awaknyan Lôn peusuci lagée pirak nyang jipeu gleh lé apui. Awaknyan Lôn ujoe lagée ureuëng ji ujoe méuh. Laju awaknyan meudoá ubak Ulôn, dan Ulôn Lôn jaweueb awaknyan. Ulôn Lôn peugah ubak awaknyan bahwa awaknyan na kheueh umat Lôn, dan awaknyan pi meungaku bahwa Ulôn kheueh TUHAN Allah awaknyan."

Zakharia 14

1 Uroe mahkamah TUHAN ka tô that. Teuma Yerusalem jireupah, dan hase rampokan nyan jibagi-bagi dikeue mata gata. 2 TUHAN geupeusapat banmandum bansa mangat jijak prang Yerusalem. Banda nyan jireubot, bubena rumoh disinan jitamong lé pancuri, dan bubena ureuëng inong lam rumoh nyan jipeukosa. Siladum nibak peunduduek disinan jiangkot u teumpat nyang teuböih, teuma nyang leubeh nibak nyan teutab tinggai di teumpat nyan. 3 Laju TUHAN geumaju dan geumuprang ngon bansa-bansa nyan, lagée nyang ka geupeubuet bak jamén dilée. 4 Bak uroe nyan Gobnyan geudong bak Bukét Zaiton, siblaih u timu Yerusalem. Teuma Bukét Zaiton teuprah lé pantôn nyang luwah, phon di timu sampoe ubarat. Siladum nibak bukét nyan jiseuk u utara, dan siladum teuk u seulatan. 5 Gata taplueng meulalu pantôn nyang teubagi bukét nyan dua bagian. Gata taplueng lagée indatu gata watée teuka geumpa bumoe masa keurajeuen Uzia, raja Yehuda. Laju teuka kheueh TUHAN Po teu Allah lôn, geukawai lé bandum malaikat. 6 Meunyoe uroe nyan ka teuka, hana le udara leupie atawa éeh. 7 Nibak uroe nyan ka hana le seupôt seupeut. Uroe trang, meunan cit meunyoe watée malam. Teuma TUHAN kheueh nyang teupeue pajan uroe nyan teuka. 8 Nibak uroe nyan, ié sijuek ji-ile di Yerusalem; siladum nibak ié nyan ji-ile u Laôt Maté dan siladum teuk u Laôt Teungoh. Ié nyan ji-ile sipanyang thon, bah kheueh watée musém ujeuen meunan cit watée musém khueng. 9 Teuma TUHAN geumat peurintah sibagoe raja ateueh banmandum muka bumoe; soe mantong ureuëng jiseumah Gobnyan sibagoe Po teu Allah dan jituri Gobnyan deungon nan nyang saban. 10 Bansaboh nanggroe phon di Geba di utara sampoe u Rimon di seulatan, nyan jeuet keudarat. Teuma Yerusalem manyang meulambong, leubeh manyang nibak tanoh sikeulileng nyan; banda nyan meutamah luwah phon di babah Pintoe Geureubang Benyamin trok ubak Pintoe geureubang Sagoe, nyan kheueh babah pintoe geureubang Phon dan nibak Meunara Hananel sampoe trok ubak teumpat teuprah ié anggô atra raja. 11 Ureuëng ramé tinggai deungon aman di banda nyan, hana ancaman dan keubinasaan. 12 TUHAN geupeutron peunyakét nyang lumpah parah ateueh bandum bansa nyang ka jimuprang jilawan Yerusalem. Mata dan lidah awaknyan, dan bansaboh tuboh awaknyan brok seudangkan awaknyan mantong udeb. 13 Bak uroe nyan TUHAN geupeujeuet bansa-bansa nyan lumpah bingong dan teumakot sampoe soe mantong ureuëng jidrob rakan jihnyan nyang na siblaih jih dan jiprang gobnyan. 14 Ureuëng-ureuëng agam di Yehuda jimuprang keu jibila Yerusalem. Sibagoe hareuta rampasan awaknyan jicok bandum hareuta bansa-bansa bansilingka jihnyan, miseu jih méuh, pirak dan peukayan nyang meutumpok-tumpok. 15 Saboh peunyakét taéuen nyang lumpah parah keunong ateueh guda, bagal, unta dan keuleudée, dan bandum beulatang nyang na bak khimah musoh. 16 Óh lheuehnyan bandum ureuëng nyang na mantong udeb lamkawan bansa-bansa nyang prang Yerusalem, jijak ubak banda nyan keu jijak seumah Raja, TUHAN Nyang Mahakuasa, dan keu geupeuraya Khanuri Jambo Ôn. 17 Meunyoe na bansa nyang hana jitem jak u Yerusalem keu jiseumah Raja, TUHAN Nyang Mahakuasa, teuma di nanggroe ureuëng nyan hana jitron ujeuen. 18 Dan meunyoe ureuëng Meusé hana jitem peuna Khanuri Jambo Ôn, teuma keu awaknyan pi geupeutron peunyakét nyang geupeuteuka lé TUHAN u ateueh tieb-tieb bansa nyang hana jitem jak iébadat. 19 Nyan kheueh huköm nyang geupeutreun ateueh Meusé dan ateueh bandum bansa nyang hana jitem peuna Khanuri Jambo Ôn. 20 Bak uroe nyan bubena lonceng nyang na meugantung sibagoe peukayan guda geu-uke deungon tutoe haba nyang lagée nyoe, "Geupeukhusos keu TUHAN". Panci-panci nyang na bak Baét TUHAN jihareuga lagée cambông-cambông peuseumahan dikeue miseubah. 21 Bandum panci di Yerusalem dan bansaboh Yehuda geupeu khusos keu jeuet keu hak milék TUHAN Nyang Mahakuasa. Peunduduek nyang peuseumah keureubeuen jingui atranyan keu jireuboih sie peuseumahan. Meunyoe masa nyan ka teuka, hana le ureuëng meukat bak Baét TUHAN Nyang Mahakuasa.

Maleakhi 1

1 Nyoe kheueh peusan TUHAN ubak Maleakhi keu umat Israel. 2 TUHAN meufeureuman ubak umat Gobnyan, "Ulôn kugaséh keu gata." Teuma awaknyan jijaweueb, "Pakriban TUHAN neugaséh ubak kamoe?" Geujaweueb lé TUHAN, "Bukon kheueh Esau aduen Nabi Yakub? Teuma Yakub Ulôn gaséh, 3 seudangkan Esau Ulôn banci. Daerah nyang meubukét atra Esau ka Ulôn peuhanco, dan tanoh disinan ka Ulôn jok keu bubena beulatang juah nyang na di padang pasi." 4 Seukiraji keuturonan Esau, ureuëng-ureuëng Edom nyan jipeugah, "Banda-banda kamoe ka geupeuhanco, teuma kamoe peudong lom," dan TUHAN geujaweueb, "Awaknyan jeuet mantong banda nyan jipeudong keula-i, teuma atra nyan teutab Ulôn peuhanco. Awaknyan teuma teupeugah, 'Nanggroe doraka' dan 'Bansa nyang keunong meureuka nibak TUHAN siumu masa.' " 5 Bansa Israel jikalon keudroe, sira jipeugah, "Keubiet that rayeuk TUHAN; kuasa Gobnyan sampoe uluwa tanoh Israel!" 6 TUHAN Nyang Mahakuasa geupeugah ubak teungku-teungku imeum, "Sidroe aneuëk jihoreumat keu ayah jih, dan sidroe peulayan jibri horeumat keu amphon jih. Ulôn nyoe Bapak gata; pakon gata hana tahoreumat Ulôn? Ulôn nyoe amphon gata; pakon gata hana teumakot keu Ulôn? Gata tahina Ulôn, teuma gata tatanyong, 'Pakriban cara jih kamoe hina Droeneueh?' 7 Deungon cara takeureubeuen peunajoh nyang hana pantaih takeureubeuen ateueh miseubah Lôn. Laju gata tatanyong, 'Pakriban cara jih kamoe anggab Droeneueh enteng?' Deungon cara tapeukuto miseubah Ulôn. 8 Meunyoe gata tapeuseumah keu Ulôn beulatang nyang buta, nyang sakét atawa lapée, peu kheueh nyan bukon buet nyang salah? Cuba tajok beulatang nyang lagée nyan keu gubunur! Peu kheueh jihnyan galak dan jipeusaneut gata deungon jroh?" 9 Jinoenyoe, he teungku-teungku imeum, ci kheueh talakée ubak Po teu Allah mangat Gobnyan geugaséh keu geutanyoe. Gobnyan hana geujaweueb doá gata, dan nyan salah gata keudroe. 10 TUHAN Nyang Mahakuasa meufeureuman, "Leubeh gét pintoe Rumoh Ulôn teutôb, sabab sia-sia mantong gata peuhu apui ateueh miseubah Ulôn. Ulôn hana galak keu gata, dan hana Lôn teurimong nyang gata peuseumah. 11 Ulôn jihoreumat lé bansa-bansa bansigom donya. Dipat mantong na teutot keumeunyan keu jihoreumat nan Ulôn dan jipeuseumah keureubeuen-keureubeuen nyang patot, sabab bandum bansa jihoreumat Ulôn! 12 Teuma gata tahina Ulôn ta anggab miseubah Ulôn hana meuyuem, dan tapeuseumah disinan peunajoh nyang gata tulak. 13 Kheun gata, 'Geutanyoe ka glak deungon bandum nyan', dan gata ta anggab phui Ulôn. Gata taba beulatang nyang gata cue, beulatang nyang lapée atawa nyang sakét keu gata peuseumah ubak Ulôn. Gata pike Lôn teurimong nyang gata peuseumah nyan? 14 Teukutok kheueh sipeunipée nyang peuseumah keu Ulôn beulatang nyang hana meuguna, meunyoe lamkawan beulatang peulara jihnyan na beulatang nyang gét nyang ka jipeujanji keu Ulôn! Sabab Ulôn kheueh Raja Agong, dan jihoreumat lé bandum bansa."

Maleakhi 2

1 TUHAN Nyang Mahakuasa geupeugah ubak teungku-teungku imeum, "Nyoe kheueh peurintah Ulôn keu gata: 2 Horeumat kheueh Ulôn deungon buet gata. Meunyoe gata hana tatem deungoe peue nyang Ulôn peugah, gata Lôn kutok. Peue-peue mantong nyang gata teurimong sibagoe rezeki meu-ubah jeuet keukutok. Nyang sikeubiet jih, peue-peue mantong nyang gét nyanpi ka Ulôn kutok, sabab gata hana tapakoe nyang Ulôn peurintah. 3 Aneuëk-aneuëk gata Lôn huköm, dan muka gata Ulôn labo ngon ék beulatang nyang gata keureubeuen, dan gata jibahue ubak sinamon ék. 4 Dan tateupeue kheueh lé gata peurintah nyoe ka Ulôn bri, mangat peujanjian Ulôn deungon teungku-teungku imeum, keuturonan Lewi, teutab na. 5 Dalam peujanjian nyan Ulôn meujanji ubak awaknyan udeb nyang aman dan keuseujahtraan, dan awaknyan Ulôn yue jihoreumat Ulôn. Bak masanyan awaknyan keubit jihoreumat Ulôn dan jitakot keu Ulôn. 6 Awaknyan jipeurunoe nyang beuna, dan bukon nyang salah. Awaknyan rab that deungon Ulôn, dan deungon jujoe jiseutôt peue nyang Ulôn lakée. Awaknyan jitulông cit ureuëng ramé mangat bék jipeubuet le buet nyang jeuhet. 7 Keubit ka wajéb bak teungku-teungku imeum keu jipeurunoe nyang beuna keuhai Ulôn, TUHAN Nyang Mahamanyang. Keu awaknyan rakyat harôh jitanyong peue nyang Ulôn lakée, sabab awaknyan na kheueh utosan-utosan Ulôn. 8 Teuma nibak saát nyoe, gata teungku-teungku imeum, ka meusimpang nibak jalan nyang beuna. Peue-peue nyang gata peuruno di ureuëng ramé ka jai that nyang sisat sabab ajaran nyang gata peurunoe nyan bandum salah. Gata ka tapeurusak janji nyang ka Lôn peugét deungon gata. 9 Dan Ulôn pi Lôn peujeuet gata jihina lé umat Israel sabab gata hana taát ubak meulakée Ulôn, dan sabab gata tapeubeda-beda ureuëng watée gata peurunoe umat Ulôn." 10 Bukon kheueh Bapak geutanyoe nyan saban? Bukon kheueh geutanyoe geucebta lé Po teu Allah nyang saban teuma? Meunyoe lagée nyan, pakon geutanyoe saléng meu-iengkeue ubak janji dan deungon lagée nyan ka takhianat peujanjian nyang ka geupeugét lé Po teu Allah ngon indatu geutanyoe? 11 Umat Yehuda ka ji-iengkeue peujanjian Po teu Allah deungon awaknyan dan jipeubuet hai-hai nyang keubit meupaloe di Yerusalem dan bansaboh nanggroe. Awaknyan ka jipeukuto Baét TUHAN nyang Gobnyan cinta dan jimeucinta ngon ureuëng-ureuëng inong nyang seumah dewa-dewa bansa laén. 12 Seumoga ureuëng-ureuëng nyang peubuet lagée nyan geukireuh lé TUHAN nibak umat Israel. Seumoga awaknyan hana le jiseutôt ngon bansa geutanyoe watée tajak peuseumah keureubeuen-keureubeuen ubak TUHAN Nyang Mahakuasa. 13 Dan nyoe buet gata nyang laén. Miseubah TUHAN gata peubasah ngon ié mata; gata tamo dan tameuba-e sabab TUHAN hana geutem teurimong le keureubeuen nyang gata peuseumah. 14 Gata tatanyong pakon Gobnyan hana geutem teurimong le keureubeuen gata nyan. Lé sabab TUHAN geuteupeue gata hana seutia keu inong nyang gata meukawen watée muda gata. Ureuëng inong nyan rakan udeb gata, teuma gata khianat peurumoh gata nyan, bahpi dikeue Po teu Allah gata ka meujanji mangat teutab seutia keu Gobnyan. 15 Bukon kheueh Allah Nyang Esa nyan ka geupeujeuet gata saboh tuboh dan saboh jiwa ngon ureuëng inong? Peu kheueh meukeusut TUHAN ngon lagée nyan? Hana laén mangat gata meuteumé aneuëk-aneuëk nyang jeuet keu umat Po teu Allah nyang seujati. Lé sababnyan, jaga kheueh droe gata, bék sampoe na lamkawan gata nyang hana seutia ubak peurumoh jih. 16 "Ulôn banci keuhai meucre," feureuman TUHAN Po teu Allah Israel. "Ulôn banci meunyoe na sidroe lamkawan gata tapeubuet keujam nyang lagéenyan keu peurumoh gata. Dan jaga kheueh droe gata dan bék sagai-sagai takhianat peurumoh gata." 17 Gata tapeujeuet Po teu Allah meudesya deungon mariet gata nyang lagée nyan. Teuma gata tatanyong, "Pakriban kamoe peubosan TUHAN?" Deungon teumariet, "Bandum ureuëng nyang jipeubuet jeuhet geuanggab gét lé TUHAN, dan Gobnyan geusayang keu ureuëng nyan." Atawa deungon cara tatanyong, "Dipat Po teu Allah nyang teuanggab ade nyan?"

Maleakhi 3

1 Geujaweueb lé TUHAN Nyang Mahakuasa, "Ulôn Lôn kirém utosan Ulôn mangat jipeusiab jalan keu Ulôn. Dan deungon hana teusangka-sangka Ulôn, TUHAN nyang gata mita, teuma teuka u Baét Ulôn. Utosan Ulôn nyang gata rindukan nyan jiteuka dan jipeumaklum peujanjian Ulôn." 2 Teuma soe nyang hase peuteuen bak uroe TUHAN geuteuka dan geupeuleumah droe Gobnyan? Sabab Gobnyan lagée apui teupeugleh logam, dan lagée sabon tukang dobi. 3 Gobnyan geuteuka keu geujak peusidang, lagée ureuëng nyang peugleh dan peumurni pirak. Lagée sidroe ureuëng tukang logam nyang jipeugleh méuh dan pirak, meunan kheueh utosan TUHAN geupeugleh bandum teungku imeum mangat awaknyan geupeuseumah keureubeuen-keureubeuen deungon cara nyang geulakée lé TUHAN. 4 Dan lagée jamén ilée, TUHAN geunasu keu keureubeuen-keureubeuen nyang teupeuseumah keu Gobnyan lé umat Yehuda dan Yerusalem. 5 Feureuman TUHAN Nyang Mahakuasa, "Ulôn teuka ubak gata keu Lôn jak peusidang. Ulôn sigra jeuet keusaksi keu tukang-tukang sihe, ureuëng-ureuëng nyang peubuet mukah, nyang jeuet keusaksi dusta, nyang jipeubuet jeuhet watée jijok upah keu ureuëng tung upah, nyang teugon inong-inong balée, aneuëk yatém ngon meuntui, dan ureuëng aséng, dan keu banmandum nyang hana jihoreumat Ulôn." 6 "Ulôn kheueh TUHAN, dan Ulôn hana meu-ubah. Sabab nyan gata, keuturonan Nabi Yakub, hana teupeubinasa. 7 Lagée indatu gata yoh masa ilée, gata bandum ka meunyeuleweng nibak huköm-huköm Lôn dan hana seutia tapeubuet bandum nyan. Tagisa kheueh ubak Ulôn, teuma di Ulôn Lôn gisa ubak gata. Teuma gata tatanyong, 'Peue nyang harôh kamoe peubuet mangat kamoe woe ubak Droeneueh?' 8 Jinoenyoe Ulôn teumanyong ubak gata: Peu kheueh manusia jeuet jitipée Allah? Teuntée hana jeuet. Teuma gata teutab tatipée Ulôn. Gata tatanyong, 'Pakriban?' Jaweueb Ulôn: Lam hai teubayeue peuseumahan siper siploh dan teubri seudekah. 9 Bandum bansa jipeungéut Ulôn, teuma gata bandum keunong kutok. 10 Taba kheueh siper siploh gata nyan banmandum u Baét Ulôn mangat na peunajoh nyang meulimpah di teumpat nyan. Ujoe kheueh Ulôn, teuma gata takalon bahwa Ulôn peuhah pintoe-pintoe syeuruga dan Lôn peulimpah gata deungon banmandum nyang gét. 11 Ulôn hana Lôn peubiyeu peunyakét jijak peurusak hase bumoe gata; bak-bak anggô gata peunoh deungon boh. 12 Dan gata jipeugah bahgia lé bandum bansa, sabab nanggroe gata jeuet keuteumpat nyang jroh keu teumpat tinggai." 13 TUHAN meufeureuman, "Tutoe haba gata nyan keubit that teuhina ateueh Ulôn." "Teuma gata tatanyong, 'Peue nyang kamoe peugah keuhai Droeneueh?' 14 Gata tapeugah, 'Sia-sia mantong meubakti ubak Allah. Keupeue guna jih tapeubuet keuwajéban tanyoe keu TUHAN Nyang Mahakuasa, atawa tatunyok ubak Gobnyan bahwa geutanyoe ka meunyeusai buet geutanyoe nyang salah? 15 Tangieng keudroe bahwa ureuëng-ureuëng nyang sombong teutab udeb jih bahgia. Ureuëng jeuhet bukon mantong meutamah makmu, teuma meunyoe awaknyan jiujoe keubeusaran Allah deungon jipeubuet jeuhet, dan awaknyan teutab teupeusie.' " 16 Dan ureuëng-ureuëng nyang takot ubak TUHAN laju jimariet sabe keudroe-droe. TUHAN geudeungoe dan geusimak peue nyang awaknyan peugah. Ureuëng-ureuëng nyang horeumat ubak Gobnyan dan teumakot keu Gobnyan, geutuléh nan jihnyan lam saboh kitab catetan nyang na dikeue Gobnyan. 17 TUHAN Nyang Mahakuasa meufeureuman, "Awaknyan jeuet keu umat Lôn. Bak uroe Lôn cok tindakan, awaknyan jeuet atra milék keusayangan Lôn. Ulôn Lôn gaséh awaknyan, lagée sidroe ureuëng syiek jigaséh keu aneuëk nyang meungabdi ubak gobnyan. 18 Umat Ulôn jikalon lom naseb ureuëng gét dan naseb ureuëng jeuhet, lamkawan ureuëng nyang meubakti ubak Ulôn dan nyang hana."

Maleakhi 4

1 Feureuman TUHAN Nyang Mahakuasa, "Teuma teuka uroe jih bandum ureuëng jeuhet dan sombong teutot lagée teutot jumpung. Bak uroe nyan awaknyan geutot sampoe habéh, dan hana nyang tinggai meusidroepi nibak awaknyan. 2 Teuma keu gata nyang taát ubak Ulôn, kuasa Ulôn nyang Lôn peuseulamat teubiet lagée mata uroe, dan cahya jih nyan jeuet keu-ubat peupuléh. Gata beubaih dan geumbira lagée aneuëk leumô nyang ban teupeuteubiet lam weue. 3 Bak uroe nyan Ulôn meutindak, dan gata tapeutaloe bubena ureuëng jeuhet, sampoe awaknyan lagée abée nyang gata gilo-gilo. 4 Ingat kheueh ajaran-ajaran hamba Ulôn Nabi Musa, ingat teuma huköm-huköm dan peurintah-peurintah nyang Ulôn bri ubak jihnyan di Gunong Sinai mangat jitaát lé banmandum umat Israel. 5 Teuma sigohlom uroe nyang hibat dan dahsyat nyang ka Lôn peuteuntée nyan teuka, Lôn kirém keu gata Nabi Elia. 6 Jihnyan geupeujeuet bubena bapak dan aneuëk-aneuëk meusaboh pakat dan meusaboh até, mangat bék ulôn teuka Lôn peubinasa nanggroe gata."

The New Testament of our Lord and Saviour Jesus Christ

Matius 1

1 Nyoe dafeutar indatu Isa Almaseh, keuturonan Nabi Daud, keuturonan Nabi Ibrahim, nibak Nabi Ibrahim sampoe ubak Nabi Daud, nan-nan indatu Isa na kheueh lagée nyoe: 2 Nabi Ibrahim, Nabi Ishaq, Nabi Yakub, Yehuda dan syedara-syedara gobnyan, Peres dan Zerah (Mak awaknyan nan geuh Tamar), Hezron, Ram, Aminadab, Nahason, Salmon, Boas (Mak gobnyan nan geuh Rahab), Obed, (Mak gobnyan nan geuh Rut), Isai, dan Raja Daud.(6b)Phon nibak Nabi Daud sampoe trok ubak masa bansa Israel teuböh u Babel teucetet nan-nan lagée nyoe: Nabi Sulaiman (Mak gobnyan na kheueh beukaih peurumoh Uria), Rehabeam, Abia, Asa, Yosafat, Uzia, Yotam, Ahas, Hizkia, Manasye, Amon, Yosia, Yekhonya dan syedara-syedara gobnyan. 12 Nibak masa bansa Israel teuböh u Babel sampoe trok ubak lahé Isa teucetet nan-nan lagée nyoe: Yekhonya, Sealtiel, Zerubabel, Abihud, Elyakim, Azur, Zadok, Akhim, Eliud, Eliazar, Matan, Yakub, Yusuf lakoe Mariam. Dan nibak Mariam nyan kheueh lagée Isa nyang teuhôi Almaseh. 17 Jadi phon nibak Nabi Ibrahim sampoe ubak Nabi Daud, bandum nyan na peuet blaih geuneurasi. Nibak Nabi Daud trok ubak masa bansa Israel teuböh u Babel na teuma peuet blaih boh geuneurasi. Nibak masa bansa Israel teuböh u Babel trok ubak lahé Almaseh na teuma peuet blaih geuneurasi. 18 Meunoe kheueh kisah keuhai Isa Almaseh lahé. Mak Gobnyan nan geuh Mariam, meutunangan deungon Yusuf. Teuma sigohlom awaknyan meugatib, teunyata Mariam ka mume. Yusuf hana geuteupeue bahwa Mariam mume deungon kuasa Roh Po teu Allah. 19 Yusuf, tunangan Mariam nyan, na kheueh sidroe ureuëng nyang udeb saleh dan sabe geutaát ubak huköm-huköm agama. Jadi, gobnyan geutem peuputôh tunangan nyang ka teuikat nyan, teuma ngon cara seungab-seungab, mangat Mariam hana meuteumé malée dikeue rakyat ba. 20 Teungoh Yusuf geupike-pike hai nyan, gobnyan meulumpo. Dalam lumpo geuhnyan, deuh geukalon sidroe malaikat Tuhan nyang geupeugah ubak gobnyan, "He Yusuf, keuturonan Nabi Daud, bék tatakot meukawen deungon Mariam; sabab aneuëk nyang na dalam rahim jihnyan nyan jeuet jih lé kuasa Roh Allah. 21 Mariam teuma jipeulahé sidroe aneuëk agam. Aneuëk nyan harôh gata boh nan Isa, sabab jihnyan teuma jipeuseulamat umat jih keudroe nibak sigala desya." 22 Bandum nyan teujadi lagée nyan mangat geunab peue nyang ka geupeugah lé Tuhan meulalu nabi Gobnyan, 23 "Sidroe aneuëk dara peurawan teuma mume dan jipeu lahé sidroe aneuëk agam. Aneuëk nyan teuma jiboh nan Imanuel." (Imanuel na kheueh basa Ibrani nyang makna jih. "Allah na meusajan geutanyoe".) 24 Óh lheueh nyan Yusuf jaga dan geubeudôh nibak teumpat éh, laju geupeubuet peue nyang ka geupeugah lé malaikat Tuhan ubak gobnyan. Gobnyan laju meukawen ngon Mariam. 25 Teuma sigohlom Mariam geupeulahé aneuëk geuh nyan, Yusuf hana meusituboh deungon Mariam. Dan óh ka lheueh aneuëk nyan lahé, lé Yusuf laju geuboh nan Isa.

Matius 2

1 Isa lahé di banda Betlehem lam nanggroe Yudea bak masa keurajeuen Raja Herodes. Bak masanyan na meupadub droe ureuëng nyang ahli iéleumé bintang nibak timu jijak u Yerusalem. 2 Awaknyan jiteumanyong bansaboh nyan, "Dipat kheueh aneuëk nyan, nyang ka lahé teuma jeuet keu raja ureuëng Yahudi? Deuh kamoe ngieng bintang Gobnyan jiteubiet nibak siblaih u timu, dan kamoe teuka keu kamoe jak seumah Gobnyan." 3 Watée Raja Herodes geudeungoe hai nyan, gobnyan teukeujot lumpah na, meunan cit banmandum ureuëng di Yerusalem. 4 Teuma lé raja nyan laju geuyue bandum ulée-ulée imeum dan gurée-gurée agama bansa Yahudi geujak meugumpôi. Laju raja nyan geutanyong ubak awaknyan, "Dipat kheueh teuma lahé Raja nyang ka geupeu janji lé Po teu Allah?" 5 Awaknyan geujaweueb, "Di Banda Betlehem lam nanggroe Yudea. Sabab meunoe kheueh nyang ka geutuléh lé sidroe nabi, 6 'Gata Betlehem, di nanggroe Yudea, gata meubacut pih bukon banda nyang paleng ubit lam banda-banda nyang meusyeuhu di Yehuda. Sabab nibak gata teuma lahé sidroe peumimpén nyang teuma pimpén umat Ulôn Israel.' " 7 Óh ka lheueh meuteumé keuteurangan nyang lagée nyan, Herodes laju geuhôi ahli-ahli bintang nibak timu nyan seucara seungab-seungab. Laju gobnyan geutanyong bak awaknyan pajan nyang paih jih bintang nyan phon that leumah. 8 Óh ka lheueh nyan raja nyan laju geuyue jak awaknyan u Betlehem sira geupeuingat lagée nyoe, "Tajak kheueh, dan tamita kheueh aneuëk nyan deungon teuliti. Dan meunyoe gata ka meurumpok ngon aneuëk nyan, tapeugah kheueh ubak ulôn, mangat ulôn pih kujak seumah Gobnyan." 9 Dan jijak kheueh awaknyan. Deuh jingieng lom bintang nyang ka lheueh awaknyan ngieng yoh masa dilée di siblaih u timu. Keubiet galak that até awaknyan óh watée jikalon bintang nyan! Bintang nyan jijak laju dikeue awaknyan, dan laju jipiyôh paih di ateueh aneuëk nyan. 11 Awaknyan laju jitamong lam rumoh nyan deuh laju jikalon aneuëk nyan deungon Mariam, ma Gobnyan. Awaknyan laju sujut dan jiseumah aneuëk nyan, dan laju jiploih bungkôh atra meuneuba awaknyan, dan jipeuseumah laju ubak aneuëk nyan méuh, keumeunyan, dan mur. 12 Po teu Allah laju geupeu ingat ubak awaknyan didalam lumpo mangat bék jigisa ubak Raja Herodes. Jadi awaknyan laju jigisa rot laén. 13 Óh ka lheueh ahli-ahli bintang nyang jigisa, malaikat Tuhan laju geupeuleumah droe ubak Yusuf didalam lumpo. Malaikat nyan geupeugah, "Raja Herodes na meukeusut jijak mita dan keuneuk poh maté aneuëk gata nyan. Sabab nyan beudôh kheueh, taba kheueh aneuëk nyan deungon ma jih jak meungungse u nanggroe Meusé. Tatinggai kheueh disinan sampoe Ulôn meututoe lom deungon gata." 14 Ban geudeungoe lagée nyan Yusuf laju geubeudôh, dan bak malam nyan cit teuma laju geuba aneuëk nyan dan ma Gobnyan meungungse u Meusé. 15 Awaknyan tinggai disideh sampoe Raja Herodes maté. Meunan kheueh, teuma teujadi kheueh peue nyang ka geupeugah lé Tuhan meulalu nabi Gobnyan, lagée nyoe, "Ulôn tawök Aneuëk Ulôn nibak Meusé." 16 Watée Raja Herodes jiteupeu bahwa ahli-ahli bintang nibak timu nyan ka jitipée jih, raja nyan keubiet beungéh that. Laju raja nyan jipeutron titah mangat bubena aneuëk miet nyang agam nyang meu-umu dua thon u miyueb di Betlehem dan bansilingka nyan beuteupoh maté. Nyan paih that lagée nyang ka geupeugah lé ahli-ahli bintang keuhai watée jih bintang nyan leumah. 17 Nyan kheueh nyang teujadi lagée nyang ka lheueh geupeugah lé Nabi Yeremia, 18 "Di Rama na teudeungoe su ureuëng mo meuba-e, aloh-alah dan mo meuheuék-heuék. Rahel jipeuratoh aneuëk-aneuëk jih; gobnyan hán geutem iem sabab awaknyan ka hana lé." 19 Óh ka lheueh Herodes meuninggai donya, watée Yusuf mantong di nanggroe Meusé dan sidroe malaikat Tuhan geupeuleumah droe lom ubak Yusuf lam lumpo. 20 Malaikat nyan geupeugah, "Ureuëng-ureuëng nyang keuneuk poh maté aneuëk nyan ka meuninggai donya. Sabab nyan beudôh kheueh, tacok laju aneuëk ngon ma jihnyan gata woe laju u nanggroe Israel." 21 Teuma Yusuf pih laju geubeudôh, laju geuba lom aneuëk nyan deungon Mariam gisa u Israel. 22 Teuma óh lheueh nyan na geudeungoe na kheueh Arkelaus, aneuëk agam Herodes ka jeuet keuraja geulanto ureuëng syiek jih di nanggroe Yudea. Jadi, Yusuf teumakot geujak keunan. Óh ka lheueh gobnyan meuteumé peutunyok Tuhan lom lam lumpo gobnyan, laju geujak u daerah Galilea. 23 Disinan gobnyan tinggai di banda nyang nan jih Nazaret. Deungon lagée nyan teuma jeuet kheueh peue nyang ka geupeugah lé nabi-nabi keuhai aneuëk nyan: "Gobnyan teuma teupeugah Ureuëng Nazaret."

Matius 3

1 Bak watée nyan teuka kheueh Yahya Pumanö di padang pasi Yudea dan laju geupeuphon khutubah. 2 "Tobat kheueh nibak desya-desya gata," kheun gobnyan, "Sabab Po teu Allah hana treub lé geumat peurintah sibagoe Raja!" 3 Yahya nyoe kheueh ureuëng jih nyang geumeukeusut lé Nabi Yesaya lam tutoe haba gobnyan, "Na ureuëng geumeuhôi-meuhôi lam padang pasi, Peusiab kheueh rot ueh keu Tuhan; peusaré kheueh rot rayeuk keu Gobnyan.' " 4 Yahya nyan geusök peukayan nyang teupeugét nibak bulée unta. Taloe keuieng gobnyan nibak kulét, dan peunajoh gobnyan daruet dan meulisan uteuen. 5 Jai that ureuëng nibak Yerusalem, nibak bansaboh nanggroe Yudea dan nibak daerah-daerah nyang na tinggai bansilingka Krueng Yordan jijak ubak Yahya. 6 Awaknyan meungaku banmandum desya-desya jih, dan Yahya geupumanö awaknyan dalam Krueng Yordan. 7 Ramé cit ureuëng Farisi dan Saduki jijak ubak Yahya keu geutem pumanö. Teuma watée geungieng awaknyan jai that jiteuka, laju geupeugah ubak awaknyan, "Gata ureuëng jeuhet! Soe nyang peugah bahwa gata hase teupeusie nibak huköman Po teu Allah nyang teuma teuka? 8 Tunyok kheueh laju deungon buet gata bahwa gata ka meutobat nibak mandum desya-desya gata. 9 Bék tapike bahwa gata hase leupah nibak huköman deungon tapeugah bahwa Nabi Ibrahim na kheueh indatu gata. Ingat, nibak batée-batée nyoe pih, Po teu Allah hase geupeujeuet keuturonan keu Nabi Ibrahim! 10 Pato ka siab keuneuk koh bak kayée sampoe habéh ukeue-ukeue jih. Tieb-tieb bak kayée nyang hana jimuboh nyang gét teuma teukoh dan teutiek u dalam apui. 11 Ulôn pumanö gata deungon ié sibagoe tanda bahwa gata ka tatobat nibak desya-desya gata; teuma Gobnyan nyang teuma teuka óh ka lheueh ulôn, teuma geupumanö gata deungon Roh Allah dan apui. Gobnyan leubeh rayeuk nibak ulôn. Keu lôn ba sipatu Gobnyan mantong ulôn nyoe hana meuguna. 12 Bak jaroe Gobnyan na jeu-ée keu teutampo mandum gandom Geuh sampoe gleh. Gandom Gobnyan teuma teutamon didalam gupôk, teuma mandum seukeuem teuma teutot didalam apui nyang hana hase teupeulon." 13 Bak watée nyan Isa geujak nibak Galilea ubak Krueng Yordan. Nibak teumpat nyan Gobnyan geujak meurumpok ngon Yahya dan laju geulakée mangat Yahya geutem pumanö Gobnyan. 14 Teuma Yahya geucuba tulak peue nyang geulakée lé Isa nyan. Yahya geupeugah lagée nyoe, "Ulôn kheueh nyang sipatot jih Bapak pumanö. Teuma bak saát nyoe Bapak keudroe nyang teuka ubak ulôn." 15 Teuma lé Isa laju geujaweueb, "Peubiyeu mantong keu saát nyoe. Sabab deungon na nyang lagée nyan bak saát nyoe geutanyoe ka tapeubuet bandum nyang geukeuheundak lé Po teu Allah." Laju Yahya geupumanö Isa. 16 Óh ka lheueh teupumanö, Isa laju geuteubiet lam Krueng nyan. Hana teusangka-sangka langét teuhah dan Isa laju geukalon Roh Allah geutron lagée cicém mirah pati u ateueh Gobnyan. 17 Óh lheueh nyan teudeungoe su Allah nyang geupeugah, "Nyoe kheueh Aneuëk Ulôn nyang Ulôn gaséh. Jihnyoe keubiet lumpah that mangat até Lôn."

Matius 4

1 Óh lheueh nyan Isa laju geuba lé Po teu Allah u padang pasi mangat ji-ujoe lé Iblih. 2 Peuet ploh uroe peuet ploh malam Isa hana geumakheun. Óh lheueh nyan barô kheueh jiteuka deuk. 3 Laju teuka Iblih sira jipeugah, "Gata kon Aneuëk Allah? Nah, neuyue kheueh ubak batée-batée nyoe beujeuet keu ruti." 4 Geujaweueb lé Isa, "Didalam Alkitab na teutuléh: Manusia hana hase udeb deungon ruti mantong, teuma nibak tieb-tieb feureuman nyang geupeugah lé Po teu Allah." 5 Óh lheueh nyan Iblih laju jiba Isa u Yerusalem, banda suci nyan, dan jikeubah Gobnyan u ateueh pucak Baét Tuhan. 6 Laju Iblih jipeugah ubak Gobnyan, "Gata kon Aneuëk Po teu Allah? Meunyoe meunan, neugrob kheueh u miyueb; sabab didalam Alkitab na teutuléh lagée nyoe, 'Allah teuma geuyue malaikat-malaikat Gobnyan geulindong gata, awaknyan teuma geusambot gata deungon jaroe awaknyan, mangat gaki gata hana tupéh ateueh batée.' " 7 Geu jaweueb lé Isa, "Teuma lam Alkitab na cit teutuléh lagée nyoe, 'Bék gata ujoe Tuhan Po teu Allah gata.' " 8 Óh lheueh nyan Iblih jiba Isa ubak pucak gunong nyang paleng manyang dan jitunyok ubak Gobnyan bandum keurajeuen donya deungon sigala keukayaan nyang na disinan. 9 Laju Iblih jipeugah ubak Isa, "Bandum nyoe teuma ulôn jok keu Gata, meunyoe Gata neutem sujut neuseumah ulôn." 10 Geujaweueb lé Isa, "Kah jak keudeh, he Iblih peunggoda! Dalam Alkitab na teutuléh: Seumah kheueh Tuhan, Allah gata, dan layani kheueh Gobnyan mantong!" 11 Akhé jih Iblih nyan laju jitinggai Isa, dan malaikat-malaikat pih teuka geujak layani Gobnyan. 12 Watée geudeungoe Yahya pumanö ka jipeutamong lam glab, Isa laju geupeu siblaih droe u Galilea. 13 Gobnyan geutinggai Nazaret, laju geuduek di Kapernaum bak binéh Danau Galilea di daerah Zebulon dan Naftali. 14 Sabab Isa geupeubuet hai nyang lagée nyan, teuma teujadi kheueh peue nyang ka geupeugah lé Nabi Yesaya: 15 "Tanoh Zebulon dan tanoh Naftali, bak rot jak u danau, meurandeh Krueng Yordan, Galilea kon tanoh ureuëng Yahudi! 16 Bansa nyang udeb didalam seupôt ka jikalon trang nyang hu muble-ble! Keu nyang tinggai lam nanggroe nyang seupôt mawöt ka jiteubiet cahya trang!" 17 Phon saát nyan Isa laju geujak seumeugah, "Meutobat kheueh nibak sigala desya-desya gata, sabab Po teu Allah teuma bagaih geuteuka geumat peurintah sibagoe Raja!" 18 Watée Isa teungoh geujak bak panté Danau Galilea, deuh geukalon dua droe neulayan, awaknyan na kheueh Simon (Nyang meunan Petrus) deungon adoe jihnyan, Andreas. Awaknyan teungoh jidrob uengkot bak danau nyan deungon jeue. 19 Isa laju geupeugah ubak awaknyan bandua, "Jak keunoe, seutôt kheueh Ulôn. Ulôn teuma Lôn peurunoe gata tajak jeue manusia." 20 Ban jideungoe haba nyan awaknyan bandua langsong jibeudôh jitinggai jeue jihnyan disinan dan laju jiseutôt Isa. 21 Isa geujak laju, laju deuh teuma dua droe ureuëng meusyedara nyang laén, awaknyan na kheueh Yakobus dan Yahya, aneuëk-aneuëk Zebedeus, awaknyan meusajan-sajan deungon bapak jih keudroe teungoh cob jeue didalam peurahô. Dan Isa laju geutawök awaknyan, 22 dan awaknyan laju jitiek disinan peurahô dan ureuëng syiek jihnyan, laju jijak ho nyang geujak Isa. 23 Di Galilea, Isa geukeulileng bansaboh nanggroe dan geuseumeubeuet di rumoh-rumoh iébadat. Gobnyan geupeusampoe Haba Gét bahwa Po teu Allah teuma geumat peurintah. Dan Gobnyan geupeu puléh teuma ureuëng-ureuëng nyang sakét dan cacat. 24 Haba keuhai Isa nyan ka meugah bansaboh nanggroe Siria, sampoe ramé that ureuëng jijak bak Gobnyan. Awaknyan nyang teuka ubak Gobnyan na teuma jiba ureuëng-ureuëng nyang keunong meubagoe macam peunyakét dan keusosahan. Ureuëng-ureuëng nyang jitamong roh jeuhet, nyang sakét sawan, dan nyang lapée, bandum ureuëng nyan geupeu puléh lé Isa. 25 Jai lumpah na ureuëng nyang seutôt Isa bak watée nyan. Na nyang teuka nibak Galilea, na nyang nibak siploh boh banda, nibak Yerusalem, nibak Yudea, dan na teuma nyang nibak nanggroe meurandeh Yordan.

Matius 5

1 Watée Isa geukalon ureuëng ramé nyan, laju geuék u ateueh bukét. Óh ka lheueh geuduek, murit-murit Gobnyan laju jijak ubak Gobnyan. 2 Dan geupeuphon peurunoe awaknyan: 3 "Mubahgia kheueh ureuëng nyang meurasa hana meudaya dan meugantung ubak Tuhan mantong; awaknyan kheueh nyang po keurajeuen syeuruga. 4 Mubahgia kheueh ureuëng nyang meuseudeh até; Allah teuma geuhibur awaknyan! 5 Mubahgia kheueh ureuëng nyang miyueb até; teuma Allah geupeuwaréh donya keu ureuëng nyan! 6 Mubahgia kheueh ureuëng nyang meucen jipeubuet keuheundak Allah; Allah teuma geupeupuih até ureuëng nyan! 7 Mubahgia kheueh ureuëng nyang murah até; Allah teuma murah até keu ureuëng nyan! 8 Mubahgia kheueh ureuëng nyang gleh até; ureuëng lagée nyan na kheueh jituri Allah. 9 Mubahgia kheueh ureuëng nyang ba damé lamkawan manusia; Allah teuma geu akui ureuëng nyan sibagoe aneuëk-aneuëk Gobnyan! 10 Mubahgia kheueh ureuëng nyang meudeurita keunong iénanya sabab jipeubuet keuheundak Po teu Allah; ureuëng nyan kheueh nyang po keurajeuen syeuruga! 11 Mubahgia kheueh gata meunyoe jihina, ji-iénanya, dan jipiteunah meusabab lé Ulôn. 12 Nabi-nabi nyang udeb sigohlom gata pih ka ji-iénanya lagée nyan. Meusuka cita kheueh dan meugeumbira kheueh, sabab raya that upah nyang geubri lé Tuhan keu gata." 13 "Gata na kheueh sira donya. Meunyoe sira ka jeuet keu tabeue, peu kheueh mungken teupeumasen lom? Hana meunguna lé, teuma jitiek dan jigiloe-giloe lé gob. 14 Gata na kheueh trang donya. Banda nyang teuduek di ateueh bukét hana mungken hase teusöm. 15 Hana ureuëng nyang peuhu panyöt, laju jigom panyöt nyan deungon guci. Ureuëng nyan teuma jikeubah panyöt nyan bak teumpat panyöt, mangat jeuet peungéh keu mandum ureuëng nyang na lam rumoh. 16 Meunan cit trang gata harôh meucahya dikeue ureuëng, mangat awaknyan jikalon buet-buet gata nyang gét, laju ji pujoe Bapak gata di syeuruga." 17 "Bék kheueh ta anggab Ulôn nyoe Lôn teuka keuneuk jak sampôh huköm Nabi Musa dan peungajaran nabi-nabi. Ulôn teuka bukon keuneuk sampôh nyan, teuma keuneuk tunyok makna nyang sibeuna jih. 18 Ingat kheueh! Simantong bumoe dan langét mantong na, saboh hurof atawa titek nyang paleng ubit pih nyang na lam huköm nyan, hana teuma teusampôh, meunyoe mandum nyan gohlom teujadi! 19 Ngon sabab nyan, barang sigasoe nyang iengkeue saboh mantong nibak peurintah-peurintah nyan, bahpih nyang paleng ubit, dan jipeurunoe ureuëng laén mangat jipeugét lagée nyan cit teuma, teuma jeuet nyang paleng ubit lamkawan umat Allah. Seubalek jih, barang sigasoe nyang jipeubuet peurintah-peurintah nyan dan jipurunoe ureuëng laén mangat jipeubuet lagée nyan cit teuma, ureuëng nyan teuma jeuet keu rayeuk di teungoh-teungoh umat Allah. 20 Jadi, ingat kheueh: Gata hana mungken jeuet keu umat Po teu Allah, meunyoe hana leubeh nibak gurée-gurée agama dan ureuëng-ureuëng Farisi lam hai tapeubuet keuheundak Po teu Allah!" 21 "Meunyoe tateupeue bahwa indatu geutanyoe na meuteumé ajaran nyang lagée nyoe: Bék seumeupoh maté; barang sigasoe seumupoh maté, ureuëng nyang lagée nyan harôh teuadili. 22 Teuma jinoenyoe Ulôn peugah ubak gata, barang sigasoe beungéh ubak ureuëng laén, teuma teuadili; dan barang sigasoe nyang seurapa ureuëng laén, ureuëng nyan teuma teupeusidang dikeue Mahkamah Agama. Dan barang sigasoe nyang peugah ubak ureuëng laén, 'Bangai,' ureuëng nyang kheun wajéb teutiek lam apui nuraka. 23 Ngon sabab nyan, meunyoe sidroe lamkawan gata teungoh jipeuseumah meuneubri jihnyan ubak Po teu Allah, dan laju teu-ingat bahwa na ureuëng nyang sakét até keu jihnyan, 24 bah kheueh teutinggai ilée nyang jipeuseumah nyan dikeue miseubah, laju jijak meudamé ngon ureuëng nyan. Óh lheueh nyan, barô kheueh jeuet jigisa lom teuma jijak peuseumah meuneubri jih nyan ubak Allah. 25 Seukira jih na ureuëng nyang jijak gadu gata ubak gantoe mahkamah, meudamé kheueh ngon ureuëng nyan singoh na watée sigohlom trok ubak kantô mahkamah. Meunyoe hán, ureuëng nyan teuma jijok gata ubak hakém, nyang teuma seurah gata ubak peulisi, dan lé peulisi laju jipeutamong gata u dalam glab. 26 Dan ingat kheueh: Pasti gata hana hase tateubiet lam glab nyan, sigohlom mandum denda gata lunaih teubayeue." 27 "Gata tateupeue bahwa na ajaran lagée nyoe: Bék meumukah. 28 Teuma bak saát nyoe Ulôn peugah ubak gata: Barang sigasoe watée jigieng ureuëng inong deungon nafeusu gurangsang, ureuëng nyan ka jimeumukah ngon inong nyan lam até jih. 29 Meunyoe mata uneuen gata jeuet keu sabab gata meudesya, cungke kheueh dan gata böih kheueh mata nyan! Leubeh gét gadôh saboh anggota tuboh gata nibak bansaboh tuboh gata teutot lam apui nuraka. 30 Meunyoe jaroe uneuen gata jeuet keu sabab gata meudesya, taköh dan taböih kheueh jaroe nyan! Leubeh gét gadôh jaroe gata sibalih nibak bansaboh tuboh gata teutot lam apui nuraka." 31 "Na cit peulajaran lagée nyoe: tieb-tieb ureuëng nyang jitaleuek peurumoh jih, harôh jijok surat taleuek ubak inong nyan. 32 Teuma jinoenyoe Ulôn peugah ubak gata: barang sigasoe nyang taleuek peurumoh jih padahai peurumoh jih nyan hana jimeumukah ngon agam laén, teupeusabab peurumoh jih nyan ka meumukah, meunyoe peurumoh jih nyan jimeukawen lom. Dan barang sigasoe nyang meukawen ngon inong nyang ka teutaleuek nyan, teuma nyan ka jimeumukah." 33 "Gata tateupeue bahwa nibak ajaran indatu geutanyoe na meuteumé ajaran nyang lagée nyoe: bék mungkie janji. Peue nyang ka gata meujanji deungon sumpah dikeue Po teu Allah, nyan harôh gata peubuet. 34 Teuma jinoenyoe Ulôn peugah ubak gata: bék sagai-sagai mubudok, bah kheueh deumi langét, sabab langét na kheueh takhta Po teu Allah, 35 meunan cit deumi bumoe, sabab bumoe na kheueh lapek gaki Gobnyan: atawa deumi Yerusalem, sabab nyan kheueh banda Raja rayeuk. 36 Meunan cit bék meubudok deumi ulée gata, sabab gata keudroe hana hase tapeujeuet ôk gata buputéh atawa itam, bahpih meusiôn mantong. 37 Peugah mantong, 'Nyoe' atawa 'Hán' -- leubeh nibak nyan teuka jih nibak si Iblih." 38 "Gata tateupeue bahwa na cit peungajaran nyang lagée nyoe: mata gantoe mata, gigo gantoe gigo. 39 Teuma jinoe Ulôn peugah ubak gata: bék gata balaih dam keu ureuëng nyang jipeubuet jeuhet u ateueh gata. Seubalek jih, meunyoe na ureuëng jitampa mieng gata nyang blaih uneuen, bah kheueh jitampa mieng blaih wie gata. 40 Dan meunyoe na ureuëng jigadu gata ubak hakém sira jilakée bajée gata, taujok kheueh laju ubak ureuëng nyan meusigoe ngon bajée jubah gata. 41 Meunyoe na sidroe peunguasa jipaksa bak gata jiyue gulam barang gob nyang jiôh jih sikilo metée, tagulam kheueh beujiôh sampoe trok dua kilo metée. 42 Meunyoe na ureuëng jilakée sapeue-sapeue ubak gata. Dan bék cit tatulak ureuëng nyang keuneuk lakée ngui sapeue-sapeue nibak gata." 43 "Gata tateupeue bahwa na cit peungajaran lagée nyoe: cinta kheueh keu rakan-rakan gata dan banci kheueh keu musoh-musoh gata. 44 Taeuma jinoenyoe Ulôn peugah ubak gata: cinta kheueh musoh-musoh gata, dan meudoá kheueh ureuëng-ureuëng nyang iénanya gata, 45 mangat gata jeuet keu aneuëk-aneuëk Bapak gata di syeuruga. Sabab Po teu Allah geupeuteubiet mata uroe Gobnyan keu ureuëng nyang jroh dan meunan cit keu ureuëng nyang jeuhet. Gobnyan geupeutron ujeuen keu ureuëng nyang peubuet surôh dan keu nyang peubuet jeuhet. 46 Sabab meunyoe gata tagaséh ubak ureuëng nyang gaséh gata mantong, keupeue guna jih Po teu Allah harôh geubalaih buet gata nyan? Bukon kheueh ureuëng nyang kutéb cukée pih jipeubuet lagée nyan? 47 Dan meunyoe gata tabeuôt saleuem teuma keu rakan-rakan gata mantong, peu kheueh istimewa jih? Ureuëng-ureuëng nyang hana jituri keu Allah pih jipeubuet lagée nyan! 48 Bapak gata di syeuruga geugaséh ubak bandum ureuëng deungon sampoereuna. Dan gata pih beutagaséh cit lagée nyan."

Matius 6

1 "Ingat kheueh, bék tapeubuet keuwajéban agama dikeue ureuëng ramé mangat jikalon lé gob. Meunyoe lagée nyan gata peubuet, gata hana teuma geubri upah lé Bapak gata di syeuruga. 2 Jadi, meunyoe gata tajok seudeukah keu ureuëng gasien, bék kheueh tapeugah keudeh-keunoe hai nyan lagée nyang jipeubuet lé ureuëng munafék. Awaknyan galak jipeubuet lagée nyan lam rumoh iébadat dan bak rot ueh raya, mangat jikalon dan jipujoe lé gob. Ingat kheueh, awaknyan ka jiteurimong upah jihnyan. 3 Teuma gatanyoe, meunyoe gata tajok seudeukah, tabri kheueh nyan deungon seungab-seungab, sampoe hana nyang teupeu. 4 Bah kheueh buet gata nyang mulia nyan hana jiteupeu lé ureuëng laén, seulaén Bapak gata nyang na lam syeuruga. Gobnyan geukalon buet gata nyang teusöm nyan dan teuma teubri upah ubak gata." 5 "Meunyoe gata nemeudoá, bék kheueh lagée ureuëng nyang galak meupura-pura. Awaknyan galak meudoá sira jidong nibak rumoh iébadat bak simpang rot mangat jikalon lé gob. Ingat kheueh, nyan kheueh upah nyang ka awaknyan teurimong. 6 Teuma meunyoe gata meudoá, tamong kheueh lam bilék dan tatôb kheueh pintoe, dan meudoá kheueh ubak Bapak gata nyang hana leumah nyan. Teuma Bapak gata nyang ngieng buet gata nyang teusöm teuma geubri upah keu gata. 7 Meunyoe gata meudoá, bék kheueh meutelée-telée lagée ureuëng nyang hana jituri Tuhan. Awaknyan jipike peue nyang jilakée nyan geuteurimong lé Tuhan sabab doá awaknyan nyang panyang nyan. 8 Bék lagée awaknyan. Bapak gata ka geuteupeue peue nyang gata peureulée, sigohlom gata lakée. 9 Jadi meunyoe meudoá-meudoá kheueh lagée nyoe, Bapak kamoe nyang na dalam syeuruga: Beuteupeu kudus kheueh nan Droeneueh, 10 beuteuka kheueh keurajeuen Droeneueh, beujeuet kheueh keuheundak Droeneueh, dibumoe lagée lam syeuruga. 11 Beuneubri kheueh peunajoh kamoe nibak uroenyoe nyang kamoe peureulée. 12 Beuneupeu amphon kheueh desya kamoe lagée kamoe ka meu peuamphon ureuëng nyang meudesya ateueh kamoe. 13 Dan bék kheueh neuba kamoe lam peucubaan, teuma beuneu peulheueh kheueh kamoe nibak si Jeuhet. Kareuna Droeneueh kheueh nyang po keurajeuen, dan kuasa dan keumuliaan sampoe siumu masa. Amin. 14 Meunyoe gata tapeuamphon ureuëng nyang meusalah ubak gata, Bapak gata nyang na lam syeuruga pih geupeu-amphon keusalahan gata. 15 Teuma meunyoe gata hana tapeuamphon keusalahan ureuëng laén, Bapak gata nyang na lam syeuruga pih hana geupeu-amphon keusalahan gata." 16 "Meunyoe gata tapuasa, bék kheueh tapeuleumah ié muka masam lagée ureuëng nyang galak meupura-pura. Awaknyan ji-ubah ié muka jih nyan mangat ureuëng laén jiteupeu bahwa jih nyan teungoh puasa. Ingat kheueh, nyan kheueh upah nyang ka awaknyan teurimong. 17 Teuma meunyoe gata puasa, jak rhah kheueh muka gata dan sugot kheueh ôk gata, 18 mangat hana nyang teupeu bahwa gatanyoe teungoh puasa, keucuali Bapak gata nyang hana leumah nyan mantong nyang teupeu. Gobnyan deuh geukalon buet gata nyang teusöm nyan dan teuma geubri upah keu gata." 19 "Bék kheueh peusapat hareuta keu droe gata keudroe lam donya nyoe, nibak teumpat keuraleueb dan geuratan jipeurusak atra gata nyan dan pancuri teuka jijak cue atra gata. 20 Nyang sigét jih, peusapat kheueh hareuta lam syeuruga, nibak teumpat keuraleueb dan geuratan hana hase jipeurusak, dan pancuri hana jiteuka keuneuk jak cue. 21 Sabab, dipat na hareuta gata, disinan cit teuma até gata!" 22 "Mata na kheueh panyöt keu tuboh. Meunyoe mata gata jeureunéh, bansaboh tuboh gata pih trang muble-ble. 23 Teuma meunyoe mata gata rabon, ban saboh tuboh gata glab gulita. Teuma meunyoe panyöt lam tuboh gata nyan seupôt, keubiet that seupôt jih gulita nyan!" 24 "Hana meusidroe manusia pih hase jimeubuet meunyoe keu dua droe toke. Sabab ureuëng nyang leubeh jigaséh ubak nyang sidroe nibak nyang laén. Atawa ureuëng nyan leubeh seutia ubak toke nyang sidroe nibak toke nyang laén. Meunan cit deungon gatanyoe. Gata hana hase tameubuet keu Allah dan keu atra beunda gata. 25 Sabab nyan ingat kheueh; bék kheueh gundah keuhai udeb gata, na kheueh peue nyang keuneuk gata pajoh dan gata jieb, atawa peue nyang teuma gata ngui. Bukon kheueh udeb nyoe leubeh nibak peunajoh, dan tuboh leubeh nibak peukayan? 26 Ngieng kheueh cicém po di manyang. Jihnyan hana jipula sapeue, hana jimupot, dan hana teuma jikeubah hase sinaman jihnyan lam gupôk keu jipajoh. Bahpih lagée nyan Bapak gata di syeuruga teutab geupeulara awaknyan! Bukon kheueh gata jiôh leubeh meuyuem nibak cicém? 27 Soe kheueh lamkawan gatanyoe ngon até nyang gundah hase jipeupanyang umu jih bahpih mubacut mantong? 28 Pakon gata khawate keuhai peukayan gata? Ngieng kheueh bungöng-bungöng bakong nyang timoh lam padang. Bungöng-bungöng nyan hana jimubuet dan hana teuma jimeurajôt; 29 teuma Nabi Sulaiman nyang leubeh kaya pih, hana jingui peukayan lagée bungöng-bungöng nyan! 30 Naleueng lam padang uroe nyoe timoh dan singoh ka habéh teutot. Teuma Po teu Allah geupeusaneut naleueng nyan sampoe gagah bukon lé. Peu kheueh gatanyoe! Teuma gata kureueng peucaya! 31 Bék khawate dan tapeugah, 'Peue nyang teuma tanyoe pajoh,' atawa 'peue nyang teuma geutanyoe ngui'? 32 Hai-hai nyang lagée nyan sabe jitiyeub lé ureuëng-ureuëng nyang hana jituri Allah. Padahai Bapak gata nyang di syeuruga geuteupeue bahwa gata peureulée bandum nyan. 33 Jadi, useuha kheueh leubeh dilée mangat Po teu Allah geupeurintah ateueh udeb gata dan peubuet kheueh keuheundak Gobnyan. Teuma mandum nyang laén teuma geubri lé Allah ubak gata. 34 Ngon sabab nyan, bék kheueh khawate keu uroe singoh. Sabab singoh na lom khawate jih keudroe. Uroe nyoe ka seb keusosahan jih, hana peu teutamah lé."

Matius 7

1 "Bék kheueh tapeusidang ureuëng laén, mangat gata pih hana jisidang lé Po teu Allah. 2 Sabab lagée toh gata peusidang ureuëng laén, meunan teuma Po teu Allah teuma geupeu sidang gata. Dan ukoran nyang gata peuguna keu ureuëng laén, nyan pih teuma geupeu guna lé Po teu Allah keu gata. 3 Pakon nyang deuh gata ngieng rabôk kayée lam mata syedara gata, seudangkan balok lam mata gata keudroe hana gata kalon? 4 Pakriban gata jeuet tapeugah ubak syedara gata, 'Ba keunoe jeuet lôn cungke rabôk kayée nyang ubit nyan lam mata gata,' seudangkan lam mata gata keudroe na balok? 5 He munafék! Peuteubiet kheueh leubeh dilée balok nyang na lam mata gata keudroe, barô kheueh jeuet gata ngieng deungon nyata, dan jeuet gata peuteubiet rabôk kayée nyang na lam mata syedara gata. 6 Bék tabri barang nyang suci ubak asée, mangat asée nyan hana jigisa jiseurang gata. Dan bék tabri mutiara ubak bui, mangat bui nyan hana jigiloe-giloe mutiara nyan." 7 "Lakée kheueh, gata teuma tateurimong. Mita kheueh, teuma gata meuteumé. Tok-tok kheueh, pintoe teuma jipeuhah keu gata. 8 Sabab ureuëng nyang meulakée teuma jiteurimong; ureuëng nyang mita teuma meuteumé; dan ureuëng nyang tok-tok pintoe, teuma teupeuhah. 9 Lamkawan gata peu kheueh na sidroe ayah jibri batée keu aneuëk gobnyan, meunyoe aneuëk nyan jilakée ruti? 10 Atawa geujok uleue, meunyoe aneuëk nyan jilakée uengkot? 11 Bah pih gata jeuhet, gata tateupeue cit meuneubri nyang gét keu aneuëk-aneuëk gata. Peu kheueh lom Bapak gata di syeuruga! Gobnyan leubeh lom geubri nyang gét ubak ureuëng nyang meulakée ubak Gobnyan. 12 Peusaneut kheueh ureuëng laén lagée gata meuheuét jipeusaneut lé awaknyan. Nyan kheueh inti huköm Nabi Musa dan ajaran nabi-nabi." 13 "Tamong kheueh rot pintoe nyang sampiek, sabab pintoe nyang teutuju dan rot jak ubak nuraka rayeuk dan luwah, dan ramé ureuëng nyang jak rot nyan. 14 Teuma sampiek dan payah that meunyoe pintoe nyang teuba ureuëng ubak jalan udeb. Dan na bacut mantong ureuëng nyang meuteumé rot nyang sampiek nyan." 15 "Até-até kheueh teuhadab nabi-nabi peuleusu. Awaknyan jijak ubak gata jipeurupa droe lagée bubiri, teuma awaknyan nyang sibeuna jih na kheueh lagée asée srigala nyang juah. 16 Gata teuma taturi awaknyan nibak hase nyang jipeubuet. Tamah meuduro hana teuma jipeuhase boh anggô, dan seumak meuduro hana teuma jipeuhase boh ara. 17 Nibak bak kayée nyang subo teuma meuteumé boh kayée nyang gét, dan nibak bak kayée nyang hana subo teuma jimuboh nyang brok. 18 Bak kayée nyang subo hana jipeuhase boh nyang brok, dan bak kayée nyang hana subo hana teuma jipeuhase boh nyang gét. 19 Tieb-tieb bak kayée nyang hana jipeuhase boh nyang gét, laju teuköh dan teutot lam apui. 20 Meunan cit deungon nabi-nabi peuleusu. Gata teuma taturi awaknyan nibak hase nyang jikeureuja." 21 "Bukon bandum ureuëng nyang jitawök-tawök Ulôn, 'Tuhan, Tuhan,' teuma jeuet keu anggota umat Allah, teuma ureuëng-ureuëng nyang jipeubuet keuheundak Bapak Ulôn nyang di syeuruga. 22 Bak Uroe Kiamat ramé ureuëng teuma jipeugah ubak Ulôn, 'Tuhan, Tuhan, bukon kheueh deungon nan Droeneueh, kamoe ka kamoe peusampoe peusan Po teu Allah? Dan bukon kheueh deungon nan Tuhan teuma kamoe ka kamoe use roh-roh jeuhet dan jai that kamoe peubuet buet-buet nyang ajaéb?' 23 Teuma Ulôn jaweueb, 'Ulôn hántom na meuturi ngon gata! Wéeh keudeh, gata nyang peubuet keujeuhetan!' " 24 "Nah, ureuëng nyang deungoe tutoe haba Lôn nyoe, dan jipeubuet lagée Lôn peugah, saban lagée ureuëng carông geupeudong rumoh di ateueh batée. 25 Óh watée jitron ujeuen, ié raya teuka, dan angén badée teuka jiheuntam rumoh nyan, rumoh nyan hana reubah sabab rumoh nyan teupeudong di ateueh batée. 26 Dan ureuëng nyang deungoe tutoe haba Lôn nyoe, teuma hana jipako lagée Lôn peugah, ureuëng nyan saban lagée ureuëng bangai nyang jipeudong rumoh di ateueh anoe. 27 Óh watée jitron ujeuen, dan ié raya teuka meunan cit deungon angén badée raya teuka jiheuntam rumoh nyan, rumoh nyan reubah. Dan rusak nibak rumoh nyan hibat lumpah na!" 28 Akhé jih Isa seuleusoe geuseumeubeuet, dan ureuëng-ureuëng nyang na disinan hireuen lumpah na watée jideungoe ajaran Gobnyan. 29 Sabab Gobnyan seumeubeuet deungon wibawa, hana lagée gurée-gurée agama awaknyan.

Matius 8

1 Isa geutron nibak bukét, dan ramé that ureuëng nyang seutôt Gobnyan. 2 Bak watée nyan teuka kheueh ubak Gobnyan sidroe ureuëng nyang meupeunyakét kulét nyang lumpah parah. Ureuëng nyan laju meuteuôt dikeue Isa, sira jipeugah, "Pak, meunyoe Bapak neutem, Bapak hase neupeupuléh ulôn." 3 Isa laju geumat ureuëng nyan sira geupeugah, "Ulôn tem. Bupuléh kheueh!" Watée nyan cit teuma peunyakét ureuëng nyan gadôh. 4 Laju Isa geupeugah ubak ureuëng nyan, "Ingat kheueh! Bék tapeugah ubak soe mantong. Teuma tajak kheueh ubak Teungku Imeum, dan lakée ubak gobnyan keu nyang pasti bahwa gata ka puléh. Óh ka lheueh nyan peuseumah kheueh keureubeuen nyang ka geupeurintah lé Nabi Musa, sibagoe bukeuti ubak ureuëng laén bahwa gata beutôi ka puléh!" 5 Watée Isa geutamong u Kapernaum, na sidroe peuwira Roma jijak murumpok deungon Gobnyan, dan jilakée tulông ubak Gobnyan. 6 "Bapak," kheun peuwira nyan, "peulayan ulôn brat that sakét di rumoh. Peulayan lôn nyan ka teuéh dan lapée bak teumpat éh dan lumpah meudeurita." 7 Geupeugah lé Isa, "Ulôn teuma Lôn jak peupuléh jihnyan." 8 "Bék Pak," Kheun peuwira nyan, "Ulôn hana layak lôn teurimong Bapak di rumoh ulôn. Bapak peurintah mantong. Euenteuk peulayan lôn nyan ka puléh. 9 Sabab ulôn pih harôh tundok ubak peurintah atasan. Dan dimiyueb ulôn mantong cit sipa-i-sipa-i nyang harôh tundok ubak peurintah ulôn. Meunyoe ulôn yue sidroe sipa-i, "Jak laju!" sipa-i nyan pih jijak. Ulôn peugah teuma ubak nyang laén, 'Jak keunoe!' Teuma ureuëng nyan pih jiteuka; dan meunyoe ulôn peurintah namiet ulôn, 'Peugét kheueh nyoe!' Teuma di namiet nyan pih laju jipeugét." 10 Watée Isa geudeungoe peue nyang jipeugah lé peuwira nyan, Gobnyan kagum lumpah na. Laju Gobnyan geupeugah ubak ureuëng-ureuëng nyang seutôt droe Geuh, "Hebat that ureuëng nyoe. Lamkawan ureuëng Israel pih gohlom na Lôn teumé iman nyang rayeuk lagée ureuëng nyoe! 11 Keubiet! Jai that ureuëng nyang teuka nibak timu ngon barat keujijak meusukaria meusajan-sajan Nabi Ibrahim, Nabi Ishaq, Nabi Yakub di dalam Donya Barô Allah. 12 Padahai ureuëng-ureuëng nyang seuharôh jih jeuet keu umat Po teu Allah teuma teutiek u dalam seupôt di luwa. Disinan awaknyan teuma jimoe ba-e dan meudeurita." 13 Laju Isa geupeugah ubak peuwira nyan, "Woe kheueh, peue nyang gata peucaya nyan teuma teujadi." Dan bak saát nyan cit teuma peulayan nyan puléh. 14 Isa laju geujak u rumoh Petrus. Disinan geukalon mak tuwan si Petrus teungoh sakét deumam bak teumpat éh. 15 Isa laju geumat jaroe ureuëng nyan, dan deumam ureuëng nyan pih gadôh. Óh lheueh nyan di ureuëng nyan laju jibeudôh dan jilayani Isa. 16 Watée uroe karab seupôt, di ureuëng laén laju jiba ubak Isa ureuëng-ureuëng nyang ka jitamong roh jeuhet. Dan deungon sikrék haba mantong, Isa laju geu-use roh-roh jeuhet nyan geupeu puléh bandum ureuëng nyang sakét. 17 Isa geupeubuet bandum nyan, dan deungon nyan teuma teujadi kheueh peue nyang ka geupeugah lé Nabi Yesaya, "Gobnyan geutanggong peundeuritaan tanyoe dan geupeu puléh peunyakét geutanyoe." 18 Jai lagoena ureuëng di seukeulileng Isa. Watée geukalon lé Isa awaknyan bandum, Gobnyan laju geuyue ubak murit-murit Geuh keuteujeumeurang danau. 19 Laju teuka ubak Gobnyan sidroe gurée agama sira jipeugah, "Bapak Gurée, ulôn keuneuk seutôt Bapak ho mantong neujak!" 20 Geujaweueb lé Isa, "Asée srigala na uruek, dan cicém po na eumpung, teuma Aneuëk Manusia hana meuteumpat éh." 21 Dan sidroe teuk murit Gobnyan nyang laén jipeugah, "Bapak, neupeu-idhin kheueh ubak Ulôn mangat lôn peutamong lam jrat ureuëng syiek ulôn nyang ka meuninggai." 22 Geujaweueb lé Isa, "Seutôt mantong ulôn, dan bah kheueh ureuëng maté jipeukubu ureuëng maté jih keudroe." 23 Isa laju geu-ék ateueh peurahô meunan cit deungon murit-murit Gobnyan sajan seureuta. 24 Hana teusangka-sangka angén badée teuka hibat lumpah na sampoe ié lam danau meuguncang dan peurahô awaknyan jipoh lé umbak meuhayak hana meuteuntée. Watée angén badée nyan teuka Isa teungoh geuéh. 25 Teuma murit-murit Gobnyan laju jijak ubak Gobnyan sira jipugo jiyue beudôh. "Bapak! He Bapak! Neutulông! Geutanyoe ka cilaka!" kheun awaknyan. 26 "Pakon gata teumakot?" kheun Isa. "Peu kheueh gata kureueng peucaya keu Ulôn!" Óh lheueh nyan Isa laju geudong dan geudhôt laju angén badée dan ié danau nyang meu-umbak nyan. Dan watée nyan cit teuma ié danau nyan ka jeuet keureda. 27 Murit-murit Isa hireuen. Awaknyan jimarit sabe keudroe-droe, "Ureuëng peu kheueh Gobnyan nyoe, sampoe angén dan umbak pih jiturot peurintah Gobnyan!" 28 Isa ka trok u meurandeh danau di daerah Gadara. Nibak teumpat nyan na dua droe ureuëng nyang ka jitamong roh jeuhet jijak murumpok ngon Gobnyan. Ban dua droe ureuëng nyang ka jitamong roh jeuhet nyan ganah dan juwah lumpah na, sampoe hana meusidroe pih nyang jijeuet jak rot nyan. 29 Awaknyan laju jiteubiet nibak lam guha-guha jirat sira jidumpék lagée nyoe jipeugah, "He Aneuëk Allah, peue nyang teuma neupeulaku ateueh kamoe? Peu kheueh Droeneueh keuneuk seksa kamoe bahpih watée jih gohlom trok?" 30 Hana jiôh nibak teumpat nyan, jai that-that bui teungoh jimita uempeuen. 31 Roh-roh jeuhet nyan jilakée laju ubak Isa, "Meunyoe Droeneueh neuyue ubak kamoe mangat kamoe teubiet, yue kheueh laju ubak kamoe mangat kamoe tamong lam tuboh bui-bui nyan." 32 "Teubiet!" Geukheun lé Isa. Teuma roh-roh jeuhet nyan laju jiteubiet nibak tuboh bandua droe ureuëng nyan, dan laju jijak tamong u dalam tuboh bui-bui nyang teungoh mita uempeuen nyan. Dan di bui-bui nyan pih laju jiplueng dan jilumpat nibak binéh reuleueng u dalam danau sampoe habéh lham. 33 Di ureuëng-ureuëng nyang rabe bui nyan laju jiplueng u dalam banda dan jipeugah laju peue-peue nyang ban lheueh jikalon nyan, meunan cit jipeugah peue nyang ka teujadi ateueh dua droe ureuëng nyang ka jitamong roh jeuhet nyan. 34 Teuma bandum ureuëng nyang na lam banda nyan pih laju jijak meurumpok ngon Isa. Watée awaknyan jikalon Isa, awaknyan jilakée deungon meuharab that mangat Isa geutinggai laju teumpat nyan.

Matius 9

1 Isa laju geu-ék dalam peurahô, laju geujeumeurang danau, geuwoe u gampông leuen Gobnyan. 2 Disinan lé ureuëng ramé laju jiba ubak Gobnyan sidroe ureuëng lapée nyang teu-éh dalam tika. Watée Isa geukalon padub na rayeuk iman ureuëng ramé nyan, Gobnyan laju geupeugah ubak ureuëng lapée nyan, "Tabah kheueh, he aneuëk Ulôn! Desya-desya gata ka teupeu-amphon." 3 Na meupadub droe gurée agama nyang na disinan jikheun lam até jih, "Ureuëng nyoe jihina Allah!" 4 Isa geuteupeue pikeran awaknyan, jadi Gobnyan geupeugah, "Pakon pikeran gata lumpah that jeuhet? 5 Toh nyang leubeh mudah: teupeugah, 'Desya gata ka teupeu-amphon,' atawa teupeugah, 'Beudôh kheueh dan jak kheueh laju'? 6 Teuma bak saát nyoe Ulôn teuma Lôn bri bukeuti ubak gata bahwa di ateueh bumoe nyoe Aneuëk Manusia meukuasa keu teupeu-amphon desya." Laju Isa geupeugah ubak ureuëng lapée nyan, "Beudôh, cok tika gata dan woe kheueh laju u rumoh gata!" 7 Ureuëng lapée nyan pih jibeudôh dan laju jiwoe u rumoh jih keudroe. 8 Watée ureuëng ramé jikalon hai nyang lagée nyan, awaknyan lumpah teumakot dan laju jipujoe Allah, sabab Po teu Allah ka geubri kuasa nyang paleng rayeuk ubak manusia. 9 Óh lheueh nyan Isa geutinggai teumpat nyan. Teungoh geujak, deuh geukalon sidroe ureuëng tukang kutéb cukée, nan ureuëng nyan Matius, teungoh geuduek bak kantô cukée gobnyan. Isa geupeugah ubak ureuëng nyan, "Jak keunoe, seutôt Ulôn!" Teuma Matius laju geudong dan geuseutôt Isa. 10 Watée Isa teungoh geumakheun di rumoh Matius, jai lumpah na teuka ubak Gobnyan tukang kutéb cukée dan ureuëng-ureuëng nyang jianggab hana gét lé masyarakat, awaknyan pih laju jimakheun meusajan Isa dan murit-murit Gobnyan. 11 Na ureuëng-ureuëng Farisi nyang jikalon hai nyan. Dan awaknyan jiteumanyong ubak murit-murit Isa, "Peue sabab jih gurée gata geumakheun meusajan ureuëng-ureuëng tukang kutéb cukée dan ureuëng-ureuëng hana gét nyan?" 12 Isa geudeungoe peue nyang jitanyong lé awaknyan dan laju geujaweueb, "Ureuëng nyang seuhat hana peureulée dokto, nyang peureulée keu dokto na kheueh keu ureuëng sakét. 13 Tilek kheueh peue makna jih ayat Alkitab nyoe: 'Nyang Ulôn keuheundaki gaséh sayang, dan bukon beulatang keureubeuen,' Sabab Ulôn teuka bukon Lôn tawök ureuëng nyang jianggab droe jih ka gét, teuma ureuëng nyang jianggab hina." 14 Óh ka lheueh nyan murit-murit Nabi Yahya pumanö geujak meurumpok deungon Isa. Laju awaknyan geutanyong, "Pakon kamoe dan ureuëng-ureuëng Farisi puasa dan murit Bapak hana?" 15 Geujaweueb lé Isa, "Pakriban meunurot gata? Peu kheueh jeuet jamé-jamé bak teumpat khanuri ureuëng meukawen meuseudeh até meunyoe teungku linto agam mantong na meusajan awaknyan? Teuntée hana! Teuma teuka watée jih teungku linto agam nyan teucok nibak awaknyan. Watée nyan barô kheueh awaknyan jipuasa. 16 Hana ureuëng nyang tampai bajée tuha deungon ija barô. Sabab ija sinampai nyan teuma keunyuet akhé jih bajée nyan teupriek leubeh rayeuk lom. 17 Meunan cit hana ureuëng nyang jiroe ié anggô barô dalam baluem kulét nyang ka tuha. Sabab baluem nyan teuma beukah dan rusak, dan ié anggô lam baluem nyan laju ro uluwa. Anggô barô harôh teuleng lam baluem nyang barô, mangat bandua nyan teutab gét." 18 Teungoh Isa geupeugah haba ubak murit-murit Yahya Pumanö, teuka kheueh ubak Gobnyan sidroe peumimpén rumoh iébadat. Ureuëng nyan jimeuteuôt dikeue Isa sira ji peugah, "Aneuëk inong lôn banmantong meuninggai donya. Teuma, lôn harab neutem kheueh jakmat aneuëk ulôn nyan mangat jeuet udeb lom teuma." 19 Isa laju geubeudôh dan geujak laju deungon murit-murit Gobnyan u rumoh ureuëng nyan. 20 Bak teungoh rot ueh na teuma sidroe inong nyang ka dua blaih thon treb jih sakét peundarahan nyang na hubongan deungon hé jihnyan, jijak meurumpok laju ngon Isa nibak likot. Ureuëng nyan geupike, "Asai ta cukéh mantong bajée jubah Gobnyan, ulôn teuma puléh." Óh lheueh jipike lagée nyan laju jicukéh bajée jubah Isa. 22 Watée nyan cit teuma Isa geupaleng dan geukalon inong nyan laju geupeugah ubak gobnyan, "Tabah kheueh, aneuëk Ulôn! Sabab gata tapeucaya keu Ulôn, gata puléh!" Bak watée nyan cit teuma inong nyan puléh. 23 Óh lheueh nyan Isa laju trok u rumoh peumimpén iébadat nyan. Watée geukalon peumeuén-peumeuén biula meukabông dan jai that-that nyang riôh, 24 laju geupeugah ubak awaknyan, "Teubiet kheueh gata banmandum! Aneuëk nyoe hana maté, na kheueh teungét." Awaknyan bandum jipeukém Isa. 25 Óh ka jiteubiet awaknyan bandum, Isa laju geutamong lam bilék aneuëk nyan sira geumat jaroe jih. Dan laju jibeudôh aneuëk inong nyan. 26 Haba nyan sampoe ka meugah bansaboh daerah nyan. 27 Isa laju geujak nibak teumpat nyan dan na dua droe ureuëng buta jiseutôt Gobnyan rot likot. Awaknyan jiteumawök, "He Aneuëk Nabi Daud, neugaséh kheueh keu kamoe!" 28 Watée Isa geutamong lam rumoh nyan, bandua droe ureuëng buta nyan jijak ubak Gobnyan. Isa laju geutanyong ubak awaknyan, "Peu kheueh gatanyoe tapeucaya bahwa Ulôn nyoe hase lôn peupuléh gata?" "Peucaya, Pak!" jaweueb awaknyan. 29 Laju Isa geumat mata awaknyan sira geupeugah, "Sabab gata peucaya, teuma beujeuet kheueh peue nyang gata lakée." 30 Teuma awaknyan ka jeuet jimeungieng. Isa geupeu-ingat ubak awaknyan deungon kreueh, mangat bék jipeugah hai nyan ubak soe mantong. 31 Teuma awaknyan laju jijak dan jipeugah teuma keuhai Isa nyan u tieb-tieb daerah. 32 Watée bandua droe awaknyan ka jijak, na sidroe ureuëng kalu nyang ka jikuasa lé roh jeuhet laju jiba ubak Isa. 33 Isa laju geu-use roh jeuhet nyan dan bak watée nyan cit ureuëng kalu nyan ka jeuet jipeugah haba. Ureuëng ramé nyan hireuen dan jimarit sabe keudroe-droe, "Gohlom na kamoe kalon nyang lagée teujadi di Israel." 34 Teuma ureuëng-ureuëng Farisi jipeugah, "Ubak roh-roh jeuhet kheueh nyang brijihnyan meukuasa keu jiuse roh-roh jeuhet nyan." 35 Meunan kheueh sabe Isa geukeulileng nibak banda nyang saboh u banda nyang laén, dan nibak gampông nyang saboh u gampông nyang laén. Gobnyan geupeubeuet ureuëng laén di rumoh-rumoh iébadat, dan geupeusampoe Haba Gét keuhai pakriban Po teu Allah geumat peurintah sibagoe Raja. Gobnyan geupeu puléh ureuëng-ureuëng nyang meudeurita meubagoe macam peunyakét dan nyang cacat tuboh. 36 Watée Isa geukalon ureuëng ramé nyan, Gobnyan weueh that-that keu awaknyan, sabab awaknyan ka bingong dan hana meudaya, lagée bubiri hana tukang rabe. 37 Laju Isa geupeugah ubak murit-murit Geuh, "Nyang teupot jai that, teuma tukang pot nyang bacut. 38 Sabab nyan lakée kheueh ubak ureuëng po lampôh nyan mangat jikirém ureuëng pot hase lampôh gobnyan."

Matius 10

1 Bak siuroe Isa geuhôi ban dua blaih droe murit Gobnyan keu geujak meusapat. Laju geubri ubak awaknyan kuasa mangat jeuet geu-use roh-roh jeuhet meunan cit jeuet geupeu puléh sigala macam peunyakét dan meubagoe macam cacat tuboh. 2 Nan bandua blaih droe rasui nyan na kheueh: nyang keu phon, Simon (Nyang geuhôi ngon nan Petrus) deungon syedara gobnyan Andreas, laju Yakobus ngon syedara gobnyan Yahya, awaknyan na kheueh aneuëk-aneuëk Zebedeus. 3 Óh lheueh nyan Pilipus dan Bartolomeus, deungon Tomas, dan Matius, tukang kutéb cukée meunan cit Yakobus aneuëk Alfeus, dan Tadeus; 4 dan nyang paleng akhé Simon, si patriot dan Yudas Iskariot nyang meukhianat ubak Isa. 5 Ban dua blaih droe rasui nyan laju geu-utus lé Isa deungon geubri peutunyok-peutunyok lagée nyoe, "Bék kheueh gata jak u daerah nyang kon daerah ureuëng Yahudi. Dan bék cit teuma u banda-banda ureuëng Samaria. 6 Teuma tajak kheueh ubak ureuëng-ureuëng Israel, khusos jih ubak awaknyan nyang sisat. 7 Neupeugah kheueh ubak awaknyan bahwa Po teu Allah deungon sigra geumat peurintah sibagoe Raja. 8 Neupeupuléh kheueh ureuëng-ureuëng nyang sakét; peu-udeb kheueh ureuëng nyang ka maté; peupuléh kheueh ureuëng nyang keunong peunyakét kulét nyang cukob parah, dan neu-use kheueh roh-roh jeuhet. Gata ka neuteurimong bandum nyan deungon cuma-cuma. Teuma, neubri kheueh atra nyan deungon cuma-cuma. 9 Bék neuba péng méuh, péng pirak atawa péng teumaga. 10 Meunan cit bék teuma neuba baluem seudeukah, atawa dua ôn peukayan keu beukai gata nibak teumpat tugaih, atawa sipatu, atawa pih tungkat. Sabab ureuëng nyang meukeureuja ka sipatot jih teujamin peue-peue nyang jipeureulée. 11 Meunyoe gata ka trok u banda atawa gampông, neumita kheueh sidroe ureuëng nyang geutem teurimong gata. Tinggai kheueh ngon ureuëng nyan sampoe gata neujak ho laén teuma. 12 Watée gata neutamong lam rumoh, neupeugah kheueh lagée nyoe, "Seumoga Tuhan geubri beureukat ubak gatanyoe." 13 Meunyoe ureuëng-ureuëng lam rumoh nyan geuteurimong gata, bah kheueh saleuem gata nyan teutab nibak awaknyan. Teuma meunyoe awaknyan hana jiteurimong gata, neutarek kheueh lom teuma saleuem gata nyan. 14 Meunyoe na rumoh atawa banda nyang hana jitem teurimong gata atawa hana jitem deungoe gata, neutinggai laju teumpat nyan dan geureutôk kheueh abée nyang na bak tapak gaki gata. 15 Ingat kheueh! Bak Uroe Kiamat, ureuëng banda Sodom dan Gomora teuma leubeh mudah geupeu-amphon lé Allah, nibak ureuëng-ureuëng nyang na di banda nyan!" 16 "Peurati kheueh nyoe: Ulôn utus gata lagée bubiri nyang sisat lamkawan asée srigala nyang juwah. Gata harôh waspada lagée uleue dan jujoe até lagée cicém mirah pati. 17 Meujaga-jaga kheueh, sabab gatanyoe teuma jidrob dan jiba ubak sidang-sidang mahkamah. Gata teuma jiseksa di rumoh-rumoh iébadat. 18 Gata teuma jiba ukeue peunguasa-peunguasa dan raja-raja sabab gata taseutôt Ulôn. Dan nyan kheueh watée nibak gata keu gata meusaksi keuhai ulôn ubak awaknyan dan ubak ureuëng-ureuëng nyang hana jituri Po teu Allah. 19 Teuma meunyoe gata jiba keu jipeusidang di kantô peungadelan, bék khawate keuhai peue nyang keuneuk gata peugah, atawa pakriban gata harôh tapeugah haba. Sabab peue nyang keuneuk gata peugah nyan, teuma neubri tée ubak gata óh trok bak watée jih. 20 Sabab nyang peugah haba bak watée nyan kon kheueh gata, teuma Roh Bapak nyang na dalam syeuruga, rot gata. 21 Teuma teuka bak saboh watée ureuëng jeuet jijok syedara jih keudroe keu jipoh maté. Dan nyan pih teuma teuka nibak ayah ngon aneuëk gobnyan. Aneuëk-aneuëk miet teuma jilawan ma ngon yah jih, dan jijok awaknyan keu jipoh maté. 22 Gata teuma jibanci lé bandum ureuëng sabab gata murit Ulôn. Teuma ureuëng nyang meuteuen sampoe bak akhé dudoe geupeu seulamat. 23 Meunyoe gata ji-iénanya bak saboh banda, beutaplueng kheueh ubak banda nyang laén. Ulôn bri tée ubak gata: Sigohlom gata seuleusoe tajak bandum u banda-banda nyang na di Israel, Aneuëk Manusia ka trok geuteuka. 24 Murit hana leubeh rayeuk nibak gurée jihnyan, dan peulayan hana leubeh rayeuk nibak po jih. 25 Ka seb meunyoe sidroe murit saban lagée gurée jihnyan, dan sidroe peulayan lagée po droe jih. Meunyoe ulée keuluwarga ka geuboh nan Beelzebul, peuteuk lom bansaboh asoe rumoh. Awaknyan teuma teuboh nan nyang leubeh brok nibak nan nyan!" 26 "Bék kheueh teumakot keu manusia. Hana nyang teusöm, nyang hana teuma leumah, dan hana nyang teurahsia nyang hana teuma teupeugah. 27 Peue nyang Ulôn peugah ubak gata dalam seupôt harôh kheueh gata peugah lom di dalam peungéh bak watée uroe. Dan peue nyang teusháh bak punyueng gata, jak peumaklum kheueh nyan ubak rakyat ba! 28 Bék kheueh teumakot keu awaknyan nyang jipoh tuboh, teuma hana kuasa jipoh jiwa. Beuteumakot kheueh keu Po teu Allah nyang meukuasa geupeubinasa bah kheueh nyan tuboh meunan cit jiwa lam apui nuraka. 29 Dua boh cicém tulôe meuteumé teubloe deungon sineuk mata péng nyang paleng ubit. Lagée nyan hana meusaboh pih rhot bak tanoh meunyoe hana geukeuheundak lé Bapak gata. 30 Padub na lé jeumeulah ôk bak ulée gata pih ka geubileueng. 31 Sabab nyan, bék kheueh teumakot! Gata leubeh meuyuem nibak cicém-cicém tulô nyan!" 32 "Barang gasoe jipeucaya dikeue rakyat ba bahwa gobnyan murit Ulôn, teuma Ulôn pih Lôn akui ureuëng nyan dikeue Bapak Ulôn di dalam syeuruga. 33 Teuma, barang gasoe nyang ji iengkeue Ulôn dikeue rakyat ba bahwa jihnyan murit Ulôn, teuma Ulôn pih Lôn iengkeue jih nyan dikeue Bapak Ulôn di syeuruga." 34 "Bék kheueh neusangka bahwa Ulôn ba damé ateueh donya nyoe. Ulôn hana Lôn ba damé, teuma sitree. 35 Ulôn nyoe teuka sampoe jeuet keusabab aneuëk agam jilawan bapak jih, dan aneuëk inong jilawan mak jih, meunan cit meulintée nyang inong jilawan mak tuwan jih. 36 Nyoe, nyang teuma jeuet keumusoh nyang paleng rayeuk na kheueh anggota keuluwarga droe jih. 37 Ureuëng nyang jigaséh keu bapak jih dan mak jihnyan leubeh nibak jigaséh keu Lôn, ureuëng nyan hana patôt jeuet keu murit Lôn. Meunan cit deungon ureuëng nyang jigaséh keu aneuëk jih nyang agam atawa aneuëk inong leubeh nibak jigaséh keu Lôn. 38 Dan ureuëng nyang hana jitem gulam saleb gobnyan dan hana teuma jitem seutôt Ulôn, ureuëng nyang lagée nyan hana patot jeuet keu murit Lôn. 39 Ureuëng nyang jipeuteun udeb jih, ureuëng nyan teuma gadôh udeb jihnyan, teuma ureuëng nyang gadôh udeb jih sabab seutia keu Ulôn, ureuëng nyan teuma meuteumé udeb." 40 "Ureuëng nyang teurimong gata, ureuëng nyan jiteurimong Ulôn. Dan ureuëng nyang teurimong Ulôn, saban cit geuteurimong ureuëng nyang utus Ulôn. 41 Ureuëng nyang teurimong Nabi sabab gobnyan keubiet Nabi, ureuëng nyan teuma geuteurimong upah sidroe Nabi. Dan soe mantong nyang teurimong sidroe ureuëng nyang gét sabab gobnyan gét, ureuëng nyan teuma jiteurimong upah sidroe ureuëng gét. 42 Soe-soe nyang jitem jok ié jieb, bahpih ié leupie keu sidroe nibak ureuëng-ureuëng nyang hina nyoe, sabab gobnyan murit Lôn, peucaya kheueh gobnyan pasti meuteumé upah!"

Matius 11

1 Óh ka lheueh Isa geubri bandum peutunyok-peutunyok ubak bandua blaih droe murit Gobnyan, laju geujak dan geutinggai teumpat nyan. Gobnyan geujak seumeubeuet dan geupeusampoe peusan-peusan nibak Po teu Allah bak banda-banda nyang rab-rab disinan. 2 Nabi Yahya Pumanö nyang mantong lam glab geudeungoe peue-peue nyang geupeubuet lé Almaseh. Laju lé gobnyan geuyue ubak na padub droe murit geuh keujak meurumpok ngon Isa keuneuk teumanyong, 3 "Peu kheueh Bapak nyang trok lagée nyang ka geumeujanji lé Po teu Allah, atawa peu kheueh harôh kamoe preh ureuëng laén?" 4 Geujaweueb lé Isa, "Neujak gisa kheueh laju ubak Nabi Yahya Pumanö dan neupeugah laju peue-peue nyang gata deungoe dan gata kalon: 5 Ureuëng buta deuh jimeungieng, ureuëng lapée ka jeuet jijak, dan ureuëng meupeunyakét kulét nyang lumpah parah ka puléh; ureuëng tuloe ka deuh jideungoe, ureuëng maté udeb lom teuma, dan Haba Gét nibak Po teu Allah geupeusampoe keu ureuëng-ureuëng gasien. 6 Mubahgia kheueh ureuëng nyang hán tulak Ulôn!" 7 Óh ka geujak bandum utosan Nabi Yahya Pumanö nyan, Isa laju geupeu phon peugah haba keuhai Nabi Yahya Pumanö, kheun Gobnyan, "Gata nyoe tajak u padang pasi peue nyang gata jak ngieng? Peu kheueh siôn naleueng nyang jipoet lé angén? 8 Gata tajak peue nyang gata jak ngieng? Peu kheueh sidroe ureuëng nyang jisök peukayan tari? Ureuëng-ureuëng nyang sök peukayan lagée nyan teumpat jih bak meuligoe! 9 Teuma, peubuet gata tajak u padang pasi? Peu kheueh gata jak ngieng nabi? Beutôi, leubeh nibak sidroe nabi. 10 Sabab Nabi Yahya nyan kheueh nyang teupeugah lam ayat Alkitab nyoe, 'Nyoe kheueh utosan Ulôn, kheun Po teu Allah, Ulôn utus gobnyan leubeh dilée nibak Gata mangat gobnyan geupeuhah jalan keu Gata.' 11 Ingat kheueh! Ateueh rhueng donya nyoe hana ureuëng laén nyang leubeh rayeuk nibak Nabi Yahya Pumanö. Bah pih lagée nyan, ureuëng nyang paleng ubit lamkawan umat Po teu Allah ureuëng nyan leubeh rayeuk nibak Nabi Yahya Pumanö. 12 Yoh phon Nabi Yahya Pumanö geujak peusampoe beurita gobnyan sampoe ubak watée nyoe, umat Po teu Allah jilawan lé ureuëng-ureuëng nyang meu-useuha keuneuk kuasa ateueh gobnyan deungon cara paksa. 13 Akhé jih sampoe trok Nabi Yahya Pumanö, bandum huköm Nabi Musa dan ajaran nabi-nabi na teupeugah keuhai-hai nyang harôh teujadi. 14 Dan meunyoe gata neutem peucaya, nabi Yahya nyan kheueh Ilyas, keuhai gobnyan teuka ka lheueh teupeugah. 15 Meunyoe na geulinyueng, deungoe kheueh! 16 Deungon peue Lôn peusaban ureuëng-ureuëng bak jamén nyoe? Awaknyan lagée aneuëk manyak nyang duek-duek bak keude. Saboh kawan nyoe jihôi kawan nyang laén, 17 'Kamoe keuneuk peumeuén ca-e geumbira keu gata nyoe, teuma gata hana tatem meunari! Kamoe meuca-e lagu meuba-e, dan gata hana tatem mo!' 18 Nabi Yahya ka trok -- gobnyan geupuasa dan hana geujieb ié anggô; dan di ureuëng ramé jipeugah, 'Gobnyan ka jitamong jén!' 19 Jinoenyoe Aneuëk Manusia, ka teuka -- Gobnyan geu makheun dan geujieb ié; laju lé ureuëng ramé geupeugah, 'Ngieng kheueh ureuëng nyan! Leuba, peumabök, rakan ureuëng kutéb cukée dan rakan ureuëng peubuet desya.' Bah pih meunan, keubijaksanaan Po teu Allah teubri bukeuti nibak hase-hase nyan." 20 Dan Isa laju geupeu phon seurapa keu banda-banda, di teumpat Gobnyan paleng jai geupeugét buet nyang ajaéb. Sabab ureuëng-ureuëng nyang na lam banda nyan hana jitem meutobat nibak desya-desya nyang ka jipeubuet. 21 "Cilaka gata, Korazim! Dan cilaka teuma gata, he Betsaida! Sangkira jih buet-buet nyang ajaéb ka geupeubuet lamkawan gata nyan pih ka teupeubuet di Tirus dan Sidon, pasti ureuëng-ureuëng nyang na nibak teumpat nyan ka treb that meutobat nibak desya-desya jihnyan dan jingui peukayan meuduka cita dan geuboh abée di ateueh ulée. 22 Ingat kheueh, bak Uroe Kiamat, ureuëng-ureuëng Tirus dan Sidon teuma leubeh mudah geupeu-amphon lé Po teu Allah nibak gata! 23 Teuma gata, hé banda Kapernaum! Peu kheueh gata teupeumanyang cit teuma sampoe trok u dalam syeuruga? Hana! Teuma gata teuböh lam apui nuraka! Sabab dak jeuet buet-buet nyang ajaéb nyan ka lheueh teupeubuet di Sodom, Sodom nyan mantong na sampoe bak watée nyoe! 24 Ingat, nibak Uroe Kiamat, ureuëng Sodom leubeh mangat geupeu-amphon lé Po teu Allah nibak gata!" 25 Bak watée nyan Isa meudoá, "Bapak, nyang mat kuasa ateueh langét ngon bumoe! Ulôn lakée teurimong gaséh ubak Droeneueh sabab bandum nyan Droeneueh nyang rahsia nibak ureuëng-ureuëng nyang carông dan meu-iéleumé, teuma Droeneueh tunyok ubak ureuëng-ureuëng nyang hana sikula. 26 Nyan kheueh nyang teuba keu galak até Bapak." 27 Laju Isa geupeugah lom, "Banmandum nyan pih ka geujok lé Bapak keu Ulôn. Hana meusidroe pih nyang turi Aneuëk, seulaén Bapak. Meunan cit hana nyang turi Bapak seulaén Aneuëk, dan ureuëng-ureuëng keu Aneuëk nyan geupeuturi Bapak. 28 Tajak kheueh ubak Ulôn he gata bandum nyang reuôh reuah, dan nyang teurasa beuban teuh brat; Ulôn teuma nyang peupuih rukueng gata. 29 Seutôt kheueh peue-peue nyang Ulôn peurintah dan meurunoe kheueh ubak Ulôn. Sabab Ulôn nyoe leumoh leumbot dan miyueb até, teuma gata meurasa mangat. 30 Sabab peue-peue nyang Ulôn peurintah keubiet mangat lumpah na, dan beuban nyang Ulôn keubah ateueh gata nyan phui lumpah na."

Matius 12

1 Bak siuroe, uroe Sabat, watée Isa geujak rot lampôh gandom gob, murit-murit Gobnyan laju geupot boh gandom, laju geupajoh boh gandom nyan sabab ka deuk that. 2 Watée jingieng hai nyan lé ureuëng-ureuëng Farisi, awaknyan laju jipeugah ubak Isa, "Kalon kheueh! Murit-murit Droeneueh ji-iengkeue huköm agama geutanyoe deungon cara jipeubuet nyang geutham bak uroe Sabat." 3 Geujaweueb lé Isa, "Peu kheueh gohlom na gata beuet peue nyang ka geupeubuet lé Nabi Daud watée gobnyan ngon murit-murit gobnyan deuek? 4 Gobnyan geutamong lam Baét Allah; teuma laju geupajoh ruti nyang ka teupeuseumah keu Po teu Allah. Padahai meunurot huköm agama geutanyoe, gobnyan meunan cit deungon murit-murit gobnyan hana jeuet geupajoh ruti nyan -- nyang jeuet pajoh na kheueh imeum-imeum mantong. 5 Atawa peu kheueh gohlom na gata beuet didalam huköm Nabi Musa bahwa tieb-tieb uroe Sabat imeum-imeum nyang peubuet tugaih bak Baét Allah, geu-iengkeue peuratoran uroe Sabat, teuma hainyan hana geupeusalah? 6 Neusimak kheueh peue nyang Ulôn peugah nyoe: disinoe na nyang leubeh rayeuk nibak Baét Allah. 7 Lam Alkitab na meutuléh: Gaséh sayang kheueh nyang Ulôn lakée, bukon keureubeuen beulatang. Meunyoe seukira jih gata beutôi-beutôi muphom peue nyang Ulôn peugah nyan, pasti gata hana tapeusalah ureuëng-ureuëng nyang hana meusalah. 8 Sabab Aneuëk Manusia meukuasa ateueh uroe Sabat." 9 Isa teuma laju geutinggai teumpat nyan teuma geujak u dalam saboh rumoh iébadat. 10 Nibak teumpat nyan na ureuëng nyang jaroe jihnyan lapée siblaih. Na meupadub droe nyang teungoh jimita salah nyang geupeubuet lé Isa, awaknyan laju jitanyong ubak Isa, "Peu kheueh jeuet teupeupuléh ureuëng bak uroe Sabat?" 11 Geujaweueb lé Isa, "Meunyoe sangkira jih na sidroe lamkawan gata na tapeulara saboh bubiri, dan bak uroe Sabat bubiri nyan rhot lam mon nyang lumpah that lhok; peu kheueh ureuëng po bubiri nyan hana jiuseuha jipeuteungoh bubiri lam mon nyan? 12 Nyan, manusia leubeh muyuem nibak bubiri! Teuma, meunyoe meunan, jeuet teutulông gob bak uroe Sabat." 13 Óh lheueh nyan Isa geupeugah ubak ureuëng nyang jaroe jih lapée siblaih nyan, "Sunyueng kheueh keunoe jaroe gata." Ureuëng nyan laju jisunyueng jaroe jihnyan, dan jaroe nyan laju puléh lagée jaroe siblaih treuk. 14 Teuma lé ureuëng-ureuëng Farisi laju jitinggai rumoh iébadat nyan, teuma laju jijakmupakat keuneuk poh maté Isa. 15 Isa geuteupeue bahwa ureuëng-ureuëng Farisi nyan na niet brok keu Gobnyan. Teuma, Gobnyan laju geujak nibak teumpat nyan dan jai that ureuëng laén nyang seutôt Gobnyan. Laju Gobnyan geupeu puléh bandum ureuëng nyang sakét. 16 Teuma Gobnyan geutham ureuëng-ureuëng nyang geupeu puléh nyan bék jipeugah bak ureuëng laén keuhai Gobnyan. 17 Deungon lagée nyan jeuet teuk peue nyang ka geupeugah lé Allah rot Nabi Yesaya, 18 "Nyoe kheueh utosan lôn nyang ulôn piléh, Ureuëng nyang Lôn gaséh dan biet that galak até Lôn. Roh Ulôn teuma Lôn bri keu Gobnyan, keuadelan Lôn teuma jipeusampoe keu bansa-bansa. 19 Gobnyan hana geumeudakwa atawa geu-geumeuciek, atawa meupidato bak rot ueh raya. 20 Trieng nyang leunuet hana teuma geuleugôt panyöt nyang mala hana teuma geupeulon. Gobnyan teuma meujuang sampoe keuadelan meuteumé; 21 banmandum bansa geupeutroh harapan keu Gobnyan." 22 Óh lheueh nyan laju jiba ukeue Isa sidroe ureuëng buta dan kalu sabab ka jikuasa lé roh jeuhet. Isa laju geupeu puléh ureuëng nyan sampoe ka jeuet jipeugah haba ngon jikeumalon. 23 Bandum ureuëng hireuen sira jipeugah, "Mungken nyoe kheueh Gobnyan Aneuëk Nabi Daud nyang ka geupeu janji lé Po teu Allah nyan?" 24 Watée ureuëng-ureuëng Farisi jideungoe hai nyan, awaknyan jijaweueb, "Ureuëng nyoe nyang jeuet geu-use roh jeuhet, sabab Beelzebul, ulée roh-roh jeuhet, ka geubri kuasa nyan keu Gobnyan." 25 Isa geuteupeue pikeran ureuëng Farisi nyan. Teuma Gobnyan laju geupeugah ubak awaknyan, "Meunyoe na saboh nanggroe ka peucah beulah sampoe ka jeuet meukawöm-kawöm nyang musoh meumusoh, nyan tanda jih nanggroe nyan hana ék meuteuen. Teuma saboh banda atawa keuluwarga nyang teujadi peucah beulah dan jeuet keumusoh saboh deungon nyang laén teuma nyang lagée nyan rhot keu ancoe. 26 Meunan cit teuma lam keurajeuen Iblih; meunyoe na saboh kawan teu-use kawan nyang laén, teuma keurajeuen Iblih nyan ka teujadi peucah beulah dan laju ancoe. 27 Gata tapeugah bahwa Ulôn use roh jeuhet sabab kuasa Beelzebul. Meunyoe meunan deungon kuasa soe kheueh murit-murit gata jiuse roh jeuhet. Murit-murit gata keudroe nyang jeuet keutanda bahwa gatanyoe salah! 28 Teuma Ulôn use roh jeuhet deungon kuasa Roh Allah. Dan nyan na kheueh sibagoe tanda bahwa Allah ka geupeu phon mat peurintah lamkawan geutanyoe. 29 Pakriban ureuëng hase jitamong lam rumoh ureuëng kha keu jijak reupah hareuta ureuëng nyan, meunyoe ureuëng kha nyan hana teu-ikat leubeh ilée? Óh lheueh nyan, barô kheueh gobnyan hase jicok bandum atra ureuëng nyan. 30 Ureuëng nyang hana jidong blaih Lôn nyang sikeubiet jih ureuëng nyan ka jilawan Ulôn. Dan ureuëng nyang hana jitem tulông Ulôn nyang sikeubiet jih ka jipeureulôh nyang Ulôn peubuet! 31 Ngon sabab nyan, beutateupeu kheueh, meunyoe na ureuëng jipeubuet desya ngon jimeututoe nariet nyang hina, ureuëng nyan jeuet teupeu amphon! Teuma meunyoe ureuëng nyang jihina Roh Po teu Allah, ureuëng nyan hana jeuet teupeu amphon! 32 Meunyoe na ureuëng jipeugah sipeue-peue nyang sifeuet jih jilawan Aneuëk Manusia, ureuëng nyan jeuet teupeue amphon, teuma meunyoe ureuëng nyan jihina Roh Po teu Allah, ureuëng nyang lagée nyan hana jeuet geupeu amphon, bah kheueh nyan bak watée nyoe meunan cit óh uroe akhirat!" 33 "Mangat boh kayée nyan gét, bak jih harôh subo ngon gét. Meunyoe bak jih hana subo ngon gét, bôh jih pih hana gét. Subö jih bak kayée nyan leumah teukalon nibak bôh jih. 34 Gata ureuëng jeuhet, pakriban mungken gata jeuet tapeugah hai-hai nyang gét meunyoe gata jeuhet? Peue nyang jipeugah lé babah nyan kheueh teuma nyang teusuréh dalam até! 35 Ureuëng nyang gét geumeututoe nyang jroh sabab ureuëng nyan peunoh ngon nyang gét. Seubalek jih, ureuëng nyang jeuhet jimeututoe hai-hai nyang jeuhet sabab gobnyan peunoh ngon nyang jeuhet. 36 Teuma, ingat kheueh: bak Uroe Kiamat, tieb-tieb ureuëng harôh meutanggong jaweueb ateueh tieb-tieb nariet nyang ka jipeugah nyang hana meuguna. 37 Sabab tutoe gata keudroe kheueh nyang teungui keu teupeuputôh peu kheueh gata meusalah atawa beuna." 38 Óh lheueh nyan na meupadub droe gurée agama dan ureuëng-ureuëng Farisi geupeugah, "Bapak gurée, kamoe keuneuk kalon Droeneueh neupeuleumah buet nyang ajaéb." 39 "Keubiet that jeuhet jih dan doraka jih ureuëng-ureuëng bak jamén nyoe!" Geujaweueb lé Isa, "Gata nyoe talakée mangat Lôn peuleumah buet ajaéb? Keu gata hana teubri bah pih meusaboh buet ajaéb, malengkan keuajaéban Nabi Yunus. 40 Nabi Yunus tinggai lhée uroe lhée malam dalam pruet uengkot raya. Meunan cit deungon Aneuëk Manusia teuma tinggai lhée uroe lhée malam dalam pruet bumoe. 41 Bak Uroe Kiamat, peunduduek Niniwe teuma jibeudôh meusigoe ngon ureuëng-ureuëng jamén nyoe dan jitudôh awaknyan. Sabab ureuëng-ureuëng Niniwe nyan ka meutobat nibak desya-desya jih nyan, watée Nabi Yunus geu-khutubah ubak awaknyan. Teuma disinoe bak watée nyoe na nyang leubeh rayeuk nibak Nabi Yunus! 42 Bak Uroe Kiamat, ratu nibak nanggroe Seulatan teuma geubeudôh meusigoe-sigoe ngon ureuëng-ureuëng jamén nyoe dan geutudôh awaknyan. Sabab keu teudeungoe peurunoe Nabi Sulaiman nyan bijak, ratu nyan kuasa geujak nibak nanggroe geuh nyang jiôh that di ujong bumoe. Teuma disinoe bak watée nyoe na nyang leubeh rayeuk nibak Nabi Sulaiman!" 43 "Meunyoe roh jeuhet jitinggai sidroe-droe ureuëng, roh nyan jikeulileng bak teumpat-teumpat nyang tho keu jimita teumpat peuniyôh, teuma nyang jimita nyan hana meuteumé. 44 Ngon sabab nyan laju jipeugah, 'ulôn teuma lôn gisa u rumoh nyang ka lôn tinggai.' Watée awaknyan ka trok keudeh, rumoh nyan ka shoh, gleh dan teu-atoe. 45 Laju jijak dan jiba tujoh droe roh nyang laén nyang leubeh jeuhet nibak jih nyan. Óh lheueh nyan awaknyan laju jitamong lam tuboh ureuëng nyan, laju jitinggai lam badan ureuëng nyan. Teuma akhé jih keuadaan ureuëng nyan leubeh brok nibak bak nyang ka-ka. Nyan kheueh teuma nyang jeuet deungon ureuëng-ureuëng jeuhet bak jamén nyoe." 46 Teungoh Isa mantong geupeugah haba deungon ureuëng ramé nyan, teuka teuk ubak Gobnyan mak Geuh ngon syedara-syedara Gobnyan. Awaknyan geudong diluwa sira geu-useuha mangat hase geumariet deungon Gobnyan. 47 Na kheueh sidroe lamkawan ureuëng ramé nyan, nyang na nibak teumpat nyan jipeugah ubak Isa, "Hai pak, mak neueh ngon syedara droeneueh na di luwa. Awaknyan keuneuk peugah haba deungon Bapak." 48 Laju geujaweueb lé Isa, "Soe kheueh mak Ulôn? Soe kheueh teuma syedara-syedara Lôn?" 49 Laju Gobnyan geutunyok ubak murit-murit Geuh sira geupeugah lagée nyoe, "Nyoe kheueh mak ngon syedara-syedara Lôn. 50 Ureuëng nyang peubuet keuheundak Bapak Ulôn di syeuruga, nyan kheueh syedara Ulôn nyang agam, syedara inong, dan mak Ulôn."

Matius 13

1 Bak uroe nyan cit teuma Isa geujak nibak rumoh nyan dan laju geujak bak binéh danau dan geuduek bak binéh danau nyan. 2 Jai lagoena ureuëng nyang meuhudom ban silingka Isa, lé sabab nyan laju geujak duek lam peurahô, teuma di ureuëng ramé nyan jidong meuriti bak binéh panté. 3 Teuma Isa laju geupeurunoe ureuëng ramé nyan deungon miseue keuhai-hai nyang lumpah lé. "Sidroe ureuëng meutani jijak tabu bijéh," meunan kheueh Isa geupeu phon meucalitra. 4 "Teungoh geutabu bijéh nyan, na bijéh nyang rhot ateueh rot ueh. Laju jiteuka cicém jijak catuek bijéh nyan sampoe habéh. 5 Na teuma nyang rhot bak teumpat nyang meubatée-batée, nyang tanoh jih cit bacut. Bijéh-bijéh nyan bagaih that jitimoh sabab kureueng tanoh. 6 Teuma watée mata uroe ka jipeuphon teungoh, bijéh-bijéh nyang bantimoh nyan ka jipeuphon layée, óh lheueh nyan tho dan maté sabab ukeue jih hana jitamong sampoe óh lhok. 7 Na teuma bijéh nyang rhot di teungoh-teungoh tamah meuduro. Tamah meuduro nyan laju jitimoh sampoe habéh teutob bubena bijéh-bijéh nyan akhé jih maté. 8 Teuma na cit bijéh nyang rhot bak tanoh nyang luhu, jitimoh laju jimuboh; na nyang sireutôh, na nyang nam ploh, dan na cit nyang lhée ploh go ganda." 9 Óh ka lheueh geucalitra bandum miseue nyan laju geupeugah lé Isa, "Meunyoe gata na punyueng, deungoe kheueh!" 10 Óh lheueh nyan murit-murit Isa geuteuka dan geutanyong ubak Gobnyan, "Pakon Bapak neuboh miseue meunyoe neumeututoe ngon ureuëng ramé nyan?" 11 Geujaweueb lé Isa, "Sabab gata ka geubri anugeurah keu neuteupeue rahsia pakriban Po teu Allah geumat peurintah, teuma keu awaknyan hana. 12 Sabab ureuëng nyang ka lheueh na, teuma geubri nyang leubeh le lom, dan ureuëng nyan teuma leubeh hareuta. Teuma, ureuëng nyang hana sapeue na, nyang bacut nyang na nibak ureuëng nyan geucok lom teuma. 13 Nyang kheueh sabab jih Ulôn peugah ngon miseue meunyoe Ulôn peugah haba ngon ureuëng ramé, sabab awaknyan jimeungieng, teuma lagée ureuëng nyang hana deuh keumalon; awaknyan jideungoe teuma lagée ureuëng nyang hana deuh teudeungoe dan hana muphom. 14 Deungon lagée nyan jeuet kheueh peue nyang ka geupeugah lé Nabi Yesaya, 'Po teu Allah meufeureuman: awaknyan teuma sabe jideungoe teuma hana muphom; Awaknyan sabe na jisimak teuma hana jiteupeu peue-peue teuma nyang teujadi. 15 Sabab pikeran ureuëng nyoe ka tumpôi, geulinyueng awaknyan ka tulo dan mata awaknyan ka teupeupét. Nyoe jeuet mangat mata awaknyan bék jikeumalon, geulinyueng awaknyan bék teudeungoe sapeue, pikeran awaknyan bék muphom dan bék jigisa bak Ulôn, laju Ulôn peupuléh awaknyan.' " 16 "Teuma keubiet meu-untông gatanyoe bandum," geupeugah lé Isa bak murit-murit Gobnyan, "sabab gata beutôi tameungieng dan neumeudeungoe. 17 Ingat kheueh lé that nabi dan ureuëng nyang taát ubak Po teu Allah meuhéuet that keuneuk geukalon lagée nyang gata ngieng bak watée nyoe, teuma hai nyan hana awaknyan kalon. Awaknyan meuheuét that keuneuk jideungoe peue nyang gata deungoe bak watée nyoe, teuma hai nyan hana awaknyan deungoe." 18 "Deungoe peue makna miseue keuhai ureuëng teumabu bijéh nyan. 19 Bijéh nyang rhot ateueh rot lagée ureuëng nyang jideungoe haba pakriban Po teu Allah geumat peurintah, teuma hana jimuphom. Si jeuhet nyan jiteuka laju jireupah peue-peue nyang teutabu lam até awaknyan. 20 Bijéh nyang rhot bak teumpat nyang meubatée-batée, miseue ureuëng nyang jideungoe haba nyan, dan maté nyan cit geuteurimong deungon galak até. 21 Teuma haba nyan hana meu-ukeue lam até awaknyan, akhé jih hana treb meuteuen. Meunan awaknyan meuteumé keusosahan atawa keunong iénanya sabab haba nyan, watée nyan cit teuma awaknyan murtat. 22 Bijéh nyang rhot lam tamah meuduro miseue ureuëng nyang geudeungoe haba nyan, teuma khawate keuhai udeb jih dan nyang jipike sabe keu udeb mangat dan meuwáh. Sabab nyan haba nyang teuka nibak Po teu Allah jiginton lam até awaknyan akhé jih hana mubôh. 23 Dan bijéh nyang rhot bak tanoh nyang subo miseue ureuëng-ureuëng nyang geudeungoe haba nyan dan geupeu phon laju. Awaknyan jimuboh óh lé, na nyang sireutôh, na nyang nam ploh, dan na nyang lhée ploh goe lipat hase jih." 24 Isa geucalitra lom sabôh miseue keu ureuëng ramé nyan, kheun Gobnyan, "Meunyoe Po teu Allah nyang mat peurintah, keuadaan jih na kheueh lagée nyoe: Sidroe ureuëng meugo geutabu bijéh nyang gét nibak blang gobnyan. 25 Bak simalam, watée bandum ureuëng teungoh mangat ji éh, musoh ureuëng meugo nyan teuka jijak sipreuk bijéh naleueng lakoe lam teungoh-teungoh bijéh gandom nyan, óh lheueh nyan laju jijak. 26 Watée sinaman nyan timoh dan mu-mu sinaman nyan ka jiteubiet, teuma deuh kheueh laju naleueng lakoe nyan. 27 Laju ureuëng-ureuëng nyang jigaji lé peutani nyan jijak ubak peutani nyan sira jipeugah, "Teungku, hat lôn teupeu droeneueh neupula bijéh nyang gét dalam blang Teungku? Pakriban jeuet hase jitimoh naleueng lakoe lam blang amphon?' 28 Geujaweueb lé ureuëng meugo nyan, 'Nyan buet nyang jipeuteuka lé musoh.' Dan di ureuëng-ureuëng nyang tueng upah ubak ureuëng meugo nyan geutanyong lom, 'Peu kheueh lé Teungku neuyue kamoe mangat kamoe jak lot bak naleueng lakoe nyan?' 29 'Hana peue,' geujaweueb lé gobnyan, 'Sabab meunyoe naleueng lakoe nyan teulot, eunteuk gandom nyan pih rhoh teutarek. 30 Bah kheueh naleueng lakoe nyan jitimoh watée trok watée musém mupot. Eunteuk ulôn peugah ubak ureuëng mupot nyan: Peusapat dilée bandum naleueng lakoe nyan, ikat, dan tot laju. Óh ka lheueh nyan peusapat teuma boh gandom, dan keubah laju u dalam gupôk.' " 31 Isa geucalitra lom miseue-miseue keu ureuëng ramé, kheun Gobnyan, "Meunyoe Allah geumat peurintah, keuadaan jih na kheueh lagée miseue nyoe: sineuk aneuëk sisawi jicok lé sidroe ureuëng, laju jipula lam ladang ureuëng nyan. 32 Aneuëk sisawi na kheueh bijéh nyang paleng ubit. Teuma meunyoe ka timoh, bak sisawi nyan jeuet keu sinaman nyang paleng rayeuk lamkawan sinaman nyang laén, bak sisawi nyan jeuet keu bak kayée, mangat dum na cicém-cicém jijak keunan jipeugöt uempueng bak cabeueng-cabeueng kayée nyan." 33 Na miseue nyang laén nyang geucalitra lé Isa ubak ureuëng ramé, "Meunyoe Po teu Allah ka geumat peurintah, keuadaan jih na kheueh lagée ragoe nyang geucok lé sidroe ureuëng inong, laju geucawoe deungon peuet ploh arée teupông teurigu mangat meukeumang banmandum!" 34 Bandum nyang geupurunoe lé Isa bak ureuëng ramé nyan deungon miseue-miseue. 35 Deungon lagée nyan teuma jeuet kheueh peue nyang ka geupeugah lé nabi, 'Ulôn peuguna miseue-miseue meunyoe Lôn peugah haba deungon awaknyan; ulôn peugah hai-hai nyang teusöm yoh phon that jeuet donya nyoe." 36 Óh lheueh nyan Isa laju geutinggai ureuëng ramé nyan, dan geutamong laju lam rumoh. Murit-murit Gobnyan geujak keunan sira geupeugah, "Ci Bapak peutrang keu kamoe makna miseue bak naleueng lakoe lamkawan bak gandom nyan." 37 Geujaweueb lé Isa, "Ureuëng nyang sipreuk bijéh nyang gét nyan na kheueh Aneuëk Manusia. 38 Blang nyan na kheueh donya nyoe. Bijéh nyang gét nyan na kheueh ureuëng-ureuëng nyang ka jeuet keu umat Po teu Allah. Naleueng lakoe nyan na kheueh ureuëng nyang doeng blaih Iblih. 39 Musoh nyang pula naleueng lakoe nyan na kheueh Iblih. Musém mupot na kheueh Uroe Kiamat, dan ureuëng nyang pot nyan na kheueh malaikat-malaikat. 40 Lagée toh naleueng lakoe teupeusapat dan teutot lam apui hu, meunan cit teuma bak Uroe Kiamat singoh. 41 Aneuëk Manusia teuma geuyue ubak malaikat-malaikat Gobnyan jeuet geupeusapat lamkawan umat manusia bandum nyang jeuet keusabab manusia jipeubuet desya, dan bandum ureuëng laén nyang peubuet jeuhet. 42 Awaknyan bandum teuma teuböh lam sinungkée meu-apui nyang hu meuhuéb-huéb; disinan awaknyan teuma jimoe dan meudeurita. 43 Dan ureuëng-ureuëng nyang jipeubuet keuheundak Po teu Allah ureuëng nyan meucahya lagée mata uroe lam Donya Barô Allah, Bapak awaknyan. Teuma, meunyoe na geulinyueng, deungoe kheueh!" 44 "Meunyoe Po teu Allah geumat peurintah, keuadaan jih lagée miseue umpamanyoe: Na atra nyang teuseubée lam tanoh laju jiteumé lé sidroe-droe ureuëng, dan jipeutamong lom lam tanoh. Oh lheueh nyan sabab galak that até jih, ureuëngnyan jijak peubloe banmandum atra milék jih, lheuehnyan laju jigisa dan jibloe tanoh nyan." 45 "Meunyoe Po teu Allah geumat peurintah, keuadaan jih na kheueh lagée miseue umpamanyoe: Sidroe saudaga jimita mutiara-mutiara nyang meuhái yum. 46 Watée jihnyan jiteumé sineuk mutiara nyang lumpah ceudah get jih, laju jijak jipeubloe banmandum atra milék jih, lheuehnyan laju jibloe mutiara nyang sineuk nyan." 47 "Meunyoe Po teu Allah geumat peurintah, keuadaan jih geuboh miseue ubak jeue nyang teutiek lam danau, lheueh nyan laju meuteumé meubagoe-bagoe eungkot. 48 Oh ka lheueh jeue nyan peunoh, jeue nyan laju jitarek ateueh darat lé neulayan-neulayan. Lheuehnyan awaknyan jiduek laju jipiléh dan jipeumeungkréeh-meungkréeh eungkot-eungkotnyan: Nyang get jikeubah lam guci dan nyang hana get jiböih. 49 Meunan kheueh haijih watée Uroe Dudoe, malaikat-malaikat geujak piléh ureuëng-ureuëng jeuhet nibak ureuëng-ureuëng nyang jipeubuet keuheundak Po teu Allah. 50 Lheuehnyan ureuëng-ureuëng jeuhetnyan geuböih lam sinungkée apui. Inan kheueh awaknyan jimoe ba-e dan meudeurita." 51 "Peue ka muphom gata?" tanyong Isa, "Muphom Pak!" jaweueb awaknyan. 52 Teuma geupeugah lom lé Isa, "Nyan kheueh sabab jih gurée agama nyang ka jeuet keu anggota umat Po Teu Allah, na kheueh lagée sidroe ureuëng po rumoh nyang jipeuteubiet nibak teumpat keuneubah hareuta jihnyan bandum barang-barang nyang barô ngon nyang treb." 53 Óh ka seuleusoe Isa geucalitra bandum miseue nyan, laju geutinggai teumpat nyan, 54 dan geujakwoe teuma u gampông droe Gobnyan. Óh bantrok u gampông Gobnyan laju geujak seumeubeuet u rumoh iébadat, dan ureuëng-ureuëng nyang deungoe Gobnyan nibak teumpat nyan, hireuen lumpah na. Awaknyan jipeugah, "Dipat geuteumé lé ureuëng nyoe hikeumat nyang lagée nyan? Dan pane teuma Gobnyan meuteumé kuasa keu geupeuna buet ajaéb? 55 Kon kheueh ureuëng nyoe aneuëk tukang kayée? Dan kon kheueh Mariam nyan mak Gobnyan; dan syedara-syedara Gobnyan na kheueh Yakobus, Yusuf, Simon dan Yudas? 56 Dan kon kheueh syedara-syedara Gobnyan nyang inong tinggai disinoe? Dipat Gobnyan geuteumé banmandum nyan?" 57 Teuma awaknyan laju jitulak Isa. Laju Isa geupeugah ubak awaknyan, "Sidroe nabi jihoreumat dipat mantong, seulaén di gampông geuh keudroe dan di rumoh gobnyan keudroe." 58 Teuma deungon sabab nyan Isa hana lé geupeugöt buet nyang ajaéb sabab awak disinan hana jipatéh.

Matius 14

1 Bak watée nyan Herodes, nyang mat kuasa ateueh nanggroe Galilea, geudeungoe keuhai Isa. 2 Herodes geupeugah ubak peujabat-peujabat gobnyan, "Pasti nyoe Nabi Yahya Pumanö nyang ka udeb lom! Nyan kheueh sabab jih bak Gobnyan na kuasa keu geupeubuet nyang ajaéb." 3 Sabab sigohlom nyoe Herodes geuyue drob Nabi Yahya Pumanö dan geuyue ikat gobnyan sira geuyue peutamong lam glab. Herodes geupeubuet lagée nyan sabab Herodias, peurumoh syedara gobnyan keudroe, nyang nan geuh Pilipus. 4 Sabab ka lheueh geupeugah lagée nyoe lé Nabi Yahya ubak Herodes, "Hana jeuet gata meukawen ngon Herodias!" 5 Nyang sibeuna jih Herodes keuneuk peumaté Nabi Yahya nyan, teuma gobnyan teumakot ubak ureuëng ramé, sabab awaknyan ji-anggab Nabi Yahya nyan nabi. 6 Bak watée Herodes geupeuna khanuri keu teupeu ingat uroe ulang thon gobnyan, aneuëk inong Herodias jimeunari dikeue ureuëng ramé. Deungon nari dan likak aneuëk inong nyan, nyang biet-biet lumpah that galak até Herodes keu nari nyang diet nyan, 7 akhé jih Herodes geumeujanji ubak jihnyan deungon sumpah peue mantong nyang jilakée, teuma geubri keu ureuëng nyan. 8 Sabab ka jipeusuna lé ma aneuëk nyan, aneuëk dara nyan jipeugah, "Ulôn lakée ulée Nabi Yahya Pumanö bak uroe nyoe cit teuma nyang teuba ateueh talam!" 9 Ban geudeungoe haba nyan, Herodes seudeh lumpah na. Teuma sabab gobnyan ka geumeubudôk dikeue jamé teuka, laju geupeutron titah mangat jeuet peue nyang jilakée lé aneuëk dara nyan teupeupeunoh. 10 Laju geuyue ubak ureuëng geuh mangat jijak laju u rumoh glab keu jijak khoh takue Nabi Yahya. 11 Óh lheueh nyan ulée Nabi Yahya nyang ka putôh nyan laju jikeubah lam talam dan jipeutamong u dalam sira jijok ubak aneuëk dara nyan. Dan di aneuëk dara nyan laju jiba teuma atra nyan ubak ma jihnyan. 12 Óh lheueh nyan murit-murit Nabi Yahya laju jijak cok manyét gobnyan dan jijak peukubu lam jrat. Dan óh lheueh nyan laju awaknyan jijak sira geupeugah ubak Isa. 13 Watée geudeungoe hai nyan lé Isa, laju geu-ék ateueh peurahô sidroe Geuh mantong dan laju geutinggai teumpat nyan, lheueh nyan geujak bak saboh teumpat nyang seungue. Teuma watée jideungoe lé ureuëng ramé keuhai nyan, awaknyan laju jitinggai banda-banda jih keudroe dan jijak seutôt Isa rot darat. 14 Watée Isa geutron nibak peurahô dan geukalon ureuëng ramé nyan, laju jiteuka inseuh keu awaknyan, dan geupeu puléh laju ureuëng nyang sakét nyang na lamkawan nyan. 15 Watée uroe ka seupôt, murit-murit Isa laju geupeugah ubak Gobnyan, "Uroe ka seupôt dan teumpat nyoe teu-aséng that nibak teumpat laén. Leubeh gét Bapak neuyue bandum ureuëng nyoe mangat jeuet jijak, mangat hase jijak bloe peunajoh di gampông-gampông." 16 "Hana peue, awaknyan bék jijak," geu kheun lé Isa, "Gata mantong nyang bri peunajoh keu awaknyan." 17 "Bak kamoe nyang na cit limong boh ruti ngon dua boh eungkot!" geujaweueb lé murit-murit Isa nyan. 18 "Taba laju atra nyan keunoe," geupeugah lé Isa. 19 Óh lheueh nyan lé Isa laju geuyueduek ureuëng ramé nyan ateueh naleueng. Óh lheueh nyan geucok laju ruti nyang limong boh dan eungkot nyang dua boh nyan, óh lheueh nyan geutangáh u langét sira geu peugah syukoe ubak Po teu Allah. Óh lheueh nyan laju geuprah-prah ruti nyan ngon jaroe Gobnyan dan laju geujok ubak murit-murit Gobnyan mangat jeuet teubagi-bagi ubak ureuëng ramé nyan. 20 Awaknyan bandum jimakheun sampoe troe-troe. Óh lheueh nyan lé murit-murit Isa laju geupeusapat peunajoh nyang leubeh teumakheun nyan; na dua blaih boh raga lé jih. 21 Nyang makheun bak watée nyan kira-kira na limong ribée droe, gohlom teu-itong ureuëng inong dan aneuëk-aneuëk miet. 22 Óh lheueh nyan Isa laju geuyue ubak murit-murit Gobnyan mangat geu-ék ateueh peurahô leubeh awai mangat jeuet geujak u meurandeh danau, dan Gobnyan laju geuyue woe ureuëng ramé nyan u rumoh droe maséng-maséng. 23 Óh ka leupah ureuëng ramé nyan jiwoe, Isa laju geu-ék ateueh bukét sidroe Gobnyan keu geujak meudoá. Watée ka malam, Isa teutab mantong disinan sidroe Geuh. 24 Watée nyan peurahô nyang geu-ék lé murit-murit Gobnyan ka jiôh that bak teungoh danau. Peurahô nyan meuguyang gayeng jitampo lé umbak, sabab angén meulawan arah ngon peurahô. 25 Kira-kira poh lhée ngon poh nam beungoh, Isa geujak meurumpok ngon awaknyan sira geujak di ateueh ié. 26 Watée murit-murit Gobnyan geukalon Isa geujak di ateueh ié, awaknyan teukeujot lumpah na, "Hantu!" geuklik awaknyan sabab teumakot that. 27 Teuma Isa laju geujaweueb, "Teunang kheueh! Nyoe Ulôn, Isa. Bék teumakot!" 28 Laju geupeugah lé Petrus, "Meunyoe Droeneueh beutôi Isa, neuyue kheueh bak ulôn mangat lôn jak cit ateueh ié." 29 "Tajak kheueh keunoe," geujaweueb Isa. Teuma Petrus laju geutron lam peurahô, geujak di ateueh ié laju geutuju ubak Isa. 30 Teuma watée geungieng lé Petrus angén nyang jipot rayeuk that ateueh danau nyan, gobnyan teumakot lumpah na dan laju lham. "Tuhan, tulông lôn!" sira geuklik Petrus geulakée tulông. 31 Isa laju geusunyueng jaroe Gobnyan dan laju geudrob Petrus nyan, dan Isa laju geupeugah, "Petrus, Petrus, gata nyoe kureueng iman. Pakon gata ragu-ragu keu Ulôn?" 32 Dan ban dua awaknyan laju geuteungoh ateueh peurahô, watée nyan cit teuma angén ka reuda. 33 Teuma bandum murit-murit Isa laju geusujut geuseumah Gobnyan. Awaknyan geupeugah, "Keubiet, Tuhan na kheueh Aneuëk Po teu Allah!" 34 Watée awaknyan ka troh u meurandeh danau, laju geuteungoh di Genesaret. 35 Dan watée jikalon lé ureuëng-ureuëng nyang na disinan bahwa nyang trok nyan na kheueh Isa, awaknyan laju jijak peusampoe haba nyan ubak bandum daerah nyang na di silingka banda nyan. Dan bubena ureuëng sakét laju jiba ubak Isa. 36 Dan awaknyan jilakée bak Gobnyan jeuet geubri cukéh bajée jubah Geuh, bah pih ujong jih mantong. Dan bandum ureuëng nyang cukéh bajée jubah nyan habéh puléh.

Matius 15

1 Na saboh kawan ureuëng Farisi dan na teuma meupadub droe gurée-gurée agama teuka nibak Yerusalem geujak ubak Isa. Awaknyan geutanyong ubak Gobnyan, 2 "Pakon murit-murit Droeneueh geu-iengkeue keu adat istiadat indatu geutanyoe? Watée keuneuk makheun, awaknyan hana geu rhah jaroe leubeh dilée lagée peuratoran nyang ka na!" 3 Geujaweueb lé Isa, "Dan gata nyoe bandum pakon teutab ta-iengkeue peurintah Allah, nyang peunteng nibak gata taseutôt adat-istiadat indatu gata? 4 Sabab Po teu Allah meufeureuman, 'Horeumat kheueh ubak ayah ngon ma gata,' dan 'Barang gasoe nyang teunak ayah ngon ma jih, ureuëng nyan harôh teuhuköm maté.' 5 Teuma gata tapeurunoe gob lagée nyoe: Meunyoe ureuëng jipeugah keu ureuëng syiek, 'Peue nyang seuharôh jih teujok keu ayah ngon ma, atra nyan ka ulôn peuseumah ubak Po teu Allah,' 6 teuma ureuëng nyang lagée nyan hana wajéb lé jihoreumat keu ureuëng syiek jih. Teuma, lé sabab adat istiadat indatu gata, gata ta-anggab angén pôt peue-peue nyang geupeugah lé Po teu Allah. 7 Gata ureuëng munafék! Paih that peue nyang ka lheueh geupeugah lé Nabi Yesaya keuhai gata, 8 'Meunoe kheueh feureuman Allah: Ureuëng-ureuëng nyan teuma jiseumah Ulôn ngon tutoe haba, teuma até awaknyan jiôh that nibak Ulôn. 9 Sia-sia mantong awaknyan jiseumah Ulôn, sabab peuratoran manusia nyang awaknyan peurunoe siulah-ulah nyan kheueh peuratoran Ulôn.' " 10 Óh lheueh nyan Isa laju geutawök bubena na ureuëng dan geupeugah ubak awaknyan, "Deungoe kheueh nyoe jeuet gata muphom! 11 Nyang jitamong lam babah ureuëng, nyan hana jeuet keu najih; teuma nyang teubiet lam babah ureuëng nyan, nyang kheueh nyang teupeugah najih." 12 Laju murit-murit Isa geuteuka dan geupeugah ubak Gobnyan, "Peu kheueh Bapak teupeu bahwa ureuëng-ureuëng Farisi nyan tupéh até jih watée jideungoe Bapak peugah lagée nyan?" 13 Geujaweueb lé Isa, "Tieb-tieb peunula nyang hana geupula lé Bapak Ulôn di syeuruga teuma geutarek bak ubo jih. 14 Bék neupakoe keu ureuëng-ureuëng Farisi nyan. Awaknyan peumimpén-peumimpén buta; dan meunyoe ureuëng buta jipimpén ureuëng buta, ban dua awaknyan teuma reubah lam paret." 15 Geupeugah lé Petrus, "Neutulông peugah miseue nyan ubak kamoe, Pak!" 16 Geujaweueb lé Isa ubak awaknyan, "Peu kheueh gata gohlom cit muphom? 17 Peu kheueh hana gata teupeu, bahwa nyang jitamong lam babah laju jitron lam pruet, dan óh lheueh nyan jiteubiet lom teuma? 18 Teuma nyang teubiet lam babah, meu-asai nibak até; dan nyan kheueh nyang teupeujeuet manusia rhot bak najih. 19 Sabab nibak lam até jiteuka pikeran-pikeran jeuhet, nyang rhot keu musabab manusia jeuet keu tukang seumupoh maté, meumukah, jipeubuet cabui, ceumeucue, jeuet keusaksi duseuta dan tukang ba peusuna! 20 Hai-hai nyang lagée nyan kheueh nyang rhot ureuëng jeuet keu najih, dan kon lé sabab jipajoh bu ngon jaroe nyang hana teu rhah." 21 Óh lheueh nyan Isa laju geutinggai teumpat nyan dan geujak laju u daerah nyang rab ngon banda Tirus dan Sidon. 22 Na sidroe ureuëng inong Kanaan nibak daerah nyan, jijak murumpok ngon Isa sira jitawök-tawök, "Aneuëk Daud, neugaséh kheueh keu ulôn! Aneuëk inong ulôn ka jitamong roh jeuhet. Udeb jih parah lagoe na." 23 Isa mubacut pih hana geujaweueb keu ureuëng inong nyan. Teuma lé murit-murit Isa geujak ubak Gobnyan sira geulakée, "Pak, neuyue wéeh keudeh ureuëng inong nyan. Jih nyan kiroh mantong dilikot geutanyoe!" 24 Geujaweueb lé Isa, "Ulôn geu-utus keu bansa Israel, khusos jih keu awaknyan nyang sisat." 25 Ureuëng inong nyan laju jipeurab dan jisujut laju dikeue Isa sira jipeugah lagée nyoe, "Neutulông kheueh ulôn, Teungku." 26 Geujaweueb lé Isa, "Hana gét teucok peunajoh aneuëk manyak laju teutiek keu asée." 27 "Beutôi, Teungku," jaweueb ureuëng inong nyan, "Seudangkan asée pih jipajoh séueh-séueh peunajoh nyang rhot nibak meuja teungku po jih." 28 Laju Isa geupeugah bak ureuëng nyan, "Mak, raya lumpah na iman droeneueh! Bah kheueh jeuet peue nyang gata lakée!" Watée nyan cit teuma aneuëk ureuëng inong nyan puléh. 29 Isa laju geutinggai teumpat nyan, dan geujak laju seutôt rot panté Danau Galilea. Óh lheueh nyan laju geuteungoh ubak saboh bukét dan laju geuduek nibak teumpat nyan. 30 Jai lagoe na ureuëng nyang teuka ubak Gobnyan sira jiba ureuëng nyang keunong peunyakét capiek, nyang buta, nyang lapée, nyang kalu, dan ramé lom ureuëng laén nyang sakét. Awaknyan laju jikeubah ureuëng-ureuëng nyang sakét nyan dikeue Isa, dan lé Isa laju geupeu puléh bandum ureuëng nyang sakét nyan. 31 Ureuëng ramé nyang dong disinan hireuen lagoe na, watée awaknyan jikalon ureuëng kalu ka jeuet jipeugah haba, ureuëng capiek puléh, ureuëng lapée ka jeuet jijak, dan di ureuëng buta ka deuh jimeungieng. Teuma awaknyan laju jipujoe-pujoe Allah bansa Israel. 32 Óh lheueh nyan Isa laju geutawök bandum murit Gobnyan sira geupeugah, "Ulôn weueh lumpah na keu ureuëng ramé nyoe. Ka lhée uroe treb jih awaknyan meusajan-sajan ngon Ulôn, dan bak watée nyoe nibak awaknyan ka hana le peunajoh. Ulôn hana Lôn bri awaknyan jiwoe deungon pruet shoh, eunteuk awaknyan pansan bak rot ueh raya." 33 Laju lé murit-murit Isa geutanyong bak Gobnyan, "Dipat ta teumé peunajoh nibak daerah nyang seungue lom aséng keu ureuëng nyang dub nyoe ramé?" 34 "Na padub boh ruti nibak gata?" geutanyong lé Isa bak awaknyan. "Na tujoh boh," jaweueb awaknyan, "dan eungkot ubit na teuma meupadub boh." 35 Teuma lé Isa laju geuyueduek ureuëng ramé nyan di ateueh tanoh. 36 Laju Gobnyan geucok ban tujoh boh ruti meunan cit ngon eungkot nyan, óh lheueh nyan geu-ucab syukoe ubak Po teu Allah. Óh lheueh nyan Gobnyan laju geupriek-priek ruti nyan meunan cit deungon eungkot nyan ngon jaroe Gobnyan, laju atra nyan geubri ubak murit-murit Geuh. Dan lé murit-murit Gobnyan laju geubagi-bagi atra nyan ubak ureuëng ramé nyan. 37 Bandum awaknyan jimakheun sampoe mandum troe. Óh lheueh nyan murit-murit Isa laju geupeusapat bandum peunajoh nyang leubeh awaknyan pajoh. Bandum nyan na tujoh boh raga peunoh. 38 Jeumeulah ureuëng agam mantong nyang makheun peunajoh nyan na peuet ribée droe, gohlom teu-itong ureuëng inong ngon aneuëk manyak. 39 Óh lheueh nyan Isa laju geuyue woe bandum ureuëng ramé nyan. Gobnyan keudroe geu-ék lam saboh peurahô geujak laju u daerah Magadan.

Matius 16

1 Na meupadub droe ureuëng Farisi ngon ureuëng Saduki jijak ubak Isa keuneuk jijeubak Gobnyan. Awaknyan jilakée mangat Isa geupeugét buet nyang ajaéb sibagoe bukeuti bahwa Gobnyan beutôi teuka nibak Po teu Allah. 2 Geujaweueb lé Isa, ("Meunyoe mata uroe teungoh jilhob, gatanyoe tapeugah, 'Cuaca gét that, sabab langét mirah.' 3 Dan meunyoe beungoh uroe, gatanyoe tapeugah, 'Uroe nyoe teuma ujeuen, sabab langét mirah dan reudok.' Nah, gata hase taramai cuaca deungon cara takalon keuadaan langét, padahai, tanda-tanda jamén hana hase gata ramai!") 4 "Keubiet that jeuhet dan that doraka ureuëng-ureuëng bak jamén nyoe. Gata lakée ubak Ulôn mangat Lôn peugét buet nyang ajaéb. Keu gata hana teubri meusaboh keuajaéban pih keucuali keuajaéban Nabi Yunus." Óh lheueh geupeugah meunan Isa laju geutinggai awaknyan, dan geujak laju ho laén. 5 Watée murit-murit Isa ka trok u meurandeh danau, barô kheueh geuteupeue lé awaknyan bahwa awaknyan tuwoe geuba ruti. 6 Isa geupeugah ubak awaknyan, "Até-até kheueh ubak ragoe ureuëng Farisi dan Saduki." 7 Ban geudeungoe tutoe haba Isa nyan, murit-murit Gobnyan laju geumariet sabe keudroe-droe, "Gobnyan geupeugah lagée nyan sabab geutanyoe hana taba ruti." 8 Isa geuteupeue peue nyang awaknyan peugah nyan. Teuma Gobnyan laju geupeugah, "Keupeue gata peumasa-alah keuhai hana meuruti? Peu kheueh gata kureueng meuiman! 9 Peu kheueh gata gohlom muphom? Peu kheueh gata hana ta-ingat keu ruti nyang limong boh Ulôn priek-priek keu ureuëng nyang limong ribée droe? Padub boh raga nyang mantong leubeh ruti nyan óh watée gata peusapat? 10 Dan pakriban teuma deungon ruti nyang tujoh boh keu ureuëng nyang peuet ribée droe nyan? Padub boh raga teuma peunajoh nyan nyang leubeh óh watée gata peusapat? 11 Pakon gata hana tamuphom bahwa Ulôn mariet ngon gata kon kheueh keu ruti? Beu até-até kheueh keu ragoe ureuëng Farisi dan Saduki!" 12 Akhé jih murit-murit Isa ka muphom bahwa Isa geuyue awaknyan beu até-até bukon keu ragoe nyang jipeuguna keu teupeugöt ruti, teuma keu bandum peungajaran ureuëng-ureuëng Farisi dan Saduki. 13 Isa geujak dan geupeutô laju ubak banda Kaisarea Filipi. Disinan Gobnyan geuteumanyong bak murit-murit Gobnyan, "Meunurot nyang jipeugah lé gob, Aneuëk Manusia nyan soe?" 14 Geujaweueb lé murit-murit Geuh nyan, "Na nyang peugah Nabi Yahya Pumanö. Na teuma nyang peugah Nabi Ilyas. Nyang laén geupeugah Yeremia, atawa sidroe lamkawan nabi-nabi." 15 "Teuma meunurot gata keudroe, Ulôn nyoe soe?" 16 Geujaweueb lé Simon Petrus, "Bapak na kheueh Raja Nyang ba Seulamat, Aneuëk Allah Nyang Udeb." 17 "Meu-untông that-that gata, Simon, aneuëk Yona!" Kheun Isa, "Sabab bukon manusia nyang peugah nyan ubak Ulôn, teuma Bapak Ulôn nyang na lam syeuruga. 18 Sabab nyan beu tateupeue kheueh, gata na kheueh Petrus, batée nyang khong. Dan di ateueh keunaleueng batée nyoe kheueh teuma Lôn peudong geureja Lôn, nyang hana hase jipeutaloe lé gob; bah pih lé mawöt! 19 Ulôn teuma Lôn bri keu gata gunci Donya Barô Allah. Peue nyang gata tham di ateueh bumoe nyoe, nyan pih teu tham lam syeuruga. Dan peue nyang gata peubeutôi di ateueh bumoe, nyan pih geupeubeutôi dalam syeuruga." 20 Óh ka lheueh nyan Isa geupeu-ingat ubak murit-murit Gobnyan mangat awaknyan hana geupeugah bak soe mantong bahwa Gobnyan kheueh Raja nyang ba Seulamat. 21 Phon watée nyan, Isa geupeugah troh trang ubak murit-murit Gobnyan, bahwa Gobnyan harôh geujak u Yerusalem dan laju meuteumé meubagoe-bagoe deurita nibak peumimpén-peumimpén, peumimpén-peumimpén Imeum dan gurée-gurée agama. Gobnyan teuma jipoh maté, teuma bak uroe nyang keu lhée Gobnyan teupeubeudôh lom teuma. 22 Laju Petrus geutarek Isa bak binéh Gobnyan sira geumariet, "Mudah-mudahan Po teu Allah geupeujiôh hai nyan. Tuhan, bék sampoe hainyan rhot ateueh Tuhan!" 23 Isa geupaleng dan laju geupeugah ubak Petrus, "Neujak keudeh, he tukang peudaya! Droeneueh neuhalang-halangi lôn. Pikeran gata nyan pikeran manusia; bukon pikeran Po teu Allah!" 24 Óh lheueh nyan Isa geupeugah ubak murit-murit Gobnyan, "Ureuëng nyang keuneuk seutôt Ulôn, ureuëng nyan harôh jipeutuwoe ubak keupeuntengan jih keudroe, jitem gulam saleb Gobnyan, dan laju jiseutôt Ulôn. 25 Sabab ureuëng nyang keuneuk peuteuen udeb jih, ureuëng nyan gadôh udeb. Teuma ureuëng nyang jikeureubeuen udeb jih deumi Ulôn, ureuëng nyan teuma meuteumé udeb. 26 Peue untông jih nibak sidroe-droe ureuëng, meunyoe bansigom donya nyoe jeuet keuhak milék jih teuma gobnyan ka gadôh udeb? Peu kheueh hase udeb nyan teutuka ngon sapeue-sapeue? 27 Hana treb le Aneuëk Manusia meusajan-sajan ngon malaikat-malaikat Gobnyan teuma geuteuka deungon kuasa Bapak Gobnyan. Bak watée nyan Gobnyan teuma geubalaih keu ureuëng-ureuëng nyang sapeue-sapeue deungon peue-peue nyang ka jipeubuet. 28 Beuneuteupeu kheueh! Lamkawan gata nyan na disinoe nyang hana teuma maté, sigohlom jikalon Aneuëk Manusia geuteuka sibagoe Raja."

Matius 17

1 Nam uroe teuma óh lheueh nyan Isa laju geuba Petrus meunan cit Yakobus dan syedara gobnyan Yahya, geupeu-aséng droe bak saboh gunong nyang manyang. 2 Dikeue awaknyan, Isa geupeu-ubah droe: Rupa Gobnyan gleh ngon trang lagée mata uroe dan peukayan Gobnyan putéh muble-ble. 3 Óh lheueh nyan ban lhée droe murit Geuh nyan leumah laju geukalon Nabi Musa dan Ilyas teungoh geupeugah haba ngon Isa. 4 Laju Petrus geupeugah ubak Isa, "Tuhan, mangat that tanyoe disinoe. Meunyoe Tuhan neutem, ulôn teuma lôn peudong lhée khimah bak teumpat nyoe: saboh keu Tuhan, saboh keu Nabi Musa dan saboh treuk keu Ilyas." 5 Teungoh Petrus mantong geupeugah haba, awan nyang peungéh that na di langét manyang laju jipeurab dan jipeupayong awaknyan dan nibak lam awan nyan laju teudeungoe su lagée nyoe, "Nyoe kheueh Aneuëk Ulôn nyang Ulôn gaséh. Gobnyan keubiet mangat that até Lôn. Deungoe kheueh peue nyang Geupeugah!" 6 Watée murit-murit Isa geudeungoe su nyan, awaknyan lumpah teumakot sampoe reubah teugageueng bak tanoh. 7 Teuma Isa laju geupeurab sira geumat awaknyan. "Beudôh kheueh," kheun Gobnyan, "Bék teumakot!" 8 Watée jingieng lé awaknyan, hana deuh geukalon meusidroe pih, seulaén Isa sidroe. 9 Watée awaknyan geutron nibak ateueh gunong nyan, Isa laju geupeu-ingat awaknyan, "Bék tabri tée peue nyang ka gata kalon bunoe ubak soe mantong, sigohlom Aneuëk Manusia geupeubeudôh nibak maté." 10 Murit-murit Isa laju geutanyong ubak Gobnyan, "Pakon gurée-gurée agama geupeugah bahwa Ilyas harôh teuka leubeh dilée?" 11 Geujaweueb lé Isa, "Beutôi Ilyas teuka dan gobnyan geupeu béeréeh peue-peue nyang gohlom béeréeh. 12 Teuma Ulôn peugah ubak gata, Ilyas ka troh geuteuka, teuma lé manusia hana jituri gobnyan; awaknyan jipeusaneut gobnyan ban galak até droe. Dan meunan cit awaknyan teuma jipeusaneut ateueh Aneuëk Manusia." 13 Teuma lé bandum murit Gobnyan ka muphom bahwa nyang geupeugah lé Isa nyan keuhai Nabi Yahya Pumanö. 14 Watée Isa dan ban lhée droe murit Gobnyan geugisa ubak ureuëng ramé nyan, na sidroe ureuëng agam jipeurab ubak Gobnyan, laju jisujut dikeue Isa, 15 sira jipeugah, "Bapak, neugaséh kheueh keu aneuëk lôn. Aneuëk ulôn nyan keunong peunyakét sawan. Peunyakét sawan nyang keunong ateueh jih nyan lumpah parah sampoe watée jilab peunyakét nyan kayém that jihnyan reubah lam apui meunan cit kayém teuma reubah lam ié. 16 Ulôn ka lheueh lôn ba aneuëk ulôn nyan ubak murit-murit Bapak, teuma awaknyan hana hase geupeu puléh aneuëk ulôn nyan." 17 Geujaweueb lé Isa, "Hebat that gata nyoe! Gata biet that ureuëng nyang meunyeuleweng dan hana neupeucaya. Sampoe án pajan Ulôn harôh tinggai ngon gata dan Ulôn saba keu gata? Neuba laju aneuëk gata nyan keunoe!" 18 Dan Isa laju geupeurintah bak roh jeuhet nyang na lam tuboh aneuëk nyan beu jiteubiet. Dan bak saát nyan cit teuma aneuëk nyan ka puléh lagée bak nyang ka. 19 Óh lheueh nyan murit-murit Isa laju geujak ubak Gobnyan sidroe-droe dan geutanyong bak Gobnyan, "Pak, pakon kamoe nyoe hana hase kamoe use roh jeuhet nyan?" 20 Geujaweueb lé Isa, "Sabab gata kureueng iman. Ingat kheueh! Meunyoe gata na iman bah pih bube bijéh sisawi, gata jeuet tapeugah ubak gunong nyoe, 'He gunong, minah kheueh keudeh!' Pasti gunong nyan teuma jiminah. Hana mubacut pih nyang hana hase gata peubuet! 21 Teuma roh jeuhet nyang lagée nyoe, barô kheueh hase teu-use deungon doá dan puasa." 22 Watée murit-murit Isa ka meusapat di Galilea, Isa geupeugah bak awaknyan, "Hana treb le, Aneuëk Manusia teuma jiseurah ubak kuasa manusia. 23 Gobnyan jipoh maté, teuma bak uroe nyang keu lhée Gobnyan geupeubeudôh teuma." Teuma bandum murit Gobnyan seudeh ngon pilu. 24 Watée Isa dan murit-murit Gobnyan trok u Kapernaum, ureuëng-ureuëng kutéb cukée bak Baét Tuhan jijak ubak Petrus sira jitanyong, "Peu kheueh Gurée gata nyan geubayeue cukée keu Baét Tuhan atawa hana?" 25 Geujaweueb lé Petrus, "Bayeue!" Watée Petrus geuwoe, Isa geumariet ngon gobnyan teuleubeh ilée, "Simon, pakriban peundapat gata? Soe nyang harôh bayeue cukée atawa impak-impak keu raja-raja lam donya nyoe? Rakyat atawa ureuëng aséng?" 26 "Ureuëng aséng," geujaweueb lé Petrus. "Meunyoe meunan," kheun Isa, "rakyat hana peureulée jibayeue. 27 Teuma bék kheueh geutanyoe ta peutupéh peurasaan awaknyan. Jadi, neujak keumawe kheueh ubak danau. Neucok kheueh eungkot nyang phon that jikab bak kawe. Lam babah eungkot nyan gata teumé péng nyang seb keu tabayeue cukée geutanyoe dua. Neucok kheueh péng dan neubayeue kheueh ubak awaknyan cukée geutanyoe keu Baét Tuhan."

Matius 18

1 Bak watée nyan murit-murit Isa geujak ubak Gobnyan sira geutanyong, "Soe nyang teu-anggab paleng rayeuk lamkawan umat Po teu Allah?" 2 Isa laju geutawök sidroe aneuëk mit, dan jidong laju aneuëk manyak nyan dikeue awaknyan. 3 Laju geupeugah lé Isa, "Peucaya kheueh! Meunyoe gata meu-ubah dan ka jeuet lagée aneuëk manyak, gata teuma jeuet keu anggota umat Po teu Allah. 4 Ureuëng nyang peumiyueb droe dan ka jeuet lagée aneuëk manyak nyoe, jihnyan kheueh nyang paleng rayeuk lamkawan umat Po teu Allah. 5 Dan ureuëng nyang teurimong aneuëk miet nyang lagée nyoe sabab lé Ulôn, nyan saban cit ka gata teurimong Ulôn." 6 "Soe nyang jeuet keu sabab sidroe lamkawan ureuëng-ureuëng nyang ubit nyoe hana meuiman lé bak Ulôn, leubeh gét meunyoe batée meugileng teu-ikat bak takue laju teupeunom lam laôt nyang lhok. 7 Biet that ceulaka donya nyoe sabab hai-hai nyang teupeusabab ureuëng jipeubuet desya. Beutôi hai-hai nyang lagée nyan sabe na, teuma ceulaka kheueh ureuëng nyang teupeusabab keunyan! 8 Meunyoe jaroe gata atawa gaki gata nyang jeuet keusabab gata tapeubuet desya, takoih kheueh dan taböh kheueh. Leubeh gét gata udeb deungon Po teu Allah hana meusiblah jaroe atawa meusiblah gaki, nibak gata geutiek u dalam apui nuraka deungon ban dua jaroe atawa gaki gata. 9 Dan meunyoe mata gata nyang teupeusabab gata tapeubuet desya, cungke kheueh dan taböh kheueh. Leubeh gét gata udeb deungon Po teu Allah ngon mata siblaih nibak teuböh lam apui nuraka deungon ban dua blaih mata." 10 "Awaih! Bék tahina sidroe-droe ureuëng nyang ubit nyoe. Sabab ingat kheueh, malaikat-malaikat awaknyan sabe na dikeue Bapak Ulôn di syeuruga. 11 Sabab Aneuëk Manusia teuka keu geujak peuseulamat ureuëng nyang sisat! 12 Pakriban kheun gata? Meunyoe na sidroe ureuëng bak jih nyan na jipeulara siploh boh bubiri, dan saboh nibak bubiri-bubiri nyan gadôh, peu kheueh nyang jipeubuet lé ureuëng nyan? Ka pasti ureuëng nyan jitinggai bubiri nyang sikureueng ploh sikureueng boh nyan di ateueh bukét dan gobnyan jijak mita laju bubiri nyang gadôh nyan. 13 Dan meunyoe gobnyan ka meuteumé lom teuma bubiri nyang gadôh nyan -- peucaya kheueh Lôn -- gobnyan leubeh galak até jih keu bubiri nyang gadôh nyan nibak bubiri nyang na si kureueng ploh sikureueng boh nyang hana gadôh. 14 Meunan cit deungon Bapak gata nyang na lam syeuruga hana geutem sidroe lamkawan ureuëng-ureuëng nyang ban meuiman ubak Ulôn nyoe sisat." 15 "Meunyoe syedara gata na meudesya ateueh gata, tajak kheueh ubak ureuëng nyan dan tatunyok kheueh salah gobnyan. Tapeubuet kheueh nyan deungon seungab-seungab lé gata bandua. Meunyoe gobnyan geuturot peue nyang gata peugah, teuma gata ka hase tacok lom syedara gata nyan. 16 Teuma meunyoe hán, taba kheueh sidroe atawa dua treuk. Sabab lam Alkitab na teutuléh, 'Sikureueng-kureueng jih dua atawa lhée droe saksi nyang teupeureulée keu jeuet teupeugah sidroe-droe ureuëng teutudoh nyan meusalah.' 17 Meunyoe gobnyan hana jiteurimong naseuhat ureuëng-ureuëng nyan, tapeugah kheueh hai nyan ubak jeumaáh, anggab kheueh gobnyan sibagoe ureuëng tukang kutéb cukée dan sidroe ureuëng nyang hana jituri ubak Po teu Allah." 18 "Beutateupeu kheueh: Peue nyang gata tham lam donya nyoe, nyan pih teu tham dalam syeuruga. 19 Dan beutateupeu kheueh teuma: Meunyoe lamkawan gata di donya nyoe na dua droe ureuëng ka sipakat keuhai peue mantong dan neudoá teuma, doá gata nyan teuma geudeungoe lé Bapak Ulôn lam syeuruga. 20 Sabab, dipat mantong na dua atawa lhée droe ureuëng meusapat kareuna Ulôn, Ulôn teutab na di teungoh-teungoh awaknyan." 21 Óh lheueh nyan Petrus geujak ubak Isa dan geupeugah, "Tuhan, meunyoe syedara ulôn meudesya ateueh ulôn, sampoe padub goe ulôn peu-amphon ureuëng nyan? Peu kheueh sampoe troh tujoh goe?" 22 Geujaweueb lé Isa, "Hana, kon sampoe tujoh goe, teuma tujoh ploh kali tujoh goe! 23 Sabab meunyoe Po teu Allah nyang peurintah, keuadaan jih na kheueh lagée miseue nyoe: Sidroe raja keuneuk peuseuleusoe bandum utang-utang namiet gobnyan. 24 Watée gobnyan keuneuk geupeu phon peureksa, jipeuhadab ubak gobnyan sidroe namiet nyang meu-utang meujuta-juta, 25 dan hana hase jibayeue utang nyan. Teuma, raja nyan geupeutron peurintah mangat namiet nyan geupeubloe dan bandum hareuta milék gobnyan keu teubayeue utang nyan. 26 Namiet nyan laju jisujut di keu raja nyan, dan jilakée, 'Teungku amphon, neusaba kheueh ilée. Ulôn teuma lôn peuglah bandum utang-utang lôn.' 27 Raja nyan wéueh keu namiet nyan, sampoe bubena utang namiet nyan bandum geusampôh. 28 Watée namiet nyan jiteubiet u luwa, laju meurumpok ngon rakan jih, rakan jih nyan sidroe namiet cit, nyang meu-utang nibak gobnyan kira-kira na meupadub ribée. Namiet nyan laju jidrob rakan jih nyan dan ji ceukak bak takue, sira jipeugah, 'Bayeue laju bandum utang gata!' 29 Laju rakan gobnyan nyan jisujut dikeue jih nyan sira jilakée, 'Neusaba kheueh ilée he rakan lôn, bandum nyan teuma lôn bayeue!' 30 Teuma namiet nyan jitulak. Akhé jih gobnyan laju jipeutamong rakan jih nyan u dalam glab sampoe ureuëng nyan hase jibayeue utang gobnyan. 31 Watée namiet-namiet nyang laén jingieng peue nyang ka teujadi, awaknyan seudeh that dan laju bri tée hai nyan ubak raja. 32 Teuma lé raja laju geutawök namiet nyang jeuhet nyan sira geupeugah, 'Hei, namiet nyang jeuhet! Bubena utang gata ka ulôn sampôh sabab gata talakée bak ulôn. 33 Pakon gata hana tagaséh keu rakan gata lagée nyang ka ulôn peubuet hai nyan u ateueh gata?' 34 Raja nyan beungéh lumpah na. Namiet nyang jeuhet nyan laju geusak lam glab sampoe namiet nyan jibayeue bandum utang jihnyan nibak raja." 35 Isa geupeu habéh haba Gobnyan deungon geupeugah lagée nyoe, "Meunan cit deungon Bapak Ulôn di syeuruga teuma geupeusaneut ateueh gata maséng-maséng, meunyoe gata hana tapeu amphon rakan gata deungon ikhlaih."

Matius 19

1 Óh ka seuleusoe bandum nyan geupeugah lé Isa ubak awaknyan, laju geutinggai Galilea dan geujak laju u daerah Yudea di meurandeh Krueng Yordan. 2 Jai that ureuëng nyang seutôt Gobnyan, dan laju geupeu puléh awaknyan nibak teumpat nyan. 3 Teuma di ureuëng-ureuëng Farisi laju geujak keunan keuneuk jijak jeubak Isa. Awaknyan laju jitanyong, "Meunurot huköm agama geutanyoe, peu kheueh jeuet ureuëng jitaleuek purumoh jih deungon alasan peue mantong?" 4 Geujaweueb lé Isa, "Peu kheueh gohlom gata beuet dalam Alkitab bahwa Peuncebta nyang peujeuet manusia, bak awaiphon geupeujeuet agam dan inong? 5 Dan óh ka lheueh nyan Gobnyan geupeugah, 'Nyan kheueh sabab jih di ureuëng agam jitinggai mak ngon yah laju jijak meusaho ngon peurumoh jih, teuma bandua nyan ka jeuet keusaboh.' 6 Teuma awaknyan kon lé dua droe, teuma sidroe. Nyan kheueh sabab jih peue nyang ka geupeu saboh lé Po teu Allah hana jeuet jipeu cre lé manusia." 7 Lé ureuëng Farisi geutanyong bak Gobnyan, "Meunyoe meunan pakon Nabi Musa geuyue jok surat taleuek ubak ureuëng nyang taleuek purumoh jihnyan?" 8 Geujaweueb lé Isa, "Nabi Musa geupeu idhin keu gata tataleuek purumoh gata sabab gata payah that teupeurunoe. Teuma nyang sibeuna jih kon lagée nyan yoh awai ilée. 9 Teuma, deungoe kheueh nyoe: Soe nyang taleuek purumoh jihnyan -- padahai inong nyan hana jimeumukah -- óh lheueh nyan jimeukawen lom ngon inong laén, ureuëng nyang lagée nyan ka jimeumukah." 10 Teuma murit-murit Isa geupeugah ubak Gobnyan, "Meunyoe soai hubongan lakoe binoe na kheueh lagée nyan, leubeh gét bék meukawen." 11 Geujaweueb lé Isa, "Hana bandum ureuëng jeuet jiteurimong tutoe haba nyan, teuma ureuëng-ureuëng nyang ka geupeuteuntée lé Po teu Allah. 12 Sabab na ureuëng nyang hana meuteumé meukawen, sabab awaknyan keubiet ka lahé lagée nyan. Dan na teuma nyang hana hase meukawen sabab ateueh gobnyan jipeubuet lagée nyan lé ureuëng laén. Dan na teuma nyang jipiléh keudroe keu hana jitem meukawen, mangat hase jilayani Po teu Allah. Ureuëng nyang hase jiteurimong peungajaran nyoe, bah kheueh jiteurimong." 13 Na ureuëng nyang jiba aneuëk miet ubak Isa mangat geutem peuduek jaroe Gobnyan ateueh ulée awaknyan dan geumeudoá keu awaknyan. Teuma lé murit-murit Isa laju geubeungéh ateueh awaknyan. 14 Teuma Isa laju geupeugah bak murit-murit Gobnyan, "Bah kheueh aneuëk miet nyan jijak bak Ulôn! Bék neu tham awaknyan, sabab ureuëng-ureuëng nyang lagée nyoe kheueh nyang jeuet keu anggota umat Po teu Allah." 15 Dan Isa laju geukeubah jaroe Gobnyan ateueh ulée aneuëk miet nyan dan geubri beureukat keu awaknyan. Óh lheueh nyan Gobnyan laju geujak nibak teumpat nyan. 16 Bak siuroe na sidroe ureuëng agam jijak meuhadab ubak Isa, "Pak Gurée," kheun ureuëng nyan, "peubuet nyang gét nyang harôh ulôn keureuja mangat jeuet ulôn teurimong udeb seujati dan keukai?" 17 Geujaweueb lé Isa, "Pakon gata tanyong bak Ulôn keuhai peue nyang gét? Teuma na saboh nyang gét. Meunyoe gata keuneuk udeb, gata harôh taát ubak peue-peue nyang geupeurintah lé Po teu Allah." 18 "Peurintah nyang toh?" jitanyong lé ureuëng nyan. Geujaweueb lé Isa, "Bék poh maté gob, bék meumukah, bék ceumeucue, bék jeuet keu saksi duseuta, 19 horeumat kheueh ubak ayah ngon ma gata; dan gaséh kheueh seusabe gata manusia lagée gata gaséh keu droe gata." 20 "Bandum peurintah nyan ka ulôn peubuet," jijaweueb lé ureuëng muda nyan. "Peue lom nyang peureulée?" 21 Isa laju geupeugah ubak aneuëk muda nyan, "Meunyoe gata keuneuk trok bak sampoereuna, tajak peubloe kheueh bandum hareuta milék gata. Tabri kheueh péng nyan keu ureuëng gasien, dan gata teuma meuteumé hareuta lam syeuruga. Óh lheueh nyan, teuka kheueh jak seutôt Ulôn!" 22 Ban jideungoe haba nyang lagée nyan, ureuëng muda nyan jijak laju deungon até nyang gundah sabab gobnyan lumpah that jai hareuta. 23 Teuma Isa geupeugah bak murit-murit Gobnyan, "Ulôn peugah ubak gata, payah that-that meunyoe ureuëng kaya jeuet keu anggota umat Allah. 24 Dan nyoe lom nyang keuneuk Ulôn peugah ubak gata; leubeh mudah saboh unta jitamong lam ruhuéng jarôm, nibak ureuëng kaya jitamong lam Donya Barô Po teu Allah." 25 Watée murit-murit Gobnyan geudeungoe haba Isa nyan, awaknyan hireuen lumpah na. "Meunyoe meunan," kheun awaknyan, "soe nyang hase seulamat?" 26 Isa geungieng ateueh awaknyan laju geupeugah, "Nibak manusia, hai nyan hana jitamong lam akai! Teuma nibak Po teu Allah, bandum mungken." 27 Laju geupeugah lé Petrus, "Ngieng kheueh, kamoe ka kamoe tinggai peue-peue nyang na deumi keu kamoe seutôt Bapak. Dan peu teuma nyang kamoe teurimong?" 28 Geupeugah lé Isa ubak awaknyan, "Peucaya kheueh: Lam Donya nyang Barô, Aneuëk Manusia teuma taduek ateueh takhta Gobnyan nyang mulia. Bak watée nyan gata bandum murit-murit Ulôn teuma neuduek ateueh dua blaih boh takhta dan gata peusidang ban dua blaih boh sukée bansa Israel! 29 Dan tieb-tieb ureuëng nyang ka jitinggai rumoh, atawa syedara agam meunan cit deungon nyang inong, atawa mak ngon yah, atawa aneuëk miet, atawa lampôh meusabab lé Ulôn, keu ureuëng nyan teuma jiteurimong lom sireutôh go ganda. Dan gobnyan teuma jiteurimong udeb seujati dan keukai. 30 Teuma jai that ureuëng nyang bak saát nyoe jeuet keu ureuëng awai teuma jeuet keu ureuëng nyang akhé atawa nyang bak saátnyoe akhé teuma jeuet keu nyang awai."

Matius 20

1 "Meunyoe Po teu Allah ka geumat peurintah, keuadaan jih na kheueh lagée miseue nyoe: Na sidroe ureuëng po lampôh anggô ban beungoh that jiteubiet nibak rumoh gobnyan jijak mita ureuëng nyang tem meubuet bak lampôh anggô gobnyan. 2 Óh ka situju ureuëng mubuet nyan jibayeue upah saboh péng pirak siuroe, gobnyan laju jiyue ubak awaknyan mangat jikeureuja laju bak lampôh anggô gobnyan. 3 Poh sikureueng beungoh, ureuëng po lampôh anggô nyan jijak lom, dan laju deuh jikalon na meupadub droe teuk ureuëng nyang teungoh meunganggur hana buet di dalam banda. 4 Teuma jipeugah kheueh lé gobnyan ubak awaknyan, 'Neujak buet kheueh laju ubak lampôh lôn. Ulôn teuma lôn bayeue upah gata deungon yuem nyang sisuai.' 5 Awaknyan pih jijak. Poh dua blaih watée cot uroe dan meunan cit poh lhée seupôt, ureuëng po lampôhnyan jiteubiet lom dan jijak peubuet hai nyang saban lagéenyan cit teuma. 6 Dan kira-kira poh limong seupôt, gobnyan jiteubiet lom dan mantong na jikalon ureuëng nyang meunganggur. Laju gobnyan jitanyong ubak awaknyan, 'Peubuet gatanyoe neudong siuroe seupôt bak teumpat nyoe deungon hana neupeubuet sapeue?' 7 Awaknyan nyang na dong disinan jijaweueb, 'Hana ureuëng nyang jitem bie buet keu kamoe.' 'Meunyoe meunan,' jikheun lé ureuëng po lampôh nyan, 'neujak kheueh mubuet bak lampôh anggô lôn.' 8 Óh seupôt uroe, ureuëng po lampôh nyan jipeugah ubak mando gobnyan, 'Teuma jijak kheueh bandum ureuëng meukeureuja nyan dan jibayeue kheueh upah awaknyan maséng-maséng, phon nibak ureuëng nyang tamong akhé sampoe ubak nyang tamong awai.' 9 Teuma teuka kheueh ureuëng-ureuëng nyang mubuet phon poh limong seupôt. Awaknyan maséng-maséng jiteurimong upah saboh péng pirak. 10 Óh lheueh nyan teuka teuma ureuëng-ureuëng nyang mubuet phon beungoh uroe. Awaknyan jipike jiteurimong leubeh jai nibak ureuëng nyang mubuet seupôt, padahai gobnyan jiteurimong saban cit ngon ureuëng mubuet seupôt saboh péng pirak. 11 Watée jiteurimong péng nyan, awaknyan jimeurapa keu ureuëng po lampôh: 12 'Ureuëng-ureuëng nyang mubuet dudoe nyan cit sijeuem jijak buet. Seudangkan kamoe meukeureuja siuroe suntok lam uroe kha, teuma lé Teungku neubayeue awaknyan saban ngon keu kamoe!' 13 Ureuëng po lampôh anggô nyan geujaweueb ubak sidroe lamkawan ureuëng nyang teumanyong nyan, 'He rakan, ulôn hana meusalah ateueh gata. Gata kon ka situju neuteurimong upah saboh péng pirak keu gata mubuet siuroe peunoh? 14 Nyoe, tacok kheueh upah gata dan neuweh kheueh keudeh. Ulôn keubiet lôn keuneuk bri bak ureuëng nyang tamong paleng akhé ngon upah nyang saban deungon upah nyang ulôn bri keu gata. 15 Peu kheueh ulôn hana jeuet lôn peubuet ban galak droe ulôn deungon atra lôn keudroe? Atawa gata bingiek, sabab ulôn peumurah até?' " 16 Geupeugah lom lé Isa, "Meunan cit deungon ureuëng-ureuëng nyang paleng akhé teuma jeuet keu ureuëng phon, dan ureuëng nyang phon teuma jeuet nyang paleng akhé." 17 Watée Isa geujak u Yerusalem, bak teungoh rot ueh laju geutawök bandua blaih droe murit Gobnyan jeuet meusapat meu aséng keudroe. Isa laju geupeugah ubak awaknyan, 18 "Deungoe kheueh nyoe! Geutanyoe jinoe teungoh tajak u Yerusalem. Nibak teumpat nyan Aneuëk Manusia jiseurah ubak imeum-imeum ulée dan ubak gurée-gurée agama. Laju Gobnyan jihuköm maté, 19 óh lheueh nyan Gobnyan jijok keu ureuëng-ureuëng nyang kon Yahudi. Awaknyan jihina-hina Gobnyan, jiseksa Gobnyan, dan jisaleb Gobnyan. Teuma bak uroe nyang keu lhée, Gobnyan geupeubeudôh lom teuma." 20 Óh lheueh nyan purumoh Zebedeus ngon aneuëk-aneuëk gobnyan geujak murumpok ngon Isa. Dikeue Isa gobnyan geusujut laju geulakée sapeue-sapeue. 21 "Peue nyang mak peureulée?" geutanyong lé Isa. Geujaweueb lé mak nyan, "Ulôn meuharab dak jeuet ban dua droe aneuëk ulôn nyoe jiduek rot blaih uneuen dan blaih wie Bapak watée Bapak ka jeuet keu Raja singoh." 22 "Gata nyoe hana tateupeue peue nyang gata lakée," Geukheun lé Isa ubak awaknyan. "Peu kheueh sanggob tajieb ié nibak piala peundeuritaan nyang harôh Ulôn jieb?" "Sanggob," jaweueb awaknyan. 23 Geupeugah lé Isa, "Keubiet, gatanyoe teuma tajieb cit nibak piala Lôn. Teuma keuhai soe nyang duek di wie dan uneuen Lôn, nyan bukon Ulôn nyang meuhak peuteuntée. Teumpat nyan na kheueh keu ureuëng-ureuëng nyang ka geupeuteuntée lé Bapak Lôn." 24 Watée geudeungoe hai nyan lé ban siploh droe murit Geuh nyang laén, awaknyan laju geubeungéh keu bandua droe meusyedara nyan. 25 Sabab nyan Isa geutawök awaknyan bandum dan laju geupeugah, "Gata tateupeue bahwa peumimpén-peumimpén bansa nyang hana jituri ubak Po teu Allah peumimpén nyang lagée nyan teuma jiteugom ngon jitindéeh rakyat jih keudroe. Dan ureuëng-ureuëng rayeuk awaknyan jiteugon awaknyan. 26 Teuma gata nyoe hana jeuet lagée nyan. Sikeubiet jih, ureuëng nyang keuneuk jeuet keu rayeuk lam kawan gata, harôh jeuet keu peulayan gata. 27 Dan ureuëng nyang keuneuk jeuet keu ureuëng nyang phon lamkawan gata, harôh jeuet keu namiet gata. 28 Saban lagée Aneuëk Manusia nyan cit teuma; Gobnyan teuka bukon keu teulayani teuma keu geulayani, geuseurah nyawöng Gobnyan keu geupeubeubaih ureuëng ramé." 29 Watée awaknyan geutinggai Yerikho, jai lumpah na ureuëng nyang seutôt Isa. 30 Na dua droe ureuëng buta teungoh jiduek-duek bak binéh jalan. Watée jideungoe lé awaknyan bahwa Isa teungoh geujak rot nyan, awaknyan laju jiteumawök ngon su nyang teuga, "Aneuëk Nabi Daud, neugaséh kheueh keu kamoe!" 31 Ureuëng ramé nyang na dong disinan laju jibeungéh awaknyan sira jiyue seungab. Teuma awaknyan jidumpék leubeh teuga nibak nyang ka, "Teungku, Aneuëk Nabi Daud, neugaséh kheueh keu kamoe!" 32 Laju Isa geupiôh sira geuhôi awaknyan, "Peue nyang gata harab mangat Ulôn peubuet ateueh gata?" geutanyong lé Isa. 33 Jijaweueb lé awaknyan, "Teungku, nyang kamoe lakée mangat kamoe beujeuet keumalon!" 34 Isa weueh that keu awaknyan, laju geumat mata awaknyan. Watée nyan cit teuma awaknyan ka deuh jikeumalon. Laju awaknyan jiseutôt Isa.

Matius 21

1 Watée ka tô u Yerusalem, awaknyan laju trok u Betfage di Bukét Zaiton. Nibak teumpat nyan Isa laju geuyue bak dua droe murit Gobnyan geuyuejak leubeh dilée. 2 "Neujak kheueh laju u gampông nyang na dikeue nyan," peusan Isa bak awaknyan. "Nibak teumpat nyan eunteuk laju leumah gata kalon saboh keuleudée nyang mantong teu ikat meusapat ngon aneuëk jih. Neupeuleueh kheueh bandua boh keuleudée nyan dan neuba laju ubak Ulôn. 3 Meunyoe na ureuëng nyang teumanyong sapeue-sapeue, neupeugah bak ureuëng nyang teumanyong nyan, 'Tuhan nyang peureulée atra nyoe', teuma di ureuëng nyang teumanyong nyan laju seungab jipeubiyeu mantong keuleudée nyan teuba." 4 Hai nyang lagée nyan mangat jeuet peue nyang ka lheueh geupeugah lé nabi, 5 "Peugah kheueh ubak Sion, Raja gata teungoh geujak ubak gata. Gobnyan miyueb até dan teungoh geupreh saboh keuleudée, saboh aneuëk keuleudée nyang mantong muda." 6 Óh lheueh nyan bandua droe murit Geuh nyan laju geujak dan geupeubuet peue nyang ka geupeugah lé Isa nyan. 7 Awaknyan jiba keuleudéenyan deungon aneuëk jih. Laju awaknyan jipeungui ateueh rhung keuleudée-keuleudéenyan deungon ija jubah awaknyan keudroe. Oh lheuehnyan Isa laju geu ék. 8 Le that-that ureuëng disinan jileueng ija-ija jubah awaknyan di ateueh rot ueh, dan di ureuëng-ureuëng laén laju jikoh ranteng-ranteng kayée laju jitabu ateueh rot ueh. 9 Ureuëng ramé nyang jak dikeue dan dilikot Isa jidumpék-dumpék, "Udeb Aneuëk Daud! Geubri beureukat kheueh Gobnyan nyang teuka ateueh nan Tuhan! Pujoe kheueh Allah nyang Mahamanyang!" 10 Óh lheueh nyan, watée Isa geutamong u Yerusalem, bansaboh banda nyan teukeujot lumpah na. "Nyoe soe?" jitanyong lé ureuëng-ureuëng lam banda nyan. 11 "Gobnyan Nabi Isa, nibak Nazaret di Galilea," geujaweueb lé ureuëng ramé nyang seutôt Isa. 12 Óh lheueh nibak nyan Isa geutamong laju lam Baét Tuhan, dan geu-use banmandum ureuëng nyang na bloe peubloe disinan. Bubena meuja-meuja teumpat tuka péng habéh geupeu kengkeueng saboh sahoe, dan bangku-bangku ureuëng meukat cicém mirah pati nyan pih habéh geubalek sampoe teueng bayeueng. 13 Óh lheueh nyan laju geupeugah bak ureuëng-ureuëng nyan, "Di dalam Alkitab na teutuléh bahwa Po teu Allah na geupeugah, 'Rumoh Ulôn teupeugah rumoh teumpat meudoá.' Teuma lé gata bandum ka gata peujeuet keu eumpung pancuri!" 14 Ureuëng-ureuëng buta ngon lapée jijak laju ubak Isa nibak Baét Tuhan, dan Gobnyan laju geupeu puléh awaknyan. 15 Teuma ulée-ulée Imeum dan gurée-gurée agama beungéh lumpahna watée geukalon buet-buet ajaéb nyang geupeubuet lé Isa. Dan meunan cit awaknyan beungéh that watée jikalon aneuëk-aneuëk miet jiseumurak mubura nibak Baét Tuhan, "Udeb Aneuëk Daud!" 16 Awaknyan jipeugah ubak Isa, "Peu kheueh na deungoe peue nyang jipeugah lé awaknyan?" "Nyoe, na Lôn deungoe," geujaweueb lé Isa. "Peu kheueh hántom gata beuet ayat Alkitab nyang teutuléh nyoe: 'Aneuëk-aneuëk miet ngon aneuëk-aneuëk manyak ka Gata purunoe keu jipeugah puja ngon pujoe nyang sampoereuna?' " 17 Óh lheueh nyan Isa laju geutinggai awaknyan disinan, laju geuteubiet teuma nibak banda nyan geujak laju u Betania dan geudom di sinan. 18 Ban beungoh óh singoh teuma, watée geujak geugisa u banda, Isa jiteuka deuek. 19 Gobnyan geukalon sibak bak ara nyang na timoh bak binéh rot. Laju geupeurab bak binéh bak ara nyan. Teuma bak ara nyan hana jimuboh bah pih meusaboh nyang jai cit meuôn. Laju geupeugah lé Isa keu bak ara nyan, "He bak ara, siumu udeb gata hana muboh le!" Watée nyan cit teuma bak ara nyan laju layée. 20 Watée murit-murit Isa geukalon peue nyang ka teujadi nyan, awaknyan hireuen lumpah na. "Pakriban bak ara nyan langsong maté bak saát nyan cit teuma?" geutanyong lé awaknyan. 21 "Nyang sikeubiet jih, geukheun lé Isa, meunyoe gata meuiman dan hana ragu-ragu, gata pih hase tapeubuet pakriban nyang ka Ulôn peubuet keu bak ara nyoe. Dan kon nyan mantong, teuma gata jeuet tapeugah ubak gunong nyoe, 'teubeuôt kheueh dan teuböh kheueh u dalam laôt': teuma hai nyan teujadi. 22 Peue mantong nyang gata lakée lam doá gata, nyang gata lakée nyan teuma gata teurimong, asai gata meuiman." 23 Óh lheueh nyan Isa geugisa u Baét Tuhan, laju geutamong dan geuseumeubeuet disinan. Watée Gobnyan teungoh geuseumeubeuet, ulée-ulée imeum dan peumimpén-peumimpén Yahudi jijak ubak Gobnyan dan sira geutanyong, "Ateueh dasai peue bandum nyoe gata peubuet? Soe nyang jok hak nyan ubak gata?" 24 Geujaweueb lé Isa, "Ulôn pi keuneuk teumanyong ubak gata. Dan meunyoe gata neujaweueb, di Ulôn pih teuma Lôn peugah ubak gata deungon hak soe Ulôn peubuet hai-hai nyoe. 25 Nabi Yahya geupumanö ngon hak soe? Deungon hak Po teu Allah atawa manusia?" Laju lé Imeum-imeum ulée dan peumimpén-peumimpén Yahudi geumeupakat sabe keudroe-droe, "Meunyoe tanyoe peugah, 'Deungon hak Allah', Gobnyan teuma geupeugah, 'Meunyoe meunan pakon gatanyoe hana tapeucaya keu Gobnyan?' 26 Teuma meunyoe tapeugah, 'Deungon hak manusia', tanyoe ta takot keu rakyat ba, sabab awaknyan bandum jianggab nabi Yahya nyan sidroe nabi." 27 Teuma awaknyan jijaweueb, "Kamoe hana meuteupeue." Laju Isa geupeugah bak awaknyan, "Meunyoe meunan Ulôn pih hana Lôn peugah ubak gata deungon hak soe Ulôn peubuet bandum nyoe." 28 "Jinoenyoe pakriban peundapat gata keuhai nyoe?" geupeugah lom lé Isa. "Na sidroe bapak nyang na dua droe aneuëk agam. Ureuëng tuha nyan geujak ubak aneuëk gobnyan nyang tuha dan geupeugah, 'Neuëk, tajak kheueh keureuja bak lampôh anggô uroe nyoe.' 29 'Ulôn hán kutem,' jaweueb aneuëk nyan. Teuma óh dudoe aneuëk nyan meu-ubah pikeran jih laju jijak mubuet u lampôh anggô nyan. 30 Óh lheueh nyan ureuëng syiek aneuëk nyan geujak teuma ubak aneuëk gobnyan nyang keudua, dan geupeugah teuma haba lagée nyang ka geupeugah bak aneuëk geuh nyang awai. 'Jeuet, bapak,' jijaweueb lé aneuëk gobnyan nyang keudua nyan. Teuma di aneuëk nyan hana jijak. 31 Nyan, bandua aneuëk geuh nyan, nyang toh kheueh nyang seutôt kheun ureuëng syiek jih?" "Nyang tuha," geujaweueb lé Imeum-imeum ulée dan peumimpén-peumimpén Yahudi nyan. Teuma Isa geupeugah bak awaknyan, "Peucaya kheueh: Tukang-tukang kutéb cukée dan inong-inong jeuhet leubeh dilée jeuet keu anggota umat Po teu Allah nibak gata nyoe. 32 Sabab Nabi Yahya Pumanö teuka, dan geutunyok bak gata cara udeb nyang geulakée lé Tuhan, teuma gata hana cit ta patéh ubak ajaran gobnyan; teuma tukang-tukang kutéb cukée dan inong-inong jeuhet nyan peucaya keu gobnyan. Teuma bah pih gata na takalon bandum nyan, gata teutab hana tatem ubah bandum pikeran gata dan hana tapeucaya ubak Tuhan." 33 "Deungoe kheueh miseue nyang saboh trek nyoe," kheun Isa, "Na sidroe ureuëng po tanoh jimeulampôh bak saboh sagoe tanoh gobnyan deungon jipula bak anggô. Laju jipageue ban silingka lampôh nyan, dan jikueh teuma uruek keu teumpat prah ié anggô, óh lheueh nyan jipeudong teuma meunara teumpat meujaga. Óh lheueh nyan laju jipeusiwa lampôh anggô nyan ubak ureuëng nyang keureuja bak lampôh gobnyan nyan, dan gobnyan laju jijak u nanggroe laén. 34 Óh ka trok bak watée musém pot boh anggô, ureuëng po tanoh nyan laju jikirém namiet-namiet gobnyan ubak ureuëng-ureuëng nyang mubuet bak lampôh nyan keu jiteurimong jeumba gobnyan. 35 Teuma lé ureuëng-ureuëng nyang mubuet bak lampôh nyan laju jidrob bandum namiet-namiet ureuëng po tanoh nyan: Nyang sidroe jipoh, nyang laén jipoh maté, nyang laén lom jirhom ngon aneuëk batée. 36 Ureuëng po tanoh nyan jikirém teuma namiet-namiet nyang laén, leubeh jai nibak nyang phon jikirém. Teuma awaknyan teutab jipoh lagée nyang ka-ka. 37 Akhé jih ureuëng po tanoh nyan jikirém aneuëk jih keudroe ubak ureuëng nyang mubuet di lampôh anggô nyan. 'Pasti aneuëk ulôn jihoreumat.' 38 Teuma watée jikalon aneuëk ureuëng po tanoh nyan ka teuka keunan lé ureuëng-ureuëng nyang mubuet lam lampôh nyan, awaknyan laju jimarit sabe keudroe-droe, 'Nyan, nyoepat jih, ahli waréh gobnyan. Jak tapoh maté aneuëk toke nyan, mangat hareuta warésan tateumé keutanyoe!' 39 Teuma aneuëk nyan laju jidrob, ji rhom uluwa, dan laju jipeumaté." 40 Geutanyong lé Isa, "Nyan, meunyoe ureuëng po lampôh anggô jiwoe, peue nyang teuma jipeubuet ateueh ureuëng-ureuëng nyang keureuja bak lampôh jih nyan?" 41 Geujaweueb lé awaknyan, "Pasti ureuëng nyan geupoh maté banmandum ureuëng jeuhet nyan, dan lampôh anggô nyan laju geupeusiwa bak ureuëng laén nyang jitem weuek hase tanoh nyan keu gobnyan óh trok bak watée." 42 Teuma Isa geupeugah ubak awaknyan, "Peu kheueh gohlom na gata baca peue nyang teutuléh lam Alkitab? 'Batée nyang hana jipeuguna lé tukang peugét bangunan batée nyan ka jeuet keu batée nyang paleng lumboi sa. Nyoe kheueh buet Tuhan; keubiet lagak that!' " 43 "Teuma, ingat kheueh," kheun Isa, "bandum hak sibagoe umat Po teu Allah geutarek nibak gata dan geubri keu laén bansa nyang jipeubuet peurintah-peurintah Allah. 44 Ureuëng nyang rhot ateueh batée nyan, hanco; dan ureuëng nyang jitimpok lé batée nyan, teugileng jeuet keu abée." 45 Watée imeum-imeum ulée dan ureuëng-ureuëng Farisi geudeungoe miseue-miseue nyang geupeugah lé Isa nyan, awaknyan geuteupeue bahwa Isa geumeututoe keuhai awaknyan. 46 Teuma awaknyan jiuseuha keuneuk jidrob Gobnyan. Teuma awaknyan teumakot keu ureuëng ramé, sabab ureuëng ramé nyan jianggab Isa sidroe nabi.

Matius 22

1 Isa geu meu haba lom ngon ureuëng ramé sira geuboh miseue lagée nyoe, 2 kheun Gobnyan, "Meunyoe Po teu Allah ka geumat peurintah, keuadaan jih na kheueh lagée miseue nyoe: na sidroe raja geupeuna khanuri keu geupeukawen aneuëk gobnyan nyang agam. 3 Raja nyan geuyue jak tueng ubak peulayan-peulayan gobnyan ureuëng-ureuëng nyang teu-undang ubak teumpat khanuri geuh nyan. Teuma di ureuëng-ureuëng nyang teu-undang nyan hana jitem jak bak teumpat ureuëng meukawen nyan. 4 Óh lheueh nyan lé raja nyan geuyue jak teuma peulayan gobnyan nyang laén. Geupeugah ubak peulayan nyang geuyue jak nyan: 'Neubri tée kheueh ubak undangan nyan: Hidangan khanuri ka siab. Leumô-leumô aneuëk-aneuëk leumô ulôn nyang paleng gét ka lheueh ulôn sie. Bandum nyan ka siab. Neujak kheueh laju u teumpat meukawen!' 5 Teuma bandum jamé nyang teu-undang nyan hana jipako. Awaknyan jijak bak buet jih keudroe maséng-maséng -- nyang sidroe jijak u ladang jih, nyang laén teuma ubak peurusahaan jih keudroe; 6 dan nyang laén laju jidrob bubena peulayan-peulayan raja nyan, laju jiseupôt dan jipoh maté awaknyan. 7 Watée raja geudeungoe peue nyang ka teujadi nyan, gobnyan beungéh that-that. Dan raja pih laju geukirém sipa-i gobnyan keu jijak poh maté bandum ureuëng-ureuëng tukang peumaté peulayan geuh nyan, dan laju geutot banda awaknyan. 8 Óh lheueh nyan lé raja laju geutawök bandum peulayan gobnyan, dan laju geupeugah, 'Khanuri keu meukawen ka siab, teuma bandum undangan hana nyang jeuet ngui. 9 Jinoenyoe tajak laju ubak rot ueh raya, dan taundang laju ureuëng beuramé that jijak bak teumpat meukawen nyoe.' 10 Teuma bubena peulayan nyan pih laju jijak. Awaknyan laju jijak bak rot ueh raya dan jipeusapat laju bubena ureuëng nyang na meurumpok disinan, bah kheueh nyang gét meunan cit ngon nyang jeuhet. Deungon lagée nyan teumpat khanuri nyan pih ka peunoh ban siseun lingka ngon jamé nyang teuka. 11 Óh lheueh nibak nyan di raja nyan laju geutamong keu geujak ngieng banmandum jamé nyang ka trok keunan. Dan deuh laju geukalon na sidroe ureuëng nibak teumpat nyan nyang hana jingui peukayan khanuri. 12 Laju lé raja nyan geutanyong bak ureuëng nyan, 'He rakan, pakriban cara jih sampoe meuhase tatamong lam ruweueng nyoe sabab gata hana tangui peukayan khanuri?' Di ureuëng nyan hana hase jipeugah sapeue. 13 Laju lé raja nyan geupeugah ubak peulayan-peulayan gobnyan, 'Ikat laju gaki ngon jaroe ureuëng nyoe, dan jak tiek laju ureuëng nyoe u teumpat nyang seupôt buta. Nibak teumpat nyan na teumpat mo meuba-e dan deurita.' " 14 Laju lé Isa geupeu habéh calitra miseue nyan lagée nyoe, "Jai that nyang teutawök, teuma na bacut khong nyang teupiléh." 15 Óh lheueh nyan lé ureuëng Farisi laju jijak duek meurok pakat sabe keudroe-droe nyang tujuan jih pakriban cara beuhase Isa teujeubak ngon cara jiteumanyong meubagoe rupa. 16 Teuma awaknyan laju ji utus murit-murit jih ubak Isa meusajan deungon na padub droe anggota golongan Herodes. Awaknyan jipeugah ubak Isa, "Pak Gurée, kamoe meuteupeue Bapak jujoe. Bapak neupurunoe deungon troh trang keuhai meulakée Po teu Allah keu manusia, hana neupakoe peundapat soe mantong. Sabab Bapak hana neungieng ureuëng. 17 Sabab nyan, ci Bapak peugah bak kamoe: Meunurot peuratoran agama tanyoe, peu kheueh jeuet teubayeue cukée keu kaisar atawa hana?" 18 Isa geuteupeue meukeusut awaknyan nyang jeuhet nyan, jadi laju geupeugah, "He, ureuëng-ureuëng munafék! Pakon gata keuneuk ujoe Ulôn? 19 Ci gata tunyok bak Ulôn mata péng nyang gata peuguna keu neubayeue cukée!" Laju awaknyan jijok bak Gobnyan saboh keupeng péng pirak. 20 Isa geutanyong bak awaknyan, "Gamba dan nan soe nyang na lam péng nyoe?" 21 "Gamba Kaisar," jaweueb awaknyan. Teuma Isa geupeugah ubak awaknyan, "Meunyoe meunan, tabri kheueh ubak Kaisar peue nyang atra Kaisar, dan ubak Allah peue nyang atra Allah." 22 Watée jideungoe lé awaknyan peue nyang ka geupeugah lé Isa nyan, awaknyan hireuen lumpahna. Teuma awaknyan laju jijak jitinggai Isa. 23 Bak uroe nyan cit teuma, na meupadub droe ureuëng Saduki jijak ubak Isa. Awaknyan na kheueh golongan ureuëng nyang meupeundapat bahwa ureuëng nyang ka maté hana udeb lé. 24 "Bapak Gurée," kheun awaknyan, "Nabi Musa na geupurunoe lagée nyoe: Meunyoe sidroe ureuëng agam meuninggai donya, dan ureuëng nyan hana meu-aneuëk, syedara gobnyan harôh meukawen ngon ureuëng inong balée nyan mangat jibri keuturonan keu ureuëng nyang ka meuninggai nyan. 25 Ka lheueh na tujoh droe ureuëng meusyedara tinggai di sinoe. Nyang tuha meukawen óh lheueh nyan meuninggai donya ngon hana geutinggai aneuëk. Teuma balée ureuëng nyan geutinggai keu syedara gobnyan. 26 Syedara gobnyan nyan meuninggai teuma hana cit jitinggai aneuëk. Hai nyang lagée nyan teujadi teuma ubak syedara gobnyan nyang keu lhée dan sampoe trok bak nyang keu tujoh. 27 Dan akhé jih inong nyan keudroe meuninggai donya. 28 Nyan, bak watée ureuëng maté geupeubeudôh lom teuma, peurumoh soe kheueh ureuëng inong nyan? Sabab ban tujoh droe awaknyan ka jimeukawen ngon ureuëng inong nyan." 29 Geujaweueb lé Isa, "Gata keuliru, sabab gata hana muphom Alkitab, meunan cit kuasa Po teu Allah. 30 Sabab meunyoe ureuëng maté óh trok bak watée jibeudôh lom teuma, awaknyan hana teuma jimeukawen lé, teuma awaknyan teutab udeb lagée malaikat lam syeuruga. 31 Peu kheueh gohlom na gata baca peue nyang geupeugah lé Po teu Allah keuhai ureuëng maté geupeubeudôh lom teuma? Allah meufeureuman, 32 'Ulôn kheueh Allah Nabi Ibrahim, Allah Nabi Ishaq dan Allah Nabi Yakub.' Allah nyan kon Allah ureuëng maté. Gobnyan na kheueh Allah ureuëng udeb!" 33 Watée ureuëng ramé nyan jideungoe peue nyang geupeugah lé Isa, awaknyan hireuen lagoena keuhai nyang geupurunoe lé Gobnyan. 34 Bak watée ureuëng-ureuëng Farisi jideungoe bahwa Isa ka geupeujeuet ureuëng-ureuëng Saduki hana jeuet jipeugah haba lé, teuma awaknyan laju jimeurok pakat. 35 Sidroe lamkawan awaknyan, na kheueh sidroe gurée agama, ji-ujoe keuneuk jeubak Isa ngon cara jiteumanyong. 36 "Bapak Gurée," kheun gobnyan, "peurintah toh kheueh nyang paleng awai didalam huköm agama?" 37 Geujaweueb lé Isa, "Cinta kheueh Tuhan Allah gata deungon sipeunoh até gata, deungon sipeunoh jiwa gata, dan deungon silurôh ákai gata. 38 Nyan peurintah nyang paleng phon nyang paleng peunteng! 39 Peurintah nyang keudua saban deungon peurintah nyang phon nyan: Cinta kheueh seusabe gata keudroe lagée gata tacinta keu droe gata keudroe. 40 Bandum huköm agama nyang ka geubri lé Nabi Musa dan ajaran bandum nabi nyan dasai jih nibak bandua huköm nyan." 41 Teungoh ureuëng-ureuëng Farisi nyan mantong meugumpôi disinan, Isa geutanyong ubak awaknyan, 42 "Peue kheun gata keuhai Raja Peuseulamat? Keuturonan soe kheueh gobnyan?" "Keuturonan Nabi Daud," jaweueb awaknyan. 43 "Meunyoe meunan," geutanyong lom lé Isa, "peue sabab Roh Allah geu ilham bak Nabi Daud keu teupeugah Raja Peuseulamat 'Tuhan'? Sabab Nabi Daud geupeugah. 44 'Tuhan geupeugah ubak Tuhan lôn: neuduek kheueh blaih uneuen Lôn, sampoe án Ulôn peujeuet musoh-musoh Gata jitaklok ubak Gata.' 45 Ngon nyan meunyoe Nabi Daud Raja Peuseulamat nyan 'Tuhan', pakriban tapeugah Gobnyan keuturonan Nabi Daud?" 46 Hana meusidroe pih nyang hase jijaweueb peue nyang geutanyong lé Isa nyan. Dan phon uroe nyan, hana lé nyang teumanyong peue-peue mantong ubak Gobnyan.

Matius 23

1 Dan Isa teuma geupeugah ubak ureuëng ramé dan ubak murit-murit Gobnyan, 2 "Gurée-gurée agama dan ureuëng-ureuëng Farisi na keukuasaan keu geutafeuse huköm-huköm Nabi Musa. 3 Deungon sabab nyan gata seutôt dan gata taát kheueh bandum nyang awaknyan peurintah. Teuma bék tapeubuet peue nyang awaknyan peubuet, sabab awaknyan hana jipeubuet peue nyang awaknyan peurunoe. 4 Awaknyan jilakée hai-hai nyang hana jitamong lé akai dan jipeuget peuratoran-peuratoran nyang brat, teuma mubacut pih awaknyan hana jitulông ureuëng nyang peubuet hai nyan. 5 Bandum nyang awaknyan peubuet na kheueh jeuet jingieng lé manusia mantong. Awaknyan jisaja jingui ija seumayang nyang luwah-luwah dan jipeupanyang rumbai-rumbai bajée jubah awaknyan! 6 Awaknyan galak keu teumpat nyang paleng gét meunyoe jijak bak teumpat khanuri, dan kurusi istimewa nibak rumoh-rumoh iébadat. 7 Awaknyan galak that meunyoe jihoreumat lé gob di pasai-pasai, dan teuhôi deungon 'Bapak Gurée'. 8 Teuma gata nyoe bandum bék kheueh tatem meunyoe jihôi 'Bapak Gurée', sabab Gurée gata cit sidroe gata bandum meusyedara. 9 Dan bék gata hôi dalam donya nyoe meusidroe pih deungon teukheun 'Bapak', sabab Bapak gata cit sidroe, nyan kheueh Bapak nyang na lam syeuruga. 10 Dan bék teuma gata tatem meunyoe jihôi 'Peumimpén', sabab peumimpén gata cit sidroe, nyan kheueh Raja Peuseulamat nyang ka geupeu janji lé Po teu Allah. 11 Ureuëng nyang paleng rayeuk lamkawan gata, bah kheueh beujeuet keu peulayan gata. 12 Ureuëng peu manyang droe jih ureuëng nyan teuma geupeumiyueb lé Po, dan ureuëng nyang peumiyueb droe jih teuma geupeumanyang lé Po." 13 "Meupaloe kheueh gata he gurée-gurée agama dan ureuëng-ureuëng Farisi! Gata bandum na kheueh tukang meupura-pura. Gata tapagab-pagab ureuëng laén keuneuk jeuet keu umat Allah, dan ureuëng laén nyang keuneuk jeuet keu umat Allah, gata pagab. 14 Meupaloe kheueh gata he gurée-gurée agama dan ureuëng Farisi: Gata bandum tukang meupura-pura. Gata tatipée inong-inong balée dan gata reupah rumoh ureuëng nyan keu gata tôb-tôb buet gata nyang jeuhet, gata meudoá panyang-panyang. Nyan kheueh sabab jih huköman nyang rhot ateueh gata singoh lumpah brat! 15 Mupaloe kheueh gata he gurée-gurée agama dan ureuëng-ureuëng Farisi! Gata tukang meupura-pura! Gata tajak jiôh-jiôh gata jeumeurang laôt, gata jak bansaboh daratan ngon tujuan keu gata peutamong sidroe ureuëng lam agama gata. Dan óh ka lheueh ureuëng nyan jitamong lam agama gata, gata peujeuet ureuëng nyan keu calon ureuëng jeuet jitamong lam apui nuraka nyang dua goe leubeh jeuhet nibak gata keudroe! 16 Mupaloe kheueh gata he peumimpén-peumimpén nyang buta! Gata purunoe keu awaknyan lagée nyoe, 'Meunyoe ureuëng jimeu sumpah deumi keu Baét Tuhan, ureuëng nyan hana teu-ikat ubak sumpah jih nyan; teuma meunyoe jimeusumpah deumi méuh nyang na di Baét Tuhan, ureuëng nyan teu-ikat nibak sumpah geuh nyan.' 17 Gata ureuëng-ureuëng nyang bangai dan buta! Toh nyang leubeh peunteng méuh jihnyan, atawa Baét Tuhan nyang peujeuet méuh nyan suci? 18 Gata meurunoe lom lagée nyoe, 'Meunyoe sidroe ureuëng jimeusumpah deumi miseubah, ureuëng nyan hana teu-ikat lé sumpah jihnyan; teuma meunyoe jihnyan jimeusumpah deumi keureubeuen di ateueh miseubah nyan, ureuëng nyan teu-ikat ngon sumpah jih nyan.' 19 Keubiet buta jih gata bandum! Toh nyang leubeh peunteng? Keureubeuen jihnyan atawa miseubah nyang teupeujeuet keureubeuen nyan suci? 20 Sabab nyan, meunyoe sidroe ureuëng meusumpah deumi miseubah, nyan saban cit ureuëng nyan jimeusumpah deumi miseubah, dan deumi bandum nyang na di ateueh miseubah nyan. 21 Dan meunyoe sidroe ureuëng jimeusumpah deumi Baét Tuhan, nyan saban cit gobnyan jimeubudôk deumi Baét Tuhan nyan dan deumi Po teu Allah nyang tinggai disinan. 22 Dan meunyoe sidroe ureuëng jimeusumpah deumi syeuruga, nyan saban cit jihnyan meusumpah deumi takhta Tuhan, dan deumi Po teu Allah nyang geuduek ateueh takhta nyan. 23 Mupaloe kheueh gata bandum hé gurée-gurée agama dan ureuëng-ureuëng Farisi! Gata bandum tukang meupura-pura. Reumpah-reumpah lagée seulaseh, adas maméh dan jintan, gata bri siper siploh ubak Tuhan. Padahai hai-hai nyang paleng peunteng dalam huköm-huköm agama, lagée miseue jih: keuadelan, gaséh sayang, dan rasa seutia, nyan bandum hana gata pakoe. Padahai nyan kheueh nyang seuharôh jih gata peubuet, deungon hana tapeu-ayeuem nyang laén-laén. 24 Gata peumimpén-peumimpén nyang buta! Lalat nyang na dalam ié jieb droe gata sareng, padahai unta nyang rayeuk gata uét! 25 Meupaloe kheueh gata he gurée-gurée agama dan ureuëng-ureuëng Farisi! Gata bandum tukang meupura-pura! Mangkok-mangkok dan pireng-pireng droe gata rhah sampoe gleh-gleh blaih luwa jih mantong, padahai siblaih u dalam kutoe lumpah na deungon hai-hai nyang gata teumé deungon cara paksa dan leuha. 26 He Farisi buta! Gata rhah kheueh ilée mangat beutôi-beutôi gleh siblaih u dalam bandum pireng dan mangkok-mangkok gata, mangat siblaih luwa jih jeuet keu gleh teuma! 27 Meupaloe kheueh gata he gurée-gurée agama dan ureuëng-ureuëng Farisi! Gata bandum tukang meupura-pura! Gata lagée jirat-jirat nyang teu cét putéh; diluwa leumah lagak, teuma didalam nyan peunoh deungon tuleueng dan bandum ka habéh brok. 28 Meunan cit deungon gata. Nibak luwa leumah jih gata gét deungon ureuëng lingka; teuma didalam, gata peunoh deungon peuleusu dan peulanggaran-peulanggaran." 29 "Meupaloe kheueh gata he gurée-gurée agama dan ureuëng-ureuëng Farisi! Gata bandum tukang meupura-pura! Gata tapeugôt jrat-jrat nyang gét-gét keu nabi-nabi, dan gata peungui tugu-tugu peuingat nibak ureuëng-ureuëng nyang udeb jihnyan gét. 30 Dan gata nyoe tapeugah, 'Seukira jih kamoe nyoe udeb bak jamén indatu kamoe yoh masa ilée, kamoe hana teuma kamoe seutôt ngon awaknyan kamoe jak peumaté bubena nabi-nabi.' 31 Teuma gata aku keudroe bahwa gata nyoe kheueh keuturonan ureuëng-ureuëng nyang poh maté nabi-nabi! 32 Meunyoe lagée nyan, tapeujak kheueh laju dan peuseuleusoe kheueh desya-desya nyang ka jipeuphon lé indatu gata nyan! 33 Gata jeuhet dan keuturonan ureuëng jeuhet! Pakriban gata hase tapeuseulamat droe nibak huköman lam apui nuraka? 34 Deungoe kheueh beu gét-gét: Ulôn teuma Lôn kirém ubak gata nabi-nabi, ureuëng-ureuëng malem, dan gurée-gurée; siladum nibak awaknyan teuma gata poh maté, dan siladum teuk nyang laén gata saleb. Na nyang teuma gata seksa didalam rumoh-rumoh iébadat, dan gata tiyeub-tiyeub nibak banda nyang saboh u banda nyang laén. 35 Sabab nyan, gata teuma teuhuköm sabab seumeupoh maté nyang ji peubuet ateueh ureuëng-ureuëng nyang hana meusalah -- phon nibak teupoh maté Habel nyang hana meusalah, sampoe trok ubak teupoh maté Nabi Zakharia aneuëk Berekia, nyang gata poh maté lamkawan Rumoh Tuhan dan miseubah. 36 Peucaya kheueh: bandum nyan teuma jitanggong lé ureuëng-ureuëng bak jamén nyoe!" 37 "Yerusalem-Yerusalem! Nabi-nabi gata peumaté. Utosan-utosan Allah gata rhom ngon batée sampoe maté. Ka padubgoe Ulôn keuneuk wa bandum peunduduek gata lagée nang manök nyang ji uem bandum aneuëk jih dimiyueb sayeueb jih, teuma gata hana tatem! 38 Sabab nyan Po teu Allah hana le meusajan gata. 39 Beutateupeu kheueh: Phon watée nyoe gata hana teuma gata kalon le Ulôn sampoe gata tapeugah, 'Beugeubri kheueh beureukat ateueh Gobnyan nyang teuka ateueh nan Tuhan.' "

Matius 24

1 Watée Isa geutinggai Baét Tuhan, murit-murit Gobnyan laju jijak ubak Gobnyan dan geutunyok laju ubak bangunan Baét Tuhan nyan. 2 Isa geupeugah ubak awaknyan, "Peu kheueh na gata kalon bandum nyan? Tateupeue kheueh, hana meu sianeuëk batée pih nibak bangunan-bangunan nyan teuma na tinggai teususon nibak teumpat jih. Bandum nyan teuma teureuloh." 3 Óh lheueh nyan Isa geujak u Bukét Zaiton, dan teungoh geuduek-duek, murit-murit Gobnyan jijak ubak Gobnyan keuneuk jipeugah haba deungon Gobnyan seucara pribadi. "Neupeugah laju ubak kamoe pajan bandum nyan teujadi," jipeugah lé awaknyan ubak Gobnyan. "Peu kheueh tanda-tanda jih nyang teutunyok keuhai Bapak teuka dan tanda akhé jamén?" 4 Geujaweueb lé Isa, "Waspada kheueh, bék sampoe gata keunong peungeuet. 5 Sabab ramé that ureuëng jiteuka deungon jipeuguna nan Ulôn dan jipeugah, 'Ulôn kheueh Raja Peuseulamat!' Awaknyan ka jitipée ureuëng ramé. 6 Gata teuma tadeungoe meubagoe-bagoe su di mideuen prang dan haba keuhai ureuëng muprang, teuma bék teumakot. Sabab hai-hai nyang lagée nyan bit teujadi, teuma deungon na lagée nyan bukon kheueh sibagoe tanda ka watée jih uroe kiamat. 7 Bansa nyang saboh jimuprang jilawan bansa nyang laén, dan nanggroe nyang saboh teuma jijak prang nanggroe nyang laén. Dipat mantong jiteuka bala musém deuek dan geumpa bumoe. 8 Bandum nyang teujadi nyan na kheueh awai nibak phon teujadi, lagée geurasa sakét lé sidroe ureuëng inong nyang keuneuk peulahé aneuëk. 9 Óh lheueh nyan gata teuma teudrob dan jiseurah keu jiseksa dan jipoh maté. Bansigom donya teuma jibanci ubak gata sabab gata murit Ulôn. 10 Bak watée nyan jai lumpah na ureuëng nyang murtat, dan jikhianat dan jibanci sidroe ubak nyang laén. 11 Ramé that-that nabi-nabi peuleusu teuma jiteuka, dan jitipée ureuëng ngon rakyat ba. 12 Buet nyang jeuhet jimeu-éue bagaih lumpah na sampoe di ureuëng ramé ka hana le gaséh meugaséh. 13 Teuma ureuëng nyang meuteuen sampoe bak akhé, ureuëng nyan teuma geupeu seulamat. 14 Dan Haba Gét keuhai pakriban Po teu Allah geumat peurintah dan geupeusampoe bansigom donya, mangat bandum ureuëng meuteumé jideungoe. Óh ka lheueh nyan barô kheueh kiamat teuka." 15 "Gata teuma takalon 'Keujeuhetan nyang jipeuhanco peue-peue nyang na', lagée nyang geupeugah lé Nabi Daniel, teudong bak teumpat nyang suci. (Catetan keu peumbaca: Simak kheueh peue makna jih!) 16 Bak watéenyan, ureuëng nyang na di Yudea harôh jiplueng u gunong-gunong. 17 Ureuëng nyan na ateueh bubong rumoh bék jitron keu jijak cok sapeue-sapeue lam rumoh nyan. 18 Ureuëng nyang mantong lam lampôh bék jiwoe u rumoh keu jijak cok bajée jubah jihnyan. 19 Keubiet that phet dan paleng teumakot nibak uroe-uroe nyan keu ureuëng inong nyang teungoh mume, dan kawöm mak nyang mantong geupeu mom aneuëk manyak! 20 Meudoá kheueh mangat gata bék sampoe taplueng watée musém ujeuen atawa uroe Sabat! 21 Bak uroe-uroe nyang paleng teumakot nyan teuma na keusosahan nyang paleng hibat lagée nyang gohlom na teujadi seumeunjak donya nyoe na sampoe nibak watée nyoe, dan nyang lagée nyan hana jiteuka lé. 22 Seungkira jih Po teu Allah hana geupeu paneuk watée jih; teuma hana meusidroe pih nyang na seulamat. Teuma sabab lé umat Gobnyan, Po teu Allah geupeu paneuk watée nyan. 23 Bak watée nyan meunyoe na sidroe ureuëng nyang jipeugah ubak gata, 'Ngieng, Raja nyang ba seulamat nyan na disinoe!' atawa, 'Gobnyan na disinan!' -- bék kheueh tapatéh bak ureuëng nyan. 24 Sabab teuma jiteuka nyang jiaku droe jih nyang ba seulamat teuma nyan na kheueh peuleusu dan nabi-nabi peuleusu. Awaknyan teuma jipeubuet buet-buet nyang luwa biasa hibat jih, dan buet-buet nyang ajaéb keu jeuet jiteumipée, meunyoe jeuet, umat Po teu Allah pih jitipée cit. 25 Teuma, ingat kheueh! Ulôn ka Lôn peugah ubak gata leubeh ilée sigohlom hai nyan teujadi. 26 Meunyoe na ureuëng jipeugah ubak gata, 'Ngieng, Gobnyan na di sideh dipadang pasi!' -- bék gata jak bak teumpat nyan. Atawa meunyoe awaknyan jipeugah, 'Ngieng, Gobnyan geumusöm lam bilék nyang na disinoe!' -- bék tapatéh. 27 Sabab Aneuëk Manusia teuka lagée kilat nyang muble nyang teuka nibak timu, dan meucahya trok u barat. 28 Dipat na bangke, disinan na cicém nyang pajoh bangke!" 29 "Hana treb óh ka lheueh keusosahan bak watée nyan, mata uroe laju jeuet keu seupôt, dan buleuen hana le meucahya. Bintang nyang meutabu di langét manyang teuma rhot u bumoe, dan bubena nyang mat kuasa di angkasa raya teuma keng keueng hana meuteuntée. 30 Óh ka lheueh nyan tanda Aneuëk Manusia teuma leumah di langét. Bak watée nyan bandum bansa di ateueh bumoe laju jimoe ba-e. Awaknyan laju jikalon Aneuëk Manusia teuka di ateueh awan deungon kuasa dan keumuliaan nyang raya. 31 Beureuguih raya teuma teuyueb, dan Aneuëk Manusia laju jiyue bubena malaikat Gobnyan jeuet teupeusapat bandum umat Gobnyan nibak ban peuet boh ujong bumoe, nibak ujong langét nyang saboh sampoe ubak ujong langét nyang laén." 32 "Cok kheueh peulajaran nibak bak ara. Meunyoe ranteng-ranteng jih ijo dan leunuet, dan ka jipeuphon meutarôk, gata tateupeue bahwa musém khueng ka tho lumpah na. 33 Meunan cit hai jih meunyoe gata kalon hai-hai nyan teujadi, gata tateupeue bahwa watéejih ka tô that. 34 Tateupeue kheueh! Hai-hai nyan teuma teujadi sigohlom ureuëng-ureuëng nyang udeb bak watée nyoe maté banmandum. 35 Langét dan bumoe teuma gadôh, teuma tutoe haba Lôn teutab na siumu masa." 36 "Hana ureuëng nyang jiteupeu pajan uroe dan jeuem jih, malaikat-malaikat nyang na dalam syeuruga hana geuteupeue, Aneuëk Po teu Allah pih hana, nyang teupeue na kheueh Bapak mantong. 37 Meunyoe Aneuëk Manusia ka teuka singoh, keuadaan jih lagée bak jamén Nabi Nuh yoh masa ilée. 38 Bak uroe-uroe sigohlom ié raya nyan teuka, manusia-manusia lagée biasa jimakheun ngon jijieb ié, dan meukawen. Meunan kheueh nyang teujadi hana putôh-putôh sampoe trok ubak uroe Nabi Nuh geutamong dalam kapai. 39 Watée ié raya teuka sampoe habéh jisampôh awaknyan banmandum, barô kheueh awaknyan sadar peue nyang ka teujadi. Meunan kheueh keuadaan jih singoh meunyoe Aneuëk Manusia teuka. 40 Bak watée nyan, na dua droe ureuëng teungoh meukeureuja di ladang: Sidroe teuba, dan sidroe teuk teuma tinggai. 41 Na dua droe ureuëng inong teungoh jitob aneuëk gandom: Sidroe teuba, dan sidroe treuk teuma teutinggai. 42 Sabab nyan, waspada kheueh, sabab gata hana tateupeue pajan Tuhan gata teuma geuteuka. 43 Ingat kheueh nyoe! Seukira jih ureuëng po rumoh jiteupeu poh padub pancuri jitamong lam rumoh jihnyan, ureuëng po rumoh nyan hana jiéh, mangat pancuri hana jitamong lam rumoh jihnyan. 44 Sabab nyan, gata harôh meusiab-siab. Sabab Aneuëk Manusia teuka bak watée nyang hana gata sangka-sangka." 45 Geupeugah lom lé Isa, "Meunyoe meunan, peulayan nyang toh kheueh nyang seutia lom bijaksana? Jihnyan kheueh nyang ji-angkat lé po droe jih mangat jeuet keu ulée keu peulayan-peulayan nyang laén, mangat jibri makheun ubak awaknyan óh trok bak watée. 46 Keubiet bahgia jih peulayan nyan watée po jihnyan jigisa, dan jingieng jih nyan teungoh jipeubuet tugaih nyang ka teupeucaya ubak jihnyan. 47 Peucaya kheueh, bahwa nyan teupeucaya bandum atra gobnyan ubak peulayan nyan. 48 Teuma meunyoe peulayan nyan jeuhet, gobnyan teuma jikheun lam até jih, 49 'Teungku po lôn mantong treb geugisa,' laju lé jihnyan jipeuphon poh peulayan-peulayan nyang laén, dan jimakheun ngon ji-jieb ié ngon ureuëng-ureuëng mabök. 50 Óh lheueh nyan teungku po jihnyan laju jiwoe bak uroe dan watée nyang hana jisangka-sangka. 51 Teuma peulayan nyan laju jiheuntam bit-bit that lé po jihnyan, dan laju geutiek u teumpat ureuëng-ureuëng munafék. Awaknyan laju jiklik dan meudeurita bak teumpat nyan."

Matius 25

1 "Meunyoe ka teuka Aneuëk Manusia sibagoe Tuhan, keuadaan jih na kheueh lagée miseue nyoe: Na siploh droe aneuëk dara jeuet keupeungiréng teungku linto maséng-maséng awaknyan jicok saboh panyöt, laju jijak sambot teungku linto nyang agam. 2 Na limong droe lamkawan awaknyan bangai that, dan nyang limong droe treuk na kheueh bijaksana. 3 Ban limong droe aneuëk dara nyang bangai nyan jiba panyöt, teuma hana jiba minyéuk geunantoe. 4 Teuma ban limong droe aneuëk dara nyang bijaksana jiba panyöt meusajan ngon minyéuk geunantoe. 5 Teungku linto agam nyan jiteuka ka teulat, jadi aneuëk-aneuëk dara nyan ka teuka teugantuek laju teungét. 6 Watée ka teungoh malam barô kheueh teudeungoe su ureuëng meukuk sira jitawök, 'Teungku linto ka teuka! Jak ta sambot gobnyan!' 7 Ban siploh droe aneuëk dara nyan laju teujaga dan jibeudôh, dan laju jitot maséng-maséng panyöt jihnyan. 8 Aneuëk-aneuëk dara nyang bangai nyan laju jipeugah ubak aneuëk dara nyang bijaksana, 'Neujok kheueh keu kamoe mubacut khong minyéuk gata, sabab panyöt kamoe karab lon.' 9 'Hana jeuet!' jijaweueb lé aneuëk-aneuëk dara nyang bijaksana nyan, 'sabab eunteuk bandum geutanyoe hana seb minyéuk. Neujak bloe laju u keudée.' 10 Teuma lé aneuëk-aneuëk dara nyang bangai nyan laju jijak bloe minyéuk u keudée. Teungoh awaknyan jijak bloe minyéuk nyan, teuma teuka kheueh teungku linto agam. Ban limong droe aneuëk dara nyang ka siab nyan jitamong laju meusajan ngon teungku linto lam teumpat khanuri, dan óh lheueh nyan pintoe pih geutob! 11 Óh lheueh nyan aneuëk-aneuëk dara nyang ban jiwoe jak bloe minyéuk nyan ka trok jigisa sira jipeugah, 'Teungku-teungku, neupeuhah laju pintoe mangat kamoe tamong.' 12 Teuma teungku linto agam nyan laju geujaweueb, 'Ulôn hana Lôn turi keu gata!' " 13 Laju Isa geupeu habéh haba miseue nyan lagée nyoe, "Ngon sabab nyan meujaga-jaga kheueh, sabab gata hana neuteupeue uroe dan jeuem jih." 14 "Meunyoe Aneuëk Manusia ka teuka sibagoe Tuhan keuadaan jih na kheueh lagée miseue nyoe. Sidroe ureuëng agam keuneuk jak u teumpat nyang jiôh. Gobnyan laju jitawök bandum peulayan-peulayan jih, dan hareuta gobnyan nyang na nyan laju jipeucaya ubak awaknyan. 15 Keu tieb-tieb peulayan nyan laju geubri meunurot keusanggopan maséng-maséng. Keu nyang sidroe laju geubri limong ribée péng méuh. Ubak nyang laén geubri teuma dua ribée péng méuh. Dan ubak nyang sidroe trek geubri teuma siribée péng méuh. Óh lheueh nyan laju teungku nyan geujak. 16 Peulayan nyang jiteurimong limong ribée péng méuh nyan laju jijak meuniaga, dan nibak meuniaga jih nyan laju neuteumé laba limong ribée péng méuh. 17 Meunan cit deungon peulayan nyang jiteurimong dua ribée péng méuh nyan meuteumé laba dua ribée teuma. 18 Teuma lé peulayan nyang jiteurimong siribée péng méuh nyan laju jijak khueh uruek lam tanoh, dan péng nyang jibri lé toke jih nyan laju jisöm lam uruek nyan. 19 Treb that teuma óh lheueh nyan, toke nibak peulayan-peulayan nyan jiwoe, dan laju geupeu phon peuna hitongan deungon awaknyan. 20 Peulayan nyang teurimong limong ribée nyan jiteuka, dan jijok laju siploh ribée. 'Teungku po,' kheun peulayan nyan, 'Teungku po neuseurah limong ribée péng méuh ubak ulôn. Ngieng kheueh, ulôn meuteumé laba limong ribée teuk.' 21 'Jroh that,' kheun toke nyan, 'gata na kheueh peulayan nyang gét dan seutia. Sabab gata jeuet teupeucaya deungon nyang bacut, ulôn teuma lôn peucaya nyang leubeh le ubak gata. Tamong kheueh dan meuseunang-seunang kheueh meusajan ngon ulôn!' 22 Óh lheueh nyan teuka teuma pelayan nyang teurimong péng méuh dua ribée, laju jipeugah, 'Teungku po, droeneueh ka neuseurah dua ribée péng méuh ubak ulôn. Ngieng kheueh nyoe, ulôn meuteumé laba dua ribée treuk péng méuh.' 23 'Jroh that,' kheun toke nyan, 'gata peulayan nyang gét dan seutia. Sabab gata jeuet teupeucaya deungon nyang bacut, ulôn teuma peucaya deungon nyang jai keu gata. Tamong kheueh dan meuseunang-seunang kheueh meusajan ngon ulôn!' 24 Óh lheueh nyan teuka teuma peulayan nyang jiteurimong siribée péng méuh sira jipeugah, 'Teungku po, ulôn teupeu droeneueh na kheueh sidroe ureuëng nyang paleng kreueh dan teugaih. Teungku po neupot boh nibak sinaman nyang bukon po pula, dan neucok hase bak teumpat nyang bukon teungku po tabu bijéh. 25 Ulôn teumakot, sababnyan kheueh ulôn jaksöm péng teungku po lam tanoh. Nyoe kheueh péng teungku nyan.' 26 'Gata peulayan nyang jeuhet dan beu-o!' geupeugah lé toke nyan. 'Bukon kheueh ka gata teupeu bahwa ulôn kupot boh nibak seunaman nyang bukon lôn pula, dan lôn cok hase bak teumpat nyang bukon ulôn tabu? 27 Meunyoe meunan, nyang sibeuna jih harôh gata keubah péng ulôn nyan nibak bank, teuma óh watée ulôn woe, ulôn teurimong lom teuma péng lôn nyan deungon bungöng jih. 28 Kareuna nyan, cok kheueh péng nyan nibak gobnyan, dan jok kheueh ubak ureuëng nyang na siploh ribée péng méuh nyan. 29 Sabab, nibak ureuëng nyang ka lheueh na, teuma teubri leubeh le lom, dan leubeh jai nibak bak nyang ka. Teuma ureuëng nyang hana sapeue na, nyang bacut mantong na nibak jihnyan teuma teucok lom teuma. 30 Dan peulayan nyang hana sapeue jeuet nyan, tatiek kheueh u dalam seupôt diluwa. Disinan jihnyan jimoe dan meudeurita!' " 31 "Meunyoe Aneuëk Manusia ka teuka sibagoe raja nyang geu-iréng lé malaikat Gobnyan, Gobnyan geuduek ateueh takhta Gobnyan nyang mulia. 32 Banmandum bansa teuma geupeusapat dikeue Gobnyan. Laju Gobnyan geupeu weuek awaknyan sampoe jeuet keu dua boh keulompok lagée ureuëng meurabe nyang jipeu aséng bubiri nibak kaméng. 33 Ureuëng nyang peubuet keuheundak Po teu Allah teuma geupeusapat blaih uneuen Gobnyan, dan nyang laén blaih si uwie Gobnyan. 34 Óh lheueh nyan raja nyan laju geupeugah ubak ureuëng-ureuëng nyang na blaih uneuen Gobnyan, 'Jak kheueh keunoe gata bandum nyang geubri beureukat lé Bapak Ulôn. Tamong kheueh dalam Keurajeuen nyang ka teukeubah keu gata yoh watée phon geupeujeuet donya nyoe. 35 Sabab óh watée Ulôn deuek, gata bri makheun keu Ulôn, dan óh watée Ulôn glah, gata bri ié. Ulôn sidroe ureuëng aséng, gata teurimong Ulôn di rumoh gata. 36 Ulôn hana peukayan, gata bri peukayan. Óh watée Ulôn sakét, gata nyang peu-ubat Ulôn. Ulôn dalam glab, gata nyang tulông Ulôn.' 37 Ban jideungoe meunan awaknyan bandum laju jitanyong, 'Tuhan, pajan na kamoe kalon Tuhan deuek laju kamoe bri ubak Tuhan peunajoh, atawa glah laju kamoe bri ubak Tuhan ié? 38 Pajan kamoe ngieng Tuhan sibagoe ureuëng aséng, laju kamoe sambot Tuhan lam rumoh kamoe? Pajan Tuhan hántom neungui peukayan, laju kamoe bri ubak Tuhan peukayan? 39 Pajan na kamoe kalon Tuhan sakét atawa jipasoe lam glab, laju kamoe tulông Tuhan?' 40 Raja nyan teuma geujaweueb, 'Beutateupeu kheueh: watée gata peubuet hai nyan, bahpih ubak salah sidroe nibak syedara-syedara Lôn nyang paleng hina, saban cit nyan gata peubuet ateueh Ulôn!' 41 Óh lheueh nyan raja teuma geupeugah ubak ureuëng-ureuëng nyang na blaih siwie Gobnyan, 'Jak wéeh keudeh, he jahanam! Jak blôh laju dalam apui nuraka nyang hán lon-lon, nyang ka teukeubah keu iblih dan malaikat-malaikat gobnyan! 42 Sabab óh watée Ulôn deuek, gata hanatabri keu Ulôn peunajoh; óh watée Ulôn glah, hana gata bri ié. 43 Ulôn sidroe ureuëng aséng, gata hana tateurimong Ulôn lam rumoh gata. Ulôn hana meupeukayan, gata hana bri peukayan keu Ulôn. Ulôn sakét dan jipeutamong lam glab, gata hana tapako Ulôn.' 44 Laju awaknyan jipeugah ubak Gobnyan, 'Tuhan, pajan kheueh na kamoe kalon Tuhan deuek, atawa glah, atawa sibagoe ureuëng aséng, atawa hana meupeukayan, atawa sakét, atawa jipeutamong lam glab, dan kamoe hana kamoe tulông Tuhan?' 45 Raja nyan teuma geujaweueb, 'Beutateupeu kheueh: bak watée gata hana tatem tulông sidroe ureuëng nyang paleng papa nyoe, saban cit gata hana tatem tulông Ulôn.' 46 Teuma ureuëng-ureuëng nyang lagée nyan teuma teuhuköm deungon huköman nyang keukai abadi, seudangkan ureuëng-ureuëng nyang peubuet keuheundak Po teu Allah ureuëng nyan teuma geuteurimong udeb seujati dan keukai abadi."

Matius 26

1 Watée Isa ka seuleusoe geupurunoe bandum hai nyan, Gobnyan geupeugah ubak murit-murit Geuh, 2 "Gata tateupeue dua uroe treuk na kheueh Uroe Raya Paskah, dan Aneuëk Manusia teuma jiseurah keu jisaleb!" 3 Bak watée peumimpén-peumimpén teungku imeum dan peumimpén-peumimpén Yahudi meugumpôi bak meuligoe Teungku Imeum Agong Kayafas. 4 Awaknyan jimeurok pakat keuneuk drob Isa seucara seungab-seungab, dan keuneuk jipoh maté Gobnyan. 5 "Teuma," kheun awaknyan, "Bék hainyan teupeubuet bak watée peurayaan, sabab hai nyang lagée nyan teuma jiteuka karu lamkawan rakyat." 6 Watée Isa mantong na di Betania, di rumoh Simon nyang yoh masa ilée keunong peunyakét kulét nyang lumpah parah, 7 na sidroe ureuëng inong jijak meuhadab ubak Isa. Ureuëng inong nyan na jiba saboh kaca pualam, meuasoe minyéuk mangat bée nyang lumpah meuhái. Watée Isa teungoh geuduek sira geumakheun, ureuëng inong nyan laju geuprée minyéuk mangat bée nyan ateueh ulée Isa. 8 Murit-murit Isa na jikalon hai nyan laju jiteuka beungéh. "Keupeue guna jih banmandum nyoe boros?" kheun awaknyan. 9 "Minyéuk mangat bée nyan hase teupeubloe deungon yuem nyang lumpah meuhái, dan péng hase nyan jeuet teujok bak ureuëng gasien!" 10 Isa geuteupeue pikeran awaknyan, laju geupeugah lé Gobnyan, "Keupeue gata peususah ureuëng inong nyoe? Jih nyan jipeubuet sapeue-sapeue nyang jroh dan teupujoe u ateueh Ulôn. 11 Ureuëng gasien na sabe lamkawan gata, teuma meunyoe Ulôn hana sabe na meusajan gata. 12 Deungon na geuro minyéuk mangat bée nyan u ateueh badan Lôn, gobnyan ka geupeu siab Ulôn keu teupeutamong lam jrat. 13 Peucaya kheueh! Bansigom donya nyoe, dipat mantong Haba Gét nibak Allah teupeumaklum, peue-peue nyang jipeubuet lé ureuëng inong nyoe teutab teucalitra sibagoe keunangan keu gobnyan." 14 Dan sidroe lamkawan murit Isa nyang nan jihnyan Yudas Iskariot, jijak meurumpok ngon peumimpén-peumimpén teungku imeum. 15 Gobnyan jikheun ubak peumimpén-peumimpén teungku imeum nyan, "Peu kheueh nyang gata bri keu ulôn meunyoe ulôn jok Isa ubak gata?" Teuma awaknyan laju ji-itong lhée ploh péng pirak, laju jijok péng nyan ubak jihnyan. 16 Phon bak saát nyan Yudas laju jimita watée nyang paih keuneuk jikhianat Isa. 17 Bak uroe raya nyang keuphon watée Peurayaan Ruti Hana Meuragoe, murit-murit Isa jijak meurumpok ngon Gobnyan. Awaknyan jipeugah, "Nibak teumpat toh nyang Bapak galak mangat kamoe keubah peunajoh Paskah keu Bapak?" 18 Geujaweueb lé Isa, "Neujak kheueh ubak sidroe ureuëng di banda dan neupeugah laju ubak gobnyan, 'Geupeugah lé Bapak Gurée, ka sampoe watée jih keu Ulôn; Ulôn keuneuk peuna uroe raya Paskah di rumoh gata meusajan-sajan ngon bandum murit-murit Lôn.' " 19 Murit-murit Isa laju geupeubuet peue nyang geupeurintah lé Gobnyan ubak awaknyan. Awaknyan laju jijak peusiab peunajoh Paskah nyan. 20 Óh watée malam ka teuka, Isa meunan cit bandua blaih droe murit Gobnyan geuduek sira geumakheun, 21 teungoh awaknyan geumakheun, Isa geupeugah, "Deungoe kheueh: na sidroe lamkawan gata nyoe teuma jikhianat Ulôn." 22 Ban jideungoe hai nyan lé awaknyan, murit-murit Isa seudeh lumpah na. Laju lé awaknyan, sidroe-droe jiteumanyong ubak Isa, "Teuntée bukon keu ulôn nyang Bapak peugah nyan?" 23 Geujaweueb lé Isa, "Ureuëng nyang ceulob ruti lam mangkok Ulôn meusigoe-sigoe ngon Ulôn, ureuëng nyan kheueh nyang khianat Ulôn. 24 Keubiet Aneuëk Manusia teuma maté lagée nyang ka lheueh teutuléh lam Alkitab. Teuma ceulaka kheueh ureuëng nyang khianat Aneuëk Manusia! Leubeh gét ureuëng nyan hana lahé ateueh rhueng donya nyoe!" 25 Laju lé Yudas si peukhianat nyan geupeugah, "Teuntée kon keu ulôn nyang Bapak Gurée peugah nyan?" Geupeugah lé Isa, "Meunan kheueh gata peugah!" 26 Watée awaknyan teungoh geumakheun, Isa geucok ruti, laju geumeudoá. Óh lheueh nyan Gobnyan geupriek-priek ruti nyan ngon jaroe Gobnyan dan geujok laju ubak murit-murit Gobnyan sira geupeugah, "Cok, pajoh kheueh; nyoe kheueh tuboh Ulôn." 27 Óh lheueh nyan Gobnyan laju geucok saboh piala anggô, laju geumeudoá ubak Po teu Allah. Óh lheueh nyan laju geujok piala nyan ubak murit-murit Gobnyan, sira geupeugah, "Jieb kheueh, gata bandum. 28 Sabab nyoe kheueh darah Ulôn nyang ka teupeusah janji Ulôn ngon Po teu Allah -- darah nyang teuroe keu ureuëng ramé keu teupeu amphon bubena desya awaknyan. 29 Peucaya kheueh: Ulôn hana teuma Lôn jieb lé ié anggô nyoe sampoe trok ubak Ulôn teuma Lôn jieb ié anggô nyang barô meusajan-sajan deungon gata lam Donya Barô Bapak Ulôn." 30 Óh lheueh nyan awaknyan geumeulagu saboh lagu puja ngon pujoe. Dan óh ka lheueh nyan awaknyan laju geujak u Bukét Zaiton. 31 Óh lheueh nyan Isa geupeugah ubak murit-murit Gobnyan, "Bak malam nyoe cit teuma gata bandum taplueng tatinggai Ulôn; sabab lam Alkitab na teutuléh; Allah meufeureuman, 'Teuma Lôn peumaté tukang meurabe nyan, dan kawan bubiri gobnyan Ulôn peucrebre.' 32 Óh ka lheueh Ulôn geupeubeudôh lom teuma, Ulôn jak laju leubeh awai nibak gata u Galilea." 33 Petrus geupeugah ubak Isa, "Bah kheueh mandum nyang laén geutinggai Bapak, teuma ulôn hán sagai-sagai lôn tinggai Bapak!" 34 "Ingat," Kheun Isa ubak gobnyan, "Malam nyoe cit teuma, sigohlom manök jiku-uék, gata ka lhée goe ta-iengkeue keu ulôn." 35 Geujaweueb lé Petrus, "Bah pih ulôn nyoe harôh maté meusajan Bapak, ulôn hana kupeugah bahwa ulôn hana lôn tinggai Bapak!" Dan mandum murit nyang laén lagée nyan cit geupeugah. 36 Óh ka lheueh nyan Isa laju geujak ngon murit-murit Geuh ubak saboh teumpat nyang nan jih Getsemani, nibak teumpat nyan Gobnyan geupeugah ubak awaknyan, "Taduek kheueh disinoe meusikeujab Ulôn keuneuk jak meudoá." 37 Dan Gobnyan laju geupakat Petrus meunan cit bandua droe aneuëk Zebedius meusajan Gobnyan. Gobnyan ka jipeuphon jiteuka seudeh dan geulisah. 38 Gobnyan geupeugah ubak murit-murit Geuh, "Até Ulôn seudeh lagoena, nyum-nyum jih lagée keuneuk maté. Tinggai kheueh gata disinoe, dan meusajan kheueh meujaga-jaga deungon Ulôn." 39 Óh lheueh nyan Isa geujak leubeh jiôh bacut treuk, laju Gobnyan teudugom bak tanoh sira geumeudoá. "Bapak," kheun Gobnyan, "Meunyoe jeuet, neupeujiôh kheueh nibak Ulôn bandum bala nyang harôh Ulôn rasa nyoe. Teuma bék kheueh teuseutôt keuheundak Ulôn, teuma meunurot keuheundak Bapak nyang teujadi." 40 Óh ka lheueh nyan Isa laju geugisa ubak ban lhée droe murit Gobnyan dan geungieng awaknyan ka habéh teu-éh. Gobnyan laju geupeugah ubak Petrus, "Teuma cit sijeuem sagai gata ban lhée droe ka hana ék tameujaga deungon Ulôn? 41 Meujaga-jaga kheueh, dan meudoá kheueh mangat ateueh gata hana keunong bala. Keubiet roh gata jitem keuneuk jipeubuet nyang jroh-jroh teuma gata keudroe nyang hana hase, sabab tabaiát manusia nyan leumoh." 42 Sigoe treuk Isa geujak meudoá, kheun Gobnyan, "Bapak, meunyoe peundeuritaan nyoe harôh Ulôn rasa, dan hana hase teupeujiôh, bah kheueh keuheundak Bapak nyang teujadi." 43 Óh ka lheueh geumeudoá nyan Isa geuriwang lom teuma, dan geungieng lom bandum murit-murit Gobnyan ka habéh teungét, sabab mata awaknyan ka teungét lumpah na. 44 Keu nyang keu lhée Isa geutinggai awaknyan dan kali nyang keu lhée teuma geujak meudoá deungon tutoe haba doá nyang geulakée saban lagée nyang ka geulakée dua goe nyang ka. 45 Óh ka lheueh nyan Gobnyan geuriwang lom ubak murit-murit Gobnyan dan laju geupeugah, "Peu kheueh mantong gata éh dan peupuléh hék? Ngieng, ka trok watée jih Aneuëk Manusia jijok ubak kuasa ureuëng-ureuëng meudesya. 46 Beudôh kheueh, jak geutanyoe tajak. Kalon Ureuëng nyang khianat keu Ulôn ka trok jiteuka!" 47 Teungoh Isa mantong geupeugah haba, Yudas sidroe lamkawan dua blaih droe murit Gobnyan teuka. Meusajan-sajan deungon Yudas nyan, jai cit ureuëng laén teuka sira jiba peudeueng ngon puntông kayée. Awaknyan jiyue lé peumimpén-peumimpén teungku imeum dan peumimpén-peumimpén Yahudi. 48 Tukang khianat nyan ka jibri tée ubak awaknyan tanda nyang lagée nyoe, "Toh ureuëng nyang ulôn cöm eunteuk, nyan kheueh jih. Drob laju ureuëng nyan!" 49 Meunan trok ubak teumpat nyan, Yudas langsong jijak ubak Isa dan jipeugah, "Assalamuálaikum, Pak Gurée!" Laju Yudas nyan jicöm Isa. 50 Geujaweueb lé Isa, "Syedara, keupeue gata jak keunoe?" Óh lheueh nyan ureuëng ramé nyan laju ji maju, dan laju jidrob Isa. 51 Sidroe murit Isa nyang na lamkawan nyan laju geusuet peudeueng lam sarong geu-heungko laju ateueh sidroe hamba imeum agong sampoe ureuëng nyan putôh ôn geulinyueng. 52 Isa geupeugah ubak murit Geuh nyan, "Peutamong lom peudeueng gata lam sarong, sabab bandum ureuëng nyang peuguna peudeueng jih ureuëng nyan teuma maté jipajoh lé peudeueng. 53 Gata pike hana meuteumé Lôn lakée tulông ubak Bapak Ulôn, dan Gobnyan teuma reujang geukirém leubeh nibak dua blaih pasokan sidadu malaikat? 54 Teuma meunyoe meunan, panena mungken lagée nyang ka teutuléh lam Alkitab keubiet harôh teujadi lagée nyang kana nyoe?" 55 Laju Isa geupeugah ubak ureuëng ramé nyan, "Peu kheueh Lôn nyoe peunjahat, sampoe gatanyoe tateuka sira taba peudeueng dan kayée puntông keu tajak drob Ulôn? Tieb-tieb uroe Ulôn seumeubeuet di Baét Allah, dan gata hana tadrob Ulôn! 56 Teuma beutôi ka seuharôh jih jeuet lagée nyan mangat teujadi peue nyang ka geutuléh lé nabi-nabi dalam Alkitab." Óh ka lheueh nyan, bandum murit-murit Gobnyan jiplueng jitinggai Isa. 57 Ureuëng-ureuëng nyang drob Isa laju jiba Gobnyan u rumoh Teungku Imeum Agong Kayafas. Nibak teumpat nyan bandum gurée-gurée agama dan peumimpén-peumimpén Yahudi ka meugumpôi. 58 Deungon seungab-seungab Petrus geuseutôt Isa nibak likot sampoe uleuen rumoh teungku imeum agong. Laju Petrus geutamong bak leuen rumoh nyan, dan geuduek laju meusajan ngon peungawai-peungawai nyang na disinan. Gobnyan geukeuneuk teupeu pakriban akhé jih nyan teujadi. 59 Peumimpén-peumimpén Teungku Imeum dan banmandum Mahkamah Agama geu-useuha keu jimita saksi peuleusu mangat jeuet teupeu rhot huköman maté u ateueh Isa. 60 Teuma lé awaknyan hana jiteumé meusaboh bukeuti pih, bah pih jai that nyang maju sibagoe saksi duseuta. Akhé jih na dua droe saksi nyang maju ukeue. 61 Awaknyan jipeugah, "Ureuëng nyoe geupeugah, 'Ulôn hase Lôn reuloh Baét Allah, dan lam lhée uroe hase Lôn peudong lom teuma.' " 62 Óh lheueh nyan teungku imeum agong laju geudong, dan geupeugah ubak Isa, "Peu kheueh hana gata jaweueb peue nyang jitudôh ateueh gata nyan?" 63 Teuma Isa seungab mantong. Sigoe teuk teungku imeum agong geu-ulang peugah, "Deumi Allah nyang udeb, neupeugah kheueh ubak kamoe peu kheueh Droeneueh Raja nyang ba Seulamat, Aneuëk Po teu Allah?" 64 Geujaweueb lé Isa, "Meunan kheueh kheun gata. Teuma peucaya kheueh: phon saát nyoe, gata teuma neungieng Aneuëk Manusia geuduek blaih uneuen Allah Nyang Mahakuasa, dan geuteuka di ateueh awan dilangét!" 65 Teuma teungku imeum agong nyan laju geupriek-priek peukayan bak tuboh gobnyan, dan geupeugah, "Ureuëng nyoe jihujat Allah! Hana peureulée lé saksi. Gata bandum ka tadeungoe keudroe tutoe haba nyang geuhujat Allah. 66 Jinoenyoe pakriban kheun gata?" Jijaweueb lé awaknyan, "Ureuëng nyoe meusalah, dan harôh maté." 67 Dan awaknyan laju jiludah muka Isa, sira jiseupôt Gobnyan. Na cit nyang tampa Gobnyan, 68 sira jipeugah, "Ci peugah dan neubri tée ubak kamoe, he Raja Peuseulamat! Soe kheueh nyang tampa gata?" 69 Petrus teungoh geuduek diluwa, nibak leuen. Na sidroe ureuëng inong peulayan jitanyong, "Droeneueh nyoe kon sidroe lamkawan murit Isa nibak Galilea nyan?" 70 Teuma Petrus geu-iengkeue dikeue awaknyan mandum. "Ulôn hana lôn teupeu peue nyang gata meukeusut," geujaweueb lé Petrus 71 laju gobnyan geujak ubak pintoe leuen. Na lom sidroe peulayan inong nyang laén jingieng ateueh Petrus, dan jipeugah ubak ureuëng-ureuëng nyang na disinan, "Ureuëng nyoe bunoe na meusajan-sajan deungon Isa nibak Nazaret nyan." 72 Dan Petrus ji-iengkeue lom, sira geu meusumpah. "Keubiet that-that hana lôn turi ngon ureuëng nyan!" kheun Petrus. 73 Hana treb teuma óh lheueh nyan, ureuëng-ureuëng nyang dong disinan jijak ubak Petrus, dan jipeugah, "Pasti gata nyoe sidroe lamkawan awaknyan. Tanda nyan deuh that nibak loghat tutoe haba gata." 74 Laju Petrus geumeusumpah cula caloe sira geupeugah, "Hana ulôn turi keu ureuëng nyan!" Haba geuh nyan pih lheueh, manök pih jiku-uék. 75 Dan Petrus laju teu-ingat keu haba Isa nyang ka lheueh geupeugah ubak gobnyan, "Sigohlom manök jiku-uék, gata ka lhée goe ta-iengkeue keu Ulôn." Óh lheueh nyan Petrus laju geuteubiet sira geumo ngon até peudeh.

Matius 27

1 Ban beungoh seuboh buta, banmandum peumimpén Imeum dan peumimpén Yahudi jimupakat dan jicok keuputosan keuneuk jipoh maté Isa. 2 Jaroe Isa laju jibeuleunggu lé awaknyan, dan jijak jok laju ubak Pilatus, nyang jeuet keu gubunur keurajeuen Roma. 3 Óh watée jiteupeu lé si Yudas bahwa Isa ka jipeu rhot huköman maté, jihnyan meunyeusai that. Lhée ploh péng pirak nyang ka jiteurimong nyan laju jijok pulang ubak peumimpén Imeum-imeum dan peumimpén-peumimpén Yahudi. 4 Óh lheueh nyan jipeugah laju lagée nyoe, "Ulôn that-that ka meudesya ulôn khianat ureuëng nyang hana meusalah, sampoe Gobnyan teuhuköm maté!" Jijaweueb lé awaknyan, "Beu gata teupeu, nyan kon urosan kamoe? Dan nyan na kheueh urosan gata!" 5 Yudas laju jigeulawa péng nyan lam Baét Tuhan, óh lheueh nyan jijak laju jigantung droe. 6 Peumimpén Imeum-imeum laju jicok péng nyan sira jipeugah lagée nyoe, "Péng nyoe péng yuem darah. Meunurot huköm agama, péng nyoe hán jeuet tapeutamong lam teumpat peuseumahan nyang na lam Baét Tuhan." 7 Óh ka na haba sipakat, péng nyan laju jibloe tanoh nyang jiboh nan Tanoh Tukang Beulangöng. Tanoh nyan jipeuguna keu jirat-jirat ureuëng aséng. 8 Nyang kheueh sabab jih tanoh nyan sampoe án uroe nyoe nan jih Tanoh Darah." 9 Deungon nyan, jeuet kheueh peue nyang ka lheueh geupeugah lé Nabi Yeremia, "Awaknyan nyang jiteurimong lhée ploh péng pirak, na kheueh yuem nyang ka jisituju lé bansa Israel sibagoe yuem teubayeue keu jih nyan. 10 Dan péng nyan awaknyan peuguna keu jibloe tanoh tukang beulangöng, lagée nyang ka geupeurintah lé Tuhan ubak ulôn." 11 Watée Isa meuhadab ubak Pilatus, gubunur nanggroe nyan, laju jitanyong lé Pilatus, "Peu kheueh gata Raja ureuëng Yahudi?" "Meunan kheueh kheun gata," Jaweueb Isa. 12 Teuma watée peumimpén Imeum-imeum dan peumimpén-peumimpén Yahudi jipeugah jai that-that tudohan keu Isa, Gobnyan hana geujaweueb meusikrek haba pih. 13 Sabab nyan Pilatus laju jipeugah ubak Gobnyan, "Peu kheueh hana gata deungoe banmandum nyang jitudôh lé awaknyan ateueh gata nyan?" 14 Isa teutab hana geujaweueb meusikrek haba pih sampoe gubunur nyan hireuen lumpah na. 15 Tieb-tieb na Peurayaan Paskah, gubunur lazem jih geupeu lheueh sidroe ureuëng nyang keunong huköm meunurot nyang jipiléh lé ureuëng ramé. 16 Bak watée nyan na sidroe ureuëng huköman nyang that meugah. Nan ureuëng nyan Yesus Barabas. 17 Teuma, watée ureuëng ramé nyan ka meusapat keunan, Pilatus laju geutanyong ubak rakyat ba nyan, "Soe kheueh meunurot gata nyang gata tem ulôn peuleueh keu gata? Yesus Barabas atawa Isa nyang teuhôi Almaseh?" 18 Pilatus geupeugah meunan sabab gobnyan geuteupeue bahwa peunguasa-peunguasa Yahudi jiseurah Isa ubak gobnyan sabab awaknyan bingiek até. 19 Bak watée Pilatus teungoh geuduek-duek ateueh balée peungadelan, peurumoh gobnyan laju jikirém peusan nyang lagée nyoe ubak gobnyan, "Bék kheueh droeneueh neutem mat peukara ureuëng nyang hana meusalah nyan, sabab lé kareuna Gobnyan, ulôn na leumah lam lumpo nyang lumpah teumakot." 20 Teuma lé peumimpén Imeum-imeum dan banmandum peumimpén Yahudi hana piôh-piôh jipeusuna rakyat mangat jilakée ubak Pilatus nyang jipeulheueh na kheueh Yesus Barabas dan Isa teuhuköm maté. 21 Dan gubunur nyan geutanyong lom ubak ureuëng ramé nyan, "Ban dua droe ureuëng nyan, soe kheueh meunurot gata nyang jeuet ulôn peu lheueh keu gata?" "Yesus Barabas," jaweueb awaknyan. 22 "Meunyoe meunan, peue nyang harôh ulôn peubuet ateueh Isa nyang teuhôi nan Almaseh?" Geu tanyong lé Pilatus ubak ureuëng ramé nyan. "Saleb mantong Ureuëng nyan!" jaweueb awaknyan banmandum. 23 "Ka jeuet, jinoe ulôn tanyong ubak gata mandum, "Peue buet nyang jeuhet nyang ka jipeubuet lé ureuëng nyoe?" tanyong Pilatus bak ureuëng ramé nyan. Laju awaknyan jimeusu leubeh teuga lom, "Saleb laju Ureuëng nyan" 24 Akhé jih Pilatus sadar bahwa gobnyan hana hase lé geupeubuet sapeue dan ureuëng nyan mungken teuma jibeurontak ateueh gobnyan. Óh lheueh nyan Pilatus laju geucok ié, dan dikeue ureuëng ramé nyan laju geu rhah jaroe geuh sira geupeugah, "Ulôn hana meutanggong jaweueb ureuëng nyoe maté, nyan tanggong jaweueb gata!" 25 Banmandum ureuëng ramé nyan jijaweueb, "Nyoe, bah kheueh kamoe dan aneuëk-aneuëk kamoe nyang tanggong huköman ateueh maté Ureuëng nyan!" 26 Dan Pilatus pih laju geupeuleueh Barabas keu awaknyan, teuma geuyue laju bak ureuëng laén mangat jiseunuét Isa; dan geujok laju keu jisaleb. 27 Óh lheueh nyan lé sidadu-sidadu Pilatus laju jipeutamong Isa lam meuligoe gubunur, dan mandum pasokan jidong bansilingka Isa. 28 Awaknyan laju jisuet peukayan nyang geungui lé Isa, laju jipeusok ubak Gobnyan bajée jubah ungu. 29 Awaknyan laju jipeugét saboh seureuban nibak ranteng-ranteng nyang meuduro, seureuban nyan laju jipeuseuôn ateueh ulée Isa, óh lheueh nyan laju jikeubah sikrék tungkat bak jaroe uneuen Gobnyan, laju jimeuteuôt dikeue Gobnyan sira jihina Gobnyan. "Amphon delat po Raja Ureuëng Yahudi!" kheun awaknyan. 30 Óh lheueh nyan lé awaknyan laju jiludah ateueh Isa, dan jicok laju tungkat nyan, ngon tungkat nyan laju jiseukok ateueh ulée Isa. 31 Óh ka lheueh Isa jihina lagée nyan, jubah ungu nyang na bak Isa laju jisuet dan jipeusok lom teuma peukayan droe Gobnyan. Óh lheueh nyan Isa laju jiba uluwa keuneuk jijak saleb. 32 Bak teungoh rot ueh awaknyan laju meurumpok ngon sidroe ureuëng nibak Kirine nan ureuëng nyan Simon. Awaknyan jipaksa bak ureuëng nyan beujitem gulam saleb Isa. 33 Óh lheueh nyan awaknyan troh laju bak saboh teumpat nyang nan jih Golgota, nyang makna jih, "Teumpat Bruek Ulée", 34 Bak teumpat nyan lé awaknyan laju jipeujieb ié anggô ubak Isa nyang meujampu ngon pheuet. Teuma óh ka lheueh geuci rasa ié anggô nyan lé Isa, laju geukeubah dan hana geujieb le. 35 Óh lheueh nyan awaknyan laju jisaleb Gobnyan, dan jibagi-bagi laju bajée Isa nyan deungon cara ji undi. 36 Óh ka lheueh nyan awaknyan laju jiduek jipreh Gobnyan disinan. 37 Ateueh ulée Isa nyan laju jikeubah lé awaknyan saboh tulésan nyang su jih keuhai peue nyang jitudôh lé awaknyan ubak Gobnyan sampoe Gobnyan keunong huköm, su tulésan nyan na kheueh lagée nyoe: "Nyoe kheueh Isa, Raja Ureuëng Yahudi", 38 Meusigoe ngon Isa nyan awaknyan na teuma jisaleb dua droe ureuëng jeuhet nyang buet jih meurampok; sidroe blaih uneuen, dan sidroe teuk blaih wie Gobnyan. 39 Ureuëng-ureuëng nyang na jijak rot nyan jiasek-asek ulée, sira jihina Isa. 40 Awaknyan jipeugah, "Gata nyang keuneuk reuloh Baét Allah, dan gata peudong teuma lam teumpo lhée uroe! Meunyoe gata Aneuëk Allah, tron kheueh laju nibak saleb nyan, dan peuseulamat droe gata!" 41 Meunan cit deungon peumimpén Imeum-imeum dan gurée-gurée agama lom peumimpén-peumimpén Yahudi jihina Isa. Awaknyan jipeugah lagée nyoe, 42 "Ureuëng nyoe jipeuseulamat ureuëng laén, padahai droe Geuh keudroe hana hase jipeuseulamat! Meunyoe Gobnyan raja Israel, bah kheueh bak saát nyoe Gobnyan jitron nibak saleb nyan, barô kheueh kamoe peucaya ubak Gobnyan. 43 Jikheun Gobnyan peucaya ubak Allah, lom jipeugah Gobnyan Aneuëk Allah. Nah, jak tangieng jinoe, peu kheueh Gobnyan geupeu seulamat lé Allah saát nyoe." 44 Peurampok-peurampok nyang dua droe nyan nyang teusaleb meusigoe ngon Gobnyan pih jipeugah cit haba meuhina nyang lagée nyan. 45 Watée cot uroe timang, nyang treb jih na lhée jeuem, bansaboh nanggroe nyan seupôt tan deuh sapeue. 46 Poh lhée seupôt, Isa geudumpék ngon su Geuh nyang teuga dan meugeunta, "Eli-eli, lama sabakhtani?" Nyang makna jih, "Ya Allah Lôn, ya Allah Lôn, pakon Droeneueh neutinggai Ulôn?" 47 Na padub droe ureuëng nyang na disinan jideungoe su Isa meudumpék nyan, dan laju jipeugah sabe keudroe-droe jih, "Ureuëng nyang jihôi Ilyas!" 48 Sidroe lamkawan nyan bagaih-bagaih jijak cok bungöng kareueng, laju jipeunom lam ié anggô masam. Óh lheueh nyan atranyan laju jilat bak ujong reunong, jisunyueng laju bak bibi Isa. 49 Teuma lé ureuëng-ureuëng nyang laén jipeugah, "Preh ilée, jak tangieng peu kheueh Ilyas teuka jijak peuseulamat Ureuëng nyan!" 50 Óh lheueh nyan Isa geudumpék lom ngon su nyang teuga, dan óh lheueh nyan Gobnyan laju meuninggai donya. 51 Ija Gorden nyang na meugantung lam Baét Tuhan teupriek jeuet keudua phon rot ateueh sampoe trok u miyueb. Bumoe meugeunta dan gunong-gunong batée beukah. 52 Bubena jirat ka teuhah, dan jai lumpah na umat Po teu Allah nyang ka meuninggai geupeu udeb lom teuma. 53 Awaknyan mandum jiteubiet nibak lam kubu-kubu óh ka lheueh Isa geubeudôh nibak maté, dan awaknyan laju jitamong u Yerusalem. Dan disinan jai that-that ureuëng nyang ngieng awaknyan. 54 Keumandan pasokan meusajan ngon sidadu-sidadu nyang keumiet Isa habéh yo ngon teumakot watée jikalon geumpa bumoe, dan mandum nyang ka teujadi nyan. Awaknyan jipeugah, "Beutôi that, jihnyoe Aneuëk Po teu Allah!" 55 Disinan ramé that cit ureuëng inong nyang teungoh jingieng nibak jiôh. Awaknyan kheueh nyang seutôt Isa keu jijak tulông Gobnyan phon nibak Galilea. 56 Lamkawan ureuëng inong nyan na kheueh Mariam Magdalena, Mariam mak Yakobus dan Yusuf, dan mak aneuëk-aneuëk Zebedeus. 57 Malam nyan teuka kheueh sidroe ureuëng kaya nibak Arimatea, nan ureuëng nyan Yusuf. Ureuëng nyan murit Isa cit. 58 Ureuëng nyan laju jijak ubak Pilatus, dan jilakée manyét Isa nyan, dan Pilatus pih laju jipeurintah mangat manyét Isa nyan jijok bak gobnyan. 59 Teuma lé Yusuf laju geucok manyét Isa nyan, laju jibalot ngon ija kapan nibak ija lineun barô. 60 Manyét Isa nyan jikeubah laju lam kubu atra gobnyan keudroe nyang jipeugét bak saboh gunong batée. Óh ka lheueh nyan lé gobnyan laju geubalek sineuk batée rayeuk sampoe teutob banmandum babah pintoe kubu nyan, dan óh lheueh nyan ureuëng nyan laju geuwoe. 61 Mariam Magdalena dan Mariam nyang laén geuduek bak binéh nyan sira geupeukeue ubak kubu nyan. 62 Óh singoh beungoh nyan, bak uroe Sabat, peumimpén Imeum-imeum dan ureuëng-ureuëng Farisi jijak meusajan-sajan meuhadab ubak Pilatus sira jipeugah lagée nyoe, 63 "Amphon, kamoe mantong teuingat watée ureuëng teumipée nyan mantong udeb, jihnyan ka lheueh jipeugah, 'Óh ka lheueh lhée uroe Ulôn teuma Lôn beudôh.' 64 Sabab nyan, neuyue kheueh ubak ureuëng laén mangat jikeumiet kubu nyan beugét-gét sampoe bak uroe nyang keu lhée, mangat murit-murit jihnyan hana jiteumé cue manyét nyan laju jipeugah ubak ureuëng ramé bahwa ureuëng nyan ka jibeudôh nibak lam kubu. Dan teumipée nyang dudoe nyoe leubeh brok nibak nyang phon." 65 "Nibak gata na sidadu peungawai," kheun Pilatus ubak awaknyan, "Jak kheueh jak keumiet kubu nyan bék reunggang-reunggang." 66 Dan awaknyan pih laju jijak ubak kubu Isa nyan, jiséegée laju batée raya nyang teukeubah lam babah pintoe kubu nyan, mangat hana nyang peukaru kubu Isa nyan.

Matius 28

1 Óh ka lheueh seuleusoe uroe Sabat, bak uroe aleuhat watée jih mantong beungoh lumpah na, Mariam Magdalena ngon Mariam nyang laén geujak ngieng laju ubak kubu Isa nyan. 2 Ngon hana jisangka-sangka teuka geumpa bumoe nyang lumpah teuga. Sidroe malaikat Tuhan geutron nibak syeuruga laju geugule batée raya nyang teutôb bak babah pintoe kubu nyan, óh lheueh nyan laju geuduek ateueh batée nyan. 3 Muka malaikat nyan lagée kilat, dan peukayan gobnyan putéh lagoena. 4 Sidadu nyang keumiet kubu nyan lumpah teumakot dan yo hana teukira, dan ka jeuet lagée ureuëng maté. 5 Malaikat nyan geupeugah ubak ureuëng-ureuëng inong nyang na disinan, "Bék teumakot! Ulôn kuteupeu gata tamita Isa nyang ka teusaleb nyan. 6 Gobnyan hana disinoe. Gobnyan ka geubeudôh lagée nyang ka lheueh geupeugah yoh masa ilée. Jak tangieng teumpat Gobnyan teuéh nyan. 7 Jinoe gata jak kheueh laju bagaih-bagaih, jak peugah laju ubak mandum murit-murit Gobnyan, 'Gobnyan ka geubeudôh, dan saát nyoe Gobnyan geujak leubeh awai nibak gata u Galilea. Disideh gata teuma gata kalon Gobnyan!' Ingat kheueh peue nyang ka lheueh ulôn peugah ubak gata." 8 Bagaih that-that ureuëng-ureuëng inong nyan geutinggai kubu Isa nyan. Deungon peurasaan teumakot meujampu galak, awaknyan geuplueng-plueng keu geujak peugah hai nyan ubak murit-murit Isa. 9 Hana jisangka-sangka Isa geujak meurumpok ngon ureuëng inong nyan sira geupeugah lagée nyoe, "Assalam muálaikum!" Laju awaknyan geupeurab ubak Gobnyan, geuwa gaki Geuh dan geuseumah Gobnyan. 10 "Bék teumakot," kheun Isa ubak awaknyan, "Jak peugah laju ubak mandum syedara-syedara Lôn mangat awaknyan jijak u Galilea; disideh awaknyan teuma jikalon Ulôn." 11 Teungoh ureuëng inong-inong nyan jijak mita syedara-syedara Isa, na padub droe sidadu nyang keumiet kubu nyan jijak woe u banda, dan jipeugah laju ubak mandum peumimpén Imeum-imeum banmandum nyang ka teujadi. 12 Peumimpén Imeum-imeum nyan laju jimeurok pakat ngon peumimpén-peumimpén Yahudi, dan jijok laju péng nyang lupah jai ubak sidadu nyang kawai kubu nyan, 13 sira jipeugah meunoe, "Gata harôh gata kheun bahwa murit-murit Isa jiteuka óh malam uroe, dan laju jicue manyét nyan watée gata teungoh teungét. 14 Dan meunyoe gubunur geudeungoe hai nyan, kamoe nyang bujuk gobnyan mangat gata hana halangan sapeue." 15 Teuma lé sidadu peungawai nyan laju jicok péng nyan, dan jipeubuet laju lagée nyang ka ji amanat ubak jihnyan. Ngon sabab nyan calitra nyan mantong meutabu di teungoh-teungoh ureuëng Yahudi sampoe án uroe nyoe. 16 Ban siblaih droe murit Isa nyan laju geujak u bukét di Galilea lagée nyang ka geupeurintah lé Isa ubak awaknyan. 17 Bak watée awaknyan geukalon Isa na disinan, awaknyan laju jisujut jiseumah Gobnyan. Teuma na cit lamkawan awaknyan nyang ragu-ragu. 18 Isa laju geupeurab bak awaknyan sira geupeugah, "Banmandum kuasa nyang na di syeuruga dan di bumoe ka geuseurah ubak Ulôn. 19 Sabab nyan jak kheueh ubak mandum bansa nyang na ateueh donya, peujeuet kheueh awaknyan keumurit-murit Ulôn. Pumanö kheueh awaknyan deungon gata teuôh nan Bapak, Aneuëk, dan Roh Allah. 20 Purunoe kheueh awaknyan jitaát banmandum nyang ka Lôn peurintah ubak gata. Dan ingat kheueh Ulôn teuma na sabe meusajan gata sampoe akhé jamén."

Markus 1

1 Nyoe kheueh Haba Gét keuhai Isa, Aneuëk Allah. 2 Haba Gét nyoe awaiphon geutuléh lé Nabi Yesaya lagée nyoe, " 'Nyoe kheueh utosan ulôn,' kheun po teu Allah; 'Ulôn kirém jihnyan leubeh ilée nibak Gata, mangat jihnyan jipeuhah rot ueh keu Gata.' 3 Na ureuëng nyang meuhôi-meuhôi di padang pasi, 'Peusiab kheueh rot ueh keu Tuhan; peusaré kheueh rot-rot nyan jeuet mangat bak Geujak.' " 4 Lagée nyang teutuléh nyan, meunan kheueh teuka Nabi Yahya lam padang pasi. Gobnyan geupumanö manusia dan geupeusampoe haba nyang teuka nibak Po teu Allah. "Gata harôh tobat nibak mandum desya-desya gata dan harôh teupumanö, mangat Po teu Allah geupeu amphon gata," meunan kheueh geupeugah lé Nabi Yahya. 5 Mandum ureuëng nyang teuka nibak Yodea dan banda di Yerusalem jijak ubak Nabi Yahya dan jideungoe peue nyang geupeugah lé Nabi Yahya nyan. Laju awaknyan jiaku banmandum desya-desya jih, dan Nabi Yahya laju geupumanö awaknyan lam Krueng Yordan. 6 Nabi Yahya geungui peukayan nyang teupeugét nibak bulée unta. Taloe keuieng gobnyan teupeugét nibak kulét, peunajoh gobnyan daruet ngon meulisan uteuen. 7 Gobnyan geupeusampoe haba nyang lagée nyoe, "Singoh óh ka lheueh ulôn, teuma teuka ureuëng nyang leubeh rayeuk nibak ulôn. Keu lôn tukui lôn ploih taloe sipatu Gobnyan pih hana jeuet lôn peubuet. 8 Ulôn pumanö gata deungon ié, teuma Gobnyan geupumanö gata ngon Roh Po teu Allah." 9 Bak watée nyan Isa teuka nibak Nazaret u Galilea, dan Nabi Yahya Pumanö watée nyan na Gobnyan bak Krueng Yordan, lam Krueng Yordan nyan kheueh Isa geupumanö lé Nabi Yahya. 10 Meunan Isa geuteungoh lam krueng nyan, deuh laju geungieng langét teuhah dan Roh Allah geutron lagée cicém mirah pati u ateueh Gobnyan. 11 Dan óh lheueh nyan teudeungoe su Po teu Allah nyang geupeugah lagée nyoe, "Gata kheueh Aneuëk Ulôn nyang Ulôn gaséh. Gata nyang peugalak that nibak até Lôn." 12 Bagaih that óh lheueh nyan Roh Allah laju geuba Isa u padang pasi. 13 Peuet ploh uroe Gobnyan lam padang pasi nyan, ji-ujoe lé Iblih. Meunan cit deungon beulatang kleut na meusajan Gobnyan disinan, dan dumna malaikat geupeutimang Gobnyan. 14 Óh ka lheueh Nabi Yahya Pumanö jipeutamong lam glab, Isa laju geujak u Galilea, dan geupeusampoe laju Haba Gét nyang teuka nibak Allah disinan. 15 Kheun Gobnyan, "Watée jih ka troh, Allah sigra geumat peurintah. Tobat kheueh nibak banmandum desya-desya gata, dan peucaya kheueh ubak Haba Gét nyang teuka nibak Po teu Allah!" 16 Watée Isa teungoh geujak bak panté Danau Galilea, leumah laju geungieng dua droe neulayan, neulayan nyan na kheueh Simon dan adoe jih nyang nan Andreas. Awaknyan teungoh jeue eungkot lam danau nyan. 17 Isa geupeugah ubak awaknyan, "Seutôt kheueh ulôn, ulôn teuma lôn purunoe gata pakriban cara jih teujeue manusia." 18 Hana jipike panyang bandua awaknyan laju jiseutôt Isa dan jeue jihnyan hana jipako jitinggai disinan. 19 Isa geujak laju, deuh teuma geungieng dua droe teuk adoe aduen, nyang nan jih sidroe Yakobus dan Yahya, awaknyan bandua aneuëk Zebedeus. Watée Isa troh keunan, geungieng awaknyan teungoh cob jeue lam peurahô jih. 20 Isa langsong geutawök awaknyan. Bandua awaknyan laju jitron lam peurahô sira jitinggai ureuëng syiek ngon ureuëng-ureuëng laén nyang pajoh gaji bak gobnyan. Dan awaknyan laju jiseutôt Isa. 21 Isa ngon murit-murit Gobnyan laju troh u banda Kapernaum. Bak uroe Sabat seulanjut jih, Isa geutamong lam saboh rumoh iébadat laju geuseumeubeuet disinan. 22 Ureuëng-ureuëng nyang deungoe Gobnyan hireuen watée jideungoe cara Gobnyan seumeubeuet. Sabab, Gobnyan geuseumeubeuet deungon peunoh wibawa, hana lagée gurée-gurée agama nyang laén. 23 Bak watée nyan na sidroe ureuëng nyang ka jitamong roh jeuhet laju jitamong lam rumoh iébadat, óh troh keunan laju jidumpék ngon su meutaga, 24 "Hei Isa ureuëng Nazaret, peue keuneuk ta peubuet ateueh kamoe nyoe? Droeneueh jak keunoe keuneuk peubinasa kamoe? Ulôn kuteupeu soe Droeneueh nyan: Droeneueh kheueh utosan nyang suci nyang teuka nibak Po teu Allah!" 25 "Seungab!" geudhôt lé Isa ubak roh jeuhet nyan, "teubiet laju lam tuboh ureuëng!" 26 Teuma di roh jeuhet nyan laju jiyok-yok tuboh ureuëng nyan sihabéh seuneuga, óh lheueh nyan laju jiteubiet lam tuboh ureuëng nyan sira jidumpék. 27 Banmandum ureuëng nyang na disinan hireuen lumpah na, sampoe awaknyan jimarit sabe keudroe-droe, "Hei, peue bala nyoe? Saboh peungajaran nyang barô! Deungon peunoh wibawa gobnyan hase geupeurintah roh-roh jeuhet jiteubiet lam ureuëng nyan, dan jihnyan taát ubak Gobnyan!" 28 Teuma haba keuhai Isa bagaih that meutabu bansaboh Galilea. 29 Isa ngon murit-murit Gobnyan laju geutinggai rumoh iébadat nyan dan geujak laju u rumoh Simon dan Andreas. Yakobus ngon Yahya geujak cit meusajan awaknyan. 30 Mak tuan Simon teungoh sakét deumam bak teumpat éh. Watée Isa ngon murit-murit Gobnyan geutamong lam rumoh nyan, ubak Isa laju jibri tée hainyan. 31 Ban geudeungoe nyan, Isa laju geujak ubak tuan Simon nyan, laju geumat jaroe ureuëng nyan, laju geutulông peubeudôh ureuëng nyan. Watée nyan cit teuma ureuëng nyan ka puléh deumam dan laju jitulông peutimang awaknyan. 32 Óh seupôt uroe, watée mata uroe ka jilhob, di ureuëng ramé laju jiba ubak Isa mandum ureuëng sakét dan nyang jitamong roh jeuhet. 33 Banmandum peunduduek banda nyan ka meusapat dileuen rumoh nyan. 34 Dan Isa laju geupeu ubat banmandum ureuëng nyang keunong meubagoe rupa peunyakét, dan geu use bubena roh-roh jeuhet. Gobnyan hana geubri idhin roh-roh jeuhet nyan jipeugah haba, sabab jihnyan jiteupeu soe Gobnyan. 35 Óh singoh beungoh, watée mantong suboh that, Isa geubeudôh geutinggai laju rumoh nyan. Gobnyan geujak u teumpat nyang sungue diluwa banda, laju geumeudoá bak teumpat nyang sungue nyan. 36 Teuma lé Simon dan rakan-rakan gobnyan jijak mita gobnyan. 37 Dan watée awaknyan ka meurumpok ngon gobnyan, awaknyan jipeugah, "Banmandum ureuëng teungoh jimita bapak." 38 Teuma geujaweueb lé Isa, "Jak geutanyoe tajak laju u banda-banda nyang na ban sikeulileng. Ulôn harôh lôn khutubah bak teumpat nyan, sabab nyan kheueh meukeusut ulôn teuka keunoe." 39 Sabab nyan Isa geujak ho-ho mantong bansaboh Galilea, dan geukhutubah bak rumoh-rumoh iébadat sira geu use bubena roh-roh jeuhet. 40 Sidroe ureuëng meupeunyakét kulét nyang ka lumpah that parah jijak ubak Isa. Sira jimeuteuôt ureuëng nyan jipeugah, "Meunyoe Bapak neutém, Bapak jeuet Bapak peupuléh ulôn." 41 Isa weueh óh geungieng ureuëng nyan. Jadi, Gobnyan laju geumat ureuëng nyan sira geupeugah, "Ulôn tem, beupuléh kheueh gata!" 42 Watée nyan cit teuma peunyakét ureuëng nyan gadôh dan laju puléh. 43 Dan Isa laju geuyuejak ureuëng nyan sira geupeu ingat lagée nyoe, 44 "Awaih, bék peugah-peugah bak soe mantong, teuma gata jak kheueh ubak imeum, dan gata lakée gobnyan keu geupeubeutôi bahwa gata ka puléh. Dan sibagoe gata ka puléh, gata sie kheueh keureubeuen lagée nyang ka geupeurintah lé Nabi Musa, sibagoe bukeuti bak ureuëng laén bahwa gata beutôi-beutôi ka puléh." 45 Teuma di ureuëng nyan jijak, hana putôh-putôh jicalitra bak gob keujadian nyan Isa hana hase geutamong lam banda seucara trang-trang. Gobnyan teuma tinggai diluwa banda bak teumpat-teumpat nyang sungue. Teuma ureuëng laén hana putôh-putôh jijak bak gobnyan nyang teuka nibak pané-pané.

Markus 2

1 Na padub uroe teuma óh lheueh nyan Isa geugisa u Kapernaum. Teuma meutabu kheueh haba bahwa Gobnyan na di rumoh. 2 Ureuëng ramé jijak bak Gobnyan. Awaknyan meusapat disinan Sampoe ka hana le teumpat. Bak babah pintoe pih ka peunoh meusak ngon ureuëng. Dan Isa pih laju geupeusampoe haba nibak Po teu Allah ubak awaknyan. 3 Teungoh gobnyan geupeugah haba, na peuet droe ureuëng jigulam sidroe ureuëng lapée jiba ubak Isa. 4 Teuma sabab ureuëng jai lumpah na, awaknyan hana hase jipeurab ubak Gobnyan. Teuma, awaknyan laju jireulôh bubong paih bak teumpat Isa teungoh peugah haba. Óh lheueh nyan awaknyan laju jipeutron ureuëng lapée nyan meusigoe ngon tika éh jih. 5 Watée geungieng lé Isa padub na rayeuk iman awaknyan, Gobnyan laju geupeugah ubak ureuëng lapée nyan, "Aneuëk ulôn, desya gata ka teupeu amphon." 6 Na padub droe gurée-gurée agama nyang teungoh duek disinan, ka jipeuphon jiteumanyong lam até, 7 "Lumpah that ajam babah ureuëng nyan jijeuet peugah lagée nyan! Jihnyan ka jihina Po teu Allah. Soe nyang jeuet peu amphon desya, meunyoe kon Po teu Allah keudroe?" 8 Watée nyan cit teuma Isa geuteupeue pikeran awaknyan. Laju Gobnyan geupeugah lagée nyoe, "Pakon gata teumanyong meunan lam até gata? 9 Toh nyang leubeh mudah teupeugah, 'Desya gata ka teupeu amphon', atawa teupeugah, 'Beudôh kheueh, gulong kheueh tika gata dan jak kheueh'? 10 Teuma jinoenyoe Ulôn bri bukeuti keu gata bahwa ateueh bumoe nyoe Aneuëk Manusia na kuasa jipeu amphon desya." Dan laju Isa geupeugah ubak ureuëng lapée nyan lagée nyoe, 11 "Beudôh kheueh, gulong tika gata dan jakwoe kheueh!" 12 Ureuëng lapée nyan laju jibeudôh sira jigulong tika jih jiteubiet laju dan mandum ureuëng ramé jingieng ateueh ureuëng nyan. Ureuëng-ureuëng laén teuhireuen-hireuen laju jipujoe Po teu Allah. Kheun awaknyan, "Gohlom na tangieng keujadian nyang lagée nyoe!" 13 Isa geugisa lom u panté Danau Galilea. Jai that ureuëng jijak ubak Gobnyan, dan Gobnyan laju geupeubeuet awaknyan. 14 Teungoh Isa geujak nibak teumpat nyan, gobnyan geukalon sidroe ureuëng tukang kutéb cukée nyang nan jih Lewi, aneuëk Alfeus, teungoh jiduek lam kantô cukée. "Seutôt kheueh ulôn," Kheun Isa ubak ureuëng nyan. Teuma ureuëng Lewi nyan laju jidong dan jijak laju jiseutôt Isa. 15 Watée Isa teungoh geumakheun di rumoh Lewi, teuka kheueh keunan ureuëng-ureuëng tukang kutéb cukée nyang laén dan ureuëng-ureuëng nyang jianggab hana gét lé masyarakat jimakheun meusajan ngon Isa dan murit-murit Gobnyan. Sabab ramé that lamkawan awaknyan nyang seutôt Isa. 16 Na padub droe gurée-gurée agama nibak golongan ureuëng Farisi geukalon Isa teungoh makheun meusajan-sajan ngon ureuëng-ureuëng kutéb cukée nyan dan ureuëng-ureuëng nyang jianggab hana gét nyan. Teuma lé awaknyan laju jitanyong ubak murit-murit Isa, "Pakon gurée gata jipajoh bu meusajan ngon ureuëng-ureuëng kutéb cukée dan ureuëng-ureuëng nyang hana gét nyan?" 17 Isa teudeungoe peue nyang jitanyong lé awaknyan, laju geujaweueb lagée nyoe, "Ureuëng nyang seuhat hana peureulée dokto; nyang peureulée dokto na kheueh ureuëng sakét. Ulôn teuka bukon lôn tawök ureuëng nyang jianggab droe jih gét, teuma ureuëng nyang jianggab hina." 18 Bak saboh watée murit-murit Nabi Yahya Pumanö dan ureuëng-ureuëng Farisi teungoh puasa. Dan na nyang jijak ubak Isa sira jitanyong lagée nyoe, "Pakon murit Nabi Yahya Pumanö dan murit ureuëng Farisi jipuasa, seudangkan murit Bapak hana?" 19 Geujaweueb lé Isa, "Bak teumpat khanuri ureuëng meukawen, peu kheueh jamé-jamé nyang troh nyan hana jimakheun? Meunyoe linto agam mantong na meusajan ngon awaknyan, teuntée awaknyan jimakheun. 20 Teuma trok teuka watée jih linto agam nyan jicok nibak awaknyan. Bak watée nyan barô kheueh awaknyan hana jimakheun. 21 Hana ureuëng nyang tampai bajée tuha ngon ija barô. Sabab ija sinampai nyan teuma kunyuét laju teupriek bajée nyan, deungon na lagée nyan akibat jih beukah bajée teutampai nyan leubeh raya. 22 Meunan cit hana ureuëng nyang rô ié anggô barô lam baluem kulét nyang ka tuha. Sabab ngon ié anggô nyang barô nyan jeuet keusabab baluem nyan beukah. Keuneulheueh jih bandua nyan teuböh. Ié anggô nyang barô harôh teuroe lam baluem nyang barô!" 23 Bak siuroe-uroe Sabat, watée Isa teungoh geujak rot lam lampôh gandom, murit-murit Gobnyan laju jipot boh gandom nyan. 24 Di ureuëng Farisi laju jipeugah ubak Isa, "Pakon murit-murit Droeneueh ji iengkeue huköm agama geutanyoe, deungon cara jipeubuet buet nyang teutam bak uroe Sabat?" 25 Geujaweueb lé Isa, "Peu kheueh gohlom na gata beuet peue nyang geupeubuet lé Nabi Daud, watée Abyatar teungoh meutugaih jeuet keu imeum agong. Watée Nabi Daud dan ureuëng-ureuëng deuk, dan hana peunajoh sapeue, gobnyan geutamong lam Baét Tuhan, laju geupajoh ruti nyang ka teupeuseumah keu Allah. Dan ruti nyan pih geubri ubak ureuëng-ureuëng gobnyan. Padahai meunurot agama geutanyoe, imeum-imeum mantong nyang jeuet pajoh ruti nyan." 27 Geupeugah lom lé Isa, "Uroe Sabat teupeugét keu manusia; bukon manusia keu uroe Sabat. 28 Jadi, Aneuëk Manusia na kuasa, bah kheueh nyan ateueh uroe Sabat."

Markus 3

1 Isa geugisa lom u rumoh iébadat. Disinan na sidroe ureuëng nyang lapée jaroe jih siblaih. 2 Disinan na ureuëng nyang teungoh jimita-mita keusalahan Isa, mangat na rot jigadu peue-peue buet Gobnyan nyang salah. Jadi awaknyan hana putôh-putôh jipeurati Gobnyan peu kheueh Isa nyan geupeu puléh ureuëng bak uroe Sabat. 3 Isa geupeugah ubak ureuëng nyang jaroe jih lapée siblaih nyan, "Dong keunoe, dikeue ulôn." 4 Óh lheueh nyan laju geutanyong ubak ureuëng nyang na disinan, "Meunurot ajaran agama, peue nyang jeuet tapeubuet bak uroe Sabat? Peubuet nyang jroh atawa peubuet nyang jeuhet? Peuseulamat manusia atawa poh maté manusia?" Awaknyan seungab mantong. 5 Deungon beungéh Isa laju geungieng ban sikeulileng Geuh, teuma Gobnyan seudeh cit, sabab awaknyan lumpah kréuh ulée. Laju geupeugah ubak ureuëng nyan, "Sunyueng keunoe jaroe gata." Ureuëng nyan laju jisunyueng jaroe jih, dan saát nyan cit jaroe ureuëng nyan puléh. 6 Teuma lé ureuëng-ureuëng Farisi laju jitinggai rumoh iébadat nyan, dan jijak mupakat laju ngon na padub droe ureuëng-ureuëng raja Herodes, keuneuk jipeumaté Isa. 7 Isa dan murit-murit gobnyan laju geusurot ubak binéh Danau Galilea. Teuma jai lumpah na ureuëng Galilea jiseutôt Isa, dan ramé cit nyang teuka nibak Yudea, 8 nibak Yerusalem, nibak daerah Idumea, dan nibak daerah siblaih u timu Yordan, dan nibak keulileng banda Tirus dan Sidon. Awaknyan banmandum jijak ubak Isa, sabab awaknyan jideungoe keuhai-hai nyang ka geupeubuet. 9 Ureuëng nyang teuka nyan ramé that-that, sampoe Isa geuyue seudia peurahô ubak murit-murit Gobnyan, sabab pat tateupeue teuma Gobnyan jisak-sak lé ureuëng ramé nyan. 10 Ramé that ureuëng sakét nyang geupeu puléh, sampoe banmandum ureuëng sakét meusak-sak jiuseuha jipeurab ubak Gobnyan mangat meuteumé jimat Gobnyan. 11 Dan ureuëng-ureuëng nyang ka jitamong roh jeuhet, tieb-tieb jingieng ateueh Gobnyan, laju jisujut dikeue Gobnyan sira jidumpék, "Droeneueh kheueh Aneuëk Po teu Allah!" 12 Teuma lé Isa sagai-sagai hana geubri peugah ubak roh-roh jeuhet nyan soe Gobnyan. 13 Óh lheueh nyan Isa geu ék u ateueh saboh bukét, laju geuhôi ureuëng-ureuëng nyang geugalak. Ureuëng-ureuëng nyang geutawök nyan laju jijak ubak Gobnyan, 14 ureuëng-ureuëng nyang ka jijak ubak Gobnyan laju geupiléh dua blaih droe. Kheun Gobnyan, "Ulôn piléh gatanyoe, mangat gata taseutôt ho-ho mantong nyang ulôn jak, dan ulôn kirém gata keu gata jak peusampoe Haba Gét nyoe nyang teuka nibak Po teu Allah, 15 dan gata teuma meuteumé kuasa keu gata use roh jeuhet." 16 Nyoe kheueh nan-nan ban dua blaih droe nyan: Simon (nyang teuhôi Petrus), Yakobus dan Yahya syedara gobnyan, 17 na kheueh aneuëk-aneuëk Zebedeus (awaknyan geuboh nan Boanerges makna jih, "aneuëk geulanteue"), 18 Andreas, Filipus, Bartolomeus, Matius, Tomas, Yakobus bin Alfeus, Tadeus, Simon si Patriot, 19 dan Yudas Iskariot nyang khianat Isa. 20 Óh lheueh nyan Isa geuwoe u rumoh Geuh. Teuma di ureuëng ramé teuka lom meusapat, sampoe Isa dan mandum murit-murit Gobnyan hana meuteumé geupajoh bu. 21 Ureuëng-ureuëng nyang na disinan jipeugah, "Jih nyan kapungoe!" Dan watée keuluwarga Gobnyan geudeungoe hai nyan, awaknyan laju jijak keuneuk cok Gobnyan. 22 Gurée-gurée agama nyang teuka nibak Yerusalem jipeugah, "Ureuëng nyan ka jitamong Beelzebul! Pang ulée roh-roh jeuhet nyan kheueh nyang bri kuasa ubak jihnyan mangat jeuet jiuse roh jeuhet." 23 Teuma lé Isa laju geutawök ureuëng ramé nyan, laju geucalitra ubak awaknyan na padubboh miseue. "Panena mungken roh jeuhet ji-use roh jeuhet," kheun Isa. 24 "Meunyoe lam saboh nanggroe teubagi lam peureute-peureute nyang sabe jimeumusoh, nanggroe nyan hana hase meuteun. 25 Dan meunyoe lam saboh keuluwarga hana haba sipakat dan anggota-anggota keuluwarga nyan sabe lam karu hana sapeue kheun, keuluwarga nyan teuma hanco. 26 Meunyoe lam keurajeuen Iblih sabe meusugang dan meukoh-koh reupang, keurajeuen nyan hana treb meuteun dan teuma gadôh hana meubeukaih. 27 Hana meusidroe pih nyang hase jitamong lam rumoh ureuëng nyang teuga dan jireupah hareuta jih meunyoe hana ji-ikat leubeh ilée ureuëng teuga nyan. Óh lheueh nyan, barô kheueh hase jicok mandum atra ureuëng nyan. 28 Beutateupeue kheueh! Meunyoe ureuëng jipeubuet desya dan jipeugah haba meuhina, ureuëng nyang lagée nyan jeuet teupeu amphon. 29 Teuma meunyoe jihnyan jihina roh Allah, ureuëng nyan hana jeuet le teupeu amphon! Sabab nyang jihina nyan na kheueh desya nyang keukai." ( 30 Isa geupeugah meunan sabab na ureuëng nyang peugah Isa kajitamong roh jeuhet.) 31 Óh lheueh nyan Mak ngon syedara-syedara Isa geujak ubak Gobnyan. Awaknyan geupreh diluwa geuyue bak sidroe ureuëng jeuet jihôi Isa. 32 Watée nyan ureuëng ramé nyang teungoh duek bansikeulileng Isa. Awaknyan jipeugah ubak Gobnyan, "Pak, mak dan syedara-syedara bapak na diluwa. Awaknyan geumita Bapak." 33 Geujaweueb lé Isa, "Soe mak Ulôn? Soe kheueh syedara-syedara Lôn?" 34 Óh lheueh nyan laju geungieng bak ureuëng-ureuëng nyang duek bansikeulileng Gobnyan laju geupeugah, "Nyoe kheueh mak dan syedara-syedara Lôn! 35 Ureuëng nyang jipeubuet keuheundak Allah, nyan kheueh syedara Lôn nyang agam, syedara Lôn nyang inong, dan mak Ulôn."

Markus 4

1 Isa geuseumeubeuet lom di panté Danau Galilea. Ramé lumpah na ureuëng nyang hudom Gobnyan disinan. Sabab nyan Gobnyan laju geujak duek lam peurahô nyang na ateueh ié, dan ureuëng ramé nyan jidong bak binéh danau. 2 Dan Isa laju geupeurunoe meubagoe hai ubak awaknyan deungon geupeu guna miseue-miseue. Meunoe kheueh cara jih geupeurunoe awaknyan. 3 "Deungoe kheueh nyoe! Na sidroe ureuëng meutani jitabu bijéh. 4 Watée ureuëng nyang teungoh teumabu, na bijéh nyang rhot bak rot ueh. Laju teuka cicém dan bijéh nyan jicatuek sampoe habéh. 5 Na teuma nyang rhot bak teumpat nyang meubatée-batée tanoh jih cit bacut. Bijéh-bijéh nyan laju timoh sabab kureueng tanoh, 6 teuma watée mata uroe ka ji ék, tarôk-tarôk nyang timoh nyan laju layée dan laju tho óh lheueh nyan laju maté sabab ukeue jih hana lhok jitamong. 7 Na teuma bijéh nyang rhot lam tamah meuduro. Tamah meuduro nyan laju timoh dan jiginton tarôk-tarôk nyan sampoe hana meuhase jimuboh. 8 Teuma na cit bijéh nyang rhot ateueh tanoh nyang subo. Bijéh nyan timoh, laju rayeuk dan laju jimuboh, na nyang lhée ploh, na nyang nam ploh, dan na nyang sireutôh go lipat." 9 Óh ka lheueh geucalitra miseue-miseue nyan, Isa geupeugah lom, "Meunyoe na geulinyueng, deungoe kheueh!" 10 Watée Isa ka tinggai sidroe, ureuëng-ureuëng nyang ka jideungoe peue-peue nyang ka geupeubeuet, laju jijak ubak Gobnyan meusajan-sajan ngon bandua blaih droe murit-murit Gobnyan. Awaknyan laju jilakée ubak Isa mangat geutém peugah makna miseue-miseue nyan. 11 Teuma Isa laju geupeugah ubak awaknyan, "Ubak gata ka geubri anugeurah keu gata teupeu rahsia pakriban Po teu Allah geumat peurintah. Teuma ureuëng-ureuëng nyang geupeurunoe ngon miseue-miseue, 12 mangat 'Awaknyan sabe jipeurati teuma hana jiteupeu peue nyang teujadi, awaknyan sabé jideungoe, teuma hana muphom, nyoe na mangat awaknyan bék jingieng dan bék muphom dan bék jijak ubak Po teu Allah dan Po teu Allah geupeu amphon awaknyan.' " 13 Óh lheueh nyan Isa geupeugah ubak awaknyan lagée nyoe, "Meunyoe gatanyoe hana tamuphom miseue, pakriban gata jeuet gata peuphom miseue nyang laén? 14 Nyang teumabu nyan na kheueh ureuëng nyang peusiab haba nibak Po teu Allah. 15 Bijéh nyang rhot bak rot ueh nyan na kheueh miseue ureuëng nyang jideungoe haba keuhai pakriban Allah geumat peurintah. Meunan jideungoe, Iblih teuka laju jicok peue nyang ka teutabu lam até ureuëng nyan. 16 Bijéh nyang rhot bak teumpat nyang meubatée-batée miseue ureuëng nyang deungoe haba nyan, dan laju jiteurimong ngon galak até. 17 Teuma haba nyan hana meu-ukeue lam até awaknyan, seuhingga hana treb meuteuen. Meunan awaknyan meuteumé sosah atawa ji-iénanya sabab haba nyan, laju awaknyan murtat. 18 Bijéh nyang rhot lam tamah meuduro nyan miseue ureuëng nyang jideungoe haba nyan, 19 teuma khawate keuhai udeb awaknyan dan meuheuét keuneuk udeb mewáh. Nafeusu keu meubagoe rupa jitamong lam até awaknyan. Sabab nyan haba nibak Po teu Allah teuseupet lam até awaknyan, sampoe hana jeuet keu boh. 20 Dan bijéh nyang rhot bak tanoh nyang subo miseue jih ureuëng nyang deungoe haba nyan dan laju jiteurimong, awaknyan jimuboh jai that, na nyang lhée ploh, na nyang nam ploh, dan na nyang sireutôh goe lipat hase jih." 21 Óh lheueh nyan Isa geupeugah lom, "Peu kheueh na ureuëng nyang peuhu panyöt laju jitôb ngon guci, atawa jikeubah dimiyueb teumpat éh? Peu kheueh hana jikeubah panyöt jihnyan bak gaki panyöt? 22 Hana nyang teusöm nyang hana deuh teukalon; dan hana nyang teurahsia nyang hana hase teubongkar. 23 Sabab nyan meunyoe na punyueng, deungoe kheueh!" 24 Geupeugah lom lé Isa, "Ngieng kheueh peue nyang gata deungoe nyoe! Sineupat nyang gata peuguna keu ureuëng laén teuma geupeu guna cit lé Allah keu gata dan leubeh lé nibak nyan. 25 Sabab ureuëng nyang ka lheueh na, teuma geubri leubeh nibak nyang na; teuma keu ureuëng nyang hana, bacut nyang mantong na bak ureuëng nyan geucok lom teuma." 26 Isa geusambong lom haba Gobnyan, "Meunyoe Po teu Allah nyang mat peurintah sibagoe raja, keuadaan jih jeuet teuboh miseue lagée ureuëng nyang tabu bijéh bak ladang jih keudroe. 27 Óh watée malam ureuëng nyan ji-éh; óh beungoh uroe jibeudôh. Dan teungoh lagée nyan bijéh-bijéh nyang ka jitabu nyan laju udeb dan rayeuk. Teuma pakriban jeuet jih bijéh-bijéh nyan jitimoh dan rayeuk, ureuëng nyan hana jiteupeu. 28 Tanoh nyan kheueh nyang deungon keudroe jih nyang peuteubiet hase: phon-phon that tangke jih, óh lheueh nyan aneuëk jih laju jeuet keuboh. 29 Dan meunyoe gandom nyan ka masak, di ureuëng pih ka jipeuphon koh ngon sadeueb sabab ka troh watée jih keu teukoh." 30 "Meunyoe Allah nyang mat peurintah, ngon peue tanyoe jeuet tacok bandengan?" geutanyong lé Isa lom. "Cuntoh peu kheueh nyang jeuet tapeuguna keu tapeutrang hainyan? 31 Meunyoe Allah nyang mat peurintah, keuadaan jih na kheueh lagée miseue nyoe: Sineuk bijéh sisawi laju jicok lé gob dan jipula laju bak tanoh. Bijéh sisawi na kheueh bijéh nyang paleng ubit nyang na lam donya. 32 Teuma meunyoe ka timoh, bijéh nyan ka jeuet keu kayée nyang paleng rayeuk di teungoh-teungoh kayée nyang laén. Cabeueng-cabeueng jih luhu-luhu sampoe mubagoe cicém jijakdong keunan, dan jipeugét eumpung dimiyueb cabeueng nyang luhu nyan." 33 Meunan kheueh cara jih Isa geupeurunoe gob deungon cara geuboh miseue lagée nyang ka geupeugah nyan, meunyoe awaknyan jeuet jiwaham. 34 Isa sabe geupeu guna miseue meunyoe Gobnyan geupeurunoe awaknyan. Teuma meunyoe Gobnyan keudroe ngon murit-murit Gobnyan, geupeugah banmandum ubak awaknyan. 35 Watée seupôt nyan cit teuma, Isa geupeugah ubak murit-murit Geuh, "jak kheueh tameulayeue u meurandeh danau." 36 Teuma Isa laju geu-ék ateueh peurahô, dan murit-murit Gobnyan jitinggai ureuëng ramé bak binéh danau, laju ji-ék ateueh peurahô nyang geu-ék lé Isa. Peurahô-peurahô laén na cit nibak teumpat nyan. Óh lheueh nyan Isa dan murit-murit Gobnyan laju geumeulayeue. 37 Hana treb watée jih awaknyan geumeulayeue, teuka kheueh angén badée nyang lumpah teuga. Umbak raya laju jipoh ateueh peurahô dan ié pih ka jitamong lam peurahô nyan sampoe-sampoe peurahô nyan rab peunoh ngon ié. 38 Bak si ulikot peurahô nyan Isa teungoh geu-éh ulée Geuh geupeusadeue ateueh bantai. Murit-murit Gobnyan laju jipeugoe. Jipeugah lé awaknyan, "Bapak Gurée, peu kheueh Bapak hana neupakoe, tanyoe lam bala?" 39 Isa geubeudôh, laju geudhôt angén nyan, dan geupeugah teuma ubak danau, "Iem, seungab kheueh!" Angén pih seungab, dan danau ka teunang lagée nyang ka. 40 Óh lheueh nyan Isa geupeugah ubak murit-murit Geuhnyan, "Pakon gata teumakot? Pakon gata hana tapeucaya ubak ulôn"? 41 Teuma awaknyan meutamah teumakot laju jimarit sabe keudroe-droe, "Soe kheueh nyang sibeuna jih ureuëng nyoe, sampoe angén ngon umbak pih jitaát ubak Gobnyan."

Markus 5

1 Óh lheueh nyan Isa dan murit-murit Gobnyan laju troh u meurandeh Danau Galilea, bak daerah Gerasa. 2 Meunan Isa geutron lam peurahô, jijak laju ubak Gobnyan sidroe ureuëng agam nyang banjiteubiet lam guha-guha jirat ureuëng maté. 3 Ureuëng nyan ka jikuasa lé roh jeuhet dan tinggai bak jirat-jirat ureuëng maté. Ureuëng nyan ka hana hase le teu ikat; bah kheueh ngon ikat jih nyan ranté, hana cit meuguna. 4 Ka kayém that gaki dan jaroe ureuëng nyan teubeuleunggu ngon ranté, teuma bandum ranté-ranté nyan putôh jireut, dan beuso nyang na bak gaki jih pih hase jipeupatah. Ureuëng nyan teuga lumpah na seuhingga hana meusidroepi nyang hase jimat ureuëng nyan. 5 Uroe ngon malam ureuëng nyan meuwot-wot dilampôh jirat dan bak bukét-bukét, sira jiklik-klik dan ji krôk-krôk tuboh jih ngon batée. 6 Watée jingieng rot jiôh Isa ka teuka, ureuëng nyan jiplueng-plueng dan laju jisujut dikeue Isa. 7 Ngon su nyang teuga sira jidumpék ureuëng nyan jipeugah, "Isa. Aneuëk Allah Nyang Mahamanyang! Peue keuneuk Droeneueh peubuet ateueh ulôn nyoe? Deumi Allah, ulôn lakée bék Droeneueh seksa ulôn!" ( 8 Ureuëng nyan jipeugah lagée nyan sabab Isa geupeugah ubak ureuëng nyan, "Roh jeuhet, teubiet laju lam tuboh ureuëng nyoe!") 9 Dan Isa laju geutanyong bak ureuëng nyan, "Soe nan gata?" Jaweueb ureuëng nyan, "Nan ulôn 'Legiun' -- sabab kamoe nyoe ramé lagoena!" 10 Meu-ulang-ulang jilakée lé ureuëng nyan mangat Isa bék geuyue teubiet roh-roh jeuhet nyan nibak daerah nyan. 11 Bak binéh teumpat nyan jai lumpahna bui-bui nyang teungoh jimita eumpeuen bak barieh gunong. 12 Roh-roh jeuhet nyan jilakée ubak Isa, "Neuyue kheueh ubak kamoe jeuet kamoe tamong lam tuboh bui-bui nyan." 13 Dan Isa situju. Teuma mandum roh-roh jeuhet nyan laju jiteubiet lam tuboh ureuëng nyan dan jitamong laju lam tuboh bui-bui nyang na disinan. Banmandum kawan bui nyan laju jiplueng dan jigrob nibak binéh reuleueng lam danau -- lam banmandum, mandum bui-bui nyan na kira-kira dua ribée boh bui. 14 Ureuëng-ureuëng nyang rabe bui laju jiplueng, laju jipeugah peue nyang ka jingieng nyan lam banda-banda dan gampông-gampông nyang na didaerah nyan. Dan di ureuëng nyang ka jideungoe habanyan pih laju jiteubiet jijak kalon peue nyang ka teujadi. 15 Awaknyan jijak ubak Isa, jingieng laju ureuëng nyang yoh baroekan jitamong roh jeuhet nyan, teungoh jiduek disinan. Ureuëng nyan ka jisok peukayan, dan pikeran jih pih ka sampoereuna. Teuma awaknyan mandum ka jeuet teumakot. 16 Ureuëng-ureuëng nyang ka jingieng keudroe peue nyang ka teujadi ateueh ureuëng nyan dan bui-bui nyan jicalitra peue nyang ka teujadi. 17 Dan peunduduek nyang na didaerah nyan pih laju jilakée ubak Isa mangat Gobnyan geutinggai laju daerah nyan. 18 Watée Isa geu-ék ateueh peurahô, ureuëng nyang bunoe jikuasa lé roh jeuhet nyan jilakée ubak Isa, mangat jeuet jiseutôt. 19 Teuma lé Isa hana geubri, kheun Gobnyan, "Jakwoe kheueh dan peugah laju bak waréh kawöm gata peue nyang ka geupeubuet lé Tuhan keu gata dan padub na jroh jih Gobnyan ateueh gata!" 20 Ureuëng nyan pih laju jijak, dan jicalitra laju phon lam daerah Siploh boh Banda peue nyang ka geupeubuet lé Isa ateueh jihnyan. Banmandum ureuëng hireuen jideungoe nyan. 21 Isa geugisa lom u meurandeh danau. Bak binéh danau nyan, ramé that ureuëng jijak hudom bansilingka Gobnyan. 22 Jipeurab kheueh ubak Gobnyan sidroe ureuëng nyang nan jih Yairus. Ureuëng nyan na kheueh sidroe ureuëng nyang jeuet keupimpénan rumoh iébadat nyang na di banda nyan. Watée ureuëng nyan jingieng Isa, ureuëng nyan laju jisujut dikeue Gobnyan, 23 laju jilakée deungon meuharab that-that, "Pak, aneuëk inong lôn brat that sakét. Ulôn meuharab bapak neutem jakmat aneuëk ulôn nyan, mangat aneuëk nyan puléh dan bék maté!" 24 Teuma Isa laju geujak meusigoe ngon Yairus nyan. Ramé that-that ureuëng nyang seutôt Gobnyan dan jisak-sak jeueb-jeueb sagoe. 25 Lamkawan nyan na teuma sidroe ureuëng inong nyang ka dua blaih thon sakét meudarah nyang na hubongan jih ngon darah he. 26 Mandum atra keukayaan jih ka habéh jipeuguna keu uengkoh meu-ubat bak dokto-dokto, teuma bandum nyan hana nyang hase jipeupuléh Gobnyan, nyang na peunyakét ureuëng nyan meutamah brat. 27 Ureuëng inong nyan ka le that jideungoe keuhai Isa. Dan lamkawan ureuëng ramé nyan, ureuëng nyan jipeurab laju ubak Isa nibak likot, 28 sabab ureuëng nyan jipike lagée nyoe, "Asai meuteumé lôn cukéh jubah Gobnyan, ulôn teuma puléh!" 29 Laju jicukéh bajée jubah Isa, watée nyan cit teuma peunyakét meudarah nyan puléh. Ureuëng nyan laju jirasa bahwa jihnyan ka puléh. 30 Bak watée nyan cit teuma Isa teurasa bahwa na teunaga nyang teubiet nibak lam tuboh Gobnyan. Teuma laju geungieng lamkawan ureuëng ramé nyan laju geutanyong, "Soe nyang mat bajée jubah Lôn?" 31 Murit-murit Gobnyan jipeugah, "Ci Bapak ngieng keudroe pakriban jai jih manusia meusak-sak. Dan Bapak mantong cit neutanyong, soe nyang mat Bapak?" 32 Teuma Isa teutab geungieng bansikeulileng Gobnyan keu geuteupeue soe nyang ka mat bajée jubah Gobnyan. 33 Ureuëng inong nyan nyang teupeu peue nyang ka teujadi ateueh droe jihnyan, deungon yo dan teumakot laju jisujut dikeue Isa dan jimeungaku banmandum nyan. 34 Dan Isa laju geupeugah ubak inong nyan, "Aneuëk Ulôn, sabab gata peucaya keu Ulôn, gata puléh! Jak kheueh laju deungon seulamat. Gata ka puléh banmandum!" 35 Teungoh Isa mantong geupeugah haba, na padub droe peulayan teuka nibak rumoh Yairus sira jipeugah, "Aneuëk inong amphon nyang sakét nyan ka meuninggai donya," kheun awaknyan ubak Yairus. "Bék le Amphon peuhék Bapak Gurée nyoe." 36 Hana jipakoe peue nyang ka jipeugah lé ureuëng nyan ubak Yairus Isa laju geupeugah, "Bék yo, peucaya kheueh!" 37 Isa geujak laju, hana geubri meusidroe ureuëng pih nyang jeuet jijak ngon Gobnyan, seulaén Petrus, Yakobus dan Yahya ngon syedara jih. 38 Watée ka troh u rumoh Yairus, geukalon lé Isa keuadaan rumoh nyan gét that subra, dan geudeungoe su ureuëng mo ngon ureuëng meuba-e ngon su nyang teuga-teuga. 39 Isa laju geutamong dan geupeugah ubak awaknyan, "Pakon jeuet karu that dan pakon neumoe? Aneuëk nyan hana maté; teuma jiteungét!" 40 Awaknyan jipeukém peue nyang geupeugah lé Isa nyan. Teuma laju geuyue lé gobnyan mangat awaknyan banmandum jiteubiet uluwa, dan laju geuba ma ngon ayah aneuëk nyan meunan cit ban lhée droe murit Gobnyan mangat jitamong lam kama aneuëk nyan. 41 Isa geumat jaroe aneuëk nyan dan laju geupeugah ubak aneuëk nyan, "Talita kum," nyang makna jih, "Hei aneuëk inong, ulôn peugah ubak gata: Beudôh kheueh!" 42 Aneuëk inong nyan laju jibeudôh, dan laju jijak (umu jih ka dua blaih thon.) Mandum ureuëng nyang kalon nyan lumpah hireuen! 43 Teuma Isa geutam that-that mangat hai nyan bék jipeugah sahoe. Óh lheueh nyan laju geupeugah, "Bri kheueh makheun keu aneuëk nyan."

Markus 6

1 Geubeudôh disinan, Isa ngon murit-murit Geuh laju geuwoe u gampông droe. 2 Bak uroe Sabat gobnyan geupeu phon seumeubeuet lam rumoh iébadat. Ramé that ureuëng disinan. Watée ureuëng-ureuëng nyang na disinan jideungoe peue nyang geupeubeuet lé Isa nyan, awaknyan hireuen lagoena. Awaknyan jipeugah, "Pat jiteumé mandum nyoe lé ureuëng nyan? Hikeumat peu kheueh nyang na bak ureuëng nyoe? Pakriban cara jih ureuëng nyoe geupeuna buet ajaéb? 3 Jihnyoe kon utôh kayée, aneuëk Maryam, dan syedara lé Yakobus, Yoses, Yudas dan Simon? Nyoe, syedara-syedara Geuh nyang inong pih na tinggai disinoe." Sabab nyan awaknyan hana jiteurimong Gobnyan. 4 Laju Isa geupeugah ubak awaknyan, "Sidroe Nabi jihoreumat dipat mantong, keucuali di gampông droe jih, dan lamkawan waréh kawöm jih dan keuluwarga jih." 5 Bak teumpat nyan Isa hana geuteumé peubuet sapeue keuhai buet-buet nyang ajaéb, nyang na geupeu puléh na padub droe ureuëng sakét deungon cara geukeubah jaroe Gobnyan ateueh awaknyan. 6 Gobnyan hireuen awaknyan hana jipeucaya. Óh lheueh nyan Isa geujak laju u gampông-gampông nyang na sikeulileng nyan laju geuseumeubeuet. 7 Gobnyan laju geutawök ban dua blaih droe murit Geuh, laju geu utus awaknyan dua-dua droe dan geubri kuasa ubak awaknyan keu jeuet geu-use roh-roh jeuhet. 8 Laju geubri peutunyok lagée nyoe ubak awaknyan, "Bék gata ba sapeue watée gata jak nyan, seulaén tungkat. Bék gata ba peunajoh atawa baluem seudeukah, atawa péng. 9 Sôk kheueh sipatu, teuma bék gata ba dua ôn bajée." 10 Geupeugah lom, "Meunyoe gata tamong lam saboh rumoh, tinggai kheueh lam rumoh nyan sampoe óh watée gata tinggai banda nyan. 11 Teuma meunyoe gata troh bak saboh teumpat, dan ureuëng-ureuëng nyang na disinan hana jitem teurimong dan jideungoe gata, gata tinggai laju teumpat nyan. Dan gata kipah kheueh abée nyang na bak gaki gata sibagoe peu ingat keu awaknyan!" 12 Óh ka lheueh geu amanat lé Isa lagée nyan, geujak kheueh laju ban dua blaih droe murit Gobnyan nyan. Awaknyan geujak peusampoe haba gét bahwa manusia harôh meutobat nibak desya-desya. 13 Murit-murit Isa nyan jai that geu-use roh-roh jeuhet, geusiliek minyéuk zaiton bak ureuëng sakét dan geupeu puléh awaknyan. 14 Haba-haba keuhai banmandum nyang ka teujadi nyan troh cit ubak Raja Herodes, sabab nan Isa ka meusyeuhu ho-ho mantong. Na ureuëng nyang peugah, "Nabi Yahya Pumanö ka udeb lom teuma! Nyang kheueh sabab jih Gobnyan na kuasa keu geupeubuet bandum buet nyang ajaéb nyan." 15 Teuma ureuëng-ureuëng laén jipeugah, "Geuh nyan Ilyas." Na teuma nyang peugah, "Geuh nyan Nabi, lagée sidroe lam kawan Nabi yoh jamén ilée." 16 Watée Herodes jideungoe nyan, laju jipeugah, "Pasti nyoe Nabi Yahya Pumanö nyang ka lôn reupang takue jih yoh masa ilée. Jinoenyoe jihnyan ka udeb lom!" 17 Sabab sigohlom nyan Herodes ka jiyue ureuëng-ureuëng jih keuteujak drob Nabi Yahya, dan jipeutamong gobnyan lam glab. Herodes jipeubuet lagée nyan sabab soai Herodias, peurumoh syedara jih keudroe, na kheueh Filipus. Sabab Herodes ka geumeukawen ngon Herodias, 18 dan soai keuhai nyan Nabi Yahya ka meu ulang-ulang geuteugah Herodes lagée nyoe, "Hana jeuet gata meukawen ngon purumoh syedara gata nyan!" 19 Nyang kheueh sabab jih Herodias jidam that keu Nabi Yahya dan keuneuk jipoh maté Nabi Yahya, teuma jihnyan hana hase jipeubuet hai nyan, sabab jihnyan ji ampeueng-ampeueng lé Herodes. 20 Sabab Herodes ka geuyue bak ureuëng laén jeuet jijaga Nabi Yahya nyan beujroh-jroh ideh lam glab, sabab jihnyan teumakot keu Nabi Yahya. Jihnyan jiteupeu Nabi Yahya sidroe ureuëng gét nyang geu-utus lé Po teu Allah. Dan beutôi, meunyoe Nabi Yahya geumeututoe, Herodes galak cit jideungoe, bah pih jihnyan aloh alah that watée jideungoe. 21 Akhé jih Herodias meuteumé keuseumpatan watée ulang thon Herodes. Bak watéenyan Herodes jipeuna khanuri keu banmandum peujabat manyang keurajeuen nanggroe, peuwira-peuwira dan ureuëng-ureuëng patot Galilea. 22 Nibak khanuri nyan aneuëk dara Herodias jimeunari, dan tari aneuëk dara nyan keubiet mangat that até raja Herodes meunan cit ngon jamé-jamé gobnyan. Dan Herodes laju jipeugah bak aneuëk dara nyan, "Peue nyang kah galak, lakée kheueh. Nyang gata lakéenyan teuma ulôn bri keu gata!" 23 Dan Herodes pih laju jimeujanji bak aneuëk dara nyan deungon jimeusumpah. Kheun Herodes, "Peue-peue mantong nyang gata lakée teutab ulôn bri, bah pih siteungoh nibak keurajeuen ulôn nyang na nyoe!" 24 Teuma aneuëk daranyan laju jiteubiet dan jitanyong bak ma jih, "Mak, peue nyang harôh lôn lakée bak raja nyan?" Jaweueb mak aneuëk dara nyan, "Lakée laju ulée Nabi Yahya Pumanö." 25 Aneuëk dara nyan laju jigisa ubak Herodes dan jipeugah, "Ulôn lakée ulée Nabi Yahya Pumanö neubri keu ulôn jinoenyoe cit teuma nyang teuboh ateueh talam!" 26 Watée jideungoe peue nyang jilakéenyan lé aneuëk dara nyan Herodes seudeh lumpah na. Teuma gobnyan hana hase jitulak peue nyang jilakéenyan sabab raja nyan ka jimeusumpah dikeue dum na jamé jih. 27 Deungon nyan lé raja nyan laju jipeurintah ubak peungawai jih mangat jijakcok ulée Nabi Yahya Pumanö. Deungon nyan, sipa-i nyan laju jijak ubak peunjara, dan laju jireupang takue Nabi Yahya. 28 Óh lheueh nyan lé sipa-i nyan laju jiba ulée nyan lam talam dan laju jijok ubak aneuëk dara nyan. Dan aneuëk daranyan laju jijok teuma atra nyan ubak mak jih. 29 Watée murit-murit Nabi Yahya jideungoe hai nyan, awaknyan laju jijak cok manyét Nabi Yahya, dan laju jipasoe lam kubu. 30 Rasui-rasui nyang geukirém lé Isa nyan óh lheueh nyan ka geuwoe teuma, dan laju meusapat ngon Isa. Awaknyan jilapor bak Gobnyan banmandum nyang ka awaknyan peubuet dan awaknyan peurunoe. 31 Jai lagoena ureuëng nyang teuka dan jijak, akhé jih keugeu makheun mantong Isa ngon murit-murit Gobnyan hana hase. Sabab nyan Isa geupeugah ubak murit-murit Geuh, "Jak kheueh geutanyoe bak teumpat nyang sungue, nibak teumpat nyan tanyoe jeuet keudroe dan gata hase tameureuhat sikeujab." 32 Deungon na haba Isa nyan, awaknyan laju geu-ék ateueh peurahô geujak ubak teumpat nyang sungue. 33 Teuma jai that nyang kalon awaknyan geutinggai teumpat nyan, dan jiteupeu soe awaknyan. Teuma, nibak mandum banda nyang na lam wilayah nyan, bubena ureuëng laju jijak sira jiplueng rot ateueh darat mangat leubeh awai trok awaknyan nibak Isa ngon murit-murit Gobnyan. 34 Watée Isa geutreun ateueh peurahô, laju deuh geukalon ureuëng ramé nyan. Gobnyan weueh that-that watée geungieng, lagée bubiri hana nyang rabe. Teuma Gobnyan pih ka geupeu phon peurunoe awaknyan deungon mubagoe masa-alah. 35 Watée uroe ka seupôt, murit-murit Isa geupeugah ubak Gobnyan, "Karab malam dan teumpat nyoe sungue that. 36 Leubeh gét bapak yue awaknyoe mangat jijak, mangat awaknyan jeuet teuma jijak bloe peunajoh nyang na nibak binéh-binéh gampông nyang na silingka nyoe." 37 Teuma geujaweueb lé Isa, "Gata mantong nyang bri mangat awaknyan jeuet jimakheun" "O ma, peu kheueh museuti kamoe jak bloe keu ureuëng ramé nyoe ngon dua reutoh péng pirak keuteubri makheun mandum awaknyoe?" meunan kheueh geukheun lé murit-murit Isa nyan. 38 Teuma geutanyong lé Isa, "Padub boh na ruti nibak gata? Cuba jak ngieng." Oh leupah awaknyan jijak kalon, awaknyan laju jikheun, "Ruti na limong boh meunan cit eungkot na dua boh." 39 Oh lheueh nyan Isa laju geuyue duek awaknyan banmandum ateueh naleueng nyang ijo seucara meutumpôk-tumpôk. 40 Bubena awaknyan pih laju geuduek ngon teuatoe, meutumpôk-tumpôk. Na nyang sireutôh droe saboh tumpok, dan na cit nyang limong ploh droe saboh tumpok. 41 Óh lheuehnyan Isa laju geucok ruti nyang limong boh nyan dan meunan cit eungkot nyang dua boh, laju geutangáh u langét sira geulakée teurimong gaséh ubak Allah. Óh lheueh nyan, ruti nyang na nyan laju geupriek-priek ngon jaroe Geuh keudroe laju geujok bak murit-murit Geuh dan geuyue jok-jok ubak mandum ureuëng nyang na disinan. Meunan cit ngon eungkot dua boh nyan geujok-jok keu awaknyan banmandum. 42 Awaknyan banmandum jiteumé makheun sampoe án troe-troe. 43 Óh lheueh nyan peunajoh nyang na leubeh nyan laju geupeusapat lé murit-murit Isa -- banmandum nyan na dua blaih boh raga peunoh. 44 Ureuëng agam nyang pajoh ruti nyan na limong ribée droe. 45 Óh lheueh nyan Isa laju geuyue jak banmandum murit-murit Gobnyan leubeh awai nibak gob nyan u Betsaida nyang na di meurandeh danau, dan Gobnyan laju geuyue bak ureuëng ramé nyan mangat jiwoe. 46 Óh ka lheueh geuyue woe ureuëng ramé nyan, Isa geujak laju ubak bukét keugeujak meudoá. 47 Watée malam ka teuka, peurahô murit-murit Isa kana nibak teungoh danau, dan Isa keudroe mantong na ateueh darat. 48 Gobnyan deuh geukalon padub na hek jih awaknyan jikayoh peurahô nyan u meurandeh sabab angén teuga that jipot nyang teuka meulawan arah. Sabab nyan, na kira-kira poh lhée ngon poh nam beungoh, Isa laju geujak ubak awaknyan sira geujak ateueh ié. Dan gobnyan geujak laju siulah-ulah teuma teulewat awaknyan. 49 Watée awaknyan jingieng Isa geujak ateueh ié, awaknyan jipike Gobnyan antu, 50 deungon nyan awaknyan jiklik-klik sabab teumakot that. Sabab banmandum awaknyan na jingieng gobnyan dan awaknyan lumpah teukeujot. Teuma Isa laju geupeugah bak awaknyan, "Teunang mantong! Ulôn nyoe Isa, bék teumakot!" 51 Laju teuma Gobnyan geu-ék ateueh peurahô awaknyan, óh lheueh nyan angén pih reuda dan mandum murit-murit Isa hireuen lagoena. 52 Nyang ajaéb le sabab limong boh ruti nyan gohlom cit muphom lé awaknyan, payah that nibak awaknyan keujituóh muphom. 53 Watée katrok u meurandeh danau, awaknyan geurhom saôh di panté Genesaret. 54 Watée awaknyan geuteubiet lam peurahô, ureuëng-ureuëng ramé jikalon bahwa nyang teuka nyan na kheueh Isa. 55 Laju awaknyan jiplueng-plueng keudeh keunoe bansaboh wilayahnyan, dan laju jipeuphon ba ureuëng-ureuëng sakét ateueh tika ubak Isa. Meunyoe awaknyan jideungoe Isa na bak saboh teumpat, awaknyan pih laju jiba ureuëng-ureuëng sakétnyan keunan. 56 Dipat mantong Isa teuka -- bahnyan di gampông, di banda atawa di gampông -- disinan pih ureuëng-ureuëng ramé sabe jiteuka sira jikeubah ureuëng-ureuëng sakét nyan lam padang. Awaknyan laju jilakée deungon meuharab that mangat awaknyan jitem cukéh jubah Isa, bahpi ujong jih mantong. Banmandum nyang cukéh nyan, puléh mandum.

Markus 7

1 Na saboh keulompok ureuëng Farisi dan na meupadub droe gurée agama nibak Yerusalem, jijak ubak Isa. 2 Awaknyan jingieng na meupadub droe murit Isa jipajoh bu hana ji rhah jaroe sabab nyan na kheueh peuratoran agama. 3 Ureuëng-ureuëng Farisi, meunan cit banmandum ureuëng Yahudi, seutia that jiseutôt adat istiadat indatu jih. Awaknyan hana jimakheun, sigohlom ji rhah jaroe meunurot cara-cara nyang ka teupeuteuntée. 4 Peue mantong nyang jibloe dikeudée hana jipajoh, sigohlom jirhah leubeh ilée. Dan jai that peuratoran nyang laén nibak indatu awaknyan nyang ji amai biet-biet that; miseue jih lagée teu rhah glah, cawan, dan peukakaih-peukakaih teumaga. 5 Sabab nyan kheueh ureuëng Farisi dan gurée-gurée agama nyan jitanyong ubak Isa, "Pakon murit-murit Droeneueh jipajoh bu hana ji rhah jaroe? Peue sabab awaknyan hana jiseutôt adat istiadat indatu geutanyoe?" 6 Geujaweueb lé Isa, "Gatanyoe mandum ureuëng-ureuëng munafék! Beutôi that peue nyang ka geupeugah lé Nabi Yesaya keuhai gata, 'Meunoe kheueh feureuman Allah, ureuëng nyan jiseumah ulôn ngon tutoe haba, meunyoe até awaknyan jiôh nibak ulôn. 7 Hana guna awaknyan jiseumah ulôn, sabab atoran manusia nyang awaknyan peurunoe siulah-ulah nyan atoran Lôn!' 8 Peue-peue nyang geupeurintah lé Allah hana gata pakoe, dan atoran-atoran nyang jipeugét lé manusia gata mat habéh teunaga." 9 Geupeugah lom lé Isa, "Gata carông that gata tulak peurintah Allah mangat jeuet gata peuteun ajaran gata keudroe. 10 Nabi Musa ka geubri peurintah lagée nyoe, 'Horeumat kheueh ubak ayah dan ma gata,' dan 'Barang sigasoe nyang teunak ayah ngon ma jih, ureuëng nyan wajéb teuhuköm maté.' 11 Teuma gata tapeurunoe lagée nyoe: Meunyoe na ureuëng jipeugah ubak ureuëng syiek jih, 'Peue nyang museuti ulôn bri keu ayah ngon ma lôn, ka ulôn bri ubak Po teu Allah,' 12 deungon lagée nyan gata ka tapeubeubaih ureuëng jitulông ayah ngon ma jih. 13 Jadi deungon ajaran droe gata keudroe nyang gata bri ubak ureuëng-ureuëng, gata ka gata peutan peue nyang geukheun lé Allah. Mantong jai that hai nyang lagée nyoe nyang gata peubuet." 14 Dan Isa geutawök lom ureuëng ramé nyan sigoe teuk geupeugah laju ubak awaknyan, "Deungoe kheueh mangat muphom! 15 Hana sapeue pih nyang teuka nibak luwa nyang jitamong lam ureuëng nyang meuakibat ureuëng nyan ka jeuet keu kutoe. Nyang sikeubiet jih, nyang jiteubiet nibak sidroe-sidroe ureuëng, nyan kheueh nyang teupeugah kutoe. 16 Jadi, meunyoe na punyueng, deungoe kheueh" 17 Watée Isa geutinggai awaknyan dan geutamong lam rumoh, murit-murit Gobnyan laju jitanyong ubak gobnyan keuhai makna miseue-miseue nyan. 18 Laju Isa geupeugah uak awaknyan, "Peu kheueh gata gohlom cit muphom? Peu kheueh gata hana hase gata peuphom bahwa nyang jitamong lam sidroe-droe ureuëng hana hase teupeujeuet ureuëng nyan kutoe? 19 Sabab nyang jitamong nyan bukon rot até, teuma rot pruet, dan óh lheueh nyan jiteubiet lom." Deungoe tutoe haba lagée nyan Isa geupeugah bahwa mandum peunajoh nyan haleue. 20 Óh lheueh nyan geupeugah lom lé Isa, "Nyang jiteubiet nibak ureuëng, nyan kheueh nyang peukuto jih nyan. 21 Sabab nibak di dalam até, jiteuka pikeran-pikeran jeuhet nyang jeuet keusabab manusia jipeubuet cabui, ceumeucue, peu maté gob, 22 meumukah, teumipée, ba haba fiteunah, meunan cit jipeubuet meubagoe rupa nyang jeuhet, tamak, hana adab, bingiek até, sombong, dan payah teupeurunoe. 23 Mandum nyang jeuhet nyan teuka nibak dalam, dan nyan kheueh nyang jeuet keusabab manusia jeuet keu kutoe." 24 Óh lheueh nyan Isa laju geutinggai teumpat nyan, dan geujak laju u daerah rab ngon banda Tirus. Laju geutamong lam saboh rumoh dan hana geutem bahwa na ureuëng ji teupeu gobnyan na didaerah nyan. Teuma Gobnyan hana hase geupeusöm droe. 25 Na sidroe ma, nyang aneuëk inong gobnyan ka jitamong roh jeuhet, jideungoe keuhai Isa. Ureuëng nyan laju jijak ubak Isa sira jisujut dikeue Gobnyan, 26 sira geumeulakée mangat Isa geutem use roh jeuhet nyang jitamong lam tuboh aneuëk gobnyan. Inong nyan kon ureuëng Yahudi, lahé ureuëng nyan di daerah Finesia di Siria. 27 Isa geupeugah ubak ureuëng nyan, "Aneuëk-aneuëk miet harôh teubri makheun leubeh ilée. Hana gét teucok peunajoh bak aneuëk miet teugeulawa keu asée." 28 "Teungku," kheun inong nyan, "asée-asée dimiyueb meuja pih jipajoh séueh-séueh nyang jipajoh lé aneuëk manyak!" 29 Laju geupeugah lé Isa ubak inong nyan, "Sabab peu nyang ka gata jaweueb nyan, jakwoe kheueh; roh jeuhet ka jiteubiet lam tuboh aneuëk gata!" 30 Ureuëng inong nyan laju jiwoe. Óh troh u rumoh, deuh laju jikalon aneuëk jih teu-éh ateueh teumpat éh, dan roh jeuhet beutôi-beutôi ka jiteubiet lam tuboh aneuëk jih. 31 Óh lheueh nyan Isa geutinggai laju daerah Tirus, dan geujak lom u Danau Galilea meulalu Sidon. Geucok rot jak geuh lam daerah Siploh boh Banda. 32 Bak teumpat nyan lé ureuëng disinan laju jiba ubak gobnyan sidroe ureuëng nyang kalu ngon tulo. Awaknyan jilakée mangat Isa geukeubah jaroe Geuh ateueh ureuëng nyang hán jeuet marit dan tulo nyan. 33 Isa laju geuba ureuëng nyan keudroe jióh nibak ureuëng ramé, laju geukeubah jaroe Gobnyan lam mandua geulinyueng ureuëng nyan. Óh lheueh nyan Isa laju geumeuludah, laju geumat lidah ureuëng nyan. 34 Óh lheueh nyan Isa laju geutangáh u langét, laju geupeuleueh nafáh teuga-teuga sira geupeugah bak ureuëng nyan, "Efata," nyang makna jih, "Teuhah kheueh!" 35 Punyueng ureuëng nyan laju teuhah dan lidah jih ka leumoh lom teuma, di ureuëng nyan pih ka jeuet jipeugah haba ngon lanca. 36 Óh lheueh nyan Isa geutam awaknyan hana geubri peugah sahoe peue nyang ka teujadi nyan. Teuma, seumaken geutam lé Isa, meutamah-tamah hainyan jipeugah keudeh keunoe. 37 Dan mandum ureuëng nyang deungoe nyan hireuen lumpah na. Awaknyan jipeugah, "Banmandum jipeugét deungon jroh! Nyang luwa biasa ureuëng tulo hase jideungoe dan ureuëng kalu jeuet jipeugah haba!"

Markus 8

1 Hana padubna treb teuma óh lheueh nyan, na lom saboh kawan ureuëng ramé jijak meugumpôi. Sabab awaknyan hana jiba peunajoh, Isa laju geutawök murit-murit Geuh sira geupeugah, 2 "Ulôn wéueh that watée Ulôn ngieng ateueh ureuëng ramé nyoe. Ka lhée uroe treb jih awaknyan meusajan ngon Ulôn, bak saát nyoe awaknyan hana sapeue jipajoh sabab hana jiba. 3 Meunyoe ulôn yue woe awaknyan ngon pruet söh hana mungken, awaknyan teuma pansan bak teungoh rot. Peue lom na awaknyan nyang teuka nibak jiôh." 4 Geujaweueb lé murit-murit Isa, "Bak teumpat nyang sungue lagée nyoe, pat kheueh awaknyan jicok peunajoh nyang meumada keu ureuëng nyang ramé jih lagée nyoe?" 5 "Padubboh na ruti bak gata?" tanyong Isa. "Tujoh boh," jaweueb awaknyan. 6 Isa laju geuyueduek ateueh tanoh mandum ureuëng ramé nyan, laju geucok bantujoh boh ruti nyan laju geu kheun teurimong gaséh ubak Po teu Allah. Óh lheueh nyan geurpriek-priek laju rutinyan ngon jaroe Gobnyan dan geujok laju ubak murit-murit Geuh keu jibagi-bagi ubak ureuëng ramé nyan. Teuma mandum murit-murit Gobnyan jipeubuet lagée nyang ka geupeurintah nyan. 7 Bak awaknyan na teuma padub boh eungkot nyang ubit-ubit. Isa geukheun teurimong gaséh ubak Po teu Allah ateueh eungkot-eungkot nyan, geujok ubak murit-murit Geuh mangat jibagi-bagi keu ureuëng ramé nyan. 8 Awaknyan jimakheun sampoe troe banmandum -- na kira-kira peuet ribée droe nyang pajoh nyan. Óh lheueh nyan murit-murit Isa laju geupeusapat mandum séueh-séueh nyang leubeh jipajoh lé ureuëng ramé nyan -- na tujoh boh raga peunoh. Óh lheueh nyan barô kheueh Isa geuyue woe ureuëng ramé nyan u rumoh jih maséng-maséng, 10 seudangkan Gobnyan meusajan ngon murit-murit Geuh laju geu ék ateueh peurahô geumeulayeue teuma u daerah Dalmanuta. 11 Na padub droe ureuëng Farisi jijak ubak Isa, dan laju jimeudebat ngon Gobnyan nyang meukeusut jih jikeuneuk jeubak Isa. Awaknyan jilakée mangat Isa beugeutem peuleumah buet nyang ajaéb sibagoe tanda bahwa gobnyan beutôi teuka nibak Po teu Allah. 12 Isa meukeutuët até Geuh laju geujaweueb, "Peue sabab ureuëng-ureuëng jamén nyoe jilakée mangat lôn peuna buet nyang ajaéb? Hana! Ulôn hana lôn bri tanda nyang lagée nyan ubak awaknyan!" 13 Isa laju geutinggai awaknyan disinan dan geujak ék ateueh peurahô; óh lheueh nyan geujak laju u meurandeh danau nyan. 14 Murit-murit Isa tuwoe jiba ruti nyang séb. Nyang na bak awaknyan cit saboh ruti lam peurahô. 15 "Até-até kheueh teuhadab ragoe ureuëng Farisi dan ureuëng Herodes," kheun Isa ubak awaknyan. 16 Ban jideungoe nyan murit-murit Isa laju jimarit sabe keudroe-droe keuhai nyang ban geupeuingat lé Isa nyan. Awaknyan jipeugah, "Gobnyan geupeugah lagée nyan, sabab bak tanyoe hana ruti." 17 Isa geuteupeue peue nyang awaknyan peumasa alah. Sabab nyan Gobnyan laju geutanyong ubak awaknyan, "Keupeue gata peumasa alah keuhai hana ruti? Peu kheueh gata tateupeue dan gohlom cit gata muphom? Peue ka tumpôi that pikeran gata? 18 Bak gata na mata -- pakon hana gata keumalon? Bak gata na geulinyueng -- pakon hana gata deungoe? Peu kheueh hana gata ingat 19 keuhai limong boh ruti nyan ulôn priek-priek keu limong ribée droe ureuëng? Padub boh raga leubeh peunajoh nyang gata peusapat nyan?" "Dua blaih boh raga," jaweueb awaknyan. 20 "Dan watée ulôn priek-priek tujoh boh ruti keu peuet ribée droe ureuëng," geutanyong lé Isa lom, "Padub boh raga nyang leubeh jipajoh nyang na gata peusapat?" "Tujoh boh raga," jaweueb awaknyan. 21 "Nyan, ka lagée nyan peu kheueh gohlom cit muphom nibak gata?" kheun Isa lom. 22 Awaknyan laju troh u Betsaida. Bak teumpat nyan lé ureuëng disinan laju jiba ubak Isa sidroe ureuëng buta, dan jilakée lé awaknyan mangat Isa geutem mat ureuëng buta nyan deungon harapan mata nyang buta nyan puléh. 23 Lé Isa laju geumat bak jaroe ureuëng nyan geubahue laju u luwa banda nyan. Óh lheueh nyan lé Isa geucok ié babah Geuh keudroe laju geulabô bak mata ureuëng buta nyan, óh lheueh nyan laju geutanyong bak ureuëng nyan, "Peu kheueh ka deuh gata meungieng bak saát nyoe?" 24 Ureuëng nyan jikalon ukeue, laju jipeugah, "Nyoe. Na deuh lôn ngieng ureuëng jijak-jak; teuma deuh jih lagée bak kayée." 25 Isa geupeuduek lom jaroe Gobnyan bak mata ureuëng nyan. Goenyoe ureuëng nyan jiuseuha jimeungieng sira jibleuet siteuga-teuga jih. Mata ureuëng nyan laju puléh, dan laju jingieng banmandum nyan deungon jeulaih dan trang lumpah na. 26 Geupeugah laju lé Isa ubak ureuëng nyan, "Jakwoe kheueh, dan bék gata gisa u banda nyan." 27 Isa dan murit-murit gobnyan geujak lam gampông-gampông nyan sikeulileng Kaisarea Filipi. Bak teungoh rot ueh Isa geutanyong ubak awaknyan, "Meunurot jipeugah lé gob, soe kheueh Ulôn nyoe?" 28 Jijaweueb lé awaknyan, "Na nyang peugah, Nabi Yahya Pumanö; na teuma nyang peugah Ilyas, dan nyang laén lom jipeugah: sidroe nibak nabi-nabi." 29 "Pakriban meunurot gata keudroe, soe Ulôn nyoe?" tanyong Isa. Geujaweueb lé Petrus, "Bapak na kheueh Raja Nyang Peuseulamat!" 30 Isa geupeuingat bak awaknyan, mangat bék jipeugah sahoe soe droe Gobnyan nyan. 31 Óh lheueh nyan, Isa geupeu phon peurunoe mandum murit-murit Geuh bahwa Aneuëk Manusia museuti jiteurimong ázeb deurita nyang jai, dan hana jiteurimong lé peumimpén-peumimpén, Peumimpén Imeum-imeum dan gurée-gurée agama. Ureuëng nyan teuma jipoh maté, teuma bak uroe nyang keu lhée Gobnyan teuma teupeubeudôh teuma. 32 Deuh that Isa geupeugah hainyan ubak murit-murit Gobnyan. Ban jideungoe lagée nyan Petrus laju jitarek Isa bak binéh, dan jiseugah Gobnyan. 33 Teuma Isa geupaleng dan geupeugah ubak murit-murit Gobnyan, laju geuseugah Petrus, "Wéeh keudeh, Peunggoda! Pikeran gata nyan pikeran manusia; kon pikeran Allah!" 34 Óh lheueh nyan Isa geutawök ureuëng ramé nyang na disinan meusajan-sajan ngon murit-murit Gobnyan. Laju Gobnyan geupeugah ubak awaknyan, "Ureuëng nyang keuneuk seutôt Ulôn, ureuëng nyan harôh jipeutuwoe ubak keupeuntengan droe jih, óh lheueh nyan jigulam saleb gobnyan, dan laju jiseutôt Ulôn. 35 Sabab ureuëng nyang keuneuk peuteun udeb jih, ureuëng nyan teuma gadôh udeb. Teuma ureuëng nyang jikeureubeuen udeb jih keu Ulôn dan keu Haba Gét nibak Allah, teuma teupeuseulamat ureuëng nyan. 36 Peue laba jih nibak sidroe ureuëng, meunyoe bansaboh donya nyoe jeuet keumilék jih, teuma ureuëng nyan gadôh udeb jih? 37 Peu kheueh meuteumé udeb jih teutuka ngon sisuatu? 38 Meunyoe sidroe ureuëng malée jiangkée Ulôn dan meuneubeuet Ulôn bak jamén nyang jeuhet dan doraka nyoe, Aneuëk Manusia pih teuma malée geuangkée ureuëng nyan, bak watée Gobnyan teuka singoh ngon kuasa Bapak Gobnyan, ji-iréng lé malaikat-malaikat nyang suci."

Markus 9

1 "Beu gata teupeu kheueh!" kheun Isa. "Lamkawan gata nyoe na nyang hana teuma maté, sigohlom jingieng Allah geumat peurintah deungon kuasa!" 2 Nam uroe óh lheueh nyan Isa geuba Petrus ngon Yakobus dan syedara geuh Yahya, jak peu aséng droe bak saboh gunong nyang manyang. Dikeue mata awaknyan Isa meu-ubah rupa. 3 Peukayan gobnyan ka meu-ubah putéh muble-ble. Hana meusidroe tukang dobi nyang na lam donya nyoe nyang hase ji rhah lagée nyan putéh. 4 Óh lheueh nyan ban lhée droe murit Gobnyan jingieng Isa teungoh meututoe ngon Nabi Ilyas dan Nabi Musa. 5 Teuma Petrus laju geupeugah ubak Isa, "Pak Gurée, mangat that tanyoe bak teumpat nyoe. Bah kheueh kamoe peudong lhée boh khimah: saboh keu Bapak, saboh keu Nabi Musa, dan saboh teuk keu Nabi Ilyas." 6 Nyang sikeubiet jih Petrus hana jiteupeu peue nyang harôh jipeugah, sabab geuhnyan ngon mandua droe rakan geuh teumakot lumpah na. 7 Óh lheueh nyan awan pih jitron laju jipeupayong awaknyan dan nibak lam awan nyan teudeungoe su nyang jipeugah, "Nyoe kheueh Aneuëk lôn nyang ulôn gaséh. Deungoe kheueh peue nyang jipeugah!" 8 Bagaih that awaknyan ngieng bansikeulileng geuh, teuma hana le geukalon meusidroe pih nyang na disinan, nyang na Isa sidroe. 9 Watée awaknyan geutron nibak gunong nyan, Isa geupeu ingat ubak awaknyan, "Bék gata peugah bak soe mantong peu nyang ka lheueh gata ngieng bunoe sigohlom Aneuëk Manusia geupeubeudôh nibak maté." 10 Awaknyan taát peue nyang ka geupeusan lé Isa nyan, teuma sabe keudroe-droe awaknyan ka jipeuphon marit peue nyang geumeukeusut lé Isa deungon "udeb lom óh lheueh maté". 11 Teuma awaknyan laju jitanyong ubak Gobnyan, "Pakon gurée-gurée agama jipeugah bahwa Nabi Ilyas nyang leubeh ilée teuka?" 12 Geujaweueb lé Isa, "Beutôi Nabi Ilyas leubeh ilée teuka keu geupeu béeréeh peue nyang gohlom béeréeh. Teuma pakriban kheueh deungon Aneuëk Manusia? Peue sabab lam Alkitab na teutuléh Gobnyan le that geurasa deurita dan jihina lé manusia? 13 Teuma Ulôn peugah ubak gata: Nabi Ilyas ka teuka, dan lé manusia jipeuhina Gobnyan ban galak droe. Nyan paih that lagée nyan teutuléh lam Alkitab keuhai droe gobnyan." 14 Watée Isa meunan cit ban lhée droe murit Gobnyan ka meusaho lom ngon murit-murit Gobnyan nyang laén, geukalon ramé that ureuëng disinan. Na padubdroe gurée-gurée agama teungoh meudebat ngon murit-murit Isa nyang na disinan. 15 Meunan awaknyan jikalon Isa, awaknyan mandum teuceungang, dan laju jiplueng-plueng jijak sambot Gobnyan. 16 "Peue nyang gata meuseu-eue ngon gurée-gurée agama nyan?" geutanyong lé Isa bak murit-murit Geuh nyan. 17 Sidroe lamkawan ureuëng ramé nyan jijaweueb, "Bapak Gurée, ulôn na lôn ba aneuëk droe ulôn ubak Bapak. Aneuëk lôn nyoe ka kalu sabab ka jitamong roh jeuhet. 18 Meunyoe roh nyan jiseurang aneuëk nyan, tuboh jih jiseumpom-seumpom bak tanoh, babah jih mukuboh-kuboh, gigo jih meuthot-thot dan bansaboh tuboh jih teugang. Ulôn lakée ubak murit-murit Bapak mangat geutem use roh jeuhet nyan, teuma awaknyan hana hase geupeubuet." 19 Geupeugah laju lé Isa ubak awaknyan, "Luwa biasa gata nyoe! Gata biet-biet ureuëng nyang hana peucaya. Sampoe án pajan ulôn teutab meusajan gata dan lôn saba teuhadab gata? Ba laju keunoe aneuëk nyan!" 20 Awaknyan laju jiba aneuëk manyak nyan ubak Isa. Meunan roh jeuhet nyan jingieng Isa, laju geupeujeuet tuboh aneuëk nyan teubot-bot dan teugang sampoe aneuëk nyan reubah meugule-gule bak tanoh. Babah jih meukuboh. 21 Laju Isa geutanyong bak ayah aneuëk nyan, "Ka padub na treb aneuëk nyoe lagée nyoe?" "Yoh ubit kon ka keunong lagée nyoe!" jaweueb ayah aneuëk nyan. 22 "Ka kayém that roh jeuhet nyan keuneuk jipoh maté aneuëk nyan ngon cara jipeureubah droe lam apui atawa lam ié. Teuma meunyoe Bapak hase neutulông, beuneugaséh kheueh kamoe ngon neutulông kamoe!" 23 "Peue gata peugah? meunyoe Bapak hase?" jaweueb Isa. "Peue mantong hase, asai ureuëng peucaya!" 24 Laju ayah aneuëk nyan jidumpék, "Tuhan, ulôn peucaya, teuma iman lôn kureueng. Tulông kheueh ulôn mangat ulôn leubeh peucaya lom!" 25 Watée geungieng lé Isa ureuëng ramé ka meuhudom, laju geupeurintah bak roh jeuhet nyan sira geupeugah, "Hei Roh tulo dan kalu, ulôn peurintah bak kah kahteubiet lam tuboh aneuëk nyoe dan bék sagai-sagai kah tamong lom lam tuboh aneuëk nyoe!" 26 Roh jeuhet nyan jiklik, dan tuboh aneuëk nyan laju meulawan-lawan sira teubot-bot, óh lheueh nyan laju jiteubiet lam tuboh aneuëk nyan. Aneuëk nyan deuh lagée manyét sampoe ureuëng nyang meuhudom nyan jipeugah, "aneuëk nyan ka maté!" 27 Teuma Isa laju geutulông peubeudôh aneuëk nyan, dan aneuëk nyan pih ka jibeudôh. 28 Óh lheueh nyan Isa kana di rumoh, murit-murit Gobnyan jijak laju ubak Gobnyan sira jipeugah, "Peue sabab kamoe hana hase kamoe use roh jeuet nyan?" 29 Geujaweueb lé Isa, "Roh jeuhet nyang lagée nyan hana hase teu-use ngon cara peue mantong meunyoe kon ngon doá." 30 Isa dan murit-murit Gobnyan laju geutinggai teumpat nyan dan geujak laju rot Galilea. Isa hana geutem teumpat Gobnyan jiteupeu lé gob, 31 sabab Gobnyan teungoh geupeubeuet murit-murit Geuh. "Aneuëk Manusia teuma jijok ubak kuasa manusia," meunan geupeugah lé Isa, "dan Gobnyan teuma jipoh maté, teuma bak uroe nyang keu lhée Gobnyan teuma geubeudôh!" 32 Murit-murit Gobnyan hana jituóh muphom peue nyang geupeugah lé Isa nyan, teuma awaknyan jitakot teumanyong ubak Gobnyan. 33 Awaknyan laju troh u Kapernaum. Óh ka troh u rumoh, Isa laju geutanyong ubak murit-murit Geuh, "Peue gata tanyong bak teungoh rot bunoe?" 34 Awaknyan hana jijaweueb, sabab bak teungoh rot awaknyan jimeudakwa soe nyang leubeh rayeuk. 35 Isa geuduek, dan laju geutawök bandua blaih droe murit Geuh nyan. Laju geupeugah bak awaknyan, "Ureuëng nyang keuneuk jeuet keu ureuëng lumboi sa, jihnyan bah beujeuet nyang paleng akhé dan beujeuet keupeulayan banmandum manusia." 36 Óh lheueh nyan Isa laju geucok sidroe aneuëk manyak, laju geupeudong aneuëk nyan dikeue awaknyan banmandum. Isa geuwa aneuëk nyan sira geupeugah ubak murit-murit Gobnyan, 37 "Ureuëng nyang jiteurimong sidroe aneuëk miet lagée nyoe sabab Ulôn, saban cit ureuëng nyan ka jiteurimong Ulôn, ureuëng nyan bukon mantong ka jiteurimong Ulôn, teuma gobnyan nyang ka utus Ulôn." 38 Laju Yahya geupeugah ubak Isa, "Pak Gurée, kamoe kalon sidroe ureuëng jiuse jén ateueh nan Bapak. Dan kamoe tam ureuëng nyan sabab jihnyan bukon nibak geutanyoe." 39 Geupeugah lé Isa, "Bék gata tam jihnyan, sabab hana meusidroe pih jipeubuet buet ajaéb ateueh nan Ulôn, jeuet troh trang jipeubrok-peubrok Ulôn. 40 Sabab ureuëng nyang hana jilawan geutanyoe, saban cit jihnyan na blaih geutanyoe. 41 Ingat kheueh! Ureuëng nyang jibri ié jieb keu gata sabab gata murit Raja Nyang Peuseulamat, ureuëng nyan pasti jiteurimong upah jih." 42 "Soe nyang jeuet keusab sidroe nibak ureuëng-ureuëng nyang ubit nyoe hana jipeucaya le ubak ulôn, leubeh gét meunyoe batée geumiléng teu-ikat bak takue jih, dan teuböh lam laôt. 43 Meunyoe jaroe gata nyang jeuet gata meudesya, khoh kheueh jaroe gata nyan! Leubeh gét gata udeb ngon Po teu Allah deungon hana jaroe siblaih nibak gata deungon dua blaih jaroe tamong lam nuraka, nuraka nyan na kheueh apui nyang hu siumu masa. 44 Disinan apui hana jitem lon dan ulat hana jitem maté. 45 Dan meunyoe gaki gata nyang peujeuet gata meudesya, khoh kheueh gaki nyan. Leubeh gét gata udeb ngon siblaih gaki dikeue Allah, nibak gata udeb ngon gaki dua blaih teuma jitiek lam nuraka. 46 Disinan apui hana jitem lon dan ulat hana jitem maté. 47 Meunyoe mata gata nyang jeuet keusabab gata meudesya, cungke kheueh mata nyan! Leubeh gét gata tamong lam Donya Barô Allah deungon hana mata siblaih, nibak gata udeb ngon dua blaih mata teuma teutiek lam apui nuraka. 48 Disinan apui hana jitem lon dan ulat hana jitem maté. 49 Tieb-tieb ureuëng teuma teupeu gleh ngon apui, lagée keureubeuen nyang teupeu gleh ngon sira. 50 Sira nyan gét, teuma meunyoe ka jeuet keutabeue, peu kheueh mungken teupeu masen lom? Teuma, bah kheueh gata jeuet lagée sira -- udeb kheueh meusajan-sajan deungon rukon."

Markus 10

1 Óh lheueh nyan Isa geutinggai laju teumpat nyan, geujak u daerah Yudea dan daerah meurandeh Krueng Yordan. Ureuëng ramé teuka lom ka meuhudom bansikeulileng Isa. Lagée nyang ka-ka Isa laju geupeubeuet awaknyan. 2 Na padub droe ureuëng Farisi jijak cit keunan keu jikeuneuk jeubak Isa. Awaknyan jitanyong, "Meunurot huköm agama geutanyoe, peu kheueh jeuet ureuëng jitaleuek peurumoh jih?" 3 Geujaweueb lé Isa, "Nabi Musa peue na geubri peurintah ubak gata?" 4 "Nabi Musa geubri ureuëng jitaleuek peurumoh jih asai jibri surat taleuek leubeh ilée," jaweueb awaknyan. 5 "Nabi Musa geupeurintah lagée nyan sabab gata payah that teupeurunoe," Kheun Isa ubak awaknyan. 6 "Teuma bak awaiphon, watée Allah geucebta manusia, Allah geupeugah lagée nyoe, 'Allah geucebta agam ngon inong. 7 Nyang kheueh sabab jih ureuëng agam jitinggai ma ngon yah jih dan laju udeb meusajan ngon peurumoh jih, teuma mandua nyan ka jeuet keusaboh, 8 teuma, awaknyan kon le dua droe, ka jeuet keu sidroe.' 9 Nyang kheueh sabab jih, peue nyang ka geupeu saboh lé Po teu Allah, nyan hana jeuet jipeucre lé manusia!" 10 Óh ka lheueh awaknyan geutamong lam rumoh, murit-murit Gobnyan laju jitanyong ubak Isa keuhai nyang ban lheueh geupeugah bunoe. 11 Isa geupeugah ubak awaknyan, "Soe mantong nyang taleuek peurumoh jih laju jijak meukawen ngon inong laén, ureuëng nyan ka jimeumukah ngon peurumoh jih nyang phon. 12 Meunan cit inong nyang taleuek lakoe jih laju jijak meukawen ngon agam nyang laén, jihnyan pih ka jimeumukah." 13 Na ureuëng nyang ba aneuëk miet ubak Isa mangat geutem jamah dan geubri beureukat bak aneuëk nyan. Teuma lé murit-murit Gobnyan jibeungéh keu ureuëng-ureuëng nyang ba aneuëk miet nyan. 14 Óh geungieng hai nyan, Isa beungéh dan laju geupeugah ubak murit-murit Gobnyan, "Peubiyeu mantong aneuëk-aneuëk miet nyan jijak ubak Ulôn! Bék gata tam awaknyan, sabab ureuëng-ureuëng nyang lagée nyoe kheueh keu anggota umat Allah. 15 Ingat nyoe! Soe nyang hana meuhadab ubak Po teu Allah lagée sidroe aneuëk miet, ureuëng nyan hana teuma jeuet keu anggota umat Allah." 16 Óh lheueh geupeugah lagée nyan, Isa laju geuwa mandum aneuëk miet nyan, óh lheueh nyan laju geupeuduek jaroe Geuh ateueh awaknyan maséng-maséng dan geubri beureukat awaknyan. 17 Watée Isa geujak lom, na sidroe ureuëng jiplueng-plueng jijak meurumpok ngon Isa. Ureuëng nyan laju jisujut dikeue Isa sira jitanyong, "Gurée nyang jroh, peue nyang harôh lôn peubuet mangat ulôn meuteumé udeb seujati dan keukai?" 18 "Pakon gata peugah Ulôn nyoe gét?" geutanyong lé Isa. "Hana nyang gét, seulaén Po teu Allah keudroe. 19 Gata katateupeu peue-peue nyang geupeurintah lé Allah, 'Bék poh maté, bék meumukah, bék ceumeucue, bék jeuet keusaksi sulet, bék teumipée, horeumat kheueh keu yah ngon ma gata.' " 20 "Bapak Gurée," kheun ureuëng nyan lom, "Mandum peurintah nyan ka lheueh lôn peubuet yoh muda lôn sampoe án jinoe." 21 Isa geungieng ateueh ureuëng nyan ngon gaséh sayang laju geupeugah, "Tinggai saboh teuk nyang gata peureulée. Jak peubloe laju mandum atra milék gata; gatabri kheueh péng nyan keu ureuëng gasien, dan teuma meuteumé hareuta lam syeuruga. Óh ka lheueh nyan gata jak kheueh taseutôt Ulôn." 22 Ban jideungoe Isa geupeugah haba lagée nyan, ureuëng nyan seudeh lumpah na, laju jitinggai teumpat nyan ngon até nyang hana gundah sabab jihnyan kaya lagoena. 23 Isa laju geungieng ateueh mandum murit Gobnyan sira geupeugah, "Payah that-that ureuëng kaya jeuet keu anggota umat Po teu Allah!" 24 Murit-murit Gobnyan hireuen watée jideungoe peue nyang geupeugah lé Isa nyan. Teuma geupeugah lom lé Isa, "Wahei aneuëk-aneuëk Lôn, meumang beutôi lumpah payah keu jeuet keu anggota umat Allah! 25 Leubeh mudah saboh unta jitamong lam ruhuéng jarôm nibak sidroe ureuëng kaya jitamong lam Donya Barô Allah." 26 Tutoe haba Isa nyang geupeugah lagée nyan teuhireuen-hireuen mandum murit-murit Gobnyan sampoe awaknyan jimarit sabe keudroe-droe, "Meunyoe meunan, soe nyang jeuet seulamat?" 27 Isa geungieng ateueh awaknyan dan laju geujaweueb lagée nyoe, "Bak manusia nyang lagée nyan mustahe, hana mustahe bak Po teu Allah; mandum mungken meunyoe bak Allah." 28 Laju jipeugah lé Petrus, "Neungieng kheueh, kamoe ka habéh kamoe tinggai peue-peue nyang na guna kamoe jak seutôt Bapak." 29 Geupeugah lé Isa, "Peucaya kheueh: ureuëng nyang ka jitinggai binoe jih, atawa syedara jih nyang agam atawa nyang inong, meunan cit ngon ma jih, atawa ayah jih, atawa aneuëk-aneuëk jih, atawa blang ngon lampôh jih sabab jiseutôt Ulôn atawa sabab Haba Gét nibak Allah, 30 ureuëng nyan teuma jiteurimong leubeh jai bak masa jinoe. Jihnyan teuma meuteumé sireutôh goe leubeh le rumoh, syedara agam, syedara inong, ma, aneuëk-aneuëk, blang ngon lampôh, -- dan meunan cit ngon seksa. Dan singoh bak jamén nyang teuma teuka, ureuëng nyan teuma jiteurimong udeb seujati dan keukai. 31 Teuma ramé ureuëng nyang bak saát nyoe nyang phon teuma jeuet keu nyang dudoe dan ramé nyang saát nyoe nyang akhé teuma jeuet keu nyang phon." 32 Isa ngon murit-murit Gobnyan teungoh geujak u Yerusalem, Isa geujak dikeue, dan mandum murit Gobnyan habéh gundah. Meunan cit ureuëng-ureuëng nyang seutôt Gobnyan rot dilikot pih ka teumakot. Óh lheueh nyan Isa geutawök lom murit-murit Gobnyan keudroe mantong óh lheueh nyan geupeugah lom bak awaknyan peu nyang teuma teuka ateueh Gobnyan. 33 "Deungoe kheueh," kheun Gobnyan, "Tanyoe jinoenyoe teungoh tajak u Yerusalem. Nibak teumpat Aneuëk Manusia teuma jijok ubak peumimpén-peumimpén imeum dan ubak gurée-gurée agama. Gobnyan teuma jihuköm maté, óh lheueh nyan laju jijok ubak ureuëng-ureuëng nyang kon Yahudi. 34 Awaknyan teuma ji peukaru ngon jihina Gobnyan, jiludah Gobnyan, jiseksa Gobnyan, dan jisaleb Gobnyan. Teuma nibak uroe nyang keu lhée Gobnyan teuma geubeudôh." 35 Teuma Yakobus ngon Yahya, aneuëk-aneuëk nibak Zebedeus, jijak ubak Isa, "Bapak Gurée," kheun awaknyan, "Na saboh hai nyang kamoe meuharab Bapak peubuet keu kamoe." 36 "Peue nyang gata lakée jeuet lôn peuget keu gata?" geutanyong lé Isa. 37 Jijaweueb lé awaknyan, "Kamoe keuneuk duek blaih uneun ngon blaih wie Bapak, meunyoe Bapak neuduek meutakhta ngon mulia." 38 "Gata hana tateupeue peue nyang gata lakée," kheun Isa ubak awaknyan, "Peu kheueh sanggob gata jieb nibak piala peundeuritaan nyang teuma Ulôn jieb dan tatamong lam mideuen deurita nyang teuma Ulôn tamong?" 39 "Sanggob," jaweueb awaknyan. Teuma Isa geupeugah lom bak awaknyan, "Beutôi gata teuma tajieb nibak piala deurita nyang teuma Ulôn jieb, dan tatamong lam mideuen deurita nyang teuma Ulôn tamong. 40 Teuma keuhai soe kheueh nyang duek blaih uneun ngon blaih wie lôn, nyan kon ulôn nyang hak peuteuntée. Po teu Allah nyang peuteuntée soe-soe nyang duek nibak teumpat nyan." 41 Watée geudeungoe lé ban siploh droe murit Isa keuhai nyan, awaknyan laju beungéh ubak Yakobus meunan cit bak Yahya. 42 Teuma Isa laju geuhôi awaknyan banmandum, laju geupeugah, "Gata tateupeue bahwa peumimpén-peumimpén bansa nyang hana jituri Allah jitindéeh rakyat jih keudroe. Dan lé ureuëng-ureuëng rayeuk jiteugon bansa jih nyan. 43 Teuma gata hana jeuet lagéenyan! Nyang sikeubiet jih, ureuëng nyang keuneuk rayeuk lamkawan jih keudroe, ureuëng nyan bah kheueh jeuet keupeulayan gata. 44 Dan ureuëng-ureuëng nyang keuneuk jeuet keu nyang lumboi sa lamkawan gata, ureuëng nyan bah kheueh beujeuet keu namiet keu mandum ureuëng. 45 Sabab, Aneuëk Manusia pih hana teuka keuteulayani. Gobnyan teuka keu geujak layani dan keugeujak jok nyawöng Gobnyan mangat teupeubeubaih dum ureuëng ramé." 46 Awaknyan laju trok u Yerikho. Dan watée Isa ngon murit-murit Gobnyan meunan cit ngon ureuëng ramé geutinggai banda nyan, na sidroe ureuëng buta nyang teungoh jiduek bak binéh rot sira geumadée nan jih Bartemeus. Aneuëk nibak Timeus. 47 Watée ureuëng nyan jiteupeu bahwa nyang teungoh jak nyan na kheueh Isa ureuëng Nazaret, laju ureuëng nyang jikuk, "Isa, Aneuëk Daud! Neugaséh kheueh keu lôn!" 48 Ureuëng buta nyan laju jibeungéh le ureuëng ramé sira jiyue seungab. Teuma ureuëng buta nyan leubeh teuga lom jikuk, "Aneuëk Daud, neugaséh kheueh keu lôn!" 49 Teuma Isa geupiôh sira geupeugah, "Hôi laju ureuëng nyan." Teuma awaknyan jijak tawök ureuëng buta nyan sira jikheun bak ureuëng nyan, "Teunang kheueh! Gata geutawök lé Isa, beudôh laju!" 50 Ureuëng buta nyan bagaih that jibeudôh sira jirhom bajée jubah jih dan jijak laju ubak Isa. 51 "Peue nyang gata lakée jeuet Lôn peubuet ateueh gata?" Geutanyong lé Isa bak ureuëng nyan. Ureuëng buta nyan jijaweueb, "Pak Gurée, ulôn keuneuk keumalon." 52 "Jak kheueh," kheun Isa, "sabab gata peucaya keu Ulôn, gata puléh." Bak watéenyan cit teuma ureuëng nyan hase jimeungieng, dan laju jiseutôt Isa jak.

Markus 11

1 Watée karab tô ngon Yerusalem, awaknyan troh laju bak banda Betfage dan Betania, bak gaki Bukét Zaiton. Óh troh keunan lé Isa laju geu-utus dua droe murit Gobnyan. 2 "Jak kheueh laju u gampông nyang na dikeue nyan," kheun Isa ubak awaknyan. "Meunan gata troh u gampông nyan, gata teuma tangieng na saboh aneuëk keuleudée nyang teungoh teu ikat, dan hántom na jigiduek lé gob. Gata peuleueh laju keuleudée nyan dan gata ba keunoe. 3 Dan meunyoe na ureuëng nyang tanyong bak gata peusabab gata peuleueh keuleudée nyan, gata peugah laju, 'Tuhan nyang peureulée, dan ureuëng nyan laju jijok pulang.' " 4 Teuma geujak kheueh laju mandua droe murit Isa nyan, laju geungieng na saboh aneuëk keuleudée teungoh teu ikat bak pintoe rumoh bak binéh rot. Awaknyan laju geupeuleueh keuleudée nyan. 5 Ureuëng nyang dong disinan laju jitanyong ubak awaknyan, "Hei, peue gata peubuet nyan? Keupeue gata peuleueh aneuëk keuleudée nyan?" 6 Awaknyan laju geujaweueb lagée nyang ka geupeugah lé Isa ubak awaknyan. Ban jideungoe haba nyan, awaknyan pih jipeubiyeu mantong keuleudée nyan jiba lé murit-murit Isa. 7 Watée ka troh ubak Isa, ateueh rhung keuleudée nyan laju jilapek ngon bajée jubah awaknyan, dan Isa laju geu-ék ateueh keuleudée nyan. 8 Ramé that ureuëng nyang jileueng bajée jubah jih ateueh rot raya, na teuma nyang tabu ateueh rot nyan ranteng-ranteng kayée nyang awaknyan cok bak lampôh. 9 Ureuëng-ureuëng nyang jak dikeue dan ureuëng-ureuëng nyang seutôt gobnyan nibak likot, mandum awaknyan jikuk-kuk, 10 "Pujoe kheueh Allah! Geubri beureukat kheueh Gobnyan nyang teuka ateueh nan Tuhan! Udeb kheueh peumeurintah Gobnyan nyang teuma teuka -- peumeurintah Nabi Daud indatu geutanyoe! Pujoe kheueh Allah Nyang Mahamanyang!" 11 Akhé jih Isa troh u Yerusalem, laju geutamong u Baét Tuhan. Disinan laju geungieng bansikeulileng. Teuma uroe karab seupôt, geubeudôh sinan laju geujak u Betania meusajan-sajan ngon bandua blaih droe murit Gobnyan. 12 Óh singoh nyan, watée awaknyan teungoh geujak geuteubiet nibak Betania, Isa ka teurasa deuek. 13 Nibak jiôh leumah geukalon sibak bak ara nyang ôn jih luhu lumpah na. Laju geujak keunan sira geukalon peu kheueh na boh kayée nyan. Teuma watée Gobnyan ka troh keunan hana geuteumé sapeue, nyang na cit ôn nyang luhu, sabab bak watée nyan gohlom troh musém muboh boh ara. 14 Laju geupeugah lé Isa keu bak ara nyan, "Phon saát nyoe hana meusidroe manusia nyang teuma jipajoh boh gata nyan, hei bak ara!" Murit-murit Isa jideungoe peu nyang geupeugah lé gobnyan. 15 Óh lheueh nyan awaknyan laju troh u Yerusalem, dan Isa geujak lom u Baét Tuhan. Disinan Gobnyan laju geu-use banmandum ureuëng bloe peubloe nyang meukat disinan. Bubena na meuja teumpat ureuëng tuka péng habéh geutunggeng teungbayeueng, meunan cit deungon bangku-bangku teumpat ureuëng meukat cicém mirah pati. 16 Dan hana meusidroe pih nyang geubri idhin ubak ureuëng nyang ba peue mantong rot leuen Baét Tuhan. 17 Óh lheueh nyan Isa laju geupurunoe ureuëng-ureuëng nyang na disinan. Gobnyan geupeugah lagée nyoe, "Lam Alkitab na teutuléh lagée nyoe: Feureuman Allah, 'Baét Ulôn teuma teupeugah baét teumpat meudoá keu banmandum bansa.' Teuma lé gata tapeujeuet keuteumpat eumpung seumamon!" 18 Peumimpén imeum-imeum ngon gurée-gurée agama jideungoe peu nyang geupeugah lé Isa nyan. Teuma awaknyan laju jimita jalan pakriban cara mangat jeuet Isa teupoh maté. Awaknyan jitakot keu Gobnyan, sabab banmandum ureuëng hireuen jideungoe peue nyang geupeubeuet nyan. 19 Sampoe án rab malam, Isa dan murit-murit Gobnyan laju geutinggai banda nyan. 20 Beungoh that óh singoh nyan, watée awaknyan geujak rot bak ara nyang ka geuseurapa lé Isa nyan, deuh laju geukalon bak ara nyan ka maté troh bak ukeue-ukeue jih. 21 Dan Petrus laju teu ingat ubak peue nyang teujadi barosa. Teuma Petrus jipeugah ubak Isa, "Bapak Gurée, Bapak ngieng kheueh nyan! Bak ara nyang Bapak rapa nyan ka maté!" 22 Geujaweueb lé Isa, "Peucaya kheueh ubak Po teu Allah. 23 Gata pih jeuet gata peugah ubak gunong nyoe, 'Beuteubeuôt kheueh kah hei gunong dan beuteu pupo kheueh lam laôt raya!' Hei nyan teuma teujadi keu gata; asai gata hana ragu-ragu, dan gata peucaya bahwa nyang gata peugah nyan beutôi-beutôi teujadi. 24 Sabab nyan ingat kheueh nyoe: Meunyoe gata meudoá dan gata lakée peue nyang keuneuk gata lakée, peucaya kheueh bahwa Allah ka geubri keu gata peue nyang gata lakée, teuma nyan gata tateurimong. 25 Dan meunyoe gata meudoá, teuma até gata hana mangat ubak sidroe-droe ureuëng, gata peuamphon kheueh ureuëng nyan ilée, mangat Bapak gata nyang na lam syeuruga geupeu amphon mandum desya-desya gata. 26 Meunyoe gata hana tapeuamphon ureuëng laén, Bapak gata nyang na lam syeuruga pih hana geupeu amphon bubena desya-desya gata." 27 Awaknyan geugisa lom u Yerusalem. Dan watée Isa geujak geukeulileng lam Baét Tuhan, Peumimpén Imeum-imeum, gurée-gurée agama, dan mandum peumimpén Yahudi nyang laén laju jijak ubak Gobnyan. 28 Awaknyan jitanyong, "Peue dasai jih droeneueh peubuet banmandum nyoe? Soe nyang bri hak nyan keu Droeneueh?" 29 Geujaweueb lé Isa, "Ulôn keuneuk teumanyong ubak gata. Jaweueb kheueh dan Ulôn teuma Lôn peugah ubak gata deungon haksoe Ulôn peubuet hainyoe. 30 Nabi Yahya Pumanö ngon hak soe, ngon hak Po teu Allah, atawa manusia?" 31 Dan di Peumimpén Imeum-imeum meunan cit deungon banmandum peumimpén Yahudi jimupakat sabe keudroe-droe. Laju awaknyan peugah, "Meunyoe tanyoe peugah, 'Deungon hak Po teu Allah,' Gobnyan teuma geupeugah, 'Pakon hana gata peucaya ubak Nabi Yahya?' 32 Teuma payah cit meunyoe tapeugah, 'Deungon hak manusia.' " Sabab awaknyan teumakot keu ureuëng ramé, sabab banmandum ureuëng ka jianggab Nabi Yahya nyan sidroe Nabi. 33 Laju jijaweueb lé awaknyan, "Hana kamoe teupeu." Dan Isa laju geupeugah ubak awaknyan, "Meunyoe meunan, ulôn pih hana lôn peugah ubak gata deungon hak soe banmandum nyoe ulôn peubuet."

Markus 12

1 Óh lheueh nyan Isa laju geupeu phon peugah haba ngon peumimpén imeum-imeum, gurée-gurée agama dan peumimpén-peumimpén Yahudi nyan. Geupeugah lé Gobnyan, "Na sidroe ureuëng nyang jipula bak anggô lam lampôh jih, lampôh nyan jipageue bansikeulileng. Óh lheueh nyan laju jikueh uruek keuteumpat jiprah ié anggô, jipeudong teuma saboh meunara keuteumpat ureuëng keumiet lampôh nyan. Óh lheueh nyan lampôh anggô jihnyan jipeusiwa ubak na padub droe ureuëng nyang buet jih jisiwa lampôh anggô óh lheueh nyan laju geujak u nanggroe laén. 2 Óh trok bak watée musém teupot boh anggô, ureuëng nyan laju geukirém sidroe peulayan gobnyan ubak ureuëng-ureuëng nyang siwa lampôh gobnyan, guna jih keu jiteurimong wase gobnyan. 3 Teuma lé ureuëng-ureuëng nyang siwa lampôh nyan laju jidrob peulayan nyan. Óh lheueh nyan laju jipoh dan barô kheueh jiyue woe ngon jaroe söh. 4 Dan ureuëng po lampôh nyan geukirém lom peulayan gobnyan nyang laén. Lé ureuëng-ureuëng nyang siwa nyan laju jipoh bak ulée peulayan nyan, óh lheueh nyan laju jiuse sira jiteunak ngon jiseurapa. 5 Ureuëng po lampôh nyang jikirém lom peulayan gobnyan nyang laén. Peulayan nyan laju jipoh maté lé awaknyan. Dan meunan kheueh sabe bubena peulayan nyang geukirém lé ureuëng po lampôh nyan jipoh lé ureuëng nyang siwa lampôh, na nyang jipoh mantong, na nyang jipoh maté. 6 Soe kheueh nyang jeuet jikirém lom lé ureuëng po lampôh nyan? Nyang na tinggai sidroe teuk, na kheueh aneuëk gobnyan keudroe nyang paleng geugaséh. Dan akhé jih aneuëk geuh nyan laju geukirém ubak ureuëng-ureuëng nyang siwa tanoh nyan. 'Pasti aneuëk ulôn nyoe jihoreumat,' geupike lé ureuëng po lampôh nyan. 7 Teuma lé ureuëng-ureuëng nyang siwa lampôh nyan laju jimarit sabe keudroe-droe, 'Nyoe pat ahli waréh jih. Jak tapoh maté jihnyan, mangat tanyoe meuteumé tacok hareuta warésan nyoe!' 8 Laju jidrob aneuëk ureuëng po lampôh nyan, dan jipoh sampoe maté. Manyét aneuëk nyan laju jitiek uluwa lampôh." 9 Laju geutanyong lé Isa, "Peu kheueh nyang harôh geupeubuet lé ureuëng po lampôh nyan? Pasti gobnyan teuka dan geupoh maté bubena ureuëng nyang siwa lampôh geuh nyan, dan óh lheueh nyan laju geuseurah lampôh nyan ubak ureuëng siwa nyang laén. 10 Gata teuntée ka lheueh gata beuet ayat Alkitab nyang teutuléh lagée nyoe, 'Batée nyang hana jipeuguna lé utôh-utôh rumoh ka jeuet keu batée nyang keuphon. 11 Nyoe kheueh buet Tuhan; nyang paleng gagah!' " 12 Teuma tukoh-tukoh bansa Yahudi nyang deungoe miseue, jiuseuha jidrob Isa, sabab awaknyan jiteupeu miseue nyan na kheueh rhot jih keu awaknyan. Teuma awaknyan teumakot keu ureuëng ramé. Dan awaknyan laju jijak jitinggai Isa disinan. 13 Na padub droe ureuëng Farisi dan na padub droe anggota golongan Herodes jiyue jak jeubak Isa deungon cara jiteumanyong. 14 Awaknyan jijak laju ubak Isa sira jipeugah lagée nyoe, "Bapak Gurée, kamoe meuteupeue bahwa bapak na kheueh ureuëng jujoe dan hana neupakoe peundapat soe mantong. Bapak purunoe troh trang keuhai keuheundak Allah ubak manusia, sabab Bapak hana neungieng soe ureuëng nyan. Jinoe, ci kheueh Bapak peugah ubak kamoe, 'Meunurot peuratoran agama geutanyoe, peu kheueh jeuet tabayeue cukée ubak Kaisar atawa hana? Peu kheueh harôh tabayeue cukée nyan atawa bék?' " 15 Isa geuteupeue bahwa awaknyan munafék. Laju geujaweueb, "Peue sabab jih gata keuneuk jeubak ulôn? Cipeuleumah ubak ulôn saboh keupeng péng pirak." 16 Teuma awaknyan laju jibri ubak Isa saboh keupeng péng pirak. Laju geutanyong lé Isa, "Gamba dan nan soe kheueh nyang na lam péng nyoe?" "Gamba dan nan Kaisar," jaweueb awaknyan. 17 "Meunyoe meunan," kheun Isa, "jok kheueh ubak Kaisar peue nyang atra Kaisar, dan ubak Allah peue nyang atra Allah." Awaknyan hireuen jideungoe gobnyan peugah lagée nyan. 18 Na padub droe golongan Saduki ji ubak Isa (Awaknyan na kheueh golongan nyang jianut peundapat bahwa ureuëng maté hana udeb le.) 19 "Bapak Gurée," kheun awaknyan ubak Isa, "Nabi Musa geutuléh huköm nyang lagée nyoe keu geutanyoe: 'Meunyoe sidroe ureuëng agam maté dan hana meu aneuëk, syedara ureuëng agam nyang maté nyan bah geumeukawen ngon inong balée nyan sibagoe gantoe tika mangat na keuturonan keu ureuëng nyang ka maté nyan.' 20 Ka lheueh na tujoh droe meusyedara, nyang tuha meukawen laju maté hana meu aneuëk. 21 Óh lheueh nyan nyang lomboi dua meukawen teuma ngon inong balée adue jih nyan, ureuëng nyan pih maté hana meu aneuëk. Hai nyang lagée nyan keunong teuma ubak syedara gobnyan nyang keu lhée, 22 dan seulanjut jih sampoe ubak nyang keutujoh. Akhé jih inong nyan keudroe nyang meuninggai donya. 23 Óh uroe dudoe, watée ureuëng maté geupeubeudôh lom teuma, peurumoh soe kheueh ureuëng inong nyan? Sabab bantujoh droe adoe aduen nyan ka jimeukawen ngon inong nyan!" 24 Geujaweueb lé Isa, "Bangai that gata nyoe. Sabab gata hana muphom peue nyang teutuléh lam Alkitab meunan cit kuasa Po teu Allah. 25 Sabab meunyoe ureuëng-ureuëng nyang ka maté teupeubeudôh lom, awaknyan hana meukawen le, awaknyan udeb lagée malaikat nyang na lam syeuruga. 26 Dan keuhai ureuëng maté teupeubeudôh lom, peu kheueh gohlom na gata beuet lam kitab Nabi Musa keuhai tamah beulukar nyang hu jiteubiet apui nyan? Lam ayat-ayat nyan na teutuléh bahwa Po teu Allah geupeugah ubak Nabi Musa, 'Ulôn kheueh Allah Nabi Ibrahim, Allah Nabi Ishaq dan Allah Nabi Yakub.' 27 Allah nyan bukon Allah ureuëng maté. Gobnyan Allah ureuëng udeb. Gata nyoe beutôi-beutôi ka sisat!" 28 Teuka kheueh laju sidroe gurée agama jijak deungoe Isa peugah haba ngon ureuëng-ureuëng Saduki nyan. Gurée agama nyang ahli kitab Taurat nyan jikalon Isa ka geujaweueb peue-peue nyang jitanyong lé ureuëng-ureuëng Saduki nyan deungon jroh dan beuna. Teuma gurée agama nyan jitanyong ubak Isa, "Peurintah nyang toh kheueh nyang paleng peunteng nibak banmandum peurintah nyang na?" 29 Geujaweueb lé Isa, "Peurintah nyang phon, na kheueh: 'Deungoe kheueh, hei bansa Israel! Tuhan Po teu Allah geutanyoe, Tuhan nyan Esa. 30 Cinta kheueh ubak Tuhan Allah gata deungon sipeunoh até, deungon sigeunab jiwa gata, deungon banmandum akai gata dan deungon banmandum teunaga gata.' 31 Peurintah nyang keudua: 'Cinta kheueh seusamoe gata manusia, lagée gata cinta ubak droe gata keudroe.' Hana le peurintah nyang laén nyang leubeh peunteng nibak ban dua peurintah nyan." 32 Dan gurée agama nyan laju jipeugah ubak Isa, "Paih that lagée neupeugah nyan Bapak Gurée! Keubiet beutôi peu nyang Bapak peugah nyan: Tuhan Allah Nyang Esa, dan hana le Allah nyang laén seulaén Allah Nyang Esa nyan. 33 Dan manusia harôh jicinta Allah deungon sipeunoh até, dan deungon banmandum ákai dan deungon banmandum teunaga nyang na bak ureuëng nyan. Dan ureuëng nyan pih harôh jicinta seusamoe jih manusia lagée jicinta droe jih keudroe. Nyan leubeh gét nibak jipeuseumah keureubeuen nyang teutot dan keureubeuen-keureubeuen nyang laén ubak Po teu Allah." 34 Isa geukalon bahwa gurée agamanyan ka geujaweueb deungon jroh that. Dan Isa geupeugah ubak awaknyan, "Gata karab jeuet keu anggota umat Po teu Allah." Óh lheuehnyan hana meusidroe pih nyang jijeuet teumanyong ubak Isa. 35 Watée teungoh geuseumeubeuet lam Baét Allah, Isa geutanyong lagée nyoe, "Pakriban cara jih jipeugah lé gurée-gurée agama nyan bahwa Raja nyang ba Seulamat nyan keuturonan Nabi Daud? 36 Padahai Nabi Daud keudroe -- sabab geuilham lé Roh Allah -- geupeugah lagée nyoe, 'Tuhan meufeureuman ubak Tuhan lôn: duek kheueh blaih uneuen Lôn sampoe Ulôn peujeuet banmandum musoh-musoh Droeneueh jitaklok ubak Droeneueh.' 37 Jadi, meunyoe Nabi Daud geupeugah Raja nyang ba Seulamat nyan 'Tuhan' pakriban mungken Gobnyan keuturonan Nabi Daud?" Ureuëng ramé nyang na lam Baét Allah nyan galak that jideungoe Isa seumeubeuet. 38 Gobnyan laju geupeugah ubak awaknyan, "Até-até kheueh teuhadab gurée-gurée agama. Awaknyan galak jijak-jak ngon bajée jubah nyang panyang dan galak that jihoreumat lé gob di dalam pasai-pasai dipat nyang na ureuëng ramé. 39 Awaknyan galak that bak teumpat-teumpat nyang teuhoreumat watée jitamong lam rumoh iébadat meunan cit meunyoe bak teumpat-teumpat khanuri. 40 Buet awaknyan jipeungét inong-inong balée dan meunan cit rumoh-rumoh inong balée nyan jicok keujih. Dan keu jitôb-tôb buet jih nyang jeuhet nyan, watée jimeudoá panyang-panyang. Huköman keu awaknyan óh uroe dudoe brat lumpah na!" 41 Watée geuduek meuhadab keue ngon tông teumpat peuseumahan lam Baét Allah, Isa geupeurati ureuëng-ureuëng nyang peuseumah péng sibagoe peuseumahan jih lam tông dikeue gobnyan nyan. Jai that ureuëng kaya jipeutamong péng nyang jai lam tông nyan; 42 Óh lheueh nyan na teuma sidroe inong balée nyang gasien geujak cit keunan. Laju geupeutamong dua neuk péng teumaga, na kheueh péng glik nyang paleng ubit yuem jih. 43 Teuma Isa laju geuhôi mandum murit-murit Gobnyan sira geupeugah ubak awaknyan, "Ngieng kheueh ubak inong balée nyang gasien nyan: Leubeh jai inong balée nyang gasien nyan peutamong lam tông peuseumahan nyan nibak nyang jipeutamong lé ureuëng-ureuëng laén. 44 Sabab awaknyan nyang jibri nyang leubeh nibak hareuta jih. Teuma inong balée nyan bah kheueh jih nyan ureuëng paleng gasien jibri banmandum nyang na bak jihnyan -- na kheueh nyang paleng jipeureulée keu udeb jih."

Markus 13

1 Watée Isa geutinggai Baét Allah, sidroe lamkawan murit Geuh nyan jipeugah ubak Isa, "Bapak Gurée, Ci neungieng mandum bangunan-bangunan nyan, neukalon kheueh batée-batée jih. Hana wayang gagah jih!" 2 Geujaweueb lé Isa, "Gata takalon bangunan-bangunan nyang rayeuk nyan, bukon? Hana meusineuk pih batée-batée nyan nyang na tinggai teususon nibak bangunan-bangunan nyan lagée sot nibak teumpat jih. Banmandum nyan teuma teureuloh sampoe án hanco." 3 Óh lheueh nyan Isa laju geujak u Bukét Zaiton, dan duek bak teumpat nyang meuhadab keue ngon Baét Allah. Teuka laju Petrus, Yakobus, Yahya dan Andreas jijak ubak Gobnyan keu jikeuneuk marit ngon Gobnyan seucara pribadi. 4 "Ci Bapak peugah ubak kamoe," kheun awaknyan ubak Isa, "pajan bandum nyan teuma teujadi? Dan peu kheueh tanda-tanda jih nyang teutunyok ubak nyan bahwa katroh watée jih?" 5 "Waspada kheueh," jaweueb Isa, "bék sampoe gata keunong peungét. 6 Ramé that nyang teuka jiba-ba nan Ulôn deungon jipeugah lagée nyoe, 'Ulôn kheueh jihnyan!' óh lheueh nyan jijak tipée ureuëng ramé. 7 Meunyoe na gata deungoe su grám gruém dimideuen prang dan haba-haba keuhai muprang, bék teumakot. Hai-hai nyang lagée nyan keubiet teujadi, teuma hainyan bukon sibagoe tanda bahwa ka watée jih donya nyoe ka kiamat. 8 Bansa nyang saboh teuma jimuprang jilawan bansa nyang laén. Nanggroe nyang saboh teuma jimuprang ngon nanggroe nyang laén. Dipat mantong teuma na geumpa bumoe dan bala deuek luwa biasa. Banmandum nyan na kheueh awai nibak nyang teuma teujadi, saban lagée sakét nyang jirasa lé ureuëng inong nyang keuneuk peulahé aneuëk. 9 Gata harôh beu até-até, sabab gata jidrob dan jibahue ubak kantô-kantô mahkamah agama. Gata jipoh lam rumoh-rumoh iébadat. Gata teuma jiba jak meuhadab ubak peunguasa-peunguasa dan raja-raja sabab gata murit Ulôn. Dan watée nyan kheueh watée jih nibak gata keu gata meusaksi keuhai Ulôn keu awaknyan. 10 Haba Gét nyang teuka nibak Po teu Allah nyan bah teutabu leubeh dilée ubak banmandum bansa. 11 Dan meunyoe gata jidrob dan jiba ubak kantô mahkamah agama, bék gundah keuhai peue nyang teuma gata peugah. Meunyoe ka troh watée jih keu gata peugah haba, peugah laju peue nyang teupeugah ubak gata óh troh bak watée jih. Sabab tutoe haba nyang gata peugah nyan bukon haba gata keudroe, teuma atra nyan teuka nibak Roh Allah. 12 Ureuëng teuma jikhianat syedara jih keudroe keu jipoh maté. Nyan pih teuma teujadi lamkawan ayah ngon aneuëk. Aneuëk miet teuma jilawan mak ngon yah jih, dan jiseurah awaknyan keu jipoh maté. 13 Gata teuma jibanci lé mandum ureuëng sabab gata murit Ulôn. Teuma ureuëng nyang meuteuen sampoe án akhé, ureuëng nyan teuma teupeuseulamat." 14 "Gata takalon 'Keujeuhetan nyang Jipeuhanco' jidong bak teumpat nyang hán jeuet jidong le jih nyan. (Catetan keu peumbaca: peurati kheueh peue makna jih!) Bak masanyan ureuëng nyang na di Yudea bah jiplueng u gunong-gunong. 15 Ureuëng nyang na ateueh bubong rumoh bék jitron dan jitamong lam rumoh jih keu jijakcok sapeue-sapeue. 16 Ureuëng nyang mantong na di lampôh bék jiwoe keu jijakcok bajée jubah jih. 17 Lumpah yo ngon teumakot luwabiasa bak ureuëng inong nyang teungoh mume dan mak-mak nyang mantong geupeumom aneuëk manyak! 18 Meudoá kheueh mangat hai-hai nyang lagée nyan bék sampoe teujadi watée musém ujeuen. 19 Bak uroe-uroe nyang lumpah teumakot ngon yo nyan teuma keusosahan nyang gohlom na teujadi, yoh phon Po teu Allah geupeujeuet donya nyoe sampoe bak uroe, dan hana teuma teujadi lé nyang lagée nyan bagoe. 20 Meunyoe Po teu Allah hana geupeupaneuk masa nyang lagée nyan, teuma hana meusidroe pih nyang na seulamat. Lé sabab umat Gobnyan, Allah geupeupaneuk masa nyang lagée nyan. 21 Bak watée nyan meunyoe sidroe ureuëng jipeugah ubak gata, 'Ngieng kheueh, Raja Peuseulamat nyan na disinoe!' atawa, 'Ngieng, Gobnyan na disinan!' -- bék kheueh gata patéh ubak ureuëng nyan. 22 Sabab ureuëng-ureuëng peuseulamat peuleusu dan nabi-nabi peuleusu teuma teuka. Awaknyan jipeubuet buet-buet nyang luwa biasa dan buet-buet nyang ajaéb keu jipeungét gob meunyoe na mungken, umat Po teu Allah cit teuma. 23 Jadi, waspada kheueh! Banmandum nyan ka ulôn peugah ubak gata sigohlom hainyan teujadi." 24 "Óh ka lheueh leuseusoe masa nyang sosah nyan, mata uroe teuma jeuet keuseupôt, dan buleuen hana le meucahya. 25 Bintang-bintang di langét teuma rhot u bumoe, dan bubena nyang mat kuasa di angkasa raya teuma ka-ák ka-ok hana meuteuntée. 26 Bak masa nyan Aneuëk Manusia teuma deuh teukalon teuka rot lam awan deungon kuasa raya dan keuagongan gobnyan. 27 Gobnyan teuma geukirém malaikat-malaikat keu geupeusapat umat nyang geupiléh nibak ban peuet boh sagoe ujong bumoe, nibak ujong-ujong bumoe sampoe troh ubak ujong-ujong langét." 28 "Cok kheueh peulajaran nibak bak ara. Meunyoe ranteng-ranteng jih ijo dan leumiek, dan ka jipeuphon meutarôk, gata tateupeue bahwa musém khueng ka rab teuka. 29 Meunan cit meunyoe gata ngieng hai-hai nyan teujadi, gata tateupeue bahwa watée jih ka rab that. 30 Beutateupeue kheueh! Banmandum peuristiwa nyoe teuma teujadi sigohlom ureuëng-ureuëng nyang udeb bak saát nyoe maté banmandum. 31 Langét ngon bumoe hanco, teuma haba ulôn teutab na siumu masa." 32 "Bah pih meunan, hana meusidroe pih jiteupeu pajan uroe jih dan pajan teuma jeuem jih. Malaikat-malaikat nyang na lam syeuruga hana, dan Aneuëk pih hana, teuma Bapak mantong nyang teupeue. 33 Ngon sabab nyan, gata harôh meujaga-jaga dan waspada, sabab gata hana tateupeue pajan watée jih. 34 Keuadaan jih na kheueh lagée sidroe ureuëng nyang tinggai rumoh jih dan jijak laju u teumpat nyang jiôh. Rumoh jih nyang jitinggai jiyue ubak namiet-namiet jih mangat ji urôh dan jijaga, dan geubri tugaih ubak awaknyan maséng-maséng. Ubak ureuëng nyang jaga babah pintoe, jipeu ingat mangat jijaga beugét-gét. 35 Sabab nyan, gata harôh meujaga-jaga, sabab gata hana tateupeue pajan ureuëng po rumoh nyan jiwoe -- mungken watée uroe seupôt, mungken watée teungoh malam, mungken bak watée suboh, atawa mungken bak watée mata uroe teubiet. 36 Meunyoe jihnyan teuka hana teusangka-sangka, bék kheueh sampoe jikalon gata teungoh teu éh dan teungét. 37 Peue nyang ulôn peugah nyoe ubak gata, ulôn peugah cit ubak mandum ureuëng laén: meujaga-jaga kheueh!"

Markus 14

1 Dua uroe treuk Uroe raya Paskah dan Peurayaan Ruti hana Meuragoe. Peumimpén Imeum-imeum dan gurée-gurée agama teungoh jimita jalan pakriban cara Isa nyan beuteudrob deungon cara seungab-seungab, dan keu jikeuneuk poh maté Gobnyan. 2 "Teuma bék tapeubuet nyan watée peurayaan," kheun awaknyan, "sabab teuka karu nyang luwa biasa." 3 Bak watée Isa kana di Betania, bak rumoh Simon nyang yoh masa ilée ka keunong peunyakét kulét nyang paleng parah, na sidroe ureuëng inong jijak ubak Gobnyan. Ureuëng inong nyan na jiba saboh kaca minyéuk mangat bée nyang jipasoe lam kaca pualam nyang paleng meuhái yuem jih. Watée Isa teungoh geuduek sira geumakheun, ureuëng inong nyan laju jipeubeukah kaca nyan óh lheueh nyan jicok minyéuk nyan laju jiro ateueh ulée Isa. 4 Na padub droe ureuëng nyang na bak teumpat nyan jiteuka beungéh jih laju jimarit sabe keudroe-droe, "Hana manfaát minyéuk mangat bée nyan jiböih-böih sia-sia? 5 Minyéuk nyan jeuet jipeubloe ngon yuem leubeh nibak lhée reutôh péng pirak, dan péng jih jeuet jibri keu ureuëng gasien!" Ngon sabab nyan awaknyan beungéh keu ureuëng inong nyan. 6 Teuma geupeugah lé Isa, "Peubiyeu mantong! Keupeue gatanyoe tapeusosah jihnyan? Inong nyan ka jipeubuet buet nyang jroh lom teupujoe keu Ulôn. 7 Ureuëng gasien sabe na di teungoh-teungoh gata, tieb-tieb watée meunyoe gata tem jeuet gata tulông awaknyan. Teuma ulôn hana siumu masa na meusajan ngon gata. 8 Ureuëng inong nyoe ka jipeubuet peue nyang jeuet jipeubuet. Jihnyoe ka jipeusiab keu ulôn ngon minyéuk mangat bée sibagoe jipeutamong ulôn lam jrat sigohlom troh bak watée. 9 Peucaya kheueh! Ban sigom donya, dipat mantong Haba Gét nibak Allah jipeusampoe, peue nyang jipeubuet lé ureuëng inong nyoe teuma jipeugah sibagoe keunangan keu inong nyoe." 10 Dan Yudas Iskariot, sidroe lamkawan dua blaih droe murit Isa, jijak ubak Peumimpén Imeum-imeum ngon tujuan keu jikhianat Isa. 11 Awaknyan galak that-that watée jideungoe haba nyan, dan awaknyan jimeujanji teuma jibri péng ubak Yudas. Phon watée nyan Yudas laju jimita keuseumpatan keu jikhianat Isa. 12 Bak uroe keuphon watée Peurayaan Ruti Hana Meuragoe -- bak watée ureuëng teungoh jisie bubiri Paskah -- murit-murit Isa jitanyong ubak Gobnyan, "Dipat nyang Bapak galak mangat kamoe peuhidang peunajoh Paskah keu Bapak?" 13 Isa laju geuyue dua droe ureuëng nibak awaknyan, "Jak kheueh laju u banda, disinan na sidroe ureuëng agam nyang teungoh jiba saboh tima meuasoe ié, ureuëng nyan teuma meurumpok ngon gata. Seutôt kheueh ureuëng nyan 14 u rumoh nyang jitamong dan peugah kheueh ubak ureuëng po rumoh nyan, 'Bapak Gurée geutanyong, dipat teumpat Gobnyan dan murit-murit Geuh keu teumpat geupajoh peunajoh Paskah.' 15 Ureuëng nyan teuma jitunyok ubak gata saboh kama nyang paleng luwah dibagian ateueh. Kama nyan ka teuatoe, leungkab ngon mandum peurabot. Peusiab kheueh mandum bak teumpat nyan keu geutanyoe." 16 Dan bandua droe murit Isa nyan pih laju jijak u banda. Óh troh keunan laju meurumpok banmandum paih that lagée nyang ka geupeugah lé Isa. Dan awaknyan pih laju geupeu siab peunajoh Paskah. 17 Watée ka malam, Isa teuka laju keunan ngon bandua blaih droe murit Geuh. 18 Teungoh awaknyan geuduek sira geumakheun, geupeugah lé Isa, "Deungoe ulôn peugah: Sidroe ureuëng lamkawan gata nyoe, nyang bak saát nyoe na jimakheun meusajan ngon Ulôn jikhianat Ulôn." 19 Ban jideungoe nyan, mandum murit-murit Isa seudeh lumpah na. Dan lé murit-murit Isa nyan laju jitanyong sidroe-droe ubak Gobnyan, "Teuntée bukon ulôn nyang Bapak peugah nyan?" 20 Geujaweueb lé Isa, "Jihnyan na sinoe lamkawan gata nyang dua blaih droe nyoe, nyang pajoh bu saboh pingan ngon Ulôn. 21 Beutôi Aneuëk Manusia teuma maté lagée nyang na teutuléh lam Alkitab. Teuma lumpah that cilaka ureuëng nyang khianat Aneuëk Manusia nyan! Leubeh gét keu ureuëng nyan meunyoe jih hana lahé lam donya nyoe!" 22 Watée awaknyan teungoh geumakheun, Isa laju geucok ruti dan peugah doá syukoe ubak Po teu Allah. Óh lheueh nyan laju geupriek-priek rutinyan ngon jaroe Gobnyan, dan laju geubri ubak mandum murit-murit Gobnyan sira geupeugah, "Cok dan pajoh kheueh, nyoe kheueh tuboh ulôn." 23 Óh lheueh nyan laju geucok saboh ciriek nyang meuasoe ié anggô. Laju geumeudoá syukoe ubak Po teu Allah, dan ciriek nyang meuasoe ié anggô nyan laju geujok ubak murit-murit Geuh. Óh lheueh nyan awaknyan mandum jijieb ié anggô nyan. 24 Óh lheueh nyan Isa geupeugah ubak awaknyan, "Nyoe kheueh darah ulôn nyang teupeusah janji Po teu Allah, darah nyang teurö keu ureuëng ramé. 25 Peucaya kheueh: Ulôn hana lôn jieb lé ié anggô nyoe, sampoe bak watée jih ulôn jieb ié anggô nyang barô meusajan ngon gata lam Donya Barô Bapak Ulôn." 26 Óh lheueh nyan awaknyan laju meunyanyoe saboh ca-e puja ngon pujoe. Dan Óh lheueh nyan awaknyan laju geujak u Bukét Zaiton. 27 Óh lheueh nyan Isa geupeugah ubak awaknyan, "Gata banmandum teuma gata plueng gata tinggai Ulôn. Sabab lam Alkitab na teutuléh lagée nyoe, 'Po teu Allah teuma geupoh maté tukang meurabe Gobnyan, dan kawan bubiri Gobnyan teuma meucrebre saboh sahoe.' 28 Teuma óh ka lheueh ulôn geupeubeudôh lom, teuma lôn jak leubeh awai nibak gata u Galilea." 29 "Hán jeuet," jaweueb Petrus, "Bah kheueh awaknyan banmandum jitinggai Bapak, ulôn hana sagai-sagai lôn tinggai Bapak." 30 "Ingat," geupeugah lé Isa, "bak malam nyoe cit teuma, sigohlom manök jiku-uék dua goe, gata ka lhée goe gata iengkeue keu ulôn." 31 Geujaweueb lé Petrus ngon su nyang pasti, "Bah kheueh ulôn maté meusajan-sajan ngon Bapak, sagai-sagai hana lôn peugah bahwa ulôn hana lôn turi Bapak!" Meunan cit ngon murit-murit nyang laén lagée nyan cit jipeugah. 32 Laju awaknyan troh bak saboh teumpat nyang nan jih taman Getsemani, dan Isa laju geupeugah ubak murit-murit Gobnyan, "Gata duek kheueh disinoe ulôn keuneuk jak meudoá siat." 33 Dan Isa laju geupakat Petrus, Yakobus, dan Yahya jak meusajan ngon gobnyan. Gobnyan ka jipeuphon teuka seudeh apoh apah. 34 "Até Ulôn seudeh lumpah na," kheun Isa ubak awaknyan, "Rasa jih lagée keuneuk maté Ulôn nyoe. Tinggai kheueh disinoe dan meujaga-jaga kheueh!" 35 Isa geujak leubeh jiôh lom laju geudugom bak tanoh sira geumeu doá. Lam doá gobnyan geulakée meunyoe jeuet bék geurasa saát deurita nyan. 36 "Bapak, ôh Bapak," kheun Gobnyan, "Hana sapeuepih nyang mustahe nibak Droeneueh Bapak. Neubot kheueh deurita nyoe nibak Ulôn. Teuma bék kheueh neuseutôt keuheundak Ulôn seulaén keuheundak Droeneueh ôh Bapak." 37 Óh ka lheueh nyan Isa geugisa dan geungieng murit-murit Gobnyan ka habéh teuéh-éh dan teungét banmandum. Laju geupeugah ubak Petrus, "Simon, peu kheueh gata teungét? Ban sijeuem, gata hana hase meujaga-jaga?" 38 Dan Isa laju geupeugah ubak awaknyan, "Meujaga-jaga kheueh, dan meudoá kheueh mangat gata hana gata rasa cubaan nyan. Keubiet beutôi roh gata jipeubuet buet nyang beuna, teuma gata hana hase sabab tabiát manusia nyan leumoh." 39 Sigoe teuk Isa geujak meudoá ngon tutoe haba doá Geuh nyan saban lagée nyang ka lheueh bunoe. 40 Óh lheueh nyan laju geugisa ubak murit-murit Geuh dan geukalon awaknyan mantong teuéh ngon teungét, sabab mata awaknyan teungét that-that. Teuma awaknyan hana jiteupeu peue nyang harôh jipeugah ubak Isa. 41 Watée Isa geuriwang ubak awaknyan nyang keu lhée goe jih, laju geupeugah, "Peu kheueh mantong gata éh dan meureuhat? Kaseb nyan! Watée jih ka troh Aneuëk Manusia jiseurah lam jaroe ureuëng-ureuëng meudesya. 42 Beudôh kheueh, jak geutanyoe tajak. Ngieng! Ureuëng nyang khianat ulôn ka troh jiteuka!" 43 Teungoh Isa mantong geupeugah haba, teuka kheueh Yudas, sidroe lamkawan dua blaih droe murit Geuh nyan. Meusajan-sajan ngon jihnyan teuka cit teuma ureuëng ramé nyang laén sira jiba peudeueng dan banie kayée. Awaknyan jikirém lé peumimpén imeum-imeum, gurée-gurée agama dan peumimpén-peumimpén Yahudi. 44 Yudas nyang khianat nyan ka jibri tanda ubak ureuëng nyang keuneuk drob gobnyan. "Ureuëng nyang ulôn côm eunteuk," nyan kheueh ureuëng jih, "drob Jihnyan dan ba laju Jihnyan deungon teukawai nyang leubeh rapat." 45 Watée Yudas ka troh keunan, jihnyan laju jijak ubak Isa sira jipeugah, "Bapak Gurée!" óh jikheun meunan laju jicôm Isa. 46 Dan di ureuëng-ureuëng nyang jak meusajan ngon Yudas nyan laju jidrob Isa sira jiranté jaroe Gobnyan. 47 Teuma sidroe ureuëng nyang na lamkawan nyan laju jisut peudeueng jih dan ngon peudeueng nyan laju jihayôn ateueh namiet imeum agong sampoe ôn punyueng ureuëng nyan putôh. 48 Dan Isa laju geupeugah ubak awaknyan, "Peu kheueh Ulôn nyoe ureuëng jeuhet, sampoe gata jak keunoe sira gata ba peudeueng ngon banie kayée keu gata drob Ulôn? 49 Tieb-tieb uroe Ulôn na lôn seumeubeuet lam Baét Allah dikeue gata keudroe, dan gata hana tadrob ulôn. Teuma beutôi ka seuharôh jih lagée nyan, mangat teujadi peue nyang ka teutuléh lam Alkitab." 50 Banmandum murit Isa jiplueng jitinggai Gobnyan keudroe disinan. 51 Na sidroe ureuëng muda, nyang jingui siôn ija keungon tob tuboh jih, jiseutôt Isa nibak likot. Ureuëng ramé keuneuk jidrob ureuëng nyan, 52 teuma di ureuëng nyan laju jisuet ija nyang na bak tuboh nyan, dan jiplueng laju ngon badan teulon. 53 Isa laju jiba u rumoh imeum agong. Disinan banmandum peumimpén imeum, peumimpén Yahudi dan gurée-gurée agama ka meusapat. 54 Petrus jiseutôt Isa rot jiôh sampoe jitamong ubak leuen rumoh imeum agong. Nibak teumpat nyan laju jiduek jimeu adeueng bak binéh apui meusajan-sajan ngon sidadu-sidadu peungawai. 55 Peumimpén Imeum-imeum dan banmandum Mahkamah Agama jiuseuha jimita bukeuti-bukeuti keuhai buet nyang salah nyang ka geupeubuet lé Isa mangat jeuet jipeu rhot huköman maté ateueh Gobnyan. Teuma nyang jimita lé awaknyan hana jiteumé meusaboh bukeuti pih. 56 Jai that-that saksi nyang jitawök mangat jeuet jibri keuteurangan peuleusu keuhai Isa, teuma banmandum keusaksian awaknyan meubeda sidroe ngon nyang laén. 57 Dan na padub droe saksi laju jidong dan jipeugah keusaksian peuleusu keuhai Isa, 58 "Na kamoe deungoe jipeugah lé ureuëng nyoe lagée nyoe, 'Ulôn teuma lôn reuloh Baét Allah nyang jipeugét lé manusia nyoe, dan lhée uroe óh lheueh nyan, teuma lôn peudong nyang laén nyang bukon jipeugét lé manusia.' " 59 Teuma peue-peue nyang jisaksi lé ureuëng nyan hana saban keusaksian nyang sidroe ngon nyang laén. 60 Teuma imeum agong laju jidong dikeue awaknyan dan laju jitanyong ubak Isa, "Pakon hana gata jaweueb peue-peue nyang jitudôh nyan keu Gata?" 61 Isa seungab mantong, hana geuseuôt sapeue. Dan imeum agong nyan laju jitanyong sigoe teuk ubak Gobnyan, "Peu kheueh gata Raja nyang ba Seulamat, Aneuëk Po teu Allah Nyang Mahasuci?" 62 "Ulôn kheueh nyan," jaweueb Isa, "dan gata banmandum teuma gata ngieng Aneuëk Manusia geuduek blaih uneuen Allah Nyang Mahakuasa dan geuteuka lam awan nibak langét!" 63 Ban jideungoe lagée nyan imeum agong laju jipriek-priek peukayan gobnyan sira jipeugah, "Hana peureulée lé saksi! 64 Gata banmandum ka gata deungoe tutoe haba jih nyang jihujat Po teu Allah. Jinoenyoe peue keuputosan droeneueh?" Awaknyan banmandum jicok keuputosan bahwa Isa nyan salah, dan patot teuhuköm maté. 65 Dan laju lé na padub droe ureuëng jiludah Isa, dan awaknyan laju jitôb mata Gobnyan sira jipoh gobnyan, óh lheueh nyan laju jipeugah, "Ci peugah, soe nyang poh gata?" Dan ureuëng-ureuëng peungawai nyan pih sajan cit jipoh Isa. 66 Petrus mantong na dileuen rumoh imeum agong nyan, na sidroe inong deundayang imeum agong nyan jijak keunan. 67 Watée jingieng Petrus teungoh meu adeueng bak binéh apui, laju jikalon gét-gét bak muka Petrus dan laju jipeugah, "Gata nyoe kon meusajan ngon Isa ureuëng Nazaret nyan?" 68 Petrus ji-iengkeue ngon jisanggah. "Ulôn hana lôn teupeu dan hana muphom peue nyang gata peugah nyan," kheun Petrus ubak dendayang nyan. Jibeudôh sinan Petrus jijak laju ubak babah pintoe geureubang rumoh imeum agong nyan. Bak watée nyan, manôk pih jiku-uék. 69 Deundayang inong nyan jingieng lom ubak Petrus, dan jipeugah teuma ubak ureuëng-ureuëng nyang na disinan, "Ka beutôi dan hana salah le, jihnyoe na kheueh ureuëng awaknyan!" 70 Petrus teutab ji-iengkeue dan jisanggah lom. Hana treb teuma óh lheueh nyan, ureuëng-ureuëng nyang na disinan jipeugah lom ubak Petrus, "Hana jeuet gata iengkeue lé ka beutôi gata na kheueh ureuëng awaknyan, sabab gata nibak Galilea!" 71 Laju Petrus jimeusumpah-sumpah sira jipeugah, "Ulôn hana lôn turi ureuëng nyang Gata peugah nyan!" 72 Bak watée nyan manôk pih jiku-uék nyang keu dua goe. Dan Petrus teuingat Isa ka lheueh geupeugah ubak gobnyan, "Sigohlom manôk jiku-uék nyang keu dua goe, gata ka lhée goe gata iengkeue keu Ulôn." Teuma Petrus pih laju geumo musök-musök.

Markus 15

1 Ban beungoh that, banmandum Mahkamah Agama, meunan cit Imeum-imeum ulée, peumimpén-peumimpén Yahudi dan gurée-gurée agama bagaih that jimeurok pakat. Awaknyan laju jibeuleunggu Isa Almaseh, dan jiba laju ubak Pilatus. 2 Pilatus laju jitanyong ubak Isa, "Peu kheueh beutôi gata raja ureuëng Yahudi?" "Meunan kheueh kheun gata," jaweueb Isa. 3 Imeum-imeum ulée laju jipeugah ubak Pilatus keuhai buet-buet nyang salah nyang ka geupeubuet lé Isa. 4 Laju jitanyong lom lé Pilatus ubak Isa, "Peu kheueh hana cit gata jaweueb, ci gata peugah? Kalon kheueh, padub na jai jih tudohan nyang awaknyan tudoh ateueh Gata!" 5 Teuma Isa sagai-sagai hana geutem jaweueb le sampoe Pilatus hireuen lumpah na. 6 Tieb-tieb na Peurayaan Paskah, lazem jih Pilatus jipeuleueh sidroe ureuëng huköman meunurot nyang jipiléh lé rakyat. 7 Lam peunjara, lamkawan ureuëng-ureuëng beurontak nyang jipoh maté ureuëng bak watée na karu ka-ak ka-ok, na sidroe ureuëng nyang nan jih Barabas. 8 Ureuëng ramé ka meusapat nibak teumpat nyan dan jilakée laju ubak Pilatus mangat jipeuleueh sidroe ureuëng huköman lagée nyang ka-ka. 9 Laju jitanyong lé Pilatus ubak awaknyan, "Peu kheueh gata tem, jeuet ulôn peuleueh keu gatanyoe raja ureuëng Yahudi nyan keu gata?" 10 Sabab Pilatus jiteupeu bahwa Imeum-imeum ulée nyan jiseurah Isa ubak gobnyan sabab Imeum-imeum nyan bingiek até. 11 Teuma lé Imeum-imeum ulée laju jipiteunah ureuëng ramé mangat Pilatus jipeuleueh Barabas keu awaknyan. 12 Teuma jipeugah lom lé Pilatus ubak ureuëng ramé nyan, "Meunyoe meunan, peue nyang harôh lôn peusaneut ateueh ureuëng nyang gata peugah raja ureuëng Yahudi nyan?" 13 Sira jikuk-kuk ureuëng ramé nyan jipeugah, "Saleb laju ureuëng nyan!" 14 "Teuma peue nyang ka jipeubuet nyang salah lé Ureuëng nyoe?" jitanyong lé Pilatus bak ureuëng ramé nyan. Laju awaknyan jikuk-kuk nyang leubeh teuga lom, "Saleb laju ureuëng nyan!" 15 Pilatus keuneuk peumangat até ureuëng ramé nyan, teuma laju jipeuleueh Barabas keu awaknyan. Óh lheueh nyan jiyue laju bak ureuëng laén mangat jiseunuét Isa, laju jijok keu jisaleb. 16 Isa laju jiba lé sidadu-sidadu ubak kantô peungadelan nibak meuligoe gubunur. Óh lheueh nyan banmandum pasokan jiyue meugumpôi. 17 Óh lheueh nyan lé awak nyan laju jipeungui bajée jubah ungu keu Isa, dan jipeugét mahkota nibak ranteng-ranteng nyang meuduro, óh lheueh nyan laju jipeuseuôn bak ulée Isa. 18 Óh ka lheueh nyan awaknyan laju jibri saleuem ubak Gobnyan, "Delat Po Raja ureuëng Yahudi!" 19 Ulée Isa laju jiseukok ngon tungkat, óh lheueh nyan laju jiludah Gobnyan dan jiseumah sujut dikeue Gobnyan. 20 Óh ka lheueh jihina Isa lagée nyan, bajée jubah ungu nyan laju jisuet lé awaknyan dan jipeusok laju bajée Gobnyan keudroe. Óh lheueh nyan laju jiba Isa uluwa keu jijak saleb. 21 Bak teungoh rot ueh awaknyan jipaksa bak sidroe ureuëng jiyue gulam saleb Isa. Ureuëng nyan ban teuka nibak gampông keuneuk jak u banda. (Nan ureuëng nyan Simon, -- asai jih di Kirene -- ayah nibak Alexander dan Rufus.) 22 Isa laju jiba ubak teumpat nyang nan jih Golgota, makna jih, "Teumpat bruek ulée". 23 Bak teumpat nyan awaknyan jikeuneuk bri ubak Gobnyan ié anggô nyang ka meujampu ngon mur, teuma Isa hana geutem jieb ié anggô nyan. 24 Óh lheueh nyan awaknyan laju jisaleb Isa, dan peukayan Gobnyan laju jibagi-bagi ngon cara ji-undi mangat teuteupeu jeumba maséng-maséng awaknyan. 25 Watée ji saleb Isa nyan poh sikureueng beungoh. 26 Bak pucak saleb nyan jituléh ngon tulésan keuhai peu nyang jitudôh keu Isa nyan, su jih na kheueh lagée nyoe: "Raja Ureuëng Yahudi". 27 Meusigoe ngon Isa na teuma awaknyan saleb dua droe ureuëng peurampok; sidroe blaih uneuen dan sidroe teuk blaih wie Gobnyan. 28 Deungon na lagée nyan ka jeuet kheueh lagée na teutuléh lam Alkitab; na kheueh: "Gobnyan jianggab saban lagée ureuëng-ureuëng jeuhet." 29 Ureuëng-ureuëng nyang na jijak rot nyan jiasek-asek ulée sira jihina Isa. Jipeugah lé awaknyan lagée nyoe, "Hei, kah nyang keuneuk reuloh Baét Allah dan kahpeudong teuma lam timpo lhée uroe. 30 Ci kah tron ateueh saleb nyan dan laju kahjak peuseulamat droe!" 31 Meunan cit deungon imeum-imeum ulée dan gurée-gurée agama jihina Isa. Awaknyan jimarit sabe keudroe-droe, "Jihnyan jipeuseulamat ureuëng laén, teuma droe jih keudroe hana hase jipeuseulamat! 32 Meunyoe jihnyan raja Israel, Raja nyang ba Seulamat, bah kheueh jihnyan jinoe jitron nibak saleb nyan, mangat kamoe ngieng dan kamoe patéh keu jihnyan!" Ureuëng-ureuëng nyang saleb meusajan ngon Isa nyan pih jihina Gobnyan. 33 Watée cot uroe timang, bansaboh nanggroe nyan ka seupôt hán deuh sapeue. 34 Dan óh ka troh poh lhée seupôt, Isa geuklik sira geudumpék ngon su nyang teuga, "Eloi, Eloi, lama sabakhtani?" Nyang makna jih, "Allah Po, Allah Po, pakon Droeneueh neutinggai Lôn?" 35 Na padub droe ureuëng nyang na disinan jideungoe su geuklik nyan, dan laju jipeugah, "Deungoe kheueh nyan, Ureuëng nyan teungoh jihôi Elia!" 36 Sidroe ureuëng lam kawan awaknyan bagaih that jijak cok bungöng kareueng, bungöng kareueng nyan jipeunom laju lam ié anggô masam. Óh lheueh nyan bungöng kareueng nyan laju jilat bak ujong reunong, dan jisunyueng laju bak bibi Isa, sira jipeugah lagée nyoe, "Preh ilée, bah tangieng peu kheueh Elia teuka jijak peutron Jihnyan bak kayée saleb nyan." 37 Óh lheueh nyan Isa geuklik lom, dan Gobnyan pih meuninggai donya. 38 Ija tirée nyang na meugantung bak Baét Allah teupriek dua phon di ateueh sampoe u miyueb. 39 Panglima nyang na jidong dikeue saleb nyan, deuh jikalon pakriban Isa meuninggai. Dan laju jipeugah lé panglima nyan lagée nyoe, "Biet-biet that ureuëng nyoe na kheueh Aneuëk Allah!" 40 Disinan na cit padub droe ureuëng inong nyang na jikalon peue nyang ka teujadi nyan nibak jiôh. Lamkawan inong nyan na Salome, Maryam Magdalena, dan Maryam mak Yakobus nyang muda dan Yoses. 41 Awaknyan kheueh ureuëng-ureuëng nyang seutôt dan nyang tulông Isa watée Gobnyan na di Galilea. Dan jai that mantong ureuëng-ureuëng inong nyang laén nyang na bak teumpat nyan nyang ka teuka u Yerusalem meusajan-sajan ngon Isa. 42 Uroe karab malam watée Yusuf nibak Arimatea teuka. Ureuëng nyan anggota Mahkamah Agama nyang jihoreumat le gob. Dan Gobnyan pih teungoh geupreh-preh pajan masa jih Po teu Allah geupeu phon mat peurintah sibagoe Raja. Uroe nyan na kheueh uroe peusiab-siab (na kheueh uroe sigohlom uroe Sabat) Sabab nyan ngon hana teumakot Yusuf laju geujak meuhadab ubak Pilatus dan laju geulakée manyét Isa. 44 Pilatus hireuen that watée jideungoe bahwa Isa ka meuninggai donya. Jadi gobnyan laju geuyue ubak ureuëng laén mangat jijak hôi keumandan pasokan dan jitanyong ubak ureuëng nyan peu kheueh Isa ka treb meuninggai donya. 45 Óh ka lheueh jideungoe peue nyang ka jilapor lé keumandan pasokan nyan, barô kheueh jibri lé Pilatus mangat Yusuf geujakcok manyét Isa nyan. 46 Dan Yusuf pih laju geubloe ija lineun nyang haloh keu ija kapan dan óh ka lheueh geupeutron manyét Isa, laju geubalot ngon ija nyan. Óh lheueh nyan gobnyan laju geukeubah manyét nyan lam saboh kubu nyang geupeugét lam bukét batée. Óh lheueh nyan laju geugule sineuk batée nyang rayeuk keu ngon tôb babah pintoe kubu nyan. 47 Maryam Magdalena dan Maryam mak si Yoses geukalon pat Isa jipeukubu.

Markus 16

1 Watée uroe Sabat ka seuleusoe, Maryam Magdalena, Maryam mak Yakobus dan Salome geujak bloe meubagoe jeunéh reumpah-reumpah keu geuboh minyéuk ateueh manyét Isa. 2 Ban seuboh buta watée mata uroe ka jiteubiet, uroe nyang keuphon aleuhat nyan, awaknyan laju jijak ubak kubu Isa. 3 Bak teungoh rot ueh awaknyan jimarit sabe keudroe-droe, "Soe kheueh nyang tem tulông tanyoe mangat jeuet batée nyang teutôb pintoe kubu Isa nyan hase teupeusée?" Sabab batée nyan rayeuk lumpah na. Teuma watée awaknyan ka troh keunan laju jingieng batée nyan ka meugule. 5 Dan awaknyan pih laju jitamong lam kubu nyan. Lam kubu nyan, blaih uneuen, deuh awaknyan kalon sidroe ureuëng muda nyang geungui bajée jubah putéh teungoh geuduek disinan, dan awaknyan teukeujot lumpah na. 6 Ureuëng muda nyan geupeugah lagée nyoe, "Bék teumakot! Ulôn lôn teupeu gatanyoe tajak mita Isa ureuëng Nazaret nyang ka maté teusaleb nyan. Gobnyan hana disinoe. Gobnyan ka geubeudôh! Ngieng kheueh, nyoe teumpat awaknyan peuéh Gobnyan. 7 Jinoenyoe jak laju, dan peutroh kheueh haba nyoe ubak murit-murit Gobnyan, meunan cit ubak Petrus, peugah lagée nyoe, 'Gobnyan geujak leubeh awai nibak gata u Galilea. Disideh gata teuma gata ngieng gobnyan, lagée nyang ka lheueh geupeugah ubak gata.' " 8 Ban jideungoe habanyan awaknyan laju jiteubiet lam kubu nyan dan laju jiplueng sabab teukeujot dan teumakot. Awaknyan hana jipeugah sahoe hai nyan sabab teumakot. 9 Ureuëng-ureuëng inong nyan laju jijak ubak Petrus dan rakan-rakan gobnyan, laju jipeugah ngon singkat banmandum nyang ka geupeugah ubak awaknyan lé ureuëng muda nyan. 10 Óh ka lheueh nyan, Isa keudroe rot murit-murit gobnyan geujak peusampoe phon di timu sampoe u barat haba nyang suci dan abadi keuhai keuseulamatan nyang keukai. 11 Teuma watée awaknyan deungoe bahwa Isa ka udeb, dan bahwa Maryam ka lheueh geukalon Gobnyan awaknyan hana peucaya. 12 Óh lheueh nyan Isa laju geupeuleumah droe ubak dua droe murit Gobnyan deungon cara nyang laén. Nyan teujadi watée ban dua droe ureuëng nyan teungoh jijak bak saboh gampông. 13 Teuma awaknyan laju jigisa dan jijak peugah laju ubak rakan-rakan geuh nyang laén. Teuma di rakan-rakan nyang laén nyan teutab hana jipatéh. 14 Akhé jih, Isa geupeuleumah droe ubak ban siblaih droe murit Gobnyan, bak watée awaknyan teungoh jimakheun. Isa geusapa awaknyan sabab awaknyan kureueng iman lom kreueh that ulée sampoe hana jipatéh ubak ureuëng-ureuëng nyang ka lheueh jikalon keudroe bahwa Isa udeb. 15 Dan laju Isa geupeugah ubak awaknyan, "Gata jak kheueh laju bansigom donya dan peusampoe kheueh Haba Gét nibak Allah nyan keu banmandum umat manusia. 16 Ureuëng nyang hana peucaya teuma teuhuköm. Teuma ureuëng nyang peucaya dan teupumanö, ureuëng nyan teuma seulamat. 17 Sibagoe bukeuti bahwa awaknyan jipeucaya, gata teuma ta use bubena roh jeuhet ateueh nan Ulôn; awaknyan jimeututoe lam basa-basa nyang hana awaknyan teupeu. 18 Meunyoe awaknyan jimat uleue atawa ji jieb ié tuba, ateueh awaknyan hana keunong bala. Meunyoe awaknyan jikeubah jaroe ateueh ureuëng-ureuëng sakét, ureuëng nyang sakét nyan teuma puléh." 19 Óh ka seuleusoe Isa geupeugah haba ngon awaknyan, Gobnyan laju teubeuôt u syeuruga. Disideh gobnyan geumat peurintah meusajan ngon Po teu Allah. 20 Teuma le murit-murit Gobnyan laju jijak peusampoe haba seulamat nyang teuka nibak Po teu Allah nyan ho-ho mantong. Dan Tuhan pih geumubuet meusajan-sajan ngon awaknyan dan geubri bukeuti keuhai buet-buet nyang ajaéb bahwa peue-peue nyang awaknyan peusampoe nyan na kheueh beutôi.

Lukas 1

1 Teofilus nyang jroh até, jai that-that ureuëng ka jiuseuha jiteumuléh ngon teuatoe keuhai peuristiwa-peuristiwa nyang ka teujadi di teungoh-teungoh geutanyoe. 2 Awaknyan jiteumuléh sisuai ngon peue nyang ka jicalitra ubak geutanyoe lé ureuëng-ureuëng nyang geukalon keudroe peuristiwa-peuristiwa nyan nibak awaiphon, dan óh lheueh nyan jipeutabu haba nyan. 3 Óh ka lheueh ulôn tilek ngon até-até that banmandum nyan phon nibak awai, laju lôn cok keusimpulan gét that-that meunyoe ulôn tuléh saboh laporan nyang teuatoe keu Amphon. 4 Banmandum nyang ulôn peubuet nyan, mangat droeneueh neuteupeue bahwa peue nyang ka teupeurunoe ubak Amphon keubiet beutôi. 5 Watée Herodes jeuet keu raja di nanggroe Yudea, na sidroe imeum nyang nan gobnyan Nabi Zakharia, gobnyan jitamong lam golongan imeum-imeum Abia. Peurumoh gobnyan nan geuh Elizabet, nyan pih keuturonan imeum. 6 Cara udeb dua lakoe binoenyan galak that-that até Allah. Mandua awaknyan geutaát that ubak peurintah dan huköm Tuhan deungon sipeunoh até. 7 Awaknyan hana meu aneuëk sabab Elizabet peurumoh gobnyan balui dan mandua awaknyan ka tuha-tuha. 8 Bak siuroe, watée golongan Abia keunong gileran, Nabi Zakharia laju geupeubuet tugaih gobnyan sibagoe Imeum dikeue Po teu Allah. 9 Deungon teu-undi, nyang ka kayém geupeubuet lé imeum-imeum, Nabi Zakharia jitunyok keu geutamong lam Baét Tuhan óh troh keunan laju geutot keumeunyan. 10 Teungoh upacara teutot keumeunyan nyan geupeubuet, ureuëng ramé meudoá diluwa. 11 Bak watée nyan malaikat Tuhan geupeuleumah droe ubak Nabi Zakharia. Malaikat nyan geudong blaih uneuen meuja teumpat teutot keumeunyan. 12 Watée geungieng lé Nabi Zakharia malaikat nyan, gobnyan jiteuka bingong deungon teumakot. 13 Teuma lé malaikat nyan laju geupeugah lagée nyoe, "Bék teumakot, hei Zakharia! Allah ka geudeungoe doá gata. Peurumoh gata Elizabet teuma jipeulahé sidroe aneuëk agam. Dan harôh gata boh nan Yahya keu aneuëk nyan. 14 Gata teuma jeuet keu ureuëng nyang lumpah galak deungon lahé aneuëk nyan dan di ureuëng ramé teuma harok ngon meusukaria meunyoe aneuëk nyan ka lahé teuma! 15 Jihnyan teuma jeuet keu ureuëng rayeuk meunurot pandangan Tuhan, dan jihnyan hana jijieb ié anggô atawa ié kreueh. Ban lahé jihnyan ka geukuasa lé Roh Allah. 16 Dan jai lumpah na ureuëng Israel teuma geubimbéng lom ubak Po teu Allah, Tuhan awaknyan. 17 Gobnyan teuma jeuet keu utosan Tuhan nyang teuga dan meukuasa lagée Nabi Ilyas. Gobnyan teuma geuba damé lagée ayah ngon aneuëk gobnyan, dan ureuëng nyang hana taát ubak pimpénan jih jiwoe lom teuma ubak pikeran nyang beutôi. Deungon lagée nyan jihnyan ka jikeubah saboh umat nyang ka siab keu Tuhan." 18 "Pakriban ulôn teupeu bahwa hainyan teuma teujadi?" geutanyong lé Nabi Zakharia ubak malaikat nyan. "Ulôn ka tuha, meunan cit ngon peurumoh lôn ka tuha." 19 Geujaweueb lé malaikat nyan lagée nyoe, "Ulôn nyoe Jiebrail. Ulôn layani Po teu Allah dan Gobnyan kheueh nyang yue ulôn keu lôn jak peusampoe haba gét nyoe ubak gata. 20 Peue nyang ulôn peugah nyoe, teuma teujadi óh trok bak watée. Teuma sabab gata hana tapatéh, gata singoh hana jeuet gata peugah haba; gata teuma jeuet keu ureuëng kalu sampoe ubak peue nyang ka ulôn peugah teujadi." 21 Teungoh lam keuadaan lagée nyan, di ureuëng ramé nyang ka teupreh-preh Nabi Zakharia. Awaknyan hireuen pakon treb lagoena gobnyan lam Baét Tuhan. 22 Dan bak watée gobnyan ka geuteubiet uluwa, gobnyan hana jeuet le geumariet ngon awaknyan. Dan gobnyan laju geubri isyarat ngon jaroe geuh, dan gobnyan teutab kalu. Dan di ureuëng ramé pih jiteupeue bahwa gobnyan ka geungieng sapeue-sapeue nyang deuh teukalon didalam Baét Tuhan. 23 Óh ka habéh masa tugaih gobnyan di Baét Tuhan, Nabi Zakharia laju geuwoe u rumoh droe. 24 Hana padubna treb teuma óh lheueh nyan, Elizabet, peurumoh geuhnyan pih laju mume, dan laju geukurong droe lam rumoh nyang treb jih na limong buleuen. 25 Gobnyan laju geupeugah, "Akhé jih Tuhan geutulông ulôn dan geusampôh banmandum keuhinaan nyang na nibak ulôn." 26 Watée Elizabet ka mume nam buleuen, Allah laju geuyue ubak malaikat Jiebrail jeuet geujak u Nazaret, saboh banda di daerah Galilea. 27 Malaikat Jiebrail nyan geu-utus ubak sidroe aneuëk dara, nyang nan geuh Maryam. Maryam nyan ka meutunangan ngon sidroe ureuëng agam nyang nan jih Yusuf, keuturonan Raja Nabi Daud. 28 Malaikat nyan laju geujak ubak Maryam sira geupeugah lagée nyoe, "Assalamuálaikum, gata nyang geubri beureukat lé Tuhan seucara istimewa! Tuhan na meusajan ngon gata!" 29 Ban geudeungoe su malaikat nyan Maryam teukeujot that, sampoe-sampoe laju jiteumanyong lam até geuh peue meukeusut saleuem nyan. 30 Teuma lé malaikat nyan laju geupeugah ubak gobnyan, "Bék teumakot, hei Maryam. Sabab gata meukeunong bak até Allah. 31 Gata teuma mume dan gata peulahé sidroe aneuëk, nyang museuti gata boh nan Isa. 32 Gobnyan jeuet keu agong dan teupeugah Aneuëk Allah Nyang Mahamanyang. Tuhan Allah nyang peujeuet gobnyan raja lagée Raja Nabi Daud, indatu gobnyan. 33 Dan gobnyan geumat peurintah sibagoe raja ateueh keuturonan Nabi Yakub siumu masa. Keurajeuen gobnyan hana meu akhé." 34 "Teuma ulôn nyoe mantong peurawan," kheun Maryam ubak malaikat nyan, "pakriban hainyan hase teujadi?" 35 Geujaweueb lé malaikat nyan, "Roh Allah teuma teuka ubak gata, dan kuasa Allah teuma peunoh jiseuleubong ateueh gata. Nyang kheueh sabab jih aneuëk nyang teuma lahé nyan teupeugah Suci, Aneuëk Allah. 36 Ingat: Elizabet, syedara gata nyan ka mume nam buleuen, bah kheueh jihnyan ka tuha dan jikheun lé gob bahwa jihnyan balui. 37 Sabab nibak Po teu Allah hana nyang mustahe." 38 Dan lé Maryam laju geupeugah, "Ulôn nyoe hamba Tuhan; bah kheueh teujadi ateueh ulôn lagée nyang droeneueh peugah." Dan óh lheueh nyan malaikat nyan laju geujak geutinggai Maryam disinan sidroe. 39 Reujang that óh lheueh nyan, Maryam laju geujak ubak saboh banda nyang na di Yudea bak daerah nyang meugunong-gunong. 40 Gobnyan laju geujak u rumoh Nabi Zakharia, dan watée geutamong laju geubri saleuem ubak Elizabet. 41 Dan meunan geudeungoe lé Elizabet Maryam geubri saleuem, aneuëk nyang na lam pluet Elizabet nyan mumet-met. Teuma Elizabet laju jikuasa lé Roh Allah, 42 óh lheuehnyan laju geumeuhôi, "Droeneueh kheueh nyang paleng geubri beureukat lé Po nibak mandum ureuëng inong nyang laén! Geubri beureukat aneuëk nyang droeneueh peulahé nyan! 43 Soe ulôn nyoe sampoe-sampoe mak Tuhan geujak ubak ulôn? 44 Meunan ulôn deungoe saleuem droeneueh, aneuëk nyang na lam pluet ulôn mumet-met galak lumpah na. 45 Mubahgia kheueh droeneueh, sabab peucaya peue nyang geupeugah lé Tuhan ubak droeneueh nyan teuma teujadi!" 46 Geupeugah lé Maryam, "Até ulôn lôn pujoe Tuhan, 47 dan jiwa ulôn meusukaria sabab Allah nyang Peuseulamat lôn. 48 Gobnyan geuingat ulôn, namiet Gobnyan nyang hina! Phon watée nyoe banmandum bansa geupeugah ulôn mubahgia. 49 Kareuna Allah Nyang Mahakuasa ka geupeubuet hai-hai nyang rayeuk ateueh ulôn. Sukacita nan jih. 50 Keuturonan deumi keuturonan Tuhan geubri gaséh ngon sayang keu ureuëng nyang teumakot ubak Gobnyan. 51 Ngon jaroe Gobnyan nyang kuköh dan teuga gobnyan geupeucrebre ureuëng sombong, dan geupeucawa-cawe reuncana awaknyan. 52 Raja-raja laju geupeutron nibak takhta dan ureuëng hina geupumulia. 53 Ureuëng nyang deuk geupeutroe ngon peue-peue mantong nyang jroh, ureuëng kaya geu-use ngon jaroe hampa. 54 Gobnyan geutulông Israel hamba Gobnyan, lagée janji nyang ka lheueh geupeugét ngon indatu geutanyoe. 55 Tuhan hana tuwoe ubak peue-peue nyang ka geupeujanji, gobnyan meumurah até ubak Nabi Ibrahim dan keuturonan Gobnyan sampoe siumu masa." 56 Nibak keunira na lhée buleuen treb jih Maryam tinggai ngon Elizabet, óh lheueh nyan barô kheueh geuwoe u rumoh geuh keudroe. 57 Troh kheueh watée jih nibak Elizabet keu geupeu lahé aneuëk. Gobnyan laju geupeu lahé sidroe aneuëk agam. 58 Waréh lingka gobnyan dan waréh kawöm geuh laju jipeugah padubna gét jih Tuhan keu Elizabet, dan awaknyan pih meusajan-sajan ngon Elizabet meugeumbira ngon harok até. 59 Watée aneuëk manyak nyan ka meu-umu lapan uroe, awaknyan laju jiteuka keuneuk jak peusunat gobnyan. Awaknyan jikeuneuk boh nan aneuëk manyak nyan Zakharia meunurot nan ayah aneuëk nyan, 60 teuma lé ma aneuëk nyan laju geupeugah lagée nyoe, "Hán jeuet! Aneuëk nyoe harôh teubôh nan Yahya." 61 "Hana meusidroe pih nyang na lam waréh kawöm geuh nyan nyang na nan lagée nyan," kheun awaknyan ubak gobnyan. 62 Dan deungon isyarat, awaknyan laju jitanyong ubak Nabi Zakharia peue nan nyang harôh teubôh keu aneuëk geuh nyan. 63 Nabi Zakharia laju geulakée saboh batée tuléh óh lheueh nyan laju geutuléh, "Nan aneuëk nyoe Yahya." Awaknyan banmandum hireuen. 64 Bak watée nyan cit teuma Nabi Zakharia ka jeuet geupeugah haba dan laju geupujoe Po teu Allah. 65 Kawöm silingka gobnyan banmandum teumakot, dan haba nyan laju meuluwah troh bansaboh daerah gunong-gunong Yudea. 66 Banmandum ureuëng deungoe hainyan jiteumanyong lam até, "Keupeue kheueh jeuet jih aneuëk nyan singoh?" Sabab Tuhan meusajan ngon gobnyan. 67 Nabi Zakharia, ayah aneuëk nyang ban lahé nyan, laju jikuasa lé Roh Allah sampoe gobnyan geujak peutroh peusan nibak Tuhan. Laju geupeugah lagée nyoe, 68 "Jak geutanyoe tapujoe Tuhan, Allah bansa Israel! Gobnyan ka troh geuteuka geujak tulông umat Geuh dan geupeu beubaih awaknyan. 69 Gobnyan geubri keu geutanyoe nyang bri seulamat nyang peukasa, keuturonan Nabi Daud hamba Gobnyan. 70 Yoh watée ilée rot Nabi-nabi nyang geupiléh lé Gobnyan, Tuhan ka geubri janji Geuh keudroe 71 keu teupeuseulamat geutanyoe nibak musoh tanyoe dan nibak kuasa ureuëng-ureuëng nyang banci keu geutanyoe. 72 Keu geupeudeuh murah até Gobnyan ubak indatu tanyoe, janji Gobnyan nyang suci nyan geupeutrok teuma. 73 Gobnyan geumeubudôk ubak Nabi Ibrahim bapak geutanyoe, dan geumeujanji keu geupeu seulamat tanyoe nibak musoh geutanyoe, mangat geutanyoe hana teumakot tapeutimang Gobnyan 75 sabe peuhamba droe ubak Gobnyan dan tapeumangat até Gobnyan sipanyang udeb geutanyoe. 76 Gata, hei aneuëk ulôn, teuma teupeugah Nabi Allah Nyang Mahamanyang. Gata geu-utus leubeh awai nibak Tuhan keu teurintéh rot ueh keu Gobnyan, 77 keu teupeusampoe ubak umat Gobnyan bahwa awaknyan teuma teupeuseulamat bubena, meunyoe Po teu Allah ka geupeu amphon bubena desya awaknyan. 78 Tuhan geutanyoe murah that até lom na gaséh sayang; guna teupeuseulamat geutanyoe Gobnyan tateuka. Lagée mata uroe jiteubiet óh watée beungoh, 79 meunan kheueh Gobnyan geubri trang geuhnyan ubak mandum manusia nyang udeb lam seupôt lom teumakot raya. Gobnyan geubimbéng geutanyoe ubak rot ueh nyang teutuju bak keudaméan." 80 Aneuëk Nabi Zakharia nyan treb bak treb meutamah rayeuk dan meutamah teuga roh Gobnyan. Gobnyan tinggai lam padang pasi, sampoe watée jih Gobnyan geupeugah soe droe geuh ubak bansa Israel.

Lukas 2

1 Bak watée nyan Kaisar Agustus geupeutron titah mangat banmandum wareuga neugahra keurajeuen Roma teudafeutar droe keu teuseunsus. 2 Seunsus nyang phon that nyoe teupeuna watée Kirenius jeuet keu gubunur nanggroe Siria. 3 Banmandum ureuëng bak watée nyan jijak dafeutar droe nibak banda jih maséng-maséng. 4 Yusuf pih laju geujak nibak Nazaret u Galilea, u Betlehem di Yudea, teumpat lahé Raja Nabi Daud; sabab Yusuf keuturonan Nabi Daud. 5 Yusuf geudafeutar droe meusigoe ngon Maryam tunangan geuh nyan, nyang teungoh mume. 6 Watée awaknyan ka troh u Betlehem teuka kheueh watée jih nibak Maryam keuneuk geupeu lahé aneuëk. 7 Laju geupeu lahé sidroe aneuëk agam, aneuëk Gobnyan nyang tuha. Aneuëk nyan laju geubalot ngon ija tumpée, dan geukeubah laju lam palong nyang meuasoe jeurami; sabab awaknyan hana meuteumé teumpat mudom. 8 Bak malam nyan na ureuëng-ureuëng meurabe nyang teungoh jirabe beulatang jih lam blang naleueng nyang na di daerah nyan. 9 Hana teusangka-sangka malaikat Tuhan laju geupeuleumah droe ubak awaknyan, dan cahya trang nyang teuka nibak Tuhan laju teupanca ateueh awaknyan sampoe-sampoe awaknyan ka peungéh ngon trang, dan awaknyan lumpah teumakot. 10 Teuma laju geupeugah lé malaikat nyan, "Bék teumakot! Sabab ulôn nyoe lôn teuka keuneuk jakba haba gét keu gata -- haba nyang lumpah mangat até keu mandum manusia. 11 Uroenyoe, di banda Nabi Daud ka lahé sidroe Raja nyang peuseulamat gata na kheueh Almaseh, Tuhan. 12 Nyoe kheueh tanda jih: Gata teuma meurumpok ngon sidroe aneuëk manyak nyang teubalot ngon ija tumpée, dan teuéh lam saboh palong." 13 Ngon hana teusangka-sangka malaikat nyan meusajan ngon malaikat laén, nyang geupujoe Allah. Awaknyan jipeugah, 14 "Teupujoe kheueh Allah di langét nyang paleng manyang! Dan di ateueh bumoe, seujahteura kheueh manusia nyang peugalak até Tuhan!" 15 Óh ka lheueh malaikat-malaikat geutinggai awaknyan dan geuwoe lam syeuruga, ureuëng-ureuëng meurabe nyan laju jimarit sabe keudroe-droe, "Jak tajak u Betlehem dan takalon peue nyang ka teujadi nyan. Nyang ka geubri tée lé Tuhan keu geutanyoe." 16 Awaknyan laju jijak, óh troh keunan laju meurumpok ngon Maryam dan Yusuf, meunan cit aneuëk manyak nyang teungoh teu éh lam palong. 17 Watée jingieng lé ureuëng meurabe nyan aneuëk manyak nyan, awaknyan laju jicalitra peue nyang ka geupeugah lé malaikat keuhai aneuëk manyak nyan. 18 Dan mandum ureuëng hireuen peue nyang ka jipeugah lé ureuëng meurabe nyan. 19 Teuma Maryam geukeubah banmandum nyan lam até geuh dan geupike ngon teumanueng banmandum nyang teujadi nyan. 20 Ureuëng-ureuëng meurabe nyan laju jigisa u blang naleueng sira jipujoe dan jipeumulia Po teu Allah, sabab banmandum nyang ka lheueh awaknyan deungoe dan awaknyan kalon, paih that lagée nyang geupeugah lé malaikat. 21 Óh watée aneuëk manyak nyan ka meu-umu lapan uroe, laju teupeusunat. Dan awaknyan laju geuboh nan gobnyan Isa, nan nyang geubri lé malaikat ubak gobnyan sigohlom gobnyan mume lam pruet ma geuh. 22 Troh kheueh watée jih Yusuf ngon Maryam geupeuna adat peusuci meunurot huköm Nabi Musa. Dan awaknyan geuba aneuëk manyak nyan u Yerusalem keu geujak peujok ubak Tuhan. 23 Sabab na teutuléh lam huköm Tuhan nyang su jih lagée nyoe, "Tieb-tieb aneuëk agam nyang tuha, aneuëk nyan harôh teujok ubak Tuhan." 24 Meunan cit awaknyan kana meukeusut keuneuk geupeu seumah keureubeuen, na kheueh sipasang cicém teukukur atawa dua boh cicém mirah pati nyang mantong muda, lagée nyang ka teupeuteuntée lam Huköm Tuhan. 25 Bak watée nyan di Yerusalem na sidroe ureuëng nyang nan jih Simeon. Jihnyan ureuëng gét, nyang teumakot keu Po teu Allah dan teungoh jipreh-preh watée jih Allah geupeuseulamat Israel. Roh Allah na meusajan gobnyan, 26 dan Roh Allah ka lheueh geubri tée ubak gobnyan bahwa gobnyan hana maté sigohlom geukalon Raja Peuseulamat nyang ka geupeu janji lé Tuhan. 27 Deungon geubimbéng lé Roh Allah, Simeon laju geutamong lam Baét Tuhan. Bak watée nyan Yusuf dan Maryam laju geupeutamong Isa nyang mantong ubit nyan keu teupeubuet upacara lagée nyang ka jipeurintah lé huköm agama. 28 Teuma lé Simeon laju geucok aneuëk manyak nyan dan laju geutiengkue, óh lheueh nyan laju geupujoe Po teu Allah, 29 "Jinoenyoe, ya Tuhan, droeneueh ka neupeutroh janji. Bah kheueh namiet Droeneueh nyoe meuninggai deungon aman. 30 Sabab ngon mata ulée lôn keudroe ka lheueh ulôn kalon Peuseulamat na kheueh nyang teuka nibak Droeneueh. 31 Peuseulamat nyan ka Droeneueh keubah keu banmandum bansa: 32 Lagée peungéh nyang trang nyang teupeudeuh rot ueh keu bansa-bansa laén, keu teujak ubak Droeneueh; na kheueh trang nyang teupeuteuka keuhoreumatan keu umat Droeneueh Israel." 33 Ayah ngon ma aneuëk nyan hireuen that watée geudeungoe peue nyang jipeugah lé Simeon keuhai aneuëk gobnyan. 34 Simeon laju geubri beureukat keu awaknyan sira geupeugah ubak Maryam, ma aneuëk nyan, "Aneuëk nyoe ka geupiléh lé Po teu Allah keu geupeu hanco dan geupeu seulamat jai that ureuëng Israel. Gobnyan jeuet keutanda nibak Po teu Allah, nyang hana jitueng lé ureuëng ramé, 35 dan deungon na lagée nyan teubuka kheueh peue nyang na teukandong lam até awaknyan. Seudeh ngon pilu teuma jitôb-tôb lam até gata lagée mata peudeueng nyang tajam." 36 Na teuma sidroe nabi inong nyang ka tuha lumpah na. Nan nabi nyan Hana, binti Fanuel, asai nibak sukée Asyer. Óh ka lheueh tujoh thon geumeukawen, 37 Hana ka jeuet keu inong balée sabab ka meucre ngon lakoe geuh, jinoenyoe meu-umu lapan ploh peuet thon. Hántom na geutinggai Baét Tuhan. Uroe ngon malam gobnyan meuiébadat keu Po teu Allah nibak teumpat nyan ngon cara geumeudoá dan puasa. 38 Paih bak watée nyan gobnyan pih teuka, laju geupujoe Po teu Allah dan geumeututoe keuhai aneuëk nyan ubak banmandum ureuëng nyang ka teupreh-preh watée Allah geupeu meurdehka Yerusalem. 39 Óh ka lheueh geupeubuet banmandum Huköm Tuhan lé Yusuf dan Maryam, awaknyan laju geuwoe u Nazaret di Galilea. 40 Aneuëk nyan meutamah rayeuk dan teuga. Gobnyan lumpah bijaksana dan that-that geugaséh lé Po teu Allah. 41 Tieb-tieb thon ureuëng syiek Isa geujak u Yerusalem keu geujak peuraya Uroe Raya Paskah. 42 Dan watée Isa ka meu-umu dua blaih thon, awaknyan geujak ubak teumpat peurayaan nyan sisuai lagée nyang ka-ka. 43 Óh ka lheueh peurayaan nyan awaknyan laju geuwoe, teuma Isa, Aneuëk geuhnyan, mantong tinggai di Yerusalem, lé ayah ngon ma Geuh hana geuteupeue. 44 Awaknyan geupike Isa na rhoh lamkawan. Óh ka lheueh geujak siuroe seupôt baroe kheueh geumita Gobnyan lamkawan waréh kawöm atawa rakan-rakan geuh nyang laén. 45 Teuma nyang geumita nyan hana meuteumé, dan awaknyan laju geugisa u Yerusalem keu geujak mita Gobnyan. 46 Óh ka lheueh na lhée uroe geumita-mita, laju meurumpok ngon Gobnyan lam Baét Tuhan. Gobnyan teungoh geuduek sira geudeungoe gurée-gurée agama seumeubeuet dan geumeuseu-eue jaweueb. 47 Banmandum ureuëng nyang deungoe Gobnyan teuhireuen-hireuen watée jideungoe peue-peue nyang geujaweueb carông lumpah na. 48 Ureuëng syiek Gobnyan pih lumpah hireuen watée geungieng Gobnyan. Mak Gobnyan laju geupeugah ubak Gobnyan, "Neuëk, keupeue kah peubuet mandum nyoe ateueh kamoe? Ayah ngon ma gata ka hék that-that kamoe jak mita Gata!" 49 Geujaweueb lé Isa, "Keupeue ayah ngon ma neujak mita Ulôn? Peu kheueh ayah ngon ma hana neuteupeue bahwa ulôn nyoe na lam rumoh Bapak Ulôn?" 50 Teuma awaknyan hana muphom peue nyang geupeugah lé Isa nyan. 51 Óh lheueh nyan Isa laju geuwoe meusajan-sajan ngon gobnyan u Nazaret, dan taát that ubak mandua ureuëng tuha geuh nyan. Banmandum nyan geukeubah mantong lé ma geuh lam até gobnyan. 52 Isa meutamah rayeuk dan meutamah-tamah bijaksana, dan lumpah geugaséh lé Po teu Allah dan jigalak lé manusia.

Lukas 3

1 Bak thon nyang keulimong blaih masa keurajeuen Kaisar Tiberius, pontius Pilatus jeuet keugubunur di Yudea, dan Herodes jimat peurintah di Galilea, Filipus, syedara Herodes jimat keurajeuen dibagian Iturea dan Trakhonitis, seudangkan Lisanias jimat keurajeuen di Abilene. 2 Nyang mat jabatan jeuet keu Imeum-imeum agong na kheueh Hanas dan Kayafas. Bak thon nyan kheueh Po teu Allah meufeureuman ubak Nabi Yahya, aneuëk Nabi Zakharia di padang pasi. 3 Teuma di Nabi Yahya geujak laju ho-ho mantong bansaboh daerah Krueng Yordan dan geupeusampoe haba nibak Po teu Allah. Nabi Yahya geupeugah lagée nyoe, "Meutobat kheueh nibak banmandum desya-desya gata, dan gata harôh teupumanö, mangat Po teu Allah geupeu amphon gata." 4 Nyan paih lagée nyang ka teutuléh lam kitab Nabi Yesaya: "Na ureuëng geumeuhôi-meuhôi lam padang pasi, 'Peusiab kheueh rot ueh keu Tuhan, peurata kheueh rot ueh keu Gobnyan. 5 Tieb-tieb na pantôn taseubée laju, tieb-tieb na gunong ngon bukét teupeusaré rata. Rot ueh nyang kiwieng kiwot tapeuteupat laju, rot ueh nyang lhok-lhok lumbo peusaré laju. 6 Di ureuëng ramé bansigom donya teuma jikalon Allah geupeu seulamat manusia!' " 7 Jai that ureuëng jijak ubak Nabi Yahya keu teupumanö. Nabi Yahya geupeugah ubak awaknyan, "Gata ureuëng jeuhet! Soe nyang peugah bahwa gata hana keunong ngon huköman Allah nyang teuma teuka? 8 Tunyok kheueh ngon buet-buet gata bahwa gata ka meutobat nibak banmandum desya-desya gata! Bék gata peuphon peugah bahwa Nabi Ibrahim na kheueh indatu gata. Ingat: Nibak batée-batée nyoe pih Po teu Allah hase geupeujeuet keuturonan keu Nabi Ibrahim! 9 Pato kasiab keu ngon teuteubang bak kayée sampoe habéh ukeue-ukeue jih. Tieb-tieb bak kayée nyang hana jimuboh nyang gét teuma teuteubang dan teutiek lam apui." 10 "Jadi, peue nyang harôh kamoe peubuet?" jitanyong lé ureuëng nyan ubak Nabi Yahya. 11 Geujaweueb lé Nabi Yahya, "Ureuëng nyan na bak jih dua ôn bajée, bajée jihnyan nyang siôn bah kheueh jijok keu ureuëng nyang hana meubajée; dan ureuëng nyang na peunajoh, peunajoh nyan bah kheueh jibagi keu ureuëng nyang hana." 12 Ureuëng nyang tugaih jih jikuteb cukée jijak cit ubak Nabi Yahya keu teupumanö. Awaknyan jitanyong lagée nyoe, "Bapak Gurée, peue nyang harôh kamoe peubuet?" geujaweueb lé Nabi Yahya, 13 "Bék kheueh gata kutéb cukée leubeh nibak nyang ka teupeuteutab." 14 Na cit sidadu nyang jitanyong lagée nyoe, "Pakriban deungon kamoe? Peu kheueh nyang harôh kamoe peubuet?" Geujaweueb lé Nabi Yahya, "Bék gata lakée ngon cara paksa ateueh soe mantong dan bék gata reupah péng deungon gata tudoh nyang hana-hana. Beuséb kheueh ngon gaji nyang hak gata!" 15 Bak watée nyan di ureuëng ramé kajipeuphon teumanyong sabe keudroe-droe, peu kheueh Nabi Yahya nyan Raja nyang ba Seulamat nyang awaknyan preh-preh. 16 Nyang kheueh jeuet Nabi Yahya geupeugah ubak awaknyan banmandum, "Ulôn pumanö gata ngon ié, teuma singoh teuka ureuëng nyang leubeh rayeuk nibak ulôn. Keu ulôn piyôh taloe sipatu Gobnyan mantong hana kuasa nibak ulôn. Gobnyan teuma geupumanö gata ngon Roh Allah dan apui. 17 Bak jaroe gobnyan na jeuée ngon tampo banmandum gandom sampoe gleh. Gandom nyan teuma geupeusapat lam gupôk, teuma meunyoe sikheum mandum geutot lam apui nyang hana lon-lon!" 18 Meunan kheueh Nabi Yahya geubri naseuhat ubak awaknyan ngon mubagoe cara, bak watée gobnyan geupeusampoe Haba Gét. 19 Teuma Herodes, nyang mat keurajeuen di Galilea, geuseugah lé Nabi Yahya keuhai jimeukawen ngon Herodias, peurumoh syedara jih keudroe, dan meunan cit keuhai buet-buet jih nyang jeuhet nyang laén nyang ka jipeubuet. 20 Teuma Herodes bukon jipatéh peue nyang geutam lé Nabi Yahya nyan seubalek jih jipeubuet buet-buet nyang jeuhet nyan leubeh bak nyang ka dan Nabi Yahya keudroe jipeutamong lam glab. 21 Óh ka lheueh seuleusoe banmandum awaknyan teupumanö, Isa teupumanö cit. Dan bak watée gobnyan teungoh meudoá, langét laju teuhah, 22 dan Roh Allah laju geutron ateueh Gobnyan lagée cicém mirah pati. Dan laju teudeungoe su Allah nyang geupeugah lagée nyoe, "Gata kheueh Aneuëk ulôn nyang ulôn gaséh. Gata lumpah galak nibak até lôn." 23 Watée Isa geupeu phon meudakwah, umu gobnyan na lhée ploh thon. Meunurot kheun gob, gobnyan aneuëk Yusuf, bin Eli, 24 bin Matat, bin Lewi, bin Malkhi, bin Yanai, bin Yusuf, 25 bin Matica, bin Amos, bin Nahum, bin Hesli, bin Nagai, 26 bin Maat, bin Matica, bin Simei, bin Yosekh, bin Yoda, 27 bin Yohanan, bin Resa, bin Zerubabel, bin Sealtiel, bin Neri, 28 bin Malkhi, bin Adi, bin Kosam, bin Elmadam, bin Er, 29 bin Yesua, bin Eliezer, bin Yorim, bin Matat, bin Lewi, 30 bin Simeon, bin Yehuda, bin Yusuf, bin Yonam, bin Elyakim, 31 bin Melea, bin Mina, bin Matata, bin Natan, bin Nabi Daud, 32 bin Isai, bin Obed, bin Boas, bin Salmon, bin Nahason, 33 bin Abinadab, bin Admin, bin Arni, bin Hezron, bin Peres, bin Yehuda, 34 bin Nabi Yakub, bin Nabi Ishaq, bin Nabi Ibrahim, bin Terah, bin Nahor, 35 bin Serug, bin Rehu, bin Peleg, bin Eber, bin Salmon, 36 bin Kenan, bin Arpakhsad, bin Sem, bin Nabi Noh, bin Lamekh, 37 bin Metusalah, bin Henokh, bin Yared, bin Mahalaleel, bin Kenan, 38 bin Enos, bin Set, bin Nabi Adam, bin Allah.

Lukas 4

1 Isa ka geukuasa lé Roh Allah watée Gobnyan geutinggai Krueng Yordan. Roh Allah nyang pimpén Gobnyan u padang pasi. 2 Lam padang pasi nyan Isa jiujoe lé Iblih peuet ploh uroe treb jih. Watée lam keunong ujoe nyan, gobnyan hana geupajoh sapeue. Dan akhé jih gobnyan teurasa deuk. 3 Jipeugah lé Iblih ubak Gobnyan, "Gata Aneuëk Allah, kon? Ci gatayue ubak batée nyoe mangat jeuet keuruti." 4 Geujaweueb lé Isa, "Lam Alkitab na teutuléh lagée nyoe, 'Manusia hana hase udeb ngon jipajoh ruti mantong.' " 5 Dan Iblih laju jiba Isa u teumpat nyang paleng manyang, dan lam sikléb mata lé Iblih laju jitunyok ubak Isa keurajeuen lam donya. 6 "Banmandum keukuasaan dan keukayaan nyoe ulôn bri keu Droeneueh," kheun Iblih ubak Isa, "Sabab banmandum ka geubri keu ulôn dan ulôn jeuet mantong ulôn bri atranyan ubak soe mantong nyang ulôn galak. 7 Banmandum nyan teuma jeuet keuhak milék Droeneueh, meunyoe Droeneueh sujut neuseumah ulôn." 8 Geujaweueb lé Isa, "Lam Alkitab na teutuléh lagée nyoe, 'Seumah kheueh Tuhan Allah gata dan bak gobnyan mantong gata meungabdi.' " 9 Dan lé Iblih jiba teuma Isa u Yerusalem óh troh keunan laju jipeuduek Isa nyan ateueh tampöng Baét Tuhan sira jipeugah ubak Gobnyan lagée nyoe, "Droeneueh kon Aneuëk Allah? Ci Droeneueh grob uyueb phon ateueh nyoe. 10 Sabab lam Alkitab na teutuléh lagée nyoe, 'Allah teuma geuyue malaikat-malaikat Gobnyan mangat jikawai droeneueh ngon cara gét-gét.' 11 Dan meunan cit, 'Malaikat-malaikat teuma geusambot droeneueh ngon jaroe gobnyan, mangat gaki droeneueh hana keunong ateueh batée.' " 12 Geujaweueb lé Isa, "Lam Alkitab na teutuléh lagée nyoe, 'Bék gata ujoe, Tuhan, Allah gata.' " 13 Óh ka lheueh seuleusoe jiujoe Isa ngon mubagoe cara lé Iblih nyan, laju jitinggai Isa dan jipreh watée nyang jroh keu jicuba lom. 14 Óh lheuehnyan Isa geugisa u Galilea; dan Gobnyan laju geukuasa lé Roh Allah. Haba keuhai droe Gobnyan ka meutabu bansaboh daerah nyan. 15 Gobnyan geuseumeubeuet di rumoh-rumoh iébadat, dan banmandum ureuëng jipujoe Gobnyan. 16 Isa geujak teuma u Nazaret, bak teumpat Gobnyan rayeuk. Watée nyan uroe Sabat, meunurot keubiasaan Gobnyan geujak u rumoh iébadat. Sira geudong laju geubeuet Alkitab, 17 dan laju geubri kitab Yesaya. Laju geupeuhah gunulong kitab nyan, dan meuteumé laju ayat nyang su jih lagée nyoe, 18 "Roh Tuhan na bak Ulôn, sabab Gobnyan ka geubaiát Ulôn keu lôn jak peusampoe Haba Gét keu ureuëng gasien. Gobnyan ka geu-utus Ulôn mangat lôn peumaklum haba peubeubaih keu ureuëng nyang na didalam glab dan geuyue peupuléh ureuëng nyang buta; geuyue peubeubaih ureuëng nyang teuseksa 19 dan geuyue peusampoe saát jih Tuhan teuka geujak peuseulamat umat Gobnyan." 20 Óh ka lheueh geubeuet kitab nyan, Isa laju geugulong lom lagée sôt teuma, dan geujok laju ubak peutugaih, dan óh lheuehnyan laju geuduek. Banmandum ureuëng nyang na lam rumoh iébadat nyan jingieng ateueh Gobnyan. 21 Dan Isa laju geupeu phon mariet ngon awaknyan lagée nyoe, "Ayat-ayat Alkitab nyang ban lheueh ulôn beuet nyan nibak uroenyoe ka teupeupeunoh saát gata deungoe watée ulôn beuet bunoe." 22 Tutoe haba nyang geupeugah gét lumpah na, sampoe awaknyan teuhireuen-hireuen dan jipeubeuna peue nyang geupeugah nyan. Awaknyan laju jipeugah, "Gobnyan kon aneuëk Yusuf?" 23 Teuma Isa laju geupeugah ubak awaknyan, "Pasti gatanyoe peuguna pribasa nyoe keu Ulôn, 'Dokto, peupuléh kheueh tuboh droeneueh keudroe. Buet nyang ajaéb nyang kamoe deungoe droeneueh peubuet di Kapernaum, dan neupeubuet kheueh lagée nyan di gampông Droeneueh keudroe.' " 24 "Ingat kheueh, hana Nabi nyang jihoreumat di gampông jih keudroe. 25 Dan gata deungoe kheueh nyoe: bak jamén Nabi Ilyas, watée ujeuen hana jitôh-tôh lhée siteungoh thon treb jih, ka teuka musém deuk nyang paleng parah bansaboh nanggroe. Bak watée nyan jai that-that inong-inong balée di nanggroe Israel. 26 Bah pih meunan, Po teu Allah hana geuyue ubak Nabi Ilyas mangat geujak ubak sidroe lamkawan inong balée nyan teuma nyang geuyue jak ubak sidroe inong balée di Sarfat lam daerah Sidon. 27 Meunan cit jamén Nabi Elisa jai lumpah na ureuëng Israel nyang keunong peunyakét kulét nyang lumpah parah, dan hana meusidroe pih lamkawan awaknyan nyang na geupeu puléh, seulaén Naaman ureuëng Siria nyan." 28 Banmandum ureuëng nyang na lam rumoh iébadat nyan beungéh raya watée jideungoe hainyan. 29 Awaknyan laju jidong dan jiuse laju Isa u luwa banda, jiba laju gobnyan bak barieh gunong, nibak banda droejih, na kheueh banda nyang jipeugét keudroe. Niet awaknyan keuneuk jitulak Isa lam barieh gunong nyan. 30 Teuma Isa laju geukuwak kawan ureuëng ramé nyan dan geujak laju ho laén. 31 Geubeudôh nibak teumpat nyan Isa laju geujak u banda Kapernaum di Galilea. Nibak banda nyan gobnyan laju geupeubeuet ureuëng ramé watée uroe Sabat. 32 Awaknyan hireuen watée jikalon cara Gobnyan seumeubeuet, sabab Gobnyan geupeugah haba ngon peunoh wibawa. 33 Nibak teumpat nyan, lam rumoh iébadat na sidroe ureuëng nyang ka jikuasa lé roh jeuhet. Ureuëng nyan jiklik-klik habéh sineuga, 34 "Hei Isa, ureuëng Nazaret, peue keuneuk Droeneueh peubuet ateueh kamoe nyoe? Peu kheueh Droeneueh teuka keuneuk jak peubinasa kamoe? Ulôn kuteupeu soe Droeneueh nyan: Droeneueh utosan nyang suci nyang teuka nibak Po teu Allah!" 35 "Seungab!" kheun Isa sira geudhôt ateueh roh jeuhet nyan. "Teubiet kheueh laju lam tuboh ureuëng nyoe!" Laju lé roh jeuhet nyan jiseumpom ureuëng nyan dikeue awaknyan mandum, óh lheueh nyan jiteubiet lam tuboh ureuëng nyan ngon hana jipeusakét mubacut pih. 36 Banmandum ureuëng nyang na nibak teumpat nyan hireuen, laju jimarit sabe keudroe-droe, "Hana wayang tutoe haba ureuëng nyoe. Deungon wibawa dan kuasa, hase jipeurintah roh-roh jeuhet nyan jiteubiet lam tuboh ureuëng nyoe, dan awaknyan pih laju jiteubiet nibak teumpat nyan!" 37 Óh lheuehnyan haba keuhai Isa laju meutabu bansaboh wilayah nyan. 38 Isa laju geutinggai rumoh iébadat nyan, dan geujak laju u rumoh Simon. Ma tuwan Simon nyang inong bak watée nyan teungon deumam, dan ureuëng-ureuëng nyang na nibak teumpat nyan laju jijak peugah hainyan ubak Isa. 39 Ban geudeungoe haba nyan, Isa laju geujak ubak teumpat éh mak tuwan Simon nyan, dan geu-use laju deumam mak nyan. Dan deumam nyan pih gadôh, óh banpuléh geuhnyan, lé mak tuwan Simon laju geubeudôh geujak peutimang awak nyang na lam rumoh nyan. 40 Watée mata uroe teungoh jilôb, banmandum ureuëng laju jiba ubak Isa syedara-syedara geuh nyang ka keunong mubagoe rupa peunyakét. Isa laju geukeubah jaroe gobnyan ateueh awaknyan maséng-maséng dan di ureuëng sakét nyan pih puléh. 41 Roh-roh jeuhet pih laju jiteubiet lam tuboh ureuëng ramé, sira jiklik-klik, "Droeneueh kheueh Aneuëk Allah!" Dan Isa laju geudhôt awaknyan dan hana geubri roh-roh jeuhet nyan jipeugah haba, sabab awaknyan jiteupeu bahwa gobnyan Raja Peuseulamat. 42 Watée mata uroe kajipeuphon teubiet Isa laju geutinggai banda nyan dan geujak laju ubak saboh teumpat nyang seungue. Di ureuëng ramé kajipeuphon mita-mita Gobnyan, dan watée awaknyan ka meurumpok ngon gobnyan, awaknyan jiuseuha mangat gobnyan bék geutinggai lé awaknyan. 43 Teuma Isa laju geupeugah lagée nyoe, "Haba Gét keuhai pakriban Po teu Allah geumat peurintah harôh ulôn jakpeusampoe cit u banda-banda laén, sabab nyan kheueh Allah geu-utus Ulôn lam donya nyoe." 44 Sabab nyan Isa geumeukhutubah didalam rumoh-rumoh iébadat nyang na bansaboh nanggroe Yudea.

Lukas 5

1 Bak saboh watée, Isa teungoh geudong-dong bak panté Danau Genesaret. Jai that-that ureuëng dan meusak-sak keu jijak deungoe haba nibak Po teu Allah. 2 Isa geukalon na dua boh peurahô bak binéh panté; neulayan-neulayan nyang na lam peurahô nyan ka jitron nibak lam peurahô dan laju jijak rhah jeue-jeue ngon drob eungkot jih. 3 Isa laju geu-ék u ateueh saboh peurahô atra Simon, óh lheuehnyan laju geuyue ubak Simon mangat peurahô jih nyang ka geuduek lé Isa nyan jeuet jitulak beujiôh bacut nibak panté. Isa laju geuduek lam peurahô dan laju geupeurunoe ureuëng ramé nyang na disinan. 4 Óh ka seuleusoe geupeurunoe rakyat ba nyan, laju geupeugah ubak Simon, "Gata kayôh kheueh peurahô gatanyoe u teumpat nyang lhok, óh lheueh nyan tiek kheueh jeue gata keu gata drob eungkot." 5 "Bapak Gurée," jaweueb Simon, "Simalam beungoh kamoe meukeureuja brat, hana kamoe teumé drob sapeue lam danau nyoe! Teuma sabab Bapak nyang yue, bah kheueh; Ulôn jak tiek jeue keula-i." 6 Óh ka lheueh jipeubuet lé awaknyan pakriban nyang ka geuyue lé Isa nyan, laju meuteumé eungkot nyang lumpah jai lé awaknyan, sabab brat lé eungkot nyan, jeue awaknyan sampoe teupriek, 7 ngon sabab nyan awaknyan laju jilakée tulông bak rakan-rakan jih nyang na bak peurahô laén. Rakan-rakan jihnyan laju jiteuka keunan jijak tulông pasoe lam peurahô nyang dua boh nyan akhé jih ka peunoh ngon eungkot sampoe-sampoe mandua boh peurahô, dan peurahô nyan pih rab-rab lham. 8 Watée Simon jingieng hainyan, laju jisujut dikeue Isa, sira jipeugah lagée nyoe, "Tinggai kheueh ulôn, ya Tuhan! Sabab ulônnyoe ureuëng meudesya!" 9 Simon dan banmandum ureuëng nyang na meusajan ngon jih nibak teumpat nyan hireuen that watée jingieng eungkot nyang awaknyan drob jai lumpah na. 10 Meunan cit deungon rakan-rakan Simon, Yakobus dan Yahya aneuëk-aneuëk Zebedeus. Isa laju geupeugah ubak Simon lagée nyoe, "Bék teumakot! Phon saát nyoe gata teuma jeuet keu ureuëng jeue manusia." 11 Simon dan rakan-rakan geuhnyan laju jibahue peurahô jih ateueh panté, óh lheueh nyan laju jitinggai banmandum nyang na disinan, dan laju jijak seutôt Isa. 12 Bak siuroe, Isa na lam saboh banda. Disinan na sidroe ureuëng agam nyang bak tuboh jih peunoh jitimoh peunyakét kulét nyang paleng parah. Watée ureuëng nyan jikalon Isa, laju jisujut dikeue Gobnyan sira jilakée, "Pak, meunyoe Bapak neutem, Bapak jeuet neupeupuléh ulôn!" 13 Isa laju geuraba ureuëng nyan sira geupeugah lagée nyoe, "Ulôn tem, bupuléh kheueh gata!" Dan watée nyan cit teuma peunyakét ureuëng nyan gadôh. 14 Dan Isa laju geutam ureuëng nyan mangat bék jipeugah sahoe peue nyang ka geupeubuet ateueh droe jih nyan, sira geukheun lagée nyoe, "Jak kheueh ubak Imeum, dan gata lakée bak gobnyan keu geupeukeubiet bahwa gata kapuléh. Óh lheuehnyan gata jak laju peuseumah keureubeuen lagée nyang ka geupeurintah lé Nabi Musa, sibagoe bukeuti ubak ureuëng ramé bahwa gata biet-biet ka puléh." 15 Haba keuhai Isa meugah laju hô-hô mantong, dan jai that-that ureuëng jiteuka keu jijak deungoe gobnyan meunan cit keu jilakée mangat gobnyan geupeu puléh bubena peunyakét-peunyakét nyang na bak awaknyan. 16 Óh ka lheueh nyan Isa laju geujak meudoá ubak teumpat nyang seungue. 17 Bak siuroe watée Isa teungoh geuseumeubeuet, na padubdroe ureuëng Farisi dan gurée-gurée agama teungoh jiduek-duek disinan. Awaknyan teuka nibak Yerusalem, dan nibak banda-banda nyang na Galilea dan Yudea. Kuasa Tuhan na bak Isa keu geupeu puléh ureuëng nyang sakét. 18 Bak watée nyan na meupadub droe ureuëng jiteuka sira jiba ureuëng lapée nyang ka teuéh ateueh tika ubak gobnyan. Awaknyan ka jiuseuha mangat ureuëng sakét nyan jeuet jiba lam rumoh mangat meuteumé jipeuduek dikeue Isa. 19 Sabab ureuëng jai lagoena nibak teumpat nyan, sampoe ureuëng lapée nyan hana hase jipeutamong lé awaknyan. Ngon sabab nyan ureuëng lapée nyan laju jipeuék ateueh bubong rumoh. Dan jibuka laju bubong genteng, rot nyan laju jipeutron ureuëng sakét meusigoe ngon tika jih paih dikeue Isa lamkawan ureuëng nyang jai nyan. 20 Watée geungieng lé Isa padub na rayeuk iman ureuëng nyan, laju geupeugah ubak ureuëng nyan, "Syedara, desya gata ka teupeu amphon." 21 Gurée-gurée agama dan ureuëng-ureuëng Farisi nyang na disinan laju jimarit sabe keudroe-droe, "Soe kheueh ureuëng nyoe nyang keubiet that beuhe jihina Po teu Allah? Soe nyang jeuet peu amphon desya, meunyoe kon Allah keudroe?" 22 Isa geuteupeue peue nyang jitanyong lé awaknyan. Jadi laju geupeugah, "Pakon até gatanyoe jiteumanyong lagée nyan? 23 Toh nyang leubeh mudah, teupeugah, 'Desya gata ka teupeu amphon', atawa teukheun 'Beudôh kheueh dan jak kheueh laju!'? 24 Teuma saát nyoe ulôn jok bukeuti ubak gata bahwa di ateueh bumoe nyoe Aneuëk Manusia na kuasa jipeu amphon desya." Dan laju Isa geupeugah ubak ureuëng nyang lapée nyan lagée nyoe, "Beudôh kheueh, dan gulong kheueh teumpat éh gata, dan jakwoe kheueh laju!" 25 Ureuëng nyan pih laju jibeudôh dikeue awaknyan banmandum, laju jigulong tika éh jih, dan jiwoe laju sira jipujoe Po teu Allah. 26 Awaknyan banmandum hireuen lumpah na sira jipujoe Allah. Dan deungoe peurasaan teumakot, awaknyan jipeugah, "Lumpah that ajaéb peue nyang ka takalon nibak uroe nyoe!" 27 Óh lheuehnyan Isa laju geuteubiet deuh laju geukalon sidroe ureuëng buet jih tukang kutéb cukée, nan ureuëng nyan Lewi, bak watée nyan Lewi nyan teungoh jiduek lam kantô jih. Geupeugah lé Isa ubak ureuëng nyan, "Jak keunoe, seutôt Ulôn." 28 Ureuëng Lewi nyan jibeudôh laju jidong dan jitinggai banmandum peue-peue nyang na disinan jijak seutôt Isa. 29 Óh lheuehnyan Lewi laju jipeuna khanuri di rumoh jih keu Isa. Ramé that tukang kutéb cukée dan ureuëng-ureuëng nyang laén jipajoh bu di rumoh Lewi nyan. 30 Na kira-kira padub droe ureuëng Farisi dan gurée-gurée agama até jih hana galak watée jingieng hai nyan, dan laju jipeugah ubak murit-murit Isa, "Pakon gata banmandum taseumajoh meusajan ngon tukang kutéb cukée dan ureuëng-ureuëng hana jroh?" 31 Geujaweueb lé Isa, "Ureuëng nyang sihat bak jih hana peureulée dokto; nyang peureulée keu dokto na kheueh ureuëng sakét. 32 Ulôn teuka bukon ulôn tawök ureuëng-ureuëng nyang jianggab droe jih jroh, teuma ureuëng-ureuëng nyang meudesya mangat awaknyan jitobat nibak desya-desya jih." 33 Ureuëng ramé jipeugah ubak Isa, "Murit Nabi Yahya dan murit ureuëng Farisi kayém that awaknyan jipuasa ngon meudoá. Pakon murit-murit Droeneueh jimakheun ngon ji-jieb ié." 34 Geujaweueb lé Isa, "Peu kheueh gata jeuet gata yue mandum jamé jipuasa bak teumpat khanuri ureuëng meukawen, simantong linto agam mantong na ngon awaknyan? Teuntée hana jeuet! 35 Teuma teuka watée jih linto nyang agam jicok nibak awaknyan. Bak watée nyan kheueh awaknyan jipuasa." 36 Dan Isa laju geucalitra ubak awaknyan miseue-miseue lagée nyoe, "Hana ureuëng nyang jitampai bajée brok ngon ija barô. Sabab bajée brok nyan jipriek ija barô nyan. Lom teuma ija sinampai nyang barô nyan hana paih ngon bajée brok nyan. 37 Meunan cit hana ureuëng jiroe ié anggô lam baluem kulét nyang ka tuha, sabab ié anggô nyang barô nyan jeuet keusabab baluem kulét nyang ka tuha nyan beukah. Dan ié anggô nyan roe, dan baluem jih rusak. 38 Ié anggô nyang barô harôh teuroe lam baluem nyang barô. 39 Meunan cit hana ureuëng nyang jitem jieb ié anggô barô óh ka lheueh jijieb ié anggô nyang tuha. 'Ié anggô tuha nyan leubeh mangat,' kheun gobnyan."

Lukas 6

1 Bak siuroe, uroe Sabat, watée Isa geujak rot ladang gandom, murit-murit Gobnyan laju jipot boh gandom gob nyang na lam ladang nyan. Boh gandom nyang ka lheueh jipot nyan laju jigeusok-geusok ngon jaroe, óh lheuehnyan laju jipajoh. 2 Kira-kira na padub droe ureuëng Farisi laju jipeugah, "Pakon gatanyoe taliengkeu huköm-huköm agama deungon cara gata peubuet nyang teutam hán jeuet tapeubuet bak uroe Sabat?" 3 Geujaweueb lé Isa, "Peu kheueh gohlom gata beuet keuhai nyang geupeubuet lé Nabi Daud, watée gobnyan dan ureuëng-ureuëng geuh deuk? 4 Gobnyan geutamong lam Baét Tuhan laju geucok ruti nyang ka teupeuseumah ubak Po teu Allah, óh lheuehnyan ruti nyan laju geupajoh. Dan ruti nyan pih geubri cit keu ureuëng-ureuëng geuh. Padahai meunurot huköm agama geutanyoe, imeum-imeum mantong nyang jeuet pajoh ruti nyan." 5 Óh lheueh nyan laju geupeugah lé Isa, "Aneuëk Manusia na kuasa ateueh uroe Sabat!" 6 Bak siuroe, uroe Sabat nyang laén, Isa geujak seumeubeuet lam rumoh iébadat. Disinan na ureuëng nyang jaroe jih lapée siblaih. 7 Kira-kira na padub droe gurée agama dan ureuëng Farisi teungoh jimita-mita buet nyang salah nyang geupeubuet lé Isa, mangat awaknyan na alasan jigadu Gobnyan. Dan awaknyan hana putôh-putôh jipeurati peu kheueh Gobnyan na geupeu puléh ureuëng sakét bak uroe Sabat. 8 Rupari Isa geuteupeue peue nyang jipike lé awaknyan. Dan laju geupeugah ubak ureuëng nyang jaroe jih lapée siblaih nyan, "Dong keunoe, ukeue Ulôn!" Ureuëng nyan laju jibeudôh, dan laju jidong disinan. 9 Óh lheueh nyan Isa geutanyong ubak ureuëng-ureuëng nyang na disinan, "Meunurot agama geutanyoe, peue nyang jeuet tapeubuet bak uroe Sabat? Tapeubuet nyang gét atawa tapeubuet nyang brok? Tapeuseulamat gob atawa tapeuceulaka manusia?" 10 Isa laju geungieng bansikeulileng dan keu awaknyan banmandum, dan laju geupeugah ubak ureuëng nyan, "Sunyueng keunoe jaroe gata." Ureuëng nyan laju jisunyueng jaroe jih dan jaroe ureuëng nyan pih laju puléh. 11 Teuma banmandum gurée-gurée agama dan ureuëng-ureuëng Farisi nyan beungéh lumpah na, dan laju jimeurok pakat keuhai peue nyang harôh jipeusaneut ateueh Isa. 12 Bak watée nyan Isa laju geu-ék ateueh saboh bukét keu geujak meudoá ubak Po teu Allah simalam suntok. 13 Watée uroe ka peungéh, Gobnyan laju geuhôi murit-murit Geuh. Dan laju geupiléh dua blaih droe lamkawan awaknyan. Laju geuboh nan mandua blaih droe nyan rasui-rasui. Awaknyan na kheueh: 14 Simon (Nyang teuhôi Petrus), Andreas syedara Simon; Yakobus dan Yahya, Pilipus dan Bartolomeus, 15 Matius dan Tomas, Yakobus bin Alfeus, dan Simon (Nyang teuhôi Patriot), 16 Yudas bin Yakobus dan Yudas Iskariot nyang óh dudoe jeuet keu ureuëng peukhianat. 17 Óh lheueh nyan Isa laju geutron di ateueh bukét nyan meusigoe ngon rasui-rasui geuhnyan, laju geupiôh dan geudong bak saboh teumpat nyang data. Bak teumpat nyan na cit murit-murit Gobnyan nyang laén nyang ka jai that na teupreh-preh inan nyang teuka aléh pané-pané mantong bansaboh Yudea, Yerusalem, dan banda-banda nyang na di Tirus dan Sidon bak binéh laôt. 18 Awaknyan jijak keunan keu jijak deungoe Isa, dan keu geupeu puléh nibak peunyakét-peunyakét nyang na bak awaknyan. Meunan cit ureuëng nyang ka jitamong roh jeuhet jijak cit keunan lé Isa laju geupeu puléh. 19 Banmandum ureuëng jiuseuha jikeuneuk mat Isa, sabab na kuasa nyang teubiet lam tuboh Gobnyan nyang peupuléh awaknyan banmandum. 20 Isa geungieng ateueh murit-murit Gobnyan dan laju geupeugah, "Mubahgia kheueh gata hei ureuëng-ureuëng gasien, sabab gata na kheueh anggota umat Allah! 21 Mubahgia kheueh gata nyang deuk bak watée nyoe; gata teuma teupeutroe! Mubahgia kheueh gata nyang mo bak watée nyoe; gata teuma teukém! 22 Mubahgia kheueh gata meunyoe jibanci, jitulak, jihina dan jifiteunah ngon sabab lé Aneuëk Manusia! 23 Nabi-nabi bak jamén ilée pih ka jipeusaneut lagée nyan bagoe. Meunyoe hainyan teuka ateueh gata bah kheueh gata meugalak até dan meulikak ngon rasa geumbira, sabab upah keu gata rayeuk that ka geukeubah keu gata lam syeuruga. 24 Teuma cilaka kheueh gata nyang kaya bak watée nyoe; sabab gata ka tarasa pakriban nekmat! 25 Cilaka kheueh gata nyang troe bak watée nyoe; sabab gata teuma tarasa pakriban deuk! Cilaka kheueh gata nyang teukém-kém bak watée nyoe; sabab gata teuma tarasa seudéh até dan gata mo meuá-á! 26 Cilaka kheueh gata, meunyoe banmandum ureuëng jipujoe gata, sabab meunan cit indatu awaknyan jipujoe nabi-nabi peuleusu yoh jamén ilée." 27 "Teuma keu gata nyang tadeungoe Ulôn nibak watée nyoe, Ulôn bri peusan nyang lagée nyoe: gaséh kheueh keu musoh gata, dan gata peubuet kheueh nyang jroh keu ureuëng nyang banci keu gata. 28 Bri kheueh beureukat keu ureuëng nyang kutôk gata, dan gata doá kheueh keu ureuëng nyang jeuhet ateueh gata. 29 Meunyoe na ureuëng jitampa mieng gata nyang siblaih, gata peubiyeu kheueh jitampa mieng gata nyang siblaih teuk. Meunyoe bajée jubah gata jireupah, gata bri kheueh teuma bajée gata. 30 Meunyoe ureuëng na jilakée sapeue-sapeue ubak gata, gata bri kheueh nyang jilakée nyan; dan meunyoe atra gata jireupah, bék kheueh gata lakée lom teuma. 31 Gata peubuet kheueh ateueh ureuëng laén lagée nyang gata keuneuk jipeubuet lé ureuëng laén ateueh gata. 32 Meunyoe gata tagaséh ureuëng-ureuëng nyang gaséh keu gata mantong, peue jasa gata? Ureuëng meudesya pih jiteupeu peubuet gaséh ateueh ureuëng-ureuëng nyang jigaséh ateueh droe jih! 33 Dan meunyoe gata tapeubuet nyang jroh ateueh ureuëng-ureuëng nyang jipeubuet jroh ateueh gata mantong, peu jasa gata? Ureuëng meudesya pih jiteupeu peubuet lagée nyan! 34 Meunan cit meunyoe gata tapeu-utang péng ubak ureuëng-ureuëng nyang meunurot gata péng gata nyang jimeu-utang nyan hase jipulang lom teuma, peue jasa gata? Ureuëng meudesya pih jiteupeu peu-utang péng keu ureuëng meudesya, dan óh lheueh nyan laju jilakée lom teuma! 35 Nyang sikeubiet jih kon lagée nyan! Gata nyang paleng gét harôh gata gaséh keu musoh gata dan gata peubuet nyang jroh ateueh awaknyan. Gata harôh gata bri jimeu-utang, dan bék gata harab nyang jimeu-utang nyan gata teumé cok lom teuma. Meunyoe meunan nyang gata peubuet, upah gata rayeuk that-that dan gata teuma jeuet keu aneuëk-aneuëk Allah Nyang Mahamanyang. Sabab Allah jroh that até ateueh ureuëng nyang hana jiteupeu lakée teurimong gaséh, meunan cit ateueh ureuëng jeuhet. 36 Bah kheueh nibak gata na sabe gaséh sayang lagée Bapak gata nyang na sabe gaséh sayang!" 37 "Bék jeuet keu hakém ureuëng laén, mangat gata keudroe bék geupeu hakém lé Po teu Allah. Bék teuma gata huköm ureuëng laén, mangat gata keudroe hana geuhuköm lé Po teu Allah. Gata peuamphon kheueh keu ureuëng laén, mangat Po teu Allah geupeu amphon gata. 38 Gata meuseudeukah kheueh keu ureuëng laén, mangat Po teu Allah pih geubri keu gata; gata teuma tateurimong meuneubri gobnyan nyang meulimpah ruwah nyang ka teusukat peunoh-peunoh keu gata. Sabab sinukat nyang gata peuguna keu ureuëng laén teuma geupeu guna lé Po teu Allah keu gata." 39 Óh lheueh nyan Isa geucalitra teuma ubak awaknyan miseue laén nyang lagée nyoe, "Meunyoe ureuëng buta jibahue ureuëng buta nyang laén, pasti mandua awaknyan teuma rhot lam paret. 40 Hana murit nyang leubeh rayeuk nibak gurée jih. Teuma murit nyang ka seuleusoe jimurunoe, teuma jeuet keusaban lagée gurée jih. 41 Pakon nyang deuh gata ngieng rabôk kayée nyang ubit lam mata syedara gata, balok nyang rayeuk nyang na lam mata gata hana gata pakoe? 42 Pakriban jeuet gata peugah ubak syedara gata, 'Jak keunoe, syedara, ulôn cuengke rabôk kayée nyang ubit nyan lam mata gata,' seudangkan lam mata gata keudroe na balok nyang hana gata kalon? Hei ureuëng munafék! Cuengke kheueh ilée balok nyang na lam mata gata nyan. Barô kheueh gata hase gata meungieng ngon mata nyang trang dan hase gata cuengke rabôk kayée nyang ubit lam mata syedara gata." 43 "Bak kayée nyang subo hana jipeuhase boh kayée nyang brok. Meunan cit deungon bak kayée nyang hana subo hana jipeuhase boh kayée nyang gét. 44 Tieb-tieb bak kayée teuturi watée teukalon boh jih. Paya meuduro hana jipeuhase boh ara, dan meunan cit tamah meuduro hana teuma jipeuhase boh anggô. 45 Ureuëng nyang jroh jipeuteubiet hai-hai nyang jroh sabab até jih peunoh meulimpah ngon hai-hai nyang jroh. Ureuëng nyang jeuhet jipeuteubiet hai-hai nyang jeuhet sabab até jih peunoh meulimpah ngon hai-hai nyang jeuhet teuma. Sabab peue nyang jipeugah lé babah gata nyan kheueh nyang meulimpah nyang na lam até gata." 46 "Pakon gata hôi Ulôn, 'Tuhan, Tuhan,' teuma hana gata peubuet peue nyang Ulôn peugah ubak gata? 47 Ngon soe kheueh jeuet tapeusaban ureuëng nyang jijak ubak Ulôn, dan jideungoe peue nyang Ulôn peugah, dan jipeubuet teuma? -- Bah kheueh Ulôn tunyok ubak gata -- 48 Ureuëng nyan na kheueh lagée ureuëng nyang watée jipeudong rumoh jikhueh uruek sampoe lhok-lhok, dan jipeugét laju keunaleueng rumoh ateueh batée. Watée teuka ié raya atawa ié krueng ji heuntam ateueh rumoh nyan, rumoh nyan hana hase jipeuanyöt lé ié nyan, sabab ka teupeudong ateueh keunaleueng nyang kông. 49 Teuma ureuëng nyang jideungoe peue nyang ulôn peugah hana jipeubuet lagée ulôn kheun nyan, na kheueh lagée ureuëng nyang jipeudong rumoh ateueh keunaleueng. Meunyoe ié raya teuka, rumoh nyan bagaih that reuloh; ngon rusak nyang brat lumpah na!"

Lukas 7

1 Óh ka seuleusoe geupeugah banmandum hai-hai nyan ubak ureuëng ramé, Isa laju geujak u Kapernaum. 2 Nibak teumpat nyan na sidroe panglima Roma nyang geupeulara sidroe namiet nyang lumpah geugaséh. Namiet nyan sakét brat dan rab-rab maté. 3 Watée jideungoe lé panglima nyan keuhai Isa, jiyue laju ubak na padub droe peumimpén Yahudi keu jijak meurumpok ngon Gobnyan mangat Isa geutem jak peupuléh namiet jih nyan. 4 Watée ka trok bak Isa, awaknyan laju jilakée deungon meuharab that mangat Isa geutem tulông panglima nyan, "Panglima nyoe patot Bapak tulông," kheun awaknyan ubak Isa, 5 "sabab geuhnyan lumpah geugaséh keu bansa tanyoe dan ka geupeudong rumoh iébadat keu kamoe." 6 Ban geudeungoe haba nyan Isa laju geujak meusajan-sajan ngon awaknyan. Watée Isa karab trok u rumoh nyan, panglima nyan laju jiyue bak rakan-rakan jihnyan mangat jijak peugah, "Hana peureulée Bapak meusosah payah neujak u rumoh lôn. Ulôn hana patôt lôn teurimong Bapak di rumoh lôn. 7 Nyang kheueh sabab jih ulôn keudroe nyang jak meuhadab ubak Bapak. Teuma neujok mantong peurintah mangat peulayan ulôn nyan puléh. 8 Sabab ulôn pih tundok ubak peurintah atasan lôn dan dimiyueb ulôn mantong na sidadu-sidadu nyang harôh tundok ubak peurintah lôn. Meunyoe ulôn yue sidroe sidadu, 'Jak keudeh!' laju jijak; dan ulôn peugah ubak nyang laén, 'Jak keunoe!' jihnyan pih laju jijak meuhadab ulôn. Dan meunyoe ulôn peurintah ubak namiet lôn, 'Peugét nyoe!' nyang ulôn yue nyan laju jipeugét." 9 Isa hireuen watée geudeungoe haba panglima nyan. Laju geupaleng dan geupeugah ubak ureuëng ramé nyang teungoh jiseutôt gobnyan, "Hana wayang ureuëng nyoe. Lamkawan ureuëng Israel keudroe pih gohlom na ulôn teumé iman nyang rayeuk lagée ureuëng nyoe!" 10 Watée ureuëng-ureuëng nyang jiyue nyan jigisa u rumoh panglima nyan, namiet nyan ka puléh. 11 Hana padubna treb teuma óh lheueh nyan, Isa laju geujak u banda Nain. Murit-murit Gobnyan meunan cit deungon ureuëng-ureuëng ramé jijak meurôn-rôn ngon Gobnyan. 12 Watée Isa ka trok ubak babah pintoe geureubang banda, laju geukalon na ureuëng ramé teungoh ji-intat manyét uluwa banda. Nyang meuninggai nyan na kheueh sidroe aneuëk agam, aneuëk tunggai sidroe inong malée. Ramé that peunduduek banda nyang jijak meusajan ngon mak aneuëk nyang meuninggai nyan. 13 Watée geungieng lé Isa ureuëng inong nyan, Gobnyan weueh that ubak inong nyan dan laju geupeugah, "Bék neumoe, hai ma!" 14 Óh lheueh nyan Isa laju geupeurab ubak keureunda manyét nyang teungoh jiseuôn nyan dan laju geumat. Dan ureuëng-ureuëng nyang seuôn keureunda nyan laju jipiôh. Geupeugah lé Isa, "Hei aneuëk muda, Ulôn peurintah ubak gata, beudôh!" 15 Aneuëk muda nyang ka maté nyan laju jibeudôh jiduek dan jipeugah haba. Dan Isa laju geuseurah aneuëk muda nyang ka udeb nyan ubak ma jih. 16 Banmandum ureuëng temakot dan laju jipeuphon pujoe Po teu Allah. Awaknyan jipeugah, "Sidroe Nabi nyang rayeuk ka teuka diteungoh-teungoh geutanyoe! Allah ka teuka keu geujak peuseulamat umat Gobnyan!" 17 Haba keuhai Isa nyoe laju meutabu bansaboh Yudea dan didaerah sikeulileng nyan. 18 Murit-murit Nabi Yahya laju jijak peugah peue-peue nyang ka jikalon nyan ubak gobnyan. Dan Nabi Yahya laju geuhôi dua droe murit geuh 19 laju geuyue bak awaknyan mangat jijak meurumpok ngon Tuhan Isa sira jitanyong lagée nyoe, "Peu kheueh Bapak ureuëng nyang teuma teuka sisuai ngon janji Po teu Allah, atawa harôh kamoe preh ureuëng laén?" 20 Bandua droe murit Nabi Yahya nyan laju jijak ubak Isa óh trok keunan laju jipeugah, "Nabi Yahya Pumanö geuyue bak kamoe geuyue jak tanyong ubak Bapak peu kheueh Droeneueh nyang teuma teuka sisuai ngon janji Po teu Allah, atawa peu kheueh harôh kamoe preh nyang laén?" 21 Watée nyan, Isa teungoh geupeu puléh ureuëng ramé, dan geu-use roh-roh jeuhet meunan cit geupeu bleuet ureuëng-ureuëng buta sampoe hase jimeungieng. 22 Geujaweueb lé Isa, "Jak gisa kheueh ubak Nabi Yahya dan gata peugah kheueh peue-peue nyang ka gata deungoe ngon gata kalon: ureuëng buta hase jimeungieng, ureuëng lapée jeuet jijak, ureuëng nyang keunong peunyakét lulét nyang lumpah parah ka puléh, ureuëng klo punyueng hase jimeudeungoe, ureuëng maté udeb keula-i, dan Haba Gét nyang teuka nibak Po teu Allah geupeusampoe keu ureuëng-ureuëng gasien. 23 Mubahgia kheueh ureuëng nyang hana alasan jitulak ulôn." 24 Óh ka leupah jijak ureuëng-ureuëng nyang geukirém lé Nabi Yahya nyan, Isa laju geupeu phon peugah ubak ureuëng ramé keuhai Nabi Yahya nyan, kheueh gobnyan, "Gatanyoe tajak u padang pasi peue nyang gata jak kalon? Peu kheueh gata jak ngieng siôn naleueng nyang jipot lé angén? 25 Gata jak peue nyang gata kalon? Peu kheueh sidroe ureuëng nyang jingui peukayan nyang gét? Ureuëng-ureuëng nyang ngui peukayan lagée nyan dan udeb meuwáh teumpat tinggai jih bak meuligoe! 26 Teuma, gata teubiet peue nyang gata kalon? Peu kheueh gata jak kalon sidroe nabi? Beutôi that, dan leubeh nibak sidroe nabi. 27 Sabab, Nabi Yahya nyan kheueh nyang teutuléh lam ayat Alkitab nyoe, 'Nyoe kheueh utosan Ulôn,' kheun Po teu Allah, 'Ulôn teuma lôn utus jihnyan leubeh awai nibak Gata, mangat jihnyan jibuka rot ueh keu Gata!' " 28 "Ingat kheueh," kheun Isa lom, "lam donya nyoe hana ureuëng nyang leubeh rayeuk nibak Nabi Yahya Pumanö." 29 Banmandum -- ureuëng meunan cit deungon ureuëng-ureuëng tukang kutéb cukée -- jideungoe Isa geupeugah lagée nyan; awaknyan kheueh ureuëng-ureuëng nyang ka jitaát peue-peue nyang ka geulakée lé Allah dan jitem teupumanö lé Nabi Yahya. 30 Teuma di ureuëng-ureuëng Farisi dan gurée-gurée agama hana jitem teurimong reuncana Po teu Allah keu awaknyan keudroe. Awaknyan hana jitem geupumanö lé Nabi Yahya. 31 Dan Isa geupeugah lom, "Deungon peu kheueh harôh Ulôn peusa ureuëng-ureuëng bak jamén nyoe? Lagée toh kheueh awaknyan? 32 Awaknyan lagée aneuëk-aneuëk miet nyang teungoh jiduek-duek bak keudée; saboh kawan aneuëk miet nyan jikuk bak kawan nyang laén lagée nyoe, 'Kamoe meunyanyoe ca-e geumbira keu gata, teuma gata hana tatem meunari! Kamoe meunyanyoe ca-e nyang seudeh, dan gata hana tatem moba-e!' 33 Nabi Yahya Pumanö teuka -- gobnyan geupuasa dan hana geujieb ié anggô -- dan gatanyoe ta peugah, 'Gobnyan ka jitamong jén!' 34 Aneuëk Manusia teuka -- Gobnyan geumakheun dan geujieb ié -- dan laju gata peugah, 'Kalon ureuëng nyan! Leuha, tukang mabök, jimeungon ngon ureuëng tukang kutéb cukée dan ureuëng meudesya.' 35 Bah kheueh meunan, keubijaksanaan Allah na bukeuti dan banmandum ureuëng jiteurimong" 36 Na sidroe ureuëng Farisi, nan jih Simon, ureuëng nyan ji-undang Isa mangat geutem makheun dirumoh jih. 37 Di banda nyan na teuma sidroe ureuëng inong nyang udeb jih peunoh ngon desya. Watée jideungoe Isa teungoh geumakheun di rumoh ureuëng Farisi nyan, laju jijak keunan sira jiba saboh kaca pualam nyang meuasoe peunoh ngon minyéuk mangat bée. 38 Inong nyan laju jidong dilikot Isa bak binéh gaki Gobnyan, sira jimoe ié mata inong nyan tijoh meutreb-treb sampoe-sampoe gaki Isa ka habéh basah. Óh lheuehnyan gaki Isa nyang ka basah ngon ié mata jihnyan laju jilab ngon ujong ôk óh lheuehnyan laju jicöm sira jiroe ngon minyéuk mangat bhée. 39 Watée ureuëng Farisi nyang undang Isa jingieng hai nyan, laju jikheun lam até jih, "Seukira jih ureuëng nyoe Nabi, teuntée gobnyan geuteupeue soe ureuëng inong nyang mat Gobnyan, dan ureuëng inong nyan udeb jih peunoh lam desya!" 40 Dan Isa laju geupeugah ubak Simon, "Simon, na nyang keuneuk ulôn peugah ubak gata." "Nyoe pat lôn, Pak Gurée," jaweueb Simon, "Neupeugah laju." 41 Geupeugah lé Isa, "Na dua droe ureuëng jijak meu-utang ubak ureuëng nyang buet jih peubungöng péng. Nyang sidroe jimeu-utang limong reutôh péng pirak, dan nyang sidroe teuk limong ploh péng pirak. 42 Mandua droe ureuëng nyan hana hase jibayeue utang jih nyan, ngon sabab nyan utang ureuëng nyan jisampôh banmandum. Nyan, soe kheueh mandua droe ureuëng nyan nyang leubeh jigaséh ureuëng nyang peu-utang péng nyan?" 43 "Ulôn pike ureuëng nyang paleng jai jisampôh utang jih!" jaweueb Simon. "Peundapat gatanyan beutôi," jaweueb Isa. 44 Dan Isa laju geukalon ubak ureuëng nyan dan geupeugah ubak Simon, "Peu kheueh ka gata ngieng ateueh ureuëng inong nyoe? Ulôn teuka u rumoh gata, dan gata hana takeubah ié ngon rhah gaki Ulôn; teuma lé ureuëng inong nyan ka jirhah gaki Ulôn ngon ié mata jih, dan jilab sampoe gleh ngon ujong ôk jih. 45 Gata hana tasambot Ulôn deungon tacöm, teuma lé inong nyoe hana jipiôh jicöm gaki Lôn yoh phon Ulôn teuka keunoe. 46 Gata hana ta rô minyéuk bak ulee Lon, teuma ureuëng inongnyoe ka jirô minyéuk mangat bée bak gaki Lôn. 47 Keubiet: gaséh gobnyan nyang rayeuk nyan ka jeuet keutanda bahwa desya jih nyang jai ka teupeu amphon! Meunyoe ureuëng jipeu amphon bacut, gobnyan pih teuma geugaséh deungon bacut teuma." 48 Óh lheuehnyan Isa geupeugah ubak ureuëng inong nyan, "Bubena desya gata ka teupeu amphon." 49 Ureuëng-ureuëng laén nyang na jiduek jimakheun meusajan ngon Isa laju jimarit sabe keudroe-droe, "Soe ureuëng nyoe sampoe-sampoe jipeugah jeuet jipeu amphon desya?" 50 Teuma Isa geupeugah ubak ureuëng inong nyan, "Sabab gata tapeucaya ubak Ulôn, gata ka teupeuseulamat. Jak kheueh deungon damé!"

Lukas 8

1 Hana treb óh lheueh nyan, Isa laju geujak u banda-banda dan gampông-gampông, keu geujak peusampoe Haba Gét bahwa Allah ka geupeu phon mat peurintah sibagoe Raja. Dua blaih droe murit geuh na meusajan Gobnyan. 2 Meunan cit na meupadub droe ureuëng-ureuëng inong nyang ka geupeu puléh nibak jitamong roh jeuhet dan peunyakét. Awaknyan na kheueh Maryam nyang teuhôi Magdalena (na tujoh boh roh jeuhet nyang teupeuteubiet lam tuboh jih nyan); 3 meunan cit Yohana, peurumoh Khuza, peugawée lam meuligoe Herodes; Susana, dan jai that mantong inong nyang laén. Deungon biaya keudroe, awaknyan jitulông Isa dan murit-murit Gobnyan. 4 Ureuëng-ureuëng ramé hana putôh-putôh jijak ubak Isa nyang teuka nibak mubagoe banda. Dan watée ureuëng ka jai that meusapat, Isa laju geucalitra bak awaknyan miseue lagée nyoe, 5 "Sidroe ureuëng nyang buet jih meulampôh saboh watée jijak tabu bijéh. Bak watée ureuëng nyan teungoh teumabu, na bijéh nyang rhot ateueh rot. Siparo jigiloe lé gob dan nyang laén jipajoh lé cicém. 6 Na cit nyang rhot bak teumpat nyang mubatée-batée. Watée tarök-tarök jih ka jiteubiet lam bijéh seunaman nyan laju layée sabab tanoh tho. 7 Na teuma bijéh nyang rhot ateueh tanoh tamah meuduro. Tamah meuduro nyan jitimoh meusigoe ngon bijéh nyang teutabu nyan, laju jiginton sampoe maté. 8 Teuma na cit bijéh nyang rhot ateueh tanoh nyang brée, laju jitimoh dan jimuboh sampoe jipeuhase sireutôh goe ganda." Óh ka lheueh geucalitra miseue nyan, Isa geupeugah, "Meunyoe na punyueng, gata deungoe kheueh!" 9 Murit-murit Isa laju jitanyong ubak Gobnyan peue makna miseue nyan. 10 Geujaweueb lé Isa, "Keu gata ka teubri anugeurah mangat gata teupeu pakriban Allah geumat peurintah sibagoe Raja. Teuma keu ureuëng laén teupeurunoe ngon miseue, mangat awaknyan jisimak, teuma hana jiteupeu peue nyang teujadi; dan awaknyan jideungoe, teuma hana muphom." 11 "Nyoe kheueh makna miseue nyan: Bijéh nyan na kheueh haba Po teu Allah. 12 Bijéh nyan rhot ateueh rot muphom jih manusia nyang jideungoe tutoe haba nyan. Teuma Iblih teuka laju jireupah haba Allah lam até awaknyan, mangat awaknyan bék jipeucaya dan bék meuteumé seulamat. 13 Bijéh nyang rhot bak teumpat nyang meubatée-batée na kheueh lagée ureuëng watée jideungoe haba nyan, laju jiteurimong ngon galak até. Teuma haba nyan hana meu-ukeue lam até awaknyan. Awaknyan jipeucaya siat mantong, dan watée teuka cubaan, awaknyan laju murtat. 14 Bijéh nyang rhot lam teungoh tamah meuduro na kheueh miseue ureuëng nyang jideungoe haba nyan, teuma khawate keuhai udeb nyoe, awaknyan keuneuk udeb nyang mangat dan meuwáh lam donya nyoe. Banmandum nyan ka jiteugon lam até awaknyan sampoe hana jipeuhase boh nyang masak. 15 Bijéh nyang rhot bak tanoh nyang brée ngon subo na kheueh miseue ureuëng nyang jideungoe haba nyan, laju jikeubah lam até nyang gét dan jujoe. Awaknyan jimeuteun sampoe jipeuhase boh." 16 "Hana ureuëng nyang jipeuhu panyöt óh lheueh nyan jitôb ngon guci, atawa jipeuduek panyöt nyan dimiyueb teumpat éh. Panyöt nyan teuma jikeubah bak gaki panyöt, mangat ureuëng nyang tamong deuh jikalon trang nyang deuh nibak panyöt nyan. 17 Hana nyang teusöm nyang hana deuh teukalon; dan nyang hana nyang teurahsia nyang hana hase teubuka dan teuteupeue. 18 Sabab nyan ngieng kheueh beugét-gét peue nyang teuma gata deungoe. Sabab di ureuëng nyang ka na, keu jihnyan teuma teubri leubeh jai lom; teuma keu ureuëng nyang hana sapeue na, bacut nyang mantong na bak jihnyan teucok teuma." 19 Mak ngon syedara-syedara Isa geujak ubak Gobnyan, teuma awaknyan hana hase trok ubak Gobnyan sabab ureuëng jai lumpah na. 20 Teuma na sidroe ureuëng nyang jipeugah ubak Isa, "Pak, Ma ngon syedara-syedara Bapak na diluwa geupreh Bapak. Awaknyan keuneuk meurumpok ngon Bapak." 21 Teuma Isa laju geupeugah ubak awaknyan, "Ureuëng nyang jideungoe peue kheun Po teu Allah dan jipeubuet lagée nyang geukheun lé Allah nyan, ureuëng nyan kheueh mak ngon syedara-syedara Lôn." 22 Bak siuroe Isa ngon murit-murit Gobnyan laju geu-ék ateueh peurahô layeue. "Jak geutanyoe tajeumeurang u meurandeh danau," kheun Isa ubak murit-murit Gobnyan. Dan awaknyan pih laju jikeumayôh peurahô nyan u meurandeh danau. 23 Watée awaknyan teungoh meulayeue, mata Isa ka jiteuka teungét dan laju geu éh. Bék lalée meuteuka teuk angén badée lam danau nyan, peurahô awaknyan laju jipoh lé angén nyan sampoe ka guyang gayeng ié-ié ka jitamong lam peurahô, jipike lé awaknyan nyoe biet-biet ka meubala. 24 Murit-murit Isa laju jijak ubak Gobnyan sira jipeugo dan jikheun lagée nyoe, "Bapak Gurée, Hei Bapak Gurée, geutanyoe ka bala!" Isa laju geubeudôh dan laju geudhôt angén badée dan umbak nyang teungoh meungamôk nyan. Angén badée ngon umbak raya nyan laju jipiôh dan ié danau pih laju teunang lom teuma. 25 Dan óh lheueh nyan Isa laju geupeugah ubak murit-murit Gobnyan, "Pakon gatanyoe hana tapeucaya ubak Ulôn?" Awaknyan meutamah hireuen dan teumakot that. Dan jimeusáh-sáh kheueh awaknyan sabe keudroe-droe, "Soe nyang sikeubit jih ureuëng nyoe sampoe angén ngon umbak jeuet geupeurintah dan jitaát teuma ateueh peurintah geuh nyan!" 26 Isa dan murit-murit Gobnyan laju geumeulayeue trok u daerah Gerasa di meurandeh Danau Galilea. 27 Bak watée Isa geutron u darat, ubak Gobnyan laju jiteuka lé sidroe ureuëng agam nyang ka jitamong roh jeuhet. Ureuëng nyan teuka jih nibak banda. Ka treb that jihnyan hana jitem sok peukayan dan hana jitem tinggai dirumoh. Nyang galak jih tinggai na kheueh lam guha-guha nibak teumpat jrat-jrat ureuëng maté. 28 Watée jikalon Isa, ureuëng nyan jidumpék dan laju jisujut dikeue Gobnyan sira jipeugah lagée nyoe, "Isa, Aneuëk Allah Nyang Mahamanyang! Peue keuneuk Droeneueh peubuet ateueh Ulôn nyoe? Ulôn lakée bék neuseksa ulôn!" 29 Ureuëng nyan jipeugah meunan sabab Isa geupeurintah ubak roh jeuhet nyan mangat jiteubiet lam tuboh ureuëng nyan. Ka kayém that ureuëng nyan jikuasa lé roh jeuhet nyan sampoe-sampoe gaki ngon jaroe jih ka teuikat ngon rante dan jihnyan teukawai ngon bit that, rante ngon ikat jihnyan teutab hase jireuet sampoe putôh dan laju jiba lé roh jeuhet u padang pasi. 30 Isa geutanyong ubak ureuëng nyan, "Soe nan gata?" "Nan ulôn 'Legiun'," jaweueb ureuëng nyan -- sabab jai that-that roh jeuhet nyang laén nyang ka jitamong lam tuboh jih nyan. 31 Roh-roh jeuhet nyan jilakée deungon meuharab that ubak Isa mangat bék geu-use jihnyan lam Jurông Mawöt. 32 Bak binéh teumpat nyan jai lumpah na bui-bui nyang teungoh jimita eumpeuen bak binéh barieh gunong. Roh-roh jeuhet nyan jilakée deungon meuharab that ubak Isa mangat jeuet jitamong lam tuboh bui-bui nyang teungoh mita eumpeuen nyan. Dan Isa situju. 33 Laju bubena roh-roh jeuhet nyan jiteubiet lam tuboh ureuëng nyan dan jitamong laju lam tuboh bui-bui nyang jai nyan. Dan bui-bui nyan laju jiplueng dan jigrob lam barieh gunong u dalam danau, dan laju lham lam danau nyan. 34 Di ureuëng-ureuëng nyang rabe bui nyan laju jikalon peu nyang ka teujadi ateueh bui-bui jihnyan. Dan awaknyan laju jiplueng dan jijak peugah ubak ureuëng-ureuëng nyang na di banda dan gampông-gampông nyang na di silingka nyan. 35 Dan di ureuëng ramé laju jiteubiet dan jingieng peue nyang ka teujadi. Awaknyan jijak laju ubak Isa, dan nibak teumpat nyan laju meurumpok ngon ureuëng nyang ka jiteubiet roh-roh jeuhet nyan teungoh jiduek bak binéh gaki Isa. Ureuëng nyan ka jingui peukayan dan pikeran jih ka waraih. Awaknyan laju jiteuka teumakot. 36 Ureuëng nyang kalon hainyan laju jijak peugah ubak ureuëng laén pakriban cara jih ureuëng nyan teupeupuléh. 37 Ban jideungoe habanyan bak watée nyan cit teuma banmandum peunduduek daerah Gerasa jilakée ngon meuharab that mangat Isa geujak laju dan geutinggai teumpat nyan, sabab awaknyan biet-biet teumakot lumpah na. Dan Isa laju geu-ék lam peurahô keuneuk geujakwoe. 38 Ureuëng nyang ka hana jikuasa lé roh-roh jeuhet nyan jilakée ubak Isa mangat jeuet jiseutôt ho-ho nyang Isa geujak. Teuma Isa hana geubri dan geuyue ureuëng nyan mangat jijak laju holaén, 39 sira geupeugah lagée nyoe, "Jakwoe kheueh dan peugah kheueh bak ureuëng laén peue-peue nyang ka geupeubuet lé Allah ateueh gata." Dan di ureuëng nyan pih laju jijak peugah hainyan ubak tieb-tieb sagoe banda, peue nyang ka geupeubuet lé Isa ateueh droe jih nyan. 40 Watée Isa ka geugisa u meurandeh danau, Gobnyan laju jisambot ngon geumbira lé ureuëng ramé sabab awaknyan teungoh jipreh-preh Gobnyan geuwoe. 41 Watée nyan laju jiteuka sidroe ulée rumoh iébadat nyang na disinan ubak Isa. Nan ureuëng nyan Yairus. Ureuëng nyan laju jisujut dikeue Isa dan jilakée deungon meuharab that mangat Gobnyan geutem jak u rumoh jih, 42 sabab aneuëk inong jih nyan kheueh sidroe kông mantong meu-umu dua blaih thon lam keuadaan sakét brat karab maté. Teungoh Isa geujak u rumoh Yairus, di ureuëng ramé meurôn-rôn jisak-sak Gobnyan nyang teuka nibak sigala arah. 43 Lamkawan ureuëng nyang meusak-sak nyan na teuma sidroe ureuëng inong nyang ka treb that rhot bak sakét jiteubiet darah hé hana putôh-putôh ka dua blaih thon treb jih. Gobnyan ka geupeu habéh mandum hak milék geuh keugeujak meu-ubat ubak dokto, teuma teutab hana nyang hase jipeu-ubat inong nyan. 44 Ureuëng inong nyan laju jipeurab ubak Isa rot likot, dan laju jicukéh ujong bajée jubah Gobnyan. Watée nyan cit teuma peunyakét meudarah nyang na bak inong nyan puléh. 45 Isa geutanyong, "Soe nyang cukéh Ulôn?" Banmandum ureuëng nyang na disinan jibantah. Dan laju jipeugah lé Petrus, "Pak, ureuëng ramé lumpah na bansikeulileng Bapak; awaknyan mandum jisak-sak Bapak!" 46 Teuma geupeugah lé Isa, "Hán, na nyang cukéh Ulôn. Ulôn teupeu that nyan, sabab na teunaga nyang jiteubiet lam tuboh Lôn." 47 Ureuëng inong nyan jitée bahwa buet jih ka geuteupeue lé Isa. Jadi inong nyan laju jipeurab ubak Isa sira badan jih yo meukot-kot laju jisujut dikeue Gobnyan. Teuma lé inong nyan laju jipeugah dikeue ureuëng ramé nyan, pakon jicukéh Isa, dan peunyakét jih puléh bak watée nyan cit teuma. 48 Isa laju geupeugah ubak inong nyan, "Aneuëk Ulôn, sabab gata peucaya keu Ulôn, gata puléh. Jak kheueh ngon seulamat." 49 Teungoh Isa mantong geupeugah haba, na sidroe namiet teuka nibak rumoh Yairus. Namiet nyan jipeugah ubak Yairus, "Aneuëk inong Amphon ka meuninggai donya. Bék lé Amphon peusosah Bapak Gurée nyoe geujak u rumoh Amphon." 50 Watée geudeungoe hainyan lé Isa, laju geupeugah ubak Yairus, "Bék teumakot. Peucaya mantong aneuëk gata puléh." 51 Óh ka troh u rumoh Yairus, Isa hana geubri meusidroe ureuëng pih nyang jeuet jitamong ngon Gobnyan seulaén Petrus, Yahya, Yakobus dan ma ngon ayah aneuëk nyan. 52 Banmandum ureuëng nyang na disinan teungoh jipeumo ba-e sabab aneuëknyan maté. Teuma lé Isa laju geupeugah, "Bék mo. Aneuëk nyoe hana maté, jihnyoe teungét!" 53 Awaknyan jipeukém Isa, sabab awaknyan jiteupeu aneuëk inong nyan ka maté. 54 Óh lheueh nyan Isa geumat jaroe aneuëk nyan sira geupeugah, "Neuëk, beudôh kheueh!" 55 Nyawöng aneuëk nyan jiwoe lom lam tuboh aneuëk nyan, dan watée nyan cit teuma aneuëk inong nyan jibeudôh. Óh lheueh nyan Isa geuyue bri makheun aneuëk nyan bak ureuëng nyang na nibak teumpat nyan. 56 Ureuëng syiek aneuëk nyan hireuen lumpah na. Teuma Isa geutam awaknyan bék jipeugah sahoe hai nyang ka teujadi nyan.

Lukas 9

1 Isa laju geuhôi bandua blaih droe murit Gobnyan, laju geubri kuasa bak awaknyan keu jeuet jiuse roh jeuhet dan jipeupuléh peunyakét. 2 Óh lheuehnyan geuyue bak awaknyan jijak peupuléh ureuëng sakét dan geuyue peusampoe haba pakriban Po teu Allah geumat peurintah sibagoe Raja. 3 "Bék gataba sapeue watée gata jak," kheun Isa ubak awaknyan. "Bék gata ba tungkat, atawa baluem teumpat seudeukah, atawa peunajoh, atawa péng, atawa dua ôn peukayan. 4 Dipat mantong gata jiteurimong, tinggai kheueh disinan sampoe bak watée jih gata tinggai banda nyan. 5 Dan bak teumpat gata hana jiteurimong, watée gata tinggai banda nyan, seuteuk kheueh abée nyang na bak tapak gaki gata, sibagoe peuingat keu awaknyan." 6 Murit-murit Isa laju geujak u gampông-gampông keu jijak peusampoe Haba Gét nyan dan jipeupuléh ureuëng sakét di jeueb-jeueb teumpat. 7 Watée raja Herodes nyang mat keurajeuen di Galilea, jideungoe peue-peue mantong nyang teujadi nyan, jihnyan jiteuka bingong. Sabab na nyang peugah Nabi Yahya Pumanö ka udeb keula-i. 8 Na teuma nyang peugah Nabi Ilyas ka teuka lom. Ureuëng laén jipeugah sidroe nabi nibak nabi-nabi yoh jamén ilée ka udeb lom teuma. 9 Herodes jipeugah lagée nyoe, "Ka Ulôn peurintah bak ureuëng laén mangat jijak kôh takue Nabi Yahya Pumanö. Teuma di ureuëng nyoe, soe nyang seubeuna jih? Jai that-that nyang ka ulôn deungoe keuhai jihnyoe." Dan Herodes jiuseuha beu meuteumé jingieng Isa. 10 Óh ka seuleusoe nibak tugaih rasui-rasui Isa laju jigisa dan jicalitra banmandum ubak gobnyan peue-peue nyang ka awaknyan peubuet. Isa laju geupakat awaknyan meusajan-sajan ngon gobnyan jak peuaséng droe u banda Betsaida. 11 Teuma watée jiteupeu lé ureuëng ramé keuhai nyan, awaknyan laju jiseutôt Isa. Gobnyan geuteurimong awaknyan, laju geumariet ngon awaknyan keuhai pakriban meunyoe Allah ka geumat peurintah sibagoe Raja. Dan meunan cit geupeu puléh ureuëng sakét nyang na lamkawan awaknyan. 12 Watée mata uroe karab jilhob, mandua blaih droe murit Isa laju jijak meuhadab ubak Gobnyan sira jipeugah lagée nyoe, "Bapak, teumpat nyoe seungue dan jiôh that nibak ureuëng ramé. Leubeh gét neuyue jak ureuëng ramé nyoe banmandum, mangat jihnyan jeuet jijak mita peunajoh dan teumpat éh nyang na di gampông-gampông nyang na nibak silingka nyoe." 13 Teuma geujaweueb lé Isa, "Gata mantong nyang bri bak awaknyan mangat jeuet jimakheun." Jiseuôt lé murit-murit Isa nyan, "Bak kamoe nyang na limong boh ruti dan dua boh eungkot. Peu kheueh harôh kamoe jakbloe peunajoh keu ureuëng ramé nyoe?" 14 (Na kira-kira limong ribée droe ureuëng agam nibak teumpat nyan) Isa geupeugah ubak murit-murit Gobnyan, "Neuyue duek kheueh awaknyan banmandum meutumpôk-tumpôk, kira-kira limong ploh droe saboh tumpôk." 15 Murit-murit Isa laju jipeubuet peue-peue nyang ka geuyue lé Isa ubak awaknyan. 16 Dan óh lheuehnyan lé Isa laju geucok ruti nyang limong boh nyan meunan cit deungon eungkot nyang na dua boh nyan, óh lheuehnyan laju geutangáh u langét sira geulakée teurimong gaséh ubak Po teu Allah. Óh lheueh nyan ruti ngon eungkot nyan laju geupriek-priek ngon jaroe gobnyan dan geujok laju ubak murit-murit geuh keu jibagi-bagi keu ureuëng ramé nyan. 17 Dan awaknyan banmandum jiteumé makheun sampoe troe. Dan murit-murit Isa laju geupeusapat séueh-séueh nyang jipajoh lé ureuëng ramé nyan nyang le jih na dua blaih boh raga. 18 Bak saboh watée, Isa teungoh geumeudoá sidroe geuh mantong, murit-murit Gobnyan laju jijak ubak Gobnyan. Isa laju geutanyong ubak awaknyan lagée nyoe, "Meunurot lagée jipeugah lé gob, Ulôn nyoe soe?" 19 Awaknyan laju jijaweueb, "Na nyang peugah Nabi Yahya Pumanö. Na teuma nyang peugah gobnyan Nabi Ilyas, nyang laén jipeugah teuma sidroe nabi yoh jamén ilée nyang watéenyoe ka udeb keula-i." 20 "Dan meunurot gata keudroe pakriban, Ulôn nyoe soe?" geutanyong lé Isa lom. Jijaweueb lé Petrus lagée nyoe, "Bapak na kheueh Raja Nyang ba Seulamat nyang ka geupeu janji lé Po teu Allah." 21 Dan Isa laju geupeugah ubak murit-murit Gobnyan, "Bék sagai-sagai gata peugah hainyan ubak soe mantong." 22 Geupeugah lom lé Isa, "Aneuëk Manusia keubiet jai that harôh jiteurimong deurita dan jiteuntang lé peumimpén-peumimpén ngon imeum-imeum ulée, meunan cit lé gurée-gurée agama. Gobnyan teuma jipoh maté, teuma bak uroe nyang keu lhée geubeudôh lom teuma." 23 Óh lheuehnyan Isa geupeugah teuma ubak bandum ureuëng nyang na nibak teumpat nyan, "Ureuëng nyang jitem seutôt Ulôn, harôh jipeutuwoe ubak keupeuntengan jih keudroe, jitem gulam saleb gobnyan tieb-tieb uroe, dan hana jipiôh jiseutôt Ulôn. 24 Sabab ureuëng nyang keuneuk peuteun keuhai udeb jih, ureuëng nyan teuma gadôh udeb. Nyang keubiet jih, ureuëng nyang jikeureubeuen udeb jih deumi keu Ulôn, ureuëng nyan teuma seulamat. 25 Peue laba jih sidroe ureuëng meunyoe bansigom donya nyoe jeuet keu milék jih, teuma jihnyan jipeurusak ngon jipeugadôh udeb jih? 26 Meunyoe ureuëng malée jiangkée Ulôn dan peue-peue nyang Ulôn peurunoe, meunan cit Aneuëk Manusia teuma malée jiangkée ureuëng nyan bak watée geuhnyan teuka singoh ngon kuasa Gobnyan, dan deungon kuasa Bapak dan malaikat-malaikat nyang suci! 27 Beutateupeue kheueh: na ureuëng lamkawan gata nyoe nyang hana lom maté sigohlom jihnyan jikalon Po teu Allah geumat peurintah." 28 Na kira-kira sigoe aleuhat óh ka lheueh Isa geupurunoe hai-hai nyan, laju geuba Petrus, Yahya dan Yakobus u ateueh puncak saboh gunong guna jih keuneuk meudoá. 29 Teungoh Isa geumeudoá bak teumpat nyan, ruman Gobnyan laju meu-ubah dan peukayan Gobnyan ka jeuet keuputéh meuble-ble cahya. 30 Ngon hana teusangka-sangka, teuka kheueh keunan dua droe ureuëng, Nabi Musa ngon Nabi Ilyas geujak peuleumah droe deungon cahya nibak syeuruga. Awaknyan geumeututoe ngon Isa keuhai Gobnyan maté nyang hana treb le teuma geurasa di Yerusalem. 32 Bak watée nyan Petrus dan rakan-rakan Gobnyan ka teungét, dan deungon hana jisangka-sangka Gobnyan teujaga laju jibeudôh, dan laju jigieng Isa muble-ble cahya dan na dua droe ureuëng ka teudong ngon Gobnyan. 33 Watée bandua droe ureuëng nyan keuneuk tinggai Isa, Petrus laju jipeugah ubak Gobnyan, "Bapak Gurée, mangat that tanyoe bak teumpat nyoe. Bah kheueh kamoe jak peudong lhée boh khimah: saboh keu Bapak, saboh keu Nabi Musa, dan saboh teuk keu Nabi Ilyas." (Petrus jipeugah meunan deungon hana jituôh peuphom peu nyang ka jipeugah nyan.) 34 Teungoh Petrus mantong jipeugah haba, teuka kheueh saboh gunulong awan, di awan nyan laju jipeupayong ateueh awaknyan, sampoe awaknyan teumakot that. 35 Óh lheueh nyan nibak lam awan nyan teudeungoe kheueh su nyang teupeugah lagée nyoe, "Nyoe kheueh Aneuëk Ulôn nyang Ulôn piléh. Deungoe kheueh peue nyang jipeugah!" 36 Óh ka lheueh su nyan hana teudeungoe le, laju jingieng lé awaknyan Isa sidroe kông teudong nibak teumpat nyan. Murit-murit Isa seungab mantong keuhai banmandum nyan, dan hana jipeugah baksoe mantong keuhai peue nyang ka lheueh jikalon. 37 Óh singoh beungoh Isa ngon ban lhée droe murit geuh nyan laju geutron nibak gunong nyan, dan di ureuëng ramé laju jijak ubak Gobnyan. 38 Na sidroe ureuëng agam lamkawan ureuëng ramé nyan jiteumawök ubak Isa, "Bapak Gurée, neutulông jak kalon aneuëk ulôn -- jih nyan kheueh sidroe kong aneuëk ulôn, neutulông ulôn Bapak Gurée! 39 Meunyoe roh jeuhet jiteuka dan jitamong lam tuboh jihnyan, badan jih laju teubot-bot ngon teuleunteuk-leunteuk sira jiklik-klik dan babah jih mukuboh-kuboh. Roh nyan hana jipiôh jiseksa aneuëk nyan dan hana jitem teubiet lam tuboh jihnyan! 40 Ka lheueh ulôn lakée ubak murit-murit Bapak mangat jitem peuteubiet roh jeuhet nyan lam tuboh aneuëk ulôn, teuma awaknyan hana hase jipeuteubiet." 41 Geujaweueb lé Isa, "Hana wayang gata nyoe! Biet-biet gata nyoe ureuëng nyang meunyeuleweng dan hana tapeucaya! Sampoe án pajan harôh lôn tinggai meusajan ngon gata dan ulôn saba ateueh gata? Ba laju aneuëk nyan keunoe!" 42 Teungoh aneuëk nyan jijak ubak Isa, roh jeuhet nyang na lam tuboh aneuëk nyan laju jiseumpom aneuëk nyan sampoe-sampoe badan aneuëk nyan teubot-bot ngon teuleunteuk-leunteuk. Teuma Isa laju geupeurintah roh jeuhet nyan mangat jiteubiet dan bak watée nyan cit aneuëk nyan ka puléh. Dan aneuëk nyan pih laju geujok lom ubak ayah jih. 43 Banmandum ureuëng hireuen watée jingieng kuasa Po teu Allah nyang rayeuk nyan. Watée ureuëng ramé mantong teuhireuen-hireuen jikalon peu nyang ka geupeubuet nyan, Isa laju geupeugah ubak murit-murit geuh, 44 "Simak kheueh beugét-gét dan bék tuwoe peue nyang Ulôn peugah nyoe: Aneuëk Manusia teuma jijok ubak kuasa manusia." 45 Teuma lé murit-murit Isa nyan hana muphom peue nyang geupeugah lé Gobnyan. Hainyan geusöm nibak awaknyan mangat awaknyan hana muphom. Teuma awaknyan teumakot jitanyong hai nyan ubak Gobnyan. 46 Murit-murit Isa keudroe ka jimeudakwa sabe keudroe-droe keuhai soe nyang paleng rayeuk lamkawan awaknyan. 47 Isa geuteupeue peue nyang jipike lé awaknyan, sabab nyan kheueh laju geucok sidroe aneuëk ubit dan laju geupeudong aneuëk nyan bak binéh Gobnyan. 48 Dan laju geupeugah ubak murit-murit Gobnyan, "Ureuëng nyang jiteurimong aneuëk nyoe ngon sabab lé Ulôn, saban cit jihnyan ka jiteurimong ulôn. Dan ureuëng nyang teurimong ulôn, saban cit ka jiteurimong Gobnyan nyang utus Ulôn. Sabab ureuëng nyang paleng ubit lamkawan gata nyoe, nyan kheueh nyang paleng rayeuk!" 49 Yahya jipeugah, "Po, na kamoe ngieng ureuëng laén ji use iblih ateueh nan Po, kamoe tam ureuëng nyan, sabab jihnyan bukon ureuëng geutanyoe." 50 "Bék gata tam jihnyan," kheun Isa ubak Yahya dan murit-murit Gobnyan nyang laén, "sabab ureuëng nyang hana jilawan gata, saban cit jihnyan jidong blaih gata." 51 Watée ka tô that saát jih Isa teubeuôt lam syeuruga, laju geucok peunutôh keu geujak u Yerusalem. 52 Dan geuyue laju ureuëng laén leubeh awak nibak Gobnyan. Ureuëng-ureuëng nyang geuyue nyan laju jijak, dan jitamong laju lam saboh gampông nyang na di Samaria keu jipeusiab sigala sisuatu guna keu teusambot Isa. 53 Teuma di ureuëng-ureuëng nyang na lam gampông nyan hana jiteurimong Isa geujak keunan, sabab ka jeulaih that gobnyan teungoh geujak u Yerusalem. 54 Dan watée murit-murit Isa, Yakobus ngon Yahya jiteupeu keuhai nyan, laju jipeugah lé awaknyan, "Tuhan, peu kheueh Tuhan neutem, kamoe lakée apui mangat jitron nibak langét keu teupeubinasa banmandum ureuëng nyoe?" 55 Isa laju geupaleng bak murit-murit Geuh nyan sira geubeungéh bak awaknyan. 56 Óh lheuehnyan awaknyan laju geujak u gampông laén. 57 Teungoh geujak Isa ngon murit-murit Gobnyan, na ureuëng jipeugah ubak Gobnyan, "Bapak, ulôn kutem seutôt Bapak ho mantong nyang Bapak jak!" 58 Geujaweueb lé Isa, "Asée srigala na uruek, dan cicém na eumpung, meunyoe Aneuëk Manusia hana teumpat éh." 59 Dan geupeugah laju lé Isa ubak ureuëng laén, "Seutôt kheueh Ulôn." Teuma ureuëng nyan jipeugah, "Bapak, neupeu idhin kheueh Ulôn woe leubeh ilée Lôn jak kubu ayah Ulôn nyang ka maté." 60 Geujaweueb lé Isa, "Bah kheueh ureuëng maté jipeukubu ureuëng maté keudroe. Teuma digata, jak laju dan gata peusampoe bahwa Allah ka geupeu phon mat peurintah." 61 Na teuma ureuëng laén jipeugah lagée nyoe, "Bapak, ulôn kutem seutôt Bapak, teuma neupeu idhin kheueh ulôn ilée keu lôn jak peugah u rumoh." 62 Isa geupeugah ubak ureuëng nyan, "Ureuëng nyang ka jipeuphon meu-uéue, laju jingieng u likot, ureuëng nyang lagée nyan hana patot jeuet keu umat Po teu Allah."

Lukas 10

1 Óh lheuehnyan Tuhan geupiléh lom tujoh ploh droe murit geuh, laju geu-utus awaknyan dua-dua droe u tieb-tieb banda dan daerah-daerah nyang teuma geujak keunan leubeh awai nibak Gobnyan. 2 "Hase nyang teuma teupôt jai that," kheun gobnyan ubak awaknyan, "teuma nyang mubuet keu jipôt nyan cit bacut. Sabab nyan, lakée kheueh ubak ureuëng po ladang mangat jihnyan jikirém ureuëng mubuet keu jipôt hase seunaman jih nyan. 3 Nyan, jak kheueh laju! Ulôn utus gata lagée bubiri lam kawan asée srigala. 4 Bék gata ba baluem atawa uempang teumpat pasoe hase seudeukah, atawa sipatu. Bék gata piôh bak teungoh rot ueh keu gata bôt saleuem ubak soe mantong. 5 Meunyoe gata tamong lam saboh rumoh, gata bôt kheueh saleuem, 'Assalamuálaikum.' 6 Meunyoe lam rumoh nyan na ureuëng nyang galak keu damé, saleuem damé gata nyan teutab tinggai bak ureuëng nyan; meunyoe hán, gata tarek kheueh lom saleuem nyang ka gata bri nyan. 7 Tinggai kheueh lam saboh rumoh mantong. Teurimong kheueh peue nyang jihidang lé ureuëng po rumoh keu gata, sabab ureuëng nyang mubuet nahak jiteurimong upah. Bék minah-minah nibak saboh rumoh u rumoh nyang laén. 8 Meunyoe gata tajak ubak saboh banda dan lam banda nyan gata jiteurimong ngon cara gét-gét, gata pajoh kheueh peue nyang jihidang ukeue gata. 9 Gata peupuléh kheueh ureuëng-ureuëng nyang sakét nyang na lam banda nyan, dan gata peusampoe kheueh ubak ureuëng-ureuëng nyang na disinan, 'Allah deungon sigra teuma geupeu phon mat peurintah sibagoe Raja di teungoh-teungoh gata.' 10 Teuma meunyoe gata tajak bak saboh banda lam banda nyan gata hana jiteurimong, gata teubiet kheueh bak rot ueh dan gata peugah kheueh lagée nyoe, 11 'Bah kheueh abée banda gata nyang meuleukek bak gaki kamoe, kamoe reuteuk sibagoe peuingat keu gata. Dan beugata teupeu kheueh, karab that watée jih Allah geupeu phon mat peurintah sibagoe Raja di teungoh-teungoh gata!' 12 Ingat kheueh, bak uroe kiamat singoh, ureuëng Sodom teuma leubeh mudah geupeu amphon lé Po teu Allah nibak ureuëng nyang na lam banda nyan!" 13 "Cilaka kheueh gata, hei Korazim! Dan Cilaka kheueh gata, hei Betsaida! Seukira jih buet-buet ajaéb nyang ka teupeubuet di teungoh-teungoh gata ka teupeuleumah di banda Tirus dan Sidon, ka pasti ureuëng-ureuëng nyang na lam banda nyan ka treb that jitobat nibak banmandum desya-desya awaknyan, lom jimugui peukayan meukabông sira jiboh abée ateueh ulée jih keudroe. 14 Watée uroe kiamat singoh, ureuëng-ureuëng nyang na lam banda Tirus ngon Sidon teuma leubeh mudah geupeu amphon lé Po teu Allah nibak gata. 15 Dana gata, hei Kapernaum! Gata pike, gata nyan teuma teupeumanyang sampoe u lam syeuruga? Hana! Sikeubit jih gata nyan teuma teurhom lam apui nuraka!" 16 Dan laju geupeugah lé Isa ubak murit-murit Geuh, "Ureuëng nyang jideungoe gata, saban cit ka jideungoe Ulôn. Ureuëng nyang tulak gata, saban cit ka jitulak Ulôn. Dan ureuëng nyang tulak Ulôn, saban cit ka jitulak Gobnyan nyang utus Ulôn." 17 Ban tujoh ploh droe murit Isa nyan jigisa ngon até harôk dan ria lumpah na. "Tuhan," kheun awaknyan, "roh-roh jeuhet pih jitaát ubak kamoe meunyoe kamoe peurintah awaknyan ateueh nan Tuhan!" 18 Geujaweueb lé Isa, "Na Ulôn kalon Iblih rhot ateueh langét lagée kilat. 19 Butateupeu kheueh! Ubak gata ka ulôn bri kuasa mangat gata jeuet gata giloe uleue ngon kala mubisa dan gata peupatah bubena teunaga musoh, hana sapeue pih nyang hase jipeubala ateueh gata. 20 Bah kheueh meunan bék that meusukaria sabab roh-roh jeuhet jitaát ubak gata. Leubeh gét gata meusukaria sabab nan gata ka teucetet lam syeuruga." 21 Bak watée nyan cit teuma, Isa galak that até sabab Gobnyan ka jikuasa lé Roh Allah. Geupeugah lé Isa, "Bapak, Tuhan nyang mat kuasa ateueh langét ngon bumoe! Ulôn meuteurimong gaséh ubak Droeneueh sabab banmandum nyan Droeneueh rahsia nibak ureuëng-ureuëng nyang carông dan meu iéleumé, teuma Droeneueh tunyok ubak ureuëng-ureuëng nyang hana sikula. Nyan kheueh nyang peugalak até Bapak. 22 Peue-peue mantong ka geuseurah lé Bapak ubak Ulôn. Hana meusidroe pih nyang jituri keu Aneuëk, meunyoe kon Bapak keudroe. Hana nyang turi ubak Bapak meunyoe kon Aneuëk; dan ureuëng-ureuëng ubak soe Aneuëk nyan jitem peuturi Bapak." 23 Dan Isa laju geupaleng ubak murit-murit Geuh, dan óh lheueh nyan geupeugah ubak awaknyan keudroe, "Meu-untông that gata sabab ka gata kalon nyang gata ngieng nibak saát nyoe. 24 Sabab ingat: Dumna Nabi dan raja meuheuét that keuneuk jikalon lagée nyang gata ngieng bak watée nyoe teuma awaknyan teutab hana deuh jikalon. Awaknyan meuheuét that jikeuneuk deungoe nyang gata deungoe bak watée nyoe, teuma awaknyan teutab hana jiteumé deungoe." 25 Óh lheuehnyan na sidroe gurée agama teuka keu jikeuneuk jeubak Isa. Ureuëng nyan jitanyong meunoe, "Bapak Gurée, peu nyang harôh ulôn peubuet mangat ulôn jeuet meuteumé udeb seujati dan keukai?" 26 Geujaweueb lé Isa, "Peue nyang na teutuléh lam Alkitab? Pakriban peundapat gata keuhai nyan?" 27 Jijaweueb lé ureuëng nyan, " 'Cinta kheueh ubak Tuhan Allah gata deungon até nyang sunggoh-sunggoh, deungon sigeunab jiwa gata, dan deungon banmandum ákai budho gata,' dan 'Cinta kheueh seusabe gata manusia lagée gata cinta ubak droe keudroe gata.' " 28 "Peue nyang gata jaweueb nyan beutôi," kheun Isa. "Peubuet kheueh lagée nyan, teuma gata meuteumé udeb." 29 Teuma lé gurée agama nyan keuneuk jipeubeutôi droe keudroe jih. Laju jitanyong, "soe nyang teupeugah seusabe keudroe lôn nyan?" 30 Geujaweueb lé Isa, "Na sidroe ureuëng agam jitron rot Yerusalem jijak u Yerikho. Bak teungoh rot ueh ureuëng nyan laju jiseurang lé peurampok, peue-peue nyang na jiba lé ureuëng nyan habéh jireupah, kon nyan mantong ureuëng nyan pih jipoh siteungoh maté, dan óh lheueh nyan laju jitinggai ateueh rot ueh nyan lam keuadaan ureuëng nyan luka-luka parah lumpah na. 31 Hana teujalok lam até na sidroe imeum pih geujak ateueh rot nyan. Watée geungieng ureuëng nyang luka brat nyan, laju jipeusie rot binéh laén, dan jijak laju. 32 Meunan cit deungon sidroe ureuëng Lewi nyang jijak rot nyan; watée jikalon ureuëng nyan, laju jipeurab keu jitilek soe ureuëng nyang luka brat nyan. Dan dijih pih laju jipeusie u meurandeh jalan, dan jijak laju. 33 Teuma na sidroe ureuëng Samaria nyang teungoh jijak bak rot nyan. Watée jingieng ureuëng nyang teutiek lam keuadaan luka brat nyan, laju jiteuka weueh lam até jih. 34 Dan laju jipeurab bak ureuëng nyan dan jipeugleh laju luka-luka nyang na bak tuboh ureuëng nyan ngon ié anggô dan jiboh ubat ngon minyéuk, óh lheueh nyan luka-luka nyang bak tuboh ureuëng nyan laju jibalot ngon ija. Óh lheuehnyan, laju jipeuék ureuëng nyan ateueh keuleudée jih keudroe, dan laju jiba ubak losmen nibak teumpat nyan kheueh ureuëng nyang keunong reupah nyan jipeu-ubat sira jirawat. 35 Óh singoh beungoh lé ureuëng Samaria nyan laju jicok dua boh keupeng péng pirak péng nyan laju jijok ubak ureuëng po losmen nyan sira jipeugah, 'Neu-useuha kheueh ureuëng nyoe sampoe puléh, dan meunyoe na biaya-biaya nyang laén, ulôn bayeue teuma watée ulôn gisa bak teumpat nyoe.' " 36 Óh lheueh nyan Isa geupeu putôh calitra nyan deungon geutanyong lagée nyoe, "Nibak ban lhée droe ureuëng nyan, nyang toh kheueh, meunurot pikeran gata, nyang jipeubuet sibagoe sabe keudroe-droe nibak ureuëng nyang keunong reupah nyan?" 37 Gurée agama nyang teutanyong nyan jijaweueb, "Ureuëng nyang ka jitulông ureuëng nyang keunong rampok nyan." "Nyan, gata jak kheueh, dan gata peubuet kheueh lagée nyang ka jipeubuet lé ureuëng Samaria nyan!" kheun Isa. 38 Óh lheueh nyan Isa ngon murit-murit gobnyan geujak lom ho laén teuma, dan trok laju bak saboh gampông. Lam gampông nyan, na sidroe ureuëng inong nyang nan jih Marta, ureuëng inong nyan jiundang Isa u rumoh jih. 39 Marta na syedara jih nyang inong nan jih Maryam. Maryam nyoe jiduek rab ngon Tuhan Isa jideungoe peue-peue nyang geupeurunoe lé Gobnyan. 40 Teuma si Marta laloe bak dapu jipeusiab peue-peue mantong nyang peureulée keu jipeujamé Isa. Óh lheueh nyan laju jijak ubak Isa sira jipeugah, "Tuhan, peu kheueh Tuhan hana neupakoe bak Maryam nyang jipeubiyeu mantong ulôn meubuet keudroe? Neuyue kheueh jeuet jitulông ulôn!" 41 "Marta, Marta!" jaweueb Tuhan. "Gata khawate dan aloh alah gata pike jéh nyoe; 42 padahai nyang paleng peunteng na kheueh saboh. Dan Maryam ka jipiléh nyang paleng gét, nyang hana teuma teucok nibak jih nyan."

Lukas 11

1 Bak siuroe Isa geumeudoá bak saboh teumpat. Óh ka lheueh meudoá, sidroe lamkawan murit gobnyan jitanyong lagée nyoe, "Tuhan, cineupeurunoe kamoe meudoá lagée Nabi Yahya geupeurunoe murit-murit gobnyan meudoá." 2 Teuma Isa laju geupeugah ubak awaknyan, "Meunyoe gata meudoá, peugah kheueh lagée nyoe, 'Bapak, Droeneueh kheueh Allah Nyang Esa. Seumoga Droeneueh jiseumah ngon jihoreumat. 3 Neubri kheueh keu kamoe tieb-tieb uroe peunajoh nyang kamoe peureulée. 4 Neupeu amphon kheueh desya-desya kamoe, lagée kamoe meupeu amphon ureuëng-ureuëng nyang na salah nibak kamoe. Dan bék kheueh neupeubiyeu kamoe gadôh peucaya kamoe watée kamoe keunong peudaya.' " 5 Isa geupeugah ubak murit-murit Gobnyan, "Seukira jih na sidroe lamkawan gata jijak u rumoh rakan jih bak watée teungoh malam, óh troh keunan laju jipeugah, 'Hei rakan mutuwah, peu-utang kheueh keu ulôn lhée boh ruti, 6 sabab rakan ulôn nyang teungoh jijak, ban sagai jipiôh nibak rumoh dan bak ulôn hana lôn keubah peunajoh keu jamé nyan!' 7 Meunyoe rakan nyang gata teuka nyan jijaweueb lagée nyoe, nibak lam rumoh jih, 'Bék gata peusosah ulôn! Pintoe ka ulôn gunci dan ulôn ngon aneuëk peurumoh lôn ka lôn éh. Ulôn hana hase lôn beudôh keu ulôn bri peue nyang gata lakée.' " 8 "Dan pakriban?" kheun Isa óh lheueh nyan teuma. "Ulôn peugah, nyoe! Bah kheueh gatanyan na kheueh rakan jih, jihnyan hana jitem beudôh dan jibri sapeue-sapeue keu gata. Teuma sabab gata hana meurasa malée teutab gata lakée bak jihnyan hana piôh-piôh, ureuëng nyan pih laju jibeudôh laju jibri keu gata peue nyang gata lakée nyan. 9 Dan, Ulôn peugah ubak gata: Lakée kheueh, keu gata teuma teubri; mita kheueh, nyang gata mita teuma meuteumé; keutok kheueh, teuma pintoe jibuka keu gata. 10 Sabab ureuëng nyang meulakée teuma jiteurimong; ureuëng nyang mita teuma jiteumé, dan ureuëng nyang keutok, pintoe teuma jibuka. 11 Lamkawan gata nyoe peu kheueh na ayah nyang jibri uleue keu aneuëk gata, meunyoe aneuëk gata nyan jilakée eungkot? 12 Atawa gata bri kala itam, meunyoe nyang jilakée boh manök? 13 Bah kheueh nyan gata ureuëng jeuhet, gata teutab tabri nyang jroh keu aneuëk-aneuëk gata. Peu kheueh lom Bapak gata nyang na lam syeuruga! Gobnyan teuma geubri Roh geuh keu ureuëng nyang lakée ubak Gobnyan!" 14 Bak siuroe Isa geu-use roh jeuhet nyang jitamong lam tuboh sidroe ureuëng kalu. Óh ka lheueh jiteubiet roh jeuhet nyan, ureuëng nyan laju jeuet jipeugah haba. Di ureuëng ramé teuhireuen-hireuen, 15 teuma na cit nyang peugah lagée nyoe, "Jihnyan hase jiuse roh jeuhet sabab na Beelzebul, ulée kawan roh jeuhet nyan." 16 Dan na teuma ureuëng-ureuëng nyang keuneuk jeubak Isa, di awaknyan laju jilakée ubak Gobnyan mangat geupeubuet buet-buet nyang ajaéb sibagoe tanda bahwa gobnyan biet-biet teuka nibak Po teu Allah. 17 Teuma lé Isa geuteupeue peue meukeusut awaknyan. Dan laju geupeugah ubak awaknyan, "Meunyoe na saboh nanggroe karu lam peureute-peureute nyang saléng jimeumusoh, nanggroe nyang lagée nyan hán hase meuteuen. Dan saboh keuluwarga nyang karu dan meumusoh sidroe ngon nyang laén, keuluwarga nyan teuma hanco. 18 Meunan cit teuma deungon keurajeuen Iblih; meunyoe saboh kawan jimeulo ngon kawan nyang laén, keurajeuen nyan reuloh. Gatanyoe tapeugah bahwa Ulôn use roh jeuhet sabab na Beelzebul. 19 Meunyoe meunan, ngon kuasa soe murit-murit gata jiuse roh-roh jeuhet nyan? Murit-murit gata nyan kheueh sibagoe bukeuti bahwa gatanyoe salah! 20 Teuma meunyoe ulôn ku-use roh jeuhet ngon kuasa Allah, nyan na kheueh sibagoe tanda bahwa Allah ka geumat peurintah lamkawan gata. 21 Meunyoe na sidroe ureuëng nyang teuga beuhe ngon tungang, sinjata bak jaroe jih leungkab na, jikeumiet rumoh jih keudroe, banmandum atra milék jih teuma seulamat. 22 Teuma meunyoe ureuëng laén nyang leubeh teuga jijak seurang ngon jilo ureuëng nyan sampoe án taloe, teuma lé ureuëng nyang leubeh teuganyan laju jireupah mandum sinjata nyang jipeubangga lé ureuëng po rumoh nyan, dan laju jibagi-bagi banmandum barang-barang ureuëng nyan. 23 Ureuëng nyang hana jidong blaih Ulôn, ureuëng nyan ka jilawan Ulôn, dan ureuëng nyang hana jitulông Ulôn, nyang sikeubiet jih ureuëng nyan ka jipeurusak buet Ulôn!" 24 "Meunyoe roh jeuhet ka jitinggai sidroe-droe ureuëng, rohnyan laju jimeurawôh bak teumpat-teumpat nyang tho keu jimita teumpat peuniôh, teuma teumpat piôh nyang jimita nyan hana meuteumé. Ngon sabab nyan laju jipeugah, 'Ulôn teuma lôn gisa u rumoh nyang ka ulôn tinggai!' 25 Watée roh jeuhet nyan ka trok keunan, laju jingieng rumoh nyan ka gleh ngon teuatoe. 26 Dan laju jijak sira jiba lom tujoh droe roh jeuhet nyang leubeh jeuhet nibak jihnyan. Óh lheuehnyan laju jitamong lam tuboh ureuëng nyan dan laju jitinggai disinan. Dan akhé jih keuadaan ureuëng nyan leubeh brok nibak nyang ka-ka." 27 Óh ka lheueh geupeugah lagée nyan lé Isa, na sidroe ureuëng inong lamkawan ureuëng ramé nyan jipeugah ubak Isa, "Mubahgia that inong nyang peulahé dan nyang peumom Droeneueh!" 28 Geujaweueb lé Isa, "Leubeh mubahgia lom ureuëng nyang jideungoe feureuman Allah dan jipeubuet lagée kheun feureuman nyan!" 29 Teungoh ureuëng ramé jihudom Isa nyan, Gobnyan hana geupiôh bak geupeugah haba, geupeugah lom lé gobnyan lagée nyoe, "Lumpah that jeuhet manusia bak jamén nyoe. Awaknyan jilakée buet nyang ajaéb mangat jihnyan jeuet jipeucaya ubak Ulôn, meusaboh buet ajaéb pih hana teuma teubri keu awaknyan, seulaén keuajaéban Nabi Yunus. 30 Lagée Nabi Yanus ka jeuet keuajaéb keu ureuëng banda Niniwe, meunan cit deungon Aneuëk Manusia teuma jeuet saboh keuajaéban keu ureuëng-ureuëng bak jamén nyoe. 31 Watée uroe kiamat singoh, Ratu nanggroe Seulatan teuma jibeudôh meusigoe ngon ureuëng-ureuëng bak jamén nyoe, dan jitudôh awaknyan. Sabab keujijak deungoe peulajaran Nabi Sulaiman nyang bijak, Ratu nyan ka jisaja jak nyang jiôh lumpah na phon nibak ujong bumoe. Teuma disinoe bak watée nyoe na nyang leubeh rayeuk nibak Nabi Sulaiman! 32 Watée uroe kiamat singoh, peunduduek Niniwe teuma jibeudôh meusajan-sajan ngon ureuëng jamén nyoe, dan jitudôh awaknyan, sabab ureuëng Niniwe nyan ka jimeutobat nibak desya-desya jih watée Nabi Yunus geukhutubah keu awaknyan. Teuma disinoe bak watée nyoe na nyang leubeh rayeuk nibak Nabi Yunus!" 33 "Hana ureuëng nyang jitot panyöt laju jisöm atawa jitôb ngon guci. Ureuëng nyan jikeubah panyöt nyan bak gaki panyöt, mangat ureuëng nyang tamong deuh jingieng peungéh nyang trang. 34 Mata na kheueh panyöt keu tuboh. Meunyoe mata gata jeureunéh, bansaboh badan gata trang bandrang. Teuma meunyoe mata gata sapu, bansaboh tuboh gata ka jeuet keuseupôt tan deuh sapeue. 35 Ngon sabab nyan, beugét-gét kheueh, bék sampoe trang nyang ka na nibak gata nyan jeuet keuseupôt. 36 Meunyoe bansaboh tuboh gata ka jeuet keutrang, dan hana meusapat pih na nyang seupôt, teuma bansaboh tuboh gata nyan ka jeuet keutrang bandrang lagée keunong cahya panyöt." 37 Óh ka lheueh Isa geupeugah haba nyang lagée nyan bagoe, na sidroe ureuëng Farisi ji-undang Isa mangat geutem makheun di rumoh jihnyan. Teuma Isa laju geujak u rumoh ureuëng Farisi nyan keu geujak makheun. 38 Ureuëng Farisi nyan hireuen that jingieng Isa geumakheun hana geu rah jaroe lagée nyang ka teuatoe lam peuratoran agama. 39 Sabab nyan Tuhan geupeugah ubak ureuëng Farisi nyan, "Keubiet nyoe gata na kheueh ureuëng-ureuëng Firisi nyang ka lazem tapeugleh cawan ngon pingan blah luwa mantong, teuma lam tuboh gata keudroe peunoh ngon buet-buet nyang jeuhet. 40 Biet-biet gatanyoe bangai that! Kon kheueh Allah nyang peugét blah luwa nyan, ka teuma geupeugét blah dalam jih? 41 Nyang na lam cawan dan pingan gatanyan, nyan kheueh nyang harôh gata bri keu ureuëng-ureuëng gasien. Deungon cara nyang lagée nyan, banmandum nyan ka jeuet keu gleh keu gata. 42 Mupaloe kheueh gata, hei ureuëng-ureuëng Farisi! Hase seunaman gata lagée bak seulaseh, inggu dan mubagoe rupa reumpah nyang laén, gata bri siper siploh ubak Allah, teuma keuadelan ngon geunaséh ubak Po teu Allah hana gata pakoe. Padahai nyan kheueh nyang harôh gata peubuet, deungon hana gata peubiyeu keu nyang laén-laén. 43 Mupaloe kheueh gata, hei ureuëng-ureuëng Farisi! Gata galak that bak teumpat-teumpat nyang teuhoreumat meunyoe gata tamong lam rumoh-rumoh iébadat, dan galak jihoreumat lé gob meunyoe gata jak u keude-keude. 44 Mupaloe kheueh gata, gata lagée jrat nyang hana batée nisan, nyang jigiloe-giloe lé gob sabab hana jiteupeue." 45 Sidroe lamkawan gurée agama nyan jipeugah ubak Isa, "Bapak Gurée, deungon tutoe Droeneueh nyang lagée nyan, saban cit Bapak ka neuhina kamoe!" 46 Geujaweueb lé Isa, "Mupaloe kheueh gata, hei gurée-gurée agama! Nyang gata lakée hai-hai nyang sulet dan gata bri atoran-atoran nyang brat-brat, teuma di gata mubacut pih hana gatatem tulông ureuëng nyang peujak atoran nyang gata peugét nyan. 47 Mupaloe kheueh gata! Gata peugôt jirat keu Nabi-nabi, nyang poh maté na kheueh indatu gata keudroe. 48 Deungon lagée nyan, gata keudroe ka gata peubeutôi peue-peue nyang ka jipeubuet lé indatu gata; sabab keubiet beutôi awaknyan nyang poh banmandum nabi-nabi nyan dan gata kheueh nyang peugôt kuburan jih. 49 Nyang kheueh sabab jih Keubijaksanaan Allah geupeugah lagée nyoe, 'Ulôn teuma Lôn kirém keu awaknyan Nabi-nabi dan utosan-utosan lôn; siteungoh teuma jipoh maté dan siteungoh teuk ji iénanya!' 50 Allah geupeubuet lagée nyan mangat ureuëng-ureuëng bak jamén nyoe geuhuköm sabab kajipoh maté ateueh mandum Nabi yoh awaiphon donya nyoe geucebta, 51 phon jipoh maté Habel sampoe ubak jipoh maté Nabi Zakharia, nyan na jih rab miseubah ngon Baét Tuhan. Peucaya kheueh: Ureuëng-ureuëng jamén nyoe pasti teuma teuhuköm sabab banmandum nyan. 52 Mupaloe kheueh gata, hei gurée-gurée agama! Gunci ngon peuhah pintoe peungeutahuan na teukeubah nibak gata, teuma digata keudroe hana gatatem tamong u dalam keu gata mita peungeutahuan nyan. Nyang keubiet jih gata pagab-pagab ureuëng-ureuëng nyang jiuseuha keuneuk jitamong u dalam nyan!" 53 Watée Isa geutinggai teumpat nyan, gurée-gurée agama dan ureuëng-ureuëng Farisi laju jiseurapa Isa deungon beungéh raya. Awaknyan ka jiujoe-ujoe kawe gobnyan mangat geutem peugah haba keuhai-hai nyang laén teuma. 54 Dan watée jideungoe nyan awaknyan jisimak gét-gét that guna jidrob peue-peue mantong nyang salah geupeugah haba.

Lukas 12

1 Meuribée-ribée ureuëng meusak-sak dan sampoe na nyang teugidong-gidong gaki jih. Teungoh ureuëng ramé nyan meuhudom nibak teumpat nyan, Isa laju geupeugah ubak murit-murit geuh, "Beuaté-até kheueh keu ragoe ureuëng Firisi, nyang Lôn meukeusut, keuhai munafék awaknyan. 2 Hana nyang teusöm nyang hana deuh teukalon, dan hana nyang teurahsia nyang hana teupeugah. 3 Nyang gata peugah watée malam, teuma teudeungoe óh watée uroe; nyang gata sáh bak punyueng gob lam kama nyang teutôb, teuma jipeumaklum jeueb-jeueb sagoe." 4 "Ingat kheueh, hei rakan-rakan Lôn! Bék kheueh gata takot keu ureuëng nyang hase jipoh maté tuboh teuma hana hase jipeubuet nyang leubeh nibak nyan. 5 Bah kheueh Ulôn tunyok ubak gata soe nyang harôh gata takot. Takot kheueh ubak Po teu Allah! Sabab óh ka lheueh gobnyan teupoh maté, Gobnyan teutab na kuasa keu geutiek lam apui nuraka! Peucaya kheueh, Gobnyan kheueh nyang harôh gata takot. 6 Limong boh cicém tulo jipeubloe ngon yuem dua mata péng nyang paleng ubit. Bah kheueh meunan hana meusaboh pih nyang geutuwoe lé Po teu Allah. 7 Ôk nyang na ateueh ulée gata pih ka geuitong banmandum, sabab nyan bék kheueh teumakot; gata jiôh leubeh muyuem nibak cicém-cicém nyan!" 8 "Ingat kheueh beu gét-gét nyang Ulôn peugah nyoe: Ureuëng nyang jiangkée Ulôn dikeue rakyat ba ureuëng nyan na kheueh murit Ulôn, jihnyan pih teuma geuangkée lé Aneuëk Manusia dikeue malaikat-malaikat Allah. 9 Teuma ureuëng nyang bantah Ulôn dikeue rakyatba bahwa jihnyan geubantah murit Ulôn, jihnyan geubantah cit teuma lé Aneuëk Manusia dikeue malaikat-malaikat Allah. 10 Meunyoe na ureuëng jipeugah nyang kon-kon dan jibantah keuhai Aneuëk Manusia, ureuëng nyan mantong jeuet teupeu amphon; teuma meunyoe jihnyan jihina Roh Po teu Allah, ureuëng nyan hana jeuet teupeu amphon. 11 Meunyoe gata jiba u rumoh-rumoh iébadat keu jijak ba lam sidang dikeue peumeurintah atawa nyang mat kuasa, bék kheueh sosah até gata pakriban gata harôh tabila droe atawa peue nyang harôh gata peugah. 12 Sabab peue nyang harôh gata peugahnyan teuma geupurunoe lé Roh Allah ubak gata óh trok bak watée." 13 Na sidroe ureuëng lamkawan ureuëng ramé nyan jipeugah ubak Isa, "Bapak Gurée, cineuyue ubak syedara lôn mangat jibri keu ulôn siparo nibak hareuta nyang geutinggai lé ayah kamoe." 14 Geujaweueb lé Isa, "Syedara, soe kheueh nyang ka peujeuet ulôn jeuet keuhakém atawa nyang weuek atra warésan keu gata mandua?" 15 Óh lheuehnyan ubak banmandum ureuëng nyang na disinan geupeugah lé Isa, "Até-até kheueh dan beuwaih-waih kheueh, bék sampoe gata jeuet keu ureuëng leuha. Sabab manusia udeb hana meugantung bak atra keukayaan jih mantong, bah kheueh nyan atra jih jai meukuyan-kuyan." 16 Dan Isa laju geupeugah saboh miseue nyang laén lagée nyoe, "Na sidroe ureuëng kaya. Ureuëng nyan na tanoh nyang jai that jibri hase. 17 Ureuëng kaya nyan ka teupike lam até jih, 'Ka hana le teumpat keu lôn keubah hase tanoh lôn. Peue akai ulôn jinoenyoe?' 18 Óh lheuehnyan ureuëng kaya nyan jipike lom jikheun ubak droe jih keudroe, 'Nyan, lôn na akai; gudang-gudang ulôn lôn yue reuloh óh lheuehnyan ulôn yue peudong nyang leubeh rayeuk. Disinan kheueh teuma ulôn keubah banmandum gandom lôn meunan cit deungon barang-barang ulôn nyang laén. 19 Óh lheueh nyan teuma ulôn peugah ubak droe lôn keudroe: Gata meu-untông! Banmandum nyang gét ka na bak gata dan hana teuma habéh meuthon-thon. Meureuhat kheueh gata bak saát nyoe! Éh-éh pajoh kheueh mantong dan peuguna kheueh nékmat udeb gata!' 20 Teuma Po teu Allah geupeugah ubak gobnyan, 'Hei ureuëng bangai! Malam nyoe cit gata teuma maté, dan soe kheueh nyang cok banmandum atra keukayaan nyang ka gata peusapat keu droe gata nyan?' 21 Meunan kheueh jeuet jih deungon tieb-tieb ureuëng nyang jiuseuha jeuet keu ureuëng kaya keudroe jih keudroe, teuma hana jiuseuha jeuet keu ureuëng kaya dikeue Po teu Allah." 22 Dan Isa laju geupeugah ubak murit-murit Gobnyan, "Nyan kheueh sabab jih ulôn peugah, 'Bék kheueh khawate keuhai udeb gata, peue nyang teuma gata pajoh, dan peuteuma nyang teuma gata ngui.' 23 Udebnyoe na kheueh leubeh nibak peunajoh, dan tuboh leubeh nibak peukayan. 24 Gata ngieng kheueh cicém po! Cicém nyan hana jipula, hana teuma peue nyang jipot, dan meunan cit hana jipeugét gupôk keuteumpat jikeubah peunajoh jih. Teuma, Po teu Allah teutab geupeulara beulatang nyan! Teuma digata leubeh meuhareuga nibak cicém-cicém nyan! 25 Soe kheueh nibak gatanyoe nyang sabab jih khawate jeuet jipeupanyang umu jih bah pih bacut? 26 Meunyoe hai nyang ubit lagée nyan ka hana hase gata peubuet, pakon gata khawate keuhai-hai nyang laén? 27 Dan gata ngieng kheueh pakriban bungöng-bungöng bakông jitimoh; bungöng-bungöng bakông nyan hana jimubuet, dan hana teuma jimeurajôt. Nabi Raja Sulaiman nyang meunan meugah ngon kaya hana peukayan gobnyan nyang saban lagak jih lagée bungöng bakông nyan! 28 Naleueng lam blang uroe nyoe timoh singoh teutot. Teuma Po teu Allah teutab geupeusaneut naleueng nyan mangat teutab ceudah. Peuteuk lom gata! Teuma digata kureueng peucaya! 29 Ngon sabab nyan, bék kheueh khawate dan bingong keuhai peue nyang gata pajoh ngon gata jieb. 30 Hai-hai nyang lagée nyan jipeubuet ngon jitiyeub lé ureuëng-ureuëng nyang hana jituri Po teu Allah. Padahai Bapak gata geuteupeue bahwa gata tapeureulée banmandum nyan. 31 Teuma gata harôh ta useuha mangat Po teu Allah geupeurintah lam udeb gata, deungon lagée nyan nyang laén-laén teuma geubri lé Allah keu gata." 32 "Gata nyang bacut jeumeulah jih, bék kheueh teumakot! Sabab Bapak gata galak geubri keu gata beureukat nibak Peumeurintahan Gobnyan. 33 Peubloe kheueh atra milék gata dan gata bri kheueh péng nyan keu ureuëng gasien. Peugét kheueh keu droe gata baluem nyang hana useueng-useueng, na kheueh atra nyang teukeubah lam syeuruga. Atranyan hana jitem gadôh sabab pancuri hana jeuet jicok dan keuraleueb hana jeuet jikab. 34 Sabab dipat na atra gata, nibak teumpat nyan kheueh teuma na até gata!" 35 "Meujaga-jaga kheueh watée meuhadab ubak tieb-tieb hai. Gata harôh sabe lam siab ngon peukayan bak tuboh meunan cit deungon panyöt sabe lam keuadaan hu, 36 saban lagée peulayan-peulayan nyang ka siab jipreh Po jih jiwoe nibak teumpat ureuëng meukawen. Meunyoe Po jih nyan jiwoe dan jikeutok pintoe, bagaih that awaknyan jibuka pintoe. 37 Mubahgia that peulayan-peulayan nyan watée jiwoe Po jih cit ka teupreh-preh. Peucaya kheueh: Po nyan ka siab-siab dan jiyueduek peulayan-peulayan jih nyan, óh lheueh nyan laju jipeutimang awaknyan. 38 Lumpah mubahgia peulayan-peulayan nyan watée jiwoe Po jih awaknyan mantong lam keuadaan meujaga, bah pih Po jih nyan jiwoe watée ka teungoh malam atawa liwat nibak nyan! 39 Ingat kheueh nyoe! Meunyoe ureuëng po rumoh nyan jiteupeu poh padub pancuri nyan jitamong lam rumoh jih, ureuëng nyan teutab jikeumiet pancuri nyan bék jitamong lam rumoh jih. 40 Sabab nyan, gata pih harôh beusiab-siab, sabab Aneuëk Manusia teuma teuka bak watée nyang gata keudroe hana gata sangka-sangka." 41 "Tuhan, peu kheueh peungajaran nyan Tuhan tunyok keu kamoe keu banmandum manusia?" jitanyong lé Petrus. 42 Geujaweueb lé Isa, "Soe peulayan nyang seutia dan bijaksana sampoe jiangkat lé po jih jeuet keumando ateueh peulayan-peulayan nyang laén sampoe awaknyan jibri makheun óh trok bak watée? 43 Biet-biet mubahgia peulayan nyan watée Po jih jiwoe dan jikalon peulayan nyan teungoh jipeubuet tugaih droe jih! 44 Peucaya kheueh: Po jihnyan teuma jipeucaya banmandum atra jih ubak peulayan jih nyan. 45 Teuma meunyoe peulayan nyan jikheun lam até jih, 'Po ulôn mantong treb geugisa,' dan laju jipoh mandum peulayan nyang laén dan jimakheun ngon jijieb ié sampoe án mabök, 46 teuma Po jih laju jiwoe bak jeuem dan watée nyang hana jisangka-sangka. Dan peulayan nyan laju jipoh sikeubiet-keubiet jih lé Po jihnyan dan jipeujeuet lagée naseb ureuëng-ureuëng nyang hana taát ubak Po teu Allah. 47 Peulayan nyang jiteupeu keuheundak Po jih, teuma jihnyan hana meusiab-siab dan hana jipeubuet lagée nyang jikeuheundak lé Po jih, peulayan nyan teuma jiseunuét sikeubiet-keubiet jih. 48 Teuma peulayan nyang hana jiteupeu keuheundak Po jih, óh lheueh nyan jipeubuet buet-buet nyang salah sampoe harôh teuseunuet, teuma teuseunuet bacut mantong. Sabab ureuëng nyang ka lheueh teubri nyang jai, nibak ureuëng nyan teuma teulakée nyang leubeh jai lom. Dan keu ureuëng nyang teupeucaya nyang jai, nibak ureuëng nyan teuma teulakée nyang leubeh jai lom." 49 "Ulôn teuka keu lôn ba apui sampoe habéh tutong bansaboh bumoe nyoe. Paleng gét meunyoe apui ka hu! 50 Mantong na bala nyang paleng hebat nyang harôh Ulôn tanggong. Dan até ulôn apoh apah that sigohlom hainyan teujadi. 51 Peu kheueh gata pike ulôn teuka keu lôn ba damé ateueh rhung donya? Hana, kon damé nyang ulôn ba, nyang ulôn ba na kheueh peudeueng. 52 Phon nibak saát nyoe, saboh keuluwarga nyang na limong droe teuma jimeudakwa sabe, lhée lawan dua. 53 Bapak jilawan aneuëk jih nyang agam dan aneuëk jih nyang agam teuma jilawan bapak jih. Ma jilawan aneuëk jih nyang inong dan aneuëk jih nyang inong teuma jilawan ma jih. Ma tuwan jilawan meulintée jih nyang inong dan meulintée nyang inong teuma jilawan ma tuwan." 54 Dikeue ureuëng ramé nyang na nibak teumpat nyan geumeututoe cit Isa, "Meunyoe gata ngieng awan ji ék rot siblaih u barat, bubagaih that gata peugah, 'Hana treb le jitron ujeuen.' Dan biet-biet jitron ujeuen. 55 Meunyoe gata rasa angén teuka rot sibalih seulatan, laju gata peugah, 'hana treb le jiteuka seu-eum.' Dan biet-biet seu-eum teuka. 56 Gata ureuëng nyang galak bak buet pura-pura! Gata hase gata ramai ikeulem deungon gata ngieng keuadaan langét dan bumoe. Pakon tanda-tanda jamén nyoe hana hase gata ramai?" 57 "Pakon hana gata peuputôh keudroe peue nyang beutôi? 58 Meunyoe ureuëng jijak gadu gata ubak kantô hakém, gata useuha kheueh keu meuteumé gata peuseuleusoe peukara nyan ngon ureuëng nyan sigohlom troh u kantô hakém. Meunyoe hán, eunteuk jihnyan jihila gata u keue hakém dan hakém nyan teuma jijok gata ubak peulisi, dan peulisi jipeutamong gata lam glab. 59 Peucaya kheueh! Gata hana teuma tateubiet lam glab sigohlom huköm gata seuleusoe."

Lukas 13

1 Bak watée nyan na padubdroe ureuëng jicalitra ubak Isa keuhai ureuëng-ureuëng Galilea nyang jipoh maté lé Pilatus, watée awaknyan teungoh jipeuseumah keureubeuen keu Po teu Allah. 2 Watée geudeungoe calitranyan, laju geupeugah lé Isa, "Sabab ureuëng-ureuëng Galilea nyan jipoh maté lagée nyan bagoe, gata pike nyan sibagoe bukeuti awaknyan leubeh meudesya nibak mandum ureuëng Galilea nyang laén? 3 Sagai-sagai kon lagée nyang gata pike nyan! Teuma ingat kheueh: Meunyoe gata hana gata tobat nibak desya-desya gata, banmandum gata teuma maté saban lagée awaknyan. 4 Pakriban teuma ngon lapan blaih droe ureuëng nyang maté di Siloam, watée meunara reubah laju jitimpok ateueh awaknyan? Gata pike awaknyan leubeh meudesya nibak mandum ureuëng nyang na di Yerusalem? 5 Sagai-sagai kon lagée nyang gata pike nyan! Sigoe teuk Ulôn peugah ubak gata: Meunyoe gata tatobat nibak mandum desya-desya gata, gata banmandum teuma maté saban lagée awaknyan." 6 Óh lheueh nyan Isa geucalitra teuma hai lagée nyoe, "Na sidroe ureuëng lam lampôh anggô jih na jitimoh bak ara. Bak siuroe jijak kheueh ureuëng nyan keuneuk jimita boh kayée nyan, óh trok keunan hana jiteumé boh ara nyang jimeuheuét nyan. 7 Ban jingieng bak kayée nyan hana muboh, laju jipeugah ubak namiet nyang jaga lampôh anggô nyan, 'Kalon, ka lhée thon ulôn preh-preh jimuboh bak ara nyang na lam lampôh nyoe, teutab hana lôn teumé meusaboh boh ara. Gata kôh mantong bak ara nyoe! Deungon na jih udeb lam lampôh nyoe hana meuguna keu ulôn, nyang na jipeu habéh zat tanoh mantong!' 8 Teuma jijaweueb lé namiet nyang meubuet bak lampôh nyan, 'Bah kheueh jitimoh sithon teuk, hei Po. Ulôn teuma lôn catôk tanoh bansikeulileng dan ulôn boh baja nyang leubeh jai lom. 9 Pat tateupeue thon ukeue nyoe jimuboh. Meunyoe hana cit jimuboh, jeuet Po yue bak ulôn mangat ulôn teubang bak ara nyang hana meuguna nyan.' " 10 Bak siuroe na kheueh uroe Sabat, Isa teungoh geuseumeubeuet lam saboh rumoh iébadat. 11 Bak teumpat nyan na sidroe ureuëng inong nyang ka lapan blaih thon sakét, sabab na jitamong roh jeuhet lam tuboh ureuëng nyan. Inong nyan bungkôk dan mubacut pih hana jeuet jidong tupat. 12 Watée hainyan geungieng lé Isa, laju geupeugah bak inong bungkôk nyan, "Hei Ma, droeneueh ka puléh nibak peunyakét nyang na lam tuboh neueh!" 13 Dan Isa laju geupeuduek jaroe Geuh ateueh ureuëng inong nyan, watée nyan cit teuma ureuëng inong tuha bungkôk nyan ka jeuet jidong tupat laju jipujoe Po teu Allah. 14 Ulée rumoh iébadat nyang na disinan beungéh raya, sabab Isa geupeu puléh gob bak ureuëng Sabat, sabab nyan laju jipeugah ubak ureuëng-ureuëng nyang na disinan, "Na nam uroe keu tamubuet; teuka kheueh bak uroe-uroe mubuet nyan keu jeuet teupeupuléh nibak mubagoe peunyakét, bék bak uroe Sabat lagée nyoe bagoe!" 15 Geujaweueb lé Isa, "Gata nyoe mandum ureuëng munafék! Bak uroe Sabat banmandum ureuëng jipeuleueh leumô atawa keuleudée jih lam weue dan laju jiba uluwa keu jipeujieb ié keu beulatang nyan. 16 Nyan, disinoe na sidroe ureuëng keuturonan Nabi Ibrahim, nyang ka lapan blaih thon treb jih inong nyoe ji-ikat lé Iblih. Peu kheueh inong nyoe hana jeuet jipeuleueh droe bak uroe Sabat?" 17 Peu nyang geujaweueb lé Isa nyan lumpah that malée nibak lawan-lawan Gobnyan; teuma banmandum ureuëng laén nyang na disinan galak that buet-buet ajaéb nyang ka geupeubuet lé Isa 18 Isa geuteumanyong bak awaknyan, "Meunyoe Po teu Allah ka geumat peurintah, pakriban kheueh keuadaan jih? Ngon peu kheueh jeuet ulôn peubeda atra nyan? 19 Keuadaan jih lagée miseue nyoe. Si aneuëk bijéh sisawi jicok lé sidroe-droe ureuëng dan laju jipula lam lampôh jih. Bijéh nyan timoh laju jeuet keu bak kayée, dan cicém-cicém laju jipeugét eumpung ateueh bak kayée nyan." 20 Sigoe teuk geutanyong lé Isa, "Meunyoe Allah kageumat peurintah, ngon peu kheueh jeuet lôn peusa keuadaan jih? 21 Keuadaan jih lagée ragoe nyang jicok lé sidroe ureuëng inong laju jilawôk ngon peuet ploh arée teupông, sampoe meukeumang banmandum." 22 Sira geujak u Yerusalem, Isa geujak meulalu banda-banda dan gampông-gampông sira geuseumeubeuet bak teumpat-teumpat nyan. 23 Dan na ureuëng teumanyong ubak Gobnyan, "Bapak, Peu kheueh cit bacut sagai ureuëng nyang teupeuseulamat?" 24 Geujaweueb lé Isa, "Meu-useuha kheueh gata tamong rot babah pintoe nyang sampiek. Sabab, ingat! Jai that-that ureuëng nyang ji useuha jikeuneuk tamong teuma meuteumé. 25 Watée ureuëng po rumoh jibeudôh dan jitôb pintoe, gata kateudong diluwa dan laju gata keutok-keutok sira gata peugah lagée nyoe, 'Po lôn, neupeuhah kheueh pintoe keukamoe!' Ureuëng po rumoh nyan teuma jijaweueb, 'Ulôn hana lôn teupeu rot pat gata teuka!' 26 Gata teuma tajaweueb, 'Kamoe ka lheueh kamoe makheun ngon kamoe jieb ié ngon Droeneueh, dan Droeneueh pih ka lheueh neuseumeubeuet bak rot euh lam banda-banda kamoe!' 27 Teuma Po rumoh nyan jipeugah lom, 'Ulôn hana lôn teupeu rot pat gata teuka. Jak wéeh keudeh, gata nyang ka gata peubuet buet nyang jeuhet!' 28 Watée gata ngieng Nabi Ibrahim Nabi Ishaq dan Nabi Yakub dan banmandum nabi meugalak ria lam Donya Barô Allah, gata teuma tamo deungon deurita sabab gata keudroe ka teu-use uluwa! 29 Bube na ureuëng ramé teuma teuka phon nibak blaih timu sampoe nyang na nibak blaih barat, phon nibak utara ngon seulatan, dan teuma meugalak ria lam Donya Barô Allah. 30 Nyang sikeubit jih, na ureuëng nyang paleng akhé jeuet keu ureuëng nyang phon, dan na ureuëng nyang phon nyang teuma jeuet keu ureuëng nyang akhé." 31 Watée nyan cit teuma, na meupadub droe ureuëng Farisi jijak meurumpok ngon Isa sira jipeugah, "Droeneueh bék tinggai disinoe! Jak laju uteumpat laén, sabab Herodes jikeuneuk poh maté droeneueh." 32 Geujaweueb lé Isa, "Gata jak peugah laju ubak ureuëng nyang tan meuguna nyan, 'Uroe nyoe ngon singoh Ulôn use roh jeuhet dan Lôn peupuléh ureuëng sakét, teuma bak uroe nyang keu lhée, teuma Lôn peuseuleusoe banmandum buet Ulôn.' 33 Bah pih meunan bak uroe nyoe singoh dan lusa teutab Ulôn jak meuneujak Ulôn, sabab hana gét meunyoe sidroe nabi jipoh maté diluwa Yerusalem. 34 Yerusalem, Yerusalem! Nabi-nabi gata peumaté! Utosan-utosan Allah gata geulawa ngon batée sampoe maté! Ka padub goe ulôn keuneuk wa peunduduek gata lagée nang manök nyang jiuem banmandum aneuëk jih dimiyueb sayeueb, teuma gata hana tatem! 35 Sabab nyan Po teu Allah hana geutem le meusajan gata. Butateupeue kheueh, phon saát nyoe gata hana le gata ngieng Ulôn, sampoe singoh gata peugah, 'Geubri kheueh beureukat Gobnyan nyang teuka ateueh nan Tuhan.' "

Lukas 14

1 Bak siuroe na kheueh uroe Sabat, Isa geujak makheun u rumoh sidroe ureuëng tokoh bansa Farisi. Nibak teumpat nyan di ureuëng laén jingieng Isa ngon teuliti that. 2 Dan jijak kheueh ubak Isa sidroe ureuëng sakét busong gaki ngon jaroe jih ka gumbong-gumbong. 3 Dan Isa laju geutanyong ubak gurée-gurée agama dan ureuëng-ureuëng Farisi nyang na nibak teumpat nyan, "Meunurot huköm agama geutanyoe, peu kheueh jeuet atawa hana tapeu-ubat ureuëng sakét bak uroe Sabat?" 4 Gurée-gurée agama dan ureuëng-ureuëng Farisi nyang na disinan seungab mantong. Dan laju Isa geuhôi ureuëng nyan dan laju geupeu puléh ureuëng sakét busong nyan, óh lheueh nyan laju geuyue jak ureuëng nyang ka puléh nyan. 5 Óh ka lheueh nyan Isa laju geupeugah ubak ureuëng-ureuëng nyang na inan, "Seukira jih sidroe lamkawan gata nyoe na sidroe aneuëk atawa saboh leumô nyang rhot lam mon bak uroe Sabat, peu kheueh nyan hán jeuet tapeuteungoh uluwa aneuëk nyan atawa leumô nyan bak uroe nyan cit teuma?" 6 Teuma ureuëng nyang na nibak teumpat nyan hana meusidroe pih nyang hase jijaweueb peue nyang geutanyong lé Isa nyan. 7 Isa geukalon na jamé-jamé jipiléh-piléh teumpat duek nyang paleng gét. Sabab nyan gobnyan laju geubri peulajaran nyang lagée nyoe ubak awaknyan banmandum. 8 "Meunyoe gata na jitawök bak teumpat ureuëng meukawen, bék kheueh gata duek bak kurusi teuhoreumat. Pat tateupeue ureuëng laén nyang leubeh peunteng nibak gata pih na jitawök, 9 sampoe ureuëng po rumoh nyang ka jitawök gata bandua nyan teupaksa jijak ubak gata sira jipeugah, 'Meuáh, teumpat nyoe ka teukeubah keu jamé nyang bantrok nyan.' Teuma deungon malée raya gata teupaksa gata duek bak teumpat nyang paleng likot. 10 Sabab nyan kheueh, meunyoe gata na jitawök, gata piléh kheueh teumpat nyang paleng dilikot, mangat ureuëng po rumoh teuma teuka dan jipeugah ubak gata, 'Rakan, jak taduek bak teumpat nyang leubeh gét.' Deungon lagée nyan gata kajihoreumat dikeue jamé-jamé nyang laén. 11 Sabab tieb-tieb ureuëng nyang jipeumanyang droe jih teuma teupeumiyueb, sikeubiet jih ureuëng nyang jipeumiyueb droe jih teuma teupeumanyang." 12 Dan laju geupeugah lé Isa ubak ureuëng po rumoh, "Meunyoe gata tatawök ureuëng laén keu jimakheun di rumoh gata bah kheueh nyan makheun watée uroe meunan cit makheun malam, bék kheueh gata tawök rakan atawa syedara gata, atawa waréh kawöm, atawa waréh lingka gata nyang kaya. Sabab saboh watée ureuëng-ureuëng nyan teuma jitawök gata, ngon lagée nyan gata ka gata teurimong beunalaih ateueh peue nyang ka gata peubuet. 13 Dan, meunyoe gata tapeuna khanuri, gata tawök kheueh ureuëng gasien, ureuëng cidra, ureuëng lapée, dan ureuëng buta. 14 Gata teuma geubri beureukat, sabab ureuëng-ureuëng nyan hana teuma hase jibalaih ateueh keugét até gata. Buet gata nyang gét nyan teuma geubalaih lé Po teu Allah bak watée ureuëng-ureuëng nyang gét teuma teupeubeudôh nibak maté." 15 Watée geupeugah lagée nyan lé Isa, na sidroe lamkawan nyang na nibak teumpat nyan habéh mandum jideungoe peue nyang geupeugah nyan, ureuëng nyan laju jipeugah lagée nyoe, "Untông lumpah na ureuëng nyang teuma jimakheun meusajan ngon Allah watée Gobnyan teuka sibagoe Raja!" 16 Teuma Isa laju geupeugah ubak ureuëng nyan, "Bak saboh watée na ureuëng nyang jipeuna khanuri nyang rayeuk dan jitawök ureuëng jai lumpah na. 17 Watée katroh watée jih khanuri teupeuphon, ureuëng nyan laju jiyue namiet jih ubak ureuëng nyang ka teutawök sira jipeugah lagée nyoe, 'Neubot kheueh langkah u rumoh kamoe, banmandum ka lheueh kamoe hidang!' 18 Teuma di ureuëng nyang teutawök nyan banmandum, sidroe-droe jilakée meuáh. Nyang phon that jipeugah bak namiet nyan, 'Ulôn ban that-that ulôn bloe saboh keubeueng tanoh, dan lumpah peureulée lôn keuneuk jak pareksa tanoh nyan. Peumeuáh kheueh keu ulôn.' 19 Nyang laén jipeugah teuma, 'Ulôn ban that ulôn bloe limong boh judo leumô, dan lôn keuneuk ujoe leumô-leumô lôn nyan. Peumeuáh kheueh keu ulôn!' 20 Nyang laén lom jipeugah teuma lagée nyoe, 'ulôn ban that lheueh lôn meukawen, ngon sabab nyan hana hase ulôn jak.' 21 Namiet nyan laju jiwoe dan jipeugah laju hai nyan ubak Po jih, Po nyan beungéh lumpah na, laju jipeugah ubak namiet jih, 'Bubagaih kheueh gata jak u banda nibak rot-rot euh dan tatamong laju lam-lam jurông lam banda nyan. Gata ba kheueh keunoe ureuëng-ureuëng gasien, ureuëng cidra, ureuëng lapée dan ureuëng buta.' 22 Óh lheueh nyan lé namiet nyan laju jipeugah lagée nyoe, 'Ya Po ulôn, banmandum peurintah Po ka lheueh ulôn peubuet, teuma teumpat jih mantong that jai.' 23 Dan ureuëng Po khanuri nyan laju jipeugah lagée nyoe, 'Gata jak kheueh u rot-rot ueh raya dan jurông-jurông nyang na diluwa banda, dan gata paksa kheueh mangat ureuëng-ureuëng nyan jitem teuka, mangat rumoh ulôn peunoh. 24 Ingat kheueh! Hana meusidroe pih nibak banmandum jamé nyang ka teutawök nyan jiteumé pajoh peunajoh nyang ka ulôn keubah watée khanuri dirumoh ulôn nyan!' " 25 Jai that-that ureuëng jijak meusajan ngon Isa, dan Isa geupaleng sira geupeugah ubak awaknyan, 26 "Meunyoe ureuëng jijak ubak Ulôn, teuma di ureuëng nyan leubeh jigaséh keu ma jih, ayah jih, peurumoh jih, aneuëk-aneuëk jih, syedara jih, dan droe jih keudroe, ureuëng nyang lagée nyan hana hase jeuet keu murit Ulôn. 27 Ureuëng nyang hana jitem gulam saleb gobnyan dan jiseutôt Ulôn, ureuëng nyang lagée nyan hana hase jeuet keu murit Ulôn. 28 Meunyoe na sidroe lamkawan gata jikeuneuk peudong saboh meunara, teuntée jihnyan teuma jiduek ji-itong leubeh ilée padub le habéh biaya meunara nyan dan mangat jiteupeu peu kheueh péng jih séb keu jipeuseuleusoe meunara nyan atawa hana. 29 Sabab meunyoe teunyata jihnyan hana hase jipeuseuleusoe meunara nyan, padahai keunaleueng meunara nyan ka jipeugôt, dan banmandum ureuëng nyang jikalon meunara nyan teuma jipeukém. 30 Awaknyan teuma jipeugah lagée nyoe, 'Ngieng, ureuëng nyan jiseumeugôt, teuma hana hase jipeuseuleusoe!' 31 Meunyoe na sidroe raja bak jihnyan na siploh ribée droe sipa-i keuneuk jimaju lam prang ngon raja laén nyang na dua ploh ribée sipa-i, teuntée raja nyan teuma jiduek jipeutimang leubeh ilée peu kheueh jihnyan ka seb teuga keu jilawan musoh jih, 32 Meunyoe jihnyan jiteupeu bahwa jihnyan gohlom séb teuga, kateuntée simantong musoh jih mantong jiôh, jihnyan teuma jikirém utosan jih keu jilakée meudamé." 33 Keuneulheueh jih geupeugah lé Isa lagée nyoe, "Meunan cit deungon gata. Hana meusidroe pih nibak gata hase jeuet keu murit Ulôn, meunyoe jihnyan hana jikeureubeuen peue-peue nyang na." 34 "Sira nyan gét, teuma meunyoe sira nyan ka jeuet keutabeue, peu kheueh mungken teupeumasen lom teuma? 35 Siranyan hana meuguna le, bah kheueh teupeuguna keu lampôh meunan cit keu baja. Dan akhé jih sira nyan teuböh mantong. Meunyoe gata na punyueng, gata deungoe kheueh!"

Lukas 15

1 Bak siuroe, jai that-that ureuëng nyang buet jih tukang kutéb cukée dan ureuëng-ureuëng nyang jianggab hana gét lé masyarakat jijak deungoe Isa peugah haba. 2 Ureuëng-ureuëng Farisi dan gurée-gurée agama beungéh raya sira meuôk-ôk. Awaknyan laju jikheun meunoe, "Héh, ureuëng nyoe jiteurimong ureuëng hana gét dan jimakheun meusajan awaknyan!" 3 Ngon sabab nyan Isa laju geupeugah ubak awaknyan miseue lagée nyoe, 4 "Meunyoe na sidroe lamkawan gata nyoe na jipeulara sireutôh boh bubiri, lamkawan bubiri nyang sireutôh nyan gadôh saboh -- peu kheueh nyang jipeubuet lé ureuëng po bubiri nyan? Ka pasti ureuëng nyan jitinggai bubiri nyang sikureueng ploh sikureueng boh nyan lam blang naleueng, laju jijak mita nyang gadôh nyan sampoe meuteumé. 5 Dan meunyoe bubiri nyan ka jiteumé, até ureuëng nyan galak lumpah na sampoe-sampoe bubiri nyang ka jiteumé nyan laju jigulam bak bahô jih, 6 laju jipeuwoe u rumoh. Óh lheuehnyan laju jitawök rakan-rakan dan waréh silingka jih sira jipeugah lagée nyoe, 'Jak ngon lôn tameusukaria. Sabab bubiri ulôn nyang gadôh ka lôn teumé lom teuma!' 7 Meunan kheueh lam syeuruga na keugeumbiraan nyang leubeh rayeuk ateueh sidroe ureuëng nyang meudesya jitobat nibak desya-desya jih nyan, nibak sikureueng ploh sikureueng droe nyang ka jroh dan hana peureulée jitobat le." 8 "Atawa sidroe ureuëng inong bak jih na siploh péng pirak, dan péng nyan gadôh saboh -- peu kheueh nyang teuma jipeubuet lé inong nyan? Ureuëng dum laju jitot panyöt dan jisampôh rumoh jih sira jimita dipat mantong sampoe péng nyang gadôh nyan meuteumé lom teuma. 9 Watée péng nyan ka meuteumé, ureuëng inong nyang laju jitawök rakan-rakan dan waréh lingka jih sira jipeugah, 'Ulôn galak lumpah na péng lôn nyang gadôh ka meuteumé lom teuma. Bôh jak geutanyoe tameusukaria!' 10 Meunan cit deungon malaikat Allah galak geuh that-that meunyoe sidroe ureuëng nyang jeuhet jimeutobat nibak desya-desya jih. Peucaya kheueh!" 11 Geupeugah lom lé Isa, "Na sidroe ayah nyang na dua droe aneuëk agam. 12 Aneuëk nyang tulot jipeugah bak ayah jih lagée nyoe, 'Ayah, neubri kheueh keu ulôn bak watée nyoe jeumba ulôn nibak hareuta pusaka nyan.' Teuma lé ayah jihnyan laju jijakweuek atra keukayaan jih nyan keu mandua aneuëk jih. 13 Teuma bak siuroe aneuëk nyang tulot nyan jipeubloe atra warésan jih nyan laju jibungka u nanggroe nyang jiôh. Nibak nanggroe gobnyan jimeupoya-poya ngon péng jihnyan. 14 Watée péng jih ka habéh banmandum, teuka kheueh lam nanggroe nyan musém deuk nyang parah lumpah na, sampoe aneuëk nyan ka meukarat lumpah na. 15 Dan laju jijak mubuet bak sidroe ureuëng peunduduek nyang na disinan, ureuëng teumpat jimubuet nyan laju jiyue aneuëk nyan ublang jak rabe bui. 16 Aneuëk nyan deuk lagoena sampoe kana niet lam até jih keuneuk jipasoe lam pruet jihnyan ngon peunajoh bui nyan. Bah pih jihnyan ka deuk that, hana meusidroe ureuëng nyang jibri makheun keu jih nyan. 17 Akhé jih aneuëk nyan sada dan jikheun lam até jih, 'Ureuëng-ureuëng nyang meubuet bak ayah lôn peunajoh jih meulimpah ruwah, dan ulôn disinoe karab maté ngon sabab deuk! 18 Ulôn bah lôn jakwoe bak ayah lôn, laju lôn peugah ubak gobnyan: Ayah, ulôn ka meudesya ubak Allah meunan cit ubak Ayah. 19 Hana patot le ulôn nyoe teupeugah aneuëk Ayah. Anggab kheueh ulôn nyoe ureuëng nyang mubuet nibak ayah.' 20 Óh lheueh jikheun lam até jih lagée nyan laju jiwoe ubak ayah jih. Mantong jiôh nibak rumoh, aneuëk nyan ka deuh jingieng lé ayah jih. Deungon até nyang wéueh ngon meucén lumpah na ayah jihnyan laju jipeulet bak aneuëk nyan, óh bantrok keunan laju ji uem sira jicöm aneuëk jih nyan. 21 'Ayah,' kheun aneuëk nyan, 'ulôn nyoe ka meudesya ubak Allah meunan cit ubak Ayah. Hana patot le ulôn nyoe ayah peugah aneuëk Ayah.' 22 Teuma lé ayah jihnyan laju jitawök bubena namiet sira jipeugah lagée nyoe, 'Bubagaih, kahjakcok laju peukayan nyang paleng gét, dan kah peungui laju bak aneuëk nyoe. Peusok kheueh euncien bak jaroe jih, dan sipatu bak gaki jih. 23 Óh lheueh nyan gatacok laju aneuëk leumô nyang teumbon dan kahsie laju. Geutanyoe tapajoh rayeuk ngon meusukaria. 24 Sabab aneuëk ulôn nyoe ka maté, jinoenyoe ka udeb lom teuma; aneuëk nyoe ka gadôh, jinoenyoe ka meuteumé lom teuma.' Óh lheuehnyan ayah aneuëk nyan laju jipeuna khanuri nyang luwabiasa meuriah jih. 25 Watée nyan, aneuëk nyang tuha mantong na di blang. Watéenyan jiwoe dan karab trok bak binéh rumoh, laju jideungoe su musik ngon su ureuëng meunari dan meulikak. 26 Lé aneuëk nyang tuha nyan laju jihôi sidroe namiet dan laju jitanyong bak namiet nyan, 'Peue na dirumoh subra lumpah na?' 27 Jijaweueb lé namiet nyan, 'Adoe Po kajigisa! Dan ayah Droeneueh kageuyue sie saboh leumô nyang teumbon, sabab gobnyan kameurumpok lom ngon aneuëk geuh lam keuadaan seulamat!' 28 Aneuëk nyang tuha nyan beungéh lumpah na sampoe jihnyan hana jitem tamong lam rumoh. Laju ayah jih jiteubiet sira jirayu mangat aneuëk tuha jihnyan jitem tamong. 29 Teuma aneuëk tuha nyan jipeugah, 'Meuthon-thon treb jih ulôn mubuet keu Ayah. Hántom na ulôn bantah peu nyang Ayah peurintah. Dan peue kheueh nyan Ayah bri keu ulôn? Meusaboh kaméng pih gohlom na Ayah bri keu ulôn mangat lôn meuramien ngon rakan-rakan lôn! 30 Aneuëk Ayah nyan ka jipeuhabéh atra Ayah meupoya-poya ngon inong jeuhet, teuma meunan jiwoe u rumoh nyoe, Ayah sie aneuëk leumô nyang teumbon keu jih!' 31 'Hei aneuëk Ayah,' jaweueb Ayah jih, 'gata sabe na meusajan Ayah dirumoh nyoe. Banmandum nyang ulôn po nyoe na kheueh atra gata cit. 32 Teuma tanyoe harôh takhanuri dan meugeumbira, sabab adoe gata nyan ka maté, teuma bak saát nyoe ka udeb lom teuma; jihnyan ka gadôh, teuma bak saát nyoe ka meuteumé lom teuma.' "

Lukas 16

1 Isa geupeugah ubak murit-murit Geuh, "Na sidroe ureuëng kaya. Ureuëng kaya nyan na jipeukeureuja sidroe peugawée bagian mat péng nyang atoe atra keukayaan jihnyan. Ureuëng kaya nyan na gob lapor bak jih bahwa peugawée nyang mat bagian péng ka jihambo-hambo péng jih. 2 Banjideungoe haba nyan laju jihôi peugawée nyan dan jipeugah lagée nyoe, 'Peubeutôi nyang ulôn deungoe? Jinoenyoe gata jok laju ubak ulôn laporan nyang leungkab keuhai hase buet gata nyang gata urôh keukayaan ulôn. Dan gata hana jeuet le keupeugawée bagian mat péng ulôn.' 3 Dan lé peugawée bagian mat péng nyan laju jipike, 'Peu nyang harôh ulôn peulaku bak saátnyoe? Po ulôn keuneuk geupeucat lôn. Jak ceumatôk, ulôn hana teuga; jak geumadée, ulôn malée. 4 Jinoe na akai; meunyoe ulôn ka geupeucat, ulôn harôh na rakan nyang ramé mangat jeuet jiteurimong ulôn dirumoh awaknyan!' 5 Ngon nyan, lé peugawée bagian mat péng nyan laju jitawök banmandum ureuëng nyang ka lheueh jimeu-utang bak Po jih. Ubak ureuëng nyang phon jipeugah lagée nyoe, 'Padub na le utang gata bak Po ulôn?' 6 Jijaweueb lé ureuëng nyan, 'Sireutôh boh guci minyéuk zaiton.' Laju jipeugah lé peugawée nyan ubak ureuëng nyan, 'Nyoe surat utang gata. Gata duek kheueh dan tuléh: limong ploh.' 7 Óh lheueh nyan jipeugah teuma bak ureuëng nyang keudua, 'Dan gata, padubna utang gata?' Jijaweueb lé ureuëng nyan, 'Siribée boh umpang gandom.' Peugawée bagian mat péng nyan laju jipeugah bak ureuëng nyan, 'Nyoe surat utang gata, tuléh: lapan reutôh.' 8 Teuma lé toke nibak peugawée bagian mat péng nyang hana jujoe nyan jipujoe peugawée jih nyang lisék nyan; sabab ureuëng-ureuëng lam donya nyoe leubeh lisék jiatoe urosan droe jih nibak ureuëng-ureuëng nyang udeb lam trang." 9 Óh lheuehnyan Isa geupeugah lom, "Deungoe kheueh! Peuguna kheueh keukayaan lam donya nyoe keu tamita rakan, watée keukayaan donya nyoe ka hana meuguna le, gata teuma jiteurimong bak teumpat tinggai nyang keukai baka. 10 Ureuëng nyang jeuet teupeucaya nibak hai-hai nyang ubit, jeuet cit teupeucaya nibak buet-buet nyang rayeuk. Teuma ureuëng nyang hana jeuet teupeucaya nibak hai-hai nyang ubit, hana teuma jeuet teupeucaya nibak buet-buet nyang rayeuk. 11 Dan, meunyoe keuhai keukayaan donya nyoe gata ka hana jeuet teupeucaya, soe nyang jitem peucaya gata keuhai keukayaan rohani? 12 Dan meunyoe keuhai barang nyang na bak ureuëng laén, gata kana bukeuti hana jeuet teupeucaya, soe teuma nyang jitem bi ubak gata peue nyang jeuet keuhai milék gata? 13 Hana meusidroe pih hase jimubuet keu dua droe toke; sabab jihnyan teuma leubeh jigaséh ubak nyang sidroe nibak nyang laén, atawa jihnyan leubeh seutia ubak toke nyang sidroe nibak nyang laén. Meunan cit deungon gata. Gata hana hase tamubuet keu Po teu Allah dan meunan cit keu hareuta beunda gata." 14 Ureuëng-ureuëng Farisi jideungoe banmandum peue-peue nyang geupeugah lé Isa nyan. Dan awaknyan laju jipeukém Gobnyan, sabab awaknyan galak keupeng. 15 Teuma Isa geupeugah ubak awaknyan, "Gata kheueh ureuëng meunyoe dikeue ureuëng laén deuh jih beutôi, teuma Po teu Allah geuteupeue asoe até gata. Sabab peue nyang jianggab manyang lé manusia, geupandang miyueb lé Po teu Allah. 16 Huköm nyang geubri lé Nabi Musa dan ajaran Nabi-nabi, teutab teupeuguna sampoe watée teuka Nabi Yahya Pumanö. Phon watée nyan Haba Gét keuhai pakriban Po teu Allah geumat peurintah sibagoe Raja teupeusampoe laju. Dan ureuëng jipaksa droe beu jeuet keu anggota umat Po teu Allah. 17 Dan leubeh mudah langét ngon bumoe hanco, nibak saboh hurof nyang na lam Huköm Po teu Allah jeuet keubateue. 18 Soe nyang taleuek peurumoh jih laju jimeukawen ngon inong laén, ureuëng nyan ka jimeumukah, dan ureuëng nyang meukawen ngon inong nyan nyang ka jitaleuek nyan pih ka jimeumukah." 19 "Na sidroe ureuëng kaya. Peukayan nyang jingui yuem jih meuhái-meuhái, dan udeb jih sabe lam meuwáh tieb-tieb uroe. 20 Bak babah pintoe rumoh jih jipeuduek sidroe ureuëng gasien nan jih Lazarus. Bansaboh tuboh ureuëng nyan peunoh jitimoh purée. 21 Meunyoe jimakheun na kheueh séueh-séueh nyang rhot u miyueb meuja makheun ureuëng kaya nyan. Dan asée pih jijak lieh purée ureuëng nyan. 22 Ureuëng gasien nyan laju meuninggai donya dan laju geuba lé malaikat ubak teumpat nyang paleng mulia bak binéh Nabi Ibrahim lam syeuruga. Meunan cit ureuëng kaya nyan meuninggai donya laju teupeukubu. 23 Lam donya ureuëng maté ureuëng kaya nyan meudeurita lumpah na. Dan watée jitangah u ateueh nibak teumpat jih nyan, deuh laju jikalon Nabi Ibrahim bak teumpat nyang jiôh dan Lazarus na bak binéh Nabi Ibrahim. 24 'Wahei Bapak ulôn Nabi Ibrahim!' kheun ureuëng kaya nyan. 'Neugaséh kheueh keu ulôn, neuyue kheueh bak Lazarus mangat jitem ceulob jaroe jih lam ié óh lheuehnyan jijak peucilét bak lidah lôn. Ulôn seungsara that lam apui nuraka nyoe!' 25 Teuma Nabi Ibrahim laju geujaweueb lagée nyoe, 'Ingat kheueh héi aneuëk ulôn: siumu udeb gata katateumé banmandum nyang gét-gét, seudangkan Lazarus jiteumé nyang brok-brok. Jinoenyoe jihnyan mangat disinoe, teuma digata seungsara. 26 Seulaén nibak nyan, gata ngon kamoe kateupeugét jurông nyang rayeuk, mangat ureuëng nyang na disinoe hana jeuet jijak keunan dan ureuëng nyang na disinan hana jeuet jijak keunoe!' 27 'Meunyoe meunan, hei Bapak meutuwah,' kheun ureuëng kaya nyan lom, 'Ulôn lakée ngon meuharab that mangat Bapak yue Lazarus u rumoh ayah ulôn. 28 Lam rumoh ayah lôn nyan na limong droe syedara lôn. Neuyue kheueh bak Lazarus mangat jipeuingat awaknyan, jeuet awaknyan pih bék sampoe rhot bak teumpat seksaan lagée nyoe bagoe.' 29 Geujaweueb lé Nabi Ibrahim, 'Bak awaknyan ka na kitab-kitab Nabi Musa dan kitab-kitab nabi-nabi! Bah kheueh awaknyan jipeubuet peue nyang ka teutuléh lam kitab nyan!' 30 Teuma jijaweueb lé ureuëng kaya nyan, 'Nyan hana séb, ya Bapak ulôn Nabi Ibrahim. Teuma meunyoe na ureuëng maté udeb lom teuma dan jijak ubak awaknyan, awaknyan teuma jitobat nibak desya-desya jih.' 31 Teuma geupeugah lé Nabi Ibrahim, 'Meunyoe awaknyan hana jipako peue nyang ka geupeurintah lé Nabi Musa dan kheun nabi-nabi, ka pasti awaknyan pih hana jipeucaya, bah pih na ureuëng maté nyang udeb lom teuma.' "

Lukas 17

1 Isa geupeugah ubak murit-murit Gobnyan lagée nyoe, "Hai-hai nyang jeuet keusabab manusia jipeubuet desya teuntée teuma na. Teuma mupaloe kheueh ureuëng nyang peusabab nyan! 2 Leubeh gét meunyoe batée geumiléng teuikat bak takue jih, óh lheuehnyan teupeunom lam laôt raya nibak jih udeb jeuet keusabab sidroe lamkawan ureuëng ubit nyoe jipeubuet desya. 3 Kareuna nyan, até-até kheueh! Meunyoe syedara gata meudesya, seugah kheueh jihnyan. Meunyoe jih nyan meunyeusai, peuamphon kheueh jih nyan. 4 Meunyoe jih meudesya nibak gata tujoh goe siuroe dan tieb-tieb jijak ubak gata jipeugah, 'Ulôn lakée meuáh,' peuamphon kheueh jihnyan." 5 Rasui-rasui geupeugah ubak Isa, "Tuhan, peukông kheueh iman kamoe." 6 Geujaweueb lé Tuhan, "Meunyoe gata na iman bah kheueh nyan bube bijéh sisawi, gata jeuet gata peugah keubak kayée meureubo nyoe, 'Beuteulot kheueh kah hei bakkayée dan beuteupula kheueh lam laôt raya,' pasti bak kayée meureubo nyoe jipatéh peurintah gata." 7 "Seukira jih sidroe lamkawan gata nyoe na namiet gata jimeu-éue diblang dan jirabe bubiri. Watée namiet nyan ka jiwoe, peu kheueh jihnyan jipeugah ubak gata, 'Jak bubagaih tapajoh bu?' 8 Teuntée hana! Sikeubit jih Po nyan jipeugah ubak namiet jih lagée nyoe, 'Keubah laju peunajoh ulôn. Ngui kheueh peukayan nyang gleh dan kah preh kheueh ulôn kujak pajoh bu ngon lôn jieb ié; óh lheuehnyan barô kheueh jeuet gata pajoh bu.' 9 Namiet nyan hana peureulée teupujoe kareuna ka jiseutôt peue nyang jipeugah lé Po jih, nyoe peukon? 10 Meunan cit deungon gata. Meunyoe gata ka gata peubuet banmandum nyang ka teupeurintah ubak gata, peugah kheueh laju, 'Kamoe na kheueh namiet biasa; nyang kamoe peubuet na kheueh keuwajéban kamoe.' " 11 Isa teungoh geujak u Yerusalem, rot daerah nyang meuceue ngon Samaria dan Galilea. 12 Watée geutamong lam saboh gampông, laju jijak ubak gobnyan siploh droe ureuëng nyang ka keunong peunyakét kulét nyang lumpah parah. Awaknyan jidong rot jiôh 13 laju jitawök, "Isa, Po ulôn! Neugaséh kheueh keukamoe!" 14 Watée geungieng lé Isa awaknyan, laju geupeugah bak awaknyan, "Gata jak kheueh ubak Imeum-imeum dan gata peureksa laju peue peunyakét gata nyan." Teungoh awaknyan geujak, peunyakét awaknyan laju puléh. 15 Watée jiteupeu lé sidroe lamkawan awaknyan bahwa peunyakét jih ka puléh, awaknyan laju jigisa sira jisumurak jipujoe Po teu Allah. 16 Dan jijak laju ukeue Isa jisujut sira jiseumah Gobnyan dan jilakée teurimong gaséh bak Gobnyan. Ureuëng nyan sidroe ureuëng Samaria. 17 Óh lheueh nyan geupeugah lé Isa, "Kon na siploh droe nyang ka teupeupuléh? Ho kajijak nyang sikureueng droe teuk? 18 Pakon jeuet ureuëng aséng nyoe nyang jigisa jipeugah teurimong gaséh ubak Allah?" 19 Laju geupeugah lé Isa bak ureuëng nyan, "Beudôh dan gata jak kheueh laju. Kareuna gata peucaya keu Ulôn, gata puléh." 20 Na padub droe ureuëng Farisi laju jitanyong bak Isa pajan Po teu Allah geupeu phon mat peurintah sibagoe Raja. Geujaweueb lé Isa, "Peumeurintah Po teu Allah hana geupeu phon ngon tanda-tanda nyang deuh jingieng lé manusia, 21 sampoe manusia jeuet jipeugah, 'Jakngieng nyoe, nyoe pat gobnyan!' atawa, 'Disideh gobnyan!' Sabab Po teu Allah ka geupeu phon mat peurintah diteungoh-teungoh gata." 22 Óh lheueh nyan Isa laju geupeugah ubak murit-murit Gobnyan lagée nyoe, "Teuma teuka watée jih gata meuheuét keuneuk kalon siuroe nibak uroe-uroe Aneuëk Manusia, teuma digata teutab hana hase gata kalon. 23 Singoh ureuëng teuma jipeugah ubak gata, 'Ngieng, disinan!' atawa, 'Ngieng, disinoe!' Dan bék kheueh gata teubiet jak mita peue nyang jipeugah nyan. 24 Lagée kilat muble dilangét, dan peungéh meucahya phon di ujong trok u ujong, meunan kheueh singoh keuadaan Aneuëk Manusia bak uroe jih gobnyan teuka. 25 Teuma phon-phon gobnyan harôh geurasa deurita nyang lumpah jai dan hana jiteurimong lé ureuëng-ureuëng bak jamén nyoe. 26 Bak uroe Aneuëk Manusia teupeugah singoh, keuadaan jih lagée bak jamén Nabi Nuh yoh jamén ilée. 27 Manusia jimakheun ngon jijieb ié, jimeukawen; meunan kheueh sabe hana putôh-putôh sampoe Nabi Nuh geutamong lam kapai laju ié raya teuka dan habéh jipeubinasa banmandum ureuëng nyan. 28 Meunan cit saban lagée jamén Nabi Lot. Manusia jimakheun ngon jijieb ié, bloe peubloe, jimeulampôh dan jipeugét rumoh. 29 Teuma watée Nabi Lot geuteubiet nibak Sodom, bak uroe nyan apui ngon tanoh beulerang jitreun nibak langét dan habéh jipeubinasa awaknyan banmandum. 30 Meunan kheueh keuadaan jih singoh watée Aneuëk Manusia geupeugah. 31 Bak uroe nyan ureuëng nyang mantong na ateueh bubông rumoh jih bék kheueh jitreun keu jijak cok barang-barang jih nyang na lam rumoh. Meunan cit keu ureuëng nyang mantong na di blang bék kheueh jiwoe u rumoh. 32 Ingat kheueh peue nyang ka keunong ateueh peurumoh Nabi Lot! 33 Ureuëng nyang jiuseuha jipeuseulamat udeb jih, teuma gadôh udeb. Teuma keu ureuëng nyang gadôh udeb jih teuma teupeuseulamat udeb jih. 34 Peucaya kheueh: Bak malam nyan, dua droe ureuëng teungoh jiéh ateueh peuratah, sidroe teuma geuba dan sidroe teuk geutinggai disinan. 35 Dua droe inong teungoh jigileng gandom, sidroe teuba geuba dan sidroe teuk teuma geutinggai disinan. 36 Dua droe ureuëng teungoh jimubuet diblang, sidroe teuma geuba dan sidroe teuk teuma geutinggai disinan." 37 Murit-murit Isa laju jitanyong ubak Gobnyan, "Dipat nyang lagée nyan teuma teujadi, Tuhan?" Geujaweueb lé Isa, "Dipat na bangke, nibak teumpat nyan na cicém nyang pajoh bangke."

Lukas 18

1 Óh lheueh nyan geucalitra saboh umpama lé Isa guna keu geupeurunoe murit-murit geuh mangat awaknyan sabe meudoá dan bék putôh asa. 2 Isa laju geupeugah miseue nyan, "Lam saboh banda na sidroe hakém nyang hana jitakot ubak Allah, dan hana jipako keusoe mantong. 3 Lam banda nyan na teuma sidroe inong balée nyang sabe jimeuhadab ngon hakém nyan jilakée mangat peukara jih jibila. 'Neutulông kheueh ulôn lampeukara nyoe lôn hadab lawan ulôn.' Kheun inong nyan ubak hakém. 4 Napadub treb watée jih hakém nyan hana jitem tulông inong balée nyan. Akhé jih hakém nyan jipike, 'Bah pih ulôn nyoe hana lôn takot keu Po teu Allah dan hana lôn pakoe ubak soe mantong, 5 sabab inong balée nyoe hana putôh-putôh jipeukaru ulôn, leubeh gét peukara ureuëng nyoe ulôn bila. Meunyoe hán, inong nyoe hana jipiôh-piôh jipeukaru ulôn.' " 6 Dan laju geupeugah lé Tuhan lagée nyoe, "Ngieng kheueh peu nyang jipeugah lé hakém nyang hana ade nyan! 7 Nyan, peu kheueh Po teu Allah hana geubila peukara umat Geuh keudroe nyang jilakée ubak Gobnyan uroe ngon malam? Peu kheueh Gobnyan geu-ulue-ulue watée keu geutulông awaknyan? 8 Peucaya kheueh: Gobnyan reujang that geubila peukara awaknyan! Teuma meunyoe Aneuëk Manusia ka teuka, peu kheueh mantong na meuteumé ureuëng meuiman ubak Gobnyan ateueh rhueng bumoe nyoe?" 9 Dan Isa geucalitra lom saboh miseue keuhai manusia nyang jingieng miyueb ateueh ureuëng laén, ureuëng nyan yakén bahwa droe jih keudroe kheueh nyang paleng gét. 10 Geupeugah lé Isa, "Na dua droe ureuëng jijak u Baét Tuhan keu jijak meudoá. Nyang sidroe ureuëng Farisi, sidroe teuk nyang laén buet jih tukang kutéb cukée. 11 Ureuëng Farisi nyan jidong aséng keudroe sira jimeudoá, 'Ya Allah, ulôn lakée teurimong gaséh ubak Droeneueh, sabab ulôn hana lagée ureuëng laén, nyang leuha, jeuhet, atawa tukang peubuet meumukah. Ulôn syukoe that sabab ulôn bukon lagée tukang kutéb cukée nyan. 12 Ulôn puasa dua goe lam sigoe aleuhat, dan ulôn peuseumah ubak Droeneueh siper siploh nibak banmandum hase nyang ulôn teumé.' 13 Teuma di ureuëng tukang kutéb cukée nyan jidong jiôh-jiôh dan hana jijeuet jitangah u langét. Sira jiurôt dada laju jipeugah, 'Ya Allah, neugaséh kheueh keu ulôn, ureuëng meudesya nyoe!' " 14 "Peucaya kheueh," kheun Isa, "Watée jiwoe u rumoh, doá ureuëng kutéb cukée nyan nyang geuteurimong lé Po teu Allah dan bukon doá ureuëng Farisi nyan. Sabab tieb-tieb ureuëng nyang jipeumanyang droe jih teuma geupeumiyueb; dan tieb-tieb ureuëng nyang peumiyueb droe jih teuma geupeumanyang." 15 Na ureuëng-ureuëng nyang jiba aneuëk-aneuëk miet ubak Isa mangat geutem mat dan geubri beureukat keu aneuëk miet nyan. Watée hainyan jingieng lé murit-murit Isa laju awaknyan jibeungéh bak ureuëng-ureuëng nyan. 16 Teuma lé Isa laju geutawök aneuëk nyan dan laju geupeugah ubak murit-murit Geuh, "Bah kheueh aneuëk miet nyan jijak bak ulôn! Bék gata tam awaknyan, sabab ureuëng nyang lagée nyoe kheueh jeuet keu anggota umat Allah. 17 Ingat kheueh! Ureuëng nyang hana jimeuhadab ubak Allah lagée sidroe aneuëk, ureuëng nyan hana teuma jeuet keu anggota umat Po teu Allah." 18 Sidroe peumimpén Yahudi jiteumanyong bak Isa, "Bapak Gurée nyang gét, peu nyang harôh ulôn peubuet mangat ulôn meuteumé udeb seujati dan keukai?" 19 "Pakon gata peugah Ulôn gét?" geutanyong lé Isa bak ureuëng nyan. "Hana nyang gét, seulaén Po teu Allah keudroe. 20 Gata ka tateupeue peue-peue nyang geupeurintah lé Po teu Allah: 'Bék meumukah, bék seumeupoh maté, bék ceumeucue, bék jeuet keusaksi duseuta, dan horeumat kheueh keu ayah ngon ma gata.' " 21 "Banmandum peurintah nyan ka ulôn peubuet phon muda ulôn kon," seuôt ureuëng nyan. 22 Ban geudeungoe lagée nyan, laju geupeugah lé Isa, "Mantong na sapeue nyang harôh gata peubuet: Jak peubloe kheueh banmandum atra milék gata, gata bri kheueh péng keu ureuëng gasien, dan gata teuma meuteumé hareuta lam syeuruga. Óh lheueh nyan teuka kheueh keunoe taseutôt Ulôn." 23 Teuma watée jideungoe haba nyan, até jih peudeh lumpah na sabab jih kaya lagoena. 24 Isa geuteupeue ureuëng nyan seudéh that até, sabab nyan laju geupeugah, "Payah that-that meunyoe ureuëng kaya jeuet keu anggota umat Po teu Allah! 25 Leubeh mudah saboh unta jitamong lam ruhuéng jarôm, nibak ureuëng kaya jitamong lam Donya Barô Allah." 26 Ureuëng-ureuëng nyang jideungoe Isa geupeugah meunan laju jitanyong, "Meunyoe meunan, soe nyang hase seulamat?" 27 Geujaweueb lé Isa, "Nyang hana mungken bak manusia, mungken bak Allah!" 28 Dan Petrus laju jipeugah meunoe, "Ngieng kheueh! Kamoe ka kamoe tinggai aneuëk binoe kamoe jeuet kamoe jak seutôt Bapak." 29 "Peucaya kheueh!" kheun Isa. "Ureuëng nyang ka jitinggai rumoh jih, atawa peurumoh jih, atawa syedara jih, atawa ayah ngon ma jih atawa aneuëk-aneuëk jih kareuna jiseumah Po teu Allah, 30 ureuëng nyan teuma geubalaih meulipat ganda bak saát nyoe, dan óh uroe dudoe keu ureuëng keu teuma geubri udeb seujati dan keukai." 31 Isa laju geupeusapat mandua blaih droe murit Geuh u teumpat nyang aséng, ubak awaknyan laju geupeugah lagée nyoe, "Deungoe nyoe! Tanyoe watée nyoe tajak u Yerusalem. Disinan, banmandum nyang ka geutuléh lé Nabi-nabi keuhai Aneuëk Manusia, teuma teujadi. 32 Gobnyan teuma jiseurah ubak ureuëng-ureuëng nyang bukon ureuëng Yahudi, nyang jihina, jiludah dan jipeumalée. 33 Awaknyan teuma jiseksa dan jipoh maté Gobnyan, teuma bak uroe nyang keu lhée, Gobnyan teuma geubeudôh." 34 Banmandum nyan mubacut pih hana muphom bak murit-murit Isa. Makna nibak tutoe haba nyan teusöm nibak awaknyan. Awaknyan hana jiteupeue keuhai peue nyang geupeugah lé Isa nyan. 35 Watée Isa karab trok u Yerikho, na sidroe ureuëng buta sira jiduek jigeumadée bak binéh rot. 36 Watée jideungoe ureuëng ramé nyan teungoh jijak, laju jitanyong, "Peue nyan?" 37 "Isa ureuëng Nazaret nyan teungoh geujak," Seuôt awaknyan bak ureuëng buta nyan. 38 Ban jideungoe haba nyan, di ureuëng buta nyan pih laju jiteumawök sira jidumpék, "Isa, aneuëk Nabi Daud! Neugaséh kheueh keu ulôn!" 39 Ureuëng-ureuëng nyang teungoh jijak dikeue laju jibeungéh keu ureuëng buta nyan sira jiyue seungab. Ureuëng buta nyan hana jipatéh jikuk ngon jimeuhôi leubeh teuga nibak su yoh awai, "Hei Aneuëk Nabi Daud, neugaséh kheueh keu ulôn!" 40 Isa laju geupiôh dan geuyue bak gob mangat ureuëng butanyan jiba ubak Gobnyan. Watée gobnyan ka troh keunan, Isa laju geutanyong bak ureuëng nyan, 41 "Peue nyang gata lakée jeuet ulôn peubuet ateueh gata?" "Hei Po," jaweueb ureuëng butanyan, "Ulôn lakée beudeuh ulôn keumalon." 42 Dan laju geupeugah lé Isa, "Meunyoe meunan, kalon kheueh! Kareuna gata peucaya ubak ulôn, gata puléh." 43 Watée nyan cit teuma ureuëng buta nyan ka jeuet jikeumalon, laju jiseutôt Isa sira jilakée teurimong gaséh bak Po teu Allah. Watée ureuëng ramé nyan jingieng hai nyan, awaknyan banmandum jipujoe Allah.

Lukas 19

1 Watée Isa ka troh u Yerikho, hana geupiôh geujak laju lam banda nyan. 2 Lam banda nyan na jiduek sidroe ureuëng ulée kawan tukang kutéb cukée nyang kaya raya, nan ureuëng nyan Zakheus. 3 Ureuëng nyan meuheuét that keuneuk ngieng soe Isa nyan, teuma sabab ureuëng laén nyang na disinan jai lumpah ramé dan jih keudroe paneuk, sampoe hana hase jikalon Isa. 4 Ureuëng nyan hana putôh asa, jibeudôh inan laju jiplueng ukeue leubeh awai jih nibak ureuëng laén, dan laju jiék ateueh bak kayée, mangat jeuet jiteumé ngieng Isa nyang hana treb le trok keunan. 5 Watée Isa ka trok bak binéh bak kayée nyan, Gobnyan geungieng u ateueh dan óh lheuehnyan laju geupeugah, "Hei Zakheus, treun laju bubagaih! Sabab ulôn keuneuk jak u rumoh gata uroe nyoe." 6 Ban jideungoe haba nyan Zakheus reujang that jitreun ngon até nyang galak that laju jijak meurumpok ngon Isa. 7 Banmandum ureuëng nyang na disinan dan jingieng hai nyan até awaknyan tunu lumpah na. Awaknyan jipeugah lagée nyoe, "Héueh! Ureuëng nyoe jijak meujamé u rumoh ureuëng hana gét!" 8 Óh lheuehnyan, lam rumoh jih nyan, Zakheus jidông dan laju jipeugah ubak Isa, "Tuhan, siteungoh atra ulôn nyang le nyoe lôn seudeukah keu ureuëng gasien; dan soe mantong nyang ka lheueh ulôn peungét, teuma lôn bayeue lom keu ureuëng nyan peuet goe ganda!" 9 Dan laju geupeugah lé Isa, "Bak uroenyoe, gata dan banmandum keuluwarga gata ka geupeu seulamat lé po teu Allah dan geubri udeb nyang barô, sabab gata pih keuturonan Nabi Ibrahim. 10 Aneuëk Manusia teuka keu geujak mita dan geupeuseulamat ureuëng nyang sisat." 11 Isa geucalitra lom saboh miseue dikeue ureuëng-ureuëng nyang mantong jideungoe Gobnyan meupeugah haba. Sabab, bakwatée nyan gobnyan karab ngon Yerusalem, dan di ureuëng ramé jipike bahwa Allah teuma laju geumat peurintah sibagoe Raja lam donya nyoe. 12 Isa laju geupeugah, "Na sidroe ureuëng bansawan jijak u nanggroe jiôh meukeusut keu jijak teurimong droe jih teubaiát jeuet keu raja, óh lheueh nyan laju jiwoe. 13 Sigohlom jijak, leubeh ilée jipeusapat siploh droe namiet jih, ubak awaknyan laju jijok maséng-maséng saboh keupeng péng méuh. 'Jak meukat kheueh ngon péng nyoe sigohlom ulôn woe,' kheun ureuëng bansawan nyan ubak namiet jih. 14 Teuma peunduduek nanggroe nyan hana galak keu gobnyan. Dan óh ka leupah gobnyan geujak, awaknyan laju jikirém utosan keu jipeugah, 'Kamoe hana kamoetem ureuëng nyoe jeuet keuraja kamoe.' 15 Teuma bansawan nyan teutab teubaiát jeuet keuraja, óh lheueh nyan laju jigisa u nanggroe jih. Dan meunan trok u rumoh jih laju jipeusapat bansiploh droe namiet jih nyang ka jibri sikeupeng péng méuh bunoe keuneuk jiteupeue padubna laba nyang jiteumé lé awaknyan. 16 Namiet nyang phon jimeuhadab dan laju jipeugah, 'Po lôn, saboh keupeng péng méuh nyang Po bri bak ulôn nyan ka ulôn peujeuet siploh.' 17 'Jroh that,' kheun bansawan nyan, 'Gata peulayan nyang gét! Sabab lam hai-hai nyang ubit gata jeuet teupeucaya, ulôn angkat gata jeuet keu ureuëng nyang mat kuasa ateueh siploh boh banda.' 18 Peulayan nyang keudua jimeuhadab sira jipeugah lagée nyoe, 'Po lôn, sikeupeng péng méuh nyang Po bri bak ulôn, ka ulôn peujeuet limong.' 19 Ubak peulayan nyang raja nyan laju geupeugah, 'Gata jeuet keu ureuëng nyang mat kuasa ateueh limong boh banda.' 20 Peulayan nyang laén teuka dan jipeugah teuma lagée nyoe, 'Po lôn, nyoe péng Droeneueh; péng nyoe ulôn keubah lam ija sinungkue. 21 Ulôn teumakot keu Droeneueh, sabab Droeneueh ureuëng nyang paleng kreueh. Droeneueh neucok peue mantong nyang kon atra Droeneueh, dan Droeneueh neucok wase nyang bukon Droeneueh pula.' 22 Raja nyan laju jikheun keue namiet jih nyan, 'Kah peulayan nyang jeuhet! Pakriban lagée gata peugah nyan ulôn teuma lôn huköm gata. Gata tateupeue ulôn ureuëng nyang paleng kreueh; ulôn cok peue nyang bukon atra ulôn dan lôncok wase bak teumpat nyang hana ulôn pula. 23 Meunyoe meunan pakon hana kah jok péng nyan bak ureuëng nyang peubungöng péng mangat watée lôn gisa péng nyan jeuet lôncok lom teuma meusigoe ngon bungöng jih?' 24 Óh lheuehnyan raja nyan laju jipeugah ubak ureuëng-ureuëng nyang teungoh jidong disinan, 'Cok péng nyan bak jaroe jih dan bri laju ubak peulayan nyang na siploh péng méuh nyan.' 25 Teuma lé ureuëng-ureuëng nyan jipeugah, 'Po lôn, jihnyan kana siploh.' 26 Jijaweueb lé Raja nyan, 'Ingat: Ureuëng nyang kana, keu ureuëng nyan teuma teubri leubeh jai lom. Teuma ureuëng nyang hana sapeuena, peue nyang na nibak jih nyan teucok lom teuma. 27 Dan jinoenyoe gata ba kheueh musoh-musoh ulôn nyan, nyang hana jitem ulôn jeuet keu raja jih. Peumaté kheueh jihnyan banmandum dikeue ulôn!' " 28 Óh ka lheueh geupeugah banmandum nyan lé Isa gobnyan laju geujak dikeue awaknyan geutuju u Yerusalem. 29 Watée katrok bakbinéh Betfage dan Betania di Bukét Zaiton, laju geuyue bak dua droe murit gobnyan mangat jijak leubeh awai nibak gobnyan. 30 "Gata jak kheueh laju u gampông nyang na dikeue nyan," kheun Isa ubak awaknyan, "meunyoe gata ka tatamong keunan, inan enteuk gata ngieng na saboh aneuëk keuleudée teuikat. Keuleudée nyan hántom lom jipasang lé gob ateueh rhueng jih. Gata peuleueh laju keuleudée nyan dan gata ba keunoe. 31 Meunyoe na ureuëng jitanyong ubak gata, 'Keupeue gata peuleueh keuleudée nyan?' Gata peugah laju, 'Tuhan nyang peureulée keuleudée nyoe.' " 32 Bandua droe murit Isa nyan laju jijak, dan laju meurumpok banmandum lagée nyang ka geupeugah lé Isa nyan. 33 Teungoh awaknyan jiplôh talo aneuëk keuleudée nyan, ureuëng po keuleudée nyan laju jipeugah ubak awaknyan, "Keupeue gata peuleueh aneuëk keuleudée nyan?" 34 Awaknyan laju jijaweueb, "Tuhan nyang peureulée." 35 Dan aneuëk keuleudée nyan laju jiba ubak Isa. Óh lheuehnyan awaknyan laju jikeubah bajée jubah droejih ateueh keuleudée nyan dan jitulông laju Isa geuék ateueh keuleudée nyan. 36 Teungoh gobnyan geujak sira geuduek ateueh rhueng keuleudée nyan, di ureuëng ramé laju jileueng bajée jubah jih ateueh rot ueh raya. 37 Watée Isa karab trok u Yerusalem, bak rot ueh nyang teutreun u Bukét Zaiton, banmandum murit-murit Gobnyan nyang ramé nyan jimeuhôi-meuhôi sira jipujoe Po teu Allah dan jilakée teurimong gaséh ubak Gobnyan sabab banmandum nyang ajaéb nyang ka awaknyan kalon. 38 Awaknyan jimeuhôi-meuhôi, "Teubri kheueh beureukat Raja nyang teuka ateueh nan Tuhan! Seujahteura kheueh lam syeuruga, dan teupujoe kheueh Po teu Allah!" 39 Na padubdroe ureuëng Farisi lamkawan ureuëng ramé nyan laju jipeugah ubak Isa, "Bapak Gurée, neuyue kheueh murit-murit Bapak jeuet jiseungab." 40 Geujaweueb lé Isa, "Peucaya kheueh! Meunyoe awaknyan seungab, batée-batée nyoe teuma jiklik." 41 Watée Isa ka meutamah rab ngon Yerusalem, dan geukalon banda nyan, Gobnyan laju geumo. 42 Kheun Gobnyan, "Biet wéueh that, biet-biet jroh, meunyoe uroenyoe gata tateupeue peue nyang jeuet teuba ubak buet damé! Teuma watéenyoe gata hana deuh gata kalon. 43 Gata teuma tarasa saboh masa, musoh gata jipeugét pageue keu ampéh bansikeulileng gata; awaknyan teuma jikeupông gata dan jipeusak gata u jeueb-jeueb sagoe. 44 Awaknyan teuma jipeuhanco gata meusigoe ngon peunduduek gata; dan hana meusi aneuëk batée pih nyang na tinggai meususon nibak teumpat jih, sabab gata hana tapeurati watée saát jih Po teu Allah teuka keu geujak peuseulamat gata!" 45 Isa laju geutamong lam Baét Tuhan dan geu-use laju bubena ureuëng meukat lam Baét Tuhan nyan. 46 "Lam Alkitab na teutuléh," kheun Gobnyan ubak awaknyan, "na teutuléh lagée nyoe: Allah meufeureuman, 'Baét Ulôn teuma jeuet keu Baét teumpat meudoá.' Teuma lé gata ka tapeujeuet keu weue ureuëng seumamon!" 47 Tieb-tieb uroe Isa geuseumeubeuet lam Baét Tuhan. Imeum-imeum ulée, dan gurée-gurée agama, meunan cit ngon peumimpén-peumimpén Yahudi kana niet keuneuk jipoh maté Gobnyan, 48 teuma lé awaknyan hana jiteumé ilah pakriban cara jipoh maté gobnyan, sabab banmandum ureuëng hana putôh-putôh jideungoe Gobnyan peugah haba, dan meukeunong that ubak peue-peue nyang Gobnyan peugah.

Lukas 20

1 Bak siuroe, Isa teungoh geuseumeubeuet dan geupeusampoe Haba Gét nyang teuka nibak Po teu Allah ubak manusia nyang na lam Baét Tuhan. Imeum-imeum ulée, gurée-gurée agama, meusajan ngon peumimpén-peumimpén Yahudi na cit jijak keunan 2 dan laju jipeugah ubak Isa, "Ci neupeugah ubak kamoe ateueh dasai peue Droeneueh peubuet banmandum nyoe? Soe nyang bri haknyan ubak Droeneueh?" 3 Geujaweueb lé Isa, "Ulôn keuneuk tanyong leubeh ilée ubak gata. Ci gata peugah ubak Ulôn, 4 Nabi Yahya geupumanö gob ngon hak soe? Ngon hak Allah atawa manusia?" 5 Teuma laju awaknyan jimeurok pakat, "Meunyoe tapeugah, 'Ngon hak Allah,' gobnyan jeuet geupeugah, 'Meunyoe meunan, pakon gatanyoe hana tapeucaya ubak gobnyan?' 6 Teuma meunyoe tapeugah 'ngon hak manusia,' banmandum ureuëng jigeulawa tanyoe ngon batée, sabab awaknyan jipeucaya bahwa Nabi Yahya na kheueh sidroe Nabi." 7 Dan awaknyan laju jijaweueb, "Hana kamoe teupeue." 8 Dan Isa laju geupeugah ubak awaknyan, "Meunyoe meunan Ulôn pih hana Ulôn peugah keu gata ngon hak soe Ulôn peubuet banmandum nyoe." 9 Isa laju geucalitra ubak ureuëng nyan, miseue laén lagéenyoe, "Na sidroe ureuëng nyang jipula saboh keubeueng tanoh keu lampôh anggô. Lampôh jih nyan laju jipeusiwa bak padub droe ureuëng nyang buet jih cit tukang meulampôh, óh lheueh nyan di ureuëng po lampôh nyan laju jijak bungka u teumpat laén dan tinggai di nanggroe gobnyan lam timpo nyang treb. 10 Óh katrok watée boh anggô nyan teupot, di ureuëng po lampôh anggô nyan laju jiyuejak peulayan jih keu jijak lakée jeumba jih bak ureuëng nyang siwa lampôh jih nyan. Teuma lé ureuëng siwa lampôh nyan laju jipoh peulayan nyan dan jiyuewoe ngon jaroe soh. 11 Dan lé ureuëng po lampôh nyan jiyuejak teuma peulayan jih nyang laén, saban cit lagée peulayan nyang phon peulayan nyoe pih jipoh ngon jihina lé ureuëng siwa lampôh anggô nyan, dan jiwoe ngon jaroe soh. 12 Óh lheueh nyan ureuëng po lampôh nyan jiyuejak teuma peulayan jih nyang keu lhée. Dan peulayan nyan pih laju jipoh óh lheueh nyan jitiek uluwa pageue lampôh nyan. 13 Akhé jih ureuëng po lampôh nyan laju jipeugah, 'Peu nyang harôh lôn peusaneut ateueh awaknyan? Bah lôn yuejak aneuëk nyang paleng lôn gaséh. Pasti aneuëk ulôn nyan jihoreumat lé awaknyan!' 14 Teuma lé awak nyang siwa lampôh nyan meunan jingieng aneuëk ureuëng po lampôh keudroe nyang jak bak jih, awaknyan laju jimarit sabe keudroe-droe, 'Nyoepat jih ahli waréh po lampôh nyoe. Jak tapoh maté jihnyan, mangat tanyoe jeuet tateumé atra warésan jihnyan.' 15 Teuma lé awaknyan laju jibahue aneuëk ureuëng po lampôh nyan uluwa pageue dan laju jipoh maté aneuëk nyan." Dan laju geupeugah lé Isa, "Nyan, meunyoe ureuëng po lampôh nyan jiwoe, peue nyang harôh jipeubuet ateueh ureuëng-ureuëng nyang siwa lampôh jihnyan? 16 Pasti nyang po lampôh teuka dan jipoh maté banmandum ureuëng nyang siwa lampôh jih nyan, dan jijok lampôh anggô nyan ubak ureuëng siwa nyang laén." Banjideungoe haba nyan, jipeugah kheueh lé ureuëng ramé nyan ubak Isa, "Hana sagai-sagai!" 17 Isa geungieng ateueh awaknyan dan laju geupeugah, "Meunyoe meunan, keupeuguna jih ayat Alkitab nyoe? 'Batée nyang hana jipeuguna lé utôh rumoh, batée nyan ka jeuet keu batée nyang phon.' 18 Soe mantong ureuëng nyang reubah ateueh batée nyan jihnyan hanco; dan soemantong nyang jitimpok lé batée nyan laju teugileng jeuet keu abée." 19 Gurée-gurée agama dan Imeum-imeum ulée jiteupeue bahwa miseue-miseue nyang geupeugah lé Isa nyan rhot ateueh jih. Lé sabab nyan awaknyan kana niet keuneuk drob gobnyan watée nyan cit, teuma awaknyan teumakot keu ureuëng ramé. 20 Dan awaknyan laju jimita watée nyang paih. Awaknyan laju jisugok ureuëng laén mangat jitem meupeurangoe lagée ureuëng meupeurangoe nyang ikhlaih, dan jiyue bak ureuëng nyan mangat jijeubak ngon mubagoe seumeu-eue ngon teumanyong, mangat awaknyan na rot jiseurah gobnyan ubak wewenang keukuasaan gubunur. 21 Teuma lé ureuëng-ureuëng nyang ka keunong suléng nyan laju jipeugah ubak Isa, "Bapak Gurée, kamoe muteupeu bahwa mandum nyang Bapak peubeuet keu kamoe nyan beutôi. Dan kamoe pih kamoe teupeu bahwa Bapak neupeurunoe kamoe ngon cara trok trang keuhai keuheundak Allah sabab Bapak hana neupeubeda manusia. 22 Ngon sabab nyan ci Bapak peugah ubak kamoe, meunurot peuratoran agama tanyoe, peu kheueh jeuet tabayeue cukée ubak Kaisar atawa hana?" 23 Dan Isa geuteupeue akai awaknyan nyang lisék nyan. Sabab nyan laju geupeugah, 24 "Cipeuleumah ubak ulôn saboh keupeng péng pirak. Gamba dan nan soe kheueh nyang na bak péng nyoe?" "Gamba dan nan Kaisar!" jaweueb awaknyan. 25 "Meunyoe meunan," kheun Isa ubak awaknyan, "Jok kheueh keu Kaisar, peue nyang atra Kaisar dan ubak Po teu Allah, peu nyang atra Allah." 26 Dan nyata that dikeue ureuëng ramé nyan pih awaknyan hana jiteumé buet Isa nyang salah. Awaknyan seungab mantong dan kagum ateueh peue-peue nyang ka geujaweueb lé Isa nyan. 27 Na padubdroe nibak gulongan ureuëng Saduki jijak meurumpok ngon Isa. (Awaknyan na kheueh peureute ureuëng nyang meupeundapat bahwa ureuëng nyang ka maté hana udeb le.) Awaknyan jitanyong bak Isa, 28 "Bapak Gurée, Nabi Musa geutuléh huköm lagée nyoe keu geutanyoe: Meunyoe sidroe ureuëng agam maté dan ureuëng nyan hana jitinggai aneuëk, syedara ureuëng nyan harôh jimeukawen ngon inong balée nyan mangat jeuet jibri keuturonan keu ureuëng nyang ka maté nyan. 29 Ka kheueh na tujoh droe ureuëng meusyedara adoe ngon aduen. Nyang tuha jimeukawen, óh lheueh nyan maté hana jitinggai aneuëk. 30 Óh lheueh nyan nyang keudua meukawen ngon inong balée nyan, dan ureuëng nyan pih maté hana jitinggai aneuëk. 31 Hai nyang lagée nyan rhot teuma ateueh syedara jih nyang keu lhée dan sampoe ubak nyang keutujoh. 32 Dan akhé jih ureuëng inong nyan pih meuninggai donya. 33 Óh uroe dudoe watée ureuëng maté teupeu-udeb lom teuma, peurumoh soe kheueh ureuëng inong nyan? Sabab bantujoh droe adoe aduen nyan ka jimeukawen ngon ureuëng inong nyan." 34 Geujaweueb lé Isa, "Ureuëng udeb bak saát nyoe jimeukawen, 35 teuma ureuëng-ureuëng nyang patôt teupeubeudôh óh ka lheueh maté, dan udeb bak jamén nyang teuma teuka, awaknyan hana meukawen. 36 Keuadaan awaknyan lagée malaikat, dan hana jitem maté. Awaknyan na kheueh aneuëk-aneuëk Allah, sabab awaknyan ka teupeubeudôh keula-i nibak maté. 37 Nabi Musa keudroe ka geupeugah ngon trang that bahwa ureuëng maté teuma geupeubeudôh lom teuma. Lam tulésan gobnyan keuhai tamah meuduro nyang hu nyan gobnyan geupeugah bahwa Tuhan sibagoe 'Allah Nabi Ibrahim, Allah Nabi Ishaq dan Allah Nabi Yakub'. 38 Nyan, deuh nyata, bahwa Allah nyan bukon Allah ureuëng maté! Allah ureuëng-ureuëng nyang mantong udeb! Sabab, keu Allah kheueh banmandum ureuëng udeb." 39 Na padubdroe gurée agama laju jipeugah, "Nyang geujaweueb lé Bapak Gurée nyan jroh lumpah na." 40 Sabab nyan awaknyan hana jijeuet teumanyong sapeue pih ubak Isa. 41 Isa geutanyong ubak awaknyan, "Pakriban kheueh jeuet teupeugah bahwa Raja nyang ba Seulamat nyan keuturonan Nabi Daud? 42 Padahai Nabi Daud keudroe ka geupeugah lam kitab Zabur, 'Tuhan meufeureuman ubak Tuhan Lôn: Duek kheueh blaih uneuen Lôn, 43 sampoe Lôn peujeuet banmandum musoh-musoh Gata taklok ubak Gata.' 44 Teuma, meunyoe Nabi Daud geupeugah Raja nyang ba seulamat nyan 'Tuhan', pakriban mungken Gobnyan keuturonan Nabi Daud?" 45 Teungoh ureuëng ramé nyang na disinan jideungoe Isa geupeugah haba, gobnyan laju geupeugah ubak murit-murit Geuh, 46 "Beu até-até kheueh keu gurée-gurée agama. Awaknyan galak jijak-jak ngon bajée jubah nyang panyang, dan galak jihoreumat lé gob lam pasai-pasai. Awaknyan galak keu teumpat nyang teuhoreumat meunyoe jijak u rumoh iébadat dan bak teumpat-teumpat ureuëng khanuri. 47 Buet awaknyan teumipée dan jipeungeuet inong-inong balée sira jireupah rumoh inong balée nyan. Dan jeuet jisöm-söm buet jih nyang jeuhet nyan, awaknyan jimeudoá panyang-panyang! Huköman ateueh awaknyan óh uroe dudoe brat lumpah na!"

Lukas 21

1 Lam Baét Tuhan, Isa geukalon ureuëng-ureuëng jipeutamong péng lam baluem peuseumahan. 2 Na cit geukalon sidroe inong balée nyang biet-biet gasien ngon papa, jipeutamong dua boh keupeng péng teumaga lam baluem nyan. 3 Laju geukheun lé Isa, "Deungoe ulôn peugah: Inong balée nyang gasien nyoe jipeutamong leubeh jai nibak nyang laén. 4 Sabab awaknyan jibri banmandum nyang leubeh nibak hareuta jih. Teuma meunyoe inong balée nyoe, bah pih gasien ngon papa, jibri banmandum nyang na bak jihnyan nyang jipeureulée keu udeb jih keudroe." 5 Na ureuëng-ureuëng jimeututoe keuhai padubna jroh jih Baét Tuhan nyang teuhias ngon batée nyang gét-gét dan ngon barang-barang nyang teupeuseumah keu Po teu Allah. Dan Isa laju geupeugah ubak awaknyan, 6 "Singoh na watée jih, banmandum nyang gata ngieng nyoe teuma teureuloh; hana meusi aneuëk batée pih nyang na disinoe nyang tinggai bak teumpat jih!" 7 Awaknyan jitanyong bak Isa, "Bapak Gurée, pajan hainyan teuma teujadi? Dan peu kheueh tanda-tanda jih bahwa katroh saát jih hainyan ji teuka?" 8 Geupeugah lé Isa, "Até-até kheueh, bék sampoe gata keunong tipée. Jai that manusia jiteuka ngon cara jipeuguna nan Ulôn, dan laju jipeugah lagée nyoe, 'Ulôn kheueh jihnyan!' dan 'Katrok watée jih.' Dan peue mantong nyang jipeugah lé awaknyan bék kheueh gata peunyoe dan bék gata seutôt awaknyan. 9 Meunan cit bék gata takot meunyoe gata deungoe haba muprang dan ureuëng beurontak. Banmandum nyan keubiet harôh teujadi leubeh ilée. Dan nyan bukon tanda bahwa donya nyoe ka trok watée keuneuk kiamat." 10 Dan óh lheueh nyan Isa laju geupeugah lom tutoe haba Gobnyan, "Bansa nyang saboh teuma jimuprang ngon bansa nyang laén dan nanggroe nyang saboh teuma jijak prang nanggroe nyang laén. 11 Dipatmantong na teujadi geumpa bumoe nyang paleng hebat, bala musém deuk dan bala peunyakét. Teuma teuka hai-hai nyang paleng teumakot dan meugrúm-grúm su meutaga ateueh langét. 12 Teuma sigohlom bandum nyan teujadi, gata teuma jidrob dan ji iénanya. Gata laju jiba bak sidang lam rumoh-rumoh iébadat dan jipeutamong lam glab. Meunan cit gata teuma jibahue ukeue raja-raja dan ukeue ureuëng nyang mat kuasa sabab gata taseutôt Ulôn. 13 Nyan kheueh watée jih nibak gata keu gata peusampoe Haba Gét nibak Allah. 14 Dan cok kheueh teukat nyang bulat bahwa gata hana khawate keuhai peue nyang harôh gata peugah keu teubila droe. 15 Ulôn keudroe teuma ulôn bri ubak gata tutoe haba dan keubijaksanaan nyan, sampoe hana meusidroe pih nibak musoh-musoh gata hase jilawan atawa jisanggah peue nyang gata peugah. 16 Gata teuma jikhianat lé ma ngon yah gata, lé syedara-syedara gata, lé waréh kawöm gata dan lé rakan-rakan gata. Siladum nibak gata laju jipoh maté lé awaknyan. 17 Gata teuma jibanci lé mandum ureuëng sabab gata murit Ulôn. 18 Bah pih meunan meusiôn ôk nyang na bak ulée gata hana gadôh. 19 Meunyoe gata meuteun dan saba, gata teuma seulamat." 20 "Meunyoe gata takalon Yerusalem ka jikeupông lé tantra, gata laju tateupeue bahwa banda nyan hana treb le teuma hanco. 21 Bak watée nyan ureuëng nyang na tinggai di Yudea harôh jiplueng u gunong-gunong. Ureuëng nyang na tinggai lam banda harôh jitinggai banda nyan, dan ureuëng nyang na diluwa banda bék jitamong lam banda. 22 Sabab bak uroe-uroe nyang lagée nyan na kheueh uroe 'Uroe-uroe teupeu rhot Huköman'. Deungon na lagée nyan ka teujadi lagée peue nyang ka teutuléh lam Alkitab. 23 Lumpah that peudeh watée teuka uroe nyan keue ureuëng inong nyang teungoh mume, dan meunan cit mak nyang mantong jipeumom sinyak! Nanggroe nyoe teuma jiteuka ázeb nyang paleng parah, dan Tuhan laju geuhuköm bansa nyoe. 24 Na nyang geuhuköm ngon peudeueng, na cit nyang ba sibagoe ureuëng keunong teuen u nanggroe-nanggroe ureuëng laén; dan ureuëng-ureuëng nyang hana jituri Allah teuma jigiloe-giloe Yerusalem sampoe án habéh watée nyang ka geupeuteuntée lé Tuhan keu awaknyan." 25 "Eunteuk, bak mata uroe, buleuen dan bintang-bintang teuma leumah tanda-tanda. Ateueh bumoe, bansa-bansa teuka teumakot, yo ngon bingong watée jiteuka geulanteue ngon gulumbang laôt. 26 Manusia teuma teuka teumakot siteungoh maté watée jihadab peue nyang teuma teujadi bansigom donya nyoe, sabab nyang mat kuasa ateueh angkasa raya laju jiteuka karu ngon teueng bayeueng. 27 Bak watée nyan kheueh Aneuëk Manusia teuma teuka lam awan ngon kuasa keumuliaan nyang rayeuk. 28 Meunyoe hai-hai nyan ka jipeuphon teujadi, beudôh kheueh dan beuôt kheueh ulée gata, sabab sikeujab teuk gata teuma teupeuseulamat." 29 Dan Isa laju geucalitra bak awaknyan miseue nyang laén, "Ngieng kheueh ateueh bak ara dan banmandum bak kayée nyang laén. 30 Meunyoe pucok-pucok jih ka jipeuphon deuh teukalon, gata tateupeue bahwa musém khueng karab teuka. 31 Meunan cit meunyoe gata ngieng hai-hai nyan teujadi, gata teuma tateupeue bahwa Po teu Allah deungon reujang that geumat peurintah sibagoe Raja. 32 Butateupeue kheueh, bahwa hai-hai nyang lagée nyan teuma teujadi sigohlom ureuëng-ureuëng nyang udeb bak watée nyoe teuma maté banmandum. 33 Langét ngon bumoe teuma hanco, teuma haba nyang Ulôn peugah teutab na siumu masa." 34 "Jaga kheueh droe gata, bék laloe gata ngon gata teugok ié kreueh dan meupoya-poya hana meuteuntée, atawa laloe gata pike keuhai-hai udeb gata, sampoe gata hana siab watée uroe nyan teuka ngon hana teusangka-sangka. 35 Sabab Uroenyan teuma jiteuka lagée peurangkab keumandum ureuëng nyang na ateueh rhung bumoe nyoe. 36 Meujaga-jaga kheueh, dan meudoá kheueh sabe mangat gata hase gata hadab banmandum hai nyang teuma teujadi dan gata hase tajakmeuhadab ngon Aneuëk Manusia." 37 Isa geuseumeubeuet nibak Baét Tuhan watée uroe, dan óh watée malam Gobnyan laju geujak u Bukét Zaiton laju geutinggai nibak teumpat nyan. 38 Tieb-tieb beungoh banmandum ureuëng jijak ubak Baét Tuhan keu jijak deungoe Isa geuseumeubeuet.

Lukas 22

1 Peurayaan Ruti Hana Meuragoe nyang teupeunan Paskah that. 2 Imeum-imeum ulée ngon gurée-gurée agama teungoh jimita rot pakriban cara keu jikeuneuk poh maté Isa ngon cara seungab-seungab, sabab awaknyan jitakot keu ureuëng ramé. 3 Óh lheuehnyan Iblih jitamong lam Yudas nyang teuhôi Iskariot, Iskariot nyan na kheueh sidroe lamkawan murit Isa nyang dua blaih droe. 4 Sabab nyan Yudas laju jijak meurumpok dan jimeurokpakat ngon Imeum-imeum ulée dan ulée-ulée kawan nyang kawai Baét Tuhan keuhai pakriban cara jiteumé jok Isa ubak awaknyan. 5 Awaknyan galak that-that dan jimeujanji teuma jibri péng keu Yudas nyan. 6 Yudas pih ka situju dan laju jipeuphon mita rot pakriban cara mangat Isa jiteumé jok bak awaknyan, hana jiteupeu lé ureuëng laén. 7 Dan trok kheueh watée jih teupeuna peurayaan Ruti Hana Meuragoe dan bubiri keu peunajoh Paskah laju teusie. 8 Teuma lé Isa laju geuyue ubak Petrus ngon Yahya, "Gata jak laju peusiab peunajoh Paskah keu geutanyoe." 9 "Dipat nyang Bapak meuheuét mangat atra nyan kamoe peusiab?" jitanyong lé awaknyan. 10 Geujaweueb lé Isa, "Bak watée gata tatamong lam banda, na sidroe ureuëng agam nyang teungoh jiba ié lam calueng laju meurumpok ngon gata. Dan gata seutôt laju ureuëng nyan u rumoh nyang jijak, 11 dan gata peugah laju ubak ureuëng po rumoh nyan: Gurée geupeugah, 'Dipat kheueh teumpat keu murit-murit Ulôn dan Ulôn makheun peunajoh Paskah?' 12 Ureuëng po rumoh nyan laju jitunyok ubak gata saboh ruweueng kama ateueh nyang luwah ngon raya, kama nyan ka teupeuleungkab ngon peurabot. Dan gata peusiab kheueh banmandum nyang ulôn peugah bak teumpat nyan." 13 Dan geujak kheueh laju Petrus ngon Yahya, dan laju meurumpok banmandum paih that lagée nyang geupeugah lé Isa. Awaknyan pih laju jipeusiab peunajoh Paskah nyan. 14 Óh ka troh watée jih peunajoh Paskah nyan teumakheun, Isa geuduek ngon banmandum murit geuh bak teumpat peujamé. 15 Dan laju geupeugah ubak murit geuh, "Ulôn meuheuét that keuneuk makheun peunajoh Paskah nyoe meusigoe ngon gata sigohlom ulôn meudeurita! 16 Sabab, peucaya kheueh: Ulôn hana teuma lôn pajoh le nyang nyoe sampoe makna nibak peujamé suci nyoe teupeusampoe lam Donya Barô Allah." 17 Óh lheueh nyan Isa geubeuôt piala nyang meuasoe ié anggô nyan, laju geumeudoá syukoe ubak Po teu Allah, óh lheueh nyan geupeugah, "Cok kheueh nyoe, dan jok-jok kheueh keu awaknyan; 18 kareuna beutateupeue kheueh: phon bak saát nyoe hana teuma ulôn jieb le ié anggô nyoe sampoe trok Allah ka geumat kuasa deungon sipeunoh jih." 19 Óh lheueh nyan Isa laju geucok ruti. Dan óh ka lheueh geumeudoá syukoe ubak hadhirat Allah, laju geupriek-priek ruti nyan ngon jaroe Gobnyan dan geujok-jok laju ubak murit-murit Geuh sira geupeugah, "Nyoe kheueh tuboh Ulôn Nyang teubie keu gata. Peubuet kheueh lagée nyoe mangat gata ingat Ulôn." 20 Meunan cit óh ka lheueh makheun, laju geujok piala nyang meuasoe ié anggô nyan ubak awaknyan sira geupeugah, "Piala nyoe na kheueh janji Po teu Allah nyang barô, nyang ka teupeusah ngon darah ulôn -- darah nyang teuroe keu gata." 21 "Dan gata ngieng kheueh! Ureuëng nyang khianat Ulôn na disinoe meusajan ngon Ulôn! 22 Aneuëk Manusia keubiet teuma maté lagée nyang ka geupeuteuntée lé Po teu Allah; teuma cilaka kheueh ureuëng nyang khianat Gobnyan!" 23 Dan awaknyan laju jiteumanyong sabe keudroe-droe, soe lamkawan awaknyan nyang peubuet hainyan. 24 Lamkawan murit-murit Isa laju jimeudakwa sabe keudroe-droe keuhai soe lamkawan awaknyan teuanggab nyang paleng rayeuk. 25 Isa geupeugah ubak awaknyan, "Raja-raja bansa nyang hana jituri ubak Po teu Allah jiséksa rakyat jih, dan nyang mat-mat kuasa jipeugah 'Nyang lindong Rakyat'. 26 Teuma gatanyoe hana jeuet lagée nyan. Sikeubit jih, ureuëng nyang paleng rayeuk lamkawan gata harôh beujeuet nyang paleng ubit, dan peumimpén harôh beujeuet lagée peulayan. 27 Soe kheueh nyang paleng rayeuk: ureuëng duek makheun bak meuja, atawa ureuëng nyang peutimang gobnyan? Teuntée ureuëng nyang duek nyan. Teuma di Ulôn na lamkawan gata sibagoe peulayan. 28 Lam peue-peue mantong Ulôn nyoe sosah, gata sabe na meusajan ngon Ulôn. 29 Lagée Bapak ka geubri ubak Ulôn hak keu Ulôn mat peurintah, meunan cit Ulôn teuma Lôn bri hak nyan keu gata. 30 Deungon lagée nyan gata jeuet meumangat-mangat ngon Ulôn bak watée Ulôn jeuet keu Raja. Dan gata teuma gata duek ateueh dua blaih boh takhta keu gata peurintah ateueh dua blaih boh sukée bansa Israel." 31 "Simon, Simon, deungoe kheueh nyoe! Iblih ka teubri idhin keu jiujoe gatanyoe; lagée gandom teupeu aséng nibak kulét sampoe nyang gét teupeu aséng nibak nyang brok. 32 Teuma Ulôn ka Lôn meudoá keu gata, hei Simon, mangat iman gata bék cupa. Dan meunyoe gata katagisa ubak Ulôn, gata harôh tapeukong bubena syedara-syedara gata." 33 Jijaweueb lé Petrus, "Tuhan, ulôn kasiab lôn tamong lam glab meusajan-sajan ngon Tuhan!" 34 "Peucaya kheueh hei Petrus," kheun Isa, "sigohlom manök jiku-uék uroenyoe, gata ka lhée goe gata iengkeue keu Ulôn." 35 Óh lheueh nyan Isa geupeugah ubak awaknyan, "Yoh watée dilée, watée Ulôn kirém gata deungon hana Lôn bri idhin gata ba dompet, baluem atawa sipatu, peu kheueh gata na kureueng sapeue-sapeue?" "Hana!" jaweueb awaknyan. 36 "Teuma jinoenyoe," kheun Isa, "Soe nyang na dompet atawa baluem, atranyan harôh jiba sajan; dan soe nyang hana meupeudeueng, harôh jipeubloe jubah jih keu jibloe peudeueng. 37 Sabab, peucaya kheueh, ayat Alkitab nyang na teutuléh lagée nyoe, 'Gobnyan jianggab lagée sidroe ureuëng jeuhet,' harôh teujadi ateueh droe Ulôn. Sabab peue nyang teutuléh lam Alkitab keuhai Ulôn teungoh teujadi bak watée nyoe." 38 "Tuhan," kheun murit-murit Isa, "Kalon kheueh, disinoe na dua boh peudeueng." "Ka kheueh!" jaweueb Isa. 39 Isa laju geutinggai banda dan geujak teuma u Bukét Zaiton, dan murit-murit Gobnyan pih na jijak sajan ngon Gobnyan. 40 Watée ka trok bak teumpat nyan, laju geupeugah ubak awaknyan, "Meudoá kheueh mangat gata bék meudesya meunyoe gata ji-ujoe." 41 Óh lheuehnyan Gobnyan laju geujak leubeh jiôh bacut nibak awaknyan, na kira-kira jiôh jih éuet batée teugeulawa, óh trok keunan laju geumeuteuôt sira geumeudoá, 42 "Bapak," kheun Gobnyan, "Meunyoe jeuet, neupeujiôh kheueh nibak Ulôn peundeuritaan nyang harôh Ulôn rasanyoe. Teuma bék kheueh meunurot lakée Ulôn, teuma meunurot lakée Bapak mantong." 43 Sidroe malaikat geujak ubak Gobnyan laju geupeuteuga Gobnyan. 44 Isa lumpah that meudeurita baten geuh seuhingga Gobnyan seumaken khusyuék geumeudoá. Reuôh gobnyan lagée darah meutreb-treb roe bak tanoh. 45 Óh ka lheueh seuleusoe geumeudoá, Isa laju geugisa ubak murit-murit geuh. Laju geungieng awaknyan banmandum ka habéh teungét sabab lumpah that seudeh. 46 Laju geupeugah ubak awaknyan, "Pakon gata teungét? Beudôh kheueh dan meudoá kheueh mangat gata hana keunong cubaan." 47 Teungoh Isa mantong geumeututoe disinan, teuka kheueh ubak gobnyan saboh kawan ureuëng. Awaknyan nyang teuka nyan jipimpén lé Yudas, sidroe lamkawan murit Isa. Óh lheuehnyan Yudas laju jijak ubak Isa dan jicöm Gobnyan. 48 Teuma Isa laju geupeugah ubak jihnyan, "Yudas, peu kheueh ngon gata cöm nyan gata keuneuk khianat ateueh Aneuëk Manusia?" 49 Watée murit-murit Isa nyang na disinan jingieng peue nyang teujadi, awaknyan jipeugah, "Tuhan, kamoe heuntam mantong ngon peudeueng!" 50 Dan watée nyan cit sidroe lamkawan murit Isa laju jisuet peudeueng ngon peudeueng nyan laju jiheuntam ateueh sidroe hamba imeum agong sampoe punyueng blaih uneuen ureuëng nyan putôh. 51 Dan Isa laju geupeugah, "Ka kheueh!" Laju geumat punyueng ureuëng nyan dan watéenyan pih ka puléh. 52 Óh lheueh nyan Isa laju geupeugah ubak Imeum-imeum ulée Panglima-panglima nyang kawai Baét Tuhan, meunan cit peumimpén-peumimpén Yahudi nyang teuka keunan keu jijak drob Gobnyan, "Peu kheueh Ulôn nyoe ureuëng jeuhet, sampoe gata tateuka keunoe ngon peudeueng dan kayée puntông keu gata jakdrob Ulôn? 53 Tieb-tieb uroe Ulôn nyoe na meusajan gata lam Baét Tuhan, hana gata drob Ulôn. Teuma nyoe kheueh watée jih gata meutindak, watée kuasa itam kajimat kuasa." 54 Awaknyan jidrob Isa dan jiba laju u rumoh imeum agong. Petrus jiseutôt rot jiôh. 55 Bak teungoh-teungoh leuen rumoh nyan apui puron ka awai jipeuhu dan Petrus laju jijakduek bak binéh apui nyan ngon ureuëng-ureuëng nyang teungoh meu adeueng disinan. 56 Sidroe ureuëng inong peulayan nyang na disinan laju jingieng Petrus teungoh meu adeueng bak binéh apui puron nyan; óh lheueh nyan laju jipeugah ubak Petrus, "Ureuëng nyoe bunoe na ulôn ngieng meusajan-sajan ngon Isa!" 57 Teuma Petrus ji-iengkeue sira jibantah dan jipeugah lagée nyoe, "Ulôn sagai-sagai hana lôn turi keu ureuëng nyan!" 58 Hana treb teuma óh lheueh nyan, na teuma sidroe teuk ureuëng laén jikalon Petrus dan laju jipeugah, "Hana salah le, gata na kheueh sidroe lamkawan ureuëng nyan!" Jijaweueb lé Petrus, "Bukon, kon ulôn!" 59 Na teuma sijeuem óh lheueh nyan, na teuma sidroe teuk ureuëng laén ngon su nyang teuga laju jipeugah, "Ka beutôi ureuëng nyoe murit Isa, sabab jih nyoe pih ureuëng Galilea!" 60 Jaweueb Petrus, "Peue nyang gata meukeusut, ulôn hana lôn teupeu!" Watée nyan cit teuma, teungoh Petrus mantong jipeugah haba, manök laju jiku uéuk. 61 Isa pih laju geupaleng dan geungieng ateueh Petrus. Dan Petrus laju teuingat Tuhan nyang ka lheueh geupeugah ubak gobnyan, "Sigohlom manök jiku-uék uroe nyoe, gata lhée goe gata iengkeue keu Ulôn." 62 Dan jiteubiet kheueh laju Petrus nibak teumpat nyan sira jimoe musôk-musôk. 63 Ureuëng-ureuëng nyang teungoh keumiet Isa nyang na disinan, laju jihina ngon jipeumeuéun-meuéun dan jipoh Isa. 64 Mata Gobnyan laju jitôb sira jitanyong ubak Gobnyan, "Ci peugah soe nyang poh gata?" 65 Dan jai that tutoe haba nyang laén nyang sifeuet jih meuhina nyang jituju ubak Isa. 66 Óh watée beungoh, mandum peumimpén Yahudi, mandum Imeum-imeum ulée, mandum gurée-gurée agama ka meusapat, dan Isa laju jiba ukeue Mahkamah Agama awaknyan. 67 "Peugah laju ubak kamoe," kheun awaknyan, "peue kheueh Gatanyoe Raja nyang ba Seulamat?" Geujaweueb lé Isa, "Bah kheueh nyan Ulôn peugah ubak gata, teuma gata teutab hana tapatéh. 68 Dan meunyoe ulôn teumanyong ubak gata, gata teutab hana tatem jaweueb. 69 Teuma phon saát nyoe, Aneuëk Manusia teuma geuduek blaih uneuen Allah Nyang Mahakuasa." 70 Awaknyan banmandum jipeugah, "Meunyoe meunan, Gatanyoe Aneuëk Allah?" Geujaweueb lé Isa, "Lagée nyan gata kheun." 71 Dan awaknyan laju jipeugah, "Hana peureulée lé saksi! Tanyoe ka tadeungoe nibak babah jih keudroe!"

Lukas 23

1 Banmandum ureuëng nyang na lam teumpat sidang nyan jidong, dan Isa laju jiba ukeue Pilatus. 2 Nibak teumpat nyan awaknyan laju jipeuphon tudoh gobnyan. Awaknyan jipeugah lagée nyoe, "Kamoe teumé ureuëng nyoe teungoh jipeusisat rakyat. Ureuëng nyoe jipeusuna rakyat mangat rakyat bék jibayeue cukée ubak Kaisar, sabab jipeugah jihnyan na kheueh, sidroe raja." 3 Dan Pilatus laju jitanyong ubak Isa, "Peu kheueh beutôi gata raja ureuëng Yahudi?" Geujaweueb lé Isa, "Lagée nyan kheueh kheun gata." 4 Dan laju jipeugah lé Pilatus ubak Imeum-imeum ulée ngon ureuëng ramé nyang na disinan, "Hana lôn teumé sapeue pih peue nyang ka jipeubuet salah lé ureuëng nyoe sampoe harôh ulôn huköm." 5 Teuma awaknyan laju jipaksa, "Deungon meuneubeuet nyang jipeurunoe, ureuëng nyoe ka jipeusuna ureuëng bansaboh Yudea; phon-phon that di Galilea, dan watée nyoe ka trok keunoe." 6 Watée jideungoe hai nyan lé Pilatus, laju jitanyong, "Peue kheueh ureuëng nyoe ureuëng Galilea?" 7 Óh ka lheueh teubri tée bahwa Isa asai jih dimiyueb keukuasaan Herodes, Pilatus laju jikirém Isa ubak Herodes, nyang yoh watée nyan na teuma di Yerusalem. 8 Herodes galak lumpah na watée jingieng Isa, sabab katreb that jideungoe keuhai Gobnyan dan meuheuét that keuneuk jikalon Gobnyan. Jihnyan that jimeuharab mangat hase jikalon Isa geupeubuet buet nyang ajaéb. 9 Sabab nyan kheueh Herodes jai that jiteumanyong ubak Gobnyan, teuma Isa sagai-sagai hana geutem jaweueb. 10 Imeum-imeum ulée dan gurée-gurée agama pih na meuhadab disinan dan jitudôh Isa deungon teumudoh nyang brat-brat. 11 Herodes dan sipa-i-sipa-i jih ji-ejek ngon jihina Isa, laju jipeungui bak gobnyan peukayan keurajeuen, óh lheueh nyan jikirém keula-i Gobnyan ubak Pilatus. 12 Bak uroenyan cit teuma Herodes ngon Pilatus, nyang yoh awai jimeumusoh óh lheueh nyan ka gét lom teuma. 13 Pipaltus laju jipeusapat bubena Imeum-imeum ulée, bubena peumimpén, dan rakyat, 14 laju jipeugah ubak awaknyan, "Gatanyoe ka taba ureuëng nyoe ubak ulôn dan gata peugah jihnyoe ka jipeusisat rakyat ba. Jinoenyoe dikeue gata ureuëng nyoe ka ulôn pareksa, teuma hana ulôn teumé mubacut pih buet nyang jeuhet nyang ka jipeubuet lé ureuëng nyoe. 15 Herodes pih meunan cit peundapat jih, sabab jihnyan ka jikirém lom teuma Isa nyoe ubak kamoe. Ureuëng nyoe hana jipeubuet mubacut pih nyang patôt jihnyoe teuhuköm maté. 16 Lé sabab nyan ulôn seunuét ureuëng nyoe óh lheueh nyan ulôn peuleueh." 17 Bak tieb-tieb teuka watée peurayaan Paskah, Pilatus harôh jipeuleueh sidroe ureuëng huköman keu rakyat. 18 Banmandum ureuëng nyang na meugumpôi disinan laju jikuk, "Poh maté ureuëng nyan! Peuleueh laju Barabas keu kamoe!" ( 19 Barabas jipeutamong lam glab sabab jih nyan kajipeubuet salah ngon cara jipeubuet beurontak nyang teujadi lam banda dan sabab jipoh maté ureuëng laén.) 20 Pilatus jitem peuleueh Isa, sabab nyan kheueh jipeugah sigoe teuk bak ureuëng ramé nyan. 21 Teuma awaknyan laju jikuk, "Saleb laju Jihnyan! Saleb laju Jihnyan!" 22 Dan keu nyang keu lhée goe jih Pilatus jipeugah bak awaknyan, "Teuma peue salah Gobnyan? Ulôn hana lôn teumé mubacut pih peu buet nyang ka salah jipeubuet, dan nyang patot Gobnyan nyoe harôh teuhuköm ngon huköman maté! Ulôn teuma lôn seunuét Gobnyan dan óh lheueh nyan laju ulôn peuleueh." 23 Teuma di ureuëng ramé nyan hana putôh jikuk habéh sineuga mangat Isa beuteusaleb. Dan akhé jih su ureuëng nyang nyang kuk nyan meuhase. 24 Dan Pilatus laju jipeurhot huköman maté ateueh Isa sisuai ngon nyang jilakée lé ureuëng ramé nyan, 25 dan laju jipeuleueh ureuëng nyang awaknyan lakée, na kheueh nyang jipeutamong lam glab sabab ka jipeubuet buet nyang salah ngon cara jipeuna beurontak dan jipoh maté ureuëng laén. Óh lheueh nyan Isa laju jijok bak ureuëng ramé nyan keu jipeubuet ban galak droe jih. 26 Teuma Isa pih laju jiba lé awaknyan. Bak teungoh rot ueh, awaknyan laju meurumpok ngon Simon, nyang asai jih nibak Kirene, nyang teungoh jitamong lam banda. Awaknyan laju jidrob Simon nyan, laju jipaksa ureuëng nyan mangat jigulam kayée saleb nyan dilikot Isa. 27 Jai that-that ureuëng nyang seutôt dilikot Isa -- lamkawan ureuëng nyan na cit ureuëng inong. Ureuëng-ureuëng inong nyan jipeumo sira jipeuba-e Isa. 28 Teuma Isa laju geupaleng ubak awaknyan sira geupeugah, "Hei ureuëng-ureuëng inong Yerusalem! Bék kheueh gata peumoe Ulôn. Gata peumoe kheueh droe gata keudroe dan aneuëk-aneuëk gata. 29 Sabab teuma teuka watée jih manusia jipeugah, 'Meu-untông that-that ureuëng inong nyang hántom na mume, hántom na jimeu aneuëk dan hántom na jipeumom sinyak!' 30 Watée nyan kheueh manusia teuma jipeugah ubak gunong-gunong, 'Hei gunong, rhot kheueh ateueh kamoe!' Dan ubak bukét-bukét jipeugah, 'Hei bukét-bukét, seubée kheueh kamoe!' 31 Sabab meunyoe keu bak kayée nyang mantong udeb, manusia jipeubuet lagée nyoe, peuteuma nyang teuma jipeubuet lé awaknyan keu bak kayée nyang ka maté!" 32 Na teuma dua droe ureuëng laén -- mandum duadroe nyan ureuëng jeuhet -- nyang jiba lé awaknyan keu teuhuköm maté meusigoe ngon Isa. 33 Óh watée troh ubak teumpat nyang jibohnan bukét "Bruek ulée", awaknyan laju jisaleb Isa meusigoe ngon mandua droe ureuëng jeuhet nyan -- sidroe blaih uneuen dan sidroe teuk blaih wie Isa. 34 Isa laju geumeudoá, "Ya Bapak, neupeuamphon kheueh awaknyan! Awaknyan hana jiteupeu peue nyang jipeubuet." Peukayan Isa laju jibagi-bagi lamkawan awaknyan ngon cara jiundi. 35 Ureuëng ramé jidong disinan sira meunonton, teungoh peumimpén-peumimpén Yahudi jihina Isa sira jipeugah, "Jihnyoe ka sipeuseulamat ureuëng laén; cuba kheueh jinoe jipeuseulamat droe jih keudroe, meunyoe jihnyan beutôi-beutôi Raja Nyang ba seulamat nyang geupiléh lé Po teu Allah!" 36 Sidadu-sidadu nyang kawai Gobnyan pih jihina Isa. Awaknyan jijak ubak Gobnyan sira jiba ié anggô masam, 37 sira jijok ié anggô nyan jipeugah lagée nyoe, "Meunyoe gata biet-biet raja ureuëng Yahudi, cuba peuseulamat droe Gata!" 38 Nibak paleng ateueh kayée saleb Isa nyan na teutuléh lagée nyoe: "Nyoe kheueh Raja Ureuëng Yahudi." 39 Sidroe ureuëng jeuhet nyang teusaleb meusajan ngon Isa nyan pih jihina Gobnyan. Jipeugah lé ureuëng jeuhet nyang teugantueng bak kayée saleb nyan, "Droeneueh kon Raja nyang Peuseulamat umat manusia? Ngon sabab nyan, cuba kheueh peuseulamat droe Gata meusajan ngon kamoe!" 40 Teuma lé ureuëng jeuhet nyang sidroe teuk laju jiseugah rakan Jihnyan sira jipeugah lagée nyoe, "Peu kheueh gata hana teumakot ubak Po teu Allah? Gata saban lagée Jihnyan teuhuköm maté. 41 Teuma huköman geutanyoe manduanyoe keubiet ka paih ngon buet nyang tapeubuet. Teuma di ureuëng nyan mubacut pih hana salah!" 42 Óh lheueh nyan laju jipeugah lé ureuëng nyan, "Isa, ingat kheueh Ulôn watée droeneueh teuka sibagoe Raja!" 43 "Peucaya kheueh," kheun Isa ubak ureuëng nyan, "Uroenyoe gata na meusajan ngon Ulôn lam syeuruga." 44 Kira-kira poh dua blaih cot uroe timang, mata uroe hana meucahya, dan bansaboh nanggroe nyan ka habéh seupôt sampoe poh lhée seupôt. 45 Ija Tutôb tingkab nyang na meugantung lam Baét Tuhan beukah dua. 46 Dan óh lheueh nyan Isa laju geudumpék ngon su nyang meutaga, "Bapak! Lam jaroe Droeneueh Ulôn seurah droe Ulôn!" Óh ka lheueh geupeugah lagée nyan, Gobnyan pih meuninggai donya. 47 Watée jingieng lé pang pasokan peue nyang teujadi, laju jipujoe Allah, dan laju jikheun, "Keubiet that, ureuëng nyoe hana meusalah!" 48 Ureuëng ramé nyang na jijak keunan keu jijak meunonton, na cit jingieng peue nyang ka teujadi. Awaknyan banmandum jiwoe ngon até teulah that. 49 Dan banmandum rakan Isa, meunan cit deungon ureuëng-ureuëng inong nyang seutôt gobnyan nibak Galilea, jidong jiôh-jiôh dan jikalon banmandum peue nyang ka teujadi nyan. 50 Na sidroe ureuëng nan jih Yusuf, ureuëng nyan asai jih nibak banda Arimatea nyang jitamong lam nanggroe Yudea. Ureuëng nyoe sidroe ureuëng gét até dan jihoreumat lé gob, dan ureuëng nyoe teungoh jipreh-preh pajan Po teu Allah geupeu phon peurintah sibagoe Raja. Bah pih ureuëng nyoe anggota Mahkamah Agama, gobnyan hana situju ngon keuputosan dan tindakan nyang ka jicok lé mahkamah nyan. 52 Yusuf nyoe jijak meuhadab laju ubak Pilatus mangat jeuet manyét Isa jibri keu geuh. 53 Óh lheuehnyan lé Yusuf nyan laju jipeutron manyét Isa nyang mantong meugantung bak kayée saleb, dan laju jibalot ngon ija lineun sibagoe ija kapan. Óh lheuehnyan manyét Isa nyan laju jipeutamong lam kubu nyang ka lheueh jipeugét lam guha batée -- kubu nyan hántom na lom teupeuguna. 54 Uroe nyan na kheueh uroe jeumeuát; dan uroe Sabat rab teupeuphon. 55 Ureuëng-ureuëng inong nyang jijak meusigoe ngon Isa nibak Galilea jiseutôt laju Yusuf dan jikalon pat kubu Isa nyan. Meunan cit jingieng lé awaknyan pakriban manyét Isa jikeubah lam kubu nyan. 56 Óh lheuehnyan awaknyan laju jiwoe dan jipeusiab laju mubagoe uréeh dan minyéuk mangat bée keu jiboh minyéuk bak manyét Isa. Bak uroe Sabat, awaknyan laju jipiôh jimubuet sibagoe jitaát keu huköm agama.

Lukas 24

1 Banseuboh that, uroe Aleuhat, ureuëng-ureuëng inong nyan jijak ubak teumpat Isa teukubu, sira jiba mubagoe rupa uréeh dan minyéuk mangat bée nyang ka awaknyan peuna. 2 Óh troh awaknyan bak kubu Isa nyan, laju jingieng batée ngon tôb babah kubu nyan ka meugule bak binéh. 3 Dan awaknyan laju jitamong lam kubu nyan, teuma teutab hana jiteumé manyét Tuhan Isa lam kubu nyan. 4 Teungoh awaknyan jidong sira teumanueng dan bingong bak jipike keuhai manyét nyan, hana jisangka-sangka na dua droe ureuëng ngon peukayan muble-ble cahya ka teudong bak binéh awaknyan. 5 Awaknyan teumakot lumpah na, laju jisujut trok bak tanoh, dan awaknyan nyang dua droe nyan laju jipeugah bak awaknyan, "Pakon gatanyoe jak mita ureuëng udeb di teungoh-teungoh ureuëng maté? 6 Gobnyan hana disinoe, Gobnyan ka geubeudôh! Ingat kheueh peue nyang ka lheueh geupeugah ubak gata yoh Gobnyan mantong di Galilea, 7 bahwa Aneuëk Manusia harôh jiseurah ubak ureuëng meudesya, laju jisaleb, dan bak uroe nyang keu lhée teuma geubeudôh!' " 8 Dan teuingat kheueh lé ureuëng-ureuëng inong nyan peu nyang ka lheueh geupeugah lé Isa. 9 Óh ka geuwoe nibak kubu nyan, awaknyan laju jicalitra peu nyang ka lheueh jikalon ubak ban siblaih droe rasui dan banmandum murit nyang laén. 10 Ureuëng-ureuëng inong nyang jipeugah banmandum nyan ubak murit-murit Isa, na kheueh: Maryam Magdalena, Yohana dan Maryam mak Yakobus, dan inong-inong nyang laén nyang na meusajan awaknyan. 11 Teuma lé rasui-rasui nyan jipike peue nyang ka jipeugah lé ureuëng-ureuëng inong nyan na kheueh haba buhak. Awaknyan hana jipatéh peue nyang jipeugah lé ureuëng-ureuëng inong nyan. 12 Teuma Petrus laju jibeudôh dan jiplueng laju ubak kubu teumpat Isa teukubu. Sira jiteukui laju jijeungeuek lam guha nyan, dan deuh laju jingieng nyang na disinan na kheueh ija kapan. Petrus hireuen lumpah na, dan laju jiwoe ngon mubagoe rupa jikheun dan jiteumanyong lam até jih keuhai peue nyang ka teujadi nyan. 13 Bak uroe nyan cit teuma, na dua droe murit Isa teungoh jijak bak saboh gampông nyang nan gampông nyan Emaus, na kira-kira siblaih kilo metée jiôh jih nibak Yerusalem. 14 Sira jijak awaknyan meututoe keuhai banmandum peue-peue nyang ka teujadi nyan. 15 Teungoh awaknyan jipeugah haba dan jituka pikeran, Isa keudroe teuka dan geujak meusajan ngon awaknyan. 16 Awaknyan laju jingieng Isa, teuma na sapeue-sapeue nyang teujalok awaknyan hana jituri Gobnyan. 17 Dan Isa laju geupeugah, "Peue nyang gata peugah bak teungoh rot ueh nyoe?" Awaknyan laju jipiôh ngon ié muka nyang seudéh. 18 Dan sidroe lamkawan awaknyan, nyang nan jih Kleopas, jitanyong bak Isa, "Mungken bapak sidroe ureuëng aséng di Yerusalem nyang hana bapak teupeue peue nyang ka teujadi disideh akhé-akhé nyoe?" 19 "Peuristiwa peue?" geutanyong lé Isa. "Peuristiwa nyang teujadi ateueh Isa, ureuëng Nazaret nyan," jaweueb awaknyan. "Gobnyan Nabi. Tutoe haba dan buet-buet gobnyan meukuasa that -- bah kheueh nyan bak mata Po teu Allah meunan cit bak mata rakyat ba. 20 Imeum-imeum ulée dan peumimpén-peumimpén bansa geutanyoe jiseurah gobnyan keu teuhuköm maté, dan awaknyan laju jisaleb Gobnyan! 21 Padahai kamoe meuharab that bahwa Gobnyan kheueh nyang teuma peubeubaih Israel! Dan uroenyoe uroe nyang keu lhée seujak hainyan teujadi. 22 Lom teuma, na padubdroe ureuëng inong nibak kawöm kamoe ka jipeujeuet kamoenyoe teukeujot. Banseuboh that awaknyan ka jijak ubak kubu, 23 teuma hana jiteumé manyét gobnyan lam kubu nyan. Laju awaknyan jigisa dan jipeugah bahwa awaknyan na jingieng malaikat, dan malaikat-malaikat nyan geupeugah bahwa Isa ka udeb. 24 Na padubdroe lam kawöm kamoe laju jijak ubak kubu nyan dan laju jingieng bahwa peue nyang jipeugah lé ureuëng inong nyan biet-biet beutôi, teuma awaknyan hana jikalon Isa." 25 Dan Isa laju geupeugah ubak awaknyan, "Gata biet-biet bangai! Meulet that keu gata patéh banmandum nyang ka lheueh geupeugah lé Nabi-nabi! 26 Peue kheueh hana gata teupeue bahwa Raja nyang ba seulamat nyan harôh geurasa banmandum deurita nyan, óh lheueh nyan barô kheueh trok ubak keumuliaan?" 27 Óh lheuehnyan Isa laju geupeu trang ubak awaknyan peue nyang ka teutuléh lam mandum Alkitab keuhai droe gobnyan, phon lam kitab-kitab Nabi Musa sampoe ubak kitab Nabi-nabi. 28 Teungoh jipeugah haba lagée nyan awaknyan jijak laju karab trok u gampông nyang jituju. Isa geupeue jeuet droe siulah-ulah keuneuk jak laju, 29 teuma awaknyan laju jipeuteun Gobnyan sira jipeugah. "Tinggai kheueh bak teumpat kamoe," kheun awaknyan ubak Gobnyan, "Jinoenyoe karab malam dan karab seupôt." Dan Isa laju geutamong keu geumudôm bak teumpat awaknyan. 30 Teungoh geuduek geumakheun meusajan awaknyan, Isa laju geucok ruti, geupeugah doá syukoe ubak Po teu Allah, laju geuprah-prah ruti nyan ngon jaroe Gobnyan, laju geujok ruti nyan keu awaknyan. 31 Óh lheueh nyan barô kheueh jitée lé awaknyan bahwa ureuëng nyang bunoekon geujak ngon awaknyan na kheueh Isa. Teuma Gobnyan gadôh nibak mata awaknyan. 32 Jimarit awaknyan sabe keudroe-droe, "Bukon kheueh rasa até geutanyoe lagée meugeulumbang, watée Gobnyan geumariet ngon tanyoe bak teungoh rot, dan geupeu trang asoe Alkitab ubak geutanyoe?" 33 Watée nyan cit teuma awaknyan jibeudôh dan jijak laju u Yerusalem. Disinan awaknyan laju meurumpok ngon bansiblaih droe murit Isa teungoh meugumpôi ngon ureuëng laén. 34 Awaknyan jipeugah, "Biet-biet beutôi that Tuhan ka udeb lom teuma! Gobnyan ka geupeuleumah droe geuh ubak Simon!" 35 Mandua droe murit Isa nyang ban teuka nyan laju jicalitra peungalaman awaknyan bak teungoh rot, dan pakriban awaknyan jituri Tuhan watée Gobnyan teungoh geuprah-prah ruti. 36 Teungoh awaknyan mantong meucalitra haba nyan, hana jisangka-sangka Isa ka teudong di teungoh-teungoh awaknyan laju geupeugah, "Seujahteura kheueh gata!" 37 Awaknyan teukeujot dan teumakot lumpah na, kareuna jisangka jipike lé awaknyan nyang jingieng nyan na kheueh antu. 38 Teuma Isa laju geupeugah, "Pakon gatanyoe teumakot? Pakon ragu-ragu lam até gata? 39 Ngieng jaroe Ulôn dan ngieng teuma gaki Ulôn. Beutateupeue kheueh, bahwa nyoe Ulôn, Isa! Geue kheueh dan peurati kheueh beugét-gét, sabab meunyoe antu hana meuasoe atawa tuleueng, lagée nyang gata ngieng bak Ulôn." 40 Isa geupeugah meunan sira geungieng bak gaki dan jaroe awaknyan. 41 Dan watée awaknyan gohlom cit jipeucaya, sabab lumpah that galak ngon hireuen, Isa laju geutanyong ubak awaknyan, "Peu kheueh bak gatanyoe disinoe na peunajoh?" 42 Dan awaknyan laju jijok ubak Gobnyan sikrék eungkot nyang ka lheueh teu cráh. 43 Isa geucok eungkot nyan dan laju geupajoh dikeue awaknyan. 44 Óh ka lheueh nyan laju geupeugah ubak awaknyan, "Nyoe kheueh hai-hai nyang ka lheueh Ulôn peugah ubak gata yohmantong Ulôn na meusajan ngon gata; bahwa tieb-tieb hai nyang teutuléh lam Kitab-kitab Nabi Musa keuhai Ulôn, Nabi-nabi dan lam kitab Zabur, nyan harôh teujadi." 45 Óh lheuehnyan Isa geubuka pikeran awaknyan mangat hase jipeuphôm meukeusut nyang teutuléh lam Kitab Suci. 46 Dan laju geupeugah lé Gobnyan ubak awaknyan, "Lam Kitab Suci na teutuléh bahwa Raja nyang ba Seulamat nyan harôh meudeurita, dan harôh geubeudôh keula-i nibak maté bak uroe nyang keu lhée. 47 Dan meunan cit ateueh nan Raja Peuseulamat nyan harôh teupeusampoe ubak banmandum bansa bahwa manusia harôh jitobat, dan bahwa Po teu Allah geupeu amphon desya. Dan haba nyan harôh teupeusampoe phon nibak Yerusalem. 48 Gata kheueh saksi-saksi nibak banmandum nyan. 49 Dan ulôn keudroe teuma lôn kirém ubak gata peue nyang ka geupeu janji lé Allah Bapak. Teuma gata harôh teutab gata preh lam banda nyoe sampoe kuasa nyang teuka nibak Po teu Allah ka peunoh ateueh gata." 50 Óh lheueh nyan Isa laju geuba awaknyan sampoe u Betania. Nibak teumpat nyan Gobnyan laju geubeuôt jaroe geuh u ateueh, dan laju geubri beureukat ubak awaknyan. 51 Teungoh Gobnyan geupeubuet lagée nyan, Gobnyan laju teubeuôt lam syeuruga, laju meucre ngon awaknyan. 52 Awaknyan laju jisujut jiseumah Gobnyan, óh lheuehnyan jigisa u Yerusalem deungon até nyang galak lumpah na, 53 dan hana putôh-putôh geupujoe Allah lam Baét Tuhan.

Yahya 1

1 Nibak awaiphon, sigohlom donya teupeujeuet, Feureuman ka na. Feureuman nyan na meusajan Po teu Allah dan Feureuman nyan saban ngon Allah. 2 Yoh awai kon Geuhnyan na meusajan ngon Allah. 3 Banmandum geupeujeuet meulalu Gobnyan, dan nibak banmandum nyang na, hana meusapeue nyang geupeujeuet meunyoe hana meusajan Gobnyan. 4 Feureuman nyan pangkai udeb, dan udeb teubri trang keu manusia. 5 Trang nyan peungéh lam seupôt, dan seupôt nyan hana hase jipeulon trang. 6 Teuka kheueh sidroe ureuëng nyang geu-utus lé Allah, Nabi Yahya nan geuh. 7 Gobnyan teuka sira geupeugah keuhai trang nyan, mangat banmandum ureuëng jimeuiman. 8 Gobnyan keudroe bukon trang nyan, gobnyan teuma geujak peugah keuhai trang nyan. 9 Trang seujati nyang geupeupeungeuh banmandum umat manusia, teuka lam donya. 10 Feureuman na lam donya, donya geupeujeuet meulalu Gobnyan, teuma lé donya hana jituri keu Gobnyan. 11 Gobnyan teuka ubak nanggroe Geuh keudroe, teuma lé bansa Gobnyan hana jitem teurimong Geuh nyan. 12 Teuma na cit ureuëng nyang teurimong Gobnyan, dan jimeuiman bak Gobnyan; awaknyan geubri hak jeuet keu Aneuëk Allah, 13 nyang lahé bukon nibak manusia, sabab udeb barô nyan nibak Po teu Allah asai jih. 14 Feureuman ka jeuet keu manusia, Gobnyan tinggai diteungoh-teungoh geutanyoe, dan tanyoe ka takalon keuagongan Gobnyan. Keuagongan nyan geuteurimong sibagoe aneuëk tunggai Bapak. Rot Gobnyan tanyoe takalon Allah dan geunaséh Gobnyan ateueh geutanyoe. 15 Yahya teuka sibagoe saksi Gobnyan, gobnyan nyang peusampoe: "Nyoe kheueh Gobnyan nyang ulôn peugah: Gobnyan teuma teuka leubeh dudoe nibak ulôn. Teuma Gobnyan leubeh rayeuk nibak ulôn, sabab sigohlom ulôn na, Gobnyan ka leubeh awai na." 16 Gobnyan peunoh ngan geunaséh; hana putôh-putôh, Gobnyan geubri beureukat ateueh geutanyoe. 17 Huköm Tuhan tateurimong rot Nabi Musa. Teuma geunaséh dan keuseutiaan Allah geupeugah rot Isa. 18 Hana nyang ka lheueh jikalon Allah, seulaén aneuëk tunggai Bapak, nyang saban ngon Bapak dan krab lumpah na nibak Gobnyan. Gobnyan kheueh nyang peugah Bapak ubak geutanyoe. 19 Lé peunguasa Yahudi di Yerusalem laju jiyue bak Imeum-imeum dan ureuëng-ureuëng Lewi mangat jijak meurumpok ngon Nabi Yahya dan jitanyong bak gobnyan, "Droeneueh nyoe soe?" 20 Nabi Nabi Yahya nyan geukheun troh trang bahwa, "Ulôn bukon Raja Peuseulamat." 21 "Meunyoe meunan, droeneueh nyoe soe?" jitanyong lom lé awaknyan. "Peu kheueh droeneueh Ilyas?" "Bukon," jaweueb Nabi Yahya. "Peu kheueh droeneueh Sang Nabi?" jitanyong lom lé awaknyan. "Kon cit," seuôt Nabi Yahya. 22 "Meunyoe meunan, peugah kheueh bak kamoe soe droeneueh nyoe," kheun awaknyan, "mangat kamoe hase kamoe jaweueb bak ureuëng-ureuëng nyang yue kamoe. Peue kheun droeneueh keuhai droe teuh keudroe?" 23 Nabi Yahya geujaweueb, "Ulôn kheueh jihnyan nyang ka lheueh geupeugah lé Nabi Yesaya: 'Ureuëng nyang meuhôi-meuhôi lam padang pasi: Peurata kheueh jalan keu Tuhan.' " 24 Ureuëng-ureuëng nyang geu-utus lé ureuëng Farisi 25 laju jitanyong, "Meunyoe droeneueh bukon Raja Peuseulamat, bukon teuma Ilyas, meunan cit bukon sang Nabi, keupeue gata pumanö gob?" 26 Geujaweueb lé Nabi Yahya, "Ulôn pumanö ngon ié. Teuma lamkawan gata na nyang hana gata turi. 27 Ureuëng nyan teuka leubeh dudoe nibak ulôn, teuma keu lôn ploih talo sipatu Gobnyan mantong hana hak ulôn peubuet." 28 Banmandum nyan teujadi di Betania, siblaih u timu Krueng Yordan bak teumpat Nabi Yahya Pumanö. 29 Óh singoh beungoh nyan, Yahya geukalon Isa geujak bak gobnyan. Laju geupeugah lé Nabi Yahya, "Ngieng, nyan kheueh Aneuëk Bubiri Allah nyang sampôh desya donya. 30 Gobnyan kheueh nyang ulôn peugah teuma teuka leubeh dudoe nibak ulôn, sabab, sigohlom ulôn lahé Gobnyan ka na. 31 Sigohlom nyan, ulôn hana kuteupeue soe ureuëng nyan. Padahai ulôn teuka lôn pumanö ngon ié, mangat bansa Israel jituri Gobnyan." 32 Meunan cit lé Isa geumeusaksi lagée nyoe, "Ulôn kalon Roh Allah geutreun lagée cicém mirah pati laju tinggai ateueh Gobnyan. 33 Watée nyan gohlom lôn tusoe soe Gobnyan. Teuma Allah nyang yue bak ulôn mangat lôn pumanö ngon ié dan ka geupeugah bak ulôn, 'Meunyoe gata takalon Roh Allah geutreun, laju tinggai ateueh sidroe-droe ureuëng, Gobnyan nyan kheueh nyang teuma pumanö manusia ngon Roh Allah.' 34 Ulôn ka lheueh lôn kalon keudroe hainyan," kheun Nabi Yahya, "dan ulôn meusaksi bahwa Gobnyan kheueh Aneuëk Allah." 35 Óh singoh beungoh Nabi Yahya na lom bak teumpat nyan ngon dua droe murit gobnyan. 36 Watée jikalon Isa lewat disinan, laju jipeugah, "Ngieng! Nyan kheueh Aneuëk Bubiri Allah." 37 Bandua droe murit Nabi Yahya jideungoe peue nyang jipeugah nyan, dan laju jijak seutôt Isa. 38 Isa geupaleng u likot, laju geukalon awaknyan teungoh jiseutôt Gobnyan. Laju geutanyong, "Soe nyang gata mita?" Jaweueb awaknyan, "Rabi, dipat kheueh Rabi tinggai?" (Haba 'Rabi' makna jih na kheueh gurée.) 39 "Jak keunoe gata ngieng keudroe," kheun Isa. Awaknyan laju jijak ngon Gobnyan dan laju deuh jikalon pat Gobnyan tinggai. Watée nyan poh peuet seupôt. Uroenyan awaknyan tinggai ngon Gobnyan. 40 Sidroe lamkawan ureuëng dua droe nyan nyang ka jideungoe peue nyang geupeugah lé Nabi Yahya dan óh lheueh nyan jiseutôt Isa, na kheueh Andreas, syedara Simon Petrus. 41 Bagaih that-that Andreas jijak mita Simon, syedara jihnyan, dan laju jipeugah bak jih nyan, "Kamoe ka lheueh murumpok ngon Mesias!" (Mesias saban ngon Almaseh, nyang makna jih na kheueh: Raja Peuseulamat.) 42 Andreas laju ji intat Simon ubak Isa. Isa laju geupandang ateueh Simon, óh lheuehnyan laju geupeugah, "Gata Simon, aneuëk Yona, gata teuma teuhôi Kefas." (Kefas saban ngon Petrus, nyang makna jih: gunong batée.) 43 Óh singoh beungoh Isa geucok haba sinutôh keu geujak u Galilea. Gobnyan laju meurumpok ngon Filipus, dan geupeugah bak ureuëng nyan, "Jak keunoe seutôt ulôn!" 44 Filipus asai jih nibak Betsaida, na kheueh teumpat tinggai Andreas dan Petrus. 45 Filipus meurumpok ngon Natanael laju jipeugah bak ureuëng nyan, "Kamoe ka meurumpok ngon ureuëng nyang geupeugah lé Nabi Musa lam Kitab Huköm Allah, dan nyang ka geupeusampoe lé Nabi-nabi. Gobnyan na kheueh Isa nibak Nazaret, aneuëk Yusuf." 46 Teuma Natanael jijaweueb, "Peu kheueh mungken sapeue-sapeue nyang gét teuka jih nibak Nazaret?" "Jak keunoe, ngieng keudroe," jaweueb Filipus. 47 Isa geukalon Natanael teungoh teuka laju geupeugah bak jihnyan, "Kalon, nyan ureuëng Israel seujati, hana nyang peuleusu nibak jihnyan." 48 "Pakriban Bapak jeuet neuturi ulôn?" jitanyong lé Natanael bak Isa. Geujaweueb lé Isa, "Sigohlom Filipus jitawök gata, ulôn ka lheueh ulôn ngieng gata na dimiyueb bak ara nyan." 49 "Bapak Gurée," kheun lé Natanael, "Bapak na kheueh Aneuëk Allah! Bapak kheueh Raja bansa Israel!" 50 Geupeugah lé Isa, "Gata tapatéh, sabab ulôn peugah bahwa ulôn ka lheueh lôn kalon gata na dimiyueb bak ara nyan? Hai-hai nyang jiôh leubeh rayeuk nibak nyan teuma gata kalon!" 51 Kheun Isa lom, "Keubiet, peucaya kheueh, gata teuma takalon langét teubuka, dan malaikat-malaikat Allah geuék treuen bak Aneuëk Manusia."

Yahya 2

1 Dua uroe óh lheueh nyan na khanuri meukawen di banda Kana Galilea, dan mak Isa na disinan. 2 Isa ngon murit-murit Gobnyan na cit jiundang nibak khanuri nyan. 3 Watée ié anggô ka habéh, mak Isa geupeugah ubak aneuëk geuhnyan, "Awaknyan ka habéh ié anggô." 4 Geujaweueb lé Isa, "Mak, bék neuyue ulôn. Gohlom trok watée jih ulôn peugah soe droe Ulôn nyoe." 5 Teuma mak Isa geupeugah ubak peulayan-peulayan nyang na inan, "Peubuet mantong peue nyang jipeugah ubak gata." 6 Nibak teumpat nyan na nam boh guci nyang ka teukeubah sibagoe teumpat seumeu rhah meunurot adat Yahudi. Guci-gucinyan maséng-maséng asoe jih kira-kira sireutoh arée. 7 Isa laju geupeugah ubak peulayan-peulayan nyan, "Pasoe kheueh laju mandum guci nyan ngon ié," dan awaknyan laju jipasoe lagée nyang geupeurintah lé Isa nyan sampoe peunoh. 8 Laju Isa geupeugah ubak awaknyan, "Jinoenyoe cok laju bacut ié nyan dan gata ba laju ubak peumimpén khanuri." Awaknyan laju jiba ié nyan ubak peumimpén khanuri, 9 lé peumimpén khanurinyan laju jirasa bacut ié nyang ka meu-ubah jeuet keu ié anggô. (Gobnyan hana geuteupeue pane teuka jih ié anggô nyan, teuma peulayan-peulayan nyang leng ié nyan mantong nyang teupeu.) Teuma lé peumimpén khanurinyan laju geupeurab ubak linto barô, 10 laju geupeugah ubak teungku linto nyan, "Lazem jih ureuëng geuhidang anggô nyang paleng gét leubeh ilée, óh lheueh nyan barô kheueh ié anggô biasa. Teuma digata takeubah ié anggô nyang paleng gét sampoe bak saátnyoe!" 11 Nyan kheueh buet ajaéb nyang phon that geupeuleumah lé Isa. Gobnyan geupeubuetnyan di Kana di Galilea. Deungon tanda nyang lagéenyan gobnyan ka geutunyok keuagongan Gobnyan. Teuma lé murit-murit Gobnyan laju jimeuiman ubak Gobnyan. 12 Óh ka lheueh nyan Isa laju geujak u Kapernaum meusajan ngon ma Gobnyan, syedara-syedara Gobnyan dan murit-murit Geuh. Awaknyan tinggai disinan na padub uroe treb jih. 13 Watée Uroe Raya Paskah Yahudi ka tô, Isa laju geujak u Yerusalem. 14 Di Rumoh iébadat di Yerusalem nyan Gobnyan laju meurumpok ngon ureuëng-ureuëng nyang teungoh peubloe leumô, bubiri dan cicém mirah pati; meunan cit ngon ureuëng-ureuëng tuka péng teungoh duek bak teumpat nyan. 15 Isa laju geucok talo geupeugét peunyuenuet ngon peunyuenuet nyan geu-use mandum bubena beulatang nyan, bah kheueh bubiri meunan cit ngon leumô, nibak lam Rumoh iébadat. Meunan cit ngon meuja-meuja ureuëng tuka péng habéh geubalek sampoe péng-péng nyang na ateueh meuja nyan habéh meusipreuk bansaboh nyan. 16 Óh lheuehnyan laju geupeugah bak ureuëng nyang peubloe cicém mirah pati, "Beuôt banmandum nyang na nibak teumpat nyoe. Bék gata peujeuet Baét Bapak ulôn keuteumpat meukat!" 17 Teuma lé murit-murit Gobnyan laju teuingat keu ayat Alkitab nyang na teutuléh lagée nyoe, "Cinta ulôn keu Baét Droeneueh ya Allah, jipeututong até ulôn." 18 Lé peunguasa Yahudi laju jilawan Isa, jipeugah lé peunguasa nyan lagéenyoe, "Cuba peugét buet nyang ajaéb paih lagée tanda bak kamoe bahwa gata na hak tapeubuet nyang lagée nyoe." 19 Geujaweueb lé Isa, "Baétnyoe, lam lhée uroe Ulôn peudong lom teuma." 20 Laju jipeugah lé awaknyan, "Peuet ploh nam thon watée jih keu teupeugot Baét Iébadat nyoe. Dan gata keuneuk peudong lom lam tempo lhée uroe?" 21 Teuma Baét Iébadat nyang geumeukeusut lé Isa na kheueh tuboh Gobnyan keudroe. 22 Teuma óh lheueh nyan, óh ka lheueh Isa geupeubeudôh lam kawan ureuëng maté, teuingat kheueh lé murit-murit Gobnyan bahwa hainyan ka lheueh geupeugah. Teuma jipatéh kheueh lé awaknyan ngon peue nyang ka teutuléh lam Alkitab dan ubak peue nyang ka geupeugah lé Isa. 23 Teungoh Isa mantong na di Yerusalem bak watée Peurayaan Paskah, ramé that-that ureuëng nyang meuiman ubak Gobnyan sabab buet-buet ajaéb nyang ka geupeubuet lé Gobnyan. 24 Teuma Isa keudroe hana geupatéh keu awaknyan, sabab gobnyan geuturi keu mandum manusia. 25 Hana peureulée na ureuëng jijak bri keuteurangan ubak Gobnyan keuhai soe mantong, sabab Gobnyan keudroe geuteupeue peue nyang na lam até manusia.

Yahya 3

1 Na sidroe tukoh agama lamkawan ureuëng Farisi nyang nan geuh Nikodemus. 2 Bak simalam Nikodemus nyan geujak bak Isa sira geupeugah lagéenyoe, "Bapak Gurée, kamoe teupeu Droeneueh geu utus lé Po teu Allah. Sabab hana meusidroe pih nyang hase jipeubuet buet lagée nyang Bapak peugét, meunyoe bukon Po teu Allah hana meusajan gobnyan." 3 Geupeugah lé Isa, "Peucaya kheueh, hana meusidroe pih nyang jeuet keu anggota umat Allah, meunyoe jihnyan hana teupeulahé lom teuma." 4 "Panena mungken ureuëng rayeuk teupeulahé lom teuma," kheun Nikodemus bak Isa, "Peu kheueh mungken ureuëng nyan jitamong lom lam pruet ma jih óh lheueh nyan teupeulahé lom?" 5 Geujaweueb lé Isa, "Keubiet beutôi haba ulôn nyoe: Meunyoe manusia hana teupeulahé nibak ié dan nibak Roh Allah, ureuëng nyan hana hase jeuet keu anggota umat Po teu Allah. 6 Manusia seucara jasmani geupeu lahé lé ureuëng tuha, teuma seucara rohani geupeu lahé lé Roh Allah. 7 Bék hireuen meunyoe ulôn peugah: Gata banmandum harôh teupeulahé lom teuma. 8 Angén jipot ho nyang jigalak; geutanyoe tadeungoe su angén nyan, teuma hana tateupeue rot pat jiteuka dan ho jijak. Meunan cit teuma ngon ureuëng nyang geupeu lahé lé Roh Allah." 9 "Pakriban hainyan hase teujadi?" geutanyong lé Nikodemus. 10 Geujaweueb lé Isa, "Gata gurée di Israel, ék kheueh hainyan hana gata teupeue? 11 Peucaya kheueh: Kamoe meututoenyoe keuhai peue nyang kamoe teupeue, dan kamoe meusaksi keuhai peue nyang ka kamoe kalon; teuma gatanyoe hana tatem teurimong keusaksian kamoe. 12 Gata hana tapatéh meunyoe ulôn calitra bak gata keuhai-hai nyang na lam donya nyoe; pakriban gata hase tapatéh, meunyoe ulôn peugah bak gata keuhai syeuruga? 13 Hana meusidroe pih nyang ka lheueh jiék lam syeuruga, seulaén Gobnyan nyang ka geutron lam donya, Gobnyan na kheueh Aneuëk Manusia. 14 Saban lagée Nabi Musa geupeuék uleue teumaga ateueh sibak kayée lam padang pasi, meunan cit deungon Aneuëk Manusia harôh teupeuék teuma, 15 mangat banmandum ureuëng nyang meuiman keu Gobnyan meuteumé udeb seujati dan keukai." 16 Sabab Po teu Allah lumpah that geugaséh keu manusia lam donya nyoe, nyang kheueh Gobnyan geubri Aneuëk Gobnyan nyang tunggai, mangat tieb-tieb ureuëng nyang meuiman ubak Gobnyan hana binasa, teuma meuteumé udeb seujati dan keukai. 17 Sabab Allah geu kirém Aneuëk Geuhnyan bukon keu jeuet keu hakém donya nyoe, teuma keu geupeu seulamat. 18 Ureuëng nyang meuiman bak Gobnyan hana teuhuköm. Teuma ureuëng nyang hana meuiman ka geuhuköm lé Po teu Allah, sabab jihnyan hana jimeuiman ubak Aneuëk Allah nyang tunggai. 19 Gobnyan jilakée ngon dasai jih hai nyang lagée nyoe: Trang nyan ka teuka lam donya, teuma manusia leubeh galak keu seupôt nibak trang, sabab buet awaknyan jeuhet. 20 Soemantong ureuëng nyang jipeubuet jeuhet, ureuëng nyan banci keu trang; ureuëng nyan hana jitem teuka ubak trang, mangat buet jih nyang jeuhet hana deuh teukalon. 21 Teuma ureuëng nyang peubuet keuheundak Po teu Allah, teuka ubak trang mangat jeuet sahéh bahwa peue nyang jipeubuet nyan na kheueh meunurot keuheundak Po teu Allah. 22 Óh ka lheuehnyan Isa dan murit-murit Gobnyan geujak u Yudea. Gobnyan tinggai disinan na padub watée treb jih ngon awaknyan dan geupumanö. 23 Nibak watée nyan Nabi Yahya gohlom jipeutamong lam glab. Gobnyan geupumanö gob di Ainon, hana padub na jiôh ngon Salim, sabab bak teumpat nyan jai that ié. Ureuëng ramé jijak bak gobnyan, dan gobnyan laju geupumanö awaknyan. 25 Na meupadubdroe murit Nabi Yahya jimeudakwa ngon ureuëng Yahudi keuhai atoran gleh. 26 Awaknyan laju jijak bak Nabi Yahya, dan jipeugah lagée nyoe, "Pak Gurée, peu kheueh Bapak mantong neuingat ureuëng nyang meusajan ngon Bapak di meurandeh Krueng Yordan nyan, nyang Bapak tunyok bak kamoe yoh masa ilée? Gobnyan bak saát teungoh geupumanö cit, dan banmandum ureuëng jijak bak Gobnyan!" 27 Geujaweueb lé Nabi Yahya, "Manusia hana jiteumé sapeue meunyoe hana geubri lé Allah keu jihnyan. 28 Gata keudroe ka tadeungoe ulôn peugah, 'Ulôn bukon Raja Peuseulamat. Ulôn geu-utus leubeh awai nibak Gobnyan.' 29 Dara barô na kheueh atra linto barô. Rakan linto barô nyan teuma jidong bak binéh sira jideungoe, dan jihnyan galak meunyoe jideungoe su teungku linto. Meunan cit teuma ngon ulôn. Bak saátnyoe ulôn galak lumpah na. 30 Gobnyan kheueh paleng peunteng, dan ulôn maken kureueng peunteng." 31 Nyang teuka nibak ateueh leubeh nibak peue mantong. Nyang teuka nibak lam donya jitamong lam kawöm ureuëng donya, dan jimeututoe keuhai-hai nyang na hubongan ngon donya. Gobnyan nyang teuka nibak ateueh leubeh nibak peue mantong nyang na. 32 Gobnyan geumeututoe keuhai nyang ka Gobnyan deungoe, teuma hana meusidroe pih nyang jitem patéh ateueh peue nyang ka geupeu saksi nyan. 33 Ureuëng nyang meuiman nibak keusaksian Gobnyan nyan, laju jipatéh bahwa Allah nyan na kheueh beutôi. 34 Sabab ureuëng nyang geu-utus lé Po teu Allah jipeusampoe tutoe haba nyang teuka bak Allah, sabab Roh Allah ka geubri bak gobnyan sipeunoh jih. 35 Bapak geugaséh keu Aneuëk Geuh, dan ka geuseurah banmandum kuasa bak Gobnyan. 36 Ureuëng nyang meuiman bak Aneuëk nyan teuma meuteumé udeb seujati dan keukai. Teuma ureuëng nyang hana taát keu Aneuëk nyan ureuëng nyan hana meuteumé udeb. Jihnyan geuhuköm lé Po teu Allah siumu masa.

Yahya 4

1 Ureuëng-ureuëng Farisi jideungoe bahwa Isa leubeh jai geupumanö ureuëng nibak Nabi Yahya. ( 2 Nyang sibeuna jih Isa keudroe hana geupumanö lé murit-murit Gobnyan.) 3 Watée Isa geuteupeue bahwa ureuëng-ureuëng Farisi ka jideungoe hai nyan, gobnyan geutinggai Yudea laju geugisa u Galilea. 4 Bak watée geugisa nyan gobnyan harôh geujak rot Samaria. 5 Teuma trok laju Isa bak saboh banda di Samaria nyang nan banda nyan Sikhar, hana padub na jiôh nibak tanoh nyang yoh ilée geubri lé Nabi Yakub keu aneuëk gobnyan Nabi Yusuf. 6 Disinan na meuteumé mon Nabi Yakub. Isa hék that-that sabab bak geujak nyan, sababnyan kheueh gobnyan geuduek bak binéh mon. Watéenyan kira-kira poh dua blaih uroe. 7 Dan murit-murit Isa ka geujak u banda keu jijak bloe peunajoh. Óh lheueh nyan na sidroe ureuëng inong Samaria teuka bak mon nyan keu jijak crông ié. Isa geupeugah bak inong nyan, "Mak, peu kheueh jeuet Lôn lakée jieb ié?" 9 Jijaweueb lé ureuëng inong Samaria nyan, "Teungku ureuëng Yahudi, di ulôn nyoe ureuëng Samaria; pakon teungku lakée jieb ié bak ulôn?" (Sabab ureuëng-ureuëng Yahudi hana hubongan ngon ureuëng Samaria.) 10 Geujaweueb lé Isa, "Meunyoe droeneueh neuteupeue meuneubri Allah dan soe nyang meulakée jieb ié bak Droeneueh, pasti droeneueh keudroe nyang lakée jieb ié bak ureuëng nyan, dan Gobnyan teuma geubri keu droeneueh ié udeb." 11 Kheun ureuëng inong nyan, "Teungku hana meutima, dan mon nyoe lhok lumpah na. Dipat Teungku meuteumé ié udeb? 12 Nabi Yakub, bapak indatu kamoe, geubri bak kamoe mon nyoe. Gobnyan keudroe nyang cok ié mon nibak teumpat nyoe; meunan cit teuma ngon aneuëk-aneuëk gobnyan dan beulatang peulara gobnyan. Peue kheueh Teungku pike teungku leubeh rayeuk nibak Nabi Yakub?" 13 "Ureuëng nyang jieb ié nyoe teuma jiteuka glaih lom," geupeugah lé Isa, 14 "teuma ureuëng nyang jijieb ié nyang teuma Ulôn bri, ureuëng nyan hana teuma glaih le siumu masa. Sabab ié nyang Ulôn bri nyan jeuet keu mata ié lam tuboh ureuëng nyan nyang jiteubiet uluwa dan teubri bak ureuëng nyan udeb seujati dan keukai." 15 Kheun ureuëng inong nyan, "Teungku, neubri kheueh keu ulôn ié nyan, mangat ulôn hana glaih le; dan hana peureulée le lôn riwang keunoe keu lôn jak crông ié." 16 "Jak kheueh, tawök lakoe droeneueh, dan gisa kheueh keunoe," kheun Isa. 17 "Ulôn hana meulakoe," Jaweueb inong nyan. "Keubiet beutôi lagée kheun droeneueh," geupeugah lé Isa. 18 "Sabab droeneueh ka tameukawen limong go, dan ureuëng nyang udeb meusajan ngon droeneueh bak saát nyoe bukon lakoe droeneueh " 19 "Jinoenyoe barô kheueh lôn teupeue bahwa teungku sidroe Nabi," jipeugah le inong nyan. 20 Indatu kamoe geuseumah Allah bak bukét nyoe, teuma bansa teungku jipeugah bahwa di Yerusalem mantong kheueh teumpat ureuëng jiseumah Allah." 21 "Peucaya kheueh," kheun Isa bak ureuëng nyan, "bak saboh watée manusia teuma jiseumah Bapak, hana le nibak bukét nyoe, dan bukon teuma di Yerusalem. 22 Droeneueh ureuëng Samaria neuseumah nyang hana neuturi, seudangkan kamoe ureuëng Yahudi kamoe seumah Gobnyan nyang kamoe turi, sabab keuseulamatan teuka nibak ureuëng Yahudi. 23 Teuma watée jih keubiet teuka, ka teuka, bahwa ngon kuasa Roh Allah manusia teuma jiseumah Bapak sibagoe Allah nyang beutôi nyang geuharab lé Bapak. 24 Sabab Allah nyan Roh, teuma ngon kuasa Roh Allah manusia hase jiseumah Bapak lagée toh Gobnyan na. 25 Ureuëng inong nyan jipeugah bak Isa, "Ulôn kuteupeue Raja Peuseulamat (nyang teupeugah Almaseh) teuma teuka. Meunyoe Gobnyan teuka, Gobnyan teuma geupeugah bak geutanyoe." 26 "Ulôn kheueh nyan," jaweueb Isa, "Ulôn nyang saát nyoe teungoh meututoe ngon droeneueh." 27 Bak watée murit-murit Isa ka geugisa. Awaknyan hireuen watée jikalon Isa geupeugah haba ngon sidroe ureuëng inong. Teuma hana meusidroe pih lamkawan awaknyan nyang jiteumanyong bak inong nyan, "Peue nyang mak peureulée?" atawa nyang teumanyong bak Isa, "Pakon Bapak neumeututoe ngon inong nyan?" 28 Dan ureuëng nyan laju jitinggai teumpat nyan dan laju jiplueng lam banda óh trok keudeh laju jipeugah bak ureuëng-ureuëng nyang na lam banda nyan, 29 "Jak takalon ureuëng nyang peugah bak ulôn peue-peue mantong nyang ka lheueh ulôn peubuet. Peu kheueh mungken Gobnyan Raja Peuseulamat?" 30 Dan ureuëng nyan pih laju jitinggai banda jihnyan jijak laju ubak Isa. 31 Bak watée nyan murit-murit Isa geupakat gobnyan mangat Isa geutem makheun, "Bapak Gurée," kheun awaknyan, "Neumakheun laju." 32 Teuma geujaweueb lé Isa, "Na peunajoh bak Ulôn, nyang hana gata teupeue." 33 Dan murit-murit Gobnyan laju jiteumanyong sabe keudroe-droe, "Peu kheueh ureuëng laén nyang ba peunajoh keu Gobnyan?" 34 Laju geupeugah lé Isa, "Peunajoh Ulôn na kheueh teuseutôt keuheundak Gobnyan nyang utus Ulôn, dan teupeuseuleusoe buet nyang ka geujôk bak Ulôn. 35 Gatanyoe tapeugah, 'Peuet buleuen teuk musém mupot.' Teuma Ulôn peugah bak gata: Ngieng lam blang-blang nyang kunéng pade, ka siab keu teupot! 36 Ureuëng nyang mupot ka jipeuphon teurimong upah jih dan jipeusapat hase keu udeb nyang seujati dan keukai. Teuma nyang teumabu dan ureuëng nyang mupot jeuet udeb mumangat-mangat ngon gobnyan. 37 Pribasa nyoe beutôi cit, 'Nyang sidroe tukang pula, dan nyang laén nyang pot.' 38 Ulôn yue bak gata tajak mupot u blang nyang hana gata peubuet; ureuëng laén ka jimubuet disinan, dan gata tateurimong laba nibak buet awaknyan." 39 Jai that-that ureuëng Samaria peunduduek banda nyan meuiman bak Isa, sabab ureuëng inong nyan jipeugah, 'Gobnyan geupeugah bak ulôn peue-peue mantong nyang ka lheueh ulôn peubuet.' 40 Teuma, watée ureuëng-ureuëng Samaria nyan meurumpok ngon Isa, awaknyan jilakée ngon meuharab that mangat Gobnyan geutem tinggai ngon awaknyan. Teuma Isa tinggai bak teumpat nyan dua uroe treb jih. 41 Óh lheuehnyan leubeh jai lom ureuëng nyang meuiman bak Isa sabab peue nyang geupurunoe keudroe bak awaknyan. 42 Awaknyan jipeugah bak ureuëng inong nyan, "Kamoe ka kamoe meuiman nibak saát nyoe, kon le sabab peue nyang ka gata peugah bak kamoe, sabab kamoe keudroe pih ka kamoe deungoe Gobnyan, dan kamoe teupeue bahwa Gobnyan na kheueh Nyang Peuseulamat donya." 43 Óh ka lheueh dua uroe tinggai di Sikhar, Isa geujak teuma u Galilea. 44 Isa keudroe ka geupeugah, "Sidroe Nabi hana jihoreumat di nanggroe jih keudroe." 45 Teuma watée Gobnyan ka trok u Galilea, ureuëng-ureuëng nyang na disinan jisambot Gobnyan ngon galak até, sabab awaknyan na di Yerusalem watée Uroe Raya Paskah, dan ka jikalon mandum nyang geupeubuet lé Isa. 46 Óh lheuehnyan Isa geugisa lom u Kana di Galilea, bak teumpat Gobnyan ka lheueh geu-ubah ié jeuet keu ié anggô. Lam banda nyan na sidroe peugawée peumeurintah, aneuëk ureuëng nyan teungoh sakét brat di Kapernaum. 47 Watée ureuëng nyan jideungoe bahwa Isa ka teuka u Galilea nibak Yudea, ureuëng nyan laju jijak bak Isa dan jilakée Gobnyan beugeutem jak u Kapernaum mangat geutem peupuléh aneuëk Gobnyan nyang karab maté. 48 Isa geupeugah bak peugawée peumeurintah nyan, "Meunyoe gatanyoe hana takalon buet-buet nyang ajaéb, gata hana tapatéh." 49 "Teungku," kheun peugawée peumeurintah nyan, "bubagaih kheueh neujak sigohlom aneuëk ulôn maté." 50 Geupeugah lé Isa bak ureuëng nyan, "Jakwoe kheueh laju, aneuëk gata ka puléh." Ureuëng nyan jipatéh peue nyang geupeugah lé Isa, laju ureuëng nyan jijak. 51 Bak teungoh rot ueh, peulayan-peulayan ureuëng nyan jijak bak ureuëng nyan sira jipeugah lagéenyoe, "Aneuëk Teungku ka puléh." 52 Laju peugawée nyan jitanyong bak awaknyan poh padub aneuëk nyan phon puléh. Awaknyan jijaweueb, "Kira-kira poh sa cot uroe deumam jih gadôh." 53 Laju ayah aneuëk nyan teuingat peue nyang ka geupeugah lé Isa bunoe, "Aneuëk gata puléh." Teuma peugawéenyan meunan cit banmandum keuluwarga jih meuiman ubak Isa. 54 Nyan kheueh buet ajaéb nyang keudua nyang geupeubuet lé Isa di Galilea óh ka lheueh Gobnyan teuka nibak Yudea.

Yahya 5

1 Óh lheueh nyan na peurayaan Yahudi, lé sabab nyan Isa geujak u Yerusalem. 2 Di Yerusalem rab "Pintoe Bubiri" na saboh kulam, nyang lam basa Ibrani nan jih Betesda. Nibak teumpat nyan na limong boh seuramoe. 3 Nibak seuramoe-seuramoe nyan jai that-that ureuëng sakét nyang teu-éh-éh; na nyang buta, na nyang capiek, dan na teuma nyang lapée. Awaknyan banmandum jipreh ié lam kulam nyan meugeulumbang. 4 Sabab na watée jih malaikat Tuhan geutreun lam kulam nyan dan geuyok-yok ié lam kulam nyan. Dan ureuëng sakét nyang phon that treun lam kulam nyan watée ié nyan meugeulumbang teuma puléh nibak mandum peunyakét nyang na nibak ureuëng nyan. 5 Nibak teumpat nyan na sidroe ureuëng agam nyang ka keunong sakét lhée ploh lapan thon treb jih. 6 Isa geukalon ureuëng nyan teu-éh nibak teumpat nyan, dan geuteupeue bahwa ureuëng nyan ka treb that sakét; lé sabab nyan Isa geutanyong bak ureuëng nyan, "Peu kheueh gatatem gata beu puléh?" 7 Ureuëng sakét nyan laju jijaweueb, "Wahe Bapak lôn, hana ureuëng nyang na nibak teumpat nyoe nyang jitem peutamong lôntuan lam kulam nyan watée ié nyan meugeulumbang. Dan watée lôntuan teungoh lôn jak lam kulam, ureuëng laén ka awai leubeh ilée." 8 Teuma Isa laju geupeugah bak ureuëng nyan, "Beudôh kheueh, dan gulong laju tika gata dan gata jak kheueh." 9 Bak watée nyan cit teuma ureuëng nyan puléh. Ureuëng nyan jigulong tika jih laju jijak. Hainyan na jih jijak uroe Sabat. 10 Lé sababnyan dumna peunguasa Yahudi laju jipeugah bak ureuëng nyang ban puléh nyan, "Uroenyoe uroe Sabat. Gata hana jeuet tabeuôt tika gata." 11 Teuma ureuëng nyan jiseuôt, "Ureuëng nyang peupuléh ulôn bunoe nyang yue bak ulôn mangat lôn gulong tika lôn dan lôn jak." 12 "Soe kheueh nyang yue gata tagulong tika gata dan jiyue jak?" tanyong ureuëng nyan. 13 Teuma lé ureuëng nyang ka puléh nyan hana jituri soe ureuëng nyan, sabab Isa ka gadôh lamkawan ureuëng ramé nyan. 14 Óh lheuehnyan Isa meurumpok ngon ureuëng nyan lam Baét Tuhan, dan geupeugah bak ureuëng nyan, "Jinoenyoe gata ka puléh. Bék kheueh tapeubuet desya lé, mangat hana gata rasa hai nyang leubeh brok lom nibak nyang ka." 15 Ngon lagéenyan jijak kheueh ureuëng nyan jijak peugah ubak peunguasa bansa Yahudi bahwa Isa kheueh nyang peupuléh jihnyan. 16 Dan ngon sabab nyan awaknyan ka jipeuphon jipeusosah Isa, sabab gobnyan geupeu puléh gob nibak uroe Sabat. 17 Teuma Isa geupeugah bak awaknyan, "Bapak ulôn teutab geumubuet trok nibak uroenyoe, dan Ulôn pih kumubuet." 18 Deungon tutoe haba nyan ka jeuet keusabab nibak ureuëng Yahudi keuneuk jipoh maté Gobnyan. Awaknyan jipeubuet hai nyang lagée nyan, kon lé sabab Gobnyan geupeu beuáh peuratoran agama keuhai uroe Sabat, teuma lé sabab Gobnyan geupeugah bahwa Po teu Allah nyan Bapak Gobnyan; ngon lagée nyan Gobnyan ka geupeusa droe Geuh saban ngon Po teu Allah. 19 Isa geujaweueb keu ureuëng-ureuëng nyan lagée nyoe, "Peucaya kheueh, Aneuëk hana hase jipeubuet sapeue ngon kuasa jih keudroe. Gobnyan hase geupeubuet peue nyang ka geukalon nyang geupeubuet lé Bapak Geuh keudroe, nyang kheueh teuma nyang geupeubuet lé Aneuëk. 20 Sabab Bapak geugaséh keu Aneuëk dan geutunyok bak Gobnyan banmandum nyang geupeubuet keudroe. Kon nyan mantong, Bapak teuma geutunyok ubak Gobnyan buet-buet nyang leubeh rayeuk lom, ngon sababnyan gata banmandum hireuen. 21 Bapak nyan geupeubeudôh ureuëng maté, dan geubri keu gobnyan udeb nyang seujati ngon keukai baka; meunan cit teuma ngon Aneuëk geubri udeb nyang keukai baka ubak ureuëng nyang jitem geubri udeb. 22 Bapak keudroe hana geupeu hakém soe-soe mantong. Banmandum keukuasaan keu ngon hakém nyan ka geujok ubak Aneuëk Geuh. 23 Bapak geupeubuet mandum nyan mangat mandum ureuëng jihoreumat Aneuëk lagée jihnyan jihoreumat keu Bapak. Ureuëng nyang hana jihoreumat Aneuëk hana teuma jihoreumat Bapak nyang utus Aneuëk nyan. 24 Keubiet beutôi nyang lôntuan kheun nyoe: Ureuëng nyang jisimak peue nyang Ulôn peugah, dan meuiman ubak Gobnyan nyang utus Ulôn, ureuëng nyan na udeb seujati ngon keukai baka. Jihnyan hana teuma teuhuköm; jihnyan ka leupah nibak maté dan meuteumé udeb. 25 Peucaya kheueh: Teuma teuka watée jih -- dan ka trok watée jih -- ureuëng maté teuma jideungoe su Aneuëk Allah. Dan ureuëng nyang deungoe nyan teuma udeb. 26 Lagée Bapak keudroe jeuet keu sumber udeb, dan Gobnyan geupeujeuet Aneuëk Geuh sumber udeb cit teuma. 27 Gobnyan ka geujok bak Aneuëk Geuh nyan hak keujeuet keu hakém, sabab Gobnyan Aneuëk Manusia. 28 Bék kheueh sampoe hireuen gata watée tadeungoe hai nyan, sabab watée jih teuma teuka bahwa banmandum ureuëng nyang ka maté jideungoe su Gobnyan, 29 laju jiteubiet lam jrat. Ureuëng nyang ka jipeubuet nyang jroh teuma jibeudôh keu udeb. Teuma ureuëng nyang ka jipeubuet jeuhet teuma jibeudôh keu teuhuköm." 30 "Ulôn hana hase lôn peubuet sapeue pih meunyoe ateueh keuheundak lôn keudroe. Ulôn meuhakém lagée nyang geupeurintah lé Po teu Allah. Dan keuputosan Lôn nyan ade, sabab Ulôn hana kuseutôt lagée jikheun lé até Lôn keudroe, teuma keuheundak Bapak nyang utus Ulôn. 31 Meunyoe seukira jih ulôn bri keusaksian Lôn keudroe, keusaksian nyan hana jeuet teupatéh. 32 Teuma na ureuëng laén nyang meusaksi keuhai Ulôn, dan Ulôn kuteupeue peue nyang jimeusaksi nyan beutôi. 33 Gata ka takirém utosan ubak Nabi Yahya, dan gobnyan ka geumeusaksi nyang beutôi keuhai Ulôn. 34 Hai nyoe Ulôn peugah, kon lé sabab Ulôn peureulée keusaksian nibak manusia, teuma mangat gata teupeuseulamat. 35 Nabi Yahya nyan lagée panyöt nyang hu dan jipeuteubiet trang nyang muble-ble. Keu sikeujab nyan gata galak tateurimong cahya nyang trang nyan. 36 Teuma meusaksi Ulôn leubeh rayeuk nibak meusaksi Nabi Yahya, peue nyang jinoenyoe Ulôn peubuet, na kheueh buat nyang geubri tugaih lé Bapak ubak Ulôn, nyan sibagoe bukeuti bahwa Bapak nyang geu utus Ulôn. 37 Dan Bapak nyang utus lôn nyan pih geumeusaksi keuhai Ulôn. Gata gohlom na peureunah gata deungoe su Gobnyan atawa gata ngieng hi Gobnyan. 38 Tutoe haba Gobnyan hana teukeubah lam até gata sabab gata hana tapatéh keu Ulôn nyang geu-utus lé Gobnyan. 39 Gata tameurunoe Alkitab sabab ngon lagée nyan gata sangka ngon cara nyang lagée nyan gata na udeb seujati dan keukai baka. Dan Alkitab nyan keudroe jimeusaksi keuhai Ulôn. 40 Teuma gata hana tatem mangat ubak ulôn meuteumé udeb nyang keukai baka. 41 Ulôn hana lôn mita jipujoe nibak manusia. 42 Ulôn kuturi gata. Ulôn kuteupeue gata hana tagaséh ubak Po teu Allah lam até gata. 43 Ulôn kuteuka ngon kuasa Bapak, teuma gata hana tateurimong Lôn. Teuma meunyoe ureuëng laén teuka ngon kuasa jih keudroe, gata tatem teurimong Gobnyan. 44 Pakriban gata hase tapatéh, meunyoe gata tamita jipujoe lé sabe keudroe-droe gata, dan hana ta useuha tamita pujoe nibak Po teu Allah nyang Esa? 45 Bék gata pike Ulôn kupeusalah gata dikeue Bapak. Nyang bit jih nyang peusalah gata na kheueh Nabi Musa, gobnyan nyang gata harab. 46 Seukira jih gata tapeucaya ubak Nabi Musa, gata teuma tameuiman ubak Ulôn, sabab keuhai Ulôn kheueh gobnyan teumuléh. 47 Teuma meunyoe gata hana tapatéh ubak peue nyang geutuléh lé Nabi Musa, pakriban teuma gata hase tapatéh ubak nyang Ulôn peugah?"

Yahya 6

1 Na meupadub watée óh lheueh nyan Isa geujak u meurandeh Danau Galilea, nyang nan laén Danau Tiberias. 2 Óh ka trok gobnyan keudeh, jai that-that ureuëng nyang seutôt Gobnyan sabab awaknyan ka jiteupeue buet-buet nyang ajaéb nyang ka lheueh geupeubuet ngon cara geupeu puléh ureuëng sakét. 3 Isa laju geuék u ateueh bukét, laju geuduek disinan ngon murit-murit Gobnyan. 4 Bak watée nyan ka tô that Uroe Raya Paskah Yahudi. 5 Watée geungieng lé Isa ban sikeulileng Gobnyan, laju geukalon ureuëng meurôn-rôn jijak bak Gobnyan. Ngon sabab nyan Gobnyan laju geupeugah bak Filipus, "Dipat tanyoe hase tabloe peunajoh mangat banmandum awaknyoe hase jimakheun?" ( 6 Isa ka geuteupeue peue nyang teuma geupeubuet, teuma Gobnyan geupeugah meunan sabab Gobnyan geukeuneuk ujoe Filipus.) 7 Jijaweueb lé Filipus, "Meunyoe tabloe ruti ngon dua reutôh péng pirak hana seb keu ureuëng nyang jai that nyoe, bah pih tieb-tieb ureuëng meuteumé bacut mantong." 8 Sidroe murit Isa nyang laén, nyang nan jih Andreas, syedara Simon Petrus, jipeugah lagée nyoe, 9 "Lamkawan geutanyoe na aneuëk agam bak jih na limong boh ruti dan dua boh eungkot. Teuma patna seb atranyan keu ureuëng nyang jai nyoe?" 10 "Gata yue kheueh awaknyan banmandum mangat jiduek," kheun Isa. Bak teumpat nyan jai that-that naleueng, jadi mandum ureuëng ramé nyan jiduek ateueh naleueng -- banmandum na kira-kira limong ribée droe ureuëng agam. 11 Óh lheueh nyan Isa laju geucok ruti nyan, laju geu-meudoá syukoe bak Po teu Allah. Óh lheueh nyan laju geubagi-bagi ruti nyan keu ureuëng ramé. Meunan cit óh lheuehnyan geubagi-bagi teuma eungkot nyan, dan awaknyan laju jipajoh sipuih-puih jih. 12 Óh ka lheueh banmandum awaknyan jimakheun sampoe troe, Isa laju geupeugah bak murit-murit Gobnyan, "Peusapat kheueh laju séueh-séueh nyang leubeh jipajoh lé awaknyan; bék sampoe na nyang teutiek." 13 Laju awaknyan geupeusapat na dua blaih boh raga peunoh peunajoh nyang leubeh nibak limong boh ruti nyang jimakheun lé ureuëng ramé nyan. 14 Watée ureuëng ramé jikalon buet nyang ajaéb nyang ka geupeubuet lé Isa nyan, awaknyan laju jipeugah, "Keubiet, nyoe kheueh Nabi nyang teuharab teuka lam donya!" 15 Isa geuteupeue awaknyan jitem teuka keu jijak paksa Gobnyan mangat geutem jeuet keu raja awaknyan. Sabab nyan geujak laju peuaséng droe u daerah nyang meubukét-bukét. 16 Watée uroe ka jiteuka malam, murit-murit Isa laju jitron u danau. 17 Laju awaknyan jiék ateueh peurahô jijeumeurang danau geutuju u Kapernaum. Uroe ka seupôt Isa gohlom cit teuka geujak bak awaknyan. 18 Bak watée nyan danau ka jipeuphon meu-umbak sabab angén teuga ka jitreun. 19 Óh ka lheueh awaknyan jimeulayeue na kira-kira limong atawa nam kilo metée, awaknyan laju jikalon Isa geujak ateueh ié sira geutuju bak awaknyan. Awaknyan teumakot lumpah na. 20 Teuma Isa geupeugah bak awaknyan, "Bék teumakot, nyoe Ulôn!" 21 Dan ngon galak até awaknyan jiteurimong Gobnyan geuék ateueh peurahô, dan watée nyan cit teuma peurahô awaknyan trok ubak teumpat nyang teutuju. 22 Óh singoh beungoh ureuëng ramé mantong na tinggai di meurandeh danau, jiteupeue bahwa bunoe na saboh peurahô disinan. Awaknyan jiteupeue bahwa murit-murit Isa ka habéh jibeurangkat ngon peurahô nyan, seudangkan Isa hana geuseutôt. 23 Óh lheuehnyan na meupadub boh peurahô nyang teuka nibak banda Tiberias dan laju jitiek saôh bak binéh ureuëng ramé nyang teungoh pajoh ruti óh ka lheueh Tuhan geumeudoá syukoe. 24 Watée ureuëng ramé nyan jikalon bahwa Isa meunan cit ngon murit-murit Gobnyan ka hana le bak teumpat nyan, awaknyan pih laju jiék ateueh peurahô nyang na disinan dan laju jijak u Kapernaum keu jijak mita Isa. 25 Watée ureuëng-ureuëng nyan meurumpok ngon Isa di meurandeh danau, awaknyan laju jitanyong bak Gobnyan, "Bapak Gurée, pajan Bapak trok bak teumpat nyoe?" 26 Isa geujaweueb, "Keubiet that, gatanyoe ta mita Ulôn bukon lé sabab gatanyoe ka muphom meukeusut buet-buet ajaéb nyang Ulôn peubuet, teuma sabab gata ka taseumajoh sampoe troe. 27 Bék kheueh tamubuet keu meuteumé peunajoh nyang hase habéh dan brok. Mubuet kheueh keu hase meuteumé peunajoh nyang hana jitem brok dan nyang jibri udeb seujati ngon keukai. Peunajoh nyan teuma geubri lé Aneuëk Manusia keu gata, sabab Gobnyan ka geubaiát lé Po teu Allah Bapak." 28 Laju awaknyan jiteumanyong bak Gobnyan, "Peue nyang harôh kamoe peubuet jeuet kamoe peubuet keuheundak Po teu Allah?" 29 Geujaweueb lé Isa, "Nyoe kheueh nyang geulakée lé Po teu Allah nibak gata: Meuiman kheueh ubak Gobnyan nyang ka geu-utus lé Allah." 30 "Meunyoe meunan," kheun awaknyan, "Peue bukeuti jih nyang jeuet bapak jok bak kamoe mangat jeuet kamoe ngieng dan kamoe meuiman ubak Bapak? Peue nyang teuma Bapak peubuet? 31 Indatu kamoe geupajoh manna lam padang pasi, lagée nyang na teutuléh lam Alkitab, 'Gobnyan geubri bak awaknyan peunajoh ruti dan syeuruga.' " 32 Laju Isa geupeugah bak awaknyan, "Peucaya kheueh: Kon Nabi Musa, teuma Bapak Ulôn kheueh nyang bri keu gata ruti nyang sibeuna jih nibak lam syeuruga. 33 Sabab ruti nyang geubri lé Po teu Allah na kheueh Gobnyan nyang geutreun nibak lam syeuruga, dan geubri udeb bak manusia lam donya nyoe." 34 "Bapak," kheun awaknyan, "Neubri kheueh keu kamoe ruti beusabe-sabe," 35 "Ulôn kheueh ruti nyang teubri udeb," kheun Isa bak awaknyan. "Ureuëng nyang jijak bak Ulôn hana deuek le siumu masa. Dan ureuëng nyang peucaya keu Ulôn hana teuma glaih le siumu masa." 36 "Teuma lagée nyang ka lheueh teupeugah bak gata, bah kheueh gata ka takalon ulôn, gata teutab hana patéh. 37 Banmandum ureuëng nyang geubri lé Bapak keu Ulôn teuma ji teuka bak Ulôn. Ulôn hana teuma lôn tulak soemantong nyang jitem jak bak Ulôn. 38 Sabab Ulôn kutreun nibak lam syeuruga, bukon Ulôn kupeubuet keuheundak Lôn keudroe, teuma keuheundak Gobnyan nyang utus Ulôn. 39 Dan nyoe kheueh keuheundak Gobnyan nyang utus Ulôn: mangat nibak banmandum ureuëng nyang geubri keu Ulôn, hana meusidroe pih nyang gadôh; teuma jeuet Ulôn peubeudôh awaknyan bak Uroe Kiamat. 40 Keubiet nyoe kheueh keuheundak Bapak Ulôn: Mangat banmandum nyang kalon Aneuëk dan meuiman bak Aneuëk nyan ureuëng nyan meuteumé udeb seujati dan keukai, dan Ulôn peu-udeb lom teuma watée Uroe Kiamat." 41 Dum na ureuëng Yahudi ka jipeuphon meupéb-péb keu Isa, sabab Gobnyan geupeugah: "Ulôn ruti nyang jitreun nibak syeuruga", 42 Awaknyan jipeugah lagée nyoe, "Bukon kheueh ureuëng nyoe Isa, aneuëk Yusuf? Kamoe meuturi ma ngon yah jih! Pakriban jeuet jipeugah bahwa jihnyoe jitreun nibak Syeuruga?" 43 Dan Isa laju geupeugah bak awaknyan, "Bék meupéb-péb. 44 Hana meusidroe pih nyang hase jijak bak Ulôn, meunyoe Bapak nyang utus Ulôn, hana geuba gobnyan bak Ulôn; dan soe nyang teuka, ureuëng nyan teuma lôn peubeudôh bak Uroe Kiamat. 45 Lam Kitab Nabi-nabi na teutuléh lagée nyoe, 'Banmandum ureuëng teuma geupurunoe lé Po teu Allah.' Ngon lagée nyan, banmandum ureuëng nyang jideungoe Bapak jimeurunoe bak Gobnyan teuma jijak bak ulôn. 46 Ngon lagée nyan bukon meumakna na ureuëng nyang ka jikalon Bapak. Teuma gobnyan nyang teuka nibak Po teu Allah, ka jikalon Bapak. 47 Beutateupeue kheueh: Ureuëng nyang meuiman, bak ureuëng nyan na udeb seujati dan keukai. 48 Ulôn kheueh ruti nyang teubri udeb. 49 Indatu gata jimakheun manna di padang pasi dan awaknyan teutab cit maté. 50 Teuma kon lagée nyan ngon ruti nyang jitron nibak syeuruga; ureuëng nyang makheun ruti nyan hana teuma maté. 51 Ulôn kheueh ruti nyang treun nibak syeuruga -- ruti nyang teubri udeb. Ureuëng nyang makheun ruti nyoe teuma udeb siumu masa. Ruti nyang teuma ulôn bri keuhajat udeb manusia lam donya na kheueh asoe Ulôn." 52 Watée jideungoe haba nyan ureuëng-ureuëng Yahudi laju jimeudakwa sabe keudroe-droe, "Pakriban ureuëng nyoe hase jibri asoe Jih keu geutanyoe keu teumakheun?" kheun awaknyan. 53 Laju Isa geupeugah bak awaknyan, "Peucaya kheueh: Meunyoe gata hana tapajoh asoe Aneuëk Manusia dan gata jieb darah Jihnyan, gata hana teuma beutôi-beutôi udeb. 54 Ureuëng nyang makheun asoe Ulôn dan jijieb darah Ulôn keu ureuëng nyan na udeb seujati dan keukai dan Ulôn teuma Lôn peubeudôh ureuëng nyan bak Uroe Kiamat. 55 Sabab asoe Ulôn keubiet peunajoh, dan darah Ulôn keubiet nyang teujieb. 56 Ureuëng nyang makheun asoe Ulôn dan jijieb darah Lôn, ureuëng nyan teutab meusaboh ngon Ulôn, dan Ulôn ngon ureuëng nyan. 57 Bapak nyang udeb nyan, geu-utus Ulôn dan Ulôn pih udeb nibak Bapak. Meunan cit ureuëng nyang makheun asoe Ulôn teuma udeb nibak Ulôn. 58 Nyoe kheueh ruti nyang jitreun nibak syeuruga: bukon ruti lagée geumakheun indatu gata. Sabab óh lheueh teupajoh rutinyan, awaknyan maté cit teuma. Teuma ureuëng nyang makheun ruti nyoe teuma udeb siumu masa." 59 Banmandum nyan geupeugah lé Isa bak watée Gobnyan geuseumeubeuet lam rumoh iébadat di Kapernaum. 60 Óh ka lheueh jideungoe tutoe gaba Isa nyan, jai that murit Gobnyan jipeugah, "Ajarannyoe keubiet lumpah brat. Soe nyang hase jiteurimong nyan!" 61 Isa keudroe geuteupeue bahwa murit-murit Gobnyan meupéb-péb keuhai nyan. Teuma Gobnyan laju geupeugah, "Peu kheueh gata teusinggong sabab tutoe haba lôn nyan? 62 Pakriban jeuet jih singoh meunyoe gata ngieng Aneuëk Manusia jiék lom bak teumpat awai phon? 63 Nyang peujeuet manusia udeb na kheueh Roh Allah. Teunaga manusia hana meuguna. Tutoe haba nyang Ulôn peugah bak gata nyoe na kheueh tutoe haba Roh Allah dan tutoe haba nyang teubri udeb. 64 Teuma na cit diteungoh-teungoh gata nyang hana meucaya." (Isa ka geuteupeue phon yoh awai soe-soe ureuëng nyang hana jitem peucaya, dan soe teuma nyang keuneuk khianat Gobnyan.) 65 Laju geupeugah lom lé Isa Almaseh, "Nyan kheueh sabab jih Ulôn britée bak gata bahwa hana meusidroe pih nyang hase jijak bak Ulôn, meunyoe Bapak hana geubri keumungkenan." 66 Phon saát nyan le that that murit Gobnyan nyang tinggai Gobnyan, dan hana jitem seutôt le Gobnyan. 67 Laju Isa geupeugah bak bandua blaih droe murit Gobnyan, "Peu kheueh gata keuneuk tinggai cit Ulôn?" 68 "Tuhan," kheun Simon Petrus bak Gobnyan, "Bak soe teuma kamoe jak? Haba Tuhan teubri udeb seujati dan keukai. 69 Kamoe ka kamoe peucaya dan yakén that-that bahwa Tuhan kheueh utosan suci nibak Po teu Allah." 70 Jaweueb Isa, "Bukon kheueh Ulôn nyang ka Lôn piléh gata dua blaih droe nyoe? Teuma sidroe nyang na lamkawan gata na kheueh roh jeuhet!" 71 Nyang geumeukeusut lé Isa na kheueh Yudas aneuëk Simon Iskariot. Sabab, bah kheueh Yudas nyan sidroe nibak bandua blaih droe murit Isa, jihnyan teuma jikhianat Isa.

Yahya 7

1 Óh lheueh nyan Isa geujak hoho mantong bansaboh Galilea. Gobnyan hana geutem jak u Daerah Yudea sabab peunguasa Yahudi nyang na disinan na niet keuneuk poh maté Gobnyan. 2 Bak watée nyan karab that ngon Uroe Raya Jambo Ôn. 3 Teuma lé syedara-syedara Isa laju geupeugah ubak Gobnyan, "Tinggai kheueh teumpat nyoe dan gata jak laju u Yudea, mangat murit-murit Gata pih jeuet jikalon buet Gata. 4 Hana ureuëng nyang jisöm peue nyang jipeubuet, meunyoe ureuëng nyan keuneuk jeuet keu ureuëng meusyeuhu. Meunyoe gata peubuet hai-hai nyang lagée nyan, bansigom donya harôh jiteupeue!" ( 5 Sabab syedara-syedara Gobnyan keudroe hana peucaya cit bak Gobnyan.) 6 "Gohlom trok watée nibak Ulôn," geupeugah lé Isa bak awaknyan, "teuma meunyoe keu gata, pajan mantong hase. 7 Donya nyoe hana mungken jibanci gata. Teuma meunyoe Ulôn keubiet jibanci lé donya, sabab Ulôn sabe Lôn peugah bak donya bahwa buet jeuhet. 8 Jak kheueh gata keudroe bak peurayaan nyan. Ulôn hana Lôn jak sigohlom trok watée jih nibak Ulôn." 9 Meunan kheueh geupeugah lé Isa bak syedara-syedara Gobnyan, dan Gobnyan pih laju tinggai di Galilea. 10 Óh ka leupah syedara Gobnyan banmandum jijak bak peurayaan nyan, seungab-seungab Isa geujak keudroe ngon hana jiteupeue lé meusidroe ureuëng pih. 11 Teungoh peurayaan nyan, lé peunguasa Yahudi jimita Gobnyan dan jitanyong-tanyong, "Dipat ureuëng nyan?" 12 Jai that-that ureuëng ka jimeusáh-sáh keuhai Gobnyan. Na nyang peugah, "Gobnyan ureuëng gét," na teuma nyang peugah, "Kon ureuëng gét! Gobnyan jipeusisat ureuëng ramé." 13 Teuma hana meusidroe pih nyang jijeuet peugah haba nyan seucara troh trang keuhai Gobnyan sabab awaknyan jitakot keu peunguasa Yahudi. 14 Teungoh peurayaan nyan teupeuna, Isa laju geutamong lam Baét Allah, óh trok keunan laju geuseumeubeuet. 15 Bubena peunguasa Yahudi hireuen lumpah na laju jipeugah, "Peue sabab ureuëng nyoe jai that-that nyang jiteupeue, padahai jihnyan hántom na jisikula?" 16 Geujaweueb lé Isa, "Nyang Ulôn peurunoenyoe bukon ajaran Ulôn, teuma ajaran Gobnyan nyang utus Ulôn. 17 Ureuëng nyang jitem seutôt keuheundak Po teu Allah, teuma jiteupeue peu kheueh ajaran Ulôn nyoe teuka jih nibak Po teu Allah atawa nibak Ulôn keudroe. 18 Ureuëng nyang peurunoe ajaran jih keudroe jimita keuhoreumatan keu droe jih keudroe. Teuma ureuëng nyang mita keuhoreumatan keu Gobnyan nyang utus Jihnyan, ureuëng nyan jujoe, hana nyang teupeunget nibak jihnyan. 19 Bukon kheueh Nabi Musa ka geubri peurintah Po teu Allah keu gata? Teuma lamkawan gata hana nyang seutôt peue-peue nyang teupeurintah nyan. Pakon gatanyoe keuneuk poh maté Ulôn?" 20 Ureuëng ramé nyan jijaweueb, "Droeneueh pungoe! Soe nyang keuneuk poh maté Droeneueh?" 21 Isa geujaweueb, "Teuma saboh buet nyang Ulôn peubuet bak uroe Sabat, dan gata hireuen. 22 Nabi Musa geubri keu gata peuratoran keuhai meukatan -- bah pih meukatan nyan kon bak Nabi Musa asai jih, teuma nibak bapak-bapak indatu sigohlom Nabi Musa. Ngon sabab nyan, bak uroe Sabat pih gata keuneuk peukatan gob. 23 Meunyoe hainyan gata peubuet mangat bék teuiengkeue peuratoran Nabi Musa keuhai meukatan, pakon gata beungéh keu Ulôn sabab Lôn peupuléh gob banmandum bak uroe Sabat? 24 Bék gata peuhakém ureuëng ngon dasai jih nyang deuh teukalon, teuma ngon dasai keuadelan." 25 Óh lheueh nyan na meupadub droe ureuëng Yerusalem jipeugah lagée nyoe, "Peu kheueh kon ureuëng nyoe nyang teungoh teumita-mita keu teupoh maté? 26 Ngieng kheueh jipeugah haba ban galak droe dikeue rakyat ba, dan hana nyang jijeuet peugah sapeue keu ureuëng nyan! Peu kheueh peunguasa-peunguasa geutanyoe mungken geusadar bahwa ureuëng nyoe Raja Peuseulamat? 27 Teuma meunyoe Raja Peuseulamat nyan teuka, hana meusidroe pih jiteupeu dipat asai Gobnyan! Padahai tanyoe tateupeue dipat asai ureuëng nyoe." 28 Óh lheueh nyan, teungoh Isa geuseumeubeuet lam Baét Allah, Gobnyan laju geutawök ngon su nyang teuga, "Jadi gata tateupeue soe Ulôn nyoe, dan dipat asai Ulôn? Ulôn hana teuka ateueh keuheundak Ulôn keudroe. Ulôn geu-utus lé Gobnyan nyang hak geu-utus ulôn, dan Gobnyan jeuet teupeucaya. Teuma gata hana taturi Gobnyan. 29 Ulôn kuturi Gobnyan, sabab Ulôn meuasai nibak Gobnyan, dan Gobnyan kheueh nyang utus Ulôn." 30 Bak watée nyan awaknyan keuneuk drob Isa, teuma hana ureuëng nyang jijeuet mat Gobnyan, sabab gohlom trok watée jih. 31 Jai that-that ureuëng-ureuëng nyang na lamkawan awaknyan ka jipeuphon meuiman keu Gobnyan, dan jipeugah lagée nyoe, "Meunyoe Raja Peuseulamat nyan teuka, peu kheueh Gobnyan hase geupeubuet buet nyang ajaéb leubeh jai nibak nyang ka jipeubuet lé ureuëng nyoe?" 32 Ureuëng-ureuëng Farisi jideungoe pakriban ureuëng ramé nyan jimeusáh-sáh keuhai Isa. Ngon sabab nyan, meusajan-sajan ngon Imeum-imeum ulée, awaknyan laju jiyue ubak na meupadub droeb tukang jaga Baét Allah mangat jijak droe Isa. 33 Isa geupeugah bak ureuëng ramé nyang na dileuen Baét Allah nyan, "Cuma sikeujab teuk Ulôn nyoe na meusajan gata. Óh ka lheueh nyan Ulôn teuma lôn gisa ubak nyang utus Ulôn. 34 Gata teuma ta mita Ulôn, teuma hana hase meurumpok ngon Ulôn; sabab gata hana hase tajak bak teumpat Ulôn tinggai." 35 Laju peunguasa Yahudi jimarit sabe keudroe-droe, "Ureuëng nyoe ho jikeuneuk jak sampoe tanyoe hana hase meurumpok ngon jih nyoe? Peu kheueh jihnyoe keuneuk jak ubak ureuëng-ureuëng Yahudi nyang tinggai di luwa nanggroe lamkawan ureuëng Yunani, dan jipeurunoe ureuëng Yunani? 36 Peu kheueh makna Jih jipeugah bahwa geutanyoe teuma tamita jihnyan teuma hana hase meurumpok ngon jihnyan dan geutanyoe hana hase tajak bak teumpat Jihnyan tinggai?" 37 Bak uroe keuneulheueh nibak peurayaan nyan, na kheueh uroe nyang paleng peunteng, Isa geudong lam Baét Allah laju geupeugah lagée nyoe, "Ureuëng nyang glaih jak kheueh keunoe bak Ulôn mangat Lôn peujieb ié. 38 Keuhai ureuëng nyang meuiman bak Ulôn, na teutuléh lam Alkitab, 'Lam até ureuëng nyan ji-ile ié nyang teubri udeb.' " ( 39 Isa geumeututoe keuhai Roh Allah, nyang teuma jiteurimong lé ureuëng-ureuëng nyang meuiman ubak Gobnyan. Sabab, bak watée nyan Roh Allah gohlom geubri; sabab Isa gohlom teupeumulia deungon maté Gobnyan.) 40 Jai that ureuëng nyang jideungoe peue nyang geupeugah lé Isa, dan lamkawan awaknyan na nyang peugah, "Ureuëng nyoe ka pasti Nabi nyan!" 41 Nyang laén jipeugah meunoe, "Nyoe kheueh Raja Peuseulamat!" Teuma na cit nyang peugah, "Ah, panena mungken Raja Peuseulamat teuka nibak Galilea? 42 Lam Alkitab na teutuléh bahwa Raja Peuseulamat na kheueh keuturonan Nabi Daud dan teuma teuka nibak Betlehem, na kheueh gampông Nabi Daud." 43 Akhé jih awaknyan ka jipeuphon meudakwa keuhai Isa. 44 Na nyang keuneuk drob Gobnyan, teuma hana meusidroe pih nyang jijeuet mat Gobnyan. 45 Watée tukang-tukang jaga Baét Allah nyang teuyue jak drob Isa jigisa lom, Imeum-imeum ulée dan ureuëng-ureuëng Farisi nyan laju jitanyong bak awaknyan, "Pakon hana gata ba ureuëng nyan keunoe?" 46 Jijaweueb lé tukang-tukang kawai nyan, "Luwa biasa, gohlom na ureuëng nyang peugah haba lagée Gobnyan!" 47 "Peu kheueh gata pih ka sisat ngon cara gata deungoe haba Gobnyan?" kheun ureuëng Farisi nyan. 48 "Peu kheueh na nibak peunguasa-peunguasa geutanyoe atawa ureuëng Farisi nyang meuiman keu Gobnyan? 49 Teuma ureuëng ramé nyan, awaknyan hana muphom huköm Nabi Musa, dan pakriban mantong awaknyan ka keunong kutok." 50 Sidroe lamkawan ureuëng Farisi nyan na kheueh Nikodemus nyang ka lheueh jijak ubak Isa. Nikodemus laju jipeugah bak ureuëng-ureuëng Farisi nyang laén, 51 "Meunurot huköm, sidroe-droe ureuëng hana jeuet teuhuköm sigohlom peukara jih teudeungoe dan buet jih teupareksa." 52 "Peu kheueh gata nibak Galilea cit?" Jaweueb awaknyan, "Ngieng mantong lam Alkitab! Gata teuma deuh takalon bahwa hana nabi nyang asai jih nibak Galilea!" 53 Óh lheuehnyan banmandum ureuëng jiwoe u rumoh.

Yahya 8

1 Teuma Isa laju geujak u Bukét Zaiton. 2 Óh singoh beungoh watée mantong suboh Gobnyan geujak lom u Baét Allah, dan ramé that ureuëng jijak bak Gobnyan. Isa laju geuduek, óh lheueh nyan laju geupeu phon peubeuet awaknyan. 3 Bak watée nyan, gurée-gurée agama dan ureuëng-ureuëng Farisi laju jimé bak Gobnyan sidroe ureuëng inong nyang teudrob sabab jimeumukah. Awaknyan laju jiyue bak ureuëng inong nyan mangat jidong di teungoh-teungoh, 4 óh lheueh nyan laju jipeugah bak Isa, "Bapak Gurée, inong nyoe kamoe drob sabab teungoh jimeumukah. 5 Lam Huköm Nabi Musa na peuratoran bahwa inong nyang lagée nyoe harôh teurhom ngon batée sampoe maté. Jinoenyoe pakriban peundapat Bapak lam hainyoe?" 6 Awaknyan jitanyong lagée nyan keu jikeuneuk jeubak Gobnyan, mangat awaknyan jeuet jipeusalah Gobnyan. Teuma Isa geuduek mantong, dan geutuléh ngon jaroe Gobnyan ateueh tanoh. 7 Teuma lé awaknyan laju jipaksa geu, Gobnyan laju geubeuôt ulée Geuh dan geupeugah bak awaknyan, "Ureuëng nyang hana meudesya nyang na lamkawan gata, bah kheueh ureuëng nyan nyang geulawa batée ateueh inong nyan." 8 Óh lheueh geupeugah nyan Isa geuduek lom, dan geutumuléh lom ngon jaroe Geuh ateueh tanoh. 9 Óh ka lheueh jideungoe Isa geupeugah meunan, jijak kheueh laju awaknyan jitinggai teumpat nyan, sidroe seun sidroe phon nyang tuha. Keuneuk jitinggai Isa sidroe disinan meusajan ngon inong nyang mantong teudong bak teumpat jih. 10 Laju Isa geubeuôt ulée geuh dan geupeugah bak inong nyan, "Ho ka awaknyan banmandum? Peu kheueh hana nyang huköm gata?" 11 "Hana Pak," jaweueb inong nyan. "Meunyoe meunan bah kheueh," kheun Isa, "Ulôn pi hana lôn huköm gata. Jinoenyoe jak kheueh, bék tapeubuet desya le." 12 Isa geumeututoe lom ngon ureuëng ramé, kheun gobnyan, "Ulôn kheueh trang donya. Ureuëng nyang seutôt Ulôn hana jijak lam seupôt, teuma meuteumé trang lam udeb." 13 "Jinoenyoe Gata tabri keusaksian keuhai droe keudroe," jikheun lé ureuëng-ureuëng Farisi nyan ubak Gobnyan, "Keusaksian droeneueh hana beutôi." 14 Geujaweueb lé Isa, "Bah pi Ulôn peugah keusaksian keuhai droe keudroe Ulôn, keusaksian Ulôn nyan beutôi; sabab Ulôn kuteupeu dipat Ulôn teuka dan ho Ulôn jak. Gatanyoe hana tateupeue dipat Ulôn teuka dan ho Ulôn jak. 15 Gata peuhakém ureuëng ngon cara manusia; Ulôn hana Lôn peuhakém meusidroe manusia pi. 16 Teuma meunyoe Ulôn peuhakém manusia, keuputosan nyang Ulôn cok nyan na kheueh ade, sabab Ulôn kon sidroe; Bapak nyang kirém Ulôn na meusajan Ulôn. 17 Lam Huköm Nabi Musa na teutuléh lagée nyoe: keusaksian nyang beutôi na kheueh keusaksian nibak dua droe ureuëng. 18 Nyang bri keusaksian keuhai droe Ulôn na dua droe -- Ulôn dan Bapak nyang utus Ulôn." 19 "Bapak droeneueh nyan dipat?" kheun awaknyan. Geujaweueb lé Isa, "Gata hana taturi Ulôn meunan cit Bapak Ulôn. Meunyoe gata taturi Ulôn, ka pasti gata pih ta turi keu Bapak Ulôn." 20 Banmandum nyan geupeugah lé Isa watée Gobnyan teungoh geuseumeubeuet di Baét Allah bak binéh caleng-caleng péng seudeukah. Teuma hana meusidroe pi nyang jijeuet drob Gobnyan sabab gohlom trok watée jih. 21 Isa geupeugah lom bak awaknyan, "Ulôn teuma Lôn jak, dan gata teuma tamita Ulôn, teuma gata maté lam desya-desya gata. U teumpat Ulôn jak, gata hana hase tateuka." 22 Teuma lé peunguasa Yahudi laju jipeugah, "Kadang Jihnyan keuneuk jak poh droe, sabab Jihnyan jipeugah, 'U teumpat Ulôn jak, gata hana hase ta teuka.' " 23 Laju Isa geupeugah bak awaknyan, "Gata tateuka nibak miyueb; teuma Ulôn teuka nibak ateueh. Gata nibak lam donya; Ulôn kon nibak lam donya. 24 Nyang kheueh sabab jih Ulôn peugah bak gata, bahwa gata maté lam desya-desya gata. Dan keubiet gata teuma maté lam desya-desya gata, meunyoe hana gata patéh bahwa 'Ulôn kheueh Jihnyan nyang teupeugah ULÔN NA'." 25 "Droeneueh nyoe soe nyang sibeuna jih?" jitanyong lé awaknyan. Geujaweueb lé Isa, "Keupeue lom Lôn peugah haba ngon gata! 26 Mantong jai that keuhai gata nyang keuneuk Ulôn peugah dan Lôn hakém. Teuma Gobnyan nyang utus Ulôn jeuet teupeucaya. Dan Ulôn peugah bak donya peue nyang Ulôn deungoe nibak Gobnyan." 27 Awaknyan hana muphom bahwa Gobnyan teungoh geumeututoe ngon droe Jih nyan keuhai Bapak. 28 Ngon sabab nyan Isa geupeugah bak awaknyan, "Teuma, meunyoe gata ka tapeumanyang Aneuëk Manusia, gata teuma ta teupeu bahwa 'Ulôn kheueh nyang teupeugah bahwa ULÔN NA', dan gata teuma ta teupeu bahwa hana sapeue pih nyang Ulôn peubuet nibak droe Lôn keudroe. Nyang Ulôn peugah peue nyang geupeugah lé Bapak ubak Ulôn. 29 Dan Gobnyan nyang utus Ulôn na meusajan Ulôn. Gobnyan hántom na geupeubiyeu Ulôn keudroe, sabab Ulôn sabe Lôn peubuet peue nyang jeuet keu galak até Gobnyan." 30 Óh ka lheueh geupeugah banmandum nyan lé Isa, jai that ureuëng nyang meuiman ubak Gobnyan. 31 Óh lheueh nyan Isa geupeugah ubak ureuëng-ureuëng Yahudi nyang ka meuiman ubak Gobnyan, "Meunyoe gata udeb meunurot ajaran nyang Ulôn peurunoe gata keubiet-keubiet murit Ulôn, 32 ngon lagée nyan gata teuma taturi Allah nyang beutôi, dan ngon sabab nyan gata teuma teupeubeubaih." 33 "Kamoenyoe keuturonan Nabi Ibrahim," kheun awaknyan. "Gohlom na kamoe rasa jeuet keunamiet soe mantong! Peue meukeusut Droeneueh nyang neupeugah, 'Gata teuma teupeubeubaih'?" 34 "Keubiet beutôi nyang Ulôn peugah nyoe," kheun Isa bak awaknyan. "Ureuëng jipeubuet desya, na kheueh namiet desya. 35 Dan sidroe namiet hana meuteumé teumpat nyang teutab lam keuluwarga, meunyoe aneuëk siumu masa na meuteumé teumpat lam keuluwarga. 36 Sabab nyan kheueh, meunyoe aneuëk jipeubeubaih gata, gata biet-biet beubaih. 37 Keubiet Ulôn teupeue gatanyoe keuturonan Nabi Ibrahim. Teuma gata keuneuk tapeumaté Ulôn, sabab gata hana tatem teurimong nyang Ulôn purunoe. 38 Peue nyang Ulôn ngieng bak Bapak Ulôn, nyan kheueh nyang Ulôn peugah. Seudangkan gata tapeubuet peue nyang jipeurunoe lé bapak gata keu gata." 39 Awaknyan jijaweueb, "Bapak kamoe na kheueh Nabi Ibrahim." "Meunyoe gata biet-biet aneuëk Nabi Ibrahim," kheun Isa, "Ka pasti gata peubuet peue nyang geupeubuet lé Nabi Ibrahim. 40 Ulôn peusampoe ubak gata keubeunaran nyang Ulôn deungoe bak Po teu Allah, teuma digata keuneuk tapoh maté Ulôn. Nabi Ibrahim hana geupeubuet nyang lagée nyan! 41 Gata tapeubuet peue nyang jipeubuet lé bapak gata keudroe." Jaweueb awaknyan, "Kamoe bukon aneuëk-aneuëk hareuem. Bapak kamoe cit sidroe, na kheueh Allah keudroe." 42 Laju Isa geupeugah bak awaknyan, "Meunyoe bit Allah nyan Bapak gata, gata tagaséh keu Ulôn, sabab Ulôn teuka nibak Po teu Allah. Ulôn hana teuka ngon lakée droe Ulôn, teuma Gobnyan kheueh nyang utus Ulôn. 43 Peue sabab jih gata hana muphom peue nyang Ulôn peugah? Sabab gata hana ék tateuen watée gata deungoe nyang Ulôn peurunoe. 44 Iblih bapak gata, dan gata keuneuk taseutôt kheun bapak gata. Yoh awaikon Iblih nyan tukang peumaté gob. Iblih nyan hántom na jidong ubak nyang beuna, sabab hana keubeunaran bak Iblih nyan. Meunyoe Jihnyan jimeusulet, nyan hánpeu hireuen, sabab ka lagée nyan sifeuet jih. Iblih tukang seumeungét dan asai banmandum sulet. 45 Teuma Ulôn peugah nyang beutôi bak gata, ngon sabab nyan kheueh gata hana tapatéh keu Ulôn. 46 Soe nyang na lamkawan gata nyang hase gata bri bukeuti bahwa na desya bak Ulôn? Meunyoe Ulôn peugah nyang beuna, pakon gata hana tapatéh keu Ulôn? 47 Ureuëng nyang asai jih nibak Po teu Allah, ureuëng nyan jideungoe peue nyang geupeugah lé Allah. Teuma gata bukon asai nibak Po teu Allah, nyang kheueh sabab jih gata hana tatem deungoe." 48 Ureuëng-ureuëng Yahudi nyan jijaweueb Isa, "Keubiet that beutôi kamoe peugah bahwa gata ureuëng Samaria nyang ka jitamong jén?" 49 Geujaweueb lé Isa, "Ulôn hana jitamong jen. Ulôn horeumat keu Bapak Lôn, teuma gata tahina Ulôn. 50 Ulôn hana Lôn mita horeumat keu droe Lôn keudroe. Na saboh nyang geu-useuha horeumat keu Ulôn, dan Gobnyan kheueh nyang peuhakém. 51 Keubiet beutôi nyang Ulôn peugah nyoe, ureuëng nyang jiturot lagée Ulôn peugah, siumu masa ureuëng nyan hana maté." 52 Dan ureuëng-ureuëng Yahudi nyan laju jipeugah bak Isa, "Jinoenyoe ka biet-biet kamoe teupeu bahwa Droeneueh beutôi-beutôi ka jitamong jen! Nabi Ibrahim keudroe ka maté, meunan cit ngon mandum Nabi. Teuma gata tapeugah, 'Ureuëng nyang jiseutôt peue nyang Ulôn peugah, siumu masa hana maté.' 53 Meunyoe Nabi Ibrahim keudroe ka maté, meunan cit banmandum Nabi-nabi nyang laén ka maté, droeneueh nyoe soe? Hana jitamong lam akai kamoe Droeneueh leubeh rayeuk nibak bapak kamoe Nabi Ibrahim!" 54 Geujaweueb lé Isa, "Seukira jih Ulôn mita horeumat keu droe Lôn mantong, horeumat nyan hana meuguna. Nyang horeumat Ulôn na kheueh Bapak Ulôn nyang gata anggab Allah gata, 55 padahai gata hana taturi keu Gobnyan. Teuma Ulôn kuturi Gobnyan. Seukira jih Ulôn peugah bahwa Ulôn hana Lôn turi keu Gobnyan, teuma Ulôn sidroe ureuëng sulet, saban lagée gata. Ulôn kuturi keu Gobnyan, taát peue nyang geupeugah. 56 Bapak gata Nabi Ibrahim galak lumpah na bahwa Gobnyan geukalon uroe Ulôn. Gobnyan ka geukalon dan Gobnyan galak!" 57 Dan ureuëng-ureuëng Yahudi laju jipeugah bak Isa, "Umu Droeneueh gohlom na limong ploh thon, dan droeneueh ka kalon Nabi Ibrahim?" 58 Geujaweueb lé Isa, "Keubiet Ulôn peugah bak gata: sigohlom Nabi Ibrahim lahé, Ulôn ka na." 59 Laju ureuëng-ureuëng Yahudi nyan jicok batée jikeuneuk geulawa Gobnyan; teuma Isa laju geupeusöm droe, dan geujak laju geutinggai Baét Allah.

Yahya 9

1 Watée Isa teungoh geujak, laju geukalon ureuëng buta yoh phon lahé. 2 Murit-murit Isa jitanyong bak Gobnyan, "Bapak Gurée, pakon ureuëng nyoe lahé buta? Peu kheueh sabab jih keudroe meudesya atawa ma ngon yah jih nyang meudesya?" 3 Geujaweueb lé Isa, "Jihnyoe buta bukon sabab desya jih keudroe meunan cit bukon sabab desya ma ngon yah jih, teuma sibagoe tanda mangat manusia jeuet jikalon kuasa Po teu Allah meukeureuja lam tuboh ureuëng nyan. 4 Simantong uroe, tanyoe harôh tamubuet buet nyang ka geubri lé Gobnyan nyang utus Ulôn. Meunyoe malam ka teuka, hana meusidroe pi nyang hase jimubuet. 5 Simantong Ulôn na ateueh rhung donya nyoe, Ulôn kheueh trang donya." 6 Óh ka lheueh geupeugah meunan Isa laju geumuludah ateueh tanoh, dan laju geucawoe ié babah Gobnyan ngon tanoh. Óh lheuehnyan laju geusiliek bak mata ureuëng buta nyan, óh lheuehnyan laju geupeugah bak ureuëng nyan, 7 "Gata jak laju rhah muka gata lam kulam Siloam." (Siloam muphom jih 'Jiutus'.) Dan ureuëng nyan laju jijak rhah muka jih bak kulam nyan. Watée jigisa, ureuëng nyan ka hase jimeungieng. 8 Kawöm silingka ureuëng nyan dan ureuëng-ureuëng nyang yoh ilée kon jikalon ureuëng nyan jigeumadée, banmandum jipeugah, "Ureuëng nyoe nyang lazem jih jiduek sira jigeumadée bukon?" 9 Na teuma nyang peugah, "Beutôi jihnyan." Teuma na cit nyang peugah, "Kon, jihnyoe saban lagée ureuëng nyan." Teuma ureuëng nyan keudroe jipeugah, "Ulôn kheueh ureuëng nyang gata peugah nyan." 10 "Pakriban jeuet jih sampoe gata hase tameungieng?" kheun awaknyan bak ureuëng nyan. 11 Laju jijaweueb, "Ureuëng nyang nan geu Isa nyan geupeugét bacut luhob, óh lheueh nyan laju geusiliek bak mata ulôn sira geupeugah, 'Jak rhah laju muka gata lam Kulam Siloam.' Laju ulôn jak bak kulam nyang geupeugah nyan. Dan watée ulôn peugleh muka ulôn nyoe, laju deuh ulôn keumalon." 12 "Dipat ureuëng nyan?" jitanyong lé awaknyan. Laju jijaweueb, "Hôm, hana lôn tuho." 13 Uroe nyan na kheueh uroe Sabat watée Isa geuwot tanoh ngon ié babah Gobnyan keu geupeu puléh ureuëng buta nyan sampoe jeuet jimeungieng. Dan ureuëng nyan yoh bunoe buta nyan laju jiba ubak ureuëng-ureuëng Farisi. 15 Awaknyan pih jiteumanyong bak ureuëng nyan pakriban jihnyan hase jimeungieng. Ureuëng nyan jijaweueb, "Ureuëng nyan jisiliek luhob bak mata lôn, laju ulôn peugleh akhé jih hase lôn meungieng." 16 Lamkawan ureuëng-ureuëng Farisi nyan na nyang jaweueb, "Hana mungken ureuëng nyang peubuetnyoe asai jih nibak Po teu Allah, sabab jihnyan hana jipako keu uroe Sabat." Teuma lé ureuëng laén na nyang peugah lagée nyoe, "Mustahe ureuëng meudesya hase jipeubuet buet-buet nyang ajaéb lagée nyoe bagoe?" Dan jiteuka kheueh mubagoe peundapat lam kawan awaknyan keudroe. 17 Dan lé ureuëng-ureuëng Farisi nyan jitanyong lom bak ureuëng nyan, "Peue peundapat gata keuhai ureuëng nyang ka jipeupuléh gata sampoe gata hase tameungieng?" "Ureuëng nyan Nabi," kheun ureuëng nyan. 18 Teuma lé mandum peumimpén Yahudi dan hana jipatéh bahwa ureuëng nyan keubiet buta yoh awaikon dan bak saát nyoe ka jeuet jikeumalon. Ngon sabab nyan awaknyan laju jitawök ureuëng tuha ureuëng buta nyan, 19 laju jitanyong, "Peu kheueh beutôi nyoe aneuëk gata nyang jipeugah yoh lahé cit ka buta? Dan pakriban jihnyoe hase jikeumalon saát nyoe?" 20 Ma ngon yah aneuëk nyan jijaweueb, "Beutôi jihnyoe aneuëk kamoe, dan beutôi that yoh phon lahé jihnyoe cit ka buta. 21 Teuma pakriban cara dan peue sabab jihnyoe ka hase jikeumalon bak saát nyoe, nyan hana kamoe teupeue. Dan soe teuma ureuëng nyang peupuléh mata jih nyan, nyang pih hana kamoe teupeue. Tanyong mantong bak jih keudroe, jih ka rayeuk, dan jihnyan hase jijaweueb keudroe." 22 Mak ngon ayah ureuëng nyan jipeugah meunan sabab jitakot keu peumimpén-peumimpén Yahudi; lom teuma awaknyan ka sipakat, bahwa ureuëng nyang meungaku droe Isa sibagoe Raja Peuseulamat, hán jeuet le jitamong lam Rumoh Iébadat. 23 Nyang kheueh sabab jih ma ngon yah ureuëng nyan jipeugah, "Jihnyan ka rayeuk; tanyong mantong bak droe jih." 24 Laju awaknyan jitawök lom ureuëng nyang yoh awai buta nyan, dan jipeugah bak ureuëng nyan, "Meusumpah kheueh bahwa gata tapeugah nyang beutôi. Kamoe muteupeu bahwa ureuëng nyan na kheueh ureuëng meudesya." 25 "Peu kheueh Gobnyan meudesya atawa hana," jaweueb ureuëng nyan, "nyan hana lôn teupeu, teuma saboh hai nyang ulôn teupeu; yoh ilée ulôn nyoe buta, jinoenyoe ka deuh ulôn keumalon." 26 Dan awaknyan jipeugah lom bak ureuëng nyan, "Peue nyang jipeubuet ateueh gata? Pakriban cara jih jipeubuet ateueh gata sampoe gata deuh tameungieng?" 27 Jijaweueb lé ureuëng nyan, "Ka lheueh ulôn peugah bak droeneueh, teuma droeneueh hana tatem deungoe. Pakon droeneuehnyoe keuneuk deungoe lom? Mungken droeneueh keuneuk jeuet keu murit-murit Gobnyan cit?" 28 Laju awaknyan jiteunak ureuëng nyan sira jipeugah, "Kah kheueh murit ureuëng nyan; kamoe bukon, kamoe murit Nabi Musa. 29 Kamoe meuteupeue bahwa Po teu Allah ka geumeututoe bak Nabi Musa, teuma keuhai ureuëng nyan, hana kamoe teupeu pane asai jih." 30 Ureuëng nyan jijaweueb, "Bit gura that meunyoe droeneueh nyoe hana tatupat dipat asai Gobnyan, seudangkan Gobnyan ka geupeujeuet mata ulôn nyoe hase lôn keumalon. 31 Tatateupeu bahwa Po teu Allah hana geudeungoe ureuëng meudesya, seulaén ureuëng nyang jihoreumat keu Allah, dan jipeubuet surohan Gobnyan. 32 Yoh phon jeuet donya nyoe gohlom na tadeungoe na ureuëng nyang hase jipeubleuet mata jih nyang ka buta yoh phon lahé. 33 Meunyoe ureuëng nyan bukon nibak Po teu Allah, gobnyan hana hase geupeubuet sapeue." 34 Jaweueb awaknyan, "Peue gata peugah? Gata peunoh desya yoh phon lahé, gata keuneuk purunoe kamoe?" Dan phon saát nyan ureuëng nyan hana jibri le jitamong lam Rumoh Iébadat. 35 Isa geudeungoe bahwa ureuëng nyang ka geupeu puléh mata jih nyan hana jibri tamong le lam Rumoh Iébadat. Gobnyan geumita ureuëng nyan dan laju geupeugah bak ureuëng nyan, "Peu kheueh gata tapeucaya keu Aneuëk Manusia?" 36 Ureuëng nyan jijaweueb, "Soe jih nyan, Teungku? Tulông Droeneueh peugah mangat ulôn peucaya bak Gobnyan." 37 "Gata ka gata ngieng Gobnyan," jaweueb Isa, "Gobnyan kheueh nyang bak saát nyoe teungoh meututoe ngon gata." 38 "Ulôn patéh, Tuhan," kheun ureuëng nyan, laju jisujut dikeue Isa. 39 Isa geupeugah, "Ulôn teuka lam donya nyoe keu Lôn jak peuhakém; mangat ureuëng nyang buta hase jimeungieng, dan ureuëng nyang jeuet jimeungieng, jeuet keu buta." 40 Na padub droe ureuëng Farisi nyang na disinan jideungoe peue nyang geupeugah lé Isa nyan, dan laju awaknyan jitanyong, "Meukeusut Droeneueh, kamoe nyoe buta cit?" 41 Geujaweueb lé Isa, "Miseue jih gata buta, gata hana meudesya. Teuma sabab gata tapeugah, 'Kamoe deuh meungieng,' nyan saban cit makna jih gata mantong meudesya."

Yahya 10

1 "Keubiet beutôi nyang Ulôn peugah nyoe: Ureuëng nyang tamong lam weue bubiri ngon cara jilumpat pageue, dan hana rot babah pintoe, atawa jiék rot laén, ureuëng nyang lagée nyan pancuri dan peurampok. 2 Teuma ureuëng nyang jitamong rot babah pintoe, nyang kheueh tukang rabe bubiri. 3 Nyang jaga weue jibuka pintoe keu tukang meurabe nyan, dan bubena bubiri jiseutôt su ureuëng nyan watée jihôi beulatang nyan ngon nan maséng-maséng dan laju jikawai beulatang nyan peuteubiet uluwa. 4 Óh ka lheueh mandum bubiri nyan jiba uluwa, tukang meurabe nyan jijak dikeue, dan mandum bubiri nyan laju jiseutôt dilikot sabab jituri su nyang kawai jih. 5 Awaknyan hana jeuet jiseutôt ureuëng laén, meunan teuma jiplueng nibak ureuëng nyan, sabab hana jituri su nyang kawai jih." 6 Isa geupeugah keumiseue nyan, teuma awaknyan hana muphom peue meukeusut jih. 7 Teuma Isa geupeugah sigoe teuk, "Keubiet beutôi nyang ulôn peugah nyoe: Ulôn kheueh pintoe keu bubiri. 8 Banmandum nyang teuka sigohlom ulôn na kheueh pancuri dan peurampok, teuma bubena bubiri hana jideungoe su awaknyan. 9 Ulôn kheueh pintoe, soe nyang tamong rot ulôn seulamat; jihnyan jiteubiet tamong dan meuteumé peunajoh. 10 Pancuri teuka teuma jijak ceumeucue, keu jijak peumaté dan keu jipeurusak. Teuma ulôn teuka mangat manusia meuteumé udeb-udeb nyang meulimpah ruah. 11 Ulôn kheueh tukang meurabe nyang gét. Tukang meurabe nyang gét jitem bri nyawöng jih keu bubiri-bubiri jih. 12 Ureuëng tung upah nyang kon tukang meurabe dan kon teuma ureuëng po mandum bubiri nyan, jiplueng jitinggai mandum bubiri meunyoe jihnyan jikalon asée srigala nyang teuka. Dan bubena bubiri nyan laju jiteugom ngon jipeucrebre. 13 Ureuëng nyang tung upah nyan jiplueng, sabab ureuëng nyan jimubuet keu tueng upah. Ureuëng nyan hana jipako keu mandum bubiri nyan. 14 Ulôn kheueh tukang meurabe nyang gét. Saban lagée Bapak geuturi Ulôn dan Ulôn kuturi Bapak, meunan cit teuma Ulôn kuturi mandum bubiri Lôn dan awaknyan pih jituri Ulôn. Ulôn peuna watée keu beulatang nyan. 16 Mantong na bubiri nyang laén atra Ulôn, teuma hana rhoh lamkawan bubiri nyoe. Awaknyan Ulôn ba dan awaknyan pih jideungoe su Ulôn. Awaknyan mandum teuma jeuet keu saboh kawan deungon sidroe tukang meurabe. 17 Bapak geugaséh Ulôn sabab Ulôn peujôk nyawöng Ulôn, keu Lôn teurimong lom teuma. 18 Hana meusidroe pih nyang hase jicok nibak Ulôn. Ulôn bri atranyan ateueh meulakée Ulôn keudroe. Ulôn na kuasa keu Lôn seurah atra nyan, dan na teuma kuasa keu Lôn cok lom. Nyan tugaih nyang Ulôn teurimong bak Bapak Ulôn." 19 Sabab Isa geupeugah meunan, ureuëng-ureuëng Yahudi ka jimeudakwa. 20 Keubiet jai that nyang jipeugah, "Ureuëng nyan ka jitamong jén! Jihnyan ka pungoe! Keupeue guna jih gata deungoe nyang jipeugah nyan?" 21 Teuma na cit nyang peugah, "Ureuëng nyang jitamong jén hana jeuet jimarit lagée nyan! Peu kheueh hase jipeubuet lé jén ureuëng buta jeuet jimeungieng?" 22 Di Yerusalem dumna rakyat ba teungoh jimeu Uroe Raya Teureseumi Rumoh Iébadat. Bak watée nyan musém sijuek. 23 Isa teungoh geujak bak seuramoe Nabi Sulaiman lam Rumoh Iébadat nyan, 24 watée nyan ureuëng-ureuëng Yahudi teuka laju meusapat ban silingka Isa. Awaknyan jipeugah, "Sampoe án pajan Droeneueh peubiyeu kamoe ragu-ragu? Peugah laju troh trang, meunyoe Droeneueh biet-biet Raja Peuseulamat." 25 Geujaweueb lé Isa, "Ka lheueh Lôn peugah bak gata, teuma gata teutab hana tapatéh. Buet-buet nyang Ulôn peubuet ateueh nan Bapak Lôn, ka jeuet keu bukeuti keuhai Ulôn. 26 Gata hana tapatéh sabab gata hana rhoh lamkawan bubiri Lôn. 27 Bubiri-bubiri Ulôn jideungoe su Ulôn. Ulôn kuturi awaknyan, dan awaknyan jiseutôt Ulôn. 28 Ulôn bri keu awaknyan udeb seujati dan keukai, dan siumu masa awaknyan hana binasa. Hana meusidroe pi nyang hase jireupah awaknyan lam jaroe Ulôn. 29 Bapak Ulôn, nyang ka geubri awaknyan keu Ulôn, leubeh nibak peue mantong. Dan hana meusidroe pi nyang hase jireupah awaknyan lam jaroe Bapak. 30 Ulôn ngon Bapak na kheueh sa." 31 Ban jideungoe haba nyan laju lé ureuëng-ureuëng Yahudi jicok lom batée jikeuneuk geulawa Isa. 32 Teuma Isa geupeugah bak awaknyan, "Gatanyoe ka tangieng Ulôn nyang ka lheueh Ulôn peubuet buet nyang jroh, nyang geubri tugaih lé Bapak ubak Ulôn. Nibak mandum buet nyan, nyang toh kheueh nyang jeuet keusabab gatanyoe keuneuk rhom ulôn?" 33 Ureuëng Yahudi nyan jijaweueb, "Kon sabab buet-buet Droeneueh nyang gét nyan kamoe keuneuk geulawa Droeneueh ngon batée, teuma sabab Droeneueh neuhujat Allah. Droeneueh sidroe manusia, keuneuk neupeujeuet Droeneueh Allah." 34 Geujaweueb lé Isa, "Bukon na teutuléh lam Kitab Huköm gata: Allah meufeureuman, 'Gata na kheueh ilah'? 35 Geutanyoe ta teupeu bahwa peue nyang teutuléh lam Alkitab teutab teupeuguna siumu masa. Jadi, meunyoe Allah geubri seubutan 'ilah' keu ureuëng nyang teurimong peue nyang geupeugah, 36 pakon gata peugah Ulôn hujat Allah sabab Lôn peugah Ulôn Aneuëk Allah? Padahai Ulôn geupiléh lé Bapak dan geu-utus lam donya nyoe. 37 Meunyoe Ulôn hana lôn peubuet buet nyang geubri lé Bapak, bék neupatéh keu Ulôn. 38 Teuma sabab Ulôn peubuet hainyan, patéh kheueh peue nyang Ulôn peubuet, bah kheueh gata hana tatem patéh ubak Ulôn. Deungon lagée nyan gata tateupeue dan muphom Bapak teutab meusaboh ngon Ulôn, dan Ulôn teutab meusaboh ngon Bapak." 39 Awaknyan jiuseuha lom keuneuk drob Isa, teuma Gobnyan hase teupeusi nibak awaknyan. 40 Isa geugisa lom u meurandeh Krueng Yordan, bak teumpat Nabi Yahya ilée geuseumanö, laju geutinggai disinan. 41 Jai that-that ureuëng nyang jijak bak Gobnyan. Awaknyan jipeugah, "Nabi Yahya hana geupeubuet buet-buet nyang ajaéb, teuma banmandum nyang geupeugah keuhai ureuëng nyoe beutôi." 42 Dan Ramé that ureuëng nyang na disinan meuiman ubak Isa.

Yahya 11

1 Na sidroe ureuëng nyang nan jih Lazarus tinggai di Betania meusapat ngon syedara jih nyang nan Maryam dan Marta. 2 Maryam na kheueh ureuëng inong nyang rô minyéuk mangat bée bak gaki Tuhan, dan jisampôh ngon ôk droe jih. Saboh watée Lazarus rhot bak sakét. 3 Bandua syedara Gobnyan jipeugah bak Isa, "Tuhan, syedara kamoe nyang Tuhan gaséh nyan sakét." 4 Watée geudeungoe lé Isa haba nyan, laju geupeugah, "Peunyakét gobnyan hana jiba maté. Nyoe teujadi mangat Allah jipeumulia, dan lom teuma sabab Aneuëk Allah jipeumulia cit." 5 Isa geugaséh keu Marta, Maryam dan Lazarus. 6 Teuma watée Isa geuteumé haba Lazarus sakét, Gobnyan geusaja tinggai bak teumpat nyan dua uroe teuk. 7 Óh lheueh nyan barô kheueh geupeugah bak murit-murit Geuh, "Jak tagisa u Yudea." 8 Awaknyan laju jijaweueb, "Bapak Gurée, banmantong ureuëng-ureuëng Yahudi jikeuneuk rhom Bapak ngon batée dan jinoenyoe Bapak keuneuk gisa lom keudeh?" 9 "Bukon kheueh meunyoe uroe treb jih dua blaih jeuem?" kheun Isa. "Ureuëng nyang jak watée uroe, hana meugantôh sabab deuh jikalon trang donya nyoe. 10 Teuma ureuëng nyang jak óh watée malam meugantôh, sabab hana trang bak ureuëng nyan." 11 Meunan kheueh geupeugah lé Isa. Óh lheuehnyan gobnyan geupeugah lom, "Sahabat geutanyoe Lazarus ka jiéh, teuma Ulôn keuneuk Lôn jak peugo jihnyan." 12 Murit-murit Isa laju jipeugah, "Tuhan, meunyoe Lazarus jiéh, eunteuk jihnyan teuma puléh." 13 Meukeusut Isa na kheueh bahwa Lazarus nyan ka maté. Teuma awaknyan jipike meukeusut Isa nyan Lazarus jiéh biasa. 14 Ngon sababnyan Isa geupeugah bak awaknyan troh trang, "Lazarus ka maté. 15 Teuma Ulôn galak cit sabab Ulôn hana sideh, sabab leubeh-leubeh keu gata, mangat gata jeuet tapatéh. Jak kheueh tajak bak saát nyoe ubak Lazarus." 16 Tomas nyang teuhôi "Sikeumbeue" jipeugah bak rakan-rakan jih murit-murit Isa, "Jak geutanyoe taseutôt, bah kheueh tanyoe maté meusajan ngon Geuhnyan!" 17 Watée Isa ka trok bak teumpat nyan, Lazarus ka peuet uroe treb jih lam kubu. 18 Betania tô ngon Yerusalem, kira-kira lhée kilo metée jiôh jih. 19 Ramé that ureuëng Yahudi jiteuka jijak saweue Marta dan Maryam keu jijak peumangat até awaknyan sabab Lazarus syedara jihnyan ka meuninggai. 20 Watée Marta jideungoe Isa ka trok, gobnyan laju geuteubiet keu geujak sambot Isa. Seudangkan Maryam teutab tinggai di rumoh. 21 Geupeugah lé Marta bak Isa, "Tuhan, meunyoe Tuhan na disinoe bak watée nyan, pasti syedara ulôn nyoe hana meuninggai. 22 Teuma meunan ulôn teupeu bahwa bak saátnyoe cit teuma Po teu Allah teuma geubri peue mantong nyang Tuhan lakée bak gobnyan." 23 "Syedara gata nyan udeb lom," kheun Isa ubak Marta. 24 Geujaweueb lé Marta, "Ulôn kuteupeue Lazarus teuma udeb lom watée ureuëng maté teupeubeudôh lom óh Uroe Kiamat." 25 "Ulôn kheueh nyang bri udeb dan nyang peubeudôh ureuëng maté," kheun Isa bak Marta. "Ureuëng nyang meuiman keu Ulôn teuma udeb, bah kheueh jihnyan ka maté. 26 Dan ureuëng udeb nyang meuiman bak Ulôn, siumu masa hana maté. Peue gata tapatéh lam hainyan?" 27 "Tuhan" jaweueb Marta, "Ulôn meuiman Tuhan Aneuëk Allah, Raja Peuseulamat nyang teuma teuka lam donya nyoe." 28 Óh ka lheueh geupeugah lé Marta lagée nyan, laju geujak tawök Maryam, syedara gobnyan laju geusáh bak Maryam nyan, "Bapak Gurée na disinoe; Gobnyan geutanyong gata." 29 Ban jideungoe haba nyan, Maryam bagaih-bagaih jibeudôh, laju jijak meurumpok ngon Isa. 30 Watée nyan, Isa gohlom geutamong lam gampông. Gobnyan mantong na bak teumpat Marta meurumpok ngon gobnyan. 31 Ureuëng-ureuëng Yahudi nyang teungoh jipeumangat até Maryam di rumoh, ban jikalon Maryam jibeudôh dan bagaih that jiteubiet uluwa; awaknyan pi laju jiseutôt Maryam, sabab awaknyan jipike Maryam jijak bak jrat keu jijak mo ba-e. 32 Watée Maryam trok bak teumpat Isa dan jikalon Gobnyan, laju jimeuteuôt Maryam dikeue Gobnyan sira jipeugah, "Tuhan, meunyoe Tuhan na disinoe bak watée nyan, pasti syedara ulôn nyan hana meuninggai." 33 Watée Isa geukalon Maryam jimoe, dan ureuëng-ureuëng nyang jijak meusajan ngon Maryam nyan pi jimoe, até ji seudeh, dan jihnyan leumah inseuh lumpah na. 34 Dan geutanyong kheueh lé gobnyan bak awaknyan, "Dipat gata kubu Lazarus nyan?" "Jak takalon, Tuhan," jaweueb awaknyan. 35 Laju Isa geumo. 36 Teuma ureuëng-ureuëng Yahudi nyan laju jipeugah, "Ngieng kheueh, hana wayang gaséh Gobnyan keu Lazarus!" 37 Teuma na cit lamkawan awaknyan jipeugah lagée nyoe, "Gobnyan geupeujeuet ureuëng buta deuh jikeumalon, pakon Gobnyan hana hase geutam mangat Lazarus bék maté?" 38 Isa inseuh lumpah na, laju geujak bak kubunyan. Kubu nyan na kheueh saboh guha nyang teutôb ngon batée raya. 39 "Kireueh keudeh batée nyan," kheun Isa. Marta, syedara ureuëng nyang maté nyan jijaweueb, "Teuma, Tuhan, jihnyoe ka peuet uroe teukubu. Kateuntée ka mubée khiéng!" 40 Isa geupeugah bak Marta, "Kon ka lheueh Ulôn peugah bak gata: meunyoe gata meuiman, gata takalon padubna rayeuk kuasa Allah!" 41 Teuma awaknyan laju jikireueh batée. Óh lheuehnyan Isa geutangáh u langét sira geupeugah, "Teurimong gaséh, Bapak, sabab Droeneueh ka neudeungoe Ulôn. 42 Ulôn kuteupeu Droeneueh sabe neudeungoe Ulôn, teuma Ulôn peugah nyoe, keu ureuëng-ureuëng nyang na disinoe; mangat awaknyan jipatéh bahwa Droeneueh kheueh nyang utus Ulôn." 43 Óh ka lheueh geupeugah meunan, Isa laju geudumpék ngon su nyang teuga, "Lazarus, teubiet!" 44 Dan jiteubiet kheueh laju ureuëng nyang ka maté nyan. Jaroe ngon gaki jih mantong meubalot ngon ija kafan, dan muka jih mantong teutôb ngon ija tôb muka. "Ploh laju ija kafan jihnyan mangat jeuet jijak," kheun Isa bak ureuëng-ureuëng nyang na disinan. 45 Jai that-that nibak ureuëng-ureuëng Yahudi nyang teuka jijak saweue Maryam, jimeuiman ubak Isa watée jikalon keujadian nyan. 46 Teuma na meupadub droe lamkawan awaknyan laju jijak bak ureuëng-ureuëng Farisi dan laju jipeugah peue nyang ka geupeubuet lé Isa. 47 Ngon sabab nyan ureuëng-ureuëng Farisi dan imeum-imeum ulée laju jipeuna rapat dikeue Mahkamah Agama. Awaknyan jipeugah, "Peue nyang harôh tapeubuet? Ureuëng nyoe jai that jipeubuet nyang ajaéb! 48 Meunyoe tapeubiyeu ureuëng nyan jipeubuet laju lagée nyoe meutamah jai ureuëng nyang meuiman bak jih nyan. Dan akhé jih peunguasa Roma teuma jiteuka dan jipeuhanco Baét Allah dan banmandum banda geutanyoe!" 49 Sidroe lamkawan awaknyan nyang nan jih Kayafas, imeum agong bak thon nyan, ureuëng nyan jipeugah lagée nyoe, "Gatanyoe hana tateupeue sapeue. 50 Peu kheueh gata hana tasada bahwa deumi rakyat, leubeh gét sidroe ureuëng maté nibak bansaboh bansa hanco?" 51 Sibeuna jih Kayafas jipeugah nyan, bukon lam pikeran jih keudroe. Teuma sibagoe imeum agong thon nyan jihnyan laju jipeujeuet Isa teuma maté keu bansa Yahudi. 52 Dan bukon keu bansa Yahudi mantong, teuma keu teupeusapat dan teupeusaboh aneuëk-aneuëk Allah nyang meucrebre. 53 Phon nibak uroenyan lé peunguasa Yahudi laju jimeupakat keu jipoh maté Isa. 54 Ngon sabab nyan Isa hana le geupeuleumah droe dikeue ureuëng ramé lamkawan ureuëng Yahudi. Gobnyan laju geutinggai Yudea, laju geujak u banda nyang nan jih Efraim bak binéh padang pasi. Disinan Gobnyan tinggai meusajan ngon murit-murit Geuh. 55 Bak watée nyan ka tô that ngon Uroe Raya Paskah Yahudi. Jai that-that ureuëng nyang tinggai di gampông-gampông jijak u Yerusalem keu jijak peuna upacara teupeugleh droe sigohlom peurayaan nyan. 56 Awaknyan jimita Isa, dan watée ka meusapat di Baét Allah, awaknyan laju jimarit sabe keudroe-droe, "Pakriban meunyoe bak gata? Peu kheueh mungken Gobnyan hana geuteuka uroe raya nyoe." 57 Awaknyan jipeugah meunan sabab imeum-imeum ulée dan ureuëng-ureuëng Farisi jipeuteubiet peurintah bahwa ureuëng nyang jiteupeue dipat Isa nyan na, harôh jilapor mangat Gobnyan hase teudrob.

Yahya 12

1 Nam uroe sigohlom trok bak Uroe Raya Paskah, Isa geujak u Betania. Bak teumpatnyan tinggai Lazarus nyang ka geupeubeudôh lé Gobnyan nibak maté. 2 Disinan Isa jipeujamé lé awaknyan, dan Marta nyang peutimang. Lazarus meunan cit ngon jamé-jamé nyang laén jiduek dan makheun meusajan-sajan deungon Isa. 3 Óh lheuehnyan teuka Maryam sira jiba na kira-kira siteungoh litée minyéuk mangat bée narwastu nyang meuhái lumpah na. Lé Maryam laju jiroe minyéuknyan bak gaki Isa, óh lheueh nyan laju jisampôh ngon ôk jih. Bansaboh rumoh nyan ka peunoh ngon bée minyéuk nyang harôm nyan. 4 Teuma lé Yudas Iskariot, sidroe lamkawan murit Isa -- nyang óh dudoe jikhianat Isa -- jipeugah, 5 "Pakon minyéuk mangat bée nyan hana teupeubloe mantong ngon lhée reutôh péng pirak, dan péng nyan teubri keu ureuëng gasien?" 6 Yudas jipeugah meunan kon sabab jih jipako keu ureuëng gasien, sabab jihnyan pancuri. Jihnyan kayém that jicok péng lam kaih nyang teukeubah bak jih. 7 Teuma lé Isa geupeugah, "Peubiyeu mantong peue nyang jipeubuet lé ureuëng inong nyan! Peue nyang jipeubuet nyoe na kheueh keu uroe Ulôn teukubu. 8 Ureuëng gasien sabe na lamkawan gata, teuma Ulôn hana." 9 Ramé that ureuëng Yahudi jideungoe bahwa Isa na di Betania, jadi, awaknyan laju jijak keudeh. Awaknyan jijak bukon sabab Isa mantong, teuma sira jijak ngieng Lazarus nyang ka geupeubeudôh nibak maté lé Gobnyan. 10 Nyang kheueh sabab jih Imeum-imeum ulée keuneuk jipoh cit Lazarus; 11 sabab jihnyan jeuet keusabab jai that-that ureuëng Yahudi jitinggai awaknyan dan meuiman ubak Isa. 12 Óh singoh beungoh ureuëng ramé nyang ka teuka keu jipeuraya Paskah jideungoe bahwa Isa teungoh geujak dan geutuju u Yerusalem. 13 Teuma lé awaknyan laju jicok ôn-ôn palem laju jijak sambot Gobnyan, sira jisumurak meuhubo, "Pujoe kheueh Allah! Teubri beureukat Gobnyan nyang teuka ateueh nan Tuhan. Teubri beureukat kheueh Raja Israel!" 14 Isa meuteumé saboh keuleudée muda, dan laju geuék ateueh keuleudée nyan. Ngon lagée nyan jeuet kheueh peue nyang ka teutuléh lam Alkitab: 15 "Bék teumakot, putroe Sion! Ngieng Raja gata teuka, geuék ateueh saboh keuleudée muda!" 16 Bak watée nyan murit-murit Isa gohlom muphom banmandum nyan. Teuma óh ka lheueh Isa teupeuagong deungon Gobnyan maté, barô kheueh awaknyan teuingat bahwa nyang jipeubuet lé gob ateueh Gobnyan ka na teutuléh lam Alkitab keuhai Gobnyan. 17 Ureuëng-ureuëng nyang teuka watée Isa geutawök Lazarus jiteubiet lam kubu dan jibeudôh nibak maté, laju jibri keusaksian keuhai nyan. 18 Nyang kheueh sabab jih ureuëng ramé nyan jijak bak Isa sabab awaknyan jideungoe Gobnyan kheueh nyang ka geupeujeuet buet ajaéb nyan. 19 Teuma ureuëng-ureuëng Farisi laju jimarit sabe keudroe-droe, "Geutanyoe hana jeuet tapeubuet sapeue! Ngieng kheueh, mansaboh donya jijak seutôt Gobnyan!" 20 Lamkawan ureuëng-ureuëng nyang teungoh jak u Yerusalem keu jijak meuiébadat watée peurayaan nyan na teuma mupadub droe ureuëng Yunani. 21 Awaknyan jijak ubak Filipus laju jipeugah, "Syedara, meunyoe jeuet, kamoe keuneuk meurumpok ngon Isa." (Filipus asai jih di Betsaida di Galilea.) 22 Teuma lé Filipus laju jijak peugah hainyan bak Andreas, dan óh lheueh nyan awaknyan bandua jijak peugah bak Isa. 23 Isa geupeugah bak awaknyan, "Ka watée jih Aneuëk Manusia teuagongkan. 24 Keubiet beutôi nyang Ulôn peugah nyoe: meunyoe sianeuëk gandom hana teupula lam tanoh dan maté, aneuëk gandom nyan teutab tinggai sianeuëk. Teuma meunyoe aneuëk gandom nyan maté, barô kheueh jipeuhase gandom nyang le. 25 Ureuëng nyang cinta udeb jih teuma gadôh udeb jih. Teuma ureuëng nyang banci keu udeb jih lam donya nyoe, teuma teupeulara jihnyan keu udeb seujati ngon keukai. 26 Ureuëng keuneuk peutimang Ulôn bah jiseutôt Ulôn; mangat peulayan Ulôn hase meusapat ngon Ulôn dipat mantong Ulôn na. Ureuëng nyang peutimang Ulôn teuma geuhoreumat lé Bapak Lôn." 27 "Até Ulôn seudeh that; peue nyang jeuet Lôn peugah bak saát nyoe? Peu kheueh jeuet Lôn peugah, 'Bapak, peuseuliseh kheueh Ulôn bak saátnyoe'? Teuma ngon lagée nyoe keu Lôn rasa watée meudeurita nyoe kheueh Ulôn teuka. 28 Bapak, teupeumulia kheueh nan Droeneueh!" Teuma laju teudeungoe su di langét nyang geupeugah meunoe, "Ulôn ka Lôn peumulia Gobnyan, dan Ulôn Lôn peumulia lom Gobnyan." 29 Ureuëng ramé nyang na disinan jideungoe banmandum su nyan. Awaknyan jipeugah, "Nyan su geulanteue!" Teuma na nyang peugah, "Bukon, nyan Malaikat nyang meututoe ngon Gobnyan!" 30 Laju Isa geupeugah bak awaknyan, "Su nyan teudeungoe, bukon peureulée keu Lôn, teuma na kheueh peureulée keu gata. 31 Jinoenyoe ka watée jih donya teupeuhakém; bak saát nyoe nyang mat kuasa ateueh donya nyoe teupeutron. 32 Teuma Ulôn nyoe, meunyoe Ulôn ka teupeumanyang di ateueh bumoe, Ulôn teuma Lôn tarek mandum ureuëng ubak Ulôn." 33 Gobnyan geupeugah meunan keu geutunyok pakriban cara jih Gobnyan maté. 34 Ureuëng ramé nyan jipeugah bak Gobnyan, "Meunurot Kitab Huköm kamoe, Raja Peuseulamat teuma udeb siumu masa. Pakriban droeneueh jeuet neupeugah Aneuëk Manusia bah teupeumanyang di ateueh bumoe? Soe Aneuëk Manusia nyan?" 35 Geujaweueb lé Isa, "Teuma keu sikeujab mantong trang nyan na lamkawan gata. Ngon lagée nyan, gata jak kheueh simantong trang nyan na, mangat gata bék keunong lam seupôt. Ureuëng nyang jijak lam seupôt hana jituho hojijak. 36 Peucaya kheueh keu trang nyan, simantong trang nyan mantong na bak gata, mangat gata jeuet keu aneuëk-aneuëk trang." Óh ka lheueh Isa geupeugah meunan, Gobnyan laju geujak nibak teumpatnyan dan hana geutem tunyok droe bak awaknyan. 37 Bah kheueh ka jai that geupeuleumah buet nyang ajaéb lé Isa dikeue awaknyan, awaknyan teutab hana jipatéh keu gobnyan. 38 Ngon lagée nyan jeuet kheueh peue nyang geupeugah lé Nabi Yesaya, "Tuhan, soe kheueh nyang patéh bak haba kamoe? Ubak soe kheueh kuasa Tuhan teupeuleumah?" 39 Nyang kheueh sabab jih awaknyan hana jitem patéh, sabab Isa ka geupeugah, "Po teu Allah meufeureuman, 40 'Ulôn peubuta mata awaknyan, Lôn peujeuet awaknyan kreueh até; mangat mata awaknyan bék deuh jikalon, pikeran awaknyan bék jimuphom. Mangat awaknyan bék jiriwang bak Ulôn, laju Ulôn peupuléh awaknyan.' " 41 Nabi Yesaya geupeugah meunan sabab gobnyan ka geukalon keubeusaran Isa, dan meututoe keuhai Gobnyan. 42 Bah kheueh meunan, jai that ureuëng, meunan cit na peunguasa Yahudi jimeuiman ubak Isa. Teuma awaknyan hana jijeuet peugah hainyan ngon cara troh trang, sabab awaknyan teumakot keu ureuëng-ureuëng Farisi meunyoe jiteupeu hainyan hana jibri tamong lam rumoh iébadat. 43 Awaknyan leubeh galak jipujoe lé manusia nibak geuhareuga lé Po teu Allah. 44 Laju Isa geutawök, "Hei ureuëng nyang meuiman ubak Ulôn, kon keu Ulôn jimeuiman, teuma ubak Gobnyan nyang utus Ulôn. 45 Dan ureuëng nyang kalon Ulôn, jikalon Gobnyan nyang utus Ulôn. 46 Ulôn teuka ateueh rhung donya sibagoe trang, mangat mandum ureuëng nyang meuiman bak Ulôn bék tinggai lam seupôt. 47 Ureuëng nyang jideungoe peue nyang Ulôn peurunoe, teuma hana jiseutôt lagée nyang Ulôn peurunoe nyan -- kon Ulôn nyang huköm jihnyan. Sabab Ulôn teuka bukon keu Lôn peuhakém donya nyoe, teuma keu Lôn peuseulamat. 48 Ureuëng nyang tulak Ulôn dan hana jideungoe nyang Ulôn peugah, ka na nyang peusidang ureuëng nyan. Haba nyang Ulôn peusampoe, nyan kheueh nyang peuhakém ureuëng nyan bak Uroe Kiamat. 49 Sabab Ulôn hana Lôn meututoe ateueh keuheundak Ulôn keudroe; Bapak nyang utus Ulôn, Gobnyan kheueh nyang peurintah bak Ulôn peue nyang harôh Lôn peugah dan Ulôn peusampoe. 50 Dan Ulôn teupeue peurintah Geuh nyan teubri udeb seujati dan keukai. Teuma Ulôn peusampoe lagée nyang geupeurunoe lé Bapak ubak Ulôn."

Yahya 13

1 Siuroe sigohlom Uroe Raya Paskah, Isa geuteupeue bahwa ka watée jih Gobnyan geutinggai donya nyoe keu geugisa ubak Bapak Geuh. Gobnyan geugaséh keu ureuëng nyang jeuet keu milék Gobnyan ateueh rhueng donya, dan Gobnyan teutab geugaséh keu awaknyan sampoe án pagée. 2 Isa dan murit-murit Gobnyan teungoh makheun malam. Iblih ka jipeutamong niet lam até Yudas aneuëk Simon Iskariot keu jikhianat Isa. 3 Isa geuteupeue bahwa Bapak ka geuseurah mandum keukuasaan bak Gobnyan. Gobnyan pih geuteupeue bahwa Gobnyan teuka nibak Allah dan teuma geugisa bak Po teu Allah. 4 Sabab nyan Gobnyan laju geudong, geusuet bajée jubah Geuh, dan geuikat andok bak keuieng Geuh. 5 Óh lheuehnyan Gobnyan laju geuprée ié lam saboh baskom, laju geurhah gaki murit-murit Gobnyan dan laju geupeutô ngon ija andok nyang teuikat bak keuieng Geuh. 6 Trok kheueh gobnyan bak Simon Petrus, laju jipeugah lé Simon Petrus nyan lagée nyoe, "Tuhan, ék kheueh beutôi Tuhan nyang rhah gaki ulôn?" 7 Geujaweueb lé Isa, "Jinoenyoe gata hana muphom peue nyang Ulôn peubuet nyoe, teuma singoh gata teuma tateupeue." 8 "Bék, Tuhan," kheun Petrus bak Isa, "Bék sagai-sagai Tuhan neu rhah gaki Ulôn!" Teuma Isa geujaweueb, "Meunyoe Ulôn hana Lôn rhah gata, gata hana hubongan ngon Ulôn." 9 Jipeugah lé Simon Petrus, "Meunyoe meunan, Tuhan, bék gaki lôn mantong, meunan cit ngon jaroe dan ulée ulôn!" 10 "Ureuëng nyang ka lheueh jimanoe, ka gleh bansaboh tuboh," geupeugah lé Isa bak Petrus. "Ureuëng nyan hana peureulée le teupeugleh seulaén gaki geuh. Gatanyoe ka gleh, teuma hana banmandum." ( 11 Isa ka geuteupeue soe nyang keuneuk khianat Gobnyan. Nyang kheueh sabab jih Gobnyan geupeugah, "Gatanyoe ka gleh, teuma hana banmandum.") 12 Óh ka lheueh Isa geu rhah gaki awaknyan, laju geungui lom bajée jubah Geuh dan geuduek lom teuma. Laju geupeugah bak awaknyan, "Peu kheueh muphom gata peue nyang ban Ulôn peubuet ateueh gata? 13 Gata hôi Ulôn Gurée dan Tuhan. Dan keubiet lagée nyan. 14 Meunyoe Ulôn sibagoe Tuhan dan Gurée gata Ulôn rhah gaki gata, gata pi wajéb teuma saléng gata rhah gaki. 15 Ulôn bie teuladan nyoe ubak gata, mangat gata pi tapeubuet peue nyang ka Ulôn peubuet ateueh gata. 16 Keubiet beutôi nyang Ulôn peugah nyoe: Sidroe namiet hana leubeh rayeuk nibak amphon jih, dan sidroe utosan hana leubeh rayeuk nibak nyang utus jih nyan. 17 Meunyoe gata ka tateupeue banmandum nyoe, mubahgia kheueh gata meunyoe tapeubuet lagée nyan. 18 Peue nyang ulôn peugah nyoe bukon kheueh keu gata mantong. Ulôn kuteupeue soe-soe nyang ka Ulôn piléh. Teuma peue nyang teutuléh lam Alkitab, nyan harôh teujadi, na kheueh, 'Ureuëng nyang jimakheun meusajan ngon Ulôn, teuma jilawan Ulôn.' 19 Hainyan Ulôn peusampoe bak gata jinoenyoe, meunyoe hainyan jeuet singoh, gata teuma tapatéh bahwa Ulôn kheueh nyang teupeugah ULÔN NA. 20 Keubiet beutôi nyang Ulôn peugah nyoe: Soe nyang teurimong ureuëng nyang Ulôn utus, ureuëng nyan ka jiteurimong Ulôn. Dan soe nyang teurimong Ulôn, ka jiteurimong Gobnyan nyang utus Ulôn." 21 Óh ka lheueh geupeugah lagée nyan lé Isa, Gobnyan laju jiteuka weueh. Dan geupeugah, "Keubiet beutôi nyang Ulôn peugah nyoe: sidroe lamkawan gatanyoe jikhianat Ulôn." 22 Murit-murit Gobnyan laju jimeungieng-ngieng sabe keudroe sabab awaknyan hireuen lumpah na soe nyang geumeukeusut lé Isa nyan. 23 Murit nyang geugaséh lé Isa jiduek bakbinéh Isa. 24 Simon Petrus laju jibri isyarat bak Gobnyan, mangat jitem tanyong bak Isa soe nyang geumeukeusut lé Isa nyan. 25 Teuma murit nyan laju jipeurab bak Isa, dan laju jitanyong, "Soe nyang neumeukeusut nyan, Tuhan?" 26 Geujaweueb lé Isa, "Ureuëng nyang Ulôn jok ruti nyang Ulôn ceulob lam cawan; laju geubri bak Yudas aneuëk Simon Iskariot. 27 Bagaih that óh ka lheueh Yudas jiteurimong ruti nyan, Iblih laju jitamong lam até jih, dan laju Isa geupeugah bak ureuëng nyan, "Peu buet teuh dan peue nyang keuneuk gata peubuet." 28 Hana meusidroe pi nibak awaknyan nyang na duek makheun disinan nyang muphom pakon Isa geupeugah meunan bak Yudas. 29 Na nyang pike Isa geuyue bak Yudas sapeue-sapeue nyang teupeureulée keu khanuri nyan, atawa teubri bacut péng keu ureuëng gasien -- sabab Yudas na kheueh nyang mat kaih awaknyan. 30 Óh ka lheueh Yudas jiteurimong ruti nyan, jihnyan laju jiteubiet u luwa. Uroe nyan ka malam. 31 Óh ka leupah Yudas jijak, Isa laju geupeugah, "Jinoenyoe Aneuëk Manusia jipeumulia, dan Allah jipeumulia rot Gobnyan. 32 Meunyoe Po teu Allah teupeumulia rot Gobnyan, Gobnyan pi teuma geupeu mulia lé Allah rot droe Gobnyan keudroe. Dan Allah teuma geupeu mulia deungoe reujang. 33 Aneuëk-aneuëk Ulôn, Ulôn hana treb le tinggai ngon gatanyoe. Gata tamita Ulôn, teuma lagée nyang ka lheueh Ulôn peugah bak dumna peunguasa Yahudi, meunan cit Ulôn peugah bak gata; bak teumpat Ulôn jak, gatanyoe hana hase tateuka. 34 Peurintah barô Ulôn jok keu gata: Gaséh kheueh sidroe ngon nyang laén. Saban lagée Ulôn gaséh keu gata, meunan cit gata bah kheueh saléng tameugaséh. 35 Meunyoe gata saléng na geunaséh, banmandum ureuëng jiteupeue bahwa gata na kheueh murit-murit Ulôn." 36 "Tuhan, Tuhan ho keuneuk jak?" jitanyong lé Simon Petrus bak Isa, geujaweueb lé Isa, "Ho Ulôn jak, gata hana jeuet taseutôt bak saát nyoe. Gata teuma taseutôt Ulôn óh watée dudoe." 37 "Tuhan, pakon ulôn hana jeuet lôn seutôt Tuhan bak saát nyoe?" jitanyong lé Petrus lom. "Ulôn rila maté keu Tuhan!" 38 Geujaweueb lé Isa, "Peu kheueh keubiet gata rila maté keu Ulôn? Beutateupeue kheueh, sigohlom manök jiku-uék eunteuk, gata ka lhée goe, gata peugah bahwa gata hana taturi keu Ulôn!"

Yahya 14

1 "Bék sosah até gata," kheun Isa bak awaknyan. "Meuiman kheueh ubak Allah, dan meuiman kheueh teuma ubak Ulôn. 2 Di rumoh Bapak Ulôn jai that teumpat tinggai, Ulôn jak keudeh keu Lôn jak keubah teumpat keu gata. Ulôn hana Lôn peugah meunan bak gata, meunyoe jih nyan kon lagée nyan. 3 Óh ka leupah Ulôn jak keu Lôn jak keubah teumpat keu gata, teuma Lôn riwang lom dan Lôn jaktueng gata, mangat dipat Ulôn na, disinan teuma gata na. 4 Bak teumpat Ulôn jak gata tatuho rot jih." 5 Laju Tomas jipeugah bak Isa, "Tuhan, kamoe hana meuteupeue ho Tuhan jak, pakriban jeuet kamoe tuho rot jih?" 6 Geujaweueb lé Isa, "Ulôn kheueh rot keu teuturi ubak Allah dan meuteumé udeb. Hana meusidroe pih nyang hase jijak ubak Bapak, meunyoe hana rot Ulôn. 7 Meunyoe gata taturi keu Ulôn, pasti gata teuma taturi keu Bapak Ulôn. Jinoenyoe gata ka taturi keu Gobnyan, dan ka gata kalon Gobnyan." 8 Teuma Filipus laju jipeugah bak Isa, "Tuhan, tunyok kheueh Bapak bak kamoe, mangat kamoe puih até." 9 Geujaweueb lé Isa, "Ka padubnyan treb Ulôn na meusajan gata, gohlom cit gata turi keu Ulôn hai Filipus? Ureuëng nyang ka jikalon Ulôn, ka jikalon Bapak. Pakriban gata tapeugah, 'Tunyok kheueh Bapak bak kamoe'? 10 Filipus, peu kheueh hana gata patéh, bahwa Ulôn meusaboh ngon Bapak, dan Bapak meusaboh ngon Ulôn? Peue nyang Ulôn peugah bak gata, hana Ulôn peugah nibak droe Ulôn keudroe. Bapak nyang teutab na meusaboh ngon Ulôn, Gobnyan kheueh nyang peubuet banmandum nyan. 11 Meuiman kheueh bak Ulôn, bahwa Ulôn meusaboh ngon Bapak dan Bapak meusaboh ngon Ulôn. Atawa sihana-hana jih, tapatéh kheueh sabab peue nyang ka Ulôn peubuet. 12 Keubiet beutôi nyang ulôn peugah nyoe: Ureuëng nyang meuiman ubak Ulôn, teuma jipeubuet peue nyang ka Ulôn peubuet -- lom teuma ureuëng nyan jipeubuet nyang leubeh rayeuk lom -- sabab Ulôn jak ubak Bapak. 13 Dan peue mantong nyang gata lakée ateueh nan Ulôn, nyan teuma Ulôn peubuet keu gata, mangat Bapak jipeumulia rot Aneuëk. 14 Peue mantong nyang gata lakée ateueh nan Ulôn, Ulôn peubuet." 15 "Meunyoe gata tagaséh keu Ulôn, gata teuma tapeujak peurintah Ulôn. 16 Ulôn teuma Lôn lakée bak Bapak, dan Gobnyan geubri keu gata nyang Tulông laén, nyang teuma tinggai meusajan gata keu siumu masa. 17 Geuhnyan na kheueh Roh Allah nyang teuma peugah keuhai Po teu Allah nyan beuna. Donya hana hase jiteurimong Geuhnyan, sabab hana jikalon atawa hana jituri. Teuma gata taturi Geuhnyan, sabab Geuhnyan tinggai meusajan gata dan teuma meusaboh ngon gata. 18 Gata hana teuma Ulôn tinggai sidroe sibagoe aneuëk yatem ngon meuntui. Ulôn teuma kuriwang bak gata. 19 Tinggai sikeujab teuk donya nyoe hana jikalon le Ulôn. Teuma gata tangieng Ulôn. Dan sabab Ulôn udeb, gata pih udeb. 20 Meunyoe katrok uroenyan, gata teuma tateupeue bahwa Ulôn meusaboh ngan Bapak, gata meusaboh ngon Ulôn, dan Ulôn meusaboh ngon gata. 21 Ureuëng teurimong peue-peue nyang Ulôn peurintah dan jipeubuet lagée nyang teupeurintah nyan, jihnyan nyang gaséh Ulôn. Bapak Ulôn teuma geugaséh ureuëng nyang gaséh keu Ulôn. Ulôn pi teuma Lôn gaséh keu ureuëng nyan dan Lôn peugah droe Ulôn bak jihnyan." 22 Yudas, (kon Yudas Iskariot) jitanyong bak Isa, "Tuhan, pakon Tuhan neutem peugah droe ubak kamoe dan bukon bak donya nyoe?" 23 Geujaweueb lé Isa, "Ureuëng nyang jigaséh keu Ulôn, teuma jiseutôt peue nyang Ulôn purunoe. Bapak Ulôn teuma geugaséh keu jihnyan. Bapak ngon Ulôn teuma kamoe jak bak jihnyan dan tinggai meusajan jihnyan. 24 Ureuëng nyang hana jigaséh keu Ulôn, hana jiseutôt ajaran Ulôn. Ajaran nyang gata deungoe nyan, kon nibak Ulôn asai jih, teuma nibak Bapak nyang utus Ulôn. 25 Banmandum nyan Ulôn peugah bak gata simantong Ulôn na meusajan gata. 26 Teuma Roh Allah, nyang tulông nyang teuma geu-utus lé Bapak ateueh nan Ulôn, Gobnyan kheueh nyang teuma peurunoe gata banmandum dan geupeuingat gata keu banmandum nyang ka lheueh Ulôn bri keu gata. 27 Seujahteura Ulôn tinggai bak gata. Seujahteura Ulôn keudroe nyang Ulôn bri keu gata, nyang Ulôn bri nyan bukon lagée nyang jibri lé donya keu gata. Bék apoh apah dan bék teumakot. 28 Gata ka tadeungoe Ulôn meututoe, 'Ulôn kujak, teuma Ulôn teuma kuriwang lom ubak gata'. Meunyoe gata tagaséh keu Ulôn, gata teuma tagalak watée Ulôn jak bak Bapak, sabab Bapak leubeh rayeuk nibak Ulôn. 29 Ulôn peugah nyan nibak gata nibak saát nyoe, sigohlom mandum nyan teujadi, gata teuma tameuiman. 30 Ulôn hana teuma Lôn meututoe leubeh jai lom ngon gata, sabab ka trok watée jih peunguasa donya nyoe teuka. Teuma jihnyan hana meukuasa ateueh droe Ulôn. 31 Teuma mandum nyan harôh na mangat donya jisadar bahwa Ulôn kugaséh Bapak dan Ulôn peubuet mandum nyang geupeurintah lé Bapak ubak Ulôn. Ka jeuet, bohjak tawéh nibak teumpat nyoe."

Yahya 15

1 Geupeugah lom lé Isa, "Ulôn na kheueh bak anggô nyang seujati, dan Bapak Ulôn na kheueh nyang peugleh lampôh. 2 Tieb-tieb cabeueng nibak Ulôn nyang hana muboh, laju teukoh, dan tieb-tieb cabeueng nyang muboh geupeukureueng ôn jih dan geupeu gleh mangat leubeh jai jimuboh. 3 Gata ka gleh sabab ajaran nyang Ulôn bri keugata. 4 Teutab meusaboh ngon Ulôn dan Ulôn pi teutab meusaboh ngon gata. Cabeueng keudroe hana hase jimuboh, keucuali meunyoe cabeueng nyan teutab na meukeumat ateueh bak jih. Meunan cit gata hase jimuboh, meunyoe teutab meusaboh ngon Ulôn. 5 Ulôn kheueh bak anggô, dan gata cabeueng-cabeueng jih. Ureuëng nyang teutab meusaboh ngon Ulôn dan Ulôn ngon jihnyan, teuma jimuboh le; sabab meunyoe hana Ulôn, gata hana hase tapeubuet sapeue. 6 Ureuëng nyang hana teutab meusaboh ngon Ulôn, teuma teutiek lagée cabeueng, laju tho. Cabeueng-cabeueng nyang lagée nyan teupeusapat dan teutiek lam apui, óh lheuehnyan laju teutot. 7 Meunyoe gata teutab meusaboh ngon Ulôn dan ajaran Ulôn tinggai lam até gata, lakée kheueh bak Bapak peue mantong nyang gata keuneuk lakée; nyang gata lakée nyan teuma geubri. 8 Meunyoe gata tapeubuet nyang le, Bapak Ulôn teupeumulia; dan deungon lagée nyan gata biet-biet jeuet keu murit Ulôn. 9 Lagée Bapak geugaséh keu Ulôn, meunan kheueh Ulôn gaséh keu gata. Bah kheueh gata teutab udeb lagée ureuëng nyang Ulôn gaséh. 10 Meunyoe gata peujak peue-peue nyang Ulôn peurintah nyoe, gata teutab seutia bak geunaséh Ulôn, saban lagée Ulôn teutab seutia bak geunaséh Bapak sabab Ulôn peubuet peue-peue nyang geupeurintah lé Gobnyan. 11 Banmandum nyoe Ulôn bri tée bak gata, mangat galak Ulôn na lam até gata, dan galak gata jeuet keusampoereuna. 12 Nyoe kheueh peurintah Ulôn: Gaséh kheueh sidroe ngon nyang laén, saban lagée Ulôn kugaséh gata. 13 Ureuëng nyang paleng jigaséh keu rakan-rakan jih na kheueh ureuëng nyang jibri udeb jih keu awaknyan. 14 Gata na kheueh sabat-sabat Ulôn, meunyoe gata tapeubuet peue nyang Ulôn peurintah bak gata. 15 Gata hana le Ulôn hôi namiet, sabab namiet hana jiteupeu peue nyang teungoh jipeubuet lé amphon jih. Gata Ulôn hôi sabat, sabab mandum nyang Ulôn deungoe nibak Bapak, ka Ulôn bri bak gata. 16 Kon gata nyang piléh Ulôn. Ulôn kheueh nyang piléh gata, dan nyang yuejak gata mangat jimuboh le -- boh nyang hana hase binasa. Teuma Bapak geubri keu gata peue mantong nyang gatalakée bak Gobnyan ateueh nan Ulôn. 17 Nyoe kheueh peurintah Ulôn keu gata: Gaséh kheueh sidroe ngon nyang laén." 18 "Meunyoe donya jibanci gata, ingat kheueh bahwa ulôn ka leubeh ilée jibanci lé donya. 19 Seukira jih gata atra donya, gata teuma jigaséh lé donya sibagoe atra jih. Teuma Ulôn ka lôn piléh gata lam donya nyoe, ngon lagée nyan gata bukon lé atra donya. Nyang kheueh sabab jih donya jibanci gata. 20 Ingat kheueh peue nyang ka lheueh Ulôn peugah bak gata, 'Namiet hana leubeh rayeuk nibak amphon jih.' Meunyoe awaknyan ka ji-iénanya Ulôn, awaknyan pih teuma ji iénanya gata. Meunyoe awaknyan jiseutôt nyang lagée Ulôn purunoe, awaknyan pih teuma jiseutôt nyang gata purunoe. 21 Banmandum nyan awaknyan peubuet ateueh gata, sabab gata murit Ulôn, sabab awaknyan hana jituri Gobnyan nyang utus Ulôn. 22 Meunyoe Ulôn hana Lôn teuka dan hana Lôn peugah banmandum nyan bak awaknyan, awaknyan hana meudesya. Teuma bak saátnyoe awaknyan hana alasan le keu desya droe jih. 23 Ureuëng nyang banci Ulôn, jibanci Bapak Ulôn. 24 Seukira jih lamkawan awaknyan hana Ulôn peubuet hai-hai nyang gohlom na jipeubuet lé ureuëng laén, awaknyan hana meudesya. Teuma bak saát nyoe awaknyan ka jikalon peue nyang Ulôn peubuet, dan awaknyan jibanci Ulôn meunan cit Bapak Ulôn. 25 Teuma biet ka seuharôh jih lagée nyan, mangat jeuet peu nyang teutuléh lam Kitab Huköm awaknyan, na kheueh: 'Awaknyan jibanci Ulôn ngon hana alasan.' 26 Ulôn teuma lôn utus bak gata peunulông nyang asai jih nibak Bapak. Gobnyan kheueh Roh nyang geupeugah Roh nyang beuna keuhai Po teu Allah. Meunyoe Rohnyan teuka, Gobnyan geumeusaksi keuhai Ulôn. 27 Dan gata pi harôh gata bri keusaksian keuhai Ulôn, sabab gata kana meusajan Ulôn phon yoh awai.

Yahya 16

1 Banmandum nyan Ulôn peugah bak gata mangat gata bék murtat. 2 Gata teuma teupeuteubiet nibak rumoh-rumoh iébadat. Dan teuma teuka watée jih bahwa ureuëng nyang poh maté gata jipike jihnyan meungabdi bak Po teu Allah. 3 Awaknyan jipeubuet lagée nyan ateueh gata sabab awaknyan gohlom jituri Bapak meunan cit Ulôn. 4 Teuma bak saát nyoe Ulôn peugah nyan bak gata, meunyoe nyan jeuet singoh, gata taingat bahwa Ulôn ka lheueh lôn peugah bak gata." "Hainyoe hana Ulôn peugah bak gata yoh awai phon, sabab, Ulôn mantong na meusajan ngon gata. 5 Teuma bak saát nyoe Ulôn kujak ubak Gobnyan nyang utus Ulôn; dan hana meusidroe pi nibak gata tatanyong ho Ulôn jak. 6 Bak saát nyoe até gata jeuet keuseudeh, sabab Ulôn peugah hainyan bak gata. 7 Teuma Ulôn peugah nyang beutôi bak gata: Leubeh gét nibak gata, meunyoe ulônjak; sabab meunyoe Ulôn hana lônjak, Nyang tulông nyan hana teuka bak gata. Teuma meunyoe ulônjak, Ulôn teuma lôn utus Gobnyan ubak gata. 8 Meunyoe Gobnyan teuka, Geuhnyan teuma geupeugah bak donya makna nyang sibeuna jih nibak desya, nibak peue nyang sibeuna jih, dan nibak huköman Po teu Allah. 9 Gobnyan teuma geupeugah nyang hana meuiman ubak Ulôn na kheueh desya; 10 bahwa Ulôn beutôi, sabab Ulôn jak ubak Bapak dan gata hana gata ngieng le Ulôn; 11 dan bahwa Po teu Allah ka geupeu phon huköm, sabab peunguasa donya nyoe ka geuhuköm. 12 Jai that-that nyang lôn keuneuk peugah bak gata, teuma bak saát nyoe gata gohlom hase gata teurimong. 13 Teuma meunyoe Rohnyan teuka, na kheueh Gobnyan nyang peugah keubeunaran keuhai Allah, gata teuma geubimbéng keu taturi banmandum keubeunaran. Gobnyan hana geumeututoe nibak droe Geuh keudroe teuma geupeugah peue nyang ka geudeungoe, dan Gobnyan teuma geupeugah bak gata peue nyang teuma teujadi óh uroe dudoe. 14 Gobnyan teuma geupeu mulia Ulôn, sabab peue nyang geupeusampoe bak gata, geuteurimong nibak Ulôn. 15 Banmandum nyang na bak Bapak na kheueh atra Ulôn. Nyang kheueh sabab jih ulôn peugah bahwa peue nyang jipeutrok lé Roh ubak gata, geuteurimong atranyan nibak Ulôn." 16 "Tinggai sikeujab teuk gata hana meurumpok le ngon Lôn, dan meunan cit tinggai sikeujab teuk gata teuma takalon Ulôn." 17 Na padubdroe murit Isa laju jiteumanyong sabe keudroe-droe, "Peue meukeusut jih geupeugah bak geutanyoe: 'Tinggai sikeujab teuk gata hana teuma gata ngieng le Ulôn, dan tinggai sikeujab teuk gata teuma tangieng ulôn'? Dan peue teuma meukeusut jih: 'Ulôn kujak ubak Bapak'?" 18 Awaknyan jiteumanyong laju, "Peue makna jih, 'Sikeujab'? Geutanyoe hana muphom Gobnyan geumariet keuhai peue!" 19 Isa geuteupeue awaknyan keuneuk teumanyong bak Gobnyan. Jadi Gobnyan laju geupeugah, "Bunoe ka lheueh lôn peugah, 'Tinggai sikeujab teuk, gata hana teuma gata ngieng Ulôn, dan meunan cit tinggai sikeujab teuk gata teuma tangieng Ulôn'. Peu kheueh nyan nyang gata peusoai lamkawan gata? 20 Beuneupatéh kheueh gata teuma tamo dan meuba-e, teuma donya meugeumbiraria. Gata tunu até, teuma sosah gata nyan meu-ubah jeuet keu geumbiraan. 21 Meunyoe sidroe ureuëng inong ka tô that watée jikeuneuk peulahé aneuëk, jihnyan lumpah that sosah dan apoh apah, sabab ka watée jih inong nyan meudeurita. Teuma meunan aneuëk jihnyan lahé, ureuëng inong nyan tuwoe ubak peundeuritaan jih sabab galak that até sidroe aneuëk manyak ka lahé lam donya. 22 Meunan cit deungon gata: Jinoenyoe gata meusosah até, teuma Ulôn meurumpok lom ngon gata, teuma até gata teuma mangat; dan hana meusidroe pi nyang hase jicok nyang mangat nyan lam até gata. 23 Bak uroe nyan, gata hana tanyong sapeue le ubak Ulôn. Neupatéh kheueh: Peue mantong nyang gata lakée ubak Bapak ateueh nan Ulôn, nyan teuma geubri keu gata. 24 Sampoe bak saát nyoe gata gohlom talakée sapeue ateueh nan ulôn. Lakée kheueh, teuma gata tateurimong, mangat harok gata sampoereuna." 25 "Banmandum nyoe ulôn peugah bak gata ngon kiasan. Teuma teuka watée jih, hana ulôn peuguna le kiasan, teuma lôn mariet troh trang ngon gata keuhai Bapak. 26 Bak watée nyan gata teuma talakée bak bapak ateueh nan Ulôn; beutateupeue kheueh, Ulôn hana teuma lôn lakée nibak Bapak keu gata, 27 Sabab Bapak keudroe geugaséh gata. Gobnyan geugaséh gata sabab gata tagaséh keu Ulôn, dan tapatéh bahwa Ulôn teuka nibak Po teu Allah. 28 Beutôi Ulôn asai nibak Bapak, dan ka lôn teuka lam donya. Teuma bak saát nyoe Ulôn tinggai donya keu lôn gisa ubak Bapak." 29 Laju murit-murit Isa jipeugah bak Gobnyan, "Jinoenyoe Tuhan neumeututoe troh trang dan hana neupeuguna kiasan, 30 dan kamoe meuteupeu bahwa Tuhan neuteupeue peue-peue mantong. Hana peureulée meusidroe ureuëng pi jiteumanyong sapeue-sapeue ubak Tuhan. Ngon sabab kamoe meupatéh Tuhan teuka nibak Po teu Allah." 31 Isa geujaweueb awaknyan, "Jadi, peu kheueh ka gata patéh bak saát nyoe? 32 Ingat! Saát jih teuma teuka, dan ka teuka, gata teuma teupeucre bre. Gata teuma tawoe u rumoh droe maséng-maséng dan teuma gata tinggai Ulôn sidroe. Teuma Ulôn hana sidroe sabab Bapak na meusajan ngon Ulôn. 33 Banmandum nyoe Ulôn peugah mangat gata meuteumé seujahteura sabab meusaboh ngon Ulôn. Lam donya gata teuma meudeurita. Dan tabah kheueh até gata! Ulôn ka Lôn peutaloe donya!"

Yahya 17

1 Óh ka lheueh geupeugah meunan, Isa laju geutangáh u langét sira geupeugah, "Bapak, jinoe ka trok watée jih. Peu Agong kheueh Aneuëk Droeneueh, mangat Aneuëk Droeneueh pi ji peu Agong Bapak. 2 Bapak ka neubri kuasa ateueh banmandum umat manusia ubak Aneuëk, mangat jihnyan jibri udeb seujati dan keukai keu mandum ureuëng nyang Bapak bri bak jihnyan. 3 Nyoe kheueh Udeb seujati dan keukai; mangat manusia jituri Bapak, sibagoe Allah nyang beutôi, dan jituri Isa nyang nyang geu-utus lé Bapak. 4 Ulôn ka lôn peumulia Bapak ateueh rhueng bumoe nyoe deungon lôn peuseuleusoe buet nyang ka Bapak bri bak Ulôn. 5 Bapak! Agong kheueh Ulôn jinoenyoe ubak Bapak deungoe keumuliaan nyang na bak Ulôn meusajan Bapak sigohlom donya nyoe teupeujeuet. 6 Ulôn ka Lôn peuturi Bapak ubak ureuëng-ureuëng nyang na lam donya nyoe nyang ka Bapak bri keu Ulôn. Awaknyan na kheueh atra Bapak, dan Bapak ka neubri awaknyan bak Ulôn. Awaknyan ka jiseutôt peue nyang Bapak peugah. 7 Jinoenyoe awaknyan ka jiteupeue bahwa banmandum nyang Bapak bri bak Ulôn asai jih nibak Bapak. 8 Ka Ulôn peusampoe bak awaknyan tutoe haba nyang Bapak bri bak Ulôn; dan awaknyan ka jiteurimong. Awaknyan jiteupeue bahwa Ulôn biet-biet teuka nibak Bapak dan awaknyan jipatéh bahwa Bapak kheueh nyang utus Ulôn. 9 Ulôn meudoá keu awaknyan. Ulôn hana meudoá keu donya seulaén keu ureuëng-ureuëng nyang ka Bapak bri ubak Ulôn, sabab awaknyan na kheueh atra Bapak. 10 Mandum atra Ulôn na kheueh atra Bapak cit teuma; dan banmandum atra Bapak atra Ulôn cit teuma. Ulôn jipeumulia lam kawan awaknyan. 11 Jinoenyoe Ulôn teuka ubak Bapak. Ulôn hana tinggai le lam donya nyoe; teuma awaknyan na lam donya. Bapak nyang Suci! Jaga kheueh awaknyan ngon keukuasaan nan Bapak, na kheueh nan nyang ka Bapak bri ubak Ulôn -- mangat awaknyan jeuet keusaboh, saban lagée Bapak ngon Ulôn na kheueh saboh. 12 Watée Ulôn mantong na meusajan awaknyan, Ulôn ka Lôn jaga awaknyan ngon keukuasaan nan Bapak -- nan nyang Bapak bri ubak Ulôn. Ulôn ka Lôn jaga awaknyan dan hana meusidroe pih lam kawan awaknyan nyang gadôh, keucuali jihnyan nyang ka seuharôh jih gadôh; ngon lagée nyan geunab kheueh peue nyang ka teutuléh lam Alkitab. 13 Jinoenyoe Ulôn jak bak Bapak. Banmandum nyoe Ulôn peugah simantong Ulôn na lam donya; mangat awaknyan ngon sipeunoh até jirasa keugeumbiraan Ulôn. 14 Ulôn ka Lôn peusampoe bak awaknyan tutoe haba Bapak, dan donya jibanci awaknyan, sabab awaknyan bukon milék donya, saban lagée Ulôn kon cit atra donya. 15 Ulôn hana Lôn lakée mangat Bapak neucok awaknyan nibak lam donya nyoe, teuma nyang Ulôn lakée mangat Bapak neujaga awaknyan nibak ureuëng jeuhet. 16 Saban cit hai jih lagée Ulôn bukon atra donya, awaknyan pih bukon atra donya. 17 Beujeuet kheueh awaknyan atra khusos Bapak rot keubeunaran; Tutoe Bapak nyan na kheueh keubeunaran. 18 Lagée Bapak ka geukirém Ulôn lam donya, lagéenyan cit teuma Ulôn kirém awaknyan u dalam donya. 19 Keu keupeuntengan awaknyan, Ulôn seurah droe sibagoe atra milék khusos Bapak meulalu keubeunaran. 20 Bukon keu awaknyoe mantong Ulôn meudoá. Ulôn meudoá cit teuma keu ureuëng-ureuëng nyang meuiman ubak ulôn ngon keusaksian awaknyan nyoe. 21 Ulôn lakée, Bapak, mangat awaknyan banmandum jeuet keu saboh, lagée Bapak meusaboh ngon Ulôn, dan Ulôn ngon Bapak. Seumoga awaknyan jeuet keu saboh ngon tanyoe mangat donya jipatéh bahwa Bapak nyang utus Ulôn. 22 Ulôn ka Lôn bri bak awaknyan keumuliaan nyang Bapak bri keu Ulôn, mangat awaknyan jeuet keusaboh, saban cit lagée geutanyoe saboh; 23 Ulôn ngon awaknyan, dan Bapak ngon Ulôn; mangat awaknyan keubiet-keubiet saboh. Teuma donya jiteupeue bahwa Bapak kheueh nyang utus Ulôn, dan bahwa Bapak neugaséh awaknyan lagée Bapak neugaséh Ulôn. 24 Bapak, Ulôn meuharab awaknyan, nyang Bapak bri keu Ulôn, na meusajan ngon Ulôn bak teumpat Ulôn na, mangat awaknyan jikalon keumuliaan Ulôn; na kheueh keumuliaan nyang Bapak bri keu Ulôn, sabab Bapak neugaséh Ulôn sigohlom donya teupeujeuet. 25 Bapak nyang ade! Donya hana jituri Bapak, teuma Ulôn kuturi Bapak; dan ureuëng-ureuëng nyoe jiteupeue bahwa Bapak nyang utus Ulôn. 26 Ulôn ka Ulôn peugah nan Bapak bak awaknyan; dan Ulôn teuma sabe Lôn peubuet lagée nyan, mangat geunaséh Bapak keu Ulôn teutab na lam até awaknyan dan Ulôn meusaboh ngon awaknyan."

Yahya 18

1 Óh ka lheueh Isa geumeudoá lagée nyan, Gobnyan ngon murit-murit Geuh laju geujak u meurandeh Krueng Kidron. Nibak teumpat nyan na saboh taman, Isa ngon murit-murit Geuh geutamong laju lam taman nyan. 2 Yudas tukang khianat nyan, jiteupeu teumpat nyan; sabab Isa ka kayém that meusapat nibak teumpat nyan ngon murit-murit Gobnyan. 3 Deungon nyan Yudas laju jijak ubak teumpat nyan sira jiba saboh pasokan sidadu Romawi dan ngon padubdroe teuma peungawai Baét Tuhan nyang jiyue lé imeum-imeum ulée dan ureuëng-ureuëng Farisi. Awaknyan jiba sinjata, lentara meunan cit suwa. 4 Isa geuteupeue mandum peue nyang teuma teujadi ateueh droe Gobnyan. Ngon sabab nyan Gobnyan laju geupeurab ubak ureuëng-ureuëng nyan sira geutanyong, "Soe nyang gata jak mita?" 5 "Isa, ureuëng Nazaret," jaweueb awaknyan. "Ulôn kheueh Jihnyan," seuôt Isa. Yudas tukang khianatnyan na jidong inan ngon awaknyan. 6 Watée Isa geupeugah bak awaknyan, "Ulôn kheueh jihnyan," awaknyan banmandum jisurot dan reubah bak tanoh. 7 Sigoe teuk Isa geutanyong bak awaknyan, "Soe nyang gatanyoe mita?" "Isa ureuëng Nazaret," jaweueb awaknyan. 8 "Ka lheueh Lôn peugah, Ulôn kheueh Jihnyan," seuôt Isa. "Dan meunyoe keubiet Ulôn gata nyoe mita, peubiyeu mantong nyang laén nyoe jijak." ( 9 Deungon na geupeugah meunan, teuma jeuet kheueh peue nyang ka lheueh geupeugah lé Isa sigohlom nyan: "Bapak, nibak ureuëng-ureuëng nyang Bapak bri ubak Ulôn, hana meusidroe pi nyang gadôh.") 10 Simon Petrus nyang na geuba saboh peudeueng, laju geutarek ngon peudeueng nyan teuma geuseunuet ateueh sidroe namiet imeum agong sampoe putôh ôn punyueng blaih uneuen. Nan namiet nyan Malkus. 11 Lé sabab nyan Isa laju geupeugah ubak Petrus, "Peutamong lom peudeueng gata nyan lam sarong! Peu kheueh gata pike hana Lôn jieb piala deurita nyang geubri lé Bapak ubak Ulôn?" 12 Laju lé sidadu-sidadu Romawi deungon keumandan jih dan peungawai-peungawai Yahudi jidrob dan ji-ikat Isa. 13 Phon-phon that awaknyan jiba Isa meuhadab Hanas, ayah tuan Kayafas. Kayafas na kheueh imeum agong nibak thon nyan. 14 Dan Gobnyan kheueh nyang geubri naseuhat ubak peunguasa Yahudi bahwa leubeh gét sidroe nyang maté nibak saboh bansa. 15 Simon Petrus meunan cit ngon sidroe teuk murit nyang laén jiseutôt Isa. Murit nyang laén nyoe jituri lé imeum agong; ngon sabab nyan geuhnyan geutamong meusajan-sajan ngon Isa ubak leun rumoh imeum agong, 16 dan Petrus geupreh diluwa, nibak pintoe. Óh lheuehnyan murit nyang laén nyan geujak uluwa dan meututoe ngon peulayan inong nyang keumiet pintoe, laju jijak Petrus peutamong u dalam. 17 Peulayan inong nyang keumiet pintoe nyan jitanyong bak Petrus, "Hai, peu kheueh droeneueh nyoe murit Isa cit?" "Bukon," jaweueb Petrus. 18 Nibak uroenyan udara sijuek that, deungon nyan peulayan-peulayan meunan cit lé peungawai-peungawai laju jipeukab adang keungeue apui ngon meuadeueng, dan awaknyan laju jimeuadeueng nibak apui nyan. Petrus geujak keunan dan laju geudong meuadeueng ngon awaknyan. 19 Imeum agong geutanyong bak Isa keuhai murit-murit Gobnyan meunan cit keuhai ajaran nyang geuba. 20 Isa geujaweueb, "Ulôn meututoe ngon troh trang dikeue ureuëng ramé. Ulôn sabe na Lôn seumeubeuet nibak rumoh-rumoh iébadat meunan cit lam Baét Allah, nibak teumpat ureuëng Yahudi lazem jih meugumpôi. Hántom na Lôn peugah sapeue ngon cara seungab-seungab. 21 Nyang kheueh sabab jih pakon Teungku neutanyong Ulôn? Tanyong kheueh bak awaknyan nyang ka jideungoe Ulôn seumeubeuet. Pasti awaknyan jiteupeu peue nyang ka Ulôn peugah." 22 Watée Isa geupeugah meunan, sidroe tukang kawai nyang na inan laju jitampa sira jipeugah, "Ajam that babah teuh kahjeuet meututoe lagée nyan ubak imeum agong!" 23 Geujaweueb lé Isa, "Meunyoe na tutoe haba Lôn nyang salah, neupeugah laju nibak teumpat nyoe dipat nyang salah nyan! Teuma meunyoe nyang Ulôn kheun nyan keubiet beutôi, keupeue droeneueh neutampa Ulôn?" 24 Óh lheuehnyan Hanas laju jiyue bak ureuëng laén mangat jiba Isa ubak Imeum Agong Kayafas. 25 Simon Petrus mantong cit geudong geumeuadeueng inan. Ureuëng-ureuëng jipeugah bak gobnyan, "Peu kheueh droeneueh nyoe murit ureuëng nyan cit?" Teuma Petrus geubantah, "Bukon!" 26 Na sidroe namiet imeum agong, na kheueh syedara nibak ureuëng nyang punyueng jih geukoh lé Petrus nyan, jikheun, "Kon kheueh na lôn ngieng gata nibak taman nyan meusajan-sajan ngon Gobnyan?" 27 Teuma Petrus teutab geubantah, "Bukon," -- dan paih that bak watée nyan manök pi jiku-uék. 28 Ban beungoh that awaknyan laju jiba Isa nibak rumoh Kayafas ubak meuligoe gubunur. Ureuëng-ureuëng Yahudi keudroe hana jitamong lam meuligoe, mangat awaknyan hana jeuet keukuto seucara agama, sabab awaknyan keuneuk jak makheun peunajoh Paskah. 29 Lé sabab nyan Pilatus laju jijak uluwa ubak awaknyan lheueh nyan jitanyong, "Peue nyang gata gadu keuhai ureuëng nyoe?" 30 Awaknyan jijaweueb, "Seukira jih ureuëng nyan hana meusalah, kamoe hana kamoe ba Jihnyan ubak Bapak Gubunur." 31 Pilatus laju geupeugah bak awaknyan, "Cok kheueh jihnyan dan huköm kheueh jihnyan meunurot huköm gata keudroe!" Teuma lé ureuëng-ureuëng Yahudi nyan jijaweueb, "Kamoe hana jeuet kamoe huköm maté gob." ( 32 Hai nyoe na mangat teupeubuet peue nyang geupeugah lé Isa keuhai cara jih Gobnyan teuma maté.) 33 Pilatus geutamong lom lam meuligoe dan geutawök Isa, lheuehnyan laju geutanyong, "Peu kheueh droeneueh Raja ureuëng Yahudi?" 34 Geujaweueb lé Isa, "Peu kheueh nyang neutanyong nyoe nibak droeneueh keudroe atawa na ureuëng laén nyang ka jibri tée bak droeneueh keuhai Ulôn?" 35 Geujaweueb lé Pilatus, "Peu kheueh ulôn nyoe ureuëng Yahudi? Nyang jok Droeneueh ubak ulôn na kheueh bansa Droeneueh keudroe dan imeum-imeum ulée. Peue nyang ka Droeneueh peubuet?" 36 Geujaweueb lé Isa, "Keurajeuen Ulôn bukon lam donya nyoe. Meunyoe kirajih keurajeuen Lôn nibak lam donya nyoe ureuëng-ureuëng Lôn teuma jimeujuang mangat bék jijok Ulôn ubak peunguasa Yahudi. Teuma keubiet keurajeuen Ulôn bukon nibak donya nyoe!" 37 Teuma Pilatus laju geutanyong ubak Gobnyan, "Meunyoe meunan, Droeneueh raja?" Isa geujaweueb, "Droeneueh peugah bahwa Ulôn nyoe raja. Ulôn lahé dan teuka lam donya nyoe ngon saboh meukeusut, na kheueh keu Lôn bri keusaksian keuhai nyang beuna. Ureuëng nyang nibak nyang beuna nyan jideungoe Ulôn." 38 Pilatus geutanyong ubak Gobnyan, "Peue makna jih beuna nyan?" Laju Pilatus geuteubiet nibak lam meuligoe dan geupeugah ubak ureuëng-ureuëng Yahudi, "Ulôn hana kuteumé meusaboh nyang salah pih nibak Gobnyan. 39 Teuma meunurot keubiasaan gata, ulôn sabe lôn peulheueh sidroe ureuëng huköman nibak Uroe Raya Paskah. Peu kheueh neutem mangat lôn peulheueh keu gata raja ureuëng Yahudi nyan?" 40 Awaknyan jijaweueb sira jikuk-kuk, "Hánjeuet, bék Jihnyan, teuma Barabas!" (Barabas na kheueh sidroe peurampok.)

Yahya 19

1 Óh lheuehnyan Pilatus jitamong dan jiyue laju bak ureuëng laén mangat jiseunuét Isa. 2 Sidadu-sidadu nyan laju jipeugét saboh mahkota nibak ranteng nyang meuduro, mahkota meuduro nyan laju jipeuseuôn bak ulée Isa. Óh lheueh nyan jipeungui teuma bajée jubah nyang meuwareuna ungu, 3 laju meu-ulang-ulang jijak bak Gobnyan sira jipeugah, "Udeb raja ureuëng Yahudi!" Óh lheuehnyan awaknyan jitampa Gobnyan. 4 Óh lheueh nyan Pilatus jiteubiet lom dan jipeugah bak ureuëng ramé nyan, "Ngieng! Ka ulôn peuteubiet Gobnyan uluwa keu gata, mangat gata tateupeue bahwa ulôn hana lôn teumé meusaboh pi nyang salah nibak ureuëng nyoe." 5 Teuma Isa laju geuteubiet sira geungui mahkota meuduro dan bajée jubah ungu. Pilatus jipeugah bak awaknyan, "Ngieng kheueh ureuëng nyan." 6 Watée imeum-imeum ulée dan peungawai-peungawai jikalon Isa, awaknyan laju jikuk-kuk, "Saleb laju Jihnyan, saleb laju Jihnyan!" Pilatus jipeugah bak awaknyan, "Cok kheueh laju Gobnyan, dan saleb kheueh lé gata keudroe, ulôn hana lôn teumé meusaboh pi nyang salah nibak Gobnyan." 7 Ureuëng Yahudi nyan jijaweueb, "Meunurot huköm kamoe, ureuëng nyan harôh teuhuköm maté sabab Jihnyan jiaku droe jih Aneuëk Allah." 8 Watée Pilatus jideungoe awaknyan jipeugah meunan, raja nyan leubeh teumakot nibak nyang ka. 9 Teuma laju jitamong lom lam meuligoe dan óh lheueh Isa jipeutamong, Pilatus laju jitanyong bak Gobnyan, "Dipat asai droeneueh?" Teuma Isa hana geujaweueb. 10 Teuma lé Pilatus jipeugah lom, "Droeneueh hana neutem peugah haba ngon ulôn? Beutateupeue kheueh, ulôn na kuasa keu lôn peulheueh Droeneueh, dan na kuasa teuma lôn saleb Droeneueh!" 11 Geujaweueb lé Isa, "Meunyoe Allah hana geubri kuasa nyan keu gata, gata mubacut pi hana meukuasa ateueh Ulôn. Sabab nyan, ureuëng nyang peusalah Ulôn nibak gata, leubeh rayeuk desya jih nibak gata." 12 Watée Pilatus jideungoe hai nyan, jihnyan jiuseuha keu jipeuleueh Isa. Teuma di ureuëng-ureuëng Yahudi laju jikuk-kuk, "Meunyoe amphon neupeuleueh Jihnyan, amphon bukon rakan Kaisar! Ureuëng meungaku droejih raja na kheueh musoh Kaisar!" 13 Watée Pilatus jideungoe haba nyan, Pilatus nyan laju jiba Isa uluwa dan laju jipeuduek ateueh kurusi peungadelan bak teumpat nyang nan jih Aleue Batée. (Lam basa Ibrani nan jih Gabata.) 14 Watéenyan karab poh dua blaih uroe, uroe sigohlom Uroe Raya Paskah. Pilatus jipeugah bak ureuëng-ureuëng nyan, "Nyoe raja gata!" 15 Awaknyan jikuk-kuk laju, "Poh maté Jihnyan! Poh maté Jihnyan! Saleb laju jihnyan!" Pilatus jitanyong, "Peu kheueh ulôn nyang saleb raja gata?" Imeum-imeum ulée jijaweueb, "Sidroe Kaisar mantong nyang raja kamoe!" 16 Teuma Pilatus laju jiseurah Isa bak awaknyan keu jisaleb. Awaknyan laju jicok Isa, dan laju jiba Gobnyan nibak teumpat nyan. 17 Isa geuteubiet sira geugulam keudroe saleb Geuh laju geuba ubak teumpat nyang nan jih, "Teumpat Bruek Ulée". (Lam basa Ibrani nan jih Golgota.) 18 Disinan kheueh Gobnyan jisaleb. Meusigoe ngon Gobnyan na teuma dua droe ureuëng laén nyang jisaleb disinan; sidroe blaih wie, sidroe blaih uneuen dan Isa keudroe na di teungoh-teungoh. 19 Bak kayée saleb Isa, Pilatus laju jiyue pasang tulésan lagée nyoe, "Isa teuka nibak Nazaret, Raja Ureuëng Yahudi". 20 Jai that-that ureuëng Yahudi nyang jibaca tulésan nyan, sabab teumpat Isa teusaleb nyan hana jiôh nibak banda. Tulésan nyan lam basa Ibrani, Laten dan Yunani. 21 Imeum-imeum ulée jipeugah bak Pilatus, "Bék neutuléh 'Raja ureuëng Yahudi,' teuma tuléh kheueh lagée nyoe, 'Ureuëng nyoe jipeugah, Ulôn Raja ureuëng Yahudi.' " 22 Teuma lé Pilatus jijaweueb, "Nyang ka ulôn tuléh, teutab teutuléh." 23 Óh ka lheueh jisaleb Isa lé sidadu-sidadu nyan, awaknyan laju jicok peukayan Gobnyan. Peukayan nyan laju jibagi peuet: maséng-maséng meuteumé saboh jeumba. Meunan cit awaknyan laju jicok jubah Gobnyan. Jubah nyan hana teucôb -- teutenun phon nibak ateueh sampoe u miyueb. 24 Sidadu-sidadu nyan laju jipeugah sabe keudroe-droe, "Bék ta koh-koh bajée jubah nyoe. Jak tatiek undi mangat tateupeue soe nyang hak ateueh bajée nyoe." Hainyan teujadi mangat teupeubuet lagée peue nyang ka teutuléh lam Alkitab, na kheueh lagée nyoe: "Awaknyan jibagi-bagi peukayan Ulôn, dan jitiek undi keu jiteumé jubah Ulôn." Dan keubiet sidadu-sidadu nyan jipeubuet lagée nyan. 25 Bak binéh saleb Isa geudong mak Gobnyan, syedara inong mak Gobnyan, Maryam peurumoh Klopas, dan Maryam Magdalena. 26 Watée Isa geukalon mak Geuh dan murit-murit Gobnyan nyang geugaséh na teudong disinan, Gobnyan laju geupeugah bak mak Geuh, "Mak, nyan aneuëk mak." 27 Óh lheueh nyan Isa geupeugah teuma bak murit-murit Geuh, "Nyan mak gata." Phon saát nyan mandum murit Isa jiteurimong mak Isa keu tinggai dirumoh awaknyan. 28 Isa geuteupeue bahwa bak saátnyoe banmandum nyan ka seuleusoe, dan mangat peue nyang na teutuléh lam Alkitab hase teujadi, Gobnyan geupeugah, "Ulôn glah that." 29 Disinan na saboh cangkie nyang peunoh meuasoe ngon ié anggô nyang masam. Teuma laju jiculob saboh bungöng kareueng lam ié anggô nyan, óh lheueh nyan laju jiculok bak saboh tangke hisop, dan laju jisunyueng bak Isa. 30 Isa geurasa ié anggô nyan dan laju geupeugah, "Ka seuleusoe!" Laju geutukui ulée Geuh dan meuninggai donya. 31 Lé peunguasa Yahudi hana jitem manyét-manyét nyang ka lheueh teusaleb nyan teutab meugantung bak kayée saleb bak uroe Sabat, peue teuklom bak goenyoe Sabat nyan Uroe Raya nyang khusos. Sabab uroe watée Isa teusaleb rhot jih sigohlom uroe Sabat nyan, ureuëng-ureuëng Yahudi laju jilakée bak Pilatus keu jiwiet gaki ureuëng-ureuëng nyang ka teusaleb dan jipeutron manyét-manyét nyan nibak ateueh kayée saleb. 32 Teuma lé sidadu-sidadu nyan laju jijak wiet phon-phon gaki bandua droe nyang jisaleb meusigoe ngon Isa. 33 Watée awaknyan ka trok bak Isa, laju jikalon Gobnyan ka meuninggai. Ngon lagée nyan awaknyan hana jadéh jiwiet gaki Gobnyan. 34 Teuma lhong Isa teutab jitôb ngon kapak lé sidroe sidadu nyang na lamkawan nyan; dan laju jiteubiet darah dan ié. 35 Ureuëng nyang kalon keudroe keujadian nyan, ureuëng nyan kheueh nyang jak peugah hainyan, mangat gata mandum meunan cit peucaya. Dan keusaksian gata nyan beutôi, dan jiteupeue bahwa nyan beutôi. 36 Hainyan jeuet mangat teupeubuet peue nyang ka teutuléh lam Alkitab lagée nyoe: "Hana meusikrek pih nibak tuleueng Gobnyan teuma jiwiet". 37 Lam Alkitab na cit teutuléh lagée nyoe, "Awaknyan teuma jipandang Gobnyan nyang ka awaknyan tôb". 38 Óh lheueh nyan Yusuf nibak Arimatea jilakée idhin bak Pilatus mangat jeuet jicok manyét Isa. (Yusuf na kheueh murit Isa teuma ngon cara seungab-seungab, sabab jihnyan teumakot ubak peunguasa Yahudi.) Pilatus laju jibri idhin bak ureuëng nyan, óh lheueh nyan ureuëng nyan laju jijakcok manyét Isa. 39 Nekodemus, nyang awai ilée ka lheueh jijak bak Isa bak watée malam, jijak cit meusigoe ngon Yusuf. Nekodemus jiba ramuan mur dan gaharu -- banmandum na kira-kira lhée ploh kilo gram le jih. 40 Bandua awaknyan laju jicok manyét Isa dan laju jibalot ngon ija kafan meusajan ngon uréeh nyang mangat bée nyan meunurot adat teuseumiyueb ureuëng Yahudi. 41 Bak teumpat Isa teusaleb na saboh taman. Lam taman nyan na saboh kubu barô, nyang hántom lom jipeuguna keu teumpat teukubu ureuëng laén. 42 sabab kubu nyan tô, dan uroe Sabat karab jipeuphon, awaknyan laju jiseumiyueb Isa bak teumpat nyan.

Yahya 20

1 Bak uroe Aleuhat, watée jih mantong beungoh, keuadaan jih mantong seupôt, Maryam Magdalena jijak bak jrat. Laju jikalon batée ngon tôb babah kubu nyan ka meugéesée nibak uruek kubu nyan. 2 Ban jikalon nyan laju jiplueng bak Simon Petrus dan murit Gobnyan nyang geugaséh lé Isa, laju jipeugah bak awaknyan, "Tuhan kajicok lam kubu, dan ulôn hana lôn tupat dipat Gobnyan jikeubah." 3 Óh lheueh nyan Petrus ngon murit-murit nyang laén laju jijak bak kubu nyan. 4 Bandua awaknyan jiplueng-plueng, teuma murit nyang laén leubeh bagaih nibak Petrus, dan awaknyan leubeh awai trok ubak kubu nyan. 5 Laju jikalon lam kubu nyan dan jingieng laju ija kafan mantong na teupeuduek disinan, teuma jihnyan hana jitamong. 6 Simon Petrus laju trok nibak likot, laju jitamong lam kubunyan. Laju jingieng ija kafan mantong na teuduek disinan, 7 teuma ija nyang teuikat bak ulée Isa hana tô nyan teuma meugulong keudroe. 8 Óh lheueh nyan murit nyang leubeh awai trok keunan jitamong cit lam kubu, laju jikalon dan jipatéh. ( 9 Sampoe bak watée nyan awaknyan gohlom muphom peue nyang teutuléh lam Alkitab bahwa Gobnyan harôh geubeudôh nibak maté.) 10 Óh lheuehnyan murit-murit Isa nyan laju jiwoe. 11 Maryam Magdalena jidong dikeue kubu nyan sira jimoe. Teungoh jimoe nyan, laju jijeungeuek lam kubu, 12 laju deuh jikalon dua malaikat geusok peukayan putéh. Awaknyan jiduek bak teumpat beukaih manyét Isa, nyang sidroe nibak blaih ulée, dan nyang laén nibak blaih gaki. 13 Malaikat-malaikat nyan laju geutanyong, "Mak, pakon neumoe?" Geujaweueb lé Maryam, "Tuhan ulôn ka jicok, dan ulôn hana lôn tuho pat jikeubah." 14 Óh ka lheueh jipeugah meunan laju jingieng u likot dan deuh laju Isa ka geudong disinan. Teuma Magdalena nyan hana jiteupeu bahwa nyang dong nyan na kheueh Isa. 15 Isa geutanyong bak inong nyan, "Mak, pakon neumoe, soe nyang mak mita?" Maryam jipike nyang mariet nyan na kheueh ureuëng meulampôh, jadi laju jipeugah, "Pak, meunyoe bapak nyang pinah Gobnyan nibak teumpat nyoe, cuba bapak peugah bak ulôn dipat bapak keubah manyét nyan, mangat ulôn jeuet lôn jakcok." 16 Isa geupeugah bak inong nyan, "Maryam!" Maryam jingieng ateueh Isa aju jimarit lam basa Ibrani, "Rabuni!" (Makna jih "Gurée".) 17 "Bék gata mat Ulôn," kheun Isa bak inong nyan, "Sabab Ulôn gohlom Ulôn ék ubak Bapak. Teuma gata jak kheueh bak syedara-syedara Lôn, dan gata peugah kheueh bak awaknyan bahwa saát nyoe Ulôn ék ubak Bapak Lôn dan Bapak gata, Allah Lôn dan Allah gata." 18 Teuma lé Maryam laju geujak peugah bak murit-murit Isa bahwa jihnyan ka jikalon Tuhan dan bahwa Tuhan ka geupeugah banmandum nyan bak jihnyan. 19 Bak uroe Aleuhat nyan cit teuma, watée malam ka teuka, murit-murit Isa laju meugumpôi bak saboh rumoh deungon pintoe-pintoe mandum teugunci, sabab awaknyan teumakot keu peunguasa Yahudi. Ngon hana jisangka-sangka Isa teuka dan geudong lamkawan awaknyan sira geupeugah, "Assalamuálaikum." 20 Óh ka lheueh geupeugah meunan, Gobnyan laju geutunyok bak awaknyan jaroe ngon lhong Geuh. Watée jikalon Tuhan, awaknyan galak lumpah na. 21 Dan Isa laju geupeugah bak awaknyan sigoteuk, "Assalamuálaikum. Lagée Bapak nyang ka geu utus Ulôn, meunan cit teuma Ulôn utus gata." 22 Laju Gobnyan geuyueb nafáh Gobnyan ubak awaknyan dan geupeugah, "Teurimong kheueh Roh Allah. 23 Meunyoe gata tapeuamphon desya sidroe-droe ureuëng, meunan cit Allah geupeu amphon gata. Dan meunyoe gata hana tapeuamphon desya sidroe-droe ureuëng, Allah pi hana geupeu amphon." 24 Tomas (Nyang teuhôi nan laén "Sikeumbeue"), sidroe lam kawan dua blaih droe murit Isa, hana meusajan ngon ureuëng laén watée Isa teuka. 25 Teuma lé murit-murit Isa nyang laén jipeugah bak Tomas, "Kamoe ka lheueh kamoe kalon Tuhan!" Jaweueb lé Tomas, "Meunyoe ulôn gohlom lôn ngieng inciek jaroe Geuh teulabang dan gohlom lôn mat ngon jaroe lôn bak inciek luka keunong labang nyan, meunan cit gohlom lôn mat ngon jaroe lôn bak inciek lhong Gobnyan nyang keunong tôb nyan, mubacut pih hana lôn patéh." 26 Sigoe Aleuhat teuma óh lheuehnyan murit-murit Isa meugumpôi lom bak teumpat nyan, dan Tomas na disinan. Banmandum pintoe teugunci. Teuma Isa teuka dan geudong lamkawan awaknyan, laju geupeugah, "Assalamuálaikum." 27 Óh lheueh nyan Isa geupeugah ubak Tomas, "Ngieng kheueh jaroe Lôn, dan peuduek kheueh jaroe gata disinoe. Sunyueng kheueh jaroe gata dan peuduek kheueh bak lhong Ulôn. Bék ragu-ragu le, teuma peucaya kheueh!" 28 Tomas jipeugah bak Isa, "Tuhan dan Allah lôn!" 29 Teuma Isa geupeugah bak awaknyan, "Gata tapatéh sabab ka tangieng Ulôn bukon? Mubahgia kheueh ureuëng nyang jipatéh bah pih hana jikalon Ulôn!" 30 Mantong jai that buet-buet nyang ajaéb nyang geupeuleumah lé Isa dikeue murit-murit Gobnyan, teuma hana teutuléh lam kitab nyoe. 31 Teuma mandum nyoe teutuléh, mangat gatanyoe peucaya bahwa Isa na kheueh Raja Peuseulamat, Aneuëk Allah, dan sabab meuiman keu Gobnyan, gata meuteumé udeb.

Yahya 21

1 Óh lheuehnyan Isa geupeuleumah droe sigoe teuk bak murit-murit Gobnyan di Danau Tiberias. Meunoe kheueh keujadian jih: 2 Bak siuroe Simon Petrus, Tomas, nyang teuhôi si Keumbeue, Natanael nibak Kana di Galilea, aneuëk-aneuëk Zebedeus, dan dua droe murit Isa nyang teungoh meugumpôi. 3 Jipeugah lé Simon Petrus, "Ulôn keuneuk jak drob eungkot." "Kamoe jak cit," kheun awaknyan ubak Simon Petrus nyan. Dan jijak kheueh awaknyan jiék peurahô. Teuma simalam beungoh nyan hana meuteumé sapeue. 4 Watée mata uroe ka jiteubiet, Isa geudong bak binéh panté, teuma awaknyan hana jiteupeue bahwa nyang dong nyan Isa. 5 Isa geupeugah bak awaknyan, "Aneuëk Ulôn, peu kheueh bak kah na eungkot?" "Hana," jaweueb awaknyan. 6 Isa geupeugah bak awaknyan, "Rhom kheueh laju jeue gata blah uneuen peurahô, eunteuk gata meuteumé eungkot." Banjideungoe nyan laju jeue awaknyan jitiek blaih uneuen peurahô, teuma hana hase jitarek lom sabab lumpah that jai eungkot lam jeue nyan. 7 Murit nyang geugaséh lé Isa jipeugah bak Petrus, "Nyan Tuhan!" Watée jideungoe lé Simon Petrus bahwa nyan Tuhan, laju jisok bajée (sabab jihnyan hana meubajée) laju jigrob lam ié. 8 Murit-murit nyang laén laju jiseutôt u darat ngon peurahô, sira jitarek jeue nyang peunoh ngon eungkot. Awaknyan hana padub na jiôh nibak darat, na kira-kira sireutoh metée. 9 Watée awaknyan jitron nibak ateueh peurahô, laju jikalon na ngeue apui disinan deungon eungkot ateueh ngeue apui nyan meunan cit ruti. 10 Isa geupeugah bak awaknyan, "Cuba gata ba keunoe mupadub boh eungkot nyang ban gata drob." 11 Simon Petrus laju jiék ateueh peurahô, laju jitarek jeue jih ateueh darat. Jeue nyan peunoh ngon eungkot nyang raya-raya; banmandum na sireutôh limong ploh lhée boh. Bah pi eungkot nyan jai that, teuma jeue jihnyan hana beukah. 12 Isa geupeugah bak awaknyan, "Jak keunoe tamakheun." Hana meusidroe pih nibak murit-murit Gobnyan nyang jijeuet teumanyong, "Bapak nyoe soe?" Sabab awaknyan jiteupeue bahwa Gobnyan na kheueh Tuhan. 13 Óh lheuehnyan Isa laju geupeurab bak awaknyan, geucok laju ruti nyan, laju geujok keu awaknyan. Meunan cit lagée nyan teuma geupeugét ngon eungkot nyan. 14 Nyoe kheueh nyang keu lhée goe jih Isa geupeuleumah droe bak murit-murit Gobnyan óh ka lheueh Gobnyan teupeubeudôh nibak maté. 15 Óh ka lheueh seuleusoe awaknyan jimakheun, Isa geupeugah bak Simon Petrus, "Simon, aneuëk Yona, peu kheueh gata leubeh ta gaséh Ulôn nibak awaknyan nyoe nyang gaséh Ulôn?" "Beutôi, Tuhan," jaweueb Petrus, "Tuhan neuteupeue bahwa ulôn cinta that keu Tuhan." Óh lheueh nyan geupeugah lom lé Isa bak gobnyan, "Peulara kheueh aneuëk bubiri Lôn." 16 Nyang keu dua jih Isa geupeugah bak Simon Petrus nyan, "Simon, aneuëk Yona, peu kheueh gata tagaséh keu Ulôn?" "Beutôi, Tuhan," jaweueb Petrus, "Tuhan neuteupeue ulôn cinta that keu Tuhan." Geupeugah lé Isa bak Simon Petrus nyan, "Peulara kheueh bubiri-bubiri Lôn." 17 Nyang keu lhée goe jih Isa geutanyong bak Simon Petrus nyan, "Simon aneuëk Yona, peu kheueh tacinta keu Ulôn?" Petrus seudeh that até sabab Isa geutanyong bak jihnyan sampoe lhée goe. Teuma laju geujaweueb lé Petrus, "Tuhan, Tuhan neuteupeue peue-peue mantong, Tuhan neuteupeue ulôn cinta keu Tuhan!" Laju Isa geupeugah bak Simon nyan, "Peulara kheueh bubiri-bubiri Ulôn. 18 Keubiet beutôi nyang Ulôn peugah nyoe: Watée gata mantong muda, gata keudroe nyang ikat keuieng gata, dan tajak homantong nyang galak gata. Teuma meunyoe gata ka tuha singoh, gata sunyueng jaroe gata, dan ureuëng laén nyang ikat gata dan jiba gata ho nyang hana gatatem jak." 19 (Deungon tutoe Geuh lagée nyan Isa geutunyok bak Petrus pakriban Petrus watée maté singoh keu jipeumulia Po teu Allah.) Óh lheuehnyan Isa geupeugah bak Petrus, "Seutôt kheueh Ulôn!" 20 Watée Isa geupaleng, laju deuh geukalon dilikot Gobnyan murit nyang geugaséh lé Gobnyan. (Jihnyan kheueh nyang duek bak binéh Isa watée makheun dan nyang tanyong bak Gobnyan, "Tuhan, soe nyang khianat Tuhan?") 21 Watée geukalon ureuëng nyan, Petrus jitanyong bak Isa, "Tuhan, pakriban ngon ureuëng nyoe?" 22 Geujaweueb lé Isa, "Seukira jih Ulôn kutem mangat jihnyoe teutab udeb sampoe Ulôn teuka, nyan kon urosan gata. Teuma gata, seutôt kheueh Ulôn!" 23 Ngon lagée nyan meutabu kheueh haba lamkawan murit Isa bahwa murit nyan hana teuma maté. Padahai Isa hana geupeugah murit nyan hana teuma maté, teuma: "Seukira jih Ulôn kutem jihnyan tinggai udeb sampoe Ulôn teuka, nyan bukon urosan gata." 24 Nabi Yahya geubri keusaksian keuhai keujadian-keujadian nyoe. Gobnyan kheueh nyang ka tuléh nyan. Dan tanyoe tateupeue bahwa peue nyang geupeugah nyan na kheueh beutôi. 25 Mantong jai that hai-hai nyang laén nyang geupeubuet lé Isa. Seukira jih nyan teutuléh saboh-saboh, Ulôn rasa hana seb teumpat bansigom bumoe nyoe keu teukeubah mandum kitab nyang teuma geutuléh nyan.

Kisah Rasui-Rasui 1

1 Lam kitab nyang phon ka lheueh lôn peutrang banmandum nyang geupeubuet dan geupurunoe lé Isa watée yoh phon that geupeuphon buet Gobnyan, 2 sampoe bak uroe Gobnyan teubeuôt lam syeuruga. Sigohlom Gobnyan geu-ék lam syeuruga, deungon kuasa Roh Allah Gobnyan geubri peutunyok-peutunyok bak Rasui-rasui Gobnyan nyang teupiléh. 3 Óh ka lheueh Gobnyan maté, treb jih na peuet ploh uroe Gobnyan kayém that geutunyok ngon cara nyang nyata that ubak murit-murit Gobnyan bahwa Gobnyan biet-biet udeb. Awaknyan jikalon Gobnyan, dan Gobnyan geumeututoe ngon awaknyan keuhai pakriban Allah geumat peurintah sibagoe Raja. 4 Dan bak watée Gobnyan meusapat ngon awaknyan, Gobnyan laju geubri peurintah nyang lagée nyoe bak awaknyan, "Bék gata jak nibak Yerusalem. Preh disinan sampoe Bapak geubri peue nyang ka geupeu janji, na kheueh nyang ka lheueh Ulôn bri keu gata yoh masa ilée. 5 Sabab Yahya geuseumanö ngon ié, teuma na padub uroe teuk gata geuseumanö ngon Roh Allah." 6 Watée Rasui-rasui nyan meusapat meusajan-sajan ngon Isa, awaknyan jitanyong bak Gobnyan, "Peu kheueh jinoenyoe Tuhan keuneuk neupeudong lom Keurajeuen bansa Israel?" 7 Geujaweueb lé Isa, "Bapak Ulôn keudroe nyang peuteuntée uroe dan watée jih. Nyan hana peureulée gata teupeue, sabab nyan na kheueh hak Bapak. 8 Teuma gata meuteumé kuasa, meunyoe Roh Allah ka teuka ubak gata. Dan gata jeuet keu saksi-saksi keu Ulôn di Yerusalem, bansaboh Yudea, di Samaria dan sampoe u ujong bumoe." 9 Óh ka lheueh geupeugah meunan lé Isa, Gobnyan laju teubeuôt lam syeuruga dikeue mata awaknyan keudroe, dan awan jitôb Gobnyan nibak pandangan rasui-rasui nyan. 10 Teungoh awaknyan mantong jikalon u langét, watée Isa teubeuôt, hana jisangka-sangka dua droe nyang jingui peukayan putéh ka teudong bak binéh awaknyan. 11 "Hei ureuëng-ureuëng Galilea," kheun awaknyan, "Pakon gata dong mantong disinan sira gata tangah u langét? Isa nyang gata kalon teubeuôt lam syeuruga dikeue gata nyan, teuma geugisa lom ngon cara lagée nyan cit teuma." 12 Óh lheuehnyan rasui-rasui nyan laju jigisa u Yerusalem nibak Bukét Zaiton. Bukét nyan teumpat jih na kira-kira sikilo metée nibak Yerusalem. 13 Di Yerusalem awaknyan laju jijak u rumoh teumpat awaknyan meunumpang, laju ji-ék ateueh kama nyang na di bagian ateueh. Rasui-rasui nyan, na kheueh Petrus dan Yahya, Yakobus dan Andreas, Filipus dan Tomas, Bartolomeus dan Matius, Yakobus bin Alfeus, Simon Patriot dan Yudas bin Yakobus; 14 banmandum nyan sabe ngon siaté meusapat keu meudoá. Awaknyan meudoá meusajan-sajan ngon ureuëng-ureuëng inong na cit Maryam mak Isa, dan meusajan ngon syedara-syedara Isa. 15 Bak siuroe, watée awaknyan teungoh meugumpôi -- na kira-kira sireutôh dua ploh droe nyang teuka keunan -- Petrus laju jidong keu jipeugah haba. Laju jipeugah lagée nyoe, 16 "Syedara-syedara! Peue nyang na teutuléh lam Alkitab, nyan keubiet teujadi. Yoh masa ilée meulalu Nabi Daud, Roh Allah ka lheueh geupeugah keuhai Yudas, peumimpén ureuëng-ureuëng nyang drob Isa. 17 Yudas na kheueh sidroe lamkawan geutanyoe, dan jihnyan pih ka teupiléh keu jimeukeureuja meusajan-sajan ngon tanyoe." ( 18 Yudas nyan ka meuteumé tanoh jrat jih sibagoe upah jimeukhianat nyang jeuhet nyan. Jihnyan rhot dan maté ngon pruet jih teuprah sampoe asoe jih meuburée uluwa banmandum. 19 Banmandum ureuëng nyang na ji tinggai di Yerusalem jiteupeue keuhai nyan. Nyan kheueh sabab jih lam basa awaknyan, awaknyan boh nan tanoh nyan Akeldama, nyang makna jih 'Tanoh Darah'.) 20 "Sabab lam kitab Zabur na teutuléh lagée nyoe, 'Bah kheueh teumpat tinggai jih jeuet keusungue; bék na meusidroe pih tinggai didalam nyan.' Na lom teutuléh lagée nyoe, 'Bah kheueh keududukan jih jicok lé ureuëng laén.' 21 Sabab nyan, harôh na nyang seutôt meusajan ngon tanyoe jeuet keusaksi bahwa Tuhan Isa ka udeb lom teuma nibak maté. Ureuëng nyan museuti sidroe lamkawan ureuëng-ureuëng nyang sabe na meusajan ngon tanyoe watée tanyoe sabe taseutôt Tuhan Isa homantong nyang geujak, yoh phon Nabi Yahya peumanö sampoe watée Isa teubeuôt lam syeuruga lamkawan geutanyoe." 23 Teuma lé ureuëng-ureuëng nyang na teuka disinan laju jisaran dua droe, awaknyan na kheueh Yusuf nyang teuhôi cit ngon nan Barsabas (dan ureuëng nyan na cit teuhôi ngon nan Yustus), dan Matias. 24 Laju awaknyan meudoá. Meunoe doá awaknyan, "Tuhan, Droeneueh neuteupeue peue nyang na lam até mandum manusia. Yudas ka rhot nibak jabatan jih sibagoe rasui dan ka maté, teuma neutunyok kheueh bak kamoe, soe nibak bandua droe nyoe nyang Tuhan piléh keu teubri tugaih nyan keugeunantoe Yudas." 26 Óh lheuehnyan mandua droe nan nyan ji-undi, dan undian nyan laju rhot ateueh Matias. Teuma jihnyan laju jiangkat jeuet keu rasui keu meusajan-sajan ngon bansiblaih droe rasui nyang laén.

Kisah Rasui-Rasui 2

1 Watée ka trok bak uroe Pentakosta, mandum ureuëng meuiman meusapat bak saboh teumpat. 2 Ngon hana jisangka-sangka teudeungoe su nibak langét lagée angén teuga nyang teungoh jipôt. Rumoh bak teumpat awaknyan teungoh jiduek bansaboh rumoh nyan ka peunoh ngon su nyan. 3 Laju jikalon lé awaknyan lidah-lidah lagée apui hu jimeu-éue ho-homantong dan laju jidong ateueh awaknyan maséng-maséng. 4 Awaknyan banmandum ka jikuasa lé Roh Allah, dan laju jimarit lam meubagoe rupa basa. Awaknyan jimeututoe meunurot peue nyang jipeugah lé Roh nyan bak awaknyan keu jipeugah. 5 Bak watée nyan jai that-that ureuëng Yahudi, nibak mubagoe nanggroe nyang na bansigom donya, tinggai di Yerusalem. Awaknyan na kheueh ureuëng-ureuëng nyang taát ubak Po teu Allah. 6 Watée teudeungoe su nyan, jai that-that manusia jijak meuhudom keunan. Awaknyan banmandum that-that teukeujot watée jideungoe ureuëng-ureuëng nyang na disinan jimututoe lam basa jih keudroe. 7 Ngon hireuen dan takjob awaknyan jipeugah, "Ureuëng-ureuëng nyang meututoenyoe banmandum ureuëng Galilea bukon? 8 Pakriban jeuet jih meunoe tadeungoe awaknyan jimeututoe lam basa nanggroe geutanyoe maséng-maséng? 9 Geutanyoe ureuëng-ureuëng nibak Partia, Media, Elam; nibak Mesopotamia, Yudea dan Kapadokia; nibak Pontus dan Asia, 10 nibak Frigia dan Famfilia, nibak nanggroe Meusé dan daerah-daerah Libiya tô ngon Kirene; na lamkawan geutanyoe nyang teuka nibak Roma, 11 na ureuëng-ureuëng Yahudi dan na teuma ureuëng-ureuëng bansa laén nyang ka jitamong agama Yahudi; na teuma nyang teuka nibak Kreta dan Arab. Tanyoe mandum tadeungoe awaknyan jimeututoe lam basa geutanyoe maséng-maséng keuhai hai-hai nyang ajaéb nyang geupeubuet lé Po teu Allah!" 12 Ngon hireuen dan takjob, awaknyan banmandum jitanyong sidroe ngon nyang laén, "Peue makna jih nyoe?" 13 Teuma na cit ureuëng-ureuëng nyang jihina. Awaknyan jipeugah, "Ah, awaknyan mandum ka mabök!" 14 Laju Petrus jidong meusajan-sajan ngon siblaih droe rasui nyang laén, óh lheuehnyan jipeugah bak ureuëng ramé nyan. Ngon su nyang meugeunta jikheun lagée nyoe, "Syedara-syedara, ureuëng-ureuëng Yahudi dan mandum nyang tinggai di Yerusalem! Deungoe kheueh beugét-gét, sabab hainyoe peureulée ulôn peugah bak gata. 15 Banmandum ureuëng nyoe hana mabök, lagée nyang gata duga; sabab bak saát nyoe mantong poh sikureueng beungoh. 16 Teuma nyoe ka lheueh geubri feureuman lé Po teu Allah meulalu Nabi Yoël: 17 Allah meufeureuman, 'Bak akhé jamén Ulôn teuma Lôn bri Roh Ulôn keu mandum manusia. Aneuëk-aneuëk gata nyang agam dan aneuëk-aneuëk gata nyang inong teuma jibritée bak gata keuhai-hai nyang Ulôn peugah bak awaknyan. Ureuëng-ureuëng muda gata teuma jikalon hai-hai nyang Ulôn peuleumah bak awaknyan. Ureuëng-ureuëng tuha gata teuma mulumpo keuhai lumpo nyang Ulôn bri keu awaknyan. 18 Keu namiet-namiet Ulôn pih -- bah kheueh nyang agam meunan cit nyang inong --, teuma Ulôn bri Roh Ulôn nibak uroe-uroe nyan. Awaknyan teuma jibri tée hai-hai nyang Ulôn bri tée keu awaknyan. 19 Ulôn teuma Lôn peuna buet-buet nyang ajaéb di ateueh jéh nyang na di langét, dan hai-hai luwa biasa dimiyueb nyang na disinoe, bumoe; teuma na darah dan apui, uab dan asab. 20 Mata uroe teuma jeuet keu seupôt, buleuen jeuet keumirah lagée darah Sigohlom Uroe Tuhan, Uroe nyang rayeuk dan mulia nyan teuka. 21 Bak watée nyan, ureuëng nyang jimeuhôi bak Tuhan teuma teupeuseulamat.' 22 Syedara-syedara ureuëng-ureuëng Israel! Deungoe kheueh peu nyang ulôn peugah nyoe; Isa ureuëng Nazaret nyan ka geubri tugaih lé Po teu Allah keu syedara. Nyan nyata that bak buet-buet nyang ajaéb dan hai-hai nyang luwa biasa nyang geupeubuet lé Allah di teungoh-teungoh gata meulalu Isa nyan. Banmandum nyan gata keudroe ka gata teupeue. 23 Paih lagée reuncana Gobnyan keudroe, Allah ka geupeu putôh keu geuseurah Isa nyan keu gata. Dan watée Gobnyan teuseurah, laju gata poh maté Gobnyan sira gata peubiyeu ureuëng-ureuëng jeuhet jisaleb Gobnyan. 24 Teuma Po teu Allah geupeu udeb Gobnyan lom lam kawan ureuëng maté. Gobnyan jiuét lé maté, teuma Po teu Allah geupeuleueh Gobnyan, sabab hana mungken Gobnyan jikuasa sabe lé maté. 25 Keuhai Isa nyoe Nabi Daud ka lheueh geupeugah, 'Ulôn kalon Tuhan sabe na dikeue ulôn; Gobnyan sabe na bak binéh ulôn, mangat ulôn hana jiguncang lé peue mantong. 26 Nyang kheueh sabab jih até ulôn harôk lumpah na, babah ulôn lôn peugah puja ngon pujoe; dan tuboh ulôn nyoe teuma jipreh deungon aman lam kubu. 27 Sabab gata hana tapeubiyeu meunyoe watée teutinggai lam donya ureuëng maté. Gata hana tapeubiyeu hamba Droeneueh nyang seutia nyan hanco dan habéh. 28 Droeneueh ka neutunyok bak ulôn rot nyang teutuju keu udeb nyang seujati. Keugeumbiraan ulôn meutamah mangat lam até sabab Droeneueh na meusajan ngon ulôn.' 29 Syedara-syedara, idhin kheueh ulôn peugah trok trang keuhai Nabi Daud, bapak indatu geutanyoe nyan. Gobnyan ka maté dan ka teutanom lam jrat; kubu gobnyan mantong na di lamkawan geutanyoe sampoe bak saát nyoe. 30 Allah ka geumeujanji bak Nabi Daud, ngon geumeusumpah, bahwa sidroe nibak keuturonan gobnyan teuma teu angkat jeuet keu raja. Sabab Nabi Daud geuteupeue keuhai janji nyan dan sabab gobnyan pih sidroe Nabi, 31 gobnyan pih geuteupeue peue nyang teuma geupeubuet lé Po teu Allah. Jadi gobnyan ka lheueh geupeugah bahwa Raja Peuseulamat nyang geupeu janji lé Allah, teuma udeb lom nibak maté. Nabi Daud geupeugah lagée nyoe, 'Gobnyan hana teupeubiyeu tinggai lam donya ureuëng maté; tuboh Geuh nyan hana teuma teupeubiyeu sampoe hanco dan habéh.' 32 Isa nyoe kheueh nyang teupeu udeb di teungoh-teungoh ureuëng maté lé Allah. Kamoe mandum ka lheueh kamoe kalon keudroe hai nyan. 33 Gobnyan teuangkat nibak keududuekan nyang manyang dan geubri keukuasaan lé Allah, laju geuteurimong Roh Allah nyang ka geupeu janji lé Bapak. Dan nyang gata deungoe bak saátnyoe dan gata kalon na kheueh Roh nyan nyang Gobnyan bri keu kamoe. 34 Nabi Daud keudroe hana geu-ék lam syeuruga, teuma Nabi Daud geupeugah, 'Tuhan geupeugah bak Tuhan ulôn: 35 Duek kheueh blaih uneuen Ulôn, sampoe Ulôn peujeuet mandum musoh Gata tundok ubak Gata!' 36 Nyang kheueh sabab jih mandum ureuëng Israel harôh jiteupeue that bahwa Isa nyang gata saleb nyan, Isa nyan cit teuma nyang ka geupeujeuet lé Po teu Allah jeuet keu Tuhan dan Raja Peuseulamat!" 37 Watée awaknyan mandum jideungoe hai nyan, até awaknyan gundah lumpah na. Laju awaknyan jitanyong bak Petrus dan rasui-rasui nyang laén, "Syedara-syedara mandum, peue nyang harôh kamoe peubuet?" 38 Geujaweueb lé Petrus, "Meutobat kheueh nibak desya-desya gata. Dan bah kheueh gata maséng-maséng teupumanö ateueh nan Isa, mangat mandum desya-desya gata teupeue amphon. Teuma gata mandum tateurimong Roh Allah nibak Po teu Allah. 39 Sabab nyang geupeu janji lé Allah nyan na kheueh keu gata dan keuturonan gata meunan cit keu ureuëng-ureuëng nyang na bak teumpat-teumpat nyang jiôh -- na kheueh mandum ureuëng nyang geutawök lé Allah Tuhan tanyoe keu tajak ubak Gobnyan." 40 Meunan kheueh Petrus geupeugah ubak awaknyan. Dan deungon jai tutoe haba nyang laén gobnyan pih geuyue bak awaknyan mangat awaknyan jipeuleueh droe nibak bansa nyang jeuhet nyoe nyang teuma geuhuköm lé Po teu Allah. 41 Jai that-that ureuëng peucaya peue nyang geupeugah lé Petrus, laju awaknyan teupumanö. Teuma jeumeulah ureuëng nyang peucaya nibak uroe nyan meutamah lom na lhée ribée droe. 42 Deungon biet-biet awaknyan jimurunoe sabe nibak rasui-rasui dan sabe meusapat meusajan-sajan. Awaknyan jimakheun meusajan-sajan dan meudoá meusajan-sajan. 43 Jai that-that buet nyang ajaéb nyang geupeubuet lé rasui-rasui nyan sampoe mandum ureuëng hireuen ngon teumakot. 44 Ureuëng-ureuëng meuiman nyan banmandum laju meusaboh dan peue nyang na nibak awaknyan, nyang awaknyan ngui meusajan-sajan. 45 Awaknyan laju jipeubloe barang-barang dan atra milék jih keudroe, laju jibagi-bagi péng awaknyan keudroe keu awaknyan keudroe meunurot nyang jipeureulée lé awaknyan maséng-maséng. 46 Tieb-tieb uroe awaknyan sabe meugumpôi di Baét Allah; dan makheun meusajan-sajan, deungon geumbira dan miyueb até di rumoh awaknyan keudroe. 47 Awaknyan hana putôh-putôh jipujoe Allah dan jigalak lé mandum ureuëng. Tieb-tieb uroe jeumeulah awaknyan laju meutamah sabab Tuhan geubri keu awaknyan ureuëng-ureuëng nyang teungoh teupeuseulamat.

Kisah Rasui-Rasui 3

1 Bak siuroe Petrus ngon Yahya geujak u Baét Allah poh lhée seupôt, na kheueh bak watée nyan watée keu meudoá. 2 Bak teumpat nyan bak babah pintoe geureubang nyang nan jih "Pintoe Ceudah", na sidroe ureuëng agam nyang lapée yoh phon lahé. Tieb-tieb uroe ureuëng nyan jiba keunan keu jigeumadée bak ureuëng-ureuëng nyang tamong lam Baét Allah nyan. 3 Watée ureuëng nyan jikalon Petrus dan Yahya teungoh geutamong lam Baét Allah, laju jilakée lé ureuëng lapée nyan sapeue-peue bak awaknyan mandua. 4 Teuma awaknyan laju jingieng ateueh ureuëng nyan, óh lheueh nyan Petrus geupeugah, "Ngieng kheueh ateueh kamoe!" 5 Laju di ureuëng lapée nyan jingieng ateueh awaknyan mandua ngon harapan meuteumé sapeue-peue nibak awaknyan. 6 Teuma Petrus laju geupeugah bak ureuëng nyan, "Bak Ulôn sagai-sagai hana meupéng. Teuma peue nyang na nibak Ulôn, nyan teuma Ulôn bri keu gata: Ngon kuasa Isa ureuëng Nazaret nyan, gata jak kheueh!" 7 Laju Petrus geumat jaroe uneuen ureuëng lapée nyan dan laju geutulông peubeudôh. Ban sikeujab nyan cit teuma gaki ureuëng nyan dan mata gatok gaki jih jeuet keuteuga. 8 Laju jigrob sira jidong, jipeuphon jak keudeh keunoe. Óh lheuehnyan laju jitamong lam Baét Allah meusajan-sajan ngon Petrus dan Yahya, sira jijak jigrob-grob ngon jipujoe Allah. 9 Mandum ureuëng jikalon ureuëng nyan jijak dan jipujoe-pujoe Allah. 10 Dan awaknyan laju sadar bahwa ureuëng nyan kheueh tukang geumadée nyang kayém jiduek bak babah "Pintoe Ceudah" nibak Baét Allah. Awaknyan mandum hireuen lumpah na dan takjob peue nyang ka jikalon ateueh ureuëng nyan. 11 Ureuëng nyan hana jipiôh-piôh jiseutôt Petrus dan Yahya. Dan watée awaknyan ban lhée droe ka trok bak seuramoe nyang teuboh nan "Seuramoe Nabi Sulaiman", bandum ureuëng teuka jijak meuhudom bak awaknyan sabab takjob. 12 Watée Petrus jikalon ureuëng ramé nyan, laju jipeugah bak awaknyan, "Hei ureuëng-ureuëng Israel, Pakon gata banmandum hireuen keuhai nyoe? Pakon gatanyoe takalon sabe ateueh kamoe? Peu kheueh gata pike ureuëng nyoe jeuet jijak sabab na kuasa nibak kamoe atawa sabab kamoe taát keu Po teu Allah? 13 Allah nyang geuseumah lé Nabi Ibrahim, Nabi Ishaq, Nabi Yakub, Allah indatu geutanyoe, Allah nyan ka geupumulia hamba Gobnyan, na kheueh Isa. Isa nyan kheueh nyang ka gata jok bak peunguasa, dan gata lawan dikeue Pilatus, bak watée Pilatus keuneuk jipeuleueh Gobnyan. 14 Gobnyan suci dan jroh, teuma gata talawan Gobnyan dan tapaksa mangat Pilatus jipeuleueh sidroe ureuëng huköman nyang ka jipoh maté gob keu gata. 15 Gata nyoe banmandum ka tapoh maté Gobnyan, padahai nyang sibeuna jih Gobnyan kheueh punca udeb keu mandum manusia. Dan Allah ka geupeu udeb lom Gobnyan nibak maté. Kamoe ka lheueh kamoe kalon keudroe hainyan. 16 Syedara banmandum ka gata kalon keudroe peue nyang ka teujadi ngon ureuëng lapée nyoe. Ureuëng nyoe ka jeuet keuteuga dan seuhat lagée sot nyang ka sabab jihnyoe peucaya keu Isa dan kuasa Gobnyan. Sabab jipeucaya keu Isa ureuëng nyoe ka puléh lagée sot nyang ka dikeue gata banmandum. 17 Syedara-syedara! Jinoenyoe ka Ulôn teupeue bahwa peue nyang gata peubuet dan peumimpén-peumimpén gata peubuet ateueh Isa, mandum nyan gata peubuet sabab hana gata teupeue peue nyang teungoh gata peubuet. 18 Dan ngon sabab nyan kheueh teuma teujadi cit peue nyang ka geubri lé Allah yoh masa ilée meulalu mandum nabi-nabi Gobnyan, bahwa Raja Peuseulamat nyang geupeu janjinyan harôh meudeurita. 19 Ngon sabab nyan syedara-syedara, meutobat kheueh nibak desya-desya gata dan gata gisa kheueh ubak Po teu Allah, mangat Gobnyan geusampôh mandum desya-desya gata. 20 Tuhan geuteuka ubak gata dan gata teuma tarasa keuseugaran rohani. Dan Tuhan teuma geuyue Isa geujak ubak gata, sabab Gobnyan ka geupeuteuntée lé Po teu Allah jeuet keu Raja Peuseulamat keu gata. 21 Gobnyan harôh tinggai lam syeuruga sampoe Allah geupeujeuet banmandum nyan barô lagée nyang geupeugah lé Allah meulalu nabi-nabi Gobnyan bak jamén ilée. 22 Nabi Musa ka lheueh geupeugah, 'Allah Tuhan gata teuma geu-utus keu gata sidroe Nabi nibak bansa gata keudroe, lagée Gobnyan geu utus ulôn. Gata harôh tadeungoe mandum nyang geupeugah lé nabi nyan ubak gata. 23 Ureuëng nyang hana jipako peue nyang geupeugah lé nabi nyan, ureuëng nyan teuma teupeu aséng nibak umat Po teu Allah dan teupeubinasa.' 24 Nabi-nabi nyang ka lheueh na geupeusampoe haba nibak Po teu Allah, phon nibak Nabi Samuel dan nabi-nabi laén nyang teuka dudoe nibak nyan, banmandum nyan geubri tée keuhai jamén nyoe. 25 Janji-janji nibak Po teu Allah nyang jipeusampoe lé Nabi-nabi nyan na kheueh keu syedara mandum. Lam peujanjian nyang Allah peugét ngon indatu gata, Allah meufeureuman ubak Nabi Ibrahim lagée nyoe, 'Nibak keuturonan gata Ulôn teuma lôn bri beureukat banmandum bansa nyang na dibumoe.' Peujanjian nyan na kheueh gata cit teuma. 26 Nyang kheueh sabab jih Allah geupiléh hamba Gobnyan, laju geuyue awaknyan mangat geujak ubak gata leubeh ilée, mangat Gobnyan geubri beureukat keu gata. Cara jih Gobnyan geubri beureukat keu gata na kheueh ngon cara geupeujeuet Gata banmandum meutobat nibak cara udeb gata nyang sisat."

Kisah Rasui-Rasui 4

1 Watée Petrus ngon Yahya mantong geupeugah haba ngon ureuëng-ureuëng nyang na disinan, imeum-imeum ulée dan panglima nyang kawai Baét Allah meunan cit ngon ureuëng-ureuëng Saduki jijak ubak Petrus dan Yahya. 2 Awaknyan beungéh that sabab Petrus dan Yahya jipeugah ubak mandum ureuëng bahwa Isa ka udeb lom nibak maté, dan nyan sibagoe bukeuti bahwa ureuëng maté udeb lom teuma. 3 Ngon sabab nyan awaknyan laju jidrob mandua droe rasui nyan laju jipeutamong lam glab. Dan sabab ka malam, Petrus dan Yahya jiteun disinan sampoe óh singoh beungoh. 4 Teuma lé ureuëng-ureuëng nyang ka jideungoe ajaran nyang jipeusampoe lé rasui-rasui nyan, jai that-that nyang peucaya. Jeumeulah awaknyan laju meutamah sampoe limong ribée droe. 5 Óh singoh nyan, tukoh-tukoh Mahkamah Agama, peumimpén-peumimpén Yahudi dan gurée-gurée agama meugumpôi di Yerusalem. 6 Awaknyan laju meurumpok ngon Imeum Agong Hanas, dan Kayafas, Yahya, Iskandar, dan mandum nyang jitamong lam keuluwarga imeum agong nyan. 7 Petrus ngon Yahya laju jiba jak meuhadab awaknyan, laju awaknyan jitanyong, "Pakriban cara jih gata peupuléh ureuëng lapée nyan? Ngon teunaga peue atawa ngon kuasa nibak soe gata peubuet nyan?" 8 Petrus nyang ka jikuasa lé Roh Allah laju jijaweueb, "Teungku-teungku peumimpén bansa dan teungku-teungku anggota mahkamah! 9 Kamoe teupeukara nibak uroenyoe sabab kamoe peubuet nyang jroh ngon cara kamoe peupuléh sidroe ureuëng lapée, dan sabab teungku-teungku keuneuk neuteupeue pakriban cara ureuëng nyan teupeupuléh. 10 Biet that, teungku-teungku banmandum harôh tateupeue dan banmandum bansa Israel pih harôh jiteupeue bahwa ureuëng nyoe jidong bak saát nyoe ngon badan nyang seuhat dikeue teungku-teungku, sabab teunaga dan keukuasaan nibak Isa ureuëng Nazaret nyan. Teungku-teungku ka neusaleb Isa nyan, teuma Po teu Allah ka geupeu udeb lom Gobnyan. 11 Isa nyoe kheueh nyang jimeukeusut lé ayat nyoe nyang na teutuléh lam Alkitab, 'Batée nyang hana gata peuguna lé utôh-utôh bangunan, teuma ka jeuet keu batée nyang paleng lumboi sa.' 12 Teuma meulalu Isa mantong manusia teupeuseulamat. Sabab bansaboh donya lamkawan manusia hana meusidroe ureuëng laén nyang meuteumé keukuasaan nibak Po teu Allah keu teupeuseulamat geutanyoe." 13 Anggota-anggota sidang peungadelan nyan hireuen that-that watée jikalon keubeuranian Petrus ngon Yahya, peuteuk lom awaknyan jiteupeue bahwa mandua droe rasui nyan na kheueh ureuëng-ureuëng biasa nyang hántom jijak beuet. Laju awaknyan sadar bahwa mandua droe rasui nyan na kheueh ureuëng-ureuëng nyang na jiseutôt ngon Isa. 14 Teuma awaknyan hana jeuet jipeugah sapeue, sabab ureuëng nyang ka jipeupuléh nyan na jidong disinan dikeue awaknyan meusajan-sajan ngon Petrus dan Yahya. 15 Teuma awaknyan laju jiyue teubiet mandua droe rasui nyan uluwa nibak ruweueng sidang. Óh lheuehnyan awaknyan jimupakat. 16 Awaknyan laju jipeugah, "Peue nyang museuti tapeusaneut ateueh ureuëng-ureuëng nyoe? Mandum ureuëng nyang na di Yerusalem ka jiteupeue keuhai buet nyang ajaéb nyang luwabiasa nyoe, jipeubuet lé awaknyan mandua. Tanyoe hana hase tabantah hainyan. 17 Teuma mangat hainyoe bék meutabu leubeh luwah lom lamkawan umat manusia, jak ta peurasat awaknyan bandua mangat awaknyan bék sagai-sagai jipeugah baksoe mantong ngon jingui nan Isa." 18 Teuma awaknyan laju jihôi lom Petrus ngon Yahya u dalam ruweueng sidang, dan laju jibritée mangat awaknyan sagai-sagai bék le jipeugah atawa jiseumeubeuet ateueh nan Isa. 19 Teuma Petrus dan Yahya laju jijaweueb, "Pike kheueh keudroe peue nyang beutôi dikeue Po teu Allah: teuseutôt peue nyang teungku-teungku peurintah atawa teuseutôt peue nyang Allah peurintah. 20 Sabab kamoe hana jeuet kamoe piôh meupeugah haba keuhai peu nyang ka kamoe kalon dan kamoe deungoe keudroe." 21 Anggota-anggota sidang nyan hana jiteumé meusaboh alasan pih keu jihuköm Petrus dan Yahya. Teuma awaknyan jipirasat mandua droe rasui nyan, óh lheueh nyan laju jipeuleueh mandua droe awaknyan, sabab mandum ureuëng jipujoe-pujoe Po teu Allah ngon keujadian nyan. 22 Ureuëng nyang ka jirasa teupeupuléh seucara ajaéb nyan ka peuet ploh thon umu jih. 23 Óh ka lheueh Petrus dan Yahya jipeuleueh, awaknyan laju jigisa ubak rakan-rakan droe dan laju jipeugah mandum nyang jipeugah lé imeum-imeum ulée dan peumimpén-peumimpén Yahudi nyan ubak awaknyan. 24 Óh ka lheueh jideungoe lé rakan-rakan awaknyan keuhai haba nyan, awaknyan meusajan-sajan laju meudoá ngon siaté ubak Allah. Awaknyan jipeugah, "Tuhan, Droeneueh kheueh nyang peujeuet langét ngon bumoe dan laôt ngon mandum asoe jih. 25 Ngon Roh Droeneueh Tuhan ka lheueh neumeututoe meulalu indatu kamoe, Nabi Daud, na kheueh hamba Droeneueh: Neupeugah lagée nyoe, 'Pakon ureuëng-ureuëng, nyang hana jituri Tuhan beungéh; pakon bansa-bansa jipeuget reuncana nyang hana meuguna? 26 Raja-raja donya meusiab-siab keu jijak muprang, dan dumna peumimpén ka sipakat jijak lawan Tuhan dan Raja Peuseulamat.' 27 Sabab keubiet Herodes dan Pontius Pilatus nyang ka sipakat ngon ureuëng-ureuëng nyang hana jituri keu Tuhan dan ngon ureuëng-ureuëng Israel di banda nyoe. Awaknyan meurumpok keu jilawan Isa hamba Droeneueh nyang suci nyan, nyang ka Droeneueh angkat jeuet keu Raja Peuseulamat. 28 Awaknyan sipakat keu jipeubuet peue-peue mantong, nyang Droeneueh ka neupeuteuntée leubeh ilée bahwa nyan teuma teujadi. Dan Droeneueh peuteuntée nyan ateueh keukuasaan dan keumampuan Droeneueh keudroe. 29 Jinoenyoe, Tuhan, ngieng kheueh pakriban awaknyan jipeurasat kamoe. Dan neupeue idhin kheueh kamoe, hamba-hamba Droeneueh nyoe, kamoe meudakwah haba Droeneueh ngon hana teumakot. 30 Neutulông kheueh kamoe mangat jeuet kamoe tulông ureuëng sakét sampoe puléh dan buet-buet nyang ajaéb dan hai-hai nyang luwabiasa teujadi meulalu keukuasaan dan teunaga nibak nan Isa, Hamba Droeneueh nyang suci nyan." 31 Óh ka seuleusoe awaknyan jimeudoá, teumpat awaknyan meusapat nyan meuguncang. Awaknyan mandum jikuasa lé Roh Allah, dan jipeuphon mariet ngon beurani that-that keuhai beurita nibak Po teu Allah. 32 Banmandum ureuëng nyang peucaya nyan siudeb simaté dan sijiwa. Hana meusidroe pih nibak awaknyan jianggab bahwa peue nyang na nibak droe jihnyan na kheueh atra droe jih keudroe. Peue-peue mantong nyang na nibak awaknyan, awaknyan peuguna meusajan-sajan. 33 Ngon kuasa nyang raya, rasui-rasui nyan laju jibri keusaksian bahwa Isa ka udeb lom. Teuma lé Po teu Allah that-that geubri beureukat keu awaknyan. 34 Dan hana meusidroe pih lamkawan awaknyan nyang na kureueng peue-peue mantong. Sabab awaknyan nyang na tanoh atawa rumoh, jipeubloe tanoh atawa rumoh jih nyan; laju péng nibak hase nyang jipeubloe nyan awaknyan ba 35 dan awaknyan jok ubak rasui-rasui. Óh lheueh nyan péng nyan laju jibagi-bagi lé awaknyan ubak tieb-tieb ureuëng nyang peureulée. 36 Meunan cit teuma ngon Yusuf. Jihnyan pih jijak peubloe tanoh atra milék jih. Laju péng hase yuem tanoh nyan jiba dan jijok laju ubak rasui-rasui. Yusuf nyoe na kheueh sidroe ureuëng keuturonan Lewi nibak Siprus: rasui-rasui geuboh nan laén Yusuf nyan Barnabas (makna jih Peunghibur).

Kisah Rasui-Rasui 5

1 Teuma na sidroe ureuëng agam nyang nan jih Ananias, ureuëng nyan ngon purumoh jih nyang nan jih Safira, awaknyoe pih jipeubloe cit saboh keubeueng tanoh atra jih keudroe. 2 Péng hase yuem tanoh nyan siteungoh jipeuguna keu droe jih dan nyang laén jijôk ubak rasui-rasui. Jipeubuet hainyan ngon jiteupeu lé purumoh jih keudroe. 3 Teuma Petrus jipeugah bak ureuëng nyan, "Ananias, pakon gata peubiyeu Iblih jikuasa até gata, sampoe gata meusulet bak Roh Allah, ngon cara seungab-seungab gata teun keu gata keudroe siteungoh nibak hase gata peubloe tanoh gata? 4 Tanoh nyan atra gata sigohlom gata peubloe. Dan óh ka lheueh tanoh nyan gata peubloe pih, péng nyan pih mantong atra gata. Teuma pakon na meukeusut lam até gata keu gata peubuet nyang lagée nyan? Kon manusia nyang gata peungeuet teuma Po teu Allah!" 5 Meunan jideungoe tutoe haba nyan lé Ananias, jihnyan laju reubah, dan maté. Mandum ureuëng nyang jideungoe keuhai keujadian nyan jeuet keuteumakot. 6 Teuma lé ureuëng-ureuëng muda nyang teuka jijak bungkôh manyét Ananias, laju jiba uluwa keu jijak tanom lam jrat. 7 Na kira-kira lhée jeuem óh lheueh nyan purumoh Ananias laju jitamong. Inong nyan hana jiteupeue peue nyang ban teujadi. 8 Petrus geupeugah bak inong nyan, "Cuba gata peugah bak ulôn: Peu kheueh tanoh nyang gata dan lakoe gata peubloe nyan, sidubnyoe yuem jih?" "Beutôi, nyan yuem jih," jaweueb purumoh Ananias. 9 Laju jipeugah lé Petrus bak inong nyan, "Pakon gata dan lakoe gata ka sipakat keu gata ujoe Roh Tuhan? Deungoe kheueh! Ureuëng-ureuëng nyang kubu lakoe gata ka jigisa. Awaknyan jiba gata uluwa cit teuma." 10 Watée nyan cit teuma peurumoh Ananias nyan reubah dan maté dikeue Petrus. Dan watée ureuëng-ureuëng muda nyan jitamong, laju jikalon lé awaknyan inong nyan ka maté. Laju lé awaknyan jiba manyét nyan uluwa dan jikubu bak binéh jrat lakoe jih. 11 Ngon lagée nyan mandum ureuëng-ureuëng nyang meuiman nyan dan ureuëng-ureuëng nyang laén, nyang jideungoe keuhai peuristiwa nyan, habéh teumakot. 12 Sabab peulayanan rasui-rasui jai that-that buet-buet nyang ajaéb teujadi diteungoh-teungoh masyarakat. Ngon siaté awaknyan laju jimeuiman dan meugumpôi bak Seuramoe Nabi Sulaiman di Baét Tuhan. 13 Dan ureuëng luwa hana jijeuet jak bak teumpat ureuëng-ureuëng meuiman nyan meugumpôi. Teuma ureuëng-ureuëng meuiman nyan lumpah that jihoreumat lé masyarakat. 14 Dan maken treb maken meutamah jai ureuëng-ureuëng nyang meuiman ubak Tuhan -- bah kheueh nyang agam meunan cit nyang inong. 15 Ngon lagée nyan keuadaan jih ka jeuet lagée nyan bagoe, sampoe bubena ureuëng-ureuëng sakét jikeubah ateueh teumpat éh atawa ateueh tika, laju jiba ubak rot, mangat awaknyan sihana-hana jih hase jimeuturi ngon Petrus, meunyoe Petrus jijak rot nyan. 16 Meuron-ron manusia jiteuka nibak banda-banda nyang na ban sikeulileng banda Yerusalem. Awaknyan laju jiba ureuëng-ureuëng nyang sakét dan nyang jitamong lé roh-roh jeuhet. Dan mandum ureuëng nyang jipeupuléh lé Petrus nyan. 17 Akhé jih imeum agong dan mandum murit-murit jih, na kheueh kawöm Saduki, kajipeuphon peuna karu, sabab awaknyan bingiek até. 18 Rasui-rasui nyan laju jidrob, laju jipeutamong lam glab biasa. 19 Teuma óh watée malam, sidroe malaikat Tuhan laju geujak peuhah mandum pintoe-pintoe peunjara, laju geupeuteubiet mandum rasui nyan uluwa. Malaikat nyan geupeugah bak rasui-rasui nyan, 20 "Jak kheueh gata dong bak Baét Tuhan dan gata peugah kheueh bak mandum manusia keuhai udeb barô nyoe." 21 Teuma lé rasui-rasui nyan pih geuturot peue nyang ka geupeugah lé malaikat nyan. Ban suboh that awaknyan ka jijak bak Baét Tuhan dan laju jipeuphon seumeubeuet disinan. Bak watée nyan imeum agong meunan cit ngon murit-murit jihnyan jijak keunan, laju jipeuna sidang mahkamah ngon mandum peumimpén Yahudi. Óh lheueh nyan jiyue laju bak gob mangat jijak cok rasui-rasui nyang na lam glab nyan keu jiba jak meuhadab awaknyan. 22 Teuma watée ureuëng-ureuëng nyang keunong yue nyan trok ubak rumoh glab, awaknyan hana meurumpok ngon rasui-rasui nyan disinan. Ngon sabab nyan awaknyan laju jigisa, laju jilapor hainyan ubak mahkamah. 23 "Watée kamoe trok ubak rumoh glab," kheun awaknyan ubak mahkamah, "laju kamoe ngieng pintoe kama peunjara nyan teugunci lagée sot nyang ka, dan peugawée-peugawée nyan teungoh meujaga-jaga bak babah pintoe. Teuma watée kamoe peuhah pintoe nyan, hana meurumpok ngon kamoe meusidroe pih didalam glab nyan." 24 Watée panglima nyang kawai Baét Tuhan dan imeum-imeum ulée jideungoe peue nyang jilapor nyan, awaknyan bingong keuhai rasui-rasui nyan dan teumakot teuma peue nyang hase teujadi. 25 Óh lheuehnyan teuka sidroe ureuëng agam jiba haba nyoe, "Deungoe! Ureuëng-ureuëng nyang teungku-teungku teun lam glab nyan jinoenyoe teungoh jipeubeuet ureuëng ramé lam Baét Allah!" 26 Banjideungoe haba nyan lé panglima nyang kawai Baét Tuhan nyan meunan cit ureuëng-ureuëng kawai jih laju jijak cok rasui-rasui nyan lom. Teuma awaknyan hana ngon cara paksa, sabab awaknyan teumakot keu ureuëng ramé, pat jiteupeue lé ureuëng ramé nyan laju jigeulawa awaknyan ngon batée. 27 Rasui-rasuinyan laju jipeutamong jak meuhadab mahkamah. Laju lé imeum agong jipareksa rasui-rasui nyan. 28 Imeum agong nyan jipeugah, "Ka kamoe tam ngon kreueh bak gatanyoe mangat bék gata peubeuet keuhai Ureuëng nyan. Teuma jinoenyoe cuba takalon peue nyang ka gata peubuet! Gata peudakwah peungajaran gata nyan bansaboh Yerusalem, dan gata pih keuneuk gata tudoh bahwa sabab lé kamoe kheueh Ureuëng nyan maté." 29 Petrus dan rasui-rasui nyang laén laju jijaweueb, "Kamoe museuti kamoe seutôt Allah bukon kamoe seutôt manusia. 30 Isa nyang gata saleb nyan, ka geupeu udeb lom nibak maté lé Allah indatu geutanyoe. 31 Dan Allah ka geubri bak Gobnyan keududukan dan keukuasaan nyang manyang sibagoe Peumimpén dan Peuseulamat; mangat bansa Israel teubri watée keu meutobat nibak desya-desya jih dan meuteumé keuamphonan. 32 Kamoe kheueh saksi-saksi keuhai mandum nyan -- Kamoe dan meunan cit ngon Roh Allah keu ureuëng-ureuëng nyang seutôt peurintah Gobnyan." 33 Watée anggota-anggota Mahkamah Agama nyan jideungoe haba nyan, awaknyan beungéh that-that, dan awaknyan ka sipakat keu jipeumaté bubena rasui-rasui nyan. 34 Teuma lamkawan anggota mahkamah agama na sidroe ureuëng Farisi nyang nan jih Gamaliel. Ureuëng nyan sidroe gurée agama nyang paleng jihoreumat lé mandum ureuëng. Ureuëng jidong dan laju jiyue peuteubiet uluwa mandum rasui-rasui nyan sikeujab. 35 Óh lheueh nyan laju jipeugah ubak Mahkamah Agama nyan, "Syedara-syedara nyang ureuëng-ureuëng Israel! Pike kheueh beugét-gét keuhai peue nyang keuneuk gata peubuet ateueh ureuëng nyoe. 36 Sabab yoh ilée ka lheueh teuka Teudas, nyang jianggab droe jih ureuëng rayeuk, sampoe na kira-kira peuet reutôh droe nyang jeuet keu murit jih. Teuma ureuëng nyan teupoh maté mandum murit jih ka cre bre, dan geurakan jih pih habéh. 37 Óh lheuehnyan watée na seunsus, teuka teuma Yudas, ureuëng nibak Galilea. Sabab peungaroh jih, jai that-that cit ureuëng nyang seutôt ureuëng nyan. Meunan cit ureuëng nyan teupoh maté, dan mandum murit-murit jih ka cre bre. 38 Dan jinoe nyoe ngon keujadian lagée nyoe, naseuhat ulôn na kheueh: bék kheueh gata peukaru ateueh ureuëng-ureuëng nyoe, peubiyeu mantong awaknyan. Sabab meunyoe ajaran dan geurakan jih nyan nibak manusia, ajaran dan geurakan jih nyan teuma hanco. 39 Teuma meunyoe nyan teuka jih nibak Po teu Allah, gata mandum hana meuhase gata peutaloe awaknyan. Dan mungken teuma teunyata bahwa gata mandumnyoe talawan Allah." Naseuhat Gamaliel nyan jiteurimong lé sidang mahkamah. 40 Teuma rasui-rasui nyan jihôi lom, laju jiseunuét, óh lheueh nyan jitam bék sagai-sagai jiseumeubeuet le keuhai Isa. Óh lheueh nyan, barô kheueh awaknyan jipeuleueh. 41 Rasui-rasuinyan laju jitinggai Mahkamah Agama ngon até nyang galak sabab Allah ka geuanggab awaknyan wajéb keu jihina sabab Isa. 42 Dan tieb-tieb uroe di Baét Tuhan dan di rumoh-rumoh gob, awaknyan hana putôh-putôh jiseumeubeuet dan jipeusampoe Haba Gét keuhai Isa bahwa Gobnyan kheueh Raja Peuseulamat nyang teupeujanji nyan.

Kisah Rasui-Rasui 6

1 Murit-murit Isa maken treb maken meutamah ramé, bak watée nyan ureuëng-ureuëng Yahudi nyang meubasa Yunani, ka hana galak keu ureuëng-ureuëng Yahudi aseuli. Yahudi nyang meubasa Yunani nyan jipeugah, "Ureuëng-ureuëng inong kamoe nyang ka jeuet keu inong balée hana meuteumé bantuan biaya udeb siuroe-uroe nyang jibagi-bagi keu ureuëng laén." 2 Ngon sabab nyan, mandua blaih droe rasui nyan jipeusapat mandum murit geuh dan laju geupeugah bak awaknyan, "Hana gét kamoe piôh kamoe meudakwah keu feureuman Allah, sabab harôh kamoe urôh soai peunajoh. 3 Ngon nyan, gét kheueh lamkawan gata gata piléh tujoh droe nyang na nan jih gét dan jikuasa lé Roh Allah lom bijaksana, nyang jeuet kamoe bri tugaih jiatoe keuhai-hai nyoe; 4 Sabab kamoe keuneuk meudoá dan kamoe peusampoe feureuman Allah mantong." 5 Banmandum ureuëng nyan situju deungon usui lé rasui-rasui nyan. Laju awaknyan jipiléh Stefanus, ureuëng nyang peucaya that keu Isa dan jikuasa lé Roh Allah. Meunan cit teupiléh: Filipus, Prokhopus, Nikanor, Timon, Parmenas, dan Nikolaus nibak Antiokhia; ureuëng nyan bukon ureuëng Yahudi teuma ka jitamong lam agama Yahudi. 6 Ban tujoh droe awaknyan laju jiusui ubak rasui-rasui, laju rasui-rasui nyan jimeudoá dan jilakée beureukat Tuhan keu awaknyan. 7 Meunan kheueh haba nibak Po teu Allah seumaken meutabu dan murit-murit Isa di Yerusalem pih maken meutamah ramé. Dan le that teuma Imeum-imeum nyang meuiman ubak Isa. 8 Stefanus jai that geubri beureukat lé Po teu Allah, deungon nyan, jihnyan jai that-that jipeuna buet-buet nyang ajaéb dan hai-hai nyang luwabiasa lamkawan manusia. 9 Teuma na cit ureuëng-ureuëng nyang hana jigalak geuh nyan; awaknyan na kheueh anggota-anggota rumoh iébadat nyang jiboh nan Rumoh Iébadat Ureuëng-ureuëng Beubaih. Anggota-anggota rumoh iébadat nyan na kheueh ureuëng Yahudi nibak Kirene dan Iskandariah. Awaknyan ngon ureuëng-ureuëng Yahudi nibak Kilikia dan Asia jimeudebat ngon Stefanus. 10 Teuma awaknyan hana hase jibantah peue nyang jipeugah lé Stefanus, sabab Roh Allah geubri ubak jihnyan keubijaksanaan keu jipeugah haba. 11 Ngon sabab nyan awaknyan laju jisogok na padub droe ureuëng mangat jitem peugah, "Na kamoe deungoe ureuëng nyan jihina Nabi Musa dan Allah!" 12 Meunan kheueh cara jih awaknyan jipeusuna ureuëng ramé, dan peumimpén-peumimpén Yahudi, meunan cit ngon gurée-gurée agama. Laju awaknyan jijak drob Stefanus, óh lheueh nyan jiba Stefanus nyan ubak Mahkamah Agama. 13 Meunan cit awaknyan jipeuhadab saksi-saksi nyang jibri keuteurangan nyang hana beutôi keuhai Stefanus. Saksi-saksi nyan jipeugah, "Ureuëng nyoe sabe jihina Baét Allah nyang suci dan jihina peurintah-peurintah Allah nyang jipeusampoe lé Nabi Musa. 14 Kamoe ka kamoe deungoe jihnyan meututoe, bahwa Isa nibak Nazaret nyan teuma jireulôh Baét Allah nyoe, laju jiubah adat istiadat nyang geupeutreun lé Nabi Musa keu geutanyoe!" 15 Mandum ureuëng nyang na teuka lam sidang Mahkamah Agama nyan jikalon ateueh Stefanus. Dan bak watée nyan muka Stefanus deuh jih lagée muka malaikat.

Kisah Rasui-Rasui 7

1 Imeum Agong jitanyong bak Stefanus, "Peu kheueh mandum nyang jipeugah lé gob nyan beutôi?" 2 Jaweueb Stefanus, "Syedara-syedara, dan Bapak-bapak! Cuba deungoe ulôn peugah! Sigohlom indatu geutanyoe Nabi Ibrahim minah u Haran, watée gobnyan mantong tinggai di Mesopotamia, Allah nyang mulia geujak ubak gobnyan 3 dan geupeugah, 'Tinggai kheueh laju nanggroe gata dan waréh kawöm ngon keuluwarga gata. Jak kheueh laju u nanggroe nyang ulôn tunyok keu gata.' 4 Deungon nyan, Nabi Ibrahim laju geutinggai nanggroe Kasdim, laju geuminah u Haran. Óh ka lheueh ureuëng syiek Nabi Ibrahim nyan meuninggai donya, Allah geuyue bak Nabi Ibrahim mangat geuminah u nanggroe nyoe nyang syedara-syedara dan Bapak-bapak mandum duek bak saát nyoe. 5 Bak watée nyan hana mubacut pih nibak nanggroe nyang Allah jok keu Nabi Ibrahim mangat jeuet keu hak milék Nabi Ibrahim; meusitapak tanoh pih hana geubri keu gobnyan. Teuma Po teu Allah geumeujanji Gobnyan teuma geubri keu Nabi Ibrahim mangat jeuet keu hak milék Nabi Ibrahim dan keuturonan gobnyan. Watée nyan Nabi Ibrahim hana meu aneuëk. 6 Teuma nyoe kheueh nyang geupeugah lé Allah ubak gobnyan, 'Keuturonan gata teuma tinggai sibagoe ureuëng aséng di nanggroe ureuëng laén. Ureuëng-ureuëng nanggroe nyan jijajah awaknyan dan jipeusaneut awaknyan ngon keujam peuet reutôh thon treb jih. 7 Lé Ulôn teuma Lôn huköm bansa nyang jipeujeuet keu namiet awaknyan, dan awaknyan teuma jiteubiet lam nanggroe nyan dan jiseumah Ulôn nibak teumpat nyoe.' 8 Óh ka lheueh geupeugah meunan ikatan janji nyan laju geupeusah lé Po teu Allah ngon upacara meusunat. Teuma óh lheueh Nabi Ishaq, aneuëk Nabi Ibrahim lahé, Nabi Ibrahim geupeusunat aneuëk geuhnyan watée aneuëk nyan meu-umu lapan uroe. Óh lheueh nyan Nabi Ishaq pih geupeusunat teuma aneuëk gobnyan, na kheueh Nabi Yakub. Dan Nabi Yakub pih geupeusunat teuma ban dua blaih droe aneuëk gobnyan, nyan kheueh nyang jeuet keu bapak-bapak indatu bansa Yahudi. 9 Bapak-bapak indatu geutanyoe nyan ceumuru keu Nabi Yusuf, sampoe awaknyan laju jipeubloe gobnyan jeuet keu namiet di nanggroe Meusé. Teuma Allah teutab na meusajan gobnyan, 10 dan geupeubeubaih gobnyan nibak mandum salah gobnyan. Allah geubri bak awaknyan budho dan keubijaksanaan watée gobnyan geujak meuhadab ukeue Firaun raja nanggroe Meusé, sampoe lé raja Firaun jipeujeuet gobnyan keu gubunur nanggroe Meusé dan jeuet keu nyang mat kuasa ateueh meuligoe raja Firaun. 11 Óh lheuehnyan teuka masa musém deuk nyang paleng panyang parah dan treb that di nanggroe Meusé meunan cit nanggroe Kanaan sampoe bubena peunduduek meudeurita lumpah na. Indatu geutanyoe hana hase jiteumé peunajoh. 12 Watée Nabi Yakub geudeungoe na gandom di nanggroe Meusé laju geuyue aneuëk-aneuëk gobnyan, indatu geutanyoe, geujak keudeh keu nyang keu phon. 13 Watée awaknyan geujak nyang keudua goe, Nabi Yusuf laju geupeugah bak syedara-syedara gobnyan, bahwa gobnyan na kheueh Nabi Yusuf. Barô kheueh watée nyan raja nanggroe Meusé jiteupeue keuhai keuluwarga Nabi Yusuf. 14 Óh lheueh nyan Nabi Yusuf geukirém haba ubak ayah gobnyan, na kheueh Nabi Yakub, keu geulakée gobnyan meusajan mandum keuluwarga geuh minah u nanggroe Meusé -- banmandum na tujoh ploh limong droe. 15 Teuma Nabi Yakub laju geuminah u nanggroe Meusé dan disinan kheueh gobnyan ngon indatu tanyoe nyang laén meuninggai donya. 16 Manyét gobnyan óh lheueh nyan jiba lom teuma u Sikhem laju jikubu bak lampôh jrat nyang geubloe ngon sijeumeulah péng lé Nabi Ibrahim dan sukée bansa Hemor di Sikhem. 17 Watée karab trok tempo jih Allah geupeutrok janji Gobnyan keu Nabi Ibrahim, bansa geutanyoe di nanggroe Meusé ka meutamah le. 18 Akhé jih sidroe raja laén nyang hana jituri Nabi Yusuf, jimat peurintah di nanggroe Meusé. 19 Raja nyan jihina bansa geutanyoe dan keujam that-that ateueh indatu geutanyoe. Raja nyan jipaksa bak indatu geutanyoe mangat tieb-tieb aneuëk nyang lahé jiyue tiek dan jipeubiyeu teulanta dan maté. 20 Bak watée nyang lagée nyan nabi Musa lahé; gobnyan aneuëk manyak nyang paleng ceudah. Lhée buleuen treb jih gobnyan jipeulara di rumoh bapak jih, 21 dan óh ka lheueh gobnyan jitiek, putroe raja Firaun nyan laju jicok gobnyan dan jipeulara gobnyan lagée aneuëk jih keudroe. 22 Banmandum iéleumé bansa Meusé jipeurunoe keu gobnyan dan gobnyan jeuet keu ureuëng nyang paleng meukuasa nibak tutoe haba dan buet gobnyan. 23 Watée Nabi Musa meu-umu peuet ploh thon, teuka kheueh niet lam até gobnyan keu geujak kalon keuadaan bansa gobnyan ureuëng Israel. 24 Laju geukalon lé Nabi Musa sidroe lamkawan ureuëng Israel nyan ji iénanya lé sidroe ureuëng Meusé; teuma gobnyan laju geubila ureuëng nyang keunong iénanya nyan ngon cara geupoh maté ureuëng Meusé nyan. 25 Nabi Musa geusangka bansa geuhnyan muphom bahwa gobnyan teungoh geupeu guna lé Allah keu geupeu beubaih awaknyan. Teuma teunyata awaknyan hana jiteupeue. 26 Óh singoh beungoh geukalon teuma na dua droe ureuëng Israel teungoh jimeulo, laju geu-useuha geupeu damé awaknyan. Gobnyan geupeugah, 'Gatanyoe meusyedara, pakon jeuet gata meulo?' 27 Teuma lé ureuëng poh rakan jih nyan laju jitulak Nabi Musa bak binéh sira jipeugah, 'Soe nyang beuot gata jeuet keupeumimpén dan hakém kamoe? 28 Peu kheueh gata keuneuk poh maté ulôn lagée gata poh maté ureuëng Meusé nyan baroe?' 29 Watée Nabi Musa geudeungoe peue nyang jipeugah lé ureuëng nyan, Nabi Musa geuplueng nibak nanggroe Meusé dan geutinggai laju di Midian. Disinan gobnyan geumeu aneuëk teuma dua droe. 30 Peuet ploh thon teuma óh lheueh nyan sidroe malaikat geujak bak Nabi Musa di padang pasi rab ngon Gunong Sinai. Malaikat nyan teuka lam apui nibak tamah nyang teungoh hu. 31 Nabi Musa hireuen watée geukalon hai nyan, sampoe gobnyan laju geupeurab keunan leubeh tô lom mangat geuteupeue peue nyang sibeuna jih nyan. Laju geudeungoe su Tuhan nyang geupeugah, 32 'Ulôn kheueh Allah indatu gata; Ulôn Allah Nabi Ibrahim, Nabi Ishaq dan Nabi Yakub.' Nabi Musa yo ngon teumakot that sampoe gobnyan hana geujeuet kalon le lam tamah nyan. 33 Óh lheueh nyan Tuhan meufeureuman lom, 'Suet laju seulob nyang gata ngui nyan, sabab tanoh bak teumpat gata dong nyan na kheueh tanoh nyang suci. 34 Ulôn ka Ulôn kalon dan Lôn peurati pakriban phet jih umat Ulôn di nanggroe Meusé. Ulôn ka Lôn deungoe apoh apah awaknyan dan Ulôn treun keu Lôn jak tulông awaknyan. Jinoenyoe, jak keunoe! Ulôn Lôn kirém gata lom teuma u nanggroe Meusé.' 35 Nabi Musa nyoe kheueh nyang hana jiaku lé bansa Israel dan nyang jitulak ngon haba lagée nyan, 'Soe nyang ka beuot droeneueh jeuet keu peumimpén dan hakém kamoe?' Teuma nyang sibeuna jih gobnyan kheueh nyang geu-utus lé Allah keu jeuet keu peumimpén dan peuseulamat, ngon geutulông lé malaikat nyang teuka ubak gobnyan lam tamah nyang teungoh hu nyan. 36 Nabi Musa nyan kheueh nyang pimpén bansa Israel geupeuteubiet nibak nanggroe Meusé ngon geupeuna buet-buet nyang ajaéb dan hai-hai nyang luwabiasa di Meusé, di Laôt Mirah dan di padang pasi nyang treb jih na peuet ploh thon. 37 Nabi Musa nyan cit teuma nyang peugah bak bansa Israel, 'Allah geubri keu gata sidroe Nabi nyang geupiléh lamkawan gata keudroe, saban lagée Gobnyan geupiléh ulôn.' 38 Nabi Musa kheueh nyang lamkawan bansa Israel di padang pasi, jeuet keupeurantara keu malaikat nyang meututoe ngon gobnyan di Gunong Sinai ngon indatu geutanyoe. Gobnyan kheueh nyang teurimong nibak Po teu Allah haba nyang udeb keu geupeusampoe ubak geutanyoe. 39 Bah kheueh ka meunan indatu geutanyoe teutab hana taát keu gobnyan. Awaknyan jitulak gobnyan dan meuharab that jikeuneuk gisa u nanggroe Meusé. 40 Awaknyan jipeugah bak Nabi Harun, 'Peugét kheueh dewa-dewa keu kamoe, mangat dewa-dewa nyan jeuet jipimpén kamoe. Sabab kamoe ka hana kamoe teupeue le peue nyang teujadi ngon Nabi Musa nyan nyang ka jiba kamoe jipeuteubiet nibak nanggroe Meusé!' 41 Laju bak watée nyan awaknyan jipeuget saboh patong aneuëk leumô, óh lheueh nyan awaknyan jipeuseumah keureubeuen bak patong nyan dan jipeuna khanuri keu jipujoe barang nyang jipeuget keudroe. 42 Ngon sabab nyan Allah geutinggai awaknyan geupeubiyeu mantong awaknyan jiseumah bintang-bintang nyang na di langét. Nyan sisuai ngon peue nyang ka teutuléh lam kitab Nabi-nabi. Legée nyoe, 'Hai ureuëng-ureuëng Israel! Bukon keu Ulôn gata sie dan gata peuseumah keureubeuen beulatang nyang treb jih peuet ploh thon lam padang pasi. 43 Khimah beurala Molokh kheueh nyang gata ba-ba meusajan-sajan ngon patong beurala gata, na kheueh Refan; nyan kheueh patong nyang gata peuget keu gata seumah. Ngon sabab nyan ulôn teuma lôn böih gata sampoe jiôh u meurandeh nibak nanggroe Babel.' 44 Khimah teumpat Allah teuka ubak manusia na meuteumé bak indatu geutanyoe di padang pasi. Khimah nyan teupeuget ateueh peurintah Po teu Allah ubak Nabi Musa dan meunurot cuntoh nyang geupeuleumah lé Allah bak Nabi Musa. 45 Óh lheuehnyan khimah nyan seulanjut jih jiba lé indatu tanyoe bak watée awaknyan ngon Yosua geujak reubot nanggroe geutanyoe nyoe nibak keukuasaan bansa-bansa nyang geu-use lé Po teu Allah dikeue awaknyan. Khimah nyan teutab na disinan sampoe bak jamén Nabi Daud. 46 Nabi Daud galak that até Allah dan geulakée bak Gobnyan mangat geupeu idhin geupeuget saboh Baét keu Allah nyang geuseumah lé Nabi Yakub. 47 Teuma Nabi Sulaiman kheueh nyang peudong Baét keu Allah. 48 Teuma lé Allah Nyang Maharayeuk hana geutem tinggai lam Baét nyang dipeuget lé manusia; sabab lam kitab Nabi na teutuléh lagée nyoe, 49 'Langét na kheueh takhta Ulôn, dan bumoe lapek gaki Lôn. Rumoh peu kheueh nyang keuneuk gata peudong keu Ulôn? Dipat kheueh teumpat Ulôn meupiôh? 50 Bukon kheueh Ulôn keudroe nyang peujeuet banmandum nyang na nyoe?' meunan kheueh feureuman Allah. 51 Hana tanggong biet-biet kreueh that ulée syedara-syedara banmandum dan biet-biet that payah gata taát ubak Po teu Allah! Punyueng gata ka tulo that mangat tatem deungoe peue nyang geupeugah lé Allah! Gata mandum saban lagée indatu gata; sabe talawan Roh Allah! 52 Peu kheueh na nabi nyang hana ji iénanya lé indatu gata? Awaknyan jipoh maté asai na utosan-utosan nyang geukirém lé Po teu Allah nyang yoh masa ilée ka geupeu maklum bahwa hamba Allah nyang beuna nyang teuma teuka. Dan bak watée nyoe gata khianat dan gata poh maté Hamba Allah nyan. 53 Malaikat-malaikat ka geupeusampoe peurintah-peurintah Allah ubak gata teuma gata hana tatem seutôt!" 54 Meunan jideungoe banmandum lé anggota-anggota Mahkamah Agama tutoe haba Stefanus nyan, awaknyan sakét até dan beungéh lumpah na keu Stefanus. 55 Teuma Stefanus nyang geukuasa lé Roh Allah, laju jitangah u langét. Laju deuh jikalon keumuliaan Allah dan Isa geudong bak teumpat Gobnyan meukuasa blaih uneuen Allah. 56 "Ngieng," kheun Stefanus, "Deuh ulôn kalon syeuruga teubuka dan Aneuëk Manusia siblaih uneuen Allah!" 57 Anggota-anggota Mahkamah Agama nyan laju jitôb punyueng jih sira jiklik-klik, dan laju ngon sireuntak jitajoe ateueh Stefanus. 58 Awaknyan jibahue gobnyan uluwa banda óh lheueh nyan laju jirhom ngon batée. Ureuëng-ureuëng nyang kalon keujadian nyan laju jikeubah peukayan awaknyan bak sidroe aneuëk muda nyang nan jih Saulus. 59 Teungoh awaknyan jirhom Stefanus, Stefanus geuteumawök, "Tuhan Isa, teurimong kheueh roh ulôn!" 60 Laju Stefanus nyan jimeuteuôt sira jidumpék ngon su meutaga, "Tuhan, bék kheueh desya nyoe jitanggong ateueh awaknyan!" Óh lheueh jipeugah meunan Stefanus pih maté.

Kisah Rasui-Rasui 8

1 Dan Saulus pih galak that ateueh teupoh maté Stefanus nyan. Uroe nyan cit teuma jeumaáh di Yerusalem ka jipeulet keudeh keunoe, akhé jih mandum ureuëng meuiman, keucuali rasui-rasui, ka meutabu bansaboh Yudea dan Samaria. 2 Ureuëng-ureuëng nyang teumakot keu Po teu Allah jipeukubu Stefanus dan jipeumo ba-e ngon lumpah that inseuh. 3 Teuma Saulus teutab hana jipiôh jiuseuha jipeuhanco jeumaáh. Jijak nibak rumoh saboh u rumoh laén laju jitarek uluwa ureuëng-ureuëng meuiman, dan laju jipeutamong lam glab. 4 Ureuëng-ureuëng meuiman nyang ka meutabu nyan laju jipeusampoe Haba Gét nibak Allah nyan ho-ho mantong. 5 Filipus laju jijak u banda Samaria jipeusampoe disinan keuhai Raja Peuseulamat nyang ka geupeu janji lé Po teu Allah. 6 Watée ureuëng-ureuëng disinan jideungoe Filipus peugah haba dan awaknyan jikalon buet-buet nyang ajaéb nyang jipeubuet lé Filipus nyan, jai that nibak awaknyan nyang jipeurati peue nyang jipeugah lé Filipus. 7 Sabab roh-roh jeuhet ka jiteubiet ngon jiklik-klik lam tuboh ureuëng ramé nyang ka jitamong jén. Ureuëng nyang lapée dan capiek pih jai that-that nyang jipeupuléh. 8 Ngon lagée nyan ureuëng-ureuëng nyang na lam banda Samaria pih galak lumpah na. 9 Lam banda nyan na sidroe ureuëng agam nyan nan jih Simon, nyang ka padub na treb jih jipeujeuet ureuëng-ureuëng Samaria hireuen ngon takjob keu iéleumé sihe jih. Jihnyan jipeugah bak awaknyan bahwa droe jih na kheueh ureuëng nyang luwabiasa. 10 Ngon lagée nyan mandum ureuëng nyang na lam banda nyan nibak meubagoe lapesan masyarakat biet that-that jipeurati ureuëng nyan. "Ureuëng nyoe na kheueh teunaga Allah nyang meusyeuhu sibagoe 'Teunaga Rayeuk' nyan," kheun awaknyan. 11 Ka treb that ureuëng nyan jipeuhireuen manusia ngon teunaga sihe jih, sampoe lé ureuëng-ureuëng Samaria that-that teupeusona ateueh keuhebatan ureuëng nyan. 12 Teuma Filipus geupeugah bak awaknyan keuhai Haba Gét soai pakriban Allah teuma geumat peurintah sibagoe raja dan keuhai Isa, Raja Peuseulamat nyan. Ngon lagée nyan awaknyan jipeucaya keuhai haba nyang jipeusampoe lé Filipus, laju awaknyan teupeumanö bah kheueh ureuëng agam meunan cit ngon ureuëng inong. 13 Simon keudroe pih jipatéh. Dan óh ka lheueh teupumanö, jihnyan laju jiseutôt Filipus. Buet-buet ajaéb nyang jipeubuet jeuet keu sabab Simon teuhireuen-hireuen. 14 Rasui-rasui nyang na di Yerusalem jideungoe bahwa ureuëng-ureuëng Samaria ka jiteurimong feureuman Allah. Ngon sabab nyan awaknyan laju jiyue jak Petrus dan Yahya u Samaria nyan. 15 Watée Petrus dan Yahya ka trok keunan, awaknyan laju meudoá keu ureuëng-ureuëng Samaria nyan mangat awaknyan meuteumé Roh Allah, 16 sabab, Roh Allah gohlom teuka geukuasa ateueh awaknyan meusidroe pih; awaknyan ban teupumanö ateueh nan Tuhan Isa. 17 Laju Petrus ngon Yahya geupeuduek jaroe geuhnyan ateueh ureuëng-ureuëng Samaria nyan; ngon lagée nyan awaknyan ka jiteurimong Roh Allah. 18 Simon jikalon bahwa jaroe rasui-rasui geupeuduek ateueh awaknyan, Roh Allah geubri keu awaknyan. Ngon sabab nyan Simon jiba péng bak Petrus dan Yahya, 19 laju jipeugah, "Neubri kheueh keu ulôn kuasa nyan mangat jeuet jaroe ulôn lôn peuduek ateueh soe mantong, ureuëng nyan pih jiteurimong Roh Allah." 20 Teuma Petrus geujaweueb, "Ceulaka kheueh gata dan péng gata nyan! Gata pike meuneubri Allah hase teubloe ngon péng? 21 Gata hana hak keu gata seutôt lam buet kamoe, sabab até gata hana beutôi keu Po teu Allah. 22 Ngon sabab nyan tinggai kheueh meukeusut gata nyang jeuhet nyan, dan lakée kheueh ubak Tuhan mangat Gobnyan geupeu amphon pikeran gata nyang jeuhet nyan! 23 Sabab ulôn kuteupeue gata peunoh ngon até nyang picék lom bingiek lumpah na dan jipeunamiet lé buet nyang jeuhet." 24 Laju Simon jipeugah bak Petrus dan Yahya, "Tulông kheueh lakée bak Tuhan mangat hana meubacut pih nyang droeneueh peugah nyan keunong ateueh ulôn." 25 Óh ka lheueh awaknyan geubri keusaksian dan geupeusampoe feureuman Tuhan, Petrus dan Yahya laju jigisa u Yerusalem. Bak teungoh rot ueh, awaknyan laju jipeusampoe Haba Gét nyan di gampông-gampông Samaria. 26 Sidroe malaikat Tuhan geupeugah bak Filipus, "Jak tajak! Jak kheueh laju u arah seulatan bak rot nyang meusambong Yerusalem ngon Gaza." Rot nyan seungue. 27 Teuma Filipus pih laju jijak. Bak watée nyan na sidroe peugawée meuligoe Etiopia nyang teungoh jiwoe u nanggroe jih. Ureuëng nyan na kheueh sidroe peugawée rayeuk nyang meutanggong jaweueb ateueh mandum keukayaan Kandake, ratu nanggroe Etiopia. Ureuëng nyan ka lheueh jijak u Yerusalem keu jijak meubakti bak Po teu Allah dan jinoenyoe teungoh jiwoe ngon geuritan jih. Teungoh jiduek lam geuritan jih nyan ureuëng nyan jibeuet Kitab Nabi Yesaya. 29 Roh Allah geupeugah bak Filipus, "Gata peurab kheueh laju bak geuritan nyan." 30 Teuma Filipus laju geupeurab bak geuritan nyan, dan laju jideungoe ureuëng nyang teungoh jibeuet Kitab Yesaya. Filipus jitanyong bak ureuëng nyan, "Peu kheueh Teungku muphom nyang teungku beuet nyan?" 31 Ureuëng nyan jijaweueb, "Pakriban ulôn muphom, meunyoe hana ureuëng nyang peutrang keu ulôn?" Laju jipakat Filipus jiek ateueh geuritan nyan óh lheueh nyan laju jibeuet meusajan-sajan. 32 Nyoe kheueh ayat nyang jibeuet nyan, "Jihnyan lagée bubiri nyang jiseutôt keu jijak sie, lagée aneuëk bubiri nyang hana ji meu mbéek watée bulée jih teugunteng, meunan kheueh jihnyan hana jipeugah meusikrek haba pih. 33 Jihnyan jihina jipeusaneut ngon hana ade. Nyawöng jihnyan teutarek nibak ateueh muka bumoe sampoe meusidroe pih hana nyang hase jicalitra keuhai keuturonan Jih." 34 Peugawée tinggai nanggroe Etiopia nyan jipeugah bak Filipus nyan, "Cuba gata peugah bak ulôn, soe nyang jimeukeusut lé Nabi nyoe? Droe jih keudroe atawa peu kheueh ureuëng laén?" 35 Teuma Filipus pih laju jipeuphon peugah haba; gobnyan geupeu guna ayat-ayat nyan sibagoe awai geupeusampoe Haba Gét keuhai Isa bak peugawée nyan. 36 Bak teungoh rot ueh sira jijak nyan, awaknyan laju trok bak saboh teumpat nyang na ié. Peugawée nyan jipeugah, "Ngieng, jéh pat na ié! Peue lom nyang kureueng keu droeneueh pumanö ulôn?" 37 Geupeugah lé Filipus, "Meunyoe Teungku neupeucaya ngon sipeunoh até, Teungku jeuet teupumanö." "Ulôn peucaya keu Isa na kheueh Aneuëk Allah," kheun peugawée rayeuk nibak nanggroe Etiopia nyan. 38 Ureuëng nyan laju jiyue piôh geuritan jih; óh lheueh nyan awaknyan mandua, Filipus dan peugawée nyan, laju jitron lam ié, Filipus laju geupumanö ureuëng nyan. 39 Watée awaknyan jiteubiet nibak lam ié, Roh Allah laju geucok Filipus nibak teumpat nyan. Peugawée rayeuk nibak Etiopia nyan hana deuh le jikalon gobnyan. Ngon até that-that galak peugawée nyan laju jijak lom teuma. 40 Ngon hana teusangka-sangka Filipus ka na di Asdod, dan watée gobnyan geujak lom teuma, gobnyan laju geupeusampoe Haba Gét keuhai Isa nibak mandum banda sampoe gobnyan trok u Kaisarea.

Kisah Rasui-Rasui 9

1 Watée nyan Saulus teutab jipeucrok ngon jipeulet dan jikeuneuk poh maté murit-murit Tuhan Isa, laju jijak ubak imeum agong, 2 dan jilakée surat kuasa keu jijak ubak peumimpén rumoh-rumoh iébadat ureuëng Yahudi di Damsyik, deungon nyan meunyoe jiteumé ureuëng-ureuëng nyang ka jipeucaya keu Isa bak teumpat nyan, jeuet jidrob dan jiba awaknyan u Yerusalem. 3 Teungoh jijak u Damsyik, watée Saulus nyan ka tô ngon banda nyan, ngon hana jisangka-sangka cahya nyang teuka ateueh langét ka peungéh ban sikeulileng Saulus. 4 Saulus nyan laju reubah bak tanoh dan laju jideungoe su nyang jipeugah bak jihnyan, "Saulus, Saulus! Peue sabab gata taiénanya Ulôn?" 5 "Soe kheueh Droeneueh, Teungku?" tanyong Saulus. Su nyan jijaweueb, "Ulôn kheueh Isa, nyang gata iénanya. 6 Teuma jinoenyoe beudôh kheueh dan jak tamong kheueh lam banda. Disinan teuma teupeugah bak gata peue nyang harôh gata peubuet." 7 Ureuëng-ureuëng nyang jiseutôt meusajan ngon Saulus teukeujot sampoe awaknyan hana jeuet jipeugah haba; sabab awaknyan jideungoe su nyan teuma hana deuh jikalon meusidroe pih. 8 Laju Saulus jidong dan jibleuet mata, teuma mata jih nyan hana hase jipeubleuet dan hana hase jikeumalon peue-peue mantong. Teuma lé rakan-rakan jihnyan laju jimat bak jaroe dan jipapah jipeutamong lam banda Damsyik. 9 Lhée uroe treb jih Saulus nyan hana hase jikeumalon dan lhée uroe nyan teuma hana jimakheun dan hana jijieb ié. 10 Di Damsyik na sidroe ureuëng nyang ka peucaya keu Isa nyang nan jih Ananias. Deuh lam saboh keumalon, Tuhan geupeugah bak jihnyan, Tuhan meufeureuman, "Ananias!" Ananias jijaweueb, "Nyoe lôn, Tuhan." 11 Tuhan meufeureuman, "Jinoe gata jak laju u rumoh Yudas bak Rot nyang Tupat. Gata tanyong laju disinan pat Saulus nyang asai jih nibak banda Tarsus. Ureuëng nyan teungoh meudoá, 12 dan lam saboh keumalon deuh jingieng sidroe ureuëng agam, nyang nan jih Ananias, jijak bak ureuëng nyan dan jipeuduek jaroe jih ateueh ureuëng nyan mangat jeuet jihnyan hase jikeumalon lom teuma." 13 Ananias jijaweueb, "Tuhan, ulôn ka lôn deungoe jai that keuhai ureuëng nyoe, keuhai buet-buet jih nyang ji iénanya umat Droeneueh di Yerusalem. 14 Dan jinoenyoe jihnyan ka meuteumé idhin nibak imeum-imeum ulée jijak drob mandum ureuëng nyang peucaya keu Droeneueh." 15 Teuma Tuhan geupeugah bak Ananias, "Gata mantong! Sabab Ulôn ka Lôn piléh jihnyan keu jilayani Ulôn, mangat jihnyan jijak peusampoe keuhai Ulôn ubak bansa-bansa nyang hana meu agama Yahudi meunan cit ubak raja-raja dan umat Israel. 16 Dan Ulôn keudroe teuma Lôn tunyok bak jihnyan mandum deurita nyang harôh jirasa sabab Ulôn." 17 Teuma Ananias pih laju jijak u rumoh nyan laju jipeuduek jaroe jih ateueh Saulus. "Syedara Saulus," kheun Ananias, "Tuhan Isa nyang gata kalon bak teungoh rot ueh watée gata jak keunoe, Gobnyan kheueh nyang yue jak ulôn bak gata mangat gata jeuet gata keumalon lom dan jikuasa lé Roh Allah." 18 Watée nyan cit teuma na sijeuneh beunda lagée sisek eungkot leukang nibak mata Saulus dan gobnyan ka jeuet jikeumalon lom teuma. Dan Saulus pih jibeudôh, laju teupumanö. 19 Dan óh ka seuleusoe jimakheun, Saulus ka jeuet keuteuga lom teuma. Saulus tinggai di Damsyik ngon murit-murit Isa na padub uroe treb jih. 20 Saulus nyan laju jijak bak rumoh-rumoh iébadat dan bak teumpat nyan laju jiseumeubeuet bahwa Isa nyan na kheueh Aneuëk Allah. 21 Mandum ureuëng hireuen jideungoe Saulus. Awaknyan jipeugah, "Bukon kheueh jihnyoe nyang di Yerusalem ka jipoh maté mandum ureuëng meuiman keu Isa? Jihnyan jijak keunoe sapeue tujuan jih na kheueh jikeuneuk jakdrob dan jiba awaknyan ubak imeum-imeum ulée!" 22 Teuma Saulus maken treb maken teuga peungaroh jih. Bukeuti-bukeuti nyang jipeugah nyan keuhai Isa biet-biet yakén that ureuëng nyang deungoe bahwa Isa nyan kheueh Raja Peuseulamat, sampoe ureuëng-ureuëng Yahudi nyang na di Damsyik hana hase le jibantah. 23 Óh ka na padub watée treb jih ureuëng-ureuëng Yahudi ka sipakat keu jikeuneuk poh maté Saulus. 24 Teuma reuncana awaknyan jiteupeue lé Saulus. Uroe malam awaknyan jipreh Saulus bak babah pintoe geureubang banda keu jipoh maté gobnyan. 25 Teuma bak simalam, murit-murit Saulus jicok gobnyan, laju jipasoe lam saboh raga oh lheueh nyan jipeutreun rot beuton banda. 26 Saulus jijak u Yerusalem, disinan gobnyan meu-useuha meugumpôi ngon murit-murit Isa. Teuma awaknyan jitakot keu gobnyan, sabab awaknyan hana jipatéh bahwa geuh nyan biet-biet ka jeuet keu murit Isa. 27 Óh lheueh nyan Barnabas jijak meurumpok ngon Saulus, laju jiba gobnyan ubak rasui-rasui. Barnabas laju jipeugah bak awaknyan keuhai pakriban Saulus jikalon Tuhan bak teungoh rot euh dan pakriban Tuhan geumeututoe ngon gobnyan. Barnabas pih geupeugah pakriban beuhe jih Saulus nyoe jipeubeuet ureuëng di Damsyik ngon nan Isa. 28 Ngon sabab nyan Saulus tinggai ngon awaknyan, dan meukhutubah ngon beuhe that bansaboh Yerusalem ngon nan Tuhan. 29 Gobnyan meututoe dan meudebat ngon ureuëng-ureuëng Yahudi nyang meubasa Yunani, teuma awaknyan jiuseuha keuneuk poh maté gobnyan. 30 Watée ureuëng-ureuëng meuiman nyang laén jiteupeue keuhai nyan, awaknyan laju jiba Saulus u Kaisarea, óh lheueh nyan jikirém gobnyan u Tarsus. 31 Ngon lagée nyan jeumaáh nyang na bansaboh Yudea, Galilea, dan samaria ka jeuet keu aman. Geutulông lé Roh Allah, ngon teumakot ubak Tuhan, jeumaáh-jeumaáh nyan meutamah teuga lom meutamah le. 32 Petrus jijak bansaboh nyan jijak saweue bubena jeumaáh. Bak siuroe gobnyan geujak saweue umat Tuhan di Lida. 33 Disinan gobnyan meurumpok ngon sidroe ureuëng agam nyang nan jih Eneas, nyang lapée dan hana jibeudôh-beudôh nibak teumpat éh na lapan thon ka treb jih. 34 Petrus geupeugah bak Eneas, "Eneas, Isa geupeu puléh gata. Beudôh kheueh dan peukeumah laju teumpat éh gata." Watée nyan cit teuma Eneas jibeudôh. 35 Banmandum peunduduek di Lida dan Saron jikalon Eneas, laju awaknyan banmandum meuiman ubak Tuhan. 36 Di Yope na sidroe ureuëng inong nyang nan jih Tabita. Inong nyan sidroe ureuëng nyang meuiman ubak Isa. (Nan jih lam basa Yunani na kheueh Dorkas nyang makna jih rusa.) Inong nyan sabe jipeubuet hai-hai nyang jroh dan jitulông ureuëng gasien. 37 Bak watée nyan ureuëng nyan sakét laju meuninggai donya. Óh ka lheueh manyét jih teupumanö, manyét nyan laju jikeubah ateueh kama nyang na di ateueh. 38 Yope nyan hana padub na jiôh nibak Lida. Teuma, watée murit-murit Isa tinggai di Yope jideungoe Petrus na di Lida, awaknyan laju jiutus dua droe keuneuk meurumpok ngon Petrus ngon amanat jih lagée nyoe, "Bubagaih kheueh droeneueh jak keunoe." 39 Petrus laju geubeudôh dan geuseutôt awaknyan. Watée ka trok keudeh, gobnyan laju jiba ubak kama nyang na di ateueh. Banmandum inong balée nyang na disinan jihudom Petrus sira jimoe dan jitunyok bak gobnyan bajée-bajée dan jubah-jubah nyang jicöb lé Dorkas keu awaknyan watée Dorkas nyan mantong udeb. 40 Petrus laju geuyue teubiet uluwa awaknyan banmandum, laju gobnyan meuteuôt dan meudoá. Óh lheueh nyan gobnyan laju geuhadab ubak manyét Dorkas dan geupeugah, "Tabita, beudôh!" Teuma Dorkas laju jibleuet mata jih dan watée nyan cit teuma jikalon Petrus, laju jiduek. 41 Laju lé Petrus jimat jaroe Dorkas nyan sira geupeudong. Óh lheueh nyan Petrus laju geuhôi ureuëng-ureuëng meuiman nyang na disinan meusajan-sajan ngon inong-inong balée nyan, laju geujok Dorkas nyang ka udeb nyan ubak awaknyan. 42 Haba keuhai keujadian nyan bagaih that meutabu bansaboh Yope, akhé jih sampoe jai that-that ureuëng meuiman ubak Isa sibagoe Raja Peuseulamat awaknyan. 43 Petrus na tinggai disinan meupadub uroe teuk treb jih bak rumoh sidroe ureuëng samak kulét nyang nan jih Simon.

Kisah Rasui-Rasui 10

1 Di Kaisarea na sidroe ureuëng agam nyang nan jih Kornelius. Ureuëng nyan sidroe Kapiten "Pasokan Italia". 2 Ureuëng nyan that-that jitakot ubak Po teu Allah dan bansaboh keuluwarga jih meuiébadat bak Allah. Ureuëng nyan kayém that jitulông ureuëng-ureuëng Yahudi nyang gasien, dan ureuëng nyan sabe jimeudoá bak Po teu Allah. 3 Bak siuroe kira-kira poh lhée uroe ureuëng nyan deuh jikalon ngon nyata that nibak saboh keumalon, sidroe malaikat Allah teuka dan jitawök jih nyan, "Kornelius!" 4 Kornelius laju jingieng ateueh malaikat nyan ngon rasa teumakot laju jipeugah, "Peue hai Teungku?" Geujaweueb lé malaikat nyan, "Doá gata dan keuhai murah até gatanyan ka geuteurimong lé Po teu Allah dan Allah geuingat keu gata. 5 Jinoenyoe gata yuejak laju ureuëng u Yope keu jijak hôi Simon Petrus. 6 Ureuëng nyan teungoh jipiôh bak rumoh ureuëng samak kulét nyang nan jih Simon, nyang tinggai bak binéh panté." 7 Óh ka lheueh malaikat nyang meututoe ngon Kornelius nyan geujak, Kornelius laju jitawök dua droe peulayan rumoh jih dan sidroe anggota sidadu peungawai jih nyang saleh. 8 Kornelius laju jicalitra bak awaknyan peue nyang ka teujadi, óh lheuehnyan laju jiyuejak awaknyan u Yope. 9 Óh singoh beungoh, watée awaknyan mantong teungoh jijak dan rab trok u Yope, Petrus jiék ateueh rumoh laju jimeudoá. 10 Dan laju jiteuka deuk meuheuét that keuneuk makheun. Teungoh peunajoh teupeusaneut, jihnyan laju meuteumé saboh keumalon. 11 Laju jikalon langét teuhah deuh jingieng sisuatu lagée ija nyang luwah teusunyueng u bumoe, ijanyan meugantueng bak peuet boh sagoe jih. 12 Lam nyan na mubagoe beulatang nyang meugaki peuet, mubagoe beulatang meulata dan cicém-cicém kleuet. 13 Laju na su nyang jipeugah bak jihnyan, "Petrus, beudôh, sie kheueh dan pajoh!" 14 Jijaweueb lé Petrus, "Hán, Tuhan! Hántom na ulôn pajoh peue-peue mantong nyang hareuem dan kuto." 15 Teuma su nyan jipeugah lom bak jih nyan, "Peue nyang ka geupeugah haleue lé Allah, bék kheueh gata anggab nyan hareuem." 16 Nyang deuh teukalon nyan meu-ulang-ulang sampoe lhée goe, óh lheueh nyan ijanyan laju teubeuôt lam syeuruga. 17 Petrus bingong bak jipike peue makna nyang deuh jikalon. Teungoh Petrus jipike-pike, ureuëng-ureuëng nyang jiyue lé Kornelius laju meurumpok rumoh Simon dan awaknyan kana bak babah pintoe. 18 Laju awaknyan jitawök ureuëng nyan dan jitanyong, "Peu kheueh disinoe na jamé nyang jimudom, nyang nan jih Simon Petrus?" 19 Watée nyan Petrus teutab mantong jiuseuha jipeuwaham peu makna nibak nyang deuh jikalon nyan, Roh Allah geupeugah bak jihnyan, "Hai Petrus, na lhée droe ureuëng teungoh jimita gata. 20 Ta treun laju bubagaih u miyueb dan bék waih-waih gata seutôt awaknyan, sabab Ulôn kheueh nyang yua awaknyan." 21 Teuma Petrus laju jitreun uyueb dan jipeugah bak awaknyan, "Ulôn kheueh nyang awaknyoe mita. Gatanyoe mandum tajak keunoe peuna peureulée?" 22 Jijaweueb lé awaknyan, "Kapiten Kornelius nyang yuejak kamoe keunoe. Gobnyan sidroe ureuëng gét dan geutakot keu Po teu Allah, dan lumpah jihoreumat lé mandum ureuëng Yahudi. Sidroe malaikat Allah geuyue bak gobnyan mangat Teungku jak u rumoh gobnyan, nyan na kheueh sibagoe jeunaweueb ateueh doá gobnyan, gobnyan geuyue deungoe peue nyang teuma Teungku peugah bak gobnyan." 23 Teuma Petrus laju geuyue tamong awaknyan mangat jimudom disinan. Óh singoh nyan Petrus jibeudôh dan laju jijak ngon awaknyan. Na padub droe ureuëng nibak Yope jijak cit ngon awaknyan. 24 Siuroe óh lheueh nyan awaknyan laju trok u Kaisarea. Disinan awaknyan ka jipreh-preh lé Kornelius ngon kawöm syedara jih dan rakan-rakan krab jih nyang ka jihôi. 25 Watée Petrus trok keunan. Kornelius laju jijak sambot gobnyan dan jisujut dikeue gobnyan. 26 Teuma lé Petrus laju jitulông peudong ureuëng nyan, sira jipeugah, "Beudôh kheueh! Ulôn keudroe pih manusia lagée gata." 27 Teungoh geumeututoe ngon Kornelius nyan, Petrus laju geutamong lam rumoh. Disinan laju geukalon jai that-that ureuëng ka meusapat. 28 Laju geupeugah bak awaknyan, "Syedara-syedara keudroe tateupeue bahwa ureuëng Yahudi jitam lé agama jih mangat bék jijak meurumpok atawa meuhubongan ngon ureuëng-ureuëng nibak bansa laén. Teuma Allah ka geutunyok bak ulôn bahwa ulôn hana jeuet lôn anggab soe mantong najih atawa hareuem. 29 Nyang kheueh sabab jih watée Teungku lakée mangat ulôn teuka keunoe, nibak ulôn hana masa-alah. Teuma jinoenyoe keuneuk lôn teupeue keupeue Teungku tayue jak ulôn keunoe." 30 Jijaweueb lé Kornelius, "Lhée uroe nyang ka lheueh, kira-kira watée jih lagée saát nyoe, ulôn teungoh meudoá dirumoh poh lhée seupôt. Ngon hana lôn sangka-sangka sidroe ureuëng agam jidong dikeue ulôn. Peukayan ureuëng nyan meukilat-kilat. 31 Ureuëng nyan jipeugah, 'Kornelius! Allah ka geudeungoe doá gata dan geuingat ateueh keumurahan até gata. 32 Teuma gata yue kheueh mangat ureuëng jijak u Yope keu jijak hôi ureuëng nyang nan jih Simon Petrus. Gobnyan teungoh geu éh bak rumoh sidroe ureuëng nyang buet jih jisamak kulét nyang nan ureuëng nyan Simon; rumoh nyan bak binéh laôt.' 33 Nyang kheueh sabab jih bagaih that lôn yue ureuëng mangat jijak tawök Teungku. Dan Teungku keubiet jroh that até keu neujak keunoe bak watée nyoe kamoe mandum meusapat disinoe dikeue Allah keu kamoe deungoe mandum nyang geupeugah lé Allah mangat hai nyan Teungku peugah bak kamoe." 34 Laju jipeugah lé Petrus, "Jinoenyoe biet-biet ulôn sadar bahwa Allah geupeujeuet mandum manusia saban. 35 Ureuëng nyang takot keu Allah dan peubuet nyang beutôi, ureuëng nyan geuteurimong lé Allah, hana geupakoe ureuëng nyan nibak bansa peue. 36 Syedara-syedara ka tateupeue asoe beurita nyang Allah peusampoe keu bansa Israel. Habanyan na kheueh keuhai Haba Gét keuhai damé meulalu Isa, na kheueh Tuhan mandum manusia. 37 Gata tateupeue peue nyang ka teujadi bansaboh Yudea, na kheueh phon nibak Galilea óh lheueh teupeumanö nyang geuyue lé Nabi Yahya. 38 Gata ka tateupeue bahwa Allah ka geupiléh Isa ureuëng Nazaret nyan dan geubri keu Gobnyan Roh Allah dan kuasa. Meunan cit gata tateupeue bahwa Isa nyan geujak ho-ho mantong keu geupeubuet nyang jroh; Gobnyan geupeu puléh mandum ureuëng nyang ka jikuasa lé Iblih. Sabab Allah na meusajan Gobnyan. 39 Kamoenyoe kheueh ureuëng nyang ka kamoe ngieng keudroe peue-peue mantong nyang ka geupeubuet di nanggroe ureuëng Yahudi dan di Yerusalem. Bah kheueh meunan awaknyan jisaleb dan jipoh maté Gobnyan. 40 Teuma bak uroe nyang keu lhée Allah geupeu udeb Gobnyan lom nibak maté dan geupeudeuh Gobnyan ubak manusia; 41 bukon keu mandum ureuëng, teuma ubak kamoe nyang ka geupiléh lé Allah leubeh ilée beu jeuet keusaksi-saksi Gobnyan. Kamoe makheun dan jieb ié meusajan ngon Gobnyan óh ka lheueh Gobnyan udeb lom nibak maté. 42 Dan Gobnyan geuyue bak kamoe keu kamoe jak peusampoe Haba Gét nyan ubak ureuëng-ureuëng dan kamoe meusaksi bahwa Gobnyan kheueh nyang geuangkat lé Po teu Allah jeuet keu hakém ureuëng-ureuëng nyang mantong udeb dan ureuëng-ureuëng nyang ka maté. 43 Mandum nabi-nabi na geupeugah keuhai Gobnyan. Awaknyan geupeugah bahwa mandum ureuëng nyang meuiman ubak Isa, teuma teupeuamphon desya jih ngon kuasa nibak Isa." 44 Watée Petrus mantong jipeugah haba, Roh Allah geutreun dan geukuasa mandum ureuëng nyang deungoe haba nyan. 45 Ureuëng-ureuëng Yahudi nyang peucaya ubak Isa dan jiseutôt Petrus phon nibak Yope, mandum hireuen watée jikalon bahwa Allah geubri cit Roh Gobnyan keu ureuëng-ureuëng bansa laén nyang bukon bansa Yahudi. 46 Sabab awaknyan jideungoe mandum ureuëng nyan jimututoe lam mubagoe basa dan jipujoe-pujoe keubeusaran Po teu Allah. Laju jipeugah lé Petrus, 47 "Cuba kalon, ureuëng-ureuëng nyoe ka meuteumé Roh Allah saban lagée geutanyoe. Ngon lagée nyan peu kheueh hase ureuëng laén jitam awaknyoe keu teupumanö ngon ié?" 48 Teuma Petrus jiyue awaknyan teupumanö ateueh nan Isa. Óh lheueh nyan awaknyan jilakée mangat Petrus beutinggai ngon awaknyan keu padub uroe treb jih.

Kisah Rasui-Rasui 11

1 Rasui-rasui dan ureuëng-ureuëng meuiman bansaboh Yudea jideungoe bahwa ureuëng-ureuëng nyang hana meuagama Yahudi pih ka jiteurimong feureuman Allah. 2 Óh lheueh nyan watée Petrus geujak u Yerusalem, ureuëng-ureuëng Yahudi nyang ka lheueh jimeuiman nyan, jihina keu Petrus. Awaknyan jipeugah lagée nyoe, 3 "Keupeue gata jak u rumoh ureuëng-ureuëng nyang gohlom teupeukatan? Dan gata makheun teuma meusajan-sajan ngon awaknyan!" 4 Ngon sabab nyan Petrus geupeu trang bak awaknyan mandum nyang ka teujadi, phon nibak awai, Petrus geupeugah, 5 "Ulôn teungoh meudoá di banda Yope, laju deuh ulôn ngieng lam saboh keumalon. Ulôn ngieng laju na sapeue-peue lagée siôn ija nyang luwah teupeutreun nibak langét, meugantung nibak ban peuet boh sagoe jih, óh lheueh nyan laju jipiôh bak binéh ulôn. 6 Watée ulôn kalon u dalam nyan, laju ulôn ngieng beulatang-beulatang nyang meugaki peuet, beulatang-beulatang kleut, beulatang-beulatang nyang jimeu-éue dan cicém-cicém kleut. 7 Óh lheueh nyan laju ulôn deungoe na saboh su nyang jipeugah ubak ulôn, 'Beudôh laju hai Petrus! Sie kheueh laju nyan dan gata pajoh!' 8 Teuma ulôn jaweueb, 'Hánjeuet Tuhan! Gohlom na ulôn makheun peunajoh nyang hareuem atawa najih.' 9 Teuma su nyan geupeugah lom nibak langét, 'Barang nyang ka geupeugah haleue lé Allah bék gata peugah hareuem.' 10 Ulôn ngieng hai nyan sampoe lhée goe dan akhé jih banmandum teubeuôt lom lam syeuruga. 11 Paih bak watée nyan cit teuma ban lhée droe nibak Kaisarea, nyang jiyue jak meurumpok ngon ulôn, trok u rumoh teumpat ulôn éh. 12 Laju Roh Allah geuyue ulôn jak meusajan-sajan ngon awaknyan dan bék na bimbeng. Ban nam droe syedara nyan pih jijak meusajan ngon ulôn u Kaisarea, dan kamoe banmandum kamoe tamong lam rumoh Kornelius. 13 Óh lheueh nyan Kornelius jipeugah bak kamoe pakriban gobnyan jikalon sidroe malaikat jidong dirumoh jih sira jipeugah, 'Gata yue laju ureuëng jijak u Yope keu jijakhôi sidroe ureuëng agam nyang nan jih Simon Petrus. 14 Gobnyan teuma jipeusampoe ubak gata haba keuhai teupeuseulamat gata dan keuluwarga gata.' 15 Dan bak watée ulôn teungoh peugah haba lagée nyan," meunan kheueh Petrus geupeugah lom calitra gobnyan, "Roh Allah geutron ateueh awaknyan, saban lagée nyang teujadi ateueh geutanyoe ilée yoh awaiphon. 16 Laju ulôn teuingat, Tuhan ka lheueh geupeugah, 'Nabi Yahya geupumanö ngon ié, teuma gata teupumanö ngon Roh Allah.' 17 Ngon lagée nyan jeulaih that bahwa Po teu Allah geubri cit ubak ureuëng-ureuëng nyang hana meuagama Yahudi, meuneubri nyang saban geubri keu geutanyoe bak watée geutanyoe tapeucaya ubak Tuhan Isa. Ngon sabab nyan, panena mungken ulôn tam Po teu Allah!" 18 Óh ka lheueh jideungoe nyan, awaknyan hana jibantah le. Laju awaknyan jipujoe Po teu Allah. Awaknyan jipeugah, "Meunyoe meunan, ureuëng-ureuëng nyang bukon Yahudi pih geubri keuseumpatan lé Po teu Allah keu jimeutobat nibak desya-desya jih dan jideungoe udeb nyang seujati!" 19 Óh ka lheueh Stefanus jipoh maté, ureuëng-ureuëng nyang meuiman ubak Isa ka jipeuphon let keudeuh keunoe, akhé jih awaknyan meutabu beba hán meuhô sahoe. Na jiplueng sampoe u Fenisia, dan na teuma nyang sampoe u Siprus dan Antiokhia. Awaknyan laju jipeusampoe haba nibak Allah na kheueh ubak ureuëng-ureuëng Yahudi mantong. 20 Teuma lamkawan ureuëng-ureuëng nyang meuiman nyan, nyang asai jih nibak Siprus dan Kirene, na teuma ureuëng-ureuëng nyang jijak u Antiophia dan jimeudakwah Haba Gét keuhai Isa ubak ureuëng-ureuëng nyang hana meuagama Yahudi cit teuma. 21 Kuasa Tuhan na bak awaknyan sampoe jai that-that ureuëng meuiman dan jiseurah droe ubak Tuhan. 22 Haba keuhaba keuhai peuristiwa nyoe trok cit teuma ubak jeumaáh nyang na di Yerusalem. Ngon lagée nyan awaknyan laju jikirém Barnabas u Antiokhia. 23 Dan watée Barnabas ka trok keudeh, dan jikalon pakriban Allah geubri beureukat ateueh ureuëng-ureuëng nyan, gobnyan galak that-that. Laju jilakée mangat awaknyan biet-biet patuh ubak Tuhan deungon sipeunoh até. 24 Barnabas nyoe na kheueh ureuëng gét até dan jikuasa lé Roh Allah dan that-that jimeuiman ubak Tuhan sampoe meutamah ramé ureuëng jiseutôt Tuhan. 25 Óh lheueh nyan Barnabas jijak u Tarsus jijak mita Saulus. 26 Óh ka lheueh meurumpok ngon Saulus, laju jiba Saulus u Antiokhia na sithon peunoh awaknyan meugumpôi ngon jeumaáh nyang na disinan sira jipeubeuet ureuëng ramé. Di Antiokhia nyan kheueh ureuëng-ureuëng nyang peucaya keu Isa nyang keuphon that teupeugah ureuëng-ureuëng Kristen. 27 Bak watée nyan na pa dubdroe nabi nyang teuka nibak Yerusalem u Antiokhia. 28 Lamkawan nabi-nabi nyan na nyang nan geuh Agabus. Lé durongan Roh Allah gobnyan meunubuat bahwa bansaboh donya teuma teuka musém deuk nyang paleng parah. (Dan hainyan keubiet na teujadi bak watée Kaisar Klaudius mat peurintah.) 29 Ngon lagée nyan banmandum murit Isa nyan ka sipakat keu jikirém sumbangan keu syedara-syedara nyang na tinggai di Yudea; maséng-maséng jikirém meunurot keumampuan jih. 30 Keuhai situju nyan teutab teupeubuet, laju Barnabas dan Saulus ji-utus keu jijak intat sumbangan nyan ubak peumimpén-peumimpén jeumaáh.

Kisah Rasui-Rasui 12

1 Kira-kira bak watée nyan cit teuma Raja Herodes jipeuphon teugon anggota-anggota jeumaáh. 2 Ateueh peurintah raja nyan, Yakobus, syedara Yahya jipoh maté ngon peudeueng. 3 Watée jikalon lé Herodes buet nyan galak that até ureuëng-ureuëng Yahudi, jipeubuet lom lagée nyan; laju jipeutreun peurintah keu teujakdrob Petrus. Hai nyan teujadi bak watée Uroe Raya Ruti Hana Meuragoe. 4 Óh ka lheueh jidrob, Petrus laju jipeutamong lam glab. Peuet boh reugu sipa-i nyang jibri tugaih keu jijaga Petrus lam glab nyan -- maséng-maséng reugu na peuet droe sipa-i. Óh ka lheueh peurayaan Paskah seuleusoe, barô kheueh Herodes teuma jipeusidang Petrus dikeue ureuëng ramé. 5 Ngon lagée nyan Petrus jiteuen lam glab; teuma lé anggota-anggota jeumaáh hana jipiôh-piôh jimeudoá ngon sisunggoh até ubak Tuhan keu Petrus. 6 Bak malam sigohlom Herodes jiba Petrus dikeue ureuëng ramé, Petrus teuéh sira teuikat ngon beuleunggu nibak teungoh dua droe sidadu nyang kawai. Bak babah pintoe peunjara nyan, peungawai-peungawai nyang laén pih teungoh jikawai peunjara. 7 Ngon hana teusangka-sangka malaikat Tuhan ka teudong nibak teumpat nyan dan saboh cahya muble-ble lam kama peunjara nyan. Malaikat nyan laju geuguncang-guncang Petrus sampoe Petrus teujaga. Laju geupeugah lé malaikat nyan, "Hai, bubagaih tabeudôh!" Watée nyan cit teuma rhot rante beuso nyang na bak jaroe Petrus. 8 Óh lheueh nyan malaikat nyan geupeugah, "Ngui kheueh laju peukayan gata dan ikat kheueh laju talo sipatu gata." Teuma Petrus pih laju geungui peukayan dan geuikat talo sipatu geuh keudroe. Óh lheueh nyan malaikat nyan geupeugah lom, "Ngui kheueh bajée jubah dan seutôt kheueh ulôn." 9 Teuma Petrus laju geuseutôt malaikat nyan geuteubiet nibak peunjara. Teuma Petrus hana geusadar bahwa peue nyang teungoh geupeubuet lé malaikat na kheueh sapeue-peue nyang biet-biet teujadi. Petrus geupike nyan kheueh saboh keumalon. 10 Watée awaknyan ka geulewat nibak teumpat jijaga pintoe phon dan pintoe nyang keudua, awaknyan laju trok bak pintoe beuso, nyang rhot jih u banda. Pintoe nyan teuhah keudroe jih, laju awaknyan jiteubiet dan jijak rot saboh jurông. Ngon hana geusangka-sangka malaikat nyan geutinggai Petrus sidroe. 11 Óh ka lheueh nyan barô kheueh Petrus sadar keuhai peue nyang ka teujadi ateueh droe gobnyan, laju geupeugah, "Jinoenyoe barô kheueh lôn teupeue bahwa Tuhan biet-biet ka geukirém malaikat Gobnyan keu geupeulheuh ulôn nibak kuasa Herodes dan nibak sigala sisuatu nyang jikeuneuk peubuet lé bansa Yahudi ateueh ulôn." 12 Óh ka lheueh geusadar keuadaan nyan, Petrus laju geujak u rumoh Maryam, ma Yahya nyang teuhôi cit ngon Markus. Disinan jai that-that ureuëng meugumpôi dan teungoh meudoá. 13 Petrus laju geukeutok pintoe luwa, laju lé sidroe peulayan inong nyang nan jih Rode, teuka keu jibuka pintoe. 14 Inong nyan laju jituri nyan na kheueh su Petrus. Sabab galak that até, inong nyan bagaih-bagaih jigisa u dalam ngon hana jipeuhah pintoe leubeh ilée, laju jipeugah bak ureuëng-ureuëng nyang na disinan bahwa Petrus na diluwa. 15 "Kah nyoe ka pungoe!" kheun awaknyan. Teuma Rode jimeukreueh bahwa nyan biet-biet Petrus. Teuma awaknyan laju jipeugah, "Nyan malaikat gobnyan!" 16 Watée nyan Petrus hana piôh geukeutok pintoe. Dan watée awaknyan jipeuhah pintoe, laju jikalon Petrus, awaknyan hireuen lumpah na. 17 Petrus laju geubri isyarat ngon jaroe gobnyan mangat awaknyan teunang, óh lheueh nyan barô kheueh geucalitra pakriban Tuhan ka geuba gobnyan geupeuteubiet lam glab. Laju geupeugah, "Jak peugah kheueh hainyoe ubak Yakobus dan syedara-syedara nyang laén lom teuma." Óh ka lheueh nyan Petrus laju geutinggai teumpat nyan dan geujak u teumpat laén. 18 Óh singoh beungoh barô kheueh jiteuka karu riôh-riôh dan ka-ak ka-ok lamkawan sipa-i nyang jaga. Awaknyan bingong lumpah na keuhai peue nyang ka teujadi ateueh Petrus. 19 Laju lé Herodes jiyue ureuëng jak mita Petrus, teuma awaknyan hana hase meurumpok ngon gobnyan. Teuma Herodes laju jipeurintah mangat peungawai-peungawai nyan jitanyong óh lheueh nyan laju jipoh maté. Óh lheueh nyan Herodes laju jijak u Yudea dan tinggai na padub treb di Kaisarea. 20 Herodes beungéh lumpah na keu ureuëng-ureuëng Tirus dan Sidon. Ngon sabab nyan awaknyan meusajan-sajan jijak meuhadab gobnyan. Phon-phon awaknyan jibujuk Blastus, nyang jeuet keu ulée lam meuligoe Herodes, sampoe jihnyan jidong blaih awaknyan. Óh lheueh nyan awaknyan laju jijak meuhadab Herodes, laju jilakée meudamé, sabab nanggroe awaknyan meugantung nibak peunajoh nibak nanggroe Herodes. 21 Bak siuroe nyang ka teupeuteuntée, Herodes laju jingui peukayan keurajeuen dan laju jiduek ateueh takhta keurajeuen dan jipeuphon pidatoe dikeue rakyat ba. 22 Rakyat nyang teungoh jideungoe nyan jikuk-kuk, "Nyoe kheueh su dewa, bukon su manusia!" 23 Bak watée nyan cit teuma malaikat Tuhan geutampa Herodes, sabab jihnyan hana jihoreumat Allah. Herodes jipajoh lé glang dan laju maté. 24 Teuma feureuman Allah seumaken meukeumang luwah dan seumaken teuga. 25 Óh ka lheueh Barnabas dan Saulus geupeu seuleusoe tugaih geuh, awaknyan laju geuriwang nibak Yerusalem sira geuba Yahya Markus meusajan-sajan ngon awaknyan.

Kisah Rasui-Rasui 13

1 Lam jeumaáh di Antiokhia na nabi-nabi dan gurée-gurée, na kheueh Barnabas, Simeon nyang jihôi Si Itam, Lukius dan asai Kirene, Menahem nyang rayeuk meusajan Raja Herodes, dan Saulus. 2 Watée awaknyan teungoh iébadat ubak Tuhan dan jipuasa, Roh Allah geupeugah bak awaknyan, "Piléh kheueh Barnabas dan Saulus khusos keu Ulôn, mangat awaknyan jipeubuet buet nyang ka Lôn peuteuntée keu awaknyan." 3 Óh ka lheueh puasa dan meudoá awaknyan laju jikeubah jaroe ateueh Barnabas dan Saulus laju jiutus awaknyan bandua. 4 Sabab geu-utus lé Po teu Allah, Barnabas dan Saulus laju jijak u Seleukia. Di sinan awaknyan jimeulayeue laju u Pulo Siprus. 5 Watée ka trok u Salamis, awaknyan laju jimeudakwah jipeusampoe feureuman Allah di rumoh-rumoh iébadat Yahudi. Lam meuneujak awaknyan mandua jibantu lé Yahya Markus. 6 Bansaboh pulo nyan awaknyan bloih sampoe trok u Pafos. Bak teumpat nyan awaknyan laju meurumpok ngon sidroe ureuëng Yahudi, nyang nan jih Bar Yesus. Ureuëng nyan tukang sihe nyang jiaku droe jih nabi. 7 Sergius Paulus, gubunur pulo nyan na kheueh rakan krab that ngon tukang sihe nyan. Gubunur nyan na kheueh sidroe ureuëng nyang carông dan bijaksana. Gobnyan laju jihôi Barnabas dan Saulus sabab jihnyan jikeuneuk deungoe feureuman Allah. 8 Teuma Barnabas dan saulus hánjitem teurimong lé Elimas ahli sihe nyan, sabab Elimas (nyan kheueh nan ureuëng nyan lam basa Yunani) jiuseuha mangat gubunur bék sampoe jipeucaya ubak Isa. 9 Teuma Saulus -- nyang teuhôi cit ngon nan Paulus -- laju jikuasa lé Roh Allah, akhé jih gobnyan laju geupandang ateueh tukang sihe nyan, 10 lheueh nyan laju jipeugah, "Hai tukang teumipée jeuhet, aneuëk jahanam! Gata musoh bandum nyang gét. Pakon hana gata tem piôh gata peurusak reuncana Allah keu teupeuseulamat manusia? 11 Jinoe gata kalon, Tuhan teuma geuhuköm gata! Gata teuma jeuet keu ureuëng buta, sampoe gata hana hase gata ngieng cahya mata uroe lam padub watée nyoe." Watée nyan cit teuma Elimas jirasa na sagob itam nyang jitôb mata jih, sampoe watée jijak meugeue-meugeue jimita ureuëng keu jitarek jih. 12 Watée gubunur nyan jikalon peue nyang ka teujadi, ureuëng nyan laju peucaya keu Isa; sabab gobnyan hireuen lumpah na keuhai ajaran keu Tuhan. 13 Nibak Pafos, Paulus dan rakan-rakan jih laju jimeulayeue u Perga di Pamfilia. Nibak teumpat nyan Yahya Markus jitinggai awaknyan, laju jigisa u Yerusalem. 14 Beudôh di Perga, awaknyan jijak laju u Antiokhia di Pisidia, óh lheueh nyan bak uroe Sabat awaknyan laju jijak duek lam rumoh iébadat. 15 Óh ka lheueh Kitab Nabi Musa dan kitab nabi-nabi jibeuet lé awaknyan, peumimpén-peumimpén rumoh iébadat nyan jiyue ureuëng jijak teumanyong bak Paulus dan rakan-rakan jih, "Syedara-syedara, meunyoe gata na naseuhat keu ureuëng nyoe, kamoe peusilakan syedara peugah naseuhat nyan." 16 Paulus laju jidong, laju jibri isyarat ngon jaroe jih, óh lheueh nyan jipeugah, "Syedara-syedara bansa Israel dan bandum syedara-syedara nyang laén nyang na nibak teumpat nyoe nyang taát ubak Po teu Allah! Cuba gata deungoe ulôn: 17 Allah bansa Israel ka geupiléh indatu geutanyoe, dan geupeujeuet bansa nyoe bansa nyang rayeuk watée awaknyan tinggai di nanggroe Meusé sibagoe ureuëng aséng. Óh lheueh nyan ngon kuasa nyang rayeuk Allah geuba awaknyan geupeuteubiet lam nanggroe Meusé. 18 Gobnyan saba ateueh pi-e-pi-e awaknyan lam padang pasi peuet ploh thon treb jih. 19 Tujoh boh bansa geupeuhabéh di nanggroe Kanaan keu geubagi-bagi nanggroe nyan keu bansa Israel mangat nanggroe nyan jeuet keuhak milék awaknyan. 20 Banmandum nyan na jih 450 thon treb jih. Óh ka lheueh taubagi nanggroe Kanaan nyan, Allah laju geubri keu awaknyan hakém-hakém. Hakém nyang keuneulheueh na kheueh Nabi Samuel. 21 Óh lheueh nyan awaknyan jilakée sidroe raja. Allah laju geubri bak awaknyan Saul bin Kis nibak sukée bansa Benyamin mangat jeuet keu raja awaknyan nyang treb jih sampoe peuet ploh thon. 22 Óh ka lheueh Allah geu géesée raja nyan nibak takhta jih, Allah geu angkat teuma Nabi Daud jeuet keu raja awaknyan. Dan nyoe kheueh feureuman Allah keuhai Nabi Daud, 'Ulôn ka meuteumé Daud bin Isai nyan sidroe nyang jipeuharok até Ulôn. Jihnyan kheueh nyang jipeubuet mandum nyang Ulôn lakée.' 23 Nibak keuturonan Nabi Daud nyan kheueh Allah geukeubah keu Bansa Israel sidroe Raja Peuseulamat, lagée nyang ka geupeu janji nyan. Dan Isa nyan kheueh Raja Peuseulamat nyan. 24 Sigohlom Isa geupeu phon tugaih Gobnyan, Nabi Yahya ka geupeusampoe ubak ureuëng-ureuëng Israel mangat awaknyan jimeutobat nibak mandum desya-desya dan awaknyan teupumanö. 25 Dan karab trok bak akhé buet gobnyan, Nabi Yahya jipeugah ubak dumna ureuëng, 'Soe kheueh ulôn nyoe meunurot peundapat gata? Ulôn nyoe bukon Ureuëng nyang gata preh-preh. Ingat, Ureuëng nyan teuma teuka óh ka lheueh ulôn; keu lôn ploih talo sipatu Gobnyan mantong nibak ulôn nyoe hana jeuet.' 26 Syedara-syedara keuturonan Nabi Ibrahim, dan mandum syedara nyang laén nyang na disinoe nyang taát ubak Po teu Allah! Allah ka geukirém keu geutanyoe haba seulamat nyan; 27 sabab ureuëng-ureuëng nyang tinggai di Yerusalem dan peumimpén-peumimpén awaknyan hana jiteupeue bahwa Gobnyan kheueh peuseulamat nyan. Awaknyan hana muphom ajaran nabi-nabi nyang teubeuet tieb-tieb uroe Sabat, sampoe awaknyan jihuköm Isa Almaseh. Teuma ngon jipeubuet nyang lagée nyan lé awaknyan, teunyata peue nyang ka geupeugah lé nabi-nabi nyan biet-biet teujadi. 28 Bah kheueh awaknyan hana jiteumé sapeue pih nibak Gobnyan nyang patôt teuhuköm ngon huköman maté, teuma awaknyan teutab jilakée bak Pilatus mangat Gobnyan teutab jipoh maté. 29 Dan óh ka lheueh awaknyan jipeubuet banmandum nyang na teutuléh lam Alkitab keuhai Gobnyan, awaknyan laju jipeutron manyét Gobnyan nibak kayée saleb, laju jikeubah lam kubu. 30 Teuma lé Allah geupeu udeb lom teuma Gobnyan nibak maté. 31 Óh lheueh nyan meu-uroe-uroe treb jih Gobnyan geupeuleumah droe ubak ureuëng-ureuëng nyang ka lheueh teuka ngon Gobnyan nibak Galilea u Yerusalem. Awaknyan kheueh bak saát nyoe jeuet keusaksi-saksi keu Gobnyan keu bansa Israel. 32 Jadi, bak saát nyoe kamoe peusampoe Haba Gét nyan keu gata: Peue nyang ka geupeujanji lé Allah ubak indatu geutanyoe, 33 nyan lé Gobnyan ka geupeubuet keu geutanyoe ngon geupeu udeb lom Isa nibak maté. Sabab lam kitab Zabur nyang keudua na teutuléh lagée nyoe, 'Gata kheueh Aneuëk Ulôn, bak uroenyoe Ulôn ka jeuet keu Bapak Gata.' 34 Allah ka geupeu udeb Gobnyan lom nibak maté. Jinoenyoe Gobnyan hana le geurasa maté lam kubu. Keuhai nyan Allah meufeureuman, 'Ulôn teuma Lôn bri keu gata janji suci nyang pasti teukeureuja, nyang ka Ulôn meujanji bak Nabi Daud.' 35 Meunan cit bak ayat nyang laén na na teutuléh lagée nyoe, 'Droeneueh hana neupeubiyeu hamba Droeneueh nyan brok lam kubu.' 36 Nabi Daud ka maté dan ka lheueh teukubu meusajan ngon indatu gobnyan, óh ka lheueh geupeubuet peue nyang Allah yue peubuet. Manyét Nabi Daud pih ka habéh hanco banmandum. 37 Teuma Isa, nyang Allah peu udeb lom nibak maté, Isa nyan hana hanco lom hana habéh. 38 Sabab nyan kheueh syedara-syedara, bah kheueh beugata teupeue bahwa meulalu Isa haba keuhai teupeu amphon desya teupeusampoe ubak gata; gatanyoe harôh tateupeue bahwa tieb-tieb ureuëng nyang meuiman keu Gobnyan, geupeu beubaih nibak mandum desya nyang hana hase teusampôh meulalu peurintah-peurintah Allah nyang geupeusampoe lé Nabi Musa. 40 Nyang kheueh sabab jih gata harôh tasimak beugét-gét, bék sampoe teujadi ateueh gata peue nyang ka geupeugah lé Nabi-nabi nyoe, 41 'Simak kheueh beugét-gét, hai gata nyang galak bak buet meuhina! Gata teuka hireuen dan laju maté! Sabab bak jamén nyoe teungoh lôn peubuet sapeue-sapeue nyang gata keudroe hana teuma gata patéh, bah kheueh na ureuëng nyang peutrang ubak gata.' " 42 Watée Paulus dan Barnabas geutinggai rumoh iébadat nyan, ureuëng-ureuëng nyang na lam rumoh iébadat nyan jilakée lom mangat awaknyan jigisa lôn óh watée uroe Sabat nyang teuma teuka, guna keu geupeu trang leubeh jiôh keuhai nyan. 43 Óh ka lheueh ureuëng-ureuëng jiteubiet lam rumoh iébadat nyan, Paulus dan Barnabas laju jiseutôt lé ureuëng ramé, ureuëng Yahudi dan bansa laén nyang ka jitamong agama Yahudi. Dan rasui-rasui nyan laju jibri naseuhat bak awaknyan mangat awaknyan teutab meusadeue bak rakhmat Allah. 44 Bak uroe Sabat lheueh-lheueh nyan, rab mandum ureuëng nyang na lam banda nyan jijak deungoe feureuman Tuhan. 45 Watée ureuëng-ureuëng Yahudi jikalon ureuëng ramé nyan, awaknyan biet-biet jiteuka bingiek até. Awaknyan laju jihina Paulus dan jibantah mandum nyang geupeugah nyan. 46 Teuma ngon leubeh beuhe lom Paulus dan Barnabas geumeututoe troh trang. Awaknyan geupeugah, "Feureuman Allah keubiet teupeusampoe ubak gata leubeh ilée. Teuma sabab gata hana tatem teurimong, gata ka tapeuteuntée keudroe bahwa gata keubiet hana patot tateurimong udeb seujati dan keukai. Dan jinoenyoe kamoe tinggai gata dan kamoe jak ubak bansa laén. 47 Sabab nyoe kheueh peurintah Tuhan ubak kamoe: Tuhan meufeureuman, 'Ulôn ka lôn peuteuntée gata jeuet keu trang nibak ureuëng-ureuëng bansa laén nyang bukon Yahudi, mangat gata tapeuteuka keuseulamatan bansigom donya.' " 48 Watée ureuëng-ureuëng bansa laén nyang bukon Yahudi jideungoe hai nyan, awaknyan galak lumpah na, laju awaknyan jipujoe-pujoe feureuman Tuhan. Dan ureuëng-ureuëng nyang geupeuteuntée lé Allah keu meuteumé udeb seujati dan keukai, ureuëng-ureuëng nyan jimeuiman. 49 Feureuman Tuhan pih laju meutabu ho-ho mantong bansaboh daerah nyan. 50 Teuma ureuëng-ureuëng rayeuk banda nyan meunan cit ngon ureuëng-ureuëng inong nibak golongan manyang nyang takot keu Po teu Allah, laju jipeusuna lé ureuëng-ureuëng Yahudi. Awaknyan jipeuteuka meumusoh ngon Paulus dan Barnabas, dan ji use awaknyan bandua di daerah nyan. 51 Teuma lé rasui-rasui nyan laju geukipah abée bak gaki awaknyan dikeue ureuëng-ureuëng nyang na disinan sibagoe peuingat, óh lheueh nyan laju geujak u Ikonium. 52 Murit-murit di Antiokhia lumpah that galak dan jikuasa lé Roh Allah.

Kisah Rasui-Rasui 14

1 Paulus dan Barnabas geurasa teuma hai nyang saban di Ikonium. Awaknyan geujak cit ubak rumoh iébadat Yahudi dan geumeututoe disinan lagée nyang sibeuna jih akhé jih jai that ureuëng Yahudi dan nyang kon ureuëng Yahudi meuiman keu Isa. 2 Teuma di ureuëng-ureuëng Yahudi nyang hana jipatéh, jipeusuna ureuëng nyang bukon Yahudi, sampoe jeuet awaknyan banci ubak ureuëng nyang meuiman keu Isa. 3 Ngon sabab nyan Barnabas dan Paulus treb geutinggai disinan. Dan ngon beuhe that awaknyan geumeututoe keuhai Tuhan. Dan Tuhan pih geubri bukeuti bahwa haba awaknyan keuhai gaséh nyan beutôi; Gobnyan laju geubri keu awaknyan kuasa keu jeuet geupeubuet buet-buet nyang ajaéb dan hai-hai nyang luwabiasa. 4 Teuma peunduduek banda nyan hana sapeue kheun meu adu peundapat sidroe ngon nyang laén; na nyang jidong blaih ureuëng Yahudi dan na teuma nyang jidong blaih rasui-rasui nyan. 5 Laju di ureuëng-ureuëng Yahudi ngon peumimpén-peumimpén jih meusajan-sajan ngon kon ureuëng Yahudi ka sapeue kheun jikeuneuk seksa dan jigeulawa rasui-rasui nyan ngon aneuëk batée. 6 Teuma lé rasui-rasui nyan geusadar keuhai nyan, laju geupeu aséng droe u Listra dan Derbe, na kheueh banda-banda nyang na di Likaonia, dan u daerah sikeulileng nyan. 7 Bak teumpat nyan awaknyan geupeusampoe lom Haba Gét nyan. 8 Di Listra na sidroe ureuëng agam nyang gaki jih lapée yoh phon lahé, sampoe ureuëng nyan hánjeuet jijak yoh ubit kon, sabab gaki jih lumpah that leumiek. 9 Ureuëng nyan jiduek disinan sira jideungoe Paulus peugah haba. Paulus geukalon bahwa ureuëng nyang meuiman ngon sabab nyan jihnyan hase teupeupuléh. Teuma Paulus laju geungieng ateueh ureuëng nyan 10 dan ngon su meutaga Paulus geupeugah, "Dong laju beucot!" Ureuëng nyan jilumpat sira jidong óh lheueh nyan jijak. 11 Watée ureuëng ramé jikalon peue nyang geupeubuet lé Paulus, awaknyan dumpék lam basa Likaonia, "Dewa-dewa ka jitron ateueh donya lam tuboh manusia." 12 Laju Barbanas jiboh nan lé awaknyan Zeus, dan Paulus jiboh nan Hermes, sabab awaknyan kheueh nyang peugah haba. 13 Imeum Dewa Zeus, nyang rumoh iébadat jih dikeue banda, jijak keunan sira jiba leumô-leumô agam dan bungöng-bungöng u babah pintoe banda. Ureuëng nyan keuneuk seutôt ngon ureuëng ramé nyan keu jipeuseumah keureubeuen jih keu rasui-rasui nyan. 14 Watée Barnabas dan Paulus geudeungoe peue nyang keuneuk jipeubuet lé ureuëng-ureuëng nyan, awaknyan laju jipriek-priek peukayan jih keudroe sira jiplueng-plueng lamkawan ureuëng ramé nyan, dan laju jidumpék, 15 "Hai, keupeue gata peubuet nyoe? Kamoe nyoe manusia cit saban lagée Gata! Kamoe na di lam sinoe keu kamoe peusampoe Haba Gét keu gata mangat gata mandum tatinggai hai-hai nyang hana meuguna nyoe dan tajak ubak Allah nyang udeb, nyang cebta langét ngon bumoe dan laôt ngon mandum nyang na lam nyan. 16 Bak masa ilée Allah geupeubiyeu bansa-bansa udeb meunurot keuheundak jih keudroe. 17 Teuma awaknyan hana tuwoe geubri bukeuti-bukeuti keuhai droe Gobnyan, na kheueh ngon cara tapeubuet nyang jroh. Gobnyan geubri keu gata ujeuen nyang jitron nibak langét dan hase tanoh óh trok bak watée musém. Gobnyan geubri peunajoh keu gata dan geupeu galak até gata." 18 Ngon tutoe haba nyang lagée nyan rasui-rasui nyan teutab payah that-that geutam ureuëng-ureuëng nyan jipeuseumah keureubeuen keu gobnyan mandua. 19 Na padub droe ureuëng Yahudi jiteuka u Listra nibak Antiokhia di Pisidia dan nibak Ikonium laju jipeusuna ureuëng ramé nyan sampoe ureuëng-ureuëng nyan laju jidong blaih awaknyan. Awaknyan laju jigeulawa Paulus ngon batée, óh lheueh nyan laju jitarek gobnyan uluwa banda. Awaknyan jipike Paulus nyan ka maté, 20 teuma watée ureuëng-ureuëng meuiman nyan jidong bansilingka gobnyan, gobnyan geubeudôh dan geutamong lom banda. Óh singoh beungoh geujak teuma u Derbe meusajan-sajan ngon Barnabas. 21 Di Derbe, Paulus dan Barnabas laju geupeusampoe lom Haba Gét nyan dan jai that ureuëng jimeuiman ubak Isa. Óh ka lheueh nyan awaknyan jigisa lom u Listra, óh lheueh nyan u Ikonium, laju u Antiokhia di Pisidia. 22 Lam banda-banda nyang geujak nyan awaknyan laju geupeukong até murit-murit Isa dan geubri naseuhat ubak murit-murit nyan mangat teutab meuiman keu Isa, "Geutanyoe harôh beujai that tarasa deurita leubeh ilée, barô kheueh geutanyoe hase tarasa keubahgiaan Donya Barô Allah," meunan kheueh cara jih rasui-rasui nyan geupurunoe murit-murit Isa di banda-banda nyan. 23 Dan bak tieb-tieb jeumaáh, Paulus dan Barnabas laju geuangkat peumimpén-peumimpén jeumaáh nyan. Laju ngon meudoá dan puasa, awaknyan laju jiseurah peumimpén-peumimpén nyan ubak Tuhan nyang awaknyan peucaya nyan. 24 Óh ka lheueh nyan Paulus dan Barnabas geujak lom laju liwat daerah Pisidia dan trok laju u Pamfilia. 25 Dan óh ka lheueh awaknyan geupeusampoe feureuman Allah di Perga, awaknyan laju geujak u Atalia. 26 Nibak sinan awaknyan geumeulayeue lom u Antiokhia. Nyan kheueh banda teumpat awaknyan yoh masa ilée jibri ubak rakhmat Allah, mangat awaknyan jipeubuet buet nyang jinoenyoe ka awaknyan peuseuleusoe. 27 Watée ka trok u Antiokhia, awaknyan laju geupeusapat ureuëng-ureuëng nyang na nibak jeumaáh nyan, laju geupeugah mandum nyang ka geupeubuet lé Po teu Allah meulalu awaknyan. Meunan cit awaknyan geupeugah pakriban Allah ka geupeuhah jalan mangat ureuëng-ureuëng nyang bukon Yahudi meuiman ubak Isa. 28 Lam banda nyan Paulus dan Barnabas treb tinggai meusajan-sajan ngon ureuëng-ureuëng meuiman.

Kisah Rasui-Rasui 15

1 Na meupadub droe ureuëng nyang teuka nibak Yudea jijak u Antiokhia dan jipeurunoe ureuëng-ureuëng meuiman di Antiokhia nyan bahwa meunyoe awaknyan hana meusunat lagée nyang teutuléh lam kitab huköm Nabi Musa, awaknyan hana hase teupeuseulamat. 2 Paulus dan Barnabas geubantah habéh peundapat ureuëng-ureuëng nyan. Akhé jih teucok keuputosan mangat Paulus dan Barnabas meunan cit ngon na meupadub droe ureuëng laén di Antiokhia jeuet geujak u Yerusalem keu geujak peugah keuhai nyan ngon rasui-rasui dan peumimpén-peumimpén disinan. 3 Jeumaáh di Antiokhia ji intat awaknyan sampoe uluwa banda, óh lheueh nyan awaknyan laju geujak meulalu Finisia dan Samaria. Disinan awaknyan laju geupeugah pakriban ureuëng-ureuëng nyang bukon Yahudi ka jiseurah droe bak Po teu Allah. Watée jideungoe haba nyan lumpah that galak até ureuëng-ureuëng nyang na disinan. 4 Watée awaknyan ka trok u Yerusalem, awaknyan jisambot ngon gét that lé jeumaáh, dan lé rasui-rasui meunan cit lé peumimpén-peumimpén. Laju awaknyan geucalitra bak ureuëng-ureuëng nyan keuhai mandum nyang ka geupeubuet lé Allah meulalu awaknyan. 5 Teuma na meupadub droe nibak golongan Farisi nyang ka meuiman, jidong laju jipeugah, "Ureuëng-ureuëng bansa laén nyang ka meuiman nyan museuti meusunat dan teupeuwajéb jipeubuet huköm Nabi Musa." 6 Laju rasui-rasui dan bubena peumimpén meurok pakat guna keu geupeugah keuhai nyan. 7 Treb that-that awaknyan meutuka pikeran. Akhé jih Petrus geudong dan geupeugah, "Syedara-syedara! Gata keudroe tateupeue bahwa na meupadub watée nyang ka lheueh Allah ka geupiléh ulôn lamkawan gata keu lôn jak peusampoe Haba Gét nyan ubak ureuëng-ureuëng nyang kon Yahudi, mangat awaknyan pih jideungoe dan jimeuiman. 8 Dan Allah geuteupeue até manusia ka geutunyok bahwa Gobnyan geuteurimong awaknyan; gobnyan geutunyok hai nyan ngon cara geubri Roh Allah keu awaknyan saban lagée nyang ka geubri keu geutanyoe. 9 Allah hana geubeda-beda geutanyoe ngon awaknyan. Gobnyan geupeu suci até awaknyan, sabab awaknyan meuiman. 10 Ngon lagée nyan, peue sabab gatanyoe keuneuk talawan Allah dan jinoe ngon gata bri saboh keuwajéban brat ubak murit-murit nyoe, padahai indatu geutanyoe dan tanyoe keudroe pih hana hase tapeubuet nyan? 11 Dilikot nibak nyan, geutanyoe ta meuiman dan tanyoe geupeu seulamat sabab geunaséh Tuhan Isa; meunan cit ngon awaknyan." 12 Dan nibak watée nyan seungab kheueh mandum ureuëng nyang meugumpôi disinan. Óh lheueh nyan awaknyan jideungoe Barnabas dan Paulus banmandum keuajaéban dan hai-hai nyang luwabiasa nyang ka geupeubuet lé Allah rot awaknyan lamkawan bansa laén nyang bukon ureuëng Yahudi. 13 Óh ka lheueh seuleusoe awaknyan jipeugah haba, Yakobus jipeugah, "Syedara-syedara! Cuba tadeungoe ulôn. 14 Simon banmantong geupeugah pakriban Allah yoh awai phon geutunyok peuratian Geuh ateueh ureuëng-ureuëng nyang bukon Yahudi, ngon meukeusut geupiléh nibak awaknyan ureuëng-ureuëng laén nyang teuma jeuet keu umat Gobnyan. 15 Nyan paih that lagée nyang ka lheueh geupeugah lé Nabi-nabi. Sabab na teutuléh lagée nyoe, 16 'Óh ka lheueh nyan teuka lom,' kheun Tuhan, 'Ulôn teuma Lôn peudong lom rumoh Nabi Daud nyang ka reuloh, dan Ulôn peugét nyang reuloh-reuloh, laju Ulôn peudong lom teuma; 17 mangat mandum ureuëng nyang mantong tinggai nyan jimita Tuhan, beusajan ngon bansa laén nyang bukon Yahudi nyang ka Ulôn hôi jeuet keu milék Ulôn.' Meunan kheueh feureuman Tuhan, 18 nyang ka geubri tée hainyan yoh awai ilée." 19 "Ngon nyan, meunurot peundapat ulôn," kheun Yakobus, "Geutanyoe hán jeuet tapeupayah ureuëng nyang bukon Yahudi nyan nyang ka jiseurah droe ubak Po teu Allah. 20 Teuma geutanyoe museuti tatuléh surat keu awaknyan dan tanaseuhat awaknyan mangat awaknyan bék jimakheun peunajoh nyang najih nyang ka jipeuseumah keu beurala, atawa teupajoh sie beulatang nyang maté teuceukiek, atawa pajoh darah. Meunan cit mangat awaknyan jipeujiôh droe nibak buet meumukah. 21 Sabab huköm Nabi Musa yoh ilée kon ka teubeuet tieb-tieb uroe Sabat di rumoh-rumoh iébadat, dan teupeugah bak tieb-tieb banda." 22 Rasui-rasui dan peumimpén-peumimpén, meusajan-sajan ngon mandum anggota jeumaáh nyan jicok keuputosan keu jipiléh meu padub droe nibak awaknyan keu teu utus u Antiokhia meusajan-sajan ngon Paulus dan Barnabas. Teuma awaknyan laju jipiléh Silas dan Yudas nyang teuhôi cit ngon nan Barsabas. Mandua droe awaknyoe na kheueh ureuëng-ureuëng nyang meusyeuhu nibak ureuëng-ureuëng meuiman di Yerusalem. 23 Meusigoe ngon utosan nyan awaknyan geukirém teuma sipucok surat nyang su jih lagée nyoe, "Keu syedara-syedara mandum nyang meuasai nibak bansa laén nyang bukon bansa Yahudi, nyang na tinggai di Antiokhia, Siria dan Kilikia. Saleuem nibak kamoe, rasui-rasui dan peumimpén-peumimpén, na kheueh syedara-syedara gata. 24 Kamoe na meudeungoe na meupadub droe lamkawan kamoe nyang ka jijak ubak gata jipeukaru dan jipeubingong gata ngon ajaran-ajaran nyang jiba lé awaknyan. Padahai kamoe hana meuyue jipeubuet nyang lagée nyan bagoe. 25 Nyang kheueh sabab jih kamoe ka mupakat dan mandum situju keu kamoe piléh na meupadub droe dan kamoe utus awaknyan ubak gata. Awaknyan teuma jijak meusajan-sajan ngon Barnabas dan Paulus nyang kamoe gaséh. 26 Mandua droe awaknyoe na kheueh ureuëng-ureuëng nyang ka jipeusabong nyawöng awaknyan keu Tuhan geutanyoe Isa. 27 Ngon lagée nyan, kamoe kirém Yudas dan Silas keu Syedara-syedara. Awaknyan keudroe nyang peugah ngon babah jih keuhai asoe surat nyang teutuléh nyoe. 28 Roh Allah ka situju -- dan kamoe pih situju -- mangat gata bék jibri keuwajéban-keuwajéban nyang leubeh brat nibak keuwajéban-keuwajéban nyang peureulée nyoe mantong: 29 bék gata makheun peunajoh nyang ka jibri keubeurala; bék gata pajoh darah, bék gata pajoh sie beulatang nyang maté teucikiek, dan peujiôh kheueh nibak buet-buet nyang meumukah. Meunyoe gata tapeujiôh droe nibak buet-buet nyang lagée nyan, gata ka gata peubuet nyang jroh. Óh noe mantong, seulamat!" 30 Óh ka lheueh jilakée idhin, awak nyang teukirém nyan laju jijak u Antiokhia. Disinan awaknyan laju jihôi mandum anggota jeumaáh meugumpôi óh lheueh nyan barô kheueh jipeutrok surat nyan. 31 Watée anggota-anggota jeumaáh jibaca surat nyan, awaknyan galak that-that ateueh asoe surat nyan nyang biet-biet teuhibor até awaknyan. 32 Yudas dan Silas, nyang na kheueh nabi cit teuma, treb that jimeututoe ngon syedara-syedara nyang meuiman di Antiokhia nyan keu jibri seumangat dan keubeuranian keu awaknyan. 33 Óh ka lheueh Yudas dan Silas tinggai disinan na padub na treb, ureuëng-ureuëng meuiman nyang na di Antiokhia laju jikirém woe lom dan jiyue bak awaknyan mangat jipeutrok saleuem ubak ureuëng-ureuëng nyang utus awaknyan. 34 Teuma Silas jicok keuputosan keu teutab tinggai di Antiokhia. 35 Meunan cit Paulus dan Barnabas tinggai cit na padub treb di Antiokhia. Disinan awaknyan geuseumeubeuet dan geupeurunoe feureuman Tuhan meusajan-sajan ngon ureuëng ramé nyang laén. 36 Hana padub na treb teuma óh lheueh nyan Paulus geupeugah bak Barnabas, "Jak tajak lom teuma tasaweue syedara-syedara nyang ka jipeucaya ubak Isa lam banda-banda bak teumpat tanyoe ka lheueh tapeusampoe feureuman Tuhan; mangat tanyoe takalon pakriban keuadaan awaknyan." 37 Barnabas keuneuk geuba Yahya Markus, 38 teuma Paulus meurasa hana gét teuba Markus, nyang hana jitem mubuet meusajan-sajan ngon awaknyan dan jitinggai awaknyan di Pamfilia. 39 Ngon sabab nyan Paulus dan Barnabas geumeudakwa brat akhé jih awaknyan pih meucre: Barnabas geucok Markus laju geumeulayeue ngon jih nyan u Siprus. 40 Paulus geucok Silas laju geujak ngon jihnyan óh ka lheueh syedara-syedara nyang di Antiokhia geuseurah awaknyan ubak rakhmat Tuhan. 41 Awaknyan pih laju jikeulileng Siria dan Kilikia; nibak teumpat nyan awaknyan laju geupeuteubai iman dumna jeumaáh.

Kisah Rasui-Rasui 16

1 Paulus geujak lom laju u Derbe, óh lheueh nyan u Listra. Disinan na sidroe murit Isa nyang nan jih Timotius. Mak jih sidroe Yahudi, nyang ka jipeucaya keu Isa; teuma ayah jih ureuëng Yunani. 2 Lamkawan ureuëng-ureuëng meuiman nyang tinggai di Listra dan Ikonium, Timotius jituri lé gob sibagoe ureuëng nyang gét. 3 Paulus meuharab that mangat jitem jak ngon gobnyan; ngon sabab nyan Paulus laju geupeukatan Timotius. Gobnyan geupeubuet nyang lagée nyan, sabab ureuëng-ureuëng Yahudi didaerah nyan mandum jiteupeu bahwa ayah Timotius ureuëng Yunani. 4 Bak tieb-tieb banda nyang awaknyan tamong, awaknyan laju geupeusampoe ubak ureuëng-ureuëng meu iman keuputosan-keuputosan nyang ka geupeuteuntée lé rasui-rasui dan peumimpén-peumimpén di Yerusalem. Ureuëng-ureuëng nyang ka meu iman nyan laju geubri naseuhat lé awaknyan mangat teutab taát keu atoran-atoran nyan. 5 Ngon lagée nyan jeumaáh-jeumaáh nyan meutamah-tamah kong iman jih, dan tieb-tieb uroe seumaken meutamah ramé jeumeulah jih. 6 Roh Allah hana geubri bak Paulus dan Silas geumeudakwah feureuman Allah di propinsi Asia. Jadi awaknyan geujak u daerah Frigia dan Galatia. 7 Watée ka trok ubak bataih Misia, awaknyan jiuseuha tamong u propinsi Bitinia, teuma Roh Isa geutam awaknyan bék geujak keudeh. 8 Teuma awaknyan geujak u Misia dan laju u Troas. 9 Óh watée ka malam, di Troas, Paulus geungieng saboh keumalon. Lam keumalon nyan deuh geungieng sidroe ureuëng Makedonia jidong dikeue gobnyan sira jilakée ngon meuharab that mangat gobnyan beugeujak u Makedonia keu jak tulông awaknyan. 10 Óh ka lheueh Paulus meuteumé keumalon nyan, kamoe langsong meukeumah jeuet kamoe jak u Makedonia. Sabab, deungon yakén that kamoe cok keusimpulan bahwa Allah geuyue bak kamoe keu kamoe peusampoe Haba Gét nyan ubak ureuëng-ureuëng nyang na disinan. 11 Laju kamoe tinggai Troas dan langsong kamoe meulayeue u Samotrake, óh singoh nyan laju kamoe jak u Neapolis. 12 Beudôh nibak teumpat nyan laju kamoe jak u Filipi, saboh banda nibak distrik phon Makedonia. Filipi na kheueh jajahan keurajeuen Roma. Nibak teumpat nyan kamoe tinggai na meupadub uroe. 13 Bak uroe Sabat laju kamoe jak bak binéh krueng nyang na diluwa pintoe geureubang banda, sabab kamoe meuharab bak teumpat nyan na teumpat seumayang keu ureuëng Yahudi. Laju kamoe duek dan kamoe meututoe ngon ureuëng-ureuëng inong nyang na meugumpôi bak teumpat nyan. 14 Sidroe lamkawan ureuëng inong nyan na kheueh ureuëng meukat ija ungu, nan jih Lidia nyang asai jih nibak Tiatira. Inong nyan jigaséh keu Po teu Allah, teuma Tuhan geupeugrak até inong nyan mangat jiteurimong peue nyang Paulus peurunoe bak jih. 15 Lidia dan bansaboh asoe rumoh nyan laju geupumanö. Óh ka lheueh teupumanö laju jiundang kamoe. Inong nyan jipeugah, "Meunyoe syedara-syedara biet-biet neupatéh kamoe ka meu iman bak Isa, jak kheueh tamudom dirumoh lôn." Laju inong nyan jipaksa mangat kamoetem mudom dirumoh jih. 16 Bak siuroe watée kamoe teungoh kamoe jak meudoá, laju kamoe meurumpok ngon sidroe ureuëng inong; inong nyan namiet. Inong nyan ka jikuasa lé roh jeuhet nyang hase jiramai keujadian-keujadian nyang teuma teuka. Ngon cara jiramai naseb gob, inong nyan hase jibri untông nyang rayeuk that keu teungku jih. 17 Inong nyan hana jipiôh jiseutôt Paulus dan kamoe sira jiklik-klik, "Ureuëng-ureuëng nyoe hamba Allah Maharayeuk! Awaknyan teuka keuneuk jijak peugah bak gata mandum pakriban gata mangat hase seulamat!" 18 Na padub uroe treb jih ureuëng inong nyang jiklik-klik lagée nyan hana piôh-piôh. Paulus gadôh saba, sampoe gobnyan geupaleng laju geupeugah bak roh nyan, "Ateueh nan Isa ulôn peurintah gata teubiet lam tuboh inong nyoe!" Watée nyan cit teuma roh nyan jitinggai inong nyan. 19 Watée majikan-majikan inong nyan jiteupeue rot jimita péng ka hana le, awaknyan laju jidrob Paulus dan Silas, laju jitarek bandua awaknyan lam padang dan jipeuhadab laju ubak nyang meuwajéb. 20 Awaknyan laju jipeuhadab Paulus dan Silas ubak peujabat-peujabat peumeurintah Roma. Óh lheueh nyan jipeugah, "Ureuëng-ureuëng nyoe ureuëng Yahudi. Awaknyan jipeuna karu lam banda tanyoe. 21 Awaknyan jiyue peubuet adat keubiasaan nyang hana saban lagée huköm-huköm geutanyoe, ureuëng-ureuëng Roma. Tanyoe hana hase tateurimong atawa taseutôt adat keubiasaan nyan!" 22 Di ureuëng ramé pih rhoh cit jiheuntam Paulus dan Silas; dan peujabat-peujabat peumeurintah laju jipriek-priek peukayan nibak tuboh mandua droe rasui nyan dan laju jiyue ureuëng jeuet jisunuet awaknyan mandua. 23 Óh ka lheueh awaknyan jisunuet ngon brat that, awaknyan laju jipeutamong lam glab. Keumandan peunjara laju jiyue jaga awaknyan mandua ngon rapat that. 24 Sabab peurintah nyan, keumandan rumoh glab nyan laju jiteun awaknyan lam kama glab nyang paleng lhok, dan jipasong gaki awaknyan bak kayée bulat. 25 Kira-kira teungoh malam Paulus ngon Silas teungoh meudoá dan geumeuseulaweuet ngon ca-e-ca-e pujoe keu Po teu Allah. Ureuëng-ureuëng nyang teuten laén pih teungoh jideungoe awaknyoe meuseulaweuet. 26 Ngon hana teusangka-sangka jiteuka geumpa bumoe nyang paleng hebat, sampoe-sampoe keunaleueng rumoh glab nyan pih meuguncang-guncang. Banmandum babah pintoe peunjara teuhah dan rante-rante nyang teuikat bak mandum ureuëng nyang teuteuen pih leukang. 27 Keumandan peunjara nyan teukeujot laju jibeudôh. Watée jikalon mandum babah pintoe peunjara ka teuhah, laju jisuet peudeueng jih keuneuk jipoh droe sabab jipike mandum ureuëng nyang na lam glab nyan ka habéh jiplueng. 28 Teuma Paulus laju jidumpék ngon su meutaga, "Bék gata poh droe! Kamoe mandum mantong na disinoe!" 29 Keumandan peunjara nyan jilakée panyöt laju jiplueng u dalam, dan ngon yo meukot-kot laju teudugom dikeue Paulus dan Silas. 30 Óh lheueh nyan jiba awaknyan uluwa sira jipeugah, "Teungku-teungku, peue nyang harôh ulôn peubuet mangat ulôn meuteumé seulamat?" 31 Paulus dan Silas geujaweueb, "Peucaya kheueh ubak Tuhan Isa! Gata teuma seulamat -- gata dan mandum ureuëng nyang na lam rumoh gata!" 32 Laju Paulus dan Silas geupeu trang feureuman Tuhan ubak ulée rumoh glab nyan dan ubak mandum ureuëng nyang na lam rumoh jihnyan. 33 Watée teungoh malam nyan cit teuma, ulée rumoh glab nyan jiba awaknyan laju jipeugleh mandum luka-luka awaknyan. Teuma ureuëng nyan dan mandum ureuëng laén nyang na lam rumoh jih nyan laju geupumanö. 34 Óh lheueh nyan ureuëng nyan laju jiba Paulus dan Silas u rumoh jih laju jibri makheun keu awaknyan. Ureuëng nyan dan mandum keuluwarga galak lumpah na sabab awaknyan jinoe ka meuiman ubak Po teu Allah. 35 Óh singoh beungoh, peujabat-peujabat peumeurintah Roma laju jiutus peulisi ubak rumoh glab keu jipeusampoe peurintah mangat Paulus dan Silas jipeuleueh. 36 Keumandan peunjara nyan laju jipeugah hainyan ubak Paulus. Ureuëng nyan jikheun, "Teungku-teungku, peujabat-peujabat peumeurintah ka geubri peurintah keu teupeuleueh mandua teungku, jinyoe teungku-teungku jeuet neuwoe. Seulamat neujak!" 37 Teuma Paulus geupeugah ubak peutugaih-peutugaih peulisi nyan, "Kamoe nyoe wareuga nanggroe Roma. Hana teupeusidang, kamoe ka jiseunuét dikeue rakyat ba dan jipeutamong lam glab. Dan jinoenyoe awaknyan jiyue kamoe jak ngon seungab-seungab? Kamoe hán kamoe tem! Yue peujabat-peujabat peumeurintah nyan jijak keudroe keunoe jipeuleueh kamoe." 38 Peutugaih-peutugaih peulisinyan laju jijak lapor hainyan ubak peujabat-peujabat peumeurintah Roma. Watée peujabat-peujabat Roma nyan jideungoe Paulus dan Silas wareuga nanggroe Roma, awaknyan laju jiteuka teumakot. 39 Laju awaknyan jijak lakée meuáh ubak Paulus dan Silas, óh lheueh nyan ji-intat awaknyan mandua peuteubiet nibak lam glab, dan jilakée mangat awaknyan jitinggai banda nyan. 40 Paulus dan Silas geutinggai peunjara nyan dan geujak laju u rumoh Lidia. Óh ka lheueh meurumpok ngon ureuëng-ureuëng meu iman disinan, dan geubri seumangat bak awaknyan, Paulus dan Silas laju geujak.

Kisah Rasui-Rasui 17

1 Paulus dan Silas geubot langkah geujak lom meuneujak geuh rot Amfipolis dan Apolonia laju trok u Tesalonika. Disinan na rumoh iébadat ureuëng Yahudi. 2 Teuma lé Paulus laju geujak u rumoh iébadat nyan -- lagée nyang ka lazem geupeubuet meunyoe awaknyan na bak saboh rumoh iébadat ureuëng Yahudi -- laju meutuka pikeran ngon ureuëng-ureuëng nyang na nibak teumpat nyan keuhai ayat-ayat Alkitab. Hainyan geupeubuet lhée uroe nibak uroe Sabat meuturot-turot. 3 Ngon dasai ayat-ayat Alkitab lé Paulus laju geupeu trang dan geubri bukeuti bahwa Raja Peuseulamat nyang ka geupeu janji lé Po teu Allah peureulée meudeurita dan udeb lom teuma nibak maté. "Isa nyang ulôn peusampoe ubak gata nyan, Gobnyan kheueh Raja Peuseulamat nyang ka geupeujanji lé Po," kheun Paulus. 4 Na meupadub droe nibak teumpat nyan laju jimeuiman dan jiseutôt Paulus ngon Silas; meunan cit ngon jeumeulah nyang le ureuëng-ureuëng Yunani nyang takot keu Allah, dan jai that-that ureuëng-ureuëng inong nyang meusyeuhu. 5 Teuma lé ureuëng-ureuëng Yahudi bingiek até. Awaknyan laju jihôi ureuëng-ureuëng geulandangan nyang na bak binéh-binéh rot laju jipeugét geurombolan peukaru. Laju awaknyan jipeunakaru bansaboh banda nyan dan jiseurang rumoh sidroe ureuëng meuiman nyang nan jih Yason keu jijak mita Paulus ngon Silas, sabab awaknyan jikeuneuk ba Paulus ngon Silas uluwa meuhadab ureuëng rakyat ba. 6 Teuma watée awaknyan hana meurumpok ngon Paulus dan Silas, awaknyan laju jibahue Yason dan na teuma meupadubdroe ureuëng meuiman nyang laén ukeue peujabat-peujabat nyang mat kuasa lam banda nyan. Awaknyan jikuk-kuk, "Ureuëng-ureuëng nyoe jipeuna karu dipat mantong! Jinoenyoe banda tanyoe pih ka jipeukaru lé awaknyan, 7 dan Yason ka jiteurimong awaknyan lam rumoh jih. Awaknyan mandum ji iengkeue peue-peue nyang ka geupeu teutab lé Kaisar Roma, sabab awaknyan jipeugah na lom raja laén nyang nan jih Isa." 8 Ngon tutoe haba nyan ka jeuet ureuëng ramé dan nyang mat kuasa lam banda nyan habéh subra. 9 Laju lé peunguasa nyan jiyue Yason dan ureuëng-ureuëng meuiman laén jibayeue péng jaminan. Óh lheuehnyan barô kheueh awaknyan jipeuleueh. 10 Malam nyan ureuëng-ureuëng meuiman nyang na lam banda nyan jiyue Paulus dan Silas mangat jijak u Berea. Óh trok keunan, Paulus dan Silas laju geujak u rumoh iébadat ureuëng Yahudi. 11 Ureuëng-ureuëng Berea leubeh teubuka até jih nibak ureuëng-ureuëng di Tesalonika. Ngon galak até awaknyan jideungoe haba keuhai Isa, dan tieb-tieb uroe awaknyan jibeuet Alkitab keu jiteupeu peu kheueh ajaran nyang geupurunoe lé Paulus nyan beutôi. 12 Jai that-that lamkawan awaknyan nyang meuiman keu Isa, dan hana bacut nibak ureuëng-ureuëng Yunani nyang meugah-meugah, nyang meuiman; bah kheueh inong meunan cit nyang agam. 13 Watée ureuëng-ureuëng Yahudi nyang na di Tesalonika jideungoe Paulus na teuma jipeusampoe haba Allah di Berea laju jipiteunah dan jipeujeuet ureuëng-ureuëng nyang na di Berea nyan sosah até. 14 Bagaih that-that ureuëng Berea nyan jiintat Paulus bak binéh panté, seudang Silas dan Timotius teutab na tinggai lam banda nyan. 15 Óh ka lheueh ji-intat Paulus trok u Atena, awaknyan nyang intat nyan laju jigisa u Berea sira jiba haba nibak Paulus mangat Silas dan Timotius bubagaih that jiseutôt gobnyan. 16 Teungoh jipreh-preh Silas dan Timotius lé Paulus di Atena nyan, até gobnyan peudeh that watée jikalon banda nyan peunoh ngon beurala. 17 Ngon sabab nyan, lam rumoh iébadat, Paulus laju meutuka pikeran ngon ureuëng-ureuëng Yahudi dan ureuëng-ureuëng laén nyang jiseumah Allah nibak teumpat nyan. Meunan cit lam pasai-pasai tieb-tieb uroe gobnyan meutuka pikeran ngon ureuëng nyang na inan. 18 Gurée-gurée aleran Epikuros dan aleran Stoa meudebat cit ngon gobnyan. Na meupadub droe lamkawan awaknyan jipeugah lagée nyoe, "Ureuëng nyoe peue jiteupeu? Iéleumé jih cit bacut, teuma nyang jiteupeu teuga jipeugah haba!" Lé padub droe ureuëng laén jipeugah teuma lagée nyoe, "Rupari jihnyoe jipeugah keuhai dewa-dewa bansa laén." Awaknyan jipeugah lagée nyan, sabab Paulus meututoe keuhai Isa dan keuhai udeb lom teuma óh ka lheueh maté. 19 Óh lheueh nyan awaknyan laju jiba Paulus bak teumpat meusapat di Bukét Areopagus. Nibak teumpat nyan awaknyan jipeugah bak gobnyan, "Kamoe keuneuk meuteupeue peulajaran barô nyang droeneueh peubeuet nyan. 20 Sabab nyang gata peugah nyan hai-hai nyang teudeungoe jih laén nibak nyang laén. Ngon sababnyan kamoe keuneuk muteupeu makna jih." ( 21 Sabab ureuëng Atena dan ureuëng-ureuëng aséng nyang na disinan galak lumpah na jipeuhabéh watée seunggang jih jideungoe hai-hai nyang paleng barô.) 22 Watée Paulus geudong dikeue ureuëng-ureuëng nyang meugumpôi di Areopagus nyan, "Hei ureuëng-ureuëng Atena! Ulôn kalon lam sigala hai gata keubiet that lagée ureuëng meuagama. 23 Sabab watée ulôn jak-jak bansikeulileng banda gata dan ulôn ngieng teumpat-teumpat iébadat gata, na teuma lôn kalon saboh teumpat keureubeuen; bak teumpat nyan na teutuléh lagée nyoe, 'Ubak Allah Nyang Hana Teuturi.' Syedara, Allah nyang gata seumah teuma hana taturi, Gobnyan kheueh nyang ulôn peugah ubak gata. 24 Allah nyang peujeuet donya nyoe ngon mandum asoe jih, Gobnyan kheueh Tuhan langét ngon bumoe. Gobnyan hana tinggai lam rumoh-rumoh dewa nyang jipeugét lé manusia. 25 Gobnyan pih hana peureulée jitulông lé manusia, sabab Gobnyan kheueh nyang bri udeb na nafáh dan peue-peue mantong keu manusia. 26 Nibak sidroe manusia Gobnyan geupeujeuet sigala bansa dan geuyue awaknyan jitinggai bansigom bumoe. Gobnyan teuma nyang peuteuntée yoh awaikon, pajan dan dipat awaknyan jeuet udeb. 27 Allah geupeubuet nyan mangat awaknyan jimita Gobnyan. Mudah mudahan awaknyan hase meurumpok ngon Gobnyan bak watée awaknyan jimita Gobnyan. Teuma nyang sibeuna jih Allah hana jiôh nibak geutanyoe maséng-maséng. 28 Lagée nyang jipeugah lé gob, 'Tanyoe udeb dan meugrak dan na lam donya nyoe sabab kuasa Gobnyan.' Saban cit lagée nyang jipeugah lé padub droe tukang meuca-e gata. Awaknyan jipeugah lagée nyoe, 'Geutanyoe banmandum na kheueh aneuëk-aneuëk Gobnyan.' 29 Ngon lagéenyan, sabab geutanyoe na kheueh aneuëk-aneuëk Allah, geutanyoe hana jeuet ta anggab Allah saban lagée patong nibak méuh atawa pirak atawa batée nyang teupeugét meunurot keu ahlian manusia. 30 Watée geutanyoe bangai nyan ka geupeutuwoe lé Po teu Allah, teuma Gobnyan bak saátnyoe geuyue bak manusia nyang bansigom donya mangat jimeutobat nibak mandum desya-desya jih. 31 Sabab Gobnyan ka geupeuteuntée saboh watée geuadili bansigom donya nyoe ngon ade. Tugaih nyan teuma jipeubuet lé ureuëng-ureuëng nyang ka geupiléh lé Allah keu nyan. Dan mangat mandum ureuëng teuma yakén keuhai nyan, Allah ka geupeu udeb lom ureuëng nyan nibak maté!" 32 Watée ureuëng-ureuëng nyan jideungoe udeb lom óh lheueh maté, na nibak awaknyan nyang jipeukém Paulus. Na teuma nyang peugah, "Kamoe keuneuk deungoe lom Gata peugah keuhai nyoe." 33 Laju Paulus geutinggai teumpat ureuëng meugumpôi nyan. 34 Teuma na cit lamkawan awaknyan nyang jidong blaih Paulus dan meuiman ubak Isa, awaknyan na kheueh: Dionisius anggota majeuleh Areopagus, dan sidroe ureuëng inong nyang nan jih Damaris, dan na padub droe teuk nyang laén.

Kisah Rasui-Rasui 18

1 Óh lheuehnyan Paulus geutinggai Atena dan laju geujak u Korintus. 2 Nibak teumpat nyan laju meurumpok ngon sidroe ureuëng Yahudi nyang nan jih Akwila; asai jih nibak nanggroe Pontus. Akwila banmantong teuka nibak Italia ngon peurumoh jih Priskila. Awaknyan jijak u Korintus sabab Kaisar Klaudius ka jiyue mandum ureuëng Yahudi jiteubiet lam nanggroe Roma. Paulus laju jijak saweue awaknyan mandua, 3 laju jitinggai disinan ngon awaknyan dan jimubuet meusajan-sajan ngon awaknyan, sabab ngon mita hareukat awaknyan saban lagée Paulus, na kheueh jipeugét khimah. 4 Teuma bak tieb-tieb uroe Sabat, Paulus geujak marit-marit lam rumoh iébadat keu jipeujeuet ureuëng-ureuëng Yahudi meunan cit ureuëng-ureuëng Yunani, meuiman ubak Isa. 5 Óh ka lheueh Silas dan Timotius trok nibak Makedonia, Paulus laju geupeu guna mandum watée geuh keu geujak peusampoe haba gét nibak Po teu Allah ubak ureuëng-ureuëng Yahudi bahwa Isa nyan na kheueh Raja Peuseulamat nyang ka geupeu janji lé Allah. 6 Teuma sabab lé ureuëng-ureuëng hana jipiôh jiteuntang dan jihina gobnyan, lé Paulus laju geukipah abée bak peukayan gobnyan sibagoe tanda teupeuingat awaknyan keuhai buet awaknyan nyang salah. Geupeugah lé Paulus, "Meunyoe gata meuteumé bala, nyan salah gata keudroe! Ulôn hana meutanggong jaweueb! Phon saátnyoe ulôn teuma lôn jak ubak ureuëng-ureuëng nyang bukon Yahudi." 7 Laju Paulus geutinggai awaknyan geujak laju u rumoh nyang na di meurandeh rumoh iébadat nyan. Rumoh nyan bukon rumoh ureuëng Yahudi, teuma ureuëng nyan jiseumah Allah. Nan ureuëng nyan Titius Yustus. 8 Teuma Krispus, pang ulée rumoh iébadat nyan ngon mandum keuluwarga jih peucaya keu Tuhan Isa. Dan jai that cit teuma ureuëng-ureuëng Korintus nyang laén jideungoe haba nyang geupeusampoe lé Paulus, dan awaknyan meuiman ubak Isa laju teupumanö. 9 Bak simalam lam saboh keumalon, Tuhan meufeureuman ubak Paulus, "Bék teumakot, meututoe kheueh troh trang dan bék seungab. 10 Sabab Ulôn na meusajan gata. Hana meusidroe pih nyang hase jipeubuet nyang jeuhet ateueh gata, sabab le that ureuëng lam bandanyoe na kheueh ureuëng-ureuëng Ulôn." 11 Ngon sabab nyan Paulus tinggai di Korintus sithon siteungoh treb jih dan geupeubeuet feureuman Allah ubak awaknyan. 12 Watée Galio jeuet keu gubunur Akhaya, ureuëng-ureuëng Yahudi sipakat jilawan Paulus dan jiba gobnyan ubak kantô mahkamah. 13 Awaknyan jigadu Paulus ngon tuntotan lagée nyoe, "Ureuëng nyoe jipeusuna rakyat ba mangat jiseumah Allah ngon cara hana saban ngon huköm Nabi Musa!" 14 Meunan Paulus jikeuneuk jaweueb, Galio ka jipeugah ubak ureuëng-ureuëng Yahudi, "Hai ureuëng-ureuëng Yahudi! Meunyoe nyang jigadunyoe buet meulanggeh atawa buet jeuhet, ka sipatot jih ulôn saba lôn deungoe nyang gata gadu nyoe. 15 Teuma nyoe na kheueh meudakwa keuhai tutoe haba dan nan-nan ngon huköm gata keudroe! Ngon lagée nyan gata nyang harôh peuseuleusoe. Ulôn hán kutem ulôn peusidang hai-hai nyang lagée nyoe!" 16 Laju Galio jiuse awaknyan uluwa. 17 Teuma awaknyan laju jidrob Sostenes, ulée rumoh iébadat nyan, dan laju jipoh ureuëng nyan dikeue meuja mahkamah. Teuma Galio mubacut hana jipako keuhai nyan. 18 Óh lheueh nyan Paulus mantong treb tinggai di Korintus. Óh lheueh nyan laju geu kheun seulamat tinggai ubak ureuëng-ureuëng meuiman nyang na disinan, laju geumeulayeue ngon Priskila dan Akwila u Siria. Di Kengkrea, Paulus laju geucuko ôk geuh nyang ka geupeubiyeu geupeupanyang sabab kaôy geuh ubak Tuhan. 19 Watée ka trok u Efesus, Paulus laju geutinggai Priskila dan Akwila, laju jitamong lam rumoh iébadat dan meutuka pikeran ngon ureuëng-ureuëng Yahudi nyang na disinan. 20 Awaknyan jilakée mangat gobnyan tinggai leubeh treb ngon awaknyan, teuma gobnyan hana geutem. 21 Bah pih meunan, bak watée geukeuneuk jak lom, Paulus geupeugah, "Meunyoe Allah geubri idhin, ulôn teuma lôn gisa lom keunoe." Óh lheueh geupeugah meunan, gobnyan laju geutinggai Efesus. 22 Óh ka lheueh geutreun di Kaisarea, gobnyan laju geujak u Yerusalem keu geujakbri saleuem keu jeumaáh nyang na disinan, óh lheueh nyan laju geujak u Antiokhia. 23 Óh ka lheueh tinggai disinan na padub treb, gobnyan geujak lom goenyoe geujak saweue daerah Galatia dan Frigia keu geujak peukong iman ureuëng-ureuëng peucaya. 24 Bak watée nyan, teuka kheueh u Efesus sidroe ureuëng Yahudi nyang lahé di Aleksandria, nan ureuëng nyan Apolos. Ureuëng nyan carông that jipeugah haba dan muphom that keu asoe Alkitab, 25 dan ka teupeubeuet mangat jituri keu ajaran Isa. Dan deungon seumangat nyang mubara ureuëng nyan geupurunoe ngon teuliti keuhai Isa, teuma lé ureuëng nyan nyang jiteupeu na kheueh keuhai pumanö nyang geupurunoe lé Nabi Yahya mantong. 26 Ngon hana teumakot sapeue Apolos jipeuphon peugah haba lam rumoh iébadat dan bak watée Priskila dan Akwila jideungoe peu nyang geupeubeuet nyan, awaknyan laju jiba Apolos nyan u rumoh jih. Bak teumpat nyan awaknyan laju jipeutrang bak gobnyan keuhai nyang leubeh paih lom reuncana Allah keu geupeu seulamat manusia meulalu Isa. 27 Óh lheueh nyan Apolos na niet keuneuk jak u Akhaya. Teuma ureuëng-ureuëng nyang meuiman ubak Isa di Efesus jituléh surat keu syedara-syedara nyang ka meuiman di Akhaya mangat awaknyan jitem teurimong Apolos. Dan watée Apolos trok u Akhaya, peue nyang geutulông nyan keubiet that-that meuguna keu ureuëng-ureuëng nyang sabab nekmat Allah ka jimeuiman ubak Isa. 28 Sabab, ngon that-that meuwibawa, Apolos jipeutaloe ureuëng-ureuëng Yahudi watée tieb-tieb meudobat dikeue ureuëng ramé. Dan gobnyan laju geubri bukeuti ngon ayat-ayat nyang na lam Alkitab bahwa Isa Raja Peuseulamat nyang ka geupeu janji.

Kisah Rasui-Rasui 19

1 Teungoh Apolos mantong na di Korintus, Paulus teungoh geujak-jak bansaboh gampông nyang na didaerah nyan óh lheueh nyan trok laju u Efesus. Disinan laju meurumpok ngon na meupadubdroe ureuëng nyang ka meuiman ubak Isa. 2 Laju geutanyong bak awaknyan, "Peu kheueh syedara-syedara ka tateurimong Roh Allah watée gata meuiman ubak Isa?" Awaknyan jijaweueb, "Gohlom. Lom teuma, kamoe hántom meudeungoe bahwa na Roh Allah." 3 "Meunyoe meunan, ngon cara pumanö peu kheueh gata teupeumanö?" tanyong Paulus. "Ngon cara pumanö Nabi Yahya," jaweueb awaknyan. 4 Laju geupeugah lé Paulus, "Nabi Yahya geupumanö gob sibagoe tanda bahwa ureuëng nyan ka jitobat nibak mandum desya-desya jih. Teuma watée nyan cit teuma Nabi Yahya geupeugah bak ureuëng-ureuëng Israel bahwa awaknyan harôh meuiman ubak ureuëng nyang teuma teuka dudoe nibak gobnyan, ureuëng nyan na kheueh Isa." 5 Watée awaknyan jideungoe nyan, awaknyan laju teupumanö ateueh nan Isa. 6 Dan watée Paulus geukeubah jaroe geuh ateueh awaknyan, Roh Allah laju jikuasa ateueh awaknyan, laju awaknyan jimarit lam mubagoe basa dan jipeusampoe haba nibak Po teu Allah. 7 Jeumeulah awaknyan mandum na kira-kira dua blaih droe. 8 Lhée buleuen treub jih Paulus sabe geumeututoe ngon trok trang ubak ureuëng-ureuëng nyang na lam rumoh-rumoh iébadat dan meudobat ngon awaknyan keu geupeuyakén awaknyan keuhai pakriban Allah geumat peurintah sibagoe Raja. 9 Teuma na meupadubdroe lamkawan awaknyan keubiet that kreueh ulée dan hana jitem. Dikeue mandum ureuëng nyang na meugumpôi disinan awaknyan jirapa ngon jihina ajaran keuhai reuncana Allah keu geupeu seulamat manusia rot Isa. Ngon sababnyan Paulus laju jitinggai awaknyan, laju jijak ngon murit-murit Isa lam ruweueng kuliah Tiranus. Nibak teumpat nyan tieb-tieb uroe gobnyan meusueue jaweueb ngon ureuëng dum na. 10 Gobnyan geupeubuet hainyan hana putôh-putôh na dua thon treb jih sampoe mandum ureuëng nyang na tinggai di propinsi Asia, bah kheueh ureuëng Yahudi meunan cit ngon ureuëng bansa laén, mandum jideungoe peue nyang geufeureuman lé Tuhan. 11 Allah geupeuna buet-buet nyang ajaéb luwabiasa rot Paulus. 12 Meunyoe ija lab jaroe atawa talo keuieng Paulus nyang ka lheueh jingui jiba bak ureuëng sakét, peunyakét ureuëng nyan gadôh dan roh jén pih jiteubiet nibak awaknyan. 13 Na meupadubdroe dukon Yahudi jijak ho-homantong, jiuse roh-roh jeuhet nyang jitamong bak ureuëng dum na. Dukon nyan pih jicuba-cuba cit jipeuguna nan Isa keu jiuse roh-roh jén nyan. Awaknyan jipeugah bak roh-roh jén nyan, "Ateueh nan Isa nyang jipeusampoe lé Paulus nyan, ulôn use kah hai jén!" 14 Na tujoh droe aneuëk agam sidroe imeum ulée, nyang nan jih Skewa, nyang peubuet hai lagée nyan. 15 Teuma roh jén nyan jipeugah bak awaknyan, "Ulôn kuturi Isa dan Paulus pih ulôn turi, teuma kahnyoe soe?" 16 Laju lé ureuëng nyang ka jitamong jén nyan jilumpat dan jiteugom awaknyan ngon juah lagoena sampoe awaknyan jiplueng nibak rumoh nyan ngon luka-luka dan badan jih teulon, sabab peukayan awaknyan jipriek-priek nibak badan ureuëng nyan. 17 Banmandum bansa Yahudi dan bansa laén nyang na tinggai di Efesus jideungoe keuhai keujadian nyan, dan awaknyan mandum jiteuka takot. Teuma ngon lagée nyan nan Tuhan Isa maken jipujoe-pujoe. 18 Jai that ureuëng nyang ka meuiman ubak Isa, jijak meungaku dikeue ureuëng ramé keuhai desya-desya jih yoh watée ilée. 19 Dan awaknyan nyang ka kayém jingui iéleumé guna-guna, laju jipeusapat mandum kitab-kitab jih dan laju jitot dikeue ureuëng ramé. Yuem mandum kitab-kitab nyan meunyoe teujeumeulah na kira-kira limong ribée péng pirak. 20 Lagée nyan kheueh, ngon cara nyang luwabiasa nyan feureuman Tuhan maken meukeumang dan seumaken teuga peungaroh jih. 21 Óh ka lheueh keujadian-keujadian nyan, Paulus geucok keuputosan keu geujak u Makedonia dan Akhaya laju beusôt u Yerusalem. "Óh ka lheueh trok keudeh," kheun Paulus, "ulôn harôh lôn jak teuma u Roma." 22 Teuma lé Paulus laju geukirém dua droe utosan nyang geucok nibak peumbantu-peumbantu geuh, awaknyan na kheueh Timotius dan Erastus keu jijak u Makedonia, dan Paulus tinggai na padub treb teuma di propinsi-propinsi Asia. 23 Kira-kira bak watée nyan kheueh jiteuka karu ka-ak, ka-ok, nyang paleng rayeuk di Efesus sabab peungajaran keuhai Isa. 24 Sabab lam banda nyan na sidroe teumpeuen peuget pirak nyang nan jih Demetrius, nyang buet jih jipeugét rumoh-rumoh dewa keu Dewi Artemis. Useuha ureuëng nyan keubiet rayeuk that jipeutamong hase keu utôh-utôh nyang mubuet bak jih. 25 Ngon sabab nyan ureuëng nyan laju jipeusapat bubena utôh-utôh jihnyan meusajan-sajan ngon utôh-utôh pirak nyang laén, laju jipeugah, "Syedara-syedara! Gata mandum tateupeue bahwa geutanyoe na meuteumé hase nibak buet tanyoe nyoe. 26 Jinoenyoe syedara ka takalon tadeungoe keudroe peue nyang jipeubuet lé Paulus nyan. Jihnyan jipeugah bahwa dewa-dewa nyang teupeugét lé manusia mubacut pih nyan kon dewa. Dan Paulus nyan ka meuhase jipeujeuet ureuëng meuiman ubak ajaran jih, bukon mantong disinoe, di Efesus, teuma rab mandum bansaboh Asia. 27 Bahya jih na kheueh bahwa peurusahaan tanyoenyoe meuteumé nan brok. Dan bukon mantong keuhai nyan, rumoh Dewi Artemis pih teuma jianggab hina dan keubeusaran Dewi Artemis nyan teuma jigiloe-giloe; padahai jihnyan dewi nyang teupujoe lé mandum ureuëng di Asia dan bansigom donya!" 28 Meunan awaknyan jideungoe haba nyan até awaknyan ka jeuet keuseu-uem, laju awaknyan jikuk-kuk, "Udeb Artemis, dewi ureuëng Efesus!" 29 Dan karu nyan laju meuluwah sampoe bansaboh banda. Óh lheueh nyan geurombolan peukarunyan laju jidrob Gayus dan Aristarkus, na kheueh ureuëng-ureuëng Makedonia nyang geucok keurakan lé Paulus lam meuneujak geuh, laju jibahue awaknyan ubak stadion banda nyan. 30 Paulus keuneuk geutamong geuseutôt awaknyan, teuma ureuëng-ureuëng nyang ka meuiman ubak Isa nyang na disinan jitam gobnyan. 31 Na meupadubdroe ureuëng rayeuk lam propinsi Asia nyan pih, nyang meurakan ngon Paulus, jiyue ureuëng laén keu jijak peugah ubak Paulus mangat gobnyan bék geupeudeuh droe bak stadion nyan. 32 Watéenyan ureuëng-ureuëng nyang meugumpôi lam stadion nyan ka jeuet keukaru ka-ak ka-ok. Na nyang jikuk-kuk lagéenyoe, na nyang jikuk-kuk lagée nyan, sabab jai that-that nibak awaknyan hana jiteupeue peue sabab awaknyan meusapat bak teumpat nyan. 33 Na siteungoh nibak ureuëng ramé nyan jipike Aleksander nyang peuna ramé nyan sampoe jeuet keukaru lagée nyan bagoe, sabab jihnyan nyang jitulak ukeue lé ureuëng-ureuëng Yahudi. Teuma Aleksander jibri isyarat ngon jaroe jih keu jilakée watée jibila droe dikeue ureuëng ramé nyan. 34 Teuma meunan jikalon bahwa jihnyan ureuëng Yahudi, ngon su meusigoe awaknyan jidumpék ngon su meutaga, "Udeb Artemis, dewi ureuëng Efesus!" 35 Akhé jih panetra banda meuhase jipeuseungab ureuëng-ureuëng nyang teungoh beungéh nyan, ureuëng nyan jipeugah lagée nyoe, "Hai peunduduek Efesus! Soemantong ureuëng jiteupeu bahwa Efesus kheueh banda nyang peulara rumoh Dewi Artemis dan batée suci nyang rhot di langét. 36 Hana meusidroe pih nyang hase jibantah hai nyan. Ngon sabab nyan teunang kheueh dan bék tapeubuet hai-hai nyang teugopoh-gopoh. 37 Ureuëng-ureuëng nyoe, gataba keunoe bukon sabab awaknyan ka jireupah rumoh dewa atawa sabab awaknyan ka jihina dewi geutanyoe. 38 Meunyoe Demetrius ngon mandum utôh-utôh jih na niet keuneuk jak gadu teuhadab sidroe-droe ureuëng, bah kheueh awaknyan jiba peukara jih ubak kantô mahkamah. Kantô mahkamah teubuka keu nyan dan peujabat-peujabat peumeurintah pih sabe na. 39 Teuma meunyoe na lom sapeue-sapeue nyang laén nyang gata lakée, nyan harôh teupeuseuleusoe lam rapat umum nyang sah. 40 Sabab peue nyang teujadi nibak uroenyoe jeuet keubala ateueh geutanyoe. Geutanyoe jeuet jitudôh tapeuna beurontak, sabab geutanyoe hana meusaboh alasan pih nyang jeuet tapeubeuna karu nyang ka-ak, ka-ok nyoe." 41 Óh ka lheueh jipeugah mandum nyan, panetra banda laju jiyue bak ureuëng raményan mangat jiwoe.

Kisah Rasui-Rasui 20

1 Óh ka lheueh keuadaan di Efesus teuntram keula-i, Paulus laju geupeusapat jeumaáh dan geubri seumangat keu awaknyan. Óh lheueh nyan geupeugah seulamat tinggai dan laju geujak u Makedonia. 2 Gobnyan geujak saweue daerah-daerah Makedonia dan geubri naseuhat nyang jai keu ureuëng-ureuëng meuiman ubak Isa nibak teumpat nyan keu geubri durongan bak awaknyan. Óh lheueh nyan gobnyan laju geujak u Yunani. 3 Na lhée buleuen treb jih gobnyan tinggai inan. Watée gobnyan ka siab-siab keuneuk meulayeue u Siria, na haba bahwa ureuëng-ureuëng Yahudi ka siab-siab jikeuneuk poh maté gobnyan. Ngon sabab nyan gobnyan geucok keuputosan keu geugisa rot Makedonia. 4 Sopater aneuëk Pirus asai jih nibak Berea jijak meusajan-sajan ngon gobnyan; meunan cit deungon Aristarkus dan Sekundus ureuëng Tesalonika, dan Gayus ureuëng Derbe. Meunan cit Timotius, Tikhikus dan Trofimus, ureuëng-ureuëng nibak propinsi Asia. 5 Awaknyan jijak leubeh awai nibak kamoe dan jipreh kamoe di Troas. 6 Óh ka lheueh Peurayaan Ruti Hana Meuragoe, kamoe meulayeue kamoe tinggai Filipi. Limong uroe óh lheueh nyan kamoe meusapat lom ngon awaknyan di Troas. Inan kamoe tinggai siseun aleuhat. 7 Malam aleuhat kamoe meusapat keu kamoe makheun meusajan seucara meusyedara. Paulus geumeututoe ngon ureuëng-ureuëng nyang na inan, sabab singoh nyan gobnyan ka na niet keuneuk beurangkat lom. Trok teungoh malam Paulus hana geupiôh geupeugah haba. 8 Lam kama bak tingkat ateueh, teumpat kamoe meusapat nyan jai that-that panyöt. 9 Na sidroe peumuda nyang nan jih Eutikhus jiduek bak tingkab. Sabab Paulus hana geupiôh-piôh geupeugah haba, peumuda nyan laju jiteuka teungét ngon brat that mata jih sampoe teuéh bak tingkab nyan, dan laju rhot u miyueb phon nibak tingkat lhée. Watée awaknyan jibeuôt peumuda nyan, rupari jihnyan ka maté. 10 Teuma Paulus geutreun u miyueb dan geupeureubah droe ateueh badan peumuda nyan sira geuwa. Geupeugah lé Paulus, "Bék khawate, jihnyoe mantong udeb!" 11 Óh lheueh nyan Paulus geuék lom u ateueh, laju geubagi-bagi ruti dan geumakheun meusajan-sajan. Óh ka lheueh geumeututoe ngon ureuëng-ureuëng nyang na inan sampoe beungoh, Paulus laju geubeurangkat. 12 Ureuëng-ureuëng nyang laén laju jipeuwoe peumuda nyang mantong udeb nyan u rumoh jih. Awaknyan meurasa mangat that dan lumpah teuhibor. 13 Kamoe jak bak kapai dan laju kamoe meulayeue leubeh awai u Asos keu kamoe jak sambot Paulus bak kapai. Gobnyan ka geuatoe lagée nyan sabab teuma geujak keunan rot darat. 14 Óh ka lheueh meurumpok di Asos, Paulus laju geuék ateueh kapai laju kamoe meulayeue u Metilene. 15 Nibak teumpat nyan kamoe meulayeue lom, dan singoh nyan kamoe ka trok bak teumpat nyang meuhadab ngon Khios. Lusa nyan kamoe trok u Samos dan siuroe óh lheueh nyan di Miletus. 16 Paulus ka geucok keuputosan bahwa gobnyan hana geupiôh di Efesus, mangat bék teuboh watée didaerah Asia. Meunyoe jeuet gobnyan meuharab that bubagaih trok u Yerusalem bak uroe raya Pentakosta. 17 Nibak Miletus Paulus geukirém haba u Efesus keu geulakée bubena peumimpén jeumaáh nyang na inan jijak meurumpok ngon gobnyan. 18 Watée awaknyan trok keunan, Paulus geupeugah bak awaknyan, "Syedara-syedara mandum tateupeue pakriban ulôn udeb nyang ka nyoe lamkawan gata watée uroe phon that ulôn trok di Asia. 19 Ngon até nyang miyueb dan ngon ié mata nyang ro, ulôn mubuet keu Tuhan di teungoh-teungoh deurita nyang ulôn rasa sabab reuncana jeuhet ureuëng-ureuëng Yahudi. 20 Syedara tateupeue bahwa ulôn hana seugan-seugan ulôn bri thée bak gata peue nyang meuguna keu gata. Ulôn peubeuet gata bak teumpat-teumpat meusapat ureuëng ramé dan nibak rumoh-rumoh. 21 Bah kheueh ubak ureuëng-ureuëng Yahudi meunan cit keu bansa-bansa laén sabe ulôn peuingat mangat awaknyan jimeutobat nibak mandum desya-desya jih dan jijak ubak Po teu Allah, ngon peucaya ubak Tuhan Isa. 22 Jinoenyoe keu teutaát bak perintah Roh Allah, ulôn jak u Yerusalem. Dan ulôn hana lôn teupeu peue nyang teujadi ateueh ulôn nibak teumpat nyan. 23 Nyang ulôn teupeu bahwa bak tieb-tieb banda, Roh Allah ka deungon teugaih geubri tée ubak ulôn, bahwa ulôn teuma lôn tamong lam glab dan teuma meudeurita. 24 Teuma ulôn hana lôn pakoe ngon udeb ulôn nyoe, asai ulôn hase lôn peuseuleusoe tugaih nyang geupeucaya lé Tuhan Isa ubak ulôn dan asai ulôn seutia sampoe ubak akhé hayat keu ulôn peusampoe Haba Gét nyan keuhai rakhmat Allah. 25 Ulôn ka lôn jak saweue syedara-syedara banmandum dan ka ulôn peusampoe cit teuma keuhai pakriban Allah geumat peurintah sibagoe Raja. Jinoenyoe ulôn rasa ulôn hana meurumpok le ngon mandum syedara. 26 Ngon sabab nyan ngon troh trang ulôn peugah ubak gata nibak uroe nyoe bahwa meunyoe na lamkawan gata nyang binasa singoh, nyan kon salah ulôn. 27 Hántom na ulôn plueng nibak tugaih ulôn keu ulôn peugah bak gata banmandum reuncana Po teu Allah. 28 Bah kheueh gata jaga droe dan jaga kheueh mandum jeumaáh nyang ka geuseurah lé Roh Allah ubak gata keu teujaga; sabab gata ka teubaiát jeuet keu nyang jaga jeumaáh nyan. Bah kheueh gata jaga jeumaáh Allah nyan lagée tukang meurabe jijaga bubiri jih, sabab Allah ka geupeujeuet jeumaáh nyan atra milék Gobnyan rot Aneuëk Gobnyan nyang maté. 29 Saban lagée ulôn, pasti teuma teuka srigala-srigala nyang juah lamkawan gata. Dan ureuëng-ureuëng nyang gata jaga teuma jeuet keu eumpeuen srigala-srigala nyan. 30 Dan lamkawan gata keudroe pih teuma teuka ureuëng-ureuëng nyang jipeusampoe haba-haba nyang hana beutôi. Awaknyan jipeubuet meunan mangat ureuëng nyang ka meuiman ubak Isa jeuet keu sisat dan jiseutôt awaknyan. 31 Sabab nyan meujaga-jaga kheueh! Ingat bahwa lhée thon treb jih ngon jai that ié mata ro, uroe malam ulôn hántom na lôn piôh lôn purunoe ureuëng nibak gata. 32 Jinoenyoe ulôn seurah gata ubak Allah mangat Gobnyan nyang peulara gata dan mangat gata teutab tamumat bak haba rakhmat Allah. Allah na kuasa keu geupeukong gata dan geubri ubak gata beureukat-beureukat nyang ka geukeubah keu banmandum umat gobnyan. 33 Gohlom na ulôn meuharab péng atawa peukayan bak soe mantong. 34 Gata keudroe tateupeue, bahwa ngon teunaga ulôn keudroe ulôn meukeureuja keu lôn peupeunoh peue nyang ulôn peureulée dan rakan-rakan ulôn nyang na jiseutôt ngon ulôn. 35 Lam peukara peue mantong ulôn ka lôn bri teuladan ubak gata bahwa ngon keureuja brat nyang lagée nyoe geutanyoe harôh tatulông ureuëng-ureuëng nyang hana teuga. Sabab geutanyoe harôh taingat peue nyang Tuhan Isa keudroe geupeugah, 'Leubeh mubahgia tabri nibak tateurimong.' " 36 Óh ka lheueh Paulus geupeugah haba, gobnyan meuteuôt ngon awaknyan dan laju meudoá. 37 Awaknyan mandum jimoe sira jiwa Paulus dan jipeugah seulamat jalan. 38 Awaknyan seudeh sabab Paulus geupeugah bahwa awaknyan hana teuma jikalon le gobnyan. Laju awaknyan ji intat gobnyan trok bak kapai.

Kisah Rasui-Rasui 21

1 Kamoe lakée idhin bak peumimpén-peumimpén jeumaáh di Efesus nyan, óh lheueh nyan laju kamoe tinggai awaknyan. Dan laju kamoe meulayeue langsong u pulo Kos; singohnyan trok laju kamoe u pulo Rodos. Beudôh inan laju kamoe meulayeue u peulabohan Patara. 2 Di Patara, meuteumé kapai nyang meulayeue u Fenisia. Dan kamoe ék kampai nyan laju beurangkat 3 dan meulayeue laju sampoe kamoe ngieng pulo Siprus blaih wie kamoe; teuma kamoe laju meulayeue lom dan kamoe karat u Siria. Kamoe ék ateueh darat di Tirus, sabab nibak teumpatnyan kapai nyang kamoe meunumpang nyan jibongka barang. 4 Bak teumpatnyan laju kamoe jak saweue ureuëng-ureuëng nyang meuiman ubak Isa, laju kamoe tinggai ngon awaknyan nyang treb jih na siseun aleuhat. Ateueh peutunyok nibak Roh Allah awaknyan jitam Paulus bék geujak u Yerusalem. 5 Teuma óh ka habéh watée jih kamoe tinggai disinan, laju kamoe tinggai awaknyan dan kamoe karat lom meujak kamoe. Awaknyan banmandum meusajan ngon aneuëk peurumoh jih ji-intat kamoe sampoe uluwa banda. Disideh bak binéh panté, kamoe mandum meuteuôt dan meudoá. 6 Óh lheuehnyan laju kamoe saléng mumat jaroe sidroe ngon nyang laén, óh lheueh nyan laju kamoe ék ateueh kapai dan awaknyan pih laju jiwoe u rumoh. 7 Kamoe meulayeue laju phon di Tirus trok laju u Ptolemais. Bak teumpat nyan laju kamoe jak saweue ureuëng-ureuëng nyang ka, meuiman keu kamoe bri saleuem bak awaknyan, dan laju kamoe tinggai siuroe ngon awaknyan. 8 Singohnyan kamoe jak lom, laju trok u Kaisarea. Bak teumpat nyan kamoe jak meurumpok ngon peunginjil nyang nan jih Filipus, dan kamoe tinggai dirumoh jihnyan. Ureuëng nyan na kheueh sidroe lamkawan tujoh nyang ka teupiléh di Yerusalem. 9 Peuet droe aneuëk dara jih ka geubri keumampuan lé Allah keu jipeusampoe feureuman Allah. 10 Óh kana padubna treb kamoe inan, teuka kheueh nibak Yudea sidroe nabi nyang nan jih Agabus. 11 Gobnyan geujak bak kamoe laju geucok talo keuieng Paulus. Ngon talo keuieng nyan ureuëng nyang laju ji ikat gaki dan jaroe droe jih. Óh lheueh nyan jipeugah, "Nyoe kheueh nyang geupeugah lé Roh Allah: Nyangpo talo keuieng nyoe jiikat lagéenyoe teuma di Yerusalem lé ureuëng-ureuëng Yahudi, dan jipeujok bak ureuëng-ureuëng nyang bukon Yahudi." 12 Watée kamoe deungoe hainyan, kamoe dan mandum syedara nyang tinggai di Kaisarea nyan jilakée ngon meuharab that ubak Paulus mangat gobnyan bék geujak u Yerusalem. 13 Teuma gobnyan geujaweueb, "Keupeuguna jih gatamo lagée nyoe sampoe até ulôn hanco? Ulôn ka siab bukon mantong jidrob disideh, teuma keu maté pih ulôn rela deumi Tuhan Isa." 14 Paulus hana geutem deungoe kamoe, ngon lagée nyan laju kamoe iem hana kamoe tam le. "Bah kheueh keuheundak Tuhan nyang teujadi," kheun kamoe. 15 Óh ka lheueh tinggai inan na meupadub treb, laju kamoe peukeumah barang-barang kamoe, dan laju kamoe beurangkat u Yerusalem. 16 Na meupadubdroe syedara geutanyoe nibak Kaisarea jijak cit meusajan ngon kamoe keu ji-intat kamoe u rumoh Manason, sabab dirumoh jih kheueh kamoe mudom. (Manason na kheueh ureuëng Siprus nyang ka treb that jeuet keu murit Isa). 17 Watée kamoe trok u Yerusalem, syedara-syedara nyang na inan jisambot kamoe ngon galak até. 18 Óh singohnyan Paulus geujak meusajan ngon kamoe teuma meurumpok ngon Yakobus; mandum peumimpén-peumimpén jeumaáh nyang na inan na cit sajan. 19 Óh ka lheueh geubri saleuem bak awaknyan, Paulus laju geucalitra bak awaknyan peue-peue mantong nyang ka geupeubuet lé Allah rot gobnyan nibak teungoh teungoh ureuëng nyang bukon Yahudi. 20 Óh ka lheueh jideungoe calitra Paulus nyan, awaknyan mandum jipujoe Allah. Óh lheueh nyan awaknyan jipeugah bak Paulus, "Syedara Paulus! Droeneueh harôh tateupeue bahwa ka meuribée-ribée ureuëng Yahudi nyang ka meuiman ubak Isa. Awaknyan mandum na kheueh ureuëng-ureuëng nyang seutia jitaát bak huköm Nabi Musa. 21 Dan jinoenyoe awaknyan jideungoe bahwa Droeneueh neupeubeuet mandum ureuëng Yahudi nyang tinggai diteungoh-teungoh bansa laén, mangat jipeuleueh huköm Nabi Musa. Droeneueh neu naseuhat awaknyan mangat awaknyan bék jipeusunat aneuëk-aneuëk awaknyan atawa jiseutôt adat istiadat Yahudi. 22 Jinoenyoe ureuëng-ureuëng Yahudi nyang ka meuiman nyan teuntée jideungoe bahwa Droeneueh kana inoe. Ngon nyan, pakriban jinoe? 23 Nyang gét jih neuseutôt kheueh naseuhat kamoe. Na peuet droe inoe nyang ka jipeugét janji bak Tuhan. 24 Jroh that Droeneueh jak peusuci droe meusajan-sajan ngon awaknyan, dan neutanggong kheueh biaya awaknyan mangat ôk awaknyan jeuet teucuko. Ngon lagée nyan teuma deuh bak mandum ureuëng bahwa peue nyang jideungoe keuhai Droeneueh hana beutôi, sabab Droeneueh keudroe pih neuamai huköm Nabi Musa. 25 Teuma keuhai ureuëng nyang kon Yahudi nyang ka meuiman keu Isa, kamoe ka meukirém surat bak awaknyan keuhai keuputosan kamoe bahwa awaknyan hana jeuet jimakheun peunajoh nyang ka teupeuseumah keu beurala, hana jeuet pajoh darah, atawa teupajoh beulatang nyang maté teuceukiek; dan hana jeuet teupeubuet buet-buet nyang cabui." 26 Ngon lagée nyan Paulus laju geujak ngon ban peuet droe awaknyan dan geupeuna laju upacara teupeusuci droe meusajan-sajan ngon awaknyan óh singoh uroe. Óh lheueh nyan awaknyan laju jitamong lam Baét Allah keu jijak bri tée bahwa na padub uroe teuk barô kheueh upacara teupeusuci droe nyan seuleusoe dan keureubeuen keu awaknyan maséng-maséng jipeuseumah teuma. 27 Óh watée tujoh uroenyan karab habéh, na padub droe ureuëng Yahudi nibak Asia jikalon Paulus na lam Baét Allah. Laju awaknyan jipeusuna ureuëng ramé, óh lheuehnyan laju jimat Paulus 28 sira jikuk-kuk, "Hai ureuëng-ureuëng Israel, tulông! Nyoe kheueh ureuëng jih nyang jijak ho-ho mantong jijak peubeuet ubak mandum ureuëng ajaran-ajaran nyang jihina bansa Israel, jilawan huköm Nabi Musa dan jihina Baét Allah nyoe. Jinoenyoe ka jijeuet ba ureuëng-ureuëng nyang bukon Yahudi lam Baét Allah dan jipeubuet najih bak teumpat nyang sucinyoe!" ( 29 Awaknyan jipeugah meunan sabab awaknyan ka jikalon Trofimus ureuëng Efesus lam banda meusajan-sajan ngon Paulus; dan jipike Paulus ka geuba ureuëng nyan lam Baét Allah.) 30 Bansaboh banda ka jeuet keu ka-ak ka-ôk, dan mandum ureuëng jiplueng-plueng sira jihudom. Awaknyan laju jidrob Paulus jibahue gobnyan jipeuteubiet lam Baét Allah. Watée nyan cit teuma pintoe Baét Allah teutôb. 31 Teungoh mandum ureuëng nyang peuna karu nyan jiuseuha keuneuk poh maté Paulus, ureuëng laén laju jijak peugah ubak keumandan pasokan Roma bahwa bansaboh Yerusalem teungoh subra. 32 Watée nyan cit teuma keumandan nyan jicok na padub droe peuwira dan padub droe teuma sipa-i laju bagaih-bagaih jijak ngon awaknyan bak teumpat nyang teungoh karu nyan. Watée ureuëng jai nyan jikalon keumandan nyan ngon pasokan jih, awaknyan laju jipiôh jipoh Paulus. 33 Keumandan nyan laju jijak bak Paulus laju jidrob gobnyan, jiyue ureuëng laén mangat jaroe geuh nyan teuranté. Óh lheueh keumandan nyan jitanyong soe Paulus nyan dan peue nyang ka jipeubuet. 34 Siteungoh nibak ureuëng ramé nyan na nyang jaweueb meunoe dan teuma nyang jaweueb meudeh. Keuadaan nyan lumpah that subra nyan sampoe lé keumandan nyan hana hase geuteupeu peue nyang ka teujadi. Ngon sabab nyan keumandan nyan laju jipeurintah mangat Paulus geuba bak markas. 35 Watée awaknyan teungoh jiba gobnyan trok bak reunyeuen. Ureuëng-ureuëng peuna karu nyan laju ji heuntam Paulus teuga lumpah na akhé jih Paulus harôh jirandée lé na meupadub droe sipa-i. 36 Awaknyan jiseutôt gobnyan nibak likot lé geurombolan ureuëng-ureuëng nyang peuna karu nyan nyang jikuk-kuk, "Peumaté jihnyan!" 37 Meunan keuneuk geutamong lam markas, Paulus geupeugah bak keumandan nyan, "Peu kheueh jeuet lôn meututoe sikeujab ngon Teungku?" "Peu kheueh gata jeuet tameututoe ngon basa Yunani?" Jitanyong lé keumandan nyan. 38 "Meunyoe meunan, gata bukon ureuëng Meusé, nyan kheueh nyang yoh awai ilée jipeuna beurontak dan jipeuplueng droe na peuet ribée droe tukang peuna karu nyang meusinjata jitamong lam padang pasi?" 39 Geujaweueb lé Paulus, "Ulôn ureuëng Yahudi; ulôn wareuga banda Tarsus, banda nyang peunteng di Kilikia. Neupeuidhin kheueh ulôn meututoe bak ureuëng-ureuëng nyan." 40 Teuma óh ka lheueh Paulus jibri idhin keu geumeututoe, Paulus laju geudong bak reunyeuen, laju geubri isyarat ngon jaroe gobnyan. Mandum ureuëng jeuet keuseungab. Óh lheueh nyan Paulus geumeututoe bak awaknyan lam basa Ibrani. Paulus geupeugah.

Kisah Rasui-Rasui 22

1 "Bapak-bapak dan syedara-syedara banmandum! Ulôn teuma lôn peugah keuhai lôn bila droe lôn ubak syedara. Cuba deungoe nyoe!" 2 Watée awaknyan jideungoe Paulus geumeututoe lam basa Ibrani, awaknyan leubeh seungab ngon teunang. Ngon lagée nyan, Paulus geupeugah lom haba gobnyan. 3 "Ulôn ureuëng Yahudi," kheun Paulus, "Ulôn lahé di Tarsus lam nanggroe Kilikia, teuma ulôn rayeuk lam Yerusalem nyoe, dan jididek ngon biet-biet that lé gurée rayeuk ulôn Gamaliel lam huköm nyang geubri lé Nabi Musa ubak indatu geutanyoe. Saban lagée syedara banmandum inoe nibak uroenyoe, ulôn pih biet-biet that sunggoh keu Po teu Allah. 4 Ulôn iénanya sampoe maté murit-murit ajaran barô nyan. Awaknyan mandum, bah kheueh nyang agam meunan cit nyang inong, ulôn drob dan lôn peutamong lam glab. 5 Imeum agong keudroe dan mandum Mahkamah Agama jeuet teucok keusaksi bahwa ulôn hana sulet. Sabab awaknyan kheueh nyang ka geubri keu ulôn surat peu intat haba nyang jituju keu ureuëng-ureuëng Yahudi nyang na di Damsyik. Ngon na surat nyan ulôn jeuet lôn drob inan ureuëng-ureuëng nyang meuiman ubak ajaran nyan, dan lôn ba awaknyan u Yerusalem keu teuhuköm." 6 "Watée ulôn mantong bak rot euh dan rab trok u Damsyik, watée nyan cot uroe, saboh cahya nyang trang lumpah na ngon hana teusangka-sangka jiteubiet nibak langét ban sikeulileng lôn. 7 Ulôn reubah bak tanoh dan laju ulôn deungoe su nyang jipeugah bak ulôn, 'Saulus, Saulus! Pakon gata iénanya Ulôn?' 8 Laju ulôn tanyong, 'Soe kheueh Droeneueh, Teungku?' 'Ulôn kheueh Isa ureuëng Nazaret nyan nyang gata iénanya,' jaweueb su nyan. 9 Ureuëng-ureuëng nyan na inan meusajan ngon ulôn jingieng cahya nyan, teuma awaknyan hana jideungoe su nyang geupeugah bak ulôn. 10 Laju lôn tanyong teuma, 'Peue nyang harôh ulôn peubuet, Tuhan?' Tuhan geujaweueb, 'Beudôh kheueh dan tamong u Damsyik. Inan eunteuk gata teuma geubri tée keuhai mandum nyang lé Allah gatatem peubuet.' 11 Ulôn jeuet keubuta sabab cahya nyang seulala nyan. Dan rakan-rakan ulôn laju jipapah ulôn peutamong u Damsyik. 12 Inan na sidroe ureuëng nyang nan jih Ananias. Ureuëng nyan sidroe ureuëng nyang saleh dan taát that jipeubuet huköm Nabi Musa. Mandum ureuëng Yahudi nyang na tinggai di Damsyik jihoreumat that keu ureuëng nyan. 13 Gobnyan teuka geujak ngieng ulôn, laju geudong bakbinéh ulôn sira geupeugah, 'Syedara Saulus, bah kheueh gata tameungieng lom teuma!' Watée nyan cit teuma ulôn beuôt ulée lôn dan lôn ngieng gobnyan. 14 Óh lheueh nyan gobnyan geupeugah bak ulôn, 'Allah indatu geutanyoe ka geupiléh gata mangat gata tateupeue nyang geulakée lé Gobnyan, dan takalon Isa, Hamba Allah nyang geupeubuet keuheundak Allah dan geudeungoe su Isa keudroe. 15 Gata teuma jeuet keu keusaksi keu gata peusampoe bak mandum ureuëng peue nyang ka gata deungoe dan gata kalon. 16 Jinoenyoe bék le gata preh treb that. Beudôh kheueh, dan jok kheueh droe gata teupumanö. Meulakée kheueh ubak Tuhan mangat gata geupeu beubaih mandum desya-desya gata.' " 17 "Ulôn gisa u Yerusalem, dan watée ulôn teungoh meudoá lam Baét Allah, ulôn jikuasa lé Roh Allah. 18 Ulôn kalon Tuhan: Gobnyan geupeugah bak ulôn, 'Bubagaih gata tinggai Yerusalem, sabab ureuëng-ureuëng disinoe hana galak jideungoe gata meusaksi keuhai Ulôn.' 19 Laju lôn peugah, 'Tuhan, awaknyan jiteupeu that bahwa ulôn ka lôn tamong lam rumoh-rumoh iébadat keu lôn jak drob awaknyan dan ulôn poh ureuëng-ureuëng nyang meuiman ubak Droeneueh. 20 Meunan cit watée saksi Droeneueh Stefanus jipoh maté, ulôn keudroe na nibak teumpat nyan dan lôn situju ateueh jipoh maté nyan. Dan ulôn kheueh nyang priek peukayan ureuëng-ureuëng nyang peumaté ureuëng nyan.' 21 Teuma Tuhan geupeugah bak ulôn, 'Gata jak mantong, sabab ulôn teuma lôn yuejak gata u teumpat nyang jiôh ubak ureuëng-ureuëng nyang bukon Yahudi.' " 22 Ureuëng ramé teutab mantong jideungoe Paulus peugah haba, teuma bak kalimat akhé awaknyan jikuk sihabéh teunaga, "Peumaté mantong ureuëng nyang lagée nyan. Ureuëng nyan hana patot udeb!" 23 Sira geudumpék, awaknyan laju geukipah bajée jubah geuh, dan geusipreuek abée u manyang. 24 Teuma lé keumandan pasokan Roma nyan laju jiyueba Paulus ubak markas mangat gobnyan jipareksa inan deungon paksa keu jiteupeu peue sabab ureuëng-ureuëng Yahudi jikuk-kuk sira jidumpék lagée nyan ateueh gobnyan. 25 Teuma watée Paulus ka ji-ikat keu jiseunuét, Paulus laju geupeugah bak peuwira nyang dong inan, "Peu kheueh teusunuet sidroe wareuga keurajeuen Roma sigohlom jihnyan teupeusidang?" 26 Ban jideungoe haba nyan, peuwira nyan laju jijak ubak keumandan dan jipeugah, "Peue nyang bapak peubuet nyoe? Ureuëng nyoe wareuga neugahra Roma!" 27 Lé keumandan nyan laju jijak ubak Paulus sira jitanyong, "Cuba gata peugah, peu kheueh gata wareuga neugahra Roma!" "Nyoe," kheun Paulus, "Ulôn wareuga nanggroe Roma." 28 Keumandan nyan jipeugah lom, "Ulôn jeuet keuwareuga neugahra Roma ngon lôn bayeue jai lumpah na!" Geujaweueb lé Paulus, "Teuma ulôn lahé sibagoe wareuga neugahra Roma." 29 Watée nyan cit teuma sidadu-sidadu nyang keuneuk pareksa Paulus nyan jisurot dan keumandan nyan pih jeuet keuteumakot sabab jihnyan ka jigari Paulus, padahai Paulus wareuga neugahra Roma. 30 Keumandan pasokan Roma nyan meuheuét that peue sabab jih ureuëng-ureuëng Yahudi jipeusalah Paulus. Ngon sabab nyan óh singoh beungoh laju jitawök Imeum ulée dan Mahkamah Agama mangat meusapat. Laju Paulus jipeuleueh nibak teugari, óh lheuehnyan laju jiba jak meuhadab ukeue awaknyan banmandum.

Kisah Rasui-Rasui 23

1 Paulus geukalon ateueh anggota mahkamah nyan dan laju geupeugah, "Syedara-syedara! Trok uroenyoe ulôn hana meurasa meusalah bak Po teu Allah lam até nurani lôn keuhai udeb ulôn." 2 Watée Paulus geupeugah meunan, Imeum Agong Ananias laju jiyue bak ureuëng nyang dong blaih Paulus mangat jitampa babah Paulus. 3 Dan Paulus laju geupeugah bak imeum agong nyan, "Allah pasti geutampa gata, ureuëng munafék nyang pura-pura suci! Droeneueh neuduek inan neupeusidang ulôn meunurot huköm Nabi Musa, padahai droeneueh keudroe iengkeue keu huköm nyan ngon cara neuyue ureuëng laén jitampa ulôn!" 4 Ureuëng-ureuëng nyang na blah Paulus laju jipeugah bak Paulus, "Gata tahina Imeum Agong Allah!" 5 Geujaweueb lé Paulus, "Óh, ulôn hana lôn teupeu, syedara-syedara, bahwa jihnyan imeum agong. Beutôi lam Alkitab na teutuléh lagée nyoe, 'Bék kheueh gata hina peumimpén-peumimpén bansa gata.' " 6 Paulus geukalon bahwa ladum nibak peumimpén-peumimpén bansa nyan na kheueh ureuëng-ureuëng Saduki dan ladum teuk na kheueh ureuëng-ureuëng Farisi. Ngon sabab nyan gobnyan laju geupeugah bak mahkamah nyan, "Syedara-syedara! Ulôn sidroe ureuëng Farisi, keuturonan Farisi. Ulôn jipeusidang nibak teumpatnyoe sabab ulôn peugah ureuëng maté udeb lom teuma." 7 Watée geupeugah meunan ureuëng-ureuëng Farisi dan ureuëng-ureuëng Saduki laju jipeuphon meudakwa, sampoe sidangnyan jeuet teubagi lam dua peureute. ( 8 Sabab ureuëng-ureuëng Saduki jipeugah ureuëng maté hana udeb le, bahwa malaikat nyan hana, meunan cit roh-roh jeuhet hana; seudangkan ureuëng-ureuëng Farisi jipeucaya banmandum nyan.) 9 Ngon lagée nyan teuka kheueh karu nyang paleng gura. Na meupadubdroe ureuëng Farisi nyang jeuet keu gurée agama jidong dan jilawan biet-biet. "Meunurot kamoe ureuëng nyoe hana meusalah mubacut pih! Mungken keubiet na roh atawa malaikat nyang peugah bak gobnyan!" 10 Meudakwanyan biet-biet meutamah subra sampoe keumandan pasokan nyan jitakot Paulus jiparan lé awaknyan. Dan laju jiyue pasokan keu jijak cok Paulus lamkawan ureuëng nyang teungoh meudakwanyan jeuet teuba u markas. 11 Malam óh lheueh nyan teuma Tuhan Isa geudong bak binéh Paulus dan geupeugah, "Peukong kheueh até gata! Gata katabri keusaksian gata keuhai ulôn di Yerusalem. Singoh teuma harôh gata tabri keusaksian lagée nyan di Roma." 12 Banbeungoh that óh singoh nyan, ureuëng-ureuëng Yahudi laju jipeuna kumplotan. Awaknyan jimubudok hana jimakheun ngon jijieb ié meunyoe gohlom jipeumaté Paulus. 13 Leubeh peuet ploh droe nyang rhoh lam kumplotan nyan. 14 Awaknyan laju jijak ubak imeum-imeum ulée dan peumimpén-peumimpén Yahudi dan jipeugah, "Kamoe ka kamoe mubudok meusajan-sajan, hana kamoe makheun atawa kamoe jieb ié sigohlom kamoe poh maté Paulus. 15 Syedara-syedara ngon anggota-anggota Mahkamah Agama nyang sigét jih neukirém surat ubak keumandan pasokan Roma nyan keu talakée awaknyan jiba Paulus lom jak meuhadab droeneueh, pura-pura droeneueh keuneuk pareksa lom peukara ureuëng nyan ngon teuliti. Dan kamoe ka siab keu kamoe poh maté jihnyan sigohlom trok keunoe." 16 Teuma aneuëk nibak syedara nyang inong Paulus jideungoe reuncana jeuhet nibak kumplotan nyan. Teuma laju jijak ubak markas dan jipeugah hainyan ubak Paulus. 17 Paulus laju geutawök sidroe peuwira dan geupeugah bak ureuëng nyan, "Ba kheueh aneuëk mudanyoe ubak keumandan; jihnyoe keuneuk lapor sapeue-sapeue bak keumandan nyan." 18 Peuwira nyan laju jiba aneuëk muda nyan ubak keumandan dan jipeugah, "Paulus, nyang na lam tahanan nyan, geutawök ulôn dan geulakée ulôn mangat lôn ba aneuëk muda nyoe ubak Bapak; jihnyoe keuneuk jilapor sapeue-sapeue." 19 Keumandan nyan laju jimat jaroe aneuëk muda nyan, "Peukeuneuk gata peugah ubak ulôn?" 20 Jijaweueb lé aneuëk muda nyan, "Ureuëng-ureuëng Yahudi kasipakat keuneuk jilakée bak Teungku jeuet Paulus teuba ubak Mahkamah Agama singoh, pura-pura awaknyan keuneuk jipareksa lom peukara Paulus nyan ngon leubeh teuliti. 21 Teuma bék Teungku turot lagée nyang jilakée nyan, sabab na leubeh peuet ploh droe nyang teungoh jimusöm keuneuk jilinteueng gobnyan bak rot euh. Awaknyan mandum ka jimubudok hana teuma jimakheun atawa jijieb ié sigohlom Paulus jipoh maté. Jinoenyoe pih awaknyan ka siab; tinggai jipreh nariet Teungku mantong." 22 Keumandan nyan jipeugah, "Bék gata peugah bak soe mantong bahwa gata ka tabritée hainyan ubak ulôn." Laju jiyue aneuëk muda nyan jiwoe u rumoh jih. 23 Óh lheuehnyan keumandan nyan laju jitawök dua droe peuwira, dan laju jipeugah bak awaknyan, "Peusiab laju dua reutôh droe sidadu meusajan ngon tujoh ploh droe sidadu meuguda dan dua reutôh sidadu meukapak keu teubeurangkat poh sikureueng malam nyoe cit teuma u Kaisarea. 24 Meunan cit gata peusiab guda keu ngon ba Paulus dan gata ba kheueh jinyoe ngon seulamat sampoe trok ubak Gubunur Feliks." 25 Laju keumandannyan jituléh surat nyang asoe jih lagée nyoe, 26 "Nyang Mulia Gubunur Feliks. Saleuem nibak Klaudius Lisias! 27 Ureuëng nyoe ka jidrob lé ureuëng-ureuëng Yahudi dan rab jipoh maté lé awaknyan, meunyoe ulôn hana lôn jak ngon pasokan lôn dan lôn peuseulamat jihnyan; sabab ulôn deungoe jihnyoe wareuga neugahra Romawi. 28 Sabab ulôn keuneuk kuteupeu peue nyang seubeuna jih buet nyang salah nyang jikeuneuk tudoh ateueh ureuëng nyoe, teuma laju ulônba ubak Mahkamah Agama awaknyan. 29 Teunyata ureuëng nyoe hana jipeubuet sapeue pih nyang jeuet tehuköm ngon huköm maté atawa huköm lam glab. Nyang jitudôh lé awaknyan ateueh ureuëng nyoe na kheueh nyang na hubongan ngon huköm-huköm agama awaknyan keudroe. 30 Óh lheueh nyan bak ulôn jibritée bahwa na reuncana jeuhet nibak ureuëng-ureuëng Yahudi ateueh ureuëng nyoe. Ngon sabab nyan langsong ulôn kirém jihnyoe ubak Teungku Gubunur. Dan ulôn ka lônyue bak ureuëng nyang tudoh jihnyoe jak meuhadab ubak Teungku." 31 Teuma lé sidadu nyan laju jipeubuet peurintah nyan. Awaknyan jijakcok Paulus malam nyan cit teuma laju jiba sampoe trok u Antipatris. 32 Óh singohnyan awaknyan jipeubiyeu pasokan meuguda jijak laju ngon Paulus, dan awaknyan keudroe laju jiwoe u markas. 33 Watée pasokan meuguda nyan trok u Kaisarea, awaknyan laju jipeusampoe suratnyan ubak gubunur, dan laju jijok Paulus bak gubunur nyan. 34 Óh ka lheueh jibaca surat nyan lé gubunur nyan, laju jitanyong bak Paulus pat asai jih. Watée jiteupeu Paulus asaijih di Kilikia, 35 laju jipeugah, "Gét kheueh, meunyoe meunan! Ulôn teuma lôn pareksa peukara gata, meunyoe ureuëng-ureuëng nyang gadu gata katrok keunoe." Laju jipeutron peurintah mangat Paulus jiteuon lam meuligoe Herodes.

Kisah Rasui-Rasui 24

1 Limong uroe óh lheuehnyan, Imeum Agong Ananias dan peumimpén-peumimpén Yahudi jijak u Kaisarea meusajan ngon sidroe peungacara nyang nan jih Tertulus. Awaknyan laju jijak meuhadab Gubunur Feliks dan laju jipeusampoe nyang jigadu keuhai Paulus nyan. 2 Watée Terutulus jihôi ukeue, jihnyan laju jitudôh Paulus lagée nyoe, "Amphon Gubunur Nyang Mulia! Dimiyueb pimpénan Amphon nanggroe kamoe aman ngon damé. Dan ateueh keubijaksanaan Amphon ka jai that-that nyang teupeujroh keu bansa kamoe. 3 Banmandum nyan kamoe sambot sabe ngon teurimong gaséh dan horeumat kamoe nyang paleng manyang dipat mantong kamoe na. 4 Teuma mangat bék jai that teubôh watée Amphon, ulôn meuharab beuneutem kheueh Amphon deungoe peue nyang kamoe gadu nyang paneuk nyoe. 5 Kamoe teumé ureuëngnyoe tukang peuna karu nyang paleng mubahya. Dipatmantong jihnyoe jipeuna karu lamkawan ureuëng Yahudi dan jeuet keupeumimpén geurakan ureuëng-ureuëng Nazaret. 6 Jihnyoe pih ka jicuba jipeukuto Baét Allah, teuma laju kamoe drob jihnyan. Kamoe kana niet keuneuk kamoe peusidang jihnyan meunurot huköm agama kamoe keudroe. 7 Teuma lé keumandan Lisias jireupah jihnyan nibak kamoe, 8 dan jipeurintah mangat ureuëng nyang jak gadu nyan jijak meuhadab ubak Amphon. Meunyoe Amphon neupareksa ureuëng nyoe, Amphon keudroe teuma neudeungoe nibak jihnyan nyang beuna nibak mandum nyang kamoe gadunyoe keuhai jih nyan." 9 Ureuëng-ureuëng Yahudi nyang na inan pih meusajan jigadu Paulus dan jipeubeutôi mandum nyang jipeugah lé Tertulus. 10 Laju gubunurnyan geubri kode bak Paulus bahwa gobnyan jeuet geupeugah haba. Teuma Paulus laju geupeugah, "Ulôn kuteupeu bahwa Teungku ka jeuet keu hakém di nanggroenyoe meuthon-thon treb jih. Nyang kheueh sabab jih ulôn meurasa galak lôn peusampoe keuhai lôn bila droe lôn ubak Teungku. 11 Teungku jeuet neuseulidek keudroe bahwa hana leubeh nibak dua blaih uroe nyang ka lheueh ulôn jak u Yerusalem keu lôn jak seumayang. 12 Dan hántom na ureuëng-ureuëng Yahudi nyang laén jikalon ulôn teungoh meudakwa ngon ureuëng laén atawa lôn peusapat gob keu lôn peuna karu bah kheueh nyan nibak Baét Allah meunan cit bak rumoh-rumoh iébadat atawa dipatmantong didalam banda. 13 Awaknyan pih hana hase jibri bukeuti peue-peue nyang jitudôh dan nyang jigadunyan ubak Teungku keuhai ulôn. 14 Keubiet beutôi ulôn harôh lôn aku ubak Teungku bahwa ulôn seumah Allah indatu kamoe meunurot ajaran nyang geupeurunoe lé Isa nyang jianggab lé awaknyan salah. Teuma ulôn teutab mantong lôn meuiman mandum nyang na teutuléh lam Kitab Nabi Musa dan kitab Nabi-nabi. 15 Saban lagée awaknyan, ulôn pih na harapan ubak Po teu Allah bahwa mandum ureuëng udeb lom teuma óh ka lheueh maté -- ureuëng-ureuëng gét, meunan cit ngon ureuëng-ureuëng jeuhet! 16 Nyang kheueh sabab jih ulôn teutab meu-useuha nyang si jroh-jroh jih, mangat até nurani lôn gleh ubak Allah dan gleh teuma keu manusia. 17 Óh ka lheueh na padub thon ulôn hana di Yerusalem, ulôn gisa keudeuh keu lôn jakba bantuan péng keu bansa ulôn dan keu lôn peuseumah keureubeuen keu Po teu Allah. 18 Watée ulôn teungoh kupeubuet nyan, awaknyan laju meurumpok ngon lôn lam Baét Allah, óh ka lheueh ulôn seuleusoe ngon upacara peusuci droe. Hana ureuëng ramé meusajan ngon ulôn, dan hana teuma karu bak teumpat nyan bak watée nyan. 19 Teuma na meupadubdroe Yahudi nibak teumpat nyan asai nibak propinsi Asia. Awaknyan kheueh nyang sikeubiet jih beuna nibak teumpat nyoe mangat jipeusampoe nyang jigadu lé awaknyan ubak Teungku, meunyoe awaknyan na sapeue-sapeue jikeuneuk gadu ateueh ulôn. 20 Atawa bah kheueh ureuëng-ureuëng nyoe keudroe nyang meungadu peu buet nyang jeuhet nyang ka jiteumé nibak ulôn watée ulôn jipeuhadab bak Mahkamah Agama. 21 Awaknyan jiteumé teuma kalimat nyang saboh nyoe nyang ulôn peugah dikeue awaknyan, kalimat nyan na kheueh: Ulôn teupeusidang nibak uroenyoe sabab ulôn peucaya ureuëng-ureuëng nyang ka maté udeb lom teuma." 22 Laju lé Feliks nyang ka jiteupeu jai that keuhai ajaran Isa, jipeuputôh sidang peukara nyan, "Ulôn teuma lôn peuputôh peukaranyoe," kheun Feliks, "meunyoe keumandan Lisias ka trok keunoe." 23 Laju jipeurintah peuwira nyang meutanggong jaweueb ateueh Paulus nyan mangat teutab jipeuteun Paulus, teuma ngon jibri bacut keubeubaihan ubak gobnyan dan jipeuidhin rakan-rakan gobnyan jibri keugobnyan peue nyang geupeureulée. 24 Na padub uroe teuma óh lheueh nyan Feliks teuka, jipeungah lé peurumoh jih nyang nan jih Drusila; jihnyan ureuëng Yahudi. Laju lé Feliks jiyue gob jeuet jijakcok Paulus, óh lheuehnyan Feliks jideungoe Paulus geupeugah haba keuhai meuiman ubak Isa Almaseh. 25 Teuma watée Paulus geupeugah haba lom keuhai jujoe ngon teupeuteuen hawa nafeusu meunan cit keuhai huköman bak Uroe Kiamat, Feliks jeuet keuteumakot laju jipeugah, "Gata jeuet neujak bak saátnyoe ulôn teuma lôn tawök lom gata meunyoe na watée." 26 Watée nyan Feliks meuharab teuma beumeuteumé péng nibak Paulus. Nyang kheueh sabab jih jihnyan meu-ulang-ulang jiyue gob jakcok Paulus keu jipeugah haba ngon geuhnyan. 27 Óh ka lheueh na dua thon, Perkius Festus jeuet geunantoe Feliks sibagoe gubunur. Dan sabab Feliks keuneuk jicok até ureuëng-ureuëng Yahudi, jihnyan jipeubiyeu mantong Paulus teutab lam glab.

Kisah Rasui-Rasui 25

1 Lhée uroe óh lheueh Festus trok bak teumpat nyan, gobnyan laju geujak nibak Kaisarea u Yerusalem. 2 Nibak teumpat nyan Imeum-imeum ulée dan peumimpén-peumimpén Yahudi laju jipeusampoe ubak gobnyan peue nyang jigadu lé awaknyan keuhai Paulus. Awaknyan teutab jibujuk Festus 3 jiuseuha ateueh jroh até jih ateueh awaknyan, Festus nyan jitem yue jakcok Paulus dan jiba u Yerusalem; sabab awaknyan ka mupakat keu jipeumaté Paulus bak teungoh rot. 4 Teuma Festus jijaweueb, "Paulus teungoh teuteun di Kaisarea; dan ulôn keudroe pih hana treble lôn riwang keudeh. 5 Jadi, bah kheueh ureuëng-ureuëng rayeuk nyang na lamkawan gata jijak meusajan ngon ulôn u Kaisarea dan teupeusidang Paulus nyan disideh, meunyoe keubiet jihnyan ka jipeubuet buet nyang salah." 6 Óh ka lheueh tinggai di Yerusalem kira-kira lapan atawa siploh uroe teuk, Festus laju jiwoe u Kaisarea. Singohnyan laju jipeuna sidang peungadelan dan jipeurintah mangat Paulus jipeuhadab ukeue. 7 Watée Paulus trok keunan, ureuëng-ureuëng Yahudi nyang ka trok nibak Yerusalem laju jidong bansilingka gobnyan, dan laju jipeuphon peugah nyang jigadu nyan nyang paleng brat u ateueh Paulus. Teuma awaknyan hana bukeuti-bukeuti peue nyang ka jitudôh nyan. 8 Nibak geubila droe gobnyan, Paulus geupeugah, "Ulôn hana lôn peubuet sapeue pih nyang salah ubak huköm Nabi Musa atawa keu Baét Allah meunan cit ubak Kaisar Roma." 9 Teuma Festus keuneuk jicok até ureuëng Yahudi. Laju jitanyong bak Paulus, "Peu kheueh gatatem jak u Yerusalem mangat gata teupeusidang ideh dikeue ulôn keuhai peue-peue nyang ka jitudôh nyan?" 10 Geujaweueb lé Paulus, "Ulôn teungoh lôn dong dikeue mahkamah Kaisar Roma; dan bak teumpat nyan kheueh ulôn museuti teupeusidang. Teungku keudroe neuteupeue bahwa ulôn hana meusalah ateueh ureuëng Yahudi. 11 Meunyoe ulôn ka lôn iengkeue huköm dan lôn peubuet sapeue-sapeue buet nyang patot teuhuköm ngon huköm maté, ulôn rela maté. Teuma meunyoe peue-peue nyang jitudôh nyan hana beutôi, hana meusidroe pih nyang jeuet jijôk ulôn bak awaknyan. Ulôn lakée mangat ulôn teupeusidang bak peungadelan Kaisar!" 12 Óh ka lheueh jimeupakat ngon peunaseuhat-peunaseuhat jih, Festus jipeugah, "Gata talakée teupeusidang dipeungadelan Kaisar, jadi gata harôh jak meuhadab Kaisar." 13 Hana padubna treb teuma óh lheueh nyan, Raja Agripa dan Bernike geujak ubak Kaisarea keu geujak peugah seulamat ubak Festus. 14 Óh ka lheueh awaknyan na padub uroe nibak teumpat nyan, Festus laju jipeutrang keuhai peukara Paulus ubak Raja Agripa. Kheun Festus, "Na disinoe sidroe ureuëng huköman nyang jitinggai lé Feliks. 15 Watée ulôn mantong na di Yerusalem, imeum-imeum ulée dan peumimpén-peumimpén Yahudi jipeutamong peungaduan awaknyan ateueh ureuëng nyan dan jilakée mangat ulôn peurhot huköman ateueh ureuëng nyan. 16 Teuma ulôn jaweueb bahwa ureuëng Roma hana jeuet teuseurah meunan mantong sidroe ureuëng teutudoh keu teuhuköm, meunyoe nyang teutudoh nyan gohlom meuhadab keue ngon ureuëng-ureuëng nyang peudakwa gobnyan dan teubri watée keu jibila droe. 17 Ngon nyan, watée awaknyan jijak keunoe, ulôn hana lôn preh treb. Singohnyan laju ulôn peuna sidang peungadelan dan lôn peurintah mangat ureuëng nyan jiba meuhadab. 18 Watée ureuëng nyang peudakwa jidong sira jipeugah peu nyang jigadu nyan, awaknyan hana jigadu sapeue-sapeue buet nyang jeuhet nyang jipeubuet lé ureuëng nyoe lagée nyang ulôn pike teuma jipeugah lé awaknyan. 19 Nyang na awaknyan meubida peundapat sabe keudroe-droe keuhai agama jih keudroe dan keuhai sidroe ureuëng nyang nan jih Isa. Ureuëng nyan ka maté, teuma Paulus teutab jimeukreueh bahwa ureuëng nyan udeb. 20 Sabab ulôn bingong pakriban ulôn hase meuteumé keuteurangan-keuteurangan keuhai peukara nyan, laju ulôn tanyong bak Paulus peu kheueh jitem jak u Yerusalem dan teupeusidang ideh ateueh peukara nyan. 21 Teuma Paulus jilakée ék bandeng; jihnyan jilakée mangat jihnyan teutab teuteun sampoe peukara jih geupeu putôh lé Kaisar. Ngon sabab nyan ulôn peurintah mangat jihnyan teutab teuteun, sampoe ulôn meuteumé watée keu lôn kirém jihnyan ubak Kaisar." 22 Laju Agripa jipeugah bak Festus, "Ulôn keudroe pih keuneuk lôn deungoe ureuëng nyan." "Singoh Amphon jeuet neudeungoe," jaweueb Festus. 23 Singohnyan Agripa dan Bernike jijak ngon upacara keubeusaran. Awaknyan jitamong lam ruweueng sidang meusajan-sajan ngon ureuëng-ureuëng rayeuk angkatan prang dan ureuëng-ureuëng meugah nyang na lam banda nyan. Ateueh peurintah Festus, Paulus laju jipeutamong. 24 Dan Festus laju jipeugah, "Daulat Teungku Amphon dan mandum hadirin! Ureuëngnyoe ka jigadu bak ulôn lé mandum bansa Yahudi, bah kheueh nyan di Yerusalem meunan cit nyang na disinoe. Awaknyan jituntot ngon jiklik-klik bahwa jihnyoe hana patot teupeubiyeu udeb. 25 Teuma di ulôn hana lôn teumé mubacut pin nyang ka jipeubuet keu jeuet teucok keudasai huköm keu teupeu rhot huköman maté. Ngon sabab nyan jihnyoe keudroe ka jilakée keu teupeusidang ubak peungadelan Kaisar, ulôn ka lôn cok keuputosan keu lôn kirém jihnyoe ubak Kaisar. 26 Teuma di ulôn hana lôn teumé sapeue pih keuteurangan nyang teugaih keuhai droe jihnyoe keu lôn tuléh surat ulôn ubak Kaisar. Nyang kheueh sabab jih ulôn peuhadab jihnyoe dikeue Teungku-teungku banmandum, nyang paleng lumboi sa ubak Teungku Amphon Baginda Agripa! Meukeusut ulôn na kheueh óh ka lheueh teupareksanyoe, na bahan keu ulôn kutuléh surat. 27 Sabab meunurot peurasaan ulôn, hana kheueh bak teumpat jih teukirém sidroe ureuëng keunong teun ngon hana teupeugah peu salah nyang teutudoh ateueh jihnyoe."

Kisah Rasui-Rasui 26

1 Agripa jipeugah bak Paulus, "Gata teubri idhin neupeugah haba keu gata bila droe." Teuma Paulus geubeuôt jaroe laju geubila droe geuh lagée nyoe, 2 "Nyang Mulia Amphon Baginda Agripa! Ulôn meurasa meu-untông that jeuet lôn bila droe ulôn nyang paleng meu-untông dikeue Baginda keudroe keuhai mandum nyang ji gadu lé ureuëng-ureuëng Yahudi ateueh ulôn; 3 nyang paleng peunteng Baginda neuteupeue that adat istiadat dan masa-alah-masa-alah ureuëng Yahudi. Ngon sabab nyan, ulôn meuharab Baginda neutem deungoe keuteurangan ulôn nyoe ngon saba. 4 Mandum ureuëng Yahudi jiteupeu pakriban ulôn udeb phon muda kon. Awaknyan jiteupeu bahwa yohmuda kon ulôn ka udeb lamkawan bansa ulôn keudroe di Yerusalem. 5 Katreb that awaknyan jiteupeue keuhai ulôn. Dan meunyoe awaknyan jitem, awaknyan jeuet jimeusaksi bahwa ulôn ka udeb sibagoe ureuëng Farisi ngon lôn turot mandum peuratoran nyang paleng kong lam agama kamoe. 6 Dan jinoenyoe ulôn dong disinoe keu jipeusidang sabab ulôn peucaya keu janji nyang geupeugot lé Allah ubak indatu kamoe. 7 Janji nyang geupeugah nyan kheueh teuma nyang jiharab-harab lé bandua blaih boh sukée bansa Israel, sampoe awaknyan jiseumah Po teu Allah uroe ngon malam. Dan sabab ulôn kupatéh ubak janji nyan, Baginda nyang mulia, ulôn jipeusalah lé ureuëng-ureuëng Yahudi. 8 Pakon syedara-syedara ureuëng Yahudi hana neupeucaya bahwa Allah geupeu udeb ureuëng maté? 9 Yoh ilée ulôn keudroe pih lagée nyan bahwa ulôn harôh lôn useuha ngon meubagoe cara keu lôn lawan Isa nyang teuka nibak Nazaret nyan. 10 Dan nyang kheueh nyang ka ulôn peubuet di Yerusalem. Ngon surat kuasa nyang geujok bak lôn lé Imeum-imeum ulée, ka lôn peutamong lam glab ureuëng-ureuëng nyang seutia ubak Allah. Dan ulôn pih situju bahwa awaknyan teupeu rhot huköm maté. 11 Jai lumpah na ulôn seksa awaknyan lam rumoh-rumoh iébadat, mangat awaknyan ji iengkeue peue nyang ka awaknyan meuiman. Gét that seu eum até ulôn ateueh awaknyan, sampoe banda-banda nyang laén ulôn jak keu lôn jak peulet awaknyan." 12 "Ngon meukeusut nyan kheueh teuma ulôn ba surat kuasa nyang geubri lé imeum-imeum ulée dan lôn jak u Damsyik. 13 Dan watée ulôn mantong na bak teungoh rot euh, watée nyan mantong cot uroe, Baginda Nyang Mulia, deuh lôn kalon saboh cahya nibak langét nyang leubeh trang nibak mata uroe. Cahya nyan meuble-ble ban sikeulileng lôn dan ban silingka ureuëng-ureuëng nyang na jijak ngon ulôn. 14 Kamoe mandum reubah bak tanoh. Laju ulôn deungoe su nyang geupeugah bak ulôn lam basa Ibrani, 'Saulus, Saulus! Pakon gata hana tapiôh ta iénanya Ulôn? Gata teuma tarasa sakét keudroe, meunyoe gata teutab hana tapiôh talawan pimpén Geuhnyan nyang jeuet keu teungku gata.' 15 Teuma laju lôn peugah, 'Soe kheueh Droeneueh, Teungku?' Dan Tuhan geujaweueb, 'Ulôn kheueh Isa nyang gata iénanya. 16 Beudôh kheueh dan dong laju! Ulôn peudeh droe ubak gata ngon meukeusut keu Lôn beuot gata jeuet keupeulayan Ulôn. Gata harôh tapeusampoe bak ureuëng laén peue nyang ka ta ngieng uroenyoe keuhai Ulôn dan keuhai peue nyang teuma Lôn tunyok bak gata bak watée nyang singoh teuka. 17 Ulôn teuma Lôn peulheueh gata nibak bansa Israel dan nibak bansa-bansa laén nyang bukon Yahudi. Ulôn teuma Lôn yue gata ubak awaknyan mangat keu gata peubleuet mata jihnyan, 18 mangat awaknyan jiteubiet nibak lam seupôt dan jitamong lam trang; mangat awaknyan beubaih nibak godaan iblih, laju jikuasa lé Roh Allah. Teuma ngon peucaya ubak Ulôn desya-desya awaknyan teuma teupeu amphon dan awaknyan teuma jeuet keu anggota umat Allah nyang teupiléh.' " 19 "Sabab nyan, Baginda Agripa, ulôn sabe lôn useuha taát ubak keumalon nyang ka ulôn teurimong nibak Po teu Allah nyan. 20 Ngon troh trang ulôn peugah ubak dum na ureuëng bahwa awaknyan harôh meutobat nibak desya-desya awaknyan dan jipeujok droe ubak Po teu Allah dan jipeuleumah lam udeb jih bahwa awaknyan ka meutobat nibak desya-desya awaknyan. Hainyan ulôn bri tée phon-phon that di Damsyik, óh lheueh nyan di Yerusalem dan bansaboh Yudea dan lamkawan nyang bukon ureuëng Yahudi. 21 Ngon sabab nyan kheueh ureuëng-ureuëng Yahudi jidrob ulôn nibak Baét Allah dan jiuseuha keuneuk peumaté lôn. 22 Teuma trok án jinoe ulôn mantong geulindong lé Po teu Allah, sampoe ulôn hase lôndong nibak teumpat nyoe keu lôn bri keusaksian ulôn bak mandum ureuëng -- ubit meunan cit nyang rayeuk. Peue nyang ulôn peugahnyoe hana laén na kheueh peu nyang ka awai geupeugah lé nabi-nabi dan Nabi Musa; 23 na kheueh bahwa Raja Peuseulamat nyang geupeu janji lé Po teu Allah nyan harôh meudeurita, dan jeuet keu ureuëng phon that nyang geubeudôh lom óh ka lheueh maté; deungon lagée nyan Gobnyan jeuet geupeugah trang -- nyan kheueh haba keuseulamatan -- bah kheueh ubak ureuëng Yahudi meunan cit ubak ureuëng nyang bukon Yahudi." 24 Teungoh Paulus geupeugah keuhai bila droe geuhnyan, Festus laju jikuk, "Gata ka pungoe Paulus! Iéleumé gata nyang jai nyan ka jipeujeuet gata pungoe!" 25 Teuma Paulus geujaweueb, "Ulôn hana pungoe, Nyang Mulia. Nariet nyang ulôn peugah nyan beutôi dan jiteubiet lam pikeran nyang seuhat. 26 Baginda Agripa keudroe geuteupeue that keuhai-hai nyan, nyang kheueh sabab jih ulôn kujeuet meututoe dikeue Baginda ngon troh trang. Ulôn yakén hana musapeue pih nibak hai-hainyan nyang gohlom geuteupeue lé Baginda, sabab mandum nyan hana teujadi nibak teumpat-teumpat nyang teusom. 27 Nyang Mulia Baginda Agripa, peu kheueh Baginda neupatéh peue nyang ka geupeugah lé nabi-nabi? Ulôn pike Baginda neupatéh!" 28 Laju Agripa geupeugah ubak Paulus, "Gata pike peumudah ulôn jeuet keu ureuëng Kristen lam watée nyang paneuk nyoe?" 29 "Lam watée nyang paneuk atawa lam watée nyang panyang," jaweueb Paulus, "Ulôn meudoá ubak Po teu Allah mangat Baginda dan Teungku-teungku mandum nyang neudeungoe ulôn nibak uroenyoe hase jeuet lagée ulôn -- keucuali gari nyang lagée nyoe!" 30 Akhé jih baginda raja, gubunur dan Bernike, dan mandum nyang laén nyang dong. 31 Óh ka lheueh na diluwa, awaknyan laju jimarit sabe keudroe-droe, "ureuëng nyoe hana jipeubuet meusapeue pih nyang patot teuhuköm ngon huköman maté atawa teuhuköm lam glab." 32 Laju Agripa geupeugah ubak Festus, "Ureuëng nyoe ka jeuet teupeuleuh, seukira jih ureuëng nyoe hana jituntot peukara jih bak peungadelan Kaisar."

Kisah Rasui-Rasui 27

1 Óh ka lheueh teucok keuputosan bahwa kamoe harôh meulayeue u Italia, Paulus ngon na meupadub droe ureuëng teuhuköman nyang laén laju jijok ubak Yulius, peuwira sipa-i Roma nyang jiboh nan "Resimen Kaisar". 2 Kamoe laju meuék ateueh kapai nyang teuka nibak Adramitium, óh lheueh nyan ngon kapai nyan laju kamoe beurangkat nyang ka siab meulayeue u peulabohan-peulabohan lam propinsi Asia. Aristarkus, sidroe ureuëng Makedonia nyang teuka nibak Tesalonika, na cit meulayeue meusajan-sajan ngon kamoe. 3 Singoh nyan kamoe laju trok u Sidon, Paulus jipeusaneut ngon jroh that lé Yulius. Gobnyan jibri idhin jak saweue rakan-rakan gobnyan mangat awaknyan hase jijok keu gobnyan peue-peue nyang geupeureulée. 4 Beudôh nibak teumpat nyan laju kamoe meulayeue lom. Lé sabab angén nyang meulawan arah ngon kapai kamoe, kamoe meulayeue laju seutôt binéh panté pulo Siprus nyang bacut meuseuliseh nibak angén. 5 Óh lheueh nyan laju kamoe haröng laôt nyang meuhadab keue ngon Kilikia dan Pamfilia dan laju trok u Mira lam nanggroe Likia. 6 Nibak teumpat nyan lé peuwira nyan laju meuteumé saboh kapai nyang teuka nibak Aleksandria nyang keuneuk meulayeue u Italia. Dan lé gobnyan laju jipinah kamoe lam kapai nyan. 7 Na padub uroe treb jih kamoe meulayeue mulet lumpah na, dan ngon aloh alah akhé jih kamoe trok ubak banda Knidus. Óh lheueh nyan, sabab angén teutab mantong brok, kamoe hana hase kamoe meulayeue ubak jurosan nyang phon. Ngon lagéenyan kamoe laju meulayeue u seulatan pulo Kreta rot Tanjong Salmone mangat nibak teumpat nyan kamoe teuhinda nibak angén. 8 Ngon aloh alah kamoe meulayeue seutôt binéh panté pulo nyan sampoe akhé jih kamoe trok bak saboh teumpat nyang nan jih Peulabohan Indah, hana padub na jiôh nibak banda Lasea. 9 Bak watée nyan Uroe Raya Peudamé ureuëng Yahudi ka seuleusoe. Kamoe ka gadôh watée nyang jai that-that, ngon lagée nyan ka hana watée le kamoe meulayeue ngon aman. Ngon sabab nyan lé Paulus laju geubri naseuhat lagée nyoe ubak awaknyan, 10 "Syedara-syedara, meunurot peundapat ulôn, keubiet mupaloe that meunyoe tanyoe tameulayeue laju. Tanyoe teuma meuteumé rugoe nyang raya that kon mantong nibak barang nyang tapeudieng lam kapai nyoe, teuma nyawöng tanyoe pih hase teusuet." 11 Teuma lé peuwira nyan leubeh peucaya ubak nyang mat keumudo dan ubak kapiten kapai nyan nibak keu Paulus. 12 Peulabohan nyang na inan beutôi hana gét keu kapai-kapai nyang meusaôh inan watée musém leupie. Ngon sabab nyan rab banmandum aneuëk kapai nyan sipakat keumeulayeue lom sira teutinggai peulabohan nyan sabab awaknyan jimeue useuha beubagaih trok u Feniks dan tinggai nibak teumpat nyan lam watée musém sijuek nyan. Feniks na kheueh saboh peulabohan di Kreta nyang meuhadab u barat daya dan barat laôt. 13 Bak watéenyan angén seulatan jipôt leumoh lagoena. Lé aneuëk kapai jipike ka jeuet jimeulayeue lom teuma. Awaknyan laju jibeuôt saôh laju jimeulayeue banseutôt binéh panté pulo Kreta. 14 Teuma hana treb óh lheueh nyan jiteuka teuk angén badée -- nyan kheueh nyang teupeunan angén Timu Laôt -- jipôt teuga lumpah na nibak ateueh darat, 15 laju jiheuntam ateueh kapai kamoe. Ngon sababnyan hana mungken kapai kamoe jimeulayeue meulawan arah ngon angén, teuma kamoe meunyeurah dan kamoe peubiyeu mantong kapai nyan anyôt jiba lé angén. 16 Kamoe meupadok bacut, watée kamoe trok blah u seulatan pulo Kauda nyang ubit nyan. Nibak teumpat nyan ngon apoh apah meuhase kamoe cok sikoci kapai nyan. 17 Óh ka lheueh sikoci nyan kamoe peuék ateueh kapai, kapai nyan keudroe teupeukong ngon cara teupeuguna talo ngon teuikat bansikeulileng kapai nyan. Sabab teumakot kapai nyan sôk bak anoe Sirtis nyang deue, layeue teupeutreun dan óh lheueh nyan teupeubiyeu mantong kapai nyan jiba lé angén. 18 Angén hana piôh jiheuntam keudeuh keunoe, akhé jih óh singoh beungoh bubena asoe kapai teutiek lam laôt. 19 Uroe-uroe nyang laén lé aneuëk kapai nyan jiböih teuma peukakaih-peukakaih kapai lam laôt ngon jaroe awaknyan keudroe. 20 Meu uroe-uroe treb jih kamoe hana deuh kamoe ngieng mata uroe ngon bintang, dan angén teutab hana jipiôh-piôh jipôt keudeuh keunoe. Akhé jih habéh kheueh harapan kamoe keuseulamat. 21 Na meupadub watée treb jih dumna awaknyan hana jiteumé makheun. Ngon lagée nyan Paulus laju geujak dong dikeue awaknyan sira geupeugah lagée nyoe, "Syedara-syedara! Meunyoe gata ka taseutôt naseuhat ulôn dan hana tameulayeue nibak Kreta, tanyoe hana tarasa rusak ngon rugoe lagéenyoe bagoe. 22 Teuma jinoenyoe pih ulôn lakée ngon meuharab that mangat gata beurayeuk até. Hana meusidroe pih lamkawan gata nyoe nyang maté; nyang gadôh nibak geutanyoe teuma kapai nyoe mantong. 23 Sabab beuklam malaikat Allah nyang ulôn seumah, na kheueh Allah nyang po ulôn nyoe, geujak ubak ulôn. 24 Geupeugah lé Malaikat nyan, 'Bék takot, Paulus! Sabab gata teuma tameuhadab ubak Kaisar. Dan ateueh keugét até Allah ateueh gata, banmandum ureuëng nyang meulayeue meusajan gata teuma seulamat lé sabab gata.' 25 Ngon sabab nyan, Syedara-syedara, bah kheueh gata beurayeuk até! Sabab ulôn meuiman ubak Po teu Allah bahwa banmandum teuma teujadi lagée nyang geupeugah ubak ulôn. 26 Teuma singoh tanyoe teutiek bak panté saboh pulo." 27 Bak malam nyang keu peuet blah kamoe mantong meuapöng-apöng lam Laôt Adria. Kira-kira bak teungoh malam aneuëk kapai nyan teurasa teungoh jipeurab bak panté. 28 Teuma lé awaknyan laju jiulu talo nyang ka ji-ikat ngon batée guna keujiteupeu padub na lhok jih laôt. Rupari teumpat nyan lhok jih rab peuet ploh metée. Hana padub na treb teuma óh lheueh nyan awaknyan ji-ukô lom, laju jiteupeu laôt nibak teumpat nyan lhok jih rab lhée ploh metée. 29 Awaknyan jitakot kapai shok bak batée kareueng, ngon lagée nyan awaknyan laju jipeutreun peuet boh saôh nyang na nibak bagian likot kapai, laju jimeuharab meunyoe jeuet beubagaih-bagaih jijak. 30 Ngon cara seungab-seungab lé aneuëk kapai jikeuneuk plueng nibak kapai nyan. Awaknyan laju jipeutreun sikoci pura-pura jikeuneuk peutreun saôh nyang na bak ulée kapai nyan. 31 Teuma lé Paulus laju geupeugah ubak peuwira kapai dan tantra-tantra nyang na lam kapai nyan, "Meunyoe aneuëk kapai nyoe hana tinggai lam kapai, Gata banmandum hana nyang seulamat." 32 Ngon sabab nyan lé tantra-tantra nyan laju jikoh talo sikoci nyan, ngon lagée nyan sikoci nyan laju anyôt. 33 Bak watée gohlom jiteuka beungoh, Paulus geuyue bak awaknyan mangat banmandum makheun. Geupeugah lé Paulus, "Ka peuet blah uroe treb jih Gata banmandum tapreh-preh mantong lam keuadaan yo ngon teumakot dan hana tapajoh sapeue. 34 Ulôn yue, makheun kheueh bacut. Nyang lagée nyan jroh that keu gata, mangat gata teuga lom teuma. Sabab gatabanmandum teuma seulamat hana kureueng meusapeue pih." 35 Óh ka lheueh geupeugah meunan Paulus laju geucok ruti dan geulakée teurimong gaséh ubak Tuhan dikeue awaknyan banmandum. Óh lheuehnyan gobnyan laju geubagi-bagi ruti nyan, dan laju jipajoh. 36 Dan awaknyan mandum ka jiteuka seumangat lom dan meusajan-sajan jimakheun. 37 Banmandum lam kapai nyan na dua reutoh tujoh ploh nam droe. 38 Óh ka lheueh banmandum jimakheun bube séb, awaknyan laju jiböih lam laôt banmandum gandom nyang na lam kapai nyan mangat kapai nyan meutamah phui. 39 Watée uroe ka beungoh, lé aneuëk kapai laju jingieng u darat, teuma awaknyan hana jiteupeu peue nan darat nyan. Deuh jikalon saboh peulabohan ngon panté jih. Dan meunyoe hase awaknyan na meukeusut keuneuk peurab kapai jih nyan ubak peulabohan nyan. 40 Teuma talo-talo saôh laju jikoh dan saôh-saôh nyan jipeubiyeu mantong lham lam laôt. Meunan cit lé awaknyan laju jipeulheueh talo-talo nyang na teuikat bak keumudo. Óh lheueh nyan awaknyan laju jipeuék layeue nyang na dikeue kapai mangat angén jipot kapainyan u binéh panté. 41 Teuma kapai nyan laju sok lam anoe. Bagian keue kapai nyan meuseubée hana jeuet lé meugrak, meunan cit bagian likot kapai nyan ka hanco jipoh lé umbak nyang teuga. 42 Lé tantra-tantra nyang na lam kapai nyan kana niet jikeuneuk poh banmandum ureuëng huköman, sabab awaknyan teumakot pat jiteupeu teuma na nyang meulangue bak binéh óh lheueh nyan jiplueng. 43 Teuma lé peuwira nyan jitam niet awaknyan sabab jihnyan keuneuk peuseulamat Paulus. Lé jihnyan laju jiyue bak mandum ureuëng nyang jeuet meulangoe mangat jigrob leubeh ilée lam laôt dan meulangoe bak binéh panté; 44 meunan cit nyang laén jiseutôt jilikot ngon cara jimumat bak papeuen-papeuen atawa bak kapai nyang ka beukah nyan. Ngon cara lagée nyan kheueh kamoe banmandum seulamat trok bak binéh panté.

Kisah Rasui-Rasui 28

1 Óh ka lheueh kamoe teungoh ngon seulamat, barô kheueh kamoe teupeu bahwa pulo nyan nan jih Malta. 2 Ureuëng pulo nyan keubiet that-that ramah keu kamoe. Awaknyan jisambot kamoe banmandum ngon cara gét dan laju jipeukab apui keukamoe sabab ujeuen ka jitreun bacut-bacut dan udara pih leupie lagoena. 3 Paulus laju geupeusapat kayée, laju geukeubah kayée nyang ka geupeusapat nyan ateueh apui hu. Teungoh Paulus geupeubuet nyan, laju jiteubiet saboh uleue, sabab keunong wab apui nyang seu-eum nyan, dan uleue nyan laju jikab bak jaroe gobnyan. 4 Watée jikalon lé peunduduek pulo nyan uleue mantong meugantueng bak jaroe Paulus, awaknyan laju jimarit sabe keudroe-droe, "Ureuëng nyoe pasti tukang poh maté gob, sabab bah kheueh jih ka seulamat lam laôt raya, Dewi Keuadelan hana geupeubiyeu ureuëng nyoe udeb." 5 Teuma lé Paulus laju geutapih uleue nyan lam apui dan gobnyan hana teurasa sakét meubacut pih. 6 Awaknyan jipike sikeujab teuk jaroe Paulus jiteuka kumong dan mungken watée nyan cit gobnyan maté. Teuma óh ka jipreh-preh na padub na treb dan hana sapeue-sapeue nyang teujadi ateueh Paulus, pikeran awaknyan laju meu-ubah dan awaknyan jipike bahwa Paulus nyan na kheueh dewa. 7 Hana padub na jiôh nibak teumpat nyan na tanoh atra Publius, peujabat nyang paleng rayeuk lam pulo nyan. Ngon até nyang jroh ureuëng nyan jisambot kamoe nyang treb jih na lhée uroe. 8 Bak watée nyan ureuëng syiek ureuëng nyan teungoh sakét, jiteuka deumam ngon ciret-ciret. Paulus geujak kalon ureuëng sakét nyan sira geumeudoá geupeuduek jaroe geuh ateueh ureuëng nyan, akhé jih ureuëng sakét nyan puléh. 9 Sabab keujadian nyan banmandum ureuëng nyang sakét nyang na lam pulo nyan jijak ubak Paulus, dan awaknyan geupeu puléh. 10 Awaknyan laju jibri keukamoe hadiah nyang jai lagoena, dan watée kamoe keuneuk meulayeue, awaknyan laju jiba lam kapai banmandum nyang kamoe peureulée keubeukai watée kamoe jak lom. 11 Óh ka lheueh na lhée buleuen treb jih disinan, kamoe tinggai pulo nyan sira kamoe ék kapai nyang teuka nibak Aleksandria nyang watée musém sijuek jimeusaôh lam pulo nyan. Kapai nyan jiboh lambang "Dewa Meukeumbeue Kastor dan Poluks". 12 Kamoe laju meusaôh bak banda Sirakusa dan tinggai lam banda nyan lhée uroe treb jih. 13 Nibak teumpat nyan kamoe meulayeue lom seutôt binéh panté akhé jih trok kamoe u banda Regium. Singoh nyan angén jiteuka nibak arah seulatan, ngon lagée nyan lam dua uroe kamoe laju trok u banda Putioli. 14 Disinan kamoe laju meurumpok ngon napadub droe ureuëng nyang ka meuiman ubak Isa, dan ateueh undangan awaknyan kamoe tinggai ngon awaknyan nyang treb jih na sigoe aleuhat. Óh lheueh nyan laju kamoe jak u Roma. 15 Syedara-syedara di Roma nyang ka peucaya ubak Isa jideungoe keuhai kamoe, akhé jih awaknyan jijak sampoe trok ubak Pasai Apius dan Teumpat piôh Lhée guna jijak sambot kamoe. Watée Paulus meurumpok ngon awaknyan, gobnyan laju geulakée teurimong gaséh ubak Po teu Allah dan até gobnyan jeuet keutabah. 16 Watée ka trok u Roma, Paulus jeuet geutinggai sidroe sira jikawai lé sidroe sidadu. 17 Óh ka lheueh na lhée uroe, Paulus laju geutawök tukoh-tukoh ureuëng Yahudi nyang na inan. Dan óh ka lheueh awaknyan meusapat, gobnyan laju geupeugah bak awaknyan, "Syedara-syedara! Ulôn nyoe sapeue pih hana salah ateueh bansa geutanyoe, meunan cit ngon adat keubiasaan nyang ka tateurimong nibak indatu geutanyoe hana lôn iengkeue. Teuma bah kheueh meunan ulôn nyoe jidrob di Yerusalem laju jijok ubak ureuëng-ureuëng Roma. 18 Óh ka lheueh peukara ulôn nyoe jipareksa, awaknyan keuneuk peubeubaih ulôn, sabab ulôn nyoe hana lôn peubuet meubacut pih nyang salah nyang jeuet ulôn nyoe teupeurhot bak huköman maté. 19 Teuma sabab ureuëng-ureuëng Yahudi jilawan ulôn, ulôn teupaksa lôn tuntot peukara lôn nyoe jipeusidang nibak peungadelan Kaisar Roma. Ulôn peubuet lagée nyan kon ulôn nyoe na barang sapeue-sapeue lôn jak gadu ateueh bansa ulôn keudroe. 20 Dan nyang kheueh sabab jih ulôn lakée meurumpok ngon gatanyoe banmandum guna lôn marit-marit ngon gata; sabab ulôn jiboh beuleunggu, lé sabab Peuseulamat nyang jiharab-harab lé bansa Israel." 21 Laju awaknyan jipeugah bak gobnyan, "Kamoe gohlom kamoe teurimong meusaboh surat pih nibak Yudea keuhai Droeneueh. Dan hana meusidroe syedara pih nyang teuka nibak sideh jijakba haba keunoe keuhai droeneueh atawa jipeugah nyang brok-brok keuhai Droeneueh. 22 Teuma kamoe meuheuét cit keuneuk deungoe keuhai peue nyang Droeneueh peucaya nyan, sabab kamoe mandum ka kamoe deungoe keuhai ureuëng nyang hina ajaran nyang Droeneueh anut nyan." 23 Teuma awaknyan dan Paulus laju jimeurok pakat uroe peu awaknyan ngon Paulus meurumpok lom teuma, nibak uroe nyan jai that-that ureuëng nyang teuka bak teumpat Paulus tinggai. Phon beungoh trok án seupôt Paulus geupeu trang dan geupeugah haba keuhai pakriban Allah geumat peurintah sibagoe Raja. Ngon geukuteb ayat-ayat nyang lam Kitab Nabi Musa dan Kitab Nabi-nabi, Paulus geu-useuha geuba awaknyan beuji meuiman ubak Isa. 24 Na nyang patéh peue nyang geupeugah lé Paulus nyan, teuma na cit nyang hana patéh. 25 Ngon peundirian nyang hana saban meulawan sidroe ngon nyang laén awaknyan laju jitinggai teumpat nyan, óh ka lheueh Paulus geupeugah nyang lagée nyoe ubak awaknyan, "Keubiet beutôi that peue nyang geupeugah lé Roh Allah meulalu Nabi Yesaya ubak indatu gata! 26 Allah meufeureuman, 'Jak kheueh peugah ubak bansa nyoe: Gata hana putôh tadeungoe, teuma hana tamuphom; gata teuma sabe takalon teuma hana tateupeue peue nyang teuma teujadi. 27 Sabab pikeran bansa nyoe ka jeuet keu tumpôi, geulinyueng awaknyan ka jeuet keutulo, dan mata awaknyan ka geupeupet. Nyoe hase jeuet mangat mata awaknyan bék deuh jimeungieng, punyueng awaknyan bék jimeudeungoe, pikeran awaknyan bék jimuphom, dan bék jigisa ubak Ulôn, laju Ulôn kupeupuléh awaknyan.' " 28 Akhé jih geupeugah lom lé Paulus, "Syedara banmandum harôh tateupeue bahwa haba keuhai seulamat nyang teuka nibak Po teu Allah jinoenyoe ka jipeusampoe ubak bansa-bansa laén nyang kon ureuëng Yahudi. Awaknyan jiseutôt haba nyan!" 29 Óh ka lheueh Paulus geupeugah lagée nyan, ureuëng-ureuëng Yahudi nyan laju jitinggai teumpat nyan sira jimeudakwa sabe keudroe-droe. 30 Dua thon treb jih Paulus tinggai di Roma, bak rumoh nyang geusiwa keudroe. Gobnyan galak that geuteurimong mandum ureuëng nyang saweue gobnyan. 31 Dan ngon beuhe jih gobnyan geupeugah ubak awaknyan pakriban Allah geumat peurintah sibagoe Raja dan keuhai Tuhan Isa. Paulus geupeubuet nyan ngon beubaih dan hana nyang tam.

Roma 1

1 Syedara-syedara banmandum nyang na di Roma nyang geugaséh lé Allah dan nyang ka geutawök lé Po teu Allah mangat jeuet keu umat Gobnyan. Allah ka geupiléh dan geuangkat ulôn khusos keu ulôn peusampoe Haba Gét nibak Allah. 2 Haba Gét nyan ka geupeu janji lé Po teu Allah nibak jamén ilée meulalu nabi-nabi Gobnyan dan ka teutuléh lam Alkitab. 3 Haba Gét nyan keuhai Aneuëk Allah, Tuhan geutanyoe Isa Almaseh. Seucara manusia, Gobnyan na kheueh keuturonan Nabi Daud, 4 teuma seucara ilahi Gobnyan na kheueh Aneuëk Allah. Nyan ka deuh bukeuti ngon kuasa nyang luwabiasa meulalu Gobnyan geubeudôh nibak maté. 5 Meulalu Gobnyan cit teuma Allah geubri karonya ubak ulôn jeuet keu rasui, mangat ulôn -- keu lôn horeumat Almaseh -- ulôn bimbeng bubena ureuëng nibak meubagoe bansa mangat jimeuiman dan taát. 6 Makna sigala bansa na kheueh jitamong gata nyang na di Roma; gata pi ka geutawök keu jeuet keu umat Isa Almaseh. 7 Nyang kheueh sabab jih ulôn teumuléh keu gata. Seumoga Allah Bapak geutanyoe dan Tuhan Isa Almaseh geubri beureukat dan seujahteura ubak geutanyoe. 8 Phon-phon that meulalu Isa Almaseh, ulôn lakée teurimong gaséh ubak Po teu Allah sabab Syedara-syedara banmandum; sabab bansaboh donya ka jideungoe bahwa gata meuiman ubak Almaseh. 9 Ulôn sabe na lôn ingat gata watée ulôn meudoá. Po teu Allah jeuet keusaksi bahwa peue nyang ulôn peugah nyan beutôi. Gobnyan kheueh Allah nyang ulôn seumah sipeunoh até deungon ulôn peusampoe Haba Gét keuhai Aneuëk Gobnyan. 10 Ulôn meulakée ngon meuharab that ubak Allah, seumoga Gobnyan geubri idhin keu ulôn bak saát nyoe keu lôn jak saweue gata. 11 Sabab ulôn meuheuét that keuneuk meurumpok ngon gata mangat ulôn hase lôn meuweuek ngon gata karonya nibak Roh Allah keu teupeuteuga gata. 12 Nyang ulôn meukeusut na kheueh sabab geutanyoe ka sabe-sabe tameuiman ubak Isa Almaseh, ngon lagée nyan geutanyoe jeuet saléng tapeukong. 13 Syedara-syedara! Ulôn meuharab mangat gata mandum tateupeue bahwa ka jai that-that ulôn meuniet keuneuk jak saweue gata teuma sabe na mantong halangan jih. Ulôn meuharab mangat lamkawan gata pih buet ulôn na hase jih lagée toh buet ulôn nyang ka meuhase lamkawan ureuëng nyang kon Yahudi nibak teumpat-teumpat nyang laén. 14 Sabab ulôn na keuwajéban keu mandum bansa; bah kheueh nyang ka meuadab meunan cit nyang mantong biadab, bah kheueh nyang ka na peundidekan meunan cit nyang gohlom jiteurimong peundidekan. 15 Nyang kheueh sabab jih ulôn meuharab that keuneuk peutrok Haba Gét nyang na tinggai nibak Roma nyoe. 16 Ulôn meuiman that nibak Haba Gét nyan, sabab haba nyan na kheueh teunaga Allah keu geupeue seulamat mandum ureuëng nyang meuiman; phon-phon that ureuëng Yahudi, dan bansa nyang laén. 17 Sabab ngon Haba Gét nyan Allah geutunyok pakriban hubongan manusia ngon Po teu Allah jeuet keu gét lom; cara jih na kheueh ngon teumeuiman ubak Po teu Allah, nibak awai sampoe akhé. Nyan saban lagée nyang na teutuléh lam Alkitab, "Ureuëng nyang meuiman ubak Po teu Allah akhé jih hubongan jih ngon Allah jeuet keu gét lom teuma, ureuëng nyan teuma udeb!" 18 Nibak lam syeuruga Allah geupeuleumah meureuka Gobnyan ateueh mandum desya dan buet nyang jeuhet nyang jipeubuet lé manusia, sabab nyang jeuhet nyan jipeuteun manusia keu jiteurimong ajaran nyang beutôi keuhai Allah. 19 Peue nyang hase jiteupeue lé manusia keuhai Po teu Allah ka nyata lam até manusia, sabab Allah keudroe ka geupeugah nyan bak manusia. 20 Yoh phon Allah geucebta donya nyoe, sifeuet-sifeuet Allah nyang hana deuh teukalon, na kheueh keuadaan Gobnyan sibagoe Allah dan kuasa Gobnyan nyang bakha, ka hase jiteupeue lé manusia nibak mandum nyang geucebta. Ngon lagée nyan manusia mubacut pih hana alasan keu jipeubeuna droe. 21 Manusia jituri Allah, teuma lé manusia nyan hana jihoreumat Gobnyan sibagoe Allah dan hana teuma jilakée teurimong gaséh ubak Gobnyan. Seubalek jih manusia nyang jipike nyang hana-hana; até awaknyan ka jeuet keuseupôt. 22 Awaknyan jianggab droe bijaksana, padahai awaknyan bangai. 23 Bukon Allah nyang bakha nyang awaknyan seumah, teuma patong-patong nyang saban lagée makhlok nyang hase maté; na kheueh manusia, cicém, beulatang nyang meugaki peuet, dan beulatang nyang meulata. 24 Le sababnyan Po teu Allah geupeubiyeu awaknyan jikuasa lé keuheundak até awaknyan keu jipeubuet nyang beujat, sampoe awaknyan jipeubuet hai-hai nyang kutoe ateueh sabe keudroe-droe jih. 25 Allah nyang beutôi, awaknyan gantoe ngon nyang peuleusu. Bukon peuncebta teuma nyang jicebta nyan kheueh nyang jiseumah dan jilayani lé awaknyan. Padahai nyang cebta nyan kheueh nyang harôh jipujoe siumu masa! Amin. 26 Sabab manusia jipeubuet nyang lagée nyan, teuma Allah laju geupeubiyeu awaknyan jiturot nafeusu droe jih nyang hina. Ureuëng-ureuëng inong awaknyan hana le nyang hawa keu ureuëng agam lagée nyang lazem jih nibak manusia, teuma jigalak ubak sabe keudroe-droe jih nyang ureuëng inong. 27 Meunan cit deungon ureuëng agam; awaknyan hana le seucara beutôi jipeuna hubongan ngon ureuëng inong, teuma jigalak ngon nafeusu beureuhi ateueh ureuëng agam. Ureuëng agam jipeuna buet nyang keubiet that-that malée ateueh seusabe ureuëng agam, sampoe awaknyan jiteurimong meunalah nyang patot ngon buet jih nyang jeuhet nyan. 28 Ngon sabab manusia meurasa hana peureulée jituri Po teu Allah, teuma Allah geupeubiyeu mantong pikeran awaknyan jeuet keurusak, akhé jih awaknyan jipeubuet hai-hai nyang hana jeuet awaknyan peubuet. 29 Até awaknyan peunoh ngon mandum nyang jeuhet, nyang hana beutôi; peunoh ngon seurakah, nyang brok dan peurasaan bingiek; peunoh ngon nafeusu keuneuk poh maté gob, meulo, peungeuet gob dan jitroh dam. Awaknyan galak that jikheun-kheun keu ureuëng laén, 30 galak that jipeubrok-brok nan ureuëng laén; awaknyan sombong dan kureueng aja, nyang banci keu Po teu Allah dan galak that jimeututoe haba nyang buhak. Awaknyan carông that jimita cara-cara nyang barô keu jipeubuet nyang jeuhet. Awaknyan jilawan ureuëng tuha; 31 awaknyan hana peureulée jimuphom ateueh ureuëng laén; awaknyan hana seutia dan hana rasa prikeumanusiaan. 32 Awaknyan jiteupeue, bahwa meunurot huköm Po teu Allah, ureuëng peubuet mandum nyan patot teuhuköm maté. Bah kheueh meunan awaknyan teutab cit jipeubuet hai-hai nyang lagée nyan; dan situju teuma ureuëng laén jipeubuet lagée nyan.

Roma 2

1 Ngon sabab nyan, Syedara-syedara, soe kheueh Gatanyan, sampoe Gata tatem peusalah ureuëng laén? Nibak Gata hana sapeuena keu gata bila droe! Sabab, meunyoe Gata tapeusalah ureuëng laén, padahai Gata keudroe tapeubuet nyang lagée awaknyan peubuet, ngon lagée nyan Gata katapeurhot huköman ateueh droe gata keudroe. 2 Geutanyoe tateupeue bahwa meunyoe Allah geupeurhot huköman ateueh ureuëng-ureuëng nyang jipeubuet buet-buet nyang lagée nyan, keuputosan nyang geucok Po teu Allah nyan beutôi. 3 Teuma gata, Syedara-syedara, gata peubuet cit hai-hai nyang lagée gata tudoh keu ureuëng laén! Dan gata tapike hase leupah nibak huköman Po teu Allah? 4 Atawa gata anggab phui keumurahan até Allah dan lapang até atawa saba Gobnyan nyang meunan rayeuk? Pasti gata tateupeue bahwa Allah geutunyok até geuh nyang gét nyan mangat Gobnyan meuharab gata tameutobat nibak mandum desya-desya gata. 5 Teuma gata teutab kreueh ulée dan hana gatatem ubah. Ngon sabab nyan gata keudroe kheueh nyang tapeugét huköman gata meutamah geuhon watée Uroe Kiamat teuka, meunyoe Po teu Allah ka geupeuleumah meureuka Gobnyan dan geupeurhot huköman nyang ade. 6 Sabab Allah teuma geubalah tieb-tieb ureuëng nyang sisuai ngon buet jih. 7 Allah geubri udeb seujati dan keukai keu awaknyan nyang biet-biet jipeubuet nyang gét jeuet meuteumé nyang mulia, nyang teuhoreumat dan nyang abadi. 8 Teuma ureuëng-ureuëng nyang jipeunteng droe jih keudroe dan hana jitem taát ubak Po teu Allah, teuma jiseutôt nyang jeuhet, ureuëng-ureuëng nyang lagée nyan lumpah that geubri meureuka lé Allah. 9 Soe mantong ureuëng nyang galak jipeubuet jeuhet teuma seungsara dan meudeurita; phon-phon that ureuëng Yahudi, dan meunan cit ngon bansa-bansa laén. 10 Teuma mandum ureuëng nyang galak jipeubuet nyang jroh teuma geubri keumuliaan dan keuhoreumatan meunan cit keuseujahteuraan lé Po teu Allah; phon-phon that keu ureuëng Yahudi, meunan cit keu ureuëng-ureuëng bansa laén. 11 Sabab Po teu Allah geupeusaneut mandum manusia nyan saban. 12 Ureuëng-ureuëng bansa laén meudesya meunyoe hana jiteupeue huköm agama Yahudi. Ngon lagée nyan awaknyan teuhuköm diluwa huköm nyan. Teuma ureuëng-ureuëng Yahudi meudesya óh ka lheueh jiteupeu huköm nyan; ngon sabab nyan awaknyan teuma geutuntot cit teuma ngon dasai huköm nyan. 13 Sabab ureuëng jimeujroh lom ngon Po teu Allah, kon sabab ureuëng nyan ka jiteupeue huköm agama Yahudi, teuma ngon sabab jihnyan ka jipeubuet peue nyang na teutuléh lam huköm nyan. 14 Ureuëng-ureuëng bansa laén hana jituri peue nyan huköm agama Yahudi. Teuma meunyoe awaknyan ateueh keuheundak jih keudroe jipeubuet peue nyang jipeurintah lé huköm nyan, até awaknyan keudroe kheueh nyan jeuet keuhuköm keu jih keudroe, bah kheueh awaknyan hana jiteupeue huköm agama Yahudi. 15 Pi-e awaknyan deuh teukalon peue nyang jipeurintah lé huköm nyan na teutuléh lam até awaknyan. Até nurani awaknyan pih jeuet keubukeuti keuhai nyan, sabab awaknyan keudroe na watée jih teupeusalah dan na teuma watée jih jipeubeutôi lé pikeran jih keudroe. 16 Meunan kheueh nyang teuma teujadi singoh bak uroe nyang ka teupeuteuntée nyan. Nibak uroe nyan -- meunurot lagée nyang teutuléh lam kitab Haba Gét nyang ulôn peusampoe -- Po teu Allah rot Isa Almaseh, teuma geupeu hakém banmandum rahsia até dan pikeran mandum manusia. 17 Teuma jinoenyoe pakriban ngon Syedara-syedara keudroe? Gata ta angkée droe ureuëng Yahudi. Gata meugantueng bak huköm agama Yahudi dan Gata bangga ateueh hubongan Gata ngon Po teu Allah. 18 Gata meuteumé peutunyok-peutunyok nibak huköm nyan, ngon lagée nyan Gata tateupeue keuheundak Allah dan tateupeue peuteuntée nyang toh nyang gét. 19 Gata yakén bahwa Gata na kheueh peumimpén ureuëng buta dan peungéh nibak ureuëng nyang na lam seupôt; 20 Gata tapurunoe ureuëng nyang akhlak jih brok, dan gurée nibak ureuëng-ureuëng nyang bangai. Gata yakén bahwa lam huköm agama Yahudi, Gata meuteumé mandum iéleumé peungeutahuan dan peungajaran nyang beuna. 21 Gata tapeubeuet ureuëng laén; ngon lagée nyan pakon Gata hana tapeubeuet droe gata keudroe? Gata tapeubeuet gob mangat bék jiceumeucue, padahai Gata keudroe ceumeucue! 22 Gata tapeubeuet gob mangat bék jimeumukah, padahai Gata keudroe meumukah! Gata banci ubak beurala, padahai Gata tacok barang-barang nyang na lam rumoh beurala. 23 Gata tapeubangga-bangga droe bahwa nibak Gata na huköm Nabi Musa, padahai Gata tahina Allah ngon cara hana taseutôt huköm Gobnyan. 24 Lam Alkitab na teutuléh lagée nyoe, "Sabab gata, ureuëng-ureuëng Yahudi, teuma nan Po teu Allah jipeukuto lé bansa-bansa nyang laén." 25 Meunyoe Gata taát nibak huköm agama Yahudi, Gata meukatan nyan na paedah jih. Teuma meunyoe gata hana lazem Gata patuh ubak hai-hai nyang na teupeurintah lam huköm nyan, ngon lagée nyan Gata meukatan nyan hana meuguna mubacut pih. 26 Meunyoe sidroe ureuëng nyang kon Yahudi nyang hana meukatan, meunurot huköm agama Yahudi, kon kheueh Allah geuanggab nyan sibagoe ureuëng nyang ka lheueh meukatan? 27 Dan ureuëng-ureuëng nyang hana meukatan nyan teuma jipeusalah Gata ureuëng Yahudi, sabab Gata na huköm agama Yahudi dan Gata teupeukatan, teuma Gata ta iengkeue ateueh huköm nyan. Awaknyan hana meukatan, teuma awaknyan kheueh nyang taát ubak huköm agama Yahudi. 28 Sabab ureuëng Yahudi nyang seujati kon kheueh ureuëng nyang nan jih mantong ureuëng Yahudi; dan ureuëng nyang biet-biet meukatan kon kheueh ureuëng nyang meukatan seucara lahé mantong. 29 Sikeubiet jih, sidroe ureuëng Yahudi nyang seujati na kheueh ureuëng nyang até jih meujiwa Yahudi; dan meukatan nyang seujati na kheueh meukatan nyang lam até jih geupeubuet lé Roh Allah, kon nyang na teucetet lam kitab. Ureuëng nyang lagée nyan jiteurimong pujoe nibak Po teu Allah, kon nibak manusia.

Roma 3

1 Meunyoe, meunan peu kheueh laba jih jeuet keu ureuëng Yahudi? Dan peu kheueh paedah jih taseutôt peuratoran meukatan? 2 Ka teuntée jai that paedah jih! Phon-phon that, sabab ubak ureuëng Yahudi kheueh Po teu Allah geupeucaya feureuman-feureuman Gobnyan. 3 Teuma pakriban teuma meunyoe ladum ureuëng Yahudi hana seutia? Peu kheueh ngon lagée nyan Allah jeuet hana seutia? 4 Ka teuntée hana! Sabab nyang biet jih Allah sabe beutôi, bah kheueh tieb-tieb ureuëng jimeusulet. Lam Alkitab na teutuléh lagée nyoe, "Bah kheueh gata keubiet na bukeuti ateueh peue mantong nyang gata peugah, dan gata meunang bak watée gata teupeusidang." 5 Teuma meunyoe keuadelan Allah deuh jih seumaken trang, ngon sabab tanyoe tapeubuet nyang hana beutôi, peu kheueh nyang keuneuk tapeugah? Bahwa Po teu Allah hana ade meunyoe Gobnyan geuhuköm tanyoe? (Keubiet teumanyong nyoe jeuet mantong seucara manusia.) 6 Sagai-sagai hana! Sabab, meunyoe Po teu Allah hana ade, pakriban Gobnyan jeuet geupeu hakém donya nyoe? 7 Teuma meunyoe ngon sabab buet nyang hana beutôi, peue nyang beutôi keuhai Allah seumaken trang sampoe Gobnyan teupujoe, pakon ureuëng nyang peubuet jeuhet nyan mantong teupeusalah sibagoe ureuëng nyang peubuet desya? 8 Dan pakon tanyoe hana jeuet tapeugah, "Bah kheueh tanyoe tapeubuet jeuhet mangat teuka nyang jroh?" Beutôi na ureuëng-ureuëng nyang jihina ulôn sira jipeugah bahwa ulôn ka lôn peugah lagée nyan. Ureuëng-ureuëng nyang lagée nyan ka patot geuhuköm lé Allah. 9 Ngon lagée nyan, peue kheueh meuneuduek tanyoe sibagoe ureuëng Yahudi leubeh gét nibak bansa laén? Sagai-sagai hana! Ka lheueh lôn peugah bahwa bah kheueh ureuëng Yahudi meunan cit bansa laén, banmandum nyan ka jikuasa lé desya. 10 Lagée nyang ka teutuléh lam Alkitab, "Hana meusidroe ureuëng pi nyang beutôi, 11 hana meusidroe pi nyang muphom dan hana meusidroe pih nyang seumah Allah. 12 Banmandum ureuëng ka jipeujiôh droe nibak Po teu Allah; banmandum ka sisat. Hana meusidroe ureuëng nyang peubuet nyang beutôi; meusidroe pi hana! 13 Rukueng awaknyan lagée jirat nyang teuhah. Tipée ngon daya lagée ié ile nyang teuka bak lidah awaknyan, dan bibi awaknyan jipeuteuka fiteunah lagée uleue nyang meubisa. 14 Babah awaknyan ka peunoh ngon kutok dan seurapa. 15 Langkah awaknyan bagaih that jigrak meunyoe keuneuk jakseksa ngon jipoh maté gob. 16 Hanco ngon ázeb seungsara jitabu lé awaknyan dipat mantong. 17 Awaknyan ka buta ateueh jalan keuseujahteuraan, 18 dan hana jihoreumat Po teu Allah." 19 Jinoenyoe tanyoe tateupeue bahwa banmandum nyang teutuléh lam huköm agama Yahudi, na kheueh keu ureuëng-ureuëng nyang na dimiyueb peumeurintahan huköm nyan. Ngon lagée nyan hana meusidroe pi nyang hase jibri alasan peue-peue mantong dan bansigom donya jeuet geutuntot lé Allah. 20 Sabab hana meusidroe pi nyang teupeumungken jimeugét ngon Po teu Allah lé sabab ureuëng nyan jipeubuet hai-hai nyang na lam huköm agama. Nyang sibeuna jih huköm nyan sibagoe teutunyok ubak manusia bahwa manusia nyan meudesya. 21 Teuma jinoenyoe Allah ka geutunyok jalan pakriban manusia jimeugét ngon Gobnyan; dan cara jihnyan hana sangkot paôt jih ngon huköm agama Yahudi. Kitab-kitab Nabi Musa dan kitab-kitab nabi-nabi nyang peugah hai nyan, 22 bahwa Po teu Allah geupeumungken manusia jimeugét ngon Gobnyan, na kheueh meunyoe manusia nyan jimeuiman ubak Isa Almaseh. Allah geupeubuetnyoe keu mandum ureuëng nyang meuiman ubak Almaseh; sabab hana nyang peubeda: 23 Mandum ureuëng ka meudesya dan jiôh nibak Po teu Allah nyang keuneuk peuseulamat awaknyan. 24 Teuma sabab rakhmat Allah mantong nyang geubri ngon cuma-cuma, hubongan manusia ngon Allah jeuet keugét lom teuma; cara jih na kheueh: manusia geupeubeubaih lé Isa. 25 Allah geukeureubeuen Isa mangat jeuet ngon maté Gobnyan manusia kateupeubeubaih nibak salah meunyoe awaknyan meuiman ubak Gobnyan. Allah geupeuget meunan sibagoe geutunyok bahwa Gobnyan ade. Sabab yoh watée ilée Allah ka geupeuteun saba ateueh desya-desya manusia, sampoe Gobnyan hana geuhuköm awaknyan. 26 Teuma jinoenyoe Gobnyan geucok tindakan ateueh desya sibagoe geubri bukeuti bahwa Gobnyan ade. Ngon caranyan Gobnyan ka geutunyok bahwa droe Gobnyan beutôi; dan tieb-tieb ureuëng nyang meuiman keu Isa, geupeugah sibagoe ureuëng nyang ka jimeugét lom teuma ngon Po teu Allah. 27 Ngon sabab nyan hana le alasan nibak geutanyoe keutapeubangga droe. Pakon lagée nyan? Peu kheueh sabab tanyoe tapeubuet peue nyang na teutuléh lam huköm agama Yahudi? Kon nyan, sabab geutanyoe katameuiman. 28 Sabab keusimpolan jih na kheueh lagée nyoe: Ureuëng nyang teupeugah jimeugét lom teuma ngon Po teu Allah, kon sabab jipeubuet peue nyang na teutuléh lam agama Yahudi, teuma sabab jihnyan meuiman ubak Isa Almaseh. 29 Atawa peu kheueh Allah nyan Allah ureuëng Yahudi mantong? Peu kheueh Gobnyan kon Allah bansa laén cit teuma? Beutôi, Gobnyan Allah bansa laén cit teuma! 30 Sabab Allah na kheueh sidroe. Gobnyan kheueh nyang peumungken ureuëng-ureuëng Yahudi jimeugét lom teuma ngon Allah sabab awaknyan meuiman. Dan Gobnyan kheueh teuma nyang peumungken bansa-bansa laén jimeugét lom teuma ngon Allah; nyan saban cit sabab awaknyan meuiman. 31 Peu kheueh nyoe meumakna bahwa sabab geutanyoe meuiman ubak Almaseh, tanyoe ka taböih huköm agama Yahudi? Sagai-sagai hana! Teuma nyang seubeuna jih ngon meuiman nyan, tanyoe ka tahareuga huköm nyan.

Roma 4

1 Meunyoe lagée nyan, peue kheueh nyang jeuet tapeugah keuhai Nabi Ibrahim, indatu bansa tanyoe? Pakriban kheueh peungalaman gobnyan? 2 Meunyoe hai-hai nyang geupeubuet jeuet keusabab Allah geuteurimong gobnyan sibagoe ureuëng nyang jipeumangat até Allah, ngon lagée nyan na alasan nibak gobnyan keu geupeu bangga até. Teuma gobnyan hana hase geupeu bangga droe dikeue Po teu Allah. 3 Lam Alkitab na teutuléh lagée nyoe, "Nabi Ibrahim meuiman ubak Po teu Allah, dan ngon sabab meuiman geuh nyoe gobnyan geuteurimong lé Allah sibagoe ureuëng nyang jipeugalak até Allah." 4 Ureuëng mubuet, jiteurimong upah; dan upah jihnyan hana jianggab sibagoe meuneubri, sabab nyan na kheueh hak jih. 5 Teuma na teuma ureuëng nyang hana meugantueng nibak useuha jih keudroe; ureuëng nyan jimeuiman droe jih ubak Po teu Allah nyang peugah ureuëng meudesya beubaih nibak buet nyang salah. Ngon dasai jimeuiman nyan kheueh Allah geuteurimong ureuëng nyan sibagoe ureuëng nyang jipeugalak até Allah. 6 Meunan cit ngon peundapat Nabi Daud; nyang kheueh sabab jih gobnyan geupeugah seulamat meubahgia keu ureuëng nyang lé Allah ka geuteurimong sibagoe ureuëng nyang jipeugalak até Gobnyan, meunyoe Allah hana geukalon buet-buet ureuëng nyan. Nabi Daud geupeugah lagée nyoe, 7 "Seulamat mubahgia ureuëng nyang jipeubuet salah teuma geupeu amphon lé Po dan desya-desya jih ka geupeu kubu lé Allah! 8 Seulamat mubahgia ureuëng nyang desya-desya jih hana geutuntot lé Tuhan!" 9 Peu kheueh teupeugah seulamat mubahgia nyoe teutuju keu ureuëng nyang meusunat mantong? Atawa keu ureuëng-ureuëng nyang hana jitem turot peuratoran meusunat? Ka lheueh kamoe peugah sigohlom nyoe, bahwa Nabi Ibrahim geuteurimong lé Allah sibagoe ureuëng nyang teupeugalak até Gobnyan, sabab Nabi Ibrahim meuiman keu Po teu Allah. 10 Ngon lagée nyan, pajan kheueh Allah geupeugah hai nyan? Sigohlom atawa óh ka lheueh Nabi Ibrahim meukatan? Beutôi sigohlom gobnyan teupeukatan, bukon óh ka lheueh nyan. 11 Gobnyan teupeukatan teuma óh dudoe, dan meukatan geuh nyan sibagoe tanda bahwa Allah ka geuteurimong gobnyan sibagoe ureuëng nyang jipeugalak até Allah, sabab geumeuiman ubak Allah. Gobnyan geuteurimong lé Allah bak watée gobnyan gohlom geuseutôt peuratoran meukatan. Dan Nabi Ibrahim jeuet keu bapak seucara rohani keu mandum ureuëng nyang meuiman ubak Po teu Allah, dan ngon sabab nyan ka geuteurimong lé Allah sibagoe ureuëng nyang peugalak até Gobnyan, bah pi awaknyan hana jiseutôt peuratoran meukatan. 12 Meunan cit Nabi Ibrahim bapak rohani keu ureuëng-ureuëng nyang meukatan. Gobnyan bapak rohani awaknyan bukon sabab jih awaknyan jiseutôt peuratoran meukatan, sabab awaknyan udeb ngon jimeuiman ubak Po teu Allah, saban lagée Nabi Ibrahim bak watée gobnyan gohlom geuseutôt peuratoran meukatan. 13 Allah meujanji ubak Nabi Ibrahim dan keuturonan gobnyan bahwa donya nyoe teuma jeuet keu milék Nabi Ibrahim. Allah geumeujanji lagée nyan bukon ngon sabab Nabi Ibrahim taát keu huköm agama Yahudi, teuma sabab gobnyan meuiman keu Allah sampoe gobnyan geuteurimong lé Allah sibagoe ureuëng nyang jipeugalak até Gobnyan. 14 Sabab meunyoe teuma ureuëng-ureuëng nyang taát keu huköm-huköm agama Yahudi mantong nyang teurimong peue nyang ka geupeu janji lé Allah nyan, teumeuiman ubak Po teu Allah hana meuguna mubacut pih, dan janji Allah pi soh hana meuguna. 15 Huköm agama Yahudi teupeuteuka huköman Allah. Teuma meunyoe huköm hana, buet-buet nyang teulanggar pi hana. 16 Ngon lagée nyan janji Allah nyan dasai jih na kheueh manusia jimeuiman ubak Allah. Nyan jeuet keujaminan ubak banmandum keuturonan Nabi Ibrahim bahwa janjinyan geubri ubak awaknyan sibagoe meuneubri nyang cuma-cuma nibak Allah; kon mantong keu awaknyan nyang taát ubak huköm agama Yahudi, teuma meunan cit keu ureuëng nyang meuiman ubak Allah saban lagée Nabi Ibrahim meuiman ubak Gobnyan. Sabab Nabi Ibrahim na kheueh ureuëng syiek geutanyoe banmandum seucara rohani. 17 Sabab Po teu Allah meufeureuman lagée nyoe ubak Nabi Ibrahim, "Ulôn ka kupeujeuet gata bapak keumandum bansa." Meunan kheueh Allah geubri janji nyan ubak Nabi Ibrahim. Dan Nabi Ibrahim meuiman ubak Gobnyan. Gobnyan kheueh Allah nyang peu-udeb ureuëng maté; dan Gobnyan kheueh teuma Allah nyang ngon geupeugah mantong beujeuet peue nyang hántom na hase na. 18 Nabi Ibrahim teutab meuharab dan peucaya bah kheueh hana harapan lé. Sabab nyan gobnyan jeuet keu bapak lé mandum bansa. Lagée nyang na teutuléh lam Alkitab, "Keuturonan gata teuma meukeumang jai lagoena." 19 Nabi Ibrahim bak watée nyan geuteupeue bahwa gobnyan hana mungken le meuteumé keuturonan, sabab tuboh gobnyan ka tuha that dan umu gobnyan rab sireutôh thon; lom teuma Sara, peurumoh gobnyan, balui. Teuma bah kheueh meunan iman Nabi Ibrahim teutab hana meukureueng. 20 Gobnyan teutab meuiman dan hana was-was peue nyang ka geupeu janji lé Po teu Allah keu gobnyan. Dan iman gobnyan meutamah kong dan gobnyan sabe meudhike ubak Allah. 21 Gobnyan peucaya that bahwa Allah hase geupeubuet peue nyang ka geupeu janji ubak gobnyan. 22 Nyang kheueh sabab jih Nabi Ibrahim geuteurimong lé Po teu Allah sibagoe ureuëng nyang peumangat até Gobnyan. 23 Haba "teuteurimong sibagoe ureuëng nyang peumangat até Allah" teutuléh kon mantong keu Nabi Ibrahim, 24 teuma rhot cit keugeutanyoe. Geutanyoe pi geuteurimong sibagoe ureuëng nyang peumangat até Allah, sabab geutanyoe meuiman ubak Allah nyang peu-udeb Isa, Tuhan geutanyoe, nibak maté. 25 Isa ka geujok keu jipoh maté sabab desya-desya geutanyoe; laju Gobnyan geupeu udeb lom teuma lé Po teu Allah sibagoe geutanyoe tameugét lom ngon Allah.

Roma 5

1 Jinoenyoe tanyoe ka tameugét lom ngon Po teu Allah, sabab tanyoe tameuiman. Dan ngon sababnyan tanyoe udeb damé ngon Allah rot Tuhan geutanyoe Isa Almaseh. 2 Ngon sabab nyan tanyoe meuiman ubak Isa. Deungon na lagée nyan teupeu mungken tanyoe tahayati geunaséh Allah, dan geunaséh nyan kheueh tanyoe udeb bak saát nyoe. Ngon sabab nyan tanyoe meugalak até sabab geutanyoe na harapan bahwa tanyoe teuma tarasa keubahgiaan nyang geubri lé Allah! 3 Dan nyang leubeh nibak nyan, geutanyoe pi geumbira lam deurita, sabab tanyoe tateupeue ngon deurita nyan teupeujeuet manusia meutamah khusyuék, 4 dan ngon khusyuék nyan teupeujeuet manusia jeuet teu-ujoe; ngon lagée nyan kheueh jipeuteuka harapan. 5 Harapan nyang lagée nyoe hana teuma keucewa geutanyoe, sabab lam até geutanyoe ka geupasoe lé Po teu Allah ngon geunaséh Gobnyan. Allah geupeubuet nyan ngon peurantaraan Roh Gobnyan, nyang ka geubri keu geutanyoe. 6 Watée tanyoe lam keuadaan hana meudaya, Almaseh maté keu geutanyoe bak watée nyang paih nyang ka geupeuteuntée lé Po teu Allah; padahai tanyoe ureuëng-ureuëng nyang jiôh nibak Allah. 7 Keu sidroe-droe ureuëng nyang ade pih payah that ureuëng jitem maté. Mungken keu sidroe ureuëng nyang gét, na cit ureuëng nyang jitem maté. 8 Teuma lé Allah geupeuleumah geunaséh Gobnyan ubak tanyoe watée Almaseh maté keugeutanyoe bak watée tanyoe mantong jeuet ureuëng meudesya. 9 Jinoenyoe tanyoe ka tameugét lom ngon Po teu Allah rot Almaseh maté; ngon sabab nyan pasti geutanyoe geupeu seulamat cit teuma nibak ázeb Allah lé Almaseh. 10 Meunyoe bak watée tanyoe meumusoh ngon Allah, geutanyoe geupeu damé ngon Gobnyan meulalu Aneuëk geuh maté, peulom jinoenyoe óh ka lheueh hubongan tanyoe ngon Allah gét lom teuma, ka teuntée tanyoe geubri seulamat rot udeb Almaseh. 11 Dan nyang leubeh nibak nyan, geutanyoe pi galak that até ateueh jroh geuh Allah rot Tuhan geutanyoe Isa Almaseh. Sabab rot Almaseh, tanyoe bak watéenyoe tarasa hubongan tanyoe nyang gét ngon Allah. 12 Desya jitamong lam donya rot sidroe ureuëng, dan nibak desya nyan teuka kheueh maté. Akibat jih, maté laju jimeu-éue ubak mandum manusia, sabab mandum ureuëng ka meudesya. 13 Sigohlom huköm agama Yahudi geubri lé Po, desya ka na ateueh rhueng donya. Teuma desya hana jituntot, sabab hana huköm nyang jeuet ji-iengkeue. 14 Teuma, phon jamén Nabi Adam trok ubak jamén Nabi Musa, maté ka jikuasa mandum umat manusia. Bah kheueh ureuëng-ureuëng nyang hana jipeubuet buet nyang meulanggeh ngon cara nyang sa lagée nyang geupeubuet lé Nabi Adam, ureuëng-ureuëng nyan pih meusajan cit jikuasa lé maté. Nabi Adam na kheueh sibagoe gamba nibak Gobnyan nyang teuka singoh dudoe. 15 Teuma mandua nyan hana saban; sabab meuneubri Allah jiôh leubeh rayeuk meunyoe teupeusa ngon buet nyang geulanggeh lé Nabi Adam. Buet sidroe ureuëng nyang salah jeuet keusabab jai that-that manusia maté. Padub na leubeh rayeuk lom akibat nibak rakhmat Allah dan hadiah keuseulamatan nyang geubri keu ureuëng ramé, rot até nyang jroh sidroe ureuëng, na kheueh Isa Almaseh. 16 Meunan cit hadiah Allah jiôh leubeh rayeuk nibak desya nyang sa nyan. Sabab óh ka lheueh sidroe ureuëng jipeubuet buet nyang ji-iengkeue, jipeurhot kheueh ponis, "Meusalah". Teuma óh ka lheueh jai that ureuëng jipeubuet desya teuka kheueh hadiah Po teu Allah nyang geupeugah, "Hana meusalah". 17 Sabab buet nyang jilanggeh lé sidroe ureuëng, maté laju jimeu-éue ho-ho mantong rot ureuëng nyang sidroe nyan. Padub na leubeh rayeuk lom akibat nibak peue nyang jipeubuet lé sidroe ureuëng nyang laén, na kheueh Isa Almaseh. Rot Gobnyan, Allah geupeutreun limpahan rakhmat Gobnyan ubak ureuëng ramé, dan ngon hana meuharab sapeue geupeu mungken manusia jimeugét lom ngon Allah; awaknyan jimeukuasa ateueh rhueng donya nyoe rot Almaseh. 18 Teuma, lagée toh buet nyang ka ji-iengkeue lé sidroe ureuëng jeuet keu akibat banmandum umat manusia geuhuköm, meunan cit ngon buet nyang jipeubuet lé sidroe ureuëng nyang jiseutôt keuheundak Po teu Allah, jeuet keuakibat mandum ureuëng geupeubeubaih nibak buet salah dan geubri udeb. 19 Dan lagée toh jai that ureuëng ka jeuet keu ureuëng meudesya sabab sidroe ureuëng nyang hana taát, meunan cit teuma jai that ureuëng teupeumungken jimeugét lom ngon Po teu Allah sabab sidroe ureuëng taát ubak Allah. 20 Nyang bri huköm agama Yahudi na kheueh Allah keudroe. Teuma seumaken manusia jiuseuha jitaát ubak huköm nyan, seumaken jai awaknyan ji iengkeue dan meudesya ubak Allah. Teuma seumaken manusia jipeubuet desya, Allah teutab geugaséh keu awaknyan. 21 Ngon sabab nyan, tanyoe museuti maté sabab tanyoe ka tapeubuet desya. Teuma Allah geugaséh keu tanyoe dan geubri jalan ubak geutanyoe keu tameugét lom teuma ngon Gobnyan. Dan sabab hubongan geutanyoe ngon Po teu Allah ka gét lom teuma, Gobnyan pi geubri udeb seujati dan keukai ubak geutanyoe rot Isa Almaseh, Tuhan geutanyoe.

Roma 6

1 Meunyoe meunan, peu kheueh nyang jeuet tapeugah? Peu kheueh geutanyoe tapeubuet desya sabe mangat Allah geugaséh keu tanyoe? 2 Teuntée hana! Desya hana le meukuasa ateueh geutanyoe, ngon lagée nyan, panena hase tanyoe udeb sabe tapeubuet desya? 3 Peu kheueh Gata mandum tateupeue bahwa bak watée tanyoe teupumanö, tanyoe ka teupeusaboh ngon Isa? Ngon lagée nyan makna jih tanyoe ka geupeu saboh lam maté Gobnyan. 4 Ngon teupumanö nyan, tanyoe teupeukubu meusajan ngon Almaseh dan meusajan maté ngon Gobnyan, mangat jeuet lagée toh Almaseh ka geupeu udeb nibak maté ngon kuasa Bapak nyang mulia, meunan kheueh tanyoe hase tarasa udeb nyang barô. 5 Meunyoe tanyoe ka jeuet meusaboh ngon Almaseh sabab tanyoe meusajan maté ngon Gobnyan, tanyoe teuma jeuet meusaboh ngon Gobnyan sabab geutanyoe meusajan geupeu udeb lom saban lagée Gobnyan. 6 Tanyoe tateupeue bahwa tabiát geutanyoe nyang katreb sibagoe manusia ka teupeumaté meusajan-sajan ngon Almaseh bak kayée saleb mangat kuasa tabiát geutanyoe nyang meudesya nyan teupeuhanco; ngon lagée nyan tanyoe hana le jipeubudak lé desya. 7 Sabab meunyoe sidroe-droe ureuëng maté, ureuëng nyan teupeubeubaih nibak kuasa desya. 8 Meunyoe tanyoe maté meusajan ngon Almaseh, tanyoe peucaya bahwa tanyoe pih teuma udeb meusajan Gobnyan. 9 Sabab tanyoe tateupeue bahwa Almaseh ka geupeu udeb nibak maté dan Gobnyan hana teuma maté le; maté hana meukuasa le ateueh droe Gobnyan. 10 Maté nyang geurasa lé Almaseh na kheueh maté ateueh desya. Nyan na jih sigoe mantong keu siumu masa. Dan udeb nyang geurasa bak watée nyoe na kheueh udeb keu Po teu Allah. 11 Gata pih harôh gata anggab droe gata maté ateueh desya, teuma udeb lam hubongan nyang krab ngon Allah meulalu Isa. 12 Bék le peubiyeu desya jikuasa udeb gata nyang fana mangat Gata bék taturot keuheundak gata nyang jeuhet. 13 Meunan cit bék teuma Gata seurah anggota tuboh gata ubak kuasa desya keu teupeuguna keu meukeusut-meukeusut nyang jeuhet. Teuma peujok kheueh droe gata ubak Allah sibagoe ureuëng nyang ka geupinah nibak maté ubak udeb. Bie kheueh bansaboh tuboh gata ubak Allah mangat geupeu guna keu geupeubuet keuheundak Allah. 14 Desya hana jeuet jikuasa ateueh gata, sabab gata hana le udeb dimiyueb huköm agama Yahudi teuma ka dimiyueb rakhmat Allah. 15 Jinoenyoe, peue keusimpolan jih? Peu kheueh jeuet tanyoe meudesya, sabab tanyoe ka hana le dimiyueb kuasa huköm agama Yahudi, teuma ka dimiyueb rakhmat Allah? Sagai-sagai hana! 16 Peu kheueh gata teupeu meunyoe gata peujok droe ubak sidroe-droe ureuëng keu teupeubuet keuheundak jih ngon lagée nyan gata na kheueh namiet ureuëng nyang gata taát nyan -- aléh namiet desya nyang jiba gata ubak maté, atawa namiet nyang taát ubak Allah, dan ngon lagée nyan meugét lom teuma ngon Allah. 17 Teuma teurimong gaséh ubak Allah! Sabab yoh masa ilée gata jeuet keu namiet desya, teuma bak watée nyoe gata ngon sipeunoh até gata taát ubak peungajaran nyang beutôi nyang ka teubri ubak gata. 18 Gata ka teupeubeubaih nibak desya, dan jinoenyoe jeuet keu hamba lagée nyang geulakée lé Allah. 19 Sabab daya pike gata that-that leumoh, ulôn peuguna tambeh-tambeh keunamiet mangat leubeh gata muphom. Yoh watée ilée gata peujok droe bansaboh tuboh gata sibagoe namiet keu hai-hai nyang kutoe dan nyang jeuhet keu meukeusut-meukeusut nyang jeuhet teuma. Meunan cit bak watée nyoe, bah kheueh gata jok bansaboh tuboh gata sibagoe hamba lagée nyang geukeuheundak lé Allah keu meukeusut-meukeusut Allah nyang khusos. 20 Watée gata jicok keunamiet lé desya, gata hana jikuasa lé keuheundak Po teu Allah. 21 Bak watée nyan peu kheueh laba jih nyang gata teurimong nibak hai-hai nyang bak watée nyoe gata malée bak tapeubuet? Buet-buet nyang lagée nyan teuma teuba ubak maté! 22 Teuma jinoenyoe gata kateupeubeubaih nibak desya, dan jeuet keu hamba Allah. Laba gata na kheueh bahwa Gata udeb khusos keu Po teu Allah dan hai nyan jipeuhase udeb seujati dan keukai. 23 Sabab maté na kheueh upah nibak desya; teuma udeb seujati dan keukai meusajan ngon Isa Tuhan tanyoe na kheueh meuneubri nyang geubri lé Allah ngon cuma-cuma.

Roma 7

1 Syedara-syedara lôn! Gata banmandum ka taturi keu huköm. Ngon lagée nyan, gata tateupeue bahwa keukuasaan huköm ateueh sidroe-droe ureuëng, meulaku simantong ureuëng nyan udeb. 2 Sidroe ureuëng inong nyang na lakoe, miseue jih, teuikat ngon huköm bak lakoe jih seumantong lakoe jih udeb. Meunyoe lakoe jih ka meuninggai donya, peurumoh ureuëng nyan ka beubaih nibak huköm nyang teuikat jihnyan bak teungku lakoe. 3 Meunyoe inong nyan udeb ngon agam laén seudangkan lakoe jih mantong udeb, dan ureuëng inong nyan teupeugah ka meumukah. Teuma meunyoe lakoe jih meuninggai donya, seucara huköm, inong nyan ka beubaih. Dan meunyoe inong nyan jimeukawen lom ngon agam laén, inong nyan hana teupeugah meumukah. 4 Meunan cit hai jih ngon gata, Syedara-syedara lôn. Teuhadab huköm agama Yahudi gata ka maté, sabab gata ka teupeusaboh ngon tuboh Almaseh dan ka jeuet keu atra Gobnyan nyang ka teupeu udeb lom teuma nibak maté. Gobnyan teupeu-udeb nibak maté mangat tanyoe jeuet meuguna nibak Po teu Allah, lam udeb geutanyoe. 5 Sabab, yoh masa ilée tanyoe udeb meunurot sifeuet-sifeuet manusia. Bak watée nyan nafeusu-nafeusu nyang meudesya, nyang teuka sabab na huköm agama, jimat peuranan lam tuboh geutanyoe. Nyang kheueh sabab jih tanyoe tapeubuet hai-hai nyang akibat jih rhot bak maté. 6 Teuma jinoenyoe tanyoe hana le teuikat bak huköm agama Yahudi. Tanyoe ka maté ateueh huköm nyang yoh watée ilée jikuasa tanyoe. Tanyoe hana le meungabdi ngon cara nyang awai, meunurot huköm nyang teutuléh. Jinoenyoe tanyoe meungabdi meunurot cara barô nyang jitunyok lé Roh Allah ubak geutanyoe. 7 Meunyoe meunan, peu kheueh nyang jeuet tapeugah? Bahwa huköm agama Yahudi nyan jeuhet? Teuntée hana! Teuma huköm nyan kheueh nyang purunoe ulôn keuhai desya. Ulôn hana teuma lôn teupeu peue nyang teupeugah ngon leuha nyan, meunyoe huköm agama Yahudi hana jipeugah, "Bék kheueh leuha." 8 Rot huköm agama, desya meuteumé keuseumpatan keu jipeuteuka mubagoe rupa keuheundak nyang leuha lam até ulôn; sabab meunyoe huköm agama hana, dan desya pih maté. 9 Ulôn ilée udeb hana meuagama. Teuma watée huköm agama teuka, desya ka jipeuphon udeb 10 dan ulôn maté. Dan huköm agama nyan, nyang yoh awai na meukeusut keu teubri udeb, nyang teuka na kheueh maté ateueh ulôn. 11 Sabab meulalu huköm agama nyan, desya jicok keuseumpatan keu jipeunget dan jipoh maté lôn. 12 Huköm agama asai jih nibak Po teu Allah, dan tieb-tieb peurintah nyang na lam huköm nyan teuka jih nibak Po teu Allah, jadi ade dan jroh. 13 Ngon lagée nyan, peu kheueh nyoe meumakna bahwa nyang gét nyan jipeuteuka maté keu ulôn? Teuntée hana! Desya kheueh nyang peuteuka maté nyan. Ngon teupeuguna nyang gét, desya jipeuteuka maté ateueh ulôn, mangat sifeuet-sifeuet desya mangat deuh ngon nyata. Ngon peurintah-peurintah Po teu Allah, deuh kheueh bukeuti jih padub na jeuhet jih desya. 14 Tanyoe tateupeue bahwa huköm agama Yahudi asai jih nibak Roh Allah; teuma ulôn nyoe manusia leumoh. Ulôn ka jipeubloe jeuet keu namiet desya. 15 Sabab ulôn keudroe hana muphom buet ulôn. Hai-hai nyang keuneuk ulôn peubuet, nyan hana lôn peubuet; teuma keu hai-hai nyang ulôn banci, nyang lagée nyan nyang ulôn peubuet. 16 Ngon lagée nyan, meunyoe ulôn peubuet hai-hai nyang hana patot ngon keuheundak ulôn, nyan saban cit ulôn angkée bahwa huköm agama Yahudi gét. 17 Ngon lagée nyan, kon ulôn le nyang sibeuna jih nyang peubuet lagée nyan, teuma desya nyang ka jikuasa ateueh droe ulôn. 18 Ulôn kuteupeue bahwa hana meusapeue pih nyang gét lam tuboh ulôn; na kheueh lam tabiát ulôn sibagoe manusia. Sabab na meuheuét lam droe ulôn keuneuk peubuet nyang jroh, teuma ulôn hana hase lôn peubuet nyan. 19 Ulôn hana lôn peubuet nyang gét nyang lôn keuneuk peubuet; sikeubit jih nyang ulôn peubuet hai-hai nyang jeuhet, nyang hana lôntem peubuet. 20 Meunyoe ulôn peubuet hai-hai nyang hana lôn tem peubuet, nyan saban cit bukon ulôn nyang peubuet hai nyan, teuma desya nyang ka jikuasa ateueh droe ulôn. 21 Ngon lagée nyan ulôn cok keuputosan bahwa huköm nyoe kheueh nyang mat peuranan: na kheueh bahwa meunyoe ulôn keuneuk peubuet nyang gét, teuma nyang jeuhet mantong nyang jiteuka bak ulôn. 22 Baten ulôn galak ubak huköm Allah, 23 teuma ulôn sadar bahwa lam droe ulôn na teuma huköm laén nyang jimat peuranan -- na kheueh huköm nyang meubeda ngon huköm nyang jiaku lé akai budho lôn. Nyang kheueh sabab jih ulôn teuikat nibak huköm desya nyang mat keumudo lam tuboh ulôn. 24 Syedara, lagée nyoe kheueh keuadaan ulôn: ulôn taát keu huköm Allah ngon akai budho lôn, teuma ngon tabiát manusia ulôn, ulôn taklôk ubak desya. Mupaloe that ulôn nyoe! Soe kheueh nyang tem peuseulamat ulôn nibak tuboh nyoe nyang ba ulôn ubak maté? Syukoe ubak Po teu Allah! Gobnyan geutem peuseulamat ulôn meulalu Isa Almaseh.

Roma 8

1 Jinoenyoe hana huköman keue ureuëng nyang udeb meusaboh ngon Isa. 2 Sabab huköm Roh Allah nyang peujeuet geutanyoe udeb meusaboh ngon Isa ka geupeubeubaih ulôn nibak huköm nyang teupeusabab desya dan maté. 3 Peue nyang hana hase jipeubuet lé huköm agama, sabab geutanyoe manusia leumoh, nyan ka geupeubuet lé Allah. Allah geupeutaloe kuasa desya lam tabiát manusia ngon geukirém Aneuëk Gobnyan keudroe, nyang teuka lam keuadaan saban ngon manusia nyang meudesya, keu teusampôh desya. 4 Allah geupeubuet lagée nyan mangat keuheundak Gobnyan nyang na lam huköm agama Yahudi nyan jeuet teupeujak lam droe geutanyoe nyang udeb meunurot Roh Allah dan kon meunurot tabiát manusia. 5 Ureuëng-ureuëng nyang udeb meunurot tabiát manusia, hana piôh jipike peue nyang jilakée lé tabiát manusia. Teuma ureuëng nyang udeb meunurot Roh Allah, hana piôh jipike peue nyang lakée lé Roh Allah. 6 Meunyoe pikeran gata jikuasa lé tabiát manusia, akibat jih na kheueh maté. Teuma meunyoe pikeran gata jikuasa lé Roh Allah, teuma akibat jih na kheueh udeb damé ngon Allah. 7 Ureuëng nyang jikuasa lé tabiát manusia, ureuëng nyan jimeumusoh ngon Allah; sabab ureuëng nyan hana tundok ubak huköm Allah; dan keubiet jihnyan hana hase tundok ubak huköm Allah. 8 Ureuëng nyang udeb meunurot tabiát manusia, ureuëng nyan hana hase jipeugalak até Allah. 9 Teuma gata hana udeb meunurot tabiát manusia. Gata udeb meunurot Roh Allah -- meunyoe, teuntée jih, Roh Allah biet-biet geumat peuranan lam tuboh gata. Ureuëng nyang hana bak jih Roh Almaseh, ureuëng nyan bukon kheueh atra Almaseh. 10 Teuma meunyoe Almaseh udeb lam tuboh gata, bah pi tuboh gata teuma maté ngon sabab desya, teuma Roh Allah geubri udeb ubak gata, sabab hubongan gata ngon Allah ka gét. 11 Meunyoe Roh Allah, nyang peu-udeb Almaseh nibak maté, udeb lam tuboh gata, teuma Gobnyan nyang peu-udeb Almaseh nibak maté nyan, teuma geupeu udeb teuma tuboh gata nyang hase maté nyan. Gobnyan geupeubuet nyan ngon Roh Gobnyan nyang udeb lam tuboh gata. 12 Nyang kheueh sabab jih, Syedara-syedara, geutanyoe na tanggong jaweueb; teuma kon tanggong jaweueb ubak tabiát manusia; tanyoe hana peureulée udeb meunurot nyang jilakée. 13 Sabab meunyoe gata udeb meunurot tabiát manusia, teuma gata maté; teuma meunyoe ngon kuasa Roh Allah, gata hana piôh tapeumaté buet-buet gata nyang meudesya, ngon lagée nyan gata teuma udeb. 14 Ureuëng-ureuëng nyang geubimbéng lé Roh Allah, na kheueh aneuëk-aneuëk Allah. 15 Sabab Roh, nyang geubri lé Allah ubak gata, hana kheueh teupeujeuet gata jeuet keu namiet sampoe gata udeb lam keuadaan teumakot. Nyang beuna Roh Allah nyan teupeujeuet gata keu aneuëk-aneuëk Allah. Dan ngon kuasa Roh Allah nyan tanyoe tapeugah keu Allah nyan, "Bapak, nyoe Bapak lôn!" 16 Roh Allah meusajan-sajan ngon roh geutanyoe jipeugah bahwa tanyoe na kheueh aneuëk-aneuëk Allah. 17 Ngon lagée nyan, meunyoe tanyoe na kheueh aneuëk-aneuëk Gobnyan, tanyoe pih na kheueh ahli waréh Gobnyan nyang teuma tateurimong beureukat-beureukat nyang teuma geukeubah lé Allah keu aneuëk-aneuëk Gobnyan. Geutanyoe teuma tateurimong meusajan-sajan ngon Almaseh peue nyang ka geukeubah lé Allah keu Gobnyan; sabab meunyoe tanyoe meudeurita meusajan ngon Almaseh, tanyoe pih geupeumulia meusajan Gobnyan. 18 Banmandum deurita nyang tarasa bak watée nyoe, meunurot peundapat ulôn, hana hase tapeusa mubacut pih ngon keumuliaan nyang teuma geupeugah ubak geutanyoe. 19 Bansigom donya jipreh ngon that-that meucen teuma watée jih Allah geupeugah aneuëk-aneuëk Gobnyan. 20 Sabab álam ka geupeubiyeu jeuet keu rapôh, bukon sabab keuheundak jih keudroe, teuma ngon sabab Allah geupeubiyeu lagée nyan. Bah kheueh ka lagée nyan na cit harapan nyoe: 21 bahwa bak saboh watée álam teuma geupeubeubaih nibak kuasa nyang peuhanco dan teuma meusajan jipeumeurdehka meunan cit jipeumulia meusajan-sajan ngon aneuëk-aneuëk Allah. 22 Tanyoe tateupeue bahwa trok bak watéenyoe bansigom donya apoh apah sabab meudeurita lagée sidroe inong nyang jipeulahé aneuëk manyak. 23 Dan bukon bansigom donya mantong nyang apoh apah; tanyoe keudroe pih apoh apah lam baten. Tanyoe ka tateurimong Roh Allah sibagoe meuneubri Allah nyang phon, teuma tanyoe teutab mantong tapreh Allah geupeubeubaih droe geutanyoe banmandum nyan dan geupeujeuet tanyoe sibagoe aneuëk-aneuëk Gobnyan. 24 Sabab ngon meuharab, tanyoe geupeu seulamat. Teuma meunyoe peue nyang taharab nyan ka deuh tangieng, nyan bukon le harapan. Sabab soe kheueh nyang mantong meuharab sapeue-sapeue meunyoe ka deuh jingieng? 25 Teuma meunyoe tanyoe meuharab sapeue-sapeue nyang gohlom tangieng, tanyoe tapreh ngon saba. 26 Meunan cit ngon Roh Allah teuka geujak tulông tanyoe meunyoe tanyoe leumoh. Sabab geutanyoe hana tateupeue pakriban nyang sibeuna jih tanyoe meudoá; Roh nyan keudroe meuhadab Allah keu jijak lakée keu geutanyoe ngon meucen nyang leupah lhok sampoe hana hase jipeugah. 27 Ngon lagée nyan Po teu Allah, nyang geuteupeue asoe até manusia, muphom peue nyang jilakée lé Roh nyan; sabab Roh nyan jilakée ubak Allah keu umat Allah keudroe, dan saban ngon keuheundak Allah. 28 Tanyoe tateupeue bahwa Allah nyang atoe peue-peue mantong, sampoe jipeuhase nyang gét keu ureuëng-ureuëng nyang gaséh Gobnyan dan geuhôi jihnyan saban ngon reuncana Gobnyan. 29 Awaknyan nyang ka geupiléh lé Allah, ka teuma geupeuteuntée nibak awaiphon keu jeuet keusaban lagée Aneuëk Gobnyan, na kheueh Isa Almaseh. Ngon lagée nyan Aneuëk nyan ka jeuet nyang phon lamkawan syedara-syedara jih. 30 Meunan kheueh Allah geutawök awaknyan nyang ka geupeuteuntée leubeh ilée; dan awaknyan nyang geuhôi nyan, teupeumungken jimeugét lom teuma ngon Gobnyan. Dan awaknyan nyang teupeumungken jimeugét lom ngon Allah, jicok jeumba lam udeb Allah keudroe. 31 Peu kheueh nyang jeuet teupeugah bak watée nyoe ngon mandum nyan? Meunyoe Allah na blaih geutanyoe, soe nyang hase jilawan tanyoe? 32 Aneuëk Gobnyan keudroe hana geugaséh, teuma geuseurah keu keupeuntengan tanyoe banmandum; hana mungken Gobnyan hana geubri keu geutanyoe sipeue-peue nyang laén? 33 Soe kheueh nyang hase jigugat tanyoe umat nyang geupiléh lé Allah, meunyoe Allah keudroe geupeugah bahwa tanyoe hana meusalah? 34 Peu kheueh na ureuëng nyang keuneuk peusalah geutanyoe? Isa singoh nyang bila tanyoe! Gobnyan kheueh nyang ka maté, atawa Gobnyan kheueh nyang ka geupeu udeb lom nibak maté dan na ngon Allah bak teumpat Gobnyan meukuasa. 35 Peu kheueh nyang hase jitam Almaseh geugaséh tanyoe? Peu kheueh hase keusosahan nyang seugah nyan, atawa payah, meunan cit ngon teu iénanya, atawa ngon deuek, meunan cit ngon gasien, atawa bahya, meunan cit ngon maté? 36 Lam Alkitab na teutuléh lagée nyoe, "Siuroe seupôt kamoe udeb lam bahya mawöt lé sabab Droeneueh. Kamoe jipeusaneut lagée bubiri nyang keuneuk jisie." 37 Hana! Nyang beutôi lam banmandum nyan geutanyoe meuteumé meunang nyang sampoereuna lé Gobnyan nyang gaséh geutanyoe! 38 Sabab ulôn peucaya that bahwa bansigom donya, bah kheueh maté meunan cit udeb, bah kheueh malaikat meunan cit nyang mat kuasa, bah kheueh ancaman-ancaman nyang teuka jinoenyoe meunan nyang ancaman nyang teuka singoh atawa teunaga-teunaga nyang laén; 39 bah kheueh hai-hai nyang na di langét, meunan cit hai-hai nyang na lam bumoe atawa peue mantong nyang laén, banmandum nyan hana hase jitam Po teu Allah geugaséh geutanyoe, lagée nyang ka geutunyok rot Isa, Tuhan geutanyoe.

Roma 9

1 Peue nyang ulôn peugah nyoe na kheueh beutôi sabab ulôn atra Almaseh. Ulôn hana sulet. Até nurani ulôn nyang jibimbéng lé Roh Allah, geupeu yakén ulôn bahwa haba ulôn nyoe beutôi. 2 Ulôn biet that seudeh dan até ulôn meudeurita 3 sabab syedara-syedara lôn nyang saboh bansa ngon ulôn. Sabab keu awaknyan, ulôn keudroe rila geukutôk lé Allah dan geupeucre nibak Almaseh. 4 Awaknyan na kheueh umat nyang teupiléh dan Allah geupeujeuet awaknyan sibagoe aneuëk-aneuëk geuh keudroe, dan geupeugah kuasa Gobnyan bak awaknyan. Gobnyan geupeuna peujanjian ngon awaknyan dan geubri keu awaknyan huköm agama. Allah geubri tée bak awaknyan pakriban awaknyan meu iébadat dan awaknyan ka teuma jiteurimong janji-janji Gobnyan. 5 Awaknyan na kheueh keuturonan nibak indatu tanyoe. Almaseh seucara manusia asai jih nibak bansa awaknyan. Gobnyan leubeh manyang nibak banmandum. Teupujoe kheueh Allah keu siumu masa! Amin. 6 Ulôn hana meukeusut ulôn peugah bahwa janji Allah ka hana laku le; teuma kon mandum ureuëng Israel umat nyang geupiléh lé Allah. 7 Kon banmandum keuturonan Nabi Ibrahim na kheueh aneuëk-aneuëk Allah. Sabab Allah meufeureuman ubak Nabi Ibrahim lagée nyoe, "Keuturonan Nabi Ishaq mantong kheueh nyang teupeugah keuturonan gata." 8 Nyan meumakna bahwa keuturonan Nabi Ibrahim nyang jeuet keu aneuëk-aneuëk Allah, na kheueh keuturonan nyang lahé ngon sabab janji Allah; dan bukon mandum keuturonan gobnyan. 9 Sabab janji Allah na kheueh lagée nyoe, "Bak watée nyang ka teupeuteuntée, Ulôn teuma Lôn gisa, dan Sara teuma jipeulahé sidroe aneuëk agam." 10 Dan nyoe lom: Ribka teuma jipeulahé dua droe aneuëk agam nibak saboh yah, na kheueh Nabi Ishaq indatu geutanyoe. 11 Sigohlom mandua droe aneuëk nyan lahé, Allah ka geupeuteuntée piléhan Gobnyan keu seulanjut jih. Nyang geupiléh lé Allah nyan hana meugantueng nibak peue nyang hase jipeubuet lé manusia, teuma meugantueng ubak panggelan Allah keudroe. Sabab bak watée mandua droe aneuëk agam Ribka nyan gohlom hase jipeubuet nyang gét atawa nyang jeuhet, 12 Allah ka meufeureuman ubak Ribka, "Nyang tuha teuma jipeutimang nyang muda." 13 Lam Alkitab na teutuléh bahwa Allah meufeureuman lagée nyoe, "Nabi Yakub Ulôn gaséh, teuma Esau Ulôn banci." 14 Peu kheueh keusimpolan tanyoe jinoenyoe? Peu kheueh Allah nyan hana ade? Ka teuntée Allah ade! 15 Sabab Allah meufeureuman ubak Nabi Musa lagée nyoe, "Ulôn kutunyok rakhmat ubak ureuëng nyang Ulôn keuneuk tunyok rakhmat, dan Ulôn Lôn bri rasa gaséh ubak ureuëng nyang Lôn tem bri rasa gaséh." 16 Ngon lagée nyan keuputosan Allah nyan bukon kheueh meugantueng ateueh keurilaan manusia atawa ateueh useuha manusia, teuma ateueh keugét até Allah mantong ateueh ureuëng-ureuëng nyang geupiléh nyan. 17 Sabab lam Alkitab na teutuléh lagée nyoe, "Allah meufeureuman ubak Raja Nanggroe Meusé, 'Ulôn peujeuet gata keuraja teuma saboh meukeusut nyoe mantong, na kheueh mangat ngon gata, Ulôn kutunyok keukuasaan Lôn dan teupeujeuet nan Ulôn meusyeuhu bansigom donya.' " 18 Ngon lagée nyan, Allah na gaséh sayang ateueh sidroe-droe ureuëng, meunyoe Allah geukeuheundak nyang lagée nyan. Dan lé Allah teupeusabab sidroe-droe ureuëng jeuet kreueh ulée, meunyoe Allah geulakée lagée nyan. 19 Ngon lagée nyan, Gata teuma tapeugah ubak ulôn, "Meunyoe meunan pakon mantong geupeusalah manusia? Kon kheueh hana meusidroe manusia pih nyang hase jitam keuheundak Allah?" 20 Teuma Syedara! Gata na kheueh manusia biasa. Dan hana jeuet Gata seuôt bak Po teu Allah! Peu kheueh jeuet pot bungöng jitanyong bak nyang peugét jih, "Keupeue gata peugét ulôn lagée nyoe?" 21 Kon kheueh ureuëng nyang peugét pot bungöng nyan na hak jipeugét tanoh kliet nyan ban galak droe jih? Nibak saboh geucai tanoh kliet, ureuëng nyan na hak jipeugét dua macam pot bungöng: saboh nyang gét, dan nyang laén kureueng gét. 22 Meunan cit teuma nyang geupeugét lé Allah. Gobnyan na niet keuneuk peuleumah beungéh geuh dan geupeuleumah kuasa Gobnyan. Teuma Gobnyan saba ateueh awaknyan nyang harôh teuhuköm sabab jipeujeuet Gobnyan teumeureuka. 23 Meunan cit Allah na niet keuneuk peuleumah nibak geutanyoe bahgia nyang meulimpah ruah nyang geuro ateueh geutanyoe nyang geugaséh. Tanyoe ka geupeu siab keutateurimong keubahgiaan nyan. 24 Tanyoe kheueh nyang ka geutawök, kon mantong nibak bansa Yahudi, teuma meunan cit ateueh bansa laén. 25 Sabab lam kitab Nabi Hosea, Allah meufeureuman, "Ureuëng-ureuëng nyang kon umat Lôn, teuma Lôn peugah 'Umat Lôn', Bansa nyang hana Ulôn gaséh, teuma Lôn peugah 'Geunaséh Ulôn', 26 Dan bak teumpat nyang jipeugah bak ureuëng, 'Gata kon umat Lôn,' nibak teumpat nyan ureuëng-ureuëng teuma teupeugah aneuëk-aneuëk Allah nyang udeb." 27 Nabi Yesaya geupeugah ngon teugaih keuhai bansa Israel lagée nyoe, "Bah kheueh bansa Israel nyan jai jih lagée anoe lam laôt, teuma cit bacut nyang teuma seulamat; 28 sabab Tuhan sigra geupeu rhot huköman ateueh asoe donya." 29 Dan Nabi Yesaya geupeugah lom lagée nyoe, "Seukira jih Allah Nyang Mahakuasa hana geutinggai nibak geutanyoe keuturonan, ka pasti tanyoe banmandum ka jeuet lagée Sodom dan Gomora." 30 Ngon lagée nyan, keusimpolan na kheueh lagée nyoe: Bansa-bansa laén nyang kon bansa Yahudi hana jiuseuha mangat hubongan jih ngon Allah jeuet keugét lom teuma. Teuma sabab awaknyan jimeuiman, teuma Allah geupeujeuet hubongan awaknyan ngon Gobnyan jeuet keugét lom teuma. 31 Teuma, di ureuëng-ureuëng Yahudi sabe jiuseuha jitaát ubak huköm mangat hubongan jih ngon Allah jeuet keugét lom. Teuma awaknyan teutab hana meuhase. 32 Pakon awaknyan hana meuhase? Sabab awaknyan nyang jipeubuet nyan rot meuiman ubak Po teu Allah, teuma rot useuha awaknyan keudroe. Teuma awaknyan laju reubah meugantoh bak "Batée meugantoh". 33 Keuhai batéenyan lam Alkitab na teutuléh lagée nyoe, "Simah kheueh nyoe: Di Sion ka Lôn keubah saboh batée nyang teuma jeuet keuakibat ureuëng meugantoh; na kheueh saboh batée rayeuk nyang jeuet keuakibat ureuëng reubah. Teuma ureuëng nyang meuiman ubak Gobnyan hana teuma keucewa."

Roma 10

1 Syedara-syedara! Ulôn meucen that-that mangat bansa ulôn nyoe teupeuseulamat. Dan ulôn biet-biet meudoá ubak Allah keu awaknyan. 2 Ulôn kujeuet peugah bahwa awaknyan meuseumangat that meungabdi ubak Allah. Teuma seumangat awaknyan hana ngon dasai peungeutahuan nyang teuka nibak Allah. 3 Awaknyan hana jiteupeue cara Allah geupeujeuet hubongan manusia ngon Gobnyan gét lom teuma. Dan sabab awaknyan jikeuneuk seutôt cara jih keudroe, teuma awaknyan hana tundok ubak cara nyang geutunyok lé Allah. 4 Huköm agama ka geupeu peunoh lé Almaseh. Ngon lagée nyan tieb-tieb ureuëng nyang meuiman ubak Almaseh, hubongan jih ngon Allah jeuet keu gét lom teuma. 5 Nabi Musa geutuléh bahwa ureuëng nyang meugét ngon Allah ngon dasai jih huköm agama, ureuëng nyan teuma udeb sabab jih taát ubak huköm agama nyan. 6 Teuma keuhai cara ureuëng jimeugét ngon Allah ngon dasai jih meuiman ubak Allah, lam Alkitab na teutuléh lagée nyoe, "Bék gata peugah lam até gata, 'Soe kheueh nyang tamong lam syeuruga?' (makna teupeutreun Almaseh), 7 atawa, 'Soe kheueh nyang teuma treun lam donya ureuëng maté?' (makna jih teuangkat Almaseh geuék nibak maté)." 8 Meukeusut jih na kheueh lagée nyoe, "Haba nibak Po teu Allah nyan rab that ngon gata; lam babah gata dan lam até gata." Nyan kheueh haba nyang kamoe peumaklum; haba nyan na kheueh bahwa ureuëng harôh meuiman. 9 Sabab meunyoe Gata tapeubeuna ngon babah gata bahwa "Isa nyan Tuhan", dan Gata peucaya lam até teuh bahwa Allah ka geupeu udeb Isa nibak maté, ngon lagée nyan Gata teuma seulamat. 10 Sabab ngon até jih ureuëng meuiman, sampoe Allah geuteurimong jihnyan sibagoe ureuëng nyang jimeugét ngon Allah. Dan ngon babah jih ureuëng meungaku, sampoe jihnyan teupeuseulamat. 11 Lam Alkitab na teutuléh lagée nyoe, "Ureuëng nyang meuiman hana geubri keucewa." 12 Hainyan teutab keunong ateueh mandum ureuëng, sabab hana bida jih ureuëng Yahudi ngon ureuëng bansa laén. Allah nyang sidroe nyan na kheueh Tuhan keu mandum ureuëng. Gobnyan geubri beureukat nyang meulimpah ruah keu mandum manusia nyang jilakée tulông ubak Gobnyan. 13 Lam Alkitab na teutuléh lagée nyoe, "Mandum ureuëng nyang jimeulakée ubak Tuhan, teuma geubri seulamat." 14 Teuma pakriban kheueh ureuëng hase jitawök ubak Tuhan meunyoe awaknyan gohlom meuiman? Dan pakriban kheueh awaknyan jeuet jimeuiman ubak Tuhan, meunyoe awaknyan gohlom jideungoe keuhai Gobnyan? Meunan cit, pakriban awaknyan jeuet jideungoe keuhai Tuhan, meunyoe hana nyang peurunoe? 15 Dan pakriban kheueh ureuëng hase jiba haba nyan meunyoe ureuëng nyan hana teuyue jak? Lam Alkitab na teutuléh lagée nyoe, "Keubit that jroh jih jiteuka ureuëng-ureuëng nyang ba Haba Gét nibak Allah!" 16 Teuma hana mandum ureuëng jiteurimong Haba Gét nyan. Sabab Nabi Yesaya na geupeugah lagée nyoe, "Tuhan, soe kheueh nyang patéh bak haba kamoe?" 17 Nyang kheueh sabab jih manusia jeuet jipatéh watée jideungoe haba, dan haba nyang jideungoe sabab na nyang peusampoe keuhai Almaseh. 18 Teuma ulôn tanyong: Peu kheueh keubiet awaknyan gohlom jideungoe haba nyan? Pasti ka jideungoe! Sabab lam Alkitab na teutuléh lagée nyoe, "Su awaknyan ka meugeunta bansigom donya, tutoe haba awaknyan ka trok sampoe bak ujong bumoe." 19 Ulôn tanyong lom: Peu kheueh bansa Israel gohlom jiteupeue? Bah kheueh teumanyong nyan phon-phon that geujaweueb lé Nabi Musa, Nabi Musa geupeugah lagée nyoe, "Meunoe kheueh feureuman Allah, 'Ulôn Lôn peujeuet gata picék até ateueh bansa nyang bukon umat dan Ulôn peujeuet gata beungéh keu saboh bansa nyang bangai.' " 20 Nabi Yesaya leubeh geujeuet lom geupeugah lagée nyoe, "Meunoe kheueh feureuman Allah, 'Ureuëng-ureuëng nyang hana jimita Ulôn ka meurumpok ngon Lôn; dan Ulôn peuleumah droe Ulôn bak awaknyan nyang hana jitanyong keuhai Ulôn.' " 21 Teuma keuhai bansa Israel Nabi Yesaya geupeugah lagée nyoe, "Meunoe kheueh feureuman Allah, 'Sipanyang uroe Ulôn sunyueng jaroe Lôn ubak saboh bansa nyang kreueh ulée dan hana taát.' "

Roma 11

1 Ulôn teumanyong: Peu kheueh Allah ka geuböih umat geuh keudroe? Teuntée hana! Ulôn keudroe ureuëng Israel keuturonan nabi Ibrahim, dan nibak sukée Benyamin. 2 Hana! Allah hana geuböih umat Gobnyan nyang ka geupiléh yoh awaikon. Syedara keudroe tateupeue peue nyang na teutuléh lam Alkitab keuhai Ilyas, watée gobnyan geujak gadu soai Israel ubak Allah. Ilyas geupeugah lagée nyoe, 3 "Tuhan, ureuëng-ureuëng ka jipoh maté bubena nabi-nabi Droeneueh dan jipeuhanco bubena teumpat keureubeuen peuseumahan keu Droeneueh. Tinggai lôn sidroe nyang awaknyan pih jikeuneuk peumaté teuma." 4 Peu kheueh jeunaweueb Allah ubak Ilyas? Allah geujaweueb, "Ulôn ka Lôn keubah tujoh ribée droe keu Lôn keudroe. Awaknyan gohlom na nyang seumah Dewa Baal." 5 Meunan cit bak saát nyoe: Na ngon jeumeulah bacut ureuëng nyang ka geupiléh lé Allah sabab rakhmat Gobnyan. 6 Gobnyan geupiléh awaknyan ngon dasai rakhmat geuh dan bukon lé dasai buet awaknyan. Sabab meunyoe nyang geupiléh lé Allah nyan ngon dasai buet manusia, teuma rakhmat Allah nyan bukon le rakhmat nyang seujati. 7 Teuma, pakriban? Umat Israel hana meuteumé nyang jimita. Nyang meuteumé na kheueh sigolongan ubit ureuëng-ureuëng nyang ka geupiléh lé Allah. Nyang laén mandum ka jeuet keu ureuëng kreueh ulée ubak panggelan Allah. 8 Sabab lam Alkitab na teutuléh lagée nyoe, "Allah geupeujeuet até dan pikeran awaknyan jeuet keu batat; dan trok saátnyoe mata awaknyan hana deuh jikeumalon dan punyueng awaknyan hana jeuet jimeudeungoe." 9 Nabi Daud pi na geupeugah lagée nyoe, "Bah kheueh khanuri-khanuri nyang awaknyan peuna jeuet keupeurangkab awaknyan keudroe, dan uruek, teumpat awaknyan rhot dan hanco! 10 Bah kheueh pandangan awaknyan jeuet keuseupôt mangat awaknyan hana jeuet jimeungieng; dan bah kheueh awaknyan jeuet keu bungkôk siumu masa." 11 Ulôn tanyong lom: Watée ureuëng Yahudi reubah, peu kheueh nyan na mangat awaknyan hanco? Sagai-sagai hana! Teuma sabab awaknyan meudesya, teuma bansa laén geupeu seulamat, ngon lagée nyan ureuëng Yahudi jeuet keu bingiek até keu bansa laén. 12 Sabab bansa Yahudi meusalah dan hana jitem seutôt peurintah Allah, teuma bansa-bansa laén geubri beureukat lé Allah. Peue teuklom meunyoe hubongan bansa Yahudi ngon Allah jeuet keu gét lom teuma; teuntée leubeh rayeuk lom beureukat nyang geubri lé Allah! 13 Jinoenyoe bah kheueh ulôn meututoe keu Syedara-syedara nyang kon Yahudi! Nyang ka nyoe, sibagoe rasui keu bansa-bansa nyang kon Yahudi, ulôn that-that lôn seuôn manyang tugaih-tugaih ulôn. 14 Ulôn meuharab lôn teumé peuteuka bingiek até lé bansa lôn keudroe, ngon jalan nyan meuteumé ulôn peuseulamat bacut nibak ladum lamkawan awaknyan. 15 Sabab awaknyan geutulak lé Allah, ngon lagée nyan hubongan donya ngon Allah jeuet keu gét lom teuma; peuteuk lom meunyoe awaknyan geuteurimong lé Allah! Ka teuntée nyan saban cit lagée ureuëng maté ka udeb lom teuma! 16 Meunyoe saboh ruti nyang phon ka teubri ubak Allah, nyan saban cit banmandum ruti nyan ka teubri keu Po teu Allah. Dan meunyoe ukeue kayée atra Allah, nyan saban cabeueng-cabeueng kayée nyan atra Allah cit teuma. 17 Ladum nibak cabeueng-cabeueng bak zaiton -- na kheueh ureuëng-ureuëng Yahudi -- ka teureupang. Dan bak inciek teureupang nyan teucangkok bak zaiton nyang kleuet, na kheueh Syedara-syedara nyang kon Yahudi. Syedara teucangkok nibak nyan mangat Syedara neurasa mandum nyang gét nibak udeb rohani ureuëng-ureuëng Yahudi. 18 Ngon sabab nyan bék kheueh gata anggab enteng keu awaknyan nyang ka teureupang lagée cabeueng nyan. Gata harôh taingat bahwa gata na kheueh cabeueng mantong. Dan kon cabeueng nyang teubri makheun keu ukeue, teuma ukeue nyang teubri makheun keu cabeueng. 19 Teuma Gata tapeugah, "Nyoe, teuma cabeueng-cabeueng nyan harôh teukoh mangat jeuet lôn cangkok nibak bak kayée nyan!" 20 Nyan keubiet beutôi. Teuma awaknyan teutiek sabab awaknyan hana meuiman, digata geuteurimong sabab Gata tameuiman. Ngon lagée nyan bék kheueh Gata jeuet keusombong ngon na lagée nyan; nyang sibeuna jih Gata harôh na rasa teumakot. 21 Sabab meunyoe Allah hana meurasa gaséh keu geutiek ureuëng Yahudi nyang lagée cabeueng-cabeueng aseuli nyan, bék tasangka Gobnyan teuma meurasa gaséh keu geutiek Gata! 22 Ngon lagée nyan disinoe deuh takalon padub na jroh jih Allah dan padub na kreueh jih Gobnyan. Gobnyan geupeubuet nyang kreueh ateueh awaknyan nyang meudesya, teuma Gobnyan gét até ateueh Gata -- asai Gata teutab udeb nibak jroh Gobnyan. Meunyoe hana, Gata teuma geuböih. 23 Dan keuhai ureuëng-ureuëng Yahudi nyan, meunyoe awaknyan jipiôh jimeusikeub hana meuiman; awaknyan geuteurimong lom teuma; sabab Allah na kuasa keu geuteurimong awaknyan jigisa. 24 Gata kon asai jih nibak bansa Yahudi na kheueh saban lagée cabeueng nibak bak zaiton nyang kleuet. Ngon lagée nyan, meunyoe Gata, meulawan ngon sifeuet Gata, jeuet teucangkok ateueh bak kayée zaiton nyang aseuli, peuteuk lom ngon ureuëng-ureuëng Yahudi nyang teubôh miseue ngon cabeueng-cabeueng bak kayée zaiton aseuli nyan. Ka teuntée leubeh mudah lom nibak Po teu Allah keu geupeuriwang awaknyan ateueh bak kayée zaiton awaknyan keudroe. 25 Syedara-syedara! Ulôn harab bék na nibak gata ka gata teupeue banmandum. Sabab na saboh hai nyang geulakée lé Allah, teuma gohlom jiteupeu lé manusia. Dan ulôn meuheuét hainyoe beugata teupeue; hai nyan na kheueh lagée nyoe: Ladum lam kawöm ureuëng Yahudi jimeukreueh ulée, teuma sikeub jih nyang lagée nyan sampoe jeumeulah ureuëng-ureuëng nyang kon Yahudi nyang teuka ubak Allah ka leungkab. 26 Meunan kheueh mandum ureuëng Yahudi teuma seulamat. Sabab lam Alkitab na teutuléh lagée nyoe, "Raja nyang ba seulamat teuka nibak Sion; Gobnyan teuma geusampôh banmandum buet nyang jeuhet nibak keuturonan Nabi Yakub. 27 Ulôn Lôn ikat peujanjian nyoe ngon awaknyan bak watée Ulôn peuamphon bubena desya-desya awaknyan." 28 Sabab ureuëng Yahudi hana jitem teurimong Haba Gét nyang teuka nibak Po teu Allah, ngon lagée nyan awaknyan ka jeuet keumusoh Allah; dan nyan ka jeuet keuturonan nibak Syedara nyang kon Yahudi. Teuma sabab piléhan Allah, ureuëng-ureuëng Yahudi nyan teutab geugaséh lé Allah deumi indatu awaknyan. 29 Sabab meunyoe Allah geupiléh gob dan geubri beureukat keu ureuëng nyan, Allah hántom na geutarek lom peue nyang ka geupeubuet nyan. 30 Yoh watée ilée gata hana taát ubak Allah. Teuma bak watée nyoe Allah ka geupeugah bahwa gata beubaih nibak mandum buet nyang salah, sabab ureuëng-ureuëng Yahudi hana taát. 31 Meunan cit teuma ngon ureuëng-ureuëng Yahudi nyan. Jinoenyoe awaknyan hana taát ubak Allah, mangat gata geupeugah beubaih nibak buet salah. Teuma singoh awaknyan pih teuma geupeugah beubaih nibak buet nyang salah. 32 Sabab Allah ka geupeubiyeu banmandum umat manusia kajikuasa lé hana taát, mangat Gobnyan jeuet geupeuleumah gaséh sayang Gobnyan ubak awaknyan banmandum. 33 Keubiet hebat that keukayaan Allah! Keubiet rayeuk that keubijaksanaan dan iéleumé Gobnyan! Soe kheueh nyang hase jiseulidek peue-peue nyang ka geucok keuputosan? Soe kheueh nyang hase jimuphom cara-cara Gobnyan mubuet? 34 Lam Alkitab na teutuléh lagée nyoe, "Soe kheueh nyang teupeue pikeran Tuhan? Soe kheueh nyang hase jibri naseuhat ubak Gobnyan? 35 Soe kheueh nyang ka lheueh jibri sapeue-sapeue ubak Tuhan sampoe jeuet jituntot bila jih?" 36 Allah nyang cebta peue-peue mantong nyang na. Banmandum nyan asai jih nibak Allah dan na kheueh keu Po teu Allah. Teupujoe kheueh Allah siumu masa. Amin.

Roma 12

1 Syedara-syedara! Allah biet that-that jroh ateueh geutanyoe. Nyang kheueh sabab jih ulôn meulakée ngon meuharab that mangat gata tapeuseumah droe gata sibagoe keureubeuen udeb nyang khusos keu Allah dan nyang that-that teupeugalak até Gobnyan. Iébadat gata ubak Allah nyang sibeuna jih nyang kheueh lagée nyan. 2 Bék gata seutôt atoran-atoran donya nyoe. Peubiyeu mantong Allah geupeujeuet pribadi gata jeuet keu barô, mangat gata meu-ubah. Ngon na lagée nyan gata hase tateupeue keuheundak Allah -- na kheueh peue nyang jroh nyang jeuet keu galak até Gobnyan dan nyang sampoereuna. 3 Po teu Allah ka geubri anugeurah ubak ulôn. Nyang kheueh sabab jih ulôn bri naseuhat keu Gata mandum: Bék kheueh meurasa droe leubeh manyang nibak nyang sibeuna jih. Bah kheueh gata ngieng keuadaan droe gata ngon até nyang miyueb; maséng-maséng jinilai droe jih meunurot keumampuan nyang geubri lé Allah ubak gobnyan ngon sabab gobnyan meuiman ubak Isa. 4 Tuboh geutanyoe na anggota nyang jai sileupah. Tieb-tieb anggota na tugaih jih maséng-maséng keudroe. 5 Meunan cit ngon geutanyoe. Bah pi tanyoe mandum nyoe jai that, teuma tanyoe teutab saboh tuboh sabab tanyoe meusaboh ngon Almaseh. Dan tanyoe maséng-maséng na hubongan sidroe ngon nyang laén sibagoe anggota nyang saboh tuboh. 6 Geutanyoe maséng-maséng na karonya-karonya peulayanan nyang meulaén-laén. Banmandum karonya geubri lé Allah keu geutanyoe meunurot rakhmat Gobnyan. Ngon sabab nyan tanyoe harôh tapeuguna karonya-karonya nyan. Ureuëng nyang na karonya keu jipeusampoe haba nibak Po teu Allah, ureuëng nyan harôh jipeusampoe haba nibak Allah nyan meunurot keumampuan nyang na nibak jih nyan. 7 Ureuëng nyang na karonya keu jitulông ureuëng laén, harôh biet-biet jitulông ureuëng laén. Ureuëng nyang na karonya keu jeuet keu gurée, harôh biet-biet jipeubeuet ureuëng laén. 8 Ureuëng nyang na karonya keu jipeu ék seumangat ureuëng laén, harôh biet-biet jibri seumangat keu ureuëng laén. Ureuëng nyang na karonya keu jibri keu ureuëng laén peue nyang na bak jihnyan, bah jipeubuet nyan ngon murah até seucara wajar. Ureuëng nyang na karonya keu jeuet keupeumimpén, harôh biet-biet jeuet keupeumimpén. Ureuëng nyang na karonya keu jibri gaséh sayang keu ureuëng laén, harôh jipeubuet nyan ngon mangat até. 9 Gaséh kheueh ngon até nyang ikhlaih. Banci kheueh ubak nyang jeuhet, dan mumat kheueh ubak peue nyang gét. 10 Bah kheueh Syedara banmandum saléng lam gaséh sayang sidroe ngon nyang laén ngon biet-biet meusra lagée ureuëng-ureuëng nyang meusyedara lam saboh keuluwarga, dan bah kheueh gata saléng awai tabri horeumat. 11 Mubuet kheueh ngon biet-biet jumôt. Bék beu oe. Mubuet kheueh keu Tuhan ngon seumangat nibak Roh Allah. 12 Bah kheueh Syedara meuharab ubak Tuhan ngon até nyang geumbira, saba kheueh watée meuteumé sosah, dan khusyuék kheueh watée meudoá. 13 Tulông kheueh tabri beuseb keu ureuëng Kristen nyang laén dan sambot kheueh syedara-syedara nyang seuiman nyang hana Gata turi, ngon galak até lam rumoh gata. 14 Lakée kheueh ubak Po teu Allah mangat Gobnyan geubri beureukat keu ureuëng-ureuëng nyang keujam ateueh gata. Keubiet syedara, lakée kheueh ubak Allah mangat geubri beureukat keu awaknyan, bék gata seurapa. 15 Meugeumbira kheueh ngon ureuëng-ureuëng nyang geumbira, dan gata mo ba-e kheueh ngon ureuëng nyang mo ba-e. 16 Udeb kheueh lam rukon sidroe ngon nyang laén. Bék kheueh na sikeub manyang até, teuma peusanteut kheueh droe gata ngon ureuëng nyang miyueb keududuekan jih. Bék anggab droe leubeh carông nibak nyang sibeuna jih. 17 Meunyoe na ureuëng jipeubuet jeuhet ateueh gata, bék kheueh gata balaih ngon nyang jeuhet. Peubuet kheueh peue nyang jianggab gét lé mandum ureuëng. 18 Nibak blaih gata, meu-useuha kheueh pakriban cara keu udeb damé ngon mandum ureuëng. 19 Syedara-syedara lôn! Bék kheueh sagai-sagai gata balaih dam, bah kheueh Po teu Allah nyang huköm. Sabab lam Alkitab na teutuléh lagée nyoe, "Ulôn kheueh nyang balaih. Ulôn nyang huköm jihnyan, feureuman Tuhan." 20 Sikeubiet jih, meunyoe musoh gata deuek, gata bri kheueh makheun; dan meunyoe jih nyan grah, gata bri kheueh ié. Sabab ngon gata peubuet lagée nyan, Gata ka tapeujeuet jihnyan malée. 21 Bék kheueh gata peubiyeu droe gata jipeutaloe lé nyang jeuhet, teuma bah kheueh Gata peutaloe nyang jeuhet ngon nyang get.

Roma 13

1 Tieb-tieb ureuëng museuti taát bak peumeurintah, sabab hana peumeurintah nyang hana meuteumé keukuasaan nibak Allah. Dan peumeurintah nyang na bak saát nyoe, jipeujak keukuasaan jih ateueh peurintah nibak Allah. 2 Nyang kheueh sabab jih ureuëng nyang lawan peumeurintah saban cit jilawan peue nyang ka geupeunteuntée lé Allah. Dan ureuëng nyang peubuet lagée nyan teuma jiteurimong huköman. 3 Sabab, ureuëng nyang jipeubuet nyang jroh hana peue jitakot keu peumeurintah. Teuma ureuëng nyang peubuet jeuhet nyang teumakot. Meunyoe Gata meukeusut bék teumakot keu peumeurintah, Gata harôh tapeubuet nyang jroh, ngon lagée nyan Gata teuma teupujoe. 4 Sabab peumeurintah na kheueh hamba Allah nyang mubuet keu jroh gata. Teuma meunyoe Gata tapeubuet jeuhet, keubiet that Gata harôh takot keu peumeurintah, sabab bukon mantong sia-sia jimeukuasa keu jihuköm manusia. Peumeurintah nyan na kheueh hamba Allah, nyang peurhot huköman Allah ateueh ureuëng-ureuëng nyang jipeubuet jeuhet. 5 Nyang kheueh sabab jih Gata harôh taát keu peumeurintah -- bukon mantong sabab Gata hana tatem teuhuköm, teuma sabab su até nurani gata. 6 Nyang kheueh teuma alasan jih pakon Gata tabayeue impak, sabab peumeurintah na kheueh peugawée Allah nyang peujak tugaih khusos nyoe. 7 Ngon lagée nyan, bayeue kheueh bak peumeurintah peue nyang wajéb Gata bayeue. Bayeue kheueh impak, meunyoe atra nyan harôh Gata bayeue, dan bayeue kheueh cukée, meunyoe gata harôh tabayeue cukée. Hareuga kheueh awaknyan nyang harôh tahareuga dan horeumat kheueh awaknyan nyang harôh tahoreumat. 8 Bék kheueh meu-utang peue mantong bak soe mantong, seulaén meu-utang gaséh ubak sidroe ngon nyang laén. Sabab ureuëng nyang jigaséh sabe manusia, ka jipeupeunoh mandum huköm Nabi Musa. 9 Sabab huköm agama Yahudi, na kheueh: Bék meumukah, bék seumupoh maté, bék ceumeucue, bék galak keu atra gob; banmandum nyan meusajan-sajan ngon huköm-huköm nyang laén, ka teupeusaho jeuet keu saboh huköm mantong, atranyan na kheueh, "Gaséh kheueh sabe keudroe-droe gata manusia lagée gata gaséh droe gata keudroe." 10 Ureuëng nyang jigaséh keu ureuëng laén, hana teuma jipeubuet jeuhet ateueh ureuëng nyan. Ngon lagée nyan ureuëng nyang ka jigaséh sabe keudroe-droe jih na kheueh ka jipeupeunoh banmandum syarat huköm agama. 11 Seulaén nibak mandum nyan gata tateupeue bahwa watée nyoe saát jih nibak gata keu gata beudôh nibak teumpat éh. Sabab, watée jih keu geutanyoe keu geupeu seulamat ka rab that saát nyoe nibak watée geutanyoe phon that tameuiman. 12 Malam ka jula; dan sikeujab teuk ka beungoh. Ngon lagée nyan, bah kheueh tapiôh tapeubuet buet-buet nyang seupôt. Tanyoe harôh tapeuleungkab droe geutanyoe ngon sinjata-sinjata trang. 13 Tanyoe harôh tapeubuet hai-hai nyang teuhoreumat lagée nyang jipeubuet lé gob bak watée uroe; bék na pesta pora nyang keulewat bataih, atawa mabök-mabök. Bék peubuet buet nyang cabui, atawa meupi-e hana sopan. Bék meulo, atawa bék picék até. 14 Bah kheueh Tuhan Isa Almaseh nyang peuteuntée peue nyang harôh gata peubuet. Dan bék kheueh gata seutôt tabiát manusia nyang meudesya keu teupeupuih hawa nafeusu.

Roma 14

1 Ureuëng nyang hana yakén keupeue nyang jipeucaya nyan harôh jiteurimong ngon gét diteungoh-teungoh Gata. Bék gata meudakwa ngon ureuëng nyan keuhai peundirian-peundirian jih nyan. 2 Na ureuëng nyang meupeundirian bahwa jihnyan jeuet jipajoh peue mantong. Teuma na ureuëng laén nyang leumoh keuyakénan jih; nyang jirasa nibak ureuëng nyan bahwa nyang jeuet jipajoh teuma gulée-gulée mantong. 3 Ureuëng nyang makheun peue mantong bék kheueh jianggab hina ateueh ureuëng nyang makheun peunajoh nyang ka teuntée mantong; dan ureuëng nyang makheun peunajoh nyang ka teupeuteuntée mantong, bék kheueh jipeusalah ureuëng nyang makheun peue-peue mantong, sabab Allah ka geuteurimong jih nyan. 4 Soe kheueh Gatanyan sampoe Gata peusidang namiet ureuëng laén? Aléh namiet nyan reubah atawa hana, nyan na kheueh urosan po jih. Dan keubiet namiet nyan teuma teudong cot, sabab Tuhan hase geupeujeuet namiet nyan teudong cot. 5 Na ureuëng nyang meurasa siuroe nyang ka jipeuteuntée leubeh peunteng nibak uroe-uroe laén, teuma lé ureuëng laén jianggab bahwa uroe-uroe nyan saban hana meubeda. Peubiyeu mantong maséng-maséng ureuëng jipeuteuntée peundirian jih keudroe. 6 Ureuëng nyang peupeunteng uroe-uroe nyang ka jipeuteuntée, ureuëng nyan jipeubuet meunan keu jihoreumat Tuhan. Ureuëng nyang pajoh peue-peue mantong, jipeubuet meunan keu jihoreumat Tuhan, sabab jih nyan meusyukoe ubak Allah ateueh peunajoh nyan. Meunan cit teuma keu ureuëng nyang jimakheun peunajoh nyang ka jipeuteuntée mantong; ureuëng nyan pih jihoreumat Tuhan dan jilakée syukoe ubak Po teu Allah. 7 Hana meusidroe pih nibak geutanyoe nyang udeb keudroe tanyoe keudroe; dan meusidroe pih nibak geutanyoe nyang maté keugeutanyoe keudroe. 8 Meunyoe tanyoe udeb, tanyoe udeb keu Tuhan. Dan meunyoe tanyoe maté, tanyoe pih maté keu Tuhan. Ngon lagée nyan, udeb atawa maté tanyoe na kheueh milék Tuhan. 9 Almaseh ka maté dan udeb lom teuma. Nyang kheueh sabab jih Gobnyan jeuet keu Tuhan keu ureuëng-ureuëng nyang udeb meunan cit keu ureuëng-ureuëng nyang ka maté. 10 Ngon lagée nyan, Syedara-syedara! Keupeue guna jih gata peusalah syedara gata nyang saboh iman? Dan keupeue guna jih gata anggab jih nyan hina? Tanyoe banmandum teuma tameuhadab Allah keu geuadili. 11 Lam Alkitab na teutuléh lagée nyoe, "Nyang sibeuna jih," feureuman Tuhan, "tieb-tieb ureuëng teuma jiseumah sujut dikeue Ulôn; dan tieb-tieb ureuëng teuma jipeubeuna bahwa Ulôn nyoe kheueh Allah." 12 Ngon lagée nyan tanyoe maséng-maséng harôh tapeutanggong jaweueb peue mantong nyang tapeubuet ubak Po teu Allah. 13 Ngon sabab nyan bék kheueh geutanyoe saléng tapeusalah. Dan useuha kheueh mangat gata bék tapeubuet peue-peue mantong nyang jeuet keusabab sidroe syedara gata saboh iman teugoda dan meudesya. 14 Sabab ulôn meusaboh ngon Tuhan Isa, ulôn keubiet kupatéh that bahwa hana meusapeue pih nyang bak dasai jih najih; teuma hai nyan najih nibak sidroe-droe ureuëng, meunyoe ureuëng nyang jianggab nyan najih. 15 Teuma meunyoe ngon peue nyang Gata makheun, sidroe syedara gata saboh iman jipeusakét até jih, ngon lagée nyan Gata hana lé gata peubuet nyang dasai jih nibak gaséh. Meunyoe Almaseh ka maté keue sidroe-droe ureuëng, bék kheueh gata peubiyeu ureuëng nyan jipeurusak lé peue nyang Gata makheun. 16 Nyang kheueh sabab jih bék kheueh gata peubiyeu peue nyang gét nibak gata, jianggab hana gét bak ureuëng laén. 17 Sabab meunyoe Allah geupeurintah udeb sidroe-droe ureuëng, peue nyang jeuet jimakheun atawa jijieb, hana peunteng lé. Nyang peunteng na kheueh bahwa ureuëng nyan jiturot keuheundak Allah, jirasa até nyang teunang dan jiteurimong suka cita nyang geubri lé Roh Allah. 18 Ureuëng nyang peutimang Almaseh ngon cara lagée nyan, ureuëng nyan ka jipeumangat até Allah, dan jihareuga lé ureuëng-ureuëng laén. 19 Sabab nyan tujuan tanyoe bah kheueh sabe keu hai-hai nyang teucebta keurukonan dan saléng tapeudong. 20 Bék kheueh sampoe, sabab soai peunajoh, Gata peureulôh peue nyang ka geupeubuet lé Allah. Peue mantong peunajoh beutôi haleue keuteupajoh; teuma meunyoe peue nyang Gata pajoh jeuet keusabab ureuëng laén meudesya, ngon lagée nyan Gata ka salah. 21 Leubeh gét bék gata pajoh eungkot sie atawa gata jieb ié anggô atawa gata peubuet peue mantong meunyoe lé buet nyan jeuet keusabab syedara seuiman rhot bak desya. 22 Bah kheueh peue nyang Gata peucaya nyan, Gata peubuet dikeue Allah mantong keu Gata keudroe. Ureuëng nyang hana alasan keumeurasa droe jih meusalah ateueh peue nyang jianggab nyan beutôi, ureuëng nyan mubahgia. 23 Teuma ureuëng nyang meurasa waih-waih keu jimakheun sipeue-peue, óh lheueh nyan atra nyan jipajoh cit, ureuëng nyan geupeusalah lé Allah; sabab ureuëng nyan hana jipeubuet meunurot keuyakénan jih keuhai peue nyang beuna dan peue nyang salah. Dan peue nyang jipeubuet ngon hana keuyakénan na kheueh desya.

Roma 15

1 Tanyoe nyang biet-biet yakén ateueh peue nyang tapeucaya, harôh kheueh beurayeuk saba keuhai hánjitem lé ureuëng nyang leumoh keuyakénan jih. Bék kheueh tanyoe tapeumangat droe teuh mantong. 2 Nyang biet jih tanyoe maséng-maséng harôh tapeumangat até ateueh sabe syedara tanyoe keudroe keu keugét jih, mangat keuyakénan jih meutamah kong. 3 Sabab Almaseh pih hana geupike keumangat droegeuh keudroe. Lam Alkitab na teutuléh lagée nyoe, "Peue mantong hinaan nyang jipeukeue ateueh Gata ka rhot ateueh ulôn." 4 Banmandum nyang na teutuléh lam Alkitab na kheueh keu teupurunoe tanyoe. Sabab peungajaran nyang tateurimong lam Alkitab nyan teupeujeuet tanyoe meutamah tabah dan teuga ngon lagée nyan tanyoe jeuet meuharab ubak Allah. 5 Seumoga Allah, nyang bri keutabahan dan hiboran keumanusia, geutulông gata keu udeb ngon si até, teuseutôt teuladan Isa. 6 Ngon si até Gata banmandum meusajan-sajan jeuet tapujoe Allah, Bapak Tuhan geutanyoe Isa Almaseh. 7 Ngon sabab nyan bah kheueh Gata mandum tateurimong sidroe ngon nyang laén ngon seumangat mangat até, saban lagée Almaseh nyang geuteurimong gata keu teupujoe Allah. 8 Sabab, ingat kheueh, Almaseh ka geulayani ureuëng Yahudi sibagoe geutunyok bahwa Allah seutia bak geupeu peunoh peue-peue nyang ka geupeue janji ubak indatu tanyoe. 9 Lé Isa cit teuma geupeujeuet bansa-bansa laén jipeumulia Po teu Allah sabab gét até geuh ubak awaknyan. Lam Alkitab na teutuléh lagée nyoe, "Sabab nyan ulôn kupajoe Droeneueh lamkawan bansa-bansa, ulôn kumeulagu puja ngon pujoe keunan Droeneueh." 10 Na lom teutuléh lagée nyoe, "Meugeumbira kheueh meusajan umat Allah nyang teupiléh, he bansa-bansa!" 11 Dan nyoe lom, "Pujoe kheueh Allah, he banmandum bansa, bah kheueh banmandum ureuëng jipujoe Gobnyan!" 12 Dan nyoe teuma nyang geupeugah lé Nabi Yesaya, "Nibak keuturonan Isai teuka sidroe ureuëng nyang teuma mat peurintah ateueh bansa-bansa; ubak Gobnyan kheueh bansa-bansa nyan jimeuharab." 13 Allah na kheueh teumpat gata meuharab. Seumoga Gobnyan geugaséh até gata ngon sigala suka cita dan seujahteura sabab gata meuiman ubak Gobnyan, mangat kuasa Roh Allah gata maken meuharab ubak Allah. 14 Syedara-syedara! Ulôn yakén that bahwa jai that nyang gét na nibak gata. Gata pih tateupeue peue-peue mantong dan hase tapeurunoe sidroe ngon nyang laén. 15 Teuma meunyoe keuhai-hai nyang ka teuntée, ulôn peuingat gata ngon teugaih lam surat nyoe, sabab Allah ka geu anugeurah bak ulôn tugaih nyan. 16 Gobnyan ka geupeujeuet ulôn keupeulayan Isa keu geu-utus ubak bansa-bansa nyang kon bansa Yahudi. Dan ulôn kudong sibagoe imeum, nyang peusampoe Haba Gét nibak Allah, mangat ureuëng-ureuëng nyang kon Yahudi jeuet keusaboh nyang teupeuseumah ubak Po teu Allah nyang jeuet geuteurimong lé Gobnyan. Seumoga Roh Allah nyang peujeuet awaknyan meusaboh nyang teupeuseumah khusos keu Allah. 17 Ngon lagée nyan, sabab ulôn ka meusaboh ngon Isa, ulôn jeuet meurasa bangga ateueh buet ulôn keu Allah. 18 Ulôn kujeuet peugah haba nyang meunan bagoe na kheueh keuhai peue nyang ka geupeubuet lé Almaseh ateueh ulôn mangat keuteupeujeuet ureuëng nyang kon Yahudi jitaát ubak Allah. Ulôn peubuet nyan ngon tutoe haba meunan cit ngon buet, 19 nyang meusajan ngon buet-buet nyang ajaéb dan hai-hai nyang luwabiasa; banmandum nyan ngon kuasa lé Roh Allah. Haba Gét keuhai Almaseh ka ulôn peusampoe banmandum ubak ureuëng-ureuëng, phon di Yerusalem trok u Ilirikum. 20 Cita-cita ulôn na kheueh ulôn peusampoe Haba Gét nibak Allah bak teumpat-teumpat nyang gohlom na ureuëng nyang deungoe keuhai Almaseh. Sabab ulôn hana kutem peudong buet nibak keunaleueng nyang jikeubah lé ureuëng laén. 21 Lam Alkitab na teutuléh lagée nyoe, "Ureuëng-ureuëng nyang gohlom na jiteurimong haba keuhai Gobnyan, teuma jikalon; dan awaknyan nyang hántom jideungoe teuma muphom." 22 Nyang kheueh sabab jih ka kayém that ulôn nyoe meuteun keu lôn jak saweue gata. 23 Teuma bak watée nyoe buet ulôn nyang na lam daerah-daerah nyan ka seuleusoe. Ka meuthon-thon treb jih ulôn keuneuk jak saweue gata. 24 Singoh meunyoe ulôn jak rot banda gata watée lôn beurangkat u Seupanyol, ulôn harab hase meurumpok ngon gata dan meugeumbira sikeujab ngon gata. Óh lheueh nyan ulôn harab gata hase tatulông ulôn keu ulôn jak u Seupanyol nyan. 25 Teuma jinoenyoe ulôn keuneuk jak u Yerusalem guna ulôn jak ba bantuan keu umat Allah nyang na disideh. 26 Sabab jeumaáh-jeumaáh nyang na di Makedonia dan Akhaya ka jisituju keujibri sumbangan keu syedara-syedara tanyoe nyang gasien nyang na diteungoh-teungoh umat Allah di Yerusalem. 27 Ngon mangat até awaknyan jicok keuputosan keu jipeubuet nyan. Keubiet nyang sibeuna jih awaknyan patot jitulông syedara-syedara tanyoe nyang gasien nyang na di Yerusalem nyan; sabab nibak ureuëng-ureuëng Yahudi kheueh ureuëng-ureuëng nyang kon Yahudi nyan jiteurimong beureukat nibak Allah. Ngon lagée nyan, ureuëng-ureuëng nyang kon Yahudi nyan patot cit jitulông ureuëng-ureuëng Yahudi ngon beureukat-beureukat hareuta. 28 Meunyoe ulôn ka lôn peuseuleusoe tugaih ulôn nyoe, dan ulôn jôk ubak awaknyan nyang na di Yerusalem sumbangan nyang ka awaknyan peusapat nyan, barô kheueh ulôn jak u nanggroe Seupanyol rot banda gata nyan. 29 Meunyoe ulôn teuka bak gata, ka pasti ulôn teuka ngon beureukat nyang jai that nyang lôn teurimong nibak Almaseh keu gata. 30 Deumi Tuhan geutanyoe Isa Almaseh, dan deumi geunaséh nyang geubri lé Roh Allah, ulôn lakée ngon meuharab that ubak gata, mangat gata meusajan-sajan tameudoá nyang biet-biet meusajan-sajan ngon ulôn ubak Po teu Allah keu ulôn. 31 Meudoá kheueh mangat Allah geupeu beubaih ulôn nibak jaroe-jaroe ureuëng nyang hana meuiman di Yudea, dan mangat tugaih ulôn keu lôn ba sumbangan u Yerusalem jiteurimong ngon mangat até lé umat Allah nyang na disinan. 32 Ngon lagée nyan, meunyoe Allah geutem, ulôn hase lôn jak bak gata ngon até nyang mangat. Dan ulôn teuma meurasa teuhibor lamkawan gata. 33 Mudah-mudahan Allah, nyang bri seujahteura ateueh manusia, na meusajan gata banmandum. Amin.

Roma 16

1 Ulôn keuneuk peuturi syedara tanyoe bak gata, nan jih Febe. Geuhnyan geubantu jeumaáh di Kengkrea. 2 Teurimong kheueh jihnyan sibagoe sidroe umat Tuhan. Keubiet lagée nyan kheueh ureuëng-ureuëng nyang meuiman ubak Allah harôh jiteurimong sidroe ngon nyang laén. Tulông kheueh jihnyan, meunyoe ureuëngnyoe jipeureulée gata bantu, sabab jihnyoe ka jai that jibantu ureuëng laén meunan cit ngon ulôn ka lheueh jibantu. 3 Peutrok kheueh saleuem ulôn keu Priskila dan Akwila, sahabat-sahabat lôn nyang meusajan-sajan kamoe mubuet keu Isa. 4 Awaknyan karab maté sabab jipeuseulamat ulôn. Ulôn lakée teurimong gaséh bak awaknyan -- dan kon ulôn mantong, teuma mandum jeumaáh bansa laén nyang kon ureuëng Yahudi meuteurimong gaséh cit keuawaknyan. 5 Meunan cit peutrok kheueh saleuem ulôn keujeumaáh nyang meugumpôi di rumoh awaknyan. Saleuem keu Epenetus nyang ulôn gaséh. Gobnyan kheueh ureuëng nyang phon-phon that meuiman keu Almaseh di daerah Asia. 6 Meunan cit saleuem ulôn keu Maryam. Gobnyan ka jimubuet biet-biet that sunggoh keu gata. 7 Meunan cit peutrok kheueh saleuem ulôn keu Andronikus dan Yunias. Awaknyan saboh sukée bansa ngon ulôn dan ka lheueh jitamong lam glab meusajan-sajan ngon lôn. Sigohlom lôn meuiman ubak Almaseh, awaknyan ka leubeh ilée jimeuiman. Awaknyan meugah that nibak rasui-rasui. 8 Saleuem lon keu Ampliatus, nyang ulôn gaséh sabab jihnyan meusajan-sajan ngon ulôn ka meusaboh ngon Tuhan. 9 Peutrok teuma horeumat ulôn keu Urbanus, sahabat tanyoe nyang jimubuet meusajan-sajan ngon tanyoe keu Almaseh. Meunan cit horeumat ulôn keu Stakhis nyang ulôn gaséh. 10 Saleuem keu Apeles. Keuseutiaan jih keu Almaseh kana bukeuti. Meunan cit saleuem ulôn keu keuluwarga Aristobulus, 11 dan keu Herodion. Gobnyan saboh sukée bansa ngon ulôn. Meunan cit saleuem ulôn keusyedara-syedara saboh iman lam keuluwarga Narkisus. 12 Saleuem ulôn keu Trifena dan Trifosa nyang biet-biet brat that jimubuet keu Tuhan, dan keu Persis nyang ulôn gaséh. Gobnyan pi ka jimubuet brat that keu Tuhan. 13 Saleuem keu Rufus dan keu mak jih, nyang nibak ulôn lagée mak lôn keudroe. Rufus na kheueh ureuëng nyang geupiléh lé Tuhan nyang teupujoe. 14 Meunan cit peusampoe kheueh saleuem ulôn keu Asinkritus, Flegon, Hermes, Patrobas, Hermas, dan mandum syedara seuiman nyang meusajan-sajan ngon awaknyan. 15 Saleuem keu Filologus dan Yulia; keu Nereus dan syedara jih nyang inong; keu Olimpas dan keumandum ureuëng peucaya nyang na meusajan-sajan ngon awaknyan. 16 Meumumat-mat jaroe kheueh ngon peunoh meusra sibagoe syedara Kristen. Banmandum jeumaáh Almaseh jipeutrok saleuem awaknyan keu Syedara banmandum. 17 Syedara-syedara! Ulôn lakée ngon meuharab that: Até-até kheueh keue ureuëng nyang jipeucrebre jipeukaru ureuëng-ureuëng nyang meuiman ubak Tuhan. Hainyan hana sisuai ngon peue nyang ka teupeurunoe nibak gata. Peujiôh kheueh ureuëng-ureuëng nyang lagée nyan. 18 Sabab ureuëng-ureuëng nyang peubuet lagée nyan kon jimubuet keu Almaseh Tuhan tanyoe, nyang sibeuna jih keu jipeupuih até awaknyan keudroe. Ngon cara jibujuk dan tutoe haba nyang maméh, awaknyan jipeungét ureuëng-ureuëng nyang hana jiteupeu sapeue. 19 Banmandum ureuëng ka jiteupeue bahwa gatanyoe seutia ubak peungajaran keuhai Haba Gét nyang teuka nibak Allah. Dan ulôn galak that ateueh hainyan keuhai gata. Ulôn meuharab mangat gata bijaksana ateueh hai-hai nyang jroh, dan bangai keuhai-hai nyang jeuhet. 20 Po teu Allah nyang bri seujahteura keumanusia, dan ngon sigra geukeubah Iblih dimiyueb keukuasaan gata dan teupeuhanco jih nyan. Seumoga Gata banmandum geubri beureukat lé Isa Almaseh Tuhan tanyoe! 21 Timotius, rakan ulôn, jipeutrok saleuem gobnyan keugata. Meunan cit ngon Lukius, Yason dan Sosipater, nyang saboh sukée bansa ngon ulôn. 22 Nyang tuléh suratnyoe na kheueh ulôn, Tertius. Ulôn peusampoe saleuem lam syedara keugata. 23 Gayus geukirém saleuem keugata. Ulôn meunumpang dirumoh jihnyan dan jeumaáh kamoe jiseumayang nibak teumpat nyan. Erastus, ulée nyang mat péng banda nyan, jikirém saleuem gobnyan keugata. Meunan cit ngon syedara tanyoe Kwartus. 24 Seumoga Tuhan geutanyoe Isa Almaseh geubri beureukat ubak Gata. Amin. 25 Teupujoe kheueh Allah! Gobnyan na kuasa geupeukong iman Gata sisuai ngon Haba Gét nibak Po teu Allah nyang ulôn peusampoe keuhai Isa Almaseh. Ulôn peusampoe habanyan sisuai ngon peue nyang geupeugah lé Allah; na kheueh keuhai reuncana Allah nyang ka meuabat-abat treb jih hana jiteupeue lé manusia. 26 Teuma bak saátnyoe, ateueh peurintah Po teu Allah nyang abadi, reuncana nyan ka geupeugah dan teupeusampoe keumandum bansa rot tulésan dumna nabi-nabi, mangat awaknyan banmandum meuiman dan taát ubak Po teu Allah. 27 Gobnyan kheueh Allah nyang tunggai, Gobnyan biet-biet bijaksana. Seumoga Gobnyan teuseuôn manyang siumu masa rot Isa Almaseh! Amin. Horeumat kamoe, Paulus, hamba Isa Almaseh

1 Korintus 1

1 Syedara-syedara jeumaáh Allah nyang na di Korintus! Gata ka geutawök lé Allah keu jeuet keu umat Gobnyan sabab Gata atra Isa Almaseh, meusajan-sajan ngon mandum ureuëng dipat mantong nyang jiseumah Tuhan geutanyoe Isa Almaseh, na kheueh Tuhan awaknyan dan Tuhan geutanyoe cit teuma. Ulôn, Paulus, dan syedara tanyoe Sostenes, geumeuharab seumoga Allah Bapak geutanyoe dan Tuhan Isa Almaseh geubri beureukat dan keuseujahteuraan ubak gata. Ulôn tuléh suratnyoe sibagoe rasui Isa Almaseh, nyang geuangkat lé Allah keudroe dan ateueh keuheundak Gobnyan cit teuma. 4 Ulôn sabe lôn lakée teurimong gaséh ubak Allah keuhai gata, sabab gata katateurimong rakhmat nibak Allah meulalu Isa Almaseh. 5 Sabab gata ka jeuet keumilék Almaseh, ngon lagéenyan udeb gata kaya lam sigala hai. Peungeutahuan gata lam hai peue mantong lhok lumpahna, dan gata carông tapeurunoe peungeutahuan nyan. 6 Ngon lagéenyan ka teutunyok bak gata bahwa haba keuhai Almaseh ka jitamong that lam até gata, 7 sampoe gata hana kureueng meusapeue beureukat pi, teungoh gata tapreh Tuhan tanyoe Isa Almaseh geuteuka dan jikalon lé mandum ureuëng. 8 Almaseh keudroe teuma geujamin gata sampoe án pagée; watée gobnyan geuteuka lom, gobnyan meurumpok ngon gata ngon hana meucupa. 9 Po teu Allah jeuet teupeucaya sipeunoh até. Gobnyan kheueh Allah nyang ka geuhôi gata keu jeuet meusaboh ngon Aneuëk Gobnyan, na kheueh Isa Almaseh, Tuhan tanyoe. 10 Syedara-syedara! Ateueh nan Tuhan geutanyoe Isa Almaseh, ulôn lakée mangat gata banmandum sapeue kheun; mangat békna nyang crebre lamkawan gata. Bah kheueh gata meusaboh, siaté dan sapeue pike. 11 Sabab, ureuëng-ureuëng nibak keuluwarga Kloë jijak lapor ubak ulôn bahwa gata sabe keudroe-droe na meudakwa. 12 Nyang ulôn meukeusut na kheueh bahwa lamkawan awaknyan na nyang peugah lagée nyoe, "Ulôn seutôt Paulus," nyang laén na teuma nyang peugah, "Ulôn kuseutôt Apolos," nyang laén jipeugah teuma, "Ulôn seutôt Petrus," teuma nyang laén lom jipeugah, "Ulôn kuseutôt Almaseh." 13 Hana mungken Almaseh teubagi-bagi! Paulus hana maté bak kayée saleb keugata! Gata pi hana teupumanö keu jeuet keumurit-murit Paulus, nyoe peukon? 14 Syukoe kheueh ulôn hana kupumanö meusidroe pih nyang na lamkawan gata, seulaén Krispus dan Gayus. 15 Bék sampoe meusidroe pih jipeugah bahwa ulôn ka lôn pumanö jih nyan mangat jeuet keumurit ulôn. ( 16 Oh nyoe, Stefanus dan keuluwarga jih, keubiet ulôn nyang pumanö awaknyan. Teuma seulaén nibak nyan, meunurot nyang lôn ingat, hana le nyang ulôn pumanö.) 17 Almaseh geu-utus ulôn bukon keu lôn pumanö manusia, teuma keu ulôn peusampoe Haba Gét nyang teuka nibak Po teu Allah; dan nyan pih harôh ulôn peubuet ngon hana lôn peuguna keuhai carông ulôn meututoe seucara manusia, mangat kuasa nibak maté Almaseh bak kayée saleb nyan hana jeuet keusia-sia. 18 Sabab nibak ureuëng nyang jituju ubak keubinasaan, haba keuhai maté Almaseh bak kayée saleb nyan na kheueh haba sulet. Teuma, keugeutanyoe nyang geupeu seulamat lé Po teu Allah, haba nyan na kheueh cara jih Allah geutunyok kuasa Gobnyan. 19 Sabab lam Alkitab Allah meufeureuman, "Keubijaksanaan ureuëng árif Ulôn peukaru, dan peungeurtian ureuëng-ureuëng meuiéleumé Lôn peubinasa." 20 Ngon lagée nyan, keupeuguna jih ureuëng-ureuëng nyang árif lagée nyan? Keupeuguna jih awaknyan nyang na iéleumé? Keupeuguna jih ahli-ahli seumike lam donya? Allah ka geutunyok bahwa keubijaksanaan donya nyoe na kheueh hana meuguna! 21 Sabab, pakriban mantong carông jih manusia, ureuëng nyan hana hase jituri Allah rot carông jihnyan keudroe. Teuma sabab Allah nyang bijaksana, ngon lagée nyan Gobnyan geutem peuseulamat ureuëng-ureuëng nyang meuiman ubak Gobnyan rot haba nyang kamoe peusampoe jianggab haba buhak lé donya. 22 Ureuëng Yahudi jilakée buet ajaéb sibagoe bukeuti, dan di ureuëng Yunani jipeunteng keuhai keubijaksanaan donya nyoe. 23 Teuma tanyoenyoe nyang tapeusampoe Almaseh nyang maté bak kayée saleb. Haba nyan teusinggong peurasaan ureuëng-ureuëng Yahudi, dan jianggab haba buhak lé ureuëng-ureuëng nyang bukon Yahudi. Dan ureuëng nyang bukon Yahudi jianggab nyan na kheueh bangai lagoena. 24 Teuma pakriban keu ureuëng-ureuëng nyang ka geuhôi lé Po teu Allah -- bah kheueh ureuëng Yahudi meunan cit nyang kon Yahudi -- habanyan, cara jih Po teu Allah geutunyok kuasa dan keubijaksanaan Gobnyan. 25 Sabab nyang leumoh bangai nibak Allah, na kheueh leubeh bijaksana nibak keubijaksanaan manusia; dan nyang deuh jih leumoh nibak Allah, na kheueh leubeh teuga nibak teunaga manusia. 26 Syedara-syedara! Cuba gata ingat pakriban keuadaan gata watée Allah geutawök gata. Bacut sagai nyang na lamkawan gata nyang bijaksana, atawa nyang meukuasa, atawa keududukan manyang meunurot bakmata manusia. 27 Sabab keubiet Allah geusaja geupiléh nyang jianggab bangai lé donya, mangat bubena ureuëng carông jeuet keumalée. Dan Allah geupiléh teuma nyang jianggab hana meudaya lé donya, mangat ureuëng-ureuëng nyang gagah peukasa jeuet keumalée. 28 Po teu Allah geupiléh nyang jianggab miyueb, hina, dan nyang jianggab hana meuguna lé donya nyoe, mangat Allah geupeu hanco nyang jianggab peunteng lé donya. 29 Ngon lagée nyan hana meusidroe pih nyang jeuet jipeusombong droe dikeue Po teu Allah. 30 Allah keudroe kheueh nyang peujeuet sampoe Gata meusaboh ngon Isa Almaseh. Meulalu Almaseh, tanyoe geupeujeuet bijaksana. Dan meulalu Gobnyan cit teuma Po teu Allah geupeujeuet tanyoe tameuget lom deungon droe Gobnyan, geupeujeuet tanyoe umat Gobnyan nyang khusos dan geupeubeubaih geutanyoe. 31 Teuma, lagée nyang na teutuléh lam Alkitab, "Ureuëng nyang jitem peubangga-bangga droe, harôh jipeubangga droe ateueh peue nyang geupeubuet lé Tuhan."

1 Korintus 2

1 Syedara-syedara! Bak watée ulôn jak ubak gata dan ulôn britée bak gata keuhai reuncana Allah nyang gohlom jiteupeue lé donya, ulôn hana lônpeuguna keubijaksanaan donya nyoe atawa lôn meututoe ngon haba nyang buhak. 2 Sabab ulôn ka lôncok teukat bahwa simantong ulôn na meusajan gata, ulôn hana lôn peugah sapeue, seulaén keuhai Isa Almaseh; khusos jih keuhai Gobnyan ka maté bak kayée saleb. 3 Watée ulôn mantong na meusajan ngon gata, ulôn hana leumoh dan yo ngon teumakot. 4 Haba nyang ulôn peutrok bak gata hana ulôn peutrok ngon tutoe nyang meunarek meunurot keubijaksanaan manusia. Ulôn peutrok nyan ngon cara teubri bukeuti bahwa Roh Allah meukuasa. 5 Ulôn peubuet lagée nyan, mangat keupeucayaan gata ubak Almaseh hana meudasai bak keubijaksanaan manusia, teuma meudasai bak kuasa Po teu Allah. 6 Bah kheueh meunan, lamkawan ureuëng-ureuëng nyang udeb rohani jih ka biet-biet kong, keubiet ulôn meututoe keuhai keubijaksanaan. Teuma keubijaksanaan nyoe bukon keubijaksanaan donya, atawa keubijaksanaan ureuëng-ureuëng nyang mat kuasa jamén nyoe, nyang keukuasaan jih teuma habéh. 7 Keubijaksanaan nyang ulôn peugah nyan na kheueh keubijaksanaan nibak Po teu Allah. Keubijaksanaan nyan hana jiteupeu lé donya, teuma Allah ka geukeubah keu keubahgiaan tanyoe sigohlom donya nyoe geupeujeuet. 8 Hana meusidroe pih nibak ureuëng-ureuëng mat kuasa jamén nyoe nyang jiteupeu keuhai keubijaksanaan nyan. Sabab, seukira jih awaknyan ka jiteupeue, ka teuntée awaknyan hana jisaleb Tuhan nyang mulia nyan. 9 Sibeuna jih hainyan na kheueh lagée nyang teutuléh lam Alkitab, "Peue nyang hántom jingieng atawa jideungoe lé manusia, dan hántom teuma jiteubiet lam pikeran manusia, nyan kheueh nyang geukeubah lé Allah keu ureuëng-ureuëng nyang gaséh keu Gobnyan." 10 Teuma Allah ka geupeugah nyan bak geutanyoe ngon peurantaraan Roh Gobnyan. Roh Allah nyan jiseulidek peue-peue mantong, sampoe ubak reuncana-reuncana Allah nyang paleng teusöm. 11 Sabab nyang leubeh teupeu asoe até sidroe-droe ureuëng na kheueh roh ureuëng nyan keudroe, nyoe peukon? Meunan cit keuhai Allah. Nyang teupeu asoe até Allah na kheueh Roh Allah keudroe! 12 Dan keugeutanyoe hana geubri roh donya nyoe, teuma na kheueh Roh nyang teuka nibak Allah, mangat tanyoe tateupeue mandum nyang ka geuanugeurah lé Po teu Allah keugeutanyoe. 13 Sabab nyan, meunyoe kamoe peugah keuhai-hai Allah ubak ureuëng-ureuëng nyang ka na Roh Allah, kamoe hana kamoe peugah meunurot keubijaksanaan manusia, teuma na kheueh meunurot nyang geupurunoe lé Roh Allah nyan keudroe. 14 Ureuëng nyang hana nibak jih Roh Allah, hana hase jiteurimong peue nyang geupeugah lé Roh nyan. Sabab nibak ureuëng nyan hai-hai nyang lagée nyan na kheueh buet nyang bangai. Ureuëng nyan hana hase jimuphom, sabab hainyan hase teunilai ngon cara rohani. 15 Ureuëng nyang na nibak jih Roh Allah hase jinilai peue-peue mantong, teuma hana meusidroe pih nyang na hak jinilai Gobnyan. 16 Lam Alkitab na teutuléh lagée nyoe, "Soe nyang teupeu pikeran Tuhan? Dan soe nyang hase jibri naseuhat ubak Gobnyan?" Tanyoe nyang na pikeran nyang saban ngon Almaseh!

1 Korintus 3

1 Syedara-syedara, sibeuna jih ulôn hana jeuet lôn meututoe ngon gata lagée ureuëng nyang na Roh Allah. Ulôn jeuet lôn meututoe ngon Gata lagée ureuëng nyang mantong udeb meunurot nyang jikeuheundak lé donya; lagée ureuëng nyang mantong manyak lam hai keupeucayaan jih ubak Almaseh. 2 Yoh masa ilée ulôn hase lôn bri keugata peunajoh aneuëk manyak, kon peunajoh ureuëng rayeuk; sabab gata gohlom seb teuga keuhai nyan. Teuma bak watéenyoe pih gata gohlom seb teuga keuhai nyan, 3 sabab gata mantong udeb meunurot tabiát seucara manusia. Sabab meunyoe gata mantong na bingiek até dan tameulo sabe keudroe-droe, peu kheueh lagée nyan bukon sibagoe dali gata mantong udeb meunurot tabiát manusia, lagée ureuëng nyang hana jituri keu Po teu Allah? 4 Meunyoe na nyang peugah, "Kamoe seutôt Paulus," dan nyang laén jipeugah, "Kamoe seutôt Apolos," peu kheueh nyang lagée nyan gata mantong taturot tabiát ureuëng-ureuëng donya? 5 Nyang sibeuna jih soe kheueh Apolos nyan? Dan soe teuma Paulus nyan? Kamoe na kheueh peulayan-peulayan Allah, nyang ka kamoe bimbeng gatanyoe keu tameuiman ubak Almaseh. Kamoe cuma kamoe keureuja buet nyang ka geubri lé Tuhan ubak kamoe maséng-maséng. 6 Ulôn nyang pula dan Apolos nyang siram, teuma Allah keudroe kheueh nyang peujeuet seunaman nyan timoh. 7 Ngon lagée nyan, nyang peunteng na kheueh Po teu Allah, sabab Gobnyan kheueh nyang peutimoh. Nyang pula dan nyang siram hana peunteng; 8 banduanyan na kheueh santeuet. Maséng-maséng teuma jiteurimong upah meunurot buet nyang jipeubuet nyan. 9 Kamoe na kheueh ureuëng-ureuëng nyang saban kamoe mubuet keu Allah; dan gata na kheueh lagée ladang Allah. Gata-gata banmandum na kheueh lagée geudong Allah cit teuma. 10 Ngon carông nyang geubri lé Allah, ulôn sibagoe ahli bangunan ka ulôn puduek keunaleueng nibak bangunan nyan, dan ureuëng laén jipeudong geudong nibak keunaleueng nyan. Tieb-tieb ureuëng harôh jipeurati beugét-gét pakriban jipeudong ateueh keunaleueng nyan. 11 Sabab Allah keudroe ka geukeubah Isa Almaseh sibagoe sidroe ureuëng nyang hana tandengan jih keu keunaleueng geudong nyan; hana keunaleueng nyang laén. 12 Na nyang peudong ateueh keunaleueng nyang jiboh ngon méuh, nyang boh pirak, na nyang peuguna batée peumata, na nyang peuguna kayée, naleueng tho dan jeurami. 13 Buet sidroe-droe ureuëng teuma deuh teukalon singoh watée Almaseh geuteuka lom teuma. Sabab bak watée nyan apui teuma jipeudeuh buet maséng-maséng ureuëng. Apui teuma jiujoe dan jipeuteuntée gét ngon hana buet nyan. 14 Meunyoe geudong nyang jipeudong lé gob ateueh keunaleueng nyan hana tutong watée teutot ngon apui, ureuëng nyan teuma jiteurimong hadiah jih. 15 Teuma meunyoe buet gob nyan tutong, jihnyan teuma rugoe; jih keudroe teuma seulamat, teuma lagée ureuëng nyang teuhinda nibak jilui apui. 16 Peu kheueh Gata teupeu bahwa gatanyoe Baét Allah? Dan bahwa Roh Allah tinggai lam gata? 17 Meunyoe na ureuëng nyang jipeurusak Baét Allah, Allah pih teuma geupeu rusak ureuëng nyan. Sabab Baét Allah na kheueh khusos keu Allah mantong, dan gata kheueh baét nyan. 18 Bék na meusidroe ureuëng pih jitipée droe jih keudroe. Meunyoe ureuëng lamkawan gata meurasa droe jih bijaksana meunurot ukoran donya nyoe, ureuëng nyan harôh jeuet keu ureuëng bangai, mangat jihnyan biet-biet jeuet keu ureuëng bijaksana. 19 Sabab, nyang jianggab bijaksana lé donya na kheueh bangai nibak Allah. Lam Alkitab na teutuléh lagée nyoe, "Allah geujeubak ureuëng-ureuëng bijaksana lam ceureudek awaknyan keudroe." 20 Na lom teutuléh lagée nyoe, "Tuhan geuteupeue bahwa pikeran ureuëng-ureuëng nyang bijaksana na kheueh pikeran nyang hana meuguna." 21 Sabab nyan, bék kheueh na meusidroe ureuëng pih jisanjong-sanjong manusia, sabab peue-peue mantong ka geubri jeuet keumilék gata: 22 Paulus, Apolos, Petrus, donya nyoe, udeb ngon maté, jamén nyoe meunan cit jamén nyang teuma teuka, banmandum nyan na kheueh milék gata. 23 Gata na kheueh milék Almaseh, dan Almaseh milék Po teu Allah.

1 Korintus 4

1 Anggab kheueh kamoenyoe peulayan-peulayan Almaseh, nyang meutanggong jaweueb kamoe peusampoe reuncana-reuncana Allah nyang gohlom jiteupeu lé donya. 2 Nyang phon-phon that jituntot lé peulayan nyang lagée nyan na kheueh bahwa jihnyan seutia ubak teungku droe jih. 3 Nibak ulôn, hana jeuet keumasaalah peue nyang gata -- atawa soe mantong -- pi jipike keuhai droe ulôn. Teuma peue nyang sibeuna jih ulôn pike keuhai droe ulôn keudroe nyan pih hana jeuet keusoai. 4 Ulôn hana meurasa meusalah lam hai peue mantong, teuma nyan bukon sibagoe bukeuti bahwa ulôn hana salah. Tuhan keudroe kheueh nyang peuteuntée peu kheueh ulôn salah atawa hana. 5 Ngon sabab nyan, sabab gohlom trok watée jih, bék kheueh gata bagaih-bagaih gata peuteuntée bahwa sidroe-droe ureuëng nyan salah atawa hana. Preh kheueh sampoe Tuhan geupreh. Gobnyan kheueh nyang peuhah peue-peue mantong nyang teusöm lam seupôt. Gobnyan kheueh nyang teuma peuteubiet banmandum nyang na niet teusöm lam até manusia. Bak watéenyan kheueh tieb-tieb ureuëng jiteurimong nibak Po teu Allah puja ngon pujoe nyang patot jiteurimong. 6 Syedara-syedara! Keu keupeuntengan gata, atranyan ka ulôn peungui ateueh Apolos dan ateueh droe lôn keudroe. Meukeusut jih ngon na cuntoh nibak kamoe nyan gata jeuet tameurunoe peumakna jih nyang teupeugah nyoe, "Mumat kheueh bak peuratoran nyang na." Ngon lagéenyan hana meusidroe pih nibak gata nyang jeuet tapeubangga-bangga sidroe-droe ureuëng, laju gata hina nyang laén. 7 Soe kheueh nyang peujeuet Gata leubeh nibak ureuëng laén? Bukon mandumnyan Gata teurimong nibak Allah? Ngon lagée nyan, pakon Gata keuneuk peusombong droe, siulah-ulah peue nyang na nibak Gata nyan kon mandum nyang geubri? 8 Beutôi gata hana tapeureulée sapeue! Gata ka kaya! Gata ka jeuet keuraja! Dan kamoe hana. Paleng gét meunyoe gata biet-biet ka jeuet keu raja, mangat kamoe jeuet kamoe matpeurintah meusajan gata. 9 Sabab meunurot nyang lôn pike, kamoe nyang rasui-rasui nyoe, ka geupeujeuet lé Allah sibagoe nyang jinonton dikeue manusia dan malaikat. Kamoe lagée ureuëng-ureuëng hina nyang jipeurhot huköman maté dikeue rakyatba dan jisurak-surak lé donya nyoe. 10 Sabab Almaseh, kamoe na kheueh ureuëng nyang bangai, dan gata ureuëng Kristen nyang carông! Kamoe leumoh, gata teuga! Kamoe jikheun lé gob, dan gata jisanjong-sanjong! 11 Trok bak watée nyoe kamoe teundeuk dan grah; peukayan kamoe tinggai bak tuboh; ureuëng jiseksa kamoe; kamoe hana teumpat keu kamoe meureuhat; 12 Kamoe banteng tuleueng jakmita beulanja. Meunyoe kamoe jicarot, kamoe balaih ngon beureukat; meunyoe kamoe ji iélanya, kamoe saba; 13 meunyoe ureuëng jipeubrok-brok kamoe, kamoe balaih ngon tutoe haba nyang maméh. Kamoe hana leubeh nibak brôh donya nyoe; trok bak watéenyoe kamoe mantong jianggab lagée brôh ateueh bumoe. 14 Ulôn tuléh nyoe keugata kon meukeusut kamoe pumalée gata, teuma sibagoe naseuhat keugata lagée aneuëk-aneuëk lôn keudroe. 15 Sabab ulôn kheueh nyang jeuet keu bapak gata, bah kheueh mungken sibagoe ureuëng Kristen, gata kana siploh ribée droe gurée. Lam udeb gata sibagoe ureuëng-ureuëng meusaboh ngon Almaseh, ulôn nyang jeuet keu bapak gata, sabab ulôn nyang ba Haba Gét keuhai Almaseh keu gata. 16 Ngon sabab nyan ulôn lakée ngon meuharab that mangat gata seutôt cuntoh nyang na bak ulôn. 17 Keunyan ulôn ka lôn kirém Timotius ukeue gata. Sibagoe murit Almaseh, jihnyan saban lagée aneuëk lôn keudroe nyang ulôn gaséh. Jihnyan aneuëk nyang jeuet teupeucaya. Singoh jihnyan teuma jipeuingat gata keuhai cara udeb nyang ulôn peujak óh ka lheueh lôn meuiman ubak Almaseh, na kheueh cara udeb nyang ulôn purunoe nibak tieb-tieb jeumaáh dipat mantong. 18 Na padubdroe lamkawan gata nyang ka jeuet keu ureuëng sombong, sabab awaknyan jipike ulôn hana lônjak bak gata. 19 Teuma meunyoe Tuhan geubri idhin ulôn teuma teuka cit ubak gata hana treb le. Singoh watée ulôn lôn ngieng cit teuma peue nyang hase jipeubuet lé ureuëng-ureuëng sombong nyan; kon haba jih mantong. 20 Sabab meunyoe Allah geupeurintah udeb sidroe-droe ureuëng, hainyan teubukeuti lé teunaga udeb ureuëng nyan, kon ngon tutoe haba jih. 21 Ngon lagée nyan, piléh mantong peue nyang gata galak! Peu kheueh gatatem ulôn teuka keu lôn purunoe gata ngon kreueh atawa ulôn teuka jak purunoe gata ngon leumoh leumbot dan gaséh sayang?

1 Korintus 5

1 Ulôn ka kuteurimong laporan bahwa lamkawan gata na nyang kajipeubuet buet-buet nyang cabui biet-biet luwabiasa: Na ureuëng lamkawan Gata nyang jimeumukah ngon ma ui jih. Ureuëng-ureuëng nyang hana jituri Tuhan mantong hánjipeubuet nyang lagée nyan! 2 Bah kheueh ka lagée nyan, Gata mantong cit manyang até. Nyang sibeuna jih Gata seudeh, dan Gata peuteubiet lamkawan Gata ureuëng nyang peubuet lagée nyan. 3 Seucara lahé ulôn jiôh nibak gata, teuma seucara baten ulôn na lamkawan gata. Ngon lagée nyan, ulôn keuneuk meutindak siulah-ulah ulôn na lamkawan gata, "Ateueh nan Tuhan Isa Almaseh, ulôn peugah bahwa ureuëng nyangka jipeubuet buet lagée nyan kutoe, ureuëng nyan meuseuti teuhuköm!" Meunyoe gata meusapat anggab mantong ulôn nyoe na lamkawan gata, dan ngon kuasa Tuhan tanyoe Isa, 5 gata meuseuti tajôk ureuëng nyang lagée nyan ubak Iblih mangat tuboh ureuëng nyan binasa dan ngon lagée nyan roh jih teupeuseulamat watée Tuhan teuka lom teuma. 6 Hana patot gata meurasa sombong. Mungken gata ka tadeungoe pribasa lagée nyoe, "Rago nyang bacut jipeujeuet mandum nyang teulawok jeuet meukeumang!" 7 Böih kheueh leubeh ilée rago nyang ka treb nyan, na kheueh rago desya, mangat gata jeuet lagée tupông nyang teulawok nyang barô, gleh nibak rago desya nyang treb, dan ulôn kuteupeu gata keubiet lagée nyan. Sabab, peurayaan Paskah tanyoe ka siab, sabab Almaseh nyang jeuet keububiri Paskah geutanyoe, ka lheueh teukeureubeuen. 8 Ngon lagée nyan, jak kheueh geutanyoe tapeuraya Paskah nyan ngon ruti nyang hana meuragoe, na kheueh ruti nyang teupeulambang ubak keumurnian dan banmandum nyang meukeunong nibak até Allah. Bék geutanyoe tapeuna peurayaan Paskah nyan ngon ruti nyang mantong na rago nyang awai, na kheueh rago desya dan keujeuhetan. 9 Lam surat ulôn nyang ka lheueh, ulôn peugah ubak gata mangat bék meurakan ngon ureuëng nyang peubuet cabui. 10 Nyang ulôn meukeusut kon kheueh ureuëng nyang cabui atawa leuha, atawa tukang teumipée atawa nyang seumah beurala nyang sagai-sagai hana jituri keu Po teu Allah. Kon nyan! Ulôn hana meukeusut keu awaknyan; sabab meunyoe gata harôh tapeujiôh awaknyan, ka teuntée gata tateubiet beuhabéh lam donya nyoe. 11 Nyang lôn meukeusut na kheueh, gata bék meurakan ngon ureuëng nyang meungaku droe jih ureuëng Kristen, teuma ureuëng nyan jipeubuet cabui, atawa leuha, atawa jiseumah beurala, atawa galak jipeubrok-brok ureuëng laén, atawa tukang mabök, atawa tukang ceumeucue. Gata duek sira tamakheun ngon ureuëng lagée nyan pih bék! 12 Beutôi nyang peusidang ureuëng-ureuëng Kristen kon buet ulôn. Allah keudroe kheueh nyang teuma peusidang awaknyan. Teuma keuhai anggota-anggota jeumaáh gata, kon kheueh gata keudroe nyang meuseuti peusidang awaknyan? Lam Alkitab na teutuléh lagée nyoe, "Use kheueh ureuëng jeuhet nyang na lamkawan gata."

1 Korintus 6

1 Pakon na lamkawan gata jijeuet ba ubak hakém nyang hana jituri keu Allah, gata jakgadu syedara gata nyang seuiman, meunyoe jihnyan jimeudakwa ngon syedara jih nyan? Pakon jihnyan hana jilakée umat Allah nyang peuseuleusoe peukara jih nyan? 2 Peu kheueh gata hana tateupeue bahwa umat Allah teuma jipeusidang donya nyoe? Ngon lagée nyan, meunyoe keubiet gata keuneuk peusidang donya nyoe, peu kheueh gata hana hase gata peuseuleusoe peukara-peukara peungadelan nyang hana meumakna? 3 Peu kheueh gata hana tateupeue bahwa tanyoe teuma tapeusidang malaikat-malaikat? Leubeh-leubeh lom peukara-peukara udeb tieb-tieb uroe! 4 Teuma meunyoe teuka peukara-peukara nyang lagée nyan, peu kheueh gata gadu bak ureuëng-ureuëng nyang sagai-sagai hana jabatan lam jeumaáh? 5 Biet-biet malée that! Teuntée lamkawan gata na ureuëng nyang leubeh bijaksana keu jipeuseuleusoe hai-hai nyang na hubongan ngon seuliseh paham ngon syedara-syedara sabe ureuëng Kristen! 6 Nyang na teuka meubalek sidroe ureuëng Kristen jijak bak ureuëng nyang bukon Kristen keu jijak gadu peukara jih keuhai syedara jih nyang Kristen! 7 Bék jak meupeukara bak ureuëng nyang kon Kristen; ngon na seuliseh paham sabe keudroe-droe gata nyan pih ka jeuet keutalo nibak gata. Leubeh gét gata jipeubuet hana ade, atawa jipeurugoe! 8 Teuma rupari gata keudroe nyang peusaneut ateueh ureuëng laén ngon hana ade. Gata keudroe teuma nyang peurugoe ureuëng laén. Dan nyan gata peubuet ateueh syedara-syedara gata seuiman! 9 Peu kheueh gata teupeu bahwa ureuëng-ureuëng nyang hana jipatéh kheun Allah, hana teuma jeuet keu anggota umat Allah? Bék keunong peungeuet! Ureuëng-ureuëng nyang peubuet cabui, ureuëng-ureuëng seumah beurala, nyang meumukah, nyang peubuet-buet nyang that-that malée ateueh ureuëng sabe jeunéh, 10 nyang ceumeucue, nyang leuha, tukang mabök, nyang galak peubrok ureuëng laén, dan ureuëng nyang meulakée ngon paksa atra ureuëng laén -- banmandum ureuëng nyang lagée nyan hana teuma jeuet keuanggota umat Allah. 11 Na meupadub droe lamkawan gata yoh ilée na nyang peubuet lagée nyan. Teuma jinoenyoe gata teupeugah ka gleh nibak desya. Gata ka jeuet keu milék Allah nyang khusos. Gata ka gét lom teuma ngon Allah, sabab gata meuiman ubak Tuhan Isa Almaseh dan kareuna kuasa Roh nibak Allah geutanyoe. 12 Na nyang peugah bahwa soemantong ureuëng jeuet jipeubuet ban galak droe. Teuma nibak ulôn hana banmandum nyan meuguna. Ngon lagée nyan bah kheueh ulôn nyoe jeuet lôn peubuet peue mantong, teuma ulôn teutab hana lôn peubiyeu droe ulôn jikuasa lé peue mantong. 13 Na cit nyang peugah bahwa peunajoh keu asoe pruet, dan pruet teukeubah keu peunajoh. Teuma bandua nyan geusampôh lé Po teu Allah. Tuboh manusia hana jeuet teupeuguna keu teupeuna hubongan nyang cabui, teuma na kheueh keuteupeutimang Tuhan. Dan Tuhan teuma geupeulara tuboh nyan. 14 Allah ka geupeu udeb Tuhan Isa Almaseh nibak maté, meunan cit ngon Allah geupeu udeb tanyoe ngon kuasa Gobnyan. 15 Syedara-syedara tateupeue bahwa tuboh gata nyan na kheueh anggota tuboh Almaseh. Ngon lagée nyan, peu kheueh jeuet lôncok saboh anggota tuboh Almaseh laju lôn peujeuet keuanggota tuboh sidroe inong jeuhet? Sagai-sagai hán jeuet! 16 Atawa mungken gata gohlom tateupeue bahwa ureuëng nyang meumukah ngon sidroe inong jeuhet, ureuëng nyan ka jeuet meusaboh ngon inong jeuhet nyan! Sabab lam Alkitab na teutuléh lagée nyan, "Manduanyan ka jeuet keusaboh." 17 Teuma ureuëng nyang peusaboh droe ngon Tuhan, Roh Tuhan ngon roh ureuëng nyan ka jeuet meusaboh. 18 Peujiôh kheueh buet-buet nyang cabui. Sabab mandum desya laén nyang jipeubuet lé gob, jeuetjih diluwa tuboh ureuëng nyan. Teuma keu ureuëng nyang peubuet cabui, nyan saban cit ka jipeubuet desya ateueh tuboh jih keudroe. 19 Gata harôh tateupeue bahwa tuboh gata na kheueh teumpat tinggai Roh Allah. Rohnyan tinggai lam tuboh gata. Dan Allah keudroe kheueh nyang bri Roh nyan keu gata. Droe Gata nyan kon atra gata. Nyan atra Po teu Allah. 20 Allah ka geubloe gata dan ka geubayeue ngon lunaih. Sabab nyan, peuguna kheueh tuboh gata lagée nyan bagoe sampoe Allah teupeumulia.

1 Korintus 7

1 Jinoenyoe ulôn keuneuk peugah haba keuhai nyang gata peugah lam surat gata. Meunyoe sidroe ureuëng agam hana meukawen, nyan gét. 2 Teuma mangat bék teupeudaya ngon hai-hai nyang hana patot, leubeh gét sidroe ureuëng agam na purumoh jih keudroe dan tieb-tieb inong na lakoe jih keudroe. 3 Ureuëng lakoe harôh jipeupeunoh keuwajéban jih sibagoe lakoe keue purumoh jih, dan di purumoh harôh teuma jipeupeunoh keuwajéban jih sibagoe purumoh keue lakoe; maséng-maséng jipeupeunoh keuwajéban jih ateueh ureuëng laén. 4 Purumoh hana meukuasa ateueh tuboh jih keudroe; nyang meukuasa ateueh tuboh jih na kheueh lakoe. Meunan cit lakoe hana meukuasa ateueh tuboh jih keudroe; nyang meukuasa ateueh tuboh jih na kheueh purumoh. 5 Bék kheueh peujiôh sidroe ngon nyang laén seusabe lakoe binoe. Jeuet mantong meunyoe sikeujab, asai ateueh situju ban dua blaih pihak. Ngon lagée nyan maséng-maséng meuteumé meudoá ngon cara hana teuganggu. Teuma óh lheueh nyan bah kheueh gata saléng tameurab lom sibagoe ureuëng meulakoe binoe. Meunyoe hana lagée nyan, singoh gata teuma jisáh lé roh jeuhet, sabab gata hana teuga tapeuteun hawa nafeusu. 6 Nyang ulôn peugah nyoe kon kheueh sibagoe peurintah, teuma sibagoe naseuhat. 7 Nyang sibeuna jih ulôn leubeh galak meunyoe mandum ureuëng lagée ulôn. Teuma maséng-maséng ka teuterimong karonya nyang khusos nibak Po teu Allah. Sidroe ureuëng na karonya lagée nyoe, nyang laén na teuma karonya nyan. 8 Keu ureuëng-ureuëng nyang gohlom meukawen dan keu ureuëng-ureuëng inong nyang ka balée, nyoe kheueh naseuhat ulôn: Leubeh gét Gata teutab udeb lagée ulôn. 9 Teuma meunyoe Gata hana hase tapeuteun nafeusu, bah kheueh Gata meukawen. Sabab leubeh gét Gata meukawen nibak nafeusu gata meuhuéb-huéb lagée apui hu. 10 Keu ureuëng nyang ka meukawen, nyoe kheueh peurintah ulôn: (Nyang sibeuna jih kon ulôn nyang bri peurintah nyoe, teuma na kheueh Tuhan.) Sidroe ureuëng inong nyang ka meukawen bék kheueh jitinggai lakoe jih. 11 Teuma meunyoe inong nyan ka jitinggai lakoe jih, inong nyan bah kheueh teutab hana meulakoe, atawa jigisa ubak lakoe jih. Dan sidroe ureuëng lakoe hana jeuet jitaleuek purumoh jih. 12 Keu ureuëng nyang laén-laén, naseuhat ulôn na kheueh lagée nyoe: -- nyoe naseuhat ulôn keudroe, kon naseuhat Tuhan -- meunyoe sidroe ureuëng Kristen jimeukawen ngon sidroe ureuëng nyang hana meuiman ubak Almaseh, dan purumoh jih nyan situju keu udeb meusajan ngon lakoe jih nyan, ureuëng nyan hana jeuet jitaleuek purumoh jih nyan. 13 Dan meunyoe sidroe inong Kristen jimeulakoe ngon sidroe agam nyang hana meuiman ubak Almaseh, dan lakoe jih nyan situju keu udeb meusajan ngon purumoh jih nyan, teuma inong nyan hana jeuet jitaleuek lakoe jih nyan. 14 Sabab lakoe nyang hana meuiman teupeulayak jeuet keu anggota umat Allah sabab purumoh jih nyan ka jeuet keu milék Allah. Meunan cit keu purumoh nyang hana meuiman teupeulayak jeuet keu anggota umat Allah, sabab jimeukawen ngon lakoe nyang ka jeuet keu milék Allah. Meunyoe hana lagée nyan, aneuëk-aneuëk awaknyan jeuet keu aneuëk-aneuëk kaphe, padahai aneuëk-aneuëk nyan teuanggab sibagoe anggota umat Allah. 15 Teuma meunyoe ureuëng nyang hana meuiman nyan jitinggai lakoe jih atawa purumoh jih nyang Kristen, bék gata tam jih nyan. Lam hai nyoe Gata nyang inong atawa nyang agam beubaih, sabab Allah meuharab mangat Gata udeb ngon rukon. 16 Sabab Gata sibagoe purumoh -- nyang ka meuiman ubak Tuhan -- pakriban kheueh Gata hase tateupeue ngon paih bahwa Gata hana hase tapeuseulamat lakoe gata? Meunan cit Gata sibagoe lakoe nyang Kristen, pakriban Gata hase tateupeue ngon pasti bahwa Gata hana hase tapeuseulamat purumoh gata? 17 Bah kheueh maséng-maséng jiatoe udeb jih meunurot bimbéngan Tuhan lagée nyang ka geupeuteuntée lé Po teu Allah keu jihnyan bak watée Allah geutawök jihnyan keujipeucaya ubak Gobnyan. Nyan kheueh peuratoran nyang ulôn purunoe bak tieb-tieb jeumaáh. 18 Miseujih, meunyoe sidroe ureuëng nyang ka meukatan bak watée jih nyan jiteurimong panggelan Allah, bék kheueh ureuëng nyan jiuseuha jisampôh tanda-tanda meukatan nyang ka na bak jih nyan. Meunan cit keu ureuëng nyang gohlom meukatan bak watée jihnyan jiteurimong panggelan Allah, bék kheueh ureuëng nyan jilakée meukatan. 19 Sabab teuseutôt peuratoran meusunat atawa hana, bandua nyan saban mantong hana meumakna meubacut pih. Nyang peunteng na kheueh teuseutôt peue-peue nyang geupeurintah lé Po teu Allah. 20 Bah kheueh tieb-tieb ureuëng udeb lam keuadaan lagée watée jihnyan jiteurimong panggelan Allah. 21 Meunyoe bak watée Gata teutawök, Gata na kheueh sidroe namiet, bék kheueh Gata sampoe sosah payah tapike keuhai nyan. Teuma meunyoe singoh Gata meuteumé keuseumpatan jeuet keubeubaih, peuguna kheueh keuseumpatan nyan. 22 Sabab sidroe namiet nyang ka meuiman ubak Tuhan, na kheueh ureuëng Tuhan nyang ka beubaih. Dan sidroe ureuëng beubaih nyang ka meuiman ubak Tuhan, na kheueh namiet Almaseh. 23 Allah ka geubloe Gata dan ka lunaih geubayeue nyan. Lé sabab nyan, bék kheueh Gata seurah droe keu jeuet namiet manusia. 24 Ngon lagée nyan, Syedara-syedara, pakriban mantong keuadaan gata bak watée gata teutawök, bah kheueh Gata teutab udeb lagée nyan meusajan ngon Allah. 25 Jinoe keu ureuëng-ureuëng nyang gohlom meukawen. Keu hai nyan, ulôn hana kuteurimong peurintah meusapeue pih nibak Tuhan. Teuma sibagoe ureuëng nyang sabab rakhmat Tuhan patot teupeucaya, ulôn kutem kubri mubagoe naseuhat. 26 Teuingat ubak mandum keusosahan nyang teuancam nibak watée nyoe, ulôn pike leubeh gét meunyoe ureuëng teutab jiudeb lagée keuadaan nyang na bak saát nyoe. 27 Meunyoe Gata kana purumoh bék kheueh ta useuha mangat gata lheuh nibak purumoh gata nyan. Dan meunyoe Gata gohlom na purumoh bék kheueh gata useuha gata mita purumoh. 28 Teuma meunyoe Gata meukawen, nyan kon desya. Meunan cit teuma meunyoe sidroe aneuëk dara jimeukawen, hana rhot jih nyan ubak desya. Teuma, awaknyan nyang meukawen nyan teuma meuteumé ngon mubagoe keusosahan. Dan ulôn meuharab mangat Gata teupeujiôh nibak hai-hai nyang sosah nyan. 29 Nyang ulôn meukeusut lagée nyoe, Syedara-syedara: Nibak geutanyoe watée hana le lé. Phon nibak saát nyoe, soe mantong ureuëng nyang ka meupurumoh bah kheueh jih nyan udeb lagée ureuëng nyang gohlom meupurumoh; 30 ureuëng nyang mo, udeb jih siulah-ulah hana lam seudeh até; ureuëng nyang kém, siulah-ulah jih nyan hana geumbira; ureuëng nyang ka lheueh jimeubloe, siulah-ulah jihnyan hana sapeue na; 31 dan ureuëng nyang laloe nibak hai-hai donya, bah kheueh jiudeb siulah-ulah ureuëng nyan hana sibok ngon peue nyang jipeubuet nyan. Sabab, donya nyoe hana treb le, lam keuadaan nyang na jinoenyoe, teuma sapan sapa! 32 Ulôn meuharab that mangat Gata leupah nibak keusosahan. Ureuëng nyang hana meupurumoh teuma jipusat pikeran jih ubak hai-hai keu Tuhan, sabab jih jikeuneuk peumangat até Tuhan. 33 Teuma ureuëng nyang ka na purumoh jai that-that jipike keuhai donya nyoe, sabab jihnyan keuneuk jipeumangat até purumoh jih; 34 ngon lagée nyan, peuratian ureuëng nyan ka teuweuek-weuek. Sidroe ureuëng inong nyang hana meulakoe, atawa sidroe aneuëk dara, teuma jai that jipike keu hai Tuhan, sabab jihnyan meuharab that mangat jeuet jiwaraga jih keu milék Allah. Teuma sidroe ureuëng inong nyang ka meulakoe, jipeusaho pikeran jih ubak hai-hai donya, sabab jih nyan jikeuneuk peumangat até lakoe jih. 35 Banmandum nyang ulôn tuléh nyan na kheueh jeuet keujroh gata keudroe, hana meukeusut lôn tam nyoe dan lôn tam jéh. Nyang ulôn lakée na kheueh mangat Gata peubuet nyang beutôi dan patot, dan mangat Gata hase tapeusaho pikeran gata ubak Tuhan. 36 Meunyoe sidroe ureuëng meurasa droe jih hana jipeubuet nyang sipatot jih ateueh tunangan jih, meunyoe jihnyan hana hase jipeuteun hawa nafeusu jih, dan jihnyan meurasa peureulée jimeukawen ngon aneuëk dara nyan, bah kheueh jipeubuet peue nyang jirasa nyan jroh. Jihnyan hana meudesya meunyoe awaknyan meukawen. 37 Teuma meunyoe sidroe-droe ureuëng ka jicok keuputosan lam até jih keu hana jimeukawen ngon tunangan jih dan keuputosan nyan hana teupaksa, teuma nyang jipeubuet nyan jroh that, asai jihnyan teuga jipeubuet hainyan. 38 Jeulaih jih, ureuëng nyang meukawen gét buet jih, dan ureuëng nyang hana meukawen leubeh gét lom buet jih. 39 Sidroe ureuëng inong nyang ka meukawen jihnyan teuikat ubak lakoe jih simantong lakoe jih nyan udeb. Meunyoe lakoe jih ka meuninggai donya, inong nyan beubaih jimeukawen lom ngon ureuëng nyang jigalak; asai jimeukawen nyan seucara Kristen. 40 Teuma jihnyan leubeh meu-untông meunyoe hana jimeukawen le. Nyan peundapat ulôn keudroe, teuma ulôn rasa bahwa nyang ulôn peugah nyan na kheueh ngon kuasa Roh Allah.

1 Korintus 8

1 Jinoenyoe ulôn peugah keuhai peunajoh nyang jibri sibagoe peuseumahan keu beurala. Keubiet beutôi lagée jipeugah lé gob, "Tanyoe banmandum ka carông." Teuma ngon carông nyan teupeujeuet manusia rhot bak sombong, seudang geunaséh teupeudong pribadi manusia. 2 Ureuëng nyang jipike jihnyan jiteupeu peue-peue mantong, nyang sibeuna jih gohlom jiteupeu nyang silhok-lhok jih. 3 Teuma ureuëng nyang biet-biet jigaséh keu Allah, ureuëng nyan geuturi lé Allah. 4 Soai peunajoh nyang ka teupeuseumah keu beurala, tanyoe tateupeue bahwa beurala nyan sibagoe gamba nyang sikeubiet jih hana. Dan tanyoe pih tateupeue bahwa Po teu Allah nyan sidroe; hana nyang laén. 5 Keubiet jai that cit peue nyang jipeugah ilah dan tuhan; bah kheueh nyang na dilangét meunan cit nyang na ateueh rhueng bumoe. 6 Teuma nibak geutanyoe, Allah na kheueh tunggai. Gobnyan kheueh Bapak nyang cebta peue-peue mantong. Keu Gobnyan kheueh tanyoe udeb. Dan Tuhan na kheueh tunggai, Gobnyan kheueh Isa Almaseh. Meulalu Gobnyan peue-peue mantong teucebta, dan sabab Gobnyan kheueh geutanyoe nyoe udeb. 7 Teuma bah kheueh meunan, hana mandum ureuëng jiteupeu hainyan. Na ureuëng nyang awai ilée jiseumah beurala. Ngon lagée nyan, sabab jihnyan trok bak watéenyoe pih awaknyan mantong jirasa bahwa peunajoh, nyang ka jipeuseumah ubak beurala, na kheueh peunajoh beurala. Teuma, meunyoe awaknyan jipajoh peunajoh nyan, awaknyan meurasa meudesya; sabab keuyakénan awaknyan gohlom khong. 8 Nyang sikeubit jih peunajoh keudroe hana teupeujeuet hubongan tanyoe ngon Allah meutamah krab. Meunyoe tanyoe tapajoh peunajoh nyan, tanyoe hana meuteumé untông sapeue. Sikeubit jih, meunyoe tanyoe hana tapajoh peunajoh nyan, tanyoe pih hana rugoe sapeue. 9 Teuma, até-até kheueh! Bék sampoe rôh ureuëng laén jeuet meudesya -- sabab keuyakénan jih gohlom khong -- ngon sabab Gata beubaih tapeubuet peue mantong. 10 Nyang ulôn meukeusut lagée nyoe: Seukira jih Gata, nyang na keuyakénan nyang khong, teungoh gata duek dan gata makheun lam kuil beurala. Óh lheueh nyan na sidroe ureuëng jingieng Gata na taduek dan tamakheun lam kuil nyan. Meunyoe keuyakénan ureuëng nyan hana khong, peu kheueh nyan teuma teupeujeuet ureuëng nyan jijeuet makheun peunajoh nyang ka jibri keu beurala? 11 Ngon sabab nyan, keuyakénan Gata teupeujeuet ureuëng laén nyang keuyakénan jih gohlom khong nyan jeuet keusisat. Padahai Almaseh maté keu ureuëng nyan cit teuma. 12 Dan meunyoe Gata tapeubuet nyang salah lagée nyan ateueh syedara-syedara nyang Kristen -- na kheueh Gata katapeurusak keuyakénan awaknyan nyang leumoh -- ngon lagée nyan Gata ka meudesya ubak Almaseh. 13 Nyang kheueh sabab jih, meunyoe peunajoh jeuet keusabab syedara lôn meudesya, ulôn sagai-sagai hana lôn pajoh le. Pat tateupeue syedara ulôn meudesya ngon sabab lé ulôn.

1 Korintus 9

1 Peu kheueh ulôn nyoe kon ureuëng beubaih? Peu kheueh ulôn nyoe kon rasui? Peu kheueh ulôn nyoe gohlom na lôn ngieng Isa, Tuhan tanyoe? Peu kheueh gata kon hase buet ulôn keu Tuhan? 2 Bah kheueh di ureuëng-ureuëng laén hana jitem aku ulôn nyoe sibagoe rasui, sihana-hana jih mubacut gata na ta aku ulôn nyoe rasui! Sabab udeb gata sibagoe ureuëng Kristen na kheueh sibagoe bukeuti bahwa ulôn nyoe na kheueh sidroe rasui. 3 Meunyoe ureuëng jikritek ulôn, ulôn teuma kujaweueb lagée nyoe: 4 Peu kheueh ulôn hana hak lôn teurimong peunajoh dan ié jieb sabab buet ulôn? 5 Peu kheueh ulôn hana hak ulôn ba sidroe purumoh ureuëng Kristen meusajan-sajan ngon ulôn watée ulôn jak, lagée nyang geupeubuet lé syedara-syedara Tuhan Isa dan lé rasui-rasui nyang laén, meunan cit ngon Petrus? 6 Atawa Barnabas dan ulôn mantong nyang teupeuwajéb jak mita hareukat keudroe? 7 Peu kheueh hana anggota tantra nyang harôh jipeubiaya droe jih keudroe lam angkatan prang! Hana peutani nyang jipula anggô lam lampôh jih óh lheueh nyan hana jipajoh wase jih nyang jipeuhase lé lampôh jih nyan! Hana ureuëng meurabe nyang peulara bubiri, laju hana jijieb ié mom nyang jipeuhase lé bubiri-bubiri jih nyan! 8 Ulôn peugah hai nyan kon kheueh nyang ka lazem nibak peungalaman tieb-tieb uroe, teuma sabab Alkitab pih na geupeugah nyang lagée nyan. 9 Lam Kitab Nabi Musa na teutuléh lagée nyoe, "Leumô nyang teungoh jigiloe-giloe boh gandom keu jipeuleukang boh gandom nibak mu jih, bék kheueh teubeukab babah jih." Peu kheueh leumô nyang geukalon lé Po teu Allah? 10 Atawa nyan nyang geumeukeusut keu geutanyoe? Beutôi nyan teutuléh keu geutanyoe. Sabab ureuëng nyang mubuet bak ladang dan ureuëng nyang jipeugleh gandom jih ka sipatot jih jimubuet ngon harapan keu jiteurimong siparo nibak hase nyang jipeubuet nyan. 11 Kamoe ka kamoe tabu bijéh rohani lam udeb gata. Ngon lagée nyan meunyoe kamoe pot beureukat-beureukat hareuta nyang na nibak gata, peu kheueh ngon lagée nyan kamoe lakée leubeh jai nibak gata? 12 Meunyoe ureuëng-ureuëng laén na hak jiharab nyoe nibak gata, peu kheueh kamoe leubeh na hak nibak awaknyan? Teuma ulôn gohlom lôn peuguna hak nyan. Nyang keubiet jih ulôn leubeh galak lôn tanggong peue-peue mantong nibak jipeuteuka sapeue-sapeue hai nyang jihalang teupeutabu Haba Gét keuhai Almaseh. 13 Gata teuntée tateupeu bahwa ureuëng nyang mubuet lam Baét Allah jiteurimong peunajoh awaknyan nibak Baét Allah. Dan ureuëng-ureuëng nyang peusaneut teumpat peuseumah keureubeuen, meuteumé siparo nibak keureubeuen nyang na teupeuseumah nibak teumpat nyan. 14 Meunan cit Tuhan ka geupeuteuntée bahwa ureuëng nyang peusampoe Haba Gét nyan harôh meuteumé hareukat nibak buet jih nyan. 15 Teuma gohlom na lôn peuguna mubacut pih nibak hak-hak ulôn nyan. Dan ulôn tuléh suratnyoe kon teuma ngon meukeusut mangat jeuet hai-hai nyan teupeubuet laju jinoenyoe cit keu ulôn. Leubeh gét ulôn maté nibak gadôh hai nyang ulôn peubangga nyan. 16 Sabab, meunyoe nyan soai teupeusampoe Haba Gét nyang teuka nibak Po teu Allah, ngon lagée nyan ulôn hana hak lôn peubangga droe, sabab Po teu Allah ka geupeurintah bak ulôn keu lôn peubuet nyan. Cilaka kheueh ulôn, meunyoe ulôn hana lôn peusampoe Haba Gét nyan! 17 Seukira jih ulôn peubuet buet nyan ateueh keuheundak lôn keudroe, ngon lagée nyan lôn jeuet meuharab keu meuteumé upah. Teuma ulôn peusampoe Haba Gét nyan na kheueh sabab wajéb. Ulôn geubri tugaih lé Po teu Allah keu lôn peubuet lagée nyan. 18 Meunyoe meunan, peue upah lôn? Nyoe kheueh upah jih: bahwa ulôn hase lôn peusampoe Haba Gét nyan ngon hana lôn peubrat meusidroe ureuëng pih jipeubiaya lôn, sabab ulôn hana lôn lakée hak-hak ulôn sibagoe lôn peusampoe Haba Gét nyan. 19 Ulôn nyoe bukon namiet manusia soe mantong; ulôn ureuëng beubaih. Teuma bah kheueh meunan, ulôn ka lôn peujeuet droe ulôn nyoe namiet keu mandum ureuëng. Ulôn peubuet lagée nyan mangat ulôn hase lôn peuseulamat sijai-jai jih manusia keu Almaseh. 20 Keu ureuëng Yahudi, ulôn lagée ureuëng Yahudi mangat ulôn hase lôn peumeunang ureuëng Yahudi keu Almaseh. Keu ureuëng-ureuëng nyang udeb jih meunurot huköm Nabi Musa, ulôn peudeh droe siulah-ulah ulôn teuikat ngon huköm nyan, bah kheueh nyang sibeuna jih ulôn hana teuikat ngon huköm nyan. Ulôn peubuet lagée nyan mangat ulôn hase lôn tarek awaknyan mangat jeuet keu murit Almaseh. 21 Meunan cit keu ureuëng-ureuëng nyang kon Yahudi, ulôn ba droe lagée kon ureuëng Yahudi, nyang udeb diluwa huköm Nabi Musa. Ulôn peubuet lagée nyan mangat ulôn hase lôn tarek awaknyan jeuet keu murit Almaseh. Ngon lagée nyan kon meumakna ulôn nyoe hana taát ubak Po teu Allah, dan ulôn nyoe keubiet ka jikuasa lé kuasa peurintah-peurintah Almaseh. 22 Lamkawan ureuëng-ureuëng nyang keuyakénan jih hana teuga, ulôn pih lôn peubuet lagée ureuëng nyang keuyakénan jih hana teuga mangat ulôn hase lôn tarek awaknyan jeuet keu murit Almaseh. Paneuk haba, ulôn jeuet keu peue mantong keu mandum ureuëng mangat ngon rot nyang lagée peue mantong ulôn hase lôn peuseulamat siparo nibak lamkawan awaknyan. 23 Banmandum nyan ulôn peubuet keu Haba Gét nyang teuka nibak Po teu Allah nyan, mangat ulôn pi meusajan geubri beureukat. 24 Syedara teuntée mandum tateupeue bahwa lam tieb-tieb na meutunang plueng mandum peuseurta meusajan jiplueng, teuma sidroe ureuëng nyang meuteumé hadiah. Ngon lagée nyan plueng kheueh beutajam that mangat Gata meuteumé hadiah nyan. 25 Tieb-tieb ureuëng nyang teungoh meulatih, jipeuteun droe lam hai peue mantong. Jihnyan jisaja peubuetnyan sabab jihnyan mangat teuboh ngon taloe takue bungöng keujuaraan, na kheueh bungöng nyang bagaih layée. Teuma tanyoenyoe tapeuteun droe lam hai peue mantong sabab tanyoe meuheuét that beumeuteumé teuboh ngon taloe takue bungöng nyang hana layée-layée. 26 Nyang kheueh sabab jih ulôn plueng ngon tujuan nyang ka teuntée. Lagée watée meutunang tinju, ulôn hana lôn söh ban galak droe. 27 Ulôn peubiyeu tuboh lôn nyoe jilatih ngon biet-biet kreueh sampoe ulôn hase lôn kuasa nyan. Ulôn peubuet lagée nyan, sabab ulôn hana lôntem sampoe teujadi bahwa óh ka lheueh lôn pakat ureuëng laén meusajan-sajan jiseutôt lam meutunang plueng nyan, ulôn keudroe jitulak.

1 Korintus 10

1 Syedara-syedara! Gata nyang sibeuna jih beuta ingat peue nyang ka teujadi ateueh indatu tanyoe watée awaknyan geuseutôt Nabi Musa. Awaknyan banmandum jipeupayong lé awan, dan ngon seulamat jijeumeurang Laôt Mirah. 2 Keuneuk jeuet keu murit-murit Nabi Musa, awaknyan banmandum teupeumanö lam awan dan laôt nyan. 3 Awaknyan banmandum jipajoh peunajoh rohani nyang saban, 4 dan jijieb ié rohani nyang saban teuma. Awaknyan bandum jijieb ié nibak gunong batée rohani nyang na meusajan ngon awaknyan; gunong batée nyan na kheueh Almaseh keudroe. 5 Bah kheueh meunan, Allah hana galak ateueh ladum nibak awaknyan, dan nyang kheueh sabab jih manyét-manyét awaknyan teutiek-tiek lam padang pasi. 6 Banmandum nyan jeuet keucuntoh nibak geutanyoe, sibagoe peuingat nibak geutanyoe mangat tanyoe bék ta galak keuhai-hai nyang jeuhet lagée awaknyan. 7 Meunan cit mangat tanyoe bék taseumah beurala lagée nyang jipeubuet lé ladum nibak awaknyan. Lam Alkitab na teutuléh lagée nyoe, "Teuma bansa nyan jipeuphon makheun ngon jijieb ié, dan jimeunari keu jiseumah beurala." 8 Tanyoe hana jeuet tapeubuet hai-hai nyang cabui lagée nyang jipeubuet lé ladum ureuëng lamkawan awaknyan. Sabab, dua ploh lhée ribée droe lamkawan awaknyan maté lam siuroe sabab jipeubuet nyan. 9 Tanyoe hana jeuet ta ujoe-ujoe Tuhan lagée nyang jipeubuet lé ladum lamkawan awaknyan yoh watée ilée, akhé jih awaknyan maté jikab lé uleue meubisa. 10 Meunan cit tanyoe hana jeuet aloh alah; lagée nyang jipeubuet lé ladum ureuëng lamkawan awaknyan yoh watée ilée, akhé jih awaknyan jipoh maté lé Malaikat Mawöt 11 Banmandum hainyan teujadi ateueh awaknyan mangat jeuet keucuntoh keu ureuëng laén. Dan bandum nyan pi na teutuléh sibagoe peuingat keu geutanyoe. Sabab tanyoe bak watée nyoe udeb lam masa akhé jamén. 12 Ureuëng nyang jisangka droe jih teudong ngon teugab, gét kheueh beu até-até; bék sampoe jihnyan reubah. 13 Tieb-tieb cubaan nyang Gata rasa na kheueh cubaan nyang ka lazem jirasa lé manusia. Teuma Po teu Allah seutia ubak janji Gobnyan. Gobnyan hana teuma geupeubiyeu Gata jiujoe leubeh nibak keusanggopan gata. Bak watée Gata jiteuka ngon cubaan, Gobnyan laju geubri jalan keugata beujeuet keuteuga mangat Gata hase tameuteun. 14 Ngon sabab nyan, Syedara mandum nyang ulôn gaséh, gata banci kheueh keu ureuëng nyang seumah beurala. 15 Ulôn meututoe ngon gata lagée ngon ureuëng-ureuëng bijaksana. Bah kheueh gata timang keudroe tutoe haba lôn nyoe. 16 Bak watée tanyoe jieb ié anggô talakée teurimong gaséh ubak Po teu Allah, peu kheueh nyan kon ka teutunyok bahwa tanyoe meusaboh ngon Almaseh lam maté Gobnyan? Dan bak watée tanyoe tabagi-tabagi ruti keutapajoh meusajan-sajan, peu kheueh nyan kon ka teutunyok bahwa tanyoe ka meusaboh lam tuboh Almaseh? 17 Ngon sabab nyan teuma na saboh ruti, dan tanyoe mandum tapajoh ruti nyang saboh nyan cit teuma, dan tanyoe nyang jai nyoe jeuet keusaboh tuboh. 18 Cuba kalon ureuëng-ureuëng Yahudi. Awaknyan nyang jimakheun peunajoh nyang teupeuseumah ateueh teumpat peuseumah keureubeuen, na kheueh ureuëng-ureuëng nyang ka meusaboh ngon teumpat nyan. 19 Peue meukeusut lôn ngon lagée nyan? Beurala atawa peunajoh nyang jipeuseumah keubeurala nyan sagai-sagai hana areuti. 20 Peue nyang jipeuseumah bak teumpat keureubeuen keu beurala hana teupeuseumah keu Po teu Allah, teuma na kheueh keu roh-roh jeuhet. Dan ulôn hana kutem gata meusaboh ngon roh jeuhet. 21 Gata hana jeuet gata jieb ié nibak piala anggô Tuhan, dan sigoguih nibak piala anggô roh jeuet cit teuma. Gata hana tamakheun bak meuja Tuhan, dan meunan cit bak meuja roh jeuhet. 22 Atawa peu kheueh tanyoe takeuneuk peujeuet Tuhan hana picék até? Peu kheueh tanyoe leubeh teuga nibak Tuhan? 23 Jipeugah lé gob, "Tanyoe jeuet tapeubuet peue mantong asai tatem." Beutôi! Teuma hana mandum nyang tatem nyan na guna. "Tanyoe jeuet teupeubuet peue mantong nyang asai tatem" -- teuma hana banmandum nyang tatem nyan jipeugot udeb tanyoe. 24 Bék kheueh na peusidroe ureuëng jimeujuang deumi keu keupeuntengan jih keudroe. Tieb-tieb ureuëng harôh meujuang keu keupeuntengan ureuëng laén teuma. 25 Gata jeuet tapajoh peue mantong nyang na jipeubloe lam peukan eungkot sie. Hana peue gata tilek leubeh ilée, bah kheueh na rasa brat lam até nurani gata. 26 Sabab lam Alkitab na teutuléh lagée nyoe, "Bumoe nyoe ngon banmandum asoe jih na kheueh atra Tuhan." 27 Meunyoe gata jiundang jak makheun lé sidroe nyang bukon ureuëng Kristen, dan gata tateurimong undangan gobnyan, pajoh kheueh peue nyang ka ji idang ukeue gata. Hana peue gata tilek pane asaijih peunajoh nyan, mangat bék na rasa brat lam até nurani gata. 28 Teuma meunyoe na nyang peugah bak gata, "Peunajoh nyoe ka teupeuseumah keubeurala," bék kheueh gata pajoh peunajoh nyan, sabab teukalon keupeuntengan ureuëng nyan dan sabab su até nurani. 29 Nyang ulôn meukeusut kon su at`e nurani gata, teuma su at`e nurani ureuëng nyan. Mungken na nyang tanyong, "Ka gura, pakon keubeubaihan lôn ka jipeubataih lé su até nurani ureuëng laén? 30 Meunyoe ulôn pajoh peunajoh ngon lôn lakée teurimong gaséh ubak Allah, pakon gob harôh jihina ulôn keu peunajohnyan, seudangkan ulôn ka lôn lakée teurimong gaséh ubak Allah ateueh nyan?" 31 Peue mantong nyang Gata peubuet -- Gata makheun atawa Gata jieb ié -- peubuet kheueh mandum nyan keu gata peumulia Allah. 32 Udeb kheueh beulagée nyan bagoe sampoe lé Gata ureuëng laén hana jipeubuet desya; peu kheueh awaknyan ureuëng Yahudi atawa kon ureuëng Yahudi, atawa pih jeumaáh Allah. 33 Udeb kheueh lagée ulôn nyoe. Ulôn lôn useuha lôn peumangat até mandum ureuëng lam sigala sisuatu, kon meukeusut-meukeusut keupeuntengan droe teuh keudroe. Tujuan lôn na kheueh mangat awaknyan banmandum hase teupeuseulamat.

1 Korintus 11

1 Seutôt kheueh teuladan ulôn, lagée ulôn pih lôn seutôt teuladan Almaseh. 2 Ulôn kupujoe gata sabab gata sabe tapeuingat ulôn dan taturot peungajaran nyang ulôn bri bak gata. 3 Teuma ulôn meuheuét beutateupeue saboh hai teuk, bahwa nyang jeuet keu ulée ateueh tieb-tieb ureuëng agam na kheueh Almaseh; nyang jeuet keue ulée ateueh purumoh na kheueh lakoe, dan nyang jeuet keue ulée ateueh Almaseh na kheueh Allah. 4 Meunyoe sidroe ureuëng agam watée jimeudoá atawa watée jipeusampoe haba nyang teuka nibak Po teu Allah dikeue ureuëng ramé, jingui sinutôb ulée, ngon lagée nyan ureuëng nyan ka jihina Almaseh. 5 Dan meunyoe sidroe ureuëng inong watée jimeudoá atawa watée jipeusampoe haba nyang teuka nibak Po teu Allah dikeue ureuëng ramé, hana jingui sinutôb ulée, ngon lagée nyan ureuëng inong nyan ka jihina lakoe jih nyang jeuet ulée ateueh droe jih. Nyang lagée nyan saban cit ulée inong nyan ka jicuko. 6 Sabab meunyoe sidroe ureuëng inong hana jitem ngui sinutôb ulée leubeh gét ôk jih teugunteng. Teuma meunyoe sidroe ureuëng inong teucuko ôk jih atawa teugunteng ôk jih, nyang lagée nyan na kheueh hinaan ateueh droe jih. Ngon lagée nyan leubeh gét inong nyan jingui tutôb ulée. 7 Ureuëng agam hana peue jitôb ulée, sabab jihnyan sibagoe ceureumen pribadi dan keubeusaran Po teu Allah. Teuma ureuëng inong sibagoe ceureumen keu ureuëng lakoe, 8 sabab ureuëng agam hana teupeujeuet nibak ureuëng inong, ureuëng inong kheueh nyang teupeujeuet nibak ureuëng agam. 9 Ureuëng agam pih hana teupeujeuet keu keupeuntengan ureuëng inong, teuma ureuëng inong nyang teupeujeuet keu keupeuntengan ureuëng agam. 10 Sabab nyan, keuteupeumangat até dumna malaikat, sidroe ureuëng inong harôh jingui sinutôb ulée sibagoe tanda bahwa jihnyan na dimiyueb kuasa lakoe jih. 11 Teuma bah kheueh meunan lam udeb geutanyoe ureuëng Kristen, ureuëng inong nyan hana jidong keudroe, lheueh nibak ureuëng agam, dan ureuëng agam pih hana jidong keudroe, lheuh nibak ureuëng inong. 12 Sabab bah kheueh ureuëng inong phon that teupeujeuet nibak ureuëng agam, teuma óh ka lheueh ureuëng agam lahé lam pruet ureuëng inong; dan banmandum nyan asai jih nibak Po teu Allah. 13 Cuba gatanyoe keudroe tapeutimang hainyoe: Peu kheueh gét sidroe ureuëng inong jimeudoá ubak Allah dikeue ureuëng ramé, hana jingui sinutôb ulée? 14 Nibak peungalaman umum, gata ka teupeurunoe bahwa meunyoe ureuëng agam meuôk panyang, nyan saboh hai nyang kureueng patôt. 15 Teuma keu ureuëng inong, ôk teubri keu jih nyan sibagoe sinutôb ulée jih dan ôk panyang na kheueh keubanggaan jih. 16 Ngon lagée nyan, meunyoe nyang keuneuk meudakwa keuhai nyoe, saboh sagai nyang jeuet lôn peugah na kheueh bah kheueh tanyoe meunan cit ngon jeumaáh-jeumaáh Allah nyang laén, umum jih na saboh keubiasaan lam jeumaáh; laén nibak nyan hana. 17 Keuhai nyang seulanjutjih nyoe, ulôn hana lôn pujoe gata. Gata meugumpôi tameuiébadat hana jipeuhase nyang gét, teuma nyang hana gét. 18 Phon-phon that na ulôn deungoe, bahwa bak teumpat-teumpat gata meugumpôi keu meuiébadat na golongan-golongan nyang saléng meulaén. Dan ulôn pike hana le meubacut na nyang beutôi haba nyan. 19 Keubiet ka siwajar jih jiteuka peupeucahan lamkawan gata, mangat deuh singoh soe-soe nyang ureuëng Kristen seujati. 20 Teuma bak watée gata meusapat, nyang gata peuna nyan kon Peujamé Tuhan. 21 Sabab watée pajoh bu, gata maséng-maséng gata meureupah tacok peunajoh teuh keudroe, sampoe na nyang hana meuteumé sapeue, seudangkan nyang laén sampoe án mabök. 22 Pakon meunan? Kon kheueh Gata na rumoh? Gata jeuet makheun dan tajieb ié nibak teumpat nyan! Atawa peu kheueh gata keuneuk tahina jeumaáh Allah dan gata peumalée ureuëng-ureuëng gasien? Peu kheueh nyang harôh ulôn peugah keu gata? Peu kheueh harôh lôn pujoe gata? Hana! Sagai-sagai ulôn hana lôn pujoe gata. 23 Sabab nyang lôn purunoe keu gata nyan, na kheueh nyang lôn teurimong nibak Tuhan keudroe: bahwa bak malam nyan watée Isa, Tuhan tanyoe jikhianat, Gobnyan laju geucok ruti, 24 dan óh ka lheueh geupeugah teurimong gaséh ubak Po teu Allah ateueh ruti nyan, laju geupriek-priek rutinyan ngon jaroe Gobnyan, óh lheueh nyan laju geupeugah, "Nyoe kheueh tuboh Lôn nyang teupeujôk keu gata. Peubuet kheueh lagée nyoe sibagoe gata ingat keu Lôn." 25 Meunan cit teuma óh ka lheueh habéh makheun, Gobnyan geucok piala ié anggô dan laju geupeugah, "Anggô nyoe na kheueh meujanji Allah nyang barô, teupeusah ngon darah Lôn. Tieb-tieb gata jieb nyoe, peubuet kheueh nyoe sibagoe taingat keu lôn." 26 Beutôi tieb-tieb gata pajoh ruti dan gata jieb ié anggô nyoe, gata peusampoe Tuhan ka maté, sampoe Gobnyan teuka lom teuma. 27 Ngon sabab nyan, ureuëng-ureuëng nyang jipajoh ruti Tuhan atawa jijieb ié anggô Tuhan ngon cara nyang hana beutôi, ureuëng nyan meudesya ubak Tuhan nyang ka geukeureubeuen tuboh dan darah Gobnyan. 28 Ngon lagée nyan, tieb-tieb ureuëng meuseuti jijak peureksa droe jih leubeh ilée, barô kheueh jeuet jipajoh ruti atawa jijieb ié anggô nyan. 29 Sabab meunyoe ureuëng jipajoh ruti dan jijieb ié anggô hana jipako bahwa peujamé nyan na hubongan ngon tuboh Tuhan, ureuëng nyan jimakheun dan jijieb ié keue jiteurimong huköm Po teu Allah ateueh droe jih keudroe. 30 Nyang kheueh sabab jih jai that lamkawan gata nyang sakét dan leumoh, dan na teuma nyang maté. 31 Teuma meunyoe tanyoe tapareksa droe tanyoe leubeh ilée, tanyoe hana teuma geuhuköm lé Po teu Allah. 32 Teuma meunyoe tanyoe geuhôi lé Allah, Gobnyan teuma geuseunuet tanyoe, mangat tanyoe bék keunong huköm meusajan-sajan ngon donya nyoe. 33 Ngon sabab nyan, Syedara-syedara lôn, meunyoe gata meusapat keu tamakheun nibak teumpat peujamé Tuhan, gata meuseuti saléng tamupreh-preh. 34 Meunyoe na nyang deuk, ureuëng nyan bah kheueh jipajoh bu ilée dirumoh jih. Meunyoe gata tapeubeuah hai nyoe, tieb-tieb gata peuna meusapat keu taiébadat hana teuma meuteumé huköman nibak Po teu Allah ateueh droe gata keudroe. Keuhai masa-alah-masa-alah nyang laén, ulôn peutrang ubak gata, meunyoe ulôn teuka singoh.

1 Korintus 12

1 Jinoenyoe keuhai karonya-karonya nyang geubri lé Roh Allah. Keuhai nyan, ulôn meuharab mangat Gata tateupeue nyang sibeuna jih. 2 Ingat kheueh bahwa bak watée gata gohlom taturi Tuhan, gata teupeungaroh gata seutôt beurala nyang hánjeuet mariet. 3 Gata meuseuti tateupeue bahwa ureuëng-ureuëng nyang geupimpén lé Roh Allah hana hase jipeugah, "Teukutok kheueh Isa!" Meunan cit teuma hana meusidroe pih nyang hase jipeugah, "Isa kheueh Tuhan!" meunyoe ureuëng nyan hana jipimpén lé Roh Allah. 4 Na mubagoe rupa karonya nibak Roh Allah, teuma mandum nyan jibri lé Roh nyang sa. 5 Na mubagoe rupa buet keu teuseumah Tuhan, teuma Tuhan nyang jiseumah nyan, Tuhan nyang sa cit! 6 Na mubagoe cara teupeubuet buet Tuhan, teuma nyang bri teunaga keunyan bak tieb-tieb ureuëng na kheueh Po teu Allah nyang sa cit teuma. 7 Keu keugét tanyoe mandum, Roh Allah geumubuet bak tieb-tieb ureuëng seucara keudroe-droe. 8 Keu nyang sidroe, Roh nyan jibri keumampuan ureuëng nyan jipeugah haba ngon peunoh wibawa. Keu nyang laén Roh nyang nyan cit jibri keumampuan keu jipeugah keuhai Allah. 9 Roh nyang sa nyan cit teuma jibri ubak ureuëng nyang sidroe, keumampuan nyang luwabiasa keue jimeuiman ubak Almaseh; keue nyang laén Roh Allah nyan geubri kuasa keu jipeupuléh ureuëng sakét. 10 Keu sidroe ureuëng jibri kuasa keu jipeuna buet-buet nyang ajaéb dan keu nyang laén jibri karonya keu jibritée reuncana-reuncana Allah. Keu nyang laén teuma Roh Allah nyan jibri teuma keumampuan keujeuet jipeubeda nyang toh karonya nyang geubri lé Roh Allah dan nyang toh teuma nyang kon. Na nyang geubri keumampuan keu jimeututoe ngon mubagoe basa nyang ajaéb, dan na teuma nyang jibri keumampuan keu jibohmakna basa-basa nyan. 11 Banmandum nyan jipeubuet lé Roh Allah nyang sa nyan cit teuma; keu maséng-maséng ureuëng jibri karonya keudroe meunurot nyang jikeuheundak lé Roh nyan keudroe. 12 Almaseh na kheueh lagée tuboh manusia; tuboh nyan saboh, teuma na anggota nyang le. Banmandum anggota nyan, bah kheueh nyan jai that, na kheueh saboh tuboh. 13 Meunan cit ngon tanyoe mandum, bah kheueh nyan ureuëng Yahudi meunan cit nyang kon ureuëng Yahudi, namiet-namiet meunan cit ngon ureuëng nyang meurdehka; tanyoe mandum kateupumanö ngon Roh nyang sa nyan, mangat tanyoe teupeujeuet saboh ngon tuboh Almaseh nyan. Tanyoe mandum tarasa Roh nyang sa nyan ngon sipeunoh jih. 14 Sabab tuboh nyan keudroe hana teudong bak saboh anggota teuma jai that anggota jih. 15 Meunyoe gaki tanyoe jipeugah, "Ulôn kon jaroe, ngon sabab nyan ulôn kon bagian nibak tuboh," nyan kon meumakna bahwa gaki nyan kon bagian nibak tuboh. 16 Dan meunyoe punyueng jipeugah, "Sabab ulôn kon mata, ngon lagée nyan ulôn kon bagian nibak tuboh nyan," nyang lagée nyan kon cit meumakna bahwa punyueng nyan kon bagian nibak tuboh. 17 Meunyoe bansaboh tuboh nyan jeuet keu saboh mata mantong, pakriban tuboh nyan hase jimeudeungoe? Atawa peu kheueh bansaboh tuboh nyan jeuet keu punyueng mantong, pakriban teuma tuboh nyan jimeucöm? 18 Deuh takalon bahwa Allah nyang keubah banmandum anggota tuboh nyan nibak tuboh. Maséng-maséng geukeubah bak teumpat jih lé Po teu Allah meunurot lagée nyang geugalak lé Gobnyan keudroe. 19 Meunyoe mandum nyan teuma saboh anggota mantong, nyang toh kheueh nyang teupeugah tuboh? 20 Teuma keubiet na anggota nyang jai, teuma tuboh na kheueh saboh. 21 Ngon sabab nyan, mata hana jeuet jipeugah bak jaroe, "Ulôn hana peureulée keugata!" atawa ulée jipeugah bak gaki, "Ulôn hana peureulée keugata!" 22 Nyang sibeuna jih anggota-anggota tuboh nyang teupeugah leumoh nyan, that-that tapeureulée; 23 dan anggota-anggota nyang tanyoe anggab hana meunan meuyum, na kheueh anggota-anggota nyang tanyoe bri leubeh jai peunghargaan. 24 Anggota-anggota tuboh nyang ka deuh jih g`et, hana peureul`ee l`e beutapeurati. Po teu Allah ka geususon tuboh geutanyoe meunan g`et jih ngon lag`ee nyan anggota-anggota nyang kureueng muyuem geubri leub`eh jai peunghargaan. Anggota-anggota tuboh nyang hana deuh lagak, nyan nyang leubeh teupeurati. 25 Ngon lagée nyan tuboh nyan hana teubagi-bagi; maséng-maséng anggota teupeurati saboh ngon nyang laén. 26 Meunyoe na saboh anggota nyang sakét, banmandum anggota nyang laén pih meurasa sakét; meunyoe saboh anggota teupujoe, banmandum anggota nyang laén pih meusajan meusukaria. 27 Gata banmandum meusajan-sajan na kheueh tuboh Almaseh dan gata maséng-maséng teuma na kheueh anggota nibak tuboh nyan. 28 Meunan cit teuma lam jeumaáh, Allah ka geupeuteuntée teumpat keumubagoe-bagoe ragam manusia: Nyang phon that rasui-rasui; keudua, nabi-nabi, nyang keu lhée, gurée-gurée, laju keu awaknyan nyang jipeubuet buet-buet nyang ajaéb, óh lheueh nyan keu awaknyan nyang geubri karonya keu jipeupuléh ureuëng sakét, atawa keu jitulông ureuëng laén, atawa keu jeuet keupeumimpén, atawa keu jeuet jimeututoe ngon meubagoe basa nyang ajaéb. 29 Awaknyan kon banmandum rasui, atawa nabi, atawa gurée. Hana banmandum nyan na kuasa jipeubuet buet nyang ajaéb, 30 atawa keu teupeupuléh ureuëng sakét, atawa keumututoe ngon mubagoe basa nyang ajaéb, atawa keu teutejeumah basa-basa nyan. 31 Ngon sabab nyan, meu-useuha kheueh lé gata ngon biet-biet mangat meuteumé karonya-karonya nyang lumboi sa. Teuma seulanjut jih nyoe ulôn tunyok bak gata rot nyang paleng gét.

1 Korintus 13

1 Bah kheueh ulôn nyoe hase lôn meututoe ngon meubagoe basa manusia, ngon basa malaikat pih jeuet lôn meututoe, teuma meunyoe ulôn hana lôn gaséh keu ureuëng laén, peue-peue nyang lôn peugah nyan na kheueh lagée su nyang meuleungkeng teuma hana meumakna. 2 Bah kheueh ulôn nyoe carông lôn peusampoe haba nyang teuka nibak Po teu Allah, dan lôn muphom mandum hai nyang silhok-lhok jih, dan lôn teupeu peue-peue mantong dan that-that lôn meuiman ubak Po teu Allah sampoe hase lôn peujeuet gunong jiminah bak teumpat laén, teuma ulôn hana lôn gaséh keu ureuëng-ureuëng laén, ulôn nyoe teutab hana areuti sapeue! 3 Bah kheueh banmandum nyang na nibak ulôn, ulôn jok seudeukah keu ureuëng gasien, dan ulôn jok droe lôn keu teutot lam apui, teuma ulôn hana lôn gas`eh keu ureuëng la`en, teuma banmandum nyan hana meuguna mubacut pi. 4 Ureuëng nyang jigaséh keu ureuëng laén, saba dan gét até. Ureuëng nyan hana seu-eum ngon ceumuru, hana meututoe rayeuk haba ngon sulet, hana sombong. 5 Ureuëng nyan hana manyang até dan hana gasa, jihnyan hana jipaksa ureuëng laén beuji seutôt lagée jih peugah, hana bagaih teusinggong, dan hana jitroh dam lam até jih. 6 Ureuëng nyang jigaséh keu ureuëng-ureuëng laén, hana galak bak buet nyang jeuhet, teuma ureuëng nyan galak bak buet nyang jroh. 7 Ureuëng nyan hase jiteundroe watée meuhadab ngon peue-peue mantong dan jitem peucaya keu nyang paleng gét nibak tieb-tieb ureuëng; lam keuadaan pakriban mantong ureuëng nyang na geunaséh nyan hántom na gadôh harapan jih dan saba jipreh peue-peue mantong. 8 Hántom na watée jih ureuëng teuma saléng jigeumaséh. Jinoenyoe na ureuëng nyang carông jipeusampoe haba nyang teuka nibak Po teu Allah, teuma singoh jipiôh jipeusampoe haba nyan. Jinoenyoe na nyang carông jimeututoe lam meubagoe basa nyang ajaéb, teuma singoh jihnyan teuma jipiôh peugah haba ngon basa-basa nyan. Jinoenyoe na ureuëng nyang jiteupeu lam mubagoe hai, teuma singoh peue nyang awaknyan teupeue nyan teuma tuwoe. 9 Sabab, iéleumé tanyoe dan keumampuan tanyoe keu tapeusampoe haba nyang teuka nibak Po teu Allah nyan, mantong kureueng sampoereuna. 10 Teuma teuma trok watée jih Allah geupeujeuet banmandum nyan sampoereuna, dan nyang hana sampoereuna nyan teuma gadôh. 11 Watée ulôn mantong aneuëk miet, ulôn mariet lagée aneuëk miet, peurasaan lagée aneuëk miet dan ulôn seumike pih lagée aneuëk miet. Jinoenyoe ulôn ka rayeuk, pi-e ulôn nyang lagée aneuëk miet ka ulôn tinggai. 12 Peue nyang tanyoe ngieng nibak watée nyoe na kheueh lagée bubayang nyang buram lam ceureumen. Teuma singoh tanyoe tangieng langsong ngon nyata. Jinoenyoe ulôn hana lôn teupeu sapeue, teuma singoh lôn teupeu peue-peue mantong saban lagée Allah peue-peue mantong keuhai droe ulôn. 13 Ngon lagée nyan, bak watée nyoe na lhée boh hai nyang teutab harôh tapeubuet: meuiman, meuharab dan saléng tameugaséh sabe keudroe-droe. Nyang paleng peunteng lam lhée boh nyan na kheueh beutagaséh kheueh keu ureuëng-ureuëng laén.

1 Korintus 14

1 Gata useuha kheueh beugata gaséh keu ureuëng laén. Dan useuha kheueh teuma keu gata teurimong karonya-karonya nyang geubri lé Roh Allah, nyang paleng peunteng na kheueh hase keu gata peusampoe reuncana-reuncana Allah ubak manusia. 2 Ureuëng nyang meututoe lam basa nyang ajaéb, ureuëng nyan kon jimeututoe bak manusia; teuma jimarit ngon Po teu Allah. Hana ureuëng nyang muphom peue nyang jipeugah, sabab Roh Allah kheueh nyang jeuet keusabab jipeugah hai-hai nyang teuma geuteupeue lé Po teu Allah. 3 Teuma keu ureuëng nyang peutrok haba nyang teuka nibak Allah, laju jipeutrok ubak manusia; keu teupeuteuga awaknyan, keu teubri seumangat bak awaknyan dan keu teupeumangat awaknyan. 4 Ureuëng nyang meututoe haba lam basa nyang ajaéb na kheueh jipeukong droe jih keudroe, seudangkan ureuëng nyang peusampoe haba nyang teuka nibak Allah jitulông jeumaáh mangat meutamah maju. 5 Keubiet gét lumpah na meunyoe Gata banmandum hase tameututoe ngon mubagoe basa nyang ajaéb. Teuma nyang paleng gét na kheueh meunyoe Gata hase tapeusampoe reuncana-reuncana Allah. Sabab ureuëng nyang peusampoe haba nibak Allah, leubeh rayeuk nibak ureuëng nyang meututoe ngon mubagoe basa nyang ajaéb; laén hai jih meunyoe ureuëng nyang hase jimeututoe ngon mubagoe basa nyang ajaéb nyan hase jipeugah peue nyang jimeututoe nyan, mangat banmandum jeumaáh meuteumé ceufaát jih. 6 Meunyoe ulôn miseue jih lôn jak bak gata dan ulôn meututoe ngon basa-basa nyang ajaéb, keupeue guna jih atra nyan keu gata? Mubacut pih hana meuguna nibak gata! Laén hai jih, meunyoe teupeugah saboh ungkapan nyang teuka nibak Allah, atawa ulôn peugah sapeue-sapeue keuhai Allah, atawa ulôn peusampoe haba nyang teuka nibak Allah, atawa ulôn seumeubeuet. 7 Alat-alat musik nyang hana meunyawöng mubacut pi, lagée suleng ngon keucapi, meunyoe nada-nada jih hana jipeumeuén ngon nyata, pakriban gob jiteupeu lagu peue nyang jipeumeuén nyan? 8 Saboh cuntoh nyang laén lom: meunyoe beureuguih jiyueb ban galak droe, soe ureuëng nyang ka siab keujijak muprang? 9 Meunan cit teuma ngon keumampuan Gata keu gata mariet ngon mubagoe basa nyang ajaéb. Meunyoe gata ngon keusanggopan nyan gata mariet ngon haba nyang hana meuteuntée, hana meusidroe ureuëng pih nyang hase jipeuphom peue nyang Gata peugah nyan. Tutoe haba nyan teuma gadôh hana meuteuntée. 10 Lam donya nyoe na basa nyang lumpah that jai, teuma hana meusaboh pih nibak basa-basa nyan nyang hana meumakna. 11 Teuma meunyoe ulôn hana muphom ngon basa nyang jipeugah lé sidroe-droe ureuëng, ngon lagée nyan, ureuëng nyang peuguna basa nyan na kheueh ureuëng aséng teuhadab ulôn; meunan cit ulôn nibak ureuëng nyan. 12 Meunyoe keu gata keudroe, ulôn kuteupeu gata meuharab that bumeuteumé karonya nibak Roh Allah. Teuma nyang paleng phon, gata useuha kheueh keugata mita keusanggopan nyang jeuet teutulông jeumaáh nyang hase maju. 13 Nyang kheueh sabab jih ureuëng nyang meututoe ngon basa nyang ajaéb, meuseuti jimeulakée ubak Po teu Allah mangat keujih nyan geubri keusanggopan keu jipeutrang peue nyang jipeugah nyan. 14 Sabab meunyoe ulôn meudoá ngon basa nyang ajaéb, roh ulôn beutôi meudoá, teuma pikeran ulôn hana jimubuet. 15 Ngon lagée nyan, peue nyang meuseuti ulôn peubuet? Nyoe nyang teuma ulôn peubuet: Ulôn teuma meudoá ngon roh ulôn, ulôn meudoá cit ngon pikeran lôn. Ulôn teuma meulagu ngon roh ulôn, teuma ulôn pih keuneuek meulagu ngon pikeran lôn. 16 Sabab meunyoe Gata tapeugah teurimong gaséh ubak Allah ngon roh gata mantong, dan na ureuëng laén nyang hana muphom basa ajaéb nyang teuka nibak Roh Po teu Allah nyan, ngon lagée nyan ureuëng laén nyan jipeugah, "Ulôn situju" ateueh doá syukoe gata nyan; sabab jih nyan hana jiteupeu peue nyang Gata peugah. 17 Bah kheueh doá teulakée teurimong gaséh nibak Tuhan nyan keubiet that gét, teuma doá nyan hana meuguna mubacut pi keu ureuëng laén. 18 Ulôn meuteurimong gaséh ubak Po teu Allah sabab ulôn keudroe hase lôn peugah haba lam mubagoe basa nyang ajaéb leubeh nibak Syedara banmandum. 19 Teuma, bak teumpat-teumpat meusapat keuteuseumah Tuhan, ulôn leubeh galak lôn peuguna limong boh tutoe haba nyang hase jimuphom lé gob nibak lôn peuguna meuribée-ribée tutoe haba lam basa nyang ajaéb. Ulôn leubeh galak lagée nyan mangat jeuet lôn peubeuet gob. 20 Syedara-syedara! Bék kheueh gata seumike lagée aneuëk manyak. Lam hai buet nyang jeuhet, bah kheueh gata lagée aneuëk miet. Teuma seumike, bah kheueh gata jeuet keu ureuëng rayeuk. 21 Lam Alkitab na teutuléh lagée nyoe, "Tuhan meufeureuman, 'Ngon peurantaraan ureuëng-ureuëng nyang meututoe ngon basa nyang hana muphom, Ulôn teuma kumariet ngon umat nyoe. Meunan cit ngon peurantaraan ureuëng aséng, Ulôn teuma meututoe haba ngon umat Lôn; bah kheueh meunan, awaknyan teutab hana jitem deungoe nyang ulôn peugah.' " 22 Teumanyoe teupeugah haba ngon meubagoe basa nyang ajaéb na kheueh sibagoe tanda ureuëng nyang hana meuiman, kon keue ureuëng nyang meuiman. Dan karonya nyang teupeusampoe reuncana Allah ubak manusia na kheueh tanda keu ureuëng nyang meuiman, kon keu ureuëng nyang hana meuiman. 23 Ngon sabab nyan, meunyoe seukira jih watée meusapat ngon jeumaáh jimeututoe ngon mubagoe basa nyang ajaéb, laju jiteuka keunan na meupadub droe ureuëng luwa, atawa nyang bukon ureuëng Kristen, teuntée ureuëng nyan teuma jisangka gata kapungoe banmandum! 24 Teuma meunyoe Gata banmandum tapeusampoe haba nibak Po teu Allah, laju jiteuka keunan ureuëng nyang kon Kristen atawa ureuëng luwa, teuma hai-hai nyang Gata peugah lé gata mandum teuma teutunyok ubak desya-desya ureuëng nyan dan teupeujeuet jihnyan sadar nibak desya-desya jih. 25 Hai-hai nyang teusöm lam até jih teuma jipeugah, sampoe ureuëng nyan teuma jipeumiyueb droe laju jiseumah Allah. Ureuëng nyan teuma meungaku bahwa Po teu Allah keubiet-keubiet na lamkawan awaknyan. 26 Ngon lagée nyan syedara-syedara, peue areuti jih keumandum nyan? Meunyoe gata meusapat keu taseumah Tuhan, na nyang meulagu, na nyang seumeubeuet, na nyang peugah sapeue-sapeue nyang teuka nibak Po teu Allah, na nyang meututoe lam basa nyang ajaéb, dan nyang jipeuglah peue nyang jipeugah nyan. Teuma banmandum nyan harôh jipeubuet keu seumeubeuet dan keu nyang keugét banmandum. 27 Meunyoe na keuneuk meututoe lam basa nyang ajaéb, meuseuti dua atawa paleng ramé lhée droe mantong seucara meugantoe-gantoe. Dan meuseuti na nyang peuglah peue nyang jipeugah lé ureuëng nyang meututoe nyan. 28 Meunyoe hana ureuëng nyang hase jipeugah makna tutoe haba awaknyan, teuma ureuëng-ureuëng nyang meututoe lam basa nyang ajaéb nyan harôh seungab lam iébadat jih. Bah kheueh awaknyan jimeututoe lam até mantong ubak Po teu Allah. 29 Dua atawa na lhée droe nyang na haba nibak Allah bah kheueh jipeutrok haba nyan dan nyang laén jipeutimang peue nyang jipeugah nyan. 30 Teuma meunyoe seukira jih haba nyang teuka nibak Po teu Allah teuka nibak ureuëng laén nyang na jiduek lam meusapat nyan, teuma ureuëng nyang teungoh peugah haba, bah kheueh jipiôh. 31 Ngon cara nyang lagée nyan, Syedara-syedara banmandum, sidroe deumi sidroe, jeuet jipeusampoe haba nyang teuka nibak Po teu Allah nyan; mangat banmandum hase jiteurimong peungajaran dan seumaken jeuet keu ureuëng meuiman. 32 Karonya nibak Roh Allah keuteupeusampoe haba nibak Allah hase teukeundali lé ureuëng nyang peusampoe haba nyan. 33 Po teu Allah na kheueh Allah nyang galak keuteureuteb; Gobnyan kon Allah nyang harôk keu buet nyang karu. Lagée nyang ka teupeugét lam banmandum jeumaáh Allah, 34 ureuëng inong bah kheueh jiseungab watée bak teumpat meusapat jeumaáh. Awaknyan hana jeuet jipeugah haba. Awaknyan hana jeuet jimat pimpénan; nyan sisuai ngon huköm agama. 35 Meunyoe awaknyan jikeuneuk teupeue sapeue-sapeue, inong nyan bah kheueh jitanyong hainyan bak lakoe jih di rumoh. Keubiet that malée meunyoe sidroe ureuëng inong jiteumanyong watée bak jeumaáh meusapat. 36 Peu kheueh feureuman Allah teuka nibak gata? Atawa keugata mantong feureuman nyan geupeusampoe? 37 Meunyoe na ureuëng nyang meurasa na karonya keu jipeusampoe haba nyang teuka nibak Po teu Allah, atawa jihnyan na karonya nyang laén nyang teuka nibak Po teu Allah, ureuëng nyan harôh sadar bahwa peue nyang ulôn tuléh nyoe na kheueh peurintah nibak Tuhan. 38 Teuma meunyoe na nyang hana jitem teurimong nyoe, bék kheueh gata pakoe ateueh ureuëng nyan. 39 Ngon sabab nyan, Syedara-syedara, gata useuha kheueh keu gata peusampoe haba nyang teuka nibak Po teu Allah, teuma bék kheueh gatatam ureuëng nyang keuneuk meututoe ngon mubagoe basa nyang ajaéb. 40 Teuma banmandum nyan harôh jipeubuet ngon jroh dan teuatoe.

1 Korintus 15

1 Dan jinoenyoe, Syedara-syedara, ulôn meuharab gatanyoe mandum taingat lom keuhai Haba Gét nyang teuka nibak Po teu Allah nyang ulôn bri tée keugata. Gata teurimong, dan meuiman ubak Almaseh sabab Haba Gét nyan. 2 Meunyoe gata tamumat nyang kong ubak peue nyang ulôn peugah nyan, ngon lagée nyan Haba Gét nyan jipeuseulamat gata; laén hai meunyoe Gata tapatéh ubak nyan hana peungeurtian. 3 Peue nyang ulôn peusampoe bak Syedara-syedara na kheueh nyang ka lôn teurimong cit teuma. Nyang paleng peunteng, lagée nyang na teutuléh lam Alkitab, lôn peusampoe bak gata bahwa Almaseh maté sabab lé desya-desya tanyoe; 4 bahwa Gobnyan teupasoe lam jrat, teuma bak uroe nyang keu lhée Gobnyan teupeu udeb lom teuma. Nyan pi na teutuléh lam Alkitab. 5 Ulôn peugah lom ubak gata bahwa Almaseh nyang teupeu-udeb lom teuma nyan geupeuleumah lom droe Gobnyan ubak Petrus, dan óh lheueh nyan ubak bandua blaih droe rasui. 6 Óh lheueh nyan geupeuleumah teuma droe Gobnyan ubak leubeh nibak limong reutôh droe murit Gobnyan sigoe guih. Mantong ramé lamkawan awaknyan nyang mantong udeb trok bak saát nyoe, teuma na padub droe nyang ka meuninggai donya. 7 Óh ka lheueh Almaseh geupeuleumah droe ubak Yakobus dan óh lheueh nyan ubak mandum rasui. 8 Nyang paleng akhé geupeuleumah droe ubak ulôn -- ulôn nyang lagée aneuëk manyak nyang lahé kon bak watée jih! 9 Ulôn na kheueh rasui Tuhan nyang paleng miyueb. Ulôn hana patot teupeugah rasui, sabab ulôn ka lôn iénanya jeumaáh Allah. 10 Teuma sabab rakhmat Allah ulôn jeuet lagée keuadaan ulôn bak watée nyoe. Dan hana kheueh sia-sia Allah geupeue amphon ulôn. Teuma ulôn kheueh nyang mubuet nyang leubeh brat nibak mandum rasui-rasui nyang laén. Teuma nyan kon useuha ulôn; nyan na kheueh useuha Po teu Allah nyang geugaséh ulôn dan nyang mubuet meusajan-sajan ngon ulôn. 11 Ngon lagée nyan, nibak soemantong gata teurimong Haba Gét nyan -- peu kheueh nibak ulôn atawa nibak rasui-rasui nyang laén -- nyan hana jeuet keusoai. Nyang peunteng kamoe bri tée Haba Gét nyan dan Gata meuiman. 12 Meunyoe nyang kamoe bri tée nyan bahwa Almaseh ka teupeu udeb lom teuma nibak maté, pakon na lamkawan gata nyang peugah bahwa ureuëng maté hana teupeue udeb le? 13 Meunyoe keubiet ureuëng maté hana teupeu udeb lom teuma, nyan saban cit Almaseh hana teupeu udeb lom teuma nibak maté. 14 Dan meunyoe sikeubiet jih Almaseh hana teupeu udeb lom nibak maté, ngon lagée nyan hana guna jih kamoe peugah peue-peue mantong dan hana teuma guna jih gata meuiman, sabab keupeucayaan gata nyan hana dasai sapeue. 15 Leubeh nibak nyan, nyata kheueh bahwa kamoe meusulet keuhai Po teu Allah, sabab kamoe bri tée bahwa Allah ka geupeu udeb lom teuma Almaseh nibak maté, padahai Allah hana geupeu udeb Gobnyan lom teuma -- meunyoe keubiet ureuëng maté hana geupeu udeb lom teuma! 16 Sabab meunyoe ureuëng maté hana teupeu udeb lom teuma, ngon lagée nyan Almaseh pih hana teupeu udeb lom teuma nibak maté. 17 Dan meunyoe Almaseh hana teupeu udeb lom teuma nibak maté ngon lagée nyang gata peucaya nyan na kheueh lumpo nyang hana meuguna; nyan saban cit gata mantong lam keuadaan meudesya dan hana harapan mubacut pi. 18 Nyan meumakna teuma bahwa ureuëng-ureuëng Kristen nyang ka meuninggai donya, meunan cit hana harapan sapeue. 19 Meunyoe harapan tanyoe ubak Almaseh teubataih bak udeb geutanyoe lam donya nyoe mantong, teuma nibak banmandum umat manusia nyang na lam donya nyoe, tanyoe kheueh nyang paleng malang! 20 Teuma ngon lagée nyan deuh kheueh Almaseh ka teupeu udeb lom teuma nibak maté. Nyoe kheueh jaminan jih bahwa ureuëng-ureuëng nyang ka maté teuma teupeu udeb lom teuma. 21 Sabab maté nyang jitamong lam donya nyoe ngon peurantaraan sidroe ureuëng, meunan cit ngon udeb lom teuma nibak maté nyang geubri keu manusia ngon peurantaraan sidroe ureuëng teuma. 22 Lagée tateupeue banmandum manusia maté sabab jitamong saboh ngon Nabi Adam, meunan cit ngon mandum nyang geupeu udeb, sabab jitamong saboh ngon Almaseh. 23 Teuma maséng-maséng geupeu udeb meunurot gileran jih: nyang phon-phon that Almaseh; óh lheueh nyan singoh watée Gobnyan teuka lom teuma, teuka gileran lé ureuëng-ureuëng nyang jitamong lam atra Almaseh. 24 Óh lheueh nyan barô kheueh teuka uroe kiamat. Bak watée nyan Almaseh teuma geupeu taklôk banmandum peumeurintahan, banmandum keukuasaan dan banmandum nyang teuga-teuga; laju Gobnyan geupeujok keukuasaan geuhnyan sibagoe Raja, ubak Allah, Bapak geutanyoe. 25 Almaseh meuseuti geumat sabe peumeurintah sampoe Allah geupeujeuet banmandum musoh Almaseh taklôk ubak Almaseh. 26 Musoh nyang paleng akhé nyang teuma geupeu taklôk na kheueh maté. 27 Lam Alkitab na teutuléh lagée nyoe, "Allah ka geupeujeuet peue-peue mantong taklôk ubak Gobnyan." Deuh kheueh disinoe bahwa nyang teupeugah ngon "peue-peue mantong" nyan hana jitamong Allah keudroe, nyang peujeuet peue-peue mantong nyan taklôk ubak Almaseh. 28 Teuma óh ka lheueh banmandum nyan teupeutaklok u miyueb peumeurintahan Almaseh, ngon lagée nyan Gobnyan keudroe, na kheueh Aneuëk Allah, geupeu taklôk droe Gobnyan ubak Allah nyang ka geupeujeuet peue-peue mantong taklôk ubak Gobnyan. Ngon lagée nyan Allah keudroe pi nyang peurintah banmandum nyan. 29 Meunyoe ureuëng maté hana geupeu udeb lom teuma, pakon na ureuëng nyang teupumanö keu ureuëng maté? Keupeue guna jih awaknyan jipeubuet hai nyan? Meunyoe keubiet ureuëng maté sagai-sagai hana teupeu udeb le, keupeue guna jih awaknyan jipeubuet hai nyan? 30 Dan keupeue teuma guna jih kamoe meuhadab ngon bahya tieb-tieb watée? 31 Syedara-syedara! Tieb-tieb uroe ulôn ék lôn teun deurita sabab ulôn bangga ateueh udeb gata ngon sabab ka tameuiman ubak Isa Almaseh, Tuhan tanyoe. 32 Meunyoe nyan teuma keuhai manusia mantong, peue laba jih keu ulôn lôn meujuang siulah-ulah lôn lawan beulatang-beulatang juah nyang na lam banda nyoe, di Efesus? Meunyoe keubiet ureuëng maté hana teupeu udeb lom teuma, ngon lagée nyan, leubeh gét taseutôt peue nyang jipeugah lé pribasa nyoe: "Jak tanyoe tamakheun ngon tajieb ié tapeulalo até ban galak droe, sabab singoh tanyoe teuma maté." 33 Bék kheueh gata keunong tipée! Meurakan ngon brok teuma jipeureulôh nyang jroh. 34 Sadar kheueh bak saát nyoe, dan bék le gata peubuet desya. Nyang sibeuna jih gata harôh malée, bahwa lamkawan gata na nyang gohlom jituri keu Po teu Allah. 35 Mungken na nyang teumanyong, "Pakriban kheueh ureuëng maté teupeu udeb lom teuma? Tuboh nyang pakriban kheueh nyang teubri keu awaknyan, óh ka lheueh awaknyan teupeu udeb lom teuma?" 36 Bangai lumpah na! Meunyoe Gata tapula bijéh lam tanoh, bijéh nyan hana teuma timoh, meunyoe bijéh nyan gohlom maté leubeh ilée. 37 Dan bijéh nyang Gata pula lam tanoh nyan -- mungken bijéh gandom atawa bijéh laén -- na kheueh aneuëk bijéh nyan mantong, kon mandum seunaman nyang timoh singoh. 38 Allah keudroe nyang bri keu bijéh nyan beuntuek nyang meunurot pandangan Gobnyan gét keu seunaman nyan. Keu tieb-tieb rupa bijéh, Allah geubri beuntuek seunaman nyan keudroe jih maséng-maséng. 39 Tubôh makhlok-makhlok nyang meunyawöng hana mandum nyan sa. Manusia na saboh jeunéh tuboh, meunan cit keu beulatang-beulatang na saboh jeunéh tuboh nyang laén; meunan cit cicém-cicém laén teuma jeunéh tuboh jih, dan eungkot-eungkot laén teuma jeunéh tuboh jih. 40 Meunan cit teuma ngon mubagoe beunda nyang na dilangét dan meunan cit nyang na dibumoe. Mubagoe beunda nyang na dilangét maséng-maséng na keulagak jih keudroe, dan beunda-beunda nyang na dibumoe pih lagée nyan cit teuma. 41 Gét mata uroe meulaén ngon gét buleuen. Meunan cit ngon bintang-bintang pi na keugét jih keudroe. Dan bintang-bintang nyan maséng-maséng laén teuma gét jih. 42 Meunan cit hai jih singoh keu ureuëng-ureuëng nyang ka maté teupeu udeb lom teuma. Tuboh nyang ka teukubu nyan na kheueh tuboh hase jeuet keu brok, teuma tuboh nyang teupeu udeb lom teuma, na kheueh tuboh nyang hana jitem rusak. 43 Bak watée tuboh nyan teupeutamong lam jrat, tuboh nyan brok dan leumoh; teuma bak watée jihnyan teupeu udeb lom teuma, na kheueh tuboh nyang gét dan teuga. 44 Watée teupeutamong lam jrat, tuboh nyan na kheueh tuboh donya; teuma óh ka lheueh teupeu udeb lom teuma, tuboh nyan na kheueh tuboh nyang geubri lé Roh Allah. Na tuboh nyang nibak donya, na teuma tuboh nyang nibak Po teu Allah. 45 Lam Alkitab na teutuléh lagée nyoe, "Manusia nyang phon, na kheueh Nabi Adam, ka jeuet keu makhlok nyang udeb," teuma Nabi Adam nyang paleng akhé na kheueh Roh nyang jibri udeb. 46 Nyang teuka leubeh ilée na kheueh jasmani, kon nyang rohani. Nyang rohani teuka jih teuma óh dudoe. 47 Nabi Adam nyang phon teupeujeuet nibak tanoh, teuma Nabi Adam nyang keudua asai jih lam syeuruga. 48 Ureuëng-ureuëng nyang na lam donya nyoe na kheueh lagée Nabi Adam nyang phon, nyang geupeujeuet nibak tanoh, teuma ureuëng-ureuëng syeuruga na kheueh lagée Gobnyan nyang teuka nibak syeuruga. 49 Lagée geutanyoe bak watée nyoe na kheueh lagée Nabi Adam nyang geupeujeuet nibak tanoh, singoh tanyoe teuma jeuet lagée Gobnyan nyang nibak syeuruga nyan. 50 Meukeusut ulôn, Syedara-syedara, na kheueh: tuboh nyang geupeujeuet nibak darah ngon asoe, hana hase jitamong lam Donya Barô Allah; dan tuboh nyang hase maté hana jeuet keu siumu masa. 51 Ngieng kheueh rahsia nyoe: Hana banmandum tanyoe maté, teuma tanyoe banmandum meu-ubah. 52 Hainyan teujadi lam sikeujab ngon sikrék mata, bak watée sangka kala teuyueb keu nyang paleng akhé. Sabab bak watée teudeungoe su sangka kala nyan, ureuëng-ureuëng maté teupeu udeb lom teuma ngon tuboh nyang abadi, dan tanyoe banmandum teuma geu-ubah. 53 Tuboh tanyoe nyang hase maté nyoe meuseuti teugantoe ngon tuboh nyang hana hase maté, dan tuboh nyang nibak donya meuseuti teugantoe ngon tuboh nyang nibak syeuruga. 54 Meunyoe tuboh nyang hase maté ka meuteumé teugantoe ngon tuboh nyang hana hase maté, dan tuboh nyang nibak donya ka teugantoe ngon tuboh nyang nibak syeuruga, bak watée nyan barô kheueh teujadi peue nyang ka teutuléh lam Alkitab, "Maté ka geupeu hanco; meunang ka meuteumé!" 55 "Hei mawöt, hoka meunang gata nyan? Hei mawöt, dipat kheueh bisa gata?" 56 Bisa mawöt na kheueh desya, dan desya jipeujak peuranan jih rot huköm agama. 57 Teuma syukoe that ubak Po teu Allah; Gobnyan ka geubri keugeutanyoe keumeunangan rot Isa Almaseh Tuhan geutanyoe! 58 Ngon sabab nyan, Syedara-syedara nyang lon gaséh, bah kheueh gata teuga dan teugoh. Mubuet kheueh bék tinggai keu Tuhan ngon biet-biet sunggoh, sabab gata tateupeue bahwa banmandum nyang gata peubuet nyan na kheueh keu Tuhan, nyan hana teuma peucuma.

1 Korintus 16

1 Jinoenyoe keuhai péng nyang keuneuk gata sumbang keuseusamoe ureuëng Kristen, jinoenyoe ulôn peugah bak gata mangat gata peubuet saban lagée peutunyok nyang ka ulôn jok bak jeumaáh-jeumaáh nyang na di Galatia. 2 Bak uroe phon tieb-tieb uroe aleuhat, bah kheueh Gata banmandum takeubah péng, maséng-maséng sisuai ngon padubna hase hareukat jih. Keubah kheueh péng nyan sampoe ulôn teuka, ngon lagée nyan watée trok bak watée jih singoh hana peureulée le gata peusapat. 3 Teuma meunyoe ulôn ka trok, ulôn teuma lôn yue jak ureuëng-ureuëng nyang ka gata situju. Ulôn kujok bak ureuëng nyan surat peu intat, mangat awaknyan jiba péng sumbangan nyan u Yerusalem. 4 Dan meunyoe deuh jih gét ulôn pih kujak ngon awaknyan, teuma ulôn kujak meusajan-sajan ngon awaknyan. 5 Ulôn lôn jaksaweue gata óh ka lheueh lôn jak rot Mekadonia, sabab ulôn kana niet keuneuk jak rot nyan. 6 Jeuet mantong ulôn tinggai sikeujab ngon gata, mungken watée musém sijuek. Óh ka lheueh nyan gata meuteumé tatulông ulôn watée ulôn jak u teumpat laén. 7 Ulôn hana kutem kusaweue gata meunyoe keuneuk piôh mantong. Tuhan geubri idhin keulôn, ulôn keuneuk tinggai beutreb bacut ngon gata. 8 Teungoh lôn tinggai lam banda nyoe, di Efesus, trok ubak uroe Pentakosta. 9 Jai that nyang watée jih nibak teumpat nyoe nyang jeuet teupeubuet keu buet-buet nyang na manfaát, bah pi jai that teuma ureuëng nyang hana galak. 10 Meunyoe Timotius teuka, sambot kheueh jihnyan ngon gét mangat jihnyan meurasa harok lamkawan gata, sabab jihnyan saban lagée ulôn nyang mubuet keu Tuhan. 11 Bék sampoe na ureuëng nyang jianggab enteng keu jihnyan. Tulông kheueh jihnyan mangat jihnyan hase jiwoe lom teuma ubak ulôn ngon seulamat, sabab ulôn kupreh jihnyan jiwoe meusajan ngon syedara-syedara nyang laén. 12 Keuhai syedara tanyoe nyang nan jih Apolos, kana padub goe ulôn yue bak jih mangat jihnyan meusajan ngon syedara nyang laén jijak saweue gata. Teuma jihnyan gohlom meurasa yakén bahwa jihnyan meuseuti jijak jinoenyoe. Teuma meunyoe na watée singoh, ka teuntée jihnyan teuma jijak. 13 Beuaté-até dan waspada kheueh gata dan beukong lam udeb gata sibagoe ureuëng Kristen. Meutindak kheueh ngon beuhe dan beuteuga kheueh. 14 Banmandum nyang gata peubuet, peubuet kheueh ngon gaséh. 15 Gata teuntée taturi keu Stefanus dan keuluwarga jih; awaknyan nyang phon-phon that jeuet keu ureuëng Kristen di Akhaya. Awaknyan ngon sipeunoh até jimubuet khusos jilayani umat Allah. 16 Ulôn yue bak gata ngon biet-biet mangat gata seutôt pimpénan ureuëng-ureuëng nyang lagée nyan, dan ureuëng-ureuëng laén nyang jimubuet sajan dan jilayani meusajan ngon awaknyan. 17 Ulôn galak that ngon teuka Stefanus nyan, Fortunatus dan Akhaikus. Awaknyan na kheueh geunantoe gata nibak ulôn. 18 Awaknyan ka jipeujeuet até ulôn mangat lumpah na, lagée awaknyan ka jipeumangat até gata. Ureuëng-ureuëng nyang lagée nyan meuseuti teuhareuga. 19 Jeumaáh-jeumaáh nyang na di Asia jipeutrok saleuem keu gata. Akwila dan Priskila dan jeumaáh nyang meugumpôi dirumoh awaknyan jikirém saleuem Kristen nyang that-that geumbira. 20 Banmandum syedara nyang na disinoe jipeutrok saleuem keu gata. Meubôt-bôt saleuem kheueh ngon meusra sibagoe syedara lam Kristen. 21 Ulôn tamah disinoe saleuem nyang lôn tuléh keudroe: saleuem nibak ulôn, Paulus. 22 Ureuëng nyang hana jigaséh keu Tuhan, bah kheueh jihnyan keunong kutok! Maranatha -- Tuhan kamoe, teuka kheueh! 23 Seumoga Tuhan Isa geubri beureukat keu Gata. 24 Teurimong gaséh keu gata mandum nyang meusaboh ngon Isa Almaseh.

2 Korintus 1

1 Syedara-syedara jeumaáh Allah nyang na di Korintus dan banmandum jeumaáh Allah nyang na di Akhaya. Ulôn, Paulus, rasui Isa Almaseh, nyang teuangkat ateueh keuheundak Po teu Allah, meusajan-sajan ngon syedara tanyoe Timotius, 2 meuharab seumoga Po teu Allah Bapak geutanyoe dan Tuhan Isa Almaseh geubri beureukat dan seujahteura keu gata banmandum. 3 Teupujoe kheueh Allah, Bapak nibak Tuhan tanyoe Isa Almaseh. Gobnyan Bapak nyang paleng gét até, dan Gobnyan Allah nyang geubri teunaga batén keu manusia. 4 Gobnyan geupeukong baten kamoe bak tieb-tieb kamoe meuteumé susah, mangat jeuet ngon teunaga nyang kamoe teurimong nibak Po teu Allah nyan, kamoe jeuet kamoe peukong baten banmandum ureuëng nyang lam apoh apah. 5 Deurita-deurita nyang geurasa lé Almaseh ka jai that kamoe rasa. Dan rot Almaseh cit teuma, baten kamoe keubiet that-that geupeukong. 6 Meunyoe kamoe meurasa lam susah, nyan na kheueh sibagoe teupeukong baten gata, deumi gata seulamat. Meunyoe baten kamoe geupeukong, ngon lagée nyan gata pi meusajan ngon kamoe teupeukong sampoe gata jeuet keutabah watée tateurimong hai-hai nyang susah lagée nyang kamoe rasanyoe. 7 Kamoe sabe yakén dan hántom na ragu-ragu ateueh Gata, sabab kamoe meuteupeu bahwa gata meusajan meudeurita ngon kamoe. Ngon sabab nyan gata pi meusajan teupeukong sinoe ngon kamoe. 8 Syedara-syedara! Kamoe meuharab gata beutateupeue keuhai susah kamoe nyang kamoe rasa di wilayah Asia. Deurita nyang kamoe tanggong nyoe keubiet that jiteugon kamoe, sampoe nibak kamoe ka hana meuharab le keu udeb nyoe; 9 rasa jih ka lagée jipeurhot huköman maté mantong. Teuma hainyan jeuet mangat kamoe bék meusadeue bak teunaga droe teuh keudroe, teuma ubak Allah nyang peu-udeb ureuëng maté. 10 Gobnyan kheueh nyang ka geupeuseulamat kamoe nibak bahya maté nyang paleng rayeuk. Dan Gobnyan cit teuma nyang peuseulamat kamoe singoh bak uroe-uroe pagée, sabab, ubak Gobnyan kheueh kamoe meuharab. 11 Kamoe yakén bahwa ngon doá-doá nyang na keu kamoe, Po teu Allah teuma geupeu seulamat kamoe nibak bahaya. Allah geutem geubri beureukat bak kamoe sibagoe geujaweueb ateueh jai that doá keu kamoe, ngon sabab nyan jai that ureuëng jilakée teurimong gaséh ubak Po teu Allah. 12 Kamoe bangga, sabab até nurani kamoe teupeuyakén kamoe bahwa udeb kamoe lam donya nyoe -- nyang paleng peunteng hubongan kamoe ngon gata ka kamoe peujak ngon ikhlaih dan murni. Kamoe peubuet nyan, kon ngon keubijaksanaan manusia, teuma ngon keumampuan nyang geubri lé Po teu Allah. 13 Nyang kamoe tuléh keu gata na kheueh keuhai-hai nyang hase gata baca dan muphom. Jinoenyoe gata hana muphom keu kamoe nyang sibeuna jih, teuma ulôn harab singoh gata biet-biet muphom keu kamoe. Ngon lagée nyan, watée Tuhan Isa teuka singoh, gata teuma bangga ateueh kamoe, lagée kamoe pih that-that bangga ateueh gata. 15 Sabab ngon keuyakénan nyan kheueh yoh awaikon ulôn ka lôn reuncana keuneuk jak saweue gata mangat keu gata meuteumé beureukat dua goe lipat. 16 Ulôn na meukeusut keuneuk saweue gata watée ulôn jak u Makedonia dan lôn piôh lom bak gata watée ulôn woe lom teuma, mangat gata jeuet tatulông ulôn watée lônjak u Yudea. 17 Teuma niet ulôn nyan ka lôn ubah; teuma, peu kheueh ngon lagée nyan sibagoe peutunyok ulôn nyoe hana kong peundirian lôn? Watée lôn peugét reuncana, peu kheueh reuncana nyang lôn peugét ateueh keuheundak droe lôn keudroe, sikeujab jipeugah, "Nyoe" dan "Kon"? 18 Deumi Allah nyang jeuet teupeucaya, janji ulôn ubak Gata kon kheueh "Nyoe" dan "Kon". 19 Sabab Isa Almaseh, Aneuëk Allah, nyang jipeusampoe ubak gata lé Silas, Timotius, dan ulôn keudroe kon kheueh ureuëng "Nyoe" dan "Kon". Nyang beutôi nyan kheueh jeunaweueb nibak Po teu Allah "Nyoe". 20 Sabab rot Gobnyan Allah ka geupeugah "Nyoe" keubanmandum janji Gobnyan. Ngon dasai nyan kheueh tanyoe tapeugah "Amin" ubak Po teu Allah sabab Isa Almaseh. Kamoe peubuet nyang lagée nyan mangat Allah teupeumulia. 21 Allah keudroe nyang peujeuet kamoe dan Syedara mandum yakén ngon kong tameusaboh ngon Almaseh; Gobnyan kheueh teuma nyang piléh tanyoe khusos keu droe Gobnyan. 22 Keu nyang nyan Po teu Allah ka geupeusah tanyoe jeuet keumilék dan geubri Roh Gobnyan lam até geutanyoe sibagoe jaminan bahwa Gobnyan teuma geubri ubak geutanyoe banmandum nyang ka geupeu janji nyan. 23 Allah saksi ulôn -- sabab Gobnyan geuteupeue peue nyang na lam até lôn -- bahwa ulôn hana jadéh lônjak u Korintus, sabab ulôn hana kutem até gata jeuet keuseudeh. 24 Ulôn hana lôn paksa gata keuhai gata peue nyang meuseuti gata meuiman, sabab gata keubiet ka that-that tameuiman ubak Almaseh. Ulôn teuma lôn mubuet meusajan ngon gata mangat gata seumaken bahgia.

2 Korintus 2

1 Ngon sababnyan ulôn ka lôn cok keuputosan hana lônjak le bak gata ngon kunjongan teupeusabab gata rhot bak seudeh. 2 Sabab meunyoe ulôn kupeuseudeh gata, soe teuma nyang hase jipeumangat até lôn, meunyoe kon ureuëng-ureuëng nyan cit teuma nyang ka lôn peuseudeh até jih nyan? 3 Nyang kheueh sabab jih ulôn tuléh surat nyan keu gata. Ulôn hana kutem jak saweue gata, laju gata peuseudeh até lôn padahai gata kheueh nyang peumangat até lôn. Sabab ulôn biet-biet yakén meunyoe ulôn mangat até, teuma gata banmandum pih mangat cit até. 4 Ulôn teumuléh keu gata ngon até nyang seudeh dan brat, jai that-that lôn ro ié mata. Nyang ulôn meukeusut kon gata pih beuseudeh, teuma gata sadar bahwa ulôn biet-biet lôn gaséh keugata. 5 Meunyoe na ureuëng nyang jeuet keusabab ureuëng laén seudeh, teuma hainyan nyang jipeubuet kon ateueh ulôn, teuma ateueh Syedara banmandum atawa paleng hana ateueh siladum nyang na lamkawan Gata. Ulôn hana kutem lôn meukreueh ateueh awaknyan. 6 Keu ureuëng nyang lagée nyan, huköman nyang teupeu rhot ateueh ureuëng nyan lé ureuëng nyang jai di teungoh-teungoh Gata, kaseb. 7 Jinoenyoe gata meuseuti tapeu amphon jihnyan dan tabri seumangat lom keu jihnyan mangat jihnyan bék treb-treb lam seudeh até sampoe putôh asa. 8 Ngon sabab nyan ulôn lakée, mangat gata tunyok lom ubak jihnyan bahwa gata biet-biet gaséh keu awaknyan. 9 Ulôn tuléh surat nyan keu gata ngon meukeusut keu lôn ujoe gata, peu kheueh gata sabe tatem seutôt banmandum peue-peue nyang ulôn tunyok. 10 Meunyoe gata tapeu amphon ureuëng-ureuëng nyang ka jipeubuet salah ateueh gata teuma ulôn pih lôn peu amphon keu ureuëng nyan. Sabab peue nyang ka lôn peu amphon -- meunyoe keubiet na nyang peureulée teupeu amphon -- nyan ulôn peu amphon dikeue Almaseh deumi keu nyang keugét gata. 11 Ulôn peubuet nyang lagée nyan mangat Iblih bék sampoe jicok keuseumpatan jikuasa ateueh geutanyoe; sabab tanyoe tateupeue reuncana-reuncana jih nyan. 12 Bak watée ulôn ka trok u Troas ngon meukeusut keuneuk peusampoe Haba Gét keuhai Almaseh, Tuhan ka geubuka jalan keu ulôn keu lôn mubuet bak teumpat nyan. 13 Teuma ulôn hana galak sabab hana meurumpok ngon syedara tanyoe Titus nyang na nibak teumpat nyan. Ngon lagée nyan laju lôn lakée droe bak ureuëng-ureuëng nyang na nibak teumpat nyan óh lheueh nyan lôn jak laju u Makedonia. 14 Teuma meusyukoe kheueh ubak Po teu Allah! Gobnyan sabe geupimpén kamoe meusajan lam pawai keumeunangan Almaseh sabab kamoe udeb meusaboh ngon Gobnyan. Allah geupeu guna kamoe mangat haba keuhai Almaseh meutabu lagée mubée nyang harom meusipreuk bansaboh nyan. 15 Sabab kamoe na kheueh lagée bée keumeunyan nyang mangat bée, nyang geutot lé Almaseh keu Po teu Allah. Keu ureuëng-ureuëng nyang teungoh jijak ubak keuhancoran, kamoe nyoe lagée bée ureuëng maté nyang seumeupoh; teuma keu ureuëng-ureuëng nyang teungoh teupeuseulamat, kamoe nyoe lagée bée harôm nyang teuba udeb. Ngon lagée nyan, soe kheueh nyang hase jipeupeunoh keuwajéban nyoe? 17 Kamoe hana lagée ureuëng ramé nyang jingui haba nibak Allah lagée barang nyang teupeubloe. Tujuan-tujuan kamoe na kheueh gleh, sabab kamoe geubri tugaih lé Po teu Allah. Dan Allah keudroe geukalon bahwa kamoe nyang jak peusampoe haba nyan sibagoe hamba-hamba Almaseh.

2 Korintus 3

1 Peu kheueh nyoe, deuh jih kamoe pujoe-pujoe droe kamoe lom? Atawa kamoe peureulée surat pujoe keu gata, atawa nibak gata, lagée nyang jipeureulée lé ureuëng-ureuëng laén? 2 Gata keudroe kheueh surat pujoe kamoe, nyang jeuet teutuléh lam até kamoe dan nyang jeuet jiteupeu ngon jibaca lé tieb-tieb ureuëng. 3 Awaknyan keudroe deuh jikalon bahwa Gata na kheueh surat nyang geutuléh lé Almaseh, nyang teukirém meulalu kamoe. Surat nyan teutuléh kon ngon daweuet, teuma ngon Roh Allah nyang udeb; kon teuma ateueh batée tuléh, teuma lam até manusia. 4 Kamoe peugah lagée nyan sabab keuyakénan kamoe keu Po teu Allah rot Almaseh. 5 Nibak kamoe hana sapeue alasan pi keuteupeugah bahwa kamoe hase kamoe peubuet buet nyoe, teuma Allah nyang bri keumampuan nyan ubak kamoe. 6 Gobnyan kheueh nyang peujeuet kamoe sanggob jeuet keupeulayan keusaboh peujanjian nyang barô; peujanjian nyang meugantueng ubak Roh Allah, kon bak huköm nyang teutuléh. Sabab nyang teutuléh nyan teuba ubak maté, seudangkan Roh Allah teubri udeb. 7 Watée peujanjian nyang teuba ubak maté nyan teupeugét dan teu uke ateueh batée, cahya Po teu Allah hu muble-ble bak muka Nabi Musa. Cahaya nyan keubiet that trang sampoe ureuëng Israel hana ék jipandang bak muka Nabi Musa, sampoe jeuet cahya nyang nibak muka geuh nyan ka jipeuphon layée bak watée nyan. Nyan, meunyoe teupeugét janji nyang jiba ubak maté nyan teureuseumi ngon ceumeurlang nyang gét that rayeuk, 8 teuntée teupeugét peujanjian nyang geubri lé Roh Allah, teureuseumi ngon leubeh ceumeurlang lom. 9 Meunyoe peujanjian nyang teuhuköm manusia nyan keubit that ceumeurlang, ka teuntée nyang leubeh ceumeurlang nyang teupeu mungken manusia jimeugét lom teuma ngon Po teu Allah. 10 Peue nyang yoh ilée ceumeurlang, ka hana ceumeurlang le sabab ngon ceumeurlang nyang na bak saát nyoe. 11 Meunyoe sapeue-sapeue nyang hase meuteun teuma sikeujab, meunan ceumeurlang, ka teuntée sapeue-sapeue nyang siumu masa leubeh ceumeurlang lom teuma. 12 Lé sabab kamoe na harapan nyang lagée nyan, nyang kheueh jeuet kamoe jeuet meututoe lagée nyan bagoe. 13 Kamoe kon lagée Nabi Musa nyang geutôb ngon silubong muka geuh mangat bék deuh jikalon le bansa Israel cahya Tuhan nyang teungoh lon dan teusampôh bak muka gobnyan. 14 Pikeran awaknyan ka teutôb. Dan trok án uroenyoe pi pikeran awaknyan mantong teutôb ngon sulubong watée awaknyan jibeuet kitab-kitab keuhai peujanjian nyang ka treb nyan. Sulubong nyan hase teubuka meunyoe ureuëng ka meusaboh ngon Almaseh. 15 Jinoenyoe pi, watée awaknyan jibeuet kitab-kitab Nabi Musa, sulubong nyan mantong teutôb pikeran awaknyan. 16 Teuma meunyoe sidroe-droe ureuëng jiteuka jijak meuhadab bak Tuhan, sulubong nyan pi teubeuôt nibak muka awaknyan. 17 Nyan, Tuhan nyang teupeugah disinoe na kheueh Roh. Dan dipat mantong Roh Tuhan na, nibak teumpat nyan pih na keumeurdehkaan. 18 Jinoenyoe muka tanyoe banmandum hana teutôb ngon sulubong, dan tanyoe peuhu cahya ceumerlang Tuhan Isa. Dan ngon sabab nyan tanyoe hana putôh-putôh jiubah jeuet lagée Gobnyan; maken treb tanyoe maken ceumeurlang. Ceumeurlang nyan teuka jih nibak Roh, dan Roh nyan na kheueh Tuhan.

2 Korintus 4

1 Kamoe peubuet-buet nyang lagée nyoe sabab keumurahan até Po teu Allah. Nyang kheueh sabab jih kamoenyoe hana putôh asa. 2 Kamoe hana kamoe peuguna cara-cara lam seupôt nyang jiba malée. Kamoe hana kamoe tem mubuet ngon ilat atawa kamoe puta balek feureuman Allah. Kamoe layani Allah ngon até nyang gleh lagée nyang geu lakée. Ngon sabab nyan, kamoe meuharab banmandum ureuëng jitilek kamoe ngon gét lam até nurani jih. 3 Meunyoe Haba Gét nyang kamoe peusampoe nyoe gohlom cit jituóh muphom, teuma ureuëng-ureuëng nyang teungoh jituju ubak keuhancoran kheueh nyang hana jituóh muphom. 4 Ilah jeuhet nyang kuasa donya nyoe nyang tôb pikeran ureuëng-ureuëng nyang hana meuiman nyan. Jihnyan kheueh nyang tam-tam awaknyan mangat awaknyan hana jingieng trang nyang na lam Haba Gét nyan na kheueh keuhai keubeusaran Almaseh, sibagoe haba nibak Po teu Allah. 5 Haba nyang kamoe peusampoe nyan kon kheueh haba keuhai kamoe keudroe. Haba nyan na kheueh haba keuhai Isa Almaseh; bahwa Gobnyan na kheueh Tuhan; dan kamoe na kheueh hamba-hamba gata sabab lé Gobnyan. 6 Allah meufeureuman, "Bah kheueh nibak lam seupôt jiteubiet trang," Allah nyan cit teuma nyang peuteubiet trang nyan lam até geutanyoe, mangat pikeran tanyoe jeuet keutrang keu teumuphom keuceumeurlangan Allah nyang meucahya bak muka Almaseh. 7 Teuma atra rohani nyang ceudahnyan kamoe ba bak droe kamoe nyang hana meuyuem nyoe nyang teupeugét nibak tanoh. Ngon lagée nyan deuh kheueh bahwa keubeusaran kuasa nyan teuduek nibak Po teu Allah dan kon bak kamoe. 8 Kamoe jiheuntam wie ngon uneuen, teuma kamoe teutab hana meuseupet. Kamoe bingong, teuma hana sampoe putôh asa. 9 Jai that nyang jimeumusoh ngon kamoe, teuma kamoe hántom na kamoe tinggai sidroe. Dan bah kheueh kamoe kayém that jipoh sampoe reubah, teuma kamoe hana maté. 10 Sabe kamoe rasa Isa nyang ka maté nyan na nibak tuboh kamoe, mangat udeb geuh pi leubeh deuh nibak tuboh kamoe. 11 Simantong kamoe udeb, kamoe sabe jiancam lé maté sabab Isa, ngon lagée nyan udeb Isa pih jeuet teupeugah bak tuboh kamoe nyang fana nyoe. 12 Nyoe saban cit bahwa lam tuboh kamoe maté nyan teungoh biet-biet jipeujak peuranan jih, teuma kamoe galak that bahwa udeb nyang teungoh biet-biet lam tuboh gata. 13 Lam Alkitab na teutuléh lagée nyoe, "Ulôn kupatéh, nyang kheueh sabab jih ulôn peugah haba." Nyan, ngon seumangat meuiman nyang lagée nyan cit teuma, kamoe peugah haba sabab kamoe meuiman. 14 Kamoe yakén bahwa Allah nyang ka geupeu udeb lom teuma Tuhan Isa, teuma geupeu udeb kamoe ngon Isa, dan teuba gata dan kamoe ukeue Gobnyan. 15 Banmandum nyan na kheueh keu keupeuntengan gata. Sabab seumaken jai ureuëng nyang jirasa geunaséh Allah, seumaken jai teuma doá syukoe nyang jipeusampoe ubak Po teu Allah; ngon lagée nyan Allah jipeumulia. 16 Nyang kheueh sabab jih kamoe hana putôh asa. Bah kheueh kamoenyoe seucara lahé seumaken meutamah rusak, teuma seucara batén kamoenyoe geupeujeuet barô tieb-tieb uroe. 17 Dan susah nyang hana padub na nyoe, nyang kamoe rasa keusikeujab, teuma jipeuhase keu kamoe saboh keubahgiaan nyang luwabiasa dan siumu masa. Bahgia nyan jiôh leubeh rayeuk meunyoe teubandeng ngon susah nyan keudroe. 18 Sabab kamoe hana kamoe ngieng hai-hai nyang deuh teukalon, teuma nyang hana deuh teukalon. Nyang deuh teuma meuteun sikeujab, teuma nyang hana deuh nyan keukai siumu masa.

2 Korintus 5

1 Óh ka lheueh kamoe teupeu bahwa meunyoe rumoh -- na kheueh tuboh -- nyang taduek lam donya nyoe teureuloh, Allah teuma geukeubah keugeutanyoe rumoh lam syeuruga, nyang geupeugét lé Allah keudroe dan nyang meuteun siumu masa. 2 Lam rumoh nyang na jinoenyoe, tanyoe apoh apah sabab tanyoe meuheuét that keuneuk tinggai lam rumoh tanyoe nyang na lam syeuruga nyan. 3 Rumoh nyan kheueh tuboh tanyoe nyang barô. 4 Simantong tanyoe tinggai lam rumoh nyang na lam donya nyoe, tanyoe apoh apah sabab beuban tanyoe geuhon that. Kon lé sabab tanyoe keuneuk lheuh nibak tuboh tanyoe nyang nibak donya nyoe, teuma sabab tanyoe meuheuét takeuneuk ngui tuboh nyang na nibak syeuruga nyan, mangat tuboh tanyoe nyang hase maté nyoe jikuasa lé nyang udeb. 5 Nyang peusiab tanyoe keunyan na kheueh Allah keudroe, dan Gobnyan nyang jok Roh geuh keugeutanyoe sibagoe jaminan. 6 Ngon sabab nyan até kamoe sabe meurasa teuga. Kamoe meuteupeu bahwa simantong kamoe na tinggai lam tuboh kamoe nyoe, kamoe jiôh nibak rumoh nyang teuma tinggai meusapat ngon Tuhan. 7 Sabab kamoe udeb ngon dasai jih meuiman ubak Almaseh, kon bak dasai peue nyang deuh teukalon, 8 nyang kheueh sabab jih até kamoe tabah. Kamoe leubeh kamoe tem lheueh nibak tuboh kamoe nyoe, mangat meuteumé kamoe tinggai meusajan Tuhan. 9 Ngon sabab nyan kamoe meu-useuha ngon biet-biet jeuet teupeu mangat até Gobnyan, bah kheueh watée kamoe mantong na lam rumoh kamoe nibak teumpat nyoe, atawa disideh. 10 Sabab tanyoe pasti teuma jiba ubak peungadelan Almaseh, dan maséng-maséng teuma meuteumé balasan nyang sisuai ngon buet watée lam donya nyoe -- buet nyang gét atawa nyang jeuhet. 11 Kamoe meuteupeu peue makna jih takot keu Tuhan; nyang kheueh sabab jih kamoe meu-useuha kamoe peuyakén gob keuhai droe kamoe. Allah geuturi kamoe silhok-lhok jih, dan ulôn harab gata pi taturi kamoe lam até gata. 12 Ngon lagée nyoe kamoe hana meulakée mangat gata tapujoe droe kamoe. Kamoe keuneuk bri saboh alasan nyang jroh keu gata mangat jeuet keubangga keukamoe, dan mangat gata tateupeue pakriban gata meuseuti tajaweueb ureuëng-ureuëng nyang jipeunteng keuhai manusia dan kon sifeuet jih. 13 Meunyoe kamoe keubit deuh jih ka pungoe, nyan na kheueh deumi keupeuntengan Po teu Allah. Dan meunyoe kamoe deuh jih waraih, nyan deumi keupeuntengan gata. 14 Geunaséh Almaseh kheueh nyang kuasa kamoe; dan kamoe sadar bahwa meunyoe sidroe ureuëng ka maté keumandum ureuëng, ngon lagée nyan meumakna bahwa banmandum ureuëng ka maté. 15 Almaseh maté keu mandum ureuëng, mangat ureuëng-ureuëng nyang udeb, hana le udeb keu droe jih keudroe, teuma keu Almaseh nyang ka maté dan geupeu udeb lom teuma deumi keu keupeuntengan awaknyan. 16 Ngon sabab nyan, kamoe hana le kamoe tilek ureuëng meunurot ukoran manusia. Beutôi kamoe na kamoe tilek Almaseh rot manusia, teuma bak watée nyoe ka hana lé. 17 Ureuëng nyang ka meusaboh ngon Almaseh, ka jeuet keumanusia barô bansaboh tuboh. Nyang awai ka hana lé -- banmandum nyan ka jeuet keu barô. 18 Banmandum nyan geupeubuet lé Po teu Allah. Rot Almaseh Allah geupeujeuet tanyoe tameugét lom ngon Gobnyan, laju geubri tugaih bak geutanyoe mangat ureuëng-ureuëng laén teupeu mungken jimeugét lom teuma ngon Allah. 19 Kamoe peusampoe bahwa ngon peurantaraan Almaseh, Allah geupeujeuet manusia jimeugét lom teuma ngon Gobnyan. Allah geupeubuet lagée nyan ngon hana geutuntot buet-buet nyang salah nyang ka jipeubuet lé manusia ateueh droe Gobnyan. Dan kamoe kageubri tugaih lé Allah keu kamoe peusampoe haba nyan. 20 Teuma kamoe nyoe na kheueh utosan-utosan Almaseh. Rot kamoe Allah keudroe nyang peusampoe peusan Gobnyan. Ateueh nan Almaseh, kamoe lakée ngon meuharab that, teurimong kheueh jaroe Allah nyang ka geusunyueng nyan keu teupeumungken gata gét lom teuma ngon Gobnyan. 21 Almaseh hana meudesya, teuma Allah nyang peujeuet Gobnyan geutanggong desya geutanyoe, mangat tanyoe tameugét lom teuma ngon Allah sabab meusaboh ngon Almaseh.

2 Korintus 6

1 Sabab kamoe mubuet meusajan-sajan ngon Po teu Allah, teuma kamoe meulakée ngon that meuharab bék kheueh gata sia-sia keugét até Allah nyan. 2 Lam Alkitab, Allah meufeureuman, "Bak watée nyang ka teuntée, Ulôn deungoe gata, dan bak uroe keuseulamatan, Ulôn ka kutulông gata." Ingat kheueh beugét-gét, jinoenyoe kheueh watée jih nyang ka teupeu teuntée nyan. Jinoenyoe kheueh uroe keuteupeuseulamat nyan! 3 Kamoe hana kamoe tem peulayan kamoe teupeusalah. Ngon sabab nyan kamoe meu-useuha hana kamoe bri alasan baksoe mantong keu jipeubuet nyan. 4 Sikeubiet jih, lam hai peue mantong, kamoe meutunyok bahwa kamoe na kheueh hamba-hamba Allah. Sabab, peue mantong nyang susah ngon deurita nyan ka kamoe rasa ngon saba: 5 Kamoe jiseksa, jipeutamong lam glab, dan jiparan ramé-ramé; kamoe meukeureuja brat, kayém that hana kamoe éh dan kayém that teuma hana kamoe teumé peunajoh. 6 Ngon kamoe peubuet nyang jujoe, bijaksana, saba dan gét até, kamoe meutunyok bahwa kamoe na kheueh hamba Allah. Meunan cit kamoe meugantung bak tulôngan Roh Allah, dan ngon geunaséh nyang ikhlaih, 7 meunan cit ngon cara kamoe peusampoe haba nyang teuka nibak Po teu Allah dan ngon kuasa Allah, kamoe tunyok bahwa kamoe nyoe na kheueh hamba-hamba Allah. Kamoe mumat bak keuheundak Allah sibagoe sinjata kamoe bah kheueh keu kamoe seurang meunan cit keu kamoe bila droe. 8 Kamoe jihoreumat, dan jihina cit teuma; jipujoe, dan jifiteunah teuma. Sidub nyan kamoe nyoe jujoe, jitudôh cit kamoe ureuëng sulet. 9 Kamoe jianggab hana meusyeuhu, teuma kamoe jituri lé mandum ureuëng. Kamoe jisangka maté, teuma teunyata kamoe mantong udeb. Bah pi kamoe nyoe ji iénanya, kamoe hana maté. 10 Bah kheueh até kamoe jipeuseudeh, teuma kamoe sabe lam geumbira. Kamoe deuh jih gasien, teuma kamoe ka kamoe peujeuet jai that manusia jeuet keu ureuëng kaya. Deuh jih kamoe hana sapeue na, teuma nyang sibeuna jih nibak kamoe dumpeue na. 11 Syedara-syedara nyang teucinta di Korintus! Kamoe ka troh trang ubak gata, banmandum asoe até kamoe ka kamoe peugah. 12 Kamoe hana kamoe tôb até keu gata, teuma gata kheueh nyang tôb até gata keu kamoe. 13 Jinoenyoe, bah kheueh ulôn meututoe lagée lôn mariet bak aneuëk-aneuëk lon keudroe. Buka kheueh até gata keukamoe. 14 Bék kheueh jeuet keu ureuëng nyang meurakan ngon ureuëng-ureuëng nyang hana meuiman keu Isa; nyang lagée nyan hana paih. Panena mungken nyang gét meulawok ngon nyang jeuhet! Hana mungken trang meujampu ngon supot. 15 Hana mungken Almaseh sapeue kheun ngon Iblih. Peu kheueh nyang saban ureuëng Kristen ngon nyang bukon ureuëng Kristen? 16 Peu kheueh hubongan jih Baét Tuhan ngon rumoh beurala? Geutanyoe nyoe Baét Tuhan, na kheueh Allah nyang udeb. Allah keudroe meufeureuman, "Ulôn teuma tinggai diteungoh-teungoh awaknyan, dan udeb meusajan-sajan ngon awaknyan. Ulôn teuma jeuet keu Allah awaknyan, dan awaknyan teuma jeuet keu umat Lôn. 17 Sabab nyan, tinggai kheueh laju ureuëng-ureuëng nyang hana jituri keu Po teu Allah nyan, dan peujiôh kheueh droe gata nibak awaknyan. Bék tapeugot hubongan sagai-sagai ngon nyang najih, ngon lagée nyan Ulôn teuma kuteurimong gata. 18 Ulôn teuma jeuet keu Bapak gata, dan gata teuma jeuet keu aneuëk-aneuëk Ulôn, meunan kheueh feureuman Tuhan Nyang Mahakuasa."

2 Korintus 7

1 Syedara-syedara nyang teucinta! Phon-phon that janji nyan teutuju keu geutanyoe. Ngon sababnyan bah kheueh geutanyoe tapeugleh droe nibak peue mantong nyang jipeukuto jiwa raga tanyoe. Bah kheueh geutanyoe tatakot keu Po teu Allah, mangat tanyoe jeuet udeb khusos keu Gobnyan ngon sampoereuna. 2 Sambot kheueh kamoe lam até gata. Kamoe hana meusalah baksoe mantong, dan hántom na ureuëng nyang ka kamoe peurugoe. Kamoe sagai-sagai hana kamoe kuet laba nibak soe mantong. 3 Ulôn peugah lagée nyan, kon lôn keuneuk peusalah gata. Sabab, lagée nyang ka lheueh lôn peugah yoh awai ilée, kamoe biet-biet that kamoe gaséh keugata, dan tanyoe na kheueh rakan-rakan nyang siudeb simaté. 4 Ulôn biet-biet that lôn peucaya peunoh keugata. Teuma ulôn bangga that keu gata. Bah kheueh kamoenyoe jai that-that kamoe rasa keusuletan, até ulôn biet-biet mangat that. Até ulôn biet-biet geumbira. 5 Watée katrok u Makedonia, kamoe mubacut hana hase kamoe peupuléh hék. Nibak jeueb-jeueb sagoe kamoe jipeusulét: nibak pihak laén jimeudakwa dakwi, lam até keudroe meurasa teumakot. 6 Biet kheueh meunan, syukoe kheueh, Allah sabe keupeurayeuk até ureuëng nyang putôh asa; Gobnyan geupeumangat até kamoe ngon teuka Titus. 7 Até kamoe mangat kon mantong sabab ka teuka Titus, teuma nyang leubeh peunteng gobnyan geupeugah pakriban até jih teuhibor ngon sabab lé gata. Gobnyan geupeugah bak kamoe pakriban gata disinoe rindu that keuneuk meurumpok ngon ulôn; bahwa gata ka meunyeusai ateueh buet nyang gata peubuet yoh ilée dan jinoe rila keu gata bila ulôn. Hai nyang lagée nyan teupeujeuet até lôn leubeh mangat lom teuma. 8 Bah kheueh ngon surat lôn nyoe teupeujeuet até gata meutamah seudeh, ulôn hana meunyeusai lôn tuléh surat nyan. Beutôi watée lôn ngieng bahwa sabab surat lôn nyan ka teupeujeuet gata mandum seudeh até -- bah kheueh seudeh gata nyan sikeujab mantong -- ulôn pi meunyeusai cit teuma. 9 Teuma bak watée nyoe ulôn mangat até -- kon lé sabab até gata ka jeuet keuseudeh, teuma ngon na seudeh gata nyan teupeujeuet peurangoe gata ka meu-ubah. Keubiet that, seudeh gata nyan sisuai ngon keuheundak Po teu Allah. Ngon lagée nyan, kamoe hana kamoe peurugoe gata. 10 Sabab seudeh nyang lagée nyan jipeuhase até teu ubah nyang jipeuteuka keuseulamatan. Dan ureuëng hana teuma meunyeusai keuhai nyang lagée nyan. Sikeubiet jih, seudeh nyang teuma sijalan ngon keuheundak manusia jipeuhase maté. 11 Cuba gata ngieng peuhase jih nibak gata nyang seudeh nyan sijalan ngon keuheundak Allah! Hase jih na kheueh gata biet-biet gata useuha guna gata peujeureunéh nyang ceuko! Gata ka jeuet keubanci ubak desya, gata teumakot, gata rindu, gata jeuet meuseumangat, gata rila tahuköm nyang salah! Lam banmandum soai nyoe gata ka tatunyok bahwa gata hana meusalah. 12 Ngon lagée nyan, bah kheueh ulôn ka lôn tuléh surat nyan, ulôn teumuléh kon lé sabab ureuëng nyang meusalah nyan. Kon cit teuma lé sabab ureuëng nyang meudeurita lé sabab nyang salah nyan. Ulôn tuléh surat nyan mangat dikeue Po teu Allah, gata tasada keudroe padubna rayeuk jih peuratian gata keukamoe. 13 Nyang kheueh sabab jih até kamoe mangat that, dan kamoe leubeh-leubeh meutamah geumbira sabab kamoe ngieng até Titus nyang geumbira; até jih mangat lé sabab Gata banmandum. 14 Ulôn keubiet ka lôn peubangga-bangga keugata nibak awaknyan. Syukoe kheueh, gata hana tapeumalée ulôn. Banmandum nyang ka lheueh kamoe peugah bak gata na kheueh beutôi. Meunan cit teuma peue nyang kamoe peubangga-bangga keuhai gata ubak Titus teunyata pi beutôi cit. 15 Jinoenyoe jihnyan seumaken jigaséh keu gata, sabab jihnyan teuingat pakriban gata mandum tatem seutôt pimpén jihnyan dan pakriban gata teurimong gobnyan ngon horeumat dan patuh. 16 Ulôn mangat that até, sabab gata hase teupeucaya lam sigala hai.

2 Korintus 8

1 Syedara-syedara, ulôn meuharab gatanyoe tateupeue cit keuhai pakriban gét jih Allah keu jeumaáh-jeumaáh di Makedonia. 2 Awaknyan ka teu ujoe ngon nyang payah-payah dan geuhon-geuhon. Teuma lam keuadaan nyang meunan brat jirasa lé awaknyan, awaknyan meugeumbira dan murah that até bak jibri sumbangan-sumbangan keujitulông ureuëng laén, bah kheueh awaknyan gasien lumpah na. 3 Ulôn jeuet lôn pasti awaknyan jibri meunurot nyang hase jibri, mungken leubeh. Hana nyang yue, 4 awaknyan jilakée ngon meuharab that ubak kamoe meunyoe jeuet awaknyan meusajan-sajan jitulông jibri sumbangan keu umat Allah nyang na di Yudea. 5 Awaknyan jibri jiôh leubeh nibak nyang kamoe harab. Awaknyan phon-phon that jiseurah droe ubak Tuhan, óh lheueh nyan ubak kamoe cit teuma, sisuai ngon keuheundak Po teu Allah. 6 Nyang kheueh sabab jih kamoe keubiet that kamoe yue bak Titus -- nyang peuphon useuha nyoe -- mangat jihnyan jipeujak laju useuha nyang gét nyoe lamkawan gata cit teuma. 7 Gata leubeh nibak peue mantong: Gata leubeh lam hai meuiman, lam hai tapeugah peundapat, lam hai iéleumé peungeutahuan, lam mubagoe rupa useuha, dan lam gaséh gata ubak kamoe. Sabab nyan, gét that cit gata leubeh nibak useuha nyang jroh nyoe. 8 Ulôn hana lôn yue nyan sibagoe saboh peurintah. Teuma ngon teutunyok padub na sunggoh jih ureuëng laén jitulông sabe keudroe-droe, ulôn pih keuneuk lôn teupeu trok éutna gaséh gata. 9 Sabab gata tateupeue that bahwa geutanyoe that-that geugaséh lé Isa Almaseh Tuhan tanyoe. Gobnyan kaya, teuma Gobnyan geupeujeuet droe geuh keugasien deumi keupeuntengan gata, mangat ngon gasien Gobnyan nyang lagée nyan, gata ka jeuet keukaya. 10 Meunurot peundapat ulôn, bak teumpat jih kheueh gata peuseuleusoe peue nyang ka gata peuphon thon nyang ka lheueh. Sabab gata kheueh nyang phon-phon that nyang pike dan nyang peuphon useuha nyan. 11 Ngon lagée nyan, bah kheueh gata nyang peubuet laju meunurot nyang gata mampu. Ulôn meuharab bah kheueh gata ngon seumangat nyang hu gata peuseuleusoe buet nyan, lagée seumangat gata yoh phon that gata reuncana buet nyan. 12 Meunyoe gata rila tabri, teuma Po teu Allah geuteurimong meuneubri gata nyan ngon dasai jih peue nyang na nibak gata, kon dasai jih peue nyang hana nibak gata. 13 Mubacut pih hana meukeusut ulôn keu lôn peubeubaih ureuëng laén nibak tanggong jaweueb, dan teupeubrat gata. Teuma sabab gatanyoe bak watée nyoe lam keuadaan na, ka sipatot jih gata peuseb nyang kureueng nibak awaknyan. Teuma, meunyoe gata lam keuadaan kureueng, dan awaknyan lam keuadaan seb, awaknyan teuma jitulông gata. Ngon lagée nyan bandua nyan saban-saban teulayani. 15 Lam Alkitab na teutuléh lagée nyoe, "Ureuëng-ureuëng nyang peunghaselan jih jai, hana meuleubeh, dan ureuëng nyang hase jih bacut, hana meukureueng." 16 Padub na syukoe jih kamoe ubak Allah sabab Gobnyan ka geupeujeuet Titus nyang sunggoh-sunggoh lagée kamoe nyang tulông gata! 17 Sabab Titus kon mantong rila jipeupeunoh lagée nyang kamoe lakée, teuma jihnyan meunan that jumôt jitulông gata sampoe ateueh keuheundak jih keudroe jicok keuputosan jijak ubak gata. 18 Meusajan ngon jihnyan kamoe kirém teuma sidroe syedara nyang that jihoreumat bak mandum jeumaáh sabab buet jihnyan jipeusampoe Haba Gét nyang teuka nibak Po teu Allah. 19 Disampéng nyan, ureuëng nyan pih ka teupiléh dan jipeuteuntée lé jeumaáh-jeumaáh keujipeungon kamoe lam meuneujak kamoe. Sabab kamoe teuma kamoe peuna meuneujak keukamoe jak peutrok sumbangan nyan, mangat Tuhan teupeumulia dan mangat gata takalon keudroe bahwa kamoe rila kamoe meutulông. 20 Kamoe keubiet até-até that mangat bék na ureuëng jipeusalah kamoe lam hai kamoe peusampoe sumbangan nyang rayeuk nyoe. 21 Kamoe keuneuk peubuet nyang jujoe kon mantong dikeue Tuhan, dikeue manusia cit teuma. 22 Meusajan-sajan ngon Titus dan syedara nyan, kamoe kirém cit teuma sidroe syedara nyang laén. Kamoe ka kamoe ujoe jih nyan meu-ulang-ulang dan teunyata jihnyan sabe jitem tumulông. Dan jinoenyoe, jihnyan leubeh-leubeh jitem tulông gata sabab jihnyan jikeubah harapan nyang rayeuk bak gata. 23 Keuhai Titus, jihnyan na kheueh rakan ulôn, nyang mubuet ngon ulôn keu jitulông gata. Dan keuhai mandua syedara nyan, nyang jijak meusajan ngon jihnyan, awaknyan na kheueh ureuëng-ureuëng nyang jiutus lé jeumaáh-jeumaáh dan jeuet keu banggaan nibak Almaseh. 24 Kamoe meuharab gata tatunyok geunaséh gata ubak awaknyan, mangat banmandum jeumaáh jiteupeu bahwa gata tagaséh awaknyan dan bahwa peue nyang kamoe peubangga keuhai gata na kheueh beutôi.

2 Korintus 9

1 Nyang sibeuna jih hana peureulée lé lôn tuléh surat keu gata keuhai bantuan nyang teungoh teukirém keu umat Allah di Yudea. 2 Ulôn kuteupeu gata tatem tulông gob, dan ulôn ka lôn peubangga gata ubak ureuëng-ureuëng nyang na di Makedonia. Ulôn peugah bak awaknyan, bahwa phon thon nyang ka lheueh syedara-syedara tanyoe nyang na di Akhaya ka siab keu jibri sumbangan. Dan ngon seumangat gata nyang meugeulora nyan ka jeuet keusabab seumangat siladum nibak awaknyan meugeulora cit teuma. 3 Jinoenyoe ulôn utus Titus dan bandua droe syedara nyan keu gata mangat peue nyang kamoe peubangga-bangga nyan keuhai gata bék jeuet keu haba nyang sulet hana meuguna. Ngon lagée nyan, gata nyang sibeuna jih ka siab, sabab ulôn peugah bak awaknyan bahwa ka siab meunyoe keu nyan. 4 Ulôn khawate meunyoe na ureuëng-ureuëng Makedonia nyang jijak meusajan ngon ulôn singoh watée ulôn jak ubak gata. Dan meunyoe jikalon lé awaknyan bahwa gata gohlom siab, keubiet malée that kamoe singoh, sabab ka kamoe peugah bahwa kamoe meupatéh that ubak gata! Dan gata keudroe pi malée cit teuma. 5 Nyang kheueh sabab jih ulôn meurasa lôn kirém awaknyan leubeh ilée ubak gata keu jiurôih sumbangan nyang ka gata peujanji nyan. Ulôn peubuet nyang lagée nyan singoh watée ulôn teuka, sumbangan nyang gata bri nyan ka siab. Ngon lagée nyan, deuh kheueh bahwa nyang gata bri nyan teubri ngon mangat até, dan kon sabab teupaksa. 6 Ingat kheueh! Ureuëng nyang tabu bijéh bacut teuma jipot bacut teuma. Teuma ureuëng nyang tabu bijéh nyang jai teuma jipot hase nyang jai teuma. 7 Tieb-tieb ureuëng harôh jibri meunurot keurelaan até jih. Bék kheueh jibri ngon seugan-seugan atawa sabab teupaksa, sabab Allah geugaséh keu ureuëng nyang mubri ngon galak até. 8 Allah meukuasa geubri keu gata beureukat nyang meulimpah-limpah, mangat gata sabe na peue nyang gata peureulée; dan gata teuma na leubeh keu tapeubuet gét dan tameu amai. 9 Lam Alkitab na teutuléh lagée nyoe keuhai Allah, "Gobnyan geutabu-tabu keu ureuëng-ureuëng gasien; até geuh nyang gét nyan keukai siumu masa." 10 Allah nyang keubah bijéh keu ureuëng teumabu dan peunajoh keugeutanyoe. Gobnyan teuma nyang keubah dan nyang peulé peue nyang gata tabu, mangat hase até gata nyang murah nyan meutamah-tamah lom teuma. 11 Ngon lagée nyan gata meuteumé dumpeue na lam sigala hai ngon lagée nyan gata sabe hase tameubri ngon murah até. Dan meuneubri-meuneubri gata nyang kamoe weuek-weuek keu ureuëng laén nyan, jeuet keusabab jai that ureuëng jilakée teurimong gaséh ubak Allah. 12 Sabab buet nyang jroh nyang gata peubuet nyoe kon teupeuseb nibak ukoran umat Allah mantong, teuma jeuet keusabab jai that ureuëng jilakée teurimong gaséh bak Allah. 13 Dan ngon nyang jroh nyang gata peuleumah nyan, jai that ureuëng Kristen nyang na di Yudea teuma jipujoe Allah sabab awaknyan jikalon keuseutiaan gata keuhai Haba Gét soai Almaseh nyang gata seutôt nyan. Meunan cit, awaknyan jipujoe Allah, sabab gata biet-biet murah até keu gata weuek-weuek ubak awaknyan dan keu mandum ureuëng laén nyang na nibak gata. 14 Ngon lagée nyan awaknyan teuma jimeudoá keu gata ngon peurasaan gaséh sayang kareuna Allah that gét até keu gata. 15 Gét that tanyoe meusyukoe ubak Po teu Allah ateueh meuneubri Gobnyan nyang luwabiasa nyan.

2 Korintus 10

1 Jinoenyoe ulôn, Paulus, keuneuk peugah sapeue-peue bak gata. Ulôn nyoe, meunurot nyang jipeugah lé gob, leumoh meunyoe meuhadab keu ngon gata, meunyoe jiôh barô kheueh lôn jeuet. Nah, sabab leumoh leumbot dan keu gét até Almaseh, 2 ulôn meulakée ngon that meuharab bék kheueh sampoe teupaksa lôn peubuet nyan kreueh ngon teugaih ateueh gata watée ulôn teuka singoh. Sabab ulôn kana niet keuneuk lôncok tindakan nyang teugaih ateueh ureuëng-ureuëng nyang jipeugah bahwa kamoe mubuet ngon tujuan donya nyang fana nyoe. 3 Beutôi kamoe mantong udeb lam donya, teuma kamoe hana meujuang ngon tujuan donya. 4 Sinjata-sinjata nyang kamoe peuguna lam peujuangan kamoe kon sinjata donya nyoe, teuma sinjata-sinjata Allah nyang meukuasa. Ngon sinjata-sinjata nyan laju kamoe peuhanco bubena kuta-kuta; kamoe tangkeh bubena dobat-dobat 5 dan kamoe peuhanco bubena kuta-kuta keusombongan nyang jipeudong keu jiheuntam peungeutahuan nyang geupeudong lé Po teu Allah. Kamoe teun mandum pikeran manusia dan kamoe peujeuet awaknyan taklôk ubak Almaseh. 6 Dan meunyoe gata ka taát ngon sipeunoh até, kamoe kasiab kamoe jak huköm mandum nyang hana taát. 7 Bah kheueh gata sadar ubak keuadaan nyang sibeuna jih. Meunyoe sidroe-droe ureuëng yakén bahwa jihnyan Almaseh, bah kheueh jihnyan jipeuingat droe jih keudroe dan beusadar bahwa kamoe nyoe pih Almaseh saban lagée jih nyan. 8 Ulôn hana malée meunyoe ulôn leubeh jai lôn peubangga keukuasaan nyang ka geubri lé Tuhan ubak kamoe, sabab keukuasaan nyan geubri keuteupeudong gata, kon keuteureuloh. 9 Ulôn hana kutem tarasa bahwa ulôn nyoe kujak peutakot-takot gata ngon surat-surat ulôn. 10 Ureuëng jipeugah, "Surat-surat Paulus nyan teugaih dan meuwibawa, teuma meunyoe gobnyan keudroe na lamkawan tanyoe, pribadi gobnyan leumoh dan tutoe haba gobnyan hana meumakna sapeue!" 11 Bah kheueh ureuëng nyang lagée nyan beujisadar bahwa meunyoe kamoe na lamkawan gata, buet kamoe teupat lagée peue nyang ka kamoe tuléh lam surat kamoe nyan. 12 Ka teuntée kamoe hana kamoe jeuet peubandeng atawa kamoe peuduek droe kamoe sideureujat ngon ureuëng-ureuëng nyang jianggab droe jih leubeh manyang. Keubiet bangai that awaknyan! Awaknyan jipeugét sineupat jih keudroe dan jiukô keudroe ngon sineupat nyan. 13 Kamoe hana lagée nyan. Meunyoe kamoe meubangga-bangga, kamoe hana meuliengkeu bataih. Kamoe tinggai lam bataih-bataih daerah teumpat kamoe mubuet nyang ka geupeuteuntée lé Allah keu kamoe. Dan gata jitamong lam daerah nyan. 14 Teuma, watée kamoe jak saweue gata dan kamoe ba Haba Gét keuhai Almaseh ubak gata, kamoe biet-biet hana kamoe teubiet nibak bataih-bataih daerah teumpat kamoe mubuet. 15 Kamoe hana kamoe pujoe ateueh buet ureuëng laén nyang na diluwa bataih nyang ka geupeuteuntée lé Allah keu kamoe. Sikeubiet jih kamoe teutab na teutab lam bataih-bataih nyang ka geupeuteuntée lé Po teu Allah keu kamoe dan meuharab bahwa gata seumaken tameuiman ubak Almaseh, mangat kamoe hase kamoe peubuet buet-buet nyang leubeh rayeuk nibak gata. 16 Ngon lagée nyan kamoe pih hase kamoe peusampoe Haba Gét nyan bak nanggroe-nanggroe laén ngon hana kamoe peurayeuk-rayeuk droe ateueh buet nyang jipeubuet lam wilayah peulayanan ureuëng laén. 17 Lam Alkitab na teutuléh lagée nyoe, "Ureuëng nyang jitem peubangga sapeue-sapeue, bah kheueh jipeubangga peue nyang ka geupeugét lé Tuhan." 18 Sabab ureuëng nyang teupujoe na kheueh ureuëng nyang geupujoe lé Tuhan, kon ureuëng nyang jipujoe droe jih keudroe.

2 Korintus 11

1 Peumeuáh kheueh keu lôn nyang meusifeuet bangai bacut. Jeuet peue hán? 2 Ulôn meucen ubak gata, lagée Po teu Allah keudroe pi meucen ubak gata. Gata na kheueh lagée sidroe aneuëk dara peurawan nyang mantong gadih nyang ka lôn peujanji keu teupeukawen ngon sidroe teungku lakoe, na kheueh Almaseh. 3 Teuma ulôn khawate pikeran gata teuma teugoda keu hana seutia lé ubak Almaseh, saban lagée Hawa nyang yoh watée ilée teugoda ubak buet licek nyang jipeuteuka lé uleue. 4 Sabab rupari gata magat mantong gata teurimong ureuëng nyang teuka ubak gata dan jipeurunoe keuhai Isa nyang laén -- kon Isa nyang kamoe peuturi ubak gata. Dan gata pi tatem teurimong roh dan "haba gét" nyang sagai-sagai hana saban ngon Roh Allah dan Haba Gét nyang ka lheueh gata teurimong nibak kamoe. 5 Ulôn meubacut pi hana meurasa leubeh miyueb nibak "rasui-rasui" nyang luwabiasa nyan! 6 Mungken ulôn nyoe kureueng carông peugah haba, teuma meunyoe keuhai iéleumé peungeutahuan, ulôn nyoe kon ureuëng nyang bangai. Nyan ka lheueh kamoe bri bukeuti ubak gata lam sigala hai peue mantong. 7 Bak watée ulôn britée keuhai Haba Gét nibak Po teu Allah ubak gata, ulôn hana kulakée ubak gata beugata bri biaya nibak gata meubacut pi; dan ngon lagée nyan ulôn ka kupeujeuet droe ulôn leubeh miyueb. Dan ulôn peubuet nyan keulôn peumanyang gata. Peu kheueh ngon lagée nyan saboh buet nyang salah nyang ka lôn peubuet ateueh gata? 8 Nibak watée ulôn peutimang gata, ulôn jijok biaya lé jeumaáh-jeumaáh nyang laén. Jeuet tapeugah ulôn ka lôn peurugoe jeumaáh-jeumaáh nyan mangat hase lôn tulông gata. 9 Meunyoe nibak watée nyan ulôn na kureueng sapeue-sapeue, ulôn hántom na lôn peususah ureuëng laén meusidroe pi nyang na nibak gata. Banmandum nyang ulôn peureulée jipeuna lé syedara-syedara nyang teuka nibak Makedonia. Ulôn kujaga gét-gét mangat ulôn hana lôn peususah gata nibak hai peue mantong, dan ulôn teutab sabe kujaga mangat nyan teutab lagée nyan. 10 Keubanggaan ulôn nyoe hana hase teusampôh dipat mantong bansaboh nanggroe Akhaya, sabab peungajaran Almaseh nyang beutôi na nyoepat bak lôn. 11 Pakon jeuet lôn peubuet lagée nyan? Peu kheueh lé sabab ulôn nyoe hana kugaséh gata? Po teu Allah geuteupeue bahwa ulôn gaséh keu gata! 12 Peue nyang ulôn peubuet jinoenyoe teutab ulôn peubuet laju mangat "rasui-rasui" nyang laén nyang hana alasan keu jipeurayeuk-rayeuk droe dan jikheun jihnyan jimubuet lagée kamoe. 13 Ureuëng-ureuëng nyang lagée nyan na kheueh rasui-rasui peuleusu. Awaknyan ureuëng-ureuëng mubuet nyang jipeunget ureuëng laén sira jimeunyamar sibagoe rasui-rasui Almaseh. 14 Hana hireuen awaknyan jipeubuet lagée nyan bagoe, sabab Iblih keudroe pi jimeunyamar lagée malaikat trang! 15 Deungon nyan hana hireuen cit teuma meunyoe peulayan-peulayan Iblih jimeunyamar sibagoe peulayan-peulayan nyang jipeubuet keuheundak Po teu Allah. Akhé jih awaknyan pi jiteurimong beunalaih nyang sisuai ngon buet-buet awaknyan. 16 Ulôn ulang lom sigoe teuk: Bék sampoe nyang jianggab ulôn ureuëng bangai. Teuma meunyoe ta-anggab cit lagée nyan, idhin kheueh ulôn nyang bangai nyoe lôn meubangga bacut. 17 Seulanjut jihnyoe teuma lôn kheun keubanggaan lôn, teuma kon Tuhan nyang yue bak ulôn keuteupeugah nyan. Lam hainyoe ulôn biet-biet kumeututoe lagée ureuëng bangai. 18 Keubiet na dan jai that ureuëng nyang jipeubangga ubak hai-hai donya, teuma ulôn keuneuk meubangga-bangga cit teuma. 19 Gata ngon mangat até tameusaba ateueh ureuëng-ureuëng nyang bangai, sabab gata meurasa droe ureuëng carông that! 20 Gata tapeubiyeu mantong meunyoe na ureuëng jipeunamiet gata, atawa jiprah ngon jicok laba ateueh gata, atawa meurasa droe leubeh manyang nibak gata dan jijeuet tampa gata. 21 Ulôn malée lôn akunyan bahwa kamoe keubiet that leumoh keukamoe peubuet lagée nyan. Teuma peue nyang nibak ureuëng laén jijeuet peubangga, ulôn pi kujeuet cit teuma! (Ulôn kumeututoe lagée ureuëng bangai). 22 Peu kheueh awaknyan ureuëng Ibrani? Ulôn pi ureuëng Ibrani. Peu kheueh awaknyan ureuëng Israel? Ulôn pi ureuëng Israel. Peu kheueh awaknyan keuturonan Nabi Ibrahim? Ulôn pi lagée nyan cit! 23 Peu kheueh awaknyan peulayan-peulayan Almaseh? Teudeungoe jih lagée ulôn nyoe ureuëng ka gadôh akai, teuma ulôn keubiet peulayan nyang leubeh gét nibak awaknyan banmandum! Ulôn kumubuet leubeh brat, ulôn ka kayém that jipeutamong lam glab, ulôn leubeh jai jiseksa dan kayém that rab-rab maté. 24 Ka limong goe ulôn jiseksa lé ureuëng Yahudi dan jiseunuét ngon peunyuenuet na teuma lhée ploh sikureueng goe. 25 Lhée goe teuma ulôn jisunuet lé ureuëng-ureuëng Roma; na teuma lôn rasa jigeulawa ngon batée. Lhée goe ulôn rasa lham ngon kapai lam laôt, dan na sigoe ulôn meuapöng-apöng lam laôt nyang treb jih na dua ploh peuet jeuem. 26 Ka jai lagoe na ulôn jak nyang peunoh ngon bahaya: lagée bahaya ié raya, bahaya lé peurampok, bahaya nyang teuka nibak ureuëng Yahudi meunan cit nibak pihak nyang kon Yahudi, bahaya lam banda, bahaya diluwa banda, bahaya lam laôt dan bahaya nibak ureuëng-ureuëng nyang jipeugah droe syedara Kristen padahai kon. 27 Ulôn kubanteng tuleueng dan lôn meujuang siteungoh maté: kayém that hana ulôn éh, hana lôn makheun, hana lôn jieb ié, kayém that-that ulôn teulanta lam keuadaan deuk, sijuek sabab kureueng peukayan dan hana teuma teumpat tinggai. 28 Nibak banmandum nyan, tieb-tieb uroe ulôn teutab gundah watée lôn ingat keuadaan jeumaáh. 29 Meunyoe na nyang leumoh ulôn pih meusajan teuma leumoh. Meunyoe na nyang rhot lam desya, até ulôn pi meusajan hanco. 30 Ngon lagéenyan, meunyoe ulôn meuseuti lôn peubangga sapeue-sapeue, teuma ka lôn peubangga ngon hai-hai nyang teutunyok ubak ulôn nyang leumoh. 31 Po teu Allah, Bapak nibak Tuhan Isa geuteupeue bahwa ulôn hana kumeusulet. Teupujoe kheueh nan Gobnyan siumu masa. 32 Watée ulôn mantong na di Damsyik, gubunur nyang mat kuasa nibak teumpat nyan dimiyueb keukuasaan Raja Aretas, jiyue bak tantra mangat jikeumiet babah pintoe banda nyan keujijak drob ulôn. 33 Teuma ngon saboh raga ulôn laju jikirém u miyueb rot saboh guha beuton. Meunan kheueh ulôn lheueh nibak jaroe gubunur nyan.

2 Korintus 12

1 Beutôi hana laba jih tapeubangga droe. Teuma lôn kutem cit peubangga keuhai-hai nyang lé Allah ka geupeuleumah bak lôn lam wahyu atawa lam keumalon. 2 Ulôn kuturi sidroe ureuëng Kristen nyang peuet blaih thon nyang ka lheueh geu beuôt lé Po u teumpat nyang paleng manyang lam syeuruga. (Ulôn hana kuteupeu peue beutôi-beutôi tuboh ureuëng nyan teubeuôt atawa saboh keumalon -- Allah kheueh nyang teupeu.) 3 Ulôn ulang sigoe teuk: Ulôn kuteupeu bahwa ureuëng nyoe geubeuôt lam taman Firdaus. (Ulôn hana kuteupeu peu kheueh tuboh ureuëng nyan biet-biet teubeuôt atawa nyan saboh keumalon -- Allah mantong kheueh nyang teupeu.) Bak teumpat nyan ureuëng nyan laju jideungoe hai-hai nyang hana hase jipeugah lé manusia dan hana teuma teubri idhin keu manusia keujipeugah hai nyan. 5 Keuhai ureuëng nyan kheueh nyang keuneuk ulôn peubangga, kon keuhai droe lôn keudroe. Keuhai droe ulôn, na kheueh keuhai-hai nyang teutunyok ubak keuleumohan lôn mantong nyang jeuet lôn peugah, dan nyan kheueh nyang keuneuk lôn peubangga. 6 Seukira jih ulôn keuneuk peubangga sapeue-sapeue, ulôn hana kutem jeuet keu ureuëng raya haba nyang mariet jih sulet; ulôn teuma lôn peugah nyang beutôi. Teuma lôn kupeuteun droe, mangat bék na ureuëng nyang jianggab ulôn nyoe leubeh nibak peue nyang ka jikalon lôn peubuet atawa nyang jideungoe peue nyang lôn peugah. 7 Teuma mangat ulôn bék lumpah that sombong sabab keumalon-keumalon nyang luwabiasa nyan, ulôn geubri simacam peunyakét nibak tuboh lôn nyang rupari alat Iblih. Peunyakét nyan geubri keu nyang seupôt ulôn mangat ulôn bék jeuet keu ureuëng sombong. 8 Lhée goe ulôn meudoá ubak Tuhan mangat jeuet peunyakét nyan geucok nibak ulôn. 9 Teuma Tuhan geujaweueb, "Ulôn kugaséh gata dan nyan ka seb keugata; sabab kuasa Ulôn keubiet that teuga meunyoe gata lam keuadaan leumoh." Nyang kheueh sabab jih ulôn leubeh galak lôn peubangga hai-hai lôn nyang leumoh, sabab meunyoe ulôn ka leumoh, dan bak watée nyan kheueh ulôn rasa Almaseh geulindong ulôn ngon teunaga Gobnyan. 10 Ngon lagée nyan ulôn keubiet that galak ateueh keuleumohan lôn nyan. Ulôn biet that mangat até meunyoe lé sabab Almaseh ulôn jifiteunah, ulôn meuteumé susah, jilet-let dan ulôn meuteumé keupayahan. Sabab meunyoe ulôn leumoh, teuma bak watée nyan kheueh ulôn jiteuka teumakot. 11 Keubiet that, ulôn ka lôn peujeuet droe lagée ureuëng bangai -- teuma gata kheueh nyang peujeuet ulôn sampoe lagée nyan. Nyang sibeuna jih gata nyang meusti tapujoe ulôn. Sabab, bah kheueh ulôn nyoe hana areuti sapeue, teuma ulôn sagai-sagai hana taloe ngon "rasui-rasui" nyang luwabiasa nyan! 12 Buet-buet nyang ajaéb dan hai-hai nyang luwabiasa meunan cit ngon buet-buet nyang rayeuk-rayeuk ka teupeukalon ngon saba ubak gata sibagoe bukeuti bahwa ulôn nyoe sidroe rasui. 13 Lam hai peue kheueh gata kureueng jikalon, teubandeng ngon jeumaáh-jeumaáh nyan? Paleng-paleng teuma lam hai nyoe: bahwa ulôn hana lôn peususah gata keugata peubiaya ulôn. Peumeuáh kheueh ulôn ateueh nyang salah nyan! 14 Jinoenyoe ka nyang keu lhée goe jih ulôn jak saweue gata. Dan hana kutem peususah gata, sabab nyang ulôn lakée kon kheueh peue nyang na nibak gata, teuma na kheueh droe gata. Sabab peu kheueh kon aneuëk manyak nyang harôh jimita nafeukah keu ureuëng syiek jih, teuma ureuëng syiek kheueh nyang harôh jimita nafeukah keu aneuëk-aneuëk jih. 15 Ngon sabab nyan, ngon mangat até ulôn rila lôn keureubeuen peue-peue mantong keugata, kon nyan mantong, droe lôn keudroe pi lôn peurila. Meunyoe ulôn ka meunan lôn gaséh keugata, peu kheueh patot kureueng gata gaséh keu lôn? 16 Ngon lagée nyan, peu kheueh gata situju bahwa ulôn hántom lôn peususah gata. Teuma na nyang peugah bahwa ulôn nyoe lisek; bahwa ulôn meuteuma laba nibak gata sabab tipée daya ulôn. 17 Panena mungken! Peu kheueh rot ureuëng-ureuëng nyang lôn yuejak bak gata nyan lônkuet laba nibak gata? 18 Ulôn ka lôn yue Titus jijak bak gata, dan meusajan ngon jih lôn yue teuma syedara tanyoe ureuëng Kristen nyang laén keurakan jih. Peu kheueh Titus jicok laba ateueh gata? Teuma kamoe bandua mubuet ngon tujuan nyang saban dan kamoe cok tindakan pih ngon cara nyang saban teuma. 19 Jeuet mantong gata kira kamoe nyang kanyoe teungoh meu-useuha kamoe bila droe ateueh gata? Gata keubiet that-that keuliru! Allah geuteupeue bahwa banmandum nyang kamoe peugah nyan na kheueh meunurot keuheundak Almaseh. Dan bandum nyang kamoe peubuet na kheueh keu teupeudong udeb rohani. 20 Ulôn khawate bahwa watée ulôn jak bak gata singoh, lôn kalon gata hana lagée peue nyang lôn harab dan gata pih meurumpok ngon lôn hana lagée nyang gata harab. Pat tateupeue singoh na nyang mulo, bingiek até, seu-uem até, teupeupeunteng droe keudroe, fiteunah keudeh keunoe, hasut keudeh keunoe, sombong dan teupeuna karu. 21 Ulôn teumakot pat tateupeue watée ulôn teuka singoh Allah teuma geupumiyueb ulôn dikeue gata dan ulôn teuma lônmo sabab jai that lamkawan gata nyang meudesya yoh masa ilée, hana meu-ubah dan hana jipiôh jipeubuet buet-buet nyang cabui, kutoe dan hana patot.

2 Korintus 13

1 Nyoe na kheueh nyang keu lhée goe jih ulôn teuka jaksaweue gata. Lam Alkitab na teutuléh lagée nyoe, "Tieb-tieb peukara meuseuti jibantu lé keusaksian dua atawa lhée droe saksi, barô kheueh peukara nyan sah." 2 Ureuëng-ureuëng nyang masa ilée ka jipeubuet desya dan mandum ureuëng laén teuma, ka lôn peuingat leubeh ilée watée ulôn jaksaweue gata nyang keudua goe jih. Jinoenyoe, teungoh ulôn jiôh nibak gata, ulôn peuingat lom teuma bahwa meunyoe ulôn teuka lom teuma, hana meusidroe pih nibak awaknyan nyang lheueh nibak huköman. 3 Teuma gata meuteumé banmandum bukeuti nyang gata lakée bahwa Almaseh biet-biet geumeututoe rot ulôn. Meunyoe Almaseh geucok tindakan ateueh gata, hana ngon cara leumoh-leumoh, seubalek jih Gobnyan geutunyok kuasa geuh lamkawan gata. 4 Beutôi watée Gobnyan teusaleb, Gobnyan leumoh, teuma jinoenyoe Gobnyan udeb sabab kuasa Allah. Meunan cit kamoe leumoh lam udeb kamoe sabab meusaboh ngon Almaseh, teuma meunyoe meuhadab ngon gata, kamoe pih teuga meusajan Almaseh sabab kuasa Po teu Allah. 5 Cuba gata ujoe droe teuh keudroe peu kheueh gata biet-biet meuiman ubak Almaseh! Pasti gata tasadari bahwa Isa Almaseh nyan na lam tuboh gata! -- laén hai jih meunyoe keubiet gata biet-biet hana tameuiman. 6 Ulôn harab gata sadar bahwa kamoenyoe kon ureuëng nyang ék teuteun ujoe. 7 Kamoe meudoá ubak Po teu Allah seumoga Gobnyan geutem tulông gata keu hana tapeubuet salah. Bukon keu teutunyok bahwa kamoe nyoe keubiet carông bak teupeuseuleusoe tugaih, teuma mangat gata tapeubuet peue nyang geukeuheundaki lé Po teu Allah -- bah kheueh deuh jih kamoenyoe hana meuhase, hana peue! 8 Sabab kamoe hana hase kamoe peubuet musapeue pih nyang meubida ngon nyang beutôi; kamoe meuseuti kamoe seutôt nyang beutôi. 9 Kamoe galak that meunyoe kamoe leumoh, dan gata teuga. Kamoe pih meudoá mangat gatanyoe jeuet keusampoereuna. 10 Nyang kheueh sabab jih ulôn tuléh surat nyoe bak watée ulôn gohlom na lamkawan gata. Ngon lagée nyan, meunyoe ulôn teuka teuma, hana peue lôn cok tindakan nyang kreueh ateueh gata ngon lôn peuguna keukuasaan nyang geubri lé Tuhan keu ulôn. Keukuasaan nyan geubri guna jih keu teupeudong gata, kon keu teupeuhanco. 11 Akhé jih, Syedara-syedara, bah kheueh gata bumangat até, dan meu useuha kheueh jeuet keusampoe reuna. Teurimong kheueh peue-peue mantong nyang ulôn naseuhat nyoe. Bah kheueh gata saboh até dan udeb nyang rukon. Allah Nyang Mahapeugaséh dan nyang peudamé nyan teuma sabe na meusajan gata. 12 Mumat-mat jaroe kheueh sidroe ngon nyang laén seucara meusra sibagoe syedara lam Kristen. Banmandum umat Po teu Allah jikirém saleuem ubak gata. 13 Tuhan Isa Almaseh geubri beureukat keu gata, Allah geugaséh gata, dan Roh Allah na meusajan gata banmandum teuma! Horeumat kamoe, Paulus

Galatia 1

1 Syedara-syedara mandum jeumaáh nyang na di Galatia, Ulôn, Paulus, dan banmandum syedara nyang Kristen nyang na meusajan ngon ulôn, kamoe meuharab seumoga Allah Bapak geutanyoe dan Tuhan Isa Almaseh geubri beureukat dan seujahteura keu gata. Ulôn jeuet keurasui kon lé peurantaraan manusia atawa kareuna jiangkat lé manusia, teuma lé Isa Almaseh dan Allah Bapak geutanyoe nyang ka geupeu udeb lom teuma gobnyan nibak maté. 4 Taát ubak keuheundak Allah Bapak geutanyoe, Almaseh geupeujok droe Gobnyan jeuet keu keureubeuen keubanmandum desya-desya tanyoe, mangat tanyoe geupeu seulamat nibak jamén nyang jeuhet nyoe. 5 Teupujoe kheueh Allah siumu masa! Amin. 6 Ulôn hireuen keuhai Syedara banmandum! Gata geutawök lé Po teu Allah lé sabab rahmat Almaseh, teuma bak watée nyoe gata keubiet bagaih that tapeulikot Allah dan gata seutôt "haba gét" nyang laén nibak Haba Gét nyang teuka nibak Po teu Allah keudroe. 7 Nyang sibeuna jih hana "haba gét nyang laén". Teuma na ureuëng nyang jijakpeugah ubak gata "haba gét" keuhai Almaseh nyang ka jiputa balek lé awaknyan ngon sabab nyan pikeran gata karu hana meuteuntée. 8 Ureuëng nyang peusampoe "haba gét" nyang laén nibak Haba Gét nyang ka kamoe peusampoenyan, bah kheueh ureuëng nyan geuhuköm lé Allah -- bah kheueh ureuëng nyang pesampoe nyan ulôn keudroe atawa malaikat nyang teuka lam syeuruga! 9 Kamoe ka lheueh kamoe peugah yoh awaikon ilée, jinoenyoe ulôn peugah sigoe teuk: Ureuëng nyang peusampoe keu gata "haba gét" nyang laén nibak Haba Gét nyang ka gata teurimong nibak kamoe, ureuëng nyan bah kheueh geuhuköm lé Po teu Allah! 10 Peu kheueh ngon lagée nyan deuh jih ulônnyoe siulah-ulah meuharab beujiaku lé manusia? Sagai-sagai hana dan kon lagée nyan! Nyang ulôn harab na kheueh peungakuan nibak Po teu Allah. Peu kheueh ulôn teungoh meu-useuha lôn cok até manusia mangat jigalak lé gob? Meunyoe ulôn mantong kupeubuet lagée nyan, ulôn nyoe bukon kheueh hamba Almaseh. 11 Syedara-syedara banmandum harôh beutateupeue bahwa Haba Gét nyang ulôn peusampoe nyan kon asai jih nibak manusia. 12 Ulôn hana kuteurimong haba nibak manusia, dan hana meusidroe pih nyang purunoe keu ulôn. Isa Almaseh keudroe kheueh nyang peugah asoe Haba Gét nyan ubak ulôn. 13 Teuntée gata katadeungoe keuhai udeb lôn yoh ilée sibagoe sidroe ureuëng nyang anut agama Yahudi. Gata tateupeue pakriban keujam jih ulôn bak watée nyan lôn iélanya jeumaáh Allah dan pakriban kreueh jih ulôn keuneuk peuhanco jeumaáh nyan. 14 Lam hai lôn amai agama Yahudi, ulôn leubeh jroh nibak ureuëng Yahudi nyang laén nyang santeuet ngon umu ulôn. Ulôn meuseumangat that lam hai-hai adat istiadat indatu kamoe. 15 Teuma ngon jroh até Po teu Allah, Gobnyan ka geupiléh ulôn sigohlom ulôn lahé dan teutawök ulôn guna lôn layani Gobnyan. 16 Allah geupeugah Aneuëk Gobnyan keu ulôn mangat Haba Gét keuhai Aneuëk Gobnyan hase lôn peusampoe keu ureuëng-ureuëng nyang kon Yahudi. Bak watée nyan hana ulôn jak bak soe mantong lôn jak lakée naseuhat. 17 Meunan cit ulôn hana lôn jak ubak ureuëng-ureuëng nyang na di Yerusalem nyang ka leubeh ilée nibak ulôn jeuet keurasui. Teuma ulôn kujak u nanggroe Arab, nibak teumpat nyan laju lôn gisa lom u Damsyik. 18 Lhée thon teuma óh lheueh nyan, ulôn jak teuma u Yerusalem guna lôn jak meuturi ngon Petrus. Ulôn tinggai ngon gobnyan na limong blaih uroe treb jih. 19 Ulôn hana murumpok ngon rasui-rasui nyang laén, keucuali Yakobus, syedara Tuhan. 20 Peue nyang lôn tuléh nyoe na kheueh beutôi. Allah geuteupeue bahwa ulôn hana meusulet! 21 Óh lheueh nyan laju ulôn jak u daerah-daerah nyang na di Siria dan Kilikia. 22 Trok bak watée nyan jeumaáh-jeumaáh Kristen nyang na di Yudea mantong na gohlom jituri keulôn seucara langsong. 23 Awaknyan teuma jideungoe gob peugah, "Ureuëng nyang iélanya kamoe yoh watée ilée, jinoe jijak peusampoe haba nyang yoh masa ilée jikeuneuk peuhanco." 24 Ngon lagée nyan awaknyan laju jipujoe Allah sabab lé ulôn.

Galatia 2

1 Peuet blaih thon óh lheueh nyan, ulôn woelom u Yerusalem, meusigoe ngon Barnabas. Meunan cit Titus na lôn ba sajan. 2 Ulôn kujak u Yerusalem sabab Allah ka geupeugah ubak ulôn bahwa ulôn harôh lônjak keunan. Dan bak saboh teumpat meurok pakat khusos ngon peumimpén-peumimpén nyang na disinan, laju ulôn peugah Haba Gét nyang ka lôn peusampoe ubak ureuëng-ureuëng nyang kon Yahudi. Sabab ulôn hana kutem useuha lôn nyang awai, meunan cit nyang jinoe, tinggai sia-sia. 3 Titus, nyang peungon ulôn, na kheueh ureuëng Yunani, teuma jihnyan hana teupaksa meuseuti jiseutôt peuratoran meusunat, 4 bah kheueh na ureuëng-ureuëng nyang jipaksa hai nyan. Awaknyan na kheueh ureuëng-ureuëng jiseuludob lam gulongan tanyoe dan jimeunyamar sibagoe syedara. Awaknyan jitamong ngon seungab-seungab keu jijak seulidek keubeubaihan nyang na nibak geutanyoe sabab tanyoe meusaboh ngon Isa Almaseh. Awaknyan jikeuneuk peugisa tanyoe ubak keuadaan lagée yoh awai sibagoe namiet, 5 teuma kamoe hana meunyeurah mubacut pih ubak awaknyan, sabab kamoe keuneuk kamoe jaga mangat Haba Gét nyan teutab gleh keugata. 6 Bah kheueh lagée nyan, hana hai-hai barô nyang jituntot nibak ulôn lé ureuëng-ureuëng nyang jianggab ureuëng patot -- nibak ulôn hana meulaén meunyoe awaknyan ureuëng patot atawa kon ureuëng patot, sabab Po teu Allah hana geungieng muka. 7 Seubalek jih, ureuëng-ureuëng nyang jianggab ureuëng patot jiaku keudroe bahwa Allah ka geubri tugaih ubak ulôn keu lôn peusampoe Haba Gét keu ureuëng nyang kon Yahudi, sabab lagée Gobnyan ka geubri tugaih ubak Petrus keujijak peusampoe Haba Gét nyan ubak ureuëng Yahudi. 8 Sabab Allah nyang bri ubak Petrus keusanggopan beujeuet keu rasui ureuëng Yahudi, meunan cit geubri teuma ubak ulôn keujeuet keurasui ubak ureuëng nyang kon Yahudi. 9 Yakobus, Petrus dan Yahya, nyang deuh jih jeuet keupeumimpén-peumimpén jeumaáh, jiaku keudroe bahwa Allah ka geubri ubak ulôn tugaih khusos nyoe. Teuma awaknyan laju jimumat jaroe ngon Barnabas dan ulôn sibagoe tanda meusahabat. Laju awaknyan dan kamoe situju bahwa kamoe teuma mubuet lamkawan bansa-bansa nyang kon Yahudi, dan awaknyan lamkawan ureuëng Yahudi. 10 Nyang that-that jilakée lé awaknyan bak kamoe na kheueh mangat kamoe biet-biet kamoe pike keu ureuëng gasien. Dan ulôn keubiet mangat até peubuet hai nyan. 11 Watée Petrus jijak u Antiokhia, laju lôn lawan jih troh trang, sabab buet jih ka salah. 12 Phon-phon that jiduek sira jimakheun meusajan-sajan ngon ureuëng-ureuëng nyang kon Yahudi. Teuma óh ka lheueh ureuëng-ureuëng utosan Yakobus nyan teuka, laju jipeujiôh droe nibak ureuëng-ureuëng nyang bukon Yahudi nyan dan hana jitem lé makheun meusajan ngon awaknyan, sabab jitakot keu ureuëng-ureuëng nyang jilakée mangat banmandum ureuëng teupeusunat. 13 Lé syedara-syedara nyang ureuëng Yahudi laén pih ka rhot bak munafék lagée Petrus nyan, dan akhé jih Barnabas pih teupeungaroh ngon sikeub nyang jipeuleumah lé awaknyan. 14 Meunan lôn teupeu bahwa awaknyan hana meusikeub nyang sisuai ngon keubeunaran nyang na lam Haba Gét nyan, laju ulôn peugah ubak Petrus dikeue mandum ureuëng nyang teuka disinan, "Meunyoe Gata sibagoe ureuëng Yahudi ka udeb lagée kon ureuëng Yahudi, keupeue jinoenyoe Gata keuneuk paksa ureuëng-ureuëng laén udeb lagée ureuëng Yahudi?" 15 Keubiet, meunurot lahé, kamoe na kheueh ureuëng Yahudi dan kon "ureuëng nyang kon Yahudi nyang meudesya". 16 Bah kheueh meunan kamoe meuteupeue bahwa manusia jimeugét lom teuma ngon Po teu Allah sabab jimeuiman ubak Isa Almaseh, dan kon ngon sabab jiamai huköm agama. Kamoe keudroe pih meuiman ubak Isa Almaseh, mangat kamoe jeuetmeugét lom teuma ngon Allah meulalu iman kamoe nyan, kon ngon sabab kamoe amai huköm agama. Sabab ngon teuamai huköm agama, hana meusidroe pih hase jimeugét lom teuma ngon Po teu Allah. 17 Kamoe meu-useuha kamoe meugét lom teuma ngon Allah rot udeb meusaboh ngon Almaseh. Teuma meunyoe óh ka lheueh teupeubuet nyang lagée nyan, teunyata kamoe mantong jeuet lagée "ureuëng-ureuëng meudesya" meunan cit lagée ureuëng-ureuëng nyang kon Yahudi, peu kheueh ngon lagée nyoe bahwa Almaseh kheueh nyang jeuet keusabab kamoe meudesya? Ka teuntée hana! 18 Meunyoe ulôn kupeuphon lom teuma lôn peudong pola huköm agama nyang ka ulôn reuloh, ngon lagée nyan ka lôn peuleumah bahwa ulôn ka lôn langga huköm. 19 Teuma ulôn ka maté ateueh huköm agama -- jipeumaté lé huköm nyan keudroe -- mangat ulôn jeuet udeb keu Po teu Allah. Ulôn ka jisaleb meusajan ngon Almaseh. 20 Jinoenyoe bukon lé ulôn nyang udeb, teuma Almaseh nyang udeb lam tuboh ulôn. Udeb nyoe nyang ulôn amai jinoe na kheueh lé iman ulôn keu Aneuëk Allah nyang geugaséh ulôn dan nyang ka geukeureubeuen droe Gobnyan keu ulôn. 21 Ulôn hana lôn peubeuah rahmat Allah. Meunyoe hubongan manusia ngon Po teu Allah jeuet keu gét lom teuma sabab jiamai huköm agama, nyan saban cit maté Almaseh hana meuguna!

Galatia 3

1 Syedara-syedara nyang ureuëng-ureuëng Galatia! Gata biet-biet bangai! Aléh peungaroh soe nyang ka keunong nibak gata? Almaseh maté bak kayée saleb ka ulôn peutrang sijeulaih-jeulaih jih keu gata! 2 Cuba gata peugah ubak saboh hai nyoe: Peu kheueh gata katateurimong Roh Allah sabab gata amai huköm agama, atawa sabab gata deungoe Haba Gét nyang teuka nibak Po teu Allah dan meuiman ubak Almaseh? 3 Pakon gata keubiet that bangai! Gata ka tapeuphon udeb barô ngon Roh Allah, pakon jinoenyoe gata keuneuk trok ubak keusampoereuna ngon teunaga gata keudroe? 4 Sia-sia mantong banmandum nyang ka gata alami nyan? Hana mungken sia-sia! 5 Po teu Allah geubri Roh gobnyan keu gata dan geupeuna buet-buet nyang ajaéb lamkawan gata. Peu kheueh Allah geupeubuet nyan sabab gata ka tapeubuet huköm agama atawa sabab gata ka tadeungoe Haba Gét nyan dan meuiman ubak Almaseh? 6 Nyan saban lagée nyang na teutuléh lam Alkitab keuhai Nabi Ibrahim -- lagée nyoe, "Nabi Ibrahim geumeuiman ubak Allah, dan sabab meuiman geuhnyan gobnyan geuteurimong lé Allah sibagoe sidroe nyang teupeumangat até Allah." 7 Ngon lagée nyan bah kheueh gata beutasadar bahwa ureuëng nyang biet-biet keuturonan Nabi Ibrahim na kheueh ureuëng nyang meuiman ubak Allah. 8 Alkitab ka jikalon leubeh ilée bahwa Allah ka geupeumungken ureuëng-ureuëng nyang kon Yahudi jimeugét lom teuma ngon Allah, meunyoe awaknyan jimeuiman ubak Gobnyan. Haba Gét nyan teupeugah leubeh ilée ubak Nabi Ibrahim lam janji nyang lagée nyoe, "Rot gata, Allah teuma geubri beureukat banmandum umat manusia ateueh rhueng bumoe." 9 Nabi Ibrahim geumeuiman, nyang kheueh sabab gobnyan geubri beureukat. Meunan cit teuma keu mandum ureuëng nyang meuiman, teuma geubri beureukat meusajan-sajan ngon Nabi Ibrahim. 10 Ureuëng-ureuëng meugantueng ubak huköm agama, banmandum udeb dimiyueb kutokan. Sabab lam Alkitab na teutuléh lagée nyoe, "Ureuëng nyang hana seutia jiamai banmandum nyang teutuléh lam Kitab Huköm Agama, geukutôk lé Allah!" 11 Hana meusidroe pi nyang jimeugét ngon Po teu Allah ngon sabab jiamai huköm agama. Hai nyan ka teupeugah lam Alkitab, "Teuma ureuëng nyang meuiman ubak Allah sampoe hubongan jih ngon Allah jeuet keugét lom, teuma udeb!" 12 Teuma huköm agama hana meudasai ateueh iman. Lam Alkitab na teutuléh bahwa ureuëng nyang jiamai huköm agama, teuma udeb ngon sabab huköm nyan. 13 Teuma Almaseh geupeubeubaih tanyoe nibak kutokan huköm agama. Gobnyan geupeubuet lagée nyan ngon cara geupeubiyeu droe Gobnyan teukutok sabab lé geutanyoe. Sabab lam Alkitab na teutuléh lagée nyoe, "Teukutok kheueh ureuëng nyang maté teugantueng bak taméh kayée." 14 Almaseh geupeubuet lagée nyan mangat beureukat nyang ka geupeu janji lé Allah ubak Nabi Ibrahim geubri cit teuma ubak ureuëng-ureuëng nyang bukon Yahudi. Ngon lagée nyan tanyoe pih nyang meuiman ubak Allah, hase tateurimong Roh nyang ka geupeu janji lé Allah nyan. 15 Syedara-syedara! Bah kheueh lôn peuguna cuntoh nibak peungalaman tieb-tieb uroe. Meunyoe na ureuëng jipeuna saboh janji dan janji nyan ka teupeusah, hana meusidroe pih nyang jeuet jipeubateu janji nyan, atawa jitamah sapeue-sapeue nibak janji nyan. 16 Janji-janji Allah geupeugét lé Allah keu Nabi Ibrahim dan keu ureuëng keuturonan Nabi Ibrahim. Lam Alkitab hana teutuléh "dan keu ureuëng-ureuëng keuturonan Nabi Ibrahim", nyang makna jih jai that ureuëng. Nyang na teutuléh lam Alkitab nyan na kheueh, "dan keu ureuëng keuturonan gata", nyang makna jih keu sidroe ureuëng mantong, nyan kheueh Almaseh. 17 Nyang keuneuk lôn peugah nibak teumpat nyoe na kheueh lagée nyoe: janji Allah ka geupeugét dan teupeusah leubeh ilée. Huköm agama nyang geubri 430 thon óh lheueh nyan hana hase teupeubateu nyang ka teupeusah nyan dan teusampôh janji Allah nyan. 18 Sabab meunyoe meuneubri Allah teugantueng nibak huköm agama, ngon lagée nyan kon lé meuneubri nyang ka geupeu janji. Teuma lé sabab Allah ka geupeu janji nyan ubak Nabi Ibrahim, ngon lagée nyan Allah geubri atra nyan keu gobnyan. 19 Meunyoe meunan, keupeuguna jih huköm agama teubri? Jaweueb jih na kheueh bahwa huköm agama teutamah keuteupeugah buet nyang jilangga lé manusia. Huköm agama nyan meulaku sampoe bak watée trok sidroe keuturonan Nabi Ibrahim, nyang teupeugah lam janji Allah keu Nabi Ibrahim. Huköm agama nyan geupeusampoe lé malaikat-malaikat ngon peurantara sidroe manusia. 20 Nyang kheueh, meuseuti na dua pihak, barô kheueh peureulée sidroe peurantara. Teuma nibak Allah hana peureulée peurantara sabab Gobnyan keudroe nyang meutindak. 21 Peu kheueh nyan meumakna bahwa huköm agama meulawan ngon janji Allah? Ka teuntée hana! Sabab meunyoe huköm agama geubri keu anugeurah udeb manusia, ngon lagée nyan manusia hase jimeugét ngon Allah meulalu huköm agama. 22 Teuma lam Alkitab na teutuléh lagée nyoe bahwa banmandum umat manusia na dimiyueb keukuasaan desya. Ngon sabab nyan, meuneubri nyang geupeu janji ngon dasai jih meuiman ubak Isa Almaseh teubri keu awaknyan nyang meuiman. 23 Sigohlom trok watée jih keumeuiman ubak Almaseh, tanyoe jijaga that lé huköm agama; tanyoe jikurong sampoe iman nyan teupeugah. 24 Ngon lagée nyan, huköm agama teupeujeuet sibagoe nyang kawai tanyoe trok ubak Almaseh teuka keu geujak peugét tanyoe beutameugét lom ngon Allah sabab tanyoe meuiman ubak Almaseh. 25 Jinoenyoe, sabab ka trok watée jih manusia jeuet jimeuiman ubak Almaseh, ngon lagée nyan tanyoe hana lé jikawai lé huköm agama. 26 Sabab gata meuiman ubak Isa Almaseh, ngon lagée nyan gata meusaboh ngon Gobnyan; dan ngon sabab nyan gata ka jeuet keu aneuëk-aneuëk Allah. 27 Gata banmandum ka teupumanö ateueh nan Almaseh, dan gata ka tateurimong nibak droe gata sifeuet-sifeuet Almaseh keudroe. 28 Lam hai nyoe hana lé beda ureuëng Yahudi ngon ureuëng nyang kon Yahudi, meunan cit hana lé beda sidroe namiet ngon ureuëng beubaih, hana meubeda ureuëng agam ngon ureuëng inong. Gata banmandum ka meusaboh ngon sabab Isa Almaseh. 29 Meunyoe gata atra Almaseh, ngon lagée nyan gata na kheueh keuturonan Nabi Ibrahim. Dan gata teuma tateurimong peue nyang geupeu janji lé Allah.

Galatia 4

1 Teuma peureulée lôn peujeulaih: simantong ahli waréh mantong dimiyueb umu, na sidroe ureuëng nyang kawai jihnyan dan nyang uruih peue-peue nyang jipeureulée lé ahli waréh nyan trok ubak umu nyang ka jipeuteuntée lé bapak jih. Jihnyan teupeusaneuet saban lagée sidroe namiet, bah pi jihnyan ahli waréh nibak mandum atra nyan. 3 Meunan cit ngon geutanyoe: Simantong tanyoe gohlom rayeuk, tanyoe jipeunamiet lé roh-roh nyang kuasa donya nyoe. 4 Teuma nibak watée nyang paih, Allah geu-utus Aneuëk Gobnyan lam donya nyoe. Aneuëk Gobnyan nyan jipeulahé lé sidroe ureuëng inong dan udeb dimiyueb keukuasaan huköm agama. 5 Ngon lagée nyan Gobnyan geupeu beubaih ureuëng-ureuëng nyang udeb dimiyueb keukuasaan huköm agama; mangat tanyoe pih hase jeuet keu aneuëk-aneuëk Allah. 6 Sabab gata na kheueh aneuëk-aneuëk Allah, Allah geuyue Roh Aneuëk Gobnyan jitamong lam até Gata dan até ulôn, nyan kheueh Roh nyang jimeuhôi, "Bapak, oe Bapak lôn." 7 Ngon lagée nyan, gata kon lé namiet, teuma ka jeuet keu aneuëk. Dan sabab gata aneuëk Allah, teuma Allah geubri ubak gata peue-peue mantong nyang geukeubah keu aneuëk-aneuëk Gobnyan. 8 Yoh watée ilée gata hana taturi keu Allah, nyang kheueh sabab jih gata jeuet keu namiet nibak kuasa-kuasa nyang teuanggab sibagoe ilah nyang sibeuna mubacut pih kon Allah. 9 Teuma bak watéenyoe gata ka taturi keu Allah, atawa nyang leubeh paih lom, Allah geuturi gata. Ngon sabab nyan, pakon gata keuneuk tagisa lom ubak roh-roh donya nyoe, nyang leumoh dan gasien? Pakon gata tatem jipeubudak lom lé roh-roh nyan? 10 Gata tapeuna uroe raya bak uroe-uroe nyang ka teupeuteuntée, buleuen-buleuen nyang ka teupeuteuntée, dan thon-thon nyang ka teupeuteuntée teuma. 11 Ulôn khawate, hana-hana jeuréh payah ulôn keugata sia-sia mantong. 12 Syedara-syedara! Ulôn meulakée ngon meuharab that mangat gata beujeuet lagée ulôn. Sabab ulôn pi ka jeuet lagée gata. Gata hana tapeubuet musapeue pih nyang salah ateueh ulôn. 13 Gata teuntée mantong teuingat peue sabab jih bak awaiphon ulôn peusampoe Haba Gét ubak gata. Sabab jih na kheueh ulôn rhot bak sakét. 14 Bak watée nyan gata hana meurasa luwat keu ulôn, bah pih keuadaan tuboh ulôn ka jeuet keucubaan nyang paleng rayeuk ateueh gata. Bahkan gata tateurimong ulôn sibagoe malaikat Allah atawa lagée tateurimong Isa Almaseh keudroe. 15 Gata mubahgia that bak watée nyan. Teuma bak watée nyoe, dipat kheueh keubahgiaan nyan? Ulôn kuteupeue bahwa bak watée nyan gata rila gata cungke mata gata keudroe keugata jok ubak ulôn, meunyoe nyan hase teupeubuet. 16 Peu kheueh gata bak watéenyoe ka gata anggab ulôn sibagoe musoh gata, sabab ulôn peugah nyang beutôi ubak gata? 17 Ureuëng-ureuëng nyang laén nyan ngon peunoh seumangat jimita gata, teuma meukeusut awaknyan hana gét. Awaknyan jikeuneuk peuputôh hubongan ngon kamoe, mangat gata taseutôt awaknyan ngon peunoh seumangat. 18 Beutôi gét that beuna seumangat lam hai-hai nyang gét, asai beusabe na lagée nyan dan bék watée ulôn na meusapat ngon gata mantong. 19 Aneuëk-aneuëk ulôn nyang lôn cinta! Ulôn bak watée nyoe ka meudeurita lom sabab lé gata. Ulôn meudeurita lagée sidroe inong meudeurita watée jipeulahé aneuëk. Ulôn teuma sabe meudeurita, meunyoe sifeuet-sifeuet Almaseh gohlom teupula lam tuboh gata! 20 Ulôn meuheuét that keuneuk meugumpôi lamkawan gata bak watée nyoe, mangat ulôn jeuet lôn meucalitra ubak gata ngon su nyang laén, sabab ulôn ka lôn teupeue lé peue nyang meuseuti lôn peubuet ateueh gata! 21 Syedara-syedara nyang keuneuk udeb dimiyueb keukuasaan huköm agama, cuba deungoe ulôn peugah! Ulôn keuneuk kheun bak gata peue nyang na teutuléh lam Kitab Huköm Nabi Musa. 22 Disinan na teutuléh bahwa Nabi Ibrahim na dua droe aneuëk: Mak nibak aneuëk nyang sidroe na kheueh sidroe namiet, dan mak nibak sidroe aneuëk nyang sidroe teuk nyan na kheueh sidroe inong nyang meurdehka. 23 Aneuëk nibak inong namiet lahé jih lazem sabab keuheundak manusia. Teuma aneuëk nyang lahé nibak inong nyang meurdehka, lahé jih sabab geupeue janji lé Allah. 24 Nyoe jeuet tapeuguna sibagoe kiasan. Dua droe inong nyan na kheueh miseue lagée dua boh janji: nyang sidroe asai jih nibak Gunong Sinai -- nyan kheueh Hagar; aneuëk-aneuëk inong nyan lahé sibagoe namiet. 25 Dan, Hagar nyan kheueh teupeumiseue ngon Gunong Sinai, di nanggroe Arab. Gobnyan sibagoe lambang banda Yerusalem ngon banmandum peunduduek jih nyang bak watée nyoe ka jeuet keunamiet. 26 Teuma Yerusalem nyang na lam syeuruga nyan na kheueh Yerusalem nyang meurdehka, dan nyan kheueh mak geutanyoe. 27 Sabab lam Alkitab teutuléh lagée nyoe, "Meugeumbira kheueh gata he inong malée, nyang hántom na peulahé aneuëk! Meusukaria kheueh dan seumurak meuhubo kheueh gata nyang hántom sakét meusalen! Sabab ureuëng inong nyang jitinggai lé lakoe jih teuma meuteumé leubeh jai aneuëk nibak ureuëng inong nyang udeb meusajan lakoe." 28 Syedara-syedara! Gata keudroe na kheueh aneuëk-aneuëk Allah nyang teupeulahé sabab janji Allah; gata saban lagée Nabi Ishaq. 29 Bak watée nyan aneuëk nyang lahé meunurot keuheundak manusia, ji iélanya aneuëk nyang lahé meunurot keuheundak Roh Allah. Meunan cit bak watée nyoe. 30 Teuma peu kheueh nyang teutuléh lam Alkitab? Disinan teutuléh lagéenyoe: "Use kheueh namiet inong nyan meusajan ngon aneuëk jih, sabab aneuëk nibak namiet inong nyan hana teuma jeuet keu ahli waréh meusajan ngon aneuëk inong nyang meurdehka." 31 Ngon lagée nyan, Syedara-syedara, geutanyonyoe kon aneuëk-aneuëk nibak sidroe namiet ureuëng inong; geutanyoe na kheueh aneuëk-aneuëk nibak inong nyang meurdehka.

Galatia 5

1 Tanyoe jinoenyoe meurdehka, sabab Almaseh ka geupeu meurdehka tanyoe! Ngon sabab nyan gata peuteun kheueh keubeubaihan gata, dan bék gatatem jipeujeuet keu namiet lom teuma. 2 Ingat, meunyoe gata talakée meusunat, nyan saban cit Almaseh hana meuguna lé nibak gata. Nyang peugah nyoe na kheueh ulôn keudroe, Paulus. 3 Sigoeteuk lôn peuingat keu ureuëng nyang jilakée meusunat, bahwa jihnyan wajéb jiamai banmandum huköm agama! 4 Meunyoe gata meu-useuha tameugét lom teuma ngon Allah rot huköm agama, nyan saban cit hubongan gata ngon Almaseh ka putôh. Ngon lagée nyan gata ka udeb diluwa lingkongan rahmat Allah. 5 Teuma nibak kamoe, kamoe meuharab bahwa ngon geutulông lé Roh Allah dan ngon dasai meuiman kamoe ubak Almaseh, Allah geupeumungken kamoe meugét lom teuma ngon Gobnyan. 6 Sabab meunyoe tanyoe ka meusaboh ngon Isa Almaseh, keuhai teuturot atawa hana teuturot meusunat nyan, hana jeuet keumasaalah lé. Nyang peunteng na kheueh meuiman ubak Almaseh, dan nyan nyata that lam geunaséh tanyoe ubak ureuëng laén. 7 Yohmasa ilée gata meujuang ngon gét! Dan jinoenyoe pakon gata hana taát lé ubak keuheundak Po teu Allah? Soe nyang ka peusuna gata? 8 Pasti nyang peubuet nyan bukon Allah nyang ka geutawök gata! 9 "Rago nyang bacut teuma jipeukeumang banmandum teupông nyang ka teulawok," jikheun lé gob. 10 Bah kheueh meunan ulôn teutab mantong peucaya bahwa gata hana ta anut peundirian nyang laén, sabab tanyoe ka meusaboh ngon Almaseh. Dan ulôn yakén that bahwa soe mantong nyang peukaru pikeran gata pasti geuhuköm lé Allah. 11 Keuhai ulôn, syedara-syedara, pakon ulôn hana piôh-piôh jimeumusoh meunyoe ulôn mantong lôn peugah bahwa peuratoran meusunat nyan peureulée? Meunyoe ulôn keubiet na lôn peugah lagée nyan, ngon keudroe jih peue nyang ka ulôn peugah keuhai saleb Almaseh hana tepeuteuka masa alah. 12 Leubeh gét ureuëng-ureuëng nyang peukaru pikeran gata nyan jiteubiet mantong lam jeumaáh! 13 Gata banmandum teutawök beujeuet keu ureuëng nyang meurdehka. Teuma bék kheueh gata peuguna keubeubaihan gata nyan hana putôh-putôh gata peubuet peue nyang gata galak. Nyang sikeubiet jih, gata beuna saléng meugaséh dan saléng tapeutimang. 14 Banmandum huköm agama ka teupeusaboh lam peurintah nyang saboh nyoe, "Bah kheueh gata saléng tameugaséh seusabe gata manusia lagée gata gaséh droe gata keudroe." 15 Teuma meunyoe gata saléng tameukrok sabe keudroe-droe, ingat, teuma gata banmandum hanco. 16 Nyang ulôn meukeusut lagée nyoe: Bah kheueh Roh Allah geubimbéng gata dan bék udeb meunurot tabiát manusia. 17 Sabab keuheundak manusia hana sisuai ngon keuheundak Roh Allah, dan keuheundak Roh Allah hana sisuai ngon keuheundak manusia. Mandua nyan sabe meulawan, ngon lagée nyan gata hana hase tapeubuet peue nyang gata keuneuk peubuet. 18 Teuma meunyoe Roh Allah nyang pimpén gata, ngon lagée nyan gata hana jikuasa lé huköm agama. 19 Keuheundak tabiát manusia deuh that nibak buet-buet nyang cabui, kutoe dan hana patot; 20 nibak teuseumah beurala dan iéleumé guna-guna; nibak meumusoh-musoh, meulo, bingiek até, bagaih beungéh, dan teupeupeunteng droe keudroe; peupeucahan dan meudong-dong siblaih, 21 meunan cit picék até, mabök-mabök, meugura-gura dan laén-laén sibagoe jih. Keu banmandum nyan ulôn peuingat gata jinoenyoe lagée nyang ka lôn peuingat gata yoh masa ilée, bahwa ureuëng-ureuëng nyang jipeubuet hai-hai nyang lagée nyan hana teuma jeuet keuanggota umat Allah. 22 Teuma, meunyoe ureuëng-ureuëng nyang jipimpén lé Roh Allah, hase jih na kheueh lagée nyoe: Awaknyan saléng na gaséh sayang, awaknyan sabe lam geumbira, até awaknyan teunang, awaknyan saba dan meubudho basa, awaknyan gét ateueh ureuëng laén dan awaknyan seutia, 23 awaknyan miyueb até, dan sabe hase jikuasa droe. Hana huköm agama nyang larang hai-hai nyang lagée nyan. 24 Ureuëng-ureuëng nyang ka jeuet keu milék Isa Almaseh, ureuëng-ureuëng nyan ka jipeumaté tabiát manusia jih ngon sigala nafeusu dan nyang jilakée lé até. 25 Roh Allah ka geubri keugeutanyoe udeb nyang barô; ngon sabab nyan Roh Allah cit teuma nyang kuasa lam udeb geutanyoe. 26 Geutanyoe bék jeuet keu ureuëng sombong, dan saléng tapeusakét até gob, dan picék até sidroe ngon nyang laén.

Galatia 6

1 Syedara-syedara! Meunyoe sidroe-droe ureuëng meuteumé teungoh jipeubuet desya, bah kheueh gata nyang udeb meunurot Roh Allah, gata bimbeng ureuëng nyan tapeuwoe bak jalan nyang beuna. Teuma hai nyan harôh gata peubuet ngon leumoh leumbot, dan jaga kheueh bék sampoe gata keudroe teugoda teuma. 2 Bah kheueh gata saléng tabantu tatanggong beuban ureuëng laén, mangat ngon lagée nyan ka tataát ubak peue nyang geupeurintah lé Almaseh. 3 Meunyoe sidroe-droe ureuëng jipike jih nyan leubeh peunteng, padahai hana peunteng, ureuëng nyan ka jipeungeut droe jih keudroe. 4 Tieb-tieb ureuëng bah kheueh jipeureksa droe jih keudroe peu kheueh droe jih nyan gét atawa hana. Meunyoe gét, ureuëng nyan jeuet meurasa bangga ateueh hai nyan. Teuma hanapeue jipeusa droe ngon peue nyang jipeubuet lé ureuëng laén. 5 Sabab maséng-maséng ureuëng harôh jiseuôn tanggong jaweueb jih keudroe. 6 Ureuëng nyang teurimong peue nyang geupeurunoe lé Almaseh, bah kheueh jimeuweuk ngon gurée jih banmandum nyang gét nyang na nibak jih nyan. 7 Bék sampoe keunong peungeut. Allah hana jeuet teupeumeuén! Peue nyang jipula, nyan kheueh teuma nyang jipöt. 8 Meunyoe jipula meunurot tabiát manusia nyang na nibak jih, ureuëng nyan teuma jipöt maté nibak tabiát jih nyan. Teuma meunyoe ureuëng nyan jipula meunurot pimpénan Roh Allah, ureuëng nyan teuma jipöt udeb seujati dan keukai nibak Roh Allah. 9 Ngon sabab nyan, bék kheueh geutanyoe sampoe bosan bak tapeubuet hai-hai nyang gét; sabab meunyoe tanyoe hana tapiôh bak tapeubuet hai nyan bak saboh watée singoh teuma tateumé pöt hase jih. 10 Ngon lagée nyan, simantong na watée nibak geutanyoe, bah kheueh tapeubuet nyang gét ubak mandum ureuëng, nyang phon that keu syedara-syedara tanyoe nyang saboh iman ngon tanyoe. 11 Simak kheueh beugét-gét bagian nyoe nyang ulôn tuléh ngon hurof nyang rayeuk-rayeuk. 12 Ureuëng nyang jitem peubangga droe ngon hai-hai nyang lahé, ureuëng nyan kheueh nyang paksa gata mangat gatatem seutôt peuratoran meukatan. Teuma awaknyan jipeubuet nyan mangat jihnyan hana ji iénanya lé ureuëng-ureuëng Yahudi ngon sabab lé saleb Almaseh. 13 Ureuëng-ureuëng jiseutôt atoran meukatan nyan pih hana jipeujak lagée huköm agama. Teuma awaknyan meuharab mangat gata tameukatan, mangat awaknyan jeuet jipeubangga droe bahwa gata tataát ubak peuratoran nyan. 14 Teuma ulôn mubacut pi hana kutem peubangga droe keuhai peue-peue mantong, seulaén Tuhan geutanyoe Isa Almaseh nyang ka maté jisaleb. Sabab, ngon sabab Gobnyan ka teusaleb nyan, teuma donya nyoe hana meuguna sapeue keu ulôn. Dan keuhai donya nyoe, ulôn pi siulah-ulah ka maté. 15 Meukatan atawa hana meukatan, nyan hana peunteng. Nyang leubeh peunteng na kheueh jeuet keumanusia barô. 16 Keu ureuëng nyang udeb lagée peundirian nyan, dan meunan cit teuma keubanmandum umat Po teu Allah, ulôn meuharab Allah geubri keuseujahteuraan dan rahmat Gobnyan. 17 Óh lheueh nyan, bék kheueh na meusidroe pih jipeususah le ulôn nyoe, sabab nibak tuboh ulôn na bukeuti-bukeuti bahwa ulôn na kheueh murit Isa Almaseh. 18 Seumoga Tuhan geutanyoe Isa Almaseh sabe geubri beureukat keugata banmandum. Amin. Horeumat kamoe, Paulus

Efesus 1

1 Umat Allah di Efesus, nyang seutia ubak Isa Almaseh! 2 Ulôn, Paulus, rasui Isa Almaseh ateueh keuheundak Po teu Allah, meuharab seumoga Allah Bapak geutanyoe dan Tuhan Isa Almaseh geubri beureukat dan seujahteura ateueh gata. 3 Teupujoe kheueh Allah, Bapak Tuhan geutanyoe Isa Almaseh! Gobnyan geubri beureukat ubak geutanyoe ngon sigala beureukat rohani lam syeuruga, sabab geutanyoe meusaboh ngon Almaseh. 4 Sigohlom donya nyoe geucebta, Allah ka geupiléh geutanyoe rot Almaseh ngon meukeusut mangat tanyoe jeuet keu atra milék Gobnyan nyang khusos dan hana meucupa dikeue Gobnyan. Sabab geunaséh Allah, 5 teuma Gobnyan ka geupeuteuntée leubeh ilée bahwa rot Isa Almaseh, Gobnyan teuma geu angkat geutanyoe jeuet keu aneuëk-aneuëk geuh keudroe. Dan keubiet nyan kheueh nyang keuneuk geupeubuet. 6 Teupujoe kheueh Allah nyang agong, sabab rot Aneuëk Gobnyan nyang teucinta Gobnyan that-that geugaséh geutanyoe. 7 Sabab, ngon maté Almaseh, tanyoe geupeu meurdehka lé Po teu Allah, ngon lagée nyan Gobnyan ka geupeu amphon tanyoe nibak banmandum desya-desya geutanyoe. 8 Gobnyan geupeubuet lagée nyan sabab Gobnyan keubiet that geugaséh keutanyoe, dan geunaséh nyan geurô ateueh tanyoe ngon peunoh keubijaksanaan dan peunoh peungeurtian. 9 Meunurot nyang geumeuhéuet keudroe, Allah geupeugah ubak geutanyoe rahsia reuncana Gobnyan; Gobnyan ka geucok keuputosan bahwa reuncana Gobnyan teuma geupeuseuleusoe rot Almaseh. 10 Reuncana nyan na kheueh mangat peue-peue mantong, bah kheueh nyang na lam syeuruga meunan cit nyang na ateueh rhueng bumoe, jeuet meusaboh ngon Almaseh sibagoe ulée. Dan hainyan teuma geupeuseuleusoe lé Po teu Allah meunyoe ka trok watée jih. 11 Allah geupeubuet peue-peue mantong meunurot nyang geumeuhéuet dan peunutôh geuh keudroe. Yoh awaikon Gobnyan ka geupiléh tanyoe sabab Gobnyan meuharab geutanyoe jeuet keu umat geuh sabab meusaboh ngon Almaseh. 12 Bah kheueh geutanyoe, nyang phon-phon that meuharab ubak Almaseh, tapujoe Allah sabab keuagongan Gobnyan! 13 Gata pi ka jeuet keu umat Allah watée gata deungoe peusan Po teu Allah, na kheueh Haba Gét nyang teubri seulamat keugata. Gata meuiman ubak Isa Almaseh, sabab nyan Allah geubri tanda milék Gobnyan keugata, na kheueh Roh Gobnyan nyang ka geupeu janji nyan. 14 Roh nyan kheueh sibagoe jaminan bahwa geutanyoe tateurimong peue nyang ka geupeu janji lé Po teu Allah ubak umat Gobnyan. Nyoe teubri keuyakénan ubak geutanyoe bahwa Po teu Allah teuma geupeubeubaih umat Gobnyan. Teupujoe kheueh Allah sabab keuagongan Gobnyan! 15 Ngon sabab nyan, watée lôn deungoe gata meuiman ubak Tuhan Isa, dan gata tagaséh banmandum umat Allah, 16 ulôn hana putôh-putôh lôn lakée teurimong gaséh ubak Allah keuhai gata. Sabe lôn teuôh nan gata watée ulôn meudoá. 17 Ulôn meulakée mangat Allah Tuhan geutanyoe Isa Almaseh, Bapak nyang mulia, geubri Roh Gobnyan keugata. Ngon Roh nyan teuma teupeujeuet gata bijaksana, dan teuma teupeugah Allah keu gata sampoe gata taturi Gobnyan. 18 Ulôn meulakée mangat Allah geubuka pikeran gata sampoe jeuet keu trang; ngon lagée nyan gata muphom peue nyang gata teumé meuharab nibak Allah nyang ka geutawök gata. Meunan cit mangat gata tateupeue padub na jai beureukat-beureukat nyang ceudah meulimpah geukeubah lé Allah keu umat Gobnyan; 19 dan padub na hebat jih Allah geumubuet ngon peunoh kuasa lam droe geutanyoe nyang meuiman. Kuasa Allah nyan saban lagée kuasa nyang luwabiasa 20 nyang geupeu guna watée geupeu udeb lom teuma Almaseh nibak maté dan geubri ubak Gobnyan jabatan nyang paleng manyang meusajan-sajan ngon Allah lam syeuruga. 21 Jabatan Almaseh nyan jiôh leubeh manyang nibak jabatan bubena peumeurintah, bubena nyang mat kuasa, bubena peumimpén, bubena teuku-teuku dan keusoe mantong nyang ka geubri keududuekan nyang paleng manyang; bah kheueh nyang udeb bak jamén nyoe meunan cit nyang udeb bak jamén nyang teuma teuka. 22 Allah geupeu taklok banmandum nyan dimiyueb keukuasaan Almaseh, dan geubri Almaseh ubak jeumaáh sibagoe ulée nibak peue-peue mantong. 23 Jeumaáh na kheueh tuboh Almaseh, geupeue sampoereuna lé Gobnyan nyang peusampoereuna peue-peue mantong dipat mantong na.

Efesus 2

1 Yoh watée ilée gata maté seucara rohani sabab gata meudesya dan gata iengkeue peue-peue nyang geupeurintah lé Allah. 2 Bak watée nyan gata taseutôt keulazeman-keulazeman lam donya nyoe; ngon lagée nyan gata taát ubak peunguasa angkasa raya, na kheueh roh nyang bak watée nyoe jikuasa até ureuëng-ureuëng nyang hana taát ubak Allah. 3 Yoh masa ilée tanyoe banmandum saban lagée awaknyan; tanyoe udeb meunurot tabiát manusia teuh keudroe dan tapeubuet peue nyang jipeugalak badan dan pikeran tanyoe. Bak watée nyan tanyoe na kheueh ureuëng-ureuëng nyang keunong meureuka Allah cit teuma, saban lagée ureuëng-ureuëng laén. 4 Teuma padubna rayeuk jih keumurahan até Allah! Gobnyan keubiet that geugaséh geutanyoe, 5 sampoe watée tanyoe mantong maté seucara rohani sabab buet-buet tanyoe nyang teularang, Gobnyan geupeu udeb lom tanyoe meusajan-sajan ngon Almaseh. Ngon lagée nyan, na kheueh lé sabab jroh até Allah, gata geupeu seulamat lé Gobnyan. 6 Sabab tanyoe meusaboh ngon Isa Almaseh, Allah geupeu udeb lom tanyoe meusajan-sajan ngon Gobnyan, mangat tanyoe tamat peurintah cit teuma meusajan-sajan Gobnyan lam syeuruga. 7 Allah geupeubuet lagée nyan mangat bak jamén nyang teuma teuka, manusia hase jikalon padub na rayeuk jih geunaséh Allah. Geunaséh nyan geupeugah lé Allah rot até Gobnyan nyang jroh keu geutanyoe ngon peurantaraan Isa Almaseh. 8 Allah geugaséh gata, nyang kheueh sabab jih Gobnyan geupeu seulamat gata sabab gata meuiman ubak Isa. Seulamat nyang gata rasa nyan bukon lé sabab hase useuha gata keudroe. Nyan na kheueh anugeurah Allah. Ngon lagée nyan, hana meusidroe ureuëng pih jeuet jipeusombong droe jih keuhai nyan. 10 Tanyoe na kheueh cebtaan Allah, dan rot Isa Almaseh, Allah geupeugét tanyoe mangat tanyoe tapeubuet hai-hai nyang jroh nyang ka geukeubah keu geutanyoe. 11 Syedara-syedara nyang kon ureuëng Yahudi! Ingat kheueh keuadaan gata yoh masa ilée: Gata jipeugah "ureuëng hana meusunat", lé ureuëng Yahudi nyang meungaku droe jih meusunat (meukeusut jih nyang ka meuteumé tanda bak tuboh awaknyan). 12 Bak watée nyan gata hana meusaboh ngon Almaseh, gata na kheueh ureuëng aséng nyang hana jitamong lam umat nyang geupiléh lé Allah. Gata hana jitamong lam ikatan janji nyang geupeugot lé Allah ngon umat Gobnyan. Gata udeb lam donya nyoe ngon hana harapan dan hana Allah. 13 Teuma bak watée nyoe, sabab gata ka meusaboh ngon Isa Almaseh, gata nyang yoh masa ilée jiôh, ka teupeurab lé Almaseh maté. 14 Sabab Almaseh keudroe nyang peudamé tanyoe. Gobnyan geupeu saboh ureuëng-ureuëng Yahudi dan ureuëng-ureuëng nyang bukon Yahudi jeuet keusaboh bansa. Beuton nyang peujiôh keu awaknyan, na kheueh saléng meumusoh, ka geupeu hanco lé Almaseh ngon cara geukeureubeuen droe Gobnyan keudroe. 15 Huköm agama Yahudi ngon peurintah-peurintah dan peuratoran-peuratoran jih ka geusampôh lé Almaseh mangat dua boh bansa nyan jeuet keusaboh bansa manusia barô, nyang meusaboh ngon Gobnyan. Ngon caranyan kheueh Almaseh geupeuna damé. 16 Lé maté Gobnyan bak kayée saleb, Almaseh geupeu saboh dua boh bansa nyan, dan geupeu damé awaknyan ngon Po teu Allah, ngon lagée nyan teusampôh kheueh saléng meumusoh nyan. 17 Nyang kheueh sabab jih Almaseh teuka sira geuba Haba Gét keuhai meudamé nyan ubak gata; bah kheueh keugata nyang kon ureuëng Yahudi nyang yoh awai ilée jiôh nibak Allah, meunan cit keu ureuëng Yahudi nyang rab ngon Allah. 18 Ngon peurantaraan Almaseh, geutanyoe mandum -- bah kheueh ureuëng Yahudi meunan cit nyang bukon Yahudi -- lé Roh Allah nyang saboh, jeuet tapeurab ubak Bapak. 19 Ngon sabab nyan, gata hana jitamong lé lamkawan ureuëng aséng atawa ureuëng luwa. Gata jinoenyoe na kheueh saban-saban sibagoe wareuga umat Allah. Gata na kheueh anggota-anggota keuluwarga Allah. 20 Gata pih teupeudong ateueh dasai nyang ka jikeubah lé rasui-rasui dan nabi-nabi, Isa Almaseh sibagoe batée nyang lumboi sa. 21 Gobnyan kheueh nyang suson banmandum bangunan nyan dan jeuet keu Baét Allah nyang khusos keu Tuhan. 22 Sabab udeb meusaboh ngon Almaseh, gata pih teungoh teupeudong meusajan-sajan ngon ureuëng laén jeuet keusaboh baét keu Po teu Allah; nibak teumpat nyan Allah tinggai ngon Roh Gobnyan.

Efesus 3

1 Nyang kheueh sabab jih ulôn, Paulus, jipeutamong lam glab sabab lé Isa Almaseh keu keupeureulée gata nyang kon ureuëng Yahudi. 2 Teuntée gata katadeungoe bahwa Allah, sabab ngon jroh até Gobnyan, ka geubri ubak ulôn tugaih nyoe deumi keupeureulée gata. 3 Allah geupeugah rahsia reuncana Gobnyan dan geupeugah nyan ubak ulôn. (Keuhainyoe ka ulôn tuléh di ateueh ngon ringkaih, 4 dan meunyoe gata baca nyan, gata teuma muphom rahsia keuhai Almaseh lagée nyang ulôn muphom.) 5 Yoh watée ilée rahsia nyan hántom na teubri keumanusia, teuma bak watée nyoe Roh Allah ka geupeugah droe ubak rasui-rasui dan nabi-nabi Gobnyan. 6 Rahasia nyan na kheueh lagée nyoe: Rot Haba Gét nyan, ureuëng nyang kon Yahudi meusajan-sajan jirasa beureukat Allah nyang yoh masa ilée teukeubah keu ureuëng Yahudi. Ureuëng-ureuëng nyang kon Yahudi ka jeuet keu anggota tuboh nyang saban, dan meusajan-sajan jiteurimong peue nyang geupeu janji lé Po teu Allah rot Isa Almaseh. 7 Allah geubri ubak ulôn anugeurah -- na kheueh tugaih -- keuteupeusampoe Haba Gét nyan. Ulôn teurimong anugeurah nyan rot kuasa Allah nyang mubuet lam droe ulôn. 8 Lam bandum umat Allah, ulôn kheueh nyang paleng hina. Teuma Allah geubri ubak ulôn karonya nyoe: tugaih keulôn jak peusampoe ubak ureuëng-ureuëng nyang bukon Yahudi Haba Gét keuhai keukayaan Almaseh nyang hana habéh-habéh nyan; 9 dan meunan cit mangat rot ulôn banmandum ureuëng jiteupeue pakriban Allah, nyang cebta bansigom donya nyoe, geulaksana reuncana Gobnyan nyang yoh jamén ilée teurahsia keu donya nyoe. 10 Meukeusut Allah na kheueh mangat bak watée nyoe, rot jeumaáh, banmandum nyang mat keukuasaan nibak angkasa jiteupeue keuhai keubijaksanaan Allah lam mubagoe rupa hi jih. 11 Allah geupeubuet nyan sisuai ngon reuncana Gobnyan nyang keukai, nyang geupeubuet ngon peurantaraan Isa Almaseh Tuhan geutanyoe. 12 Ngon teumeuiman ubak Almaseh dan sabab meusaboh ngon Gobnyan, keugeutanyoe geubri keubeubaihan keu tapeurab ubak Allah ngon peunoh iman. 13 Sabab nyan, nyang lôn lakée na kheueh: bék kheueh khawate peue nyang ulôn deurita lé sabab gata, sabab banmandum nyan na kheueh keu keugét gata. 14 Ngon sabab nyan kheueh ulôn meuteuôt dikeue Bapak. 15 Nibak Gobnyan kheueh tieb-tieb keuluwarga bah kheueh nyang na lam syeuruga meunan cit nyang na ateueh rhueng bumoe nyoe jiteurimong sifeuet Gobnyan nyang khusos. 16 Ulôn meudoá seumoga Allah nyang mahamulia geutembri teupeukong batén gata ngon Roh Gobnyan. 17 Seumoga teuma sabab gata meuiman ubak Almaseh, Almaseh tinggai lam até gata, dan udeb gata meudasai dan jikuasa lé geunaséh. 18 Ulôn meudoá seumoga meusajan-sajan ngon banmandum umat Allah, gata meuteumé tarasa padubna luwah jih dan panyang jih meunan cit manyang jih dan lhok jih geunaséh Almaseh, 19 nyang ngon akai manusia hana hase jipike silhok-lhok jih. Seumoga gata taturi geunaséh Almaseh nyan, ngon lagée nyan gata peunoh ngon keupribadian Allah nyang sampoereuna. 20 Ngon kuasa Allah nyang biet-biet jimubuet lam tuboh geutanyoe, Allah hase geupeubuet jiôh leubeh jai nibak peue nyang hase talakée atawa nyang ta pike. 21 Seumoga Allah teupeumulia tron meutron lam jeumaáh, rot Isa Almaseh. Teupujoe kheueh Allah siumu masa! Amin.

Efesus 4

1 Nyang kheueh sabab jih ulôn -- sidroe ureuëng huköman, nyang jihuköm sabab lôn layani Tuhan -- lôn lakée ngon meuharab that bak gata: udeb kheueh sisuai ngon keududuekan gata lagée ureuëng nyang ka geutawök lé Allah. 2 Bah kheueh gata sabe miyueb até, leumoh leumbot dan rayeuk saba. Tunyok kheueh geunaséh gata ngon cara tatulong sidroe ngon nyang laén. 3 Useuha kheueh beu biet-biet keu udeb lam damé mangat meusaboh nyang ka geucebta lé Roh Allah teutab teupeulara. 4 Teuma na saboh tuboh dan saboh Roh. Meunan cit gata teuhôi keu jeuet saboh harapan nyang sa. 5 Teuma na sidroe Tuhan, saboh iman, saboh pumanö, 6 dan sidroe Allah nyang jeuet keu Bapak banmandum manusia. Gobnyan kheueh Tuhan seumesta álam, nyang mubuet rot banmandum, dan meukuasa ateueh banmandum. 7 Geutanyoe maséng-maséng tateurimong meuneubri meunurot peue nyang geubri lé Almaseh. 8 Lam Alkitab na teutuléh lagée nyoe, "Watée Gobnyan geuék bak teumpat nyang manyang, jai that geuba ureuëng keunong teun; dan Gobnyan geubri peue-peue mantong keumanusia." 9 Ngon lagée nyan, meunyoe geupeugah "Gobnyan geu ék" nyan makna jih phon-phon that Gobnyan ka geutreun trok ubak teumpat nyang paleng miyueb ateueh bumoe nyoe. 10 Dan Gobnyan nyang ka geutreun nyan, nyan kheueh teuma nyang ék jiôh leubeh manyang nibak banmandum langét, ngon lagée nyan bansaboh álam nyoe ka peunoh ngon Gobnyan nyang teuka. 11 Gobnyan kheueh nyang "bri raseki-raseki keu umat manusia"; na nyang geuangkat jeuet keu rasui, nyang laén jeuet keu nabi; nyang laén lom jeuet keu ureuëng nyang peusampoe Haba Gét nyan, dan nyang laén teuma geuangkat jeuet keu gurée-gurée dan jipeulara jeumaáh. 12 Nyoe geupeubuet mangat umat Allah geupeu leungkab sampoe peunoh mangat hase jilayani Tuhan dan jipeudong tuboh Almaseh. 13 Ngon lagée nyan tanyoe banmandum ka jeuet keusaboh lé iman nyang saban dan peungeurtian nyang saban keuhai Aneuëk Allah. Dan tanyoe jeuet keu ureuëng-ureuëng rayeuk nyang maken treb maken meutamah sampoereuna lagée Almaseh. 14 Ngon lagée nyan tanyoe hana lé jeuet lagée aneuëk miet nyang hana lom teutab peundirian jiba keudeuh keunoe lé mubagoe rupa peungajaran nibak ureuëng-ureuëng nyang jeuhet. Awaknyan jipeusisat gob ngon tipée daya jih. 15 Hán jeuet! Nyang sikeubiet jih tanyoe meuseuti tapeugah hai-hai nyang beutôi ngon até nyang peunoh gaséh sayang, ngon lagée nyan, lam hai-hai peumanoe tanyoe maken treb maken sampoereuna lagée Almaseh, nyang jeuet keu panghulée tanyoe. 16 Dimiyueb pimpénan Gobnyan, banmandum anggota tuboh nyan teususon rapat, dan saléng meukeumat lé atot-atot jih maséng-maséng. Dan meunyoe tieb-tieb anggota nyan jimubuet lagée nyang sibeuna jih, teuma bansaboh tuboh nyan jitimoh jeuet keu rayeuk dan teuga rot gaséh sayang. 17 Sabab nyan, deumi nan Tuhan, nyoe kheueh teuma ulôn peugah dan peuteugaih: bék lé kheueh udeb lagée ureuëng-ureuëng nyang gohlom jituri Allah, dan teupike nyang kon-kon. 18 Pikeran awaknyan ka teutôb. Awaknyan hana jituri keu udeb nyang geubri lé Allah, sabab awaknyan sagai-sagai hana iéleumé peungeutahuan mubacut pih keuhai Allah. Awaknyan lagée nyan, sabab batat ngon kreueh ulée. 19 Awaknyan ka hana lé peurasaan malée, ngon lagée nyan awaknyan laju jiseutôt hawa nafeusu, dan udeb cabui ban galak droe. 20 Teuma Isa Almaseh nyang gata turi kon lagée nyan! 21 Gata ka tadeungoe keuhai Gobnyan! Dan sibagoe murit-murit Gobnyan, keu gata pih ka teupurunoe keuhai sifeuet-sifeuet Allah nyang na nibak Gobnyan! 22 Ngon sabab nyan suet kheueh laju manusia awai ngon pola udeb nyang ka treb nyang teungoh jireulôh lé keuheundak-keuheundak jih nyang sisat nyan. 23 Bah kheueh até dan pikeran gata teupeubarô banmandum. 24 Bah kheueh gata udeb sibagoe manusia barô nyang teucebta meunurot pola Allah; na kheueh ngon tabiát nyang beutôi, teupat dan suci. 25 Sabab nyan Syedara-syedara banmandum, bék lé meusulet. Beujujoe kheueh gata sidroe ngon nyang laén, sabab tanyoe banmandum na kheueh saban-saban anggota tuboh Almaseh. 26 Meunyoe gata beungéh, bék sampoe lé beungéh gata nyan jipeujeuet gata rhot lam desya. Bék kheueh beungéh siuroe seupôt, 27 mangat Iblih hana jiteumé keuseumpatan. 28 Ureuëng nyang kalazem buet jih ceumeucue piôh kheueh laju nibak buet lagée nyan. Bah kheueh ureuëng nyan jimubuet mangat meuteumé atra hareukat nyang jujoe dan hase jitulông ureuëng-ureuëng nyang kureueng mampu. 29 Meunyoe gata meututoe, bék kheueh gata peuguna nariet nyang kutoe. Peuguna kheueh tutoe haba nyang sifeuet jih teubina dan beuteutulông ureuëng laén. Tutoe haba nyang lagée nyan teuma jipeuteuka nyang jroh keu ureuëng-ureuëng nyang deungoe. 30 Bék kheueh sampoe tapeuseudeh até Roh Allah. Keugata ka geuboh materai ngon Roh, jeuet keu milék Allah. Roh nyan cit teuma ka jeuet keujaminan bahwa Uroe Peubeubaih teuma teuka keu gata. 31 Peugadôh kheueh bubena peurasaan sakét até, dam dan beungéh. Bék lé gata klik-klik sira teumeunak. Bék na lé peurasaan banci atawa nyang saban lagée nyan. 32 Nyang sikeubiet jih, bah kheueh gata beugét até dan gaséh sayang sidroe ngon nyang laén, dan saléng peumeuáh lagée Allah pi geupeu amphon gata rot Almaseh.

Efesus 5

1 Gata na kheueh aneuëk-aneuëk Allah nyang geugaséh, ngon sabab nyan gata meuseuti meu-useuha gata turot teuladan Allah. 2 Udeb gata bah kheueh meujiwa ngon gaséh sayang, lagée Almaseh geugaséh tanyoe. Gobnyan geukeureubeuen droe geuh keugeutanyoe, sibagoe keureubeuen nyang mangat bée dan lumpah that mangat até Allah. 3 Gata na kheueh umat Allah. Sabab nyan, buet-buet nyang cabui dan hana patot teupeubuet, meunan cit ngon leuha, nyang lagée nyan hana jeuet na lamkawan gata. Bék sampoe na ureuëng laén jeuet keualasan keujipeugah bahwa gata katapeubuet hai-hai nyang lagée nyan. 4 Meunan cit hana patot nibak gata tapeuteubiet tutoe haba nyang kutoe, nyang cabui dan nyang hana pantaih. Dan nyang sibiet jih bah kheueh gata peugah syukoe ubak Po teu Allah. 5 Simak kheueh beugét-gét: ureuëng nyang pi-e jih cabui, atawa hana patot, meunan cit leuha (buat nyang lagée nyan saban mantong lagée teuseumah beurala), ureuëng nyan hana meuteumé jeuet keu anggota umat nyang geupeurintah lé Almaseh dan Allah. 6 Bék sampoe gata keunong peungét ngon tutoe haba nyang sulet. Sabab hai-hai nyang lagée nyoe kheueh nyang teupeuteuka meureuka Allah ateueh ureuëng-ureuëng nyang hana taát ubak Gobnyan. 7 Ngon lagée nyan, bék gata meuhubongan sagai-sagai ngon ureuëng nyang lagée nyan. 8 Gata yoh watée ilée ka lheueh udeb lam seupôt. Jinoenyoe gata ka jeuet keu umat Tuhan, ngon sababnyan gata ka udeb lam peungéh. Lé sababnyan gata harôh udeb lam trang. 9 Sabab lam peungéh nyan kheueh jiteubiet banmandum nyang jroh, ade dan jujoe nibak pandangan Allah. 10 Useuha kheueh beugata turi peue nyang jeuet keumangat até Tuhan. 11 Bék gata peubuet buet-buet nyang hana meuguna nyang jipeubuet lé ureuëng-ureuëng nyang udeb lam seupôt. Sikeubiet jih, gata peuhanco kheueh hai-hai nyang lagée nyan. ( 12 Sabab hai-hai nyang awaknyan peubuet ngon cara seungab-seungab nyan, keuteupeugah mantong ka teupeuteuka malée.) 13 Peue-peue mantong nyang jilôh lé peungéh nyan, teuma leumah ngon nyata. 14 Sabab mandum nyang deuh teukalon ngon nyata, na kheueh peungéh. Nyang kheueh sabab jih na teupeugah lagée nyoe, "Beudôh kheueh, hei gata nyang éh, dan beudôh kheueh nibak maté! Almaseh teuma meucahya ateueh gata." 15 Ngon sabab nyan, peurati kheueh beugét-gét cara udeb gata. Bék udeb lagée ureuëng-ureuëng bangai; udeb kheueh lagée ureuëng-ureuëng carông. 16 Peuguna kheueh sigét-gét jih tieb-tieb keuseumpatan nyang na nibak gata, sabab watéenyoe na kheueh watée nyang jeuhet. 17 Bék bangai, teuma seulidek kheueh peue nyang geukeuheundak lé Tuhan. 18 Bék kheueh gata mabök lé ié anggô, sabab nyang lagée nyan teuma jipeurusak gata. Sikeubiet jih, bah kheueh gata jikuasa lé Roh Allah. 19 Peuguna kheueh tutoe haba nyang na lam kitab zabur, ca-e puja ngon pujoe dan lagu rohani, bak tieb-tieb gata peugah haba. Bah kheueh gata ngon até nyang geumbira gata meulagu puja ngon pujoe ubak Tuhan. 20 Sabe-sabe dan keuhai peue mantong, bah kheueh gata peugah teurimong gaséh ubak Allah Bapak, ateueh nan Isa Almaseh Tuhan geutanyoe. 21 Keu teuhoreumat Almaseh, bah kheueh gata tundok sidroe ngon nyang laén. 22 Purumoh, tundok kheueh ubak lakoe, lagée ubak Tuhan. 23 Sabab lakoe na kheueh ulée ateueh purumoh jih, saban lagée Almaseh panghulée ateueh jeumaáh dan Gobnyan keudroe na kheueh Raja Peuseulamat ateueh jeumaáh nyang jeuet keutuboh geuh. 24 Saban lagée jeumaáh tundok ubak Almaseh, meunan cit ngon peurumoh lam sigala hai tundok ubak lakoe. 25 Lakoe, gaséh kheueh keupurumoh gata, saban lagée Almaseh geugaséh jeumaáh dan geukeureubeuen droe Gobnyan keu jeumaáh nyan keudroe. 26 Almaseh geupeubuet lagée nyan mangat Gobnyan jeuet geupeu gleh jeumaáh nyan ngon ajaran Gobnyan dan rot ié pumanö, mangat óh lheueh nyan Gobnyan hase geujok ubak Allah. 27 Ngon lagée nyan Almaseh ka geupeujeuet jeumaáh nyan teudong ngon agong dan murni dikeue Gobnyan, deungon hana cacat cupa mubacut pih. 28 Meunan kheueh teuma lakoe beujigaséh keupurumoh saban lagée jigaséh tuboh jih keudroe. Ureuëng nyang gaséh keupurumoh jih saban cit lagée ka jigaséh keu droe jih keudroe. ( 29 Hántom na ureuëng nyang jibanci keu tuboh jih keudroe. Sikeubiet jih, jipeulara dan jijaga lagée Almaseh geupeulara jeumaáh Gobnyan. 30 Tanyoe tateupeue nyan, sabab tanyoe na kheueh anggota-anggota tuboh Almaseh.) 31 Lam Alkitab na teutuléh lagée nyoe, "Sabab nyan sidroe ureuëng agam jitinggai bapak ngon ma jih keujijak meusaboh ngon purumoh jih, dan bandua awaknyan teuma jeuet meusaboh." 32 Ayat nyan keubiet lhok that makna jih. Dan lôn peusangkot hainyan ngon hubongan Almaseh ngon jeumaáh. 33 Teuma ayat nyan na hubongan jih ngon gata: Bah kheueh tieb-tieb lakoe jigaséh keupurumoh jih dan jigaséh teuma keu droe jih keudroe meunan cit tieb-tieb purumoh bah kheueh jiuseuha jihoreumat keu lakoe jih.

Efesus 6

1 Aneuëk-aneuëk! Sibagoe murit Almaseh, taát kheueh keu ureuëng tuha gata, sabab nyang kheueh nyang patot gata peubuet. 2 "Horeumat kheueh keu bapak ngon ma gata" na kheueh peurintah nyang paleng phon nibak Allah ngon janji Gobnyan, 3 na kheueh: "Mangat gata mubahgia dan panyang umu gata di bumoe". 4 Syedara-syedara nyang jeuet keu bapak! Bék kheueh gata peusakét aneuëk-aneuëk gata leubeh nibak patot sampoe aneuëk gata nyan beungéh. Seubalek jih, peurayeuk kheueh aneuëk gata nyan ngon iétikeuet nyang jroh dan peungajaran nibak Tuhan. 5 Syedara-syedara nyang jeuet keunamiet! Turot kheueh peurintah po gata nyang na lam donya nyoe. Peubuet kheueh nyan ngon peurasaan horeumat dan patuh lom ngon keubiet-keubiet siulah-ulah gata peubuet nyan keu Almaseh keudroe. 6 Bék kheueh gata peubuet nyang jroh nyan meunyoe gata jijaga, teuma keumeuteumé jipujoe lé manusia. Teuma bah kheueh gata peubuet sibagoe namiet Almaseh nyang teungoh teuseutôt keuheundak Allah ngon sipeunoh até. 7 Buet nyang gata peubuet sibagoe namiet nyan, bah kheueh gata peubuet ngon até nyang mangat siulah-ulah Tuhan kheueh nyang gata layani, dan bukon teuma manusia. 8 Ingat kheueh bahwa tieb-tieb ureuëng, bah kheueh namiet meunan cit ureuëng meurdehka, teuma jiteurimong nibak Tuhan keuhai-hai nyang jroh nyang jipeubuet nyan. 9 Syedara-syedara nyang jeuet keu po! Bah kheueh gata meusikeub lagée nyan cit teuma ateueh namiet-namiet gata. Bék lé gata peuguna ancaman-ancaman. Ingat bahwa gata dan namiet-namiet gata nyan, saban-saban na saboh po, Gobnyan na kheueh Tuhan nyang na lam syeuruga. Gobnyan hana geungieng muka. 10 Akhé jih, bah kheueh gata teuga ngon teunaga nyang gata teumé nibak kuasa Tuhan, sabab gata meusaboh ngon Gobnyan. 11 Peuguna kheueh banmandum peuleungkapan prang nyang geubri lé Allah keugata, mangat gata hase meuteun talawan siasat-siasat nyang lisek nibak Iblih. 12 Sabab tanyoe meujuang kon talawan manusia, teuma talawan teunaga banmandum jén-jén nyang jikuasa jamén nyang jeuhet nyoe. Tanyoe talawan teunaga roh-roh jeuhet nyang kuasa ruweueng angkasa. 13 Sabab nyan, jinoenyoe, peuguna kheueh banmandum peuleungkapan prang Allah, mangat bak uroe nyang jeuhet gata hase talawan watée jiseurang lé musoh. Dan watée gata ka lheueh meujuang sampoe akhé, gata mantong teutab gagah peukasa. 14 Bah kheueh gata siab sabe. Peuguna kheueh keuseutiaan gata ubak Allah sibagoe taloe keuieng, dan jujoe sibagoe bajée beuso gata. 15 Bah kheueh keurilaan até gata tapeusampoe Haba Gét nyang teuba ubak seujahteura jeuet keusipatu gata. 16 Tieb-tieb watée peuguna kheueh peucaya gata ubak Tuhan sibagoe sinjata tangkesan gata; ngon iman nyan gata hase tapeulon banmandum aneuëk panah meuapui nyang teuka nibak sijeuhet. 17 Cok kheueh keuseulamatan sibagoe tupi beuso, dan feureuman Allah sibagoe peudeueng nibak Roh Allah. 18 Peubuet kheueh banmandum nyan sira meudoá keuteulakée tulông ubak Allah. Bak tieb-tieb keuseumpatan, meudoá kheueh lagée Roh Allah geupimpén gata. Bah kheueh gata sabe lam keuadaan waspada dan bék meunyeurah. Meudoá kheueh sabe keubanmandum umat Po teu Allah. 19 Dan meunan cit meudoá kheueh keu ulôn cit teuma, mangat bak watée peugah haba, Allah geubri ubak ulôn tutoe kata nyang paih. Dan mangat ulôn ngon beurani hase ulôn peugah rahsia Haba Gét nyan. 20 Sabab lé Haba Gét nyan, ulôn ka jeuet keusidroe utosan, dan bak watée nyoe kana lam peunjara. Meudoá kheueh mangat ulôn kujeuet peugah haba keuhai Haba Gét nyan, lagée toh ulôn harôh meututoe haba. 21 Tikhikus, syedara tanyoe dan peulayan nyang seutia bak buet Tuhan, teuma jijak peugah ubak gata keuhai peue mantong teuntang ulôn, dan mangat gata tateupeue keuhai ulôn dan buet ulôn. 22 Nyang kheueh sabab jih ulôn utus jihnyan keugata keujipeugah keuadaan kamoe keugata banmandum, mangat até gata rayeuk. 23 Seumoga Allah Bapak, dan Tuhan Isa Almaseh geupeumungken banmandum jeumaáh keu meusaboh dan saléng lam gaséh sayang dan teutab peucaya ubak Almaseh. 24 Seumoga Allah geubri beureukat ubak Gata mandum nyang teugaséh ubak Tuhan tanyoe Isa Almaseh ngon gaséh nyang hana hase teupeulon. Horeumat kamoe, Paulus

Filipi 1

1 Syedara-syedara umat Allah banmandum nyang na tinggai di Filipi, dan nyang ka meusaboh ngon Isa Almaseh. Meunan cit keu Syedara banmandum nyang peumimpén dan peumbantu jeumaáh! Ulôn, Paulus, meusajan ngon Timotius, namiet-namiet Isa Almaseh, 2 meuharab that seumoga Allah Bapak geutanyoe dan Tuhan Isa Almaseh geubri beureukat dan seujahteura ateueh gata. 3 Tieb-tieb watée ulôn teuingat keu gata, dan ulôn lakée teurimong gaséh ubak Po teu Allah. 4 Dan pajan mantong watée ulôn meudoá keu Gata mandum, ulôn meudoá ngon mangat até. 5 Ulôn lakée teurimong gaséh ubak Po teu Allah sabab phon uroe phon sampoe bak watée nyoe, gata ka tatulông ulôn tajak peusampoe Haba Gét nyang teuka nibak Allah. 6 Allah keudroe kheueh nyang peuphon buet nyang jroh nyan keu gata, dan ulôn yakén that Gobnyan teuma geupeubuet laju buet nyang lagée nyan sampoe seuleusoe bak Uroe Isa Almaseh geuteuka lom teuma. 7 Keubiet ka bak teumpat jih ulôn na peurasaan nyang lagée nyan ubak gata, sabab Syedara banmandum sabe rab ngon até ulôn. Meunan cit sabab gata meusajan tateurimong meusigoe ngon ulôn, anugeurah nyang geubri lé Allah ubak ulôn; bah kheueh watée nyoe teungoh ulôn mantong na lam glab meunan cit watée ulôn mantong na diluwa keu ulôn bila dan ulôn peuteun Haba Gét nyan. 8 Allah geuteupeue bahwa ulôn biet-biet that meucen keu gata ngon peurasaan gaséh meusra nyang teuka nibak Isa Almaseh keudroe. 9 Nyoe kheueh doá ulôn keu gata: seumoga gata banmandum seumaken tagaséh ubak Allah dan seusabe manusia dan laju meutamah lam peungeutahuan nyang beutôi dan pandangan nyang bijaksana. 10 Ngon lagée nyan gata tateupeue tapiléh peue nyang paleng gét, dan udeb gata gleh nibak teucela atawa jitudôh peue mantong nibak uroe Almaseh teuka lom teuma. 11 Udeb gata teuma meulimpah ngon buet nyang biet-biet gét nyang jipeuhase lé Isa Almaseh keudroe; ngon lagée nyan Allah teuma jipeumulia dan jipujoe-pujoe. 12 Ulôn meuharab mangat gata tateupeue, bahwa hai-hai nyang ka teujadi ateueh ulôn jeuet keusabab leubeh le ureuëng deungoe dan jipatéh ubak Haba Gét nyan. 13 Akibat jih, mandum peugawée meuligoe dan ureuëng-ureuëng laén nyang na lam banda nyoe jiteupeu bahwa ulôn jipeutamong lam glab sabab ulôn meuiman ubak Almaseh. 14 Ngon jipeutamong ulôn lam glab ka teupeujeuet ureuëng-ureuëng Kristen nyang na lam banda nyoe ka jeuet keu yakén lom keuhai Tuhan, ngon lagée nyan awaknyan leubeh jijeuet jipeusampoe peusan Allah ngon hana rasa teumakot. 15 Beutôi na meupadum droe lamkawan awaknyan nyang jipeusampoe keuhai Almaseh sabab bingiek até dan keuneuk meudakwa, teuma nyang laén jipeusampoe keuhai Almaseh sabab na meukeusut nyang murni. 16 Ureuëng-ureuëng nyoe jipeubuet hai nyan sabab awaknyan jigaséh keu Po teu Allah dan ulôn, sabab awaknyan ka jiteupeu bahwa Allah ka geu-utus ulôn keu lôn tunyok bak awaknyan bahwa Haba Gét nyan beutôi. 17 Teuma ureuëng laén jipeugah keuhai Almaseh ngon meukeusut nyang hana gét; awaknyan jipeusampoe hainyan keu keupeuntengan droe jih. Ngon lagée nyan awaknyan meuharab hase jipeubuet ulôn nyoe leubeh meukarat lam glab. 18 Teuma hana peue! Sabab pakriban kheueh mantong, bah kheueh nyan jipeubuet ngon meukeusut nyang murni atawa ngon meukeusut nyang salah, nyang peunteng Almaseh teutab jipeusampoe; ngon lagée nyan ulôn galak. Dan ulôn teutab meurasa lagée nyan, 19 sabab ulôn kuteupeu bahwa ngon doá-doá gata dan ngon geubantu lé Roh Isa Almaseh, ulôn teuma geupeubeubaih. 20 Nyang lumpah that lôn lakée dan ulôn meuharab na kheueh mangat bék sagai-sagai ulôn nyoe gagai nibak tugaih lôn. Teuma ulôn meuharab that mangat bak tieb-tieb watée, nyang paleng phon jinoenyoe, ulôn hase lôn cok sikeub beurani ngon lagée nyan bansigeunab jiwa tuboh lôn -- bah kheueh ulôn udeb atawa ulôn maté -- Almaseh teuteb teupeumulia. 21 Sabab nibak ulôn, tujuan udeb lôn na kheueh Almaseh! Dan meunyoe maté nyan na kheueh untông. 22 Teuma meunyoe ngon udeb lam donya nyoe, ulôn hase lôn keureuja buet nyang leubeh meuguna, teuma ulôn hana kuteupeu nyang toh nyang harôh lôn piléh. 23 Ulôn jitarek nibak dua pihak. Ulôn meuheuét that keuneuk tinggai donya nyoe keu ulôn jak tinggai meusajan Almaseh, sabab nyan kheueh nyang paleng jroh; 24 teuma, keu keupeuntengan gata, na kheueh leubeh jroh meunyoe ulôn teutab tinggai lam donya. 25 Ulôn yakén that keuhai nyan. Nyang kheueh sabab jih ulôn teupeu bahwa ulôn teutab tinggai ngon Syedara banmandum, mangat hase lôn tulông gata beujeuet keuteuga dan seumaken mangat lam meuiman gata ubak Tuhan. 26 Sabab nyan, meunyoe ulôn singoh kugisa ubak gata, gata nyang ka meusaboh ngon Isa Almaseh teuma gata teumé leubeh jai lom alasan keumeurasa bangga ateueh droe ulôn. 27 Ngon lagée nyan, nyang peunteng bak watée nyoe na kheueh gata beu udeb nyang sisuai peue nyang jilakée lé Haba Gét keuhai Almaseh nyan. Ngon lagée nyan, aléh ulôn hase meurumpok ngon gata atawa hana, ulôn teuma lôn deungoe bahwa gata kong tamumat ngon tameujuang meusajan-sajan ngon saboh tujuan dan saboh keuinginan; na kheueh keu keupeucayaan nyang sisuwai ngon Haba Gét nyang teuka nibak Allah nyan. 28 Bah kheueh gata sabe beurani; bék teumakot ateueh lawan-lawan gata. Ngon lagée nyan gata tatunyok bahwa awaknyan pasti taloe, dan gata teuma meunang, sabab Allah keudroe kheueh nyang peumeunang ateueh gata. 29 Sabab Po teu Allah ka geubri anugeurah ateueh gata kon keumeuiman ubak Almaseh mantong, teuma nyang leubeh nibak nyan keumeudeurita keu Almaseh. 30 Jinoenyoe gata pi na meusajan ngon ulôn lam meujuang nyang sa; na kheueh nyang gata ka lheueh takalon ulôn peujuang yoh masa ilée, dan nyang teutab mantong lôn peujuang sampoe nibak watée nyoe, lagée nyoe jinoenyoe ka gata deungoe.

Filipi 2

1 Gata teuga, sabab gata meusaboh ngon Almaseh. Dan gata teuhibor sabab Almaseh geugaséh gata! Gata geubimbéng lé Roh Allah, dan gata pi saléng meugaséh sayang dan na rasa geunaséh sidroe ubak nyang laén. 2 Ngon lagée nyan, cuba kheueh gata biet-biet tapeumangat até lôn ngon hai-hai nyang lagée nyoe: Udeb kheueh beusaboh até ngon geunaséh nyang saban, ngon pikeran nyang saban dan tujuan nyang saban teuma. 3 Bék kheueh gata peubuet sapeue lé sabab jidurong lé keupeuntengan gata keudroe, atawa keu gata peusombong droe. Nyang sikeubiet jih bah kheueh gata maséng-maséng ngon até nyang miyueb ta anggab ureuëng laén leubeh gét nibak droe keudroe. 4 Peurati kheueh keupeuntengan ureuëng laén; bék keupeuntengan droe keudroe. 5 Bah kheueh gata na jiwa lagée Isa Almaseh: 6 Nibak dasai jih Gobnyan saban ngon Po teu Allah, teuma Gobnyan hana geurasa droe bahwa keuadaan geuh nyang ilahi nyan meuseuti geupeuteun. 7 Nyang sibeuna jih, Gobnyan geupeulheuh banmandum nyan laju jeuet keusaban lagée sidroe namiet. Gobnyan jeuet lagée sidroe manusia, dan leumah udeb geuh lagée sidroe manusia. 8 Gobnyan geupeumiyueb droe, dan udeb ngon taát ubak Allah trok án maté -- na kheueh maté teusaleb. 9 Sabab nyan kheueh Allah geuangkat Gobnyan simanyang-manyang jih, dan geubri ubak Gobnyan keukuasaan nyang leubeh rayeuk nibak peue-peue mantong keukuasaan nyang laén. 10 Teuma keuteuhoreumat Isa, banmandum makhlok nyang na lam syeuruga, meunan cit nyang na ateueh bumoe, meunan cit nyang di miyueb bumoe, teuma jiseumah Gobnyan. 11 Awaknyan banmandum teuma jiaku bahwa Isa Almaseh kheueh Tuhan; ngon lagée nyan Allah Bapak teupeumulia. 12 Sabab nyan, Syedara-syedara nyang teucinta, lagée toh gata sabe taát ubak ulôn bak watée ulôn na lamkawan gata, teuma leubeh-leubeh nibak watée nyoe geutanyoe ka jiôh, bah kheueh gata teutab taát ubak ulôn. Gata ka geupeu seulamat lé Allah, ngon lagée nyan useuha kheueh sabe mangat seujahteura gata jeuet keusampoereuna. Peubuet kheueh nyan ngon horeumat dan patuh keu Po teu Allah, 13 sabab Allah keudroe nyang mubuet lam tuboh gata keugeupeujeuet gata rila dan sanggob tapeugalak até Allah. 14 Peubuet kheueh peue mantong ngon hana meu krôb-krôb atawa meudakwa. 15 Ngon lagée nyan gata katatunyok bahwa gata na kheueh aneuëk-aneuëk Allah nyang hana meucupa, nyang udeb ngon jujoe dan beutôi lamkawan ureuëng jeuhet dan ureuëng meudesya. Dan bak watée gata peusampoe ubak awaknyan haba nyang teubri udeb, bah kheueh gata peujeuet keu awaknyan lagée cahya muble-ble jipeutrang donya. Meunyoe gata udeb nyang lagée nyan, singoh na alasan nibak ulôn keu meurasa bangga ateueh gata bak watée Isa Almaseh geuteuka lom teuma. Nyan sibagoe bukeuti bahwa peujuangan ulôn hana sia-sia dan useuha ulôn na hase jih. 17 Mungken ulôn teuma jipoh maté dan darah ulôn jeuet lagée darah keureubeuen nyang teuroe ateueh peue nyang gata peuseumah ubak Po teu Allah sibagoe tanda bahwa gata meuiman ubak Gobnyan. Meunyoe keubit nyan meuseuti lagée nyan, ulôn meusyukoe ateueh hainyan dan meusajan meugeumbira ngon gata. 18 Meunan cit heundak jih gata meurasa mangat dan meusajan meugeumbira ngon ulôn. 19 Ulôn peucaya bahwa ngon geutulông lé Tuhan Isa, ulôn kukirém bubagaih Timotius keu gata, mangat ulôn hase teuhibor keuhai gata. 20 Teuma Timotius kheueh sidroe sagai ureuëng nyang saboh jiwa ngon ulôn, dan biet-biet teupike ubak keubahgiaan gata. 21 Banmandum nyang laén nyang jiurôih na kheueh keu keupeuntengan jih keudroe, kon keupeuntengan Isa Almaseh. 22 Gata keudroe ka gata ngieng bukeuti jih bahwa Timotius nyan meuguna. Jihnyan ka jimubuet brat that meusajan ngon ulôn keuteujak peusampoe Haba Gét nyang teuka nibak Allah. Kamoe bandua deuh jih lagée aneuëk ngon bapak. 23 Ngon sabab nyan, reujang that óh lheueh lôn teupeue pakriban peukara ulôn akhé jih singoh, ulôn teuma lôn kirém jih nyan ubak gata. 24 Ulôn peucaya bahwa ngon tulông Tuhan, ulôn keudroe pih hana treb lé lôn jak saweue gata. 25 Keuhai syedara tanyoe di Epafroditus nyang gata kirém keu jitulông ulôn, ulôn meurasa that peureulée lôn yue jihnyan jigisa ubak gata. Jihnyan ka jibantu ulôn nibak lam buet dan peujuangan lôn. 26 Jihnyan meucen that-that keugata banmandum, dan jihnyan sosah that sabab gata ka meuteumé haba bahwa jihnyan sakét. 27 Keubiet beutôi jihnyan sakét karab habéh umu. Teuma Allah geugaséh keu jih nyan; dan kon keu jih mantong, teuma keu ulôn cit teuma, mangat ulôn bék sampoe meutamah seudeh. 28 Nyang kheueh sabab jih seumaken rayeuk mantong keuheundak ulôn keu lôn yue jihnyan jigisa ubak gata, jeuet gata mangat até lom meunyoe gata ka meurumpok ngon jih nyan, dan até ulôn pih jeuet keumangat. 29 Ngon lagée nyan, sambot kheueh jihnyan ngon até nyang mangat sibagoe sidroe syedara nyang saboh iman. Hareuga kheueh mandum ureuëng nyang lagée jih nyan. 30 Deumi keu keupeuntengan buet Almaseh, jihnyan rab habéh umu; jihnyan jisabong nyawöng keujibri seunulông keu ulôn ateueh nan gata.

Filipi 3

1 Akhé jih, Syedara-syedara lôn, bah kheueh gata meugeumbira sabab gata ka meusaboh ngon Tuhan. Ulôn hana meurasa brat peue nyang ka lôn tuléh keu gata sigohlom nyan; sabab hainyan gét keu keuseulamatan gata. 2 Até-até kheueh keu ureuëng-ureuëng nyang jipeubuet hai-hai nyang jeuhet, ureuëng-ureuëng nyang patot teukheun 'Asée'. Awaknyan jipaksa jeuet mandum ureuëng teupeukatan. 3 Padahai tanyoe kheueh ureuëng-ureuëng nyang ka tateurimong meukatan nyang seujati, kon awaknyan. Tanyoe taseumah Allah ngon bimbéngan Roh Allah keudroe, dan tanyoe meusyukoe sabab geutanyoe udeb meusaboh ngon Isa Almaseh. Tanyoe hana meugantung ubak upacara-upacara nyang sifeuet jih lahé. 4 Nyang sibeuna jih ulôn jeuet mantong lôn meugantueng ubak upacara-upacara nyan. Sabab meunyoe na sidroe-droe ureuëng bak jih nyan na alasan keujimeugantung nibak upacara nyang sifeuet jih lahé, ulôn leubeh lom. 5 Ulôn teupeukatan watée ulôn meu-umu lapan uroe. Ulôn lahé sibagoe ureuëng Israel, nibak sukée bansa Benyamin; ulôn aseuli ureuëng Ibrani. Lam hai taát ubak huköm-huköm agama Yahudi, ulôn na kheueh anggota golongan Farisi. 6 Ulôn keubiet that-that meuseumangat lôn iénanya jeumaáh. Meunyoe teutilek rot huköm agama Yahudi, ulôn sidroe ureuëng gét nyang hana meucupa. 7 Teuma lé sabab Almaseh, banmandum nyang yoh ilée ulôn anggab sibagoe nyang jibri laba nibak ulôn, jinoenyoe keubiet ka jeuet keusipeu-peu nyang lumpah that rugoe. 8 Kon mantong hai-hai nyang teupeugah nyan, teuma peue-peue mantong nyang lôn anggab hai-hai nyang rugoe mubara. Nyang na nibak ulôn watée nyoe na kheueh nyang paleng meuyuem; na kheueh lôn turi Isa Almaseh, Tuhan ulôn. Sabab Almaseh, banmandum nyan ka ulôn böih banmandum. Ulôn anggab banmandum nyan lagée bloih mantong, mangat ulôn hase meuteumé Almaseh, 9 dan biet-biet meusaboh ngon Gobnyan. Hubongan nyang jroh ngon Po teu Allah hana lé lôn useuha keudroe ngon cara lôn taát ubak huköm agama. Jinoenyoe ulôn na hubongan nyang jroh ngon Allah, sabab ulôn meuiman ubak Almaseh. Teuma, hubongan nyang jroh nyan teuka jih nibak Allah, dan ngon dasai jih meuiman ubak Isa Almaseh. 10 Saboh sagai nyang ulôn lakée, atra nyan na kheueh jeuet ulôn kuturi Almaseh, dan lôn rasa kuasa nyang teupeu-udeb Gobnyan nibak maté. Ulôn meuharab beumeusajan meudeurita ngon Gobnyan dan beujeuet keusaban ngon Gobnyan lam hai maté Gobnyan. 11 Dan ulôn meuharab bahwa ulôn keudroe teuma geupeu udeb lom teuma nibak maté. 12 Ulôn hana lôn peugah bahwa ulôn ka meuhase, atawa ka jeuet keusampoereuna. Teuma ulôn hana putôh lôn useuha keu lôn reubot hadiah nyang ka geukeubah lé Isa Almaseh. Keunyan kheueh Gobnyan ka geureubot ulôn dan geupeujeuet ulôn keumilék Gobnyan. 13 Ka teuntée, Syedara-syedara, ulôn nyang sibeuna jih hana lôn peugah bahwa ulôn ka meuhase lôn reubot hadiah nyan. Teuma na saboh hai nyang ulôn peubuet, hainyan na kheueh ulôn putuwoe peue nyang na dilikot ulôn, dan lôn useuha ngon biet-biet that beumeuteumé peue nyang na dikeue. 14 Nyang kheueh sabab jih ulôn teutab kuplueng mangat meuteumé tujuan akhé mangat meuteumé meunang, na kheueh udeb lam syeuruga; keu nyan kheueh Allah geutawök tanyoe rot Isa Almaseh. 15 Tanyoe mandum nyang ka rayeuk seucara rohani, lagée nyan kheueh nyang sigét jih tameusikeub. Teuma meunyoe na lamkawan gata nyang sikeub jih laén, teuma Po teu Allah geupeu trang teuma ubak gata. 16 Teuma hainyoe nyang harôh gata peurati: Tanyoe meuseuti taudeb meunurot peuratoran nyang ka taseutôt trok bak watée nyoe. 17 Syedara-syedara lôn banmandum! Seutôt kheueh teuladan ulôn. Kamoe ka kamoe bri teuladan nyang beutôi, sabab nyan ngieng kheueh beugét-gét bak ureuëng nyang ka jiseutôt teuladan kamoe nyan. 18 Ulôn ka kayém that ulôn britée ubak gata, dan jinoenyoe ulôn ulang lom ngon cara ulôn mo, bahwa na dan jai that ureuëng nyang udeb jih jipeurusak makna Almaseh maté bak kayée saleb. 19 Udeb ureuëng-ureuëng nyang lagée nyan akhé jih teuma rhot ubak hanco, sabab ilah awaknyan na kheueh keuheundak tuboh jih keudroe. Hai-hai nyang teupeumalée, nyan kheueh nyang awaknyan peubangga; sabab awaknyan nyang jipike keuhai-hai nyang na hubongan ngon donya nyoe mantong. 20 Teuma geutanyoe na kheueh wareuga neugahra syeuruga. Nibak teumpat nyan kheueh teuma Raja Peuseulamat geutanyoe, Tuhan Isa Almaseh, teuma teuka. Gobnyan kheueh nyang tanyoe preh-preh ngon meucen lumpah na. 21 Tuboh geutanyoe nyang leumoh dan hase hanco nyoe, teuma geu-ubah lé Almaseh jeuet lagée tuboh Gobnyan keudroe nyang mulia. Gobnyan hase geupeubuet nyan sabab bak Gobnyan na kuasa keugeupeutaklok peue-peue nyang na.

Filipi 4

1 Sabab nyan, Syedara-syedara ulôn nyang lôn cinta, meunan kheueh kira jih gata udeb ngon biet-biet meuiman ubak Tuhan. Até ulôn meucen that keugata! Gata kheueh keubanggaan ulôn nyang peujeuet ulôn geumbira. 2 Gata hei inong Euodia dan meunan cit gata inong Sintike! Ulôn lakée ngon meuharab that mangat gata saboh até sibagoe ureuëng-ureuëng nyang saboh iman. 3 Keu rakan ulôn nyang seutia, ulôn lakée cit mangat gata bantu ureuëng inong nyoe. Awaknyan ka jimubuet brat that meusajan ulôn keuteupeusampoe Haba Gét nyang teuka nibak Allah; saban cit lagée Klemen dan banmandum ureuëng laén nyang jimeukeureuja meusajan ulôn. Nan-nan awaknyan na lam Kitab Ureuëng Udeb. 4 Seumoga gata sabe lam geumbira sabab gata ka udeb meusaboh ngon Tuhan. Sigoe teuk ulôn peugah: meugeumbira kheueh! 5 Bah kheueh mandum ureuëng hase jikalon sikeub gata nyang gét até. Sabab hana treb lé Tuhan teuma teuka. 6 Bék kheueh khawate keuhai peue mantong. Lam hai-hai peue mantong. Lam sigala hai meudoá kheueh dan kirém kheueh meulakée gata ubak Allah. Peue nyang gata peureulée, bri tée kheueh nyan ubak Po teu Allah ngon cara gata peugah teurimong gaséh. 7 Teuma seujahteura nyang teuka nibak Allah hana mungken hase jimuphom lé manusia, teuma jeuet até dan pikeran gata nyang ka meusaboh ngon Isa Almaseh. 8 Akhé jih, Syedara-syedara, pasoe kheueh pikeran gata ngon hai-hai nyang na asoe, nyang patot teupujoe, na kheueh hai-hai nyang beutôi, nyang teuhoreumat, nyang ade, mureuni, maméh, dan jroh. 9 Peujak kheueh peue nyang ka gata meurunoe dan gata teurimong nibak ulôn; bah kheueh nyan nibak tutoe haba meunan cit nibak buet-buet nyang ulôn keureuja. Allah teumpat sigala seujahteura, teuma na meusajan gata. 10 Lam udeb lôn nyang meusaboh ngon Tuhan, ulôn meurasa mubahgia that, sabab óh ka lheueh meunan treb, jinoenyoe gata na watée lom tapike ulôn. Nyang lôn meukeusut kon gata katatuwoe keulôn; gata keubiet takalon ulôn, teuma gata hana meuteumé watée keugata tunyok hainyan. 11 Ulôn peugah nyoe kon sabab di ulôn nyoe kakureueng sipeue-peue, sabab ulôn ka lôn meurunoe teurasa puih ngon peue nyang na. 12 Ulôn ka lôn rasa udeb lam keuadaan kureueng hana sapeuena, dan ka teuma lôn rasa udeb ngon atra nyang leubeh. Ulôn ka lôn teupeu rahsia jih keu ulôn hadab keuadaan nyang pakriban mantong; bah kheueh lam keuadaan makmu meunan cit lam keuadaan gasien, bah kheueh lam keuadaan meuwáh meunan cit lam keuadaan kureueng hana sapeuena. 13 Ngon kuasa nyang geubri lé Almaseh keu ulôn, nibak ulôn kana teunaga keu lôn meuhadab ubak peue-peue mantong keuadaan nyang teuka. 14 Teuma gata katatulông ulôn lam keuadaan ulôn sosah; dan peue nyang gata peubuet nyan keubiet gét lagoena. 15 Syedara-syedara ureuëng Filipi! Gata keudroe tateupeue that bahwa bak watée ulôn tinggai Makedonia yoh masa ilée, bak watée Haba Gét nyan ulôn tabu phon-phon that, gata kheueh saboh sagai jeumaáh nyang tulông ulôn; dan gata teuma saboh sagai jeumaáh nyang meusajan ngon lôn tarasa laba rugoe. 16 Bak watée ulôn na di Tesalonika dan ulôn peureulée bantuan, ka leubeh nibak sigoe gata kirém bantuan ubak ulôn. 17 Nyan kon meumakna bahwa ulôn teuma keuneuk teurimong meuneubri. Nyang ulôn lakée na kheueh mangat ulôn jeuet lôn ngieng hase-hase nyang teutamah keulaba gata. 18 Ulôn ka kuteurimong banmandum -- bahkan leubeh nibak nyang seb! Banmandum meuneubri nyang gata kirém keu ulôn, ka lôn teurimong meulalu Epafroditus. Jinoenyoe ulôn kana banmandum nyang ulôn peureulée. Meuneubri-meuneubri nyang nibak gata nyan na kheueh lagée bée mangat nyang teupeuseumah ubak Po teu Allah dan nyang geuteurimong lé Allah ngon mangat até. 19 Allah nyang ulôn seumah, nyang meulimpah ngon keukayaan lam Isa Almaseh, teuma teupeupeunoh peue-peue nyang gata peureulée. 20 Teupujoe kheueh Allah Bapak geutanyoe siumu masa! Amin. 21 Peutrok kheueh saleuem ulôn ubak banmandum umat Allah nyang meusaboh ngon Isa Almaseh. Dan teurimong kheueh teuma saleuem nibak syedara-syedara nyang na meusajan ulôn disinoe. 22 Banmandum umat Allah nyang na lam banda nyoe, nyang phon that awaknyan nyang na lam meuligoe Kaisar, jikirém saleuem keugata mandum. 23 Seumoga Tuhan geutanyoe Isa Almaseh geubri beureukat keugata mandum. Horeumat kamoe, Paulus dan Timotius

Kolose 1

1 Syedara-syedara umat Allah di Kolose nyang seutia meusaboh ngon Almaseh! Sibagoe rasui Isa Almaseh, -- nyang geuangkat lé Allah -- ulôn, Paulus, meusajan-sajan ngon syedara-syedara geutanyoe Timotius, meuharab seumoga Allah Bapak geutanyoe geubri beureukat dan seujahteura ateueh gata. 3 Kamoe ka meudeungoe bahwa gata meuiman ubak Isa Almaseh dan gata tagaséh keumandum umat Allah. Nyang kheueh sabab jih watée kamoe meudoá keugata, kamoe sabe kamoe lakée teurimong gaséh ubak Allah, Bapak Tuhan geutanyoe Isa Almaseh. 5 Gata meuiman dan gata tagaséh, sabab gata meuharab teuma peue nyang ka geukeubah lam syeuruga lé Allah keugata. Gata katadeungoe keuhai nyan, bak watée Haba Gét nyang beutôi teupeusampoe keu gata. 6 Haba nibak Po teu Allah meutabu bansigom donya, dan udeb manusia sabe teubri beureukat lé haba nyan, sabab lagée udeb gata geubri beureukat watée phon that gata deungoe keuhai rahmat Allah dan biet-biet gata amai. 7 Hai nyan jipeutrok bak gata lé Epafras, rakan nyang kamoe gaséh. Jihnyan na kheueh ureuëng nyang mubuet keu Almaseh nyang ka seutia jimeukeureuja keu keupeuntengan tanyoe. 8 Nibak jihnyan kamoe deungoe bahwa ngon kuasa Roh Allah gata hase saléng meugaséh sayang. 9 Nyang kheueh sabab jih kamoe sabe meudoá keugata watée phon that kamoe deungoe keuhai gata. Kamoe lakée ubak Allah mangat Roh Allah geubri keugata keubijaksanaan dan peungeurtian sampoe gata tateupeue ngon sampoereuna peue nyang geukeuheundak lé Allah. 10 Ngon lagée nyan gata hase udeb meunurot keuheundak Allah, dan sabe tapeugalak até Gobnyan, sampoe lam hai peue-peue mantong gata hase tapeuhase hai-hai nyang gét. Dan iéleumé gata keuhai Allah pih meutamah teuma. 11 Peunoh harapan, ngon kuasa nibak Allah nyang agong, gata teupeuteuga sampoe gata hase tapeuteun deurita pakriban mantong ngon saba dan mangat até 12 dan ngon teupeugah teurimong gaséh ubak Bapak. Sabab Bapak nyan kheueh nyang peujeuet gata jeuet gata teurimong peue nyang geukeubah lé Allah keu umat Gobnyan lam keurajeuen gobnyan nyang trang. 13 Gobnyan ka geupeuleueh geutanyoe nibak kuasa nyang seupôt dan geupinah geutanyoe u dalam keurajeuen Aneuëk Gobnyan nyang geugaséh. 14 Lé Aneuëk Gobnyan tanyoe geupeubeubaih; ngon lagée nyan banmandum desya-desya geutanyoe ka geupeu amphon. 15 Almaseh na kheueh gamba nyang nyata nibak droe Allah nyang hana leumah teukalon; Almaseh na kheueh aneuëk nyang tuha, leubeh peunteng nibak banmandum nyang geucebta. 16 Sabab meulalu Gobnyan kheueh Allah geucebta peue-peue mantong nyang na lam syeuruga dan nyang na ateueh rhung bumoe, peue-peue mantong nyang deuh teukalon dan nyang hana deuh teukalon, jitamong cit keunan mandum roh nyang meukuasa dan nyang mat peurintah. Bansigom donya nyoe geucebta rot lalu Almaseh dan keu Almaseh. 17 Sigohlom na peue-peue mantong ateueh rhung donya nyoe, Almaseh ka leubeh ilée na. Dan lé sabab Gobnyan kheueh teuma peue-peue mantong na nibak teumpat jih maséng-maséng. 18 Gobnyan kheueh ulée nibak tuboh geuh, nyan kheueh jeumaáh, sabab Gobnyan kheueh punca udeb banmandum jeumaáh nyan. Gobnyan kheueh aneuëk nyang tuha, nyang phon-phon that geupeu udeb lom teuma nibak maté, mangat Gobnyan keudroe mantong nyang jeuet keu nyang paleng peunteng ateueh peue-peue mantong. 19 Allah keudroe nyang lakée mangat peue-peue mantong nyang na nibak droe Allah, na cit teuma meuteumé ngon leungkab nibak droe Aneuëk Gobnyan. 20 Dan rot Aneuëk nyan teuma Allah geucok keuputosan keugeupeugét peue-peue mantong jimeugét lom teuma ngon Gobnyan -- bah kheueh nyang na peue-peue ateueh rhueng bumoe, meunan cit nyang lam syeuruga. Allah geupeubuet nyan rot Aneuëk Gobnyan maté bak kayée saleb. 21 Yoh masa ilée gata jiôh nibak Po teu Allah. Gata meumusoh ngon Gobnyan sabab pi-e dan pikeran gata jeuhet. 22 Teuma jinoenyoe, ngon maté Aneuëk Gobnyan, Allah geupeujeuet hubongan gata ngon Gobnyan jeuet keu gét lom teuma. Ngon cara nyan gata hase teuba meuhadab Allah lam keuadaan nyang suci, gleh dan hana meucupa. 23 Teuma gata kateuntée dan meuseuti teutab seutia meuiman dan teudong cot nibak keuimanan gata. Bék sampoe gata peulheueh harapan gata nyang ka geubri keugata watée gata tateurimong Haba Gét nyang teuka nibak Allah. Haba nyan ka geupeusampoe ubak tieb-tieb ureuëng bansigom donya. Dan keunyan kheueh teuma ulôn, Paulus, ka jeuet keupeulayan. 24 Jinoenyoe ulôn galak meudeurita deumi keu keupeuntengan gata. Sabab ngon na peundeuritaan bak tuboh ulôn, ka lôn peuleungkab peue nyang meuseuti geudeurita lé Almaseh keujeumaáh Gobnyan, na kheueh tuboh Gobnyan. 25 Allah geuyue ulôn jeuet keupeulayan jeumaáh Gobnyan deumi keu keupeuntengan gata. Ulôn meuseuti lôn peusampoe haba nyang teuka nibak Allah, banmandum; 26 na kheueh haba nyang ka meuabat-abat nyang ka lheueh geusöm lé Po teu Allah keumandum ureuëng, teuma watée nyoe ka geupeugah keu umat Gobnyan. 27 Ubak umat Geuhnyan Allah geupeugah padun na gét jih dan agong jih rahsia Geuhnyan keu banmandum umat manusia. Rahasia nyan na kheueh: Almaseh na lam tuboh gata, nyang meumakna bahwa gata teuma meusajan tarasa keubeusaran Allah. 28 Almaseh nyan kheueh nyang kamoe peugah ubak tieb-tieb manusia. Kamoe peuingat dan kamoe peurunoe awaknyan banmandum ngon sigala bijaksana. Tujuan kamoe na kheueh mangat tieb-tieb ureuëng hase teuba ubak Allah, sibagoe ureuëng nyang ka rayeuk lam hai-hai rohani, sabab ka meusaboh ngon Almaseh. 29 Keumeuteumé hainyan ulôn meukeureuja brat. Ulôn meujuang ngon sigeunab teunaga nyang ka geubri lé Almaseh ubak ulôn dan nyang mubuet lam tuboh ulôn ngon peunoh kuasa.

Kolose 2

1 Ulôn meuharab mangat gata teupeu pakriban brat jih ulôn meujuang deumi keugata dan keu awaknyan nyang na di Laodikia dan banmandum nyang hana jituri keulôn seucara pribadi. 2 Banmandum nyoe ulôn peubuet mangat até awaknyan beujeuet keuteuga dan awaknyan saléng lam gaséh sayang ngon lagée nyan awaknyan beujeuet meusaboh. Deungon lagée nyan awaknyan biet-biet muphom dan yakén lom jituri rahsia Allah, na kheueh Almaseh keudroe. 3 Almaseh kheueh nyang peutrang banmandum keubijaksanaan dan peungeutahuan Allah nyang yoh masa ilée teusöm. 4 Ulôn peugah nyoe mangat gata bék jipeungét lé soe mantong nyang babah jih maméh ateueh gata. 5 Dan bah kheueh ulôn nyoe jiôh nibak gata, anggab kheueh ulôn na meusajan gata. Dan ulôn mangat that até watée lôn ngieng gata siaté dan teugoh tameuiman ubak Almaseh. 6 Syedara banmandum ka tateurimong Isa Almaseh sibagoe Tuhan. Lé sabab nyan bah kheueh gata udeb meusaboh ngon Gobnyan, 7 dan meu-ukeue lam Gobnyan. Bah kheueh gata tapeudong udeb gata ngon Almaseh sibagoe dasai jih. Bah kheueh gata seumaken tameuiman ubak Almaseh, meunurot peue nyang ka teupeurunoe ubak gata. Dan bah kheueh até gata bumangat that sira tapeugah teurimong gaséh. 8 Bah kheueh gata beuaté-até, bék sampoe na nyang jipakat gata ngon falsafah-falsafah manusia nyang hana meuguna, nyang na keubiet jipeusisat. Falsafah-falsafah nyan asai jih kon nibak Almaseh, teuma nibak peundapat manusia mantong dan nibak roh-roh nyang meukuasa lam donya. 9 Sabab banmandum pribadi Allah na tinggai lam Almaseh, na kheueh nibak keumanusiaan Gobnyan. 10 Dan sabab udeb meusaboh ngon Almaseh, keugata pih teubri udeb nyang sipeunoh jih. Sabab Almaseh na kheueh ulée ateueh tieb-tieb roh nyang meukuasa dan nyang mat peurintah. 11 Sabab meusaboh ngon Almaseh, gata kateupeukatan, kon ngon peukatan nyang jipeubuet lé manusia, teuma ngon meukatan nyang geupeugét lé Almaseh, nyang peubeubaih gata nibak kuasa tabiát nyang meudesya. 12 Sabab bak watée gata teupumanö, gata teukubu meusajan-sajan Almaseh; dan ngon pumanö nyan cit teuma, gata meusajan teupeu udeb lom teuma meusajan Almaseh sabab gata peucaya ubak kuasa Allah nyang ka geupeu udeb Almaseh nibak maté. 13 Yoh masa ilée, gata ka maté seucara rohani sabab gata meudesya, dan sabab gata hana teupeukatan seucara lahé. Teuma jironyoe Allah geupeu udeb gata meusajan-sajan ngon Almaseh. Allah ka geupeu amphon banmandum desya-desya geutanyoe, 14 dan geupeubateue surat utang ateueh geutanyoe, nyang jiancam geutanyoe ngon syarat-syarat nyang brat. Deungon teusaleb surat nyan bak kayée saleb, Allah geupeu amphon banmandum peukara ateueh geutanyoe. 15 Nibak saleb nyan Almaseh geupeugöt banmandum roh-roh nyang mat peurintah dan nyang meukuasa ka jeuet hana meudaya lé. Awaknyan ka jeuet keubeunda nyang jinonton lé ureuëng ramé bak watée Almaseh geuiréng awaknyan sibagoe ureuëng teuteun lam pawai keumeunangan. 16 Sabab nyan bék kheueh tapeubiyeu ureuëng laén jipeusalah gata keuhai peunajoh atawa nyang gata jieb, atawa keuhai uroe-uroe raya keuagamaan, atawa peurayaan-peurayaan buleuen barô, atawa keuhai uroe Sabat. 17 Banmandum nyan na kheueh bubayang mantong nibak hai-hai nyang teuma teuka, teuma keunyataan nibak hai-hai nyan na kheueh Almaseh! 18 Bék kheueh gata tapeubiyeu droe jipeurugoe lé ureuëng-ureuëng nyang pura-pura peumiyueb droe dan nyang seumah malaikat-malaikat. Ureuëng nyan sombong ngon pikeran-pikeran donya dan jipeubangga-bangga droe ngon peue-peue nyang jikalon nyang khusos, 19 sampoe hana lé jimumat ubak Almaseh nyang jeuet keu ulée. Dimiyueb pimpénan Almaseh, bansaboh tuboh geupeulara dan teupeusaboh lé jeueb-jeueb seundi jih, dan timoh meunurot keuheundak Allah. 20 Gata ka maté meusajan-sajan ngon Almaseh, dan ka geupeubeubaih nibak roh-roh nyang kuasa ateueh alam nyoe. Ngon lagée nyan, pakon gata udeb lagée ureuëng nyang mantong jikuasa lé donya nyoe? Pakon gata tundok ubak peuratoran-peuratoran nyoe, 21 "Bék mat nyoe", "Bék cilet nyan", "Bék cukéh nyoe?" 22 Banmandum atoran nyan na kheueh keuhai-hai nyang meunan jimat hana meuguna lé. Nyan na kheueh atoran-atoran dan peungajaran-peungajaran nyang jipeugét lé manusia. 23 Beutôi deuh jih hainyan bijaksana, ngon cara jiyue mangat manusia jiseumah malaikat, peumiyueb droe dan teuseksa droe; teuma banmandum nyan hana meuguna keuteukeundali nafeusu manusia.

Kolose 3

1 Gata ka teupeu udeb lom teuma meusajan-sajan Almaseh. Sabab nyan bah kheueh gata useuha keumeuteumé hai-hai nyang lam syeuruga, dipat Almaseh geumat peurintah meusajan Allah. 2 Peupusat kheueh pikeran gata bak hai-hai nyang na disinan, bék bak hai-hai nyang na lam donya. 3 Sabab gata ka maté, dan udeb gata teusöm meusajan Almaseh lam Allah. 4 Ngon lagée nyan, punca udeb gata nyang seujati na kheueh Almaseh dan watée Gobnyan leumah singoh gata pi teuma teuka deungon Gobnyan lam keubeusaran geuh! 5 Sabab nyan, peumaté kheueh nyang jimeuheuet le donya nyan jipeukaru droe gata, lagée buet cabui, hai-hai nyang hana teupujoe, hawa nafeusu, meulakée nyang jeuhet, dan seurakah (sabab seurakah nyan na kheueh saban lagée teuseumah beurala). 6 Hai-hai nyang lagée nyan kheueh nyang jeuet meuakibat ubak meureuka Allah ateueh ureuëng-ureuëng nyang hana taát. 7 Yoh masa ilée gata keudroe pi taturot hai-hai nyang meuheuét nyan, bak watée gata jikuasa lé jih nyan. 8 Teuma bak watée nyoe bah kheueh gata tiek hai-hai nyang jeuhet lam tuboh gata: bék beungéh lé, atawa bingkéng hana meuteuntée dan na rasa banci keu ureuëng laén. Bék sagai-sagai jiteubiet lam babah gata tutoe haba teumeunak atawa tutoe nyang kutoe. 9 Bék meusulet sidroe ngon nyang laén, sabab udeb nyang awai nyang peue mantong sifeuet jih ka gata tinggai. 10 Gata jinoenyoe ka teubri udeb nyang barô. Gata na kheueh manusia barô, nyang teungoh geupeu barô hana putôh-putôh lé nyang cebta, nyan kheueh Allah, meunurot hi geuh keudroe. Meukeusut jih na kheueh mangat gata taturi Allah ngon sampoereuna. 11 Sibagoe akibat nibak mandum nyan hanco kheueh peue-peue mantong nyang na meubeda ureuëng Yahudi ngon kon ureuëng Yahudi, ureuëng meukatan ngon ureuëng nyang hana meukatan, hana meubeda lé ureuëng aséng ngon ureuëng biadab, sidroe namiet ngon ureuëng meurdehka, sabab Almaseh na kheueh sigala-gala jih dan Gobnyan meusaboh ngon mandum nyan! 12 Gata na kheueh umat Allah, Allah geugaséh gata dan geupiléh gata keujeuet keumilék Gobnyan nyang khusos. Nyang kheueh sabab jih meuseuti tatunyok gaséh sayang, gata harôh gét até, miyueb até, leumoh leumbot, dan ék gatateun meudeurita. 13 Gata meuseuti saba sidroe ngon nyang laén, dan saléng tapeu amphon meunyoe na nyang troh dam ateueh ureuëng laén. Tuhan ngon mangat até geupeu amphon gata, ngon lagée nyan gata pih meuseuti beutateum peu amphon sidroe ngon nyang laén. 14 Dan nyang paleng peunteng na kheueh: Gata meuseuti saléng tameugaséh sabab gaséh nyan kheueh nyang peusaboh Gata banmandum sampoe jeuet keusampoereuna. 15 Bah kheueh peue-peue mantong nyang gata cok keuputosan jipeuteuntée nibak damé nyang geubri lé Almaseh lam até gata. Sabab Allah geutawök gata jeuet keu anggota saboh tuboh, mangat gata udeb lam damé nibak Almaseh nyan. Bah kheueh gata meuteurimong gaséh. 16 Bah kheueh ajaran-ajaran Almaseh nyang peunoh beureukat jilhob lam até gata. Bah kheueh gata saléng peurunoe dan saléng tabri naseuhat ngon bijaksana mungken. Meuca-e kheueh ngon lagu-lagu zabur puja dan pujoe meunan cit lagu-lagu rohani; meulagu kheueh keu Po teu Allah ngon peurasaan syukoe lam até gata. 17 Peue mantong nyang gata peubuet atawa nyang gata peugah, bah kheueh nyan gata peubuet atawa gata peugah lam nan Tuhan Isa. Meusyukoe kheueh ubak Allah Bapak keupeue nyang geupeubuet lé Isa keugata. 18 Hei gata-gata nyang jeuet keupurumoh! Taát kheueh ubak lakoe gata, sabab meunan kheueh nyang sibeunajih peurangoe gata sibagoe ureuëng Kristen. 19 Hei gata-gata nyang jeuet keu ureuëng lakoe! Gaséh kheueh keupurumoh gata. Bék gata peubuet gasa ateueh purumoh teuh nyan. 20 Aneuëk-aneuëk! Na kheueh keuwajéban gata sibagoe ureuëng Kristen keusabe ta-taát ubak ayah ngon ma, sabab lagée nyan kheueh nyang jeuet keu mangat até Allah. 21 Hei gata-gata nyang jeuet keu ayah! Bék gata peusakét até aneuëk-aneuëk gata akhé jih aneuëk gata nyan jeuet keuputôh asa. 22 Hei gata-gata nyang jeuet keu namiet! Lam hai peue mantong, bah kheueh gata taát ubak po gata nyang lam donya nyoe. Bék kheueh taát ubak awaknyan watée awaknyan teungoh jikeumiet gata, sabab gata meuheuét jipujoe. Taát kheueh ubak awaknyan ngon até nyang ikhlaih, sabab gata tahoreumat Tuhan. 23 Buet peue mantong nyang geubri ateueh gata, bah kheueh gata peubuet ngon sipeunoh até, siulah-ulah Tuhan kheueh nyang gata peutimang, dan kon manusia mantong. 24 Ingat kheueh bahwa gata teuma tateurimong upah nibak Tuhan. Peue nyang geukeubah lé Tuhan keu umat Gobnyan, nyan kheueh nyang teuma geubri keugata. Sabab amphon nyang sibeuna jih nyang teungoh gata peutimang nyan na kheueh Almaseh keudroe. 25 Dan soe mantong nyang peubuet salah, teuma jitanggong buet-buet jih nyang salah nyan; sabab Tuhan hana geupandang muka.

Kolose 4

1 Syedara-syedara nyang jeuet keu amphon! Bah kheueh gata peusaneut namiet-namiet gata ngon beuna dan ade. Ingat kheueh bahwa gata pih na sidroe amphon lam syeuruga. 2 Bah kheueh gata meudoá ngon khusyuék dan sabe siab waspada, sira gata peugah syukoe ubak Allah. 3 Meudoá kheueh teuma keukamoe mangat Allah geubri keukamoe keuseumpatan nyang jroh keukamoe peusampoe haba keuhai Almaseh. Sabab hainyan kheueh jinoenyoe ulôn na lam rumoh glab. 4 Meudoá kheueh mangat ulôn hase lôn peugah rahsia nyan ngon sijeulaih-jeulaih jih lagée nyang sibeuna jih. 5 Lam hubongan gata ngon ureuëng-ureuëng nyang hana meuiman, bah kheueh gata udeb bijaksana dan gata peuguna tieb-tieb keuseumpatan ngon sigét-gét jih. 6 Bah kheueh hai-hai nyang gata peugah nyan sabe mangat dan teutarek até. Bah kheueh gata tateupeue pakriban nyang sibeuna jih gata meuseuti tajaweueb peue-peue nyang jitanyong lé gob. 7 Tikhikus, syedara tanyoe nyang teugaséh, teuma jijak peugah bak gata peue-peue mantong keuhai ulôn. Jihnyan seutia that jimubuet meusajan-sajan ngon kamoe keu Tuhan. 8 Ulôn kukirém jihnyan ubak gata ngon alasan mangat gata tateupeue keuadaan kamoe dan gata teuhibor. 9 Onesimus teuma jijak meusajan-sajan ngon Tikhikus; jihnyan sidroe ureuëng gata. Jihnyan sidroe ureuëng nyang seutia, dan kamoe that meugaséh keu jih nyan. Jihnyan dan Tikhikus teuma jipeugah ubak gata peue-peue mantong nyang ka teujadi bak teumpat lôn nyoe. 10 Aristarkus, nyang na lam rumoh glab meusajan-sajan ngon ulôn, jikirém saleuem keu gata. Meunan cit ngon Markus, syedara blaih ma Barnabas. (Gata ka teukirém haba keuteusambot jihnyan meunyoe jihnyan teuka ubak gata.) 11 Saleuem teuma nibak Isa nyang nan jih Yustus. Nibak ureuëng-ureuëng Yahudi nyang ka meuiman ubak Tuhan Isa, teuma awaknyan lhée droe mantong kheueh nyang jinoenyoe meukeureuja meusapat ngon ulôn keuteupeujak tugaih nibak Allah. Awaknyan biet-biet that-that jitulông ulôn. 12 Saleuem nibak Epafras. Ureuëng nyoe pi ureuëng gata. Jihnyan namiet Isa Almaseh, nyang sabe meudoá ngon khusyuék keu gata. Jihnyan meulakée ngon meuharab that ubak Allah mangat keuyakénan gata meutamah teuga dan gata biet-biet rayeuk, mangat gata ngon sampoereuna taát ubak keuheundak Allah. 13 Ulôn kalon keudroe bahwa jihnyan biet-biet ka jikeureuja brat keu gata dan keu ureuëng-ureuëng nyang na di Laodikia dan Hierapolis. 14 Dokto Lukas, nyang tanyoe gaséh, dan Demas jikirém saleuem keugata. 15 Peutrok kheueh saleuem kamoe ubak ureuëng-ureuëng Kristen di Laodikia; meunan cit ubak Nimfa, dan keu jeumaáh nyang meuiébadat lam rumoh geuh. 16 Óh lheueh surat nyoe teubaca keugata, useuha kheueh teuma mangat surat nyan jibaca teuma bak jeumaáh nyang na di Laodikia. Meunan cit teuma gata keudroe harôh tabaca surat nyang teuma teukirém nibak Laodikia keugata. 17 Dan peugah cit ubak Arkhipus, "Peuseuleusoe kheueh tugaih nyang teubri ubak gata guna teupeutimang Tuhan." 18 Saleuem nibak ulôn, Paulus. Ulôn keudroe nyang tuléh bagian nyoe. Bék tuwoe bahwa ulôn mantong na lam glab! Seumoga Tuhan geubri beureukat keugata. Horeumat kamoe, Paulus

1 Tesalonika 1

1 Syedara-syedara jeumaáh nyang na di Tesalonika, nyang jeuet keu umat Allah Bapak dan Tuhan Isa Almaseh: Kamoe, na kheueh Paulus, Silas dan Timotius meuharab beujeuet Allah geubri beureukat dan seujahteura ateueh gata. 2 Kamoe sabe meusyukoe ubak Allah sabab lé Syedara mandum. Tieb-tieb watée kamoe meudoá ubak Allah dan Bapak geutanyoe, kamoe sabe teuingat gata. Kamoe sabe meudoá keu gata Kamoe teutab teuingat pakriban gata tatunyok lam buet bahwa gata meuiman ubak Almaseh, pakriban gata talayani ureuëng laén dan gata gaséh awaknyan, dan pakriban teuma gata meuharab ngon biet-biet meuiman ubak Tuhan geutanyoe Isa Almaseh. 4 Kamoe meuteupeue, wahe Syedara mandum, bahwa Allah geugaséh gata dan ka geupiléh gata jeuet keu atra Gobnyan nyang khusos. 5 Sabab kamoe peusampoe Haba Gét keugata kon ngon tutoe haba mantong, teuma ngon kuasa dan ngon Roh Allah. Dan kamoe yakén that ateueh keubeunaran Haba Gét nyan. Gata tateupeue pakriban kamoe udeb keu keupeuntengan gata watée kamoe mantong na lamkawan gata. 6 Gata taseutôt teuladan kamoe dan teuladan Tuhan. Bah pih gata keubiet that meudeurita, gata tasambot ngon mangat até haba nyang kamoe peusampoe bak gata. Geumbira nyan geubri lé Roh Allah. 7 Ngon lagée nyan gata kajeuet keucuntoh keumandum ureuëng Kristen nyang na di Makedonia dan Akhaya. 8 Sabab phon nibak gata, haba keuhai Tuhan ka meutabu trok u Makedonia dan Akhaya. Dan kon nyan mantong; sampoe haba keuhai pakriban gata meuiman ubak Allah ka trok ho-homantong, sampoe kamoe hana peureulée lé kamoe peugah sapeue. 9 Banmandum awaknyan jipeugah pakriban gata tateurimong kamoe yoh watée kamoe ilée meujak ubak gata. Awaknyan jimeututoe pakriban gata tatinggai beurala-beurala dan tajak ubak Allah nyang sidroe nyang udeb keuteuseumah Gobnyan. 10 Awaknyan jimeututoe cit pakriban gata tameuharab teuka Aneuëk Allah nibak syeuruga, na kheueh Isa, nyang ka geupeu udeb lé Allah nibak maté. Isa nyan kheueh teuma nyang peuseulamat geutanyoe nibak meureuka Allah nyang teuma teuka.

1 Tesalonika 2

1 Syedara-syedara! Gata keudroe tateupeue bahwa kamoe jaksaweue gata hana sia-sia. 2 Gata tateupeue bahwa sigohlom kamoe jak ubak gata di Tesalonika, kamoe kaji iénanya dan jihina di Filipi. Teuma bah pih jai that ureuëng jilawan kamoe, Allah geutanyoe ka geubri ubak kamoe keubeuranian keuteupeusampoe keugata Haba Gét nyang asai jih nibak Gobnyan. 3 Kamoe pakat gata kon kheueh saboh hai nyang keuliru; dan kon teuma ngon meukeusut hana gleh atawa teumipée. 4 Hana! Kamoe hana kamoe meututoe keuneuk peumangat até gob, teuma keuneuk peumangat até Po teu Allah, nyang ujoe até kamoe. Sabab kamoe geuanggab hase lé Allah keuteupeusampoe Haba Gét nyan. 5 Gata keudroe tateupeue bahwa kamoe hántom na meututoe ngon haba maméh atawa keuneuk peungeut gata ngon meukeusut geureuda. Allah saksi jih! 6 Kamoe hana cit meu-useuha mangat jipujoe lé gob -- bah kheueh nibak gata meunan cit nibak ureuëng laén. Nyang sibeuna jih sibagoe rasui Almaseh, kamoe jeuet mantong kamoe lakée sipeue-peue nibak gata. 7 Teuma kamoe meusikeub leumoh-leumbot watée kamoe na lamkawan gata, lagée sidroe ma nyang teungoh geurawat aneuëk-aneuëk gobnyan. 8 Sabab lé gaséh sayang kamoe, kamoetém bri keugata kon mantong Haba Gét nyang teuka nibak Allah nyan, teuma trok ubak udeb kamoe. Sabab kamoe keubiet that gaséh keugata. 9 Teuntée gata mantong teuingat pakriban brat jih kamoe meu-useuha dan meujuang. Uroe malam kamoe meukeureuja mangat kamoe hana kamoe peususah meusidroe pih nibak gata bak watée kamoe tabu Haba Gét nyang teuka nibak Allah nyan keugata. 10 Kamoe udeb lam suci, beutôi dan hana meucupa ateueh gata nyang ka meuiman ubak Almaseh, gata kheueh saksi-saksi kamoe, meunan cit Allah. 11 Gata tateupeue bahwa kamoe peusaneut gata maséng-maséng lagée sidroe ayah geupeusaneut aneuëk geuh. 12 Kamoe naseuhat gata, kamoe durong gata dan kamoe paksa mangat gata udeb lagée nyan bagoe sampoe teupeugalak até Allah. Sabab Allah ka geutawök gata mangat jeuet wareuga Donya Barô Allah dan teurasa keubeusaran Gobnyan. 13 Na lom saboh teuk hai nyang laén nyang teupeujeuet kamoe sabe meulakée teurimong gaséh ubak Allah. Hainyan na kheueh, bahwa bak watée kamoe peutrok haba nibak Allah keugata, gata tadeungoe dan tateurimong haba nyan kon sibagoe haba nibak manusia, teuma sibagoe haba nyang biet-biet teuka nibak Po teu Allah. Gobnyan kheueh nyang teungoh mubuet lam tuboh gata nyang meuiman ubak Almaseh. 14 Syedara-syedara, hai nyang gata rasa ka teuma jirasa lé jeumaáh-jeumaáh Allah di Yudea nyang ka jeuet keu atra Isa Almaseh. Gata tarasa deurita nibak pihak bansa droe teuh keudroe, saban lagée nyang ka jirasa lé jeumaáh-jeumaáh Allah di Yudea nyan nibak pihak ureuëng-ureuëng Yahudi. 15 Ureuëng-ureuëng nyan nyang poh maté Tuhan Isa dan nabi-nabi, dan ji iénanya kamoe. Awaknyan jimeumusoh ngon mandum ureuëng, dan Allah sagai-sagai hana galak keu awaknyan. 16 Teuma awaknyan jipagab-pagab kamoe keukamoe peusampoe habanyan keu bansa-bansa nyang kon Yahudi haba nyang hase teupeuseulamat bansa-bansa nyan. Deungon lagée nyan, ureuëng-ureuëng Yahudi nyan jitamah-tamah laju desya-desya jih keudroe trok ubak jeumeulah jih nyang leungkab. Dan jinoenyoe awaknyan akhé jih kakeunong meureuka Allah! 17 Teuma syedara-syedara, yoh phon that kamoe meucre sikeujab ngon gata -- meucre bak mata teuma kon bak até -- kamoe meutamah-tamah meucen keugata dan meu-useuha ngon biet-biet that mangat meurumpok lom ngon gata! 18 Kamoe naniet keuneuk jak saweue gata; dan ulôn, ka lôn ujoe sigoe dua goe, teuma Iblih jipagab-pagab kamoe. 19 Keubiet, gata kheueh harapan dan pumangat até kamoe. Sabab, singoh watée Tuhan Isa teuka, dan tanyoe meuhadab Gobnyan, teuma gata kheueh nyang teuma jeuet kamoe peubangga! 20 Keubiet gata kheueh keubanggaan dan keumangat até kamoe!

1 Tesalonika 3

1 Akhé jih meucen kamoe hana ék teuteun lé. Sabab nyan kheueh kamoe pike leubeh gét tinggai di Atena, 2 teungoh kamoe kirém syedara tanyoe Timotius. Jihnyan peulayan Allah nyang meukeureuja meusajan kamoe keu jijak peusampoe Haba Gét keuhai Almaseh. Meunan cit kamoe kirém Timotius ubak gata mangat jihnyan jeuet jipeukong gata dan jidurong gata guna keuleubeh jimeuiman lom ubak Almaseh. 3 Deungon lagée nyan hana meusidroe pi nibak gata nyang surot sabab deurita-deurita tanyoe nyoe. Gata keudroe tateupeue bahwa deurita-deurita nyan jitamong lam reuncana Allah keugeutanyoe. 4 Watée kamoe mantong na meusajan gata, ka lheueh kamoe peugah bak gata leubeh ilée bahwa geutanyoe teuma meudeurita. Dan beutôi nyan biet-biet ka teujadi; gata keudroe tateupeue nyan. 5 Nyang kheueh sabab jih ulôn kirém Timotius, sabab ulôn meuharab that keuneuk lôn teupeue pakriban keumajuan gata keuhai iman gata ubak Almaseh. Ulôn khawate Iblih meuhase jigoda gata akhé jih mandum jeureh payah kamoe sia-sia. 6 Jinoenyoe Timotius ka jigisa dan ka jipeusampoe bak kamoe haba geumbira keuhai pakriban gata meuiman ubak Almaseh dan udeb lam gaséh sayang. Jihnyan jipeugah bak kamoe bahwa gata sabe takeubah keunang-keunangan nyang jroh keuhai kamoe lam até gata. Dan gata keuneuk meurumpok ngon kamoe, saban lagée kamoe pi keuneuk meurumpok ngon gata. 7 Nyang kheueh sabab jih, Syedara-syedara, lam keuadaan susah dan deurita kamoe, até kamoe teuhibor watée meudeungoe haba keuhai gata. Iman gata ubak Almaseh keubiet rayeuk that até kamoe, 8 sampoe jinoenyoe kamoe keubiet meurasa biet-biet udeb, asai gata teutab teudong cot, meusaboh ngon Tuhan. 9 Padubna rayeuk jih peurasaan teurimong gaséh kamoe ubak Allah ateueh banmandum keugeumbiraan nyang kamoe rasa dikeue Gobnyan ngon sabab lé gata. 10 Uroe malam kamoe lakée bak Gobnyan ngon sipeunoh até, mangat kamoe hase meurumpok keudroe ngon gata keu teupeuleungkab peue nyang gata peureulée keumeuiman gata ubak Almaseh lagée toh nyang sibeuna jih. 11 Seumoga Allah Bapak geutanyoe keudroe, dan Tuhan geutanyoe Isa geupeudata rot ueh keukamoe jak meurumpok ngon gata! 12 Seumoga Tuhan geupeujeuet gata seumaken tagaséh sidroe ngon nyang laén dan seumaken tagaséh banmandum manusia, sampoe geunaséh gata nyan meutamah-tamah, saban lagée geunaséh kamoe ateueh gata. 13 Deungon lagée nyan Tuhan teuma geupeuteuga até gata, sampoe gata gleh dan hana meucupa dikeue Allah Bapak geutanyoe, bak watée Tuhan geutanyoe Isa teuka meusajan ngon mandum ureuëng nyang jeuet keu milék Gobnyan.

1 Tesalonika 4

1 Akhé jih Syedara-syedara, kamoe kameubri teuladan keugata keuhai pakriban gata meuseuti udeb keu teupeumangat até Allah. Beutôi gata ka udeb lagée nyan. Teuma jinoenyoe ateueh kuasa Tuhan Isa, kamoe meulakée ngon meuharab bak gata mangat gata leubeh tauseuha lom lam hai nyan! 2 Sabab gata ka tateupeue peutunyok-peutunyok nyang ka kamoe bri bak gata ateueh kuasa Tuhan Isa. 3 Nyoe kheueh keuheundak Po teu Allah: Mangat gata udeb khusos keu Gobnyan, gleh, tapeujiôh mandum buet nyang cabui. 4 Tieb-tieb ureuëng agam nyang na lamkawan gata meuseuti jiteupeue pakriban udeb meusajan ngon purumoh jih ngon cara nyang teupeumangat até Allah dan manusia. 5 Bék udeb meunurot hawa nafeusu ateueh purumoh gata, lagée nyang jipeubuet lé ureuëng-ureuëng nyang hana jituri Allah. 6 Lam hai nyang lagée nyan, bék kheueh meusidroe pi jipeubuet salah ateueh syedara jih, atawa jitipée gobnyan. Yoh masa ilée kamoe ka lheueh kamoe peuingat nyang that brat ateueh gata, bahwa Tuhan singoh geuhuköm ureuëng-ureuëng nyang jipeubuet buet-buet salah nyang lagée nyan. 7 Allah geutawök tanyoe, kon beujeuet geutanyoe udeb lam cabui, teuma geutanyoe udeb deungon cara nyang teupeumangat até Gobnyan. 8 Ureuëng nyang tulak peue nyang teupurunoe nyoe, kon jitulak manusia, teuma nyang jitulak na kheueh Allah nyang ka geubri Roh Gobnyan nyang suci keugata. 9 Hana peureulée lé kamoe teumuléh keu gata keuhai pakriban gata meuseuti tagaséh syedara-syedara nyang saboh iman. Gata keudroe ka geupurunoe lé Allah keusaleng tameugaséh. 10 Dan hainyoe ka lheueh gata tunyok ateueh mandum syedara saboh iman di bansaboh Makedonia. Teuma, Syedara-syedara, kamoe lakée ngon meuharab that, bah kheueh udeb gata meutamah gét lom. 11 Meu-useuha kheueh udeb ngon teunang dan hana gata peurhoh droe lam urosan ureuëng laén. Bah kheueh gata mubuet tamita nafeukah keudroe, lagée nyang ka lheueh kamoe peurintah ilée nibak gata. 12 Meunyoe gata udeb lagée nyan, gata hana meugantueng ubak soe mantong, dan ureuëng-ureuëng nyang hana peucaya bak Almaseh, teuma jihoreumat gata. 13 Syedara-syedara, kamoe meuharab mangat gata teupeu nyang sibeuna jih keuhai ureuëng-ureuëng nyang ka meuninggai donya; mangat gata hana seudeh até lagée ureuëng-ureuëng nyang hana peungharapan. 14 Tanyoe tapatéh bahwa Isa ka maté dan ka udeb lom teuma. Nyang kheueh sabab jih tanyoe tapatéh bahwa Allah teuma geupeu udeb lom banmandum ureuëng nyang meuiman ubak Isa dan ka meuninggai, mangat awaknyan udeb meusajan gobnyan. 15 Keuhai nyan, nyoe kheueh ajaran Tuhan nyang keuneuk kamoe peusampoe ubak gata: Bak watée Tuhan Isa teuka, geutanyoe nyang mantong udeb hana teuma tapeuawai nibak ureuëng-ureuëng nyang ka meuninggai leubeh awai. 16 Teuma malaikat agong geudumpék ngon su geuh nyang meutaga dan beureuguih Allah teuyueb sibagoe tanda aba-aba. Dan Tuhan Isa keudroe teuma geutron lam syeuruga, dan ureuëng-ureuëng Kristen nyang ka meuninggai teuma teupeu udeb leubeh ilée. 17 Óh lheueh nyan, geutanyoe nyang mantong udeb nibak watée nyan teuma meusajan-sajan ngon awaknyan lam awan ijo keuneuk meurumpok ngon Tuhan di manyang. Laju tanyoe tinggai ngon Tuhan siumu masa. 18 Sabab nyan, bah kheueh gata saléng tapeuteuga até ngon cara tapeuguna tutoe haba nyang lagée nyoe.

1 Tesalonika 5

1 Syedara-syedara, hana peureulée kamoe teumuléh keugata pajan watée jih nyang paih hainyan teuma teujadi. 2 Sabab gata keudroe tateupeue ngon jeulaih that bahwa Uroe Tuhan teuka nyan teuma trok lagée pancuri nyang teuka bak watée malam. 3 Meunyoe na ureuëng jipeugah, "Banmandum aman dan teuntram," teuma bak watée nyan kheueh ngon hana teusangka-sangka awaknyan teuma jitimpok lé binasa, dan hana meusidroe pih nyang hase jipeuseulamat droe. Hai nyan teuma teuka ngon hana teusangka-sangka, lagée peurasaan sakét jitôh aneuëk nibak sidroe ureuëng inong nyang keuneuk jipeulahé aneuëk. 4 Teuma gata kon ureuëng nyang udeb lam seupôt, sanpoe uroenyan keubiet teukeujot that gata lagée jiteuka lé pancuri. 5 Gata banmandum na kheueh ureuëng nyang udeb lam trang; gata jitamong lam uroe nyang trang. Tanyoe kon ureuëng nyang udeb lam seupôt; atawa nyang jitamong nibak malam nyang seupôt. 6 Sabab nyan geutanyoe hana jeuet taéh-éh mantong lagée ureuëng laén. Tanyoe meuseuti waspada dan pikeran tanyoe meuseuti trang. 7 Watée malam teuka manusia jijak éh, dan nibak malam teuka teuma ureuëng jeuet keumabök. 8 Teuma geutanyoe nyoe jitamong nibak ureuëng-ureuëng nyang peungéh dan trang; sabab nyan pikeran tanyoe meuseuti trang. Geutanyoe meuseuti teutab meuiman ubak Tuhan dan tagaséh keu ureuëng-ureuëng laén meunan cit tameuharab ngon yakén bahwa Po teu Allah teuma geupeu seulamat tanyoe. Nyan kheueh sinjata nyang peulindong geutanyoe nibak meujuang talawan seupôt. 9 Allah geupiléh geutanyoe kon keu teuhuköm, teuma geupeu seulamat meulalu Tuhan geutanyoe Isa Almaseh. 10 Gobnyan maté keugeutanyoe mangat bak watée Gobnyan teuka singoh -- aléh geutanyoe mantong udeb, aléh geutanyoe ka maté -- tanyoe meuteumé udeb meusajan ngon Gobnyan. 11 Sabab nyan, bah kheueh gata teutab saléng tadurong dan saléng tapeukong, saban lagée nyang teungoh gata peubuet nibak watée nyoe. 12 Syedara-syedara, kamoe meulakée ngon meuharab that mangat gata tahareuga ureuëng-ureuëng nyang mubuet lamkawan gata; na kheueh awaknyan nyang ka geupiléh lé Tuhan keu jipimpén dan jibri naseuhat gata. 13 Peusaneut kheueh ateueh awaknyan ngon sihoreumat-horeumat jih dan ngon cinta gaséh sabab taingat peue nyang awaknyan peubuet. Udeb kheueh sabe lam keuadaan rukon. 14 Meunan cit kamoe lakée, Syedara-syedara, seugah kheueh ngon gét keu ureuëng nyang hana jitem keureuja; peutabah kheueh até ureuëng teumakot; tulông kheueh ureuëng nyang peureulée teutulông dan saba kheueh ateueh mandum ureuëng. 15 Jaga kheueh mangat bék na nyang jibalaih buet nyang jeuhet ngon buet nyang jeuhet. Meu-useuha kheueh sabe keu tapeubuet nyang gét, sidroe ateueh nyang laén dan ateueh mandum ureuëng. 16 Bah kheueh gata sabe lam keuadaan geumbira, 17 dan meudoá kheueh sabe. 18 Lam keuadaan peue mantong bah kheueh gata meusyukoe, sabab nyang lagée nyan kheueh nyang Allah lakée nibak gata sibagoe ureuëng nyang udeb meusaboh ngon Isa Almaseh. 19 Bék kheueh gata keukang Roh Allah. 20 Bék kheueh gata anggab phui mantong haba-haba nyang geupeutrok lé Roh Allah. 21 Peue-peue mantong meuseuti teu ujoe, dan nyang gét harôh teuseutôt. 22 Peujiôh kheueh peue-peue mantong nyang jeuhet. 23 Seumoga Allah keudroe nyang bri ubak geutanyoe seujahteura, geupeujeuet gata keu ureuëng-ureuëng nyang biet-biet udeb khusos keu Po teu Allah. Seumoga Allah geujaga bansaboh anggota tuboh gata, bah kheueh roh, jiwa meunan cit tuboh gata,sampoe hana meucupa bak watée Tuhan Isa Almaseh teuka lom teuma. 24 Allah, nyang ka geutawök gata, teuma geupeubuet hainyan sabab Gobnyan seutia. 25 Doá kheueh keukamoe, Syedara-syedara! 26 Meumat-mat jaroe kheueh banmandum seucara meusra sibagoe syedara ureuëng Kristen. 27 Ateueh kuasa Tuhan, ulôn lakée ngon meuharab that mangat gata baca surat nyoe keumandum syedara nyang saboh iman. 28 Seumoga Tuhan geutanyoe Isa Almaseh geubri beureukat ateueh gata. Horeumat kamoe, Paulus

2 Tesalonika 1

1 Syedara-syedara jeumaáh nyang na di Tesalonika, nyang jeuet keu umat Allah Bapak geutanyoe Tuhan Isa Almaseh! Kamoe, na kheueh Paulus, Silas dan Timotius 2 meuharab seumoga Allah Bapak dan Tuhan Isa Almaseh geubri beureukat dan seujahteura ubak gata mandum. 3 Syedara-syedara, kamoe sabe wajéb kamoe peugah teurimong gaséh ubak Allah sabab gata. Dan beutôi kapatot kamoe peubuet meunan, sabab gata seumaken meuiman ubak Almaseh, dan gata seumaken tagaséh sidroe ngon nyang laén. 4 Nyang kheueh sabab jih pakon kamoe meututoe keuhai gata tieb-tieb watée kamoe jak saweue jeumaáh-jeumaáh Allah. Deungon bangga kamoe calitra pakriban gata teutab teugoh seutia gata meuiman ubak Almaseh lam keuadaan keunong iélanya dan deurita nyang gata rasa. 5 Dan inoe kheueh deuh nyata padubna ade jih huköman Allah: Gata ka meudeurita sabab Donya Barô Allah, dan sabab nyan gata teuma teuanggab patot gata tamong lam nyan. 6 Gobnyan geupeubuet peue nyang ade, dan teuma geubalaih deurita keu ureuëng nyang peujeuet gata meudeurita. 7 Dan ubak gata nyang ka jeuet bak watée nyoe meudeurita -- meunan cit teuma ateueh kamoe -- Allah teuma geubri keuleugaan nibak uroe Tuhan Isa geutron nibak syeuruga dan geupeuleumah droe Gobnyan ngon malaikat-malaikat Geuh nyang peukasa 8 dan ngon apui nyang hu meuháb-háb. Gobnyan geutron keu geujak huköm ureuëng-ureuëng nyang hana jipako keu Po teu Allah dan nyang hana jitem udeb sisuai ngon Haba Gét keuhai Isa Tuhan geutanyoe. 9 Ureuëng-ureuëng nyan teuma jiteurimong huköman keubinasaan siumu masa, geutiek uluwa nibak lingkongan Tuhan dan nibak kuasa Gobnyan nyang agong; 10 banmandum nyan teuma teujadi nibak uroe Gobnyan teuka singoh keujiagong lé umat Gobnyan dan keu jihoreumat lé mandum ureuëng nyang meuiman. Gata pi teuma na lamkawan umat Allah nyan, sabab gata katapatéh ubak haba nyang kamoe peutrok keugata. 11 Nyang kheueh sabab jih kamoe sabe meudoá keugata. Kamoe meudoá mangat Allah geupeujeuet gata patot keu udeb lagée nyang geulakée; keu nyan kheueh Gobnyan geutawök gata. Seumoga Allah, ngon kuasa Gobnyan, teupeupeunoh keuheundak Gobnyan keu teupeubuet nyang jroh, dan teupeusampoereuna banmandum buet nyang gata peubuet sabab meuiman ubak Almaseh. 12 Deungon lagéenyan, Tuhan geutanyoe Isa tapeuagong lé gata, dan gata pih geupeu agong lé Isa sabab keugét até Po teu Allah geutanyoe dan Tuhan Isa Almaseh.

2 Tesalonika 2

1 Keuhai Tuhan tanyoe Isa Almaseh teuka, dan keuhai jipeusapat geutanyoe mangat tinggai meusapat ngon Gobnyan, nyoe nyang ulôn lakée ngon meuharab that nibak gata: 2 Bék kheueh bagaih that bingong atawa apoh apah sabab na haba bahwa katrok uroe jih Tuhan Isa geuteuka lom teuma. Mungken haba nyan asai jih nibak saboh nubuat, atawa nibak saboh ajaran; atawa jeuet mantong na nyang peugah bahwa kamoe kaleuh teumuléh lam saboh surat kamoe. 3 Pakriban mantong kheuh teuma, bék tapeubiyeu ureuëng laén jipeungét gata. Sabab sigohlom trok Uroe nyan, harôh kheueh teujadi hainyoe leubeh ilée: Jai that ureuëng teuma murutat, ji iengkeue keu Almaseh; dan Manusia Jeuhet nyang ka teupeuteukeudi jitamong lam nuraka, jipeuleumah droe. 4 Deungon sombong jihnyan jilawan dan jipeumanyang droe ateueh banmandum nyang jiseumah lé manusia, atawa mandum ilah nyang jianggab Allah lé manusia. Nyang hebat lom jihnyan teuma jiduek lam Baét Allah dan jipeumaklum bahwa jihnyan na kheueh Allah. 5 Ingat kheueh bahwa ulôn ka lheueh lôn peugah banmandum nyan yoh ulôn mantong na meusajan gata. 6 Dan gata tateupeue peue jinoenyoe mantong teutam teujadi mandum nyan. Singoh bak watée nyang ka teupeuteuntée lé Po teu Allah, Manusia Jeuhet nyan teuma teuka. 7 Teunaga nyang jipeubuet atranyan ka jipeuphon mubuet seucara rahsia, teuma mantong jiteun-teun. Singoh meunyoe nyang peuteun nyan ka teukireuh ho laén, 8 barô kheueh deuh teungieng Manusia Jeuhet. Teuma meunyoe Tuhan Isa teuka, Gobnyan geupoh maté Manusia Jeuhet nyan ngon nafáh bak babah Gobnyan, dan teupeubinasa ngon keuhebatan Gobnyan teuka. 9 Manusia Jeuhet nyan teuma teuka ngon saboh kuasa nyang rayeuk nibak Iblih. Jihnyan teuma jipeuna sapeue-sapeue buet ajaéb dan hai-hai nyang luwabiasa nyang peunoh ngon peungét dan teumipée. 10 Jihnyan teuma jipeuguna sigala tipée daya nyang jeuhet keujipeusisat ureuëng-ureuëng nyang teuma binasa. Awaknyan binasa sabab jitulak dan hana jigalak keu haba nyang beuna nyang geubri lé Allah nyang hase peuseulamat awaknyan. 11 Nyang kheueh sabab jih Allah geupeuteuka ateueh awaknyan saboh kuasa nyang keubiet sisat that, sampoe awaknyan jipatéh peue nyang hana beutôi. 12 Akibat jih, mandum ureuëng nyang galak jipeubuet desya dan hana jipatéh ubak nyang beutôi nyan, teuma teuhuköm. 13 Syedara-syedara nyang geugaséh lé Tuhan! Sabe kamoe peugah teurimong gaséh ubak Po teu Allah keuhai gata, sabab yoh awaiphon Allah ka geupiléh gata keu geupeuseulamat. Hai nyan teujadi lé peue nyang jipeubuet lé Roh Allah keugata keu teupeujeuet gata umat Allah nyang gleh dan lé sabab gata tapatéh ubak haba nyang beutôi nyang teuka nibak Allah. 14 Keu nyan kheueh Allah geutawök gata keu Haba Gét nyang kamoe peusampoe ubak gata. Allah geutawök gata, sabab Gobnyan meuharab gata pih tarasa pakriban keuagongan Tuhan geutanyoe Isa Almaseh. 15 Lé sabab nyan, Syedara-syedara, dong kheueh beucot dan mumat kheueh beukong nibak ajaran-ajaran nyang ka kamoe bri ubak gata, bah kheueh nyan seucara teupeugah meunan cit seucara teutuléh. 16 Seumoga Tuhan geutanyoe Isa Almaseh keudroe, dan Allah Bapak geutanyoe geuhibur dan geupeukong até gata, mangat gata hase tapeubuet dan gata bri peue nyang gét. Sabab Allah geugaséh keugeutanyoe, dan sabab lé até Geuh nyang gét nyan Gobnyan geupeujeuet geutanyoe teutab tabah, dan teuharab nyang jroh.

2 Tesalonika 3

1 Akhé jih, Syedara-syedara, meudoá kheueh keu kamoe. Meudoá kheueh mangat haba nibak Tuhan jeuet meutabu sabe ngon bagaih that dan jiteurimong ngon gét, saban lagée nyang ka teujadi ateueh gata yoh masa ilée. 2 Meudoá kheueh teuma mangat Allah geupeu seulamat kamoe nibak ureuëng-ureuëng nyang beujat dan jeuhet. Sabab hana mandum ureuëng jipatéh ubak haba nibak Tuhan nyan. 3 Teuma Tuhan seutia. Gobnyan teuma geupeuteuga gata dan geulindong gata nibak Si Jeuhet. 4 Dan kamoe peunoh meuiman ubak Tuhan keuhai gata, bahwa gata teungoh tapeubuet dan teuma sabe tapeubuet peue nyang kamoe yue ubak gata. 5 Seumoga Tuhan nyang bimbeng gata leubeh tamuphom bahwa Allah geugaséh gata dan bahwa Almaseh geubri até gata nyang tabah. 6 Syedara-syedara, ateueh kuasa Tuhan geutanyoe Isa Almaseh, kamoe peurintah ubak gata mangat gata peujiôh mandum syedara, nyang udeb jih laloe ngon beu-o, dan nyang hana jiturot ajaran-ajaran nyang ka kamoe bri ubak awaknyan. 7 Gata keudroe tateupeue bahwa gata harôh taseutôt cuntoh bak kamoe. Kamoe hana laloe dan beu-o watée kamoe mantong na lamkawan gata. 8 Kamoe hana kamoe makheun peunajoh gob ngon hana kamoe bayeue. Uroe malam kamoe meukeureuja kamoe banteng tuleueng mangat kamoe hana kamoe peususah soe-soe mantong meunan cit nyang na lamkawan gata. 9 Kamoe peubuet nyan kon kamoe hana hak kamoe tuntot mangat gata tatulong kamoe, teuma kamoe keuneuk jeuet teuladan keugata mandum. 10 Watée kamoe mantong na lamkawan gata, kamoe bri peuratoran lagée nyoe, "Ureuëng nyang hana jitem keureuja, bék jimakheun." 11 Kamoe peugah nyoe sabab na kamoe deungoe bahwa ureuëng-ureuëng nyang na lamkawan gata na nyang udeb laloe ngon beu-o. Awaknyan hana jipeubuet meusapeue pi, nyang na laloe jipeuroh droe lam urosan ureuëng laén. 12 Ateueh kuasa Tuhan Isa Almaseh kamoe peurintah ureuëng-ureuëng nyan dan kamoe peuingat, mangat awaknyan jimubuet ngon beutôi dan jimita nafeukah droe jih keudroe. 13 Teuma gata bék tunu tapeubuet nyang gét. 14 Mungken singoh na ureuëng nyang hana jitem deungoe peue nyang kamoe peugah lam surat nyoe. Até-até kheueh keu ureuëng nyang lagée nyan dan bék meurakan ngon jihnyan mangat jihnyan malée. 15 Teuma bék kheueh gata anggab jihnyan sibagoe musoh; teuma bri kheueh naseuhat sibagoe sidroe syedara. 16 Tuhan na kheueh ulée keuseujahteuraan geutanyoe. Seumoga Gobnyan sabe geubri keugata seujahteura lam sigala hai. Seumoga Tuhan sabe na meusajan gata banmandum. 17 Saleuem nibak ulôn, Paulus. Ulôn keudroe nyang tuléh bagian nyoe. Nyoe kheueh tanda nyang ulôn boh bak mandum surat ulôn. 18 Seumoga Tuhan geutanyoe Isa Almaseh geubri beureukat keugata mandum. Horeumat kamoe, Paulus

1 Timotius 1

1 Timotius aneuëk ulôn nyang seujati lam Tuhan! Suratnyoe nibak ulôn, Paulus, rasui Isa Almaseh ateueh peurintah Allah, nyang peuseulamat geutanyoe dan ateueh peurintah Isa Almaseh, harapan geutanyoe. Seumoga Allah Bapak dan Isa Almaseh Tuhan tanyoe geubri beureukat, rahmat dan seujahteura ubak gata. 3 Ulôn meuharab mangat gata teutab tinggai di Efesus lagée nyang ka lheueh ulôn peugah bak gata bak watée ulôn jak u Makedonia. Sabab, di Efesus na meupadub droe ureuëng nyang jipeurunoe ajaran sisat nyang hana beutôi, dan gata harôh tatam awaknyan. 4 Peugah kheueh bak awaknyan mangat bék lé jisimak haba dongeng dan calitra-calitra asai usui nyang hana jipiôh-piôh nyan. Banmandum nyan jipeuteuka riôh ngon meudakwa, dan hana jipeumaju reuncana Allah nyang hase teuturi rot meuiman ubak Gobnyan. 5 Tujuan naseuhat lôn na kheueh mangat jeuet manusia meuteumé até nyang gleh dan até nurani nyang suci, dan biet-biet meuiman ubak Tuhan, dan deungon lagée nyan awaknyan hase jigaséh seusabe keudroe-droe. 6 Na siladum ureuëng nyang hana udeb lé lagée nyan, dan sisat nibak meudebat-meudebat nyang hana meuguna. 7 Awaknyan keuneuk jeuet keugurée-gurée agama, padahai awaknyan keudroe hana jiteupeu tutoe haba nyang jipeuguna atawa hai-hai nyang awaknyan peugah lagée nyan yakén. 8 Tanyoe tateupeue bahwa huköm agama na kheueh gét, meunyoe teupeuguna bak jalan nyang beutôi. 9 Teuntée jih meuseuti beuingat bahwa huköm nyan teupeugét kon keu ureuëng gét, teuma keu ureuëng nyang langga huköm, bubena ureuëng jeuhet, keu ureuëng beujat, keu ureuëng meudesya, keu ureuëng nyang hana agama, ureuëng donyawi, keu ureuëng nyang poh maté ayah ngon ma jih, dan keubuna ureuëng nyang poh maté gob, 10 keu ureuëng-ureuëng nyang peubuet cabui, keu ureuëng meuagam ngon ureuëng agam, keu ureuëng tukang culek gob, keu ureuëng nyang meututoe beurakah; keu ureuëng nyang meusaksi sulet, dan keusoe mantong nyang jipeubuet hai-hai nyang meulawan ngon ajaran nyang beuna. 11 Ajaran nyan na meuteumé lam Haba Gét nyang jaktabu atra nyan geupeucaya ubak ulôn, nyan kheueh Haba Gét nyang teuka nibak Allah nyang agong dan patot teupujoe. 12 Ulôn peugah teurimong gaséh ubak Isa Almaseh Tuhan geutanyoe. Gobnyan ka geubri teunaga ubak ulôn keulôn layani Gobnyan, dan Gobnyan geuanggab ulôn patot lôn teurimong tugaih nyan, 13 bah pi yoh ilée ulôn fiteunah lôn iénanya meunan cit lôn hina Gobnyan. Teuma Allah geugaséh keulôn, sabab yoh masanyan ulôn gohlom meuiman, kareuna hana lôn teupeue peue nyang ulôn peubuet. 14 Biet pi meunan ulôn ka geupeu peunoh ngon rakhmat Tuhan tanyoe. Gobnyan geubri keu ulôn keumampuan keu lôn meuiman bak Gobnyan dan geuyue gaséh seusamoe manusia. Keumampuan nyan geubri bak geutanyoe mandum nyang ka meusaboh ngon Isa Almaseh. 15 Keubiet beutôi that haba nyoe -- sabab nyan patot kheueh teuteurimong dan teupeucaya sipeunoh até -- : "Isa Almaseh geuteuka ateueh rhueng donya nyoe keu geupeu seulamat ureuëng meudesya." Dan ulôn kheueh ureuëng meudesya nyang paleng jeuhet. 16 Teuma lé sabab nyan kheueh Allah geugaséh ulôn, mangat Isa Almaseh hase geubri banmandum saba Gobnyan keu ulôn, ureuëng nyang meudesya nyoe. Dan nyoe jeuet keusaboh cuntoh keumandum ureuëng nyang teuma-teuma jimeuiman ubak Gobnyan dan meuteumé udeb seujati dan keukai. 17 Allah, Raja sipanyang jamén, patot teuhoreumat dan teupujoe sabe, sabab Gobnyan kheueh nyang keukai, nyang hana deuh dan nyang esa! Amin. 18 Timotius, aneuëk ulôn! Tugaihnyoe ulôn peucaya ubak gata, teuingat ubak peusan Allah nyang ka geupeutrok lé nabi-nabi lam jeumaáh keuhai droe gata. Bah kheueh peusan nyan jeuet keubeukai nibak gata lam meujuang nyang jroh. 19 Meujuang kheueh ngon cara tamumat beukong nibak keupeucayaan nyang beutôi dan ngon até nurani nyang gleh. Na ureuëng nyang hana jipako keuhai su até nurani jih, ngon lagée nyan hanco kheueh keupeucayaan ureuëng nyan. 20 Lamkawan ureuëng nyan na kheueh Himeneus dan Aleksander. Mandua droe ureuëng nyan ka lôn huköm deungon cara ulôn jok ubak Iblih, mangat awaknyan jimeurunoe keujipiôh jihujat Allah.

1 Timotius 2

1 Phon-phon that, ulôn meulakée ngon meuharab that mangat peumohonan, seumayang, dan doá syafaát meunan cit meulakée teurimong gaséh ubak Po teu Allah keumandum ureuëng; 2 keuraja-raja dan banmandum ureuëng nyang mat keukuasaan. Lakée kheueh mangat geutanyoe jeuet udeb teunang dan teuntram keu Po teu Allah ngon pi-e nyang patot. 3 Nyan kheueh nyang gét dan teupeumangat até Allah, nyang bri seulamat ateueh geutanyoe. 4 Gobnyan meuharab mangat jeuet banmandum ureuëng teupeuseulamat dan jiteupeu nyang beuna. 5 Sabab, teuma na sidroe Allah, dan sidroe nyang jeuet peudamé Allah ngon manusia, na kheueh Isa Almaseh. 6 Gobnyan sidroe manusia nyang ka geupeujok droe Geuh guna teupeubeubaih mandum manusia nibak desya-desya jih. Deungon nyan Allah ka geutunyok bak watée nyang paih, bahwa Gobnyan meuharab mangat mandum manusia teupeuseulamat. 7 Dan nyang kheueh sabab jih ulôn geuyuejak bak ureuëng-ureuëng nyang kon Yahudi keu lôn jak peusampoe bak awaknyan haba keuhai keupeucayaan nyang beutôi. Nyang ulôn peugah nyoe na kheueh beutôi dan ulôn hana buhak. 8 Ulôn meuharab mangat dipat mantong ureuëng agam meudoá ngon até nyang gleh, ngon hana rasa beungéh atawa meusiliseh waham. 9 Bah kheueh ureuëng inong jipeungui droe jih ngon cara seudeurhana dan jisôk peukayan nyang sopan. Bék koh ôk mubagoe-bagoe atawa teungui piasan méuh atawa mutiara, atawa peukayan nyang meuhái-meuhái. 10 Nyang sikeubiet jih, bah kheueh ureuëng inong nyan jingui droe jih ngon buet-buet nyang jroh lagée toh nyang patot keu ureuëng inong nyang meuiébadat ubak Po teu Allah. 11 Ureuëng inong meuseuti jimurunoe ngon cara ji-iem droe dan patuh. 12 Ulôn hana kupeubeuna ureuëng inong nyan jipeurunoe atawa jipeurintah ateueh ureuëng agam; awaknyan harôh seungab. 13 Sabab nyang phon that teucebta na kheueh Nabi Adam óh lheueh nyan barô kheueh Siti Hawa. 14 Dan kon Nabi Adam, teuma inong kheueh nyang keunong tipée, ngon lagée nyan ka ji iengkeue peurintah Allah. 15 Teuma biet pi meunan, ureuëng inong teuma seulamat deungon jipeulahé aneuëk, asai jihnyan ngon até nyang miyueb teutab meuiman ubak Almaseh dan teutab jigaséh keu ureuëng laén dan udeb khusos keu Po teu Allah.

1 Timotius 3

1 Keubiet beutôi haba nyoe, "Ureuëng nyang keuneuk jeuet keupeunilék jeumaáh, jimeuharab saboh buet nyang keubiet meuhareuga." 2 Sidroe ureuëng nyang jeuet keupeunilék jeumaáh ureuëng nyan hana meucupa, peurumoh jih sidroe mantong, ék jiteun droe, bijaksana, dan teureuteb; ureuëng nyan jitem teurimong gob dirumoh jih, dan hase jipeurunoe ureuëng laén; 3 bék ureuëng peumabök, atawa nyang galak jimulo. Dilikot nibak nyan, ureuëng nyan nyang leumoh leumbot dan galak keudamé. Dan ureuëng nyan bék nyang teupéng-péng. 4 Ureuëng nyan jiteupeu atoe rumoh tangga deungon jroh, dan carông jididek aneuëk-aneuëk jih beujitaát dan horeumat keu jih. 5 Sabab meunyoe ureuëng nyan hana carông jiatoe rumoh tangga jih keudroe, pakriban ureuëng nyan hase jiatoe jeumaáh Allah? 6 Sidroe peunilék jeumaáh hana jeuet ureuëng nyan ban jitamong Kristen, sabab singoh ureuëng nyan jeuet keu manyang até laju keunong kutok lagée Iblih yoh masa ilée. 7 Ureuëng nyan meuseuti nyang na nan gét lam masyarakat; sabab meunyoe hán lagée nyan, ureuëng nyan teuma jihina lé gob, deungon lagée nyan jihnyan rhot lam peurangkab Iblih. 8 Meunan cit deungon peumbantu jeumaáh meuseuti ureuëng nyang jroh dan jujoe; kon ureuëng nyang teupéng-péng dan galak jijieb ié anggô nyang jai. 9 Ureuëng nyan meuseuti nyang kong jimumat nibak ajaran Kristen nyang beuna ngon até nurani nyang gleh nyang ka geupeugah lé Po teu Allah. 10 Bah kheueh ureuëng nyan teu ujoe leubeh ilée, dan meunyoe deuh teukalon ureuëng nyan hana meucupa, barô kheueh ureuëng nyan jeuet keupeubantu lam jeumaáh. 11 Meunan cit deungon peurumoh awaknyan museuti ureuëng nyang jroh, kon ureuëng nyang galak jiba peusuna. Ureuëng nyan meuseuti carông-carông bak jiba droe dan jujoe lam hai peue mantong. 12 Peumbantu jeumaáh museuti sidroe mantong peurumoh geuh. Ureuëng nyan museuti carông jiatoe aneuëk-aneuëk jih dan rumoh tangga jih ngon jroh. 13 Ureuëng-ureuëng nyang jibantu deungon gét lam jeumaáh, teuma jihoreumat lé gob dan seumaken jijeuet meututoe keuhai iman jih ubak Almaseh. 14 Ulôn meuharab hana treb lé ulôn jak saweue gata. Bah pih meunan, ulôn tuléh cit surat nyoe keugata, 15 mangat meunyoe ulôn teulat, gata jeuet tateupeue pakriban geutanyoe meuseuti udeb sibagoe keuluwarga Allah, na kheueh jeumaáh Allah nyang udeb. Jeumaáh nyoe kheueh nyang jeuet keu taméh teupeudong dan nyang dukong ajaran nyang beutôi nibak Allah. 16 Hana meusidroe pi nyang hase jibantah, padubna rayeuk jih rahsia agama geutanyoe: Gobnyan geupeuleumah droe lam ruman manusia, dan geupeugah beutôi lé Roh Pe teu Allah, dan geukalon lé dumna malaikat. Haba nibak Gobnyan jipeusampoe lamkawan bansa-bansa, dan Gobnyan jimeuiman bansigom donya dan teubeuot lam syeuruga.

1 Timotius 4

1 Roh Allah deungon teugaih geupeugah bahwa bak watée-watée nyang teuma teuka, siladum ureuëng jimurtat, ji-iengkeue keu Almaseh. Awaknyan jiturot peue nyang jipeugah lé roh-roh nyang sisat dan jiseutôt ajaran-ajaran nibak roh jeuhet, 2 nyang jipeusampoe lé ureuëng-ureuëng munafék nyang buhak. Até nurani ureuëng-ureuëng nyan ka seupôt. 3 Ureuëng nyan jipeurunoe bék meukawen dan jitam bék jipajoh lé peunajoh nyang ka jipeuteuntée. Padahai peunajoh nyan geucebta lé Po teu Allah keuteupajoh ngon teupeugah teurimong gaséh ubak Gobnyan lé ureuëng-ureuëng nyang ka meuiman ubak Almaseh dan ka jiteupeue ajaran nyang beutôi nibak Allah. 4 Peue-peue mantong nyang geucebta lé Allah nyan gét, dan hana meusapeue pi nyang harôh teuanggab hareuem meunyoe ka teuteurimong deungon teupeugah teurimong gaséh ubak Allah. 5 Sabab beureukat nibak Po teu Allah dan doá nyang teulakée teupeusabab peunajoh nyan haleue. 6 Meunyoe gata tapeurunoe banmandum nyan ubak syedara-syedara nyang seuiman, gata teuma jeuet keupeulayan Isa Almaseh nyang mubuet deungon gét. Dan gata teuma sabe tapasoe lam baten gata ngon feureuman Allah nyang tapeucaya, dan deungon ajaran-ajaran nyang beutôi nyang ka gata seutôt seulawet nyoe. 7 Peujiôh kheueh calitra-calitra tahyul nyang hana meuguna. Lateh kheueh droe gata keu udeb lam iébadat. 8 Latehan jasmani bacut sagai hase jih, teuma latehan rohani keubiet meuguna lam hai peue mantong, sabab na teukandong janji keu udeb nibak jamén nyoe dan watée nyang teuma teuka. 9 Hainyan beutôi dan patot teuteurimong dan teupeucaya sipeunoh até. 10 Nyang kheueh sabab jih tanyoe meujuang dan meukeureuja brat, sabab geutanyoe meuharab sipeunoh jih ubak Po teu Allah nyang udeb; Gobnyan kheueh Peuseulamat keu mandum ureuëng, nyang paleng phon na kheueh ureuëng-ureuëng meuiman. 11 Peurunoe kheueh mandum nyan dan yue kheueh ureuëng-ureuëng beujiseutôt. 12 Bék kheueh na meusidroe ureuëng pih jianggab gata hina sabab gata mantong muda. Nyang sikeubiet jih, bah kheueh gata jeuet keuteuladan keu ureuëng-ureuëng nyang meuiman bah kheueh watée gata meututoe dan pi-e gata, lam cara gata tagaséh seusamoe keudroe-droe dan iman ubak Isa Almaseh, meunan cit ngon udeb gata nyang gleh. 13 Watée nyoe, trok án ulôn teuka singoh, gata beubiet-biet tabeuet Alkitab keu dumna ureuëng, tadurong dan gata purunoe awaknyan. 14 Bék sampoe gata laloe tapeuguna karonya nibak Roh Allah nyang teubri ubak gata bak watée peumimpén-peumimpén jeumaáh geupeuduek jaroe gobnyan ateueh ulée gata, meunan cit nabi-nabi geupeusampoe feureuman Allah keuhai droe gata. 15 Peubuet kheueh mandum nyan deungon biet-biet mangat keumajuan gata jikalon lé mandum ureuëng. 16 Jaga kheueh droe gata dan beu até-até kheueh ngon peue nyang gata peurunoe. Bah kheueh gata ngon seutia gata peubuet banmandum nyan, sabab deungon lagée nyan gata ka tapeuseulamat bah kheueh droe gata keudroe meunan cit ngon ureuëng-ureuëng nyang deungoe gata.

1 Timotius 5

1 Bék kheueh gata beungéh ngon haba nyang kreueh ateueh ureuëng nyang leubeh tuha nibak gata teuma pakat kheueh gobnyan beugeudeungoe haba gata siulah-ulah gobnyan ureuëng syiek gata. Meunan cit peusaneut kheueh bubena ureuëng-ureuëng sibagoe syedara, 2 dan inong-inong tuha sibagoe ma. Inong-inong muda gata peujeuet sibagoe adoe, ngon sikeueb gata nyang murni. 3 Horeumat kheueh keu inong-inong balée nyang biet-biet udeb jih keudroe. 4 Teuma meunyoe sidroe inong balée na aneuëk atawa cucoe, awaknyan kheueh nyang phon-phon gata bri peungeurtian bahwa awaknyan wajéb jikalon kawöm keuluwarga jih keudroe, dan jibalaih budoe ureuëng tuha dan nék awaknyan. Sabab hai nyang lagée nyan kheueh nyang teupeumangat até Allah. 5 Inong balée nyang biet-biet tinggai sidroe, dan hana meusidroe ureuëng pi nyang jitem peulara gobnyan, teuma jimeuharab ubak Allah. Uroe malam jihnyan sabe meudoá ubak Allah keu jilakée tulông. 6 Teuma inong balée nyang galak udeb meumangat-mangat, ka maté bah kheueh jihnyan mantong udeb. 7 Peutrok kheueh peutunyok-peutunyok nyoe ubak awaknyan, mangat awaknyan udeb ngon hana meucupa. 8 Teuma meunyoe ureuëng-ureuëng nyang hana jitem peulara waréh kawöm jih, leubeh-leubeh keuluwarga jih keudroe, ureuëng nyan ka ji iengkeue ubak peue nyang ji-iman; ureuëng nyang lagée nyan leubeh brok nibak ureuëng nyang hana meuiman. 9 Teuma inong balée nyang jipeupeunoh syarat-syarat lagée nyoe jeuet teupeutamong lam dafeutar inong-inong balée; umu jih hana kureueng nibak nam ploh thon, yoh masa ilée teuma na sigoe jimeukawen, 10 meugah sibagoe ureuëng inong nyang jipeubuet hai-hai nyang jroh, lagée miseue nyoe: ka jipeurayeuk aneuëk-aneuëk jih deungon gét, galak jiteurimong jamé-jamé nyang mudom dirumoh jih, jipeutimang ureuëng-ureuëng meuiman, jitulông ureuëng-ureuëng nyang susah udeb, dan jipeubuet deungon biet-biet peue mantong buet nyang jroh. 11 Bék peutamong nibak inong-inong balée nyang mantong muda. Sabab meunyoe rasa beureuhi jih mantong teuga that, inong nyan jitem meukawen lom, dan jitinggai Almaseh. 12 Deungon lagée nyan awaknyan kasalah sabab ji-iengkeue janji nyang teubri ubak jihnyan. 13 Lom teuma awaknyan jiböih-böih watée deungon cara jiteubiet tamong lam rumoh gob. Dan nyang leubeh brok lom, na kheueh awaknyan jimeurunoe jipeusuna ureuëng laén jipeurhoh droe nibak urosan ureuëng laén meunan cit jipeugah hai-hai nyang hana patot jipeugah. 14 Nyang kheueh sabab jih ulôn meulakée mangat ureuëng inong balée nyang mantong-mantong muda jimeukawen lom, jimeu aneuëk dan jiurôih rumoh tangga, mangat jeuet musoh-musoh geutanyoe hana watée jipeubrok-brok nan geutanyoe. 15 Sabab na inong-inong balée nyang ka sisat jiseutôt peue nyang jikheun lé roh jeuhet. 16 Teuma, meunyoe sidroe ureuëng inong Kristen na anggota keuluwarga nyang ka jeuet keu inong balée, jihnyan meuseuti jitulông inong balée nyan; bék jipeubiyeu jeumaáh nyang tanggong jih nyan. Deungon lagée nyan jeumaáh jeuet jitulông inong-inong balée nyang biet-biet hana waréh kawöm jih. 17 Peumimpén jeumaáh nyang jipeubuet tugaih jih deungon gét, patot teubri peunghargaan dua goe lipat, nyang peunteng awaknyan nyang kayém meukutubah dan jipeurunoe gob. 18 Sabab lam Alkitab na teutuléh lagée nyoe, "Leumô nyang teungoh jigiloe-giloe gandom jipeuleukang aneuëk gandom nyan nibak mu jih, bék kheueh teubeukab babah jih", dan meunan cit, "Ureuëng nyang mubuet, na hak jilakée upah jih". 19 Bék kheueh teurimong tudohan ateueh sidroe-droe peumimpén jeumaáh, keucuali meunyoe na jipeukong lé dua droe saksi atawa leubeh. 20 Ureuëng peubuet desya, bah kheueh teuseugah dikeue banmandum jeumaáh, mangat nyang laén jeuet teumakot. 21 Dikeue Po teu Allah, Isa Almaseh, dan bubena malaikat nyang ka teupiléh, ulôn lakée ngon meuharab that jeuet gata seutôt banmandum peutunyok-peutunyok nyoe ngon hana wasangka ateueh soe mantong, dan hana meudong-dong siblaih. 22 Bék kheueh teugisa-gisa takeubah jaroe ateueh sidroe-droe ureuëng guna teubaiát jihnyan sibagoe peulayan Tuhan. Meunyoe ureuëng laén meudesya, bék kheueh rhoh meulawok lam desya nyan. Jaga kheueh droe gata mangat teutab gleh. 23 Bék lé laloe jieb ié mantong; jieb kheueh bacut ié anggô guna keutulông keumunyoh gata, sabab gata kayém that sakét-sakét. 24 Desya siladum ureuëng, sigohlom teuba bak kantô peungadelan, ka deuh teukalon ngon nyata that. Teuma desya ureuëng laén barô kheueh teu teupeue óh ka lheueh nyan teuma. 25 Meunan cit deungon buet-buet nyang jroh bagaih that deuh teukalon. Dan nyang hana deuh pih, hana hase sabe teusöm.

1 Timotius 6

1 Ureuëng-ureuëng Kristen nyang jeuet keu namiet, harôh jianggab bahwa teungku po jih meuseuti jihoreumat, mangat ureuëng laén hana hase jipeubrok nan Allah atawa peulajaran geutanyoe. 2 Namiet-namiet nyang po jih ureuëng Kristen, hana jeuet jianggab po jih nyan hina sabab awaknyan saban-saban ureuëng Kristen. Teuma lé namiet nyan jilayani po jih nyan leubeh gét lom, sabab po nyang jilayani ngon jroh nyan na kheueh saban-saban ureuëng meuiman nyang teugaséh. Banmandum nyoe meuseuti gata peurunoe dan gata naseuhat. 3 Soe-soe mantong nyang peurunoe ajaran laén seulaén nibak nyan dan hana situju ngon ajaran nyang beutôi nibak Tuhan geutanyoe Isa Almaseh, dan ngon ajaran agama tanyoe, 4 na kheueh ureuëng nyang sombong hana jiteupeue sapeue! Peunyakét jih na kheueh galak meudobat dan meudakwa keuhai istilah-istilah akhé jih rhot nibak picék até, meucrebre, fiteunah, curiga nyang hana gét, 5 meunan cit meusiliseh waham nyang hana putôh-putôh. Rot seumike ureuëng nyang lagée nyan ka paneuk dan hana lé nyang beuna. Awaknyan jipike hase jeuet keukaya rot agama. 6 Beutôi agama teubri untông nyang rayeuk, meunyoe manusia nyan puih ngon peue nyang ka na. 7 Sabab hana meusapeue pi nyang jeuet taba u dalam donya nyoe, dan hana meusapeue pi nyang jeuet taba uluwa! 8 Teuma, meunyoe na peunajoh dan peukayan, nyan kaseb. 9 Teuma ureuëng nyang keuneuk jeuet keukaya, teugoda dan meupalet ngon mubagoe hawa nafeusu nyang bangai dan nyang rusak. Nafeusu-nafeusu nyang lagée nyan teuba manusia ubak hanco dan ceulaka. 10 Sabab nibak cinta ubak péng, jiteuka mubagoe rupa nyang jeuhet. Na siladum ureuëng nyang jitiyeub péng akhé jih ka hana jiturot lé ajaran Kristen, laju awaknyan jiteurimong mubagoe peundeuritaan nyang jipeuhanco até awaknyan. 11 Teuma gata na kheueh ureuëng atra Po teu Allah, ngon lagée nyan gata harôh tapeujiôh banmandum atra nyan. Useuha kheueh beujeuet keu ureuëng nyang beutôi bak mata Allah, nyang peuhamba droe ubak Allah, meuiman ubak Almaseh, tagaséh keusabe manusia, tabah lam deurita, dan meusikeub leumoh leumbot. 12 Meujuang kheueh beubiet-biet keu udeb lagée ureuëng Kristen mangat gata tareubot hadiyah seujati dan keukai. Sabab keunyan kheueh Allah geutawök gata bak watée gata ta-aku Gobnyan dikeue ureuëng ramé bahwa gata meuiman ubak Almaseh. 13 Dan jinoenyoe, dikeue Po teu Allah nyang bri nyawöng keu makhlok peue mantong, dan dikeue Isa Almaseh nyang ka geubri saksi nyang beutôi dikeue Pontius Pilatus, ulôn lakée nyoe nibak gata: 14 Taát kheueh ubak peurintah nyan deungon até nyang gleh dan hana meucupa trok ubak watée jih Tuhan geutanyoe Isa Almaseh geuteuka lom teuma. 15 Keuhai teuka Gobnyan teuma geupeuteuntée bak watée nyang paih lé Allah keudroe. Gobnyan kheueh nyang matkuasa sidroe kong sagai; Gobnyan agong, Raja di ateueh raja, dan Tuhan banmandum tuan. 16 Gobnyan kheueh mantong nyang hana hase jikuasa lé maté; Gobnyan udeb lam cahya nyang hana hase jipeurab lé soemantong. Hana meusidroe manusia pi nyang ka lheueh jikalon Gobnyan. Keu Gobnyan kheueh horeumat dan kuasa siumu masa! Amin. 17 Keu ureuëng-ureuëng nyang kaya ateueh rhueng donya, gata peugah kheueh mangat awaknyan bék sombong dan bék meuharab ateueh barang-barang nyang hana teutab -- lagée hai jih atra keukayaan. Awaknyan meuseuti meuharab ubak Po teu Allah nyang geubri peue-peue mantong ubak geutanyoe deungon meulimpah mangat geutanyoe tateumé rasa. 18 Lakée kheueh nibak awaknyan mangat awaknyan jitunyok keubuet nyang jroh, keu jipeubuet buet-buet nyang gét, murah até dan galak jimeubri. 19 Deungon lagée nyan awaknyan ka jigumpôi atra nyang jeuet keumodal nyang gét keuwatée nyang teuma teuka. Dan deungon lagée nyan awaknyan teuma meuteumé udeb nyang keukai, na kheueh udeb nyang seujati. 20 Peue nyang ka teupeucaya keugata, jaga kheueh nyan beugôt-gôt, Timotius! Peujiôh kheueh tutoe haba nyang hana meuguna dan meudobat keuhai-hai nyang seucara keuliru teupeugah "Peungeutahuan". 21 Sabab na ureuëng nyang jipeugah bahwa awaknyan na peungeutahuan nyan, sampoe ngon lagée nyan kajiseuleweng ajaran-ajaran Kristen nyang awaknyan meuiman yoh masa ilée. Seumoga Tuhan geubri beureukat ubak Syedara mandum. Horeumat kamoe, Paulus

2 Timotius 1

1 Timotius, aneuëk ulôn nyang teucinta! Ulôn, Paulus, lôn tuléh suratnyoe keugata, dan meuharab seumoga Allah Bapak dan Tuhan geutanyoe Isa Almaseh geubri beureukat, rakhmat dan seujahteura ateueh gata. Ateueh keuheundak Po teu Allah, ulôn geuangkat jeuet keu rasui Isa Almaseh dan geuyue peusampoe keuhai udeb nyang geupeu janji lé Allah. Udeb nyan tateurimong sabab meusaboh ngon Isa Almaseh. 3 Ulôn meulakée syukoe ubak Po teu Allah nyang lôn layani ngon até nurani nyang gleh lagée nyang geupeubuet lé indatu ulôn yoh masa ilée. Ulôn sabe lôn lakée teurimong gaséh ubak Allah pajan mantong ulôn ingat keugata lam doá, bah kheueh uroe meunan cit malam. 4 Ulôn teuingat ubak até gata nyang seudeh. Nyang kheueh sabab jih ulôn meuharab that meurumpok ngon gata mangat ulôn biet-biet meugeumbira. 5 Ulôn teuingat ubak keupeucayaan gata nyang biet-biet sunggoh ubak Almaseh, saban lagée keupeucayaan nék gata Lois dan ma gata Eunike. Dan ulôn yakén gata pih meuiman nyang lagée nyan. 6 Sabab nyan ulôn peuingat gata keutateupeue udeb karonya nyang geubri lé Allah ubak gata bak watée ulôn keubah jaroe lôn ateueh gata. 7 Sabab Roh Allah nyang geubri ubak geutanyoe, kon kheueh Roh nyang teupeujeuet geutanyoe jeuet keuteumakot. Nyang sibeuna jih, Roh Allah nyan teupeujeuet geutanyoe meutamah teuga, peunoh ngon gaséh sayang dan hase tapeuteun droe. 8 Sabab nyan bék kheueh malée tabri keusaksian keuhai Tuhan geutanyoe, dan bék teuma malée keuhai ulôn, nyang jipeutamong lam glab sabab lé Gobnyan. Nyang sikeubiet jih, bah kheueh gata ngon teunaga nibak Po teu Allah, meusajan meudeurita lé sabab Haba Gét nyan. 9 Allah geupeu seulamat geutanyoe dan geutawök geutanyoe mangat jeuet keu umat Gobnyan keudroe. Gobnyan geupeubuet lagée nyan kon dasai jih peue nyang ka tapeubuet, teuma reuncana Gobnyan dan rakhmat Gobnyan. Gobnyan geubri keugeutanyoe rahmat Gobnyan meulalu Isa Almaseh sigohlom donya nyoe geucebta. 10 Dan jinoenyoe, Allah geutunyok rakhmat nyan ubak geutanyoe deungon jiteuka Raja nyang ba seulamat tanyoe Isa Almaseh. Isa geupeutalo kuasa maté dan geuba udeb nyang abadi meulalu Haba Gét nyan. 11 Keuteupeusampoe Haba Gét nyan kheueh Allah geuangkat ulôn jeuet keurasui dan gurée. 12 Nyang kheueh sabab jih ulôn meudeurita lé mandum nyoe, teuma ulôn teutab yakén, sabab ulôn kuteupeue that soe nyang ulôn meuiman. Ulôn yakén bahwa peue nyang ka Gobnyan peucaya ubak ulôn, Gobnyan pih hase geujaga trok bak Uroe Pagée. 13 Seutôt kheueh ngon biet-biet ajaran nyang beutôi nyang ka ulôn bri nibak gata. Dan bah kheueh gata teutab tamumat nibak iman dan gaséh nyang ka jeuet keuhak milék geutanyoe sabab meusaboh ngon Isa Almaseh. 14 Ngon geutulông lé Roh Allah nyang udeb lam tuboh geutanyoe, bah kheueh gata tajaga beugét-gét hai-hai nyang muyuem nyang ka teupeucaya ubak gata. 15 Gata tateupeue bahwa banmandum ureuëng nyang na diwilayah Asia ka jitinggai ulôn, meunan cit ngon Figelus dan Hermogenes ka jitinggai lôn. 16 Teuma keuluwarga Onesiforus kana padub goe jipeumangat até lôn. Seumoga Tuhan geubalaih gaséh sayang Geuh ateueh awaknyan. Bah kheueh ulôn na lam glab, Onesiforus hana malée ngon keuadaan ulôn nyan. 17 Meunan trok u Roma, jihnyan laju jiuseuha jimita ulôn sampoe jihnyan meurumpok ngon ulôn. 18 Dan gata tateupeue di Efesus jihnyan jai that-that ka jitulông lôn. Seumoga Tuhan geutunyok gaséh sayang Geuh keu jihnyan bak uroe Tuhan geupeu sidang banmandum umat manusia.

2 Timotius 2

1 Timotius, aneuëk ulôn! Bah kheueh gata jeuet keuteuga lé rakhmat nyang geubri ubak geutanyoe, sabab tanyoe meusaboh ngon Isa Almaseh. 2 Ajaran nyang yoh masa ilée ka gata deungoe nibak ulôn dikeue rakyat ba, bah kheueh gata patéh ubak ureuëng-ureuëng nyang jeuet gata patéh dan nyang carông jipeurunoe ureuëng laén. 3 Gata meuseuti meusajan meudeurita sibagoe sidadu Isa Almaseh nyang seutia. 4 Sidroe sidadu nyang teungoh meutugaih, hana teuma jipeugabuek droe jih ngon urosan-urosan droe, sabab jihnyan jikeuneuk peumangat até pang droe jih keudroe. 5 Sidroe ureuëng peumeuén ulah raga hana teuma jeuet keujuara watée jimeutunang, meunyoe jihnyan hana jitaát ubak atoran-atoran. 6 Ureuëng meugo nyang ka jikeureuja brat, ureuëng nyan kheueh nyang phon-phon that nyang hak jiteurimong wase seunaman. 7 Pike kheueh peue nyang ulôn peugah nyan, sabab Tuhan teuma geubri keugata keusanggopan keutamuphom banmandum. 8 Ingat kheueh nyoe: Haba Gét nyang ulôn peusampoe nyan na kheueh haba keuhai Isa Almaseh, keuturonan Nabi Daud; Gobnyan kheueh Almaseh nyang ka udeb lom teuma nibak maté. 9 Sabab teupeusampoe Haba Gét nyan kheueh, ulôn meudeurita; bahkheueh sampoe jiranté lagée sidroe ureuëng jeuhet. Teuma feureuman Allah hana hase jiranté. 10 Nyang kheueh sabab jih ulôn tabah lôn tanggong banmandum nyan deumi keupeuntengan ureuëng-ureuëng nyang ka geupiléh lé Po teu Allah, mangat awaknyan pi meuteumé seulamat nyang geubri meulalu Isa Almaseh, dan nyang meusajan-sajan ngon keuagongan nyang abadi. 11 Keubiet beutôi nyang ulôn peugah nyoe, "Meunyoe geutanyoe ka maté meusajan Gobnyan, geutanyoe teuma udeb cit lom meusajan Gobnyan. 12 Meunyoe tanyoe teutab tabah, geutanyoe teuma tamat peurintah cit meusajan Gobnyan. Meunyoe geutanyoe taiengkeue keu Gobnyan, Gobnyan pi teuma geuiengkeue keugeutanyoe. 13 Meunyoe geutanyoe hana seutia, Gobnyan teutab seutia, sabab hana hase Gobnyan meubeda ngon droe Geuh keudroe." 14 Bah kheueh gata peuingat ureuëng-ureuëng keuhai mandum nyoe. Dikeue Allah, bri kheueh naseuhat bak awaknyan mangat bék jimeudakwa keuhai istilah-istilah. Nyang lagée nyan hana meuguna, nyang na jipeukaru pikeran ureuëng-ureuëng nyang deungoe. 15 Useuha kheueh lé gata deungon biet-biet mangat Allah geuangkée gata sibagoe ureuëng nyang patot tamubuet keu Gobnyan. Useuha kheueh mangat gata bék malée keuhai buet gata nyan, dan gata purunoe ngon jeulaih dan beutôi keuhai ajaran nyang beuna nibak Po teu Allah. 16 Peujiôh kheueh tutoe haba nyang hana manfaát dan nyang teuhina Allah. Tutoe haba nyang lagée nyan teuma teuba manusia bak buet nyang leubeh jeuhet. 17 Ajaran awaknyan bagaih that jimeu éue lagée peunyakét kanker nyang that-that meubahya. Lamkawan awaknyan jitamong cit keunan Himeneus dan Filetus. 18 Awaknyan ka sisat nibak ajaran nyang beutôi, dan jiputa balék nyang ka ji-iman lé siladum ureuëng. Awaknyan jipeugah bahwa teubeudôh nibak maté ka teujadi. 19 Teuma dasai nyang kông nyang ka geupeugét Allah hana hase jiyok-yok. Di ateueh nyan na teutuléh lagée nyoe, "Tuhan geuturi ureuëng-ureuëng nyang atra Gobnyan", dan "Ureuëng nyang jipeugah bahwa jihnyan milék Tuhan, ureuëng nyan meuseuti jipiôh jipeubuet nyang salah". 20 Lam rumoh nyang rayeuk na meuteumé meubagoe rupa peurabot. Na nyang teupeugét nibak pirak atawa méuh, teuma na cit nyang teupeugét nibak kayée atawa tanoh. Na nyang jipeuguna keu nyang istimewa, dan na cit nyang jipeuguna keu keupeureulée biasa. 21 Ureuëng nyang jipeugleh droe jih nibak mandum nyang jeuhet, ureuëng nyan teuma teupeuguna keuteupeureulée nyang istimewa. Gobnyan jeuet keu atra nyang khusos dan naguna keu po droe jih. Jihnyan teukeubah keuteupeuguna keu tieb-tieb buet nyang jroh. 22 Peujiôh kheueh peue-peue nyang jiharok lé ureuëng muda. Useuha kheueh ubak udeb lagée nyang geulakée lé Allah, seutia nibak ajaran Gobnyan dan teugaséh seusabe manusia, dan na até nyang teuntram. Udeb kheueh ngon awaknyan nyang jilakée tulông ubak Tuhan ngon até nyang murni. 23 Bék kheueh peu rhoh droe nibak buet-buet nyang meudobat lé ureuëng-ureuëng bangai nyang hana jiteupeue sapeue. Gata tateupeue bahwa banmandum nyan jipeuteuka dakwa. 24 Ureuëng nyang mubuet keu Tuhan hana patot jimeudakwa; jihnyan meuseuti ramah ateueh mandum ureuëng, dan hase jipeurunoe gob ngon jroh dan saba. 25 Jihnyan meuseuti ngon leumoh leumbot jipeurunoe ureuëng nyang galak meulawan; mudah-mudahan Allah geubri watée keu ureuëng-ureuëng nyan keu jimeutobat nibak mandum desya-desya awaknyan dan jituri keu ajaran nyang beuna. 26 Deungon lagée nyan awaknyan ka jeuet keusadar lom teuma, dan leupah nibak peurangkab Iblih nyang ka jidrob awaknyan dan jipaksa awaknyan jiseutôt keuheundak até jih.

2 Timotius 3

1 Ingat kheueh nyoe: Nibak uroe-uroe akhé teuma na keusosahan. 2 Manusia jipeupeunteng droe jih keudroe, sifeuet manusia nyan teupéng-péng, sombong dan galak meututoe ngon haba sulet. Awaknyan galak jihina gob, beurontak bak ureuëng tuha, hana jiteupeue lakée teurimong gaséh, dan jibanci keuhai-hai nyang rohani. 3 Awaknyan hana jigaséh seusabe manusia, hana jitem peuamphon gob salah, awaknyan galak jipeubrok-brok nan ureuëng laén, galak jipoh gob ban galak droe, awaknyan keujam, dan hana galak nyang keugôt. 4 Awaknyan galak meukianat, manyang até dan hana seumike panyang. Awaknyan leubeh galak keumangat lam donya nibak jiseutôt Allah. 5 Bah pi seucara lahé awaknyan taát jipeubuet keuwajéban agama, teuma jitulak inti agama nyan keudroe. Peujiôh kheueh nibak ureuëng-ureuëng nyang lagée nyan. 6 Na lamkawan awaknyan nyang ka jitamong lam rumoh-rumoh, laju jirayu ureuëng-ureuëng inong nyang leumoh dan nyang ka jai lagoena desya dan jikuasa lé mubagoe nafeusu. 7 Ureuëng-ureuëng inong nyan hana putôh-putôh jilakée peurunoe, hántom na jiteume beujituri ajaran nyang beutôi nibak Allah. 8 Lagée toh Yanes dan Yambres jilawan Nabi Musa yoh masa ilée, meunan kheueh teuma ureuëng-ureuëng nyan jilawan ajaran nyang teuka nibak Allah. Pikeran awaknyan ka rusak, dan iman awaknyan hana ék jiteun keunong cuba. 9 Teuma awaknyan hana teuma jiteume sapeue, sabab bangai jih nyan teuma jiteupeue lé mandum ureuëng, lagée nyang ka jirasa lé Yanes dan Yambres. 10 Teuma gata ka taseutôt ajaran lôn, pi-e ulôn, dan tujuan udeb lôn. Gata ka tangieng keudroe pakriban ulôn nyoe biet-biet meuiman ubak Isa Almaseh dan lôn gaséh seusabe manusia. Meunan gata tateupeue keuhai saba dan tabah ulôn. 11 Gata ka takalon ulôn ji iénanya dan ulôn meudeurita. Gata tateupeue mandum nyang teujadi ateueh ulôn di Antiokhia, di Ikonium, dan di Listra; dan gata tateupeue banmandum nyang ulôn deurita! Teuma Tuhan geupeu seulamat ulôn nibak mandum nyan. 12 Beutôi mandum ureuëng nyang keuneuk udeb meuiébadat dan udeb meusaboh ngon Isa Almaseh teuma ji iénanya, 13 seudangkan ureuëng-ureuëng jeuhet dan ureuëng-ureuëng buet teumipée meutamah jeuhet. Awaknyan jipeungét ureuëng laén padahai awaknyan keudroe pih keunong peungeut. 14 Teuma keuhai gata, Timotius, bah kheueh gata teutab tamumat nibak ajaran-ajaran nyang beuna nyang ka teupurunoe bak gata dan nyang gata meuiman sipeunoh até; sabab gata tateupeue soe gurée-gurée gata. 15 Gata meuseuti teuingat bahwa yoh ubit gata ka taturi keu Alkitab. Alkitab nyan hase jibri keugata peungeurtian keumeuteumé ubak keuseulamatan meulalu iman ubak Isa Almaseh. 16 Banmandum nyang teutuléh lam Alkitab, geupeu ilham lé Allah dan meuguna keuteupeurunoe nyang beuna, keuteuseugah dan teupeubeutôi nyang salah, dan keuteupeurunoe manusia mangat udeb meunurot keuheundak Allah. 17 Deungon Alkitab nyan ureuëng nyang layani Allah hase teupeuleungkab ngon sampoereuna keumeubagoe macam buet nyang jroh.

2 Timotius 4

1 Isa Almaseh teuma teuka lom lam donya nyoe dan geupeu sidang ureuëng-ureuëng nyang udeb dan nyang maté; dan Gobnyan teuka keugeuba peurintah sibagoe Raja. Ngon sabab nyan ulôn meulakée ngon meuharab that nibak gata dikeue Allah dan Isa Almaseh: 2 Bah kheueh gata peusampoe haba nyang beutôi nyang teuka nibak Allah nyan, dan sabe gata peusak mangat jitem deungoe lé gob, peu kheueh awaknyan jitem atawa hana. Bah kheueh gata tapeuyakén gob, gata tunyok nyang salah, dan gata bri durongan keu awaknyan. Peurunoe kheueh gob nyan deungon saba nyang rayeuk. 3 Sabab teuma teuka watée jih, manusia hana jitem teurimong lé ajaran nyang beuna. Sikeubiet jih, awaknyan teuma jiturot keuheundak jih keudroe, dan jipeusapat gurée-gurée nyang guna jipeurunoe hai-hai nyang mangat teudeungoe nibak geulinyueng awaknyan. 4 Awaknyan jisumpai geulinyueng ateueh nyang beuna, teuma teuma jipeudeungoe gét-gét ubak calitra-calitra dongeng. 5 Bah kheueh lagée nyan, gata meuseuti takuasa droe gata lam keuadaan peue mantong. Tabah kheueh nibak peundeuritaan, peubuet kheueh tugaih gata sibagoe ureuëng nyang peusampoe Haba Gét nyan dan peujak kheueh nyan ngon sigét-gét jih keuwajéban gata sibagoe peulayan Allah. 6 Keuhai droe ulôn, ka trok watée jih ulôn maté sibagoe keureubeuen keu Po teu Allah. Hana treb lé ulôn teuma lôn tinggai donya nyoe. 7 Ulôn ka lôn seutôt meutunang plueng deungon sigét-gét jih, dan ka trob bak garéh akhé. Ulôn teutab seutia ubak Almaseh sampoe akhé. 8 Dan jinoenyoe hadiah keu nyang meunang ka jipreh ulôn. Bak Uroe Kiamat, Tuhan, Hakém nyang ade nyan kheueh nyang seurah hadiah nyan keu ulôn, sabab ulôn udeb meugét lom ngon Po teu Allah. Dan kon ulôn mantong nyang teurimong hadiyah nyan, teuma banmandum ureuëng nyang ka jipreh-preh deungon rindu Tuhan nyang teuka. 9 Useuha kheueh dan teuka kheueh bak ulôn beureujang-reujang, 10 sabab Demas ka jitinggai ulôn sabab jicinta keu donya nyoe. Jihnyan ka jijak u Tesalonika. Dan Kreskes ka teuma jijak u Galatia, meunan cit deungon Titus u Dalmatia. 11 Teuma Lukas nyang tinggai ngon lôn. Jaktueng kheueh Markus dan bah kheueh jihnyan tinggai meusajan gata, sabab jihnyan jeuet jitulông nibak buet ulôn. 12 Ulôn ka lôn yue Tikhikus jijak u Efesus. 13 Meunyoe gata teuka, ba kheueh mantel nyang lôn tinggai di Troas bak rumoh Karpus. Meunan cit ngon kitab-kitab gata bék tuwoe gata ba, nyang paleng peunteng kitab nyang teupeugét nibak keureutah kulét. 14 Aleksander, teumpeun teumaga nyan ka jipeubuet hai-hai nyang paleng jeuhet ateueh ulôn. Tuhan teuma geubalaih ateueh jih nyan sisuai ngon buet jih nyang jeuhet. 15 Gata keudroe meuseuti até-até keu jih nyan, sabab jihnyan jilawan that beurita nyang tanyoe ba. 16 Bak watée ulôn phon-phon that lôn peusampoe peumbilaan lôn, hana meusidroe pi nyang jitem dong blaih lôn; banmandum jitinggai lôn. Mudah-mudahan Allah hana geupeusalah awaknyan lam hainyoe! Teuma Tuhan na meusajan ulôn. 17 Gobnyan geubri teunaga keu ulôn sampoe ulôn hase lôn peusampoe banmandum Haba Gét nyan, mangat jideungoe lé mandum ureuëng nyang kon Yahudi. Dan ulôn lheuh nibak bahya maté. 18 Keubiet Tuhan teuma geupeulheuh ulôn nibak tieb-tieb useuha nyang jeuhet ateueh ulôn. Gobnyan teuma geuba ulôn deungon seulamat lam keurajeuen Geuh di Syeuruga. Bah kheueh Gobnyan teupeuagong siumu masa! Amin. 19 Saleuem ulôn keu Priskila dan Akwila dan keu keuluwarga Onesiforus. 20 Erastus tinggai di Korintus, dan Trofimus ka ulôn tinggai lam keuadaan sakét di Miletus. 21 Meu-useuha kheueh sijeuet-jeuet jih keuteu-teuka sigohlom musem sijuek. Ebulus, Pudes, Linus, dan Klaudia, awaknyan jikirém saleuem keugata mandum; meunan cit keu syedara saboh iman nyang laén. 22 Seumoga Tuhan na meusajan gata. Seumoga Tuhan geubri beureukat keu Syedara mandum! Horeumat kamoe, Paulus

Titus 1

1 Aneuëk ulôn Titus! Ulôn, Paulus, kutuléh surat nyoe sibagoe hamba Allah dan rasui Isa Almaseh. Ulôn geupiléh dan geu-utus keu teutulông ureuëng-ureuëng piléhan Allah mangat beujeuet teuga iman awaknyan. Meunan cit ulôn museuti kubimbéng awaknyan mangat jituri ajaran nyang beuna nyang jipeurunoe lé agama tanyoe. 2 Ajaran na kheueh sibagoe harapan bahwa geutanyoe tateurimong udeb seujati dan keukai. Allah ka geupeu janji udeb nyan sigohlom awai jamén -- dan Allah hana mungken meusulet. 3 Bak watée nyang paih, Allah geupeugah janji Gobnyan nyan lam peusan Geuh. Peusan nyan ka geupeucaya bak ulôn, dan ulôn britée nyan ateueh peurintah Allah Peuseulamat tanyoe. 4 Titus, gata na kheueh biet-biet aneuëk ulôn, sabab gata dan ulôn saban-saban kata meuiman ubak Almaseh. Ulôn meuharab seumoga Allah Bapak dan Isa Almaseh Raja Peuseulamat tanyoe, geubri beureukat dan seujahteura ateueh gata. 5 Ulôn tinggai gata di Kreta mangat gata hase tauroih hai-hai nyang peureulée teuatoe. Meunan cit, mangat gata ta angkat peumimpén-peumimpén jeumaáh ditieb-tieb banda. Dan ingat kheueh ubak peutunyok-peutunyok nyang ulôn peugah nyoe: 6 Sidroe peupeumimpén jeumaáh na kheueh sidroe ureuëng nyang hana meucupa; ureuëng nyan peurumoh jih sidroe mantong; aneuëk-aneuëk jih nyang ka meuiman ubak Almaseh dan kon aneuëk nyang jeuhet hana jeuet teupurunoe. 7 Peunilék jeumaáh na kheueh ureuëng nyang jiurôih buet Allah, ureuëng nyan hana meucupa. Ureuëng nyan hana sombong atawa bagaih beungéh, atawa galak keumabök, atawa galak keumulo, atawa teupéng-péng. 8 Ureuëng nyan meuseuti nyang galak jiteurimong jamé dirumoh jih, galak bak hai-hai nyang jroh, hase jiteun droe, jujoe, gleh dan teureuteb. 9 Ureuëng nyan meuseuti nyang jimumat kong that nibak ajaran nyang ji-iman, lagée nyang ka teupurunoe bak jih nyan. Ngon lagée nyan jihnyan hase jibri naseuhat keu ureuëng laén nyang dasai jih nibak ajaran nyang beutôi, dan jitunyok buet-buet ureuëng nyang salah nyang lawan jih. 10 Sabab jai that ureuëng nyang galak keubeurontak, nyang paleng phon ureuëng-ureuëng nyang yoh awai meuagama Yahudi; awaknyan jipeunget ureuëng laén ngon haba jih nyang sulet. 11 Ureuëng-ureuëng nyang lagée nyan meuseuti teusumpai babah jih, sabab awaknyan jipeukaru keuluwarga-keuluwarga deungon ajaran-ajaran nyang hana beutôi. Awaknyan jipeubuet lagée nyan jikeuneuk mita laba nyang hana patot! 12 Ka lheueh geupeugah lé nabi nyang asai jih di Kreta ureuëng awaknyan keudroe, "Ureuëng-ureuëng Kreta sabe jimeusulet, dan lagée beulatang juwah nyang leuha dan beu-o." 13 Peue nyang geupeugah lé nabi nyan keubiet beutôi. Nyang kheueh sabab jih gata meuseuti tatam awaknyan deungon teugaih; mangat awaknyan teutab jimumat nibak ajaran-ajaran nyang beutôi 14 hana lé jimumat bak dongeng-dongeng Yahudi atawa peuratoran-peuratoran nyang jipeuget lé ureuëng-ureuëng nyang tulak ajaran nyang beutôi nyan. 15 Peue-peue mantong na kheueh gleh nibak ureuëng nyang gleh. Teuma nibak ureuëng nyang pikeran jih kutoe lom hana meuiman, hana meusapeue pi nyang gleh, sabab pikeran dan até nurani awaknyan ka kutoe! 16 Awaknyan jipeugah bahwa awaknyan jituri Allah, padahai buet awaknyan ji iengkeue hai nyan. Awaknyan keubiet that luwat, dan awaknyan hana jitem taát; awaknyan na kheueh ureuëng-ureuëng nyang hana hase jipeubuet nyang jroh.

Titus 2

1 Teuma gata, Titus, bah kheueh gata tapeurunoe ajaran nyang beutôi. 2 Bri kheueh naseuhat bak ureuëng agam nyang tuha, mangat awaknyan jiteun droe, bijaksana dan udeb sibagoe ureuëng nyang patot teuhoreumat. Meunan cit awaknyan seutia jimumat bak ajaran nyang beutôi nyang teuka nibak Allah, jigaséh ngon sampoereuna dan meudeurita ngon até nyang tabah. 3 Meunan cit teuma gata bri kheueh naseuhat keu ureuëng-ureuëng inong nyang tuha mangat peurangoe awaknyan saban lagée peue nyang patot keu ureuëng nyang udeb khusos keu Po teu Allah. Ureuëng nyan hana jeuet jifiteunah ureuëng laén, dan hana jeuet banggi keu ié kreueh. Awaknyan meuseuti jipeurunoe hai-hai nyang gét, 4 deungon lagée nyan awaknyan jeuet jididek inong-inong nyang mantong muda beujigaséh keu lakoe dan aneuëk-aneuëk jih, 5 jeuet keu ureuëng bijaksana, udeb jih gleh dan jeuet keu ma rumoh tangga nyang jroh nyang taát ubak lakoe jih. Deungon na lagée nyan hana ureuëng nyang hase jihina haba nyang teuka nibak Po teu Allah. 6 Meunan cit teuma, bri kheueh naseuhat keu ureuëng-ureuëng muda mangat awaknyan jeuet keu ureuëng bijaksana. 7 Lam hai peue mantong, bah kheueh gata jeuet keuteuladan pi-e nyang jroh. Meunyoe gata peurunoe, gata beu biet-biet jujoe dan beutôi-beutôi. 8 Peuguna kheueh tutoe haba nyang bijaksana, nyang hana hase jipeubeuáh lé gob, mangat lawan-lawan gata jeuet keumalée sabab hana hai-hai nyang brok nyang hase jipeugah keugeutanyoe. 9 Namiet-namiet bah kheueh jitaklok ubak amphon jih, dan jipeumangat até jih lam hai peue mantong. Awaknyan hana jeuet jibantah, 10 atawa jiceumeucue. Bah kheueh awaknyan jipeuleumah droe bahwa jihnyan gét dan seutia, mangat ngon sikeueb awaknyan nyang lagée nyan ureuëng laén jipujoe keuhai ajaran Po teu Allah, nyang peuseulamat geutanyoe. 11 Sabab Allah ka geutunyok rahmat Gobnyan guna teupeuseulamat banmandum umat manusia. 12 Rahmat Allah nyan teudidek geutanyoe mangat hana lé meuantok ngon meulakée Gobnyan dan hana taseutôt kheun donya nyoe. Geutanyoe geudidek keu udeb lam donya nyoe deungon tateupeue tapeuteun droe, jujoe dan seutia ubak Po teu Allah. 13 Jinoenyoe geutanyoe teungoh tapreh-preh Uroe nyang taharab-harab nyan; nibak Uroe nyan donya teuma jikalon keuagongan Isa Almaseh, na kheueh Allah Maharayeuk dan Raja Peuseulamat tanyoe. 14 Gobnyan ka geukeureubeuen droe Geuh keudroe keugeutanyoe guna keugeupeu beubaih geutanyoe nibak mandum nyang jeuhet, dan geupeujeuet geutanyoe saboh umat nyang beubaih nibak desya-desya dan nyang jeuet keu milék Gobnyan mantong, dan meunan cit nyang biet-biet jipeubuet nyang gét. 15 Purunoe kheueh banmandum nyan, dan naseuhat kheueh dan marit kheueh ngon ureuëng nyang deungoe ngon peunoh wibawa. Dan bék kheueh meusidroe ureuëng pi nyang jingieng gata deungon hina.

Titus 3

1 Peuingat kheueh ubak anggota jeumaáh gata mangat awaknyan jideungoe ubak peue nyang geukheun lé peumimpén-peumimpén dan nyang mat kuasa neugahra, lom taát dan jitem peubuet tieb-tieb hai nyang jroh. 2 Peugah kheueh bak awaknyan mangat bék karu atawa meudakwa ngon soe mantong, dan meusikeub rumeh. Dan bah kheueh awaknyan meusikeub leumoh leumbot ubak soe mantong. 3 Sabab yoh masa ilée geutanyoe keudroe pi bangai, sisat dan hana taát. Tanyoe jipeubudak lé mubagoe-bagoe nafeusu dan hasrat; tanyoe udeb peunoh ngon niet-niet nyang jeuhet dan bingiek até, dan sabe lam banci. 4 Teuma Po teu Allah, Nyang Peuseulamat geuteunyoe geubri gaséh dan até geuh nyang jroh ubak geutanyoe. 5 Gobnyan geupeu seulamat tanyoe, kon lé sabab tanyoe ka tapeubuet sapeue-peue buet nyang gét, teuma na kheueh Gobnyan keudroe keugeunaséh keu geutanyoe. Gobnyan geupeu seulamat tanyoe meulalu Roh Allah, nyang geubri bak geutanyoe lahé barô deungon cara geurhah geutanyoe. 6 Allah geuprée Roh Gobnyan ateueh geutanyoe deungon peurantara Isa Almaseh, Raja Peuseulamat geutanyoe, 7 mangat lé rahmat Isa, geutanyoe tameugét lom teuma ngon Allah dan geutanyoe meuteumé udeb seujati dan keukai nyang geutanyoe harab that. 8 Tutoe haba nyoe keubiet beutôi that. Ulôn meuharab beu gata waham that hai nyoe, mangat ureuëng-ureuëng nyang meuiman ubak Po teu Allah biet-biet jiuseuha keu jipeubuet buet-buet nyang jroh dan na manfaát keu mandum ureuëng. 9 Peujiôh kheueh meudobat nyang hana meuguna, haba-haba asai usui, meudakwa dan meulo sabab keuhai huköm agama. Banmandum nyan hana meuguna dan hana meulaba. 10 Ureuëng nyang jeuet keusabab jeumaáh meucrebre, gata seugah kheueh sigoe dan dua goe; óh lheueh nyan bék kheueh gata meurakan lé ngon jih nyan. 11 Gata tateupeue bahwa ureuëng nyang lagée nyan jeuhet dan desya-desya jih sibagoe bukeuti bahwa jihnyan salah. 12 Beubagaih kheueh meunan lheueh lôn kirém Artemas dan Tikhikus ubak gata, useuha bubagaih that keu gata jak ubak ulôn di Nikopolis, sabab ulôn na niet keuneuk tinggai bak teumpat nyan watée musém sijuek. 13 Useuha kheueh beubiet-biet keu tatulông Zenas, nyang malem huköm nyan, dan Apolos, mangat awaknyan hase jijak hana kureueng peue-peue mantong. 14 Ureuëng-ureuëng geutanyoe bah kheueh jimeurunoe keu jipeubuet hai-hai nyang jroh mangat jeuet jipeupeunoh peue-peue mantong nyang keubiet that jipeureulée; bék sampoe awaknyan udeb hana meuguna. 15 Banmandum syedara nyang na meusajan ulôn, geukirém saleuem keu gata. Peutrok kheueh saleuem kamoe ubak rakan-rakan geutanyoe nyang saboh iman. Seumoga Tuhan geubri beureukat ubak Gata mandum. Horeumat kamoe, Paulus

Filemon 1

1 Syedara Filemon, sabat dan rakan kamoe! Ulôn, Paulus, sidroe ureuëng huköman sabab lé Isa Almaseh, meusajan deungon syedara ulôn Timotius, kamoe tuléh surat nyoe keu gata 2 dan keu jeumaáh nyang na meusapat dirumoh gata; meunan cit keu syedara tanyoe ureuëng inong nyang nan jih Apfia dan rakan saboh peujuangan ngon geutanyoe Arkhipus. 3 Kamoe meuharab that seumoga Allah Bapak geutanyoe dan Tuhan Isa Almaseh geubri beureukat dan seujahteura ubak gata. 4 Tieb-tieb ulôn meudoá, ulôn kheun nan Gata dan lôn lakée teurimong gaséh ubak Po teu Allah. 5 Sabab ulôn deungoe bahwa Gata biet-biet meuiman ubak Tuhan Isa dan gata gaséh banmandum umat Allah. 6 Ulôn meudoá mangat meusyedara geutanyoe sibagoe ureuëng-ureuëng meuiman teuma jipeuhase peungeurtian nyang leubeh rayeuk ateueh banmandum beureukat nyang na bak geutanyoe sabab meusaboh ngon Almaseh. 7 Syedara lôn Filemon, geunaséh gata ateueh banmandum umat Allah, keubiet mangat that até lôn dan ngon lagée nyan ka teubri durongan keu ulôn nyoe! Banmandum umat Allah ka jeuet keu geumbira sabab lé Gata. 8 Ngon sabab nyan, sibagoe sidroe syedara nyang saboh iman, ulôn jeuet mantong lôn peurintah Gata keu Gata peubuet peue mantong nyang meuseuti Gata peubuet. 9 Teuma sabab ulôn kugaséh Gata, nyang kheueh sabab jih lôn lakée mantong. Ulôn nyoe sidroe ureuëng tuha nyang jinoenyoe teungoh keunong teun lam peunjara sabab lé Isa Almaseh. 10 Ulôn, Paulus, nyang lôn peugah nyoe keuhai Onesimus, aneuëk ulôn lam Almaseh. Sabab lam peunjara nyoe ulôn ka jeuet keu bapak rohani jih. 11 Yoh masa ilée jih nyan hana meuguna nibak gata, teuma watée nyoe jihnyan ka na guna, kon mantong keu gata, teuma keu ulôn cit teuma. 12 Jinoenyoe ureuëng nyang ulôn gaséh nyan lôn kirém lom ubak gata. 13 Nyang sikeubit jih ulôn keuneuk teun jih nyan meusajan ulôn sibagoe geunantoe gata, mangat jihnyan jeuet jitulông lôn, simantong ulôn teuteun lam peunjara nyoe sabab lôn peusampoe Haba Gét nyang teuka nibak Allah. 14 Teuma ulôn hana kutem peubuet sapeue pi meunyoe Gata hana situju. Ulôn leubeh galak meunyoe Gata peubuet deungon até gata nyang rila; ulôn hana kutem paksa gata. 15 Mungken Onesimus jijak nibak Gata teuma sikeujab mangat Gata jeuet meuteumé jih nyan lom teuma keu siumu masa. 16 Jinoenyoe jihnyan kon mantong sidroe namiet keu Gata; jihnyan leubeh nibak nyan. Jihnyan na kheueh sabe ureuëng Kristen nyang teucinta. Jihnyan meuguna that nibak ulôn, peuteuk lom keu gata! Teuntée jihnyan meuguna that bah kheueh sibagoe namiet meunan cit sibagoe sidroe syedara lam Tuhan! 17 Lé sabab nyan, sabab Gata ta anggab ulôn rakan sabe ureuëng Kristen, teurimong kheueh lom teuma Onesimus saban lagée Gata tateurimong ulôn. 18 Meunyoe jihnyan meusalah atawa meu utang nibak gata, bah kheueh ulôn nyang tanggong banmandum nyan. 19 Deungon lagée nyan, bah kheueh ulôn teumuléh keudroe disinoe: Ulôn, Paulus, teuma lôn bayeue banmandum nyan. (Teuntée hana peureulée lôn peuingat bahwa Gata keudroe na utang nibak ulôn, na kheueh udeb gata nyang barô sibagoe ureuëng Kristen.) 20 Lé sabab nyan, deumi Tuhan cuba kheueh gata tulông ulôn, peumangat kheueh até ulôn sibagoe syedara lam Almaseh. 21 Ulôn tuléh suratnyoe sabab yakén bahwa Gata teuma tapeubuet peue nyang ulôn lakée. Dan keubiet ulôn teupeue bahwa Gata teuma tapeubuet leubeh nibak nyan. 22 Meunan cit teuma, tulông kheueh gata tinggai saboh kama keu ulôn di rumoh gata, sabab ulôn meuharab Allah geukabui doá Syedara banmandum dan geuba lom teuma ulôn ubak gata. 23 Epafras, nyang na meusajan ulôn lam peunjara sabab lé Isa Almaseh, jikirém saleuem keu gata. 24 Dan teurimong kheueh teuma saleuem rakan-rakan lôn: Markus, Aristarkus, Demas dan Lukas. 25 Seumoga Tuhan Isa Almaseh geubri beureukat ubak gata. Horeumat kamoe, Paulus

Ibrani 1

1 Bak jamén ilée jai lagoena Allah meufeureuman ubak indatu geutanyoe meulalu nabi-nabi deungon geupeu guna meubagoe cara. 2 Teuma nibak jamén akhé nyoe Gobnyan geumeututoe ubak geutanyoe deungon peurantaraan Aneuëk Gobnyan. Meulalu Aneuëk Geuh nyoe kheueh Allah geucebta alam seumeusta. Dan Po teu Allah ka geupeuteuntée bahwa Aneuëk Gobnyan nyoe kheueh nyang na hak geupeuteuntée peue-peue mantong. 3 Gobnyan kheueh nyang peuteubiet keu agongan Allah nyang paleng meusyeuhu; Gobnyan kheueh gamba nyang paleng nyata nibak droe Allah keudroe. Gobnyan kheueh teuma nyang peulara alam nyoe sampoereuna deungon feureuman Geuh nyang paleng meukuasa. Óh ka lheueh Gobnyan teupeumungken manusia keuteupeubeubaih nibak desya-desya awaknyan keudroe, Gobnyan geuduek bak tahta peumeurintah nyang na lam syeuruga meusajan-sajan ngon Allah, Peunguasa nyang paleng manyang. 4 Aneuëk nyan meuteumé jabatan nyang jiôh leubeh manyang nibak malaikat, dan nan nyang geubri lé Po teu Allah ubak Gobnyan pih jiôh leubeh teuhoreumat nibak nan nyang geubri ubak malaikat. 5 Hántom na Allah geupeugah meunoe ubak meusidroe malaikat pi, "Gata kheueh Aneuëk Ulôn; nibak uroenyoe ulôn jeuet keu Bapak gata." Hántom na Allah meufeureuman meunoe ubak malaikat pakriban kheueh mantong, "Ulôn teuma jeuet keu Bapak jih, dan jihnyan teuma jeuet keu Aneuëk Ulôn." 6 Teuma bak watée Allah geu kirém Aneuëk Gobnyan nyang tuha lam donya nyoe, Allah meufeureuman lagée nyoe, "Banmandum malaikat Allah wajéb jiseumah Aneuëk nyan." 7 Keuhai malaikat-malaikat Allah meufeureuman lagée nyoe, "Allah geupeujeuet malaikat-malaikat Gobnyan jeuet keu angén, dan peulayan-peulayan Gobnyan jeuet keu apui hu." 8 Teuma ubak Aneuëk nyan Allah meufeureuman, "Takhta Droeneueh, ya Allah, teuma keukai siumu masa! Peumeurintah Droeneueh na kheueh peumeurintah nyang ade. 9 Droeneueh galak ubak keuadelan, dan banci ubak buet nyang hana ade; nyang kheueh sabab jih Allah, Allah Gata, geupiléh Gata dan geubri keu Gata keuhoreumatan nyang teupeuteuka suka cita, leubeh nibak rakan-rakan Gata." 10 Allah meufeureuman lom, "Droeneueh, Tuhan, bak awaiphon neucebta bumoe, dan Droeneueh keudroe nyang peujeuet langét. 11 Banmandum nyan teuma gadôh, dan jeuet keu tuha lagée peukayan; teuma Droeneueh hana meu ubah. 12 Bansigom alam raya nyoe Droeneueh lipat lagée bajée, dan Droeneueh gantoe ngon nyang laén. Teuma Droeneueh hántom na meu-ubah, dan udeb Droeneueh hántom na akhé." 13 Po teu Allah hántom na meufeureuman lagée nyoe ubak meusidroe pi malaikat Gobnyan, "Duek kheueh blaih uneuen Lôn, sampoe banmandum musoh-musoh gata Ulôn peutaklok keu gata." 14 Meunyoe meunan, malaikat-malaikat nyan peue nyang sibeuna jih? Awaknyan na roh-roh nyang layani Allah, dan nyang geuyue lé Allah keuteutulông ureuëng-ureuëng nyang teurimong seulamat.

Ibrani 2

1 Nyang kheueh sabab jih geutanyoe harôh tamumat beukong that nibak ajaran-ajaran nyang ka tanyoe deungoe, mangat geutanyoe bék tatinggai ajaran nyan. 2 Peusan-peusan nyang geupeutrok lé dum na malaikat ubak indatu tanyoe teunyata beutôi, dan ureuëng nyang hana jiturot atawa hana jitaát teuma jiteurimong huköman nyang sisuai ngon buet jih nyan. 3 Peue teuk lom ngon keuseulamatan nyang leubeh hebat nibak peusan-peusan nyan! Meunyoe geutanyoe hana tapako nibak keuseulamatan nyan, geutanyoe ka teuntée hana teuma lheuh nibak huköman. Sabab Tuhan keudroe kheueh nyang phon-phon nyang peumaklum keuseulamatan nyan, dan ureuëng nyang phon-phon that deungoe ka jibri bukeuti keubeunaran nyan ubak geutanyoe. 4 Disampéng nyan, Allah ka geupeukong keubeunaran keusaksian ureuëng-ureuëng nyan deungon cara jipeuna mubagoe rupa buet-buet nyang ajaéb dan hai-hai nyang luwabiasa dan jibagi-bagi meuneubri-meuneubri nibak Roh Allah meunurot keuheundak jih keudroe. 5 Malaikat-malaikat hana meuteumé kuasa nibak Allah keu jipeurintah donya barô nyang teuma teuka, nyan kheueh donya nyang teungoh tapeugah nyoe. 6 Seubalek jih, bak saboh bagian nyang na lam Alkitab na teutuléh lagée nyoe, "Manusia nyan peue, ya Allah, sampoe Droeneueh neutem peuingat awaknyan? Manusia na kheueh manusia mantong, teuma Droeneueh neukalon awaknyan! 7 Lam watée nyang paneuk Droeneueh peujeuet awaknyan bacut leubeh miyueb nibak malaikat. Droeneueh bri ubak jihnyan pangkat nyang mulia dan teuhoreumat, 8 lagée teupeujeuet keu nyang mat kuasa ateueh peue mantong." Deungon lagée nyan, meunyoe teupeugah Allah geupeujeuet manusia "nyang mat kuasa ateueh peue mantong", nyan makna jih bahwa hana meusapeue pi nyang hana dimiyueb kuasa manusia. Bah pih meunan, geutanyoe hana takalon bak watée nyoe manusia jimat kuasa ateueh peue mantong. 9 Teuma geutanyoe ka takalon Isa meukuasa! Gobnyan geupeujeuet bacut leubeh miyueb nibak malaikat bak watée nyang paneuk, mangat ateueh keu gét até Po teu Allah Gobnyan hase maté keumandum umat manusia. Tanyoe takalon jinoe Gobnyan geubri keududukan nyang mulia dan teuhoreumat sabab Gobnyan ka meudeurita sampoe maté. 10 Keubiet ka sipatot jih Allah -- nyang cebta peue-peue mantong keu meukeusut Gobnyan keudroe -- teupeujeuet Isa nyang ba seulamat nyang sampoereuna meulalu deurita. Deungon lagée nyan Allah hase geupakat jai that ureuëng keu meusajan teupeuagong meusajan ngon Isa. Sabab Gobnyan kheueh nyang buka jalan keu awaknyan mangat jeuet teupeuseulamat. 11 Isa geupeu gleh manusia nibak desya-desya awaknyan; dan Gobnyan nyang peugleh, dan awaknyan nyang teupeugleh nyan, saban-saban na sidroe Bapak. Nyang kheueh sabab Isa hana malée geuaku awaknyan sibagoe syedara-syedara Gobnyan. 12 Isa geupeugah ubak Po teu Allah, "Ulôn teuma kubri ubak syedara-syedara Lôn keuhai Droeneueh. Ulôn teuma lôn pujoe Droeneueh nibak teumpat awaknyan meugumpôi." 13 Dan Isa geupeugah lom lagée nyoe, "Ulôn teuma Lôn keubah harapan Lôn ubak Allah." Dan Gobnyan geupeugah lom, "Nyoe kheueh Ulôn, meusajan ngon aneuëk-aneuëk nyang ka geubri lé Allah ubak Ulôn." 14 Lé sabab ureuëng-ureuëng nyang geupeugah aneuëk nyan, na kheueh makhlok manusia nyang hase maté, teuma Isa keudroe jeuet keu saban lagée awaknyan dan udeb lam keuadaan manusia. Gobnyan geupeubuet meunan, mangat deungon maté Geuhnyan hase geupeu hanco Iblih nyang kuasa ateueh maté. 15 Deungon cara nyan Gobnyan ka geupeubeubaih bubena ureuëng nyang sipanyang udeb jih ka jipeunamiet sabab jitakot ubak maté. 16 Deungon lagée nyan deuh kheueh takalon bahwa kon malaikat nyang geutulông, teuma keuturonan Nabi Ibrahim. 17 Nyoe meumakna bahwa Gobnyan harôh saban deungon syedara-syedara Gobnyan lam hai peue mantong. Dan deungon lagée nyan Gobnyan jeuet keu Imeum Agong nyang seutia dan na gaséh sayang. Deungon peulayan Geuh nyang lagée nyan desya manusia jeuet geupeu amphon. 18 Dan sabab Gobnyan keudroe ka lheueh geurasa meudeurita dan keunong cuba, Gobnyan hase geutulông ureuëng-ureuëng nyang keunong cubaan, sabab Gobnyan keudroe ka lheueh jicuba dan meudeurita.

Ibrani 3

1 Syedara-syedara seusabe ureuëng Kristen nyang geutawök cit lé Po teu Allah! Cuba gata pike beu lhok-lhok keuhai Isa nyoe! Allah geukirém Gobnyan khusos beujeuet keu Imeum Agong lam agama nyang tanyoe anut. 2 Gobnyan seutia ubak Allah nyang ka geupiléh Gobnyan keubuet nyan, saban lagée Nabi Musa yoh masa ilée seutia geupeubuet tugaih geuh lam Baét Allah. 3 Teuma Isa patot meuteumé horeumat nyang leubeh rayeuk nibak Nabi Musa. Sabab ureuëng nyang peudong rumoh harôh meuteumé horeumat nyang leubeh rayeuk nibak rumoh nyan keudroe. 4 Beutôi tieb-tieb rumoh na nyang peudong, teuma nyang paeudong peue-peue mantong na kheueh Allah keudroe. 5 Nabi Musa seutia sibagoe peulayan lam Baét Allah dan geupeusampoe hai-hai nyang teuma geupeugah lé Allah bak watée nyang teuma teuka. 6 Teuma Almaseh seutia sibagoe Aneuëk nyang meutanggong jaweueb ateueh Baét Allah. Dan geutanyoe kheueh Baét Allah, meunyoe tanyoe teutab meuseumangat dan teutab yakén peue nyang tanyoe harab nyan. 7 Sabab nyan, lagée nyang geupeugah lé Roh Allah, "Meunyoe uroenyoe gata tadeungoe su Allah, 8 bék kheueh gata tapeukreuh ulée, lagée indatu gata, watée awaknyan jibeurontak ubak Po teu Allah, dan ji ujoe Allah lam padang pasi. 9 'Nibak teumpat nyan indatu gata ji cuba Ulôn, dan ji ujoe Ulôn,' kheun Allah, 'Padahai awaknyan ka jikalon buet Ulôn nyang peuet ploh thon treb jih.' 10 Nyang kheueh sabab jih Ulôn meureuka bak awaknyan dan Lôn peugah lagée nyoe, 'Awaknyan sabe hana seutia, dan beu-oe that jitaát peue-peue nyang Lôn peurintah.' 11 Ulôn beungéh dan meusumpah, 'Awaknyan hana teuma jitamong lam nanggroe nyan keujiteumé meureuhat meusajan ngon ulôn.' " 12 Syedara-syedara, até-até kheueh dan bék sampoe na lamkawan gata ureuëng nyang até jih jeuhet that dan hana meuiman, akhé jih jihnyan jigisa dan jipeujiôh Allah nyang udeb! 13 Ngon lagée nyan, mangat bék na meusidroe pi lamkawan gata nyang keunong tipée lé desya akhé jih jilawan Allah, bah kheueh gata saléng na tabri naseuhat tieb-tieb uroe simantong tanyoe na udeb lam jamén nyang teupeugah "Uroe Nyoe" lam Alkitab. 14 Tanyoe mandum na kheueh rakan saboh meujuang ngon Almaseh, asai geutanyoe trok bak akhé tamumat nyang kong ubak keuyakénan nyang tanyoe milék yoh awai kon. 15 Nyoe kheueh nyang teutuléh lam Alkitab, "Meunyoe nibak uroe nyoe gata teudeungoe su Allah, bék kheueh gata tapeukreuh ulée, lagée indatu gata, watée awaknyan jibeurontak ubak Po teu Allah." 16 Ngon lagée nyan, soe kheueh nyang jideungoe su Allah laju beurontak ubak Gobnyan? Nyan kheueh banmandum ureuëng nyang ka geupimpén lé Nabi Musa jiteubiet lam nanggroe Meusé, bukon? 17 Dan ateueh soe kheueh Allah beungéh peuet ploh thon treb jih? Ateueh awaknyan nyang meudesya, nyang reubah maté lam padang pasi, nyoe peue kon? 18 Watée Allah meusumpah lagée nyoe, "Awaknyan hana teuma jitamong lam nanggroe nyan keujiteumé meureuhat meusajan Ulôn" -- soe kheueh teuma nyang geumeukeusut lé Po teu Allah? Nyang geumeukeusut nyan na kheueh ureuëng-ureuëng nyang beurontak ubak Allah, nyoe peue kon? 19 Jinoenyoe tanyoe ka muphom bahwa awaknyan hana hase jitamong, sabab awaknyan hana meuiman ubak Po teu Allah.

Ibrani 4

1 Deungon lagée nyan, janji Allah mantong na, dan keugeutanyoe teuma geubri meureuhat lagée nyang ka geupeu janji. Deungon nyan, gét that tanyoe tajaga mangat bék na meusidroe pih lamkawan gata nyang teunyata hana nyang jirasa meureuhat nyang ka geupeu janji lé Allah nyan. 2 Sabab Haba Gét nyan ka geubri keugeutanyoe saban cit lagée keu awaknyan. Teuma keu awaknyan, haba nyan hana meuguna. Sabab, watée awaknyan jideungoe, hana jipatéh. 3 Teuma, geutanyoe nyang meuiman nyoe tateurimong meureuhat nyang ka geupeu janji lé Po teu Allah nyan. Nyan sisuai ngon peue nyang ka geufeureuman lé Allah, lagée nyoe, "Ulôn beungéh dan meusumpah, 'Awaknyan hana jiteumeutamong keujimeureuhat meusajan Ulôn.' " Allah meufeureuman lagée nyan bah pi buet Gobnyan ka seuleusoe watée phon that geucebta donya nyoe. 4 Sabab keuhai uroe nyang keutujoh, na teutuléh lam Alkitab lagée nyoe, "Nibak uroe nyang keutujoh Po teu Allah geumeureuhat nibak mandum buet Gobnyan." 5 Keuhai nyan na lom teutuléh lagée nyoe, "Awaknyan hana teuma jitamong lam nanggroe nyan keu meuteumé meureuhat meusajan Ulôn." 6 Teuma awaknyan nyang phon-phon that jiteurimong Haba Gét nyan, hana jiteurimong meureuhat nyan sabab awaknyan hana meuiman. Meunyoe lagée nyan ka nyata bahwa na ureuëng-ureuëng nyang jeuet jiteurimong meureuhat nyan. 7 Sabab Allah ka geupeuteuntée saboh uroe nyang laén lom, nyang teupeugah "Uroe Nyoe". Meuthon-thon óh lheueh nyan Allah geumeututoe keuhai nyan meulalu Nabi Daud, lam ayat nyang ka lheueh teupeugah bunoe, "Meunyoe nibak uroenyoe gata tateurimong feureuman Allah, bék kheueh gata tapeukreuh ulée." 8 Meunyoe seukira jih Yosua ka geubri ureuëng-ureuëng nyang meureuhat nyang geupeu janji lé Allah, teuma Allah hana teuma meufeureuman le keuhai saboh uroe nyang laén. 9 Teuma, keu umat Allah mantong na janji keujimeureuhat lagée Allah meureuhat bak uroe nyan keutujoh nyan. 10 Sabab ureuëng nyang teurimong meureuhat nyang geupeu janji lé Allah ubak jihnyan, teuma jimeureuhat cit nibak banmandum buet jih nyan, saban lagée Po teu Allah. 11 Sabab nyan, jak kheueh tanyoe ta useuha beubiet-biet keutateurimong meureuhat lagée nyang geupeu janji lé Allah nyan. Bék sampoe meusidroe pi lamkawan tanyoe hana meuhase lagée awaknyan yoh masa ilée, sabab hana meuiman ubak Allah. 12 Feureuman Allah na kheueh feureuman nyang udeb dan teuga; leubeh tajam nibak peudeueng nyang meumata dua. Feureuman Geuhnyan jitamong tajam trob ubak bataih jiwa ngon roh; trok ubak atot-atot dan tuleueng sum-sum, sampoe geuteupeue si lhok-lhok jih pikeran dan niet até manusia. 13 Hana meusaboh makhlok nyang na teusöm nibak pandangan Allah. Peue-peue mantong teulon dan teuhah dikeue Gobnyan. Dan tanyoe harôh tabri tanggong jaweueb ubak Gobnyan. 14 Nyang kheueh sabab jih tanyoe beutamumat nyang kong ubak nyang ta aku nibak peue nyang ka ta iman. Sabab tanyoe na Imeum Agong nyang rayeuk, nyang ka geutamong trok ukeue Po teu Allah -- Gobnyan kheueh Isa Aneuëk Allah. 15 Imeum Agong tanyoe nyan kon kheueh imeum nyang hana geurasa meusajan ngon na nyang leumoh-leumoh nibak geutanyoe. Nyang sikeubiet jih, Gobnyan ka teu ujoe lam hai-hai peue mantong, saban lagée geutanyoe keudroe; teuma Gobnyan hana geupeubuet desya! 16 Sabab nyan, jak kheueh geutanyoe ngon biet-biet tajeuet tameuhadab ubak Po teu Allah nyang mat peurintah deungon jroh até. Allah teuma geugaséh geutanyoe dan geubri beureukat ubak geutanyoe mangat geutanyoe meuteumé sinulong paih óh trok bak watée jih.

Ibrani 5

1 Tieb-tieb imeum agong teupiléh lamkawan umat, dan teuangkat keujilayani Allah sibagoe waki awaknyan. Tugaih jih na kheueh teupeuseumah ubak Po teu Allah meuneubri-meuneubri dan keureubeuen-keureubeuen keuteupeu amphon desya. 2 Imeum agong nyan keudroe leumoh lam sigala hai, dan ngon sabab nyan gobnyan jeuet geupeubuet leumoh leumbot keu ureuëng-ureuëng nyang hana jiteupeu dan keu ureuëng nyang sisat jalan jih. 3 Dan sabab gobnyan keudroe leumoh, nyang kheueh sabab jih gobnyan keudroe geupeu seumah keureubeuen, kon mantong lé sabab desya-desya umat, teuma meunan cit lé sabab desya-desya jih keudroe. 4 Hana meusidroe pi nyang jiangkat droe jih keudroe jeuet keu imeum agong. Ureuëng nyang jeuet keu imeum agong, meunyoe Po teu Allah nyang tawök jih nyan beujeuet keu imeum agong nyan -- saban lagée Nabi Harun. 5 Meunan cit deungon Almaseh. Gobnyan hana geuangkat droe Geuh keudroe jeuet keu Imeum Agong. Allah keudroe kheueh nyang angkat Gobnyan. Allah meufeureuman ubak Gobnyan, "Gata kheueh Aneuëk Ulôn; nibak uroenyoe Ulôn jeuet keu Bapak Gata." 6 Bak teumpat nyang laén Allah meufeureuman, "Gata na kheueh imeum siumu masa, lagée Imeum Melkisedek." 7 Bak watée Isa udeb lam donya nyoe, Gobnyan meudoá dan geumeulakée ngon su geudumpék sira geumo ubak Po teu Allah, nyang hase peuseulamat Gobnyan nibak maté. Dan sabab lé Gobnyan takzem ubak Allah ngon peunoh horeumat, ngon lagée nyan Gobnyan geudeungoe lé Po. 8 Isa na kheueh Aneuëk Allah, teuma bah pi meunan, Gobnyan geumeurunoe jeuet keu ureuëng nyang taát meulalu deurita Gobnyan. 9 Dan óh ka lheueh Gobnyan teupeujeuet keu nyang peuseulamat nyang sampoereuna, Gobnyan jeuet keu panghulée seulamat nyang keukai keu mandum manusia nyang taát ubak Gobnyan, 10 dan Allah pi geupeugah bahwa Gobnyan na kheueh Imeum Agong, saban lagée Imeum Melkisedek! 11 Keuhai keududukan Isa sibagoe Imeum Agong, jai that-that nyang peureulée kamoe britée ubak gata, teuma payah that keu kamoe peutrang sabab gata mulet that bak tamuphom. 12 Nyang sibeuna jih ka watée jih nibak gata jeuet keu gurée, rupari gata peureulée that beujai tameurunoe nibak ureuëng laén keuhai azas-azas nyang phon nibak ajaran Allah. Gata goh hase tateurimong peunajoh nyang kreueh; gata mantong tajieb susu kong. 13 Ureuëng mantong jieb susu, nyan makna jih mantong aneuëk manyak; jihnyan gohlom na peungalaman keuhai peue nyang beutôi dan peue nyang salah. 14 Peunajoh nyang kreueh na kheueh keu ureuëng rayeuk nyang lé sabab peungalaman, ka hase jipeubeda nyang toh nyang jroh dan toh nyang jeuhet.

Ibrani 6

1 Sabab nyan, jak kheueh tabeuet laju ubak peungajaran-peungajaran nyang leubeh keuhai tuha lam udeb Kristen, dan bék mantong teukalon azas-azas nyang phon nibak ajaran agama tanyoe. Bék ta ulang lé ajaran dasai bahwa manusia meuseuti jipiôh nibak buet-buet nyang hana meuguna dan harôh meuiman ubak Allah, 2 atawa peulajaran dasai keuhai pumanö atawa keuhai teupeuduek jaroe ateueh gob, atawa keuhai udeb lom teuma óh ka lheueh maté atawa huköman nyang keukai. 3 Jak kheueh geutanyoe, meunyoe Allah geupeu idhin, tabeuet ubak peulajaran-peungajaran nyang leubeh mayang! 4 Sabab, ureuëng-ureuëng nyang ka meurutat, hana mungken teubimbéng lom teuma. Awaknyan yoh masa ilée kana lam trang nibak Po teu Allah, dan jirasa meuneubri Gobnyan. Meunan cit awaknyan ka jikuasa lé Roh Allah. 5 Awaknyan jiteupeu nibak peungalaman jih keudroe bahwa feureuman Allah nyan jroh that, dan awaknyan jirasa karonya-karonya nyang peunoh kuasa nibak jamén nyang teuma teuka. 6 Teuma óh lheueh nyan awaknyan meurutat! Panena mungken teubimbéng lom keujitobat lom teuma nibak desya-desya jih. Sabab awaknyan teungoh jisaleb lom Aneuëk Allah dan jipeujeuet Gobnyan jihina dikeue rakyat ba. 7 Tanoh nyang kayém jiphiéb ié ujeuen u ateueh jih, laju jipeuhase seunaman nyang meuguna keu ureuëng-ureuëng nyang keureuja, tanoh nyang lagée nyan geubri beureukat lé Po teu Allah. 8 Teuma meunyoe tanoh nyan jipeuhase naleueng lakoe dan timoh jih meuduro, tanoh nyang lagée nyan hana meuguna singoh teuma geukutôk lé Po teu Allah dan akhé jih teutot sampoe habéh. 9 Teuma Syedara-syedara lôn nyang teucinta, bah pih kamoe meupeugah meunan, kamoe yakén meunyoe keu gata. Kamoe yakén bahwa gata ka tateurimong hai-hai nyang leubeh jroh, na kheueh beureukat-beureukat nyang jeuet keubagian nibak keuseulamatan gata. 10 Po teu Allah kon kheueh Allah nyang hana ade. Gobnyan hana tuwoe ubak peue nyang gata peubuet keu Gobnyan, dan geunaséh nyang gata peuleumah ubak Gobnyan bak watée gata tulông syedara-syedara saboh iman, watée yoh ilée dan jinoenyoe. 11 Kamoe meuharab that mangat gata maséng-maséng sabe lam seumangat trok bak akhé, sampoe gata tateurimong peue nyang gata harab-harab that nyan. 12 Kamoe hana kamoe tem gata jeuet keu beu-o. Teuma kamoe meuharab gata taudeb lagée ureuëng nyang teurimong peue nyang geupeu janji lé Po teu Allah, sabab meuiman ubak Gobnyan dan sabab tapreh deungon saba. 13 Bak watée Allah meujanji ubak Nabi Ibrahim, Gobnyan meusumpah bahwa Gobnyan teuma geupeubuet peue nyang ka geupeu janji nyan. Dan sabab hana nyang leubeh manyang nibak Allah, teuma Gobnyan meusumpah ateueh nan Geuh keudroe. 14 Gobnyan geupeugah, "Ulôn meujanji teuma Lôn bri beureukat keugata dan lôn peujeuet keuturonan gata nyang le." 15 Nabi Ibrahim geupreh janji nyan ngon saba, teuma gobnyan laju geuteurimong peue nyang ka geupeu janji lé Allah ubak gobnyan nyan. 16 Meunyoe ureuëng meusumpah, jihnyan meusumpah ateueh nan ureuëng laén nyang leubeh manyang nibak jihnyan, ngon lagée nyan sumpah nyan jeuet keuseuneulheueh banmandum nyang teubantah. 17 Allah keuneuk geupeuteugaih bak ureuëng-ureuëng nyang teurimong janji Gobnyan, bahwa Gobnyan hana teuma geu ubah reuncana Geuh. Nyang kheueh sabab jih Gobnyan geutamah sumpah nibak janji Geuh nyan. 18 Dua boh hai nyan hana hase meu ubah: Allah hana mungken meusulet keuhai janji dan sumpah Gobnyan. Sabab nyan, geutanyoe nyang ka tameupayong nibak Allah, geubri durongan nyang teuga keutamumat nyang kong ubak harapan nyang teuleung luwah dikeue geutanyoe. 19 Harapan tanyoe nyan lagée saoh nyang teubeunom sampoe that lhok dan na kheueh teumpat tamumat nyang lumpah that kong dan aman lam udeb geutanyoe. Harapan nyang peureulong ubak gorden sinutôb Ruweueng Mahasuci nibak Baét Tuhan lam syeuruga. 20 Isa ka geurinteh jalan rot jak ubak teumpat nyan keu geutanyoe, dan ka geutamong keunan jeuet keu Imeum Agong geutanyoe siumu masa, lagée Imeum Melkisedek.

Ibrani 7

1 Melkisedek na kheueh raja nibak Saleuem dan imeum Allah Nyang Mahamanyang. Watée Nabi Ibrahim geuwoe nibak mideuen prang geupeutaloe dum na raja-raja, Melkisedek laju geuteuka geujak sambot gobnyan sira geubri beureukat keu gobnyan. 2 Teuma Nabi Ibrahim laju geubri ubak Melkisedek siper siploh nibak peue-peue mantong nyang hase geureupah. (Nan Melkisedek makna jih, nyang phon-phon that, "Raja nyang ade"; dan sabab gobnyan raja nibak Saleuem, ngon lagée nyan nan gobnyan teupeugah teuma, "Raja Seujahteura".) 3 Keuhai Melkisedek nyoe gobnyan hana keuteurangan dipat mantong bahwa gobnyan na ayah atawa ma atawa indatu; meunan cit hana keuteurangan keuhai uroe lahé gobnyan, meunan cit keuhai gobnyan maté. Gobnyan saban lagée Aneuëk Allah; gobnyan na kheueh imeum nyang abadi. 4 Deungon lagée nyan, deuh takalon disinoe padub na rayeuk jih Melkisedek nyoe; gobnyan meunan rayeuk sampoe Nabi Ibrahim keudroe, bapak indatu bansa geutanyoe, geubri keu gobnyan siper siploh nibak peue-peue mantong nyang geuteumé nibak muprang nyan. 5 Lam huköm agama Yahudi ka teupeuteuntée bahwa imeum-imeum keuturonan Lewi meuseuti geukuteb siper siploh nibak hase hareukat umat Israel, na kheueh syedara-syedara awaknyan keudroe, bah kheueh awaknyan saban-saban keuturonan Nabi Ibrahim. 6 Melkisedek kon keuturonan Lewi, teuma gobnyan meuteumé cit siper siploh nibak peue nyang geureubot lé Nabi Ibrahim, dan geubri beureukat teuma ubak Nabi Ibrahim nyang sibeuna jih ka geuteurimong janji-janji nibak Po teu Allah. 7 Keubiet hana jeuet teubantah bahwa ureuëng nyang teubri beureukat leubeh miyueb nibak ureuëng nyang bri beureukat nyan. 8 Imeum-imeum nyang teurimong hase nyang teutageh siper siploh jeumba geuhnyan na kheueh ureuëng nyang hase maté. Teuma meunurot nyang na teutuléh lam Alkitab, Melkisedek nyang geuteurimong meuneubri siper siploh nyan na kheueh ureuëng nyang teutab udeb. 9 Jeuet teupeugah bahwa Lewi -- nyang keuturonan gobnyan geucok siper siploh jeumba nibak umat Israel -- geubayeue cit teuma jeumba nyan meulalu Nabi Ibrahim, bak watée Nabi Ibrahim geubayeue atra nyan ubak Melkisedek. 10 Bah pi Lewi gohlom lahé, teuma jeuet teupeugah gobnyan kana lam tuboh Nabi Ibrahim indatu gobnyan, bak watée Melkisedek meurumpok ngon Nabi Ibrahim. 11 Di miyueb pimpénan imeum-imeum Lewi, huköm agama Yahudi teubri keu umat Israel. Sabab imeum-imeum Lewi yoh masa ilée nyan hana hase geupeubuet ngon sampoereuna peue nyang meuseuti geupeubuet, ngon lagée nyan meuseuti beuna imeum nyang laén, na kheueh nyang saban lagée Imeum Melkisedek, dan kon nibak kawöm Imeum Nabi Harun lom teuma! 12 Deungon lagée nyan, meunyoe keududukan imeum-imeum nyan meu ubah, huköm agama Yahudi pi meu ubah teuma. 13 Nyang teumeukeusut disinoe na kheueh Tuhan geutanyoe: Gobnyan nibak sukée laén, dan hantom na meusidroe pih lamkawan sukée Gobnyan nyang jeuet sibagoe imeum. 14 Banmandum ureuëng jiteupeu bahwa Tuhan geutanyoe asai geuh nibak sukée Yehuda; dan Nabi Musa hantom na geurebot sukée nyan bak watée gobnyan geumeututoe keuhai imeum-imeum. 15 Hai nyang teupeugah nyoe jeuet keuleubeh jeulaih lom, deungon teuka jih sidroe imeum laén nyang saban lagée Melkisedek. 16 Gobnyan teuangkat jeuet keu imeum, kon ngon dasai jih lé peuratoran-peuratoran manusia, teuma ngon dasai jih nibak udeb gobnyan nyang meukuasa dan nyang hana keuneulheueh jih. 17 Sabab lam Alkitab na teutuléh lagée nyoe, "Droeneueh na kheueh imeum siumu masa, saban lagée imeum Melkisedek." 18 Teuma, jinoenyoe peuratoran nyang awai ka teukeubah bak binéh, sabab hana kong dan hana meufaedah. 19 Huköm agama Yahudi hana hase jipeuna sapeue-sapeue pih nyang sampoereuna. Nyang kheueh sabab jih geutanyoe jinoenyoe geubri saboh harapan nyang paleng gét; deungon atra nyan tanyoe hase tapeurab ubak Po teu Allah. 20 Lom teuma, banmandum nyan na meusajan ngon sumpah nibak Po teu Allah. Gohlom na sumpah nyang lagée nyan bak watée imeum-imeum nyang laén teu baiát. 21 Teuma Isa teubaiát jeuet keu imeum teupeu sumpah, bak watée Allah meufeureuman ubak Gobnyan lagée nyoe, "Tuhan ka meusumpah, dan Gobnyan hana geu ubah keuputosan Geuh, 'Droeneueh na kheueh imeum siumu masa.' " 22 Deungon nyoe teuma Isa jeuet keujaminan keusaboh meujanji nyang leubeh gét. 23 Na lom saboh teuk hai: imeum-imeum nyang laén nyan jai that, sabab awaknyan maséng-maséng maté akhé jih hana hase jipeusampoe jabatan jih. 24 Teuma Isa udeb siumu masa, deungon lagée nyan jabatan Gobnyan sibagoe imeum hana teupinah bak ureuëng laén. 25 Deungon sabab keu siumu masa Isa hase geupeu seulamat ureuëng-ureuëng nyang jijak ubak Po teu Allah meulalu Gobnyan, sabab Gobnyan udeb siumu masa keu teupeutrok meulakée Gobnyan ubak Po teu Allah keu ureuëng-ureuëng nyan. 26 Deungon nyan, Isa nyan kheueh Imeum Agong nyang tanyoe peureulée. Gobnyan suci; nibak Gobnyan hana meuteuma nyang salah atawa desya peue mantong. Gobnyan teupeujiôh nibak ureuëng-ureuëng nyang meudesya, dan teupeu ék trok ubak teumpat nyang leubeh manyang nibak banmandum langét. 27 Gobnyan hana saban lagée imeum-imeum agong nyang laén, nyang tieb-tieb uroe meuseuti jipeuseumah keureubeuen sabab desya-desya jih keudroe yoh masa ilée, barô kheueh lé sabab desya-desya umat. Isa geupeu seumah keureubeuen teuma cit sigoe sagai keu siumu masa, watée Gobnyan geupeu seumah droe Geuh keudroe sibagoe keureubeuen. 28 Huköm agama Yahudi teu angkat ureuëng nyang hana sampoereuna jeuet keu imeum agong. Teuma dudoe nibak huköm nyan, Allah geupeugét janji deungon sumpah bahwa Gobnyan geu baiát sibagoe Imeum Agong, Aneuëk nyang ka geupeupeujeuet Peuseulamat nyang sampoereuna keu siumu masa.

Ibrani 8

1 Ulée haba nibak mandum tutoe nyoe na kheueh: Tanyoe na Imeum Agong nyang lagée nyan, nyang geuduek geumat peurintah meusajan ngon Po teu Allah nyang Maharayeuk lam syeuruga. 2 Gobnyan geupeubuet tugaih sibagoe Imeum Agong lam Ruweueng Mahasuci, na kheueh lam Khimah Tuhan nyang seujati, nyang geupeudong lé Tuhan keudroe, kon lé manusia. 3 Tieb-tieb imeum agong teubaiát keu teupeuseumah keureubeuen atawa keureubeuen keu Po teu Allah. Meunan kheueh teuma ngon Imeum Agong geutanyoe; Gobnyan meuseuti na sapeue-sapeue keuteupeu seumah. 4 Seukira jih Gobnyan na ateueh rhueng donya nyoe, Gobnyan hana teuma jeuet keu imeum, sabab kana imeum nyang peuseumah keureubeuen nyang teupeuteuntée lam huköm agama Yahudi. 5 Buet nyang awaknyan peubuet sibagoe imeum nyan nyang sibeuna jih na kheueh sibagoe gamba atawa bubayang lagée toh nyang na lam syeuruga. Hai nyan ka lheueh geupeugah lé Nabi Musa bak watée geukeuneuk peudong Khimah Tuhan. Allah meufeureuman lagée nyoe ubak Nabi Musa, "Ingat! Banmandum nyan meuseuti gata peubuet meunurot cara nyang ka teutunyok ubak gata di ateueh gunong." 6 Teuma jinoenyoe Isa meuteumé tugaih imeum nyang jiôh leubeh mulia nibak nyang geupeubuet lé imeum-imeum nyan. Sabab janji nyang geupeuna lé Allah ngon manusia, na kheueh janji nyang leubeh jroh sabab meudasai nibak janji keu hai-hai nyang leubeh gét. 7 Seukira jih hana nyang kureueng nibak peujanji nyang phon, deungon lagée nyan hana peureulée teupeuna janji nyang keudua. 8 Teuma Allah ka geuteumé nyang salah ateueh umat Geuh, sampoe Allah meufeureuman, "Ingat, teuma teuka watée jih, Ulôn teuma Lôn peugét peujanjian nyang barô ngon bansa Israel, dan ngon bansa Yehuda. 9 Kon lagée peujanjian nyang ka Lôn peugét ngon indatu awaknyan bak watée Ulôn kawai awaknyan Lôn peuteubiet nibak nanggroe Meusé. Awaknyan hana seutia ubak peujanjian nyang Ulôn peugét ngon awaknyan; nyang kheueh sabab jih hana Lôn pakoe keu awaknyan. 10 Teuma jinoenyoe, nyoe peujanjian nyang Ulôn peugét ngon umat Israel nibak uroe-uroe nyang teuma teuka, feureuman Tuhan: Ulôn teuma kukeubah huköm Lôn lam pikeran awaknyan, dan Lôn tuléh bak até awaknyan. Ulôn teuma jeuet keu Allah awaknyan, dan awaknyan teuma jeuet keu umat Lôn. 11 Awaknyan hana peureulée jipurunoe seusabe kawöm droe, atawa jipeugah ubak syedara jih, 'Turi kheueh ubak Tuhan.' Sabab awaknyan mandum, cut rayeuk, teuma jituri Ulôn. 12 Ulôn teuma kupeu amphon bubena nyang salah nibak awaknyan, dan hana Lôn ingat lé desya-desya awaknyan." 13 Deungon geupeugah saboh peujanjian nyang barô, Allah geupeugét peujanjian nyang phon nyan jeuet keu tuha dan useueng; dan peue nyang ka tuha, teuma reujang gadôh.

Ibrani 9

1 Peujanjian nyang phon na peuratoran-peuratoran iébadat, dan na teuma teumpat iébadat nyang jipeugét lé manusia. 2 Saboh khimah teupeudong nyang nibak bagian keu jih teuboh nan Ruweueng Suci. Nibak teumpat nyan na standar teumpat panyöt, dan na cit meuja ngon ruti nyang teupeuseumah ubak Po teu Allah. 3 Nibak bagian dalam, dilikot gorden nyang keudua, na ruweueng nyang teuboh nan Ruweueng Mahasuci. 4 Lam ruweueng nyan na miseubah nyang teupeugét nibak méuh keu teumpat tot dupa, dan na cit Peutoe Peujanjian nyang bansaboh nyan teuseupoh ngon méuh. Lam Peutoe nyan na beulangöng méuh nyang meuasoe manna, tungkat Nabi Harun nyang ka jitimoh tunéh, dan dua boh leumpeung batée tuléh nyang nibak bagian ateueh jih teutuléh siploh boh peurintah Allah. 5 Di ateueh Peutoe nyan na teuma teukeubah dua Kerub, na kheueh makhlok meusayeub sibagoe lambang Allah geuteuka. Sayeueb nibak bandua makhlok nyan meureuntang ateueh sinutôb Peutoe, na kheueh teumpat peu amphon desya. Teuma banmandum nyan hana hase teupeutrang jinoenyoe seucara saboh-saboh. 6 Meunan kheueh banmandum teuatoe. Tieb-tieb uroe imeum-imeum geutamong nibak bagian keu khimah nyan keugeujak peubuet tugaih awaknyan. 7 Nyang tamong ubak bagian nyang paleng lhok khimah nyan na kheueh imeum agong mantong. Gobnyan geupeubuet lagée nyan sigoe lam sithon. Hai nyan geupeubuet sira geuba darah keugeupeuseumah ubak Po teu Allah sabab droe geuh keudroe dan sabab lé desya-desya nyang jipeubuet ngon hana sadar lé umat Gobnyan. 8 Deungon atoran nyan, Roh Allah geutunyok deungon nyata, bahwa simantong khimah bagian keu nyan mantong na teudong, rot tamong u dalam Ruweueng Mahasuci nyan gohlom teubuka. 9 Nyoe sibagoe lambang jamén jinoenyoe; nyan meumakna bahwa peue-peue nyang ka teupeuseumah dan keureubeuen-keureubeuen beulatang nyang teupeuseumah ubak Allah, hana hase teupeusampoereuna até nurani ureuëng nyang ba peuseumahan. 10 Sabab banmandum upacara nyan na hubongan ngon peunajoh, ié meuneujiéb, dan meubagoe rupa upacara peusuci. Banmandum nyan na kheueh peuratoran-peuratoran lahé nyang meulaku meuguna sampoe ubak watée Allah geupeu barô lom teuma. 11 Teuma Almaseh ka teuka sibagoe Imeum Agong nibak hai-hai nyang gét nyang ka lheueh na. Khimah Tuhan bak teumpat Gobnyan geumubuet sibagoe Imeum Agong na kheueh Khimah nyang leubeh agong dan leubeh sampoereuna. Atra nyan hana jipeugét lé manusia; meukeusut jih, kon asai lam donya nyang geucebta nyoe. 12 Almaseh geutamong lam Ruweueng Mahasuci nyang na lam Khimah nyan teuma cit sigoe sagai keu siumu masa. Bak watée nyan Gobnyan hana geuba darah kaméng agam atawa darah aneuëk leumô keugeupeuseumah; nyang geuba na kheueh darah Geuh keudroe, dan deungon nyan Gobnyan ka geupeubeubaih geutanyoe siumu masa. 13 Darah nibak kaméng dan leumô agam meunan cit abée nibak keureubeuen aneuëk leumô, geupeu guna keuteureutek ateueh ureuëng-ureuëng nyang kutoe meunurot atoran agama mangat awaknyan jeuet keu gleh. Ngon lagée nyan, meunyoe darah dan abée nyan jeuet jipeugleh najih nibak ureuëng-ureuëng nyan, 14 peuteuk lom darah Almaseh! Meulalu Roh nyang keukai, Almaseh geupeu seumah droe Geuh keudroe ubak Po teu Allah sibagoe keureubeuen nyang sampoereuna. Darah Gobnyan teupeugleh até nurani geutanyoe nibak upacara agama nyang hana meuguna, mangat geutanyoe hase tapeutimang Allah nyang udeb. 15 Nyang kheueh sabab jih Almaseh jeuet keu nyang ba ubak peujanjian nyang barô, mangat ureuëng nyang ka geutawök lé Allah jeuet jiteurimong beureukat-beureukat abadi nyang ka geupeujanji lé Allah. Banmandum nyan hase teujadi sabab kana nyang maté, nyan kheueh Almaseh; dan deungon maté Geuh nyan hase teupeubeubaih manusia nibak buet-buet nyang salah nyang ka awaknyan peubuet bak watée peujanjian nyang phon mantong meulaku. 16 Meunyoe na surat warésan, meuseuti teuma beuna bukeuti jih bahwa ureuëng nyang peugét surat nyan ka meuninggai donya. 17 Sabab surat warésan hana meuguna simantong ureuëng nyang peugét surat nyan mantong udeb. Surat nyan jeuet teupeuguna meunyoe nyang peugét surat nyan ka maté. 18 Sabab nyan peujanjian nyang phon pih meuseuti teupeu aséng ngon darah. 19 Phon-phon that Nabi Musa geupeusampoe banmandum peurintah huköm Allah ubak bansa Israel. Óh lheueh nyan Nabi Musa laju geucok darah aneuëk leumô dan darah kaméng agam, laju geujampu ngon ié, óh lheueh geureutek laju ateueh Kitab Huköm-huköm nibak Allah dan ateueh banmandum bansa Israel deungon geupeu guna naleueng hisop dan bulée bubiri nyang wareuna mirah tuha. 20 Sira geupeugah nyan Nabi Musa geupeugah lagée nyoe, "Nyoe kheueh darah nyang teupeusah peujanjian nibak Allah nyang meuseuti gata taát." 21 Óh lheueh nyan ngon cara nyang saban, Nabi Musa geuseutek teuma darah nyan ateueh Khimah Tuhan dan ateueh mandum alat-alat nyang teupeuguna watée iébadat. 22 Keubiet meunurot huköm agama Yahudi, rab banmandum peue-peue mantong teupeusuci ngon darah; dan desya barô kheueh hase teupeu amphon meunyoe na darah nyang ro. 23 Deungon cara lagée nyan kheueh barang-barang nyang meulambang hai-hai nyang di syeuruga, peureulée teupeusuci. Teuma keu hai-hai nyang di syeuruga nyan keudroe teupeureulée keureubeuen nyang jiôh leubeh gét. 24 Sabab Almaseh hana geutamong lam Ruweueng Suci nyang jipeugét lé manusia, nyang na kheueh meulambang Ruweueng Suci nyang sibeuna jih. Almaseh geutamong lam syeuruga keudroe; lam syeuruga nyan Gobnyan meuhadab Allah deumi keugeutanyoe dumna. 25 Imeum agong Yahudi tieb-tieb thon jitamong lam Ruweueng Mahasuci nyang na lam Baét Tuhan deungon teuba darah saboh beulatang. Teuma Almaseh hana geutamong keugeujak peuseumah droe Geuh meu ulang-ulang. 26 Sabab meunyoe lagée nyan, nyan saban cit Gobnyan ka kayém that meudeurita yoh phon donya nyoe teucebta. Teuma nyata jih, jinoenyoe nibak jamén akhé nyoe, Gobnyan teuka sigoe sagai keugeujak sampôh desya deungon cara geukeureubeuen droe Geuh keudroe. 27 Po teu Allah ka geupeu teutab bahwa manusia maté sigoe sagai óh lheueh nyan barô kheueh geupeu sidang lé Allah. 28 Meunan cit deungon Almaseh sigoe sagai teupeuseumah sibagoe keureubeuen keuteusampôh desya ureuëng ramé. Gobnyan teuma teuka lom bak watée nyang keudua goe, kon geujak peuseuleusoe soai desya, teuma keugeujak peuseulamat ureuëng-ureuëng nyang teungoh jipreh-preh Gobnyan teuka.

Ibrani 10

1 Huköm agama Yahudi teukalon ngon hana nyata keu hai-hai nyang jroh nyang teuma teuka, dan kon gamba nyang sibeuna jih nibak hai-hai nyan. Hana mungken huköm nyan hase teupeusampoereuna ureuëng nyang teuka jak seumah Allah deungon jiba peuseumahan, bah pih tieb-tieb thon hana putôh jiba keureubeuen-keureubeuen nyang saban. 2 Seukira jih beutôi ureuëng-ureuëng nyang seumah Allah nyan biet-biet ka teupeu gleh nibak desya, awaknyan hana lé nibak jih peurasaan meudesya, dan keureubeuen hana jipeuseumah lé. 3 Teuma teunyata keureubeuen-keureubeuen nyang jipeuseumah tieb-tieb thon nyan sibagoe peuingat keu manusia keuhai desya-desya jih, 4 sabab keubiet darah leumô dan darah kaméng agam hana hase teusampôh desya. 5 Nyang kheueh sabab jih watée Almaseh geutamong lam donya, Gobnyan geupeugah ubak Po teu Allah, "Droeneueh hana peureulée keureubeuen dan nyang teupeuseumah; nyang sikeubiet jih Droeneueh ka neukeubah tuboh keu Ulôn. 6 Droeneueh hana peureulée keu keureubeuen nyang teutot atawa keureubeuen keu teupeu amphon desya. 7 Laju Ulôn peugah, 'Nyoe kheueh Ulôn, ya Allah! Ulôn teuka keuneuk jak peubuet keuheundak Droeneueh, lagée nyang na teutuléh keuhai droe Ulôn lam Alkitab.' " 8 Phon-phon that Almaseh geupeugah, "Droeneueh hana peureulée keureubeuen dan nyang teupeuseumah; Droeneueh hana peureulée keu keureubeuen beulatang nyang teutot sibagoe peuseumahan dan teuma keureubeuen peu amphon desya." Almaseh geupeugah lagée nyan, bah pih banmandum keureubeuen nyan teupeuseumah meunurot huköm agama Yahudi. 9 Óh lheueh nyan Almaseh geupeugah, "Nyoe kheueh Ulôn, ya Allah! Ulôn teuka keuneuk jak peubuet keuheundak Droeneueh." Ngon lagée nyan Allah geusampôh mandum keureubeuen nyang ka treb nyan, dan geugantoe ngon keureubeuen Almaseh. 10 Isa Almaseh ka geupeubuet peue nyang geukeuheundak lé Po teu Allah dan geupeu seumah droe Geuh sibagoe keureubeuen. Deungon peuseumahan nyan, nyang geupeubuet sigoe sagai keu siumu masa, geutanyoe mandum geupeu gleh nibak banmandum desya. 11 Tieb-tieb imeum Yahudi jipeubuet buet jih sibagoe imeum tieb-tieb uroe, dan meu ulang-ulang gobnyan peuseumah keureubeuen-keureubeuen nyang saban. Teuma keureubeuen-keureubeuen nyan sagai-sagai hana hase teusampôh desya. 12 Nyang sikeubiet jih, Almaseh geupeu seumah saboh keureubeuen keu teupeu amphon desya, dan keureubeuen nyan teutab jeuet keu siumu masa. Óh ka lheueh geupeu seumah keureubeuen nyan, Almaseh geuduek blaih uneuen Allah dan geumat peurintah meusajan-sajan ngon Gobnyan. 13 Dan jinoenyoe Almaseh geupreh sampoe Allah geupeu taklok banmandum musoh-musoh Geuh nyan ubak Gobnyan. 14 Teuma, deungon saboh keureubeuen, Almaseh geupeu sampoereuna ureuëng-ureuëng nyang ka teupeu gleh nibak desya. 15 Keuhai nyan Roh Allah pi na geumeusaksi keugeutanyoe. Roh Allah geupeugah, 16 " 'Nyoe kheueh peujanjian nyang teuma Ulôn peugét ngon awaknyan bak uroe-uroe nyang teuma teuka,' feureuman Tuhan, 'Ulôn teuma kukeubah huköm-huköm Lôn lam até awaknyan dan Lôn tuléh lam pikeran awaknyan.' " 17 Allah meufeureuman lom, "Ulôn teuma Lôn peutuwoe keuhai desya-desya dan buet-buet nyang jeuhet awaknyan." 18 Deungon lagée nyan, desya-desya dan buet-buet nyang jeuhet nyan ka geupeu amphon, ngon lagée nyan hana peureulée lé teupeuseumah keureubeuen peu amphon desya. 19 Hei Syedara-syedara, deungon maté Isa nyan geutanyoe jinoenyoe ka tajeuet ta tamong lam Ruweueng Mahasuci. 20 Isa ka geupeuhah saboh rot nyang barô keugeutanyoe, na kheueh rot nyang teubri udeb. Rot nyan meulalu gorden, nyan kheueh tuboh Isa keudroe. 21 Dan jinoenyoe keugeutanyoe na sidroe Imeum Agong, nyang meutanggong jaweueb ateueh Baét Allah. 22 Lé sabab nyan, jak kheueh geutanyoe tapeurab ubak Allah ngon até nyang jujoe dan iman nyang kong; ngon até nyang ka teupeu gleh nibak peurasaan meusalah, dan deungon tuboh nyang ka teupeu gleh ngon ié nyang jeureunéh. 23 Bah kheueh tanyoe tamumat nyang kong ubak harapan nyang tanyoe angkée, sabab Allah jeuet teupatéh dan Gobnyan geupeutupat janji. 24 Dan bah kheueh geutanyoe saléng tameungieng, mangat tanyoe hase saléng tabri durongan mangat tateumé peubuet gaséh sabe keudroe-droe dan tapeubuet hai-hai nyang gét. 25 Bah kheueh geutanyoe teutab tameusapat meusajan-sajan, dan bék kheueh lalée lagée ureuëng laén. Geutanyoe beuleubeh seutia dan saléng tapeukong, sabab tanyoe tateupeue bahwa hana treb lé Tuhan teuma teuka. 26 Sabab meunyoe haba nyang beutôi nibak Allah ka trok ubak geutanyoe, teuma geutanyoe teutab tapeubuet desya ngon tasaja, ngon lagée nyan ka hana lé keureubeuen keuteusampôh desya geutanyoe. 27 Cit saboh nyang na bak tanyoe dan atra nyan na kheueh tameuhadab ubak peungadelan Allah dan apui beungéh Gobnyan nyang teuma teutot habéh ureuëng-ureuëng nyang lawan Gobnyan! 28 Ureuëng nyang hana taát ubak huköm nyang geubri lé Nabi Musa, teuhuköm maté hana amphon, meunyoe ateueh meusaksi dua atawa lhée droe ureuëng, jihnyan na bukeuti salah. 29 Padub na geuhon huköm jih ateueh ureuëng nyang gilo-gilo Aneuëk Allah. Ureuëng nyan jianggab hina darah peujanjian Allah, na kheueh keuhai maté Almaseh nyang teupeu gleh jih nyan nibak desya. Jihnyan ka jihina Roh nyang bri rakhmat. 30 Tanyoe tateupeue soe nyang sibeuna jih nyang meututoe, "Ulôn teuma kubalah! Ulôn teuma kuhuköm!" dan nyang peugah, "Tuhan teuma geupeu hakém umat Gobnyan." 31 Lumpah that phet meunyoe rhot lam jaroe Allah Nyang Udeb! 32 Ingat kheueh pakriban keuadaan Syedara-syedara bak watée yoh masa ilée. Bak watée nyan, óh ka lheueh cahya Allah geupeue trang ateueh gata, gata jai that meudeurita; teuma gata teutab meujuang ngon biet-biet hana putôh asa. 33 Na teuma gata jihina dan jipeusaneuet ateueh gata ngon cara hana gét dikeue ureuëng ramé. Dan na teuma watée jih gata meudeurita meusajan ngon awaknyan nyang jipeusaneuet lagée nyan, 34 dan gata meusajan tarasa ngon ureuëng nyang seudeh lam peunjara. Dan bak watée nyang na nibak gata jireupah, gata teurimong nyan ngon mangat até, sabab gata tateupeue bahwa gata mantong na sapeue-sapeue nyang leubeh gét, nyang teuma meuteun siumu masa. 35 Lé sabab nyan, bék kheueh putôh asa, sabab meunyoe gata teutab meuiman, na upah nyang paleng rayeuk keuhai nyan! 36 Gata peureulée that beusaba, mangat gata hase tapeubuet keuheundak Allah dan deungon lagée nyan tateurimong peue nyang ka geupeu janji. 37 Sabab lam Alkitab na teutuléh lagée nyoe, "Teuma sikeujab teuk, Gobnyan teuma teuka atra nyan, dan teuma reujang teuka; Gobnyan hana meutanggoh-tanggoh keuhai teuka Geuh. 38 Dan umat Lôn nyang beuna teuma jipatéh dan udeb; teuma meunyoe lamkawan awaknyan na nyang surot, Ulôn hana galak keu jih nyan." 39 Geutanyoe nyoe kon umat nyang surot dan sisat. Nyang keubiet jih, geutanyoe na kheueh umat nyang meuiman ubak Allah dan nyang geupeu seulamat.

Ibrani 11

1 Meuiman nyan makna jih keubiet yakén ngon biet-biet keu hai-hai nyang teuharab nyan, na keupastian keu hai-hai nyang hana deuh teukalon. 2 Sabab meuiman, teuma lé ureuëng-ureuëng jamén ilée geuharôk lé Po teu Allah. 3 Sabab meuiman, geutanyoe teuma muphom bahwa álam nyoe geucebta lé feureuman Allah; teuma, peue nyang hase teukalon, nyan na nibak peue nyang hana hase teukalon. 4 Sabab meuiman, lé Habel jipeuseumah ubak Po teu Allah keureubeuen nyang leubeh gét nibak keureubeuen Kain. Sabab lé iman jih nyan, Habel geuteurimong lé Allah sibagoe ureuëng nyang gét, sabab deuh that bahwa Allah geuteurimong peuseumahan jih. Habel ka meuninggai donya, teuma sabab lé iman jih nyan, teuma jih nyan mantong meututoe trok bak watée nyoe. 5 Sabab meuiman, Henokh hana maté, lom teuma teubeuôt dan teuba ubak Allah. Hana meusidroe pi nyang hase meurumpok ngon jih nyan, sabab Henokh nyan ka geubeuôt lé Po teu Allah. Lam Alkitab na teutuléh bahwa sigohlom Henokh teubeuôt, gobnyan jipeugalak até Allah. 6 Meunyoe tan iman, hana meusidroe pih nyang hase jipeugalak até Allah. Sabab ureuëng nyang teuka ubak Po teu Allah meuseuti jimeuiman ubak Allah bahwa Gobnyan na, dan bahwa Allah geubri balasan ubak ureuëng nyang mita Gobnyan. 7 Sabab meuiman, nyang kheueh sabab Nabi Nuh geubri tée lé Po teu Allah keu hai-hai nyang teujadi singoh dudoe, nyang hana hase jikalon lé droe jih keudroe. Nabi Nuh taát ubak Allah akhé jih gobnyan geupeugét saboh kapai nyang óh dudoe jeuet keunyata bahwa lé kapai nyan jipeuseulamat droe geuh dan keuluwarga gobnyan. Deungon lagée nyan donya teuhuköm, seudang Nabi Nuh keudroe sabab lé iman gobnyan geupeugah lé Allah sibagoe ureuëng nyang gét. 8 Sabab meuiman, nyang kheueh sabab Nabi Ibrahim geutaát ubak Allah bak watée Allah geutawök gobnyan dan geuyue jak gobnyan u nanggroe nyang ka Allah peujanji nyan. Laju Nabi Ibrahim geujak deungon hana geutuho ho gobnyan teuma geujak. 9 Deungon meuiman, Nabi Ibrahim tinggai lagée ureuëng aséng nibak nanggroe nyang ka geupeu janji lé Allah keu geuh nyan. Nabi Ibrahim tinggai nibak teumpat nyan lam khimah. Meunan cit teuma Nabi Ishaq ngon Nabi Yakub, nyang teurimong janji nyang saban nibak Po teu Allah. 10 Sabab Nabi Ibrahim teungoh geupreh-preh banda nyang ka geureuncana dan geupeudong deungon keunaleueng nyang kong. 11 Sabab meuiman, Nabi Ibrahim hase meuteumé keuturonan nibak Sara, bah pih Nabi Ibrahim ka tuha lumpah na, dan Sara keudroe mandul. Nabi Ibrahim yakén that bahwa Allah teutab geupeutupat janji Geuh. 12 Bah pi Nabi Ibrahim bak watée nyan lagée ureuëng nyang ka maté tuboh geuh, teuma gobnyan meuteumé keuturonan nyang jai, nyang lé jih hana teuhingga -- lagée nyan jai jih bintang di langét dan anoe di panté. 13 Banmandum ureuëng nyan teutab meuiman trok án maté. Awaknyan hana jiteurimong hai-hai nyang geupeu janji lé Po teu Allah, teuma jikalon dan jisambot nibak jiôh. Dan deungon nyan awaknyan jipeugah bahwa awaknyan na kheueh ureuëng aséng dan ureuëng meuranto nibak bumoe nyoe. 14 Ureuëng nyang peugah lagée nyan deuh teukalon ngon nyata bahwa awaknyan teungoh jimita nanggroe nyang singoh jeuet keu tanoh ié awaknyan. 15 Kon nanggroe nyang ka awaknyan tinggai nyan nyang awaknyan pike. Sabab meunyoe lagée nyan, teuma ka jai that keuseumpatan nibak awaknyan keujigisa u nanggroe nyan. 16 Teuma nyan deuh jih, awaknyan jimeucen that keu saboh nanggroe nyang leubeh gét, na kheueh nanggroe nyang na lam syeuruga. Nyang kheueh sabab jih Allah hana malée meunyoe awaknyan jipeugah Gobnyan Allah awaknyan, sabab Allah ka geukeubah saboh banda keu awaknyan. 17 Sabab meuiman cit teuma, Nabi Ibrahim geupeu seumah Nabi Ishaq sibagoe keureubeuen watée gobnyan geucuba lé Po teu Allah. Ubak nabi Ibrahim kheueh Allah geubri janji Geuh, teuma lé Nabi Ibrahim rila geujok aneuëk gobnyan nyang tunggai nyan. 18 Po teu Allah ka lheueh meufeureuman ubak Nabi Ibrahim, "Meulalu Nabi Ishaq nyoe kheueh gata teuma meuteumé keuturonan nyang ka Lôn meujanji ubak gata." 19 Nabi Ibrahim yakén that bahwa Gobnyan hase geupeu udeb lom Nabi Ishaq nibak maté -- teuma, jeuet teupeugah, Nabi Ibrahim ka geuteurimong lom Nabi Ishaq nibak maté. 20 Sabab meuiman, teuma Nabi Ishaq geumeujanji beureukat-beureukat ubak Nabi Yakub dan Esau keu masa ukeue. 21 Sabab meuiman kheueh, teuma sigohlom Nabi Yakub meuninggai, gobnyan laju geupeutron beureukat jih ubak aneuëk-aneuëk Nabi Yusuf -- deungon meusadeue ubak ulée tungkat jihnyan dan taseumah Allah. 22 Sabab meuiman, Nabi Yusuf -- watée karab meuninggai donya -- geumeututoe keuhai jiteubiet umat Israel di nanggroe Meusé, dan geutinggai amanat keuhai peue nyang meuseuti jipeubuet ateueh manyét geuh nyan. 23 Sabab meuiman, ureuëng tuha Nabi Musa geusöm gobnyan na lhée buleuen treb jih óh ka lheueh gobnyan lahé. Awaknyan jikalon bahwa gobnyan sidroe aneuëk nyang ceudah, dan awaknyan hana teumakot geulawan peurintah raja. 24 Sabab meuiman, Nabi Musa óh ka rayeuk, hana geutem jipeugah aneuëk nibak putroe Meusé. 25 Gobnyan leubeh galak udeb meudeurita meusajan-sajan ngon umat Po teu Allah nibak udeb mangat nyang sikeujab teuma peunoh lam desya. 26 Nabi Musa meurasa bahwa jiôh leubeh muyuem keunong hina deumi Raja Peuseulamat nyang geupeu janji lé Allah nyan nibak meuteumé mubagoe atra lam nanggroe Meusé, sabab Nabi Musa meuharab upah watée uroe dudoe. 27 Sabab meuiman, Nabi Musa geutinggai nanggroe Meusé ngon hana geurasa takot geubeungéh lé raja. Nabi Musa geumaju ubak tujuan gobnyan siulah-ulah gobnyan ka geungieng Po teu Allah nyang hana deuh teukalon nyan. 28 Sabab meuiman, Nabi Musa geupeugét Paskah dan geupeutron peurintah mangat jisipreuk darah nibak tieb-tieb pintoe rumoh ureuëng Israel mangat jeuet Malaikat Mawöt bék geupoh maté aneuëk tuha awaknyan. 29 Sabab meuiman, teuma ureuëng-ureuëng Israel hase jijeumeurang laôt Mirah, siulah-ulah awaknyan hase jijak ateueh tanoh nyang tho, dan di ureuëng-ureuëng Meusé habéh jiuét lé laôt nyan, watée awaknyan jicuba jijeumeurang cit teuma. 30 Sabab meuiman, ureuëng-ureuëng Israel hase jipeujeuet bintéh-bintéh beuton di Yerikho reuloh óh lheueh jikeulileng lé awaknyan tujoh uroe. 31 Sabab meuiman cit teuma, Rahab, inong lunte nyan, hana rhoh meusajan teupoh maté lamkawan ureuëng-ureuëng nyang lawan Allah, sabab inong nyan jiteurimong ngon mangat até ureuëng-ureuëng Israel nyang teungoh muluem. 32 Syedara, ulôn jeuet mantong hana putôh-putôh lôn peugah haba, teuma watée nyang hana seb nibak ulôn. Sabab ulôn gohlom lôn peugah Gideon, Barak, Simson, Yefta, Nabi Daud, Samuel, dan nabi-nabi. 33 Sabab meuiman, teuma awaknyan ka jipeutalo bubena keurajeuen. Awaknyan jipeubuet peue nyang beutôi, akhé jih jiteurimong peue nyang ka geupeu janji lé Allah. Awaknyan jisumpai bubena babah singa, 34 jipeulon apui nyang teungoh hu meuhúb-húb, teupeusi nibak mata peudeueng nyang tajam. Awaknyan leumoh, akhé jih jeuet keu teuga; awaknyan campen lam mideuen prang akhé jih hase jipeutalo bubena pasokan bansa aséng. 35 Sabab meuiman, teuma lé ureuëng-ureuëng inong meuteumé lom ngon ureuëng-ureuëng jih nyang ka maté. Na teuma nyang rila teuseksa sampoe maté, dan jitem watée teupeubeubaih, sabab jitem udeb lom teuma nibak saboh udeb nyang leubeh gét. 36 Na nyang keunong hina, keunong seunuét, ji-ikat ngon ranté dan jipeutamong lam glab. 37 Awaknyan jirhom ngon batée sampoe maté, na nyang jikoh ngon gogajo, dan nyang jireupang ngon peudeueng. Awaknyan jimeurawöh ngon peukayan nibak kulét bubiri atawa kulét kaméng; awaknyan gasien, ji-iénanya dan keunong ázeb. 38 Donya nyoe kon teumpat nyang jroh nibak awaknyan. Awaknyan jimeurawöh lam padang pasi dan lam bukét-bukét, lom tinggai lam guha-guha dan lam ruhueng tanoh. 39 Keubiet rayeuk that meunang nyang jiteurimong lé mandum ureuëng nyan. Sabab iman awaknyan keudroe! Teuma awaknyan hana jiteurimong peue nyang geupeu janji lé Allah, 40 sabab Allah na reuncana nyang leubeh gét keu geutanyoe. Reuncana Gobnyan na kheueh bahwa meusajan ngon geutanyoe, awaknyan jeuet keu ureuëng nyang sampoereuna.

Ibrani 12

1 Syedara, keuhai geutanyoe keudroe, ban sikeulileng tanyoe na dan jai lumpah na saksi! Sabab nyan, jak kheueh geutanyoe tatiek banmandum nyang jipeubrat tanyoe dan desya nyang sabe meuleukek nibak geutanyoe. Dan jak kheueh geutanyoe deungon biet-biet tatiyeub deungon biet-biet that meutunang plueng nyang na dikeue geutanyoe. 2 Bah kheueh mata tanyoe tatuju ubak Isa, sabab Gobnyan kheueh nyang peubeudôh iman geutanyoe dan nyang peulara phon awai trok án akhé. Isa ék geupeuteun deurita bak kayée saleb! Gobnyan hana geupakoe bahwa maté bak kayée saleb nyan na kheueh buet nyang paleng malée. Nyang geuingat na kheueh keugeumbiraan nyang geuteurimong watée nyang teuma teuka. Jinoenyoe Gobnyan geuduek blaih uneuen takhta Allah dan geumat peurintah meusajan-sajan ngon Gobnyan. 3 Cuba kheueh pike pakriban ázeb jih Isa watée geuhadab ureuëng-ureuëng nyang meudesya nyang lawan Gobnyan hana ngon peusa! Sabab nyan bék kheueh cut até dan putôh asa. 4 Sabab lam meujuang droeneueh talawan desya, gata gohlom na meujuang sampoe roe darah. 5 Dan bék kheueh tatuwoe naseuhat Allah nyoe, nyang geubri ubak gata sibagoe aneuëk-aneuëk Gobnyan: "Aneuëk Lôn, simak kheueh beugét-gét ajaran Tuhan, dan bék kheueh cut até meunyoe Gobnyan beungéh keu gata. 6 Sabab Tuhan geuseupôt tieb-tieb ureuëng nyang geugaséh, dan Gobnyan geusunuét tieb-tieb ureuëng nyang geu angkée sibagoe aneuëk Geuh." 7 Gata teun kheueh meunyoe geusunuét lé Allah sibagoe seupôt lé sidroe bapak. Sabab, peu kheueh na sidroe aneuëk nyang hántom keunong huköm lé ayah jih? 8 Meunyoe gata hana meusajan teuhuköm lagée banmandum aneuëk geuh nyang laén nyoe saban cit gata kon aneuëk sah, teuma aneuëk nyang hana sah. 9 Geutanyoe na bapak lam donya. Gobnyan geupurunoe tanyoe, dan tanyoe horeumat bak gobnyan. Ngon lagée nyan, peu kheueh u ateueh Bapak rohani tanyoe nyang na lam syeuruga, ka teuntée geutanyoe leubeh tatukui lom ubak Gobnyan mangat tanyoe udeb. 10 Ureuëng syiek geutanyoe nyang na lam donya geupurunoe bak geutanyoe deungon watée nyang teubataih, meunurot peue nyang geurasa gét. Teuma Allah geupurunoe tanyoe na kheueh guna keu gét tanyoe keudroe, mangat tanyoe hase jeuet keusuci meusajan-sajan ngon Gobnyan. 11 Beutôi bak watée tanyoe geupurunoe, huköman nyan biet hana mangat até tanyoe, nyang na peudeh jih. Teuma óh lheueh nibak nyan, keugeutanyoe nyang ka geupurunoe, huköman nyan jeuet keusabab geutanyoe udeb meunurot keuheundak Po teu Allah, dan teupeuhase peurasaan seujahteura ateueh geutanyoe. 12 Sabab nyan, peukong kheueh jaroe gata nyang leumoh dan teuôt gata nyang meugok-gok nyan! 13 Gata jak kheueh sabe ateueh rot nyang sare, mangat gaki gata nyang capiek nyan hana meusalah, teuma jeuet keu puléh. 14 Useuha kheueh keu udeb rukon ngon mandum ureuëng. Meunan cit useuha kheueh teuma keu udeb suci, khusos keu Tuhan. Sabab hana meusidroe pi nyang hase jikalon Tuhan meunyoe jihnyan hana udeb lagée nyan. 15 Jaga kheueh bék na sampoe meusidroe pi nyang teubiet nibak lingkongan ngon nibak jroh até Allah, mangat bék sampoe na lagée seunaman nyang meuracon lamkawan gata akhé jih jipeuteuka bala dan jipeurusak ureuëng ramé ngon racon nyan. 16 Jaga kheueh mangat bék na nyang udeb cabui atawa hana jihareuga nyang hai-hai rohani, lagée jipeubuet lé Esau. Jipeubloe hak jih sibagoe aneuëk tuha, teuma keu saboh pingan bu. 17 Gata tateupeue bahwa óh dudoe Esau meuheuét jikeuneuk meuteumé beureukat nyan nibak bapak jih, teuma jihnyan geutulak. Sabab bah kheueh ngon jimoe ba-e jihnyan jimita rot keu jipeugét buet jih nyang salah nyan, ruweueng keuhai nyan ka hana lé. 18 Syedara-syedara hana tajak tahadab sapeue-sapeue lagée nyang jipeukeue lé bansa Israel yoh masa ilée. Awaknyan jipeukeue sapeue-sapeue nyang jeuet jigeue, na kheueh Gunong Sinai deungon apui nyang teungoh hu; awaknyan jipeukeue nyang seupôt, glab dan angén badée; 19 awaknyan jipeukeue ubak su beureuguih, dan meubagoe su nyang meutaga. Bak watée ureuëng-ureuëng Israel jideungoe su nyan, awaknyan jilakée ngon meuharab that mangat su nyan hana jimarit lé keu awaknyan. 20 Sabab awaknyan hana ék jiteun watée jideungoe peurintah nyang jipeugah lé su nyan. Sabab su nyan jipeugah, "Banmandum nyang keunong nibak gunong nyoe, hana keucuali peu kheueh jih nyan beulatang atawa soe mantong, harôh teu rhom ngon batée sampoe maté." 21 Peue nyang jikalon lé ureuëng-ureuëng Israel nyan meunan hebat sampoe Nabi Musa geupeugah, "Ulôn teumakot ngon yo!" 22 Nyang biet jih, gata ka tateuka ubak Bukét Sion dan banda Allah nyang udeb, na kheueh Yerusalem nyang na lam syeuruga deungon meuribée-ribée malaikat jih. 23 Gata tapeuna saboh meurokpakat nyang meuriah -- meurok pakat keu aneuëk-aneuëk tuha Po teu Allah, nyang nan-nan jih na teudafeutar lam syeuruga. Gata tateuka meuhadab Allah, Hakém banmandum umat manusia. Gata meuhadab ngon roh-roh ureuëng jroh-jroh, nyang ka geupeujeuet sampoereuna. 24 Gata tateuka meuhadab Isa, peurantara keu peujanjian nyang barô nyan; gata tameuhadab ubak darah nyang teureutek nyang teujamin keu hai-hai nyang jiôh leubeh gét nibak nyang jijamin lé darah Habel. 25 Sabab nyan, beu até-até kheueh, bék sampoe gata hana tatem deungoe Gobnyan nyang meututoe nyan. Ureuëng nyang hana jitem deungoe Gobnyan nyang teuka u bumoe dan geupeusampoe feureuman nibak Allah, ureuëng nyan hana hase jipeuplueng droe. Peuteuk lom tanyoe nyang tadeungoe Gobnyan meututoe lam syeuruga! Meunyoe tanyoe hana tatem deungoe nyan, panena mungken geutanyoe hase teuhinda! 26 Bak watée nyan su Geuhnyan meuhayak bumoe. Teuma jinoenyoe Gobnyan meujanji, "Sigoe teuk, Ulôn teuma Lôn peugeumpa kon mantong bumoe meunan cit langét." 27 Kheun "sigoe teuk" sibagoe teutunyok bahwa bansigom donya nyang ka geucebta teuma geuyok-yok dan geuböih ho laén, mangat jeuet nyang tinggai na kheueh nyang hana hase meuhayak. 28 Sabab nyan, bah kheueh geutanyoe talakée teurimong gaséh ubak Po teu Allah, sabab tanyoe tateurimong nibak Gobnyan saboh keurajeuen nyang hana hase meuhayak. Bah kheueh tanyoe talakée teurimong gaséh dan tameu iébadat ubak Allah deungon horeumat dan teumakot, meunurot cara nyang geulakée lé Gobnyan keudroe. 29 Sabab Allah geutanyoe lagée apui nyang jipeuhangôh peue nyang na.

Ibrani 13

1 Bah kheueh gata saléng tameugaséh sidroe ngon nyang laén sibagoe ureuëng-ureuëng Kristen nyang meusyedara. 2 Bék seugan-seugan gata teurimong lam rumoh gata ureuëng-ureuëng nyang gohlom gata meuturi. Sabab, deungon na gata peubuet nyang lagée nyan, ka lheueh na ureuëng, ngon hana sadar, ka jiteurimong malaikat lam rumoh jih. 3 Ingat kheueh ureuëng-ureuëng nyang na lam glab, siulah-ulah gata pi na meusajan awaknyan. Dan ureuëng-ureuëng nyang keunong iélanya lé gob, bah kheueh gata ingat keu awaknyan siulah-ulah gata pih jipeusaneut lagée nyan cit teuma. 4 Banmandum ureuëng harôh jitunyok sikeub horeumat ubak leumbaga meukawen, nyang kheueh sabab jih lakoe binoe beuseutia sidroe ngon nyang laén. Ureuëng nyang cabui dan ureuëng nyang meumukah teuma geupeue sidang lé Po teu Allah. 5 Bék kheueh udeb gata jikuasa lé cinta keu péng, teuma bah kheueh gata pueh ngon peue nyang na nibak gata. Sabab Allah ka geumeufeureuman, "Ulôn hana Lôn peubiyeu atawa Lôn tinggai gata." 6 Lé sabab nyan tanyoe tajeuet peugah, "Tuhan na kheueh nyang tulông lôn, ulôn hana teumakot. Peue nyang hase jipeubuet manusia ateueh ulôn?" 7 Bék kheueh tuwoe ubak peumimpén-peumimpén gata nyang peusampoe peusan Allah keu gata. Ngieng kheueh pakriban awaknyan udeb dan pakriban teuma awaknyan maté, dan cuntoh kheueh iman awaknyan. 8 Isa Almaseh teutab saban, bah kheueh yoh masa ilée, jinoe, dan trok siumu masa. 9 Bék kheueh peubiyeu mubagoe rupa ajaran nyang kon-kon jipeusisat gata. Até geutanyoe bah kheueh Allah nyang jroh nyang peukong, nyan kheueh nyang gét; bék lé mubagoe atoran keuhai peunajoh. Ureuëng yoh masa ilée jitaát ubak atoran-atoran nyan hana meuteumé sapeue. 10 Tanyoe na saboh miseubah keu teumpat tapeuseumah keureubeuen keu Po teu Allah. Dan imeum-imeum nyang meulayani bak Khimah Tuhan, hana hak jimakheun keureubeuen nyang na ateueh miseubah. 11 Darah beulatang nyang teupeuseumah sibagoe keureubeuen keu teupeu amphon desya, geuba lé imeum agong ubak Ruweueng Mahasuci, teuma bangke beulatang nyan keudroe jitot diluwa khimah-khimah. 12 Nyang kheueh sabab jih Isa maté diluwa pintoe geureubang banda keu teupeu gleh umat Gobnyan nibak desya ngon darah Geuh keudroe. 13 Sabab nyan, jak kheueh tajak ubak Gobnyan diluwa khimah-khimah dan meusajan jihina ngon Gobnyan. 14 Sabab dibumoe hana teumpat tinggai nyang keukai keugeutanyoe; tanyoe tamita teumpat tinggai keu nyang teuma teuka. 15 Sabab nyan, ngon peurantaraan Isa, bah kheueh geutanyoe sabe tapujoe-pujoe Allah; nyang lagée nyan na kheueh sibagoe keureubeuen syukoe geutanyoe keu Gobnyan, nyang tanyoe peuseumah rot bibi tanyoe keu tapeumulia nan Gobnyan. 16 Bék tuwoe tapeubuet nyang jroh dan saléng tateumulông, sabab nyoe kheueh keureubeuen-keureubeuen nyang teupeu mangat até Allah. 17 Seutôt kheueh peurintah peumimpén-peumimpén gata, dan tundok kheueh ubak awaknyan. Sabab awaknyan sabe geukalon jiwa gata, dan awaknyan harôh meutanggong jaweueb ubak Allah. Meunyoe gata taát ubak awaknyan, awaknyan hase jimubuet ngon mangat até; meunyoe hán, teuma awaknyan jimubuet ngon seudeh até, dan nyang lagée nyan biet hana laba nibak gata. 18 Bék putôh-putôh meudoá keukamoe. Kamoe yakén até nurani kamoe murni, sabab lam hai peue mantong kamoe meutem mubuet peue mantong nyang beutôi. 19 Khusos jih ulôn meulakée ngon meuharab that, mangat gata meudoá keu ulôn mangat Allah ngon bagaih-bagaih geuba ulôn nyoe ubak gata. 20 Allah ka geupeu udeb Tuhan geutanyoe Isa nibak maté. Sabab maté Geuh nyan Gobnyan jinoenyoe Geumbala Agong keu geutanyoe, nyan kheueh bubiri-bubiri Gobnyan. Lé maté Geuh nyan cit teuma teupeusah peujanjian keukai nyang ka geupeugét lé Allah ngon geutanyoe. 21 Seumoga Allah pangkai seujahteura nyan geupeue leungkab gata ngon peue-peue mantong nyang jroh nyang gata peureulée keu gata peubuet keuheundak Gobnyan. Seumoga, deungon peurantaraan Isa Almaseh, Allah geumubuet lam droe geutanyoe, peue nyang geukeuheundaki. Bah kheueh Almaseh jipujoe keu siumu masa! Amin. 22 Ulôn meuharab mangat gata tasimak naseuhat-naseuhat lôn nyoe ngon saba, sabab surat ulôn nyoe hana padub na panyang. 23 Bah kheueh gata tateupeue bahwa rakan geutanyoe Timotius ka teupeubeubaih nibak peunjara. Meunyoe jih nyan ka jijak ubak teumpat lôn nyoe, ulôn teuma kuba bak watée ulôn jak saweue gata singoh. 24 Peutrok kheueh saleuem kamoe ubak mandum peumimpén droeneueh dan ateueh umat Allah. Dan teurimong cit teuma saleuem nibak syedara-syedara nyang na di Italia. 25 Seumoga Tuhan geubri beureukat ateueh Syedara banmandum.

Yakobus 1

1 Syedara-syedara umat Allah banmandum nyang na meusipreuk bansigom donya! Saleuem nibak ulôn, Yakobus, hamba Allah dan hamba Tuhan Isa Almaseh. 2 Syedara-syedara! Meunyoe gata jiteuka meubagoe macam cubaan, keubah kheueh lam até gata bahwa nyan na kheueh laba keu gata. 3 Sabab gata tateupeue, meunyoe gata teutab meuiman ubak Tuhan bak watée teuka cubaan nyan ateueh gata, akibat jih na kheueh: gata jeuet keu ureuëng nyang tabah. 4 Jaga kheueh mangat tabah até gata nyan meukeumang sabe sampoe gata biet-biet sampoereuna dan hana kureueng lam hai peue mantong. 5 Meunyoe na sidroe lamkawan gata nyang hana bijaksana, bah kheueh jihnyan jilakée ubak Allah, ngon lagée nyan Allah teuma geubri keubijaksanaan nyan bak jih; sabab keu tieb-tieb ureuëng, Allah geubri ngon murah até dan ngon peurasaan gaséh sayang. 6 Teuma ureuëng nyang meulakée, harôh meuiman; ureuëng nyan hana jeuet waih-waih. Sabab ureuëng nyang waih-waih na kheueh lagée geulumbang lam laôt nyang jipôt lé angén keudeh keunoe. 7 Ureuëng nyang lagée nyan hana teutab pikeran jih; sapeue hana hase jicok keuputosan lam hai peue mantong nyang jipeubuet lé ureuëng lagée nyan. Sabab nyan, bék jimeuharab sapeue nibak Tuhan. 9 Ureuëng Kristen nyang gasien bah kheueh meurasa mangat até meunyoe Po teu Allah geupeu manyang jih nyan. 10 Dan ureuëng Kristen nyang kaya pih bah kheueh meurasa mangat até teuma, meunyoe Po teu Allah geupeumiyueb jih nyan. Sabab ureuëng kaya teuma gadôh lagée bungöng naleueng. 11 Bak watée mata uroe jiteubiet ngon cahya jih nyang seu-uem, ngon lagée nyan naleueng nyan laju layée dan lurôh kheueh bungöng jih dan gadôh kheueh ceudah nibak bungöng nyan. Meunan kheueh teuma ngon ureuëng kaya; jih nyan teuma hanco bak watée jihnyan teungoh jipeujak useuha jih. 12 Mubahgia kheueh ureuëng nyang tabah watée ateueh jih keunong cubaan. Sabab óh ka lheueh jihnyan meuhase lam cubaan nyan, ureuëng nyan teuma jiteurimong upah jih, nyan kheueh udeb nyang ka geupeu janji lé Po teu Allah keu ureuëng-ureuëng nyang gaséh ubak Allah. 13 Meunyoe sidroe-droe ureuëng teupeudaya ngon cubaan nyang lagée nyan, bék kheueh jipeugah, "Godaan nyoe teuka nibak Allah," sabab Allah hana hase teupeudaya lé nyang jeuhet, dan hana teuma geupeu daya soe-soe mantong. 14 Teuma ureuëng teupeudaya meunyoe jihnyan teutarek dan meunafeusu ngon keuheundak jih keudroe nyang jeuhet. 15 Óh lheueh nyan, meunyoe keuheundak jih keudroe jipeuseutôt, ngon lagée nyan lahé kheueh desya; dan meunyoe desya ka masak ateueh ureuëng nyan, akibat jih na kheueh maté. 16 Bék kheueh gata keunong peungét, Syedara-syedara lôn nyang lôn gaséh! 17 Tieb-tieb meuneubri nyang jroh dan hadiah nyang sampoereuna atra nyan teuka nibak syeuruga, nyang geupeutron lé Po teu Allah, nyang cebta mandum nyang trang di langét. Gobnyan kheueh Allah nyang hana meu-ubah, dan hana teuma jeuet keuseupôt lé peue mantong. 18 Ateueh keuheundak Geuh keudroe Gobnyan geupeujeuet tanyoe keu aneuëk-aneuëk Gobnyan meulalu feureuman Geuh nyang beuna. Gobnyan geupeubuet lagée nyan mangat geutanyoe meuteumé teumpat nyang paleng phon nibak mandum makhlok cebtaan Gobnyan. 19 Ngieng kheueh nyoe beugét-gét, Syedara-syedara lon nyang lôn gaséh! Tieb-tieb ureuëng meuseuti bubagaih lam jideungoe, teuma mulet jimeututoe dan mulet teuma jiteuka beungéh. 20 Ureuëng nyang beungéh hana hase jipeubuet nyang gét, nyang peumangat até Po teu Allah. 21 Sabab nyan, böih kheueh bubena nyang kutoe atawa nyang jeuhet. Teurimong kheueh ngon até nyang miyueb tieb-tieb feureuman nyang geupula lé Allah lam até gata, sabab feureuman Geuh nyan na teunaga nyang ba gata ubak seulamat. 22 Bah kheueh gata peubuet peue nyang geupeugah lé Allah, bék gata deungoe mantong, sampoe deungon lagée nyan ka gata tipée droe teuh keudroe. 23 Ureuëng nyang deungoe feureuman Allah, teuma hana jipeubuet na kheueh lagée ureuëng nyang teungoh jikalon muka jih keudroe nyang sibeuna jih dikeue ceureumen. 24 Óh ka lheueh jikalon gét-gét, laju jijak dan tuwoe pakriban ruman jih nyan. 25 Huköm Allah sampoereuna dan na teunaga keu teupeu meurdehka manusia. Dan ureuëng nyang seulidek dan jikalon gét-gét lom jipeubuet huköm-huköm nyan, dan kon jideungoe mantong óh lheueh nyan laju tuwoe, ureuëng nyan teuma geubri beureukat lé Allah lam hai peue mantong nyang jipeubuet. 26 Meunyoe na sidroe ureuëng nyang meurasa droe jih ureuëng nyang taát meuagama, teuma ureuëng nyan hana jijaga lidah jih, ngon lagée nyan ureuëng nyanka jitipée droe jih keudroe; iébadat ureuëng nyan hana meuguna. 27 Keuhai taát meuagama nyang gleh dan seujati meunurot bak mata Allah Bapak na kheueh: tatem tulông aneuëk yatem ngon aneuëk muntui dan inong-inong balée nyang udeb meudeurita, dan jijaga droe jih keudroe mangat bék jipeurusak lé donya nyoe.

Yakobus 2

1 Syedara-syedara! Sibagoe ureuëng nyang meuiman ubak Tuhan Isa Almaseh, Tuhan Nyang Mahamulia, bék kheueh gata peubeda-beda manusia ngon dasai hai-hai nyang lahé. 2 Sabab meunyoe na sidroe ureuëng kaya nyang jingui euncien méuh meunan cit peukayan nyang ceudah watée jijak bak teumpat khanuri gata, nibak teumpat nyan teuka teuma sidroe ureuëng gasien jingui peukayan nyang beukah-beukah, 3 teuma gata leubeh tahoreumat keu ureuëng nyang jingui peukayan ceudah nyan. Laju gata peugah lagée nyoe bak ureuëng nyan, "Inoe neuduek Teungku bak keurusi nyang diet nyoe." Teuma bak ureuëng nyang gasien nyan gata peugah, "Dong mantong disideh," atawa, "Kah duek ateueh aleue nyoe." 4 Deungon gata peubuet lagée nyan, gata ka gata peubeda seusabe gata dan gata ponten ureuëng ngon dasai bak pikeran nyang jeuhet. 5 Ingat kheueh, Syedara-syedara nyang lôn gaséh! Ureuëng nyang gasien lam donya nyoe, geupiléh lé Allah jeuet keu ureuëng nyang kaya lam iman. Ureuëng-ureuëng nyan jeuet keu anggota umat Allah lagée nyang geupeu janji lé Allah ubak ureuëng nyang geugaséh. 6 Teuma gata tahina ureuëng gasien, padahai ureuëng-ureuëng kaya kheueh nyang teugon gata dan nyang tarek gata bak kantô mahkamah! 7 Awaknyan kheueh nyang hina nan teuhoreumat nyang gata teurimong nibak Allah! 8 Gata tapeubuet nyang beutôi, meunyoe gata ta amai huköm Keurajeuen nyang na lam Alkitab nyoe, "Cinta kheueh seusabe gata keudroe-droe lagée gata cinta keudroe gata sidroe." 9 Teuma meunyoe gata tapeubeda-beda manusia nyang dasai jih nibak hai-hai nyang lahé, gata ka tapeubuet desya, dan huköm Allah geupeugah bahwa gata ureuëng nyang langga huköm. 10 Ureuëng nyang langga saboh lam huköm-huköm Allah, nyan saban cit ka jilangga banmandum huköm nyan. 11 Sabab nyang peugah, "Bék meumukah," gobnyan kheueh nyang peugah, "Bék poh maté." Teuma, meunyoe gata hana meumukah, teuma gata peumaté gob, ngon lagée nyan gata na kheueh nyang langga huköm. 12 Meututoe kheueh dan mubuet kheueh lagée ureuëng nyang teuma teupeusidang meunurot huköm Allah nyang peumeurdehka manusia. 13 Sabab Allah hana geubri gaséh sayang ubak ureuëng nyang hana jituri gaséh sayang. Teuma gaséh sayang leubeh teuga nibak huköman! 14 Syedara-syedara! Keupeue guna jih manusia jipeugah, "Ulôn ureuëng nyang meuiman", meunyoe jihnyan hana jipeuleumah ngon buet nyang nyata? Peu kheueh hase iman nyang lagée nyan jipeuseulamat jih? 15 Seukira jih sidroe agam atawa sidroe inong peureulée peukayan dan hana seb peunajoh nyang jimakheun keu jimakheun tieb-tieb uroe. 16 Keupeue guna jih gata peugah bak jihnyan, "Seulamat neungui peukayan nyang seu-uem dan seulamat makheun!" -- meunyoe gata hana tabri keu jih nyan peue nyang peureulée keu udeb? 17 Meunan cit teuma ngon iman, meunyoe hana teupeuleumah ngon buet, iman nyan hana meuguna. 18 Mungken na nyang peugah, "Na ureuëng nyang meusadeue bak iman jih dan na teuma nyang meusadeue bak buet jih." Ulôn teuma kujaweueb, "Tunyok kheueh bak ulôn pakriban ureuëng hase jiteumé iman meunyoe hana ngon buet dan ulôn teuma kutunyok ngon buet bahwa ulôn na iman." 19 Gata tapatéh bahwa Allah na kheueh sidroe, kon? Ngon lagée nyan, roh-roh jeuhet pi jipatéh dan awaknyan yo sabab teumakot! 20 Gata bangai lumpah na! Peu kheueh peureulée teubri bukeuti keu gata bahwa hana guna na iman meunyoe hana ngon buet? 21 Ngieng kheueh Nabi Ibrahim indatu tanyoe. Gobnyan geuteurimong jroh that lé Po teu Allah sabab lé buet gobnyan, watée gobnyan geupeu seumah Nabi Ishaq, aneuëk gobnyan, keu Po teu Allah di ateueh miseubah. 22 Inoe deuh takalon bahwa iman harôh ngon buet mangat meusampoereuna. 23 Nyan paih that lagée nyang teutuléh lam ayat Alkitab nyoe, "Nabi Ibrahim meuiman ubak Allah, dan sabab lé iman geuh nyan Allah geuteurimong gobnyan sibagoe ureuëng nyang peubuet keuheundak Allah." Nyang kheueh sabab jih Nabi Ibrahim teupeugah, "Sahabat Allah". 24 Nyata kheueh jinoenyoe, bahwa manusia geuteurimong ngon gét lé Po teu Allah sabab peue nyang jipeubuet lé manusia nyan, dan kon mantong lé iman jih. 25 Ngieng kheueh teuma ubak Rahab, inong lunte nyan. Jih nyan geuteurimong nyang jroh lé Po teu Allah sabab buet jih, na kheueh watée inong nyan jiteurimong lam rumoh jih tukang-tukang meuluem bansa Israel dan jitulông awaknyan jipeuplueng droe meulalu rot laén. 26 Nyan, lagée toh tuboh nyang hana roh na kheueh tuboh nyang maté, meunan cit teuma iman hana mubuet na kheueh iman nyang maté.

Yakobus 3

1 Syedara-syedara! Bék kheueh meuron-ron lamkawan gata keuneuk jeuet keu gurée. Gata tateupeue bahwa geutanyoe nyang jeuet keu gurée teuma geupeu sidang nyang leubeh brat nibak ureuëng laén. 2 Tanyoe kayém that tapeubuet salah. Teuma ureuëng nyang hántom jipeubuet salah ngon tutoe haba jih, nyan kheueh ureuëng nyang sampoereuna, nyang hase jikuasa bansaboh tuboh jih. 3 Meunyoe tanyoe tapeubeukab keukang bak babah guda mangat guda nyan jitem seutôt peue nyang tapeugah, ngon lagée nyan tanyoe hase takuasa bansaboh tuboh guda nyan. 4 Cok teuma kapai sibagoe cuntoh. Bah pih kapai nyan saboh beunda nyang meunan rayeuk dan jiba lé angén nyang tajam, teuma kapai nyan hase jikeundali lé keumudo nyang ubit, meunurot keuheundak nyang mat keumudo. 5 Meunan cit ngon lidah tanyoe; bah pi lidah tanyoe nyan ubit, teuma lidah nyan hase jipeusombong droe ngon hai-hai nyang rayeuk-rayeuk. Cuba gata bayang padub na rayeuk jih gle teuma hase tutong ngon apui nyang ubit! 6 Lidah saban lagée apui. Lam tuboh tanyoe, lidah nyan pangkai nyang jeuhet nyang jimeu-éue bansaboh tuboh tanyoe. Ngon apui nyang asai lam nuraka, jihnyan hase jipeuhangoh bansaboh tuboh tanyoe. 7 Mubagoe rupa beulatang juah, cicém, beulatang nyang meu éue dan eungkot hase teupeu seuiet, dan ka teuma ji peuseuit lé manusia. 8 Teuma lidah manusia hana hase jipeuseu iet lé soe mantong. Lidah nyan jeuhet dan hana hase takuasa; peunoh ngon racon nyang jiba maté. 9 Tanyoe tapeuguna keu tapeugah teurimong gaséh ubak Tuhan Bapak tanyoe, teuma lidah nyan cit nyang seurapa sabe geutanyoe manusia, nyang ka geucebta meunurot ruman Allah. 10 Nibak babah nyang saban jiteubiet tutoe haba teurimong gaséh dan meunan cit tutoe haba teukutok. Nyang sibeuna jih kon lagée nyan! 11 Peu kheueh na mata ié nyang jipeuteubiet ié tabeue ngon ié phet nibak mata ié nyang sa? 12 Bak ara, Syedara-syedara lôn, hana jeuet jipeuhase boh zaiton, dan bak anggô hana jeuet jipeuhase boh ara. Meunan cit mata ié nyang masen hana jeuet jipeuhase ié nyang tabeue. 13 Meunyoe lamkawan gata na nyang bijaksana atawa meubudoe basa, bah kheueh jihnyan jitunyok lam udeb jih nyang jroh dan ngon jipeubuet hai-hai nyang jroh teuma, nyang meusajan ngon até nyang miyueb dan keubijaksanaan. 14 Teuma meunyoe gata ceumuru, sakét até, dan tapeumanyang droe teuh keudroe, bék kheueh tapeubangga keubijaksanaan nyan, sabab deungon nyan gata kataputa balek haba nyang beutôi nyang teuka nibak Po teu Allah. 15 Keubijaksanaan nyang lagée nyan kon asai jih lam syeuruga. Atranyan asai jih lam donya nyoe, nibak nafeusu manusia, dan nibak jén! 16 Dipat na sifeuet ceumuru dan jipeupeunteng droe jih keudroe, nibak teumpat nyan teuma na karu ka-ak ka ok dan meubagoe rupa buet nyang jeuhet. 17 Teuma ureuëng nyang na keubijaksanaan nyang asai jih di ateueh, jihnyan kheueh nyang phon-phon that gleh, óh lheueh nyan jitem meudamé, ramah dan patuh. Nibak jihnyan peunoh gaséh sayang dan jipeuhase buet-buet nyang gét. Jihnyan hana meupihak dan hana meupura-pura. 18 Keubiet buet nyang jroh na kheueh hase nibak bijéh damé nyang jitabu lé ureuëng-ureuëng nyang cinta damé.

Yakobus 4

1 Pane jiteuka asai mupake meudakwa lamkawan gata? Kon kheueh nyan teuka nibak nafeusu-nafeusu gata nyang sabe jimuprang lam tuboh gata keu gata teumé mangat lam donya! 2 Gata meuheuét, teuma hana meuteumé, ngon lagée nyan gata naniet keuneuk peumaté gob! Gata meuseumangat, teuma hana meuteumé peue nyang gata mita, deungon lagée nyan gata meudakwa dan gata mulo. Gata hana meuteumé sapeue, sabab gata hana meulakée bak Po teu Allah. 3 Dan bah kheueh gata ka talakée, teuma teutab hana gata teumé, sabab tujuan nyang gata lakée nyan salah; peue nyang gata lakée na kheueh keu tapeumangat droe teuh keudroe. 4 Gata na kheueh ureuëng nyang hana seutia! Peu kheueh gata teupeue bahwa meunyoe gata meurakan ngon donya, gata jeuet keumusoh Allah? Lé sababnyan, barang sigasoe keuneuk jeuet keu sahabat donya nyoe, gobnyan jipeujeuet droe jih musoh Allah. 5 Bék tapike bahwa Alkitab hana alasan teutuléh lagée nyoe, "Lam droe geutanyoe Allah geukeubah roh nyang paleng kreueh that keumauan jih." 6 Teuma bahpi meunan, rakhmat Allah nyang geubri keugeutanyoe leubeh teuga nibak nafeusu roh tanyoe nyan. Nyang kheueh sabab jih lam Alkitab na cit teutuléh lagée nyoe, "Allah geulawan ureuëng nyang sombong, teuma gobnyan geugaséh keu ureuëng nyang miyueb até." 7 Sabab nyan, tundok kheueh ubak Allah dan lawan kheueh Iblih, ngon lagée nyan Iblih teuma jiplueng jitinggai gata. 8 Peurab kheueh ubak Allah, dan Po teu Allah pi geupeurab ubak gata. Peugleh kheueh jaroe gata, he gata nyang meudesya! Dan peujeureunéh kheueh até gata, he gata nyang meucabeueng até! 9 Bah kheueh gata biet-biet beuna meunyeusai dan gata mo sira meuba-e; bah kheueh khem gata jeuet keu mo dan geumbira gata jeuet keuseudeh! 10 Bah kheueh gata peumiyueb droe dikeue Tuhan, deungon lagée nyan Tuhan teuma geupeumanyang gata. 11 Syedara-syedara, bék kheueh saléng meuhina atawa saléng peusalah sidroe ngon nyang laén. Ureuëng nyang meuhina atawa jipeusalah syedara jih nyang seusabe ureuëng Kristen, ureuëng nyan ka jihina dan jipeusalah huköm Po teu Allah. Dan meunyoe gata tapeusalah huköm Allah, nyan saban cit gata hana taturot keu huköm-huköm nyan keudroe, teuma ka jeuet keuhakém jih. 12 Padahai sidroe nyang na hak jibri huköm keu manusia dan nyang peusidang manusia. Na kheueh Allah nyang meukuasa nyang peuseulamat dan nyang peubinasa. Deungon lagée nyan, soe kheueh gata nyan, gata jeuet peusalah sabe manusia? 13 Syedara-syedara nyang peugah haba, "Uroe nyoe atawa singoh kamoe keuneuk jak u banda pulan dan tinggai disinan sithon treb jih keuneuk kamoe meukat dan meumita péng," -- deungoe naseuhat ulôn nyoe. 14 Peue nyang teuma jeuet lam udeb gata óh singoh nyan, gata keudroe hana gata teupeue! Gata na kheueh lagée asab nyang deuh jih sikeujab mantong, óh ka lheueh nyan gadôh. 15 Nyang sibeuna jih gata peugah lagée nyoe, "Meunyoe Tuhan geubri idhin, kamoe teuma udeb dan kamoe peubuet nyoe atawa meupeubuet nyan." 16 Teuma jinoenyoe gata sombong dan raya haba. Banmandum haba gata nyang rayeuk lagée nyan hana beutôi. 17 Sabab nyan, ureuëng nyang teupeue peue nyang gét nyang harôh jipeubuet nyan teuma hana jipeubuet, ureuëng nyan meudesya.

Yakobus 5

1 Syedara-syedara, ureuëng-ureuëng kaya! Deungoe kheueh naseuhat ulôn. Bah kheueh gata mo ngon meuba-e sabab gata teuma meudeurita! 2 Keukayaan gata kabrok. Peukayan gata ka jikab lé keuraleueb. 3 Méuh ngon pirak gata ka habéh meugeuratan; sabab teuma jeuet keusaksi jilawan gata dan teuma jipajoh habéh tuboh gata lagée apui pajoh. Gata ka tapeusapat atra bak jamén karab pagée. 4 Gata hana tabayeue upah keu ureuëng-ureuëng nyang mubuet bak blang gata. Jinoenyoe deungoe kheueh awaknyan apoh apah! Ureuëng-ureuëng nyang peusapat wase blang gata, jiklik jilakée tulông dan klik awaknyan ka geudeungoe bak geulinyueng Allah, Tuhan Nyang Mahakuasa. 5 Gata ka udeb meuwáh dan tateumé nekmat lam donya nyoe. Gata siulah-ulah teungoh peuteumbon droe keu uroe seumeusie. 6 Gata tahuköm dan tapoh maté ureuëng-ureuëng nyang hana meusalah, dan awaknyan hana jilawan gatanyoe. 7 Sabab nyan, saba kheueh wahe mandum Syedara lôn, sampoe Tuhan geuteuka teuma. Ngieng kheueh pakriban ureuëng meutani jipreh sampoe tanoh jih jipeuteubiet wase nyang meuhareuga keu jih. Deungon saba jihnyan jipreh ujeuen tron bak watée musém lurôh ôn kayée dan ujeuen watée musém meubungöng. 8 Meunan cit bah kheueh gata beusaba dan beurayeuk até, sabab uroe Tuhan teuka ka rab lumpah na. 9 Bék kheueh tunu até dan saléng peusalah sabe keudroe-droe, mangat gata hana geuhuköm lé Po teu Allah. Ingat kheueh! Hakém karab that, dan kakeumah geukeuneuk teuka. 10 Syedara-syedara, ingat kheueh ubak nabi-nabi nyang meututoe ateueh nan Tuhan. Awaknyan saba dan ék geuteun deurita. Ngon lagée nyan, cok kheueh awaknyan sibagoe cuntoh. 11 Awaknyan teupeugah mubahgia sabab awaknyan tabah. Gata ka tadeungoe keuhai Nabi Ayub nyang saba, dan gata tateupeue pakriban Tuhan keuneulheueh jih geubri beureukat keu Nabi Ayub nyan. Sabab Tuhan keubiet gét that gaséng sayang dan jroh até. 12 Nyang phon-phon that, na kheueh: Bék meusumpah, bah kheueh deumi langét, meunan cit deumi bumoe, atawa deumi peue mantong. Peugah kheueh mantong lagée nyoe, "Nyoe" meunyoe meukeusut gata nyoe, dan "Hán" meunyoe meukeusut gata hán; mangat gata hana geupeurhot huköman lé Po teu Allah. 13 Meunyoe lamkawan gata na nyang teungoh apoh apah, bah kheueh jimeudoá. Meunyoe na nyang geumbira, bah kheueh jimeulagu jipujoe Allah. 14 Meunyoe na nyang sakét, bah kheueh jihôi peumimpén-peumimpén jeumaáh. Dan bah kheueh mandum peumimpén nyan geumeudoá keu ureuëng nyang sakét nyan dan jisiliek ngon minyéuk ateueh nan Tuhan. 15 Meunyoe doá awaknyan jipeutrok ngon yakén, Tuhan teuma geupeu puléh ureuëng nyang sakét nyan, dan teupeu amphon desya-desya nyang ka jipeubuet. 16 Sabab nyan, bah kheueh gata saléng ta angkée nyang salah dan saléng gata meudoá, mangat gata geupeu puléh. Doá ureuëng nyang jiseutôt keuheundak Allah, na kuasa nyang paleng rayeuk. 17 Ilyas saban lagée geutanyoe manusia. Gobnyan meudoá deungon khusyuék mangat ujeuen bék jitôh, dan keubiet that ujeuen pih hana jitôh nyang treb jih na lhée thon siteungoh. 18 Óh lheueh nyan gobnyan meudoá lom, laju langét jipeutron ujeuen akhé jih tanoh jipeuteubiet wase. 19 Wahe syedara lôn banmandum! Meunyoe lamkawan gata na sidroe nyang hana jitem seutôt lé keuheundak Po teu Allah, dan lé ureuëng laén laju ji peujeuet ureuëng nyan jigisa ubak Allah, 20 ingat kheueh ubak ayat nyoe: Ureuëng nyang jipeujeuet ureuëng meudesya jigisa lom nibak jalan jih nyang salah, ureuëng nyan jipeuseulamat jiwa ureuëng meudesya nyan nibak maté dan jeuet keusabab jai that desya geupeu amphon lé Po. Horeumat kamoe, Yakobus

1 Petrus 1

1 Syedara-syedara nyang umat piléhan Allah, nyang na bansaboh daerah Pontus, Galatia, Kapadokia, Asia dan Bitinia! Ulôn, Petrus, rasui Isa Almaseh, meuharab seumoga Po teu Allah geubri beureukat dan seujahteura ateueh gata ngon meulimpah-limpah. Gata teupiléh jeuet keu umat Allah nyang sisuai ngon reuncana Allah Bapak. Dan Roh Allah ka geupeujeuet gata keu umat nyang suci, khusos keu Po teu Allah, mangat gata taát ubak Isa Almaseh dan geupeu suci ngon darah Gobnyan. 3 Jak kheueh geutanyoe talakée syukoe ubak Po teu Allah, Bapak Tuhan tanyoe Isa Almaseh! Gobnyan that-that geugaséh keu geutanyoe, nyang kheueh sabab jih Gobnyan geubri keugeutanyoe udeb nyang barô, deungon geupeu udeb lom teuma Isa Almaseh nibak maté. Nyoe teubri keu geutanyoe harapan nyang kukôh. 4 Tanyoe meuharab that keutateumé beureukat-beureukat nyang geukeubah lé Allah keu umat Gobnyan, na kheueh beureukat-beureukat nyang geukeubah lam syeuruga, deungon lagée nyan hana hase rusak, atawa jeuet keu brok atawa cupa. 5 Banmandum nyan na kheueh keu gata, sabab gata meuiman ubak Po teu Allah. Ngon lagée nyan gata geujaga ngon kuasa Allah mangat gata tateurimong seulamat nyang ka siyab teupeugah bak uroe pagée nyang teuma teuka. 6 Deungon na lagée nyan bah kheueh gata bumangat até, bah pi jinoe lam watée nyang paneuk nyoe gata harôh seudeh le sabab gata tarasa meubagoe-bagoe cubaan. 7 Nyan sibagoe teu ujoe gata peu kheueh gata biet-biet meuiman ubak Tuhan atawa hana. Méuh nyang hase rusak pi, teu ujoe ngon apui. Deungon lagée nyan, iman gata na kheueh leubeh muyuem nibak méuh nyan, nyang kheueh sabab teu-ujoe cit mangat meutamah kông. Deungon lagée nyan gata teuma teupujoe dan jihoreumat meunan cit teupeumanyang bak watée uroe Isa Almaseh geuteuka lom teuma. 8 Gata tagaséh, bahpi yoh masa ilée hana takalon. Dan gata meuiman ubak Gobnyan bahpi jinoe hana gata kalon. Nyang kheueh sabab jih gata meugeumbira, dan gata rasa sukacita nyang paleng agong dan hana jeuet teupeugah ngon babah. 9 Sabab tujuan iman gata trok, na kheueh keuseulamat jiwa gata. 10 Keuhai seulamat nyoe kheueh nyang teutilek dan teuseulidek lé nabi-nabi, dan awaknyan geuramai keuhai beureukat nyang geubri lé Po teu Allah keu gata. 11 Awaknyan jiseulidek pakriban dan pajan hainyan teujadi, nyang teumeukeusut lé Roh Almaseh nyang na lam tuboh awaknyan. Nibak watée nyan, Roh nyan teupeusabab bak awaknyan keuhai mubagoe deurita nyang meuseuti geurasa lé Almaseh dan keuhai keuagongan Gobnyan nyang teuka teuma óh ka lheueh nyan. 12 Ubak nabi-nabi nyan Po teu Allah geubri tée bahwa peue nyang awaknyan peubuet kon keu keupeuntengan awaknyan, teuma na kheueh keu gata; nyan kheueh hai-hai nyang jinoenyoe teungoh gata deungoe deungon nyata nibak ureuëng-ureuëng nyang ba Haba Gét keuhai Isa Almaseh. Awaknyan jipeusampoe hai-hai nyan keugata ngon kuasa Roh Allah nyang geukirém nibak lam syeuruga. Dan malaikat-malaikat pih meuheuét that keuneuk geuteupeue haba nyang awaknyan peusampoe nyan. 13 Deungon sabab nyan, bah kheueh gata siab siaga. Até-até kheueh dan meuharab kheueh sipeunoh jih ubak beureukat nyang teuma teubri ubak gata bak watée Isa Almaseh teuka lom teuma. 14 Taát kheueh ubak Po teu Allah, dan bék kheueh udeb lagée kheun gata yoh masa ilée, bak watée gata gohlom meuturi ngon Po teu Allah. 15 Nyang sikeubiet jih, bah kheueh gata gleh lam hai peue mantong nyang gata peubuet, saban lagée Po teu Allah geutawök gata nyan gleh. 16 Lam Alkitab na teutuléh, "Bah kheueh gata gleh, sabab Ulôn nyoe gleh." 17 Gata tapeugah Allah nyan Bapak bak watée gata meudoá ubak Gobnyan. Ngon lagée nyan, Allah nyan kheueh nyang jeuet keuhakém manusia nyang sisuai ngon buet nyang jipeubuet maséng-maséng hana geupiléh bulée. Sabab nyan, simantong gata na ateueh rhueng donya nyoe, bah kheueh gata tapeuagong Po teu Allah lam udeb gata. 18 Gata tateupeu peue nyang ka geubayeue keuteupeubeubaih gata nibak udeb nyang hana meuguna nyang ka jipeutreun lé indatu gata. Meunayeue nyan kon kheueh sapeue-sapeue barang nyang hase rusak lagée pirak ngon méuh, 19 teuma sisuatu nyang paleng meuyuem; na kheueh tuboh Almaseh keudroe, nyang jeuet sibagoe bubiri nyang teukeureubeuen ubak Allah ngon hana cacat dan cupa. 20 Almaseh geupiléh lé Po teu Allah sigohlom donya nyoe teucebta. Dan nibak uroe-uroe karab akhé jamén nyoe, Gobnyan teuka lam donya mangat gata teupeuseulamat. 21 Rot Gobnyan kheueh gata meuiman ubak Allah nyang ka geupeu udeb lom teuma nibak maté dan teupeuagong Gobnyan. Ngon lagée nyan, Allah kheueh nyang gata iman dan ubak Allah teuma kheueh gata keubah harapan. 22 Sabab gata taát ubak ajaran nyang teuka nibak Allah, deungon lagée nyan gata ka tapeugleh droe dan tagaséh teuma ureuëng-ureuëng nyang saboh iman ngon cara ikhlaih. Ngon sabab nyan, bah kheueh gata saléng tameugaséh sidroe ngon nyang laén deungon sipeunoh até. 23 Sabab meulalu feureuman Allah nyang udeb dan abadi nyan, gata ka teupeujeuet sibagoe manusia barô nyang kon lahé nibak manusia, teuma nibak Bapak nyang abadi. 24 Lam Alkitab na teutuléh lagée nyoe, "Banmandum umat manusia lagée naleueng, dan banmandum keubeusaran jihnyan lagée bungöng naleueng. Naleueng layée, bungöng jih pih lurôh; 25 teuma feureuman Tuhan teutab na siumu masa." Feureuman nyan Haba Gét nyang ka teupeusampoe ubak gata.

1 Petrus 2

1 Sabab nyan, böih kheueh nyang na bak gata mandum nyang jeuhet; bék lé meututoe ngon haba nyang sulet, dan bék teuma galak meupura-pura. Bék bingiek até, dan bék tahina ureuëng laén. 2 Bah kheueh gata jeuet lagée aneuëk manyak nyang ban lahé, sabe glaih keu ié mom nyang murni. Deungon lagée nyan gata teuma timoh dan teupeuseulamat. 3 Lam Alkitab na teutuléh lagée nyoe, "Gata ka tarasa keudroe padub na jroh jih Tuhan." 4 Sabab nyan, teuka kheueh ubak Tuhan. Gobnyan lagée batée nyang udeb, batée nyang ka jitiek lé manusia sabab jianggab hana meuguna; teuma nyang geupiléh lé Po teu Allah sibagoe batée nyang meuhareuga. 5 Gata lagée batée-batée nyang udeb. Sabab nyan bah kheueh gata tatem teupeuguna keuteupeugét Baét Allah nyang rohani. Deungon lagée nyan gata ka jeuet keu imeum-imeum, nyang udeb khusos keu Po teu Allah. Dan nyang meulalu Isa Almaseh teupeuseumah ubak Allah, keureubeuen rohani nyang geuteurimong bak até Allah. 6 Sabab lam Alkitab na teutuléh lagée nyoe, "Ulôn ka kupiléh saboh batée nyang meuyuem, nyang Lôn keubah di Sion sibagoe batée paleng phon; dan ureuëng nyang meuiman ubak Gobnyan hana geubri keucewa." 7 Batée nyan biet that meuyuem keu gata nyang meuiman. Teuma keu ureuëng nyang hana meuiman, keunong kheueh ayat-ayat Alkitab nyang lagée nyoe. "Batée nyang hana jipeuguna lé utôh-utôh bangunan nyan rupaji ka jeuet keu batée nyang paleng phon," 8 dan "Nyang kheueh batée nyang teupeusabab manusia hase meugantoh, batée jeuet keusabab awaknyan rhot." Awaknyan meugantoh sabab awaknyan hana jimeuiman ubak feureuman Allah. Meunan kheueh nyang ka geupeuteuntée lé Allah keuhai awaknyan. 9 Teuma gata na kheueh bansa nyang teupiléh, imeum-imeum nyang peutimang raja, bansa nyang suci, khusos keu Allah, umat Po teu Allah keudroe. Allah geupiléh gata dan geutawök gata beutateubiet nibak seupôt keu gata tamong u dalam trang Gobnyan nyang pengéh, deungon meukeusut mangat gata peutabu haba keuhai buet-buet nyang luwabiasa. 10 Yoh masa ilée gata kon umat Allah, teuma jinoenyoe gata na kheueh umat Allah. Yoh masa ilée gata hana geugaséh Po teu Allah, teuma jinoenyoe gata ka tateurimong gaséh sayang Gobnyan. 11 Syedara-syedara nyang teucinta! Gata na kheueh ureuëng aséng dan meuranto lam donya nyoe. Sabab nyan ulôn meulakée ngon meuharab that ubak gata mangat gata bék taturot hawa nafeusu manusia nyang sabe jimuprang jilawan jiwa. 12 Pi-e gata lamkawan ureuëng nyang hana meu Tuhan biet beugét that, deungon lagée nyan meunyoe awaknyan jifiteunah gata sibagoe ureuëng jeuhet, awaknyan teutab jiaku meuneubuet gata nyang jroh, deungon lagée nyan awaknyan jipujoe Allah nibak uroe Gobnyan geuteuka. 13 Deumi Tuhan, bah kheueh gata tundok ubak tieb-tieb ureuëng peunguasa manusia: meunan cit ubak Kaisar nyang jeuet keu peunguasa nyang phon, 14 meunan cit ubak gubunur nyang geutunyok lé Kaisar keuteuhuköm ureuëng nyang peubuet jeuhet dan keu teuhoreumat ureuëng nyang peubuet gét. 15 Sabab, Po teu Allah geutem deungon buet-buet gata nyang gét gata ka tasumpai babah ureuëng nyang meututoe bangai. 16 Bah kheueh gata udeb sibagoe ureuëng nyang meurdehka, teuma bék kheueh gata peuguna keumeurdehkaan gata nyan keu gata tôb nyang jeuhet, teuma udeb kheueh sibagoe hamba Allah. 17 Hareuga kheueh mandum manusia, gata gaséh kheueh mandum syedara gata nyang sabe ureuëng Kristen. Takot kheueh ubak Allah, dan horeumat kheueh Kaisar. 18 Syedara-syedara nyang jeuet keupeulayan, tundok kheueh ubak toke gata deungon peunoh horeumat; kon bak awaknyan nyang gét até ngon ramah mantong, teuma meunan cit ubak ureuëng nyang keujam. 19 Po teu Allah teuma geubri beureukat ubak gata, meunyoe gata sadar ateueh keuheundak Allah, saba ateueh jipeusaneut gata ngon hana ade. 20 Sabab peu kheueh istimewa jih meunyoe gata saba tapeuteun huköman nyang sibeuna jih gata tanggong sabab lé salah? Teuma meunyoe gata deungon saba tatanggong deurita nyang keunong ateueh gata sabab lé buet nyang beutôi, teuma Allah geubri beureukat ateueh gata. 21 Keu nyan kheueh Po teu Allah geutawök gata. Sabab Almaseh keudroe ka meudeurita keu gata, dan deungon nyan Gobnyan ka geubri keugata saboh teuladan, mangat gata taseutôt langkah Gobnyan. 22 Gobnyan hántom na geupeubuet desya, dan hántom na meusidroe pih nyang deungoe Gobnyan meusulet. 23 Bak watée Gobnyan jiteunak sihabéh-habéh jih, Gobnyan hana geubalaih deungon haba teumeunak. Bak watée Gobnyan rhot lam deurita, Gobnyan hana geuancam; Gobnyan teuma geuseurah hai Geuh nyan ubak Po teu Allah, Hakém nyang ade nyan. 24 Almaseh keudroe geuseuôn bubena desya-desya geutanyoe ateueh droe Gobnyan watée Gobnyan bak kayée saleb, mangat tanyoe beubaih nibak kuasa desya, dan udeb meunurot lagée nyang geulakée lé Allah. Deungon luka-luka Almaseh kheueh nyang peupuléh gata. 25 Yoh masa ilée gata lagée bubiri nyang sisat, teuma jinoenyoe gata ka teuba lom teuma keuteuseutôt tukang Rabe dan nyang Peulara jiwa gata.

1 Petrus 3

1 Meunan cit ngon gata, hei purumoh-purumoh, harôh tundok ubak lakoe sabab meunyoe lamkawan awaknyan na nyang hana meuiman ubak feureuman nibak Allah, pi-e gata nyan jeuet teuba awaknyan keu jimeuiman. Dan hana peureulée gata peugah sapeue bak awaknyan, 2 sabab awaknyan nyang jingieng na kheueh pi-e gata nyang gleh dan saleh. 3 Bék kheueh ceudah gata nyan teuma na diluwa mantong, lagée miseu jih teuhias ôk atawa gata ngui mubagoe hiasan, atawa gata ngui peukayan nyang meuhái-meuhái. 4 Nyang biet jih, bah kheueh keuceudah gata nyan teuka lam batén, budho basa nyang leumoh leumbot dan teunang; nyan kheueh ceudah nyang abadi nyang paleng muyuem nibak mata Allah. 5 Ngon cara nyoe kheueh yoh jamén ilée ureuëng-ureuëng inong nyang meuagama nyang meuharab ubak Po teu Allah jipeulagak droe deungon tundok ubak lakoe awaknyan. 6 Meunan cit deungon Sara, geuhnyan taát ubak lakoe geuh Nabi Ibrahim dan jihôi gobnyan teungku. Gata jinoenyoe na kheueh aneuëk-aneuëk Sara, meunyoe gata peubuet hai-hai nyang jroh dan hana teumakot bak peue mantong. 7 Dan meunan cit gata, hei teungku-teungku lakoe, bah kheueh gata udeb ngon peunoh peungeurtian ateueh purumoh gata, dan ngon sadar bahwa awaknyan na kheueh kawöm nyang leumoh. Peusaneut kheueh awaknyan deungon horeumat, sabab awaknyan meusajan-sajan ngon gata, teuma jiteurimong anugeurah udeb nyang seujati nibak Allah. Peubuet kheueh nyoe, mangat hana nyang ampeung doá gata. 8 Keusimpolan jih na kheueh: bah kheueh Syedara mandum sapeue kheun dan saboh peurasaan. Bah kheueh gata saléng tameugaséh lagée ureuëng-ureuëng nyang meusyedara. Dan bah kheueh gata saléng na weueh meuweueh lom beuna sikeub miyueb até. 9 Bék kheueh tabalaih buet nyang jeuhet ngon nyang jeuhet, atawa meurapa ngon seurapa; nyang sikeubiet jih, balaih kheueh deungon cara teulakée beureukat bak Allah. Sabab Allah geutawök gata na kheueh mangat tateurimong beureukat nibak Gobnyan. 10 Lam Alkitab na teutuléh lagée nyoe, "Ureuëng nyang jitem teurimong nekmat lam udeb dan jitem teurimong uroe-uroe nyang jroh, bah kheueh jijaga babah jih mangat bék meututoe hai-hai nyang jeuhet dan hana jipeugah hai-hai nyang sulet. 11 Ureuëng nyan beujipeujioh nyang jeuhet dan jipeubuet nyang gét; bah kheueh jimeujuang biet-biet beujiteumé damé. 12 Sabab Tuhan sabe geungieng bak ureuëng-ureuëng nyang jiturot keuheundak Gobnyan, dan Tuhan sabe geudeungoe doá-doá awaknyan; teuma Tuhan geulawan keu ureuëng-ureuëng nyang peubuet nyang jeuhet." 13 Soe kheueh nyang keuneuk peubuet jeuhet ateueh gata, meunyoe gata galak tapeubuet nyang gét? 14 Teuma bahpi gata tateurimong deurita sabab gata peubuet hai-hai nyang gét, gata meulaba! Bék kheueh teumakot bak soe mantong dan bék khawate. 15 Teuma lam até gata, bah kheueh gata tabri ubak Almaseh horeumat nyang khusos nyang sisuai ngon keududukan Geuh sibagoe Tuhan. Dan bah kheueh gata beusabe siab tabri jeunaweueb keu tieb-tieb ureuëng nyang jitanyong keuhai harapan nyang na nibak gata. 16 Teuma peubuet kheueh nyan ngon leumoh leumbot dan horeumat. Dan bah kheueh até nurani gata gleh, dan meunyoe gata jifiteunah sabab gata udeb deungon jroh sibagoe murit Almaseh, ureuëng-ureuëng nyang ba fiteunah nyan teuma jiteuka malée keudroe. 17 Leubeh gét meudeurita sabab tapeubuet nyang gét -- meunyoe nyan na kheueh keuheundak Po teu Allah -- nibak meudeurita sabab tapeubuet nyang jeuhet. 18 Sabab Almaseh keudroe maté cit sigoe sagai, keu siumu masa sabab lé desya manusia -- sidroe ureuëng nyang hana meusalah, meuninggai donya keu ureuëng nyang na salah. Almaseh geupeubuet lagée nyan mangat Gobnyan hase geuba gata ubak Po teu Allah. Gobnyan jipoh maté seucara tuboh, teuma teupeu udeb lom seucara rohani. 19 Lam keuadaan roh Gobnyan geujak keugeupeusampoe feureuman nibak Allah ubak roh-roh nyang na lam glab: 20 na kheueh roh-roh ureuëng nyang hana taát ubak Po teu Allah bak watée jamén nabi Noh. Bak watée nyan Allah geupreh ngon saba watée nabi Noh geupeugét kapai gobnyan. Teuma ureuëng-ureuëng nyang na lam kapai nyan mantong -- banmandum na lapan droe -- nyang geupeu seulamat sabab lé ié beuna nyang rayeuk that nyan. 21 Ngon lagée nyan, keujadian nyang lagée nyan na kheueh saboh kiyaih nibak pumanö nyang na jinoenyoe teupeuseulamat gata. Pumanö nyoe na kheueh kon sibagoe upacara teupeugleh tuboh nibak mandum kalang nyang kutoe-kutoe, teuma na kheueh sibagoe janji gata ubak Allah nibak até nurani nyang jroh. Pumanö nyan teupeuseulamat gata sabab Isa Almaseh ka udeb lom teuma nibak Gobnyan nyang ka meuninggai, 22 dan ka geutamong lam syeuruga. Jinoenyoe Gobnyan meukuasa meusajan ngon Po teu Allah dan geupeurintah banmandum malaikat, banmandum nyang mat kuasa dan banmandum teunaga.

1 Petrus 4

1 Sabab Almaseh ka meudeurita seucara jasmani, gata harôh tapeukong droe deungon até nyang kukoh ubak nyang nyan. Sabab ureuëng nyang meudeurita seucara tuboh, ureuëng nyan hana lé meudesya. 2 Sabab nyan, bah kheueh gata udeb sabe nyang lagée nyan bagoe lam donya nyoe lagée keuheundak Allah, dan kon lagée keuheundak manusia. 3 Yoh masa ilée, gata ka treb that tapeubuet peue nyang ka jipeubuet lé ureuëng-ureuëng nyang hana jituri Tuhan. Udeb gata hana gét. Nyang gata seutôt hawa nafeusu, mabök-mabök dan laloe bak meu-én, jieb ié kreueh dan seumah beurala nyang biet-biet luwat lagoena. 4 Jinoenyoe ureuëng nyang hana jituri Tuhan, hireuen that bahwa gata hana taudeb lagée awaknyan, jipeubuet desya ngon hana bataih. Nyang kheueh sabab jih awaknyan jihina gata. 5 Teuma awaknyan singoh harôh jipeutanggong jaweueb mandum nyan dikeue Po teu Allah nyang ka siab keugeupeusidang ureuëng nyang udeb dan nyang ka maté. 6 Nyang kheueh sabab jih Haba Gét ka teuma teupeutrok ubak ureuëng nyang ka meuninggai donya. Meukeusut jih mangat awaknyan, nyang ka teupeusidang seucara badan -- lagée hai jih banmandum ureuëng teuma teupeusidang -- hase udeb seucara rohani, meunurot keuheundak Allah. 7 Peue-peue mantong karab that ubak akhé, sabab nyan bah kheueh gata takuasa droe dan teutab waspada, mangat gata hase ta meudoá. 8 Leubeh nibak peue-peue nyang na, bah kheueh gata beubiet-biet beutagaséh sidroe ngon nyang laén, sabab deungon na sabe tameugaséh sidroe ngon nyang laén nyan gata pi kasiab cit teuma keu saléng tapeuamphon. 9 Bah kheueh gata saléng tateurimong sidroe ngon nyang laén lam rumoh gata, ngon hana tunu até. 10 Gata maséng-maséng ka tateurimong meuneubri nyang meulaén-laén nibak Allah. Sabab nyan sibagoe ureuëng nyang peusaneut nyang gét nibak peue-peue nyang ka geubri lé Allah, bah kheueh gata peuguna keumampuan nyan deumi keupeuntengan meusajan. 11 Ureuëng nyang peutrok haba, bah kheueh jipeutrok haba nibak Allah; ureuëng nyang peutimang ureuëng laén, bah kheueh jipeutimang ngon teunaga nibak Allah, mangat lam hai peue mantong, Po teu Allah jeuet teupeuguna meulalu Isa Almaseh. Gobnyan kheueh nyang meukuasa dan patot teupeuagong siumu masa. Amin. 12 Syedara-syedara nyang lôn cinta! Gata jinoenyoe that-that meudeurita sabab teungoh teu-ujoe. Teuma bék kheueh meurasa hireuen, siulah-ulah na sipeue-peue nyang luwabiasa keunong ateueh gata. 13 Teuma, bah kheueh gata meurasa mangat sabab meusigoe meudeurita meusajan-sajan ngon Almaseh. Teuma singoh watée keuagongan Almaseh teupeuleumah, gata teuma meusukacita. 14 Gata meu-untông meunyoe gata jihina sabab gata murit Almaseh. Nyan meumakna Roh nyang mulia, na kheueh Roh Allah, na nibak gata. 15 Bék kheueh meusidroe pih nyang na lamkawan gata meudeurita sabab jihnyan jipoh maté gob, atawa tukang ceumeucue, atawa jeuhet, meunan sabab jihnyan jipeuroh droe nibak urosan ureuëng laén. 16 Teuma meunyoe gata meudeurita sabab lé gata ureuëng Kristen, bék kheueh malée sabab lé hai nyan. Lakée kheueh teurimong gaséh ubak Po teu Allah, bahwa gata taba nan Almaseh. 17 Ka trok watée jih Allah geuhakém donya nyoe. Dan umat Allah keudroe nyang phon-phon that geupeu sidang. Ngon lagée nyan, meunyoe Allah geupeu phon ateueh geutanyoe, pakriban teuma jeuet jih singoh ateueh ureuëng-ureuëng nyang hana jipatéh ubak Haba Gét nyang teuka nibak Allah nyan? 18 Lam Alkitab na teutuléh lagée nyoe, "Meunyoe ureuëng nyang jroh-jroh pi ka payah teupeuseulamat, peue teuma nyang keunong ateueh ureuëng-ureuëng nyang meudesya nyang hana jituri Tuhan!" 19 Sabab nyan, meunyoe na ureuëng-ureuëng nyang meudeurita sabab lé Allah geukeuheundak nyang lagée nyan, bah kheueh ureuëng-ureuëng nyan udeb ngon beutôi dan jipeucaya droe ubak peuncebta awaknyan. Gobnyan sabe geupeu teupat janji Gobnyan.

1 Petrus 5

1 Ulôn lakée beujipeurati that lé peumimpén jeumaáh gata. Ulôn teumuléh nyoe sibagoe rakan peumimpén dan sibagoe ureuëng nyang ka lheueh lôn ngieng keudroe deurita Almaseh, dan nyang meusajan cit teuma jipeuagong, meunyoe keuagongan Almaseh teupeuleumah bak manusia. Ulôn meulakée ngon meuharab that 2 mangat gata rabe kawan bubiri nyang ka geuseurah lé Allah ubak gata. Rabe kheueh awaknyan ngon até nyang mangat lagée nyang geuharôk lé Allah keudroe, dan bék kheueh ngon até nyang brat. Bék teuma gata peubuet meuneubuet gata nyan ngon meuharab laba, teuma sabab lé gata biet-biet keuneuk gata peutimang. 3 Bék teuma tameubuet lagée sidroe ureuëng mat kuasa ateueh awaknyan nyang teupeucaya ubak gata, teuma beujeuet kheueh cuntoh nyang jroh nibak awaknyan. 4 Dan bak watée tukang Meurabe Agong nyan teuka teuma, gata teuma tateurimong mahkota nyang paleng hibat, nyang hántom layée cahya jih. 5 Meunan cit teuma deungon Gata, nyang ureuëng muda. Tundok kheueh ubak ureuëng tuha. Gata banmandum harôh tapeumiyueb droe sabe peutimang deungon até nyang miyueb. Sabab lam Alkitab na teutuléh lagée nyoe, "Po teu Allah geulawan ureuëng nyang sombong, teuma geugaséh keu ureuëng nyang miyueb até." 6 Sabab nyan, peumiyueb kheueh droe gata dimiyueb jaroe Allah nyang teuga, ngon lagée nyan Gobnyan geupeumanyang gata watée katrok watée. 7 Seurah kheueh banmandum nyang gata khawate nyan ubak Allah, sabab Gobnyan geungieng gata. 8 Bah kheueh gata waspada dan lam siab sabe! Sabab Iblih na kheueh musoh gata. Jihnyan lagée singa jijak keudeh keunoe sira jitaúm jimita eumpeuen. 9 Lawan kheueh jihnyan ngon iman nyang kong, sabab gata tateupeue bahwa syedara-syedara sabe ureuëng Kristen nyang laén bansigom donya saban cit meudeurita lagée gata. 10 Teuma óh ka lheueh gata meudeurita sikeujab, Allah keudroe teuma geupeujeuet gata sampoereuna. Gobnyan teuma geupeudong dan geupeukong gata. Sabab Gobnyan na kheueh Allah nyang jroh até, nyang ka geutawök gata keutarasa meusajan keuagongan Gobnyan nyang abadi meulalu Almaseh. 11 Gobnyan kheueh nyang meukuasa siumu masa! Amin. 12 Surat ulôn nyang paneuk nyoe lôn tuléh keugata deungon jitulông lé Silas, nyang lôn anggab sidroe syedara Kristen nyang seutia. Ulôn meuheuét keuneuk bri durongan bak gata dan lôn peuyakén gata bahwa peue nyang lôn tuléh nyoe haba nyang sampoereuna keuhai rakhmat Allah. Bah kheueh gata tamumat nyang kong nibak rakhmat nyan. 13 Rakan-rakan saboh jeumaáh di Babilon, nyang ka geupiléh cit lé Po teu Allah, geukirém saleuem ubak gata; meunan cit teuma ngon aneuëk ulôn Markus nyang lôn cinta. 14 Meu-meuáh meuáh desya kheueh sidroe ngon nyang laén deungon peunoh gaséh sibagoe syedara lam Kristen. Seumoga Tuhan geubri seujahteura ateueh gata mandum nyang ka jeuet keu milék Almaseh. Horeumat kamoe, Petrus

2 Petrus 1

1 Syedara-syedara nyang biet-biet meuiman lagée kamoe meuiman! Isa Almaseh, na kheueh Allah dan Raja Peuseulamat geutanyoe, biet mungken tanyoe meuiman bak Gobnyan, sabab Gobnyan geupeubuet nyang beutôi. Surat nyoe nibak Simon Petrus, sidroe namiet dan rasui Isa Almaseh. 2 Seumoga Allah geubri beureukat dan seujahtra ateueh gata deungon meulimpah-limpah, sabab gata taturi Allah dan Isa, Tuhan tanyoe. 3 Po teu Allah ka geupeu guna kuasa ilahi Gobnyan keu geubri keugeutanyoe peue-peue mantong nyang peureulée keu tameuiébadat. Gobnyan geupeubuet nyoe meulalu peue nyang tanyoe teupeu keuhai Isa Almaseh, nyang ka geutawök tanyoe keu tarasa keurayeuk Gobnyan dan keu gét Gobnyan. 4 Deungon cara nyan kheueh Allah geuanugeurah keugeutanyoe beureukat-beureukat nyang lumpah jai dan meuhareuga nyang ka geupeu janji. Deungon na beureukat-beureukat nyan gata hase leupah nibak nafeusu-nafeusu jeuhet nyang jipeurusak donya nyoe, dan gata tateurimong sifeuet ilahi. 5 Lé nyan, useuha kheueh beu biet-biet mangat gata teutab peucaya ubak Almaseh dan peucaya gata nyan jitumpang teuma lé udeb nyang jroh. Disampéng udeb nyang jroh, gata peureulée that beujeuet keu ureuëng nyang meuiéleumé, 6 dan disampéng iéleumé, gata pih meuseuti hase takuasa droe. Meunan cit seulaén hase takuasa droe beuhase teuma tabina droe jeuet keu tabah gata meuhadab ngon peue mantong. Disampéng tabah meuhadab peue mantong, gata pih harôh udeb meunurot lagée nyang geulakée lé Po teu Allah. 7 Dan udeb lagée nyang geulakée lé Allah beuna teuma gaséh ngon sayang ubak syedara-syedara gata nyang seuiman. Meunan cit bah kheueh teuma gaséh sayang gata ubak syedara-syedara nyang saboh iman teutamah teuma gaséh sayang ubak mandum manusia. 8 Banmandum nyan na kheueh sifeuet-sifeuet nyang gata peureulée. Meunyoe mandum sifeuet nyan na nibak gata ngon meulimpah-limpah, gata teuma jeuet keu ureuëng nyang jumôt dan meuhase lam buet, dan taturi Isa Almaseh Tuhan geutanyoe deungon leubeh gét lom teuma. 9 Teuma ureuëng nyang hana sifeuet-sifeuet nyang lagée nyan, pandangan ureuëng nyan picék; ureuëng nyan hana hase jikalon dan desya-desya jih nyang awai ka teupeugleh. 10 Sabab nyan, Syedara-syedara, meu-useuha kheueh leubeh brat lom mangat panggelan Allah dan geupiléh lé Gobnyan ateueh droe gata nyan meutamah-tamah teuga. Meunyoe gata tapeubuet nyan, gata hana murtad. 11 Deungon na lagée nyan keugata teuma geubri hak nyang peunoh keu gata tamong lam Keurajeuen nyang keukai nibak Tuhan dan Raja Peuseulamat geutanyoe Isa Almaseh. 12 Sabab nyan, ulôn sabe lôn peuingat gata keuhai nyan, bah pi gata ka tateupeue dan gata meuiman ubak ajaran nyang teuka nibak Allah nyang ka gata teurimong nyan. 13 Simantong ulôn nyoe lam udeb, ulôn meurasa wajéb lôn peuingat ubak gata lam hai-hai nyan. 14 Sabab ulôn kuteupeu bahwa hana treb lé ulôn teuma kutinggai donya nyoe, sabab Tuhan geutanyoe Isa Almaseh ka geubri tée ngon nyata that ubak ulôn. 15 Deungon lagée nyan ulôn teuma ku-useuha bahwa watée ka meuninggai pih, gata sabe taingat lom teuma hai-hai nyoe. 16 Watée kamoe peugah ubak gata padub na agong jih óh teuka Tuhan geutanyoe Isa Almaseh, kamoe hana meugantung nibak haba-haba dongeng nyang hana beutôi nyang jipeugah lé manusia. Keuagongan Almaseh nyan ka lheueh kamoe ngieng ngon mata ulée kamoe keudroe. 17 Kamoe na nibak teumpat nyan watée Gobnyan geupeu agong dan geuhoreumat lé Allah Bapak. Bak watée nyan teudeungoe su nibak Nyang Mahamulia, nyang peugah ubak Gobnyan, "Nyoe kheueh Aneuëk Ulôn nyang Ulôn gaséh. Gobnyan that jipeumangat até Lôn!" 18 Kamoe keudroe na meudeungoe su nyan nyang teuka nibak syeuruga watée kamoe na meusajan ngon Gobnyan ateueh gunong nyang suci nyan. 19 Nyang kheueh sabab jih kamoe leubeh yakén lom peue nyang geupeusan lé Allah nyang ka geupeutrok lé dumna nabi-nabi. Nyang sigét jih gata ngieng peusan nyan, sabab peusan nyan lagée panyöt nyang hu bak teumpat nyang seupôt trok án mata uroe jiteubiet, dan cahya bintang timu hu meucahya lam até gata. 20 Nyang phon that bah kheueh gata ingat nyoe: Peusan Allah nyang geupeusampoe lé dumna nabi-nabi hana jeuet tatafeuse meunurot peundapat droe teuh keudroe. 21 Sabab, hántom na peusan Allah nyan ateueh keuheundak manusia. Teuma Roh Allah geukuasa manusia keuteupeusampoe peusan nibak Allah nyan keudroe.

2 Petrus 2

1 Bak jamén ilée lamkawan umat Allah ka teuka nabi-nabi peuleusu. Meunan cit teuma lamkawan gata teuma teuka gurée-gurée peuleusu. Awaknyan kana jipeutamong ajaran-ajaran nyang hana beutôi, nyang rhot ubak binasa manusia. Dan awaknyan ji-iengkeue ubak Peunguasa nyang ka peubeubaih awaknyan. Ngon lagée nyan awaknyan jipeuteuka keubinasaan ateueh droe keudroe, dan nyang teuma rhot ateueh awaknyan deungon sigra. 2 Bah pi meunan, jai that ureuëng jiseutôt peue nyang jipurunoe lé gurée-gurée peuleusu nyan nyang ka jikuasa lé hawa nafeusu awaknyan keudroe. Dan lé buet gurée-gurée peuleusu nyan teuma jipeuteuka leubeh jai lom ureuëng nyang hina Jalan nyang Beutôi nyang teutuju ubak Po teu Allah. 3 Sabab awaknyan leuha that, lé gurée-gurée peuleusu nyan laju jicalitra haba-haba nyang jisuson keudroe keujiteumé laba nibak gata. Teuma mahkamah nyang peurhot huköman ateueh awaknyan ka treb that teupeusiab, dan binasa nyang ka teupeuteuntée keu awaknyan teungoh jipreh-preh awaknyan. 4 Malaikat-malaikat nyang meudesya pih hana geupeubiyeu lé Allah leupah nibak huköman, teuma teutab geuböih lam nuraka. Awaknyan teupeutamong lam guha nyang seupôt keuteuteun nibak teumpat nyan trok bak Uroe Peungadelan. 5 Meunan cit ngon donya bak jamén ilée, Allah hana geupeubiyeu lheueh nibak huköman. Allah laju geukirém ié beuna nyang rayeuk that lam donya ureuëng jeuhet bak watée nyan. Teuma Nabi Noh meusajan ngon tujoh droe nyang laén nyang seulamat, sabab nabi Noh geupeu maklum haba keuhai udeb nyang paih bak até Allah. 6 Saban cit hai jih ngon banda Sodom ngon Gomora: Po teu Allah geupeuhanco banmandum banda-banda nyan ngon apui mangat jeuet keucuntoh keuhai peue nyang teuma teujadi ngon ureuëng-ureuëng nyang jeuhet. 7 Teuma Nabi Lot teupeuseulamat, sabab geuhnyan geuturot peue kheun Allah; gobnyan that-that meudeurita sabab peurangoe nyang jeuhet nibak ureuëng-ureuëng nyang beujat. 8 Lamkawan ureuëng-ureuëng nyang lagée nyan, nabi Lot nyang gét udeb ngon baten nyang teuseksa, sabab tieb-tieb uroe gobnyan geukalon dan geudeungoe buet-buet awaknyan nyang jeuhet. 9 Teuma, Tuhan geuteupeue pakriban cara teupeuseulamat ureuëng-ureuëng nyang turot peurintah Gobnyan watée awaknyan meuteumé cubaan. Dan Tuhan pih geuteupeue pakriban teukeubah ureuëng-ureuëng jeuhet keu geuseksa bak Uroe Peungadelan, 10 khusos jih keu ureuëng-ureuëng nyang jiturot hawa nafeusu awaknyan nyang kutoe dan nyang hina keukuasaan Allah. Meunan jijeuet dan sombong jih gurée-gurée peuleusu nyan sampoe awaknyan hana teumakot mubacut pi jihina dumna mahklok mulia lam syeuruga! 11 Seudangkan malaikat-malaikat nyang jiôh leubeh teuga dan meukuasa nibak gurée-gurée peuleusu nyan, hana jitudôh dumna makhlok nyang mulia nyan ngon tutoe nyang hina dikeue Tuhan. 12 Teuma lé gurée-gurée nyan, luwabiasa! Awaknyan lagée beulatang nyang lahé keu teudrob dan teupoh maté. Awaknyan hana jipike, teuma jimubuet meunurot kheun até jih mantong, sampoe jiheuntam hai-hai nyang hana jiteupeue ngon tutoe haba meuhina. Sabab nyan lé buet-buet awaknyan keudroe, awaknyan teuma maté lagée beulatang-beulatang nyang juwah. 13 Sibagoe huköman ateueh deurita nyang ka jipeusabab lé awaknyan, awaknyan teuma meudeurita ngon seungsara nyang peudeh. Nibak awaknyan, hai nyang mangat até na kheueh jipeubuet peue mantong óh watée uroe guna jipeupuih hasrat tuboh jih keudroe. Meunyoe awaknyan jiduek meusajan-sajan ngon gata bak teumpat khanuri, sikeub awaknyan biet luwat that sabab awaknyan laloe mabök ngon hawa nafeusu. 14 Awaknyan puih hán puih jipeubuet desya, dan nyang jigalak na kheueh jikalon inong jeuhet. Dan ureuëng nyang ban meuiman lom kureueng yakén, laju jipakat blaih jih. Até awaknyan ka lazem ngon leuha. Awaknyan na kheueh ureuëng-ureuëng nyang teukutok! 15 Sabab awaknyan hana jitem turot jalan nyang beutôi, akhé jih awaknyan sisat. Awaknyan jicok rot nyang jijak lé Bileam aneuëk Beor yoh masa ilée. Bileam nyoe meuheuét that keuneuk meuteumé péng nibak buet jih nyang jeuhet. 16 Teuma jihnyan keunong peuingat nyang brat ateueh buet jih nyang jeuhet nyan, watée keuleudée jihnyan jimarit ngon su manusia. Teuma nabi nyan jipaksa beujipiôh buet nyang pungoe nyan. 17 Gurée-gurée peuleusu nyan na kheueh lagée ié nyang tho dan lagée sagob nyang jipôt lé angén badée. Allah ka geukeubah keu awaknyan saboh teumpat nyang seupôt buta. 18 Awaknyan jipeugah haba keudeuh keunoe nyang hana-hana sôh tanna meuasoe; nafeusu cabui jipeuguna lé awaknyan keujipeusisat ureuëng-ureuëng nyang banmantong lheueh nibak lingkongan ureuëng nyang udeb sisat. 19 Gurée-gurée peuleusu nyan jipeujanji meurdehka ubak ureuëng-ureuëng nyan, seudangkan awaknyan keudroe jipeubudak lé keubiasaan-keubiasaan nyang jipeurusak manusia. Sabab meunyoe ureuëng jipeutaloe lé sapeue-sapeue, deungon nyan ureuëng nyan ka jeuet keu namiet keu ureuëng nyang peutaloe nyan. 20 Ureuëng nyang turi Tuhan dan Peuseulamat tanyoe Isa Almaseh ka beubaih nibak kuasa-kuasa donya nyang peubrôk manusia. Teuma meunyoe óh lheueh nyan jihnyan teutaron lom akhé jih jipeutaloe lé kuasa-kuasa nyan, keuadaan ureuëng nyan akhé jih leubeh brok nibak nyangka-ka. 21 Leubeh gét ureuëng-ureuëng nyang lagée nyan hántom na jituri rot nyang beutôi nibak Allah, nibak jituri lé awaknyan, teuma óh lheueh nyan hana jitem seutôt peurintah-peurintah nyang geubri lé Allah ubak awaknyan. 22 Peue nyang awaknyan peubuet jeuet keubukeuti pribasa nyang teupeugah lagée nyoe, "Asée jipajoh lom peue nyang ka jiulée nyan" dan "Bui nyang ka teupeumanö, teuma jiriwang lom meubalek-balek lam luhob."

2 Petrus 3

1 Syedara-syedara nyang lôn cinta! Nyoe kheueh surat lôn nyang keudua lôn tuléh keu gata. Lam bandua surat nyoe, ulôn meu-useuha lôn peubeudôh pikeran-pikeran nyang gleh keu gata. 2 Ulôn peuingat mangat gata taingat peue-peue nyang ka geupeugah lé nabi-nabi Allah yoh masa ilée, dan keuhai peurintah nibak Tuhan, Raja Peuseulamat, nyang teupeutrok ubak gata meulalu rasui-rasui. 3 Phon-phon that, gata harôh tateupeue bahwa nibak uroe-uroe akhé, teuma teuka ureuëng-ureuëng nyang udeb jih jikuasa lé hawa nafeusu awaknyan keudroe. Awaknyan jihina gata 4 deungon haba lagée nyoe, "Jipeugah Tuhan meujanji keuneuk teuka! Jinoe pat Geuhnyan? Bapak-bapak indatu tanyoe ka meuninggai donya, teuma peue-peue mantong teutab saban lagée yoh phon álam nyoe teucebta!" 5 Awaknyan ngon jisaja hana jitem patéh bahwa yoh masa ilée Allah geucebta langét ngon bumoe ngon feureuman Gobnyan. Bumoe geupeujeuet nibak ié, dan ngon ié; 6 dan ngon ié teuma -- na kheueh ié nibak ié beuna -- donya phon that nyan geupeuhanco. 7 Teuma langét ngon bumoe nyang na jinoenyoe, geupeulara lé feureuman Allah nyan cit teuma guna keugeupeuhanco ngon apui óh trok bak watée teuma. Jinoenyoe langét ngon bumoe mantong geupeulara trok ubak uroe ureuëng-ureuëng nyang jeuhet teuhuköm dan teupeubinasa. 8 Teuma syedara-syedara lôn, sapeue hainyoe nyang bék gata tuwoe; bahwa nibak pandangan Tuhan, siuroe hana beda jih ngon siribée thon -- bandua nyan saban mantong nibak Gobnyan. 9 Tuhan hana mulet geubri peue nyang ka geupeu janji bah pih na nyang sangka lagée nyan. Nyang sikeubiet jih, Gobnyan saba nibak gata, sabab Gobnyan hana geutem meusidroe pih binasa. Gobnyan meuharab mangat banmandum ureuëng meutobat nibak desya-desya jih. 10 Teuma Uroe teuka Tuhan nyan na jih lagée pancuri. Nibak Uroe nyan, langét teuma leunyab ngon su meugum-gum, dan bubena beunda dilangét teuma habéh tutong, dan bumoe ngon peue nyang na ateueh nyan teuma gadôh. 11 Sabab banmandum nyan geupeu hanco ngon cara nyang lagée nyan bagoe, pakriban kheueh nyang sibeuna jih gata udeb? Gata meuseuti udeb suci dan khusos keu Allah, 12 simantong gata preh dan tameucen keu Uroe Allah. Nibak Uroe nyan langét teuma habéh tutong, dan sabab lé seu-eum jih nyan, banmandum beunda-beunda nyang na di langét teuma meuliléh. 13 Teuma geutanyoe tapreh peue nyang ka geupeu janji lé Allah, na kheueh langét nyang barô dan bumoe nyang barô teuma, nibak teumpat nyan meuteumé keuadelan. 14 Sabab nyan, Syedara-syedara nyang lôn gaséh, teungoh jinoenyoe gata preh Uroe nyan, meu-useuha kheueh beubiet-biet keu udeb suci dan hana meucupa dikeue Po teu Allah. Dan peulara kheueh hubongan nyang jroh ngon Allah. 15 Anggab kheueh Tuhan nyang saba nyan sibagoe watée nyang geubri keugata mangat gata hase seulamat. Paulus, syedara tanyoe nyang tagaséh, ka geutuléh nyang lagée nyan keu gata. Gobnyan geutuléh nyan ngon peunoh keubijaksanaan nyang geubri lé Allah keu geuh nyan. 16 Lam banmandum asoe surat gobnyan, Paulus sabe geutuléh keuhai nyan. Beutôi na meupadub boh hai nyang payah that tamuphom lam surat geuh nyan. Dan bagian nyan jiputa balek lé ureuëng-ureuëng nyang hana jiteupeue sapeue dan lé ureuëng-ureuëng nyang hana kong iman jih. Hai nyang lagée nyan hana jeuet tahireuen, sabab ladum-ladum nyang na nibak Alkitab jipeubuet cit lagée nyan lé awaknyan. Peue nyang awaknyan peubuet na kheueh meuakibat awaknyan keudroe hanco. 17 Teuma gata, Syedara-syedara nyang lôn gaséh, ka gata teupeue keuhai hainyan. Sabab nyan, waspada kheueh, bék sampoe gata teuba-ba u lam buet nyang sisat nyang jipeubuet lé ureuëng-ureuëng jeuhet akhé jih gata rhot nibak teumpat geumilo gata nyang kukoh. 18 Bah kheueh gata seumaken tarasa rakhmat Isa Almaseh, Tuhan dan Raja Peuseulamat tanyoe, dan bah kheueh gata seumaken taturi Gobnyan. Teupujoe kheueh Gobnyan, jinoe dan trok siumu masa! Amin. Horeumat kamoe, Petrus

1 Yahya 1

1 Asoe surat nyoe keuhai Feureuman nyang teubri udeb, na kheueh Feureuman nyang ka na yoh phon that. Kamoe meudeungoe, dan ka kamoe ngieng ngon mata kamoe keudroe. Kamoe ka kamoe pandang, dan ka kamoemat ngon jaroe kamoe keudroe. 2 Watée udeb nyan teupeugah, na kamoe ngieng. Nyang kheueh sabab jih kamoe meusaksi keuhai nyan. Kamoe peusampoe ubak gata keuhai udeb seujati dan keukai, nyang na meusajan Bapak, dan nyang ka geupeugah bak kamoe. 3 Peue nyang ka kamoe ngieng dan kamoe deungoe, nyan cit teuma nyang kamoe peutrok ubak gata, mangat gata meusajan ngon kamoe tarasa udeb meusaboh ngon Bapak dan ngon Aneuëk Gobnyan Isa Almaseh. 4 Kamoe tuléh nyoe mangat até geutanyoe biet-biet geumbira. 5 Nyoe kheueh haba nyang kamoe deungoe keuhai Aneuëk Gobnyan dan nyang kamoe peutrok keugata: Allah nyan trang, dan nibak Gobnyan hana seupôt meubacut pih. 6 Meunyoe tanyoe peugah bahwa udeb meusaboh ngon Gobnyan, padahai geutanyoe udeb lam seupôt, ngon lagée nyan tanyoe kameusulet bah kheueh ngon tutoe haba meunan cit ngon buet. 7 Teuma meunyoe tanyoe udeb lam trang, lagée Allah na lam trang, ngon lagée nyan tanyoe udeb krab that, rukon sidroe ngon nyang laén, dan darah Isa, Aneuëk Gobnyan, geupeu gleh tanyoe nibak mandum desya. 8 Meunyoe tanyoe tapeugah bahwa tanyoe hana meudesya, tanyoe ka tapeunget droe teuh keudroe; dan Po teu Allah hana lam até geutanyoe. 9 Teuma meunyoe tanyoe ta-aku desya-desya geutanyoe dikeue Po teu Allah, Gobnyan teuma geupeutrok janji Geuh dan geupeubuet peue nyang ade. Gobnyan teuma geupeu amphon bubena desya-desya geutanyoe dan geupeu gleh geutanyoe nibak mandum buet tanyoe nyang salah. 10 Teuma meunyoe tanyoe tapeugah bahwa tanyoe hana meudesya, tanyoe ka ta-anggab sang-sang Allah nyan sulet dan tanyoe hana takeubah feureuman Allah lam até tanyoe.

1 Yahya 2

1 Aneuëk-aneuëk lôn! Ulôn teumuléh nyoe keugata mangat gata bék peubuet desya. Teuma meunyoe na nyang peubuet desya, nibak geutanyoe na sidroe nyang bila, Gobnyan na kheueh Isa Almaseh nyang ade nyan; Gobnyan geulakée ubak Bapak keu geutanyoe. 2 Meulalu Isa Almaseh nyan kheueh desya-desya tanyoe teupeuamphon. Dan kon desya-desya tanyoe mantong, meunan cit desya banmandum umat manusia. 3 Meunyoe tanyoe taát ubak peue-peue nyang geupeurintah lé Allah, nyan tanda jih tanyoe taturi Po teu Allah. 4 Ureuëng nyang peugah, "Ulôn kuturi Allah," teuma hana taát peue-peue nyang geupeurintah nyan, ureuëng nyan duseuta, dan Allah hana lam até ureuëng nyan. 5 Teuma ureuëng nyang taát ubak peurintah Allah, ureuëng nyan jigaséh Allah ngon sampoereuna. Nyan kheueh tanda jih bahwa tanyoe udeb meusaboh ngon Allah. 6 Soe-soe mantong nyang peugah jihnyan udeb meusaboh ngon Allah, ureuëng nyan meuseuti udeb jih jiseutôt tapak Almaseh. 7 Syedara-syedara nyang lôn gaséh! Nyang ulôn tuléh nyoe kon kheueh saboh peurintah nyang barô. Nyoe peurintah awai nyang ka teupeutrok ubak gata yoh phon-phon that gata meuiman ubak Almaseh; na kheueh haba nibak Allah nyang ka gata deungoe sigohlom nyan. 8 Bah pih meunan, peurintah nyang ulôn tuléh nyoe barô cit; sabab keubeunaran deuh teukalon lam tuboh Almaseh dan lam droe gata. Sabab seupôt seumaken leunyab dan trang nyang beutôi ka jipeuphon meucahya. 9 Ureuëng nyang peugah bahwa jihnyan na lam trang teuma ureuëng nyan mantong jibanci keusyedara jih, ureuëng nyan mantong na lam seupôt trok ánjinoe. 10 Ureuëng nyang jigaséh keusyedara jih, ureuëng nyan udeb lam peungéh ngon sabab nyan hana meusapeue pih jeuet keusabab ureuëng laén rhot lam desya. 11 Teuma ureuëng nyang banci keu syedara jih, ureuëng nyan na lam seupôt. Ureuëng nyan jijak lam seupôt, dan hana jiteupeue ho jihjak, sabab lé seupôt nyan jeuet keusabab hana deuh jikeumalon. 12 Ulôn teumuléh keugata, Aneuëk-aneuëk, sabab desya gata ka teupeuamphon sabab lé Almaseh. 13 Ulôn teumuléh keugata, Ayah-ayah, sabab gata taturi Gobnyan yoh awaikon phon that Gobnyan na. Ulôn teumuléh keugata hai Ureuëng-ureuëng muda, sabab gata ka tapeutalo Si jeuhet. 14 Ulôn teumuléh keu gata, Aneuëk-aneuëk, sabab gata taturi Allah Bapak. Ulôn teumuléh keu gata, Ayah-ayah, sabab gata taturi Feureuman nyang ka na yoh awaikon. Ulôn teumuléh keu gata, Ureuëng-ureuëng muda, sabab gata teuga. Feureuman Allah na lam até gata, dan gata ka tapeutaloe Si Jeuhet. 15 Bék kheueh tacinta donya nyoe, atawa peue mantong nyang na lam donya nyoe. Meunyoe gata tacinta donya, nyan makna jih hana tacinta ubak Bapak. 16 Peue-peue mantong nyang na lam donya nyoe -- nyang jiharab lé manusia meudesya, nyang jikalon laju meuheuét dan jipeubangga-bangga atra nyan -- banmandum nyan na kheueh hai-hai nyang hana meuasai nibak Bapak, teuma nibak donya. 17 Donya dan peue-peue mantong nyang na lam donya nyang jimeuheuet lé manusia, teungoh leunyab. Teuma keu ureuëng nyang jiturot peukheun Po teu Allah, ureuëng nyan teutab udeb siumu masa. 18 Aneuëk-aneuëk lôn, akhé jamén katho that! Ka lheueh teupeugah bak gata yoh awaikon bahwa Musoh Almaseh teuma teuka; dan jinoe ka teuka jai that musoh Almaseh. Nyan kheueh tanda jih bahwa akhé jamén ka tho that. 19 Musoh-musoh Almaseh nyan na kheueh ureuëng-ureuëng nyang ka jitinggai tanyoe, sabab awaknyan nyang sibeuna jih keubiet kon ureuëng geutanyoe. Meunyoe awaknyan awak geutanyoe, ka teuntée awaknyan teutab na meusajan ngon tanyoe. Teuma awaknyan jitinggai tanyoe, ngon lagée nyan deuh kheueh bahwa hana meusidroe pih lamkawan awaknyan nyang biet-biet jitamong golongan tanyoe. 20 Teuma gata ka tateurimong Roh Allah nyang geusintong lé Isa Almaseh dan nyan kheueh sabab jih gata banmandum taturi ubak ajaran-ajaran nyang beutôi. 21 Ngon lagée nyan, ulôn tuléh surat keu gata kon lé sabab gata hana taturi ajaran nyang beutôi, teuma sabab lé gata ka taturi, dan gata pih ka tateupeue bahwa hana nyang sulet lam ajaran nyang beutôi nyan. 22 Nyang meusulet na kheueh ureuëng nyang peugah bahwa Isa nyan kon Raja Peuseulamat nyang ka geupeu janji lé Allah. Ureuëng nyan Musoh Almaseh; ureuëng nyan hana jiaku Bapak meunan cit Aneuëk. 23 Ureuëng nyang jiaku Aneuëk, nyan saban cit hana jiteurimong Bapak. Dan ureuëng nyang jiaku Aneuëk, nyan saban cit ka jiteurimong Bapak. 24 Sabab nyan, haba nyang ka gata deungoe yoh phon-phon that ka tapatéh harôh kheueh gata jaga beugét-gét dalam até. Meunyoe haba nyan gata simak gét-gét, gata teuma sabe udeb meusaboh ngon Aneuëk dan ngon Bapak cit teuma. 25 Dan nyoe kheueh nyang geupeu janji lé Almaseh keudroe keugeutanyoe; udeb seujati dan keukai. 26 Ulôn tuléh nyoe keugata keuhai ureuëng-ureuëng nyang teungoh jiuseuha jipeungét gata. 27 Teuma meunyoe keuhai gata keudroe, Almaseh ka geusintong Roh Gobnyan ateueh gata. Dan simantong Roh Geuhnyan mantong na ateueh gata, hana peureulée na ureuëng laén jipurunoe gata. Sabab Roh Gobnyan jipurunoe gata peue-peue mantong; dan peue nyang geupurunoe nyan beutôi, kon haba sulet. Sabab nyan, bah kheueh gata taát ubak peue nyang jipurunoe lé Roh nyan, dan bah kheueh gata teutab udeb meusaboh ngon Almaseh. 28 Ngon lagée nyan, aneuëk-aneuëk lôn, teutab kheueh udeb meusaboh ngon Almaseh, mangat singoh bak watée Gobnyan teuka, tanyoe tameuhadab ngon Gobnyan deungon beurani nyang peunoh, dan hana jeuet musöm sabab lé malée. 29 Gata ka tateupeue bahwa Almaseh udeb meunurot nyang geulakée lé Allah, sabab nyan gata harôh tateupeue, tieb-tieb ureuëng nyang udeb meunurot ajaran Allah na kheueh aneuëk Allah.

1 Yahya 3

1 Ngieng kheueh padub na Allah geugaséh tanyoe, sampoe tanyoe geuaku sibagoe aneuëk-aneuëk Gobnyan. Dan biet, tanyoe na kheueh aneuëk-aneuëk Allah. Nyang kheueh sabab jih donya nyang jeuhet nyoe hana jituri tanyoe, sabab donya hana jituri Allah. 2 Syedara-syedara nyang lôn gaséh! Tanyoe jinoe na kheueh aneuëk-aneuëk Allah, teuma keuadaan tanyoe singoh gohlom teuntée. Teuma tanyoe tateupeue bahwa meunyoe Almaseh teuka, tanyoe jeuet lagée Gobnyan, sabab tanyoe takalon Gobnyan lam keuadaan nyang sibeuna jih. 3 Banmandum ureuëng nyang na harapan nyoe ubak Almaseh, jijaga droe jih mangat biet-biet suci, gleh nibak mandum desya lagée Almaseh nyang suci. 4 Ureuëng nyang peubuet desya, jilanggéh huköm Allah; sabab desya-desya na kheueh teulanggéh ateueh huköm Allah. 5 Gata tateupeue bahwa Almaseh teuka keu geusampôh bubena desya-desya manusia, dan bahwa hana desya lam droe Gobnyan. 6 Banmandum ureuëng nyang udeb meusaboh ngon Almaseh, hana sabe-sabe jipeubuet desya. Ureuëng nyang sabe-sabe jipeubuet desya, hántom na jikalon Almaseh atawa jituri Gobnyan. 7 Aneuëk-aneuëk lôn, bék tapeubiyeue droe gata jipeusisat lé soemantong. Ureuëng nyang peubuet lagée kheun Allah na kheueh aneuëk Allah saban lagée Almaseh na kheueh Aneuëk Allah. 8 Teuma ureuëng nyang hana jipiôh-piôh jipeubuet desya na kheueh aneuëk Iblih, sabab Iblih meudesya yoh awaikon. Keunyoe kheueh Aneuëk Allah teuka, na kheueh keugeupeuhanco banmandum buet Iblih. 9 Ureuëng nyang ka jeuet keu Aneuëk Allah, hana sabe-sabe jipeubuet desya, sabab sifeuet Allah keudroe na nibak gobnyan. Dan sabab lé Allah nyan Bapak jih, ngon lagée nyan jihnyan hana sabe-sabe jipeubuet desya. 10 Nyoe kheueh beda jih aneuëk-aneuëk Allah ngon aneuëk-aneuëk Iblih: soe mantong nyang hana jipeubuet keuheundak Allah, atawa hana jigaséh keu syedara jih, ureuëng nyan kon aneuëk Allah. 11 Yoh awaikon ka teupeutrok haba nyoe ubak gata: Tanyoe harôh tagaséh sidroe ngon nyang laén. 12 Bék kheueh geutanyoe lagée Kain, nyang jeuet keu aneuëk Iblih jipoh maté syedara jih keudroe. Peue sabab Kain jipoh maté syedara jih? Sabab hai-hai nyang jipeubuet na kheueh salah, teuma hai-hai nyang jipeubuet lé syedara jih na kheueh beutôi. 13 Sabab nyan, Syedara-syedara lôn, bék kheueh hireuen meunyoe ureuëng-ureuëng donya nyoe jibanci gata. 14 Tanyoe tateupeue bahwa tanyoe ka tateubiet nibak maté, dan taminah ubak udeb. Tanyoe tateupeue, sabab tanyoe tagaséh sabe syedara tanyoe. Ureuëng-ureuëng nyang hana geunaséh, nyan saban cit mantong jikuasa lé maté. 15 Ureuëng nyang banci keu syedara jih na kheueh tukang poh maté gob, dan gata tateupeue bahwa sidroe tukang poh maté gob nibak jih hana udeb seujati dan keukai. 16 Ngon jalan nyoe kheueh tanyoe tateupeue cara tagaséh sabe keudroe-droe: Almaseh ka geupeujok udeb Geuh keu geutanyoe. Sabab nyan, tanyoe pih bah kheueh tapeujok droe tanyoe keu syedara-syedara tanyoe! 17 Meunyoe sidroe ureuëng seb lam udeb jikalon syedara jih kureueng hana sapeue na, teuma hana jitem tulông syedara jih nyan, pakriban ureuëng nyan jeuet jipeugah bahwa jihnyan jigaséh keu Allah? 18 Aneuëk-aneuëk lôn! Bék kheueh tanyoe tapeugah tagaséh teuma bak babah mantong atawa ngon tutoe haba mantong. Bah kheueh tanyoe tameugaséh ngon gaséh nyang seujati, nyang tabri bukeuti ngon buet geutanyoe. 19 Meunan kheueh cara geutanyoe tateupeue bahwa tanyoe na kheueh aneuëk-aneuëk Allah nyang beutôi, dan até tanyoe meuteumé teunang dikeue Po teu Allah. 20 Tanyoe tateupeue, bahwa meunyoe tanyoe jipeusalah lé até tanyoe, iéleumé Allah leubeh rayeuk nibak iéleumé tanyoe, dan bahwa Gobnyan geuteupeue peue-peue mantong. 21 Ngon lagée nyan, Syedara-syedara lôn nyang teucinta, meunyoe até tanyoe hana jipeusalah tanyoe, tanyoe hase tameuhadab ubak Po teu Allah ngon beurani. 22 Dan peue nyang tanyoe lakée nibak Gobnyan, meuteumé, sabab geutanyoe taát ubak peue-peue nyang geupeurintah lé Gobnyan dan tapeubuet peue nyang teupeugalak até Gobnyan. 23 Nyang Gobnyan peurintah bak geutanyoe na kheueh: Tanyoe meuseuti tameuiman ubak Aneuëk Gobnyan, na kheueh Isa Almaseh, dan tanyoe bah kheueh saléng tameugaséh, lagée nyang ka geupeurintah lé Isa ubak geutanyoe. 24 Banmandum ureuëng nyang taát ubak peue-peue nyang geupeurintah lé Allah, ureuëng nyan udeb meusaboh ngon Allah, dan Allah meusaboh ngon awaknyan. Dan tanyoe tateupeue bahwa Allah meusaboh ngon tanyoe, sabab Gobnyan ka geubri Roh Geuh keu geutanyoe.

1 Yahya 4

1 Syedara-syedara nyang lôn cinta! Bék kheueh tapatéh bak mandum ureuëng nyang meungaku na Roh Allah, teuma ujoe kheueh awaknyan leubeh ilée keutateupeue peu kheueh roh nyang na nibak awaknyan asai jih nibak Allah atawa bukon. Sabab jai that nabi-nabi peuleusu ka jijak bansaboh nyoe. 2 Meunoe kheueh cara jih mangat gata teupeue peu kheueh Roh Allah atawa kon: Ureuëng nyang jiaku bahwa Isa Almaseh geutreun lam donya sibagoe manusia, ureuëng nyan biet na Roh nyang teuka nibak Allah. 3 Teuma meunyoe na ureuëng nyang hana jiaku hai nyan, ureuëng nyan nibak jih hana Roh Allah. Ureuëng nyan na roh nibak Musoh Almaseh. Syedara ka tadeungoe bahwa roh nyan teuma teuka, dan jinoenyoe kana lam donya nyoe. 4 Teuma Aneuëk-aneuëk lôn, gata na kheueh milék Allah. Gata ka tapeutalo nabi-nabi peuleusu, sabab Roh nyang na nibak gata leubeh meukuasa nibak roh nyang na nibak ureuëng-ureuëng milék donya nyoe. 5 Nabi-nabi peuleusu nyan jimeututoe keuhai donya nyoe, dan donya jideungoe peue nyang jipeugah lé awaknyan, sabab awaknyan milék donya. 6 Teuma geutanyoe na kheueh aneuëk-aneuëk Allah; dan ureuëng nyang jituri Allah, jideungoe peue nyang tanyoe peugah. Ureuëng nyang kon milék Allah, hana jideungoe peue nyang tanyoe peugah. Meunan kheueh cara jih tanyoe tateupeue beda Roh nyang jibri ajaran nyang beutôi ngon roh nyang jipeusisat tanyoe. 7 Syedara-syedara nyang lôn cinta! Jak kheueh geutanyoe saléng tameugaséh sidroe ngon nyang laén, sabab geunaséh nyan asai jih nibak Allah. Ureuëng nyang na gaséh, na kheueh aneuëk Allah dan jihnyan jituri Allah. 8 Ureuëng nyang hana gaséh, ureuëng nyan hana jituri Allah; sabab Allah na kheueh gaséh. 9 Allah geupeugah bahwa Gobnyan geugaséh tanyoe ngon cara geukirém Aneuëk Geuh nyang tunggai u lam donya nyoe mangat tanyoe meuteumé udeb meulalu Aneuëk Geuh nyan. 10 Nyoe kheueh gaséh nyan: Bukon geutanyoe nyang ka tagaséh Allah, teuma Allah nyang gaséh keugeutanyoe dan geukirém Aneuëk Geuh mangat meulalu Aneuëk Geuhnyan tanyoe meuteumé amphon banmandum desya-desya geutanyoe. 11 Syedara-syedara nyang lôn cinta, meunyoe Allah meunan that geugaséh geutanyoe, tanyoe pih harôh tagaséh sidroe ngon nyang laén. 12 Hana meusidroe pih nyang ka lheueh jikalon Allah, teuma meunyoe geutanyoe sabe na lam gaséh sayang, Po teu Allah meusaboh ngon geutanyoe dan geunaséh Gobnyan ka jeuet sampoereuna lam tuboh geutanyoe. 13 Lé sabab Allah ka geubri ubak geutanyoe Roh Gobnyan, ngon lagée nyan tanyoe tateupeue bahwa geutanyoe ka udeb meusaboh ngon Po teu Allah, dan Allah udeb meusaboh ngon geutanyoe. 14 Kamoe keudroe ka lheueh kamoe kalon Aneuëk Allah, dan kamoe peusampoe bahwa Gobnyan geukirém lé Bapak keu jeuet keu Raja Peuseulamat donya nyoe. 15 Barang sigasoe nyang jiaku bahwa Isa nyan Aneuëk Allah, Po teu Allah udeb meusaboh ngon ureuëng nyan, dan ureuëng nyan pih udeb meusaboh ngon Allah. 16 Tanyoe keudroe tateupeu dan tapatéh keuhai geunaséh Allah ateueh geutanyoe. Allah nyan gaséh. Ureuëng nyang udeb jih jikuasa lé gaséh, ureuëng nyan meusaboh ngon Allah, dan Allah meusaboh ngon ureuëng nyan. 17 Gaséh geupeujeuet sampoereuna lam tuboh geutanyoe, mangat tanyoe beutajeuet nibak Uroe Peungadelan. Tanyoe teuma na beurani, sabab udeb geutanyoe lam donya nyoe saban lagée udeb Almaseh. 18 Ureuëng nyang jirasa geunaséh Allah, nibak ureuëng nyan hana jituri keupeurasaan teumakot; sabab geunaséh nyang sampoereuna jipeuleunyab banmandum peurasaan teumakot nyan. Ngon lagée nyan deuh kheueh teukalon bahwa nibak ureuëng nyan gohlom jirasa gaséh Allah nyang sampoereuna meunyoe ureuëng nyan teumakot meuhadab ngon Uroe Peungadelan. 19 Tanyoe geugaséh, sabab Allah ka leubeh ilée geugaséh tanyoe. 20 Meunyoe sidroe-droe ureuëng jipeugah, "Ulôn kugaséh Allah," teuma ureuëng nyan hana jigaséh keusyedara jih keudroe, ureuëng nyan tukang meusulet. Sabab ureuëng nyang hana jigaséh syedara jih nyang jikalon keudroe, hana mungken ureuëng nyan hase jigaséh Allah nyang hana deuh jikalon. 21 Sabab nyan, nyoe peurintah nyang geubri lé Almaseh ubak geutanyoe: Barang sibagoe jigaséh Allah harôh jigaséh teuma syedara-syedara jih.

1 Yahya 5

1 Ureuëng nyang jipatéh bahwa Isa na kheueh Raja Peuseulamat nyang geupeu janji lé Allah, ureuëng nyan na kheueh aneuëk Allah. Ureuëng nyang jigaséh sidroe ayah, jigaséh cit keu aneuëk jih teuma. 2 Ngon jalan nyoe kheueh tanyoe tateupeue bahwa tanyoe tagaséh keu aneuëk-aneuëk Allah: Tanyoe tagaséh Allah dan taát ubak peue-peue nyang geupeurintah. 3 Sabab, tagaséh Allah nyan makna jih ta-taát ubak peue-peue nyang geupeurintah. Dan peue-peue nyang geupeurintah nyan hana that geuhon nibak geutanyoe, 4 sabab tieb-tieb aneuëk Allah hase jipeutaloe donya nyang jeuhet nyoe. Dan tanyoe tapeutaloe donya nyoe ngon iman geutanyoe. 5 Soe kheueh nyang hase peutaloe donya? Na kheueh ureuëng-ureuëng nyang jipatéh bahwa Isa na kheueh Aneuëk Allah. 6 Isa Almaseh kheueh nyang teuka lam donya nyoe ngon ié pumanö Geuh dan ngon darah maté Gobnyan. Gobnyan teuka kon ngon ié mantong, teuma ngon ié dan darah. Dan Roh Allah keudroe jimeusaksi bahwa nyan beutôi, sabab Roh hántom na meusulet. 7 Na lhée droe saksi: 8 Roh Allah, ié ngon darah -- ban lhée nyan jimeusaksi nyang saban. 9 Tanyoe tapatéh ubak manusia nyang meusaksi, teuma saksi Po teu Allah leubeh teuga lom. Dan nyan kheueh keusaksian nyang geubri lé Allah keuhai Aneuëk Gobnyan. 10 Sabab nyan, ureuëng nyang meuiman ubak Aneuëk Allah, ka jiteurimong keusaksian nyan lam até jih; teuma ureuëng nyang hana jipatéh ubak Allah, ka jianggab siulah-ulah Allah nyan sulet, sabab jihnyan hana jipatéh peue nyang geupeugah lé Allah keuhai Aneuëk Gobnyan. 11 Nyoe keusaksian nyan: Po teu Allah ka geubri keugeutanyoe udeb nyang seujati dan keukai, dan Aneuëk Gobnyan na kheueh punca udeb nyan. 12 Ureuëng nyang na Aneuëk Allah, nibak jih na udeb nyan; dan ureuëng nyang hana Aneuëk Allah nyan, nibak ureuëng nyan hana udeb nyan. 13 Ulôn teumuléh keu gata nyang meuiman ubak Aneuëk Allah, mangat gata tateupeue bahwa gata kana udeb seujati dan keukai. 14 Dan tanyoe tajeuet meuhadab ubak Allah, sabab geutanyoe yakén Gobnyan geuteurimong doá tanyoe, meunyoe tanyoe lakée peue mantong nyang sisuai ngon peue nyang sisuai deungon keuheundak Gobnyan. 15 Sabab tanyoe tateupeue bahwa Gobnyan geuteurimong doá tanyoe peue-peue mantong nyang ta lakée, ngon lagée nyan tanyoe pih tateupeue bahwa Gobnyan geubri keugeutanyoe peue mantong nyang tanyoe lakée. 16 Meunyoe gata takalon sidroe ureuëng Kristen nyang peubuet desya nyang hana jeuet keuakibat ureuëng nyan gadôh udeb seujati dan keukai, bah kheueh gata meudoá ubak Allah; dan Allah teuma geubri udeb keu ureuëng nyan. Nyoe keunong ateueh awaknyan nyang desya jih hana jeuet keuakibat ureuëng nyan gadôh udeb jih. Teuma na desya nyang jeuet keuakibat ureuëng nyan gadôh udeb jih, keuhai nyan ulôn hana lôn peugah gata harôh meudoá ubak Allah. 17 Banmandum buet nyang salah na kheueh desya, teuma na desya nyang hana jeuet keuakibat ureuëng nyan gadôh udeb seujati dan keukai nyan. 18 Tanyoe tateupeue bahwa banmandum ureuëng nyang ka jeuet keu aneuëk-aneuëk Allah, hana sabe-sabe jipeubuet desya, sabab Aneuëk Allah geulindong ureuëng nyan, dan Si Jeuhet hana hase jipeubuet sapeue ateueh ureuëng nyan. 19 Tanyoe tateupeue bahwa tanyoe na kheueh milék Allah, bah pih bansigom donya nyoe dimiyueb peurintah Si Jeuhet. 20 Tanyoe tateupeue bahwa Aneuëk Allah ka teuka dan ka geubri peungeurtian keugeutanyoe, mangat tanyoe taturi ubak Allah nyang beutôi. Tanyoe udeb meusaboh ngon Allah nyang beutôi dan udeb meusaboh ngon Aneuëk Gobnyan Isa Almaseh. Nyoe kheueh Allah nyang beutôi, dan nyoe kheueh udeb seujati nyang keukai. 21 Aneuëk-aneuëk lôn, peujiôh kheueh droe gata nibak beurala-beurala!

2 Yahya 1

1 Keu droe neuh Ma nyang ka geupiléh lé Po teu Allah, dan keu aneuëk-aneuëk Ma. Surat nyoe nibak ulôn, peumimpén jeumaáh nyang biet-biet lôn cinta gata. Kon mantong ulôn, teuma mandum ureuëng nyang jituri Allah nyang beutôi, jicinta cit gata. 2 Sabab Allah tinggai lam até geutanyoe, dan sabe na meusajan tanyoe siumu masa. 3 Seumoga geutanyoe geubri beureukat, rakhmat dan seujahteura lé Allah Bapak, dan Isa Almaseh Aneuëk Bapak nyan. Seumoga banmandum nyan jeuet keumilék ngon até nyang gleh dan ngon gaséh. 4 Ulôn mangat that até watée lôn teupeue bahwa na aneuëk-aneuëk Ma nyang udeb meunurot ajaran Allah, lagée nyang ka geupeurintah lé Allah Bapak ubak geutanyoe. 5 Sabab nyan, bak droeneueh Ma ulôn lakée ngon meuharab that mangat tanyoe mandum sabe udeb lam gaséh. Nyang ulôn peugah nyoe kon kheueh saboh peurintah nyang barô; peurintah nyoe ka geubri keugeutanyoe yoh phon that geutanyoe tameuiman. 6 Saléng tameugaséh nyan makna jih udeb meunurot peue-peue nyang geupeurintah lé Allah. Dan peurintah nyang ka gata deungoe yoh phon that bahwa gata bah kheueh udeb deungon meugaséh sidroe ngon nyang laén. 7 Jai that tukang teumipée kajijak-jak bansigom donya. Awaknyan na kheueh ureuëng-ureuëng nyang jiaku Isa Almaseh teuka lam donya sibagoe sidroe manusia. Ureuëng nyang lagée nyan na kheueh tukang teumipée, dan Musoh Almaseh. 8 Sabab nyan, jaga kheueh bék sampoe gata gadôh peue nyang ka kamoe useuha keu gata. Useuha kheueh mangat gata tateurimong nibak Allah upah gata banmandum. 9 Ureuëng nyang hana jimumat bak ajaran Almaseh, teuma ka meusimpang nibak peue nyang ka geupurunoe lé Almaseh, nibak ureuëng nyan hana Allah. Ureuëng nyang teutab lam ajaran Almaseh, nyan makna jih teutab na bah kheueh nyan Allah Bapak meunan cit Aneuëk. 10 Lé sabab nyan, meunyoe na ureuëng teuka dan jibri tée ubak gata ajaran nyang hana geupurunoe lé Almaseh, bék kheueh gata teurimong ureuëng nyan lam rumoh gata atawa gata bri saleuem bak ureuëng nyan. 11 Sabab ureuëng nyang jibri saleuem bak ureuëng nyang lagée nyan meusajan cit ngon ureuëng nyan jipeubuet nyang jeuhet. 12 Jai lumpah na nyang peureulée ulôn peugah bak gata, teuma rasa jih leubeh gét bék meulalu surat. Ulôn meuharab hase lôn jaksaweue gata dan lôn meututoe keudroe ngon gata, mangat até geutanyoe biet-biet geumbira. 13 Aneuëk-aneuëk nibak syedara inong Ma nyang ka cit geupiléh lé Allah, geukirém saleuem keu droeneueh Ma.

3 Yahya 1

1 Syedara Gayus nyang ulôn gaséh! Ulôn peumimpén jeumaáh nyang biet-biet lôn gaséh gata, 2 meudoá kheueh mangat Gata na lam keuadaan seuhat sabe dan banmandum gét-gét ngon gata, saban lagée jiwa gata gét-gét mantong. 3 Ulôn mangat até watée na padub droe syedara tanyoe nyang Kristen teuka dan jipeugah bak ulôn padub na seutia jih Gata ubak Po teu Allah nyang beutôi, sabab keubiet that udeb Gata sabe meunurot ajaran Allah. 4 Hana nyang hase jipeujeuet ulôn biet-biet geumbira, watée lôn deungoe aneuëk-aneuëk ulôn udeb meunurot ajaran Allah. 5 Syedara lôn! Gata meunan seutia nibak buet nyang Gata peubuet keu syedara-syedara tanyoe seusabe ureuëng Kristen; meunan cit keu ureuëng Kristen nyang gohlom Gata turi pih, Gata layani. 6 Awaknyan ka jipeugah ubak jeumaáh bak teumpat kamoe keuhai geunaséh gata. Tulông kheueh awaknyan mangat hase jipeujak meuneujak awaknyan dan ngon na lagée nyan biet galak that até Allah, 7 sabab nibak meuneujak teupeutimang Almaseh, awaknyan hana jiteurimong bantuan peue mantong nibak ureuëng-ureuëng nyang hana jituri Allah. 8 Sabab nyan, geutanyoe ureuëng-ureuëng Kristen gét that tatulong syedara-syedara tanyoe nyang Kristen nyang lagée nyan bagoe, mangat tanyoe hase taseutôt lam useuha awaknyan keujijak peusampoe ajaran nyang beutôi nibak Allah. 9 Ulôn ka lôn tuléh surat nyang paneuk ubak jeumaáh, teuma lé Diotrefes nyang keuneuk jeuet keupeumimpén lam jeumaáh, hana jitem seutôt ulôn. 10 Teuma watée ulôn teuka, lôn reuloh banmandum peue-peue mantong nyang ka jipeubuet nyan, na kheueh keuhai-hai nyang jeuhet dan haba sulet nyang jipeugah keuhai kamoe! Teuma banmandum nyan gohlom seb keu jihnyan. Bak watée rakan-rakan nyang ureuëng Kristen nyan teuka, jihnyan hana jitem teurimong awaknyan. Dan jitam soe-soe mantong ureuëng nyang jikeuneuk teurimong awaknyan, dan jihnyan laju jiyue teubiet bandum awaknyan nibak jeumaáh! 11 Syedara lôn nyang teucinta, bék kheueh gata cuntoh peue nyang brok. Dan cuntoh kheueh peue nyang gét. Ureuëng nyang peubuet nyang gét na kheueh milék Allah. Dan ureuëng nyang peubuet jeuhet gohlom jituri Allah. 12 Banmandum ureuëng jipujoe Demetrius. Dan Po teu Allah keudroe jipujoe geuh nyan. Meunan cit kamoe pih meupujo jihnyan, dan Gata tateupeue bahwa peue nyang kamoe peusampoe nyoe jeuet teupeucaya. 13 Jai that-that nyang peureulée ulôn peugah bak gata, teuma ulôn rasa leubeh gét bék meulalu surat. 14 Ulôn meuharab hana treb lé hase meurumpok ngon gata, dan tanyoe teuma tameutoe langsong. 15 Seumoga Tuhan geubri beureukat ateueh Syedara. Rakan-rakan gata nibak teumpat lôn nyoe jikirém saleuem keu gata. Dan peutrok kheueh saleuem ulôn ubak mandum syedara tanyoe sidroe-droe.

Yudas 1

1 Syedara-syedara nyang ka geutawök dan that-that geugaséh lé Allah Bapak, dan jijaga keu Isa Almaseh. Sibagoe hamba Isa Almaseh, ulôn -- Yudas -- syedara nibak Yakobus, 2 meuharab: Seumoga Allah geubri beureukat, rakhmat dan seujahteura u ateueh gata ngon meulimpah-limpah. 3 Syedara-syedara nyang lôn cinta! Ulôn biet-biet ngon meukeusut lôn tuléh surat keu gata keuhai keuseulamatan nyang ka tarasa meusajan geutanyoe. Teuma jinoenyoe ulôn teurasa keu lôn peuingat gata ngon surat nyoe mangat gata teutab meujuang keu iman gata nyang ka geubri sigoe nyan lé Allah keu siumu masa bak umat Gobnyan. 4 Sabab ngon hana tasada, na okeunum-okeunum ka teuntée nyang jipeurhoh droe lamkawan geutanyoe. Awaknyan ureuëng-ureuëng jeuhet nyang jiputa balek haba keuhai rakhmat Allah tanyoe, keujiteumé keuseumpatan jipeupuih hawa nafeusu awaknyan. Dan awaknyan hana jiaku Isa Almaseh, sibagoe sidroe tok nyang meukuasa dan Tuhan geutanyoe. Yoh awaikon huköman keu awaknyan ka lheueh teutuléh lam Alkitab. 5 Banmandum nyan ka gata teupeue. Teuma ulôn teutab lôn peuingat bak gata keuhai pakriban Tuhan geupeuseulamat umat Israel nibak nanggroe Meusé, teuma óh lheueh nyan geupoh maté ureuëng-ureuëng nyang hana jipatéh lamkawan awaknyan. 6 Ingat kheueh teuma bak malaikat nyang jilewat bataih kuasa awaknyan, akhé jih jijak jitinggai teumpat tinggai awaknyan keudroe. Allah geuranté malaikat-malaikat nyan ngon ranté nyang keukai, bak teumpat nyang seupôt dimiyueb bumoe. Nibak teumpat nyan awaknyan teutab teuteun sampoe trok ubak huköman teupeu rhot ateueh awaknyan nibak Uroe nyang luwabiasa nyan teuma. 7 Ingat kheueh banda Sodom dan Gomora meunan cit banda-banda nyang na bak-bak binéh nyan, nyang peunduduek disinan jipeubuet hai-hai lagée nyang jipeubuet lé malaikat-malaikat nyan. Awaknyan jipeubuet hai-hai nyang cabui dan beujat, akhé jih awaknyan teuseksa ngon huköman apui nyang keukai, sibagoe peuingat keu mandum manusia. 8 Meunan cit ngon okeunum-okeunum nyan sabe jimeukhayal sampoe awaknyan jipeugét desya ateueh tuboh jih keudroe. Awaknyan jipandang miyueb that keukuasaan Po teu Allah dan jihina bubena makhlok nyang mulia nyang na lam syeuruga. 9 Malaikat Mikhael keudroe, nyang jeuet keu ulée kawan bubena malaikat-malaikat, hántom na geupeubuet lagée nyan bagoe. Bak watée gobnyan geumeudakwa ngon Iblih keuhai soe nyang hak ateueh manyét Nabi Musa, malaikat Mikhael hana geujeuet geuhuköm Iblih ngon tutoe haba nyang meuhina. Teuma nyang geupeugah lé Mikhael na kheueh, "Tuhan teuma geudôt gata!" 10 Teuma ngon cara jihina-hina lagée nyan, dumna awaknyan laju jiseurang peue-peue mantong nyang hana jimuphom. Awaknyan saban lagée dumna beulatang nyang hana meuakai, nyang jiteupeue hai-hai ngon pikeran jih mantong. Teuma lé hai-hai nyan kheueh nyang jeuet keusabab awaknyan hanco. 11 Mupaloe that awaknyan! Awaknyan ka jicok rot nyang jijak lé Kain. Mangat meuteumé péng, awaknyan jipeurhot droe lam ceurucong nyang sisat, sabab lagée Bileam. Dan awaknyan pih teupeuhanco sabab meubeurontak saban lagée Korah. 12 Bak watée gata teungoh tapeuna khanuri, sikeub awaknyan biet luwat that-that watée takalon lamkawan gata. Sabab awaknyan jimakheun ngon leuha lumpah na biet hana malée-malée, nyang jipeupeunteng na kheueh droe jih keudroe. Awaknyan lagée awan nyang jiba lé angén, teuma awan nyan hana jipeutreun ujeuen. Meunan cit awaknyan lagée bak kayée nyang hana meuhase jimuboh bah pih watée nyan teungoh musém boh kayée; bak kayée nyang teubot ukeue jih dan ka maté banmandum. 13 Saban lagée gulumbang nyang hebat lam laôt nyang jipeuteubiet kuboh, meunan cit awaknyan jipeukuboh buet-buet jih nyang keubiet that-that malée. Awaknyan na kheueh lagée bintang-bintang nyang jijak bansaboh langét dan keu awaknyan ka geukeubah teumpat jih lé Allah nibak teumpat nyang paleng seupôt keu siumu masa. 14 Henokh, keuturonan keu tujoh nibak Nabi Adam, yoh masa ilée ka lheueh geupeugah keuhai ureuëng-ureuëng nyan. Geupeugah lé Henokh, "Kalon, Tuhan teuma teuka ngon meuribée-ribée malaikat nyang suci 15 keugeujak peuhakém banmandum manusia. Tuhan teuma geuhuköm ureuëng-ureuëng jeuhet sabab buet-buet awaknyan nyang beujat. Dan Gobnyan teuma geuhuköm ureuëng meudesya ngon doraka sabab mandum tutoe haba meuhina nyang jipeugah." 16 Ureuëng-ureuëng nyan sabe-sabe lam keuadaan tunu sira jipeusalah ureuëng laén. Awaknyan udeb meunurot peue-peue nyang jikheun lé awaknyan keudroe nyang peunoh ngon desya. Awaknyan jipeu mbong-mbong droe ngon haba nyang sulet, dan jilieh ureuëng laén keujiteumé laba. 17 Teuma Syedara-syedara lôn nyang teucinta, ingat kheueh ubak peue nyang ka geupeugah lé rasui-rasui Tuhan tanyoe Isa Almaseh. 18 Awaknyan leubeh ilée geupeugah ubak gata watée ka tho akhé jamén teuma teuka ureuëng-ureuëng nyang jihina gata, na kheueh ureuëng-ureuëng nyang udeb meunurot peue-peue nyang jikheun lé até awaknyan nyang meudesya. 19 Awaknyan nyoe kheueh ureuëng-ureuëng nyang jipeuteuka mucrebre ateueh manusia laén. Awaknyan hana jikuasa lé Roh Allah, teuma lé peue-peue nyang meuheuét lé tabiát donya. 20 Teuma gata, Syedara-syedara lôn, peusaneut kheueh laju udeb gata ngon dasai jih iman gata ubak Isa Almaseh. Iman gata nyan suci lumpah na. Dan meudoá kheueh sabe ngon kuasa Roh Allah, 21 dan udeb kheueh sabe lam lindongan gaséh Po teu Allah seumantong gata preh-preh rakhmat Isa Almaseh Tuhan tanyoe, nyang teuma geubri keu gata udeb seujati dan keukai. 22 Keu ureuëng-ureuëng nyang waih-waih até jih, bah kheueh gata tatunyok gaséh sayang. 23 Tarek kheueh ureuëng beujiteubiet lam apui keuteupeu seulamat awaknyan. Meunan cit ateueh ureuëng-ureuëng laén bah kheueh gata tatunyok gaséh sayang meusajan ngon peurasaan teumakot, teuma banci kheueh bah pih nyan peukayan awaknyan keudroe nyang ka jipeukuto ngon desya. 24 Po teu Allah, nyang hase jaga mangat gata bék rhot, dan nyang hase ba gata ubak hazirat Gobnyan nyang mulia ngon sukacita lom hana meucupa, 25 Gobnyan kheueh sidroe sagai Allah, Peuseulamat tanyoe meulalu Isa Almaseh Tuhan tanyoe. Gobnyan kheueh Allah nyang mulia, agong, meukuasa dan meuwibawa yoh awai ilée trok án jinoe dan keu siumu masa! Amin.

Wahyu 1

1 Asoe kitab nyoe keuhai peue nyang geupeugah lé Isa Almaseh keuhai meubagoe peuristiwa nyang teuma teuka. Allah geupeugah ubak Almaseh mangat Gobnyan geutunyok bak hamba-hamba Allah peue nyang sigra harôh teujadi. Almaseh geukirém malaikat Gobnyan ubak Yahya, hamba Gobnyan, keugeupeugah peuristiwa-peuristiwa nyan ubak gobnyan. 2 Teuma lé Yahya pih laju geupeugah banmandum nyang geukalon nyan; dan nyoe kheueh laporan keuhai peusan nibak Allah nyang ka geupeukong lé Isa Almaseh meulalu keusaksian Gobnyan. 3 Meubahgia kheueh ureuëng nyang beuet dan nyang deungoe haba nubuat lam kitab nyoe dan taát ubak peue nyang na teutuléh lam kitab nyoe. Sabab hana treb lé banmandum nyoe teuma teujadi. 4 Syedara-syedara nyang na nibak tujoh boh jeumaáh lam daerah Asia! Ulôn, Yahya, meuharab gata beugeubri beureukat dan seujahteura nibak Po teu Allah -- na kheueh Gobnyan nyang na, nyang ka na, dan nyang na siumu masa -- dan meunan cit nibak bantujoh boh roh nyang na dikeue takhta Allah, 5 dan nibak Isa Almaseh, saksi nyang seutia. Gobnyan kheueh nyang phon-phon that teupeu-udeb nibak maté dan Gobnyan kheueh nyang mat kuasa ateueh raja-raja donya. Isa geugaséh keugeutanyoe, dan ngon maté Geuhnyan Gobnyan ka geupeubeubaih geutanyoe nibak mandum desya-desya tanyoe, 6 dan geupeujeuet geutanyoe saboh bansa nyang khusos imeum-imeum, nyang layani Allah, Bapak Gobnyan, Isa Almaseh nyan kheueh nyang agong dan meukuasa siumu masa. Amin! 7 Ngieng kheueh, Gobnyan geuteuka jitôb lé awan! Banmandum ureuëng teuma jikalon Geuh nyan, meunan cit lé ureuëng nyang ka jitôb Gobnyan. Banmandum bansa nyang na ateueh rhueng donya nyoe jimoe peuba-e sabab lé Gobnyan. Biet, pasti! Amin! 8 "Ulôn kheueh nyang awai dan nyang akhé," feureuman Tuhan Allah, nyang na, nyang ka na, dan nyang na siumu masa, Nyang Mahakuasa. 9 Ulôn Yahya, syedara gata nyang saboh naseb ngon gata lam peudeuritaan nyang jirasa lé tieb-tieb murit Almaseh. Tanyoe tabah meudeurita sibagoe umat milék Gobnyan. Ulôn jiböih u pulo Patmos sabab ulôn meudakwah feureuman Allah, nyang geupeukong lé Isa meulalu keusaksian Gobnyan. 10 Bak uroe Tuhan, ulôn jikuasa lé Roh Allah, laju lôn deungoe su nyang teuga -- lagée su beureuguih -- jimeututoe dilikot ulôn. 11 Sue nyan jipeugah, "Tuléh kheueh peue nyang gata kalon, dan kirém kheueh laju kitab nyan ubak tujoh boh jeumaáh nyang lôn peugah nyoe: Efesus, Smirna, Pergamus, Tiatira, Sardis, Filadelfia, dan Laodikia." 12 Laju lôn ngieng u likot mangat lôn teupeue soe nyang ka meututoe nyan ubak ulôn. Deuh laju lôn kalon tujoh boh gaki panyöt nyang teupeugét nibak méuh. 13 Bak teungoh-teungoh gaki panyöt nyan deuh lôn kalon sidroe nyang leumah lagée manusia. Gobnyan geungui bajée jubah nyang panyang jih trok bak gaki. Nibak dada Geuhnyan Gobnyan geungui tutôb dada méuh. 14 Ôk Gobnyan putéh lagée bulée bubiri, lagée gapeueh nyang putéh. Mata Gobnyan hu muble-ble lagée apui; 15 gaki Gobnyan meu meuek-meuek lagée teumaga nyang teutot. Su Gobnyan lagée su ié tajo nyang rayeuk. 16 Bak jaroe uneuen Gobnyan geumat tujoh boh bintang, dan nibak babah Gobnyan jiteubiet saboh peudeueng tajam nyang meumata dua. Ruman Gobnyan meucahya lagée mata uroe óh watée cot uroe. 17 Watée ulôn kukalon Gobnyan, laju reubah teudugom dikeue Gobnyan lagée ureuëng maté. Teuma Gobnyan laju geukeubah jaroe uneuen Geuh ateueh ulôn sira geupeugah, "Bék takot! Ulôn kheueh nyang awai dan nyang akhé. 18 Ulôn kheueh Gobnyan nyang udeb! Ulôn ka meuninggai donya, teuma ngieng kheueh, Ulôn udeb keusiumu masa. Ulôn na kuasa ateueh maté, dan ateueh donya ureuëng maté. 19 Sabab nyan, tuléh kheueh hai-hai nyang gata kalon, na kheueh hai-hai nyang na jinoenyoe, dan hai-hai nyang teuma teuka teuma. 20 Nyoe kheueh rahsia nibak tujoh boh bintang nyang gata kalon bak jaroe uneuen Lôn, dan nibak tujoh boh gaki panyöt méuh nyan: Tujoh boh bintang nyan na kheueh malaikat-malaikat nibak tujoh boh jeumaáh, dan tujoh boh gaki panyöt nyan na kheueh ban tujoh jeumaáh nyan."

Wahyu 2

1 "Keu malaikat jeumaáh di Efesus, tuléh kheueh lagée nyoe: Nyoe kheueh peusan nibak Gobnyan nyang mat tujoh boh bintang bak jaroe uneuen Gobnyan, dan geujak lam ruweueng ban tujoh boh gaki panyöt méuh nyan. 2 Ulôn kuteupeue peue nyang gata peubuet: Gata tamubuet brat that dan biet gata tabah lagoena. Ulôn kuteupeue bahwa gata hana tabri até keu ureuëng jeuhet. Dan ureuëng-ureuëng nyang jiaku droe jih rasui padahai kon, ka gata ujoe, dan deuh laju gata ngieng bahwa awaknyan jimeusulet. 3 Gata saba dan gata meudeurita sabab lé Ulôn, dan gata hana putôh asa. 4 Teuma nyoe nyang brat that até Lôn ateueh gata: Bahwa gata hana lé tagaséh keu Ulôn lagée yoh awai. 5 Sabab nyan, ingat kheueh padub na jiôh gata ka rhot! Meutobat kheueh gata nibak desya-desya gata, dan peubuet kheueh peue nyang gata peubuet yoh awai. Meunyoe hana, teuma Ulôn kuteuka ubak gata dan teuma Lôn cok gaki panyöt gata nyan nibak teumpat jih. 6 Teuma na sapeue-sapeue nyang gét nibak gata, atra nyan na kheueh: Gata tabanci ubak murit Nikolaus, Ulôn pih banci keu awaknyan. 7 Barang sigasoe na jideungoe, bah kheueh jikalon peue nyang jipeugah lé Roh Allah ubak jeumaáh-jeumaáh! Awaknyan nyang meunang, teuma Lôn bri jipajoh boh kayée nyang na nibak bak-kayée keuudeban nyang timoh lam Taman Allah." 8 "Keu malaikat jeumaáh nyang na di Smirna, tuléh kheueh lagée nyoe: Nyoe kheueh peusan nibak Gobnyan nyang phon dan nyang akhé -- nyang ka maté dan nyang udeb lom teuma. 9 Ulôn kuteupeue peue-peue nyang gata susah; Ulôn kuteupeue gata gasien teuma nyang sibeuna jih gata kaya! Ulôn kuteupeue peue-peue nyang jipeusuna ateueh gata lé ureuëng-ureuëng nyang jiaku droe jih ureuëng Yahudi, padahai kon; awaknyan na kheueh umat Iblih! 10 Bék kheueh teumakot ubak deurita nyang hana treb lé harôh gata teurimong. Ingat, Iblih teuma jipeutamong siladum lamkawan gata u lam glab guna keuteucuba gata. Gata meudeurita nyang treb jih siploh uroe. Bah kheueh gata seutia ubak Ulôn sampoe án maté, ngon lagée nyan Ulôn teuma kubri ubak gata udeb seujati dan keukai sibagoe hadiah keumeunang. 11 Barang sigasoe hase jideungoe, bah kheueh jisimak peue nyang jipeugah lé Roh Allah ubak jeumaáh-jeumaáh! Awaknyan nyang meunang, sagai-sagai hana teuma meudeurita sapeue lé maté nyang keudua." 12 "Keu malaikat nyang na bak jeumaáh di Pergamus, tuléh kheueh lagée nyoe: Nyoe kheueh peusan nibak Gobnyan nyang mat peudeueng tajam nyang meumata dua. 13 Ulôn kuteupeue dipat gata tinggai, na kheueh bak teumpat Iblih meutakhta. Gata seutia ubak Ulôn. Meunan cit watée Antipas, saksi Ulôn nyang seutia nyan, jipoh maté dikeue gata nibak markas Iblih, gata hana taiengkeue bahwa gata peucaya keu Ulôn. 14 Teuma biet pih meunan na meupadubboh hai nyang hana Ulôn galak keu gata: Na siladum ureuëng lamkawan gata nyang jiseutôt peue nyang jipeurunoe lé Bileam. Bileam jipurunoe Balak pakriban teupeu rhot umat Israel u dalam desya; ngon cara jibujuk awaknyan jipajoh peunajoh nyang ka jipeuseumah keu beurala dan jipeubuet hai-hai nyang cabui. 15 Meunan cit teuma na lamkawan gata ureuëng-ureuëng nyang jiseutôt ubak ajaran nyang jiba lé murit-murit Nikolaus. 16 Sabab nyan, meutobat kheueh nibak desya-desya gata! Meunyoe hán, sikeujab teuk Ulôn teuma teuka ubak gata dan Ulôn prang bubena ureuëng nyan ngon peudeueng nyang na nibak babah Lôn. 17 Barang sigasoe nyang hase jideungoe, bah kheueh jipeuleumah peue nyang geupeugah lé Roh Allah ubak jeumaáh-jeumaáh! Awaknyan nyang meunang, teuma Lôn bri idhin jipajoh manna nyang teusöm, dan maséng-maséng teuma jiteurimong nibak Ulôn saboh batée putéh. Nibak batée nyan teutuléh saboh nan nyang barô, nyang hana jiteupeue lé soe mantong, seulaén lé ureuëng nyang teurimong atra nyan." 18 "Keu malaikat jeumaáh di Tiatira, tuléh kheueh lagée nyoe: Nyoe kheueh peusan nibak Aneuëk Allah, nyang mata Gobnyan hu muble-ble lagée apui, dan gaki Gobnyan meu meuk-meuk lagée teumaga nyang teutot. 19 Ulôn kuteupeue banmandum nyang gata peubuet -- Ulôn kuteupeue gata tagaséh sabe keudroe-droe manusia, gata seutia, gata lam buet, dan gata hase tapeuteun deurita. Ulôn kuteupeue gata bak watée nyoe tamubuet leubeh brat nibak nyang ka-ka. 20 Teuma nyoe nyang brat até Lôn ateueh gata: Gata tabri até keu Izebel, sidroe inong nyang jiaku droe utosan Allah. Ka jai that hamba-hamba Lôn nyang jipeungét dan jipurunoe beujitem peubuet cabui dan beujitem pajoh peunajoh nyang ka jipeuseumah ubak beurala. 21 Ka Ulôn bri keuseumpatan bak jih nyan keu jimeutobat nibak mandum desya-desya jih, teuma jihnyan teutab hana jitem piôh jipeubuet hai-hai nyang cabui nyan. 22 Ingat kheueh! Ulôn teuma kuseumpom jihnyan sampoe sakét ateueh teumpat éh. Nibak teumpat nyan jihnyan dan ureuëng-ureuëng nyang meumukah ngon jihnyan teuma meudeurita luwabiasa. Banmandum nyan Ulôn peubuet jinoenyoe -- laén hai jih meunyoe awaknyan jipiôh jipeubuet hai-hai nyang jeuhet meusajan-sajan ngon jihnyan. 23 Bubena nyang seutôt jihnyan mandum Lôn poh maté mangat jeumaáh jiteupeue bahwa Ulôn kheueh Gobnyan nyang seunom lam pikeran dan até manusia. Gata teuma Lôn balaih meunurot buet gata maséng-maséng. 24 Teuma keu gata nyang laén-laén nyang na di Tiatira hana taseutôt ajaran nyang jeuhet nyan, dan hana gata meurunoe iéleumé-iéleumé Iblih. Ulôn peugah bahwa Ulôn hana teuma Lôn tamah keu gata beuban nyang geuhon nyan. 25 Teuma trok bak watée Ulôn teuka, bah kheueh gata teutab taseutôt peue nyang ka na nibak gata. 26 Awaknyan nyang meunang, dan nyang sampoe bak akhé sabe jipeubuet peue nyang Ulôn lakée, teuma Ulôn bri kuasa nyang saban lagée nyang Lôn teurimong nibak Bapak Lôn. Awaknyan teuma jiteurimong keukuasaan nibak Ulôn keu jipeurintah bansa-bansa ngon tungkat beuso, dan keu jipeuhanco bansa-bansa nyan lagée beulangöng tanoh. 28 Awaknyan teuma jiteurimong bintang timu nibak Ulôn. 29 Barang sigasoe nyang hase jideungoe, bah kheueh jikalon peue nyang jipeugah lé Roh Allah ubak jeumaáh-jeumaáh!"

Wahyu 3

1 "Keu malaikat jeumaáh di Sardis, tuléh kheueh lagée nyoe: Nyoe kheueh peusan nibak Gobnyan nyang na tujoh boh roh nibak Allah dan ban tujoh boh bintang nyan. Ulôn kuteupeue peue nyang gata peubuet. Jipeugah gata udeb, padahai gata maté! 2 Sabab nyan, beudôh kheueh, dan peukong kheueh peue nyang mantong na nibak gata sigohlom atra nyan maté banmandum. Sabab Lôn teumé bahwa peue nyang gata peubuet, gohlom sapeue pih nyang sampoereuna dikeue Po teu Allah. 3 Ngon lagée nyan, ingat kheueh lom peue nyang ka lheueh teupurunoe keu gata yoh awai ilée dan peue nyang ka gata deungoe. Amai kheueh nyan dan meutobat kheueh nibak banmandum desya-desya gata. Meunyoe gata hana tabeudôh, Ulôn teuma teuka bak gata lagée pancuri; dan gata hana tateupeu pajan watée jih Ulôn teuka. 4 Teuma lamkawan gata di Sardis mantong na ureuëng nyang keumiet mangat peukayan jih teutab gleh. Awaknyan teuma jijak meusajan-sajan ngon Lôn sira teungui peukayan putéh, sabab awaknyan patot that keuhai nyan. 5 Keu awaknyan nyang meunang teuma teubri peukayan jubah putéh. Nan awaknyan teutab hana Lôn sampoh lam Kitab Ureuëng Udeb. Dan dikeue Bapak Lôn dan malaikat-malaikat, awaknyan laju Lôn peugah bahwa nyan na kheueh milék Lôn. 6 Barang sigasoe hase jideungoe, bah kheueh jisimak peue nyang geupeugah lé Roh Allah ubak jeumaáh-jeumaáh!" 7 "Keu malaikat jeumaáh di Filadelfia, tuléh kheueh lagée nyoe: Nyoe kheueh peusan nibak Gobnyan nyang suci dan seujati. Gobnyan kheueh nyang mat gunci nyang na bak Nabi Daud; meunyoe Gobnyan nyang peuhah, hana meusidroe pih nyang hase jitôb atra nyan, dan meunyoe Gobnyan nyang tôb, hana meusidroe pih nyang hase jipeuhah. 8 Ulôn kuteupeue peue nyang gata peubuet. Ulôn kuteupeue bahwa gata hana padub na teuga; gata ka taturot nyang Ulôn purunoe dan seutia bak Ulôn. Keugata ka Ulôn peuhah saboh pintoe, nyang hana hase jitôb lé soe mantong. 9 Ingat kheueh nyoe: Ureuëng-ureuëng nyang jeuet keu umat Iblih nyan, tukang meusulet nyang jiaku droe jih Yahudi padahai kon, teuma Lôn peujeuet jihnyan akhé jih jijak sujut dikeue gata. Dan awaknyan teuma jiteupeue bahwa Ulôn kugaséh gata. 10 Sabab gata ka taturot peurintah Lôn mangat beuteukon, Ulôn pih Lôn lindong gata nibak masa susah nyang jiteuka bansigom donya. Hai nyan teujadi keu teu-ujoe banmandum ureuëng nyang na ateueh rhueng bumoe. 11 Ulôn reujang kuteuka! Jaga kheueh beugét-gét peue nyang na nibak gata, mangat bék na meusidroe pi nyang jireupah hadiah keumeunangan gata. 12 Ureuëng nyang meunang, teuma Lôn peujeuet sibagoe taméh lam Baét Suci Allah Lôn, dan jihnyan tinggai nibak teumpat nyan siumu masa. Nan Allah Lôn, dan nan banda Allah Lôn -- na kheueh Yerusalem barô nyang jitreun lam syeuruga, nibak Allah Lôn -- teuma Lôn tuléh nibak droe ureuëng nyan. Meunan cit nan Ulôn nyang barô teuma Lôn tuléh nibak droe jih. 13 Barang sigasoe hase jideungoe, bah kheueh jisimak peue nyang geupeugah lé Roh Allah ubak jeumaáh-jeumaáh!" 14 "Keu malaikat jeumaáh nyang na di Laodikia, tuléh kheueh lagée nyoe: Nyoe kheueh peusan nibak Sang Amin, Saksi nyang seutia dan beutôi, sumber nibak peue-peue mantong nyang geucebta lé Po teu Allah. 15 Ulôn kuteupeue peue nyang gata peubuet; Ulôn kuteupeue gata hana leupie dan hana teuma seu-uem. Nyang sibeuna jih gata sapeue lam dua nyan! 16 Teuma gata seu-uem seu-uem gukée; seu-uem hana, leupie pih hana. Nyang kheueh sabab jih gata Lôn peumuntah uluwa lam babah Lôn. 17 Gata tapeugah, 'Kamoe kaya dan peue-peue mantong na; nibak kamoe hana kureueng sapeue.' Teuma gata hana tateupeu padub na meularat dan padub na seudeh jih keuadaan gata! Gata gasien, teulon dan buta. 18 Sabab nyan Ulôn naseuhat gata mangat tabloe nibak Ulôn méuh, na kheueh méuh nyang aseuli, mangat gata jeuet keukaya. Meunan cit jakbloe cit teuma peukayan putéh nyang na bak Lôn mangat gata na peukayan dan teutôb keuadaan gata nyang teulon dan that-that malée nyan. Meunan cit bloe cit teuma ubat keuteu siliek bak mata gata mangat gata jeuet takeumalon. 19 Ureuëng-ureuëng nyang Ulôn gaséh, awaknyan kheueh nyang Ulôn seugah dan Lôn seunuét. Lé sabab nyan bah kheueh gata meuseumangat, dan meutobat kheueh nibak desya-desya gata. 20 Ngieng kheueh! Ulôn dong bak babah pintoe dan Lôn keutok. Meunyoe na ureuëng nyang jideungoe su Lôn, dan jipeuhah pintoe, Ulôn teuma kutamong jak meurumpok ngon jihnyan; Ulôn teuma ku makheun meusajan-sajan ngon jih nyan dan jih nyan jimakheun teuma meusajan-sajan ngon Ulôn. 21 Awaknyan nyang meunang, teuma kubri idhin jiduek nibak takhta Lôn meusajan ngon Lôn, saban lagée Lôn keudroe pih ka meunang dan jinoenyoe teuduek ngon Bapak Lôn nibak takhta Gobnyan. 22 Barang sigasoe jeuet jimeudeungoe, bah kheueh jisimak peue nyang jipeugah lé Roh Allah ubak jeumaáh-jeumaáh!"

Wahyu 4

1 Óh lheueh nyan ulôn meuteumé lôn keumalon. Deuh lôn kalon saboh pintoe ka teuhah lam syeuruga. Óh lheueh nyan teudeungoe lom su nyang yoh awai phon ka geumariet lagée su beureuguih. Su nyan jipeugah, "Jak ék keunoe. Ulôn teuma lôn tunyok bak gata peue nyang teuma teujadi." 2 Watée nyan cit teuma lôn jikuasa lé Roh Allah. Laju lôn ngieng lam syeuruga na saboh takhta, dan na sidroe ureuëng jiduek ateueh takhta nyan. 3 Ruman ureuëng nyan muble-ble cahya lagée peumata baiduri ôn sikée dan peumata deulima. Dan na saboh peulangi wareuna jih lagée zamrut jikeulileng takhta nyan. 4 Lam bantuek meulingka bansikeulileng takhta nyan na teuma dua ploh peuet boh takhta nyang laén. Nibak teumpat nyan na teuma jiduek dua ploh peuet droe peumimpén nyang banmandum jingui peukayan putéh, meunan cit jingui mahkota méuh. 5 Nibak takhta nyan jiteubiet teuma cahya kilat dan jiteubiet su geulanteue nyang biet-biet teuga. Dan dikeue takhta nyan na teuma tujoh boh suwa nyang teungoh hu; nyan kheueh bantujoh boh Roh Allah. 6 Na teuma dikeue takhta nyan sisuatu lagée laôt ceureumen, jeureunéh lagée kristal. Ban sikeulileng takhta nyan, nibak tieb-tieb binéh jih, na peuet boh makhlok, nyang bagian keue ngon bagian likot jih peunoh ngon mata. 7 Makhlok nyang phon deuh jih lagée singa. Nyang keudua lagée leumô agam. Nyang keu lhée ruman jih lagée ruman manusia. Nyang keu peuet, deuh jih lagée cicém siwah nyang teungoh po. 8 Ban peuet boh makhlok nyan, maséng-maséng na nam boh sayeueb, dan bansilingka nyan meunan cit nibak bagian u dalam nyan peunoh ngon mata. Uroe malam makhlok-makhlok nyan hana jipiôh jimeuzikée, "Kudus, kudus, kudus kheueh Tuhan, Allah Mahakuasa; nyang na, nyang ka na, dan nyang na siumu masa." 9 Ban peuet boh makhlok nyan jimeuzikée ngon ca-e puja ngon pujo, horeumat dan syukoe ubak Gobnyan nyang duek ateueh takhta nyan, na kheueh Gobnyan nyang udeb siumu masa. Dan bak watée makhlok-makhlok nyan meuzike, 10 ban dua ploh peuet droe peumimpén nyan reubah teudugom dikeue ureuëng nyang duek ateueh takhta nyan, laju jiseumah Gobnyan nyang udeb siumu masa. Óh lheueh nyan awaknyan jigeulawa mahkota-mahkota awaknyan keudroe ukeue takhta nyan sira jipeugah, 11 "Ya Tuhan, ya Allah kamoe! Droeneueh mantong kheueh nyang patot teurimong pujo, horeumat ngon kuasa. Sabab droeneueh nyang cebta peue-peue nyang na, dan ateueh keuheundak Droeneueh cit teuma peue-peue mantong nyan ka na dan udeb."

Wahyu 5

1 Óh lheueh nyan lôn kalon teuma saboh gunulong kitab bak jaroe Gobnyan nyang duek ateueh takhta nyan. Kitab nyan peunoh ngon tulésan blaih deh blaih noe dan na teuma teuboh meuteurai nyang le jih na tujoh boh segée. 2 Laju lôn kalon sidroe malaikat nyang peukasa sira geumeuhôi-meuhôi ngon su meudumpék, "Soe nyang patot jipeubeukah segée-segée nyoe dan jipeuhah kitab nyoe?" 3 Teuma bahnyan lam syeuruga, nyang na ateueh bumoe, atawa dimiyueb bumoe, hana meuteumé meusidroe pih nyang hase jipeuhah kitab nyan, dan jingieng lam kitab nyan. 4 Teuma ulôn laju kumo musôk-musôk sabab hana meusidroe ureuëng pih nyang hase jipeuhah kitab nyan dan jingieng lam nyan. 5 Laju sidroe lamkawan peumimpén nyan jipeugah bak ulôn, "Bék mo! Ngieng kheueh! Singa nibak sukée bansa Yehuda, keuturonan nabi Daud nyang rayeuk, ka meunang. Jih nyan hase jipeubeukah tujoh boh segée dan jipeuhah kitab nyan." 6 Óh lheueh nyan laju lôn kalon saboh Aneuëk Bubiri teudong diteungoh-teungoh takhta nyan, jikeulileng lé peuet boh makhlok dan mandum peumimpén nyan. Aneuëk Bubiri nyan deuh jih lagée ka teusie. Bak jih na tujoh boh lungkée dan tujoh boh mata: na kheueh tujoh roh nibak Allah nyang ka geukirém bansigom donya. 7 Óh lheueh nyan Aneuëk Bubiri nyan jipeurab ukeue dan laju jicok gunulong kitab nyan bak jaroe uneuen ureuëng nyang duek ateueh takhta nyan. 8 Teungoh jipeubuet lagée nyan lé Aneuëk Bubiri nyan, laju meuduga ban peuet boh makhlok dan ban dua ploh peuet peumimpén nyan dikeue geuh nyan. Awaknyan maséng-maséng jimat keucapi dan mangkok méuh nyang meuasoe keumeunyan, na kheueh doá-doá umat Po teu Allah. 9 Awaknyan meuca-e saboh lagu nyang barô: "Droeneueh patot tacok kitab nyan dan Droeneueh peubeukah segée-segée nyan. Sabab Droeneueh ka jipoh maté, dan ngon maté Droeneueh nyan, manusia nibak banmandum sukée, basa, neugahra dan bansa ka tabloe lé droeneueh keu Po teu Allah. 10 Droeneueh ka neupeujeuet awaknyan saboh bansa khusos imeum-imeum, mangat awaknyan jipeutimang Allah geutanyoe, dan jimat peurintah di ateueh bumoe." 11 Óh lheueh nyan deuh lôn kalon lom. Ulôn deungoe su malaikat nyang meuribée-ribée dan meujuta-juta lé jih. Awaknyan jidong jikeulileng takhta dan ban peuet boh makhlok meunan cit ngon peumimpén-peumimpén nyan. 12 Dan awaknyan laju jimeulagu ngon su nyang teuga, "Aneuëk Bubiri nyang ka teusie nyan, na hak keujiteurimong kuasa, keukayaan, keubijaksanaan dan teunaga; Gobnyan patot teuhoreumat, teupeuagong dan teupujo-pujo!" 13 Laju lôn deungoe mubagoe makhlok nyang na di langét, ateueh bumoe, dan nyang na dimiyueb bumoe meunan cit nyang na lam laôt -- jeulaih jih banmandum makhlok nyang na ateueh rhueng donya nyoe -- jimeulagu, "Gobnyan nyang duek di ateueh takhta, dan Nyang Aneuëk Bubiri nyan, na kheueh teupujo dan teuhoreumat dan agong lom meukuasa keu siumu masa!" 14 Teuma ban peuet boh makhlok nyan laju jijaweueb, "Amin!" Dan banmandum peumimpén nyan pih laju teudugom dan jiseumah.

Wahyu 6

1 Óh lheueh nyan lôn kalon Aneuëk Bubiri nyan jipeubeukah segée nyang phon lamkawan tujoh boh segée nyan. Laju lôn deungoe saboh lamkawan peuet boh makhlok nyan jipeugah, "Keunoe!" Su jihnyan meutaga lagée su geulanteue. 2 Teuma lôn kalon, deuh laju saboh guda putéh. Nyang duek ateueh guda nyan jimat saboh ali-ali, dan keu jihnyan tebri saboh mahkota. Óh lheueh nyan jimaju ukeue lagée ureuëng meunang nyang jijak reubot keumeunangan. 3 Óh lheueh nyan Aneuëk Bubiri nyan jipeubeukah segée nyang keudua, dan laju lôn deungoe makhlok nyang keudua jipeugah, "Keunoe!" 4 Dan laju saboh guda nyang laén jiteubiet lom teuma. Guda nyan mirah hi jih. Nyang duek ateueh guda nyan geubri kuasa keu jipeuleunyab keuadaan damé ateueh rhueng bumoe, mangat manusia sabe jipoh keudroe-droe. Ngon lagée nyan bak jihnyan laju geujok saboh peudeueng nyang rayeuk. 5 Laju lé Aneuëk Bubiri nyan jipeubeukah segée nyang keu lhée. Dan lôn deungoe makhlok nyang keu lhée jipeugah, "Keunoe!" Ulôn kalon, deuh laju saboh guda itam. Nyang duek ateueh guda nyan jimat dua boh céng bak jaroe jih. 6 Dan laju lôn deungoe sisuatu nyang teudeungoe jih lagée su nyang teungoh jimeuhôi-meuhôi nibak teungoh-teungoh peuet boh makhlok nyan. Su nyan jipeugah, "Siarée gandom nyang jroh yuem jih sidub upah siuroe, dan lhée arée gandom nyang jeunéh jih laén yuem jih siuroe mubuet cit. Teuma bék peurusak bube na bak zaiton dan lam poh anggô!" 7 Óh lheueh nyan lé Aneuëk Bubiri nyan laju jipeubeukah segée nyang keu peuet. Dan laju lôn deungoe makhlok nyang keu peuet jipeugah, "Keunoe!" 8 Ulôn kalon, deuh laju saboh guda nyang pucat ié muka jih. Nyang duek ateueh guda nyan nan jih Mawöt. Rot likot, jihnyan jiseutôt rab-rab that lé Álam Mawöt. Keukuasaan ateueh siper peuet bumoe nyoe teujok bak awaknyan, mangat awaknyan hase jipoh maté gob watée lam prang, meunan cit meulalu watée jiteuka musém deuk, meulalu bala peunyakét dan meulalu beulatang-beulatang juah. 9 Óh lheueh nyan lé Aneuëk Bubiri nyan jipeubeukah segée nyang keu limong. Laju deuh lôn kalon dimiyueb miseubah na jiwa-jiwa ureuëng nyang maté keunong poh sabab awaknyan jipeukong peusan nibak Allah meulalu keusaksian awaknyan. 10 Awaknyan jimeudumpék ngon su nyang meutaga, "Ya Tuhan Nyang Mahakuasa, nyang suci dan nyang beuna! Padub treb teuk Droeneueh neupeusidang peunduduek bumoe dan neuhuköm awaknyan sabab ka jipoh maté kamoe?" 11 Awaknyan maséng-maséng teubri siôn bajée jubah nyang putéh. Laju awaknyan teuyue meureuhat sikeujab teuk, sampoe ka seb jeumeulah rakan-rakan siperjuangan dan syedara-syedara awaknyan nyang teuma jipoh maté lagée awaknyan. 12 Laju ulôn kalon Aneuëk Bubiri nyan jipeubeukah segée nyang keu nam. Dan jiteuka kheueh geumpa bumoe nyang luwabiasa. Mata uroe ka jeuet keu itam lagée ija itam nyang gasa, dan buleuen ka jeuet keumirah lagée darah. 13 Bintang-bintang ka rhot nibak langét ateueh bumoe lagée boh ara nyang gohlom masak rhot ateueh bak jih watée jipot lé angén teuga. 14 Langét gadôh lagée keureutah teugulong, dan banmandum gunong ngon pulo teugesée nibak teumpat jih. 15 Laju lé raja-raja donya, dum na ureuëng rayeuk, dum na pang-pang, ureuëng-ureuëng kaya dan ureuëng-ureuëng meukuasa, meunan cit ngon ureuëng-ureuëng laén, bah kheueh namiet meunan cit ngon ureuëng meurdehka, banmandum jipeusöm droe lam guha-guha dan lam-lam luengkiek batée gunong. 16 Ubak gunong-gunong dan batée nyan awaknyan jidumpék, "Ginton kheueh kamoe! Som kheueh kamoe nibak jikalon lé Gobnyan nyang duek ateueh takhta jéh, dan nibak beungéh Aneuëk Bubiri nyan! 17 Uroe pagée ka trok, jinoenyoe awaknyan jipeuleumah beungéh jih, dan hana meusidroe pih nyang hase jimeuteun dikeue awaknyan!"

Wahyu 7

1 Óh lheueh nyan, lôn kalon teuma peuet droe malaikat geudong bak peuet boh peunjuru bumoe. Awaknyan geupeuteun ban peuet boh angén di bumoe mangat bék na angén nyang jipot di darat atawa di laôt, atawa ateueh bak-bak kayée. 2 Óh lheueh nyan deuh teuma lôn kalon sidroe teuk malaikat nyang laén teuka di siblaih u timu. Gobnyan geuba segée nibak Allah nyang udeb. Ngon su nyang teuga malaikat nyan laju geuhôi ban peuet droe malaikat nyang ka meuteumé kuasa nibak Allah keujipeurusak darat ngon laôt. 3 Malaikat nyan jipeugah, "Bék ilée gata peurusak darat atawa laôt, atawa bak-bak kayée meunyoe kamoe gohlom kamoe boh tanda segée nibak dho hamba-hamba Allah tanyoe." 4 Laju bak lôn geubri tée bahwa na nyang lé jih 144.000 droe nyang teubri tanda segée nibak Allah nibak dho awaknyan. Ureuëng-ureuëng nyan teucok nibak bandua blaih sukée bansa Israel; 5 nibak tieb-tieb sukée 12.000 ureuëng. Na kheueh nibak sukée Yehuda, Ruben, Gad, 6 Asyer, Naftali, Manasye, 7 Simeon, Lewi, Isakhar, 8 Zebulon, Yusuf, dan Benyamin. 9 Óh lheueh nyan lôn ngieng lom, laju deuh laôt manusia nyang hana teukira lé jih -- hana meusidroe pih nyang hase ji-itong jeumeulah jih. Awaknyan na kheueh ureuëng-ureuëng nibak tieb-tieb bansa, sukée, neugahra, dan basa. Deungon jingui bajée jubah nyang putéh-putéh dan bak jaroe jih maséng-maséng jimat cabeueng bak palem, ureuëng nyang jai that nyan jidong jimeuhadab ubak takhta dan jihadab ubak Aneuëk Bubiri nyan. 10 Laju ngon su nyang meutaga awaknyan jimeuhôi, "Seulamat geutanyoe teuka nibak Allah tanyoe, nyang duek di ateueh takhta, dan nibak Aneuëk Bubiri nyan!" 11 Banmandum malaikat geudong geukeulileng takhta meunan cit ngon mandum peumimpén dan ban peuet boh makhlok nyan. Malaikat-malaikat nyan laju teudugom dikeue takhta laju geuseumah Allah. 12 Awaknyan geutawök, "Amin! Teupujoe kheueh Allah geutanyoe nyang agong dan bijaksana. Gobnyan patot teupeulimpah ngon tutoe haba syukoe dan horeumat. Gobnyan meukuasa dan teuga siumu masa! Amin." 13 Sidroe lamkawan peumimpén jitanyong bak ulôn, "Ureuëng-ureuëng nyang jingui bajée jubah putéh nyoe, soe awaknyan dan pane asai jih?" 14 "Ulôn hana kuteupeue, Teungku. Teungku keudroe nyang teupeue," jaweueb lôn. Teuma ureuëng nyan jipeugah bak ulôn, "Nyoe kheueh ureuëng-ureuëng nyang ka seulamat meulalu masa iénanya nyang luwabiasa. Awaknyan ka jirhah jubah awaknyan dan jipeujeuet nyan sampoe putéh ngon darah Aneuëk Bubiri nyan. 15 Nyang kheueh sabab jih awaknyan jidong dikeue takhta Allah, dan meu iébadat ubak Gobnyan uroe ngon malam didalam Baét Allah. Dan Gobnyan nyang duek ateueh takhta nyan teuma na meusajan awaknyan keugeulindong awaknyan. 16 Awaknyan hana lé teurasa deuk atawa grah; mata uroe atawa seu-eum nyang kha hana lé jitot awaknyan, 17 sabab Aneuëk Bubiri nyang duek bak teungoh-teungoh takhta nyan ka jeuet tukang rabe awaknyan. Gobnyan teuma geuba awaknyan ubak mata ié nyang teubri udeb. Dan Po teu Allah geusampôh ié mata awaknyan nyang ile bak mata awaknyan."

Wahyu 8

1 Watée Aneuëk Bubiri nyan jipeubeukah segée nyang keutujoh, syeuruga laju sungue nyang treb jih na kira-kira siteungoh jeuem. 2 Laju ulôn kalon bantujoh malaikat nyang geudong dikeue Po teu Allah, dan bak awaknyan laju geujok tujoh boh beureuguih. 3 Sidroe malaikat nyang laén, nyang geuba saboh dupa méuh, geuteuka dan geudong dikeue miseubah. Ubak gobnyan jai that geubri keumeunyan keu ngon baca doá-doá banmandum umat Allah dan keugeupeuseumah ubak miseubah méuh nyang na dikeue takhta. 4 Meusajan ngon doá-doá umat Po teu Allah, asab dupa nyang teungoh hu nyan meukeupong jiék nibak jaroe malaikat nyang teudong dikeue Allah nyan. 5 Óh lheueh nyan lé malaikat nyan laju geucok dupa nyan, dan geupasoe laju ngon apui nibak miseubah, laju geurhom u ateueh bumoe. Ngon nyan jiteuka kheueh geulanteue meutaga-taga meunan cit ngon kilat sabe muble-ble hana reuda, dan teuka kheueh geumpa bumoe. 6 Óh lheueh nyan, bantujoh droe malaikat nyang mat tujoh boh beureuguih nyan ka siab-siab keuneuk jiyueb beureuguih nyan. 7 Malaikat nyang phon laju jiyueb beureuguih jih, watée nyan cit ujeuen éeh dan apui meulawok ngon darah jitreun ngon tajam that u ateueh bumoe. Siper lhée bumoe habéh tutong; meunan cit siper lhée nibak bak-bak kayée, dan tieb-tieb naleueng nyang ijo. 8 Óh lheueh nyan malaikat nyang keudua jiyueb teuma beureuguih jih, meunan jiyueb deuh laju teukalon saboh beunda nyang biet that rayeuk deuh lagée gunong hu muble-ble teupeupo lam laôt. Siper lhée laôt nyan meu-ubah jeuet keudarah, 9 ngon lagée nyan maté kheueh siper lhée nibak makhlok nyang na lam laôt; dan meunan cit teuma na siper lhée nibak kapai-kapai nyang na lam laôt nyan habéh tutong. 10 Óh lheueh nyan malaikat nyang keu lhée laju jiyueb teuma beureuguih jih, ngon lagée nyan saboh bintang nyang rayeuk, nyang hu muble-ble bak lagée suwa apui, rhot nibak langét, laju rhot ateueh siper lhée nibak krueng-krueng dan mata ié. 11 (Nan bintang nyan "Phet".) Ngon lagée nyan siper lhée nibak ié ka jeuet keu phet, dan jai that ureuëng meuninggai óh lheueh jijieb ié nyang ka jeuet keu phet nyan. 12 Óh lheueh nyan malaikat nyang keu peuet jiyueb teuma beureuguih jih. Ngon lagée nyan, keunong tampa kheueh siper lhée nibak mata uroe, siper lhée nibak buleuen, dan siper lhée nibak bintang-bintang ngon lagée nyan gadôh kheueh siper lhée nibak teunaga cahya awaknyan. Meunan cit siper lhée nibak uroe hana trang dan meunan cit siper lhée nibak malam. 13 Laju ulôn kalon, teuma ulôn deungoe saboh cicém siwah nyang teungoh jipo manyang di udara, jimeuhôi, "Mupaloe! Mupaloe! Mupaloe kheueh banmandum ureuëng nyang na ateueh rhueng donya nyoe meunyoe teudeungoe lhée malaikat nyang laén jiyueb beureuguih jih teuma!"

Wahyu 9

1 Laju lé malaikat nyang keulimong geuyueb beureuguih geuh, dan deuh laju lôn kalon saboh bintang rhot nibak langét u ateueh bumoe. Bintang nyan teubri gunci jurông mawöt. 2 Teuma lé bintang nyan laju jipeuhah jurông mawöt nyan, laju deuh asab jiteubiet lam atra nyan lagée asab nibak tungkée nyang rayeuk. Mata uroe ngon langét manyang ka jeuet keuseupôt sabab lé asab nyang jiteubiet lam jurông nyan. 3 Laju nibak lam asab nyan jiteubiet teuma daruet-daruet nyang jitreun u bumoe. Ubak daruet-daruet nyan jibri kuasa nyang saban lagée nyang teubri keu kala jeungking. 4 Bak awaknyan teutam bék jipeurusak naleueng, meunan cit ngon bak-bak kayée, atawa seunaman-seunaman laén banmandum nyan hana jeuet jipeurusak. Daruet-daruet nyan nyang jeuet jiseurang na kheueh ureuëng-ureuëng nyang nibak dho jih hana tanda segée nibak Allah. 5 Teuma ubak daruet-daruet nyan hana teubri jipoh maté ureuëng-ureuëng nyan, nyang jeuet jiseksa awaknyan nyang treb jih limong buleuen. Sakét nyang jirasa lé sabab teuseksa lé daruet-daruet nyan saban sakét jih lagée jikab lé kala jeungking. 6 Nyang treb jih limong buleuen nyan, ureuëng-ureuëng nyang keunong seksa lé daruet-daruet nyan jiuseuha mangat droe jih maté, teuma awaknyan teutab hase jitem maté; awaknyan jitem maté, teuma mawöt jiôh nibak awaknyan. 7 Hi daruet nyan lagée guda nyang ka siab keuneuk jak lam prang. Bak ulée daruet-daruet nyan na deuh sapeue-sapeue lagée makhkota méuh. Ruman daruet-daruet nyan lagée ruman manusia. 8 Ôk jih lagée ôk ureuëng inong, dan gigo jih lagée gigo singa. 9 Nibak dada jih teutôb ngon sisuatu nyang rab saban ngon sinutôb beuso. Su sayeueb jih lagée su geuritan-geuritan guda nyang jai teungoh jimaju u mideuen prang. 10 Daruet-daruet nyan na iku ngon bisa lagée kala jeungking. Dan iku jihnyan na kheueh na meuteumé teunaga droe jih keu jiseksa manusia nyang treb jih limong buleuen nyan. 11 Awaknyan na raja nyang peurintah droe jih keudroe, dan raja nyan na kheueh malaikat nyang meutanggong jaweueb ateueh jurông mawöt. Nan jih lam basa Ibrani na kheueh Abadon; dan lam basa Yunani Apolion (nyang makna jih "Peurusak"). 12 Ceulaka nyang phon ka liwat. Óh lheueh nyan na dua boh ázeb teuk nyang meuseuti teuka. 13 Óh lheueh nyan malaikat nyang keu nam laju geuyueb beureuguih geuh. Teuma laju lôn deungoe su nyang teuka nibak ban peuet boh sagoe miseubah méuh nyang na dikeue Po teu Allah. 14 Su nyan jipeugah bak malaikat nyang keu nam nyan, "Jak peuleueh kheueh ban peuet droe malaikat nyang teuikat nibak Krueng Efrat nyan!" 15 Ban peuet droe malaikat nyan pih laju teupeuleuh. Awaknyan ka teupeusiab khusos keu jeuem, uroe, buleuen dan thon keu teupoh maté siper lhée nibak banmandum umat manusia. 16 Bak ulôn jibri tée bahwa jeumeulah pasokan-pasokan meuguda nyan na dua reutôh juta. 17 Dan lam keumalon lôn nyan, laju lôn ngieng guda-guda nyan dan nyang duek ateueh guda-guda nyan. Nyang duek ateueh guda-guda nyan jisôk bajée beuso nyang wareuna jih mirah hu. Ijo lagée batée nilam, dan kunéng beulerang. Ulée guda-guda nyan lagée ulée singa, dan nibak babah jih jiteubiet apui, asab dan beulerang. 18 Siper lhée nibak umat manusia teupoh maté lé lhée boh beuncana nyan, atra nyan na kheueh; apui, asab, dan beulerang nyang jiteubiet lam babah guda-guda nyan. 19 Teunaga guda-guda nyan na meuteumé nibak babah dan meunan cit nibak iku jih. Iku-iku jih lagée uleue meu-ulée. Ngon iku jih nyan, guda-guda nyan jiseksa manusia. 20 Teuma nyang tinggai umat manusia nyang hana teupoh maté lé beuncana-beuncana nyan pih, hana teuma jitinggai buet jaroe jih keudroe. Awaknyan hana jipiôh jiseumah roh-roh jeuhet dan beurala-beurala méuh, pirak, teumaga, batée dan kayée nyang hana hase jikalon atawa jideungoe, meunan cit hana jeuet jijak. 21 Meunan cit awaknyan hana teuma jitinggai buet-buet jih nyang jeuhet, na kheueh jipoh maté gob, jingui iéleumé-iéleumé gaéb, buet cabui dan ceumeucue.

Wahyu 10

1 Laju lôn kalon sidroe malaikat peukasa nyang laén geutreun lam syeuruga. Malaikat nyan jipeupayong lé awan, dan saboh peulangi jikeulileng ulée gobnyan. Ruman geuh meucahya lagée mata uroe, dan gaki gobnyan lagée taméh apui. 2 Bak jaroe gobnyan na saboh geunulong kitab ubit nyang teuhah. Gaki wie geuh teugilo lam laôt dan gaki uneuen geuh teugilo ateueh darat. 3 Laju gobnyan geudumpék ngon su nyang meutaga lagée su singa-singa meudumpék. Óh ka lheueh malaikat nyan geudumpék, ban tujoh boh geulanteue laju jijaweueb ngon su nyang meutaga. 4 Meunan ban tujoh boh geulanteue nyan jimeusu, ulôn keuneuk cetet atra nyan, teuma laju lôn deungoe su lam syeuruga jipeugah, "Söm kheueh bék na soe teupeu peue nyang jipeugah lé ban tujoh geulanteue nyan; bék gata cetet!" 5 Laju malaikat nyang lôn ngieng gaki geuh nyang teugilo lam laôt ngon ateueh darat nyan geubeuôt jaroe uneuen geuh u langét. 6 Gobnyan meusumpah deumi nan Allah nyang udeb siumu masa, nyang cebta langét, bumoe dan laôt dan banmandum peue-peue nyang na lam nyan. Malaikat nyan jipeugah, "Watée jih hana teuma teupeupreh lé! 7 Teuma meunyoe malaikat keu tujoh geuyueb beureuguih gobnyan, Allah teuma geupeubuet banmandum reucana rahsia Gobnyan, lagée nyang ka geupeugah ubak hamba-hamba Gobnyan, na kheueh nabi-nabi." 8 Óh lheueh nyan su nyang ka ulôn deungoe lam syeuruga nyan, jimeututoe lom bak ulôn. Gobnyan geupeugah, "Jak kheueh laju gata cok geunulong kitab bak jaroe malaikat nyang gaki geuh na teugilo lam laôt ngon ateueh darat nyan." 9 Teuma ulôn pi laju kujak ubak malaikat nyan mangat geubri bak lôn geunulong kitab nyang ubit nyan. Malaikat nyan geupeugah, "Cok kheueh dan makheun kheueh nyoe. Óh trok lam pruet gata jihnyan jeuet keu phet, teuma lam babah gata jihnyan maméh lagée meulisan." 10 Laju ulôn cok geunulong kitab nyang ubit nyan bak jaroe gobnyan laju lôn pajoh. Bak babah rasa jih lagée meulisan maméh jih, teuma óh ka lheueh lôn uét atra nyan, lam pruet lôn atra nyan ka jeuet keu phet. 11 Óh lheueh nyan ulôn jipeurintah, "Jak peusampoe kheueh sigoe teuk haba keuhai Po teu Allah ubak bansa-bansa, neugahra-neugahra, basa-basa dan raja-raja."

Wahyu 11

1 Óh lheueh nyan keulôn geubri sikrék kayée nyang hi jih lagée tungkat ngon uko, óh lheueh nyan laju geupeurintah lagée nyoe, "Jak uko kheueh laju Baét Allah dan miseubah. Itong kheueh padub na lé jih ureuëng nyang meuiébadat lam Baét Allah nyan. 2 Teuma bék gata uko leuen Baét Allah nyang bagian luwa jih, sabab jeumba nyan ka teujok keu ureuëng-ureuëng nyang hana jituri Tuhan. Awaknyan teuma jigiloe-giloe banda nyang suci nyan nyang treb jih peuet ploh dua buleuen. 3 Ulôn teuma kukirém dua droe saksi Lôn nyang jingui peukayan meuduka, dan awaknyan teuma jipeumaklum feureuman Allah nyang treb jih 1260 uroe." 4 Dua saksi nyan na kheueh dua bak zaiton dan dua boh gaki panyöt nyang na dikeue Tuhan semeusta álam nyoe. 5 Meunyoe na ureuëng jicuba peubuet sapeue-sapeue nyang hana gét ateueh awaknyan, teuma lam babah awaknyan jiteubiet kheueh laju apui nyang ka siab jipeubinasa musoh-musoh awaknyan. Ngon cara nyang lagée nyan, banmandum ureuëng nyang jikeuneuk iélanya awaknyan teupoh maté. 6 Awaknyan na kuasa keu jitôb langét mangat bék jitreun ujeuen watée awaknyan teungoh jipeumaklum feureuman nibak Po teu Allah. Meunan cit nibak awaknyan na kuasa ateueh mandum mata ié, keu ji-ubah ié jeuet keu darah. Dan awaknyan na teuma kuasa keu jiseupôt bumoe ngon meubagoe rupa beuncana, pajan mantong nyang jikeuneuk peubuet lé awaknyan. 7 Óh ka seuleusoe awaknyan jipeusampoe feureuman Allah nyan, beulatang nyang jiteubiet lam jurông mawöt teuma jilawan awaknyan. 8 Dan manyét awaknyan teuma teuhanta ateueh rot rayeuk banda rayeuk, nibak teumpat Tuhan awaknyan teusaleb. Nan kiasan banda nyan na kheueh Sodom atawa Meusé. 9 Ureuëng-ureuëng nibak mandum neugahra, sukée, basa, dan bansa teuma jikalon manyét awaknyan nyang treb jih lhée siteungoh uroe, dan hana teupeuidhin manyét-manyét nyan teukubu. 10 Peunduduek bumoe jimeusurak ria ateueh meuninggai bandua saksi nyan. Awaknyan teuma jipeurayeuk dan saléng keumirém bungöng jaroe, sabab bandua droe nabi nyan ka jipeuteuka seksaan ateueh banmandum ureuëng nyang na di bumoe. 11 Óh ka lheueh lhée uroe siteungoh, teuka kheueh nafáh udeb nibak Po teu Allah dan jitamong lom lam tuboh bandua droe nabi nyan. Bandua awaknyan laju jibeudôh dan jidong, akhé jih, banmandum ureuëng nyang kalon awaknyan teumakot lumpah na. 12 Óh lheueh nyan bandua droe nabi nyan laju teudeungoe su nyang paleng teuga jitawök awaknyan, "Gata ék laju keunoe!" Dan dikeue mata musoh-musoh awaknyan, awaknyan ji ék lam syeuruga, sira jipeupayong lé awan. 13 Watée nyan jiteuka kheueh geumpa bumoe nyang paleng hebat. Siper siploh nibak banda nyan hanco, dan na tujoh ribée droe nyang meuninggai donya lé sabab geumpa bumoe nyan. Dumna ureuëng laén teumakot lagoena, laju awaknyan jipujoe keubeusaran Allah di syeuruga. 14 Bala nyang keudua ka leupah. Teuma ngieng kheueh! Bala nyang keu lhée hana treb lé jiteuka. 15 Laju lé malaikat keutujoh geuyueb beureuguih gobnyan, watée nyan cit teuma teudeungoe su nyang teuga lumpah na, "Keukuasaan keuteupeurintah donya jinoenyoe na lam jaroe Tuhan tanyoe dan Raja Peuseulamat nyang ka geupeu janji nyan. Gobnyan teuma geumat peurintah siumu masa!" 16 Ngon lagée nyan ban dua ploh peuet droe peumimpén nyang teungoh duek bak takhta droe jih dikeue Po teu Allah, laju reubah teudugom dan jiseumah Allah. 17 Awaknyan jipeugah, "Tuhan, Allah Nyang Mahakuasa, nyang na, dan nyang ka na! Kamoe meulakée teurimong gaséh bak Droeneueh sabab Droeneueh ka neupeuguna kuasa Droeneueh nyang paleng rayeuk, dan ka neupeuphon mat peurintah! 18 Ureuëng nyang hana jituri Tuhan, laju beungéh hana meuteuntée sabab ka watée jih Droeneueh neupeuleumah beungéh, dan ka teuma watée jih Droeneueh peusidang keu ureuëng maté. Nyoe kheueh watée jih keuteubri upah ubak hamba-hamba Droeneueh, bubena nabi, dan ubak banmandum umat Droeneueh, na kheueh banmandum ureuëng nyang meuiébadat ubak Droeneueh, ubit meunan cit rayeuk. Nyoe kheueh watée jih keuteupeu hanco ateueh ureuëng-ureuëng nyang jipeuhanco bumoe!" 19 Ngon lagée nyan teuhah kheueh Baét Allah nyang na lam syeuruga, dan deuh kheueh teukalon Peuto Peujanjian nyang na lam nyan. Dan teuka kheueh laju kilat hana putôh-putôh dan su geulanteue meugudum-geudum, meunan cit ngon gumpa bumoe ngon ujeuen éeh nyang paleng hebat.

Wahyu 12

1 Laju deuh di langét sapeue-sapeue nyang ajaéb lom luwabiasa. Sidroe ureuëng inong nyang jingui mata uroe sibagoe peukayan jih, teungoh jidong di ateueh buleuen. Ateueh ulée gobnyan na saboh mahkota nyang teupeuget nibak dua blah boh bintang. 2 Ureuëng inong nyan teungoh mume, dan sabab ka trok watée jih keuneuk peulahé aneuëk, laju jiklik sabab sakét lagoena. 3 Óh lheueh nyan deuh lom teukalon di langét sapeue-sapeue nyang ajaéb. Na saboh naga mirah nyang rayeuk lumpah na nyang ulée jih na tujoh boh dan siploh boh lungkée. Tieb-tieb ulée beulatang nyan na jiseuôn saboh mahkota. 4 Ngon iku jih laju jitarek siteungoh nibak bintang-bintang nyang na di langét laju jigeulawa u ateueh bumoe. Naga nyan laju jidong dikeue ureuëng inong nyang keuneuk peulahé aneuëk nyan ngon meukeusut keuneuk uét aneuëk inong nyan, watée aneuëk nyan lahé. 5 Laju lé inong nyan jipeulahé sidroe aneuëk agam nyang teuma jimat peurintah ateueh banmandum bansa ngon tungkat beuso. Teuma aneuëk nyan laju jireupah bak ureuëng inong nyan, laju jiba ubak Po teu Allah dan ukeue takhta Gobnyan. 6 Ngon lagée nyan ureuëng inong nyan laju jiplueng u padang pasi, ubak teumpat nyang ka geukeubah lé Po teu Allah keu inong nyan. Nibak teumpat nyan jihnyan teupeulara nyang treb jih na 1260 uroe. 7 Laju lam syeuruga na teujadi muprang. Mikhael meusajan ngon malaikat-malaikat geuh nyan laju jimeulo jilawan naga nyan. Dan naga nyan pih, nyang jitulông lé malaikat-malaikat geuh nyan, teulawan Mikhael. 8 Teuma naga nyan jipeutaloe. Geuhnyan meusajan ngon malaikat-malaikat gobnyan hana geubri lé tinggai lam syeuruga. 9 Naga nyang rayeuk nyan laju jitiek uluwa! Nyan kheueh uleue tuha nyan nyang nan jih Iblih atawa Roh Jeuhet, nyang jitipée bansigom donya nyoe. Jihnyan teuböh u bumoe meusajan ngon mandum malaikat gobnyan. 10 Laju lôn deungoe su nyang meutaga lam syeuruga lagée nyoe, "Jinoe kheueh watée jih Allah geupeu seulamat umat Gobnyan! Jinoenyoe Allah geupeuleumah kuasa Gobnyan sibagoe Raja! Jinoenyoe Raja Peuseulamat nyang ka geupeu janji nyan pih geupeuleumah keukuasaan Gobnyan! Sabab nyang tudoh syedara-syedara geutanyoe dikeue Po teu Allah uroe ngon malam, ka geupeuteubiet lam syeuruga. 11 Syedara-syedara geutanyoe ka jipeutaloe jihnyan ngon darah Aneuëk Bubiri nyan, dan ngon feureuman nyang beutôi nibak Allah nyang awaknyan peudakwah. Awaknyan rila jikeureubeuen nyawöng droe jih trok án maté. 12 Sabab nyan, bah kheueh syeuruga dan banmandum nyang na tinggai lam syeuruga nyan, beusukaria! Teuma meupaloe kheueh bumoe ngon laôt, sabab Iblih ka jitreun bak gata ngon beungéh nyang rayeuk lumpah na, sabab jihnyan jiteupeue bahwa watée jih tinggai bacut teuk." 13 Bak watée naga nyan jiteupeue bahwa jihnyan ka teurhom u bumoe, jihnyan laju jitiyeub ureuëng inong nyang ka jipeulahé aneuëk agam nyan. 14 Teuma keu ureuëng inong nyan laju teubri dua boh sayeueb cicém rajawali nyang rayeuk, mangat jihnyan jipo ubak teumpat droe jih lam padang pasi, nibak teumpat nyan jihnyan teuma jipeulara nyang treb jih lhée thon siteungoh, teupeusie nibak jiseurang lé naga. 15 Teuma lé naga nyan laju jisumprot ngon ié nyang jai that lam babah jih u ateueh ureuëng inong nyan, guna jih mangat jeuet inong nyan anyôt. 16 Teuma lé bumoe laju jitulông inong nyan; laju jipeuhah babah jih dan jiúet laju ié nyang jipeuleueh lé naga nyan. 17 Naga meutamah beungéh ngon bit that keu ureuëng inong nyan, akhé jih laju jijak seurang keuturonan nyang laén nibak inong nyan, na kheueh banmandum ureuëng nyang jitaát ubak peue-peue nyang geupeurintah lé Allah, dan nyang meusaksi keuhai Isa dan kuasa Gobnyan. 18 Laju naga nyan jidong bak binéh panté.

Wahyu 13

1 Óh lheueh nyan deuh lôn kalon saboh beulatang jiteuka nibak lam laôt. Beulatang nyan na siploh boh lungkée dan tujoh boh ulée. Nibak tieb-tieb lungkée jih na saboh mahkota, dan nibak tieb-tieb ulée beulatang nyan na teutuléh saboh nan teuhina ateueh Po teu Allah. 2 Beulatang nyang lôn kalon nyan hi jih lagée rimueng tutul, dan gaki jih lagée gaki cagée, meunan cit babah jih lagée babah singa. Óh lheueh nyan ubak beulatang nyan lé naga nyan laju jibri teunaga jih keudroe, meunan cit ngon takhta jih dan keukuasaan nyang rayeuk. 3 Saboh nibak tujoh boh ulée beulatang nyan deuh lagée luka parah lumpah na, teuma luka nyan ka puléh. Bansigom bumoe laju jiseutôt beulatang nyan ngon peurasaan takjob that. 4 Dan awaknyan jipujoe naga nyan sabab jihnyan ka jibri keukuasaan ubak beulatang nyan. Dan awaknyan pih jipujoe beulatang nyan. Awaknyan jipeugah lagée nyoe, "Hana nyang saban ngon beulatang nyoe! Hana nyang hase jimuprang jilawan beulatang nyan!" 5 Beulatang nyan jeuet jipeugah hai-hai nyang angkoh dan jihina Po teu Allah. Bak jihnyan teupeu idhin jimat peurintah nyang treb jih peuet ploh dua buleuen. 6 Laju jihnyan jipeuphon hina Allah, dan nan Allah. Meunan cit ngon teumpat tinggai Allah, dan banmandum nyang na tinggai lam syeuruga nyan pih jihina. 7 Meunan cit keu beulatang nyan teupeu idhin jilawan umat Allah dan jipeutaloe awaknyan. Dan jimat kuasa ateueh banmandum sukée, neugahra, basa, meunan cit ngon bansa teubri bak jihnyan. 8 Beulatang nyan teuma jiseumah lé banmandum ureuëng nyang udeb ateueh rhueng bumoe, keucuali ureuëng-ureuëng nyang nan jih ka teudafeutar sigohlom donya teucebta, lam kitab ureuëng udeb atra Aneuëk Bubiri nyang ka teusie. 9 Sabab nyan, meunyoe gata hase tadeungoe, deungoe kheueh haba nyoe: 10 "Ureuëng nyang meuseuti teudrob, pasti teuma teudrob. Dan ureuëng nyang meuseuti teupoh maté ngon peudeueng, nyan pasti teuma teupoh maté ngon peudeueng. Nyang kheueh sabab jih umat Allah meuseuti tabah dan seutia." 11 Óh lheueh nyan laju lôn kalon lom saboh beulatang laén teuka nibak lam bumoe. Bak beulatang nyan na dua boh lungkée lagée lungkée aneuëk bubiri. Su jih lagée su naga. 12 Dikeue beulatang nyang phon nyan beulatang nyan jingui keukuasaan nyang rayeuk nyang jiteumé nibak beulatang nyan cit teuma. Bansigom bumoe dan mandum nyang tinggai di ateueh nyan, jipaksa teuseumah beulatang nyang phon nyan, nyang luka brat that nyan ka puléh. 13 Beulatang nyang keudua nyan laju jipeuna buet-buet ajaéb nyang rayeuk. Dikeue mandum ureuëng nyang na nibak teumpat nyan laju jipeuna buet ajaéb lagée jipeugét apui jitreun nibak langét u ateueh bumoe. 14 Dan banmandum ureuëng nyang udeb lam bumoe nyoe jitipée ngon buet-buet ajaéb nyang jipeugét dikeue beulatang nyang phon nyan. Dan awaknyan banmandum jiyue peudong saboh patong nibak beulatang nyang ka luka lé peudeueng, teuma teutab udeb. 15 Beulatang nyang keudua nyan jipeu idhin jiboh nyawöng ubak patong nyan, akhé jih patong nyan jeuet jimeututoe dan jipoh maté mandum ureuëng nyang hana jitem seumah jih. 16 Banmandum ureuëng, cut ngon rayeuk, kaya ngon gasien, namiet dan ureuëng meurdehka, jipaksa lé beulatang nyan keujiteurimong tanda nibak jaroe uneuen awaknyan atawa nibak dho awaknyan. 17 Hana meusidroepi hase jimeubloe atawa jipeubloe sapeue-sapeue barang, meunyoe nibak jihnyan hana tanda nyan, na kheueh nan beulatang nyan keudroe, atawa angka nyang teupeugah nan nyan. 18 Inoe peureulée na hikeumat. Ureuëng nyang bijaksana hase ji itong makna nibak angka beulatang nyan, sabab angka nyan na kheueh nan sidroe manusia. Angka jih 666.

Wahyu 14

1 Óh lheueh nyan ulôn kalon, laju deuh Aneuëk Bubiri nyan jidong ateueh Bukét Sion. Meusajan Gobnyan na 144.000 droe nyang nibak dho maséng-maséng na teutuléh nan Gobnyan dan nan Bapak Gobnyan. 2 Laju lôn deungoe su nibak langét nyang meugrúm-grúm lagée su ié tajo nyang rayeuk that dan lagée su geulanteue nyang luwabiasa. Su nyan teudeungoe lagée su musik nibak peumeuén-peumeuén keucapi nyang teungoh jipeumeu-én keucapi jih. 3 Dikeue takhta dan ban peuet makhlok meunan cit banmandum peumimpén ban sikeulileng takhta nyan, 144.000 droe nyan jimeulagu saboh lagu nyang barô. Lagu nyan hana hase jimeurunoe lé meusidroe pi seulaén nibak ureuëng nyang 144.000 droe nyan nyang ka teupeubeubaih nibak bumoe. 4 Awaknyan na kheueh ureuëng-ureuëng nyang teutab gleh lagée aneuëk dara nyang mantong peurawan, sabab hana jipeuna hubongan ngon ureuëng inong. Awaknyan laju jiseutôt Aneuëk Bubiri nyan ho-ho mantong nyang jijak. Nibak banmandum umat manusia, awaknyan kheueh nyang ka teupeubeubaih sibagoe peuseumahan nyang phon ubak Po teu Allah dan ubak Aneuëk Bubiri nyan. 5 Hántom na awaknyan jimeusulet; dan hana meucupa meubacut pih nibak awaknyan. 6 Laju ulôn kalon sidroe malaikat nyang laén nyang jipo di langét manyang. Malaikat nyan geuba beurita keuhai Haba Gét nyang keukai keuteupeusampoe ubak manusia nyang ateueh rhueng bumoe na kheueh ubak bandum bansa, sukée, basa dan neugahra. 7 Malaikat nyan geutawök ngon su meutaga, "Takot kheueh ubak Allah, dan pujoe kheueh keubeusaran Gobnyan! Sabab ka watée jih Allah geupeu hakém manusia. Seumah kheueh Gobnyan nyang peujeuet langét, bumoe, laôt dan banmandum mata ié!" 8 Malaikat nyang keudua jiseutôt malaikat nyang phon sira jipeugah, "Ka rhot! Banda Babel nyang rayeuk ka rhot! Jihnyan ka jipeujeuet bandum bansa mabök ngon ié anggô -- na kheueh anggô nibak nafeusu cabui jih!" 9 Óh lheueh nyan malaikat nyang keu lhée jiseutôt malaikat nyang dua nyan, sira jitawök ngon su nyang meutaga, "Ureuëng nyang pujoe beulatang nyan ngon patong jih, na tanda beulatang nyan nibak dho atawa jaroe jih, 10 ureuëng nyan teuma jijieb ié anggô Allah, na kheueh anggô beungéh Gobnyan nyang ka geusintong u dalam wadah jih, hana teupeukureueng meubacut pih! Banmandum ureuëng nyan teuma geuseksa lam apui dan beulerang dikeue malaikat-malaikat suci dan dikeue Aneuëk Bubiri nyan. 11 Asab nibak apui nyang teuseksa ureuëng-ureuëng nyan teuma teutab na sabe keu siumu masa. Uroe malam hana piôh-piôh awaknyan teuseksa, na kheueh awaknyan nyang seumah beulatang nyan dan patong jih, dan banmandum ureuëng nyang na tanda nan beulatang nyan." 12 Lam hainyoe umat Allah nyang taát ubak peue-peue nyang geupeurintah lé Allah dan seutia ubak Isa, peureulée that beujeuet keu ureuëng nyang tabah. 13 Laju lôn deungoe nyang teuka lam syeuruga jipeugah, "Tuléh kheueh nyoe: Phon jinoenyoe, meubahgia kheueh ureuëng-ureuëng nyang maté sabab jipeutimang Tuhan!" "Beutôi!" jaweueb Roh Allah. "Awaknyan teuma jipiôh jimubuet nyang brat, sabab hase peulayanan awaknyan sabe na meusajan awaknyan." 14 Óh lheueh nyan deuh lôn kalon, teuma leumah laju awan putéh. Ateueh awan nyan jiduek sidroe nyang hi jih lagée manusia. Ateueh ulée Gobnyan na saboh mahkota méuh, dan bak jaroe jih na saboh sadeueb nyang tajam. 15 Óh lheueh nyan sidroe malaikat nyang laén jiteubiet lam Baét Allah. Ngon su nyang meutaga. Gobnyan laju geutawök bak Gobnyan nyang duek ateueh awan nyan, "Ayon kheueh laju sadeueb Gata nyan dan pot kheueh jinoenyoe, sabab ka watée jih keu teupot; bumoe ka masak keu teupot!" 16 Laju lé nyang duek ateueh awan nyan jiayon sadeueb Geuh u ateueh bumoe, ngon lagée nyan bumoe pih jipot. 17 Óh lheueh nyan deuh teuma lôn kalon sidroe malaikat nyang laén jiteubiet lam Baét Allah di syeuruga. Jihnyan pih na jimat saboh sadeueb nyang tajam. 18 Óh lheueh nyan, sidroe malaikat nyang laén, nyang na kuasa ateueh apui, teuka nibak miseubah. Ngon su nyang teuga jihnyan laju jitawök ubak malaikat nyang teungoh mat sadeueb nyang tajam nyan, "Ayon kheueh sadeueb nyan dan reupang kheueh boh-boh anggô nyang na di bumoe, sabab boh-boh jih ka masak!" 19 Ngon lagée nyan lé malaikat nyan pi laju geuayon sadeueb geuh u ateueh bumoe laju geureupang bubena boh-boh anggô nyang na ateueh bak jih, óh lheueh nyan laju jigeulawa lam peuneurah teumpat prah ié anggô keubeungéh Allah nyang ju meudok-dok nyan. 20 Boh-boh anggô nyan jiprah diluwa banda, dan nibak peuneurah nyang prah boh anggô nyan jiteubiet kheueh darah lagée ié krueng, nyang jiôh jih na lhée reutôh kilo metée, meunan cit lhok jih rab dua metée.

Wahyu 15

1 Óh lheueh nyan lôn kalon di langét sapeue-sapeue nyang ajaéb dan luwabiasa hebat jih. Na tujoh malaikat ngon tujoh beuncana nyang keuneulheueh. Nyoe kheueh nyang keuneulheueh jih Po teu Allah geusintong banmandum beungéh Gobnyan. 2 Óh lheueh nyan deuh teuma lôn kalon sapeue-sapeue nyang leumah jih lagée laôt ceureumen meujampu ngon apui. Meunan cit lôn kalon ureuëng-ureuëng nyang ka meunang ateueh beulatang dan patong jih, dan meunang ateueh ureuëng nyang nan jih teuboh tanda ngon angka. Ureuëng-ureuëng nyang meunang nyan jidong bak binéh laôt ceureumen sira jimat keucapi nyang geujok lé Po teu Allah ubak awaknyan. 3 Dan awaknyan laju jimeuca-e ngon lagu Nabi Musa, hamba Allah, dan ca-e Aneuëk Bubiri. Meunoe kheueh su ca-e nyan, "Tuhan, Allah Nyang Mahakuasa, keubiet that rayeuk dan ajaéb jih buet-buet Droeneueh! Raja banmandum bansa, keubiet that ade dan beutôi banmandum nyang Droeneueh peubuet! 4 Soe nyang hana jitakot ubak Droeneueh, Tuhan? Soe kheueh nyang hana jitem peugah keubeusaran Droeneueh? Droeneueh mantong kheueh nyang suci. Banmandum bansa teuma jiteuka jijak seumah Droeneueh sabab buet-buet Droeneueh nyang ade ka jikalon lé mandum ureuëng." 5 Óh lheueh nyan ulôn kalon teuma Baét Tuhan lam syeuruga nyang teuhah, dan Khimah Tuhan na lam nyan. 6 Laju bantujoh malaikat ngon bantujoh beuncana nyan jiteubiet lam Baét Allah. Peukayan awaknyan teupeugét nibak ija linun nyang gleh ngon meukilat. Dan awaknyan jingui tutôb dada nyang teupeugét nibak méuh. 7 Óh lheueh nyan sidroe lamkawan makhlok nyang peuet droe nyan jibri ubak bantujoh droe malaikat nyan tujoh boh wadah méuh nyang peunoh meuasoe beungéh Allah, -- Allah nyang udeb siumu masa. 8 Deungon lagée nyan Baét Allah nyan ka peunoh ngon asab nibak keuagongan dan kuasa Po teu Allah. Dan simantong bantujoh beuncana nyang jiba lé bantujoh malaikat nyan gohlom seuleusoe, hana meusidroe pi nyang hase jitamong lam Baét Allah.

Wahyu 16

1 Laju lôn deungoe su nyang teuga that lam Baét Allah jipeugah bak ban tujoh malaikat nyan, "Jak kheueh laju dan tasintong kheueh ban tujoh boh wadah beungéh Allah nyan u ateueh bumoe!" 2 Malaikat nyang phon laju jijak dan jisintong asoe wadah jihnyan u ateueh bumoe. Watée nyan cit teuma jitimoh kheueh cumuet-cumuet nyang paleng parah dan lumpah that sakét ateueh banmandum ureuëng nyang na tanda beulatang nyan, dan meunan cit ateueh ureuëng-ureuëng nyang seumah patong jih. 3 Óh lheueh nyan malaikat nyang keudua jisintong asoe wadah jih lam laôt. Watée nyan cit teuma ié laôt ka jeuet lagée darah ureuëng maté, ngon lagée nyan maté kheueh banmandum makhlok nyang na lam laôt. 4 Óh lheueh nyan malaikat nyang keu lhée jisintong wadah jih nyan lam krueng dan ubak dumna mata ié, watéenyan cit teuma banmandum ié ka jeuet keudarah. 5 Laju lôn deungoe malaikat nyang meukuasa ateueh ié jipeugah, "Huköman nyang Droeneueh peurhot nyan na kheueh ade, Nyang Mahasuci, Allah nyang na, dan nyang ka na! 6 Awaknyan ka jipeuro dumna darah umat Allah dan darah nabi-nabi; jinoenyoe Droeneueh peujeuet awaknyan jijieb darah. Keubiet ka patot huköman nyan teupeu rhot ateueh awaknyan!" 7 Óh lheueh nyan lôn deungoe teuma su ateueh miseubah jipeugah lagée nyoe, "Tuhan, Allah Nyang Mahakuasa, beutôi dan ade that banmandum huköman nyang Droeneueh peurhot nyan!" 8 Óh lheueh nyan malaikat nyang keupeuet laju geusintong asoe wadah nyang na bak geuhnyan ubak mata uroe, deungon lagée nyan mata uroe pih ka jeuet jitot sampoe angoh manusia ngon seu-eum jih nyang luwabiasa nyan. 9 Manusia teupeu angoh lé seu-eum nyang kha nyan, dan awaknyan jikutok nan Po teu Allah, nyang meukuasa ateueh beuncana-beuncana nyan. Bah pih meunan, awaknyan hana jitem meutobat ateueh desya-desya jih keudroe dan hana jitem pujoe keubeusaran Allah. 10 Laju lé malaikat nyang keulimong jisintong asoe wadah jih ateueh takhta beulatang nyan. Ngon lagée nyan banmandum keurajeuen beulatang nyan ka jeuet keuseupôt, dan manusia jikab lidah droe sabab lé sakét. 11 Laju awaknyan jikutok Allah nyang na lam syeuruga sabab awaknyan sakét that meunan cit sabab lé cumuet-cumuet nyang na bak awaknyan. Teuma awaknyan teutab hana jitem meutobat nibak desya-desya jih nyang jeuhet nyan. 12 Óh lheueh nyan lé malaikat nyang keu nam laju jisintong asoe wadah lam Krueng Efrat nyang rayeuk nyan. Ngon lagée nyan krueng nyan laju tho dan raja-raja di timu ka jeuet jijak rot lam krueng tho nyan. 13 Óh lheueh nyan laju deuh lôn kalon lhée boh roh jeuhet nyang hi jih lagée cangguek. Maséng-maséng cangguek nyan jiteubiet lam pruet naga, nibak babah beulatang, nibak babah nabi peuleusu. 14 Awaknyan na kheueh roh-roh jeuhet nyang jipeubuet buet-buet nyang ajaéb. Ban lhée droe roh nyan laju jijak ubak raja-raja nyang na bansigom donya dan jipeusapat awaknyan keu ji muprang bak Uroe nyang rayeuk, na kheueh Uroe nibak Allah Nyang Mahakuasa. 15 "Deungoe kheueh! Ulôn teuka lagée pancuri! Meubahgia kheueh ureuëng nyang teutab siaga dan jijaga peukayan jih, ngon lagée nyan jihnyan hana jijak ngon teulon dan jeuet keu malée dikeue rakyat ba!" 16 Óh lheueh nyan lé roh-roh nyan laju jipeusapat raja-raja nyan nibak teumpat nyang lam basa Ibrani teuboh nan Harmagedon. 17 Óh lheueh nyan malaikat nyang keutujoh laju jisintong asoe wadah jih u manyang. Dan teudeungoe kheueh laju su nyang paleng teuga nibak takhta lam Baét Allah, nyang jipeugah, "Ka seuleusoe!" 18 Dan jiteuka kheueh kilat nyang hana putôh-putôh dan su geulanteue meugrúm-grúm dan meutaga-taga, meunan cit geumpa bumoe nyang hebat lumpah na. Hántom na teujadi geumpa bumoe nyang lagée nyan bagoe yoh phon donya nyoe geucebta. Nyoe kheueh geumpa bumoe nyang paleng hebat! 19 Banda nyang rayeuk nyan beukah jeuet keu lhée boh bagi, dan hanco teuma banda-banda banmandum neugahra nyang na lam donya. Laju Po teu Allah teuingat ubak Babel nyang rayeuk nyan. Teuma Allah laju geupeugét ié meuneujiéb nibak wadah anggô Allah -- na kheueh anggô beungéh Gobnyan nyang luwabiasa. 20 Banmandum pulo ka gadôh, dan banmandum gunong pih ka habéh leunyab. 21 Ujeuen éeh nyang rayeuk, nyang maséng-maséng na brat jih limong ploh kilo gram, rhot nibak langét laju jitingkeh ateueh dumna ureuëng. Ngon lagée nyan awaknyan laju jikutok Allah sabab lé bala ujeuen éeh nyang luwabiasa nyan.

Wahyu 17

1 Óh lheueh nyan sidroe lamkawan tujoh droe malaikat nyang jimat tujoh boh wadah nyan laju jijak ubak ulôn sira jipeugah, "Jak keunoe, ulôn teuma kupeuleumah bak gata pakriban inong lunte rayeuk nyan teuhuköm, na kheueh banda rayeuk nyan nyang jipeudong nibak binéh-binéh krueng. 2 Raja-raja donya jipeubuet cabui ngon jih nyan, dan nyang tinggai lam bumoe ka jeuet keu mabök sabab jijieb anggô buet cabui jih nyan." 3 Laju Roh Allah geukuasa ateueh ulôn, dan malaikat nyan jiba ulôn ubak padang pasi. Nibak teumpat nyan laju deuh lôn kalon sidroe ureuëng inong teungoh jiduek ateueh saboh beulatang nyang wareuna jih mirah tuha, dan nyang peunoh teutuléh ngon nan-nan nyang teuhina ubak Po teu Allah. Beulatang nyan na tujoh boh ulée dan siploh boh lungkée. 4 Ureuëng inong nyan jingui bajée nyang wareuna jih ungu ngon mirah tuha, meunan cit teuhia ngon mubagoe piasan méuh, ngon peumata-peumata, dan ngon mutiara. Nibak jaroe jih jimat saboh cambong méuh nyang peunoh ngon hai-hai nyang keuji dan kutoe, hase nibak buet jih nyang cabui nyan. 5 Nibak dho jih teutuléh saboh nan nyang muphom jih rahsia. Nan nyan na kheueh, "Babel Nyang Rayeuk, ma meubagoe lunte dan ureuëng jeuhet ateueh rhueng donya." 6 Laju ulôn kalon bahwa inong nyan mabök ngon darah umat Po teu Allah dan darah ureuëng-ureuëng nyang teupoh maté sabab seutia ubak Isa. Watée ulôn ngieng inong nyan, ulôn jeuet teuhireuen-hireuen. 7 Laju malaikat nyan jipeugah bak ulôn, "Peue sabab gata teuhireuen-hireuen? Bah kheueh ulôn peugah bak gata rahsia inong nyan dan rahsia beulatang nyang jigiduek nyan, na kheueh beulatang nyang na tujoh boh ulée dan siploh boh lungkée. 8 Beulatang nyan yoh masa ilée ka lheueh udeb, teuma jinoenyoe hana udeb lé. Jihnyan sikeujab teuk teuma jiteubiet nibak barieh mawöt dan laju jijak ubak keubinasaan. Ureuëng-ureuëng nyang udeb ateueh rhueng bumoe, nyang nan jih hana teudafeutar lam Kitab Ureuëng Udeb sigohlom donya teucebta teuma hireuen watée jingieng beulatang nyan. Sabab beulatang nyan yoh masa ilée ka lheueh na udeb. Jinoenyoe jihnyan hana udeb lé, teuma jihnyan teuka lom teuma. 9 Lam hainyoe peureulée that na hikeumat ngon peungeurtian. Tujoh boh ulée nyan na kheueh tujoh boh bukét; na kheueh bukét-bukét teumpat inong nyan duek. Dan tujoh boh ulée nyan jeuet cit tujoh boh raja: 10 limong droe lamkawan awaknyan ka rhot, sidroe mantong jimat peurintah, dan nyang sidroe teuk gohlom jiteuka. Meunyoe gobnyan teuka singoh, gobnyan harôh geumat keurajeuen sikeujab mantong. 11 Dan beulatang nyang masa ilée ka lheueh udeb, teuma jinoenyoe hana udeb lé, na kheueh raja nyang keulapan. Jihnyan na kheueh sidroe lamkawan tujoh droe raja nyan, nyang jinoenyoe teungoh jijak ubak keubinasaan. 12 Siploh boh lungkée nyang gata kalon nyan na kheueh siploh droe raja nyang gohlom jipeuphon mat peurintah. Teuma keu awaknyan teubri kuasa keu jimat peurintah sibagoe raja meusajan-sajan ngon beulatang nyan nyang treb jih sijeuem. 13 Ban siploh droe raja nyoe tujuan jih saban; awaknyan banmandum jiseurah teunaga dan keukuasaan jih ubak beulatang nyan. 14 Awaknyan teuma jimuprang jilawan Aneuëk Bubiri nyan. Teuma Aneuëk Bubiri nyan ngon murit-murit Gobnyan nyang seutia nyang ka jitawök dan jipiléh nyan teuma jipeutalo raja-raja nyan, sabab Gobnyan kheueh Tuhan banmandum amphon, dan Raja sigala raja." 15 Malaikat nyan geupeugah teuma, "Ié nyang gata ngieng nyan, teumpat duek inong lunte nyan, na kheueh bansa-bansa, rakyat-rakyat, neugahra-neugahra dan basa-basa. 16 Siploh boh lungkée nyang gata kalon dan beulatang nyan teuma jibanci keu inong lunte nyan. Awaknyan jireupah peue-peue nyang na nibak jih, dan jipeujeuet jih nyan sampoe teulon. Awaknyan teuma jipajoh asoe jih dan jipeubinasa jihnyan ngon apui. 17 Sabab Po teu Allah ka geupeugrak até awaknyan keujipeujak reuncana Allah nyan. Allah geupeujeuet awaknyan sipakat keujiseurah keukuasaan awaknyan ubak beulatang nyan, mangat beulatang nyan jimat peurintah sampoe teujadi peue nyang ka geupeugah lé Allah. 18 Ureuëng inong nyang gata kalon nyan na kheueh banda rayeuk, nyang peurintah raja-raja ateueh rhueng bumoe."

Wahyu 18

1 Óh lheueh nyan ulôn kalon sidroe malaikat laén jitreun nibak lam syeuruga. Jihnyan na keukuasaan nyang rayeuk, dan seumarak jih nyang jipeujeuet bumoe ka jeuet keutrang. 2 Ngon su nyang meudumpék, jihnyan jipeugah, "Ka rhot! Babel ayeuk ka rhot! Jinoenyoe jihnyan ka jeuet keu teumpat jén-jén dan roh-roh jeuhet. Lam nyan udeb meubagoe cicém nyang kutoe dan nyang jibanci lé manusia. 3 Sabab banmandum bansa ka jijieb anggô nafeusu buet cabui. Raja-raja donya jipeubuet jeuhet ngon jih nyan, dan ureuëng-ureuëng meukat ateueh bumoe ka jeuet keu kaya lé nafeusu jih nyang hana hase teukeundali nyan." 4 Laju lôn deungoe su laén lam syeuruga jipeugah, "Teubiet kheueh, umat Lôn! Teubiet kheueh nibak lam nyan! Bék kheueh gata seutôt desya-desya jih nyan, dan meusajan ta-tanggong huköman jih nyan! 5 Sabab desya jih meutumpôk-tumpôk trok u langét, dan Po teu Allah geuingat keubuet jih nyang jeuhet. 6 Peusaneut kheueh geuhnyan lagée geuh nyan ka geupeusaneut gata; balaih kheueh geuhnyan dua goe lipat keu banmandum nyang ka geupeubuet nyan. Pasoe kheueh cambong nyan ngon ié jieb nyang dua goe leubeh kreueh nibak ié jieb jih nyan, nyang ka teukeubah keu gata. 7 Bie kheueh bak jihnyan deurita ngon dukacita nyang sadub lé jih ngon keubeusaran dan keumeuwahan nyang jibri ubak droe jih keudroe. Sabab jihnyan sabe jipeugah ubak droe jih keudroe, 'Ulôn nyoe ratu nyang mat peurintah! Ulôn kon inong balée; ulôn hana lôn teumé rasa seudeh!' 8 Sabab hainyan kheueh, teuma lam siuroe mantong jihnyan ka keunong beuncana -- peunyakét, seudeh até, ngon deuek. Dan jihnyan teuma teutot sampoe angoh ngon apui, sabab meukuasa kheueh Tuhan Allah nyang peuhakém jih nyan." 9 Raja-raja donya nyang na meusajan lam buet-buet cabui dan nafeusu inong jeuhet nyan teuma jipeumo dan jipeuba-e banda nyan watée awaknyan jikalon asab meukeupong nibak apui nyang jitot habéh banda nyan. 10 Awaknyan teuma jidong dijiôh sabab jitakot keupeundeuritaan jih nyan. Awaknyan jipeugah, "Biet seudeh that, hana wayang ceulaka jih banda nyang meugah nyoe -- banda Babel nyang kong! Lam sijeuem mantong huköman droeneueh ka teupeubuet!" 11 Dumna ureuëng meukat ateueh bumoe pih habéh jimoe dan meukabông sabab lé inong jeuhet nyan, sabab hana meusidroe pih nyang jitem jakbloe barang-barang nyang awaknyan meukat. 12 Hana lé nyang bloe méuh, pirak, peumata, dan mutiara awaknyan; meunan cit ngon ija lineun, ija ungu, ija sutra, dan ija mirah tuha; meubagoe rupa kayée nyang jareueng meuteumé, barang-barang lagée gadeng dan lagée kayée nyang meuhái-meuhái, nibak teumaga, beuso dan pualam; 13 kulét kayée maméh, reumpah-reumpah, seutanggi, mur, meunan cit ngon keumeunyan; anggô meunan cit minyéuk, teupông ngon gandom; leumô ngon bubiri, guda dan geuritan, namiet-namiet, dan nyawöng manusia pih teuma. 14 Bubena ureuëng meukat jipeugah bak ureuëng inong nyan, "Banmandum nyang keuneuk gata kuasa ka hana lé, dan banmandum keumeuwahan dan hu muble-ble nyang na nibak gata ka hana lé. Banmandum nyan hana gata teumé lé!" 15 Bubena ureuëng meukat nyang ka jeuet keukaya sabab jimeukat lam banda nyan jidong dijiôh, sabab awaknyan jitakot keunong deurita nyan. Awaknyan teuma jimoe dan meukabông, 16 laju jipeugah, "Hana wayang, biet ceulaka that banda nyang meugah ngon meusyeuhu nyoe! Lazem jih jihnyan jingui peukayan ija lineun, ija ungu dan ija mirah tuha; lazem jih jihnyan peunoh ngon piasan méuh, peumata, dan mutiara! 17 Teuma lam sijeuem mantong, jihnyan ka gadôh mandum keukayaan jih nyan!" Banmandum nakhoda, peunumpang, dan aneuëk kapai, meunan cit banmandum ureuëng nyang mita jihnyan di laôt, jidong dijiôh. 18 Dan jiklik watée jikalon asab meukeupong nibak apui nyang jitot banda nyan. Awaknyan jitawök, "Hántom na banda laén lagée banda nyang rayeuk nyoe!" 19 Teuma awaknyan laju jitabu abée ateueh ulée droe jih sibagoe tanda meukabông, laju jimoe sira jiklik-klik, "Ya amphon, hana wayang ceulaka jih banda nyang rayeuk nyoe! Keukayaan jihnyan ka teupeujeuet banmandum ureuëng nyang na kapai-kapai lam laôt ka jeuet keukaya! Teuma lam sijeuem mantong, jihnyan ka gadôh peue-peue nyang na!" 20 Hai syeuruga, meusukaria kheueh ateueh hanco banda nyan! Hai umat Allah, rasui-rasui dan nabi-nabi, meusukaria kheueh! Sabab Po teu Allah ka geuhuköm jihnyan sibagoe beunalaih ateueh peue nyang ka jipeubuet ateueh gata! 21 Óh lheueh nyan, sidroe malaikat nyang peukasa laju jibeuôt saboh batée -- na bube batée geumiléng nyang rayeuk -- laju jigeulawa lam laôt sira jipeugah, "Meunoe kheueh cara jih banda Babel nyang meusyeuhu nyan teuma jigeulawa habéh teunaga akhé jih hana meurumpok lé. 22 Su musik nibak ureuëng meuén keucapi, nibak ureuëng-ureuëng biduan, nibak peumeuén suléng dan nibak ureuëng yub beureuguih, hana teuma teudeungoe lé lam gata; dan hana teuma teudeungoe lé meusidroe ureuëng nyang mubuet ahli nibak teumpat nyan, meunan cit su batée geumiléng pih hana teudeungoe lé nibak teumpat nyan. 23 Ureuëng hana teuma jikalon lé cahya panyöt lam gata; dan meunan cit hana teuma teudeungoe ka-ak ka-ok khanuri meukawen nibak teumpat nyan. Toke-toke gata na kheueh ureuëng-ureuëng nyang paleng meugah ateueh rhueng bumoe, dan ngon iéleumé-iéleumé gaéb gata ka gata tipée banmandum bansa lam donya!" 24 Babel teuhuköm sabab lam banda nyan ka meuteumé darah nabi-nabi, darah umat Po teu Allah -- paneuk calitra darah banmandum ureuëng nyang ka jipoh maté ateueh rhueng bumoe.

Wahyu 19

1 Óh lheueh nyan lôn deungoe su subra ureuëng ramé lam syeuruga nyang jimeuhôi-meuhôi, "Pujoe kheueh Allah! Allah geutanyoe na kheueh Allah nyang peuseulamat tanyoe; Gobnyan Allah nyang agong dan meukuasa! 2 Hakém nyang ade lom bijaksana! Gobnyan ka geupeu rhot huköman ateueh inong lunte nyang rayeuk, nyang peurusak donya ngon buet jih nyang cabui. Po teu Allah ka geuhuköm inong lunte nyan, sabab jihnyan jipoh maté hamba-hamba Allah." 3 Laju su ureuëng nyang subra nyan jipeugah lom, "Pujoe kheueh Allah! Asab nibak apui nyang jipeuhangôh banda rayeuk nyan teuma meuhúb-húb hana piyôh-piyôh!" 4 Teuma ban dua ploh peuet peumimpén dan ban peuet droe makhlok nyang ban sikeulileng takhta nyan teudugom dam jiseumah Allah nyang geuduek ateueh takhta. Awaknyan jipeugah, "Amin! Pujoe kheueh Allah!" 5 Laju teudeungoe nibak takhta nyan su nyang jipeugah lagée nyoe, "Pujoe kheueh Allah, he banmandum hamba Allah, dan banmandum ureuëng -- rayeuk ngon ubit -- nyang seumah Allah!" 6 Óh lheueh nyan laju lôn deungoe sisuatu su lagée su saboh kawan ureuëng nyang jai lumpah na; su jih lagée geulumbang nyang meugrúm-grúm dan lagée su geulanteue nyang meutaga. Ulôn deungoe awaknyan jipeugah, "Pujoe kheueh Allah! Sabab Tuhan, Allah geutanyoe Nyang Mahakuasa jinoenyoe nyang mat peurintah! 7 Jak kheueh geutanyoe tameusukaria dan meugeumbira; jak kheueh geutanyoe tapujoe keubeusaran Gobnyan! Sabab ka trok uroe meugatib nyang mat gala Aneuëk Bubiri nyan, dan darabarô ka siab keuteupeu gatib. 8 Peukayan ija lineun nyang meukilat ka teujôk bak jihnyan keu jingui." (Peukayan lineun nyan na kheueh buet-buet nyang jroh nyang jipeubuet lé umat Allah.) 9 Laju malaikat nyan jipeugah bak ulôn, "Tuléh kheueh lagée nyoe: 'Meubahgia kheueh ureuëng nyang ji-tawök ubak meukawen Aneuëk Bubiri nyan.' " Óh lheueh nyan malaikat nyan geutamah lom, "Nyoe kheueh haba nyang beutôi nibak Allah." 10 Ulôn teudugom dikeue malaikat nyan keuneuk lôn seumah gobnyan, teuma gobnyan geupeugah bak lôn, "Bék! Bék taseumah ulôn, seumah kheueh Allah! Sabab ulôn pih hamba saban lagée gata dan lagée banmandum syedara gata nyang tamumat ngon kong ubak keusaksian Isa!" Sabab keusaksian Isa nyan kheueh nyang jeuet keu ileuham ureuëng-ureuëng nyang meunubuat. 11 Óh lheueh nyan lôn kalon syeuruga teubuka, laju deuh saboh guda putéh. Nyang duek ateueh guda nyan nan jih Sang Seutia dan Sang Beutôi. Jihnyan ade lam hai jipeuputôh huköm dan lam mideuen prang nyang jipeubuet. 12 Mata Jih lagée apui hu dan bak ulée Jih jingui mahkota nyang lé. Nibak droe Jih teutuléh saboh nan; dan Jihnyan keudroe nyang muphom nan nyan. 13 Jubah nyang jingui nyan ka jiceulob lam darah. Dan Jihnyan teuhôi ngon nan "Feureuman Allah". 14 Angkatan prang lam syeuruga jiseutôt Jihnyan ngon jipasang ateueh guda-guda putéh, dan jingui peukayan ija lineun nyang putéh gleh. 15 Lam babah Jih jiteubiet saboh peudeueng nyang tajam dan ngon peudeueng nyan jihnyan teuma jipeutaloe bansa-bansa, dan Jihnyan jipeurintah awaknyan ngon tungkat beuso. Jihnyan jiprah ié anggô lam teumpat prah ié anggô beungéh Allah Nyang Mahakuasa. 16 Nibak jubah Jih dan nibak pha Jih na teutuléh nan nyoe, "Raja sigala raja, dan Tuhan sigala teungku." 17 Laju ulôn kalon sidroe malaikat jidong ateueh mata uroe. Ngon su nyang meutaga dan jimeuhôi bak mandum cicém nyang jipo di manyang, "Jak kheueh meusapat keu tajak teuka ubak khanuri rayeuk nyang geupeuna lé Po teu Allah! 18 Jak kheueh tapajoh asoe raja-raja, asoe pang-pang, dan asoe pahlawan-pahlawan; jak kheueh tapajoh asoe ureuëng nyang pasang guda ngon asoe guda-guda jih dan asoe banmandum umat manusia, rayeuk ngon ubit, namiet ngon ureuëng meurdehka!" 19 Óh lheueh nyan lôn kalon beulatang nyan, dan raja-raja bumoe ngon angkatan prang jih, meugumpôi keuneuk jak muprang jilawan Jihnyan nyang duek ateueh rhueng guda putéh nyan dan angkatan prang Jih. 20 Teuma beulatang nyan laju teudrob meusajan-sajan ngon nabi peuleusu nyang ka jipeubuet buet nyang ajaéb ngon beulatang nyan. (Ngon buet-buet nyang ajaéb nyan kheueh beulatang nyan jitipée ureuëng-ureuëng nyang na tanda beulatang nyan, dan ureuëng-ureuëng nyang seumah patong beulatang nyan.) Laju beulatang nyan dan nabi peuleusu nyan teutiek udeb-udeb lam laôt apui nyang hu meuhúb-húb nyan. 21 Dan angkatan prang awaknyan jipoh maté ngon peudeueng nyang teubiet lam babah nyang duek ateueh rhueng guda putéh nyan. Teuma bubena cicém pih laju jiteuka jijak pajoh ngon leuha jih asoe awaknyan nyang ka teupoh maté nyan.

Wahyu 20

1 Óh lheueh nyan ulôn kalon sidroe malaikat geutreun nibak lam syeuruga. Bak jaroe gobnyan geumat gunci reuleueng mawöt dan saboh beuleunggu nyang rayeuk. 2 Laju geudrob naga nyan, si uleue tuha -- na kheueh Iblih atawa Roh Jeuhet nyan -- dan laju geugari jihnyan keu siribée thon treb jih. 3 Óh lheueh nyan malaikat nyan laju geutiek naga nyan lam barieh mawöt, laju geugunci jurang sira geu séegée, mangat naga nyan hana jeuet lé jitipée bansa-bansa sigohlom masa nyang treb jih siribée thon habéh. Óh lheueh nyan naga nyan harôh teupeuleuh ngon watée nyang paneuk. 4 Óh lheueh nyan lôn kalon takhta-takhta, dan ureuëng-ureuëng nyang duek ateueh takhta-takhta nyan jibri kuasa keuteupeuputôh huköman. Meunan cit na lôn kalon areuwah-areuwah ureuëng-ureuëng nyang ka teukoh takue jih sabab awaknyan jimeusaksi keuhai Isa, dan jipeusampoe peusan nyang teuka nibak Po teu Allah. Ureuëng-ureuëng nyan hana jiseumah beulatang, atawa patong jih. Awaknyan pih hántom na jiteurimong tanda beulatang nyan nibak dho atawa jaroe awaknyan. Ngon lagée nyan awaknyan udeb lom teuma dan jimat peurintah sibagoe raja meusajan ngon Almaseh nyang treb jih siribée thon. 5 Nyoe kheueh tahab nyang phon that ureuëng-ureuëng nyang maté teupeu udeb lom teuma. (Teuma ureuëng-ureuëng nyang maté nyang laén hana teupeu udeb lom simantong watée nyang siribée thon nyan.) 6 Mubahgia kheueh ureuëng-ureuëng nyang meusajan teupeubeudôh lom teuma nibak tahab nyang phon nyan. Awaknyan patot jeuet keu milék Allah. Maté tahab nyang keudua hana meukuasa ateueh awaknyan. Awaknyan jeuet keu imeum-imeum Allah dan imeum-imeum Almaseh; dan awaknyan teuma jimat peurintah meusajan ngon Gobnyan nyang treb jih siribée thon. 7 Óh ka habéh masa nyang siribée thon nyan, Iblih teuma teupeuleuh nibak peunjara jih, 8 dan jihnyan laju jijak peungét dumna bansa nyang na lam donya, na kheueh Gog dan Magog. Iblih jipeusapat awaknyan keu jijak muprang, saboh jeumeulah nyang rayeuk lumpah na, saban jai jih lagée anoe lam laôt. 9 Ngon lagée nyan awaknyan pih laju meutabu bansigom donya, laju jijak keupong khimah-khimah umat Allah dan banda nyang geugaséh lé Allah. Teuma apui laju jitreun di langét dan jipeu habéh awaknyan. 10 Óh lheueh nyan Iblih nyang peungéut awaknyan nyan, laju geu-geulawa lam laôt apui dan beulerang. Inan kheueh teumpat jih beulatang dan nabi peuleusu nyan teutiek leubeh ilée. Awaknyan teuma teuseksa uroe ngon malam keu siumu masa. 11 Óh lheueh nyan ulôn kalon saboh takhta putéh nyang rayeuk dan Gobnyan nyang duek ateueh nyan. Langét ngon bumoe gadôh dikeue Gobnyan, akhé jih hana leumah lé. 12 Dan ulôn kalon ureuëng-ureuëng maté, cut rayeuk, jidong dikeue takhta nyan. Teuma kitab-kitab pih laju jipeuhah. Laju saboh kitab nyang laén jipeuhah, na kheueh Kitab Ureuëng Udeb. Óh lheueh huköman laju teupeurhot ateueh ureuëng maté, sisuai ngon buet awaknyan meunurot nyang na teutuléh lam kitab-kitab nyan. 13 Laju laôt jijok ureuëng-ureuëng maté nyang na lam laôt nyan. Mawöt dan Alam Mawöt pi jijôk ureuëng-ureuëng maté nyang na nibak jih. Dan di ureuëng-ureuëng maté nyan laju geupeurhot huköman nyang sisuai ngon buet nyang jipeubuet awaknyan. 14 Óh lheueh nyan Mawöt ngon Alam Mawöt laju geu-geulawa lam laôt apui. (Laôt apui nyoe na kheueh maté tahab nyang keudua.) 15 Ureuëng-ureuëng nyang hana teutuléh nan jih lam Kitab Ureuëng Udeb, teutiek lam laôt apui.

Wahyu 21

1 Laju ulôn kalon langét nyang barô dan bumoe nyang barô. Langét nyang phon dan bumoe nyang phon pih ka gadôh, meunan cit ngon laôt ka sapan sapa. 2 Teuma laju lôn kalon banda suci nyan, na kheueh Yerusalem nyang barô, jitreun nibak syeuruga nibak Allah. Banda nyan ka geupeu siab lagée sidroe dara barô nyang teupeungui keu teujak peurumpok ngon teungku linto. 3 Laju lôn deungoe su nibak takhta nyan jitawök ngon su nyang teuga, "Jinoenyoe teumpat tinggai Allah na kheueh meusajan-sajan ngon manusia! Gobnyan teuma udeb ngon awaknyan, dan awaknyan teuma jeuet keu umat Gobnyan. Allah keudroe na ngon awaknyan dan jeuet keu Allah awaknyan. 4 Gobnyan teuma geusampôh banmandum ié mata nibak mata awaknyan. Maté hana teuka na le; seudeh, mo ba-e, atawa sakét pih hana jiteuka lé. Hai-hai nyang awai ka sapan sapa." 5 Laju Gobnyan nyang duek ateueh takhta nyan geupeugah, "Jinoenyoe lôn peujeuet banmandum barô!" Dan Gobnyan geupeugah cit bak ulôn, "Tuléh kheueh nyoe, sabab peue-peue nyang teupeugah nyoe beutôi dan jeuet teupatéh." 6 Laju Gobnyan geupeugah, "Ka seuleusoe! Ulôn kheueh nyang awai dan nyang akhé; Ulôn kheueh Tuhan nibak Awai trok án Akhé. Tieb-tieb ureuëng nyang grah, teuma Lôn bri ié jieb ngon hana teubayeue nibak mata ié nyang teubri udeb. 7 Ureuëng-ureuëng nyang meunang teuma jiteurimong hai-hai nyan nibak Ulôn. Ulôn teuma jeuet keu Allah jih, dan jihnyan jeuet keu aneuëk Ulôn. 8 Teuma ureuëng nyang gusuen, peukhianat, ureuëng jeuhet, tukang poh maté gob, ureuëng cabui, ureuëng nyang jingui iéleumé-iéleumé gaéb, nyang seumah beurala, dan banmandum nyang galak meusulet, teutiek lam laôt apui dan beulerang nyang hu, na kheueh maté tahab nyang keudua." 9 Sidroe lamkawan tujoh droe malaikat nyang ka na wadah-wadah nyang peunoh ngon tujoh beuncana keuneulheueh nyan jijak ubak ulôn dan jipeugah, "Keunoe! Ulôn kutunyok bak gata Dara barô, na kheueh peurumoh Aneuëk Bubiri." 10 Teuma Roh Allah laju jikuasa ulôn, dan malaikat nyan jiba ulôn u pucak gunong nyang lumpah manyang. Gobnyan geutunyok bak ulôn Yerusalem, banda suci nyan, banda nyan jitreun nibak lam syeuruga, nibak Allah, 11 ngon seumarak dan keuagongan Allah. Banda nyan muble-ble lagée batée peumata, lagée batée baiduri sikée nyang jeureunéh lagée kristal. 12 Beuton bansikeulileng nyan manyang ngon rayeuk, na dua blaih boh pintoe geureubang, dan jijaga lé dua blah droe malaikat. Nibak bandua blaih boh pintoe nyan na teutuléh nan-nan bandua blaih sukée bansa Israel. 13 Na lhée boh pintoe geureubang nyang meuhadab ubak tieb-tieb arah: lhée boh siblaih u timu, lhée boh siblaih u seulatan, lhée boh siblaih u utara, dan lhée boh siblaih u barat. 14 Beuton banda nyan teupeudong ateueh dua blaih batée keunaleueng. Ateueh batée-batée keunaleueng nyan teutuléh nan-nan ban dua blaih droe rasui Aneuëk Bubiri nyan. 15 Malaikat nyang meututoe ngon ulôn nyan na tungkat sineupat nyang teupeugét nibak méuh, keu ngon sipat banda nyan, pintoe-pintoe geureubang nyan dan beuton-beuton nyan. 16 Banda nyan bantuek jih meusagoe peuet -- panyang jih saban ngon luwah jih. Ngon lagée nyan malaikat geusipat banda nyan ngon tungkat sineupat gobnyan; teunyata panyang jih na 2400 kilo metée; luwah ngon manyang jih saban lagée panyang jih. 17 Watée malaikat nyan geusipat beuton nyan, teunyata manyang beuton nyan nam ploh metée. Sineupat nyang geupeu guna lé malaikat nyan na kheueh sineupat nyang jipeuguna lé manusia. 18 Beuton banda nyan teupeugét nibak batée baiduri sikée, seudangkan banda jih keudroe nibak méuh aseuli, jeureunéh lagée ceureumen. 19 Batée-batée keunaleueng banda nyan teuhias ngon mubagoe rupa batée peumata. Batée keunaleueng nyang phon teupeugét nibak batée baiduri sikée, nyang keudua nibak batée nilam, nyang keu lhée nibak batée yakut, keu peuet nibak batée zamrut, 20 keulimong nibak batée baiduri seupah, keu nam nibak batée deulima, keu tujoh nibak batée ratna ceumpaka, keu lapan nibak batée pirus, keu sikureueng nibak batée topas, keu siploh nibak batée krisopras, keu siblaih nibak batée lazuardi, dan keudua blaih nibak batée keucubong. 21 Ban dua blaih babah pintoe geureubang teupeugét nibak dua blaih boh mutiara, maséng-maséng pintoe teupeuget nibak saboh mutiara. Rot ueh lam banda nyan teupeugét nibak méuh murni, jeureunéh lagée ceureumen nyang meukilat. 22 Ulôn hana kukalon Baét Allah nyang lam banda nyan, sabab Baét Allah na kheueh Tuhan keudroe, Allah Nyang Mahakuasa, dan Aneuëk Bubiri nyan. 23 Banda nyan hana peureulée na cahya mata uroe atawa caya buleuen, sabab keuagongan Allah jipatéh ateueh nyan, dan Aneuëk Bubiri nyan na kheueh panyöt nyan. 24 Bansa-bansa nyang na ateueh rhueng donya teuma jijak lam cahya gobnyan, dan raja-raja pih teuma jibri keukayaan awaknyan ubak banda nyan. 25 Babah-babah pintoe geureubang nyan teuma teuhah siuroe seupôt; hana teuma teutôb, sabab hana malam nibak teumpat nyan. 26 Keubeusaran dan keukayaan bansa-bansa teuma jiba lam banda nyan. 27 Teuma keu ureuëng nyang jipeubuet hai-hai nyang kutoe, atawa ureuëng nyang meusulet -- paneuk haba peue mantong nyang kutoe, sagai-sagai hana jitamong lam nyan. Nyang teuma jitamong na kheueh nyang nan jih na teutuléh lam Kitab Ureuëng Udeb, kitab Aneuëk Bubiri nyan.

Wahyu 22

1 Malaikat nyan pih geutunyok bak lôn krueng nyang ié jih teubri udeb. Krueng nyan muble-ble cahya lagée kristal dan ji ile nibak takhta Allah dan Aneuëk Bubiri nyan, 2 bak teungoh-teungoh rot ueh lam banda nyan. Bak binéh krueng nyan, blaih deh blaih noe na sumber keu udeb, nyang muboh dua blaih goe lam sithon, na kheueh sigoe lam sibuleuen. Ôn jih jeuet teucok keu ubat bansa-bansa. 3 Lam banda nyan hana meusapeue pih nyang na keunong kutokan Po teu Allah. Takhta Allah dan Aneuëk Bubiri nyan na teuna lam banda nyan. Hamba-hamba Gobnyan jimeubakti ubak Gobnyan, 4 dan jikalon ruman Gobnyan. Nan Gobnyan teuma teutu1éh nibak dho awaknyan. 5 Awaknyan hana peureulée panyöt atawa cahya mata uroe, sabab malam ka hana lé, dan Tuhan Allah keudroe nyang peutrang awaknyan. Ngon lagée nyan awaknyan teuma jimat peurintah sibagoe raja keu siumu masa. 6 Laju lé malaikat nyan geupeugah bak lôn, "Tutoe haba nyoe beutôi dan jeuet teupatéh. Tuhan Allah nyang bri Roh Gobnyan ubak nabi-nabi, dan nyang kirém malaikat Gobnyan keugeutunyok ubak hamba-hamba Gobnyan peue nyang teujadi lam watée hana treb lé." 7 "Kalon kheueh nyoe!" kheun Isa, "Ulôn reujang kuteuka. Mubahgia kheueh ureuëng nyang jitaát ubak tutoe haba nubuat nyang na lam kitab nyoe!" 8 Ulôn, Yahya, ka lôn ngieng dan lôn deungoe banmandum nyoe. Óh ka seuleusoe lôn deungoe dan lôn kalon nyan ulôn laju teudugom dikeue malaikat nyang ka geutunyok banmandum nyan ubak ulôn, dan ulôn keuneuk seumah gobnyan, 9 teuma gobnyan geupeugah bak ulôn, "Bék! Bék gata seumah lôn! Seumah kheueh Allah! Sabab ulôn pih hamba saban lagée gata, dan lagée syedara-syedara gata banmandum nabi dan mandum ureuëng nyang jitaát ubak peue-peue nyang na teutuléh lam kitab nyoe!" 10 Laju gobnyan geupeugah lom, "Bék kheueh tasöm tutoe nubuat lam kitab nyoe, sabab ka tho watée jih banmandum nyoe teuma teujadi. 11 Ureuëng nyang jeuhet, bah kheueh jipeubuet jeuhet sabe; ureuëng nyang kutoe, bah kheueh jipeukuto sabe droe jih nyan; ureuëng nyang jiseutôt peue nyang geukeuheundak lé Po teu Allah, bah kheueh sabe jiseutôt peue nyang geukeuheundak lé Po teu Allah nyan, dan ureuëng nyang udeb khusos keu Allah, bah kheueh udeb jih khusos keu Allah mantong." 12 "Simak kheueh nyoe!" kheun Isa, "Hana treb lé Ulôn teuma teuka sira Lôn ba upah keu Lôn bayeue bak tieb-tieb ureuëng ateueh peue nyang ka jipeubuet nyan. 13 Ulôn kheueh nyang awai dan nyang akhé; Ulôn kheueh Tuhan nibak Awai phon trok ubak nyang Keuneulheueh." 14 Mubahgia kheueh ureuëng nyang rhah bajée jubah jih sampoe án gleh akhé jih awaknyan jeuet jipajoh boh kayée nibak bak kayée keu udeban dan jitamong lam banda nyan meulalu pintoe geureubang. 15 Teuma ureuëng-ureuëng nyang jipeubuet hai-hai nyang jeuhet, nyang jingui iéleumé-iéleumé gaéb, ureuëng-ureuëng nyang jipeubuet buet-buet nyang cabui, tukang poh maté gob, nyang seumah beurala, dan ureuëng-ureuëng nyang sulet bak peugah haba, bah kheueh ngon tutoe haba meunan cit ngon buet jih, banmandum ureuëng nyang lagée nyan teumpat jih diluwa banda nyan. 16 "Ulôn, Isa, ka lôn kirém malaikat Lôn ubak gata mangat jihnyan jibri tée hai-hai nyang lagée nyoe keu keupeuntengan jeumaáh-jeumaáh. Ulôn nyoe keuturonan nabi Daud; Ulôn kheueh bintang timu nyang trang nyan." 17 Roh Allah dan Dara barô Inong jipeugah, "Jak kheueh keunoe!" Tieb-tieb ureuëng nyang jideungoe nyoe bah kheueh jipeugah cit teuma, "Jak keunoe!" Soe nyang grah, bah kheueh jiteuka! Dan soe nyang meuheuét, bah kheueh jicok ié nyang teubri udeb nyan ngon cuma-cuma. 18 Keu tieb-tieb ureuëng nyang jideungoe tutoe haba nubuat lam kitab nyoe, ulôn, Yahya, kubri peuingat lagée nyoe: meunyoe ureuëng jitamah sapeue-sapeue lam nubuat nyoe, teuma Allah geutamah huköman ateueh ureuëng nyan ngon bala-bala nyang teulukeh lam kitab nyoe. 19 Dan meunyoe na nyang peukureueng sapeue-sapeue nibak tutoe haba nubuat nyoe, teuma Allah geupeukureueng jeumba ureuëng nyan nyang na teulukeh lam kitab nyoe -- na kheueh bagian nibak bak kayée keu udeban dan nibak banda suci nyan. 20 Gobnyan nyang peutrok haba nyoe geupeugah, "Beutôi, Ulôn reujang ku teuka!" Amin! Teuka kheueh, ya Tuhan Isa! 21 Seumoga Tuhan Isa geubri beureukat ubak banmandum umat Allah!