1 Sa parakayan datiyan apo in Agiplaong. In Agiplaong sarig in Diyos. Siyo Diyos. 2 In bayote in agiplaong sarig in Diyos. 3 In boote piyangwat Diyos, in Agiplaong in agpangwat. In boote no idapo in Agiplaong, na idapo mipangwat. 4 Batang sa kansiyo in boway. In boway in tinglaw sa mga mangyan. 5 Agrawa in tinglaw sa lened. Siyo yewed akaplek lened. 6 In Diyos agsogo mangyan, in ngaran Owan. 7 Siyo atai pataboy matang agbarita keyen, Ina wa in tinglaw, matang in boo mangyan maniwala sa tinglaw panawen sa kansiyo barita. 8 Yewed Owan in tinglaw, no yewed siyo in agbarita keyen, Ina wa in tinglaw. 9 Ina pag betek agrateng sa kobat in tinglaw gayed, na siyo in agrawa sa boo mangyan. 10 Siyo atai pataboy sa kobat. Siyo in agpangwat in mga mangyan, kamay siyo yewed atawanan in mga mangyan. 11 Siyo atai pataboy sa kansiyo kobat, kamay siyo yewed piyabelag kansiyo mga mangyan. 12 Kamay in boo mga agpabelag sa kansiyo, in boo mga agpasandig sa kansiyo, siro boo kansiyo piyakapya matang maal wa mibaloy bodang Diyos. 13 Siro biyodang Diyos, yewed panawen sa biyoslot mangyan, yewed sa beet mangyan, no yewed sa kabaloyan Diyos. 14 In Agiplaong mibaloy mangyan, agbalay wa sa kantam. Siyo in betek wano, in agpakayawte wano gayed. Kanyam ngiitan in kansiyo kalakoyen, kalakoy daan in boktong Bodang kansiyo Amang Diyos. 15 Owan agpaalam panawen sa Agiplaong. Siyo miplaong maksen, keyen, Ina in ako keyen in agrateng paori sa kangay labi kay kalakoy ako, angkataw ako idapo kay, siyo dogay wa boway. 16 Panawen sa kalobaen siyo agpakayawte wano gayed, kitam palagi piyagpakan, piyagpakan. 17 Angkataw Mowisis in agbaba sa kantam in mga Batas Diyos. Kamay IsoKiristo in agbaba in betek sa kantam, in agpakayawte wano gayed sa kantam. 18 Anda pag kadogayen idapo batang kangitan sa Diyos. Kamay in Diyos piyapangkit sa kantam. In kansiyo boktong Bodang, in kansiyo piyagmaal wano, siyo in agpapangkit. 19 In mga poon Odyo sa Irosalim agsogo mga sasirdoti osai mga katolong sasirdoti kay Owan matang agtanong no nakay siyo. 20 Siyo yewed mayabang. Kansiyo siyabi gayed keyen, Yewed ako in Kiristo in piyangako Diyos batay agpamaboway. 21 Siro keyen, Na nakay kao? Kao lames Iliyas? Keyen, Yewed. Keyen siro, Kao lames in Poropita in kanyam piyagpanaya? Keyen, Yewed din. 22 Siro agtanong wakay keyen, Na nakay ngani kao? Sabiyen wa gayed, matang kami apo batay siyabi sa mga agsogo sa kanyam, no nakay batay kaimo siyabi panawen sa kaimo. 23 Keyen Owan, Ako osai ka agiplaong maksen sa moyod keyen, Pakapyaen wa in batay dalan in Kapwan, kataw in siyabi in poropita Isaiyas. 24 In mga agpanggisodan kay Owan siyogo mga Parisiyo. 25 Tagoli wakay siro agtanong kay Owan keyen, Na no yewed kao in Kiristo in piyangako Diyos batay agpamaboway, yewed kao Iliyas, yewed kao in Poropita, na nakay batang kao agbaotismo, in mga mangyan piyagsogbo sa sapa? 26 Siyo keyen, Ako agbaotismo sa sapa, kamay asin kanyo kagwaraan apo mangyan kamo yewed katawan. 27 Siyo sa kangay paoriyan. Siyo lakonaw, ako kalakoyte, yewed sibay kamayba sogowan waget agbaba kansiyo sinilas. 28 Ina mibaloy sa Bitanya, sa ripay sapa Ordan. Asina betek Owan agbaotismo. 29 Paka goribas wakay, Owan kangitan kay Isos agpasabangen sa kansiyo. Siyo keyen, Baati in Bodang Topa batang sa Diyos, in agkowa daet sa boo mangyan. 30 Ina in ako taite keyen, Apo mangyan agrateng paori sa kangay labi kay kalakoy ako angkataw ako idapo kay siyo datiyan agkaboway. 31 Tangona ako yewed kay katawan sa kansiyo, kamayba in dailan kaya ako agbaotismo sa sapa matang siyo piyatoldo sa mga kasokponan Israil. 32 Anda in barita Owan keyen, Kangay ngiitan in Abyan Diyos aglabo batang sa langit kataw bantog kalapati agapon sa kansiyo. 33 Tangona siyo yewed kay kangay atawanan, kamay in agsogo sa kangay matang agsogbo sa sapa, siyo in keyen, Kaimo batay ngiitan osai ka mangyan, in Abyan Diyos aglabo agbalay sa kansiyo. Na siyo in batay agsogbo sa Betek pag Abyan. 34 Ina ngani kangay ngiitan mibaloy asin pag mangyan. Matang ako agbarita keyen, siyo in Bodang Diyos. 35 Paka goribas wakay Owan ista wakay tagoli, osai in dowai ka agadar sa kansiyo. 36 Kansiyo ngiitan Isos domalan. Siyo keyen, Baati wa in Bodang Topa batang sa Diyos. 37 Karengey kansiyo siyabi in dowai ka agadar, kalbas siro mangagak wa kay Isos. 38 Isos managoli, kansiyo ngiitan in dokalaki agyanggat. Siyo keyen, Nakay in kanyo panawen? Siro keyen, Rabi, in beet siyabi Laki Agpamatoldo, saano kaimo pagbalayan? 39 Keyen Isos, Aywawa, kamo mangkit. Siro miyanggat, kansiro ngiitan kansiyo pagbalayan. Ina mangiriyan wate, siro asin sa kansiyo anggan bayapon. 40 Asin pag dowai ka karengey kay Owan miyanggat kay Isos, in osai Anns, belag Simon Pidro. 41 Siyo toloy mamangkit kansiyo belag Simon, siyo keyen, Kanyam wa ngiitan in piyangako Diyos batay agpamaboway. Ina in beet siyabi in Kiristo. 42 Siyo piyaanggat Anris kay Isos. Isos mangkit kay Simon keyen, Kao mana Simon, bodang Owan. Kao batay piyagawit Sipas. In beet siyabi ina pag ngaran Pidro, osai bato. 43 Paka goribas wakay Isos manremrem ista wa pataboy sa Galiliya. Ngiitan siyo Pilipi, keyen, Kao miyanggat sa kangay. 44 Pilipi taga Bitsayda, kataw tayari Anris, osai Pidro. 45 Pilipi mamangkit kay Natanail keyen, Kanyam ngiitan in keyen Mowisis sa aklat mga Batas Diyos, osai keyen in solat mga poropita. Siyo Isos taga Nasarit, bodang Osi. 46 Keyen Natanail, Apo mana aglowas maal sa Nasarit? Keyen Pilipi, Kita wa, kaimo pangkiten. 47 In Isos kangitan Natanail agrateng siyo keyen, Baanda in osai ka kasokponan gayed Israil. Siyo yewed wano agpadaya. 48 Keyen Natanail, Nakay batang kao katawan kangay ogali? Isos keyen, Bayo kao piyaanggat Pilipi, ako kangitan kao agpanagirong sa poon igos. 49 Keyen Natanail, Laki Agpamatoldo, kao in Bodang Diyos, kao in poon lakoy sa mga kasokponan Israil. 50 Isos keyen, Kao mana maniwala panawen ako keyen kao kangay ngiitan sa poon igos? Kao batay kangitan labi kay lakonaw. 51 Siyo keyen kay, Mamarengey gayed sa kangay piyagsabi keyen, Batay kanyo ngiitan masiwang in langit, in mga angil Diyos aglabo agonaik sa kangay sa bodang Mangyan.
1 Paka katolo wakay ka ibeng, apo kasalan sa Kana sa Galiliya. Ista din in inang Isos. 2 Biyerya din Isos, osai in kansiyo mga agadar. 3 Siro alobosan wa alak, kalbas siyabi in inang kay Isos keyen, Siro alobosan alak. 4 Keyen Isos, Dada, ako ayaw kay aglaliyen. Ikkay kabetek ako agpapangkit kangay kabaloyan. 5 Siyabi in inang Isos sa mga katolong keyen, No nakay in siyabi Isos sa kanyo na pangwaten. 6 Asin apo enem ka pagsoroyan lakoy sapa, baatte osai sibay dalwampo ka galon, no yewed tatlompo. Ina mga piyagkailangan sa ogali mga Odyo agogas. 7 Isos keyen sa mga katolong, Pakaknowen sapa in mga pagsoroyan. Kalbas kansiro piyakakno anggan sa lingit. 8 Kalbas keyen Isos, Somikro wa. Babaen wa sa agbagi pamangnen. Kalbas biyaba ngani. 9 In agbagi yewed katawan no saano batang ina pag alak, kamay in mga somikro, siro katawan. Kansiyo tiyepeng in sapa mibaloy wa alak, kalbas kansiyo biyerya in kiyasal pag lalaki, 10 keyen, In kalaati mangyan, piyatokaw in masadap pag alak. Paka karowan wa in iinem, piyalowas wakay in daeten. Kao osai wakay, kaimo piyapaori in masadap agbangen. 11 Ina piyangwat Isos sa Kana, sa Galiliya. Ina in tokaw pag lakonaw pag piyangwat Isos, matang piyapangkit kansiyo kabaloyan. Kalbas in mga agadar maniwala sa kansiyo. 12 Paka kalbas, pataboy Isos sa Kapirnaom. Miyanggat kansiyo inang, mga belag, mga agadar. Siro ista mamataw kamay yewed dogay. 13 Bangen wa in piyasta mga Odyo piyagawit Paskowa, matang Isos pataboy sa Irosalim. 14 Kansiyo ngiitan sa tongkodan balay lakoy Diyos in mga agpabili mga baka, mga topa, mga bantog kalapati, osai in mga agpamalit kowarta. 15 Isos komwa robid. Kansiyo piyangwat pamogbog, biyoyaw sa tongkodan balay lakoy Diyos in mga aglako, kadayo in mga topa, in mga baka. Kansiyo biyenglay in kowarta in mga agpamalit, piyanligan in kansiro mga tabla pagyanganan kowarta. 16 Kansiyo siyabi sa mga agpabili kalapati keyen, Ayaw atai in mga ina. Ayaw agpangwaten palingki in balay kangay Amang. 17 In kansiyo mga agadar manremrem sa siyabi sa mga Agisolat keyen, Diyos, in ako agremrem sa kaimo balay, in maskit sa kangay galem kagwali piyagtebed sa baya. 18 Matang siyo tiyanong in mga poon Odyo keyen, Nakay in agsogo kaimo agpangwat ina? Amba, kao agpangwat in lakonaw pag panawen matang kanyam atawanan Diyos in agsogo sa kaimo. 19 Isos keyen, Regnasen anda pag balay lakoy Diyos. Tagoli wakay kangay piyagpangwat, tolo ka ibeng in agpanawen. 20 Keyen in mga poon Odyo, Apatnapo enem ka dagon in agpangwat anda pag balay lakoy Diyos. Kalbas nakay, kai mo wakay piyagpangwat tolo waget ka ibeng? 21 Kamay in piyagawit Isos balay lakoy Diyos, in beet siyabi kansiyo bilog. 22 Paka Isos boway wakay, in kansiyo mga agadar manremrem wakay sa kansiyo siyabi kataw ina. Matang siro maniwala sa mga Agisolat, osai sa mga siyabi Isos. 23 In Isos sa Irosalim in betek piyasta piyagawit Paskowa, karowan in maniwala sa kansiyo, angkataw kansiro ngiitan in kansiyo mga lakonaw pag piyangwat. 24 Kamay Isos idapo tiwala sa kansiro, 25 angkataw kansiyo daan atawanan siro boo. Kamayba idapo agbarita sa kansiyo keyen kataw ina in mangyan, angkataw baatte mangyan kansiyo daan atawanan in kansiro mga remrem.
1 Apo osai ka Parisiyo in ngaran Nikodimo, siyo poon sa mga Odyo. 2 Osai ka yabi siyo pataboy kay Isos, keyen Laki Agpamatoldo, kanyam atawanan Diyos in agsogo sa kaimo agpatoldo, angkataw idapo batay kapangwat in mga lakonaw pag panawen kataw in kaimo piyagpangwat no yewed siyo piyagsarig in Diyos. 3 Isos keyen, Amba, kao mamarengey, no yewed biyodang wakay tagoli in mangyan, na siyo idbatay ngani piyagsakop in Diyos. 4 Keyen Nikodimo, Nangkataw siyo batay biyodang wakay tagoli no siyo koyay wa? Nakay ina, siyo misoroy wakay sa kansiyo inang boyon matang biyoslot wakay tagoli? 5 Keyen Isos, Totoo ngani, no in osai ka mangyan yewed biyodang sa sapa osai sa Abyan Diyos, na siyo idbatay ngani piyagsakop in Diyos. 6 In biyodang mangyan na mangyan daan, in biyodang in Abyan Diyos na abyan daan. 7 Ayaw magolo in remrem panawen sa kangay siyabi keyen kailangan in boo biyodang wakay tagoli. 8 In kowaya pataboy no saano kansiyo beet. Kao karengey in agaleng, kamay yewed kaimo atawanan no saano agrakay, no saano agrateng. Na kataw daan ina in boo biyodang in Abyan Diyos. 9 Nikodimo keyen, Nangkataw batay mibaloy ina? 10 Isos keyen, Kao osai ka agpatoldo sa mga kasokponan Israil, bago mana kao yewed katawan in kangay mga piyagsabi? 11 Totoo ngani, kami katawan in kanyam piyagsabi, in kanyam piyagbarita kanyam ngani ngiitan, kamay yewed kanyo piyagpaniwala in kanyam barita. 12 Kangay piyagbarita in mga atai sa kobat. No kao yewed maniwala asin na nangkataw kao batay maniwala no in kangay piyagbarita in mga sa langit? 13 Idapo batang monaik sa langit no yewed ako in bodang Mangyan in lomabo batang sa langit. 14 Kataw in bakal pag olay siyokbit Mowisis sa tadyok mabwat sa moyod, na kataw daan ina ako in Bodang Mangyan kailangan din siyokbit, 15 matang in boo agpasandig sa kangay batay apo boway idapo kalobosan. 16 In Diyos agpakayawte wano gayed sa boo mga mangyan, anggan kansiyo tiyaboy in kansiyo boktong Bodang, matang in boo agpasandig sa kansiyo idwa piyarosa sa toyongan, no yewed apo boway idapo kalobosan. 17 Kaya in Diyos agsogo kansiyo Bodang sa kobat, yewed matang agparosa sa mga mangyan, no yewed matang agpaboway sa kansiro. 18 In agpasandig sa boktong Bodang Diyos idwa piyagparosa, dayem in yewed agpasandig sa kansiyo, na piyasyaan wa batay ngani piyagparosa, kataw siyo yewed agpasandig sa kansiyo. 19 Kaya in mga mangyan piyasyaan wa piyagparosa, angkataw in tinglaw atai pataboy sa kobat, kamay kansiro piyagamag in lened, dayo sa mapawa, kataw daeten kansiro mga piyagpangwat. 20 In agpamangwat daet dayo sa tinglaw. Siyo yewed agpasabangen sa tinglaw, karam batay ngiitan in kansiyo mga daet pag panawen. 21 Kamay in agpamangwat in maal, siyo agpasabangen sa tinglaw matang ngiitan in kansiyo piyagpangwat in mga Batas Diyos. 22 Paka kalbas, Isos pataboy sa kobat Odiya. Siyo ista mamataw, kadayo in kansiyo mga agadar. Siro agbaotismo sa mga mangyan. 23 Owan din agbaotismo sa kobat Inon bangen sa Salim angkataw bonton sapa ista. Pataboy sa kansiyo in mga mangyan, siro agpabaotismo. 24 Ina pag betek Owan ikkay bii langgo. 25 Osai ka ibeng apo malaway osai ka Odyo osai in mga agadar kay Owan, no nangkataw in maal pag agogas. 26 Matang siro pataboy kay Owan, keyen, Laki Agpamatoldo, ina pag lalaki in kaimo piyatoldo taite sa ripay Ordan, siyo agbaotismo din. In boo mga mangyan ista agpataboy sa kansiyo. 27 Owan keyen, In mangyan idapo tongkolin no yewed piyakan Diyos. 28 Kamo katawan in ako taite keyen yewed ako in piyangako Diyos batay agpamaboway, ako siyogo waget tokaw sa kansiyo. 29 No apo piyagkasal, na in babai sa lalaki waget. In pagbelag in lalaki, in agpanaya sa agrateng in lalaki, na siyo agkaanggay wa no karengey wa in kansiyo agiplaong. Ngona kataw din ina ako agkaanggay wano gayed. 30 In maal Isos agbangen in piyagpakalakonaw, ako agbangen kalakoyte. 31 In batang sa langit lakonaw sa boo. In datiyan atai sa kobat taga kobat. In mga sa kobat in kansiyo piyagpanggisodan. In batang sa langit siyo in agpapoon sa boo. 32 Kansiyo piyagbarita in kansiyo ngiitan, osai in kansiyo arengeyan, kamay idapo agpaniwala sa kansiyo barita. 33 Kaya in amat kangitan in Diyos yewed mayabang, panawen sa mga agpaniwala sa kansiyo. 34 Angkataw in siyogo in Diyos, siyo agsabi in mga agiplaong Diyos, angkataw in Betek pag Abyan tiyaboy sa kansiyo anggan idbatay masokat in kalakoyen. 35 Piyagmaal in Amang in kansiyo Bodang, tiyaboy sa kansiyo in boote. 36 In agpasandig sa Bodang apo boway idapo kalobosan, dayem in yewed agpasandig sa Bodang, na idapo batay boway. In Diyos agaway agkabais sa kansiyo.
1 In mga Parisiyo abaritaan keyen osai kay Owan, osai kay Isos, kay Isos agbangen karowan in piyagbaotismo osai in piyagpatoldo. 2 Kamay yewed Isos in agbaotismo, dayem in mga agadar kay Isos in agbaotismo. 3 Paka Isos katawan in mga Parisiyo abaritaan wa, siyo panaw wa sa Odiya, moli wakay sa Galiliya. 4 Kailangan siyo domalan sa Samariya. 5 Batay wa tangali in ibeng, siyo ista rateng sa osai ka bayan piyagawit Sikar, bangen sa kobat tiyaboy Akob sa kansiyo bodang Osi. 6 Ista in balon Akob. Tomokkaw Isos sa balabaan balon, angkataw siyo idapo eyat batang agipanaw. 7 Apo lomwas osai ka kagbaiyan taga Samariya, batay somalod. Isos keyen sa kansiyo, Ako pakanen sapa. 8 (Tn kansiyo mga agadar panaw wa, pataboy sa bayan, agbili pamangnen.) 9 In kagbaiyan keyen, Kao Odyo, ako taga Samariya, na nakay batang kao agayay sapa sa kangay? Angkataw in remrem mga Odyo marames in mga taga Samariya. 10 Keyen Isos, Dayem nges kao katawan in piyagtaboy in Diyos, osai no nakay ako in agayay sapa sa kaimo, na nges kao batay mangayay sapa sa kangay. Na kao batay kangay piyakan sapa agpaboway. 11 Keyen in kagbaiyan, Laki, malayem in balon, kao idapo panarok, na saano batay kaimo kiyowa in sapa agpaboway? 12 Kao lames labi kay kalakoy in kanyam kakoyayan Akob, in agkali anda pag balon? Siyo minem atai, kadayo kansiyo mga bodang, anggan kansiyo mga piyagalapet. 13 Keyen Isos, In minem anda pag sapa batay wakay agkainem. 14 Dayem in minem in kangay piyagtaboy sapa idbatay wa agkainem. In kangay sapa piyagtaboy batay mibaloy bokal sa kansiyo galem agpaboway sa kansiyo anggan idapo kalobosan. 15 Keyen in kagbaiyan, Laki, na ako pakanen in kao keyen sapa, matang ako idwa agkainem, idwa din agsalod. 16 Isos keyen, Kao moli wa. Atai paanggaten in kaimo lalaki. 17 Keyen in kagbaiyan, Ako idapo lalaki. Keyen Isos, Totoo in kao keyen kao idapo lalaki. 18 Kamay kaimo lalaki batang lima, kalbas in kaimo sarig ngona yewed kaimo lalaki. Betek in kao keyen. 19 In kagbaiyan keyen, Kao mana poropita. 20 Atai pag boksor in kanyam mga kakoyayan agsamba sa Diyos, kamay kamo in mga Odyo keyen, Irosalim waget in maal pag sambaan sa Diyos. 21 Keyen Isos, Laki, maniwala sa kangay. Dogayan idwaget atai pag boksor, idwaget din sa Irosalim in mga mangyan batay agsamba sa Amang. 22 Yewed kanyo atawanan in kanyo piyagsamba. Dayem kami, kanyam atawanan in kanyam piyagsamba, angkataw in Agpamaboway batang sa mga Odyo. 23 - 24 In Abyan Diyos in agpamatoldo no kataw nakay gayed in Amang, na siyo din in agpakan kabaloyan agmaal sa Amang. Bangen wa ngani in kabetek in mga mangyan batay agmaal sa Amang no kataw nakay gayed siyo. In Diyos, siyo Abyan agpamaboway. In mga piyakan kabaloyan kansiyo Abyan, siro waget in kabaloy agmaal sa Amang no kataw nakay gayed siyo. Kamayba saano pag betek kataw ina pag mga agmaal in kansiyo beet. 25 Keyen in kagbaiyan, Kangay atawanan batay rateng in Kiristo. Paka siyo rateng wa, siyo batay agsabi in boote sa kantam. 26 Keyen Isos, Ako in agpanggisodan sa kaimo, ako in Kiristo. 27 Ina daan pag betek rateng wa in kansiyo mga agadar. Siro manremrem angkataw Isos agpanggisodan sa kagbaiyan, kamay idapo agtanong sa kansiyo keyen, Nakay batang kao agpanggisodan sa kagbaiyan? Nakay in kaimo panawen sa kansiyo? 28 Biyaliwan in kagbaiyan kansiyo pagsoroyan sapa sa salodan, moli sa bayan. Siyo keyen sa mga mangyan ista, 29 Kitam wa. Pangkiten. Ista apo mangyan katawan in boo kangay mga piyangwat. Siyo lames in Kiristo? 30 Kalbas siro boo panaw wa sa bayan, pataboy kay Isos. 31 Siro ikkay rateng Isos piyagpilit in kansiyo mga agadar keyen, Laki Kapwan, mamangan wa. 32 Kamay siyo keyen, Ako apo pamangnen yewed kanyo atawanan. 33 Matang in mga agadar agpanggisodan keyen, Apo lames agbaba sa kansiyo pamangnen? 34 Isos keyen, Ako siyogo agpanawen. In kangay pamangnen in agpangwat in beet in agsogo sa kangay, osai in aglobos in panawen kansiyo tiyaboy sa kangay. 35 Kamo keyen, Opat kay ka bolan tagani wa, aon? Kamay ako keyen, Kamo mangkit. In mga agay madayaan wa, maal wa yaani. 36 In agani piyakan bayad, osai siyo agtipon in galem sa boway idapo kalobosan. Matang boo batay agkaanggay kadayo in agasik anggan in agani. 37 Betek in piyagsabi keyen, Osai in agasik, kamay idwakay ina in agani. 38 Kamo kangay siyogo agani in yewed kanyo yaasik. In amat pagod, kalbas kamo in agani in galem kansiro panawen. 39 Aronaw mga taga Samariya asin pag bayan in maniwala kay Isos panawen sa siyabi in kagbaiyan keyen, Siyo katawan in boo kangay mga piyangwat. 40 Matang paka rateng siro kay Isos, siro agpilit sa kansiyo keyen, Kao agbalay atai kanyam, kalbas siyo mataw dowai ka ibeng. 41 Karowan kay in maniwala kay Isos panawen siro karengey sa kansiyo. 42 Siro keyen sa kagbaiyan, Kami ngona agpaniwala sa kansiyo, yewed sa kaimo siyabi, no yewed kami karengey sa kansiyo daan siyabi. Kanyam ngiitan siyo ngani in Agpamaboway sa boo mangyan. 43 Paka katolo ka ibeng Isos panaw, pataboy sa Galiliya. 44 Angkataw Isos batang agsabi keyen, In osai ka poropita yewed piyagmaal sa kansiyo sadiri kobat. 45 Paka siyo rateng sa Galiliya in mga mangyan agkaanggay sa kansiyo, angkataw siro din sa Irosalim in betek piyasta piyagawit Paskowa, kansiro ngiitan in boo kansiyo mga piyangwat ista. 46 Kalbas Isos pataboy wakay sa Kana sa Galiliya, ista piyangwat alak in sapa. Sa Kapirnaom apo poon, in kansiyo bodang apo maskit. 47 Siyo abaritaan Isos rateng wakay sa Galiliya batang wa sa Odiya, matang siyo ista pataboy, Isos piyagkaon keyen, Kitam wa sa Kapirnaom, paorawen in maskit kangay bodang. Siyo maloba wa. 48 Isos keyen, Kamo dayo maniwala no yewed kamo kangitan kangay mga lakonaw pag piyangwat. 49 Keyen in poon, Laki Kapwan, ayaw agpabeya, agkatay wa ngani kangay bodang. 50 Isos keyen, Moli wa kao, maal wa kaimo bodang. Maniwala in poon sa siyabi Isos, siyo moli wa. 51 Sa dalan kay, tiyagbo wa siyo kansiyo mga sogowan keyen, Maal wa kaimo bodang. 52 Siro tiyanong keyen, Kataw nakay in ibeng in kaoraw? Keyen siro, Mitwang tangali in ibeng kaponi, maoraw wa in lagnat. 53 Riyemrem in amang ina ngani pag betek Isos keyen sa kansiyo maal wa kaimo bodang, matang siyo maniwala wa anggan in boo kansiyo mga kamalay. 54 Ina in kadowai ka lakonaw pag piyangwat Isos sa Galiliya in siyo pataboy ista batang sa Odiya.
1 Paka kalbas apo wakay piyasta in mga Odyo. Isos pataboy wakay sa Irosalim. 2 Sa Irosalim apo linaw piyagawit Bitisda sa Agiplaong Ibriyo, bangen sa Sakbawan mga Topa. Apo lima ka balay pagpanokkawan sa balabaan linaw. 3 Aronaw mga maskit ista. Apo mga beleg, mga pilay, mga pilaw. 5 Apo osai ka kaliyakiyan tatlompo walo ka dagon apo maskit. 6 Siyo ngiitan Isos, atawanan ina pag kaliyakiyan dogay wa apo maskit, kalbas siyabi sa kansiyo keyen, Kao lames beet maoraw? 7 Keyen in apo maskit, Laki, no betek maglebey in sapa ako idapo katolong agsogbo. Ako ikkay rateng sa sapa apo wa manokaw sa kangay. 8 Isos keyen, Kao tomaydek, babaen wa in kaimo damig, kao panaw wa. 9 Kalbas toloy wa maoraw in maskit, biyaba wa kansiyo damig, siyo panaw wa. Ina in Ibeng Pamainga. 10 Ina in dailan kaya in mga poon Odyo keyen sa piyaoraw, Ngona Ibeng Pamainga, piyagayaw in agbaba kaimo damig. 11 Kamay siyo keyen, In agpaoraw sa kangay, siyo in keyen babaen wa in kaimo damig, panaw wa kao. 12 Siro keyen, Nakay in keyen kaimo babaen kaimo damig, panaw wa kao? 13 Kamay ina pag kaliyakiyan yewed katawan no nakay in agpaoraw sa kansiyo, angkataw idapo wa Isos, miyagem wa sa karowan mangyan. 14 Kadogay Isos kangitan sa kansiyo sa balay lakoy Diyos, keyen, Ngona maal wa kao. Ayaw wa tagoli agpangwat daet, karam labi kay lakonaw in batay kaimo kaidapan. 15 In kaliyakiyan panaw wa, pataboy sa mga poon Odyo keyen, Isos in agpaoraw sa kangay. 16 Ina in dailan kaya aglaban kay Isos in mga poon Odyo, angkataw siyo agpaoraw sa Ibeng Pamainga. 17 Matang Isos keyen sa kansiro, Kangay Amang agaway kay agpanawen, na ako kataw daan ina. 18 Matang in mga poon Odyo agkabono sa kansiyo, angkataw siyo kono agpanawen sa Ibeng Pamainga. Kalbas labi kay agkabono, angkataw siyo keyen in Diyos kansiyo Amang. Na in galem ina pag siyabi keyen siyo kalakoy daan in Diyos. 19 Isos keyen sa mga Odyo, Kamo mamarengey gayed. In Bodang idapo piyagpangwat siyo wakayte. Kansiyo ngani piyagpangwat in kansiyo ngiitan in piyagpangwat in Amang. In piyagpangwat in Amang piyagpangwat din in Bodang. 20 Angkataw in Bodang piyagmaal kansiyo Amang, piyagpapangkit sa Bodang in boo kansiyo piyagpangwat. Kalbas labi kay lakonaw in mga panawen batay piyapangkit in Amang sa Bodang matang kamo batay agsoyo. 21 Kataw in Amang agpaboway sa mga matay, kataw din ina in Bodang batay agpaboway kamayba nakay in kansiyo beet piyaboway. 22 In Amang yewed agsabi parosa kamayba kay nakay pag mangyan. Kansiyo tiyaboy sa Bodang in boo kabaloyan agosap. 23 Matang in boo batay agmaal sa Bodang, kataw daan in siro agmaal sa Amang. In dayo agmaal sa Bodang yewed agmaal sa amang, sa agsogo sa Bodang. 24 Totoo ngani, in agparengey sa kangay piyagsabi, osai agpasandig sa agsogo sa kangay, apo boway idapo kalobosan. Siyo idbatay wa piyarosa, no yewed siyo batang wa matay, kalbas piyaboway wakay. 25 Totoo ngani, bangen wa ngani in kabetek batay karengey in mga matay in agiplaong in Bodang Diyos. Kalbas in agparengey sa kansiyo batay apo boway. Amang apo kabaloyan agpaboway. Kalbas in Bodang kansiyo piyakan kabaloyan agpaboway. 27 Siyo piyakan din kabaloyan agsabi parosa, angkataw siyo in Bodang Mangyan. 28 Kamo ayaw manremrem asin, angkataw agrateng in kabetek in mga matay batay karengey kansiyo agiplaong. 29 Siro batay wakay piyagpaboway, batay miyorog batang sa lebengan. In boo batang agpamangwat maal batay piyagpaboway anggan idapo kalobosan. Dayem in boo batang agpamangwat daet, na siro batay piyagparosa. 30 Ako idapo piyagpangwat kangay wakayte. In kangay remrem na batang sa kangay Amang, matang betek in kangay parosa. Yewed kangay remrem in kangay piyagpangwat, no yewed in remrem in agsogo sa ka ngay. 31 No ako waget in agbarita panawen sa kangay sadiri, na ayaw kamo maniwala. 32 Kamay apo kay osai ka agbarita panawen sa kangay. Betek in kansiyo piyagsabi. 33 Kamo batang agsogo agtanong kay Owan, kalbas siyo agbarita panawen in betek. 34 Kamay kamayba idapo mangyan agbarita panawen sa kangay. Ina kangay piyagsabi matang kamo piyaboway. 35 Owan kataw tinglaw agigang, agrawa wano. Kamo kadogayte agkaanggay sa kansiyo rawa. 36 Kamay apo agbarita panawen sa kangay labi kay kalakoy in barita Owan. Kaya maal maniwala keyen in Diyos in agsogo sa kangay, angkataw ako agpangwat in mga lakonaw pag panawen kansiyo tiyaboy sa kangay. 37 Kadayo in Amang in agsogo sa kangay siyo din agbarita panawen sa kangay. Anggan ngona kamo idbatang kangitan no kagwali nakay siyo, yewed din karengey kansiyo agiplaong. 38 In kansiyo agiplaong yewed din agbalay sa kanyo galem, angkataw kamo dayo maniwala sa kangay, in siyogo in Amang. 39 Kanyo piyagadar gayed in mga Agisolat angkataw kanyo remrem asin kamo batay kabel in boway idapo kalobosan. Ina in mga Agisolat in agbarita panawen sa kangay. 40 Kamay kamo dayo agpasabangen sa kangay matang nges kamo apo boway. 41 Ako yewed agamag in mga mangyan agmaal sa kangay. 42 Kamay kamo kangay atawanan. Ako katawan kamo dayo sa Diyos. 43 Ako atai pataboy panawen ako piyagsogo kangay Amang, kamay kamo dayo maniwala sa kangay. No apo wakay osai ka rateng siyo idapo agsogo, kansiyo waget remrem, na asina wa kamo batay maniwala. 44 In kanyo beet kamo piyagmaal mga mangyan. Kamo yewed agpilit agpakamaal sa Diyos, siyo waget in Diyos, na nangkataw kamo batay kabaloy agpaniwala? 45 Kamo ayaw keyen kamo kangay batay piyagsombong sa Amang. Ako idbatay. Mowisis, in kanyo pagpasandigan, siyo agbangen in batay agsombong sa kanyo. 46 No nges kamo agpaniwala gayed kay Mowisis, na kamo maniwala din sa kangay, angkataw ako in piyagbarita sa kansiyo solat. 47 Kamay no yewed kamo maniwala sa kansiyo mga solat, na nangkataw kamo batay maniwala sa kangay mga piyagsabi?
1 Paka kalbas, Isos motol sa dagatte Galiliya, piyagawit din dagatte Tibiryas. 2 Karowan mangyan miyanggat sa kansiyo, angkataw kansiro ngiitan kansiyo kabaloyan agpaoraw sa mga maskit. 3 Isos monaker sa bolod, agyanggat in kansiyo mga agadar, siro ista omaron. 4 Bangen wa in piyasta mga Odyo piyagawit Paskowa. 5 Isos manrongaw, kansiyo ngiitan karowan wano mangyan agrateng sa kansiyo. Pilipi tiyanong keyen, Saano kitam batay bomili pamangnen matang mamangan anda pag mga mangyan? 6 Kaya Isos keyen, matang Pilipi piyagtepeng. Angkataw atawanan Isos in kansiyo batay piyagpangwat. 7 Pilipi keyen, In karo ina mangyan kamayba in bayad alaga panawenen dowai ka daan ka ibeng ina idbatay sibay kamayba pangkalakoyte waget in kiyoman. 8 In osai ka agadar Anris, belag Simon Pidro, siyo keyen, 9 Apo osai ka bodang kaliyakiyan agbaba lima wagette ka siba, osai dowaite ka isda. Kamay nangkataw in agbagi karo ina mangyan lima waget ka tinapay? 10 Keyen Isos, Siro patokkawen. Lalosenen ina pag kobat. Siro boo malpanokkaw, mga lima ka libo ka kaliyakiyan. 11 Kiyowa Isos in tinapay. Siyo agpasalamat sa Diyos, kalbas kansiyo wa biyagi sa mga mangyan, kalbas in isda din. Siro boo piyakan, boo bosog. 12 In siro kalbas wa agkoman Isos keyen sa kansiyo mga agadar, Tiponen in tera matang yewed biyenglay. 13 In tinapay mitera kansiro tiipon, labing dowai ka galang makno kay. 14 Paka ngiitan in mga mangyan in lakonaw pag panawen Isos, siro keyen, Totoo wa ngani ina in Poropita in kantam piyagpanaya atai sa kobat. 15 Paka Isos katawan siyo batay piyagdakep, piyagkapangwat poon lakoy, siyo panaw wa, pataboy wa sa boksor. Siyo idapo sarig. 16 Bayapon wa in mga agadar pataboy wa sa balabaan dagatte. Lened wa idapo kay Isos. 17 Siro somakay wa sa bangka, agpotol agtaboy sa Kapirnaom. 18 Agkowaya lakoy, agistobo in alon. 19 Paka siro kadalan wa mga lima, mga enem ka kilomitro, kansiro ngiitan Isos agipanaw aglaed sa sapa agpasabangen sa bangka. Siro alimowan. 20 Kamay keyen Isos, Ayaw agkalimo, ako daan. 21 Anggayan wano siro. Isos piyasakay sa bangka, kalbas toloy wa siro rateng sa kansiro pagratengan. 22 Goribas wakay apo kay mga mangyan agpamataw sa ripay dagat. Ngiitan siro ati kay osai ka bangka. Kansiro atawanan in mga agadar waget kaponi in somakay sa bangka, panaw wa, Isos yewed miyanggat. 23 Rateng wakay in mga bangka batang sa Tibiryas, pomondo sa bangen kansiro kaponi pagkomanan tinapay, in piyasalamat Isos pag tinapay. 24 In mga mangyan mangkit, idapo wa asin Isos, anggan kansiyo mga agadar idapo. Matang siro somakay wa sa mga bangka pataboy sa Kapirnaom, agpamangkit kay Isos. 25 Isos kansiro atagbowan sa ripay dagat. Siro keyen, Laki Agpamatoldo, nangkadogay wa kao atai? 26 Isos keyen, Amba, in kangay piyagsabi kaya ako kanyo piyagpamangkit panawen waget kamo mamangan in tinapay, kamo bosog, yewed panawen kanyo ngiitan in kangay mga lakonaw pag panawen. 27 In agpamangkit pamangnen, na papaoriyen in agkalobos, patokawen agbangen in yewed agkalobos, in agtaboy boway idapo kalobosan. Ina piyagtaboy sa kanyo ako in Bodang Mangyan, angkataw ako piyakan kabaloyan in Diyos Amang. 28 Matang siro keyen, Nakay in kanyam pangwaten matang kami kabaloy agpangwat in beet Diyos? 29 Isos keyen, In piyagpapangwat sa kanyo in Diyos, in kamo maniwala sa kansiyo siyogo. 30 Siro keyen, Na kami papangkiten in lakonaw pag panawen matang kami maniwala sa kaimo. Nakay in kaimo batay piyangwat? 31 Keyen kay, Sa moyod in kanyam mga kakoyayan mamangan in pamangnen batang sa Diyos. Kataw in agisolat keyen, Siro kansiyo piyakan pamangnen batang sa langit. 32 Isos keyen, Kailangan kanyo atawanan, yewed Mowisis in agtaboy sa kanyo in pamangnen batang sa langit, no yewed in kangay Amang. siyo in agtaboy sa kanyo in maal pag pamangnen in batang sa langit. 33 Angkataw in pamangnen tiyaboy Diyos, ina in lomabo batang sa langit, in agpamaboway sa boo mangyan. 34 Siro keyen, Na laki, kami baatte pakanen ina pag pamangnen. 35 Isos keyen, Ako in pamangnen agpamaboway. In agpasabangen sa kangay idbatay wa agkayawes. In agpasandig sa kangay idbatay wa agkainem kamayba nangkadogay. 36 Kamay kangay wa siyabi sa kanyo keyen, Kamayba ako kanyo wa ngiitan, kamo dayo agpasandig sa kangay. 37 In boo piyagtaboy kangay Amang batay agpasabangen sa kangay. Idbatay kangay piyamoyaw kamayba nakay pag mangyan in agpasabangen sa kangay. 38 Angkataw ako lomabo batang sa langit matang kangay piyagpangwat in beet in agsogo sa kangay, yewed in kangay agbangen beet. 39 In kansiyo beet kangay alapeten in boo kansiyo tiyaboy sa kangay, matang ayaw apo malibangaw kamayba osai waget, no yewed siro boo kangay wakay piyaboway sa kalobosan pag ibeng. 40 Angkataw in beet kangay Amang in boo kangitan osai agpasandig sa Bodang apo boway idapo kalobosan, siro kangay wakay piyagpaboway sa kalobosan pag ibeng. 41 Agpaypolongan in mga Odyo keyen, Ablayan in kansiyo siyabi keyen siyo in pamangnen lomabo batang sa langit. 42 Siro keyen, Siyo Isos, bodang Osi. Kitam katawan sa kansiyo amang, kansiyo inang. Nakay batang siyo agsabi keyen siyo lomabo batang sa langit? 43 Matang keyen Isos, Kamo ayaw agpaypolongan. 44 Idapo kapasabangen sa kangay no yewed siyo biyaba in kangay Amang in agsogo sa kangay. In agpasabangen sa kangay na kangay wakay piyagpaboway sa kalobosan pag ibeng. 45 Agisolat sa aklat in mga poropita keyen, Siro boo batay piyagpatoldo Diyos. In mga karengey sa Amang osai katawan, siro boo batay agpasabangen sa kangay. 46 Kamay idapo kay batang kangitan sa Amang. Ako in kangitan sa kansiyo angkataw ako batang sa kansiyo. 47 Isos keyen kay, Ayaw agkanawey, in agpasandig sa kangay piyagpaboway anggan idapo kalobosan. 48 Ako in pamangnen in agpamaboway. 49 In kanyo mga kakoyayan matay sa moyod, kamayba siro mamangan in pamangnen batang sa Diyos. 50 Kamay kamayba nakay in mamangan in pamangnen lomabo batang sa langit idbatay matay. 51 Ako in pamangnen agpamaboway in lomabo batang sa langit. Kamayba nakay in mamangan sa kangay batay agkaboway anggan idapo kalobosan. In kangay bilog in kangay piyagtaboy pamangnen matang piyaboway in boo mangyan. 52 Panawen sa siyabi Isos agpalawayan wa in mga Odyo. Siro keyen, Ina pag mangyan, nangkataw siyo batay kabaloy agtaboy kansiyo bilog sa kantam, matang kantam kiyoman? 53 Matang keyen Isos, Kamo mamarengey gayed, No kamo yewed mamangan in bilog ako in Bodang Mangyan, osai yewed minem sa kangay daya, na kamo idbatay apo boway. 54 In agpamangan kangay bilog, in aginem kangay daya, apo boway idapo kalobosan. Siyo batay wakay kangay piyaboway sa kalobosan pag ibeng. 55 Angkataw in kangay bilog in pamangnen gayed, in kangay daya maal wano piyaginem. 56 In agpamangan kangay bilog, in aginem kangay daya agbalay sa kangay. Ako din agbalay sa kansiyo. 57 Agkaboway in amang in agsogo sa kangay. Ako agkaboway panawen sa kansiyo. Na kataw daan, kamayba nakay in agpamangan sa kangay, batay agkaboway panawen sa kangay. 58 Ako in pamangnen lomabo batang sa langit. In agpamangan sa kangay apo batay boway idapo kalobosan. Ako yewed kataw in kiyoman kanyo mga kakoyayan sa moyod. Siro matay kamayba siro mamangan ina. 59 Ina pag boo siyabi Isos sa balay pagpaniponan in siyo agpatoldo sa Kapirnaom. 60 Karengey in kansiyo mga agadar in kansiyo mga siyabi. Kalbas karowan sa kansiro keyen, Ina maidap pag piyagpatoldo, kitam idbatay katawan. 61 Atawanan Isos in kansiyo mga agadar agpaypolongan panawen asin, matang siyo keyen, Kamo mana dayo wa sa kangay panawen sa kangay siyabi? 62 Na labi wa lames no kanyo ngiitan ako in Bodang Mangyan agonaik sa kangay pagpamatawan tangona? 63 In Abyan Diyos in agpamaboway, in bilog mangyan idapo kabaloyan. In kangay mga siyabi sa kanyo batang sa Abyan Diyos, ina in agpamaboway. 64 Kamay apo sa kanyo yewed agpasandig sa kangay. Ibat tangona kay, atawanan Isos no nakay in yewed agpasandig sa kansiyo, osai no nakay in batay agpadakep sa kansiyo. 65 Isos keyen kay, Ina in dailan kaya ako keyen, Idapo batay kapasabangen sa kangay, no yewed biyaba kangay Amang. 66 Ibat asin karowan sa kansiyo mga agadar pasoway wa sa kansiyo. 67 Matang tiyanong Isos in Labing Dowai keyen, Nakay ina, kamo agkapasoway wa din sa kangay? 68 Keyen Simon Pidro, Laki Kapwan, kay nakay kay batay kami? Kao in apo agiplaong agpamaboway anggan idapo kalobosan. 69 Kami agpaniwala, osai kami katawan kao in Maal wano in siyogo Diyos. 70 Keyen Isos, Kamo Labing Dowai kangay iidang, kamay in osai sa kanyo mamaw. 71 In kay Isos beet siyabi Odas, bodang Iskaryoti. Kamayba siyo osai sa Labing Dowai, siyo in batay agpadakep kay Isos sa mga agkabono sa kansiyo.
1 Paka kalbas liiblibok Isos in boo Galiliya. Siyo dayo agipanawan sa Odiya, angkataw siyo piyagkabono ista in mga poon Odyo. 2 Bangen wa in piyasta mga Odyo piyagawit Torda. 3 Matang in mga belag Isos keyen sa kansiyo, Kao panaw wa atai, pataboy wa sa Odiya, matang ngiitan in kaimo mga agadar in kaimo mga panawen. 4 No kao beet atawanan boo mangyan, na ayaw agpatago, papangkiten sa boo mangyan in kaimo mga panawen. 5 Kamayba in mga belag Isos, siro yewed agpasandig sa kansiyo. 6 Siyo keyen, Ikkay ngona kangay kabetek. Dayem sa kanyo, na kamayba nangkadogay. 7 Kamo yewed piyagkagalitan in mga mangyan, kamay ako piyagkagalitan, angkataw kangay wa siyabi in kansiro mga daet pag panawen. 8 Kamo pataboy wa sa piyasta. Ako idbatay ista kataw ikkay kangay kabetek. 9 Paka siyabi wa ina siyo mataw kay sa Galiliya. 10 Paka panaw wa in kansiyo mga belag, Isos ista din pataboy, kamay yewed agpapangkit. 11 Siyo piyagpamangkit in mga poon Odyo sa piyasta keyen, Saano siyo? 12 Isos piyagpaypolongan in karowan. In kalaati keyen, Siyo maal pag mangyan. Keyen in amat, Yewed. Kansiyo piyagpadaya in mga mangyan. 13 Kamay piyagtago in agpanggisodan, angkataw siro agkalimo sa mga poon Odyo. 14 Paka kagwaraan wa piyasta, Isos misoroy wa sa balay lakoy Diyos, agpatoldo. 15 Agsoyo in mga poon Odyo keyen, Nakay batang ina pag lalaki katawanan wa labi? Idwakay siyo batang agpasok. 16 Isos keyen, In kangay piyagpatoldo yewed batang sa kangay, no yewed batang sa agsogo sa kangay. 17 No in mangyan beet ngani agpangwat in beet Diyos, na siyo batay katawan no batang ngani sa Diyos in kangay piyagpatoldo, no sa kangay waget. 18 In agpatoldo in kansiyo waget remrem, beet waget siyo piyaglakonaw. Kamay no in kansiyo beet piyaglakonaw in agsogo sa kansiyo, na siyo in betek, yewed mayabang. 19 Tiyaboy wa Mowisis sa kanyo in mga Batas Diyos, aon? Kamay kamayba osai waget sa kanyo yewed agpaniwala asin pag mga Batas. Nakay batang ako kanyo piyagkabono. 20 Keyen in mga mangyan, Kao piyaglowasan mamaw. Nakay in agkabono sa kaimo? 21 Keyen Isos, Osai waget ka panawen in kangay piyangwat, toloy wa kamo boo agsoyo. 22 Mowisis in agsogo sa kanyo agtoli, kamay yewed batang kay Mowisis, no yewed batang sa kanyo mga kakoyayan. 23 No kanyo piyagtoli osai ka kaliyakiyan kamayba sa Ibeng Pamainga matang maniwala sa Batas Mowisis, na nakay batang kamo agkagalit sa kangay panawen ako agpaoraw sa osai ka mangyan sa Ibeng Pamainga? 24 Kamo ayaw toloy manremrem keyen, Ablayan. Remremen wa kamo in betek. 25 Keyen in kalaati mga taga Irosalim, Yewed lames ina in kansiro piyagkabono? 26 Baina, siyo agpatoldo yewed agpatago, kamay idapo siro matiwid sa kansiyo. Karam atawanan in mga poon siyo wa in Kiristo. 27 Kamay no lomwas wa atai in Kiristo na idapo batay katawan in kansiyo rakayan. Kamay kantam atawanan no saano in rakayan ina pag lalaki. 28 Matang in Isos agpatoldo sa balay lakoy Diyos siyo maksen miplaong keyen, Kamo lames katawan sa kangay, kamo lames katawan no sa nakay batang ako? In ako atai pataboy yewed sa kangay waget beet. In Totoo in agsogo sa kangay, kamay kamo yewed katawan sa kansiyo. 29 Dayem ako katawan sa kansiyo, angkataw ako batang sa kansiyo, siyo in agsogo kangay. 30 Siyo kansiro tiyepeng diyakep, kamay siro yewed kabaloy, angkataw yewed kay kansiyo kabetek. 31 Kamay karowan in mga mangyan agpasandig sa kansiyo. Siro keyen, Ina pag lalaki lakonaw in mga panawen. No rateng wa in Kiristo nakay, labi kay lames kalakoy ina? 32 Karengey in mga Parisiyo in Isos piyagpaypolongan in mga mangyan. Siro, osai in mga poon sasirdoti, apo mga polis agdamay sa balay lakoy Diyos. Ina kansiro siyogo batay agdakep kay Isos. 33 Keyen Isos, Ako atai kay agoli sa kanyo. Kamay idwa dogay ako agoli wa sa kangay agsogo. 34 Ako kanyo batay piyagpamangkit, idbatay wa kanyo ngiitan, angkataw kamo idbatay kataboy sa kangay batay pagtaboyan. 35 Agpaypolongan in mga poon Odyo keyen, Saano lames batay agtaboy ina pag mangyan matang idwa batay kantam ngiitan? Siyo lames batay pataboy sa mga Odyo malsowayan, sa kobat mga Girigo, matang agpatoldo sa mga Girigo? 36 Nakay in beet kansiyo siyabi keyen siyo kantam batay piyagpamangkit idbatay wa kantam ngiitan? Osai keyen kitam idbatay kataboy sa kansiyo batay pagtaboyan? 37 Sa kalobosan pag ibeng piyasta, sa piyagmaal pag ibeng, tomaydek Isos. Maksen siyo miplaong keyen, In agkainem na aywawa, minem. 38 Kataw siyabi sa mga Agisolat keyen, In agpasandig sa kangay, batang sa kansiyo galem batay agbokbokal sapa agpamaboway. 39 In kansiyo beet siyabi in Abyan Diyos, in batay tiyaboy sa mga agpasandig sa kansiyo. Ina pag betek ikkay tiyaboy in Betek pag Abyan, kataw Isos ikkay moli sa langit. 40 Karowan in mga karengey sa kansiyo siro keyen, Totoo ngani siyo in kantam piyagpanaya pag Poropita. 41 Keyen in kalaati, Ina wa ngani in Kiristo. Kamay keyen wakay in kalaati, Yewed mayadi taga Galiliya in Kiristo, 42 angkataw siyabi in mga Agisolat keyen, In Kiristo batang sa kasokponan Dabid. Siyo taga Bitliim, sa kay Dabid kobat. 43 Malsowayan in remrem in mga mangyan panawen kay Isos. 44 In kalaati beet agdakep kay Isos, kamay idapo kabaloy. 45 In mga polis moli wakay sa mga poon sasirdoti, osai sa mga Parisiyo. Siro keyen, Nakay batang Isos yewed kanyo biyaba atai? 46 Keyen in mga polis, Kami idapo kay karengey mangyan kaalen ina in agiplaong. 47 Keyen in mga Parisiyo, Kamo din mana piyaakayan wa Isos? 48 Kamo lames kangitan poon, kangitan Parisiyo agpaniwala sa kansiyo? Idapo. 49 Mga mangyan waget, in yewed katawan sa mga Batas Diyos, in agpaniwala sa kansiyo, siro pamanesen. 50 In osai ka Parisiyo asin Nikodimo, in pataboy tangona kay Isos. Siyo keyen sa kansiro, 51 Baribid sa mga Batas Diyos in agparosa sa osai ka mangyan in siyo ikkay yoosap, ikkay atawanan in kansiyo mga piyangwat. 52 Siro keyen, Kao nakay, taga Galiliya din? Kao agpamangkit sa boo mga Agisolat, idapo asin poropita taga Galiliya. 53 Siro boo moli wa. 1 Kamay Isos pataboy sa boksor Olibowan. 2 Paka omaga siyo pataboy wakay sa balay lakoy Diyos. Pataboy sa kansiyo in karowan mangyan. Isos tomokkaw, agpatoldo sa kansiro. 3 In mga agpatoldo in mga Batas Diyos osai in mga Parisiyo agbaba sa kansiyo osai ka kagbaiyan abel sa agpanggaraw. Siyo piyataydek piyatobang kay Isos. 4 Siro keyen kay Isos, Laki Agpatoldo, anda pag kagbaiyan abel sa agpanggaraw. 5 In Batas Mowisis keyen in kailangan mga kataw siyo benglayen bato anggan siyo matay. Nakay in kaimo piyagsabi asin? 6 Kaya Isos tiyanong matang siyo piyagkabel, matang siyo siyombong. Kamay Isos patalegeb, kansiyo solo agsolat sa diya. 7 Kamay siro agaway kay agtanong, matang Isos tomokkaw wakay, siyo keyen, No nakay sa kanyo in idapo daet, na siyo in tokaw agbenglay bato. 8 Kalbas Isos tagoli wakay patalegeb, agsolat wakay sa diya. 9 Paka siro karengey, siro kaksiyo kaksiyo panaw. In tokaw panaw in koyay sa kansiro. Idapo biyaliwan no yewed Isos waget, osai in kagbaiyan baywi kay sa bangen siyo. 10 Tomokkaw wakay Isos, keyen, Siro saano wa? Idapo lames agparosa sa kaimo? 11 Keyen in kagbaiyan, Idapo, Laki. Isos keyen, Kao idbatay din kangay piyarosa. Kao panaw wa, ayaw wa tagoli agpamangwat daet. 12 Tagoli wakay Isos agpanggisodan sa mga mangyan keyen, Ako in tinglaw sa boo mangyan. In agyanggat sa kangay batay apo tinglaw agpamaboway, idbatay wa agipanawan sa lened. 13 Siyabi sa kansiyo in mga Parisiyo keyen, Kao agbarita panawen sa kaimo sadiri, yewed maal piyasandigan in kaimo barita. 14 Isos keyen, Kamayba ako in agbarita panawen sa kangay sadiri, totoo ngani in kangay piyagsabi, angkataw ako katawan no saano in kangay rakayan osai in kangay batay pagtaboyan. Kamay kamo yewed katawan in kangay rakayan osai in kangay batay pagtaboyan. 15 In kanyo remrem sa mga daet, remrem waget mangyan. Kamay ako yewed agremrem kamayba kay nakay mga daet. 16 Kamayba ako agremrem sa mga daet, na betek in kangay remrem, angkataw yewed ako waget in agremrem, dayem ako anggan in Amang in agsogo sa kangay. 17 Agisolat sa kanyo aklat mga Batas keyen, Kailangan maniwala no dowai ka mangyan tikkataw in piyagsabi. 18 Ako in osai ka agbarita panawen sa kangay, in kadowai in Amang in agsogo sa kangay. Siyo din agbarita panawen sa kangay. 19 Matang siro keyen sa kansiyo, Saano in kaimo amang? Isos keyen, Kamo yewed katawan sa kangay. Kadayo sa kangay Amang, kamo yewed din katawan. No nges kamo katawan sa kangay, na kamo katawan din sa kangay Amang. 20 Ina siyabi Isos in siyo agpatoldo sa balay lakoy Diyos, bangen sa pag soroyan andog. Kamay idapo mangaas agdakep sa kansiyo, angkataw yewed kay kansiyo kabetek. 21 Tagoli wakay siyabi Isos sa kansiro keyen, Ako batay panaw, ako batay kanyo piyagpamangkit, kamay kamo batay matay agaway in kanyo mga daet. Kamo idbatay kataboy sa kangay batay pagratengan. 22 Keyen in mga poon Odyo, Batay lames pakatay siyo? Baina siyo keyen kitam idbatay kataboy sa kansiyo batay pagratengan? 23 Keyen Isos, Kamo taga kobat, ako taga langit. Kamo taga atai sa kobat, ako yewed. 24 Matang in kangay piyagsabi sa kanyo, Kamo batay matay agaway in kanyo mga daet. Batay ngani matay kamo agaway in kanyo mga daet no kamo yewed agpaniwala keyen, Ako in ako ngani. 25 Siro keyen, Nakay kao? Isos keyen, Dogay wa ako agsabi sa kanyo no nakay ako. 26 Lakonaw in kangay atawanan sa kanyo aronaw daet. Kamay in kangay arengeyan sa agsogo sa kangay, ina waget in kangay piyagsabi sa mga mangyan, betek in kansiyo piyagsabi. 27 Siro yewed katawan kansiyo beet siyabi karai in keyen Amang. 28 Matang Isos keyen, Paka dogayan kanyo siyokbit ako in Bodang Mangyan, na batay atawanan kamo keyen, Ako in ako ngani. Ako idapo piyagpangwat sa kangay waget sadiri. Ako agiplaong kataw in siyabi sa kangay in Amang. 29 In agsogo sa kangay na agyanggat sa kangay, ako yewed kansiyo piyagbaliwan ako waget, angkataw baatte kangay piyagpangwat in makaanggay sa kansiyo. 30 In mga karengey ina pag mga siyabi Isos siro maniwala sa kansiyo. 31 Keyen Isos sa mga Odyo agpaniwala sa kansiyo, No kamo agaway agpaniwala sa kangay mga piyagpatoldo sa kanyo, na totoo ngani kamo kangay mga agadar. 32 Batay kanyo atawanan in totoo. In totoo batay agpalpas sa kanyo. 33 Siro keyen, Kami kasokponan Abraam, kami idbatang sakop kamayba kay nakay. Nakay batang kao keyen kami batay piyalpas? 34 Keyen Isos, Totoo ngani sakop sa daet in boo agpamangwat daet. 35 In sogowan yewed mayadi piyagawit bodang kamayba nangkadogay. Dayem in bodang, siyo piyagawit bodang anggan idapo kalobosan. 36 No in Bodang in agpalpas sa kanyo, na kamo mipalpas wa gayed. 37 Kamo kangay atawanan kamo kasokponan Abraam. Kamay ako kanyo piyagkabono, angkataw kamo dayo maniwala sa kangay piyagsabi. 38 Kangay piyagsabi in kangay ngiitan sa kangay Amang, kamay kanyo wakay piyagpangwat in kanyo arengeyan sa kanyo amang. 39 Siro keyen, Abraam in kanyam amang. Keyen Isos, No kamo mga bodang Abraam, na kamo batay agtolad sa kansiyo mga piyangwat. 40 Kamayba kangay waget piyagsabi in boo betek kangay arengeyan sa Diyos, kanyo piyagpilit ako piyagbono. Yewed kataw ina in piyagpang wat Abraam. 41 In kanyo piyagpangwat kataw in piyangwat kanyo amang. Siro keyen, Kanyam inang yewed agpanggaraw, kami yewed bodang agpanggaraw, Diyos in kanyam amang. 42 Keyen Isos, No kamo ngani bodang Diyos, na ako nges kanyo piyagmaal, angkataw ako batang sa Diyos. Ako atai pataboy yewed sa kangay waget beet, no yewed ako siyogo Diyos. 43 Kaya kamo yewed katawan in kangay piyagsabi, angkataw yewed kanyo piyagpaniwala in kangay mga piyagpatoldo. 44 In Dimonyo in kanyo amang. No nakay in kansiyo beet na ina in kanyo piyagpangwat. Ibat sa parakayan siyo agpamono mangyan, osai agsonggar sa totoo. Kamayba nangkadogay idapo batay ngiitan totoo sa kansiyo. No siyo agsabi baribid, na ina in kansiyo ogali, angkataw siyo agpamabaribid, siyo in amang sa boo baribid. 45 Kamay kaya ako yewed kanyo piyagpaniwala, angkataw in kangay piyagsabi in boo totoo. 46 Kamo boo katawan ako idapo daet. No totoo in kangay mga piyagsabi, na nakay batang kamo yewed agpaniwala sa kangay? 47 In mga batang sa Diyos siro agparengey sa mga siyabi Diyos, kamay kamo yewed batang sa Diyos, matang yewed kanyo piyagparengey in mga piyagsabi Diyos. 48 Keyen in mga Odyo, Totoo mana ngani in kanyam siyabi kao taga Samariya, kao piyaglowasan mamaw. 49 Keyen Isos, Ako yewed piyaglowasan mamaw. Kangay piyaglakonaw in kangay Amang, kamay ako kanyo piyagpadaet. 50 Yewed kangay piyagpamangkit in ako piyaglakonaw mga mangyan. In kangay Amang in kansiyo beet ako piyaglakonaw, kalbas siyo in batay agsabi no nakay in totoo. 51 Ayaw agkanawey, in agpaniwala sa kangay piyagpatoldo idbatay matay kamayba nangkadogay. 52 Keyen in mga Odyo, Totoo ngani kao piyaglowasan mamaw. Matay Abraam, anggan in mga poropita, kamay kao keyen in agpaniwala sa kaimo piyagpatoldo idbatay matay kamayba nangkadogay. 53 Kao lames lakonaw kay sa kanyam amang Abraam? Siyo matay, anggan in mga poropita. Nakay in kaimo remrem sa kaimo sadiri? 54 Keyen Isos, No ako waget in aglakonaw sa kangay sadiri, na ina idapo kabolowan. Kamay in kangay Amang in aglakonaw sa kangay, in kanyo piyagsabi siyo in kanyo Diyos. 55 Kamo yewed katawan sa kansiyo, dayem ako, ako katawan sa kansiyo. No ako keyen ako yewed katawan sa kansiyo na ako mayabang kataw kamo. Kamay ako katawan sa kansiyo, kangay piyagpangwat in kansiyo mga piyagsabi. 56 Anggayan kanyo amang Abraam in siyo kangitan ako rateng atai sa kobat. Kangitan ngani siyo, siyo anggayan ngani. 57 Matang keyen in mga Odyo, Kao idapo kay limampo ka dagon. Kao lames kangitan wa kay Abraam? 58 Keyen Isos, Totoo ngani, Abraam idapo kay, Ako Ako wa. 59 Siro mamorot bato matang siyo biyenglayan, kamay Isos patago, siyo panaw wa sa balay lakoy Diyos.
1 In Isos agipanaw, siyo kangitan osai ka kaliyakiyan ibat biyodang beleg. 2 Isos tiyanong in kansiyo mga agadar keyen, Laki Agpamatoldo, nakay batang ina pag kaliyakiyan biyodang beleg? Nakay agbangen in apo daet, osai siyo, osai kansiyo mga koyay? 3 Isos keyen, Ina pag kaliyakiyan biyodang beleg, yewed panawen sa apo daet, kamayba kansiyo daet, kamayba kansiyo mga koyay daet, dayem matang ngiitan in kalakoyen Diyos. 4 Kataw ibeng kay, kailangan kantam pangwaten in mga panawen in agsogo sa kangay. Agrateng in yabi, idapo batay kapanawen. 5 In ako baywi kay sa kobat ako in tinglaw sa boo mangyan. 6 Kalbas Isos tomopay sa diya, kansiyo piyangwat letek, in letek yoodyod sa mata in beleg. 7 Isos keyen sa kansiyo, Amba, kao pataboy sa linaw piyagawit Silowi. In beet siyabi Silowi na keyen, Siyogo. Kao mangogas ista. Maniwala in beleg, mangogas ista, kalbas siyo agoli wakay kangitan wa. 8 In mga kamalay in batang beleg, osai in mga kangitan sa kansiyo in siyo agpangayay kay, siro keyen, Yewed lames ina in kaliyakiyan in datiyan agpangayay? 9 Keyen in kalaati, Ina wa ngani. Keyen wakay in amat, Yewed. Kagwali waget. Keyen in kaliyakiyan, Ako ngani ina. 10 Siro keyen, Nangkataw kao kangitan? 11 Siyo keyen, In kaliyakiyan piyagawit Isos agpangwat letek yoodyod sa kangay mata. Kalbas siyo keyen pataboy kao sa linaw Silowi, mangogas. Matang ako ista pataboy, mangogas, kalbas ako kangitan wa. 12 Siro keyen, Saano wa siyo? Siyo keyen, Saken. 13 In batang beleg piyaanggat sa mga Parisiyo. 14 Ibeng Pamainga in Isos agpangwat letek, agpaoraw sa beleg. 15 Siyo tiyanong din in mga Parisiyo no nangkataw siyo kangitan. Siyo keyen, Kansiyo yoodyodan letek in kangay mata. Kalbas ako mangogas matang ngona ako kangitan wa. 16 In amat Parisiyo keyen, Yewed batang sa Diyos ina pag mangyan, angkataw yewed kansiyo piyagalapet in Ibeng Pamainga. Kamay in amat wakay keyen, Nangkataw kapangwat in kataw ina lakonaw pag panawen, no in mangyan apo daet? Yewed malageman in kansiro mga remrem. 17 Siro agtanong wakay tagoli sa batang beleg keyen, Kao wakay, nakay in kaimo remrem panawen sa kansiyo agpaoraw in kaimo mata? Siyo keyen, Siyo osai ka poropita. 18 Dayo maniwala in mga poon Odyo keyen siyo ngani in datiyan beleg, matang kansiro siyogo tomangaw sa kansiyo mga koyay. 19 Keyen in mga poon Odyo, Kanyo lames bodang anda? Totoo lames siyo ibat biyodang beleg? Nakay batang siyo kangitan ngona? 20 Keyen in kansiyo mga koyay, Kami katawan siyo ngani kanyam bodang, osai siyo ibat biyodang beleg, 21 kamay kami yewed katawan no nakay batang siyo kangitan wa ngona, no nakay in agpaoraw sa kansiyo mata. Siyo gorangen wa, siyo in kanyo tanongen, siyo kabaloy wa agsabi panawen sa kansiyo sadiri. 22 Kaya siro keyen, siro agkalimo sa mga poon Odyo, angkataw in polong in mga poon Odyo keyen no siyo agsabi Isos in Kiristo, na siyo boyawen sa balay pagpaniponan. 23 Ina in dailan kaya in kansiyo mga koyay keyen, Siyo gorangen wa, siyo in tanongen. 24 Kalbas tagoli wakay kansiro biyerya in batang beleg. Siro keyen, Sabiyen ngani in totoo. Kanyam atawanan Isos agpamangwat daet. 25 Siyo keyen, Ako yewed katawan no siyo agpamangwat daet, no yewed. Osai waget in kangay atawanan, ako datiyan beleg, kamay ngona ako kangitan wa. 26 Siro keyen, Nakay in piyangwat siyo sa kaimo? Nangkataw in agpaoraw sa kaimo mata? 27 Siyo keyen, Kangay wa karai siyabi sa kanyo, kamay kamo dayo agparengey. Nakay batang kamo beet wakay tagoli karengey? Beet din lames kamo agadar sa kansiyo? 28 Kalbas siyo kansiro siyabiyan daet. Keyen, Kao in agadar sa kansiyo, kamay kami mga agadar kay Mowisis. 29 Kanyam atawanan in Diyos miplaong kay Mowisis. Dayem ina pag mangyan, kami yewed katawan no saano batang siyo. 30 Keyen ina pag lalaki, Makasoyo ngani ina. Kansiyo piyaoraw kangay mata, kamay kamo yewed katawan no saano batang siyo. 31 Kantam atawanan yewed piyagparengey in Diyos in mga agpamangwat daet, dayem in agmaal sa kansiyo, in mga agpaniwala sa kansiyo remrem, ina piyagparengey in Diyos. 32 Ibat sa parakayan kobat idapo kay kapaoraw mata beleg ibat biyoslot. 33 Isos idbatay kabaloy no siyo yewed batang sa Diyos. 34 Siro keyen, Kao biyodang in agpamangwat daet, kalbas kao kay in agkapatoldo sa kanyam? Kalbas siyo biyoyaw sa balay pagpaniponan. 35 Abaritaan Isos keyen, In batang beleg piyamoyaw mga Parisiyo sa balay pagpaniponan. Paka siyo ngiitan wakay Isos keyen, Kao lames agpaniwala sa Bodang Mangyan? 36 Keyen in kaliyakiyan, Laki koyay, nakay pag mangyan siyo? Ako patoldowen matang ako maniwala sa kansiyo. 37 Isos keyen, Siyo kaimo wa ngiitan, siyo ngona agpanggisodan sa kaimo. 38 In kaliyakiyan keyen, Laki Kapwan, ako agpasandig wa ngani. Kalbas siyo agmaal kay Isos. 39 Isos keyen, Ako atai pataboy matang in daet boo mangyan atawanan, matang kangitan in mga beleg, osai biyeleg in mga kangitan. 40 In mga Parisiyo sa bangen karengey kansiyo siyabi. Siro keyen, In beet kaimo siyabi kami nakay, beleg din? 41 Isos keyen, No kamo beleg, na kamo nges idapo daet. Kamay kanyo piyagsabi kamo kangitan, matang agaway kay in kanyo mga daet.
1 I sos keyen, Kangay piyagsabi sa kanyo, in agisoroy sa alabat topa, in yewed agdalan sa sakbawan, in aglakbon sa yewed pagdalanan na siyo tolisan, agpanakaw. 2 Kamay in agdalan sa sakbawan, siyo in kapwan in mga topa. 3 Siyo piyagpasoroy in agdamay sa sakbawan, kalbas in mga topa agparengey sa kansiyo agiplaong. Kansiyo piyagberya in baatte ngaran kansiyo topa, piyagpapanaw sa alabat. 4 Paka panaw wa, siyo tokawan sa kansiro, agyanggat din in mga topa, angkataw siro katawan in kansiyo agiplaong. 5 Siro idbatay miyanggat sa amat, no yewed agdalagan, angkataw siro yewed katawan in kansiro agiplaong. 6 Ina osai ka alimbawa in siyabi Isos, kamay siro yewed katawan in kansiyo beet siyabi. 7 Matang Isos tagoli wakay keyen sa kansiro, Remremen, ako in sakbawan, in pagdalanan mga topa. 8 In mga tokaw sa kangay mga tolisan, agpanakaw, kamay in mga topa yewed agparengey sa kansiro. 9 Ako in sakbawan. Kamayba nakay in domalan sa kangay batay piyaboway, batay kaisoroy, kapanaw, batay kangitan sabsaban. 10 Kaya atai pataboy in agpanakaw, matang waget agtakaw, agbono, agsida. Dayem ako, kaya ako atai pataboy matang kamo piyagpakan in sibay pag boway, osai agkaanggay gayed. 11 Isos keyen, Ako in maalno pag agalapet. In maalno pag agalapet agtaboy kansiyo boway, matay panawen sa mga topa. 12 In piyagbayadan pag agalapet, paka lomwas in bangaw, siyo domalagan. Kansiyo piyagbaliwan in mga topa, angkataw yewed siyo in kapwan, yewed kansiyo in mga topa. Matang in mga topa siyonggaban in bangaw, piyaarabang. 13 Siyo agdalagan angkataw piyagbayadan waget, yewed agpakayawte sa mga topa. 14 Ako in maalno pag agalapet, ako katawan sa kangay mga topa, osai siro katawan sa kangay. 15 Kataw daan in Amang katawan sa kangay, osai ako katawan sa kansiyo. Osai kangay piyagtaboy in kangay boway, matay panawen sa mga topa. 16 Ako aronaw kay mga topa, idapo atai pag alabat, kamay kailangan siro kangay din piyagalapet. Siro batay agparengey sa kangay agiplaong, matang batay mibaloy osai waget ka arigbowan, osai waget in agalapet. 17 Kaya ako piyagpakayawte in kangay Amang, angkataw kangay piyagtaboy in kangay boway, kalbas kangay wakay piyagkowa in kangay boway. 18 Idapo batay kakowa in kangay boway. Ako wakayte in agtaboy. Ako apo kabaloyan agtaboy osai agkowa wakay in kangay boway. Ako siyogo kangay Amang agkataw ina. 19 Tagoli wakay malsowayan in remrem in mga Odyo panawen asin pag mga siyabi Isos. 20 Karowan sa kansiro in agsabi siyo piyaglowasan mamaw, siyo agkapayagan, nakay batang kamo agparengey sa kansiyo? 21 Keyen wakay in kalaati, Yewed kabaloy agpanggisodan kataw ina in piyaglowasan mamaw. In mamaw lames kabaloy agpaoraw sa beleg? 22 Ina betek pandimla. Kabetek in Piyasta Piyagtalaga sa Diyos in kansiyo lakoy balay. 23 Agipanawan Isos sa balay lakoy Diyos, sa betek piyagawit kay Solomon Solambi. 24 Siyo riibok in mga Odyo. Siro keyen, Kami dogay wa agpanaya, nangkadogay kay kao batay agsabi? No kao in Kiristo na sabiyen wa gayed. 25 Isos keyen, Kangay wa siyabi sa kanyo, kamay kamo dayo maniwala. In kangay mga piyagpangwat sa kabaloyan kangay Amang in agsabi no nakay ako, 26 kamay kamo dayo maniwala, angkataw kamo yewed kangay mga topa. 27 In kangay mga topa agparengey sa kangay, siro kangay atawanan, agyanggat sa kangay. 28 Siro kangay piyagpakan boway idapo kalobosan, anggan dogayan idbatay matay, idbatay siro aagaw sa kangay bakwaw kamayba nakay pag mangyan. 29 In kangay Amang, in agtaboy kansiro sa kangay, siyo labi kay lakonaw sa boo. Siro idbatay akowa kamayba nakay sa bakwaw kangay Amang. 30 Ako, osai kangay Amang, kami osai waget. 31 Tagoli wakay komwa bato in mga Odyo matang piyabenglay kay Isos. 32 Matang keyen Isos, Kanyo ngiitan kangay piyangwat aronaw mga maal pag panawen batang sa kangay Amang. Nakay agbangen pag panawen in dailan matang ako kanyo piyagbenglayan bato? 33 In mga Odyo keyen, Kaya kao piyagbenglayan bato, yewed panawen sa kaimo maal pag piyangwat, no yewed kao aglaban sa Diyos. Kao mangyan daan, in kalakoyen Diyos kaimo piyagtakaw. 34 Keyen Isos, Apo agisolat sa kanyo mga Batas keyen, In siyabi Diyos kamo mga diyos. 35 Mga diyos in piyagawit in mga Batas Diyos sa kansiyo mga piyaalapetan in mga Agisolat. Kalbas yewed mayadi liyabanan in mga Agisolat. 36 Ako iidang in Amang, kalbas ako kansiyo siyogo. Na nakay batang kamo keyen, ako aglaban sa Diyos in ako keyen ako in Bodang Diyos? 37 No yewed kangay piyagpangwat in panawen kangay Amang, na ako ayaw kanyo agpaniwalaen. 38 Kamay no kangay piyagpangwat ina, no kamo dayo maniwala sa kangay, na kamo maniwala sa kangay mga piyagpangwat. No kataw ina kamo batay katawan sa kangay in Amang, osai ako sa kansiyo. 39 Tagoli wakay nges siyo batay diyakep, kamay siyo mipalpas. 40 Isos pataboy wakay sa ripay Ordan, sa kobat pagbaotismowan tangona Owan. Siyo ista agpamataw. 41 Karowan in ista pataboy sa kansiyo. Siro keyen, Owan idapo piyangwat lakonaw, kamay betek in boo kansiyo siyabi panawen kay Isos. 42 Ista bonton in agpasandig kay Isos.
1 Apo osai ka kaliyakiyan in ngaran Lasaro, kansiyo pagoliyan sa Bitanya. Siro agpaykamalayan osai kansiyo mga belag Mariya osai Marta. 2 Ina pag Mariya in agbobo langis mala masadap sa darapa Isos, kansiyo abok in pagponas. Lasaro apo maskit. 3 Kalbas in tayari agsogo tomangaw kay Isos keyen, Laki Kapwan, in kaimo pagbelag piyagmaal apo maskit. 4 Kamay paka Isos karengey ina siyo keyen, Ina pag maskit yewed matang siyo matay, no yewed matang piyaglakonaw in Diyos, matang ako din in Bodang Diyos piyaglakonaw. 5 Piyagmaal Isos in tayariyan Marta, Mariya, osai Lasaro. 6 Paka abaritaan apo maskit Lasaro, Isos mataw kay asin dowai ka ibeng. 7 Kalbas siyo keyen sa kansiyo mga agadar, Kitam wa moli sa Odiya. 8 Keyen in mga agadar, Laki Agpamatoldo, taite waget kao batay biyenglayan bato in mga Odyo, na nakay batang kao ista wakay agtaboy? 9 Keyen Isos, In ibeng labing dowai ka oras. Idbatay maligan in mangyan no siyo agipanaw sa mapawa, angkataw siyo kangitan, agrawa lakoy in ibeng. 10 Dayem in agipanaw yabi, siyo in batay maligan angkataw lened. 11 Kalbas Isos keyen kay, Agesek in kantam pagbelag Lasaro, ako batay ista, siyo kangay batay piyagpolaw. 12 Keyen in mga agadar, Laki Kapwan, no agesek na siyo batay maoraw. 13 In beet siyabi Isos matay wa Lasaro, kamay in remrem in mga agadar siyo agesek waget. 14 Kalbas siyabi wakay gayed keyen, Matay wa Lasaro, 15 kamay ako agkaanggay ako idapo ista, matang kamo pasandig gayed sa kangay. Kitam wa, pataboy sa kansiyo. 16 Tomas piyagawit Malsiing keyen sa kalaati mga agadar, Kitam wa miyanggat sa kansiyo matang kitam matay sarig siyo. 17 Paka Isos rateng sa Bitanya siyo abaritaan keyen, Lasaro liyebeng wa opat wa ka ibeng. 18 In Bitanya bangen sa Irosalim, mga tolo waget ka kilomitro. 19 Karowan in mga taga Odiya pataboy kay kora Marta osai Mariya matang agpakayawte sa kansiro. 20 Paka Marta abaritaan agrateng wa Isos siyo toloy tomagbo, kamay Mariya mataw sa balay. 21 Marta keyen kay Isos, Laki Kapwan, no nges kao atai na yewed matay in kangay belag. 22 Kamay kangay atawanan kamayba ngona batay piyagtaboy in Diyos sa kaimo kamayba nakay in kaimo yaayay sa kansiyo. 23 Isos keyen sa kansiyo, Batay wakay boway kaimo belag. 24 Keyen Marta, Ako katawan siyo batay wakay boway sa kalobosan pag ibeng, sa ibeng in boo piyagpaboway. 25 Keyen Isos, Ako in boway, Ako in agpamaboway. ln agpasandig sa kangay, kamayba siyo matay, siyo batay wakay boway. 26 Kamayba nakay pag agkaboway, agpasandig sa kangay, idbatay matay anggan idapo kalobosan. Kao lames maniwala asin? 27 Siyo keyen, Aon, Laki Kapwan. Ako agpasandig sa kaimo, kao in Bodang Diyos, in Kiristo in piyangako Diyos batay atai pataboy sa kobat. 28 Paka kalbas agpanggisodan, moli wa Marta, maypolong mangingkimot kay Mariya keyen, Anda wa in Agpamatoldo. Kao piyagberya. 29 Paka Mariya karengey ina siyo toloy tomaydek, siyo tomagbo kay Isos. 30 Isos yewed kay rateng sa mga balay, siyo ista kay agbangen sa katagbowan Marta. 31 Mariya siyarig in mga taga Odiya agpakayawte sa kansiyo in siyo toloy tomaydek batay panaw. Siro keyen siyo batay sa lebengan matang ista batay manangis. 32 Paka Mariya rateng kay Isos, siyo patalegeb sa bangen Isos. Siyo keyen, Laki Kapwan, no nges kao atai na yewed matay kangay belag. 33 In Isos kangitan Mariya agpanangis, osai in mga taga Odiya kansiyo sarig, siyo maloba apakayawtean anggan maskit kansiyo barosen. 34 Siyo keyen, saano siyo liyebeng? Siro keyen, Laki Kapwan, kitam wa, kaimo pangkiten. 35 Manangis Isos. 36 Matang keyen in mga taga Odiya, Lazaro kansiyo wano gayed piyagmaal. 37 Kamay in kalaati keyen, Ina pag mangyan kapaoraw in beleg, siyo lames idapo padalan matang Lasaro yewed matay? 38 In lebengan leyang, piyagbengbeng osai ka bato lakoy. Paka rateng Isos siyo agkapingiten wakay. 39 Isos keyen, Kanyo liganen in bato. Keyen Marta, Laki Kapwan, mala wa, opat wa ka ibeng siyo matay. 40 Keyen Isos, Yewed mana kangay siyabi sa kaimo no kao agpasandig sa kangay na kaimo batay ngiitan in kabaloyan Diyos? 41 Kalbas kansiro liigan in bato. Isos manangra, siyo keyen, Mambey, ako agkaanggay angkataw ako kaimo piyagparengey. 42 Ako katawan baatte kao agparengey sa kangay, kamay kangay siyabi ina panawen sa mga mangyan atai sa bangen, matang siro maniwala kao in agsogo sa kangay. 43 Kalbas siyo mango keyen, Lasaro, kao lomwas wa. 44 Lomwas ngani in matay. In kansiyo bakwaw, kansiyo bitis piyagteem benang, piyagteem panyowan in kansiyo mata. Keyen Isos, Kanyo bolwaten, palpasen wa. 45 Karowan in mga taga Odiya asin kay Mariya in kangitan kay Isos piyangwat, kalbas siro agpasandig wa sa kansiyo. 46 Kamay in kalaati sa kansiro pataboy sa mga Parisiyo, biyarita in piyangwat Isos. 47 Matang biyerya in mga poon sasirdoti osai in mga Parisiyo in kansiro mga konsiyal. Siro keyen, Nakay in kantam pangwaten? Ina pag mangyan agpamangwat karowan mga lakonaw pag panawen. 48 No Isos idwa kantam yaayaw agkataw ina, na in boo mangyan maniwala wa sa kansiyo, na in mga taga Roma batay wa atai, batay wa piyagligan in balay lakoy Diyos, piyagbono wa in boo mga Odyo. 49 Osai sa kansiro in mabwat pag poon sa mga sasirdoti ina pag dagon. In ngaran Kaypas. Siyo keyen, Kamo yewed katawan. 50 Kamo idapo manremrem in maal kay sa kantam osai waget ka mangyan in matay, ayaw ngaro in boo mga Odyo. 51 Yewed siyo wakayte in agsabi ina, no yewed angkataw ina betek siyo in mabwat pag poon sa mga sasirdoti kansiyo siyabi in batay mibaloy, in Isos batay matay kapalit sa mga Odyo. 52 Yewed waget kapalit ina pag bansa, no yewed matang tiipon in boo mga bodang Diyos sa boo mga kobat. 53 Piyarakay ina pag ibeng siro agpolong no nangkataw in agbono kay Isos. 54 Matang siyo idwa gayed agpapangkit agipanawan sa Odiya. Siyo pataboy sa Ipraim, osai ka bayan bangen sa moyod, siyo ista mamataw sarig in kansiyo mga agadar. 55 Bangen wa in piyasta piyagawit Paskowa. Karowan in mangyan batang sa paribok pag mga kobat pataboy sa Irosalim agpalinis kataw in agisolat sa mga Batas, matang sandata wa sa piyasta. 56 Kansiro piyagpamangkit Isos sa balay lakoy Diyos. Siro boo agsabi keyen, Nakay in kanyo remrem? Isos lames batay atai pataboy sa piyasta, nakay, yewed? 57 Agsogo in mga poon sasirdoti, osai in mga Parisiyo keyen, No siyo in katawan in pagpamatawan Isos na kami patoldowen, matang siyo kanyam piyagpadakep.
1 Paka bangen wa in piyasta piyagawit Paskowa, enem kay ka ibeng, Isos rateng sa Bitanya, sa pagbalayan Lasaro. Siyo in batang wa matay kalbas piyaboway wakay Isos. 2 Siro agyapon agpalkaanggayan kay Isos. Marta agbagi, kora Isos osai Lasaro agpaylanglangan. 3 Mariya komwa langis piyagawit nardo, mala masadap, lakonaw in bayad, kalaati kilo in kabyaten. Kalbas piyayodyod kay Isos darapa, in pagponas kansiyo abok. Mala wa gayed in boo galem balay. 4 Sa kansiyo mga agadar in osai Odas Iskaryoti, siyo in agpadakep kay Isos. Siyo keyen, 5 Dayem nges piyabili in mala masadap, in abel in kalakoyen kalakoy in abel panawenen tolo ka daan ka ibeng. Kalbas in bayad taboyen sa mga maidap. 6 Odas yewed agpakayawte sa mga maidap. Kaya siyo keyen siyo agpanakaw, siyo in agalapet kansiro kowarta, kamay kansiyo piyagpangkowa. 7 Isos keyen, Bayansiyo, ayaw agniniyen. Mariya agsandata wa ako batay liyebeng. 8 Palagi apo mga maidap, kamay ako idbatay palagi agyanggatyanggat sa kanyo. 9 Karowan mga Odyo abaritaan Isos sa Bitanya wa. Matang siro pataboy ista yewed waget matang kangitan kay Isos, dayem anggan kay Lasaro, in kay Isos piyaboway wakay. 10 Matang in mga poon sasirdoti agpolong keyen, Bonowen wa din Lasaro. 11 Angkataw panawen kay Lasaro in karowan mga Odyo idwa agyanggat sa kansiro, agpasandig wa kay Isos. 12 Paka goribas wakay karowan wano mangyan in lomwas sa piyasta abaritaan keyen, Isos agrateng wa sa Irosalim. 13 Siro komwa mga daon yangaw, panaw sa bayan matang siyo tiyagbo. Siro agpalkaanggayan keyen, Pagmaalen in Diyos. Pagmaalen in atai agrateng apo in kabaloyan Diyos. Pagmaalen in Poon lakoy sa mga kasokponan Israil. 14 Ngiitan Isos osai ka bodang asno, siyo asin somakay, kataw in Agisolat keyen, 15 Ayaw agkalimo, mga taga Irosalim. Maanda wa, agrateng in kanyo Poon lakoy, agsakay sa bodang asno. 16 In bayote ina yewed atawanan kansiyo mga agadar. Kamay in Isos boway wakay siro manremrem ina in Agisolat panawen sa kansiyo. Kalbas kataw ngani ina in mibaloy sa kansiyo. 17 In mga agpangkit in Isos agberya kay Lasaro sa lebengan, agpaboway wakay sa kansiyo, siro agbarita. 18 Ina in dailan kaya siyo tiyagbo in karowan mangyan, siro abaritaan in kansiyo lakonaw pag panawen. 19 Agpaypolongan in mga Parisiyo keyen, Kitam idapo wa abaloyan. Baina, in boo mangyan agyanggat kay Isos. 20 Sa mga pataboy sa piyasta matang agsamba apo mga yewed Odyo. 21 Siro pasabangen kay Pilipi taga Bitsayda sa Galiliya. Siro keyen, Laki kami agkapangkit kay Isos. 22 Kalbas ina siyabi Pilipi kay Anris. Siro tanan pataboy kay Isos, kansiro siyabi in beet in mga yewed Odyo. 23 Isos keyen, Rateng wa in kabetek ako in Bodang Mangyan batay piyaglakonaw. 24 Ayaw agkanawey, in beter bini, no yewed malabo sa diya, no yewed matay, na siyo agaway osai waget. Kamay no siyo matay na batay karowan. 25 No in mangyan in agpatokaw in kansiyo sadiri boway, na siyo batay matay. Kamay no siyo in yewed agpatokaw in kansiyo boway atai sa kobat, na siyo batay apo boway anggan idapo kalobosan. 26 In kangay mga sogowan kailangan miyanggat sa kangay, matang kamayba saano ako pataboy na asina daan in kangay sogowan. Batay piyagmaal kangay Amang in kangay mga sogowan. 27 Keyen Isos, Ngona malingetnget in kangay remrem. Maal lames ako keyen, Mambey, ayaw agpadalanen sa kangay in batay kaidapan? Ayaw. Yewed maal kataw ina in pandalangin, angkataw kaya ako atai pataboy matang ako domalan atai pag kaidapan. 28 Kamay Mambey, kaimo papangkiten in kaimo kalakoyen. Kalbas apo miplaong batang sa langit keyen, Kangay wa piyapangkit in kangay kalakoyen, kalbas tagoli wakay batay kangay piyagpapangkit. 29 In mga mangyan sa bangen karengey, siro keyen, Dalegdeg. Keyen wakay in kalaati, Manggisodan sa kansiyo osai ka angil. 30 Keyen Isos, Ina pag agiplaong panawen sa kanyo agbangen, yewed panawen sa kangay. 31 Ngona wa in kabetek in Diyos agpanremrem sa mga mangyan no nakay in batay piyagparosa. Batay wa piyagbenglay in agpansakop sa mga mangyan sa boo kobat. 32 No ako siyokbit wa, na in boo mangyan kangay piyagpasabangen. 33 Kansiyo siyabi ina matang agpatoldo no nangkataw siyo batay matay. 34 Keyen in mga mangyan, Agisolat sa mga Batas keyen in Kiristo batay agkaboway idapo kalobosan. Na nakay batang kao keyen in Bodang Mangyan batay siyokbit? Nakay lames in Bodang Mangyan? 35 Isos keyen, Kadogayte wa agaway kay sa kanyo in tinglaw. Kamo agipanaw agaway kay kanyo in tinglaw, matang kamo yewed agkalenedan. In agipanawan sa lened yewed katawan no saano siyo agtaboy. 36 Anggan kamo apo kay in tinglaw, kamo agpasandig sa tinglaw, matang kamo mga agpaniwala sa tinglaw. Paka Isos kasabi wa ina siyo panaw wa, agpatago. 37 Kamayba siro kangitan in kay Isos mga piyangwat lakonaw, siro yewed din maniwala sa kansiyo. 38 Kataw ina mibaloy wa in siyabi in poropita Isaiyas keyen, Laki Kapwan, nakay in maniwala sa kanyam barita? Kay nakay piyapangkit in kabaloyan in Kapwan? 39 Kaya siro yewed kabaloy agpaniwala, kataw Isayas apo kay siyabi keyen, 40 Kansiyo biyeleg in kansiro mga mata, osai piyarigen in kansiro mga remrem, matang siro idbatay kangitan, idbatay katawan in kansiro mga remrem. Siro idbatay tagoli sa kangay, matang nges siro kangay piyaoraw. 41 Kaya ina siyabi Isaiyas, kataw kansiyo ngiitan in kalakoyen Isos, siyo agiplaong panawen kay Isos. 42 Kamayba kataw ina, karowan sa mga poon Odyo agpasandig kay Isos, kamay piyagtago panawen agkalimo sa mga Parisiyo, karam siro batay biyoyaw sa balay pagpaniponan. 43 Angkataw osai in mangyan, osai in Diyos, in mangyan agbangen in kansiro piyagkalimowan. 44 Isos miplaong maksen keyen, In agpasandig sa kangay, yewed waget agpasandig sa kangay, no yewed kadayo sa agsogo sa kangay. 45 Osai in kangitan sa kangay, kangitan din sa agsogo sa kangay. 46 Ako in tinglaw atai pataboy sa kobat, matang idwa agpamataw kay sa lened in mga agpasandig sa kangay. 47 Kamayba nakay in karengey in kangay mga piyagsabi kamay yewed agpaniwala, siyo yewed kangay batay piyagparosa, angkataw ako atai pataboy yewed matang piyarosa in mga mangyan, no yewed matang piyaboway. 48 In mga dayo sa kangay, in yewed agpaniwala sa kangay mga piyagsabi, na apo batay agparosa sa kansiro. In kangay mga siyabi, ina in batay agparosa sa kansiro sa kalobosan pag ibeng. 49 Angkataw ako yewed agiplaong kangay wakayte, no yewed in Amang in agsogo sa kangay, siyo in agpatoldo sa kangay no nakay in kangay maal siyabi, osai no nangkataw in agiplaong. 50 Kangay atawanan in kansiyo mga bilin agpamaboway idapo kalobosan. Matang in mga piyasabi kangay Amang, ina in kangay piyagsabi.
1 Goribas piyasta wa piyagawit Paskowa. Isos katawan rateng wa in kabetek siyo batay wa panaw atai sa kobat, batay wakay moli sa Amang. Kansiyo datiyan piyagpakayawte in kansiyo mga agyanggat atai sa kobat. Kansiyo wa batay piyagpapangkit sa kansiro in kalakoyen in siyo agpakayawte. 2 Agyapon kora Isos osai in kansiyo mga agadar. Odas Iskaryoti, bodang Simon, siyoroyan wa Dimonyo in remrem keyen, Isos padakepen wa. 3 Isos katawan siyo piyakan wa in boo kabaloyan in kansiyo Amang. Kansiyo din atawanan siyo batang sa Diyos, kalbas batay wakay moli sa Diyos. 4 In siro agyapon Isos tomaydek, kiyowa wa kansiyo lambong, piyabekkes sa baris in towalya. 5 Kalbas siyo agbobo sapa sa palanggana, kalbas agparakay wa agogas sa mga darapa kansiyo mga agadar, kalbas piyagponas towalya in agibekkes sa baris. 6 Paka batay wa kay Simon Pidro, Pidro dayo. Siyo keyen, Laki Kapwan, kao mana batay agogas sa kangay darapa? 7 Isos keyen, Yewedkay kaimo atawanan in kangay piyagpangwat, kamay dogayan kao batay katawan. 8 Pidro keyen, Idbatay wano gayed kangay piyaogas sa kaimo in kangay darapa. Keyen Isos, No kao yewed kangay yoogas na kao idwa kangay sarig. 9 Keyen Pidro, Laki Kapwan, na ayaw waget in kangay darapa, anggan in kangay bakwaw, anggan din kangay olo. 10 Isos keyen, No siyo kaligo wa na idwa kailangan ogasen kay no yewed in darapa waget, angkataw maogas wa in boo kansiyo bilog. Kamo maogas wa, kamay yewed boo. 11 Kaya Isos keyen, Kamo yewed boo maogas, angkataw siyo katawan no nakay in batay agpadakep sa kansiyo. 12 Paka yoogas wa Isos in kansiro mga darapa, siyo agsoroy wakay kansiyo lambong, kalbas tomokkaw wakay. Isos keyen, Kamo lames katawan in beet siyabi in kangay piyangwat sa kanyo? 13 Ako kanyo piyagawit Agpamatoldo osai Kapwan. Betek ina, angkataw ako ngani. 14 Na no ako in kanyo Kapwan kanyo Agpamatoldo agogas kanyo mga darapa, na kamo din malsiyogasan darapa. 15 Kamo kangay piyakan pagtoladan, kamo agtolad sa kangay. 16 Totoo ngani in kangay piyagsabi, in sogowan yewed lakonaw sa kansiyo kapwan, in siyogo yewed lakonaw sa agsogo sa kansiyo. 17 No ina kanyo atawanan osai kanyo piyagpangwat na kamo batay agkaang gay. 18 In kangay piyagsabi yewed sa kanyo boo. Kangay atawanan in kangay mga iidang. Kamay kailangan mibaloy in siyabi sa mga Agisolat keyen, Ako siikadan in kangay piyakan pamangnen. 19 Ina kangay wa piyagsabi sa kanyo ngona kay bayo batay mibaloy, matang no mibaloy wa na kamo batay maniwala keyen Ako wa in Ako ngani. 20 Ayaw agkalibangaw, in agpabelag sa kangay sogowan agpabelag din sa kangay. Osai in agpasandig sa kangay, agpasandig din sa agsogo sa kangay. 21 Paka ina siyabi, malingetnget kay Isos remrem. Siyo keyen, Totoo ngani apo osai sa kanyo batay agpadakep sa kangay. 22 Mayterekan in mga agadar. Siro yewed katawan no nakay in keyen Isos. 23 Osai ka agadar piyagmaal wano Isos agitokkaw sa bangen kansiyo. 24 Matang Simon Pidro mangingkimot sa kansiyo keyen, Kaimo tanongen no nakay pag mangyan ina in keyen Isos. 25 Matang siyo domarede pasabangen kay gayed kay Isos. Siyo keyen, Laki Kapwan, nakay pag mangyan ina in kao keyen? 26 Keyen Isos, ako batay agsogbo tinapay sa sabaw, kalbas kangay piyagtaboy kansiyo, na ina wa. Paka siyogbo wa in tinapay, kansiyo tiyaboy kay Odas, bodang Simon Iskaryoti. 27 Paka kiyowa wa Odas in tinapay, Katanas misoroy wa sa kansiyo. Isos keyen, In kaimo piyagkapangwat na pangwaten wa. 28 Kamayba osai sa kansiyo mga sarig agkoman yewed katawan no nakay batang kansiyo siyabi ina. 29 Angkataw Odas in agalapet in kansiro kowarta siro keyen siyo piyagsogo Isos bomili in mga batay piyagkailangan sa piyasta, no yewed batay agtaboy kowarta sa mga maidap. 30 Paka kiyoman wa Odas in baaw siyo toloy wa panaw. Ina betek yabi wa. 31 Paka Odas panaw wa, Isos keyen, Ngona batay wa liyakonaw ako in Bodang Mangyan. Panawen sa kangay batay din liyakonaw in Diyos. 32 Paka liyakonaw wa in Diyos, na toloy wakay in Diyos in batay aglakonaw sa Bodang. 33 Laki mga bodang, ako idbatay wa dogay kanyo sarig. Ako batay kanyo piyagpamangkit, kamay kangay piyagsabi ngona sa kanyo in ako keyen sa mga poon Odyo, kamo yewed kataboy sa kangay pagtaboyan. 34 Osai wakay kangay piyagtaboy otos sa kanyo, kamo maybelagan. No kataw nakay ako agpabelag sa kanyo na kamo kataw din ina maybelagan. 35 No kamo agpaybelagan na in boo mga mangyan batay katawan kamo mga agadar sa kangay. 36 Keyen Simon Pidro, Laki Kapwan, kao saano agtaboy? Isos keyen, Sa kangay batay pagtaboyan kao yewed kaanggat ngona, kamay dogayan kao batay miyanggat. 37 Keyen Pidro, Laki Kapwan, Nakay batang ako yewed kaanggat sa kaimo ngona wa daan? Ako sandata wa matay agyanggat sa kaimo. 38 Isos keyen, Kao mana sandata wa matay agyanggat sa kangay? Totoo ngani, bayo tomalaok in manok ako makatolo kaimo batay piyamangyan.
1 Keyen Isos, Ayaw kamo agpanremrem. Kamo pasandig wa sa Diyos, pasandig din sa kangay. 2 Maliway lakoy in balay kangay Amang. No yewed maliway na kangay nges siyabi sa kanyo. Ako ista agtaboy, ako agpangwat kanyo batay talabang. 3 No ako ista wa, paka mibaloy wa in kanyo batay talabang, na ako batay wakay atai, kamo batay wa kangay piyagpaanggat sa kangay pagtaboyan. 4 Kanyo wa atawanan in dalan sa kangay pagtaboyan. 5 Keyen Tomas, Laki Kapwan, kami yewed katawan no saano kao agtaboy, na nangkataw kami batay katawan in dalan? 6 Keyen Isos, Ako in dalan, in totoo, in boway. Idapo ista karateng sa Amang no yewed domalan sa kangay. 7 No ako kanyo atawanan, na atawanan wa din kamo in kangay Amang. Sigod ngona siyo kanyo wa atawanan, kanyo ngiitan. 8 Pilipi keyen, Laki Kapwan, papangkiten wa sa kanyam in Amang, na ina sibay wa sa kanyam. 9 Keyen Isos, Pilipi, dogay wa ako agyanggat sa kanyo. Ako nakay, ikkay kanyo atawanan? In kangitan sa kangay, kangitan din sa Amang. Nakay batang lames kao keyen, Papangkiten sa kanyam in Amang? 10 Kao mana yewed maniwala keyen ako sa Amang, in Amang sa kangay? In kangay mga piyagsabi yewed kangay wakayte piyagsabi. In Amang in agbalay sa kangay in agpangwat kansiyo panawen. 11 Kamo maniwala wa keyen ako sa Amang, in Amang sa kangay. No kamo dayo maniwala sa kangay piyagsabi, na kamo maniwala panawen sa kangay mga piyangwat. 12 Ayaw agkanawey, in agpasandig sa kangay batay kabaloy agpangwat in kangay mga piyagpangwat. Labi kay lakonaw, angkataw ako ista wa agtaboy sa Amang. 13 Kamayba nakay in kanyo piyagayay sa Amang sa kangay kabaloyan, kangay batay piyangwat matang in kalakoyen in Amang piyagngitan sa Bodang. 14 Kangay batay piyagpangwat in kamayba nakay kanyo piyagayay sa kangay kabaloyan. 15 No ako kanyo piyagmaal na kamo batay maniwala sa kangay mga otos. 16 Ako batay omayay sa Amang, kalbas kamo kansiyo batay piyakan osai wakay ka Agpakaeyat remrem batay kanyo sarig anggan idapo kalobosan. 17 Siyo in Abyan in agpatoldo in betek. In mga agkasadapan sa kobat yewed katanggap sa kansiyo, angkataw siyo yewed kansiro piyagngitan, yewed kansiro atawanan. Kamay siyo kanyo atawanan angkataw siyo sa kanyo, osai batay agbalay sa kanyo galem. 18 Kamo idbatay kangay piyagbaliwan, idbatay yoolila. Ako batay wakay atai kanyo. 19 Kadogayte waget ako idbatay wa piyagngitan in mga agkasadapan sa kobat, kamay ako batay kanyo piyagngitan. Panawen ako agkaboway, kamo batay din agkaboway. 20 Ina pag ibeng kamo batay katawan ako sa Amang, kamo sa kangay, ako sa kanyo. 21 In apo kangay mga otos, osai agpaniwala, siyo in agmaal sa kangay. Kalbas in agmaal sa kangay batay piyagmaal kangay Amang. Siyo batay din kangay piyagmaal, ako batay agpapangkit sa kansiyo. 22 Odas, yewed in Iskaryoti pag Odas, keyen, Laki Kapwan, nakay batang kao batay agpapangkit sa kanyam waget, nakay batang yewed sa boo mangyan? 23 Keyen Isos, No in mangyan agmaal sa kangay na siyo batay agpaniwala sa kangay mga piyagsabi, siyo batay piyagpakayawte kangay Amang, kami batay sa kansiyo, batay agbalay sa kansiyo galem. 24 In yewed agmaal sa kangay yewed agpaniwala sa kangay mga piyagsabi. In kangay mga piyagsabi yewed batang sa kangay waget, no yewed batang sa Amang in agsogo sa kangay. 25 Anda pag boo kangay piyagsabi sa kanyo in ako baywi kay kanyo sarig. 26 Kamay in Agpakaeyat remrem, in Betek pag Abyan, in batay piyagsogo in Amang panawen sa kangay, siyo in batay agpatoldo sa kanyo in boote, osai agawit wakay in boo kangay siyabi sa kanyo. 27 In apyaan pag remrem in kangay piyagbaliwan sa kanyo. Kangay apyaan pag remrem in kangay piyagtaboy sa kanyo, yewed kataw in piyagtaboy in mga mangyan atai sa kobat. Kamo ayaw agkariyaban, ayaw agkalimo. 28 Kangay wa siyabi sa kanyo ako batay panaw, kamay ako batay wakay moli. No ako kanyo piyagmaal na kamo batay agkaanggay angkataw ako batay wa sa kangay Amang, angkataw in Amang labi kay kalakoy ako. 29 Bayo batay mibaloy kangay wa piyagsabi sa kanyo, matang no mibaloy wa na kamo batay agpasandig sa kangay. 30 Idbatay wa dogay ako agpanggisodan sa kanyo, angkataw agrateng wa in agsakop atai sa kobat. Siyo yewed kapandaeg sa kangay, 31 kamay kangay piyagpangwat in mga otos kangay Amang matang in mga mangyan katawan ako agmaal sa kangay Amang. Malpanaydek wa, kitam wa.
1 Keyen Isos, Ako in poon gayed obas. In kangay Amang in agalapet. 2 Kansiyo piyagpandodo in yewed agpanraweg pag mga sanga. In agpanraweg pag mga sanga, kansiyo din piyagpandodo in poso piyagpangkaspi in mga pasek, matang manraweg kayno gayed. 3 Kamo in mga sanga. Piyangkaspi wa in kanyo mga pasek. In kangay mga siyabi sa kanyo ina in mangkaspi 4 Kamo agaway agiskapet sa kangay, na ako agaway din agiskapet sa kanyo. In sanga idbatay kabaloy manraweg no yewed agiskapet sa poon. Na kataw din ina kamo yewed kapanraweg no kamo yewed agiskapet sa kangay. 5 Ako in poon obas, kamo in mga sanga. In agiskapet sa kangay osai ako sa kansiyo, siyo in batay agpanraweg gayed, angkataw no kamo agisoway sa kangay, na kamo idapo batay abaloyan. 6 In yewed agiskapet sa kangay batay piyagbenglay, batay maloto kataw in sanga. Kalbas in mga loto wa piyagtipon, piyagbenglay sa baya matang matebed. 7 No kamo agiskapet sa kangay, no agbalay sa kanyo in kangay mga piyagsabi, na kanyo ayayen kamayba nakay in kanyo beet, ina batay piyagtaboy sa kanyo. 8 Kangay Amang piyaglakonaw no kamo agpanraweg lakoy, matang atawanan kamo agadar sa kangay. 9 No nangkataw ako piyagmaal in Amang, na kataw din ina kamo kangay din piyagmaal. Kailangan kamo agaway kay kangay piyagmaal. 10 No kamo agpaniwala sa kangay mga otos, na kamo agaway kay kangay piyagmaal. Kataw ako, ako agpaniwala sa mga otos kangay amang, na ako agaway kay kansiyo piyagmaal. 11 Ina kangay wa siyabi sa kanyo matang in kangay kaanggayan agbalay sa kanyo, matang kamo din agkaanggay wa gayed. 12 Anda in kangay otos, kamo maybelagan, kataw in ako agpabelag sa kanyo. 13 No in mangyan matay kapalit sa kansiyo mga pagbelag, na ina in agpakayawte lakonaw kay sa boo agpakayawte. 14 Kamo kangay mga pagbelag no kamo agpaniwala sa kangay mga piyagsabi. 15 Kamo yewed kangay piyagawit sogowan, angkataw yewed atawanan in sogowan in piyagpangwat in kansiyo kapwan. Dayem pagbelag in kangay pagawitan sa kanyo, angkataw kangay wa siyabi sa kanyo in boo siyabi sa kangay in Amang. 16 Yewed kamo in omidang sa kangay, ako in omidang sa kanyo, osai agsogo sa kanyo matang kamo panaw kalbas batay manraweg, kalbas agaway in kanyo raweg. No kataw ina na kamayba nakay in kanyo piyagayay sa kangay Amang sa kangay kabaloyan na ina batay piyagtaboy sa kanyo. 17 In kangay otos sa kanyo, kamo maybelagan. 18 No agkagalit sa kanyo in mga mangyan, na kailangan kanyo atawanan ako in tokaw kansiro piyagkagalitan, kalbas kamo. 19 No kamo agkasadapan sa kobat na kamo nges batay piyagmaal in mga agkasadapan sa kobat. Kamay kamo yewed agkasadapan sa kobat. Kaya agkagalit sa kanyo in mga agkasadapan sa kobat, angkataw kamo kangay iidang batang sa mga agkasadapan sa kobat. 20 Remremen wakay in kangay siyabi sa kanyo keyen, Idapo sogowan lakonaw kay sa kansiyo kapwan. No ako kansiro piyangwatan daet, na kamo din kansiro batay piyagpangwatan daet. No siro maniwala sa kangay mga siyabi, na siro batay din maniwala sa kanyo mga batay siyabi. 21 Kamay daet in kansiro batay piyagpangwat sa kanyo panawen sa kangay, angkataw siro yewed katawan sa agsogo sa kangay. 22 No ako yewed atai pataboy agpamatoldo sa kansiro, na siro nges idapo daet. Kamay ngona siro idapo wa dailan sa kansiro daet. 23 In agkagalit sa kangay agkagalit din sa kangay Amang. 24 Siro nges idapo daet no yewed kangay piyagpapangkit sa kansiro in mga lakonaw pag panawen idapo mangyan kapangwat kalakoy ina. Kamay kamayba wa kansiro ngiitan in kangay mga piyangwat, ako kansiro piyagkagalitan, osai in kangay Amang. 25 Kataw ina mibaloy wa in Agisolat sa kansiro mga Batas keyen idapo dailan in ako kansiro piyagkagalitan. 26 Kamay in Agpakaeyat remrem, in Abyan in agpamatoldo in betek batay atai pataboy batang sa Amang, siyo kangay batay piyagsogo sa kanyo ibat ista sa Amang, na siyo in batay agbarita panawen sa kangay. 27 Kamo batay din agbarita panawen sa kangay, angkataw kamo kangay mga sarig ibat sa parakayan kay.
1 Keyen Isos, Ina kangay piyagsabi sa kanyo matang kamo yewed agempet agpasandig sa kangay. 2 Kamo batay kansiro piyagpamoyaw sa mga balay pagpaniponan. Dogayan in mangyan batay manremrem no siyo agbono sa kanyo na ina tolong sa Diyos. 3 Kaya ina kansiro batay piyangwat, siro yewed katawan sa kangay osai sa kangay Amang. 4 Kaya anda kangay piyagsabi sa kanyo, matang no betek wa kansiro piyagpangwat na kanyo wakay aremreman ina in kangay tangona siyabi sa kanyo. Anda ikkay kangay siyabi sa kanyo tangona angkataw kitam agpaysarigan kay. 5 Kamay ngona ako ati wa sa agsogo sa kangay. Sa kanyo idapo agtanong sa kangay no saano batay ako pataboy. 6 Ngona daan kamo maloba wano agremrem panawen sa kangay siyabi. 7 Kamay kailangan kanyo atawanan, no ako agipanaw na labi kay maal sa kanyo, angkataw idbatay atai sa kanyo in Agpakaeyat remrem no ako yewed panaw. Kamay no ako panaw wa, na siyo kangay piyagsogo sa kanyo. 8 Paka siyo rateng siyo batay agpatoldo sa mga agkasadapan sa kobat, keyen baribid in kansiro remrem sa daet, osai sa betek, osai sa batay parosa. 9 Kaya baribid in kansiro remrem sa daet, angkataw siro yewed agpasandig sa kangay. 10 Kaya baribid in kansiro remrem sa betek, angkataw ako batay wa sa Amang, idbatay wa kanyo ngiitan. 11 Kaya baribid in kansiro remrem sa batay parosa, angkataw piyolong wa batay wa piyagparosa in agpansakop sa boo mga kobat. 12 Karowan kay in kangay piyagsabi sa kanyo. Kamay kamo idbatay kay katawan ngona. 13 Paka rateng wa in Abyan in agpatoldo in betek, kamo kansiyo batay piyagtolong matang kanyo atawanan in boo betek, angkataw in kansiyo batay piyagsabi yewed sa kansiyo waget remrem, dayem in kansiyo arengeyan, ina in kansiyo batay piyagsabi sa kanyo. Kansiyo batay piyagpatoldo sa kanyo in mga batay mibaloy dogayan. 14 Ako batay piyaglakonaw, angkataw batang sa kangay in kansiyo batay piyagpatoldo sa kanyo. 15 In boo sa Amang kangay, matang ako keyen batang sa kangay in kansiyo batay piyagpatoldo sa kanyo. 16 Kadogayte waget ako idwa batay kanyo piyagngitan. Kalbas idwakay dogay ako tagoli wakay kanyo piyagngitan. 17 Agpaypolongan in kalaati mga agadar keyen, Nakay lames in kansiyo beet siyabi, nakay batang siyo keyen kadogayte waget siyo idwa batay kantam piyagngitan, kalbas idwakay dogay siyo tagoli wakay kantam piyagngitan? Siyo keyen kay angkataw kono siyo batay sa Amang. 18 Nakay lames in kansiyo beet siyabi keyen kadogayte waget? Yewed kantam atawanan in kansiyo beet siyabi. 19 Isos katawan in beet siro agtanong sa kansiyo, matang siyo keyen sa kansiro, Kamo lames agpanggisodan panawen sa kangay siyabi keyen kadogayte waget ako idwa kanyo piyagngitan, kalbas idwakay dogay ako tagoli wakay kanyo piyagngitan? 20 Totoo in kangay piyagsabi kamo batay manangis, agpalpanggoong, kamay in mga agkasadapan sa kobat batay agkaanggay. Kamo batay maloba agrongkot, kamay batay wakay tagoli agkaanggay. 21 Kataw no betek agkaboslotan in osai ka kagbaiyan siyo agpanremrem angkataw rateng wa in betek maidap, kamay paka miboslot wa in bodang, idwa kansiyo piyagpanremrem in maidap, siyo agkaanggay wa panawen biyoslot wa osai ka bodang. 22 Na kataw din ina kamo. Ngona in kanyo remrem malingetnget, kamay ako batay wakay tagoli kanyo ngiitan, na kamo batay agkaanggay wa gayed. Ina pag kaanggayan idbatay atakaw in roma. 23 Ina pag ibeng kamo idbatay wa agtanong sa kangay kamayba nakay. Ayaw agkalibangaw, kamayba nakay in kanyo piyagayay sa Amang sa kangay kabaloyan batay kansiyo piyagtaboy sa kanyo. 24 Anggan ngona kamo idapo kay yaayay sa kansiyo sa kangay kabaloyan. Kamo mangayay, na kamo batay piyakan, matang kamo agkaanggay wa gayed. 25 Ina kangay mga siyabi sa kanyo sa mga alimbawa, kamay dogayan in kangay mga piyagsabi idwa alimbawa, dayem mapawa in kangay piyagsabi sa kanyo panawen sa kangay Amang. 26 Ina pag ibeng kamo batay agayay sa kansiyo sa kangay kabaloyan. Yewed kangay piyagsabi sa kanyo kamo batay kangay piyagpandalangin sa amang, 27 angkataw kamo piyagpakayawte in Amang. Kamo kansiyo piyagpakayawte angkataw ako kanyo piyagmaal osai kamo maniwala keyen ako batang sa Diyos. 28 Ako batang sa Amang, atai pataboy sa kobat. Ngona ako batay agipanaw atai sa kobat, agoli wakay sa Amang. 29 Keyen in kansiyo mga agadar, Ngona mapawa wa in kaimo piyagsabi sa kanyam, idwa alimbawa. 30 Ngona kanyam atawanan kao katawan in boote, idwa kailangan piyagtanong. Panawen ina kami maniwala wa kao ngani batang sa Diyos. 31 Keyen Isos, Ngona lames kamo maniwala wa? 32 Bangen wa ngani in kabetek, kamo batay domalagan malsowayan, kaksiyo kaksiyo batay malipanaw. Ako kanyo batay biyaliwan ako waget, kamay ako yewed agboktong angkataw kangay sarig in Amang. 33 Kangay piyagsabi anda sa kanyo matang apyaan in kanyo remrem kataw agiyagem sa kangay. Kamo batay apo kaidapan atai sa kobat, kamay pakaeyaten in remrem, ayaw agkalimo, kangay wa diyaeg in boo atai sa kobat.
1 Paka Isos kasabi wa ina, siyo manangra sa langit keyen, Mambey, ngona wa in kabetek. Kaimo lakonawen ako in kaimo Bodang, matang kao liyakonaw din ako in kaimo Bodang. 2 Angkataw ako kaimo piyakan in kabaloyan sa boo mga mangyan, matang agpakan boway idapo kalobosan sa boo kaimo mga tiyaboy sa kangay. 3 In beet siyabi boway idapo kalobosan, na in kao kansiro atawanan keyen kao waget in Diyos, osai in kansiro din atawanan kaimo siyogo ako Kiristo Isos. 4 Kao kangay liyakonaw atai sa kobat, kangay wa liyobos in panawen kaimo piyagpapangwat sa kangay. 5 Mambey, kaimo taboyen sa kangay in kangay tangona kalakoyen, in ako asina kay sa kaimo bayo piyangwat in kobat. 6 Kao kangay piyatoldo sa mga mangyan tiyaboy sa kangay batang atai sa kobat. Siro kaimo, kalbas kaimo tiyaboy sa kangay, kalbas siro maniwala sa kaimo mga siyabi. 7 Ngona kansiro atawanan in boo kaimo mga tiyaboy sa kangay ina batang ngani sa kaimo, 8 angkataw kangay piyatoldo wa sa kansiro in kangay atawanan sa kaimo, kalbas kansiro din tiyanggap. Kansiro ngani atawanan ako batang sa kaimo. Siro agpaniwala kao in agsogo sa ka ngay. 9 Kangay piyagpandalangin siro. Yewed kangay piyagpandalangin in mga agkasadapan sa kobat, dayem in boo kaimo tiyaboy sa kangay, angkataw siro kaimo. 10 In boo sa kangay na kaimo din, osai in boo kaimo na kangay din. Ako kansiro piyaglakonaw. 11 Kalbas ngona ako batay wa asin sa kaimo, ako batay wa agipanaw sa kobat, kamay siro baywi kay atai sa kobat. Maal wano pag Amang, siro kaimo alapeten in kaimo kabaloyan lakoy, in kabaloyan in kaimo tiyaboy sa kangay, matang siro mibaloy osai waget, kataw daan kita osai waget. 12 In ako kansiro kay sarig, siro kangay piyagalapet in kaimo kabaloyan lakoy, in tiyaboy sa kangay. Siro kangay yaalapet, kamayba osai sa kansiro idapo malibangaw. Dayem in siyo wakayte palibangaw, matang mibaloy in Agisolat. 13 Kamay ngona ako agtaboy wakay sa kaimo. Anda kangay piyagsabi in ako baywi kay sa kobat, matang in kangay agkaanggay pag remrem agbalay gayed sa kansiro remrem. 14 In kaimo siyabi kangay wa tiyaboy sa kansiro. Siro piyagkagalitan in mga agkasadapan sa kobat angkataw siro idwa agkasadapan sa kobat, kataw daan ako yewed agkasadapan sa kobat. 15 Ako yewed agpandalangin keyen siro kowaen wa atai sa kobat. Dayem keyen siro kaimo alapeten panawen sa Daet. 16 Siro yewed agkasadapan sa kobat, kataw daan din ako yewed agkasadapan sa kobat. 17 Sa kabaloyan in totoo siro kaimo pabokoden. In kaimo agiplaong in totoo. 18 No nangkataw ako kaimo siyogo sa kobat, na kataw daan din ina siro kangay piyagsogo sa kobat. 19 Panawen sa kansiro kangay piyabokod in kangay sadiri, matang siro din mapabokod sa kabaloyan in totoo. 20 Yewed waget siro in kangay piyagpandalangin. Kadayo in mga batay agpasandig sa kangay panawen sa kansiro piyagbarita. 21 Mambey, in kangay pandalangin siro mibaloy osai waget. No nangkataw kao sa kangay, osai ako sa kaimo, na kataw daan din siro sa kanta, matang in boo mga mangyan maniwala keyen kao in agsogo sa kangay. 22 In kalakoyen kaimo tiyaboy sa kangay, na kangay wa tiyaboy sa kansiro, matang siro mibaloy wa gayed osai waget, kataw daan din kita osai waget. 23 Ako sa kansiro, kao sa kangay, matang siro mibaloy wa gayed osai waget. No kataw ina na atawanan in boo mga mangyan ako kaimo siyogo, osai atawanan siro kaimo piyagpakayawte kataw daan din in ako kaimo piyagpakayawte. 24 Mambey, kangay din beet in kaimo mga tiyaboy sa kangay kangay sarig sa kangay pagpamatawan, matang kansiro piyanroris in kalakoyen kaimo tiyaboy sa kangay, angkataw ako kaimo piyagmaal in ikkay piyangwat in kobat. 25 Maal wano pag Amang, kao yewed atawanan in mga agkasadapan sa kobat. Kamay kao kangay atawanan, osai atawanan in kangay mga agadar keyen kao in agsogo sa kangay. 26 Kao kangay piyatoldo sa kansiro, osai batay kay piyagpatoldo, matang in kaimo pakayawte sa kangay agbalay sa kansiro galem, osai ako din sa kansiro. Ina in kalobosan in kay Isos pandalangin.
1 Paka siyabi wa Isos ina, siyo panaw wa, kadayo in kansiyo mga agadar. Siro motol sa sapa Kidron pataboy sa osai ka alamanan ista. 2 Odas, in agpadakep kay Isos sa mga agkabono sa kansiyo, katawan ina pag kobat, angkataw Isos mapret ista pataboy, osai in kansiyo mga agadar. 3 Odas ista pataboy agyanggat in amat mga polis batang sa balay lakoy Diyos, agyanggat osai ka barkadaan mga sondalo, siyogo in mga sasirdoti lakoy osai mga Parisiyo. Siro agbaba mga tinglaw, mga solo, mga torag. 4 Isos katawan in boo batay mibaloy sa kansiyo, matang siro kansiyo tiyagbo, keyen, Nakay in kanyo piyagpamangkit? 5 Siro keyen, Isos taga Nasarit. Keyen Isos, Ako ngani. Asina din Odas in agpadakep sa kansiyo. 6 In Isos keyen Ako ngani, siro toloy pasiwi, kalbas mangaligan sa diya. 7 Isos keyen wakay, Nakay in kanyo piyagpamangkit? Siro keyen, Isos taga Nasarit. 8 Keyen Isos, Ako keyen wa sa kanyo, Ako Isos. Na no ako in kanyo piyagpamangkit na bayansiyo panaw anda pag mga mangyan. 9 Ina kansiyo siyabi matang mibaloy in kansiyo pandalangin karai keyen, Mambey, idapo malibangaw in kaimo mga tiyaboy sa kangay kamayba osai waget. 10 Liyakso Simon Pidro in kansiyo piyagtakles pisaw. Kansiyo piyalang in sogowan in mabwat pag poon sa mga sasirdoti, maagis in kansiyo talinga, in pamalang agbangen. Malko in ngaran in sogowan. 11 Keyen Isos kay Pidro, Soroyen wa sa kaloban in kaimo pisaw. Yewed mayadi ako yewed domalan sa kaidapan tiyaboy in Amang sa kangay. 12 Isos diyakep in mga polis Odyo, osai in barkadaan mga sondalo, in poonan in kansiro kapitan. Kalbas biyakos. 13 Isos kansiro biyaba tokaw kay Anas, in biyanan Kaypas. Ina pag dagon Kaypas in mabwat pag poon sa mga sasirdoti. 14 Kaypas in keyen sa mga poon Odyo in maal kay sa kansiro osai waget ka mangyan in matay kapalit sa boo mga Odyo. 15 Simon Pidro mangagak kay Isos, osai osai kay ka agadar. Ina pag agadar atawanan in mabwat pag poon sa mga sasirdoti, matang siyo kaiso roy sarig Isos sa tongkodan balay. 16 Pidro biyaliwan wakay sa awak sakbawan. Matang in agadar, in atawanan in mabwat pag poon sa mga sasirdoti, siyo ista pataboy, siyabiyan in daraga agdamay sa sakbawan, kalbas Pidro kansiyo piyaisoroy. 17 In daraga keyen kay Pidro, Kao din yangon osai ka agadar asin pag mangyan? Keyen Pidro, Yewed. 18 In mga sogowan asin agtaydek, osai in mga agdamay, piyagdimla, matang siro agpoypoy wa, agpanayang. Pidro agpaagem din agpanayang. 19 In mabwat pag poon sa mga sasirdoti agbotog kay Isos panawen sa kansiyo mga agadar, osai sa kansiyo mga siyabi. 20 Keyen Isos, Ako agiplaong sa adapan karowan, mapret ako agpatoldo sa mga balay pagpaniponan mga Odyo, osai sa balay lakoy Diyos. Ako idapo siyabi piyagtago. 21 Nakay batang ako kaimo piyagbotog? In kaimo tanongen in mga karengey sa kangay, kansiro atawanan no nakay in kangay siyabi. 22 Paka kansiyo siyabi ina siyo siyontok osai ka polis asin keyen, Nakay batang kao agsagot kataw ina sa mabwat pag poon sa mga sasirdoti? 23 Keyen Isos, Amba, kaimo sabiyen sa kangay in kangay mga siyabi daet. Kamay no maal in kangay siyabi na nakay batang ako kaimo siyontok? 24 Isos piyagbakos daan piyababa wa Anas kay Kaypas in mabwat pag poon sa mga sasirdoti. 25 Ina betek Simon Pidro agtaydek kay din agpanayang. Siro keyen, Kao lames agadar din kay Isos? Pidro keyen, Yewed. 26 Asina apo kabelagan in kay Pidro yaagisan talinga, siyo sogowan in mabwat pag poon sa mga sasirdoti. Siyo keyen, Yewed mana kao in kangay ngiitan kansiyo sarig sa alamanan? 27 Pidro tagoli agsabi keyen, Yewed. Kalbas toloy tomalaok in manok. 28 Isos batang kay Kaypas balay, siyo biyaba sa balay lakoy in gobirnador. Ina agkaboka wa. Yewed misoroy in mga poon Odyo sa balay lakoy in gobirnador, angkataw no siro misoroy sa balay yewed Odyo, na siro piyagayaw wa mamangan in yapon piyagawit Paskowa. 29 Matang Gobirnador Pilato lomabo pataboy sa tongkodan, kalbas siro kansiyo tiyanong keyen, Nakay in kanyo piyagsombong sa kangay panawen atai pag mangyan? 30 Siro keyen, No yewed agpangwat daet ina pag mangyan, na siyo idbatay kanyam biyaba sa kaimo. 31 Pilato keyen sa kansiro, Siyo kanyo kowaen, kanyo parosaanen kataw in kanyo ogali. Keyen in mga poon Odyo, Kami piyagayaw agbono kamayba kay nakay. 32 Ina mipangwat matang mibaloy in siyabi Isos in padalan kansiyo batay katayan. 33 Pilato misoroy wakay sa kansiyo pagbalayan. Isos Biyerya. Keyen, Kao lames in poon lakoy in mga Odyo? 34 Keyen Isos, Ina lames batang daan sa kaimo remrem? Nakay, apo agsabi sa kaimo? 35 Keyen Pilato, Nakay, ako Odyo? In kaimo mga kamangyanan osai in mga poon sasirdoti in agpaanggat kaimo atai. Nakay in kaimo piyangwat? 36 Isos keyen, In kangay sakopan yewed atai sa kobat. No in kangay sakopan atai sa kobat, na in kangay mga mangyan batay aglaban matang ako yewed piyadakep sa mga poon Odyo. Kamay in kangay sakopan yewed atai sa kobat. 37 Keyen Pilato, Na kao mana poon lakoy? Keyen Isos, Kao wa in agsabi keyen ako poon lakoy. Ina wa in dailan kaya ako biyodang, osai atai pataboy sa kobat matang miplaong panawen sa totoo. In boo beet sa totoo siro agparengey sa kangay agiplaong. 38 Keyen Pilato, Nakay in totoo? Paka ina masabi wa Pilato, siyo lompot wakay, keyen sa mga mangyan, Ako idapo ngiitan daet asin pag mangyan. 39 Kamay kanyo ogali no ibeng Paskowa na kailangan ako agpalpas osai ka piyagbilanggo. Kanyo lames beet ako agpalpas in poon lakoy in mga Odyo? 40 Siro agpango keyen, ayaw. Ayaw siyo, dayem Barabas. Barabas osai ka tolisan.
1 Kalbas Pilato agsogo keyen, Isos kowaen, kalbas bogbogen. 2 In mga sondalo komwa dogiyen, piyangwat sarikaw, piyabalay kay Isos olo, siyo piyalambongan mapola wano. 3 Siro malagakan pasabangen sa kansiyo keyen, Pakaabaen in boway in poon lakoy sa mga Odyo. Kalbas siyo toloy piyanontok. 4 Lompot wakay Pilato, keyen sa mga mangyan, Baanda, siyo kangay piyagpapangkit sa kanyo matang kanyo atawanan ako idapo ngiitan daet sa kansiyo. 5 Isos piyalompot, agisarikaw in dogiyen, aglambongan mapola wano. Keyen Pilato, Baanda in mangyan. 6 Paka kangitan sa kansiyo in mga poon sasirdoti, osai in mga polis, siro mango mayraesan keyen, Pakowen sa kodos. Pakowen sa kodos. Keyen Pilato, Siyo kanyo kowaen, kamo in agpako sa kansiyo. Ako idapo ngiitan daet sa kansiyo. 7 Keyen in mga Odyo, Kami apo mga Batas. Sa kanyam Batas kailangan siyo matay, angkataw siyo keyen siyo Bodang Diyos. 8 In Pilato karengey ina pag siyabi siyo maloba alimowan. 9 Tagoli wakay siyo misoroy sa kansiyo pagbalayan. Isos biyotog Pilato keyen, Kao taga nakay? Kamay Isos yewed somagot. 10 Keyen Pilato, Nakay batang kao yewed somagot sa kangay? Kao beet yewed mipalpas? Nakay, kao beet piyako sa kodos? Kao mana yewed katawan ako in apo kabaloyan? 11 Keyen Isos, Kao idapo kabaloyan sa kangay no yewed tiyaboy Diyos sa kaimo. Matang labi kay lakonaw in daet in agbaba sa kangay atai. 12 In karengey ina Pilato, Labi kay siyo agkapalpas kay Isos. Kamay agpalpangowan in mga mangyan keyen, No kaimo piyalpas ina pag mangyan na kao idbatay wa piyabelag Sisar. Angkataw kamayba nakay in keyen siyo poon lakoy, na siyo kalaban wa Sisar. 13 Paka Pilato karengey ina pag matiwid kansiyo piyalompot Isos. Pilato tomokkaw sa pagpanokkawan tanongan, sa betek piyagawit Bato Paltawan. No sa agiplaong Ibriyo na keyen, Gabata. 14 Ina pag ibeng agsandata sa Paskowa, agakyat wa tangali. Keyen Pilato sa mga mangyan, Baanda in kanyo poon lakoy. 15 Siro mango keyen, Bonowen, bonowen. Pakowen wa sa kodos. Keyen Pilato, Nakay, pakowen wa sa kodos in kanyo poon lakoy? Keyen in mga poon sasirdoti, Kami idapo poon lakoy no yewed Sisar. 16 Matang Isos tiyaboy wa Pilato sa kansiro, matang piyako sa kodos. 17 Kansiro kiyowa ngani Isos. Siyo piyapanaw sa bayan piyagpasan kansiyo kodos, pataboy sa kobat piyagawit Kobat Bitol Olo, no sa agiplaong Ibriyo na Golgota. 18 Paka rateng ista siyo piyako sa kodos. Apo kay din dowai ka piyako sa mga kodos piyalkaktek, in osai kay Isos pamalang agbangen, in osai sa kansiyo tagwala. 19 Somolat Pilato keyen, Isos taga Nasarit, in Poon Lakoy mga Odyo. Kalbas in solat piyaiskapet sa kodos. 20 Karowan sa mga mangyan kabasa ina pag solat angkataw bangente sa Irosalim in betek pagpakowan kay Isos. Osai ina siyolat sa mga agiplaong Ibriyo, osai agiplaong Latin, osai agiplaong Girigo. 21 Matang siyabi in mga poon sasirdoti kay Pilato keyen, Ayaw kaimo agsolaten keyen, In Poon Lakoy mga Odyo. Dayem keyen, Ina pag mangyan agsabi siyo Poon Lakoy mga Odyo. 22 Pilato keyen, In kangay solat masolat wa. 23 In Isos mapako wa in mga sondalo, piyagpalbagiyan in opat ka sondalo in kansiyo mga damit. Osai in kansiyo maaba pag lambong. Ina piyangwat idapo simat sigod sa ogbos anggan sa bitis. 24 Maypolongan in mga sondalo keyen, Ayaw kantam aggisiyen anda. Kitam malpostaan matang atawanan no kay nakay wa damit anda. Kataw ina mibaloy wa in siyabi sa Agisolat keyen, Kansiro piyalbagiyan in kangay mga damit. Siro agpostaan sa kangay lambong maaba. Kataw ngani ina in piyangwat in mga sondalo. 25 Agpalpantaydek in inang Isos sa bangen kay Isos pagsokbitan, in kadowai kay Isos inang belag, Mariya Kilyopas babai, in katolo Mariya Magdalina. 26 In ngiitan Isos kansiyo inang, osai in kansiyo piyagmaal pag agadar asin din sa bangen, Isos keyen sa kansiyo inang, Dada, ina wa in kaimo bodang. 27 Kalbas keyen din sa kansiyo agadar, Laki, ina wa in kaimo inang. Ibat ina pag betek in inang piyaanggat ina pag agadar sa kansiyo balay. 28 Paka kalbas, Isos katawan mibaloy wa in boote. Matang mibaloy wa in Agisolat siyo keyen, Ako agkainem. 29 Apo ista keden makno kagwali toba. Kansiro siyogbo asin kagwali bolak, kalbas piyaistebek wa oway, piyasopsop kay Isos. 30 Paka masopsop Isos in toba siyo keyen, Mibaloy wa. Piyapekle wa in kansiyo olo, kalbas matay wa. 31 Ina in ibeng agsandata sa Paskowa. Dayo in mga poon Odyo in mga bilog mataw sa mga kodos sa Ibeng Pamainga, angkataw kansiro piyaglakonaw ina pag Ibeng Pamainga. Matang kansiro yaayay kay Pilato keyen, Kao agsogo pangkagdowen in mga bitis, kalbas kowaen sa kodos in mga bilog. 32 Ista wa pataboy in mga sondalo, kiyagdo in mga bitis in dowai ka piyako sa mga kodos sa bangen Isos. 33 Kamay paka siro rateng kay Isos, kansiro ngiitan siyo matay wa, idwa kansiro kiyagdo in kansiyo bitis. 34 Kamay kansiyo tagyang siyaldak torag osai ka sondalo. Toloy omampelek in daya osai sapa. 35 In kangitan ina anda wa pag agbarita. Betek in kangay barita. Kangay atawanan betek in kangay mga piyagsabi, matang kamo maniwala. 36 Ina mipangwat matang mibaloy in siyabi sa Agisolat keyen, Idapo magdo kamayba osai waget sa kansiyo mga bitol. 37 Siyabi wakay in osai ka Agisolat keyen, Kansiro batay piyangkit in kansiro siyaldak. 38 Paka kalbas, Osi taga Arimatiya pataboy kay Pilato. Osi osai ka agadar kay Isos, kamay patago, panawen agkalimo sa mga poon Odyo. Siyo omayay kay Pilato no maal kansiyo kiyowa in bilog Isos. Keyen Pilato, Kalobante. Matang Osi pataboy ista, kansiyo kiyowa in bilog. 39 Miyanggat kansiyo Nikodimo. Siyo in tangona pataboy kay Isos yabi. Kansiyo piyagbaba langis mala masadap piyalageman mira osai alwi, limampo ka kilo. 40 Kansiro kiyowa in bilog Isos, tiyeem sa lino pag benang, piyaagem in langis mala masadap, panawen sa ogali mga Odyo aglebeng. 41 Sa bangen kay Isos pagpakowan apo alamanan. Asin apo lebengan, bayo kay, idapo kay batang liyebeng asin. 42 Angkataw ina ibeng agsandata in mga Odyo sa Ibeng Pamainga, osai panawen bangen in lebengan, asina wa kansiro liyebeng Isos.
1 Agkaboka wa in ibeng Linggo, Mariya Magdalina pataboy sa lebengan. Kansiyo ngiitan kiyowa wa in bato lakoy agikopot sa sakbawan lebengan. 2 Matang siyo toloy domalagan pataboy kay Simon Pidro osai sa piyagmaal Isos pag agadar. Mariya keyen, Idapo wa sa lebengan in bilog in Kapwan, idapo kanyam atawanan no saano biyaba. 3 Kalbas Pidro panaw pataboy sa lebengan, osai in osai ka agadar. 4 Tanan agdalagan, kamay Pidro piyagbaliwan, in osai ka agadar in tokaw rateng. 5 Siyo mamaserek sa galem lebengan, kansiyo ngiitan agibolalang in mga lino pag benang, kamay siyo yewed misoroy. 6 Paori rateng Simon Pidro. Siyo toloy misoroy sa lebengan, kansiyo ngiitan in mga lino pag benang agibolalang, 7 osai in panyowan batang piyateem sa kansiyo olo, yewed agiyagem sa mga benang, no yewed agipiklo, agisoway in pagibangkagan. 8 Kalbas misoroy din in tokaw rateng pag agadar, ina kansiyo ngiitan, kalbas maniwala wa. 9 Anggan asin ikkay kansiro atawanan in piyagsabi sa Agisolat keyen, Batay wakay boway Isos. 10 Kalbas moli wakay in dokalaki. 11 Mariya agtaydek sa bangen lebengan agpanangis, siyo mamaserek sa galem lebengan. 12 Kansiyo ngiitan dowai ka angil aglambong maboksi. Siro agtokkaw sa batang pagibolalangan in bilog Isos, in osai sa olo agbangen, in osai sa bitis agbangen. 13 Siro keyen kay Mariya, Laki, nakay batang kao agpanangis? Keyen Mariya, Kansiro kiyowa in bilog kangay Kapwan, yewed kangay atawanan no saano kansiro biyaba. 14 Paka ina siyabi, siyo pabalingling. Isos kansiyo ngiitan asin agtaydek, kamay siyo yewed katawan ina Isos. 15 Keyen Isos, Laki, nakay batang kao agpanangis? Nakay in kaimo piyagpamangkit? Kay Mariya remrem siyo in agalapet in mga togda, matang siyo keyen, Laki, no kao in komwa sa kansiyo, na ako patoldowen no saano kaimo biyaba, kalbas kangay batay piyagkowa. 16 Keyen Isos, Mariya. Kalbas Mariya patobang, siyo keyen, Raboni. In beet siyabi Agpamatoldo. 17 Keyen Isos, Ako ayaw agatangen, angkataw ako ikkay karateng sa Amang. Kao ngaro ista pataboy sa kangay mga kabelagan. Kaimo sabiyen keyen ako batay monaik batay sa kangay Amang, siyo kanyo din Amang, sa kangay Diyos, siyo kanyo din Diyos. 18 Kalbas Mariya Magdalina pataboy sa mga agadar keyen, Kangay ngiitan in Kapwan. Toloy kansiyo siyabi sa kansiro in bilin Isos. 19 Paka yabi wa ina pag ibeng, agkatipon in mga agadar. Kiyopot in mga sakbawan balay, panawen siro agkalimo sa mga poon Odyo. Kalbas rateng Isos, tomaydek sa kansiro kagwaraan. Siyo keyen, Kataw nakay wa kamo? 20 Paka ina siyabi, kansiyo piyapangkit in kansiyo mga bakwaw, anggan kansiyo tagyang. Paka siro kangitan sa Kapwan agkaanggay wano in mga agadar. 21 Keyen Isos, Kamo apyaan wa. No nangkataw ako siyogo in Amang, kamo kangay din piyagsogo. 22 Kalbas siro kansiyo piyaroypoyan, keyen, Kanyo tanggapen in Betek pag Abyan. 23 Kamayba nakay no kanyo liibangaw in kansiyo daet, na malibangaw ngani. In yewed kanyo piyaglibangaw, na agaway daan. 24 Tomas, in osai sa Labing Dowai ka agadar, in piyagawit Malsiing. In betek rateng Isos siyo idapo asin. 25 Matang in kalaati mga agadar keyen sa kansiyo, Kanyam ngiitan in Kapwan. Keyen Tomas, Ako idbatay maniwala, dayem ako kangitan in salay batang pagpakowan sa kansiyo bakwaw, kangay piyagsoroy kangay solo, osai piyagsoroy in kangay bakwaw sa kansiyo tagyang. 26 Paka sa kawalo wa ka ibeng tagoli wakay agkatipon sa galem balay in mga agadar. Asin din Tomas. Piyagkopot in mga sakbawan, kamay Isos misoroy tomaydek sa kansiro kagwaraan. Siyo keyen, Kamo apyaan wa. 27 Kalbas siyo keyen kay Tomas, Kao mangkit kangay bakwaw, atai pataboyen in kaimo solo. In kaimo bakwaw soroyen sa kangay tagyang. Ayaw piyagbaslag in remrem, kao maniwala wa. 28 Keyen Tomas, Kangay Kapwan, kangay Diyos. 29 Keyen Isos, Kao mana maniwala wa angkataw ako kaimo ngiitan? Agkaanggay in mga agpaniwala kamayba ako yewed piyagngitan. 30 Karowan kay in kay Isos piyangwat mga lakonaw pag panawen, ngiitan in kansiyo mga agadar, kamay idwa masolat atai pag aklat. 31 Kaya siyolat in mga atai matang kamo maniwala keyen Isos ngani in Kiristo, in Bodang Diyos. Kataw ina kamo kansiyo piyaboway.
1 Kalbas tagoli wakay papangkit Isos sa mga agadar sa balabaan dagat Tibiryas, kataw tai. 2 Agpaysarigan in osai Simon Pidro, in kadowai Tomas piyagawit Malsiing, in katolo Natanail taga Kana sa Galiliya, in kaopat osai in kalima in mga bodang Sibidiyo, in kaenem osai in kapito in dowai kay ka agadar. 3 Keyen sa kansiro Simon Pidro, Ako batay mangisda. Siro keyen, Kami batay miyanggat. Siro panaw, somakay sa bangka, kamay ina pag yabi idapono abel. 4 Badya kayte lened Isos tomaydek sa balabaan, kamay in mga agadar yewed katawan sa kansiyo. 5 Siyo keyen, Mga bodang, kamo lames apo abel? Siro keyen, Idapono. 6 Isos keyen, Palabowen in lambat sa pamalang agbangen bangka, na kamo batay kabel. Kalbas piyalabo ngani siro in lambat, kalbas yewed kansiro agoyod panawen sa karowan abel. 7 In agadar in piyagmaal Isos keyen kay Pidro, Ina in Kapwan. In Simon Pidro karengey ina siyo toloy agsoroy lambong, angkataw siyo idapo lambong, kalbas toloy lomabo sa bangka tomalma kay Isos. 8 Kamay in kansiyo mga sarig agadar anggan sa balabaan sa bangka daan, piyaggoyod in lambat makno isda. Yewed adayonaw sa balabaan, mga siyamnapo waget ka mitro. 9 Paka siro patakdang wa sa balabaan siro kangitan ista baya apo isda piyagsiba, osai mga pamangnen. 10 Keyen Isos, Atai babaen in kalaati kanyo abel isda. 11 Kalbas Pidro monaik wakay sa bangka, kalbas giyoyod sa balabaan in lambat, makno mga lakonaw pag isda, 153 in boo. Kamayba karo ina yewed marognit in lambat. 12 Keyen Isos, Kamo aywawa, kitam wa agambi. Kamayba osai sa kansiyo agadar idapo mangaas agtanong keyen, Nakay kao? Angkataw siro katawan siyo wa in Kapwan. 13 Kiyowa Isos in pamangnen osai in isda, tiyaboy sa kansiro. 14 Ina in katolo ka agpapangkit Isos sa mga agadar, in batang siyo matay. 15 Paka siro kaambi wa Isos keyen kay Simon Pidro, Laki Simon, bodang Owan, kao lames agmaal sa kangay in labi kay atai pag mga mangyan? Siyo keyen, Aon, laki Kapwan, kao katawan ako agkabeet sa kaimo. Isos keyen, Na pakomanen in kangay mga bodang topa. 16 Isos keyen wakay tagoli, Laki Simon, bodang Owan, kao lames agmaal sa kangay? Keyen Pidro, Aon, Laki Kapwan, kao katawan ako agkabeet sa kaimo. Isos keyen, Na kaimo alapeten in kangay mga topa. 17 In katolo Isos agtanong keyen, Laki Simon, bodang Owan, kao lames agkabeet sa kangay? Pidro manremrem angkataw makatolo siyo tiyanong keyen, Kao lames agkabeet sa kangay? Siyo keyen, Laki Kapwan, kaimo atawanan in boote, kaimo ngani atawanan ako agkabeet sa kaimo. Keyen Isos, Na pakomanen in kangay mga topa. 18 Ayaw agkalibangaw, in kao bodang kay kao wakayte agsoroy kaimo lambong, agipanawan no sa nakay in kaimo beet, kamay paka kao koyay wa, kao batay agodoy kaimo bakwaw, kao batay biyakos, batay biyaba sa yewed kaimo beet pagtaboyan. 19 Kaya kansiyo siyabi ina matang agpaalam no nangkataw in batay katayan Pidro, matang in Diyos kansiyo batay piyagpakalakonaw. Kalbas keyen Isos sa kansiyo, Kao miyanggat sa kangay. 20 Pidro managoli, kansiyo ngiitan agyanggat in kay Isos piyagmaal pag agadar. Siyo in taite agitokkaw sa bangen Isos in siro agyapon, in agtanong keyen, Laki Kapwan, nakay in batay agpadakep sa kaimo? 21 In Pidro kangitan sa kansiyo Pidro keyen kay Isos, Laki Kapwan, nakay in batay mibaloy asin pag lalaki? 22 Keyen Isos, No kangay beet siyo batay boway anggan ako atai wakay dogayan rateng, na ina sa kangay agbangen, yewed sa kaimo. Kao ngaro miyanggat sa kangay. 23 Boo abaritaan in mga kabelagan keyen, Ina pag agadar idbatay wa matay. Kamay Isos idapo siyabi keyen siyo idbatay matay, no yewed keyen waget, No kangay beet siyo batay boway anggan ako atai wakay dogayan rateng, na ina sa kangay agbangen, yewed sa kaimo. 24 Ina pag agadar in agbarita anda pag boo. Siyo din in somolat anda. Kanyam atawanan betek in kansiyo barita. 25 Aronaw kay in mga piyangwat Isos. No nges boo masolat, na kangay remrem idbatay sibay pagpabolalangan in boo kobat sa mga aklat.