Nô Né Daa Mâ Mör̂u
1 Tö ka rhavûû wè Nô, na tö pwar̂a Bâô na Nô, aè Nô na Bâô. 2 Aè na dè tö pwar̂a Bâô na ce tö ka rhavûû. 3 Na yaxai pâr̂â kââ wânii na ce, na yèri aau rha kââ ré ki da yaxai na ce. 4 Na tö pwar̂a-è na mör̂u, aè mör̂u wè daa i kâmö. 5 Na waa na daa rö léwé orê, aè na da bar̂i cëi-e na orê. 6 Na tùr̂ùwaa kâmö na Bâô, wi-ré néé-é na Ioané. 7 Na wê pwa na ce vè pè ye vè avâr̂i, wè pè ye vè avâr̂i daa cè ké-r̂é tâ néwèi-e na pâr̂â kâmö xè-i xi-e. 8 Na da xa ce ré daa, aè na pè ye vè avâr̂i rö daa na ce. 9 Ökâré dö daa ré pè daa pâr̂â kâmö wânii ré pwa rö bwêê jë. 10 Na wê tö bwêê jë yawi na ce, mâ na yaxai bwêê jë, aè na da tö tâwai-e na bwêê jë. 11 Na wê pwa rö névâ xi-e na ce, cér̂é bör̂i da cëi-e na pâr̂â pâ ker̂e-é. 12 Aè pâr̂â kâmö ré cëi-e mâ tâ néwèi rö-i néé-é, wè na nââ yè-r̂é ar̂inadö cè ké-r̂é wê pâr̂â pâlè Bâô, 13 pâlè pa é da ër̂i-r̂é rö-i war̂a mâ rhî vè e i kar̂ö, mâ rhî vè e i kâmö bar̂ee, aè pa é ër̂i-r̂é xè-i rö Bâô. 14 Aè, é pugèwè nô vè kar̂ö, na bör̂i bâ tö négowé né ré, mâ rhâri xè-i vi méar̂i vi bwir̂i mâ avâr̂i; aè gèvé wê tö rhûû rhîrhér̂é xi-e, na ûr̂û rhîrhér̂é i O ka rhaaxâ r̂ö ka mi xè-i Pevaa. 15 Na ye vè avâr̂i-e na Ioané, mâ na aʼvè kau, êr̂ê: «Ir̂i ce xa gö êr̂ê mâʼ, êr̂ê: “Na mö ké mi rhaadè-nya na kâmö ré baayê rai-nya, wè na dè mör̂u baayê rai-nya.”» 16 Na wê wii rö pwar̂a-ré wânii na vi méar̂i vi bwir̂i xi-e ka rhâri. 17 Wè na wêyê né mââyöö na Mosé, aè Ièsu Kérisö, wè na wêyê né vi méar̂i vi bwir̂i mâ avâr̂i na ce. 18 Na yèri aau rha kâmö ka yè tö rhûû Bâô. Aè o xi-e ka rhaaxâ r̂ö, wè, na tö léwé Pevaa, na bör̂i êr̂ê vèa-è na ce.
Na Ye Vè Avâr̂i Na Ioané Batiyi
19 Ökââ pè ye vè avâr̂i i Ioané, na cér̂é mö ké nôâ pâi pa nâânévâ mâ pâi xè Lévi mi xè Iérusalèm na pâi xè Juda, cè ké-r̂é vi na ka ërëwaa-è, êr̂ê: «Gèi wîr̂î?» 20 Na dè vi êr̂ê vèa, aè na da aʼvi yiâwîî na ce, aè na dè êr̂ê yè-r̂é, êr̂ê: «Gö da Kérisö.» 21 Cér̂é bör̂i ërëwaa-è, êr̂ê: «É a gè mâ wîr̂î? Gè Élia ra?» Na bör̂i êr̂ê yè-r̂é na ce, êr̂ê: «Aè! Na da gènyâ!» Aè cér̂é bör̂i êr̂ê yè-è êr̂ê: «Gè pérövéta ra?» Na bör̂i êr̂ê yè-r̂é, êr̂ê: «Aè.» 22 Cér̂é bör̂i êr̂ê yè-è, êr̂ê: «É a gè mâ wîr̂î? Wè cè gèvé vi na ka êr̂ê yè pâi ré nôâ-vé mi. Jië na néé-i?» 23 Na bör̂i aʼcëi yè-r̂é na ce êr̂ê: «Gènyâ, wè, mêr̂ê aʼ i ö kâmö ré aʼ rö nékaê, êr̂ê: Rhôôr̂u vè târi wêyê i Ör̂ökau!» Na ûr̂û ké êr̂ê i Isaia pérövéta. 24 Aè pâr̂â kâmö ré é tùr̂ùwaa-r̂é, wè, cér̂é mi rai pâr̂â pâi pâ farésaiö. 25 Cér̂é bör̂i ërëwaa-è tëë mwâr̂â mâ êr̂ê yè-è, êr̂ê: «Gè wêr̂êi, gè vi batiyi na gè êr̂ê gè da Kérisö, mâ gè da Élia bar̂ee, mâ gè da dèxâ pérövéta?» 26 Na bör̂i aʼcëi yè-r̂é na Ioané, êr̂ê: «Gö vi batiyi i rhëë, aè na tömâ rö négowé né-ve na ö kâmö ré gëve da tâwai-e. 27 Ce rö ré mi rhaadè-nya, aè na dö kau yè-nya na ké yè cöö kwé né duö mwâ néxar̂a â-ê.» 28 Pâr̂â kââ-ré, wè é waa rö Bétani, tö é ye né Ioridanô, tö ökâré na vi batiyi rö-i na Ioané.
Ièsu, Arénio I Bâô
29 Tèi nédaa gaar̂a, na bör̂i tö rhûû Ièsu na Ioané, na na vi ua-è mi, na bör̂i êr̂ê na ce, êr̂ê: «Tö rhûû Arénio i Bâô, ce ré kaxe virai yaané i bwêê jë. 30 Ö ce ré gö êr̂ê mâ, êr̂ê: “Na mi rhaadè-nya na rha kâmö ré baayê rai-nya, wè na dè mör̂u baayê rai-nya.” 31 Gö da bör̂i rhîâgür̂ü-é, aè gö mi na ka batiyi i rhëë, cè ki pè pèri-e yè pâi xè Israèl.» 32 Na ye vè avâr̂i na Ioané, êr̂ê: «Gö tö rhûû ko na na cêê ria mi xè nékö, na ûr̂û mawi, na bör̂i cuè rö bwêêwé-é. 33 Aè gö da rhîâgür̂ü-é, aè ö kâmö ré tùr̂ùwaa-nya na ka vi batiyi i rhëë, wè na êr̂ê yè-nya, êr̂ê: “Ki tö rhûû xi-i ko na na cêê ria mi ua-è mâ cuè rö bwêêwé-é, wè ö ce ré vi batiyi i Ko-Ar̂ii.” 34 Gö tö rhûû-é mâ ye vè avâr̂i, wè o i Bâô na ce.»
Pâi Pa Pâgür̂ü Ka Baayê I Ièsu
35 Gaar̂a tëë mwâr̂â, wè, na tömâ cér̂é kaar̂u kâmö xi-e na Ioané. 36 Na bör̂i tö rhûû Ièsu na ce na na vâr̂â, na bör̂i êr̂ê, êr̂ê: «Tö rhûû Arénio i Bâô!» 37 Cur̂u wê pwêr̂ê na duö kâmö xi-e ké êr̂ê xi-e, cur̂u bör̂i vi ua Ièsu. 38 Na bör̂i yabér̂é na Ièsu mâ tö rhûû-r̂u, na cur̂u vi ua-è mi, na bör̂i êr̂ê yè-r̂u, êr̂ê: «Göu vi mè yé?» Cur̂u bör̂i êr̂ê yè-è, êr̂ê: «Rabbi (ökââ na nô né kâmö ka vi pur̂â), âri ökâré gè yè töö-i?» 39 Na bör̂i êr̂ê yè-r̂u na Ièsu êr̂ê: «Göu mi na ka tö rhûû.» Cér̂é bör̂i rhau vi vèâ na ka tö rhûû kaa töö xi-e. Cér̂é bör̂i tö vèâ rèi nédaa-ré rö-i, wè na wê rhêêrè. 40 Adèrè, wè, pâdii Simona Pètèru, na dèxâ rai dui ré pwêr̂ê Ioané mâ vi ua Ièsu na cur̂u, 41 Adèrè, wè na tö rhûû baayê pâriè-è Simona, mâ êr̂ê yè-è, êr̂ê: «Gèvé wê tö rhûû Mésia.» Nô né «Kérisö.» 42 Na bör̂i yörhèè-è yè Ièsu. Na bör̂i tö rhûû-é na Ièsu, mâ êr̂ê yè-è, êr̂ê: «Simona, o i Iona; é yè wê aʼyè-i vè Kéfa.» Dèxâ néé-é “Pètèru”.
Filip Mâ Natanaèl
43 Gaar̂a, na bör̂i vi tëë na Galilé na Ièsu, na bör̂i tö rhûû Filip, mâ êr̂ê yè-è, êr̂ê: «Ua-nya mi.» 44 Filip, wè kâmö xè Bétsaïda, névâ i bar̂ee Adèrè mâ Pètèru. 45 Filip, wè na tö rhûû Natanaèl, mâ êr̂ê yè-è, êr̂ê: «Gèvé tö rhûû ö kâmö ré na êr̂ê na maâyöö ré na yu mâ na Mosé, mâ ka yu i mâ pâr̂â pérövéta, êr̂ê, Ièsu, wè wi xè Nazarèt, o i Ioséfa.» 46 Na bör̂i êr̂ê yè-è na Natanaèl, êr̂ê: «Na wii na kââ ka e ré yè pwa mi xè Nazarèt?» Na bör̂i aʼcëi yè-è na Filip, êr̂ê: «Mi cè gèi vi tö rhûû.» 47 Na bör̂i tö rhûû Natanaèl na Ièsu, na na mi ua-è, na bör̂i êr̂ê, êr̂ê: «Tö rhûû dö kâmö mi xè Israèl, wè na yèri nô ka vee xi-e.» 48 Na bör̂i aʼcëi-e na Natanaèl, mâ êr̂ê yè-è êr̂ê: «Gè rhîâgür̂ü-nya xè-wè?» Na bör̂i êr̂ê yè-è na Ièsu, êr̂ê: «Gö tö rhûû-i rö pûû bââwê na na da tö-aʼyè-i na Filip.» 49 Na bör̂i êr̂ê yè-è na Natanaèl, êr̂ê: «Rabbi, gèi rö O i Bâô, gèi rö Ör̂ökau xè Israèl.» 50 Na bör̂i êr̂ê yè-è na Ièsu, êr̂ê: «Gè wê tâ néwèi xè-i ké êr̂ê xi-nya yè-i, êr̂ê, gö wê tö rhûû-i rö pûû bââwê? Tö wîr̂î, gè yè mâ tö rhûû pâr̂â kââ ka kau rai kââ-ré.» 51 Na bör̂i êr̂ê bar̂ee, êr̂ê: «Avâr̂i, avâr̂i, gö êr̂ê yè-ve, êr̂ê, gëve yè tö rhûû nékö na ki mâ cîî, aè pâr̂â angéla i Bâô, wè cér̂é yè vi rua mâ vi ria mi rö bwêêwé o i kâmö!»
Vi öyö rö Kana
1 Tèi pèkarir̂i nédaa, na bör̂i wii na bwêê né vi pè öyö tö Kana rö Galilé. 2 Aè na tö-i bar̂ee na pâni Ièsu. Aè é nôâ yè Ièsu mâ pâi pa pâgür̂ü xi-e yè vi pè öyö. 3 Na bör̂i wê yèri viné xé-r̂é, na bör̂i êr̂ê yè Ièsu na pâni-e êr̂ê: “Na wê yèri viné xé-r̂é.” 4 Na bör̂i êr̂ê yè pâni-e na Ièsu êr̂ê: “Nyanyâ, jië na kââ ka yè wii yè-i mâ yè-nyâ? Na na da tö pwa na nédaa xi-nyâ.” 5 Na bör̂i êr̂ê na pâni-e yé pâr̂â pa waa nêr̂ê, êr̂ê: “Ö kââ-ré nè yè êr̂ê yè-ve na ce, gëve bör̂i waa.” 6 Aè na tö-i na kanii na ma rhaaxâ pâr̂â mwâ rhëë pèyaa pè vi ga, na ûr̂û ké waa i pâi xè Juda, na kaar̂u mâ karir̂i na dâ-né. 7 Na bör̂i êr̂ê yè-r̂é na Ièsu, êr̂ê: Kö vè rhâri pâr̂â mwâ rhëë ré i dö rhëë. Cér̂é bör̂i wê kö vè rhâri kwéyë. 8 Na bör̂i êr̂ê yè-r̂é na ce, êr̂ê: “Kö mâ pè vèr̂i xina ma nââ yè kaavûû vi ara.” 9 Cér̂é bör̂i wê rhéxar̂a yè-è. Na bör̂i néwaa rhëë ré é pugèwè vè viné na kâmö kaavûû vi ara, wè na da tâwai ö kââ-ré é pè xè-i, aè cér̂é dè tâwai na pâi pa waa nêr̂ê pa kö rhëë. Na bör̂i aʼyè kâmö ré yè öyö, 10 mâ êr̂ê yè-è êr̂ê: “Ké waa i pâr̂â kâmö, wè cér̂é vi wii baayê pâr̂â viné ka e, aè é wê wâyö vè kau; é bör̂i vi wii bar̂ee viné ka yaané, aè gèi wè gè bâ tö xar̂a viné ka e cêmè rua xina.” 11 Ökâré nêr̂ê ka ar̂inadö ré na rhavûû baayê na Ièsu rö Kana rö Galilé, mâ êr̂ê vèa rhîrhér̂é xi-e, cér̂é bör̂i tâ néwèi-e na pâi pa pâgür̂ü xi-e. 12 Tèi nédèè, na bör̂i rhééröö ria mi na Kapérénaum na Ièsu cér̂é pâni-e mâ pâr̂â pâvâdii-e mâ pâi pa pâgür̂ü xi-e, aè na da pôr̂ô na pâr̂â nédaa né ké tö-i xé-r̂é
Ièsu Rö Mwâ Ka Ar̂ii
13 Na wê tö vè ubwa na nédaa né Paséka i pâi xè Juda, na bör̂i wê vi na Iérusalèm na Ièsu. 14 Na bör̂i tö rhûû na ce pâr̂â kâmö rö léwé mwâ waa ar̂ii na cér̂é vi rhöwöi pâr̂â pôr̂ômökau mâ pâr̂â mutô, mâ pâr̂â mawi, mâ pâr̂â kâmö bar̂ee pa vi rhöwöi mwâné, wè, cér̂é vi cuè. 15 Na bör̂i waa rha kwé ka yar̂i na Ièsu vè pè kwijir̂è-r̂é, mâ rhau yayâwâ-r̂é xè léwé mwâ ka ar̂ii, cér̂é vèâ pâr̂â mutô mâ pâr̂â pôr̂ômökau, mâ virai mwâné i pâi pa vi rhöwöi mwâné, mâ puwir̂i ria pâr̂â taapër̂ë. 16 Na bör̂i êr̂ê na ce yè pâi pa vi rhöwöi mwâné, êr̂ê: «Pè koa pâr̂â kââ xè-a, aè koa yè waa mwâ i Pevaa vè mwâ vi rhöwö.» 17 Aè cér̂é bör̂i tâ néxâi na pâr̂â pa pâgür̂ü xi-e rha ka yu, êr̂ê: «Na bâ arai-nya na rhî vè e vè kau né mwâ waa ar̂ii xi-i.» 18 Cér̂é bör̂i êr̂ê yè-è na pâi xè Juda êr̂ê: «Jië na pètâbâ yè-vé, êr̂ê, gè waa pâr̂â kââ-ré?» 19 Na bör̂i êr̂ê yè-r̂é na Ièsu, êr̂ê: «Rhâi virai ö mwâ waa ar̂ii-a, wè gö yè mâ pè tömâ tëë rèi karir̂i nédaa.» 20 Cér̂é bör̂i êr̂ê yè-è na pâi xè Juda, êr̂ê: «Kaar̂u kâmö nédö na ma kanii na ma rhaaxâ né ké waa mwâ-â, aè gè êr̂ê, gè yè pè tömâ tëë rèi karir̂i rö nédaa?» 21 Aè ö mwâ waa ar̂ii ré na êr̂ê na Ièsu, wè na dè êr̂ê kar̂ö-è. 22 Na wê mör̂u tëë na ce xè-i ka pèii mé xi-e mâ, cér̂é bör̂i tâ néxâi na pâr̂â pâi pa pâgür̂ü xi-e ö nô ré na êr̂ê mâ' xiréé, cér̂é bör̂i wê cê tâwai pâr̂â ka yu mâ' xiréé, mâ nô ré na êr̂ê mâ' na Ièsu.
Na Rhîâgür̂ü-E Vi Tâ Néxâi Kâmö Na Ièsu
23 Na mö tö Iérusalèm na ce rèi nédaa né Paséka, cér̂é pôr̂ô yéyé na pâr̂â kâmö ré tâ néwèi rö-i néé-é, wè cér̂é wê tö rhûû pâr̂â nêr̂ê ka ar̂inadö ré na waa. 24 Aè Ièsu, wè na da bör̂i tö kâyâi-e yè-r̂é, wè na wê dè rhîâgür̂ü-r̂é wânii na ce. 25 Wè na da dö kââ yè-è na ki mâ êr̂ê yè-è ké waa i dèxâ kâmö, wè na dè rhîâgür̂ü na ce pâr̂â kââ ré tö pwéé kâmö.
Ièsu Mâ Nikodème
1 Na wii na dèxâ kâmö farésaiö, néé-é na Nikodème, dèxâ kâmö ka vi winô rö pwar̂a pâi xè Juda. 2 Na bör̂i vi cêmèèr̂i Ièsu rèi bwê, mâ êr̂ê yè-è, êr̂ê: «Kâmö ka vi pur̂â éé, gèvé wê tâwai, êr̂ê, gè kâmö ka vi pur̂â e ka mi xè-i Bâô, na yèri rha kâmö ka yè waa pâr̂â nêr̂ê ka ar̂inadö ré gè waa, na ki da tö pwar̂a-è na Bâô.» 3 Na bör̂i aʼcëi yè-è na Ièsu, êr̂ê: «Avâr̂i, avâr̂i, gö êr̂ê yè-i, êr̂ê, é yè da ër̂i vè döwöö tëë dèxâ kâmö, nè yè da vi na ce na ka tö rhûû mwâcir̂i i Bâô.» 4 Na bör̂i êr̂ê yè na Nikodème, êr̂ê: «É yè tâîî tëë ké yè ër̂i kâmö ka wê béâr̂i? Na tâwai na ce ké yè vi ru tëë rö léwé pâni-e cè ki mâ ër̂i-e vè kaar̂u tëë?» 5 Na bör̂i aʼcëi yè-è na Ièsu, êr̂ê: «Avâr̂i, avâr̂i, gö êr̂ê yè-i, êr̂ê, é yè da ër̂i tëë kâmö xè-i rhëë mâ ko, nè yè da tâwai vi ru rö mwâcir̂i i Bâô na ce. 6 Ö ké yè vi ër̂i rö-i kar̂ö, wè dè kar̂ö, aè ö ké yè vi ër̂i rö-i ko, wè dè ko-ré. 7 Koa yè cêrhö i ké êr̂ê xi-nya yè-i, êr̂ê: “Na dö kââ na ké yè ër̂i vè döwöö tëë.” 8 Na dè ku mi na kayâ rö ökâré na dè rhî vè e ké yè ku mi xi-e rö-i, gè bör̂i tö pwêr̂ê mâr̂ââ ku xi-e, aè gè da tâwai ökâré na mi xè-i, mâ ökâré na vi nai, na ûr̂û-ré yè pâr̂â kâmö wânii ré na ër̂i-r̂é na ko.» 9 Na bör̂i aʼcëi yè-è na Nikodème, êr̂ê: «É yè tâwai tâîî ö kââ-ré?» 10 Na bör̂i êr̂ê yè-è na Ièsu, êr̂ê: «Gè wêr̂êi, na gè dö kâmö ka vi pur̂â rö Israèl, gè bör̂i da tâ pâgür̂ü ö kââ-ré? 11 Avâr̂i, avâr̂i, gö êr̂ê yè-i, êr̂ê, gèvé dè êr̂ê pâr̂â kââ ka é dè tâwai xé-vé, mâ ye vè avâr̂i pâr̂â kââ ré gèvé tö rhûû; aè gëve da bör̂i cëi ka é ye vè avâr̂i xé-vé. 12 Gö yè êr̂ê yè-ve pâr̂â kââ ré tö-a bwêê jë, na nè yè bör̂i yèri tâ néwèi xe-ve, aè gëve yè mâ a tâwai tâîî pâr̂â kââ ré tö rua nékö na ki göi êr̂ê yè-ve? 13 Nè yèri rha kâmö ka yè tèi rua na nékö, aè na e rö na kâmö ré vi ria mi xè nékö, wè, o i kâmö rö rua nékö. 14 Na navui rua mârhùr̂ii na Mosé rö nékaê, na e na ki mâ navui rua ûr̂û-ré bar̂ee o i kâmö, 15 cè ki da mé na dèxâ kâmö rai pâi pa tâ néwèi-e, aè nè yè mâ wii na mör̂u xé-r̂é ka yè da tâwai yèri. 16 Wè na dö méar̂i vè kau aau bwêê jë na Bâô, na bör̂i kâyâi mi o xi-e ka dö rhaaxâ rö, cè ki da mé na dèxâ kâmö rai pâi pa tâ néwèi-e, aè nè yè mâ wii na mör̂u xé-r̂é ka yè da tâwai yèri. 17 Wè na da tùr̂ùwaa mi o xi-e na Bâô cè ki pè yerii bwêê jë, aè nè yè pè mör̂u-é. 18 Nè yè da yerii na kâmö ré tâ néwèi-e, aè nè yè wê yerii xina na kâmö ré da tâ néwèi-e, xè-i ké da tâ néwèi rö-i néé o i Bâô ka rhaaxâ rö. 19 Ökââ yerii, wè na wê pwa na daa rö bwêê jë, aè cér̂é rhî vè e orê rai daa na pâr̂â kâmö, wè na yaané na pâr̂â câwâ xé-r̂é. 20 Wè na rhîaa i daa na kâmö ré waa nô ka yaané, aè na da bar̂i vi rö daa, êr̂ê, wi mâ tö vèa na pâr̂â câwâ xi-e. 21 Aè ö kâmö ré avâr̂i, wè na vi rö daa, cè ki wê tö vèa na pâr̂â nêr̂ê-ê, êr̂ê, na waa xè-i Bâô.»
Ièsu Mâ Ioané
22 Tèi nédèè pâr̂â nô ré, na bör̂i vi na Ièsu, cér̂é pâr̂â pâi pa pâgür̂ü xi-e na névâ rö Juda, na bör̂i tö cér̂é-é rö-i mâ vi batiyi. 23 Aè Ioané, wè na wê vi batiyi bar̂ee rö dèxâ névâ néé-é na Ainon, tö vè ubwa i Salim, wè na kau na rhëë rö-i; cér̂é bör̂i vi ua-è cè ki batiyi-r̂é na ce. 24 Aè é da tö pöi Ioané tö mwâ pö kâmö. 25 Cér̂é bör̂i vi caa-r̂é na pâr̂â pâi pa pâgür̂ü i Ioané mâ dèxâ kâmö i Juda wa nô né vi batiyi. 26 Cér̂é bör̂i vi pwa yèr̂i Ioané na pâr̂â pâi pa pâgür̂ü xi-e mâ êr̂ê yè-è, êr̂ê: «Ka vi pur̂â éé, ö kâmö ré tö göu yawi rö ékar̂aè tö é vè ye né Ioridanô, ré gè ye vè avâr̂i-e mâ', wè gè tö rhûû, wè, ökââ na wê vi batiyi, aè cér̂é vi ua-è na pâr̂â kâmö pa pôr̂ô yéyé.» 27 Na bör̂i êr̂ê yè-r̂é na Ioané, êr̂ê: «Na da tâwai cëi vi bwir̂i rha kââ na dèxâ kâmö na ki mâ da nââ yè-è mi xè nékö. 28 Wè gëve wê pwêr̂ê avâr̂i-nya, êr̂ê, gö da Kérisö, aè é tùr̂ùwaa-nya cè göi mi baayêr̂î-e. 29 Ö kâmö ré é rhî vè e-é, ö kââ-ré kâmö ré mö ké vi öyö; aè wi ker̂e kâmö ré mö ké öyö, wè na tömâ tö pwêr̂ê-ê, mâ vi or̂o vè kau xè-i ké tëvë i ö kâmö ré mö ké öyö. Na ûr̂û ké vi or̂o xi-nya, wè na wê rhâri. 30 Aè na e na ki yè bâ tuö vè kau vi na ce, aè gö yè bâ yar̂i ria vi na gènyâ.»
Ce Ré Mi Xè Rua Nékö
31 «Ö kâmö ré mi xè rua, wè na vi kwéjî rai pâr̂â kâmö wânii; aè ö kâmö ré vi xè-a bwêê jë, wè dè kâmö xè bwêê jë na ce, na bör̂i dè waa ké tëvë xè bwêê jë. Aè ö kâmö mi xè rua, wè, na vi kwéjî rai pâr̂â kâmö wânii, 32 aè na dè ye vè avâr̂i pâr̂â kââ ré na dè tö rhûû mâ pwêr̂ê na ce, aè na yèri rha kâmö ka yè cëi kââ ka é ye vè avâr̂i xi-e. 33 Ö kâmö ré cëi ka é ye vè avâr̂i xi-e, wè na êr̂ê vè mör̂ö, êr̂ê, na avâr̂i na Bâô. 34 Wè ö kâmö ré na tùr̂ùwaa-è na Bâô, wè na êr̂ê nô i Bâô, wè na da nââ yè ko ka é dâwaa na Bâô. 35 Pevaa, wè na méar̂i o xi-e, mâ nââ rö néxar̂a â-ê pâr̂â kââ wânii. 36 Ö kâmö ré yè tâ néwèi o, wè nè yè mâ wii na mör̂u xi-e ka yè da tâwai yèri, aè nè yè da tö rhûû mör̂u na kâmö ré da tâ néwèi o, wè nè yè bâ tö xi-e na vi rhôê i Bâô.»
Ièsu Mâ Bwè Xè Samaria
1 Na wê tâwai na Ör̂ökau, êr̂ê, cér̂é wê pwêr̂ê na pâr̂â farésaiö, êr̂ê, na pôr̂ô yéyé na pâr̂â kâmö ré na aʼyè-r̂é na ce, mâ vi batiyi-r̂é, cér̂é duwê na pâr̂â kâmö ré na batiyi-r̂é na Ioané. 2 Aè na da batiyi-r̂é na Ièsu, aè cér̂é vi batiyi-r̂é na pâr̂â pâi pa pâgür̂ü xi-e. 3 Na bör̂i kâyâi Juda na Ièsu, mâ vi tëë na Galilé. 4 Na bör̂i e yè na ké yè rhöwörher̂e rhâmâ rö négowé né Samaria. 5 Na bör̂i pwa na ce rö dèxâ névâ, névâ rö Samaria, néé-é na Sika, na tö vè ubwa i néjë na nââ na Iakobo yè Ioséfa o xi-e. 6 Na tö-i na wêê rhëë i Iakobo. Na bör̂i cuè rö bwêêwé na Ièsu, wè, na yör̂a xè-i ké vâr̂â xi-e, wè na wê goowé karèè. 7 Na bör̂i pwa na dèxâ bwè xè Samaria na ka kö rhëë, na bör̂i êr̂ê yè-è na Ièsu, êr̂ê: «Nââ wâyö-nya.» 8 Aè pâr̂â pâi pa pâgür̂ü xi-e, wè, cér̂é wê vi na ka vi urhii êê ara rö névâ. 9 Na bör̂i êr̂ê yè na bwè xè Samaria, êr̂ê: «Gè wêr̂êi, gè tùr̂ùyè rhëë rai-nya, na gè kâmö xè Juda, aè gènyâ, wè gö bwè xè Samaria?» Wè, cér̂é da vi pâ ker̂e-r̂é na pâi xè Juda mâ Samaria. 10 Na bör̂i kurher̂e yè-è na Ièsu, êr̂ê: «Gè yè wê rhîâgür̂ü e kwââvâr̂â i Bâô, mâ ö kâmö ré êr̂ê yè-i nââ wâyö-nya, gè yè bör̂i a tùr̂ùyè rai-e, nè yè bör̂i xa nââ yè-i rhëë né mör̂u na ce.» 11 Na bör̂i êr̂ê yè-è na bwè, êr̂ê: «Ör̂ökau, na yèri pè kö wâyö-i, wè na tù na wêê rhëë, aè kè-wè na wêê rhëë né mör̂u ré gè êr̂ê? 12 Na wêr̂êi, gè vi kwéjî rai Iakobo, pevaa xé-vé, kâmö ré nââ yè-vé wêê rhëë-a, wè, dè wêê rhëë wâyö-r̂é vèâ pâr̂â pâlè-è mâ pâr̂â bwâr̂âwê xi-e wânii.» 13 Na bör̂i kurher̂e yè-è na Ièsu, êr̂ê: «Cér̂é yè bar̂i wâyö tëë na pâr̂â kâmö ré yè wâyö rö wêê rhëë-a; 14 aè ö kâmö ré yè wâyö rö wêê rhëë ré gö yè nââ yè-è, wè nè yè da bar̂i wâyö tëë cêmè rö léé, aè ö wêê rhëë ré gö yè nââ yè-è, wè nè yè bâ tö pwéé-é mâ pwé rua xè-i kwéyë rua rö mör̂u ka da tâwai yèri.» 15 Na bör̂i êr̂ê yè-è na bwè-ré, êr̂ê: «Ör̂ökau, nââ yè-nya wêê rhëë-ré cè göi da bar̂i wâyö tëë, mâ mi tëë na ka kö rhëë rö-a.» 16 Na bör̂i êr̂ê yè-è na Ièsu êr̂ê: «Vi aʼyè mi kui-i na-a.» 17 Na bör̂i kurher̂e yè-è na bwè-ré, êr̂ê: «Na yèri kui-nya.» Na bör̂i êr̂ê yè-è na Ièsu, êr̂ê: «Na avâr̂i na ké êr̂ê xi-i, na yèri kui-i, 18 wè na wii mâ na pâi panii pâ kui-i, aè wi-ré tö göu xina, wè na da kui-i bar̂ee, ökâré na bör̂i avâr̂i xè-i na ké êr̂ê xi-i.» 19 Na bör̂i êr̂ê yè-è na bwè, êr̂ê: «Ör̂ökau, gö tö rhûû-i vè pérövéta. 20 Pâi béâr̂i xiréé mâ', wè, cér̂é waa ar̂ii rö gwêêwè-a, aè gëve, wè gëve êr̂ê dö ka waa ar̂ii, wè Iérusalèm.» 21 Na bör̂i êr̂ê yè-è na Ièsu, êr̂ê: «Bwè-rè, tâ néwèi-nya, wè nè yè wê pwa na ké yè da waa ar̂ii tëë rö gwêêwè-a yè Pevaa, nè yè yèri bar̂ee rö Iérusalèm. 22 Gëve da tâwai ö kââ-ré gëve waa ar̂ii yè-è, aè gèvé, wè gèvé dè tâwai ö kââ-ré gèvé waa ar̂ii yè-è, wè na mi xè-i pâi xè Juda na vi pè mör̂u. 23 Aè nè yè pwa na nédaa né é, wè ökââ, cér̂é yè vi na pâr̂â kâmö ré waa ar̂ii avâr̂i na ka waa ar̂ii yè Pevaa rö-i ko mâ avâr̂i, wè na rhî vè e na Pevaa pâr̂â kâmö pa ûr̂û-ré na ké waa ar̂ii yè-è. 24 Bâô wè ko, aè pâr̂â kâmö ré waa ar̂ii yè-è, wè na e na ké-r̂é waa ar̂ii yè-è xè-i ko mâ avâr̂i.» 25 Na bör̂i êr̂ê yè-è na bwè-ré, êr̂ê «Gö tâwai, êr̂ê nè yè wê pwa na Mésia, dèxâ néé-é na Kérisö, nè yè wê pwa na ce, nè yè bör̂i êr̂ê vèa yè-vé pâr̂â kââ wânii.» 26 Na bör̂i êr̂ê yè-è na Ièsu, êr̂ê: «Gènyâ, ré vi tëvë göru.» 27 Cér̂é bör̂i pwa na pâr̂â pâi pa pâgür̂ü xi-e, mâ cêrhö na cér̂é tö rhûû-é, na na vi tëvë cur̂u bwè-ré, aè na yèri kâmö rai-r̂é ka ërëwaa-è, êr̂ê: «Gè vi mè yè? Aè gè wêr̂êi, göu vi tëvë vèâ göu-é?» 28 Na bör̂i kâyâi mwâ kö rhëë xi-e na bwè-ré, mâ vi tëë na névâ, mâ vi êr̂ê yè pâr̂â kâmö, êr̂ê: 29 «Gëve mi na ka tö rhûû ö kâmö ré rhau êr̂ê vèa yè-nya wânii pâr̂â kââ ré gö waa, wè wi wîr̂î? Wi Kérisö ra?» 30 Cér̂é bör̂i rhau vi röi na pâr̂â kâmö xè névâ-ré na ka tö rhûû-é. 31 Na mö ké yidöö mi na bwè, cér̂é bör̂i a paur̂u-é na pâr̂â pâi pa pâgür̂ü xi-e, mâ êr̂ê yè-è, êr̂ê: «Kâmö ka vi pur̂â-ê, gèi ara wîr̂î.» 32 Na bör̂i êr̂ê yè-r̂é na ce, êr̂ê: «Na wii na néara-nya rö-a ré gëve da tâwai.» 33 Cér̂é bör̂i vi êr̂ê na pâr̂â pâi pa pâgür̂ü, êr̂ê: «Na ûr̂û ka wii na kâmö ka nââ ara-è?» 34 Na bör̂i êr̂ê yè-r̂é na Ièsu, êr̂ê: «Néara-nya rö, na ké yè waa kââ ka é rhî vè e i ce ré tùr̂ùwaa-nya, mâ waa röi nêr̂ê-ê. 35 Na wêr̂êi, na da ké êr̂ê xe-ve, êr̂ê: “Na mö ké tö na kavùè var̂ui né ké yè vi yiur̂u.” Aè tö rhûû, gö êr̂ê yè-ve, tö rhûû e vèr̂i döwöö na gëve, wè na wê kùr̂ù cè ki mâ vi yiur̂u! 36 Nè wii na pè urhii yè kâmö ré kî mâ ka vèâi vè rhaaxâ pè yè mör̂u ka da tâwai yèri, cè ku-r̂u rhau vi or̂o na kâmö ré nai mâ kâmö ré kî. 37 Ökâré na bör̂i avâr̂i na ki êr̂ê, êr̂ê: “Rhaaxâ kâmö, wè na nai, aè dèxâ wè na kî.” 38 Gö tùr̂ùwaa-ve na ka kî ö kââ-ré gëve da waa; aè ka é waa i bör̂i, gëve bör̂i vi ru rö kaa mar̂a xé-r̂é.» 39 Gèré pôr̂ô yéyé na pâi xè Samaria pâi pa tâ néwèi rö névâ-ré, xè-i nô ré na êr̂ê yè-r̂é na bwè-ré, êr̂ê: «Na rhau êr̂ê vèa yè-nya röi pâr̂â kââ ré gö waa na ce.» 40 Cér̂é bör̂i wê pwa yèr̂i-e na pâi xè Samaria mâ pëër̂ii yè-è cè ki tö cér̂é vèâ; na bör̂i tö cér̂é vèâ rö-i kaar̂u nédaa 41 Cér̂é pôr̂ô yéyé bar̂ee na bör̂i kâmö pa dö tâ néwèi-e xè-i ké dö tëvë xi-e. 42 Cér̂é bör̂i êr̂ê yè-è bwè-ré, êr̂ê: «Gèvé da tâ néwèi xè-i nô xi-i rhar̂i, aè gèvé wê pwêr̂ê mâ tâwai, êr̂ê, avâr̂i, ce wè kâmö ré pè mör̂u bwêê jë.»
Na Pè Mör̂u O I Kâmö Ka Vi Winô Na Ièsu
43 Tèi nédèè duö nédaa-ré, na bör̂i vi xè-i na Galilé. 44 Wè na ye vè avâr̂i na Ièsu, êr̂ê: «Na da mâ vè kau na dèxâ pérövéta rö névâ xi-e.» 45 Na bör̂i pwa na ce rö Galilé, cér̂é bör̂i cëi-e na pâi xè Galilé, wè cér̂é wê tö rhûû pâr̂â kââ ré na waa na ce rö Iérusalèm tèi nédaa né vi ara, wè cér̂é wê vi bar̂ee na ka tö rhûû vi ara. 46 Na bör̂i pwa tëë na Ièsu rö Kana rö Galilé, tö ökâré na pugèwè rhëë vè viné rö-i. 47 Ökâré dèxâ kâmö ka vi winô, wè na pèii na ö xi-e rö Kapérénaum. Na wê tö pwêr̂ê na ce, êr̂ê, na wê pwa na Ièsu rö Galilé, mi xè Juda, na bör̂i vi ua-è na ce, mâ pëër̂ii yè-è cè ki pè mör̂u o xi-e, wè na wê tö vè ubwa na ké yè mé xi-e. 48 Na bör̂i êr̂ê yè-è na Ièsu, êr̂ê: «Gëve yè da tö rhûû pâr̂â pètâbâ mâ pâr̂â nêr̂ê ka ar̂inadö, nè yè bör̂i yèri vi tâ néwèi xe-ve!» 49 Na bör̂i êr̂ê yè-è na kâmö ka vi winô, êr̂ê: «Ör̂ökau, mi baayê na ki da tö pèii na o xi-nya.» 50 Na bör̂i êr̂ê yè-è na Ièsu, êr̂ê: «Wê vi, wè na wê mör̂u na o xi-i.» Na bör̂i tâ néwèi na kâmö-a nô ré na êr̂ê yè-è na Ièsu, mâ vi. 51 Aè na mö ké vi, cér̂é bör̂i vi javirù cér̂é pâi pâ kâmö yar̂i xi-e, cér̂é bör̂i êr̂ê yè-è, êr̂ê: «Na wê mör̂u na o xi-i.» 52 Na bör̂i ërëwaa-r̂é wa pè mèèxa ré na iwa rèi. Cér̂é bör̂i êr̂ê yè-è, êr̂ê: «Na yèri pixê xi-e xöömwê rèi kanii na ma kaar̂u pè mèèxa.» 53 Na bör̂i tâ néxâi na pevaa xi-e, êr̂ê, ökâré pè mèèxa ré na êr̂ê na Ièsu rèi, êr̂ê nè yè mör̂u na o xi-i rèi. Na bör̂i tâ néwèi, cér̂é pâr̂â wêê mwâ xi-e wânii. 54 Ökâré pèkaar̂u nêr̂ê ka ar̂inadö ré na waa na Ièsu na na mö ké pwa rö Galilé mi xè Juda.
Na Pè Mör̂u Dèxâ Kâmö Ka Waa Pèii Yör̂a Na Ièsu
1 Tèi nédèè, cér̂é bör̂i waa vi ara na pâi xè Juda, na bör̂i tèi rua na Iérusalèm na Ièsu. 2 Na tö Iérusalèm na dèxâ wêê rhëë, néé-é rö mêr̂ê aʼ xè Hébèru na Bétsata, na tö vè ubwa i mèö bé néé-é na mèö bé né mutô; na bör̂i wii na kanii ka tâ ui rö-i. 3 Cér̂é kur̂u rö-i na pâr̂â kâmö pa pèii yör̂a, mâ pâr̂â bwi, mâ pâr̂â pa bee, mâ pâr̂â pa yör̂a. Cér̂é tö-a târ̂î ké yè bë vè yir̂i i rhëë; 4 wè na vi ria mi tèi bör̂i na dèxâ angéla cè ki bë vè yir̂i. Aè ö kâmö ré koyo ria baayê rö wêê rhëë na na mö ké bë vè yir̂i, wè nè yè mör̂u na ce. 5 Na tö-i na dèxâ kâmö ka pèii, wè na rha kâmö na ma pârör̂ö na ma dèxâ é â na ma karir̂i na pâr̂â nédö né pèii xi-e. 6 Na bör̂i tö rhûû-é na Ièsu na na kur̂u, aè na wê dè tâwai, êr̂ê, na mwââ aau na ké pèii xi-e, na bör̂i êr̂ê yè-è na ce, êr̂ê: «Gè bar̂i mör̂u?» 7 Na bör̂i êr̂ê yè-è na kâmö ka pèii, êr̂ê: «Ör̂ökau, na yèri kâmö ka yer̂e-nya na wêê rhëë, na ki bë vè yir̂i, wè gö yè mö ké koyo ria, na bör̂i a koyo bèr̂éé na dèxâ.» 8 Na bör̂i êr̂ê yè-è na Ièsu, êr̂ê: «Tömâ rua mâ pè kaa kur̂u xi-i mâ vi.» 9 Na bör̂i wê mör̂ö na kâmö-ré, na bör̂i wê pè kaa kur̂u xi-e mâ vi. Aè nédaa-ré wè nédaa ka ar̂ii. 10 Cér̂é bör̂i êr̂ê na pâi xè Juda yè kâmö-ré é pè mör̂u-é, êr̂ê: «Nédaa ka ar̂ii xina, na da e na gèi kââ kaa kur̂u xi-i.» 11 Na êr̂ê kurher̂e yè-r̂é na ce, êr̂ê: «Na êr̂ê yè-nya na kâmö ré pè mör̂u-nya: “Pè kaa kur̂u xi-i mâ vi”.» 12 Cér̂é bör̂i êr̂ê yè-è, êr̂ê: «Wîr̂î ré êr̂ê yè-i, gèi pè kaa kur̂u xi-i mâ vi?» 13 Na da bör̂i tâwai ö kâmö ré pè mör̂u-é, wè wi wîr̂î? Wè, na vi jarua rö néjêr̂ê pâr̂â kâmö pa pôr̂ô yéyé rö-i na Ièsu. 14 Aè tèi nédèè, na bör̂i tö rhûû-é na Ièsu rö mwâ waa ar̂ii, na bör̂i êr̂ê yè-è, êr̂ê: «Gè tö rhûû, é wê cowa pè mör̂u-i, koa yè waa tëë nô ka yaané, wè wi pwa yèr̂i-i na nô ka yaané ka dö kau aau.» 15 Na bör̂i vi na kâmö ré, mâ êr̂ê yè pâi xè Juda, êr̂ê, na pè mör̂u-é na Ièsu. 16 Aè pâi xè Juda, wè, cér̂é bar̂i yömör̂ui Ièsu, mâ vi mè wêyê né ké yè yö vè mii-e, xè-i ké waa pâr̂â nêr̂ê-ré rèi nédaa ar̂ii. 17 Na bör̂i êr̂ê yè-r̂é na Ièsu, êr̂ê: «Pevaa, wè na waa nêr̂ê kwéyë rua rèi nédaa xina, gö yè waa nêr̂ê ûr̂û-ré bar̂ee na gènyâ.» 18 Aè pâi xè Juda, wè cér̂é mör̂ö vi mè nô né ké yè yö vè mii-e na da kèi rhar̂i ké tar̂a kwéjîr̂i xi-e nédaa ka ar̂ii, aè xè-i ké êr̂ê xi-e bar̂ee, êr̂ê, na dö Pevaa xi-e rö na Bâô, mâ kèi ké êr̂ê xi-e bar̂ee êr̂ê na ûr̂û Bâô.
Vi Winô I O I Bâô
19 Na bör̂i êr̂ê yè-r̂é na Ièsu, êr̂ê: «Avâr̂i, avâr̂i, gö êr̂ê yè-ve, na da tâwai na O waa dèxâ nêr̂ê ka é tâ néxâi xi-e, aè, na tö rhûû rai Pevaa xi-e na na waa, aè pâr̂â kââ ré na waa na Pevaa, wè, na waa bar̂ee na O. 20 Pevaa, wè na méar̂i O mâ na êr̂ê vèa yè-è röi pâr̂â kââ ré na waa; nè yè bör̂i êr̂ê vèa yè-è pâr̂â nêr̂ê ka dö kau aau rai pâr̂â nêr̂ê ré é, gëve yè bör̂i buèi. 21 Na ûr̂û Pevaa, wè na pè tömâ tëë pâr̂â pa wê mé, mâ pè mör̂u-r̂é, na ûr̂û-ré bar̂ee na O, wè na pè mör̂u pâr̂â kâmö ré na rhî vè e. 22 Na da ërëwaa dèxâ kâmö na Pevaa, aè na nââ rö-i vi winô yè Ö cè ki ërëwaa wânii, 23 cè ké-r̂é rhau pè kau O na pâr̂â kâmö wânii, na ûr̂û ké pè kau xé-r̂é Pevaa. Ö kâmö ré da pè kau O, wè na da pè kau bar̂ee Pevaa ré tùr̂ùwaa-è.» 24 «Avâr̂i, avâr̂i, gö êr̂ê yè-ve, êr̂ê, ö kâmö ré pwêr̂ê pâr̂â nô xi-nya, mâ tâ néwèi yè kâmö ré tùr̂ùwaa-nya, wè nè yè cëi mör̂u ka yè da tâwai yèri, aè nè yè da tâwai vi ru rö yerii, wè, na vi xè-i mé na mör̂u. 25 Avâr̂i, avâr̂i, gö êr̂ê yè-ve, na wê pwa na nédaa né ké yè pwêr̂ê mêr̂ê aʼ i O i Bâô i pâr̂â kâmö ré wê mé, aè pâr̂â kâmö ré pwêr̂ê, wè, cér̂é yè mör̂u. 26 Na ûr̂û-ré na Pevaa, wè na wii na mör̂u rö pwar̂a-è, na ûr̂û ké nââ xi-e yè O, wè na wii bar̂ee na mör̂u rö pwar̂a-è. 27 Na nââ yè-è vi winô cè ki vi rhôôr̂u, wè, na ö i kâmö na ce. 28 Koa yè cêrhö i pâr̂â kââ-ré, wè, na mö mi na nédaa né ké yè rhau tömâ rua tëë i pâr̂â kâmö xè pâr̂â kaa vi uyû, na ka tö pwêr̂ê mêr̂ê aʼ xi-e. 29 Cér̂é yè vi rua, bör̂i pâr̂â kâmö pa waa nô ka e, wè, cér̂é yè mör̂u tëë na mör̂u, aè pâr̂â kâmö pa waa nô ka yaané, wè cér̂é yè mör̂u tëë na yerii. 30 Gö da tâwai waa vè târ̂ââ dèxâ kââ na gènyâ. Aè gö rhôôr̂u; na ûr̂û ké tö pwêr̂ê xi-nya, mâ gö rhôôr̂u vè târi, wè gö da mèyè kââ ka é rhî vè e xi-nya, aè na e rö na kââ ka é rhî vè e i ce ré tùr̂ùwaa-nya.»
Ké Ye Vè Avâr̂i Ièsu
31 «Gö yè dè ye vè avâr̂i-nya, na bör̂i da avâr̂i na pè ye vè avâr̂i-nya. 32 Aè na wii na kâmö ré ye vè avâr̂i-nya, wè gö tö rhûû-é, wè na avâr̂i na ké ye vè avâr̂i-nya xi-e. 33 Gëve vi tùr̂ù yè Ioané, na bör̂i ye vè avâr̂i na ce. 34 Gö da cëi pè ye vè avâr̂i dèxâ kâmö, aè gö êr̂ê yè-ve pâr̂â kââ-ré cè ke-ve mör̂u. 35 Ioané wè mwââ kêmör̂u ka wér̂a, na bör̂i wii na wér̂a-è, gëve yè bör̂i wê rhî vè e vi or̂o rö wér̂a-è rèi rö rha pè mèèxa. 36 Gènyâ, wè na wii na pè ye vè avâr̂i-nya ka vi kwéjî rai Ioané; wè ö kââ-ré pâr̂â nêr̂ê ré na aʼpâgür̂ü yè-nya na Pevaa, cè göi waa röi, ö kââ-ré rö pâr̂â nêr̂ê ré gö waa, é yè ye vè avâr̂i-nya, êr̂ê, na tùr̂ùwaa-nya na Pevaa. 37 Na wê ye vè avâr̂i-nya röi na Pevaa, ö ce ré tùr̂ùwaa-nya. Aè gëve da dö tö pwêr̂ê mêr̂ê aʼ xi-e, mâ da tö tö rhûû bar̂ee némèè-è, 38 mâ na da tö pwéé-ve na pâr̂â nô xi-e, xè-i ké da tâ néwèi xe-ve ö ce ré tùr̂ùwaa-nya. 39 Gëve vi na ka mèyè rö pwar̂a pèci ar̂ii, wè gëve tâ néxâi, êr̂ê, nè yè wii rö-i na mör̂u xe-ve ka da tâwai yèri, ökâré rö nô ré pè ye vè avâr̂i-nya. 40 Gëve bör̂i viö rai mi ua-nya cè ke-ve mör̂u!» 41 «Gö da mèyè vi pè kau-i kâmö na gènyâ. 42 Aè gö tâwai-ve na gènyâ, êr̂ê, na da wii na vi méar̂i xe-ve yè Bâô. 43 Gö wê pwa mi rö-i néé Pevaa, gëve bör̂i da cëi-nya; aè nè yè mâ pwa na dèxâ kâmö rö-i dè néé-é, gëve yè bör̂i cëi-e. 44 Gëve yè tâwai tâîî ké yè tâ néwèi na gëve, pâi pa cëi vi pè kau xè xé-r̂é, aè gëve da mèyè rö vi pè kau ré mi xè-i Bâô rhar̂i? 45 Koa yè tâ néxâi na gëve, êr̂ê, gö yè vi na gènyâ na ka vi kââr̂â i-ve yè Pevaa; aè nêr̂ê dèxâ kâmö na ké yè vi kââr̂â i-ve, ökâré Mosé ré gëve tâ néwèi-e. 46 Gëve yè cëi Mosé na gëve, gëve yè cëi-nya bar̂ee, wè na yu nô né-nya na ce. 47 Gëve yè da cëi ka yu xi-e, gëve yè bör̂i cëi tâîî pâr̂â nô xi-nya?»
Na Pè Ara Kanii Mille Kâmö Na Ièsu
1 Tèi nédèè, na bör̂i tawarher̂e nérhëë rö Galilé na Ièsu, néé-é bar̂ee nérhëë-ré na Tibériade. 2 Cér̂é bör̂i vi ua-è na pâr̂â kâmö pa pôr̂ô yéyé, wè cér̂é tö rhûû pâr̂â nêr̂ê ka ar̂inadö ré na waa na ce rö bwêêwé pâr̂â kâmö pa pèii. 3 Na bör̂i tèi rua na gwêêwè na Ièsu, na bör̂i cuè vèâ cér̂é pâr̂â pâi pa pâgür̂ü xi-e rö-i. 4 Na wê tö vè ubwa na nédaa né Paséka, wè bwêê i pâi xè Juda. 5 Na bör̂i tö rhûû pâr̂â kâmö pa pôr̂ô yéyé na Ièsu, na cér̂é mi ua-è, na bör̂i êr̂ê yè Filipo na ce, êr̂ê: «Gèré yè vi na ka urhii êê ara rö-wè cè ki pè ara-r̂é?» 6 Na êr̂ê nô ré, wè na waa yeyèè yè-è, wè na dè tâwai ö kââ-ré nè yè waa na ce. 7 Na bör̂i êr̂ê yè-è na Filip, êr̂ê: «Nè yè da pâr̂i-r̂é na pâr̂â var̂awa pè urhii pârör̂ö kâmö dènari, wè nè yè da pâr̂i-r̂é kwéyë na ka yar̂i xè-i.» 8 Na bör̂i êr̂ê yè-è na dèxâ rai pâi pa pâgür̂ü xi-e, néé-é na Adèrè, pâdii Simona Pètèru, êr̂ê: 9 «Na wii na dèxâ wi dowa rö-a, wè na tö xar̂a kanii var̂awa orge mâ kaar̂u êêwâ; wi yè xö wêr̂êi yè pâr̂â kâmö-a?» 10 Na bör̂i êr̂ê na Ièsu, êr̂ê: «Pè cuè yâbèr̂i ria pâr̂â kâmö.» Tö ökâré na pôr̂ô na nédeewi rö-i. Cér̂é bör̂i cuè ria na pâr̂â kâmö, wè cér̂é ûr̂û kanii mille. 11 Na bör̂i pè pâr̂â var̂awa na Ièsu, aè na wê cowa ëi, na bör̂i vi wii yè pâr̂â pâi pa pâgür̂ü xi-e, aè pâr̂â pâi pa pâgür̂ü, wè cér̂é vi wii pè pâr̂i pâr̂â kâmö ré cuè yâbèr̂i-r̂é; mâ kaar̂u êêwâ bar̂ee, na ûr̂û rhî vè e xé-r̂é. 12 Cér̂é bör̂i wê kiè, na bör̂i êr̂ê yè pâr̂â pâi pa pâgür̂ü xi-e na ce, êr̂ê: «Ka vèâi vè rhaaxâ pâr̂â ka örua xè-i, cè ki yèri ka yè vi bwir̂i xè-i.» 13 Cér̂é bör̂i wê ka vèâi mâ oè vè rhâri pârör̂ö kêbö na ma kaar̂u ka örua xè-i kanii var̂awa orge, tèi nédèè ké vi ara. 14 Cér̂é wê tö rhûû na pâr̂â kâmö nêr̂ê ka ar̂inadö ré na waa na Ièsu, cér̂é bör̂i êr̂ê, êr̂ê: «Avâr̂i êr̂ê, ökââ pérövéta ré é êr̂ê nè yè vi ria mi na bwêê jë.» 15 Na wê rhî tâwai-r̂é na Ièsu, êr̂ê, cér̂é yè mi na ka pè tömâ-ê cè ki ör̂ökau, na bör̂i vi rhar̂i tëë na ce na gwêêwè.
Na Vâr̂â Rö Bwêêrher̂e Rhëë Na Ièsu
16 Na wê rhêêrè, cér̂é bör̂i vi ria na nérhëë na pâr̂â pâi pa pâgür̂ü, 17 mâ oè kwâ, mâ tawarher̂e rhâmâ nérhëë, wè cér̂é vi na Kapérénaum. Aè na wê bwê, na bör̂i da tö pwa yèr̂i-r̂é na Ièsu. 18 Na bör̂i wii na rhövè rö nérhëë, wè na kau na kayâ mâ kwiè. 19 Cér̂é wê tawaur̂u kwâ, na ûr̂û kanii töwè kanii na ma rhaaxâ kilomèèti, cér̂é bör̂i tö rhûû Ièsu na na vâr̂â mi rö bwêêrher̂e rhëë, mâ vi vè ubwa i kwâ. Cér̂é bör̂i cê bar̂a. 20 Na bör̂i êr̂ê yè-r̂é na ce, êr̂ê: «Gènyâ-a, aè koa yè bar̂a!» 21 Cér̂é bör̂i cëi-e rö kwâ mâ vi or̂o, cér̂é bör̂i wê cir̂i rö névâ ré cér̂é vi nai.
Pâr̂â Kâmö Cér̂é Vi Mèyè Ièsu
22 Tèi mélöö, cér̂é bör̂i tömâ rö dèxâ ékar̂aè nérhëë na pâr̂â kâmö pa pôr̂ô yéyé, na bör̂i rhî vè yèri rha kwâ rö-i, aè na rhaaxâ rö kwâ ré cér̂é oè na pâr̂â pâi pâgür̂ü i Ièsu, na bör̂i da tö cér̂é Ièsu, aè cér̂é oè rhâri kwâ na pâr̂â kâmö xi-e. 23 Aè na wê cir̂i na bör̂i kwâ mi xè Tibériade rö ka tö vè ubwa i ö kââ-ré cér̂é wê vi ara rö-i, tèi nédèè ké ëi yè êê ara i Ör̂ökau. 24 Cér̂é bör̂i wê tö rhûû na pâr̂â kâmö na na yèri Ièsu rö pwar̂a pâi pa pâgür̂ü xi-e, cér̂é bör̂i oè pâr̂â kwâ ré, mâ vi na Kapérénaum, wè cér̂é vi mèyè Ièsu.
Ièsu, Var̂awa Né Mör̂u
25 Cér̂é bör̂i tö rhûû-é rö dèxâ ékar̂a nérhëë, cér̂é bör̂i êr̂ê yè-è, êr̂ê: «Ka vi pur̂â éé, gè pwa rö-a wanéyé?» 26 Na bör̂i êr̂ê yè-r̂é na Ièsu, êr̂ê: «Avâr̂i, avâr̂i, gö êr̂ê yè-ve, êr̂ê, gëve da mèyè-nya xè-i ké wê tö rhûû xe-ve pâr̂â nêr̂ê ka ar̂inadö, aè xè-i rö ké ara xe-ve, gëve bör̂i wê kiè xè-i var̂awa. 27 Koa yè waa nêr̂ê yè êê ara ka yè bo, aè na e rö na êê ara ka tö yawi cêmè rö mör̂u ka da tâwai yèri, ré nè yè nââ yè-ve na o i kâmö, wè na pè tömâ-ê vè mör̂ö na Pevaa, wè Bâô.» 28 Cér̂é bör̂i êr̂ê yè-è, êr̂ê: «Ö jië na nêr̂ê-vé, cè ké-vé waa nêr̂ê i Bâô?» 29 Na bör̂i êr̂ê yè-r̂é na Ièsu, êr̂ê: «Ökââ nêr̂ê Bâô, êr̂ê, tâ néwèi yè kâmö ré na tùr̂ùwaa-è.» 30 Cér̂é bör̂i êr̂ê yè-è, êr̂ê: «Ö jië pètâbâ ré gè yè waa cè ki gèvé tö rhûû mâ tâ néwèi? Jië na nêr̂ê-i? 31 Cér̂é kâi mana na pâi kau xé-vé rö nékaê, na ûr̂û ka yu mâ', êr̂ê: “Na nââ vè cî-r̂é var̂awa mi xè nékö.”» 32 Na bör̂i êr̂ê yè-r̂é na Ièsu, êr̂ê: «Avâr̂i, avâr̂i, gö êr̂ê yè-ve, êr̂ê, na da nââ yè-ve var̂awa mi xè nékö na Mosé, aè Pevaa xi-nya, kâmö ré nââ yè-ve dö var̂awa mi xè nékö; 33 wè var̂awa i Bâô, wè, var̂awa ka vi ria mi xè nékö, mâ nââ mör̂u yè bwêê jë wânii.» 34 Cér̂é bör̂i êr̂ê yè-è, êr̂ê: «Ör̂ökau, gè yè bâ nââ yè-vé var̂awa-ré.» 35 Na bör̂i êr̂ê yè-r̂é na Ièsu, êr̂ê: «Gènyâ, wè var̂awa né mör̂u. Aè ö kâmö ré mi ua-nya, wè nè yè da mêr̂ê tëë, aè ö kâmö ré tâ néwèi-nya, wè nè yè da bar̂i wâyö tëë. 36 Gö wê cowa êr̂ê yè-ve, êr̂ê, gëve tö rhûû-nya avâr̂i, aè gëve da bör̂i tâ néwèi-nya rö. 37 Cér̂é yè rhau mi ua-nya na pâr̂â kââ wânii ré na nââ yè-nya na Pevaa, aè ö kâmö ré yè mi ua-nya, wè gö yè da yayâwâ-ê. 38 Tö ökâré, gö da vi ria mi xè nékö na ka waa rhî vè e xi-nya, aè, na e rö na rhî vè e i kâmö ré tùr̂ùwaa-nya. 39 Ökââ rhî vè e i kâmö ré tùr̂ùwaa-nya, cè göi yè da kâ vè bwir̂i dèxâ rai pâr̂â kâmö ré na nââ-r̂é yè-nya, aè gö yè mâ pè mör̂u-r̂é tëë rèi nédaa ka taadè. 40 Aè ökââ rhî vè e i Pevaa xi-nya, êr̂ê, pâr̂â kâmö wânii ré tö rhûû O mâ tâ néwèi-e, wè cér̂é yè cëi mör̂u ka da tâwai yèri; aè gö yè mâ pè mör̂u-r̂é tëë rèi nédaa ka taadè.» 41 Cér̂é bör̂i vi vâpèr̂u-é na pâi xè Juda, xè-i ké êr̂ê xi-e, êr̂ê; «Gènyâ var̂awa ka vi ria mi xè nékö.» 42 Cér̂é bör̂i êr̂ê, êr̂ê: «Ö jië, na da Ièsu o i Ioséfa na wi-a? Aè gèré da tâwai bar̂ee pevaa xi-e mâ pâni-e? Na wêr̂êi, na êr̂ê na ce, gö vi ria mi xè nékö?» 43 Na bör̂i êr̂ê yè-r̂é na Ièsu, êr̂ê: «Koa yè vi vâpèr̂u na gëve. 44 Na yèri rha kâmö ka yè tâwai mi ua-nya, na ki da yörhèè-è na Pevaa, ö ce ré tùr̂ùwaa-nya. Aè gö yè mâ pè tömâ-ê tëë rèi nédaa ka taadè. 45 É yu rö pèci i pâi pa péröféta, êr̂ê: “Cér̂é yè rhau pâgür̂ü rai Bâô”. Tö ökâré, cér̂é yè rhau mi ua-nya na pâr̂â kâmö ré tö vi pwêr̂ê mâ pâgür̂ü rai Pevaa. 46 Aè na yèri rha kâmö ka tö rhûû Pevaa, aè na e rö na kâmö ré mi xè-i Bâô, wè na tö rhûû Pevaa xi-e. 47 Avâr̂i, avâr̂i, gö êr̂ê yè-ve, êr̂ê, ö kâmö ré yè tâ néwèi-nya, wè nè yè mâ wii na mör̂u xi-e ka da tâwai yèri. 48 Gènyâ, var̂awa nè mör̂u. 49 Cér̂é kâi mana rö nékaê na pâr̂â pâi kau xe-ve mâ' xiréé, aè, cér̂é wê pèii mé. 50 Ökââ var̂awa ka vi ria mi xè nékö, wè nè yè kâi na dèxâ kâmö, nè yè da bör̂i mé. 51 Gènyâ var̂awa ka mör̂u, ka vi ria mi xè nékö,, nè yè kâi var̂awa-ré na dèxâ kâmö, nè yè bör̂i mör̂u kwéyë rua waavi, aè var̂awa ré gö yè nââ, wè kar̂ö-nya, gö yè nââ vè mör̂u né bwêê jë.» 52 Cér̂é bör̂i vi caa-r̂é na pâi xè Juda, êr̂ê: «Na tâwai tâîî ké yè nââ kar̂ö-è na kâmö-a cè ki mâ kâi?» 53 Na bör̂i êr̂ê yè-r̂é na Ièsu, êr̂ê: «Avâr̂i, avâr̂i, gö êr̂ê yè-ve, êr̂ê, gëve yè da öi kar̂ö o i kâmö, mâ wâyö war̂a xi-e, nè yè bör̂i da wii na mör̂u rö pwar̂a pwéé-ve. 54 Ö kâmö ré yè öi kar̂ö-nya, mâ wâyö war̂a xi-nya, wè nè yè mâ wii na mör̂u xi-e ka yè da tâwai yèri, wè gö yè mâ pè mör̂u-é tëë rèi nédaa ka taadè. 55 Tö ökâré, na dö êê ara na kar̂ö-nya, aè dö rhëë na war̂a xi-nya. 56 Ö kâmö ré öi kar̂ö-nya mâ wâyö war̂a xi-nya, wè na tö pwéé-nya na ce, aè gö tö pwéé-é na gènyâ. 57 Na ûr̂û Pevaa ka mör̂u, wè na tùr̂ùwaa-nya, aè gènyâ, wè gö mör̂u xè-i Pevaa, na ûr̂û bar̂ee kâmö ré öi-nya, wè nè yè mör̂u xè-i xi-nya. 58 Ökââ var̂awa ka vi ria mi xè nékö,, na da ûr̂û pâr̂â pâi kau xe-ve, wè cér̂é kâi mana, cér̂é bör̂i wê mé, aè nè yè mör̂u aau na kâmö ré yè kâi var̂awa-a.» 59 Aè pâr̂â nô ré, wè na êr̂ê na Ièsu rö mwâ waa ar̂ii, na na vi pur̂â rö Kapérénaum.
Pâr̂â Nô Né Mör̂u Ka Da Tâwai Yèri
60 Aè cér̂é wê pwêr̂ê na bör̂i pâi pa pâgür̂ü xi-e pa pôr̂ô, cér̂é bör̂i êr̂ê, êr̂ê: «Na dö yéé aau na nô ré, aè wîr̂î ré yè tâwai pwêr̂êwaa?» 61 Na bör̂i rhî tâwai rö wêê nénââ xi-e na Ièsu ké vi vâpèr̂u i pâi pa pâgür̂ü xi-e wa pâr̂â nô ré, na bör̂i êr̂ê yè-r̂é na ce, êr̂ê: «Gëve wêr̂êi, nè yè vi kââr̂â i-ve na nô-ré? 62 Gëve yè wêr̂êi, na ki gëve tö rhûû o i kâmö, na ki vi rua tëë na ka tö kaa töö xi-e mâ' xiréé? 63 Na pè mör̂u na ko, aè na da dö kââ na kar̂ö. Aè pâr̂â nô xi-nya ré gö êr̂ê yè-ve, wè ö kââ-ré ko mâ mör̂u. 64 Aè bör̂i rai-ve, wè cér̂é da tâ néwèi.» Tö ka rhavûû, wè na wê tâwai na Ièsu pâr̂â kâmö pa da tâ néwèi, mâ kâmö ré yè e. 65 Na bör̂i êr̂ê yè-r̂é bar̂ee na ce, êr̂ê: «Na yèri rha kâmö ka yè tâwai mi ua-nya, na ki da yörhèè-è yè-nya na Pevaa xi-nya.» 66 Na rhavûû rèi céréé ké tëëtëë i bör̂i pâi pa pâgür̂ü pa pôr̂ô, cér̂é bör̂i da vi vèâ tëë cér̂é-é. 67 Na bör̂i êr̂ê na Ièsu yè pâi pa pârör̂ö na ma kaar̂u, êr̂ê: «Gëve wêr̂êi, gëve bar̂i tö vi tëëtëë bar̂ee na gëve?» 68 Na bör̂i aʼcëi yè-è na Simona Pètèru, êr̂ê: «Ör̂ökau, gèvé yè vi wa ya? Aè na dè tö pwar̂a-i na nô né mör̂u ka da tâwai yèri. 69 Gèvé wê dè tâ néwèi mâ rhîâgür̂ü, êr̂ê, gèi rö Kérisö, O i Bâô ka mör̂u aau.» 70 Na bör̂i êr̂ê yè-r̂é na Ièsu, êr̂ê: «Na wêr̂êi, gö da pâbir̂i-ve pa pârör̂ö na ma kaar̂u, na gènyâ? Aè na méavor̂a na dèxâ rai-ve.» 71 Ce, wè na êr̂ê Iuda Iskariot, o i Simona, wè ce ré yè ârui-e, wè dèxâ rai pâi pa pârör̂ö na ma kaar̂u.
Cér̂é Da Tâ Néwèi Ièsu Na Pâr̂â Pâvâdii-E
1 Tèi nédèè pâr̂â nô ré, na bör̂i vi rö Galilé na Ièsu, wè na da rhî vè e na ce ké yè vi rö Juda, wè cér̂é vi mè wêyê né ké yè yö vè mii-e na pâi xè Juda. 2 Na bör̂i wê tö vè ubwa na nédaa né bwêê né mwâ vi tö rhaavu i pâi xè Juda. 3 Cér̂é bör̂i êr̂ê yè-è na pâr̂â dö pâvâdii-e ru, êr̂ê: «Kâyâi ökââ, aè vi na Juda cè ké-r̂é tö rhûû pâr̂â nêr̂ê ré gè waa na pâi pa pâgür̂ü xi-i. 4 Wè na yèri dèxâ kâmö ka yè waa rha kââ rö ka tö yêr̂ê, na ki rhî vè e ké yè tö vèa xi-e. Gè yè bör̂i waa pâr̂â nêr̂ê-ré, na e na gèi êr̂ê vèa-i yè bwêê jë.» 5 Wè cér̂é da tâ néwèi-e bar̂ee na pâr̂â pâvâdii-e ru. 6 Na bör̂i aʼcëi yè-r̂é na Ièsu, êr̂ê: «Na da tö pwa na nédaa xi-nya, aè na mö dè bâ nédaa xe-ve yawi. 7 Na da tâwai yè rhîaa xe-ve na bwêê jë, aè nè yè dè rhîaa xi-nya, pûû-é, wè gö ye vè avâr̂i, êr̂ê, na yaané na pâr̂â nêr̂ê-ê. 8 Gëve vi rua ua bwêê na gëve, aè gö yè da ua bwêê na gènyâ xina, wè na da tö pwa na nédaa xi-nya.» 9 Na wê êr̂ê yè-r̂é röi nô ré na ce, na bör̂i tâ tö Galilé.
Na Tö Némwââ Bwêê Né Mwâ Mwââlöö Na Ièsu
10 Cér̂é bör̂i wê vi ua bwêê na pâr̂â pâvâdii-e ru, na bör̂i dè vi rhaadè-r̂é na ce, wè, na vi uyûi. 11 Cér̂é bör̂i vi mèyè-è na pâi xè Juda rö némwââ bwêê, mâ êr̂ê, êr̂ê: «Âri e?» 12 Aè na pôr̂ô na pâr̂â nô vidù i pâr̂â kâmö wa-è. Wè cér̂é êr̂ê na bör̂i, êr̂ê: «Na kâmö ka e.» Aè cér̂é êr̂ê na bör̂i, êr̂ê: «Bwaa, na kâmö ka pè vi mür̂ü pâr̂â kâmö.» 13 Aè na yèri kâmö ré yè êr̂ê vèa-è vè kau, wè cér̂é bar̂a i pâi xè Juda. 14 Bör̂i tèi négowé né ké waa bwêê, na bör̂i tèi rua na mwâ waa ar̂ii na Ièsu, mâ vi pur̂â rö-i. 15 Cér̂é bör̂i vi buèi na pâi xè Juda, mâ êr̂ê, êr̂ê: «Na tâwai tâîî pâr̂â pèci ar̂ii na wi-a, na é da pâgür̂ü yè-è?» 16 Na bör̂i êr̂ê yè-r̂é na Ièsu, êr̂ê: «Na da kèi xi-nya na ké vi aʼpâgür̂ü xi-nya, aè kèi ö kâmö ré tùr̂ùwaa-nya. 17 Nè yè bar̂i waa rhî vè e i Bâô na dèxâ kâmö, nè yè bör̂i rhîâgür̂ü ka vi aʼpâgür̂ü xi-nya, êr̂ê, kèi mi Bâô, aè gö dè êr̂ê vi bwir̂i xè-i xi-nya. 18 Ö kâmö ré yè dè vi tâ néxâi xè-i xi-e, wè na mèyè ö kââ ré yè pè kau-é, aè ö kâmö ré mèyè ké yè pè kau ö kâmö ré tùr̂ùwaa-è, wè na avâr̂i na ce, wè na yèri dèxâ nô ka téé rö pwar̂a-è. 19 Na wêr̂êi, na da nââ yè-ve mââyöö na Mosé? Aè na yèri dèxâ kâmö rai-ve ka yè köiwaa mââyöö-ré. Gëve wêr̂êi, gëve mèyè ké yè yö vè mii-nya?» 20 Cér̂é bör̂i êr̂ê yè-è na pâr̂â kâmö êr̂ê: «Na tö pwar̂a-i na u! Wîr̂î ré mèyè cè ki mâ yö vè mii-i?» 21 Na bör̂i êr̂ê yè-r̂é na Ièsu, êr̂ê: «Gö wê cowa waa dèxâ nêr̂ê, gëve bör̂i rhau cêrhö xè-i. 22 Na wê nââ yè-ve ké yè vâr̂â yêr̂ê na Mosé, wè na da ka é waa i Mosé, aè dè kèi mâ' pâr̂â pâi kau xe-ve, aè gëve pè vâr̂â yêr̂ê kâmö rèi nédaa ar̂ii. 23 Nè yè cëi vâr̂â yêr̂ê na dèxâ kâmö rèi nédaa ar̂ii, cè ki da tar̂a kwéjîr̂i mââyöö i Mosé, na wêr̂êi, gëve rhôê xi-nya wa kâmö ré gö waa e kar̂ö é rèi nédaa ar̂ii? 24 Koa yè ye vè avâr̂i wa ké tö rhûû i pièmè, aè na e na ké mâ ye vè avâr̂i wa ké ërëwaa vè târi.»
Na Mésia Na Ièsu Ra?
25 Cér̂é bör̂i êr̂ê na bör̂i kâmö xè Iérusalèm, êr̂ê: «Na wêr̂êi na da ce ré cér̂é mèyè cè ké-r̂é yö vè mii-e? 26 Aè tö rhûû-é, wè na tö-a tëvë cér̂é vèâ, na bör̂i yèri dèxâ kââ ré cér̂é êr̂ê yè-è? Na wêr̂êi, cér̂é rhîâgür̂ü-é na pâi pa vi winô, êr̂ê, dè Mésia na ce? 27 Aè ö kâmö-a, wè gèré wê tâwai ö kââ-ré na mi xè-i, aè nè yè wê pwa na Mésia, na bör̂i yèri rha kâmö ka tâwai ö kââ-ré nè mi xè-i.» 28 Na bör̂i aʼvè kau rua na Ièsu rö léwé mwâ ka ar̂ii, na na mö ké vi pur̂â, mâ êr̂ê, êr̂ê: «Gëve wê tâwai-nya, mâ tâwai bar̂ee ö kââ-ré gö mi xè-i! Wè gö da pwa vè târ̂ââ na gènyâ, aè na avâr̂i na ö ce ré tùr̂ùwaa-nya, ö kââ-ré gëve da tâwai-e. 29 Aè gö dè tâwai-e na gènyâ, wè gö mi rai-e, wè na tùr̂ùwaa-nya na ce.» 30 Cér̂é bör̂i vi mè wêyê né ké yè tuwir̂i-e, na bör̂i yèri rha kâmö ka yè yùù köwi-e rö xi-e, xè-i ké mö ké yèri nédaa xi-e. 31 Aè cér̂é pôr̂ô yéyé na pâr̂â kâmö pa tâ néwèi yè-è, mâ êr̂ê, êr̂ê: «Nè yè wê pwa na Mésia, nè yè bör̂i waa pâr̂â nêr̂ê ka ar̂inadö rö bwêêwé pâr̂â nêr̂ê ré na waa na ce?»
É Tùr̂ùwaa Pâr̂â Kâmö Né Paa Cè-Ki Tuwir̂i Ièsu
32 Cér̂é wê pwêr̂ê na pâr̂â farésaiö vi dûû i pâr̂â kâmö pa pôr̂ô yéyé wa-è, cér̂é bör̂i tùr̂ùwaa pâr̂â kâmö yar̂i na pâr̂â ör̂ökau i pâi pa nâânévâ, mâ pâr̂â farésaiö na ka tuwir̂i-e. 33 Na bör̂i êr̂ê na Ièsu, êr̂ê: «Na da mwââ tëë na nédaa né ké yè tö gèré-nya, wè gö yè vi tëë na pwar̂a ö ce ré tùr̂ùwaa-nya. 34 Gëve yè vi mèyè-nya, gëve yè da bör̂i tö rhûû-nya, aè gëve da tâwai yè pwa rö ö kââ-ré gö yè tö-i.» 35 Cér̂é bör̂i vi êr̂ê na pâi xè Juda, êr̂ê: «Âri ö kââ-ré nè yè vi nai, cè gèré da tâwai yè vi na ka tö rhûû-é? Na wêr̂êi, nè yè vi na ce wa pâi xè Juda ré ya néjêr̂ê pâi xè Héléni mâ vi aʼpâgür̂ü yè pâi xè Héléni? 36 Jië na nô né ké êr̂ê xi-e, êr̂ê: “Gëve yè vi na ka mèyè-nya, gëve yè da bör̂i cêmèèr̂i-nya, mâ gëve yè da tâwai yè pwa rö ö kââ-ré gö yè tö-i?”»
Pâr̂â Wêê Rhëë Né Mör̂u
37 Tèi nédaa ka taadè, nédaa né waa bwêê, ökâré nédaa ka kau, na bör̂i tömâ rua na Ièsu mâ aʼvè kau, êr̂ê: «Ö kâmö ré bar̂i wâyö, mi ua-nya na ce na ka wâyö. 38 Ö kâmö ré yè tâ néwèi-nya, na ûr̂û ké êr̂ê rö ka yu mâ, êr̂ê, nè yè mâ pwé rua xè-i pwéé-é na pâr̂â wêê rhëë né mör̂u.» 39 Wè na êr̂ê nô ré na ce xè-i ko, wè cér̂é yè cëi na pâr̂â kâmö pa tâ néwèi-e, aè é da tö nââ ko xè-i ké da tö pè kau Ièsu.
Cér̂é Vi Wii Ré Na Pâr̂â Kâmö Na Pûû-É Na Ièsu
40 Cér̂é bör̂i pwêr̂ê na bör̂i kâmö pa pôr̂ô yéyé pâr̂â nô ré tèi nédaa-ré, cér̂é bör̂i êr̂ê, êr̂ê: «Avâr̂i, na pérövéta na wi-a.» 41 Aè cér̂é êr̂ê na bör̂i kâmö, êr̂ê: «Ökââ Mésia!» Aè cér̂é êr̂ê na bör̂i, êr̂ê: «Na wii na Mésia ka mi xè Galilé? 42 Na wêr̂êi, é da êr̂ê rö ka yu mâ', né yè pwa na Mésia rö pwar̂a mör̂u David ké mi Bétéléma, ö kââ-ré wêê mwâ i David.» 43 Cér̂é bör̂i vi caa-r̂é vè kaar̂u wa-è. 44 Aè cér̂é rhî vè e na bör̂i ké yè tuwir̂i-e, na bör̂i yèri rha kâmö ka yè yùù köwi-e rö xi-e.
Cér̂é Da Tâ Néwèi Na Pâi Pa Vi Winô I Pâi Xè Juda
45 Cér̂é bör̂i vi tëë na pâi pa vi târ̂î kâmö yar̂i, mâ vi cêmèèr̂i pâi pâ ör̂ökau i pâi pa nâânévâ, mâ pâr̂â farésaiö. Cér̂é bör̂i êr̂ê yè-r̂é na pâi-ré, êr̂ê: «Gëve wêr̂êi, gëve da pè xi-e mi xi-yé?» 46 Cér̂é bör̂i aʼcëi tëë na pâi pâ kâmö yar̂i, êr̂ê: «Na yèri kâmö ka tëvë ûr̂û ké tëvë i ö kâmö-a.» 47 Cér̂é bör̂i êr̂ê yè-r̂é na pâr̂â farésaiö, êr̂ê: «Na wêr̂êi, é wê pè vi mür̂ü-ve bar̂ee? 48 Na wêr̂êi, na wii na dèxâ rai pâi pa vi winô ka tâ néwèi-e, mâ dèxâ rai pâi pâ farésaiö? 49 Aè cér̂é yè wê yerii na pâr̂â kâmö-a xè-i ké da tâwai pâr̂â mââyöö xé-r̂é.» 50 Na bör̂i êr̂ê yè-r̂é na Nikodème, dèxâ rai-r̂é, wi-ré vi pwa yèr̂i Ièsu xiréé na na wê bwê. Na êr̂ê yè-r̂é: 51 «Na wêr̂êi, ârikéé wa né mââyöö xé-r̂é, gèré nââ yawi pè urhii yè kâmö, na gèré da dö tö pwêr̂ê ö kââ-ré nè yè êr̂ê, mâ tâwai ö kââ-ré na waa?» 52 Cér̂é bör̂i kurher̂e, mâ êr̂ê yè-è, êr̂ê: «Gè wi mi xè Galilé bar̂ee na gèi? Mèyè, mâ tö rhûû, wè na yèri pérövéta ka yè pwa mi xè Galilé.»
Ièsu Mâ Bwè Kui Dö Wêyê
53 Cér̂é bör̂i vi vidù rhar̂i na pâr̂â wêê mwâ xé-r̂é.
1 Na bör̂i vi na Ièsu na gwêêwè néé-é na Élaiö. 2 Aè tèi mélöö xâ tù, na bör̂i vi tëë na mwâ waa ar̂ii, cér̂é bör̂i vi ua-è na pâr̂â kâmö pa pôr̂ô, na bör̂i vi pur̂â yè-r̂é na ce. 3 Aè pâi pa yu ga mâ pâr̂â farésaiö, wè cér̂é rhiè mi yè-è dèxâ bwè, cér̂é tuwir̂i-e na na mö ké waa nô ka yaané, cér̂é bör̂i pè tömâ-ê rö négowé. 4 Cér̂é bör̂i êr̂ê yè Ièsu, êr̂ê: «Kâmö ka vi pur̂â éé, ö bwè-a, wè é tuwir̂i-e na na mö ké cuu. 5 Aè na yakoa yè-vé na Mosé rö néé mââyöö, cè ki mâ rhaxè-i pèyaa pâr̂â kâmö pa ûr̂û-ré; aè nè jië na nô xi-i yè-è?» 6 Cér̂é êr̂ê ûr̂û-ré, wè cér̂é waa yeyèè yè-è cè ki wii na dèxâ nô ka pè vi kââr̂â i-e. Na bör̂i tâ nôô ria na Ièsu, mâ yu ga rö néjë i mèè â-ê. 7 Cér̂é bör̂i tö-a ërëwaa-è i. Na bör̂i tömâ rua na ce, mâ êr̂ê yè-r̂é, êr̂ê: «Ö kâmö ré yèri nô ka yaané xi-e rai-ve, nè yè rhaxè baayê bwè-a.» 8 Na bör̂i tâ nôô ria tëë mwâr̂â mâ yu ga rö néjë. 9 Cér̂é bör̂i wê pwêr̂ê nô ré mâ cê tâwai, cér̂é bör̂i rhau ör̂ö vidù rhar̂i, rhavûû rö-i pâi kau kwéyë rö kâmö ka rhaadè; aè Ièsu rhar̂i rö mâ bwè-a ré tö-a tö rhar̂i. 10 Na bör̂i tömâ rua na Ièsu, mâ rhûû rhar̂i bwè-a mâ êr̂ê yè-è, êr̂ê: «Bwè-rè, âri-r̂é? Na yèri kâmö ka pè yerii-i?» 11 Na bör̂i êr̂ê yè-è na bwè, êr̂ê: «Ör̂ökau, na yèri.» Na bör̂i êr̂ê yè-è na Ièsu êr̂ê: «Gö yè da pè yerii-i bar̂ee na gènyâ, wè vèr̂i mâ koa yè waa tëë nô ka yaané rhavûû tèi nédaa xina.»
Ièsu, Daa Né Bwêê Jë
12 Na bör̂i êr̂ê yè-r̂é tëë na Ièsu, êr̂ê: «Gènyâ, daa né bwêê jë. Ö kâmö ré yè mi ua-nya, na da tâwai yè vi rö ka orê, aè nè yè mâ wii na daa né mör̂u rö pwar̂a-è.» 13 Cér̂é bör̂i êr̂ê yè-è na pâr̂â farésaiö, êr̂ê: «Gè dè ye vè avâr̂i-i na gèi, na bör̂i da avâr̂i ké dè ye vè avâr̂i xi-i.» 14 Na bör̂i kurher̂e yè-r̂é na Ièsu, êr̂ê: «Gö yè dè ye vè avâr̂i-nya, na bör̂i dè avâr̂i na ké dè vi ye vè avâr̂i-nya xi-nya, wè gö tâwai ökâré gö mi xè-i, mâ ökâré gö yè vi nai. 15 Gëve tâ néxâi bwir̂i wa yè kar̂ö; aè gènyâ, wè gö da tâ néxâi vi bwir̂i yè dèxâ kâmö. 16 Aè gö yè tâ néxâi, na bör̂i dè avâr̂i na ké tâ néxâi xi-nya, xè-i ké da gènyâ rhar̂i, aè dè gövu vèâ Pevaa, kâmö ré tùr̂ùwaa-nya. 17 Wè é yu rö né mââyöö xe-ve, êr̂ê, ka ye vè avâr̂i i kaar̂u kâmö, wè na dè avâr̂i. 18 Aè gènyâ, wè gö dè ye vè avâr̂i-nya rö, na bör̂i ye vè avâr̂i-nya bar̂ee na Pevaa, kâmö ré tùr̂ùwaa-nya.» 19 Cér̂é bör̂i êr̂ê yè-è, êr̂ê: «Âri Pevaa xi-i?» Na bör̂i êr̂ê yè-r̂é na Ièsu, êr̂ê: «Gëve da tâwai-vu Pevaa. Gëve yè tâwai-nya, gëve yè tâwai bar̂ee Pevaa xi-nya.» 20 Na êr̂ê pâr̂â nô ré rö ka nââ-ê vië na na mö ké vi pur̂â rö mwâ ka ar̂ii; aè na yèri rha kâmö cè ki yùù köwi-e yè-è xè-i ké da tö pwa na nédaa xi-e.
Gëve Da Tâwai Pwa Rö Ökâré Gö Vi Nai
21 Na bör̂i êr̂ê yè-r̂é tëë mwâr̂â na Ièsu, êr̂ê: «Gö yè wê vi, aè gëve yè mâ mèyè-nya, aè gëve yè mâ pèii xar̂a pâr̂â nô ka yaané xe-ve; ökâré gö yè vi nai, wè gëve da tâwai pwa rö-i.» 22 Cér̂é bör̂i êr̂ê na pâi xè Juda, êr̂ê: «Na wêr̂êi, nè yè dè yö vè mii-e na ce, xè-i ké êr̂ê xi-e, êr̂ê ökâré gö yè vi nai, wè, gëve da tâwai yè pwa rö-i»? 23 Na bör̂i êr̂ê yè-r̂é na ce, êr̂ê: «Gëve, wè gëve mi xè ria, aè gènyâ, wè gö mi xè rua, gëve wè pâr̂â kâmö xè bwêê jë, aè gö da kâmö xè bwêê jë na gènyâ. 24 Tö ökâré, gö êr̂ê yè-ve na gènyâ, êr̂ê, gëve yè pèii xar̂a pâr̂â nô ka yaané xe-ve; wè gëve yè da tâ néwèi, “êr̂ê gènyâ ré”, gëve yè bör̂i pèii xar̂a pâr̂â nô ka yaané xe-ve». 25 Cér̂é bör̂i êr̂ê yè-è êr̂ê: “Gè wîr̂î?” Na bör̂i êr̂ê yè-r̂é na Ièsu, êr̂ê: «Wè dè kââ ré gö êr̂ê yè-ve mi rö ka rhavûû. 26 Na pôr̂ô yéyé na pâr̂â nô ré gö yè êr̂ê yè-ve mâ kâ vè târi; aè na avâr̂i na ce ré tùr̂ùwaa-nya, mâ pâr̂â kââ ré gö pwêr̂ê rai-e, wè ö kââ-ré gö êr̂ê yè bwêê jë.» 27 Aè cér̂é da rhîâgür̂ü, êr̂ê, na êr̂ê xè-i Pevaa xi-e. 28 Na bör̂i êr̂ê na Ièsu, êr̂ê: «Gëve yè wê pè rua o i kâmö na gëve, gëve bör̂i yè wê tâwai êr̂ê, gènyâ ré, mâ gö da waa vè târ̂ââ dèxâ kââ, aè ö kââ-ré na aʼpâgür̂ü yè-nya na Pevaa, wè ö kââ-ré gö êr̂ê. 29 Aè na tö gövu ce ré tùr̂ùwaa-nya, na wê da kâyâi-nya na ce, wè gö bâ waa pâr̂â kââ ka e yè-è.» 30 Na mö ké êr̂ê ûr̂û-ré pâr̂â nô ré na Ièsu, cér̂é bör̂i tâ néwèi-e na bör̂i kâmö pa pôr̂ô yéyé.
Paxa Târi Mâ Paxa Tö Êê Yavia
31 Na bör̂i êr̂ê na ce yè pâi xè Juda pa tâ néwèi-e, êr̂ê: «Gëve yè bâ tö vè mör̂ö rö nô xi-nya, gëve yè bör̂i pâr̂â pâi pa avâr̂i. 32 Aè gëve yè tâwai avâr̂i, nè yè bör̂i kâyâi târi yè-ve na avâr̂i.» 33 Cér̂é bör̂i êr̂ê yè-è, êr̂ê: «Gèvé, wè gèvé pâr̂â mör̂u Abérahama, aè na yèri aau kâmö ka yè pugèwè-vé vè kâmö yar̂i, gè wêr̂êi, gè êr̂ê yè-vé, êr̂ê, é yè wê kâyâi târi yè-ve?» 34 Na bör̂i êr̂ê yè-r̂é na Ièsu, êr̂ê: «Avâr̂i, avâr̂i, gö êr̂ê yè-ve, êr̂ê, ö kâmö ré yè waa nô ka yaané, wè na kâmö yar̂i i nô ka yaané na ce. 35 Aè ö kâmö yar̂i, wè nè da tö vè mwââ rö wêê mwâ; na e rö na o i wêê mwâ, wè na tö yawi rö-i. 36 Tö ökâré nè yè wê cöö-ve na O, avâr̂i nè yè bör̂i wê wii na târi yè-ve. 37 Gö tâwai, êr̂ê, gëve pâr̂â mör̂u Abérahama; aè gëve bör̂i vi mèyè ké yè yö vè mii-nya na gëve, xè-i ké da vi ru nô xi-nya rö pwéé-ve. 38 Gö êr̂ê pâr̂â kââ ka é tö rhûû xi-nya rai Pevaa; aè gëve dè waa bar̂ee na gëve pâr̂â kââ ka é dè tö rhûû xe-ve rai pevaa xe-ve.» 39 Cér̂é bör̂i êr̂ê yè-è, êr̂ê: «Pevaa xé-vé, wè Abérahama.» Na bör̂i êr̂ê yè-r̂é na Ièsu, êr̂ê: «Gëve yè pâr̂â pâlè Abérahama na gëve, gëve yè bör̂i waa pâr̂â nêr̂ê i Abérahama. 40 Aè xina, wè gëve vi mèyè ké yè yö vè mii-nya, gènyâ kâmö ka pèri yè-ve avâr̂i ré gö pwêr̂ê rai Bâô. Na da waa ûr̂û-ré na Abérahama. 41 Aè gëve dè waa pâr̂â nêr̂ê i pevaa xe-ve.» Cér̂é bör̂i êr̂ê yè-è, êr̂ê: «Gèvé da pâr̂â pâlè nédeewi; rhaaxâ rö Pevaa xé-vé wè Bâô.» 42 Na bör̂i êr̂ê yè-r̂é na Ièsu, êr̂ê: «Nè yè pevaa xe-ve na Bâô, gëve yè bör̂i tâ néwèi-nya, wè, gö mi xè-i Bâô na gènyâ, mâ pwa xè-i xi-e, gö da pwa vè târ̂ââ, aè na tùr̂ùwaa-nya mi na ce. 43 Gëve wêr̂êi, na gëve da rhîâgür̂ü nô xi-nya? Xè-i ké da tâwai xe-ve ké yè pwêr̂ê nô xi-nya. 44 Gëve wè gëve mör̂u pevaa xe-ve wè méavor̂a; gëve bör̂i bar̂i waa rhî vè e i pevaa xe-ve. Wi ré ka vi ârui kâmö mi rö ka rhavûû, na da tâwai tömâ rö avâr̂i xè-i ké yèri rha wê nô ka avâr̂i rö xi-e. Nè yè êr̂ê nô ka vee na ce; wè dè kèi xi-e wè kâmö ka vee na ce mâ pevaa i vee. 45 Aè gènyâ, wè gö êr̂ê avâr̂i, ökâré gëve bör̂i da tâ néwèi-nya xè-i. 46 Wîr̂î rai-ve ré yè ye vè avâr̂i, êr̂ê, na wii na nô ka yaané rö pwar̂a-nya? Aè gö êr̂ê avâr̂i, gëve bör̂i wêr̂êi gëve da tâ néwèi-nya? 47 Ö kâmö ré mi rai Bâô, wè na tö pwêr̂ê nô i Bâô na ce; aè gëve da pwêr̂ê nô ré na gëve, wè gëve da mi rai Bâô.»
Ièsu Mâ Abérahama
48 Cér̂é bör̂i êr̂ê yè-è na pâi xè Juda, êr̂ê: «Na wêr̂êi, gèvé da êr̂ê vè târi, êr̂ê, gè wi xè Samaria na gèi, mâ na tö pwar̂a-i na u?» 49 Na bör̂i êr̂ê yè-r̂é na Ièsu, êr̂ê: «Na da tö pwar̂a-nya na u, wè, gö pè kau Pevaa xi-nya, aè gëve bâ pè vi ria-nya na gëve. 50 Gö da vi mèyè nô né ké yè pè kau-nya, aè na wii na kâmö ka vi mèyè nô né mâ kââ vè târi. 51 Avâr̂i, avâr̂i, gö êr̂ê yè-ve, êr̂ê nè yè wii na rha kâmö ka yè tö rhûû e nô xi-nya, nè yè da tâwai tö rhûû pèii mé kwéyë rua waavi.» 52 Cér̂é bör̂i êr̂ê yè-è na pâi xè Juda, êr̂ê: «Gèvé wê tâwai xina, êr̂ê, na tö pwar̂a-i na u. Na wê mé na Abérahama, mâ pâr̂â péröféta, aè gèi, wè gè êr̂ê, nè yè wii na rha kâmö ka yè tö rhûû e nô xi-nya, nè yè da tâwai yè tö rhûû pèii mé kwéyë rua waavi? 53 Na wêr̂êi, gè kau rai Abérahama pevaa xé-vé ka wê mé? Mâ cér̂é wê mé bar̂ee na pâr̂â pérövéta, aè gèi wè gè pugèwè-i cè gèi wîr̂î?» 54 Na bör̂i êr̂ê yè-r̂é na Ièsu, êr̂ê: «Gö yè dè pè kau-nya, nè yè bör̂i da dö kââ na ké kau xi-nya. Aè na pè kau-nya na Pevaa xi-nya, ce ré gëve êr̂ê na Bâô xe-ve na ce, 55 gëve da tâwai-e na gëve. Aè gö tâwai-e na gènyâ; gö yè êr̂ê na gènyâ, êr̂ê gö da tâwai-e, ëi, gö yè bör̂i kâmö ka vee ûr̂û-ve. Aè gö dè tâwai-e, mâ gö köiwaa nô xi-e. 56 Na wê tââ vi or̂o na Abérahama, pevaa xe-ve, wè nè yè mâ tö rhûû pâr̂â nédaa xi-nya; na bör̂i wê tö rhûû, na bör̂i vi or̂o vè kau na ce.» 57 Cér̂é bör̂i êr̂ê yè-è na pâi xè Juda, êr̂ê: «Na da dö kaar̂u kâmö na ma pârör̂ö na pâr̂â nédö xi-i, aè gè wê xö tö rhûû Abérahama?» 58 Na bör̂i êr̂ê yè-r̂é na Ièsu, êr̂ê: «Avâr̂i, avâr̂i, gö êr̂ê yè-ve, êr̂ê dè gènyâ baayê ma' na na mö ké yèri Abérahama.» 59 Cér̂é bör̂i pè pâr̂â pèyaa cè ké-r̂é rhaxè-è, na bör̂i vi uyûi na Ièsu, mâ vi rua xè mwâ ka ar̂ii.
Na Pè Mör̂u Kâmö Ka Bwi Mi Mâ' Xè Ka Ër̂i-E Na Ièsu
1 Na mö ké vi na Ièsu, na bör̂i tö rhûû dèxâ kâmö ka bwi, mi mâ' xè ka ër̂i-e. 2 Cér̂é bör̂i ërëwaa-è na pâr̂â pâi pa pâgür̂ü xi-e, êr̂ê: «Kâmö ka vi pur̂â éé, wîr̂î ré nô ka yaané xi-e-a, xè-i ké ër̂i-e mi mâ xar̂a bwi, ce ra, wi dua ër̂i-e ra, wi wîr̂î?» 3 Na bör̂i êr̂ê yè-r̂é na Ièsu, êr̂ê: «Na da yaané na wi-a, mâ cur̂u da yaané bar̂ee na dua ër̂i-e; aè na e, wè cè ki tö vèa na pâr̂â nêr̂ê i Bâô rö wi-a. 4 Na e yè-nya na göi waa pâr̂â nêr̂ê i ö kâmö ré tùr̂ùwaa-nya, na na mö ké daa, wè nè yè mi na orê, na bör̂i yèri kâmö ka yè wakè. 5 Rèi ö nédaa ré gö mö tö-a bwêê jë, wè gö daa né bwêê jë.» 6 Na wê cowa êr̂ê ûr̂û-ré, na bör̂i yiwâr̂i ria rö néjë, mâ ber̂a vè rhaaxâ, na bör̂i rhèi jë-ré rö duö pièmè kâmö ka bwi. 7 Na bör̂i êr̂ê yè-è, êr̂ê: «Vèr̂i na ka gââ rö wêê rhëë rö Siloé.» Ökââ nô-né, êr̂ê: «É tùr̂ùwaa». Na bör̂i vi mâ gââ, na bör̂i pwa mi tëë na na wê rhî. 8 Pâr̂â kâmö ré tö vè ubwa i-e, mâ pâr̂â kâmö ré tö rhûû-é yawi mi mâ' na na bâ ânââ, cér̂é bör̂i êr̂ê, êr̂ê: «Na da ö kâmö-a ré bâ cuè mâ ânââ yawi?» 9 Cér̂é bör̂i êr̂ê na bör̂i, êr̂ê: «Wè dè ce-ré.» Aè, cér̂é êr̂ê na bör̂i êr̂ê: «Na dö ûr̂û-é.» Na bör̂i aʼcëi yè-r̂é na ce, êr̂ê: «Wè dè gènyâ-â.» 10 Cér̂é bör̂i êr̂ê yè-è êr̂ê: «É pè rhî tâîî duö pièmè-i?» 11 Na bör̂i êr̂ê yè-r̂é na ce, êr̂ê: «Na waa na kâmö ré néé-é na Ièsu, wè na ber̂a jë, mâ rhèi rö duö pièmè-nya, na bör̂i êr̂ê yè-nya, êr̂ê: “Vi na ka gââ rö wêê rhëë i Siloé.” Gö bör̂i wê vi na ka gââ rö-i, gö bör̂i wê rhî.» 12 Cér̂é bör̂i êr̂ê yè-è, êr̂ê: «Bör̂i âri-e?» Na bör̂i êr̂ê yè-r̂é na ce, êr̂ê: «Üü, gö da tâwai.»
Cér̂é Ërëwaa Kâmö Ka Bwi Na Pâr̂â Farésaiö
13 Cér̂é bör̂i yörhèè kâmö ka bwi xiréé yè pâi pâ farésaiö. 14 Aè ö nédaa ré na ber̂a jë rèi na Ièsu cè ki pè rhî duö pièmè, wè nédaa ka ar̂ii. 15 Cér̂é bör̂i ërëwaa-è tëë na pâi pâ farésaiö, êr̂ê: “Gè wê rhî xè xi-yé?” Na bör̂i êr̂ê yè-r̂é na ce, êr̂ê: «Na rhèi jë rö duö pièmè-nya, gö bör̂i vi na ka gââ, gö bör̂i wê rhî.» 16 Cér̂é bör̂i êr̂ê na bör̂i rai pâi pâ farésaiö, êr̂ê: «Na da kèi mi Bâô na wi-a, wè na da rheewaa e nédaa ka ar̂ii.» Cér̂é bör̂i êr̂ê na bör̂i, êr̂ê: «Na wêr̂êi, na kâmö ka yaané-a na tâwai waa pâr̂â nêr̂ê ka ar̂inadö-a?» Cér̂é bör̂i wê vi caa-r̂é vè kaar̂u. 17 Cér̂é bör̂i êr̂ê tëë mwâr̂â yè kâmö ka bwi, êr̂ê: «Jië na wêê nénââ xi-i yè-è, xè-i ké pè rhî duö pièmè-i xi-e?» Na bör̂i êr̂ê yè-r̂é na ce, êr̂ê: «Na pérövéta.» 18 Aè cér̂é da tâ néxâi na pâi xè Juda, êr̂ê, na bwi mi mâ' xiréé, na bör̂i wê rhî tëë na wi-ré kwéyë rua i ké aʼyè dua ër̂i i ö kâmö ré é pè rhî duö pièmè-è, 19 mâ ërëwaa-r̂u, êr̂ê: «O xi-u na wi-a? Göu êr̂ê, êr̂ê, göu ër̂i-e na na bwi? Na bör̂i wê rhî xi-yé xina na ce?» 20 Cur̂u bör̂i êr̂ê yè-r̂é na pevaa xi-e mâ pâni-e, êr̂ê: «Gövu dè tâwai êr̂ê, êr̂ê, o xi-vu na wi-a, mâ gövu wê dè ër̂i-e mâ' na na bwi. 21 Na wê rhî xina na ce, aè gövu da tâwai êr̂ê, na rhî xi-yé, mâ gövu da tâwai bar̂ee ö kâmö ré pè rhî duö pièmè-è. Gëve dè ërëwaa-è waanawê, wè na wê dè wii na wêê nénââ xi-e, wè nè yè mâ dè vi yëwaa yè-ve!» 22 Cur̂u bör̂i êr̂ê ûr̂û-ré na pevaa xi-e mâ pâni-e, wè cur̂u bar̂a i pâi xè Juda, xè-i ké vi êr̂ê xé-r̂é, êr̂ê, ö kâmö ré yè êr̂ê na Kérisö na Ièsu, wè é yè yayâwâ-ê xè-i mwâ waa ar̂ii. 23 Ökâré pûû ké êr̂ê i dua ër̂i-e, êr̂ê: «Na wê dè wii na wêê nénââ xi-e, gëve ërëwaa-è waanawê!» 24 Cér̂é bör̂i kaar̂u aʼyè kâmö ka bwi na pâi pâ farésaiö, mâ êr̂ê yè-è, êr̂ê: «Pè kau Bâô na gèi, wè gèvé wê tâwai êr̂ê, na kâmö ka yaané na wi-ré.» 25 Na bör̂i êr̂ê yè-r̂é na ce, êr̂ê: «Nè yè kâmö ka yaané na wi-ré, gö da tâwai, aè rhaaxâ rö kââ ré gö tâwai, êr̂ê, gö bwi mâ' xiréé, aè xina, wè gö wê rhî.» 26 Cér̂é bör̂i êr̂ê yè-è tëë, êr̂ê: «Ö jië ré na waa yè-i? Na pè rhî tâîî duö pièmè-i na ce?» 27 Na bör̂i êr̂ê yè-r̂é na ce, êr̂ê: «Gö wê cowa êr̂ê yè-ve yawi, gëve bör̂i da pwêr̂ê. Aè ki-yé ré gëve bar̂i pwêr̂ê tëë? Na wêr̂êi, gëve bar̂i kâmö xi-e bar̂ee?» 28 Cér̂é bör̂i vër̂ëë-è vè yaané mâ êr̂ê yè-è, êr̂ê: «Dè gèi kâmö ré pwêr̂êwaa-è, aè gèvé, wè pâi pa pwêr̂êwaa Mosé. 29 Gèvé wê tâwai êr̂ê, na tëvë yè Mosé na Bâô, aè wi-ré, wè gèvé da tâwai êr̂ê na kâmö xè-wè!» 30 Na bör̂i êr̂ê yè-r̂é na kâmö ka bwi êr̂ê: «Ö kââ-â ka mö ké pwa vè pè buèi, wè gëve da tâwai ö kââ-ré na mi xè-i, aè na wê cowa pè rhî duö pièmè-nya na ce? 31 Gèré rhau tâwai êr̂ê, nè yè da pwêr̂êwaa pâr̂â kâmö pa yaané na Bâô, aè nè yè wii na dèxâ kâmö ka yè bar̂a yè Bâô mâ waa rhî vè e xi-e, nè yè bör̂i pwêr̂êwaa-è na ce. 32 É da pwêr̂ê yawi mâ' xiréé, êr̂ê, na wii na dèxâ kâmö ka pè rhî duö pièmè kâmö ka bwi mi mâ xè ka ar̂èè xi-e. 33 Nè yè da mi rai Bâô na wi-ré, nè da tâwai ké yè waa rha kââ.» 34 Cér̂é bör̂i êr̂ê yè-è, êr̂ê: «É ër̂i-i rö-i nô ka yaané ka kau aau, gè yè bör̂i tâwai ké yè vi pur̂â-vé?» Cér̂é bör̂i yayâwâ-ê xè mwâ ka ar̂ii.
Ké Bwi Rö-I Ko
35 Na wê tö pwêr̂ê na Ièsu êr̂ê, cér̂é wê yayâwâ-ê, na bör̂i tö rhûû-é na ce, mâ êr̂ê yè-è, êr̂ê: «Gè wêr̂êi, gè wê tâ néwèi yè o i kâmö?» 36 Na bör̂i êr̂ê yè-è na ce, êr̂ê: «Ör̂ökau, wîr̂î-ré cè göi tâ néwèi-e.» 37 Na bör̂i êr̂ê na Ièsu, êr̂ê: «Gè wê tö rhûû-é, wè ce ré vi tëvë vèâ göu ré.» 38 Na bör̂i êr̂ê na ce, êr̂ê: «Ör̂ökau, gö tâ néwèi-i.» Na bör̂i tâ nôô ria yè-è na ce. 39 Na bör̂i êr̂ê na Ièsu, êr̂ê: «Gö wê pwa rö-a bwêê jë na ka rhôôr̂u, cè ké-r̂é wê rhî na pâr̂â kâmö pa da rhî, aè cér̂é yè wê bwi na pâr̂â kâmö pa rhî.» 40 Cér̂é wê pwêr̂ê pâr̂â nô ré, na bör̂i rai pâi pâ farésaiö pa tö cér̂é-é, cér̂é bör̂i êr̂ê yè-è: «Wè gèvé bwi bar̂ee na gèvé?» 41 Na bör̂i êr̂ê yè-r̂é na Ièsu, êr̂ê: «Gëve yè pâr̂â kâmö pa bwi, nè yè da wii na nô ka yaané xe-ve, aè gëve êr̂ê xina, êr̂ê, gëve pâi pa rhî, ökâré na bör̂i dè bâ tö yawi na nô ka yaané xe-ve.»
Yeyèè Né Kâmö Ka Vi Târ̂î E Bwar̂âwê Mâ Pâr̂â Mutô
1 Na êr̂ê na Ièsu, êr̂ê: «Avâr̂i, avâr̂i, gö êr̂ê yè-ve, êr̂ê, ö kâmö ré yè da tö vi ru rö mèö bé né nébé né pâr̂â mutô, wè na tèi rua rö dèxâ wêyê, ce rö kâmö ka pâr̂â mâ muui pâr̂â kââ. 2 Aè ö kâmö ré vi ru rö dö mèö bé, wè ce rö ré vi târ̂î mutô. 3 Na bör̂i cîî yè-è na kâmö ré vi târ̂î mèö bé, aè cér̂é dè pwêr̂ê mêr̂ê aʼ xi-e na pâr̂â mutô; na bör̂i dè aʼyè vidù néé pâr̂â mutô xi-e na ce, mâ yörhèè-r̂é rua na bwêê wêyê. 4 Nè wê cowa nââ-r̂é rö bwêê wêyê, na bör̂i vi baayêr̂î-r̂é na ce, aè pâr̂â mutô, wè cér̂é vi rhaadè-è vi, wè cér̂é pwêr̂ê wêr̂ê mêr̂ê aʼ xi-e. 5 Aè cér̂é yè da tâwai vi ua dèxâ kâmö ka döwöö, aè cér̂é yè ör̂ö rai-e, wè cér̂é da pwêr̂ê mêr̂ê aʼ i kâmö ka döwöö.» 6 Na êr̂ê yè-r̂é yeyèè-ré na Ièsu, cér̂é bör̂i da tâ néxâi-e ké êr̂ê xi-e yè-r̂é.
Ièsu, Ka Vi Târ̂î Mutô Ka E
7 Na bör̂i êr̂ê yè-r̂é tëë na Ièsu, êr̂ê: «Avâr̂i, avâr̂i, gö êr̂ê yè-ve, gènyâ-â mèö bé né pâr̂â mutô. 8 Pâr̂â kâmö wânii ré pwa baayê rai-nya, wè pâi paxa pâr̂â mâ muui, aè cér̂é da pwêr̂êwaa-r̂é na pâr̂â mutô. 9 Gènyâ mèö bé. Ö kâmö ré yè vi ru rö pwar̂a-nya, wè nè yè mör̂u na ce; nè yè bör̂i vi ru mâ vi rua, mâ tö rhûû êê ara. 10 Na pwa na kâmö ka pâr̂â cè ki pâr̂â rö mâ yö vè mii mâ rhètia; aè gö wê pwa na gènyâ cè ki wii na mör̂u yè pâr̂â mutô, mâ pâr̂â kââ ka yè rhâri rö pwar̂a-r̂é. 11 Gènyâ wè gö kâmö ka vi târ̂î-e pâr̂â mutô. Ö kâmö ré vi târ̂î-e pâr̂â mutô, wè na nââ mör̂u xi-e yè pâr̂â mutô. 12 Aè ö kâmö ré mar̂a yè pè kwê, mâ ö kâmö ré da kaavûû avâr̂i mutô, wè na da ki-e na pâr̂â mutô, ö kâmö ré, wè nè yè wê tö rhûû lupo na ki mi, nè yè bör̂i kâyâi pâr̂â mutô mâ ör̂ö, nè bör̂i kùxè-r̂é mâ gu vè maii-r̂é na lupo. 13 Nè yè wê ör̂ö na ce xè-i ké kâmö ka mar̂a yè pè kwê, mâ ka da tâ néxâi-e pâr̂â mutô. Gènyâ, wè gö kâmö ka vi târ̂î-e pâr̂â mutô. 14 Aè gö dè rhîâgür̂ü e pâr̂â mutô xi-nya, aè cér̂é dè rhîâgür̂ü-nya bar̂ee na pâr̂â mutô xi-nya, 15 na ûr̂û Pevaa xi-nya, wè na rhîâgür̂ü-nya, aè gènyâ, wè gö rhîâgür̂ü bar̂ee Pevaa xi-nya, mâ gö nââ mör̂u xi-nya yè pâr̂â mutô. 16 Na wii bar̂ee na bör̂i mutô xi-nya ka da kèi bé-a; aè na pâr̂i-nya na ké yè pè xé-r̂é mi bar̂ee; cér̂é yè bör̂i wê pwêr̂ê mêr̂ê aʼ xi-nya, nè yè bör̂i wii na rhaaxâ nébé xé-r̂é mâ rhaaxâ r̂ö na kâmö ka yè vi târ̂î. 17 Ökâré pûû ké méar̂i-nya i Pevaa, wè gö nââ mör̂u xi-nya cè göi dè pè tëë. 18 Na yèri kâmö ka yè öxar̂a rai-nya, aè gö dè nââ xè xi-nya; na wii na ar̂inadö xi-nya né ké yè nââ mör̂u xi-nya, aè na wii bar̂ee na ar̂inadö né ké yè pè tëë xi-nya; na vi câwâ ûr̂û-ré yè-nya na Pevaa xi-nya.» 19 Cér̂é bör̂i vi caa-r̂é tëë na pâi xè Juda na pûû-é na pâr̂â nô ré é. 20 Aè cér̂é pôr̂ô yéyé na pa êr̂ê rai-r̂é, êr̂ê: «Na tö xi-e na u, mâ na vi bwéjé; gëve wêr̂êi, gëve pwêr̂êwaa-è?» 21 Aè cér̂é êr̂ê na bör̂i, êr̂ê: «Na da ûr̂û-ré na ké tëvë i kâmö ka tö xi-e na u. Na wêr̂êi na tâwai pè rhî duö pièmè kâmö ka bwi na u?»
É Da Bar̂i Yè Ièsu
22 É waa ar̂ii né cîî mèö mwâ rö Iérusalèm tèi nékwénavö. 23 Aè na vâr̂â na Ièsu rö ka tâ ui i Solomona rö mwâ waa ar̂ii. 24 Cér̂é bör̂i vi kâ vèâi rhédè pwânûr̂i-e na pâi xè Juda, mâ êr̂ê yè-è, êr̂ê: «Gè yè tö-a pè vi rhèè wêê nénââ xé-vé kwéyë rua wanéyé? Gè yè Kérisö na gèi, na e na ki gèi êr̂ê vèa yè-vé.» 25 Na bör̂i êr̂ê yè-r̂é na Ièsu, êr̂ê: «Gö wê êr̂ê röi yè-ve, gëve bör̂i da cëi. Pâr̂â nêr̂ê-r̂é gö waa rö néé Pevaa, ö kââ-ré pè ye vè avâr̂i-nya. 26 Aè, gëve bör̂i da cëi na gëve xè-i ké da pâr̂â mutô xi-nya xe-ve. 27 Cér̂é wê tö pwêr̂ê mêr̂ê aʼ xi-nya na pâr̂â mutô xi-nya; gö dè rhîâgür̂ü-r̂é na gènyâ, aè, cér̂é yè dè ua-nya na cér̂é. 28 Aè gö nââ yè-r̂é mör̂u ka da tâwai yèri; mâ cér̂é yè da tâwai pèii mé kwéyë rua waavi, na yèri dèxâ kâmö ka yè öxar̂a-r̂é xè-i néxar̂a â-nya. 29 Na nââ-r̂é yè-nya na Pevaa, na vi kwéjî na ce rai pâr̂â kââ wânii, aè na yèri kâmö ka tâwai yè öxar̂a-r̂é xè-i néxar̂a â Pevaa. 30 Gènyâ mâ Pevaa, wè, gövu rhaaxâ rö.» 31 Cér̂é bör̂i pè tëë pèyaa na pâi xè Juda cè ké-r̂é rhaxè-è. 32 Na bör̂i êr̂ê yè-r̂é na Ièsu, êr̂ê: «Na pôr̂ô yéyé na pâr̂â nêr̂ê ka e ré gö êr̂ê vèa yè-ve kèi mi Pevaa; aè nêr̂ê ka ûr̂û yé, ré gëve bör̂i rhaxè-nya wa?» 33 Cér̂é bör̂i êr̂ê yè-è na pâi xè Juda, êr̂ê: «Gèvé da rhaxè-i wa nêr̂ê ka e, aè, kèi rö ké pè kau-i, wè gè dè kâmö, gè bör̂i a pugèwè-i cè gèi Bâô!» 34 Na bör̂i êr̂ê yè-r̂é na Ièsu, êr̂ê: «Na wêr̂êi, é da yu rö mââyöö xe-ve êr̂ê, gëve pâr̂â bâô? 35 Nè yè êr̂ê na maâyöö êr̂ê, cér̂é pâr̂â bâô na pâi-ré na ké-r̂é êr̂ê nô i Bâô, aè é yè da tâwai câ vè bwir̂i tëë ka yu, 36 na wêr̂êi gëve êr̂ê yè ö kâmö ré na rheewaa-è na Bâô mâ tùr̂ùwaa-è na bwêê jë, êr̂ê, gè vi pè kau-i, xè-i ké êr̂ê xi-nya, êr̂ê, gö o i Bâô? 37 Gö yè da waa pâr̂â nêr̂ê i Pevaa, koa yè cëi-nya na gëve. 38 Aè gö yè dè waa, na gëve bör̂i yè da cëi-nya, cëi rö pâr̂â nêr̂ê-nya, cè ke-ve bör̂i tâ pâgür̂ü mâ rhîâgür̂ü, êr̂ê, gö tö léwé Pevaa, aè na tö léwé-nya na Pevaa.» 39 Tö ökâré, cér̂é bör̂i vi mèyè tëë wêyê né ké yè tuwir̂i-e, aè na örua rai-r̂é na ce. 40 Na bör̂i vi tëë na dèxâ ékar̂aè né Ioridanô, tö ö kââ-ré na vi batiyi baayê rö-i na Ioané, na bör̂i cuè rö-i. 41 Cér̂é bör̂i ua-è mi na pâr̂â kâmö pa pôr̂ô yéyé, mâ vi êr̂ê, êr̂ê: «Na da waa dèxâ nêr̂ê ka ar̂inadö na Ioané, aè na dö avâr̂i na pâr̂â nô wânii ré na êr̂ê na Ioané xè-i wi-a.» 42 Aè cér̂é pôr̂ô yéyé na pâr̂â kâmö paxa tâ néwèi-e rö-i.
Pèii Mé I Lazar
1 Na wii na rha kâmö ka wê pèii, néé-é na Lazar, wi xè Bétani, tö wêê mwâ i Maria mâ Marta pâdii-e. 2 Ökâré Maria, bwè-ré ôâ Ör̂ökau i rhëë ka borhêê, mâ câ vè mèr̂i duö köwi-e xè ria i pûr̂û gwâ-ê. Béé ër̂i-e na Lazar ré pèii. 3 Cur̂u bör̂i nôâ yè Ièsu na du kür̂ü-é na ka êr̂ê yè-è, êr̂ê: «Ör̂ökau, tö rhûû, na pèii na wi-ré gè méar̂i-e.» 4 Na wê tö pwêr̂ê na Ièsu, na bör̂i êr̂ê na ce, êr̂ê: «Na da dö pèii cè ki mé na pèii-ré, aè, na e cè ki mâ pè kau bar̂ee O i Bâô xè-i xi-e.» 5 Ièsu, wè na rhau méar̂i népavèné Marta, mâ Maria, mâ Lazar. 6 Na wê tö pwêr̂ê na ce ké pèii Lazar, êr̂ê, na wê pèii, na bör̂i dè tö-i wîr̂î kaar̂u nédaa bar̂ee. 7 Tèi nédèè duö nédaa-ré, na bör̂i êr̂ê yè pâr̂â pâi pa pâgür̂ü xi-e, êr̂ê: «Gèré vi tëë na Juda.» 8 Cér̂é bör̂i êr̂ê yè-è na pâr̂â pâi pa pâgür̂ü xi-e, êr̂ê: «Kâmö ka vi pur̂â éé, na ubwa na nédaa né, wè, cér̂é vi mè wêyê né ké yè rhaxè-i na pâi xè Juda, gè bör̂i vi tëë nai?» 9 Na bör̂i êr̂ê yè-r̂é na Ièsu, êr̂ê: «Na wêr̂êi, na da pârör̂ö na ma kaar̂u na pâr̂â pè mèèxa rèi rhaaxâ nédaa? Nè yè wii na rha kâmö ka yè vâr̂â rèi daa, nè yè da bör̂i dùxè-è, wè, na tö rhûû daa na ce rö bwêê jë, 10 aè, nè yè vâr̂â na dèxâ kâmö rèi bwê, nè yè bör̂i dùxè-è xè-i ké yèri daa rö pwar̂a-è.» 11 Na êr̂ê pâr̂â nô-ré na ce, bör̂i tèi nédèè, na bör̂i êr̂ê yè-r̂é, êr̂ê: «Na wê kur̂u na Lazar, wi ker̂e-ré; aè gö yè vi tëë na ka ya vè tâ rhî-e.» 12 Cér̂é bör̂i êr̂ê yè-è na pâi pa pâgür̂ü xi-e, êr̂ê: «Ör̂ökau, nè yè dö kur̂u na ce, nè tâwai mör̂u tëë.» 13 Na wê êr̂ê yè-r̂é na Ièsu nô né ké mé xi-e, aè cér̂é bör̂i a tâ néxâi, êr̂ê, na êr̂ê na dè dö kur̂u mâ mui. 14 Na bör̂i êr̂ê vè tö vèa yè-r̂é na Ièsu, êr̂ê: «Na wê mé na Lazar. 15 Aè, gö vi or̂o wa-ve xè-i ké wê yèri-nya rö-i, cè ki wii tâ néwèi xe-ve. Aè gèré vi na ka tö rhûû-é.» 16 Na bör̂i êr̂ê na Tomas dèxâ néé-é na Didumo yè pâi pa béé pâgür̂ü xi-e, êr̂ê: «Gèré yè vi bar̂ee, cè gèré rhau mé vèâ gèré-é!»
Ièsu Wè Mör̂u Tëë Mâ Mör̂u
17 Na bör̂i wê pwa rö-i na Ièsu, na bör̂i wê tö rhûû, wè, na wê kavùè nédaa xi-e rö kaa vi uyû. 18 Na tö vè ubwa Iérusalèm na Bétani, na ûr̂û karir̂i kilomèèti. 19 Cér̂é bör̂i pôr̂ô yéyé na pâi xè Juda pa ua Marta mâ Maria na ka ya vè tââmêr̂ê-r̂u, wè, cur̂u tâârùù béé ër̂i-r̂u. 20 Na wê tö pwêr̂ê na Marta, êr̂ê, na wê pwa na Ièsu, na bör̂i tömâ rua cè ku-r̂u vi javirù cur̂u Ièsu, aè Maria, wè, na dè tâ tö mwâ. 21 Na bör̂i êr̂ê yè Ièsu na Marta, êr̂ê: «Ör̂ökau, gè yè dè tö-a mâ, nè yè da pèii mé na béé ër̂i-nya. 22 Aè xina, wè, gö wê tâwai, êr̂ê, nè yè nââ yè-i na Bâô pâr̂â kââ wânii ré gè yè pëër̂ii yè-è.» 23 Na bör̂i êr̂ê yè-è na Ièsu, êr̂ê: «Nè yè wê mör̂u tëë na béé ër̂i-i.» 24 Na bör̂i êr̂ê yè-è na Marta, êr̂ê: «Gö tâwai, êr̂ê, nè yè mör̂u tëë na ki mör̂u tëë na paxa mé rèi nédaa ka taadè.» 25 Na bör̂i êr̂ê yè-è na Ièsu, êr̂ê: «Gènyâ rö mör̂u tëë mâ mör̂u. Ö kâmö ré tâ néwèi-nya, wè, nè yè wê mé na ce, nè yè bör̂i dè mör̂u. 26 Ö kâmö ré mör̂u mâ tâ néwèi-nya, nè yè da mé na ce kwéyë rua waavi. Ârikéé, gè yè xö tâ néwèi nô ré?» 27 Na bör̂i êr̂ê yè-è na bwè-ré, êr̂ê: «Üüwa, wè Ör̂ökau, gö tâ néwèi, gèi rö Kérisö, O i Bâô ré yè pwa rö-a bwêê jë.»
Na Tââ Na Ièsu
28 Na wê cowa êr̂ê ûr̂û-ré, na bör̂i vi mâ aʼyè uyûi Maria, pâriè-è, mâ êr̂ê yè-è, êr̂ê: «Na wê pwa na kâmö ka vi pur̂â, wè, na aʼyè-i.» 29 Na wê tö pwêr̂ê nô ré na Maria, na bör̂i tömâ rua bèr̂éé mâ vi cêmèèr̂i Ièsu. 30 Aè na da tö pwa na Ièsu rö wêê mwâ, wè, na mö ké tö ökâré cur̂u vi javirù rö-i cur̂u Marta. 31 Aè pâi xè Juda ré tö cér̂é Maria rö mwâ, wè, cér̂é ya vè tââmêr̂ê-ê, cér̂é wê tö rhûû-é na na tömâ rua vi bèr̂éé mâ vi rua, cér̂é bör̂i vi ua-è, wè, cér̂é tâ néxâi, êr̂ê, na vi na ka tââ rö kaa vi uyû. 32 Na wê pwa na Maria rö ö kââ-ré na mö ké tö-i na Ièsu, mâ tö rhûû-é, na bör̂i cê bèi ria rö duö köwi-e mâ êr̂ê yè-è, êr̂ê: «Ör̂ökau, gè yè dè tö-a mâ, nè yè da pèii mé na béé ër̂i-nya.» 33 Na bör̂i tö rhûû-é na Ièsu, na na tââ cér̂é pâi xè Juda ré vi ua-è, na bör̂i vi yipwâr̂âni rö wêê nénââ xi-e, mâ mui vè kau, 34 mâ êr̂ê, êr̂ê: «Gëve nââ-ê rö-wè?» Cér̂é bör̂i êr̂ê yè-è, êr̂ê: «Ör̂ökau, mi na ka tö rhûû.» 35 Na bör̂i tââ na Ièsu. 36 Cér̂é bör̂i êr̂ê na pâi xè Juda, êr̂ê: «Tö rhûû, ké kau i vi méar̂i xi-e yè-è!» 37 Aè, cér̂é êr̂ê na bör̂i rai-r̂é, êr̂ê: «Na da tâwai na wi ka pè rhî pièmè kâmö ka bwi ké yè aʼrhua kâmö-a cè ki da mé?»
Na Wê Mör̂u Tëë Na Lazar
38 Na bör̂i vi yipwâr̂âni tëë na Ièsu rö pwéé-é, mâ vi na kaa vi uyû, wè, dèxâ mwâér̂é ka é puwîî mèö-è i pèyaa. 39 Na bör̂i êr̂ê na Ièsu, êr̂ê: «Puè virai pèyaa.» Na bör̂i êr̂ê na Marta, kür̂ü wi ka pèii, êr̂ê: «Ör̂ökau, na wê bo na ce, wè, na wê kavùè na nédaa xi-e rö-i.» 40 Na bör̂i êr̂ê yè-è na Ièsu, êr̂ê: «Gö da êr̂ê yè-i, êr̂ê, gè yè tâ néwèi, gè yè bör̂i tö rhûû rhîrhér̂é i Bâô?» 41 Cér̂é bör̂i puè virai pèyaa. Na bör̂i komwââda rua na Ièsu, mâ êr̂ê, êr̂ê: «Pevaa éé, gö ëi yè-i, wè, gè tö pwêr̂ê-nya. 42 Gö wê tâwai, êr̂ê, gè bâ pwêr̂ê-nya, aè, gö êr̂ê ûr̂û-ré, wè, cér̂é pôr̂ô yéyé na pâr̂â kâmö ré tömâ pwânûr̂i-nya cè ké-r̂é tâ néwèi, êr̂ê, gèi ré tùr̂ùwaa-nya.» 43 Na wê cowa êr̂ê ûr̂û-ré, na bör̂i aʼvè kau mâ êr̂ê, êr̂ê: «Lazar éé, vi rua mi!» 44 Na bör̂i vi rua na kâmö ré wê mé mâ', é yayöu i pârê mwââlöö ka mwââ duö köwi-e xè rua mâ xè ria, aè é yayöu némèè-i dèxâ mwââlöö. Na bör̂i êr̂ê yè-r̂é na Ièsu, êr̂ê: «Wê cöö-è, mâ kâyâi-e cè ki vâr̂â.»
É Mèyè Wêyê Cè Ki Mâ Yö Vè Mii Ièsu
45 Cér̂é pôr̂ô yéyé na pâi xè Juda paxa vi cêmèèr̂i Maria, cér̂é bör̂i tö rhûû pâr̂â kââ ré na waa na Ièsu, cér̂é bör̂i tâ néwèi-e. 46 Aè bör̂i rai-r̂é, wè, cér̂é vi cêmèèr̂i pâi pâ farésaiö mâ vi yëwaa yè-r̂é pâr̂â kââ ré na waa na Ièsu. 47 Aè pâi pa winô i pâi pa nâânévâ mâ pâr̂â farésaiö, wè, cér̂é ka vèâi pâr̂â kâmö pa vi rhôôr̂u nô, cér̂é bör̂i êr̂ê, êr̂ê: «Gèré yè waa-yé? Wè, na wê pôr̂ô na pâr̂â nêr̂ê ka ar̂inadö ré na waa na wi-a. 48 Aè gèré yè kâyâi-e ûr̂û-ré, cér̂é yè bör̂i vi na pâr̂â kâmö na ka tâ néwèi-e, cér̂é yè bör̂i pwa na pâi xè Roma mâ öxar̂a névâ xé-r̂é mâ mwâcir̂i xè-i xi-e.» 49 Aè dèxâ kâmö rai-r̂é, ré néé-é na Kaifa, wè, wi ré kavèè pâi pa nâânévâ tèi nédö-ré, na bör̂i êr̂ê yè-r̂é na ce, êr̂ê: «Gëve da tö pwêr̂ê rha kââ; 50 gëve da tâ néxâi, êr̂ê, na dö kââ yè-r̂é na ki mé na rha kâmö vè ki névâ, cè ké-r̂é da mé na pâr̂â kâmö wânii.» 51 Na da êr̂ê vi bwir̂i nô-â na kâmö ka vi winô yè pâi pa nâânévâ tèi nédö ré, aè na aʼvè néxâi baayê, êr̂ê, nè yè mâ mé na Ièsu vè ki névâ. 52 Aè nè da waa vè ki rhar̂i névâ, aè cè ki rhau kâ vèâi wânii, cè ké-r̂é rhaaxâ rö pâr̂â pâlè Bâô ré tö vidù rhar̂i. 53 Cér̂é rhavûû rèi nédaa-ré ké vi mè wêyê né ké yè yö vè mii-e. 54 Tèi ökâré, wè na da vi vèai tëë na Ièsu rö némèè pâi xè Juda; aè na vi na ce na dèxâ névâ ka tö kaxoo, ka tö vè ubwa yè bwêê dè né névâ ré néé-é na Éféraima; na bör̂i tö cér̂é pâr̂â pâi pa pâgür̂ü xi-e rö-i. 55 Na wê tö vè ubwa na nédaa né Paséka i pâi xè Juda, cér̂é pôr̂ô yéyé na pâr̂â kâmö pa mi xè pâr̂â névâ, wè, cér̂é vi rua na Iérusalèm, na na mö ké yèri nédaa né ké yè waa Paséka, cè ké-r̂é pè rhî câwâ xé-r̂é. 56 Cér̂é bör̂i vi tëvë wa Ièsu, wè, cér̂é vi êr̂ê nô né na cér̂é mö tömâ rö léwé mwâ ka ar̂ii, mâ vi êr̂ê, êr̂ê: «Jië na wêê nénââ xe-ve? Nè yè da mi wa bwê na ce?» 57 Aè pâi pa winô i pâi pa nâânévâ mâ pâr̂â farésaiö, wè, cér̂é pè tömâ dèxâ mââyöö, êr̂ê nè yè wii na rha kâmö ka yè tö rhûû ö kââ-ré nè tö-i na Ièsu, na e na ki êr̂ê vèa-è, cê ké-r̂é vi na ka tuwir̂i-e rö-i.
Na Ôâ Duö Köwi Ièsu Xè Ria Na Maria I Rhëë Ka Borhêê
1 Na bör̂i vi na Bétani na Ièsu, na na mö kanii na ma rhaaxâ na pâr̂â nédaa ré nè yè waa Paséka rèi, aè ökâré Lazar, dèxâ kâmö ré wê mé xiréé, wè na wê mör̂u tëë xè ka mé xi-e mâ'. 2 Cér̂é bör̂i kâ vè tö vâ ara-è rö-i. Marta, wè na kâmö yar̂i xé-r̂é, aè Lazar wè na dèxâ rai-r̂é ré cuè cér̂é Ièsu rö taapër̂ë né vi ara. 3 Na bör̂i pè dèxâ léé rhëë ka borhêê ka dö kau aau na pè urhii na Maria, na bör̂i ôâ duö köwi Ièsu xè ria mâ câ vè mèr̂i i pûr̂û gwâ-ê; na bör̂i rhâri na mwâ xè-i bor̂o rhëë-ré. 4 Na bör̂i êr̂ê na dèxâ rai pâi pa pâgür̂ü, wi-a Juda Iskariot, o i Simona, kâmö ré yè ârui-e, êr̂ê: 5 «É da vi rhöwöi xi-yé rhëë-a cè ki pârör̂ö na ma dèxâ e â kâmö dènari na pè urhii, na ki mâ nââ yè pâr̂â kâmö pa rhauadè?» 6 Na da êr̂ê nô ré xè-i ké bar̂i méar̂i xi-e pâi paxa rhauadè, aè na kâmö ka pâr̂â na ce, wè na wê tö pwar̂a-è na karé mwâ mwâné, na bör̂i wê pè na ce pâr̂â kââ ka é oè rö-i. 7 Na bör̂i êr̂ê na Ièsu, êr̂ê: «Koa yè vi vâpèr̂u-é na gëve, wè na waa ö kââ-ré vè némui-nya rèi ö nédaa ré é yè kérui-nya. 8 Nè dè bâ tö gëve pâi pa rhauadè, aè gènyâ, wè gö yè da bâ tö pwar̂a-ve.»
É Mèyè Wêyê Cè ki Yö Vè Mii Lazar
9 Cér̂é pôr̂ô yéyé na pâi xè Juda pa pwêr̂ê, êr̂ê, na tö Bétani na Ièsu, cér̂é bör̂i vi ua-è nai, wè, cér̂é da vi waa rhar̂i Ièsu, aè cér̂é vi waa bar̂ee Lazar, xè-i ké mör̂u xi-e tëë rai pâr̂â pa mé. 10 Cér̂é bör̂i vi tëvë na pâi pa winô i pâi pa vi nâânévâ, wè cér̂é vi êr̂ê nô né ké yè yö vè mii bar̂ee Lazar, 11 wè cér̂é pôr̂ô yéyé na pâi xè Juda pa tâ néwèi Ièsu na pûû-é na nô ré.
Na Vi Ru Rö Iérusalèm Na Ièsu
12 Gaar̂a, wè, cér̂é pôr̂ô yéyé na pâr̂â kâmö pa mi wa kâ vèâi né waa ar̂ii, wè cér̂é tö pwêr̂ê, êr̂ê, na wê vi na Iérusalèm na Ièsu. 13 Cér̂é bör̂i carher̂e pâr̂â dee kiwê cè ké-r̂é vi na ka vi javirù vèâ cér̂é Ièsu, cér̂é uu mâ êr̂ê: «Hosana, na kau mâmâ na ko ör̂ökau xè Israèl ré wê pwa mi rö néé Ör̂ökau!» 14 Na wê tö rhûû dèxâ bwir̂iko ka yar̂i na Ièsu, na bör̂i te rö xi-e, na ûr̂û ka yu mâ', êr̂ê: 15 «Koa yè bar̂a na gèi, wè pûr̂ûbwè i Siona; Tö rhûû, wè na wê pwa mi na ör̂ökau xi-i, Wè na wê cuè rö olè bwir̂iko.» 16 Aè cér̂é da tâ néxâi na pâr̂â pâi pa pâgür̂ü xi-e pâr̂â kââ ré rö ka rhavûû, é bör̂i wê cowa pè kau Ièsu, cér̂é bör̂i wê dè tâ néxâi êr̂ê, na wê dè yexèvè pâr̂â kââ ka é yu mâ' yè-è. 17 Aè, cér̂é ye vè avâr̂i bar̂ee na pâr̂â kâmö, ré ua-è, êr̂ê, na aʼyè rua mi Lazar xè kaa vi uyû, mâ pè mör̂u-é rai pâr̂â pa mé. 18 Cér̂é bör̂i vi javirù cér̂é pâr̂â kâmö pa pôr̂ô yéyé, wè cér̂é wê pwêr̂ê, êr̂ê, na waa nêr̂ê ka ar̂inadö-ré na ce. 19 Cér̂é bör̂i êr̂ê na pâr̂â farésaiö, êr̂ê: «Gëve tö rhûû, gëve da tâwai cëi rha kââ xè-i, wè tö rhûû, cér̂é rhau rhâmâ rhaadè-è na pâr̂â kâmö wânii rö-a bwêê jë!»
Cér̂é Mèyè Ièsu Na Bör̂i Pâi Xè Éléni
20 Na wii bar̂ee na bör̂i pâi xè Héléni pa vi cér̂é pâi ré pa vi wa bwêê cè ké-r̂é pwaér̂ö. 21 Cér̂é bör̂i vi na ka cêmèèr̂i Filipo, kâmö xè Bétsaïda rö Galilé, mâ pëër̂ii yè-è: «Ör̂ökau, gèvé bar̂i tö rhûû Ièsu.» 22 Na bör̂i vi na Filipo mâ êr̂ê yè Adèrè, cur̂u bör̂i vi na cur̂u mâ êr̂ê yè Ièsu. 23 Na bör̂i êr̂ê yè-r̂é na Ièsu êr̂ê: «Na wê pwa na nédaa né ké yè pè kau o i kâmö. 24 Avâr̂i, avâr̂i, gö êr̂ê yè-ve, êr̂ê, nè yè da mèr̂i mâ bo na dèxâ pwêê bélé ka tö néjë, nè yè bör̂i bâ rhaaxâ rö, aè nè yè mèr̂i mâ bo, nè yè bör̂i pwa vè pôr̂ô yéyé. 25 Ö kâmö ré âmu i mör̂u xi-e, wè nè yè mâ yèri, aè ö kâmö ré rhîaa i mör̂u xi-e rö-a bwêê jë, wè nè yè bâ tö xar̂a yè mör̂u ka da tâwai yèri. 26 Ö kâmö ré yè kâmö yar̂i xi-nya, na e na ki mi ua-nya; aè ö kââ-ré gö yè tö-i, wè nè yè dè tö gövu rö-i. Aè nè yè kâmö yar̂i xi-nya na dèxâ kâmö, nè yè bör̂i pè kau-é na Pevaa.»
Na Êr̂ê Ké Yè Pèii Mé Xi-E Na Ièsu
27 «Na vi nénââwêr̂ê xina na pwéé-nya. Gö yè mâ êr̂ê jië? Gö yè êr̂ê, Pevaa, cöö-nya xè-i nédaa-a. Aè gö wê pwa cè göi pwa yèr̂i nédaa-a. 28 Pevaa, pè kau néé-i!» Na bör̂i pwa mi xè nékö na mêr̂ê tëvë, êr̂ê: «Gö wê cowa pè kau-é, aè gö yè dè pè kau-é tëë.» 29 Cér̂é bör̂i tö pwêr̂ê na pâr̂â kâmö pa tömâ rö-i, cér̂é bör̂i êr̂ê, êr̂ê: «Na wê kô na nör̂ö!» Aè cér̂é êr̂ê na bör̂i, êr̂ê: «Na tëvë yè-è na angéla.» 30 Na bör̂i êr̂ê na Ièsu, êr̂ê: «Na da tö vèa mi na mêr̂ê tëvë ré vè ki-nya, aè na dè tö vèa mi vè ke-ve. 31 É yè rhôôr̂u vè târi xina bwêê jë, aè é yè yayâwâ xina kavèè bwêê jë. 32 Aè gènyâ, wè é yè wê pè xi-nya rua xè-a bwêê jë, gö yè bör̂i yörhèè mi ua-nya pâr̂â kâmö wânii.» 33 Na êr̂ê ûr̂û-ré, wè na tâ êr̂ê vèa nô né ké yè mé xi-e. 34 Cér̂é bör̂i êr̂ê yè-è na pâr̂â kâmö: «Gèvé wê tö pwêr̂ê xè-i mââyöö, êr̂ê, nè yè bâ tö yawi na Kérisö, aè jië na ké êr̂ê xi-i, é yè pè rua o i kâmö? Wîr̂î o i kâmö-ré?» 35 Na bör̂i êr̂ê yè-r̂é na Ièsu, êr̂ê: «Na da mwââ tëë na ké yè tö pwar̂a-ve i daa. Aè vèr̂i na gëve na na mö ké tö pwar̂a-ve na daa, wè, koa vi pwa yèr̂i-ve na orê. Ö kâmö ré vâr̂â xè-i orê, wè, na da tâwai ö kââ-ré na vi nai. 36 Cëi vèr̂i daa na na mö ké tö pwar̂a-ve na daa, cè ke-ve pâr̂â pâlè daa.»
Cér̂é Da Tâ Néwèi Ièsu Na Pâi Xè Juda
Na wê êr̂ê ûr̂û-ré na Ièsu, na bör̂i vi uyûi rai-r̂é. 37 Na waa pâr̂â nêr̂ê ka ar̂inadö ka pôr̂ô yéyé rö némèè-r̂é na Ièsu, aè cér̂é da tâ néwèi-e, 38 cè ki yexèvè ö nô ré na êr̂ê mâ' na Isaia pérövéta, êr̂ê, «Ör̂ökau, wîr̂î ré yè tâ néwèi pâr̂â nô xé-vé? Aè é yè pèri vèa yè-ya nô i Ör̂ökau?» 39 Tö ökâré, cér̂é yè da tâwai tâ néwèi, kèi ké êr̂ê tëë i Isaia, êr̂ê: 40 «Na pè bwi pâr̂â pièmè-r̂é, Mâ pè wâréuu pâr̂â wêê nénââ xé-r̂é, Cè ké-r̂é da rhûû xè-i pâr̂â pièmè-r̂é, Mâ tâ pâgür̂ü xè-i pâr̂â wêê nénââ xé-r̂é, Koa wé-r̂é vipââr̂i, Gö yè bör̂i pè mör̂u-r̂é.» 41 Na êr̂ê ûr̂û-ré na Isaia na na tö rhûû rhîrhér̂é i Ör̂ökau, mâ êr̂ê vèa-è. 42 Aè cér̂é pôr̂ô yéyé na pâr̂â pa némèè pa tâ néwèi-e, rhaaxâr̂ö, wè cér̂é da vi êr̂ê vèa-r̂é xè-i pâi pâ farésaiö, wè wé-r̂é yayâwâ-r̂é xè-i mwâ ka ar̂ii. 43 Wè cér̂é dè rhî vè e ké yè pè kau-r̂é xè-i ké kâmö ka vi kwéjî xé-r̂é rai ké yè pè kau-r̂é xè-i Bâô.
Ké Vi Rhôôr̂u Xè-I Pâr̂â Nô I Ièsu
44 Na bör̂i êr̂ê vè mör̂ö na Ièsu, êr̂ê: «Ö kâmö ré yè tâ néwèi-nya, wè na da tâ néwèi-nya rhar̂i, aè na tâ néwèi bar̂ee ö kâmö ré tùr̂ùwaa-nya. 45 Aè ö kâmö ré yè tö rhûû-nya, wè, na tö rhûû bar̂ee ö ce ré tùr̂ùwaa-nya. 46 Gènyâ, wè daa ka wê pwa rö-a bwêê jë cè ki da tö ka orê na dèxâ rai pâi pa tâ néwèi-nya. 47 Nè yè tö pwêr̂ê nô xi-nya na dèxâ kâmö, na bör̂i da köiwaa, gö yè da pè yerii-e, wè gö da pwa na ka pè yerii bwêê jë, aè gö pwa na ka pè mör̂u bwêê jë. 48 Ö kâmö ré virai-nya, mâ da cëi pâr̂â nô xi-nya, na dè tö pwar̂a-è na pè yerii-e; wè pâr̂â nô ré gö vi pur̂â yawi, ökâré nô ré yè pè yerii-e rèi nédaa ka taadè. 49 Wè gö da tö vi êr̂ê târ̂ââ na gènyâ; aè Pevaa ré tùr̂ùwaa-nya, na nââ yè-nya nêr̂ê-nya mâ ké tëvë xi-nya. 50 Aè gö dè tâwai mââyöö xi-e, wè, mör̂u ka yè da tâwai yèri. Ökâré, pâr̂â nô ré gö êr̂ê vèa, wè gö êr̂ê ûr̂û ké êr̂ê yè-nya i Pevaa.»
Na Gââ Pâr̂â Néxar̂a â Xè Ria I Pâi Pa Pâgür̂ü Xi-E Na Ièsu
1 É da tö waa bwêê né Paséka, aè na wê tâwai na Ièsu, êr̂ê, na wê pwa na nédaa né ké yè wê vi xi-e xè-a bwêê jë na pwar̂a Pevaa xi-e, aè na wê dö méar̂i yawi pâr̂â pâ kâmö xi-e pa tö-a bwêê jë, mâ bâ waa pètâbâ vi méar̂i xi-e yè-r̂é kwéyë rö léé. 2 Tèi pè mèèxa né ara tèi rhêêrè, wè na wê cowa nââ na méavor̂a rö pwéé Juda Iskariot, o i Simona, ké yè ârui-e, 3 aè na wê tâwai na Ièsu, êr̂ê, na wê kâyâi röi pâr̂â kââ wânii na Pevaa xi-e yè duö néxar̂a â-ê, wè na mi rai Bâô mâ nè yè vi wa tëë Bâô na ce, 4 na bör̂i tömâ rua na ce xè kaa ara, mâ cùù mêr̂ê-ê, mâ nââ ria, mâ pè pârê mwââlöö mâ pöi rö xi-e. 5 Na bör̂i piyöwîî rhëë rö dèxâ mwâ piyöö, mâ rhavûû ké yè gââ pâr̂â néxar̂a â xè ria i pâi pa pâgür̂ü xi-e, mâ câ vè mèr̂i xè-i pârê mwââlöö ré na pöi rö xi-e. 6 Na bör̂i vi wa Simona Pètèru; na bör̂i êr̂ê yè-è na Pètèru, êr̂ê: «Ör̂ökau, gè yè gââ duö köwi-nya?» 7 Na bör̂i êr̂ê yè-è na Ièsu, êr̂ê: «Kââ ré gö yè waa, wè, gè da tâwai xina, aè gè yè mâ tâwai vi.» 8 Na bör̂i êr̂ê yè-è na Pètèru, êr̂ê: «Gè yè da gââ aau duö köwi-nya xè ria!» Na bör̂i êr̂ê yè-è na Ièsu, êr̂ê: «Gö yè da gââ duö köwi-i, nè yè bör̂i yèri ki-i rö pwar̂a-nya.» 9 Na bör̂i êr̂ê yè-è na Simona Pètèru, êr̂ê: «Ör̂ökau, na da duö köwi-nya xè ria rhar̂i, aè na e bar̂ee na duö néxar̂a â xè rua, mâ gwâ-nya bar̂ee!» 10 Na bör̂i êr̂ê yè-è na Ièsu, êr̂ê: «Ö kâmö ré é pè piyöö-è, wè na e rö na ké mâ gââ duö köwi-e xè ria, na bör̂i rhau e röi. Gëve wê rhau e, aè na da rhau gëve wânii.» 11 Wè na wê rhîâgür̂ü na Ièsu dèxâ kâmö rai-r̂é yè ârui-e, ökâré pûû ké êr̂ê ûr̂û-ré xi-e, êr̂ê: «Gëve da rhau e röi.» 12 Na wê cowa gââ röi pâr̂â köwi-r̂é, na bör̂i pè tëë mêr̂ê-ê, mâ cur̂i tëë, mâ êr̂ê yè-r̂é, êr̂ê: «Na wêr̂êi, gëve wê dè rhîâgür̂ü ö kââ-ré gö waa yè-ve? 13 Gëve bâ aʼyè-nya, êr̂ê, kâmö ka vi pur̂â mâ ör̂ökau, na bör̂i dè e na ké êr̂ê xe-ve, wè na avâr̂i. 14 Gö yè ör̂ökau mâ kâmö ka vi pur̂â, aè, gö wê cowa gââ pâr̂â köwi-ve xè ria, na e na ke-ve vi gââ vè rhaaxâ bar̂ee pâr̂â köwi-ve xè ria. 15 Wè gö wê cowa nââ yè-ve dâ, cè ké-ve waa ûr̂û ké waa xi-nya yè-ve. 16 Avâr̂i, avâr̂i, gö êr̂ê yè-ve, êr̂ê, na da kau na kâmö yar̂i rai ör̂ökau xi-e, aè na da kau bar̂ee na kâmö ré é tùr̂ùwaa-è rai ö kâmö ré tùr̂ùwaa-è. 17 Gëve yè tâwai pâr̂â kââ ré, na kau mâmâ na ko-ve, na ki gëve waa köiwaa rö pâr̂â kââ-ré. 18 Gö da êr̂ê-ve wânii; wè gö dè tâwai kâmö ka é yè pâbir̂i xi-nya. Aè cè ki yexèvè ka yu mâ, êr̂ê: “Ö kâmö ré kâi vèâ var̂awa gövu, na wê texai-nya i bwiida xi-e.” 19 Gö êr̂ê yè-ve nô ré xina, na na da tö pwa na pè yexèvè, pè aʼvè néxâi yè-ve na ki wê yexèvè, cè ke-ve tâ néxâi, êr̂ê wè dè gènyâ rö. 20 Avâr̂i, avâr̂i, gö êr̂ê yè-ve, êr̂ê, ö kâmö ré cëi kâmö ré gö tùr̂ùwaa-è, wè na cëi-nya bar̂ee, aè ö kâmö ré cëi-nya, wè na cëi ö ce ré tùr̂ùwaa-nya».
Na Êr̂ê Baayê Na Ièsu Ké Yè Ârui-E I Juda
21 Na wê cowa êr̂ê ûr̂û-ré na Ièsu, na bör̂i vi nénââwêr̂ê vè kau na ko-é, na bör̂i êr̂ê yè-r̂é vè târi na ce, êr̂ê: «Avâr̂i, avâr̂i, gö êr̂ê yè-ve, êr̂ê, nè yè ârui-nya na dèxâ rai-ve.» 22 Cér̂é bör̂i cê vi rhîwir̂i-r̂é na pâi pa pâgür̂ü xi-e, mâ vi ërëwaa-r̂é wa ké êr̂ê xi-e yè-r̂é. 23 Aè dèxâ kâmö rai-r̂é, wè na cuè âxéré mèè ö pèè wââ Ièsu, ö kâmö ré na méar̂i-e na Ièsu. 24 Na bör̂i vi nimè yè-è na Simona Pètèru cè ki ërëwaa-è wa ö kâmö ré na êr̂ê. 25 Na bör̂i yabér̂é na ce xè-i pèè wââ Ièsu, mâ êr̂ê yè-è, êr̂ê: «Ör̂ökau, wîr̂î?» 26 Na bör̂i êr̂ê na Ièsu, êr̂ê: «Ö kâmö ré gö yè nââ yè-è var̂awa na ki gö wê löö röi.» Na bör̂i wê löö rö-i var̂awa, na bör̂i nââ yè Juda, o i Simona Iskariot. 27 Tèi ökâré, na bör̂i vi ru rö pwéé Juda na méavor̂a tèi nédèè ké wê cëi êê ara xi-e. Na bör̂i êr̂ê yè-è na Ièsu, êr̂ê: «Waa nér̂êi ö kââ-ré gè bar̂i waa!» 28 Aè na yèri dèxâ kâmö rai-r̂é ka yè tâ pâgür̂ü pûû ké êr̂ê xi-e ûr̂û-ré yè-è; 29 wè cér̂é tâ néxâi na bör̂i, êr̂ê, na tö pwar̂a Juda na mwâ mwâné, na bör̂i êr̂ê yè-è na Ièsu, êr̂ê, vi urhii kââ ka yè pâr̂i-r̂é rèi nédaa né vi ara, aè nââ bör̂i kââ yè pâi pa rhauadè. 30 Na wê cowa cëi êê ara na Juda, na bör̂i vi rua vi bèr̂éé. Ëi, na wê bwê.
Mââyöö Ka Döwöö
31 Na wê vi, na bör̂i êr̂ê na Ièsu êr̂ê: «É yè pè kau xina o i kâmö, aè é wê pè kau mâ' Bâô rö xi-e. 32 Nè yè wê pè kau Bâô rö xi-e na ce, nè yè bör̂i xa pè kau-é na Bâô mâ pè kau-é nér̂êi 33 Névâi yar̂i, na wê ubwa rhùr̂ùù na nédaa xi-nya rö pwar̂a-ve. Aè gëve yè vi mèyè-nya; aè ö ké êr̂ê xi-nya yè pâi xè Juda, gö yè bör̂i dè êr̂ê yè-ve bar̂ee, êr̂ê, gëve da tâwai yè pwa rö ökâré gö yè vi nai. 34 Gö nââ yè-ve mââyöö ka mö döwöö, êr̂ê, gëve yè vi méar̂i-ve; ûr̂û ké méar̂i-ve xi-nya, aè gëve dè vi méar̂i-ve bar̂ee. 35 Ökâré pètâbâ yè pâr̂â kâmö wânii, êr̂ê, gëve pâi pa pwêr̂êwaa-nya na ke-ve vi méar̂i-ve.»
Na Êr̂ê Baayê Na Ièsu Ké Yè Vi Yiâ Xi-E I Pètèru
36 Na bör̂i êr̂ê yè-è na Simona Pètèru, êr̂ê: «Ör̂ökau, gè yè vi na-wê?» Na bör̂i êr̂ê yè-è na Ièsu, êr̂ê: «Gè da tâwai ki yè vi ua-nya xina na ökâré gö yè vi nai, aè gè yè mâ dè ua-nya.» 37 Na bör̂i êr̂ê yè-è na Pètèru, êr̂ê: «Ör̂ökau, gö da tâwai xi-yé ré gö yè da vi ua-i xina? Gö yè nââ mör̂u xi-nya vè ki-i.» 38 Na bör̂i aʼcëi yè-è na Ièsu, êr̂ê: «Gè yè kâyâi mör̂u xi-i vè-ki-nya? Avâr̂i, avâr̂i, gö êr̂ê yè-i, êr̂ê, nè yè da tö ya na méyë, na gè yè karir̂i vi yiâ i-nya.»
Ièsu Wêyê Na Pwar̂a Pevaa
1 «Koa yè wâré mâ wâré na wêê nénââ xe-ve. Gëve yè tâ néwèi Bâô, gëve bör̂i tâ néwèi-nya bar̂ee. 2 Na pôr̂ô yéyé na pâr̂â wêê mwâ rö pwar̂a Pevaa; aè nè yè yèri, gö yè bör̂i wê êr̂ê yè-ve. Gö yè vi na ka nyââmöi vè ke-ve. 3 Aè gö yè wê vi na ka nyââmöi cè ki kaa töö xe-ve, gö yè bör̂i dè mi tëë na ka paur̂u-ve na ö kââ-ré gö yè tö-i cè ke-ve tö-i bar̂ee. 4 Aè ö kââ-ré gö yè vi nai, wè gëve wê dè tâwai wêyê nai.» 5 Na bör̂i ërëwaa-è na Tomas, êr̂ê: «Ör̂ökau, gèvé da tâwai ö kââ-ré gè yè vi nai, aè é yè tâwai tâîî wêyê?» 6 Na bör̂i aʼcëi yè-è na Ièsu, êr̂ê: «Gènyâ wêyê, mâ avâr̂i, mâ mör̂u. Na yèri kâmö ka yè pwa yèr̂i Pevaa, na ki da pwa yèr̂i-nya baayê. 7 Gëve yè rhîâgür̂ü-nya, gëve yè bör̂i rhîâgür̂ü bar̂ee Pevaa xi-nya, aè gëve rhavûû xina ké wê rhîâgür̂ü-é mâ tö rhûû-é.» 8 Na bör̂i êr̂ê yè-è na Filipo, êr̂ê: «Pèri yè-vé Pevaa, cè ke-ve wê iwa.» 9 Na bör̂i êr̂ê yè-è na Ièsu, êr̂ê: «Gö wê dö tö vè mwââ rö pwar̂a-ve, aè gè da bâ tö rhîâgür̂ü-nya, wè Filipo? Ö kâmö ré yè tö rhûû-nya, na tö rhûû Pevaa bar̂ee; aè na wêr̂êi gè êr̂ê: “Pèri yè-vé Pevaa?” 10 Na wêr̂êi, gè da tâ néwèi, êr̂ê, gö tö pwéé Pevaa, aè na tö pwéé-nya na Pevaa? Gö da tö vi êr̂ê târ̂ââ pâr̂â nô ré gö êr̂ê yè-ve, aè, na waa na Pevaa rö pwéé-nya pâr̂â nêr̂ê ré gö yè waa. 11 Tâ néwèi-nya, êr̂ê, gö tö pwéé Pevaa, aè na tö pwéé-nya na Pevaa. Gëve yè da cëi nô ré, na e na gëve tâ néwèi xè-i pâr̂â nêr̂ê ré é. 12 Avâr̂i, avâr̂i, gö êr̂ê yè-ve, êr̂ê, ö kâmö ré yè tâ néwèi-nya, nè yè bör̂i waa pâr̂â nêr̂ê ré gö waa, aè nè yè waa bar̂ee pâr̂â nêr̂ê ka vi kwéjî rai pâr̂â nêr̂ê ré é, wè gö yè vi wa Pevaa; 13 bör̂i pâr̂â kââ wânii ré gëve yè pëër̂ii rö néé-nya, gö yè mâ waa cè ki mâ pè kau Pevaa rö O xi-e. 14 Gëve yè bör̂i pëër̂ii dèxâ kââ rö néé-nya, gö yè bör̂i waa.»
Vi Kîbô Né Ké Yè Tùr̂ùwaa Mi Ko-Ar̂ii
15 «Gëve yè méar̂i-nya, gëve bör̂i köiwaa pâr̂â mââyöö xi-nya. 16 Aè gö yè pëër̂ii yè Pevaa cè ki nââ yè-ve dèxâ pè nââbéé â-ve, cè ki tö vèa gëve rèi pâr̂â nédaa kwéyë rua waavi, 17 wè ko né avâr̂i, ka é da tâwai cëi i bwêê jë, wè cér̂é da rhîâgür̂ü-é mâ tâ pâgür̂ü-é. Aè gëve, wè gëve dè rhîâgür̂ü-é, wè na dè tö gëve, mâ nè yè dè tö pwéé-ve bar̂ee. 18 Gö yè da kâyâi-ve vi bwir̂i ûr̂û pâr̂â kâmö pa yèri ka ër̂i-r̂é, aè gö yè mâ vi pwa yèr̂i-ve. 19 Na da mwââ na nédaa, nè yè bör̂i da tö rhûû-nya tëë na bwêê jë; aè gëve yè tö rhûû-nya na gëve, wè gö mör̂u, tö ökâré gëve yè mör̂u bar̂ee na gëve. 20 Gëve yè tâwai rèi nédaa-ré, êr̂ê, gö tö pwéé Pevaa, aè gëve tö pwéé-nya na gëve, mâ gö tö pwéé-ve na gènyâ.» 21 «Ö kâmö ré wii na pâr̂â mââyöö xi-nya rö pwar̂a-è mâ köiwaa, ce rö ré méar̂i-nya; aè ö kâmö ré méar̂i-nya, wè nè yè méar̂i-e na Pevaa, aè gö yè méar̂i-e mâ pèri vèa-nya yè-è.» 22 Na bör̂i êr̂ê yè-è na Juda, na da Iskariot, aè dèxâ, êr̂ê: «Ör̂ökau, na wêr̂êi gè yè pèri vèa-i yè-vé, aè gè yè da pèri vèa-i yè bwêê jë bar̂ee?» 23 Na bör̂i êr̂ê yè-è na Ièsu, êr̂ê: «Ö kâmö ré méar̂i-nya, wè nè yè köiwaa pâr̂â nô xi-nya, nè yè bör̂i méar̂i-e na Pevaa; aè gövu yè vi cêmèèr̂i-e mâ waa kaa töö xi-vu tö pwar̂a-è. 24 Ö kâmö ré da méar̂i-nya, wè na da köiwaa pâr̂â nô xi-nya. Aè pâr̂â nô ré gëve pwêr̂ê, wè na da pâr̂â nô xi-nya, aè pâr̂â nô i Pevaa ré tùr̂ùwaa-nya. 25 Gö wê cowa êr̂ê mâ' yè-ve pâr̂â nô ré na gö mö tö pwar̂a-ve. 26 Aè ö pè nââbéé â-ve, wè Ko-Ar̂ii ré nè yè tùr̂ùwaa mi na Pevaa rö néé-nya, nè yè mâ aʼpâgür̂ü yè-ve pâr̂â nô wânii, mâ aʼvè néxâi yè-ve pâr̂â nô wânii ré gö wê êr̂ê yè-ve.» 27 «Gö nââ aʼvui xi-nya rö pwar̂a-ve, dè aʼvui xi-nya ré gö yè dè nââ yè-ve, gö da nââ yè-ve cè ki ûr̂û ké nââ êê vië né bwêê jë. Koa yè vi rhèè na wêê nénââ xe-ve mâ koa yè bar̂a. 28 Gëve wê pwêr̂ê röi ké êr̂ê xi-nya yè-ve, êr̂ê, gö yè wê vi mâ mi tëë wa-ve. Gëve yè méar̂i-nya, gëve yè bör̂i vi or̂o, êr̂ê, gö yè vi wa Pevaa, wè, na kau aau rai-nya na Pevaa. 29 Aè xina, wè, gö êr̂ê yè-ve na na da tö yexèvè, cè gëve vi tâ néwèi na ki wê yexèvè. 30 Gö yè da tëvë vè pôr̂ô tëë yè-ve, wè, nè yè wê pwa mi na kavèè bwêê jë, 31 aè na da wii na ki-e kââ rö pwar̂a-nya, aè na e cè ki tâwai na bwêê jë, êr̂ê, gö tâ néwèi Pevaa, mâ waa ûr̂û ké yakoa i Pevaa xi-nya. Tömâ rua cè gèré wê vi xè-a.»
Ièsu, Dö Pûû Viné
1 «Gènyâ dö pûû viné, aè Pevaa xi-nya, kâmö ré waa e né viné. 2 Na rharher̂e xè-i xi-nya pâr̂â kööè ka da pwa; aè pâr̂â kööè ré pwa, wè na nyââmöi e cè ki wê pwa vè kau vi. 3 Gëve wê döwöö xina xè-i pâr̂â nô ré gö êr̂ê yè-ve. 4 Cuè tâdâ na gëve rö pwar̂a-nya, aè gö yè cuè rö pwar̂a-ve. Na ûr̂û kööè ré da tâwai pwa vè târ̂ââ na ki da tö pûû viné, nè yè ûr̂û-ré na gëve na ki gëve da cuè tâdâ rö pwar̂a-nya. 5 Gènyâ dö pûû viné, aè gëve pâr̂â kööè. Ö kâmö ré cuè rö pwar̂a-nya, mâ gö cuè rö pwar̂a-è, nè yè bör̂i pwa vè kau aau, aè gëve yè da tâwai waa rha kââ na ki gëve tö vè mwâi rai-nya. 6 Nè yè da tö xi-nya na dèxâ kâmö, é yè bör̂i virai-e, na ûr̂û kööè ré wê mür̂ü; nè bör̂i ka vèâi na kâmö mâ yer̂e ö kêmör̂u. 7 Gëve yè cuè rö xi-nya, nè yè bör̂i tö xe-ve na pâr̂â nô xi-nya, aè gëve yè pëër̂ii rha kââ ré gëve rhî vè e, é yè bör̂i nââ yè-ve. 8 Ökâré pè pè kau Pevaa, na ki pwa vè kau na pwêê-ve, mâ pugèwè-ve cè gëve pâi pa pwêr̂êwaa xi-nya. 9 Ûr̂û ké méar̂i-nya i Pevaa, na ûr̂û-ré na ké méar̂i-ve xi-nya. Cuè vè mör̂ö na gëve rö vi méar̂i xi-nya. 10 Gëve yè pwêr̂êwaa pâr̂â mââyöö xi-nya, gëve yè cuè vè mör̂ö rö-i vi méar̂i xi-nya; na ûr̂û-nya, wè gö pwêr̂êwaa pâr̂â mââyöö i Pevaa xi-nya, gö bör̂i tömâ vè mör̂ö rö-i vi méar̂i xi-e.» 11 «Gö wê cowa êr̂ê yè-ve pâr̂â nô ré cè ki wê tö pwar̂a-ve na vi or̂o xi-nya, mâ cè ki wê pâr̂i-ve na vi or̂o xe-ve. 12 Ökâré mââyöö xi-nya, êr̂ê, gëve vi méar̂i-ve ûr̂û ké méar̂i-ve xi-nya. 13 Nè yè nââ mör̂u xi-e vè ki pâ ker̂e-é na dèxâ kâmö, nè da vi kwéjî na vi méar̂i i dèxâ kâmö rai-e. 14 Gëve yè waa pâr̂â kââ ré gö wê vi câwâ yè-ve, gëve yè bör̂i pâ ker̂e-nya. 15 Gö da aʼyè-ve tëë, êr̂ê, gëve pâr̂â kâmö yar̂i, wè na da tö rhûû na kâmö yar̂i ö kââ-ré na waa na ör̂ökau xi-e, aè, gö aʼyè-ve, êr̂ê, pâ ker̂e-nya, wè pâr̂â kââ wânii ré gö wê pwêr̂ê rai Pevaa, wè gö wê êr̂ê vèa röi yè-ve. 16 Gëve da pâbir̂i-nya mâ na gëve, aè, gö pâbir̂i-ve na gènyâ, mâ pugèwè-ve cè ke-ve vi rö bwêê jë wânii, mâ pwa na pwêê-ve, pwêê ka tö aau, cè ki nââ yè-ve na Pevaa pâr̂â kââ wânii ré gëve yè pëër̂ii yè-è rö néé-nya. 17 Gö yakoa ûr̂û-ré yè-ve, cè ke-ve vi méar̂i-ve.»
Na Cumiir̂i Ièsu Mâ Pâr̂â Pâi Pa Pâgür̂ü Xi-E Na Bwêê Jë Wânii
18 «Nè yè cumiir̂i xe-ve na bwêê jë, gëve wê tâwai, êr̂ê, na cumiir̂i xi-nya baayê rai-ve. 19 Gëve yè pâ ker̂e bwêê jë, nè yè bör̂i méar̂i pâ ker̂e-é na bwêê jë; aè, xè-i ké da pâ ker̂e bwêê jë xe-ve, mâ gö pâbir̂i-ve na gènyâ xè-i bwêê jë, ökâré pûû ké yè cumiir̂i xe-ve i bwêê jë. 20 Tâ néxâi nô ré gö êr̂ê yè-ve, êr̂ê: “Na da vi kwéjî na kâmö yar̂i rai ör̂ökau xi-e”. É yè wê cowa waa vè yaané-nya, é yè waa vè yaané-ve bar̂ee; é yè wê cowa cëi nô xi-nya, é yè cëi bar̂ee nô xe-ve. 21 Aè cér̂é yè waa yè-ve pâr̂â kââ-ré, wè na pûû-é na néé-nya, wè cér̂é da tâwai ö kâmö ré tùr̂ùwaa-nya. 22 Gö yè da pè mi nô yè-r̂é, na ûr̂û ka yè yèri nô ka yaané xé-r̂é; aè, wê tèi nédaa xina, wè na yèri aau rha kââ pè aʼvè e nô ka yaané xé-r̂é. 23 Ö kâmö ré cumiir̂i xi-nya, wè na cumiir̂i bar̂ee Pevaa xi-nya. 24 Gö yè da waa rö némèè-r̂é pâr̂â nêr̂ê ré na da tö waa na dèxâ kâmö, nè yè bör̂i yèri nô ka yaané xé-r̂é; aè tèi nédaa xina, wè cér̂é wê tö rhûû, cér̂é bör̂i i cumiir̂i xi-nya mâ Pevaa xi-nya bar̂ee. 25 Cè ki pè yexèvè ka yu mâ rö mââyöö xé-r̂é, êr̂ê: “Cér̂é cumiir̂i xi-nya bwir̂i, na na yèri pûû-é”.» 26 «Nè yè pwa mi na pè nââbéé â-ve, wè gö yè tùr̂ùwaa-è mi wa-ve xè-i Pevaa, ö kââ-ré ko né avâr̂i mi xè-i Pevaa, ce ré yè ye vè avâr̂i-nya. 27 Aè gëve yè ye vè avâr̂i-nya bar̂ee na gëve, wè gëve tö pwar̂a-nya rö ka rhavûû.»
1 «Gö wê cowa êr̂ê yè-ve pâr̂â kââ-ré cè gëve da paxè-ve xè-i. 2 É yè yayâwâ-ve xè-i pâr̂â mwâ waa ar̂ii, avâr̂i nè yè wê pwa bar̂ee na nédaa né ké yè yö vè mii-ve i kâmö, wè é yè tâ néxâi êr̂ê, é nââ kwââvâr̂â yè Bâô. 3 Cér̂é yè waa pâr̂â nô ka ûr̂û-ré, wè cér̂é da tâwai Pevaa mâ gènyâ bar̂ee. 4 Gö êr̂ê yè-ve pâr̂â nô ré, wè pè aʼvè néxâi yè-ve na ki wê pwa na nédaa, cè gëve tâ néxâi pâr̂â nô ré gö wê êr̂ê yè-ve.»
Wakè I Ko-Ar̂ii
«Gö da êr̂ê vèa yè-ve baayê pâr̂â nô ré xè-i ké mö tö gèré-nya. 5 Aè xina, wè gö yè wê vi waa ö ce ré tùr̂ùwaa-nya, aè na bör̂i yèri rha kâmö rai-ve ré yè ërëwaa-nya, êr̂ê: Gè vi na-wê? 6 Wè na dö vi nénââwêr̂ê vè kau na pwéé-ve xè-i pâr̂â nô ré gö êr̂ê yè-ve. 7 Aè gö êr̂ê avâr̂i yè-ve; nè yè e yè-ve na ki gö yè virai-ve, wè gö yè da virai-ve, nè yè bör̂i da pwa yèr̂i-ve na pè nââbéé â-ve; aè gö yè wê vi, gö yè bör̂i tùr̂ùwaa-è mi wa-ve. 8 Nè yè bör̂i wê pwa, nè yè bör̂i ye vè avâr̂i yè bwêê jë i yaané mâ târi mâ vi rhôôr̂u; 9 wè yaané xè-i ké da tâ néwèi xé-r̂é yè-nya; 10 aè târi, wè gö yè vi na pwar̂a Pevaa xi-nya, gëve yè bör̂i da tö rhûû-nya tëë; 11 aè vi rhôôr̂u, wè é wê cowa rhôôr̂u ce ré kavèè bwêê jë.» 12 «Na pôr̂ô yéyé na pâr̂â kââ ré gö yè êr̂ê yè-ve bar̂ee, aè gëve da tö tâwai yè pwêr̂ê xina. 13 Nè yè wê pwa na ko né avâr̂i, nè yè bör̂i yörhèè-ve rö-i pâr̂â kââ ka avâr̂i wânii, wè nè yè da dö vi êr̂ê vè târ̂ââ, aè nè yè êr̂ê pâr̂â kââ ré na wê pwêr̂ê na ce, mâ êr̂ê vèa yè-ve pâr̂â kââ ré yè pwa. 14 Nè yè pè kau-nya na ce, wè nè yè wê pè rai-nya mâ êr̂ê vèa yè-ve. 15 Néki-nya wânii na pâr̂â néki Pevaa, ökâré pûû ké êr̂ê xi-nya, êr̂ê, nè yè wê pè rai-nya na ce kââ ré nè yè êr̂ê vèa yè-ve.»
Nè Yè Pugèwè-È Yè Vi Or̂o Na Vi Nénââwêr̂ê
16 «Tö wîr̂î rha ka yar̂i, wè, gëve yè da tö rhûû-nya tëë, aè ré tö wîr̂î bar̂ee rha ka yar̂i, na gëve yè mâ dè tö rhûû-nya tëë.» 17 Cér̂é bör̂i vi êr̂ê na bör̂i rai pâi pa pâgür̂ü xi-e, êr̂ê: «Na êr̂ê ûr̂û-ré xi-yé, êr̂ê: “Tö wîr̂î rha ka yar̂i, wè gëve yè da tö rhûû-nya tëë, aè tö wîr̂î rha wê ka yar̂i, gëve yè mâ dè tö rhûû-nya tëë.” “Wè gö yè wê vi na pwar̂a Pevaa?” 18 Cér̂é bör̂i êr̂ê tëë mwâr̂â, êr̂ê: “Na êr̂ê ûr̂û-ré xi-yé na ce, êr̂ê, tö wîr̂î rha ka yar̂i?” Gèvé da tâwai nô né ké êr̂ê xi-e.» 19 Na wê tâwai na Ièsu, êr̂ê, cér̂é bar̂i ërëwaa-è, na bör̂i êr̂ê yè-r̂é na ce, êr̂ê: «Gëve wêr̂êi, gëve vi ërëwaa-ve wa ké êr̂ê xi-nya, êr̂ê, tö wîr̂î rha wê ka yar̂i, wè gëve yè da tö rhûû-nya tëë. Aè tö wîr̂î bar̂ee rha wê ka yar̂i, gëve yè mâ dè tö rhûû-nya tëë. 20 Avâr̂i, avâr̂i gö êr̂ê yè-ve, êr̂ê, gëve yè tââ mâ vi yimémé, aè nè yè vi or̂o na bwêê jë; gëve yè vi nénââwêr̂ê, aè é yè pugèwè ké vi nénââwêr̂ê xe-ve yè vi or̂o. 21 Nè yè wê vi ër̂i na bwè, na bör̂i vi nénââwêr̂ê vè kau, wè na wê pwa na nédaa xi-e, aè nè yè bör̂i tö vèa na o yar̂i, na bör̂i da tâwai tëë ké yè pèii xi-e, wè na vi or̂o wa ké ër̂i xi-e dèxâ kâmö rö-a bwêê jë. 22 Na wii na vi nénââwêr̂ê xe-ve xina, aè gö yè mâ pwa yèr̂i-ve tëë, nè yè bör̂i vi or̂o na pwéé-ve, aè na yèri kâmö ka yè öxar̂a rai-ve vi or̂o xe-ve.» 23 «Na yèri tëë rha kââ ré gëve yè vi ërëwaa-nya wa rèi nédaa-ré. Avâr̂i, avâr̂i, gö êr̂ê yè-ve, êr̂ê, pâr̂â kââ ré gëve yè pëër̂ii yè Pevaa rö-i néé-nya, wè nè yè bör̂i nââ yè-ve na ce. 24 Na mö ké yèri rha kââ ka é pëër̂ii xe-ve rö-i néé-nya. Pëër̂ii, wè gëve yè mâ cëi cè ki wê kau na vi or̂o xe-ve.»
Na Vigâr̂â Rai Bwêê Jë Na Ièsu
25 «Gö êr̂ê yè-ve pâr̂â nô ré, wè gö waa yeyèè, aè nè yè pwa na nédaa-ré, gö yè bör̂i da êr̂ê yè-ve tëë rö-i yeyèè, aè gö yè êr̂ê vèa yè-ve vè târi nô né Pevaa. 26 Tèi ö nédaa-ré, wè gëve yè pëër̂ii rö néé-nya, gö da êr̂ê yè-ve, êr̂ê, gö yè pwaér̂ö yè Pevaa vè ke-ve, 27 wè Pevaa, wè nè yè méar̂i-ve xè-i ké tâ néwèi-nya xe-ve, mâ tâ néxâi êr̂ê, gö mi rai Bâô. 28 Gö wê mi rai Pevaa, mâ pwa rö-a bwêê jë, aè gö yè wê vi tëë xina xè-a bwêê jë wa Pevaa.» 29 Cér̂é bör̂i êr̂ê yè-è na pâr̂â pâi pa pâgür̂ü xi-e, êr̂ê: «Tö rhûû, gè dö êr̂ê vèa e xina, aè gè da êr̂ê tëë yeyèè. 30 Gèvé wê rhîâgür̂ü xina, êr̂ê, gè tâwai rö-i pâr̂â kââ wânii, aè na da dö kââ yè-i na ki ërëwaa-i na dèxâ kâmö; gèvé bör̂i tâ néwèi êr̂ê, avâr̂i gè mi rai Bâô.» 31 Na bör̂i êr̂ê yè-r̂é na Ièsu, êr̂ê: «Gëve wê tâ néwèi xina ré. 32 Aè tö rhûû, nè yè pwa na nédaa, aè na wê pwa xina, na gëve yè rhau vi vidù, mâ kâyâi-nya rhar̂i, aè gö yè da tö rhar̂i, wè na tö pwar̂a-nya na Pevaa. 33 Gö êr̂ê yè-ve pâr̂â nô ré pè aʼvui ko-ve, é yè kôjuwaa-ve rö-a bwêê jë, aè mör̂ö na gëve, wè gö wê cowa pè gu bwêê jë».
Na Pwaér̂ö Na IèsuVè Ki Pâi Pa Pâgür̂ü Xi-E
1 Na wê cowa êr̂ê röi pâr̂â nô ré na Ièsu, na bör̂i komwââda rua na nékö, mâ êr̂ê, êr̂ê: «Pevaa mwêê, na wê pwa na nédaa né, aè, wè pè kau O xi-i cè ki a pè kau-i tëë na O xi-i, 2 xè-i ké wê kâyâi xi-i yè-è cè ki vi winô yè pâr̂â kâmö wânii cè ki wê nââ mör̂u ka yè da tâwai yèri yè pâr̂â kâmö ré gè wê kâyâi-r̂é yè-è. 3 Aè ökââ mör̂u ka da tâwai yèri, êr̂ê, cér̂é yè rhîâgür̂ü-i, wè gè Bâô ka rhaaxâ rö, mâ ö ce ré gè tùr̂ùwaa-è, wè, Ièsu Kérisö. 4 Gö wê cowa pè kau-i rö-a bwêê jë, gö wê waa rö-i pâr̂â nêr̂ê-r̂é gè kâyâi yè-nya cè göi waa. 5 Pevaa éé, pè kau-nya xina rö pwar̂a-i xè-i rhîrhér̂é xi-nya rö pwar̂a-i xiréé, na na mö ké yèri bwêê jë. 6 Gö wê êr̂ê vèa röi néé-i yè pâr̂â kâmö ré gè pè xé-r̂é xè-a bwêê jë, mâ a nââ yè-nya, wè, cér̂é pâr̂â kâmö xi-i na cér̂é, aè, gè wê kâyâi-r̂é yè-nya, cér̂é bör̂i wê köiwaa pâr̂â nô xi-i. 7 Cér̂é wê tâwai xina, êr̂ê, ka mi xè-i xi-i na pâr̂â kââ wânii ré gè nââ yè-nya. 8 Wè, gö nââ yè-r̂é pâr̂â nô ré gè nââ yè-nya, cér̂é bör̂i wê cëi röi, aè cér̂é wê tâwai-e, êr̂ê, gö mi rai-i, mâ cér̂é wê tâ néwèi, êr̂ê, gè tùr̂ùwaa-nya.» 9 «Gö pwaér̂ö vè ké-ré, aè gö da pwaér̂ö vè ki bwêê jë, aè gö dè pwaér̂ö vè ki pâi ré gè nââ-r̂é yè-nya, wè, cér̂é pâr̂â kâmö xi-i na cér̂é. 10 Wè ki-i na pâr̂â néki-nya, aè ki-nya na pâr̂â néki-i, aè é pè kau-nya xè-i xé-r̂é. 11 Aè xina, wè gö da tö-a tëë bwêê jë, aè dè cér̂é rö ré yè cuè rö-a bwêê jë, aè, gö yè wê vi wa-i. Pevaa ka ar̂ii, na e na gè târ̂î-r̂é rö-i néé-i, néé ré gè nââ yè-nya, cè ké-r̂é rhaaxâ ûr̂û ru. 12 Gö târ̂î-r̂é rö-i néé-i, néé ré gè nââ yè-nya, na gö mö ké tö pwar̂a-r̂é, gö wê dè târ̂î-r̂é, na da bör̂i wii dèxâ rai-r̂é ka yèri-e, rhaaxâ rö wi-ré dè o i yerii, cè ki yexèvè ka yu mâ. 13 Aè gö yè wê vi wa-i xina, aè gö êr̂ê vèa yè-i pâr̂â nô ré na gö mö ké tö bwêê jë, cè ki yexèvè vi or̂o xi-nya rö pâr̂â pwéé-r̂é. 14 Gö wê cowa nââ yè-r̂é nô xi-i; aè na cumiir̂i xé-r̂é na bwêê jë xè-i ké da pâr̂â kâmö xè bwêê jë xé-r̂é, na ûr̂û-nya, wè gö da kâmö xè bwêê jë. 15 Gö da pëër̂ii yè-i cè gèi pè xé-r̂é xè-a bwêê jë, aè cè gèi târ̂î-r̂é rai nô ka yaané. 16 Cér̂é da pâr̂â kâmö xè bwêê jë, na ûr̂û-nya, wè gö da kâmö xè bwêê jë. 17 Rheewaa-r̂é xè-i avâr̂i xi-i, wè nô xi-i ka avâr̂i. 18 Gèi wè gè tùr̂ùwaa-nya na bwêê jë, na ûr̂û bar̂ee ké tùr̂ùwaa-r̂é xi-nya na bwêê jë. 19 Gö dè rheewaa-nya vè ké-r̂é cè ké-r̂é ar̂ii rö-i avâr̂i.» 20 «Aè gö da pwaér̂ö vè ké-r̂é rhar̂i, aè vè ki bar̂ee pâr̂â kâmö ré cér̂é yè wê tâ néwèi-nya xè-i pâr̂â nô xé-r̂é, 21 cè ké-r̂é rhaaxâ rö na cér̂é wânii, na ûr̂û-i wè Pevaa, wè gè tö pwéé-nya, aè gö tö pwéé-i bar̂ee, cè ké-r̂é vi rhaaxâ vèâ göru-r̂é, cè ki tâ néwèi na bwêê jë, êr̂ê, gè tùr̂ùwaa-nya. 22 Aè rhîrhér̂é ré gè nââ yè-nya, wè gö wê nââ yè-r̂é röi, cè ké-r̂é rhaaxâ rö na cér̂é ûr̂û ké rhaaxâ xi-ru. 23 Wè gö tö xé-r̂é, mâ gèi wè gè tö xi-nya, cè ké-r̂é dö rhaaxâ rö, cè ki wê tâwai na bwêê jë, êr̂ê, gè tùr̂ùwaa-nya, mâ méar̂i-r̂é, na ûr̂û ké méar̂i-nya xi-i. 24 Pevaa xi-nya mwêê, gö rhî vè e na ki tö gèvé rö kaa töö xi-nya na pâr̂â kâmö ré gè nââ-r̂é yè-nya, cè ké-r̂é tö rhûû rhî xi-nya ré gè a nââ yè-nya, wè gè méar̂i-nya na é da tö yùè kavèè bwêê jë. 25 Pevaa ka târi mwêê, na da tâwai-i na bwêê jë; aè gö tâwai-i rö na gènyâ, mâ cér̂é ré tâwai êr̂ê gè tùr̂ùwaa-nya. 26 Gö êr̂ê vèa yè-r̂é néé-i, aè gö yè dè bâ êr̂ê vèa yè-r̂é cè ki dè tö pwéé-r̂é na vi méar̂i ré gè méar̂i-nya i, mâ cè göi tö pwéé-r̂é na gènyâ.»
Ké Tuwir̂i Ièsu
1 Na wê êr̂ê röi pâr̂â nô ré na Ièsu, cér̂é bör̂i tawarher̂e nérhexa rö Kédéro, cér̂é vèâ pâr̂â pâi pa pâgür̂ü xi-e, mâ vi ru rö dèxâ döwö nékêê ka tö-i, cér̂é pâr̂â pâi pa pâgür̂ü xi-e bar̂ee. 2 Aè na wê tâwai döwö-ré na Juda, kâmö ré ârui-e, wè cér̂é bâ vi nai yawi na Ièsu mâ pâr̂â pâi pa pâgür̂ü xi-e. 3 Na bör̂i pwa rö-i na Juda, cér̂é vèâ pâr̂â kâmö mâ pâi pa vi târ̂î, wè cér̂é tùr̂ùwaa-r̂é na pâi pa vi winô i pâi pa nâânévâ mâ pâr̂â farésaiö, cè ké-r̂é vi nai xar̂a pâr̂â mwââ kêmör̂u mâ pâr̂â yèi mâ pâr̂â nékwêêr̂ê paa. 4 Aè na dè tâwai na Ièsu pâr̂â kââ wânii ré yè pwa yèr̂i-e, na bör̂i vi par̂èè-r̂é mâ êr̂ê yè-r̂é, êr̂ê: «Wîr̂î ré gëve vi mèyè?» 5 Cér̂é bör̂i êr̂ê yè-è, êr̂ê: «Ièsu, wi xè Nazarèt.» Na bör̂i aʼcëi yè-r̂é na Ièsu, êr̂ê: «Gènyâ-a.» Aè na tömâ cér̂é Juda, wi-ré ârui-e. 6 Na wê cowa êr̂ê ûr̂û-ré yè-r̂é, êr̂ê: «Gènyâ-a,» cér̂é bör̂i öyâî tëë mâ bèi ria na bwêê jë. 7 Na bör̂i ërëwaa-r̂é tëë na ce, êr̂ê: «Wîr̂î ré gëve vi mèyè?» Cér̂é bör̂i êr̂ê yè-è, êr̂ê: «Ièsu, wi xè Nazarèt.» 8 Na bör̂i êr̂ê yè-r̂é na Ièsu, êr̂ê: «Gö wê êr̂ê yè-ve kër̂ëë, êr̂ê, gènyâ-â, gëve yè vi mèyè-nya, na e na gëve bör̂i kâyâi pâi-â cè ké-r̂é vi.» 9 Na êr̂ê ûr̂û-ré cè ki yexèvè nô ré na wê êr̂ê, êr̂ê: «Nè yè da bwir̂i na dèxâ kâmö rai pâi ré gè nââ-r̂é yè-nya.» 10 Aè na wii na o taua i Simona Pètèru, na bör̂i kui rua xè-i mwââ-ê, mâ rhau kâmö yar̂i i wi ka nâânévâ, na bör̂i yöör̂u böödê-ê é gaamëë. Néé kâmö yar̂i-ré, wè Malékus. 11 Na bör̂i êr̂ê yè Pètèru na Ièsu, êr̂ê: «Nââ ria tëë o taua xi-i rö mwââ-ê, na wêr̂êi, gö yè da wâyö mwâ wâyö né bwêêpë ré na nââ yè-nya na Pevaa?»
É Yörhèè Ièsu Yè Hanna
12 Cér̂é bör̂i tuwir̂i Ièsu na pâr̂â paa, mâ pâi pâ kâmö yar̂i i pâi xè Juda, mâ pöi-e. 13 Cér̂é bör̂i yörhèè-è baayê yè Hanna, wè na pârhââ Kaifa, kâmö ka vi winô i pâi pa nâânévâ rèi nédö ré. 14 Aè, Kaifa, wè kâmö ré êr̂ê xiréé yè pâi xè Juda, êr̂ê: «Na dö kââ na ki mé na rha kâmö vè ki névâ.»
Na Vi Yiâ I Ièsu Na Pètèru
15 Na bör̂i vi ua Ièsu na Simona Pètèru, mâ dèxâ wi ka pâgür̂ü bar̂ee ka é tâwai-e i kâmö ka vi winô i pâi pa nâânévâ, na bör̂i vi ru wa Ièsu rö némwâ caxé. 16 Aè na tömâ rö bwêê wêyê na Pètèru. Na bör̂i vi rua tëë na wi ka pâgür̂ü-ré na tâwai-e na kâmö ka vi winô i pâi pa nâânévâ, mâ êr̂ê yè bwè-ré vi târ̂î mèö mwâ cè ki mâ aʼyè Pètèru na mwâ. 17 Na bör̂i êr̂ê yè Pètèru na bwè-ré vi târ̂î mèö mwâ, êr̂ê: «Na wêr̂êi, gè da kâmö béé pâr̂â pâi pa pwêr̂êwaa wi-a?» Na bör̂i êr̂ê na ce, êr̂ê: «Na da gènyâ.» 18 Aè cér̂é tömâ rö-i na pâi pâ kâmö yar̂i mâ pâi pa vi târ̂î, wè cér̂é ku kêê i pâr̂â jöxavé, wè na kau na rhâô, cér̂é bör̂i tö-a tâ maaxé. Na bör̂i dè tö cér̂é na Pètèru, wè na tö vi tâ maaxé rö pwar̂a-r̂é.
Na Ërëwaa Ièsu Na Ka Vi Winô I Pâi Pa Nâânévâ
19 Na bör̂i ërëwaa Ièsu na kâmö ka vi winô i pâi pa nâânévâ wa pâi pa pâgür̂ü xi-e mâ vi pur̂â xi-e. 20 Na bör̂i êr̂ê yè-è na Ièsu, êr̂ê: «Gö pèri vèa röi yè ba wânii, aè gö bâ vi pur̂â rö mwâ waa ar̂ii, mâ mwâ ka ar̂ii ré cér̂é bâ vi kâ vèâi rö-i na pâi xè Juda, aè na yèri aau dèxâ nô gö yè êr̂ê uyûi. 21 Na wêr̂êi, gè ërëwaa-nya? Na e na gèi ërëwaa pâr̂â kâmö pa wê pwêr̂ê nô xi-nya, wè cér̂é tâwai pâr̂â kââ ré gö êr̂ê.» 22 Na wê cowa êr̂ê ûr̂û-ré, na bör̂i dèi-e na dèxâ kâmö ka vi târ̂î, ka tömâ vè ubwa i-e mâ êr̂ê, êr̂ê: «Gè tëvë ûr̂û-ré xi-yé yè kâmö ka vi winô i pâi pa nâânévâ?» 23 Na bör̂i êr̂ê yè-è na Ièsu, êr̂ê: «Nè yè yaané na ké êr̂ê xi-nya, gèi pèri waanawê nô ka yaané-ré, aè nè yè târi na ké êr̂ê xi-nya, gè bör̂i ya-nya wa yé?» 24 Na bör̂i tùr̂ùwaa Ièsu na Hanna, na na wê tö êê pö yè Kaifa, kâmö ka vi winô i pâi pa nâânévâ.
Na Vi Yiâ I Ièsu Tëë Na Pètèru
25 Aè Simona Pètèru wè na tö-a tömâ, wè na tâ maaxé. Cér̂é bör̂i êr̂ê yè, êr̂ê: «Gèi bar̂ee dèxâ rai pâi pa pâgür̂ü xi-e?» Na bör̂i vi yiâ na ce mâ êr̂ê: «Bwaa, na da gènyâ.» 26 Na bör̂i êr̂ê na dèxâ rai pâi pâ kâmö yar̂i i kâmö ka vi winô i pâi pa nâânévâ, cur̂u pâ ker̂e-r̂u vèâ cur̂u wi-ré na yöör̂u böödê-ê na Pètèru, êr̂ê: «Gö da tö rhûû-u vèâ mâ rö né döwö?» 27 Na bör̂i vi yiâ na Pètèru, aè na bör̂i ya na méyë.
Ièsu Rö Pwar̂a Pilato
28 Cér̂é bör̂i yörhèè Ièsu rai Kaifa na wêê mwâ i ör̂ökau rèi wêê daa. Aè cér̂é da tö vi ru rö mwâ i ör̂ökau, wè wé-r̂é boaa, cér̂é yè bör̂i da tâwai ara êê ara né Paséka. 29 Na bör̂i tùr̂ùwaa-r̂é na Pilato, mâ êr̂ê yè-r̂é, êr̂ê: «Jië na nô ka yaané i ö kâmö-a ré gëve mi na ka vi kââr̂â i-e wa?» 30 Cér̂é bör̂i êr̂ê yè-è, êr̂ê: «Nè yè yèri nô ka yaané xi-e, gèvé yè da tâwai yè kâyâi-e yè-i.» 31 Na bör̂i êr̂ê yè-r̂é na Pilato, êr̂ê: «Pè xi-e na gëve mâ ërëwaa-è, na ûr̂û mââyöö xe-ve.» Cér̂é bör̂i êr̂ê yè-è na pâi xè Juda, êr̂ê: «Na da wii na târi yè-vé né ké yè yö vè mii kâmö.» 32 Cè ki yexèvè nô ré na êr̂ê na Ièsu mâ, wè na êr̂ê vèa nô né ké yè mé xi-e. 33 Na bör̂i vi ru tëë na Pilato rö mwâ i ör̂ökau, na bör̂i aʼyè Ièsu, mâ êr̂ê yè-è, êr̂ê: «Na wêr̂êi, gè ör̂ökau i pâi xè Juda na gèi?» 34 Na bör̂i êr̂ê yè-è na Ièsu, êr̂ê: «Gè êr̂ê vi bwir̂i nô ré ra, na wii na dèxâ kâmö ka pèri vèa-nya yè-i?» 35 Na bör̂i êr̂ê yè-è na Pilato, êr̂ê: «Gö wi xè Juda bar̂ee na gènyâ? Aè cér̂é kâyâi-i yè-nya na pâi pâ ker̂e-i mâ pâi pa vi winô i pâi pa nâânévâ. Aè ö jië na kââ ré gè waa?» 36 Na bör̂i êr̂ê yè-è na Ièsu, êr̂ê: «Na da pûû-é rö-a bwêê jë na mwâcir̂i xi-nya. Aè nè yè pûû-é rö-a bwêê jë na mwâcir̂i xi-nya, cér̂é yè bör̂i vi paa na pâr̂â kâmö xi-nya cè ké-r̂é da kâyâi-nya yè pâi xè Juda; aè na da pûû-é rö-a na mwâcir̂i xi-nya.» 37 Na bör̂i êr̂ê yè-è na Pilato, êr̂ê: «Gè ör̂ökau?» Na bör̂i aʼcëi yè-è na Ièsu, êr̂ê: «Ö kââ-ré gè wê dè êr̂ê, êr̂ê, gö ör̂ökau, wè é ër̂i-nya cè ki ûr̂û-ré, mâ cè göi pè yexèvè avâr̂i yè bwêê jë. Aè pâr̂â kâmö ré avâr̂i wânii, wè cér̂é rhau tö pwêr̂ê mêr̂ê aʼ xi-nya.» 38 Na bör̂i êr̂ê yè-è na Pilato, êr̂ê: «Jië na avâr̂i?»
É Yè Yö Vè Mii Ièsu
Na wê cowa êr̂ê ûr̂û-ré na ce, na bör̂i vi rua tëë wa pâi xè Juda mâ êr̂ê yè-r̂é, êr̂ê: «Gö da tö rhûû dèxâ nô rai-e ré é vi kââr̂â i-e wa. 39 Aè ké waa xe-ve, wè, gö yè bâ cöö dèxâ kâmö mâ kâyâi-e yè-ve rèi nédaa né Paséka, aè nè wêr̂êi, gëve yè rhî vè e na ki gö cöö ör̂ökau i pâi xè Juda mâ kâyâi-e yè-ve?» 40 Cér̂é bör̂i rhau êr̂ê vè mör̂ö, êr̂ê: «Aè na da ce, aè na e na wi-a Barabas!» Wi-a Barabas, wè wi ka pâr̂â.
Na Kâyâi Ièsu Na Pilato Yè Pâi Xè Juda
1 Na bör̂i pè Ièsu na Pilato mâ nââ-ê cè ki mâ kujir̂è-è. 2 Cér̂é bör̂i xa ber̂a pâr̂â köö kêê ka köyir̂ida na pâi pa vi paa vè bwaar̂a, mâ pè bar̂i-e i, mâ pè cur̂i-e i dèxâ mêr̂ê ka mii aau, 3 mâ êr̂ê yè-è, êr̂ê: «Aauu, ör̂ökau i pâi xè Juda.» Cér̂é bör̂i dèi-e. 4 Na bör̂i vi rua tëë na Pilato mâ êr̂ê yè-r̂é, êr̂ê: Tö rhûû, gö tù rua xar̂a-è yè-ve, cè gëve tâwai, êr̂ê: «Gö da tö rhûû dèxâ nô ka yaané rai-e cè ki pè vi kââr̂â i-e.» 5 Na bör̂i tù rua bar̂ee na Ièsu, wè é pè bar̂i-e i bwaar̂a kör̂öna ka köyir̂ida, aè na cur̂i mêr̂ê ka mii aau. Na bör̂i êr̂ê yè-r̂é na Pilato, êr̂ê: «Ökâré kâmö!» 6 Cér̂é wê tö rhûû-é na pâi pa vi winô i pâi pa nâânévâ, mâ pâi pa vi târ̂î, cér̂é bör̂i êr̂ê vè mör̂ö yè-è, êr̂ê: «Pè cevè-è rö sataurö! Pè cevè-è rö sataurö!» Na bör̂i êr̂ê yè-r̂é na Pilato, êr̂ê: «Pè xi-e vèr̂i na gëve mâ pè cevè-è rö sataurö, wè gö da tö rhûû na gènyâ nô ka yaané xi-e.» 7 Cér̂é bör̂i aʼcëi yè-è na pâi xè Juda, êr̂ê: «Na wii na mââyöö xé-vé, aè na yexèvè na mââyöö, êr̂ê, na e na ki mé xè-i ké dè êr̂ê xi-e êr̂ê, na O i Bâô na ce.» 8 Na wê pwêr̂ê nô ré na Pilato, na bör̂i bar̂a vè kau aau. 9 Na vi ru tëë na ce rö mwâ i ör̂ökau mâ êr̂ê yè Ièsu êr̂ê: «Gè mi xè-wè?» Na bör̂i da aʼcëi-e na Ièsu. 10 Na bör̂i êr̂ê yè-è na Pilato, êr̂ê: «Gè da aʼcëi-nya xi-yé? Gè da tâwai êr̂ê, na wii na ar̂inadö xi-nya né ké yè kâyâi-i, aè na wii bar̂ee na ar̂inadö xi-nya né ké yè pè cevè-i rö sataurö?» 11 Na bör̂i êr̂ê yè-è na Ièsu, êr̂ê: «É yè da nââ yè-i mi xè rua, nè yè bör̂i yèri ar̂inadö xi-i rai-nya, ökâré nè yè bör̂i kau na yaané i kâmö ré kâyâi-nya yè-i rai-i.» 12 Na rhavûû rèi céréé na Pilato ki yè mè wêyê né ké yè cöö-è, cér̂é bör̂i aʼ na pâi xè Juda, mâ êr̂ê: «Gè yè cöö ö kâmö-a, gè yè da wi ker̂e Kaisara na gèi, wè, ö kâmö ré yè dè pugèwè-è vè kau, wè cur̂u yè wê vi rhîaa xi-r̂u cur̂u Kaisara.» 13 Na wê tö pwêr̂ê nô ré na Pilato, na bör̂i pè Ièsu na bwêê wêyê, na bör̂i cuè rö kaa per̂e né vi rhôôr̂u nô na ce, ö kaa cuè ré, wè, néé-é na «Pèyaa é waa e», aè mêr̂ê aʼ xè Hébèru, «Gabata». 14 Aè, nédaa-ré, wè nédaa né kâ vè tö vâ Paséka, tèi goowé karèè. Na bör̂i êr̂ê na Pilato yè pâi xè Juda, êr̂ê: «Tö rhûû ör̂ökau xe-ve!» 15 Cér̂é bör̂i êr̂ê vè mör̂ö, êr̂ê: «Pè xi-e vèr̂i, pè xi-e vèr̂i, mâ pè cevè-è rö sataurö!» Na bör̂i êr̂ê yè-r̂é na Pilato, êr̂ê «Gö yè pè cevè ör̂ökau xe-ve?» Cér̂é bör̂i êr̂ê yè-è na pâi pa vi winô i pâi pa nâânévâ, êr̂ê: «Na yèri bar̂ee dèxâ ör̂ökau xé-vé, aè rhaaxâ rö Kaisara.» 16 Na bör̂i wê kâyâi-e yè-r̂é cè ké-r̂é pè cevè-è rö sataurö. Cér̂é bör̂i pèi Ièsu.
É Pè Cevè Ièsu Rö Sataurö
17 Aè na dè kââ sataurö na ce, mâ pè na dèxâ kaa töö, néé-é «na Ka nââ për̂ë gwâ», aè néé-é rö-i mêr̂ê aʼ xè Hébèru, «Golgota». 18 Ökâré kaa töö ré cér̂é pè cevè-è rö-i, é pè cevè-r̂é vèâ bar̂ee kaar̂u kâmö, cur̂u rhau tö duö ékar̂aè i Ièsu. 19 Na bör̂i yu dèxâ ka yu na Pilato, mâ nââ rö sataurö. Aè é yu ûr̂û-â, êr̂ê: «Ièsu, Wi Xè Nazarèt, Ör̂ökau i Pâi Xè Juda.» 20 Cér̂é pôr̂ô yéyé na pâi xè Juda pa vâr̂â ka yu ré, xè-i ké tö vè ubwa i névâ na kaa töö ré cér̂é pè cevè Ièsu rö-i; aè é yu nô ré rö-i mêr̂ê aʼ xè hébèru, mâ roma mâ héléni. 21 Cér̂é bör̂i êr̂ê yè Pilato na pâi pa winô i pâi pa nâânévâ i pâi xè Juda, êr̂ê: «Koa yè yu ûr̂û-ré, êr̂ê: “Ör̂ökau i pâi xè Juda”, aè na e na gè yu ké êr̂ê xi-e, êr̂ê: “Gènyâ, wè ör̂ökau i pâi xè Juda.”» 22 Na bör̂i êr̂ê yè-r̂é na Pilato, êr̂ê: «Ö ka yu xi-nya, wè gö wê cowa yu.» 23 Cér̂é wê pè cevè Ièsu na pâr̂â paa, cér̂é bör̂i pè pâr̂â mêr̂ê-ê mâ vi wii vè kavùè cè ki pâr̂i-r̂é. Aè cér̂é pè bar̂ee jer̂e kwêêr̂ê mêr̂ê ka é da rhu, aè ka é lë wânii. 24 Cér̂é bör̂i vi êr̂ê nô né êr̂ê: «Gèré yè da rhètia, aè na e na gèré vi yai cè ki tâ mwér̂é na kâmö ka yè pè.» Na yexèvè ka yu mâ êr̂ê: «Cér̂é vi wii pâr̂â mêr̂ê-nya, Aè cér̂é vi yai jer̂e kwêêr̂ê mêr̂ê-nya.» Cér̂é waa ûr̂û-ré na pâr̂â paa. 25 Aè na tömâ vè ubwa i sataurö na pâni Ièsu mâ bwè pâdii pâni-e, bwè-ré Maria kui Kléopas, mâ Maria Magadaléna. 26 Na wê tö rhûû pâni-e na Ièsu, mâ dèxâ kâmö ka pâgür̂ü xi-e ré na dö méar̂i-e, na cur̂u tömâ vè ubwa i-e, na bör̂i êr̂ê yè pâni-e, êr̂ê: «Nyanyâ, tö rhûû, wè ökââ o xi-i.» 27 Na bör̂i êr̂ê bar̂ee yè ka pâgür̂ü xi-e, êr̂ê: «Wè ökââ pâni-i.» Aè na rhavûû tèi pè mèèxa ré, na bör̂i pè xi-e na wêê mwâ xi-e na kâmö ka pâgür̂ü.
Ké Pèii Mé Ièsu
28 Na bör̂i tèi nédèè, na wê tâwai na Ièsu, êr̂ê, na wê var̂awê röi pâr̂â nô wânii cè ki yexèvè ka yu mâ, na bör̂i êr̂ê, êr̂ê: «Gö bar̂i wâyö.» 29 Na tö-i na rha mwâ rhëë, wè é yùvè rhâri xè-i ka né mââ, cér̂é bör̂i löö pè jii rhëë rö ka né mââ mâ nââ rö böömèè kêê hysop, mâ yùù rua na néwâ-ê. 30 Na wê cowa cëi ka né mââ na ce, na bör̂i êr̂ê, êr̂ê: «É wê dö rhau waa röi.» Na bör̂i tâ nôô ria mâ wê kâyâi ko
Na Rhöwöxè Kwèèvôr̂ô Ièsu Na Dèxâ Kâmö Né Paa
31 Cér̂é bör̂i pëër̂ii yè Pilato na pâi xè Juda cè ki kurher̂e pâr̂â köwi xè ria pâi ré tö sataurö, mâ pè xé-r̂é ria, xè-i ké nédaa né kâ vè tö vâ, cè ki da cör̂ö rö sataurö na pâr̂â kar̂ö-r̂é rèi nédaa ar̂ii ré. 32 Cér̂é bör̂i vi na pâr̂â paa na ka kurher̂e duö köwi xè ria i dui ré é pè cevè-r̂é vèâ Ièsu. 33 Aè cér̂é bör̂i pwa yèr̂i Ièsu, cér̂é bör̂i tö rhûû-é na na wê mé, cér̂é bör̂i da rharher̂e duö köwi-e xè ria. 34 Aè dèxâ rai-r̂é, wè na rhöwöxè kwèèvôr̂ô-ê i dèxâ jë, na bör̂i jö na war̂a mâ rhëë. 35 Aè na ye vè avâr̂i na kâmö ré tö rhûû-é, wè na avâr̂i na ké pè ye vè avâr̂i xi-e, aè na wê rhîâgür̂ü-é, êr̂ê, na dö avâr̂i na ké êr̂ê xi-e, cè gëve tâ néwèi na gëve. 36 Aè é waa pâr̂â nô ré cè ki yexèvè ka yu: «Nè yè da mwér̂é na dèxâ juu-é.» 37 Aè na êr̂ê bar̂ee dèxâ ka yu, êr̂ê: «Cér̂é yè rhîwir̂i-e na pâi ré rhöwöxè-è.»
É Nââ Ièsu Rö Dèxâ Kaa Vi Uyû
38 Bör̂i tèi nédèè, Ioséfa wi xè Arimatéa, dèxâ kâmö ka pwêr̂êwaa Ièsu, ka da vi vèâ, wè na bar̂a i pâi xè Juda, wè na vi pëër̂ii yè Pilato cè ki nââ yè-è kar̂ö Ièsu. Na bör̂i nââ yè-è na Pilato. Na bör̂i vi na ce mâ pè kar̂ö Ièsu. 39 Na bör̂i vi bar̂ee na Nikodème, wi-ré vi kwéyëër̂i baayê Ièsu tèi bwê, na pè mi rhëë muro ka é ber̂a vèâ vè rhaaxâ vèr̂i aloès, na ûr̂û karir̂i kâmö mâ pârör̂ö litre. 40 Cér̂é bör̂i pè kar̂ö Ièsu, cér̂é bör̂i yayöu-é i mwââlöö lino mâ pâr̂â kââ ka borhêê, na ûr̂û câwâ i pâi xè Juda, na cér̂é vi uyû kâmö ka mé. 41 Na dè tö-i na dèxâ kaa yi mwâ tö ökâré cér̂é pè cevè Ièsu rö-i, aè tö kaa yi mwâ-ré, wè na wii na rha mwâér̂é ka mö ké döwöö, ka é da tö nââ kâmö ka mé rö-i. 42 Cér̂é bör̂i nââ Ièsu rö-i, xè-i ké nédaa né kâ vè tö vâ i pâi xè Juda, mâ na tö vè ubwa na mwâér̂é ré.
Na Yèri Êê Kaa Vi Uyû
1 Tèi nédaa ka baayê né pâr̂â nédaa ka kanii na ma kaar̂u, na bör̂i vi na Maria Magadaléna tèi wêê daa, na ka tö rhûû kaa vi uyû, na bör̂i tö rhûû pèyaa, wè é wê puè virai xè kaa vi uyû. 2 Na bör̂i rhâmâ na ce, mâ vi cêmèèr̂i Simona Pètèru, mâ dèxâ kâmö ka pâgür̂ü ré na méar̂i-e na Ièsu, mâ êr̂ê yè-r̂u, êr̂ê: «Cér̂é wê pèi ör̂ökau xè kaa vi uyû, gèvé bör̂i da tâwai ö kââ-ré cér̂é nââ-ê rö-i.» 3 Cur̂u bör̂i vi rua na Pètèru mâ dèxâ kâmö ka pâgür̂ü-ré, mâ vi na ka tö rhûû kaa vi uyû. 4 Cur̂u bör̂i rhau rhâmâ, na bör̂i rhâmâ vè cêê na kâmö ré rai Pètèru, mâ pwa baayê rö kaa vi uyû. 5 Na bör̂i tö jömè yè-è, na bör̂i tö rhûû rö pâr̂â mwââlöö lino na na tö-i, aè na da vi ru rö na ce. 6 Na bör̂i xa pwa na Simona Pètèru, wè na vi rhaadè vi, na bör̂i vi ru rö kaa vi uyû, na bör̂i tö rhûû rö pâr̂â mwââlöö na na tö-i, 7 mâ mwââlöö bar̂ee pè pöi gwâ-ê, na bör̂i da tö vè rhaaxâ vèr̂i pâr̂â mwââlöö, aè na dè pi kur̂u rhar̂i rö dèxâ êê mwâ, wè, na wê tö é rhöö. 8 Na bör̂i vi ru bar̂ee na wi ka pâgür̂ü-ré pwa baayê kër̂ëë rö kaa vi uyû, na bör̂i tö rhûû mâ tâ néwèi. 9 Wè cér̂é da tö tâ pâgür̂ü ka yu mâ', êr̂ê: “Nè yè tömâ rua tëë na ce xè ka mé xi-e mâ'.” 10 Cur̂u bör̂i vi a mwâr̂â tëë na dui duö kâmö na wêê mwâ xi-r̂u.
Na Vi Pèri-E Na Ièsu Yè Maria Magadaléna
11 Aè na tömâ rö ka vi uyû na Maria, wè na tö-a tââ, mâ tâ rhî ru rö kaa vi uyû; 12 na bör̂i tö rhûû duö angéla na ce, na cur̂u cur̂i mêr̂ê-r̂u ka uè, dèxâ rai-r̂u, wè na cuè rö kaa töö i gwâ-ê, aè dèxâ wè na cuè rö kaa töö i duö köwi xi-e xè ria, tö ö kââ-ré na kur̂u mâ rö-i na kar̂ö Ièsu. 13 Cur̂u bör̂i êr̂ê yè-è, êr̂ê: «Bwè-rè, gè tââ xi-yé?» Na bör̂i êr̂ê yè-r̂u na ce, êr̂ê «Gö tâârùù ör̂ökau xi-nya, wè cér̂é wê pè xi-e, aè gö da tâwai ö kââ-ré cér̂é nââ-ê rö-i.» 14 Na wê cowa êr̂ê ûr̂û-ré na ce, na bör̂i yabér̂é, mâ tö rhûû Ièsu na na tömâ, aè na da tâwai êr̂ê, Ièsu-ré. 15 Na bör̂i êr̂ê yè-è na Ièsu, êr̂ê: «Bwè-rè, gè tââ xi-yé? Gè vi mèyè-ya?» Na bör̂i tâ néxâi na Maria, êr̂ê, kâmö ka vi nyââmöi kaa mar̂a döwö na ce, na bör̂i êr̂ê yè-è êr̂ê: «Ör̂ökau, gè yè pè xi-e, pèri vèa yè-nya ö kââ-ré gè na-ê rö-i, cè göi vi na ka vi pè xi-e.» 16 Na bör̂i êr̂ê yè-è na Ièsu, êr̂ê: «Maria?» Na bör̂i yabér̂é na ce, mâ êr̂ê yè-è êr̂ê: «Raboni!» Ökââ nô-né, wè «Kâmö ka vi pur̂â.» 17 Na bör̂i êr̂ê yè-è na Ièsu, êr̂ê: «Koa yè paxè-nya, wè gö da tö vi rua wa Pevaa, aè vi na ka kwéyëër̂i pâr̂â pâvâdii-nya, mâ êr̂ê yè-r̂é, êr̂ê, gö yè wê vi rua wa Pevaa xi-nya, mâ Pevaa xe-ve bar̂ee, aè na Bâô xi-nya mâ Bâô xe-ve bar̂ee.» 18 Na bör̂i vi na Maria Magadaléna mâ vi yëwaa yè pâi pa pâgür̂ü, êr̂ê: «Gö wê tö rhûû ör̂ökau!» Na êr̂ê yè-r̂é ûr̂û ké êr̂ê yè-è.
Na Vi Pèri-E Na Ièsu Yè Pâi Pa Pâgür̂ü Xi-E
19 Tèi rhêêrè né nédaa-ré, nédaa ka baayê né nédaa kanii na ma kaar̂u, wè cér̂é wê yawi pâr̂â mèö mwâ na pâi pa pâgür̂ü, wè cér̂é wê bar̂a i pâi xè Juda. Na bör̂i pwa na Ièsu mâ tömâ rö négowé né-r̂é, na bör̂i êr̂ê yè-r̂é, êr̂ê: «Ki tö pwar̂a-ve na aʼvui.» 20 Tèi ökâré na êr̂ê ûr̂û-ré yè-r̂é, na bör̂i pèri yè-r̂é duö néxar̂a â-ê xè rua, mâ kwèèvôr̂ô-ê. Cér̂é wê tö rhûû ör̂ökau na pâi pa pâgür̂ü, cér̂é bör̂i vi or̂o vè kau. 21 Na bör̂i êr̂ê yè-r̂é tëë mwâr̂â na Ièsu, êr̂ê: «Ki tö pwar̂a-ve na nâânévâ! Gö tùr̂ùwaa-ve, na ûr̂û Pevaa, wè, na tùr̂ùwaa-nya mâ.» 22 Na wê cowa êr̂ê ûr̂û-ré yè-r̂é, na bör̂i nââ mui-e yè-r̂é, mâ êr̂ê: «Cëi vèr̂i Ko-Ar̂ii. 23 Pâr̂â nô ka yaané i pâr̂â kâmö ré gëve yè kâyâi, wè é yè dè kâyâi rai-r̂é; aè nô ka yaané i pâr̂â kâmö ré gëve yè da kâyâi, é yè bör̂i da cöö rai-r̂é.»
Ièsu Mâ Tomas
24 Aè wi-a Tomas, dèxâ kâmö béé pâi pa pârör̂ö na ma kaar̂u, Didumo na dèxâ néé-é, wè na da tö cér̂é rèi ö kââ-ré na vi pwa yèr̂i-r̂é na Ièsu. 25 Cér̂é bör̂i êr̂ê yè-è na pâi pa pâgür̂ü, êr̂ê: «Gèvé wê vi ya vèâi vé gèvé ör̂ökau.» Na bör̂i êr̂ê yè-r̂é na ce, êr̂ê: «Gö yè da tö vi tö rhûû wê vaö rö néxar̂a â-ê xè rua, mâ yùù mèè â-nya rö wê vaö, mâ yùù mèè â-nya rö kwèèvôr̂ô-ê, gö yè bör̂i da tâ néwèi.» 26 Bör̂i tèi nédèè pâr̂â nédaa ka kanii na ma karir̂i, cér̂é bör̂i tö tëë mwâ na pâi pa pâgür̂ü, aè na wê tö cér̂é na Tomas. Cér̂é wê yâwîî pâr̂â mèö mwâ, na bör̂i pwa yèr̂i-r̂é na Ièsu, na tömâ rö négowé né-r̂é mâ êr̂ê yè-r̂é, êr̂ê: «Ki tö pwar̂a-ve na nâânévâ!» 27 Na bör̂i êr̂ê yè Tomas, êr̂ê: «Pè mi mèè â-i, aè gè tö rhûû duö néxar̂a â-nya, aè pè mi néxar̂a â-i cè gèi yùù rö kwèèvôr̂ô-nya, aè koa yè vi rhèè na wêê nénââ xi-i, wè, na e na ki gèi tâ néwèi.» 28 Na bör̂i aʼcëi yè-è na Tomas, êr̂ê: «Ör̂ökau xi-nya, mâ Bâô xi-nya!» Na bör̂i êr̂ê yè-è na Ièsu, êr̂ê: 29 «Gè tâ néwèi xina xè-i ké tö rhûû-nya xi-i, na kau mâmâ na ko pâr̂â kâmö ré tâ néwèi na cér̂é da tö vi tö rhûû!»
Dö Êê Né Pèci-A
30 Na pôr̂ô yéyé na pâr̂â pètâbâ ré na waa na Ièsu rö némèè pâr̂â pâi pa pâgür̂ü xi-e, aè é da yu röi rö pèci-a. 31 Aè é wê yu röi pâr̂â nô ré cè gëve tâ néwèi, êr̂ê, Ièsu rö Kérisö, O i Bâô, cè ke-ve yè wê tâ néwèi, nè yè bör̂i wii na mör̂u yè-ve rö-i néé-é.
Na Vi Pèri-E Na Ièsu Yè Pâi Pa Pâgür̂ü Paxanii Na mâ Kaar̂u
1 Tèi nédèè nô ré, na bör̂i pèri vèa-è tëë na Ièsu yè pâr̂â pâi pa pâgür̂ü xi-e rö kâr̂âwâ nérhëë rö Tibériade, aè ökââ nô né ké pèri vèa-è. 2 Cér̂é vi kâ vèâi-r̂é na Simona Pètèru mâ Tomas, dèxâ néé-é Didumo, mâ Natanaèl, wè wi xè Kana rö Galilé, mâ dulè Zébédaio mâ kaar̂u bar̂ee rai pâi pa pâgür̂ü. 3 Na bör̂i êr̂ê yè-r̂é na Simona Pètèru, êr̂ê: «Gö wê vi na ka kwâna.» Cér̂é bör̂i êr̂ê yè-è, êr̂ê: «Nè yè vi gèré.» Cér̂é bör̂i vi mâ oè kwâ, aè na yèri êê kwâna ka é ya xé-r̂é tèi bwê-ré. 4 Aè tèi wêê daa, na bör̂i tömâ rö kâr̂âwâ nérhëë na Ièsu, aè cér̂é da rhîâgür̂ü-é na pâr̂â pâi pa pâgür̂ü, êr̂ê Ièsu-ré. 5 Na bör̂i êr̂ê yè-r̂é na Ièsu, êr̂ê: «Névâi yar̂i, na wii na êê öi rö pwar̂a-ve?» Cér̂é bör̂i êr̂ê yè-è, êr̂ê: «Na yèri.» 6 Na bör̂i êr̂ê yè-r̂é na ce, êr̂ê: «Ör̂öi poè rö ékar̂aè é gaamëë né kwâ cè ke-ve tö rhûû.» Cér̂é bör̂i ör̂öi poè, aè xina, wè cér̂é da tâwai rhèè rua poè, wè na dö pôr̂ô yéyé aau na pâr̂â êêwâ. 7 Na bör̂i êr̂ê yè Pètèru na wi ka pâgür̂ü-ré na dö méar̂i-e na Ièsu, êr̂ê: «Ökâré Ör̂ökau!» Na bör̂i tö pwêr̂ê na Pètèru, êr̂ê: «Ör̂ökau-ré», na bör̂i cur̂i mêr̂ê-ê mâ pönémui wè na rhéwèr̂è, na bör̂i koyo ria na nérhëë na ce. 8 Aè cér̂é mö ké mi bar̂ee na bör̂i pâi pa pâgür̂ü rö kwâ, wè cér̂é rhèè rua poè ka rhâri xè-i êêwâ, wè na tö vè ubwa na ka mèr̂i, na ûr̂û kavùè kâmö na ma pârör̂ö mâ dèxâ é â na dâ-né. 9 Cér̂é bör̂i wê cir̂i rö ka mèr̂i, cér̂é bör̂i tö rhûû kêmör̂u jöxavé, mâ pâr̂â êêwâ na na töö kêmör̂u, mâ var̂awa bar̂ee. 10 Na bör̂i êr̂ê yè-r̂é na Ièsu, êr̂ê: «Pè mi bör̂i êêwâ ka é ya xe-ve xina.» 11 Na bör̂i vi rua na Simona Pètèru na kwâ, mâ rhèè rua poè na kâr̂âwâ nérhëë, wè na rhâri xè-i pâr̂â êêwâ ka kau, ka kanii na ma kaar̂u kâmö na ma pârör̂ö na ma karir̂i, aè na da bör̂i mee na poè xè-i pâr̂â êêwâ ka pôr̂ô yéyé. 12 Na bör̂i êr̂ê yè-r̂é na Ièsu, êr̂ê: «Gëve mi na ka ara.» Aè na yèri dèxâ kâmö rai-r̂é ka yè mör̂ö na wêê nénââ xi-e cè ki ërëwaa-è, êr̂ê: «Gèi wîr̂î?» Wè cér̂é wê tâwai, êr̂ê, ce wè ör̂ökau. 13 Na bör̂i vi vè ubwa i-r̂é na Ièsu, mâ pè var̂awa mâ bör̂i êêwâ mâ nââ yè-r̂é. 14 Ökâré na karir̂i vi pèri vèa-è na Ièsu yè pâi pa pâgür̂ü xi-e, tèi nédèè ké wê mör̂u xi-e tëë xè ka mé.
Ièsu Mâ Pètèru
15 Cér̂é wê cowa ara, na bör̂i êr̂ê na Ièsu yè Simona Pètèru, êr̂ê: «Simona, o i Iona, gè méar̂i-nya rai pâi-â?» Na bör̂i êr̂ê yè-è na ce, êr̂ê: «Üüwa, wè ör̂ökau, gè wê rhîâgür̂ü, êr̂ê, gö dö méar̂i i.» Na bör̂i êr̂ê yè-è na Ièsu, êr̂ê: «Gèi mâ tâ pè ara pâr̂â mutô xi-nya.» 16 Na bör̂i pèkaar̂u vi êr̂ê yè-è tëë, êr̂ê: «Simona, o i Iona, gè méar̂i-nya?» Na bör̂i êr̂ê yè-è na ce, êr̂ê: «Üüwa, wè Ör̂ökau, gè rhîâgür̂ü mâ êr̂ê, gö méar̂i i.» Na bör̂i êr̂ê yè-è na Ièsu, êr̂ê: «Gèi mâ tâ târ̂î pâr̂â mutô xi-nya.» 17 Na bör̂i pèkarir̂i ké pè aʼ-è i Ièsu, êr̂ê: «Simona, o i Iona, gè wê dè méar̂i-nya?» Na bör̂i vi rhèè na wêê nénââ i Pètèru xè-i ké wê karir̂i ké êr̂ê yè-è i Ièsu, êr̂ê: «Gè méar̂i-nya?» Na bör̂i êr̂ê yè-è, êr̂ê: «Ör̂ökau, gè wê rhîâgür̂ü pâr̂â kââ wânii, aè gè wê rhîâgür̂ü, êr̂ê, gö méar̂i i.» Na bör̂i êr̂ê yè-è na Ièsu êr̂ê: «Gèi mâ tâ pè ara pâr̂â mutô xi-nya. 18 Avâr̂i, avâr̂i, gö êr̂ê yè-i, êr̂ê, tèi ökâré gè mö dowa rèi, wè gè dè pönémui-i, aè gè yè dè vi na ökâré gè yè rhî vè e, aè gè yè wê béâr̂i, gè yè bör̂i yùù duö köwi xè rua, aè nè yè pönémui-i na dèxâ kâmö, mâ yörhèè-i na ökâré gè yè da bar̂i rhî vè e.» 19 Na êr̂ê ûr̂û-ré, wè na pèri vèa yè-è nô né ké yè mé xi-e, cè ki pè kau Bâô. Na wê cowa êr̂ê ûr̂û-ré, na bör̂i êr̂ê yè bar̂ee, êr̂ê: «Mi ua-nya na gèi.»
Ièsu Mâ Wi Ka Vi Aʼpâgür̂ü Ré Na Méar̂i E
20 Na bör̂i yabér̂é na Pètèru mâ tö rhûû wi ka aʼpâgür̂ü-ré na dö méar̂i-e na Ièsu, na na mi ua-r̂u, wi-ré cuè rö pèè wââ Ièsu tèi nédaa né vi ara, mâ êr̂ê: «Ör̂ökau, wîr̂î ré yè ârui-i?» 21 Na bör̂i tö rhûû-é na Pètèru, na bör̂i êr̂ê yè Ièsu, êr̂ê: «Ör̂ökau, nè yè mâ wêr̂êi na wi-a?» 22 Na bör̂i êr̂ê yè-è na Ièsu, êr̂ê: «Gö yè rhî vè e ki yè târ̂î-nya na ce kwéyë rua na göi pwa tëë, aè gè ërëwaa-è yè-yé? Ua-nya mi rö na gèi.» 23 Na bör̂i mâ pwânûr̂i na nô ré yè pâi pa ar̂ii, êr̂ê nè yè da mé na ce. Aè na da êr̂ê na Ièsu, êr̂ê: «Nè yè da mé na ce, rhaaxâr̂ö, gö yè rhî vè e cè ki târ̂î-nya na ce kwéyë rua na ki göi pwa tëë, aè gè ërëwaa-è yè-yé?» 24 Ö kâmö ka pâgür̂ü-ré ye vè avâr̂i pâr̂â nô ré, mâ yu pâr̂â nô ré, aè gèré wê tâwai, êr̂ê, na avâr̂i na ké êr̂ê xi-e.
Pè Cowa
25 Aè na dö pôr̂ô yéyé aau na pâr̂â nô ré na êr̂ê na Ièsu, aè é yè rhau yu röi wânii, wè gö tâ néxâi êr̂ê, nè yè da pâr̂i bwêê jë na pâr̂â pèci ré é yè yu.