Anutu Naŋgan Taŋindan Miamun
1 Miamun biŋan ugu, gubuʼ Anutu taŋinda gunuŋun da intap, 2 da intap imiŋʼ utaʼ aŋu. Da nam mimindan triŋtriŋan ibuafir mpui tsiraʼ sib, da Anutu Mara Payaman imiŋʼ waguŋʼ gin ifa iba. 3 Da Anutu ini, “Nam dzidziwandan nawaʼ,” da nam dzidziwandan iwaʼ. 4 Da itsaŋan nam dzidziwandan igi iwaʼ bini i maraŋgan, da itsaf nam dzidziwandan i nam mimindan. 5 Anutu ifariŋʼ nam dzidziwandan “gubuʼ” da ifariŋʼ nam mimindan “idziaŋ.” Nam idziaŋ iwaʼ da gubnuʼ ipis--nigi isu gubuʼ da idziaŋ miamun. 6 Da Anutu ini, “Nam papanifan tsiraʼ biŋan dzara bida umpiʼ nawaʼ namunti wasaʼ i mpui da natsaf mpui i mpui.” 7 Ibinigi da Anutu itaŋin nam dzaran bida umpiʼ imunti isu ntiaŋʼ itsaf mpui miŋʼa waguŋʼ i mpui miŋʼa waraŋʼ. Da nam igi iwaʼ ibinigi. 8 Da ifariŋʼ nam dzaran igi “maraŋuntuŋ.” Nam idziaŋ iwaʼ da gubuʼ ipis-- nigi isu gubuʼ da idziaŋʼ 2. 9 Da Anutu ini, “Mpui miŋʼa maraŋuntuŋ waraŋʼ nasiri ruan nampruʼ namunti rugan da intap tsaraʼ nawaʼ.” Da nam igi iwaʼ ibinigi. 10 Da ifariŋʼ intap tsaraʼan “intap” da ifariŋʼ mpui tsiraʼ “uruts.” Da araŋan itsaŋa nam igi iwaʼ bini i maraŋgan. 11 Da Anutu ini, “Nam mara maran ntapan santan nantap intap, gai kapa nidzun da nam yaba bida sai da kapa nidzun mara maran bida dzaŋkum. Da yamuŋgan nantap nautus i ruan nabinigi.” Da nam igi iwaʼ ibinigi. 12 Nam kapa nidzun mara maran sib aŋu iyab intap: gai kapa nidzun da nam yaba bida sai da kapa nidzun mara maran bida dzaŋkum. Da araŋan itsaŋa nam igi iwaʼ bini i maraŋgan. 13 Nam idziaŋ iwaʼ da gubuʼ ipis--nigi isu gubuʼ da idziaŋʼ 3. 14 Da Anutu ini, “Nam puatsadan nawaʼ namiŋʼ maraŋuntuŋ wasaʼ i tsafa gubuʼ i idziaŋ da santiŋʼa gubuʼ da udzuf da gan gubuʼ gan mararam mara maran miŋʼa wasaʼ gin, 15 da napuatsa nari namiŋʼ maraŋuntuŋ i arida intap sib.” Da nam igi iwaʼ ibinigi. 16 Ibinigi da Anutu itaŋin nam puatsadan tsiraʼ iruʼrun, gubuʼ i mpada tayaŋʼ gubuʼ pisan da ukam i mpada tayaŋʼ idziaŋʼ. Da itaŋin ŋantam narun impruʼ ibinigi aŋu. 17 Anutu itaŋin nam puatsadan sib aŋu igi imiŋʼ maraŋuntuŋ i arida intap sib, 18 da mpada tayaŋʼ gubuʼ da idziaŋ, da tsafa dzidziwandan i nam mimin. Da araŋan itsaŋa nam igi iwaʼ bini i maraŋgan. 19 Nam idziaŋ iwaʼ da gubuʼ ipis--nigi isu gubuʼ da idziaŋʼ 4. 20 Da Anutu ini, “Mpui nasisuŋʼ i apu marantaʼan mara maran, da maraŋuntuŋ nasisuŋʼ i apu mara maran dzufan.” 21 Ibinigi da Anutu itaŋin apu marantaʼan miŋʼa uruts, tsiraʼ tsiraʼ impruʼ da mara maran sib aŋu, da itaŋin apu mara maran dzufan. Da araŋan itsaŋa nam igi iwaʼ bini i maraŋgan. 22 Da Anutu ifinti da ini, “Wasisuŋʼ namiŋʼ uruts da apu dzuf nasisuŋʼ namiŋʼ intap.” 23 Nam idziaŋ iwaʼ da gubuʼ ipis--nigi isu gubuʼ da idziaŋʼ 5. 24 Da Anutu ini, “Apu mara maran nawaʼ intap, marapagraʼ da buman, tsiraʼ da isiʼ, yuŋan da afafan.” Da nam igi iwaʼ ibinigi. 25 Anutu itaŋin apu mara maran buman da pagraʼ, tsiraʼ da isiʼ, santan imiŋʼ intap. Da araŋan itsaŋa nam igi iwaʼ bini i maraŋgan. 26 Da Anutu ini, “Agi natip garam gar nasaŋʼ maraganuŋgaŋʼ da nataŋin i suda rinun i mpada tayaŋʼ yafas mpada uruts, da apu dzuf dzufa waguŋʼ, da apu yuŋa intap mpruʼan da intap santan.” 27 Ibinigi da Anutu itip garam gar isaŋʼ maraganuŋgan. Itip garam da sagat ibi ruŋgan. 28 Anutu ifinti ribaraŋan da ini ibiani, “Agam warim narum ruas nayus i mpada saŋʼa intap da intap da suda rinun da mpada tayaŋʼ i yafas mpada uruts da apu dzufa waguŋʼ da apu yuŋa intap mpruʼan da nam santan.” 29 Da Anutu ini, “Watsaŋan! Dzi taŋin nam santan ntapan kapa nidzun mara maran da gai kapa nidzun mara maran isu agam naŋgam gadan. 30 Da dzi taŋin puatsi da gai yafan isu apu marantaʼan santan miŋʼa intap da dzufan naŋgan gadan.” Da iwaʼ ibinigi. 31 Anutu itsaŋan nam araŋan taŋindan igi santan aŋu iwaʼ ŋarubini biŋan imiŋʼ i maraŋgan. Nam idziaŋ iwaʼ da gubuʼ ipis--nigi isu gubuʼ da idziaŋʼ 6.
1 Ibinigi da gunuŋun da intap da nam sib aŋu Anutu taŋindan da miŋʼa gin ugu intsup 2 ibi arunigi aŋu. 2-3 Anutu intsup gum santan naŋan ugu sib, da waʼa gubuʼ 7 da araŋan impa asap i gan guman santan araŋan taŋindan ugu. Ibinigi da ifinti gubuʼ 7 da iraga isu gubuʼ mararam. 4 Nam sib aŋu taŋindan da waʼa miŋʼa gunuŋun da intap ugu naŋgan ibawaʼ ibiarigi.
Garam Gar Miamun Anutu Taŋindan Miŋʼa Gum Iden
Gubuʼ Anutu Yawe taŋinda gunuŋun da intap 5 da waufwauf ma nam ntapan fain wantap intap u, i Anutu Yawe warim gamiʼ u da wataŋin garam gar maŋan i rafa gum i intap u. Imaʼ. 6 Da bitsintaʼ mpui imiŋʼ intap iyab da idadaum intap santan inufunuf. 7 Da Anutu Yawe iyu intap fain da itip garamin da igufi nifu pau rima marantaʼan yataŋʼ garam yu-bampun da garam igi isu garam gar marantaʼan. 8 Da Anutu Yawe iraf gum ŋarubini maŋan imiŋʼ Iden imiŋʼ gubuʼ yaban da itaŋin garam araŋan tipan ugu impa gin. 9 Anutu Yawe inaŋ da gai mara maran dauman iyab intap, gai maran aridagin da nidzun dauman i gadan. Da miŋʼa gum igi wasaʼ gan, araŋan itaŋin gai rima marantaʼan ntiŋan aŋu da gai kupisa uwayant i nam bini da nam maisan. 10 Da mpui maran maŋan intuap iwaʼ Iden da irunt imiŋʼ wasaʼ i gum igi i rima raŋaraŋ rutin, da ibatsaf isu mpui baŋin iruʼ da iruʼ. 11 Mpui miamun biŋangan Pison, da irunt iŋuaŋʼ iŋuaŋʼ imiŋʼ wasaʼ i garam Hawila intapan, da intap igi gol imiŋʼ gin. 12 (Da gol miŋʼa intap igi ŋarubini biŋan iyus, da gai gurun gauntan waʼa bini da tauf griʼgriʼan imiŋʼ nigi impruʼ.) 13 Mpui baŋin maŋan suda iruʼrun gin biŋangan Gihon, irunt iŋuaŋʼ iŋuaŋʼ imiŋʼ wasaʼ intap Kus. 14 Mpui baŋin maŋan suda iruʼ da bits biŋangan Taigris, irunt gamp Asur marafain gan miŋʼa bida gubuʼ yaban. Da mpui baŋin maŋan suda iruʼ da iruʼ biŋaŋgan Yufretis. 15 Da Anutu Yawe iyu garam da itaŋin i gum miŋʼa Iden i naŋa gum gin da mpada tayaŋʼ gin. 16 Da ifai nan i araŋan ini ibiani, “Gai nidzun miŋʼa gum ani sib aŋu da u buŋʼ ayu da wagan, 17 da bitsintaʼ gai bits rima uwayant i nam bini da maisan, agu anuŋʼ gada i nidzuŋgan u, i gubuʼ aru u gadan igi da u buŋʼ amamp.” 18 Da Anutu Yawe ini i uŋgan ini binaʼ, “Anuŋʼ bini i garam runtaʼ aŋu mpadan u. Dzi buŋʼ atip i gan sarimpan gan maŋan saŋʼa i rima araŋan sib.” 19 Ibinigi da Araŋan iyu intap da itip apu yuŋa intap da dzufan sib aŋu gin da iyu iba da garam i tsaŋanda garam rima biŋan bida anuŋʼ gin. Da biŋan idzuwai araŋan nuʼa gin, da nigi isu i biŋaŋgan. 20 Ibinigi da garam irim biŋan da apu dzuf da apu buman da marapagraʼ miŋʼa intap sib aŋu, da bitsintaʼ apu igi gan bits anuŋʼ ifasaŋʼ i sarimpa garam igi da rima araŋan sib u. 21 Ibinigi da Anutu Yawe inaŋ da garam igiŋʼ marampruʼ funub da itus araŋan dzabaran bits da irim iwaʼ ifan, da itip yamits araŋan riniubit sib. 22 Da Araŋan iyu garam dzabaran da itip isu sagat da iyu iba da garam. 23 Gubuʼ garam tsaŋandan da itsauʼ tsiraʼ aŋu da ini, “Mai! Aruani da dzi gaŋʼ maŋan saŋʼa dzi iwaʼ. Uruŋuŋgan iwaʼ imiŋʼ dzi uruŋuŋgaŋʼ; paiʼgan iwaʼ imiŋʼ dzi paiʼgaŋʼ. Anutu itip araŋan iwaʼ imiŋʼ garamin, ibinigi da dzi nafariŋʼ araŋan nabi ‘sagat.’ ” 24 I wain arunigi da garam inaŋ da itaŋin ramaŋgan da rinaŋgan rai da irut finiŋgan impai isu nam wain bitsintaʼ. 25 Da garam igi irut finiŋgan impa ragi daŋunt da rinin wamiaʼ i ruan u.
Garam Gar Iruaʼ i Nam Maisan
1 Apu buman santan Anutu Yawe taŋindan ugu da mur isu apu mararuru tsiraʼ i nan umpur iyuʼan. Gubuʼ maŋan da mur iwaʼ da sagat da igutin, “Amaʼ! Nan nidzun i Anutu nidan da agam i anuŋʼ gada gai nidzun santan miŋʼa gum ani?” 2 Da sagat ini mur nifuŋgan muŋaʼ ibiani, “Imaʼ, aga saŋʼ i gada gai sib aŋu muntida gum wasaʼ ani nidzuŋgan, 3 da bitsintaʼ Anutu ifai nan babampafan i agai i gai bits muntida wasaʼ i gum ani aga anuŋʼ gadan ma gifan u, bida aga naŋa bidanigi da aga buŋʼ amamp.” 4 Da mur ini binaʼ, “Imaʼ! Nan umpur! Agam wasaŋʼ i mampan u. 5 Anutu ini ibinigi i araŋan isruʼgin sib i bida agam gadan da agam maram buŋʼ antap ruan da agam buŋʼ asaŋʼ Anutu i sruʼa i nam bini da nam maisan.” 6 Sagat itsaŋan gai nidzun igi iwaʼ ŋarubini biŋan i maraŋgan da idaum aŋu i gadan da uda mararuru. Ibinigi da araŋan ipis fain da igan, ida imus rima fain da gabuŋgan igan impruʼ ibinigi. 7 Gubuʼ rib iruʼ igi gada sib da suŋ biŋan aŋu maran intap ruan da irarab ruan ratar i mpada ragi daŋunt; ibinigi da ribaraŋan idaŋin gai yafan tsiraʼ impruʼ ruan da iraiŋʼ sib i ruan. 8 Gubuʼ nam nufan da ribaraŋan iriŋant i Anutu Yawe yuŋa gum badan da ribaraŋan irunt ikup i Araŋan imiŋʼ wasaʼ i gai santan. 9 Da Anutu Yawe inuʼ garam, “U mpa aruanuŋʼ?” 10 Da garam inuʼ ini Anutu Yawe nifuŋgan muŋaʼ ba, “Dzi riŋant i u yuŋa gum wasaʼ badan, ibinigi da dzi rat da dzi kup, i dzi mpa ragi daŋunt.” 11 Da Anutu igutin, “Maŋa ni da agu i u daŋuntan? U maga gai nidzun dzi paʼa agu gin ugu, ma?” 12 Da garam itip ini Anutu Yawe nifuŋgan muŋaʼ ibiani, “Sagat u taŋindan da dzi ugu irim gai igi nidzuŋgan fain da dzi da dzi gan.” 13 Da Anutu Yawe igut i sagat ini binaʼ, “U bunaŋ ibinigi iyaʼ?” Da sagat ini Anutu Yawe nifuŋgan muŋaʼ ibiani, “Mur isu umpur da dzi da dzi gan.” 14 Ibinigi da Anutu Yawe ini da mur ini binaʼ, “U naŋ nam bida ani da dzi buŋʼ apupuarap da agu namiŋʼ wasaʼ i apu marapagraʼ da buman santan, agu buŋʼ asruak i waŋum da waga ŋaruntsuaf da gubuʼ sib aŋu nasaŋʼ u gubuʼ gam mampan. 15 Dzi buŋʼ ataŋin agu da sagat narim ipiap i ruam da namiŋʼ wasaʼ i agu yaŋiŋgam da sagat yaŋiŋgan. Da araŋan yaŋiŋgan buŋʼ ayab i u gudzum, da u buŋʼ agara araŋan yaŋiŋgan faga mutun.” 16 Da ini da sagat ini binaʼ, “Dzi buŋʼ autus u barabin gam da agu nabiani: u buŋʼ awaʼ da nam tsakiadan tsiraʼ biŋan da gubuʼ u rima narum. U maram buŋʼ ari i suda wain i gabuŋgam da bitsintaʼ u gabuŋgam buŋʼ asu gudzun i agu.” 17 Da itip ini da garam ini binaʼ, “U riŋant i finiŋgam naŋgan da u ga gai nidzun dzi paʼa agu gin ugu, da intap buŋʼ asu mais da agu. U buŋʼ anaŋ gum tsiraʼ biŋan i waʼa da naŋgam gadan da gubuʼ santan nasaŋʼ u naŋgam mampan. 18-19 Sai titipu da gantsuats maradantaŋ buŋʼ antap da nari u gumam sib da u buŋʼ aga nam ntapa puatsi. Da u buŋʼ anaŋ gum uwats uwats tsiraʼ i waʼa da nam gadan gam, nasaŋʼ u tipa fadan da intap aru dzi tipa agu gin ugu. I dzi tip agu i intap da gubuʼ u mampan da u buŋʼ atip nafan da intap.” 20 Da Adam ifariŋʼ finiŋgan biŋaŋgan Ifa (waiŋgan ibi ‘marantaʼan’). I araŋan isu garam gar marantaʼan sib aŋu rinaŋgan. 21 Anutu Yawe ruŋgan itip nam atsufan i apu rinigaŋan da iraiŋʼ sib i ribaraŋan.
Anutu Iwat Adam da Ifa Iwaʼ Manaʼ Sinuŋʼ Gum Iden
22 Da Anutu Yawe ini ibiani, “Watsaŋan! Garam ugu ibasaŋʼ agi maŋan sib, isruʼ i nam bini da nam maisan sib wa. Agi anuŋʼ ruŋʼ tusa maraŋʼ i araŋan da uda gai rima marantaʼan nidzuŋgan da gadan u, i ribaraŋan buŋʼ ampa ratar nantiŋ i!” 23 Ibinigi da Anutu Yawe iwat araŋan rai i gum Iden i naŋa gum i intap aru tipa araŋan gin ugu. 24 Iwat garam rai iwaʼ sinuŋʼ gum igi sib da Araŋan itaŋin nam marantaʼan gunuŋun fain nida tserubim da bainat bururuŋan marisa i ruan imiŋʼ gubuʼ yaban i gum Iden da imunti sib i gai rima marantaʼan.
Kein da Abel Nangan
1 Adam irut finiŋgan Ifa impai da araŋan finiŋgan iwaŋun da yapiŋʼ Kein. Da Ifa ini, “Yawe irim dzi sib da dzi yapiŋʼ naruŋʼ marub.” 2 Raiyi da Ifa itip irim Kein raiŋgan Abel. Gubuʼ Abel yiŋʼa sib da inaŋ guman mpada tayaŋʼ dumpa da nuniŋ, da Kein inaŋ guman rafa gum. 3 Gubuʼ maŋan da Kein iyu nam gadan fain imiŋʼ guman da irim daŋki gin ifan da Yawe. 4 Da Abel ibinigi iyu apu bini imiŋʼ dumpa gan fain narun miamun gin da isaf da iyu nagaran bini da irim isu daŋki ifan da Yawe. Yawe nugun inuf nidzun aŋu i Abel impruʼ da gan daŋki gan, 5 da bitsintaʼ nugun wanuf i Kein da gan daŋki gan u. Ibinigi da Kein nugun itsakia nidzun da iguruŋur tsiraʼ biŋan. 6 Da Yawe igut i Kein, “Wain idzuwai da u nugum itsakia? Wain idzuwai da u guruŋur? 7 Bida u naŋa nam bini da u nugum buŋʼ atsiaʼ. Da bitsintaʼ bida u naŋa nam maisan da nam maisan itapatip sib u muantsi nifuŋgam i prutsan da garada u funub. Ini suda wain i agu, da bitsintaʼ wamunti babampafan i rasudan.” 8 Da Kein ini da raiŋgan Abel ini binaʼ, “Abel, agi yuŋa rai rai aŋu waʼa gum.” Gubuʼ ribaraŋan waʼa sib gum, da Kein yitam i ruan da yis raiŋgan funub. 9 Raiyi da Yawe igut i Kein ini binaʼ, “Da u raiŋgam Abel anuŋʼ?” Da araŋan ini, “Dzi wasruʼgin u. Mai! Dzi masu wain i mpada tayaŋʼ raiŋgaŋʼ?” Da Yawe ini, “Ibianuŋʼ da u bunaŋ sanab maisan ibiani i raiŋgam? U raiŋgam Abel biʼgan nifuŋgan nuʼan miŋʼa intap iwaʼ da dzi ibi nifun nuʼan i naŋa nam muŋaʼ. 11 Aruani da maisan narut agu da napaʼ agu rai i intap aru dagaŋa nifun da numa u raiŋgam biʼgan u baŋiŋgam yatsa rai ugu. 12 U nida rafa gum da intap wasaŋʼ rima nam nidzun maŋan da agu u. Da u buŋʼ asu garam kupa i asub rampan aŋu yuŋan saŋʼa intap aŋu fadan.” 13 Kein ini da Yawe ini binaʼ, “Dzi asubaŋʼ muŋaʼ gan u riman da dzi ani tsiraʼ biŋan iyus dzi. 14 Da wariŋantin! Aruani da u wat dzi rai i intap gum da gam maraŋgam. Da dzi buŋʼ asu garam kupa i asub rampan aŋu yuŋan, da bida maŋa tsaŋanda dzi da buŋʼ ais dzi funub.” 15 Da bitsintaʼ Yawe ini, “Imaʼ. Bida maŋa isa agu funub da buŋʼ abuariŋʼ barabin muŋaʼ maisan aŋu nasaŋʼ 7 nayus agu i muŋaʼ gan.” Ibinigi da Yawe irim ampap maŋan iyab i Kein i garam tsaŋandan ma waʼan da araŋan anuŋʼ isaŋʼ isa araŋan funub u. 16 Ibinigi da Kein itaŋin Yawe maraŋgan rai da ifa mpa intap Nod imiŋʼ gubuʼ yaban i Iden.
Kein Yaŋiŋgan
17 Kein irut finiŋgan impai da finiŋgan iwaŋun da irim naruŋgan marub Inok. Da Kein irim gamp tsiraʼ maŋan da ifariŋʼ narun Inok biŋan iyabin. 18 Raiyi da Inok irim Irad. Da Irad irim Mehudzael. Da Mehudzael irim Metusael. Da Metusael irim Lamek. 19 Lamek iyu sagat iruʼrun, Ada da Tsila. 20 Ada iwaŋun da irim Jabal. Jabal tafan rusan isu garam mpada tayaŋʼ apu pagraʼ bida makau da dumpa da nuniŋ da tumuaŋʼa uŋar tipa i apu rinigaŋan aŋu yuŋan. 21 Jabal raiŋgan biŋaŋgan Jubal. Jubal isu garam rima musik i gita da yamuŋʼ tafaŋgan. 22 Tsila iwaŋun da irim narun marub biŋaŋgan Tubal Kein. Araŋan garam baŋimurun i tipa nam mara maran i bras da ain. Da araŋan nafuŋgan biŋaŋgan Nama. 23 Gubuʼ maŋan da Lamek itsarif ruŋgan da finin rusan ibiani, “Ada da Tsila, wariŋant i gabuŋgam dzi, Lamek, nangaŋʼ! Dzi buŋʼ ais garam maŋan funub bida rima biʼ da dzi. Da buŋʼ abinigi aŋu bida mamaʼ rinifaʼ maŋan intiŋʼa dzi. 24 Bida garam maŋan isa Kein funub da araŋan buŋʼ abuariŋʼ barabin nayus 7. Da bida maŋa naŋa baŋin yaba i dzi, Lamek, da araŋan buŋʼ abuariŋʼ barabin tsiraʼ aŋu nayus 77.”
Ifa Itip Irim Narun Maŋan
25 Raiyi da Adam itip irut finiŋgan Ifa impai da finiŋgan iwaŋun da irim narun marub, da ifariŋʼ araŋan biŋaŋgan Set (waiŋgan ibi ‘irim’) da ini, “Anutu irim mamaʼ narun maŋan da dzi i uda Abel fagaŋgan aru Kein isa funub ugu.” 26 Raiyi da Set irim naruŋgan marub maŋan da ifariŋʼ i biŋaŋgan Inos. Miŋʼa araŋan gubuʼ gan arigi da fadan da garam gar iyugin da nifun itsaf Anutu da ifariŋʼ i biŋaŋgan Yawe.
Miŋʼa Adam Utupan Bawaʼa Noa
1 Adam tafan rusan yaŋiŋgan biŋaŋgan ibiani. Miŋʼa gubuʼ Anutu tipa garam gar da Araŋan itip ribaraŋan isaŋʼ Ruŋgan maraganuŋgan. 2 Gubuʼ tipa ribaraŋan da itip garam da sagat da ifinti da ifariŋʼ ibi “garam gar.” 3 Gubuʼ Adam mpada udzufan basaŋʼa 130, da irim narun marub isaŋʼ ruŋgan maraganuŋgan, da ifariŋʼ araŋan biŋaŋgan Set. 4 Gubuʼ Set waʼa sib, da Adam itip impa udzuf 800 da irim narun rusan marub da finam fain. 5 Mpruʼa Adam udzufan mpada marataʼ rutin da isaŋʼ 930 da araŋan imamp. 6 Gubuʼ Set mpada udzufan basaŋʼa 105, da araŋan irim naruŋgan Inos. 7 Da gubuʼ Inos waʼa sib, da Set itip impai udzuf 807 da irim narun rusan marub da finam fain. 8 Mpruʼa Set udzufan mpada marataʼ rutin da isaŋʼ 912 da araŋan imamp. 9 Gubuʼ Inos mpada udzufan basaŋʼa 90, da irim naruŋgan Kenan. 10 Da gubuʼ Kenan waʼa sib, da Inos itip impai udzuf 815 da irim narun rusan marub da finam fain. 11 Mpruʼa Inos udzufan mpada marataʼ rutin da isaŋʼ 905 da araŋan imamp. 12 Gubuʼ Kenan mpada udzufan basaŋʼa 70, da irim naruŋgan Mahalalel. 13 Da gubuʼ Mahalalel waʼa sib, da Kenan itip impai udzuf 840, da irim narun rusan marub da finam fain. 14 Da mpruʼa Kenan udzufan mpada marataʼ da isaŋʼ 910 da araŋan imamp. 15 Gubuʼ Mahalalel mpada udzufan basaŋʼa 65, da irim naruŋgan Jaret. 16 Gubuʼ Jaret waʼa sib, da Mahalalel itip impai udzuf 830, da irim narun rusan marub da finam fain. 17 Da mpruʼa Mahalalel udzufan mpada marataʼ rutin da isaŋʼ 895 da araŋan imamp. Gubuʼ Jaret mpada udzufan basaŋʼa 162, da araŋan irim naruŋgan Inok. 19 Gubuʼ Inok waʼa sib, da Jaret itip impai udzuf 800, da irim narun rusan marub da finam fain. 20 Mpruʼa Jaret udzufan mpada marataʼ rutin da isaŋʼ 962, da araŋan imamp. 21 Gubuʼ Inok mpada udzufan basaŋʼa 65, da araŋan irim Metusela. 22 Gubuʼ Metusela waʼa sib, da Inok itsuwir Anutu i sanaban isaŋʼ udzuf 300, da irim narun rusan marub da finam fain. 23 Da mpruʼa araŋan udzufan mpada marataʼ rutin da isaŋʼ 365. 24 Inok itsuwir Anutu i sanaban isaŋʼ gubuʼ gan santan, da watip itsaŋa araŋan u, i Anutu iyu araŋan. 25 Gubuʼ Metusela mpada udzufan basaŋʼa 187, da araŋan irim naruŋgan Lamek. 26 Gubuʼ Lamek waʼa sib, da Metusela itip impai udzuf 782, da irim narun rusan marub da finam fain. 27 Mpruʼa Metusela udzufan mpada marataʼ rutin da isaŋʼ 969, da araŋan imamp. 28 Gubuʼ Lamek mpada udzufan basaŋʼa 182, da irim naruŋgan marub maŋan. 29 Da ifariŋʼ i biŋaŋgan Noa (waiŋgan ibi ‘asap’) da ini, “Araŋan buŋʼ arim asap da agi i gum nam gadan agi naŋa uwats uwats gin miŋʼa intap aru Yawe pupuarapa rutin ugu.” 30 Gubuʼ Noa waʼa sib, da Lamek itip impai udzuf 595, da irim narun rusan marub da finam fain. 31 Mpruʼa Lamek udzufan mpada marataʼ rutin da isaŋʼ 777, da araŋan imamp. 32 Gubuʼ Noa mpada udzufan basaŋʼa 500, da irim narun rusan iruʼ da bits--Sem, Ham, da Yafet.
Garam Gar Naŋgan Maisan
1 Gubuʼ garam gar yusan da dzaraŋan mpada saŋʼa intap santan da rima narun ruas finam yusan, 2 da Anutu narun rusan itsaŋan garam intap narun rusan finam igi mara rifirif ruŋgan aŋu da iyu isu i finin rusan isaŋʼ maraŋgan aridagin. 3 Da Yawe itsaŋan da ini ibiani, “Dzi nifu pauʼ gaŋʼ marantaʼan wasaŋʼ i miŋʼa da garam gar ntiŋan u, i ribaraŋan garam gar intap aŋu. Da gan udzufan mpadan wasaŋʼ i fayusa 120 u.” 4 Miŋʼa gubuʼ igi da yaba badan da garam yiŋʼa maraurun tsiraʼ tsiraʼ biŋan impai intap. Garam igi Anutu narun rusan rima da sagat intap. Ribigi garam ŋifa ŋants nidzun da miamun biŋan ugu. 5 Da Yawe itsaŋan garam gar santan i naŋgan maisan naŋan da maran fura nam maisan nidzun aŋu bida nam bini isu gudzufugun i ribaraŋan. 6 Da Yawe nugun ibarabin nidzun biŋan aŋu da maran ifur, “Dzi damami tipa garam gar mpada intap da madadaum.” 7 Ibinigi da araŋan ini, “Dzi buŋʼ asiat garam gar santan dzi taŋindan rai sinuŋʼ intap, garam gar da apu marantaʼan santan mpada intap da dzufan. Dzi waŋuŋʼ ibarabin i dzi taŋin ribaraŋan.” 8 Da bitsintaʼ Yawe nugun inuf i Noa aŋu. 9 Noa nangan ani. Noa runtaʼ garam rururuŋan imiŋʼ wasaʼ i garam santan da gan gubuʼ gan mpadan da garam watsaŋa sanab asub maŋan wayab i araŋan, da araŋan itsuwir Anutu i sanaban mararam. 10 Noa irim narun rusan iruʼ da bits: Sem da Ham da Yafet. 11 Garam intap santan naŋgan maisan naŋan isu mais imiŋʼ Anutu maraŋgan. Da nam isa ruan idasaŋʼ isaŋʼ intap santan garam mpada gin. 12 Anutu irarab intap da itsaŋan nam maisan tsiraʼ suda gudzufugun i garam gar da taŋinda sanab bini rai. 13 Ibinigi da Anutu ini da Noa ibiani, “Dzi maraŋʼ ifur i siata garam gar santan rai, i ribaraŋan isu gudzu uris i ruan iyus. Hai, nan nidzun! Dzi buŋʼ asiat garam gar da nam santan miŋʼa intap nampruʼ. 14-16 Ibinigi da watip madzuŋ i ruŋgam i gai riniurun bini, da wasi kolta i wasaʼ da manaʼ. Da watip madzuŋ igi guntiʼ gan nasaŋʼ 140 mitas da maradza gan 23 mitas da yaban gan 14 mitas. Warim i gudzun sib da warim paŋʼ wasaʼ i gudzun da riŋampa gan nasaŋʼ 45 sentimitas. Wais tiriaŋ farab nasaŋʼ iruʼ da bits, maŋa waraŋʼ da wasaʼ da waguŋʼ. Da wais mumai igi wasaʼ farab farab in i apu mpada gin. Da warim muantsi namiŋʼ i riŋampa gan. 17 Dzi buŋʼ ataŋin mpui tsiraʼ nawaʼ intap i isa nam marantaʼan sib aŋu funub. Da nam sib aŋu miŋʼa intap buŋʼ amamp. 18 Da bitsintaʼ dzi buŋʼ autus i nan utusa i ruan gin da agu. Nabiani, warut finiŋgam da narum rusam da gan finin rusan nataŋʼ madzuŋ. 19-20 Da apu santan marantaʼan mara maran sib aŋu iruʼrun, arapuʼ da rinan, naba da agu da nataŋʼ madzuŋ nampruʼ i mpada marataʼ. 21 Wayu nam gadan mara maran santan da waufum nasaŋʼ i agam da apu santan i gadan.” 22 Noa inaŋ nam sib aŋu isaŋʼ Anutu nangan nidan da araŋan.
Mpui Furan Tsiraʼ Iwaʼ
1 Gubuʼ ibasu uts da Yawe ini da Noa ini binaʼ, “Dzi tsaŋa agu runtaʼ aŋu garam rururuŋan imiŋʼ wasaʼ i garam gar sib aŋu mpadan da gubuʼ aruani. Ibinigi da u buŋʼ au utupam da warut wataŋʼ madzuŋ. 2 Wau apu Dzi maraŋʼ aridagin i tsaradan suda daŋki maran ruga rugan arapuʼ 7 da rinan 7 da apu bubumpuadan i Dzi maraŋgaŋʼ iruʼrun rinan da arapuʼ. 3 Da nabinigi aŋu i apu dzuf maran ruga rugan; wapiriaŋʼ arapuʼ 7 da rinan 7. Wanaŋ wabinigi i apu igi ruŋʼ mpada marataʼ da utusa i ruan miŋʼa intap. 4 Miŋʼa aruani da fawaʼa gubuʼ 7 da dzi buŋʼ ataŋin gamiʼ namui nasaŋʼ gubuʼ 40 da idziaŋ 40, da dzi buŋʼ asiat nam marantaʼan santan dzi taŋindan miŋʼa intap ani rai.” 5 Ibinigi da Noa inaŋ nam sib aŋu isaŋʼ Yawe nidan. 6 Noa udzufan isaŋʼ 600 da gubuʼ aru mpui furan tsiraʼ waʼa samada intap sib. 7 Noa irut finiŋgan da narun rusan impruʼ da finin rusan yataŋʼ madzuŋ i rima ruŋgan sib i mpui tsiraʼ. 8-9 Da apu Anutu maran aridagin i tsaradan suda daŋki da apu bubumpuadan miŋʼa apu mara maran dzufan da yuŋa intap rinan da arapuʼ ifuari i ruan iruʼ iruʼ yataŋʼ da Noa i madzuŋ wasaʼ ibi Anutu nidan da araŋan. 10 Da gubuʼ 7 fada sib raiyi da mpui furan iwaʼ intap santan. 11-12 Noa udzufan waʼa 600 igi, da miŋʼa ukam 2 gubuʼ gan 17 arigi, da mpui santan miŋʼa intap waraŋʼ ipururuts iyab, da gunuŋun idagaŋ da gamiʼ tsiraʼ biŋan iruʼ isaŋʼ gubuʼ 40 da idziaŋ 40. 13 Da gubuʼ arigi da Noa da finiŋgan da naruŋgan Sem da Ham da Yafet irut finin rusan impruʼ ruan ataŋʼa madzuŋ. 14 Da apu mara maran santan--marapagraʼ da buman, tsiraʼ da isiʼ, yuŋa intap da dzufan-- yataŋʼ madzuŋ impruʼ da Noa da utupan. 15-16 Da apu marantaʼan mara maran sib aŋu, arapuʼ da rinan, ifuari ruan iruʼ iruʼ yataŋʼ madzuŋ da Noa ibi Anutu nidan. Yataŋʼ sib da Yawe ruŋgan itsuŋin muantsi sib in. 17 Da mpui tsiraʼ igi yusu iyab isaŋʼ gubuʼ 40 da ibuafir intap sib da imagaŋʼ madzuŋ iyab. 18 Da ruŋʼ yusu iyab iyus nam sib aŋu isaŋʼ madzuŋ mapa waguŋʼ aŋu gin. 19-20 Da mpui igi ruŋʼ yusu iyab iyus mamai guntiʼ santan isaŋʼ 7 mitas. 21 Da nam marantaʼan santan miŋʼa intap sib aŋu imamp sib--apu mpada intap, marapagraʼ da buman, yuŋan da afafan da dzufan, impruʼ da garam gar. 22 Nam santan mpada intap tsaraʼ uda asap i yun sib aŋu imamp sib. 23 Yawe isiat nam marantaʼan miŋʼa intap rai: garam gar da apu mpada intap da dzufa maraŋuntuŋ wasaʼ. Noa runtaʼ aŋu da utupan da apu ruta mpada madzuŋ igi aŋu ruŋʼ impa marataʼ. 24 Da mpui tsiraʼ igi ruŋʼ imunti ibuafir intap santan isaŋʼ gubuʼ 150.
Mpui Furan Tsiraʼ Iriʼ Sib
1 Da bitsintaʼ Anutu maran rufur Noa da apu santan ruŋʼ mpada madzuŋ igi da itaŋin manis irunt da igufi mpui tsiraʼ igi da isasariʼ iruʼ. 2 Da Anutu itsuŋin mpui bampun miŋʼa intap waraŋʼ da miŋʼa gunuŋun waguŋʼ da gamiʼ intap ruan. 3-4 Gubuʼ 150 naŋa i ntsupan da mpui isasariʼ iruʼ isaŋʼ madzuŋ iba mpa iyab mamai maŋan miŋʼa Ararat da ukam 7 gubuʼ gan 17. 5 Mpui ruŋʼ isasariʼ iruʼ da waʼa ukam 10 gubuʼ gan 1 da mamai fain gudzun iwaʼ. 6 Mamai fain gudzun iwaʼ sib da gubuʼ 40 maŋan ntsupan da Noa itus muantsi isiʼ maŋan miŋʼa waguŋʼ 7 da itaŋin ŋampuaʼ maŋan idzuf ifan. Da ŋampuaʼ igi idzuf iyuŋ ifa iba isaŋʼ mpui riʼan da intap waʼan. 8 Da Noa itip itaŋin ŋasabusir ifan i tsaŋanda bida mpui iriʼ iruʼ sib, ma imaʼ. 9 Da bitsintaʼ mpui ruŋʼ imunti, ibinigi da ŋasabusir isau gan mpada gin, da itip idzuf iba madzuŋ da Noa yintsi baŋin iwaʼ ifan da iyu apu araŋan yataŋʼ ifan. 10 Araŋan itip impa isaŋʼ gubuʼ 7 fada sib da itip itaŋin ŋasabusir ifan. 11 Nam nufan da ŋasabusir itip iba da Noa. Hai, miŋʼa ŋasabusir nifun da Noa itsaŋa gai olif yafan faʼ, da araŋan isruʼgin ibi mpui iruʼ sib wa. 12 Da araŋan itip impa isaŋʼ gubuʼ 7 fada sib da itaŋin ŋasabusir itip ifan. Da gubuʼ igi da ŋasabusir watip idzuf iba da Noa u. 13 Noa udzufan ibawaʼ 601 sib. Da atupa udzuf faʼ ukaman 1 da gubuʼ gan 1 da mpui iriʼ sib. Noa iraʼ i buari i nam buafira madzuŋ gudzun gin da irarab nam santan iruʼ da itsaŋan ibi mpui iriʼ sib da intap iwaʼ. 14 Da waʼa ukam 2 gubuʼ gan 27 da intap itsaraʼ sib. 15 Ida Anutu ini da Noa ibiani, 16 “Wataŋin madzuŋ rai da warut finiŋgam da narum rusam da gan finin rusan nawaʼ. 17 Wayu apu mara maran santan, apu dzufan da yuŋan da sruakan, ruta agu mpadan igi nawaʼ manaʼ i rima narun rusan da utusa i ruan da mpada saŋʼa intap santan.” 18 Ibinigi da Noa itaŋin madzuŋ da irut finiŋgan da narun rusan da narun rusan finin rusan impruʼ ruan waʼan. 19 Apu mara maran yuŋa intap da dzufan impruʼ ruan i utup utupan da itaŋin madzuŋ rai da iwaʼ.
Noa Itsara Nam da Yawe.
20 Noa yantuŋʼ tauf isu mumai mararam tsarada nam da Yawe gin. Da araŋan iyu apu fain imiŋʼ apu mara maran yuŋan da dzufan Anutu maran aridagin i rima daŋki rutin, da itai isu daŋki ifan da Yawe. 21 Yawe ituŋis Noa daŋki gan riman igi da gauntan iwaʼ ŋarubini iyus, da Araŋan ini i uŋgan ibiani, “Dzi wasaŋʼ i tipa wayada intap i garam gar naŋgan maisan muŋaʼ gan u. Nan nidzun, miŋʼa ribaraŋan marafaʼ gan da maran ifur nam maisan iyus aŋu, da bitsintaʼ dzi wasaŋʼ i tipa siata nam marantaʼan sib aŋu bida dzi naŋan ugu u. Imaʼ. 22 “Da gubuʼ intap ruŋʼ miŋʼan, da buŋʼ awaʼ gubuʼ ntaŋa nam gadan da gubuʼ yuŋa nam gadan, gubuʼ raŋaraŋ da gubuʼ sasus, gubuʼ fus da gubuʼ gamiʼ, nam idziaŋ da gubuʼ pisan. Gubuʼ mara maran gubuʼ gan bidanigi wasaŋʼ i ntsupan.”
Anutu Yudzu Sanab Faʼ Impruʼ da Noa
1 Anutu ifinti Noa da narun rusan i nan ani da ini ibiani, “Warim narum rusam nayus, i gan yaŋiŋgan utusa i ruan da mpada saŋʼa intap santan. 2 Apu marantaʼan mara maran sib aŋu mpada intap, tsiraʼ da isiʼ, dzufan da yuŋan da sruaka intap da mpada uruts wasaʼ buŋʼ arat natsuarupin i agam da agam buŋʼ asu wain i ribaraŋan. 3 Apu santan igi da dzi taŋin da agam i agam gadan ibi bus yafan da nam gadan dzi riman da agam tafam rusam ugu. 4 Nam bitsintaʼ dzi paʼa agamin ibiani: anuŋʼ gada apu biʼ ruŋʼ miŋʼa gin, i wain biʼ igi irim nam marantaʼan. 5 Da bida garam maŋan ma apu maŋan yatsa garam maŋa biʼgan rai, da dzi buŋʼ arim nam muŋaʼ da araŋan nasaŋʼ i gan asuban naŋan. 6 “Bida maŋa yatsa garam maŋa biʼgan rai, da namamp i gan muŋaʼ gan namiŋʼ garam gar baŋiŋgan, i araŋan iyats garam Anutu tipa saŋʼa maraganuŋgan ugu biʼgan rai. 7 Miŋʼa agam da agam warim narum rusam nayus, i agam narum rusam yaŋin rusan utusa i ruan da mpada sisuŋʼa saŋʼa intap santan.” 8 Da Anutu ini da Noa da narun rusan ibiani, 9 “Wariŋantin! Aruani da dzi ruŋgaŋʼ dzi ni udzuda nangaŋʼ utusa i ruan gin da agam da yaŋiŋgam taptap 10 mpruʼan da apu mara maran, dzufan da mpada intap, pagraʼ da buman, ruta agam mpruʼa ruam waʼa madzuŋ ba igi, nampruʼ da apu santan narun rusan taptap nautus i ruan namiŋʼ intap nabinigi. 11 Dzi taŋin nangaŋʼ udzudan da agam ibiani: Dzi wasaŋʼ i tipa taŋinda mpui tsiraʼ maŋan i wayada intap mpruʼan da nam marantaʼan santan u, imaʼ.” 12-13 Da Anutu ini, “Dzi taŋin umpum impar i ruan imiŋʼ maraum isu bir i nan utusa i ruan gin, dzi naŋa miŋʼa wasaʼ i dzi da agam da gam yaŋiŋgam taptap, mpruʼa da apu sib aŋu miŋʼa intap, da buŋʼ amiŋʼ ratar nantiŋ aŋu. 14 Gubuʼ dzi taŋinda maraum buafira intap da umpum buŋʼ ampar i ruan namiŋʼ wasaʼ, 15 da dzi maraŋʼ buŋʼ afur dzi nangaŋʼ udzudan mpruʼan da agam da apu marantaʼan, i wasaŋʼ i mpui tsiraʼ tipa waʼan da wayada nam marantaʼan santan u. 16 Da bida gubuʼ dzi tsaŋanda umpum waʼa maraum da dzi maraŋʼ buŋʼ afur dzi nangaŋʼ udzudan miŋʼa ratar tiŋan aru miŋʼa wasaʼ i dzi da nam marantaʼan mara maran sib aŋu mpada intap.” 17 Ibinigi da Anutu ini da Noa ibiani, “Watsaŋan! Nigi Dzi biraŋʼ nan utusa i ruan dzi taŋindan imunti wasaʼ i dzi Anutu da nam marantaʼan sib aŋu miŋʼa intap.”
Noa Narun Rusan
18 Noa narun rusan ruta mpruʼa ruan waʼa madzuŋ ba ibiani, Sem, Ham da Yafet. (Da Ham isu Kanan ramaŋgan.) 19 Da garam mpada saŋʼa intap sib aŋu waiŋgan iruʼ Noa narun rusan iruʼ da bits igi gin. 20 Da Noa garam rafa gum da isu garam miamun i ntaŋa gum wain. 21 Gubuʼ maŋan da araŋan inum wain gurun araŋan ruŋgan ntaŋan da tipan da maran ididirunt da igiŋʼ ragi daŋunt imiŋʼ uŋaran wasaʼ. 22 Ham, Kanan ramaŋgan, yataŋʼ ba da itsaŋa ramaŋgan giŋʼa ragi daŋunt da itip iwaʼ ifan da ini da rain rusan iruʼ igi. 23 Sem da Yafet iyu bruʼ da igif i barun da ifa barun barun gin da ibuafir ramaŋgan sib. Tuasaraŋan irarab nam intiʼ i anuŋʼ tsaŋanda ramaŋgan ragi daŋunt igi u. 24 Gubuʼ Noa maran dzidziwandan da iriŋant i nan narun bampa sib, Ham, naŋgan tsaŋanda araŋan giŋʼa utaʼ da fisagin. 25 Ibinigi da Noa ipupuarap da Ham naruŋgan ibiani, “Barabin tsiraʼ nais mara wafir i Kanan nantiŋ. Da buŋʼ asu rain rusan mamaʼ guman utaʼ aŋu.” 26 Da itip ini, “Dzi natsarif Yawe, Sem Anutu gan. Kanan nasu Sem mamaʼ guman utaʼ aŋu. 27 Anutu nautus i Yafet yaŋiŋgan nawaʼ nasisuŋʼ da gan yaŋiŋgan narut Sem yaŋiŋgan nampruʼ ruan nampa bini, da Kanan nasu Yafet mamaʼ guman utaʼ aŋu.” 28 Gubuʼ mpui tsiraʼ ntsupan da Noa itip impa isaŋʼ udzuf 350, 29 da mpruʼa Noa udzufan mpadan da isaŋʼ 950 da araŋan imamp. 10
Noa Tafan Rusan Biŋaŋgan
1 Nani Noa narun rusan Sem, Ham da Yafet narun rusan rima miŋʼa bampan 10 i mpui tsiraʼ.
Yafet Tafan Rusan
2 Yafet narun rusan biŋaŋgan ibiani, Gomer, Magok, Madai, Jawan, Tubal, Mesek da Tiras. 3 Gomer irim narun rusan ibiani: Askenats, Rifat da Togarma. 4 Jawan irim narun rusan: Elisa, Tarsis da Kit da Rodan. 5 Miŋʼa garam utup ani yaŋin rusan da tafan rusan idzaraŋ impa intap ruga rugan ibafan imiŋʼ uruts riŋan da intap isiʼ isiʼ miŋʼa uruts wasaʼ da impa utup utup da ini nan nifun ruga rugan.
Ham Tafan Rusan
6 Ham irim narun rusan ibiani: Kus, Mitsraim, Put da Kanan. 7 Kus irim narun rusan ibiani: Seba, Hawila, Sapta, Rama da Sapteka. Rama irim narun rusan iruʼrun: Siba da Dedan. 8 Kus ibinigi irim naruŋgan maŋan biŋaŋgan Nimrod. Nimrod isu garam nampaŋ da nifutsarif i ŋants gifan isu miamun imiŋʼ intap. 9 Araŋan isu garam baŋi tatiʼ yuŋa apu imiŋʼ Yawe maraŋgan. Ibinigi da garam nida tsarifa maŋan i biŋan tsiraʼ, da inaŋ da ini binaʼ, “Garam igi isu baŋi tatiʼ yuŋa apu imiŋʼ Yawe maraŋgan isaŋʼ Nimrod.” 10 Nimrod gampan miamun mpada tayaŋʼ gin ibiani: Babilon (nida Babel gin) da Erek da Akat, gamp santan igi imiŋʼ intap Sinar (nida Babilonia gin). 11-12 I miŋʼa nigi da araŋan ifa Asiria da iraf gamp Niniwe, Rihobot-Ir da Kala, da Resen. I gamp Resen igi imiŋʼ wasaʼ i gamp Niniwe da gamp tsiraʼ Kala. 13-14 Mitsraim isu garam Lud da Anam da Lehap da Naftu da Patrus da Kaslu da Kaftor tafaŋgan. Da garam Filistia iwaʼ i tafan Kaslu. 15 Kanan naruŋgan miamun Saidon, da rain rusan fain biŋaŋgan ibiani: Hit 16 da Jebus da Amor da Girgas 17 da Hiwi da Arka da Sini 18 da Arwat da Tsemar da Hamat. Raiyi da utup Kanan igi idzaraŋ da impa ruga rugan ifan. 19 Rib Kanan intapan ampapan mpada gin imiŋʼ gamp tsiraʼ Saidon da iragi uruts riŋan ifa iwaʼ Gatsa da Gerar da ifa ibi gubuʼ yaban da iwaʼ Sodom da Gomora da Adma da Tseboim da ifa iwaʼ Lasa. 20 Ribigi Ham tafan rusan yatsuŋʼ utupan da nifu-nangan impruʼ ruan impai intap ruga rugan isu utup utup.
Sem Tafan Rusan
21 Sem ibinigi irim narun rusan fain da isu garam utup Eber tafaŋgan, da araŋan raiŋgan tsiraʼ Yafet. 22 Sem narun rusan biŋaŋgan ibiani: Elam, Asur, Arfaksat, Lud da Aram. 23 Da Sem naruŋgan Aram narun rusan ibiani: Uts, Hul, Geter da Mas. 24 Sem naruŋgan Arfaksat isu Sela ramaŋgan, da Sela isu Eber ramaŋgan. 25 Eber irim narun rusan marub iruʼrun, maŋan biŋaŋgan Pelek, i miŋʼa araŋan gubuʼ gan mpada intap, da garam intap ibraŋ ruan idzaraŋ impa utup utup. Da araŋan raiŋgan biŋaŋgan Joktan. 26-29 Joktan isu Almodat, Selef, Hatsarmawet, Tsera, da Hadoram, Utsal, Dikla, da Obal, Abimael, Seba, da Ofir, Hawila da Jobap ramaŋgan. 30 Garam utup igi intapan mpada gin imiŋʼ Mesa da ifan iwaʼ Sefar miŋʼa mamai gubuʼ yaban. 31 Nigi Sem tafan rusan yatsuŋʼ utupan da nifu-nangan impruʼ ruan impai intap ruga rugan isu utup utup. 32 Rib utup mpada ruga rugan igi Noa tafan rusan. I miŋʼa ribigi, da garam intap santan aŋu iwaʼ da idzaraŋ impa isaŋʼ intap sib aŋu, da gubuʼ mpui tsiraʼ riʼa sib.
Yawe Irintsum Garam Gar Nifu-Nangan Imiŋʼ Babel
1 Miamun ugu da garam intap santan ini nifu-nan bitsintaʼ aŋu. 2 Garam igi santan intsuŋ impai iyuŋ imiŋʼ gubuʼ yaban da iwaʼ intap bump tsiraʼ biŋan miŋʼa intap Sinar (nida Babilonia gin) da sib aŋu impruʼ ruan impa nigi. 3 Da ribaraŋan ini da ruan, “Ariʼ! Wauriʼ da agi nau intap gur da natip brik gin da natai i dzaf i babampafan.” Ribaraŋan inaŋ ibinigi da iwaʼ da brik i rafa uŋar gin, da iyu kolta i amitsa brik mpruʼan da ruan. 4 Da itip ini da ruan ini binaʼ, “Ariʼ! Wasiri wampruʼ ruam waba, da agi naraf gampaŋʼ tsiraʼ maŋan da narim uŋar guntiʼ biŋan aŋu, gudzun waʼa gunuŋun, i naŋa ruŋgaŋʼ biŋaŋgaŋʼ muntida piapan da anuŋʼ dzaraŋan da mpada saŋʼa intap bafadan u.” 5 Da bitsintaʼ Yawe iruʼ ba i tsaŋanda gamp tsiraʼ da uŋar guntiʼ garam gar ruŋʼ rima yaban igi. 6 Da Yawe ini, “Aitsaŋan! Bida garam ani garam utup bitsintaʼ da nifu-nan bitsintaʼ da naŋa nam bida ani, da nam maŋan wasaŋʼ i barabindan da ribaraŋan u, imaʼ. Da pas aŋu da buŋʼ anaŋ nam mara maran i gan maraŋgan furan. 7 Ariʼ. Agi ruʼan da rintsuma ribaraŋan nifunangan da ribaraŋan anuŋʼ sruʼa i runifu nangan u.” 8 Ibinigi da Yawe irintsum ribaraŋan i nifu-nan bitsintaʼ nidan, da inaŋ ribaraŋan idzaraŋ ifan isaŋʼ intap da intap da wantsup gamp tsiraʼ riman ugu sib u. 9 I wain igi da garam ifariŋʼ gamp igi biŋaŋgan Babel (ma Babilon), da waiŋgan ibi ‘rintsuman’, i Yawe irintsum garam gar igi nifu-nangan da ibraŋ ribaraŋan imiŋʼ nigi da idzaraŋ impa isaŋʼ intap santan.
Sem Utupan Nangan Ragidan
10 Sem narun rusan biŋaŋgan da nangan ntuaŋan. Udzuf iruʼ aru miŋʼa bampan i mpui tsiraʼ riʼan ugu, da Sem udzufan iwaʼ 100 da irim naruŋgan Arfaksat. 11 Arfaksat waʼa sib, da Sem itip impa udzuf 500, da irim narun rusan marub da finam fain. 12 Arfaksat udzufan iwaʼ 35 da irim naruŋgan Sela. 13 Sela waʼa sib, da Arfaksat itip impa udzuf 403, da irim narun rusan marub da finam fain. 14 Sela udzufan iwaʼ 30 da irim naruŋgan Eber. 15 Eber waʼa sib, da Sela itip impa udzuf 403, da irim narun rusan marub da finam fain. 16 Eber udzufan iwaʼ 34 da irim naruŋgan Pelek. 17 Pelek waʼa sib, da Eber itip impa udzuf 430, da irim narun rusan marub da finam fain. 18 Pelek udzufan iwaʼ 30 da irim naruŋgan Reu. 19 Reu waʼa sib, da Pelek itip impa udzuf 209, da irim narun rusan marub da finam fain. 20 Reu udzufan iwaʼ 32 da irim naruŋgan Seruk. 21 Seruk waʼa sib, da Reu itip impa udzuf 207, da irim narun rusan marub da finam fain. 22 Seruk udzufan iwaʼ 30 da irim naruŋgan Nahor. 23 Nahor waʼa sib, da Seruk itip impa udzuf 200, da irim narun rusan marub da finam fain. 24 Nahor udzufan iwaʼ 29 da irim naruŋgan Tera. 25 Tera waʼa sib, da Nahor itip impa udzuf 119, da irim narun rusan marub da finam fain. 26 Tera udzufan iwaʼ 70 da irim naruŋgan Abram da Nahor da Haran.
Tera Yaŋiŋgan Nangan Ragidan
27-29 Nan ani intuaŋ Tera utupan nangan. Tera isu Abram da Nahor da Haran ramaŋgan. Da Haran irim naruŋgan marub Lot da narun rusan finam iruʼ, Milka da Iska. Gubuʼ Tera ruŋʼ mpadan da naruŋgan Haran imamp imiŋʼ Ur, gan gampan wain miŋʼa Kaldia ugu. Nahor iyu Haran naruŋgan finam Milka isu i gan finiŋgan, da Abram iyu Sarai. 30 Da Sarai igi sagat yami da warim narun u. 31 Tera iyu naruŋgan Abram da rumpuŋgan Lot, Haran naruŋgan, da buŋgan Sarai, Abram finiŋgan, da itaŋin gamp Ur miŋʼa Kaldia rai da intsuŋʼ i fada Kanan. Da bitsintaʼ gubuʼ ribaraŋan yuŋa fawaʼa Haran da ribaraŋan impai nigi. 32 Tera impa udzufan iwaʼ 205 da araŋan imamp imiŋʼ Haran.
Yawe Inuʼ Abram i Atsuŋʼa Araŋan
1 Yawe ini da Abram ibiani, “Wataŋin gam intapam, da ribam, da ramaŋgam utupan rai, da wauriʼ wafa intap dzi nida santiŋʼa agu gin. 2 “Dzi buŋʼ afinti agu da nanaŋ u yaŋiŋgam nawaʼ nasu utup tsiraʼ maŋan. Dzi buŋʼ anaŋ u biŋaŋgam nasu tsiraʼ, da agu buŋʼ asu sanab i mara-ampi. 3 Dzi buŋʼ afinti garam uda agu yaban, da bida maŋa pupuarapan da agu da dzi buŋʼ arim barabin maisan i muŋaʼ gan rutin. Da miŋʼa agu da dzi buŋʼ afinti garam intap utup utup santan.” 4-5 Abram udzufan waʼa 75 sib da itaŋin gamp Haran rai isaŋʼ Yawe nangan nida rutin ugu. Da iyu finiŋgan Sarai da raiŋgan Haran naruŋgan Lot da nam bunumpan da garam guman santan uda miŋʼa Haran ugu, da irut impruʼ ruan ifa intap Kanan. Gubuʼ ribaraŋan waʼa intap Kanan sib, 6 da Abram iyuŋ itsuar intap igi ifan isaŋʼ waʼa gai tsiraʼ miŋʼa mumai mararam biŋaŋgan More miŋʼa gamp Sekem. Da miŋʼa gubuʼ arigi da garam Kanan mpada intap igi ruŋʼ impai, 7 da bitsintaʼ Yawe iwaʼ da Abram da ini da araŋan ibiani, “Dzi buŋʼ arim intap aruani da u yaŋiŋgam.” Ibinigi da Abram yantuŋʼ tauf isu mumai mararam tsarada nam da Yawe gin, i miŋʼa nigi da Yawe iwaʼ da araŋan. 8 Raiyi da Abram itip intsuŋʼ ifa mamai fain miŋʼa gubuʼ yaban miŋʼa Betel da yari uŋar apu rinigaŋan i nigi imiŋʼ wasaʼ i gamp Betel da Ai. Gamp Betel imiŋʼ gubuʼ ruʼan da Ai imiŋʼ gubuʼ yaban. Da miŋʼa nigi da araŋan itip yantuŋʼ tauf isu mumai mararam tsarada nam in da iyugin da nifun itsaf Yawe. 9 Impa nigi raiyi da itip yuriʼ impa wasaʼ wasaʼ ifan isaŋʼ waʼa intap Negeb, miŋʼa bida fiʼ.
Abram Intsuŋʼ Ifa Idzip
10 Raiyi da gubuʼ fus tsiraʼ nam gadan mariŋʼa sib iwaʼ imiŋʼ Kanan. Ibinigi da Abram yuriʼ da itip intsuŋʼ ifa intap Idzip i mpadan nigi pas aŋu. 11 Naŋa i ataŋʼa intap Idzip da araŋan ini da finiŋgan Sarai ibiani, “Wariŋantin! U sagat mara rifirif biŋan iyus. 12 Da bida gubuʼ agi ataŋʼa gamp Idzip da garam Idzip tsaŋanda agu da buŋʼ ayafi un i agu, da buŋʼ ani nabiani, ‘Araŋan finiŋgan igi,’ da buŋʼ ais dzi maragab funub da nagantsi agu. 13 Ibinigi da wani nabiani, ‘Dzi nafuŋgaŋʼ igi,’ da ribaraŋan wasaŋʼ isa dzi funub u; i agu aŋu da buŋʼ agantsi dzi da dzi buŋʼ ampa bini.” 14 Gubuʼ Abram waʼa gamp Idzip da garam Idzip itsaŋa Sarai sagat mara rifirif bini biŋan. 15 Da garam gifa gum tsiraʼ miŋʼa kiŋ maraŋgan itsaŋa Sarai da itsauʼ i araŋan da kiŋ, ibinigi da kiŋ ini da ribaraŋan ifa yu Sarai iba taŋin i kiŋ uŋaran i suda i finiŋgan maŋan. 16 Kiŋ imagaŋʼ Abram bini iyab i Sarai da irim nam ntsuman bida ani: dumpa da nuniŋ da makau da doŋki da kamir impruʼ da garam gum da sagat gum. 17 Da bitsintaʼ Yawe itaŋin nam rinin giŋʼan mara maran maisan iwaʼ da kiŋ da gan utupan da rib santan mpada i gan uŋaran, i wain iyu Abram finiŋgan sinuŋʼ. 18 Ibinigi da kiŋ yaga Abram iba munti i maraŋgan da ini, “Ibianuŋʼ da u iyuʼ dzi? U saŋʼ nida nan wasi da dzi i u finiŋgam Sarai, ma? 19 Wain idzuwai da u ni araŋan u nafuŋgam da dzi yu araŋan isu dzi finiŋgaŋʼ? U finiŋgam aruani! Wau ya warut wafan!” 20 Kiŋ yaga gan garaman i wata Abram rai mpruʼan da finiŋgan da naŋgan santan aŋu da taŋinda Idzip da tipa fada gan arun.
Abram da Lot Itaŋin Ruan Rai
1 Ibinigi da Abram irut finiŋgan da naruŋgan Lot itumuaŋʼ naŋgan santan udan da mpada tayaŋʼ gin miŋʼa Idzip da itip ifa Negeb. 2-4 Araŋan itaŋin gamp Negeb da intsuŋʼ igiŋʼ wasaʼ wasaʼ iba isaŋʼ batipa waʼa mumai miŋʼa wasaʼ i gamp Betel da Ai, mumai araŋan mpada gin da antuŋʼa tauf suda mumai mararam tsarada nam in ugu. Miŋʼan nigi da araŋan iyugin da nifun itsaf Yawe. Abram isu garam nam bunump tsiraʼ i apu mpada tayaŋʼ gin, impruʼ da silva da gol. 5 Da Lot, aru Abram ruta mpruʼa ruan badan ugu, ibinigi isaŋʼ ruan i apu mpada tayaŋʼ gin bida nuniŋ da dumpa da makau impruʼ da garam da sagat gum. 6 Abram da Lot isaŋʼ ruan i apu ampibiŋan aŋu da intap sai wasaŋʼ i rima rib iruʼ igi apu gan sib i bida rumpruʼa ruan mpadan u. 7 Ibinigi da ufuai imunti wasaʼ i Lot da Abram garam guman mpada tayaŋʼ i ribaraŋan apu gan. Da gubuʼ arigi da garam gamp Kanan da Peris ruŋʼ impai imiŋʼ intap igi. 8 Ibinigi da Abram ini da Lot, “Agi biʼ bitsintaʼ! Da agi anuŋʼ suda ufuai da ruaŋʼ ma ufuai anuŋʼ uriʼa wasaʼ i agu da dzi ma agi garam gumaŋʼ u. 9 Watsaŋan! Intap ani tsiraʼ biŋan imiŋʼ utaʼ aŋu, da agi buŋʼ ataŋin ruŋgaŋʼ rai. Ibinigi da wapiriaŋʼ nasaŋʼ maraŋgam aridan. Bida u nida fada bida baŋi yas, da dzi buŋʼ afa nabi baŋi bini, da bida u nida fada bida baŋi bini, da dzi buŋʼ afa nabi baŋi yas.” 10 Ibinigi da Lot iraʼ i maran da irarab ifan da itsaŋan intap bump Jordan da nam sib aŋu miŋʼa fadan da waʼa gamp Tsoar. Intap igi da mpui irunt wasaʼ gin da nam santan maran iraŋaraŋ ibi Yawe guman Iden ugu da isaŋʼ intap Idzip miŋʼa uts da mpui Nail. (I gubuʼ arigi da Yawe wawarip itias gamp Sodom da Gomora rai u.) 11 Ibinigi da Lot ruŋgan ipiriaŋʼ intap bump santan miŋʼa Jordan miŋʼa gubuʼ yaban da iyu naŋgan santan da irut utupan da gan garam guman da itaŋin Abram rai da ifan. 12 Da Abram ruŋʼ impai imiŋʼ intap Kanan, da Lot ifa mpa wasaʼ wasaʼ i gamp fain miŋʼa bump Jordan, raiyi da ifamus arida uŋar apu rinigaŋan uts da gamp Sodom. 13 Da garam Sodom irim barun nidzun aŋu da Yawe da inaŋ nam maisan tsiraʼ tsiraʼ ampibiŋan iyus. 14 Gubuʼ Lot fada sib da Yawe ini da Abram ibiani, “Wataniŋʼ taniŋʼ da wararab nam santan miŋʼa gubuʼ yaban da gubuʼ ruʼan da dzraʼ da fiʼ. 15 Intap santan aru u tsaŋandan ani, dzi buŋʼ arim da agu da u yaŋin rusam nantiŋ aŋu. 16 Da dzi buŋʼ anaŋ u yaŋiŋgam nawaʼ nasisuŋʼ nasaŋʼ intap sasanuai, da bida maŋa saŋʼa i farisa sasanuai ida nafaris u yaŋin rusam nabinigi. 17 Wafan da wayuŋ watsuwar intap ani santan, i dzi buŋʼ arim da agu.” 18 Ibinigi da Abram itawaʼ uŋaran apu rinigaŋan da intsuŋʼ ifan da impa uts aŋu da Mamri gai tsiraʼ tsiraʼ gan miŋʼa gamp Hibron. Da araŋan yantuŋʼ tauf tsarada nam da Yawe gin.
Abram Iyu Naruŋgan Lot Sinuŋʼ Garam Ipiap Baŋiŋgan
1 Miŋʼa gubuʼ arigi da kiŋ nampaŋ 4, Amrafel miŋʼa Sinar, Ariok miŋʼa Elasar, Kedoraumer miŋʼa Elam, da Tidal miŋʼa Goim, yataŋʼ i ruan 2 da impruʼ ruan ifan i isa nam mpruʼan da kiŋ gamp isiʼ isiʼ 5 bida ani: Bera miŋʼa Sodom, Birsa miŋʼa Gomora, Sinab miŋʼa Adma, Simeber miŋʼa Tseboim, da kiŋ miŋʼa gamp Bela (gamp Bela igi biŋaŋgan maŋan Tsoar). 3-4 I wain ibiani: kiŋ gamp isiʼ isiʼ 5 igi impa waraŋʼ i Kiŋ Kedoraumer isaŋʼ udzuf 12, da bitsintaʼ bawaʼa udzuf 13 da intap ruan sinuŋʼ araŋan da ifa mpruʼ ruan imiŋʼ Bump Sidim (aru uruts Sur miŋʼa gin da aruani). 5 Da waʼa udzuf 14, Kiŋ Kedoraumer irut kiŋ iruʼ da bits ugu impruʼ da gan garaman siŋa-ari impruʼ ruan ifan da yis garam Refa mpada Astirot Karnaim, garam Tsuts mpada Ham da garam Em mpada Bump Kiriataim, 6 da garam Hur mpada mamai Seir, da idaru ribaraŋan ifan isaŋʼ waʼa El Paran miŋʼa uts da nam dadauntan. 7 Kiŋ Kedoraumer ruta kiŋ fain ugu itip yitam i ruan da ifa gamp En Mispat (nida Kades gin) da yis garam mpada intap Amalek sib impruʼ da garam Amor mpada Hatsatson Tamar. 8 Miŋʼa gubuʼ arigi da kiŋ miŋʼa gamp 5 ugu, Sodom, Gomora, Adma, Tseboim da Bela iyu garaman siŋa-ari santan impruʼ ruan ifan da irants ruan imunti muŋʼ i isa nam miŋʼa Bump Sidim. 9 Ribaraŋan irut kiŋ nampaŋ 4 ugu, Kedoraumer, Tidal, Amrafel, da Ariok, yis ruan. 10 Da miŋʼa Bump Sidim da ntsuf ampibiŋan uda kolta gin imiŋʼ gin. Da gubuʼ ribaraŋan isa ruan da kiŋ Sodom da Gomora irut garaman irunt sinuŋʼ nam isan da gan garaman fain iruaʼ iruʼ ntsuf da santan irunt sib iyab mamai. 11 Da kiŋ 4 igi iyu garam Sodom da Gomora fain impruʼ da nam bunumpan da naŋgan gadan santan da ifan. 12 Da gubuʼ arigi da Lot impa Sodom da ribaraŋan iyu araŋan impruʼ da nam bunumpan santan ibinigi. 13 Da Abram impai uts da Mamri gai gan tsiraʼ tsiraʼ ugu. Mamri igi garam Amur, Eskol da Anir raiŋgan. Rib iruʼ da bits igi yudzu nan maŋan impruʼ da Abram i rima ruan sib. Da garam bits runta sinuŋʼ adziaŋ igi ibawaʼ da Abram, garam Hibru, da ini rutin i kiŋ 4 ugu idaru garam Sodom da Gomora rai sib da iyu Lot da ifan. 14 Gubuʼ Abram uda nan i garam ipiap mpuŋa Lot da uda fada sib, da inuʼ gan garaman siŋa-ari 318 waʼa miŋʼa araŋan garam guman ruta mpadan ugu impruʼ. Da imuŋʼ i ribaraŋan ifan da idaru garam ipiap ifan isaŋʼ waʼa gamp Dan. 15 Da idziaŋ arigi, Abram irants gan garaman siŋaari imunti utup utup da ibraŋ garam ipiap ruta nam runta fafun da idaru yis ribigi titaʼ aŋu ifa isaŋʼ waʼa Hoba, miŋʼa dzraʼ i gamp Damaskus. 16 Abram itip iyu nam bunump garam ipiap udan ugu impruʼ da raiŋgan naruŋgan Lot da gan nam bunumpan impruʼ da sagat da garam fain itip iba.
Melkisedek Ifinti Abram
17 Gubuʼ Abram isa Kiŋ Kedoraumer da kiŋ fain ugu da gan garaman siŋa-ari sib da tipa badan, da kiŋ Sodom iba i tsaŋanda araŋan miŋʼa Bump Sawe (nida Kiŋ Intap Bumpan). 18 Miŋʼan nigi Melkisedek, kiŋ Salem, iyu bret da wain gurun iba i tsaŋanda Abram. Araŋan isu Anutu Garam Nampaŋ Wain Waguŋʼ garam pumuʼan gan. 19 Melkisedek ifinti Abram da ini ibiani, “Anutu Garam Nampaŋ Wain Waguŋʼ taŋinda gunuŋun da intap nafinti agu. 20 Da agi natsarif Anutu Garam Nampaŋ Wain Waguŋʼ aru rima agu sib i u yaba ragun i garam ipiap.” Da Abram ibraŋ nam santan uda miŋʼa nam isan ugu da ifab isaŋʼ 10 da irim 10 igi gan bits ifan da Melkisedek. 21 Ntsupa sib da kiŋ Sodom ini da Abram ibiani, “Nam santan u udan ugu da nasu u gam, da bitsintaʼ dzi ampaŋgaŋʼ aŋu da wataŋin naba da dzi.” 22 Da bitsintaʼ Abram ini da kiŋ Sodom ibiani, “Dzi tsaf ruaŋʼ da dzi ni nan nidzun imiŋʼ Yawe, Anutu Garam Nampaŋ Wain Waguŋʼ taŋinda gunuŋun da intap maraŋgan, 23 i dzi wasaŋʼ uda u naŋgam maŋan, bida fufuai udzuda fagagaŋkaŋ gin ma nam isiʼ maŋan u, imaʼ. Wain ibiani, u mani u naŋa dzi Abram suda garam nam bunump tsiraʼ i. 24 Dzi wasaŋʼ uda nam maŋan u, da bitsintaʼ nam gadan aru dzi garamaŋʼ gadan ugu aŋu, nigi isu dzi gaŋʼ. Da wanaŋ da garam rima dzi sib, Anir, Eskol, da Mamri nayu nam bunump igi nasaŋʼ ruan.”
Yawe Inaŋ Naŋgan Utusa i Ruan Gin da Abram
1 Gubuʼ nam igi ntsupa sib raiyi da Yawe ini nan da Abram i nam puafuban ibiani, “Abram, agu anuŋʼ ratan u. Dzi su u ŋantsam da u naŋgam bini santan waiŋgan.” 2 Da bitsintaʼ Abram ini binaʼ, “O dzi Nifutsarifaŋʼ Yawe, u naŋgam bini u nida rima da dzi igi burima dzi sib bida anuŋʼ i dzi garam yami biŋan ani? Da dzi garam gumaŋʼ Elieser, garam Damaskus ugu, buŋʼ asu wain i dzi nam bunumpaŋʼ santan da gubuʼ dzi mampan. 3 I Agu anuŋʼ irim mamaʼ narun bits da dzi u, ibinigi da dzi garam gumaŋʼ maŋan buŋʼ asu wain i dzi naŋgaŋʼ santan.” 4 Da Yawe nangan itip iba rutin ibiani, “Garam gum arigi wasaŋʼ suda wain i u nam bunumpam u; u biʼgam rururuŋan aŋu buŋʼ asu wain i u naŋgam santan.” 5 Da Yawe iyu Abram iwaʼ ifa manaʼ da ini rutin, “Wadantaŋʼ wayab gunuŋun da wafaris ŋantam santan aga, bida u saŋʼa i farisa sib aŋu fantsupan. Wariŋantin! U yaŋiŋgam buŋʼ awaʼ nabinigi.” 6 Abram irim ruŋgan santan da Yawe nangan nidan i buŋʼ awaʼ nasu nidzun, ibinigi da Yawe ifariŋʼ araŋan garam rururuŋan. 7 Yawe itip ini da araŋan ibiani, “Dzi Yawe, Dzi aruani iyu agu sinuŋʼ gamp Ur miŋʼa Kaldia ugu iba ani i rima intap ani da agu i suda u naŋgam rururuŋan.” 8 Da bitsintaʼ Abram ini, “O dzi Nifutsarifaŋʼ Yawe, dzi bu sruʼagin bida anuŋʼ i dzi suda wain gin?” 9 Ibinigi da Yawe ini da Abram, “Wayu apu bida ani: makau rinan naru faʼ maŋan da nuniŋ rinan maŋan da dumpa arapuʼ maŋan, udzufan suda iruʼ da bits, nampruʼ da ŋasabusir da ŋarumum naru faʼ maŋan--naba da dzi.” 10 Abram iyu apu ibi Yawe nidan igi iba da Araŋan, da idumpu wasaʼ farab ifa muŋaʼ da muŋaʼ da irants i marafain da marafain. Da apu dzuf iruʼ igi isintuŋʼ santan aŋu. 11 Da watsawits idzuf iruʼ i gadan da Abram idaru rai gin. 12 Gubuʼ inaŋ i ruʼan da Anutu inaŋ da Abram igiŋʼ marampruʼ funub da itsaŋan nam mimin triŋtriŋan tsiraʼ biŋan ibuafir araŋan sib da irat funub aŋu. 13 Da Yawe ini da araŋan imiŋʼ nam puafuban ibiani, “Wariŋantin! U yaŋin rusam buŋʼ ampa nabi garam marawampua namiŋʼ garam gamp maŋan intapan. Da garam intap igi buŋʼ arasu da nanaŋ i naŋgan mpadan namais, da nabuariŋʼ gum barabin tsiraʼ nasaŋʼ udzuf 400. 14 Da bitsintaʼ dzi buŋʼ arim barabin tsiraʼ muŋaʼ da garam intap igi naŋa yaba i u yaŋin rusam. Da u yaŋin rusam taŋinda intap igi rai da buŋʼ aba nantiŋ da nam bunump tsiraʼ. 15 Da bitsintaʼ Abram, u buŋʼ ampa gubuʼ guntiʼ biŋan ruta nan nufan bini nasaŋʼ agu fufida funub da wamus mampan da narim agu. 16 Da udzuf 400 ba ntsupa sib da u yaŋin rusam buŋʼ atip abau intap ani, da gubuʼ bampan aga garam Amor naŋgan maisan bawaʼa ampapan da Dzi buŋʼ asiat ribaraŋan rai.” 17 Da gubuʼ ruʼa sib da nam mimin triŋtriŋan da gur maŋan dugunt waʼa gin impruʼ da dzaf bururuŋan iwaʼ da iyuŋ wasaʼ i apu Abram safan ugu. 18 Da gubuʼ arigi, Yawe inaŋ nan utusa i ruan gin da Abram da ini, “Dzi taŋin intap ani da u yaŋin rusam, da ampapan imiŋʼ mpui Idzip da ifawaʼ mpui tsiraʼ Yufretis-- 19 intap garam Ken da Kenis, Kadmun, 20 Hit, Peris, Refa, 21 Amor, Kanan, Girgas da Jebus gin isu ribaraŋan naŋgan.”
Hagar Irim Ismail
1-3 Gubuʼ aru Abram mpada Kanan saŋʼa udzuf 10 sib da araŋan finiŋgan Sarai warim narun maŋan u. Ibinigi da Sarai ini da Abram ibiani, “Yawe yudzu dzi waŋuŋgaŋʼ sib da dzi warim naruŋʼ maŋan u. Da dzi rim Hagar, sagat Idzip dzi sagat gumaŋʼ ugu, da agu i u ruta giŋʼan. Da bida araŋan rima narun rusan da nigi buŋʼ autus i ruan i dzi biŋaŋgaŋʼ.” Ibinigi da Abram iriŋant i finiŋgan nangan da iyu Hagar isu i finiŋgan 4 da irut igiŋʼ da araŋan iwaŋun. Da gubuʼ Hagar sruʼagin bida araŋan waŋundan, da itsarif ruŋgan iyus da sagat gudzuŋgan Sarai. 5 Da Sarai ini da Abram ibiani, “Barabin waʼan da dzi isu u asubam. Hai, dzi ruŋgaŋʼ irim sagat gumaŋʼ igi da agu. Da bitsintaʼ aruani da araŋan isruʼgin ibi araŋan iwaŋun sib da imus itsarif ruŋgan da dzi. Yawe nararu maŋan i asub igi, dzi ma agu.” 6 Da Abram ini, “Ŋarubini biŋan! Da bitsintaʼ wariŋantin, nigi u sagat gumam rururuŋan da imiŋʼ da agu. U su wain gin. Nam u tsaŋanda bida dauman saŋʼa u maraŋgam aridan, wanaŋ da araŋan.” Ibinigi da Sarai inaŋ Hagar naŋgan mpadan imais wasi, da araŋan irunt sinuŋʼ Sarai. 7 Da Yawe aŋira gan iwaʼ da Hagar imiŋʼ mpui maran miŋʼa nam manaʼ dadauntan sanab fada Sur. 8 Da ini, “Hagar, Sarai sagat guman, u miŋʼ anuŋʼ iba, da u ni fada bida anuŋʼ?” Da araŋan ini aŋira nangan muŋaʼ ibiani, “Dzi runt sinuŋʼ sagat gudzuŋgaŋʼ Sarai.” 9 Da aŋira ini, “Watip wafan da rinuŋgam Sarai da wataŋʼ waraŋʼ i araŋan nangan santan nidan. 10 Dzi buŋʼ anaŋ u yaŋiŋgam nawaʼ nasisuŋʼ nayus da wasaŋʼ i farisa sib u.” 11 Da itip ini, “Wariŋantin! U waŋun sib da u buŋʼ arim narun marub. Da wafariŋʼ araŋan biŋaŋgan Ismail, i wain ibiani, Yawe iriŋant i u waŋu barabin gam sib. 12 Da u naruŋgam igi buŋʼ ampa nabi doŋki buman maŋan, da wasaŋʼ ataŋʼa waraŋʼ i garam maŋan u. Araŋa buŋʼ ais garam santan, da garam santan buŋʼ ais araŋan nabinigi. Da wasaŋʼ i ruta rain rusan mpada bini u.” 13 Hagar ini da ruŋgan, “Ai! Dzi matsaŋa Anutu Aru Tsaŋanda Dzi sib ugu da dzi rumpa marataʼ?” Ibinigi da irim biŋan da Yawe aru nida nan da araŋan ibiani, “Agu Anutu Aru Tsaŋanda Dzi.” 14 I wain igi da ifariŋʼ mpui maran igi biŋaŋgan Bir-Lahai-Roi, waiŋgan ibiani ‘Mpui Anutu Marantaʼan Tsaŋanda Dzi’. Mpui maran igi rumiŋʼ wasaʼ i gamp Kades da Beret. 15 Impai raiyi da Hagar irim Abram naruŋgan marub, da Abram ifariŋʼ i biŋaŋgan Ismail. 16 Iwaʼ gubuʼ arunigi da Abram udzufan isaŋʼ 86.
Naŋa Nan Utusa i Ruan Suda Nidzun
1 Gubuʼ Abram udzufan waʼa 99 sib, da Yawe iwaʼ da araŋan da ini da araŋan ini binaʼ, “Dzi Anutu Garam Nampaŋ Wain. Wataŋʼ waraŋʼ i dzi nidzun aŋu da wayuŋ sanab rururuŋan namiŋʼ dzi maraŋgaŋʼ. 2 Dzi buŋʼ audzu nangaŋʼ utusa i ruan gin namiŋʼ wasaʼ i dzi da agu da nautus u yaŋiŋgam nawaʼ nasisuŋʼ.” 3 Abram iriŋant i Anutu nangan igi da yidzaʼ faga gudzun da itauf maran iruʼ intap, da Anutu ini da araŋan ibiani, 4 “Dzi Anutu nangaŋʼ udzudan mpruʼan da agu ibiani, u buŋʼ asu garam wain wain ampibiŋan tafaŋgan. 5 Da u biŋangam wasaŋʼ i ruŋʼ fariŋʼa bida Abram u (ibi ‘raman da biŋan tsiraʼ), imaʼ. Da buŋʼ afariŋʼ nabi Abraham (ibi ‘ampibiŋan ramaŋgan’), i dzi rim agu isu garam wain wain ampibiŋan tafaŋgan. 6 Dzi buŋʼ autus u yaŋiŋgam nawaʼ nasisuŋ nasu utup ampibiŋan da utup kiŋ buŋʼ awaʼ namiŋʼ agu gin nabinigi. 7 Dzi buŋʼ ataŋin nangaŋʼ utusa i ruan miŋʼa ntiŋan namunti wasaʼ i dzi da agu da gam yaŋin rusam taptap. Da dzi buŋʼ asu agu da gam yaŋin rusam Anutu gan. 8 Intap Kanan santan aru agu mpada gin suda marawampua ani da dzi buŋʼ ataŋin nasu agu da tafam rusam gan nantiŋ, da dzi buŋʼ asu ribaraŋan Anutu gan.” Sanab Safa Rini Ubit Isu Nan Utusa i Ruan Gin Maraŋgan 9 Da Anutu ini da Abraham ibiani, “Agu wampa tayaŋʼ dzi nangaŋʼ utusa i ruan gin, agu da yaŋin rusam taptap nabinigi. 10-11 Da nan utusa i ruan gin igi sanaban ibiani: Agu da garam sib aŋu ruta agu mpadan nasaf riniubit, da nasu bir i santiŋʼa nan utusa i ruan gin namiŋʼ wasaʼ i dzi da agu. 12-13 Aruani da fada saŋʼa u yaŋiŋgam taptap, mamaʼ marub sib aŋu gubuʼ gan suda 8 sib, da nasaf i riniubit. Agu da narum rusam da sagat gum narun rusan da garam gum u uda miŋʼa rib fain da rima nam ntsuman gin sib aŋu nasaf riniubit nasu bir namiŋʼ nantiŋ. 14 Bida garam maŋan mamida safa riniubit da araŋan yis dzi nangaŋʼ utusa i ruan gin udziʼ da gan garaman nasiat araŋan rai.” 15 Da Anutu itip ini da Abraham ibiani, “Anuŋʼ ruŋʼ fariŋʼa finiŋgam biŋaŋgan Sarai u. Imaʼ. Aruani da wafariŋʼ araŋan biŋaŋgan Sara. 16 Dzi buŋʼ afinti araŋan da buŋʼ arim u naruŋgam marub. Hai, dzi buŋʼ afinti araŋan da buŋʼ asu garam wain wain rinaŋgan, da garam wain wain kiŋ gan buŋʼ awaʼ namiŋʼ araŋan gin.” 17 Abraham itauf maran iruʼ intap da irubuŋʼ da ini i uŋgan aŋu, “Mai! Isaŋʼ garam fufi udzufan waʼa 100 sib rima narun? Da isaŋʼ Sara rima mamaʼ narun da gan udzufan saŋʼa 90?” 18 Da Abraham ini da Anutu ini binaʼ, “O Anutu Yawe, dzi maraŋʼ ifur i Ismail i suda wain i u nangam ragadan da fintidan igi.” 19 Da bitsintaʼ Anutu ini binaʼ, “Imaʼ. U finiŋgam Sara buŋʼ arim agu naruŋgam marub, da u buŋʼ afariŋʼ araŋan biŋaŋgan Isak (waiŋgan ‘irubuŋʼ’). Dzi buŋʼ autus i nangaŋʼ utusa i ruan gin nampruʼ da araŋan da gan yaŋiŋgan taptap da buŋʼ amiŋʼ ratar nantiŋ aŋu. 20 Da miŋʼa Ismail da dzi riŋant i u nangam nidan sib, da nan nidzun, dzi buŋʼ afinti araŋan da narim mamaʼ narun ampibiŋan da araŋan, gan tafan rusan buŋʼ awaʼ nayus aŋu. Da araŋan buŋʼ asu raman i garam gudzun 12 da dzi buŋʼ anaŋ araŋan utupan nawaʼ garam utup tsiraʼ biŋan. 21 Da bitsintaʼ dzi buŋʼ autus i nangaŋʼ utusa i ruan gin da Isak, mamaʼ narun Sara buŋʼ arim da gubuʼ bida aruani da udzuf maŋan aga.” 22 Gubuʼ Anutu ntsupa nangan nidan da Abraham, da itaŋin araŋan rai da ifan. 23-27 Miŋʼa gubuʼ arigi, da Abraham iyu naruŋgan Ismail impruʼ da gan garam guman da mamaʼ marub santan ruta araŋan mpadan--rib apiŋʼa miŋʼa araŋan utupan da rib rima nam ntsuman gin--da isaf ribaraŋan riniubit ibi Anutu nidan da araŋan ugu. Da isaf Abraham impruʼ ibinigi. Gubuʼ arigi da Abraham udzufan isaŋʼ 99, da naruŋgan Ismail gan isaŋʼ 13.
Garam Iruʼ da Bits Iyuŋ Ampi da Abraham
1 Gubuʼ maŋan da Abraham impa uŋaran apu rinigaŋan muantsi maraŋgan imiŋʼ gai tsiraʼ tsiraʼ miŋʼa Mamri gin da gubuʼ wasaʼ da Yawe iwaʼ da araŋan. 2 Abraham iraʼ i maran da irunt 18 fafun i tsaŋanda garam iruʼ da bits bamuntidan. Da gubuʼ tsaŋanda ribaraŋan da araŋan iraʼ i ruan suŋ aŋu da irunt ifa rutin da yidzaʼ fagan da itatapuaŋʼ iruʼ ribaraŋan maraŋgan. 3 Da Abraham ini, “O dzi nifutsarifaŋʼ! Dzi su u mamaʼ gumam, da dzi maraŋʼ yari iyus i agam bada dzi uŋaraŋʼ. 4 Wampa asap yauŋ ani da mpui pas naba da agam wadzuʼ fagamin. 5 Agam iba dzi maragab uŋaraŋʼ sib da waga nam isiʼ pas wasuf i, ida wamus yuŋa sanabam.” Da rib iruʼ da bits igi ini binaʼ, “Isaŋʼ. Wanaŋ nabi u nidan.” 6 Ibinigi da Abraham yataŋʼ suŋ aŋu ifa uŋar apu rinigaŋan da Sara da ini da araŋan, “Ariʼ Sara! Suŋ aŋu! Wayu parawaʼ bini 20 kg ugu da wamuat da watai bret fain.” 7 Da araŋan irunt ifa makau gan mpada gin da ipiriaŋʼ makau narun faʼ bini maŋan da ini da mamaʼ guman i isa funub da tipa suŋ aŋu. 8 Gubuʼ nam gadan nuʼa sib da araŋan iyu tsis da makau sisu gurun da makau tipan ugu iba, da irim da garam igi igan, da Abraham impa tayaŋʼ ribaraŋan imiŋʼ yauŋ wasaʼ igi. 9 Tuasaraŋan igut i araŋan, “U finiŋgam Sara impa anuŋʼ?” Da Abraham ini, “Rumpa uŋar wasaʼ.” 10 Da Yawe ini da Abraham, “Waʼa gubuʼ bida aruani da udzuf maŋan aga da dzi nida tipa badan da u finiŋgam Sara buŋʼ apiŋʼ narun marub maŋan sib.” Sara impa imiŋʼ uŋar muantsi nifun miŋʼa garam igi barun da irim riŋan i nan igi. 11 Abraham da Sara ifufi sib da Sara gubuʼ gan rima narun intsup sib. 12 Sara irubuŋʼ da ini imiŋʼ waŋuŋgan ibiani, “Mai, dzi da gabuŋgaŋʼ ifufi sib, da aga riniŋgaŋʼ iraraiʼ wa. Da aga bu waʼa da nam nugun tsiaʼan igi bida anuŋ?” 13 Da Yawe ini da Abraham, “Ibianuŋʼ da Sara irubuŋʼ da ini, ‘Dzi fufi sib da isaŋʼ i dzi rima naruŋʼ?’ 14 Nam maŋan wabarabin da Dzi, Yawe, i naŋan u. Imaʼ. Da wariŋantin. Dzi buŋʼ aba da gubuʼ aru Dzi nidan da agu da aruani da udzuf maŋan aga da Sara buŋʼ arim narun marub maŋan sib.” 15 Da Sara irat da ituŋ i ruan da ini, “Dzi warubuŋʼ u.” Da bitsintaʼ Yawe ini, “Imaʼ. U rubuŋʼ.”
Abraham Igampun Ruŋgan Tsiraʼ Aŋu da Yawe i Gamp Sodom
16 Da gubuʼ ribaraŋan uriʼa i fadan da Abraham iyu ifan i taŋinda i sanab, da ifa munti da itsaŋan Sodom iruʼ. 17 Miŋʼan nigi da Yawe ini i uŋgan ini binaʼ, “Dzi nani sisiŋʼ i nam Dzi nida naŋan ani wasi da Abraham, ma? 18 Abraham tafan rusan buŋʼ awaʼ nasu garam utup tsiraʼ maŋan ruta nampaŋ, da miŋʼa Abraham da Dzi buŋʼ afinti garam intap wain wain sib aŋu. 19 I dzi piriaŋʼ araŋan sib i santiŋʼa Dzi sanabaŋʼ da narun rusan da tafan rusan waʼa bampan i atsuŋʼa gin da naŋa Dzi sanabaŋʼ dauman da rururuŋan aŋu. Da Dzi buŋʼ anaŋ nam santan dzi ragada araŋan gin ugu nasu nidzun.” 20 Ida Yawe ini da Abraham ini binaʼ, “Dzi riŋant i nam raŋan tsiraʼ ampibiŋan i raruda garam Sodom da Gomora i uwayant maisan ampibiŋan miŋʼa gamp igi. 21 Ibinigi da Dzi buŋʼ aruʼ da natsaŋan i maraŋgaŋʼ i nam raŋan Dzi riŋantagin ani. Da Dzi buŋʼ atsaŋan da nasruʼgin.” 22 Da garam iruʼ igi itaŋin Abraham rai da iyuŋ ifa i waʼa gamp Sodom, da bitsintaʼ Yawe rurut Abraham imunti. 23 Da Abraham iba su uts da Yawe da igutin ini binaʼ, “Nan nidzun? U buŋʼ asiat garam rururuŋan nampruʼ da garam maisan, ma? 24 Bida anuŋʼ i bida garam rururuŋan 50 mpada wasaʼ i gamp igi, U buŋʼ asiat garam rururuŋan 50 igi nampruʼ da garam maisan rai, ma isaŋʼ U gantsida gamp igi i garam rururuŋan 50? 25 U Garam atsuŋʼa sanampun rururuŋan aŋu i raruda garam intap santan. Da anuŋʼ isaŋʼ u, i U siata garam rururuŋan mpruʼa da garam maisan saŋʼa ruan aŋu, yaba i garam naŋa asub naŋgan. Imaʼ!” 26 Da Yawe ini Abraham nangan muŋaʼ ibiani, “Bida Dzi tsaŋanda garam rururuŋan 50 mpada gamp Sodom da Dzi buŋʼ agantsi gamp i ribigi biŋaŋgan.” 27 Da Abraham iraʼ i nifun da itip ini da Yawe, “O Nifutsarif, wasiat dzi asubaŋʼ nida nan babampaf da Agu. Dzi nam utaʼ santan ibi ŋaruntsuaf da pap. 28 Da bitsintaʼ bida anuŋʼ i garam rururuŋan 50 maʼan da 45 aŋu mpada gamp igi, da U buŋʼ asiat sib aŋu rai i garam 5 maʼan igi?” Da Yawe ini, “Bida Dzi tsaŋanda garam rururuŋan 45 mpadan, da Dzi wasaŋʼ i siata gamp igi rai u.” 29 Abraham itip igut i Yawe ini binaʼ, “Da bida U tsaŋanda garam rururuŋan 40 aŋu mpadan nigi, da U buŋʼ asiat gamp igi rai, ma?” Da Yawe itip ini, “Bida Dzi tsaŋanda garam rururuŋan 40 mpadan, da Dzi wasaŋʼ i siata gamp igi rai u.” 30 Da Abraham itip ini, “O Nifutsarif, nugum anuŋʼ ruaʼa i dzi u, dzi ni ruŋʼ guta i Agu, bida anuŋʼ i garam rururuŋan 30 aŋu mpadan, U buŋʼ asiat rai, ma?” Da Yawe ini, “Dzi wasaŋʼ i siatan bida garam rururuŋan 30 aŋu mpadan.” 31 Da Abraham itip ini, “Nifutsarif, wasiat dzi nangaŋʼ ru rima udzuŋʼ da Agu gin ani. Bida garam rururuŋan 20 aŋu mpadan, da U buŋʼ anaŋ nabianuŋʼ gin?” Da Yawe ini, “Dzi wasaŋʼ i siatan rai bida Dzi tsaŋanda garam rururuŋan 20 aŋu mpada gamp igi.” 32 Da Abraham itip ini, “Nifutsarif, dzi ni gampun da ruaŋʼ da Agu da nugum anuŋʼ ruaʼa i dzi u. Dzi ni tipa nida nan bits aŋu bida ani, bida U tsaŋanda garam rururuŋan 10 aŋu mpadan, da U buŋʼ anaŋ nabianuŋʼ gin?” Da Yawe ini, “Dzi wasaŋʼ i siata gamp igi rai bida Dzi tsaŋanda garam rururuŋan 10 aŋu mpadan.” 33 Gubuʼ Yawe ruta Abraham nida nan sib, da itaŋin araŋan rai da ifan. Da Abraham itip iba gan gampan.
Yawe Itaŋin Dzaf Tsiraʼ Iruʼ Iga Gamp Sodom da Gomora Sib
1 Da aŋira iruʼ aru ruta Yawe da Abraham badan ugu iwaʼ gamp Sodom da nam biŋibuŋan. Gubuʼ arigi da Lot impai mumai mpruʼa ruan gin miŋʼa gamp igi muantsi gan ataŋʼa gin. Lot iraʼ i maran da itsaŋan aŋira iruʼ igi da yuriʼ ifan da yidzaʼ fagan da itatapuaŋʼ iruʼ rib iruʼ igi maran, 2 da yis yariŋ gin ini binaʼ, “Agam garam tsiraʼ iruʼ igi, waba ani, dzi gaib ruŋgaŋʼ da agam i ataŋʼa ba gam garam gumam dzi uŋaraŋʼ. Da adzuʼa fagam da ruta dzi giŋʼan, da tataʼ maratait da agam wayuŋ sanabam da wafan.” Da bitsintaʼ rib iruʼ igi ini da araŋan ibiani, “Imaʼ. Aga buŋʼ agiŋʼ mumai mpruʼa ruan gin ani.” 3 Da bitsintaʼ Lot irim udzuŋ nidzun da rib iruʼ igi isaŋʼ ruta mpruʼa ruan fada araŋan uŋaran. Araŋan itip nam gadan i rib iruʼ igi, itai bret yis maʼa gin da irim da ribaraŋan igan. 4 Suda uts i giŋʼan da garam rinifaʼ da tsiraʼ sib aŋu miŋʼa gamp Sodom iba munti itsuafiʼ uŋar igi sib. 5 Da inuʼ Lot ini binaʼ, “Lot! Garam iruʼ bada uŋaram da idziaŋ aruani impai anuŋʼ? Wataŋin ribaraŋan nawaʼ ba da aga nararaʼ gin.” 6 Lot itus muantsi da iwaʼ ifan da itsuŋin sib 7 da ini da ribaraŋan santan ibiani, “Raiŋʼ ruas, dzi gaib ruŋgaŋʼ da agam i anuŋʼ naŋa uwayant maisan igi u. 8 Agam itsaŋan. Dzi naruŋʼ rusaŋʼ aruf iruʼ rumpai. Garam maŋan wawaʼ rutin u. Dzi nataŋin nawaʼ ba da agam da wanaŋ wabi agam maram furan. Da agam anuŋʼ naŋa nam maŋan i garam iruʼ ani u, i ribaraŋan isu dzi ampi gaŋʼ da dzi nampa tayaŋʼ gin.” 9 Garam Sodom iriŋant i nan arigi da ini binaʼ, “Wafa manaʼ i agai! Aga tus maraŋʼ i agu garam gamp maŋa arigi da aruani da u ni naŋa ruŋgam bida garam raruda agai i gaŋʼ uwayantaŋʼ. Wafa manaʼ i agai! I aga buŋʼ awaya agu nidzun aŋu nayus rib iruʼ aga.” Ribaraŋan iyut Lot rai da yusu ruan ifa i braŋa muantsi. 10 Da bitsintaʼ garam iruʼ mpada uŋar igi itus muantsi da idzuŋʼ i Lot yataŋʼ uŋar wasaʼ da itsuŋin muantsi sib in. 11 Da inaŋ garam santan rinifaʼ da tsiraʼ muntida muantsi manaʼ igi maran imimin da isau muantsi wasi. 12 Garam iruʼ igi ini da Lot ini binaʼ, “Bida u narum rusam marub da finam ma bum rusam ma ribam fain mpada gamp ani mpruʼan, da wani rutin i ribaraŋan uriʼan da taŋinda gamp ani rai, 13 i aga buŋʼ asiat gamp ani rai, i Yawe iriŋantin nam raŋan ampibiŋan i raruda garam gamp ani i naŋgan maisan da itaŋin agai iba i siata rai.” 14 Ibinigi da Lot ifan da ini da garam iruʼ ragada sib i uda i narun rusan finam iruʼ ugu da ini binaʼ, “Yawe ini siata gamp ani rai, ibinigi da agam wauriʼ da wawaʼ sinuŋʼ gamp ani suŋ.” Da bitsintaʼ bun rusan igi ibuni araŋan nida nan umpurin. 15 Da maratait da aŋira yaga Lot ini ibiani, “Wauriʼ suŋ! Wau finiŋgam da narum rusam finam iruʼ igi da wataŋin gamp ani rai suŋ, i agam buŋʼ antsup nampruʼ da garam gamp ani da gubuʼ Yawe siata rai.” 16 Da bitsintaʼ Lot wasu nugunugun i fadan u, ibinigi da aŋira impuŋ ribaraŋan baŋin da itaraʼ iwaʼ sinuŋʼ gamp igi suŋ, i Yawe maran intuʼ ribaraŋan. 17 Aŋira uda ribaraŋan waʼa sib da gan maŋan ini binaʼ, “Agam wafa suŋ aŋu! Da anuŋʼ tipa taniŋʼan da raraba fada gamp aga u, ma mpada asap maŋan miŋʼa bump ani u. Warunt suŋ aŋu nayab mamai aga i agam mantsup sib nampruʼ i.” 18 Da bitsintaʼ Lot ini binaʼ, “O dzi nifutsarifaŋʼ. Dzi maragab wasaŋʼ naŋa bida u nidan igi u! 19 Agu naŋ nam maran aridan tsiraʼ i rima gam garam gumam dzi sib, da bitsintaʼ dzi wasaŋʼ i fawaʼa suŋ mamai aga u. Bida barabin igi waʼan da buŋʼ asiat dzi rai namiŋʼ sanab. 20 Watsaŋa gamp isiʼ arunaga. Isaŋʼ i dzi runta fada gin i rima ruŋgaŋʼ sib in? Gamp igi isiʼ aŋu da bida u gantsidan da buŋʼ arim dzi maragab sib.” 21 Da aŋira ini, “Isaŋʼ, dzi buŋʼ atus maraŋʼ i agu i u naŋa bidanigi da dzi wasaŋʼ siata gamp u nifum gampan igi u. 22 Ariʼ! Wafa suŋ aŋu, i dzi wasaŋʼ naŋa nam maŋan nasaŋʼ u waʼan nigi.” (Lot ini gamp igi isiʼ aŋu, i wain igi da garam ifariŋʼ gamp igi Tsoar, waiŋgan ibi ‘isiʼ ma ‘nam utaʼ aŋu’.) 23 Gubuʼ Lot waʼa gamp Tsoar da gubuʼ ibarunt iyab. 24-25 Da Yawe taŋin dzaf tauf bururuŋʼan imui iruʼ da iga gamp Sodom da Gomora sib impruʼ da bump igi santan da garam gar da nam ntapan santan. 26 Da Lot finiŋgan atsuŋʼa araŋan itaniŋʼ da imunti isu tauf sur. 27 Tataʼ maratait maŋan da Abraham yuriʼ da itip ifa mumai aru muntidagin da ruta Yawe nida nan da ruan gin ugu. 28 Da irarab iruʼ gamp Sodom da Gomora da bump santan iruʼ da itsaŋa dugunt buariŋʼa ruan saŋʼa dugunt dzaf riman. 29 Gubuʼ Anutu siata gamp santan miŋʼa bump sib da maran rufur Abraham i naŋgan gutagin ugu da irim Lot sib i runta sinuŋʼ gamp igi.
Lot da Narun Rusan
30 Lot irat i mpada Tsoar da iyu narun rusan finam iruʼ ugu da iyab mamai da impa tauf bampun. 31 Gubuʼ maŋan mamaʼ finam miamun igi ini da raiŋgan isiʼ ibiani, “Agi ramaŋgaŋʼ ifufi sib, da garam maŋan wampai imiŋʼ ani i uda agi u bida garam gar sanaban uda ruan, imaʼ. 32 Ibinigi da agi narim wain gurun da ramaŋʼ anum da maran nadidirunt da agi saŋʼ i ruta araŋan giŋʼan da araŋan isaŋʼ i rima mamaʼ narun da agi da agi buŋʼ autus i gaŋʼ yaŋiŋgaŋʼ.” 33 Ibinigi da idziaŋ arigi da ribaraŋan irim wain da raman inum da narun finam miamun yataŋʼ irut igiŋʼ. Wain yis araŋan funub aŋu da araŋan wasruʼ i nam idzuwai araŋan naruŋgan miamun igi naŋa i araŋan u. 34 Pisa maiʼ maŋan da narun finam miamun ini da rain isiʼ igi ibiani, “Idziaŋ ugu da dzi rut ramaŋʼ igiŋʼ sib wa. Idziaŋ aruani da agi natip narim wain da ramaŋʼ nanum da agu saŋʼ i ruta giŋʼan bida dzi naŋan da maiʼ ugu, da agi saŋʼ i utusa gaŋʼ yaŋiŋgaŋʼ.” 35 Ibinigi da ribaraŋan itip irim wain da ramaŋgan inum da idziaŋ arigi da narun finam isiʼ yataŋʼ da irut raman igiŋʼ. Wain yis raman funub aŋu ibi idziaŋ maiʼ maŋan ugu da araŋan wasruʼ i nam idzuwai araŋan naruŋgan finam isiʼ igi naŋa i araŋan u. 36 I sanab narun ruas iruʼ igi naŋan bidanigi, da ribaraŋan iwaŋun i ramaŋgan Lot naruŋgan. 37 Narun finam miamun irim narun marub da ifariŋʼ i biŋaŋgan Moab. Moab isu garam Moab tafaŋgan ruŋ fariŋʼan da gubuʼ aruani. 38 Da narun finam isiʼ ibinigi irim narun marub da ifariŋʼ i biŋaŋgan Ben-Ami. Ben-Ami isu garam Amon tafaŋgan ruŋʼ fariŋʼan da gubuʼ aruani.
Abraham Isu Umpur da Abimelek
1 Abraham itaŋin Mamri gampan rai da intsuŋʼ iruʼ Negeb da impa wasaʼ i gamp Kadis da Sur. Raiyi da itip intsuŋʼ ifan da impa Gerar. 2 Miŋʼa nigi da Abraham ini Sara igi araŋan nafuŋgan. Ibinigi da Abimelek, garam Gerar kiŋ gan, itaŋin gan garam guman ifan da iyu Sara iba da araŋan. 3 Da bitsintaʼ idziaŋ maŋan da Anutu ini nan da Abimelek imiŋʼ nam puafuban ibiani, “Agu da u garam bini aŋu i mampan, i sagat u yudan igi sagat gabun.” 4 Abimelek anuŋʼ iwarip isu uts da Sara u, ibinigi da araŋan ini binaʼ, “Nifutsarif, dzi garam asub maʼa gin da u buŋʼ asiat dzi da utupaŋʼ santan? 5 Abraham ruŋgan ini i sagat igi araŋan nafuŋgan. Da sagat runi ibinigi i Abraham igi araŋan nafuŋgan marub. Gubuʼ dzi uda sagat igi da dzi maraŋʼ ifur i dzi naŋ sanab rururuŋan da dzi wanaŋ asub maŋan u.” 6 Da Anutu itip ini da araŋan imiŋʼ nam puafuban ibiani, “Hai, dzi tsaŋa u sanabam rururuŋan bini igi da dzi aruani imunti sib i agu i anuŋʼ naŋa nam maisan miŋʼa dzi maraŋgaŋʼ i anuŋʼ ruta araŋan giŋʼan u. 7 Da watip wataŋin Abraham finiŋgan nafa rutin, i araŋan garam uda dzi nangaŋʼ da atsuŋʼa gin da buŋʼ augin i agu da u wasaŋʼ i mampan u. Da bida u mamida taŋinda araŋan finiŋgan fada rutin da agu da gam utupam santan buŋʼ amamp.” 8 Da maratait biŋan da Abimelek yuriʼ da inuʼ gan garam guman santan impruʼ da ini da ribaraŋan i nam santan Anutu nida rutin miŋʼa nam puafuban. Da ribaraŋan irat nidzun aŋu gin. 9 Ibinigi da Abimelek ini da Abraham iba munti i maran da igutin, “Wain idzuwai da u naŋ nam bida ani da agai? Dzi naŋ asub idzuwai da agu da u naŋ uwayant bida ani da dzi da gaŋʼ utupaŋʼ iwaʼ da asub tsiraʼ? Uwayant aru u naŋan igi anuŋʼ idaum maŋan u. 10 Wain idzuwai da u naŋ ibiani?” 11 Abraham ini araŋan nangan muŋaʼ ibiani, “Dzi maraŋʼ ifur i garam gamp ani wanatsarif Anutu u. Da buŋʼ ais dzi funub i uda dzi finiŋgaŋʼ. 12 Nan nidzun, Sara igi dzi nafuŋgaŋʼ. Dzi ramaŋgaŋʼ irim da rinaŋʼ maŋan, aga wampruʼ rinaŋʼ u. Ida dzi yu isu dzi finiŋgaŋʼ. 13 Da gubuʼ Anutu nidan da dzi i taŋinda ramaŋgaŋʼ gampan rai da fada intap maŋan da dzi ni da Sara ibiani, ‘Bida u maram arida i dzi da agi nida fada gamp bida anuŋʼ da wani da garam da sagat nabiani, “Abraham igi dzi nafuŋgaŋʼ.” ’ ” 14 Gubuʼ Abraham nida nan sib, da Abimelek irim dumpa da makau da garam da sagat gum impruʼ da Sara ifan da Abraham. 15 Abimelek ini da Abraham ibiani, “Watsaŋan. Intap ani dzi intapaŋʼ. U maram fura i mpada anuŋʼ da wafa mpa gin.” 16 Da ini da Sara ibiani, “Dzi rim 1,000 silva da u nafuŋgam i ntsuma barabin aru waʼan da agu ani, i rib santan ruta agu mpadan sruʼagin bida u wanaŋ asub maŋan u.” 17 Da Abraham yugin da Anutu, da Abimelek rinin idaum da isiat barabin udzuda araŋan finiŋgan da sagat guman santan waŋun i mamida rima narun ruas ugu. 18 I Yawe yudzu sagat santan mpada Abimelek uŋaran waŋun sib i wain iruʼ, araŋan iyu Sara, Abraham finiŋgan.
Sara Irim Isak
1 Da Yawe inaŋ nam ŋarubini iwaʼ da Sara ibi araŋan nidan da ragadan ugu. 2 Ibinigi da Sara iwaŋun da irim Abraham naruŋgan marub da gubuʼ Anutu ragadan ugu. Da gubuʼ arigi da Abraham ifufi sib. 3 Abraham inuʼ mamaʼ narun igi biŋaŋgan Isak (waiŋgan ‘irubuŋʼ’). 4 Gubuʼ 8 ifa sib da Abraham isaf mamaʼ narun igi riniubit ibi Anutu nidan. 5 Abraham udzufan iwaʼ 100 da finiŋgan Sara irim araŋan naruŋgan Isak. 6 Da Sara ini, “Anutu irim nam rubuŋʼan da nugun tsiaʼan tsiraʼ da dzi, da rib santan riŋantagin da nugun buŋʼ atsiaʼ da narubuŋʼ nampruʼ da dzi.” 7 Da araŋan itip ini ibiani, “Muŋʼ ugu da maŋa wanaŋ da ini da Abraham ibi Sara isaŋʼ i rima narun, imaʼ. Da bitsintaʼ dzi rim araŋan naruŋgan marub da gubuʼ araŋan fufidan.”
Abraham Iwat Hagar da Ismail Rai
8 Gubuʼ mamaʼ narun yiŋʼan da taŋinda sisun rai, da Abraham isu nam gadan tsiraʼ aŋu gin. 9 Da Sara itsaŋan mamaʼ narun Abraham rima da sagat Idzip ugu rima umpur i Isak 10 da ini da Abraham, “Wawat sagat gum araga da naruŋgan rai. I araŋan naruŋgan anuŋʼ uda u naŋgam marafain u, i u nam bunumpam santan ani nasu dzi naruŋgaŋʼ Isak naŋgan.” 11 Sara nangan nidan inaŋ Abraham waŋun ibarabin nidzun aŋu, i Ismail igi araŋan naruŋgan impruʼ ibinigi. 12 Da bitsintaʼ Anutu ini da Abraham ini binaʼ, “Waŋum anuŋʼ barabinda yusan i naruŋgam Ismail da rinaŋgan Hagar, u sagat gumam, u. Watsuŋʼ Sara nangan da wanaŋ nabinigi, i miŋʼa Isak da u tafam rusam yaŋiŋgan taptap buŋʼ awaʼ nautus i ruan nabi dzi nidan. 13 Da dzi buŋʼ autus i sagat gum naruŋgan tafan rusan nasu garam utup tsiraʼ biŋan nabinigi, i araŋan u naruŋgam.” 14 Da tataʼ maratait, Abraham yuriʼ da iyu nam gadan da apu rinigaŋan raŋuda mpui gin sib da yantuŋʼ iyab Hagar sias. Da itaŋin naruŋgan ifan da Hagar da iwat ribaraŋan rai. Ibinigi da Hagar ifan da iyuŋ nam manaʼ dadauntan Birsiba ifan. 15 Gubuʼ mpui ntsupan da araŋan ifa taŋin mamaʼ igi rai imiŋʼ gai isiʼ maŋan marayauŋ gan. 16 Da ifampa ruguntiʼ pas i mamaʼ igi, da ini da ruŋgan, “Dzi wani tsaŋanda mamaʼ igi mampan u.” Hagar impai da iraŋ igampun ruan tsiraʼ biŋan. 17 Anutu iriŋantin i mamaʼ raŋan da Anutu aŋira gan inuʼ Hagar imiŋʼ gunuŋun ini binaʼ, “Hagar! Ibianuŋʼ? Agu anuŋʼ ratan u. Anutu iriŋant i mamaʼ raŋan aga sib. 18 Wauriʼ wafan da wagif mamaʼ aga baŋin da waraʼ gin wayab, i dzi buŋʼ anaŋ i gan yaŋiŋgan nawaʼ nasu garam utup tsiraʼ maŋan.” 19 Da Anutu inaŋ Hagar maran intap ruan da itsaŋan mpui rafan maŋan rumiŋʼan. Da araŋan ifa raŋu i apu rinigaŋan da iyu iba rim da mamaʼ igi inum. 20-21 Anutu impa tayaŋʼ mamaʼ igi isaŋʼ araŋan suda garam tsiraʼ. Araŋan impa nam dadauntan Paran da isu garam baŋi tatiʼ nidzun i dampa. Impai nigi da gan rinaŋgan iyu sagat Idzip maŋan da araŋan isu i finiŋgan.
Nan Udzudan da Yuta da Ruan Miŋʼa Birsiba
22 Gubuʼ maŋan da Abimelek (garam Gerar kiŋ gan ugu) da Fikol, garaman siŋa-ari gudzuŋgan, ifa tsaŋa Abraham da ini rutin, “Dzi tsaŋa Anutu irut agu i nam santan u naŋan. 23 Ibinigi da miŋʼa Anutu maraŋgan da wani nan nidzun da dzi i agu anuŋʼ tipa suda umpur da dzi ma dzi naruŋʼ rusaŋʼ ma dzi tafaŋʼ rusaŋʼ u. Wasantiŋʼ mara-ampi aru dzi naŋan da agu ugu da dzi, nampruʼ da garam gar intap aru u bampada suda garam marawampua gin ani.” 24 Da Abraham ini, “Hai. Dzi ni nan nidzun biŋan da agu imiŋʼ Anutu maraŋgan.” 25 Da Abraham isantiŋʼ waŋuŋgan barabindan wasi da Abimelek iyab i mpui gan rafan Abimelek garam guman suda wain gin da paʼa araŋan garam guman gin. 26 Da bitsintaʼ Abimelek ini, “Dzi wasruʼgin i maŋa naŋ uwayant bidanigi. Aruani da u buŋʼ ini da dzi da nan igi isu faʼ da dzi.” 27 Da Abraham iyu dumpa da makau fain da irim da Abimelek da rib iruʼ igi yudzu nangan. 28 Abraham itsaf dumpa naru faʼ rinan 7 da irim imiŋʼ Abimelek maran 29 da Abimelek igut i Abraham ini binaʼ, “Dumpa naru faʼ rinan 7 ani waiŋgan ibianuŋʼ?” 30 Da Abraham ini araŋan nangan muŋaʼ ibiani, “Wau dzi dumpa gaŋʼ naru faʼ 7 ani nayab i santiŋʼan bida dzi raf mpui gaŋʼ ani.” 31 Ibinigi da ifariŋʼ gamp igi biŋaŋgan Birsiba (waiŋgan ibi ‘mpui udzuda nan gin’), i rib iruʼ impruʼ ruan yudzu-nangan. 32 Gubuʼ nan udzudan da ruan miŋʼa Birsiba ntsupa sib, Abimelek da gan garam gudzuŋgan siŋa-ari Fikol, itip ifa gan gampan imiŋʼ intap Filistia. 33 Abraham intaŋ gai maŋan nida tamaris gin imiŋʼ Birsiba da iyugin da nifun itsaf Yawe, Anutu Mpada Ratar Ntiŋan Aŋu. 34 Da Abraham impa intap Filistia gubuʼ guntiʼ biŋan isu garam marawampua.
Anutu Yintsaʼ Abraham Naŋgan Muarutsan
1 Udzuf fain ifa sib raiyi, da Anutu yintsaʼ Abraham naŋgan muarutsan i tsaŋanda bida araŋan ataŋʼa waraŋʼ i Araŋan ma imaʼ. Da inuʼ araŋan ibiani, “Abraham!” 22 Da Abraham itaga ruan da ini binaʼ, “Dzi rumpai.” 2 Da Anutu ini, “Wau naruŋgam yampi bitsintaʼ Isak aru u maram aridagin nidzun aŋu ugu da wafa intap Moria. Da wais araŋan funub da watsara nasu daŋki naba da Dzi namiŋʼ mamai maŋan Dzi buŋʼ asantiŋʼ agu gin.” 3 Tataʼ maratait maŋan da Abraham yuriʼ da idumpu gai mariŋʼ taida nam tsaradan gin sib da idzur impruʼ da nam bunump santan iyab doŋki gan. Da iyu mamaʼ guman iruʼ impruʼ da naruŋgan Isak da iyuŋ i fada mumai aru Anutu ntuaŋa rutin sib ugu. 4 Iyuŋ ifan isaŋʼ gubuʼ suda iruʼ da bits da Abraham iraʼ i maran da itsaŋan mamai igi ifa ruguntiʼ. 5 Da ini da mamaʼ guman iruʼ igi, “Agam wampa ani wampruʼ da doŋki, da dzi buŋʼ arut mamaʼ aruani nafan. Da aga naidzaʼ fagaŋʼ da natsara nam da Anutu sib i naga da aga natip aba.” 6 Abraham iyu gai mariŋʼ taida nam tsaradan gin da irim da naruŋgan Isak ibuariŋʼ. Da Abraham ruŋgan igif dzaf da mudzuk da impruʼ ruan yuŋa fadan. 7 Ifan da Isak igut i raman, “Ramaŋʼ?” Da Abraham ini, “Yaʼ, naruŋʼ. Wani.” Da Isak ini, “Dzaf da gai mariŋʼ ani, da dumpa anuŋʼ i tsaradan?” 8 Abraham ini naruŋgan nangan muŋaʼ ibiani, “Naruŋʼ, Anutu ruŋgan buŋʼ ataŋin dumpa i tsaradan.” Da ribaraŋan impruʼ ruan iyuŋ ifan. 9 Gubuʼ ribaraŋan fawaʼa mumai Anutu nida rutin ugu, da Abraham yantuŋʼ tauf tsarada nam in i nigi da irants gai mariŋʼ iyabin. Da idzur naruŋgan Isak fagan da baŋin sib da isintuŋʼ iyab i gai mariŋʼ waguŋʼ. 10 Da irim baŋin ifan da iyu mudzuk i safa naruŋgan wan. 11 Da bitsintaʼ Yawe aŋira gan inuʼ araŋan imiŋʼ gunuŋun ini binaʼ, “Abraham! Abraham!” Da Abraham ini, “Hai. Dzi rumpai.” 12 Da aŋira ini, “Manaŋ baŋin maŋan i mamaʼ igi maʼ. Aruani da dzi tsaŋan agu sib, u ataŋʼ waraŋʼ i Anutu, i u wagantsi naruŋgam yampi bitsintaʼ aru u maram aridagin igi i dzi u.” 13 Abraham iraʼ i maran da itaniŋʼ da itsaŋan dumpa arapuʼ bits, tsiapan abira i gai uts uts baŋin ataŋʼa i ruan ruŋ muntidan. Araŋan ifan da yis funub da itai isu nam tsaradan iyu naruŋgan Isak mumai gan. 14 Ibinigi da Abraham ifariŋʼ mumai arigi biŋangan Yawe Ruŋgan Irim. Da miŋʼa gubuʼ aruani da ruŋʼ ini, “Miŋʼa Yawe mamai gan da Ruŋgan buŋʼ arim.” 15 Da Yawe aŋira gan itip inuʼ Abraham imiŋʼ gunuŋun 16 da ini, “Yawe ini ibiani, ‘U ataŋʼ waraŋʼ i Dzi nan nidzun aŋu da u wagantsi naruŋgam bitsintaʼ aru u maram aridagin yusan igi i Dzi u. Ibinigi da dzi Yawe ini nan nidzun biŋan da agu: 17 Dzi buŋʼ afinti agu nidzun aŋu da u yaŋin rusam nawaʼ nasisuŋʼ nasaŋʼ ŋantam narun miŋʼa waguŋʼ da nasaŋʼ sasanuai miŋʼa uruts riŋan. U yaŋin rusam buŋʼ adaru gan garam ipiapan rai da nasu wain i gan gampan. 18 Da miŋʼa u yaŋin rusam rururuŋan da Dzi buŋʼ afinti garam intap utup utup santan, i u ataŋʼ waraŋʼ nidzun aŋu i Dzi.’ ” 19 Ntsupa sib da Abraham irut naruŋgan itip iba da gan mamaʼ guman, da impruʼ ruan ifa Birsiba da impa nigi gubuʼ guntiʼ biŋan.
Nahor Narun Rusan Nangan
20 Raiyi da rib fain iragi Abraham raiŋgan Nahor narun rusan rutin ibiani, “U raiŋgam Nahor finiŋgan Milka irim narun rusan biŋaŋgan ibiani: 21 mamaʼ miamun Uts, da raiŋgan Buts, da Kemuel--Aram ramaŋgan, 22 Keset, Hatso, Pildas, Dzitraf da Betuel.” 23 Betuel isu Rebeka ramaŋgan. Milka, Abraham raiŋgan Nahor finiŋgan, irim Nahor narun rusan 8. 24 Da sagat guman Reuma irim araŋan narun rusan marub ibiani: Tiba, Gaham, Tahas da Maka.
Sara Naŋgan Mampan
1 Sara impai udzufan isaŋʼ 127. 2 Da araŋan imamp imiŋʼ gamp Kiriat-Arba (nida Hibron), imiŋʼ intap Kanan. Abraham iraŋ igampun ruan i finiŋgan imiŋʼ uŋar wasaʼ. 3 Araŋan iraŋ sib da itaŋin finiŋgan rai da ifa ni da garam Hit ibiani, 4 “Dzi maragab garam marawampua ani impa wasaʼ i agam. Agam warim intap maŋan da dzi da dzi narim finiŋgaŋʼ gin.” 5 Da garam Hit ini binaʼ, 6 “Garam tsiraʼ, aga maraŋʼ ifur ibiani: U garam nifutsarif impa wasaʼ i agai. Bida u waŋuŋgam uda tauf bampun rima badzabin maŋan miŋʼa aga gin, da warim finiŋgam in. Aga maŋa wasaŋʼ i nida nan intiʼ i tauf bampun u rima finiŋgam in u.” 7 Da Abraham iraʼ i ruan da irim antuŋʼ da irasu ruan iruʼ garam Hit igi maraŋgan. 8 Da ini da ribigi ibiani, “Bida agam mpruʼa waŋum i dzi rima finiŋgaŋʼ i nani, da dzi maraŋʼ ifur ibiani: isaŋʼ agam uda dzi nifuŋgaŋʼ da guta i Tsohar naruŋgan Efron, 9 i rima tauf bampun miŋʼa Makpila miŋʼa araŋan intapan idzintsuts riŋampa aŋu da dzi. Da nani nam bunump gudzuŋgan rururuŋan i dzi rima nam ntsuman gin miŋʼa agam maraŋgam. Da nigi nasu dzi intapaŋʼ rima badzabaŋʼ gin.” 10 Efron impa wasaʼ i gan garaman Hit igi imiŋʼ gamp tsiraʼ muantsi nifuŋgan da ini Abraham nangan muŋaʼ imiŋʼ santan igi maraŋgan ibiani, 11 “Garam tsiraʼ, dzi maraŋʼ ifur ibiani: dzi buŋʼ arim intap muŋaʼ arigi santan nampruʼ da tauf bampun miŋʼa gin ani namiŋʼ dzi ampan gaŋʼ maran da agu. Da warim finiŋgam gin.” 12 Da Abraham itip irim antuŋʼ da irasu ruan iruʼ garam gamp igi maran 13 da ini da Efron imiŋʼ ribigi maraŋgan ibiani, “Dzi gaib ruŋgaŋʼ da agu i u riŋanta i dzi waŋuŋgaŋʼ. Dzi buŋʼ arim nam bunump gudzuŋgan rururuŋan i intap igi. Wau nam bunump igi da dzi buŋʼ arim finiŋgaŋʼ gin.” 14 Efron ini Abraham nangan muŋaʼ ibiani, 15 “Dzi garam tsiraʼ gaŋʼ, ariʼ wariŋantin: intap igi nam bunumpan gudzuŋgan isaŋʼ 400 silva, da bitsintaʼ nam bunump igi nam utaʼ biŋan i garam tsiraʼ bida agu da dzi. Warim finiŋgam gin.” 16 Abraham iyu Efron nam bunumpan ruŋgan nidan igi iyab da irants 400 silva da irim da Efron imiŋʼ garam nidzun santan Hit maran. 17-18 Ibinigi da Efron intapan miŋʼa Makpila miŋʼa uts da Mamri igi impruʼ da gum da tauf bampun da gai santan miŋʼa gin isu Abraham naŋgan imiŋʼ garam Hit santan mpruʼa ruan gin igi maraŋgan. 19 Nan tipan ntsupan da Abraham irim finiŋgan Sara i tauf bampun miŋʼa Makpila imiŋʼ uts da Mamri (Hibron gampan isiʼ maŋan) miŋʼa intap Kanan. 20 Ibinigi da garam Hit intapan marafain arigi mpruʼan da tauf bampun isu Abraham gampan rima badzaban gin.
Isak Iyu Rebeka
1 Abraham aruani iwaʼ da nam fufidan biŋan sib, da Yawe ifinti araŋan i sanab mara maran. 2 Gubuʼ maŋan da Abraham ini da gan garam guman miamun gan mpada tayaŋʼ araŋan naŋgan santan ini binaʼ, “Warim baŋim waruʼ dzi faga rampuat 3 da wani nan nidzun da wataga ruam da Yawe, Anutu suda wain i gunuŋun da intap, i agu anuŋʼ uda sagat intap Kanan ani gan maŋan da dzi naruŋgaŋʼ u. 4 Da bitsintaʼ watip wafa dzi gampaŋʼ wain da wau sagat maŋan namiŋʼ dzi utupaŋʼ i suda dzi naruŋgaŋʼ Isak finiŋgan.” 5 Da garam gum igutin, “Da bida sagat igi buginda i taŋinda gampan rai i ruta dzi badan? Da isaŋʼ i dzi tipa uda Isak fada u gampam wain igi?” 6 Da Abraham ini, “Imaʼ. Watsaŋa ruŋgam sib i u anuŋʼ tipa uda dzi naruŋgaŋʼ fadan nigi u. 7 Yawe, Anutu suda wain i gunuŋun, iyu dzi sinuŋʼ dzi ramaŋgaŋʼ gampan da dzi intapaŋʼ da iraga nan muŋʼ da dzi i buŋʼ ataŋin intap aruani da dzi yaŋin rusaŋʼ. Araŋan buŋʼ ataŋin gan aŋira gan namuŋʼ i agu nafa dzi gampaŋʼ wain, i rima agu sib i uda sagat i dzi naruŋgaŋʼ miŋʼa nigi. 8 Da bida sagat igi buginda i ruta agu badan, da nan u tagada ruam in da dzi anuŋʼ muntida sib i agu u. Da bitsintaʼ agu anuŋʼ uda dzi naruŋgaŋʼ tipa fada dzi gampaŋʼ wain igi u.” 9 Da Abraham nida nan sib da garam gum igif garam tsiraʼ gan Abraham faga rampuat da itaga ruan nidzun aŋu gin i naŋa nam santan bida Abraham nidan. 10 Da garam gum iyu garam tsiraʼ gan Abraham kamiran 10 impruʼ da nam bini mara maran sib da itaŋin gampan rai da ifa i waʼa Nahor gampan miŋʼa Mesopotemia. 11 Araŋan iwaʼ sib da inaŋ da kamir santan yidzaʼ fagan da igiŋʼ ararai iruʼ uts da mpui rafan miŋʼa manaʼ i gamp igi. Nam inuf sib da sagat sagat gubuʼ gan bada i raŋuda mpui. 12 Da araŋan yugin ibiani, “O Yawe, dzi garamaŋʼ tsiraʼ Abraham Anutu gan, maram wari i Abraham, dzi garamaŋʼ tsiraʼ, da gubuʼ aruani da warim dzi sib i dzi waʼa da nidzun i gum aru dzi bada gin ani. 13 Watsaŋan, dzi munti uts da mpui rafan ani da garam gamp ani narun rusan finam finam buŋʼ iba i raŋuda mpui. 14 Da bida dzi nida da gan maŋan bida ani, ‘Amaʼ, isaŋʼ i u rima mpui guram ruʼan da dzi maragab numa mpui pas?’ Da bida araŋan nidan, ‘Wanum da dzi buŋʼ arim mpui da agu kamiram nabinigi,’ da dzi buŋʼ asruʼgin nabi U raga aruf aruani i garam gumam Isak. Nam bidanigi waʼan da dzi buŋʼ asruʼgin nabi U santiŋʼ naŋgam maram aridan da dzi garamaŋʼ tsiraʼ Abraham.” 15 Gubuʼ araŋan rumiŋʼa i nan udagin, da aruf maŋan nida Rebeka gin yantuŋʼ gur raŋuda mpui gin i sias ibawaʼ. Araŋan ramaŋgan Betuel, Abraham raiŋgan Nahor da finiŋgan Milka naruŋgan marub. 16 Rebeka igi aruf mamaʼ mara rifirif biŋan da garam maŋa wawaʼ da araŋan u. Araŋan iruʼ mpui rafan da iraŋu mpui i gur da itip yantuŋʼ i sias iyab iba. 17 Garam gum ifa da araŋan da igutin, “Amaʼ, sagat, isaŋʼ i u rima mpui pas miŋʼa u guram da dzi numan?” 18 Da Rebeka ini, “Hai, garam tsiraʼ,” da araŋan suŋ aŋu yapiŋʼ mpui gur iruʼ i araŋan numan. 19 Araŋan inum mpui isaŋʼ da Rebeka ini, “Dzi buŋʼ arim mpui da agu kamiram nabinigi nasaŋʼ ribaraŋan numa saŋʼan.” 20 Da araŋan suŋ aŋu iyats mpui iruʼ tauf piaŋʼ apu numa mpui gin. Da araŋan irunt da mpui iba isaŋʼ kamir santan numa saŋʼan. 21 Gubuʼ araŋan fada badan da garam gum impa frap maʼan aŋu irarab aŋu da ini i waŋuŋgan, “Mani sagat Yawe rima dzi sib i waʼa rutin ugu ani.” 22 Gubuʼ kamir santan numa mpui sib da araŋan isuwiʼ gol riŋ yun gan da gol tsiraʼ iruʼ atsufa i baŋin bida tsipu. Nam igi nam bunumpan tsiraʼ biŋan. 23 Da igut i araŋan, “Mai! Maŋa naruŋgan agu? Da mumai wasaʼ bits rumiŋʼ u ramaŋgam uŋaran i aga giŋʼa gin da idziaŋ aruani?” 24 Rebeka ini ibiani, “Dzi ramaŋgaŋʼ Betuel. Da dzi rumpuŋʼ rusaŋʼ Nahor da Milka. 25 Hai. Sai mariŋʼ kamir giŋʼa gin da naŋgan gadan rumiŋʼ da mumai uŋar wasaʼ i agam giŋʼa gin rumiŋʼ ibinigi.” 26 Ibinigi da garam gum igi yidzaʼ fagan da itauf maran iruʼ intap da itsarif Yawe. 27 Da ini, “Dzi natsarif Yawe, dzi garamaŋʼ tsiraʼ Abraham Anutu gan, i suda mara-ampi nidzun da atsuŋʼa nangan nidan santan da araŋan da uda dzi bada rururuŋan aŋu da Abraham raiŋgan utupan.” 28 Mamaʼ finam igi itsaŋan nam santan igi da irunt ifa uŋaran da ifis i nam santan igi da rinaŋgan da utupan. 29-30 Rebeka nafuŋgan biŋaŋgan Laban. Araŋan itsaŋan riŋ gol ruguda i nafuŋgan yun da gol iruʼrun atsufa i baŋin bida tsipu da iriŋant i nafuŋgan Rebeka fisa i nam santan garam igi nidan da naŋa rutin ugu da suŋ aŋu irunt ifa mpui rafan da itsaŋan garam igi da kamiran ruŋʼ muntidan. 31 Da yis yariŋ gin, “Garam tsiraʼ Yawe fintidan, waba i agi fada uŋar. Agu anuŋʼ muntida gamp manaʼ ani u. Dzi tip u mumai gam giŋʼa gin impruʼ da kamir gan mpada gin sib wa.” 32 Ibinigi da garam gum igi irut Laban impruʼ ruan fada uŋar. Da Laban riban igruʼ nam bunump sinuŋʼ kamir ararai iruʼ, da irim sai mariŋʼ da nam gadan da kamir. Da ribaraŋan ifinuʼ mpui iba da Abraham garam guman i ruta garaman adzuʼa fagan gin. 33 Ida nam gadan iba, da bitsintaʼ Abraham garam guman ini, “Dzi wasaŋʼ i gada nam suŋ u, nasaŋʼ dzi nafis i nan idzuwai dzi bada gin ani wasi da agam raiyi.” Da Laban ini, “Ariʼ, wafisin.” 34 Ibinigi da araŋan ini, “Dzi ani Abraham garam guman. 35 Yawe ifinti dzi garam tsiraʼ gaŋʼ da inaŋ nam inti iyus nidzun aŋu da araŋan isu garam da nam bunump tsiraʼ. Da irim dumpa, nuniŋ, makau, kamir, doŋki, silva da gol, garam da sagat gum da araŋan. 36 Dzi garamaŋʼ tsiraʼ finiŋgan Sara irim naruŋgan marub bitsintaʼ da gubuʼ araŋan fufida sib. Da dzi garamaŋʼ tsiraʼ irim nam santan aŋu da araŋan isu wain gin. 37 Da dzi garamaŋʼ tsiraʼ Abraham ini da dzi da dzi tsarif ruaŋʼ i atsuŋʼa araŋan nangan bida ani, ‘Agu anuŋʼ uda sagat maŋan da dzi naruŋgaŋʼ miŋʼa intap Kanan aru dzi mpada gin ani u. 38 Da bitsintaʼ watip wafa dzi gampaŋʼ wain da wau sagat maŋan namiŋʼ dzi utupaŋʼ i suda dzi naruŋgaŋʼ Isak finiŋgan.’ 39 Da dzi gut i garam tsiraʼ gaŋʼ igi ibiani, ‘Da bida sagat igi mamida ruta dzi badan, da bubida anuŋʼ?’ 40 Da araŋan ini binaʼ, ‘Yawe, dzi Anutu gaŋʼ dzi ataŋʼa waraŋʼ gin, buŋʼ ataŋin aŋira gan narut agu da buŋʼ anaŋ u sanabam yuŋa gin nawaʼ bini. Da u buŋʼ ayu sagat maŋan i dzi naruŋgaŋʼ namiŋʼ dzi ramaŋgaŋʼ utupan rururuŋan. 41 Da bitsintaʼ bida u fada rururuŋan da dzi utupaŋʼ, da ribaraŋan mamida i rima sagat da agu, da nan u tagada ruam in da dzi ugu anuŋʼ isaŋʼ muntida sib i agu u. Imaʼ.’ 42 “Gubuʼ dzi bawaʼa mpui rafan da aruani da dzi yugin ibiani, ‘O Yawe, dzi garamaŋʼ tsiraʼ Abraham Anutu gan, warim dzi sib i dzi waʼan da nidzun i gum aru dzi bada gin ani. 43 Watsaŋan, dzi munti uts da mpui rafan ani, da bida aruf maŋan bada i raŋuda mpui da dzi nida rutin bida ani, “Amaʼ, isaŋʼ i u rima mpui pas miŋʼa u guram da dzi numan?” 44 Da bida araŋan nidan, “Wanum da dzi buŋʼ arim mpui da agu kamiram nabinigi,” da dzi buŋʼ asruʼgin nabi Agu Yawe iraga aruf aruani i dzi garamaŋʼ tsiraʼ naruŋgan udan.’ 45 Gubuʼ aru dzi ruŋʼ udagin miŋʼa waŋuŋgaŋʼ, da Rebeka yantuŋʼ gur i sias ibawaʼ, da iruʼ i raŋuda mpui da dzi ni da araŋan, ‘Amaʼ, warim mpui da dzi nanum.’ 46 Da araŋan suŋ aŋu yapiŋʼ mpui gur iruʼ da ini, ‘Wanum da dzi buŋʼ arim mpui da u kamiram nanum nabinigi.’ Ibinigi da dzi num mpui da araŋan irim mpui da kamir inum impruʼ. 47 Gubuʼ dzi guta i araŋan i maŋa naruŋgan araŋan, da araŋan ini da dzi ibiani, ‘Dzi ramaŋgaŋʼ Betuel. Da dzi rumpuŋʼ rusaŋʼ Nahor da Milka.’ “Ibinigi da dzi rugu riŋ gol i araŋan yun da yatsuf tsipu gol iruʼ i araŋan baŋin, 48 da dzi idzaʼ fagaŋʼ da dzi tauf maraŋʼ iruʼ intap da dzi tsarif Yawe, dzi garamaŋʼ tsiraʼ Abraham Anutu gan, aru uda dzi miŋʼa sanab bada rururuŋan da raiŋgan Nahor uŋaran i uda i rumpuŋgan finam i suda raiŋgan Abraham naruŋgan finiŋgan. 49 Da bida agam tsaŋanda bini da rima waŋum da dzi garamaŋʼ tsiraʼ Abraham da wani nan rururuŋan da dzi, da bida maʼan da wani nabinigi, i dzi raraba sanabaŋʼ fada gin.” 50 Da Laban da ramaŋgan Betuel ini araŋan nangan muŋaʼ ibiani, “Nan ani iba Yawe gin, da aga wasaŋʼ i nida nan maŋan u. Da nan buŋʼ abi arunigi aŋu. 51 Rebeka aruani. Da u buŋʼ ayu araŋan da wafan, da araŋan nasu u garamam tsiraʼ igi naruŋgan finiŋgan nabi Yawe santiŋʼan.” 52 Gubuʼ Abraham garam guman riŋanta i nan ribaraŋan nidan igi, da yidzaʼ fagan da itauf maran iruʼ intap da irim daŋki da Yawe. 53 Ida araŋan isuwiʼ nam rinigira gol da silva da ŋarukui mara maran da irim da Rebeka. Da irim nam mara maran bini ampibiŋan da Rebeka nafuŋgan da rinaŋgan. 54 Ribaraŋan ini nan sib da Abraham garam guman irut garaman iga nam sib da igiŋʼ igi. Ribaraŋan uriʼa da tataʼ da garam gum ini da ribigi ibiani, “Dzi ni tipa fadan da gaŋʼ garamaŋʼ tsiraʼ.” 55 Da bitsintaʼ Rebeka rinaŋgan da nafuŋgan ini binaʼ, “Aga maraŋʼ ifur i Rebeka ruta aga mpada saŋʼa gubuʼ 10 ma gubuʼ fain raiyi, ida araŋan musa ruta agam fadan.” 56 Da bitsintaʼ Abraham garam guman ini binaʼ, “Agam anuŋʼ rasuda dzi i ruŋʼ mpadan u. I Yawe inaŋ dzi gumaŋʼ bada gin iwaʼ ŋarubini biŋan sib. Da dzi gaib ruŋgaŋʼ da agam i dzi tipa fadan da nida nam santan waʼan ani da garam tsiraʼ gaŋʼ.” 57 Da ribaraŋan ini, “Agi nanuʼ Rebeka da nagut i araŋan.” 58 Ibinigi da ribaraŋan inuʼ Rebeka ba da igutin, “U waŋuŋgam iyu i ruta garam ani fadan da aruani?” Da araŋan ini, “Hai, dzi buŋʼ arut afan.” 59 Ibinigi da ribaraŋan itaŋin Rebeka impruʼ da gan sagatan mpada tayaŋʼ gin da irut Abraham garam guman da gan garaman impruʼ ruan fadan. 60 Da gubuʼ Rebeka nida taŋinda utupan rai i fadan, da ribaraŋan ifinti araŋan i nan fintidan ani, “Nafuŋʼ, agu buŋʼ asu tausen da tausen ampibiŋan rinaŋgan! Da agu tafam rusam buŋʼ ampa riri i gan garam ipiapan da nasu wain i gan gampan.” 61 Da Rebeka irut sagat rusan naŋa gum i araŋan itip ruŋgan da iyab impa kamir da yatsuŋʼ Abraham garam guman da irut ifan. 62 Da Isak imiŋʼ intap mpui maran Bir-Lahai-Roi iba, i gubuʼ arigi araŋan impai imiŋʼ intap Negeb. 63 Nam nufan maŋan da araŋan iyuŋ nam manaʼ idzintsuts ifan i runtaʼ aŋu mpadan da maran fura nan. Da iraʼ i maran da itsaŋan kamir fain badan. 64 Rebeka ibinigi iraʼ i maran da itsaŋan Isak da yatup suŋ aŋu iruʼ sinuŋʼ kamir. 65 Da igut i Abraham garam guman ini binaʼ, “Garam idzuwai aru yuŋa badan naga?” Da garam gum ini, “Dzi garamaŋʼ tsiraʼ Isak igi.” Rebeka iriŋantin da iyu bruʼ paparatan untuda i gudzun da iraub sib i maran. 66 Fawaʼa da Isak da garam gum ifis i nam santan naŋan igi da araŋan. 67 Da Isak iyu Rebeka irut yataŋʼ rinaŋgan Sara uŋaran apu rinigaŋan da isu i finiŋgan. Da waŋuŋgan iyu Rebeka nidzun aŋu da Rebeka irasu i waŋuŋgan barabindan i rinaŋgan naŋgan mampan.
Abraham Naŋgan Mampan
1 Abraham itip iyu sagat maŋan, biŋaŋgan Kitura. 2 Sagat igi irim narun rusan ibiani, Tsimran, Joksan, Medan, Midian, Isbak da Sua. 3 Joksan isu Siba da Didan ramaŋgan. Da Didan isu garam Asur da Letus da Leum tafaŋgan. 4 Da Midian narun rusan marub biŋaŋgan ibiani, Efa, Efer, Hanok, Abida da Elda. Utup tuasarigi isu Kitura tafan rusan. 5 Abraham itaŋin nam santan araŋan suda wain gin ugu sib aŋu da naruŋgan Isak. 6 Da aru araŋan rumpada marataʼ da ifab nam bunump pas pas aŋu isaŋʼ narun rusan riman da sagat iruʼ ugu, Hagar da Kitura. Da Abraham itaŋin ribaraŋan santan ifa intap miŋʼa gubuʼ yaban i mpada guntiʼ i Isak. 7 Mpruʼa Abraham udzufan mpada rutin isaŋʼ 175. 8 Araŋan inaŋ nam santan maran furan intsup sib da ifufi nidzun aŋu da imamp da ifa da utupan mampa sib ugu. 9 Da araŋan naruŋgan Isak da Ismail irim araŋan i tauf bampun Makpela miŋʼa uts da gamp Mamri, miŋʼa Tsohar naruŋgan Efron, garam Hit, intapan. 10 Abraham ruŋgan irim nam ntsuman i intap arigi da garam Hit. Da araŋan narun rusan irim araŋan i nigi impruʼ da finiŋgan Sara. 11 Gubuʼ Abraham mampa sib, da Yawe ifinti araŋan naruŋgan Isak. Da Isak impa uts da mpui maran Bir-Lahai-Roi.
Ismail Tafan Rusan Nangan
12 Abraham naruŋgan Ismail rima da Hagar, sagat Idzip aru Sara sagat guman ugu, yaŋin rusan nangan ani. 13 Ismail narun rusan biŋangan atsuŋʼa i ruan ibiani: Nebaiot, Ismail narun marub miamun, da Kedar, Adbil, Mipsam, 14 Misma, Duma, Masa, 15 Hadat, Tema, Jetur, Nafis da Kedema. 16 Nigi Ismail narun rusan. Garam 12 igi tafan rusan biŋaŋgan imunti imiŋʼ gamp ruga rugan da intap ribaraŋan mpada gin. 17 Ismail impa udzufan isaŋʼ 137, da araŋan imamp da ifa da tafan rusan mampan ugu. 18 Ismail yaŋin rusan impai imiŋʼ intap Hawila ifa isaŋʼ gamp Sur, intap Idzip marafain gan gubuʼ yaban, sanab fada Asiria gin. Da anuŋʼ irut rain rusan impa bini u.
Rebeka Irim Narun Bampuŋʼ Isau da Yakop
19 Nani Abraham naruŋgan Isak nangan ragidan ani. 20 Gubuʼ Isak udzufan saŋʼa 40 da iyu Rebeka, Betuel naruŋgan finam da Laban nafuŋgan, ribaraŋan garam Aram mpada Mesopotemia ugu. 21 Isak finiŋgan isu sagat yami, ibinigi da Isak yugin da Yawe i rima araŋan finiŋgan sib. Yawe iriŋant i araŋan nangan udagin da Rebeka iwaŋun. 22 Mamaʼ narun iruʼ miŋʼa Rebeka waŋun igi yis ruan imiŋʼ rinan waŋun wasaʼ. Ibinigi da araŋan ifan da Yawe i nan udagin da ini binaʼ, “Wain idzuwai da nam bida ani iwaʼ da dzi?” 23 Da Yawe ini da araŋan ibiani, “Garam utup iruʼrun imiŋʼ u waŋum. Garam utup iruʼrun u nida riman igi buŋʼ antap ruan namunti ruga rugan. Da utup maŋan buŋʼ asu riniurun da nayab ragun i maŋan. Da mamaʼ narun waʼa miamun buŋʼ asu mamaʼ waʼa bampan garam guman.” 24 Iwaʼ araŋan gubuʼ gan rima narun da irim narun bampuŋʼ. 25 Mamaʼ miamun waʼan igi rinin isu biʼ funub da rinifufun iyus, da ribigi inuʼ araŋan biŋaŋgan Isau. 26 Da raiŋgan waʼa atsuŋʼa araŋan da baŋin ruturiʼ i faga mutun. Ibinigi da ribigi inuʼ araŋan biŋaŋgan Yakop (waiŋgan ‘gifa faga mutun’). Isak udzufan isaŋʼ 60 da gubuʼ aru Rebeka rima mamaʼ bampuŋʼ iruʼ igi. Yakop Iyu Mamaʼ Miamun Naŋgan Suda Wain Gin Sinuŋʼ Isau 27 Mamaʼ narun iruʼ igi ibasu garam sib da Isau isu garam mararuru da baŋi-tatiʼ i yuŋa wap da waʼan da apu. Da Yakop araŋan garam mpada ntras aŋu, da araŋan inaŋ da impa gamp aŋu. 28 Isak maran yari nidzun aŋu i Isau, wain ibiani, araŋan nugun itsiaʼ i gada apu Isau yuŋa gin. Da Rebeka ibinigi maran yari nidzun i Yakop. 29 Gubuʼ maŋan da Yakop itip mpuaʼ i upis nidzun, da Isau imiŋʼ wap iba da maŋits irut araŋan nidzun aŋu, 30 da ini da Yakop, “Maŋits yis dzi funub aŋu! Warim nam biʼ igi fain da dzi nagan!” (I wain igi da ifariŋʼ araŋan biŋaŋgan Idom, i waiŋgan ibi ‘biʼ’.) 31 Da bitsintaʼ Yakop ini da araŋan ibiani, “Hai, da bitsintaʼ warim mamaʼ miamun naŋgan suda wain gin da dzi raiyi, ida dzi buŋʼ arim mpuaʼ ani da agu.” 32 Da Isau ini, “Oiyo! U tsaŋan dzi naŋ i mampan! Da dzi naŋgaŋʼ miamun dzi suda wain gin igi burima dzi sib bida anuŋʼ? Isaŋʼ i!” 33 Da Yakop itip ini, “Wataga ruam da wani nan nidzun muŋʼ da dzi i u rima nam mamaʼ miamun gan suda wain gin da dzi.” Ibinigi da Isau itaga ruan da irim nam mamaʼ miamun gan ifan da Yakop. 34 Intsup sib da Yakop irab mpuaʼ upis nidzun da nam gadan araŋan tipan da Isau. Da araŋan iga nam da inum mpuaʼ isaŋʼ araŋan sufan, da yuriʼ da ifan. Uwayant Isau santiŋʼan igi araŋan itsaŋa nam mamaʼ miamun gan suda wain gin igi ibi nam utaʼ aŋu.
Isak Impa Imiŋʼ Gamp Gerar
1 Da gubuʼ fus tsiraʼ nam gada mariŋʼa sib iwaʼ intap Kanan ibi muŋʼ da waʼan da Abraham ugu. Ibinigi da Isak intsuŋʼ ifa gamp Gerar, garam Filistia kiŋ gan Abimelek gampan. 2 Yawe iwaʼ da araŋan da ini, “Agu anuŋʼ ruʼa gamp Idzip u. U buŋʼ ampai intap idzuwai Dzi buŋʼ ani da agu i mpada gin. 3 Wampa intap ani da Dzi buŋʼ arut agu da nafinti agu. I intap aruani santan Dzi buŋʼ arim da agu da u tafam rusam i saŋʼa nan Dzi tagada ruaŋʼ gin da u ramaŋgam Abraham ugu. 4 Dzi buŋʼ autus u tafam rusam yaŋiŋgan nawaʼ nasisuŋʼ nasaŋʼ ŋantam narun da narim intap ani santan da ribaraŋan. Da miŋʼa u yaŋin rusam rururuŋan da Dzi buŋʼ afinti garam intap utup utup santan, 5 i Abraham yataŋʼ waraŋʼ i Dzi da itip Dzi nangaŋʼ faidagin da nam santan Dzi santiŋʼa araŋan gin.” 6 Ibinigi da Isak impa imiŋʼ gamp Gerar. 7 Gubuʼ garam gamp igi guta i araŋan i finiŋgan da araŋan ini binaʼ, “Dzi nafuŋgaŋʼ igi.” I araŋan irat da ini i waŋuŋgan aŋu ibiani, “Bida dzi nida finiŋgaŋʼ gin da garam gamp ani buŋʼ ais dzi funub i araŋan, i Rebeka igi sagat mara rifirif bini.” 8 Isak impa nigi gubuʼ ampibiŋan sib raiyi, da gubuʼ maŋan Abimelek, garam Filistia kiŋ gan, imunti uŋaran muantsi waguŋʼ da irarab Isak yafusa finiŋgan Rebeka. 9 Abimelek inuʼ Isak iba munti i maran da ini rutin, “Aruani da dzi sruʼgin sib. Sagat arigi u finiŋgam. Wain idzuwai da u ni nafuŋgam i araŋan?” Da Isak ini binaʼ, “Dzi maraŋʼ ifur ibi dzi buŋʼ arim ruŋgaŋʼ rai i araŋan bida dzi nida finiŋgaŋʼ gin.” 10 Da Abimelek ini, “Ibianuŋʼ da u naŋ uwayant ibinigi da agai? Bida dzi garamaŋʼ maŋan dani ruta u finiŋgam giŋʼan, da Anutu madararu agai i u naŋgam iyuʼan igi.” 11 Abimelek ini nan babampafan da gan ampan gan ibiani, “Maŋa bida naŋa asub yaba i garam ma sagat aruani da araŋan buŋʼ amamp i muŋaʼ gan.” 12 Isak iraf gum da udzuf arigi imiŋʼ intap igi da nam nidzun bitsintaʼ bitsintaʼ araŋan ntaŋan da ikap nidzun 100 isaŋʼ ruan santan, i Yawe ifinti araŋan nidzun aŋu, 13 da araŋan isu garam nam bunump tsiraʼ da nam bunumpan ruŋʼ yutus i ruan aŋu ibinigi. 14 Araŋan isu wain i dumpa da makau da garam gum ampibiŋan, da garam Filistia nugun iruaʼ i araŋan. 15 Ibinigi da ribigi idzufuŋʼ mpui rafan santan araŋan ramaŋgan Abraham garam guman rafan ugu. 16 Da Abimelek ini da Isak, “Aruani da aga tsaŋa u su garam nampaŋʼ tsiraʼ iyus agai, ibinigi da wataŋin aga gampaŋʼ rai da wafan.” 17 Ibinigi da Isak itaŋin gamp igi rai da ifan da impa imiŋʼ intap bump Gerar. 18 Isak itip ini da garam guman iraf mpui santan aru ramaŋgan Abraham garam guman rafa muŋʼ ugu. Abraham imamp sib raiyi da garam Filistia idzufuŋʼ mpui santan sib. Gubuʼ tipa rafan da Isak itip ifariŋʼ biŋan aru ramaŋgan Abraham fariŋʼa gin muŋʼ ugu. 19 Gan garam guman itip iraf mpui faʼ maŋan imiŋʼ nigi da iwaʼ da mpui maran budubuatagin. 20 Da bitsintaʼ garam Gerar garaman mpada tayaŋʼ makau gan irut Isak garaman mpada tayaŋʼ makau gan isu ufuai da ruan da ini, “Aga mpui gaŋʼ igi.” Ibinigi da Isak ifariŋʼ mpui rafan igi Esek (waiŋgan ibi ‘suda ufuai da ruan’), i ribigi irut Isak isu ufuai da ruan i mpui rafan igi. 21 Raiyi da itip iraf mpui maŋan da ribigi itip irut isu ufuai i nigi impruʼ, da Isak ifariŋʼ i biŋaŋgan Sitna (waiŋgan ibi ‘usuda gudzun i ruan’). 22 Isak itaŋin nigi rai da itip iraf mpui maŋan. Da gubuʼ arigi da garam maŋan watip irut isu ufuai gin u, ibinigi da ifariŋʼ i biŋaŋgan Rihobot (waiŋgan ibi ‘intap utaʼ maŋan’) da ini, “Aruani da Yawe irim intap utaʼ maŋa ani da agi i mpada bini da agi yaŋin rusaŋʼ buŋʼ autus i ruan nawaʼ nasisuŋʼ namiŋʼ gamp ani.” 23 Da Isak itaŋin nigi rai da iyab ifa mpa gamp Birsiba. 24 Da idziaŋ arigi, Yawe iwaʼ da araŋan da ini binaʼ, “Dzi u ramaŋgam Abraham Anutu gan. Agu anuŋʼ ratan u, i Dzi rut agu impai. Da Dzi buŋʼ afinti agu da nautus u tafam rusam nawaʼ nasisuŋʼ, i wain iruʼ dzi yudzu nan sib da garam gumaŋʼ Abraham.” 25 Isak yantuŋʼ tauf tsarada nam in i nigi da itsarif Yawe gin. Da araŋan yari uŋaran apu rinigaŋan da gan garam guman iraf mpui maŋan impruʼ imiŋʼ igi.
Nan Udzudan Muntida Wasaʼ i Abimelek da Isak
26 Gubuʼ maŋan da Kiŋ Abimelek irut gan garaman rima uwayant, Ahusat, da gan garaman siŋa-ati gudzuŋgan, Fikol, imiŋʼ gan gampan Gerar iba i tsaŋanda Isak. 27 Bawaʼan da Isak igut i ribaraŋan, “Wain idzuwai da agam iba i tsaŋanda dzi, garam aru agam bugindan da wata rai i gam gampam ugu?” 28 Da ribaraŋan itip ini araŋan nifuŋgan muŋaʼ ibiani, “Aga tsaŋan dzidziwandan ibiani, Yawe irut agu, ibinigi da aga ni i agi tsafa ruaŋʼ da udzuda nan muntida wasaʼ i agu da agai, 29 i agu anuŋʼ naŋa maisan i agai u, nabi aga tipa agu bini aŋu isaŋʼ u taŋinda aga rai da bada ruta nan maʼan. I aruani da aga tsaŋan i Yawe ifinti agu.” 30 Ibinigi da Isak isu nam gadan tsiraʼ maŋan i ribaraŋan da igan da inum. 31 Pisa tataʼ maratait maŋan da ribaraŋan impruʼ ruan da yudzu nan da itaga ruan gin i mpada bini. Da Isak itaŋin ribaraŋan rai ruta nan nufan da ifan. 32 Gubuʼ arigi rururuŋan da Isak garam guman ibawaʼ da araŋan da ini rutin ibiani, “Aga raf mpui maŋan da aga waʼ da mpui sib wa.” 33 Da Isak ifariŋʼ mpui rafan igi biŋaŋgan Siba. Ibinigi da miŋʼa nigi bawaʼan da aruani da ruŋʼ ifariŋʼ gamp igi biŋaŋgan Birsiba. 34 Isau udzufan isaŋʼ 40 da iyu sagat iruʼrun, Judit da Basemat. Judit ramaŋgan Beri, da Basemat ramaŋgan Elon, rib iruʼ igi garam Hit. 35 Sagat iruʼ igi inaŋ Isak da finiŋgan Rebeka waŋun ibarabin nidzun aŋu.
Yakop Iyu Isau Nangan Fintidan Sinuŋʼ
1 Isak ifufi sib da maran isap da anuŋʼ isaŋʼ i ruŋʼ raraba nam, ibinigi da irim nan i narun miamun Isau iba da ini rutin, “O, Isau, dzi naruŋʼ.” 27 Da Isau ini, “Ramaŋʼ, dzi aruani. U ni wai?” 2 Da Isak ini, “Aruani da dzi fufi sib da dzi wasruʼ i gubuʼ gaŋʼ mampan u. 3 Wau dampa da biriaŋ gam da wayuŋ apu wap i tipa dzi nifuŋʼ gin. 4 Da wabaŋa apu nasu ntsits ŋarubini tusa dzi waŋʼ da wau waba da dzi nagan da dzi narim naŋgaŋʼ fintidan da agu nasu miamun, ida dzi namus mampan.” 5 Gubuʼ arigi da Rebeka impai da iriŋant i Isak nangan nidan da narun Isau. Gubuʼ Isau taŋinda raman da fada sib i yuŋa apu wap i uda badan, 6 da Rebeka ini da naruŋgan Yakop ini binaʼ, “U riŋantin, aruani da dzi mpai da dzi riŋant i u ramaŋgam nangan nidan da Isau bida ani, 7 ‘Wafan da wau apu maŋan waba da wabaŋa da nasu ntsits bini aŋu da watip dzi nifuŋʼ gin i dzi gadan. Da miŋʼa Yawe maran da dzi buŋʼ arim nangaŋʼ fintidan da agu nasu miamun ida dzi namus mampan.’ 8 Ibinigi da naruŋʼ, wariŋant i dzi bini aŋu da wanaŋ nam nasaŋʼ dzi nidan da agu da aruani: 9 Wafa ntsiŋʼ aga ugu da wau nuniŋ naru faʼ dudubadan iruʼrun naba da dzi. Da dzi natip nam gadan ntsits bini u ramaŋgam maran aridagin yusan. 10 Ida wau wafan da ramaŋgam nagan, da araŋan buŋʼ arim naŋgan fintidan da agu sib, ida namus mampan.” 11 Yakop ini rinaŋgan nangan muŋaʼ ibiani, “Rinaŋʼ. U sruʼ i dzi raiŋgaŋʼ Isau sib wa. Araŋan garam rinifufun yusan, da dzi imaʼ. 12 Da bida anuŋʼ i ramaŋʼ yafusa dzi da rabuba gin? Buŋʼ ani dzi intsaʼa i iyuʼa araŋan da buŋʼ arim nam pupuarapan maisan da dzi, da dzi wasaŋʼ i uda nam fintidan maŋan u.” 13 Da bitsintaʼ rinaŋgan ini, “Dzi naruŋʼ. U maram anuŋʼ fura nan yusan u. Dzi buŋʼ au nam pupuarapan maisan arigi. Da wanaŋ nam nabi dzi nidan da agu igi. Wafan da wau apu iruʼ igi naba da dzi.” 14 Ibinigi da Yakop ifan da iyu apu iruʼ igi iba da rinaŋgan, da rinaŋgan itip nam gadan isaŋʼ ramaŋgan Isak maran aridagin ugu. 15 Ntsupa sib da Rebeka iyu narun tsiraʼ Isau ŋarukui gan bini maŋan miŋʼa uŋar wasaʼ da yatsuf ifan da Yakop, narun isiʼ igi. 16 Araŋan yudzu nuniŋ rinifufun ifa Yakop baŋin da wan da ibuafir sib. 17 Da Rebeka iyu nam ntsits bini da bret fain araŋan tipan ugu da irim da narun Yakop. 18 Yakop iyu nam gadan igi ifan da raman da ini binaʼ, “Ramaŋʼ.” Da raman ini binaʼ, “Hai. U wai igi?” 19 Da Yakop ini, “Dzi Isau, u naruŋgam miamun. Dzi tip nam santan ibi u nidan da dzi ugu. Wauriʼ da waga apu dzi tipa sib ani da warim nam fintidan da dzi.” 20 Da Isak igutin, “Dzi naruŋʼ, u waʼ da apu igi suŋ aŋu ibianuŋʼ?” Da Yakop ini, “U Anutu gam Yawe irim dzi sib, da dzi yu iba suŋ aŋu.” 21 Da Isak ini da Yakop, “Waba uts aŋu da dzi, da dzi nagif agu. Da dzi narabubin nabi dzi naruŋgaŋʼ rururuŋan Isau agu, ma imaʼ.” 22 Yakop ifa uts aŋu raman maran da Isak igif araŋan da ini binaʼ, “U waŋgam nida nan iwaʼ ibi Yakop. Da baŋim ani ibi Isau gan.” 23 Isak anuŋʼ isruʼgin ibi Yakop u, i araŋan baŋin isu rinifufun ibi raiŋgan Isau baŋiŋgan; ibinigi da Isak ifinti araŋan. 24 Da itip igutin ini binaʼ, “Agu dzi naruŋgaŋʼ Isau rururuŋan, ma?” Da Yakop ini, “Hai, dzi araŋan arani.” 25 Da Isak ini, “Ariʼ, dzi naruŋʼ. Wayu apu gam igi waba da dzi nagan, ida dzi narim naŋgaŋʼ fintidan da agu.” Ibinigi da Yakop iyu nam gadan gan iba rim da raman Isak igan, da ifa yu wain gurun iba da araŋan inum. 26 Ida Isak ini da Yakop ibiani, “Dzi naruŋʼ, waba uts aruani da watsutsuf dzi.” 27 Ibinigi da Yakop ifa rutin da itsutsuf araŋan. Gubuʼ Isak tuŋisa Yakop ŋarukui gan atsufan da ifinti araŋan da ini binaʼ, “Dzi naruŋgaŋʼ nam gauntan impuŋ gin isaŋʼ gum maŋan gauntan Yawe naŋan waʼa ŋarubini biŋan. 28 Anutu buŋʼ ataŋin tifituf naruʼ da nanaŋ u intapam nasisuŋʼ i nam gadan, wit nidzun da wain faʼ ampibiŋan. 29 Garam utup utup buŋʼ asu u garam gumam da buŋʼ arim antuŋʼ da narasu ruŋgan da agu. Da u buŋʼ asu nifutsarif i raim rusam fain, da u rinaŋgam narun rusan buŋʼ arasu ruŋgan da agu. Garam pupuarapa ruta agu buŋʼ awaʼ da nam pupuarapan igi muŋaʼ gan. Garam tsarifa agu da naŋa bini aŋu i agu da buŋʼ au nam fintidan nabinigi.” 30 Isak ifinti Yakop sib da Yakop buŋʼ taŋinda raman rai da raiŋgan Isau imiŋʼ wap ibawaʼ. 31 Araŋan ibinigi itip apu ntsits bini da iyu iba da ramaŋgan da ini, “Ramaŋʼ, wampa wayab da waga apu dzi uda badan da agu ani, da wafinti dzi.” 32 Da Isak igut i araŋan, “Agu wai?” Da Isau ini, “Dzi Isau, u naruŋgam miamun.” 33 Isak irunt fafun nidzun aŋu da iratarat iyus da igutin ini binaʼ, “Maŋa arigi iyuŋ apu da iyu imuŋʼ ba da dzi? Dzi ga nam igi da dzi finti araŋan sib, da pas aŋu da u bawaʼ. Da nam fintidan buŋʼ arut araŋan nantiŋ.” 34 Da gubuʼ Isau riŋanta i raman nangan igi da iyaiʼ da iraŋ tsiraʼ biŋan ruta waŋun barabindan da ini binaʼ, “Ramaŋʼ, wafinti dzi nabinigi!” 35 Da bitsintaʼ Isak ini da araŋan ini binaʼ, “U raiŋgam isu umpur tsiraʼ biŋan aŋu da dzi da iyu agu nangam fintidan sib.” 36 Da Isau ini ibiani, “Ramaŋʼ! Biŋan Yakop isaŋʼ araŋan rururuŋan. Muŋʼ da araŋan isu umpur da dzi, da iyu dzi naŋgaŋʼ suda mamaʼ miamun gan da aruani da itip isu umpur da agu da iyu dzi nangaŋʼ fintidan. Da ramaŋʼ, nan fintidan pas u mamida riman da rumiŋʼan, da warim da dzi.” 37 Da Isak ini araŋan nangan muŋaʼ ibiani, “Dzi naŋ araŋan isu garam nifutsarif tsiraʼ i suda wain i agu, da dzi naŋ i rain rusan da utupan isu i garam guman. Wit da wain buŋʼ awaʼ nasisuŋʼ araŋan i dzi rim nam santan igi rutin sib. Da naruŋʼ, dzi bunaŋa bida anuŋʼ i agu?” 38 Da Isau ini da raman, “Ramaŋʼ, nan fintidan igi mani bitsintaʼ aŋu, ma? Wafinti dzi wampruʼ!” Ibinigi da araŋan iraŋ tsiraʼ biŋan aŋu. 39 Da Isak ini araŋan nangan muŋaʼ ibiani, “U gampam mpada gin buŋʼ amiŋʼ guntiʼ i intap nagaran da tifituf maraŋuntun mamida ruaʼa gin. 40 U buŋʼ ais buŋaʼ maiʼ maiʼ i waʼa da nam bunumpam da u buŋʼ asu raiŋgam garam guman aŋu. Da bitsintaʼ raiyi da u buŋʼ araraiʼ i raiŋgam da u buŋʼ antap ruŋgam rai sinuŋʼ araŋan naŋgan mpada tayaŋʼ agu.”
Isak Itaŋin Yakop Ifan da Laban
41 Isau maran ifur nan fintidan Isak riman da Yakop igi, da isu waŋun nidzun aŋu da Yakop. Da ini aŋu imiŋʼ waŋuŋgan ibiani, “Ramaŋʼ gubuʼ gan mampan iba su uts, da bida aga raŋa gin sib, da dzi buŋʼ ais raiŋgaŋʼ Yakop funub.” 42 Da bitsintaʼ gubuʼ Rebeka uda sisiŋʼ i Isau sanaban tipan da inuʼ Yakop ba da ini rutin ibiani, “Wariŋantin, u raiŋgam Isau irasu waŋun barabindan i nangan tipa i isa agu funub. 43-45 Ibinigi da dzi naruŋʼ, wanaŋ wabi dzi nidan, da wafan da dzi nafuŋgaŋʼ Laban da warut wampai namiŋʼ gamp Haran, nasaŋʼ u raiŋgam nuguŋgan nufan da maran samuda nam u naŋan da araŋan. Raiyi da dzi buŋʼ ataŋin rib fain nabiaʼ i tipa uda agu badan. Dzi bugin i taŋinda naruŋʼ rusaŋʼ agam iruʼ igi rai da gubuʼ bitsintaʼ aŋu.” 46 Rebeka ini da Isak ini binaʼ, “Dzi raraiʼ nidzun aŋu i Isau finin rusan, sagat Hit iruʼ ani. Bida Yakop uda sagat Hit ani gan maŋan saŋʼa sagat tuas iruʼ aruani, da dzi naŋgaŋʼ mpadan buŋʼ amais wasi.”
1 Ibinigi da Isak inuʼ Yakop ba da ifinti da ifai nan gin, “Agu anuŋʼ uda sagat Kanan maŋan u. 2 Wauriʼ da wafa rinaŋgam ramaŋgan Betuel gampan miŋʼa intap Mesopotemia, da wau gayaŋgam Laban naruŋgan finam maŋan. 3 Anutu Nampaŋ Wain Tsiraʼ nafinti agu da nautus i u yaŋiŋgam nasu garam wain wain ampibiŋan. 4 Anutu narim nam fintidan da agu da gam yaŋiŋgam nabi nam fintidan ragada muŋʼ da Abraham ugu. Da intap aru Anutu riman da Abraham ugu da u mpada suda marawampua gin ani nasu agamam.” 5 Isak ini ibinigi sib da itaŋin Yakop ifa Mesopotemia da Laban, Betuel garam Aram ugu naruŋgan. Laban igi Yakop da Isau rinaŋgan Rebeka nafuŋgan. 6 Da Isau iriŋant i nan ibi Isak irim nan fintidan sib da Yakop da itaŋin araŋan ifa Mesopotemia i uda sagat miŋʼa nigi, da ipaʼ araŋan i anuŋʼ uda sagat Kanan maŋan u. 7 Da Isau iriŋant ibi Yakop yataŋʼ waraŋʼ i ramaŋgan da rinaŋgan nangan da ifa Mesopotemia sib. 8 Gubuʼ arigi da Isau uwayant ipuʼ i ramaŋgan Isak buginda sagat Kanan igi. 9 Ibinigi da Isau ifan da Ismail, Abraham naruŋgan marub ugu, da itip iyu Ismail naruŋgan Mahalat, Nebaiot nafuŋgan finam, impruʼ da finin rusan iruʼ ugu.
Yakop Naŋgan Puafuban Miŋʼa Betel
10 Yakop itaŋin gamp Birsiba rai da ifa i waʼa gamp Haran. 11 Gubuʼ araŋan waʼa mumai furis wasaʼ maŋan da igiŋʼ igi, i gubuʼ iruʼ sib. Araŋan iyu tauf maragaŋaf da yis gudzun gin isu unubin da igiŋʼ marampruʼ. 12 Da araŋan ipuafub da itsaŋan antim guntiʼ biŋan wain miŋʼa intap da buntun fawaʼa gunuŋun, da itsaŋan Anutu aŋira gan ruʼan da yaban. 13 Da itsaŋan Yawe muntida waguŋʼ gin da nidan, “Dzi Yawe, u rumpuŋgam Abraham da ramaŋgam Isak Anutu gan. Intap aru u giŋʼa gin igi, Dzi buŋʼ arim da agu da yaŋin rusam. 14 U yaŋiŋgam buŋʼ awaʼ nasaŋʼ intap ŋaruntsuaf, da buŋʼ ampa nadzaraŋ nafa gubuʼ yaban da gubuʼ ruʼan da dzraʼ da fiʼ. Miŋʼa agu da yaŋin rusam da garam intap utup utup santan buŋʼ ayu nam fintidan. 15 Da wariŋantin, dzi buŋʼ arut agu da nampa tayaŋʼ agu i sanab idzuwai u fada gin, da dzi buŋʼ atip nau agu naba intap aruani. Dzi buŋʼ anaŋ nam sib aŋu dzi nidan da tagadan da agu nasu nidzun, da dzi wasaŋʼ i taŋinda agu rai u.” 16 Yakop maran itaʼ da ini i waŋuŋgan, “Nan nidzun biŋan, Yawe impai ani, da dzi wasruʼgin u.” 17 Araŋan irat da ini binaʼ, “Mumai aruani inaŋ dzi rat funub aŋu. Mumai aruani isu Anutu uŋaran da gunuŋun muantsi nifuŋgan.” 18 Pisa tataʼ maratait da Yakop iyu tauf suda unub in ugu da yantuŋʼ iyab isu nam maran rufuran. Da iyats madamin iyabin i santiŋʼa bida Anutu mumai gan mararam igi. 19 Yakop ifariŋʼ mumai arigi biŋaŋgan Betel--waiŋgan ‘Anutu uŋaran’. Garam mpada nigi muŋʼ ifariŋʼ gamp igi biŋaŋgan Luts. 20 Yakop itsaf ruan nidzun aŋu da Yawe ini binaʼ, “Anutu, bida u ruta dzi da mpada tayaŋʼ dzi bini i sanab guntiʼ dzi nida fada gin da u rima nam gadan da ŋarukui da dzi, 21 da bida dzi ba tipa waʼa ramaŋgaŋʼ gampan ŋarubini da nigi da agu Yawe buŋʼ asu dzi Anutu gaŋʼ. 22 Da tauf aru dzi antuŋʼan ani naraga mumai aruani nasu U Anutu uŋaram tsarifa Agu gin. Da nam santan u riman da dzi--dzi buŋʼ afab nasaŋʼ 10 da narim 10 igi gan bits da agu.”
Yakop Iwaʼ Laban Gampan
1 Da Yakop ruyuŋ ifan da iwaʼ garam gubuʼ yaban intapan. 2 Da irunt fafun i tsaŋanda mpui rafan maŋan rumiŋʼa intap puatsi manaʼ biŋan igi da dumpa utup iruʼ da bits giŋʼa wafiʼa mpui igi i garam inaŋ da irim mpui arigi rutin. Da tauf tsiraʼ maŋan imiŋʼ sib i mpui nifun igi. 3 Maiʼ maiʼ dumpa santan bawaʼa sib, da garam mpada tayaŋʼ gin inaŋ da irimpiŋʼ tauf igi sinuŋʼ mpui rafan nifun da irim mpui da dumpa inum. Numa mpui sib da garam mpada tayaŋʼ dumpa itip irimpiŋʼ i tauf igi ragun i mpui nifun igi. 4 Yakop igut i ribigi ini binaʼ, “Amaʼ raiŋʼ ruas, agam rib anuŋʼ igi?” Ribaraŋan ini nan muŋaʼ, “Aga rib Haran ani.” 5 Da Yakop ini, “Da agam isruʼ i Laban, Nahor rumpuŋgan?” Da ribaraŋan ini, “Hai, aga sruʼ i araŋan.” 6 Da Yakop igut i ribaraŋan, “Araŋan impa bini ma imaʼ?” Da ribaraŋan ini, “Hai, araŋan rumpa bini. Da tsaŋan, araŋan naruŋgan finam Retsel iyu ramaŋgan dumpa gan iba ani.” 7 Da Yakop ini, “Ibianuŋʼ? I gubuʼ maran biŋan rumiŋʼ da anuŋʼ iwarip iwaʼ i gubuʼ maran tsutsagin ataŋʼan u. Isaŋʼ i agam rima mpui rutin sib da tipa uda fadan da ruŋ gada sai?” 8 Da ribigi ini araŋan nangan muŋaʼ ibiani, “Aga wasaŋʼ i naŋa bidanigi u, nasaŋʼ dumpa sib aŋu nawaʼ nampruʼ ruan sib raiyi da aga namus rimpiŋʼa tauf igi sinuŋʼ mpui nifun da narim mpui da sib aŋu nampruʼ ruan nanum.” 9 Yakop ruŋʼ ruta garam mpada tayaŋʼ dumpa nida nan da Retsel iyu ramaŋgan dumpa gan ibawaʼ, i araŋan impa tayaŋʼ gin. 10 Yakop itsaŋan Retsel, gayaŋgan Laban naruŋgan finam, impruʼ da dumpa gan santan igi da ifa rimpiŋʼ tauf sinuŋʼ mpui nifun da irim mpui da gayaŋgan dumpa gan inum. 11 Da Yakop itsutsuf Retsel da iraŋ ruta nugun tsiaʼan tsiraʼ biŋan. 12 Da araŋan ini da Retsel ibiani, “Dzi Rebeka naruŋgan marub, u ramaŋgam Laban nafuŋgan finam.” Retsel iriŋantin da irunt suŋ aŋu ifan da ini da ramaŋgan. 13 Da gubuʼ aru Laban uda sisiŋʼ i nafuŋgan naruŋgan Yakop badan igi, da irunt ifan da iwaʼ da araŋan. Da impuŋ araŋan ufiak aŋu da itsutsuf araŋan da iyu iba uŋar. Waʼa uŋar sib da Yakop ifis i nam sib aŋu waʼan da araŋan ugu. 14 Da Laban ini, “Nan nidzun biŋan, agi biʼ bitsintaʼ aŋu.”
Yakop Inaŋ Gum i Laban Iyab i Lia da Retsel
Yakop irut gayaŋgan impai nigi isaŋʼ ukam maŋa sib, 15 da Laban ini da araŋan, “Dzi gaŋʼ rururuŋan agu, da bitsintaʼ anuŋʼ idaum i u naŋa gum utaʼ aŋu i dzi u. Wani da dzi i nam bunumpam u nida udan gudzuŋgan i gum u naŋan. 16 Da Laban narun rusan finam iruʼrun rumpai; miamun Lia da isiʼ Retsel. 17 Lia mara nidzun gan idaum aŋu, da bitsintaʼ Retsel araŋan aruf mararifirif biŋan iyus Lia i maraŋgan da nidzuŋgan santan. 18 Yakop maran yari i Retsel nidzun aŋu, ibinigi da ini da Laban, “Dzi buŋʼ anaŋ gum nayab i agu nasaŋʼ udzuf 7 i uda u naruŋgam isiʼ Retsel suda dzi finiŋgaŋʼ.” 19 Da Laban ini, “Bini aŋu da dzi buŋʼ arim da agu i rib fain aga mayu i. Nabinigi da warut dzi nampai.” 20 Ibinigi da Yakop inaŋ gum udzuf 7 i uda Retsel, da itsaŋan udzuf 7 igi ibi nam utaʼ aru maŋan aŋu isaŋʼ gubuʼ iruʼ aŋu, i araŋan maran yari nidzun aŋu i Retsel. 21 Udzuf 7 arigi intsup sib da Yakop ini da Laban, “Yaʼ! Dzi udzufaŋʼ naŋa gum i agu ugu iba ntsup sib, da warim dzi finiŋgaŋʼ ba da dzi i dzi udan.” 22 Ibinigi da Laban isu nam gadan tsiraʼ bintsudagin da irim nan da ampan santan gamp arigi iwaʼ da iga nam. 23 Da idziaŋ arigi da Laban iyu Lia iba da Yakop da Yakop irut igiŋʼ. ( 24 Da Laban irim sagat gum maŋan, Tsilpa, da Lia.) 25 Gubuʼ pisan da Yakop irunt fafun i tsaŋanda Lia. Da araŋan ifa ni da Laban, “Wain idzuwai gan ani da u naŋ uwayant bida ani da dzi? Dzi naŋ gum aŋu i Retsel. Da ibianuŋʼ da u bu iyuʼ dzi i rima Lia?” 26 Laban ini araŋan nangan muŋaʼ ibiani, “Aga sanabaŋʼ anuŋʼ ibinigi, mamaʼ finam bampan suda gabun muŋʼ da miamun rumpadan u. 27 Wampai nasaŋʼ suntaʼ bintsudan ani ntsupan, ida dzi namus rima Retsel da agu, da u buŋʼ atip anaŋ gum i dzi nasaŋʼ udzuf 7 maŋan.” 28 Yakop itaga ruan da irut Lia impai isaŋʼ suntaʼ arigi ntsupan. Ida Laban irim Retsel da Yakop isu araŋan finiŋgan. ( 29 Laban itaŋin sagat gum, Bilha, da Retsel.) 30 Da Yakop irut Retsel impai da maran yari i araŋan nidzun aŋu iyus Lia. Da araŋan itip inaŋ gum i Laban isaŋʼ udzuf 7 maŋan.
Yakop Narun Rusan
31 Da Yawe itsaŋan ibi Yakop maran yari i Retsel iyus Lia, ibinigi da irim Lia sib i uda i mamaʼ narun. Da bitsintaʼ Retsel isu sagat yami. 32 Lia iwaŋun da irim narun marub maŋan da ifariŋʼ i biŋaŋgan Ruben (waiŋgan ibi ‘watsaŋa, narun marub’), da ini, “Yawe itsaŋan dzi waŋu barabin gaŋʼ sib; aruani da dzi gabuŋgaŋʼ maran buŋʼ ari dzi.” 33 Raiyi da Lia itip iwaŋun da irim narun marub maŋan da ini ibiani, “Yawe iriŋantin ibiani, Yakop maran wari i dzi isaŋʼ maran arida i Retsel u, da irim mamaʼ narun maŋa ani da dzi.” Ibinigi da ifariŋʼ mamaʼ narun igi biŋaŋgan Simion (waŋgan fariŋʼan iwaʼ ibi ‘riŋantagin’). 34 Impa da Lia itip iwaŋun da irim narun marub maŋan da ini, “Aruani da dzi gabuŋgaŋʼ buŋʼ amits dzi da wasaŋʼ taŋinda dzi rai, i dzi rim araŋan narun rusan marub iruʼ da bits,” da ifariŋʼ i biŋaŋgan Liwai (waŋgan fariŋʼan iwaʼ ibi ‘udzuda mpruaʼa ruan’). 35 Da Lia itip iwaŋun gin da irim narun marub maŋan da ini, “Gubuʼ aruani da dzi buŋʼ atsarif Yawe biŋaŋgan.” Ibinigi da Lia ifariŋʼ mamaʼ narun igi biŋaŋgan Yuda (waŋgan fariŋʼan iwaʼ ibi ‘tsarifan’). Ntsupa sib da araŋan watip irim mamaʼ narun u.
1 Retsel itsaŋa ruŋgan ibi anuŋʼ irim Yakop naruŋgan da nugun iruaʼ i raiŋgan da ini da Yakop ibiani, “Warim narum da dzi amaʼ. I bida anuŋʼ da dzi buŋʼ amamp.” 30 2 Yakop nugun isasus i araŋan da ini binaʼ, “Isaŋʼ i dzi uda Anutu mumai gan i naŋa nam Anutu naŋan? Imaʼ! Araŋan runtaʼ aŋu isu wain i udzuda agu i mamida rima narum.” 3 Da Retsel ini, “Dzi sagat gumaŋʼ Bilha aruani. Nabiaʼ da warut wagiŋʼ da narim mamaʼ narun i dzi biŋaŋgaŋʼ da dzi nasu rinan gin. I miŋʼa araŋan da dzi buŋʼ autus i yaŋiŋgaŋʼ.” 4 Ibinigi da Retsel irim sagat guman Bilha ifan da Yakop isu i finiŋgan. Da Yakop irut igiŋʼ, 5 da Bilha iwaŋun da irim Yakop naruŋgan marub maŋan. 6 Da Retsel ini binaʼ, “Anutu iraru agai da imunti maran udzib da dzi da iriŋant i dzi nangaŋʼ udagin da irim mamaʼ narun aruani da dzi.” I wain igi da ifariŋʼ i biŋaŋgan Dan (waiŋgan ibi ‘iraru’). 7 Retsel sagat guman Bilha itip iwaŋun da irim Yakop naruŋgan marub maŋan. 8 Da Retsel ini binaʼ, “Dzi yis gudzun nidzun aŋu da raiŋgaŋʼ da aruani dzi waʼ da nam nidzun sib.” Ibinigi da araŋan ifariŋʼ i biŋaŋgan Naftali (waiŋgan ibi ‘isa gudzun’). 9 Gubuʼ Lia tsaŋanda bida araŋan watip irim narun u, da irim sagat guman, Tsilpa, da Yakop da araŋan iyu isu i finiŋgan. 10 Lia sagat guman Tsilpa irim Yakop naruŋgan marub maŋan. 11 Da Lia ini, “Dzi rab ruŋgaŋʼ intiŋ aŋu.” Ibinigi da araŋan ifariŋʼ i biŋaŋgan Gat (waiŋgan ibi ‘raba ruŋgan ntiŋan aŋu’). 12 Impai da Lia sagat guman itip irim narun marub maŋan. 13 Da Lia ini, “Dzi nuguŋʼ inuf wasi biŋan. Sagat sib aŋu buŋʼ ani dzi sagat nuguŋʼ tsiaʼan.” Ibinigi da araŋan ifariŋʼ i biŋaŋgan Aser (waiŋgan ibi ‘nugun tsiaʼan’). 14 Gubuʼ safa wit ibawaʼ da Ruben ifa gum wit da itsaŋan nam nidzun fain turuda sagat i waŋundan rumiŋʼan. Araŋan iyu i nidzuŋgan da iyu ifan da rinaŋgan Lia. Retsel itsaŋan da ini, “Amaʼ Lia, isaŋʼ u rima naruŋgam nam nidzuŋgan fain da dzi?” 15 Da bitsintaʼ Lia ini da Retsel, “Mani nidzun araŋan igi i u uda dzi gabuŋgaŋʼ sinuŋʼ dzi? Da aruani da u ni tipa uda dzi naruŋgaŋʼ naŋgan uda badan da dzi ani mpruʼan, a!” Da Retsel ini, “Isaŋʼ. Bida u rima naruŋgam nam nidzuŋgan fain da dzi, da Yakop buŋʼ arut agu nagiŋʼ da idziaŋ aruani.” 16 Gubuʼ Yakop miŋʼa gum ba da nam nufan arigi da Lia imiŋʼ sanab ifa i araŋan da ini rutin, “U buŋʼ rut dzi nagiŋʼ da idziaŋ aruani, i dzi rim nam ntsuman sib i agu i gai nidzun dzi naruŋgaŋʼ uda badan.” Ibinigi da Yakop irut araŋan igiŋʼ da idziaŋ arigi. 17 Anutu iriŋant i Lia nangan udagin da araŋan iwaŋun da irim Yakop naruŋgan maŋan isu 5. 18 Da Lia ini binaʼ, “Dzi taŋin sagat gumaŋʼ da gabuŋgaŋʼ, ibinigi da Anutu irim i muŋaʼ gan bini aŋu da dzi.” Ibinigi da Lia inuʼ araŋan biŋaŋgan Isakar (waŋgan fariŋʼan iwaʼ ibi ‘rima i muŋaʼ gan bini’). 19 Raiyi da Lia itip iwaŋun da irim Yakop narun marub maŋan ifa 6. 20 Da ini binaʼ, “Anutu irim mara ampi bini da dzi. Da aruani dzi gabuŋgaŋʼ nifun buŋʼ atsaf dzi nidzun aŋu, i dzi rim araŋan narun rusan marub isaŋʼ 6.” Ibinigi da Lia inuʼ araŋan biŋaŋgan Tsebulun (waŋgan fariŋʼan iwaʼ ibi ‘nifun tsafan’). 21 Raiyi da Lia itip irim narun finam maŋan da inuʼ i biŋaŋgan Daina. 22 Da Anutu maran rufur Retsel i nangan udagin da itus muantsi i araŋan waŋuŋgan da araŋa saŋʼ i rima narun. 23 Ibinigi da araŋan iwaŋun da irim narun marub maŋan da ini binaʼ, “Anutu itias dzi miaʼ gaŋʼ rai.” 24 Da inuʼ araŋan biŋaŋgan Yosef (waiŋgan ibi ‘rima ragun i ruan’). Da itip ini binaʼ, “Dzi maraŋʼ yari i Yawe tipa suda mara ampi i marub maŋa atsuŋʼa ani.”
Yakop Apu Gan Inti
25-26 Gubuʼ Retsel rima Yosef sib da Yakop ini da Laban ibiani, “Dzi naŋ gum i agu isaŋʼ udzuf 14 sib, da dzi ni tipa fada gampaŋʼ wain. Da wataŋin dzi finiŋʼ rusaŋʼ da naruŋʼ rusaŋʼ ba i dzi ruta fadan, i dzi naŋ gum tsiraʼ i agu iyab i sagat iruʼ igi. Da u sruʼgin sib wa.” 27 Da bitsintaʼ Laban ini da araŋan ibiani, “Dzi gaib ruŋgaŋʼ da agu i anuŋʼ fadan u. I dzi tsaŋa Yawe inaŋ bini i dzi, i wain ibi u rut dzi impai. Ibinigi da wampai da watip wanaŋ gum i dzi. 28 Da wani nam bunumpam u nida udan da dzi, da dzi buŋʼ arim da agu.” 29 Da Yakop ini, “U tsaŋa dzi gumaŋʼ naŋa i agu sib iyab i u apu gam waʼa bini da yusan da gubuʼ dzi mpada tayaŋʼ gin. 30 Muŋʼ aru dzi mamida badan ugu da u mpa tayaŋʼ apu gam iruʼ aŋu. Da gubuʼ dzi bawaʼan da ruta agu mpadan da u apu gam inti iyus, i Yawe ifinti agu iyab i gum dzi naŋa i agu sib da inaŋ agu isu garam nidzun. Da dzi burima utupaŋʼ sib bida anuŋʼ?” 31 Da Laban igut i araŋan, “Da u maram ifur nam bunump idzuwai i dzi riman da agu?” Da Yakop ini, “Dzi wani u rima nam maŋan da dzi u. Imaʼ. Dzi buŋʼ autus gumaŋʼ mpada tayaŋʼ u apu gam, bida u uda dzi nangaŋʼ bida ani yaban: 32 Aruani da dzi buŋʼ ayuŋ natsuar u dumpa gam da nuniŋ gam santan da nau dumpa marabusuŋ da rinin puatpuatagin da nuniŋ rinin puatpuatagin nasu dzi nam bunumpaŋʼ. 33 Bida u tsaŋanda nuniŋ maŋan rinin mamida puatpuatagin ma dumpa maŋan rinin maragamp miŋʼa dzi gin, da u buŋʼ asruʼgin nabi dzi wap. Nigi buŋʼ asu gum isiʼ da agu i u tsaŋandan dumpa da nuniŋ dzi uda suda nam ntsuman, da u buŋʼ asruʼgin nabi dzi yatsuŋʼ nangaŋʼ rururuŋan, ma imaʼ.” 34 Laban iriŋantin da ini binaʼ, “Ŋarubini. Wanaŋ wabi u nidan.” 35 Da bitsintaʼ gubuʼ arigi da Laban ipiriaŋ nuniŋ gan arapuʼ da rinan rini maragamp puatpuatagin ma umpuar tariŋʼan impruʼ da dumpa marabusuŋ santan da itaŋin ifa da narun rusan marub i mpada tayaŋʼ gin. 36 Laban irut riban iyu apu gan piriaŋʼan ugu da ifa guntiʼ isaŋʼ yuŋa gubuʼ iruʼ da bits. Da Yakop rumpa tayaŋʼ Laban dumpa gan da nuniŋ gan fain. 37 Da Yakop irab gai baŋin rururuŋan fain imiŋʼ gai iruʼ da bits biŋaŋgan popla da almon da plen, da itsuwaʼ i gaŋan itaŋin taŋin gin da gai igi isap wasaʼ wasaʼ gin. 38 Da idamaŋʼ uts da piaŋʼ numa mpui gin i Laban nuniŋ da dumpa gan bada i numa mpui da raraban. Yakop isruʼgin i gubuʼ nuniŋ da dumpa bada i numa mpui da arapuʼ buŋʼ ayab i rinan. 39 Ibinigi da gubuʼ arapuʼ yaba i rinan uts da gai baŋin igi da buŋʼ apiŋʼ narun rinin puatpuatagin da umpuar tariŋʼan. 40 Yakop ibibi i apu naru faʼ rinin ruga rugan ifa munti utup utup da apu santan yaba i ruan maran ifan da apu naru faʼ marabusuŋ da umpuar tariŋʼan igi. Araŋan inaŋ ibinigi da ruŋgan isu wain i gan dumpa gan da nuniŋ gan, da wampruʼ ifan da Laban gan u. 41 Da gubuʼ dumpa da nuniŋ riniurun naŋa i yaba i ruan da Yakop irim gai baŋin uts sib in i mpui numan igi. Da itsaŋan gai igi da iyab i ruan. 42 Da gubuʼ dumpa da nuniŋ awan maʼan naŋa i yaba i ruan da Yakop warim gai igi u. Ibinigi da dumpa da nuniŋ awan maʼan ifan da Laban, da riniurun ibafa da Yakop. 43 Yakop sanaban naŋa bidanigi da araŋa isu garam nam bunump tsiraʼ i dumpa da nuniŋ ampibiŋan impruʼ da garam da sagat gum, kamir da doŋki.
Yakop Intsuŋ Ifa Sinuŋʼ Laban
1 Yakop iriŋant i Laban narun rusan nangan nida yaba i araŋan bida ani, “Yakop iyu agi ramaŋgaŋʼ naŋgan santan da isu garam nidzun i nam bunump tsiraʼ.” 2 Yakop itsaŋan Laban uwayantan yitam i ruan da maran anuŋʼ yari i araŋan ibi miamun ugu u. 3 Da Yawe ini da Yakop ibiani, “Watip wafa rumpum rusam da utupam gampan. Da Dzi buŋʼ arut agu.” 4 Ibinigi da Yakop irim sisiŋʼ da Retsel da Lia i badan da araŋan miŋʼa araŋan mpada tayaŋʼ apu gan gin. 5 Rib iruʼ igi ibawaʼ da araŋan ini da ribaraŋan ibiani, “Dzi tsaŋa agam ramaŋgam uwayantan naŋa yaba i dzi da aruani wabi aru muŋʼ araŋan tida naŋan ugu u, da bitsintaʼ dzi ramaŋgaŋʼ Anutu gan rurut dzi. 6 Agam itsaŋa dzi gumaŋʼ uwats uwats tsiraʼ naŋa yaba i agam ramaŋgam sib wa, 7 da bitsintaʼ araŋan iti ini nan umpur da dzi da nifu-nangan iyuʼan ampibiŋan isaŋʼ 10 i nam bunump riman da dzi. Da bitsintaʼ Anutu imunti sib i araŋan i anuŋʼ ŋauŋʼa dzi u. 8 Bida araŋan nidan, ‘Apu rinin puatpuatagin nasu u naŋgam,’ da apu santan irim narun puatpuatagin isaŋʼ ruan. Da bida araŋan nidan, ‘Apu umpuar tariŋʼan nasu u naŋgam,’ da apu santan irim narun umpuar tariŋʼan isaŋʼ ruan santan. 9 I sanab bidanigi da Anutu iyu agam ramaŋgam nuniŋ da dumpa gan sinuŋʼ da irim da dzi. 10 Miŋʼa nuniŋ arapuʼ da rinan gubuʼ gan yaba i ruan, da dzi tsaŋa nam puafuban maŋan i nuniŋ arapuʼ rinin umpuar tariŋʼan da puatpuatagin aŋu yaba i nuniŋ rinan. 11 Miŋʼa nam puafuban igi da Anutu aŋira gan ini da dzi ibiani, ‘Yakop.’ Da dzi ni, ‘Dzi rumpai.’ 12 Da aŋira ini binaʼ, ‘Watsaŋan nuniŋ arapuʼ rinin umpuar da puatpuatagin ruŋgan aŋu iyab i rinan. Dzi naŋ ibinigi, i wain ibiani, dzi tsaŋan nam santan Laban naŋa yaba i agu sib wa. 13 Dzi Anutu aru waʼan da agu miŋʼa Betel, mumai u antuŋʼa tauf da yatsa madamin gin da tagada ruam i tsarifa dzi runtaʼ aŋu gin ugu. Wauriʼ da wataŋin gamp ani rai suŋ aŋu da watip wafa gampam wain.’ ” 14 Retsel da Lia iriŋant i nan igi da ini binaʼ, “Aga biŋaŋgaŋʼ maŋan wamiŋʼ impruʼ da aga ramaŋgaŋʼ i nam bunumpan maŋan u. 15 Ramaŋʼ inaŋ agai ibi rib marawampua. Araŋan itaŋin agai da agu da iyu nam bunump in da iga nam bunumpan araŋan santan sib. 16 Da nam bunump santan Anutu uda sinuŋʼ araŋan isu agi da naruŋʼ rusaŋʼ naŋgaŋʼ rururuŋan. Da wanaŋ nam nabi Anutu nidan da agu.” 17 Ibinigi da Yakop itaŋin narun rusan da finin rusan iyab kamir, 18 da itsuts i apu gan santan uda miŋʼa Mesopotemia i fada da ramaŋgan Isak i gan gampan Kanan. 19 Da gubuʼ ribaraŋan naŋa i fadan da Laban ifa sib i trapa dumpa gan rinifufun da Retsel iwap mugus maraganun miŋʼa ramaŋgan uŋaran sib. 20 Yakop irim umpur i Laban, garam Aram, da idzigin nan gin da irunt ifa gan arun. 21 Araŋan iyu nam bunumpan santan da irunt, yis mpui Yufretis udziʼ ifa marafain da iyuŋ ifa i waʼa intap mamai Giliat.
Laban Irunt Yatsuŋʼ Yakop
22 Gubuʼ suda iruʼ da bits da Laban iyu sisiŋʼ ibi Yakop irunt an arun. 23 Laban iyu gan utupan da irunt yatsuŋʼ Yakop isaŋʼ gubuʼ 7 da iwaʼ da araŋan miŋʼa intap mamai Giliat. 24 Da Anutu iwaʼ da Laban (garam Aram) da idziaŋ i nam puafuban da ini da araŋan ibiani, “Watsaŋa ruŋgam sib i nangam nidan da Yakop.” 25 Yakop irut utupan yari uŋar impai imiŋʼ mamai Giliat, da gubuʼ arigi da Laban irut utupan iba tsaŋan da impa marafain. 26 Da Laban ifan da Yakop da ini, “Wain idzuwai da u rim umpur i dzi da u yu dzi naruŋʼ rusaŋʼ finam ani iba ibi sagat wapan miŋʼa wasaʼ i nam isan? 27 Ibianuŋʼ da u kup aŋu i dzi da u runt iba? U madani da dzi da dzi dasu nam gadan da aga daŋump nam da dataŋin agam rai ruta nam nugun tsiaʼan. 28 U runt asub da dzi watsutsuf rumpuŋʼ rusaŋʼ da naruŋʼ rusaŋʼ maŋan u. U naŋ uwayant maisan biŋan. 29 Dzi saŋʼ i wayada agam, da bitsintaʼ idziaŋ ugu da u ramaŋgam Anutu gan ini da dzi ibiani, ‘Watsaŋa ruŋgam sib i nangam nidan da Yakop.’ 30 Dzi sruʼgin ibi u maram ifur iyus i tipa fada gam gampam wain da u taŋin dzi rai. Da bitsintaʼ wain idzuwai da u wap dzi mugusaŋʼ maraganun sib?” 31 Da Yakop ini da Laban, “Dzi rat i u buŋʼ ayu narum rusam finam iruʼ ani sinuŋʼ dzi, ibinigi da dzi kup i agu da dzi runt iba. 32 Da bida u tsaŋanda aga maŋan uda u mugusam da araŋan namamp. Miŋʼa agi utupaŋʼ maraŋgan, da waba sau gam naŋgam da wau.” Da bitsintaʼ Yakop wasruʼgin ibi Retsel iwap ramaŋgan mugusan u. 33 Ibinigi da Laban yataŋʼ Yakop uŋaran apu rinigaŋan da isau. Nigi ntsup sib da yataŋʼ Lia uŋaran da inaŋ ibinigi. Araŋan inaŋ ibinigi aŋu i sagat gum iruʼrun impruʼ, da bitsintaʼ wawaʼ da mugusan igi u. Ntsupa uŋar igi sib da yataŋʼ Retsel uŋaran. 34 Retsel iyu ramaŋgan mugus maraganun da ifaraŋʼ iruʼ nam rima yaba kamir barun i garam gar mpada gin da impa ragun gin. Laban iŋuar i nam sib aŋu imiŋʼ uŋar wasaʼ da wawaʼ rutin u. 35 Retsel ini da ramaŋgan ini binaʼ, “Ramaŋʼ, dzi gaib ruŋgaŋʼ da agu i dzi wasaŋʼ i muntida yaba u maraŋgam u. I dzi yu ukam.” Ibinigi da Laban iŋuar i nam bunump santan da wawaʼ da gan mugus maraganun maŋan u. 36 Yakop nugun iruaʼ nidzun aŋu i Laban da impiʼ ini binaʼ, “Dzi naŋ nam idzuwai asub? Nam maisan idzuwai dzi naŋ da u daru dzi ibi garam asub?” 37 U ŋuar i dzi naŋgaŋʼ santan da u waʼ da naŋgam idzuwai? Warim namiŋʼ wasaʼ i u ribam da dzi ribaŋʼ maran da ribaraŋan natsaŋan i maŋan nangan isu nidzun, dzi ma agu. 38 Dzi naŋ gum i agu isaŋʼ udzuf 20 aruani. Dzi mpa tayaŋʼ u dumpa gam da nuniŋ gam ŋarubini biŋan aŋu da sib aŋu irim narun bini. Da dzi waga dumpa arapuʼ maŋan imiŋʼ u gin u. Imaʼ aŋu. 39 U apu gam idzuwai apu buman ma garam wapan da gubuʼ ma idziaŋ, da u rim ririŋʼ da dzi i dzi rima muŋaʼ gan. Ibinigi da gubuʼ apu buman garada dumpa ma nuniŋ funub, da dzi wayu iba santiŋʼ agu gin u. Imaʼ. Dzi ruŋgaŋʼ irim muŋaʼ i nigi. 40 Dzi gumaŋʼ ibinigi: gubuʼ igauf dzi funub da idziaŋ raŋaraŋ gan idadaum dzi da dzi sau marampruʼ giŋʼan. 41 Udzuf 20 dzi ruta agu mpadan ugu ibiani: dzi naŋ gum i agu isaŋʼ udzuf 14 i uda u narum rusam finam iruʼ ani da dzi naŋ gum i agu isaŋʼ udzuf 6 i uda apu miŋʼa agu gin. Da u iyuʼ iyuʼ dzi i u nifuŋgam nidan isaŋʼ 10 i nam bunumpaŋʼ da u anuŋʼ irim rururuŋan. 42 Da bida dzi rumpuŋgaŋʼ Abraham da ramaŋgaŋʼ Isak Anutu gan aru garam rata gin damami ruta dzi, da u madawat dzi rai dafa baŋi sasaʼ aŋu. Da bitsintaʼ Anutu irarab dzi gumaŋʼ uwats uwats da dzi baŋiŋgaŋʼ taŋinda ruʼan, ibinigi da idziaŋ ugu Anutu ini u uwayantam maisan u naŋa yaba i dzi ugu wasi da agu.” Nan Udzudan Miŋʼa Wasaʼ i Yakop da Laban 43 Ibinigi da Laban ini Yakop nangan muŋaʼ ibiani, “Sagat iruʼ igi isu dzi naruŋʼ rusaŋʼ. Da narun rusan isu dzi gaŋʼ, da apu igi isu dzi apu gaŋʼ. Watsaŋan! Nam santan aru u udan igi isu dzi naŋgaŋʼ. Da bitsintaʼ dzi nanaŋ nabianuŋʼ i dzi naruŋʼ rusaŋʼ finam iruʼ igi da narun rusan? 44 Da agi naudzu nan da nanaŋ nam maŋan namunti wasaʼ i agu da dzi i agi maraŋʼ rufura nan udzudan igi.” 45 Ibinigi da Yakop iyu tauf guntiʼ maŋan da yantuŋʼ imunti isu dubuŋ. 46 Da ini da gayan rusan impruʼ ini binaʼ, “Agam wafura i tauf ba da wantuŋʼ wampruʼ da ruan nasu marabuntup.” Ibinigi da ribaraŋan iyufum tauf isu marabuntup sib da impruʼ ruan impai uts da tauf ufuman igi da iga nam iyab i nam udzudan igi. 47 Laban ifariŋʼ tauf ufuman igi biŋaŋgan Yegar Sahaduta, da Yakop ifariŋʼ ini Galid. 48 Da Laban ini, “Tauf ufuman ani isu ampap i rima maran furan i nan udzudan muntida wasaʼ i agu da dzi da aruani da fadan.” I wain igi da Yakop ifariŋʼ ini Galid. 49 Da itip ifariŋʼ i biŋaŋgan maŋan Mitspa (waiŋgan ibi ‘mumai miŋʼa wasaʼ tsaŋanda muŋaʼ da muŋʼa sib’), i Laban ini, “Gubuʼ agi taŋinda ruaŋʼ rai da Yawe namunti wasaʼ i agu da dzi da natsaŋa agi ragun i agi anuŋʼ atupa nangaŋʼ udzudan ani sib u. 50 Da bida u naŋa dzi naruŋʼ rusaŋʼ finam ani naŋgan mpadan maisa wasi ma u tipa uda sagat faʼ mpruʼan da garam maʼan i tsaŋandan da mamida barima sisiŋʼ da dzi da maram wafur, Anutu imunti wasaʼ da irarab agi sib.” 51 Laban ini da Yakop impruʼ ibiani, “Watsaŋan tauf guntiʼ ruŋ muntidan ani da tauf dzi ufuman suda marabuntup mpruʼan miŋʼa wasaʼ i agi iruʼ ani. 52 Tauf guntiʼ da tauf marabuntup ani isu nam maran furan nan utusa i ruan gin. Dzi wasaŋʼ atupa ampap tauf ani sib i wayada agu u, da agu anuŋʼ atupa tauf ani sib bada marafain i wayada dzi u. 53 Abraham da Nahor da ramaŋgan Tera Anutu gan buŋʼ amunti wasaʼ i raruda agu da dzi bida agi maŋa runta asub.” Ibinigi da Yakop itsarif ruan da Laban i ramaŋgan Isak Anutu gan biŋaŋgan aru rib rata nidzun aŋu gin ugu. 54 Da itsara apu da Anutu imiŋʼ mamai igi da inuʼ gayan rusan iba da irut impruʼ ruan iga nam. Gada nam sib da ribaraŋan santan igiŋʼ nigi. 55 Pisa tataʼ maŋan nigi da Laban itsutsuf rumpun rusan da narun rusan finam iruʼ igi da ifinti ribaraŋan. Da araŋan itip ifa gampan.
Yakop Itip Ruŋgan i Waʼan da Isau
1 Yakop ibinigi irut utupan yuriʼ da imiŋʼ sanaban ifan da Anutu aŋira gan utup maŋan iwaʼ da araŋan imiŋʼ sanab igi. 2 Yakop itsaŋa da ini, “Mumai aruani isu Anutu gampan siŋa-ari.” Ibinigi da Yakop ifariŋʼ i biŋaŋgan Mahanaim, waiŋgan ibiani ‘gamp siŋa-ari iruʼrun’. 3 Gubuʼ arigi da Yakop raiŋgan Isau impa imiŋʼ intap Seir, biŋan maŋan Idom. Yakop itaŋin garaman uda sisiŋʼ imuŋʼ ifan da araŋan raiŋgan Isau. 4 Yakop ini da garam uda sisiŋʼ i uda araŋan nifuŋgan fadan da nidan da Isau bida ani, “Garam tsiraʼ Isau, gam garam gumam Yakop itaŋin nan bida ani, ‘Dzi rut gayaŋʼ Laban impai iba isaŋʼ bawaʼan da aruani. 5 Dzi saŋʼ i makau, doŋki, dumpa da nuniŋ, garam gum da sagat gum. Aruani da dzi taŋin nan ibiaʼ da dzi garam tsiraʼ gaŋʼ agu da dzi gaib ruŋgaŋʼ da agu i u maram arida i dzi.’ ” 6 Da gubuʼ garam rima sisiŋʼ tipa bawaʼan da Yakop da ini binaʼ, “Aga yu sisiŋʼ ifan da u raiŋgam Isau da aruani da araŋan imiŋʼ sanab iba i tsaŋanda agu, da garam 400 irut araŋan iba.” 7 Yakop iriŋant i nan igi da irat nidzun aŋu da waŋun ibarabin da maran ifur nan iyus. Ibinigi da araŋan itsaf gan garaman santan ruta araŋan badan ugu isu utup iruʼrun da itsaf dumpa da nuniŋ, makau da kamir isaŋʼ utup iruʼrun ibinigi. 8 Araŋan maran ifur ibiani, “Bida Isau badan da ruta utup maŋan isa ruan da waŋidan da utup maŋan isaŋʼ runtan.” 9 Da Yakop yugin ibiani, “O dzi rumpuŋgaŋʼ Abraham da ramaŋgaŋʼ Isak Anutu gan. O Yawe, agu ni da dzi ibiani, ‘Watip wafa gampam wain da gam utupam, da dzi buŋʼ ampa tayaŋʼ agu da nanaŋ u naŋgam mpadan nawaʼ ŋarubini aŋu.’ 10 U garam gumam dzi ani wadaum i u naŋgam maram aridan da mpada tayaŋʼ dzi da gubuʼ santan. Gubuʼ aru dzi isa mpui Jordan ani udziʼ ugu da dzi ba baŋi sasaʼ--dzi gif itipaŋʼ aŋu. Da bitsintaʼ aruani dzi tip iba impruʼ da utupaŋʼ iruʼrun. 11 O Yawe, warim dzi sib i dzi rat i dzi raiŋgaŋʼ Isau buŋʼ aba da nais dzi nampruʼ da sagat da mamaʼ narun santan. 12 Da bitsintaʼ u ni da dzi sib ibiani, ‘Dzi buŋʼ ampa tayaŋʼ agu da nanaŋ u naŋgam mpadan nawaʼ ŋarubini aŋu, da nautus u yaŋin rusam nayus nasaŋʼ sasanuai miŋʼa uruts riŋan, da garam gar maŋan wasaŋʼ i farisan fantsupa sib u.’ ” 13 Giŋʼa arigi da idziaŋ, da pisan da araŋan irants nam riman da raiŋgan Isau: 14 nuniŋ rinan 200 da nuniŋ arapuʼ 20, dumpa rinan 200 da dumpa arapuʼ 20, 15 kamir rinan 30 ruta narun ruas, makau rinan 40 da makau arapuʼ 10, doŋki rinan 20 da doŋki arapuʼ 10. 16 Araŋan itaŋin garam guman imunti isaŋʼ apu gan utup utup igi santan i muŋʼa gin da ini binaʼ, “Agam wayu apu ani da wamuŋʼ wafa i dzi da wayuŋ da wataŋin taptap i ruam.” 17 Yakop isantiŋʼ nan da garam guman muŋʼa miamun ibiani, “Gubuʼ dzi raiŋgaŋʼ Isau bawaʼan da agu da guta i agu, ‘Maŋa garam guman agu, da agu fa anuŋʼ, da maŋa apu gan ani?’ 18 Da wani wabiani, ‘Yakop, u garam gumam, apu gan sib ani. Da itaŋin iba da agu, dzi garamaŋʼ tsiraʼ Isau, i suda u naŋgam. Da araŋan ruŋʼ iyuŋ imiŋʼ bampan i agai.’ ” 19 Da ruŋʼ ini nan ibinigi da garam gum atsuŋʼa ba da miŋʼa wasaʼ ibinigi aŋu ifan isaŋʼ garam gum santan, “Agam wani nan bitsintaʼ aru dzi nidan da agam igi da gubuʼ agam waʼan da araŋan. 20 Da wani nan wasi rutin nabiani, ‘U garam gumam Yakop ruŋʼ imiŋʼ bampan iba i agai.’ ” I araŋan maran ifur ibiani, “Bida dzi taŋinda nam ani muŋʼan da dzi buŋʼ arasu araŋan waŋu tsakia gan muŋʼ ugu. Da gubuʼ araŋan bawaʼan da dzi da maran buŋʼ asamu waŋu tsakia gan igi, da nugun buŋʼ anuf i dzi da nau dzi nayab.” 21 Ibinigi da Yakop itaŋin apu rima suda Isau gan ugu imuŋʼ ifan. Da idziaŋ arigi da araŋan ruŋʼ igiŋʼ mumai igi.
Yakop da Anutu Idabir i Ruan
22 Idziaŋ arigi da Yakop yuriʼ da iyu finin rusan iruʼ da sagat guman iruʼ igi impruʼ da narun rusan marub 11 da yis mpui Jabok udziʼ ifa marafain. 23 Araŋan itaŋin ribigi ifa sib marafain da itip iba da ini da garam gum i uda nam bunump santan fada marafain mpruʼan. 24 Yakop runtaʼ ruŋʼ impai nigi da garam maŋan iwaʼ rutin, da irut impuŋ ruan da idabir i ruan i ruaʼa ruʼan isaŋʼ gubuʼ pisan. 25 Garam igi itsaŋan i araŋan wasaŋʼ i dabira i Yakop da yis Yakop ŋump marafain da igruʼ ruan. 26 Da garam igi ini da Yakop, “Wataŋin dzi da dzi nafan. Gubuʼ inaŋ i pisan.” Da bitsintaʼ Yakop iduduntiŋ i araŋan da irim udzuŋʼ da araŋan ini binaʼ, “Wasaŋʼ u! Bida u fintida dzi sib da dzi buŋʼ ataŋin baŋiŋʼ rai i agu da wafan.” 27 Ibinigi da garam igi igut i araŋan ini binaʼ, “U biŋaŋgam wai?” Da araŋan ini binaʼ, “Dzi biŋaŋgaŋʼ Yakop.” 28 Da garam igi ini binaʼ, “Wasaŋʼ i ruŋ fariŋʼa u biŋaŋgam Yakop u. I u su gudzu uris da Anutu da garam gar impruʼ. Da u yus. Ibinigi da aruani da buŋʼ afariŋʼ agu biŋaŋgam nabi Israil (waiŋgan ibiani ‘isu gudzu uris da Anutu’).” 29 Da Yakop igutin, “Da isaŋʼ i u nida biŋaŋgam wasi da dzi?” Da bitsintaʼ garam igi ini binaʼ, “Wain idzuwai da u gut i dzi i dzi biŋaŋgaŋʼ?” Da ifinti Yakop i nigi. 30 Ibinigi da Yakop ifariŋʼ gamp arigi biŋaŋgan Penuel (waiŋgan ibiani ‘Anutu maraŋgan’) da ini, “Dzi tsaŋan Anutu maran i mara nidzuŋgaŋʼ rururuŋan, da dzi ruŋʼ impa marataʼ.” 31 Gubuʼ iyab iba da Yakop itaŋin Penuel rai da intsuŋʼ i fagan ifan, i wain iruʼ araŋan ŋump marafain igruʼ ruan. 32 Ibinigi da gubuʼ aruani da garam Israil anuŋʼ iga apu far miŋʼa ŋump u, i wain iruʼ araŋan yis Yakop far miŋʼa ŋump ugruʼ.
Yakop da Raiŋgan Isau Iwaʼ da Ruan
1 Yakop iraʼ i maran da itsaŋan Isau ruta garaman 400 badan. Da itaŋin narun rusan yatsuŋʼ rinan ruas, Lia, Retsel da gan sagat guman iruʼ igi. 2 Itaŋin sagat gum iruʼ igi impruʼ da narun rusan imuŋʼ miamun. Ida Lia da narun rusan yatsuŋʼ ifan. Da Retsel da naruŋgan Yosef imiŋʼ bampan gin. 3 Yakop ruŋgan imuŋʼ ifan i riban santan, da yidzaʼ fagan da itauf maran iruʼ intap da yuriʼ, da inaŋ ibinigi aŋu isaŋʼ 7 imiŋʼ sanab ifan da raiŋgan. 4 Da bitsintaʼ Isau irunt iba i waʼa da raiŋgan da impuŋ Yakop da itsutsuf araŋan. Da rib iruʼ igi iraŋ da ruan. 5 Da Isau iraʼ i maran da itsaŋan sagat da mamaʼ narun da igutin, “U rut rib idzuwai biŋan aga ba?” Da Yakop ini, “Nigi mamaʼ narun Anutu mara-ampi gan riman da dzi, u garam gumam.” 6 Da sagat gum iruʼ igi da narun rusan iba da yidzaʼ fagan da itauf maran iruʼ intap imiŋʼ Isau maran. 7 Ida Lia da narun rusan iba da itatapuaŋʼ iruʼ intap imiŋʼ Isau maran. Raiyi da Yosef da rinaŋgan Retsel iba da runaŋ ibinigi aŋu. 8 Isau ini binaʼ, “Dzi miŋʼa naga badan da dzi tsaŋa apu utup utup, da nigi waiŋgan ibianuŋʼ?” Yakop ini araŋan nangan muŋaʼ ibiani, “Nam dzi riman da agu igi da dzi rim i yafada u waŋum i u tsaŋanda dzi bini.” 9 Da bitsintaʼ Isau ini binaʼ, “Raiŋgan, dzi saŋʼ intiŋ aŋu. Nigi runamiŋʼ da agu.” 10 Da Yakop ini, “Imaʼ. Dzi gampun ruŋgaŋʼ da agu. Dzi yut apu ani ruta waŋuŋgaŋʼ santan ibiaʼ da agu. Bida u maram arida i dzi da wayu. I dzi nuguŋʼ itsiaʼ nidzun aŋu i tipa tsaŋanda u maraŋgam ibi dzi tsaŋanda Anutu maran, i u yu dzi iyab. 11 Dzi gaib ruŋgaŋʼ da agu i uda nam dzi riman da agu igi. Anutu isu mara-ampi da dzi da dzi wasau ruŋgaŋʼ i nam maŋan u.” Yakop irim udzuŋ da Isau isaŋʼ araŋan itaga ruan i udan. 12 Da Isau ini da Yakop, “Agi mpruʼa ruŋgaŋʼ fadan.” 13 Da bitsintaʼ Yakop ini da araŋan, “Dzi garamaŋ tsiraʼ, u tsaŋan mamaʼ narun narun aga anuŋʼ tsiraʼ tsiraʼ u. Da dzi nampa tayaŋʼ makau da dumpa rinan narun ruas rututan. Bida dzi usudan da yuŋa sanab guntiʼ da gubuʼ bitsintaʼ aŋu da apu santan buŋʼ amamp sib i. 14 Ibinigi da garam tsiraʼ, wamuŋʼ wabiaʼ i dzi, u garam gumam. Dzi buŋʼ ayuŋ da nairab i apu santan da mamaʼ narun natsuŋʼ agu nabiaʼ nasaŋʼ waʼa da agu miŋʼa intap Seir.” 15 Isau ini, “Da nabinigi da dzi nataŋin garam fain da agu i rima agu sib.” Da Yakop ini araŋan nifuŋgan muŋaʼ ini binaʼ, “Daŋki tsiraʼ. Da bitsintaʼ anuŋʼ naŋa bidanigi u. Ma maram anuŋʼ fura sanab ampibiŋan u. Aga saŋʼ. Da bida u maram aridan da aga buŋʼ amiŋʼ bampan i agu.” 16 Ibinigi da gubuʼ arigi da Isau itaŋin araŋan rai da itip iyuŋ ifa Seir. 17 Da bitsintaʼ Yakop yuriʼ da intsuŋʼ ifa Sukot. Waʼan nigi da araŋan irim gan uŋaran, da irim uŋar tsaparaŋ fain i gan apu gan santan mpadan gin. I wain igi da ifariŋʼ gamp igi biŋaŋgan Sukot, waiŋgan ibi ‘uŋar tsaparaŋ’. 18 Impai nigi gubuʼ fain sib raiyi, da Yakop iyuŋ iba da ibawaʼ bini aŋu imiŋʼ gamp Sekem imiŋʼ intap Kanan, da impa uts aŋu da gamp igi. Da araŋan sanaban yuŋa miŋʼa Mesopotemia badan ibantsup imiŋʼ nigi. 19 Da araŋan irim nam ntsuman isaŋʼ 100 silva ifan da Hamor narun rusan, Sekem da rain rusan, i intap marafain aru araŋan arida uŋar in igi. 20 Da yantuŋʼ tauf isu mumai mararam tsarada nam in i nigi da ifariŋʼ i biŋaŋgan El-Elohi-Israil, waiŋgan ibiani ‘El, Israil Anutu gan’.
Sekem Inaŋ Asub i Daina
1 Gubuʼ maŋan da Daina, Yakop naruŋgan finam riman da Lia ugu, iyuŋ ifan i tsaŋanda sagat sagat gamp igi. 2 34 Da Hamor, nifutsarif gamp igi, araŋa garam Hiwi da naruŋgan marub Sekem. Gubuʼ Sekem tsaŋanda Daina da iyafi un gin da yuntapin da inaŋ asub in. 3 Da araŋan nuguŋgan imais nidzun aŋu i Daina da nan isu madamin biŋan i untapa i araŋan waŋuŋgan. 4 Araŋan yaga ramaŋgan Hamor ini binaʼ, “Wau sagat aga da dzi i suda dzi finiŋgaŋʼ.” 5 Gubuʼ Yakop uda sisiŋʼ i araŋan naruŋgan finam igi waʼa da sanab asub, da wanaŋ nam maŋan u, i narun ruas ifa sib i mpada tayaŋʼ apu santan, da impa ntras aŋu. 6 Da Sekem ramaŋgan Hamor ifa i ruta Yakop tipa nan igi. 7 Gubuʼ Yakop narun rusan miŋʼa gum bawaʼan da ba riŋanta i nan da nugun itsakia tsiraʼ biŋan, i Sekem naŋa sanab asub i ribaraŋan nafuŋgan da nigi isu miaʼ tsiraʼ biŋan da Israil utupan. Uwayant bidanigi anuŋʼ sanab bini maŋan u. 8 Hamor ini da Yakop da narun rusan ibiani, “Dzi naruŋgan Sekem waŋungan iyu u naruŋgam finam aga nidzun aŋu. Dzi gaib ruŋgaŋʼ da agam i agam rima Daina suda araŋan finiŋgan. 9 Nam uda ruan namiŋʼ wasaʼ i agam da agai; warim narum rusam finam da agai da wau aga naruŋʼ rusaŋʼ finam nasu agamam nabinigi. 10 Da wampa wasaʼ i agai; intap rumiŋʼ da wampa gin da wanaŋ gumam in nasaŋʼ maraŋgam furan da wayu intap fain nasu u naŋgam.” 11 Da Sekem ini da Daina nafun rusan da ramaŋgan ini binaʼ, “Dzi gaib ruŋgaŋʼ da agam; dzi ni uda agam nafuŋgam suda dzi finiŋgaŋʼ. Dzi buŋʼ arim nam ntsuman idzuwai agam gutagin. 12 Warim nam bunump gudzuŋgan. Bida agam maram fura i rima tsiraʼ biŋan, da wani, da dzi buŋʼ arim, bida agam rima mamaʼ finam arigi da dzi suda dzi finiŋgaŋʼ.” 13 Da bitsintaʼ Yakop narun rusan yi-iyuʼ Sekem da Hamor i nam idzuwai Sekem naŋa da ribaraŋan nafuŋgan Daina. 14 Da ini binaʼ, “Aga wasaŋʼ atsuŋa sanab bida arigi. Aga wasaŋʼ i rima nafuŋgaŋʼ da garam maŋan mamida i safa riniubit u. Nigi buŋʼ asu rinin miaʼan tsiraʼ da agai. 15 Aga saŋʼ i nida nifuŋʼ da agu i uda araŋan bida u naŋa nam bida aruani suda miamun: agu da garam gampam ani sib aŋu nasaf riniubit nabi agai. 16 Ida aga buŋʼ arim naruŋʼ rusaŋʼ finam da agam, da nayu agamam. Da aga buŋʼ ampa wasaʼ i agam da nasu garam utup bitsintaʼ. 17 Da bitsintaʼ bida agam buginda i safa riniubit, da aga buŋʼ ayu nafuŋgaŋʼ da narut afan.” 18 Hamor da naruŋgan Sekem itsaŋa ribaraŋan nangan nidan igi iwaʼ bini aŋu. 19 Da Sekem nugun itsiaʼ i uda Yakop narun finam igi da iyu nan igi iyab suŋ aŋu. Da araŋan ramaŋgan utupan itsarif araŋan isarimp ramaŋgan Hamor. 20 Ibinigi da Hamor da naruŋgan Sekem ifa gan gampan igi mumai gan mpruʼa maran gin da ini nan wasi da gan garaman sib aŋu ibiani, 21 “Garam utup igi isu agi rinuŋʼ rusaŋʼ nidzun. Agi nataŋin ribaraŋan nampa agi intapaŋʼ da nanaŋ guman gin nasaŋʼ maraŋgan furan. Intap ani tsiraʼ biŋan isaŋʼ agi da ribaraŋan. Da agi saŋʼ i uda ribaraŋan narun rusan finam da ribaraŋan isaŋʼ i uda agi gaŋʼ. 22 Da bitsintaʼ ribigi buŋʼ ani nifun i ruta agi mpruʼa ruaŋʼ mpada suda garam utup bitsintaʼ bida agi naŋa nam bitsintaʼ aŋu bida ani: garam sib aŋu nasaf riniubit nasaŋʼ ruan, nabi ribaraŋan naŋan. 23 Bida agi naŋa bidanigi da ribaraŋan makau gan da apu gan da naŋgan santan buŋʼ asu agi gaŋʼ. Ibinigi da agi nanaŋ nam ribaraŋan nidan igi da ribaraŋan buŋʼ ampa wasaʼ i agi.” 24 Garam gamp igi santan iriŋant i nan igi, da sib aŋu irut Hamor da narun Sekem isaf riniubit. 25 Gubuʼ iruʼ da bits ntsupan da garam santan ruŋʼ mpadan da tsakia tsiraʼ da Yakop narun rusan iruʼ, Simion da Liwai, Daina nafun rusan igi, iyu bainatan da yataŋʼ gamp isu nam runta fafun da yis garam da mamaʼ marub gamp igi sib aŋu funub. 26 Da yis Hamor da naruŋgan Sekem funub da iyu nafuŋgan Daina i Sekem uŋaran da irut ifa gan arun. 27 Yakop narun rusan fain iba tsaŋan garam santan mampa sib da iyu nam santan miŋʼa gamp igi iyab i Sekem naŋgan maisan naŋa i ribaraŋan nafuŋgan. 28 Ribaraŋan iyu dumpa, nuniŋ, makau da doŋki impruʼ da nam miŋʼa gamp wasaʼ da miŋʼa manaʼ santan. 29 Ribaraŋan iyu ribigi nam bunumpan mara maran sib aŋu impruʼ da sagat da mamaʼ narun da nam idzuwai miŋʼa uŋar wasaʼ santan. 30 Ntsupa sib da Yakop ini da Simion da Liwai ini binaʼ, “Aruani da agam irim barabin tsiraʼ biŋan aŋu da dzi, da inaŋ dzi biŋaŋgaŋʼ imais. Garam Kanan da Peris mpada intap ani buŋʼ abugin dzi nidzun aŋu. Agi anuŋʼ ampibiŋan u. Garam gamp ani bida mpruʼa ruan da udzuda nan sib i waʼa gamp da buŋʼ ais agi sib.” 31 Da bitsintaʼ Yakop narun rusan iruʼ igi ini i nangan muŋaʼ ibiani, “Aga tusa maraŋʼ i garam bidanigi i naŋa sanab asub yaba i aga nafuŋgaŋʼ bida araŋan sagat sanab maŋan, a?”
Yakop Itip Ifa Betel
1 Da Anutu ini da Yakop ibiani, “Wauriʼ da watip wafa gamp Betel da wampai nigi da warim mumai mararam tsarada nam in da dzi Anutu aru waʼan da agu da gubuʼ u runta sinuŋʼ raiŋgam Isau badan ugu.” 2 Yakop iriŋant i Anutu nangan igi da ini da utupan da riban ruta mpadan ibiani, “Agam santan watiri gam mugus maraganun gam udan ugu rai da wayiʼ mpui da watip ruŋgam bini da watsuf ŋarukui gam sapan. 3 Ida agi buŋʼ ayab gamp Betel, da dzi buŋʼ arim mumai mararam tsarada nam in da Anutu aru naŋa dzi nangaŋʼ udagin suda nidzun. Araŋan irim dzi sib da gubuʼ dzi waʼan da barabin ugu, da impa tayaŋʼ dzi i sanab santan aru dzi fada gin ugu.” 4 Ibinigi da ribaraŋan santan itapu mugus maraganun santan impruʼ da nam arida i riŋan da irim da Yakop. Da Yakop iraf ntsuf in imiŋʼ gai tsiraʼ wain miŋʼa Sekem da idzufuŋʼ sib. 5 Da Yakop irut ampan gan itumuaŋʼ naŋgan santan da ifan. Da Anutu itaŋin nam ratan tsiraʼ ibuafir gamp santan miŋʼa uts da ribaraŋan fadan da maŋa wadaru u. 6 Yakop da ampan gan santan igi ibawaʼ gamp Luts miŋʼa intap Kanan. Luts igi gamp Betel biŋaŋgan ratar. 7 Miŋʼan nigi da araŋan yantuŋʼ tauf isu mumai mararam tsarada nam in da ifariŋʼ mumai arigi biŋan ibi El Betel (waiŋgan ibi ‘Anutu Mpada Betel’), i Anutu iwaʼ da Yakop imiŋʼ arigi da gubuʼ araŋan runta sinuŋʼ raiŋgan badan. 8 Gubuʼ aru ribaraŋan mpadan nigi da Debora, Rebeka sagatan mpada tayaŋʼ gin, imamp da ribaraŋan irim araŋan imiŋʼ gai tsiraʼ wain imiŋʼ Betel. Ibinigi da ifariŋʼ gai igi biŋaŋgan “Gai Siŋisiaŋ.” 9 Da Yakop taŋinda Mesopotemia rai da tipa fada intap Kanan sib, da Anutu itip iwaʼ da araŋan imiŋʼ nigi da ifinti araŋan. 10 Da ini da araŋan ibiani, “U biŋaŋgam Yakop. Da aruani da wasaŋʼ i ruŋʼ tipa fariŋʼa u biŋaŋgam Yakop u; buŋʼ afariŋʼ u biŋaŋgam faʼ Israil.” Ibinigi da Anutu ifariŋʼ araŋan biŋaŋgan Israil. 11 Da Anutu ini da araŋan, “Dzi Anutu Nampaŋ Wain ini da agu ibiani, warim narum ruas nautus i ruan nawaʼ nasisuŋʼ nabinigi. Miŋʼa agu da garam wain wain da kiŋ ruas buŋʼ awaʼ nabinigi. 12 Da intap dzi riman da u rumpuŋgam Abraham da ramaŋgan Isak aruani isu agu gam. Hai, aruani da dzi rima da agu, da buŋʼ asu u tafaŋgam taptap yaŋin rusan naŋgan.” 13 Da Anutu itaŋin araŋan rai i mumai aru Anutu ruta araŋan nidan nan da ruan gin ugu da ifan. 14 Yakop yantuŋʼ tauf guntiʼ maŋan imiŋʼ mumai Anutu nida nan da araŋan gin ugu da iyats wain da madamin ragun gin isu ampap santiŋʼa mumai mararam tsarifa Anutu gin. 15 Da Yakop ifariŋʼ mumai Anutu ruta nida nan da ruan gin igi biŋaŋgan Betel--Anutu uŋaran.
Retsel da Isak Naŋgan Mampan
16 Yakop irut utupan itaŋin Betel rai da iyuŋ ifan i waʼa gamp Efrata. Ruŋʼ yuŋa fadan da Retsel gubuʼ gan naŋa i apiŋʼan iwaʼ da ipriʼ da nam tsakia tsiraʼ biŋan iyus. 17 Da araŋan rima narun ruta nam tsakia tsiraʼ da gan sagatan rima sib ini da araŋan ini binaʼ, “U anuŋʼ ratan u, i u rim marub maŋan.” 18 Da gubuʼ Retsel ntafa gin i mampan da ifariŋʼ mamaʼ mitan igi biŋaŋgan Benoni (waiŋgan ibi ‘mamaʼ uda tsakia gin’). Da bitsintaʼ ramaŋgan Yakop ifariŋʼ i biŋaŋgan Benyamin (waiŋgan ibi ‘mamaʼ gifa gamp’). 19 Ibinigi da Retsel imamp da irim i sanab fada Efrata (gamp Betlehem biŋaŋgan ratar). 20 Miŋʼa Retsel ntsufan rima gin da Yakop iraʼ i tauf guntiʼ maŋan da intaŋ iruʼ isu ampap i santiŋʼa Retsel ntsufan giŋʼa gin. Da tauf igi ruŋʼ imunti da aruani. 21 Israil yuriʼ da ifan da iyus uŋar guntiʼ tsaŋanda dumpa sib nida Eder gin ba da yari uŋaran iruʼ. 22 Gubuʼ Israil ruŋʼ mpada miŋʼa nigi da Ruben yataŋʼ da irut ramaŋgan sagat guman Bilha igiŋʼ da Israil iriŋantin. Yakop narun rusan marub 12 rima da finin rusan ugu ibiani: 23 Lia sagat miamun irim: Yakop naruŋgan miamun Ruben, Simion, Liwai, Yuda, Isakar, da Tsebulun. 24 Retsel irim: Yosef da Benyamin. 25 Bilha, Retsel sagat guman, irim: Dan da Naftali. 26 Tsilpa, Lia sagat guman, irim: Gat da Aser. Nigi Yakop narun rusan mpada Mesopotemia da riman ugu igi. 27 Yakop ibawaʼ da ramaŋgan Isak i gamp Mamri, miŋʼa uts da gamp Kiriat Arba (biŋan maŋan Hibron) aru Abraham da Isak mpada gin ugu. 28 Isak impai udzufan isaŋʼ 180, 29 da ifufi nidzun biŋan aŋu da araŋan imamp. Da narun rusan Isau da Yakop irim araŋan.
Isau Tafan Rusan Nangan
1 Nani Isau (nida Idom) tafan rusan nangan ragidan. 2 Isau iyu finin iruʼrun imiŋʼ Kanan: Ada, Elon garam Hit ugu narun finam, da Oholibama, Ana narun finam da Tsibion garam Hiwi rumpuŋgan. 3 Araŋan itip iyu Basemat, Ismail narun finam da Nebaiot nafun finam, impruʼ ibinigi. 4 Isau irim narun ruas da finin rusan ibiani, Ada sagat miamun irim Elifats, da Basemat irim Ruel. 5 Da Oholibama irim Jeus da Jalam da Kora. Isau irim narun rusan igi da gubuʼ aru araŋan mpada miŋʼa intap Kanan. 6 Raiyi da Isau iyu finin rusan da narun rusan, impruʼ da garam guman, da makau gan da apu gan santan, da naŋgan santan uda miŋʼa Kanan ugu da intsuŋʼ iwaʼ sinuŋʼ raiŋgan Yakop, da ifampa intap wasaʼ maŋan ruguntiʼ i araŋan. 7 I intap araŋan da raiŋgan Yakop mpada gin isisuŋʼ ruan i ribaraŋan makau gan da dumpa gan da nuniŋ gan, da wasaŋʼ i rima ribaraŋan sib u. 8 Ibinigi da Isau (biŋan maŋan Idom) ifa mpa imiŋʼ intap mamai Seir. 9 Nigi Isau, garam Idom ramaŋgan mpada intap mamai Seir ugu, yaŋin rusan: 10 Isau narun rusan marub biŋaŋgan ibiani: Elifats, Ada naruŋgan, da Ruel, Basemat naruŋgan. 11 Elifats narun rusan marub ibiani: Teman, Omar, Tsefo, Gatam da Kenats. 12 Elifats sagatan maŋan Timna irim Amalek. Nigi Isau finiŋgan Ada rumpun rusan. 13 Ruel narun rusan marub biŋaŋgan ibiani: Nahat, Tsera, Sama da Misa. Nigi Isau finiŋgan Basemat rumpun rusan. 14 Oholibama, Isau finin maŋan, Ana narun finam da Tsibion rumpun finam, irim Jeus, Jalam da Kora. 15 Da utup utup waʼa miŋʼa Isau narun rusan ibiani: Elifats, Isau naruŋgan miamun, isu garam utup bida ani tafaŋgan: Teman, Omar, Tsefo, Kenats, 16 Gatam da Amalek. Ribaraŋan isu Ada, Isau finiŋgan, yaŋin rusan. 17 Da Ruel, Isau narun maŋan igi, isu garam utup bida ani tafaŋgan: Nahat, Tsera, Sama da Misa. Ribaraŋan isu Basemat, Isau finiŋgan, yaŋin rusan. 18 Da Isau finiŋgan maŋan Oholibama, Ana naruŋgan finam, isu garam utup bida ani tafaŋgan: Jeus, Jalam da Kora. 19 Garam utup utup igi Isau (ma Idom) yaŋin rusan.
Seir Yaŋin Rusan
20 Garam Hor mpada intap Idom igi muŋʼ biŋaŋgan Seir yaŋin rusan ani. Ribigi impa utup utup yatsuŋʼ tafan rusan biŋaŋgan ibiani: Lotan, Sobal, Tsibion, Ana, 21 Dison, Etser da Disan. Ribarigi Seir narun rusan da garam Hor garam gudzun rusan imiŋʼ intap Idom. 22 Da Lotan narun rusan marub ibiani: Hori da Hemam. Lotan nafuŋgan Timna. 23 Da Sobal narun rusan marub ibiani: Alwan, Manahat, Ebal, Siefo da Onam. 24 Da Tsibion narun rusan marub ibiani: Aia da Ana. Ana arigi impa tayaŋʼ ramaŋgan Tsibion doŋki gan imiŋʼ nam manaʼ dadauntan da araŋan isu miamun i tsaŋanda mpui maran sasusan fain. 25 Da Ana narun rusan ibiani: Dison da nafuŋgan finam Oholibama. 26 Da Dison narun rusan marub ibiani: Hemdan, Esban, Itran da Keran. 27 Da Etser narun rusan marub ibiani: Bilhan, Jawan da Akan. 28 Da Disan narun rusan marub ibiani: Uts da Aran. 29-30 Garam ani garam Hor gudzun gudzuŋgan mpada intap Seir biŋaŋgan ibiani: Lotan, Sobal, Tsibion, Ana, Dison, Etser da Disan.
Garam Idom Kiŋ Rusan
31 Muŋʼ garam Israil mamida suda kiŋ, da garam bida ani isu kiŋ i intap Idom: 32 Beor naruŋgan Bela isu king miamun impa tayaŋʼ Idom. Da gan gampan biŋaŋgan Dinhaba. 33 Gubuʼ Bela mampan, da Tsera naruŋgan Jobap miŋʼa gamp Botsra iyu araŋan mumai gan isu kiŋ. 34 Gubuʼ Jobap mampan, da Husam, garam miŋʼa intap Teman, iyu araŋan mumai gan isu kiŋ. 35 Gubuʼ Husam mampan, da Bedad naruŋgan Hadad miŋʼa gampan Awit, isa garam gamp Midian sib miŋʼa intap Moab ugu, iyu araŋan mumai gan isu kiŋ. 36 Gubuʼ Hadad mampan, da Samla, garam gamp Masrika, iy u araŋan mumai gan isu kiŋ. 37 Gubuʼ Samla mampan, da Siaul, garam gamp Rihobot miŋʼa mpui riŋan, iyu araŋan mumai gan isu kiŋ. 38 Gubuʼ Siaul mampan, da Akbor naruŋgan Bal-Hanan iyu araŋan mumai gan isu kiŋ. 39 Gubuʼ Akbor naruŋgan Bal-Hanan mampan, da Hadad iyu araŋan mumai gan isu kiŋ. Araŋan gampan biŋaŋgan Pau, da finiŋgan biŋaŋgan Mehetabel, Matret naruŋgan finam da Metsahap rumpuŋgan. 40-43 Isau garam Idom tafaŋgan da yaŋin rusan utup utup ibiani: Timna, Alwa, Jetet, Oholibama, Ela, Pinon, Kenats, Teman, Mipsar, Makdiel da Iram. Intap garam utup igi mpada gin iyu biŋan yatsuŋʼ garam gudzun igi biŋaŋgan. Nigi Isau tafan rusan.
Yosef Naŋgan Puafuban
1 Yakop impa intap Kanan, gamp araŋan ramaŋgan mpada gin muŋʼ ugu. 2 Yakop da narun rusan 37 nangan ibiani: Yosef mamaʼ faʼ, udzufan 17, irut rain rusan, Yakop finin rusan Bilha da Tsilpa narun rusan, impa tayaŋʼ gan dumpa gan da nuniŋ gan. Da Yosef iba da ini rain rusan igi naŋgan maisan naŋan wasi da ribaraŋan ramaŋgan. 3 Israil maran yari nidzun aŋu i Yosef iyus narun rusan fain igi, wain ibi araŋan ifufi da Yosef iwaʼ. Ibinigi da araŋan itip ŋarukui grigriʼ guntiʼ bini maŋan da Yosef. 4 Da gubuʼ araŋan rain rusan tsaŋanda bida ribaraŋan ramaŋgan irim waŋun nidzun aŋu da araŋan iyus ribaraŋan, da nugun iruaʼ i araŋan da ifiʼ i nan aŋu rutin. 5 Gubuʼ maŋan da Yosef ipuafub da ifis i naŋgan puafuban da rain rusan. Da rain rusan riŋantagin da nugun iruaʼ nidzun iyus i araŋan. 6 Yosef ini da rain rusan ibiani, “Agam wariŋant i dzi naŋgaŋʼ puafuban dzi tsaŋandan: 7 Dzi tsaŋan agi santan impruʼ ruaŋʼ udzuda wit punpun saŋʼa ruaŋʼ miŋʼa gum wasaʼ. Da gubuʼ agi udzudan da dzi gaŋʼ suŋ aŋu iraiʼ i ruan da imunti rururuŋan aŋu yab da agamam iba miŋʼ iwafiʼ dzi gaŋʼ da irim antuŋʼ iruʼ rutin.” 8 Da rain rusan ini binaʼ, “U maram mafur i suda kiŋ da mpada tayaŋʼ agai? Ma u mani suda gudzun i aga santan?” Ribaraŋan nugun iruaʼ nidzun aŋu i araŋan da ibugin araŋan i naŋgan puafuban da gan nangan fisagin. 9 Da araŋan itip itsaŋa nam puafuban maŋan da itip ifisin da rain rusan ini binaʼ, “Agam wariŋantin. Dzi tip itsaŋa nam puafuban maŋan. Dzi tsaŋa gubuʼ da ukam da ŋantam 11 idzaʼa fagan da dzi.” 10 Araŋan ifis i naŋgan puafuban igi da ramaŋgan da rain rusan. Da araŋan ramaŋgan impiʼ araŋan da ini, “U naŋgam puafuban igi ibianuŋʼ? U mani rinaŋgam da dzi da raim rusam badan da idzaʼa fagaŋʼ ruʼa agu maram?” 11 Araŋan rain rusan ifis i araŋan, da bitsintaʼ araŋan ramaŋgan maran ifur i nan ampibiŋan iyus imiŋʼ i uwayantan i araŋan naŋgan puafuban igi.
Yosef Rain Rusan Itaŋin Araŋan Rai da Garam Ismail da Iyu Ifa Idzip
12 Gubuʼ maŋan Yosef rain rusan ifa Sekem sib i mpada tayaŋʼ ribaraŋan ramaŋgan dumpa gan, 13 da Israil ini da Yosef ibiani, “U raim rusam impa tayaŋʼ dumpa imiŋʼ uts da gamp Sekem. Da dzi ni u atsuŋʼa raim rusam da tsaŋanda ribaraŋan. Da Yosef ini, “Hai, ramaŋʼ. Dzi buŋʼ afan i.” 14 Da ini da araŋan impruʼ ibiani, “Wafa tsaŋa raim ruas naŋgan mpadan da mpada tayaŋʼ dumpa ibianuŋʼ. Watsaŋa sib da watip wau sisiŋʼ waba da dzi.” Ibinigi da Yakop itaŋin Yosef imiŋʼ bump Hibron ifan i araŋan impa imiŋʼ nigi. Gubuʼ Yosef fawaʼ sib Sekem, 15 da garam maŋan itsaŋan araŋan yuŋa miŋʼa puatsi manaʼ igi bafadan da igutin, “U sau wai?” 16 Da araŋan ini, “Dzi sau raiŋʼ rusaŋʼ. Da bida u tsaŋanda ribaraŋan gan fada gin da mpada tayaŋʼ dumpa gan gin, da isaŋʼ i u ntuaŋʼa ribaraŋan gan mpada gin da dzi?” 17 Da garam igi ini araŋan nifuŋgan muŋaʼ ibiani, “Ribaraŋan itaŋin nani rai da ifa sib. Dzi riŋant i ribaraŋan nida nan da ruan bida ani, ‘Agi fada Dotan.’ ” Ibinigi da Yosef yatsuŋʼ rain rusan da iwaʼ da ribaraŋan santan imiŋʼ Dotan. 18 Da bitsintaʼ gubuʼ ribaraŋan tsaŋandan Yosef fada ruguntiʼ i ribaraŋan da musa bawaʼan, da yudzu nan i isa araŋan funub. 19 Da ini da ruan ini binaʼ, “Ariʼ tsaŋan! Garam puafuba funub aŋu ugu iba. 20 Yaʼ! Agi isa araŋan funub da tapuda ruʼa ntsuf utaʼ ani maŋan, da nani apu buman maŋan igara araŋan funub. Da agi natsaŋa i gan naŋgan puafuban igi nakap nidzun nabianuŋʼ.” 21 Gubuʼ Ruben riŋanta i nan ribaraŋan tipan igi da yintsaʼ nan i rima araŋan sib sinuŋʼ ribaraŋan baŋiŋgan da ini, “Agi anuŋʼ isa araŋan funub u. 22 Agi ruŋgaŋʼ anuŋʼ suda baŋi biʼ. Watapu waruʼ ntsuf mpui riʼa gin miŋʼa nam dadauntan ani, da anuŋʼ wayada araŋan u.” Ruben ini nan ibinigi i maran ifur i rima araŋan sib da tipa uda araŋan maradzigin aŋu badan da ramaŋgan. 23 Ibinigi da gubuʼ Yosef bawaʼan da rain rusan, da ribaraŋan impuŋ araŋan da igruʼ i gan ŋarukui gan griʼgriʼ guntiʼ bini igi sinuŋʼ 24 da iyu araŋan ifan da itapu iruʼ ntsuf mpui riʼa gin igi. 25 Ribaraŋan impruʼ ruan impai i naŋa i gada nam, da iraiʼ i maran da itsaŋan garam Ismail ruta gan kamiran miŋʼa gamp Giliat bada i ruʼa Idzip. Gan kamiran iyu nam bunump bida ani iyus: asam ma wasub wasub da gai gurun gaunt waʼa bini. 26 Yuda ini da rain rusan ini binaʼ, “Bida agi isa raiŋgaŋʼ funub da buafira agi naŋgaŋʼ suda baŋi biʼ igi, da nigi nabu rim agi sib nabianuŋʼ? 27 Agi nataŋin araŋan nafan da rib Ismail badan aga, nasu mamaʼ gum utaʼ aŋu, da agi anuŋʼ wayada baŋiŋʼ i araŋan maŋan u. Nigi agi raiŋgaŋʼ, agi biʼ gaŋʼ rururuŋan.” Da rain rusan iyu nan igi iyab. 28 Da gubuʼ garam Midian suba nam bunump fain bawaʼan da Yosef rain rusan yuntap i araŋan iyab sinuŋʼ ntsuf da itaŋin araŋan da garam Ismail igi (nida Midian gin). Da garam igi irim nam bunump 20 silva, barabin gan isaŋʼ 200 gram, da iyu araŋan iruʼ Idzip. 29 Da gubuʼ Ruben batipa fada ntsuf da sauda Yosef wasi da waŋun ibarabin nidzun aŋu da igari ŋarukui gan. 30 Da araŋan itip ifan da rain rusan da ini, “Ai! Yosef anuŋʼ ruŋʼ impa ntsuf aga u. Dzi nabu ni nan nabianuŋʼ?” 31 Ida ribaraŋan yis nuniŋ maŋan funub da iyu Yosef ŋarukui gan da ifiru i biʼ. 32 Da ribaraŋan iyu ŋarukui igi ifan da ramaŋgan. Da ini binaʼ, “Aga waʼ da ŋarukui ani. Da watsaŋan. Mani u naruŋgam ŋarukui gan ani ma imaʼ?” 33 Raman isruʼgin da ini, “Hai, dzi naruŋgaŋʼ ŋarukui gan araŋan ani. Apu buman maŋan igara araŋan funub da itsiar fafarab da iga sib. O dzi naruŋgaŋʼ Yosef!” 34 Yakop nugun ibarabin nidzun aŋu i naruŋgan, ibinigi da igari ŋarukui gan da yatsuf ŋarukui raŋa rutin, da iraŋ i naruŋgan gubuʼ ampibiŋan aŋu imiŋʼ ibinigi. 35 Araŋan narun rusan marub da finam santan iba i yafada araŋan waŋun, da bitsintaʼ araŋan ibugin da ini, “Imaʼ. Dzi buŋʼ araŋ aŋu nabiani nasaŋʼ dzi tipa atsuŋʼa naruŋgaŋʼ i garam mampan gampan.” Da Yakop iraŋ imiŋʼ ibinigi aŋu. 36 Da gubuʼ arigi da rib Midian iyu Yosef ifa Idzip da itaŋin araŋan da Potifar, garam suda gudzun i garam siŋa-ari muntida sib i Kiŋ Farau, da araŋan isu i gan mamaʼ guman utaʼ aŋu.
Yuda da Tamar Nangan
1 Miŋʼa gubuʼ igi da Yuda itaŋin rain rusan rai da iruʼ i ruta garam bits mpada Adulam biŋaŋgan Hira. 2 Mpadan nigi da Yuda iwaʼ da garam Kanan bits, biŋaŋgan Sua, narun finam. Araŋan 38 iyu da irut impai. 3 Da sagat iwaŋun da irim araŋan naruŋgan marub maŋan da inuʼ araŋan biŋaŋgan Er. 4 Impai da sagat igi itip iwaŋun da irim narun marub maŋan da ifariŋʼ i biŋaŋgan Onan. 5 Impai da araŋan itip iwaŋun da irim narun marub maŋan imiŋʼ gamp Kedzib da inuʼ araŋan biŋaŋgan Sela. 6 Gubuʼ Yuda naruŋgan marub miamun Er suda garam sib, da ramaŋgan iyu sagat maŋan rutin, biŋaŋgan Tamar. 7 Da bitsintaʼ Er iwaʼ maisan imiŋʼ Yawe maraŋgan da Yawe yis araŋan funub. 8 Da Yuda ini da Er raiŋgan Onan ibiani, “Warut raiŋgam sagat yarufan wagiŋʼ natsuŋʼ agi sanabaŋʼ, i rima narun rutin i utusa u raiŋgam yaŋiŋgan ruŋʼ fadan.” 9 Da bitsintaʼ Onan isruʼgin sib ibi mamaʼ narun igi wasaŋʼ i suda araŋan gan u, ibinigi da gubuʼ araŋan ruta raiŋgan sagat yarufan igi giŋʼan da inaŋ da iyats mpui iran gan rai iruʼ intap i Tamar anuŋʼ waŋundan da rima narun i utusa raiŋgan yaŋiŋgan u. 10 Yawe itsaŋan Onan sanaban naŋan igi iwaʼ maisan i maraŋgan, da yis araŋan funub. 11 Yuda irat i naruŋgan Sela mampan bida rain rusan ugu. Ibinigi da ini da buŋgan Tamar ibiani, “Watip wafan da wampa ramaŋgam gampan nabi sagat yaruf nasaŋʼ dzi naruŋgaŋʼ Sela yiŋʼa suda garam sib.” Ibinigi da Tamar itip ifa ramaŋgan gampan i ruta riban mpadan. 12 Yuda impai nigi gubuʼ guntiʼ biŋan da araŋan finiŋgan, Sua narun finam, imamp. Araŋan impai isaŋʼ araŋan maran dzidziwandan, da araŋan irut rinuŋgan Hira, garam Adulam, ifa Timna i tsaŋanda garaman trapa araŋan dumpa gan rinifufun. 13 Gubuʼ rib fain nida sisiŋʼ da Tamar nida binaʼ, “U buŋgam ini fada Timna i trapa dumpa gan rinifufun,” 14 da Tamar igruʼ umpuafan rai da ipatiʼ gudzun da maran sib i bruʼ paparatan i maŋa anuŋʼ fariŋʼa araŋan u, da impa gamp Inaim muantsi nifuŋgan imiŋʼ sanab fada gamp Timna. Araŋan itsaŋan ibi Sela isu garam sib da Yuda watsuŋʼ nangan i Sela uda araŋan suda i finiŋgan u. 15 Ibinigi da gubuʼ Yuda tsaŋanda araŋan da ini sagat sanab aŋu gin, i araŋan ipatiʼ maran sib. 16 Araŋan anuŋʼ isruʼgin ibi araŋan buŋgan u, da yis sanab udziʼ ifan da ini, “Amaʼ. Dzi ni ruta agu giŋʼan.” Da araŋan ini, “Bida u ruta dzi giŋʼan da u burima nam idzuwai da dzi?” 17 Da Yuda ini, “Dzi buŋʼ ataŋin nuniŋ naru faʼ bits miŋʼa dzi apu gaŋʼ mpada tayaŋʼ gin naba da agu.” Da Tamar itip igutin, “Hai. Da isaŋʼ u rima nam maŋan muŋʼ da dzi i santiŋʼa bida u ni nan nidzun da dzi, nasaŋʼ u rima nigi badan?” 18 Da araŋan ini, “U maram yari i nam idzuwai arigi i dzi riman da agu?” Da Tamar ini, “U naŋgam suŋundan suda u maram nampruʼ da u itipam yuŋa gin.” Ibinigi da Yuda irim da araŋan da irut igiŋʼ da araŋan iwaŋun. 19 Tamar itiri Yuda rai da ifan. Da igruʼ bruʼ paparatan buafira maran sib in ugu rai, da itip yatsuf umpuafan. 20 Yuda itaŋin rinuŋgan Hira, garam Adulam ugu, i uda nuniŋ naru faʼ i fada da sagat ruta giŋʼan ugu da tipa uda i gan naŋgan riman rutin ugu, da bitsintaʼ isau araŋan wasi. 21 Da igut i garam mpadan nigi ini binaʼ, “Sagat sanab mpada sanab riŋan Inaim ani impa anuŋʼ?” Da ribigi ini binaʼ, “Sagat sanab maŋan wampai ani maŋan u.” 22 Ibinigi da araŋan itip ifan da ini da Yuda ibiani, “Dzi sau sagat araŋan da dzi wawaʼ rutin u. Garam mpadan naga ini da dzi ibiani, ‘Sagat sanab maŋan wampai ani maŋan u.’ ” 23 Da Yuda ini, “Araŋan runayu nam igi. Dzi bugin agi rusaudan da ampan rubuŋʼa ruan i agi. Dzi rim nuniŋ igi ifan da araŋan ibi dzi nida rutin ugu. Da bitsintaʼ u wawaʼ da araŋan u. Da isaŋʼ i.” 24 Ukam iruʼ da bits ifa sib da rib fain ini da Yuda ibiani, “U buŋgam Tamar inaŋ ruŋgan ibi sagat sanab. Da aruani da araŋan iwaŋun sib.” Da Yuda ini, “Wayu araŋan waba da wafaŋa i dzaf nasaŋʼ araŋan mampan.” 25 Gubuʼ garam uda araŋan waʼa ba, da araŋan irim nam buŋgan riman ugu da sisiŋʼ ibiani ifan da buŋgan, “Garam suda wain i nam bida ani iwaʼ da dzi, da dzi waŋun. Watsaŋan da wafariŋʼ i maŋa nam maraŋgan da itipan yuŋa gin ani.” 26 Yuda isruʼgin da ini, “Araŋan wanaŋ asub u; dzi su asub. Araŋan inaŋ sanab igi i dzi warim araŋan da naruŋgaŋʼ Sela ibi dzi nidan.” Da Yuda watip irut igiŋʼ u. 27 Tamar gubuʼ gan naŋa i apiŋʼan da mamaʼ marub bampuŋʼ imiŋʼ araŋan waŋun wasaʼ. 28 Gubuʼ aru araŋan apiŋʼan igi da mamaʼ narun maŋan yintsi baŋin imuŋʼ ba. Da sagat rima sib idzur fufuai biʼ i araŋan baŋin da ini, “Mamaʼ narun aruani isu miamun.” 29 Da bitsintaʼ mamaʼ narun igi itip intsruk baŋin yataŋʼ ifan da gan raiŋgan isu miamun i waʼa ba, da sagat rima sib ini, “U braŋ gudzum i muantsi da u waʼ ba.” Da ifariŋʼ araŋan biŋaŋgan Perets (waiŋgan ibi ‘braŋʼa muantsi i waʼan’). 30 Ida raiŋgan udzuda fufuai biʼ i baŋin ugu iwaʼ yatsuŋʼ araŋan ba. Da ifariŋʼ araŋan biŋaŋgan Tsera (waiŋgan ibi ‘dzadzaniaŋan’).
Yosef da Potifar Finiŋgan Nangan
1 Gubuʼ garam Ismail uda Yosef ruʼa Idzip ugu da Potifar irim nam ntsuman da ribaraŋan da iyu Yosef isu gan mamaʼ guman utaʼ aŋu. Potifar igi isu gudzun i kiŋ Idzip garaman siŋa-ari muntida sib i araŋan. 2 Yawe irut Yosef, da gum santan Yosef naŋan miŋʼa garam gudzuŋgan uŋaran iwaʼ ŋarubini biŋan aŋu. 3 Potifar itsaŋan da isruʼgin ibi Yawe irut Yosef da inaŋ nam santan Yosef naŋan iwaʼ ŋarubini aŋu, 4 ibinigi da nugun inuf nidzun aŋu i Yosef da itaga araŋan isu i gan garam guman mpada tayaŋʼ araŋan uŋaran mpruʼan da araŋan naŋgan santan. 5 Miŋʼa gubuʼ aru Potifar taŋinda araŋan mpada tayaŋʼ i nam santan igi da fadan, da Yawe ifinti Potifar naŋgan santan, miŋʼa uŋaran da gan guman wasaʼ, i wain iruʼ Yosef. 6 Ibinigi da Potifar itaŋin Yosef impa tayaŋʼ araŋan naŋgan santan. Da maran wafur nan maŋan i nida yaba i naŋgan santan igi maŋan u, imaʼ, da bitsintaʼ nam gadan araŋan gadan aŋu. Yosef igi iyiŋʼ garam mara urun da maran bini aŋu. 7 Gubuʼ fain fada sib da Potifar finiŋgan iyafi un nidzun aŋu i Yosef da ini binaʼ, “Dzi ni u badan da agi giŋʼan.” 8 Da bitsintaʼ Yosef ibugin da ini, “U tsaŋan sib wa! Dzi garam gudzuŋgaŋʼ itaŋin dzi i mpada tayaŋʼ araŋan uŋaran da gan naŋgan santan, da maran wafur i nam maŋan u. 9 Maŋa wasu gudzun tsiraʼ ibi dzi imiŋʼ uŋar aruani u. Imaʼ. Dzi garam gudzuŋgaŋʼ wapaʼ dzi i nam maŋan u, da bitsintaʼ agu aŋu, i wain araŋan finiŋgan agu. Da dzi nabu naŋ sanab asub maisan igi nabianuŋʼ? Nigi buŋʼ abi nam maisan tsiraʼ biŋan dzi naŋan da Anutu.” 10 Da sagat igi rurim udzuŋ da Yosef maiʼ maiʼ i ruta araŋan giŋʼan, da bitsintaʼ Yosef ibugin da wasu uts da araŋan. 11 Gubuʼ maŋan da Yosef yataŋʼ uŋar wasaʼ i naŋa guman da garam gum maŋan wampai nigi u. 12 Potifar finiŋgan impuŋ araŋan ŋarukui gan ufiak da ini rutin, “Waba da agi giŋʼ!” Da bitsintaʼ Yosef isagruʼ ŋarukui gan rai imiŋʼ araŋan baŋiŋgan da irunt iwaʼ sinuŋʼ uŋar. 13 Gubuʼ araŋan tsaŋanda ŋarukui ruŋʼ miŋʼa araŋan baŋiŋgan da Yosef runta waʼan, 14 da araŋan inuʼ garam guman da ini, “Agam watsaŋan garam Hibru araga. Dzi gabuŋgaŋʼ iyu garam araga iba agi uŋaraŋʼ i rima rini miaʼ tsiraʼ da agi. Araŋan yataŋʼ ba i arimpa dzi, da dzi rim uŋaʼ. 15 Da gubuʼ araŋan riŋanta i dzi rima uŋaʼ, da itiri ŋarukui gan rai iruʼ da dzi, da irunt iwaʼ biaʼ manaʼ.” 16 Potifar finiŋgan rugif ŋarukui igi ragun isaŋʼ gabuŋgan bawaʼan. 17 Da araŋan ifis i nan ibiani da gabuŋgan, “Mamaʼ gum utaʼ Hibru aru agu uda bada agi uŋaraŋʼ ugu yataŋʼ uŋar da dzi i naŋa asub i dzi. 18 Da dzi rim uŋaʼ da araŋan itiri ŋarukui gan rai iruʼ da dzi da irunt iwaʼ manaʼ.” 19 Gubuʼ Yosef garam tsiraʼ gan Potifar riŋanta i finiŋgan nangan fisa i Yosef naŋgan naŋa rutin da nugun itsakia tsiraʼ biŋan aŋu. 20 Da irim Yosef i karabus imiŋʼ uŋar karabus kiŋ rima garam naŋa asub in ugu. Da bitsintaʼ Yosef mpada karabus, 21 da Yawe irut araŋan da inaŋ bini gin da inaŋ garam mpada tayaŋʼ uŋar karabus igi maran yari nidzun aŋu i Yosef. 22 Ibinigi da garam arigi itaŋin Yosef i mpada tayaŋʼ gum da garam karabus santan. 23 Garam mpada tayaŋʼ uŋar karabus igi maran wafur i tsuwara gum Yosef naŋan u, wain ibi Yawe irut araŋan da irim araŋan sib i naŋa nam santan waʼa bini.
Yosef Iragi Kiŋ Garaman Iruʼ Naŋgan Puafuban Waiŋgan Wasi
1 Gubuʼ fain ifa sib raiyi da kiŋ Idzip garam gudzuŋgan iruʼrun, maŋan mpada tayaŋʼ garam tipa wain gurun da maŋan mpada tayaŋʼ garam taida bret, inaŋ asub imiŋʼ kiŋ maraŋgan. 2 Kiŋ Farau nugun iruaʼ nidzun i garam gudzuŋgan iruʼ igi, 3 da irim i karabus imiŋʼ garam siŋa-ari gudzuŋgan uŋaran naŋa gumin, aru Yosef mpada gin ugu. 4 Da garam siŋa-ari gudzuŋgan itaŋin Yosef i mpada tayaŋʼ garam iruʼ igi, da araŋan impa tayaŋʼ gin. Mpada karabus igi gubuʼ fain sib 5 da idziaŋ maŋan, da garam iruʼ igi--garam mpada tayaŋʼ kiŋ wain gurun gan ugu da garam mpada tayaŋʼ kiŋ uŋaran taida bret in ugu--iguruan puafuban. Da gan naŋgan puafuban iruʼ igi waiŋgan ruga rugan. 6 Da gubuʼ Yosef batsaŋanda ribaraŋan da tataʼ, da itsaŋan rib iruʼ igi waŋun ibarabin da maran nidzun imais wasi. 7 Da igutin, “Wain idzuwai da agam waŋum ibarabin?” 8 Da rib iruʼ igi ini da araŋan ibiani, “Aga iruʼ ani itsaŋan nam puafuban da idziaŋ ugu. Da garam imaʼ i dziwara i waiŋgan da agai.” Da Yosef ini da garam iruʼ igi ibiani, “Anutu runtaʼ isu wain i dziwara i nam puafuban. Da agam wani agam naŋgam puafuban agam tsaŋandan igi da dzi.” 9 Ibinigi da garam mpada tayaŋʼ kiŋ wain gurun gan ifis i naŋgan puafuban da Yosef ibiani, “Miŋʼa dzi naŋgaŋʼ puafuban da dzi tsaŋan bruʼ wain maŋan muntida dzi maraŋʼ. 10 Bruʼ wain igi baŋin iruʼ da bits. Gubuʼ marasira puʼan da gan maraburuaban ipuʼ intiŋ, da suŋ aŋu da ikap da idzub intiŋ. 11 Dzi gif Kiŋ Farau kapan da igaŋiŋʼ wain nidzun dzuban igi gurun iruʼ gin da irim da araŋan.” 12 Yosef ini da araŋan ibiani, “Nigi waiŋgan ibiani: bruʼ wain baŋin iruʼ da bits igi iram iyab i gubuʼ iruʼ da bits. 13 Gubuʼ iruʼ da bits buŋʼ afa sib da kiŋ buŋʼ atip ayu agu sinuŋʼ karabus da nataŋin agu i gam gumam. Da u buŋʼ atip arim kap wain gurun da kiŋ nabi aru u naŋan da muŋʼ ugu. 14 Da gubuʼ u mpada bini, da maram wafur dzi da wagaib dzi da wafis i dzi da kiŋ i rima dzi sib i uda dzi sinuŋʼ karabus ani. 15 I miamun da garam iwap dzi aŋu imiŋʼ garam Hibru intapan da iyu dzi iba ani. Da gubuʼ dzi mpada ani, dzi wanaŋ asub maŋan u. Irim dzi utaʼ aŋu yataŋʼ karabus.” 16 Gubuʼ garam mpada tayaŋʼ uŋar taida bret in riŋanta i Yosef ragida nam puafuban igi waiŋgan bini da ini da Yosef ibiani, “Dzi binigi. Dzi puafub da dzi tsaŋa dzi untuda bret tsitsuʼ fir iru da bits tatagun i ruan miŋʼa dzi gudzuŋʼ. 17 Tsitsuʼ fir miŋʼa waguŋʼ igi fuŋʼ i bret mara maran i kiŋ gadan, da bitsintaʼ apu dzuf idzuf iruʼ da igan.” 18 Da Yosef ini, “U naŋgam puafuban igi waiŋgan ibiani: bret tsitsuʼ fir iruʼ da bits igi iram iyab i gubuʼ iruʼ da bits. 19 Gubuʼ iruʼ da bits ntsupa sib da kiŋ buŋʼ asaf u wam utap da narugu u nidzuŋgam nayab gai, da apu dzuf buŋʼ adzuf aruʼ da naga agu sib.” 20 Da gubuʼ iru da bits arigi da intuaŋ kiŋ gubuʼ gan rinaŋgan apiŋʼa rutin da isu nam gadan tsiraʼ aŋu i gan garam guman santan da irut impruʼ ruan iga nam. Da ifa yu garam iruʼ rima i karabus ugu iba munti i gan garam guman santan maraŋgan. 21 Da kiŋ ini da garam mpada tayaŋʼ wain i tipa uda gan guman aru uda muŋʼ ugu, 22 da irugu garam mpada tayaŋʼ uŋar bret igi iyab gai maŋan imiŋʼ namanaʼ, yatsuŋʼ nan Yosef ragida wasi da ribaraŋan ugu. 23 Da bitsintaʼ garam mpada tayaŋʼ kiŋ wain gan maran watip ifur Yosef u. Imaʼ. Maran isamu Yosef nidzun aŋu.
Farau Naŋgan Puafuban
1 Gubuʼ udzuf iruʼrun fada sib da Kiŋ Farau ipuafub da itsaŋan araŋan muntida mpui Nail riŋan, 2 da itsaŋan makau dudubadan bini 7 waʼa mpui Nail yaba ba da gada sai mpui riŋan. 3 Da itip itsaŋan makau 7 gaŋkidan muntida urun utaʼ waʼa mpui Nail atsuŋʼa yaba ba da bamuntida sarimpa makau dudubadan 7 ugu miŋʼa mpui riŋan. 4 Da itsaŋan makau gaŋkidan gada makau dudubadan 7 igi sib. Da Farau maran itaʼ. 5 Araŋan itip igiŋʼ marampruʼ da itip itsaŋan nam puafuban maŋan, da itsaŋan dzaŋkum wain bitsintaʼ kapa nidzun 7 da iwaʼ maran bini aŋu. 6 Rai da dzaŋkum wain maŋan gubuʼ garadan da kapa nidzun 7 maisan aŋu da fiŋʼa i ruan iyab impruʼ. 7 Da dzaŋkum nidzun fiŋʼa i ruan sib intap i dzaŋkum nidzun bini 7 ugu sib. Farau maran itaʼ da isruʼgin ibi araŋan ipuafub aŋu. 8 Pisan da araŋan iyu uwayant ampibiŋan i naŋgan puafuban igi, da itaŋin nan i garam mararuru da garam kupisa nam maradzigin santan miŋʼa Idzip iwaʼ impruʼ. Da Farau ifis i naŋgan puafuban tsaŋandan igi da ribaraŋan. Da bitsintaʼ ribaraŋan imami ruan i dziwara araŋan naŋgan puafuban igi waiŋgan. 9 Da garam suda wain i kiŋ wain gurun gan ini da kiŋ ibiani, “Aruani da dzi maraŋʼ ifur asubaŋʼ tsafa ruaŋʼ gin i naŋan, i dzi maraŋʼ isamu ruaŋʼ sib. 10 Gubuʼ maŋan da agu Kiŋ nugum iruaʼ i garam guman agai, dzi da gam garaman mpada tayaŋʼ u uŋaram bret, da u rim agai i karabus imiŋʼ u garamam siŋa-ari garam gudzuŋgan uŋaran naŋa gumin. 11 Da idziaŋ maŋan aga iruʼ igi iwaʼ da nam puafuban, da aga naŋgaŋʼ puafuban igi waiŋgan da ruga rugan. 12 Gubuʼ arigi da garam rinifaʼ Hibru maŋan, garam siŋa-ari gudzuŋgan garam guman, irut agai impai karabus. Aga fis i naŋgaŋʼ puafuban rutin da araŋan idziwar i aga naŋgaŋʼ igi waiŋgan da agai. 13 Da nam santan araŋan ragidan da agai igi iwaʼ isu nidzun. Dzi tip iyu gumaŋʼ da u rugu garam maŋan ugu.” 14 Ibinigi da Kiŋ Farau iwat garam gum ifan da iyu Yosef suŋ aŋu sinuŋʼ uŋar karabus da irut iba. Yosef inab mun da yatsuf naŋgan faʼ sib da iba munti Kiŋ Farau maran. 15 Da Kiŋ Farau ini da Yosef ibiani, “Dzi waʼ da nam puafuban maŋan da maŋa wadziwar i dzi naŋgaŋʼ puafuban igi waiŋgan wasi da dzi u. Da bitsintaʼ garam maŋan ini da dzi i agu saŋʼ i dziwara i nam puafuban waiŋgan wasi.” 16 Da Yosef ini Kiŋ Farau nangan muŋaʼ ibiani, “Dzi ruŋgaŋʼ wasaŋʼ u, da bitsintaʼ Anutu buŋʼ aragi wain wasi da agu Farau da buŋʼ anaŋ u nugum nanuf.” 17 Da kiŋ ini da Yosef, “Miŋʼa dzi naŋgaŋʼ puafuban da dzi tsaŋan dzi muntida mpui Nail riŋan, 18 da dzi tsaŋa makau dudubadan bini 7 waʼa mpui Nail yaba ba da gada sai mpui riŋan. 19 Rai da dzi tip itsaŋa makau 7 gaŋkidan muntida urun utaʼ tipa waʼa mpui. Dzi watsaŋan makau maran maŋa bidanigi imiŋʼ intap Idzip santan u. 20 Da makau gaŋkidan muntida urun utaʼ igi iga makau dudubadan bini 7 waʼa muŋʼ ugu sib. 21 Iga sib da bitsintaʼ dzi tsaŋa ibi makau gaŋkidan igi wawaʼ bini ibi gada makau bini igi u. Imaʼ. Rugaŋki aŋu ibi miamun ugu. Da dzi maraŋʼ itaʼ. 22 Da dzi tipa giŋʼan da dzi tsaŋan dzaŋkum wain bitsintaʼ kapa nidzun 7 da iwaʼ maran bini aŋu. 23 Raiyi da itip ikap nidzun 7 maisan aŋu fiŋʼa i ruan. 24 Da dzaŋkum nidzun fiŋʼa i ruan intap i dzaŋkum nidzun bini 7 ugu sib. Dzi fis i naŋgaŋʼ puafuban igi da garam mararuru da garam kupisa nam maradzigin da maŋa wadziwar i nam puafuban igi waiŋgan wasi da dzi u. Imaʼ.” 25 Da Yosef ini da Kiŋ Farau ibiani, “U naŋgam puafuban iruʼ igi waiŋgan isaŋʼ ruan aŋu. Anutu ini nan wasi da agu muŋʼ i nam araŋan nida naŋan. 26 Makau dudubadan bini 7 iram i udzuf 7. Da dzaŋkum nidzun 7 iram i udzuf 7 ibinigi. Nam puafuban i makau 7 da dzaŋkum nidzun 7 igi iram iyab i nam wain bitsintaʼ aŋu. 27 Da makau gaŋkidan 7 waʼa atsuŋʼa ba igi da dzaŋkum nidzun 7 gubuʼ garadan iram iyab i udzuf maŋits 7. 28 O kiŋ, ibi nan dzi nida sib ugu, Anutu isantiŋʼ agu i nam araŋan nida naŋan. 29 Udzuf 7 da nam gadan buŋʼ anti nasaŋʼ intap Idzip santan. 30 Da nigi ntsupan, da gubuʼ maŋits tsiraʼ buŋʼ amunti nasaŋʼ udzuf 7. Garam Idzip maran buŋʼ asamu gubuʼ bini nam gadan ntidan. Da gubuʼ tsiraʼ nam gadan maʼan buŋʼ awaya intap da garam gar santan. 31 Garam gar santan maran buŋʼ asamu udzuf bini nam gadan ntidan ugu i gubuʼ fus tsiraʼ nam mariŋʼa sib igi buŋʼ amais nidzun aŋu. 32 Wain Anutu rima nam puafuban iruʼrun da agu igi ibi araŋan itip nam igi sib i waʼan, da Anutu buŋʼ anaŋ nawaʼ suŋ aŋu. 33 Da aruani da wapiriaŋʼ garam mararuru tipa rabuba i nan bini i suda gudzun da mpada tayaŋʼ gum santan miŋʼa Idzip. 34 Da wapiriaŋʼ garam fain nasu gudzun i gamp nasaŋʼ intap Idzip santan da nabraŋ nam gadan ntidan igi nasaŋʼ 5, da nayu 5 igi gan bits nasaŋʼ udzuf 7. 35 Da u ruŋgam wani nifum i ribaraŋan ufuma nam gadan udan da udzuf 7 igi i uŋar ufuma nam gadan gin miŋʼa gamp gamp santan, da wataŋin garam siŋa-ari i mpada tayaŋʼ gin. 36 Da gubuʼ tsiraʼ muntidan da nam gadan maʼan saŋʼa udzuf 7 waʼa intap Idzip, da nam gadan garam gudzun ufuman miŋʼa uŋar tsiraʼ igi buŋʼ arim ampan santan sib i anuŋʼ mampa i maŋits u.” 37 Kiŋ Farau da gan garam gudzuŋgan iriŋant i Yosef nangan santiŋʼan igi da maran yari gin. 38 Ibinigi da Farau igut i gan garam gudzun gan ini binaʼ, “Agi busauda garam idzuwai igi i busaŋʼa garam ani i naŋa gum ani? Imaʼ. Anutu Mara Payaman irut garam ani.” 39 Da Farau ini da Yosef ibiani, “Anutu ruŋgan isantiŋʼ nam ani santan da agu, ibinigi da garam maŋan wayu uwayant da mararuru bini ibi agu u. 40 Dzi taŋin agu isu garam gudzun tsiraʼ imiŋʼ dzi uŋaraŋʼ, da dzi ampaŋgaŋʼ santan buŋʼ ataŋʼ waraŋʼ i agu da nariŋant i u nangam. Da dzi kiŋ runtaʼ aŋu da u buŋʼ ampa waraŋʼ i dzi.”
Yosef Impa Tayaŋʼ Intap Idzip
Ibinigi da Kiŋ Farau ini da Yosef ini binaʼ, “Yosef, wariŋantin. Aruani da dzi taŋin agu isu gudzun i intap Idzip santan.” 42 Da Kiŋ Farau igruʼ gan riŋ gan suda i maran miŋʼa gin i baŋin da yatsuf i Yosef baŋi narun. Farau yatsuf ŋarukui faʼ faʼ ŋarubini aŋu iyab da Yosef da isuŋun tsein gol ifa i wan. 43 Kiŋ Farau irim karis maŋan i Yosef mpada gin yatsuŋʼ kiŋ da garam siŋa-ari imuŋʼ i araŋan da inuʼ ini binaʼ, “Wawaʼ manaʼ i sanab da frap anuf! Garam tsiraʼ iba!” I sanab bidanigi da itaŋin Yosef isu gudzun i intap Idzip santan. 44 Da Farau ini da Yosef ibiani, “Dzi runtaʼ isu Kiŋ Farau, da bitsintaʼ garam Idzip maŋan wasaŋʼ i naŋa nam maŋan i maraŋgan furan. Imaʼ. Nau nan namiŋʼ agu gin muŋʼ rai.” 45 Da Farau irim biŋan Tsafenat Pania da Yosef. Da irim Asenat, Potifera narun finam, da Yosef isu i finiŋgan. (Da Potifera igi isu garam anutu wain i anutu umpur imiŋʼ gamp On, nida Heliopolis gin.) Da Yosef biŋaŋgan imunti isaŋʼ intap Idzip santan. 46 Gubuʼ Yosef uda kiŋ Idzip guman da udzufan isaŋʼ 30. Yosef itaŋin kiŋ rai da iyuŋ itsuar gamp santan miŋʼa intap Idzip igi. 47 Da miŋʼa udzuf bini 7 aru Yosef nidan ugu da nam gadan inti iyus aŋu. 48 Yosef intsuŋʼ nam gadan ntidan miŋʼa udzuf 7 arigi santan da yufum imiŋʼ gamp tsiraʼ santan. Nam gadan gum santan miŋʼa wafiʼa gamp tsiraʼ bitsintaʼ bitsintaʼ da yufum imiŋʼ gamp igi ruga rugan. 49 Yosef yufum wit nidzun isu marabuntup tsiraʼ biŋan imiŋʼ gamp tsiraʼ santan, isaŋʼ sasanuai miŋʼa uruts, da araŋan anuŋʼ isaŋʼ i kakara i gudzuŋgan da fantsupa sib u. Imaʼ. 50 Yosef finiŋgan Asenat irim araŋan narun rusan marub iruʼrun raiyi da imus waʼa udzuf maŋits tsiraʼ. 51 Yosef ifariŋʼ mamaʼ marub miamun igi biŋaŋgan Manase (waiŋgan ibi ‘maran isamu’), da ini, “I Anutu inaŋ da dzi maraŋʼ isamu barabin gaŋʼ santan da dzi ramaŋgaŋʼ utupan santan mpada dzi gampaŋʼ wain.” 52 Da ifariŋʼ narun marub isiʼ igi biŋaŋgan Ifraim (waiŋgan ibi ‘kapa nidzun’) da ini, “I Anutu inaŋ da dzi kap nidzuŋgaŋʼ bini i mamaʼ narun iruʼ imiŋʼ intap dzi mpada da barabin gin ani.” 53 Udzuf 7 nam gadan ntidan miŋʼa gamp Idzip gubuʼ gan iba ntsup, 54 da udzuf 7 maŋits tsiraʼ iwaʼ ibi Yosef nidan ugu. Da maŋits tsiraʼ iwaʼ imiŋʼ intap fain aga, da bitsintaʼ miŋʼa intap Idzip santan da nam gadan rumiŋʼ. 55 Gubuʼ rib Idzip rabuba i nam gadan ntsupan da ifa yaiʼ ruan da Kiŋ Farau i nam gadan. Da kiŋ ini da rib Idzip santan ibiani, “Agam wafan da Yosef da agam wanaŋ nam araŋan nidan da agam.” 56 Gubuʼ fus tsiraʼ nam santan mariŋʼa sib isaŋʼ intap Idzip igi santan. Da ibinigi da Yosef itus muantsi i uŋar ufuma nam gadan gin, da irim wit da garam Idzip da iyu nam ntsuman gin. 57 Da garam intap fain iba Idzip i tsaŋanda Yosef da uda nam gadan bidanigi, i gubuʼ tsiraʼ iŋauŋʼ intap santan.
Yosef Rain Rusan Iba Idzip
1 Gubuʼ Yakop riŋanta i nan bida wit miŋʼa Idzip, da ini da narun rusan ibiani, “Amaʼ! Agam ibumpa irarab rumaram ibinigi? 2 Dzi riŋant i nan i wit imiŋʼ Idzip. Agam waruʼ da wayu agi gaŋʼ fain, i agi mamamp i maŋits i.” 3 Ibinigi da Yosef rain rusan 10 iruʼ i uda wit miŋʼa Idzip. 4 Da bitsintaʼ Yakop wataŋin Benyamin, Yosef raiŋgan isiʼ igi, warut rain ruas fain igi ifan u. Irat i Benyamin mawaʼ da barabin. 5 Ibinigi da Israil narun rusan irut ampan fain ruʼa Idzip i uda wit impruʼ ruan ifan, i gubuʼ tsiraʼ nam gadan maʼan iwaʼ intap Kanan ibinigi. 6 Gubuʼ Yosef suda garam gudzun tsiraʼ miŋʼa Idzip da isu wain i rima wit da ampan santan barima nam ntsuman gin. Da rain rusan ibawaʼ da yidzaʼ fagan da itauf maran iruʼ intap imiŋʼ araŋan maran. 7 Gubuʼ aru Yosef tsaŋanda rain rusan da ifariŋʼ ribaraŋan sib, da bitsintaʼ irib inaŋ ruŋgan ibi garam maŋan da ini nan nampaŋ da ribaraŋan da igutin ini binaʼ, “Agam imiŋʼ anuŋʼ iba?” Da ribaraŋan ini, “Aga miŋʼ intap Kanan iba i uda nam gadan.” 8 Yosef ifariŋʼ rain rusan sib, da rain rusan wafariŋʼ araŋan u. 9 Da Yosef maran ifur gan naŋgan puafuban muŋʼ tsaŋanda rain rusan idzaʼa fagan rutin ugu, da ini binaʼ, “Agam garam bada i rima ipiap i agai igi da tsaŋanda aga gampaŋʼ da sruʼagin i ba-isa agai.” 10 Da ribaraŋan ini binaʼ, “Garam tsiraʼ, imaʼ. U garam gumam agai iba i suba nam i nam gadan. 11 Aga santan ani ramaŋgaŋʼ bitsintaʼ aŋu. U garam gumam agai ani garam nan nidzun; aga anuŋʼ garam rima ipiap u.” 12 Da Yosef ini, “Imaʼ. Agam iba i tsaŋanda aga gampaŋʼ i bida anuŋʼ da agam ba-isa agai.” 13 Da ribaraŋan ini, “O garam tsiraʼ, imaʼ. Aga 12, aga ramaŋgaŋʼ bitsintaʼ, da aga 10 aŋu iba i uda nam gadan da aga ramaŋgaŋʼ irut aga raiŋgaŋʼ isiʼ impa muŋʼ, da aga raiŋgaŋʼ maŋan itaŋin aga rai.” 14 Yosef rurim udzuŋʼ da ini, “Imaʼ. Nan ibi aru dzi nidan da agam. Agam garam rima ipiap i agai. 15 Da dzi buŋʼ aintsaʼ agam nangam nabiani: dzi ni nan nidzun da agam i Farau nampaŋgan, agam wasaŋʼ i fadan bida agam raiŋgam isiʼ igi mamida i badan. 16 Agam wataŋin agamam bits nafan da nau agam raiŋgam isiʼ igi naba. Da agam santan buŋʼ ampa karabus. Da aga natsaŋan agam nangam nidan igi bida nan nidzun ma imaʼ. Bida maʼan da dzi ni nan nidzun da agam i Kiŋ Farau nampaŋgan, agam garam rima ipiap i agai.” 17 Da irim ribaraŋan i karabus isaŋʼ gubuʼ iruʼ da bits. 18 Waʼa gubuʼ iruʼ da bits, da Yosef ini da ribaraŋan ibiani, “Dzi garam rata i Anutu, ibinigi da dzi wasaŋʼ isa agam funub bida agam naŋa nam bida dzi nidan. 19 Bida agam garam nan nidzun da wataŋin raiŋgam bits nampa karabus namiŋʼ ani da agam santan wayu wit nafa i gam ribam mpada maŋits. 20 Da agam wau raiŋgam isiʼ igi naba da dzi i dzi sruʼagin bida agam ini nan nidzun. Agam naŋa bidanigi da agam wasaŋʼ mampan u.” Da ribaraŋan itaga ruan i Yosef nangan. 21 Da ribaraŋan ini nan da ruŋgan ibiani, “Nan nidzun biŋan! Agi naŋgaŋʼ naŋa yaba i raiŋgaŋʼ Yosef ugu muŋaʼ gan ani. Agi tsaŋa raiŋgaŋʼ waŋu barabin gan da gubuʼ maragab raŋa gampunda ruan da agi ugu, da agi wagaib araŋan u. Ibinigi da barabin ani iwaʼ da agi.” 22 Da Ruben ini, “Dzi ni wai da agam? Dzi ni agam anuŋʼ naŋa nam asub maŋan yaba i mamaʼ igi. Da bitsintaʼ agam anuŋʼ iriŋant i nan u. Aruani da agi yu barabin muŋaʼ i araŋan naŋgan mampan.” 23 Ribaraŋan wasruʼgin ibi Yosef isruʼ i nan ribaraŋan nidan da ruan igi u, i wain ibi garam itama i nan imunti wasaʼ i Yosef da rain rusan. 24 Da itiri ribaraŋan rai da ifa maŋan da iraŋ. Ntsupa sib da araŋan itip iba da ini nan da ribaraŋan. Araŋan ini da garam gum impuŋ Simion da idzur araŋan imiŋʼ i rain rusan maran. 25 Yosef ini da gan garam guman i faraŋʼa wit ruʼa ribaraŋan bekan da tipa faraŋʼa ribaraŋan silva gan ragun gin ruʼa bek ruga rugan saŋʼa santan, da rima nam gadan i rima ribaraŋan sib i sanaban tipa fadan. Da mamaʼ gum inaŋ isaŋʼ Yosef nidan. 26 Ntsupa sib da ribaraŋan idzur bek wit iyab doŋki gan da ifan. 27 Gubuʼ ribaraŋan yuŋa fawaʼa mumai wasaʼ maŋa giŋʼa gin da ribaraŋan maŋan ikiraʼ bekan i rima nam gadan da doŋki gan da itsaŋan silva gan miŋʼa bek nifun aŋu. 28 Da inuʼ rain rusan ini binaʼ, “Aitsaŋan! Ribaga tip ifaraŋʼ dzi silva gaŋʼ iruʼ dzi bekaŋʼ.” Ribaraŋan nugun isantan ruan da irat da irarab ru maran da ini da ruan, “Nam idzuwai gan ani da Anutu inaŋ ibiani da agi?” 29 Gubuʼ ribaraŋan bawaʼa sib da raman Yakop i intap Kanan, da ifis i nam santan waʼan da ribaraŋan ugu. Da ini binaʼ, 30 “Garam gudzun tsiraʼ mpada tayaŋʼ Idzip ini nan tsiraʼ aŋu iyab i agai da idzur nan i agai ini aga garam rima ipiap i ribaraŋan gampan. 31 Da bitsintaʼ aga ni da araŋan, ‘Aga garam nan nidzun; aga anuŋʼ garam rima ipiap u. 32 Aga 12, aga ramaŋgaŋʼ bitsintaʼ. Da aga raiŋgaŋʼ maŋan itaŋin aga rai, da aga raiŋgaŋʼ isiʼ rurut aga ramaŋgaŋʼ impa Kanan.’ 33 Da garam gudzun tsiraʼ mpada tayaŋʼ intap igi ini da agai ibiani, ‘Sanab dzi tsaŋanda agam bida garam nan nidzun buŋʼ abiani: Agam wataŋin agamam bits narut dzi nampai. Da agam wayu nam gadan wafa i gam utupam nam gadan maʼa gin aga. 34 Da bitsintaʼ agam wau raiŋgam isiʼ igi naba da dzi da dzi buŋʼ asruʼgin nabi agam anuŋʼ garam rima ipiap u, agam garam nan nidzun. Da dzi buŋʼ ataŋin agam raiŋgam nabiaʼ da agam. Da agam isaŋʼ yuŋa aga gampaŋʼ da naŋa gumam da suba nam in saŋʼa maraŋgam furan.’ ” 35 Da ribaraŋan iyats gan bek witan da itsaŋa silva gan miŋʼa saŋʼa gan bek witan ruga rugan. Gubuʼ ribaraŋan ruta ramaŋgan tsaŋanda silva igi da ribaraŋan irat. 36 Ribaraŋan ramaŋgan Yakop ini da ribaraŋan ibiani, “Agam aŋu inaŋ da dzi naruŋʼ rusaŋʼ iruʼrun maran imaʼ. Yosef maran imaʼ, da Simion maran imaʼ. Da aruani da agam ini tipa uda Benyamin fada sinuŋʼ dzi. Agam naŋgam naŋan bidanigi da dzi buariŋʼ barabin gin!” 37 Da Ruben ini da raman ibiani, “Ramaŋʼ. Wataŋin araŋan ba dzi baŋiŋgaŋʼ. Dzi buŋʼ ampa tayaŋʼ araŋan nasaŋʼ dzi tipa uda araŋan badan da agu. Da bida dzi mamida tipa uda Benyamin badan da agu ida wais dzi naruŋʼ rusaŋʼ marub iruʼ aga funub.” 38 Da bitsintaʼ Yakop ini ibiani, “Dzi naruŋgaŋʼ wasaŋʼ i ruta agam ruʼan u, i araŋan raiŋgan imamp sib da araŋan runtaʼ aŋu ruŋʼ impai. Da bida barabin waʼa da araŋan i sanab da barabin igi buŋʼ ais dzi funub, i dzi fufi sib.”
Yosef Rain Rusan Irut Benyamin Ifa Idzip
1 Gubuʼ maŋits rumiŋʼ isu mais nidzun aŋu imiŋʼ intap Kanan. 2 Ibinigi da gubuʼ Yakop da gan utupan gada witan uda i Idzip badan ugu sib, da Yakop ini da narun rusan ibiani, “Agam watip wafan da warim nam ntsuman i suba agi nam gadan gaŋʼ faʼ.” 3 Da bitsintaʼ Yuda ini da araŋan, “Ramaŋʼ. Garam gudzun tsiraʼ aga ini nan riniurun da aga sib ibiani, ‘Dzi anuŋʼ tsaŋanda agam nasaŋʼ agam uda raiŋgam igi da ruta badan.’ 4 Bida agu taŋinda aga raiŋgaŋʼ da agai i ruta fadan, da aga buŋʼ aruʼ da nayu nam gadan i agu. 5 Da bida u mamida taŋinda araŋan da agai da aga wasaŋʼ i ruʼan u, i garam gudzun tsiraʼ ini da aga sib ibiani, ‘Dzi anuŋʼ tsaŋanda agam nasaŋʼ agam uda raiŋgam igi da ruta badan.’ ” 6 Da Israil igutin, “Ibianuŋʼ da agam yutus barabin igi da dzi i nidan da garam igi bida agam raiŋgam maŋan ruŋʼ impai?” 7 Ribaraŋan ini araŋan nangan muŋaʼ ibiani, “Garam igi igut aga rururuŋan aŋu i aga rib idzuwai da gaŋʼ utupaŋʼ impruʼ, da ini, ‘Da agam ramaŋgam ruŋʼ impai ma imaʼ? Da agam araŋan arunigi ma agam raiŋgam bits rumpai?’ Igut i agai da aga kupis nan santan wasi. Da maŋa busruʼgin ibi araŋan nida aga uda raiŋgaŋʼ igi tipa ruta fadan?” 8 Da Yuda ini da ramaŋgan Israil ini binaʼ, “Wataŋin Benyamin ba da dzi da aga nafa suŋ aŋu, i agu da agai da aga naruŋʼ rusaŋʼ anuŋʼ mampa i maŋits u. 9 Dzi ruŋgaŋʼ buŋʼ asu wain i mpada tayaŋʼ araŋan fadan da tipa badan da agu. Da bida dzi mamida uda araŋan badan da bataŋinda i u maraŋgam, da dzi buŋʼ asu wain i barabin igi santan namiŋʼ u maraŋgam nantiŋ. 10 U damami muntida sib i agai da aga saŋʼ fadan da badan saŋʼa iruʼrun da aruani sib.” 11 Ibinigi da ribaraŋan ramaŋgan Israil ini rutin ibiani, “Bidanigi da agam wanaŋ wabiani: agam wafaraŋʼ nam bini bini intap ani fain bida gai gurun gaunt bini da bigub gurun da asam da wasub wasub da gai nidzun pistasio da almon--nasu nam rima nugun tsiaʼan da araŋan. 12 Wayu silva ruampi nasaŋʼ uda nam gadan faʼ da tipa rima nam ntsuman ratar faraŋʼa ragun i agam bekam ugu, i mabi maran masaʼ gin. 13 Agam wau raiŋgam da wafa suŋ da garam tsiraʼ igi. 14 Da Anutu Nampaŋ Wain nanaŋ garam tsiraʼ igi uwayantan nawaʼ bini i agam da natip ataŋin agam raiŋgam maŋan ugu nampruʼ da Benyamin narut agam natip aba da dzi. Da bida dzi waʼa da waŋu barabin tsiraʼ igi i naruŋʼ rusaŋʼ mampa sib, da nawaʼ nabiarigi.” 15 Ibinigi da ribaraŋan iyu nam bini riman da Yosef impruʼ da silva ruampi da irut Benyamin iruʼ gamp Idzip suŋ aŋu da ifamunti Yosef maraŋgan. 16 Gubuʼ Yosef tsaŋanda Benyamin ruta ribaraŋan, da ini da garam guman mpada tayaŋʼ araŋan uŋaran ibiani, “Wau garam tuasarani nafa dzi uŋaraŋʼ da wais apu maŋan da watip nam gadan. I ribaraŋan buŋʼ arut dzi naga nam da gubuʼ wasaʼ.” 17 Garam igi yatsuŋ Yosef nangan nidan da iyu ribaraŋan ifa Yosef uŋaran. 18 Da gubuʼ uda ribaraŋan fada Yosef uŋaran, da ribaraŋan irat da ini da ruan ibiani, “Araŋan iyu agi iba ani i wain maruʼ silva faraŋʼa ruʼa agi bek witaŋʼ da gubuʼ miamun agi badan ugu. Mani buŋʼ ampuŋ agi da nais agi da nanaŋ agi nasu garam gum utaʼ da nau agi doŋki gaŋʼ sib.” 19 Ibinigi da ribaraŋan ifawaʼ da Yosef garam guman i muantsi ataŋʼa uŋar wasaʼ da ini rutin ibiani, 20 “O garam tsiraʼ, miamun da aga ruʼ ba Idzip da aga rim nam ntsuman i nam gadan. 21-22 Da bitsintaʼ gubuʼ aga fadan da fagiŋʼa sanab da kiraʼa bek nam gadan da aga tsaŋa silva gaŋʼ suba nam gadan gin ugu rururuŋan miŋʼa bek nifun saŋʼa ruan santan. Aga wasruʼ i maŋa faraŋʼa silva igi ruʼa aga bekaŋʼ. Ibinigi da aga tip iyu silva santan iba. Da aga yu silva fain impruʼ i tipa suba nam gadan faʼ gin.” 23 Da araŋan ini ribaraŋan nangan muŋaʼ ini binaʼ, “Nan imaʼ gin. Agam anuŋʼ ratan u. Agam da ramaŋgam Anutu gan ruŋgan irim silva igi iruʼ agam bekam. Dzi yu agam silva gam sib wa.” Da araŋan ifa yu Simion iwaʼ ba da ribaraŋan. 24 Garam gum iyu ribaraŋan yataŋʼ Yosef uŋaran da irim mpui da ribaraŋan i adzuʼa fagan gin, da irim nam gadan da ribaraŋan doŋki gan. 25 Ribaraŋan iriŋant i nan sib ibi Yosef buŋʼ arut ribaraŋan naga nam da gubuʼ wasaʼ namiŋʼ araŋan uŋaran, ibinigi da ribaraŋan itip ruan i naŋgan riman da Yosef. 26 Gubuʼ Yosef bada uŋar, da ribaraŋan irim naŋgan uda badan ugu da araŋan, da yidzaʼ fagan da itauf maran iruʼ intap imiŋʼ araŋan maran. 27 Da araŋan igut i ribaraŋan i naŋgan mpadan impa ibianuŋʼ ida igut i ribaraŋan i ramaŋgan ibiani, “Agam ramaŋgam fufi nida da dzi ugu impa ibianuŋʼ? Araŋan rumpai bini, ma?” 28 Da ribaraŋan ini, “Hai, garam tsiraʼ. U garam gumam aga ramaŋgaŋʼ ruŋʼ impa bini aŋu.” Da itip itauf maran iruʼ i tsarifa araŋan. 29 Yosef irarab ribaraŋan da itsaŋan raiŋgan Benyamin, rinaŋgan wain naruŋgan, da igutin, “Mani agam raiŋgam isiʼ agam nida da dzi ugu aruani, ma?” Da araŋan ini, “Naruŋʼ, Anutu nafinti agu.” 30 Tsaŋanda raiŋgan isiʼ igi da maran igaib araŋan nidzun aŋu da inaŋ i raŋan da itaŋin rain ruas da isau mumai maŋan i fa-raŋa gin. Araŋan yataŋʼ uŋar wasaʼ gan da iraŋ. 31 Iraŋ sib da yadzuʼ maran da iwaʼ ba da ya-aba i ruan aŋu da ini, “Warim nam gadan.” 32 Ribigi irim Yosef naŋgan gadan i mumai maŋan da rain rusan gan i mumai maŋan. Rib Idzip ruta Yosef mpadan ugu iga nam mumai maŋan, i rib Idzip wasaŋʼ i ruta rib Hibru mpruʼa ruan gada nam u. I rib Idzip naŋgan pumuʼan da itsaŋa rib Hibru da naŋgan gadan ibi nam bubumpuadan da ipaʼ ruan gin. 33 Yosef itaŋin rain ruas igi impai irants ruan yatsuŋʼ udzufan miŋʼa rain tsiraʼ da fantsupa rain isiʼ, da impai maran ifan da araŋan. Da rain ruas irunt fafun da irarab ruan i mpada bidanigi. 34 Garam gum iyu nam gadan imiŋʼ Yosef maran da irim da araŋan rain rusan i gadan. Da bitsintaʼ Benyamin naŋgan gadan da irim isaŋʼ garam 5 gan gadan. Ibinigi da ribaraŋan santan irut araŋan impruʼ ruan iga nam da inum wain iyus aŋu da nugun itsiaʼ.
Kap Silva Miŋʼa Wasaʼ i Bek
1 Gubuʼ gada nam sib da Yosef ini da gan garaman mpada tayaŋʼ araŋan uŋaran ibiani, “Wafaraŋʼ nam gadan i garam ani bekan nasaŋʼ fuŋʼan da watip wafaraŋʼ ribaraŋan silva gan ragun gin. 2 Da wafaraŋʼ dzi kapaŋʼ tipa i silva naruʼ ribaraŋan raiŋgan isiʼ bekan nampruʼ da araŋan silva gan suba wit gin ugu.” Da araŋan inaŋ isaŋʼ Yosef nidan. 3 Da pisa maratait da Yosef garam guman itaŋin araŋan rain rusan da doŋki gan ifan. 4 Rain ruas itaŋin gamp igi rai da wafa guntiʼ u da Yosef ini da garam guman ibiani, “Warunt suŋ aŋu watsuŋʼ garam tuasarunaga. Da gubuʼ u waʼa da ribaraŋan da wani wabiani rutin, ‘Ibianuŋʼ da dzi garam tsiraʼ gaŋʼ inaŋ bini i agam da agam inaŋ maisan rutin? 5 Wain idzuwai da agam iwap dzi garam tsiraʼ gaŋʼ kapan silva? Nigi kap dzi garam tsiraʼ gaŋʼ numa wain gin da rima nam fain gin i kupisa nam maradzigin wasi. Agam inaŋ asub tsiraʼ biŋan.’ ” 6 Ibinigi da Yosef garam guman irunt yatsuŋʼ da ifawaʼ da ribaraŋan da ini Yosef nifuŋgan rutin. 7 Da bitsintaʼ ribaraŋan ini i nifuŋgan muŋaʼ, “O garam tsiraʼ, ibianuŋʼ da u ni nan bidanigi iyab i agai? U garam gumam agai wasaŋʼ naŋa nam bidanigi u. 8 U sruʼgin sib wa, gubuʼ aga taŋinda intap Kanan rai i tipa badan, da aga yu silva aga tsaŋanda miŋʼa aga bekaŋʼ wit nifun itip iba da agu. Da wain idzuwai da aga wapa silva ma gol miŋʼa u garam tsiraʼ gam uŋaran? 9 Garam tsiraʼ! Bida u tsaŋanda aga gaŋʼ bits udan, da wais araŋan funub. Da aga santan aruani nasu u garam gumam utaʼ aŋu.” 10 Da araŋan ini, “Isaŋʼ. Dzi buŋʼ atsuŋʼ nan nabi agam nidan, da bitsintaʼ bida dzi waʼa rutin i agamam bits udan da araŋan aŋu buŋʼ asu dzi garam gumaŋʼ utaʼ aŋu. Da nan buŋʼ amaʼ i agam santan.” 11 Ibinigi da suŋ aŋu ribaraŋan santan itaŋin bek witan iruʼ intap da ikiraʼ bek nifun santan. 12 Da Yosef garam guman isau nam igi i bek santan, imiŋʼ rain tsiraʼ gin ibafan isaŋʼ waʼa rain isiʼ igi gin. Da itsaŋan kap silva igi miŋʼa Benyamin bek witan. 13 Gubuʼ ribaraŋan tsaŋandan da waŋun ibarabin nidzun aŋu da igari gan ŋarukui gan, da itip itsara bek witan iyab doŋki gan ruga rugan da itip iba gamp tsiraʼ igi. 14 Gubuʼ Yuda ruta rain rusan tipa bada Yosef uŋaran da araŋan rumpai. Da ribaraŋan ifa tatapuaŋʼ iruʼ Yosef maran. 15 Da Yosef ini da ribaraŋan ini binaʼ, “Agam inaŋ uwayant idzuwai gan ani? Agam madasruʼgin i garam tsiraʼ bida dzi ani isaŋʼ i naŋa nam i tsaŋanda nam miŋʼa maradzigin.” 16 Da Yuda ini, “Garam tsiraʼ. Aga bunida nan bida anuŋʼ i nida u nangam muŋaʼ? Aga wasaŋʼ tsarifa ruaŋʼ bida aga wanaŋ asub maŋan u. Imaʼ. Anutu ikupis wasi gam garam gumam agai ani asubaŋʼ. Aga santan buŋʼ asu u garam gumam utaʼ aŋu nampruʼ da aru garam gum tsaŋanda kap miŋʼa i gan bek witan ugu.” 17 Da bitsintaʼ Yosef ini binaʼ, “Imaʼ. Dzi wasaŋʼ i naŋa sanab bidanigi u. Garam aru uda kap silva aŋu buŋʼ asu dzi garam gumaŋʼ utaʼ. Da nan imaʼ i agam. Agam santan buŋʼ afan da ramaŋgam ruta nan nufan.” 18 Yuda ifa uts da Yosef da ini binaʼ, “O garam tsiraʼ! Dzi gaib ruŋgaŋʼ da agu i u riŋanta i garam gumam dzi nangaŋʼ. U garam tsiraʼ biŋan isaŋʼ Kiŋ Farau, da u nugum anuŋʼ ruaʼa i garam gumam dzi u. 19 Garam tsiraʼ, muŋʼ aga badan ugu da u gut i garam gumam agai ibiani, ‘Agam ramaŋgam ma raiŋgam rumpai ma imaʼ?’ 20 Da aga ni da agu sib ugu ini binaʼ, ‘Hai, aga ramaŋgaŋʼ fufi rurut aga raiŋgaŋʼ isiʼ aga ramaŋgaŋʼ fufida sib da riman ugu rumpai. Araŋan raiŋgan imamp sib, da araŋan runtaʼ aŋu, i rinaŋgan irim rib iruʼ igi. Ibinigi da raman maran yari nidzun aŋu gin.’ 21 Da u ni da agai u garam gumam ibiani, ‘Wau araŋan waruʼ ba da dzi da dzi ruŋgaŋʼ natsaŋan.’ 22 Da aga ni sib da agu, aga garam tsiraʼ gaŋʼ, ibiani, ‘Mamaʼ isiʼ arigi wasaŋʼ i taŋinda ramaŋgan rai u. Bida araŋan taŋinda ramaŋgan rai da raman buŋʼ amamp.’ 23 Da bitsintaʼ u ni da garam gumam agai ibiani, ‘Agam mamida ruta raiŋgam isiʼ igi badan da dzi anuŋʼ tipa tsaŋanda agam u.’ 24 “Da gubuʼ aga tipa fadan da aga fis i nan sib aŋu aga garam tsiraʼ gaŋʼ agu nidan da agai da aga ramaŋgaŋʼ, u garam gumam. 25 Raiyi da aga ramaŋgaŋʼ ini binaʼ, ‘Agam watip wafan da wayu nam gadan isiʼ pas i agi.’ 26 Da aga ni da ramaŋgaŋʼ ibiani, ‘Aga wasaŋʼ maŋan i ruʼan u. Bida aga ruta raiŋgaŋʼ isiʼ igi fadan, da isaŋʼ. Garam tsiraʼ igi wasaŋʼ i tipa tsaŋanda agai bida aga raiŋgaŋʼ isiʼ igi mamida i ruta aga fadan.’ 27 Da u garam gumam dzi ramaŋgaŋʼ ini da agai ibiani, ‘Agam isruʼgin sib wa. Dzi finiŋgaŋʼ Retsel irim dzi naruŋʼ rusaŋʼ marub iruʼrun. 28 Dzi naruŋgaŋʼ maŋan itaŋin dzi rai. Dzi ni binaʼ, “Mani apu buman maŋan igara araŋan fafarab sib.” Da dzi watsaŋan araŋan maran ibasaŋʼ aruani u. 29 Da bida agam tipa uda maŋa aruani sinuŋʼ dzi fadan da barabin waʼa rutin, da barabin igi buŋʼ ais dzi funub, i dzi fufi sib.’ 30-31 “Aruani da bida aga tipa fadan, da u garam gumam dzi ramaŋgaŋʼ mamida i tsaŋanda aga raiŋgaŋʼ isiʼ igi, da nugu barabin buŋʼ ais araŋan funub, i wain ibi araŋan ifufi sib da aga raiŋgaŋʼ isiʼ igi ibi araŋan nuguŋgan marafain. Da u garam gumam agai buŋʼ asu wain i aga ramaŋgaŋʼ naŋgan mampan igi. 32 Dzi tsaf ruaŋʼ sib da ramaŋgaŋʼ i mpada tayaŋʼ raiŋgaŋʼ isiʼ igi bini. Da dzi ni binaʼ, ‘Bida dzi mamida tipa uda raiŋgaŋʼ isiʼ igi badan da agu, da dzi aŋu buŋʼ asu wain i barabin igi santan namiŋʼ u maraŋgam nantiŋ.’ 33 Ibinigi da garam tsiraʼ, dzi gaib ruŋgaŋʼ da agu i u garam gumam dzi uda raiŋgaŋʼ isiʼ igi mumai gan da suda u garam gumam utaʼ aŋu, da wataŋin araŋan da narut rain rusan natip nafan. 34 Dzi butipa fadan da ramaŋgaŋʼ bida anuŋʼ bida mamaʼ igi mamida ruta dzi fadan? Imaʼ! Dzi bugin i tsaŋanda ramaŋgaŋʼ buariŋʼa barabin igi.”
Yosef Isantiŋʼ Ruŋgan Wasi da Rain Rusan
1 Nam raŋan iyab Yosef sib imiŋʼ garam guman maran, da iwat ribaraŋan ini binaʼ, “Agam santan wawaʼ sinuŋʼ dzi maraŋgaŋʼ.” Ibinigi da maŋan warut Yosef impai da gubuʼ araŋan santiŋʼa ruŋgan wasi da rain rusan. 2 Da araŋan iraŋ nifun tsiraʼ biŋan da garam Idzip iriŋantin, da kiŋ da riban santan mpada kiŋ uŋaran iriŋant i nan igi. 3 Da Yosef ini da rain rusan ibiani, “Dzi Yosef! Dzi ramaŋgaŋʼ ruŋʼ impai ma imaʼ?” Da bitsintaʼ rain ruas waŋun isantan ruan sib, da irat i araŋan da wasaŋʼ i nida nan maŋan u. 4 Da Yosef ini da rain rusan ini binaʼ, “Agam waba uts aŋu da dzi.” Ribaraŋan iba uts da raiŋgan Yosef da araŋan ini ibiani, “Dzi Yosef, agam raiŋgam aru agam uda nam ntsuman gin da taŋindan da garam nam bunump uda bada Idzip ugu ani! 5 Da aruani da agam waŋum anuŋʼ barabindan da tsakiada i ruŋgam tuaʼ i taŋinda dzi bada ani u, imaʼ. Anutu itaŋin dzi imuŋʼ iba ani i agam i rima santan aŋu sib. 6 Gubuʼ fus nam gadan maʼan imunti isaŋʼ udzuf iruʼ aŋu da aruani, da udzuf 5 rumiŋʼ da garam maŋan wasaŋʼ i suda gum da waʼa da nidzun u. 7 Anutu itaŋin dzi imuŋʼ iba i agam i rima agam sib i ruŋʼ utusa i agam da yaŋin rusam naŋgam mpadan. 8 Da agam anuŋʼ itaŋin dzi iba ani u. Imaʼ. Anutu aŋu. Da itaŋin dzi su kiŋ garaman santiŋʼa sanab da mpada tayaŋʼ kiŋ gampan da intap Idzip santan. 9 Aruani da agam wafa suŋ aŋu da ramaŋʼ da wani rutin, ‘U naruŋgam Yosef ini ibiani: Anutu itaŋin dzi isu garam gudzun tsiraʼ da dzi mpa tayaŋʼ intap Idzip santan. Wauriʼ da waba suŋ. 10 U buŋʼ aba mpa namiŋʼ intap Gosen uts da dzi i naŋan da dzi tsaŋanda agu ragun--agu da narum rusam da rumpum rusam da gam dumpa gam, nuniŋ gam, makau gam da naŋgam santan u suda wain gin. 11 Waba mpa nigi i dzi rima agu sib. Gubuʼ tsiraʼ nam gadan maʼa sib ani rubuŋʼ amunti nasaŋʼ udzuf 5, da dzi bugin i agu da gam utupam da apu gam santan sauda nam gadan.’ ” 12 Da Yosef ini, “Agam da dzi raiŋgaŋʼ Benyamin watsaŋan da wasruʼgin i dzi Yosef rururuŋan ani ini nan da agam. 13 Agam wani da dzi ramaŋgaŋʼ i biŋan tsiraʼ dzi udan miŋʼa Idzip da nam santan agam tsaŋandan. Da agam wau ramaŋʼ naruʼ ba ani suŋ.” 14 Araŋan impuŋ raiŋgan Benyamin da iraŋ funub aŋu, da Benyamin impuŋ araŋan da iraŋ impruʼ ibinigi. 15 Ruŋʼ iraŋ da itsutsuf rain ruas igi santan ibafan. Intsup sib da rain ruas imus ruta fisa i nan da ruan. 16 Gubuʼ sisiŋʼ waʼa da kiŋ miŋʼa gan uŋaran tsiraʼ i Yosef rain rusan bawaʼan, da kiŋ da gan garam gudzun gudzun gan nugun itsiaʼ gin. 17 Araŋan ini da Yosef ini binaʼ, “Wani da raim rusam i tipa doŋki gan da tipa fada intap Kanan. 18 Wani da ribaraŋan i uda ramaŋgam da gan utupan da tipa bada ani. Dzi buŋʼ arim intap ŋarubini biŋan maŋan yusa intap santan miŋʼa Idzip i ribaraŋan mpada gin da gada nam bini bini gin. 19 Wani da ribaraŋan nampruʼ i uda karis fain miŋʼa Idzip ani nafan i uda narun rusan da finin rusan da ramaŋgam naba ani. 20 Maran anuŋʼ fura nan ampibiŋan i nam bunumpan taŋinda rai miŋʼa intap Kanan igi u, wain ibiani, dzi buŋʼ arim nam bini bini ampibiŋan miŋʼa intap Idzip ani da ribaraŋan.” 21 Ibinigi da Israil narun rusan inaŋ ibi kiŋ nidan. Yosef irim karis fain da ribaraŋan yatsuŋʼ kiŋ nifuŋgan nidan. Da irim nam gadan da ribaraŋan i gan sanaban tipa fadan. 22 Da irim ŋarukui faʼ faʼ isaŋʼ ribaraŋan santan. Da bitsintaʼ Yosef irim ŋarukui 5 impruʼ da 300 silva, barabin gan isaŋʼ 3.5 kilogram, da Benyamin. 23 Da araŋan iyu nam bini bini ampibiŋan miŋʼa Idzip da itaŋin iyab doŋki arapuʼ 10 ifan da ramaŋgan, da itaŋin nam gadan rima i ramaŋgan sib i sanab tipa badan iyab i doŋki rinan 10. 24 Yosef itaŋin rain rusan ifan da ifai nan i ribaraŋan ibiani, “Agam anuŋʼ suda ufuai da rungam miŋʼa sanab fadan u.” 25 Ibinigi da ribaraŋan itaŋin gamp Idzip rai da itip ifan da ifawaʼ da ramaŋgan Yakop imiŋʼ intap Kanan. 26 Waʼa sib da ramaŋgan da ini rutin ibiani, “Ramaŋʼ, Yosef wamamp u; rumpa marataʼ! Araŋan isu garam gudzun tsiraʼ impa tayaŋʼ intap Idzip santan.” Yakop iriŋantin da waŋun isantan ruan sib, da wamuaruts nan igi u. 27 Da bitsintaʼ gubuʼ ribaraŋan fisa i nan santan Yosef nidan da tsaŋanda karis Yosef taŋinda badan i uda araŋan tipa fadan igi, da araŋan itaŋin waŋun iruʼ. 28 Da Israil ini ibiani, “Nan nidzun biŋan! Dzi naruŋgaŋʼ Yosef ruŋʼ impa marataʼ. Dzi nafan da natsaŋa araŋan sib raiyi, ida dzi namus mampan.”
Yakop Irut Utupan Iruʼ Intap Idzip
1 Ibinigi da Israil iyu naŋgan santan da irut utupan ifa i waʼa Idzip, da gubuʼ araŋan fawaʼa Birsiba da itsara nam isu daŋki ifan da ramaŋgan Isak Anutu gan. 2 Da Anutu ini nan da araŋan imiŋʼ nam puafuban da idziaŋ ibiani, “Yakop! Yakop!” Da Yakop ini, “Dzi aruani!” 3 Da Anutu ini binaʼ, “Dzi Anutu, u ramaŋgam Anutu gan. Agu anuŋʼ ratan i ruʼa Idzip u, i dzi buŋʼ anaŋ u yaŋiŋgam nawaʼ nasu garam utup tsiraʼ maŋan namiŋʼ nigi. 4 Dzi buŋʼ arut agu nampruʼ ruaŋʼ naruʼ Idzip, da bampan naga da dzi buŋʼ atip nau agu natip naba. Da u buŋʼ amamp nayab Yosef baŋiŋgan.” 5 Da Yakop taŋinda Birsiba rai, da narun rusan itaŋin araŋan impruʼ da ribaraŋan finin rusan da narun rusan santan iyab karis Kiŋ Farau taŋindan bada i uda ribaraŋan fadan ugu. 6-7 Da Yakop irut narun rusan da rumpun rusan finam da marub santan ifa Idzip. Da ribaraŋan iyu apu gan mpada tayaŋʼ gin da nam bunumpan santan udan miŋʼa Kanan ugu impruʼ ibinigi. 8 Israil yaŋin rusan aru ruta fada gamp Idzip ugu biŋaŋgan ibiani: Ruben, Yakop naruŋgan miamun. 9 Da Ruben narun rusan marub biŋaŋgan ibiani, Hanok, Palu, Hetsron da Karmi. 10 Simion narun rusan marub biŋaŋgan ibiani, Jemuel, Jamin, Ohat, Jakin, Tsohar da Siaul. Siaul rinaŋgan sagat Kanan. 11 Liwai narun rusan marub biŋaŋgan ibiani, Gerson, Kohat da Merari. 12 Yuda narun rusan marub biŋaŋgan ibiani, Er, Onan, Sela, Perets da Tsera. (Da bitsintaʼ Er da Onan imamp da gubuʼ ribaraŋan ruŋʼ mpada miŋʼa intap Kanan ugu.) Da Perets narun rusan marub biŋaŋgan ibiani, Hetsron da Hamul. 13 Isakar narun rusan marub biŋaŋgan ibiani, Tola, Pua, Jasup da Simron. 14 Tsebulun narun rusan marub biŋaŋgan ibiani, Seret, Elon da Jalil. 15 Nigi Lia narun rusan gabuŋgan Yakop riman da araŋan da gubuʼ mpada miŋʼa Padan-Aram (Mesopotemia). Lia irim narun finam maŋan impruʼ biŋaŋgan Daina. Mpruʼa Yakop narun rusan rima da Lia da rumpun rusan isaŋʼ 33. 16 Gat narun rusan marub biŋaŋgan ibiani, Tsefon, Hagi, Suni, Esbon, Eri, Arodi da Areli. 17 Aser narun rusan marub biŋaŋgan ibiani, Imna, Iswa, Iswi da Beraia. Ribaraŋan nafuŋgan Sera. Da Beraia narun rusan marub biŋaŋgan ibiani, Heber da Malkiel. 18 Nigi Yakop yaŋin rusan riman da Tsilpa, sagat gum Laban riman da Lia ugu. Mpruʼa utup igi santan isaŋʼ 16. 19 Retsel narun rusan Yakop riman da araŋan biŋaŋgan ibiani: Yosef da Benyamin. 20 Gubuʼ Yosef mpada gamp tsiraʼ Idzip da irim narun rusan Manase da Ifraim da finiŋgan Asenat, Potifera garam pumuʼan miŋʼa gamp On naruŋgan finam. 21 Benyamin narun rusan marub biŋaŋgan ibiani: Bela, Beker, Asbel, Gera, Neman, Ehi, Ros, Mupim, Hupim da Art. 22 Nigi Yakop narun rusan riman da finiŋgan Retsel mpruʼan da rumpun rusan isaŋʼ 14. 23 Dan naruŋgan marub bitsintaʼ aŋu biŋaŋgan Husim. 24 Naftali narun rusan marub ibiani: Jatsiel, Guniʼ, Jetser da Silem. 25 Nigi Yakop yaŋin rusan riman da Bilha, sagat gum Laban riman da Retsel ugu. Mpruʼa utup igi santan isaŋʼ 7. 26 Yakop narun rusan da rumpun rusan ruta araŋan ruʼa gamp Idzip ugu isaŋʼ 66. Da wafaris araŋan narun rusan finin rusan impruʼ u. 27 Yosef narun rusan marub iruʼ waʼa miŋʼa Idzip ugu bampruʼan da utup 66 igi da Yakop utupan fada Idzip igi isaŋʼ 70. Yakop Irut Utupan Impa Intap Isiʼ Gosen 28 Yakop itaŋin Yuda imuŋʼ i nida sisiŋʼ da Yosef i bawaʼan da ribaraŋan miŋʼa Gosen. Da gubuʼ ribaraŋan bawaʼan miŋʼa intap Gosen sib, 29 da Yosef iyu karisan da ifa Gosen i waʼa da ramaŋgan Israil. Gubuʼ Yosef bawaʼan da tsaŋanda ramaŋgan da impuŋ araŋan da iraŋ guntiʼ biŋan aŋu. 30 Da Israil ini da Yosef ibiani, “Aruani da dzi ruŋgaŋʼ maraŋgaŋʼ itsaŋan agu ibi agu ruŋʼ impai marataʼ, da dzi buŋʼ amamp ruta nuguŋʼ nufan.” 31 Da Yosef ini da rain rusan da ramaŋgan utupan ibiani, “Dzi buŋʼ afani da Kiŋ Farau nabiani, ‘Dzi raiŋʼ rusaŋʼ da dzi ramaŋgaŋʼ da utupan santan mpada Kanan ugu ibawaʼ sib. 32 Ribaraŋan garam mpada tayaŋʼ dumpa da makau da iyu apu gan santan aŋu iba impruʼ da nam bunumpan santan suda wain gin ibinigi.’ 33 Da gubuʼ Farau nuʼa agam ataŋʼa fadan da guta i agam bida ani, ‘Agam inaŋ gumam ibianuŋʼ?’ 34 da agam wani araŋan nangan muŋaʼ nabiani, ‘U garam gumam agai ani gumaŋʼ naŋan da ibiani, aga garam mpada tayaŋʼ dumpa da makau, yatsuŋʼ aga ramaŋʼ rusan sanaban musa naŋan. Aga atsuŋʼ gin da aga isi isiʼ isaŋʼ aga yiŋʼa rutin.’ Da nigi saŋʼ i rima agam sib i mpada intap Gosen, i garam Idzip ibugin i suda uts da garam mpada tayaŋʼ dumpa.”
1 Ibinigi da Yosef ifani da Kiŋ Farau ini binaʼ, “Dzi ramaŋgaŋʼ da raiŋʼ rusaŋʼ mpada intap Kanan ugu ibawaʼ sib. Ribaraŋan iba intiŋ da dumpa gan da makau gan da nam bunumpan santan, da iba mpa imiŋʼ intap Gosen da aruani.” 2 Araŋan ipiriaŋʼ rain rusan 5 da ifa rut imunti Kiŋ Farau maraŋgan. 3 Da kiŋ iguti ribaraŋan ini binaʼ, “Agam inaŋ gumam idzuwai?” Da ribaraŋan ini, “U garam gumam agai ani garam mpada tayaŋʼ dumpa yatsuŋʼ ramaŋʼ rusaŋʼ sanaban musa naŋan.” 4 Da ribaraŋan ini da araŋan impruʼ ibiani, “Aga ba i mpada nani pas aŋu, i gubuʼ fus tsiraʼ nam mariŋʼa sib iwaʼ Kanan da u garam gumam apu gan isau sai i gadan. Ibinigi da u garam gumam agai ani igaib ruŋgaŋʼ da agu i u gaiba agai da aga fampada intap Gosen.” 5 Ibinigi da Kiŋ Farau ini da Yosef ibiani, “U ramaŋgam da raim rusam iba da agu; 6 da intap Idzip ani santan isu u naŋgam da wapiriaŋʼ nasaŋʼ u maram aridagin. Bida u maram furan da wataŋin ramaŋgam da raim rusam i intap bini Gosen. Da bida u tsaŋanda ribaraŋan gan fain waʼa bini yusan i sanab mpada tayaŋʼ apu santan da nampa tayaŋʼ dzi makau gaŋʼ nampruʼ nabinigi.” 7 Ibinigi da Yosef ifa yu ramaŋgan iba munti Kiŋ Farau maraŋgan. Da Yakop ifinti kiŋ i nan bini, 8 da kiŋ igut i araŋan da ini, “Agu udzufam wayawai?” 9 Da Yakop ini da kiŋ ibiani, “Dzi udzufaŋʼ ntsuŋʼa mpada yuŋan da aruani isaŋʼ 130 aŋu, da wasaŋʼ dzi ramaŋgaŋʼ da rumpuŋgaŋʼ udzufan ntsuŋʼa mpada yuŋan u. Da dzi waʼ da barabin ampibiŋan impruʼ.” 10 Yakop ini nan sib da ifinti Kiŋ Farau da itaŋin araŋan rai da ifan. 11 Ibinigi da Yosef itaŋin intap bini Rameses miŋʼa Idzip da ramaŋgan da rain rusan impa gin ibi kiŋ nidan. 12 Da Yosef irim nam gadan da ramaŋgan da rain rusan da ramaŋgan utupan santan yatsuŋʼ narun ruas wayawai ibinigi.
Yosef Irim Ampan Sib i Gubuʼ Maŋits
13 Gubuʼ fus tsiraʼ imiŋʼ gubuʼ guntiʼ biŋan da nam gadan santan imariŋʼ sib, da garam gar sib aŋu Idzip da Kanan impa asub i maŋits. 14 Yosef iyu moni santan ampan Idzip da Kanan suba nam gadan gin da iyu iba rim i kiŋ uŋaran. 15 Gubuʼ ampan Idzip da Kanan santan moni gan ntsupan, da rib Idzip iba da Yosef da ini, “Warim aga sib i nam gadan, i aga buŋʼ amamp i maŋits. I aga moni gaŋʼ santan intsup sib wa!” 16 Da Yosef ini, “Da bidanigi da agam wayu apu gam waba da dzi da dzi buŋʼ arim nam gadan da agam i muŋaʼ gan.” 17 Ibinigi da ribaraŋan iyu hos, dumpa, nuniŋ, makau da doŋki gan iba da Yosef i suba nam gadan. Da Yosef irim ribaraŋan santan sib i nam gadan isaŋʼ udzuf arigi. 18 Gubuʼ udzuf arigi ntsupan da atupa udzuf faʼ da ribaraŋan itip iba da Yosef da ini, “O garam tsiraʼ! Aga wasaŋʼ dziginda barabin gaŋʼ i agu u. Aga moni gaŋʼ da apu gaŋʼ santan intsup sib da isu agu gam. Da aga naŋgaŋʼ maŋan ruwamiŋʼ i riman da agu i suba nam gadan gin u. Imaʼ. Agai aŋu da gaŋʼ intapaŋʼ. 19 Warim aga sib i aga anuŋʼ mampa i maŋits da aga intapaŋʼ miŋʼa utaʼ u. Wayu agai da intapaŋʼ nasub dzafain i nam gadan. Da aga nasu kiŋ garam guman da sagat guman utaʼ aŋu, da intapaŋʼ buŋʼ asu kiŋ gan. Warim nam gadan da agai i aga anuŋʼ mampan, da warim nam yamun da agai i intap anuŋʼ miŋʼa utaʼ u.” 20 Ibinigi da Yosef irim nam gadan isu nam ntsuman i rib Idzip intapan santan isu kiŋ naŋgan, iruʼ i nam maŋits tsiraʼ wayada garam Idzip santan. 21 Da Yosef inaŋ garam Idzip santan miŋʼa gubuʼ yaban da gubuʼ ruʼan isu Kiŋ Farau garam guman utaʼ aŋu i naŋa i guman. 22 Da intap Yosef mamida udan, da garam anutu wain i anutu umpur intapan, i kiŋ impa tayaŋʼ ribaraŋan da isaŋʼ i nam gadan. I wain igi da ribaraŋan rugif intapan ragun. 23 Yosef ini da ampan santan ibiani, “Agam sib aŋu wariŋantin, gubuʼ aruani da dzi yu agam da intapam isub dzafain isu Kiŋ Farau naŋgan. Da nam yamun aruani, agam wayu da wafa ntaŋ i gumam ruga rugam. 24 Gubuʼ nam igi suda nidzun sib da agam waufum nasaŋʼ 5. Da warim 5 igi gan bits nafan da kiŋ, da agam wayu gam faban igi gan 4 i agam utupam gadan da ntaŋan. 25 Da ribaraŋan ini, “Garam tsiraʼ, u rim aga sib ŋarubini, da aga rubuŋʼ ampa marataʼ. Aga taga ruaŋʼ i suda kiŋ garam guman utaʼ aŋu.” 26 Ibinigi da Yosef yudzu nan maŋan isu nan faidagin imunti wasaʼ i garam Idzip, i bida gubuʼ nam atiʼan da natsaf 5 igi gan bits nasu kiŋ gan. Da nan igi ruŋʼ imunti da gubuʼ aruani ibinigi. Da garam anutu wain i anutu umpur intapan aŋu da kiŋ anuŋʼ iyu u.
Yakop Nangan Gutagin
27 Garam Israil impai imiŋʼ intap Gosen miŋʼa Idzip da iyu intap imiŋʼ nigi, da isaŋʼ nidzun aŋu i nam bunump da irim narun rusan iyus aŋu. 28 Yakop impai Idzip isaŋʼ udzuf 17, da mpruʼ araŋan udzufan santan mpada rutin igi isaŋʼ 147. 29 Yakop gubuʼ gan naŋa i mampan basuda uts, da inuʼ naruŋgan Yosef ba da ini rutin ibiani, “Bida u maram arida nidzun aŋu i dzi da warim baŋim waruʼ dzi faga rampuat da wataga ruam nidzun aŋu da dzi i u anuŋʼ rima dzi i gamp Idzip ani u, 30 gubuʼ dzi mampa sib da watip wau dzi nawaʼ sinuŋʼ gamp Idzip da wafarim dzi nampruʼ da ramaŋʼ rusaŋʼ i gampan giŋʼa gin.” Da Yosef ini, “Hai, ramaŋʼ! Dzi buŋʼ anaŋ nabi u nidan.” 31 Da Yakop ini, “Watsarif ruam nidzun aŋu da dzi.” Yosef itaga ruan nidzun aŋu da raman, da Yakop irim antuŋʼ iruʼ gan rabiʼ gan giŋʼa gin da irim daŋki gin.
Yakop Irim Baŋin Ragun i Ifraim da Manase
1 Gubuʼ fain fada sib da Yosef iyu sisiŋʼ i araŋan ramaŋgan giŋʼa rinin. Ibinigi da araŋan iyu narun rusan marub iruʼ igi, Manase da Ifraim, ifan i tsaŋanda Yakop. 2 Gubuʼ Yakop uda sisiŋʼ i narun Yosef bada i tsaŋanda araŋan, da araŋan riniuruŋgan pas rumiŋʼan da intiŋ ruan i rabiʼ gan da impa iyab. 3 Yakop ini da Yosef, “Anutu Nampaŋ Wain iwaʼ da dzi imiŋʼ Luts miŋʼa intap Kanan da ifinti dzi imiŋʼ nigi 4 da ini ibiani, ‘Dzi buŋʼ arim yaŋin ampibiŋan da agu da u yaŋiŋgam buŋʼ autus i ruan nasu garam utup tsiraʼ biŋan. Da dzi buŋʼ arim intap aruani da u yaŋiŋgam taptap nasu i nam bunumpan nantiŋ.’ 5 Da, Yosef, u narum rusam marub iruʼ waʼa gamp Idzip ani muŋʼ da dzi musa badan da isu dzi gaŋʼ; Ifraim da Manase buŋʼ asu dzi naruŋʼ rusaŋʼ nidzun nabi Ruben da Simion. 6 Da bida u narum rusam fain waʼa bampan i mamaʼ iruʼ ani da buŋʼ asu u gam. Da intap nida faba bafadan da ribaraŋan buŋʼ amaʼ. Da buŋʼ ampa wasaʼ i Ifraim da Manase yaŋin rusan aŋu. 7 Dzi ni nan igi i gubuʼ dzi miŋʼa Padan Aram badan ugu da Retsel imamp imiŋʼ sanab, uts aŋu da gamp Efrata imiŋʼ intap Kanan da irim nugu barabin tsiraʼ biŋan da dzi i u rinaŋgam. Da dzi rim araŋan i sanampun riŋan fada Efrata” (nigi Betlehem). 8 Gubuʼ Israil raraba Yosef narun rusan marub igi da igutin, “Maŋa narun rusan igi?” 9 Da Yosef ini, “Ramaŋʼ! Mamaʼ iruʼ ani dzi naruŋʼ rusaŋʼ Anutu riman da dzi miŋʼa ani.” Da Israil ini, “Da wayu mamaʼ igi waba da dzi nafinti.” 10 Gubuʼ arigi da Israil maran isap da watip tsaŋanda nam bini u, i araŋan ifufi funub. Ibinigi da Yosef iyu narun rusan igi iba uts aŋu da ramaŋgan Yakop, da yari baŋin ragun gin da itsutsuf. 11 Yakop ini ibiani da Yosef, “Dzi maraŋʼ wafur i tipa tsaŋanda agu maram u, da bitsintaʼ Anutu irim dzi sib i dzi tsaŋanda agu mpruʼan da narum rusam.” 12 Da Yosef ibibi narun rusan sinuŋʼ ramaŋgan Yakop da yidzaʼ fagan da itauf maran iruʼ intap imiŋʼ raman maran. 13 Yosef igif Ifraim i baŋi bini da yusu ifa Israil baŋi yas da igif Manase i baŋi yas da yusu ifa Israil baŋi bini, i araŋan mamaʼ miamun. 14 Da bitsintaʼ Israil iraiʼ i baŋin bini da ibarim ifa ragun i mamaʼ isiʼ Ifraim gudzun. Da iraiʼ i baŋin yas da ibarim ifa ragun i mamaʼ miamun Manase gudzun. Ibinigi da Israil anuŋʼ yatsuŋʼ sanampun rima baŋi bini ragun i mamaʼ miamun da gubuʼ rima mirimp. 15 Da ifinti Yosef ibiani, “Anutu aru muŋʼ da dzi rumpuŋgaŋʼ Abraham da dzi ramaŋgaŋʼ Isak pumuʼan ugu da mpada tayaŋʼ dzi da gubuʼ sib aŋu badan da bawaʼan da gubuʼ aruani, 16 da Aŋira aru rima dzi sib i barabin mara maran sib aŋu nafinti mamaʼ marub iruʼ ani. Da buŋʼ afariŋʼ dzi biŋaŋgaŋʼ da rumpuŋgaŋʼ Abraham da ramaŋgaŋʼ Isak biŋaŋgan nayab i ribaraŋan, da yaŋiŋgan nautus i ruan nasu tsiraʼ namiŋʼ intap.’ 17 Gubuʼ Yosef tsaŋanda ramaŋgan rima baŋin bini yaba Ifraim gudzun, da waŋun i barabin gin, ibinigi da Yosef igif Yakop baŋin da inaŋ i raʼa gin sinuŋʼ Ifraim gudzun da barima fada Manase gudzun. 18 Da ini, “A̛a ramaŋʼ! Nani mamaʼ miamun. Da warim baŋim bini nayab i araŋan gudzun.” 19 Da bitsintaʼ Israil ibugin da ini, “Dzi sruʼgin, dzi naruŋʼ! Dzi sruʼgin i araŋan yaŋiŋgan buŋʼ awaʼ nasu garam utup tsiraʼ maŋan nabinigi. Da bitsintaʼ araŋan raiŋgan isiʼ ani yaŋiŋgan buŋʼ awaʼ nayus araŋan gan da nasu garam utup ampibiŋan aŋu.” 20 Ibinigi da Israil ifinti rib iruʼ igi da gubuʼ arigi ibiani, “Garam Israil nifun buŋʼ agamp agu biŋaŋgam i nan fintidan da nani, ‘Anutu nafinti agam nabi Ifraim da Manase.’ ” I sanab igi da itaŋin Ifraim isu miamun i Manase. 21 Da Israil ini da Yosef, “Dzi su uts i mampan, da Anutu buŋʼ arut agu da nau agu natip nafa u tafam rusam intapan. 22 Mamai fiririʼ Sikem igi dzi rim isu u naŋgam, da dzi warim da u raim rusam u. Imaʼ. Dzi yis garam Amor i gaŋʼ bainataŋʼ da dampa gaŋʼ i uda intap igi.”
Yakop Ifinti Narun Rusan
1 Yakop inuʼ narun rusan santan impruʼ da ini rutin ibiani, “Agam santan wabampa wampruʼ ruam watsuafiʼ dzi da dzi nani nan idzuwai nida waʼan da agam da gubuʼ bampan aga. 49 2 Dzi, Yakop, naruŋʼ rusaŋʼ, wampruʼ ruam waba da wariŋant i dzi, agam ramaŋgam Israil, nangaŋʼ nidan. 3 Ruben, dzi naruŋgaŋʼ miamun, u waʼ da u santiŋʼ dzi riniuruŋgaŋʼ miamun. U yu biŋan tsiraʼ da nampaŋ iyus raim rusam. 4 Agu bi mpui furan fuafagin suda tsurupiap da wasaŋʼ i garam ntiŋan u, da bitsintaʼ wasaŋʼ i ruŋʼ tsarifa agu u, i u ataŋʼ ramaŋgam uŋaran sib da u rim rini miaʼ tsiraʼ biŋan da dzi. 5 Simion da raiŋgan Liwai isaŋʼ ruan aŋu i uwayant i suda baŋi biʼ da wayada nam. 6 Dzi wasaŋʼ i mpada wasaʼ i rib iruʼ igi nangan maradzigin tipan u. Iyu waŋun tsakiadan utaʼ aŋu da yis garam funub da itipuʼ makau faga far utaʼ utaʼ aŋu isaŋʼ maraŋgan furan. 7 Nam pupuarapan narut ribaraŋan i nam nugun tsakia tsiraʼ da nugun tsiaʼan i rima tsakia da isa garam funub. Dzi buŋʼ awat ribaraŋan rai nadzaraŋ nampa wasaʼ i garam Israil gampan. 8 Yuda, u raim rusam buŋʼ atsarif agu, da buŋʼ aidzaʼ fagan da agu. Da agu buŋʼ agab garam ipiapam wan. 9 O Yuda, agu saŋʼ laion naru faʼ maŋan gada apu gan garadan da tipa bada gan giŋʼa gin. Da isaŋʼ laion amputan i mprutsan da maŋa wasaŋʼ suda frapin. 10 Miŋʼa Yuda da buŋʼ agif buŋaʼ kiŋ gan i baŋiŋgan da yaŋiŋgan taptap buŋʼ asu kiŋ, nasaŋʼ buŋaʼ igi ramaŋgan nidzun suda wain gin bawaʼan da garam intap wain wain ataŋʼa waraŋʼ i araŋan. 11 Yuda bruʼ wain gan buŋʼ ayus da araŋan buŋʼ adzur doŋki gan nafa bruʼ wain bini yusan maran aridagin. Buŋʼ atip wain gurun nayus da buŋʼ adzuʼ ŋarukui gan gin. 12 Araŋan maranidzun buŋʼ asu biʼ i wain numan, da nifu urun buŋʼ asap nidzun aŋu i makau sisu gurun numan. 13 Tsebulun buŋʼ ampa namiŋʼ mpui uruts riŋan da buŋʼ asu mumai bini madzuŋ ba antuŋʼa gin. Da ampapan buŋʼ afan da nawaʼ gamp Saidon. 14 Isakar ibi doŋki riniurun giŋʼa wasaʼ i tayap nam bunump iruʼrun. 15 Gubuʼ araŋan tsaŋanda intapan igi bida intap ŋarubini biŋan mpada asap gin, da buŋʼ adzuaŋʼ aruʼ da nausu ruŋgan i buariŋʼa barabin bida mamaʼ gum utaʼ aŋu. 16 Dan buŋʼ asu gudzun i raruda garaman bini nabi utupan Israil fain naga. 17 Dan buŋʼ abi muntsir isiʼ aŋu da nampaŋ tsiraʼ giŋʼa sanab riŋan. Da bida hos runta badan da buŋʼ agara i faga mutun, da garam mpada hos buŋʼ aruaʼ nafa barun gin. 18 O Yawe, dzi mpa irim maraŋʼ i u yuda dzi sinuŋʼ ipiap baŋiŋgan. Garam wapa nam buŋʼ awaʼ da nais Gat, da bitsintaʼ araŋan buŋʼ ais ribaraŋan da nadaru rai nafan. 20 Aser intapan buŋʼ anti nidzun aŋu i nam gadan bini. Da buŋʼ arim nam bini mara maran nasaŋʼ kiŋ ruasan gadan. 21 Naftali ibi dia rinan runta utaʼ aŋu yuŋan i maraŋgan furan, da rima narun ruas bini bini aŋu. 22 Yosef ibi bruʼ muntida uts da mpui maran da kapa nidzun bini yusan da baŋi ŋab yari ragun i nam santan. 23 Garam isa nam i biriaŋ da dampa iwaʼ da yintsaʼ i faniŋʼa araŋan da isa araŋan funub. 24 Da bitsintaʼ Yosef baŋin waratarat da gan dampa gan u, imaʼ. Baŋin ipuapap aŋu i Yakop Anutu gan nampaŋ gan irim araŋan sib, da biŋaŋgan fain ibi Garam Mpada Tayaŋʼ Dumpa da Tauf Tsiraʼ Muntida Sib i Israil. 25 Da dzi Anutu gan Nampaŋ Wain buŋʼ arim agu sib da nanaŋ nam bini ampibiŋan nawaʼ da agu: nataŋin gamiʼ namiŋʼ maraŋuntuŋ waguŋʼ naruʼ, da mpui namiŋʼ intap waraŋʼ nayab, da sagat da apu rinan santan narim narun ruas nayus. 26 Nam fintidan ampibiŋan u ramaŋgam dzi riman da agu iyus nam bini bini miŋʼa mamai ratar ratar sib. Nam fintidan santan igi narut agu, Yosef, i u yu biŋan tsiraʼ imiŋʼ wasaʼ i u raim rusam santan. 27 Benyamin isaŋʼ iyam buman ragiyab tsiraʼ. Tataʼ santan da araŋan igara apu funub da igan. Da nam nufan da araŋan ifab fain rumiŋʼan igi.” 28 Nigi utup 12 Israil, da raman Yakop ifinti i nan fintidan igi intuaŋ ribaraŋan ruga rugan. Yakop Naŋgan Mampan da Riman 29 Yakop ini nan babampafan da narun rusan ibiani, “Isu uts i dzi mampan. Da agam warim dzi wampruʼ da dzi ramaŋʼ rusaŋʼ namiŋʼ tauf bampun miŋʼa Efron garam Hit intapan 30 miŋʼa Makpela ugu, Mamri marafain gan gubuʼ yaban miŋʼa intap Kanan. Tauf bampun da intap igi da Abraham iyu imiŋʼ Efron gin, i rima badzab in. 31 I miŋʼa nigi da irim Abraham da finiŋgan Sara da Isak da finiŋgan Rebeka, da dzi rim Lia imiŋʼ nigi impruʼ. 32 Dzi rumpuŋgan Abraham iyu intap da tauf bampun igi imiŋʼ garam Hit gin.” 33 Yakop intsup nangan nidan da narun rusan sib da intsruŋ fagaŋgan iyab rabiʼ gan da igiŋʼ iruʼ da imamp.
1 Yosef impai iruʼ da igiŋʼ ragun i raman da iraŋ da itsutsuf araŋan. 2 Da iraŋ sib da ini da garam tipa garam mampan riniuriatsan i miŋʼa gubuʼ guntiʼ i tipa araŋan ramaŋgan riniuriatsan. 3 Sanab tipa Yakop riniuriatsan igi iyu gubuʼ 40, yatsuŋʼ gum igi gubuʼ gan rururuŋan. Garam Idzip iraŋ i araŋan isaŋʼ gubuʼ 70. 4 Gubuʼ raŋa i Yakop ntsupa sib da Yosef igaib ruŋgan da Kiŋ Farau garam gudzun gan ibiani, “Isaŋʼ agam uda dzi nifuŋgaŋʼ fadan da kiŋ da nidan da araŋan bida ani, 5 ‘Gubuʼ dzi ramaŋgaŋʼ naŋa i mampan, da araŋan ini da dzi taga ruaŋʼ da araŋan, i dzi tipa uda araŋan riniuriatsan fada intap Kanan, da rima miŋʼa tauf bampun araŋan ruŋgan rafan. Da isaŋʼ u tusa maram i dzi da dzi farima ramaŋgaŋʼ sib, da dzi musa tipa badan?’ ” 6 Da kiŋ iriŋant i Yosef nangan da ini ibiani, “Wayab da warim ramaŋgam nasaŋʼ u nangam tagada ruam rutin.” 7 Ibinigi da Yosef iyu ramaŋgan iyab i riman. Kiŋ garam gudzun gan ampibiŋan irut Yosef impruʼ ruan fadan--garam mpada tayaŋʼ kiŋ uŋaran da garam suda wain i gamp fain miŋʼa Idzip, 8 impruʼ da Yosef utupan da rain rusan santan da ramaŋgan utupan santan. Da narun rusan mpruʼan da apu gan aŋu ruŋʼ impa imiŋʼ intap Gosen. 9 Garam mpada karis da garam mpada hos irut araŋan impruʼ ruan yaban. Da rib fadan igi utup tsiraʼ biŋan. 10 Gubuʼ ribaraŋan bawaʼa miŋʼa mumai tura wit i uda nidzun gin miŋʼa Atad, uts da mpui Jordan, da siŋisiaŋ tsiraʼ biŋan imunti i Yakop. Da Yosef itip impa i ramaŋgan i nigi isaŋʼ gubuʼ 7. 11 Garam Kanan mpada gamp igi itsaŋa nam pumuʼa badzab miŋʼa mumai tura wit gin miŋʼa Atad da ini, “Garam Idzip aga isantiŋʼ nam maran gaiban tsiraʼ biŋan.” Ibinigi da ifariŋʼ mumai igi Abel Mitsraim, waiŋgan ‘garam Idzip maran gaiban gan’. 12 Ibinigi da Yakop narun rusan yatsuŋʼ nan ibi araŋan nidan da ribaraŋan: 13 Ribaraŋan iyu ramaŋgan ifa Kanan da irim i tauf bampun miŋʼa intap Makpela, uts da Mamri, intap Abraham rima nam ntsuman gin da Efron, garam Hit ugu, isu mumai rima badzabin. 14 Gubuʼ Yosef rima ramaŋgan sib da irut rain rusan da rib ruta fadan ugu impruʼ ruan itip iba Idzip.
Yosef Iyafa Rain Rusan Waŋun
15 Gubuʼ Yosef rain rusan tsaŋanda bida ramaŋgan mampa sib da ini ibiani, “Bida Yosef maran rufura asub agi naŋa rutin ugu da bubida anuŋʼ i agi?” 16 Ibinigi da ribaraŋan irim nan ifan da Yosef da ini ibiani, “U ramaŋgam irim nan bida ani muŋʼ da agai da imus mampan: 17 ‘Agam wani wabiani da Yosef: Dzi gut i agu i u siata raim rusam naŋgan maisan naŋa yaba i agu.’ Ibinigi da maram wantuʼ ramaŋgam Anutu gan garam guman agai da wasiat aga naŋgaŋʼ maisan rai.” Gubuʼ ribaraŋan nangan fawaʼa da Yosef, da araŋan iraŋ. 18 Da araŋan rain rusan impruʼ ruan iba da yidzaʼ fagan da itauf maran iruʼ araŋan maran da ini, “Aga rim ruŋgaŋʼ da agu isu u garam gumam utaʼ aŋu.” 19 Da bitsintaʼ Yosef ini, “Agam anuŋʼ ratan u. Dzi wasaŋʼ i uda Anutu mumai gan da rima nam muŋaʼ da agam u. Imaʼ. 20 Agam ini wayada dzi da bitsintaʼ Anutu yitam i agam naŋgam maisan igi isu nam ŋarubini, i rima garam ampibiŋan naŋgan mpadan sib. Da iwaʼ ibinigi. 21 Ibinigi da agam anuŋʼ ratan u. Dzi buŋʼ arim agam da narum rusam sib.” Da Yosef iyafa rain rusan waŋun i nan mantsiŋan bidanigi.
Yosef Naŋgan Mampan
22 Yosef da rain rusan da gan utupan impa Idzip. Araŋan impa isaŋʼ udzuf 110, 23 da itsaŋan naruŋgan Ifraim rumpun rusan. Da araŋan iyu Manase naruŋgan Makir narun rusan isu i gan ibinigi. 24 Da Yosef ini da rain rusan ibiani, “Dzi su uts i mampan. Da Anutu buŋʼ ampa tayaŋʼ agam da nau agam sinuŋʼ intap aruani nafa intap araŋan ragada muŋʼ da Abraham, Isak da Yakop ugu.” 25 Da Yosef ini da Israil narun rusan i tsafa ruan nidzun aŋu da ini, “Gubuʼ Anutu uda agam waʼa sinuŋʼ intap ani da agam wau dzi riniuriatsaŋʼ nampruʼ.” 26 Ibinigi da Yosef udzufan waʼa 110 sib da imamp da itip riniuriatsan i miŋʼa gubuʼ guntiʼ da irim i bugis da igiŋʼ Idzip.