The Old Testament of the Holy Bible
Uisneno nmoe' neno-tunan ma pah-pinan nok in afan
1 Nahunu te, Uisneno nmoe' neno-tunan ma pah-pinan. 2 Oras naan, pah-pinan ia ka mamo'ek fa fe', ma are' sa'-saa' ii nbasiksakan. Suma nmu'i haa, oe. Ma mes'ookn ii n'aum naan ee. Uisneno In Smaan Ne ntainanu nbi oe naan in fafon. 3 Rarit Uisneno na'uab am nak, “Ro he nmui' me'u.” Na'uab anrair on nana te, me'u nana njair. 4 Nkius me'u nana te, In nmariin, natuin saa' re' In nmoe' je naan ro reko. Rari te, In nbatis me'u naan na'ko mes'okan, he es-es ate nmui' kuun in oras. 5 In nakanab me'u naan ‘manas’, ma mes'okan naan, ‘fai’. Neno naan, neon goes namsoup goen. 6-7 Rarit Uisneno na'uab anteni' mnak, “Ro he nmui' ruman he nbatis oe. Es nana te, anmui' oe nbi faof, ma nmui' oe nbi 'piin.” Na'uab anrair on nana te, oe nana nbaits ok njair bare nua, fafo ma 'piin. 8 Rarit In nakanab oe abit faof ne ‘oe neno’. Neno naan, neno nua namsoup goen. 9 Rarit Uisneno na'uab anteni' mnak, “Oe abit a'pinan naan ro he nkaubuub ok nbi bare mese', maut he nmui' baer meto'.” Na'uab anrair on nana te, baer meot ii npoi neem. 10 Rarit In nakanab baer meto' naan, ‘auf meto’; ma In nteek oe re' ankaubuub on naan, ‘tasi’. Nkius aar re' nana te, In nmariin, natuin saa' re' In nmoe' je naan, ro reko. 11 Rarit Uisneno na'uab anteni' mnak, “Auf meot ii ro he natorob hau huma'-huma'. Ro he nmui' hau mano'o, hau masufa', ma hau mafuaf. Maut he hau mese'-mese' te, napoitan fini natuin in atrekan.” Na'uaba' nrair on nana te, are' hau naan nmonin. 12 Nbi auf meto' naan, hau ngguin napoitan fini natuin sin atreek kein mese'-mese'. Nkius on nana te, In nmariin, natuin saa' re' In nmoe' je naan, ro reko. 13 Neno naan, neno teun namsoup goen. 14-15 Rarit Uisneno na'uab anteni' mnak, “Anbi fafon nee, ro he nmui' baer me'u huma'-huma' he ntana' pah-pinan. Ro he nmui' baer atana' nbi oras manas, ma nmui' baer atana' nbi oras fai. Baer ein naan njarin on tanar hena' tsoi' tahiin neno, toon, ma oras.” Na'uab anrair on nana te, baer me'un neon goe tnanan sin nboran. 16 In nmoe' baer meu' huma' nua re' ko'u. Es ko'u nneis, ntana' nbi oras manas; es seor na'bau ntana' nbi oras fai. In imsa' nmoe' kfuun-akfuun. 17 In nakfirit baer ein naan nbi neon goe he ntana' pah-pinan. 18 Rarit sin ntaan ein nbi oras manas, ma oras fai. Nok ranan naan, sin nbatis me'u na'ko mes'okan. Nkius niit sin ite, In nmariin, natuin saa' re' In nmoe' je naan, ro reko. 19 Neno naan, neno haa namsoup goen. 20 Rarit Uisneno na'uab anteni' mnak, “Ro he nmui' kauna' huma'-huma' re' anmonin anbin oe. Ma ro he nmui' koro huma'-huma' re' natpeen nbi neon goe tnanan.” 21 Rarit In nmoe' ika' huma'-huma' ma kauna' bian re' nmonin nbin oe. In imsa' nmoe koro huma'-huma' re' natpenen nbin neon goe tnanan. Nkius saa' re' In nmoe' sin nana te, In nmariin, natuin saa' re' In nmoe' je naan, ro reko. 22 Rarit In na'uab anfee tetus neu are' kanan mui't ein naan am nak, “Iik ein ro he namsa'in, he naheun oe nbin bare-bare. Ma koor nein amsa' on naan.” 23 Neno naan, neno niim namsoup goen. 24-25 Rarit Uisneno na'uab anteni' mnak, “Ro he nmui' mu'it huma'-huma' re' anmonin nbin auf meto'. Sin esan re' mui' aem, mui' fui, ma anonok, es-es ate nok nain in atrekan.” Na'uab anrair on nana te, mui't ein naan njarin. Nkius on nana te, In nmariin, natuin saa' re' In nmoe' je nana, ro reko. 26 Rarit Uisneno na'uab antenin am nak, “Iim he Hit tmoe' mansian tatuin Hit huum kam Hit masak, Hit moe' kam Hit taok. Maut he sin es anpafa' ma npainoet iik ein nbin tasi, are' koro nbi neon goe tnanan, are' mui' aem, ma mu'it bian re' nmonin nbin pah-pinan.” 27 Onaim In nmoe' mansian ii natai nok In human ma In masan, In mo'en ma In taon. In nmoe' sin, atoni' ma bifee. 28 Onaim, In na'uab anfeen sin tetus am nak, “Hi ro he mihoni' ma mimsai' he miheun pah-pinan, mpafa' ma mpainoot je msa'. Au 'fee ki prenat he m'urus ika'-ika', koro-koro, ma are' kanan mui't anbin auf meto'. 29 Mneen rek-reko! Au 'fee ki mnahat huma'-huma' nbi pah-pinan. Esan re': hau mano'o, hau masufa', ma hau mafua'. 30 Au msa' a'fee hau-hau re' naan he njarin amnahat neu mui't ein. Nmu'i mnahat neu mui' aem, mui' fui, anonok, ma koor ne msa'.” Na'uab anrair on nana te, are' kanan mnahat ii namtiis. 31 Nkius niit sin on nana te, In nmariin, natuin saa' re' In nmoe' je naan ro reko 'maten. Neno naan, neno nee namsoup goen.
1 Nok ranan naan, Uisneno nmoe' naan neno-tunan ma pah-pinan nok in afni ok-oke'. 2 Ma noka' fa te, neon hiut ni ntea. Onaim In nasnaas na'ko In meup nein naan. 3 Es nana te, In nbetis neon hitu' naan na'ko neon bian keni, he njair neno snasat, natuin In narair In mepun naan, ma nbi neno naan, In nasnaas. 4 Reta' re' natoon nak Uisneno In nmoe' neno-tunan ma pah-pinan, on re' naan.
Uisneno nmoe' atoni' ma bifee
Oras UISNENO fe' nmurai nmoe' neno-tunan ma pah-pinan nana te, 5 ka tiit fa hau amonit mese' msa', natuin In ka nasanu' uran fa fe'. Ma ka tiit fa mansian re' nareen. 6 Oras naan, suma nmu'i ha nipu' re' nsae na'ko afu, ma napeet pah-pinan. 7 Rarit UISNENO nnau afu, ma nmoe' je njair mansian. Rarit In nfuu nataam snasaf npeo' in panan konan. Onaim mansian nana nmoin oras naan. 8 Rarit UISNENO nroe naan poo'n es anbi bare Eden, et pasa' neon saet. Onaim In natokob mansian naan anbi bare naan. 9 Anbi po'on naan In namonib are' kanan roet, re' tkisu te namasan, ma taah sin ate miin-oni. In imsa' namonib hau u'u nua nbi poo' ne tnanan. Karu mansian ii naah hau fua' na'ko uu goes in fuan, in of anmoin piut. Ma karu mansian ii naah na'ko uu goes anteni' in fuan, in bisa nahiin rais reko ma rais re'uf. 10 Anbi naan, anmui' naan noe jes, nasai npoi na'ko po'on naan. Noe naan a'saif haa. 11 A'saif ahuunt ee, in kaan ee Pison. A'saif ia nasai nfuun naan pah Hawira. Bare ia, nmu'i mnatu'. 12 Nbi bare re' ia, nmui' mnaut afa', nmui' hau re' in oe ne fomeni, ma nmui' faut arimat. 13 A'saif es anteni', in kaan ee Gihon. A'saif ia, nsai nfuun naan pah Kus. 14 A'saif es anteni', in kaan ee Tigris. A'saif re' ia njair nakat nbi pah Asur ntoom manse 'saen. Ma in a'sain amuin te, kaan ee, Efrat. 15 UISNENO nreek mansian naan natua nbi Eden, he npairoir po'on naan rek-reko'. 16 Onaim In naprenat mansian nana mnak, “Au 'konan ko he muah hau fua' saa'-saa' ahaa, na'ko are' kanan roet anbi po'on ia. 17 Mes anmui' naan hau uu goes, re' Au 'taar ko ma'tani', he kais muah in fuan. Hau naan es re' hau roet re', karu mansian ii naah in fuan, in bisa nahiin rais reko ma rais re'uf. Mes karu ho muah ne te, ho ro he mmaet.” 18 Rarit UISNENO na'uab anteni' mnak, “Ka reko fa karu mansian ia nmoni nmes-mees. Onaim Au he 'mo'e 'fee ne atuurn am abaabt es re' natai nok ne.” 19-20 Oras naan UISNENO nnau afu, ma nmoe' mu'it ma koro huma'-huma'. Rarit in nnao naat sin neu mansian naan, maut he in nakanab sin. Rarit mansian naan nakanab mu'it ma koron naan, es-es ate nok kuun in kanan. Mes neu in, ka nmui' fa atuurn am abaabt es, re' natai nok ne. 21 Rarit UISNENO narour natupa' mansian naan. Oras in ntuup anfini te, Uisneno nait naan in nui bnapa' tuuk es, rarit In ntoeb nareko' papa' naan. 22 Ma In nmoe' bifee na'ko nuif naan. Rarit In nnona' bifee naan neu atoni' naan. 23 Oras atoni' ia niit bifee nana te, in nak, “Haaa! Esai fe'! Ia ro natai nok kau! In nuif ein huma' mese' nok au nu. Ma in sisin huma' mese' nok au sisik. Natuin in njair na'ko atoni', es na' au ukaan be, ‘bifee’.” 24 Natuin rasi nanam, es na' atoin es of annao nasaitan in ainaf-amaf, he nmoin nabua nekaf mese' ma ansaof mese' nok in fee, henati' sin nua sin njarin mese'. 25 Oras naan sin aaf ein, mes sin ka nmu'in fa rais mae kre'o msa'.
Mansian ii ka nfairoir fa prenat Uisneno
1 Na'ko are' kanan mu'it re' UISNENO nmoe' nain sin nbin pah-pinan ia, kaun ii es aputa'-kriu anesit. Anbi orses, kauna' naan nataan neu bifee nana mnak, “Hoe! Batuur aa, oo? Uisneno ntaar ki mnak, ‘Ka nabei' fa he hi miah hau fua' na'ko roet ein anbin po'on ia, ai' kah?’” 2-3 Bifee naan nataah am nak, “Kahaf! Hai bole miah! Mes, anmui' naan roet uu' goes et poo' ne tnanan; Uisneno ntaar kai, he hai kais miah in fuan. In nak, hai kais miah in fuan, ma kais amree' goe msa', natuin hai of ammaet.” 4 Mes kauna' naan nataah am nak, “Hoe, napoi! Hi ka mmatef! 5 Uisneno batuur antaar ki on naan, natuin In nahiin, karu hi miah hau fua' naan, hi mahiin mein namnees nok Ne; hi of mihiin mee es reko, ma mee es re'uf.” 6 Rarit bifee nana nkisu te, hau roet naan reok ni kah. Ma in naben ate hau fua' naan miin ni kaheen. Onaim in natenab am nak, “Karu au uah hau fua' ia, au of uhiin.” Rarit in nseu hau fua' naan, ma in naah. In neki ma nfeen in moon je msa', he naah nok. 7 Naah anrarin on nana te, na' sin nahinin nak sin aaf ein. Es nana te, sin nkaton apas hau no'o he natain. 8 Manse nmaeb on nana te, sin nneen UISNENO neem annoon po'on naan. Rarit sin naen na'koor ein henati' UISNENO kais niit sin. 9 Mes UISNENO nhaman atoni' nana mnak, “Aupuuu! Ho et mee, Adam?” 10 Atoni' naan nataah am nak, “Au 'neen Ho 'fook mi mbi ia. Mes au umaeb ok, natuin au ao afa' kau. Etun au 'aen u'koro'.” 11 Rarit Usi' nataah am nak, “Sekau es natoon ko mnak ho m'ao aaf' om? On mee? Of oni' ho muah amrair hau fua' re' Au 'taar ee naan, ai' oo?” 12 In nataah am nak, “Usi', bifee re' Ho mfee je naan, in es anfee kau hau fua taras naan, ma au uah!” 13 Rarit UISNENO na'uab nok bifee nana mnak, “Nansa'am es ho mmoe' on naan?” Onaim, bifee naan nataah am nak, “Te kauna' naan es napoi kau, tua! Onaim, es au uah hau fua taras naan.”
Uisneno nkaas sin neik hukun ma'tani'
14 Rarit UISNENO nakua a'an neu kauna' nana mnak, “Natuin ho mo'em ia, Au 'hukun ko. Na'ko are' kanan mu'it, suma ho mmes-mees kuum es re' mupein kasat. Na'ko oras ia tar antea ho mmaet, ho suma mnonok meki haa ho 'basam. Ma ho mnaaht ein maskuuk ein. 15 Au of a'moe' ko mok bifee naan, ammamuus piut. Hi sufam-ka'um sin imsa' on naan. Ho sufam-ka'um sin of anrau sin haek-tikak sin. Mes in sufan es, of antuut nakrat-rati' ho' nakam.” 16 Rarit Uisneno nak bifee nana mnak, “Au of u'baba' ho susat oras ho mu'apu', ma mumeen annesi nteni' oras ho muhoni'. Mes maski on naan, ho mroim he mubua piut mok ho mone. Ma in es naprenat ko.” 17 Rarit Usi' nak neu atoni' nana mnak, “Ho ka mutuin fa Au prenat, mes mutuin ho fee je in romin, tar antea ho muah hau fua' re' Au 'taar ee naan. Es nana te, ho mupein kasat amsa'. Ma aaf gui msa' napein kasat. Na'ko oras ia tar antea ho mmaet, ho ro he mmepu-mbain aet nom, ma mu'bani' aaf gui, hena' ho mupein he muah. Mmeup on nana te, na' ho mmoin. 18 Maski ho mseen ma mroe huma'-huma', mes aaf gui suma napoitan aik kiis na ma krabat. 19 Rarit ho ro he mmepu mbain aet nom ma'tani', he na' aaf gui nfee ko mnahat. Ho ro he mmeup ma puus ee nsai tar ho mmaet. Au 'moe' ko na'ko afu. Onaim, karu ho mmate te, ho mfani mrair afu.” 20 Rarit nai' Adam nakanab in fee je nak ‘bi Hawa’ (in a'moufn ii ‘re' anmoin’), natuin bifee naan es re' njair ainaf neu are' mansian amonit anbi pah-pinan ia. 21 Rarit UISNENO nmoe' tais na'ko pasu, ma nfeen sin he npaken.
Uisneno nriu' napoitan nai' Adam ma bi Hawa
22 Rarit UISNENO na'uab am nak, “Oras ia mansian ein nahinin rais reko, ma rais re'uf, on re' Hit. Kais-kaisa' sin nnaah hau fua' re' neki 'honis abar-barat.” 23 Rarit In nriu' napoitan sin na'ko po'on abit Eden, he sin nua sin nnaon neu bare bian, ma nmonin on atoin tani, he sin amnaim tein na'ko afu. 24 Anri'u nrair sin on nana te, Uisneno nreun In ameup maniin ein na'ko sonaf neno-tunan, he nnao npao po'on naan nbin pasa' neon saet. Sin nna'an suni' re' npiin ma nrirok neum-neem. Usi' nreun sin he nhaken n'eka' ranan, natuin In ka nroim fa he tuaf anseu naan hau fua' re' neki 'honis abar-barat.
Reta' nai' Kain ma nai' Habel
1 Neot es, nai' Adam ntuup nok in fee bi Hawa. Onaim bifee naan na'apu'. Rarit in nahoni' ri'an moen jes. Ma in nak, “Au uhoni' upoitan aan ri'an moen jes, natuin UISNENO nturun kau.” Onaim in nakanab ri'an mone naan, nai' Kain, (re' in a'moufn ii, ‘napoitan’). 2 Rarit bi Hawa nahoni' ntein ri'an moen jes. Onaim in nakaan be, nai' Habel. Oras sin nua sin na'naen on nana te, nai' Habel natuuk mu'it, ma nai' Kain ameup rene. 3 Orses ate, nai' Kain neik in reen ee sin aaf kein bian, ma nafuata' sin neu UISNENO. 4 Nai' Habel amsa' neik ini 'bib kaes ainf ein sin aan uun ein. In nroro 'bib-kasen naan, rarit in natnaat neik sisi 'tuur arekot neu Usi'. Nkius niit on nana te, UISNENO nmarinan nai' Habel in fua'-tuur ein naan. 5 Mes In ka nroim fa nai' Kain in fua'-tuur ein naan. Onaim nai' Kain nato'o nmaet, tar antea in huum puut batuur-batuur. 6 Onaim UISNENO na'uab nok nai' Kain am nak, “Hoe, Kain! Nansa'am es ho mutoo' on naan? On meem es ho mhuum mpuut on naan? 7 Bait ho mmoe' reko te, Au 'toup ko nok reko. Mes, mumnau, goo! Karu ho mmoe' re'uf ate, mo'et naan of naah nafani' ko, on re' meo goan nnuu' he nheke knafo. Onaim, karu ho mutenab he mmoe' re'uf ate, reko nneis ho mpori' main tenab naan!” Nai' Kain he nbeos nai' Habel 8 Neot es, nai' Kain anfuri' nai' Habel am nak, “Habel! Uum he nua kit atnao on rene.” Oras sin ntean ate, nok askeken nai' Kain anbeos niis in orif. 9 Rarit UISNENO nataan nai' Kain am nak, “Hoe, Kain! Ho ori' et mee?” Nai' Kain nataah am nak, “Au ka uhinif! Au es ka 'naa' fa in haen-'niman!” 10 Onaim Uisneno na'uab am nak, “Nansa'am es ho mmoe' rais maufinu on naan? Ho kais mutenab mak ho ori' in naa' ee nmeti nrari nbi aaf gui 'pinan. Au 'iit urair saa' re' ho mmoo 'je neu ho ori'! 11 Oras ia, naa' ee nsaena' ko. Oras ho mroor miis ho ori', aaf gui nmuis in naa'. Es nana te, aaf gui ka nfee nteni' ko fa in afan he ho mmoin. 12 Karu ho mureen, aaf gui of ka nfee ko fa afa' saa'-saa'. Nmurai oras ia, ho of amfain atoes re' mpaisuun om tafi-tafi' mbi pah-pinan ia.” 13 Mes nai' Kain na'uab neik haan ma'fena' neu UISNENO, mnak, “Hae, Usi'! Nansa'am es Ho mfee maan kau kasat ma'tan-tani' naan? Au ka usaah ubei' je fa! 14 Natuin Ho mri'u mrair kau na'ko bare ia, au of u'roo Ko, tua. Au of a'toe 'bi mee-mee on re' anao-amnemat. Rarit sekau-sekau re' nateef nok kau te, of anroor niis kau, tua.” 15 Mes UISNENO nataah ee mnak, “Ka on fa naan! Sekau es anroor ko, Au 'huuk ne ma'fena' nneis no hiut!” Rarit UISNENO ntao tanar nbi nai' Kain, henati tuaf sekau-sekau re' nateef nok ne te, nahinin nak sin ka nabei' fa he nroor niis ne. 16 Rarit nai' Kain nnao nasaitan bare naan, na'roo na'ko UISNENO. In nnao ntea baar jes, nbi po'on Eden in pasa' neon saet. Bare naan in kaan ee, Not, re' in a'moufn ii nak ‘npaisuun’. In natua nbi naan.
Nai' Kain in sufan-ka'un
17 Rarit nai' Kain anmatsao. In fee je na'apu. In nahoni' ri'an moen jes, ma sin nakaan be, nai' Henok. Ma nai' Kain nafena' kuan es. Rarit in nakaan be, Henok, on re' in aanh ee kanan. 18 Nai' Henok in aanh ee, es re' nai' Irat. Nai' Irat in aanh ee, es re' nai' Mehujaer. Nai' Mehujaer in aanh ee, es re' nai' Metusaer. Ma nai' Metusaer in aanh ee, es re' nai' Lamek. 19 Nai' Lamek in nnsao bifee nua. Es kaan ee bi Ada; es anteni' in kaan ee bi Sila. 20 Ain Ada nahoni' nai' Jabar. In suuf keni, njarin atuuk mu'it. Sin a'moin keni natnan-nain naah, he namin huun neu sin mui't ein. Sin na'umin nbin haa tenas. 21 Nai' Jabar in oirf ee, nai' Jubar. Nai' Jubar in suuf keni, njarin atoin arekut, nfuun bobe, ma 'reku' huma' bian antein. Baer ein re' ia nteek sin ate nak, 'sene ma 'reku' 22 Nai' Lamek in fee bi Sila nahoni' nai' Tubar Kain. In suuf keni njarin atuut besi. Sin nmo'en bare' huma'-huma' na'ko besi ma noin moro'. Nai' Tubar Kain in feotf ee, bi Na'ama. 23 Neot es, nai' Lamek anboi's on anbi in feeng guin nua sin. In nak, “Hi mneen rek-reko! Fe' ena ri'moen muinf es anbaan kau, mes au 'baan u'maat ee. 24 Tuaf re' nroor niis nai' Kain, napein hukun no hiut. Mes karu nmui' tuaf re' he nbaras in neek tenab amre'ut neu kau, sin of napenin hukun no bo' hitu mhiut (77).”
Nai' Adam in aanh es anteni', es re' nai' Set
25 Nai' Adam in fee bi Hawa nahoni' naan ri'an moen jes anteni'. Sin nakaan be, nai' Set (re' in a'moufn ii nak, ‘nfee’) natuin ain Hawa nak, “Uisneno nfee ri'ana' ia neu kau he nsenu' nai Habel, re' nai' Kain anroor niis ne naan.” 26 Nok-noki te, nai' Set ansao. In napein ri'an moen jes, ma in nakaan be, nai' Enos. Oras naan, mansian ii nmurai na'ruri' ma na'besan neu UISNENO.
Nai' Adam in sufan-ka'un ntean nai' Noh
1-2 Oras Uisneno nmoe' mansian, In nmoe' sin natuin In huumn am In masan, In moe'n am In taon. In nmoe' sin atoni' ma bifee. Rarit In nteek sin nak “mansian”, ma In imsa' nfeen sin tetus nathoe. Mansian re' ahun-hunut, in kaan ee, nai' Adam. Nai' Adam in sufan-ka'un sin esan re' ia: 3 Oras nai' Adam in nmoin naan toon nautn es bo' teun (130), in napein ri'an moen jes. Ri'ana' ia in noes naah in amaf. Onaim in nakanab ri'ana' naan, nai Set. 4 Rarit nai' Adam fe' nmoin toon natun faun (800). In napeni nteni' ri'an mone ma ri'an feto. 5 In nmaet oras in nmoin naan toon natun sea mbo' teun (930). 6 Oras nai' Set nmoin naan toon nautn es toon niim (105), in napein ri'an moen jes, es re' nai' Enos. 7 Rarit nai' Set fe' nmoni ntein toon natun fanu mtoon hiut (807), ma in napeni nteni' ri'an mone ma ri'an feto. 8 In nmaet oras in nmoin naan toon natun sea mbo' es am nua (912). 9 Oras nai' Enos nmoin naan toon bo' sea (90), in napein ri'an moen jes, es re' nai' Kenan. 10 Rarit nai' Enos fe' nmoni ntein toon natun fanu mbo'es am niim (815), ma in napeni nteni' ri'an mone ma ri'an feto. 11 In nmaet oras in nmoin naan toon natun sea mtoon niim (905). 12 Oras nai' Kenan nmoin naan toon bo' hiut (70), in napein ri'an moen jes, es re' nai' Mahararel. 13 Rarit nai' Kenan fe' nmoni ntein toon natun fanu mbo' haa (840), ma in napeni nteni' ri'an mone ma ri'an feto. 14 In nmaet oras in nmoin naan toon natun sea mtoon bo'es (910). 15 Oras nai' Mahararel nmoin naan toon bo' nee mniim (65), in napein ri'an moen jes, es re' nai' Yaret. 16 Rarit nai' Mahararel fe' nmoni ntein toon natun fanu mbo' teun (830), ma in napeni nteni' ri'an mone ma ri'an feto. 17 In nmaet oras in nmoin naan toon natun fanu mtoon bo' sea mniim (895). 18 Oras nai' Yaret nmoin naan toon nautn es bo' nee mnua (162), in napein ri'an moen jes, es re' nai' Henok. 19 Rarit nai' Yaret fe' nmoni ntein toon natun faun (800), ma in napeni nteni' ri'an mone ma ri'an feto. 20 In nmaet oras in nmoin naan toon natun sea mbo' nee mnua (962). 21 Oras nai' Henok nmoin naan toon bo' nee mniim (65), in napein ri'an moen jes, es re' nai' Metusalak. 22 Rarit nai' Henok in nmoni nmafuut neek nok Uisneno tar antea toon natun tenu ntein. Ma in napeni nteni' ri'an mone ma ri'an feto. 23-24 In nmoin ma anneek mees nok Uisneno. Oras in nmoin naan toon natun tenu mbo' nee mniim (365), in ka mnita' fa, natuin Uisneno nait nasaeb ee. 25 Oras nai' Metusalak in nmoin naan toon nautn es bo' fanu mhiut (187), in napein ri'an moen jes, es re' nai' Lamek. 26 Rarit nai' Metusalak fe' nmoni ntein toon natun hitu mbo' fanu mnua (782), ma in napeni nteni' ri'an mone ma ri'an feto. 27 In nmaet oras in nmoin naan toon natun sea mbo' nee msea (969). 28 Oras nai' Lamek nmoin naan toon nautn es bo' fanu mnua (182), in napein ri'an moen jes. 29 Nai' Lamek nakanab ri'ana' naan nai' Noh (re' in haan ee, on re' kata es, re' in a'moufn ii, ‘nfee harinet ma haan maut’), natuin in nak, “Ri'ana' ia of anfee harinet ma haan maut neu hit neek suust ii nbi afu re' napein kasat na'ko Uisneno.” 30 Rarit nai' Lamek fe' nmoni ntein toon natun niim ambo' sea mniim (595), ma in napeni nteni' ri'an mone ma ri'an feto. 31 In nmaet oras in nmoin naan toon natun hitu mbo' hitu mhiut (77 7). 32 Oras nai' Noh nmoin naan toon natun niim (500), in napein ri'an mone teun, es re' nai' Sem, nai' Ham, ma nai' Yafet.
Maufinu na'ko mansian
1 Oras naan, mansian ii mfau-rutu. Ma sin nmonin nsisae'n ok nbin are' bare-bare. Sin imsa' nahoin ein ri'an feto. 2 Uisneno In an-monen niit ri' feot munif mansian ein ate, ro maas reu' fein. Onaim sin es-es ate nnao nsao ri' feto mee re' in romi. 3 Rarit UISNENO nak, “Au 'hae 'maet jen nok mansian ii sin monit amre'ut. Au Smanak re' namonib sin naan, ka nroim fa he sin nmonin piut. Sin ro he nmaten. Onaim sin nmoni ntu'un toon nautn es bo' nua goah (120).” 4 Na'ko batan naan, tar batan-batan amunit, atoin hae-brako anmonin nbi pah-pinan. Oras naan Uisneno In an-moen ein ansao mansian sin an-feot muinf ein, ma nahoin ein atoin ma'tani', es re' a'nak makenat, re' mateka' nbin reta' ahunut. 5 Oras naan, UISNENO nkisu te mansian anbi pah-pinan anmo'en re'uf bainesi'. Sin nopaa kein ii arahaa nateenb ein rais amre'ut piut. 6 Onaim UISNENO nme'-mei' Jon, natuin In nmo'e nrair sin, ma natokob sin anbin pah-pinan ia. Rasi naan ro nasusab niis Uisneno. 7 Etun In na'uab am nak, “Es nana te, Au of ureu' mansian re' Au 'moe' urair sin anbin pah-pinan ia. Au of u'maet are' kanan koro ma mu'it bian amsa'. Au 'mee' Jok ma 'saan Jok, natuin Au 'mo'e 'rair sin.” 8 Mes arahaa nai' Noh, es re' nhariin UISNENO In nekan.
Nai' Noh in retan
9-10 Nai' Noh in reet ni, on nai: In nmui' an-mone teun, esan re': nai' Sem, nai' Ham, ma nai' Yafet. Nai' Noh anmoin nok neek amne'o neu Uisneno, ma ka nmoe' fa moe' re'uf. Oras naan, arahaa in es re' atoin reko. In nmoni nhaumaak bon nok Uisneno. 11-12 Mes Uisneno nkisu te are' kanan mansian ni amoe' re'uf sapu'-sapu'. Anbi mee-mee jah mansian ni namre'u nmaet. Uisneno nkisu te mansian anbi pah-pinan naan, anmoe'n ahaa rais re'uf. 13 Rarit Uisneno natonan nai' Noh am nak, “Au iit urair mansian ii in moe' re'uf anbi are' bare-bare. Onaim Au ufeek urair 'ak, Au ro he ureu' ain pah-pinan ia nok in afan ok-oke'. 14 Es nana te, on nai, Noh! Oras ia ho mmoe' maan abnao oe ko' goes mpaek hau ma'tani'. Ho mmoe' ke'en-ke'en anbi bnao naan in nanan. Rarit ho mraep je koti-mnan meik ter. 15 Ho mmoe' bnao naan in amnaun ii meter nautn es bo' tenu mteun (133); in manuan tukam tuuk meter bo' nua mnua (22); ma in a'raatn ee meter bo'es am teun (13). 16 Mtefi bnao naan, ma mruup je mpaek hau 'been pisa'. Mes mufreiba' tefis naan on re' mete steen es na'ko ruip taan in fafon. Ho mbati bnao naan ktuta' teun. Rarit ammoe' eon es anbi in abnapan. 17 Mumnau rek-reko! Au of usanu' uur noe sako' he nmemun niis re' amonit anbi pah-pinan, tar antea saup tuki'. 18 Mes Au he 'moe rais manba'an ok ko. Ho of amtaam meu bnao naan, mok ho fee-anah, ma ho aan naenf ein. 19-20 Na'ko are' kanan mu'it pah-pinan ia, ho ro he meik mutaam pasan-pasan neu bnao naan in nanan, maut he sin nmonin amsa' on re' ho. Sin es re': mui' aem, koro, anonok, maut he sin nmonin. 21 Ho ro he mutaam mnahat huma'-huma' neu bnao naan in nanan neu ki ma neu mui't ein nana msa'.” Nai' Noh anmurai nmoe' bnao oe ko'u naan 22 Rarit nai' Noh nmoe' natuin Uisneno In kabin ma In prenat naan oke'.
Noe sako'
1 Rarit UISNENO na'uab neu nai' Noh am nak, “Au 'kisu nbi mee-mee, mes arahaa ho mmes-mees jah es neek amne'o. Onaim, ho mok ho fee-anah sin mtaam nai meu bnao naan. 2-3 Na'ko are' kanan mu'it re' sin siis kein nabei' he hi meuk sin, ma re' nabei' he hi mifuat sin neu Kau, ho mutaam pasan hit-hiut neu bnao naan. Na'ko are' kanan koro ho mutaam pasan hit-hitu msa'. Mes mu'it bian anteni' ho suma mutaam pasan mes-mees ah. Nok ranan naan, mui't ein naan, njarin on re' fini neu sin suuf keni, he sin imsa' nmonin. 4 Mumnau rek-reko! Ar neno hitu te, Au of usanu' uran re' ka nasnaas nitaf, tar antea neno bo' haa ma fai bo' haa. Au 'paek ranan naan, he u'maet ain are' amoint ein nbi auf meto', re' Au 'mo'e 'rair sin.” 5 Rarit nai' Noh nmoe' natuin on re' UISNENO In aprenat naan ok-oke'. 6 Oras noe sako' naan nsae te, nai' Noh nmoin naan toon natun nee jen (600). 7 Rarit nai' Noh nok in fee, ma in aanh ein, ma in aan naenf ein, ntaman neu bnao naan, he sin nsoi naan ok. 8-9 Nai' Noh natuin UISNENO In aprenat naan, onaim in nataam are' kanan koro ma mu'it, es-es ate nok nain in bian, na'ko mu'it re' he mansian bole neuk sin siis kein, ma na'ko mu'it re' ka bole fa he neuk sin siis kein. 10 Neno hiut namsopu te, noe sako' naan neem ma nmurai nmemun pah-piin ii nomes-mese'. 11 Oras nai' Noh anmoin naan toon natun nee (600) mfunan nua mneno bo'es am hiut on nana te, noe saak gui nmurai ntaam. Oras naan on re' neon goe natfe'i, es na' ooj ii nat'oop aah. Ma are' oe maat ein anpe'en rafu'-rafu' ma npuran napoitan oe. 12 Onaim uran naan ansaun ka nasnaas nitaf, fai ma manas, tar antea neno bo' haa. 13 Mes neno naan, nai' Noh, in fee, in aanh ein teun sin, esan re': nai' Sem, nai' Ham, ma nai' Yafet, ma in aan naenf ein ntaman oke' neu bnao naan. 14 Sin ntaam nabuan nok mui' aem ein, mui' fuing guin, mui' anoon kein, koron, ma mu'it bian re' manini' msa'. 15-16 Pasan mese'-mese' na'ko are' amonit sin, ntaam nabuan nok nai' Noh nbin abnao, natai nok saa' re' Uisneno napreent ee. Oras sin ntaman nrarin oke' te, UISNENO neik Non na'eek ma na'retu' bnao naan in enon. 17-19 Uur ko'u naan nsaun piut, tar antea neno bo' haa. Onaim noe sako' nsae piut tar antea bnao naan natboe. Oo ji nsae piut tar nmemun naneuk 'to'e mnaun ein oke'. 20 Oe naan nsae piut, tar in a'raat ni meter hiut nneis na'ko 'to'e mnaun isat. 21-23 Onaim, are' kanan amonit nbi auf meto' nmaet sapu'. Amaets ein esan re': mansian, mui' aem, mui' fui, anonok, ma koro. Suma nai' Noh ma sin abitan bnaa goe nanan sin mesen nmonin. 24 Oe naan, ka nsaun niit fa tar antea neno nautn es bo' niim (150).
Aaf gui nmurai nmeot
1 Mes Uisneno ka nnika' fa nai' Noh ma are' mui't ein anbin abnao naan. Onaim In npaek anin he nfuu nameit oe naan. 2 In nkeeh nain oe maat ein, ma nasnasab uran. 3 Onaim oe naan nsaun piut. Neno nautn es bo' niim (150) namsoup, oe naan in asraat ni nheer on a'kre'o. 4 Nateef fuun hiut ii ntaam neno bo'es am hiut on nai te, bnao naan na'rae't on nbi 'toe' a'raats es, kaan ee, Ararat. 5 Oe naan nsaun piut. Oras naan fuun bo' ii ntaam neno mese', a'toe'f ein sin a'puup kein mamniit ein een. Nai' Noh nafeti' kor-kefi 6 Nkoon na'ko neno bo' haa on nana te, nai' Noh nasoit bnao naan in eno sneer. 7 Rarit in nafetin kor-kaa' es. Koro naan natpeen neu-mneem tar antea oe naan nsaun batuur-batuur. Ma in ka nfain fa on abnao naan. 8 Onaim nai' Noh nafeti' ntein kor-kefi he nriun ma nahiin niit kar-karu ai' oe naan nmete nrair. 9 Mes oe naan fe' nmemun pah-pinan, etun koro naan ka napein fa bare he ntook. Onaim in nfain on abnao. Nai' Noh nnona' in a'niman, ma ntoup nataam koro naan nfain neu bnao. 10 Nai' Noh npao ntein neno hiut. Onaim in nafeti' ntein kor-kefi naan. 11 Manse nmaeb on nana te, kor-kefi nana nfain neem. In nteo neik hau noo saitun es. Rarit nai' Noh nahiin nak oe naan ansaun batuur een. 12 In npao ntein neno hiut. In nafeti' ntein kor-kefi naan. Mes neot re' ia, kor-kefi naan ka nfain nemaf. 13 Fuun mees ii ntaam neno mese', oras nai' Noh nmoin naan toon natun nee mtoon mese' (601), oe nana nmeti nrair. Nai' Noh nasoit antein eno sneer. In napene te, aaf gui nmeto nrair. 14 Anbi fuun nua' ii ntaam neno bo' nua mhiut, afu nana nmeto nkoon goen. 15 Rarit Uisneno nreun nai' Noh am nak, 16 “Noh! Oras ia, hi msaun nai mi'ko bnao naan. 17 Misanu' mui't ein naan ok-oke'! Es re': mui' aem, mui' fui, anonok, ma koro. Maut he sin namsa'in, he naheun pah-pinan.” 18-19 Rarit nai' Noh, in fee, in aanh ein, ma in aan naenf ein, nsanun oke' na'ko bnao naan. Mui't ein nana msa' nsanun, es-es ate natuin in nonot.
Nai' Noh anfee fua'-turu' he nseun banin Uisneno In manekan Sin nbakin fatu njair mee-fuat
20 Rarit nai' Noh nbakin fatu he ntao mee-fuat neu UISNENO. Na'ko mui't ein re' nabei' he npaek sin njarin fua'-turu', nai' Noh nheek mes-mese'. Rarit in nroor sin ma nout sin anbin mee-fuat, he njair tanar nak in nasaeb seun banit neu UISNENO. 21 Oras UISNENO nafoi niit fua'-tuur ein naan sin fo mein kein, In nmariin. Onaim In natenab am nak, “Nmurai oras ia, Au ka 'kaas a'teni' fa pah-pinan natuin mansian ein sin moe' re'uf. Maski sin nateenb ahaa rais re'uf na'ko an-ana', mes Au of ka ure'u 'tein fa are' kanan amonit, on re' Au fe' ureu' uraar je naan. 22 Anbi oras pah-pinan ia fe' nbi naa, ors ein nanaob ok piut, natuin ahaa sin atreek ein. Esan re': oras senat ma sekit, oras mainikin ma maputu', oras fauk-nais ma uur napu, fai ma manas.”
Uisneno nahakeb rais manba'an nok nai' Noh
1 Uisneno nfee tetus athoen neu nai' Noh ma in fee-anah sin. In na'uab am nak, “Hi mihoni' ma mimsai' he miheun pah-pinan ii ntein. 2 Mui' fuing guin ma koro, ika' of namtausan ki. Au 'nona' sin neu ki. 3 Hi bole meuk mui't ein naan sin siis kein on re' hi bole miah ai' meuk hau fua' sin. Au 'fee are' saa'-saa' ein re' ia neu ki. 4 Mes hi kais meuk sisi re' in naa' ee ka nsai npoi fa fe', natuin mui't ein sin a'moin kein et naa' naan. 5-6 Au 'moe' mansian ii natuin Au huum kam Au masak, Au moe' kam Au taos. Es nana te, kais amroor mansian. Karu nmui' tuaf, ai' mu'it, na'maet mansian, hi ro he mi'maat je msa'. Prenat ia, neem na'ko Kau. 7 Hi ro he mihoni' ma mimsai he miheun pah-pinan ia ntein.” 8 Uisneno ntuut In uaban nana mnak, 9 “Oras ia, Au he uhake' manba'an ok ki tar ntean hi sufam hi ka'um sin imsa'. 10 Rais manba'an re' ia msa' nmatoon nok are' kanan amonit, es re': mui' aem, mui' fui, ma koro. Para' te, apoit ein re' nok ki na'ko bnao naan in nanan. 11 Au rais manba'an naan, on nai: Au ka 'fee 'teni' fa noe sako' he nmemun na'maet are' kanan amonit anbi pah-pinan ia. 12-13 Au 'tao Au eons ee nbi neon goe he nfain tanar. Enous naan, of namnauba' Kau neu Au rais manba'an ia re' ka natfeek niit fa neu ki, neu amoint ein ok-oke', ma neu pah-pinan ia msa'. 14-17 Karu nmui' nope nbi neno, rarit eons ee npoi, in of namnauba' Kau mnak: noe sako' of ka nare'u nteni' fa are' amoint ein nbi pah-pinan ia. Nok ranan naan, Au rais manba'an abar-barat ia, nmafuut piut nok ki, ma nok are' kanan amonit.”
Nai' Noh anmauf tua-min-kase
18 Nai' Noh in aanh ein re' npoin na'ko bnao naan esan re': nai' Sem, nai' Ham ma nai' Yafet. (Nai' Ham nana, es re' nai' Kana'an in amaf). 19 Mansian pah-pinan ia ok-oke', amneem kein na'kon nai' Noh in aan teun ein re' ia. Hau anonok re' anteek ee tnak, anggor 20 Nai' Noh naan, atoin tani. Nahun-hunut in es re' aroe hau anggor. 21 Neot es, nai' Noh niun raur anggor tar antea nmauf ka nahiin jon fa. Onaim in nhoro' nain in paken, rarit in tuup natneen af-aaf ah nbi in tenas. 22 Oras nai' Ham antaam ate, in niit in aamf ee ntuup aaf aah. Onaim in nnaen anpoi, ma nnao natonan in tataf, nai' Sem ma nai' Yafet. 23 Rarit sin nua sin naitin tais ma npira' na'ratan tais nana nbi sin haunk ein. Rarit sin nnaon nteet kotin ntaman neu tenas naan, ma nkuub naan sin amaf. Sin ka niit fa sin aamf ee 'maen. Rarit sin npoin nfanin. 24 Oras nai' Noh in mauf goe oke', in nahiin in an-moen aheet suus goe in a'mo'en. 25 Rarit in na'uab am nak, “Hoe! Kana'an amaf! Au 'kaas ko! Ho of amfain ate neu sin ho tata'! 26 Pures-bo'is neu UISNENO, natuin nai' Sem! Mes nai' Kana'an anjair nai' Sem in an-renu'. 27 Maut he Uisneno anfeons am anhanua ntein nai' Yafet in pah. Ma in suufk ein nmonin nbin mamut nok nai' Sem in sufan. Mes maut he nai' Kana'an anjair nai' Yafet in an-reka'.” 28 Nmurai na'ko noe sako' naan anmeet, nai' Noh nmoni ntein toon natun tenu mbo' niim (350). 29 In nmaet oras in nmoin naan toon natun sea mbo' niim (950).
Nai' Noh ma nai' Yafet sin sufa'-ka'uf sin
1 Noe sako' naan namsau nrair on nai te, nai' Noh in aanh ein nmurai nahoin ein. In napein sufaf na'ko nai' Sem, nai' Ham, ma nai' Yafet. 2-5 Nai' Yafet in suufk ein esan re': nai' Gomer, nai' Magok, nai' Madai, nai' Jawan, nai' Tubar, nai' Mesek, ma nai' Tiras. Es-es ate nok in uab, in uuf, ma in pah. Nai' Gomer in suufk ein esan re': nai' Askenas, nai' Rifat, ma nai' Togarma. Nai' Jawan in suufk ein esan re': nai' Elisa, nai' Tarsis, abitan Kitim, ma abitan Dodanim re' natuan et taas je ninin.
Nai' Ham in sufan-ka'un
6 Nai' Ham in suufk ein, esan re': nai' Kus, nai' Misraim, nai' Put, ma nai' Kana'an. 7 Nai' Kus in suufk ein esan re': nai' Seba, nai' Habira, nai' Sapta, nai' Raema, ma nai' Sapteka. Nai' Raema in suufk ein esan re': nai' Seba ma nai' Dedan. 8 Nai' Kus in anmoon je, es re' nai' Nimrot. Atoni' re' ia, meo pa'e ahun-hunut re' ma'tain besi. 9 In ma'tanin nana mneem ni na'ko UISNENO, tar antea in nfain aseok rek goes. Etun sin na'kree' tein te, nak, “Maut he ho mjair aseok rek goes on re' nai' Nimrot, re' napein in ma'tain ee na'ko UISNENO.” 10 Nahunu te in pah ee nmurai na'ko Baber, Erek Akat, ma Karne. Baren re' ia sin etan pah ko'u Sinear. 11 Na'ko naan in nhanua ntein in kua-prenat neu Asur. Rarit in nafena' kota Niniwe, kota Rehobot-Ir, kota Kara, 12 ma kota Resen, re' et Niniwe ma Kara sin atnaank ein. Baren naan, pah ko'un. 13 Nai' Misraim in suufk ein, esan re': abitan Rudim, abitan Ananim, abitan Rehabim, abitan Naftuhim, 14 abitan Patrusim, abitan Kasruhim, ma abitan Kaftorim. Abitan Kasruhim naan, es re' atoin Firistin sin beif-na'if sin. 15 Nai' Kana'an in an-moen uun ee es re' nai' Sidon. Nai' Kana'an nfain aam uuf neu atoin Hetes, 16 atoin Jebusis, atoin Amoris, atoin Girgasis, 17 atoin Hibis, atoin Arkis, atoin Sinis, 18 atoin Arbadis, atoin Semaris, ma atoin Hamatis. Nai' Kana'an in suufk ein ansei jok ntean bare 'roo-roo, 19 tar antea sin naakt ein nmurai na'ko kota Sidon nkoon kuan Gerar ntea pah Gasa. Na'ko naan, nkoon neu kota Sodom, kota Gomora, kota Atma, ma kota Seboim, tar antea kota Rasa. 20 Sin arsin re' naan, nai' Ham in sufan. Es-es ate nok in uab, in uuf, ma in pah.
Nai' Sem in sufan-ka'un
21 Nai' Yafet in tataf nai' Sem, nfain abitan Eber sin aam uuf. 22 Nai' Sem in suufk ein, esan re': nai' Elam, nai' Asur, nai' Arpaksat, nai' Lut ma nai' Aram. 23 Nai' Aram in suufk ein, esan re': abitan Us, abitan Hur, abitan Geter, ma abitan Mas. 24 Nai' Arpaksat in aanh ee, es re' nai' Sera. Nai' Sera in aanh ee, nai' Eber. 25 Nai' Eber napein ri'an mone nua. Atoin ko' goe, kaan ee nai' Pelek (re' in a'moufn ii ‘batis ai' sisa'et’), natuin oras naan, mansian ein anbaits ok neu are' bare-bare nbi pah-pinan. In oirf ee kaan ee, nai' Joktan. 26 Nai' Joktan in suufk ein, esan re': nai' Armodat, nai' Seref, nai' Hasar-Mabet, nai' Jera, 27 nai' Hadoram, nai' Usar, nai' Dikra, 28 nai' Obal, nai' Abimaer, nai' Seba, 29 nai' Ofir, nai' Habira, ma nai' Jobap. Sin arsin re' ia, nai' Joktan in sufan. 30 Bare-bare re' sin natua ngguin, nmurai na'ko Mesa nkono ntea Sefar, es re' baer ma'toe'f ein et pasa' neon saet. 31 Sin arsin, nai' Sem in sufan. Es-es ate nok in uab, in uuf, ma in pah. 32 Sin arsin ok-oke', nai' Noh in sufan-ka'un, es-es ate nok in uuf akuun. Oras noe sako' naan namsau, sin re' ia es anseij ok ma nbaits ok ma naheun pah-pinan.
Kota Baber
1 Un-unu' fe' ete, mansian pah-pinan na'uab ein neik uaba' mese'. 2 Oras sin bian anmurai nanain ein neun pasa' neon saet, sin ntean mneer es et Sinear, onaim sin natuan nbin naan. 3-4 Sin arsin anma'akoran am nak, “Hoe! Aok-bian arki! Iim he hit tafena' kuuk kota ko' goes. Onaim hit tmoe' faut me'e, rarit hit tout sin tar naheran. Hit taktuta' fatun naan ma traem sin tpaek ter. Rarit hit tahake' koat ma'uim fatu mnaun es anbi kota ko'u naan in nanan. Koat ma'uim fatu naan, in a'puupn ee ansutrai neno, henati' hit mateka' kit. Ma maut he hit tjair uuf ko' goes, ma kaisa' tbaits ok.” 5 Onaim UISNENO nsaun neem ma nnoon kota ma koat ma'uim faut maktuta-mnanu' re' mansian ein naan nafena' sin. 6 Rarit In na'uab am nak, “Sin re' ia, uuf mese' ma uab mese'. Saa' re' sin nmoe' je oras ia, fe' nfaat noon. Noka'-nmeum, karu sin arsin nmafutun njarin mese' on re' oras ia, sin of nabe'in he nmo'en saa'-saa' ahaa. 7 Reko nneis Hit tsaun he trikrakan sin uaba' he njair uaba' huma'-huma'. Maut henati' esat ka nahiin fa es in uaban.” 8 Rarit Uisneno nsanu ma nrikrakan sin uaba'. Nok ranan naan, In nmoe' mansian sin nsiksakn ok neu are' bare-bare nbi pah-pinan. Onaim sin ka nafena' nakonob fa kota naan. 9 Natuin UISNENO nrikrakan sin uaba', ma nsiksakan sin neu are' bare-bare nbi pah-pinan, etun sin nakanab kota naan Baber (re' he noi huma' mese' on re' kata es, re' in oet ni ‘taka'nana'’).
Nai' Sem in suufk ein tar antea nai' Abram
10 Nai' Sem in suufk ein esan re' ia: Oras noe sako' naan namsau toon nua, nai' Sem anmoin naan toon nautn es (100), in napein ri'an moen jes, ma nakaan be nai' Arpaksat. 11 Rarit in nmoni ntein toon natun niim (500) fe', ma in napeni nteni' ri'an mone ma ri'an feto. 12 Oras nai' Arpaksat nmoin naan toon bo' tenu mniim (35), in napein ri'an moen jes, ma nakaan be, nai' Sera. 13 Rarit nai' Arpaksat nmoni ntein toon natun haa mtoon teun (403) fe', ma in napeni nteni' ri'an mone ma ri'an feto. 14 Oras nai' Sera nmoin naan toon bo' teun (30), in napein ri'an moen jes, es re' nai' Eber. 15 Rarit nai' Sera nmoni ntein toon natun haa mtoon teun (403) fe', ma in napeni nteni' ri'an mone ma ri'an feto. 16 Oras nai' Eber nmoin naan toon bo' tenu mhaa (34), in napein ri'an moen jes, es re' nai' Pelek. 17 Rarit nai' Eber nmoni ntein toon natun haa mbo' teun (430) fe', ma in napeni nteni' ri'an mone ma ri'an feto. 18 Oras nai' Pelek nmoin naan toon bo' teun (30), in napein ri'an moen jes, es re' nai' Rehu. 19 Rarit nai' Pelek nmoni ntein toon natun nua mtoon sea (209) fe', ma in napeni nteni' ri'an mone ma ri'an feto. 20 Oras nai' Rehu nmoin naan toon bo' tenu mnua (32), in napein ri'an moen jes, es re' nai' Seruk. 21 Rarit nai' Rehu nmoni ntein toon natun nua mtoon hiut (207) fe', ma in napeni nteni' ri'an mone ma ri'an feto. 22 Oras nai' Seruk anmoin naan toon bo' teun (30), in napein ri'an moen jes, es re' nai' Nahor. 23 Rarit nai' Seruk nmoni ntein toon natun nua (200) fe', ma in napeni nteni' ri'an mone ma ri'an feto. 24 Oras nai' Nahor anmoin naan toon bo' nua msea (29), in napein ri'an moen jes, es re' nai' Tera. 25 Rarit nai' Nahor nmoni ntein toon nautn es bo'es am sea (119) fe', ma in napeni nteni' ri'an mone ma ri'an feto. 26 Oras nai' Tera nmoin naan toon bo' hitu nneis, in napein ri'an mone teun, esan re': nai' Abram, nai' Nahor, ma nai' Haran.
Nai' Tera in sufan-ka'un
27 Nai' Tera in sufan-ka'un sin, esan re' ia: nai' Tera in aanh ein, nai' Abram, nai' Nahor, ma nai' Haran. Nai' Haran napein ri'an moen jes, es re' nai' Rot. 28 Nai' Haran nmate nbi in kua mnasi' Ur, et pah atoin Kasdimas. Oras in anmaet, in amaf nai' Tera nmoin fe'. 29 Nai' Abram ansao bi Sarai. Nai' Nahor ansao nai' Haran in an-feto, bi Milka. Nai' Haran amsa' napein ri'an moen jes, es re' nai' Jiska. 30 Mes bi Sarai nkiu. 31 Neot es, nai' Tera neik in anah nai' Abram, in aan nanef bi Sarai, ma in upuf nai' Rot. Sin npoin ma nnaon nasaitan sin kua-mnasi' Ur. Oras naan, sin he nnaon neu pah Kana'an. Mes antean pah Haran, sin natuan nbin naan. 32 Anbin naan, nai' Tera nmaet, oras in nmoin naan toon natun nua mtoon niim (205).
Uisneno no'en nai' Abram
1 Oras naan, UISNENO na'uab neu nai' Abram am nak, “Abram! Ho mnao musait ho nonot-asar, ho ama' in umi, ma ho kuan. Ho mnao meu baar jes, re' Au of ukriir ee neu ko. 2 Au of a'fee tetus athoen neu ko. Ma ho sufam-ka'um sin of amfau-rutu, ma of anjarin uuf ma'tani, tar ho kanam naan of mateka'. Rarit, ho mjair atoin amneik tetus neu atoin sona'. 3 Au of a'fee tetus neu tuaf-tuaf re' nfee tetus neu ko. Mes Au of a'fee kasat neu tuaf-tuaf re' nkaas ko. Mneen rek-reko! Are' uuf-uuf anbi pah-pinan ia of napenin tetus, natuin ho.” 4-5 Oras naan, nai' Abram anmoin naan toon bo' hitu mniim (75). In neik in fee bi Sarai, ma orif nai' Haran in anah nai' Rot, ma in baer pusaak ein ok-oke', ma ameupt ein in uum je nanan re' in napein sin anbin kota Haran. Onaim, nai' Abram nnao nasaitan kota Haran, neu bare re' UISNENO nba'an anrari he nakriir ee neu ne. Sin nnaon nkonon ntean pah es, in kaan ee, pah Kana'an. 6 Antean bare nana te, nai' Abram sin annoon goe nfuun am nateef, tar sin mpaumakan kuan Sikem. Rarit sin natuan ntaah nein mpaumaak hau ko' goes et More. Oras naan, abitan Kana'an fe' natuan nbin naan. 7 Anbi bare naan, UISNENO nakriir On neu nai' Abram. In na'uab am, nak, “Au of a'fee bare ia neu ho sufam-ka'um sin.” Rarit nai' Abram nbakin mei fatu he njair mei fuat neu UISNENO, re' nakriir On anbi naan. Nai' Abram na'bees neu Uisneno nbi mei fuat 8 Rarit nai' Abram sin nanain ein' bare. Sin nnaon neu 'to'ef et pasa' haa'-nua. Rarit sin natua ntaah nein nbin kuan Betel ma kuan Ai sin atnanak. Anbi bare naan, in nbaik mei fuat, ma na'bees neu UISNENO. 9 Rarit, sin natnan-nain bare, na'ko baar jes neu baar jes, ntean pah Negep et Kana'an pasa' haa'-nua.
Nai' Abram annao neu pah Masir
10 Neot es, amnahas ma'tani' ntaman pah Kana'an. Es nana te, nai' Abram sin nnaon na'roo ntein ein neu pasa' haa'-nua, ntean pah Masir. Sin natuan ntaah nein anbin naan. 11 Oras sin he ntaman neu pah Masir, in natonan in fee bi Sarai mnak, “Sarai, ho maas maan reok ni kaah! 12 Onaim karu abitan pah Masir niit ho maasm ii te, sin of na'maet kau, natuin au re' ia ho mone. Onaim, sin of ansao ko. 13 Onaim, reko nneis, ho mutonan sin am mak, au re' ia, ho na'o. Nok ranan naan, sin ka neu nroor kau fa, mes sin of nok kau te, reko, natuin sin nroim ko.” Bi Sarai nbi usif pah Masir in sonaf 14 Onaim, oras nai' Abram sin ntean pah Masir, abitan naan niit ain Sarai in masan arekot naan. 15 Oras usif pah Masir in atuta'-abha'et sin niit ee te, sin nboi's ahaa bifee naan nbi uisf ee in matan. Onaim sin neik bifee naan neu uisf ee in sonaf. 16 Onaim, usif naan nok nai' Abram nmonin reko, natuin bi Sarai. Rarit uisf ee nfee nai' Abram bijae, bikaes keledai, bikaes onta, 'bibi, ma 'bib-kase. Uisf ee nfee sin ruum ah. In nfee ate msa' neu nai' Abram, et bifee ma atoni'. 17 Mes natuin in nataam atoni' in fee nbi in sonaf, es nana te, UISNENO nhukun usif naan. Etun uisf ee napein hukun huma'-huma', et in ma in uum je naan ee msa'. 18 Rarit uisf ee no'en nai' Abram ma nataan ee mnak, “Abram! Ho mmoe' kau on mee? Nansa'am es ho ka mutoon fa mmak bifee ia, ho fee ja? 19 Mes ho mak in re' ia, ho feto'! Arakre'o te, au 'sao! Hoe! Mtoup mufani' ho fee. Oras ia, meik je ma mpoi maen mimneuk nai! Au ka iit a'tein ki fa mbi bare ia!” 20 Rarit uisf ee naprenat in ameupt ein he nriu' napoitan nai' Abram ma in fee, ma sin baer ein ok-oke'. Sin ro he nasaitan bare naan.
Nai' Abram ma nai' Rot anbaits ok
1 Rarit nai' Abram nasaitan pah Masir, he nfain on pah Negep. In neik in fee, ma in baer pusaak ein oke'. In oirf ee anah nai' Rot nok amsa'. 2 Nai' Abram naan, atoin amu'it. In mui't ein mfau-rutu. Noni mnatu' msa', mfaun. 3 Na'ko Negep in natnan-nain he nfain on kuan Betel ma kuan Ai sin atnanak. Unu' te, in natua nbi naan. 4 Ma in imsa' nbaik mei fuat. Rarit in na'ruri' ma na'bees neu UISNENO nbi naan. 5 Nai' Rot, re' nok nai' Abram naan, nmui' mu'it amsa'. In mui't ein amfaun. Ma in nmui' ameput namfau msa'. 6-7 Mes bare naan ka mainuan reko fa neu nai' Abram ma nai' Rot sin. Natuin sin a'mui' kein namfau, etun sin ka bisa fa he nmoin nabuan. Onaim, nai' Abram ma nai' Rot sin atuuks ein anmatoen, natuin huun re' nbi bare naan ka nanokab fa neu sin mui't ein. (Oras naan, atoin Kana'as ma atoin Feris fe' natuan nbin naan.) Nai' Abram ma nai' Rot npirin bare 8 Onaim, nai' Abram nak neu in anah nai' Rot am, nak “Rot! Hit nua kit umi nanan. Nati' hit nua kit kaisa' tmatenab, ma hit atuuks ein amsa' kaisa' nmatoen piut. 9 Reko nneis hit nua kit atbaits ok. Bare ia, mainuan fe'. Onaim karu ho mpiir bare nbi pasa' ponain, henat au 'ait abit pasa' haa'-nua. Mes karu ho mpiir bare nbi pasa' haa'-nua, henat au 'ait abit pasa' ponain.” 10 Rarit, nai' Rot nkisu nfuun am nateef. Ma in niit karopu' mneer ko'u noe Yarden re' oe ji nho-nhoe, ntea kuan Soar. Bare naan in amria ni on re' UISNENO in po'on, ma on re' pah Masir. (Oras naan, UISNENO fe' ka nareu' fa kota Sodom ma kota Gomora. Etun, bare naan reko fe'.) 11 Onaim nai' Rot npiir naan bare nbi karopu' mneer ko'u noe Yarden naan. Ma nua sin anbaits ok. Rarit nai' Rot nnao n'ain pasa' manse 'saen. 12 Mes nai' Abram natua nabaar anbi pah Kana'an. Nai' Rot nnao natua nbi kuan-kuan re' nhaumaak kota Sodom et karopu' mneer ko'u noe Yarden. 13 Mes abitan kota Sodom naan, atoin aburaurt ein. Ma sin imsa' ka nfairoir fa UISNENO. 14 Oras nai' Rot ma nai' Abram anbaits ok, UISNENO nak nai' Abram am nak, “Abram! Ho mkius mutef-tefan miit bare-bare na'ko bare re' ho mhaek naan. Mkius murek-reko 'rii-'ne'u, kotim-maat. 15 Au of a'fee afu bare-bare re' ho mkius sin naan, neu ko ma neu ho sufam-ka'um sin, he njair sin auf pusaak tar antea nabar-baar. 16 Au of a'moe' ho sufam-ka'um sin he nfain too mfaun on re' snaen anbi taas je ninin. Tar atoni' ka nsoi' nabei' sin fa msa'. 17 Oras ia, ho mnao mnoon bare-bare re' ho miit murair sin naan, natuin Au he 'fee sin neu ko!” 18 Rarit nai' Abram sin natnanin, ma nfain natua ntein ein nbin hau ko' guin Mamre, npaumaak kuan Hebron. Rarit in nbaik mei fuat, onaim na'ruri' ma na'bees neu UISNENO nbi naan.
Nai' Abram annao ma nok nafani' nai' Rot na'ko makenat
1 Oras naan, usif haa nabuan. Sin esan re': Amrafel, usif pah Sinear. Ariok, usif pah Elasar. Kedarlaomer, usif pah Elam. Ma Tidear, usif pah Goyim. 2 Oras nana msa', usif niim antein nabuan. Sin esan re': Bera, usif pah Sodom. Birsa, usif pah Gomora. Sinap, usif pah Adema. Semeber, usif pah Seboim. Ma Bela, usif pah Soar. Rarit uis haa ein naan nmakenan nok uis niim ein naan. 3 Uis niim ein naan nabuan nok sin soraurs ein anbin karopu' mneer ko'u Sidim, (re' oras ia sin nteket nak, Tasi 'Maten). 4 Makenat naan, na'uub on na'ko rasi re' ia: Unu' te, usif Kedarlaomer naprenat uis niim ein naan, toon bo'es am nua. Mes toon bo'es am teun ni ntama te, sin nmurai nraban usif Kedarlaomer. 5 Oras toon bo'es am haa ni ntama te, usif Kedarlaomer nok usif teun, neman nok sin soraurs ein. Onaim sin nmakenan ma niis pah-pah bian, es re': atoin Refaimas et pah Asterot-Karnaim, atoin Susimas et pah Ham, atoin Emimas et pah Sawe-Kirjataim, 6 ma atoin Horis re' et a'to'ef Seir ntea baer ruman El Paran in ninin. 7 Rarit, sin ntebi nfanin on En Mispat (re' oras ia, in kaan ee Kades). Rarit sin nkuaas atoin Amareks sin pah, ma nkuaas atoin Amoris re' natuan et pah Haseson-Tamar. 8-9 Rarit uis niim ein naan n'ator sin soraurs ein nbin karopu' mnera' Sidim. Onaim sin nmakenan nraban uis haa ein naan. 10 Anbi mnera' naan, anmui' tepas ter amfaun. Oras makenat naan, usif Sodom ma usif Gomora nok sin soraurs ein, nfeen naenan. Bian anmofu ntaman neu tepas ter ein naan. Ma bian naenan neu a'to'ef. 11 Onaim uis haa ein re' nisan nbin makenat naan, nasiik naan ma neik are' bare' ma mnahat na'ko Sodom ma Gomora. Rarit sin ntebin nfanin. 12 Mes nai' Abram in anah nai' Rot natua et Sodom. Onaim uis haa 'ein naan anheek neik nai' Rot sin, ma nasiik neik sin baer ein ok-oke'. 13 Mes anmui' tuaf es anfosuk naan on. Onaim, in nnaen natonan nai' Abram, atoin Ibranis. Oras naan, anmui' atoin Amoris es, in kaan ee, nai' Mamre. Nai' Abram natua npaumaak nai' Mamre' in hau ko' guin. Nai' Mamre in aok-bian ein, esan re' nai' Eskor ma nai' Aner. Sin nua sin, nai' Abram in soob rekon. 14 Oras nai' Abram napein hanaf nak atoin ein anheek neik in oirf ee aanh ee te, in nabuaba' in atoin ameupt ein re' nmakeen nahinin. Sin arsin natun tenu mbo'es am faun (318). Rarit sin nriu' natuin uis haa' ein naan na'roon ntean kuan Dan, et pasa' ponain. 15 Anbi naan nai' Abram nbait in ameupt ein naan njair pukan-pukan. Oras fai on nana te, sin ntaman ntaisibun atoin ein naan, mes bian naenan. Rarit nai' Abram nok in ne, nriu' sin ntean kuan Hoba, et kota Damsik in pasa' ponain. 16 Rarit nai' Abram napein nafani' nai' Rot, in ameupt ein, ma in baer ein oke', ma tuaf bian anteni'.
Nai' Melkisedek nateef nai' Abram. In usif ma a'nak pirsait na'ko Uisneno
17 Oras nai' Abram nfain neem na'ko makenat re' in niis naan uis haa' ein naan te, usif Sodom neem anseung goe nbi karopu mnera' Sabe (re' atoin ein nati' te, nteek ee te, Mnera' Usif). 18 Oras naan, Melkisedek usif kota Salem, ma in imsa' a'nak pirsait na'ko Uisneno re' A'raat isat. In neem neik utunu' ma tua-min-kase neu nai' Abram. 19-20 Rarit in nfee tetus neu nai' Abram am nak, “Maut he Uisneno re' A'raat isat naan, re' nmoe' neno-tunan ma pah-pinan naan, nfee tetus athoen neu ko. Pures ma bo'is neu Uisneno, re' nfee ko rasi mnisat na'ko ho musu sin!” Rarit nai' Abram nfeen usif Melkisedek baits es na'ko bait bo' na'ko are' saa'-saa' re' in nasiik nafani' sin. 21 Rarit usif Sodom nbaiseun nai' Abram. In na'uab am nak, “Aam Abram. Baer ein re' ho musiik meik sin na'ko au musun naan, maut he ho mpaar sin. Mes au 'toit ufain ahaa, au too ngguin.” 22 Mes nai' Abram nataah am nak, “Au 'suup a'bi Uisneno A'raat isat, re' nmoe' neno-tunan ma pah-pinan, 23 ak, au of ka 'ait fa baer saa'-saa' es na'ko ho baer ein naan. Maski abas tuka' mese' msa', au of ka 'ait if. Nok ranan naan, neot es ate, ho ka bisa mu'uaba' fa mmak, ‘Au es umu'ib nai' Abram.’ 24 Au ka 'roim fa saa'-saa'. Suma mee ja es re' au ameupt ein anpake nrair sin een, ho kais mutenab amtein sin nai. Ma maut he au soob teun ein ia, nai' Aner, nai' Eskor, ma nai' Mamre, nait neik sin sapaak ein.”
Uisneno nmanba'an nok nai' Abram
1 Rarit UISNENO nakriir On neu nai' Abram, ma na'uab am nak, “Abram! Ho kais mumtau. Au es a'panat ko na'ko ho musun. Ma Au 'fee ko mnisat ko'u.” 2-3 Mes nai' Abram nak, “Koi, Usi'. Maski Ho mfee kau saa'-saa' nathoe, noki-noki te, ruman. Natuin au ka 'mui' fa anah he nfain au sufak. Onaim, au 'mui' pusaak amfaun he saa'? Namuni te, au ate nai' Eliasar atoin Damsik naan es anpaar sin.” 4 Mes UISNENO nataah am nak, “Ka on fa naan! Ho anah kuum of es re' ntoup pusaak naan. Ka ho ate naan fa.” 5 Onaim In nneik nai' Abram anpoi, rarit In nak, “Ho mbaiseun miit on neon goe! Mkius miit kfuun ein naan. Ho msoi' maan sin ii, oo? Naa! Ho sufam-ka'um sin of mfau-rutu on re' kfuun ein naan!” 6 Onaim nai' Abram antebes UISNENO In uaban naan, rarit UISNENO nsoi' je ntaam atoin neek amne'o, natuin nai' Abram anpirsai neu Ne. 7 Rarit UISNENO ntuut antein In uaban nana mnak, “Au re' ia, Uisneno. Au es re' 'eik ko mpoi mu'ko ho kua-mnasi' Ur et pah atoin Kasdim sin. Ma Au es re' 'fee bare re' ia, njair ho auf pusaak.” 8 Mes nai' Abram nataan am nak, “Mes on mee, UISNENO? Nok ranan mee te, na' au uhini m'ak bare ia njair au auf pusaak aa?” 9 Onaim In nataah am nak, “On nai! Uum he hit ttao taan moe't es, he tfuut saa' re' Au u'uab ee fe'ena. Oras ia, ho mnao mait mu'it neu Kau; mait bijae ainf es, 'bib ainf es, ma 'bib-kaes keos goes. Sin re' naan ro he toon ten-teun goah. Rarit ho mheek maan kor-otos es, ma kor-keif jes. ” 10 Onaim nai' Abram nnao nheek mui't ein naan oke'. Rarit in roor sin, ma nkaah anbait mui't ein naan. Rarit sin siis kein, in n'ator sin ranan nua nmaktun-tuin ein anbin afu, es ate anbani' neu in bian. Mes koor nein in ka nkaah sin fa. 11 Rarit koor amneuk siis puun ein neman he nroe neik naan sisin re' naan. Mes nai' Abram nriu' sin. 12 Oras manse nmouf, nai' Abram ntuup anfiin. In namnei mnak, mes'ookn ii nkuub naan ee. Ma in namtau nmaet. 13-15 Rarit Uisneno natoon ee, mnak, “Abram! Ho of ammoin tar antea mumnais ma mnu'ir re'-re'uf, ma ho of ammaet mok neek mamut, onaim sin of ansuub ko nok rek-reko. Mes ho sufam-ka'um sin of annaon njarin atoin amnemat nbi uuf bian sin pah. Kua-tuaf abitan pah naan of na'aet sin, na'peni' ma nha'mui' sin, tar antea toon natun haa. Mes Au of a'hukun abitan pah naan. Rarit Au of 'eik upoitan ho sufam-ka'um sin na'ko bare naan, ma sin of nekin baer pusaka mfau-rutu. 16 Au of a'ator he ho up-ka'um sin anfain neman on bare ia ntein. Oras ia, atoin Amoris sin natuan etan bare ia. Atoin ein ia amoe' reu'f ein, mes fe' ba-baun. Neot es ate, karu ho up-ka'um sin anfain neman ntean bare ia te, Au of a'paek sin he 'hukun ureu' atoin Amoris sin. Natuin oras naan, sin maufiun kein kaheen.” 17 Anfai on nana te, nok askeken, a'naikonat es napoitan masu', ma paku 'nopo es anpiin, sin nnaon npeo' sisin naan sin atnaank ein. 18 Oras naan, UISNENO nahakeb rais manba'an nok nai' Abram, nak, “Au 'ba'an 'ain, Au of a'fee bare ia neu ho sufam-ka'um sin, nmurai na'ko noe Masir tar antea noe Efrat, 19 ma atoin Kenis sin pah, atoin Kenas sin pah, atoin Katmons sin pah, 20 atoin Hetes sin pah, atoin Feris sin pah, atoin Refaimas sin pah, 21 atoin Amoris sin pah, atoin Kana'as sin pah, atoin Girgasis sin pah, ma atoin Jebus sin pah.”
Ain Hagar ma in anah nai' Isma'el
1-3 Oras naan, nai' Abram nfain neem een na'ko pah Masir, ma natua naan toon bo'es een anbi Kana'an. In fee bi Sarai, ka nahoni' fa fe'. Bi Sarai nmui' aet bifee jes, na'ko pah Masir, in kaan ee, bi Hagar. Neot es, bi Sarai nak in moon je mnak, “Aam! UISNENO n'eek au apuk. Reko nneis, ho mtuup mok au ate bi Hagar, maut he au 'mui' anah.” Onaim, nai' Abram natuin in fee je hanan. Rarit bi Sarai nfee bi Hagar he nai' Abram anpana' sin. 4 Rarit nai' Abram antuup nok bi Hagar. Ma bi Hagar na'apu. Mes oras bi Hagar nahiin neu in na'apu' te, in nabeo'. In ka na'paar non fa neu bi Sarai. 5 Onaim, bi Sarai na'uab nok nai' Abram am nak, “Au es a'fee ko ate nana he njair ho fee. Mes oras in ntai boko te, in ka nkisu ntoom kauf. Ia ho ras-rasim! Anbain he UISNENO es nafeek hit rasi. Maut hena' ho muhiin!” 6 Rarit nai' Abram nataah am nak, “On nai! Au 'sao ko nahuun. In namuin. Onaim, ho es re' he mupreent ee. Es nana te, ho he mmoe' saa'-saa' neu ne te, es re' ho!” Rarit bi Sarai nmurai nha'mui' bi Hagar, tar antea bi Hagar naen nasaitn ee. 7 In naen antea baer ruumn es. Onaim UISNENO In ameput neno-tunan es neem nateef ee nbi bare re' npaumaak oe mata' nbi ranan he nnao neu Sur. 8 Rarit in nak, “Hoe! Bi Hagar, bi Sarai in ate! Nansa'am es ho es ai? Ho mu'ko mee, ma he mnao meu mee?” Onaim bi Hagar nataah am nak, “Au 'aen usaitan au ain usi'.” 9 Rarit UISNENO In ameput naan na'uab nok ne rek-reko, mnak, “On nai! Reko nneis ho mfain on ho ain usi'. In nmoe' ko on mee msa', mtoup goe. 10 Kais mumtau. Au of a'moe' ho sufam-ka'um sin amfau-rutu, tar antea ka maso'ik fa. 11 Oras ia, ho mu'apu'. Ka 'roo fa te, ho of muhoni' ri'an moen jes. Ho ro he mukaan be, nai' Isma'el (re' he noi namnees nok kata es, re' in a'moufn ii nak ‘Uisneno nneen’), natuin UISNENO nahiin inrair ho susat ma nana'renat. 12 Mes oras ri'ana' naan na'nae, in of anmoin na'roo na'ko in orif-tataf sin. Natuin in on re' bikaes fui, re' ka nroim fa he natuin aprenat. Sekau-sekau msa', in nraban sin. Ma are' atoin ein of anraban nafain ee oke'.” 13 Anneen anrair on nana te, bi Hagar natenab anbi in nekan, nak, “Au 'iit a'rair UISNENO, re' In niit ma npanat kau.” Rarit in nmurai nteek Uisneno npaek kanaf, “Usi' re' nfairoir kau.” 14 Etun atoni' nakanab oe mata' naan, Beer Lahai Roi, re' in a'moufn ii, “Oe mata' na'ko Usi' Amonit, re' anfairoir kau.” In baarn ee et kuan Kades ma kuan Beret sin atnanak. Oras ia, oe mata' naan fe' etan. 15 Rarit bi Hagar anfain. Onaim in nahoni' ri'an moen jes. Nai' Abram nakanab ri'ana' naan, nai' Isma'el. 16 Oras bi Hagar nahoni' nai' Isma'el, nai' Abram nmoin naan toon bo' fanu mnee (86).
Uisneno nahake' rais manba'an neu nai' Abram npaek tanar herit
1 Oras nai' Abram nmoin naan toon bo' sea msea (99), UISNENO neem nakriir On neu ne. Onaim, In na'uab am nak, “Au re' ia Uisneno re' Akuaas isat. Ho ro he mutuin Au roimk ii piut, ma mmoin nok neek amneot. 2 Au he' uhake' rais manba'an ok ko, ma 'moe ho sufam-ka'um sin anmfau-rutun.” 3 Onaim nai' Abram nri'tuu ma na'ruri' tar ntea afu. Rarit Uisneno na'uab ankono mnak, 4-5 “Au 'moe' rais manba'an ok ko, on nai: ho of amjair aam uuf neu uuf amfaun. Es nana te, ho kanam naan ka nai' Abram fa heen, (re' in oet ni nak ‘amaf re' mateka'’) mes nai' Abraham (re' in oet ni nak ‘aam uuf neu uuf amfaun’). 6 Au of a'moe' ho sufam-ka'um sin mfau-rutu. Au of uhakeb uuf namfau na'ko sin, ma usif namfau of anpoi ma nboor na'ko sin. 7 Au 'naa' uher-heran rais manba'an ia ok ko ma ho sufam-ka'um sin. Rais manba'an ia nabar-baar, natuin Au re' ia, Uisneno neu ko ma neu ho sufam-ka'um sin. 8 Au of a'fee pah Kana'an ok-oke' neu ko ma neu ho sufam-ka'um sin. Oras ia, ho suma mutua mtaah naah. Mes of ho sufam-ka'um sin npaar pah Kana'an ia, tar antea nabar-baar. Ma Au of a'jair sin Uisneon goa msa'. 9-10 Mes ho mok ho sufam-ka'um sin ro he mnaa' miheer-heran rais manba'an ia. Atoin ein ok-oke' ro he na'heir ein. 11-13 Nmurai oras ia, are' atoni' re' nmoin naan neno faun neki nsae, ro he na'heir ein. Ho mok ho nonot-asar, ho ameupt ein oke', ho aten re' ho msoos maan sin nbi pah bian, hi arki ro he mi'heri'. Heri' naan, anjair tanar nak hit nua kit hit rais manba'an ia mamarak anbi hi aom ein. 14 Atoni' mee ja re' ka na'heri' fa te, ka napein fa paa' ma nama' anbi Au rais manba'an, ma ka maso'ik fa nbi Au too.” 15 Rarit, Uisneno ntuut In uaban am nak, “Nmurai oras ia, ho kaisa' mteek amtein ho fee jet mak Sarai, mes mak Sara'. 16 Au of a'fee tetus athoen neu bi Sara', he in nahoni' nfee ko ri'an moen jes. Batuur-batuur! Bi Sara' of anjair ain uuf neu uuf amfaun. Ma usif namfau of anpoi ma nboor na'ko sin.” 17 Onaim nai' Abraham nri'tuu ma na'ruri' tar ntea afu. Mes anbi in nekan naan ee te, in main. In natenab am nak, “Atoni mnasi' fufu' on re' au, toon nautn es, of upein ri'ana, on mee? Ma bi Sara' re' namnais re'reu'f een, toon bo' sea, in of nahoni' on mee?” 18 Onaim in natonan Uisneno mnak, “Usi'. Maut he nai' Isma'el es npaar au pusaak ein. Ka saa'-saa' af.” 19 Mes Uisneno nataah am nak, “Kahaf! Ho fee bi Sara' of nahoni' ri'an moen jes. Ho mukaan be, nai' Isak. Au rais manba'an naan of nateab on neu ne, ma neu in sufan-ka'un sin, tar antea nabar-baar. 20 Au msa' a'neen a'rair saa' re' ho mtoot je neu nai' Isma'el. Es nana te, Au 'fee ne tetus athoen ma Au 'moe' in sufan-ka'un sin namfaun. A'naak uuf bo'es am nua of anboor na'ko in sufan-ka'un sin. Ma in sufan-ka'un of anjair pah ko' goes. 21 Maski on nana msa', Au rais manba'an ia, nmafuut nok ahaa ho anah nai' Isak. Anmanfain on re' ia te, bi Sara' of nahoins ee.” 22 Na'uab anrair on nana te, Uisneno naneuk Gon na'ko nai' Abraham. 23-27 Neno naan amsa', nai' Abraham nmoe' natuin Uisneno In aprenat. Onaim in na'heri'. Rarit in na'heri' nai' Isma'el, ma atoin ein abitan in uum je nanan. In na'heri' atoin aten amsa'. Oras naan nai' Abraham nmoin naan toon bo' sea msea (99), ma nai' Isma'el toon bo'es am teun (13).
Tuaf teun neman ma nateef nok nai' Abraham
1 Orses, nai' Abraham natua npaumaak hau ko' guin Mamre. UISNENO neem ma nakriir On neu ne. In reetn ii on nai: Neno naan, manse mapuutn ii kaheen, onaim nai' Abraham ntook ma nmaineun nbi in teens ee in enon. 2 Oras nai' Abraham nait matan on nana te, in niit tuaf teun nhaken nbin naan. Onaim, in naen anseun sin. In nri'tuu, 3 ma in na'uab neu sin am nak, “In aam ein! Karu reko te, au uskau he tkoen nok teem teu hi ate kau au tenas ia. Maski mbukae oe ruum-ruum ahaa msa' reko, tua. 4 In ama' arki misnaas akre'o mbi haun guin sin maof kein. Maut he hi aanh ein nekin oe ma nafaun ki. 5 Au 'nao ubarab bukae neu ki, maut he hi mipein ha'tanis akre'o, hena' hi mkoen om amkoon. Au 'mariin, he 'tuthae an ki, tua.” Rarit sin natahan am nak, “Reko. Hai meis mok naan, tua.” 6 Rarit nai' Abraham naen antaam neu tenas naan, ma natonan bi Sara' mnak, “Rabah! Mait maan uut arekot, sak goes. Mmoe' maan kit utunu'.” 7 Rarit in naen on in bijaeng guin, ma in npiir naan bijae apokat aan es. In nreun in ameupt es he nroor goe ma nahaan in sisin. 8 Rarit nai' Abraham nnao nait susu, suus aritas, ma siis hana' re' fe' nahana nrari, rait in neik sin neu amneem fe'un naan. Oras sin nbukaen ate, in nhake nbi hau goes uun ma ntuthae sin. 9 Onaim sin nataan ee mnak, “Abraham! Ho fee bi Sara' et mee?” Rarit in nataah am nak, “Et teens ee naan ee, tua.” Bi Sara' nneen na'ko eon ee 'kain 10 Onaim, tuaf es na'ko sin teun ein naan na'uab am nak, “Of anmanfain on re' ia te, Au 'fain uum. Oras naan, ho fee bi Sara' of nahoni' nrair ri'an moen jes.” Oras sin na'uab ein on nana te, bi Sara' nneen na'ko eon ee 'kain. 11 Oras naan, nai' Abraham ma bi Sara' sin namnasin re'-reu'f een. Bi Sara' ka napeni ntein fa funan. 12 Anneen sin uab kein on nana te, bi Sara' nmain neek ah. In natenab am nak, “Hmmh! Au umnais re'-reu'f een. Saa' anteni', au moon je nma'nuur re'-reu'f een. Nok ranan mee kah, he hai aom ein anmonin on re' amatsao feu' ne, he mipein anah?” 13 Rarit UISNENO nataan nai' Abraham am nak, “Nansa'am es bi Sara' nmain? In natenab nak ai' saa' re' Au u'uab ee ia of ka njair fa, natuin in namnasi, oo? 14 Au re' ia, UISNENO! Ka tiit taan fa saa' es re' Au ka bisa 'moo' je fa. Mumnau murek-reok, oo! Karu Au 'fain uum too amnemat, bi Sara' of nahoni' nrair ri'an moen jes.” 15 Anneen on nana te, bi Sara' namtau. Rarit in npeen mates am nak, “Au ka' main kuuk fa, te!” Mes Usi' nataah am nak, “Fe'ena ho mmain batuur ate.”
Nai' Abraham ntabar Uisneno he kais anhukun abitan Sodom
16 Rarit tua teun ein naan nnaon nkonon neu kota Sodom. Nai' Abraham annao nasain sin ntean rana tnana'. Antean nana te, sin napeen niit kota Sodom. 17 Rarit UISNENO natenab am nak, “Reko nneis, Au utonan nai' Abraham am 'ak, Au he ureu' kota Sodom. 18 Natuin nai' Abraham in suufk ein of nma'baab ok tar namfaun, ma njarin uuf es, re' ma'tani'. In imsa' of anfain amneik tetus athoen neu are' kanan uuf anbi pah-pinan ia. 19 Au 'piri 'raar je, he in nanoni' in aanh ein ma tuaf bian antein, he natuin UISNENO In raan Ne piut, ma nmonin nok neek amneot ma amnonot. Karu sin nmo'en on re' nana te, Au rais manba'an neu sin of nateab on.” 20 Onaim UISNENO natonan nai' Abraham am, nak “On nai! Au 'neen a'rair too mfaun ein nsakoina' abitan kota Sodom ma kota Gomora sin maufiun kein. Sin baiseek ein een. 21 Etun Au 'saun uum, he 'iit nok Au matak ma uhiin are' saa'-saa' re' Au 'neen sin naan, batuur aa, oo, ai' kah. Karu kah fa te, Au of uhiin imsa'.” 22 Oras UISNENO fe' na'uab nok nai' Abraham, tua nua ein naan sin nnaon nkonon neu kota Sodom. 23 Nai' Abraham nsiri' npaumak-maak Uisneno, rarit in ntaabr Ee mnak, “Koi, Aam Usi'! On mee? Ho he mureu' atoin reko ma atoin re'uf nomese' nani', oo? 24 Karu nmui' tua reko bo' niim (50) nbin kota naan, Ho he mureu' sin oke' msa' aa, oo? Ai' Ho ka mureu' fa kota naan, natuin Ho mneek sin. 25 Aam Usi'! Kaisa' mmoe' on naan! Kas-kaisa' atoin rekon naan nmaten amsa', oras Ho mureu' atoin maufinus sin. Aam Usi', Ho es amrair Afeek Rasi et neno-tunan ma pah-pinan. Es nana te, Ho meik Nom muhiin mak re' nana ka namneo fa, tua.” 26 UISNENO nataah am nak, “Karu Au upein tua reko bo' niim nbin kota Sodom, Au ka 'hukun fa kota naan, natuin Au 'neek sin.” 27 Nai' Abraham na'uab anteni' mnak, “Aam Usi'. Kais muto'on kau, tua. Reko te, au he u'uab a'teni'. Au re' ia suma mansian amonot. Au ka uhiin fa saa'-saa', tua. 28 Tareta', karu ka ntea fa tua reko bo' niim, mes suma tuaf bo' haa mniim ah, on mee, tua? Karu nkuur nahaa tuaf niim ate, on mee? Ho he mureu' kota nana fe'e, oo?” Uisneno nataah am nak, “Karu Au upein tua reko bo' haa mniim anbin kota naan, Au ka neu he uree' goe fa.” 29 Rarit nai' Abraham antabar anteni' mnak, “Karu suma tua reko bo' haa te, on mee, Aam Usi'?” In nataah am nak, “Karu Au upein tua reko bo' haa, Au ka 'hukun sin fa.” 30 Nai' Abraham na'siti' ntein, nak, “Aam Usi', kais mutoo'. Mes karu suma tua reko bo' teun goah, on mee?” In nataah nak, “Karu Au upein tua reko bo' teun, Au ka 'hukun sin fa.” 31 Rarit nai' Abraham na'siti' anteni', mnak, “Aam Usi', kais mutoo'. Au he utaan a'teni' kre'o. Karu suma tua reko bo' nua goah, on mee, tua?” In nataah antein am nak, “Karu nmui' tua reko bo' nua, Au ka neu fa he 'hukun kota naan.” 32 Nai' Abraham nasoup in han-totis am nak, “Aam Usi'. Au u'siti' haef es anteni', mes kais muto'on kau, tua. Karu suma nmu'i haa tua reko bo' es, on mee, tua?” In nataah amsa' am nak, “Karu Au upein tua reko bo' es anbin naan, Au ka ureu' fa kota naan.” 33 Na'uab anrair on nana te, UISNENO nnao nkoon. Onaim nai' Abraham antebi nfain.
Abitan Sodom sin maufinu
1 Oras Uisneno fe' na'uab nok nai' Abraham, In ameupt ein re' tuaf nua naan, nnaon nkonon neun kota Sodom. Sin ntean ne, manse he noi nmouf goen. Oras naan, nai' Rot fe' ntoko nbi eno' he ttaam teu kota naan. In niit tua nua' ein nana te, in nnao nseun sin. In nri'tuu ma na'ruri' nbi sin maatk ein. 2 Rarit in na'uab am nak, “In ama' arki! Au uskau ki he mkoen om iim meu au uum je fe', tua. Maut he hi mifaun ma mtuup maan faij es ambi ia. Nneis noi nmeu te, na' hi mnao mkoon.” Mes sin natahan am nak, “Makasi, tua. Mes ho kais muhaeb om! Maut he hai mtuup ambi kota ia in amneran.” 3 Mes nai' Rot nfuri' sin piut, tar antea sin nromin he ntuup antaah ein anbin in umi. Onaim, nai' Rot sin ntunun utunu', ma nabaarb ein bukae, ma sin nbukaen bu'-bua'. 4 Oras sin fe' ka ntupan fa fe' te, atoin ein Sodom, ana'-ko'u neman oke'. Sin nhaken nfuun naan nai' Rot in umi. 5 Sin nhuun ein ma nakan nai' Rot tafi'-tafi', am nak, “Hoe, Rot! Atoin nua' ein fe'ena, etan mee? Mupoit sin neman, hai he mi'babi' sin!” Nai' Rot na'uab nok atoin Sodom sin 6 Onaim, nai' Rot anpoi, rarit na'eek eno'. 7 In na'uab am nak, “Aok-bian arki! Hi kaisa' mmoe' re'uf on naan neu au tamun ia. 8 Bait hi mneen fe'! Au an-feot ne, tuaf nua. Sin muin rek-rekon, ma ao 'temef fe'. Maut he au 'nona' ki sin. Hi he minsaa' sin imsa', es re' hi. Mes hi kaisa' mmoe' saa'-saa' neu au taum ni. Tatuin hit haart ii te, au ro he 'panat sin.” 9 Mes atoin Sodom sin nkoa' ein am nak, “Ho kaisa' mseor mok! Ho atoin amnemat. Ho atoin sona'. Onaim ho ka mmui' fa hak he m'ator kai. Reko nneis ho mu'roo mu'ko bare ia. Karu kah ate, hai mmoe' re'uf meu ko, anneis na'ko meu tua nua' ein naan!” Rarit sin ntitar ma nsapar-napasib nai' Rot. Ma sin arsin bu'-bua' nnaon he ntuut nareu' eno'. 10 Mes taum nua' ein naan, nsoron napoitan sin a'niimk ein ma nheer nataam nai' Rot neu uum je nanan, ma sin na'seni' eno. 11 Rarit sin naforob atoin Sodom re' abitan eno', etun sin na'nabre-reon goah he naim eno'. Mes sin ka niit ee fa.
Uisneno napoit nai' Rot sin na'ko Sodom
12-13 Rarit taum nua' ein naan, nak nai' Rot, am nak, “Rot! UISNENO nahini nrair abitan kota ia sin maufinun. Onaim, In nreek kai he iim mireu' main kota ia. Onai ma, ho mmu'i mteni' asar bian et kota ia, ai' kah? Karu nmui' an-mone, an-feto, an nanef, ai' sekau-sekau. Meik sin ampoi nai mi'ko kota ia!” 14 Onaim, nai' Rot annao na'uab nok atoin munif nua re' na'frei in an-feot ne, mnak, “Mneen rek-reko! Oras ia, maen ampoi rabah mi'ko kota ia nai! Natuin UISNENO he nareu' niis kota ia!” Mes sin nak ai' nai' Rot napoi. 15 Neis noi nmeu te, Uisneno In ameupt ein naan, na'seke' nai' Rot sin he naen anpoin rab-raab nai. Sin nak, “Rot! Mfeen nai! Meik ho fee, ma ho an-feot nua' ein naan, maen ampoi misaitan kota ia nai. Kas-kaisa' hi mmaet rum-ruum, ma mimreu' bua'-bua' mok kota ia.” 16 Mes nai' Rot fe' he na'eok bon. Te kah, UISNENO he nsoi naan ee. Etun es taum nua' ein naan nsaok naan nai' Rot in a'niman, in fee, ma in an-feot nua' ein naan, he napoitan sin na'ko kota naan. 17 Onaim, tuaf es na'ko re' taum nua' ein naan, nak, “Maen miheer, he mmoin! Kaisa' mniik! Kais misnaas ambi mnera'! Maen amsae meu 'to'ef, nbain he hi mmoin!” 18 Mes nai' Rot nataah am nak, “Koi, aam! Kais on naan! 19 Ho mturun kai he hai mmoin. Mes a'to'ef ne, na'roo! Kas-kaisa' hai ka mtea maan fa ne te, amreu't ii napein kai nbi rana tnana'. 20 Aam, mkius miit. Anmui' naan kuan aan es ka na'roo fa na'ko ia. Kuan re' ne, ka mateka' fa, natuin in aan-ana'. Onaim, aam, karu ho mromi te, maut he hai m'ain na, hena' hai mmoin.” 21 Onaim in nataah am nak, “Reko! Mnao nai! Au of ka ureu' fa kuan re' naan. 22 Oras ia, hi maen nai meu kuan naan! Natuin au of ka 'moe' saa'-saa' fa fe', karu hi ka mtea fa fe'.” Nmurai na'ko oras naan, atoni' nteek kuan naan nak, Soar, re' in a'moufn ii nak ‘ana'’.
Kota Sodom am kota Gomora nputu nmaten
23 Oras manse nsae te, nai' Rot sin ntean Soar. 24 Nok askeken, UISNENO n'opa' uur-ai ma bariri re' anpiin, ansaun neem na'ko neno neu kota Sodom ma kota Gomora. 25 UISNENO nout nakrati' kota sin ok-oke' ma kuan ein anbin bare naan, ma are' kanan amonit, et mansian, mu'it, ma hau anbin naan. 26 Oras nai' Rot sin naenan, in fee je, anniik. Nok askeken ate, in njair nii masik. 27 Noka' kik-kiku te, nai' Abraham anfani nteni' neu bare re' afina in nhake ma ntabar UISNENO. 28 Onaim in nnapenen nsaun neu Sodom ma Gomora ma karopu mneer ko'u naan oke'. In nkisu te, maus ein nsaen on neon goe kbo'es-akbo'es anbi mee-mee. Ma ai pina' naan nout niis are' saa'-saa'. 29 Onaim oras Usi' nout nakrat-rati' koot ein naan, In namnau In rais manba'an neu nai' Abraham. Etun In nturun ma napoit nai' Rot na'ko bare re' In nareu' goe naan.
Nai' Rot am in an-feton
30 Oras naan, nai' Rot namtau he natua nabaar anbi kuan Soar. Es nana te, in nok in an-feot nua' ein naan, nanain ein neun a'to'ef. Rarit sin natuan nbin nuat es. 31 Neot es, an-feot uun ee, nak in oirf ee mnak, “Anbi bare ia, nfuun am nateef ka tii-tiit fa atoni' he nsao kit. Ma ka 'roo fa te, hit ama' namnais kuun een, ma ka namsa'i ntein fa heen. 32 Onaim, reko nneis, hit tamauf hit ama'. Rarit hit 'tuup tokan. Maut he hit tamsa'ib hit ama'.” 33 Fai ni te, sin na'inu sin aamf ee nok tua-min-kase, tar anmafu nmaet. Rarit feot uun ee nnao ma ntuup nok in amaf. Mes a'naef ee nmafu nmaet, onaim in ka nahiin fa neu in nmoe' saa' nok in aan feto. 34 Nmeu fini te, feot unu naan, natonan in oirf ee mnak, “Fini na, au 'tuup a'rair ok ama'. Mabe' ia, ho sapaam. Hit tamafu ttein ama', rarit ho mtaam amtuup mokan. On nana te, hit nua kit of tahoni' ma ttaur ama' in sufan.” 35 Mabe' naan, sin namafu nteni' 'naef. Rarit an-feot aheet susu, nnao ma ntuup nok in amaf. Mes a'naef ee nmafu nmaet, onaim in ka nahiin fa neu in nmoe' saa' nok in an-feto. 36 Nok ranan naan, sin nua sin na'aup ein na'ko sin aam honif. 37 Rarit an-feot uun ee nahoni' ri'an moen jes. In nakaan be, nai' Moap (re' he noi huma' mese' on re' kata es anteni', in a'moufn ii ‘neem na'ko ama'’). In es re' njair aam uuf neu atoin Moapas oras ia. 38 Rarit an-feot aheet suus goe, nahoni' ri'an moen jes. In nakaan be, nai' Ben Ami (in a'moufn ii ‘ri'ana' na'ko au nggoa’). In es anjair aam uuf neu atoin Amon sin oras ia.
Nai' Abraham napoi usif Abimerek
1 Rarit nai' Abraham nanani' na'ko Mamre, nnao neu pah Negep et pasa' haa'-nua. In natua nbi kuan Kades ma kuan Sur sin atnaan kein. Mes ka' roo fa on nana te, in natnani ntein neu kuan Gerar. 2 Ma in natonan abitan kuan naan amnak, ain Sara' naan, in fetof. Es nana te, nai' Abimerek, usif Gerar, nreek tuaf ma ntaam antoit bi Sara'. Rarit sin neik je neu uisf ee in sonaf. Rarit te, UISNENO nasnasab bifee ahoni' ma nakiuba' bifee munif, na'ko too usif Abimerek, natuin in ntoup naan nai' Abraham in fee. 3 Faaj es, Uisneno nakriir On anbi mneit neu usif naan. In na'uab am nak, “Ho he mmaten! Natuin ho mtoup maan atoni' in fee!” 4-5 Mes nai' Abimerek nataah am nak, “Usi'! Au ka 're'-reo' iit fa bifee naan. Ma au msa' ka 'sanaf. Nai' Abraham neik non natoon am nak, in fetof! Bifee nana nmanaku' msa' on re' naan. Es nana te, au 'reek tuaf ma ntaam antoit je nok neek akninu'. Onaim, Usi' kais musaan kau, tua!” 6 Onaim Uisneno nataah am nak, “Batuur. Au uhiin 'ak ho nekam nana kninu'. Ma Au es a'kahe' ko he kaisa' mreo' bifee naan. Nok ranan nana te, ho ka musanab fa neu Kau. 7 Oras ia, mnona' mufani' bifee naan neu in mone. Atoni' re' naan, Au mafefa' kninu'. Onaim, amtoit je he n'onen henati' ho kaisa' mmaet. Mes karu ho ka mnona' mufani' fa bifee naan, ho mumnau rek-reko! Ho mok ho too ngguin of anmaet sapu'-sapu'.” 8 Kik-kiku te uisf ee no'en in ameupt ein oke', ma nareta' in amneit naan. Onaim sin arsin namtaun. 9 Rarit uisf ee no'en nai' Abraham, ma nataan ee mnak, “Au 'tao 'saan ko saa, es ho mmoe' he hai msiraak om? Ho kais mupoi on re' naan. 10 Ho mutenab saa', es ho mmoe' on re' ia?” 11 Onaim nai' Abraham nataah am nak, “Aam usi'! Au 'baiseun. Au utenab ak hi ar-arki ka mihiin fa Uisneno. Onaim, hi of mi'maet kau, he msao au fee. 12 Au u'uab batuur, ak bi Sara' naan au feto'. Hai nua kai ama' mese', mes es-esat mi ain kim. Es na' hai matsao on re' ia. 13 Onaim, oras Uisneno nreek kai he mpoi mi'ko hai kuan, ma mnao mi'roo-roo meu kua-teta', au utoon ain 'eu au fee ji m'ak, ‘Hit tbi mee-mee jah, karu atoni' natanan anmatoom nok hit nua kit, ma karu ho mneek kau te, mutaah am mak, hit meu fetof-naof.’” 14-16 Rarit usif Abimerek nnona' nafani bi Sara'. Onaim in na'uab nok bi Sara' mnak, “Oras ia, au 'baen roi muti' fua' niif goes neu ho na'o, he njair tanar am nak, au ka 'saan fa saa'-saa' neu ko. Maut he arpah ii nahinin on re' naan!” Rarit uisf ee na'uab neu nai' Abraham am nak, “Abraham! Au pah ii mainuan neu ko. Ho mroim he mutua mbi mee-mee jah, es re' ho.” Rarit in nfee ne bijae, 'bibi, ma 'bib-kase. In imsa' nfee ne ate, et atoni' ma bifee. 17-18 Mes oras uisf ee nnona' nafani' bi Sara' neu in mone, nai' Abraham an'onen he Uisneno nfei bifeen naan sin 'aup kein. Ma sin bisa nahoin ein antenin.
Ain Sara' nahoni' nai' Isak
1-7 Rarit UISNENO nateaba' neu bi Sara saa' re' In nba'an anrair je. Nai' Abraham namnais jen, mes bi Sara' na'apu. Oras in he nahoni', nai' Abraham nmoin naan toon nautn es (100). Antea in ors ate, in nahoni' ri'an moen jes. Rarit nai' Abraham nakanab ri'ana' naan, nai' Isak (re' in a'moufn ii ‘in main’). Rarit ain Sara' na'uab am nak, “Uisneno nmoe' kau he 'main, natuin oras ia au 'mariin. Biak ein nateenb ein, au ka neu he uhoni' fa, nbi oras au umnais on re' ia. Te kah, maski au moen je namnais re'-reu'f een, mes au fe' uhoni' 'aan ne ri'aan es. Onaim oras ia, sekau-sekau re' anneen rasi ia te, sin of anmanin amsa' on re' au.” Oras in nmoin naan neno faun, nai' Abraham na'heri' nai' Isak, natuin Uisneno In aprenat.
Sin nriu' ain Hagar am in anah nai' Isma'el
8 Rarit nai' Isak na'nae. Oras sin he nsoor je te, amaf nai' Abraham nmoe' fesat ko'u. 9-10 Neot es, ain Sara' nkius niit nai' Abraham in fee muni' ain Hagar in anah nai' Isma'el anmabuir nok nai' Isak. Onaim, ain Sara' na'uab neu in moon je mnak, “Mriu' mupoitan aet Masir naan nok in anah! Natuin au ka 'roim fa he aet je in aanh ee napein pusaak saa'-saa'. Maut he au anah nai' Isak anmees, es anpaar nain pusaak ein oke'.” 11 Anneen ain Sara' in uaban nana te, nai' Abraham nnaben ate ka reko fa, natuin nai' Isma'el naan, in aanh aa msa'. 12 Mes Uisneno na'uab neu nai' Abraham am nak, “Aba'! Ho kais mutenab ho fee muin aan nok in aanh aan. Mutuin ain Sara' in roim naan. Natuin Au 'ba'an a'rair ak ho of musuuf na'ko nai' Isak. 13 Mes Au msa' 'fee tetus neu ho fee muni naan in anah. Natuin in imsa' ho sisim ho naam. In suuf kein of anjair uuf es.” 14 Noka kik-kiku on nana te, nai' Abraham nabarab oe-beti' neu ain Hagar. Rarit in nafetin bifee naan ma in anah he nnaon nmesen. Rarit sin nnaon nfuun baer ruman npaumaak Beer Seba. Ain Hagar ma nai' Isma'el 15 Oras sin oe mniun ee oke' te, ain Hagar nasaitan ri'ana' nana nbi hau aan es in mafon. 16 Onaim in natenab am nak, “Karu in natfeek am au 'hak-hake te, au neek ii nsuus anmaet.” Rarit in nteet koit, ma nnao ntook seor na'roo na'ko ri'ana' naan of oni' meter bo' niim. Rarit in nkae nme'me'ur. 17 Uisneno nneen nai' Isma'el nkae msa', rarit in ameupt es neem na'ko sonaf neno-tunan, ma nhaman ain Hagar am nak, “Hagar! Nansa'am es ho msuus on re' ia? Kais mumtau, Uisneno nneen anrair ho aanh ee in kaet. 18 Oras ia, mfeen ma mnao mkius ri'ana' naan. Mhan-mau goe ma mha'tain in nekan, natuin Au of a'moe' in sufan sin njair too uuf ma'tain es.” 19 Rarit Uisneno nfei ain Hagar in maat kein, ma in niit oe maat es anbi ne. Onaim in neik baer oe, ma nnao nakain oe, rarit neik je ma na'inu' ri'ana' naan. 20-21 Onaim nai' Isma'el nok in ainaf natuan nbin baer ruman Paran. Na'ko neno neu neno, in na'nae, ma in njair atoin akrao rek goes. Rarit in ainf ee nasaob ee nok bifee muinf es na'ko pah Masir. Rasin ia njarin, natuin Uisneno nok nai' Isma'el.
Nai' Abraham ma usif Abimerek anmaraem ein nbin Beer Seba
22 Oras naan, usif Abimerek, nok in meo pae' makenat, nai' Fikor, neman ma natefan nok nai' Abraham. Usif naan na'uab am nak, “Abraham! Hai mihiin mak Uisneno nok ko. Etun ho mmoe' saa'-saa' ah, ro he njair on naa. 23 Onaim oras ia, au 'toit ko he msuup ambi Uisneno In matan, mak ho of ka mputa'-kriu kau fa, ok au anah-upu' sin ok-oke'. Natuin au 'moe' reko ok ko, es nana te ho msa' ro he mmoe' reko mok kau nbi pah ia.” 24 Onaim nai' Abraham nataah am nak, “Reko, tua! Au 'suup.” 25 Mes rarit nai' Abraham natraak neu usif nana mnak, “Aam usi', ho too ngguin nasiik naan au oe maat hain es.” 26 Anneen on nana te, usif naan nataah am nak, “Hau, oo! Au fe' a'neen rasi ia. Nansa'am es ho ka mutoon fa na'ko af-afi naa? Au ka uhiin fa, neu sekau es anmoe' on re' naan.” 27-28 Rarit nai' Abraham ma nai' Abimerek nmo'en rasi tfeka'. Nai' Abraham nait bijae ma 'bib-kase ma nfee sin neu usif. Rarit in npiri ntein 'bib-kaes tipu' mana' hiut. 29 Rarit uisf ee nataan ee mnak, “Nansa'am es ho mmoe' on naan?” 30 Onai te, nai' Abraham natoon am nak, “Aam usi', mtoup 'bib-kaes tiup ein ia, he njair tanar nak aam usi' ho mmanaku neu au es a'hain oe hani' re' ia.” 31 Natuin sin nua sin nmo'en nrarin rasi tfeka' nbin bare naan, es na' sin nakanab bare naan Beer Seba. In a'moufn ii nak ‘Oe' Hain Supat’. 32 Sin nsupan nrarin on nana te, usif nai' Abimerek nok in meo pae' je nfanin on sin pah Firistin. 33 Rarit nai' Abraham nseen hau tamareska uu' goes nbi Beer Seba. Nmurai na'ko oras naan, hau naan anfain tanar amnauba' neu nai' Abraham, nak in na'bees neu UISNENO re' Amonit Nabar-baar anbi bare naan. 34 Rarit nai' Abraham natua on re' anao-amnemat tar a'roo nbi atoin Firistin sin pah.
Uisneno nreun nai' Abraham he nafuata' nai' Isak
1 Neot es ate, Uisneno nsuu' nai' Abraham, he nahiin nak in natniin Ee, ai' kah. Rarit In nhaam ne mnak, “Abraham!” Onaim in nataah am nak, “Au esai, tua.” 2 Rarit Uisneno nreun goe mnak, “Mneen rek-reko! Mait ho an-moen mese' re' ho mneek miis ne naan. Meik je mnao meu pah Moria, he mout goe njari 'turu' neu Kau. Mtea ne te, Au of na' ukrira' ko in baran et a'toe'f es.” 3 Noka' kiku te, nai' Abraham nkeut hau meto'. Rarit anfuut sin, ma nasaeb sin anbin bikaes keledai. Rarit, in nok nai' Isak, ma in ameput tuaf nua nnaon neu bare re' Uisneno nteek ee naan. 4 Sin naon neno nua goen. Ma nmeu te, nai' Abraham napeen niit bare nana nbi 'roo. 5 Onaim in nak neu in tua ameup nua' ein nana mnak, “Hi nua ki mpao kai mbi ia, mok bikaes keledai nu! Au ok au anah ia, meki-msae meu ne, he m'onen ma mi'bees meu Uisneno. Rarit of hai mfain iim on ia.” 6 Rarit nai' Abraham nait hau meot ein naan, ma nasahab nai' Isak sin. Ma in nnaa' neik besi ma ai nuta'. Oras sin nua sin nnaon bu'-bua' ate, 7 nai' Isak nak in aamf ee, mnak, “Aam!” Rarit nai' Abraham nataah am nak, “Saa', Isak?” Onait nai' Isak nataan am nak, “Aam, hit he totu 'turu'. Hit teik hau meto' nok ai. Mes a'bib-kase re' he ta'tuur ee ji, es mee?” 8 Nai' Abraham nataah am nak, “Isak! Uisneno of neik Non anfee In a'bib-kaes ana' he njari 'turu'.” Nai' Abraham nabarab he nafuat anah nai' Isak Onaim sin nua sin neki nsaen piut. 9 Oras sin ntean bare re' Uisneno nakrira' nraar je naan, nai' Abraham anbaik fatu he nmoe' mei 'turu'. Rarit in ator hau meot ein anbin mei naan. Onaim, in nfuut in aanh ee, natupa' natneen be nbi hau meot ein naan. 10 Onaim in nait besi he nroor in anah. 11 Mes nok askeken ate, UISNENO In ameput ankoa' na'ko neon goe mnak, “Hoe! Aba'! Kaisa' fe'! Mpao kre'o fe'!” In nataah am nak, “Nansaa', Usi'?” 12 Onait hanaf naan, nak, “Kais amroor ri'ana' naan! Kais munsaa'-saa' ne! Oras ia Au uhiin namneo, ak ho ro batuur-batuur mutuin Uisneno In romin, es na' ho mubarab murair he mufuat ho an-moen mese' naan neu Ne.” 13 Rarit nai' Abraham niit a'bib-kaes keos goes, re' in suun kein na'heeb ok nbi hau aan es in taek ein. Rarit nai' Abraham nnao nheke 'bib-kase naan, ma nout goe njari 'turu' neu Uisneno, nseka' in anah. 14 Onaim nai' Abraham nakanab bare naan Yehova Yire, (re' in a'moufn ii, ‘Uisneno of nabarab saa' re' anmatoom nok hit sarit’). Etun ntea oras ia msa', biak ein na'uab ein am nak, “Anbi 'to'ef UISNENO naan, In of nabarab saa' re' nmatoom nok hit sarit.” 15 Rarit ameput Uisneno naan nkoa' ntein na'ko neon goe, mnak, 16 “UISNENO neik Non nak, ‘Au 'suup 'eik Au kanak, on nai: Ho mubarab murair he mfee Kau ho aan fua mese' naan, he njari 'turu'. Es nana te, 17 Au of a'fee tetus nathoe neu ko ma neu ho sufam-ka'um sin. Sin of anmasaot-baban piut, tar antea ka tsoi' tabei' sin fa, on re' kfuun ein et neno, ma snaen et taas je ninin. Ho anah-upuf sin of niis ma naprenat sin musun. 18 Na'ko ho sufam sin, too uuf-uuf nbi pah-pinan ia of napenin tetus athoen, natuin ho munaoba' mrair Au prenat.’” 19 Rarit nai' Abraham ma nai' Isak nsanun nfanin ma natefan nok sin ameup nua ein naan. Ma sin nfanin on Beer Seba. Onaim sin natuan nbin naan.
Nai' Nahor in sufan-ka'un
20 Neot es, nai' Abraham nneen uaba' nak, in orif nai' Nahor fee bi Milka nahoni' ri'ana' mfaun. 21 An moen uun ee, kaan ee nai' Us. In oirf ee, nai' Bus. Rarit, nai' Kemuer (re' njair amaf neu nai' Aram). 22 Rarit nai' Keset, nai' Haso, nai' Pirdas, nai' Jitlaf, ma nai' Betuel. 23 Nai' Betuel naan, bi Ripka in amaf. 24 Mes nai' Nahor napeni ntein ri'an nasi na'ko bifeej es, in kaan ee, bi Reuma. In nahoni' nai' Teba, nai' Gaham, nai' Tahas, ma nai' Ma'aka.
Ain Sara' nasaeb on, ma aam Abraham ansuub ee
1-2 Ain Sara' nmaet oras in nmoin naan toon nautn es bo' nua mhiut (127). Oras in nmate te, sin natuan nbin kuan Kiryat-Arba (es re' Hebron), et pah Kana'an. Nai' Abraham ankae nsim-simak. Sin nbe'en amsa'. 3 Rarit nai' Abraham nnao nateef nok atoin Hetes sin. In na'uab am nak, 4 “Au re' ia suma atoin anao-amnemat. Au ka 'mui' fa bare he 'suub au fee ji. Onaim, karu hi mromi te, hi mi'sosa' maan kau afu piis es, he au 'suub au fee je nbi naan.” 5 Sin natahan am nak, 6 “On nai, aam! A'roo-roo re' ia, hai maan ko mjair atoni mnasi'. Hai mhormaat ko batuur-batuur, tua. Onaim aa, ho mpiir kuum, bare mee es reko nneis, re' nmatoom nok ho romim. Hai mroim mituin ahaa ho roim maan.” 7 Rarit nai' Abraham anfeen anhaek ma na'besan auf tuaf ein naan. 8 Rarit in nak, “Karu hi mtoup au han-totis fe'ena te, au 'toit he hi mturun kau he mi'uab mok aam Sohar in an-mone nai' Efron. 9 Mtoit miit, he karu reko te, in na'sosa' kau in nua-fatu Makpera, re' et in poo' ne ninin. In ntoit fak-fauk ah, au 'baen. Au he 'baen ufeek in osan nana nbi hi matam, he njair au pusaak. Au he ubaarb ee he njair hai baer subat.” 10 Oras naan, nai' Efron nok antoko nbi atoin Hetes sin naan. In neik non anneen nai' Abraham in han-totis naan. Rarit in nhake ma nataah nai' Abraham anbi atoni mnais ein sin maat kein am nak, 11 “Kais on naan, aam! On nai. Au 'fee ko po'on naan ruum-ruum ah, nok nain in nuat Makpera naan. Aam, ho msuub ho fee je nbi naan. Au 'nona' afu naan nbi au atoni mnais ein sin maat keni. Maut he sin njarin saksii.” 12 Rarit nai' Abraham na'bees antein neu atoin Hetes sin. 13 Onaim in na'uab nok nai' Efron am nak, “On re' nana msa' reko, mes hi ar-arki mneen miit au han-totis ia fe'. Au he 'soos ufeek afu naan, maut he au 'suub aun guin nbin naan.” 14-15 Rarit nai' Efron nataah am nak, “Afu naan in oosn ii, suma roi muti' natun haa goah. Hit he tmatabar osaf naan he saa'? In oos ni ka manenu' fa. Mnao meik ho fee je he msuub ee nai.” 16 Nai' Abraham nroim natuin osaf naan, on re' nai' Efron na'uab. Onaim, nai' Abraham nsoi' roi muti' fua' natun haa, rarit annona' sin neu nai' Efron, anbi atoin Hetes sin matak he sin ok-oke' njarin saksii. 17-19 Es nana te, nai' Abraham anpaar nai' Efron in afu, njair in pusaak. Es re' afu et Makpera, npaumaak kuan Mamre (es re' Hebron). In nsoos nafeek afu naan nok nain in po'on, in nuat, ma in hau kou' ne ok-oke'. Atoni mnasi Hetes sin ok-oke' njarin saksii nak, afu naan nok nain saa'-saa' re' nbi nain naan, nai' Abraham in npaar sin ok-oke'. Rarit nai' Abraham nsuub in fee, ain Sara', nbi nuat naan, et pah Kana'an. 20 Nok ranan naan, oras ia, po'on naan, ma nuat re' unu' te atoin Hetes sin afu, njair nai' Abraham in ja. In npaak je njair baer subat neu in nonot-asar.
Sin namin nai' Isak bifee he nsao
1 Nai' Abraham in ua-mnaun, tar antea in namnais re'-re'uf. UISNENO npaant ee, ma nfee ne tetus ao-mina'. 2-3 Nai' Abraham anmui' in atoin pirsaa' jes, re' n'urus are' kanan in a'mu'in. Neot es, nai' Abraham noe' ne, mnak, “Mneen rek-reko! Au 'toit ko, he ho msuup ampaek UISNENO, re' nmoe' neno-tunan ma pah-pinan, In kanan. Mak, ho kaisa' mtoit bifee munif na'ko atoin Kana'as sin he musao be nok au anah nai' Isak. 4 Mes ho ro he mnao meu au kua-mnasi', meu au nonot-asar sin. Ho maim bifee muinf es ambi ne, he tasaob ee nok au anah.” 5 Rarit, ate naan nataan nai' Abraham am nak, “Reko, tua! Mes au he 'moe' on mee, karu bifee munif naan ka nroim fa he neem nok on ia? Karu on nana te, au ro he 'eik nai' Isak he tmatsao be on ne, oo, ai' on mee?” 6 Nai' Abraham nataah am nak, “Ho mumnau murek-reko! Maski on mee msa', ho ka mubei' fa he meik au aanh ee nnao neu ne! 7 Mumnau, UISNENO re' annaa' kuasa et neno-tunan, neik kau 'poi 'rair u'ko au kua-mnasi', ma neik kau 'taam a'tea bare ia. Ma In imsa' nahakeb rais manba'an nok kau mnak, ‘Au of a'fee ko bare ia ok-oke' neu ho sufam-ka'um sin.’ Onaim, kais ho neek am naan na'oni'. Ho mnao. Uisneno of anreek In ameput na'ko sonaf neno-tunan he nfei ko ranan, he ho bisa muteef mok bifee munif, re' he njair au aanh ee in fee. 8 Mes karu bifee naan ka nroim fa he neem nok ko neu ia te, ho supat ia ka naah ko fa. Maski on mee msa', ka nabei' fa he ho meik nai' Isak on ne.” 9 Rarit, ate naan ansuup anbi nai' Abraham am nak in of nmoe' natuin nai' Abraham in uaban naan ok-oke'. 10 Onaim ate nana npiir naan bikaes unta bo' es. In nasaeb baer mamasa' ma ma'osa' huma'-huma' nbi bikaes unta sin. Onaim in nok in aok-bian sin nnaon neu nai' Nahor in kota et pah Mesopotamia. 11 Ate naan in nnao piut tar ntea kota naan in ninin. Rarit in nasnasab in bikaes unta sin nbin naan, npaumaak oe hain es. Oras naan manse nmaeb jen. Nati' te, bifee muinf ein neman he nkuin oe nbi oe hani' naan. 12 Rarit ate nana n'onen am nak, “UISNENO re' au aam usi' Abraham in Uisneno. Mturun amfei kau ranan, maut he au sairt ii ntea ma upein in afan nesan arekot. Mukrira' Uisneno Ho nekam arekot meu au aam usi', ma mumnau in rais manba'an neu kau. Onaim, maut he au uteef ok nai' Isak in fee nbi bare ia. 13 Usi', au 'haek et oe hain ii ninin. Ri'feot muinf ein neman na'ko kota he nkuin ma nsuun oe na'ko oe hani' ia. 14 Onaim, au 'toit on nai: Karu au u'uab ok bifee muinf es, ak, ‘Parmisi, tua. Karu reko te, musanut ho 'nai oej an he au 'iun aan akre'o.’ Karu in nataah am nak, ‘Reko, tua. Ma au of u'inu' ho unta sin imsa'.’ Naa, re' naan njair tanar nak, bifee munif naan es re' Uisneno Ho mpiir je njair nai' Isak in fee! Nok tanar naan, au uhiin ak, Uisneno mururu' mrair Ho maneek mi neu au aam usi', nai' Abraham.”
Nai' Abraham in ate nateef ri'feto bi Ripka
15-16 In ka n'onen anrair fa fe'e te, ri'feot muinf es neem. In kaan ee, bi Ripka. In re' naan nai' Abraham in orif nai' Nahor ma bi Milka sin upuf. In aamf ee, nai' Betuel. Bi Ripka mamasa' batuur, ma fe' ao-'temef. In nsaun neu oe hani' naan, rait in nkui oe neu in a'nai oe, oke te in nsae nfain. 17 Oras bi Ripka nsae nfani te, nai' Abraham in ate naan naen neem ansenu. Rarit in ntoti mnak, “Parmisi, tua! Mfee maan kau oe he au iun aan akre'o.” 18 Rarit bifee munif naan nataah am nak, “Reko, tua!” Rarit in nasanut in a'nai oe naan rabah, ma nfeen ate naan he niun. 19 Ninu nrair on nana te, bifee munif naan na'uab am nak, “Maut he au 'kui oe he u'inu' ho bikaes unta sin. Maut he sin nninun tar namsenan.” 20 Rarit in nnao n'opa' oe nesif naan nbi 'bai oe. Rarit in nsae-nsaun he nkui oe na'ko oe hani' naan, ma na'inu' unta sin ok-oke', tar antea namsenan. 21 Nai' Abraham in ate nana nhake ma nta'-taa' kuun, mes ankius narek-reko' ri'feot munif nana nbiur. In naten-tenab am nak, “Uisneno npiir je ji, es re' ia, oo?” 22 Unta sin ok-oke' ninun tar namsenan. Onaim ate naan naiti krene mnatu re' sin nati' te ntao goe nbi sin paan kein, ma niti mnatu paasn es ma nanitib bifee munif naan in a'niimn ein nua sin. 23 Rarit ate naan nataan am nak, “Ho ama' in kaan ee, sekau? Karu reko te, mabe' ia au 'tuup a'tahan 'bi ho ama' in umi.” 24 Onaim bifee munif naan, nataah am nak, “Au ama' kaan ee, nai' Betuel. Au na'i, es re' nai' Nahor. Au be'i, es re' bi Milka. 25 Anbi hai uum je nmui' hara' tupa neu ki. Ma nmui' huun neu ho mui't ein.” 26 Rarit ate naan na'ruri' ma na'bees neu UISNENO. 27 Onaim in na'uab am nak, “Pures ma bo'is neu Uisneno! Usi' nfei ranan neu kau, tar antea au uteef ok au aam usi' in nonot-asar sin anbin ia. Nok ranan naan, Uisneno nakrira' In neken arekot neu au aam usi', nai' Abraham ii, ma najarib in rais manba'an neu kau.” 28 Rarit bifee munif naan naen anfain rabah, he natoon rasi naan neu in uum je nanan. 29-30 Bi Ripka in naof ee kaan ee, nai' Laban. Oras in niit mnaut ein, ma nneen bi Ripka in uaban nana te, nai' Laban naen anpoi rab-raab, he nateef nok ate, re' nhaek nabaar fe' nok in bikaes unta sin npaumaak oe hani' naan. 31 Rarit nai' Laban na'uab am nak, “Aam! UISNENO neik ko mtea ia goen nok ao-mina'. Onaim kais amhaek mubaar ambi ia. Au uskau he tnao teu hai umi. Hai mibarab ke'en, ma bukae neu ko ma neu ho unta sin.”
Nai' Abraham in ate ntaam antoit bi Ripka
32 Rarit nai' Abraham in ate naan nnao natuin nai' Laban, he nnaon neu nai' Betuel in umi. Nai' Laban sin nasanut anturun sin baer ein na'ko unta sin. Rarit sin na'eku' unta sin nok huun. Sin imsa' nekin oe he ate naan nok in aok-biak ein nafanun. 33 Oras sin n'ator bukae nbi mee, ate naan nak, “Hai he mbukae, tua. Mes nahuun na'ko naan, au 'toit mainuan a'kre'o he utoon aan hai sairt ii fe'.” Onaim nai' Laban nataah am nak, “Neo! Reko, tua.” 34 Ate nana na'uab am nak, “Au re' ia, hi na'i nai' Abraham in ate. 35 UISNENO nfee tetus nathoe neu au aam usi', tar antea in nmui' batuur-batuur. Uisneno nfee ne muti'-mnatu', ate (et bifee ma atoni'), ma mu'it mfau-besi, es re': bijae, bikaes unta, bikaes keledai, 'bibi, ma 'bib-kase. 36 Oras au aam usi' ma au ain usi' namnasin on nai te, ain Sara' nahoni' naan ri'an moen jes. In es re' he ntoup aam usi' Abraham in pusaak ein ok-oke'. 37 Onaim aam usi' Abraham nreun kau he 'suup ak, ‘Ka nabei' fa he au 'ait bifee munif Kana'as, he usaob ee nok nai' Isak. 38 Mes au ro he ait bifee munif na'ko au aam usi' in nonot-asar sin, he njair nai' Isak in fee.’ 39 Rarit au utaan au aam usi' m'ak ‘Mes on mee karu ri'feot munif naan ka nroim fa he neem nok on ia?’ 40 Rarit in nataah am nak, ‘UISNENO re' au utuin In roim Ne piut naan, of anreek In ameput na'ko sonaf neno-tunan he nfei ko ranan, he ho bisa muteef mok ri'feot munif, re' he njair au aanh ee in fee. 41 Mes karu au nonot-asar sin ka nromin fa he nkonan ri'feot munif naan he neem nok ko on ia te, ho supat ia ka naah ko fa.’ 42 Onaim, fe' ena au uum a'tea oe hain ee te, au 'onen a'bi au nekak, ak, ‘UISNENO re' au aam usi' Abraham in Usif. Mturun amfei kau ranan, maut he au sairt ii ntea ma upein in afan nesan arekot. Onaim, maut he au uteef ok nai' Isak in fee nbi bare ia. 43 Usi', au 'haek et oe hain ii ninin. Ma ri'feot muinf ein neman na'ko kota he nkuin ma nsuun oe nbi ia. Onaim, au 'toit on nai: Karu au u'uab ok bifee muinf es, ak, “Parmisi, tua! Karu reko te, musanut ho 'nai oe jan he au 'iun aan akre'o.” 44 Karu in nataah am nak, “Reko, tua! Ma au of u'inu' ho unta sin imsa'.” Naa, re' naan njair tanar nak, bifee munif naan es re' Uisneno Ho mpiir je njair nai' Isak in fee!” 45 Au ka 'onen urair fa fe' te, bi non Ripka neem neik in a'nai oe, ma nkui oe nbi oe hani' naan. Oras in nsae nfain, au 'toit ak, ‘Parmisi, tua! Mfee maan kau oe he au iun aan akre'o.’ 46 Onaim in nasanut in a'nai oe naan rabah, am nak, ‘Reko, tua! Maut he au 'kui oe he u'inu' ho bikaes unta sin.’ Rarit au 'iun, ma au bikaes unta sin imsa' ninun. 47 Rarit au utaan ee m'ak, ‘Ho ama' in kaan ee, sekau?’ Onaim in nataah am nak, ‘Au ama', es re' nai' Betuel. Au na'i, es re' nai' Nahor. Ma au be'i, es re' bi Milka.’ Rarit au ukrein je nbi in panan, ma uniit be niti mnatu' paasn es. 48 Onaim au u'ruri' ma u'bees 'eu Uisneno, m'ak ‘Pures-bo'is neu Uisneno! Usi' nfei ranan neu kau, tar antea au uteef 'ok au aam usi' in nonot-asar sin anbin bare ia. Ma au msa' uteef urair 'ok nai' Isak in fee.’ 49 Onaim oras ia, karu sin ama arki mneek au aam usi' Abraham ate, mitoon kau kninu'. Ma karu kah fa te, mitoon kau kninu' msa'. Maut he au uhiin ak, au he 'moe' on mee.”
Bi Ripka in nonot-asar sin antoup oko'
50 Ate naan na'uab anrair on nana te, nai' Laban ma nai' Betuel natahan am nak, “Karu UISNENO es an'ator on nana te, hai he mak saa' ntein. 51 Bi Ripka es ia. Mok ne nnao nai. Maut he in njair na'i nai' Abraham in nanef, tatuin saa' re' UISNENO n'ator nani.” 52 Anneen on nana te, nai' Abraham in ate naan, na'bees antea afu, ma ntoit makasi neu UISNENO. 53 Onaim in nait napoit noni-mnatu' ma noin muti', ma baer paken amasat, rarit anfee sin neu bi Ripka. In imsa' anfee neu bi Ripka in naof ma ainaf ok-sonu' re' ma'osa'. 54 Rarit nai' Abraham in ate naan, ma in aok-bian sin, nbukaen bu'-bua'. Rarit sin ntupan nbin naan. Noka' on nana te, sin nfenan. Rarit ate naan natoon neu uim tuaf ein am nak, “Au 'toit mainuan he mkonan kau, karu reko te, hai mfain nai oras ia meu au aam usi'.” 55 Mes bi Ripka in naof ma in ainaf nak, “Hi mmanaap mi'sek-seke' he saa'? Maut he bi Ripka namaik naan nok kai neno bo' es a'saa'. Rarit na' hi mkoen om mok ne.” 56 Mes ate naan nataah am nak, “Koi, ain! Kaisa' mtahan amtein kau! UISNENO nturun anrair kau, tar antea au uteef a'rair ok nai' Isak in fee. Onaim ain, hi mifetin kai he hai mfain ma meik rasi ia neu hai aam usi'.” 57 Onaim sin nataah ate naan nak, “Hena te, on nai! Hit taskau bi Ripka he tataan teu ne. In nroim ni, on mee?” 58 Onaim sin nhaman bi Ripka ma nataan ee mnak, “Ripka! Oras ia, et re' ho. Ho mroim he mok main atoni' ia, oo, ai' on mee?” Rarit bi Ripka nataah am nak, “Au 'roim he 'ok, tua.”
Nai' Isak ma bi Ripka nmatsaon
59-60 Rarit sin nafetin bi Ripka, ma in ate re' n'uurs ee na'ko in an-ana', he nnaon bu'-bua' nok nai' Abraham in aten naan. Onaim sin naseon bi Ripka neikin tetus athoen, am nak, “Ripka! Maut he reko te, Uisneno nfee ko anah mfa-faun, he ho sufam-ka'um sin namsa'in nifun-nifun. Ma hai msa' mifneek henati' ho sufam-ka'um sin niis sin musun!” 61 Rarit bi Ripka nok in ate naan, sin nakbua' sin abrua' ein, ma nsaen bikaes unta, ma nnao nanin, natuin nai' Abraham in ate sin. 62 Nai' Isak natua et pah Negep. Oras naan, in fe' anfain neem na'ko oe hani' Beer Lahai Roi. 63 Neon maeb es ate, in npoi na'ko in tenas he nna-nao kuun. In nait in matan ma, napen-peen kuun on nana te, in niit unta pukn es annaon neman. 64 Oras bi Ripka nkius niit nai' Isak te, in nsaun rabah na'ko in unta. 65 Onaim in nataan nai' Abraham in ate nana mnak, “Aam, atoni' re' annao neem re' ne, sekau?” Ate naan nataah am nak, “Nai' Isak es re' ne.” Onaim bi Ripka nait in po'uk ma nsakteun he nkuub naan in human. 66 Rarit, ate naan natoon rasin naan ok-oke' neu nai' Isak. 67 Onaim nai' Isak neik bi Ripka ntaam neu in ainf ee tenas. Sin nua sin nmatsaon. Nai' Isak nneek niis bi Ripka. Es nana te, in ka nsusa ntein fa heen neu in ainf ee nmaet.
Nai' Abraham ansao ntein
1 Nai' Abraham ansao ntein bifee jes, kaan ee, bi Ketura. 2 Bi Ketura nahoni' ri'aan ein re' ia: nai' Simran, nai' Yoksan, nai' Medan, nai' Midian, nai' Isbak, ma nai' Sua. 3 Nai' Yoksan in aanh ein, esan re' nai' Seba ma nai' Dedan. Nai' Dedan in suufk ein, esan re': atoin Asuras sin, atoin Retus, ma atoin Reumas. 4 Nai' Midian in aanh ein esan re': nai' Efa, nai' Efer, nai' Henok, nai' Abida ma nai' Erdaa. Sin ok-oke' re' ia, ain Ketura in sufan. 5-6 Oras nai' Abraham nmoin fe', in nbati nrair neu ain Hagar ma ain Ketura sin aanh ein, es-es ate nok in a'mu'in. Rarit, in nreun sin, he nnao natuan nbin pah Kana'an ntoom pasa' neon saet, he sin na'roon na'ko in anah nai' Isak. Mes in baer pusaak ein ok-oke', in nnona' sin neu nai' Isak.
Nai' Abraham nasaeb on
7-8 Nai' Abraham anmaet oras in nmoin naan toon nautn es bo' hitu mniim (175). 9-10 Rarit in anah nai' Isak ma nai' Isma'el nsuub ee nbi nuat Makpera, re' npaumaak kuan Mamre. Unu' te, nai' Abraham ansoos po'on naan na'ko atoin Hetes es, re' in kaan ee nai' Efron, nai' Sohar in anah. Sin nsuub nahunun ain Sara' nbi nuat naan. 11 Nai' Abraham anmate nrair. Uisneno nfee tetus athoen neu nai' Isak ma in nmoni nbi tetus ao-mina' ma mamut. Oras naan, nai' Isak natua npaumaak oe hani' Beer Lahai Roi.
Nai' Isma'el in sufan
12 Nai' Isma'el in reetn ii on nai. In re' naan, nai' Abraham nok in fee tnana' ain Hagar sin anah. Ain Hagar naan, ain Sara' in ate na'ko pah Masir. 13-16 Nai' Isma'el in an-moen ne tuaf bo'es am nua. In aanh ein esan re' ia, nmaktun-tuin ein na'ko moen unu ntea aheet susu, esan re': nai' Nebayot, nai' Kedar, nai' Atbeel, nai' Mibsam, nai' Misma, nai' Duma, nai' Masa, nai' Hadat, nai' Tema, nai' Yetur, nai' Nafis, ma nai' Ketma. Ri'an monen re' ia, sin nfanin aam uuf neu too pah bo'es am nua, es-es ate, nmui' kuun in pah. Sin nakanab sin pah, es-es ate natuin sin be'i-na'i sin kaan keni. 17 Nai' Isma'el anmaet oras in nmoin naan toon nautn es bo' tenu mhiut (137). 18 Mes in suufk ein naan, anmamusun es nok es. Rarit sin npe'en ma natuan nbaits ok nmurai na'ko Habira tar antea Sur, re' anmanaak nok pah Masir, nkono ntean pah Asur.
Reta' na'ko nai' Esau ma nai' Yakop
19 Nai' Abraham in anah nai' Isak in reetn ii, es re' ia. 20 Oras nai' Isak ansao bi Ripka, nai' Isak nmoin naan toon bo' haa. Bi Ripka in aamf ee, es re' nai' Betuel. In naof ee, es re' nai' Laban. Sin re' naan atoin Aram, na'kon pah Padan Aram. 21 Bi Ripka ka nahoni' fa. Etun nai' Isak an'onen ntoit UISNENO he nfei bi Ripka in apun. UISNENO nneen in onen naan, es na' bi Ripka na'apu'. 22 Bi Ripka nnaben ate, in na'apu' ri'an koen. Ri'aan ein nana nmasaapn ein piut nbi sin ainf ee tain. Onaim bi Ripka natenab am nak, “Nansa'am es ri'aan nua ein ia, on re' ia?” Rarit in nataan neu UISNENO. 23 Ma UISNENO nataah ee, mnak, “Anbi ho aup maan, anmui' naan ri'ana' nua re' of he njarin uuf nua' re' sin of anmamusun piut-piut. An muin aan of na'be'i nneis na'ko aan uun aan. Ma taatf aan of anjair ameput neu in orif.” 24 Oras in neon ne ntea te, bi Ripka nahoni' ri'an koen. Monen oke'. 25 Ahuun te me'-me'e, ma in aon ee ma'funu'. Es na' sin nakaan be nai' Esau (re' he noi on re' kata es, re' in a'moufn ii ‘ma'funu'’). 26 Rarit na' in orif. Mes oras in npoi naan in nnaa' in taatf ee in haen tikan. Es na' sin nakaan be nai' Yakop (re' he noi on re' kata es, re' in a'moufn ii ‘haen tikan’). Oras nahoni' sin ate, nai' Isak nmoin naan toon bo' nee jen (60).
Nai' Esau nnona' in hak an-moen unu
27 Oras ri'an koen nana na'naen, nai' Esau njair asekot. In nroim he natua nbi nasi. Mes nai' Yakop atoin ata'as. In nroim he nbi-bi ha umi. 28 Nai' Isak biasa nroim he neuk siis fui. Es nana te, in nneek nanes-nesib nai' Esau. Mes bi Ripka nneek nanesib nai' Yakop. Nai' Esau ntoit oef na'ko nai' Yakop 29 Neot es, oras nai' Yakop nahaan oef aknaa', nai' Esau nfain neem na'ko sekot. In nhae nmaet ma namnaah anmate msa'. 30 Onaim in natonan nai' Yakop am nak, “Ako! Ho msoon maan kau oef me'-me'e re' ho muhaan ee naan. Maski kre'-re'o, he au ha'tain! Au umnaah ka ubei' fa heen.” (Etun sin nteek ee te Edom, re' he noi on re' kata es, re' in a'moufn ii, ‘me'e’.) 31 Rarit nai' Yakop nataah am nak, “Reko, taat honi'. Mes karu ho mfee kau ho hak an-moen unu naan fe'!” 32 Onaim nai' Esau nataah am nak, “Ahh. Ma on saa'na' es re' hak an-moen uun gui! Ho mpaar. Au umnaah ka ubei' fa heen. Ho msoon maan kau oef rabah he meik je neem. Au he uah heen.” 33 Mes nai' Yakop na'uab anteni' mnak, “Airoo, taat honi'. Mpao kre'-kre'o. Ho msuup fe' mak, ho mnona' kau hak naan.” Onaim nai' Esau nsuup on re' naan. 34 Rarit nai' Yakop ansono nfeen ee oef knaa' naan ma nfee ne nok utunu'. Nai' Esau nbukae nrari te, in nfeen annao kuun. Nok ranan naan, nai' Esau nnona' nain in hak an-moen unu.
Nai' Isak ma usif Abimerek
1 Neot es, amnaahs ii ntaman pah naan, on re' amnahas oras nai' Abraham anmoin fe'. Onaim nai' Isak ntoit he karu reko te usif Abimerek, atoin Firistin sin usif, nfee ne mainuan he in natuan nbi kuan Gerar. 2 In nmoe' on re' naan, natuin UISNENO nakriir On neu ne, mnak, “Ho kais amnao meu pah Masir. Au of ukrira' ko bare 'teta'. 3-4 Karu ho mutua on re' atoin anao-amnemat nbi bare naan, Au of ok ko, ma 'fee ko teuts am athoen huma'-huma'. Au of a'moe' ho suufm ein amfau-rutu on re' kfuun ein et neno. Ma Au 'fee neu ho sufam sin pah re' ia ma in kuan ein oke'. Na'ko ho sufam-ka'um sin naan, of are' uuf-uuf nbi pah-pinan ia napenin teuts am athoen. Nok ranan naan, Au uteaba' Au rais manba'an ok ho ama' nai' Abraham. 5 Au 'moe' on re' ia, natuin ho ama' natuin Au romik, Au prenat, ma Au atoran.” 6 Onaim nai' Isak natua ntahan nbi kuan Gerar. 7 Bi Ripka naan mamasa'. Onaim oras atoin ein re' nbin bare naan niit ee, sin nmaktaan ein nok ne. Mes nai' Isak nataah am nak, “Bi Ripka naan, au feto'.” In namtau karu in nmanaku nak in fee ja te, atoin ein naan of anroor goe ma ntoup neik bi Ripka. 8 Nai' Isak natua suuk a'roo nbi naan. Neot es, uisf ee nasneku' niit nai' Isak nok bi Ripka na'ko in eno sneer. In niit sin anmahoon fee-mone. 9 Onaim in nreek tuaf he nnao no'en nai' Isak, ma nakain ee mnak, “Isak! Au uhiin urek-reko 'rair, bifee naan, ho fee ja! On nai te, neu sa'am es ho mak ho feto'?” Onaim nai' Isak nataah am nak, “On nai, aam usi. Au umtau karu au utoon am 'ak au fee ja te, kais-kaisa' biak ein nroor niis kau.” 10 Rarit uisf ee nataah am nak, “Karu nmui' tuaf anbi re' ia re' ntuup nok ho fee, ho ro he musaan kai! Nansa'am es ho mmoe' on nana neu kai?” 11 Rarit nai' Abimerek namnaub neik haan ma'tani' neu in too ngguin am nak, “Hi arki mimnau rek-reko! Sekau-sekau re' nmoe' re'uf neu atoni' ia ai' in fee, au of a'hukun u'mate.”
Sin nmatoena' oe hain ein
12 Oras naan nai' Isak narene nbi pah naan. In napein in reen ne aaf kein nfain no nautn es, natuin UISNENO nfee ne tetus. 13 In a'mui'n ein na'baab ok piut, tar antea in nfain atoin amu'it batuur-batuur. 14 In bijae, 'bibi, ma 'bib-kase nma'baab ein amfaun. In ameupt ein amsa' namfaun. Tar antea atoin Firistin sin seor natenab re'uf neu ne. 15 Unu' fe, nai' Isak in amaf nai' Abraham sin nhanin oe hani' mfaun. Mes oras ia, atoin Firistin sin nkuub nareu' oe hain ein naan nekin afu. 16 Rarit usif Abimerek na'uab nok nai' Isak am nak, “Isak! Reko nneis ho mnao musaitan hai pah ii nai. Hai mkis-kisu te, ho ma'tain mi, nnesi nrair kai.” 17 Rarit nai' Isak nnao nasaitan kuan naan, ma nfain natua nbi karopu mnera' Gerar. 18 Onaim in nhain nafani' oe hain ein re' sin nkuub sin naan. Ma in nakanab oe hain ein naan, natuin kaanf ein re' unu' te in aamf ee nakanab anrair sin. 19 Oras nai' Isak in ameupt ein nhanin oe nbin mnera' Gerar naan te, sin nhain napein oe maat es, re' nasfurak npoi. 20 Mes atuuks ein na'ko Gerar anmatoen nok nai' Isak in atuuks ein, natuin oe hani' naan. Sin nak, “Ia hai oe!” Es na' nai' Isak nakanab oe hani' naan Esek, re' in a'moufn ii, ‘matoes’. 21 Rarit nai' Isak in ne, nhain oe jes anteni'. Mes sin nmatoen ntein ein, natuin oe hani' naan. Es na' nai' Isak nakanab oe hani' naan Sitna, re' in a'moufn ii ‘anmaraab nein’. 22 Rarit in nasaitan bare naan, ma nhani ntein oe hain es. Neot re' ia, sin ka nmatoen fa. Es na' nai' Isak nakanab oe hani' naan Rehobot, re' in a'moufn ii ‘baer mainuan’. Ma in na'uab am nak, “Oras ia, Uisneno nfee kai bare he mitua mbi baer mainuan ia. Anbi ia te, na' hai bisa mimsai' ma mi'baab om.” 23 Na'ko nana te, nai' Isak sin nnao n'anin Beer Seba, he natuan nbin naan. 24 Mabe' nana, UISNENO nakriir On neu ne, ma na'uab am nak, “Isak! Au re' ia, ho ama' nai' Abraham in Uisneno. Onaim, kais mumtau, natuin Au 'pao ma 'panat ko. Au of a'fee ko teuts am athoen. Ma ho sufam-ka'um sin of na'baab ok amfaun. Au 'moe' on re' ia, natuin Au rais manba'an ok ho ama'.” 25 Rarit nai' Isak anbaik fatu he nafena' mei fuat anbi naan. Onaim in ntoit makasi neu UISNENO nbi bare naan. In natua nbi naan, ma in ameupt ein nmurai nhanin ntenin oe.
Usif Abimerek ma nai' Isak nmaraem ok
26 Oras naan, usif Abimerek neem na'ko kuan Gerar. In nok in soob reko nai' Ahusat, ma in meo pa'e nai' Fikor, neman ma nateef nok nai' Isak. 27 Onaim nai' Isak nataan am nak, “Aam usi'! Unu' te hi mriu' kai mpoi mi'ko hi pah. Onaim oras ia hi iim he minsaa' amtein?” 28 Rarit sin natahan am nak, “On nai! Oras ia hai mihiin mak Uisneno npao ma npanat ko, anhao ma nfait ko. Natuin rasi naan, hai miten-tenab ate, reko nneis hit nua kit tahakeb rais manba'an. Ho msuup am mak, 29 hi of ka mmoe' fa rais re'uf neu kai, on re' hai msa' ka mmoe' fa rais re'uf neu ki. Batuur hai neekm ein reko mok ki. Es na' neon goes ii, hi misaitan hai pah ii nok mamut. Hai mihiin batuur-batuur, UISNENO es anfee ki tetus.” 30 Rarit nai' Isak nfesat neu sin. Sin nbukaen bu'-bua'. 31 Anmeu nfiin on nana te, sin nsupan. Onaim nai' Isak nafetin sin he nfanin nok mamut. 32 Neno naan, nai' Isak in ameupt ein neman ma natonan am nak, “Aam! Hai mipeni mrair oe.” 33 Rarit nai' Isak nakanab oe hani' naan Seba, re' in a'moufn ii nak ‘supat’. Onaim sin nakanab kota naan Beer Seba ntea oras ia.
Nai' Esau nsao bifee nua na'ko uuf a'teta'
34 Nai' Esau nmatsao, oras in nmoin naan toon bo' haa. In nsao bifee nua na'ko uuf atoin Hetes. Es kaan ee, bi Yudit, nai' Beri an-feto. Es antein, kaan ee bi Basmat, nai' Eron in an-feto. 35 Bifee nua' ein naan nasusab nai' Isak ma bi Ripka.
Bi Ripka napoi aam Isak he nfee tetus neu nai' Yakop
1 Oras nai' Isak namnasi nrair, in maatk ein ankupu nmaten. Onaim in no'en in an-moen unu re' in nneek niis ne ji, mnak, “Esau! Ho uum fe'!” Nai' Esau nataah am nak, “Aam, saa'?” 2 Nai' Isak natoon ee mnak, “On nai! Au umnais jen. Au ka uhiin fa au neno 'maten. 3 Onaim, mait ho baer seokt ein naan, mnao nai he mseok maan kau mui' fui jes. 4 Rarit ho muhaan maan kau mnaah amin-minat re' au 'romi, rait meik je neem. Au 'uah a'rari te, au 'fee ko tetus. Ma karu au 'fee 'rair ko tetus ate, au 'mate msa' reko.” 5 Rarit nai' Esau nnao nseok. Mes bi Ripka nneen niit nai' Isak in uaban naan. 6 Rarit bi Ripka natonan nai' Yakop am nak, “Hoe, Ako! Mneen rek-reko! Fe'ena au 'neen ama' na'uab nok nai' Esau, mnak: 7 ‘Ho mnao mseok maan kau mui' fui jes, he muhaan ee namin-miin neu kau. Karu au 'uah a'rari te, au 'fee ko tetus nbi UISNENO In matan.’ 8 Onaim, ho mneen rek-reko! Au u'uab saa' ate, mutuin. 9 Oras ia, mnao nai meu hit a'bib-kaes ne, mpiir maan a'bib tiup apokat nua. Mroor sin, ma mait meik sin siis kein naan neman neu kau. Au of uhaan sin utuin ho ama' in romin. 10 Karu au uhaan urari te, ho meik sin neu ho ama' he in nbukae. Rarit in nfee ko tetus fe', hena' in nmaet. Nok ranan naan, ho es mupein teuts ee. Ka ho tata' fa.” 11 Mes nai' Yakop na'uab nok in ainf ee mnak, “Ain! Mes nai' Esau in aon ee ma'funu'. Au aok ii kahaf! 12 Kais-kaisa' ama' nreo' au aok ii, ma in nahiin nain nak au upoi. Onaim in kaas kau!” 13 Onaim in ainf ee nak, “Ako. Kais neek maan nabait. Anbain he au es a'ator! Karu ho ama' nkaas ko, maut he au es usaah. Oras ia, mnao nai he mroro 'bibin naan.” 14 Rarit nai' Yakop nnao npiir nana 'bibin naan, onaim in nroor sin, ma neik sin siis kein neu in ainaf. Onaim bi Ripka nahaan sin namin-minan on re' nai' Isak in romin. 15 Rarit bi Ripka nnao nait nai' Esau in baer paken re' namaas, nfeen nai' Yakop sin he npaek. 16 In n'aum nai' Yakop in a'niim kein ma in neon, npaek pasu 'bibi naan. 17 Rarit in nfee sisi mtaas ein naan nok utunu' neu nai' Yakop. Nai' Isak nfee tetus neu nai' Yakop 18 Rarit nai' Yakop neik sisi mtaas ein naan neu in amaf. In na'uab am nak, “Aam! Au uum een.” Nai' Isak nataah am nak, “Hoe! Ho sekau ko?” 19 Onaim nai' Yakop nataah am nak, “Au re' ia, ho an-moen unu', nai' Esau! Au 'tao utuin ho rekat. Mfeen nai he mbukae. Au uhaan sisi na'ko mui' fui re' au 'heek aan. Mbukae, hena' rarit mu'uab amfee kau tetus!” 20 Rarit nai' Isak na'uab am nak, “Ho ma'tain, oo! Ho mseok rabah ji!” On nai te, nai' Yakop nataah am nak, “Au upein rabaah, natuin UISNENO re' ama' ho mu'bees meu Na ji, es anturun ma nbaab kau.” 21 Onaim nai' Isak nhaman nai' Yakop am nak, “Ho mpaumaak kau fe', he au 'reo' 'iit ko! Nai' Esau es re' ia, oo?” 22 Rarit nai' Yakop nsiri' ntaam ma npaumak-maak in amaf. Onaim a'naef ee nreo' goe, ma na'uab am nak, “In haan ii, on re' nai' Yakop in hanan! Mes in a'niim ii, on re' nai' Esau in a'niman.” 23 Mes nai' Isak ka nahiin fa nai' Yakop natuin in a'niim nein ma'funu' on re' nai' Esau. Mes oras in he nfee tetus neu nai' Yakop, 24 in nataan antein am nak, “Ho re' ia, nai' Esau batuur-batuur aa, oo?” Onaim nai' Yakop nataah am nak, ‘Batuur, tua!” 25 Rarit nai' Isak na'uab am nak, “Ho mnona' sisi naan he au 'euk. Rarit na' au 'fee ko tetus.” Onaim nai' Yakop ansoron sisi ma tua-min-kase neu in aamf ee, ma in nbukae. 26 Rarit in aamf ee na'uab am nak, “Airoo. Mpaumaak uum he mhoo ma mneek maan kau.” 27 Oras nai' Yakop npaumaak he nhoo ma nneek in aamf ee te, nai' Isak nafoi nahiin nai' Esau in paek ne foo kein. Rarit in nfee tetus neu nai' Yakop am nak, “Au aanh ii in foo ni, on re' mnera' huun re' UISNENO nasanu' tetus, 28 Maut he Uisneno nasanu' pinis na'ko neno, he namriab ma nasnaub ho renen! Maut he In nfee ko pena'-maka' nho-hoen, ma ho poo' anggor sin nafuan nho-hoen. 29 Uuf-uuf of anrarin ho aten sin, Ma uuf-uuf na'ko pah-pah of na'ruri' ma nhormaat ko. Maut he ho muprenat ho aom-bian sin ok-oke', ma sin arsin of anri'tuun nbin ho matam. Sekau es re' nkaas ko, sin napenin kasat. Mes sekau es anfee ko tetus, sin napenin tetus amsa'.”
Nai' Esau nfain neem ma ntoit tetus na'ko nai' Isak
30 Oras nai' Isak anfee nrair tetus, ma nai' Yakop fe' npoi nasaitan in aamf ee te, in tataf nai' Esau nfain neem ma neik mui' fui re' in nheek naan ee. 31 Onaim in nnao nahaan ee, rarit in neik je neu in amaf. In na'uab am nak, “Aam! Mfeen he mbukae nai. Au uhaan urair siis fui re' au 'nao 'seok aan. Mbukae mrari te, mfee kau tetus.” 32 Nai' Isak naskeek. In nataan am nak, “Hoe! Ho sekau ko ntein?” Rarit nai' Esau nataah am nak, “Au nai' Esau kau! Au ho an-moen unu'.” 33 Onaim nai' Isak na'ta'i. Rarit a'naef ee nataan am nak, “Karu on nana te, fe'ena sekau es re' neik kau sisi ma au 'euk? Au 'eku 'rair, ma 'fee 'rair tetus neu tuaf naan. Ma au ka ubei' fa he 'heer ufani' tetus re' au 'fee je naan.” 34 Anneen in aamf ee na'uab on nana te, nai' Esau neek ne nameen, ma nkae npin-pinus. Ma na'aub naher-heer am nak, “Kooi, aam! Mfee kau tetus amsa', tua!” 35 Mes nai' Isak nak, “Ho ori' neem am napoi nrair kau, ma nabaak naan ho tetus.” 36 Rarit nai' Esau na'uab am nak, “In napoi kau no nua goen. Nahunu te, in napoi kau ma ntoup naan au hak an-moen unu. Oras ia, in napoi ntein ma ntoup naan au tetus. Etun in kaan ee ‘Yakop’. Mes, ho mmui' tetus bian antein he mfee kau, oo?” (Kanaf Yakop in oet ni ‘nnaa' haen 'tikan’. Mes in oten bian ‘apoit’.) 37 Rarit nai' Isak nataah am nak, “Au u'ratan a'rair ho ori' njair ho usi'. Ma in aok-bian sin oke', njarin in ate-ate sin. Au 'fee ne pena'-maka nho-hoen, ma hau fua anggor nho-hoen amsa'. Onaim, Esau! Oras ia au he 'fee ko tetus saa' antein?” 38 Anneen on nana te, nai' Esau noik aamf ee piut am nak, “Aam, ho mmu'i haa tetus mese' aa, oo? Au 'tebes, ho of ammu'i mtein bian. Maski an-ana' msa' reko!” Onaim in nmurai nkae ntein. 39 Rarit nai' Isak nataah anah nai' Esau, mnak, “Ho 'moin maan of na'roo na'ko reen amriat ein, ka tiit fa pinis nsaun na'ko neno he napeet ho afun. 40 Ho suin aan of es anfee ko he mmoin. Mes maski on mee-mee msa', ho mjair ate neu ho ori'. Suma karu ho mraban mubei' je, of na' ho mufetin maan om mu'ko in a'niman.”
Bi Ripka nreun nai' Yakop he naen
41 Nai' Esau nato'on nai' Yakop re'-re'uf, natuin nai' Yakop nasiik naan in tetus. Mes in natenab am nak, “Ka' roo fa te, ama' nmaet. Onaim, au 'pao. Bee't ee oke' te, au 'roro!” 42-43 Oras bi Ripka nneen nai' Esau in sarit naan, in no'en nai' Yakop am nak, “Ho mneen rek-reko! Ho tata' nareon anrair he nbaras in neek menas. In he nroor niis ko. Onaim, ho maen nai meu ho baba' nai' Laban et Haran. 44 Mnao mutua mtahan ambi ne, tar antea ho tata' in neek ne nmuni'. 45 Karu in nnikan nain saa'-saa' re' ho mmoe' sin neu ne te, au of a'reek tuaf he neit naan ko. Natuin au ka 'roim fa he unekun au aanh ein nua sin no mese' nain.” 46 Rarit bi Ripka na'uab nok nai' Isak am nak, “Au 'renan nai' Esau in fee nua' ein re' na'kon atoin Hetes sin ia! Karu nai' Yakop ansao ri'feot munif Hetes, reko nneis au 'maet nai.” Rarit nai' Isak no'en nai' Yakop, ma nfee ne tetus ma fainekat am nak, “Mneen rek-reko! Ho kaisa' msao bifee munif na'ko pah Kana'an. Mes ho mnao meu Padan Aram, meu ho na'i nai' Betuel in umi. Ho mnao ma msao ho baba' nai' Laban in an-feot goes. Maut he Uisneno re' Akuas isat naan, es anfee ko tetus, he ho anah-upuf sin namfaun, ma ho sufam-ka'um sin anfain uuf-uuf amfaun re' ma'tain ein. Maut he Uisneno In rais manba'an neu nai' Abraham naneet neu ko, ma neu ho sufam-ka'um sin. Maut he ho mpaar pah ia, re' Uisneno nba'an anraar je neu nai' Abraham.” Na'uab anrair on nana te, nai Isak nafetin nai' Yakop he nnao neu Padan Aram, neu in babaf nai' Laban ma na'if nai' Betuel sin umi.
Nai' Esau nsao nai' Isma'el an-feot goes
6 Nai' Esau nneen, nak nai' Isak nfee nrair tetus neu nai' Yakop, ma ntaar ee he kais ansao ri'feot munif na'ko pah Kana'an. In nneen amsa' nak in aamf ee nreun goe he nnao nsao baabf ee an-feot goes et Padan Aram. 7 Rarit nai' Yakop natuin in amaf ma ainaf sin fainekat, onaim in nnao neu Padan Aram. 8 Nai' Esau msa' nahiin nak, in aamf ee ka nroim fa in fee ngguin na'kon pah Kana'an. 9 Onaim nai' Esau nnao neu in aam kouf nai' Isma'el, rarit in nsao nai' Isma'el an-feto bi Maharat. Bi Maharat naan, nai' Nebayot fetof.
Nai' Yakop namnei nbi Betel
10 Rarit nai' Yakop annao nasaitan Beer Seba neu kuan Haran. 11 Oras manse nmouf, in ntea baar jes, ma in ntuup anbi naan. Oras in he ntuup ate, in nait faat goes he n'aka'nunu'. 12 Mabe' naan in namnei. In niit era' fua' es re' in tuun ne nasnait on anbi neno. Rarit Uisneno In ameput neno-tunan sin nsae-nsanun nbin erak naan. 13 Anbi mneit naan, nai' Yakop niit UISNENO nhake nbi in abnapan, rarit In na'uab am nak, “Au re' ia, UISNENO, ho na'i nai' Abraham ma ho ama' nai' Isak sin Uisneno. Au of a'fee ko pah ia neu ko ma neu ho sufam-ka'um sin. 14 Ho sufam-ka'um sin of amfaun on re' skuku'. Ma sin of ansei jok ma nbaits ok neun bare-bare. Na'ko ho sufam-ka'um, are' uuf-uuf nbi pah-pinan of napenin tetus. 15 Mumnau murek-reko'! Ho mnao meu mee-mee jah, Au ok ko, ma 'panat ko. Au of 'eik ko mfain meu pah ia. Au ka 'konan ko fa mmees. Ma Au of uteaba' rais manbaa'n ein re' Au 'fee ko sin.” 16 Oras nai' Yakop anfeen na'ko tupas naan, in na'uab am nak, “Au fe' uhiin ak, UISNENO msa' et bare re' ia!” 17 Ma in namtau. Onaim in natenab am nak, “Koeh! Ma bare ia nmoe' kau m'au fuun kein natoron. Namneo-namneo, Uisneno In uum ji et re' ia! Ma eno' he ttaam teu sonaf neno-tunan, es re' ia.” Nai' Yakob na'ruri' ma na'bees neu Uisneno nbi Betel 18 Kik-kiku te, nai' Yakop anfeen. Rarit in nait faut aka'nunu' naan, ma nahaek ee, njair tanar. Rarit in n'oop mina' nbi fatu naan, ma n'onen neu Uisneno. 19 In nakanab bare naan Betel, re' in a'moufn ii nak ‘Umi Uisneno’. (Unu' te bare naan, kaan ee, Lus). 20 Rarit nai' Yakop ansuup am nak, “Karu Uisneno nok kau, npao ma npanat kau nbi au ranan ia, ma nfee kau mnahat ma pake, 21 tar antea au 'fain uum nok mamut ma ao-mina', UISNENO of anjair au Uisneno. 22 Fatu re' au uhaek ee ia, njair baer onen neu Uisneno. Ma saa'-saa' re' Uisneno nfee kau sin, au of a'fee ufani' sapaaf es na'ko bait bo'.”
Nai' Yakop antean babaf nai' Laban in umi
1 Rarit nai' Yakop annao nkono n'ain pasa' neon saet. 2 In nna-nao te, in niit oe hain es npaumaak kuan es. Npaumaak oe hani' naan, nmu'i 'bibi ma 'bib-kase, pukan teun, re' npaon he napenin oe mninu'. Mes anmui' faut ko' goes ntoeb naan oe hani' naan. 3 Nati' te, karu mui't ein nana nabua nrarin ate, na' atuuks ein ntitar na'roob fatu naan, rarit ankuin oe ma na' na'inu' sin. Ninu nrarin ate, sin ntoeb nafain ee. 4 Onaim nai' Yakop nnao nataan atuuks ein nana mnak, “Hoore, tua! Hi mi'ko mee, tua?” Sin natahan am nak, “Hai mi'ko kuan Haran, tua.” 5 Rarit nai' Yakop nataan antein am nak, “Hi mihiin au baba' nai' Laban aa, oo? In re' naan, nai' Nahor in anah.” Onaim sin natahan am nak, “Hai mihiin je, tua.” 6 Nai' Yakop nataan piut am nak, “In n'ao-mina', oo?” Sin natahan am nak, “A'naef ee et re' ne. In reko. Mkius. In an-feto bi Rahel napoo' neik in mui't ein neman he na'inu' sin anbin re' ia. Ho mpao mbi ia.” 7 Rarit nai' Yakop na'uab antein am nak, “Manse na'puup fe'. Onaim, reko nneis mui't ein re' neem nabuan nrarin ia, hi mi'inu' sin nai. Rarit hi mipoo' meik sin he sin nekun huun.” 8 Mes sin npenan mates, nak, “Hoe, ka on fa naan! Hai ro he mpao atuuks ein neman ok-oke' neik sin mui't ein ntean ia fe'. Hena' hai mtitar fatu ne, he mi'inu' mui't ein naan.” 9 Nai' Yakop fe' na'uub-uab nok atoin ein nana te, bi Rahel neem antea nok in aamf ee mui't ein. Nati' te, in natuuk mui't ein naan. Nai' Yakop nait nanani' faut tobef naan 10 Oras nai' Yakop niit bi Rahel nok in a'bibin ma 'bib-kasen nana te, in nnao ntitar nain faut tobef naan. Rarit in na'inu' in baabf ee in mui't ein. 11 Rarit in nneek bi Rahel, ma nkae. 12 Rarit in natonan bi Rahel am nak, “Au re' ia, ho baab feto bi Ripka in anah.” Onaim bi Rahel naen anfain on umi he natonan in amaf. 13 Oras nai' Laban anneen han-tonas nak nai' Yakop naan, in fetof bi Ripka anah, in nnaen anseun goe. Natefan ate, nai' Laban nneek ma nhoo goe. Rarit in nok ne neu in umi'. Onaim nai' Yakop natoon are' saa'-saa' neu in babaf. 14 Onaim, nai' Laban na'uab am nak, “Batuur! Hit nua kit umi nanan!”
Nai' Yakop ansao bi Lea ma bi Rahel
Oras nai' Yakop natua nok sin fuun es, 15 nai' Laban na'uab nok ne mnak, “Ako! Au ka 'roim fa he ho mmeup rum-ruum meu kau, natuin hit nua kit umi nanan. Onaim, ho mtoit fauk?” 16 Nai' Laban anmui' an-feto nua. Ahuunt ee, in kaan ee bi Lea. Amuint ee in kaan ee bi Rahel. 17 Bi Lea in maat firo. Mes bi Rahel in huum ne mamasa', ma in aon ee msa' ro reko. 18 Nai' Yakop in ntaam nekan bi Rahel. Onaim in nataah nai' Laban am nak, “Au 'mepu 'fee ko toon hiut, asar ho mroim he au 'sao bi Rahel.” 19 Rarit nai' Laban nataah am nak, “Reko! Nana es reko nneis, natuin hit nua kit umi nanan. Maut he au anah bi Rahel kais ansao atoin sona'. Onaim, ho mutua mbi ia, he mbiur neu kau.” 20 Rarit nai' Yakop nmeup toon hiut, henati' in bisa nsao bi Rahel. In nneek niis bi Rahel. Etun, toon hiut re' nana, on re' neno fauk ah. 21 Toon hiut namsopu te, nai' Yakop namnauba' babaf nai' Laban am nak, “Baab mone! Au 'meup toon hiut goen. Oras ia, mnona' kau bi Rahel he au 'sao.” 22 Onaim nai' Laban nahoeb neu kabin naan. In naskau too mfaun anbin bare naan. 23-27 Mabe' naan, nai' Laban ka nfee fa bi Rahel, mes in nfee bi Lea he ntaam neu nai' Yakop in tenar. Onaim nai' Yakop antuup nok bi Lea. Kik-kiku te, na' nai' Yakop nahiin nak in ntuup nok bi Lea. Onaim nai' Yakop anmatoe in aam babaf nai' Laban am nak, “Au 'aetn ok toon hiut he 'sao bi Rahel! Te, ho mseun ee nok bi Lea! Nansa'am es ho mu'e'ob kau on re' ia?” Rarit nai' Laban nataah am nak, “Ho kais mutoo'! Tatuin hai harat anbi bare ia, feot muni ka nabei' fa he nsao nahunun feot ko'u. Onaim, reko nneis on nai! Ho mpao he fesat neno hiut namsoup fe', na' ho mupein bi Rahel. Mes ho ro he mmepu mtein toon hiut neu kau.” Rarit nai' Laban nfee in ate bi Silpa he njair bi Lea in ate. 28 Nai' Yakop anroim natuin. Onaim fesat neno hiut namsopu te, nai' Laban anfee bi Rahel he nai' Yakop ansao. 29 Rarit nai' Laban nfee in ate bi Bilha he njair bi Rahel in ate. 30 Onaim nai' Yakop ansao bi Rahel amsa'. In nneek nanesib bi Rahel. Onaim in nmepu ntein toon hiut neu in aam babaf.
Nai' Yakop in aanh ein
31 Mes UISNENO nahiin nak nai' Yakop anneek nanesib bi Rahel. Es nana te, In nkonan bi Lea he nahoni'. Mes bi Rahel kahaf. 32 Bi Lea na'apu', ma nahoni' ri'an moen jes. In nakanab ri'ana' nana nai' Ruben (re' in a'moufn ii nak ‘mkius, nmui' anah’), natuin in na'uab am nak, “UISNENO nkius niit au susat. Etun es oras ia, au moon je nkius kau.” 33 Rarit bi Lea na'apu' ntein, ma nahoni' ri'an moen jes. In nakaan be, nai' Simeon (re' in a'moufn ii oni' nak ‘atoni' nneen anrair’), natuin in nak, “UISNENO nneen anrair nak au moon je ka nfairoir kau fa. Es na' In nfee ntein kau ri'ana' ia.” 34 Rarit bi Lea na'apu' ntein, ma nahoni' ri'an moen jes. In nakanab ri'ana' naan nai' Lewi, natuin in na'uab am nak, “Nok re' ri'ana' ia, au raas ji, oke' nrair. Namneo, au moon je of na'kii' nbi kau, natuin au uhoni' ri'an mone teun neu ne.” 35 Rarit bi Lea na'apu' ntein, ma nahoni' ri'an moen jes. In nakanab ri'ana' naan nai' Yahuda (re' in a'moufn ii oni' nak ‘bo'is’), natuin in na'uab am nak, “Neot re' ia, au he 'bo'is UISNENO!” Rarit bi Lea ka nahoni' fa heen.
1 Mes bi Rahel fe' ka nahoni' fa. Etun in sero nmui' tenab neu in tataf. Onaim, in na'uab neu in moon je, mnak, “Aam! On mee m'es au ka uhoni' fa? Karu ka mfee kau fa anah ate, reko nneis au 'maet nai.” 2 Onaim nai' Yakop naskaar ee, mnak, “Ho mak au Uisneno kau? Au ka 'moe uhiin fa ri'ana' he 'fee ko.” 3 Rarit bi Rahel na'uab am nak, “On nai! Reko nneis ho mtuup mok au ate bi Bilha. Maut he on mee te, in nahoni' ri'ana' nfee kau.” 4 Rarit in nnona' bi Bilha neu in mone. Onaim nai' Yakop antuup nokan. 5 Rarit bi Bilha na'apu, ma in nahoni' ri'an moen jes. 6 Onaim bi Rahel na'uab am nak, “Uisneno nneen au onen. Etun In nfee kau ri'an moen jes. Uisneno nafeek nataib ahaa au rasi.” Onaim in nakanab ri'ana' naan nai' Dan (re' in a'moufn ii nak ‘nafeek rasi’). 7 Rarit bi Bilha na'apu ntein, ma nahoni' ri'an moonj es. 8 Onaim bi Rahel na'uab am nak, “Au ok au tata' mmari'un mahoint ii. Onaim au 'iis aan ee.” Etun in nakanab ri'ana' naan nai' Naftali (re' in a'moufn ii nak ‘nmari'un’). 9 Oras bi Lea nnaben nahiin neu in ka nahoni' fa heen, in nnona' bi Silpa he nai' Yakop ansao. 10 Rarit bi Silpa nahoni' ri'an moen jes. 11 Rarit bi Lea na'uab am nak, “Au ua reko kau.” Onaim in nakanab ri'ana' naan nai' Gat (re' in a'moufn ii, nak ‘ua reko’). 12 Rarit bi Silpa nahoni' ntein ri'an moen jes. 13 Onaim bi Lea na'uab am nak, “Hoe! Oras ia, na' au 'mariin! Mkius kim, of bifeen guin na'uab ein am nak, au 'iis mainenu'.” Etun in nakanab ri'ana' naan, nai' Aser (re' in a'moufn ii nak ‘marinit’). 14 Neot es, nateef oras amnonut, nai' Ruben nnao nbi nasi. In napein hau re'u re' nturun tuaf he karu reko te nahoni'. Rarit in nneik je neu in ainaf bi Lea. Nkius niit on nana te, bi Rahel antoit bi Lea mnak, “Airoo, taat! Mfee maan kau re'u kre'o re' nai' Ruben neik je naan.” 15 Mes bi Lea nataah am nak, “Hoe! Ho bainesi' ko! Ho musiik amrair au mone. Ma oras ia, he musiik amtein re'u na'ko au anah. Ho ka mumaeb om fa?” Mes bi Rahel na'uab am nak, “On nai taat. Karu au upein re'u nana te, mabe' ia ho mok hit mone.” Bi Lea nroim on naan. 16 Manse nmaeb on nana te, nai' Yakop anfain neem na'ko rene. Onaim bi Lea nnao nateef nok ne, ma na'uab ee mnak, “Aam! Ho ro he mtuup mok kau mabe' ia! Natuin au 'baen a'rair ko 'eik au aanh ee in re'u.” Rarit mabe' naan, nai' Yakop antuup nok bi Lea. 17 Rarit Uisneno nneen bi Lea in onen. Onaim in na'apu', ma nahoni' ri'an moen jes. Neot ia, in nahoni' no niim een. 18 Rarit bi Lea nakanab ri'ana' naan nai' Isaskar (re' in a'moufn ii nak ‘baena' haet’), natuin in na'uab am nak, “Uisneno nbaen anrair au haet, natuin au 'nona' 'rair bi Silpa he nsao au mone.” 19 Rarit bi Lea na'apu' ntein, ma nahoni' ri'an moen jes. Re' ia, no nee jen. 20 In na'uab am nak, “Uisneno n'ook-soun kau. Onaim oras ia, au moon je ro he nhormaat kau, natuin au uhoni' 'rair ri'an mone nee jen.” Etun in nakanab ri'ana' naan nai' Seburon (re' in a'moufn ii nak ‘nfee hormaat’). 21 Rarit bi Lea nahoni' ri'an feot goes. Onaim in nakaanb ee, bi Dina. 22 Mes Uisneno namnau bi Rahel amsa'. In nneen bi Rahel in onen totis. Etun In nfei bi Rahel in apun. 23 Onaim bi Rahel na'apu' ma nahoni' ri'an moen jes. In na'uab am nak, “Uisneno nait inporin au rais mae.” 24 Onaim in nakanab ri'ana' naan, nai' Yusuf (re' in a'moufn ii oni' nak ‘maut he in na'baba'’), natuin in na'uab am nak, “Au 'toit he Uisneno na'baba' kau ri'an moen jes antein.”
Nai' Yakop naim ranan he na'baba' in mui't ein
25 Oras bi Rahel nahoni' nrair nai' Yusuf, nai' Yakop na'uab nok nai' Laban am nak, “Aam! Karu reko te, au 'fain on au pah ee fe'. 26 Maut he au 'eik au fee ma au anah sin imsa'. Aam, ho muhini mrair, au 'meup ma'tani neu ko, onaim au 'baen ufeek sin een. Natuin rasi naan, oras ia sin nfanin aung goa jeen.” 27 Rarit in aam baabf ee nataah am nak, “Ako! Ho mneen fe'. Au uketi' ma takseer a'soba'. Au 'iit a'rair, onaim au uhiin 'ak Uisneno npaek ko he nfee kau tetus. 28 Onaim oras ia ho mtoit fak-fauk ah. Au 'baen! Asar ho mutua mok kau mbi ia, ma mmepu mfee kau.” 29 Rarit nai' Yakop nataah am nak, “Aam, ho miit kuum, au mepun. Etun ho mui't ein na'baab ok piut. 30 Oras au ka uum fa fe'e te, ho 'mui'm ein ka mfaun fa fe'. Mes oras ia, ho atoin amu'it. Uisneno nfee ko tetus, natuin au mepuk. Oras ia, ntea in orsa goen he au 'meup 'eu au fee-anah sin.” 31 Rarit nai' Laban nataan am nak, “Reko. Onaim au he 'baen on mee 'eu ko?” Nai' Yakop nataah am nak, “Aam, ho kais musuusb om he mfee kau saa'-saa'. Au of utuuk ukonob ho mui't ein, mes asar au 'moe' aan taos es. 32 Mfee kau mainuan, he neno ia au 'nao 'eu ho mui't ein. Au he 'piir aan a'bibi ma 'bib-kase re' ka ma'koto' fa. Sin re' naan, hong goa, tua. Mes re' ma'koot ein ee, au nu. Ma au ait imsa' are' 'bib-kaes metan. Maut he sin ok-oke' naan, anfain baen neu au sus-haet. 33 Neno namuni te, of na' ho muhiin mak au neek ii kninu', ai' kah? Oras mee-mee jah, ho uum he muprikas au mui't ein. Karu ho miit a'bibi re' ka ma'koto' fa, ai' 'bib-kase re' muti' te, ho muhiin mak au es re' ubaak aan ho nggoan.” 34 Rarit nai' Laban nroim natuin am nak, “On re' nana te, reko” 35 Mes anbi neno naan, nai' Laban nbatis 'bib-kasen re' ma'koto', ma 'bib-kasen re' metan. Rarit in nreun in aanh ein he natuuk mui't ein naan. 36 Rarit sin nneik mui't ein naan nnao na'roo na'ko nai' Yakop, neu baar jes re' in a'roo ni tnao hae te neno teun fe'e te na' ttea. Rarit nai' Yakop fe' natuuk in aam baabf ee in a'bibin ma 'bib-kaes aneist ein naan. 37 Rarit nai' Yakop ankeut naan hau-taef na'ko hau huma' teun. In nsapi ntui raan hau-taef ein naan. 38 In ntao hau-taef ein re' in ntui raan sin naan, nbin a'bai oe. Mui't ein nana nati' te anma'teen ein nbin bare naan. 39 Onaim, oras mui't ein nana nababin npaumaak hau taef matui raanf ein nana te, sin of nahoin ein ana' 'koto'. 40 Rarit karu nai' Laban in mui't ein es re' he nababin ate, nai' Yakop na'ekab sin neu 'bibi ai' 'bib-kase re' ma'koto'. Rarit sin nahoin ein aan ma'koto' msa'. Nok ranan naan, in mui't ein kuun na'baab ok piut. Rarit in nbetis sin na'ko nai' Laban inin. 41 Oras mu'it mee re' ma'tani' nababi te, nai' Yakop antao hau taef re' in nruun sin nana, ntoom a'bai oe, re' nhaumaak sin maatk ein. 42 Mes karu in nkisu ma mu'it mee n'oer oras he nababi te, in ka ntao fa hau taef ein naan. Onaim nai' Laban in napein mui' makna'u ma a'oret. Mes nai' Yakop in ne ok-oke' es re' apokat ma ma'tani'. 43 Nok ranan nana te, nai' Yakop njair atoin amu'it. In nmu'i 'bibi, 'bib-kase, bikaes unta, bikaes keledai, ma ate-ate, re' mfaun ii kaheen.
Nai' Yakop naen nasaitan nai' Laban
1 Neot es, nai' Yakop anneen niit nai' Laban in aanh ein na'uab ein am nak, “Oras ia, nai' Yakop nmui' batuur-batuur oo. In na'susu' niis hit ama' in a'mu'in.” 2 Onaim nai' Yakop ankius in aam baabf ee huum ne te namet-meet gon, ma ka on fa re' nati' he reko. 3 Rarit UISNENO na'uab nok nai' Yakop am nak, “Ntean in orsa goen, es re' ia. Onaim ho ro he mfain nai meu ho aina'-ama' sin. Au of ok ko.” Nai' Yakop nateef nok in fee nua ein 4 Rarit nai' Yakop anreun no'en bi Rahel ma bi Lea, he neman ma nateef nok ne nbi mnera' huun, sin mui't ein baar kein. 5 Rarit in natonan sin am nak, “Muni' ia, au 'kius hi ama' te, huum ne meto'-meto' neu kau. Ma in imsa' ka nkisu ntoom kau fa on re' nati'-nati'. Mes Uisneno, re' au ama' na'bees neu Na ji, nok kau. 6 Hi nua ki mihiin, a'roo-roo re' ia, au 'meup ma'tani' 'eu hi ama'! 7 Mes maski on nana msa', in napoi kau fani-fani. In na'bani' au baen seba' no bo'es een. Maski on nana msa', Uisneno npao ma npanat kau. 8 Oras hi ama' na'uab am nak, ‘Mui' ma'koto' sin njair ho baen puse-haet te,’ mui't ein nahoin ein aan ma'koto' oke'. In nmoe' on naan neu kau fani-fani. 9 Uisneno nmoe' on naan, he In nait hi ama' in mui't ein ma nfee kau sin. 10 Neot es, oras mui't ein nana, ntotin he nababin ate, au umnei mnak, are' keos nein oke' re' nababin naan, nmui' ma'koto'. 11 Rarit Uisneno In ameput na'ko neno-tunan, nhaman kau nbi mneit, am nak, ‘Yakop!’ Rarit au utaah am ak, ‘On mee, tua?’ 12 Onaim in natoon kau mnak, ‘Mkius fe'! Are' keson re' nababin ia, suma nmu'i haa ma'koto'. Au 'ator on naan, natuin Au iit are' saa'-saa' re' nai' Laban nmoe' sin neu ko. 13 Au re' ia, Uisneno re' nakriir On neu ko nbi Betel. Anbi ne, ho muhake' fatu, rarit am'oop mina', ma m'onen meu Kau. Rarit ho muhake' rais manba'an mok Kau nbi ne. Oras ia, ho ro he mnao musaitan pah re' ia, ma mfain on ho aina' ma ho ama' sin pah.’” 14 Rarit bi Rahel ma bi Lea natahan am nak, “Es re' ho. Hai mituin ah! Hai ka mmui' fa paa' ma nama' ntein na'ko hai ama'. 15 A'roo-roo re' ia, hai ama' in naan kai on re' atoin buti. In na'sosa' nrair kai. Rarit in npaek nonin naan. 16 Are' kanan a'mu'if re' Uisneno nait sin na'ko aam Laban naan, oras ia njair pusaak neu kit ma neu hit aanh ein. Onaim karu Uisneno nak on mee te, tatuin ah!” 17-18 Rarit nai' Yakop nmurai nakbua' in baer ein. In nasaeb in fee-anah neu bikaes unta sin, ma napoo' neik in mui't ein ok-oke', ma nasaeb neik baer ein re' in napein sin nbi Padan Aram, he nnaon on pah Kana'an. 19 Oras nana, nai' Laban annao nkateer in 'bib-kaes ne sin fuun kein. Onaim bi Rahel nabaak neik in aamf ee in faut-fuat maruna'. 20 Nai' Yakop sin nfeen annaon mninu'-mninu'. Sin ka natonan fa in aam babaf. 21 In neik nain in a'mui'n ein ok-oke', rarit sin nnaon nok manapat ma nraak noe Efrat, onaim sin nnaon n'anin a'toe'f ein Gireat.
Nai' Laban anriu' natuin nai' Yakop
22 Anso'op neno teun on nai te, nai' Laban napein hanaf nak, nai' Yakop nfeen naen anrair. 23 Rarit nai' Laban no'en na'bua' in ne, ma sin nriu' natuin in an-moen feuf naan. Sin nriu' sin tar antea neno hiut, na' napein sin nbin a'toe'f ein Gireat. 24 Fai ni te, Uisneno nakriir On neu nai' Laban anbi mneit. In na'uab am nak, “Laban! Nati' mpanat ho feef man, oras ho mu'uab mok nai' Yakop.” 25 Mabe' naan, nai' Yakop nahake' nrair tenas nbi 'toe'f ein Gireat. Nai' Laban sin imsa' nahake' sin ne, ka na'roo fa na'ko bare naan. 26 Rarit nai' Laban neem nateef nok nai' Yakop. Onaim in na'uab am nak, “Hoe, Ako! Nmoe' on mee m'es ho maen meik au an-feot ni mninu'-mninu'? Ho on re' meik tuaf re' ho mheek maan sin anbin makenat. 27 Airoo, ho maen amninu'-mninu'. Ho ka mpaek fa atoran a'kre'o he musee kau, go! Karu ho mutoon kau rek-reko te, bait au 'fesat he useon ki eik marinet ma sakanat. 28 Ho saant es antein, ho ka mfee kau mainuan he au 'taeb ma 'neek aan au anah-upuf sin hena' au useon sin. Ho moe' mi on re' amoont an! 29 Au he 'sirakab ko te, rabah! Mes fini na, Uisneno, re' ho ama' na'bees neu Na ji, nakain kau nak, karu au u'uab ok ko, au ro he 'panat au fefak. 30 Au uhiin neu ho mumnau ho kuan ee, he mfain. Mes nan'sa'am es ho mubaak meik au faut-fuat re' maruun ein?” Nai' Laban ma nai' Yakop 31 Rarit nai' Yakop nataah am nak, “Aam, kais muto'on kau! Au 'fena 'nao mninu'-mninu' natuin au utiun gok, karu ho ka mroim fa he mkonan kau ri'an ein he nok kau te, of on mee?” 32 Mes nai' Yakop ka nahiin fa neu in fee bi Rahel es nabaak neik faut-fuat re' maruun ein naan. Onaim, in na'uab am nak, “Aam, re' faut-fuat maruun ein nana te, ho maim kuum! Karu ho mupein sin anbin sekau te, mu'mate he. Mpukai hai brua' ein oke'! Karu mupein ho baer pusaak bian amsa' ate, mait mufani' sin. Maut he tuaf ein re' ia njarin saksii.” 33 Rarit nai' Laban anpoi ma ntaman sin teens ein mese'-mese'. Nahunun nai' Yakop in tenas. Rarit bi Lea. Rarit neu bi Bilha ma bi Silpa sin amsa'. Mes ka niit fa baer ein naan. Namuni te, in ntaam neu bi Rahel in tenar. 34 Mes bi Rahel ankonob na'koro faut-fuat maruun ein nana nbin a'pein bikaes unta. Rarit in ntook natau 'peni naan. Nai' Laban nparikas bi Rahel in teens ee naan ne ok-oke', mes ka napein fa baer ein naan. 35 Onaim bi Rahel na'uab nok in aamf ee mnak, “Aam honi', kais mutoo'. Au ka 'feen fa, tua, natuin au upein funan.” Onaim nai' Laban naim piut, mes ka niit fa faut-fuat maruun ein naan. 36 Nai' Yakop natoo' ma huum ne npuut, onaim in naskarak in aam babaf nai' Laban am nak, “Au ureu' ho saa'? Tar ho mriu' mutuin kau, on re' au atoin aburarut kau. 37 Ho mpukai murair are' au baer ein ok-oke'. Onaim, ho mupein saa'? Mait meik je neem neu matan ia he hit 'tiit ok-oke'. Maut he hit aok-bian sin re' ia, nafeek nitan nak bare' nana, sekau ini. 38 Toon bo' nua goen au 'aet nok a'bi ko, aam. Oras au utuuk ho mui't ein naan, ka ti-tiit fa es he nropo'. Mese' msa' au ka 'tuun he 'euk 'iit fa. 39 Karu nmui' mui' fui na'maet ho mui't ein, au ka utoon ko fa, mes au 'seka' sin, tua. Karu nmui' tuaf nabaak naan ho ngguin, ho mreun kau he 'senu', maski au ka 'saan fa. 40 Man-mana te, manse nraar kau. Fa-fai te, au 'maniik tar u'ta'i 'maet. Au 'bee', ma ka 'tuup reko fa, natuin au 'panat ho mui't ein naan, tua. 41 Batuur, toon bo' nua naan namneo! Au 'meup toon bo' es am haa he 'sao ho an-feton. Rarit a'kuri 'tein toon nee, he 'heit. Au 'aetn ok a'roo-roo re' naan, mes ho mubanit au baen seba' naan no bo'es. 42 Ken-kenu' te, Uisneno re' au na'i nai' Abraham ma au ama' nai' Isak na'besan neu Ne. Karu In ka npanat kau fa te, ho mri'u mrair kau, ma au 'feen a'nao ruum-ruum ah. Mes Uisneno ka nforon fa au susat. In niit kau neu au 'meup ma'tani'. Es na' fini na, In neem ma nakain ko, tua.”
Nai' Yakop ma nai' Laban nahaek bein rais manba'an
43 Anneen nai' Yakop na'uab on nana te, nai' Laban nataah am nak, “Henat on nai! Bifee nua' ein naan, au aanh ein. Ri'an ein re' sin nahoni' sin naan, sin au upu' ok-oke'. Mui't ein re' ia, batuur au nggoa. Are' saa'-saa' re' ho miit sin nbin ia, au nu. Mes au he unsaa'? Au ka ubei' he 'tahan sin fa. 44 Onaim reko nneis hit nua kit tahakeb rais manba'an. Ma hit nua kit ro he tmoin tatuin hit rais manba'an naan.” 45 Rarit nai' Yakop nait faut ko' goes, ma nahaek be nbi naan, he njair tanar. 46 Rarit nai' Yakop anreun in ameupt ein he nkaubuub ein fatu, ma ntupu' sin. Onaim sin ntokon ma nbukaen bu'-bua' mpaumaak fatun naan. 47 Onaim nai' Laban nakanab faut tunab nana mnak, Yegar Sahaduta. Mes nai' Yakop nakaan be, Galeet. 48 Rarit nai' Laban na'uab am nak, “Faut tunab ia, njair tanar re' nsaksii hit rais manba'an.” Es nana te, bare naan, in kaan ee, Galeet. 49 Nai' Laban nakanab bare naan amsa' nak, Mispa (re' he noi on re' kata bian re' in a'moufn ii ‘baer paot re' na'raat’), natuin in na'uab am nak, “UISNENO of neik Non ansuntiur kit, he maski hit nua kit atmaka'roon amsa', hit kais attanhai hit rais manba'an ia. 50 Karu ho mmoe' amre'ut neu au aanh ein ii, ai' amsao bifee sona', au of ka uhiin fa. Mes mumnau! Uisneno njair saksii neu hit nua kit. 51-52 Mkius miit faut ahaket ia, ma faut tuun bein ia. Mumnau! Fatun ia amsa', njarin nakat. Ho ka mubei' fa he mtanhai fatun re' ia, he mmoe' amre'ut neu kau. Ma au msa' on naan. 53 Hit tahake' rais manba'an ia, tpaek hit be'i-na'i sin Uisneno. Es re' ho na'i nai' Abraham, ma au na'i nai' Nahor sin Uisneno. In of neik Non anjair Afeek Rasi neu hit rasin.” Anneen anrair on nana te, nai' Yakop ansuup anpaek kanaf Uisneno re' in amaf nai' Isak na'ruri' ma na'bees neu Ne. 54 Rarit nai' Yakop nroor mu'it, in nait neik sin siisk ein ma nafuat sin neu Uisneno nbin a'toe'f ein naan. Onaim, in naskau tuaf ein re' anbin naan, ma sin nbukaen bu'-bua', ma nbe'en tar anmeu nfiin. 55 Kik-kiuk ana' on nana te, nai' Laban nhoo ma nneek in anah-upuf sin ok-oke'. Rarit in nfeen sin tetus, ma nfain on in pah.
Nai' Yakop namtau neu he nateef nok in tataf nai' Esau
1 Rarit nai' Yakop sin nnaon konon. Onaim Uisneno In ameupt ein na'ko neno-tunan neem nateef nok ne. 2 Oras niit sin on nana te, in na'uab am nak, “Re' bare ia, Uisneno In soraurs ein bare snasat!” Etun sin nakanab bare naan, Mahanaim, (re' in a'moufn ii nak ‘bare snasat mana' nua’). 3 Rarit nai' Yakop anreun in ameput tuaf fauk nnaon nahunun neu pah Edom (es re' Seir), he natonan in tataf nai' Esau, nak in he neem. 4 Nai' Yakop natonan in ameupt ein nana mnak, “Hi mnao mitonan au tata' nai' Esau mak, ‘Aam Esau! Ho ate nai' Yakop nsonu' haan buseet ma hormaat neu ko, tua. Na'ko afi unu' tar antea oras ia, ho ate kau, utua 'bi hit baab mone nai' Laban in umi. 5 Oras ia, ho ate, nmui' bijae, bikaes keledai, 'bibi, ma 'bib-kase. Au 'mui' ate msa', et atoni' ma bifee. Au 'reek tuaf ein re' ia, he neik ko hanaf, nak au he uum. Au ufnekan anbi au nekak, henati' ho mtoup kau 'nima' nua, tua.’” Onaim, tuaf ein nana nnaon. 6 Oras sin nfain neman neu nai' Yakop, sin natonan am nak, “Hai mnao miteef amrair mok ho tata' nai' Esau. Oras ia in neem ma nok tuaf natun haa, he nateef nok ko, tua.” 7 Anneen on nana te, nai' Yakop in ansaon ee tepo-tepo, ma in namtau nmaet. Rarit in nbait in ameupt ein ma mui't ein ok-oke', nfain pukan nua. 8 In natenab am nak, “Karu nai' Esau neem ma nbaan pukan ahuun te, pukan amuin te naenan he napenin ao-mina'.” 9 Rarit nai' Yakop an'onen am nak, “Koi, Uisneno! Usi' re' au na'i nai' Abraham ma au ama nai' Isak na'ruri' ma na'bees neu Ko! Mneen maan kau fe', tua. Uisneno, neon goes ii, Ho es re' mreek kau he 'fain uum on au umi' ma au nonot-asar, nbi pah re' ia. Ho es re' mba'an mak, Ho of am'ator he mureko' sin ok-oke'. 10 Au re' ia, atoin ka maso'ik fa, mes Ho manekam neu kau nabar-baar. Unu' te, oras au 'raak noe Yarden re' ia, au eki haa teas. Mes oras ia, au 'fain uum eik tuaf pukan nua ma mu'it amsa'. 11 Au umtau, kas-kaisa' au tata' nai' Esau neem ma nbaan niis kai. Onaim, au 'toit Ko Usi' he msoi maan kai na'ko nai' Esau. Hai es re': au, au fee-anah sin, ma hai arkai ok-oke'. 12 Usi', Ho es amba'an mak, Ho es re' mfee kau tetus anho-hoen, ma mfee kau sufa'-ka'uf on re' snaen ein et taas je ninin, re' biak ein ka nsoik nabei' sin fa.” 13 Rarit nai' Yakop antuup anbi bare naan. Noka' on nana te, in nabarab mu'it he n'ok-soun sin neu in tataf. 14 In npiir naan a'bib ainaf natun nua, 'bib keso bo' nua, bib'-kaes ainaf natun nua, 'bib-kaes keso bo' nua, 15 bikaes unta ainaf bo' teun re' nasuus ein fe', bijae ainaf bo' haa, bijae keso bo' es, bikaes keledai ainaf bo' nua, ma bikaes keledai mone bo'es. 16 Rari te, in nbait mui't ein nana, huum es ate neu puukn es. In nfee pukan es ate nok in atukus. In natonan sin am nak, “Hi mnao mihuun. Au utuin ki 'bi hi kotim. Hi mnao, mes pukan es nok pukan es ate sero mmaka'roon.” 17 Rarit nai' Yakop naprenat a'nakat neu pukan ahuunt ee mnak, “Karu au tata' nai' Esau nateef nok ko, ma in nataan am nak, ‘Ho he mnao on mee? Sekau in ameupt ee, es re' ho? Mui't ein re' ia, sekau iin na?’ 18 Te, ho mutaah am mak, ‘Mui't ein re' ia, ho ate nai' Yakop iin na, tua. In nsonu' sin neu in tataf, aam usi' nai' Esau. In et re' munin.’” 19-20 In imsa' naprenat on re' naan neu atukus pukan bian, am nak, “Karu hi miteef mok au tata' nai' Esau, hi mnoon ee mui't ein re' ia. Rarit hi mitoon mak au et re' munin.” Nai' Yakop natenab am nak, karu in nfee mui't ein re' nana ok-oke' te, nai' Esau of neek ne nsesuum ma nmuni'. 21 Onaim in nsonu' mui't ein nana nahunun. Mes mabe' naan, in natua nabaar anbi naan.
Nai' Yakop nok Uisneno anmaboon ein
22 Mabe' naan, nai' Yakop anfeen ma n'ator in fee ngguin nua sin, in aten re' in pana' sin, ma in aanh ein bo' es am mese', he sin nnaon nrakan neu noe Yabok in panin. 23 Oras sin arsin antean noe naan in panin, in nsonu' in pusaak ein ok-oke' neun ne. 24 Mes nai' Yakop namaik anmees anbi noe je panin. Rarit, atoin es neem. Atoni' naan nok nai' Yakop anmaboon ein anbi naan, tar antea nesnoi nmeu. 25 Oras atoni' nana nnaben nak, nai' Yakop he niis ee jen ate, in ntuuf nai' Yakop in a'bokon, tar antea in nuin pusun uun ne natposi' npoi na'ko in tarun. 26 Onaim atoni' naan na'uab am nak, “Mufeti' kau. Kre' goes te manse he npeek jen.” Mes nai' Yakop nataah am nak, “Ho mu'uab amfee kau tetus fe', na' au ufeti' ko.” 27 Onaim atoni' naan, nataan ee, mnak, “Ho kaan maan sekau?” In nataah am nak, “Nai' Yakop.” 28 Rarit atoni' naan na'uab am nak, “Ho kanam naan, ka nai' Yakop fa heen. Mes anmurai oras ia, atoni' anteek ko nak, nai' Isra'er (re' in a'moufn ii, ‘nmabonan nok Uisneno’), natuin ho mmabonan ma'tani' mok mansian ma mok Uisneno, tar antea ho miis.” 29 Onaim nai' Yakop nataan am nak, “Ho kaan maan sekau?” Mes atoni' nana nataah am nak, “Ho he mutaan au kaan ki he saa'?” Rarit in na'uab anfee tetus neu nai' Yakop anbi naan. 30 Onaim nai' Yakop na'uab am nak, “Au iit a'rair Uisneno humaf nok humaf, mes au 'moin fe'.” Natuin rasi nana te, in nakanab bare naan, Peni'el (re' in oet ni, ‘Uisneno In human’). 31 Oras manse nsae nrari te, nai' Yakop annao nkoon, nasaitan bare naan. Mes in nsere', natuin in pusun uun ne nasuir. 32 Etun antea oras ia, atoin Isra'er sin ka nekun fa sisi na'ko mui't ein sin pusuk uuk ein, natuin Uisneno ntuuf nasurib sin aam uuf nai' Yakop in nuin pusun uun.
Nai' Yakop nateef in tataf nai' Esau
1 Neno naan, nai' Yakop niit nai' Esau neem neik atoni' tuaf natun haa. Rarit in nbait in aanh ein es-es ate nok sin ainaf. 2 In nahunub in aten re' in pana' sin naan nok sin aanh ein ntoman maat. Rarit bi Lea nok in aanh ein, na' nbi muin ii te, bi Rahel nok in anah nai' Yusuf. 3 Mes nai' Yakop annao nahun-hunu nbi maat. Oras he noi npaumaak in taatf ee te, in nri'tuu ma na'bees nafan-fain no hiut. 4 Mes oras' nai' Esau niit in orif nai' Yakop, in nan-naen ah he nateef ee. Rarit in nhoo ma nneek ee suk a'roo. Ma sin nua sin ankaen npin-piuns ein. 5 Oras nai' Esau niit bifeen naan ma ri'aan ein nana te, in nataan am nak, “Tuaf amfa-faun ia, sekau ngguin aa?” Onaim nai' Yakop nataah am nak, “Sin re' ia, tuaf ein re' Uisneno nfee sin neu ho ate kau.” 6 Rarit in fee paan ein naan, ma sin aanh ein neman ma na'besan neu nai' Esau. 7 Rarit bi Lea nok in aanh ein neman ma na'besan neu nai' Esau. Namuni te, nai' Yusuf nok in ainaf bi Rahel neman ma na'besan neu nai' Esau. 8 Rarit nai' Esau nataan am nak, “Pukan ahuunt ein re' ho mreek sin neu nahuun am nekin mu'it nana, ho sairt ii, saa'?” Rarit nai' Yakop nataah am nak, “On nai, taat! Au 'fee ko sin rum-ruum, henati' ho mtoup kau nok neek mainuan ma marine.” 9 Mes nai' Esau nataah ee mnak, “Ako! Au 'mui' kein amsa' mfaun. Onaim kais amfee kau saa'-saa'.” 10 Rarit nai' Yakop nataah am nak, “Taat honi', kais mutenab on naan. Ho ro he mtoup sin, he nfain tanar nak, ho mtoup kau nok 'nima' nua. Natuin oras au iit ko mkumain fe'ena, on re' au 'iit Uisneno nkumain. 11 Onaim au 'toit ko taat honi', maut he ho mtoup au 'ok-soun ein nana, natuin baer ein nana sin ka ma'oos ein fa. Uisneno nneek niis kau, es na' In nfee kau are' saa'-saa', natuin au 'peruu tein.” Nai' Yakop nfuri' in tataf nai' Esau, tar antea in nroim. Onaim nai' Esau ntoup baer soun ein naan. 12 Rarit nai' Esau na'uab am nak, “Karu on nana te, hi mibarab he tnao nai! Au of a'nao aat ki.” 13 Mes nai' Yakop nataah am nak, “Anbain kuun, taat. Mkius kuum. Ri'aan ein fe' ba-baun ein. Onaim sin ka neu he nnaon fa rab-raab. Mu'it bian fe' nahoin ein. Karu hit takseke' sin he nnaon rab-raab neno mees ahaa te, mui't ein ia of anmaten ok-oke'. 14 Onaim reko nneis, ho muhuun. Hai mnao kre'o-kre'o ma mituin ki ambi hi kotim. Au of uum he 'makius ko on Seir.” 15 Rarit nai' Esau na'uab antein am nak, “Karu on nana te, au umaika' au ameput bian he nok ko, he sin nfanin maat ranan neu ki.” Mes nai' Yakop nataah am nak, “Kais muhaeb om! Asar au uhini 'rair ak ho mtoup kau goen.” 16 Anneen on nana te, nai' Esau nnao nasaitan sin, he nfain on Seir. 17 Mes na'ko bare nana te, nai' Yakop annao neu Sukot. Anbi nana, in nmoe' umi, ma nmoe' o'of neu in mui't ein ok-oke'. Etun sin nakanab bare nana, Sukot (re' in oet ni nak, ‘umi re' he natuan ntaah ein’). 18 Onaim, nai' Yakop sin ntean nok ao-mina' neun kuan Sikem et pah Kana'an, na'kon Padan Aram. Rarit sin paasn ein tenas, ma natuan npaumak-maak kuan naan. 19 Afu re' sin natuan re' naan, nai' Yakop ansoos nafeek ee na'ko nai' Hemor, nai' Sikem in amaf. In baen ee neik roi muti' fua' nautn es. 20 Anbi naan, in nbaik fatu he nmoe' mei fuat. Rarit in nakanab bare naan, El-Elohe-Isra'er (re' in a'moufn ii, ‘Uisneno naan, Isra'er in Uisneno’).
Nai' Sikem nkoin bi Dina nok a'seke'
1 Neot es, bi Dina, re' nai' Yakop ma in fee bi Lea sin an-feto, nnao nmakius nok ri'feot muinf ein bare naan. 2 Pah nana in uisf ee kaan ee, nai' Hemor, na'ko uuf Hebis. In an-moen je, kaan ee, nai' Sikem. Neot es, nai' Sikem niit bi Dina. Onaim in nheek je, rarit in nkoin je nok a'seke'. 3 Nai' Sikem antaam nekan bi Dina. Onaim, nai' Sikem nkopo' bi Dina, he karu reko te, bi Dina nroim natuin. 4 Rarit nai' Sikem natonan neu in aamf ee mnak, “Aam! Reko te, ho mtaman mtoit bi Dina, he au 'sao.” 5 Oras Nai' Yakop anneen nak anmui' atoin es ankoin in an-feto nok a'seke', in ntaa'-taa' kun, ma ka nmoe' fa saa'-saa'. Natuin oras naan, in an-moen ee, natukun mu'it et mnera' huun. Onaim in npao sin tar sin nfain neman ok-oke'. 6 Oras naan, nai' Sikem in amaf nai' Hemor, neem neu nai' Yakop, he ntaam antoit bi Dina. 7 Oras sin nua sin na'uab ein ate, nai' Yakop in an-moen ee, nfain neman na'kon mnera' huun. Onaim, oras sin nnenan nak nai' Sikem ankoin sin feotf ee nok a'seke' te, sin neek ein namenan, ma sin nato'on mates. Rarit sin na'uab ein am nak, “Rasi on re' naan, ka nabei' fa he njari nbi pah Isra'er! Onaim ka nabei' fa he hit tkonan moe' re'uf on re' ia.” 8 Onaim, nai' Hemor nfuri' nai' Yakop am nak, “Aam Ako! Batuur, au anah nai' Sikem antaam nekan ho an-feto bi Dina. In nroim he nsao. Onaim, au 'toit ko henati' karu reko te, mfee kai ho anah bi Dina he au anah nai' Sikem ansao. 9 Karu reko te, hit aanh ein anmatsaon. Hi an-moen ni, nsao hai an-feton. Ma hai an-moen ee, nsao hi an-feton. 10 Maut he hi msa' mitua mibua mok kai mbi re' ia. Hi mroim kim he mitua mbi mee-mee jah. Rarit hi mrakan, ma mipeni 'mu'if ambi ia.” 11-12 Rarit nai' Sikem na'uab nok bi Dina in amaf, ma in naof ein, am nak, “Hi mtoit saa'-saa' ah, au utuin ki. Hi he mtoit roit he utai ufani' bi Dina, ma noni fak-fauk ah, au 'baen! Asar hi mroim he au 'sao hi feto'.” 13 Mes nai' Yakop in an-moen ee nahini nrarin nak nai' Sikem nkoin bi Dina nok a'seke'. Onaim, sin na'uab anroro' nai' Sikem ma in amaf nai' Hemor. 14 Sin natahan am nak, “Ka nabei' fa he hai misaob hai feto' nok atoin ka ma'herit fa! Rasi nana, ntao namaeb kai! 15 Mes in rana 'poo' ji on nai. Hi atoni' bare ia, et ana'-ko'u, ro he mi'heri' on re' hai. 16 Karu hi mmoe' on nana te, na' hit matsao bian am bian. Ma hai msa' of mitua mibua mok ki mbi ia, he hit arkit atfain on pah es. 17 Mes karu hi ka mmoe' mituin fa hai roim ein, ma ka mroim fa he mi'heri' te, hai mtoup mifani' hai feto', rarit hai mnao misaitan bare ia.” 18 Nai' Hemor ma nai' Sikem antoup sin uab kein nana nok reko. 19 Mes nai' Sikem ka nsabaar naan fa in tuan, natuin in ntaam nekan bi Dina. On nai te, abitan pah naan anhormaat nai' Sikem. 20 Onaim nai' Hemor ma nai' Sikem nnaon neu baer feek rasi kuan naan, et eno' he ttaam teu kuan, ma nabuan am na'uab ein nok abitan pah naan. Sin na'uab ein am nak, 21 “Aok-bian arki! Atoin Isra'er sin re' ia nromin he nmonin nabu-buan nok kit anbi mamut. Onaim maut he sin natuan nok kit nbi hit pah re' ia. Hit pah re' ia seor mainuan neu kit ok-oke'. Hit an-moen ee, bisa nsao sin an-feton. Ma sin an-moen ee msa' bisa nsao hit an-feton. 22 Sin suma ntotin rais aan-aan es na'ko kit. Rasi nana es re', hit ar-arkit atoni' et ana'-ko'u, mnasif-mainuki' ro he ta'heri' on re' sin. 23 Karu hit tmoin tabu-bua tok sin, sin mui't ein, ma sin a'mui' kein ok-oke' njarin hit pusaak ein amsa', ai'? Onaim, reko nneis hit ttoup sin han-totis naan. Iim he ar-arkit ta'heri' ok-oke'! On mee? Hi mromi, oo?” 24 Rarit atoin ein re' nabuan nbin naan, nroim natuin nai' Hemor ma nai' Sikem sin uab kein naan. Onaim, atoin ein bare re' nana ok-oke', sin na'heir ein. 25 Neno tenu te, oras sin npaap ein fe' namenan, bi Dina in naof nai' Simeon ma nai' Lewi, nait neik sin suin ein ma ntaman amninu'-mninu' neu kuan naan. Onaim sin nroor niis atoin ein naan oke'. 26 Nai' Hemor ma nai' Sikem amsa', sin nroor sin. Rarit sin nok nafani' sin fetof bi Dina na'ko nai' Sikem in umi, ma nfanin on sin umi. 27 Rarit nai' Yakop in anah bian sin, ntaman neu pah naan, ma nasiik neik pah nana in afan. Sin nato'on, natuin nmui' tuaf nkoin sin feotf ee nok a'seke' nbi bare naan. 28 Sin nasiik neik biak ein sin baer ein oke' na'kon sin uim ne naan kein. Ma sin imsa' napoo' neik biak ein sin mui't ein na'kon mnera' huun. 29 Sin nheek neik bifeen guin, ri'aan ein, ma nasiik pah nana in baer ma'oos ein ok-oke'. 30 Oras nai' Yakop nahiin rasi nana te, in na'uab neu nai' Simeon am nai' Lewi mnak, “Nansa'am es hi mtao maan kit rais re'uf ia? Hi misusab kau! Of abitan Kana'an, abitan Peris, ma are' abitan pah re' ia, nato'on niis kau. Sin nmu'in tuaf namfau. Hit suma fua' fauk ah. Karu sin neman nbaan kit te, hit tre'u tkoon.” 31 Mes sin natahan nok haan to'os am nak, “Aam! Ho mutenab ate, mak ai' hai he mkonan sin he nmoe' hai feto' on re' bifee a'hake' aa, oo?”
Nai' Yakop sin naenan neu Betel
1 Rarit Uisneno na'uab nok nai' Yakop am nak, “Au re' ia, Uisneno re' nakriir On neu ko, oras ho maen mu'ko ho tata' nai' Esau. Oras ia, ho mfoo' nai mu'ko bare ia meu Betel. Mtea ne te, mbaik mei fuat ma mfee fua'-turu' neu Kau. Rarit ho mutua mubaar ambi nana nai.” 2-3 Rarit nai' Yakop na'uab nok in uum je naan ee ok-oke' mnak, “Oras ia, hit he tnao teu Betel. Unu' te, oras au 'bi susat nana'renat, Uisneno nturun kau nbi ne. Au he 'moe' mei fuat a'bi bare naan. Onaim, oras ia, hi maiti mporin hi faut-fuat re' maruun ein oke'. Mikninu' hi tuam, ma mseka' hi baer paken, natuin hit he ta'ruri' ma ta'bees teu Uisneno.” 4 Onaim sin nnona' sin faut-fuat re' maruun ein ma sin faorn ein amsa'. Rarit nai' Yakop antoup sin ma nsuub sin nbi hau ko' goes in uun, npaumaak kuan Sikem. 5 Oras nai' Yakop sin nnao nasaitan Sikem, Uisneno nfee rasi mtaus neu too pah anfuun am nateef, tar antea sin ka nabranin fa he ntaon rais re'uf neu nai' Yakop sin. 6 Onaim, nai' Yakop nok in too pukan nana, ntean nok ao-mina' nbin Betel et pah Kana'an. (Betel naan, unu' fe'e te, in kaan ee, Lus .) 7 Anbi naan, nai' Yakop nbaik fatu njair mei fuat. Rarit in nakanab bare nana nak El Betel (re' in oet ni nak, ‘Betel in Uisneno’), natuin unu' te Uisneno nakriir On neu nai' Yakop anbi naan, oras in naen nasaitan in tataf. 8 Anpaumaak kuan Betel, nmui' hau uu ko' goes re' atoni' nakaanb ee, Aron Bakut. In a'moufn ii nak, ‘hau me'me'ur’. In napein kanaf naan, natuin oras bi Ripka in bifee atitus, es re' bi Debora nmaet, sin nsuub ee nbi hau nana in uun. 9 Neon goes ii, oras nai' Yakop anfain neem na'ko Padan Aram, Uisneno nakriir On antein, ma nfee ne tetus. 10 Uisneno na'uab am nak, “Nmurai oras ia, ho kaan maan ka nai' Yakop fa ntein. Mes, Au ukanab ko eik kaan fe'u es, es re' Isra'er. 11 Au re' ia, Uisneno re' Akuaas isat. Onaim, ho mumsai' ma musuuf amfa-faun. Uuf-uuf ma pah-pah of anpoi ma nboor na'ko ho sufam ma ho ka'um sin. Ma ho msa' of musai' maan usif-usif. 12 Pah re' nahunu te Au 'fee je neu ho na'i nai' Abraham ma ho ama' nai' Isak naan, oras ia Au 'fee ko goe, ma ho sufam-ka'um sin.” 13-14 Uisneno na'uab anrair on nana te, nai' Yakop nahake' fatu nbi naan, he njair tanar mese' he namnau Uisneno In rais manba'an. Rarit in n'oop tua-min-kase, ma mina' anbi fatu naan, ma n'onen neu Uisneno. 15 In nakanab bare naan, Betel.
Nai' Yakop in fee bi Rahel anmaet oras nahoni'
16 Rarit nai' Yakop sin annaon nasaitan Betel. Oras sin he noi nhaumaak kuan Efrata (es re' Betlehem), ntea in orsa jen he bi Rahel nahoni'. Mes in nahoni' nok susat. 17 Oras in nnakes-kees fe', bifee atuis ee natoon ee mnak, “Ain Rahel! Amha'tain ho neek maan. Ho aanh ii oni' mone!” 18 Oras bi Rahel he noi natfeek, in nakanab ri'ana' naan, nai' Ben-Oni (re' in a'moufn ii, ‘ri'ana' na'ko au susat nana'renat’). Rarit in natfeek. Mes nai' Yakop nakanab ri'ana' nana, nai' Benyamin (re' in oet ni nak, ‘ri'ana' nbi au 'nimak a'ne'u’). 19 Rarit sin nsuub bi Rahel nbi ranan re' he tnao teu Efrata in ninen, (re' oras ia in kaan ee, Betlehem). 20 Rarit nai' Yakop nahake' faut natef es anbi naan. Bi Rahel in faut natef nana, fe' et na fe', ntea oras ia.
Nai' Yakop in aanh ein
21 Rarit nai' Yakop nanani' bare piut-piut. Neot es, in nahake' tenas anbi tobe baik ma'nopo' Eder in aon bian. 22 Oras sin nbin nana te, nai' Ruben antuup nok in aamf ee in fee pana' bi Bilha. Nai' Yakop nahiin rasi naan. Nai' Yakop in an-moen ee, tuaf bo'es am nua. 23 Bi Lea in aanh ein esan re': nai' Ruben (nai' Yakop in an-moen unu), nai' Simeon, nai' Lewi, nai' Yahuda, nai' Isaskar, ma nai' Seburon. 24 Bi Rahel in aanh ein esan re': nai' Yusuf ma nai' Benyamin. 25 Bi Rahel in ate bi Bilha in aanh ein esan re': nai' Dan ma nai' Naftali. 26 Rarit bi Lea in ate bi Silpa in aanh ein esan re': nai' Gat ma nai' Aser. Nahonis ri'an ein nana nbin Padan Aram.
Nai' Yakop in amaf nai' Isak anmaet
27 Rarit nai' Yakop nnao nmakius in amaf nai' Isak nbi Mamre npaumaak kuan Kiriat Arba (kuan naan, oras ia, in kaan ee, Hebron). Unu' te, in na'if nai' Abraham natua nbi bare nana msa'. 28-29 Nai' Isak nmoin naan toon nautn es bo' fanu te (180), na' in nmaet. Rarit in anah nai' Esau ma nai' Yakop, nsuub ee.
Nai' Esau in sufan-ka'un
1 Nai' Esau in sufan-ka'un sin esan re' ia. In kanan es antein, es re' nai' Edom. 2 Nai' Esau nsao ri'feot munif nua na'kon pah Kana'an. Tuaf es, bifee na'ko atoin Hetes, kaan ee, bi Ada, nai' Eron in an-feto. Es anteni' atoin Hebis. In kaan ee, bi Ohoribama. In aamf ee kaan ee, nai' Anah, ma in nai'f ee kaan ee nai' Sibeon. 3 Nai' Esau msa' nsao nai' Isma'el in an-feot goes, kaan ee bi Basmat. Bi Basmat in naof ee, es re' nai' Nebayot. 4 Nai' Esau in fee unu', bi Ada, nahoni' nai' Elifas. Bi Basmat nahoni' nai' Rehuel. 5 Rarit bi Ohoribama nahoni' nai' Yeus, nai' Yaram, ma nai' Kora. Nai' Esau in aanh ein ok-oke', nahoni' sin anbin pah Kana'an. 6 Neot es, nai' Esau nfoo' neu pah es a'teta', na'roo na'ko nai' Yakop. In neik in fee-anah, ameput, mu'it ma 'mui'f ein ok-oke'. 7 Nai' Esau nbaits on nok in orif nai' Yakop natuin sin mui't ein namfaun, ma sin a'mu'ik bian, amfaun ii kah. Onaim sin naheun bare nana jen. 8 Etun nai' Esau (es re' nai' Edom), nnao natua nbi baer ma'toe'f ein et Seir. 9 Nai' Esau in sufan-ka'un sin, re' sin nteek naan je mnak, ‘atoin Edom’, esan re' ia: Sin natuan nbin baer ma'toe'f ein et Seir. 10-13 Nai' Esau in fee bi Ada, nahoni' ri'an moen jes, kaan ee nai' Elifas. Nai' Elifas in an-moen ee tuaf niim, esan re': nai' Teman, nai' Omar, nai' Sefo, nai' Gatam ma nai' Kenas. Nai' Elifas anmui' fee nasi, kaan ee bi Timna. In nahoni' ri'an moen jes, kaan ee nai' Amarek. Nai' Esau in fee bi Basmat nahoni' ri'an moen jes, kaan ee nai' Rehuel. Nai' Rehuel napein an-mone haa, esan re': nai' Nahat, nai' Sera, nai' Sama, ma nai' Misa. 14 Nai' Esau in fee bi Ohoribama, re' nai' Anah in an-feto, ma re' nai' Sibeon in upuf naan, nahoni' ri'an mone teun, esan re': nai' Yeus, nai' Yaram, ma nai' Kora. 15-16 Nai' Esau in sufan-ka'un sin nbaits ok amfaun ma nfanin uuf-uuf. Es-es ate nok kuun sin a'nak uuf. Nai' Esau in an-moen unu nai' Elifas aanh ein, nfanin a'nakat neu uuf Teman, a'nakat neu uuf Omar, a'nakat neu uuf Sefo, a'nakat neu uuf Kenas, a'nakat neu uuf Kora, a'nakat neu uuf Gatam, ma a'nakat neu uuf Amarek. Sin arsin re' naan, nai' Esau nok in fee bi Ada sin suufk ein. 17 Nai' Esau in anah nai' Rehuel in aanh ein njarin a'nakat neu uuf Nahat, a'nakat neu uuf Sera, a'nakat neu uuf Sama, ma a'nakat neu uuf Misa. Sin arsin re' naan, nai' Esau nok in fee bi Basmat sin suufk ein. 18 Nai' Esau nok in fee bi Ohoribama sin aanh ein, njarin a'nakat neu uuf Yeus, a'nakat neu uuf Yaram, ma a'nakat neu uuf Kora. 19 Uuf ein re' naan ok-oke', nai' Esau in sufan-ka'un sin.
Nai' Seir in sufan-ka'un
20-21 Anbi bare nana msa', nmui' naan atoin Horis es, in kaan ee nai' Seir. In aanh ein nbaits ok anjarin uuf-uuf namfaun, es-es ate nok in a'nakat. Rarit in aanh ein njarin a'nakat neu uuf Rotan, a'nakat neu uuf Sobar, a'nakat neu uuf Sibeon, a'nakat neu uuf Anah, a'nakat neu uuf Dison, a'nakat neu uuf Eser, ma a'nakat neu uuf Disan. 22 Nai' Rotan in aanh ein, esan re' nai' Hori, ma nai' Heman (nai' Rotan in feotf ee es re' bi Timna). 23 Nai' Sobar in aanh ein, esan re': nai' Arwan, nai' Manahat, nai' Ebal, nai' Sefo, ma nai' Onam. 24 Nai' Sibeon in aanh ein, esan re': nai' Aya, ma nai' Anah. Nai' Anah in es re' niit oe maat maputu' nbi baer ruman oras in natuuk in aamf ee bikaes keledai ngguin. 25-26 Nai' Anah in an-feot goe, es re', bi Ohoribama. Ma in an-moen je, es re' nai' Dison. Nai' Dison in aanh ein, esan re': nai' Hemdan, nai' Esban, nai' Yitran, ma nai' Keran. 27 Nai' Eser in aanh ein, esan re': nai' Birhan, nai' Sa'aban, ma nai' Akan. 28 Nai' Disan in aanh ein esan re': nai' Us ma nai' Aran. 29-30 Onaim, a'nak uuf ein atoin Horis sin, esan re': nai' Rotan, nai' Sobar, nai' Sibeon, nai' Anah, nai' Dison, nai' Eser, ma nai' Disan. Sin arsin natuan nbin pah Seir.
Pah Edom in uisf ein
31 Oras pah Isra'er ka nmui' fa usif fa fe'e te, anbi pah Edom anmu'i nrair usif. Sin kaang kein anmaktun-tuin ein, esan re': 32 Sin nait nai' Beor in anah nai' Bera, njair usif nbi kota Dinhaba. 33 Oras nai' Bera nmaet, nai' Yobap anseun ee njair usif. In aamf ee, kaan ee nai' Sera na'ko kuan Bosra. 34 Oras nai' Yobap anmaet, nai' Husam nseun ee njair usif. Nai' Husam naan, na'ko atoin Temanas sin pah. 35 Oras nai' Husam anmaet, nai' Hadat nseun ee njair usif. In aamf ee, kaan ee nai' Bedat na'ko kuan Abit. (In re' naan, es re' niis atoin Midian sin, oras sin nmakenan nbin pah Moab.) 36 Oras nai' Hadat anmaet, nai' Samra nseun ee njair usif. Nai' Samra naan, na'ko kuan Masreka. 37 Oras nai' Samra nmaet, nai' Saul anseun ee njair usif. Nai' Saul naan na'ko kuan Rehobot et noe je ninen. 38 Oras nai' Saul anmaet, nai' Ba'al-hanan nseun ee njair usif. In aamf ee kaan ee, nai' Akbor. 39 Oras nai' Ba'al-hanan anmaet, nai' Hadar anseun ee njair usif. Nai' Hadar naan, na'ko kuan Pau. In fee je, kaan ee bi Mehetaber. Bi Mehetaber in aamf ee, kaan ee nai' Matret. Ma in nai'f ee, kaan ee nai' Mesahap. 40-43 Onaim, a'nak uuf ein re' npoi ma nboran na'kon nai' Esau in suufk ein es re': nai' Timna, nai' Arwa, nai' Yetet, nai' Ohoribama, nai' Era, nai' Pinon, nai' Kenas, nai' Teman, nai' Mipsar, nai' Magdiel, ma nai' Iram. Sin es-es ate, nakanab sin pah npaek kuuk sin kaan kein. Onaim sin re' naan ok-oke', nai' Esau in sufan-ka'un. Nai' Esau njair aam uuf neu atoin Edoms sin.
Nai' Yakop anfain neem on pah Kana'an
1-2 aRe' ia, nai' Yakop sin reta'. Neon goes ii, nai' Yakop nfain natua on pah Kana'an antein. Bare naan, in amaf nai' Isak natua nbi na na'ko unu'.
Nai' Yusuf nok in taatf ein
2 bOras naan, nai' Yakop in aanh es na'ko in fee bi Rahel, kaan ee nai' Yusuf. Oras in nmoin naan toon bo' es am hiut, in nok in taatf ein nati' te sin nnaon ntiut sin a'bibin ma 'bib-kasen bu'-bua'. In taatf ein, anah na'ko nai' Yakop in fee bi Bilha ma bi Silpa. Mes nai' Yusuf re' ia, in aktuta' uab neu in amaf, nmatoon nok re' in taatf ein sin moe' kein. Sin nfeen nai' Yusuf baur fe'u reok goes 3 Oras nahoni' nai' Yusuf, nai' Yakop namnais jen. Etun in nneek nanesib nai' Yusuf na'ko in anah bian sin. Neot es nai' Yakop ansoo baru mnaun es reok ni kah, ma nfee je neu nai' Yusuf. 4 Oras in taatf ein nitan nak sin aamf ee nneek nanesib neu nai' Yusuf ate, sin nsaken nai' Yusuf, tar antea sin ka nromin fa he na'uab ein nok ne. 5-7 Faaj es, nai' Yusuf namnei. Rarit in natoon amneit naan neu in taatf ein am nak, “Hae! Hi mneen fe'! Au umnei mnak hit tfuut hit mak-gandum sin anbi rene. Onaim au maak reif ein re' mafuut ein naan, anfeen anhaken amneof ah. Mes hi maak ein nhaken nfuun naan aung guin, rarit na'ruir ein ma na'besan neu aung guin.” Annenan on nana te, in taatf ein nsaken ntein ee. 8 Rarit sin nnakaina' nai' Yusuf am nak, “Hoe! Ho mak oni' ho he mjair usif he muprenat kai, oo?” Sin nsaek ne ma'tani', natuin in natoon amneit naan neu sin. Nai' Yusuf natoon in amneit 9 Rarit nai' Yusuf namnei ntein. Onaim in natoon neu in taatf ein am nak, “Hae! Au umnei 'tein. Au iit manas, funan, ma kfuun bo'es am mese'. Sin na'ruir ein ma na'besan kau rek-reko.” 10 Oras nai' Yusuf natoon anrair mneit naan neu in amaf ma in taatf ein te, in aamf ee napuun nai' Yusuf ma nakain ee ma'tani' mnak, “Mnei saa' na es re' naan! Ho mutenab mak, au ok ho aina', ma sin ho tata' sin neman he nneek ho haem ein nana, oo? Hoe! Ho reok mi!” 11 Onaim, nai' Yusuf in taatf ein nsaken batuur-batuur. Mes in aamf ee natenab mneit ein naan anbi in nekan.
Sin na'sosa' nai' Yusuf he njair ate nbi pah Masir
12 Neot es, nai' Yusuf in taatf ein neik sin aamf ee in a'bibin ma 'bib-kasen nnaon npaumak-maak kuan Sikem. 13 Onaim, in aamf ee nak, “Usu! Ho tata' sin natukun mu'it npaumak-maak Sikem. Onaim ho mubarab he mnao mkius miit sin.” Nai' Yusuf nataah am nak, “Reko, tua.” 14 Onaim in aamf ee nak, “Ho mnao mkius miit ho tata' sin nok mu'it ein fe'. Sin on mee? Rekon aa oo, ai' on mee? Rarit ho mfain uum he mutoon kau.” Rarit nai' Yusuf nnao nasaitan mnera' pah Hebron ma nkono ntea Sikem. 15 Antea nee te, in naim sin nfuun am nateef anbin mnera' huun naan. Ma in nateef tuaf es. Tuaf naan nataan ee mnak, “Ho maim saa'?” 16 Nai' Yusuf nataah am nak, “Aam, au aim sin au tata'. Sin napoo' neik hai mui't ein he na'eku' sin npaumak-maak bare ia. Ai' ho miit sin, tua?” Nai' Yusuf in taatf ein niit ee neem 17 Tuaf naan natoon ee mnak, “Sin ka etan fa ia ntein. Mes sin nak am he nnaon ntein ein npaumak-maak kuan Dotan.” Rarit nai' Yusuf annao natuin sin, tar in niit sin anbin Dotan. 18 Mes oras nai' Yusuf fe'e nbi 'roo, sin niit anraar je. Onaim sin nma'akoran he nroor goe. 19 Rarit sin nma'uab ein am nak, “Hi mkius miit. Amneit ee neem een! 20 Naa, iim nai he troor tisan. Rarit hit tait itpoirn ee neu kon hain es nbi ia. Rarit hit tatonan ama' mtak, mui' fuing guin npius goe ma neku nraar je goen! Maut he hit tkius tiit in amneit ein on mee!” 21 Anneen on nana te, in tataf nai' Ruben naim rana 'po'i he nsoi naan nai' Yusuf. Onaim in nakaina' in oirf ein am nak, “Hae! Hit kais atroor goe! 22 Reko nneis, hit okar tataam ee neu kon hani' re' ia. Bare ia, baer ruman. Onaim ka tiit fa tuaf re' nahiin mo'et ia. Asar hit kaisa' tniim ne he naa' ii nsai.” In na'uab on naan, natuin in he nafeti' nai' Yusuf he nreung goe he nfain. Sin ntitar nataam nai' Yusuf neu kon hani' 23 Oras nai' Yusuf neem antea te, sin nheek je ma nhoro' nain in baur reko naan. 24 Rarit sin nhera nfoont ee, ma ntitar nataam ee neu kon hani' naan. 25 Rarit sin ntebi nfanin ma nbukaen. Sin fe'e nbukaen on nana te, nok askeken sin niit atoni' pukn es neman. Pukan amneemt ein naan npaken bikaes unta. Sin nasaeb ein brua' he nraakn ein. Baer raakn ein naan es re': hau fo meni in oen, bumbu huma'-huma', ma hau re'u huma'-huma'. Nkis-kisun ate, pukan amneemt ein nana, atoin Ismaeras sin re' neman na'kon kuan Gireat. Sin he nnaon neu bare 'roo neu pah Masir. 26 Rarit nai' Yahuda na'uab neu in orif-taatf ein mnak, “Hae! Reko nneis on nai. Hit kais atroor goe. Hit tapein saa'? Maski on mee msa', hit ka neu he ta'koro taan fa in naa'. 27 Reko nneis hit ta'soos ee neu atoin Ismaeras sin. Maski hit tmoo' je on mee msa', hit oir hoin aa. Onaim hit kaisa' tniim ne.” Rarit sin nmaktuina' rasi naan. Sin ma'akoran he na'sosa' nai' Yusuf neu arakan sin 28 Onaim, oras atoin araakn ein naan he nkonon ate, nai' Yusuf in taatf ein nheer napoitn ee na'ko kon hani' naan. Onaim sin na'soos ee neu atoin Ismaeras sin. In oosn ii roi muti' fua' bo' nua. Rarit asoost ein nana neik nai' Yusuf neu pah Masir. 29 Oras sin na'sosa' nai' Yusuf ate, nai' Ruben ka nahiin fa. Onaim oras in nnao neu kon hani' nana te, in naskeek, natuin nai' Yusuf ka et na fa heen. Rarit in npius nakrati' in paken anbi in aon, natuin in nsuus anmaet. 30 Onaim in ntebi nfain neu in oirf ein am nak, “Airoo! Nai' Usu ka et fa koon ee! Oras ia au he unsaa a'tein?” 31 Rarit sin nroro 'biib jes. Sin nait nai' Yusuf in baur reko naan, ma nateep ee neu naa' naan. 32 Rarit sin nait baur manaa' naan ma neik je neu sin amaf, ma natonan am nak, “Aam! Hai mait baru ia. Mkius miit ee. Kais-kaisa' nai' Usu in baru.” 33 Ankius baru nana te, nai' Yakop nahiin naan je neu in aanh ee baru. Onaim in nataah am nak, “Airoo! Batuur, au aanh ee in baar gui es re' ia. Ka tahiin neu mui' fuing guin npius niis ne et mee. Airoo! Au aanh ee nmate nrair!” 34 Rarit nai' Yakop anpius nakrati' in baru, ma ntainuus a'kaor bijae maa', natuin in nsuus ma nnana'reen. In nkae nme'me'ur a'roo neu in anah naan. 35 In an-moen ne ma an-feet goe neman ma nhaan-mau goe, mes ka nabei' je fa. In na'uab am nak, “Kahaf! Au of a'suus ma nnana'reen tar antea au' maet. Natuin au ka neu he 'nika' fa au anah re' ia.” Onaim nai' Yakop ansuus ma nnana'reen piut, natuin in namnau in anah nai' Yusuf. Nai' Yusuf njair ate nbi pah Masir 36 Oras nai' Yakop fe' ansuus on nana te, araakn ein naan ntean pah Masir. Sin neik nai' Yusuf ma na'soos ee neu kaes ko' goes. In kaan ee, nai' Potifar. In re' ia, usif pah Masir in a'naak paot.
Nai' Yahuda ma in aan nanef bi Tamar
1 Rarit nai' Yahuda nnao nsaitan in orif-tataf sin, ma natua nok in soob reko nai' Hira anbi kuan Aduram. 2 Anbi naan, anmui' a'naef es, atoin Kana'as, in kaan ee nai' Sua. Nai' Yahuda anroim in aan feet goes. Rarit in nsao goe. Onaim, in nahoni' ri'an mone nmaktun-tuin ein. 3 An-moen uun ee, sin nakaan be nai' Er. 4 An-mone tnaan ee, sin nakaan be nai' Onan. 5 Rarit an-moen muun je, kaan ee, nai' Sera. Oras nahoni' nai' Sera, sin nfo'on neu kuan es, in kaan ee, Kesip. 6 Oras an-moen unu' nai' Er na'nae te, nai' Yahuda nnao neik oko'-aruk ma ntoit ne ri'feot munif es, in kaan ee bi Tamar. Rarit nai' Er ansao bi Tamar. 7 Mes nai' Er naan atoin maufinu. Es nana te, Uisneno nhukun na'mate. Onaim nai' Er nmaet, mes ka nmui' fa anah. 8 Rarit nai' Yahuda nreun an-mone tnaan ee mnak, “Onan! Ho tata' nmate nrair, mes in ka nmui' fa anah. Onaim oras ia, tatuin atoni mnais ein sin haart ii te, ho ro he msenu' ho tata' he msao in fee. Nok ranan nana te, maut he ho mupein ri'ana' neu ho tata' in sapaan.” 9 Nai' Onan nahiin harat naan. Mes in ka nroim fa he nmui' anah neu in tataf nai' Er. Onaim, karu in ntuup nok bi Tamar ate, in akmii oe ne n'oop ee npoi henati' bi Tamar kais nahoni'. 10 Nai' Onan anmoe' on naan, onaim nato'ob niis Uisneno. Etun Usi' nhukun niis ne msa'. 11 Oras nai' Yahuda nkisu te in an-moen nua' ein re' ansao bi Tamar nana nmaten ate, in natiun gon. In natenab, kais-kaisa' in an-moen aheet susu nai' Sera nsao bi Tamar ate, of in nmate msa'. Onaim in nnao natonan in nanef bi Tamar am nak, “Tamar! Reko nneis ho mfain on ho mahoin ein ee. Karu au anah nai' Sera na'nae te, na' ho mfain uum he msao.” Rarit bi Tamar anfain. 12 Ka 'roo fa te, nai' Yahuda in fee je nmaet. Onaim in nkae ma nsuus tar antea neon nuukt ein namsopun te, in no'en in partei nai' Hira, he sin nua sin annaon neu kuan Timna. Anbi naan, atoin ein ankateer 'bib-kaes ne sin fung kein, he na'sosa' sin. Akateers ein namfa-faun. 13 Onaim biak ein natonan bi Tamar am nak, “Ho aam baba' annao et Timna. In nok et re' akateer funu 'bib-kaes ne sin fesat.” 14 Oras naan, nai' Yahuda in an-moen aheet suus goe na'nae nrair. Mes bi Tamar nahini nrair nak in aam baabf ee ka nroim fa he nai' Sera nsao goe. Onaim bi Tamar naim rana 'po'i he ntui' in sapaan. Onaim in nsenu' nain in tai-baun ein, rarit in npaek tai-paek reko. In npaek po'uk ma nsakruub naan in human. Rarit in nnao ntoko nbi eno he ttaam teu kuan Enaim, nbi haa re' ranan he tnao teu Timna. 15 Oras nai' Yahuda nnao npeo' kuan naan in rana 'tamas, in niit bifee jes. In natenab nak oni' bifee a'hake', natuin bi Tamar in paekn ee on re' bifee a'hake' sin. Annes-neis in nkuub naan in human. 16 Nai' Yahuda ka nahiin naan fa nak, bifee naan in aan nanef. Onaim in nnao npaumaak bifee naan, ma nataan ee mnak, “Hae! Karu ho mromi te, au 'tuup ok ko. Ho mtoit fauk?” Mes bi Tamar nataah am nak, “Es re' ho, tua. Ho roim maan on mee te, au utuin ah.” 17 Nai' Yahuda ntaabr ee mnak, “Au 'fee ko 'bib jes ate, ho mromi, oo?” Rarit bi Tamar nataah am nak, “Reko, tua. Asar ho mfee kau baer es fe'. Reka'-reka' ho msonu' 'bibi naan, na' ho mtoup mufani' ho baer tarun sin.” 18-19 Onaim nai' Yahuda nataan antein ee mnak, “Au 'he 'fee ko baer saa'?” Bi Tamar nataah am nak, “Aam, ho mfee kau baer maruna' re' ho mu'heek je naan nok nain in tanin. Rarit ho teas nana msa'.” Onaim nai' Yahuda nfee baer ein naan. Rarit sin nua sin nmakonin. Rarit bi Tamar anfain. In nhoro' nain in tai-paek rekon naan ma in po'uk, rarit in npaek nafani' in tai-baun ein. Namuni te, bi Tamar nnaben nak in na'apu' nrair. 20 Ka roo' fa nteni' te, nai' Yahuda ntoit babat na'ko in soob reko nai' Hira mnak, “Ho meki 'bibi ia neu bifee a'hake' re' et Enaim, he mtoup maan kau au baer ein re' in nnaa' sin.” Nai' Hira nnao ntea Enaim. In nataan neu-mneem, mes ka niit ai' nateef fa bifee naan. 21 Onaim, in nataan abitan bare nana mnak, “Au he utaan aan, tua. Hi miit bifee a'hake' es re' nati' te antok-toko nbi kuan ee in eno' 'taam ne, oo? In et mee?” Mes sin natahan am nak, “Aam, ka tiit fa bifee a'hake' et ia.” 22 Onaim nai' Hira nfain neem neu nai' Yahuda. In natoon am nak, “Au ka uteef ok aan fa bifee naan. Au aim ma 'hae' maet, mes abitan nee nak, ka tiit fa bifee a'hake' nbi naan.” 23 Nai' Yahuda nataah am nak, “Maut he in paar baer ein naan! Asar biak ein kais namaeba' kit. Natuin au he' baen, mes hit ka tateef fa bifee nana te.” 24 Ankoon funan teun on nana te, tuaf bian nnaon ma natonan nai' Yahuda mnak, “Ho aan nanef bi Tamar naan, anmo' jon on re' bifee a'hake'. Oras ia in na'apu'.” Anneen on nana te, nai' Yahuda nato'o nmaet. Rarit in nreun tua-atonas nana mnak, “Mnao mheer meik kau bifee naan neem neu ia, he tout goe 'hon-honis!” 25 Rarit sin nnaon ma nheer neik bi Tamar. Mes in nait napoin baer mamarak ma teas naan. Onaim in nreek tuaf he nnao natoon neu in aam baabf ee mnak, “Aam, mtae murek-reko baer ein re' ia fe'. Tuaf re' nmui' baer mamarak ma teas re' ia, in es re' na'apub kau.” 26 Ankius niit baer ein nana te, nai' Yahuda nahiin nain nak baer ein naan, ro in na. Rarit in natoon am nak, “Batuur! Bifee nana ka nsaan fa. Au es asanat. In ntoom. Etun au ro he usaob ee nok au anah nai' Sera. Mes au es ka 'romif. Mifeit ne nai!” Rarit nai' Yahuda ka ntuup nabua ntein fa nok bi Tamar. 27 Bi Tamar in oras he nahoin ii ntea goen. Onaim in nahoni' ri'aan koen. 28 Oras in nahoni', ri'aan es napoit nahunun in a'niman. Bifee atuis mahoin ee nfutu' ab me'e nbi in a'niman. In nak, “Re' ia, es re' ahunut.” 29 Mes ri'ana' naan anheer nataam in a'niim ne nfain. Rarit akoet ee npoi nahuun. Onaim bifee atusis naan nak, “Hoe. Ho ro ma'tain, oo! Etun ho mu'siti' ma mpoi muhuun!” Rarit sin nakanab ri'ana' nana nai' Peres (re' in oet ni nak, ‘na'sete' npoi’). 30 Rarit na' in orif re' mafuut ab me'e nana npoi. Sin nakaan be nai' Sera (in oet ni nak ‘me' rare’).
Nai' Yusuf, ma kaes ko'u Potifar in fee
1-2 Neon goes ii, atoin Ismaeras sin neik nai' Yusuf nnao neu pah Masir. Anbi naan, anmui' kaes ko' goes, in kaan ee, nai' Potifar. In re' naan, a'nakat neu are' soraurs ein re' npao usif pah Masir in sonaf. Nai' Potifar ansoos nai' Yusuf na'ko araakn ein naan, he in nait je njair ate nbi in umi. Anbi naan, UISNENO anturun nai' Yusuf. Es nana te, in meup nein nanaob ok nok reko. 3 In aam uisf ee nkius nai' Yusuf in mepun nana ro reko te, in nahiin batuur-batuur nak UISNENO nturun nai' Yusuf. 4 Es nana te, aam usi' nana nromi haa nai' Yusuf, ma npirsaa je. Onaim in nait nai' Yusuf njair mandoor neu in umi. In imsa' nnona' in uum je he nai' Yusuf an'urus. In baer pusaak ein amsa', nai' Yusuf es an'urus sin. 5 Natuin nai' Yusuf natua nbi naan, es na' Uisneno nfee tetus neu in aam usif, atoin Masir naan. In uum je naan ne, in pusaak ein, in rene-po'on, ma in mepun nana nanaob ok nok reko. 6 Oras nai' Potifar niit nai' Yusuf in meupn ein ok-oke' reko, in ka natenab fa saa'-saa'. In nahini haa he naah. Oras naan, nai' Yusuf in aon, ma in human, reokn ii kaheen. 7 In natua nbi nee fe' ka 'roo fa, mes nai' Potifar in fee je, ntaam neek neu ne. Onaim in na'oki' nai' Yusuf he karu reko te sin nua sin antupan. 8 Mes nai' Yusuf ka nroim fa. In nataah am nak, “Kais on naan, ain! Au aam usi' Potifar anfee kau kuasa he 'urus in umi-mone' sin. 9 Anbi umi ia, ka tiit fa tuaf re' nnaa' aprenat nneis kau. Aam usi' nana'at kau are' sa'-saa' he 'urus sin. Mes in ka nana'at ko fa neu kau. Nok ranan mee, au he 'moe' rais tafi' re' ia? Rasi nana msa', nasuir nok Uisneno In romin!” Nai' Potifar in fee je na'aunu' nai' Yusuf 10 Mes maski on nana msa', nai' Potifar in fee je na'oki' nai' Yusuf piut. Mes nai' Yusuf ka ntoe natuin ee fa. 11 Neot es, nai' Yusuf antaam neu uum je he nkius mepu. Neno naan, ka tiit fa tuaf es anbi naan. 12 Onaim bifee naan neem ma nnaa' nai' Yusuf in baru, ma nheer ee mnak, “Uum nai! Hit nua kit atmes-mees. Uum he hit ttuup nai.” Mes nai' Yusuf ka nroim fa. Onaim in nfoerait, tar antea in baru naan natpuu' nain. Onaim, in naen anpoi. Mes bifee nana nnaa' namaika' in baru. 13 Oras nai' Potifar in fee je niit nai' Yusuf naen nasaitan in baar goe te, 14-15 in no'en ameupt ein, ma natonan sin am nak, “Hae! Hi iim he mkius miit! Fe'ena atoin Ibrani naan, antaam anbi au ke'en. In he nmoe' re'uf neu kau, mes au 'koa' uher-heer. Mkius miit, in naen anporin in baru. Au moonj ii, in nait neik naan kuun atoin maufinu ia he ntao namab-maeb ahaa kit!” Nai' Potifar in fee je nakrira' nai' Yusuf in baru 16 Onaim nai' Potifar in fee je, nnaa' baru naan, tar antea in moonj ee nfain neem. 17 Oras in moonj ee nfain neem ate, in natoon ee mnak, “Aam! Atoin Ibrani re' ho mait meik je neem nok kit nana, fe'ena in ntaam neu nbi au ke'en. In he nkoin kau nok a'seke'! 18 Mes au 'koa' uher-heer ma 'o'en ameupt ein. Onaim in naen namneuk, namaika' nain in baru ia.” 19 Anneen in fee je natoon on nana te, nai' Potifar nato'on nmaet. 20 Onaim in nreek tuaf ma nnaon nheek nai' Yusuf. Onaim sin nataam ee nbi uisf ee in bui. 21 Mes UISNENO ka nnika' fa nai' Yusuf. Etun In ntuurn ee piut, tar antea a'naak bui nana nneek ah ee. 22 Rarit in npirsai nai' Yusuf. Onaim, in nfee ne kuasa he n'urus atoin buing guin ma are' kanan mepu nbi buuj ee nanan. 23 Es nana te, a'naak bui naan in ka natenab fa meup saa'-saa' nbi bui. UISNENO nturun nai' Yusuf piut-piut, es na' in mepun nbi buuj ee nanaob ok nok reko.
Atoin bui nua namnein. Nai' Yusuf natoon sin oet kein
1-3 Anbi bui naan, anmui' naan a'naak mepu tuaf nua re' anmeup nitan anbin usif Masir in sonaf. Es na'naak mepu barab roitan mninut neu usif; ma es antein na'naak mepu barab roitan kokis neu usif. Sin nua sin anmo'en sanat neu usif. Es na' uisf ee natoo', ma nataam sin neu bui. Onaim sin nabuan bare mese' nok nai' Yusuf anbin bui naan. 4 Rarit a'naak bui naan naprenat nai' Yusuf he n'urus a'nakat tuaf nua re' naan. Sin nabuan nbiin bui naan, tar antea oni' toon es-a'nua. 5 Faaj es ate, tua nua' ein nana namnein. Es-es ate, nok in amneit aa kuun. Ma mneit ein nana msa' sin oet kein ka huma' mese' fa. 6 Noka' on nana te, nai' Yusuf neem ma niit atoin nua' ein naan. Sin huum fosun. 7 Onaim in nataan sin am nak, “Nansa'am es neno ia hi mhuum fous on naan?” 8 Onaim sin natahan am nak, “Fini na, hai mimnei. Mes hai ka mihiin fa in oten.” Rarit nai' Yusuf nataah sin am nak, “Ka tiit fa mansian es, re' he nahiin nain mneit ein sin a'mouf kein naan, arahaa Uisneno es re' nahiin sin. Mitoon miit kau hi mneit ein naan. Maut he au aim iit sin a'moufk ein na'ko Usi'.” 9 Rarit, a'naak mepu barab roitan mninut neu usif naan, natoon am nak, “Onai. Au umnei mnak, au iit hau anggor uu' goes, 10 taef teun. Hau naan nanoo, nasuuf, ma nafua sana' mfa-faun tar namnatun. 11 Onaim au iit, au 'naa' uisf ee in a'koom oe. Onaim au ait hau nana in fuan amnatus, ma 'aes neu 'koom oe naan. Onaim, au 'noon ee neu uisf ee he nbukae.” 12 Anneen on nana te, nai' Yusuf natoon ee mnak, “Aam. Amneit nana in oet ni on nai: taef teun re' nana, in oet ni neno teun. 13 Anbi neno teun amnemat re' ia, uisf ee of napoitan ko na'ko bui ia. Rarit in nasaeb nafani 'piru'-baru neu ko, he mu'naka mfain meu barab roitan mninut neu ne. 14 Karu ho uam naan reko te, kais amnikan kau, goo! Karu ho mneek kau te, mturun kau he mutoon neu uisf ee, he napoitan kau na'ko bare ia. 15 Natuin, karu he tkius raas ji in amneon ii te, sin nait kau nok a'seke na'ko abitan Ibrani sin pah. Anbi bare ia msa', au ka 'moe' fa rais re'uf mese' msa'. Mes sin nheek kau ma nataam kau neu bui, on re' atoin maufinu.” 16 Anneen niit mneit nana in oet ni reokn ii kah, on nana te, a'naak barab roitan kokis neu uisf ee natonan nai' Yusuf am nak, “Ba'e! Au msa' umnei on nai: au 'suu aba' ktuta' teun. 17 Aba' ktuta' faof ne, matua' nok kokis huma'-huma' neu usif. Mes koor nein neman ma nabroor naan koiks ein re' nbin au 'nakak.” 18 Anneen on nana te, nai' Yusuf nataah am nak, “Aam! Ho mneit nana in a'moufn ii on nai: Aab teun ein naan, sin oet kein neno tenu msa'. 19 Neno teun amnemat re' ia, uisf ee of anreek tuaf he neem ankeut nain ho 'nakam. Rarit sin nkaton ho aom a'naen naan neu nii ma'aika'. Onaim koor nein neman, npisun ma nabroor naan ho siis maan oke'.” 20 Neno tenu nkoon on nana te, nateef nok uisf ee in neon manohin. Onaim, in nmoe' fesat neu in a'naak meupn ein ok-oke'. In naprenat he sin nnao napoitan a'naak mepu tuaf nua re' etan bui. 21 Rarit in nasaeb 'piru'-baru' nfain neu a'naak barab roitan mninut, he nanaob nafani' in mepu. 22 Mes a'naak barab roitan kokis neu usif naan, sin nkaton in aon ee, natai nok saa' re' nai' Yusuf in uaban. 23 Mes a'naak barab roitan mninut naan, nnikan nain nai' Yusuf.
Nai' Yusuf na'oteb usif pah Masir in amneit ein
1 Toon nua namsoup on nana te, usif pah Masir namnei. In namnei mnak, in nhake nbi noe Nil in ninen. 2 Nok askeken ate, in niit bijae hiut npoka nmaten. Bijaen ia sin aok ein narim-riman. Sin npoin na'ko noe naan in nanan, ma nekun huun anbin naan. 3 Rarit anmui' naan bijae hitu ntein, npoin na'ko noe naan. Sin aok ein, nmaknau bousen. Sin nhaken npaumaak bijae apookt ein naan. 4 Rarit bijae amaknaut ein naan, n'oor naan bijae apookt ein naan. Onaim uisf ee naskeke nfeen ah. 5 Onaim mes in ntuup anfain, ma nfini ntein. In namnei ntein. In niit maka' puni' hiut, npoi na'ko maka' uu' goes re' mria ni kaheen. Sin puin kein ko'u ma ma'afa'. 6 Rarit in niit antein, maka' puni' hiut. Mes ain mapuut ee nfuu sin ma namnenen. Ma sin n'aap ein. 7 Onaim maak aap ein naan n'oor naan maak mapuin ein naan. Rarit uisf ee nfeen. Na' in nahiin nak, in namnei ntein. 8 Nmeu nfiin on nana te, uisf ee in teenb ee ka ntainina' fa. Onaim in naprenat he no'en are' kanan meo ma ahinit anbi pah Masir. Rarit in natonan sin amneit ein naan, mes ka tiit fa tuaf es re' bisa na'oteb sin. A'naak barab roitan mninut na'uab neu usif 9 Rarit a'naak barab roitan mninut neu uisf ee, na' namnau niit nai' Yusuf. Onaim, in nnao natoon neu uisf ee mnak, “Au 'baiseun, tua! Ho ate kau gui 'saan. 10 Unu' te, oras usi' ho museus kau ok au aok-bian, ma mutaam kai mbi bui, 11 faaj es ate, hai nua kai mimnei. Es-es ate, nok in amneit aa kuun. Ma mneit ein nana msa' sin a'mouf keni ka huma' mese' fa. 12 Anbi bui naan, nmui' atoin Ibranis es, fe' munif. A'naak bui je nait je nfain a'naak mepu nbi bui. Hai mitoon ee hai mneit ein naan. Onaim in nbaan sin. 13 Na'ko rasi naan, aam usi' ho muna'at mufani kau au mepu. Mes au aok-bian ee, ho mhukun mu'mate. Rasin re' naan, natai nok saa' re' atoin Ibranis nana na'oteb sin!” 14 Anneen on nana te, uisf ee nreek tuaf he naen rabah he neik nai' Yusuf na'ko bui. Rarit nai' Yusuf nnao nkeu ma nsenu' in paken, ma nnao he nateef nok usif. 15 In nema ntea te, uisf ee na'uab neu ne mnak, “Anah! Au umnei, mes ka tiit fa tuaf es re' nabei' he nnbaan mneit naan. Mes nmui' tuaf re' natoon kau nak ho bisa.” 16 Onaim nai' Yusuf nataah am nak, “Aam usi'. Ho ate kau msa' ka uhiin fa saa'-saa'. Uisneno nmees kuun es anbaan are' kanan amneit. In of oni' anroim he natoon ko rais reko, tua.” 17 Rarit uisf ee natoon amneit ein naan. In nak, “Anbi au mneit naan, au 'hake 'bi noe Nil in ninen. 18 Onaim anmui' bijae apokat hiut, sin ao kein narim-riman. Sin npoin na'ko noe naan, ma nnaon nekun huun nbin noe nana in ninen. 19 Rarit anmui' bijae hitu ntein neman. Mes bijaen nana maknau-bousen. Au ka ii-iit fa bijae human on re' naan anbin pah Masir ia! 20 Mes au 'sanmaak! Natuin, nok askeken ate, bijae amaknau-bousen naan, n'oor naan bijae apookt ein. 21 Sin n'oro nrair sin on nana msa', bijaen nana nmaknaun baar ah. Rarit au uskeke' 'feen ah. 22 Rarit au 'tuup a'fain ma 'fiin. Onaim au umnei 'tein. Au iit maka' puni' hiut, npoi na'ko maka' uu' goes re' mria ni kaheen. Sin puin kein ko'u ma ma'afa'. 23 Rarit, au iit a'tein, maka' puni' hiut. Mes ain mapuut ee nfuu sin ma namnenen. Ma sin n'aap ein. 24 Onaim maak aap ein naan n'oor naan maak mapuin ein naan. Rarit au 'feen. Onaim, au utoon amneit ein ia neu ahiint ein. Mes ka nmui' fa tuaf es re' nabei' he nbaan mneit ein naan.” Nai' Yusuf nbaan uisf ee in amneit ein 25 Rarit nai' Yusuf natoon am nak, “Aam usi'. Amneit ein nana sin a'mouf kein mees ah. Uisneno natoon nain ko, tua, saa'-saa' re' In he nmoe' je. 26 Amneit ein nana sin a'mouf kein on nai: bijae hiut apookt ein naan, ma maak hiut mapuin ein naan, es re' oras mnaaht ein nho-hoen toon hiut. Sin a'mouf kein mees ah. 27 Ma bijae hiut amaknaut ein naan, ma maak puin hiut a'aap ein naan, es re' oras amnahas toon hiut. 28 Onaim, Uisneno natoon nain saa' re' In he nmo'e. On re' fe'ena au u'uab. 29 Hit of attean oras athoes toon hiut nbi pah Masir ok-oke'. 30-31 Rarit na' hit ttean oras amnahas toon hiut. Amnahas naan ma'tani', tar antea ka tiit tain fa mnahat nbi hit pah ia. Are' pah ii namnaah ok-oke', tar antea sin ka namnau ntein fa oras mnahat ein nhoen. 32 Onaim aam usi', ho mupein mneit no nua re' naan, in a'mouf kein nak, Uisneno nafeek anrair, nak, ka 'roo fa ntein te, saa' re' In nafeek sin naan, ro he njair. 33 Es nana te, au 'toit on nai, tua: reko nneis aam usi' ho maim tua-ahiint es, re' an'urus nahiin nok reko. Rarit ho mait je he n'ator ma naroitan rek-reko' pah re' ia. 34 Oras mnaah ahoet toon hiut naan, reko nneis aam usi' ho mait tua' teet es antein, he in nkaububu' pena'-maka' na'ko too gui sin renen. Pena'-maka' nana nbait sin paa' niim, he natunu' paaf es. 35 Sin ro he natuin aam usi' ho prenat, he sin ntopun pena'-maka' na'ko kuan-kuan nbi pah Masir ia. Rarit sin ro he natunu' sin nbin umin re' he tatunu' mnaaht ein. Rarit ro he npao sin rek-reko'. 36 He karu toon hiut amnahas nana ntea te, hit fe' atmu'i mnahat. Karu sin n'aotr ee on re' nana te, ka tiit fa tuaf he namnaah anmaet.”
Usif pah Masir nasaeb 'piru'-baru neu nai' Yusuf
37 Anneen nai' Yusuf na'uab on nana te, uisf ee ma in a'naak ko'u ne, nroim natuin in uab ein naan. 38 Rarit uisf ee na'uab am nak, “Uisneno In Smaan Ee ankuas nai' Yusuf re' ia. Es nana te, hit ka neu he tapein fa tuaf es antein, re' nneis na'ko nai' Yusuf.” 39 Rarit uisf ee na'uab nok nai' Yusuf am nak, “Uisneno natoon ko are' kanan rasin ia. Oras ia, hai fe' mihiin mak ho atoin ahinit ko. Ma ho mahiin maan nneis na'ko too mfaun. 40 Onaim, oras ia au 'ait ko mjair au atoin mapirsa'i. Ho mjair a'nakat ambi au sonaf. Au too ngguin ro he natuin ho preent ein. Mes arahaa au 'mees, na' au 'neis ko.” 41-42 Rarit uisf ee nous in krein mamarak, ma napaek be neu nai' Yusuf in akrurun. Ma in na'uab am nak, “Nok ranan ia, au usaeb 'piru'-baru neu ko mfain au atoin mapirsa'i nbi pah Masir ia.” Rarit in napakeb nai' Yusuf baru mnaun ma'oos es, ma na'heek be 'heke mnaut es. 43 Rarit in nana'at in kreet bikaes es anteni', he nai' Yusuf ansae. Anmui' tuaf-tuaf naen anbi kreet naan in matan ma nkoa' an nafan-fain kein am nak, “Au ooo! Misoit ranan! Mfee hormaat! A'naet ii, he nkoen on ankoon!” Nok ranan naan, uisf ee nait nai' Yusuf njair in atoin mapirsa'i nbi pah Masir. 44 Rarit uisf ee na'uab nok nai' Yusuf am nak, “Onai. Ho muhiin main, au re' ia usif. Au utoon a'rair too pah Masir ak, karu ho ka mkonan sin fa te, sin ka nabe'in fa he nmo'en saa'-saa'.” Nai' Yusuf nok in fee 45 Rarit uisf ee nakanab nai' Yusuf am nak, Safnat Panea, natuin abitan Masir sin kang kein. In nasaob nai' Yusuf nok ri'feot muinf es, in kaan ee bi Asnat. Nai' Yusuf in aam baabf ee, kaan ee nai' Potifera. In es re' na'naak rais pirsait anbi kota On. Nok ranan naan, nai' Yusuf nfain atoin makana' ma mateka' nbi pah Masir. 46 Oras sin nasaeb nai' Yusuf a'piru'-baru te, in nmoin naan toon bo' teun goen. Rarit in nnao nfuun am nateef kuan-kuan ma bare-bare nbi pah Masir. 47 Anbi oras athoes toon hiut naan, sekit ma mnonut maineun besi. 48 Rarit nai' Yusuf nnao ma nkaububu' sekit ma mnonut anneis tein, ma natunu' sin nbin umin re' he tatunu' mnaaht ein. Sekit ma mnonut na'ko bare-bare re' npaumaak kota mee te, in natunu' sin nbi uim 'tunu' bua' nbi kota naan. 49 Tar antea maka' re' in nkaububu' ma natunu' sin naan, mfau-rutu. On re' snaen ee et taas je ninin, tar antea ka tiit fa tuaf re' bisa nsoi' naan sin. 50 Oras amnahas nana ka ntea fa fe', nai' Yusuf in fee bi Asnat nahoni' ri'an mone nua. 51 Onaim nai' Yusuf na'uab am nak, “Uisneno nmoe' kau ma au 'nika' ain au susat oras au 'poi u'ko au ama' in umi.” Es na' in nakanab in an-moen uun ee, nai' Manase (re' he noi on re' kata es antein, nak ‘nikan’). 52 Oras in napein ri'an moen muun je te, in na'uab antein am nak, “Au upein suust am nana'renat amfaun 'bi bare ia. Mes Uisneno nfee kau tetus, ma au upein ri'ana' 'bi ia.” Onaim in nakanab ri'ana' naan, nai' Efraim. 53 Rarit oras athoes toon hiut naan namsoup. 54 Onaim oras amnahas toon hiut nana nmurai ntaam, natai nok re' nai' Yusuf na'uab nani. Anbi bare-bare, amnaah si ntaam een, mes anbi pah Masir, nmu'i mnahat. 55 'Roo-roo on nana te, abitan pah Masir nmurai namnahan. Rarit sin nnaon ma ntotin amnahat na'ko usif. Onaim uisf ee nreek sin he nnaon neu nai' Yusuf, he natuin in aprenat. 56 Mes amnahas nana ma'tain besi. Bare-bare nbi pah Masir in naan ee napein amnahas ok-oke'. Onaim nai' Yusuf nmurai nasoit uim 'tunu' mnaaht ein ma na'sosa' pena'-maka' neu abitan Masir. 57 Rarit biak ein na'kon mee-mee neman ma nsosan amnahat na'ko nai' Yusuf nbin pah Masir. Natuin oras amnahas nana batuur-batuur ma'tani'.
Nai' Yusuf in taatf ein nnaon neu pah Masir he nsosan amnahat
1 Oras naan, aam Yakop anneen biak ein na'uab ein am nak, anmui' pena'-maka' et pah Masir. Onaim in na'uab nok in aanh ein am nak, “Hae, ri'aan ein! Hi mtook he mtaka'nana' on re' nana, oo? 2 Au 'neen a'rair nak nmu'i mnahat et pah Masir. Reko nneis hi mnao he msoos kit. Maut he on nana te, hit kaisa' tamnaah atmaet.” 3 Rarit nai' Yusuf in taatf ein re' tuaf bo'es naan, nabaarb ein he nnaon nsosan amnahat neun pah Masir. 4 Mes nai' Yakop ka nkonan fa nai' Yusuf in orif nai' Benyamin he nok sin. In natenab am nak, “Kais-kaisa' ri'ana' naan napein siraak amsa' on re' in tataf.” 5 Anbi mee-mee te, biak ein annenan nrarin nak anmu'i mnahat et pah Masir, es nana te, too mfaun ii nnaon ma nsosan amnahat anbin ne. Amnahas naan, ro nanono ntean pah Kana'an amsa'. Rarit nai' Yakop in aanh ein nnaon ma nsosan amnahat msa' anbin ne. Nai' Yusuf in taatf ein nri'tuun ma nhormaat ee 6 Oras naan, nai' Yusuf njair tua pirsa'i na'ko usif pah Masir. Karu sekau-sekau neem na'ko mee-mee he nsoos pena'-maka' te, nai' Yusuf es na'sosa' nfeen sin. Es na' oras in taatf ein neman ntean ate, sin nri'tuun ma nhormaat ee, tar antea sin nneek afu. 7-8 Oras in niit sin on nana te, in nahiin nain sin. Mes nai' Yusuf nmoo' jon on re' atoin Masir, es na' sin ka nahiin je fa. Rarit in nataan sin nok haan sesu mnak, “Hi re' ia, mi'ko mee?” Sin natahan am nak, “Ho aten kai mi'ko pah Kana'an. Hai iim he msoos amnahat na'ko ko, aam Baker.” 9 Rarit nai' Yusuf namnau in amneit ein unu' fe'. In aka'tau sin am nak, “Au 'ka pirsai ki fa! Hi of atoin asuntirus. Hi iim maim he mihiin pah Masir in ma'niifk ein, rarit hi mtebi mfain he iim ma mbaan kai, ai'?” 10 Mes sin natahan am nak, “Kaah, tua! Hai re' ia suma ho aet na kai. Batuur-batuur hai suma iim he msosa haa mnahat. 11 Hai arkai re' ia, hai ama' mese'. Hai ka atoin asuntirus kai fa, tua! Hai atoin rekon kai, tua.” 12 Mes nai' Yusuf na'uab naheer am nak, “Hoe! Hi mipoi. Kais amputa-kriu kau! Au uhiin ain neu hi atoin asuntirus ki. Hi iim he maim pah re' ia in ma'niifk ein!” 13 Rarit sin npenan mates. Onaim, sin natahan neu nai' Yusuf am nak, “Kaah, tua! Hai re' ia suma ho aet na kai. Hai iim mi'ko pah Kana'an. Hai mma'ori-tatan bo'es am nua. Hai arkai ama' mese'. Hai ori' aheet suus goe namaika' nok hai ama'. Ma hai oirf es anteni', nnao namneuk.” Nai' Yusuf naskarak in taatf ein 14 Nai' Yusuf nataah sin am nak, “Kahaf! Batuur uab re' fe'ena au aa' ee naan. Hi re' ia ro asuntirus ki. 15 Onaim, hi ro he mfee kau bukti fe', he au uhiin ak hi uab ein fe'ena batuur, ai' kah. Au 'suup! Karu hi ori' aheet suus goe ka mok ne neem fa neu ia te, hi ka bisa fa he mnao misaitan pah re' ia! 16 Onaim hi mpiir maan tuaf es he nnao naan hi ori' neem neu ia. Biak ein, au 'tahan sin. Au he iit, hi uab ein naan batuur aa, ai' kah. Karu kah fa te, namneo, hi re' ia asuntirus ki.” 17 Rarit nai' Yusuf anrenu ma nataam sin neu bui je naan ee, neno teun. Nai' Yusuf nataam in taatf ein neu bui 18 Neno teun on nana te, nai' Yusuf nnao ma na'uab nok sin anbin bui je mnak, “Au re' ia, umtausan Uisneno. Ma au utuin In roim Ne piut-piut. Au ufetin ki he hi mmoin. Mes hi ro he minokab uab es. 19 Karu hi uab ein batuur-batuur namneo te, hi ro he mikrira' kau bukti. In rana' poo' ji on nai: au 'tahan tuaf es anbi bui re' ia. Hi bian amfain on hi pah ee, he meki mnahat neu hi nonot-asar sin. Natuin sin npao ki he mekin sin amnahat. 20 Rarit hi iim meik hi oirf aan, he njair bukti es, nak hi atoin neka mne'o. On nana te, hi ka mipoi kau fa. Maut he nok ranan nana te, au kais a'hukun u'maet ki.” Sin nnenan on nana te, sin nromin. 21 Rarit sin na'uab ein es nok es am nak, “Neo! Rek goen! Oras ia hit tapein hit mo'ek neno naan in aaf ni jen. Hit tmoe' re'uf neu hit ori'. Hit tkius tiit ee neu in nsuus anmaet, in ntoit neik haan sakoit he hit ttuurn ee, mes hit ka tfiroor je fa. Etun oras ia, hit tsuus amsa', on re' ia.” 22 Onaim nai' Ruben namnaub sin am nak, “Hae, sin au ori' arki. Neno naan au 'taar ki, he kais minsaa'-saa' ri'ana' naan! Mes hi ka mko-kosen main fa au uaba' naan. Onaim, oras ia, hit tseu fuan ii jen. Nai' Usu in naa' ee nsaen kit een.” 23 Sin na'uab ein on re' naan, mes sin ka nahinin fa neu nai' Yusuf nahiin sin uab. Natuin oras nai' Yusuf na'uab nok sin ite, in npaek uab Masir. Rari te, na' anmui' akoni' uaba' na'bain ee neu sin npaek uab Ibrani. 24 Anneen sin na'uab ein on nana te, nai' Yusuf annao nasaitan sin, ma nkae nmes-mees nbi bare re' biak ein ka niit ee fa. Oras in nkae nrari te, in nfain neem neu sin. Rarit in nreek tuaf ma nfuut nai' Simeon nbi in orif-tataf sin humak ma sin matak.
Nai' Yusuf in taatf ein nfanin on pah Kana'an
25 Rarit nai' Yusuf naprenat in ameupt ein he narain pena'-maka' neu in taatf ein sin a'kaor ein. Ma sin ro he ntao nafani' roit ein nbin a'kaor ein sin feef kein. Rarit ansoo sin. In nrenu msa' he nfeen sin beti'. Tuaf ein nana nmoe' natuin nai' Yusuf in aprenat. 26 Rarit nai' Yusuf in taatf ein nasaeb a'kaor ein nana neu sin bikaes keledai ngguin. Rarit sin npoin ma nnaon nasaitan pah Masir. 27 Sin nanaon ate, sin nasnasan. Oras tuaf es anfei in a'karo he na'eku in bikaes keledai te, in niit in roit ein anbin a'kaor ee fefan. 28 In naskeek! Onaim, in nhaman in orif-tataf sin am nak, “Hoi! Hi iim he mkius miit ia fe'! Hit tmate tkoon! Sin ntao nafani' au roit ein esan au 'karo'.” Nai' Yusuf in taatf es ntae niit in roit ein nbin a'karo' Nkius nitan on nana te, sin neek ein namnekun. Sin namtau nmaten. Rarit sin na'uab ein am nak, “Uisneno ntao saa' ntein es re' ia neu kit?” 29 Rarit sin nnaon nkonon. Antean Kana'an on nana te, sin nareta' neu sin aamf ee, saa'-saa' re' sin nabeen niit ee, nmurai na'ko sin nbin pah Masir, tar antea sin nfain neman. 30 Sin natonan am nak, “Aam honi'! Usif pah Masir in tua pirsaa' je, ma'tain besi. In na'uab ah amsa', ka tiit fa haan ma'nura'. In ntubin ma ntu'iran kai mnak hai mnao msuntiur in pah. 31 Mes hai mitaah am mak, ‘Kah fa, tua! Hai mi'uab batuur namneo, tua. Hai arkai re' ia ka asuntirus fa, tua. 32 Hai atoin neek rekon kai, tua. Hai mma'ori-tatan tuaf bo'es am nua. Hai ama' mese'. Mes tuaf es na'ko kai, nnao namneuk, ma aheet suus goe namaik nok hai ama' et pah Kana'an.’ 33 Rarit kaes je nak, ‘Au he 'soba ki. Hi atoin amneot aa, oo, ai' kah. Hi tuaf es ro he nabaar anbi ia. Hi bian amfain, meki mnahat neu hi nonot-asar sin, he sin kaisa' namnaah anmaten. 34 Hi ro he meik hi ori' neem neu ia fe'. Nok ranan nana te, na' au uhiin ak hi ka asuntirus ki fa, mes batuur-batuur hi atoin neek amne'o. Onaim, au of ufeti' ki hi benu' re' au 'taahn ee re' naan. Ma au 'konan ki he mnao meu mee-mee jah, nbi re' pah ia.’” 35 Anpeo nrarin on nana te, sin npukai sin a'kaor ein. Sin naskeken, natuin sin es-es ate, niit sin roit ein nbin sin a'kaor ein. Nkius on nana te, nai' Yakop nok in aanh ein namtau nmaten. 36 Rarit nai' Yakop na'uab nok sin am nak, “Hi mmoe' mein am es na' au aanh ein namnekun. Nai' Usu namneik goen. Mteni' nai' Meon. Oras ia hi he meiki mtein nai' Min? Batuur-batuur hi he mha'mui' kau, es re' ia!” 37 Onaim nai' Ruben na'uab neu in aamf ee mnak, “Aam honi'! Mfee kau nai' Min. Au utaah. Au 'ba'an ain, au ro he uum 'eik je nfain neem neu ko, aam honi'. Mes karu kah fa te, aam honi', ho mroor au an-moen nua ein naan.” 38 Mes nai' Yakop na'uab am nak, “Kahaf! Ka nabei' fa he hi meik nai' Min. In tataf nai' Usu nmate nrair. Oras ia, ar in nmees. Karu in napein siraak anbi rana tnana te, hi misusab miis kau, au atoni mnasi' ia, tar antea au 'taam eu noup nitu.”
Nai' Yusuf in taatf ein nfanin on pah Masir, nok sin orif nai' Benyamin
1 Oras naan, amnahas anbi pah Kana'an ma'tain besi ntein. 2 Nai' Yakop in uum je naan ee, narari nrair mnaaht ein re' neon goes ii, in aanh ein nnaon nsoos sin na'kon pah Masir. Rarit in nak sin am nak, “Ri'aan ein! Reko nneis hi mfain on pah Masir, he msoos amtein kit amnahat fe'!” 3 Mes nai' Yahuda nataah am nak, “Aam honi'! Neon goes ii, usif Masir in tua pirsaa' je namnaub kai ma'tani' nak, hai ka mibei' fa he mikrira' hai huum ein neu ne, karu hai ka mok fa ho aan aheet susu nai' Min! 4 Onaim, aam honi', ho ro he mkonan kai nai' Min, he nok kai. Hena' hai mfain he msoos kit amnahat. 5 Mes karu aam, ho ka mkonan kai fa nai' Min ate, hai ka neu he mnao fa. Atoin Masir naan na'uab anrair on nana te.” 6 Onai te nai' Yakop nakain sin am nak, “Nansa'am es hi mitonan atoni' naan mak hi fe' mmui' oir muni es antein! Hi mami haa kau susat antein!” 7 Rarit sin nfuir nai' Yakop am nak, “Aam honi'! Atoni' ne nataan piut, he nahiin kit, nok nain hit uum je naan ee ok-oke'. In nataan am nak, ‘On mee? Hi ama' nmoin fe'e oo? Hi fe' mmui' orif et hi umi' oo?’ Onaim, hai he mak saa' antein! Onaim, ro hai mitoon namnee goah. Onai te, sekau nahiin nain nak, in he nreun kai he hai mok nai' Min on ne?” 8-9 Nai' Yahuda na'uab antein am nak, “Aam honi'! Mufetin kai nai' Min he nok kai. Au 'ba'an ain, karu npoi saa'-saa' neu ne te, au utaah he 'senu'. Karu au ka 'eik je nfain neem fa nok ao-mina' neu ko te, maut he ho musaan kau, tar antea au 'maet. Onaim, ho mkonan kai' nai' Min, te hai he mna-nao goa heen. Reko nneis hai mnao nai rabah, he hit kais tamnaah atmaet. 10 Bait hai kais ampao 'roo-roo te, hai mnao, ma mfain iim no nua goen.” 11 Rarit sin aamf ee nak, “Karu on nana te, hi mmoe' on nai. Hi mnao mait meik hau fua' ma fua-bon reko na'ko hit pah. Es re': bumbu sin, hau oef re' fo meni', re'u he ttuis, oin hau, kanari, ma knaa' bian. Rarit meik sin neu usif Masir in tua pirsa'i naan, ma mitoon am mak hai baer ein re' ia nfain oksonun neu ko. 12 Hi msa' meki mtein roit nfain no nua na'ko unu hi mnao. Natuin hi ro he mnona' mifani' roit ein re' hi miit sin anbin hi 'kaor ein neon goes ii. Kais-kaisa' sin es re' ntaon nsaan sin. 13 Hi mok hi ori', mes nati' mfain iim rabah, oo! 14 Au 'on-onen, karu Uisneno In Kuasan Ma'tain Ee, nabanit usif Masir in tua pirsa'i naan he nkasian ki. He karu reko te, in nnona' nafani' ki au anah nai' Min am nai' Meon, he hi mfain iim bu'-bua'. Mes karu au aanh ein namnekun oke' te, maut he au usaah susat ia nkoon piut.” 15 Rarit sin nnaon ma nakbua' baer oksoun ein am roit, he nekin nnaon neu pah Masir. Sin nok nai' Benyamin amsa'. Antean nee te, sin nnaon nbaiseun nai' Yusuf. 16 Oras nai' Yusuf niit nai' Benyamin nok in taatf ein ate, in nreek a'naak mepu nbi in umi, mnak, “Hoe! Meik atoin ein re' ia ntaman neun au umi! Rarit amroor bijaa jes, mihaan ee rek-reko. Sin ro he nbukaen nok kau oras manse na'puup.” 17 Rarit a'nakat naan nmoe' natuin nai' Yusuf in aprenat. Onaim in nnao naat sin neu nai' Yusuf in umi. 18 Oras sin nnaon neu nai' Yusuf in umi, in taatf ein namtaun nmaten. Anbin raan ee te sin na'uab ein am nak, “Amoo! Nansa'am es in nreun he neik kit neu ia? Kais-kaisa' in he nasusab kit, natuin roit ein re' sin nfee nafani' kit sin anbin hit i'kaor ein neon goes ii. Sin nmoe' napo-poi kit he neem naat kit neu ia, he nok askeken te, sin nheek kit, ma nmoe' kit njair sin aten. Rarit sin nasiik naan hit bikaes keledai ngguin oke'.” 19 Etun, oras sin npaumaak nai' Yusuf in uum je te, sin nataan a'nakat naan am nak, 20 “Aam, kais muto'-to'on kai. Neon goes ii, hai iim amsoos miit amnahat ambi ia. 21-22 Rarit, oras hai mfain on hai kuan, hai misnaas ambi raan ee he mtuup. Onaim hai mfei 'kaor ein he mi'eku' mui't ein. He'e! Hai mtae miit hai roit ein, ntao nafani' kai sin inbin hai kaor maak ein sin feef keni. Hai ka mihiin he sekau es re' ntao sin naan. Mes oras ia, hai meik mifani' sin oke'. Onaim aam, kais mutoo' gou! Maut he ho muhiin, oras ia hai meik roit bian anteni' he msoos amnaah fe'u.” 23 Rarit a'nakat naan nataah sin am nak, “Hi mta'-taa' kim. Kais mimtau! Of oni' hi Uisneng goe es anfee tetus neu ki nbi hi 'kaor ein naan. Neon goes ii, au 'toup urair hi roit ein naan oke'. Hi ka mmui' fa tusa'!” Rarit in napoit nai' Simeon na'ko buu je he nabua nok sin. 24 Onaim sin ntaman oke' neu nai' Yusuf in umi. Rarit a'nakat naan nfeen sin oe ma nafaun sin haek ein. In imsa' na'eku' sin bikaes keledai ngguin. 25 Rarit in natoon am nak, “Hi of ambukae mok hai aam usi' oras mansi na'puup.” Oras sin npao nai' Yusuf he neem nateef nok sin ite, sin n'ator oksoun ein naan. 26 Oras nai' Yusuf neem antea te, sin nri'tuun ok-oke' nbin in matan. Rarit sin nnona' oksoun ein neu na. 27 Rarit nai' Yusuf nataan sin am nak, “On mee? Hi arki m'ao-mina', oo? Hi ama mnasi' on mee? In n'ao-mina' msa' aa, oo?” 28 Sin natahan am nak, “Ho ate mnais ee, re' hai aam honi', et re' ne. In n'ao-miin, tua.” Onaim, sin na'ruir ein ma nhormaat antein ee. 29 Rarit nai' Yusuf nait matan am ankius niit in orif nai' Benyamin. Sin nua sin, ainaf ma amaf mese'. Onaim in nak, “Ooo! Hi ori' aheet susu re' neon goes ii hi miton-toon ee ji, es re' ia!” Rarit in na'uab neu nai' Benyamin am nak, “Ba'e! Au 'on-onen he Uisneno nfee ko tetus ko'-ko'u.” 30 Ankius nai' Benyamin on nana te, nai' Yusuf in rasi mnaut neu in oirf ee he noi npe'-pee' jah een. Natuin in nneek niis in orif nai' Benyamin. In ka bisa ntahan naan fa in nekan nana ntein. Onaim, in nnao nasait sin rab-raab, ma ntaam neu in ke'en. Rarit in nkae nme'me'ur anbi naan. 31 Ankae nrari te, in nnao nameu in human. In nafani' in nekan, rait in nnao nateef nok sin. Onaim in nreun in ameupt ein uum je naan ee, he nabaarb ein bukae neu mei. 32 Sin nabarab bukae neu nai' Yusuf anbi mei jes in mees kuun. In orif-tataf sin nbukaen nbin mei' jes a'teta'. In ameupt ein, nbukaen nbin mei jes kuuk. Natuin atoin Masir sin nnaben ate sin ha'niis sin tuak ein karu sin nbukaen bu'-bua' nok atoin Ibranis sin. 33 A'nakat naan n'ator anrair he nai' Yusuf in orif-tataf sin ntoko nmabain ein nok nai' Yusuf. In n'ator sin he ntokon nmaktun-tuin ein, nmurai na'ko atoin ko' goe ntea aheet susu. Oras sin ankius niit re' mo'et re' ia te, sin nsanmakan. 34 Rarit nai' Yusuf an'ator he in ameupt ein naan naitin bukae na'ko in mei je neu in orif-tataf sin. Sin ntopun huma' mese'. Mes nai' Benyamin ntopu mfaun anneis no niim na'ko in taatf ein naan. Rarit sin nbukaen tar antea sin namsenan batur-batuur.
Nai' Yusuf in a'koom noin-muit ee namneuk
1 Sin nbukaen nrarin ate, nai' Yusuf na'se'-se'o a'naak mepu nbi in uum je mnak, “Hoe! Ho mnao murai pena'-maka' neu atoin ein ia sin a'kaor ein naan, nahen-henun. Rarit ho mtao mufani' sin roit ein es-es ate neu sin a'kaor ein naan. 2 Rarit ho mait au 'koom noin muit ee, ma mtao goe neu aheet suus goe in a'kaor aan.” Onaim in nmoe' natuin nai' Yusuf in aprenat. 3 Maan re' snaat ee nsae te, nai' Yusuf nafetin sin nok sin bikaes keledai ngguin he nnaon nfanin ma nekin amnahat. 4 Sin nnaon ka 'roo fa fe' na'ko kota nana te, nai' Yusuf natoon neu a'nakat nana mnak, “Ho mnao mriuk mutuin atoin ein naan rabah. Karu mupein sin ite, ho mak sin am mak, ‘Nansa'am es hi mmoe' maufinu' neu 'naef ee? Hi mbaras in neek reek goe nok moe' re'uf on naan! 5 On meem es hi mibaak meik hai a'naak te in a'koom noin muit ee? Hi ka mihiin fa, oo? Nana ka npaak je fa he nbukae oe nmees jah. Anpaak je he naim atoni' in uan, natuin a'koma' naan matua' ate! Hi moe' mein ia, ro reu' besi!’” Sin niit a'koma' naan anbi nai' Benyamin in a'karo' 6 Rarit a'nakat naan nriu' natuin sin tar antea napein sin. Onaim in natoon neu sin natuin ahaa nai' Yusuf in uaban fe'ena. 7 Rarit sin npenan mates am nak, “Aam, ho sairt ii, on mee? Hai msuup. Hai ka neu he mibei' fa he mmoe' re'uf on naan! 8 Ho muhiim kuum. Roit ein re' neon goes ii nbin hai 'kaor ein naan, hai mfee sin nfanin neu ko. Onaim, hai ka mibei' fa he mibaak hi a'naak te in a'koma' naan na'ko in umi. Hai ka neu he mibaak fa, tua! 9 Aam, ho mpukai ma mtae kuum. Mupein a'koma' nana nbi sekau in a'kaor ate, mhukun misan! Maut he hai bian ii, mfain ate neu ko.” 10 Rarit, a'nakat naan na'uab am nak, “Kahaf! On nai. Karu au 'iit ee nbi sekau te, in njair au ate. Hi bian ii, mnao mkoon.” 11 Onaim sin nasanut a'kaor ein nana, rabah. Rarit sin npukai nain sin. 12 Onaim a'nakat naan nparikas a'kaor ein naan barisi, nmurai na'ko atoin ko' goe in je, ntea aheet suus goe in je. Onaim, in niit a'koom noin muti' naan, anbi nai' Benyamin in a'karo'. 13 Ankius nitan on nana te, nai' Benyamin in taatf ein sin neek ein akrati'-krait ein. Rarit sin nasaeb nafani' sin a'kaor ein neu sin bikaes keledai ngguin, he ntaman nfanin on kota. 14 Oras sin ntean nai' Yusuf in uum je te, in fe' nbi naan. Onaim sin nri'tuun anbin nai' Yusuf in matan. 15 Rarit nai' Yusuf naskarak sin am nak, “Hoe! Nansa'am es hi mmoe' kau on re' ia? Hi ka mihiin fa? A'naet on re' au, npaek re'u re' he naim atoni' in uan.” 16 Rarit nai' Yahuda nataah am nak, “Koe! Uisneno npukai napoitan hit saant ein. Rarit hai he mak saa' ntein, tua? Hai he mimneob hai tuam ein on mee, tua! Karu ho mtahan hai ori' te, reko nneis ho mtahan kai oke'. Mait kai njair ho aten.” 17 Mes nai' Yusuf nataah am nak, “Kahaf! Niit a'koma' nana nbi sekau te, in es re' he njair au ate! Hi bian ii, mifrei. Mfain nai meu hi ama'!”
Nai' Yahuda ntoit he nsenu' nai' Benyamin
18 Rarit nai' Yahuda nnao npaumak-maak nai' Yusuf, ma na'uab am nak, “Aam Baker! Au 'baiseun, tua. Au uhiin ak ho kuasam naan natai nok uisf ee in kuasan kuun. Natuin rasi naan, kais muto'on kau fe'. Au 'toit mainuan he au u'siti' aan a'kre'o, tua. 19 Unu' te, ama' ho mutaan kai mmak, ‘Hi ama' nok hi ori' es fe' etan naa, oo?’ Nai' Yahuda nnao npaumak-maak nai' Yusuf 20 Rarit hai mitaah am mak, ‘Hai ama' namnasi nrair. Hai ori' aheet suus goe mese'. Oras nahoins ee te, hai ama' namnais jen. Aheet suus goe in taatf ee, nmate nrair, tua. Sin nua sin, sin ainf ee nmate nrair. Onaim oras ia, hai ori' aheet susu naan, in nmees. Es na' hai ama' nneek niis ne.’ 21 Rarit, ho mreun kai he hai meik hai ori', he ho miit ee. 22 Onaim hai mitaah am mak, ‘Ri'ana' re' ne, ka neu he nnao npori' fa in amaf. Karu in nnao npoir ne te, hai ama' ro he nmaet kuun nai, es re' naan.’ 23 On nai te, ho mutaah am mak, ‘Karu hi ka meik fa hi ori' nana te, hi ka neu he miit amtein kau fa heen.’ 24 Rarit hai mfain. Hai mtean hai ama' ne te, hai mitoon main rasin re' ho mu'uab sin neu kai. 25 A'roo-roo te, hai mnaaht ein oek ein. Rarit hai' ama' anreek kai he mfain iim amtein meu pah Masir he msoos amnahat. 26 Mes hai mitaah am mak, ‘Aam honi'! Hai ka neu he mnao fa meu ne ntein. Natuin uisf ee in tua pirsaa' je, na'uab nain nak, karu hai ka mok fa hai ori' te, hai ka neu he miit amtein fa in human. Onaim, hai ro he meik hai ori' aheet susu naan fe, he na' hai mnao.’ 27 Rarit hai ama' na'uab am nak, ‘Hi mihiin main. Au fee bi Rahel in aanh ein, tuaf nua goah. 28 Ahuunt ee nnao namneuk. Oni' mui' fuing guin npiis goe ma neku nraar je. Es na' ntea oras ia, au ka iit a'tein ee fa. 29 Karu hi mait meik aheet suus gui ntein na'ko kau, ma in napein siraak ate, hi mtao mtein kau susat neu au atoni mnasi' kau gui, he 'maet nai.’ 30-31 Es nana te, aam baker. Au 'baiseun, tua. Karu au 'fain on au ama' ne, mes au ka 'ok fa aheet susu re' ia te, ro hai ama' nmaet kuun een. Natuin in asmaan ee, nmafuut nok ri'ana' ia te. On nai te, in namnais re'-reu'f een. Onaim karu hai mtao mtein ee susat, in nmaet nai. 32 Saa' antein, au 'ba'an urair 'eu au ama' ak, au utaah ri'ana' naan. Au 'ba'an neu au ama', karu au ka 'eik ufani' fa ri'ana' ia neu ne, maut he au utaah kuuk sanat naan, tar antea au 'maet. 33 Onaim au 'baiseun, tua. Maut he au umaik a'bi ia he 'seun ee, henati' au es re' 'fain ho ate. Maut he in nfain nok in taatf ein. 34 Karu ri'ana' naan ka nok fa te, au ka neu he 'fain fa. Au ka neu he 'tahan aan fa au tuak, karu au iit au ama' ansuus tar anmaet.”
Nai' Yusuf natoon in tuan, ma ntoit in aamf ee he nfoo' neem neu pah Masir
1 Anneen on nana te, nai' Yusuf in neek ne krati-krati', tar antea in ka ntahan naan fa in tuan ii ntein nbi in ameupt ein sin maatk ein. Etun in nreun sin he npoin, he in bisa nmees nok in orif-tataf sin. Nok ranan nana te, in bisa natoon in tuan ee neu sin. 2 Rarit ameupt ein npoin oke'. Onaim nai' Yusuf ankae nme'me'ur ma npin-pinus. In ameupt ein, atoin Masir, re' nhaken et moen ee, anneen amsa'. Ma abitan uisf ee in soonf ee msa' annenan. 3 Rarit nai' Yusuf natoon namneo goah neu in orif-tataf sin am nak, “Airoo, tua. Au re' ia, nai' Usu, kau. Hi ori. Hit arkit atma'ori-tatan. Hit ama' fe' nmoni, oo?” Annenan on nana te, in orif-tataf sin namtau nmaten, tar antea sin ka fefa' mese' fa. 4 Rarit nai' Yusuf nak sin am nak, “Hae! Msiri' iim he mpaumaak kau fe'!” Onaim sin nsiir ein antaman ma npaumaak nai' Yusuf. Onaim in na'uab nafanik am nak, “Au re' ia, nai' Yusuf, re' neon goes ii, hi mi'sosa' mpoir ne neu pah Masir ia. 5 Namneo, hi mi'sosa' kau goen. Mes kais mimtau, ma kais ammatoe ma mmasanan es nok es. Natuin Uisneno es neik kau uum a'tea ia, he 'fain ahunut neu ki. Nok ranan naan, In npaek kau he In nafetin naan too mfaun ii, he sin kaisa' namnaah anmaten. 6 Oras ia, amnaahs ii fe' nnao naan toon nua. Ar toon niim fe'. Oras naan, ka tiit taan fa tuaf es he ntoof ai' nkaun, nseen, ma ka tiit fa reen jes re' he nmui' pena'-maka'. 7 Nok ranan re' hit ka tahiin taan je fa re' ia, Uisneno neik kau neem nahuun na'ko ki. Henati' na'ko ki, ma hi anah-upuf sin napenin a'honis. 8 Onaim in batuur ni, ka hi es ammoe' kau fa he au uum a'tea ia, mes Uisneno In a'mo'en. In es nait kau 'jair uisf ee in tua pirsa'i nbi pah Masir ia. Onaim au 'rair a'nakat nbi uisf ee in sonaf. Ka tiit taan fa es he nneis na'ko kau. 9 Onaim, oras ia hi mfain rabah nai, he mitoon au uabak re' ia neu hit ama', mak on nai: ‘Aam honi', ho anah nai' Yusuf anmoin fe'! In nrair kaes ko'u et pah Masir. In naskau ko aam honi', he mnao meu pah Masir nai rabah. 10 Aam honi' of ho mupein mainuan he mutua mbi pah Gosen mpaumaak ee. Bare naan mainuan. Onaim, aam honi', hi bisa mituuk ma mi'eku' hi 'bib-kasen, a'bibin, ma bijaeng guin ok-oke'. In imsa' ntoit ko aam honi' he uum meik ho anah-upuf sin, nok nain sin uum je naan ee, ma sin baer pusaak ein ok-oke', he mitua mibaar ambi ne. 11 Karu aam honi' mutua mbi Gosen ate, in bisa npairoir ko nbi ne. Natuin amnaahs ii ar toon niim fe' ntein. Onaim in of an'ator he aam honi' mok ho asar sin, ma ho mui't ein ok-oke' ka nkuran ma nrabu' fa saa'-saa'.’” 12 Nai' Yusuf natoon anrair on nana te, in na'uab antein am nak, “Oras ia, hi miit nok matam aa, oo? Ho msa', Min. Au re' ia, ho tata' nai' Yusuf teb-tebe. 13 Onaim mitoon neu hit ama' mak, au kuasat anbi pah Masir re' ia, ko' re'uf. Ma mireta' neu ama' saa'-saa' re' hi miit sin. Rarit hi meik je neem nai rabah neu ia!” 14 Rarit in nhoo ma nneek in orif nai' Benyamin, ma sin nua sin ankaen. 15 In imsa' anhoo ma nneek in taatf ein mese'-mese'. Rarit na' sin nmurai na'uab ein nok ne.
Usif pah Masir ntoup nai' Yusuf in orif-tataf sin
16 Rari te, oras uisf ee nok in a'naak meup ne nneen nak nai' Yusuf in orif-tataf sin neman, sin nmariin anmaten. 17 Onaim uisf ee na'uab neu nai' Yusuf am nak, “Yusuf! Mutoon neu sin ho benu', he sin nasaeb ein pena'-maka' neu sin bikaes keledai ngguin, he nekin on pah Kana'an. 18 Rarit amreun sin he neik ho ama' ma nonot-asar sin neman oke', he sin nfoo' neman neun ia nai. Au of a'feen sin afu ma bare re' reko nneis nbi pah Masir ia, he sin natuan ma nmonin nbin naan, ma sin napenin amnahat na'ko bare naan. 19 Mreun sin he sin neik nanin akreet bikase' fauk na'ko ia, he sin nasaeb ri'aan ein, ma ho ama'. 20 Kais sin natenab baer pusaak ein re' sin ka bisa neik sin fa. Natuin pah Masir ia, neheun nok bare' re' arekot. Sin of anpaar sin.’” 21 Anneen on nana te, nai' Yusuf anfee kreet bikase' fauk, ma beti' nbi ranan, natuin uisf ee in kabin. Ma in orif-tataf sin nabaarb ein he nfanin natuin uisf ee in kabin. 22 Nai' Yusuf amsa' nfeen sin tai fe'u esat paasn es. Mes in nfeen nai' Benyamin roi muti' fua' natun teun, ma tai fe'u pasan niim. 23 In nsonu neu in aam hoin fe baer saa'-saa' re' nareok na'ko pah Masir, ma nasaeb sin nbi bikaes keledai mone bo'es. In nfee na'baba' ntein pena'-maka', utunu', ma mnahat huma'-huma', nasaeb sin neu bikaes keledai ainaf bo'es. In n'okbeit sin neu oras sin ntebi nfain neman neu pah Masir. 24 Rarit in nnao nasaina' sin, ma namnaub sin am nak, “Nati' hi kaisa' mmatoe mbi raan ee, jo!”
Nai' Yakop anneen nak nai' Yusuf nmoin fe'
25 Rarit sin nnaon nfanin on sin aamf ee et pah Kana'an. 26 Antean ne te, sin natonan sin aamf ee mnak, “Aam honi'! Ho anah nai' Yusuf anmoin fe'. In kaes ko'u et pah Masir! In nnaa' aprenat.” Oras nai' Yakop anneen ate, in ntaka'nana' ma ka npirsai fa sin uab kein naan. 27 Mes oras sin natonan nrair nai' Yusuf in uab ein naan, ma in niit kreet bikase' re' nai' Yusuf ansoun ee he nasaeb neik je neu Masir te, na' in npirsai. 28 Onaim in na'uab am nak, “Airoo! Au aanh ee nmoin fe'! On re' nana te, na' au 'mariin. Au ro he 'nao 'kius aan ee fe', na' au 'mate msa', reko.”
Nai' Yakop sin nabaarb ein he nfo'on neu pah Masir
1 Rarit nai' Yakop nakbua' in a'brua' ein, ma nnao nasaitan pah Kana'an. Sin ntean kuan Barseba te, in nroor mu'it ma nafuat sin neu Uisneno, re' in amaf nai' Isak na'bees neu Ne na'ko unu'. Sin nnao nasaitan pah Kana'an 2 Faaj es ate, nai' Yakop namnei. Anbi mneit naan, in nneen Uisneno noe'n ee, mnak, “Hoe! Yakop! Yakop! Ho mfeen fe' he mneen!” Onaim in nataah am nak, “Tua!” 3 Ma Uisneno nak,“Au re' ia, Uisneno re' ho ama' na'bees neu Na na'ko unu'. Ho kais mumtau he mnao meu pah Masir. Au of a'moe' ho sufam-ka'um sin njarin too re' maso'ik anbin bare naan. 4 Au of ok ko tnao teu pah Masir. Ma Au msa' of ok ufani' ho sufam-ka'um sin nfanin on pah Kana'an. Oras ho mmate te, of ho anah nai' Yusuf anhake nbi ho bnapam.” 5 Rarit nai' Yakop nok in aanh ein, nnaon nasaitan kuan Barseba. Onaim sin nasaeb ee, nok sin fee-anah sin, nbi kreet bikaes ein re' usif Masir nsonu' sin. 6-7 Sin nait neik sin baer pusaak ein ma mui't ein ok-oke' re' sin nmui' sin, oras sin nbin pah Kana'an. Rarit nai' Yakop ma in anfeto-anmone sin, ma in uupf ein ok-oke', nnaon neun pah Masir.
Nai' Yakop nok in noont ein re' nokan nnaon neu pah Masir
8 Nai' Yakop in nonot-asar re' nok anfo'on neun pah Masir, es re': Nai' Ruben, an-moen unu'. 9 In aanh ein esan re': nai' Henok, nai' Paru, nai' Hesron, ma nai' Karmi. 10 Nai' Simeon, nok in aanh ein esan re': nai' Yemuer, nai' Yamin, nai' Ohat, nai' Yakin, ma nai' Sohar. Ma nai' Saur amsa', re' napein je na'ko bifee Kanaanas. 11 Nai' Lewi, nok in aanh ein esan re': nai' Gerson, nai' Kehat, ma nai' Merari. 12 Nai' Yahuda, nok in aanh ein esan re': nai' Sela, nai' Peres ma nai' Sera. Nai' Yahuda in anah bian, nai' Er ma nai' Onan, nmate nrarin nbin Kana'an. In imsa' neik nai' Peres in aanh ein, esan re': nai' Hesron ma nai' Hamur. 13 Nai' Isaskar, nok in aanh ein esan re': nai' Tora, nai' Pua, nai' Ayup, ma nai' Simron. 14 Nai' Sebulon, nok in aanh ein esan re': nai' Seret, nai' Eron, ma nai' Yahreel. 15 Sin ok-oke' re' naan, nai' Yakop nok in fee bi Lea sin aan hoin ein, oras sin natuan nbin Mesopotamia. Anmu'i ntein sin an-feto, kaan ee bi Dina. Onaim, nai' Yakop nok in mahoin ii, tuaf bo' tenu mteun. 16 Onaim nmui' in anah na'ko in fee bian es re': nai' Gat, nok in aanh ein esan re': nai' Sifion, nai' Hagi, nai' Suni, nai' Esbon, nai' Eri, nai' Arodi, ma nai' Areli. 17 Nai' Aser, nok in aanh ein esan re': nai' Yimna, nai' Yiswa, nai' Yiswi, nai' Beria, nok sin feotf es, kaan ee, bi Sera. Anmu'i msa' nai' Beria in aanh ein, esan re': nai' Heber ma nai' Markier. 18 Sin arsin re' naan, tuaf bo'es am nee. Esan re' nai' Yakop ma in fee bi Silpa in anah-upuf sin. Bi Silpa naan, ate re' nai' Laban anfee je neu in an-feto bi Lea, nai' Yakop in fee mnasi'. 19 Nai' Yakop in fee jes antein, kaan ee, bi Rahel. In nahoni' ri'ana' nua, esan re': nai' Yusuf ma nai' Benyamin. 20 Oras naan, nai' Yusuf ansao nrair bi Asnat nbi pah Masir. In aam baabf ee, a'naak pirsait anbi kota On. In kaan ee, nai' Potifera. Nai' Yusuf ma bi Asnat sin aanh ein esan re': nai' Efraim ma nai' Manase. 21 Nai' Benyamin, nok amsa' neu pah Masir. In nok in aanh ein, esan re': nai' Bera, nai' Beker, nai' Asibel, nai' Gera, nai' Na'aman, nai' Ehi, nai' Ros, nai' Mupim, nai' Hupim, ma nai' Aret. 22 Rarit nai' Yakop ma in fee bi Rahel sin mahoin kein tuaf bo'es am haa. 23 Nai' Yakop in nmu'i ntein feej es, kaan ee bi Bilha. Sin aanh ein esan re': nai' Dan ma nai' Naftali. Nai' Dan in aanh ee, nai' Husim. 24 Nai' Naftali, nok in aanh ein esan re': nai' Yaser, nai' Guni, nai' Yeser ma nai' Sirem. 25 Nai' Yakop nok in fee bi Bilha sin mahoin kein tuaf hiut. Bi Bilha naan, es re' bi Rahel in ate, re' in napein je na'ko in amaf nai' Laban. 26 Onaim, nai' Yakop in mahoin ein re' nnaon neun Masir naan, tuaf bo' nee mnee. In aan naenf ein ka masoik ein fa fe'. 27 Sin nma'baab ein nok nai' Yusuf in aanh ein re' nahoni' sin anbin pah Masir, sin tuaf nua. Onaim nai' Yakop in nonot-asar re' natuan nbin Masir, sin ar-arsin tuaf bo' hiut.
Nai' Yakop nateef in anah nai' Yusuf
28 Oras sin he noi ntean pah Masir te, nai' Yakop anreun in anah nai' Yahuda he nnao nahuun, he no'en nai' Yusuf, he neem nateef nok in aamf ee nbi pah Gosen. Oras sin ntean nrarin nbin Gosen, 29 on nana te, nai' Yusuf ansae neu in a'kreet, he nnao nateef in aamf ee nbi naan. Oras sin natefan, nai' Yusuf anhoo in aamf ee, ma nkae 'roo re'uf. Nai' Yusuf nateef nok in amaf nai' Yakop 30 Rarit nai' Yakop na'uab nok nai' Yusuf am nak, “Usu! Oras ia, au 'iit ko goen. Onaim au uhiin ak ho mmoin fe'. Maski oras ia au 'mate msa', reko.” 31 Rarit nai' Yusuf natoon neu in orif-tataf sin am nak, “Au ro he 'nao 'baiseun uisf ee, he utoon ak au nonot-asar sin na'kon Kana'an neman ntean nggoen. 32 Onaim, au of utoon ak hi re' ia, atuuk mu'it. Etun hi meik hi mui't ein ma hi pusaak ein na'kon Kana'an. 33 Karu uisf ee no'en ki, ma nataan hi meup mein saa', 34 hi mitaah am mak, hi arki re' ia, atuuk mu'it na'ko hi an-ana' fe', on re' hi be'i-na'i sin. Nok ranan naan, in of anreun ki he mitua mbi Gosen.” Nai' Yusuf natoon on naan, natuin abitan pah Masir nma'nisin, karu sin natua nabuan nok atuuk mu'it sin.
Nai' Yusuf in aasr ein napenin afu na'ko usif pah Masir
1-2 Rarit nai' Yusuf nok in tataf tuaf niim, nnaon he nbaiseun usif. Nai' Yusuf na'ekub ma natefab sin nok usif. In na'uab am nak, “Aam usi'! Au ama' ma au ori'-tata' sin neman nrarin na'kon pah Kana'an. Sin neman neik sin mui't ein ma sin baer ein ok-oke'. Oras ia sin etan pah Gosen.” Nai' Yusuf na'uab nok usif pah Masir 3 Rarit uisf ee nataan am nak, “Hi meupn ein es re' saa'?” Onai te, sin natahan am nak, “Hai re' ia atukus, on re' sin hai be'i-na'i. 4 Oras ia, pah Kana'an, nafauk-nai ko'u, tar antea ka tiit fa mnahat ma huun antein. Etun hai iim meu pah re' ia he mitua mtahan. Hai meik hai mui't ein amsa'. Onaim, oras ia hai mbaiseun ko usi', mkonan kai he hai mitua mbi pah Gosen, he hai mituuk hai mui't ein anbin naan.” 5 Rarit uisf ee natoon in roim ne neu nai' Yusuf am nak, “Oras ia, ho ama' ma sin ho benu' etan ia. 6 Onaim sin napenin mainuan he sin natuan nbi ia on re' sin pah akuuk. Au mahiin ki te, pah Gosen naan, bare re' reko nneis nbi pah ia. Onaim reko nneis sin natuan nbin re' naan. Ma karu sin natuuk mu'it am reko te, maut he sin natuuk aung guin anbin nana msa'.” 7 Rarit nai' Yusuf na'ekub ma natefab in aamf ee nok usif. Onaim nai' Yakop an'onen he Uisneno nfee tetus neu usif naan. 8 Onaim uisf ee nataan am nak, “Aam, ho toon fauk een?” Nai' Yusuf am nai' Yakop na'uab ein nok usif pah Masir 9 Nai' Yakop nataah am nak, “Au 'moin aan toon nautn es bo' teun, mes au ka utua ubaar iit fa fe' nbi baar jes. Au be'i-na'i sin imsa' on naan. Karu au he utaib ok, ok sin ite, au toon a'moin ji, fe' ka mfaun fa fe'. Mes naheun nok suust am nana'renat.” 10 Onaim nai' Yakop antoti ntein Uisneno he nfee tetus neu usif pah Masir naan. Rari te sin baisenun ma nheer ok na'ko uisf ee in matan, ma nnaon nfanin. 11 Rarit nai' Yusuf natuin uisf ee in kabin, onaim in nruur bare neu sin nbi pah Gosen. Afu bare naan, mria ni kaheen. (Sin nakanab bare naan nbi neon amunit nak, ‘Rameses’.) Onaim nai' Yusuf in amaf ma in orif-tataf sin natua nabaran nbin bare naan. 12 Rarit nai' Yusuf nataah ma nasaah mnahat neu in amaf, ma in orif-tataf sin, sin fee-anah sin, na'ko a'naet tar antea a'baut ein.
Amnaahs ee mainenu' ntein nbi pah Masir
13 Anbi oras naan, ka tiit tain fa mnahat anbi mee-mee. Amnaahs ii ntaman kuan-bare, kota mpah. Na'ko Masir ntea Kana'an mansian ein n'ore nmaten. Sin ka nabe'in fa he nmo'en saa'-saa', natuin sin namnahan nmaten. 14 Rarit biak ein neman na'kon bare-bare neu Masir, ma are' bare-bare nbi Kana'an, he nsosan amnahat na'ko nai' Yusuf. Onaim in na'bua' roit ein naan ok-oke', rarit in nnao natunu' sin anbin uisf ee in sonaf. 15 Oras naan, abitan Masir ma Kana'an sin nararin roit. Onaim sin ka nsoos nabe'in fa mnahat. Rarit sin neman neu nai' Yusuf he ntotin. Sin na'uab ein am nak, “Aam Baker! Hai mbaiseun ko, tua. Mfee kai mnahat, he hai kaisa' mimnaah ammaet. Natuin hai mirair roit.” 16 Rarit nai' Yusuf nataah am nak, “Karu batuur-batuur hi mirair roit ate, hi mmoe' on nai: mtuki mnahat nok hi mui't ein naan. Au of a'fee ki mnahat.” 17 Rarit sin nnona' sin mui't ein neu nai' Yusuf he ntukin amnahat. Mui't ein esan re': sin bijaeng guin, bikase', bikaes keledai, 'bibi, ma sin 'bib-kasen. Natuin toon naan, nai' Yusuf anba'an on re' naan. 18 Toon amneemt ii te, sin nfain neman on nai' Yusuf. Sin nbaisenun am nak, “Aam Baker! Hai ro mbaiseun namneo goah, tua. Hai roit ma mu'it, ho mtuik maan kuum sin een, tua. Oras ia, hai he mait saa' antein. Hai ruman ankon-koon. Arahaa hai tuam ein anmes-mesen, nok hai afu 'teets ein. 19 Kais mkonan kai he hai mmaet. Karu hai mmate te, sekau es re' he npairoir hai afun naan!? Reko nneis, aam baker, ho mait kai mjair ho aten. Ho mtoup hai afun naan, he ho mpaar kuum sin. Rarit ho mfee kai fini he hai mseen sin neu ko, tua. Onaim, ho mfee kai mnahat natuin hai mihaeb om ambi ho renen. Asar hai kaisa' mmaet!” 20 Natuin oras amnahas nana ma'tain besi, etun abitan Masir sin na'sosa nain sin auf ne ok-oke'. Onaim, nai' Yusuf ansoos nain afun naan he njair usif Masir in auf pusaak ein. 21 Nok ranan naan, abitan pah Masir sin njarin ate neu usif pah Masir. 22 Mes nai' Yusuf ka nsoos fa a'nak pirsait ein sin afun, natuin uisf ee nfeen sin mnahat piut. Etun sin ka na'sosa' fa sin afun. 23 Oras naan, nai' Yusuf na'uab neu too gui mnak, “Oras ia, hi mfain ate neu usif pah Masir. Au 'soos urair hi auf ne neu usif. Onaim hi mait finin re' ia nai, he mnao mseen sin neu renen naan. 24 Oras seket ma mnonut ate, hi mbait batis niim. Baits es neu usif. Neis kein paa' haa, bian hi mait fini, ma bian hi mait sin ntama mnahat neu ki ok-oke'.” 25 Rarit sin natahan am nak, “Koe aam. Ho msoi maan kai na'ko amnahas ia, tua. Onaim hai mtoit makasi, tua. Maut he hai mfain ate neu hit usi', tua.” 26 Rarit nai' Yusuf npaek atoran naan njair prenat anbi pah Masir. Etun sin nbatin batis niim na'ko are' pena'-maka' re' sin nseik ma noun sin naan. Sapaaf es neu usif. Haa' ein neu sin kuuk. Suma a'nak pirsait ein sin auf ne, uisf ee ka nsoos ein fa. Prenat naan, sin fe' anpaak je nnao nkoon.
Nai' Yusuf nmoe' manba'an nak in he nsuub in aamf ee nbi sin beif-na'if sin nopu
27 Anmurai oras naan, atoin Isra'er sin natuan nabaran nbin pah ko'u Masir, et pah Gosen. Sin njarin atoin amu'it. Ma sin nahoin ein ma nma'baab ok piut-piut. 28 Anbi pah Masir naan, nai' Yakop nmoin naan toon bo'es am hiut, tar antea in nmoin naan nabu-bua toon nautn es bo' haa mhiut. 29 Oras in neno 'maetn ee npaumak-maak een ate, in no'en nai' Yusuf ma natoon ee mnak, “Usu! Au 'naben, ka 'roo fa heen ate, Uisneno no'en nafani' kau goen. Onaim au 'toit ko, karu ho mneek kau te, ho msuup mak ho ka msuub kau fa nbi pah Masir ia. 30 Ho ro he meik mufani' au aok-ta'uk ia he msuub ee on hit be'i-na'i sin nopun, ma msuub kau nbi ne. Ho ama' kau gui, au roimk ii on re' naan.” Onaim nai' Yusuf nataah am nak, “Reko, tua! Karu ama' ho mroim maan on re' nana te, au utuin ah.” 31 Onaim nai' Yakop na'uab am nak, “Karu ho mroim mutuin kau on nana te, oras ia ho msuup, mak ho mroim mutuin ho ama' in romin.” Rarit nai' Yusuf ansuup natuin nai' Yakop in uab ein naan. Onaim, nai' Yakop nabani' ma nri'tuu n'ain koo je 'nakan, ma n'onen he nasaeb sukur neu Uisneno.
Nai' Yakop antoit tetus ma athoen neu nai' Nai' Yusuf in aanh ein
1 Ka 'roo fa na'ko oras nana te, nai' Yusuf napein hanaf nak, in aamf ee nameen ma'fena'. Onaim in nok in an-moen nua' ein naan, es re' nai' Manase ma nai' Efraim, ma sin nnaon nkius sin na'if nai' Yakop. 2 Oras nai' Yakop nahiin nak nai' Yusuf neem anrari te, in nareen on he ntoko nbi hara' tupa'. 3 Onaim in natonan nai' Yusuf am nak, “Usu! Neon goes ii, Uisneno re' In Kuas Ne ma'tain besi naan, nakriir On neu kau nbi kuan Lus, et pah Kana'an. Anbi naan, In nba'an neu kau, 4 mnak, ‘Au of umfauba' ho anah-upuf sin he njarin too mfau-rutu. Au msa' of a'fee bare re' ia he njair sin auf pusaak tar antea nabar-baar.’ 5 Naa, oras ia ho anah nai' Efraim ma nai' Manase, sin sapaak ein es re' ia: au uum eu pah Masir ia te, sin nua sin anbi nanin ia. Maski on nana msa', oras ia, au aan sin on re' au aanh ein goa kuuk, on re' nai' Ruben ma nai' Simeon. 6 Mes karu ho muhoni' mteni' te, na' ho anah. Au ka aan sin fa neu au aanh ein nu. Onaim, maut he sin ntoup sin pusaak ein na'kon sin taatf ein, nai' Efraim ma nai' Manase. 7 Au 'moe on re' naan, he umnau ho aina' bi Rahel. Oras hit tfain teem ta'ko pah Mesopotamia he teu pah Kana'an te, ho aina' nmate nbi rana tnana' nbi ranan re' npaumaak kuan Efrata et pah Kana'an. Oras naan, au 'suus a'maet! Onaim au 'suub ee et raan ee ninen re' he 'taam teu kuan Efrata naan.” (Oras ia, kuan re' naan, sin nakaan be Betlehem .) 8 Nai' Yakop na'uab anrair on nana te, in nait matan ma nkius niit nai' Yusuf in aan monen naan. Onaim in nataan nai' Yusuf am nak, “Hoe, sekau aanh ein es re' ia?” 9 Onaim, nai' Yusuf nataah am nak, “Ri'an ein re' ia, Uisneno es anfee sin neu kau nbi pah Masir ia.” Rarit nai Yakop na'uab am nak, “Karu on nana te, mpaumakab kau sin, he au 'onen ma 'toit Uisneno he nfeen sin tetus.” 10 Nai' Yakop namnasi nrair. In maatk ein ankupun. Etun in ka niit fa reko. Onaim, nai' Yusuf nok in aanh ein nana npaumaak nai' Yakop. Onaim nai' Yakop nhoo ma nneek sin. 11 Rarit in na'uab neu nai' Yusuf am nak, “A'roo-roo re' ia, au uten-teenb ah, 'ak au ka neu he uteef ok ko fa heen. Mes oras ia, Uisneno nmo'e nnesi ntein, tar antea au fe' ubei' he iit ho aanh ein.” 12 Rarit nai' Yusuf na'roba' in aanh ein na'ko nai' Yakop. In nri'tuu ma in na'ruri' tar antea in nneek afu, nbi in aamf ee in human matan. 13 Rarit nai' Yusuf anfeen. Onaim in nahake' in aanh ein npaumak-maak in amaf. In nahake' in an-moen uun ee nbi nai' Yakop in a'niman a'ne'u. On nai te, an-moen muun je nbi nai' Yakop in a'niman a'rii. 14 Mes, oras nai' Yakop he ntao in a'niim kein he ntotin nfeen sin tetus neu sin nua sin, in nkaisurib in a'niim kein. In ntao in a'niman a'nee' goe neu aan muni' nai' Efraim in a'nakan, ma in ntao in a'niman a'rii je neu aan unu nai' Manase in a'nakan. 15 Rarit in n'onen ma ntoit Uisneno he nfeen nai' Yusuf tetus am nak, “Ho nai' ka'o, Abraham, ma ho na'i nai' Isak, sin nua sin natuin Uisneno In roim Ne piut-piut. Uisneno kuun es re' npairoir ma npijaar kau u'ko oras au munif tar antea oras ia. 16 In kuun es re' nsoi naan kau na'ko siraak huma'-huma'. Onaim au 'toot Je msa' he In nfee tetus neu ri'aan ein re' ia ma sin suuf kein. Onaim, karu sin n'oen ein neu Uisneno, Sin ka nniikan fa he nteek ka'o nai' Abraham, na'i nai' Isak, ma au kanak. Maut he sin mahoin kein nasufan piut, he njair too mfau-rutu nbi pah-pinan ia.” 17 Mes oras nai' Yusuf niit in aamf ee ntao in a'niman a'nee' goe nbi aan muni nai' Efraim in a'nakan nana te, in nait nanani' in aamf ee niman naan, ma ntao goe neu aan unu nai' Manase in a'nakan. 18 In natonan aamf ee mnak, “Aam honi', kais on naan. Nai' Efraim in moen muni'. In ka atoin ko' goa fa. Ho ro he mtao ho 'nimam naan neu aan unu nai' Manase in a'nakan. Natuin atoin ko' goe in sapaa naan es re' naan.” 19 Mes amaf nai' Yakop ka nroim fa. In nak, “Usu. Au uhiin ain. Nai' Manase of anjair atoin ma'tani', ma in suufk ein amsa' of anjair too pah ko' goes. Mes in orif nai' Efraim naan, of ma'tani' nneis na'ko na. In suufk ein of amfau re'uf, tar antea sin njarin too pah amfaun re' ma'tain besi.” 20 Rarit in natoon neu ri'aan nua' ein nana mnak, “Of karu atoin Isra'er sin ntoit Uisneno he nfee tetus neu tuaf-tuaf ate, sin of anteek hi nua ki hi kaan mein naan. Sin of antotin am nak, ‘Soo' reko te, Uisneno nfee tetus neu ko, nahuum on re' In nfee tetus neu nai' Efraim ma nai' Manase.’” Nok ranan naan, nai' Yakop amsa' anteek nahunun nai' Efraim in kaan ee, na'ko nai' Manase in kanan. 21 Rarit nai' Yakop natonan nai' Yusuf am nak, “Usu! Ka 'roo fa te, au he 'maat jen. Mes Uisneno of anturun ki, onaim In ro he neik ki mfain meu hi be'i-na'i sin pah. 22 Mes oras ia, au 'fee ko nneis na'ko sin ho benu'. Au 'fee u'baba' ko 'to'ef et pah Kana'an re' unu' te au usiik aan ee 'eik au suni'-kenat na'ko atoin Amoris sin.”
Nai' Yakop natoon neu in aanh ein, es-es ate nok in a'monin nbi neon amnemat
1 Rarit nai' Yakop nreun no'en in aanh ein ok-oke'. Sin neman ntean on nana te, in na'uab am nak, “Hi iim ampaumak-maak kau fe'. Au he utoon ki es-es ate hi 'monim nbi neon amnemat.” 2 Rarit nai' Yakop nmurai na'uab ma natoon nain neu in aanh ein, am nak, “On nai joo, anah-anah nai' Yakop! Hi mkoen om iim nai ma mhake mfuun maan kau. Amtakan hi rukim he mneen am mitniin hi ama' Isra'er in uaban ma in a'an. 3 Neu ko, aam Ruben. Ho re' ia, an-moen unu, asoit eno'. Ho mfain on re' au teas ma au 'nimak a'ne'u. Are' tuaf-tuaf anhormaat ko. 4 Mes fe'-fe'fa te ho neek maan na'oni'. Ho roim ii ka nhake nki'if, on re' noe sako re' ka t'eek taan ee fa. Nok askeken, ho mnao mtuup mok au fee bi Bilha, ma mha'niis ho ama' in hara' tupa'. Es nana te, ho 'toko' nfain on atoin ko'u ma mone 'naek ka mateka' fa heen! 5 Nai' Simeon ma nai' Lewi! Sin nua sin taos mese'. Tteka ha besi-benas ate, sin nua sin manoe keni kaheen. Etun sin nha'mui' ma nasusab too mfaun. 6 Sin nmariin anmaten, karu sin n'oet nafeek bijae ngguin sin pii oet kein, tar antea sin nfuka' nenu' nabara haa sin baar kein. Sin nmo'en maufinu batuur-batuur. Karu sin neek-neok nisik, sin nroor niis atoni'. Au ka' roim fa he ok a'seor sin rasin. 7 Onaim oras ia, au 'kaas sin neek mapuut ein naan, natuin sin mapuut besin! Ma sin too' sin naan ka npaek fa rais kasian akre'o. Sin of ro he nasaah kuuk sin moe' reu'f ein. Uisneno of anporin nsiksakan sin sufak ma kauk ein. Sin of natuan nbin are' bare-bare nbi pah Isra'er. Singa mone ma ainaf 8 Neu ko, aam Yahuda. Ho kanam nana in a'moufn ii ‘pures-bo'is’. Ho ori' ma ho tata' sin of anbo'is ko ma nhormaat ko. Ho of miis ho musu sin, tar antea sin ka nait fa sin a'naak ein. 9 Ho re' ia, on re' singa muin ma'tain es, re' naim kuun amnahat. Ho on re' singa keso re' nbiun ma nakoo in aon ee he ntuup. Ka tiit fa es re' nabrain he noik ko. Ho on re' singa ainaf amsa' re' npao in ana'; ka tiit fa es nabrain he nak'aun ee. Ho msa' on naa. Atoin ein of anmasahun ko, ma ka nabei' ein fa he nmo'en huma'-huma'. 10 Ho of es am naa' aprenat. Ho sufam-ka'um sin of anna'a naprenat anmaktun-tuin ein, tar antea tuaf es re' in nmui' sapaaf annes-neis. In of es antook ma nnaa' aprenat naan. Rarit too uuf-uuf sin of na'ruri' ma na'besan neu ne. 11 Ho of ammoin nok neek marine. Ho mroim saa'-saa' ah ate, of anmui'. Ho he mmoe' saa' amsa', of anjair! Onaim ho mui't ein, nok ho reen ee aaf kein of amfaun ma nho-hoen. 12 Ho bukae mi ro namiin ka natfeek fa. 13 Neu ko, aam Seburon. Ho auf pusaak ee of mainua feko ma npaumaak tasi, tar antea nmanaak nok kota Sidon. Abnao ngguin neman na'kon mee-mee ma nasanut sin boint ein nbin ho taas je in ninin nok mamut. 14-15 Neu ko, aam Isaskar. Ho re' ia on re' bikaes es re' nteek ee te, keledai ma'tani'. Mes ho 'naak faut mi kaheen. Karu ho mtuup ambi rana tnana', sekau es re' he npoo' ko he mnao mkoon. Mes karu ho miit kuan es in areokn ii et panin ne, es ka nreun ko fa msa' ate, ho mait ho brua' ma mroi sin ma mnao meu ne. Ho on re' nana nai! 16 Neu ko, aam Dan. Ho kanam nana, in a'moufn ii, ‘afeek rasi’. Ho mok ho sufam sin of amjair afeek rasi neu hi pah Isra'er sin sin rasin. Hi mifeek rasi te, natai ma ka mpiir fa humaf. 17 Ho mahiin mi on re' kaun araut re' ntuup anpao anbi raan ee ninen. Karu atoni' nsae bikase' ma npeo' nana te, nok askeken, ho mrau mrair bikase' naan in haen tikan, tar antea in tuan nana nmouf. 18 Koi, UISNENO! Au 'on-onen he Ho mfee 'honis neu kai ok-oke'. 19 Neu ko, aam Gat. Ho kaan maan atnene te, in haan ii on re' nak ‘mbaan musu’. Pukan apaikaurt ein of anbaan ko, mes ho of mbaan ambaras sin, ma miis sin. 20 Neu ko, aam Aser. Ho rene ma po'on sin aaf kein es re' reko nnes-nesin. Ho of ammoe' kokis huma'-huma' aminat re' ma'osa', he uisf ein neman nsosan na'ko ko. Ruus 21 Neu ko, aam Naftali. Ho on re' ruu ainaf, re' naen ma nfui nmaet. Es ka nabei' fa he n'ator ko. Ho muhoni' maan ho aanh ein, namasan rek-reko. 22 Neu ko, aam Yusuf. Ho on re' fae re' nmoni npaumaak oe mata'. In taen ein of annoon kein nsaen neu rame mnanu', on re' ho sufam-ka'um sin nnaon neun bare-bare. 23 Anmui' tuaf bian re' nasaeb sin neek meens ein neu ko, on re' musu re' nakrao ko. 24 Mes Uisneno, re' au u'bees 'eu Na ji, anturun ko. Es nana te, In nmoe' ho 'nimam naan na'bei', tar antea ho mubei' ma mukrao mbaras neu musun naan, maski na'roo. Ho of miis sin, natuin Usi' es anbaab ko; batuur In kuas Ne ma'tani'! Etun au u'peis ok neu Ne. Natuin In es anpao ma nmapanat kau. 25 In imsa' of anpanat ko, ma anfee ko tetus huma'-huma'. Esan re': tetus na'ko neno-tunan, ma na'ko pah-pinan, ma ho aan hoin ein mfaun ma n'ao-minan. 26 A'toe'f ein ka namnekun fa. Tetus re' au 'fee je neu ko re' ia, nneis na'ko 'toe'f ein ok-oke'! Maut he teuts ein re' ia nasai piut neu ko, natuin ho mneis na'ko ho ori'-tata' sin ok-oke'. Aus fui ko'u anbi pah Isra'er 27 Neu ko, aam Benyamin. Ho brain mi on re' aus fui ko'u re' namnaah. Fe' kik-kiku msa', in nheke nrair in amnahat. Mes karu nfai te, in nnao ma nbati mnaah nesif naan neu in ana'-ana' sin. Ho sufam-ka'um sin of ma'tain kein on re' naan!” 28 Uab ein ia, nai' Yakop in uab ein neu in anah sin. In natoon nain sin, es-esat in a'monin, nok in sufan-ka'un sin anbi neno-neno amnemat. Sin arsin re' naan, es re' njarin aam uuf neu uuf bo'es am nua nbi pah Isra'er.
Nai' Yakop anmaet
29-30 Rarit nai' Yakop antoit in aanh ein he nmo'en rais manba'an. In na'uab am nak, “Ka 'roo fa hena te, au he 'maet. Karu au 'maet, hi ro he mnao msuub kau on nai' ka'o Abraham in nopu. Nopu nana et nuat re' npaumaak kuan Makpera ma kuan Mamre et pah Kana'an. Unu' te nai' ka'o Abraham ansoos nuat naan nok rene ma po'on naan he njair in baer subat. In nsoos nafeek ee na'ko atoin Hetes es, kaan ee nai' Efron. 31 Anbi naan, sin nsuub hit nai' ka'o Abraham, ma hit bei' ka'o bi Sara', au ama' nai' Isak, ma au aina' bi Ripka. Onaim, hi ro he msuub kau mbi naan, nbi au fee bi Lea in abnapan. 32 Mimnau! Hi kais amnikan he msuub kau mbi nuat re' nai' ka'o Abraham ansoos naan ee re' naan.” 33 Nai' Yakop na'uab anrair on nana te, in ntuup anfain neu hara' tuup ee, ma in nmaet.
1 Onaim nai' Yusuf anhoo in aamf ee, ma nkae nme'me'ur. Ma in neek nafan-fain ee. Rarit nai' Yusuf naprenat tua a'urus uis-mina' he npairoir nai' Yakop in ta'un he kais anpuun. Onaim tua a'urus uis-miin ein naan, npairoir nai' Yakop in aon-ta'un naan neno bo' haa, on re' nati' sin nmoe' nani. Onaim abitan Masir nkaen amsa' oras nai' Yakop anmaet. Sin nkaena' nai' Yakop tar antea neno bo' hiut (70), on re' sin a'naet es anmaet. 4 Neno bo' hiut namsopu te, nai' Yusuf natoon neu in a'naak meup ne mnak, “Mneen rek-reko! Au 'toit ki he meik au hanak ia meu uisf ee. Hi mak on nai: 5 ‘Oras au ama' he noi nmate te, in ntoit kau he 'nao 'suub in aon-ta'un ia on pah Kana'an. Onaim, au 'baiseun ko usi' he mfee kau mainuan he au eik au ama in aon-ta'un ma 'nao 'suub ee on pah Kana'an. Rari te, na' au 'fain uum.’” 6 Oras uisf ee nneen hanaf nana te, in nataah am nak, “Karu ho msuup amrair on nana te, maut he mnao ma msuub ho ama'.” 7 Onaim nai' Yusuf annao he nsuub in amaf. Too mfaun sin amsa' nokan. Sin esan re' uisf ee in a'naak meup ne ok-oke', ma kaes ko'un na'kon pah Masir. 8 Nai' Yusuf in orif-tataf sin, ma sin ameupt ein ok-oke' msa' nokan nbin subat naan. Amaika' nbi Gosen, arahaa sin fee kein, ri'aan ein, ma mui't ein. 9 Soraurs ein nokan namfa-faun. Bian ansaen kreet bikase', bian ansaen bikase'. Natuin amnokat sin namfaun, es na' pukan anaot neu subat nana, naraar gok pirore mnanu'. 10 Rarit sin arsin nnaon ma nraak noe Yarden, nbi baar jes in kaan ee, Atat. Nati' te, abitan naan neman ma nterin maka' nbin bare naan. Anbi naan, nai' Yusuf sin nkaena' sin amaf. Sin nbe'en ntein ein fai hiut. 11 Oras abitan Kana'an niit sin nsusan on nana te, sin na'uab ein am nak, “Hae! Hi mkius miit. Atoin Masir sin nbe'en amates ate, nuu' gui ka aan-ana' fa. Sin nkaen ate, on re' ne joo!” Etun sin nakanab bare naan Aber-Misraim. In a'moufn ii, nak ‘atoin Masir sin nukat’. 12 Rarit nai' Yakop in aanh ein nmoe' natuin saa' re' sin nba'an anrari. 13 Onaim sin nroi neik nai' Yakop in aon-ta'un naan, ma nnao nsuub ee nbi nuat re' npaumaak kuan Makpera ma kuan Mamre. Nai' Abraham ansoos nafeek bare naan na'ko atoin es na'ko uuf Hetes, kaan ee nai' Efron; he nmoe' je njair sin baer subat.
Nai' Yusuf anhan-mau in tataf sin
14 Oras ansuub anrair sin amaf nai' Yakop ate, nai' Yusuf nok in orif-tataf sin, nnaon nfanin on pah Masir. Too mfaun re' nokan nbin subat nana msa' on naan. 15 Oras sin ntean pah Masir ate, nai' Yusuf in taatf ein nmurai namtaun, natuin sin aamf ee nmate nrair. Onaim sin na'uab ein es nok es am nak, “Hae! Hit tatenab tarek-reko tiit fe'! Kais-kaisa' nai' Yusuf fe' natenab kit. Karu in he nmoe' rais re'uf neu kit ate, on mee?” 16 Rarit sin n'akoran ma nsoun ein hanaf neu nai' Yusuf am nak, “Aam baker. Hai mimnau fe'. Oras hit ama' fe' anmoin, in nreun kai 17 he mitoon ko, tua, mak, ‘Nai' Usu ro he nnikan nain in taatf ein sin saant ein. Natuin sin nmo'e nrarin rais re'uf neu ne.’ Hai msa' mimnaum mak hit ama' in na'ruri' ma na'bees neu Uisneno na'ko afi unu'. Hai msa' mfain Uisneno naan In aten. Onaim oras ia hai iim amtoit saok sanat, natuin hai mmo'e mrair sanat neu ko, tua.” Anneen on nana te, nai' Yusuf ankae. 18 Rarit in taatf ein neikn ok neman ma nri'tuun nbin in matan, ma na'uab ein am nak, “Mait kai mjair ho aten, tua.” 19 Mes nai' Yusuf nak neu sin am nak, “Sin au tata' arki! Hi kais mimtau mtein! Uisneno nmees kuun es anmui' hak he nhukun tuaf. Mes au re' ia, ka 'mui' fa hak, tua. 20 Unu' te, batuur hi m'akoor he mmoe' re'uf meu kau. Mes Uisneno nabanit hi sair amre'ut naan, he nmoe' je njair reko. Etun In nait kau 'jair a'naet a'bi pah ia, henati' too mfaun ein napenin a'honis. 21 Onaim oras ia, au utoon ki, he kais mimtau mten-teni'. Au ufeek kuuk am 'ak, au of a'kius ki, ma hi aanh ein ok-oke.” Nok uab nana te, nai' Yusuf nhan-mau in taatf ein.
Nai' Yusuf in a'maten
22 Rarit nai' Yusuf natua nabaar anbi pah Masir nok in orif-tataf sin ok-oke'. In nmoin naan toon nautn es toon bo'es. 23 In niit nai' Efraim in anah-upuf sin fe'. Ma in imsa' nkauh nai' Manase in upuf, es re' nai' Makir in aanh ein. 24 Nai' Yusuf natonan in taatf ein am nak, “Au tata' arki! Au 'naben ate, au neno 'maet ki he ntea goen. Mes au 'pirsai 'ak Uisneno of anpairoir ki. In of neik ki mpoi mi'ko pah re' ia. In of na'naak neu ki he mfain on pah re' In nfee je neu hit ka'o Abraham, na'i nai' Isak, ma hit ama' nai' Yakop. In nfee bare naan neik rais supat.” 25 Onaim nai' Yusuf antoit in orif-tataf sin he nsupan am nak, “Hi ro he mba'an meu kau. Karu ntea oras re' Uisneno neik ki mfain on hit pah ee te, hi ro he meik au aok-ta'uk ia.” 26 Rarit nai' Yusuf anmate nbi pah Masir, ma in nmoin naan toon nautn es toon bo' es. Rarit sin npairoir in aon-ta'un. Onaim sin natunu' in aon-ta'un naan nbi noup-paran.
The New Testament of our Lord and Saviour Jesus Christ
Usif Yesus In beif-nai'f ein
1-2 Surat re' ia, nareta' anmatoom nok Yesus Kristus, Tuaf re' Uisneno nba'an nain je na'ko afi unu' he nsoun Ee neem. In re' naan, usif nai' Daut in sufan, ma ka'o Abraham in sufan-ka'un. Anmurai na'ko ka'o Abraham tar antea usif nai' Daut, anmui' naan batan bo'es am haa. Na'ko batan neu batan sin, on nai: Nai' Abraham nahonis nai' Isak, nai' Isak nahonis nai' Yakop, nai' Yakop nahonis nai' Yahuda nok in orif-tataf sin, 3 nai' Yahuda nahonis nai' Peres ma nai' Sera (sin nua sin, sin ainf ee, kaan ee bi Tamar), nai' Peres nahonis nai' Herson, nai' Herson nahonis nai' Ram, 4 nai' Ram nahonis nai' Aminadap, nai' Aminadap nahonis nai' Nahason, nai' Nahason nahonis nai' Soleman, 5 nai' Soleman nahonis nai' Bo'as (in ainf ee, kaan ee bi Rahap), nai' Bo'as nahonis nai' Obet (in ainf ee, kaan ee bi Rut), nai' Obet nahonis nai' Isai, 6 anai' Isai nahonis nai' Daut. 6 b-11 Na'ko nai' Daut tar antea too Isra'el nmoufun nbin Babel, sin ar-arsin naan, batan bo'es am haa ntein. Sin esan re': nai' Daut nahonis nai' Soleman (in ainf ee, nahunu te, nai' Uria in fee). Nai' Soleman nahonis nai' Rahabeam, nai' Rahabeam nahonis nai' Abia, nai' Abia nahonis nai' Asaf, nai' Asaf nahonis nai' Yosafat, nai' Yosafat nahonis nai' Yoram, nai' Yoram nahonis nai' Usia, nai' Usia nahonis nai' Yotam, nai' Yotam nahonis nai' Ahas, nai' Ahas nahonis nai' Heskia, nai' Heskia nahonis nai' Manase, nai' Manase nahonis nai' Amos, nai' Amos nahonis nai' Yosias, nai' Yosias nahonis nai' Yekonya ma in oirf ein oras sin nmoufun nbin Babel. 12-16 Na'ko oras sin nmoufun nbin Babel antean nai' Yesus, sin ar-arsin batan bo'es am haa. Sin esan re': Nai' Yekonya nahonis nai' Saltiel, nai' Saltiel nahonis nai' Serubabel, nai' Serubabel nahonis nai' Abihut, nai' Abihut nahonis nai' Elyakim, nai' Elyakim nahonis nai' Asor, nai' Asor nahonis nai' Sadok, nai' Sadok nahonis nai' Akim, nai' Akim nahonis nai' Eliut, nai' Eliut nahonis nai' Eliaser, nai' Eliaser nahonis nai' Matan, nai' Matan nahonis nai' Yakop, rarit nai' Yakop nahonis nai' Yusuf. Nai' Yusuf ansao bi Maria. Bi Maria re' naan, es re' nahonis Yesus Kristus. 17 Onaim anmurai na'ko nai' Abraham antean nai' Daut batan bo'es am haa; na'ko nai' Daut antean oras sin nmoufun nbin Babel, batan bo'es am haa; ma na'ko Babel antean oras nahonis Kristus, batan bo'es am haa msa'.
Bi Maria nahonis Usif Yesus
18 Oras bi Maria nahonis Nai' Yesus naan, in reetn ii on nai: Bi Maria anmana'an nok nai' Yusuf. Sin nua sin ka ntuup-tuup nitan fa fe' on re' fee-mone. Mes bi Maria na'apu' na'ko Uisneno In Asmaan Akninu'. 19 Oras nai' Yusuf nahiin on naan ate, in he nafetin bi Maria. Mes in ka nroim fa he ntao namaeb ee nbi too mfaun ein sin maatk ein, natuin nai' Yusuf in neekn ee kninu' ma namnoon. Es naan ate, in he nafeitn ee mninu'-mninu'. 20 Onaim in natenab he naim ranan neu-mneem. Fai jes, in namnei. Anbi mneit naan, in niit Uisneno In ameput es neem na'ko sonaf neno tunan, ma natoon ne mnak, “Yusuf! Ho re' ia usif nai' Daut in sufan. Ho neek maan kais na'oni' he ho msao bi Maria. Fin ri'ana' re' et bi Maria in apun, naan Uisneno In Asmaan Akninu' es antao. 21 Bi Maria of nahonis naan ri'aan moen jes. Rarit ho ro he mukaanb ee, Nai' Yesus, fin In es re' of ansoi nafetin Uisneno Iin na na'kon sin sanat ma penu sin.” 22 Rasi re' ia of anjair on naan, natuin Uisneno natoon nain na'ko afi unu'. In npaek niit In mafefa kninu' nai' Yesaya he ntui mnak, 23 “Hi mneen, oo! Of anmui' bi non ao-'temef es, re' ka ntuup-tuup niit fa fe' nok atoni', mes nok askeken ate, in na'apu'. Rarit in nahonis Ri'aan moen jes. Sin nakaanb ee, Imanuel.” (Anbi uab Ibrani, ‘Imanuel’ in oetn ii: Uisneno nok kit.) 24 Nai' Yusuf namnei nrair on naan ate, in nfeen. Onaim in natuin nain Uisneno In uaban naan. In nait bi Maria njair in fee, 25 mes in ka ntuup nabua nok ne fa on re' fee-mone, tar antea bi Maria nahonis Ri'ana' naan. Rarit nai' Yusuf nakanab Ri'ana' naan, Nai' Yesus.
Akius ahini kfuun, neem ankius Nai' Yesus
1 Oras nahonis Nai' Yesus anbi kuan Betlehem et propinsi Yudea, usif Herodes annaa' aprenat. Oras naan, anmui' tuaf fauk neman nbin kota Yerusalem. Sin na'kon pasa' neon-saet, kuan am bare re' na'roo. Sin arsin re' naan, atoin akius ahini kfuun ein. 2 Oras sin ntaman ntean kota Yerusalem, sin natanan neu-mneman am nak, “Atoin Yahudis sin usif re' fe' nahoins Ee ji, et mee? Hai miit amrair kfuu goes mbi pasa' neon-saet, re' neik tanar nak, nahonis anrair Je. Es naan ate, hai iim he mi'bees meu Ne.” 3 Oras usif Herodes anneen niit sin na'uab ein on naan ate, in nseor natenab. Onaim abitan kota Yerusalem sin ok-oke' annaben nitan on naan amsa'. 4 Rarit usif Herodes na'bua' a'naak rais pirsait Yahudi sin a'naakt ein, ma tunggur agaam ein ok-oke' he nataan sin. In nataan sin im nak, “Hi mitoon miit kau fe'! Kristus re' Uisneno anba'an anrair Je naan, karu nahoins Ee te nbi bare mee?” 5 On nai te sin natahan am nak, “Anbi kuan Betlehem, et propinsi Yudea, tua. Fin Uisneno In mafefa kninu' nai' Mika ntui nrair je na'ko afi unu' nak on nai: 6 ‘Abitan Betlehem, et propinsi Yudea. Hi kais mitenab am mak, hi kuan naan, suma kuan an-aan es, re' ka mateka' fa saa'-saa'. Fin of anmui' naan a'naet es neem na'ko bare naan. In of anjair atukus neu Au too Israelas sin.’ ” 7 Anneen anrair on naan ate, usif Herodes no'en atoin ahiint ein naan. In no'en sin amninu'-mninu'. Onaim in nataan sin anmatoom nok oras re' sin nitan akfuu re' anboor anbi neon goe tnanan. Onaim sin natonan neun usif naan, saa'-saa' re' sin nahiin sin. 8 Rarit in nfeen sin mainuan he nkonon neun Betlehem. In natoon neu sin im nak, “Hi mnao maim Ri'ana' naan meu nee. Karu hi miit ma miteef mok Ne te, mtebi mfain iim he mitoon kau. Fin au he 'nao u'ruri' ma u'bees 'eu Ne msa'.” 9 Anneen anrair uisf ee in uaban naan ate, sin nnaon nkonon. Onaim sin niit akfuu re' sin nkius niit ee afi unu' nbi pasa' neon-saet. Akfuu naan anboor anbi sin maatk ein, rarit in nnao tar nasnaas nataib on anbi Ri'ana' naan In bare 'tua-ha'. 10 Ankius nitan on naan ate, sin nmarinan nmaten. 11 Rarit sin ntaman neun umi naan. Sin nitan kuuk Ri'ana' naan nok In ainaf bi Maria. Onaim sin nri'tuun he na'besan neun Ne. Rarit sin nfei sin ook-soun ein re' mamasa' ma ma'osa', ma annona' sin neun Ri'ana' naan. Sin nfeen noni mnatu', kemenyaan, ma hau oef foo meni'. 12 Rarit, oras sin ntupan ate, Uisneno nfeen sin amneit am nak, “Hi kais amtebi mfain meu usif Herodes amtein.” Etun sin nfanin neun sin pah ee, nnaon npe'on raan a'teta'.
Nai' Yusuf sin naenan neun pah Masir
13 Oras atoin akius ahini kfuun ein nfanin nrarin on naan ate, Uisneno In ameput na'ko sonaf neno tunan tuaf es neem. In natoon neu nai' Yusuf anbi mneit am nak, “Yusuf! Amfeen nai! Maen meik Ri'ana' naan ma In ainaf meu pah Masir. Mitua mibaar ambi naan, tar antea Au utoon 'eu ki oras re' hi he mfain iim, fin usif Herodes naim Ri'ana' naan he na'mate!” 14 Rarit nai' Yusuf naskeek ma nfeen. Onaim in neik in fee ma Ri'ana' naan annaon oras fai he sin naenan neun pah Masir 15 Sin natuan nbin pah Masir tar antea usif Herodes anmaet. Nok ranan naan Uisneno In kabin ro njair, natai nok Uisneno In mafefa kninu' nai' Hosea, re' natoon nain nbi afi unu' am nak, “Au 'o'en ufani' Au Anah, he npoin nfain neem na'ko pah Masir.”
Usif Herodes anroor niis are' kanan ri'ana kru'uf anbi kuan Betlehem
16 Oras usif Herodes nahiin nak, atoin akius ahini kfuun ein napniub anrair je on naan ate, in natoo' ma'tani'. In naprenat in soraurs ein am nak, “Amnao meu kuan Betlehem ma kuan-kuan bian re' anmapaumaakn ein anbin bare naan. Amroor miis are' kanan ri'aan mone re' fe' anmoin naan toon nua neiki nsaun.” Nai' Herodes naprenat on naan, natuin in namnau niit uab na'ko ahiint ein. In nsoi' nmurai na'ko oras akfuun aan anboor nbi neon goe tnanan. 17 Rasin re' ia, anjarin natai nok saa' re' Uisneno In mafefa kninu' nai' Yermias antui nain je afi unu' am nak, 18 “Anmui' haan kurut-kaet anpin-pinus anbi kota Rama. Bi Rahel ankae npin-pinus, natuin in aanh ein ok-oke' anmaten nrarin. In ka nroim fa he tuaf anfuir ma nhaan mau goe, natuin in aanh ein ka tiit fa ntein' een.”
Nai' Yusuf sin anfain neman na'kon pah Masir
19 A'roo-'roo te, usif Herodes anmaet. Oras naan nai' Yusuf sin anbin pah Masir fe'. Uisneno In ameupt es neem na'ko sonaf neno tunan, nakriir on neu nai' Yusuf anbi mneit. 20 Ameput naan na'uab am nak, “Yusuf! Amfeen nai! Mait meik Ri'ana' naan nok In ainaf, amfain nai meu pah Isra'el. Fin tuaf re' he nroor Ri'ana' naan, anmate nrair.” 21 Anneen on naan ate, nai' Yusuf anfeen. Rarit in neik sin nfanin neun pah Isra'el. 22 Mes oras in nneen niit nak, usif Herodes in anah nai' Arkilaus oras ia annaa' aprenat et propinsi Yudea, in namtau he nfain on naan. Rarit Uisneno napreent ee anbi mneit antein am nak, “Yusuf, ho kais mutua mbi pah Yudea.” Es naan ate, in nnao ma natua nbi propinsi Galilea, 23 anbi kuan es, kaan ee, Nasaret. Nok ranan naan, Uisneno In kabin, njair natai on re' saa' re' In mafefa kninu' sin antui nain sin im nak, “Sin of anteek Ee te, Atoin Nasaretas.”
Nai' Yohanis Asranit nanoni' tuaf amfaun
1 Oras Nai' Yesus na'nae nrair on naan ate, nai' Yohanis Asranit anmurai nanoni' tuaf amfaun anbi baer ruman na'roo na'ko kuan anbi propinsi Yudea. 2 In natoon am nak, “Aok-bian manekat arki! Hi ro he mmanaku' ma misaitan hi sanat ma penu sin, he mtebi mfain meu Uisneno nai. Fin oras ia, ansuun tuaf bisa mtaam amjair Uisneno Iin Na.” 3 Afi unu' Uisneno In mafefa kninu' tuaf es, kaan ee nai' Yesaya, antui nmatoom nok nai' Yohanis am nak, “Of anmui' tuaf re' annao neu bare re' ka matua' fa, anhunun ma nkoa' am nak, ‘Hi ar-arki ro he mibarab ma miroitan ranan, he mseun ma mtoup Uisneno In amneman! Mineo ma minoon ranan he mseun Goe!’ ” 4 Nai' Yohanis in a'moin ii, on re' Uisneno In mafefa kniun' ein afi unu' sin. In paek ein, anmoe' sin na'kon paus unta. In pasu 'futu', anmoe' je na'ko pasu. In amnaaht ein, aknamat ma oin hau. 5 Oras naan too mfaun ein neman he niit ma nateef nok nai' Yohanis. Sin neman na'kon kota Yerusalem, ma propinsi Yudea in afan nanan sin ok-oke'. Sin neman na'kon kuan ein re' anpaumakan noe Yarden amsa'. 6 Sin nfei sin neek ein, ma nmanaku' kuuk sin sanat ma penu sin ok-oke'. Rarit nai' Yohanis nasrain sin anbin noe Yarden. 7 Oras naan, tuaf na'kon partei pirsait Farisi ma partei pirsait Saduki msa' neman ma ntoit nai' Yohanis he nasrain sin. Mes oras in niit sin on naan ate, in naskarak sin im nak, “Hoe! Hi arki on re' kaun aputa-kriut! Uisneno of anhukun ki natuin hi 'mo'em maufinu sin. Hi kais mitenab am mak, hi of maen ampoi ma ka mipein fa In hukun. 8 Onaim reko nneis hi misaitan hi sanat ma penu sin ok-oke', ma mtebi mfain nai meu Uisneno. Rarit ammoe' reko, nahuum on re' hau roet re' nafua fua reko. 9 Kais mitenab am mak, hi reko ki goen, natuin hi arki re' ia, ka'o Abraham in sufan. Ampirsai kau! Fin Uisneno bisa nmoe' fatun re' ia njarin ka'o Abraham in sufan amsa'. 10 Ampaant om! Fin anmui' Tuaf re' annaa' fani, nabarab anrair he nnoo' are' kanan roet re' sin fuak ein ka reko fa. Anno'o nrair sin on naan ate, In nait inporin sin neun ai. 11 Oras ia, au usrain ki 'paek oe, he njair tanar nak, hi mkoit ma misaitan hi sanat ma penu sin. Mes of anmui' Tuaf es he neem. In re' naan, ma'tani nneis na'ko kau. Maski au 'jari haa in aan renu'-aan reka' msa', au ka umnees 'ok Ne fa. In of naheun hi neekm ein nok Uisneno In Asmaan Akninu'. In nakninu' ki msa', nahuum on re' tuaf anpaek ai he nout makrafu'. 12 Fin In nnaa' a'tupa' re' matua' maak a'taum he nakrai ma nakpesa' nain maak apa' anbi naan. Rarit In nasaeb maak akniun' ein neun po'of. Mes maak aap ein naan, In nait inporin nataam sin neun ai mapina' abar-barat.”
Nai' Yohanis nasrain Usif Yesus
13 Oras naan, Nai' Yesus ansaun neem na'ko Galilea neu noe Yarden. In neem antoit nai' Yohanis he nasrain Je, 14 mes nai' Yohanis ka nroim fa. In nprotees am nak, “On mee m'es au usrain Ko, Usi'? Ka nsaan fa, oo? Usi', Ho es re' he musrain kau, tua. Naan, es re' au 'perluu!” 15 Mes Nai' Yesus nataah am nak, “Reko, ba'e. Mes oras ia, ho es re' he musrain Kau. Nok ranan naan, hit tatuin Uisneno In romin.” Anneen on naan ate, nai' Yohanis nataah am nak, “Reko, tua.” Onaim in nasrain Nai' Yesus. 16 Nasrani nrair Je on naan ate, Nai' Yesus anpoi na'ko noe. Mes nok askeken ate, neon goe tnanan natfe'i. Rarit In niit Uisneno In Asmanan ansaun neem neu Na, nahuum on re' kor-kefi, ma antoko nbi Na. 17 Rarit sin nnenan Uisneno In hanan na'ko neon goe tnanan naan am nak, “In re' ia, Au Aan neka'. In nmoe' Au neek ii nmariin piut-piut.”
Nitu 'nakaf noik Usif Yesus
1 Rarit Uisneno In Asmaan Akninu' neik Nai' Yesus neu baer ruman na'roo na'ko kuan, he nitu 'naak kou' goe noik ma nfuir Ee. 2 Onaim in nanaah On fai bo' haa ma neno bo' haa nbi bare naan. Rarit In namnaah anmaet. 3 Oras In namnaah on naan ate, niutn ein sin a'naak kou' goe neem noik ma nfuir Ee mnak, “Batuur, aa oo? Ho re' ia, batuur-batuur Uisneno In Anah? Karu batuur on naan ate, muprenat fatun re' ia he njarin amnahat nai.” 4 Mes Nai' Yesus nataah am nak, “Matu'i et Uisneno In Suur Akninu' mnak: ‘Mansian ii ka nmoin fa na'ko mnaaht ahaa. Mes sin ro he nneen ma natniin Uisneno In Kabin ma Prenat amsa', ma nmoe' natuin In romin.’ ” 5 Onaim nitu 'nakaf naan neik Nai' Yesus neu kota Yerusalem, es re' Uisneno In kota kninu'. Rarit In nasaeb Nai' Yesus neu Uim Onen Uuf ee In a'pupun. 6 Onaim nitu 'nakaf naan nak, “Karu Ho batuur-batuur Uisneno In Aanh ate, am'okar miit Ho tuam aan meu 'pinan ee nai. Fin matu'i et Uisneno In Suur Akniun' ee msa', mnak: ‘Uisneno of naprenat In ameupt ein na'kon sonaf neno tunan, he npafa' ma npanat Ko.’ Anbi Uisneno In Suur Akniun' ee msa', matu'i mnak, ‘Sin of natnaat Ko npaek sin a'niimk ein, maut he Ho aom naan kais nameen, ma Ho kais musbeut fatu msa'.’ ” 7 Mes Nai' Yesus nataah am nak, “Matu'i et Suur Akniun' ee msa' mnak, ‘Uisneno naan, ho Usi'. Onaim ho kais amsoob Ee.’ ” 8 Rarit nitu 'nakaf naan neik Nai' Yesus neu 'toe'f es, re' a'raat re'uf. Onaim in nakrira' are' kanan pah anbin pah-pinan, ma sin pina' ma kraha' sin ok-oke'. 9 Nakrira' nrair sin on naan ate, nitu 'nakaf naan na'uab am nak, “Asar Ho mu'ruri' ma mu'besan kau, au of a'fee sin ok-oke' 'eu Ko.” 10 Mes Nai' Yesus anpaes ee mnak, “Hoe nitu! Ho mu'roo nai mu'ko ia. Fin Suur Akniun' ee ntui mnak, ‘Ho ro he mu'ruri' ma mu'besan Uisneno, ma ho ro he mmeup meu Ne nmees jah.’ ” 11 Anneen on naan ate, nitu 'nakaf naan annao nasaitan Nai' Yesus. Mes Uisneno In ameupt ein na'kon sonaf neno tunan, neman ma n'urus Nai' Yesus.
Usif Yesus anmurai nanoni' nbi Galilea
12 Oras naan, usif Herodes nataam nai' Yohanis Asranit anbi bui. Oras Nai' Yesus anneen niit on naan ate, In ntebi nfain neu Galilea. 13 In nfain neu In kuan Nasaret, rarit In nkoon natua nbi kuan Kapernaum. Kuan naan et nefo Galilea in panin, et uuf nai' Sebulon ma nai' Naftali sin auf pusaak. 14 Nok ranan naan, In nmoe' natuin saa' re' Uisneno In mafefa kninu' nai' Yesaya antui nain je mnak, 15 “Nai' Sebulon in afu, ma nai' Naftali in afu, re' anpaumaak nefo Galilea, et noe Yarden in panin. Atoin sona' ka atoin Yahudis fa natua etan naan amsa'. 16 Sin nmonin nbin meis'okan, mes oras ia sin niit anrair Me'u. Fin oras ia, Me'u naan anmeu'-siin, neu sekau-sekau re' ka nahiin fa Uisneno fa fe'.” 17 Anmurai na'ko oras naan, Nai' Yesus nanoni' tuaf mnak, “Hi ro he maikoit ma misaitan main hi saant ein, he mmoni kninu' nai. Fin oras ia, sekau-sekau goah bisa mtaam amjair Uisneno Iin na.”
Usif Yesus no'en akiif kai ika' tuaf haa he natuin Ee
18 Neon goes, Nai' Yesus annao npeo' nefo Galilea in ninin. In nateef atoni' tuaf nua, sin nma'ori-tatan. Es kaan ee, nai' Simon, mes biasa sin nteek ee mnak, nai' Petrus. Ma in oirf ee, kaan ee nai' Anderias. Sin nkiif kain ika' nbin nefo, natuin sin nua sin naan, akiif kai ika'. 19 Onaim Nai' Yesus no'en sin im nak, “Hae, ba'e sin. Iim he mituin Kau nai! Hi biasa maim ika', mes oras ia, Au he unoni' ki he hi mjair tuaf amnaim tuaf he njarin Uisneno Iin na.” 20 Anneen anrarin on naan ate, sin nua sin nasaitan sin jala, ma nnaon natuin nain Nai' Yesus. 21 Rarit Nai' Yesus ankono kre'o. Onaim In niit nai' Sebedius in aanh ein. Ahuunt ee, kaan ee nai' Yakobus, ma in oirf ee, kaan ee nai' Yohanis. Sin nua sin nabarab pukat anbi kofa' nok sin amaf. Onaim Nai' Yesus no'en sin nua sin he natuin Ee. 22 Anneen anrarin on naan ate, sin nasaitan sin amaf ma sin kofa' naan, ma natuin nain Nai' Yesus.
Usif Yesus nanoni' tuaf ma nareko' ameent ein
23 Rarit Nai' Yesus sin nnaon nfuun am nateef anbin propinsi Galilea, he In nanoni' tuaf anbin atoin Yahudis sin uim onen sin. In nanoni' sin anmatoom nok Uisneno In Rais Reko, ma natoon ranan he atoni' bisa natuin Uisneno In aprenat. Ma In nareko' too mfaun ein amsa' na'kon sin menas huma'-huma'. 24 Ka 'roo fa te, rasi anmatoom nok Nai' Yesus In a'mo'en sin naan, masina' ma mabeno' anfuun am natefan propinsi Siria. Rarit too mfaun ein neman ma neik ameent ein re' namenan huma'-huma' neun Ee. Sin neikin tuaf amsa' re' anniut saen, re' namaunun a'bibi, ma abuat ein. In nareko' sin ok-oke'. 25 Oras naan, too mfaun ein neman ma natuin Ee. Sin neman na'kon propinsi Galilea, ma na'kon pah Kota Bo'es, re' sin nteek ee mnak, Dekapolis. Bian anteni' neman na'kon kota Yerusalem, na'kon propinsi Yudea, ma na'kon noe Yarden in pasa' neon-saet.
Usif Yesus nanoni' too mfaun anbi 'toe'f es
1 Oras Nai' Yesus niit too mfaun ein neman ma natuin Ee te, In nsae neu 'toe' aan es, ma antoko nbi naan. In atoup noin' ein re' In npiir naan sin naan, neman npaumak-maak Ee, he nnenan ma natninan. 2 Rarit In nmurai nanoni' sin im nak,
Tuaf re' napein upan ma pa'e arekot batuur-batuur
3 “Atoin kasian sin napenin upan ma pa'e arekot, natuin Uisneno In kuun, sin Usif arekot. 4 Atoin akurut ma akaet napenin upan ma pa'e arekot, natuin Uisneno kuun es re' anhaan mau sin. 5 Atoin ba-baun sin napenin upan ma pa'e arekot, natuin sin of antoupun are' tetus-athoen re' Uisneno nba'an anrair sin. 6 Atoni' re' namnau Uisneno In raan amneot ma amnonot re'-re'uf napenin upan ma pa'e arekot, natuin In of naseen sin. 7 Atoni' re' nakrira' ma naruru' rais kasian sin napenin upan ma pa'e arekot, natuin Uisneno of ankasian ma nneek-amnau sin. 8 Atoni' re' neek akninu' sin napenin upan ma pa'e arekot, natuin sin kuuk of niit Uisneno. 9 Atoni' re' biasa narame' tuaf, napenin upan ma pa'e arekot, natuin Uisneno of nak, ‘Sin re' naan, Au aanh ein na.’ 10 Atoni' re' napenin ha'mu'it ma'tani' natuin sin natuin Uisneno, sin napenin upan ma pa'e arekot, natuin Uisneno kuun, sin Usif arekot. 11 Karu tuaf bian anha'mui' ki natuin hi mituin Kau, hi mipein upan ma pa'e arekot amsa'. Karu sin na'munu' ki nok rais puta-kriut re' na're'uf ma nkana'paar hi kaanm ein, hi mipein upan ma pa'e arekot amsa'. 12 Maski on naan amsa', hi ro he mmoe' hi tuam ein ammariin, ma hi neekm ein anmarinan amsa', natuin Uisneno nabarab ma naroitan anrair he nbaras neu ki nathoe nbi hi sapaam et sonaf neno tunan. Mes mimnau! Ka hi mmees fa re' mipein ha'mu'it on naan. Un-unu' te, tuaf-tuaf sin anmo'en maufinu neun Uisneno In mafefa kniun' ein on naan amsa'.”
Tuaf re' natuin Usif Yesus, on re' masik ma me'u
13 “Karu hit he tmo'e mnaaht ii he namiin ate, hit ro he ttao masik fe'. On naan amsa' tuaf-tuaf re' anmoni nbin pah-pinan ia, sin nperluu ki. Mes karu maisk ii miin ruman ate, he tpaek je neu saa'? Suma tait itporin ma tteri. 14 Hi ro he mmoin ma mpiin on re' paku msa', he too mfaun ein nitan rek-reko. Hi ro he masnaa me'u, on re' kota nbi 'toe'f ee tunan, re' too mfaun ein nitan ok-oke'. 15 Atoni' nout pauk ana', ka nateek je fa ma ka napaan ee fa nbi 'nai-konat. Mes sin nateek paku naan na'raat, he bisa ntana' umi naan in naan ee ok-oke'. 16 Hi ro he mmoin on naan amsa'. Hi ro he masnaa me'u he tuaf bian sin nitan nak, hi 'monim naan arekot. Sin nitan on naan ate, sin of anpures ma nbo'is Uisneno mnak, ‘Hi Ama' et sonaf neno tunan naan, mapina'-makraha'!’ ”
Usif Yesus ankoen On neem he nanokab Uisneno In atoran
17 “Hi kais mitenab am mak, Au 'taam 'uum 'eu pah-pinan ia he 'noes 'ain Uisneno In atoran re' In nfee sin neu ka'o Musa. Ma kais mitenab mak, oni' Au ka 'rae utuin fa saa' re' mafefa kninu' Uisneno sin natoon sin na'ko afi unu'. Natuin Au 'taam 'uum re' ia, he 'moe' sin ok-oke' njarin natai-tain on re' saa'-saa' re' sin na'uab nain sin naan ok-oke'. 18 Nok ranan naan, hi arki amneen mirek-reko'! Pah-pinan ma neno tunan of ka namre'un fa fe', karu ka njair natuin fa Uisneno In atoorn ein. Maski titik an-aan es, ka tiit tain fa tuaf es he nnoes nain je. 19 Na'ko Uisneno Iin na ok-oke', karu anmui' tuaf re' antanhai Uisneno In atoran, natuin in natenab am nak, ‘Hae, atoran ia an-aan aah, in ka ma'osa' ma ma'upan fa saa'-saa'!’ Rarit in nanoni' on re' naan neu tuaf bian, Uisneno et sonaf neno tunan of anmoe' je njair a'baut. Mes tuaf re' anmoe' natuin Uisneno In atoorn ein ok-oke', rarit in nanoni' sin on naan amsa' neu tuaf bian, Uisneno of anmoe' je njair tuaf re' ma'osa' ma ma'upan. 20 Ampirsai meu Kau! Karu hi ka mmoin mimnoon ma mimneo fa reko nneis na'ko tunggur agaam ein ma atoin partei Farisi sin on naan ate, hi ka bisa fa he mtaam amjair Uisneno Iin na.”
Usif Yesus nanoni' nak, kais ammakto'on
21 “Hi mihini mrair ka'o Musa in atoran re' in natoon anrair sin neu hit be'i-na'i sin nak, ‘Kaisa' mi'maet atoni', natuin sekau na'maet atoni', in of napein hukun.’ 22 Mes Au he utoon ki on nai: kais ammakto'on, natuin sekau-sekau re' anmakto'on nok in aok-bian, in of napein hukun. Tuaf re' nato'on in aok-bian nak, ‘Ho roen masak nare'!’ tuaf re' naan of anbaiseun neu afeek rais pirsait ein. Ma tuaf-tuaf re' naskarak in aok-bian, nak ‘Amonot!’ in of napein hukun anbi ai pina' abar-barat. 23 Onaim karu ho meik fua'-turu' meu Uisneno, mes ho mumnau mmak, ho aom-bian anmui' rais jes nok ko, 24 kais amnona' ma mfee fua'-turu' naan fe'. Ho mfain he muraem om mok ho aom-bian naan fe', rarit na' ho mfain uum he mnona' ma mfee fua'-turu' naan meu Uisneno. 25 Karu nmui' tuaf re' nmaka'rasi' nok ko te, reko nneis muraem om rabah mok ne fe'. Karu kaah fa te, tuaf re' naan of neik ko neu afeek rasi. Rarit afeek rasi nnona' ko neu porisi, onaim sin nataam ko neu bui. 26 Au u'uab batuur! Ho of mutua mbi bui naan piut tar antea ho mbaen mufeek ho tuus ein ok-oke'.”
Usif Yesus nanoni' tuaf am nak, kais ammakaek
27 “Hi mihini mrair ka'o Musa in atoran re' nak, ‘Kais ammakaek.’ 28 Mes Au he utoon ki 'ak on nai: atoni' re' na'aiti' matan ma nkius bifee jes, rarit in neekn ee nsinmaak he ntuup nabua nok bifee naan ate, atoni' naan anmakake nrair nok bifee naan anbi in nekan. 29 Karu ho mmo'e msaan meik ho matam a'ne'u te, mro'i mporin. Reko nneis ho mtaam meu sonaf neno tunan meiki haa mataf fua' mese', he kais sin nporin nataam ko neu ai abar-barat nok ho matam sin fua' nua. 30 Ma karu ho mmo'e msaan meik ho 'niman a'ne'u te, mketu mporin. Reko nneis ho mtaam meu sonaf neno tunan meiki haa 'nima' mese', he kais sin nporin nataam ko neu ai abar-barat nok ho 'nimam sin nua sin.”
Usif Yesus nanoni' he kais atmanporin fee-mone
31 “Hi mihini mrair ka'o Musa in atoran nak, ‘Atoni' re' nporin in fee je te, in ro he nfee surat manporin neu in fee naan.’ 32 Mes Au utoon ki on nai: atoni' re' nporin in fee, mes in fee je ka nbeon on niit fa, rarit bifee naan ansao ntein, naan on re' in moen je anmakakeb. Ma karu anmui' atoni' re' ansao bifee re' in moen je nporin, naan sin nua sin anmakaken nrarin amsa'.”
Usif Yesus nanoni' anmatoom nok rais manba'an
33 “Hi mihini mrair ka'o Musa in atoran re' natoon ee neu hit be'i-na'i sin, nak, ‘Karu ho muhake' rais manba'an ambi supat ampaek Uisneno In kanan on naan ate, ho mmafutu mrair mok rais manba'an naan.’ 34 Mes Au utoon ki on nai: karu ho muhake' rais manba'an ate, kais ampaek supat. Kais amsuup ampaek sonaf neno tunan in kanan, natuin sonaf neno tunan naan, Uisneno In sonaf. 35 Kais amsuup ampaek pah-pinan ia in kanan, natuin pah-pinan ia, Uisneno In bare' 'teri'. Ma kais amsuup ampaek kanaf Yerusalem, natuin Yerusalem naan, Uis Kou' goe In kota. 36 Kais amsuup ampaek hi 'nakam. Fin hi ka mmui' fa kuasa he miprenat a'naak funu' noon es he njair metan ai' muti'. 37 Onaim karu hi he mihake' rais manba'an ate, karu mak, ‘tua’, mitoon mak, ‘Tua’ goah. Mes karu kaah fa te, mak, ‘Kaah fa, tua’. Karu hi mi'uab a'teta' na'ko naan ate, naan na'uu ma na'baa' na'ko niut re'uf.”
Usif Yesus nanoni' he kais atbaras maufinu nok maufinu, mes ro he ttuthae tarek-reko'
38 “Hi mihini mrair ka'o Musa in atoran nak, ‘Karu anmui' tuaf nareu' ho matam ate, ambaras on naan amsa'. Ma karu anmui' tuaf antuut namouf ho nisim ate, amtuut mumouf goe msa'.’ 39 Mes Au utoon ki on nai: kais ambaras maufinu nok maufinu. Karu anmui' tuaf anpaas ho 'kinom es ate, amkonan he npaas bian naan antein. 40 Karu anmui' tuaf re' anmaka'rasi' nok ko, he nait ho baru te, amfee mtein ne ho baur manikin. 41 Karu anmui' soraurs es na'seke' ko he mroi meik in baer' ein mnao kiur goes ate, amroi meiki mtein sin mtean kiru nua. 42 Karu anmui' tuaf antoit ho baer saa'-saa' ate, amfee ne. Ma karu anmui' tuaf anpinjam ho baer saa'-saa' ate, amfee ne.”
Usif Yesus nanoni' he tneek tuaf re' natoo' ma nmusun kit
43 “Hi mneen amrair tuaf nak, ‘Amneek ho aom-bian, ma muto'on tuaf re' nato'on ko.’ 44 Mes Au utoon ki on nai: ho ro he mneek tuaf re' nato'on ko. Ma mtoit he Uisneno nfee tetus neu tuaf re' anha'mui' ko. 45 Karu ho mmoe' on naan ate, ho mukriir am mak, ho re' ia Ama abit sonaf neno tunan In anah. Natuin In nmoe' manas he ntana' neu atoin reko, ma In nmoe' manas he ntana' atoin maufinu msa'. In nasanut uran amsa' neu tuaf-tuaf re' anmoe' natuin In aprenat nabu-buan nok tuaf-tuaf re' nraban In aprenat. 46 Onaim karu ho suma mneek maan ahaa tuaf-tuaf re' nneek ko te, ho mak ai' Uisneno of anbaras anfee ko tetus? Kaah fa, tua! Atoin maufinu msa' anneek sin aok-biak ein re' anneek sin. 47 Onaim karu ho suma musee ma mtaeb ho aom-bian ate, in areokn ii saa'? Fin tuaf re' ka npirsai fa Uisneno anmoe' on naan amsa'. 48 Onaim mimnau! Hi Ama' abit sonaf neno tunan, anneek nain mansian pah-pinan. Onaim hi ro he mmoe' on naan amsa'!”
Usif Yesus nanoni' he tturun ma tbaab atoin asusat
1 Nai' Yesus nanoni' nkoon om nak, “Mimnau! Kais ammoe' mitun-tuin ahaa rais pirsait ii in atoran henati' hi mipein bo'is. Fin karu hi mmoe' on naan ate, hi Ama' abit sonaf neno tunan of ka nfee ki fa upan ma pa'e saa'-saa'. 2 Karu hi mroim he mturun atoin kasian sin ite, kais mibeno' rasi naan. Fin karu hi mmoe' on naan ate, hi on re' tuaf re' na'uab a'teta', ma anmo'e 'teta'. Sin nromin he nnaon neu-mneman neun uim onen henati' biak ein anbo'is sin im nak, ‘Hoe, atoni' re' ia ma'tain besi, joo!’ Amneen mirek-reko', fin Au u'uab batuur! Nok ranan re' sin napenin bo'is on naan ate, sin ntoupu nrarin sin upan ma sin pa'en. 3 Onaim karu hi mroim he mturun ma mbaab atoin kasian sin ite, kais mibeno' rasi naan meu sekau-sekau. 4 Nok ranan naan, tuaf-tuaf anbin pah-pinan ia ka nahiin je fa. Mes hi Ama' abit sonaf neno tunan es re' nahiin saa' re' hi mmoe' je mninu'-mninu' naan. In of anbaras neu ki tetus-athoen.”
Usif Yesus nanoni' anmatoom nok rais onen
5 “Oras hi m'onen ate, kais ammoe' hi tuam ein on re' tuaf re' na'uab a'teta', ma nmo'e 'teta'. Sin nroimk ein esan re' he nnaon neu-mneman nbin raan opat, ma nhaken nbin uim onen, henati' too mfaun ein sin nitan ma nbo'is sin im nak, ‘Sin atoni kniun' ein, joo!’ Mes amneen mirek-reko'! Nok ranan re' sin napenin bo'is on naan, sin napenin nrair sin upan ma sin pa'en. 6 Mes hi kais on re' naan amsa'. Karu hi m'onen ate, amtaam meu ke'en, rarit mi'eek eno'. Rarit am'onen mirek-reko' meu hi Ama'. Maski biak ein ka nitan fa, mes hi Ama' niit. In of anbaras neu ki tetus nathoen. 7 Karu hi m'onen ate, kais mi'uab amnanu-mnanu' meu-m'iim. Fin tuaf-tuaf re' ka nahiin fa Uisneno nmoe' on naan amsa'. Sin nateenb ein nak, Uisneno nneen ma natniin sin onen re' mnanu-mnanu' naan. 8 Kais ammoe' mituin sin! Fin hi ka mtoit fa saa'-saa' fa fe' meu hi Ama' et sonaf neno tunan, mes In nahini nrair saa' re' hi mperluu. 9 Onaim karu am'onen ate, mak on nai: ‘Ama' abit sonaf neno tunan! Ho kanam naan nakninu' teeb. Maut he are' mansian ein ok-oke' nbin pah-pinan ia ntuna' ma na'ratan Ho kanam ma'tani' naan, tua. 10 Maut he Ho mjair Usif meu mansian ein oke', tua! Maut he bifee-atoni' sin arsin anmo'en natuin Ho preent ein anbin pah-pinan ia, nahuum on re' Ho ameupt ein anmoe' natuin Ho preent ein etan sonaf neno tunan, tua. 11 Amturun ma mbaab maan kai nok bukaet re' nanokab ansuun neno, tua. 12 Hai mtoit Ko he Ho msaok main hai sanat ma penu sin, nahuum on re' hai mnikan ma mniahan main tuaf-tuaf re' anmo'en sanan neu kai, tua. 13 Ampafa' ma mpanat kai he hai kais ammoe' rais amre'ut ma maufinu. Ma msoi mufetin kai na'ko niut reu'f ee in kuasan, tua. Natuin Ho kuum, Usif re' ammui' kuasa ma'tani' ma mapina'-makraah re'uf. Ho kuum es re' anaa' aprenat nabar-baar, tua. Hai onen ma baisenut na'tuuk ma na'paar on re' naan, tua. Amin.’ 14 Mes amneen! Karu hi mnikan main biak ein sin saant ein neu ki, hi Ama' abit sonaf neno tunan of ansaok nain hi sanat ma penu sin imsa'. 15 Mes karu hi ka mroim fa he mnikan main biak ein sin saant ein neu ki, hi Ama' abit sonaf neno tunan of ka nnikan nain fa hi sanat ma penu sin imsa'.”
Usif Yesus nanoni' anmatoom nok rasi re' he tanaah ok
16 “Karu hi m'onen ma minaah om, kais amrisan hi humam on re' tuaf re' na'uab a'teta', ma nmo'e 'teta'. Fin sin nmo'en on naan henati' atoni' nbo'is sin im nak, ‘Hoe! Sin re' ia atoni kninu', joo!’ Mes amneen! Nok ranan naan, sin napein inrair sin upan ma sin pa'en. 17 Mes karu hi minaah om, mimeu kninu'-kninu', msoi' hi 'naak fuun ein rek-reko! 18 Onaim tuaf ankius ki on naan ate, sin ka nahinin fa nak, hi minaah om. Mes hi Ama' nahiin. In of anbaras neu ki nok tetus-athoen.”
Usif Yesus nanoni' anmatoom nok rasi tbubun a'mu'if sonaf neno tunan
19 “Kais ammeup ma'tani' henati' mbubun a'mu'if pah-pinan. Fin etas, 'fufu' ma nutus of nareu' sin. Ma abakat of neem ma npukai rarit nabaak neik sin imsa'. 20 Mes reko nneis hi mmeup ma'tani' he mbubun a'mu'if amfa-faun et sonaf neno tunan. Fin anbi bare naan, etas, 'fufu', ma nutus ka bisa nareu' sin fa. Ma abakat ka bisa neem ma npukai he nabaak neik sin fa msa'. 21 Hi mitunu' hi 'mui'm ein anbin mee te, hi neekm ein na'kii' naher-heran anbi naan.”
Usif Yesus nanoni' rasi anmatoom nok monit anbi meu'-sine'
22 “Maat mansian ii, nahuum on re' paku re' ntana' nbi in nekan. Karu in maatn ein nakniun' ein, in nnao natuin raan a'honis arekot, nahuum on re' atoni' nnao nbi me'u. 23 Mes karu in maatn ein ankupun, in ka nnao natuin fa raan reko, on re' tuaf re' annao nbi meis'okan, nabre-reo goah. Onaim karu meu'-sine' re' et hi neekm ein naan nameis'ook, hi ammoni mbi meis'okan amsa'.”
Usif Yesus nanoni' nak kais neekm ein na'oin ein anmatoom nok monit
24 “Atoni' ka bisa fa he nmeup rek-reko neu aam usif tuaf nua, natuin in of anroim aam usif es anneis na'ko aam usif es antein. In of natuin aam usif es, mes in of ka ntoe natuin fa aam usif es antein. Nok ranan naan, ho ka bisa fa he mak, ‘Uisneno naan, au usi',’ karu ho mpaek roit ii njair ho usif. 25 Es naan ate, Au utoon 'eu ki on nai: kais mitenab huma'-huma', mak au he 'moin on mee, au he 'uah saa', 'iun saa', ma 'paek saa'? Hi mak ai' moint ii es re' he taah am tinu haa, oo? Ma aof ii es re' tpake haa baru? Ka on fa naan, tua. 26 Amkius miit koron re' natpenen et neon goe tnanan. Sin ka nsenan fa, rarit nsekin ai' nonun fa he natuun ein amnahat anbin po'of. Mes hi Ama' abit sonaf neno tunan anpijaar ma npairoir sin piut. In bisa npijaar ma npairoir ki msa', anneis na'ko sin. Onaim mitenab mirek-reko' fe'. In nnilei ki nneis na'ko koron naan. 27 Karu atoni' ntae in human anbi nino, rarit in ntaisiub nok in tuan, in bisa na'baba' in asratan, aa oo? Ka bisa fa, tua! 28 Karu kaah fa te, nansaa' am es hi mtaisibub hi tuam ein he mitenab rasi anmatoom nok pake-nohas? Amnao mkius miit fuboon bakung et mnera' huun. Sin ka nasuun ma ntenun fa. 29 Mes amneen mirek-reko', joo! Usif Soleman in tai paken sin re' ma'osa' nneis ji, ka namnees fa nok fuboon ein naan. 30 Fin Uisneno ntao In nekan neu fubona' re' anmoin neno ia, rarit noka' on naan ate anmaet, onaim nait inporin neu ai. Karu In nmoe' on naan, In ro tebes, nfee ki pake-nohas anneis na'ko fuboon ein naan amsa'. Onaim nansaa' am es hi ka mpirsai Je fa batuur-batuur? 31 Onaim kais hi teenb ein antaisibun am mak, ‘Hit he taah ai' tiun saa'?’ ai ‘Hit he tpaek saa'?’ 32 Tuaf re' ka npirsai fa Uisneno, sin nmeup ma'tain-tain ein he nsoba' niit rasin re' naan ok-oke'. Mes hi kais on naan! Fin hi Ama' abit sonaf neno tunan nahini nrair saa' re' hi mperluu sin. 33 Mes hi ro he minaob mihunun In meup goe fe', ma mituin mihunun In apreent ein fe', rarit In na'baba' are' kanan rasi re' hi mperluu sin. 34 Onaim kais amtaisibub hi teenb ein anmatoom nok saa' re' hi mperluu sin noka'-nmeu. Fin noka'-nmeu on naan ate, in nmui' in rais taisibu ntein. Susat neno ia, in nanookb on neno ia.”
Usif Yesus nanoni' anmatoom nok rasi he kais atmatu'iran es nok es
1 “Hi kais amtu'iran ma mikuu tuaf, he Uisneno kais antu'iran ma nakuu ki. 2 Hi mnilei tuaf on mee te, Uisneno of annilei ki on naan amsa'. Hi mruuk ma m'ukur es in sanat on mee te, Uisneno of anruuk ma n'ukur ki on naan amsa'. 3 Fin ho mroim he mtanar tuaf in sanat aan'-ana', mes ho sanat re' ko'u, ho mak ho ka mmui' fa, tua. Naan on re' ho mkisu skuku' kboe' aan es et ho aom-bian in matan. Te kaah, hau tuuk kou' goes antoeb naan ho matam. Amneon ii, ho ka mnaben fa. 4 On nai te, nansaa' am es ho mak, ‘Ba'e! Uum he au 'fuu upoit makrafu' et ho matam naan fe'.’ Te kaah, ho ka mkius miit fa saa'-saa', fin anmui' naan hau tuuk kou' goes antoeb naan ho matam. 5 Koeh! Ho re' naan, tebes ro apoit! Mait imporin hau tuuk ko'u naan na'ko ho matam fe', na' ho bisa miit, he mfuu mupoitan makrafu' na'ko ho aom-bian in matan naan. 6 Kais minoni' rasi kninu' meu tuaf-tuaf re' akre'et ma aratin. Natuin sin re' naan on re' aus araut re' antebi nfain neem ma nrau ki. Sin nmonon on re' fafi. Karu tuaf anfee ne 'heke' na'ko mutiara, in ka ntoe je fa! Fin in suma nteir ee he.”
Usif Yesus nanoni' he t'onen piut-piut
7 “Karu hi m'onen, amtoit piut-piut meu Uisneno; In of anfee ma nnona' ki. Karu hi maim piut-piut; In of nakrira' ma naruru' ranan neu ki. Karu mhaman piut-piut; In of nasoit ma nfei eno' neu ki. 8 Fin tuaf-tuaf re' ntoit piut-piut neu Uisneno, of ansium ma antoup goe. Tuaf-tuaf re' naim piut-piut, of niit ma napein je. Tuaf-tuaf re' nhaman piut-piut, In of nasoit ma nfei ne eno'. 9 Hi mitenab miit! Karu anmui' ri'ana' re' antoit utunu', in aamf ee ka nfee ne fa fatu. 10 Karu ri'aan ii ntoit ika' te, in aamf ee ka nfee ne fa kauna'. 11 Hi Ama' abit sonaf neno tunan, In reok re'uf. Onaim karu mansian amaufinut on re' hi, amroim he mfee baer reko meu hi aanh ein, saa' antein hi Ama'! In of anfee ma nnona' saa' re' hi mtoit sin. 12 Onaim saa' re' ho mroim he tuaf anmoe' je neu ko, hena te, ho ro he mmoe' je meu ne on naan amsa'. Natuin rasi re' ia, njari' 'sukif na'ko saa'-saa' re' ka'o Musa nok mafefa kninu' Uisneno bian sin, nanoni' sin na'ko afi unu'.”
Usif Yesus nanoni' anmatoom nok eon ma'renat
13 “Karu tuaf anroim he ntaam neu sonaf neno tunan, in ro he nnao npeo' raan ma'renat. Fin anmu'i ranan re' in eon' ee mainuan amsa', ma tuaf amfaun anromin he npe'on naan. Mes ampaant om! Fin ranan naan neik tuaf-tuaf antaam neun ai marara' abar-barat, he sin nbeits ok na'kon Uisneno. 14 Tuaf re' nroim he ntaam neu sonaf neno tunan, ro he nnao npeo' ranan re' naheun nok susat ma ntaam anpeo' eon ma'renat. Maski suma tuaf fu'-fua' ahaa re' annaon npe'on naan, mes raan ma'renat naan es re' neik tuaf an'ain Uisneno.”
Usif Yesus nanoni' he kais tatuin aputa-kriut
15 “Ampaant om mi'ko apoit ein re' naiks ok am nak, sin re' naan mafefa kninu' Uisneno. Fin sin nmoe' jok rek-reko on re' 'bib-kase. Te kaah, amneon ii, sin re' naan anmaufinun on re' aus fui re' anheke 'bib-kase, anpius goe ma neuk goe. 16 Ammoe' on mee' he hi mihiin tuaf on re' naan? Amkius mi'ko saa' re' sin nmo'e. Nahuum on re' tuaf ankius hau fua-roet, nahiin hau fua-roet naan in uun. Hau fua-roet arekot, ka neu fa he na'ko hau re' ka reko fa. 17 Fin roet arekot, nafua fuaf arekot. Mes hau re' ka reko fa nafua fua re'uf. 18 Ka tiit tain fa hau roet arekot, nafua fua re'uf. Ma ka tiit tain fa hau re' ka reko fa nafua hau fua-roet arekot. 19 Hau re' nafua fua re'uf, tuaf of annoo' nain je, rarit nout nakrati'. 20 On naan amsa' tuaf re' anmoe' jok anfanin mafefa kniun apoit ein. Hi bisa mihiin sin mi'ko saa'-saa' re' sin nmoe' sin.”
Usif Yesus natoon rasi anmatoom nok tuaf re' suma nteek Uisneno nbi haa in rurun
21 “Of anmui' tuaf anteek Kau mnak, ‘Usi'!’ Mes suma nbi haa sin ruruk. Uisneno abit sonaf neno tunan of antitar napoitan sin. Fin suma neu tuaf-tuaf re' natuin batuur-batuur In romin, In of antoup nain sin anjarin Iin na. 22 Of antea neon amsoput, tuaf amfaun of anmanauk ein am nak, Au re' ia sin Usif. Sin of anpaumaak ma nhaman Kau, mnak, ‘Usi' ee! Hai mnao mitoon ma mibeno' mrair Ho noin' ein. Hai mriu' niutn ein ampaek Ho kanam. Ma hai mmoe' rais sanmakat huma'-huma' mpaek Ho kuasam.’ 23 Maski sin na'uab ein on naan neun Kau msa', mes of Au utaan 'eu sin im 'ak, ‘Hi re' ia, sekau? Au ka uhiin ki fa, fin hi ka mmoin mituin fa Uisneno In romin. Onaim ampoi nai mi'ko bare ia!’ ”
Usif Yesus nanoni' anmatoom nok ahinit ma amonot
24 “Tuaf re' neem ma nneen Kau, rarit anmoe' natuin Au uabk ein, in re' naan on re' tuaf ahinit, re' nafena' umi' nbi faut fanderen. 25 A'roo-'roo te, uur kou' gui neem ma noe saok gui nsae. Ain kou' gui ankataas umi' naan amsa'. Mes umi' naan ka ntaikoib fa, natuin in nhaek et faut fanderen ma'tani'. 26 Tuaf re' neem ma nneen Kau, mes ka nmoe' natuin fa Au uabk ein, in re' naan on re' tuaf amonot re' nafena' umi nbi snaen ee fafon. 27 A'roo-'roo te, uur kou' gui neem tar antea noe saok gui nsae. Ain kou' gui nkataas umi naan amsa'. Onaim umi naan ntaikobi krati'-krati'.”
Sin nsanmakan oras annenan Usif Yesus In noin' ein re' ma'tain ein naan
28 Nai' Yesus na'uab anrair on naan ate, sin ar-arsin ansanmakan nok In noin' ein naan, 29 fin In nahiin batuur-batuur noin' ein naan in afan. Cara re' In npaek je gui, ka on fa tunggur agaam ein.
Usif Yesus nareko' ameen meen nui-atroki' tuaf es
1 Nai' Yesus ansaun neem na'ko 'to'ef, onaim too mfaun ein neman bu'-bua' ma natuin Ee. 2 Nok askeken ate, tuaf es neem anpaumaak Ee. Tuaf re' ia nameen meen nui-atroki'. In nri'tuu ma nbaiseun Nai' Yesus am nak, “Usi'! Amturun maan kau, tua! Karu Usi' Ho mromi te, Ho muneuk main au menas ia, maut he biak ein kais anmai'nisin kau ntein, onaim au bisa 'onen a'bi uim onen.” 3 Anneen on naan ate, Nai' Yesus annona' In a'niman, rarit anreo' amenat naan, ma na'uab am nak, “Au 'roim! Ho mureok nai!” Nok askeken ate, menas naan namneuk nain. 4 Rarit Nai' Yesus natoon neu ne mnak, “Mumnau! Ho mureok goen, mes kais mutoon ee meu sekau-sekau. Ho ro he mnao mmoe' mutuin ka'o Musa in atoran afi unu'. Onaim mnao nai meu a'naak pirsait, maut he in nparikas ho aom, maut he in nahiin nak ho menas ia namneku, oo, ai' kahaf? Rarit ho ro he meik fua'-turu' njair tanar nak ho mfee makasi. Nok ranan naan, maut he too mfaun ein nahinin nak, ho mureko mrair.”
Usif Yesus nareko' a'naak sorarus Roma es in ameput
5 Rarit Nai' Yesus antaam neu kuan Kapernaum. Anbi naan, anmui' a'naak sorarus Roma es neem he ntoit turun-babat. In nak, 6 “Usi'! Au ameput tuaf es nmouf menas ma'fena' et umi. In ka nfeen naan fa goen na'ko harak, fin in nmakaar een, onaim he noi nmaet jen, tua.” 7 Nai' Yesus nataah am nak, “Reko! Au of 'eit ureko'.” 8 Mes a'naak sorarus naan nak, “Usi'! Ho kais muhaeb Om he uum meu au umi. Fin au ka pantas fa he 'toup Ko 'bi au umi. Asar Ho mu'uab ambi bare ia te, ro tebes au ameput naan of nareok nain. 9 Au uhiin rasi ia, natuin au a'naakt ein anmu'in kuasa he naprenat kau. Ma au a'mui' kuasa msa' he uprenat au soraurs ein. Karu au uprenat au soraur aan ein 'ak, ‘Meu nee!’ Tebes! In ro he nnao. Karu au 'ak, ‘Meu ia!’ Tebes! In ro he neem. On naan amsa', karu au 'reun au ameupt ein 'ak, ‘Ammeup ia!’ Tebes! In ro he nmeup on naan. Onaim asar Usi' Ho mu'uab aah, ro tebes au ameput naan, nareok nain.” 10 Anneen on naan ate, Nai' Yesus ansanmaak. In na'uab neu too mfaun ein re' natuin Ee naan am nak, “Ia rais sanmakat es! A'roo-'roo goen, mes Au ka 'iit ma uteef 'iit fa atoin Yahudis es, re' in npirsai ne ma'tani' on re' atoin Romas ia! 11 Amneen mirek-reko'! Fin of anmui' kase mfaun on re' atoin Romas ia re' neman na'kon pasa' maans ee 'saen ma pasa' maans ee 'moufun, re' ntokon ma nbukaen bu'-bua' nok ka'o Abraham, ka'o Isak, ma ka'o Yakop anbin Uisneno In baran et sonaf neno tunan. 12 Maski Uisneno npiir inrair atoin Yahudis he njarin Iin na, mes tuaf amfaun na'ko sin ka ntoe natuin Ee fa. In of antitar napoitan sin neun baer meis'ook tape. Anbi bare naan kurut-kaet ma ha'mu'it ma'tain besi.” 13 Na'uab anrair on naan ate, Nai' Yesus natoon neu a'nakat naan am nak, “Aam! Amfain nai. Fin ho ameput naan, nareko nrair, natuin ho rais pirsait.” Oras naan, ameput naan nareok nain.
Usif Yesus nareko' amenat amfa-faun
14 Neot es, Nai' Yesus antaam anbi nai' Petrus in umi. In niit nai' Petrus in ain babaf antuup anbi harak. Bifee mnasi' naan anmainiin. 15 Nai' Yesus annaa' in a'niman, onaim bifee mnasi' naan in maininit, namneuk nain. Rarit in nfeen ma ntuthae Nai' Yesus sin. 16 Oras maans ee nmouf, tuaf amfau neman. Sin nok tuaf-tuaf re' anniut saen. Rarit Nai' Yesus naprenat nitun naan am nak, “Hoe nitu! Ampoi nai mi'ko tuaf ein re' ia!” Onaim nitun naan anpoi nanin oras naan. In nareko' ameent ein ok-oke' msa'. 17 In nmoe' rasin re' ia, he natuin saa' re' mafefa kninu' Uisneno nai' Yesaya antui nain je mnak, “In nareko' hit menas. Ma In nasaah hit ha'mu'it.”
Tuaf re' he natuin Usif Yesus ro he natuin batuur-batuur
18 Rarit Nai' Yesus niit too mfaun ein neman ma naub naan Ee. Onaim In nreun In atoup noin' ein am nak, “Iim he hit tsae kofa' ma tatnain teu neof gui panin.” 19 Onaim tunggur agaam es na'uab am nak, “Aam Tungguru! Ho m'ain mee-mee jah, au 'roim he utuin Ko piut, tua!” 20 Mes Nai' Yesus nataah am nak, “Reko msa'! Mes mumnau. Mansian ma mu'it anmu'in bare 'tua-ha'. Aus fui ji nfain neu in nuat. Koor gui nfain neu in kuna'. Mes Au, Mansian Batuur-Batuur re' ia, ka 'mui' kuuk fa umi he 'fain 'eu naa. Aka'nunu' msa', ka 'mu'if.” 21 Rarit tuaf es anteni' re' natun-tuin Ee, neem ma ntoti mnak, “Usi'! Au he utuin Ko Usi', mes maut he au 'fain he 'kius 'aan au mahoint ein fe'. Karu au ama' nmate nrair fe'e te, na' au 'uum he utuin Ko, tua.” 22 Mes Nai' Yesus na'uab am nak, “On nai! Anbain he biak ein re' ka npirsain fa neun Uisneno sin ansuub amaets ein. Fin karu ho mroim he mutuin Kau te, ho ro he mutuin batuur-batuur!”
Usif Yesus nasnasab ain ko'u
23 Rarit Nai' Yesus ansae nbi kofa' naan, nok In atoup noin' ein. 24 Oras sin nnaon neu neof goe panin, In ntuup. Ka 'roo fa te, ain kou' gui neem. Oikn ein anpesan, onaim oe ji ntaam anbi kofa' naan. 25 Ankisun on naan ate, atoup noin' ein anpoo' Goe mnak, “Usi'! Usi', ee! Amfeen he mturun maan kit fe'. Hit he treem atmaet jen, oo!” 26 Onaim Nai' Yesus nataah am nak, “Hae, nansaa' am es hi mimtau on nai!? Hi ka mpirsai Kau fa, oo?” Onaim In nfeen. Rarit In nakain anin ma okin naan am nak, “Misnaas nai!” Onaim okin ma anin nasnaas nanin. 27 Onaim Nai' Yesus In atoup noin' ein ansanmakan. Sin na'uab ein am nak, “Hae! In re' ia, sekau? On mee m'es In bisa naprenat anin ma okin he natuin In romin?”
Usif Yesus nareko' tuaf nua re' anniut saen
28 Ka 'roo fa te, sin ntean neof goe panin, anbi atoin Gadaras sin pah. Anbi bare naan, anmui' tuaf nua anniut saen. Sin natuan etan nuat baer subat. Sin re' naan maufiunk ein kah een, tar antea ka tiit fa tuaf nabrain he nnao npeo' bare naan. Sin nkius niit Nai' Yesus neem on naan ate, 29 sin nkoa' ein am nak, “Hoi Aan Uisneno! Nansaa' am es Ho uum moik kai? In oras he nhukun kai ka ntea fa fe', mes Ho he mha'mui' kai.” 30 Anbi bare naan, anmui' naan fafi pukan es amfaun ii kah. Sin oobn ein amnahat. 31 Onaim niut ne nbaisenun ma ntotin neu Nai' Yesus am nak, “Karu mroim he mriu' kai te, amreun kai he mtaam meu fafin re' nee, tua!” 32 Onaim Nai' Yesus naprenat sin im nak, “Amnao nai!” Rarit nitun naan anpoin na'ko tua nua' ein naan, onaim sin ntaman neun fafin naan. Onaim fafin naan naenan nsiksakn ok nsanun na'kon a'to'ef naan ma nmoufun neun nefo. Onaim sin nreem anmaten. 33 Ankius nitan on naan ate, atiut fafin naan naen anfanin neun kuan, onaim sin natonan abitan kuan ee nanan. 34 Annenan on naan ate, too mfaun ein anpoin neun bare naan. Sin niit Nai' Yesus, onaim sin nak Ee he nasaitan sin kuan ma bare naan.
Usif Yesus nareko' ameen bua' es
1 Rarit Nai' Yesus sin ansaen nfanin neun kofa' naan, ma annaon nfanin neun neof goe panin, ma ntean In kota. 2 Anbi bare naan, anmui' naan tuaf na'taeb neik sin aok-bian re' nameen bua' neu Ne. Ankius niit sin on naan ate, Nai' Yesus nahiin nak sin npirsai Je nak, In bisa nareko' sin aok-bian amenat naan. Onaim In na'uab neu amenat naan am nak, “Anah! Amha'tain ho nekam naan fe'! Fin Au 'sako 'rair ho saant ein.” 3 Mes anbi bare naan, anmui' tunggur agama Yahudi tuaf fauk anhaek nokan. Sin nneen Nai' Yesus na'uab on naan. Onaim sin ruik ein anbesin. Rarit sin na'uab ein am nak, “Atoni' re' ia nabrain bainesi' he na'uab on naan, oo! Suma Uisneno kuun es re' bisa nsaok sanat. Mes atoni' re' ia in uaban naan, anmoe' jon on re' Uisneno. Ia rais man'akan neu Uisneno goen!” 4 Mes Nai' Yesus nahini ntea sin nekak naank ein. Rarit In na'uab am nak, “Nansaa' am es hi mitenab am mak, Au u'akan Uisneno? 5 Mee es ma'kafa' nneis? Karu Au 'ak 'eu abuat re' ia m'ak, ‘Ho saant ein masako' nrairn een,’ ai' Au 'ak, ‘Amfeen nai, ma mfain nai.’ 6 Karu in nfeen nain oras naan, na' hi miit bukti, mmak, Au re' ia, Mansian Batuur-Batuur. Fin Au 'mui' hak he 'saok sanat.” Onaim Nai' Yesus naprenat ameen bua' naan am nak, “Amfeen nai! Mait ho baer' ein ma mfain nai!” 7 Onaim ameen bua' naan anfeen, ma ntebi nfain. 8 Ankisun on naan ate, too mfaun ein ansanmakan. Rarit sin naikas ma npures na'rat-ratan Uisneno In kanan am nak, “Uisneno mapina'-makraha'! In nfee kuasa ma'tani' on naan neu mansian.”
Usif Yesus no'en nai' Mateos he natuin Ee
9 Rarit Nai' Yesus annao nkoon na'ko bare naan, onaim In niit atoin ahoik beo tuaf es anmepu nbi kantoor pajak. Atoni' naan kaan ee, nai' Mateos. Rarit Nai' Yesus nak ee mnak, “Uum mutuin Kau!” Anneen on naan ate, nai' Mateos anfeen ma natuin nain Je oras naan. 10 Rarit nai' Mateos naskau Nai' Yesus sin neman neun in umi he nbukaen. In nfee haan askaut amsa' neu in aok-bian ahoik beo ngguin, ma tamu bian sin, he neman ma nbukaen bu'-bua' nok sin. 11 Mes tuaf fauk na'kon partei Farisi neman ma na'mua' ein anbin Nai' Yesus In atoup noin' ein. Sin na'uab ein am nak, “Nansaa' am es hi tunggur goe naah-niun nok atoni krafun sin, on re' ahoik beo, ma in aok-bian atoin maufiun ein?” 12 Mes Nai' Yesus natoon neu sin im nak, “Ameent ii nperluu apairorit on re' dokter. Mes ao-miin ii, ka nperluu goe fa. 13 Reko nneis hi mfain ma mparikas mirek-reko' Uisneno In Kabin ma Prenat re' mafefa kninu' nai' Hosea ntui je mnak, ‘Au roimk ii, es re', Au ngguin anmanekan es nok es, ma nakrira' rais kasian. Karu sin ka nmo'en fa on naan ate, sin mu'i-'turu' re' sin neik sin neun Kau naan, ka ma'upan ma mapa'en fa saa'-saa'.’ Uisneno es re' na'uab on naan. Nok ranan naan, Au ka 'uum fa he 'urus tuaf-tuaf re' naan in tuan ee nak in reko nrair, mes Au 'uum he 'urus tuaf-tuaf re' amreu't ein.”
Atoni' nataan, nansaa' am es Usif Yesus In atoup noin' ein ka nanaah ok fa
14 Rarit nai' Yohanis Asranit in atoup noin' ein neman ma nateef nok Nai' Yesus. Sin nataan Ee mnak, “Hai atuina' nai' Yohanis biasa minaah om. Atoin Farisis sin nanaah ok amsa'. Mes nansaa' am es Ho atoup noin' ein naah-ninun piut? Sin ka nanaah ok fa, oo?” 15 Mes Nai' Yesus nataah sin anpaek uab manporin am nak, “On nai: karu anmui' fesat kabin, taumn ein ka nanaah ok fa, mes sin ro he nbukaen tar namsenan. Karu baroit atoin ee nbi nana fe'e te, sin of anbukaen bu'-bua'. Mes of anbi oors es, karu tuaf bian anheek baroit atoin aan on naan ate, na' in aok-biak ein ansusan. Oras naan sin nanaah ok. 16 Atoni' ka nait fa tai tuuk fe'u, ma npaap ee neu baru kroef atpisu'. Fin karu nsaef baru naan ate, tai tuuk fe'u naan of annuun nggon. Nok ranan naan, baru kroef naan natpisu' ma natkai nteni'. 17 On naan amsa', atoni' ka narai fa tua miin fe'u neu 'saap arapu'. Fin a'saap arapu' naan of anpee', onaim tua mina' naan nroni ma nasai npoi. Onaim tua miin fe'u ro he tarai je neu 'saap fe'u he nua sin ntaah ein rek-reko!” Nok ranan naan Nai' Yesus nanoni' sin im nak, In noni' naan, fe'u. Onaim kais masero' nok noni' amnaa'.
Usif Yesus nareko' bifee jes, re' nameen naa asait, ma namonib nafani' ri' feot goes
18 Oras Nai' Yesus fe' na'uab nok nai' Yohanis in atoup noin' ein on naan ate, a'naak uim onen es neem ma nateef nok Ne. Atoni' naan anri'tuu nbi Nai' Yesus In human ma In matan, ma nbaisenu mnak, “Aam honi'! Amturun maan kau, tua! Au aan feot goe, fe' nmaet. Au uskau Ko, tua, he mkoen Om uum, ma mtao Ho 'nimam meu ne, he reko te in nmoni nfain.” 19 Anneen on naan ate, Nai' Yesus nok In atoup noin' ein, natuin atoni' naan. 20-21 Anbin raan atnana' on naan ate, anmui' naan bifee jes natuin sin. In meen funan ka nasnaas niit fa toon bo'es am nua goen. In natenab anbi in nekan am nak, “Asar au 'reo' 'aan Nai' Yesus in baru, au of ureok.” Onaim in npaumaak ma nreo' Nai' Yesus In baru. 22 Nai' Yesus annaben niit, onaim In nbani' n'ain bifee naan. Onaim In na'uab am nak, “Ain! Amha'tain ho nekam naan. Natuin ho mpirsai batuur-batuur meu Kau, es na' ho mureok.” Bifee naan nareok nain oras naan. 23 Rarit Nai' Yesus sin nnao nkonon neun a'naak uim onen naan in umi. Antean nee te, In ntaam ankius niit areuk nuukt ein, ma too mfaun ein ankaen npin-piuns ein. 24 Mes Nai' Yesus na'uab neu sin im nak, “Misnasab hi kaet ein naan, ma mfain nai! Fin ri'ana' ia in ka nmaet fa. In suma ntuup kuun.” Mes sin nmani nfaer Ee. 25 Rarit too mfaun ein naan anpoin ok-oke'. Onaim Nai' Yesus antaam neu ri'ana' naan in ke'en, ma annaa' in a'niman. Onaim ri'ana' naan anmoni nfain nain. 26 Ankisun on naan ate, too mfaun ein nmurai nareet ein bu'-bua' nfuun am nateef sin pah naan, anmatoom nok saa' re' Nai' Yesus anmoe' je naan.
Usif Yesus nareko' aforot nua
27 Rarit Nai' Yesus annao nkoon. Anbi raan atnana', anmui' naan aforot tuaf nua natun-tuin Ee. Sin nkoa' ein am nak, “Usif nai' Daut in sufan. Amkasian maan kai, tua!” 28 Nai' Yesus antaam neu umi', onaim atoin nua afoort ein naan neman neu Ne. Rarit In nataan sin im nak, “Hi mpirsai batuur-batuur, mak Au 'mui' kuasa he ureko' ki he hi bisa miit ma mkisu, oo?” Onaim sin natahan am nak, “Airoo, Aam! Kais mutaan amtein on naan, natuin hai mpirsai batuur-batuur meu Ko, tua!” 29 Anneen on naan ate, Nai' Yesus anreo' sin maatk ein, ma na'uab am nak, “Karu on naan ate, maut nai he njair natuin hi pirsait naan!” 30 Nai' Yesus na'uab anrair on naan ate, sin niit nanin oras naan. Mes Nai' Yesus namnaub sin ma'tani' mnak, “Mimnau goo! Kais mitoon meu tuaf mese' msa' anmatoom nok rasi re' njair oras ia!” 31 Mes sin ka bisa ntahan naan fa sin tuak ein. Rarit sin nnaon nfuun am nateef sin pah naan, he nasina' ma nabeno' rasi anmatoon nok Nai' Yesus In mepun naan.
Usif Yesus nareko' amuut es
32 Atoin aforot tuaf nua' ein naan anpoin nrarin on naan ate, anmui' tuaf antaam neman neik tuaf es anteni' neu Nai' Yesus. Tuaf naan anmuu, onaim in ka na'uab nahiin fa, natuin niut goe natua et in tuan. 33 Ankius niit on naan ate, Nai' Yesus naprenat nitu naan anpoi na'ko tuaf naan. Nitu naan anpoi nain, onaim tuaf naan bisa na'uab nain oras naan. Rarit too mfaun ein re' anbin bare naan ansanmakan. Sin na'uab ein am nak, “Hae! Hit atoin Yahudis ka tiit tiit fa rasi nahuum on re' ia!” 34 Mes atoin Farisis sin ka nmarinan fa. Sin na'uab ein am nak, “Hoe! Nitu 'nakaf es re' anfee Ne kuasa he In bisa nriu' napoitan nitu.”
Usif Yesus ankasian too mfaun
35 Rarit Nai' Yesus annao nfuun am nateef kota ma kuan, he nanoni' anbi uim oen ein. In nanoni' anmatoom nok Uisneno In Rais Reko, ma anmo'en on mee he sin bisa anjarin Iin na. In nareko' are' ameent ein, ma tuaf-tuaf ein ok-oke' re' sin aok ein anmui' in akuran ma arabu' amsa'. 36 Ankius too mfaun ein on naan ate, Nai' Yesus ankasian sin, natuin sin ka nahinin fa he nmo'en on mee. Fin sin ar-arsin re' naan, nahuum on re' 'bib-kase re' ka nmui' fa atukus. 37 Rarit Nai' Yesus na'uab nok In atoup noin' ein am nak, “Too mfaun ein re' ia, nahuum on re' sekit ma mnonut na'ko rene ma etu. Maski sekit ma mnonut naan ko'u, mes ameupt ein ka mfaun fa he nsekin ma nonun, ma natuun ee nbi po'of. 38 Nok ranan naan, hi ro he m'onen ma mtoit rene ma etu naan in Tuan, he nsonu' ameput, maut he sin nbubun naan In rene ma etu sin aafk ein.”
Usif Yesus anpiir naan In atoup noni' tuaf bo'es am nua
1 Rarit Nai' Yesus no'en In atoup noin' ein he neem nabuan. Onaim In nfeen sin kuasa he nri'un nitu ma nareko' amenat huma'-huma'. 2 Atoup noni' tuaf bo'es am nua re' In nreek haefan sin naan, esan re': Ahunut, in kaan ee nai' Simon (re' biasa sin nteek ee nak, ‘Petrus’), rarit in orif, kaan ee nai' Anderias, rarit nai' Yakobus, ma in orif, kaan ee nai' Yohanis (sin nua sin naan, aam Sebedius in aanh ein). 3 Nai' Felipus, nai' Bertolomeos, nai' Tomas, nai' Mateos (ahoik beo), nai' Yakobus (aam Alfius in anah), nai' Tadius, 4 nai' Simon (atuina' partei purtik Selot), ma nai' Judas Iskariot (re' of na'sosa' Nai' Yesus).
Usif Yesus anreek haefan In atoup noin' ein
5-6 Rarit Nai' Yesus anreek haefan In atoup noni' tuaf bo'es am nua, ma In naprenat sin im nak, “Au 'reek haefan ki mnao meu hit atoin Yahudis sin, natuin tuaf amfaun na'ko hit ni, ka natuin fa batuur anbi Uisneno In ranan. Sin re' naan, on re' 'bib-kase re' anseek. Es naan ate, hi kais amnao meu tuaf re' ka Yahudi sin fa, nahuum on re' atoin Samarias sin. 7 Amnao mitoon meu hit atoin Israelas sin im mak, ‘Antea in oors aa goen he are' tuaf ein arsin bisa njarin Uisneno Iin na.’ 8 Amnao mireko' amenat, mimonib mifani' amates, mireko' ameen nui-atroki', ma mriu' mipoitan nitu. Uisneno nathoeb anfee ki, mes In ka ntoit fa saa'-saa' he njair seun baran. Onaim oras ia, hi ro he mnao mithoeb meu biak ein, mes hi kais amtoit mifani' saa'-saa' na'ko sin. 9 Amnao nai ruum-ruum aah, joo. Kais meik roit, 10 oe-beti', pake-nose, a'pein haef, ai' teas. Fin atoni' ro he nfee neu ameput, saa' re' natai nok saa' re' he sin bisa nmonin. 11 Karu hi mtaam meu kota es, ai' kuan es ate, hi maim tuaf re' he ntoup ki. Rarit mitua mbi naan, tar antea hi misaitan bare naan. 12 Karu hi mtaam meu tuaf es in umi te, mi'uab am mak, ‘Hoore tua! Saloom! Tetus ma ao-mina' na'ko Uisneno neu ki.’ 13 Karu uim tuaf aan antoup ki nok rek-reko, hi mtoit he Uisneno nfee tetus-athoen neu sin. Mes karu sin ka ntoup ki fa te, Uisneno ka nfee fa tetus-athoen neu sin imsa'. 14 Karu atoni' ka nroim fa he nneen ma natniin ki te, mpoi mi'ko umi naan, ai' kota naan, rarit mtekar askuku' na'ko hi haem ein, he njair tanar nak, sin ka nromin fa he nnenan ma natninan ki te, sin nasahan ma natahan kuuk. 15 Noka'-nmeu te, oras Uisneno he nfee hukun neu mansian pah-pinan ia, In of nasanut hukun ma'fena' neu atoin Sodom ma Gomoras re' unu' fe'e te maufiun re'uf. Mes mimnau, joo! Fin In of anfee hukun ma'fena' nneisi nteni' neu tuaf-tuaf re' ka nromin fa he ntoup ki!”
Usif Yesus natoon neu In atoup noin' ein am nak, sin of napenin susat ma ha'mu'it
16 “Mimnau! Au 'reek haefan ki nahuum on re' Au 'sonu' 'bib-kase ntaam neu aus fui apisut sin baark ein. Etun hi ro he mpaek ronef on re' kaun anonok. Ma hi neekm ein ro he namnonon on re' koor kefi re' ka naim nahiin fa rasi msa'. 17 Mes ampaant om! Atoni' of anha'mui' ki nahuum on re' asu anrau ma npius na'maet 'bib-kase. Sin of anheer neik ki meu bare re' he nafekan rais pirsait. Ma sin of anbeos ki anbi sin uim oen ein. 18 Sin of anheer neik ki mnao meu gubernur ai' usif, natuin hi mituin Kau. Mes hi ro he mpaek oras re' naan he mitoon Au Rais Reko meu sin. Nok ranan naan, atoni' re' ka nahiin fa Uisneno, anneen rasi nmatoom nok Kau. 19 Mes karu sin nheer neik ki on naan ate, hi kais mimtau mmak, ‘Au he u'uab 'ak saa'?’ ai' ‘Au he utaah 'ak saa'?’ Kais mitenab on naan, fin antea in oras on naan ate, hi Ama' abit sonaf neno tunan natoon neu ki saa' re' hi ro he mi'uab. 20 Oras naan, saa' re' hi mi'uab ee jaan ka na'uu ma na'baa' fa na'ko hi tuam ein kiim, fin In Asmaan Akniun' ee es re' nanoni' ki he hi mi'uab saa'-saa'. 21 Hi mkius kiim, fin anbi uim jes in nanan, karu anmui' tuaf anpirsai Kau, of in aok-bian aa kuun es re' naim ranan he na'maet ee. Rarit karu in aanh ee es re' apirsait, in aamf ee of es re' na'maet ee. Karu ainaf-amaf es re' apirsait, of sin aanh ein esan re' na'maet sin. 22 Amkius kiim, of tuaf amfaun sin ok-oke' nsaken mates neu ki, natuin hi mituin Kau. Mes tuaf re' naran ma ntahan tar antea namsoup, Uisneno of ansoi nafetin naan ee. 23 Karu atoni' anha'mui' ki anbi kota es ate, mfeen maen meu kota bian. Ro tebes! Au re' ia, Mansian Batuur-Batuur. Hi of ka mnao misoup maan fa kota anbi Isra'el sin ok-oke', mes Au 'tebi 'fain 'uum een. 24 Mansian ein biasa nhormaat neun tungguru tuaf es, anneis na'ko in atoup noin' ein. Ma sin anhormaat aam usi' es, anneis na'ko in ameupt ein. 25 Karu atoup noin ii nanoni' ma nahiin on re' in tungguru, in nnaben ate, nanokab. Ma karu ameput nanoni' ma nahiin on re' in usin ate, in nnaben ate, nanokab amsa'. Onaim mimnau! Karu tuaf no'en uim tuaf am nak, ‘Ho re' ia Balsebul, es re' nitu 'nakaf’ te, in uim je naan ee msa' napein kanaf re' ka reko fa ntein.”
Kais mimtausan mansian, fin Uisneno npafa' ma npanat ki
26 “Onaim hi kais mimtausan tuaf-tuaf re' anraban ki. Fin saa' re' atoni' nmoe' je nbi baer ma'nifa'-ma'koro', of mamnita'. 27 Saa' re' au unoni' ki sin ammees-mees, hi ro he mnao mitoon meu too mfaun. Ma saa' re' Au utoon ee mninu'-mninu' ro he mnao mitoon ee nfuun am nateef meu are' bare-bare. 28 Kais mimtausan mansian, fin sin suma na'mate haa mansian ii in aon, mes sin ka bisa fa he nare'u tuaf in asmanan. Onaim hi ro he mimtausan meu Uisneno, fin In kuun es re' anmui' kuasa he nporin nataam aof-ta'uf ma smanaf neu ai abar-barat. 29 Onaim amha'tain hi neekm ein naan. Atoni' na'sosa' koor maka' anbi 'masa' oosn ii ma'kaaf aah. Mes ka tiit tain fa es he nmoufun nmaet, karu hi Ama' abit sonaf neno tunan ka nfee fa mainuan. 30 Hi Ama' abit sonaf neno tunan antae niit ki tar antea saa' re' aan'-ana' krisi'. Hi 'naak fuun ein amfauk ein amsa', In nahiin sin. 31 Onaim hi kais mimtau! Natuin Uisneno naan ki ma'osa' nneis na'ko koor maak ein ok-oke'.”
Ammanaku' Usif Yesus ate, kais mimaeb om
32 Rarit Nai' Yesus na'uab anteni' mnak, “Tuaf re' nabrain he nmanaku' Kau nbi too mfaun ein sin humak ma sin maatk ein anbi pah-pinan ia, Au of a'manaku' ma uhiin je msa' 'bi Au Ama' abit sonaf neno tunan am 'ak, ‘Tuaf re' ia, Au Iin ja, tua.’ 33 Mes tuaf re' nasuan ma natotan kau nbi too mfaun ein sin humak ma sin maatk ein am nak, in ka nahiin Kau fa, Au msa' of utoon 'eu Au Ama' abit sonaf neno tunan am 'ak, ‘Au ka uhiin fa tuaf ia, tua.’ ”
Usif Yesus antaam neem ma nmoe' mansian ein anmaraabn ein, ka naraem ok fa
34 “Hi kais mitenab am mak, Au 'uum he 'eik rais rame' 'eu pah-pinan ia. Fin Au 'uum he 'moe' mansian ein anmaraban es nok es. 35 Au 'uum a'bi pah-pinan ia, utuin saa' re' mafefa kninu' Uisneno na'uab anrari mnak, ‘Aan mone of anraban in amaf, aan feto of anraban in ainaf, ma aan nanef of anraban in ain babaf, 36 fin uim jes in nanan anmamusun es nok es.’ 37 Onaim tuaf re' batuur-batuur anroim he natuin Kau, in ro he nneek Kau nneis na'ko are' saa'-saa' ii ok-oke', anneis na'ko in ainaf-amaf, ma anneis na'ko in aanh ein. Fin karu kaah fa te, tuaf re' naan ka pantas fa he njair Au ngguin. 38 Fin tuaf re' anroim he natuin Kau, mes ka nroim fa he nasaah ha'mu'it, in ka pantas fa he njair Au ngguin. 39 Tuaf re' nabarab ma naroitan in tuan he nmaet, natuin in natuin Kau, in of napeni 'honis piut-piut nok Uisneno. Mes tuaf-tuaf re' suma nroim he nmoin arahaa neu in tuan aa kuun, of in a'monin naan, namneuk on ahaa re' naan!”
Uisneno of anbaras saa' re' atoni' anmo'e
40 “Tuaf re' antoup ki nok rek-reko, in ntoup Kau msa'. Ma tuaf re' ntoup Kau, in antoup Uisneno msa' re' anreek haefan Kau. 41 Tuaf re' ntoup mafefa kninu' Uisneno, natuin mafefa kninu' naan na'uab rasi nmatoom nok Uisneno, Uisneno of anbaras neu ne on re' Uisneno nbaras neu mafefa kninu' es. Ma tuaf re' ntoup tuaf es, re' neek amne'o, natuin tuaf re' naan batuur-batuur natuin Uisneno In romin, Uisneno of anbaras neu ne on re' Uisneno nbaras neu tuaf es, re' in neekn ee mne'o. 42 Tuaf re' antoup tuaf es, re' aan ba-baun re'-re'uf, natuin in natuin Kau, ro tebes Uisneno of anbaras neu ne. Maski suma atoni' anfee oe ruum-ruum, Uisneno of ka nnikan ma niahan fa tuaf naan.”
Nai' Yohanis Asranit anreek haef he nnaon neun Usif Yesus
1 Oras Nai' Yesus anfee nrair rais manba'an neu In atoup noni' bo'es am nua on naan ate, In nnao neu kuan-kuan anbin pah re' naan, he nanoni' ma natoon Uisneno In Rais Reko. 2 Oras naan, nai' Yohanis anbi bui. Oras in nneen are' rasin re' Nai' Yesus anmoe' sin naan, in nreek haefan in atoup noin' ein he nnao nataan Nai' Yesus am nak, 3 “Uisneno nba'an nain na'ko afi unu' mnak, In he nsonu' Kristus antaam neem he nsoi nafetin kit atoin Yahudis. Onaim au he utaan 'ak, Ho re' ia, Kristus, aa oo? Ai' hai ro he mpao tuaf es antein?” Onaim sin nnaon ma nataan Nai' Yesus. 4 Anneen on naan ate, Nai' Yesus nataah am nak, “Hi mneen amrair ma miit kiim. Onaim amfain nai ma meu te mitonan nai' Yohanis am mak, are' saa'-saa' ii njari nrarin, natuin saa' re' mafefa kninu' Uisneno nai' Yesaya antui nain je mnak, 5 Aforot, ankius ma niit een. Abuat, anbiba'-tui', nfeen ma nnao goen. Ameen nui-atroki', nareok ma nakniun een. Akosot, anneen anrair kuun een. Amates, anfeen ma nmoni mfain jen. Atoin kasian, anneen kuun Rais Reko. 6 Onaim on nai: amnao nai, meu te mitonan nai' Yohanis, in of napein in upan ma pa'e karu in npirsai piut neu Kau. Natuin Uisneno of anfee tetus-athoen neu tuaf-tuaf re' in pirsait ee neu Kau gui, na'kii'!” 7 Oras nai' Yohanis in atoup noin' ein antebi nfanin on naan ate, Nai' Yesus na'uab neu too mfaun ein anmatoom nok nai' Yohanis am nak, “Oras hi mnao maim nai' Yohanis anbi baer ruman na'roo na'ko kuan on naan ate, hi mitenab mak, hi he miteef mok atoni' human on re' mee? Ka neu fa he hi mnao miteef mok atoin per-pero, on re' aijoo' goan re' ain ee nabeob ee natun-tuin aah! 8 Ma ka neu fa he hi mnao mkius atoni' re' anpaek paek ma'osa', fin tuaf on re' naan, suma natua et sonaf! 9 Onaim hi mnao mkius atoni' human on re' mee anbi bare naan? Hi mitenab am mak, hi mnao miteef mok mafefa kninu' Uisneno? Batuur! Mes in re' naan, mafefa kninu' re' ma'tain re'uf. 10 Fin matu'i et Uisneno In Suur Akninu' anmatoom nok nai' Yohanis am nak, ‘Amneen! Au 'reek haef Au tuaf, he nnao nahuun ma nasoit eno' ranan neu Ko.’ 11 Amneen mirek-reko'! Anbi pah-pinan ia, ka tiit tain fa tuaf es, re' ma'tani' nneis na'ko nai' Yohanis. Mes na'ko are' mansian ein ok-oke' re' anmanaku' Uisneno njair sin Usif, amunit baineis-neis ii msa' ma'tani' nneis na'ko nai' Yohanis. 12 Anmurai na'ko nai' Yohanis nait in mepu tar antea oras ia, tuaf amfaun een antaam anjarin Uisneno Iin na. Mes anmui' bian natenab ansaan nak, sin ro he nmakenan he na'seke' biak ein he njarin Uisneno Iin na. 13 Antea oras nai' Yohanis Asranit in amneman, hit nonot atoni' Yahudis biasa atmoin tatuin ka'o Musa ma mafefa kninu' Uisneno sin atoorn ein. 14 Onaim ampirsai meu Kau goah. Nai' Yohanis naan, es re' ka'o Elia re' mafefa kninu' Uisneno sin natoon nain in amneman. 15 Onaim karu mroim he mihini te, mneen mirek-reko'! 16 Au he u'uab reta' he hi bisa mihini mmak, mansian oras ia, mansian human on re' mee. Fin sin re' naan, nahuum on re' ri'aan ein re' antok-tokon etan a'masa'. Sin anmahaamn ein es nok es am nak, 17 ‘Hoe! Hai arkai amfuu bobe bu'-bua', mes hi ka mibsoo' ma mmarin-riin fa. Hai arkai amsii, siit kurut-kaet bu'-bua, mes hi ka msuus ma mkae fa.’ 18 Hi on re' ri'ana' re' ka nreen nahiin fa. Oras nai' Yohanis neem, in nanaah on, ma ka nbukae fa tua min-kase. Mes atoni' na'aakn ee mnak, ‘In nniut sae!’ 19 Mes oras ia, Au Mansian Batuur-Batuur re' ia, Au 'uum a'rair. Au ka unaah Ok fa, ma Au 'iun tua min-kase. Mes atoni' na'akan Kau mnak, ‘In re' naan, mansian akomat ma aparu'! Amauf raru! In nnao nkua'noon nok ahoik beo ngguin! Ankua'noon nok tuaf-tuaf re' ka mapake' fa! Ka ntae nahiin fa in tuan!’ Mes hi mtanar kiim Au uabak re' ia, hee! Uisneno In mahiin ee mamnita' anbi Iin na sin a'moink ein.”
Anmatoom nok tuaf re' ka nromin fa he ntoup Usif Yesus
20 Rarit Usif Yesus anmurai nakain kuan fauk sin too ngguin. In nmo'e nrair rais sanmakat ma'tani' anbi baren re' naan, mes sin ka nromin fa he nasaitan sin 'moe' saant ein, he ntebi nfanin ma natuin Uisneno In raan a'honis amneot. 21 Nai' Yesus nakain sin im nak, “Abitan Korasin ma Betsaidas sin! Ampaant om! Hi of mipein siraak! Au 'mo'e 'rair rais sanmakat huma'-huma' 'bi hi humam ma hi matam, mes hi ka mroim fa he mpirsai Uisneno. Te kaah, hi atoin Yahudis ki re' ammanaku' mak hi mihiin Uisneno. Mes karu rais sanmaakt ein re' Au 'moe' sin a'bi hi kuan ein naan anjari nrarin anbin kota Tirus ma Sidon, onaim a'roo-'roo te re' ia abitan re' nee, sin na'pisan nrarin, ma nasaitan sin saant am penu sin, rarit natuin Uisneno. Ma sin of anpaken tai-nukat amsa', ma antaon askuku' anbi sin a'naak ein he njarin tanar am nak, sin nmei' jok nok sin saant am penu sin. Te kaah, abitan Tirus ma Sidon naan, ka atoin Yahudis fa re' anmanauk ein nak sin nahiin Uisneno. 22 Batuur! Hi of miit kiim! Karu Uisneno nafeek are' kanan mansian ein sin rasin, abitan Tirus ma Sidon sin napenin hukun ma'kafa' nneis na'ko ki! 23 Hi abit Kapernaum! Ampaant om! Hi kais mitenab am mak, Uisneno na'ratan ki mtaam meu sonaf neno tunan. Kaah fa, tua! Uisneno of nait inporin ki mtaam meu ai abar-barat! Bait rais sanmaakt ein re' Au 'moe' sin a'bi hi kuan ein, anjair nahunun anbin kota Sodom, bait Uisneno ka nperluu fa he nareu' niis kot maufinu naan. Fin karu abitan Sodom niit rais sanmaakt ein naan, bait sin nasaitan sin moe' maufiun ein. 24 Batuur! Hi of miit kiim! Karu Uisneno nafeek are' kanan mansian ein sin rasin, abitan Sodom sin napenin hukun ma'kafa' nneis na'ko ki!”
Usif Yesus nfee haan askaut he tatuin Ee, nok ranan naan maut he hit ta'be'i tfain
25 Nai' Yesus na'uab anrair on naan ate, In n'onen am nak, “Ama' A'naet et neno tunan ma pah-pinan. Au 'baiseun ma usaeb makasi kou'-ko'u, natuin Ho m'eka' rais huukn ein naan mu'ko Ho tuam aan meu tuaf-tuaf re' annaben sin tuak ein ahiint ein, ma abeo't ein. Mes Ho m'eut ma mutoon are' kanan rasin naan meu atoin a'baut ma atoin neek a'paarn ein. 26 Namneo, Aam! Fin rasin re' naan anmoe' Ho nekam naan anmariin, tua!” 27 An'onen anrair on naan ate, Nai' Yesus na'uab neu abitan re' naan am nak, “Amneen mirek-reko'! Au Ama' abit sonaf neno tunan, anfee nrair kuasa sin ok-oke' neu Kau. Tuaf re' nahiin Kau batuur-batuur ii, suma mese', es re' Au Ama'. Ma Tuaf re' nahiin batuur-batuur Au Ama', suma Ama' In Anah, es re' Au re' ia. Ma Au 'piir tuaf bian sin he 'eut ma utoon 'eu sin, he sin nahiin narek-reok' Ee. 28 Hi ar-arki re' ammeup ma'tani' ma mhae mmaet, iim nai he mituin Kau! Hi ar-arki re' mroi ma misaah rais ma'fena', iim am'ain Kau! 29 Karu hi mtoup Au noni' sin ma iim mituin Kau te, hit on re' bijae luku nua re' anheer hau luku noon es. Fin Au re' ia, Au neek reko Kau, ma neek a'paran Kau. Karu hi mituin Kau te, hi mi'be'i mfain. 30 Natuin Au noni' naan, ka ma'nuka' ma susa fa. Ma Au prenat naan, ka ma'fena' fa.”
Atoni' nakritik Usif Yesus anmatoom nok neno snasat
1 Neot es, nateef nok atoin Yahudis sin neno snasat, Nai' Yesus nok In atoup noin' ein annaon npe'on biak ein sin rene. In atoup noin' ein namnahan, es naan ate sin nhetun maak-gandum in punin ma nahan oras sin nnaon. 2 Anbi naan, anmui' naan tuaf fauk na'kon partei pirsait Farisi re' annaa' naher-heran harat Yahudi. Ankius nitan Nai' Yesus In atoup noin' ein anmo'en on naan ate, sin nakain Ee mnak, “Ho atoup noin' ein anhetun maak-gandum nateef nok neno snasat! Kais on naan! Fin re' naan antanhai nrair hit atoran.” 3-4 Mes Nai' Yesus nataah am nak, “On mee? Hi ka mimnau fa ka'o Daut in reta'? Ka'o Daut nok iin na sin taik ein na'roton natuin sin namnahan nmaten. Onaim in ntaam neu Uisneno In Tenar Onen. Rarit in nait utunu' re' a'naak pirsait ein anfee nrair sin neun Uisneno he sin nbukaen. Te kaah, utuun ein re' naan suma a'naak pirsait ein esan re' nmu'in hak he nbukae sin. A'teta' na'ko naan ate, ka bole fa. Rarit ka'o Daut sin anbukaen, mes ka tiit fa tuaf es he nasaan sin. Hi on re' ka mrees mihiin fa Uisneno In Suur Akninu'! 5 Fin anbi Suur Akninu' naan, matu'i nmatoom nok a'naak rais pirsait ein sin mepu, es re' he ntuthaen anbin uim onen nateef nok neno snasat. Mes sin ka nsanan fa saa'-saa'. 6 Amneen! Unu' fe', uim onen ro pentiing, mes oras ia rais jes pentiing anneis. Es re' Au, Mansian Batuur-Batuur re' ia. 7 Anbi Suur Akninu', Uisneno na'uab am nak, ‘Au roimk ii on nai: Au ngguin ro he nakrira' rais kasian, es nok es. Karu sin ka nmo'en fa on naan ate, sin mu'i-'turu' re' sin neik sin ma na'turu' sin neun Kau naan, ka ma'upan fa saa'-saa'.’ Onaim karu hi mihiin mirek-reko' Uisneno In Kabin ma Prenat naan ate, bait hi ka mikuu fa Au atoup noin' ein mak sin nsanan. On nai te sin ka nsanan fa te! 8 Fin Au re' ia, Mansian Batuur-Batuur. Au 'mui' hak he ufeek 'ak, mansian ii bole nmeup saa' nateef nok neno snasat.”
Usif Yesus nareko' tuaf nateef nok neno snasat
9 Rarit Nai' Yesus annao nasaitan bare naan, he ntaam neu sin uim onen. 10 Anbi bare naan, atoin es in a'niman anmaet ao-biaf. Atoin Farisis sin namin ranan he nasaan Nai' Yesus, kar-karu In nareko' atoni' naan nateef nok neno snasat. Rarit sin nataan Ee mnak, “Tatuin hit atoran rais pirsait, atoni' bole nareko' tuaf nateef nok neno snasat, ai' kaah?” 11 Rarit Nai' Yesus nataah am nak, “Karu tuaf es in a'bib-kase es anmoufu ntaam anbi kona' nateef nok neno snasat, 'bib-kase naan in tuan ee ro he napoitn ee, ai' kaah? 12 Onaim Uisneno anneek mansian, anneis na'ko tuaf re' anneek in a'bib-kase naan. Nok ranan naan, atoni' bole nmoe' rais reko nateef nok neno snasat.” 13 Onaim In na'uab neu atoni' re' in a'niman bian ee nmaet naan am nak, “Ba'e! Amnona' ho 'nimam naan neem!” Rarit in nnona' in a'niman amates naan, onaim nareok nain oras naan, on re' in a'niman bian. 14 Ankius nitan on naan ate, atoin Farisis sin nek-neuk nisik. Onaim sin nfeen annaon nasaitan uim onen naan. Sin nnao nma'akoran am nak, “Hit ro he taim ranan he ta'maet Ee!”
Uisneno es re' anpiir naan Nai' Yesus he nmeup neu Ne
15 Mes Nai' Yesus nahiin sin reon maufinu naan, es naan ate, In nnao neu bare bian. Too mfaun ii natuin Ee, rarit In nareko' ameent ein ok-oke'. 16 Mes In ntaar sin im nak, “Hi kais mitoon meu tuaf bian anmatoom nok Kau.” 17 In nmoe' on re' naan, natuin saa' re' Uisneno natoon nain neu In mafefa kninu' nai' Yesaya mnak, 18 “Amkius miit! In re' ia, Au tua renu' tua reka' re' Au 'piir 'ain Je. Au 'neek Ee, ma Au neek ii nmariin piut neu Ne. Au of a'fee ma 'nona' Au Smanak 'eu Ne, he In nnao nanoni' mansian am tuaf et uuf am pah, anmatoom nok Au raan a'honis amneot am amnonot. 19 In ka npaas fa In a'basan. In ka naikas ma na'ratan fa In tuan. 20 In neekn ee reko. In ka nasusab fa es. Hau re' he noi nat'iup ma natrii', In ka n'iup goe fa. Pauk piin marak aan'-ana', In ka nfukar niis ne fa. In nanoni' piut, tar uuf am pah sin nahinin he natuin Uisneno In raan a'honis amneot ma amnonot. 21 Mansian na'ko uuf am pah of anpirsai Je, natuin sin nahinin nak, In re' naan, sekau.”
Tunggur agaam ein nakuu Usif Yesus am nak, nitu 'nakaf es re' anfee Ne kuasa
22 Neot es, anmui' tuaf neik neu Nai' Yesus tuaf es, re' anniut sae tar antea in nfoor ma nmuu nmaet. Onaim Nai' Yesus nriu' napoitan nitu naan, ma nareok' ee. Rarit atoni' naan bisa niit ma bisa na'uab oras naan amsa'. 23 Ankius nitan on naan ate, too mfaun ein ansanmakan. Sin na'uab ein am nak, “Of oni' In re' ia, nai' Daut in sufan, re' mafefa kninu' Uisneno sin antui nain je na'ko afi unu'. In re' ia, oni' Tuaf re' hit tpa-pao!” 24 Mes oras atoin Farisis sin annenan on naan ate, sin ka ntoupun reko fa. Rarit sin na'uab ein am nak, “Hoe! Atoni' re' ia bisa nriu' nitu, natuin nitu 'nakaf Balsebul es re' anfee Ne kuasa.” 25 Mes Nai' Yesus nahiin atoin Farisis sin uab ein naan. Onaim In natoon neu sin im nak, “Hi uab ein naan, tateenb ee te, ka nnao fa! Karu anbi pah es, in too gui anmabanan nmafan-faink ein, ka neu fa he pah re' naan bisa nhaek nabar-baar. On naan amsa' anbi kota es in nanan, ai' anbi uim jes in nanan, es ankataas es, sin ro of anpe'en ma nbaits ok. 26 Onaim karu niutn ein anmamusun ma anmari'un es nok es ate, sin a'naakt ee ka bisa nnaa' fa prenat naan a'roo. 27 Mimnau! Hi ngguin anriu' nahinin nitu msa'. Sin npaek kuasa na'ko nitu, oo? Kahaf! Onaim hi kais mi'uab tafi'-tafi' mmak, Au 'paek nitu he 'riu' kuasa na'ko nitu. Hi ngguin kiim of esan re' nafekan am nak, saa' re' hi mikuku' sin meu Kau naan, ansaan. 28 Mes karu Au 'riu' nitu 'paek Uisneno In Asmaan ee In kuasan, naan nakrira' nak, Uisneno naan, batuur-batuur Usif re' anhake nrair et hi humam ma hi matam. 29 Karu abaakt ii he ntaam nabaak anbi atoin ma'tain es in umi, in ro he nfuut nahunun uim tuaf naan mates fe'. Rarit na' in nait neik bare' na'ko umi naan. 30 Mimnau mirek-reko'. Tuaf re' ka nkua'noon fa nok Kau, in re' naan anmamuus nok Kau. Ma tuaf re' ka nturun ma nbaab Kau fa nbi Au mepu, in re' naan suma nareu' goah. 31 Onaim amneen mirek-reko' Au uabak re' ia! Uisneno nabarab he nnoes nain mansian ein sin sanat. Ma karu atoni' na'uab ka reko fa neu biak ein, Uisneno nabarab he nfee saok sanat neu ne. Mes karu anmui' tuaf nabrain he na'uab na're'uf Uisneno In Asmaan Akninu', Uisneno ka nsaok nain fa in sanat naan. 32 Karu atoni' na'uab re'uf neu Kau, Mansian Batuur-Batuur re' ia, Uisneno nabarab he nsaok nain in sanat. Mes karu atoni' na'uab na're'uf ma nraban Uisneno In Asmaan Akninu', Uisneno ka nsaok nain fa sanat naan tar antea nabar-baar amsa'!”
Hau roet ma in fuan
33 Rarit Nai' Yesus na'uab piut neu atoin Farisis sin im nak, “Mitenab mirek-reko'! Hau roet arekot, nafua fua reko. Mes hau re'uf, nafua fua re'uf. Fin, na'ko roet ii in fuan, atoni' bisa nahini mnak, hau roet naan reko, ai' kaah. 34 Mes hi on re' kaun aputa-kriut! Hi ka bisa mi'uab fa rais reko. Natuin saa' re' et atoni' in nekan, naan es re' of anpoi npeo' in fefan. 35 Atoin neek arekot, in of na'uab reko, natuin anmui' rais reko ma tenab reko et in nekan. Mes amaufinut, ro tebes na'uab maufinu, natuin anmui' rais maufinu et in nekan. 36 Ampirsai Kau! Oras pah-pinan ia namsoup, Uisneno anparikas mansian ein ok-oke' sin rasin. Oras naan, es-es ate ro he nataah kuun in uaban re' ka ma'upan fa. 37 Onaim ampaant om! Fin Uisneno of antai hi uab ein, ma nafeek am nak, hi mipein hukun, ai' kaah.”
Atoni' ntoit he Usif Yesus nakrira' bukti
38 Anneen Nai' Yesus na'uab on naan ate, tunggur agama fauk ma atoin Farisis sin ntoit Je mnak, “Aam Tungguru! Hai mtoit he hai miit Ko mmoe' rais sanmakat, he njair bukti mnak, Ho kuasam naan batuur-batuur amneemn ii na'ko Uisneno.” 39 Mes Nai' Yesus naskarak sin im nak, “Hoe! Mansian oras ia ka nroim fa he nneen ma natniin Uisneno! Suma nahini haa he nmo'en kuuk maufinu! Maski hi mtoit rais sanmakat, mes Au ka 'moe' utuin ki fa. Natuin unu' te, Uisneno nfee nrair rais sanmakat anpaek In mafefa kninu' nai' Yunus. Naan nanokab anrair! 40 Nai' Yunus natua neno teun ma fai teun anbi iik kou' goes in tain. On naan amsa' Au, Mansian Batuur-Batuur re' ia. Au of utua neno teun ma fai tenu 'bi nua fatu, bare 'maten. 41 Oras neon amsoput, Uisneno njair afeek rasi, abitan Niniwe sin nhaken njarin saksii he nakuu ki mnak, ‘Hi arki re' ia, amonot!’ Unu' te, abitan Niniwe sin nnenan ma natniin Uisneno In mafefa kninu' nai' Yunus, onaim sin na'pisan ma nasaitan sin saant am penu sin. Mes hi te, kahaf! Te kaah, oras ia, Tuaf re' et hi tnaanm ein, ma'tani nneis na'ko nai' Yunus. Tuaf re' naan, es re' Au re' ia. Mes hi ka mroim fa he mfairoir Kau kre'o msa'. 42 Oras neon amsoput, Uisneno njair afeek rasi, uis bifee bi Seba na'ko pasa' haa'-nua, anhake njair saksii. In nakuu ki ar-arki re' amonit oras ia mnak, ‘Hi ar-arki re' ia, amonot!’ Unu' te, uis bifee naan neem na'ko bare 'roo-'roo he niit nok in matan usif Soleman in mahinin. Te kaah, oras ia Tuaf re' et hi tnaanm ein, ma'tani nneis na'ko usif Soleman. Tuaf re' naan, es re' Au re' ia. Mes hi ka mroim fa he mfairoir Kau kre'o msa'.”
Nitu re' anfani nteni' neu tuaf re' in natua niit anbi naa
43 “Karu niut gui nriu' napoitn ee na'ko tuaf es, nitu naan annao neu baer ruman he nasnaas. Mes in ka napein fa bare he natua. 44 Onaim in natenab am nak, ‘Ahh! Au ka upein fa bare on nai te, reko nneis au 'fain he utua 'bi tuaf re' neno na au utua gui.’ Rarit in ntebi nfain, onaim in niit bare naan nakninu' nrair, ma ankikin narek-reko' nrair bare naan. 45 Rarit nitu naan annao nhaman in partei ngguin tuaf hiut re' maufinu nneis na'ko ne. Onaim sin nnaon natuan nbin atoni' naan, onaim sin nauban naan ee. Onaim oras ia, atoni' naan in a'moin ii nre'u nneis. On naan amsa' anmatoom nok mansian oras ia.”
Usif Yesus In nonot-asar re' batuur-batuur ein
46 Oras naan, Nai' Yesus na'uab nok too mfaun ein fe'. Onaim In ainaf ma In oirf ein neman he nateef nok Ne. Sin nhaken nbin mone', ma nreun tuaf he no'en. 47 Onaim anmui' tuaf neem natoon Ee mnak, “Aam! Ho aina' ma sin Ho ori' etan mone'. Sin he nateef nok Ko, tua.” 48 Rarit Nai' Yesus nataah am nak, “Au aina' re' batuur ii, sekau? Ma au orif-tataf re' batuur ii, sekau?” 49 Onaim In nruur neu too mfaun ein re' natuin Ee, ma na'uab am nak, “Amkius kiim, sin ar-arsin re' ia, Au aina' ma Au orif-tataf sin. 50 Fin tuaf re' nmoe' natuin Au Ama' abit sonaf neno tunan In romin, naan sin Au nonot-asar sin re' batuur.”
Usif Yesus nareta' anmatoom nok akani' fini nbi afu huma'-huma'
1 Neno naan, Nai' Yesus anpoi nnao na'ko umi naan he nnao ntoko nbi nefo Galilea in ninin. 2 Onaim too mfaun ein neman ma naub naan Ee. Rarit In nsae ntoko nbi kofa' es, re' nhake nbi naan, he nanoni' too mfaun. Abitan auf meot ee nnenan ma natniin Ee. 3 Onaim In nanoni' rasi mfaun neu sin, npaek reta'. In nareta' am nak, “Anmui' naan atoin tani es annao n'ain in rene he nkani' fini. 4 Oras in nkani' fini on naan ate, fini bian anmoufun nbin ranan. Onaim koorn ein neman ma nteon-nsiun nain finin naan oke'. 5 Mes fini bian anmoufun nbin auf mafatu'. Finin naan natoron rabah, natuin afu naan mainihas. 6 Mes oras maans ee nsae on naan ate, fiin atoors ein naan namnenen ma nmeto nmaten. Fin sin a'baa'k ein ka ntaman fa ntean auf goe 'pinan. 7 Fini bian anmoufun nbin huu ma'aika'. Onaim huu ma'aika' naan nakhapi' naan sin tar antea finin naan anmaten. 8 Mes fini bian anmoufun nbin auf afa'. Finin naan natoron, rarit anmonin, nasufan ma napunin. Bian nafuan no bo' teun, bian no bo' nee, ma bian no nautn es. 9 Sekau maruki', maut he nneen narek-reko'!”
Usif Yesus natoon neu saa' am es In nanoni' te npaek reta'
10 Rarit Nai' Yesus In atoup noin' ein neman ma nataan Ee mnak, “Nansaa' am es Ho munoni' too mfaun ein ate, ampaek reta'?” 11 Onaim Nai' Yesus nataah am nak, “Natuin hi mroim he mihiin batuur-batuur Uisneno In aprenat, es naan ate Au utoon ki reta' naan in a'moufun. Mes karu bian ate, Au unoni' sin a'paek reta'. 12 Fin atoni' re' he naim batuur-batuur neu Uisneno In romin, Uisneno of anmoe' je nahini ntein. Mes atoni' re' ka ntoe natuin fa Uisneno In romin, Uisneno of anmoe' je nmono nkoon. 13 Au unoni' sin a'paek reta', natuin: ‘Sin nkisun ma nitan nrarin, mes sin ka nromin fa he nahinin. Sin nnenan ma natninan nrarin, mes sin ka nromin fa he nahinin.’ 14 Sin re' naan on re' mafefa kninu' Uisneno nai' Yesaya antui nain je mnak, ‘Hi of amneen ma mitniin, mes hi ka mroim fa he mihiin. Hi of amkius ma miit, mes hi ka mroim he mihiin fa saa' re' njair naan. 15 Natuin tuaf ein re' ia sin neek ein on fatu, sin nmoe' sin ruik ein ankoson, sin nmoe' sin maatk ein anforon. Onaim maut he sin on re' naan, he sin ruik ein ankoson on re' naan, mbain he on re' naan, he sin maatk ein anforon on re' naan. Maut he Au kais ureko' sin, natuin sin ka nromin he ntoe natuin Kau fa.’ 16 Mes hi re' ia, ro mipein pa'e, joo! Fin hi miit kiim meik hi matam, ma mneen kiim meik hi rukim. 17 Ampirsai Kau! Afi unu' mafefa kninu' Uisneno, ma atoin neek amneo'n ein, anromin mat-maten he sin bisa niit saa'-saa' re' hi miit sin, mes ka bisa fa. Sin anromin mat-maten amsa' he nneen saa'-saa' re' hi mneen sin, mes ka bisa fa.”
Usif Yesus anfei oten na'ko reta' anmatoom nok fini
18 Na'uab anrair on naan ate, Nai' Yesus nak sin im nak, “Oras ia hi mneen reta' naan in oten. 19 Fini re' anmoufun nbin ranan naan, nahuum on re' tuaf re' anneen Kabin ma Prenat anmatoom nok Uisneno In aprenat, mes in ka nahiin fa batuur-batuur. Rarit nitu 'naakf ee neem ma nbakat naan Kabin ma Prenat na'ko tuaf naan in nekan. 20 Fini re' anmoufun nbin auf mafatu' naan, nahuum on re' tuaf re' anneen Uisneno In Kabin ma Prenat, onaim in ntoup Goe nok neek marine. 21 Mes Uisneno In Kabin ma Prenat ka na'baa' fa. Es naan ate, ka mahiki'-matunu' 'roo fa nbi in nekan. Biak ein nasusab sin natuin sin ntoup Uisneno In Kabin ma Prenat on naan ate, in nafetin nain sin. 22 Ma fini re' anmoufun nbin huu ma'aika' naan, nahuum on re' tuaf re' anneen Uisneno In Kabin ma Prenat. Mes in ntaisiub huma'-huma' nok in urusan he bisa nmoin nok ao-mina' ma mamut. Onaim uruusn ein naan nsiu' napoitan Uisneno In Kabin ma Prenat na'ko in nekan, tar antea ka ma'upan fa ntein. 23 Mes fini re' anmoufun nbin auf afa', nahuum on re' tuaf re' ntakan in rukin he nneen ma natniin Uisneno In Kabin ma Prenat, ma natuin Uisneno In romin. Rarit in nmoe' rais reko, nahuum on re' fini re' nasuuf ma nafua naan. Bian nafuan no bo' teun, bian no bo' nee, ma bian no nautn es.”
Usif Yesus nareta' anmatoom nok huun anbi reen je tnanan
24 Nai' Yesus natoon antein reta' es am nak, “Uisneno In aprenat nahuum on re' atoin es ankani' fini nbi in rene. 25 Oras fai meis'okan on naan ate, pah ii ntupan nber-beran. Onaim amaufinut antaam, ma nkani' huu sufa' anbi rene naan. 26 Oras maak ee he napuin on naan ate, ameupt ein niit huun anmoin bu'-bua' nok maak-gandum anbi naan. 27 Rarit sin nnao natonan neu reen tuaf naan am nak, ‘Usi'! Neon goes ii hit tkani' fiin reko tbi ho rene. Nansaa' am es oras ia nmui' huun et reen je nanan?’ 28 Usif naan nataah am nak, ‘Amaufiunt ee, in a'mo'en es re' naan.’ Onaim in ameupt ein anfeen penit am nak, ‘Usi', hai mnao mtoof main huun ee, oo?’ 29 Mes in nataah am nak, ‘Kaisa'! Natuin oras hi mtoof huun naan ate, hit maak ein of amfaik meik sin imsa'. 30 Anbain he sin nmonin nabu-buan tar antea oras he toun. Oras naan, na' au utoon 'eu ameupt ein am 'ak, “Hi mbubun mihunun huun naan. Rarit amfuut sin futu mes-mese', he mout sin. Namuni te, na' ambubun maak-gandum arekot na'ko rene naan, ma mait meik sin ma mitaam sin meu po'of.”’ ”
Usif Yesus nareta' anmatoom nok fua musi' aan'-ana'
31 Rarit Nai' Yesus na'uab antein am nak, “Au u'uab a'teni' reta' es, he hi bisa mihiin, on mee m'es Uisneno njair Usif neu too mfaun. Iin na, nahunu te on re' fua muis aan es, re' atoni' nseen ee nbi in po'on. 32 Maski fua musi' naan aan'-ana', mes karu nmoni te, in njair hau kou' reu'f es anbi po'on naan in nanan. Tar antea are' koro neman ma nakuun ein anbin in taek ein.”
Usif Yesus nareta' anmatoom nok raur haef
33 Nai' Yesus nareta' nteni' mnak, “Uisneno Iin na, nahuum on re' raur haef, re' bifee jes nait je ma nseor goe nok uut sauk goes. Onaim uut masero' naan ansae, natuin raur haef aan'-ana' naan.”
Usif Yesus anpaek reta', he nanoni' rais fe'u re' atoni' ka nneen niit sin fa fe'
34 Nai' Yesus nanoni' too mfaun ein anpaek reta' huma mfa-faun on naan. In uab ein ok-oke' naan, suma npake haa reta'. 35 In nanoni' on naan he natuin saa' re' mafefa kninu' Uisneno antui nain sin im nak, “Au of unoni' too mfaun ein a'paek reta'. Au of utoon are' kanan rasi re' atoni' ka nneen niit sin fa, anmurai na'ko oras Uisneno nmoe' pah-pinan tar antea oras ia.”
Usif Yesus natoon oten na'ko reta' anmatoom nok huun anbi reen je nanan
36 Rarit Nai' Yesus annao nasaitan too mfaun ein, ma ntebi nfain neu umi. Onaim In atoup noin' ein neman he ntotin turun-babat neu Ne mnak, “Usi'! Mutoon kai oten na'ko reta' anmatoom nok huun anbi reen je nanan fe'?” 37 Onaim Nai' Yesus nataah am nak, “Atoni' re' nkani' fiin rekon naan, es re' Au, Mansian Batuur-Batuur re' ia. 38 Ma etu ai' rene naan es re' pah-pinan re' ia. Fiin reok gui, es re' tuaf-tuaf re' antaman njarin Uisneno In nonot-asar sin. Ma huun naan, es re' nitu 'nakaf nok iin na. 39 Rarit amaufinut re' neem ma nkani' huu sufa' naan, es re' nitu 'nakaf naan in neikn on. Oras amnonut naan, es re' neon amsoput. Ameput re' nonun naan, es re' Uisneno In ameupt ein na'kon sonaf neno tunan. 40 Oras neon amsoput, sin na'bua' naan huun ein naan ma nout niis sin. 41 On nai te Au, Mansian Batuur-Batuur re' ia, Au of a'sonu' ameput na'ko sonaf neno tunan. Sin of annaon ma nbubun naan tuaf-tuaf re' ka natuin fa Uisneno In aprenat. Ma sin nbubun naan re' tuaf-tuaf re' anfuri' biak ein amsa', he sin kais natuin Uisneno In aprenat. 42 Sin of nait inporin amaufiunt ein ok-oke' n'anin ai abar-barat, nahuum on re' huun re' npuut naan. Anbi bare naan, na' sin nnaben niit susat ma nana'renat, ma kurut-kaet ka natfeek niit fa. 43 Mes tuaf-tuaf re' anmoin nok amnonot ma amneot natuin Uisneno In romin, sin of natuan nok sin Aam Usif anbin sonaf neno tunan. Anbi bare naan, sin maask ein anpinan on re' manas. Onaim tuaf-tuaf re' he nahiin Kau, amtakan hi ruikm ein, ma mneen mirek-reko'!”
Usif Yesus nareta' anmatoom nok baer ma'osa' 'maten
44 Nai' Yesus anfee ntein reta' es am nak, “Tuaf re' nroim he nahiin Uisneno In aprenat naan, nahuum on re' atoni' re' nroim he napein kuun baer ma'osa' 'maten, re' atoni' na'koro' nbi kona'. Atoni' naan neem ma nhain, onaim in napein bare' naan, es naan ate, in nmariin anmaet. Rarit in nkuub nafani' bare' naan. Onaim in ntebi nfain rabah, ma nnao na'sosa' in a'mui'n ein ok-oke'. Rarit in nsoos afu pisa' naan, he in npaar nain baer ma'osa' naan.”
Usif Yesus nareta' anmatoom nok mutiara re' ma'osa'
45 Nai' Yesus nareta' ntein am nak, “Tuaf re' he nahiin Uisneno In aprenat naan, nahuum on re' atoin arakan es, re' anroim he nmui' mutiara re' ma'osa' 'maten. Rarit in naim mutiara naan he nsoos. 46 Oras in niit mutiara re' reok re'uf on naan ate, in ntebi nfain rabah he na'sosa' in a'mui'k ein ok-oke'. Rarit in nnao nsoos mutiara naan, maut he in npaar nain kuun mutiara naan.”
Usif Yesus nareta' anmatoom nok kninu' pukat
47 Nai' Yesus nareta' ntein am nak, “Uisneno In aprenat, nahuum on re' pukat es, re' akiif kai ika' sin nasaunt ee neu nefo. Rarit pukat naan, naan ika' huma'-huma'. 48 Oras pukat naan naheun nok ika' te, akiif kai ika' sin neman ma nheer napoitn ee, ma neik je neu nini'. Rarit sin ntokon ma nsiun iik' ein nbin pukat naan. Ika' mee reko te, sin nataam ee neu 'kora'. Mes ika' mee re' ka reko fa te, sin nait inporin. 49 On naan amsa' neon amsoput. Uisneno In ameupt ein of neman na'kon sonaf neno tunan, he nbetis amaufinut na'ko atoin neek amne'o ma amnonot. 50 Sin of nait inporin amaufiunt ein ok-oke' neun ai abar-barat. Anbi bare naan, na' sin nnaben niit susat ma nana'renat ma'tani', ma kurut-kaet abar-barat.”
Usif Yesus nanoni' anmatoom nok noni'-taru' amnaa', ma noni'-taru' fe'u
51 Na'uab anrair on naan ate, Nai' Yesus nataan sin im nak, “Hi mihiin are' saa'-saa' re' fe'e na Au u'uab sin, ai' kaah?” Sin natahan am nak, “Hai mihiin sin, tua!” 52 Rarit Nai' Yesus nataah sin im nak, “Reko! Fin ansuun tuaf na'ko tunggur agaam ein re' batuur-batuur antoup noin' ein na'kon Uisneno In Kabin ma Prenat re' matu'i nain na'ko afi unu', rarit in annaa' naher-heran Au noni'-taru' sin amsa' oras ia te, in nahuum on re' uim tuaf es, re' nasoit in po'of he nakrira' in a'mu'in amnaa', nabu-bua nok in a'mu'in fe'u.”
Abitan Nasaret ka ntoup fa Usif Yesus
53 Oras Nai' Yesus nanoni' nrair too mfaun ein anpaek reta' on naan ate, In nnao nasaitan bare naan, 54 he nfain on In kuan Nasaret. Anbi naan, In ntaam anbi uim onen he nanoni' too mfaun. Abitan uim onen sin ok-oke' re' anneen Ee, ansanmakan nmaten. Sin na'uab ein am nak, “Aih! Atoni' ia In mahiin ii! In naskoor anbi mee? Anmoe' on mee m'es in nmoe' rais sanmaakt ein? 55 Te kaah, In re' ia atukan hau goe in anah. Hit tahiin tarek-reko' In ainaf bi Maria ma In oirf ein, esan re', nai Yakobus, nai' Yusuf, nai' Judas, ma nai' Simon. 56 Hit tahiin In feotf ein imsa', te hit arkit tatua kuan mese'. Onaim In napein In mahiin ii na'ko mee ntein? Ma In napein In kuasa ma'tani' naan na'ko sekau ntein?” 57 Es naan ate, sin nsaken ma ka nromi ntein' ein fa he nneen ma natniin Ee. Mes Nai' Yesus na'uab neu sin im nak, “Batuur! Anbi bare bian ate, biak ein anromin he nhormaat mafefa kninu' Uisneno. Mes anbi in kuan aa kuun, ma in nonot-asar sin, atoni' ka nromin fa he nhormaat ee.” 58 In ka nmoe' fa rais sanmakat amfaun anbi bare naan, natuin sin neek ein on re' fatu tar antea sin ka nromin fa he npirsain neun Nai' Yesus.
Sin na'maet nai' Yohanis Asranit
1 Oras naan, usif Herodes annaa' aprenat anbi propinsi Galilea. In neen beno huma'-huma' anmatoom nok Nai' Yesus. 2 In na'uab neu in haef-nimaf mapirsa'i sin im nak, “Nai' Yesus naan, of oni' nai' Yohanis Asranit re' neon goes ii au 'reek he nkeut naan in a'nakan. Oras ia, in nmoni nfani, oo? Es naan ate, in nmui' kuasa he nmoe' rais sanmaakt ein on re' naan.” 3 Usif Herodes na'uab on naan, natuin unu' te in nmaka'rasi' nok nai' Yohanis, tar antea in nheek nai' Yohanis ma nataam ee neu bui. Rasi naan na'uu on nai: usif Herodes ansao naan in orif nai' Felipus in fee, kaan ee bi Herodias. Te kaah, nai' Felipus ma bi Herodias ka nmanpoirn ein fa. 4 Etun nai' Yohanis nakain usif Herodes fani-fani mnak, “Usi', ka nabei' fa he ho msao ho ori' in fee. Natuin naan antanhai hit atoran harat Yahudi!” 5 Mes nai' Herodes ka ntoe ma nrae natuin ee fa, onaim in nsao bi Herodias. Maski nai' Herodes nroim he na'maet nai' Yohanis Asranit, mes in natiun gon nok too mfaun ein, natuin sin anpirsain am nak, nai' Yohanis naan, Uisneno In mafefa kninu'. Etun in nreun iin na he nataam nai' Yohanis neu bui. 6 Mes a'roo-'roo on naan ate, sin anmo'en fesat neu nai' Herodes in neon mahonin. Oras naan, ain usif bi Herodias in aan feto, nabsoo' neu taumn ein. In nabsoo'n ii reokn ii kah, tar antea nai' Herodes in nekan naan anmariin anmaet. 7 Nabso'o nrair on naan ate, nai' Herodes no'en aan feto naan am nak, “Ho mtoit saa' ate, mutoon! Au of a'fee ko. Au 'naa au rais manba'an re' ia. Ma au 'suup a'paek Uisneno In kanan.” 8 Anneen uisf ee na'uab on naan ate, aan feto naan in ainf ee na'seo' goe. Onaim in ntoti mnak, “Usi'! Au 'toit nai' Yohanis Asranit in a'nakan. Amtao maan ee neu dulang es, ma meik kau goe.” 9 Anneen ri' feto naan antoit on naan ate, nai' Herodes in teenb ee naen namneuk. Mes in ka bisa nheer nafani' fa in rais supat, fin taumn ein ok-oke' annenan nrarin ate. Etun in natuin ri' feto naan in haan totis. 10 Onaim in naprenat tuaf he nnao nkeut nai' Yohanis in a'nakan anbi bui. 11 Sin nkeut naan nai' Yohanis in a'nakan, rarit antao goe nbi dulang ma neik je neu ri' feto naan. In ntoup naan dulang naan, ma neik je neu in ainaf. 12 Oras nai' Yohanis in atoup noin' ein annenan nak sin nketu nrair in a'nakan on naan ate, sin neman ma nait in aon amates, ma nnaon nsuub ee. Rarit sin nnao natonan Nai' Yesus.
Usif Yesus antuthae bukaet neu tuaf nifun niim anneis
13 Oras Nai' Yesus anneen beno anmatoom nok nai' Yohanis in a'maten on naan ate, In nok In atoup noin' ein nasaitan bare naan. Onaim sin nsaen kofa' he nnaon neun baer ruman na'roo na'ko kuan he sin bisa nasnasan. Mes oras too mfaun ein nitan Nai' Yesus sin kofa', sin natun-tuin ein npe'on neof goe ninin. Rarit sin npoi neman na'kon kuan-kuan ein, ma nnaon rabah anpe'on raan meto'. Etun sin ntean nahunun Nai' Yesus sin. 14 Oras In nsaun na'ko kofa' naan, In niit too mfaun ein anpa-pao nain Je. Rarit In nkasian sin. Onaim In nareko' are' ameent ein. 15 Oras maans ee he noi nmouf on naan ate, In atoup noin' ein neman ma na'uab neu Ne mnak, “Usi'! Reko nneis Ho mreun too mfaun ein ia he sin nfanin nsosan amnahat neun are' kua paumaak ein. Fin maans ee he noi nmouf goen! Anbi bare ia ka tiit fa mnahat.” 16 Mes Nai' Yesus nataah sin im nak, “Kaisa'! Ro hi es re' amtuthae sin.” 17 Mes sin natahan am nak, “Koeh Usi'! Hai ka mmui' fa saa'-saa' he mtuthae too mfa-faun ein re' ia. Hai he mmoe' on mee? Hit mu'i haa utunu' fua' niim ma ika' fua' nua!” 18 Mes Nai' Yesus na'uab am nak, “Reko. Meik sin neman!” 19 Onaim In nreun too mfaun ein naan ntokon pukan-pukan anbin huun. Rarit In nait utunu' fua' niim, ma ika' fua' nua. Onaim In nbaiseun neon goe ma ntoit makasi neu Uisneno. Rarit In nteib utuun ein naan ma nbatin nfeen In atoup noin' ein, ma sin nnaon ntuthae too mfaun ein ok-oke'. 20 Rarit sin nbukaen bu'-bua' tar namsenan. Anbukae nrarin on naan ate, sin nbubun nafani' amnaah neisf ein, naheun a'kora' bo'es am nua. 21 Too mfaun ein re' nbukaen re' naan, sin of oni' nifun niim. Naan ansoi' naan ahaa atoin ein nmesen. Bifee ma ri'ana' ka nsoi' naan sin fa.
Usif Yesus annao nbi oe je fafon
22 Sin arsin anbukaen nrarin on naan ate, Nai' Yesus anreun In atoup noin' ein nsaen kofa' ma nnao nahunun neun neof goe panin. Mes In namaika' nbi bare naan fe', he nreun too mfaun ein anfanin. 23 Oras too mfaun ein anfanin on naan ate, Nai' Yesus neiki nsae nbi 'toe'f es he n'onen. Antea oras fai ji msa', In nbi naan anmees fe'. 24 Oras naan, In atoup noin' ein re' anbin kofa' antea nrarin neof goe tnanan. Sin nhae nmaten nok he nfoe' kofa' naan, natuin kofa' naan nnao nbani' n'ain anin, ma oik kou' gui anbeson sin. 25 Neis noi nmeu on naan ate, Nai' Yesus natuin sin. In nnao nbi oe je fafon. 26 Ankius nitan on naan ate, In atoup noin' ein naskeken ma na'tai' jein. Sin na'uab ein nok amtaus am nak, “Hoe! Aka'taus ee natuin kit!” 27 Mes Nai' Yesus na'uab neu sin im nak, “Hae! Hi kais mimtau. Au es re' ia. Au nai' Yesus Kau! Amha'tain jom!” 28 Anneen on naan ate, nai' Petrus nataah am nak, “Usi'! Karu batuur on naan ate, amreun kau 'nao 'bi oe ji fafon, he 'eit i'ain Ko, tua.” 29 Rarit Nai' Yesus nataah am nak, “Reko! Uum nai!” Onaim nai' Petrus anpoi na'ko kofa' he nnao n'ain Nai' Yesus. Nai' Petrus annao nbi oe je fafon. 30 Mes oras nai' Petrus annaben ain ko'u on naan ate, in namtau nmaet. Onaim in nmurai nreem antaam on naan ate, in nkoa' naheer am nak, “Koe Usi'! Amturun maan kau, tua!” 31 Nai' Yesus annona' In a'niman rabah ma nnaa' nai' Petrus. In na'uab am nak, “Pe'u, Pe'u! Nansaa' am es ho neek maan nabait? Ho ka mpirsai fa meu Kau batuur-batuur, aa oo?” 32 Rarit sin nua sin antaman neun kofa' naan. Onaim anin naan nasnaas nain. 33 Ankius nitan on naan ate, In atoup noin' ein naiks Ee mnak, “Usi'! Ho ro batuur-batuur Uisneno In Anah!”
Usif Yesus nareko' ameent ein anbin Genesaret
34 Oras sin ntean neof goe panin, sin nsanun nbin neof goe ninin, nbin kuan Genesaret. 35 Oras sin nsaun neman on naan ate, too mfaun ein nahiin nain sin. Onaim sin nkoa' ein am nak, “Hoe, Nai' Yesus neem!” Sin naen anfuun kuan on naan ma nmaktoon ein. Sin neem neikin ameent ein ok-oke'. 36 Sin ntotin he reko te, sin nreo' naan ahaa In baru. Fin sin nateenb ein am nak, “Asar ameent ein anreo' naan ahaa Nai' Yesus In baur goe, sin of nareok nanin.” Onaim ameent ein ok-oke' re' anreo' naan ahaa In baru, sin nareok nanin oras naan.
Mansian ii nmoe' atoran he nsenu' Uisneno In aprenat
1 Neot es, pukan atoin Farisis sin nok tunggur agaam ein neman na'kon Yerusalem he nateef nok Nai' Yesus. 2 Atoin Farisis sin annaa' naher-heran atoran harat Yahudi. Oras sin nnenan am nak, Nai' Yesus In atoup noin' ein nbukaen mes ka nafaun fa sin a'niimk ein natuin sin haart ii in roim naan on naan ate, sin nsaken. Rarit sin neman he nasaan Nai' Yesus am nak, “Nansaa' am es Ho atoup noin' ein nahan ate, ka nafaun fa sin a'niimk ein fe' natuin haart ii in romin? Naan antanhai hit atoran be'i-na'i sin harat!” 3 Mes Nai' Yesus nataah sin im nak, “Hi arki re' ia, ro tuaf re' na'uab ate, a'teta', ma nmo'e te, a'teta'. Hi mraban mihiin Uisneno In aprenat, he mituin hi be'i-na'i sin haart aa kuuk. 4 Fin Uisneno naprenat anrari mnak, ‘Amhormaat hi aina'-ama' sin.’ Antuta ntein am nak, ‘Karu tuaf es naseku' in ainaf ai' in amaf, ro he napein hukun a'maten.’ 5-6 Uisneno nanoni' on naan, mes hi minoni' 'teta' ntein. Fin hi mak, ‘Tuaf es ka nperluu fa he npaek in bare' he nturun ma nbaab in ainaf-amaf, maski sin nha'mui' jok, karu in nba'an anrair he nfee je neu Uisneno.’ Mes nok ranan hi minoni' on naan, hi mporin main Uisneno In aprenat, ma mseun ee nok hi atoran. 7 Etun fe'e na Au 'ak, hi re' ia atoni' re' na'uab ate, a'teta', ma nmo'e te, a'teta'! Naan natai nok saa' re' mafefa kninu' Uisneno nai' Yesaya antui nain je anmatoom nok ki na'ko un-unu'! Fin Uisneno npaek je he ntui mnak, 8 ‘Anmui' mansian anpures ma nbo'is Kau, suma neik in rurun kotin, mes ka na'ko fa in nekan. 9 Maski sin nmo'en on naan amsa', parsuum aah. Sin ka ntoe ma nrae natuin Kau fa, fin sin suma ntoe ma nrae natuin mansian ii in atoran.’ ”
Rais maufinu npoi na'ko atoni' in nekan
10 Rarit Nai' Yesus no'en tuaf bian anbi bare naan ma nanoni' sin im nak, “Amtakan hi ruikm ein he mneen mirek-reko', he hi bisa mihiin! 11 Saa' re' ntaam neu atoni' in fefan, naan ka nhai'niis je fa. Mes saa' re' npoi na'ko atoni' in fefan, naan es re' anhai'niis je.” 12 Rarit Nai' Yesus In atoup noin' ein neman ma natoon Ee mnak, “Usi'! Ho muhiin ii, oo? Atoin Farisis sin neek ein namenan, oras Ho mu'uab on re' naan.” 13 Mes Nai' Yesus nataah am nak, “Au Ama' et sonaf neno tunan of anfaki nporin tuaf-tuaf re' ka nanoni' fa natuin In romin. Naan nahuum on re' atoni' ntoof anporin roet re' in ka roim je fa. 14 Onaim kais amtoe mituin atoin Farisis sin. Fin sin re' naan, nahuum on re' aforot re' nakrira' ranan neu aforot. Sin of anroron kbua' mese' neun kona'.” 15 Rarit nai' Petrus na'uab am nak, “Usi', amturun he mutoon maan kai uab manporin fe'e na in a'moufun.” 16 Nai' Yesus nataah sin im nak, “On nai te, hi ka mihiin fa fe'e msa'? 17 In sairt ii on nai: saa' re' hit tbukae je, ntaam anpeo' hit fefak, rarit antaam ankoon neu hit taik, ma npoi nfani npeo' baer porin makrafu'. 18 Mes saa' re' anpoi nfain na'ko hit fefak, naan es re' anhai'niis atoni', tar antea Uisneno nmai'niisn ee msa', ma ka nroim fa he ntoup goe. 19 Fin rais maufinu mfaun npoin na'kon atoni' in nekan! Nahuum on re': tenab maufinu, marorot, makaket, nbeon on nok tuaf re' in ka fee je fa, ai' in ka moen ja fa, bakan, saksii puta-kriut, na'uab na're'uf es in kanan. 20 Rasin on re' naan, esan re' anhai'niis atoni'. Mes karu atoni' suma nbukae ma ka nafaun fa in a'niman natuin harat on naan ate, naan ka ntaam fa rais jes.”
Usif Yesus anturun bifee jes re' ka atoin Yahudis fa
21 Rarit Nai' Yesus annao nasaitan bare naan, he nnao neu pah re' anpaumaak kota Tirus ma kota Sidon. 22 Anbi naan, anmui' naan bifee jes, re' na'ko bare naan. In ka atoin Yahudis fa. Oras in nneen nak Nai' Yesus neem antea goen, in neem antoit nok neek akbubu' mnak, “Usif nai' Daut in sufan! Amkasian maan kau, tua! Au aan feot goe, anniut sae. Airoo, in nha'mui' niis on, tua.” 23 Mes Nai' Yesus antaa' kuun, ma ka nataah fa hana' mese' msa'. Onaim In atoup noin' ein neman ma natonan am nak, “Usi', bifee re' ia na'roto' piut. Onaim in nmo'e haa taisibu. Reko nneis, Ho mreun goe he nnao nai na'ko bare ia!” 24 Onaim Nai' Yesus nataah am nak, “Uisneno nreun Kau he 'uum a'turun hit atoin Yahudis, natuin sin nteri nsaan ranan, nahuum on re' 'bib-kaes aseket. In ka nreun Kau fa he 'turun atoin sona'.” 25 Mes bifee naan neem antein ma npaumaak Nai' Yesus. In nri'tuu ma nbaisenu ntein am nak, “Usi'! Amturun maan kau, tua!” 26 Mes Nai' Yesus anfee uab manporin am nak, “Ka neu fa he tait imnahat na'ko ri'aan ein, ma ntokar atfeen asun.” Nok sarit ma'nifa' nak, Nai' Yesus ro he nturun In atoin Yahudis sin fe', rarit na' anturun biak ein. 27 Mes bifee naan anbaras am nak, “Batuur, Usi'! Mes ausn ein anpa-paon etan mei je nupun. Sin nahan saa' re' anmoufun na'kon ri'aan ein sin a'piik ein amsa'.” Nok sarit nak, oras ri'aan ein nbukaen, ausn ein nahan amsa'. Maski Nai' Yesus anturun Iin na, mes In ro he nkius biak ein imsa'. 28 Anneen on naan ate, Nai' Yesus na'uab am nak, “Reko, ain! Ho mpirsai Kau batuur, oo! Onaim ho mfain nai, natuin saa' re' ho mtoit je naan, anjari nrair!” Rarit in ntebi nfain, ma in niit in anah naan nareko nrair oras naan.
Usif Yesus nareko' too mfaun
29 Rarit Nai' Yesus nok In atoup noin' ein nnaon nasaitan bare naan, ma sin nnaon npe'-peo'n ahaa nefo Galilea in ninin. Onaim sin nsaen neun 'toe'f es, rarit Nai' Yesus antook he nanoni' sin. 30 Rarit too mfaun ein neman neu Ne. Sin neik ein atoin hae hera', aforot, abuat, amuut, ma amenat bian sin amsa'. Sin natupa' ameent ein naan anpaumak-maak Nai' Yesus In haek ein. Rarit In nareko' sin. 31 Ankius nitan on naan ate, too mfaun ein ansanmakan. Sin na'uab ein am nak, “Hae! Ma'tain besi! Atoin hae hera', bisa nnao reko. Aforot, bisa niit. Abuat bisa nfeen ma nnao. Ma amuut ii, na'uab! Ia ro tebes Uisneno es re' ameput. In re' naan, Uisneno re' hit be'i-na'i sin na'ruir ein ma na'besan na'ko afi unu'.”
Usif Yesus antuthae tuaf nifun haa
32 Neno fauk ankono te, Nai' Yesus no'en In atoup noin' ein am nak, “Au 'kasian too mfaun ein ia. Bian neman na'kon bare 'roo-'roo, ma sin nabuan nbin ia neno teun goen, tar antea nararin beti'. Reko nneis sin kais anfanin nok tai ruman. Kais-kaisa' sin ntuamafun nbin raan atnana'.” 33 Mes Nai' Yesus In atoup noin' ein natahan am nak, “Usi'! Baer ruman ia na'roo na'ko kuan. Ka neu fa he hit ttuthae too mfa-faun ein ia.” 34 Mes Nai' Yesus nataan sin im nak, “Hi utuun ein fua' fauk?” Sin natahan am nak, “Fua' hiut goah. Ma iik' ein fua' fauk aah, tua!” 35 Rarit Nai' Yesus anreun too mfaun ein naan he ntokon neun afu. 36 Onaim In nait utuun fua hiut ein ma iik' ein naan, ma ntoit makasi neu Uisneno. Rarit In nteib sin, ma In nnona' sin neun In atoup noin' ein, he sin nnaon ntuthae too mfaun ein naan ok-oke'. 37 Onaim sin nbukaen tar namsenan. Rarit sin nbubun nafani' mnaah neis fein naan, ma npaan sin nahenu 'poni hiut. 38 Too mfaun ein re' nbukaen ok-oke' naan, of oni' sin atoni' nifun haa. Sin ka nsoi' naan fa bifee ma ri'aan ein. 39 Rarit Nai' Yesus anreun too mfaun ein naan he nfanin. Onaim In nsae kofa' ma sin nnaon neun pah Magadan.
Atoin Farisis ma atoin Sadukis he nakreo namouf Usif Yesus
1 Neot es, atoin Farisis ma atoin Sadukis fauk neman neun Nai' Yesus. Sin he nataan Ee, he nakreo. Nok ranan naan, sin ntoit Je mnak, “Aam! Ho mukrira' miit rais sanmakat es, he njair bukti mnak, Ho mupein kuasa mu'ko Uisneno.” 2 Mes Nai' Yesus nataah am nak, “Karu maans ee nmouf ma neon goe snaa me'e, hi mtanar am mak, ‘Noka' te ka na'uur fa.’ 3 Ma karu maans ee nsae ma anbi neon goe nmui' noep ma'fena', hi mtanar am mak, ‘Neno ia of na'uur.’ Onaim karu hi bisa mihiin oras on naan ate, nansaa' am es hi ka mihiin fa tanar na'ko oras neu oras, batan neu batan? 4 Airoo! Hi mansian oras ia, suma mihini haa he mmoe' rais maufinu! Hi ka mtae mituin fa hit Usi'! Maski hi mtoit rais sanmakat, mes Au ka 'moe' je fa, tua! Natuin afi unu' Uisneno nfee nrair rais sanmakat npaek mafefa kninu' nai' Yunus. Onaim naan, nanokab!” Na'uab anrair on naan ate, Nai' Yesus nasaitan sin.
Usif Yesus nanoni' am nak, ampaant om mi'ko atoin Farisis ma Sadukis sin pengaru
5 Oras Nai' Yesus sin annaon neun neof goe panin, na' In atoup noin' ein namnaun am nak, sin nniikn ein ma ka neikin fa utunu'. 6 Anneen neu sin na'uab ein on naan ate, In nak sin im nak, “Hi ro he mpaant om mi'ko atoin Farisis ma Sadukis sin raur haef ee, joo.” 7 Annenan on naan ate, In atoup noin' ein antaka'naan ein. Onaim sin na'uab ein es nok es am nak, “A'naef ee na'uab saa'? In na'uab on re' ne, natuin hit ka teik fa utunu', aa oo?” 8 Mes Nai' Yesus nahiin sin tenab. Rarit In na'uab am nak, “Hi bainesi' ki! Nansaa' am es hi mi'uab anmatoom nok utunu'? Hi ka mpirsai kau fa, oo? 9 Ro hi ka mihiin fa fe' neu Au 'mui' kuasa? Fin neon goes ii, Au 'teib utunu' fua' niim ma 'tuthae tuaf nifun niim, hi mbubun mifani' mnaah neis fein a'kora' fauk? 10 Rarit, on mee nok re' utuun fua hiut ein re' Au 'bati 'fee 'eu tuaf nifun haa? Hi mbubun mifani' mnaah neis fein 'poni fauk? 11 Nansaa' am es hi ka mihiin fa Au uabak fe'e na? Au ka u'uab fa anmatoom nok utunu'. Au he umnaub ki, he hi mpaant om mi'ko atoin Farisis ma Sadukis sin noni'-taru' sin. Fin sin noni'-taru' sin bisa npengaru naan too mfaun ein, nahuum on re' raur haef re' nkuum na'bua' ee nok uut, rarit uut naan ansae.” 12 Nai' Yesus na'uab on naan ate, na' sin nahinin nak, In ka na'uab fa anmatoom nok utunu'. Mes In na'uab anmatoom nok atoin Farisis ma Sadukis sin noni'-taru' re' anbeon ma nsanan.
Nai' Petrus anmanaku' mnak, Usif Yesus naan, Kristus
13 Rarit Nai' Yesus annao neu bare re' npaumaak kota Kaisarea Filipi. Anbi raan atnana', In nataan sin im nak, “Tatuin biak ein sin uab ein nak, Au re' ia, Mansian Batuur-Batuur re' ia, Au sekau Kau?” 14 Sin natahan am nak, “Bian nak, Ho re' ia, nai' Yohanis Asranit re' anmoni nfain. Bian nak, of oni' Ho re' ia, ka'o Elia. Bian anteni' nak, ka'o Yermias. Karu kaah fa te, mafefa kninu' Uisneno tuaf es na'ko un-unu'.” 15 Rarit Nai' Yesus nataan antein sin im nak, “Karu anbi hi teenb ein kiim ate, Au sekau Kau?” 16 Rarit nai' Simon Petrus nataah am nak, “Usi'! Ho re' ia, Kristus, Tuaf re' afi unu' Uisneno anba'an he nsoun Ee neem! Ma Usi'! Ho re' ia, Uisneno abar-barat In Anah!” 17 Rarit Nai' Yesus na'uab am nak, “Simon, nai' Yunus in aan moen ja ko! Ho mapae' reko ko! Ka mansian aa fa es re' natoon ko rasi naan. Mes Au Ama' et sonaf neno tunan es re' natoon ko. 18 Amneen! Oras ia, Au he ukanab ko ‘Petrus’. Fin kanaf naan in a'moufn ii es re' ‘fatu’. Natuin ho pirsait aan nahuum on re' fatu, ho of amjair fanderen meu Au ngguin re' npirsai Kau. Maski sin napenin ha'mu'it tar antea nmaten amsa', sin naarn ein ma ntaah ein piut-piut. 19 Au of a'fee hak 'eu ko, he ho m'urus Au ngguin, nahuum on re' ho mnaa' a'retu 'fo'e sonaf neno tunan. Fin saa' re' ho mtaar ee mbi pah-pinan, naan Uisneno ntaar ee et sonaf neno tunan amsa'. Ma saa' re' ho mfei ma mkonan ambi pah-pinan ia, naan Uisneno of nafeitn ee et sonaf neno tunan amsa'.” 20 Na'uab anrair on naan ate, Nai' Yesus antaar sin he kais natonan neu sekau-sekau nak, In re' naan, Kristus.
Usif Yesus natoon rasi anmatoom nok In a'maten ma In a'monin anfani
21 Anmurai na'ko oras naan, Nai' Yesus natoon neu In atoup noin' ein am nak, “Au ro he 'nao 'eu kota Yerusalem. Anbi nee, Au upein ha'mu'it amfaun na'ko atoni mnais haart ein, a'naak rais pirsait Yahudi sin a'naakt ein, ma tunggur agaam ein ok-oke'. Sin of anroor na'maet Kau, mes anmeu te, Au 'moni 'fain.” 22 Nai' Yesus natoon on naan ate, nai' Petrus anheer napaisb Ee, rarit in nak, “Kais mu'uab on naan, Usi'! Ka neu fa he Uisneno nkonan rasi naan!” 23 Mes nai' Petrus in uaban naan, ka natuik-natai fa nok Uisneno In romin. Es naan ate, Nai' Yesus nabani' ma nakain ee mnak, “Hoe, mu'roo mu'ko ia! Naan nitu 'nakaf es re' a'uab! Ho kais am'eka' Kau! Ho suma mutenab mutuin mansian ii in romin kuun, mes ka mutuin fa Uisneno In romin!” 24 Rarit Nai' Yesus nanoni' In atoup noin' ein am nak, “Tuaf re' he natuin Kau, in ro he naran ma ntahan piut ansuun oras! In ro he nnikan nain in roimn aa kuun, he natuin Uisneno In romin. Maski atoni' he nroor na'maet je msa', in ro he natuin piut, nahuum on re' atoni' nasaah hau nehe, he nnao n'ain bare 'maten. 25 Fin tuaf re' nabarab in tuan ee, he nmaet natuin in natuina' Kau, in of napeni 'honis piut nok Uisneno. Mes tuaf re' suma nroim he nmoni nbi in tuan ee kuun, in a'monin naan of namsaab ma namneuk on ahaa re' naan! 26 Amneen! Karu ho mupein pah-pinan ia in afan sin ok-oke', mes Uisneno antorak napoitan ko te, in upan ma in pae' ji saa'? Maski ho mroi meik main pah-pinan ia in afan sin imsa', ho ka bisa fa he mtuik ma msenu' maan fa ho smanam! 27 Au utoon ki rasin re' ia ok-oke', natuin Au re' ia, Mansian Batuur-Batuur. Au of a'sanu 'fain 'uum a'paek Au Ama' In pinan ma krahan, ubu-bua 'ok In ameupt ein na'kon sonaf neno tunan. Oras naan, Au of a'baras 'eu tuaf mese'-mese' utuin saa' re' in nmo'e. 28 Mimnau mirek-reko'! Na'ko hi ar-arki re' ia, tuaf fak-fauk of ka nmaten fa fe', tar antea oras sin niit Kau, es re' Mansian Batuur-Batuur re' ia, a'jair Usif re' annaa' aprenat.”
Uisneno nakrira' Usif Yesus In pinan ma krahan
1 Ankoon neno nee on naan ate, Nai' Yesus no'en nai' Petrus, nai' Yakobus ma in orif nai' Yohanis he nsaen neun a'toe'f es, he sin nmes-mesen nbin naan. 2 Antean a'to'ef naan in tunan, sin niit Nai' Yesus na'bani'. In huumn ee npiin on re' manas, ma In tais ein njarin muti' ma nariman. 3 Nok askeken on naan ate, sin niit Ee na'uab nok ka'o Musa ma ka'o Elia. 4 Onaim nai' Petrus antaka'nana', tar antea in na'uab tafi'-tafi' am nak, “Usi', hit tbi bare ia te, na' reko nneis! Onaim reko te hai mihakeb maan ropo teun. Es neu Ko Usi', es neu ka'o Musa, ma es anteni' neu ka'o Elia.” 5 Oras nai' Petrus fe' na'uab on naan ate, nok askeken, noep ji nsaun neem ma n'aum naan sin. Onaim sin nsanmakan, oras sin nneen hanaf es anbi nope naan in nanan am nak, “Amneen! Nai' Yesus re' ia, Au Aan neka'. In nhariin Au nekak piut-piut. Amneen mirek-reok' Ee!” 6 Annenan on naan ate, atoup noin' ein namtaun nmaten, tar antea sin nnoob ein. 7 Mes Nai' Yesus neem ankai' sin im nak, “Amfeen nai. Kais mimtau!” 8 Rarit sin nait matak, mes sin ka niit antein fa sekau-sekau nbi bare naan. Suma Nai' Yesus anmees jah. 9 Rarit sin nsanun nfanin na'kon a'to'ef naan. Onaim Nai' Yesus antaar sin mates am nak, “Saa' re' hi miit ee fe'e na, ka nabei' fa he mitoon ee meu sekau-sekau! Fin Au, Mansian Batuur-Batuur re' ia, ro he 'maet fe'. Rarit, karu Au 'moni 'fain, na' hi bisa mitoon ee.” 10 Onaim sin nataan Ee mnak, “Usi', Ho re' ia ro Kristus, mes ka'o Elia es mee? Fin tunggur agaam ein nanoin ein am nak, ka'o Elia ro he neem fe', hena' Kristus neem. Mes natuin Ho te, on mee?” 11 Nai' Yesus nataah am nak, “Batuur. Ka'o Elia ro he neem fe', he nfei ranan neu Kristus. 12 Mes amneen mirek-reko'! Ka'o Elia neem anrair, mes atoni' ka nahiin je fa. Sin nasusab niis ne, natuin sin roimk ein. Sin of anmoe' Kau, Mansian Batuur-Batuur re' ia, on naan amsa'.” 13 Annenan nrarin on naan ate, na' sin nahinin am nak, ka'o Elia re' Nai' Yesus na'uab ee naan, es re' nai' Yohanis Asranit.
Usif Yesus nareko' ri'aan es, re' anniut sae
14 Oras Nai' Yesus sin ntebi nfanin, sin nateef too mfaun re' anpao nain sin. Onaim a'naef es neem anri'tuu ma ntoit turun-babat, 15 am nak, “Usi'! Amkasian maan au aanh ee, tua! In namaunu 'bibi, ma anha'mui' jon. Karu menas naan neem ate, in nmoufu ntaam neu oe ai' ai je, tua. Amturun maan kau, tua! 16 Au 'eik je goen a'bi Ho atoup noin' ein, mes sin ka bisa nareok' ee fa, tua.” 17 Anneen on naan ate, Nai' Yesus naskarak In atoup noin' ein am nak, “Hae! Ro hi bainesi' ki! Au unoni' ki fani-fani, mes hi ka mihiin mirek-reko' fa. Hi ka mpirsai fa batuur-batuur amsa' meu Kau! Au ro he 'sabaar 'eu ki 'tea mee? Meik ri'ana' naan neem meu ia!” 18 Sin neik ri'ana' naan, rarit In nriu' napoit niut re'uf naan. Rarit niut re'uf naan anpoi nasaitan ri'ana' naan, onaim in nareok nain oras naan. 19 Rarit, oras Nai' Yesus anmees nok In atoup noin' ein on naan ate, sin nataan Ee mnak, “Usi'! Nansaa' am es fe'e na hai ka bisa mriu' mipoitan fa nitu naan?” 20 Nai' Yesus nataah am nak, “Hi ka bisa mriu' fa nitu naan, natuin hi ka mpirsai fa batuur-batuur ate. Mimnau! Karu hi mpirsai batuur-batuur meu Kau te, maski aan'-ana' msa', hi bisa miprenat maan a'toe'f es am mak, ‘Hoe! 'To'ef! Munani' meu nee!’ In of nanani'. Onaim hi bisa mmoe' saa'-saa' aah, asar ramu hi mpirsai batuur-batuur meu Uisneno. 21 Mes amneen! Niut re'uf human on re' ia ro batuur sin maufinun bainesi'. Karu hi ka m'onen ma minaah om fa, he mtoit turun-babat mi'ko Uisneno te, hi ka bisa fa he mriu' nitu on re' naan.”
Usif Yesus na'uab no nuan ii anmatoom nok In a'maten
22 Neot es, Nai' Yesus nok In atoup noin' ein nabuan nbin propinsi Galilea. In natoon neu sin im nak, “Ka 'roo fa ntein ate, sin of na'sosa' Kau neu biak ein. 23 Rarit sin na'maet Kau, Mansian Batuur-Batuur re' ia. Batuur Au 'maet, mes nmeu on naan ate, Au 'moni 'fain!” Anneen In uaban on naan ate, In atoup noin' ein sin neek ein ansusan nmaten.
Usif Yesus na'uab anmatoom nok beo neu uim onen
24 Oras Nai' Yesus nok In atoup noin' ein neman neun kuan Kapernaum, ahoik beo ngguin neman neu nai' Petrus, ma nataan ee mnak, “Hi Tunggur goe anbaen Uim Onen Uuf in beo goe, ai' kaah?” 25 Onaim nai' Petrus nataah am nak, “Anbaen, tua!” Oras in nfain on naan ate, Nai' Yesus natoon nahuun ne mnak, “Hae, Simon! Ho mutenab miit. Uisf ein pah-pinan ia naitin beo na'ko sekau? Na'ko sin aanh ein, ai' na'ko tuaf bian?” 26 Nai' Petrus nataah am nak, “Na'ko tuaf bian, tua.” Nai' Yesus na'uab anteni' mnak, “Karu on naan ate, uisf ee in aanh ein kaisa' nbaen ein beo, ai' on mee? 27 On naan amsa' nok Uim Onen Uuf in beo. Mes hit kais atmoe' ahoik beo ngguin he nato'on. Reko nneis, ho mnao mtaun ika' meu nefo. Ho mtaun maan ika fua ahunut on naan ate, amfei in fefan. Ho of mupein roi muti' fua es anbi naan. Rarit ampaek roit naan, he mbaen hit nua kit, hit beo goe. Fin re' naan nanookb een neu hit nua kit.”
Usif Yesus In atoup noin' ein anmaktaan ein am nak, sekau es re' ko'u nneisi
1 Oras naan, Nai' Yesus In atoup noin' ein neman ma nataan Ee mnak, “Usi'! Sekau es re' ko'u nneis anbin Uisneno Iin na?” 2 Onaim Nai' Yesus no'en naan ri'aan es, rarit na'haek ee nbi sin atnaank ein. 3 Rarit In na'uaba' am nak, “Amneen mirek-reko'! Tuaf re' he njair Uisneno Iin na, in ro he nabanit nahiin in tenab he njair on re' ri'aan a'baut re' ia, re' ka na'naeb nahiin fa in tuan ii. 4 Natuin tuaf re' na'paran nahiin in tuan ii, on re' ri'aan a'baut re' ia, in es re' ko'u nneisi nbi Uisneno In human ma In matan. 5 Ma tuaf re' antoup atoin a'baut on re' ri'ana' re' ia, natuin in npirsai Kau, tuaf re' naan antoupu nrair Kau.”
Usif Yesus natoon anmatoom nok tuaf re' nmoe' he tuaf bian anmo'e nsaan
6 Rarit Nai' Yesus natoon anteni' sin im nak, “Karu nmui' tuaf re' nmoe' ri'aan a'baut es anteri nsaan, tar in ka npirsai nteni' Kau fa, ampaant om, oo! Reko nneis atoni' nfuut nakfirit faut kou' goes anbi in neon, ma nporin nataam ee neu tais je tnanan. 7 Pah-pinan ia baer siraak batuur, natuin nmui' rasi mfaun re' anmoe' tuaf anmouf neu sanat. Mes tuaf re' siraak anneis, es re' tuaf re' anmoe' taos tafi'-tafi', he tuaf bian nmo'e nsaan. 8 Karu ho mmo'e msaan meik ho 'nimam, ai' ho haem, mketu mporin! Reko nneis ho mtaam meu sonaf neno tunan meiki haa 'nima' mese', ai' ha'e mese', he kais sin nporin nataam ko neu ai abar-barat, mes ho 'nimam ma ho haem sin nua. 9 Karu ho mmo'e msaan meik ho matam, mro'i mporin! Reko nneis ho mtaam meu sonaf neno tunan meiki haa mataf fua' mese', he kais sin nporin nataam ko neu ai abar-barat, mes ho matam sin fua' nua.”
Usif Yesus npaek uab manporin anmatoom nok a'bib-kaes re' namneuk
10 Nai' Yesus na'uab anteni' mnak, “Ampaant om, oo! Kais-kaisa' hi mismeru' ri'aan a'baut on re' ia. Fin Uisneno nmui' ameput et sonaf neno tunan re' anpanat sin. Ameupt ein naan bisa ntaman oras mee-mee jah, he natraak rasi anmatoom nok tuaf ein naan neun Uisneno. 11-13 Hi mitenab mirek-reko', Au 'paek uab manporin on nai: anmui' tuaf es in a'bib-kaesn ein nautn es. Rarit neon goes, anmui' a'bib-kase es annao nsaan, anpeo' kuun in ranan. Hi mitenab atukus na'ko a'bib-kasen naan he nmoe' saa'? In ro nnao nasaitan bo' seo mseo ein nbin a'toe'f ee tunan, he nnao naim a'bib-kaes re' annao nsaan re' naan. Karu in napein nafani' a'bib-kaes amnekut naan, in of anmariin anneis na'ko re' in he nkius in a'bib-kaes bo' seo mseo re' ka namnekun fa. Au, Mansian Batuur-batuur re' ia, 'uum he 'soi ufetin tuaf re' nteib ma nbeon on na'ko raan amneot. 14 Maski suma ri'aan a'baut es, es re' namneku msa', Au Ama' abit sonaf neno tunan ka nmariin fa.”
Usif Yesus natoon ranan on mee he hit ttaraem ok atfain tok tuaf re' nmo'en saan neu kit
15 Nai' Yesus na'uab antein am nak, “Karu ho aom-bian apirsait anmo'e nsaan neu ko, ho ro he mnao muteef mok ne. Rarit karu hi nua ki mmees, na' ho mutoon ee in sanat. Karu in natniin ho uabam naan, hi nua ki miraem om een. 16 Mes karu in ka natniin ko fa te, ho mnao meu ho partei tuaf es ai' nua nnao nok ko. Rarit hi miteef mok ne, ma mi'uab amteni'. Fin anbi Suur Akninu' Uisneno matu'i mnak, ‘Anbi rais jes, ro he nmui' tua asaksii nua ai' teun re' na'uab huma' mese', hena' bisa ntoup sin uabk ein naan.’ 17 Mes karu in ka natniin ki fa te, amnao mitonan jemaa't ein. Mes karu in ka ntoup reko fa jemaa't ein sin uabk ein, maan ee on re' tuaf re' ka nahiin fa Uisneno. Kaah fa te, maan ee on re' amaufinut nahuum on re' ahoik beo. 18 Mimnau mirek-reko' saa' re' Au u'uab! Saa' re' hi mtaar ee mbi pah-pinan ia, Uisneno ntaar ee msa' et sonaf neno tunan. Ma saa' re' hi mfei ma mkonan ambi pah-pinan ia, Uisneno nafetin anrair je et sonaf neno tunan. 19 Au utoon a'teni' ki m'ak, karu nmui' tuaf nua na'ko ki re' m'onen nekaf mese', of Au Ama' et sonaf neno tunan anfee ma nnona' saa' re' hi mtoit je. 20 Karu nmui' tuaf nua ai' teun nabuan ma n'oen ein, natuin sin re' naan Au ngguin, Au 'bi sin atnaank ein amsa'.”
Usif Yesus nareta' anmatoom nok pegawe re' ka nfee fa ampon neu in aok-bian
21 Rarit nai' Petrus neem nataan Nai' Yesus am nak, “Usi', au he utaan akre'o. Karu au aok-bian atoin apirsait nmo'e nsaan kau fani-fani, au ro he 'fee ne ampon no fauk? No hitu, oo?” 22 Onaim Nai' Yesus nataah am nak, “Kahaf! Ho ro he mfee ne ampon no hitu nfain no bo' hiut, tar ho ka bisa mso'i mtein sin fa. 23 Hi ro he mmoe' mituin on naan, natuin Uisneno on re' uisf es, re' ansoi' in pegawe sin tuus ein. 24 Oras in nmurai nsoi', in nreun in tuaf ein he nnaon nhaman pegawe es, re' natuus roit anbi naa, tar hoto-hoto. 25 Mes pegawe naan ka bisa nbaen fa in tusa'. Onaim uisf ee naprenat am nak, ‘Amnao mi'sosa' atoni' ia nok in fee-anah sin, he sin njarin ate. Ma mi'sosa' main in a'mu'ik ein, he nbaen in tuus ein.’ 26 Anneen on naan ate, pegawe naan anri'tuu ma nbaiseun uisf ee mnak, ‘Airoo, ama! Aam usi', amturun maan kau he mfee kau oras akre'o! Au of ufani' au tuus ein naan, tua.’ 27 Anneen on naan ate, uisf ee nkasian ee. Onaim in nnoes nain pegawe naan in tuus ein. Rarit in nafetin pegawe naan. 28 Mes oras pegawe naan anpoi, in nateef nok in aok-bian es, re' natuus roit akre'o nbi ne. Rarit in nheek in aok-bian naan, ma nkeer in neon ma naskaar ee mnak, ‘Hoe! Ambaen ho tuus aan, oras ia nai!’ 29 Anneen on naan ate, in aok-bian ee nri'tuu ma ntoti mnak, ‘Airoo, ba'e! Amturun maan kau he mfee kau oras akre'o! Au of ufani' au tuus ein naan, tua.’ 30 Mes pegawe naan nak, ‘Ka bisa fa! Ho ro he mbaena' oras ia!’ Rarit in nporin nataam in aok-bian naan nbi bui je nanan, tar in nbaena' in tuus ein naan. 31 Oras uisf ee in pegawe bian niit re' in a'mo'en, sin neek ein ansusan nmaten. Rarit sin nnaon natrakan neun usif. 32 Anneen on naan ate, uisf ee nhaman pegawe re' ka ntae nahiin jon fa. In nakain ee mnak, ‘Hoe, atoin maufinu! Ho mtoit kau he au 'kasian ko, onaim au 'noes 'ain ho tuus ein. 33 Mes nansaa' am es ho ka mkasian maan fa ho aom-bian naan, on re' au 'kasian ko?’ 34 Usif naan natoo', onaim in nreun sin he nheek je ma nataam atoni' naan anbi bui je nanan, anbain he sin ha'mui' je, tar antea in nbaen in tuus ein ok-oke'.” 35 Nai' Yesus nasoup In reta', ma In natoon am nak, “Au Ama' et sonaf neno tunan ansoi' on naan amsa'. In of anhukun ki, karu hi ka mnikan main fa hi aom-bian apirsait ein sin saant am penu sin.”
Atoin Farisis namin ranan he namouf Usif Yesus nok rais matsaos ma manporin
1 Nai' Yesus nanoni' nrair sin on naan ate, In nnao nasaitan Galilea he nnao neu propinsi Yudea et noe Yarden in panin. 2 Too mfaun ein natuin Ee. Onaim In nareko' ameent ein anbin naan. 3 Atoin Farisis fauk neman he namouf Nai' Yesus. Sin nataan Ee mnak, “Tatuin hit atoran rais pirsait, atoin amatsaos, in bole nporin in fee nok ranan saa' ahaa oo, ai' on mee, tua?” 4 Mes Nai' Yesus nataah am nak, “Hi re' ia, atoin ahiin rais pirsait. Mes nansaa' am es hi ka mihiin fa Uisneno In Suur Akniun' ee in afan? Fin anbi reta' ahun-hunut, matu'i mnak, ‘Uisneno nmoe' mansian, atoni' ma bifee.’ 5 Matu'i nteni' mnak, ‘Es naan ate, atoin ii ro he nnao nasaitan in ainaf-amaf, he nmoin nabua nekaf mese' ma ansaof mese' nok in fee, fin sin nua sin njarin mese'.’ 6 Onaim karu Uisneno neikn On es re' na'mese' sin nua sin, mansian ii kais anbatis sin!” 7 Anneen Nai' Yesus na'uab on naan ate, atoin Farisis sin nataan antein Ee mnak, “Karu on naan ate, nansaa' am es ka'o Musa nak, atoni' bisa nporin in fee, asar in nfee suur manporin neu in fee?” 8 Onaim Nai' Yesus nataah am nak, “Ka'o Musa nkonan hi be'i-na'i sin nmanpoir ein nok sin feek ein, natuin sin a'naak-fatun on re' hi! Mes Uisneno nmoe' pah-pinan ia, In sairt ii ka on fa naan. 9 Onaim Au utoon, ki m'ak: karu bifee ji anmakaek nahuun, atoin ii bisa nporin. Mes karu bifee ji ka nmakaek fa, mes atoin ii nporin, rarit ansao ntein bifee 'teta', naan makaket!” 10 Anneen In na'uab on naan, In atoup noin' ein na'uab ein am nak, “Karu on naan, reko nneis kais atsao.” 11 Onaim Nai' Yesus nataah am nak, “Ka neu fa he tuaf amfaun bisa ntoup saa' re' Au u'uab ee re' ia. Suma tuaf re' Uisneno nruur ma nreek ee. 12 Anmui' tuaf ka nsao fa, natuin na'ko oras nahoins ee te on naan. Anmui' tuaf bian ka nsao fa msa', natuin tuaf anmoe' je on naan. Ma nmui' tuaf bian anpiir ranan he ka nsao fa, natuin in suma he nanaoba' Uisneno In mepu. Tuaf re' bisa nahiin ma ntoup noni' re' ia, maut he in ntoup goe.”
Usif Yesus na'uab anfee tetus neu ri'aan a'baut ein
13 Oras naan, mahoin ein naskau neik sin aanh ein neu Nai' Yesus he In ntao In a'niimk ein ma na'uab anfeen sin tetus. Mes In atoup noin' ein nakain mahoin ein naan. 14 Onaim In naskarak In atoup noin' ein am nak, “Amkonan ri'aan ein naan neman Kau! Kais mikaina' sin! Natuin tuaf re' nahuum on re' sin re' naan, Uisneno Iin na.” 15 Rarit In ntao In a'niimk ein nbi ri'aan ein naan, ma In ntoit Uisneno he nfeen sin tetus. Rarit In nnao nasaitan bare naan.
Atoin amu'it naim ranan he nmoin nabar-baar nok Uisneno
16 Neot es, anmui' tuaf es neem nataan Nai' Yesus am nak, “Aam Tungguru! Au he 'moe' rais reko on mee, he uhiin batuur-batuur 'ak, au bisa 'taam 'eu sonaf neno tunan? Au he 'moin ubar-baar 'ok Uisneno.” 17 Onaim Nai' Yesus nataah am nak, “Nansaa' am es ho mutaan Kau nok saa' es re' reko? Suma Uisneno es re' reko. Karu ho mroim he mmoin mok Ne te, ammoin mutuin In aprenat.” 18 Atoni' naan nataan anteni' mnak, “Prenat re' mee?” Onaim Nai' Yesus nataah am nak, “Kais mu'maet mansian; kais ammakaek; kais mubaak; kais amjair saksii poi; 19 amhormaat ho aina'-ama' sin; ma amneek ho aom-bian sin on re' ho mneek ho tuam aan kuum.” 20 Atoni' naan nataah am nak, “Preent ein naan ok-oke', au utuin a'rair sin. Saa' es re' ankuran fe'?” 21 Anneen on naan ate, Nai' Yesus nataah am nak, “Karu ho mroim he mutuin Uisneno In roimn ein ok-oke' te, mfain nai, ma mnao mu'sosa' mporin ho 'mui'm ein ok-oke'. Rarit amnao mbait roit ein meu ama'mui't ein. Rarit amfain uum he mutuin Kau. Fin Uisneno of anbaras anfee ko a'mu'if natho-hoen et sonaf neno tunan.” 22 Anneen on naan ate, atoni' naan ntebi nfain nok neek susat, natuin in a'mui'n ii kah een. 23 Rarit Nai' Yesus na'uab nok In atoup noin' ein am nak, “Ampirsai Kau, atoin amui't ii susa ma'tani' hena' ntaam neu sonaf neno tunan. 24 In suust ee, on re' bikaes unta kou' goes, antaam neu in o'of anpeo' aent ee konan.” 25 Anneen on naan ate, In atoup noin' ein ansanmakan. Onaim sin natahan am nak, “Karu on naan ate, sekau es re' bisa ntaam neu sonaf neno tunan?” 26 In nkius narek-reko' sin, rarit In na'uab am nak, “Batuur, karu mansian ii es re' anmeup, ka bisa fa. Mes karu Uisneno es re' anmeup, saa'-saa' ii ro njair.” 27 Onaim nai' Petrus namnaub am nak, “Aam! Hai mnao misaitan hai 'mui'm ein oek' een, he mituina' Ko. Onaim hai mipein saa', tua?” 28 In nataah am nak, “Ampirsai Kau! Oras Uisneno nmoe' saa'-saa' ii ok-oke' njair fe'u te, Au, Mansian Batuur-Batuur re' ia, a'toko' 'bi 'toko' prenat. Oras naan, hi re' mituina' Kau, mtoko mbi 'toko' prenat bo'es am nua, he mjair afeek rasi meu uuf Isra'el bo'es am nua! 29 Tuaf re' nnao nasaitan in umi, in orif-tataf, in ainaf-amaf, in aanh ein, ma in rene, he natuina' Kau, in of antoup nafani' no nautn es. Rarit oras pah-pinan ia namsopu te, in nmoin nabar-baar nok Uisneno. 30 Onaim mimnau! Tatuin Uisneno In tenab, tuaf re' na'naeb in tuan, in re' naan, es re' tua a'baut. Mes tuaf re' na'paran in tuan ee on re' atoin a'baut, in re' naan, es re' tua a'naet natuin Uisneno In tenab.”
Uab manporin anmatoom nok aseeb poo' anggur
1 Rarit Nai' Yesus nanoni' sin im nak, “Uisneno In aprenat naan, on re' uab manporin re' ia: anmui' poo' tuaf es, re' npoi nnao kik-kiku oras anreuk nee, nnao naim tuaf he nmepu nbin in poo' anggur. 2 In napein ameput, onaim sin nneka' buan he nmeup neon goes, nok in nbaen seba', roi muti' fua es, on re' osaf biasa. Anromin nrarin on naan ate, in nreun sin nnaon nmepun. 3 Oras anreuk seo te, in npoi nnao ntein neu 'masa'. Anbi naan in nkius niit tuaf fauk re' antokon ntaka'naan ein aah. 4 Onaim in na'uab nok sin im nak, ‘Ba'e sin! Hi mroim he mmepu mbi au poo'n ee, oo? Au of a'baen ki nok reko.’ Annenan on naan ate, sin anromin, rarit sin nnaon nmepun. 5 Oras anreuk bo'es am nua on naan ate, poo' tuaf naan anpoi nnao naim ameput antein. On naan amsa' oras nreuk teun maans ee nteib. 6 Maans ee nmaeb on naan ate, of oni' nreuk niim poo' tuaf naan npoi ntein. In nkius neu-mneem, anmui' tuaf re' anhaek ruum aah. Rarit in nataan sin im nak, ‘Nansaa' am es hi mhaek ruum aah na'ko kiku ntea maans ee nmaeb jen, ma ka mmeup fa saa'-saa'?’ 7 Tuaf ein naan nataah am nak, ‘Aam! Ka nmui' fa tuaf re' anfee kai mepu, tua.’ Rarit poo' tuaf naan nak, ‘Karu on naan ate, hi mnao he mmeup meu au po'on!’ 8 Antea oras re' sin nasnasan na'kon sin meup goe te, poo' tuaf ee nhaman in mandoor ee am nak, ‘Amhaman ameupt ein naan, he mbaen sin kai ngguin mese'-mese'. Ammurai mu'ko tuaf re' antaam muni' tar antea tuaf re' ntaam nahuun naan.’ 9 Rarit mandoor ee nhaman ameupt ein re' nmurai nmepun na'kon oras nreuk niim maans ee nmaeb. In nfeen sin es-es ate antoup roi muti' fua es. 10 Rarit mandoor naan anhaman ameput bian, ntea tuaf re' nmurai nmepun na'ko oras nreuk nee kik-kiku. Re' nmepun na'ko kiku natenab am nak, sin of napenin nneis na'ko tuaf re' nmurai nmepun oras nreuk niim maans ee nmaeb. Te kaah, sin ntoup roi muti' fua' mees' aah amsa'. 11 Antoupun on naan ate, sin nmaheek poo' tuaf ee mnak, 12 ‘Hae! Aam! Ka bisa fa on nai. Sin neem namunin, suma anmeup naan jam mees' aah. Mes hai re' mtaam mi'ko kik-kiku, ammeup ma'tani' ma mhae maet tar antea puus ein nsai! On nai te, nansaa' am es ho mbaen kai natai?’ 13 Onaim poo' tuaf ee nataah am nak, ‘Ba'e, au ka upoi ko fa. Fin ho es amroim kuum he mmeup neon goes, ma in sapaan ee roi muti' fua es. Batuur, ai' on mee? Onaim au 'baen utuin hit atfeka' naan, ai'? 14 Reko nneis, ho mtoup ho roi seba' he mfain nai. Karu au 'roim he 'fee 'eu tuaf re' ntaam anmeup muni' na'ko ko, natai nok saa' re' au 'fee je 'eu ko, naan au urusan. 15 Au 'roim he 'paek au roit utuin au romik. On mee m'es ho mutoo' natuin au neek ii reko?’ 16 On naan amsa', oras Uisneno njair Usif neu mansian ein, In nbaras neu In tuaf ein natuin In romin. Onaim tuaf re' neem namuni te, in of antoup in sapaan ee on re' tuaf re' neem nahuun. Ma tuaf re' neem nahuun, of in ntoup in sapaan ee on re' tuaf re' neem namuin.”
Usif Yesus natoon nain no teun ii anmatoom nok In a'maten
17 Rarit Nai' Yesus sin nmurai nnaon neun Yerusalem. Anbin raan atnana', In nhaman In atoup noin' ein he sin nmes-mesen nok Ne. Rarit In natoon antein am nak, 18 “Hi mneen! Oras ia hit he tnao teu Yerusalem. Mes oras hit tbi nee, sin of na'sosa' Kau, Mansian Batuur-Batuur, neu a'naak pirsait Yahudi sin a'naakt ein, ma tunggur agaam ein. Rarit sin nhukun na'maet Kau. 19 Sin nana'at Kau neu tuaf ein re' ka nahiin fa Uisneno. Rarit sin na'uab namae Kau. Ma sin nbeos nakrati' niis Au aok. Rarit na' sin na'maet Kau 'bi hau nehe. Batuur Au 'maet. Mes nmeu te, Au 'moni 'fain.”
Nai' Yakobus nok nai' Yohanis sin ainf ee ntoit he nanaib in aanh ein
20 Rarit nai' Sebedius in fee je nok in anah nai' Yakobus ma nai' Yohanis neman neun Nai' Yesus. In nri'tuu ma nfee hormaat he nbaiseun neik uab furi' neu Nai' Yesus. 21 Onaim Nai' Yesus nataan ee mnak, “Ain! Ho mperluu saa'?” In natoon am nak, “On nai, Aam! Au 'toit he karu Ho mnaa' aprenat ate, munaiba' au aanh ein nua sin, he sin nna'an aprenat nok Ko. Au 'toit he mutoko' es ambi Ho 'ne'u, ma es anteni' anbi Ho 'rii.” 22 Anneen in ntoit on naan ate, Nai' Yesus na'uab neu nai' Yakobus ma nai' Yohanis am nak, “Hi ka mihiin fa saa' re' hi mtoti. Fin Au of upein ha'mu'it ma ma'ne'at amfaun. Onaim on mee? Hi of mitenab mak hi bisa misaah ha'mu'it ma ma'ne'at naan mok Kau, oo?” Sin nua sin natahan nok haan ma'kaf-kafa' am nak, “Bisa, tua!” 23 Rarit In nataah antein sin im nak, “Batuur, hi of misaah ha'mu'it ma ma'ne'at on re' Au msa'. Mes sekau re' es atokos anbi Au 'nimak a'ne'u ai' a'rii, Au ka es re' ufeek ee fa. Naan Uisneno In hak he nafeek. In nafeek anrair sekau-sekau re' antoko nbi bare naan.” 24 Oras atoup noni' tuaf bo'es anneen sin nua sin antotin on naan ate, sin nsaken. 25 Mes Nai' Yesus anhaman naan sin ok-oke', onaim In na'uab neu sin im nak, “On nai! Hi mihini mrair, ai'? A'naet ein re' anna'an aprenat biasa sin nha'mui' sin too ngguin, tar antea sin ka bisa nmo'en fa saa'-saa'. Ma a'naakt ein na'kon pah re' ka nahiin fa Uisneno, sin nasanut prenat huma'-huma', tar antea too gui ka' bisa nait fa 'nakan. 26 Mes hi kais ammoe' on naan! Sekau na'ko ki re' he njair a'naet, in ro he njair on re' ate atuthaes neu tuaf bian. 27 Ma sekau re' he njair a'nakat, in ro he nmoe' on re' ate. 28 Amneen! Au on naan amsa'. Au, Mansian Batuur-Batuur ia, 'uum he 'tuthae tuaf. Au ka 'uum fa he atoni' ntuthae Kau. Fin Au 'uum he 'fee Au 'moin ki 'teme-'teme he 'soi 'ain too mfaun ein na'kon sin sanat ma penu sin.”
Usif Yesus nareko' aforot
29 Rarit Nai' Yesus sin nnaon nkonon. Oras sin npoin na'kon kota Yeriko, nmui' too mfaun re' natuin sin. 30 Anbi naan, anmui' aforot tuaf nua re' ntokon nbin raan ee ninin. Oras sin nnenan nak, re' annao npeo' naan es re' Nai' Yesus na'ko Nasaret, sin ankoa' ein naher-heran am nak, “Usi'! Sufa'-ka'uf nai' Daut! Hai mpao Ko 'roo-'roo goen! Amkasian maan kai, tua!” 31 Anneen sin nkoa'an on naan ate, bian nakain sin im nak, “Hoe! Hi nua ki kais amtaisiub!” Mes sin nkoa' ein naher-heran antein' ein am nak, “Usi'! Sufa'-ka'uf nai' Daut! Amkasian maan kai, tua!” 32 Oras In nneen on naan ate, In nhaek. Onaim In nataan sin im nak, “Hi mroim he Au 'moe' saa' 'eu ki?” 33 Sin natahan am nak, “Usi'! Amturun kai, he hai bisa mkius miit, tua!” 34 Anneen sin na'uab ein on naan ate, In nkasian sin. Rarit In nreo' sin maatk ein, onaim sin niit nanin oras naan. Rarit sin natuin Ee.
Usif Yesus antaam neu kota Yerusalem on re' Usif
1 Rarit Nai' Yesus sin nnaon nkonon tar antean kuan es, kaan ee Betfage, et a'to'ef Saitun in ninin. Kuan naan he npaumak-maak nok kota Yerusalem. Anbi naan sin nasnasan ntaahn ein. Onaim In nreek In atoup noni' tuaf nua he nnaon nahunun. 2 In naprenat sin im nak, “Hi nua ki mnao meu kuan nee. Karu hi mtaam, hi of miit bikaes keledai ainf es nok in aan ee mafutu' et naan. Hi mnao mseif sin ma mheer meik Kau sin neman. 3 Mes karu nmui' tuaf re' nataan ki mnak, ‘Nansaa' am es hi mheer meik biak ein sin bikaes keledai?’ Hi mitaah am mak, ‘Usi' he npake. Karu In npake nrair je te, In of ansoun ee nfain neem.’ 4 Rasin re' naan ok-oke' ro he njarin, natuin saa' re' Uisneno In mafefa kniun' ein antui nain sin im nak, 5 ‘Hoe, hi atoin Yerusalemas arki! Amkoen om iim he mkius ma miit kiim! Fin hi Uisf ee, es re' ankoen On antaam neem. In ntaam neem nok neek a'parat ma ba-baun. In ntaam neem ansae ma na'tuut On nbi bikaes keledai ana'.’ ” 6 Rarit In atoup noin' ein annaon ma nmoe' natuin sin ok-oke', on re' Nai' Yesus anba'an sin. 7 Sin nheer neik bikaes keledai ainf ee nok in aan ee neu Nai' Yesus. Rarit sin ntaon tai-muti' njarin a'peni', onaim In nsae nbi bikaes keledai naan, he ntaam neu kota. 8 Oras sin ntaman neun kota nanan, too mfaun ein nait sin tai-muit ein, ma sin pouk ein, he na'been sin anbin ranan. Anmui' tuaf re' nnaon n'oten hau noo peta msa' he sin na'benan nbin raan ee tnanan. Nok ranan naan, sin nmoe' tanar am nak, sin nseun Nai' Yesus on re' kaes ko'u. 9 Ma nmui' tuaf annaon nahunun anbin Nai' Yesus In matan, ma bian namunin. Sin nsakanan ok-oke' mnak, “Hosana! Hai mpures ma mbo'is meu Uisneno! Natuin usif Daut in sufa'-ka'uf neem anrair! Hosana! Hai mpures ma mbo'is meu Uisneno! Natuin Uisneno nruur ma nreek haefan Atoni' ia. Hosana! Hai mpures ma mbo'is meu Uisneno! Natuin Uisneno ntuun On ma naprenat et neno a'raat re'uf!” 10 Oras Nai' Yesus antaam neu Yerusalem sin nkoa' ma nhunun on naan, kota naan in naan ee npoin ok-oke' ma nmaktaan ein am nak, “Sekau es re' amnemat re' ia?” 11 Too mfaun ii natahan am nak, “In re' naan Uisneno In mafefa kninu'. In kaan ee Nai' Yesus, atoin Nasaretas, na'ko propinsi Galilea.”
Usif Yesus antaam neu Uim Onen Uuf ma npukai nani 'masa' nbi naan
12 Rarit Nai' Yesus sin nnaon nkonon, onaim sin ntaman nbin Uisneno In Uim Onen Uuf. Anbi Uim Onen naan in kintal, atoin ein nmoe' je njari 'masa' he sin na'soos ein kor-kefi re' atoni' npaek je he nfee fua'-turu' anbi onen. Ankius on naan ate, Nai' Yesus nnao nriu' napoitan sin. In npesek anporin mein re' sin npaek sin he tukar roit, ma nabani' a'been ein re' sin npaek sin he na'soos ein koro. 13 Onaim In natoon neu sin im nak, “Uisneno In mafefa kninu' antui mnak, ‘Au uhake' ma ufena' Umi ia, he sekau-sekau goah bisa neman n'oen ein neun ia.’ Uisneno In sairt ee on re' naan, mes hi mmoe' je njair apaikaurt ein sin baer ekut-tefas!” 14 Rarit afoort ein ma abuat ein neman neun Nai' Yesus anbi Uisneno In Uim Onen naan. Onaim In nareko' nain sin ok-oke'. 15 Anbi naan, a'naak rais pirsait Yahudi sin a'naakt ein, ma tunggur agaam ein anhaek nokan amsa'. Oras sin nkius Nai' Yesus anmoe' rais sanmakat, sin nato'on. Anneis-neisi nteni', oras sin nnenan ri'aan ein ankoa' ein ma nsakanan ok-oke' nbin Uim Onen naan am nak, “Hosana! Hai mpures ma mbo'is meu Uisneno! Natuin usif nai' Daut in sufan-ka'un ankoen on neem anrair!” 16 Rarit a'naakt ein natonan Nai' Yesus am nak, “Ho mneen ri'aan ein sin uabk ein? Re' naan ka batuur fa!” Mes Nai' Yesus nataah sin im nak, “Reko, Au 'neen. On nai te, hi teenb ee on mee? Hi ka mrees miit fa et Uisneno In Suur Akninu' anmatoom nok anah-anah re' npures ma nbo'is neun Uisneno, ai'? Fin anbi naan matu'i mnak, ‘Uisneno nabarab nain ri'ana kru'uf ma ri'aan ana' ma a'baut, he sin npures ma nboi's Ee.’ ” 17 Rarit Nai' Yesus sin annaon nasaitan kota naan, he nnaon ntupan nbin kuan Betania.
Usif Yesus naprenat hau uu' goes he kais nafua ntein
18 Noka' kiuk ana' te, Nai' Yesus sin ntebi nfanin neun kota Yerusalem. Anbi raan atnana' In annaben ate namnaah. 19 In nkius niit hau uu' goes anbi raan ee ninin re' tuaf biasa neuk in fuan. Onaim In nnao npaumak-maak hau naan, he nkius niit ee nafua, ai' kaah. Mes oras In ntea hau naan, In ka niit fa fuaf fua' mese' msa', natuin hau naan fe' he nanoo. Onaim In na'uab neu hau naan am nak, “Natuin ho ka mufua fa meu Kau, es naan ate ho ka mufua mtein fa!” In na'uab anrair on naan ate, hau naan anmeot nain. 20 In atoup noin' ein ankius nitan on naan ate, sin naskeken. Sin natanan am nak, “Nansaa' am es nok askeken ate hau ia nmeot nain?” 21 Onaim In nataah am nak, “Amneen mirek-reko' joo! Karu hi mpirsai batuur-batuur meu Uisneno, ma hi neekm ein ka na'oin ein fa kre'o msa', hi bisa mmoe' on re' Au 'moe' je naan. Hi bisa mmo'e nneis na'ko naan. On re': hi bisa miprenat a'toe'f es nanani' neu tasi. Uisneno of nanani' nain a'to'ef naan, asar hi mpirsai batuur-batuur meu Ne! 22 Fin are' kanan rasi re' hi mtoit sin mi'ko Uisneno, hi of amtoup sin, asar hi mpirsai batuur-batuur meu Ne.”
A'naakt ein anmaktaan ein anmatoom nok Usif Yesus In hak
23 Rarit Nai' Yesus sin nnaon nkonon. Antean Yerusalem ate, sin ntaman nfanin nbin Uim Onen Uuf ee in kintal. Oras In nanoni' tuaf anmatoom nok Uisneno In raan a'honis on nai te, a'naak rais pirsait Yahudi sin a'naakt ein, ma atoni mnais haart ein neman ma nataan Ee mnak, “Sekau es re' anreun ko he ho mtao taisibu mbi ia afi naa? Sekau es re' anfee ko hak naan?” 24 Mes In nahiin neu sin namin ranan he namouf Goe. Rarit In nataah am nak, “Au he utaan ki msa'. Hi mitaah Kau fe', hena' Au utaah ki. 25 Au he utaan ki on nai: hi ok-oke' mihiin nai' Yohanis asranit, ai'? Sekau es re' anfee ne hak he nasrain? Uisneno, ai' mansian?” Rarit sin nateenb ein neu-mneman, ma na'uab ein am nak, “Kreot ii naan kit ein, karu hit tak, ‘Uisneno es re' anfee hak’, In of nataah am nak, ‘Karu on naan ate, nansaa' am es hi ka mpirsai fa nai' Yohanis?’ 26 Mes hit ka bisa fa he tak, ‘Mansian es re' anfee hak’, natuin too mfaun ein of anmaheek kit. Natuin sin npirsain am nak, nai' Yohanis naan, Uisneno In mafefa kninu'.” 27 Es naan ate, sin natahan neun Nai' Yesus am nak, “Hai ka mihiin fa, tua.” Onaim Nai' Yesus nataah neu sin im nak, “Karu on naan ate, Au ka 'perluu fa he utoon ki 'ak sekau es re' anfee Kau hak.”
Usif Yesus nareta' anmatoom nok a'naef es ma in aan mone tuaf nua
28 Nai' Yesus na'uab nok a'naakt ein am nak, “Hi mitenab on mee nok uab manporin ia? Anmui' atoni mnais es nok in aan mone tuaf nua. In naprenat in aan moen unu mnak, ‘Neno ia ho mnao mmeup on reen je fe'.’ 29 Mes aan moen unu naan nataah am nak, ‘Au ka 'nao fa.’ Mes ka 'roo fa te, in nmei' jon, rarit in nnao. 30 Rarit atoni mnasi' naan anreun in aan mone es antein am nak, ‘Neno ia, ho mnao mmeup on reen je fe'.’ Onaim anah naan nataah am nak, ‘Reko, tua. Au of a'nao’. Mes in ka nnao fa.” 31 Nareta' nrair on naan ate, Nai' Yesus nataan sin im nak, “Au he utaan ki on nai: na'ko ri'aan nua' ein naan, re' mee es re' nmoe' natuin in aamf ee prenat?” Onaim sin nataahn am nak, “Aan moen unu!” Rarit In na'uab am nak, “Reko, mes amneen mirek-reko', fin Au u'uab batuur. Tuaf re' hi mtanar nahuum on re' sin ka mapaek ein fa, on re' ahoik beo, ma bifee a'hake', sin of antaman njarin Uisneno In tuaf ein re' nahunun na'ko ki. Hi suma mitaah ‘reko’ meu Uisneno goah, mes ka mmoe' mituin fa In romin. 32 Unu', Nai' Yohanis asranit nanoni' ma natoon anrair ki nok ranan on mee he hi bisa mmoin mimnoon ma mimneo. Mes hi ka mroim fa he mpirsai Je. Te kaah, oras tuaf re' ka mapake' fa sin nneen nai' Yohanis, sin nasaitan sin sanat ma penu sin he natuin in noin' ein naan. Hi mihini mrair sin ok-oke'. Mes hi ka misnaas fa mi'ko hi sanat ma penu sin, he mituin Uisneno In romin.”
Usif Yesus nareta' anmatoom nok atoin maufinu re' anseeb poo' anggur
33 Rarit Nai' Yesus nareta' reet es antein am nak, “Anmui' naan auf tuaf es antao rene, he nseen hau anggur. Rarit in nbaah naan rene naan nfuun am nateef. Onaim in ntao baak he naes hau fua anggur oef. Ma in nmoe' tobe. Rarit in na'seba' rene naan neu aseebt ein he sin npairori, ma rene naan in afan sin nbatin nfeen auf tuaf naan. Onaim in nnao nasaitan sin neu pah pen-pene bian. 34 Oras he nseun hau fua anggur te, poo' tuaf naan anreek in haef ein he neman neu aseebt ein naan, he ntoup in sapaan. 35 Mes aseebt ein naan sin ka nfairoir fa haef ein naan. Bian napenin besot, anroor bian, ma npoir bian nok fatu. 36 Mes poo' tuaf naan anrenu nteni' in haef ein puukn es, re' namfau nneis na'ko ahuunt ein. Mes aseebt ein naan nmo'en maufinu neu sin ok-oke' msa'. 37 A'roo-'roo te, poo' tuaf naan anreun in aan honi'. In natenab am nak, ‘Karu au 'reek haefan 'eu au aan honi', sin of anseun goe rek-reko, ma sin of natniin ee.’ 38 Mes oras aseebt ein niit ri'ana' naan, sin na'uab ein am nak, ‘Hae, amkius miit! A'naef ee nreek haefan neu in aan honi', in of es re' ntoupu 'naef ee in pusaak ein ok-oke'. Onaim iim he theek je ma troor tiis ne nai, maut he hit es atpaar kuuk po'on ia.’ 39 Onaim sin nheek ri'ana' naan, rarit sin nheer neik je, ma npoirn ee neu po'on naan in kotin ma sin nroor niis ne.” 40 Nai' Yesus nareta' nrair on naan ate, In nataan sin im nak, “Au utaan ki on nai: karu poo' tuaf naan anfain neem, in of he nmoe' saa' neu aseebt ein naan?” 41 Rarit atoin Yahudis sin a'naakt ein natahan am nak, “In ro he nroor na'maet atoin maufinun sin ok-oke'. Rarit in na'seba' po'on naan neu tuaf bian antein. On naan ate, of nateef in oors ate, sin nbait po'on naan in afan.” 42 Rarit Nai' Yesus na'uab neu sin im nak, “Oni' hi ka mrees miit fa saa' re' matu'i et Uisneno In Suur Akninu' mnak, ‘Anmui' naan faut goes re' tuukn ein nait inporin, mes oras ia, fatu naan anjair fatu 'suki' neu umi'! Uisneno kuun es re' anpiir ma nbetis nain je, he natoko' fatu naan. Es naan ate, hit tahiin ma tiit in masan arekot!’ ” 43 Rarit Nai' Yesus na'uab anteni' mnak, “Onaim mitenab mirek-reko'. Unu' te Uisneno npiir kit atoin Yahudis, he tjair Iin na. Mes natuin hi ka mituina' Kau fa, Uisneno of anpiir tua sona'. Fin tuaf re' nmoin natuin Uisneno In romin es re' bisa ntaam anjair Iin na. 44 Au utoon unoon. Au re' ia, es re' fatu 'suki' naan. Tuaf re' nastuun ma ntaikobi nbi fatu ia, of namreu'. Ma karu fatu naan anmouf ma ntoom tuaf es, tuaf naan of namreu' nain.” 45 Oras a'naak rais pirsait Yahudi sin a'naakt ein, ma atoin Farisi sin nneen Nai' Yesus In reta' naan, sin nahinin am nak, In nseer sin. Sin arsin re' naan natai nok re' aseeb poo' anggur naan, ma tukan fatu re' nait inporin fatu 'suki' naan. 46 Onaim sin nato'on nmat-maten. Rarit sin n'ator asraak he nheek Nai' Yesus. Mes sin natiun gok neu too mfaun ein re' naan Nai' Yesus nak, Uisneno In mafefa kninu'. Onaim sin ka bisa nmo'en fa saa'-saa' neu Ne.
Usif Yesus nareta' anmatoom nok tuaf re' ka nroim fa he neem neu fesat kabin
1 Rarit Nai' Yesus na'uab antein anpaek reta' mnak, 2 “Uisneno In aprenat naan, nahuum on re' uisf es, re' nmoe' fesat kabin neu in aan mone. 3 Oras naroitan anrair fesat naan ate, in nreek haefan in aten he nnaon naskau tuaf-tuaf re' napenin haan askaut am nak. ‘Au uskau tua, natuin acara fesat he nmurai jen.’ Mes tuaf ein naan ka nromin fa he nokan. 4 Rarit aten naan antebi nfanin ma natonan neun sin usif. Anneen on naan ate, usif naan nreek haefan in aten bian am nak, ‘Hi mnao miskau tuaf ein naan he neman, fin fest ee naroitan anrair je. Au 'roro 'rair bijae, ma uhaan namin-miin. Miskau sin he neman ma nbukaen fesat, fin au ubarab urair je.’ 5 Aten naan annaon naskaun on naan. Mes tuaf-tuaf re' napenin haan askaut ka nfairorin fa. Bian annaon on po'on, bian annaon on baer mepu, 6 ma bian anheek usif naan in aten, ma nha'mui' na'maet sin. 7 Anneen on naan ate, usif naan natoo' batuur-batuur. Rarit in naprenat in soraurs ein he nnaon nroor tuaf-tuaf re' nroor in aten. Rarit soraurs ein naan nout kota naan tar namneer antea afu. 8 Rarit usif naan anhaman in aten bian ma na'uab am nak, ‘Tabarab atrair fesat kabin, mes tuaf-tuaf re' au uskau sin naan, ka neu fa he nokan anbin au fesat. 9 Oras ia, hi mnao meu raan oopt ein, he miskau sekau goah re' hi miteef sin anbin naan.’ 10 Rarit aten naan annaon neun raan oopt ein. Sin neik tuaf amfaun re' sin nateef sin anbin naan, he nnaon neun fesat kabin. Anmui' atoin reko ma anmui' atoin maufinu re' neman namfa-faun anbin fesat naan. 11 Rarit usif naan antaam neu baer fesat he nkisu nfuun am nateef in taumn ein ok-oke'. Onaim in niit tamu tuaf es, re' ka npaek fa baur fesat. 12 Rarit usif naan nataan am nak, ‘Hae, ba'e! Nansaa' am es ho mtaam meu ia ka mpaek fa baur fesat?’ Mes tuaf naan ntaka'nana' on ahaa re' naan. 13 Onaim usif naan naprenat in aten am nak, ‘Amfuut atoni' re' ia in haen-niman, he mait impoir ee meu mone'. Maut he in nkae ma napein ha'mu'it anbi baer meis'okan naan.’ 14 On naan amsa', Uisneno nfee haan askaut ma naskau tuaf amfaun, mes In npiir ma nbetis naan ahaa bian re' ka namfaun fa he njair Iin na.”
Usif Yesus na'uab anmatoom nok baen beo neu anaa' aprenat
15 Anneen anrair Nai' Yesus In uaban naan, atoin Farisis sin an'akoran he nakuu ma nakreo Nai' Yesus. 16 Rarit sin nreek haefan sin aten ma tuaf na'ko Herodes in partei purtik, he nataan Nai' Yesus. Sin nanaib ma na'raatn Ee mnak, “Aam Tungguru! Hai mihiin mak Ho nekam naan amne'o. Ho ka mputa-kriu muhiin fa ma ka mpiir fa humaf. Ho munoni' Uisneno In Kabin ma Prenat nok rek-reko. 17 Oras ia, hai mitaan maan Ko rais jes. Tatuin hit atoran pirsait Yahudi, hit ro he tbeos beo neu uis ko'u keser Roma, ai' kaah?” 18 Mes Nai' Yesus nahiin nak sin he nakreo Goe, he In na'uab namouf ana' prenat Roma. Onaim In nataah am nak, “Atoin puta-kriut ki! Nansaa' am es hi he mikreo Kau nok rasi naan? 19 Mikrira' miit Kau roi muti' fua es, re' tuaf anpaek je he nbaen beo!” Onaim sin nakrira' roi muti' fua es neu Ne. 20 Rarit In nataan sin im nak, “Sekau in human ma in kanan es re' maruna' ia?” 21 Sin natahan am nak, “Re' naan keser, prenat Roma in uis ko'u.” Onaim Nai' Yesus natoon neu sin im nak, “Karu on naan ate, amfee meu preent ii saa' re' preent ii in hak. Ma mfee meu Uisneno saa' re' njair Uisneno In hak.” 22 Anneen In nataah on naan ate, sin ok-oke' nmasahun, In na'uab naan batuur. Es naan ate, sin ka bisa nakreo naan Ee fa. Onaim sin nnao nasaitan Nai' Yesus.
Usif Yesus nanoni' anmatoom nok amates anmoni nfain; ma rais matsaos anbi sonaf neno tunan
23 Anbi naan, anmu'i msa' tuaf na'kon partei Saduki. Sin re' ia nanoin ein am nak, atoin amaets ein ka bisa nmonin nfanin fa. Neno naan, sin namin ranan he nakreo Nai' Yesus. Es naan ate, sin neman ma nataan Nai' Yesus am nak, 24 “Aam Tungguru! Ka'o Musa antui nain kit atoran harat ia mnak: karu anmui' atoni' nmate nporin in fee, mes ka nahoni' fa ri'ana', hena' te atoni' naan in oirf ee ro he nsao bifee banu' naan, he nahoni' nfee sufa' neu in tataf amates naan. 25 Batuur, unu' te ka'o Musa nanoni' on naan, mes oras ia hai he mitaan on nai: anmui' naan atoni' tuaf hiut sin nma'ori-taatn ein. Aan moen unu nsao, mes anmaet ma ka nahoni' fa. Onaim in orif re' natuin ee ji nsao bifee banu' naan. 26 Ka 'roo fa te, in nmaet ma ka nahoni' fa. On naan amsa' oirf es anteni'; in nsao bifee banu' naan, mes anmate ma ka nahoni' fa msa'. Matsaos naan nanaob on piut tar nasopu ntea aheit suus goe, mes in anmate msa'. 27 Rarit bifee banu' naan anmaet. 28 Onaim oras ia, hai he mitaan on nai: bifee naan ansao niit atoni' hiut. Oras pah-pinan ia namsopu te, Uisneno namonib nafani' amaets ein, bifee naan in moen je, es re' mee?” 29 Rarit Nai' Yesus nataah am nak, “Karu hi mitaan on naan, hi msaan ko'u! Fin hi ka mihiin fa Uisneno In Suur Akninu' In afan. Ma hi ka mihiin fa In kuasan re' ma'tani' msa'! 30 Batuurn ii, on nai. Oras Uisneno namonib nafani' amaets ein, sin ka nmatsao ntein' ein fa on re' In ameupt ein sonaf neno tunan amsa'. 31 Au he u'uab amsa' anmatoom nok amates anmoni nfain, ai' kaah? Anbi ka'o Musa in surat anmui' reta' hau aan es, re' anpiin mes ka nputuf. Na'ko reta' naan hit tahiin tak, amates bisa nmoni nfain. Fin naan Uisneno natoon neu ka'o Musa mnak, 32 ‘Au re' ia, sin ho ka'o sin Uisneno. Esan re' ka'o Abraham, ka'o Isak, ma ka'o Yakop. Sin arsin ok-oke' na'ruir ein ma na'besan piut neun Kau ntean oras ia.’ Hi mihini mmak, oras Uisneno na'uab on naan, a'naef ein naan anmaten nrarin a'roo-'roo goen et unu'. Mes Uisneno nak In njair sin Uisneon goa fe'. Es naan ate, hit tahiin tak, sin asmaank ein anmonin nkonon, maski sin nmate nrarin, mes sin nmonin nfanin. Fin suma atoin amonit es re' na'ruri' ma na'bees neu Uisneno. Ka tiit fa amates na'bees neu Uisneno!” 33 Anneen Nai' Yesus nanoni' on naan ate, tuaf ein na'kon partei Saduki sin ka bisa fa he nbaras saa'-saa' ntein. Mes too mfaun ein anmasahun ma na'uab ein am nak, “Amoo! Atoni' ia, In noin ii ma'tain re'uf!”
Usif Yesus nanoni' anmatoom nok prenat re' pentiing anneis
34 Oras atoin Farisis sin annenan am nak, Nai' Yesus niis anrair atoin Sadukis sin on naan ate, sin nabuan ok-oke' he nataan Nai' Yesus. 35 Sin tuaf ahinit es nbi rais pirsait, he nakreo nsoba' Nai' Yesus am nak, 36 “Aam Tungguru! Au he utaan on nai: hit haart ii in atoran ma rais pirsait ii in apreent ein, amfau re'uf. Na'ko preent ein ok-oke' re' neman na'kon ka'o Musa naan, mee es re' pentiing anneisi?” 37 Onaim In nataah am nak, “Prenat re' pentiing anneis anbi Uisneno In Suur Akninu' naan nak, on nai: ‘Uisneno naan, hi Usi'. Onaim hi ro he mneek Uisneno, anneis na'ko are' saa' ii ok-oke'. Es naan ate, hi ro he mimnau Goe piut-piut, mihiin mirek-reok' Ee, ma mmeup ma'tani' he mituin In romin.’ 38 Prenat naan, es re' pentiing anneis ma ma'tani' nneis! 39 Ma nmui' prenat es anteni', mnak on nai: ‘Ho ro he mneek ho aom-bian, on re' ho mneek ho tuam aan kuum.’ 40 Prenat noon nua' ein re' ia, esan re' na'uu ma na'ba'an na'kon ka'o Musa in atoran, ma Uisneno In mafefa kniun' ein sin noin' ein ok-oke'. Tuaf ka bisa natuin fa prenat bian, karu sin ka natuin nahunun fa prenat noon nua' ein re' ia.” Kristus naan, batuur usif nai' Daut in sufan, ma In njair usif nai' Daut in Usin amsa' 41 Oras atoin Farisis sin nabuan fe'e nbin naan ate, Nai' Yesus nataan sin im nak, 42 “Na'ko un-unu' Uisneno anba'an he nruur ma nreek Kristus he nsoi nafetin Iin na. Natuin hi peint ein ate, Kristus naan, sekau in sufan?” Onaim sin natahan am nak, “In re' naan, usif nai' Daut in sufan.” 43 Nai' Yesus na'uab antein am nak, “Karu on naan ate, nansaa' am es Uisneno In Asmaan Akninu' natoon neu usif nai' Daut he nteek Kristus nak ‘Usi’? Fin usif nai' Daut antui mnak, 44 ‘Uisneno n'eut ma natoon neu au usi' mnak, “Uum he mtoko mbi Au bnapak a'ne'u, ambi bare re' mahormata' anneis-neisi. Fin Au of a'moe' ho muusn ein, tar antea sin na'ruir ein neu ko.’ ” 45 Na'ko surat naan, hit tahiin tak usif nai' Daut amsa' in neikn on anteek Kristus naan, ‘Usi'’. Onaim karu anmui' tuaf nak Kristus naan, suma usif nai' Daut in sufan, naan ka nanokab fa fe'! Natuin In njair usif nai' Daut in Uisf amsa'!” 46 Anneen Nai' Yesus na'uab on naan ate, atoin Farisis sin anfeef a'temen, ka tiit fa tuaf es re' bisa nataah Nai' Yesus amsa'. Es naan ate, anmurai na'ko neno naan, sin namtaun he natanan, ma sin ka nabranin fa ha nakreo ntein Ee.
Usif Yesus namnaub he mpaant om mi'ko tunggur agaam ein ma atoin Farisis sin
1 Rarit Nai' Yesus nanoni' In atoup noin' ein, ma too mfaun ein re' natuin sin. 2 In na'uab am nak, “Tunggur agaam ein ma atoin Farisis sin anmu'in hak he nanoni' ka'o Musa in atoorn ein neu too mfaun. 3 Onaim hi ro he mneen ma mitniin sin ma mituin sin noin' ein naan. Mes kais mituin saa'-saa' re' sin nmoe' sin, natuin sin ka nmoe' natuin fa saa'-saa' re' sin nanoni' sin. 4 Sin na'seke' tuaf he nasaah ma nroi sin atoran rais pirsait re' ma'fena'. Mes sin tuak ein kuuk ka nromin fa he nturun ma nbaab tuaf he natuin atoran naan. 5 Saa'-saa' re' sin nmoe' sin naan, henati' sin napenin bo'is. On re': anmui' baer es, re' matua' nok Uisneno In Kabin ma Prenat re' mafutu' nbi sin a'naak ein ma sin a'niimk ein. Mes sin na'naeb sin ein, ma sin namnanub sin tais ein sin fuuk ein, henati' tuaf bian nanaib sin im nak, ‘Sin re' naan atoni kninu', joo!’ 6 Karu sin ntaman neun uim onen, ai' sin nokan anbin fesat, sin namin baer tokos re' reko nneis, henati' too mfaun ein niit sin. 7 Karu sin nnaon neun a'masa', sin namin rais hormaat amsa'. Sin nmo'en henati' atoni' anhormaat sin im nak, ‘Tabe tua, aam tungguru mahormata'.’ 8 Mes hi kais mituin sin cara naan! Kais atoni' nhaman ki mnak, ‘aam tungguru’, natuin hi Tunggur goe mese'. Ma hi ar-arki re' ia, amma'ori-tatan, mmabae-feton, ma mmabae-monen. 9 Kais maikas tuaf ambi pah-pinan ia mmak, ‘aam’, natuin hi Ama' abit sonaf neno tunan mese' kuun. 10 Atoni' ka bole fa he nhaman ki mnak, ‘usi'’, natuin hi Usi' suma mese' kuun, es re' Au re' ia, re' Uisneno nruur ma nreek nain Kau na'ko afi unu'. 11 Es naan ate, Au 'ak hi kais maiks om nahuum on re' tuaf-tuaf re' namin rais hormaat. Sekau na'ko hi arki re' amroim he mi'nae, in ro he nmoin nahuum on re' ate re' antuthae tuaf bian piut. 12 Fin tuaf re' nanaib on, Uisneno of nasaunt ee. Mes tuaf re' na'baun in tuan ee on re' atoin a'baut, Uisneno of nanaib ee.”
Usif Yesus nakain a'naak pirsait ein, natuin sin na'uab ein a'teta' ma nmo'en a'teta'
13 Rarit Nai' Yesus na'uab antein am nak, “Hoe, hi tunggur agaam ein ma atoin Farisis ki! Hi re' naan, atoin puta-kriut ki! Hi of mipein siraak, natuin hi ka mpirsai Kau fa, Tuaf re' Uisneno nba'an he nreek Ee ntaam neem. Ma hi mmaufinu mneisi mtein, hi m'eka' maan tuaf re' neman he ntaman neun Uisneno In aprenat, he sin kais anpirsain neun Kau. 14 Hoe, hi tunggur agaam ein ma atoin Farisis ki! Hi re' naan atoin puta-kriut ki! Hi of mipein siraak, natuin hi mputa-kriu baun ein, rarit misiik maan sin umin. Mes anbi too mfaun ein maatk ein, hi mi'koro' hi 'moe' maufinun naan, esan re' hi mhake ma m'onen a'roo-'roo he atoni' nak hi neekm ein nakniun' ein. Mes Uisneno of anfee ki hukun re' ma'fena' nneis. 15 Hoe, hi tunggur agaam ein ma atoin Farisis ki! Hi re' naan, atoin puta-kriut ki! Hi of mipein siraak, natuin hi msae bnao oe meu mee-mee, ma msae-msaun a'to'ef, suma he maim tuaf es aah, he in ntaam neu hi partei agama. Mes karu in ntaam anrair, hi mmoe' in a'moin ii njair maufinu nneisi ntein, tar antea in napein hukun anbi ai abar-barat ma'fena nneis no nua na'ko ki. 16 Hoe! Hi neekm ein nameis'okan, mes nansaa' am es hi fe' he miruru' ma mikrira' ranan meu tuaf a'teta' ntein? Hi of mipein siraak natuin hi minoni' tafi'-tafi' mmak, ‘Karu tuaf nait rais manba'an anpaek supat ma nteek Uim Onen Uuf, tuaf naan ka nmafutu' fa nok in rais manba'an naan. Mes karu in nait rais manba'an anpaek supat ma nteek bare mnatu' re' et Uim Onen naan, na' in nmafutu' nok rais manba'an naan.’ 17 Hi re' ia atoin amonot ma aforot ki! Hi mitenab mak Uisneno naan bare mnatu' pentiing anneis na'ko Uim Onen Uuf? Kahaf! Fin Umi naan es re' nmoe' baer' ein naan nakniun' ein! 18 Hi minoni' tafi'-tafi' msa' am mak, ‘Karu atoni' ansuup npaek supat ma nteek mei fuat re' et Uim Onen Uuf, atoni' naan ka nmafuut fa nok rais manba'an naan. Mes karu in nait rais manba'an anpaek supat ma nteek fuat re' et mei je tunan, na' in nmafuut nok rais manba'an naan.’ 19 Hi re' ia, amfoor batuur-batuur. Mei fuat re' naan pentiing anneis na'ko fuat re' et mei je tunan. Fin mei naan, es anmoe' tar antea atoni' bisa nfee sin fua'-tuur' ein neun Uisneno. 20 Natuin rasi naan, karu atoni' ansuup ma nteek mei fuat, naan nahuum on re' in nteek mei naan, ma saa'-saa' ein ok-oke' re' etan mei naan in tunan amsa'. 21 Ma karu atoni' ansuup ma nteek Uim Onen Uuf, naan nahuum on re' in nteek Uim Onen Uuf nok Uisneno In kanan. Fin In es re' natua nbi naan. 22 Ma karu atoni' ansuup ma nteek sonaf neno tunan, naan nahuum on re' in nteek Uisneno In a'toko prenat nok In kanan, fin In es re' nnaa' aprenat anbi naan. 23 Hoe, hi tunggur agaam ein ma atoin Farisis ki! Hi re' naan, atoin puta-kriut! Hi of mipein siraak, natuin hi mihiin ma'tani' he msoi' bait bo' meu Uisneno. Hi msoi' sin ok-oke', tar antea hi roet bumbu, hi msoi' je mates amsa'. On re' hi msoi' namnuut hi torere' ma sipa', rarit aijonuus. Te kaah, hi mnikan main Uisneno In Atoran re' pentiing anneisi! Fin hi ka mmoin fa nok amne'o ma namnoon. Hi ka mneek fa atoin ama'mui't ein. Ma hi ka mmoin fa piut-piut mituin Uisneno In romin. Reko nneis, hi mmoe' mituin naan ok-oke' fe', na' hi msoi' hi bumbu sin, re' he mfee sin meu Uisneno. 24 Hi neekm ein nameis'okan, mes nansaa' am es hi he miruru' ma mikrira' ranan meu tuaf bian antein? Hi miknutu' atoran ma mreun biak ein nmoe' natuin sin, mes Uisneno In atoran re' pentiing anneis-neis naan, hi ka mituin ee fa. Naan nahuum on re' hi mtai oe mninu' he kais anmu'i kbenu. Mes bijae kou' goes hi m'oor maan ee 'teme-'teme! 25 Hoe, hi tunggur agaam ein ma atoin Farisis ki! Hi arki atoin puta-kriut ki! Hi of mipein siraak, natuin hi msaef hi bare mnaaht ein tar antea narim-riman, mes naan suma nbi koit. Te kaah, in nanan n'oemeet natuin hi misiik ma mibaak nok rais sinmakat ma komat. 26 Hoe, hi atoin Farisis aforot ki! Amsaef hi bare mnaaht ein sin naank ein. Nok ranan naan, sin koitk ein of nakniun' ein amsa'! 27 Hoe, hi tunggur agaam ein ma atoin Farisis ki! Hi arki atoin puta-kriut ki! Hi of mipein siraak, natuin hi on re' faut rame' anbi nopu. Atoni' anseet ee nok seet muti'. Atoni' nkisu te in koitn ee reok re'uf. Mes in nanan, naheun nok nuif na'ko tuaf amates ma nafoo foo punu'. 28 Hi on naan amsa'! Hi mmoe' jom on re' atoni kninu'. Atoni' nkius niit ki on naan ate, sin nak hi atoin neek amneot ma amnonot ki. Te kaah, hi nekam nanan naheun nok rais maufinu. Natuin hi mi'uab ate, a'teta', ma mmo'e te, a'teta', ma mnikan main Uisneno In apreent ein. 29 Hoe, hi tunggur agaam ein ma atoin Farisis ki! Hi arki atoin puta-kriut ki! Hi of mipein siraak! Hi mifena' faut nopu meu Uisneno In mafefa kniun' ein, ma mhias faut nopun naan reok reu'f ein. 30 Mes hi mak, ‘Bait hit tmoin batan mese' tok hit be'i-na'i sin ite, hit ka troor tiis fa mafefa kninu' Uisneno sin.’ 31 Nok ranan naan, hi mitoon kiim am mak, hi re' naan atoin amaufinut nahuum on re' hi be'i-na'i sin. 32 Onaim reko neis, hi mmaufiun piut tar antea namsoup, mituin hi be'i-na'i sin a'moe'k ein re' ansaan ma nbeon naan! 33 Hi arki ammaufiun batuur-batuur on re' kaun araut. Hi mitenab am mak, of oni' Uisneno ka nhukun ki fa, ai'? Kais amharap ma mifnekan on naan! In of nait inporin ki meu ai pina' abar-barat! 34 Amneen mirek-reko'! Au of a'reek haefan Au haef ein, he sin nanoin ein ma naruru' ki raan a'honis amneot na'ko Uisneno. Mes hi of amroor miis bian ma mi'maet bian anbin hau nehe. Bian hi mbeos sin anbin uim oen ein, ma bian anteni' hi mha'mui' sin, tar antea sin naenan na'kon kota es neu kota bian. 35 Un-unu' fe'e te, hi na'i anroor niis nai' Habel. Te kaah, nai' Habel naan atoin neek amneot. Hi be'i-na'i na'maet tuaf amneot ma amnonot sin piut-piut, na'ko batan neun batan bian. Tar antea nai' Sakarias, es re' nai' Barakia in anah. Sin na'maet je anbi Uim Onen Uuf ee in kintal anpaumaak mei fuat. Natuin hi mituin hi be'i-na'i sin 'moe' maufinun, es naan ate, hi ro he misaah ma mitaah atoin neek amneot ma amnonot sin naa' at'oops ein naan. 36 Batuur! Fin hi arki oras ia, hi of mipein hukun, natuin rais maufinun re' hi be'i-na'i sin anmoe' sin afi unu' naan.”
Usif Yesus ankasian abitan Yerusalem
37 “Hi arki abitan Yerusalem! Hi es re' biasa mi'maet Uisneno In mafefa kniun' ein, ma mpoir miis In haef ein re' neman he nturun ki. Au 'o'en ma 'fuir ki fani-fani he iim meu Kau, nahuum on re' maun ainaf anpuput naan in aan ein anbin in ninin nanan. Mes hi ka mroim fa. 38 Es naan ate, Uisneno ka nrae ma mfairoir fa hi umi. Rarit noka'-nmeu te, in ruman. 39 Amneen mirek-reko', joo! Fin hi ka miit amtein Kau fa, tar antea in oras hi mmanaku' mmak, ‘Hai mtoit he Uisneno anfee tetus neu Tuaf re' ia, natuin Uisneno es re' anreek Ee.’ Hi mmanaku' on re' naan, es na' hi miit amtein Kau.”
Usif Yesus natoon nain nak Uim Onen Uuf ee of natseer
1 Rarit Nai' Yesus annao nasaitan Uim Onen Uuf. Oras In fe' npoi nnao te, In atoup noin' ein neman ma naruru' Uim Onen naan in arekon. 2 Mes In nataah sin im nak, “Umi ia batuur reokn ii kah een! Mes amneen mirek-reko'! Ka 'roo fa nteni' te, sin naseer fatun ia ok-oke'.”
Usif Yesus natoon am nak, In atoup noin' ein of napenin susat ma nana'renat
3 Rarit Nai' Yesus annao ntoko nbi 'to'ef Saitun. Onaim In atoup noin' ein neman he na'uab anmes-mesen nok Ne. Sin na'uab ein am nak, “Aam! Mutoon mufani' kai saa' re' Ho mu'uab ee fe'e na. Of reka' te Ho mfain uum, tua? Ma in a'taak ein on re' mee? On mee nok neon amsoput naan amsa'?” 4 Rarit Nai' Yesus nataah am nak, “Ampanat hi tuam ein rek-reko, he kais napoi naan ki. 5 Fin of anmui' tuaf huma'-huma' neman rarit anpaas ok am nak, ‘Au re' ia Kristus, Tuaf re' Uisneno anba'an anrair Je na'ko unu'.’ Nok ranan naan, sin napoi too mfaun. 6 Karu hi mkius makenat, ai' hi mneen uab anin am nak, anmui' taisibu ma makenat et mee-mee, hi kais mimtau. Fin rasin re' naan ro he njarin. Mes neon amsoput naan ka ntea fa fe'. 7 Uuf es of anmakeen nok uuf bian. Pah es anmakeen nok pah bian. Of antainuun nbi mee-mee. Ma oras amnahas ma'tain besi! 8 Mes naan ok-oke', fe' tanar ahunut re' natoon am nak, oras neon amsoupt ii he neem een. Naan nahuum on re' bifee re' he fe' nmurai nnaben menas, natuin in oras he nahoni' anpaumaak een. 9 Onaim hi ro he mpanat hi tuam ein rek-reko! Sin of anha'mui' ki ma nroor na'maet ki. Ma tuaf na'ko pah-pah of ka nroim nain ki fa, natuin hi mituina' Kau. 10 Oras naan, too mfaun ii nkoit ma ka npirsain ntein Kau fa. Sin ka nmaka'roim ein fa, ma of anma'soos ein es nok es. 11 Of anmui' aputa-kriut nak sin re' naan, Uisneno In mafefa kninu'. Ma too mfaun ii npirsai sin. 12 Of tuaf ein sin maufiunk ein amfaun ma na'baab ok antein, tar antea sin ka nmanekan fa es nok es. 13 Mes tuaf re' naran ma ntahan piut-piut tar antea in nmaet, Uisneno of ansoi nafetin naan ee. 14 Fin tuaf ro he natoon ma nasina' Uisneno In Rais Reko, tar antea pah-pinan ia no mes-mese', maut he bifee-atoni' sin ok-oke' nahiin Uisneno In raan a'honis re' batuur. Rarit na' neon amsoupt ii neem.”
Usif Yesus natoon am nak, amaufiun reu'f es of anboor neem
15 Nai' Yesus na'uab ankoon am nak, “Uisneno In mafefa kninu' nai' Daniel antui anmatoom nok tuaf re' in maufinu ma'tain re'uf. In of antaam anhaek neu baer nuni nbi Uisneno In Uim Onen Uuf. Nok ranan naan, in nhai'niis bare naan. Es naan ate, Uisneno naikoit bare naan. Oras hi mkius miit on naan, ampaant om! (Sekau re' anrees tuis ia, ro he nahiin narek-reko'!) 16 Naan anjair tanar nak, neon suust ein anpaumaak een. Oras amkius on naan ate, abitan propinsi Yudea maen nai meu 'to'ef. 17 Karu tuaf anpoi nrair na'ko umi, kais anfain he nait bare' ntein. Maen amkoon, maut he kais mipein siraak. 18 Tuaf re' nbi rene ma po'on, kais anfain he nait tainusat antein. Maen amkoon nai! 19 Re' tkasian sin baineis-neis ii, es re' bifee ma'apu', ma bifee re' nasuus ri'ana kru'uf. Te sin ka bisa naen nanan fa. 20 Onaim reko nneis hi m'onen he siraak naan kais nateef nok oras na'uur, ai' nateef nok neno snasat. 21 Fin neno naan susat ma'tani'! Anmurai na'ko oras Uisneno nmoe' pah-pinan tar antea oras ia, atoni' ka nkius niit fa susat ma'tani' nahuum on re' naan. Ma atoni' of ka nkius niit antein fa susat ma'tani' nahuum on re' naan amsa'. 22 Mes hi m'ua reok, fin Uisneno na'paran neno naan. Karu kaah fa te, ka tiit tain fa tuaf re' ntahan he nmoin nabaar. Mes, natuin Uisneno nneek In tuaf ein re' In npiir nain sin, es naan ate In na'paran neon suust ein naan. 23 Karu neno naan antea goen, hi mneen tuaf nak, ‘Amkius! Kristus es ia!’ Ma tuaf bian nak, ‘Kristus es nee!’ Mes hi kais ampirsai, joo! 24 Fin of anmui' tuaf anpoi ma npaas ok nak, ‘Au re' ia, Kristus!’ Ma bian antein nak, ‘Au re' ia, Uisneno In mafefa kninu'.’ Sin of anmo'en rais sanmakat huma'-huma' anpaken niutn ein sin kuasa he nputa-kriu atoni'. Sin nsoob ein he napoi Uisneno Iin na msa'. 25 Onaim hi ro he mpaant om rek-reko, joo! Neon suust ein naan ka ntean fa fe', mes Au utoon 'ain ki! 26 Karu tuaf natoon ki mnak, ‘Kristus et amnera' nee, joo!’ hi kais amnao meu nee. Ma karu nmui' tuaf nak, ‘Kristus et umi ia nanan!’, hi kais ampirsai sin aputa-kriut ein naan. 27 Fin Au re' ia, Mansian Batuur-Batuur. Oras Au 'fain 'uum a'bi pah-pinan ia, too mfaun ii niit Kau, nahuum on re' rimat re' nariim na'ko pasa' maans ee 'saen neu pasa' neon-teas. 28 Oras Au 'fain 'uum, hi of mihiin mak Au et mee. On re' tuaf nahiin nak, karu nmui' koor amneuk puun ein nabu-buan anbin baer jes, naan anmui' punu' et bare naan.”
Usif Yesus na'uab anmatoom nok he nkoen On anfain neem
29 Rarit Nai' Yesus na'uab antein, he natoon neu In atoup noin' ein am nak, “Oras neon suust ein naan oke' nrair, ‘Maans ee of anjair meis'okan, fuun ne ka masnaa fa ntein amsa'. Kfuun ein of anbamoufun na'kon neon goe tnanan, ma kuasa et neon goe tnanan sin natseran.’ 30 Rarit mansian ii niit tanar anbi neon goe tnanan nak, Mansian Batuur-Batuur ii he nkoen On anfain neem. Ankisun on naan ate, uuf-uuf ma pah-pah abitan pah-pinan namtaun tar antea sin ankaen. Au of a'saun 'uum a'bi nope, na' mansian ii niit Au kuasat ma Au 'pina' ma kraha' sin ok-oke'. 31 Rarit Au 'paek to'is re' in haan ee ma'tani' he uprenat Uisneno In ameupt ein etan sonaf neno tunan annaon na'bua' tuaf re' Au 'piir 'aan sin na'kon pah-pinan ia pani-mpain, na'ko pasa' maans ee 'saen tar antea pasa' neon-teas, na'ko pasa' ponain tar antea pasa' haa'-nua.”
Neon suust ein anjair tanar Usif Yesus In amneman
32 “Au 'pake 'tope' na'ko hau. Karu in noon ein nmurai namnaut moor ein, naan anjari 'takaf nak, oras fauk nais ii he ntaam een. 33 On naan amsa', oras hi mkius neon suust ein neman, on re' Au utoon 'ain ki, tanar naan 'ak, oras he Au 'uum ii npaumaak een. 34 Oras ia, mneen mirek-reko'! Na'ko mansian ii ok-oke' re' nmonin oras ia, of anmui' tuaf re' ka nmaet fa fe', oras neon suust ein naan neman. 35 Maski neon goe ma pah-pinan ia namnekun, mes Au a'at ma kabin sin nabar-baran kuuk.”
Usif Yesus na'uab am nak, In oras amneman naan, ma'nifa'
36 “Ka tiit fa tuaf re' nahiin oras Au 'fain 'uum. Uisneno In ameupt ein et sonaf neno tunan, ka nahinin fa msa'. Au kuuk, ka uhiin fa msa'. Suma Au Ama' kuun es re' nahini nmees. 37 Fin Au re' ia, Mansian Batuur-Batuur. Oras Au 'fain 'uum, nahuum on re' un-unu' oras nai' Noh anmoin fe'. 38 Noe sako' naan ka nsaen sin fa fe', mansian ii nbukaen amin-minat, ma nmatsaon on re' biasa. Sin nmo'en on re' naan piut-piut, tar antea nai' Noh antaam neu bnao ko'u naan. 39 Mes oras noe sako' ansaen sin, na' sin maatk ein natfe'in, he sin nahinin saa' re' njair naan. On naan amsa', oras Au 'fain 'uum. 40 Anbi oras naan, karu tuaf nua antofan nbin rene, nok askeken ate, Uisneno nait neik es, ma namaika' es. 41 Karu bifee nua napaun maka', nok askeken ate, Uisneno nait neik es, ma namaika' es. 42 Es naan ate, hi ro he mpao ma mpanat ansuun oras et fai ma manas, fin hi ka mihiin fa oras re' reka' te, hi Usi' ankoen On anfain neem. 43 Mitenab mirek-reko'! Karu anmui' uim tuaf re' nahiin neu abaakt ee he ntaam mabe' ia, in ro he npao ma npanat piut-piut, maut he abaakt ee kais antaam neu uim je nanan. 44 Onaim hi ro mibaarb om batuur-batuur. Fin oras Au 'fain 'uum re' naan, nok askeekn aah!”
Usif Yesus nanoni' mnak, ameput ro he natuin in uisn ee in roimn ee nkoon
45 Rarit Nai' Yesus na'uab antein am nak, “Hi ro he mjair on re' ameput re' natuin in uisn ee romin. Karu in uisn ee he nnao neu bare 'roo, in nait ameput on re' naan, he n'urus mnahat ma mninut neu in uim je nanan. 46 Karu in uisn ee nfain neem ma nkius niit in ameput naan anmeup rek-reko, ro tebes in of anmariin nok ameput naan. 47 Ampirsai Kau, fin usi' naan of anfee kuasa neu ameput naan, he n'urus in a'mui'k ein ok-oke'. 48 Mes karu ameput naan maufinu, in of natenab anbi in nekan am nak, 49 ‘Reko! Usi' nnao on nai te, sekau nahiin oras usi' nfain neem, oo!’ Natenab on naan ate, in nmurai nbeos ma npokos ameput bian. Ma in ntoko ma naah-niun amin-minat nok amauft ein. 50 Mes fe' ka natenab naan fa saa'-saa', nok askeken ate, in uisn ee nfain neem. 51 Onaim usif naan anha'mui' je ma'tani', rarit nait inpoirn ee neu mone', he in nabua nok atoin aputa-kriut ein. Anbi bare naan, sin ok-oke' ankaen npin-piuns ein, natuin sin napenin susat ma nana'renat ma'tani'.”
Usif Yesus nareta' anmatoom nok bifee munif re' anpaon he nseun baroit atoni'
1 Rarit Nai' Yesus na'uab antein anmatoom nok Uisneno In aprenat am nak, “Hi ro he mibarab mirek-reko' he mseun Kau, on re' reta' re' ia. On nai: neot es, anmui' bifee munif bo'es, re' npoin nbin oras fai ma neik ein paku, he nnao nseun baroit atoni' nbi sin partei je in umi. 2 Mes na'ko tuaf bo'es naan, anmui' tuaf niim re' anmonon, ma tuaf niim re' nahinin. 3 Tuaf niim re' anmonon naan ka neikin fa mina' anneis. 4 Mes tuaf niim re' nahinin, sin neik nanin mina'. 5 Antean umi naan, baroit atoin ee ka neem fa fe'e msa'. A'roo-'roo te bifee muinf ein naan anreur ein nmaten, onaim sin ntupan nfinin. 6 Te kaah, fai je natnaan ate, sin annenan atoni' nkoa' ma nsakanan am nak, ‘Hoi! Baroit ee neem een, oo! Iim he tnao tseun goe!’ 7 Annenan on naan ate, bifee muinf ein naan anfenan ok-oke'. Rarit sin nabarab sin pakun. 8 Mes bifee muinf ein re' anmonon na'uab nok sin partei ngguin am nak, ‘Hae, ba'e sin! Ambait maan kai miin a'kre'o. Hai paukn ii he noi nmaet neen!’ 9 Mes bifee muinf ein re' nahinin natahan am nak, ‘Amoo! Kais mitoo', mes ka bisa fa. Fin hai miin ein ka nanokab fa neu kit ok-oke'! Reko nneis hi mnao msoos mina'.’ 10 Onaim sin annaon nsosan mina'. Mes oras sin npoin nnaon, baroit naan neem antea goen. Rarit bifee muinf ein re' nahinin sin ntaman natuin ein anbin baer fesat, nabuan nok baroit ma taumn ein ok-oke'. Sin arsin antaman neun uim je nanan, onaim sin na'eek eno'. 11 Rarit bifee muinf ein re' anmonon neman amsa'. Sin nhaamn ein am nak, ‘Usi'! Usi'! Musoin kai eon' ii fe', tua!’ 12 Mes in nataah am nak, ‘Hoe, ka bisa fa. Au ka uhiin ki fa!’ 13 Es naan ate, hi ro he mibarab batuur-batuur he mhaat ma mpao piut-piut, fin hi ka mihiin fa msa' am mak, oras Au 'fain 'uum nateef nok neon saa', ai' nreuk fauk.”
Usif Yesus nareta' anmatoom nok ameput re' n'urus in uisn ee in noni-roit ein
14 Rarit Nai' Yesus na'uab reta' es antein am nak, “Oras Au usaitan ki, hi ro he mmeup rek-reko meu Kau, nahuum on re' reta' re' ia. On nai: anmui' naan uisf es he nnao neu bare 'roo. Oras in nabarab he nnao, in no'en in ameupt ein, rarit in naprenat sin im nak, ‘Hi mpaek re' roit re' ia njair modal. Oras au 'fain 'uum ate, hi ro he mitoon kau mmak, hi miis fauk een.’ 15 Rarit in nfee neu in ameput ahuunt ee noni-roit 'karo' niim, he in nasufab roit ein naan. Rarit in ameput no nuan ii ntoup roit 'karo' nua. Ma ameput no teun ii ntoup roit a'kaor es, natuin sin es-es ate sin a'bei'k ein. Rarit in nkoen on neu bare 'roo. 16 Antoupu nrair roit ein naan, ameput ahuunt ee nnao nrakan. Ka 'roo fa te, in niis naan roit 'karo' niim antein. 17 On naan amsa' ameput no nuan ii. In niis naan roit 'karo' nua ntein. 18 Mes ameput no teun ii re' ntoup roit a'kaor mese' naan, in nnao nhain kona', he na'koro' in uisn ee roit ein naan. 19 A'roo-'roo te, usif naan neem. Rarit in nabuab in ameupt ein he nmurai nparikas in roit ein re' sin n'urus sin naan. 20 Ameput ahuunt ee ntaam ma nnona' roit 'karo' bo'es. Rarit in nak, ‘Usi'! Ia ho roit ein. Neon goes ii ho mnona' kau roit 'karo' niim. Mes oras ia, au 'iis 'aan kuuk a'karo' niim a'tein.’ 21 Anneen on naan ate, in uisn ee nmariin. In na'uab am nak, ‘Reko! Ho re' ia, ameup reko. Ho mmakoe, ma mutuin meu au prenat, maski au ka 'bi fa ia. Natuin ho bisa m'urus rais aan'-ana' on re' ia, au of 'ait ko he m'urus rasi bian re' ko'u nneisi ntein. Au of a'moe' fesat he hit tmariin ok-oke'.’ 22 Rarit ameput no nuan ii neem annona' in uisn ee roit 'karo' haa mnak, ‘Usi! Neon goes ii ho mnona' kau roit 'karo' nua. Amkius kuum, au 'iis 'aan kuuk roit a'karo' nua 'tein.’ 23 Usif naan anmariin msa'. In na'uab am nak, ‘Reko! Ho re' ia, ameup reok goes amsa'. Ho mmakoe, ma mutuin meu au prenat, maski au ka 'bi fa ia. Natuin ho bisa m'urus rais aan'-ana' on re' ia, au of 'ait ko he m'urus rasi bian re' ko'u nneisi ntein. Au of a'moe' fesat he hit tmariin ok-oke'.’ 24 Rarit ameput no teun ii neem. Onaim in natoon am nak, ‘Usi'! Au uhiin 'ak ho atoin maputu' ko. Fin ho mait saa' re' biak ein anmo'e, ma mseu saa' re' biak ein anseen sin. 25 Au umtau, tua. Kais-kaisa' roit ein ia namnekun, rarit ho mhukun kau. Es naan ate, au u'koro urek-reko' sin. Sin esan re' ia, aam! Amtoup mufani' sin, fin ho roit a'kaor mese' re' ia ka saa'-saa' fa, tua.’ 26 Anneen on naan ate, in uisn ee naskaar ee mnak, ‘Ho re' ia ameput re' maufinu ma apehet! Karu ho muhiin main mak, au 'ait saa' re' biak ein anmo'e, ma au 'seu saa' re' biak ein anseen sin, 27 nansaa' am es ho ka mutunu' fa au roit ii meu bank? He au 'fain 'uum ate, au bisa upein in sufan, maski kre'-re'o msa', reko!’ 28 Rarit usif naan anreun in ameput bian am nak, ‘Mait roit ein na'kon tuaf ia, he mnona' sin meu ameput re' niis roit 'karo' niim naan. 29 Fin tuaf re' an'urus rek-reko saa' re' in nnaa' ee, in of napeni mfaun antein. Mes tuaf re' ka n'urus fa saa' re' in nnaa' ee naan, of nait nain sin ok-oke' na'ko in tuan. 30 Amheek ameput re' ka mapake' fa ia. Amheer amfonat ma mait impoir ne meu mone'. Maut he in nkae nok ha'mu'it anbi baer meis'okan naan!’ ”
Usif Yesus na'uab anmatoom nok neon amsoput oras In he nafeek mansian ein ok-oke' sin rasin
31 Rarit Nai' Yesus na'uab antein am nak, “Au, Mansian Batuur-Batuur re' ia, of a'saun 'uum a'paek Au Ama' In kuasan re' mapina'-makraha', ubua 'ok In ameupt ein na'kon sonaf neno tunan. Rarit Au 'toko 'bi Au 'toko' prenat re' mapina'-makraha' nneis, he uprikas mansian ein ok-oke' sin a'moink ein. 32 Mansian ii ok-oke' re' nmoin niit anbin pah-pinan ia, of neman nbaisenun Kau. Rarit Au 'batis sin, nahuum on re' atukus re' nbatis 'bib-kase na'ko 'bibi, he njair pukan nua. 33 Tuaf-tuaf re' nmoin natuin Uisneno In romin, Au 'tao sin anbin Au bnapak a'ne'u. Mes tuaf bian, Au 'tao sin anbin Au bnapak a'rii. 34 Oras naan, Au 'naa' aprenat nahuum on re' Usif. Au of utoon 'eu tuaf ein re' anbin Au bnapak a'ne'u m'ak, ‘Hi re' ia, es re' mtoup tetus-athoen mi'ko Au Ama'. Iim he mtaam meu In uim je nanan re' In nabarab nain je na'ko un-unu' neu ki. 35 Au 'fee ki haan askaut, natuin unu' fe' oras Au umnaah, hi es amfee Kau bukaet. Oras Au 'meon, hi mfee Kau oe mninut. Au 'uum ate on re' atoin kase, mes hi mtoup Kau 'bi hi umin. 36 Au ka 'mui' fa pake-nohas, mes hi msoo mfee Kau. Au umeen, hi es re' iim am'urus Kau. Au 'bi bui, hi es re' iim amkius Kau.’ 37 Annenan on naan ate, tuaf ein re' neek amne'o nbin Au bnapak a'ne'u naan, of natahan am nak, ‘Usi', on mee es re' ia? Usi' mak, Ho mumnaah, rarit hai mfee Ko bukaet. Ho mmeon oe, rarit hai mfee Ko oe mninut amsa'. 38 Ho on re' atoin kase, rarit hai mtoup Ko he mtaam meu hai umi. Ho ka mmui' fa pake-nohas, rarit hai msoo mfee Ko, tua. 39 Ho mumeen, rarit hai mnao m'urus Ko. Ho mbi bui, rarit hai mnao mturun Ko. Mes anbi oras mee, hai mmoe' rasin re' naan, tua?’ 40 Au of utaah sin im 'ak, ‘Ampirsai Kau! Fin oras hi mmoe' rasin naan meu Au ngguin, maski mmoe' meu tuaf re' ka mapake' fa msa', re' naan hi mmo'e mfee Kau goe!’ 41 Rarit Au u'uab 'eu tuaf ein re' nbin Au bnapak a'rii m'ak, ‘Atoin maufinu ki! Uisneno nkaas anrair ki. Mi'roo nai mi'ko ia! Au of a'reun tuaf he nnao nporin nataam ki meu ai abar-barat. Fin Uisneno nabarab anrair baer ha'mu'it ma ma'ne'at naan neu niutn ein ma sin uis ko'u. 42 Au 'ri'u 'porin ki, natuin oras Au umnaah, hi ka mfee Kau fa bukaet. Oras Au 'meon oe, hi ka mfee Kau fa oe mninut. 43 Au 'uum on re' atoin kase, mes hi ka mtoup Kau fa meu hi umi. Au ka 'mui' fa pake-nohas, mes hi ka msoo mfee Kau fa. Au umeen, mes hi ka iim fa he m'urus Kau. Au 'bi bui, mes hi ka iim fa he mturun Kau.’ 44 Annenan on naan ate, atoin maufiun ein of natahan am nak, ‘Usi', on mee es re' ia? Usi' mak Ho mumnaah, mes hai ka mfee Ko fa bukaet. Ho mmeon oe, mes hai ka mfee Ko fa oe mninut. Ho on re' atoin kase, mes hai ka mtoup Ko fa meu hai umin. Ho ka mmui' fa pake-nohas, hai ka msoo mfee Ko fa. Ho mumeen, mes hai ka mnao he m'urus Ko fa. Ho mbi bui, mes hai ka mnao mturun Ko fa. Mes anbi oras mee re' hai mmoe' Ko on re' naan, tua?’ 45 Au of utaah sin im 'ak, ‘Ampirsai Kau! Oras hi ka mturun fa tuaf ein re' ka mapake' fa, re' naan hi ka mturun Kau fa.’ 46 Rarit atoin maufiun ein napenin ha'mu'it ma ma'ne'at piut-piut tar antea nabar-baar. Mes neu tuaf re' neek amneot ma amnonot, sin napenin 'monit piut-piut nok Uisneno tar antea nabar-baar.”
Atoin Yahudis sin a'naakt ein namin ranan he na'maet Usif Yesus
1 Oras Nai' Yesus nanoni' nrair rasin re' naan ok-oke' neu sin, In na'uab neu In atoup noin' ein am nak, 2 “Hi mihini mrair, neno nua amnemat, hit neon ko'u, es re' Fesat Paska ntea goen. Oras naan, of anmui' tuaf re' na'sosa' Kau, Mansian Batuur-Batuur re' ia. Rarit sin nkuus na'maet Kau nbi hau nehe.” 3 Neno naan, a'naak pirsait Yahudi sin a'naakt ein, ma atoni mnais haart ein nabuan nbin nai' Kayafas in umi. Nai' Kayafas naan, es re' a'naak pirsait Yahudi sin a'naak ko'u. 4 Sin namin ranan he nheek Nai' Yesus amninu'-mninu', he na'maet Je. 5 Mes sin n'ator asraak am nak, “Amtahan fe'! Hit kais atmanaap he theek Je, natuin neon ko'u goe npaumaak een. Kais-kaisa' too mfaun ein re' anroim Je, napoit ein taisibu.”
Bifee jes an'oop miin foo meni' re' ma'osa' neu Usif Yesus In a'nakan
6 Anbi kuan Betania, anmui' tuaf es, kaan ee nai' Simon. Unu' te, atoni' nmai'niis ne, natuin in nameen meen nui-atroki'. Mes oras ia, in nareko nrair. Oras neon ko'u naan ka ntea fa fe', Nai' Yesus sin annaon nbukaen nbin nai' Simon in umi. 7 Oras sin anbukaen ate, anmui' bifee jes neem nateef nok Nai' Yesus. In nnaa' bootr es, re' anmoe' je na'ko faut ma'osa'. Botor naan narai miin foo meni' re' ma'oos re'uf. Rarit bifee naan ntuut nareu' bootr ee toben. Onaim in n'oop mina' naan akre'o-kre'o neu Nai' Yesus In a'nakan, he njair tanar am nak, in nhormaat Nai' Yesus. 8 Mes oras Nai' Yesus In atoup noin' ein ankius bifee naan anmoe' on naan ate, sin nato'on ma na'uab ein am nak, “Hoe! In kais anporin miin foo meni' re' ma'oos re'uf ia! 9 Reko nneis in na'sosa' miin foo meni' ia, maut he in roit ein, in nfee sin neun ama'mui't ein!” 10 Mes Nai' Yesus nahiin sin teenb ein naan, onaim In na'uab am nak, “Hi kais misusab bifee ia! Maut he in nmoe' on re' naan! Au 'mariin, natuin in n'oop miin foo meni' ia neu Au aok ii. 11 Ama'mui't ein et hi sonam ma hi tnanam piut-piut. Mes ka 'roo fa te, Au re' ia, ka ubua 'ok ki fa heen. 12 Nok ranan re' bifee ia na'peeh Kau npaek miin foo meni' re' ia, in nabarab anrair Au aok ii, he nkaki' nain fubona' neu Au aok amates. Fin Au 'moink ii ka 'roo fa heen. 13 Mimnau mirek-reko', joo! Anbi bare mee-mee jah, oras Uisneno In Rais Reko nanaob on anfuun am nateef anbi pah-pinan ia, sin of nareta' anmatoom nok bifee re' ia in arekon! Maut he mansian ii ok-oke' namnau goe.”
Nai' Judas nneka' bua nok a'naak pirsait Yahudi he nnona' Usif Yesus neu sin
14 Anmui' tuaf es na'ko Nai' Yesus In atoup noni' tuaf bo'es am nua' ein re' naan, kaan ee nai' Judas Iskariot. Neno naan, in anpoi nnao naim a'naak pirsait Yahudi sin a'naakt ein, he nnona' Nai' Yesus neu sin. 15 Antea on naan ate, in nataan am nak, “Sin ama' arki! Karu au 'turun ki he hi mheek Nai' Yesus naan, hi mfee kau saa'?” Onaim sin natahan am nak, “Karu ho mroim he mu'sosa' Nai' Yesus meu kai te, hai mbaen.” Rarit sin nso'in roi muti' fua bo' teun ma nnona' sin neun nai' Judas. 16 Rarit nai' Judas anpoi, onaim in naim ranan he nnona' Nai' Yesus neu sin.
Usif Yesus anbukae fesat Paska nok In atoup noin' ein
17 Toon bani' toon, atoin Yahudis sin anmui' neon ko'u re' a'roon ii neno hiut. Sin nteek neon ko'u naan nak, ‘Fesat Utunu' ka Mamuur fa’. Oras fesat naan he nmurai jen, Nai' Yesus In atoup noin' ein neman ma nataan Ee mnak, “Aam! Mabe' ia, hit ro he tmurai tanaob hit neon ko'un ia. Onaim Ho mroim he hai mroro 'bib-kase ma mibarab baer fesat Paska on mee, tua?” 18 Rarit In nataah am nak, “Hi mtaam meu kota, hi of miteef mok atoin es. Mitoon ee mak on nai, ‘Ba'e! Hai Aam Tungguru annaben neu ka 'roo fa ntein ate In he nmaet jen. Onaim In ntoit bare nbi ho umi, he In npaek je he ntao fesat Paska nok In atoup noin' ein.’ ” 19 Annenan on naan ate, In atoup noin' ein annaon nmo'en natuin In uaban naan. Rarit sin nabaarb ein bukae fesat Paska nbin naan. 20 Oras fai te, Nai' Yesus nok In atoup noni' tuaf bo'es am nua' ein naan antokon ma nbukaen fesat. 21 Oras sin nbukaen, In na'uab am nak, “Hi mneen, oo! Anmui' tuaf es na'ko ki, of es re' na'sosa' Kau neu biak ein.” 22 Annenan on naan ate, sin neek ein ka ntainiin ein fa. Onaim sin es-es ate nataan kuun Nai' Yesus am nak, “Tuaf re' Ho mu'uab ee naan, ka au fa, oo?” 23 Onaim In nataah am nak, “Tuaf re' narepa' utunu' nbi 'pik-oef nok Kau, in es re' na'sosa' Kau. 24 Mimnau! Au, Mansian Batuur-Batuur re' ia, ro he 'maet on re' sin ntui nain je nbi Uisneno In Suur Akninu'. Mes mikeo! Tuaf re' na'sosa' Kau naan, in of nasaah kuun in siraak! Reko nneis in ainf ee kais nahoins ee!” 25 Rarit nai' Judas nataan amsa' am nak, “Tuaf re' Ho mu'uab ee naan, ka au fa, oo?” Onaim Nai' Yesus nataah am nak, “Ho kuum es mu'uab on naan. He sekau ntein?”
Usif Yesus natoon am nak, utunu' ma tua min-kase naan anjair tanar he namnau Goe
26 Oras sin nbukaen fe', Nai' Yesus nait utunu' fua' es, ma ntoit makasi neu Uisneno. Rarit In nteib utunu' naan, ma nnona' neu In atoup noin' ein, ma na'uab am nak, “Utunu' re' ia, Au aok. Mait he mbukae nai, tua!” 27 Rarit In nait ikraas es naheun nok tua min-kase, ma ntoit makasi neu Uisneno. Rarit In nnona' neu In atoup noin' ein, ma na'uab am nak, “Hi arki mait he mbukae nai, tua. 28 Fin tua min-kase ia, Au naa'. Au of a'maet, Au naa' ii nat'oop ma nsai he nsoi naan too mfaun ein sin saant ein. Naa' re' ia njair tanar he mimnau mak, saa' re' Uisneno nba'an anrair je, oras ia njair teb-tebe. Mait he mbukae nai, tua! 29 Mes amneen mirek-reko'! Anmurai na'ko mabe' ia, Au ka 'inu 'tein fa tua min-kase. Of oras Au 'ok Au Ama' mtook ma mnaa' aprenat ambi sonaf neno tunan, na' Au 'bukae 'tein 'ok ki.” 30 Rarit sin nsiin siit es he npures ma nbo'is Uisneno. Rarit mabe' naan amsa', sin anpoi nnaon neun a'to'ef Saitun.
Usif Yesus natoon nain nak, nai' Petrus of nasuan nak, in ka nahiin Je fa
31 Oras sin annaon ate, Nai' Yesus natoon nain In atoup noin' ein am nak, “Mabe' ia, hi arki of maen misaitan Kau. Fin matu'i nain et Uisneno In Suur Akninu' mnak, ‘Uisneno of na'maet atukus, rarit in a'bib-kaesn ein naenan nsiksakn ok.’ 32 Au 'maet batuur. Mes oras Au 'moni 'fain, Au 'nao uhunun ki 'eu propinsi Galilea.” 33 Mes nai' Petrus anprotees am nak, “Aam! Maski tuaf bian naen nasaitan Ko, mes au kaah fa, tua!” 34 Onaim Nai' Yesus nataah am nak, “Tebe, oo, Pe'u? Ampirsai Kau! Mabe' ia, maun goe ka nkokreo' fa fe'e te, ho musuan Kau no teun goen mak, ho ka muhiin Kau fa!” 35 Mes nai' Petrus naheer am nak, “Kaah fa, tua! Karu Ho mmaet, au 'maet 'ok Ko msa'. Fin au ka 'eu fa he 'aen usaitan Ko, tua!” Nai' Petrus in partein ngguin na'uab ein on re' naan amsa'.
Usif Yesus an'onen anbi po'on Getsemani
36 Rarit Nai' Yesus sin annao nkonon neun a'to'ef Saitun, antean nbin po'on es, kaan ee Getsemani. Anbi naan In natoon neu In atoup noin' ein am nak, “Hi mtook mtahan ambi ia, Au he 'nao 'onen 'eu re' nee.” 37 Mes In nhaman neik nai' Petrus, nai' Yakobus, ma nai' Yohanis, he sin teun sin nok Ne. Anmurai na'ko oras naan, In neekn ee nsuus ma ka ntainina' fa. 38 Sin fe' nnao naan a'kre'o, In na'uab neu sin im nak, “Au neek ii nsuus anmaet! Au 'naben ate on re' he 'maet een. Hi mtook ma mpao mok Kau mbi re' ia fe'.” 39 Rarit In nnao na'roo kre'o, onaim In nri'tuu ma n'onen am nak, “Aam Honi'! Karu Ho mromi te, Au kais usaah ma'ne'at re' ia. Mes kais mutuin Au romik, maut he mutuin Ho roim aan kuum, tua.” 40 An'onen anrair on naan ate, In nnao nfain neu In atoup noni' tua teun ein naan. Mes sin ntupan nfinin. Rarit In npoo' nafena' sin, ma In na'uab nok nai' Petrus am nak, “Hae Pe'u! Hi mtuup neu saa'? Au 'bi nee rabah, mes hi ka bisa fa he mpao kre'o msa'! 41 Mimeu maatm ein naan fe'. Rarit amfeen he mpao mok Kau! Fin hi neekm ein amroim he mmoe' rais reko, mes hi aom ein an'oren. Onaim reko nneis hi m'onen, he karu mipein furit ate, hi bisa maran ma mtahan.” 42 Rarit In nnao n'onen antein am nak, “Usi'! Karu ro Au es re' he usaah ma'ne'at ia, maut he mutuin Ho roim aan kuum, tua.” 43 An'onen anrair on naan ate, In ntebi nfain neu In atoup noni' tua teun ein naan. Mes sin ntupan nfanin, natuin sin maatk ein ma'feen ein. 44 Rarit In nfain he n'onen antein no goes. In ntoti ntein neu In Amaf, he kais nasaah ma'ne'at naan, mes maut he natuin In Aamf ee In romin. 45 An'onen anrair on naan ate, In ntebi nfain he npoo' nafena' In atoup noin' ein. In na'uab am nak, “Hi mtuup kiim fe'e, oo? Amfeen nai! Natuin tuaf re' he na'sosa' Kau, Mansian Batuur-Batuur re' ia, anpaumaak een. Oras re' ia, sin he nheek Kau goen, he nnona' Kau neu atoin maufiun ein. 46 Amfeen nai! Amfei maatm ein he mkius meu nee! Tuaf re' na'sosa' Kau naan, neem een.”
A'naakt ein anrekan tuaf he nheek Usif Yesus
47 Oras Nai' Yesus na'uab on naan fe'e te, nai' Judas neem nok too mfaun ein. Sin neman neikin suni' ma hau tuka' he nheek Ee. Sin nmo'en on naan, natuin prenat na'ko a'naak pirsait Yahudi sin a'naakt ein ma atoni mnais haart ein. 48 Nai' Judas ansenen nain sin im nak, “Amkius mirek-reko', oo! Tuaf re' au 'hoo ma 'neek Ee naan, hi mheek Je nai! Fin tuaf re' naan, es re' tuaf re' hi mam-mami.” 49 Oras sin antean Nai' Yesus, nai' Judas nnao nhake nbi Nai' Yesus In matan am nak, “Saloom, Aam Tungguru!” Onaim nai' Judas anhoo ma nneek Ee. 50 Rarit Nai' Yesus nataan ee mnak, “Hae, Judas! Ho uum re' ia, meik sairt ii es re' ia, oo?” Onaim too mfaun ein naan neman, he nheek Nai' Yesus. 51 Mes nok askeken, Nai' Yesus In tuaf es anfaik benas, ma nsaip namouf atoin es in rukin noon es. (Atoni' naan, es re' pirsait Yahudi sin a'naak kou' goe in ate.) 52 Ankius on naan ate, Nai' Yesus natoon ee mnak, “Mu'taap mufani' ho benas naan. Fin tuaf re' nmoni nbi 'bae suni', in of anmaet nok suni'. 53 Ho ka muhiin fa, oo? Au bisa 'toit Au Ama' he nreek In ameupt ein nifun-nifun na'kon sonaf neno tunan, he neman nturun Kau. 54 Mes noo goah nai. Anbain he tuaf ein re' ia nheek Kau. Natuin saa' re' matu'i nain et Uisneno In Suur Akninu' nmatoom nok Kau naan, ro he njarin.” 55 Rarit Nai' Yesus na'uab neu too mfaun ein re' neman nheek Je mnak, “Hi mitenab mak, Au re' ia atoin maufinu, oo? Nansaa' am es hi iim amheek Kau meik suni' ma hau tuka'? Te kaah, neno-neno te Au unoni' ki 'bi Uim Onen Uuf, mes ka tiit fa tuaf es, he nmoe' saa'-saa' neu Kau. 56 Mes anbain nai! Iim amheek Kau nai! Natuin re' ia matu'i nain na'ko unu' et Uisneno In Suur Akninu'.” Ankisun on naan ate, Nai' Yesus In atoup noin' ein namtau nmaten. Onaim sin naenan ma nasaitan Nai' Yesus.
Sin neik Usif Yesus neu afeek rais pirsait ein
57 Rarit tuaf ein re' nheek Nai' Yesus, sin neik Je neu a'naak pirsait Yahudis sin a'naak ko'u, nai' Kayafas in umi, natuin a'naakt ein nabuan nbin naan. Abuat ein naan, sin esan re': a'naak pirsait Yahudi sin a'naakt ein, tunggur agaam ein, atoni mnais haart ein. 58 Oras sin neik Je te, nai' Petrus nnao na'kor-koro' nbi sin koitk ein, antea a'naak kou' goe in umi. Nai' Petrus antaam nok anbi kintal amsa' he ntook nabua nok tuaf ein abitan naan. Fin in he nahiin saa' re' of he njair. 59 Anbi umi naan in nanan a'naak pirsait Yahudi sin a'naakt ein na'uab ein nok tuaf ein re' afeek rais pirsait. Sin namin bukti he napenin ranan he nafeek hukun a'maten neu Nai' Yesus. 60 Maski sin nataman saksii poi mfaun, mes sin ka napenin fa bukti saa'-saa' he npaek sin. Namuni te, sin napenin saksii tuaf nua. 61 Tua nua' ein naan ansaksii am nak, “Hai mneen miit Atoni' ia na'uab am nak, ‘Au of useer Uim Onen Uuf. Mes Au of ufena' ufani' Umi naan neno teun goah.’ ” 62 Rarit a'naak pirsait Yahudis sin a'naak kou' goe nfeen anhake nbi too mfaun ein sin maatk ein re' ntokon nbin naan. Onaim in nataan Nai' Yesus am nak, “Ho mneen amrair too mfaun ein nakuu Ko. Mes nansaa' am es Ho mninu'-mninu'?” 63 Mes Nai' Yesus ka nataah fa saa'-saa'. Onaim a'naak kou' goe nataan antein am nak, “Au he utaan Ko! Mes Ho ro he mutaah batuur-batuur, nahuum on re' Ho mutaah meu Uisneno re' nmoin et sonaf neno tunan. Anmui' tuaf nak, Ho re' ia, Kristus, Uisneno In Anah re' In nba'an nain Je na'ko unu'. Batuur, aa oo?” 64 Rarit Nai' Yesus nataah am nak, “Batuur, on re' ho mu'uab naan. Mes, mimnau! Hi ar-arki of miit Kau, Mansian Batuur-Batuur re' ia. Au of a'toko 'bi sonaf neno tunan 'bi Uisneno In abnapan a'ne'u, he 'naa' aprenat 'ok Ne re' akuaas re'uf. Rarit Au 'sanu 'fain 'uum a'bi nope.” 65 Anneen Nai' Yesus na'uab on naan ate, a'naak kou' goe natoo' ma'tani', tar antea in npius nakrati' in baru mnanu'. Rarit in nkoa' ma natoon neu atooks ein naan ok-oke' mnak, “Hit ka tperluu fa saksii ttein! Hi mneen kiim meik hi rukim, In uab naan. In nanaib kuun In tuan anjair Uisneno In Anah. Re' ia rasi m'akan! Hi mihiin ok-oke' mak, tatuin hit atoran pirsait, karu atoni' nataib on, on re' Uisneno, atoni' naan ro he nmaet! 66 Onaim oras ia, hi he mifeek mak saa'?” Onaim sin nsakanan ok-oke' mnak, “Batuur atoni' ia nsaan! Onaim In ro he napein hukun a'maten!” 67 Rarit tuaf fauk antaman ma naroon Nai' Yesus. Sin nbeos Goe ma npaas Ee msa'. 68 Rarit sin nakree't Ee mnak, “Hoe! Ho re' ia Kristus, aa oo? Ho mteek miit! Sekau es antuuf Ko re' ia?”
Nai' Petrus nasuan no tenu mnak, in ka nahiin fa Usif Yesus
69 Oras naan, nai' Petrus antoko nbi kintal fe'. Rarit anmui' bifee ate es, neem na'uab nok nai' Petrus am nak, “Fe'e na, ho uum mok Nai' Yesus, atoin Nasaretas naan, ai'?” 70 Mes in nprotees anbi too mfaun ein sin maatk ein am nak, “Kaah fa, tua! Nansaa' am es ho mutaan on naan! Au ka uhiin Je fa.” 71 Rarit nai' Petrus anpoi nhake nbi eno' 'tamas. Onaim anmui' bifee jes anteni' re' nkius niit ee nbi naan. In natoon neu atoin ein re' nbin naan am nak, “Au 'iit atoni' ia nok Nai' Yesus, atoin Nasaretas naan.” 72 Onaim nai' Petrus anprotees am nak, “Ho mumaunu, oo! Au ka uhiin fa atoni' naan! Au 'suup!” 73 Ka 'roo fa te, tuaf bian sin re' ntokon nbin naan na'uab antein' ein neu ne, mnak “Hae! Ho kais mupoi kai mak, ho ka mok fa Atoni' naan! Fin hai mneen ho mu'uab ate, huma' mese on re' atoin Galileas sin!” 74 Mes in nmurai naseku', onaim in anraban am nak, “Hoe! Au 'suup a'paek Uisneno In kanan! Au ka uhiin fa Atoni' naan!” Nateef in na'uab on naan ate, maun goe nkokreo'. 75 Anneen maun goe nkokreo', nai' Petrus namnau Nai' Yesus In uaban fe'e na, re' nak, “Maun goe ka nkokreo' fa fe'e te, ho musuan amrair Kau no teun goen am mak, ho ka muhiin Kau fa.” Namnau niit on naan ate, in naen anpoi ma nkae npin-pinus.
Sin neik Usif Yesus neu gubernur Pilatus
1 Neis noi nmeu on naan ate, too mfaun ein re' an'a'an rais pirsait naan, nneka' buan he na'maet Nai' Yesus. 2 Es naan ate, sin nfuut neik Je an'ain gubernur Pilatus. Fin sin nromin he gubernur ee nhukun na'maet Je.
Nai' Judas nakfirit niis on
3 Oras nai' Judas nahiin nak, Nai' Yesus napein hukun a'maten, in nmei' jon, natuin in es re' na'sosa' Nai' Yesus. Rarit in nnao nfain neu a'naak pirsait Yahudi sin a'naakt ein ma atoni mnais haart ein, he nafani' sin roi muti' fua' bo' teun ein re' naan. 4 In na'uab am nak, “Au 'saan a'rair, natuin au 'nona' Tuaf re' ka nmui' fa sanat mese' msa'.” Mes sin natahan am nak, “Hoe! Hai ka mfairoir ko fa! Ho ro he musaah ma mutaah kuum sanat naan.” 5 Rarit nai' Judas anporin roit ein neu Uim Onen Uuf. Onaim in nnao nakfirit niis on. 6 Rarit a'naak rais pirsait Yahudi sin a'naakt ein nsiun na'bua' roit ein re' nai' Judas anporin sin naan. Sin na'uab ein am nak, “Hit kais attao tafani' roit ein ia teu peit je nanan, natuin roit ein ia of anhai'niis kit. 7 Onaim reko nneis hit tsoos afu piis es ta'ko amo'e 'na'i. Karu nmui' atoin sona' ai' kase nmaet, ma tuaf es ka nahiin je fa, hit bisa tsuub ee nbi naan.” 8 Rarit sin npaek roit ein naan, he nsosan afu. Etun tar antea oras ia, atoni' nteek bare naan nak, ‘Auf Naa'’. 9 Nok ranan naan, sin natuin saa' re' Uisneno In mafefa kninu' nai' Yermias na'uab nain je mnak, “Sin npaek roi muti' fua bo' teun he nsosan afu. Sin npaek roit ein naan, fin roit ein naan osaf he nsosan mansian, natuin osaf re' atoin Israelas sin nafeek nani. 10 Afu naan sin nsoos ee na'ko amo'e 'na'i, natuin Uisneno In apreent ee neu kau.”
Usif Yesus anbi gubernur Pilatus in human ma in matan
11 Oras too mfaun ein neik Nai' Yesus antean gubernur ee te, in nataan Nai' Yesus am nak, “On mee? Ho re' ia, batuur-batuur atoin Yahudis sin Uisf, aa oo?” In nataah am nak, “Batuur. On re' ho mu'uab aan, tua.” 12 Mes oras a'naak rais pirsait Yahudi sin a'naakt ein ma atoni mnais haart ein nakuu rasi mfaun neun Nai' Yesus, In ka nataah fa saa'-saa' msa'. 13 Rarit gubernur ee nataan Ee mnak, “Ho ka mneen fa sin uab ein naan? Sin nasaan Ko mfaun een. Mes nansaa' am es Ho ka mutaah fa?” 14 Mes In ka nataah nain fa msa', tar antea gubernur ee nsanmaak.
Gubernur Pilatus nafeek hukun a'maten neu Usif Yesus
15 Toon-toon ate, oras fesat Paska atoin Yahudis sin, too mfaun ein biasa npiir naan atoin hukun es, he gubernur ee nafetin. 16 Oras naan, anmui' atoin hukun es, in kaan ee nai' Barabas. Too mfaun ein nahiin je neu in re' naan sekau, natuin in maufiun ii ma'tani'. 17 Neno naan amsa', too mfaun ein annaon neun gubernur Pilatus, rarit sin nbaisenun ma ntotin he nafetin atoin hukun es, on re' biasa. Onaim gubernur Pilatus nataan sin im nak, “Reko! Mes au he ufetin sekau? Nai' Barabas re' ia, ai' Nai' Yesus re' tuaf anteek Ee mnak, Kristus, re' ia msa'. Au he ufetin es re' mee? Hi mpiir nai.” 18 (Gubernur ee na'uab on naan, natuin in nahiin nak, a'naak rais pirsait Yahudi sin a'naakt ein neik Nai' Yesus neu ne, natuin sin natiun Goe mates.) 19 Oras gubernur ee nparikas rasi naan fe'e te, in fee je ansonu' hanaf neu ne mnak, “Ampaant om, tua. Nai' Yesus naan Atoni' re' ka nmui' fa sanat saa'-saa'. In kakain am es re' fini na au umnei ka reko fa. Tar antea oras ia msa' au 'naben ate ka reko fa.” 20 Mes a'naak rais pirsait Yahudis sin a'naakt ein ma atoni mnais haart ein anfuaruut too mfaun ein naan, he ntoit gubernur ee nafetin nai' Barabas, ma nhukun na'maet Nai' Yesus. 21 Rarit in nataan nafani' sin im nak, “Na'ko tua nua' ein re' ia, au ufetin es re' mee?” Onaim sin natahan ok-oke' mnak, “Barabas! Mufetin kai nai' Barabas!” 22 Rarit in nataan sin im nak, “Karu on naan ate, au he 'moe' saa' 'eu Nai' Yesus, re' atoni' nteek Ee mnak, Kristus?” Onaim sin nkoa' ein ma nhuun ein ok-oke' mnak, “Amkuus mu'peit Ee meu hau nehe!” 23 Rarit gubernur ee nataan antein am nak, “Mes In saant ee, saa'? Au uprikas urair Je, mes au ka upein fa In sanat saa'-saa'!” Mes sin nkoa' ein ma nhuun ein naher-heran antein' ein am nak, “Mu'mate! Amkuus mu'peit Ee meu hau neeh je nai!” 24 Ka 'roo fa te, in nahini mnak, in ka bisa nmoe' fa saa'-saa' ntein, fin too mfaun ein he ntaisiubn een. Onaim in nait oe ma nafaun in a'niimk ein anbi sin maatk ein, ma na'uab neu sin im nak, “Au ka utaah ma usaah fa Atoni' ia in a'maten! Maut he hi es re' misaah ma mitaah kiim!” 25 Onaim too mfaun ein nkoa' ma nhuun ein am nak, “Reko, mbain nai! Maut he hai mok hai sufa'-ka'uf sin es re' mitaah ma misaah In naa' naan!” 26 Anneen on naan ate, in na'uab am nak, “Reko!” Onaim in nafetin nai' Barabas natuin sin roimk ein. Rarit in naprenat apaot ein, he nnaon nbeos Nai' Yesus npaken a'kauboe. Anbeso nrair Je on naan ate, soraurs ein neik Je he nnao nkuus Ee neu hau nehe.
Soraurs ein nakre'et Nai' Yesus
27 Rarit soraurs ein anheer neik Nai' Yesus neu sin koat ee in kintal mainuan. Anbi naan, sin no'en naan sin partei ngguin pukan es. 28 Onaim sin napaekb Ee baru mnanu' masnaa mee' apinat. 29 Rarit sin nait hau ma'aika' in taek ein he nkanen a'soeb es. Onaim sin ntuma'nii' 'soeb ma'aika' naan neu Nai' Yesus In a'nakan, he na'raur ein on re' sin he nasaeb Ee 'piru'-baru neu uisf feu' goes. Rarit sin nanaa't Ee hau noon es anbi In a'niman a'ne'u nahuum on re' teas aprenat. Ma sin nri'tuun ma nbaiseun Nai' Yesus, ma sin nakree't Ee mnak, “Baisenut neu atoin Yahudis sin Usif.” 30 Onaim sin npuran hape neu Ne, ma nait teas naan na'ko In a'niman, he ntee' na'ba-bae In a'nakan. 31 Sin nakre'et anrair Je on naan ate, sin nhoro' nporin baru mnanu' naan. Rarit sin napakeb nafani' In tais ein. Rarit sin neik Je nnao npoin na'kon kota Yerusalem, he nkuus na'peit Ee nbi hau nehe tar antea In nmaet.
Sin nkuus na'peti' Usif Yesus anbi hau nehe
32 Oras sin nheer neik Nai' Yesus anbi raan atnana', sin nateef atoin es na'ko kota Kirene in fe' he ntaam neu kota. In kaan ee nai' Simon. Sin na'seek ee he nasaah Nai' Yesus In hau nehe. 33 Rarit sin antean baer jes, kaan ee, Golgota. (Anbi uab Aram, in oten nak, ‘Bare 'naak nuif.’) 34 Anbi naan sin na'inu' Nai' Yesus tua min-kase re' sin nseor goe nok reu' miin menu', maut he In ntahan menas. Nai' Yesus annaben a'kre'o, mes rarit In ntorak. 35 Rarit sin nkuus na'peit Ee nbi hau nehe. Onaim soraurs ein anheran suur ana' he napara' Nai' Yesus In paken. 36 Rarit sin ntokon npao Goe nbin naan. 37 Sin ntuin nbin hau piis es amsa' am nak, “IA NAI' YESUS, ATOIN YAHUDIS SIN USIF” Onaim sin nkuus anpasan hau pisa' naan anbi Nai' Yesus In hau nehe, antoom faof, he njair tu'in neu saa' am es In napein hukun naan. 38 Anbi naan, sin nkuus na'peti' atoin aburarut tuaf nua. Es anbi In abnapan a'ne'u; es anbi In abnapan a'rii. 39 Too mfaun ein re' nnaon npe'on naan, ankius Goe. Onaim sin napenub sin nuurk ein ma na'uab nakree't Ee. 40 Sin nkoa' ein ma nhuun ein am nak, “Hoe! Ho mak Ho bisa museer Uisneno In Uim Onen Uuf, rarit Ho mufena' mufain' ee anbi neno teun goah. Karu Ho batuur-batuur Uisneno In Anah, mufetin miit Ho tuam aan he msaun mu'ko hau nehe naan nai.” 41 On naan amsa' a'naak rais pirsait Yahudi sin a'naakt ein, tunggur agaam ein, ma atoni mnais haart ein nakree't Ee mnak, 42 “In nsoi nafetin naan kuun biak ein, mes In ka bisa fa nsoi nafetin naan In tuan. In nak, In atoin Israelas sin Usif! Karu on naan, maut he In nsaun nai na'ko hau nehe naan. Karu hai mkius miit on naan, na' hai mpirsai Je. 43 Karu In batuur-batuur Uisneno In Anah, maut he, ‘In nafnekan ma nharap neu Uisneno. Onaim karu Uisneno nroim Je, maut he Uisneno es re' ansoi nafetin naan Ee.’ ” 44 Aburarut nua' ein naan, nakree't Ee on naan amsa'.
Usif Yesus In a'maten
45 Rarit meis'ookn ii n'aum naan bare naan na'ko maans ee natetab rek-reko tar antea nreuk teun maans ee nmaeb. 46 Nateef anreuk teun maans ee nmaeb on naan ate, Nai' Yesus ankoa' anpaek uab Aram am nak, “Eli! Eli! Lema sabaktani?” (In oten nak, “Koi Au Usi'! Koi Au Uisneno! Nansaa' am es Ho mkoit ma musaitan Kau on re' ia?”) 47 Tuaf fauk re' npaumak-maak anbin naan, annenan In hanan. Onaim sin nak, “Hae! Hi mneen fe'. In nkoa' na'i nai' Elia, Uisneno In mafefa kninu' un-unu' naan!” 48 Rarit tuaf es naen nait ani'-tei meto' he narepa' neu raur ma'ninu'. In nkaot ani'-tei meto' naan neu hau noon es in panan, rarit naramib Nai' Yesus he nmuis. 49 Mes tuaf bian antein na'uab ein am nak, “Maut he tkius tiit na'i nai' Elia he neem ansoi nafetin naan Ee, ai' kaah?” 50 Rarit Nai' Yesus ankoa' antein nok haan hunun, rarit In nmaet. 51 Anbi Uim Onen Uuf, anmui' naan tai eon kou' goes nakfiir he n'eka' Uisneno In Ke'en Akninu' nneis-neisi. Oras Nai' Yesus natfeek, tai eno' naan natkai nbatis nua, na'ko faof tar antea 'piin. Onaim antainuun, tar antea faut kou'n ein anpe'en. 52 Noup fautn ein natfe'in amsa'. Ma Uisneno In tuaf ein re' nmate nrarin, bian In namonib nafani' sin. 53 Oras Nai' Yesus anmonin nfain, sin npoin na'kon noup fautn ein, rarit sin ntaman neun Yerusalem. Too mfaun ein niit sin inbin naan. 54 Anbi Golgota, anmui' a'naak sorarus nok in soraur aan ein re' npaon nbin Nai' Yesus in hau nehe. Oras sin nnaben neu antainuun, ma nahinin nak are' rasin re' naan anjarin nrarin on naan ate, sin namtau nmaten. Sin na'uab ein am nak, “Aijoo! Atoni' ia, batuur-batuur Uisneno In Anah!” 55 Anbi naan amsa' nmui' bifee tuaf fak-fauk, re' anhaken nbin a'roo, ma napeen niit In a'maten naan. Sin natuin Ee na'kon Galilea, fin sin esan re' antuthae Je na'ko unu'. 56 Na'ko bifeen re' naan, anmui' bi Maria na'ko kuan Makdala, bi Maria es anteni' (es re' nai' Yakobus ma nai' Yusuf sin ainaf), ma nai' Sebedius in fee (es re' nai' Yakobus ma nai' Yohanis sin ainaf).
Sin nsuub Usif Yesus
57 Anbi naan anmui' atoin amui't es na'ko kuan Arimatea, kaan ee nai' Yusuf. In natuin Nai' Yesus In noni'-taru' a'roo goen. Nai' Yesus In a'maten, nateef nok neon nima'. Noka' on naan ate, nateef nok atoin Yahudis sin neon onen. Es naan ate, oras maans ee he noi nmouf, nai' Yusuf naim ranan he nasanut Nai' Yesus In aon amates naan na'ko hau nehe. 58 Rarit in nnao nbaiseun gubernur Pilatus, he ntoit Nai' Yesus In aon amates. Rarit gubernur ee naprenat he sin nnona' amates naan neu ne. 59 Onaim nai' Yusuf annao n'ain Golgota. Rarit in nasanut Nai' Yesus In aon amates naan na'ko hau nehe. Rarit in n'aum narek-reok' Ee nok tai fe'u re' ma'osa'. 60 Oras naan, nai' Yusuf sin fe' anpahat anrair koon es anbin 'toe' fatu, he nabarab nain noup fatu neu sin nonot-asar sin karu sin nmaten. Onaim nai' Yusuf sin natnaat ma nataam Nai' Yesus neun noup fatu naan. Rarit sin naritu' faut kou' goes, he sin ntoeb narek-reko' noup fatu naan. Onaim nai' Yusuf sin ntebi nfanin. 61 Oras naan, bi Maria na'ko kuan Makdala ma bi Maria es antein, nokan amsa' nbin naan. Sin ntokon nbain ein an'anin noup fatu naan.
Gubernur ee nreek tuaf he sin npao noup fatu re' nsuub Usif Yesus
62 Noka' on naan ate, nateef nok atoin Yahudis sin neno snasat. Onaim a'naak rais pirsait Yahudi sin a'naakt ein ma atoin Farisis sin nnao nbaiseun gubernur. 63 Sin nbaisenun am nak, “Ama' gubernur. Hai mimnau oras aputa-kriut naan anmoin fe', In na'uab niit, on nai: ‘Batuur Au 'maet, mes nkoon neno teun on naan ate, Au 'moni 'fain.’ 64 Es naan ate, hai mbaiseun ko, tua, he mreun ma mreek ho soraurs ein he npao narek-reko' noup fatu naan, tar antea neno teun. Nok ranan naan, In atoup noin' ein ka bisa nabaak fa In aon amates, he napoi atoni' mnak, In nmoni nfain. Fin karu sin napoin on re' naan, naan maufinu nneis na'ko unu' sin napoin am nak, In re' naan, es re' Kristus.” 65 Anneen on naan ate, gubernur ee nataah am nak, “Reko msa'! Mes hi kiim ammui' tuaf apaot. Reko nneis ampaek sin, he nnao npaon narek-reko' nbin bare naan.” 66 Rarit sin nnaon anbin bare naan, ma neik sin apaot ein. Antean bare naan, sin nmarak noup fatu naan in eno'. Onaim sin nreun tuaf he npao bare naan ankoon, he tua 'teta' kais neem nait amates naan.
Usif Yesus anmoni nfain!
1 Rarit neno krei kik-kiuk ana' bi Maria na'ko kuan Makdala ma bi Maria es antein, sin nnaon nkius noup fatu naan. 2 Nok askeken, antainuun ma'tani'. Uisneno In ameput es na'ko sonaf neno tunan ansaun neem, onaim in ntitar nanani' faut ko'u re' ntoeb noup fatu naan. Rarit in ntoko nbi faut goe tunan. 3 Ameput naan in huumn ee anpiin on re' rimat, ma in paek ein snaa muti' ma nariim. 4 Apaot ein naan namtau nmaten, tar antea sin na'ta'in met-meot goah, ma sin ka bisa nakbeor ein fa on re' amates. 5 Onaim ameput sonaf neno tunan naan, na'uab neu bifeen naan am nak, “Hi kais mimtau! Au uhiin 'ak hi iim maim Nai' Yesus, Tuaf re' sin nkuus na'maet Je nbi hau nehe. 6 Mes In ka et fa ia goen. Natuin In nmoni nfain, naan nahuum on re' In na'uab nain je. Amtaam nai he mkius kiim bare re' sin ntao In aon amates. Bare naan ruman! 7 Oras ia hi mtebi mfain nai! Amnao mitonan In atoup noin' ein am mak, Nai' Yesus anmoni nfain jen. In nnao nahuun et Galilea. Sin ro he nnaon natefan nok Ne nbin nee, on re' unu' te In nba'an nain sin. Ampirsai nai. Amfain nai he mitoon saa' re' au u'uab ee re' ia!” 8 Onaim bifeen naan naen nasaitan bare naan. Sin namtaun, mes sin nmarinan amsa'. Sin ntebi nfanin he natoon rasin re' naan ok-oke' neun Nai' Yesus In atoup noin' ein. 9 Mes antean raan atnana' on naan ate, nok askeken Nai' Yesus nateef nok sin. In na'uab am nak, “Saloom!” Sin nkius nitan on naan ate, sin neman npaumak-maak ma nhoo In haek ein, ma na'bees neu Ne. 10 Onaim In na'uab am nak, “Kais mimtau! Amnao mitonan Au atoup noin' ein, he sin nnaon npao Kau nbin Galilea.”
Apaot ein nnao natonan anmatoom nok saa' re' njari nbi noup fatu re' nsuub Usif Yesus
11 Oras bifeen naan fe' anbin raan atnana', apaot ein naan anfanin neun kota. Sin nnao natonan neu a'naak rais pirsait Yahudi sin a'naakt ein, rasin re' njarin ok-oke' naan. 12 Onaim a'naakt ein an'ator a'sraak nok atoni mnais haart ein, he nfeen apaot ein naan roit amfa-faun, he sin fefa' 'temen. 13 A'naakt ein naan naprenat sin im nak, “On nai. Karu atoni' nataan, hi ro he mitaah am mak, fai je natnaan hi mtuup amfiin. On nai te In atoup noin' ein neman ma nabaak In aon amates. 14 Karu gubernur ee anneen rasin naan, kais mimtau, natuin hai es am'ator a'naef ee.” 15 Onaim apaot ein antoup roit ein naan. Sin nmo'en natuin a'naakt ein sin roimk ein. Es naan ate, antea oras ia atoin Yahudis sin anpirsain uab puta-kriut naan fe'.
Usif Yesus nakriir On neu In atoup noin' ein
16 Anneen anrair bifeen naan sin uabk ein naan, Nai' Yesus In atoup noni' tuaf bo'es am mese' naan nnaon neun propinsi Galilea he natefan nok Ne nbin a'toe'f es, natuin In rais manba'an naan. 17 Oras sin nkius niit Ee, sin na'ruir ein ma na'besan neun Ee. Maski on naan amsa', mes anmui' tuaf re' neekn ee na'oni' fe'. 18 Rarit In neem anpaumak-maak sin, ma na'uab am nak, “Uisneno nfee Kau kuasat he Au uprenat saa'-saa' ii ok-oke' nbi sonaf neno tunan ma nbi pah-pinan ia. 19 Onaim hi mnao meu mee-mee jah ate, hi ro he mitoon Au Rais Reko meu pah-pah ma uuf-uuf ein ok-oke'. Hi ro he minoni' sin rek-reko, maut he sin njarin Au atoup noin' ein. Ma hi ro he misrain sin he njarin tanar nak, sin nmafutu' nrarin nok Ama' Uisneno, ma In Anah, ma In Asmaan Akninu'. 20 Ma minoni' sin he nmo'en natuin are' preent ein ok-oke' re' Au utoon a'rair ki sin. Mimnau! Au 'bi hi soonm ein ma hi tnaanm ein piut-piut, tar antea pah-pinan ia namsoup.”
Nai' Yohanis Asranit anfei ranan neu Usif Yesus
2 Nahuun na'ko Nai' Yesus nait In mepu, Uisneno ansonu' atoin es neem nahuun. Atoni' re' naan, in kan ne nai' Yohanis. Nai' Yohanis re' ia, ro he neem nahuun, he nfei ranan neu Nai' Yesus. Mes nahuun na'ko nai' Yohanis neem, Uisneno ansonu' nahunun mafefa' es, in kan ne nai' Yesaya. Na'ko afi ahunut, nai' Yesaya antui narair, nak on ia: “Amneen, oo! Au of a'sonu' Au haef es, he nfei ranan neu Ko. 3 Haef naan of annao neu nais hu fui re' ruman, in anhunun ma ankoak nak: ‘Usi' he nkoenon neem! Bifee-atoni', im he tabarab ranan ma taroitan bare! Im he taknino' ranan, ma atseun hit Usi'.’” 4-6 Sin biasa anteek nai' Yohanis at nak ‘Asrain Atoni'’. In natua anbi nais hu fui re' ruman. In paek ne anmo' je na'ko mui' tees on re' bikase', re' biasa anteket nak ‘unta’ in funun. Ma in na'futu' pasu. In naah sisi knamat ma niun oin hau. (Nai' Yohanis in moe' ni, nahuum on afi mafefa' nai' Elia.) Sin atokos ai' atuas na'ko kot Yerusalem, ma propinsi Yudea anfuun am nateef, sin neem na'euk nok nai' Yohanis anbi in baran. Sin neman he niit nok matak ma anneen nok sin rukik, noni'-noni' na'ko nai' Yohanis. In saksii ma natoon, nak, “Hii ro he mmanaku' are' kanan sanat, henati' Uisneno annoas naneuk sin. Narari te, ro he nasrain kii. Sranit naan anfain tanar mese' nak hii mirame' mirair hii tua mini jen mok Uisneno.” Nai' Yohanis, Asrain Atoni' Ma reka' sin anneen nararin on nana te, sin manaku' sanat, oke te, sin nana'at sin tua keni neu nai' Yohanis, ma in nasrain sin anbi noe Yarden. 7 In natoon am nak onai, “Noka'-nmeu te Atoin es of he neem. In ko'u nneis na'ko kau. Au ka maso'ik kau fa, maski bait au 'rarihaa In anreka', fin au ka 'umnees 'ok Ne fa. 8 Au 'manoe ki suma au 'usrain kii paek oe, mes Atoin amneem muni' naan, of anmoe' anneis na'ko kau. In of natua ma namonib kii nok Smana Kninu'.”
Nai' Yohanis nasrain Nai' Yesus
9 Oke te, Nai' Yesus neem na'ko kuan Nasaret et pah Galilea, ma nateef nok nai' Yohanis. Ma nai' Yohanis nasrain Je anbi noe Yarden. 10 Ma reka' Nai' Yesus anpoi na'ko oe, nok askeken, neno-tunan natfe'i. Oke te, Smana Kninu' na'ko Uisneno ansaun neem neu Ne, mamnita on re' kor-kefi mese'. 11 Ma hanaf Uisneno neem na'ko neno-tunan, ma nak, “Ho re' ia, Au An-neka'. Ho es re' Au 'roim ani.” Nai' Yohanis nasrain Usif Yesus
Niut re'uf sin A'nak Ko'u ansoba' Usif Yesus anbi nais hu fui re' ruman
12 Narari te, Sman Uisneno neik Nai' Yesus neu nais hu fui re' ruman. 13 In natua anbi bare naan fai bo' haa ma neno bo' haa. In natua nok are' kanan kaun fui sin. Anbi bare naan, niut re'uf sin A'nak Ko'u neem ma nsoba' Usif Yesus he natuin in uaban; mes ka nabei' Je fa. Oke te, Uisneno In ameput na'ko neno-tunan neem he natuta' ma nabhae' neu Ne anbi rasi aof ma smanaf.
Usif Yesus annao on propinsi Galilea he nsaksii ma natoon Uisneno In romin
14 Anbi orses, re' sin nataam narair nai' Yohanis Asranit anbi bui, Nai' Yesus annao neu propinsi Galilea, he natoon Rais Reko na'ko Uisneno anbi naan. 15 In na'uab am nak, “Amneen, oo! Oras na'ko Uisneno he ntea jen. Orsi nhaumaken, are' bifee-atoni' fe' nahinin nak Uisneno naprenat. Hii ro he mi'piis ma mite'un hii nekam nai. Oke te mituina' Uisneno In Rais Reko!”
Usif Yesus npiir ma nbeit atoup-noni' sin
16 Anbi neen goes, Nai' Yesus annao nreuk nefo Galilea in ninin. In niit atoni' nua. Es in kanan nai' Simon, nok in orif nai' Anderias. Sin nua sin, an'okar jala he nheken ika'. Mepu naan, sin mep goe neno-neno. 17 Nai' Yesus anhaman sin am nak, “Hoe, ba'e sin! Im he mituina' Kau nai! Hii amnaim ika' kii, mes anbi oras ia, Au he 'unoni' kii amfain amnaim atoni' neu pukan Uisneno.” 18 Ma reka' sin neen narair hanaf nana te, sin nua sin nasaitan jala naan, ma annao natuin Ee. 19 Ma Nai' Yesus annao nkono kre'o. In niit nai' Sabadius in anhin ii orif-tataf; an-ko'u in kan ne nai' Yakobos, ma in orif, in kan ne nai' Yohanis. Sin nua sin nabarab sin pukat anbi kof es in nanan. 20 Nai' Yesus anhaman sin am nak, “Hoe, ba'e sin! Im he mituina' Kau nai!” Es nana te, sin nua sin annao nasaitan sin amaf nok in ameput sin anbi kofa' naan in tunan, ma sin natuin Ee.
Usif Yesus anriu' napoitan niut re'uf na'ko atoin es anbi kot Kapernaum
21 Ma Nai' Yesus nok tuaf haa, sin neman tean kot Kapernaum. Anbi neno naan, nateef nok atoni' Yahudi sin neon onen. Es nana te, Nai' Yesus antaam anbi uim onen ma nanoni' anbiin. 22 Are' atoni' amnokat anbi naan nsanmakan nok In uaban. Fin In na'uab saa' re' In nahiin je batur-batuur; nneis na'ko tungguru-tungguru atoni' Yahudi.f 23 Anbi naan, anmui' atoin es re' niut re'uf sin naprent ee. In imsa' nok antaam anbi uim onen ma anhunun, nak, 24 “Hae! Yesus, atoni' Nasaret! Ho uum he mseor saa' mok kai? Ho uum he mureu' kai, ka? Hai mihiin Ko. Ho re' naan Atoni' re' Uisneno anba'an nani he nsonu' na'ko unu'. Ho ka mmui' fa sanat.” 25 Mes Nai' Yesus naskar' ee mnak, “Kaisa' mufeef!Ampoi nai mu'ko atoni' ia!” 26 Ma niut re'uf naan, anhasu' atoni' naan naheer-heer. Ma in npoi na'ko atoni' naan nok han hunun. 27 Ma are' amnemat anbi uim onen naan, ansanmakan. Oke te, sin na'uabin, am nak, “Amoo! Sa'na antein es re' ia! Ia noin fe'u, ka? A'naefe na'uabat ro tebe! In parenat niut re'uf sin he npoin, ma sin neen ma natuin In uaban.” 28 Ma bifee-atoni' sin nsaksii ma natoon mo'et na'ko Nai' Yesus, na'ko kuan neu kuan annonom nateef anbi propinsi Galilea.
Usif Yesus nareko' nai' Simon Petrus in ain babaf, ma atoni bian antein
29 Ma reka' sin npoin na'ko uim onen naan, Nai' Yesus annao neu nai' Simon ma nai' Anderias sin umi. Nai' Yakobos nok nai' Yohanis nokan amsa'. 30 Nai' Simon in ain babfe anmaniin, ma antuup anbi harak. Ma reka' Nai' Yesus nok In atoup-noni' sin antaman anbi umi naan, atoin es neem ma natonan nai' Simon nak, “Ho ain baba' nmaniin.” 31 Es nana te, Nai' Yesus annao nasneko' bifee mnais amenat naan. In nnaa' in a'niman, ma anfiit nafeen ee. Ma anbi oras naan, in nareok. Bifee mnasi' naan, anpoi natuta' ma nabhae' sin. 32 Ma anbi oras mansi he nmouf, bifee-atoni' neik are' amenat sin. On nana msa', atoni' re' niut re'uf antoman sin. Sin neik amenat sin neu Nai' Yesus ma antotin ao mina'. 33 Ma are' too mfaun anbi kot naan neman ma anhaken puknok anbi umi naan in enon. 34 Bifee-atoni' pukan naan, nekin menas huma'-huma', ma Nai' Yesus nareko' sin ok-oke'. Ma In riu' napoitan niut re'uf namfau. Mes In ka nfee fa manuan neu niut re'uf sin he na'uabin, natuin sin nahiin Je.
Usif Yesus anfuun ma nateef kota-kota bian ma ansaksii Rais Reko na'ko Uisneno
35 Neis noi nmeu, re' fe' mes'okan, Nai' Yesus anfeen ma annao nasaitan umi naan. In nao neu baer ma'koro' ma ruman, ma In onen neu Uisneno. 36 Ma anbi oras nai' Simon nok in aok-bian sin anfenan, sin ka niit fa Nai' Yesus. Es nana te, sin nnao nam Je. 37 Ma anbi oras sin nateef nok Ne, sin nak, “Aam! Atoni mfaun sin naim Ko. Uum he tfain nai.” 38 Ma In nataah am nak, “Reko msa'. Mes reko nneis, hit nao teu kota-kota bian anteni' re' anpaumakan. Au he 'utoon Rais Reko neu sin imsa'. Natuin Au meup uufi, es re' naan.” 39 Narari te, In nao nsaksii ma natoon Rais Reko na'ko Uisneno, anbi uim onen mese'-mese', anbi propinsi Galilea nfuun am nateef. Anbi nana msa', In riu' napoitan are' kanan niut re'uf na'ko amenat sin.
Usif Yesus nareko' atoin amen nui'-atroki' mese'
40 Anbi oras nana msa', anmui' atoin amen nui'-atroki' es neem neu Nai' Yesus. In nri'tuu ma antoit ao mina' na'ko Nai' Yesus nak, “Aam! Ho mbaab kau fe'! Au 'uhiin nak Ho bisa mureko' au menas, henati' atoni' kaisa' nma'nisin anteni' kau.” 41 Ma Nai' Yesus In ansao ne anmouf. Ma In nona' In a'niman ma nreo' amenat naan, ma In nak, “Tebe! Au bisa! Es nana te, Au 'ureko' ko!” 42 Nok askeken, menas naan namneuk, ma in nareok nain anbi oras re' naan. 43 Onaim, Nai' Yesus anreun atoni' naan he nfain, ma namnaub ee nak, 44 “Amneen rek-reko, Au he 'ba'an ko! Ho murek goen, mes ka nabei' fa he mutonan sekau-sekau. Ho ro he mutuin hit na'i nai' Musa in aprenat unu'. Es nana te, ho mnao muhuun mu'ko amepu krei henati' in parikas ho aom, he in nahiin batur-batuur, ho mureko mrair, ai' ka fe'? Oke te, ho ro he meik fua'-turu' anfain tanar, nak ho mtoet makasi, hena' atoni mfaun sin nahinin, nak ho mureok batur-batuur.” 45 Mes atoni naan anpoi ma nsaksii na'ko bar jes, neu bare bian. Es nana te, bifee-atoni' namin he nateef nok Nai' Yesus, tar antea In ka bisa nakrira' fa In human anbi bare naan. Ma In natua anbi bare-bare ma'koro' ma ruman na' roo na'ko kot. Ma bifee-atoni na'ko me-mee, neem namin he nateef nok Ne.
Usif Yesus nareko' atoin men-bua' es
1 Neno fauk ankoon, Nai' Yesus annao nfanin nteni' anbi kot Kapernaum. Ma abitan nee, natonan anbi me-mee nak In et umi. 2 Es nana te, bifee-atoni' neman na'ko me-mee. Sin nauban naan Ee tar umi naan naheun nok too. Tar antea umi naan in enon amsa' too mfaun. Anbi nanat, Nai' Yesus natonan sin Uisneno In Kabin ma Prenat. 3 Oras In fe' na'uaba te, anmui' atoni' haa nroi atoin men-bua' mese'. Sin neik je neem neu Ne. 4 Mes, natuin too namfau, sin ka bisa neik fa atoni' naan ntea Nai' Yesus In matan. Ma sin ansaen neu um je in tunan. Oke te, sin pukai umi naan in tefin, nataibon anbi Nai' Yesus In a'nakan.Ma reka' sin pukai narair um je in tefin, na' sin nasanu' amenat naan nok nain in a'nahek. 5 Ma reka' Nai' Yesus niit sin, In nahiin nak, sin pirsain batur-batuur neu Ne. Es nana te, In nak neu atoin abua' naan am nak, “Ba'e! Ho sanat sin masako' nrair.” 6 Anbi naan, tungguru krei Yahudi fauk nok antokon. Oras sin neen Nai' Yesus In uaban, sin neek kein namenan. 7 Narari te, sin na'uab ein es nok es am nak, “Ai roo ma atoni' ia, In nabrain he na'uab on re' nee joo! Suma Uisneno es na' nsaok atoni' sin sanat. Mes atoni ia In uab ni on re' In es Uisneno. In nakan Uisneno es re' nee!” 8 Mes Nai' Yesus nahiin narair sin neek keni. Narari te, In nak sin am nak, “Hii kais mitenab on naan! 9-10 Mee, es ma'kafa' nneis? Karu Au 'ak 'eu atoin hae bua' ia, ‘Ho sanat sin masako' nrair’, hii ka mihiin fa neu he nrari oo, ai' ka? Ma karu Au 'ak ‘Amfeen nai! Mait ho 'nahek he mfain!’ Karu in nfeen oras nana te, of hii na' miit ma mihiin, nak Au es re' An Mansian amneot. Fin Au 'mui' kuasat ma hak he 'saok atoni' sin sanat.” Narari te, Nai' Yesus nak neu atoin abua' naan am nak, 11 “Amneen, oo! Anbi oras ia, ho mureok goen! Es nana te, amfeen nai, mait ho 'nahek ma amfain nai.” 12 Ma anbi oras in neen, nok askeken in anfeen. In nuun ma nait in a'nahek, oke te anpoi nnao. Are' bifee-atoni niit nok sin matak fuan. Sin nsanmakan am nak, “Amoo! Hit fe' tiit rasi ia joo! Uisneno ro maneun teke!”
Usif Yesus anhaman nai' Lewi he natuin Ne
13 Narari te, Nai' Yesus annao nteni neu nefo Galilea in ninin. Too mfaun neman ma nateef nok Ne, ma anbi nana te, In nanoni' Uisneno In Kabin ma Prenat neu sin. Atoin ahoik roi bea 14 Anbi nana msa' nai' Lewi, nai' Alfius in an-mone. In meup ni es re' he nhoik bea he nfee neu ana aprenat Pah Roma. Reka' Nai' Yesus annao nkoon na'ko nana te, In niit nai' Lewi. Es nana te, In nak, “Ba'e! Uum he mutuin Kau!” Ma nai' Lewi anfeen am natuina' naan Je. 15 Narari te, Nai' Yesus antook ma nbukae anbi nai' Lewi in umi, nabua nok nai' Lewi in aok-bian ahoik bea sin. Anbi nana msa', atoni' bian re' atoni' Yahudi nakan sin atoin amoe' re'uf, nok nahan. Atoni mfaun na'ko atokos ma abukaet anbi re' naan, anromin he nneen Nai' Yesus. 16 Anbi oras naan, tunggur krei fauk na'ko pukan krei Farisi, sin niit Nai' Yesus antook ma anbukae nok are' ahoik bea, ma are' atoin amoe' re'uf sin. Ma sin nataan In atoup-noni' sin am nak, “Nansaa' am es hii tunggur goe naah nabua nok are' ahoik bea, ma nok are' atoin amoe' re'uf sin!” 17 Ma reka' Nai' Yesus anneen sin tanas nana te, In nataah sin am nak, “Atoin amenat sin na' namin rokat, mes atoin ao mina' sin ka namin fa rokat. Au 'uum he 'paroir atoin re'-re'uf sin. Mes Au ka 'uum fa he 'paroir are' atoni re' annaben in tuani te namneo.”
Antoom rasi tanahok, ma noni'-taru' fe'u
18 Anbi orses, too na'ko pukan krei Farisi sin nanahok. Sin niit nai' Yohanis in atoup-noni' sin nanahok amsa'. Mes sin ka nit-niit fa Nai' Yesus in atoup-noni' sin nanahok namnees on re' sin. Es nana te, atoni bian na'ko sin, neem natefan nok Nai' Yesus, ma natanan nak, “Aam! Hai minahom. Nai' Yohanis in atoup-noni' sin nanahok amsa'. Mes nansaa' am es Ho atoup-noni' sin ka nanahok fa?” 19 Ma Nai' Yesus nataah sin am nak, “Namneo, hii mihiin mirair, karu anmui' fesat kabin, taum ne sin ka nanahok fa, mes sin naah namsenan. Karu nai mon ji fe' anbi naan, sin ro he naah nabubuan. 20 Mes anbi orses, karu atoni' bian nabaak neik nai mone nana te, na' in aok-bian sin neek kein nsusan, ma sin nanahok. 21 On nana msa', ka tiit fa es he npap sii fe'u neu baru mnaa'. Natuin karu tsaef baru naan, sii fe'u naan of an'uuk gon am napisun tamba baru mnaa' naan. 22 On nana msa', ka tiit fa es re' he narai tua min fe'u neu 'sap arapu'. Natuin 'sapa' naan of natboor, ma tua' naan of nasturun npoi oke'. Es nana te, tua min fe'u, ro he tarai je neu 'sap fe'u.” (Natuina' uaba' naan, Nai' Yesus nanoni' sin am nak, In noni' fe'u, kaisa' sin seer goe nok atoni' Farisi sin noni' mnaa'.)
Usif Yesus In atoup-noni' sin nonun maka' hum es, re' kan ne ‘gandum’, nateef nok Neno Snasat
23 Anbi orses, nateef nok atoni' Yahudi sin neon onen, Nai' Yesus sin annaon nabnoon nok rene-rene sin ninin. Ma In atoup-noni' sin nonun mak gandum he sin nnahan. 24 Atoni' Farisi niit sin, onaim sin nak neu Nai' Yesus am nak, “Nansaa' am es Ho atoup-noni' sin antanhai hit atoran krei? Sin noun mak gandum nateef nok neno snasat! Ka nabei' fa, he him moe' on naan!” Mak gandum 25-26 In nataah am nak, “He tak on mee jo? Hii ka mimnau fa reta' na'ko Na'i nai' Daud. Anbi oras naan, Atoni mnasi' nai' Abiatar anrair 'Nak Ko'u neu are' ameput krei Yahudi. Na'i nai' Daud nok atoni-atoni' re' natuina', namnahan maten ma sin tai kein na'keor ein. Onaim sin taman anbi Uisneno In Tenas Onen, ma nait utunu' re' na'fuat sin ma nana'at naraar je neu Uisneno, ma sin nnahan. Mes in amneon ii suma ameput krei Yahudi sin es bisa nnahan, ma 'teta' na'ko nanat ka bisa fa. Onai ma Na'i nai' Daud sin nahan, mes ka tiit fa es nakaina' sin.” 27 Oke te, Nai' Yesus natonan teni' sin am nak, “Nati' kaisa' mnikan, nak Uisneno napara' neno snasat neu hit mansian. Mes In ka nmoe' fa mansiani arahaa he natuin atoran na'ko neno snasat. 28 Fin Au re' ia, An Mansian Amneot. Au msa' a'mui' hak he 'reek mansian, he nmeup sa'-saa' anbi neno snasat. Ma Au msa' a'mui' hak he 'penan mansian, he kaisa' nmeup sa'-saa' anbi neno snasat.”
Usif Yesus nareko' atoin amenat nateef neno snasat
1 Narari te, Nai' Yesus anfanin teni' anbi uim onen. Anbi naan, In niit atoin es re' in a'niman bian anmaet na'ko oras ahunut. 2 Anbi nana msa', anmui' atoni' bian re' namin ranan piut-piut, he nasaan Nai' Yesus. Es nana te, sin maat Ne, he nahinin, nak In nareko' atoin amenat nok neno snasat ta'oo, ai' kah. 3 Oke te, Nai' Yesus no'en atoni' re' in a'niman bian anmaet naan, ma nak, “Ba'e! Au 'uskau ko, uum he mhaek mu matan ia.” 4 Oke te, In nataan sin ok-oke', nak, “Karu tatuina' hit harat rasi pirsait, sa'na' es re' nabei' he hit mo' je anbi neno snasat? He tareko a'oo, ai' tareu'? He tareko atoin amenat ta'oo, ai' he troor tisan?” Mes sin ka ntonin fa sa'-saa'. 5 Es nana te, Nai' Yesus In neek ne ansuus anmaet, natuin sin nape' sin roen keni, neu he nparoir sin harat nneis na'ko he nparoir atoni' 'nim amates naan. Ma In natoo', es nana te, In na'kena' In matan neu sin. Oke te, In nak atoni' naan, nak, “Ba'e! Amnona' ho 'nimam naan neem!” Ma atoni' naan annona' in a'niman, ma nok askeken, in a'niman nareok. 6 Narari te, atoni' pukan krei Farisi anpoi nasaitan uim onen naan. Ma sin annao nateef nok atoni' na'ko parte-purtik Herodes, ma sin bu'-bua' namin ranan he na'maet Nai' Yesus.
Usif Yesus nareko' atoni mfaun anbi nefo Galilea in ninin
7-8 Anbi orses, Nai' Yesus nok In atoup-noni' sin annaon he nas-nasan akre'o anbi nefo Galilea in ninin. Mes natuin atoni mfaun sin anneen saa' re' In anmoe' narari, es nana te, atoni' na'ko kuan-kuan neem natuin Ee. Sin neman na'ko propinsi Galilea, ma Yudea, ma Idumea. Ma bian anteni' neman na'ko kot Yerusalem, ma Sidon, ma Tirus. Ma bian anteni' neman na'ko noe Yarden in panin et neon-saet. Sin ar sin namin ranan he nateef nok Ne. 9 Nai' Yesus anreek atoup-noni' sin he naim nee kof es, natuin atoni' amnemat sin namfaun. In roim he na'uaba' anbi kof'e in tunan, henati' mamnita' ma sin neen In hanan. 10 Nahunu te, In nareko' niit amenat namfau, tar antea anbi oras re' naan, amenat bian sin anmabe'un he nreo' naan Je. 11 Ma reka' atoni'-atoni' re' napein niut re'uf sin niit Ee, sin tof-nook anbi Nai' Yesus In matan. Ma sin anhunun, nak, “Ho re' ia, Uisneno In Anah!” 12 Mes In ntaar sin batur-batuur, nak, “Nati' kaisa' mitonan sekau-sekau sa'-saa' antoom neu Kau!”
Usif Yesus nruur ma nreek atoup-noni' bo'es am nua
13 Narari te, Nai' Yesus ansae anbi to'ef es in tunan. In no'en naan atoni' fauk re' nmatoom nok In nekan. Onaim, sin neem natuin Ee. 14 Es nana te, In nruur ma nreek naan atoni' bo'es am nua. In nak sin am nak, “Au 'ruur kii he hii mituina' Kau piut-piut. Au msa' of a'reek kii he mnao mitoon Rais Reko Uisneno neu mansian. 15 Ma Au of a'fee kii kuasat ma'tani', he hii mriu' niut re'uf na'ko mansian.” 16-19 Atoup-noni' bo'es am nua naan, es re': nai' Simon (re' Nai' Yesus anteket nak, nai' Petrus), nai' Yakobos, nok in orif nai' Yohanis, (nua sin, nai' Sabadius in anhiin. Nai' Yesus anteek nanesa' sin nua sin, nak ‘Boanerges’, re' neik hit uabit nak ‘'root se na' punu'’.) nai' Anderias, nai' Felipus, nai' Bertolomeos, nai' Mateos, nai' Tomas, nai' Yakobos (nai' Alfius an-mone), nai' Tadius, nai' Simon (atoni' na'ko parte-purtik Selot), ma nai' Yudas Iskariut (re' of he na'sosa' Nai' Yesus).
Tunggur agama sin nasaan Usif Yesus nak niut re'uf sin A'nak Ko'u es re' anfee kuasat neu Ne
20 Narari te, Nai' Yesus nok In atoup-noni' sin nsanun fanin na'ko 'to'ef naan. Ma sin antaman anbi umi. Too mfaun neem nauban anteni Ne. Es nana te, sin ka napenin fa manuan he nbukaen. 21 Nkius Nai' Yesus on nana te, bian na'uab ein nak, “Mkius miit Nai' Yesus. In nika' nain In tuan, ma ka maparori' fa.” In ba'asar sin anneen uaba' naan, es nana te, sin neman he nok nafani Ne. 22 Oras naan, tungguru krei fauk na'kon kot Yerusalem, neman ma natonan abitan re' naan nak am nak, “Hoe! Hii kais mituina' Nai' Yesus. Natuin niut re'uf sin A'nak Ko'u, re' anteket nak Baalsebul, antaam anrair et Ne, ma nfee Ne kuasat he nriu' niut re'uf sin.” 23 Ma reka' Nai' Yesus anneen ate, In anhaman nabuaba' sin am nak, “Ia ka ntaam fa neu ronef! Nok ranan mee, niut re'uf sin A'nak Ko'u bisa nriu' nafani in tuan! 24 Karu anbi prenat pah es, in too goe nmatoe ma nmaban piut, nok ranan mee henati' prenat pah naan anhaek na'bei'? 25 Ma karu anbi um jes in nanan, sin es ate nmanau nok es, nok ranan mee ka, henati' sin fanin mese'? 26 On nana msa', karu niut re'uf sin anmamusun es nok es, tebes sin of anbait-sok. Karu nrair on nana te, sin namre'un maten. 27 Karu atoin es he neem nabaak ai' nasiik bare' anbi atoin ma'tani' es in umi, in ro he nfuut naheran nahunun atoin ma'tani' naan. Oke te, in na' napein manuan he nait atoni naan in bare'. 28 Onaim Au 'utoon ain kii: Uisneno nabarab ma anpao he naneuk bifee-atoni' sin sanat. On nana msa', neu sekau-sekau re' na'uab na're'uf es, Uisneno fe' anfee saok sanat neu ne. 29 Mes karu sekau-sekau na'uab na're'uf Uisneno In Smana Kninu', Uisneno ka nsaok fa in sanat, tar antea nabar-baar!” 30 Nai' Yesus na'uab on naan, natuin sin nak Ne mnak, “Niut re'uf antaam Ne jen!”
Usif Yesus In nonot-ba'asar amneot sin
31 Narari te, Nai' Yesus In ainaf nok In orif sin neman neu umi naan, he natefan nok Ne. Sin nhaken anbi mone' ma anreek he no'en Ne. 32 Anbi oras naan, Nai' Yesus antook ma na'uaba' nok too mfaun. Ma sin neem natoon Ne nak, “Aam! Ho aina' nok ho ori' sin, feto-mone, etan mone'. Sin he natefan nok Ko, Aam.” 33 Mes Nai' Yesus nataah neik hantanas mese' nak, “Au aina' ma Au ori'-tata' amneot, es re' mee, ka?” 34 In ankius too re' antokon nniuk naan Ne. Ma In na'uaba' nak, “Hii arki ok-oke amfani Au aina' ma Au ori'-tata' amneot. 35 Fin, sekau-sekau re' natuin Uisneno In romin, sin anfani Au nonot-ba'asar amneot.”
Usif Yesus nareta' antoom fini anbi afu huma'-huma'
1 Anbi orses, Nai' Yesus annao nteni neu nefo Galilea. Ma too mfaun neman ma naub Ne. Anmui' kof es anhaek anbi naan. Es nana te, In ansae ma antook anbi kofa' naan in tunan, ma nanoni' sin. Too mfaun anbi nefo naan in ninin, anneen In uaban. 2 Ma In nanoni' sin antoom rasi namfau neik reta' nak, 3 “Hii mneen rek-reko! Akani' fini es annao ma nkani' fini anbi in rene. 4 Oras in nkani' fini te, bian anmofun anbi ranan. Es nana te, koro-koro neman ma ansinu' nain fini-fini naan. 5 Ma fini bian anmofun anbi fatu re' in af goe manihas. Fini naan natoor raba. Mes natuin afu naan manihas, 6 es nana te, oras manse nsae, fin atoros naan anmak-nene' ma nmaet. Natuin sin a'ba' keni ka ntaman ntean fa af goe in a'pinan. 7 Fini bian anteni' nmofun anbi huu ma'aika'. Es nana te, huu ma'aika' naan, anneo niis fini naan, tar antea ka bisa napuin fa. 8 Ma fini bian anmofun ntom auf afa'. Fini naan natoor, narari te na'nae tar napuin. Fini bian nasuuf no bo' teun, bian no bo' nee, ma bian no naut nes. 9 Sekau es anneen ma anheek naan reta' ia in a'mofun, maut he natenbe nnaon kon.”
Nansa'at es Usif Yesus nanoni' te anpaek reta'?
10 Anbi orses, Nai' Yesus anmes-mees. Oke te, In atoup-noni' sin bo'es am nua, nok atoni' bian anteni' re' anneen niit In reta' naan, neman he nateef nok Ne. Sin antotin henati' In natonan sin reta' naan in a'mofun. 11 Nai' Yesus nataah sin am nak, “Natuin hii mroim he mihiin namneo-namneo Uisneno In Aprenat, es nana te, Au 'utoon kii reta' naan in a'mofun. Mes neu atoni' bian, Au 'unoni' sin nok rais reta'. 12 Atoni' bian sin anfanin on re' Uisneno In mafefa' antui nani nak, ‘Sin nitan nrarin, mes ka nromin he nheek fa 'mofun. Sin nenan nrarin, mes sin on fe' ka nahinin fa. Maut he sin kaisa' npirsai Uisneno, henati' Uisneno kaisa' anfeen sin saok sanat antein.’”
Usif Yesus natoon reta' antoom fini naan in a'mofun
13 Narari te, Nai' Yesus natonan sin reta' naan in a'mofun nak, “Karu hii ka mheek fa rais reta' ia in a'mofun, nok ranan mee, henati' hii mheek reta' bian sin a'mofun? 14 Onaim in a'moufn ii on ia. Akani' fini naan, es re' sin re' nsaksii ma natoon Uisneno In Kabin ma Prenat. 15 Fini re' anmofun anbi ranan, tar antea koro-koro ansiun nain sin, es re' sin re' anneen Uisneno In Kabin ma Prenat. Mes fe' ka 'roo fa te, niut re'uf sin A'nak Ko'u neem ma nasiik naan Kabin ma Prenat naan na'ko sin nekak. 16 Fini re' anmofun antoom fatu, es re' sin re' anneen ma antoup nok marinit a'naek. 17 Mes Kabin ma Prenat naan ka na'baa' fa. Es nana te, in ka ntahan fa 'roo anbi sin nekan. Ma reka' atoni' bian nasusab sin, natuin sin antoup Kabin ma Prenat naan, sin nporen nain Kabin ma Prenat re' naan. 18 Fini re' anmofun nbi huu aika' in a'tnanan, es re' sin re' anneen narair Kabin ma Prenat naan. 19 Mes sin ntaisibun manenu' nok rasi huma'-huma', henati' sin nhariin sin tua keni. Es nana te, taisibu huma'-huma' naan, es ansiu' napoitan Kabin ma Prenat naan na'ko sin nekan, tar Kabin ma Prenat naan ka nafua fa sa'-saa'. 20 Ma fini re' anmofun neu auf afa', es re' sin re' anneen ma antoup Kabin ma Prenat naan, ma natuin Usi' In romin. Narari te, sin moe' mo'et-mo'et arekot, on re' fini re' nafua. Mo'et bian nasuuf no bo' teun, bian no bo' nee, ma bian no naut nes.”
Kaisa' amtoeb paku meki 'kora'
21 Nai' Yesus na'uab piut na'ko kof'e in tunan. In nfee nteni' reta' mese nak, “On mee! Hii mit-mita ai' kah, karu atoni' nout pauk ana', oke te antoob je anbi 'kor' es in nanan! Ai' natuun'e anbi har'ke in nupun. Ka tiit fa fe', oo? Karu natuun'e anbi naan, in ka npiin fa heen. Atoni ro he natunu' paku anbi bare' ratan he npiin. 22 Es nana te, rasi re' nahunut ma'koro', of mamnita'. Ma saa' re' oras ia ka mahini' fa, of mahini'. 23 Sekau es anneen ma anheek naan reta' ia in a'mofun, maut he natenbe nnaon kon.” 24 Narari te, In na'uab anteni, “Mitenab rek-reko! Karu hii m'ukur atoni' in a'mo'en, atoni' bian of an'ukur kii on naan. Uisneno amsa' of an'ukur kii nneis na'ko naan. 25 Karu sekau he naim Uisneno In romin batur-batuur te, in of nahinin nkoon. Mes karu sekau re' ka nfiroir fa Usi' In romin, in of anmonon nkoon.”
Reta' antoom fini re' anmoin kun
26 Narari te, Nai' Yesus na'uab anteni' nak, “Uisneno In Aprenti anhanua-ntein on, on re' fini re' mapone' anbi atoni' in rene. 27 Maski atoni' naan anfain neu in umi, ma fai-manas in antuup ma anfeen, in nikan nain fini naan. Mes fini naan natoor ma na'nae piut. 28 Fini naan anmoin kun anbi afu, anmurai na'nae, nasuuf, ma napuin. 29 Karu mak'e namnatu te, in tuan ne suma neem he nreif jah. Uisneno In Aprenti msa' on naan. Are' sa'-saa' Uisneno es anmepu.”
Reta' antoom fini re' ana' krisi'
30 Narari te, Nai' Yesus na'uaba' anteni' nak, “Au 'fee teni' kii ret es on ia. Hii bisa minesa' pukan Uisneno. Un-unu' te sin fu'-fua'an, mes na'ko neno neu neno, sin ntamba mfau re'uf. 31 Namnees on re' fini re' ana' krisi'. 32 Karu hit seen fua musi' naan, in na'nae anfain hau ko' re'uf. Tar antea, koro-koro neman ma namin mafo' anbi naan, fin anmo'en kuna'.” 33 Nai' Yesus nanoni' sin on naan, namnees nok sin hinet. 34 In biasa npaek reta' karu In nanoni' atoni' bian sin. Mes karu In nok In atoup-noni' sin, In natoon are' reta' naan sin a'mofun.
Usif Yesus nas-nasab ain ko'u
35 Mansi nmaeb jen, mes Nai' Yesus fe' anbi kof'e in tunan. Ma In reun In atoup-noni' sin am nak, “Im ar kit traak on nef goe bian.” 36 Oke te, sin nsaen kofa' bu'-bua' nok Nai' Yesus. Ma sin nnao nasaitan too mfaun anbi naan. Mes bian ansae nok kofa' teta'. 37-38 Oras naan Nai' Yesus antao In a'nakan anbi aka'nunu' ma antupa nfin anbi kof'e in kotin. Sin annaon ka 'roo fa te, ain ko' goe neem. Ma okin anpesan, ma oe antaam anbi Nai' Yesus sin kofa', tar antea ara kre'o te naheun.Es nana te, atoup-noni' sin namtau nmaten. Ma sin neem nafeen Ee nak, “Amoo! Amfeen fe'! Hit he tremat-maet! Mes Ho ka mfiroir fa!” 39 Ma Nai' Yesus anfeen ma ntaar anin, ma In naprenat okin naan nak, “Musnaas nai! Mu'tena' nai!” Ma anbi oras naan, anin nasnaas, ma okin na'tena'. 40 Narari te, Nai' Yesus nfai-neek neu In atoup-noni' sin am nak, “Nansaa' am es hii mimtau baiseke' on naan? Hii ka nmui' fa rasi fnekat neu Kau, ka?” 41 Sin ar sin namtaun ma nsanmakan. Ma sin na'uabin am nak, “Sekau on re' In? Tar antea anin ma okin sin natuina' In aprenat!”
Usif Yesus nareko' atoni' re' niut re'uf namfau ansae ne
1 Narari te, Nai' Yesus nok In atoup-noni' sin antean nefo Galilea in panin, anbi bar jes re' anteket nak Gerasa. 2-6 Anbi naan, nahunu te niut re'uf sin ansaen atoin es ma in namaun. In natua et niut naet ein. Fai-manas in na'oin neum neem nok ao afa' nkoon anbi are knete' ma 'nonof sin, ma anhunun ka natfekaf. In ntuut napapa' in aon neik fatu. In ma'taenni ka heen. Ka tiit fa es re' bisa nfutu, maski neik korenit. Sin anfuut niit in haen ma in niman neik korenit, mes in nafeek korenit naan, ma in na'iup nit-bese naan na'ko in haen. In ro ma'tain bese tar antea ka tiit fa tuaf es amsa' re' bisa ntaah ne. Atoin amaunut Oras Nai' Yesus sin ansanun na'kon kofa', amaunut naan niit sin na'ko 'roo. In npoe na'ko niut nate' sin, in naen neem ma nri'tuu anbi Nai' Yesus In matan. 7-8 Reka' Nai' Yesus niit atoni naan, In nak, “Hoi! Niut re'uf! Ampoi nai mu'ko atoni ia!” Narari te, atoni naan anhunun nak, “Hoi! Ho he munsaa' kau? Au 'uhiin 'ak Ho re' ia Nai' Yesus, Uisneno Akuasat In Anah. Au 'toit Ko henati' Ho kaisa' mha'mui' kau jo!” 9 Ma Nai' Yesus nataan ee mnak, “Ho kanmi sekau?” In nataah am nak, “Au kanki nai' Legion , natuin hai mfau re'uf, on re' sorarus batalyon-batalyon sin!” 10 Niut re'uf sin anpaek atoni' naan he ntoit Nai' Yesus henati' kaisa' nreun sin he npoin na'ko bare naan. 11 Anhaumak bare naan atoni' fauk antiut fafi o'f es. Anbi naan fafi ok-oke' oni' nifun nua. Sin namin mnahat anbin to'ef sin abnap kein. 12 Narari te, niut re'uf sin antoit Nai' Yesus nak, “Amreun kai he hai mnao mtam meu faif nee.” 13 Nai' Yesus antoup sin han totis naan. Es nana te, are' nitu-nitu sin anpoin ma antaman neu fafi-fafi naan. Fafi pukan naan, naen ansiksak nok, ma nasroro nsanun na'ko kefa-mnanu' neu nif goe in nanan. Ma sin nrem anmaten. 14 Ma oras are' atuuk fafi sin nitan on naan, sin arsin namtaun maten. Sin naen anfuun ma nateef kuan-kuan ma natonan are' too mfaun. Es nana te, too mfaun sin anpoi neman he nkius saa' re' anrari nbi naan. 15 Sin neem nateef nok Nai' Yesus, ma sin niit atoin amaunut antook anbi naan. In nareko nrair, ma in anpaek tais. Ma reka' sin niit rasi naan sin arsin namtaun, fin sin nahinin nak sekau es anriu' napoitan niut re'uf na'ko atoni' naan, in ro atoin ma'tani'. 16 Narari te, sin arsin anmaktoon nein nak sin niit nok sin matak atoin amaunut naan nareok, ma fafi-fafi sin anreman maten. 17 Oke te, sin ntotin nok ma'tani' henati' Nai' Yesus annao nasaitan sin pah. 18 Ma reka' Nai' Yesus ansae nfain neu kofa' on nana te, atoin arekot naan neem ma antoit he nnao nabua nok Nai' Yesus. 19 Mes Nai' Yesus anpeen. In nak neu atoni' naan, “Reko nneis ho mfain nai on ho umi, ma ho nonot-asar sin. Mutonan sin are' kanan rasi re' Uisneno nmo'e nrari neu ko. Mutonan sin mak Uisneno nneek niis ko!” 20 Narari te, atoni' naan annao ma natoon na'ko kot neu kot nasoup kot bo'es, re' anteket nak ‘Dekapolis’. In nsaksii ma natoon are' kanan rasi re' Nai' Yesus anmoe' narari neu ne. Ma sin arsin re' anneen uaba' naan ansanmakan ma na'uabin nak, “Ro batuur, ooo!”
Usif Yesus namonib nafani' nai' Yairus in an-feto. Bifee ameen na' anreo' Usif Yesus In baru mnanu'
21 Narari te, Nai' Yesus sin ansaen kofa' ma anraak anfanin on nefo in panin. Oras sin ansanun na'ko kofa', too mfaun sin neman ma nauban naan Je. 22 Anbi kot naan, anmui' naan atoin es in kanan nai' Yairus. In es a'nakat anbi uim onen kot naan. Oras in niit Nai' Yesus, in anri'tuu anbi Nai' Yesus In matan, 23 ma antoit nak, “Koi, au Ama'! Au an fet goe fe' toon bo'esam nua. In nameen ma nhaumak he nmaet jen. Aam! Ho mkoenom meu nai he mturun mureko' man au anah!” 24 Ma fin Nai' Yesus nok nai' Yairus annaon neu in umi. Ma oras sin annaon on nana te, too mfaun sin nokan ma anbeu' Goe. 25 Anbi too mfaun naan, anmui' bifee es re' napein funan ka natfeek fa oni toon bo'es am nua goen. 26 In narair roit nok are' kanan in a'mu'in sin natuina' anbaena' rokat. Mes ka tiit fa es nareko' in menas. In naa ii ka nheut niit fa, tar in mensi ma'fena'. 27-29 Bifee naan anneen fani-fani antoom Nai' Yesus. Es nana te, in anbeo' are' too mfaun naan, ma anhaumak-maak Nai' Yesus kotin. In natenab nak, “Asar au 'reo' an In baru mnanu', au of 'ureok.” Ma anbi oras in nreo' Nai' Yesus In baru, nok askeekn ate, na' naan anheut. In naben ate in nareok. 30 Anbi oras nana msa', Nai' Yesus annaben ate anmui' nenuf re' anpoi na'ko In tuan. Es nana te, In nik-koit ma ankius neu atoni mfaun sin. Narari te, In nataan am nak, “Sekau es anreo' Au baru mnanu' ia?” 31 In atoup-noni' sin natahan am nak, “Aam! Ho mkius kum. Te na' atoni mfaun sin anmabe'un es nok es ate. Oke te Ho mutanam mak, ‘Sekau es anreo' Au baru mnanu'?’” 32 Ma Nai' Yesus ankius sin mese-mese he naim tuaf re' anreo' In baru mnanu' naan. 33 Anbi oras Nai' Yesus nataan on nana te, bifee re' naan namtau-nmaet. Narari te, in anri'tuu anbi Nai' Yesus In matan, ma anmanaku' nak, “Koi, Aam! Au es a'reo' ho baru mnanu' naan.” 34 Ma Nai' Yesus antoin bifee naan nak, “Ain! Natuin ho nekam na'teeb batuur neu Kau, es nana te ho mureok. Ho mfain nai nok marinat.” 35 Ma oras Nai' Yesus fe' na'uaba' on nana te, atoni' neman na'ko nai' Yairus in umi natoon am nak, “Eee, kasian! An feto naan anmaten nrair. Kaisa' muhaeba' Uis tungguru ntein!” 36 Mes Nai' Yesus ka nfiroir fa atoni' naan in uaban. Onaim In nak neu nai' Yairus nak, “Ho kaisa' mumtau! Mpirsai nai meu Usi'!” 37 Ma Nai' Yesus annao nasaitan In atoup-noni' bian. In noka haa nai' Petrus, nai' Yakobos ma in orif nai' Yohanis. 38 Ma reka' sin neem antean nai' Yairus in umi, sin niit too mfaun antaisibun maten, ankaen, ma anhuun nein. 39 Nai' Yesus antaam anbi umi naan. In nataan sin am nak, “Te nansaa' am es hii mkae mi' sek-seke' on re' ia? In ka nmatef. In suma ntuup.” 40 Reka' sin neen Nai' Yesus na'uab on nana te, sin nmanin nfaer Ee. Narari te, In anreun napoitan sin ok-oke'. In no'en ri'ana' naan in amaf ma in ainaf, ma nok atoup-noni' teun, sin arsin antaman anbi ri'ana' naan in ke'en. 41 Ma Nai' Yesus anna' ri'ana' naan in a'niman, oke te In npaek sin uaba nak, “Talita kum! ” Re' neik hit uabi te nak, “An feto! Amfeen nai!” 42-43 Nok askeken, ri'an feto naan anfeen ma annao. Nai' Yesus anreek an-feto naan in ainaf nak, “Amfee ne he naah!” Are' bifee-atoni re' niit rasi naan ansanmakan. Mes Nai' Yesus antaar sin nok ma'tani' nak, “Kaisa' mitonan es-es mak Au 'umonib 'ufani' an-feot amates ia!”
Abitan Nasaret anpenan Usif Yesus
1 Narari te, Nai' Yesus nok In atoup-noni' sin naon nfanin neu In kuan Nasaret. 2 Nateef nok atoni' Yahudi sin neon onen, Nai' Yesus antaam anbi uim onen he nanoni'. Anbi neno naan too mfaun neman he n'oen nein. Ma reka' sin arsin anneen In nonin te, sin sanmakan ma na'uaban nak, “Atoni ia mahiin ni ma'tani'! In imsa' anmui' kuasat ate! Nok ranan meem es In on re' nee? 3 Mneoni In suma tukan hau. Hit tahiin In ainaf Bi Maria; nok are' In orif sin, es re': nai' Yakobos, nai' Yoses, nai' Yudas nok nai' Simon. Ini msa' anmui' fetof. Hit arkit tatua kuan mese!” Sin ka nnenan tein ee fa, natuin sin mu'in nek mantinus. 4 Es nana te, Nai' Yesus nak neu sin nak, “Namneo! Atoni' anhormat mafefa' Uisneno re' anao-amnemat, anneis na'ko mafefa' kua-tuaf.” 5-6 Atoni mfaun sin neek manun baiseke', tar sin ka npirsai nteni' fa Nai' Yesus. Es nana te, In sanmaak. Tar antea, In ka nmo'e nteni' fa rasi mkakat anbi naan. In suma areo' nareko' nanahaa amenat fau ka.
Usif Yesus anfee mepu neu In atoup-noni' sin bo'es am nua
Oke te, Nai' Yesus annao neu kuan-kuan nfuun ma nateef, ma nanoni' sin Uisneno In romin. 7 In no'en atoup-noni' sin bo'es am nua, ma anreun sin tuaf nu-nua, he nnaon ma natoon Rais Reko Uisneno. In imsa' anfee kuasat neu sin he nri'un niut re'uf. 8-9 In anba'an sin nak, “Kaisa' meik brua' namfau anbi ranan. Kaisa' meik beti', kaisa' meik noni-roit, ma kapi'. Hi meki ha teas, pein haef, ma baru mese'. 10 Karu sekau antoup kii he mtaam meu in umi, mimaika' ambi naan tar antea hii mnao mkoon meu bare bian. 11 Mes karu anbi bare mee sin ka ntoup ki fa, ma sin ka natniin ki fa, ampoi mi'ko bare naan. Ma mitonan sin am mak, “Natuin hii ka mroim he mitniin fa, es nana te maut he hii msutai in amre'un!” 12 Narari te, sin nnaon ma natoon Rais Reko naan. Sin nak neu tuaf-tuaf sin henati' anmonin natuin ranan Uisneno. 13 Ma sin anriu' napoitan niut re'uf namfau. On nana msa', sin anhose' mina' neu atoin amenat sin a'nakan, ma an'onen nareko' sin. Ma fin sin narekon.
Sin na'maet nai' Yohanis Asranit
14 Eti naan, atoni' et are' bare-bare nahiin Nai' Yesus. Tar antea Usif Herodes amsa' anneen anrair Nai' Yesus In mepun. Anmui' tuaf bian nak, “Nai' Yohanis Asranit anmoni nfain et Nai' Yesus In aon-ta'un! Es na' In nabei' he nmoe' are' kanan rasi sanmakat namfau.” 15 Mes atoni' bian nak, “Kahaf! Ia mafefa' kninu' nai' Elia es anmoni nfain anbi In aon. Ai kah ate, tuaf es na'ko mafefa' kninu' Uisneno ahun-hunut sin.” 16 Ma reka' Usif Herodes anneen rasi nana te, in nak, “Ia nai' Yohanis Asranit re' afi ahunut au 'reek ma an'oet nafeek in a'nakan. Oras ia in anmoin anfain jen.” 17-18 Usif Herodes anreun on naan, natuin in mui' rais ko'u es nok nai' Yohanis. Rasi naan on ia: Usif nai' Herodes nasiik naan in orif nai' Felipus in fee, in kanne bi Herodias. Maski nai' Felipus nok bi Herodias ka nman poir niin fa fe'.Natuin rasi naan am es, nai' Yohanis nakain ee fani-fani nak, “Aam Usi'! Ka nabei' fa he ho mait ho ori' in fee. Natuin rasi naan ansaan na'ko harat atoni' Yahudi.” Mes nai' Herodes in sao ru'-ru'. Ma in nreek tuaf he nheek nai' Yohanis ma nataam ee neu hukun. 19 Natuin fani-fani nai' Yohanis nakaina' on naan, etun bifee naan natenab nek to'os he nroor niis ne. Mes in fe' ka napein fa manuan, tar antea nai' Herodes nataam nai' Yohanis anbi hukun, 20 ma anreek sorarus sin he npante rek-reko. Namneo nai' Herodes anmanu'hain nai' Yohanis. In nahiin nak Uisneno es ansonu' nai' Yohanis. Ma nai' Yohanis naan atoin reko. Nai' Herodes anroim he nneen nai' Yohanis in uaban. Mes neot es-neot es ate, in npenan nai' Yohanis in uaban. 21 Namuni te, fenai Herodias napein manuan he nateaba' in nek menas naan. Oras naan, sin fesat nai' Herodes in neon mahonin. Sin naskau a'naet sin he nokan bukaen anbi fesat naan. Amnokat sin es re' ana' aprenat, a'nak sorarus sin, ma mnasi-mnasi' pah Galilea. 22 Oras festi ntainua goen, fenai Herodias in an fet goe antaam neem ma nabsoo'. In absoo' ni reok ni kaheen, tar antea nmoe' Usif Herodes nok are' amnok fesat naan anmariin anmaten. Es nana te, Nai' Herodes no'en abso'ot naan ma nak neu ne nak, “Ho mroim he mtoit saa' na'ko kau te, mutoon! Au ro he 'fee ko. 23 Maski ho mtoit tar antea nbait nua au prenti amsa', au ro he 'fee ko goe. Au 'suup 'eik Uisneno In kanan!” 24 Ri' an-feto naan annao ma nataan in ainaf nak, “Ain! Ho mroim he au toit sa'na re' reko nneis na'ko ama?” Ma in ain fe nataah ee nak, “Hau, oo! Reko! Mnao nai ma mtoit man nai' Yohanis in a'nakan.” 25 Narari te, an-feto naan neem neu nai' Herodes in matan am nak, “Amo! Au toit henati' amfee kau nai' Yohanis in a'nakan, amtao man je anbi dulang es. Rabah!” 26 Ma reka' nai' Herodes anneen han totis naan, in nekni namneuk. In ka nabei' fa he nheer nafani' in han supat, natuina' are' too mfaun sin anneen narair han supat naan. 27 Narari te, in naprenat naan a'nak sorarus es ma nnao n'oet neik nai' Yohanis in a'nakan naan na'ko uim hukun. 28 Ma sin an'oet naan nai' Yohanis in a'nakan, ma ntao naan je anbi dulang es. Oke te, annao naat ee neu ri' feto naan. Ri' feto naan ntoup dulang, ma nnao nfee je neu in ainaf. 29 Anbi eti nai' Yohanis in atoup-noni' sin annenan nak, an'oet narair nai' Yohanis in a'nakan, sin neman ma nait neik nai' Yohanis in aon ma annao nsuub ee. Rais reta' nai' Yohanis in a'maet ni antuu' on re' naan.
Usif Yesus antuthae too nifu nim an neis
30 Anbi orses, Nai' Yesus In atoup-noni' re' ansonu' narair sin anbi afi ahunut, sin anfain neman oke', ma nabua nfanin nok Ne. Sin natoon are' kanan rasi re' sin nmo'e nrari, nok are' saa' re' sin nanoni' naraar je neu too mfaun sin. 31 Anbi oras naan, too mfaun nao na'onin neum neman he naim Nai' Yesus. Tar antea, In nok In atoup-noni' sin ka napenin fa manuan he nbukaen. Nai' Yesus natonan In atoup-noni' sin nak, “Im he tnao taim baer-ma'koro, he tapein manuan he tasnas akre'o.” 32 Oke te, sin ansaen ok-oke' anbi kofa', ma sin nao naim baer-ma'koro, na'roo na'ko kuan. 33 Mes too mfaun sin niit Nai' Yesus sin kofa' naan, es nana te sin nnao nabnoon nefo in ninin. Too mfaun sin anpoin natuin ran meto', ma sin annao ntea nahunun Nai' Yesus nok atoup-noni' sin. 34 Ma reka' Nai' Yesus ansaun na'ko kofa' naan, In niit too mfaun sin anpao nain Je. Tar In ansao ni nmouf. Natuin too mfaun sin ka nahiin fa he nmo'en saa', sin nfanin on re' bib-kase re' ka nmu'in fa atukus. Narari te, In nanoni' sin Uisneno In romin 35-36 na'ko oras mansi na'puup tar antea mansi nmaeb. Onai ma In atoup-noni' sin natoon Ne mnak, “Amo! Reko nneis Ho mreun too mfaun sin ok-oke', he nnao nsosan mnahat anbi are' kua paumaka' ia. Natuin orsi he nfai jen, ma ka tiit fa mnahat et bare ia.” 37 Ma Yesus nataah sin am nak, “Paraak! Hii es he mfeen sin he nahan.” Mes sin nataan nafain Ee mnak, “Amoo! Karu hit tuthae too mfaun ia, hit ro he tapoina' roit ti ko'u! Namnees nok tua-ameput es re' in ntoup in roi mepu anbi toon es! Hit he tapein roi mfaun naan na'ko mee?!” 38 Mes Nai' Yesus nataah sin am nak, “Hii mnao mihiin mit fe', sekau es amneik beti'.” Narari te, sin nao natanan ma anfain neem natonan nak, “Anmui' utunu' fua' nim, nok ika' fua' nua goah.” 39 Oke te, Nai' Yesus anreun too mfaun naan he ntook nabuan anbi huun. 40 Fin sin ntokon puk nok. Pukan bian nabua nat-natun, ma pukan bian anteni bo' nim-niim. 41 Narari te, Nai' Yesus nait naan utunu' fua' niim ma fin ika' fua' nua. Ma nbaiseun neu neno-tunan ma antoit makasi neu Uisneno. Narari te, In nteib utunu' naan pisa'-pisa', ma anfee sin neu In atoup-noni' sin, he nnao nbatin too mfaun naan ok-oke'. Ika' fua' nua nana msa' In nbait sin neu sin ar-ar sin. 42 Ma sin arsin anbukaen tar antea namsenan. 43 Reka sin anbukae nrarin on nana te, atoup-noni' sin nabuab nafani' mnaah anesit naan, naheun 'kora' bo'es am nua. 44 Sin arsin of oni too nifun niim. Naan sin nsoi' nanaha atoni mnais fi nmees. Bifee ma ri'ana' ka maso'ik fa.
Usif Yesus annao npeo' oje fafon
45 Narari te, Nai' Yesus anreun In atoup-noni' sin he nnao nsaen kofa' he nnao nahunun neu kuan Betsaida et nef goe panin. Mes In fe' namaika' nbi naan, he nreun too mfaun sin he nnao nfanin. 46 Ma reka' sin arsin anfanin, In nsae neu to'ef es ma an'onen. 47-50 Oras mansi nmaeb, Nai' Yesus ansanun fain. Ma In niit atoup-noni' sin kofa', antea nrair nef goe tnanan. Mes sin anseop nok ma'tani', natuin kofa' naan annao nmaraban nok ain ko'u. Ma reka' nesnoe nmeu te, Nai' Yesus annao natuin sin. Mes In annao npe'o ha oje fafon.Ma oras In haumaak kofa' nana te, sin nkius niit Ee. Sin namtaun nmaten. Onaim sin maktaan nein es nok es nak, “Hoe! Sa'na es re' ia? Nit goa oo, ai' sa'na?” Mes Nai' Yesus na'uab am nak, “Hoe! Hi kaisa' mimtau! Au es re' ia.” 51 Ma oras Nai' Yesus antaam neu kofa', anin naan nasnaas ankoon. In atoup-noni' sin ansanmakan batur-batuur. 52 Sin fe' niit Nai' Yesus In paek kuasat ma ntuthae too nifu niim anneis. Mes sin fe' ka nahiin namneo fa In kuasat naan.
Are' amenat na'ko Genasaret sin annaon neu Usif Yesus
53 Ma reka' sin antean nefo naan in panin, sin nasnasan, ma nsanun anbi kot Genasaret in ninin. 54 Ma reka' sin sanun na'ko kofa' naan, atoni mfaun sin niit sin. Ma sin ankoa'an nak, “Hoe! Nai' Yesus nemen, oo!” 55-56 Sin arsin naenan ma nmaktoon nein anfuun ma nateef, tar antea sin anroi neik are' kanan amenat sin. Asar sin nenan nak Nai' Yesus et bare naan, sin arsin nroi neik are' kanan amenat sin, ma natupa' sin anbi mnera' husona'. Sin natenb ein nak, “Asar amenat sin anreo' naan Nai' Yesus In baru mnanu' in tuuk ne msa', sin of narekon.” Ma sin nareok nanin.
Atoran mansian kaisa' naneuk Uisneno In atoran
71 Atoni' pukan Farisi bian ma tunggur krei Yahudi bian anteni' neman na'ko Yerusalem he natefan nok Nai' Yesus. 2-5 Atoni' Farisi sin anna' naheran atoran harat Yahudi. Atoran es es re' karu atoni' he nbukae, ro he nafaun in a'niman natuin harti in romin. On nana msa', karu nfain neman na'ko 'masa', sin ro he naniun fe'. Tar antea sin bare' umi hana' amsa', on re' pika, kras, pois oe, ro he tsaef sin natuina' harat in romin, hena' bisa tpaek sin he taah. Karu anmui' tuaf Yahudi bian re' ka natuin fa harat naan, atoni Farisi sin nato'on. Natuin rasi naan am, es na' sin nato'on oras sin niit Nai' Yesus In atoup-noni' sin nahan, mes ka nafaun fa sin a'nimak. Narari te, sin neman ma nasaan Nai' Yesus nak, “Nansaa' am es ho atoup-noni' sin nahan nok re' sin ka nafaun fa sin a'nimak nahuun? Naan sin nraban hit atoran na'ko mnais unu' sin!” 6-7 Mes Nai' Yesus nataah sin am nak, “Hii re' ia on re' atoni' re' na'uaba' teta', mes hii mo'e teta'! Nahunut Na'i nai' Yesaya antui nain Uisneno In Kabin nak, ‘Hii mbo'is Kau, mes arahaa rurum kotim, ma ka mpoi na'ko fa hii nekam. Hii mo'em on nana msa' parsuum. Hii ka mfiroir fa Au romik. Mes hii mituina' haa mansian in romin.’ Hii amsa' on re' atoni' sin. 8-9 Hii misaitan mirair Uisneno In romin ma hii mituina haa harat mansian. Hii mahiin mini kaheen! 10 Nahunut Na'i nai' Musa natoon narair Uisneno In aprenat nak, ‘M'atoran hi ama' ma hi aina'.’ Ma natoon anteni' sin nak, ‘Karu tuaf es naseku' in amaf ai' in ainaf ro he thukun tisan.’ 11-12 Uisneno nanoni' ki on naan, mes hii minoni' teta' na'ko naan. Hii mak, ‘Karu tuaf es anba'an narair he nfee sa'-saa' neu Uisneno, maski in amaf ma in ainaf ansuus anmaten, mes bare' re' naan ka bisa tpak je fa he turun sin, natuin anmanba'an narair he nfee je neu Uisneno.’ 13 Es nana te, fe'ena Au 'ak kii, hii mporin main Uisneno In romin, ma hii msek'e meik atoran mansian. Anmui' atoran namfau re' hii msek'e nahuum on re' naan.”
Rais re'uf re' anpoi na'ko atoni' in nekan
14 Narari te, Nai' Yesus no'en atoni mfaun, ma nak, “Mneen rek-reko, henati' mihiin. 15 Are' saa' re' antaam neu atoni' tain, ka nha'niis fa in tuan. Mes saa' re' anpoi na'ko in nanan, es re' neik ha'nisit neu in tuan. 16 Nah! Sekau he mneen, te mneen he muhiin!” 17 Narari te, Nai' Yesus nok In atoup-noni' sin annao nasaitan are' too mfaun naan, ma antaman neu um jes. Ma In atoup-noni' sin nataan reta' naan in a'mofun. 18 Nai' Yesus nataah sin am nak, “Te hii ka mihiin fa msa', aa? In a'moufn ii on ia: saa' re' atoni naah ne, in reko kun. Mes saa' re' anpoi nfain naan, in es ka reko fa. 19 Saa' re' hit taah ne, antaam neu hit taik. Narari te, anpoi nfain. (Usif Yesus In sarit nak atoni' bole naah sa'-sa'ah. Ka taras fa.) 20 Saa' re' anpoi na'ko atoni' in nekan, naan es re' neik hai'nisit, tar antea Uisneno nma'niis ne. 21 Rais re'uf namfau anpoi na'ko atoni' in nekan! Rais re'uf sin es re': tenab amre'ut, rais makonit, rais bakan, rais marorot, 22 rais paru', rais makaket, moe' re'uf, puta-kriu huma-huma, sinmakat, mantinus, na'uab na're'uf es, nabeo', ka nahiin fa atoran, ma na'nakfaut. 23 Nah! Are' moe' re'uf naan anpoi na'ko atoni' in nekan. Naan es re' nareu' nafani' in tuan. Uisneno msa' nma'niis ne.”
Usif Yesus anturun bifee mnais es re' ka na'ko fa atoni' Yahudi
24 Oke te, Nai' Yesus sin nasaitan bare naan, ma annao neu kot es kan ne Tirus. Antean bare naan, sin antaman anbi um jes, natuin Nai' Yesus ka nroim fa he es-es nahiin nak In et re' naan. Mes In ka bisa na'koro' fa. 25-26 Anbi naan, anmui' bifee mnais es re' in amneem ni ka na'ko fa atoni' Yahudi. Nahoins ee anbi pah Fenesia et propinsi Siria. Oras in neen nak Nai' Yesus neem, in nnao ma antoit Je he nriu' napoitan niut re'uf na'ko in an-feto. 27 Nai' Yesus na'uab manporin nak, “Ri'ana' sin ro he naah nahunun, oke te na' an'okar mnaah nesif naan neu asu.” (Nok tenab ma'nifa', Nai' Yesus ro he nturun nahunun In atoni' Yahudi sin, hena' anturun atoni' bian anteni'). 28 Mes bifee naan nataah am nak, “Namneo, Aam! Mes asu naan in et mei je nupun. Es nana te in naah mnaah amofut na'ko ri'ana' naan in a'pika'.” (Nok tenab nak, oras ri'ana' sin nahan, asu naan napeni mnahat amsa'. Maski Nai' Yesus anturun In ini sin, In ro he nkius atoni' bian amsa'.) 29 Ma reka' Nai' Yesus anneen on nana te, In na'uab am nak, “Wee, bifee ia fe'! Ho uab man namneo! Es nana te aina' ho mfain nai, natuin niut re'uf naan anpoi nrair na'ko ho anah.” 30 Narari te, bifee naan anfain. Antea umi te, in anah naan antuup anfiin. Niut re'uf naan anpoi nrair.
Usif Yesus nareko' atoin amuut es, re' ankoos nok amsa'
31 Narari te, Nai' Yesus sin nasaitan kot Tirus, ma nnaon natuin ranan tas je ninin, natuin ranan kot Sidon. Na'ko naan, sin nnao nkonon tar antean nefo Galilea. Narari te, sin nnaon neu pah es nok kot bo'es, re' sin anteek nani nak, ‘Dekapolis’. 32 Nbi bare re' naan, anmui' atoin amuut es, re' ankoos nok. In aok-bian sin neik je nnao neu Nai' Yesus. Sin ntotin henati' Nai' Yesus antao In a'niman neu in a'nakan, he nareok ee. 33 Ma Nai' Yesus nasaitan too mfaun sin, ma nnao nmes nok atoni' naan. Nai' Yesus nataam In akrurun neu atoni' naan in ruik nein nua sin. Oke te, In ntao hape anbi In akrurun naan ma anreo' atoni naan in maan. 34 Nai' Yesus anbaiseun neu neno-tunan, anheer In asnasan, ma naprenat nak, “Efata! ” (in a'moufn ii nak, “Mutfe'i nai!”) 35 In na'uab ona ha re' naan, mes atoni' naan in ruik ni anneen nain oras naan. Atoni' naan in maan ama'tanes naan anma'nuur nani msa', tar antea in na'uab nok reko. 36 Oke te, sin nua sin annao nfanin neu too mfaun. Nai' Yesus antaar sin am nak, “Amneen, oo! Nati' kaisa' mitonan es-es mak Au 'ureko' 'urair atoni' ia.” Mes maski Nai' Yesus antaar sin nok ma'tani' amsa', sin na'uabin piut-piut anbi are' bare-bare. 37 Too mfaun re' anneen uab mantonas naan, ansanmakan maten. Sin na'uaban nak, “Ma'taen bese! Atoni re' ia anmoe' are' sa'i reko oke'. Akoost ate nneen. Amuut ate na'uab.”
Nai' Yesus ntuthae atoni' nifun haa
1-3 Ka 'roo nteni fa on nana te, anmui' too mfaun neem nabuan he nneen Nai' Yesus. Sin natuin Ee tar antea neno teun goen. Es nana te, sin nararin beti'. Narari te, Nai' Yesus no'en naan In atoup-noni' sin am nak, “Au ansao ki nmouf nok too mfaun ia. Bian neman na'ko bare 'roo, ma nabuan neno teun goen, tar antea sin nararin beti'. Reko nneis sin kaisa' anfanin nok tai ruman. Kas-kaisa' sin tuamafun anbin ran atnana'.” 4 Nai' Yesus In atoup-noni' sin nataah nam nak, “Aam! Bare ia na'roo na'ko kuan. Es nana te, hit ka neu tuthaetan fa too mfaun ia!” 5 Nai' Yesus nataan sin am nak, “Hii mmui' utunu' fua' fauk?” Sin natahan am nak, “Aam! Hai mitunu' utunu' fua' hiut goah.” 6 Oke te, Nai' Yesus anreun atoni mfaun naan he ntokon anbi afgui. Narari te, In nait utunu' fua' hiut naan, ma ntoit makasi neu Uisneno. Narari te, In anteib utunu' naan pisa'-pisa' neik In a'niman, ma anfee sin neu In atoup-noni' sin. Sin nnao ma nbait neu atoni mfaun ok-oke'. 7 Ma sin napenin ika'-ika' amsa'. Narari te, Nai' Yesus antoit makasi nteni' neu Uisneno antoom ika'-ika' naan. Oke te, In nreun In atoup-noni' sin, he nnao nbatin nteni' neu too mfaun. 8-9 Sin arsin ok-oke' oni' atoni' nifun haa. Sin nahan tar namsenan. Naah nararin on nana te, atoup-noni' sin nabuab mnaah nesif naan naheun 'poni hiut. Narari te, Nai' Yesus anreek sin he nfanin ok-oke'. 10 Ma oras sin nnao nfanin, on nana te, Nai' Yesus nok In atoup-noni' sin ansaen neu kofa', ma nnaon natuin nefo naan in ninin, neu bar jes in kan ne Dalmanuta.
Atoni Farisi sin namin ranan he namouf Usif Yesus
11 Ma oras Nai' Yesus sin antean Dalmanuta, anmui' tuaf-tuaf na'ko pukan krei Farisi neman he nateef nok Ne. Sin nataan na'ke't Ee. Sin toit Je mnak, “Aam! Mukrira' rais sanmakat henati' anfani 'tope' re' mamnita', nak namneo Ho mupein ma'tanif na'ko Uisneno.” 12 Nai' Yesus anheer In asnasan ma nak, “Karu Au 'neen hi uabam naan, Au neek ki nme'jon! Nansaa' am es hii mtoit rais sanmakat? Kaisa' on naan! Rais sanmakat ro nmui' msa', mes Au ka' mo'e 'fee ki fa.” 13 Narari te, Nai' Yesus annao nasaitan sin, ma ansae nfain anbi kofa' nabua nok In atoup-noni' sin. Ma sin nnrakan neu nefo naan in panin.
Usif Yesus nanoni' nak ampanat mirek-reko' atoni' Farisi sin rais makopo'
14 Ma oras Nai' Yesus sin antean nefo naan in atnanan, na' atoup-noni' sin namnaun, nak sin nikan nak sin ka nekin fa beti'. Suma sin neik utunu' fua' mese'. 15 In anneen sin na'uaba' nteek utunu' on nana te, Nai' Yesus nak sin am nak, “Hii ro he mpanat rek-reko! Kaisa' hii mtoe mituina' Usif Herodes ma atoni' Farisi sin rais makopo' amre'ut. Sin rais kopo' naan, nahuum on re' muur ii ankuum nabuab ee nok uut.” 16 Anneen In na'uab on nana te, In atoup-noni' sin ntaka'naan ein. Ma sin na'uab ein nak, “Atoni mnasi' ne na'uab rais saa', ka? Oni' In na'uab on naan, natuin hit ka teik fa utunu'.” 17 Mes Nai' Yesus nahiin sin nek tenab. Es nana te, In na'uab am nak, “Nansaa' am es hii mi'uaba haa utunu'? Hii ka mheek fa Au sair ti, oo? Hii roen mini nbufun maten! 18 Hi miit mirair meik hi mat mini jen, mes hii ka mihiin fa in a'mofun! On re' hii ka mit-mitaf! Hi mneen meik hi rukim, mes hii ka mihiin fa sa'-saa'. On re' hii ka mneen miit fa msa'! Hi mnikan main 19 utunu' fua' nim re' Au teib sin pisa'-pisa' ma 'tuthae too nifun nima, oo? Neno naan hi mibuab man utun anesit 'kora' fauk?” Sin natahan am nak, “'Kora' bo'es am nua, tua.” 20 Nai' Yesus nataan anteni' nak, “Hii fe' mimnau re' neno naan ai' kah, oras Au 'tebi' bait utunu' ma 'tuthae too nifun haa, ai' ka? Hi mibuab man utun nesif naan 'poni fauk?” Sin natahan am nak, “'Poni hiut, tua!” 21 Ma Nai' Yesus nak, “Namneo! Hi miit nok hi matam. Mes nansaa' am es hii ka mihiin fa, Au ma'tain ki in amneem ni na'ko mee?”
Usif Yesus nareko' atoin aforot mese' anbi Betsaida
22 Narari te, Nai' Yesus sin antean kuan Betsaida. Anbi naan, sin neik atoin aforot es neu Nai' Yesus. Sin ntoit Nai' Yesus he nasbeot nareko' atoin aforot naan. 23 Es nana te, Nai' Yesus antoup atoni' naan in a'niman ma neik je npoi neu kuan ee in kotin. Ma In npuran hape neu atoni' naan in matan, ma In reo' atoni' naan in matan. In nataan am nak, “On mee? Ho miita', ka?” 24 Atoni' naan na'aiti in matan, ma nkisu 'ri ma 'ne'u, ma in nataah am nak, “Tua! Au 'iit atoni' anbaknao nein. Mes humne on re' au 'iit hau nggoe es anao tein!” 25 Ma Nai' Yesus antao nteni' In a'niman neu atoni' naan in matan. Ma atoni' naan ankisu nteni', ro batuur in niit reek goen. Oras ia in niit nok akninu'. 26 Oke te, Nai' Yesus anreun atoni' naan he nnao nfain, mes namnaub ee nak, “Ho mfain nai, mes amnao mutuin ran teta'! Kaisa' amnao mfain meu Betsaida.”
Nai' Petrus anmanaku' ma namneoba' nak Usif Yesus naan Kristus, atoni' re' Uisneno anruur naan Je na'ko unu'
27 Narari te, Nai' Yesus sin annao funan ma nateef kuan-kuan anbi Kaisarea Filipi. Anbi rana tnana' te, Nai' Yesus nataan sin am nak, “Karu tatuin too mfaun sin uab keni, sin nak Au re' ia sekau Kau?” 28 Sin natahan am nak, “Bian sin nak ‘nai' Yohanis Asranit’. Bian sin nak, ‘na'i nai' Elia’, mafefa' kninu' Uisneno. Ma bian anteni' sin nak, Ho re' ia tuaf es na'ko mafefa' kninu' ahunut sin.” 29 Ma Nai' Yesus nataan anteni' neu sin nak, “Mes natuin hii mahiin mini te, Au re' ia sekau Kau?” Nai' Petrus nataah am nak, “Ho re' ia Kristus, re' Uisneno anruur naan Je na'ko unu'.” 30 Ma Nai' Yesus antaar sin mates nak, “Ka nabei' fa he hii mitonan sekau-sekau, saa' re' nai' Petrus na'uab ee ia!”
Usif Yesus natoon In ma'ne'at ma In neno' maten
31 Narari te, Nai' Yesus murai natonan In atoup-noni' sin am nak, “Au re' ia, An Mansian Kau. Au of 'upein rasi ha'mu'it namfau, natuin a'nak harat sin, a'nak rasi pirsait sin, ma tunggur krei sin ok-oke antita' Kau. Sin of anroor niis Kau, mes nmeu te, Au 'moni 'fain.” 32 Nai' Yesus natoon mat-maat on naan, onaim nai' Petrus anheer napaisb Ee, ma nakai Ne nak, “Aam! Kaisa' mu'uab on naan! Au ka neu he konan sin fa, he nniman Ko.” 33 Mes nai' Petrus in uaban naan ka natuin fa Uisneno In romin. Es nana te, Nai' Yesus anniik ma nkius In atoup-noni' bian sin. Narari te, In nakaina' nai' Petrus nok ma'tani' nak, “Hoe! Nana niut re'uf sin A'nak Ko'u kein in uaban! Mu'roo mu'ko ia! Ho suma mutenab meik tenab mansian, mes tenab naan ka natuin fa Uisneno In romin!” 34 Oke te, Nai' Yesus anhaman are' atoni mfaun he neem nabuan nok In atoup-noni' sin. Ma In nanoni' sin nak, “Atoni re' anroim he natuin Kau, ro in he naran ma natuina' neno-neno! In ro he nnikan nain in romin kun, ma natuin neu romif Uisneno. Maski atoni he nroor goe msa', in natuin piut. In on re' atoni' nasaah in hau nehe he nnao nkuus na'peti' niis ne. 35 Fin atoni' re' anroim he nmaet natuin in nok Kau, of in nmoin nabar-baar nok Uisneno. Mes atoni' re' anmoin arahaa neu in tuan, of in moin ni ka ma'osa' fa! 36 Amneen, oo! Karu ho mui' pah-pinan in afni oke', mes Uisneno antita' ko, ho he mupein saa'? 37 Maski nak ho mroe meik pah-pinan in afni oke' msa', mu'if naan ka neu he ntuik naan fa ho sman mi! 38 Mimnau nai! Atoni' pah-pinan oras ia anmo'en re'uf huma'-huma'. Sin ka nfiroir fa Uisneno. Es nana te, sekau re' he natuin Kau mes namaebon, ai' natuina' Au noin ki mes namaebon, of Au msa' 'umaebok he 'manaku' in tuan ni anbi Uisneno In matan. Natuin Au, An Mansian ia, of Au 'fain 'uum u'ko neno-tunan. Ma ameput Uisneno na'ko neno-tunan of naub Kau. Oras hai msaun im mi'ko neno-tunan meik Ama In pinan ma krahan, of mansian ni na' nahiinin nak mneo ni Au sekau Kau.
1 Hii kaisa' mnikan Au uabak ia. Na'ko hii arki ok-oke' re' ia, of anmui' tuaf re' fe'en nmoin fe' tar sin niit Uisneno antook ma naprenat neik kuasat ma'tani'.”
Usif Yesus na'bani', ma In baer pake nariim anbi to'ef in tunan
2 Neno nee ankonno te, Nai' Yesus antoit nai' Petrus, nai' Yakobos, ma nai' Yohanis, he nnaon nsaen bua'-bua' on to'e-mnanu' es, re' ka nmui' fa tuaf. Oras sin antean in fafon, sin nkius niit Nai' Yesus na'bani'. 3 Ma In baer pake naan anfanin muti' ma nariim. Ka nmui' fa bare' pah-pinan re' muit ni namnees nok In paken. 4 Nok askeken, sin niit Nai' Yesus na'uab nok na'i nai' Elia ma fin na'i nai' Musa. 5-6 Sin teun sin namtaun maten. Nai' Petrus antaka'nana', tar in na'uab tafi'-tafi'. Narari te, in natonan Nai' Yesus nak, “Aam! Hit bi iat na'reko nneis. Reko te, hit atmoe' uim ropo teun. Es neu Ko, Aam. Es neu na'i nai' Musa, ma es anteni' atfee je neu na'i nai' Elia.” 7 Oke te, nok askeken nope ansaun neem ma an'aum naan sin. Ma sin anneen hanaf es anpoi neem na'ko nope naan am nak, “Amneen nai joo! Nai' Yesus re' ia Au An neka'. Hii mneen ma mituin mirek-reko' In uaban!” 8 Oras nai' Petrus sin anneen hanaf naan, sin ankisun fuun ma nateef, mes nok askeken sin ka niit anteni' fa tua nua ee nee. Suma Nai' Yesus anmees. 9 Narari te, Nai' Yesus nok In atoup-noni' sin ansanun na'ko to'ef naan. Ma Nai' Yesus antaar sin am nak, “Saa' re' hii fe' miit mirari naan, hii kaisa' mitonan es-es. Au re' ia, An Mansian, Au ro he 'maet fe'. Karu Au 'moni 'fain, na' hii mitoon rasi naan neu too mfaun.” 10 Sin nnaa' naheran Nai' Yesus In rais manba'an naan, ma sin ka natonan fa es. Ma sin teun sin anmaktan nein es nok es nak, “In sair ti, on mee, es na' In nak, In he nmoni nfain na'ko In a'maten re' naan? Nok ranan mee?” 11 Ma sin nataan Ne ma nak, “Tunggur krei sin nak na'i nai' Elia ro he neem nahuun fe', rari te na' Kristus neem. Mes Aam, natuin Ho teen bit, on mee?” 12 Ma Nai' Yesus nataah am nak, “Namneo on naan. Na'i nai' Elia neem nahuun fe', he nfei ranan neu Kristus, atoni' re' Uisneno anruur nani na'ko un-unu'. Mes on mee? Hii ka mihiin fa saa' re' sin tui nani et Uisneno In Sur Akninu' anmatoom nok An Mansian? Natuin sin antui narari ma nak, karu In neem antea te, atoni' of anha'mui' Je ma sin of anroor nisan. 13 Ma hii ro he mtakan hii ruik min rek-reko jo! Na'i nai' Elia neem anraar jen. Ma atoni' nha'mui' je, natuin sin romik. Naan namnees nok saa' re' sin na'i antui naan je et afi unu'.”
Usif Yesus nareko' ri'an es re' niut reu' fes antaam ne
14 Oras Nai' Yesus nok In atoup-noni' tuaf teun natefan nfanin nok atoup-noni' bian, sin niit too mfaun nabuan. Too mfaun naan neman he niit atoup-noni' bian anmatoen nok tunggur krei sin. 15 Oras too mfaun sin niit Nai' Yesus te sin naskeken, fin sin nak ai' In fe' nabarah et to'ef in tunan. Ma sin naen nseun In. 16 Oke te, Nai' Yesus nataan sin am nak, “Him matoen rais saa' mok sin?” 17 Ma atoin es neem ma nak, “Aam, amneen fe'! Au 'eik au an-mone henati' Ama' mureko' man ee. In nmuu, ma ka bisa na'uaba' fa, fin niut reu' fes antoom ee. 18 Karu niut re'uf naan antaam, in nbeson ri'ana' naan neu afu. Narari te, ri'ana' naan in haep ne na'furi', ma in neuk niis nein. Rarit in aon naan nruur goah on hau meto. Au 'toit 'iit Ho atoup-noni' sin, he sin nriu' niut re'uf naan. Mes sin ka bisa fa.” 19 Anneen on nana te, Nai' Yesus naskara' sin am nak, “Hoe! Hii on he bainesi' ki! Au 'unoni kii fani-fani, mes hii ka mhe-heek man fa. Ma hii ka mpirsai Kau fa batur-batuur! Au he 'sabaar kii tar antea reka'! Meik Kau ri'ana' naan neem neu ia!” 20 Oke te, sin naskau neik ri'ana' naan neem neu Nai' Yesus. Oras niut re'uf naan nkius niit Nai' Yesus on naan, in nbonan ri'ana' naan ma antitu' anbi afu, ma in haep-bua-neor ni nsae. 21 Narari te, Nai' Yesus nataan ri'ana' naan in amaf nak, “Ho aan hi in meen si na'ko rek-reek ii?” In amaf nataah am nak, “Na'ko in an-ana' fe'. 22 Niut re'uf naan he na'maet au an hi 'ro-roo goen. In nbeson au an hi fani-fani nbi ai, ma nareem ee anbi oe. Es nana te, Aam, amturun kau fe'! Karu reko te, amneek kai, he mureko' man au anah ia.” 23 Nai' Yesus nataah am nak, “Nansaa' am es ho mak ‘karu reko’? Namneo Au bisa 'moe' are' sa'-saa', asar atoni' ro he npirsai fe'!” 24 Narari te, atoni mnasi naan nataah ma nkae nok, nak, “Aam! Namneo, au 'pirsai 'urair. Mes amturun kau he au 'neek atebes ia ma'tani' antein!” 25 Oras naan, Nai' Yesus nkius too mfaun murai neem nauban sin. Onaim In naprenat niut re'uf naan am nak, “Hoi! Niut aburarut! Ho mpoi nai mu'ko ri'ana' ia, he in bisa nneen, ma in bisa na'uaba'. Ho kaisa' mtaam amteni' meu ne!” 26 Anneen Nai' Yesus na'uab on nana te, niut re'uf naan anhunun naher-heer. In nmoe ri'ana' naan antikoib ma npaiteet koon, oke te na' anpoi nasait ne. Ma ri'ana' naan antuamauf on re' anmate nrair. Tar antea bifee-atoni' anbi naan na'uaban nak, “Nah! In mate nrair!” 27 Oke te, Nai' Yesus anna' ri'ana' naan in a'niman, ma anfiit nafeen ee. Ma ri'ana' naan anfeen nain oras naan. 28 Oke te, Nai' Yesus nok In atoup-noni' sin nnao nasaitan bare naan, ma antaman neu um jes. Anbi naan sin nataan Nai' Yesus nak, “Aam! Nansaa' am es fe'ena hai ka bisa mriu' man fa niut re'uf naan?” 29 Ma Nai' Yesus natonan sin am nak, “Amneen rek-reko! Niut re'uf sin ro amaun tein. Es nana te, karu hii ka m'onen he mtoit fa Uisneno, hii ka bisa mriu' fa niut re'uf naan.”
Usif Yesus natoon anteni In rasi 'maten
30 Narari te, Nai' Yesus nok In atoup-noni' sin nnao nasaitan bare naan, ma antaman neu propinsi Galilea. Oras naan, Nai' Yesus ka nroim fa he atoni' nahiin nak In et bare naan. 31 Mes In arahaa he nanoni' In atoup-noni' sin. In natonan sin am nak, “Ka 'roo fa heen, sin of na'sosa' Kau neu atoni' teta'. Oke te, sin nroor niis Kau, An Mansian ia. Namneo Au ro he 'maet, mes anbi nmeu te, Au of a'moni 'fain.” 32 Nai' Yesus natoon on naan, ma In atoup-noni' sin naskeken ntaka'nan ein. Sin ka nabrain fa he nataan anteni' Nai' Yesus In tenbi on mee.
Usif Yesus In atoup-noni' sin matoen neu sekau es re' ko'u nneis
33 Narari te, Nai' Yesus sin annaon ntean Kapernaum. Ma oras sin antaman anbi umi, In nataan neu In atoup-noni' sin am nak, “Fe'ena hii matoena' rais saa', ka?” 34 Mes ka tiit fa es nataah, fin sin nbi raan ne tnanan, sin matoen neu sekau es ko'u nneis anbi sin. 35 Oke te, Nai' Yesus antook ma nanoni' sin am nak, “Sekau es anroim he nrair atoin ko'u, in ro he nroim he nfain atoin neek a'baut, he ntuthae atoni mfaun.” 36 Oke te, Nai' Yesus naskau naan ri'an es anbi naan, ma nhake nfain anbi sin atnanak. Ma In na'uaba' nak, 37 “Sekau re' natuin Kau ma ntuthae too ana' on re' ri'an a'baut re' ia, huma' mese on re' in tuthae Kau msa'. Ma in imsa' antuthae Au Ama' re' ansonu' Kau he 'taam uum anbi pah-pinan ia.”
Sekau es re' anfain hit atoin'a
38 Narari te, Nai' Yesus In atoup-noni' nai' Yohanis, natraak am nak, “Amo! Anbi orses, hai miit atoin es anpaek Ho kanam ma nriu' niut re'uf sin. Mes hai mtaar ee, natuin hit ka atoin'a fa.” 39 Mes Nai' Yesus nataah am nak, “Hoe! Hii kaisa' mikain ee. Fin sekau es anpaek Au kanak he nmoe' rais sanmakat, in of ka neu na'uab na're'uf fa Au kanak. 40 Karu in ka nraban kit fa, on nana te in re' naan hit atoin'a msa'. 41 Es nana te, mimnau rek-rek go! Karu anmui' atoni' re' nahiin nak hii mituin Kristus, rari te in nturun ki, Uisneno ka neu nnikan fa in haet naan. Maski in suma na'inu' ki neik oe ruman kras es amsa', Uisneno ka neu nniik ne fa.”
Kais amkua'noon mok sanat
42 Oke te, Nai' Yesus natonan nteni' sin am nak, “Karu atoin es anmo'e nsan neu ri'an es, tar in ka npirsai nteni' Kau fa, ampantom, oo! Reko nneis, nait faut ko' goes, ma nfuut goe neu in neon, ma nporin nataam in tuan neu tas je tnanan. 43 Karu ho musanab meik ho nimam, mketu mporin ho nimam naan! Fin reko neis ho mtaam meu sonaf neno-tunan meik ho nimam mese', na'ko sin anporin nataam ko neu ai maputu' ma ai marara' abar-barat meik ho nimam nua. 44 Ai marara' naan, namneo-namneo baer naan a'renat. In ai ji ka nmaet niit fa. Ma are' kauna' so' ji nsoe nareo' ka nas-naas fa. 45 Karu ho musanab meik ho haem, mketu mporin ho haem naan. Fin reko neis ho mtaam meu sonaf neno-tunan meik ho haem mese', na'ko sin anporin nataam ko neu ai maputu' ma ai marara' abar-barat meik ho haem nua. 46 Ai marara' naan, namneo-namneo baer naan a'renat. In ai ji ka nmaet niit fa. Ma are' kauna' so' ji nsoe nareo' ka nas-naas fa. 47 Ma karu ho musanab meik ho matam, mro'i mporin ho matam naan. Fin reko neis ho mtaam meu sonaf neno-tunan meik ho matam mese', na'ko sin anporin nataam ko neu ai maputu' ma ai marara' abar-barat meik ho matam nua. 48 ‘Ai marara' naan, namneo-namneo baer naan a'renat. In ai ji ka nmaet niit fa. Ma are' kauna' so' ji nsoe nareo' ka nasnaas fa.’ 49 Au nonik ia, ro ma'fena'. Es nana te, sekau es he natuina' Kau, ro in he ntahan he nok piut, on re' sis se'ik naan ro he npaek masik, hena' sisi naan antahan a'roo. 50 Masik naan, ro reko. Hit pak je he taminab mnahat. Mes karu masik naan ka min masik fa heen, he tpak je neu saa' antein? Ro hit taiti tpoir nahe. Hii msa' ro he mfain on re' masik, he mmoin nok manekat mok are' atoni mfaun sin. Nah! Hii kaisa' matoe mteni' nai, mak sekau es ko' gui, ma sekau es an ii.”
Atoni' Farisi sin namin ranan he namouf Usif Yesus natuina' rasi matsaos ma manporin
1 Narari te, Nai' Yesus sin annaon neu propinsi Yudea, ma neu bare bian anteni' et noe Yarden in panin, pasa' neon-saet. Anbi naan, too mfaun neman ma naub Ne. On re' nati', Nai' Yesus nanoni' sin. 2 Atoni Farisi fauk neman he namouf Nai' Yesus. Sin natanan nak, “Natuin hit atoran rais-pirsait, reko ai' kah, karu atoin amatsaos es anporin in fee?” 3 Mes Nai' Yesus nataah sin nak, “Mimnau fe'! Rasi atoran fee-mone re' Nai' Musa anba'an nani neu kii nak on mee ka?” 4 Sin natahan nak, “Na'i nai' Musa in atorni nak, atoni' nabei' he nporin in fee, mes ro he nmoe' nahunun sur manporin ma annona' surat naan neu in fee.” 5 Mes Nai' Yesus nataah sin am nak, “Hoi! Amneen fe'! Na'i nai' Musa antui on naan, natuin hii mi'nakfaut bainesi'! 6 Hii kaisa' mnikan rais reta' un-unu' oras Uisneno anmoe' neno-tunan ma pah-pinan! Natuin matu'i narair et Sur Akninu' nak, ‘Uisneno anmoe' mansian nahuum bon on bifee ma atoni. 7 Es nana te, atoin es ro he nnao nasaitan in ainaf ma in amaf, ma anmafuut neek nok in fee, 8 tar nua sin anfanin mese'.’ 9 Karu Uisneno neiknon nabuab sin anfanin mese', ka nabei' fa mansiani anbatis sin!” 10 Narari te, Nai' Yesus nok In atoup-noni' sin antaman mesen anbi um jes. Anbi naan, sin nataan Nai' Yesus matoom nok In nonin re' fe'ena. 11 Nai' Yesus nataah sin am nak, “Sekau re' anporin in fee, ma annao nsao nteni' bifee 'teta', nana msa' antaam rais makaket! 12 On nana msa' bifee! Karu in porin in mone, oke te in nsao ntein atoni' teta', nana msa' antaam rais makaket!”
Usif Yesus na'uab ma anfee tetus neu ri'ana' sin
13 Anbi orses, sin neik sin anah sin neem neu Nai' Yesus, ma antotin he In nfee tetus neu sin. Mes Nai' Yesus In atoup-noni' sin nakaina' sin. 14 Reka Nai' Yesus niit rasi nana te, In nato'on In atoup-noni' sin am nak, “Mifetin ri'ana' sin he neman neu Kau! Kaisa' mikaina' sin! Natuin atoni re' nahuum bon on sin re' naan, es na' anfain Uisneno In nna. 15 Mimnau rek-reko! Sekau-sekau re' neman haumaak Uisneno, sin ro he namnau niis Ne, on re' anah-anah sin namnau sin ainaf ma sin amaf. Karu kahaf, ka nabei' fa he 'teek sin tak Uisneno In nna.” 16 Oke te, Nai' Yesus anhoo naan ri'ana' sin, ma In antao In a'niman anbi sin a'nakak mese'-mese' he nfeen sin tetus.
Atoin amu'it naim ranan he nmoin nabar-baar nok Uisneno
17 Ma reka' Nai' Yesus sin he nnaon konon, anmui' atoin amui' tes naen neem he nateef nok Ne. In na'ruri' anbi Nai' Yesus In matan, ma nataan am nak, “Aam tungguru re' au 'hormat ani! Au he 'utaan akre'o. On ai, Aam. Of au he 'moe' on mee kah, henati' au bisa 'taam on sonaf neno-tunan, he 'moin 'ubar-baar 'ok Uisneno?” 18 Nai' Yesus nataah am nak, “Nansaa' am es ho mteek mak, ‘re' au 'hormat ani’? Ka tiit fa es re' he thormat ani, karu mak Uisneno nmees. 19 Ho muhiin murair prenat Uisneno ahunut sin nak, ‘Kaisa' mroor atoni; kaisa' mmakaek; kaisa' mibaak; kaisa' msaksi mipoi; kaisa mputa-kriu atoni' in bare'; ma mi'parnom meu ho aina' ma hii ama'.’” 20 Atoni naan nataah am nak, “Namneo, Aam tungguru! Au 'unaoba' ar kanan atoran sin na'ko oras au fe' munif kau.” 21 Nai' Yesus nneek niis atoni naan. Ma In nak, “Namneo! Mes anmui' es anteni'. Es nana te, ho mfain nai he mu'sosa' main are' kanan ho 'mu'im. Narari te, meik roit re ho mupein je naan ma mnao he mbait main sin neu ama'mu'it sin. Oke te, ho uum nai he mutuina' Kau. Uisneno of anseun-banin ko neki 'mu'if neno-tunan.” 22 Ma reka' in neen Nai' Yesus In uaban nana te, in nekni nakrati'. Ma in fain nok in nekni nsuus anmaet, natuin in atoni' re' anmui' are'-kanan 'mui' fi oke'. 23 Ma Nai' Yesus ankisu nfuun am nateef ma na'uab nok In atoup-noni' sin am nak, “Amneen, oo! Atoin amui' ti na' neu-goah antaam on sonaf neno-tunan!” Bikase' unta 24 Anneen rasi nana te, atoup-noni' sin anmukekon. Ma Nai' Yesus na'uab anteni' nak, “Amneen rek-reko! He trair anah-anah Uisneno te, maneun ni ka an-ana' fa! Kaisa' mitenab am mak ma'kaf-kafa'. 25 Atoin amui' tes he ntaam on sonaf neno-tunan ma anfain on Uisneno in anha te, in sus ti huma' mese' on re' bikaes unta re' antaam neu in o'of, nao natuina' aen tes in konan.” 26 Nai' Yesus In uaban naan anmoe' sin anfanin taka'naan ein. Ma sin maktan nein ma nak, “Karu namneo on nana te, sekau ka es re' he napeni 'honis nabar-baar?” 27 Nai' Yesus ankius sin mese'-mese' ma nak, “Natuin mahinif ma manoef mansiani te, of ka nrarif. Mes mimnau, natuin mahinif ma manoef Uisneno, ka tiit fa saa' es re' of ka nrarif.” 28 Narari te, nai' Petrus nmurai na'uab am nak, “Amo! Hai mnikan main are'-kanan sa'-saa' he mituina' Ko. Onaim hai of mepein saa'?” 29-30 Nai' Yesus nak, “Au he 'utoon kim 'ak onai: Sekau es natuina' Kau, ma annao na'roo na'ko in ainaf ma in amaf, in orif-tataf, in anah-anah sin, in rene, in mepu, nok are' in um ji nanan, he nnao natoon Rais Reko Uisneno anbi mee-mee, in of antoup nafani' no naut nes. Are' sa'-saa' re' in nasaitan sin naan, of napein nafani' sin annesi ntein na'ko naan. Ini msa' of napein ha'mu'it natuin in nok Kau. Ma reka' pah-pin ni namreu', in of anmoin nabar-baar nok Uisneno. Rasi re' naan, es anfain seun banit neu ne! 31 Mimnau goo! Natuina' Uisneno in tenab, sekau-sekau es re' na'naeba' in tuan ni te, of na'bauna'. Ma sekau-sekau re' na'paran in tuan ni, natuina' tenab Uisneno, of na'raat ne.”
Ia han tonas nfain era' teun matoom nok Usif Yesus In a'maten
32 Oras naan, Nai' Yesus sin naon on Yerusalem. Nai' Yesus nnao nahuun. Ma In atoup-noni' sin ma tuaf bian anteni' natuina' anbi In kotin. Sin namnau In uaban ahunut, ma sin nmukekon ma namtaun. Narari te, Nai' Yesus no'en naan In atoup-noni' sin anmesen, ma natoon anteni' saa' re' of atoni bian sin anmo' Je anbi Yerusalem. 33 In na'uab am nak, “Hii mneen, oo! Oras ia, hit tnao teu Yerusalem. Au re' ia, An Mansian. Mes anbi Yerusalem sin of na'sosa' Kau neu a'nakat-a'nakat agama ma tungguru-tungguru krei sin. Narari te, sin of anhukun niis Kau. Ma sin anporin napoitan Kau neu ar-kanan atoni' re' ka nahiin fa Uisneno. 34 Narari te, sin na'akan Kau re'uf-re'uf. Sin naroon Kau. Sin anbeos Au aok tar Au aoki papa' oke'. Narari te, sin nroor niis Kau. Namneo, Au of he 'maet. Ma fai nua nkono te, Au 'fena' 'fain.”
Nai' Yakobos ma nai Yohanis antotin he nfanin kaes ko'u
35 Oke te, Nai Sabadius in anhin, es re' nai' Yakobos ma nai' Yohanis, sin neman neu Nai' Yesus. Ma sin totin nak, “Aam tungguru! Hai he mi'uab man akre'o!” 36 Nai' Yesus nataan sin am nak, “Hii he mi'uab saa'?” 37 Sin natahan nak, “Onai, Aam! Nati' karu Ama' Ho mtook ma Ho mnaa' man a'prenti te, hai mtoit he Ama' mutoko' kai, es anbi Ho nimam a'rii ma es anteni' anbi Ho nimam a'ne'u.” 38 Nai' Yesus nataah am nak, “Hii nua kii ka mihiin man fa saa' re' hii mtoti. Au re' ia, of 'upein susat ma nana'renat namfau. Onaim, on mee? Hii miteen bet mak, hii msa' mibei' he mnaben susat ma nana'renat tar ammaet mok Kau, oo?” 39 Sin natahan nak, “Hai mibei', Aam!” Nai' Yesus nak anteni' sin nak, “Namneo. Hii msa' of mnaben susat ma nana'renat on re' Au. 40 Mes sekau es antook anbi Au nimak a'rii ma 'ne'u, Au ka 'seor fa rasi naan. Natuin rasi naan, Uisneno In es nafeek. In nafeek anrair, sekau-sekau es nabei' he ntook anbi bare naan.” 41 Ma reka' atoup-noni' bian sin anneen nai' Yakobos ma nai' Yohanis sin han totis nana te, sin nato'on maten. 42 Narari te, Nai' Yesus no'en sin ok-oke ma nak, “Onai! Hii mihiin miraar jena, oo? Kaes ko'u re' anna'an prenat, sin es re' nati' te nha'mui' too gui. Tar antea, too gui ka nakbeor in reko fa. Ma nakaf-nakaf anbi pah-pah re' ka nahiin fa Uisneno, sin nanaoba' atoran ma prenat huma'-huma', tar sin too gui ka bisa nait fa sin a'nakan. 43 Mes ka nabei' fa he hii moe' on naan! Sekau-sekau anbi kii re' anroim he nrair kaes ko'u, in ro he nfain on re' ate he ntuthae in aok-bian sin. 44 Ma sekau es anroim he nfain a'nakat, in ro he nmeup on re' ate. 45 Natuin Au es re' An Mansiani. Mes Au ka 'uum fa he atoni' ntuthae Kau. Au 'uum he 'tuthae too mfaun sin. Au 'uum he 'fee Au 'monik no mes-mese', he 'soi too mfaun sin na'ko sin sanat.”
Usif Yesus nareko' atoin aforot
46 Nai' Yesus nok In atoup-noni' ma too mfaun sin neem antean kot Yeriko. Reka' sin he nnaon konon, sin niit atoin aforot es antook ma antoit piut-piut anbi ran ne ninin. In kan ne nai' Bartimeus, nai' Timeus in anah. 47 Reka' in nneen nak akonot naan Nai' Yesus na'ko Nasaret, in nhunun naher-heer am nak, “Yesus! Ho re' naan, sufa'-ka'uf na'ko Nai' Daud! Hai mpao Ko 'ro-roo goen, Aam! Amturun kau fe'!” 48 Ma reka' sin anneen in hanan naan, too mfaun sin nakain ne nak, “Hoe! Mumninu'!” Mes in nhunun naheer anteni', nak, “Yesus! Nai' Daud in sufan! Mumnau kau fe'!” 49 Ma Nai' Yesus anhake mnak, “Hii meik je neem neu Kau!” Ma sin naon neu ini mnak, “Noo goah nai! Aam tungguru no'en ko. Uum nai!” 50 Ma reka' in neen hanaf naan, nai' Bartimeus nporen nain in tais, in nfeen ma annao rab-raab he nateef nok Nai' Yesus. 51 Nai' Yesus nataan ne mnak, “Ho mroim saa' na'ko Kau?” Ma atoin aforot naan nataah am nak, “Koi, Aam! Au toit si es re' karu rekot au 'iit.” 52 Nai' Yesus nak antein em nak, “Natuin ho mpirsai murair mak Au 'ubei' he 'ureko' ko, es nana te oras ia msa' ho mureok! Mkoenom nai!” Ma in matan aforot sin narekon oras naan. Narari te, in nok annao naat Nai' Yesus.
Usif Yesus sin antaman neu Yerusalem, ma too mfaun sin anboi's Ee on re' kaes ko'u
1 Oras sin nhaumak kot Yerusalem, sin antean kuan Betfage ma Betania, eta' to'ef Saitun in abnapan bian. Anbi bare naan, Nai' Yesus sin nas-nasan akre'o. Narari te, In nreun In atoup-noni' sin nua he nao nahunun. 2 In nak, “Hii nua kii mnao mihuun meu kuan re' nee. Ma oras hii mtaam, hii of miit bikaes tipu' mese re' anteket nak ‘keledai’, ka masaena' fa fe', mafutu' et bare naan. Hii mnao mseif in tani ma mheer meik je neem. 3 Ma karu atoni nataan kii nak, ‘Nansaa' am es hii mheer meik bikaes tipu' naan?’ On nana te, hii mitaah am mak, ‘Usi' he npak je. Ma karu npaek naraar je te, hai of meik mifain ee neem.’” Bikase' hum es re' anteket nak ‘keledai’ 4 Oke te, nua sin naon, ma sin niit bikaes tipu' naan mafutu' anbi um jes in enon, et ran ne ninin. Ma sin nseif je, he nheer neik je nnao. 5 Mes atoni' fauk re' anhaken anbi naan, nataan sin am nak, “Hoe! Ba'e! Nansaa' am es hii mseif atoni' in bikase'?” 6 Ma sin natahan am nak, “Hai Uis fe nroim he npak je. Karu npaek naraar je te, hai of meik mifain ee neem.” Ma tua fin re' naan, nfeen sin manuan he nheer neik bikase' naan. 7 Ma sin nheer neik je nnao neu Nai' Yesus. Narari te, sin na'peni bikase' naan neik sin po'uk. Narari te, Nai' Yesus ansae. Usif Yesus antaam neu kot Yerusalem 8 Ma reka' sin he noi antaman neu kot naan, too mfaun sin nait sin tai-faof fini ma sin po'uk keni, ma na'been sin anbi ranan. Anmui' tuaf bian an'oet on re' pet no'o anbi ran ne ninin, ma na'been sin anbi ran ne tnanan. Nok mo'et naan, sin he natonan nak sin seun Nai' Yesus nok atoran. Nahuum on re' sin seun kaes ko'u bian. 9 Ma anmui' atoni' bian annao nahunun anbi Nai' Yesus In matan, ma bian namunin. Sin murai nsakanan nak, “Hosana! Hai mbo'is ma mi'naeb Uisneno! Uisneno anfee tetus neu amnemat re' neem ma neik Uisneno In kanan, natuin Uisneno anreun naraar Je neem! 10 Hosana! Hai mbo'is ma mi'naeb Uisneno! Natuin Uisneno he nahake' nafani' usif nai' Daud in aprenat! Hosana! Hai mbo'is ma mi'naeb Uisneno! Natuin Uisneno naprenat nan-nain et neno-ratan!” 11 Ma reka' sin tean kot naan in nanan, Nai' Yesus sin nnaon ntaman anbi Uisneno in Uim Onen Uuf in a'fe'on. Ma Nai' Yesus annao na'oni ma nkius natefan bare naan. Mes natuin ka nmui' fa oras anteni', es nana te sin naon nfanin neu kuan Betania. Uisneno in Uim Onen Uuf nok in kintar
Usif Yesus antaar hau uu' goes he kais nafua anteni'
12 Noka' kiuk ana' te, sin anpoin na'ko Betania he ntaman fanin neu kot Yerusalem. Anbin raan ne tnanan, Nai' Yesus annaben ate namnaah. 13 In niit hau uuf es et ran ne ninin. Biasa sin naah in fuan. Es nana te, Nai' Yesus nhaumak hau naan he nkius niit, hau naan nafua, ai' ka. Ma oras In ntea hau naan in uun ni te, In ka niit fa sa'-saa'. Natuin hau naan, in orse ka ntea fa fe' he nafua. In fe' he nanoo. 14 Es nana te, Nai' Yesus na'uab neu hau naan am nak, “Natuin ho ka mufua fa, es nana te murai na'ko oras ia, ho of ka mufua miit fa. Ma of ka tiit fa tuaf es he naah niit ho fuam.” In atoup-noni' sin anneen ate, In uaban naan ro ma'fena'.
Usif Yesus antaam anbi Uisneno in Uim Onen Uuf in a'fe'on, ma In naiti nporin bare' sosa' anbi naan
15 Narari te, sin nao nkonon tar antean Yerusalem, ma Nai' Yesus antaam anteni' anbi Uisneno in Uim Onen Uuf. Anbi Uim Onen naan in a'fe'on, too mfaun sin anfein a'masa' ma na'sos' ein kor-kefi, re' biasa sin paek je he nfeen fua'-turu'. Ma reka' Nai' Yesus niit sin on nana te, In nnao ma nriu' napoitan sin. In nbeso nsisa'en mei-mei re' sin paek sin he ntukrin roit, ma nbeso nsiksakan hau 'bena' re sin paek sin he na'sosa koro-koro naan. 16 Ini msa' npenan too mfaun sin he kaisa' nroin bare' ma nnaon refin ntenin natuin Uim Onen naan in a'fe'on. 17 Onaim, In nanoni' sin nak, “Hii mihiin mirair sa'-saa' re' mafefa' kninu Uisneno ntui naan je mnak, ‘Au 'ufena' Au Um ji, he are' bifee-atoni na'ko are' uuf-uuf neman he n'oen nen nbi naan.’ Mes hii mmoe' Umi naan anfain baer-buat neu abakat sin!” 18 Ma reka' a'nakat-a'nakat rais-pirsait ma tunggur krei sin annenan nak Nai' Yesus anmoe' rasi nana te, sin nato'on ma nek-neuk nisik. Narari te, sin namin ranan he nroor nisan. Mes sin namtaus ne msa', natuin too mfaun sin nroim niis In nonin. 19 Ma oras mansi nmaeb on nana te, Nai' Yesus sin anpoin na'ko kot Yerusalem, ma annaon fanin he ntupan anbi kuan Betania.
Karu hit pirsai batur-batuur neu Usi', In of anfee sa'-saa' re' hit toti
20-21 Noka' kik-kiku, sin nao nfanin neu Yerusalem. Anbi rana tnana', sin nnaon konon natuin hau uuf re' afina Nai' Yesus na'uab neu ne. In atoup-noni' sin nsanmakan, natuin hau uuf naan anmate nrair tar in a'ba'ne msa' nmeto nmaet.Ma nai' Petrus namnau niit Nai' Yesus In uaban afina'. Narari te, in na'uaba' am nak, “Amo! Mkius miit! Hau uuf re' afina Ama' mtaar ee ji, nmate nrair!” 22 Es nana te, Nai' Yesus nataah am nak, “Namneo on naan! Asar hii msa' mpirsai Uisneno on naan. 23 Karu hii mpirsai batur-batuur, hii of amreun to'ef mese' he nanani' bare neu tasi. Ma Uisneno msa' of nanani' to'ef naan, asar hii kaisa' mpirsai mi'ba'-ba'e! Hii ro he mpirsai batur-batuur neu Uisneno. 24 Nah! Nati' kaisa' mniik noo! Asar hii mpirsai batur-batuur mak Uisneno nabei' he nfee sa'-saa' re' hii mtoti, In of anfee kii on naan. 25 Ma karu m'onen, mes fe' anmui' neek ma'fena' mok es am es, hii ro he mnao he mmarame' mok atoni' naan fe'. Nok re' nana te, na' hii Ama' abit neno-tunan ansaok hii sanat sin. 26 Mes karu hii mipera' nek ma'fena', ma ka msaok fa hii aom bian sin sanat, hii Ama abit neno-tunan amsa' of ka nsaok fa hii sanat sin. ”
Sin maktaan nein matoom nok Usif Yesus in hak
27 Narari te, sin naon konon. Ma reka' sin tean Yerusalem, sin ntaman ntenin anbi Uisneno in Uim Onen Uuf. Ma oras sin taman tean in a'fe'on, a'nakat-a'nakat rais-pirsait ma tunggur agama sin neman, 28 ma sin nataan Nai' Yesus nak, “Afina sekau es anreun ko he uum meik taisibu anbi bare ia? Sekau es anfee ko hak!?” 29 Nai' Yesus nahiin im nak sin namin ranan he namouf Oo. Narari te, In nataah sin am nak, “Au msa' at he 'utaan kii. Hii mtoin Kau fe', hena' Au 'utaah kii. 30 Au he 'utaan kii onnai: hii arki mihiin nai' Yohanis, Asrain atoni re' nana, oo? Sekau es anreek ee he nasrain atoni'? Uisneno oo, ai' mansian?” 31 Ma sin natenab neu-mneman, ma na'uabin nak, “Amoo! Hit tarair beti'! Karu hit tataah am tak, ‘Uisneno es anreun goe te,’ In of nataah kit am nak, ‘Karu on nana te, neu saa' am es hii ka mpirsai fa nai' Yohanis!?’ 32 Mes karu hit tataah am tak, ‘Mansian ne es anrenu.’ Of are' too mfaun sin ntaisibun. Natuin sin pirsain am nak, nai' Yohanis re' naan mafefa' kninu' Uisneno.” 33 Narari te, sin natahan am nak, “Ma neo'! Hai ka mihiinif.” Ma Nai' Yesus nataah nafani' sin am nak, “Nah! Karu on nana te, Au ka 'utoon kii fa msa', sekau es anreun Kau.”
Usif Yesus nareta' antoom atoin ameup po' anggur
1 Narari te, Nai' Yesus na'uab anteni nok a'nakat-a'nakat pirsait Yahudi ma tunggur krei sin. In nareta' nak, “Anmui' atoin es ankaun nais fe'u he nseen hau anggur anbi in afu pis es. Oke te, in nbaik po'on naan anfuun am nateef. Ma anmoe' bak he ntoro' fua anggur in oen. Ma in nmoe' tobe. Oke te, in na'seba' po'on naan neu tuaf bian, he sin nmeup po'on naan, henati' napeni nate nbatin. Narari te, in nao neu pah a'teta'. Po' anggur, tobe, nok bak he ntoro' anggur in oen 2 Reka' orsi ntea he nseib anggur in fuan, auf tuaf naan anreun in ate es, he nnao neu ameup po'on naan he ntoit in sapaan. 3 Ma reka' in ntea, ameup po'on sin anheek naan ne. Narari te, sin anbeso. Oke te, sin nreen nggoe ma nfain rum-ruum. 4 Oke te, auf tuaf naan anrenu nteni' in ate es. Mes ameput sin na'tutu' in tar in a'nak ne papa'-papa'. Ma rari te, sin namae je, ma nriu' na'aenab. 5 Mes auf tuaf naan anrenu nteni' in ate es a'teta'. Ma sin anroor nisan. Mes, maski sin nmoe' onmee-onmee msa', auf tuaf naan anreun in ate sin piut. Mes ameup po'on sin anbeos bian, ma nroor niis bian. 6 Namuni te, arahaa tuaf mese anteni'. Tua mese naan, es re' auf tuaf ee in an-moen mese' re' in nek nani. Natuin ka tiit atein fa ranan bian, es na' in reun in an-mone naan. In natenab at nak, ‘Karu au 'reek au an mon ji neik non, sin of antoup goe nok rek-reko, ma sin am saa' of natniin ne.’ 7 Ma in reek in anah naan he nnao. Mes reka' atoin ameput sin niit ri'ana' naan nema te, sin na'uaban nak, ‘Hoe! Hii mkius miit fe'! A'naefe anfee in an hoin ee neik non neem! Karu 'naefe nmate te, in of es antoup are' baer pusaak sin. Iim he troor tisan, henati' hit par tain are' kanan in a'mu'in sin!’ 8 Narari te, sin arsin anheek je, ma anroor nisan. Ma sin nporin in aon amates naan anbi po' ne in kotin. Rais reta' naan antu' ma namsoup on naan.” 9 Narari te, Nai' Yesus nataan are' kaes ko'u sin am nak, “Natuin hii tenab, of auf tuaf naan anmoe' saa' ka neu are' apao po'on sin? Natuin Au tenbi te, in of neem ma nroor niis are' ameput sin ok-oke'. Narari te, in na'seba' po' anggor naan neu atoni' bian. 10 Hit arkit trees tiit anbi Uisneno in Sur Akninu' nak, ‘Anmui' fat goes re' nahunu te tuknini naiti nporin. Mes oras ia, fatu naan anfain fatu' sukif neu ni ainaf. 11 Uisneno es anpir naan je, ma natoko' fatu naan. Es nana te, hit tiit atrair in masan arekon!’” 12 Kaes ko'un re' naan nahinin nak Nai' Yesus ansair sin neik reta' naan. Sin huma' mese' nok atoin ameup po' anggur sin. Es nana te, sin murai namin ranan he nheek Ee. Mes sin namtausan too mfaun re' anroim Nai' Yesus In noni'. Onaim, sin na' nnaon npoir na He.
Atoni' bian sin namin ranan he na'nukab Usif Yesus neik rasi baen bea
13 Narair on nana te, a'nakat-a'nakat atoni' Yahudi sin anreun atoni' fauk na'ko pukan krei Farisi ma na'ko parte purtik Herodes neman he nataan Nai' Yesus henati' namouf Oo. 14 Sin neman tean ate, sin nataan Nai' Yesus am nak, “Aam tungguru! Hai arkai mihiinim mak Ama' Ho neek man ro mne'o, ma ka mputa-kriu miit fa. Ama' Ho mkisu ha atoni' in nekan. Ama' msa'at mutoon-munoon Uisneno In romin, natuin Ama' ka mkius fa humaf. Nah! Oras ia, hai he mitaan uab es. Tatuin hit atoran pirsait Yahudi te, of hit he tbaena' bea neu Uis Ko'u pah Roma, ai ka?” 15 Mes Nai' Yesus nahiin narair nak sin namin ranan he nfuir Ee, he nraban an a'prenat Roma. Ma Nai' Yesus nataah neik han ma'fena' nak, “Nansaa' am es hii he mfuir Kau meik rasi naan! Neu hii mfee miit Kau roit fua es nita!” Ana' aprenat Roma sin roit re' anmo' je na'ko noin muti' 16 Ma sin nona' roit es neu Ne. Ma Nai' Yesus nait ma ntae roit naan. Narari te, In nataan sin am nak, “Sekau in humni es re' ia? Sekau kan ne es re' ntui je ia?” Ma sin natahan am nak, “Re' naan Uis Ko'u pah Roma.” 17 Oke te, Nai' Yesus nak, “Nah! Karu on nana te, meik meu ana' aprenat sin saa' re' anfain ana' aprenat sin hak. Ma meik meu Uisneno saa' re' anfain Uisneno In hak.” Anneen In han tahas naan, sin arsin sanmakan, natuin In uaban naan namneo. Etun sin ka bisa namouf Goe fa.
Rasi amates anfeen anfain, ma rais matsaos anmu'i ai' kah anbi neno-tunan
18 Narari te, atoni' fauk na'ko pukan krei bian neman he namouf Nai' Yesus. (Sin na'ko pukan krei Saduki re' anpirsain am nak amaetsi ka nfeen anfain nitaf). 19 Sin na'uaban nok Nai' Yesus am nak, “Aam tungguru! Na'i nai' Musa antui kit harat es nak: karu atoin es nmaet nasaitan in fee, ma ka nmui' fa anah, atoin amates naan in orif ro he nsao bifee banu' naan. Maut he nfee sufa'-ka'uf neu in tataf re' anmate nrair. 20 Namneo, na'i nai' Musa nanoni' rasi naan. Es nana te, hai mitaan. Anmui' atoni' hiut nma ori-tatan. Moen unu naan nmatsao nahuun; oke te in nmaet, mes ka nmui' fa anah. 21 Onaim in orif re' natuin ee ji ansao bifee banu' naan. Mes ka 'roo fa te, in maet ma ka nmui' fa anah. On nana msa', in orif re' natuin ee ji; in sao bifee banu' naan, ma ini msa' anmaet, mes ka nmui' fa anah. 22 Ma anrari msa' ntom orif-orif amunit sin, tar antea aheet-susu msa' anmaet. Narari te banu' naan anmate msa'. 23 Nah! Oras ia hai mitaan onai: Bifee naan ansao niit atoni hiut! Ma karu pah-pin ni namsopu te, ma Uisneno namonib nafani' amates sin, of sekau es re' anfain mone neu bifee naan?” 24 Nai' Yesus nataah sin am nak, “Karu hii mitaan on naan, hii ka mihiin namneo fa Sur Akninu' Uisneno In afan. Ma hii msa' ka mihiin fa Uisneno In kuasat. Onaim hii msaan batuur! 25 Amneen! Onai! Ka tiit fa rais matsaos et sonaf neno-tunan. Are' amates re' Uisneno nafena' nafani' sin, ka nmatsaon tenin fa. On nana msa' Uisneno In ameput na'ko neno-tunan ka nmatsaon fa. 26 Onaim, anmatom nok rasi amates he nfeen anfaini ai' kah, Au 'utoon kii on ia. Oni' hii fe' ka mitenab man fa reta' antoom ai re' nout hau ana' mese', mes ka nputuf. Reta' naan nak, Uisneno nak neu nai' Musa nak, ‘Ho na'i sin Uisnen goe es re' Au. Sin es re' na'i nai' Abraham, na'i nai' Isak, ma na'i nai' Yakob. Sin arsin na'ruri' ma na'besa' neu Kau, tar antea oras ia.’ 27 Nah! Hit tahiinim tak sin na'i sin anmaten nrarin eti-eti ahunut. Mes, natuin Uisneno nak, In fe' anfain sin Usif, esnanat hit tahiin tak, sin monin fanin. Onaim, maski sin anmaten nrarin amsa', sin monin fanin. Namneo, amoin ti na'-na'ruri' ma na'bees neu Uisneno. Mes atoin amaet si, kah fa to? Es nana te, karu hii mnaa' miheran noni' nak, amates sin ka nfeen anfanin fa, hii ro msaan maneno'!”
Rasi tneek Uisneno ma hit aok-bian
28 Anbi oras naan, tunggur krei es nok ma nneen Nai' Yesus ntook ma na'uab nok atoni' pukan Saduki sin. Tunggur krei naan natenab nak Nai' Yesus nataah sin tanas sin nok reko. Narari te, in nataan Nai' Yesus nak, “Aam! Au he 'utaan on ia: Hit atoran harat ma prenat rasi pirsait sin mfau re'uf. Na'ko are' kanan prenat na'i nai' Musa, prenat mee ka, es ro he tanaoba' tahunun?” 29 Nai' Yesus nataah am nak, “Prenat re' ma'osa' nneis anbi Sur Akninu' Uisneno nak on nai: ‘Are' kanan too Isra'el, amneen rek-reko! Uisneno ro hit Usif, ma hit A'nakat. Ka tiit fa bian anteni', In mese' kun! 30 Es nana te, hii ro he mneek Ee anneis na'ko bian-bian. Es nana te, hii ro he mimnau Goe piut-piut, mihiin Je, ma mmeup ma'tani' he mituina' In romin.’ 31 Ma prenat hae' nua nak: ‘Ho ro he mneek ho aok-bian namnees on ho mneek ho tuam.’ Prenat nua sin ia es re' ma'osa' nneis. Ka tiit fa prenat bian re' ma'osa' neis pren nua in re' ia.” 32 Oke te, tunggur krei naan na'uab anteni' neu Nai' Yesus nak, “Namneo! Re' Ama mu'uab ee naan, namneo. Uisneno anfain hit Usif, ma ka tiit fa Uisneno teta'. 33 Hit ro he tneek Ee anneis na'ko are' kanan sa'-saa', ma tamnau Goe piut, tahiin Je, ma atmeup taheer he tatuin In romin, ma hit ro he tneek hit aok-bian namnees on re hit neek hit tuak. On re' nanat na' Uisneno nmariin nneis, na'ko hit arahaa tatuin atoran rasi pirsait anmees. Nana reko nneis na'ko hit arahaa troor mu'it he ta'turu, ai' atfee bare' bian neu Ne.” 34 Oras anneen in tahas naan, Nai' Yesus natenab nak tunggur krei naan nahiin rek-rek goen. Onaim Nai' Yesus nak, “Ara kre'o te, ho he noi mrair Uisneno ini.” Narari te, ka tiit fa es anteni' re' anroim he nataan Nai' Yesus, fin ka tiit fa es re' nabei' Je te.
Kristus naan, namneo Usif nai' Daud in sufan, mes ini msa' anrair nai' Daud in usif
35 Narari te, Nai' Yesus nanoni' too mfaun sin anbi Uim Onen Uuf Uisneno. Ma In nataan sin am nak, “Natuin hii tenbi on mee? Tunggur krei sin nanoni' am nak, Kristus re' naan es re' tuaf re' Uisneno nruur nani na'ko afi unu. Ma sin tenab nak, In arahaa sufaf na'ko Usif nai' Daud. Mes tenab naan ka namneo fa. 36 Natuin afi unu' Smana Kninu' Uisneno anpaek nai' Daud he ntui nak, ‘Uisneno natonan narair au Usi' nak, “Uum he mtook meu baer a'masat et Au 'nimak a'ne'u. Au of a'moe' are' ho musu sin, tar sin na'ruri neu ko.’” 37 Na'ko nana te, hit tahiin nak Usif nai' Daud anteek Kristus nak ‘Usif’. In a'mofun nak, karu sin nak Kristus naan, suma Usif nai' Daud in sufan-ka'un, naan fe ka nanokab fa. Fin In imsa' anfain Usif nai' Daud in Usif.”
Usif Yesus nak, ampantom mi'ko tunggur agama sin puta-kriu kein
Oras Nai' Yesus na'uab on naan, too mfaun sin anromin he nneen Ne. 38 Narari te, In natonan nteni' sin nak, “Hii ro he ampantom mi'ko tunggur agama sin. Sin roim he npairiur-sok neik sin baru mnanu', nnao nateef too mfaun, he too mfaun sin niit sin at nak, ‘Hoe! Sin ro kaes ko'u batuur!’ 39 Karu sin antaman anbi uim onen, ai' nokan nbin fesat, sin namin toko' arekot henati' too mfaun niit sin. 40 Ma mpantom, oo! Fin sin puta-kriu bifee banu' sin, ma nasiik naan sin umi sin ok-oke'. Ma anbi too mfaun sin matak, sin na'koro' sin moe' re'uf, es re' sin onen mnanu'-mnanu'. Sin romin he atoni' bian nahinin nak sin neek kein muti'. Mes Uisneno of anfee kasat ma'fena' neu sin.”
Bifee banu' ama'mu'it na'turu' roi kolekte nneis-neis
41 Narari te, Nai' Yesus antook anbani' neu peti 'turu', anbi Uim Onen Uuf Uisneno. In niit too namfau neman ma ntao sin roi kolekte anbi peti 'turu' naan. In niit atoin amu'it sin neman amsa' ma nataam sin roit namfau anbi naan. 42 Oke te, bifee banu' ma'mu'it es neem ma an'onen nok. In nataam roit sen nua anbi peti naan. Roit naan in 'os ni an-ana'. 43 Onaim Nai' Yesus an napen In atoup-noni' sin am nak, “Hii mkius rek-reko neu bifee banu' ama'mu'it ne. In nataam roit suma sen nua goah, mes in fee nneis na'ko are' kanan afeet. 44 Sin arsin anfeen kolekte na'ko roi nesif. Mes bifee banu' ia in anfee nain in roit sin ok-oke' neu Uisneno.”
Usif Yesus natoon nanin sin antoom Uisneno in Uim Onen Uuf in atseran
1 Narari te, Nai' Yesus nok In atoup-noni' sin anpoin na'ko Uim Onen Uuf. Oras sin anpoin, In atoup-noni' es naruur Ee Uim Onen Uuf, ma nak, “Aam! Bait Ho mkius miit ia fe'! Umi ia in reok ni kah! Sin bakin faut ko' ni reko' maten!” 2 Mes Nai' Yesus nak neu ne, nak “Uim Onen ia, namaas! Mes ka 'roo fa te, sin of anpukai natserab are' fatu-fatu naan.”
Neno msopu' fai msopu' in tanar sin
3 Oke te, Nai' Yesus sin nnaon neu to'ef Saitun, ma ntokon nbain ein on Uim Onen Uuf Uisneno. Narari te, In atoup-noni' sin haa, neman ma na'uab nok Ne. Es re' nai' Petrus, nai' Yakobos, nai' Yohanis, ma nai' Anderias. 4 Sin natanan am nak, “Aam! Bait Ho mutoon mufani' miit kai Ho uabam fe'ena. Reka te in orsi ntea? Ma in tanar-tanar sin, on re' mee?” 5 Oke te, Nai' Yesus nataah am nak, “Asar him mpanat rek-reko! Henati' es kaisa' napoi kii. 6 Natuin of anmui' atoni' namfau neman, ma npaas sin a'bas kein, ma nak, ‘Au re' ia, Kristus, atoni' re' Uisneno nba'an nani na'ko unu'.’ Onaim sin imsa' napoinan atoni namfau. 7 Karu hi miit atoni' anmakenan, ai hi mneen uab anin nak anmui' makenat et me-mee, hii kaisa' mimtau. Natuin are' rasi naan ro he nboor, mes neno amsoup ti fe' ka nteaf. 8 Fin uuf es of anfeen ma nmaraban nok uuf es. Ma fin pah es of anmakeen nok pah es. Ma fin tainuun si anhasu' anbi me-mee. Amnaah si msa' of ma'tain ni kah. Are' rasi ia anfain tanar, namnees on re' bifee a'apu' re' nnaben men-mahoni'. 9 Es nana te, hii arki ro he mpanat rek-reko. Of sin neem ma nheek ki ma nheer neik ki neu umi fek rasi pirsait. Ma sin of anbeos ki anbi uim onen sin nanan. Ma sin of nfuut neik ki neu are' ana' prenat sin, natuin hii mok Kau. Mes rasi nana msa', anfani sraak he hii mitonan sin are' rasi antoom Kau. 10 Mes Uisneno in anah sin ro he nnao natoon nahunun Au Rais Reko neu are' uf-uuf anbi pah-pinan ia, oke te na' neno amsoput antea. 11 Mimnau! Karu sin fuut neik ki neu umi fek rasi, hii kaisa' mimtau mak, ‘Au he 'u'uab 'ak saa'? Ai' au he 'utaah am 'ak saa'?’ Karu in orsi antea, hii mi'uab mituina' saa' re' Smana Kninu' Uisneno natoon neu kii. 12 Anbi um jes in nanan, karu tuaf es anpirsai neu Kau, of in orif-tataf sin es namin ranan he nroor nisan. Karu anhe es anpirsai, of in amfe kun es neik non anroor niis ne. Ma karu in ainaf ma amaf anpirsai Kau, of in anh ein anroor niis sin. 13 Es nana te, of atoni mfaun sin nato'on niis ki, natuin hii mpirsai meu Kau. Mes sekau es naran tar antea namsoup, Uisneno ro of an fee ne 'honis.”
Ampanat rek-reko natuin neno amsoput anhaumaken
14 Nai' Yesus na'uab ankon ma nak, “Tuaf es re' neik Amre'ut of he neem. In taam ma nhaek anbi baer nuni et Uim Onen Uuf Uisneno, re' ka ma'ota' fa neu ne, tar in ha'niis bare naan. Es nana te, Uisneno annao nasaitan bare naan. Karu hi miit rasi naan, nati' mpanat rek-reko! (Sekau es anrees ia, ro he nahiin!) Naan anfain tanar nak neno-neno susat sin anhaumak re'-reu' feen. Karu hi miit on nana te, abitan propinsi Yudea amfeen maen nai on a'to'ef sin. 15 Ma hii ro he maen rab-raab, he kaisa' msiraak om. Karu tuaf mee npoi nrair na'ko umi, kaisa' nfain he nait bare' antein. 16 Ma atoni' re' anbi rene, kaisa' anfain nait tainusat antein. Ro he naen ankoon! 17 Re' nsuus annes-neis ji es re' bifee a'apu, ma bifee-bifee re' nasuus ri'ana'. Fin sin ka naen nanan fa. 18 Es nana te, reko nneis hii m'onen ma amtoit henati' rais emre'ut naan kaisa' neem nateef nok oras uran-anin. 19 Fin oras naan, ma'nuuk ii ko' re'uf! Murai na'ko Uisneno nmoe' pah-pinan ia tar antea neno ia, ka tiit fa sustes ko' ni on re' naan. Ma atoni' of ka niit anteni' fa susat nahuum on re' naan. 20 Karu Uisneno ka na'paran fa neno susat naan, ka tiit fa tuaf he nmoni nkoon. Mes natuin Uisneno nneek niis In an piri' sin, es nana te In na'paran neno-neno susat naan. 21 Karu neno naan antea, hii of amneen atoni' sin na'uabin nak, ‘Mkius nai! Kristus es ia!’ Mes tuaf bian nak, ‘Kristus et nee!’ Mes nati' hii kais amneen, oo! 22 Ma of anmui' atoni' re' anpoi ma npaas in a'basan am nak, ‘Au re' ia, Kristus!’ Bian anteni' nak, ‘Au re' ia, mafefa' kninu' Uisneno.’ Sin of anmo'en rais sanmakat huma'-huma' neik kuasat niut re'uf he nputa-kriu atoni' sin. Sin namin ranan huma'-huma' he nasekeb anah-anah Uisneno. 23 Hii ro he mpanat rek-reko! Neno-neno susat naan fe' ka ntea fa fe', mes Au umnauba' ain ki sin!”
An Mansia ni In amneman
24 Oke te, Nai' Yesus antaru ntein, ma natonan In atoup-noni' sin am nak, “Karu neno-neno susat sin ankonon ate, Mansi of nameis'ook, Ma fun ni msa' of nasab-saab. 25 Kfuun-kfuun sin of an mofun na'ko nen goe tnanan, Ma are' kuasat neno-tnana' anriik-raknok.’ 26 Narari te, na' are' atoni' sin niit Kau, An Mansian ia. Of Au 'uum u'ko neno-tunan. Ma are' too mfaun sin of niit Au kuasak, ma Au masak ok-oke'. 27 Narari te, Au of a'reun Uisneno In ameput-ameput na'ko neno-tunan, he nnaon nabuaba' are' tuaf-tuaf re' Au 'piir 'urair sin, na'ko pah-pin ni tuk-am-tuk, na'ko neon-saet tar antea neon-tees; na'ko ponain tar antea ha'nua'.”
Neno-neno susat anfain tanar neu Usif Yesus In amneman
28 “Au 'ait rais reta' na'ko hau. Karu hau naan in noon namnaut, naan ee nfain tanar nak oras faok-nais ii anhaumaken. 29 On nana msa', karu hi miit neno-neno susat naan neem, on re' saa' re' Au 'utoon 'urair ki naan, naan anfain tanar nak anhaumak he Au 'umeen. 30 Oras ia, amneen rek-reko! Na'ko hi arki ok-oke' re' ia, of anmui' tuaf re' fe'e nmon-nmoin fe', eti neno-neno susat naan antea. 31 Maski neno-tunan ma pah-pinan namneuk, mes Au 'uab ki of nabar-baar.”
Usif Yesus In amneman naan ma'nifa'
32 “Ka tiit fa tuaf es nahiin neno mee, ma reku mee, te Au of a'fain 'uum. Uisneno In ameput neno-tunan amsa' ka nahinin fa. Au tua ki msa', ka 'uhiin fa. Suma Au Ama' nmees nahiin. 33 Natuin rasi nana te, hii ro he mpanat rek-reko, natuin hii ka mihiin man fa reka' te in orsi ntea. 34 Of ka 'roo fa heen ate, Au 'nao 'usaitan kii. Mes of Au 'fain 'uum. Namnees on re' tuaf re' annao nporin in umi, neu bare 'ro-roo. In reun in ameput sin he npao in umi rek-reko. Ma in batin nfeen sin es-am-es ate nok in mepu. In naprenat apao eno' he anpanat rek-reko tar antea in fain neem. 35 Hii msa' ate, ro he mpao fai-manas, natuin hii ka mihiin fa oras mee te uim tuaf naan of anfain neem. He mansi nmabe oo, fai tnana sa oo, mansi na'pupu oo, ai' mansi nsae. Hii ka mihiin man fa neu he reka'. 36 Kas-kaisa' in neem nok askeken ate, in napein ki fe' amtuup amfiin ma mikoon. 37 Onaim ma saa' re' Au 'utoon neu kii, Au 'utoon amsa' neu atoni' bian sin am 'ak, ‘Hii ro he mpanat rek-reko he mseun Kau.’” Nok rasi nana te, Usif Yesus na'tu'ub In uaban nok In atoup-noni' sin nbin to'ef Saitun.
A'nakat sin namin ran-ma'nifa' he nheek Usif Yesus
1-2 Narari te, a'nakat-a'nakat pirsait Yahudi fe' namin ran-ma'nifa' he nheek Usif Yesus. Fin sin he nroor Goe te. Ma sin namin sraak am nak, “Kaisa' fe'! Kaisa' tmanaap he theek Je, fin neon ko' ni anhaumak neen. Kas-kaisa' too mfaun sin napoitan taisibu.” Sin na'uaban on naan, natuin nmeu te, atoni' Yahudi sin nateef nok neon ko'u ‘Paska’, ma ‘Fesat Utunu' ka Maseor Muur fa’. Nok neno-neno re' naan, sin fest ein he namnao nafani' oras ahunut, re' Uisneno napoitan be'i-na'i sin na'ko pah Masir.
Bifee re' anpoin Usif Yesus neik min fobona' ma'osa'
3 Anbi kuan Betania, anmui' atoin es, in kan ne nai' Simon. Nahunut ee, atoni' anmai'niis ne, natuin in nmui' meen nui'-atroki'. Mes oras ia, in nareko nrair. Onaim aa, oras neon ko' gui ka ntea fa fe', Nai' Yesus sin annaon ma nbukaen anbi nai' Simon in umi.Oras sin nbukaen, bifee jes neem nateef nok Nai' Yesus. In na' neik bot fat goes. Narai je nok min fobona' re' ma'osa'. Narari te, bifee naan an'ipu nporin botor naan in neon. Ma in na'peeh Nai' Yesus nok mina' naan, re' anfain tanar nak in hormaat Nai' Yesus. 4 Anmui' atoni' fauk re' nbukaen nok anbi naan. Ma oras sin niit bifee naan anmo'e on naan, sin nato'on ma na'uab nok be'o nak, “Huu! Bifee sa'na es re' ia, es na' in nporin nareuk min fobon ma'osa' re' ia!? 5 Reko nneis in na'sosa' mina' re' naan! Oke te, in nbait roit naan neu ama'mu'it sin! Natuin min fobona' naan in osni namnees nok kai tuaf es anbi toon es.” 6 Mes Nai' Yesus nataah sin am nak, “Hii kaisa' misusab bifee ia! Mko naan! Au 'mariin, natuin in op narair min fobona' neu Au aok. 7 Ama'mu'it sin nok ki neno-neno. Onaim hii bisa mturun sin nsuun oras. Mes Au te, of ka 'roo fa te, Au ka neu he 'ubua 'teni' fa 'ok kii. 8 Au moin ki ka 'roo fa hen. Ma bifee re' an'opan mina' fe'e na, in nparoir nain Au aok ii, on re' in kaki' nain fobona' neu Au aok ta'uk. 9 Mimnau rek-reko'! Rais Reko' Uisneno nanao bon nbi mee-mee, atoni' of nareta' bifee ia in mo'en arekon. Maut he atoni' namnau goe.”
Nai' Yudas naim ranan he na'sosa' Usif Yesus
10 Narari te, tuaf es na'ko atoup-noni' bo'es am nua, in kan ne nai' Yudas Iskariot; in npoi nnao ma naim a'nakat-a'nakat pirsait Yahudi sin, he na'sosa' Nai' Yesus neu sin. Oras in nateef nok sin, in nateaba' sin in sarit. 11 Oras a'nakat-a'nakat sin anneen nai' Yudas in uaban naan, sin marinan maten. Ma sin ba'ne nak, “Karu ho he mu'sosa' Nai' Yesus neu kai, hai of ambaen ko.” Narari te, nai' Yudas anpoi ma in murai naim ranan he nana'at Nai' Yesus neu sin.
Usif Yesus anbukae tuthae Paska nok In atoup-noni' sin
12 Narari te, Nai' Yesus In atoup-noni' sin neman ma nataan Ne mnak, “Aam! Neno ia, neon ko'u Paska. Onaim Ama' Ho roim mi he hai mnao mibarab baer fesat Paska anbi mee?” Neno naan, neno ahunut na'ko neon ko'u atoni' Yahudi. Anbi neno naan, sin biasa ntunun utunu' re' ka mamuur fa, ma sin nroron 'bib-kase msa'. 13 Narari te, Nai' Yesus anreun In atoup-noni' nua mnak, “Hii mnao mihuun nai meu kot naan. Anbi naan of hii miteef mok atoin es re' nasaah oe anbi kuis an es. Hii mnao mituin ee. 14 Ma karu in nnao ntaam neu umi mee te, hii mtaam mituin. Narari te, hii mitonan uim tuaf naan mak, ‘Aam! Hai Aam Tungguru ntoit bare he anmoe' fesat Paska nok In atoup-noni' sin.’ 15 Te atoni' naan of naruru' ki ke' manuan es, et umi ktuta' fafon. In nkikin narair ke'en naan. Hii nua ki arahaa mibarab bukae anbi naan.” 16 Oke te, sin nua sin annaon neu kot naan. Anbi naan, sin nateef nok are' sa'-saa' re' Nai' Yesus natoon nararin sin. Onaim sin nabarab he Nai' Yesus sin nbukaen fesat Paska anbi naan. Narari te, sin nua sin annao naskau Nai' Yesus nok atoup-noni' bian. 17 Oras mansi nmouf, Nai' Yesus nok In atoup-noni' bo'es am nua annaon neu bare naan. 18 Ntean bare naan, sin ntokon ma nbukae nabubuan. Oras sin nbukaen, Nai' Yesus na'uab am nak, “Hii mneen, oo! Anmui' tuaf es na'ko kii re' of na'sosa' Kau neu atoni' bian sin.” 19 Oras sin nneen on nana te, sin neek ein na'uun ein. Ma sin mese'-mese' te nataan Nai' Yesus am nak, “Aam! Re' Ho mteek ee naan, ka au fa, oo?” 20 Nai' Yesus nataah am nak, “Atoni re' narepa' utunu' nok Kau anbi pik-oef ia, in of es na'sosa' Kau. 21 Mimnau, joo! Au, An Mansian re' ia, ro he 'maet, on re' matu'i nrair et Uisneno In Sur Akninu'. Es nana te, mpantom! Atoni' re' na'sosa' Kau naan, of in sutai kun in areu' nii! Reko nneis bait in ain fe kais nahoin se.”
Usif Yesus natoon nak utunu' ma tua-min-kase anfain tanar he tamnau Goe
22 Oras sin nbukaen, Nai' Yesus nait naan utunu' fua es, ma antoit makasi neu Uisneno. Narari te, In nteib utunu' naan pisa'-pisa', ma In nfee neu In atoup-noni' sin. Ma In nak, “Utunu' re' ia, Au aok. Mait ma mbukae nai.” 23 Narari te, In nait naan kraa-mninut re' matua tua-min-kase. Ma In ntoit makasi neu Uisneno. Oke te, In 'nona' kraas naan neu In atoup-noni' sin, he sin ninun. 24 Ma In nak, “Tua-min-kase ia, Au naak. In of nat'oop he nfee honis neu too mfaun. Naa' re' ia, anfain tanar re' namnaub kit nak, saa' re' Uisneno nba'an naraar je naan, natonon es re' ia. Mait ma miun nai. 25 Amneen rek-reko! Murai mabe' ia, Au ka neu he 'inu 'teni' fa tua-min-kase ia. Au of 'inu 'tein ee oras Au Ama' abit neno-tunan antook ma naprenat.” 26 Narari te, sin sii siit es, he nbo'is Uisneno. Oke te, sin npoin fai naan, ma nnaon on to'ef Saitun.
Usif Yesus natoon nahuun nak nai' Petrus of natoot Ne
27 Oras sin nnaon nabuan, Nai' Yesus natoon nanin sin am nak, “Mabe' ia, hii arki of maen misaitan Kau. Fin matu'i nrair et Sur Akninu' Uisneno nak, ‘Uisneno of na'maet atukus, ma in 'bib-kase sin naen ansiksak nok.’ 28 Namneo, Au ro he 'maet. Mes karu Au 'moni' fain jen ate, Au of a'nao uhunun ki on pah Galilea.” 29 Narari te, nai' Petrus anraban am nak, “Aam! Maski sin naen nasaitan Ko, mes au ka neu he aenaf!” 30 Nai' Yesus nataah am nak, “Pe'u! Nati' mumnau! Mabe' ia, nahuun na'ko maun ni nkokre'on hana' nua, ho mutotan Kau era' teun mak, ho ka muhiin Kau fa!” 31 Mes nai' Petrus han ni nsae ma nak, “Kah fa, Aam! Karu Ho mmate te, au 'maet 'ok. Au ka neu he aen usaitan Ko fa, Aam!” Nai' Petrus in aok-bian sin am msa' es-esat na'uab on naan.
Usif Yesus an'onen anbi po'on Getsemani
32 Oke te, Nai' Yesus nok sin annao nkonon ma ntean po'nes et to'ef Saitun, in kan ne ‘Getsemani’. Onaim, Nai' Yesus natonan sin am nak, “Amtook mpao Kau mbi re' ia. Au he 'nao 'onen 'eu re' ne.” 33 Ma In anhaman neik nai' Petrus, nai' Yakobos, ma nai' Yohanis, he nnao nabua nok Ne. Murai na'ko oras naan, In neek ni nsuus ma ka ntainina' fa. 34 In natonan sin am nak, “Au neek ii nsuus anmaet! Au 'naben ate on re' he Au 'maet jen. Hii mtook ma mpao mbi re' ia.” 35-36 Narari te, In nao nteni' kre'o, ma anri'tuu ma n'onen am nak, “Ama' amanekat! Karu Ho mromi te, Au kaisa' a'sutai nana' renat tar he 'maet on re' ia.Au 'uhiin 'urair 'ak, ka tiit tan fa saa' re' Ho ka mmoe' man ee fa. Es nana te, karu reko, Ama' mait mu'roba' rais ha'mu'it re' ia na'ko Kau. Mes kaisa' natuin Au romik; so' reko mak natuin Ho romim.” 37 Narari te, In nao nfain neu In atoup-noni' teun sin, mes sin ntuup anfinin. Ma In npo' na'fena' sin, ma na'uab neu nai' Petrus, nak, “Hoe! Pe'u! Ho mtuup kum, oo? Au bi nee rabah. Mes he mpao kre'o msa', hi ka mibe'if! 38 Mumeu maat min naan fe'. Narari te, amfeen he mpao mok Kau! Hii neek mini nromin he hi mmoe' rais reko, mes hi aom mini n'oren. Es nana te, reko nneis hii m'onen, henati' karu suu' te neem ate, kaisa' niis kii.” 39 Narari te, Nai' Yesus annao n'onen anteni' haef es. In ntoit Uisneno ntein, he Ama' Uisneno nait na'roba' rais ha'mu'it re' naan na'ko Ne. 40 Narari te, In fain neem neu In atoup-noni' teun sin. Mes sin ntuup anfinin, fin sin maat keni nma'fenan re'-re'uf. Onaim In npo' nafena' antein sin. Mes sin ka nahini nten-tein ein fa, he nataah Ee nak saa'. 41 Narari te, Nai' Yesus annao nasaitan sin he n'onen hae' teun ni. Oke te, In fain neem, ma anpo' nafena' antein sin. In nak, “Ai ro hii fe' amtup-tuup fe'e, oo? Noo goah nai! Amfeen! Natuin atoni re' na'sosa' Kau, An Mansian ia, anhaumaken. Oras ia, sin he nheek ma nnona' Kau neu atoin amoe' re'uf sin. 42 Amfeen nai! Mkius nai! Atoni' re' na'sosa' Kau, nemeen. Im he tnao tateef tok sin!”
Anheek Usif Yesus
43 Oras Nai' Yesus fe' na'uab on nana te, nok askeken nai' Yudas nok atoni mfaun neman. Sin neik suin tuka' nok hau tuka', he nheek Nai' Yesus. Sin nmoe' rasi naan, fin sin napenin prenat na'ko a'nakat-a'nakat pirsait Yahudi sin. Sin arsin es re' a'nakat-a'nakat rasi pirsait, tunggur krei sin, ma mnais harat sin. 44 Nai' Yudas natonan nain sin nak, “Mkius rek-reko! Au 'neek sekau te, mheek je nai! In es re' hii mam-maam je ji!” Nai' Yudas anneek Usif Yesus 45 Onaim, oras nai' Yudas nok sin antean bare naan, in neem anhaek anbi Nai' Yesus matan. Ma in nasee Je mnak, “Aam, Tungguru!” Onaim, nai' Yudas anhoo ma nneek Ee. 46 Onaim, too mfaun sin neman ma nheek Nai' Yesus. 47 Mes Nai' Yesus In atoup-noni' es anfaik in benas, ma ansaip namouf atoin es in rukin noon. Atoin ruik papa' naan, ate na'ko A'nak Ko'u sin A'nakan pirsait Yahudi. 48 Narari te, Nai' Yesus na'uab nok tuaf-tuaf re' he nheek Je naan am nak, “On mee! Hii mak Au re' ia, atoin aburarut Kau, oo? Es na' hi iim he mheek Kau meik suni' ma hau tuka'? 49 Neno-neno te, Au 'unoni' kii anbi Uim Onen Uuf Uisneno, mes ka tiit fa tuaf es re' neem he nheek Kau. Im he mheek Kau nai! Natuin rasi naan matu'i nrair na'ko unu' et Sur Akninu' Uisneno.” 50 Nai' Yesus In atoup-noni' sin namtau nmaten. Ma fin sin naen nasait Ne nmees. 51 Anbi naan, anmui' atoin es re' fe' na' nanae, annao natuina' Nai' Yesus. In tainuus tai tuuk es. Atoni mfaun sin he nheek je msa', 52 mes sin arahaa nnaa' nanahaa in tais. Onaim in namtau nmaet, es na' in naen af-af'ah.
Sin neik Usif Yesus annao neu afeek rasi pirsait sin matak
53 Narari te, sin neik Nai' Yesus annao neu A'nak Ko'u pirsait Yahudi sin A'nakan in umi. Anbi naan, kaes ko'u sin nabuan nrarin. Sin arsin es re' a'nakat-a'nakat rasi pirsait, tunggur agama sin, ma mnais harat sin. 54 Oras sin nheek neik Nai' Yesus te, nai' Petrus in nnao natuin nok a'kor-koro', tar antea A'nak Ko'u pirsait Yahudi sin A'nakan in umi. In ntaam anbi umi naan in kintar, ma in ntook nok araar ai sin. 55 Anbi umi naan in nanan, a'nak pirsait sin na'uabin nok afeek rasi pirsait sin. Sin arsin namin bukti he nasaan Nai' Yesus, fin sin he nhukun na'maet Je. Mes sin ka napenin fa bukti sa'-saa'. 56 Ma fin sin no'en saksii namfau, he namouf Nai' Yesus. Mes sin uab keni nasurin es nok es. 57 Oke te, anmui' saksii bian re' anfeen anhaken ma na'uab puta-kriu ma nak, 58 “Hai mneen atoni' ia na'uab am nak, ‘Au of 'useer Uim Onen Uuf, re' nafen ee neik 'nimaf mansian. Ma neno tenu nteni' te, Au 'ufena 'ufani' Umi naan, mes ka paek fa nimaf mansian.’” 59 Mes sin uab keni nasurin es nok es. 60 Narari te, A'nak Ko'u pirsait Yahudi sin A'nakat anfeen anhaek, anbi are' afeek rasi sin matak. Ma in nataan Nai' Yesus am nak, “Too mfaun ni natraak Ko. Mes nansaa' am es Ho mtaa' kum?” 61 Mes Nai' Yesus ka ntoin fa fefa' mese. Onaim A'nak Ko'u pirsait Yahudi sin A'nakan nataan Ee, mnak, “Ho mutoon mita! In amneo ni, Ho re' ia, batur-batuur Kristus, Uisneno In Anah re' In nba'an naan je na'ko un-unu'?” 62 Nai' Yesus nataah am nak, “Namneo! In es re' Au re' ia. Hii arki of miit Kau, An Mansian ni, 'toko' bi neno-tunan, a'bi Uisneno In a'niman a'ne'u. Uisneno anmui' kuasat ma'tani' nneis! Au of 'ok Ne mnaa' aprenat bu'-bua'. Of namuni te, Au saun 'uum 'ok nope u'ko neno-tunan.” 63 Anneen Nai' Yesus In uaban nana te, A'nak Ko'u pirsait Yahudi sin A'nakan nato' ko'u, tar antea in npius nakrati' in baru mnanu'. Oke te, in koa' ma natonan are' afeek rasi sin, nak, “Hit kais tami 'teni' saksii! 64 Hii mneen meik hi rukim kum. In es neik non na'uab on naan, oo? In nait In tuan ni nfain Uisneno in Anah. In na're'uf Uisneno! Natuina' atoran rais pirsait, karu tuaf es nanees on nok Uisneno, in ro he nmaet! Onaim oras ia, hii he mifeek mak saa'?” Onaim sin nafekan ok-oke' nak, “Namneo, atoni' ia nsaan! Es nana te, ro he thukun tiis ne!” 65 Narari te, tuaf fauk neki ntaman ma naroon Nai' Yesus. Sin aum naan In maat kein ni, oke te, sin beso. Onaim sin nataan Ne mnak, “Ho mtakseer miit, sekau es antuuf ko?” Narari te, sin no'en apao Uim Onen Uuf sin, he neem ma neik Nai' Yesus. Oras sin neik Je nnao, sin npaas nafan-fain Ke.
Nai' Petrus natotan hae' teun
66-67 Oras naan, nai' Petrus fe' antook anbi kintar. Narari te, aet-bifee es na'ko A'nak Ko'u pirsait Yahudi sin A'nakan, neem niit nai' Petrus nraar ai. In nano' narek-reko' nai' Petrus in human, ma in na'uab am nak, “Fe'ena, ho mubua mok Nai' Yesus, atoni' Nasaret nana, oo? Tebe, oo?” 68 Mes nai' Petrus nataah am nak, “Kah fa, joo! Nansaa' am es ho mutaan on naan? Au ka 'uhiin Je fa!” Rarit nai' Petrus anpoi ma nhaek anbi eno' kono'. Nateef oras naan, man goe ankokreo'. 69 Narari te, aet-bifee naan niit anteni' nai' Petrus. Ma in natonan atoni mfaun nbi naan nak, “In re' ia, es amsa' na'ko sin.” 70 Mes nai' Petrus nraban am nak, nak, “Ho oni' mumaun! Au ka 'uhiin Je fa te!” Ka 'roo fa on nana te, tua' teet es re' anhaek anbi naan nak anteni' nai' Petrus nak, “Hoe! Ho fe' he mputa-kriu ma mak ho ka mubua mok sin fa! Hoi! Hii arki atoni' Galilea!” 71 Mes nai' Petrus anraban ma'tani' am nak, “Hoe! Au 'suup! Au ka 'uhiin fa atoni' naan!” 72 Nateef oras in na'uab nana te, man goe nkokreo' noo nua. Onaim nai' Petrus namnau naan Nai' Yesus In uaban fe'ena, nak, “Nahuun na'ko maun ni ankokre'on noo nua, mes ho mutotan Kau era' teun.” Oras namnau on nana te, nai' Petrus ankae nme'-me'ur.
Sin neik Usif Yesus he nateef nok Gubernor Pilatus
1 Neis noi nmeu, afeek rasi sin nnek-mesen he na'maet Nai' Yesus. Onaim sin nfuut neik Je he nateef nok Gubernor Pilatus. 2 Oras sin ntean Gubernor naan, in nataan Nai' Yesus am nak, “On mee? Namneo ho re' ia atoni' Yahudi sin Uisfe es ho, oo?” Nai' Yesus nataah am nak, “Batuur! Ama' Gubernor ho uabam naan, batuur.” 3 Narari te, a'nak pirsait sin na'uab ein nok Gubernor naan, nak, “Atoni ia In san ni mfau re'uf!” Ma sin nsoi' In san tein mese'-mese'. 4 Narari te, Gubernor naan nataan anteni' Nai' Yesus nak, “Ho ka mneen fa sin uab kein nana, oo? Sin nasaeb ko rais sanat mfaun. Bait ho mutaah miit fe'!” 5 Mes Nai' Yesus ka ntoen fa fefa' mese', tar antea Gubernor naan nsanmaak.
Gubernor Pilatus anhukun niis Usif Yesus
6 Ton-toon ate, karu atoni' Yahudi sin anmo'en fesat Paska, biasa too mfaun sin anpiir naan atoin hukun es, henati' ama' Gubernor nafeet ne na'ko hukun. 7 Oras naan, anmui' atoin hukun es, in kan ne nai' Barabas. Nahunu te sin heek je natuin in raban ana' aprenat Roma, ma in imsa' anroor atoni'. 8 Natuin fesat Paska naan anpaumaaken, es na' atoni mfaun sin annaon neu Gubernor Pilatus ma nhuun nein am nak, “Ama' Gubernor! Neon ko'u Paska anpaumaaken. Karu reko te, mufetin atoin hukun es on re' ton-toon.” 9 Narari te, Gubernor re antoin sin am nak, “On nana te! Au he 'ufetin sekau? Karu au 'ufeti' ki Usif atoni' Yahudi re' ia te, hi mromi', oo?” 10 Ama' Gubernor ee na'uab on naan, maski in nahiin narair nak a'nakat rasi pirsait sin neik Nai' Yesus neu ne, natuin sin nneek kein nameen anmaten neu Nai' Yesus. 11 Mes are' a'nakat rasi pirsait sin anhuitan too mfaun sin he sin ntoit neu ama' Gubernor am nak, “Hai ka mro-roim man Je fa! Mufetin kai nai' Barabas!” 12 Narari te, ama' Gubernor nataan anteni' sin am nak, “Karu on naan, au he 'moe' saa' neu Nai' Yesus re' sin nteek naan Je nak ‘Usif atoni' Yahudi’ ia?” 13 Onaim sin huun nein ok-oke' am nak, “Mu'mate He! Mkuus mu'peit Ee anbi hau nehe!” 14 Narari te, ama' Gubernor nataan am nak, “In saan ni saa'? Au 'uprikas 'urair Ii, mes au ka 'upein fa sanat sa'-saa'!” Mes sin arsin anhunun naher-heran nteni' am nak, “Mu'mate He! Mkuus Ee nai anbi hau nehe!” 15 Natuin ama' Gubernor in he nmarinab too mfaun sin nekak, es na' in nafetin nai' Barabas natuin sin romik. Narari te, in naprenat atoin apaot sin he nnao nbeos Nai' Yesus npaek kauboe. Nbeos naraar Je te, soraur sin neik Nai' Yesus annao he nkuus niis Ne anbi hau nehe.
Sorarus sin nbeos nafan-fani' Usif Yesus
16 Narari te, soraros sin anheer neik Nai' Yesus neu sin koat ee in kintar. Anbi naan, sin no'en nabuab sorarus puk nes, of oni' tuaf natun niim. 17 Ma sin nabaur Nai' Yesus neik baru mnanu' mas mee-umub, on re' usif sin nbiasa npake. Narari te, sin nait noon ma'aika' ma sin nrii' soeb es. Ma sin ntumnii' nataam soeb ma'aika' naan neu Nai' Yesus In a'nakan, sin he na'raur ein on re' he nasaeba' piru'-baru neu uisfe' goes. 18 Narari te, sin na'ruri' na'bees ma nakree' Te, ma sin nak, “Sramat, Aam Usi' Yahudi!” 19 Ma sin na'ruir ein napo-poen anbi Nai' Yesus In matan. Ma sin npuur nein hape fani-fani neu In human. Narari te, sin nte' nafan-fain Ke neik hau. 20 Sin na'kre'et narair Je on nana te, sin npu' nain baru mnanu' naan. Ma sin napakeb nafani' In pake sin. Narari te, sin neik Je npoi na'ko kot Yerusalem, henati' nkuus na'peit Ee anbi hau nehe tar anmaet.
Sin nkuus na'peti' Usif Yesus anbi hau nehe
21 Oras sin npoi nnaon na'ko Yerusalem, sin nateef nok atoin es anbi ran atnana', in fe' neem na'ko kot Kirene. In kan ne nai' Simon. In re' naan, nai' Alexander ma nai' Rufus sin amaf. In fe' he ntaam neu Yerusalem ate, sorarus sin anheer nan ee, ma na'seek ee he nasaah Nai' Yesus In hau nehe. 22 Sin nheer neik Nai' Yesus antea baar jes in kan ne Golgota. In a'moufn ii ‘bare 'nak-nuif’. 23 Anbi naan, sin he na'inu' Nai' Yesus neik raur ma'ninu' maseor re'u, hena' In naran menas. Mes In ka nroim fa he niun. 24-25 Narari te, sin nkuus natneneb Nai' Yesus anbi hau nehe. Onaim sin nahake' hau nehe naan, of oni' nreuk seo manas. Narari te, sorarus sin anheran sur ana' he nahinin neu sekau es napein Nai' Yesus In paek ne. 26 Narari te, sin ntuin anbi hau pisa' es, nak: “Atoni' ia, Usif too Yahudi ” Oke te, sin nkuus hau pisa' naan, anbi hau nehe neis faof, anhaumaak Nai' Yesus In a'nakan. Sin npaek re' rais matu'i naan he nhuuk Ne. 27 Anbi naan, sin nkuus na'mate msa' aburarut tuaf nua. Es anbi Nai' Yesus In aon bian a'ne'u, ma es antein anbi 'rii. 28 Nok rasi nana te, sin natuin saa' re' matu'i nain anbi Sur Akninu' Uisneno, re' nak, “Sin mo' Je nahuum on re' atoin amoe' re'uf.” 29 Are' atoni mfaun re' annao natuin ranan naan, niit Nai' Yesus makfiri' anbi hau nehe. Onaim sin kiu' nein ma nakre'et Nai' Yesus am nak, “Hoe! Ho es re' mak am Ho he mpukai mureo' Uim Onen Uuf Uisneno, rari te mufena' mufain ee anbi neno teun in nanan. 30 Maut he Ho msaun mu'ko hau nehe naan, he mufetin Ho tua man nai! Nok rasi nana te, na' hai mpirsai mak Ho re' ia Uisneno In Anah.” 31 Atoni' Yahudi sin a'nakat rasi pirsait nok tunggur-tunggur krei sin nakre'et Nai' Yesus am nak, “In nsoi ma nafetin atoni' bian sin, mes In ka nafetin naan fa In tuan. 32 In nteek In tuan ii nak ‘Kristus’, atoni' re' Uisneno anba'an nani na'ko un-unu'. Atoni' bian nak, In re' naan too Isra'el sin Usif. Karu namneo on nana te, maut he In saun na'ko hau nehe he hai miit fe'. Hena' hai mpirsai meu Ne.” Tuaf nua ein re' na'peti' sin bua'-bua' nok Nai' Yesus anbi sin hau nehe mese'-mese', sin imsa' nakre'et Nai' Yesus.
Usif Yesus anmaet
33 Narari te, meis okan na'aum bare naan, na'ko mansi na'puup, tar antea nreuk teun mansi nmaeb. 34 Oras nreuk tenu te, Nai' Yesus anhunun neik uab Aram am nak, “Eloi! Eloi! Lama sabaktani?” Re' neik hit uabi te nak, “Koi, Au Usi'! Koi, Au Uisneno! Nansaa' am es Ho mparakan Kau on re' ia?” 35 Tuaf fauk re' nhaumakan anbi naan, sin nneen Nai' Yesus In hanan. Onaim sin na'uab ein am nak, “Hoe! Hii mneen fe'! In nkoa' na'i nai' Elia, mafefa' kninu' Uisneno un-unu'.” 36 Narari te, tuaf es naen nait ani'-tei meto' ma anteep ee anbi raur ma'ninu'. Oke te, napuun ke anbi hau, ma naramib Nai' Yesus he nmuis. Ma atoni' naan nak, “Mpao he hit kius tiit! Kas-kaisa' na'i nai' Elia neem ma nasaun Ee na'ko hau nehe.” 37 Narari te, Nai' Yesus anhunun anteni', ma In maet. 38 Anbi Uim Onen Uuf, anmui' naan tai eon ko'u goes, nakfiir ee he nakiin Uisneno In Ke'e Kninu'. Oras Nai' Yesus snasni natfeek, tai eon ko'u naan natpisu' nbait nua na'ko faof tar antea a'piin. 39 Anbi Golgota, atoin a'nak paot es anhake nhaumaak Nai' Yesus In hau nehe. Oras in niit Nai' Yesus In a'maten, in naskeek. Rarit in nak, “Ai joo! Atoni' ia namneo-namneo Uisneno in Anah!” 40-41 Anmui' bifee fauk re' napeen Nai' Yesus In a'maten na'ko 'roo. Sin es re' nahunu te antuthae Nai' Yesus nok In atoup-noni' sin anbi pah Galilea. Sin es re' ain Salome, bi Maria na'ko kuan Makdala, nok ain Maria (re' nai' Yakobos muni' nok nai' Yoses sin ainaf), fin bifee mfaun bian anteni' re' neem nabu-buan nok Nai' Yesus neu Yerusalem.
Sin nataam Usif Yesus In ta'un neu noup fatu
42-43 Narari te, atoin es naim ranan he nasanu' Nai' Yesus In ta'un na'ko hau nehe. Atoni' naan in kan ne, nai' Yusuf. In neem na'ko kot Arimatea. In imsa' tuaf es na'ko pukan afeek rasi pirsait Yahudi. In neek ne reko. In imsa' anpao prenat Uisneno re' he neem. Nai' Yesus In maet nok neon nima'. Noka' te nateef neon onen atoni' Yahudi. Es na' neon nima' naan, nai' Yusuf he nasanu' nahunun Nai' Yesus In aon. Nai' Yusuf naheran in nekan, ma annao ntoit Nai' Yesus In ta'un na'ko Gubernor Pilatus. 44 Oras ama' Gubernor anneen nai' Yusuf in han totis nana te, in nsanmaak. Onaim in nak, “Ai joo! Atoni' naan anmaet rabah, oo! Anbi au tenbi te, au 'ak oni' ka fe'.” Narari te, in nreun tuaf he no'en a'nakat naan, in nataan am nak, “On mee? Nai' Yesus anmate' oo, ai' ka fe'?” 45 A'nak paot naan nataah am nak, “Namneo! In maet et fe'ena, tua.” Oras ama' Gubernor anneen on nana te, in fee manuan neu nai' Yusuf he nnao nasanu' Nai' Yesus In aon ta'un. Sin neik Usif Yesus In aon ta'un neu noup fatu 46 Narari te, nai' Yusuf in nao neu Golgota. Ma in nasanut Nai' Yesus In aon na'ko hau nehe. In aum uismina' naan neik tai fe'u re' ma'osa'. Neot naan, sin fe' anpahat narair noup fatu es anbi knet fatu. Narari te, sin nsorot nataam uismina' naan neu noup fatu. Onaim sin naritu' faut-been ko'u es, he na'eek naheran noup fatu naan. Narari te, nai' Yusuf nok atoni' sin anfanin. 47 Oras naan, bi Maria na'ko Makdala, ma ain Maria (nai' Yoses in ainaf), sin nokan amsa' anbi naan. Sin nua sin ankius narek-reko' bare re' sin natunu' Nai' Yesus In aon ta'un.
Usif Yesus anmoni nfain!
1 Noka' neon ne'e, atoni' Yahudi sin neon onen. Mansi nmouf narari te, bi Maria na'ko kuan Makdala, ma ain Maria (nai' Yakobos in ainaf), nok ain Salome, sin nnao nsosan min-fubona', he noka' te, sin nnaon nkaik ein neu Nai' Yesus In aon ta'un, natuin harat atoni' Yahudi. 2 Ma noka' snati nsae, sin teun sin annaon neu noup fatu naan. 3-4 Anbi rana tnana' sin na'uab ein am nak, “Amoo! Of sekau es ntitar na'roba' kit faut ko'u naan na'ko noup goe in enon? Hit teun kit ka neu ta'bei' je fa, fin fatu naan ko' re'uf!” Mes oras sin ntean bare naan, sin niit fatu naan natnanib narari. 5 Narari te, sin ntaman nkonon anbi noup fatu naan. Ma nok askeken, sin niit atoin muin fes anpaek muti' nariim, antook anbi sin abnapak a'ne'u. 6 Onaim atoin munif naan natonan sin am nak, “Hoe! Hi kais mimtau! Au 'uhiin 'ak hi iim he maim Nai' Yesus, atoni Nasaret, re' sin nakmaet narari anbi hau nehe naan. Mes In ka et fa ia. In anmoni nfain! Iim he hi mkius kim bare re' sin natunu' Nai' Yesus In aon ta'un naan. Ka tiit Ee fa heen! 7 Onaim hii mfain nai rab-raab! Amnao mitonan nai' Petrus nok sin am mak, Nai' Yesus anmoni nfain jen. In nao nahunun ki et pah Galilea. Maut he sin nateef nok Nai' Yesus anbiin, on re' nahunu te In natonan narair sin. Onaim hii mfain nai!” 8 Ma oras bifee naan niit noup ruman naan, sin naskeken. Onaim sin naen anpoin. Sin nfanin rab-raab. Sin npe'on ran ne te, sin ka natonan fa sekau-sekau, natuin sin namtau nmaten.
Usif Yesus nateef nok bi Maria na'ko Makdala
9 Anbi neno Nai' Yesus anfeen anfain naan, In nao nateef nahunun bi Maria na'ko Makdala, re' nahunu te Nai' Yesus anriu' napoitan niut re'uf hiut na'ko na. 10 Oras bi Maria nateef anrair nok Nai' Yesus, in nfain ma natonan atoni namfau re' nahunut sin natuin Nai' Yesus. Sin fe' nabu-buan nok susat makaet, natuin sin namnau Nai' Yesus In a'maten. 11 Rarit bi Maria natonan sin am nak, “Nansaa' am es hii fe' am suus? Kaisa' mnana'reen amteni', natuin Nai' Yesus anmoni nfain jen! Fe'e re' ia, na' au 'uteef 'ok Ne!” Mes sin arsin ntonin am nak, “Hee'e! Ho mupoi!”
Usif Yesus nakriir on anteni' neu tuaf nua
12 Narari te, Nai' Yesus In atoup-noni' nua annaon neu kuan es. Anbin rana tnana' te, Nai' Yesus nakriir on neu sin, mes In na'bani'. Mes ka 'roo fa on nana te, sin nahiin Je. 13 Narari te, sin nua sin anfanin ma natonan sin aok-bian am nak, “Hoe! Hii mneen fe'! Fe'ena hai miteef mok Nai' Yesus anbi ranan!” Mes sin aok-bian sin antonin am nak, “Heero! Hii kaisa' mipoi on naan!”
Usif Yesus nakriir on neu In atoup-noni' sin ok-oke'
14 Narari te, Nai' Yesus nateef nok In atoup-noni' bo'es am mese. Oras naan, sin ntokon ma nbukaen. In nak sin am nak, “Hoe! Hii 'nak-faut mein ii! Atoni' natoon anrair ki ma nak sin niit narair Kau neik sin matak, mes hii ka mpirsai fa joo! Hii mak, sin arsin napoin! Naa! Oras ia, Au 'eik nok 'uum. Namneo Au 'maet, mes oras ia, Au 'moni 'fain! Naa! Hii miit meik hi matam. 15 Es nana te, oras ia hii ro he mnao amfuun ma miteef pah-pinan ia, he mitonan too mfaun ok-oke' Au Rais Reko ia. 16 Sekau re' anpirsai neu Kau, ma nasrain, of Uisneno anfee ne 'honis, he in natua nabar-baar nok Uisneno anbi neno-tunan. Mes sekau re' ka npirsai fa, of in napein hukun, ma fin Uisneno nriu' napoi ne ma natua nabaar anbi mone'. 17 Ma atoni' re' anpirsai neu Kau, of sin mo'en rais sanmakat huma'-huma', henati' atoni mfaun sin nahinin nak sin kuasat naan neem na'ko Uisneno. Es na' nabei', sin nriu' niut re'uf sin neik Au kanak. Of Uisneno nmoe' sin he sin na'uaban neik uab bian re' sin ka nahiin je fa. 18 Onaim, karu sin nnaa' kaun re'uf, ai' sin niun naan raso, sin ka neu he nsirakok fa. Karu sin npohon amenat, of amenat naan nareok.”
Usif Yesus na'ait on neu sonaf neno-tunan
19 Ma oras In na'uab narair nok In atoup-noni' sin ate, Uisneno na'aiti' nasaeba' Nai' Yesus neu neno-tunan. Anbi bare naan, In nfain on Uisneno An Pirsa'i, he nua sin ntokon ma naprenat nabu-buan. 20 Narari te, In atoup-noni' sin annao natuin In a'prenat. Sin nnaon neu bare-bare ma natonan too mfaun antoom Nai' Yesus In Rais Reko. Onaim Uisneno anfee kuasat neu sin, henati' sin nmoe' rais sanmakat namfau re' Nai' Yesus natoon nararin sin. Ma too namfau anpirsai neu Ne, natuin sin nahinin nak Rais Reko naan ro namneo.
Nansaa' am es nai' Lukas antui reta' re' ia?
1-3 Aam Teofilus re' mahormata'. Hoore, tua. Tuaf amfaun ein ansoba' he ntui nitan reta' anmatoom nok rasin re' anjarin anbin hit sonak ma hit atnanak. Sin ntui rasin naan, anpaken reta' re' napniub on naba-baar aah na'ko kai neu hai nmurai na'ko oras unu', re' hai mihiin main sin na'ko Usif Yesus in tuaf ein re' anpaumaak Ee, ma na'ko tuaf bian amsa' re' nitan nok sin maatk ein kuuk. Are' reet ein naan, batuur-batuur natuin ahaa Uisneno In rais manba'an unu' naan. Onaim au 'parikas urair sin ntea namtiis, nmurai na'ko rasi naan in uun a'ba'an. Rarit au ufeek he 'tui urek-reko' sin utuin sin a'naok ein. Nok ranan naan, ho bisa muhiin batuur-batuur saa'-saa' re' anjarin nrarin. 4 Ma ho bisa mpirsai mmak, saa' re' tuaf-tuaf sin nareet ein naan, ka rais poi fa. Rasin naan, batuur-batuur anjarin, tua!
Uisneno In ameput sonaf neno tunan, natoon nain rasi anmatoom nok nai' Yohanis Asranit
5 Reta' re' ia in uun a'baa'n ii on nai: oras usif Herodes annaa' aprenat anbi propinsi Yudea, anmui' naan atoin es, kaan ee nai' Sakarias. In re' naan, a'naak rais pirsait Yahudi tuaf es. Ma in imsa' tuaf es na'ko pukan nai' Abia in a'naak pirsait ein. Nai' Sakarias in fee je, es re' bi Elisabet. Bi Elisabet naan na'ko sufa'-ka'uf a'naak pirsait ein amsa', natuin ka'o Musa in tataf nai' Harun in sufan-ka'un. 6 Sin nua sin nmonin natuin ahaa Uisneno In aprenat ma atoorn ein ok-oke'. Atoni' anhormaat sin imsa'. 7 Ma sin nua sin namnasin nrarin, mes ka nmu'in fa anah, natuin bi Elisabet naan, ankiu. 8 Neot es, nai' Sakarias nok in pukan Abia sin napenin tabu-mainuan he ntaman nmepun nbin Uim Onen Uuf nbin kota Yerusalem. 9 Natuin sin haart ii te, a'naak pirsait ein anheran suur ana', he nahinin nak, sekau es re' anmui' sapaaf he ntaam neu Uim Onen Uuf naan in Ke'en Akninu' nneis-neisi. Anbi naan, tuaf atamas naan ro he nout hau foo meni' anbi Uisneno In human ma In matan. Neno naan, nai' Sakarias es re' anheer naan suur ana' naan. 10 Rarit in ntaam neu Ke'en naan. Oras in nout hau foo meni' nbi Ke'en naan, too mfaun ein an'oen ein anbin kintal naan. 11 Nok askeken ate, Uisneno In ameput es neem na'ko sonaf neno tunan ma nhake nbi bare re' nout hau foo meni' naan in aon bian a'ne'u. 12 Ankius niit on naan ate, nai' Sakarias namtau nmaet, tar antea in ka nahiin fa he nmoe' saa'. 13 Mes ameput sonaf neno tunan naan na'uab am nak, “Sakarias! Kais mumtau! Fin Uisneno anneen anrair ho onen totis. Onaim ho fee jan of nahoni' ri'aan moen jes neu ko. Ho ro he mukaanb ee, nai' Yohanis. 14 Too mfaun ein of anmarinan bu'-bua' nok ki, natuin hi mihoni'. Ri'ana' re' naan, of anharineb ho nekam naan. 15 Uisneno In Asmaan Akniun' ee ankuaas naan ee, nmurai na'ko oras in nbi in ainf ee apun. In ro he nanunin are' kanan mniun mafu. Oras in na'nae neem ate, Uisneno anpaek je njair atoin ko'u. 16 In of anfuri' too Israelas amfaun he ntebi nfanin natuin sin Usif, es re' Uisneno. 17 In a'mo'en ma taos natai on re' ka'o Elia, Uisneno In mafefa kninu' unu' naan. In neem nahunun hit Usi'. In nabanit mahoint ein he nneek sin aanh ein. Ma tuaf-tuaf re' nkoit Uisneno, in nabanit sin amsa', he sin nabain ein anfain neman, ma natuin Uisneno In romin. Nok ranan naan, in nabarab sin neek ein he ntoup Usi' In amneman.” 18 Mes nai' Sakarias nataan ameput naan am nak, “Hee'! Naan of anjair on mee? Au 'ok au fee je mimnasi mrair jen! Au 'moe' on mee, he au bisa uhiin 'ak rasin naan of anjarin?” 19 Rarit ameput naan nataah am nak, “On nai! Au re' ia, nai' Gabrial, Uisneno In tua renu'. In neikn On anreun kau he 'uum utoon ko rais reko re' ia. 20 Mes ho ka mpirsai fa au uabk ein re' ia. Onaim tanar re' ho mtoit je ji, on nai! Ho maam aan of ka nakbero' reko fa karu ho mroim he mu'uab. Onaim ho ka bisa mu'uab fa saa'-saa', nmurai re' oras ia, tar antea hi mihoni' ri'ana' naan. Ho mkius kuum. Saa' re' au u'uab ee re' ia of anjair, nateef nok in oras.” 21 Too mfaun ein re' an'oen ein etan mone'-mainuan, antaka'naan ein, natuin nai' Sakarias ka npoi fa fe'. 22 Oras in npoi neem ate, in ka na'uab nahiin fa saa'-saa'. Rarit in npaek in a'niman he nsenen sin. Onaim sin nahinin nak, Uisneno nakrira' nrair je rais sanmakat es anbi Ke'en Akninu' nneis-neis naan. 23 Sin tabu-mainuan naan oek' ein, onaim nai' Sakarias antebi nfain neu in umi. 24-25 Ka 'roo-'roo fa te, bi Elisabet na'apu'. Onaim in ka npo-poi niit fa na'ko sin umi tar antea funan niim. In na'uab am nak, “Pures-bo'is neu Uisneno! Aijoo! Uisneno nakrira' In nekan arekot neu kau. Karu au upein anah, biak ein ka namae kau fa goen.”
Ameput Uisneno neem na'ko sonaf neno tunan ma nateef nok bi Maria
26 Oras bi Elisabet in aupn ee naan funan nee te, Uisneno nreek In ameput na'ko sonaf neno tunan nnao neu kuan es et propinsi Galilea. Kuan naan, kaan ee, Nasaret. Ameput naan, kaan ee nai' Gabrial. 27 Anbi kuan Nasaret anmui' ri' feot ao-'temef es, kaan ee bi Maria. Bi Maria anmanaa' nok atoin es, kaan ee nai' Yusuf. Nai' Yusuf re' naan, Usif nai' Daut in sufan-ka'un. On nai te, nai' Gabrial annao ma nateef nok bi noon Maria. 28 In nakrira' in tuan ee neu bi nona naan am nak, “Hoore, tua! Uisneno anpiir ma nbeit naan ko, he nmoe' naan kuun rais reok goes neu ko. Uisneno nok ko, Maria.” 29 Anneen on naan ate, bi Maria ntaka'nana', natuin ameput naan in uaban. In ka nahiin fa in a'moufn ii saa'. 30 Onaim ameput naan antuut antein am nak, “Maria! Kais mumtau. Fin Uisneno In sairt ii, nakrira' In nekan arekot neu ko. 31 Ka 'roo fa te, ho of mu'apu', rarit ho of muhoni' maan ri'aan moen jes. Ho ro he mukaanb Ee, Nai' Yesus. 32 In of anjair Atoin a'naet. Uisneno of anteek Ee mnak, ‘In re' naan, Au Aanh aa kuuk.’ Es re', Anah na'ko Uisneno re' A'raat Re'uf. Uisneno of nanaib Ee he nnaa' aprenat, nahuum on re' In beif-na'if usif nai' Daut. 33 In of es re' annaa' aprenat piut-piut neu too Israelas sin. Ma In aprenat naan nabar-baar.” 34 Mes bi Maria nataan nai' Gabrial am nak, “Au ka 'tuu-tuup 'iit fa fe' 'ok atoni'! Onaim au he u'apu' on mee?” 35 Rarit nai' Gabrial nataah am nak, “On nai! Uisneno In Asmaan Akniun' ee of neem neu ko. Ma Uisneno A'raat Re'uf In kuasan naan of anniup naan ko. Nok ranan naan, Ri'ana' re' of ho muhoni' maan Ee naan, kninu' batuur-batuur, natuin In re' naan, Uisneno In Anah. 36 Kais amsanmaak! Ho nonot-asar es, kaan ee bi Elisabet, na'apu' nrari msa'. Te kaah, in namnasi nrair. Onaim biak ein nak, in ka bisa nahoni' fa. Mes oras ia, in na'apu' funan nee jen. 37 Anbi Uisneno te, saa'-saa' ii bisa njair!” 38 Rarit bi Maria nataah am nak, “Reko, tua. Au re' ia Uisneno in ate kau, tua. Maut he are' saa'-saa' naan najairb ok natuin ho uabam naan. Au ubarab au tuak ii, he utuin ahaa Uisneno in romin, tua.” Rarit ameput sonaf neno tunan naan, nasaitan bi Maria.
Bi Maria nnao nmakius bi Elisabet
39-40 Ankoon neno fauk ate, bi Maria naen rabah na'ko Nasaret neu nai' Sakarias in kuan et a'toe'f ein propinsi Yudea. Antea nee te, in ntaam neu nai' Sakarias in umi. Onaim in nasee ma ntaeb bi Elisabet. 41 Oras bi Elisabet anneen bi Maria in haan buseet naan, ri'ana' re' et bi Elisabet in aupn ee, natiik. Ma Uisneno In Asmaan Akniun' ee neem ma ntaam neu bi Elisabet in tuan. 42 Rarit in na'uab naher-heer am nak, “Maria! Mansian ein of nait na'ratan ho kanam naan, anneis na'ko are' kanan bifee pah-pinan ia! Sin of nait na'ratan Ri'ana' re' et ho aupm aan! 43 Au tuak ii msa' nanaib on, natuin au Usi' In ainf ii neem nateef nok kau. 44 Ho maan musee te, ri'ana' re' au u'aup ee ia, natiik, natuin in nmariin. 45 Uisneno nakrira' nrair In nekan arekot neu ko, natuin ho mpirsai mmak, In nroim he nmoe' natuin In rais manba'an.”
Bi Maria anpures ma nbo'is Uisneno
46 Bi Maria nmurai na'uab am nak, “Na'ko au nekak nanan ia, au 'tuna' u'ratan Uisneno! 47 Au neek ii nmariin, natuin Uisneno nsoi nafetin naan kau! 48 In nkius ma ntae narek-reko' nrair kau, In aan renu'-aan reka' re' ka ma'osa' fa ia. Anmurai oras ia, are' mansian ein of na'uab ein ma nteek kau, bifee re' n'ua reok re'uf kau, 49 natuin Uisneno nmoe' rais sanmakat huma'-huma' neu kau. In imsa', Akuaas Re'uf ma Kniun Re'uf. 50 Uisneno nakrira' ma natoon rais kasian neu are' too mfaun re' anhormaat ma na'bees neu Ne, na'ko batan neu batan. 51 In npaek In kuasan, he ntaisibub tuaf-tuaf re' na'naeb ma naikas sin tuak ein. 52 In namouf tuaf-tuaf re' anna'an kuasa, natuin sin nabe'on ma npaas ok. Mes In nanaib tuaf-tuaf re' neek ein ma'nura' ma ba-baun ein. 53 In nhao ma nfait amnaahs ein tar antea namsenan, mes In nriu' napoitan atoin amui't ein, he sin npoin naon, ka npooh neikin fa saa'-saa'. 54 In nturun ma nbaab In too Israelas sin, ma nakrira' In rais kasian neu sin piut-piut. 55 Unu' te, In nahake' rais manba'an nok hit be'i-na'i sin, es re', ka'o Abraham ma in sufan-kau'n ein ok-oke'. Oras ia, rais manba'an naan nmafutu' ma nhaek nabar-baar.” 56 Na'uab anrair on naan ate, bi Maria natua nok bi Elisabet funan teun fe'. Rarit na' in nfain neu kuan Nasaret.
Bi Elisabet nahoni' nai' Yohanis
57 Antea in oors aa on naan ate, bi Elisabet nahoni' naan ri'aan moen jes. 58 Rasi naan nasiin on ma nabeon on neu in nonot-asar ma kuan naan in nanan, nak Uisneno nakrira' nrair In nekan arekot neu bi Elisabet, es naan ate In nfee ne ri'ana'. Onaim sin ar-arsin anmarinan amsa'. 59 Ri'ana' naan anmoin naan neno fanu te, sin na'heir ee natuin atoran harat atoin Yahudis. Sin he nakanab ri'ana' naan, nai' Sakarias, on re' in aamf ee kanan. 60 Mes in ainf ee npeen mates nak, “Ka on fa naan, tua! In kaan ee, ro he nai' Yohanis!” 61 Mes sin nataah ee mnak, “Nansaa' am es ho mpiir kanaf Yohanis? Ka tiit tain fa tuaf es na'ko hi nonot-asar re' anpaek kanaf naan!” 62 Onaim sin nsenen nai' Sakarias he nahiin in romin, he nakanab ri'ana' naan nak sekau. 63 Nai' Sakarias ansenen sin he ntoit hau bena' he ntui. Rarit sin nnoon ee hau bena'. Onaim in ntui mnak, “In kaan ee nai' Yohanis!” Onaim too mfaun ein ansanmakan ok-oke'. 64 Nok askeken ate, nai' Sakarias in maan amates naan nakbero'. Onaim in nsii ma nbo'is na'naeb Uisneno. 65 Tuaf-tuaf re' natuan nbin bare naan, ansanmakan ma namtaun amsa'. Onaim rasi naan nasiin on ma nabeon on na'ko tuaf neu tuaf, tar antea abitan propinsi Yudea re' natuan etan a'toe'f ein nahinin ok-oke'. 66 Are' aneen rasi naan nateenb ein nak, “Naan batuur een, Uisneno In kuasan nok ri'ana' naan. In of na'nae neem ate, in taos-mo'et on re' mee?”
Nai' Sakarias anpures ma nbo'is Uisneno
67 Rarit Uisneno In Asmaan Akniun' ee neem ma ntaam nbi nai' Sakarias in tuan. Onaim in na'uab am nak, 68 “Pures-bo'is neu Uisneno, too Israelas sin Usif! Natuin In nkoen On neem he nsoi naan In tuaf ein, maut he sin kais on re' ate. 69 Uisneno nait ma nanaib Tuaf es, re' In kuaasn ee ma'tani', he nsoi nafetin kit. In re' naan, usif nai' Daut in sufan-ka'un. 70 Uisneno nba'an nain rasi ia na'ko afi unu', anpaek In mafeef akniun' ein re' na'ki'in neu Ne. 71 Oras ia, In he nsoi nafetin kit, na'ko hit muusn ein, ma na'ko tuaf-tuaf re' sin neek ein namenan neu kit. 72-73 In nakrira' In nekan arekot neu hit be'i-na'i sin, natuin In namnau piut-piut neu In rais manba'an nok sin, re' In nfuut ma nahaek ee nok ka'o Abraham. 74 In nsoi nafetin anrair kit na'ko hit muusn ein, he hit bisa ta'ruri' ma ta'bees teu Ne, ma kais tamtau ttein. 75 In nsoi nafetin kit, he hit bisa tmoni kninu' ma mne'o piut-piut atbi In human ma In matan. 76 Yohanis! Ho re' ia, au aan hoin aa, ko. Tuaf of nahiin ko nak, ho re' ia, Uisneno A'raat Re'uf In mafefa kninu'. Ho of amnao ma mutoon meu too mfaun ein, he sin npira' ma nnona' sin a'niimk ein he ntoup Usi' In amneman. 77 Ho of amnao mukrira' ma mutoon ranan meu Uisneno Iin na, he sin nahinin nak, sin napenin saok sanat ma 'honis, natuin Uisneno nnoes ma nporin nain sin saant am penu sin. 78-79 Natuin Uisneno neekn ee ma'nura' ma n'oeteen neu kit, etun In nfee kit oras ma eti mainuan fe'u, nahuum on re' maan asaet-apisar re' neik me'u ma piin fe'u. Hit re' abitan metan-meis'okan in nanan, ma hit re' amtaus rais nitu-'maten kit, natuin hit ka taraem ok fa fe' tok Uisneno, of hit tapein paku ma me'u he nnao naat kit teu raan mamut ma rame'.” 80 Nai' Sakarias nbo'is anrair Uisneno. Onaim nai' Yohanis nmurai na'nae piut. Uisneno In Asmaan Akniun' ee nha'tain je piut. In na'nae neem on naan ate, in nnao natua nbi baer ruman na'roo na'ko kuan, tar antea oras in nmurai nait in mepu neu too Israelas sin.
Bi Maria nahonis Usif Yesus
1-2 Neot es, oras nai' Kirenius na'naak neu pah Siria, uis ko'u keser, kaan ee nai' Agustus, nakua kabin prenat nak, “Are' too re' anbin prenat Roma in pah, sin ar-arsin ro he nfanin on sin kuan ein mese'-mese', he ntuin kanaf anbin sensus!” Sensus naan fe' no mese' anbi prenat Roma, re' antui ma nsoi' too mfau-rutun naan. 3 Onaim too mfaun ein anfanin neun sin kuan, he nok antuin kanaf anbin sensus naan. 4-5 Oras naan, nai' Yusuf natua nbi kuan Nasaret et propinsi Galilea. In nmanaa' anrair nok bi noon es, kaan ee bi Maria, re' na'apu'. On nai te, nai' Yusuf naan, usif nai' Daut in sufan, onaim in ro he nfain neu nai' Daut in kota Betlehem et propinsi Yudea, he na' antui kanaf anbi sensus naan. Es naan ate, sin nua sin annaon neu kota Betlehem. 6 Oras sin nbin Betlehem ate, bi Maria in oras he nahoin ii antea goen. 7 Mes anbi bare naan, sin ka napenin fa ke'en anbi uim losmen sin. Onaim sin ntaman neu oo'f es. Rarit in nahonis in aan unu, ri' mone. Onaim sin ntainuus ee, ma natuup ee nbi mui't ein sin bare mnahat.
Uisneno natoon neu atuuks ein
8 Mabe' naan, anmui' naan atuuk mu'it fauk, re' anbe'en ma ntiut sin a'bibin ma 'bib-kasen. Sin nbe'en anbin amnera' nbi kota in kotin. 9 Nok askeken ate, sin niit Uisneno In ameupt es na'ko sonaf neno tunan. Rarit anmui' snaaf na'ko Uisneno ntana' natef-tefan sin, onaim sin namtau nmaten. 10 Mes ameput naan na'uab am nak, “Hi kais mimtau fe'! Amneen mirek-reko', joo! Fin au 'uum he utoon ki rais reok goes. Sekau-sekau re' anneen rasi ia, ro of anmarinan. 11 Rais reko ia nak on nai: Neno ia, anbi Betlehem, et usif nai' Daut in kota naan, anmui' naan bifee jes nahoni' nrair Kristus! Kristus naan, Tuaf re' Uisneno nba'an nain Je na'ko afi unu'. Uisneno nreek haefn Ee neem, he nsoi nafetin tuaf na'ko sin saant am penu sin! In re' ia, re' of tuaf anteek Ee nak, ‘Usi'’, fin are' prenat, In es re' annaa' sin! 12 Hi of mihiin Je on nai: hi of miit Ri'ana kruu'f es, re' antainuus naan Ee. In ntuup et mui't ein sin bare mnahat.” 13 Ameput naan na'uab anrair on naan ate, nok askeken, Uisneno In ameput bian na'kon sonaf neno tunan neman namfa-faun ma nabuan nok ne. Onaim sin npures ma nbo'is Uisneno neik siit am nak, 14 “Hai mtuna' ma mi'ratan Uisneno In kanan! In es re' antook ma naprenat et neon goe tunan a'raat re'uf. Uisneno nroim he narame' are' mansian ein pah-pinan, re' anharineb ma nhaan mau In nekan!” 15 Rarit Uisneno In ameupt ein ntebin nfanin neun sonaf neno tunan. Onaim atuuks ein naan na'uab ein am nak, “Hoe! Iim he tnao teu Betlehem he tkius tiit Ri'ana' nee fe'! Fin Uisneno anfee nrair hanaf naan neu kit.” 16 Rarit sin naenan rabah neun Betlehem. Onaim sin niit bi Maria ma nai' Yusuf. Ma sin niit Ri'ana kru'uf naan amsa' antuup et mui't ein sin bare mnahat. 17 Oras sin niit Ri'ana' naan, sin nmurai na'uab ein am nak, “Fe'e na Uisneno In ameupt ein neman na'kon sonaf neno tunan ma natoon kai anmatoom nok Ri'ana' re' ia!” Onaim sin npeon rasi naan tar namsoup. 18 Are' tuaf amfaun ansanmakan oras sin nneen atuuks ein naan sin uab ein. 19 Mes bi Maria nahiik ma napaan sin anbin in nekan, are' kanan rasi re' anjarin naan. Ma in natenab ma namnau he naim niit nak, in a'moufn ii saa'. 20 Rarit atuuks ein naan antebi nfanin neun sin mui't ein. Onaim sin npures ma nbo'is Uisneno In kanan. Sin ntotin makasi neu Ne, natuin sin nnenan ma nitan natai on re' saa' re' ameput Uisneno natoon ee jan.
Sin nakanab Ri'ana kru'uf naan, Nai' Yesus
21 Nahoni' nrair neno faun on naan ate, sin na'heri' Ri'ana kru'uf naan natuin ka'o Musa in atoran. Onaim in ainaf-amaf nakaanb Ee, ‘Nai' Yesus’. Kanaf naan es re' ameput na'ko sonaf neno tunan natoon ee neu sin, oras In ainf ee ka na'aups Ee fa fe'.
Sin neik Ri'ana kru'uf Nai' Yesus neu Uim Onen Uuf
22 Anmui' atoran es na'ko ka'o Musa nak, bifee re' nahoni' nrair neno bo' haa, ro he nnao nakninu' in tuan nbi Uim Onen Uuf natuin atoran harat. Nok ranan naan, sin bisa ntaman neu uim onen on re' nati' te sin nmo'-moe' je ji. Etun nai' Yusuf ma bi Maria nnaon neu kota Yerusalem he nmoe' natuin atoran harat naan. Sin naskau neik Ri'ana kru'uf naan neu Uim Onen Uuf, he nanaa't Ee njair Uisneno Iin ja. 23 Sin natuin Uisneno In atoran re' nak, “Bifee re' nahoni' ri'aan unu, karu mone te, in ro he nana'at ri'ana' naan njair Uisneno Iin ja.” 24 Natuin Uisneno In atoran, karu nana'at ri'ana' naan neu Uisneno te, in mahoin ein ro he nfeen fua'-turu' kor-kuku paasn es, ai' kor-keif tipu' nua. Etun nai' Yusuf ma bi Maria nmoe' natuin atoran naan.
A'naef nai' Simeon nak Nai' Yesus naan, es re' Kristus re' Uisneno anba'an nain Je
25-26 Oras naan, anmu'i 'naef es, kaan ee nai' Simeon, re' natua nbi kota Yerusalem. In re' naan, neek amne'o ma namnau Uisneno piut-piut. Uisneno In Asmaan Akniun' ee natoon ee mnak, in of niit Kristus fe', rarit na' in nmaet. Kristus naan, of es re' ansoi nafetin too Israelas sin. 27 Oras naan, Uisneno In Asmaan Akniun' ee neik nai' Simeon antaam neu Uim Onen Uuf. Oras in ntaam ate, in nateef nok Nai' Yesus In ainaf-amaf sin neik Je, he nanaa't Ee neu Uisneno he njair Iin ja. 28 Ankius Ri'ana naan ate, 'naef Simeon antoup Goe ma naskau Goe. Rarit in npures ma nanaib Uisneno mnak, 29 “Pures-bo'is neu Uisneno! Uisneno nmoe' ma ntao nrair natuin In rais manba'an neu kau. Onaim oras ia, Uisneno bisa nfee kau oras ma eti mainuan, he reko te, au 'maet kuuk nai 'bi mamut-aomina', 30 fin au 'iit urair Tuaf re' Uisneno nreek haefn Ee neem, he nsoi nafetin kit na'ko hit saant am penu sin! 31 Uisneno anroim he npaek Ri'ana' re' ia, he nsoi nafetin uuf-uuf ma pah-pah sin ok-oke'. 32 In on re' snaa pina', re' neik rais hormaat ma baisenut neu Uisneno In too pah Israelas sin. In on re' me'u makraha', re' ntana' ma naruru' Uisneno In ranan, neu are' uuf-uuf ma pah-pah bian sin.” 33 Annenan on naan ate, nai' Yusuf ma bi Maria feefk ein nomkakan, natuin nai' Simeon in uab ein naan re' anmatoom nok Ri'ana' naan. 34 Rarit nai' Simeon na'uab anfee tetus neu sin. Onaim in na'uab neu bi Maria mnak, “Yesus ainaf! Of too Israelas sin antorak ho Anah re' ia. Mes sin 'moe't ein neu Na jan, of namouf nafani' sin. Ho Anah re' ia, of anmoe' tuaf-tuaf amfaun sin neek ein anmarinan. 35 Nok ranan naan, Uisneno of anpukai napoitan too mfaun ein sin neek ein. Mes ho, Maria, ho of amnaben miit ma'nuka' ka aan'-ana' fa, nahuum on re' suin ee napau ho ansaom naan.”
Be'i bi Hana ntoit makasi neu Uisneno, natuin Nai' Yesus
36-37 Anmui' bifee mnais es anbi Uim Onen Uuf naan, kaan ee bi Hana. In nmoin naan toon bo' fanu mhaa (84) goen. In aamf ee, kaan ee nai' Fanual na'ko uuf nai' Aser. In nmatsao naan toon hitu te, moen je nmate nporin. Be'i bi Hana re' naan, Uisneno In mafefa kninu'. In meup goe, es re' an'onen ma nanaah on anbi Uim Onen Uuf fai-manas. 38 Oras nai' Simeon na'uab neu nai' Yusuf ma bi Maria te, bifee mnasi' naan neem anpaumak-maak. In anneen amsa' sin na'uab ein naan, rarit in npures Uisneno. Onaim in na'uab anmatoom nok Nai' Yesus neu tuaf-tuaf amfaun re' anpa-pao Usif re' Uisneno nba'an he nreek haefn Ee neem he nsoi nafetin too Israelas.
Nai' Yusuf sin nfanin neun kuan Nasaret
39 Oras nai' Yusuf ma bi Maria nmo'en nrarin natuin ka'o Musa in atoorn ein ok-oke' nbi kota Yerusalem ate, sin ntebin nfanin neun propinsi Galilea, neu sin kuan Nasaret. 40 Nai' Yesus na'nae, na'bei', anmanoe, ma nahiin rasi mfaun. Uisneno nakrira' In nekan arekot neu Ne msa'.
Ri'mone Nai' Yesus anbi Uim Onen Uuf
41 Toon-toon ate, nai' Yusuf ma bi Maria nnaon neu kota Yerusalem he nokan nbin fesat Paska. 42 Neot es, oras Nai' Yesus anmoin naan toon bo'es am nua, sin nnaon bu'-bua' neun Yerusalem he nokan anbin fesat Paska on re' nati' te, sin nmo'e. 43-44 Oras neon fesat Paska sin oek' ein, nai' Yusuf ma bi Maria anfanin neun kuan Nasaret. Sin nnaon bu'-bua' nok too mfaun ein re' he nfanin neun Galilea. Mes sin ka nahinin fa nak, Nai' Yesus namaik et Yerusalem. Sin nak of oni' In nnao nok In partein ngguin. Mes oras maans ee nmouf, sin ka niit Ee fa. Onaim sin nmurai namin neu-mneman. Sin natanan neu sin nonot-asar sin ma sin partein ngguin. 45 Mes natuin sin ka niit ai' nateef Ee fa, sin ntebi nfanin neun Yerusalem, he naim Je nbi nee. 46 Antean nee te, sin naim Je neu-mneman tar antea neno teun, na' sin niit Ee nbi Uim Onen Uuf ee In nanan. In ntoko ma nmakoin ein penit ma nmaktan-taan ein nok tunggur agama Yahudi sin. 47 Too mfaun ein re' annenan sin re' naan, anmasahun, natuin In nahiin batuur-batuur Uisneno In Suur Akniun' ee In afan. Ma In nataah nahiin haan taans ein nok reko msa'. 48 Ankius nitan on naan ate, in ainaf-amaf sin ansanmakan. Rarit In ainf ee nak, “Yesus! Nansaa' am es Ho mususab kai on re' ia? Hai nua kai Ho ama' mfuun mitef-tefan bare-bare mbi ranan ma mbi kota re' ia. Hai mtaka'nana' neu re' hai he miit Ko mbi mee!” 49 Mes Nai' Yesus nataah am nak, “Nansaa' am es hi msusa mmaet he maim Kau? Hi mihini, oo? Au 'mui' urusan et Au Ama' In Umi.” 50 Mes sin ka nahinin reko fa neu In sairt ii saa'. 51 Rarit sin ntebin nfanin neun kuan Nasaret. Nai' Yesus natuin In ainaf-amaf sin aprenat. Onaim In ainf ee nahiik ma napaan rasin naan ok-oke' nbi in nekan. 52 Onaim Nai' Yesus na'nae piut, In mahinif ma manoef na'baab on piut. Uisneno ma mansian sin arsin anneek Ee.
Nai' Yohanis Asranit nait in mepu
1-2 Oras naan, nai' Tiberius anjair uis ko'u keser ma nnaa' aprenat anbi pah Roma toon bo'es am niim een. Nai' Pontius Pilatus anjair gubernur anbi propinsi Yudea. Nai' Herodes anjair gubernur anbi propinsi Galilea. Nai' Herodes tataf nai' Felipus, anjair gubernur anbi propinsi Iturea ma propinsi Trakonitis. Ma nai' Lisanias anjair gubernur anbi propinsi Abilene. Oras naan amsa', nai' Hanas ma nai' Kayafas anjarin a'naak rais pirsait Yahudi sin a'naak ko'u nbi kota Yerusalem. Oras naan, nai' Yohanis, nai' Sakarias in anah, natua nbi baer ruman na'roo na'ko kuan. Anbi bare naan, Uisneno na'uab ma nbaasn ee. 3 Anneen anrair on naan ate, nai' Yohanis antaam neu are' kuan-kuan re' anpaumaak noe Yarden, ma natoon neu abitan naan am nak, “Hi ro he mmanaku' ma misaitan hi saant ein ok-oke', he Uisneno annoes nain sin. Rarit hi ro he misrain fe', he njair tanar nak hi mmarame' mfain mok Uisneno.” 4 Un-unu' te, Uisneno In mafefa kninu' ka'o Yesaya antui anmatoom nok nai' Yohanis re' ia mnak, “Anmui' tuaf re' of annao neu bare re' ka matua' fa, rarit anhunun ma nkoa' am nak, ‘Are' too mfaun ein ro he mibarab ma miroitan ranan, he mseun ma mtoup Usi' In amneman! Mikninu' ranan he mseun Goe. 5 Amkuub ma mnae mineer kefan ma koba'if. Amnae ma mhain mineer a'toe'f ein. Mineo ma minoon raan apeunt am abeot ein, Amha'eik raan koba'if ma faut putuk. 6 Maut he tuaf-tuaf na'ko uuf-uuf ma pah-pah, bisa nahinin nak, Uisneno nroim he nsoi nafetin mansian na'ko sin saant am penu sin.’ ” 7 Too mfaun neman na'kon mee-mee, ma ntoit nai' Yohanis he nasrain sin. Mes in naskara' sin im nak, “Hoe, aputa-kriu maufinu ki! Hi on re' kaun araut aan! Hi kais mitenab mak, hi mi'piis mipo-poi he hi bisa msoi maan om mi'ko Uisneno In hukun! Kahaf! Ka 'roo fa te, Uisneno nasanut hukun neu tuaf-tuaf re' na'piis napo-poi jah! 8 Hit tahiin tak ka'o Abraham naan, Uisneno in partei. Mes hi kais mitenab am mak, ‘Au ka upein fa hukun, natuin au re' ia ka'o Abraham in sufan.’ Hi mipein rasi naan na'ko mee? Naan ka bisa nturun ki fa. Natuin rasi naan ka nmoe' ki fa he mjair atoin neek amne'o. Uisneno bisa nmoe' fatun re' ia njarin ka'o Abraham in sufan. Au utoon ki, hee! Mikrira' mbi hi 'moinm ein naan nai, mak hi mnao misaitan hi saant ein ee jen, ma mfain iim mituin Uisneno. 9 Hi ro he mmoe' rais reko. Kaah fa te, Uisneno In hukun ma'feen ee nmouf neu ki on re' atoni' npaek fani he nnoo' hau na'ko in a'ba'an. On re' naan, tua! Roet ii ka mapake' fa, karu ka nmui' fa in fuaf arekot! Onaim reko nneis amnoo' goe, rarit tout goe he nputu nmaet.” 10 Rarit too mfaun ein nataan nai' Yohanis am nak, “Onaim hai he mmoe' on mee?” 11 On nai te, in nataah sin im nak, “Karu ho mmui' baru nua, nfee es meu tuaf re' ka nmui' fa baru. Karu ho mmu'i mnahat, mbait meu tuaf re' ka nmui' fa mnahat.” 12 Rarit ahoik beon guin neman ma ntoit nai' Yohanis he nasrain sin. Sin natanan am nak, “Aam tungguru! Hai he mmoe' on mee?” 13 In nataah am nak, “Hi roim ein es re' mputa-kriu. Mes nmurai oras ia, hi ro he mmeup nok neek amneot. Kais ambeos beo nneis-neis na'ko preent ii in atoran. Maut he too gui nbaen ein beos beo natai nok atoran.” 14 Sorarus fauk anbin naan amsa'. Sin nataan nai' Yohanis am nak, “Karu hai te, on mee? Hai ro he mmoe' on mee?” Rarit in nataah sin im nak, “Kais amhoik biak ein sin roit ein mituin hi roim ein naan. Kais amtu'iran biak ein tafi'-tafi'. Hi ro he misaeb sukuur ma minokab hi teenb ein nok ahaa hi kai ngguin naan.” 15 Anneen in uab ein naan ate, too mfaun ein anmaka'in ma na'se'-seo' guin am nak, “Hae! Kais-kaisa' nai' Yohanis re' ia, Kristus, re' Uisneno nba'an he nreek Ee neem na'ko unu' naan, oo!” 16 Mes nai' Yohanis nakain sin im nak, “Amneen mirek-reko'! Anmui' tuaf es, re' ma'tani' nneis na'ko kau of he neem. Maski au 'jari haa in aan renu' msa', au ka umnees 'ok Ne fa. Au suma bisa usrani haa ki 'paek oe, mes In of anmo'e nneis na'ko kau, natuin In naheun hi neekm ein nok Uisneno In Asmaan Akninu'. In of nakninu' ki, on re' ttoutu' nunu' npaek ai. 17 In nhukun tuaf re' anmo'e nsaan, nahuum on re' atoin tani re' anpaek anin he natpeneb maka' taum. Rarit in napaan maka' anbi 'poni, mes nout nakrati' maak ta'uk ma maak apa'. On naan amsa' Kristus of anhukun tuaf-tuaf re' anmo'en sanat, ma nait inporin sin neu ai marara' abar-barat.” 18 Nok ranan naan, nai' Yohanis namnaub too mfaun ein nok rasi huma'-huma', ma natoon Uisneno In Rais Reko neu sin. 19-20 Oras naan, nai' Yohanis anmurai na'uab maat-maat anmatoom nok nai' Herodes in a'mo'en. In rais ji on nai: nai' Herodes naan, gubernur et propinsi Galilea. In saant ein na'tupu nsae. Es, es re' in nheer naan in oirf ee fee, kaan ee bi Herodias. Te kaah, in oirf ee anmoin fe', ma ka nporin fa in fee bi Herodias fa fe'. Nai' Herodes in a'monin re' ka batuur fa naan, anmoe' nai' Yohanis nakain ee maat-maat, tar nai' Herodes anrenan. Rarit nai' Herodes anheek nai' Yohanis, ma nataam ee nbi bui.
Nai' Yohanis nasrain Usif Yesus
21 Unu' te, oras sin ka nheek fa nai' Yohanis fa fe', in nasrain too mfaun. Ma in nasrain Nai' Yesus amsa'. Rarit Nai' Yesus an'onen, onaim neon goe natfe'i. 22 Rarit Uisneno In Asmaan Akniun' ee nsaun neem neu Ne. Asmaan Akninu' naan In maasn ee nahuum on re' kor-kefi. Onaim anmui' hanaf na'ko neon goe mnak, “Ho re' ia, Au Aan neka'. Ho mmoe' Au nekak ia, nmariin piut.”
Usif Yesus In beif-na'if sin, natuin aam Yusuf in uuf ein
23 Oras Nai' Yesus anmurai natoon neu too mfaun ein anmatoom nok Uisneno In ranan, In oni' anmoin naan toon bo' teun goen. Tuaf amfaun nahinin nak, Nai' Yesus naan, nai' Yusuf in Anah. Nai' Yusuf in uuf ein, on nai: Nai' Yusuf in aamf ee, nai' Eli. 24 Nai' Eli in aamf ee, nai' Matat. Nai' Matat in aamf ee, nai' Lewi. Nai' Lewi in aamf ee, nai' Melki. Na' Melki in aamf ee, nai' Yanai. Nai' Yanai in aamf ee, nai' Yusuf. 25 Nai' Yusuf in aamf ee, nai' Matatias. Nai' Matatias in aamf ee, nai' Amos. Nai' Amos in aamf ee, nai' Nahum. Nai' Nahum in aamf ee, nai' Hesli. Nai' Hesli in aamf ee, nai' Nagai. 26 Nai' Nagai in aamf ee, nai' Maat. Nai' Maat in aamf ee, nai' Matatias. Nai' Matatias in aamf ee, nai' Semein. Nai' Semein in aamf ee, nai' Yosek. Nai' Yosek in aamf ee, nai' Yoda. 27 Nai' Yoda in aamf ee, nai' Yohanan. Nai' Yohanan in aamf ee, nai' Resa. Nai' Resa in aamf ee, nai' Serubabel. Nai' Serubabel in aamf ee, nai' Seltiel, Nai' Seltiel in aamf ee, nai' Neri. 28 Nai' Neri in aamf ee, nai' Melki. Nai' Melki in aamf ee, nai' Adi. Nai' Adi in aamf ee, nai' Kosam. Nai' Kosam in aamf ee, nai' Elmadam. Nai' Elmadam in aamf ee, nai' Er. 29 Nai' Er in aamf ee, nai' Yosua. Nai' Yosua in aamf ee, nai' Eliaser. Nai' Eliaser in aamf ee, nai' Yorim. Nai' Yorim in aamf ee, nai' Matat. Nai' Matat in aamf ee, nai' Lewi. 30 Nai' Lewi in aamf ee, nai' Simeon. Nai' Simeon in aamf ee, nai' Yahuda. Nai' Yahuda in aamf ee, nai' Yusuf. Nai' Yusuf in aamf ee, nai' Yonam. Nai' Yonam in aamf ee, nai' Elyakim. 31 Nai' Elyakim in aamf ee, nai' Melea. Nai' Melea in aamf ee, nai' Mena. Nai' Mena in aamf ee, nai' Matata. Nai' Matata in aamf ee, nai' Natan. Nai' Natan in aamf ee, nai' Daut. 32 Nai' Daut in aamf ee, nai' Isai. Nai' Isai in aamf ee, nai' Obet. Nai' Obet in aamf ee, nai' Bo'as. Nai' Bo'as in aamf ee, nai' Soleman. Nai' Soleman in aamf ee, nai' Nahason. 33 Nai' Nahason in aamf ee, nai' Aminadap. Nai' Aminadap in aamf ee, nai' Atmin. Nai' Atmin in aamf ee, nai' Arni. Nai' Arni in aamf ee, nai' Hesron. Nai' Hesron in aamf ee, nai' Peres. Nai' Peres in aamf ee, nai' Yahuda. 34 Nai' Yahuda in aamf ee, nai' Yakop. Nai' Yakop in aamf ee, nai' Isak. Nai' Isak in aamf ee, nai' Abraham. Nai' Abraham in aamf ee, nai' Tera. Nai' Tera in aamf ee, nai' Nahor. 35 Nai' Nahor in aamf ee, nai' Seruk. Nai' Seruk in aamf ee, nai' Rehu. Nai' Rehu in aamf ee, nai' Pelek. Nai' Pelek in aamf ee, nai' Eber. Nai' Eber in aamf ee, nai' Sela. 36 Nai' Sela in aamf ee, nai' Kenan. Nai' Kenan in aamf ee, nai' Arpaksat. Nai' Arpaksat in aamf ee, nai' Sem. Nai' Sem in aamf ee, nai' Noh. Nai' Noh in aamf ee, nai' Lamek. 37 Nai' Lamek in aamf ee, nai' Metusalak. Nai' Metusalak in aamf ee, nai' Hanok. Nai' Hanok in aamf ee, nai' Yaret. Nai' Yaret in aamf ee, nai' Maharael. Nai' Maharael in aamf ee, nai' Kenan. 38 Nai' Kenan in aamf ee, nai' Enos. Nai' Enos in aamf ee, nai' Set. Nai' Set in aamf ee, nai' Adam. Nai' Adam naan, Uisneno neikn On es anmo'e.
Niut reu'f ein sin a'naak kou' goe ansoba' Usif Yesus
1 Oras nai' Yohanis nasrani nrair Nai' Yesus ate, Nai' Yesus annao nasaitan noe Yarden. Uisneno In Asmaan Akniun' ee nok Ne. Rarit Asmaan Akniun' ee neik Je neu baer ruman na'roo na'ko kuan. 2 Nai' Yesus natua nbi bare naan, ntea neno bo' haa. Oras naan, In ka nbukae niit fa saa'-saa', tar antea In namnaah anmaet. Rarit niut reu'f ein sin a'naakt ee neem he nakreo nsoba' Nai' Yesus. 3 In na'uab nakreo nsoba' neu Nai' Yesus am nak, “Karu batuur-batuur Uisneno In Aanh aa Ko, Ho mmui' kuasa. Onaim mu'uab meu fatun re' ia, he njarin utunu', he Ho bisa muah sin.” 4 Mes Nai' Yesus nataah am nak, “Ho roim aan in reokn ii kaah een! Ho ka muhiin fa, oo? Matu'i et Uisneno In Suur Akninu' mnak, ‘Mansian ii ka nmoin fa arahaa na'ko mnahat!’ ” 5-6 Rarit a'naak nitu naan neik Nai' Yesus neu baer a'ratas, ma nakrira' neu Ne are' prenat pah-pinan ia no mes-mese' nok nain sin pina' ma kraha' sin ok-oke'. Rarit in nfuri' Nai' Yesus am nak, “Are' pareent ein sin kuasa naan, au ngguin ok-oke'! On naan amsa' sin pina' ma kraha' sin! Onaim au 'mui' hak he 'nona' 'eu sekau-sekau goah re' au 'romi. 7 Au 'roim he 'fee sin neu Ko. Suma Ho ro he mmoe' maan rais jes, he na' au 'nona' Ko goe. Ma'kafa'! Mu'bees meu kau. Es ahaa re' naan, tua!” 8 Mes Nai' Yesus nataah ee mnak, “Ho mupein rasi naan mu'ko mee? Anbi Uisneno In Suur Akniun' ee matu'i mnak, ‘Ho ro he mu'bees meu Uisneno nmees. Ma ho ro he mtuthae kuum Ee.’ ” 9 Rarit a'naak nitu naan neik Nai' Yesus antaam neu kota Yerusalem. Anbi naan, in nasaeb Nai' Yesus anbi Uim Onen Uuf ee in a'pupun. Rarit in na'uab am nak, “Karu Ho batuur-batuur Uisneno In Anah, mumoufut Ho tuam aan nai! 10 Fin matu'i et Uisneno In Suur Akniun' ee mnak, ‘Uisneno of anreun In ameupt ein na'kon sonaf neno tunan, he npafa' ma npanat Ko. 11 Sin of natnaat Ko, maut he Ho haem ein kais nasbeut fatu kre'-re'o msa'.’ ” 12 Mes Nai' Yesus nataah am nak, “Kais mu'kake' Kau. Fin matu'i et Uisneno In Suur Akniun' ee mnak, ‘Kais amsoba' Uisneno!’ ” 13 A'naak nitu naan ansoba' Nai' Yesus npaek ranan huma'-huma', mes ka niis Ee fa. Rarit In nnao nasaitan Nai' Yesus he npao ntein oras bian.
Usif Yesus annao neu Galilea, ma nmurai natoon Uisneno In Rais Reko
14 Rarit Nai' Yesus anfani ntein on propinsi Galilea, fin Uisneno In Asmaan Akniun' ee nfee Ne kuasa. Ka 'roo fa te, Nai' Yesus In kaan ee nmurai mateka' nbi abitan pah re' naan. 15 In nanoni' nbi atoin Yahudis sin uim oen ein anbin mee-mee. Onaim too mfaun ein anboi's Ee mnak, “Nai' Yesus naan, atoin ma'tani'!”
Sin ka ntoup fa Usif Yesus anbi kuan Nasaret
16 Neot es, Nai' Yesus neem anbi In kuan Nasaret. Nateef nok atoin Yahudis sin neon onen, re' sin nteek ee te, ‘neon Sabat’, In ntaam neu uim onen, on re' nati' te In nmo'e. Rarit In nhaek he nrees na'ko Uisneno In Suur Akninu'. 17 Onaim sin na'naa't Ee ka'o Yesaya in tuis. In nfei, he naim resat, onaim In nrees nak, 18 “Kuasat na'ko Uisneno In Asmaan ee, et Au. Etun In nruur ma nreek Kau, he utoon Uisneno In Rais Reko 'eu atoin kasian ein. In nreek haefan nrair Kau. he utoon am 'ak, abitan bui je, of npoin mainuan; afoort ein, of bisa niit anfanin; tuaf-tuaf re' napenin ha'mu'it, of anmonin nbin mainuan. 19 Fin oras ia, Uisneno In oors ii ntea goen, he nsoi nafetin Iin na.” 20 Anrees anrair tuis naan ate, Nai' Yesus annuun goe ma nnona' nafain' ee neu ameup ibadat, rarit In ntook. Abitan uim onen naan ok-oke' ankius Goe piut. 21 Rarit In na'uab neu sin im nak, “Saa' re' fe'e na hi mneen amrair je naan, oras ia najairb on.” 22 Rarit too mfaun ein re' anbin naan, nmurai na'uab nanaib Nai' Yesus am nak, “Hoe! Saa' re' fe'e na In na'uab ee ji, reokn ii kah! Mes nai' Usu Anah, ai'? Nansaa' am es on re' ia?” 23 Onaim Nai' Yesus na'uab neu sin am nak, “Hi of mihiin uab es nak, ‘Hoe, apairoir menas! Mureko' ho tuam aan fe'!’ Hi mpaek uab naan he m'oet Au uabak mak, ‘Nansaa' am es Ho ka mmoe' fa rais sanmakat es neu kai mbi ia, nahuum on re' Ho mmoe' je mbi kota Kapernaum?’ 24 In batuurn ii on nai: atoni' ka nroim fa he ntoup Uisneno In mafefa kninu' nbi in kuan ee kuun. 25-26 Tait i'tope' na'ko Uisneno In mafefa kninu', ka'o Elia. Neot es, uurn ii ka nmouf fa toon teun ma stena'. Oras naan, anmui' bifee banu' mfaun nbi pah Isra'el. Mes Uisneno ka nreek fa nai' Elia he nturun too Israelas sin. Mes Uisneno nreek ee he nnao nturun baun es anbi kuan Sarfat npaumaak kota Sidon. Te kaah, bifee banu' naan, ka atoin Yahudis fa. Mes in npirsai Uisneno In kuasan. 27 Tait i'tope' bian na'ko Uisneno In mafefa kninu', nai' Elisa. Oras naan, anmui' atoin Yahudis amfaun napenin meen nui-atroki' nbi pah Isra'el. Mes Uisneno ka nareko' sin fa. Uisneno suma nreun nai' Elisa he nareko' tuaf mees' aah, kaan ee nai' Na'aman. Te kaah, amenat naan atoin Sirias, ka atoin Yahudis fa. Mes in npirsai Uisneno In kuasan.” 28 Oras sin nneen Usif Yesus na'uab on naan ate, sin ar-arsin nek-neuk nisik neu Ne. 29 Rarit sin nfenan bu'-bua', ma nriu' napoitn Ee na'ko uim onen naan. Rarit sin nheer neik Je neu kuan ee ninin, he ntitar nataam Ee neu kefa mnanu' nbi naan. 30 Mes In suma nnao npoi kuun na'ko too mfaun ein naan sin atnaank ein, rarit annao nasaitan sin anbin bare naan.
Usif Yesus anriu' nitu na'ko tuaf es
31 Rarit Nai' Yesus annao neu kota Kapernaum et nefo Galilea in ninin. Ansuun neon onen sin ate, In nanoni' too mfaun anbin uim oen ein. 32 Too mfaun ein ansanmakan oras sin nneen In uaban naan, fin In nahiin batuur-batuur saa' re' In nanoni' sin naan in afan. 33 Neot es, oras Nai' Yesus nanoni' anbi uim onen, anmui' naan tuaf es anniut sae ma nmurai nkoa' naher-heer am nak, 34 “Hoe, Yesus, Atoin Nasaretas! Ho mmui' urusan saa' mok kai! Ho uum he mureu' miis kai, oo? Hai mihiin Ko. Ho re' ia, Atoni Kninu' re' Uisneno anba'an he nreek haefn Ee neem.” 35 Mes Nai' Yesus naskaar ee mnak, “Kais mufeef! Ampoi nai mu'ko atoni' naan!” Nok askeken ate, nitu naan nait anpesek atoni' naan neu afu, anbi too mfaun ein sin maatk ein. Anpesek anrair je on naan ate, nitu naan anpoi na'ko atoni' naan ma nasaitn ee, ma ka nameenb ee fa. 36 Too mfaun ein ansanmakan ok-oke' mnak, “Airoo! Atoni' ia In uabn ii anmui' kuasa ma'tani', joo! Tar antea niut reu'f ein amsa' natuin In aprenat, ma npoin na'ko tuaf-tuaf aniut saes ein!” 37 Rarit reta' anmatoom nok Nai' Yesus nasiin ok ma nabeon ok nfuun am natef-tefan bare naan.
Usif Yesus nareko' nai' Simon in ain babaf, ma tuaf bian antein
38 Oras sin npoin na'kon uim onen naan, Nai' Yesus annao neu atoin es in umi. Atoni' naan, kaan ee nai' Simon. Nai' Simon in ain baabf ee nmaniin ma nbeis ma'tani'. Rarit sin ntoit Nai' Yesus am nak, “Aam! Amturun kai he mureko' maan bifee mnais ee fe'!” 39 Nai' Yesus annao nhake nbi koi je matan, rarit nriu' napoitan maininit naan. Oras naan amsa', maininit naan namneuk nain na'ko bifee mnasi' naan. Rarit in nfeen ma nabarab bukaet neu sin. 40 Oras maans ee noi nmouf naan, too mfaun ein nmurai neman ma neikin amenat huma'-huma' neu Nai' Yesus. Rarit In ntao In a'niman neu sin ok-oke', ma nareko' sin. 41 Anbi ameent ein naan amsa' anmui' tuaf fauk re' anniut saen. Rarit Nai' Yesus naprenat niut reu'f ein naan he npoin na'kon tuaf-tuaf ein naan. Oras sin npoin, sin nhuun ein am nak, “Ho re' ia, Uisneno In Anah!” Fin niut reu'f ein naan nahiin Je nak, In re' naan, Kristus re' Uisneno anba'an nain Je he nreek Ee neem. Natuin rasi naan, es na' Nai' Yesus nakain sin nok ma'tani' he sin kaisa' na'uab ein hanaf mese' msa' anmatoom nok In tuan.
Usif Yesus annao natoon Rais Reko nbi uim oen ein
42 Oras snaat ee nsae te, Nai' Yesus anfeen ma nnao neu baer ruman es nbi kota in kotin. Too mfaun ein naim Je nbin mee-mee. Oras sin niit ma nateef nok Ne, sin na'uab ein am nak, “Aam. Reko te, Ho mutua mok kai mbi ia nai! Kais amnao mtein meu bare bian!” 43 Mes In nataah am nak, “Au ro he 'nao 'eu kuan bian he utoon Rais Reko anmatoom nok Uisneno In Aprenat. Fin Uisneno re' anhaef Kau gui, nak Au ro he 'meup mepu naan.” 44 Onaim In nmurai nnao, npoi ma ntaam na'ko kuan es neu kuan es, ma nanoni' tuaf anbin uim oen ein nbin propinsi Yudea.
Sin npukat naan ika' mfa-faun
1 Neot es, Nai' Yesus nanoni' tuaf amfaun anbi nefo Galilea in ninin. Too mfaun ein neman ma nromin he natniin Uisneno In Kabin ma Prenat. Sin namfa-faun tar antea sin nmasiitr ein ma nmabe'un. Onaim sin he noi nsaen Nai' Yesus. 2 Anpaumaak bare naan, anmui' naan akiif kai ika' nakninu' sin pukat nbin meto'. Onaim Nai' Yesus niit kofa' nua ruum ein anhaken nbin naan. 3 Es na'ko koof nua' ein naan, nai' Simon iin ja. Rarit Nai' Yesus ansae neu nai' Simon in kofa', ma na'uab neu nai' Simon he ntorak kofa' naan neu oe je kre'o. Onaim In ntoko ma nmurai nanoni' neu too mfaun ein naan. 4 Nanoni' nrari te, In na'uab neu nai' Simon am nak, “Simon! Meik ho kofa' ia meu neof goe tnaan ee kre'o, he ho musanut ho pukat ia meu naan. Hi of mipein ika' mfa-faun.” 5 Mes nai' Simon nataah am nak, “Usi' msa', Ho es-es! Hai mmeup fai jes a'teme-'teme, mes ika' fua' mese' msa' hai ka mipenif! Mes neu Aam, Ho es mu'uab on naan, maut he au 'soba' 'iit!” 6 Onaim sin nasanut pukat naan. Rarit sin he nheer nafain' ee, mes pukat naan nahenu nrair nok ika' tuunb es, tar antea pukat naan anmurai natkai. 7 Onaim nai' Simon ankoa' in partein ngguin na'kon kofa' bian he neman ntuurn ee. Rarit sin nnaun ika' ma nkuab ein neu kofa' nua tar antea nahenun, onaim ara kre'o te anreman. 8-10 Nai' Simon in partein akiif kai ika' sin, nai' Yakobus ma nai' Yohanis, aam Sebedius in aanh ein, anbin naan amsa'. Sin nsanmakan amsa', natuin sin napenin ika' mfa-faun naan. Oras nai' Simon Petrus niit saa' re' anjari nbi naan, in naen neem ma nri'tuu nbi Nai' Yesus In matan, ma na'uab am nak, “Au re' ia, tuaf es re' anmo'e nsaan amfau-rutu. Onaim reko nneis Usi' kais ampaumaak kau ntein.” Mes Nai' Yesus nataah am nak, “Kais mutenab naan kou'-ko'u. Au 'roim he 'paek ki. Hi arki re' ia, atoin amnaim ika'. Mes oras ia, Au he unoni' ki he maim tuaf he natuin Kau!” 11 Rarit sin nheer sin koof' ein ntean meto'. Onaim sin nnaon nasaitan are' saa'-saa', ma natuin Nai' Yesus.
Usif Yesus nareko' tuaf es, re' napein meen nui-atroki'
12 Anbi kuan es, Nai' Yesus nateef nok tuaf es, re' in aon ee no mes-mese' nameen nui-atroki'. Oras in niit Nai' Yesus, in nnao nri'tuu ma na'ruri' ntea afu nbi Nai' Yesus In matan. Onaim in nak, “Aam! Amturun maan kau fe', tua! Au uhiin 'ak, Ho bisa muneuk main au menas re' ia, he reko te, biak ein kais anmai'nisin kau. Asar Ho mroim, tua.” 13 Rarit Nai' Yesus ansoron In a'niman ma nreo' goe. Onaim In na'uab am nak, “Au 'roim! Mureok nai!” Na'uab anrair on naan ate, menas naan namneuk nain. 14 Onaim Nai' Yesus namnaub ee mnak, “Mumnau murek-reko'! Ho mureok goen, mes kais mutoon meu sekau-sekau! Ho ro he mutuin ka'o Musa in aprenat unu' naan. Onaim ho mnao meu a'naak rais pirsait, he in nparikas ho aom aan, he in nahiin nak, ho menas naan namneuk batuur-batuur, ai' kaah. Rarit ho mseun bain meik fua'-turu', he too mfaun ein nahinin batuur nak, ho mureok goen.” 15 Maski Nai' Yesus antaar ee on naan amsa', reta' anmatoom nok In kuasan naan, nasiin on ma nabeon on na'ko tuaf neu tuaf anbi mee-mee. Onaim too mfaun ein sin amneemk ein nasain on noe. Sin nmarinan he nneen In noin' ein. Rarit In nareko' tuaf amfaun na'kon sin menas huma'-huma'. 16 Mes Nai' Yesus nati' te nroim he napaisb On na'ko too mfaun ein, he nnao n'onen anbi baer ruman ma'koro'.
Usif Yesus nareko' ameen bua' tuaf es
17 Neot es, Nai' Yesus nanoni' tuaf anbi uim jes. Oras naan anmui' tuaf na'ko pukan partei pirsait Farisi ma tunggur agama tuaf fauk neman ma nokan nnenan neu Ne. Sin neman na'kon kuan-kuan anbin propinsi Galilea, propinsi Yudea, ma na'kon kota Yerusalem. Uisneno nfee kuasat neu Nai' Yesus he nareko' ameent ein. 18-19 Oras naan, anmui' naan tuaf fauk na'taeb neik tuaf es nameen bua' anbi 'boki'. Sin n'usaha ma'tani' he neik amenat naan, he Nai' Yesus nareok' ee. Mes umi naan na'keek mates nok mansian, tar antea he na'seek ok he ntaman amsa' ka bisa fa. Onaim sin neik amenat naan neu uim je porata' pakan. Rarit sin npukai porata' pakan naan, ma sin nasanut amenat naan nok nain in a'boki'. Sin nasaunt ee anbi too mfaun ein sin atnaank ein, nbi nain Nai' Yesus In matan. 20 Ankius on naan ate, Nai' Yesus nahiin neu sin npirsain nak, In bisa nareko' sin partei amenat naan. Onaim In na'uab neu ameen bua' naan am nak, “Ba'e! Au 'nose 'rair ho saant ein naan.” 21 Anneen Nai' Yesus na'uab on naan ate, atoin Farisis ma tunggur agaam ein nmurai nmaktaan ein am nak, “Hee'! Suma Uisneno Kuun es re' anmui' hak he nnoes nain sanat mansian. On nai te, in re' ia, sekau, tar antea nmoe' jon on re' Uisneno! Rasi ia, man'akan ma'tani'!” 22 Mes Nai' Yesus nahini ntea sin nekak nanan. Rarit In na'uab neu sin am nak, “Nansaa' am es hi mitenab mak Au re' ia u'uab rais man'akan? 23-24 Au re' ia, Mansian Batuur-Batuur. Ma Au 'mui' hak he 'fee ampon 'eu sanat mansian. Karu Au suma utoon 'eu ameen bua' ia m'ak ‘Au 'ampon urair ho sanat,’ hi ka miit fa Au kuasat anbi pah-pinan ia. Mes karu Au 'ak, ‘Amfeen nai! Mait ho 'boik aan, ma mfain nai.’ Karu in nfeen nain oras naan, na' hi miit Au kuasat. Es naan ate, Au he ureko' ameen bua' ia, maut he hi mihini msa' mak, Au 'mui' hak he 'ampon sanat mansian.” Onaim In nabani' nfain neu ameen bua' naan. Rarit na'uab neu ne mnak, “Ba'e! Amhaek nai! Mait ho 'boik aan, ma mnao nai!” 25 Nok askeken ate, amenat naan anfeen anhaek anbi too mfaun ein sin maatk ein. Rarit in nasaah naan kuun in a'boki'. Onaim in anpoi nnao nfain, ma nbo'is Uisneno. 26 Nitan on naan ate, sin ar-arsin ansanmakan. Rarit sin nanaib Uisneno In kaan ee na'rat-raat am nak, “Uisneno mapina'-makraha', joo! Neno ia hit tiit kuuk rais sanmakat es, teik hit maatk aa kuuk!”
Usif Yesus no'en nai' Lewi he natuin Ee
27 Ka 'roo fa te, Nai' Yesus anpoi na'ko umi naan, ma In nateef nok tua ahoik beo goes, antoko nbi baer beos beo. Tuaf naan, kaan ee nai' Lewi. Rarit Nai' Yesus nak ee mnak, “Uum he mutuin Kau!” 28 Anneen on naan ate, nai' Lewi anfeen nain oras naan, ma nnao nasaitan are' saa'-saa' anbin bare naan ok-oke', ma natuin Nai' Yesus. 29 Rarit nai' Lewi nmoe' fesat ko'u ma naskau Nai' Yesus neem nok anbi in umi. In naskau in partei ahoik beo ngguin ma tamu bian amsa', he sin nokan anbin fesat naan. 30 Mes anmui' tuaf fak-fauk na'ko partei pirsait Farisi, ma tunggur agaam ein, na'mua' ein anbin Nai' Yesus In atoup noin' ein am nak, “Nansaa' am es hi mtoko mmiah mibua mok atoin ka mapaek ein fa, on re' ahoik beo ma atoin reu'f ein? Atoin reok gui kais amseor gom mok tuaf on re' sin!” 31 Mes Nai' Yesus natonan sin am nak, “Ameent ein ro nperluun apairoir menas. Mes ao-miin ein ka nperluu goe fa. 32 Au 'uum he 'urus tuaf-tuaf re' ka mapaek ein fa. Mes Au ka 'uum fa, he 'urus tuaf-tuaf re' annaben in tuan ee te, reko!”
Tunggur agaam ein anmatoen nok Usif Yesus anmatoom nok rasi tanaah ok
33 Rarit tuaf-tuaf na'ko partei pirsait Farisi ma tunggur agaam ein na'mua' ein neun Nai' Yesus am nak, “On nai, Aam! Nai' Yohanis Asranit in atoup noin' ein biasa nanaah ok ma n'oen ein. Atoin Farisis sin atoup noin' ein on naan amsa'. Mes nansaa' am es ho atoup noin' ein naah-niun piut-piut on naan? Sin ka nanaah nahiin jok fa. Neu saa'?” 34 Mes Nai' Yesus nataah sin neik uab manporin am nak, “Hi mihini mrair, karu anmui' fesat kabin, taumn ee ka nanaah ok fa, mes sin nbukaen tar namsenan. Karu baroit atoin ee nbi naan fe', sin ro he nbukaen bu'-bua' tar namsenan. 35 Mes of neot es, karu tuaf bian nheek neik baroit atoin aan fe', na' in partein ngguin ansusan. Oras naan sin nanaah ok.” 36 Rarit Nai' Yesus anfee uab manporin es antein, nak, “Ka tiit fa tuaf re' nait tai fe'u ma npaap ee neu baru kroe atpisu'. Fin karu tsaef baru naan ate, tai fe'u re' fe' anpaap ee naan, of annuun gon, ma baru kroe atpisu' naan of natpisu' nkoon. 37-38 On naan amsa' atoni' ka narai fa tua min-kaes fe'u neu 'saap rapu'. Fin a'sapa' naan of anpee', onaim tua min-kase naan nsai ruum-ruum. Onaim tua min-kaes fe'u ro he tarai je neu 'saap fe'u. Nok ranan naan, Nai' Yesus nanoni' sin am nak, In noin fe'u kais amseor goe nok atoin Farisis sin noni' mnaa'. 39 Atoni' re' niun niit tua min-kase mnaa', ka nroim fa he niun tua min-kaes fe'u, natuin in nahini mnak, ‘Tua min-kase mnaa' naan, es re' aminat anneis-neisi!’ ”
Sin nakritik Usif Yesus sin anmatoom nok neno snasat na'ko mepu
1 Neot es, nateef nok atoin Yahudis sin neno snasat na'ko mepu, Nai' Yesus nok In atoup noin' ein annaon npe'on biak ein sin reen je ninin. Onaim In atoup noin' ein anheut naan maak-gandum in punin re' anbin sin maatk ein. Rarit sin anfoer sin, ma nahan. 2 Anbi naan, anmui' tuaf fak-fauk na'kon partei pirsait Farisi re' annaa' naher-heran atoran harat Yahudi. Ankius niit Nai' Yesus In atoup noin' ein anmo'en on naan ate, sin nakain Ee mnak, “Nansaa' am es Ho atoup noin' ein antanhai hit atoran pirsait? Sin nmepun nateef nok neno snasat! Amkius sin! Sin nheut maak-gandum. Kais on naan!” 3-4 Mes Nai' Yesus nataah sin am nak, “He tak on mee, joo? Hi ka mimnau fa ka'o Daut in reetn ee oo? Ka'o Daut nok iin ne, sin taik ein na'roton natuin sin namnahan nmaten. Onaim sin ntaman neun Uisneno In Tenar Onen ma naitin utunu' re' a'naak pirsait ein sin nana'at anrair sin neu Uisneno, ma sin nahan. Te kaah, suma a'naak pirsait ein es re' nabe'in he naah utuun ein naan. Tuaf bian sin ka bole fa. Rarit ka'o Daut sin nahan, mes ka tiit tain fa tuaf es he nasaan sin. Hi on re' ka mrees mihiin fa Uisneno In Suur Akninu'! 5 Amtakan hi ruikm ein he mneen mirek-reko'! Au re' ia, Mansian Batuur-batuur. Au 'mui' hak he ufeek 'ak, atoni' nabei' he nmoe' saa'-saa' anbi neno snasat.”
Usif Yesus nareko' tuaf es, re' in a'niman es ee nmaet
6 Neon goes, nateef nok neno snasat, Nai' Yesus annao nanoni' nbi uim onen. Anbi naan, anmui' atoin es, in a'niman es ee nmaet. 7 Anbi naan amsa', anmui' tunggur agama fak-fauk ma atoni' na'kon partei pirsait Farisi re' namin raan asraak he nakreo namouf Nai' Yesus. Rarit sin nnuu' Nai' Yesus, kar-karu In nareko' atoni' naan, nateef nok neno snasat. Nok ranan naan, sin bisa ntu'iirn Ee maat-maat. 8 Mes Nai' Yesus nahiin namneo-namneo neu sin sarit naan. Es naan ate, In no'en atoni' naan nak, “Ba'e! Uum amhaek meu re' ia fe'!” Onaim in nnao ma nhake nbi naan. 9 Rarit Nai' Yesus nataan abitan re' naan am nak, “Au he utaan 'aan ki fe'. Tatuin hit atoran rais pirsait, saa' na es re' hit he tmoe' je nateef nok neno snasat ta'ko mepu? Tmoe' reko, oo? Ai', tmoe' maufinu? Tsoi tafetin tuaf, aa oo? Ai', tareu' in a'monin?” 10 Rarit Nai' Yesus ankius natef-tefan sin, ma In na'uab neu atoni' naan am nak, “Amnona' ho 'nimam naan neem!” Rarit in nsoron in a'niman naan, ma nareok nain. 11 Ankius on naan ate, tuaf-tuaf re' anmusun Nai' Yesus nek-neuk nisik. Rarit sin nmurai nareon ein rais maufinu nak, “Hit ro he tami 'tein raan a'po'i bian, he na' bisa tamouf Goe!”
Usif Yesus anpiir naan atoup noni' bo'es am nua
12 Ka 'roo-'roo fa ntein, Nai' Yesus ansae neu 'to'ef es ma n'onen. In n'onen anbi naan fai jes a'teme. 13 Noka' kik-kiku on naan ate, In no'en naan In atoup noin' ein. Rarit na'ko sin re' naan, in nbetis naan tuaf bo'es am nua he njarin In haef ein. Tuaf ein re' In nbetis sin naan, es re': 14 Nai' Simon (re' nati' te, Nai' Yesus noe'n ee te nak, ‘Petrus’), nai' Anderias (nai' Simon orif), nai' Yakobus, nai' Yohanis (nai' Yakobus orif), nai' Felipus, nai' Bertolomeos, 15 nai' Mateos, nai' Tomas, nai' Yakobus (nai' Alfius in anah), nai' Simon (re' ntaam partei purtik Selot), 16 nai' Judas (nai' Yakobus in anah), ma nai' Judas Iskariot (re' of na'sosa' Usif Yesus).
Usif Yesus nareko' tuaf amfaun
17 Oras ansaun neman na'ko 'to'ef naan, Nai' Yesus nok In atoup noin' ein anhaken anbin amnera'. Too mfaun ein nabua nanin anbin naan. Sin neman na'kon propinsi Yudea, kota Yerusalem, ma kota nua et tais je ninin, esan re' Tirus ma Sidon. 18 Sin neman he nnenan kuuk na'kon Nai' Yesus, ma bian he ntotin he In nareko' amenat. Onaim In nareko' sin. In nareko' aniut saes ein, ma nriu' napoitan niut reu'f ein na'kon tuaf ein naan. 19 Sekau-sekau re' anroim he nreo' ai' nasbetu haa Nai' Yesus a'kreo' goah, anmui' kuasa npoi na'ko Na, ma nareko' sin.
Atoin ua-pa'e ma ua-reko, ma atoin apein siraak
20 Rarit Nai' Yesus nabani' neu In atoup noin' ein ma nanoni' sin am nak, “Atoin kasian ki! Hi m'ua-pae' ma m'ua-reok, natuin Uisneno naan, hi Usif arekot! 21 Atoin amnahas ki! Hi m'ua-pae' ma m'ua-reok, natuin Uisneno of napeet ma naseen ki. Akae pin-pinus ma neek asusat ki! Hi m'ua-pae' ma m'ua-reok, natuin hi of ammain ma mmariin. 22-23 Tuaf re' napein susat natuin in natuina' Kau, Mansian Batuur-batuur re' ia! Hi m'ua-pae' ma m'ua-reok, natuin Uisneno of anbaras neu ki et sonaf neno tunan. Maski atoni' nakan ki, ai' nareu' hi kaan foo menin, ai' anteir hae ki, ai' anriu' napoitan ki on re' atoin maufinu, hi m'ua-pae' ma m'ua-reok, natuin Uisneno of namnau ki mbi sonaf neno tunan. Onaim karu anmui' tuaf nasusab ki on naan, kais misusab hi neekm ein naan, mes amharineb hi neekm ein naan! Ma amtaikreit nok ma mmariin nok! Kais amsanmaak, natuin atoni' re' nasusab ki oras ia, sin beif-na'if sin es re' nasusab Uisneno In mafefa kniun' ein un-unu'. Onaim karu hi mipein susat nahuum on re' naan, mmoe' hi neekm ein anmarinan, natuin Uisneno of anbaras neu ki nho-hoen nbi sonaf neno tunan! 24 Mes neu atoin amu'it ki! Hi mipein siraak, natuin hi 'moinm ein ro marinan, suma antu'u nbi ia. 25 Amsenat ma apetas ki! Hi mipein siraak, natuin oras amnahas antaman ki. Atoin amain fare' ki! Hi mipein siraak, natuin ma'ne'at nmoe' ki mkae mpin-pinus. 26 Atoin asinmakan rais hormaat ki! Hi mipein siraak, natuin unu' te hi be'i-na'i sin, nbo'is ma nanaib amsa' mafeef poin guin!”
Hi ro he mneek hi musun
27 Rarit Nai' Yesus antuta ntein In uaban am nak, “Amtakan hi ruikm ein he mneen mirek-reko'! Ho ro he mneek ho musun, ma mmoe' 'moe' reko meu tuaf-tuaf re' neekn ee nameen neu ko. 28 Am'onen meu Uisneno he In nmoe' reko neu tuaf-tuaf re' ankaas ko. Ma mtoit Je he In nmoe' 'moe' reko neu tuaf-tuaf re' nmo'-moe' ko goan. 29 Karu anmui' tuaf anpaas ho 'kinum es, mkoon ee he npaas ho 'kinum bian naan. Karu ntetak naan ho baur mainikin, mnoon ee ho baur guan amsa'. 30 Karu anmui' tuaf antoit ho baer es, mnoon ee he. Ma karu anmui' tuaf nait neik ho baer es, maut he in npaar kuun ee. Kais amtoup mufani'! 31 Ho ro he mmoe' meu biak ein, natai on re' ho mroim he sin nmoe' saa' neu ko. 32 Ho mrom-roim he mneek ho noont ein kuum. Naan reko. Mes in arekon anneis-neis ji, saa'? Fin amoe' maufiun ein amsa' anneek sin tuaf ein kuuk! 33 Karu ho suma mmoe' reko meu tuaf-tuaf amoe' reko neu ko, in arekon anneis-neis ji, es re' mee? Fin amoe' maufiun ein anbaras 'moe' reko on naan amsa'. 34 Karu ho mutusab roit meu tuaf-tuaf re' bisa nbaen nafani' ko ho roit ein naan, in arekon anneis-neis ji, saa'? Fin amoe' maufiun ein natuusb ein roit neu tuaf bian, asar ramu noka'-nmeu te sin ntoup nafani' sin ite, nanookb ok. 35 Mes re' reko anneis-neis ji, on nai: amneek ho musu sin! Ma mmoe' 'moe' reko meu sin. Sin nperluu saa' ate, mutusab sin. Kais mutenab mak, sin of bisa nfee nafani' ko sin, ai' kaah. Nok ranan naan, Uisneno of anbaras neu ko. Ma ho mjair Uisneno A'raat Re'uf In anah. Natuin ho mmoin on re' ho Ama' re' anroim he nmoe' reko neu tuaf-tuaf amoe' maufinu. In anmoe' 'moe' reko msa' neu tuaf-tuaf re' ka ntoit nahiin fa makasi. 36 Onaim ho ro he mukrira' rais kasian meu tuaf bian, nahuum on re' ho Ama' abit sonaf neno tunan nakrira' In rais kasian neu ko.”
Kaisa' mukritik rafu'-rafu'
37 Nai' Yesus nanoni' piut am nak, “Kais mutaib tuaf, he tuaf kais nataib neu ko msa'. Kais mukritik tuaf, fin tuaf of nakritik nafani' neu ko msa'. Amnikan main tuaf ein sin saant ein, he sin annikan nain ho saant ein amsa'. 38 Karu ho mfee meu tuaf saa' re' sin nperluu, ho of amtoup mufani' sin. Fin of Uisneno an'ator he ho mtoup mufani' sin anho-hoen. Naan nahuum on re' tuaf an'oop aknaa' neu bree-ukur, rarit anhasu' ma nneen je. Rarit n'opa' ntein' ein tar antea naheun ma nat'oop. Re' ho mtoup sin naan, nahuum on re' naan. Karu ho mfee kre'-re'o, ho mtoup mufani' sin kre'o msa'. Mes karu ho mfee kou'-ko'u, ho mtoup mufani' sin anho-hoen.” 39 Nai' Yesus nanoni' npaek uab manporin amsa'. In nareta' am nak, “Afoort ii, ka neu he nakrira' fa ranan neu aforot bian. Fin sin nua sin of anroron ntaman neu kona'! 40 Aan muirt ii, ka neu he nneis fa in tungguru! Mes karu in natuin rek-reko in tunggur goe in nonin, in bisa natai nok in tungguru. 41 Ho mroim he mtanar tuaf-tuaf bian sin sanat aan'-ana'. Mes ho sanat re' kou'-kou' goan, ho mak, ka mnita' fa. Naan on re' ho mtae miit afu skuuk aan es anbi es in matan. Te kaah, hau tbaa kou' goes an'eek ho maat maan, mes ho ka mnaben fa! 42 Anmoe' on mee' m'es ho mubrain he mu'uab am mak, ‘Ba'e, uum he au 'fuu upoin afu skuku' na'ko ho maatm aan fe'.’ Te kaah, ho tuam aan kuum ka miit fa saa'-saa', natuin hau tuuk kou' goes an'toeb naan ho maatm ein naan! Hae! Ro ho batuur-batuur atoin aputa-kriut ko! Airoo! Mait imporin hau tbaat naan na'ko ho maatm ein fe'. Na' ho mkisu te nakninu', rarit na' amfuu afu skuuk ana' naan na'ko ho ba'e in matan.”
Teenb am reona' mamnita' nbi mo'et ma taos
43 Nai' Yesus na'uab anteni' rais manporin es am nak, “Ka neu fa he roet reok gui nafua fua re'uf. Ma ka neu fa he hau fua reok gui, npoi na'ko hau re'uf. 44 Atoni' bisa ntanar, karu roet es reko, ai' kahaf, es re' na'ko hau roet naan in fuan. Sekau-sekau goah nahinin nak, ka neu fa he atoni' nseu kaut ai' hau fua anggur, na'ko hau ma'aika'. 45 On naan amsa', atoin neek akninu' bisa nmoe' 'moe' arekot. Mes atoin neek meis'okan, nmoe' 'moe' maufinu. Fin na'ko atoni' in uaban, in nakrira' in tuan batuur.”
Ahinit ma amonot nafeen ein umi
46 Rarit Nai' Yesus antuta ntein am nak, “Hi mhaman Kau te, mak ‘Usi'’. Mes nansaa' am es hi ka mroim fa he mituin Au uab ein? 47 Atoni' re' neem ma natniin Kau, rarit anmoe' natuin Au uabak, in re' naan nahuum on re' 48 tuaf re' he nafena' uim reko ma'tain es. In nhain uim baarf ee ntaam antea auf manu' ai' mafatu' te, nasnasab. Rarit in nraem fanderen nmurai na'ko auf manu' ai' mafatu' naan, he na' in nafena' umi. Karu noe saok goe nsae, umi' naan antaa' aah, natuin in faut fanderen naan ma'tani'. 49 Mes atoni' re' anneen nok neek ao-biaf neu Au uabak, tuaf re' naan nahuum on re' he nafena' umi' rabah. In ka nraem fa fanderen, mes na'pesib umi naan anbi auf afa' anpaumaak noe je ninin. Onaim oras noe saok goe neem ate, nsaen ma nmemun, rarit anroi neik umi naan!”
Usif Yesus nareko' sorarus Roma es, in ameput
1 Nanoni' nrair on naan ate, Nai' Yesus ntebi nfain neu kota Kapernaum. 2 Anbi naan, anmui' a'naak sorarus Roma tuaf es. In nmui' naan ameput tuaf es, mapirsa'i. Ameput naan nameen, onaim he nmaet een. 3 Oras a'nakat naan anneen uab anmatoom nok Nai' Yesus, in nreek haefan tuaf na'ko atoin Yahudis sin he nnaon neu Nai' Yesus, he naskau Goe neem nareko' ameput naan. 4 Sin na'uab anfuir Nai' Yesus, he karu reko te, In neem nok sin he nareko' amenat naan. Sin nfuir Ee mnak, “Aam! Atoin Romas ia, atoin reko! In re' naan, Ho mturun maan ee te, ro pantas. 5 Fin In nafena' naan uim onen es neu kit, ma in nneek hit atoin Yahudis amsa'.” 6 Onaim Nai' Yesus natuin sin. Sin ka ntean fa fe' neu umi naan ate, a'nakat naan anreek haefan tuaf anteni' he neem neik beno neu Nai' Yesus am nak, “Usi' kais muhaeb Om amtein, natuin au ka pantas fa he 'seun Ko ma 'eik Ko 'eu au umi. 7-8 Ma au ka pantas fa msa' he 'baiseun Ko, tua. Au uhiin 'ak, Ho mmui' kuasa. Onaim asar Usi' Ho mu'uab ahaa mu'ko bare naan, ro tebes, au ameput naan of nareok nain. Au uhiin rasi ia, natuin au a'naet ein anmu'in kuasa he naprenat kau. Ma au 'mui' kuasa msa' he uprenat au soraurs ein. Karu au uprenat au soraur aan ein 'ak, ‘Meu nee!’ ro tebes in nnao neu nee. Karu au 'ak, ‘Meu ia!’ ro tebes in neem neu ia. Karu au 'reek au ameput es 'ak, ‘Ammeup ia!’ ro tebes in nmeup on re' naan. Onaim asar Usi' Ho mu'uab aah, ro tebes au ameput naan, nareok nain.” 9 Anneen on naan ate, Nai' Yesus ansanmaak. In nabani' neu tuaf-tuaf re' nok Ne jan. Rarit In nki'un ma na'uab am nak, “A'roo-'roo re' ia, Au ka 'iit 'iit fa tuaf es na'ko atoin Yahudis re' in pirsait ee na'kii' ma'tani' on re' atoin Romas re' ia!” 10 Onaim Nai' Yesus annao ntu'u haa bare naan. Rarit a'naak sorarus naan in partein ngguin ntebi nfanin. Antean a'nakat naan in uim je te, sin niit amenat naan nareko nrair.
Usif Yesus namonib nafani' baun es in anah
11 Noka' on naan ate, Nai' Yesus nok In atoup noin' ein, annaon neun kuan es, kaan ee, Nain. Too amfaun ein nok sin imsa'. 12 Oras sin he noi ntean neu kuan naan in eno' 'tamas, anmui' too puukn es anpoin na'kon kuan naan, he nnaon nsuban amates. Amates naan, baun es in aan moen mese'. 13 Oras Nai' Yesus ankius bifee banu' naan, In nkasian. Onaim In nhaan mau neu bifee banu' naan am nak, “Ain! Kais amkae!” 14 Rarit Nai' Yesus annao npaumak-maak neu sin, ma nre'o 'boki' na'ko amates naan. Onaim a'taeb sin anhaken akre'o. Rarit Nai' Yesus na'uab neu amates naan am nak, “Anah! Amfeen nai!” 15 Onaim ri'aan amates naan anmoni nfain, rarit anfeen ma ntook nain oras naan. Onaim in nmurai na'uab nok ahaekt ein re' anniub naan ee re' naan. Rarit Nai' Yesus na'uab neu bifee banu' naan am nak, “Ain! Ho aanh ii es ia.” 16 Abitan re' naan ok-oke' namtaun nmaten! Onaim sin nmurai nbo'is nanaib Uisneno mnak, “Uisneno nreek anrair In mafefa kninu' ma'tain es neu kit!” Tuaf bian nak, “Uisneno ankoen On neem anrair es hit atnanak, ma nakrira' In nekan arekot!” 17 Onaim rasi naan masina' ma matona' nbi propinsi Yudea, tar antea pah bian amsa'.
Nai' Yohanis Asranit nreek haef he nnao nateef Usif Yesus
18-20 Nai' Yohanis Asranit in atoup noin' ein anneen anrarin are' kanan rasi re' Nai' Yesus anmoe' sin. Rarit sin nnaon ma natonan nai' Yohanis anbi bui. Onaim in nreek haefan tuaf nua he nnaon ma nataan Nai' Yesus am nak, “Aam. Ho re' ia batuur-batuur Kristus, re' hai mpa-pao Goe ji, oo? Ai', hai ro he mpao mtein tuaf es?” Onaim sin nateef Nai' Yesus ate, sin nataan Ee on re' naan. 21 Oras haef ein anbin naan, Nai' Yesus nareko' too mfaun ein sin meens ein huma'-huma'. Ma In nriu' napoitan niut reu'f ein na'ko tuaf-tuaf re' anniut saen. Ma In nareko' afoort ein he nitan nfanin. 22 Rarit Nai' Yesus natoon neu nai' Yohanis in haef ein am nak, “Hi mnao mfain ma mitonan nai' Yohanis, are' kanan rasi re' hi miit ma mneen kiim sin, natai on re' Uisneno In mafefa kninu' nai' Yesaya antui mnak, ‘Aforot, niit anfain. Abuat, anfeen ma nnao. Ameen nui-atroki, nareko kninu'. Akosot, anneen anfain. Amates, anmoni nfain. Atoin kasian, anneen Rais Reko.’ 23 Amfain nai. Meu te mitonan nai' Yohanis am mak, ‘Atoni' re' ka namaeb on fa he ntoup Kau, sin of napenin amnisat.’ ” 24 Oras nai' Yohanis in haef ein antebi nfanin ate, Nai' Yesus na'uab neu too mfaun ein naan, anmatoom nok nai' Yohanis am nak, “Oras hi mnao maim nai' Yohanis ambi baer ruman na'roo na'ko kuan, hi teenb ein hi he miit ma miteef mok atoni' human on re' mee? Ka neu fa he hi miit ai' miteef atoin apeort es, on re' oo goan. Ain ee nfuu nabeub oo goan ate, in natun-tuin aah! 25 Ka neu fa he hi mnao he miit ai' miteef mok atoni' re' anpaek tai-ma'osa', natuin tuaf on re' naan, suma et ahaa sonaf! 26 Onaim hi mnao mkius sekau mbi nee? Hi mitenab mak, hi mnao maim Uisneno In mafefa kninu'? Batuur! Mes in re' naan, mafefa' re' ma'tain re'uf. 27 Fin antui nain je et Suur Akninu' anmatoom nok nai' Yohanis am nak, ‘Amneen! Au 'reek Au 'haef, he nraip ranan neu Ko.’ 28 Anbi pah-pinan ia, ka tiit tain fa tuaf es, re' ma'tani' neis na'ko nai' Yohanis. Mes anbi Uisneno In aprenat, tua a'oret ma'tani' nneis na'ko nai' Yohanis.” 29 Too mfaun re' anneen Nai' Yesus In uaban naan, nahini nrarin nak, Uisneno In ranan naan, raan a'honis batuur. Ahoik beo ngguin amsa' on naan. Natuin unu' te, nai' Yohanis nasrani nrair sin ma nanoni' sin. 30 Mes tuaf-tuaf na'ko partei pirsait Farisi ma ahiin rais hukun Yahudis sin, ka nromin fa he natuin Uisneno In romin. Etun sin ka nak fa nai' Yohanis he nasrain sin. 31 Rarit Nai' Yesus nataan am nak, “Au he utaib atoni' oras ia nok saa'? Sin re' naan, mansian human on re' mee? 32 Sin re' naan nahuum on re' muinf ein re' antok-tokon kuuk et a'masa'. Sin nmakoa' ein ma anmatoen am nak, ‘Hit tfuu bobe ma treuk ok-oke', mes hi ka mmarinin fa bso'ot. Rarit hai msii mbi be'et, mes hi ka mkae fa.’ 33 Nai' Yohanis Asranit ka niun fa tua min-kase, ma in biasa nanaah on amsa', mes hi mi'aakn ee mmak, ‘In nniut sae!’ 34 Mes oras ia, Au, Mansian Batuur-batuur, Au 'iun tua min-kase ma 'uah utunu' on re' biasa. On nai te, hi mak Kau mmak, ‘In re' naan, akomat! Amauf ma'tan-tain es antein! Amakua'noon nok ahoik beo ngguin! Anmapartei nok atoin ka mapaek ein fa! Ka ntae nahiin fa in tuan!’ 35 Mes hi mtanar kiim Au hanak re' ia, hee! Atoni' re' nahiin batuur-batuur, sin natuin Uisneno In romin.”
Usif Yesus anbukae fesat anbi nai' Simon in umi
36 Anbi kota naan, anmui' atoin Farisis es, kaan ee nai' Simon. Neot es, in naskau Nai' Yesus he neem anbukae nbi in umi. Antoupu nrair haan askaut naan ate, Nai' Yesus sin annaon ma ntokon he nbukaen. 37 Oras naan, anmui' bifee a'haek es anneen nak, Nai' Yesus nok anbukae et bare naan. Onaim in ntaam. In nnaa' neik miin foo meni' bootr es. Mina' ia in ma'osa' batuur. 38 In neem anpaumaak Nai' Yesus na'ko In kotin. Rarit in nri'tuu nbi Nai' Yesus In haek ein. Onaim in nkae npin-pinus, tar antea in nuu-pinu nmoufun anbin Nai' Yesus In haek ein. In nnoes Nai' Yesus In haek ein anpaek in a'naak fuun ein, ma anneek nafan-fani' Nai' Yesus In haek ein. Rarit in n'oop miin foo meni' naan neu Nai' Yesus In haek ein. 39 Nai' Simon nahiin batuur-batuur bifee naan in a'haken. Onaim in natenab anbi in nekan am nak, “Ia njair bukti es nak Nai' Yesus ia, ka Uisneno In mafefa kniun aa fa! Karu batuur-batuur Uisneno es anreek ma nhaef Ee neem, ro batuurn ii, Nai' Yesus nahiin nain bifee re' anreo' Goe re' ia, bifee a'hake'. Uisneno In mafefa kniun' ein, ka on fa In re' ia, natuin atoni' kniun ii, ka nabei' fa he npaumaak atoin 'oemetan sin!” 40 Mes Nai' Yesus antae niit nai' Simon In tenab. Onaim in na'uab am nak, “Airoo, Simon. Au he utoon ko rais jes.” Onaim nai' Simon nataah am nak, “Mu'uab kuum, Aam Tungguru.” 41 Onaim Nai' Yesus nfee uab manporin am nak, “Anmui' atoin es atusab roit neu tuaf bian. Neot es, in natusab roit neu tuaf nua. Tuaf es, in natusab roi muti' fua' natun niim (500). Es anteni', suma fua' bo' niim (50) aah. 42 Mes antea in oras he nafani' roit ein naan, tua nua' ein naan ka nabe'in fa. Onaim tua atusab roit naan ankasian sin nua sin. Es naan ate, in nafreib sin he kais anbaen sin tuus ein naan. Onaim karu tatuin aam Simon ho teenb aan ate, mee es re' anneek nanesib tua atusab roit naan?” 43 Nai' Simon nsenu nfeek am nak, “Ro amui' tuus amfaun naan!” Nai' Yesus nataah am nak, “Batuur, aam!” 44 Onaim In nabani' neu bifee naan, ma na'uab neu nai' Simon am nak, “Ho mkius miit bifee re' ia. Oras Au 'taam 'uum 'eu ho uim ji, ho ka mubarab fa oe he ho mufaun Au haek ein mutuin hit atoran harat. Mes bifee ia, nafaun Au haek ein npaek in maat nuu ngguin, rarit annoes nakninu' sin nok in a'naak fuun ein. 45 Ma fe'e na, oras ho mseun Kau meu ho umi ia, ho ka mneek Kau fa mutuin hit atoran harat. Mes anmurai na'ko oras Au 'taam a'rair i'bi umi ia, bifee re' ia anneek au haek ein piut-piut. 46 Aam Simon, ho mnikan main hit harat re' he mu'peeh taumn ein, oras Au 'taam 'uum fe'e na. Mes bifee ia, na'peeh Kau npaek miin foo meni' re' ma'osa' neu Au haek ein. 47 Simon, ho mneen rek-reko fe'! Bifee re' ia in saant ein ro mfau-rutun. Mes Uisneno nnose nrair sin, natuin in nakrira' in rais manekat ma sukuur kou'-ko'u neu Kau. Mes tuaf-tuaf re' annaben in tuan ee ka nmoe' fa sanat amfaun, in nnaben nak in ka nperluu fa he napein ampon ko'u. Etun in ka nmaneek nahiin fa, ma ka nasaeb nahiin fa sukuur neu Uisneno.” 48 Rarit Nai' Yesus ankius bifee naan am nak, “Au 'noes 'ain ho saant ein naan een!” 49 Abukaet ein re' nbin naan, anma'se'-seo' guin am nak, “Hae! In natenab nak In re' ia sekau?! In nabrain he nfee ampon neu atoin asanat, aa oo? Te kaah, suma Uisneno Kuun es re' nmui' hak he nnoes nain sanat mansian! Phueh!” 50 Mes Nai' Yesus na'uab neu bifee naan am nak, “Natuin ho mpirsai Kau, es naan ate, Uisneno nsoi naan ko. Amfain nai nok mamut-aomina'!”
Bifeen re' natuin Usif Yesus
1 Ka 'roo fa nteni' te, Nai' Yesus ma In atoup noin' ein, tuaf bo'es am nua, annaon nfuun am natefan neun kota-kota ma kuan-kuan anbin pah naan. In nnao natoon Uisneno In aprenat. Naan njair rais reko ma beno arekot neu sin. 2 Anbi pukan anaot ein naan, anmui' bifee fauk nokan amsa'. Bifeen re' ia, nameen nitan menas huma'-huma', ma bian anniut sae nitan. Mes Nai' Yesus nareko nrair sin ok-oke'. Tuaf es, es re' bi Maria na'ko kuan Makdala. Unu' te, Nai' Yesus anriu' napoitan niut re'uf hiut na'ko bi Maria re' ia. 3 Tuaf es, es re' bi Susana, rarit ain Yohana. Ain Yohana re' ia, aam Kusa in fee. Aam Kusa naan, a'naak urusan et usif Herodes in sonaf. Ma nmu'i ntein bifee mfaun re' nnaon nabu-buan nok Nai' Yesus sin. Bifeen re' ia, npaek kuuk sin roit he nataah baen neu Nai' Yesus oras In nbi raan atnana'.
Uab manporin anmatoom nok aseen fini nbi afu huma'-huma'
4 Neot es, too mfaun ein neman na'kon kuan-kuan he naim Nai' Yesus. Oras too mfaun ein nabua nrarin ate, Nai' Yesus nareta' sin anpaek uab manpoirn es nak, 5 “Anmui' naan atoin tani es, anseen fini nbi in rene. Fini bian anmoufun anbin ranan. Oras atoni' nnaon npe'on ranan naan, sin nteir finin naan. Rarit koorn ee neman ma nteo nain sin. 6 Fini bian anmoufun anbin auf faut-makhapi'. Fini naan nmurai natoor, mes namnenen, natuin ka napein fa oe. 7 Fini bian anmoufun anbin baer ma'aika'. Mes oras finin naan anmurai natoron, hau ma'aik ein nhaip na'maet sin. 8 Mes fini bian anteni' nmoufun anbin auf amriat. Finin ia natoron, anmonin tar antea nasratan ma nasufan, rarit nafuan. Finin re' ia, nafuan no fua' nautn es.” Nareta' nrair on naan ate, Nai' Yesus natu'ub uab manporin naan. In nak, “Hi maruik ein ki, onaim mitenab mirek-reko'!”
Usif Yesus natoon nak, nansaa' am es In nanoni' npaek uab manporin
9 Rarit Nai' Yesus In atoup noin' ein nataan uab manporin naan in a'moufun. 10 In nataah am nak, “On nai! Natuin hi mituin batuur-batuur meu Uisneno In romin, es naan ate, Au he utoon ki maat-maat, he hi mihiin nok ranan mee Uisneno he naprenat Iin na. Mes biak ein ka nfairoir fa Uisneno In romin. Etun Au unoni' sin 'eik uab manporin. Fin Uisneno In mafefa kninu' antui nain anmatoom nok atoin ein ia mnak, ‘Sin nitan nrarin, mes ka nromin fa he nahinin. Sin nnenan nrarin, mes ka nromin fa he nakeon.’ ”
Usif Yesus natoon uab manporin anmatoom fini naan in oten
11 Onaim Nai' Yesus natoon uab manporin naan in a'moufun am nak, “Finin naan, es re' Uisneno In Kabin ma Prenat. 12 Fini re' anmoufun anbin ranan, es re' tuaf-tuaf re' annenan Uisneno In Kabin ma Prenat, mes a'naak niut kou' goe neem ma ntetak neik Kabin ma Prenat naan na'ko sin neek ein. Nok ranan naan, sin ka npirsain fa neu Uisneno, ma sin ka napenin fa saok sanat ma 'honis. 13 Fini re' anmoufun anbin auf faut-makhapi', es re' tuaf-tuaf re' anneen Uisneno In Kabin ma Prenat nok neek marine. Mes ka na'ba'af. Sin nmurai npirsain, mes karu napenin susat, maan aa fa te, anmoufun. 14 Fini re' anmoufun anbin auf ma'aika' naan, es re' tuaf-tuaf re' annenan ma ntoup Uisneno In Kabin ma Prenat. Mes ka 'roo fa te, sin nnikan nain Kabin ma Prenat naan, natuin sin ntaisibun nok sin urusan huma'-huma' ma sin a'mui'k ein huma'-huma', ma sin a'monik re' he nmarin-riin aah. Etun sin neek pirsait naan, ka ma'afa' fa saa'-saa'. 15 Mes fini re' anmoufun anbin auf amriat naan, es re' tuaf-tuaf re' neek amne'o ma reko. Oras sin neen Uisneno In Kabin ma Prenat on naan ate, sin nahiik ma napaan nain sin anbin sin neek ein. Nok ranan naan, sin npirsain piut, ma nmo'en rais reko mfaun.”
Uab manporin anmatoom nok antoeb paku npake 'nai konat
16 Rarit Nai' Yesus na'uab antein am nak, “Ka neu fa he tout pauk ana', rarit tait i'nai konat ma ttobe. Ma ka tiit tain fa tuaf he nateek paku nbi haark ee nupun. Natuin karu nmoe' on naan ate, of napenin me'u on mee ntein? Paku re' mapake', es re' toutu trair je te, tateek je nbi baer a'ratas, he in asnaan ee ntana' tuaf-tuaf re' antaman neu umi. 17 Are' saa'-saa' re' ma'koro' oras ia, of mamnita'. Ma are' kanan rasi re' ka mahini' fa oras ia, of mahiin ein. 18 Onaim hi ro he mitenab mirek-reko' rasin re' ia. Tuaf re' he naim batuur-batuur Uisneno In romin, in mahinif ma manoef of nafaof gon piut. Mes tuaf re' ka nrae natuin fa Uisneno In romin, in moon goe of nafaof gon piut.”
Usif Yesus In nonot-asar batuur ein
19 Neot es, Nai' Yesus na'uab nok too mfaun ein. On nai te, In ainaf ma In oirf ein neman he nateef nok Ne. Mes sin ka bisa npaumak-maak Ee fa, natuin too gui kah een. 20 Onaim anmui' tuaf annao natonan Nai' Yesus am nak, “Aam! Ho aina' ma sin Ho ori' sin etan mone'. Sin he nateef nok Ko, tua.” 21 Onaim In nataah am nak, “Tua. Mes on nai. Au aina' ma Au aok-bian sin batuur-batuur ii, es re' tuaf-tuaf re' anneen ma natniin Uisneno In Kabin ma Prenat, rarit anmoe' natuin sin.”
Usif Yesus nasnasab ain ko'u
22 Neot es, Nai' Yesus na'uab neu In atoup noin' ein am nak, “Iim he tsae kofa' he traak teu neof gui panin.” Onaim sin nsaen neu kofa' es, ma nmurai nnaon. 23 Oras sin nnaon on naan ate, Nai' Yesus antuup. Ka 'roo fa te, ain kou' gui neem. Oikn ein anpesan antaman neu kofa' naan. Sin he napenin siraak ein. 24 Ankisun on naan ate, atoup noin' ein anpoo' nafena' Nai' Yesus am nak, “Usi'! Usi'! Amfeen fe'! Hit he treem atmaet jen!” Onaim Nai' Yesus anfeen. Rarit in nakain anin ma okin naan am nak, “Misnaas nai!” Onaim okin am anin nasnaas nanin oras naan. 25 Rarit In na'uab neu In atoup noin' ein am nak, “Nansaa' am es hi ka mpirsai fa fe' meu Kau?” Sin namtaun ma nsanmakan. Onaim sin nmaktaan ein am nak, “Hae! Nai' Yesus ia, sekau? Anmoe' on mee m'es ain na' natniin Ee? Oik na' natniin Ee?”
Usif Yesus anriu' niut re'uf na'ko amaunut
26 Ka 'roo fa te, sin ntean Garasa nbi nefo Galilea in panin. 27-29 Anbi bare naan, anmui' atoin es re' niut reu'f ein ansaen ee 'roo-'roo goen. In ka nmui' fa umi. Onaim in natua nbi haa niut naet ein. Neno-neno te, in nnao neu-mneem ma n'aaf-aaf aah. Niut reu'f ein napreent ee piut-piut. Biak ein anfuut goe fani-fani npaken korenit ma niit besi, mes in ntiup nafeek sin. Rarit niutn ee na'seek ee he naen neu baer ruman na'roo na'ko kuan. Oras Nai' Yesus sin ansanun na'kon kofa', amaunut naan neem an'ain Je. Rarit amaunut naan ankoa' ma nsuban in tuan ee neu Nai' Yesus In haen. Onaim Nai' Yesus naprenat am nak, “Hoe nitu! Ampoi mu'ko atoni' ia!” Onaim amaunut naan nkoa' am nak, “Hoe, kais musein kau! Natuin au uhiin 'ak Ho re' ia, Nai' Yesus, Uisneno A'raat Re'uf In Anah! Ho kais amha'mui' kau!” 30 Nai' Yesus nataan ee mnak, “Ho kaan maan sekau?” Onaim nitu naan nataah am nak, “Legion, natuin hai mimfau, on re' sorarus nifun-nifun.” In na'uab on naan, natuin nmui' nitu mfaun antaman ma natuan et na. 31 Nitun naan antoit Nai' Yesus piut he reko te, kais anreun sin he nnaon neu Koon Ha'mu'it, es re' bare re' npaek je he ntahan kuasat maufinu sin. 32 Mes anpaumak-maak bare naan, anmui' naan fafi pukan kou' goes an'oobn ein anbin a'toe'f ee ninin. Onaim nitun naan antotin Nai' Yesus am nak, “Amreun kai he hai mtaam meu fafin nee!” Onaim Nai' Yesus anroim natuin sin. 33 Rarit nitun naan anpoin nnaon nasaitan atoni' naan, ma ntaman neun fafin naan. Fafin naan ok-oke' njarin faif amaunut, rarit sin naenan nsiksaakn ok ma nasroro nsanun na'kon 'to'ef naan, ma nmoufun ntaman na'kon aisanut neun neof goe nanan. Onaim sin nreem anmaten ok-oke'. 34 Ankius nitan on naan ate, ahao fafin naan naenan neun kuan-kuan anbin naan, ma natonan abitan baren naan ok-oke'. 35 Anneen anrarin sin uab ein on naan ate, too mfaun ein neman neu bare naan. Sin he nitan kuuk saa' re' anjari nbi naan. Antean naan ate, sin niit atoin amaunut naan antoko ntaa'-taa' npaumaak Nai' Yesus In haek ein. In npake nrair, ma in maun goe namneku nrair. Ankisun on naan ate, sin arsin namtaun. 36 Rarit tuaf ein re' fe'e na niit rasi naan, natoon neu amneemt ein naan nak, anmoe' on mee m'es na' amaunut naan, nareok. 37 Onaim abitan Garasa sin arsin re' natuan anbin bare naan, antoit Nai' Yesus he nnao nasaitan sin, natuin sin arsin namtaun nmaten. Onaim Nai' Yesus sin ansaen nfanin neu kofa', he nnaon nfanin neun nefo Galilea in panin. 38 Mes amaunut re' nareko nrair fe'e na, ntoit nafan-fain neu Nai' Yesus am nak, “Aam! Reko te au utuin Ko, tua!” Mes Nai' Yesus nataah am nak, 39 “On nai! Reko nneis ho mfain meu ho nonot-asar sin, ma mutonan sin Uisneno In arekon, re' anmo'e nrair je neu ko.” Rarit atoni' naan annao nfuun natef-tefan kota, nmurai natoon neu sekau-sekau goah anmatoom nok Nai' Yesus re' nareok' ee naan.
Usif Yesus namonib nafani' nai' Yairus in aan feto, ma nareko' bifee ameen funan ka nasnaas fa
40 Rarit Nai' Yesus sin nsaen kofa' ma nfanin neun nefo Galilea in panin. Oras sin nsanun na'kon kofa' naan, too mfaun ein anpao nain Je. Sin neman nseit-seitn ok he nseun Goe. 41-42 Anbi naan, nmui' atoin es, kaan ee nai' Yairus. In re' naan, a'naak uim onen anbi kota naan. In aan feot goe mese', anmoin naan toon bo'es am nua goen. Oras ia, ri'aan feto naan nameen ma'fena', ma he nmaet jen. Oras nai' Yairus niit Nai' Yesus In amneman naan, in nnao nseun Goe ma nri'tuu nbi In matan. In naskau Nai' Yesus he nnao neu in umi, he nturun naan in aan feto. Nai' Yesus nataah ee mnak, “Tua.” Onaim sin nnaon neu nai' Yairus in umi. Mes too mfaun ein ka ntahan naan fa sin tuak ein he nokan. Onaim sin nnaon nseit-seitn ok. 43 Anmui' naan bifee jes nnao nok anbi naan. In meen funan nroni kre'o-kre'o ka natfeek niit fa oni' toon bo'es am nua goen. In narair in roit ma in a'mui'k ein ok-oke' oras in npairoir in tuan, re' he nbaen apairoirt ein. Mes ka tiit tain fa apairoirt es re' nareok' ee. Menas naan nfoe piut. 44 Onaim in neem anpaumak-maak Nai' Yesus nbi In kotin. Rarit in nreo' naan kuun Nai' Yesus In baur goe tukan. Anre'o nrair on naan ate, in naa' aronit naan, nasnaas nain. 45 Nok askeken ate, Nai' Yesus nasnaas ma nhaek. In nataan am nak, “Sekau es re' anreo' Kau?” Mes ka tiit fa tuaf es re' anmanaku' msa'. Rarit nai' Petrus nak, “Usi' msa', Ho es-es! Ho ka miit fa neu too mfa-faun ein ia nmakseit ein! Sin es re' anmatiitr ein na'kon kotin.” 46 Mes Nai' Yesus nak neu ne mnak, “Kahaf! Fe'e na Au 'naben ate, anmui' kuasa npoi na'ko Kau. Onaim Au uhiin 'ak tuaf es anreo' Kau.” 47 Oras bifee naan nnaben nahiin neu in ka bisa na'koro' fa te, in nmurai namtau nmaet. In na'ta'i ma nri'tuu nbi Nai' Yesus In matan. Rarit in nareta' sin in rasi, nmurai na'ko in uun-a'ba'an. In natoon am nak, oras in nreo' Nai' Yesus on naan ate, in nareok nain. 48 Rarit Nai' Yesus na'uab neu na mnak, “Feto'! Ho mureok, natuin ho mpirsai Kau. Amfain nai nok mamut!” 49 Oras Nai' Yesus na'uab fe' nok bifee naan ate, tuaf es na'ko nai' Yairus in umi neem natoon am nak, “Airoo, aam! Ho aanh ee, ain ee oek' ein! Onaim kais muhaeb Aam Tungguru.” 50 Mes oras Nai' Yesus anneen uaba' naan ate, In nak neu nai' Yairus am nak, “Ba'e. Amtaa' kuum! Kais neekm aan nabait! Ampirsai meu Uisneno. In es re' nareko' ho anah, maut he in nmoin.” 51-53 Oras sin ntean nai' Yairus in umi, too gui naheun nanin. Sin nkaen npin-piuns ein. Nai' Yesus nakain sin am nak, “Hi misnasab hi kaet ein nai! Ri'ana' ia ka nmatef. In ntuup kuun!” Mes too mfaun ein anmanin nfaer Ee, natuin sin nitan nok sin matak fuak ein nak, ri'ana' naan natfeek. Rarit Nai' Yesus antoit ri'ana' naan in ainaf-amaf, nai' Petrus, nai' Yohanis, ma nai' Yakobus, he sin ntaman bu'-bua' nok Ne. Biak ein In nreun sin he npaon nbin mone'. 54 Sin ntaman nrarin ate, Nai' Yesus annaa' ri'ana' naan in a'niman, ma nhaamn ee mnak, “Nona! Amfeen nai!” 55 Nok askeken ate, ri'ana' naan anmoni nfain, ma in nfeen nain. Rarit Nai' Yesus anreun ri'ana' naan in ainf ee mnak, “Amfee ne he nbukae!” 56 Ri'aan feto naan in ainaf-amaf ansanmakan nmaten. Mes Nai' Yesus namnauba' sin, he kais natoon rasi naan neu tuaf bian sin.
Usif Yesus anreek haefan In atoup noin' ein tuaf bo'es am nua
1 Neot es, Nai' Yesus nabuab In atoup noin' ein tuaf bo'es am nua. Rarit In ntaon sin kuasa he bisa nri'un niut re'uf, ma nareko' menas huma'-huma' na'ko amenat sin. 2 In nreek sin he nnaon ma natonan anmatoom nok Uisneno In aprenat. In anreek sin imsa' he nareko' amenat anbin mee-mee. 3 Mes In natoon neu sin am nak, “Mimnau mirek-reko'. Hi kais meik saa'-saa' ambi ranan. Amnao nai, mpake haa baru mese'. Kais meik teas, ai a'kapi', ai' oe-beti', ai' roit. Kais meik tai senu' msa'! 4 Karu hi mtaam meu kuan es, ma nmui' tuaf antoup ki, amtuup ambi sin uim naan. Kais ampiir umi. Mitua mbi re' naan, tar antea hi mnao misaitan kuan naan. 5 Karu hi mtaam meu kuan es, rarit abitan kuan naan ka nroim he ntoup ma ka nroim he nneen ki fa te, ampoi mnao misaitan sin. Oras hi mpoi mnao misaitan sin naan, hi mtao maan acara es natuin harat: amtekar askuku' na'ko hi haem ein naan. Mitonan sin am mak, ‘Hi ka mroim fa he mitniin ate, maut he hi mitaah kiim!’ ” 6 Rarit atoup noin' ein naan, annaon na'kon kuan neu kuan. Sin natonan ma nasina' neu tuaf-tuaf namfaun anmatoom nok Uisneno In Rais Reko. Rarit sin nareko' ameent ein amsa'.
Usif Herodes ankeuk anmatoom nok Usif Yesus
7 Oras naan, Usif Herodes Antipas anneen anrair beno huma'-huma' anmatoom nok Nai' Yesus. Anneen uab ein naan ate, in ntaka'nana', natuin tuaf fauk nak, “Nai' Yesus naan, es re' nai' Yohanis Asranit re' anmoni nfain.” 8 Bian anteni' nak, “In re' naan ka'o Elia re' anmoni nfain.” Bian anteni' nak, “In re' naan, tuaf es na'ko Uisneno In mafefa kninu' bian un-unu' sin.” 9 Mes nai' Herodes namnau mnak, “Neon goes ii, au 'reek tuaf ankeut nai' Yohanis in a'nakan. In nmoni nfani, oo? Rarit tuaf re' ia, sekau ntein?” Onaim in n'usaha he nateef nok Nai' Yesus.
Usif Yesus antuthae too nifu niim
10 Neot es, atoup noin' ein re' Nai' Yesus anreek haefan sin naan, sin nfain neman ma nabuan nfanin nok Ne. Sin natonan neu Ne are' kanan rasi re' sin anmo'en nrair sin. Rarit Nai' Yesus nok In atoup noin' ein annaon amninu'-mninu' neun baer jes anpaumaak kuan Betsaida, he nasnasan akre'o nbin naan. 11 Mes too mfaun ein nakeon neu sin he nnaon n'anin mee, rarit sin na'iuk Nai' Yesus sin anbin sin koitk ein. Onaim Nai' Yesus antoup sin, rarit In nareko' ameent ein ok-oke', ma In natoon neu sin Uisneno In aprenat. 12 Oras maans ee he noi nmouf on naan ate, In atoup noin' ein bo'es am nua, neman ma neikin haan totis am nak, “Aam! Reko nneis Ho mreun too mfa-faun ein ia he nnaon neu kuan-kuan re' anmapaumaakn ein etan bare ia, he sin bisa napenin kuuk amnahat. Ma sin namin bare he ntupan ntaah ein. Natuin baer ruman on re' ia te, sin he napenin amnahat on mee?” 13-14 Mes Nai' Yesus nataah am nak, “On nai! Hi ro he mtuthae sin!” Mes sin nprotees ein am nak, “Hee! Ama' msa', Ho es-es! Too mfa-faun ein re' ia, nifu niim anneis-neis. Nana fe' atoin ein, bifeen guin ma ri'aan ein ka maso'ik fa fe'! On nai te, hit utuun ein suma fua' niim aah, ma iik' ein fua' nua goah. Onaim Aam. Karu Ho mroim he hai mtuthae too mfaun ein ia, hai he mmoe' on mee he msoos maan amnahat meu sin?” Rarit Nai' Yesus anreun sin am nak, “Am'ator sin he ntokon pukan-pukan. Pukan es ate, tuaf bo' niim.” 15 Onaim sin nnaon n'aotr ein on naan. 16 Oras sin ntokon on naan ate, Nai' Yesus nait utuun fua niim ein naan, ma iik fua nua' ein naan. Rarit anbaiseun, ma n'onen nasaeb sukuur ma makasi. Rarit In nteib utunu' ma iik' ein naan. Onaim In nnona' neu In atoup noin' ein he nnaon nbatin neu too mfaun ein naan. 17 Sin ar-arsin anbukaen tar namsenan. Rarit amnaah neisf ein naan, sin nabuab nafani' sin anbin a'kora' bo'es am nua nahen-henun.
Nai' Petrus nakeo nak, Usif Yesus naan, Kristus, Tuaf re' Uisneno nba'an nain Je na'ko unu'
18 Neot es, Nai' Yesus anmes-mese n'onen nbi baer jes. Rarit In atoup noin' ein neman ma nabuan nok Ne. An'onen anrari te, In nataan sin am nak, “Hi mneen biak ein na'uab ein neu Kau te, nak Au re' ia, sekau?” 19 Sin natahan am nak, “Bian nak, Ho re' ia, nai' Yohanis Asranit. Bian antein nak, of oni' Ho re' ia, ka'o Elia. Karu kaah fa te, tuaf es na'ko Uisneno In mafefa kniun' ein un-unu' re' anmoni nfain.” 20 Onaim Nai' Yesus nataan sin anteni' mnak, “Karu natuin hi peint ein ate, hi mak Au re' ia, sekau?” Rarit nai' Petrus nataah am nak, “Aam. Ho re' ia Kristus, Tuaf re' Uisneno nruur nain Je na'ko unu'!” 21 Rarit Nai' Yesus antaar sin ma'tani', he kais natonan neu sekau-sekau, nak In re' naan, Kristus.
Usif Yesus na'uab anmatoom nok In a'maten, ma In a'monin anfani
22 Rarit Nai' Yesus na'uab antein am nak, “Au re' ia, Mansian Batuur-Batuur. Au ro he usaah ma'ne'at ma ma'fena' huma'-huma'. Atoni mnais harat Yahudi sin, a'naak rais pirsait Yahudi sin a'naakt ein, ma tunggur agaam ein ka nromin fa he ntoup Kau nak, Au Kristus Kau. Rarit sin of na'maet Kau. Batuur Au 'maet, mes anmeu te, Au 'moni 'fain.” 23 Rarit In na'uab neu too mfaun ein am nak, “Sekau-sekau re' anroim he natuin Kau, in ro he naran piut ma natuin Kau neno-neno! In ro he nporin nain in roimn ein kuun. In ro he natuin piut-piut, maski he na'maet je msa', nahuum on re' atoni' nasaah hau nehe he nnao neu bare 'maten. 24 Tuaf re' nabaarb on he nmaet natuin in nok Kau, in of anmoin piut nok Uisneno. Mes neu tuaf-tuaf re' suma nroim he nmoin neu in tuan aa kuun, of in mabetis na'ko Uisneno. 25 Karu tuaf es napein nain pah-pinan ia in afan neesn ii barisi, mes Uisneno ntitar napoitn ee, in napeni mnisat saa'? 26 Au re' ia, Mansian Batuur-Batuur. Onaim karu sekau-sekau namaeb on neu In natuin Kau, ma namaeb on neu in annaa' Au noin' ein, Au msa' of umaeb Ok he 'manauk ee 'bi Uisneno In human ma In matan, oras Au 'fain 'uum u'ko sonaf neno tunan. Fin Au of a'fain 'uum 'eik Ama' In kuasat re' npiin ma nakraah reko, ubua 'ok In ameupt ein na'kon sonaf neno tunan. 27 Au utoon ki batuur-batuur. Anmui' naan tuaf fak-fauk na'ko hi arki re' ia, of nitan kuuk nok sin matak fuak ein Uisneno In Aprenat, rarit na' sin bisa nmaten.”
Usif Yesus na'bani' nbi 'toe'f ee tunan
28 Neno fanu nkono te, Nai' Yesus nok nai' Petrus, nai' Yohanis, ma nai' Yakobus annao neikin nsaen neu 'to'ef he n'oen ein. 29 Oras Nai' Yesus an'onen on naan ate, In maasn ee na'bani', ma In paekn ein narim-riman. 30 Nok askeken ate, tuaf nua npoi neman. Tuaf nua re' naan, es re' ka'o Musa ma ka'o Elia. Onaim sin nua sin na'uab ein nok Nai' Yesus. 31 Sin mamnita' nbin pina' ma kraha'. Sin teun sin na'uab ein anmatoom nok Nai' Yesus In a'maten anbi kota Yerusalem. 32 Oras naan, nai' Petrus nok in partein tuaf nua naan, anreur ein re'-re'uf, onaim sin ntupan. Oras sin anfenan ate, sin niit Nai' Yesus anhaek nok atoni' nua. Sin niit Nai' Yesus namaas rimat amsa'. 33 Oras ka'o Musa ma ka'o Elia he nfanin on naan ate, nai' Petrus ankeuk. In ka nahiin neu he nmoe' saa'. Onaim in na'uab taif aah am nak, “Usi'! Hit tbi ia te, na' reko, joo! Onaim reko nneis hai mihake' maan ra'at teun. Es neu Ko, Usi', es neu ka'o Musa, ma es antein neu ka'o Elia.” 34 Mes oras in na'uab fe' on naan ate, niup ee nsaun ma npuput naan sin. Rarit nai' Petrus sin namtaun. 35 Onaim sin nnenan hanaf na'ko nipu' naan in nanan am nak, “Au Anah re' ia, Au 'piir ain Je! In na'uab saa'-saa' ate, amneen mirek-reko' meu Ne.” 36 Hanaf naan oke' te, nai' Petrus sin niit Nai' Yesus anmes-mees. Sin teun sin nfeef a'temen. Sin ka natoon fa neu sekau-sekau saa' re' sin nitan nrair je naan. A'roo-'roo te, na' sin nmurai natoon ee neu tuaf bian.
Usif Yesus nareko' ri'ana' re' anniut sae
37 Noka' on naan ate, oras Nai' Yesus ma nai' Petrus sin nsanu nfanin na'kon a'to'ef naan, too mfaun ein neman ma nateef nok Nai' Yesus. 38 Onaim anmui' naan tuaf es ankoa' Ee mnak, “Aam Tungguru! Amturun maan kau nok au aan mone. Airoo, in fua' mees' aah, tua! 39 Anmui' niut re'uf annaa' ee, anmoe' je ma naskeke te, nkoa'. Kroo te, nkoa' ma nasteet ee, tar antea haep bua neorn ee npoi npeo' in fefan. Nitu naan nbaan nafan-fain' ee msa', ma noik je piut-piut. 40 Au 'toit Ho atoup noin' ein he nturun kau, he reko te, nitu naan anpoi na'ko au anah. Mes ka nabei' je fa, tua!” 41 Anneen on naan ate, Nai' Yesus naskarak sin ok-oke' mnak, “Hae! Hi ka mpirsai fa mmak Uisneno bisa nareko' tuaf? Hi ro batuur-batuur mansian re' ka mmoin fa mbi raan amne'o! Au ro he 'ok ki 'tea reka', he na' hi mpirsai meu Kau? Au he 'sabaar 'eu ki 'tea mee ntein?” Rarit In nabani' neu 'naef naan am nak, “Meik ri'ana' naan neem neu ia!” 42 Oras sin neik ri'ana' naan neu Nai' Yesus, niut maufinu naan na'teet ee ma npeesk ee neu afu. Mes Nai' Yesus naprenat niut goe he npoi nasaitan ri'ana' naan. Onaim in nareok nain. Rarit Nai' Yesus annona' ri'ana' naan neu in amaf. 43 aToo mfaun ein re' niit Uisneno In kuasa ma'tani' naan, sin ar-arsin ansanmakan batuur-batuur.
Usif Yesus na'uab antein rasi anmatoom nok In a'maten
43 bOras too mfaun ein ok-oke' fe' na'uab ein anmatoom nok rais sanmaakt ein re' Nai' Yesus anmoe' sin naan, In natonan In atoup noin' ein am nak, 44 “Hi mtanar mirek-reko' Au uabak ia! Ka 'roo fa nteni' te, tuaf na'sosa' Kau, Mansian Batuur-Batuur re' ia. Rarit sin na'na'at Kau neu atoni 'teet' ein.” 45 Mes In atoup noin' ein ankekun. Sin ka nahinin fa neu In sairt ii saa'. Sin he nataan in a'mouf ne amsa', namtaun.
Sekau es re' ahunut anbi maat
46 Neot es, Nai' Yesus In atoup noin' ein anmatoen rasi anmatoom neu sekau of es re' anjair tuaf ahunut anbi maat. 47 Mes Nai' Yesus nahiin sin rais matoes naan. Onaim In no'en naan ri'aan es, rarit nahaek ee nbi In aon-bian. 48 Rarit In natoon neu sin am nak, “Amneen mirek-reko'! Tuaf re' natuin Kau ma ntuthae tuaf bian on re' ri'ana' re' ia, in a'moufn ii nak, naan in ntuthae Kau msa'. Ma in antuthae Au Ama' et sonaf neno tunan amsa' re' anreek haefan Kau 'uum 'eu pah-pinan ia. Anmui' tuaf amfaun ankius nasbiin aah tuaf bian. On re' atoin kasian, asusat, atoin ka mapake' fa, amaufinut, a'baut. Hoe! Atoni' re' nroim he ntuthae tuaf-tuaf ein on re' naan, Uisneno naan sin on atoin ma'tani'.”
Sekau ka nraban fa te, naan hit partei
49 Rarit nai' Yohanis natoon neu Nai' Yesus am nak, “Usi'! Neot es, hai miit atoin es anriu' niut re'uf te, anteek Ho kanam. Onaim hai mtaar ee, he kais anteek Ho kanam naan, natuin in ka hit ja fa, tua.” 50 Mes Nai' Yesus nataah am nak, “Kais on naan! Natuin atoni' re' ka nraban kit fa te, in oetn ii nak, naan hit partein ngguin kuuk.”
Too nbin kuan es et propinsi Samaria ka nromin fa he ntoup Usif Yesus
51 Nai' Yesus nahiin nak, In oras he nsae neu sonaf neno tunan naan anpaumaak een. Rarit In nafeek he nnao neu kota Yerusalem. 52 In nreek haef he nnao nahuun na'ko sin, he sin bisa n'ator bukaet. Onaim haef ein naan antaman neun kuan es et propinsi Samaria he n'urus uim tupas. 53 Mes abitan Samaria sin ka nromin fa he ntoup Nai' Yesus sin, natuin In he nnao na'besan Uisneno neu kota Yerusalem. 54 Oras nai' Yakobus ma nai' Yohanis annenan nak abitan Samaria sin i'moe'k ein on naan ate, sin nfuri' Nai' Yesus am nak, “Usi'! Reko te hit ttoit Uisneno he nasanut ai he nout nakrati' sin.” 55 Mes Nai' Yesus nabani' neu sin nua sin, ma nakain sin am nak, “Kais mitenab on naan.” 56 Rarit sin nnaon nkonon neu kuan bian.
Tatuin Usif Yesus te, in tui'n ein esan re' ia
57 Oras sin nnaon on naan ate, anmui' atoin es na'uab neu Nai' Yesus am nak, “Aam! Ho mnao m'ain mee-mee jah, au utuin Ko piut, tua!” 58 Mes Nai' Yesus nataah am nak, “Reko msa'! Mes mumnau. Are' mansian ein ma mui't ein anmu'in bare he natuan. Aus fui ji nfain neu in nuat he ntuup. Koor gui nfain neu in kuna'. Mes Au, Mansian Batuur-Batuur ia, Au ka 'mui' kuuk fa umi he 'fain 'eu na. Aka'nunu' msa', Au ka 'mu'if.” 59 Neot es, Nai' Yesus no'en tuaf es anteni' mnak, “Uum he mutuin Kau, he mjair Au ngguin.” Mes tuaf naan nataah am nak, “Reko, tua! Mes, on nai fe', Usi'! Maut he au 'fain he 'urus 'aan mahoin ein ne fe'. Karu au ama' nmate nrari te, na' au 'uum he utuin Ko, tua.” 60 Mes Nai' Yesus na'uab neu ne mnak, “On nai! Maut he tuaf-tuaf re' ka npirsain fa neu Uisneno, n'urus amaets ein. Mes hi, re' ampirsai meu Uisneno, hi meup gui es re' he mnao minaoba' Uisneno In Aprenat.” 61 Anmui' tuaf es anteni' na'uab am nak, “Usi'! Au he utuin Ko piut-piut. Mes mfee maan kau mainuan akre'o he au 'nao 'mataeb aan 'ok au nonot-asar sin fe', na' au 'uum he utuin Ko, tua.” 62 Mes Nai' Yesus natoon ee mnak, “On nai! Karu tuaf anmurai n'oet nabani' afu, rarit antaisibu ntein urusan bian tar antea nnikan nain neu he nseen, in rene naan ka njarif. On naan amsa' neu tuaf-tuaf re' nafeek he natuin Kau, mes namnau piut-piut in a'monin unu' naan. Tuaf on re' naan, ka mapake' fa njair ameput anbi Uisneno In aprenat.”
Usif Yesus anreek haefan tuaf bo' hitu mnua
1 Rarit Nai' Yesus anpiir naan atoup noni' bian antein, tuaf bo' hitu mnua (72). Rarit In nbait sin tuaf nu-nua, he nnaon nahunun neun bare-bare re' In he ntaman sin. 2 In nreek haefan sin neik uab manbasan am nak, “Too mfaun ii on re' maka' re' namnatu nrair et rene. Arahaa he reen tuaf ee nreun tuaf he nnaon nonun. Onaim hi ro he m'onen amtoit Uisneno he nreek na'baba' In tuaf ameput antein he na'bua' tuaf-tuaf re' he natuin Kau. Natuin tuaf re' he natuin Kau naan, amfaun. Mes tuaf ameupt ii, fu'-fua' aah. 3 Oras ia, mnao nai! Au 'reek haefan ki he mnao meu too mfaun ein. Mes mimnau. Hi on re' 'bib-kaes ana' re' in neekn ee reko, re' annao ma natua nbi aus fuin apiust ein sin atnaank ein. 4 Hi kais meik roit, ai' tas he mpaan tais, ai' pein-haef bian. Kais amporin oras he mmaseen ruum-ruum mok es ambi ranan. 5-8 Karu hi he mtaam meu kuan es, hi kais mitnain umi, mi'ko uim jes meu umi bian. Karu atoni' ntoup ki nok rek-reko te, mitua mbi naan, tar antea hi mnao mtein meu kuan bian. Karu hi mtaam meu uim jes, hi ro he mtoit Uisneno he nfee tetus neu tuaf anbi umi naan. Karu uim tuaf naan antoup ki nok rek-reko, Uisneno of nakrira' In nekan arekot neu uim tuaf ein naan. Mes karu sin ka nromin fa he ntoup ki te, maut he Uisneno nakrira' In nekan arekot naan neu haa ki mmees. Karu hi mtaam meu uim jes, ai' kuan es, miah am miun saa'-saa' aah re' sin nnona' ki sin. Amtoup sin nok neek marine, fin sin nfee sin he nseun banin hi maskeet ein naan. 9 Mireko' sin ameent ein. Ma mitonan sin am mak, ‘Uisneno In aprenat et hi maatm ein aan!’ 10 Mes kuan bian sin tuak ein ka nromin fa he ntoup ki. Karu sin nmo'en on naan neu ki te, mnao mhaek meu kuan naan in ranan ma mi'uab am mak, 11 ‘Amneen mirek-reko'! Hai iim meik Uisneno In Kabin ma Prenat neu ki, mes hi ka mrae mituin fa kre'-re'o msa'. Onaim oras ia, hai mtekar askuku' na'ko hai haem ein ia, he njair tanar nak, hi of mitaah ma misaah kiim in a'moufun! Mes mimnau mirek-reko'! Uisneno In aprenat et hi maatm ein aan!’ 12 Hi mihiin kota Sodom in maufinun, ai'? Au utoon ki, he! Nateef neon amsoupt ee te, of Uisneno nasanut hukun neu tuaf-tuaf re' antorak ki, ma'fena' nneis na'ko abitan Sodom!”
Tuaf-tuaf re' ka nromin fa he ntoup Usif Yesus
13 Nai' Yesus antuta ntein am nak, “Hi abitan kuan Korasin ma kuan Betsaida, ampaant om, oo! Siraak ee of ansaen ki! Au 'moe' rais sanmakat huma'-huma' 'bi hi humam ma hi matam, mes hi ka mroim fa he mpirsai meu Uisneno. Te kaah, hi re' ia, atoin Yahudis re' ammanaku' mmak hi mihiin Je. Mes karu rais sanmaakt ein re' Au 'moe' sin a'bi hi kuan naan, anjair tanar anbi kota Tirus ma kota Sidon, abitan naan bait sin na'pisan a'roo-'roo goen, ma nasaitan sin saant ein, rarit natuin Uisneno. Bait sin imsa' anpaken tai-nukat, ma ntaon afu nbin sin a'naak ein he njair tanar nak, sin nmei' jok na'kon sin saant ein. Te kaah, abitan Tirus ma Sidon sin, ka atoin Yahudis fa re' anmanaku' nak sin nahiin Uisneno. 14 Batuur! Hi mkius kiim! Karu Uisneno nafeek nain are' kanan rasi na'ko too mfaun ein, abitan Tirus ma Sidon sin napenin hukun ma'kafa' nneis na'ko hi nggoan. 15 Ampaant om, hi abit Kapernaum! Hi kais mitenab am mak, Uisneno of nait ki msae meu sonaf neno tunan on ahaa re' naan. Kaah fa, tua! Uisneno of nait inporin ki meu ai maputu' marara' abar-barat, tua! 16 Mimnau mirek-reko'! Tuaf-tuaf re' anneen ki, huma' mese' on re' anneen Kau. Mes tuaf-tuaf re' ka nromin fa he nneen ki, huma' mese' on re' ka nromin fa he nneen Kau. Saa' antein, tuaf-tuaf re' ka nroim fa he nneen Kau naan, huma' mese' on re' sin ka nroim fa he nneen Uisneno, re' anreek haefan Kau 'taam 'uum 'eu pah-pinan ia.”
Haef tuaf bo' hitu mnua nfain neman
17 Oras haef tuaf bo' hitu mnua (72) anfain neman, sin neek ein anmarinan. Sin nmurai nareta' neu Nai' Yesus am nak, “Ma'tain besi, atoin ein! Oras hai mpaek Ho kaanm aan, he mriu' mipoitan niutn ein, nitun naan sin natniin kai, onaim sin npoi nanin!” 18 Onaim Nai' Yesus nataah sin im nak, “Tua! Oras hi mmoe' on naan ate, Au 'iit Uisneno anfain-firin niut reu'f ein nok sin a'naakt ee na'ko neno, on re' rimat nariim 'rii-'ne'u. 19 Mimnau, joo! Niut reu'f ein sin a'nakat naan, hit musu. Ma in anmui' kuasa msa'! Mes Au 'fee 'rair ki kuasa, he mireu' main in kuasa naan. Onaim karu hi mteir maan kaun araut ein, ai' kbiti te, hi ka mimeen fa saa'-saa'. Ka tiit fa tuaf re' he bisa nsirakab ki. 20 Hi neekm ein anmarinan, natuin niut reu'f ein natniin ki. Naan reko msa', mes rasi naan, aan' aah! Reko nneis hi neekm ein anmarinan, natuin Uisneno antui hi kaanm ein he mjair In too ngguin re' antaman neun sonaf neno tunan.”
Usif Yesus In neekn ee nmariin
21 Oras naan, Uisneno In Asmaan Akniun' ee, nmoe' Nai' Yesus In neekn ee nmariin. Rarit In nbo'is Uisneno mnak, “Koi, Aam Uisneno! Ho es re' amjair Uis Ko'u et neno tunan ma pah-pinan. Au 'toit makasi kou'-ko'u, natuin Ho mpuput-mu'koro' maan rasin ia na'kon atoin ein re' sin naan sin tuak ein anjarin atoin ahinit ma abeo't ein. Mes Ho mukrira' rasin re' naan ok-oke' meu ri'aan ein ma tuaf-tuaf re' nmui' neek a'parat. Batuur! Naan anharineb Ho nekam, tua.” 22 Rarit Nai' Yesus natoon neu too mfaun ein am nak, “Amneen, oo! Au Ama' et sonaf neno tunan, anfee nrair Kau are' kanan kuasa sin ok-oke'. Suma Au Ama' nmees jah, es re' nahiin Kau rek-reok gui nak, Au re' ia sekau. Ma suma Ama' In Anah, es re' Au, es re' uhiin Au Ama' urek-reok' ee 'ak, Ama' naan sekau. Ma Au 'piir tuaf-tuaf bian sin, he utonan sin, maut he sin nahiin Je rek-reko msa'.” 23 Rarit Nai' Yesus nabani' n'ain In atoup noin' ein am natonan sin nmes-mesen am nak, “Hi m'ua-reok batuur-batuur, natuin hi miit Uisneno In kuasan. 24 Uisf ein ma mafefa kniun' ein un-unu' te, anmarinan nmaten he nitan kuuk saa' re' hi miit kiim sin, mes ka bisa fa. Sin anmarinan nmaten he nnenan kuuk saa' re' hi mneen sin, mes ka bisa fa msa'.”
Atoin Samarias re' neek reko
25 Neot es, atoin ahiin rais atoran hukun Yahudi tuaf es, anhaek ma na'uab nok Nai' Yesus he nakreo Goe. In nataan am nak, “Aam Tungguru! Amturun he mutoon maan kau fe'! Au he 'moe' saa', he bisa 'moin ubar-baar 'ok Uisneno 'bi sonaf neno tunan?” 26 Nai' Yesus nataah am nak, “Ka'o Musa antui mnak saa', anmatoom nok rasi ia? Ho mahiinm ii on mee meu rasi ia?” 27 Atoni' naan nataah am nak, “In ntui mnak: ‘Ho ro he mneek Uisneno, ho Usi', anneis na'ko saa' ii ok-oke'. Es naan ate, ho ro he mumnau Goe piut-piut, ammeup ma'tani' he mutuin In romin, ma muhiin ma mukeo Goe.’ Matu'i msa' am nak, ‘Ho ro he mneek ho aom-bian, on re' ho mneek ho tuam aan kuum.’ ” 28 Nai' Yesus nataah am nak, “Batuur! Karu ho mmoe' mutuin sin on naan ate, ho mmoin mubar-baar mok Uisneno.” 29 Mes atoni' naan in nmoe' in tuan ee on re' atoin amakoet anbi rais Uisneno. Rarit in nataah Nai' Yesus am nak, “Mes au ‘aok-bian’ naan, es re' mee?” 30 Onaim Nai' Yesus nataah am nak, “On nai! Au he u'uaba' aan reet es. Rarit ho of amteek, mee es batuur-batuur ho ‘aom-bian’. Reta' naan on nai: anmui' naan atoin Yahudis es annao na'ko kota Yerusalem, neiki nsaun neu Yeriko. Mes nok askeken, apaikaurt ein neman nkarfei atoni' ia. Rarit anbaan ee ma nabaak neik in roit am in tais ein ok-oke'. Rarit sin nait anhoeb ee nbi ranan, ma sin nnaon nasaitan. Atoni' naan he nma-maet ja heen. 31 Mes ken-kenu' te, anmui' a'naak pirsait Yahudis es neem annao nsaun npeo' ranan naan amsa'. Suma oras in niit atoin ao apapa' es antuup anhoeb on nbi raan ee te, in ka nasnaas fa he nturun. Mes in nteib neu raan ee panin, ma nnao nkoon. 32 Ka 'roo fa te, tuaf es anteni' neem annao npeo' ranan naan. Atoni' naan na'ko uuf nai' Lewi re' biasa ntuthae nbi Uisneno In Uim Onen Uuf. Oras in niit atoin ahoet naan anbi raan ee ninin, in nnao npaumak-maak ma ntae, mes ka ntuurn ee fa. Rarit in ntebi n'ain raan ee panin, ma nnao nkoon. 33-34 Ka 'roo fa te, atoin es na'ko pah Samaria nok in bikaes keledai, neman nnaon npe'on ranan naan. Hit arkit tahiin tak, atoin Yahudis kit nati' te, hit tiit atoin Samarias ate hit tasbini' sin. Oras atoin Samarias naan niit atoin mapaikaru' naan ate, in nkasian ee. In neem anpaumak-maak he nturun atoni' naan. In n'oop anggur he nakninu' paap ein, rarit in nmina' sin. Rarit an'aum paap ein naan rek-reko, ma nasaeb ee neu in bikaes keledai. In neik atoni' naan antea kota. Rarit in natuaba' ntahan atoni' naan anbi losmen, ma an'uurs ee rek-reko. 35 Noka' on naan ate, atoin Samarias naan anbaen antahan roi muti' fua' nua neu losmen tuaf naan, ma na'uab am nak, ‘Ampaek roit ein re' ia, he m'urus ameent ee reka' nareok. Karu ka nanokab fa te, mpake mtahan hi roit. Oras au 'fain 'uum, au of 'eik ki roit he ufani' sin ok-oke'.’ ” 36 Nai' Yesus in reta' naan antuu' on naan. Rarit In nataan atoin ahiin rais hukun sin am nak, “Natuin ho teenb ii te, mee es re' batuur-batuur ‘aon-bian’ neu atoin mapaikaru' naan?” 37 Atoni' naan nataah am nak, “Batuur-batuur ii es re' atoni' re' ankasian ee ji, oo!” Nai' Yesus nataah am nak, “Batuur on naan, tua. Onaim amnao nai he mmoe' mutuin on naan.”
Usif Yesus, bi Marta ma bi Maria
38-40 Rarit Nai' Yesus nok In atoup noin' ein nnaon piut neun kota Yerusalem. Sin neis nokan kuan es. Anbi kuan naan, anmui' naan bifee nua, sin nma'ori-taatn ein. Sin kaank ein, es bi Marta te, es bi Maria. Bi Marta nfee haan askaut neu Nai' Yesus sin he ntupan naan fai jes a'nua nbi sin umi. Rarit Nai' Yesus sin ntupan ntaahn ein anbin naan. Oras Nai' Yesus antook ma nanoni' tuaf, bi Marta nhae nmat-maet he nabarab bukae nbi umi 'hana'. Mes in orif bi Maria, antoko npaumak-maak Nai' Yesus In haek ein, ma anneen kuun In uaban. Ka 'roo fa te, bi Marta ntaam neem ma na'mua' neu Nai' Yesus am nak, “Hae, Aam! On mee m'es re' ia? Au 'hae 'mat-maet he ubarab bukaet, onait bi Mia in ntook kuun es ia. Amreun goe he nturun naan kau kre'o!” 41 Mes Usif Yesus nataah am nak, “Marta. Ho mtaisiub kuum nok tenab huma'-huma'. 42 Reko! Mes anmui' naan rais jes reko nneis oras ia. Bi Mia antook ma nneen Au Uab ein ia, in npiir naan kuun rais reok goes. Atoni' ka bisa nabaak ai' ntoup naan fa Uab ein naan na'kon bi Maria.”
“Nanoni' kit he t'onen”
1 Neot es, Nai' Yesus annao n'onen. An'onen anrari te, In atoup noin es neem ma ntoti mnak, “Usi'! Nai' Yohanis Asranit nanoni' nrair in atoup noin' ein he n'oen ein nahinin. Hai mtoit Ko, he munoni' kai he m'onen mihiin, tua!” 2 Rarit Nai' Yesus nak, “Reko! Am'onen ampaek onen on re' ia: Aam. Ho kanam naan nakninu' teeb. Maut he mansian ein ok-oke', nanaib ma ntuna' na'ratan Ho kanam naan! Maut he Ho mjair Usif meu mansian ein ok-oke'! 3 Amturun ma mbaab kai nok rais bukaet, re' nanokab neu kai neno-neno. 4 Hai mtoit Ko, Aam, amnikan main hai saant ein ok-oke', on re' hai amnikan main tuaf bian sin saant ein amsa', re' sin nmoe' sin neu kai. Ampafa' ma mpanat kai he hai kais ammoe' amre'ut, tua.” 5-6 Rarit Nai' Yesus nanoni' ntein sin anmatoom nok rais onen. In npaek uab manporin am nak, “Karu fai tnana', anmui' ho partei jes neem na'ko 'roo, ma ntuup antahan anbi ho umi. Mes ho ka mmui' fa saa'-saa' he mfee ne he nbukae. Rarit ho mnao meu ho partei jes antein in umi. Ho mhake mbi moen ee, ma mtoit je mmak, ‘Ba'e! Amfee mtahan maan kau utunu' fua' teun fe'! Au 'mui' tamu et umi. Mes hai ka ti-tiit fa saa' es he mtuthae je. Onaim amturun maan kau! Utunu' fua' teun goah. Au of ufani' ko sin!’ 7 Onait ho ba'e of nataah ko mnak, ‘Airoo, ma ho msa' ate! Au 'tuup a'fiin jen ate, ho uum he mpoo' kau goo! Eon' ein au u'retu' 'rair sin. Ri'aan ein antupan nrarin. Neu, kais mu'too', ba'e! Neot es anteni'!’ 8 Maski on naan amsa', mes mimnau mirek-reko'. Maski tuaf naan ka nfeen fa he nfee ko, natuin ho re' naan in baef, mes karu ho mtoit je piut-piut, in of anfeen am anfee ko. 9 On naan amsa' rais onen. Amtoit piut-piut meu Uisneno; In of anfee ma nnona'. Maim piut-piut; In of naruru' ranan. Amhaman piut-piut; In of nasoin eno'. 10 Fin sekau-sekau re' antotin piut-piut neu Uisneno, of antoupun. Amnamit piut-piut, of napenin. Ahaman piut-piut, In of nasoin eno'. 11 Hi mitenab miit! Hi miit mahonit mee, re' karu in aanh ee ntoit ika' te, anfee ne kauna'? 12 Ai', ri'aan ee ntoit maun-teno' te, anfee ne kbiti? Ka neu he on na fa, ai'? 13 Mansian ii ro maufinu. Mes hi Ama' abit sonaf neno tunan naan, In reokn ii kah een. Onaim karu mansian amaufiunt ein on re' hi, amroim he mfee baer reko meu hi aanh ein, saa' antein Ama' Uisneno! In ka nfee naan ahaa ki fa saa'-saa' re' hi mperluu sin, mes anneis na'ko naan, In nfee In Asmaan Akniun' ee neu tuaf-tuaf re' ntoit Je.”
Usif Yesus ka npaek fa kuasa na'ko niut reu'f ein sin a'nakat
14 Neot es, Nai' Yesus anriu' napoitan niut re'uf na'ko amuut es. Onaim amuut naan na'uab anfain. Atoin ein anmasahun. 15 Mes bian na'uab ein am nak, “Batuur, In bisa nriu' nitu! Natuin In napein kuasa na'ko niutn ee sin a'nakat, es re' Balsebul.” 16 Bian he nsoba' Nai' Yesus. Rarit sin ntoit Je he In nmoe' naan rais sanmakat es antein, he nakrira' sin am nak, In kuasa naan batuur-batuur na'ko Uisneno. 17 Mes Nai' Yesus nahiin nain sin roen re'uf naan. Onaim In na'uab am nak, “Karu anbi pah es, in toon guin anmamusun piut, pah naan of kpete'-kpete'. On naan amsa' anbi uim jes in nanan, abitan umi naan karu anmatoen piut-piut ate, umi naan, ro kah een! 18 Onaim karu niut reu'f ein anmamusun ma anmari'un es nok es, henat sin a'naakt ee ka bisa naprenat sin fa 'roo-'roo ntein! Onaim ka ntaam fa neu ronef, karu hi mak, Au 'paek niut reu'f ein sin kuasa he 'riu' upoitan niut re'uf! 19 Mimnau he! Hi ngguin amsa' anriu' nahinin nitu. Sin npaek kuasa na'kon niutn ee, oo? Kaah fa! Onaim hi kais mi'uab tafi'-tafi' mak, Au 'paek niutn ee sin kuasa he 'riu' nitu. Hi ngguin kiim of nafekan am nak saa' re' hi mtu'iran sin meu Kau naan, ansanan. 20 Mes karu Au batuur-batuur a'riu' nitu 'paek kuasa na'ko Uisneno, naan nakriir on nak Uisneno In apreent ee et hi maatm ein naan. Mes, on re' hi ka mikeo maan fa fe'. 21 Karu tua ma'tain es annaa' suni'-kenat nbi in a'niman a'rii-'ne'u ma npao in umi', in baer' ein of ka namnekun fa. 22 Mes of anmui' tua ma'tain es antein ma'tani' nneis, neem ma nbaan niis ne, rarit nait nabaak neik tuaf naan in suni'-kenat sin. Rarit nnau neik nain tuaf naan in a'mui'k ein ok-oke', ma nbait sin neu iin ee. A'roo-'roo re' ia, tua ma'tain ahunut naan in npirsai batuur-batuur in suni'-kenat sin. Mes oras ia, in ka bisa nharap sin fa goen antein. 23 Mimnau mirek-reko'! Sekau re' ka nmapartein fa nok Kau, in re' naan, Au musu. Ma sekau re' ka nmaturun nok Kau fa nbi Au mepu, in re' naan anmo'e haa taisibu.”
Niut re'uf nfain neu in umi mnasi'
24 Nai' Yesus antuut antein In uaban am nak, “Karu hit triu' nitu npoi na'ko tuaf es, in naen neu baer ruman he nasnaas. Natuin in ka napein fa bare re' natai nok in romin, onaim in natenab nak, ‘Aah! Au ka upein fa bare on re' ia te, reko nneis au 'fain 'eu au barak neno naan.’ 25 Rarit in ntebi nfain neem, ma niit bare naan, ansaup nakniun' ee goen, ma nkikin anrair je goen. 26 Onaim nitu naan annao no'en in partein hiut, re' maufinu nneis. Rarit sin nnaon natuan nbin atoni' naan, ma sin nbaan ee bu'-bua'. Onaim oras ia, tuaf naan in a'moin ii, nre'u nneisi ntein.”
Tuaf re' ua-reko nneis-neisi
27 Oras nai' Yesus na'uab fe' nok too mfaun ein naan, anmui' bifee jes anbi naan ankoa' am nak, “Aijoo! Ho aina' ua-reko, natuin in nahoni' naan Ko, ma nasuus naan Ko, tua!” 28 Nai' Yesus nataah am nak, “Batuur, ain! Mes tuaf re' ua-reko nneis ji, es re' tuaf re' antakan in rukin ma anneen Uisneno In Kabin ma Prenat, ma nmoe' natuin sin!”
Sin ntotin he Usif Yesus nakrira' bukti fe'!
29 Oras too mfaun ein naub naan Nai' Yesus on naan ate, In nmurai na'uab am nak, “Mansian oras ia, suma nmo'-mo'e haa rais maufinu. Sin para ntoit Kau he 'moe' rais sanmakat neu sin, he sin nahinin nak Au re' ia, batuur-batuur Uisneno Iin Ja. Te kaah, unu' te Uisneno anfeen sin rais sanmakat anpaek In mafefa kninu', nai' Yunus. Naan noo goah. 30 Unu' te, nai' Yunus natoon neu abitan kota Niniwe nak, sin ro he na'pisan fe'. Onaim saa' re' anjair neu nai' Yunus afi unu' te, anjair tanar neu sin mnak, Uisneno es anreek haefn ee. On naan amsa' anmatoom nok Kau, Mansian Batuur-Batuur. Au 'uum he utoon ki m'ak, hi ro he mi'te'un ma mi'piis fe'. Ma saa' re' anjari nbi Kau, naan of anjair tanar neu tuaf-tuaf oras ia mnak, tebes Uisneno es re' anreek haefan Kau. 31 Of anbi neon amsoupt ee on naan ate, karu Uisneno nhake njair afeek rasi, of bifee usif na'ko haa'-nua, nmoni nfain ma nhake njair saksii. In of anruur ki ok-oke' re' amonit oras ia mnak, ‘Hi arki amoont ein!’ Unu' te uis bifee naan neem na'ko 'roo-'roo he niit kuun usif nai' Soleman in mahinin. Te kaah, oras ia anmui' Tuaf es et hi sonam ma hi tnaanm ein, re' ma'tani' nneis na'ko usif nai' Soleman. Mes hi ka mfairoir maan Ee fa kre'-re'o msa'! 32 Ma in ka nmees fa! Abitan Niniwe msa' of anfenan ma nruur hi amonit oras ia mnak, ‘Hi arki amoont ein!’ Sin na'uab ein on naan, natuin neno naan, oras nai' Yunus annao natoon neu sin Uisneno In roimn ee, sin na'piis nanin. Te kaah, oras ia Tuaf ma'tani nneis na'ko nai' Yunus anmoin nok ki et hi sonam ma hi tnaanm ein ate, mes hi ka mi'piis fa kre'o msa'!”
Neek meu'-sine'
33 Nai' Yesus antuut antein In uaban am nak, “Atoni' nout pauk ana', rarit nateek je nbi 'ratan, he in ntana' ke'en neu abitan naan ok-oke'. Ka tiit fa es he nout paku, rarit nait i'kora, ma ntoeb paku naan! Naan ka mapake' fa! 34 Hi maatm ein naan on re' paku. In ntana' nameu hi neekm ein. Karu hi maatm ein nameis'okan, hi mkius meik neek maufinu. Mes karu hi maatm ein me'un, hi mkius meik neek akninu' reko. 35 Ampanat he me'u nbi hi neekm ein naan, nmeu'-siin batuur-batuur on re' manas. Me'u nbi hi neekm ein naan, kais on re' funan, re' suma nfee haa mafof. 36 Karu hi neekm ein me'un, tar antea ka tiit fa kobai' aan meis'ookn es, hi 'moinm ein of me'un on naan amsa', on re' pauk ko'u re' antana' hi 'monim.”
Usif Yesus nakain atoin Yahudis sin a'naak rais pirsait ein
37 Nai' Yesus na'uab anrair on naan ate, anmui' naan atoin es na'ko partei pirsait Farisi, naskau Goe he nbukaen on in umi. Antean nee te, Nai' Yesus antaam ma ntook. Rarit sin nbukaen nbin mei mnahat. 38 Mes uim tuaf ee nsanmaak, natuin Nai' Yesus nbukae, mes ka nafaun fa In a'niimk ein, natuin atoran atoin Farisis sin. 39 Rarit Nai' Yesus natoon ee mnak, “Hi atoin Farisis, ro ma'tani'! Hi ro mnaa' miher-heran hi atoran rais pirsait! Hi mimnau meu re' he msaef mikninu' 'pika'-'sono' ma kraas ein sin koitk ein tar narim-riman, mes hi ka mimnau fa he mikninu' hi nekam oemeetn ein re' maufinu, ma akoomt ein naan! 40 Hoe amonot! Kais amnikan. Uisneno es re' anmoe' aof-kotif. In es re' anmoe' aof-nanaf amsa'. 41 Reko nneis, hi mfee meu atoin kasian ein saa'-saa' re' hi mmu'i, he hi bisa kninu' mbi Uisneno In human ma In matan. 42 Hi atoin Farisis arki! Hi of mipein siraak! Anmatoom nok rais bait bo' neu Uisneno, hi msoi' sin ok-oke', ana'-ko'u. Tar antea hi roet bumbu aan'-ana' on re' sipa' ma aijonuus amsa', hi msoi' sin! Mes hi ka mfairoir maan fa rais ma'tain ein. Rasi anmatoom nok manekat meu Uisneno, ma rasi anmatoom nok taiba', hi mnikan main sin een! Batuur, hit ro he tfee Uisneno in sapaan, mes kais atnikan tain are' rasi re' pentiing anneis. 43 Hi of mipein siraak! Natuin hi mroim he maim bare ma mtook maat ambi uim oen ein, ma mrom-roim he biak ein anhormaat ki karu hi mibua mbi too mfaun ein sin humak ma sin maatk ein. 44 Hi of mipein siraak! Natuin hi on re' faut baik natef re' mnera-mnera'. Tuaf annao nbi naan ate, sin ka nastunan ma nahinin fa, natuin ka tiit fa faut baik natef et naan, mes noup baraf naan in naan ee, foo puun ii kah ein. Te kaah, tatuin hit harat, tuaf re' anteri nbi faut baik natef, naan anhai'niis in tuan, onaim in ka nabei' fa he ntaam neu uim onen. Hi atoin Farisis on re' faut baik natef! Hi mmoe' jom on re' atoni' kninu' batuur-batuur. Mes hi nekam naank ein naan, naheun nok tenab meis'okan.” 45 Anmui' ahiin rais hukum Yahudi es anbi naan, an'oet Nai' Yesus In uaban naan am nak, “Aam Tungguru! Ho uab ein fe'e na ntoom kai msa'!” 46 Rarit Nai' Yesus nataah ee mnak, “Batuur! Hi ahiin rais hukun Yahudi, maut he hi mipein siraak amsa'! Hi ka mturun fa tuaf he napein ma'kafa', mes hi mi'baba' susat nok hi atoran pirsait re' hi mmo'-moe' sin naan, he mha'feen too. Rarit hi misahab atoran huma'-huma' re' naan neu too. Mes hi tuaf es amsa' ka amturun fa meiki kruru' mese' msa'. 47 Hi of mipein siraak! Hi mteu'-bain om he mihake' faut tugu meu Uisneno In mafefa kniun uun ein, he mhormaat sin. Te kaah, hi be'i-na'i sin es anroor niis mafeef ein naan! 48 Hi taos mese' mok hi be'i-na'i sin. Sin ntitar napoitan Uisneno In mafeef ein, ma nroor na'maet sin. Rarit hi mihake' faut tugu meu mafeef ein naan, he njair tanar am nak, hi mroim mituin hi be'i-na'i sin. 49 Nok ranan naan, Uisneno re' nahiin nain sin ok-oke', na'uab niit am nak, ‘Au of a'reek haefan Au mafefa kninu' ma au haef bian sin neu too Israelas sin. Rarit sin anha'mui' bian, ma nroor niis bian.’ 50-51 Tuaf re' anmoin oras ia, ro he nasaah tahas na'ko tuaf-tuaf re' na'maet Uisneno In mafeef ein. Naan ansoi' sin na'ko oras Uisneno nmoe' pah-pinan ia, nmurai na'ko nai' Habel in a'maten, tar antea amuin re'uf, es re' nai' Sakarias. In re' naan es re' anroor goe nbi mei fuat ma Ke'en Akninu' sin atnanak anbi Uim Onen Uuf. Hi misaah maan kiim sin hukun naan amsa'! 52 Hi ahiin rais hukun Yahudi arki! Hi of mipein siraak! Natuin hi mnaa' a'retu 'fo'e re' bisa mretu 'foe eno', he atoni' nahiin narek-reko' Uisneno In romin. Mes hi ka mtaam mok kiim fa, tua. Hi maufinu nneis-neis ji, hi m'eka' atoni' in ranan, he sin kais antaman neun naan!” 53-54 Oras Nai' Yesus na'uab anrair on naan ate, tunggur agaam ein ma atoin Farisis sin anmaheek niis Ne. Anmurai oras naan, sin natanan rasi huma'-huma' he nakreo namouf Nai' Yesus. Sin n'ator asraak he namin rasi huma'-huma' nok Ne.
Ampaant om he kais mituin atoin Farisis sin 'moe' po-poi
1 Oras naan, anmui' too nifu fak-fauk, neman he nneen Nai' Yesus. Sin nnaon nseit-seitn ok ma naub naan Ee. Onaim In na'uab nahuun neu In atoup noin' ein am nak, “Ampaant om he kais mituin atoin Farisis sin 'moe' po-poi. Fin sin biasa na'uab ein ate, a'teta', ma nmo'en ate, a'teta'. 2 Sin nmoe' napo-poin on naan ate, reko, mes sin 'moe' po-poi naan of mamnita'. Fin saa'-saa' re' oras ia na'koor ok, of mamniit ein. 3 Saa' re' hi mi'uab ee nbi ma'koro' oras ia, of manena' kninu'-kninu'. Saa' re' hi mi'se'o sin anbin ke'en, of biak ein na'uab naher-heran sin anbin too mfaun ein sin humak ma sin maatk ein.”
Mansian ii in osan anbi Uisneno In human ma In matan
4 Nai' Yesus na'uab antein am nak, “Aok-bian arki! Kais mimtau, karu nmui' tuaf he nroor ki. Natuin sin bisa nroor hi aom ein naan, mes ka bisa na'maet fa hi smaanm ein naan. 5 Au he utoon ki m'ak, hi ro he mimtausan sekau. Hi ro he mimtausan Uisneno. Natuin In es re' bisa nroor ki, rarit nporin nataam ki neu ai maputu' ma marara' abar-barat. Onaim In re' ia, es re' hi ro he mimtausan meu Ne batuur-batuur. 6 Hi mitenab miit, kor-maak ii in oosn ii fauk, hah? Mana' nima te, roit sen nua, ai'? Maski on naan amsa', mes Uisneno ka nnikan nain fa mese' msa'. 7 On naan amsa', Uisneno nkius ki. In nahiin namnuut hi 'naak fuun ein, fauk. Onaim hi kais mimtau, natuin Uisneno ntao osaf neu ki te, anneis nain kor-maak ein ok-oke'.”
Kais ammae he mmanaku' Usif Yesus
8 Rarit Nai' Yesus na'uab antein neu In atoup noin' ein am nak, “Amtakan hi ruikm ein rek-reko! Karu anmui' tuaf nabrain he nmanaku' Au Tuak ii nbi biak ein sin huumk ein anbi pah-pinan ia, Au of a'manauk ee 'bi Uisneno In ameupt ein et sonaf neno tunan am 'ak, in re' naan Au Iin ja. 9 Mes karu anmui' tuaf na'uab anbi mansian ein am nak, in ka nahiin Kau fa, Au of u'uab a'bi Uisneno In ameupt ein et sonaf neno tunan am 'ak, Au ka uhiin je fa msa'. 10 Au re' ia, Mansian Batuur-Batuur. Karu anmui' tuaf na'uab na're'uf Au kanak arekot, Uisneno nabarab he nnikan nain in sanat naan. Mes karu In na'uab na're'uf Uisneno In Asmaan Akniun' ee In kanan arekot, Uisneno ka nnikan nain fa sanat naan. 11 Of karu anmui' tuaf anheer neik ki mnao meu umi feek rais pirsait, ai' mnao meu anaa' aprenat, natuin hi mpirsai Kau, hi kais mimtau mak hi mimneob om on mee. 12 Fin oras naan, Uisneno In Asmaan Akniun' ee of natoon uab neu ki natai nok haan tanas he hi mitaah sin.”
Atoin amu'it re' anmoon
13 Rarit tuaf es na'ko too mfaun ein naan nataan Nai' Yesus am nak, “Aam Tungguru! Amreun maan au tata' he nbait kai hai pusaak ein fe'!” 14 Mes Nai' Yesus nataah ee mnak, “Hee'! Sekau es nait Kau 'jair afeek rasi 'eu hi rasi human on re' naan?” 15 Rarit Nai' Yesus na'uab neu too mfaun ein am nak, “Hi mpaant om he kaisa' msinmaak! Fin a'mui'f ii ka nfee fa rais mamut.” 16 Rarit In nareta' neik uab manporin am nak, “Anmui' atoin amui't es, in reen je naheun nok sekit ma mnonut anho-hoen. 17 Tar antea in poo'f ein na'seesn een, ma in ka nahini ntein he natunu' neu mee. 18 Rarit in nafeek am nak, ‘Au he 'moe' kuuk, on nai! Au 'pukai 'ain uim mapo'of amnaa' ia, rarit au 'mo'e 'tein uim mapo'of ko'u nneis, rarit usaeb 'ain au sekit ma mnonut sin ok-oke' ma au 'mu'ik bian sin anbin naan amsa'. 19 Karu njari nrair on naan ate, au of u'uab 'eu au tuak ii m'ak, “Hoe! Poo'f ee naheun goen! Amnaaht ee nanokab he taseen ok toon bani' toon. Onaim muah am miun nai namin-miin, amtoko ma mber-bero ha haem ein naan nai!’ ” 20 Mes Uisneno natoon ee mnak, ‘Hae! Amonot! Mabe' ia, ho mmaet. Rarit sekau es npaar kuun po'of naan in aafn ee ok-oke'?’ 21 Onaim, on nai! Mansian ein bisa naim he nmui' 'mu'if kou'-ko'u nbi pah-pinan ia neu in tuan aan kuun, mes anbi Uisneno In teenb ee, tuaf re' naan nma'mu'i nmaet, natuin in ka nmoin reko fa nok Uisneno.”
Ampirsai meu Uisneno kuun
22 Rarit Nai' Yesus nanoni' ntein neu In atoup noin' ein am nak, “Hi kais amtaisiub meu hi 'moinm ein neno-neno, mak he miah saa', ai' he mpaek saa'. 23 Natuin hit a'monik ia, anneis na'ko saa' re' hit tbukae, ma saa' re' hit tpake. 24 Amkius miit kor-kae metan! Sin ka nsenan fa, ka nsekin ma nonun fa, ka nmu'in fa po'of he natunu' sin sekit ma mnonut, mes Uisneno anpairoir sin. Karu on naan ate, In bisa npairoir ki msa'. Natuin In nsoi' ki nneis na'ko koron naan. 25 Karu hi mtae hi huum ein anbin ninu, rarit amtaisiub huma'-huma', in bisa ntuut hi 'moinm ein, aa oo? Kaah fa, tua! 26 Onaim karu mtaisiub nok rais aan es ma ka neik fa afa' saa'-saa' ate, nansaa' am es mtaisiub nok rais ko'un? Sin aafk ein saa'? 27 Amnao mkius miit fubona' et nasi. Ka nkaun rene, ka nteun. Mes usif nai' Soleman in paek ein re' ma'osa' arim-riimt ein amsa', es ka on fa fuboon fui naan. 28 Fin Uisneno anpairoir huun anoba' re' ka ma'so'ik fa. Re' suma nmoin neno ia, ma noka' te, nmaet, rarit nout goe ma nputu nmaet. Karu on naan ate, In bisa npairoir ki msa' re' maso'ik anneis na'ko huun. Onaim nansaa' am es hi ka mi'pesi' fa hi 'moinm ein batuur-batuur meu Ne? 29 On naan amsa' hi kais amtaisiub anmatoom rasi mnahat ma mninut. Fin Uisneno of an'urus sin. 30 Atoni' re' ka na'pesi' fa in tuan neu Uisneno, sin nhaen nmat-maten neu re' he n'urus rasin naan ok-oke'. Mes hi kais on re' naan, natuin hi Ama' abit sonaf neno tunan nahiin nain saa'-saa' re' hi mperluu sin. 31 Karu hi minaob Uisneno In meup Gui fe', na' In n'urus ki are' rasin naan neu ki.”
Mutunu' a'mu'if sonaf neno tunan
32 Rarit Nai' Yesus antuut antein am nak, “Hi on re' 'bib-kase pukan aan es, re' n'oren nmaten. Mes kais mimtau! Natuin hi Ama' et sonaf neno tunan naan, Uis Ko'u. Saa' re' Iin ja, In nmariin he nfee je neu In aan neek ein. 33 Onaim amnao nai he mi'sosa' main hi baer' ein, rarit ambait roit ein meu ama'mui't ein. Nok ranan naan hi mitunu' a'mu'if et sonaf neno tunan nbi baer mamut abar-barat. Abaakt ee, ka bisa nabaak ee fa. Naem am etes ka nsoor goe fa. 34 Mimnau mirek-reko'! Hi 'mui'm ein anbin mee te, hi neekm ein etan naan.”
Ameput re' nabaarb on he ntuthae fai-manas
35-36 Nai' Yesus na'uab antein am nak, “Hi mibarab he mtuthae Kau, fai-manas. Nahuum on re' ate, re' anbee' ma npao in uisn ee nfain neem na'ko fesat kabin. Karu in uisn ee nhaman anbi eon' ee te, in bisa nasoin ee raab aah. 37 Karu sin uisn ee neem napein in ameupt ein anpa-paon on naan ate, sin uak ein reko. Fin sin uisn ee neikn on nakrira' in nekan arekot neu sin. In npaek tai ate, rarit in ntuthae ameupt ein naan nok amnahat amin-minat. 38 Ameupt ein naan an'ua rekon batuur-batuur, natuin sin ntuthae sin uisn ee nok reko. Maski sin uisn ee neem oras mee-mee jah, fai atnanas, ai' neis-noi nmeu, sin nabaarb ein piut. 39 Mitenab mirek-reko'! Karu anmui' uim tuaf re' nahiin nain neu abaakt ee he ntaam oras mee, in ka nfee fa mainuan he abakat naan anpukai in umi. 40 Onaim hi ro he mibaarb om batuur-batuur, natuin ka tiit fa tuaf es nahiin batuur-batuur, reka' te, Mansian Batuur-Batuur ee, he nkoen On anfain neem.”
Ameput re' na'kii' ma ate re' anbeo
41 Rarit nai' Petrus nataan Nai' Yesus am nak, “Aam Tungguru! Ho uab manporin fe'e na antoom neu kai mmese oo, ai' ntoom too mfaun ein barisi?” 42-44 Onaim Nai' Yesus nataah am nak, “Uab manporin fe'e na antoom nain too mfaun ein ok-oke' re' anmepun on re' a'naak urusan re' n'urus nahiin ma na'kii' neu in usin. Fin in uisn ee nait je he njair abati mnahat neu ameupt ein. Karu in nmakoe nbi mepu naan ate, maski in uisn ee neem oras mee-mee jah, mes in ro nmoe' reko batuur. Rarit in n'ua-reok, natuin in uisn ee of nait je njair a'urus neu a'mui'f ein ok-oke'. 45 Mes tsiraak karu ate naan nmurai natenab am nak, ‘Aah! A'naef ee of a'roo fe' te, na' neem.’ Rarit in nmurai nbeos ma npokos ate bian, et bifee ma atoni'. Rarit in ntoko ma naah-niun ma nmarin-riin tar antea nmafu nmaet. 46 Mes neon goes, oras ate naan ka natenab naan fa saa'-saa', nok askeken ate, sin usin naan anfain neem. Oras sin usin naan nahiin rasin naan ate, in nbeso npokos, rarit anriu' goe he napein kuun in sapaan ein et mone', nok tuaf-tuaf bian re' ka na'ki'in fa natuin sin uisn ee in romin. 47 Fin ate re' nahiin nain in uisn ee in roimn ee, mes ka nabarab fa, ai' ka nroim fa he nmoe' on re' naan, of napein hukun ma'fena'. 48 Mes ate re' nmepu nsaan, natuin in ka nahiin fa in uisn ee in mahinin, in of napein hukun ma'kafa'. Fin atoni' re' antoupu mfaun, in tui'n ein amsa' amfaun. Atoni' re' antoup meup ko'u, in taahs ee msa' ko'u.”
Usif Yesus In nonin bisa nmoe' tuaf anmaraabn ein
49 Nai' Yesus antuut antein In haan ee mnak, “Au 'uum he 'betis Au ngguin na'kon tuaf bian nbin pah-pinan ia. Naan on re' tuaf anpaek ai, he nout makrafu'. Au 'roim he ai naan anpiin anbi mee-mee. 50 Mes Au ro he usaah ma'ne'at re' ma'fena' nahuun fe'. Au of upein ma'ne'at batuur-batuur tar antea in oors ee oke'. 51 Hi mitenab am mak, Au 'uum he 'eik ki rais rame' ma mamut anbi pah-pinan ia? Kaah fa, tua! Au 'uum he 'moe' mansian ein anmatoen, ma ansisa'en, natuin Au noink aan. 52 Anmurai oras ia, orif-tataf, bae-feto, bae-mone sin of anbaits ok. Anbi uim jes in nanan, tuaf tenu te, anraban tuaf nua, ma tuaf nua te, anraban tuaf teun. 53 Ama' anraban anah; anah anraban amaf. Aina' anraban anah; anah anraban ainaf. Ain baba' nraban aan nanef ma moen-feuf; aan nanef ma moen-feuf anraban ain baba'.” Mihiin mirek-reko' neon amsoupt ii in a'taakf ein 54 Onaim Nai' Yesus na'uab nok too mfaun ein am nak, “Karu hi mkius noep je na'teem anbi pasa' neon-teas, hi mak ‘tanar ia, uurn ii he nmouf goen.’ Batuur on re' naan. 55 Karu anin na'ko pasa' haa'-nua neem, hi mak, ‘Tanar ia, nak maan mapuut ii ma'tani'.’ Batuur on re' naan. 56 Hae! Hi mansian puta-kriu ki, hi mi'uab ate, a'teta', ma mmo'e te, a'teta'! Hi mihiin main pah-pinan ia nok nain neon goe tnanan sin roimk ein. Mes nansaa' am es hi ka mihiin fa Uisneno In roimn Ee nbi oras ia?”
Ammarame' mok hi musun
57-58 Nai' Yesus na'uab antein am nak, “Karu hi mmaka'rasin, nansaa' am es hi ka bisa mifeek kiim fa, mee es re' batuur! Reko nneis am'urus rame' nahuun! Kais-kaisa' hi mtea mrair afeek rais je te, in nafeek ki he mtaam meu bui. 59 Fin karu on naan ate, hi ka bisa mpoi maan fa, karu hi ka mbaen mirair fa hi tusa' re' afeek rais je nafeek ee neu ki naan.”
Misaitan 'moin maufinu, ma mituin Uisneno In ranan
1 Oras naan, anmui' tuaf natoon neu Nai' Yesus am nak, gubernur Pilatus na'maet atoni' Yahudis fauk ein na'kon Galilea oras sin neman neun kota Yerusalem he neikin fua'-turu' nbi Uim Onen Uuf. 2 Anneen on naan ate, Nai' Yesus nataan am nak, “On mee? Atoin Galileas re' nmaet naan, sin saant ein ko'un nneis na'ko biak ein ok-oke', oo? Es naan ate, sin napenin hukun a'maten, oo? 3 Kaah fa, tua! Mes karu hi ka misaitan fa hi 'monim re' ammaufinun naan, he mtebi mfain mituin Uisneno In romin, hi of amreu' on re' sin. 4 Onaim on mee ntein neu tua bo'es am faun ein re' neon goes ii rame mnanu' Siloam antaikobi ma nmeuk niis sin? Sin saant ein ko'un neis na'kon tuaf bian re' anbin Yerusalem, aa oo? 5 Kaah fa, tua! Mes karu hi ka misaitan fa hi 'monim re' nma'eokb ok, he mituin Uisneno In romin amneot, hi of amreu' on re' sin amsa'.”
Hau roet re' ka nafuaf, nahuum on re' Uisneno Iin na, re' ka nmoe' niit fa rais reko saa' es
6 Rarit Nai' Yesus anfee uab manporin es am nak, “Anmui' naan atoin es, re' anmui' hau roet mafua' es anbi in po'on. In neem piut-piut he nbaiseun hau roet naan he nahiin neu nafua goen aa oo, ai' kaah fe'. Mes hau roet naan ka nafua fa fe'. 7 Rarit in nreun akninu' po'on naan am nak, ‘Toon teun goen, au 'uum fani-fani he uhiin hau roet ia in fuan, mes au ka 'iit fa saa'-saa'. Onaim amnoo' goe he kais naah bare.’ 8 Mes akninu' po'on naan nataah am nak, ‘Aam, kais mutoo'. Amfee mtein maan ee, oras toon es. Anbain he au 'kofan 'iit afu re' roet ia in uun ii, rarit a'tao ne pupuk he namria. 9 Karu anmaan fani ma nafua te, reko! Mes karu kaah fa te, amno'o.’ ”
Usif Yesus nareko' bifee ameen nui-'sau-'boko, nateef nok neon onen
10 Neot es, nateef nok atoin Yahudis sin neon onen, Nai' Yesus annao nanoni' nbi uim onen. 11 Anbi naan, anmui' naan bifee jes re' in nui-'sau-'book, toon bo'es am faun goen, natuin niut reu'f ee nmo'e. In ka bisa nhaek namneo fa. 12 Nai' Yesus niit bifee naan, rarit anhaamn ee, ma na'uab nok ne mnak, “Ain! Oras ia, ho mureok nai.” 13 Onaim Nai' Yesus antao In a'niman neu bifee naan. Nok askeken ate, in nui-'sau abokot naan, namneo nain. Onaim in ntoit makasi, ma nbo'is Uisneno. 14 Mes uim onen naan in a'naakt ee natoo', natuin Nai' Yesus nareko' amenat nateef nok neon onen. Onaim in na'uab neu too mfaun ein am nak, “Krei jes naan ate, neno nee he hit tmeup. Onaim reko nneis ameent ein neman anbi nenon re' naan, he namin tuaf he nareko' sin. Kais neman oras neon onen!” 15 Mes Nai' Yesus nataah ee mnak, “Hoe! Ho kais mu'uab ate, 'teta', ma mmo'e te, 'teta'. Anbi neon onen amsa' hi mmeup, ai' kaah?! Fin hi mnao mifetin hi bijae ngguin ma hi bikaes keledai ngguin he ninun oe, ai'?! 16 Bifee re' ia, ka'o Abraham in sufan, on re' hit. Nitu 'naakf ee nfuut goe toon bo'es am faun. Onaim karu Au ureok' ee nateef nok neon onen on nai te, ansaan saa'?” 17 Anneen on naan ate, Nai' Yesus in muusn ein namaeb ok. Mes too mfaun ein anmarinan In meup rekon naan.
Usif Yesus anfee uab manporin npaek fua musi' re' ana' krisi'
18 Onaim Nai' Yesus antuta ntein In uaban naan am nak, “Au he utaib apirsait ein 'eik saa'? 19 Un-unu' te, sin fuak fauk aah, mes anna-nao te namfaun. Sin nmurain on re' musi' fua es re' ana' krisi'. Atoni' anseen ee nbi po'on. Rarit anmoin, ma njair hau ko'u. Onaim koorn ein neman ma nakuun ein anbin in taek ein.”
Usif Yesus anfee uab manporin npaek raur teif
20 Rarit Nai' Yesus na'uab antein am nak, “Au he utaib Uisneno Iin na, 'paek saa' antein? 21 In on re' raur teif re' bifee ngguin nait je ma nsoer goe nok uut saku nua, ankuum goe he nmo'en utunu'. Onaim uu kumu' naan ansae, natuin raur teif aan'-ana' naan. Uisneno Iin na anmu'in pengaru ko'u on naan amsa'.”
Sonaf neno tunan in eon' ee, ma'rena'
22 Rarit Nai' Yesus sin anmurai nnaon neun kota Yerusalem. Anbin raan atnana', sin neis nokan kota ma kuan he In nanoni' tuaf. 23 Antean baer jes, anmui' tuaf es nataan Ee mnak, “Aam Tungguru! Of oni' tuaf fauk aah es re' napenin saok sanat ma 'honis, oo?” 24 In nataah am nak, “Sonaf neno tunan in eno' 'taams ee, ma'rena'. Onaim mibarab hi tuam ein rek-reko he bisa mtaam ampeo'n aa. Fin anmui' tuaf amfaun anromin he nsoob ein antaman npe'on naan, mes ka bisa fa. 25 Karu uim tuaf ee na'retu' nrair eno' naan ate, hi of amhake mbi mone', ma mteek eno' naan, ma mhaman am mak, ‘Usi'! Musoin kai eon' ii fe'!’ Mes In nataah am nak, ‘Hi sekau, ki? Au ka uhiin ki fa!’ 26 Onaim hi mak, ‘Onait usi' ho ka muhiin kai fa? Airoo nati' te, hit ttoko ma tbukae tabu-bua. Ho munoni' kai nbi hai kuan ein amsa', tua.’ 27 Onaim In of nataah am nak, ‘Fe'e na Au 'ak, au ka uhiin ki fa! Hi re' ia mansian amoe' maufinu. Mi'roo mi'ko ia!’ 28 Rarit karu Uisneno nafeek mansian ein sin rasin sin ok-oke', hi mkae mpin-pinus ma mek-meuk nisim. Fin hi miit ka'o Abraham, ka'o Isak, ka'o Yakop ma Uisneno In mafefa kniun' ein antokon et sonaf neno tunan in nanan. Mes Uisneno nriu' napoitan ki meu mone'. 29 Mansian ein of neman na'kon pah-pinan ia pani-mpain, na'ko pasa' neon-saet tar antea pasa' neon-teas, na'ko pasa' ponain tar antea pasa' haa'-nua, he nbukaen bu'-bua' nok Uisneno nbi In sonaf. 30 Amtanar mirek-reko' rasi re' ia: karu Uisneno nafeek anrair mansian ein sin rasin ok-oke', anmui' tuaf es, re' unu' te, sin nak ai' aan'-ana', mes in napein hormaat ko'u. Ma bian unu' te nak in atoin a'naet, te kaah, Uisneno nak in a'baut aah.”
Usif Yesus ankasian neu abitan kota Yerusalem
31 Oras naan, anmui' naan atoin Farisis fauk neman ma nateef nok Nai' Yesus. Rarit sin na'uab neu Ne am nak, “Reko nneis Aam Tungguru mnao mu'roo-'roo meu bare bian, natuin usif Herodes he na'maet Ko, tua.” 32-33 Onaim Nai' Yesus nataah am nak, “Aah! A'naef naan nahiin suma he nareu' goah, on re' metan et nasi! Hi mnao mitoon ee mmak, ‘Au 'riu' niut re'uf ma ureko' amenat neno ia mnoka'. Anmeu te, na' Au urair mepu.’ Maski on mee msa' Au he 'meup aan akre'o 'tein 'bi ranan re' he 'eit 'eu kota Yerusalem. Fin abitan Yerusalem sin biasa na'maet Uisneno In mafefa kniun' ein. 34 Airoo, hi arki abitan Yerusalem! Hi re' ia, es re' biasa mi'maet Uisneno In mafefa kniun' ein, ma mpoir miis In haef ein re' neman ma naruru' ki ranan. Fani-fani Au he u'bua' ma 'panat 'aan ki he 'eka' 'aan ki na'ko rais maufinu, nahuum on re' maun ainaf anpuput naan in aan ein anbin in ninin nanan. Mes hi ka mroim fa. 35 Oras ia, Uisneno ka nrae ma mfairoir fa hi uim onen naan. Noka'-nmeu te, in ruman. Hi of ka miit amtein Kau fa, tar antea hi mmanaku' mmak, ‘Uisneno anfee tetus-athoen neu tuaf re' neem neik Uisneno In kanan, natuin Uisneno anreek haefn Ee!’ ”
Usif Yesus nareko' tuaf nateef nok neon onen
1 Neot es, nateef nok neon onen, atoin Farisis sin a'naakt es naskau Nai' Yesus he neem anbukae nbi in umi. In ntook ma nbukae, mes anmui' tuaf re' annuu' Goe he nahinin nak in he nmoe' saa' nbi neon onen naan. 2 Oras naan anmui' tuaf es nameen boo bere-bere, re' nok antoko nbi naan. 3 Rarit Nai' Yesus nataan neu ahiin rais hukun Yahudi ma atoin Farisis sin re' antokon ma nbukaen nbin naan am nak, “Tatuin ka'o Musa in atoran, bole tareko' amenat nateef neon onen, ai' kaah?” 4 Mes sin nfeef a'temen ok-oke'. Onaim Nai' Yesus ansai amenat naan, rarit nareok nain. Onaim Nai' Yesus anreun goe he nfain nai. 5 Rarit Nai' Yesus nataan sin ntenin am nak, “Karu anmui' ri'aan es anmoufu ntaam neu oe hani' nateef nok neon onen, hi mnao mipoin ee oo, ai' kaah? Karu bijae je es anmoufu ntaam, hi mkoon ee oo, ai', mnao mipoin ee? Hi of amnao mheer mipoin. On nai te, naan in oetn ii nak, hi mmeup!” 6 Annenan Nai' Yesus In uaban on naan ate, ka tiit fa es he bisa nataah neu Ne.
Kais ampasan ho tuam aan
7 Oras naan, Nai' Yesus ankius tuaf-tuaf re' neman nbukaen nbin umi naan. Anmui' tuaf amfaun namin bare he ntokon nbin maat. Ankius on naan ate, In na'uab am nak, 8 “Ampaant om, oo! Karu anmui' tuaf anfee haan askaut neu ki, he mnao meu fesat kabin, kais maim bare he mtoko mbi a'naet ein sin baark ein. Kais-kaisa' kabin tuaf ee anfee haan askaut neu a'naet ein. 9 Karu on naan ate, kabin tuaf naan of neem neu ko mnak, ‘Kais mutoo' goo! Au uskau he tanani' teu kotin nee, natuin au ubarab a'toko' ia 'eu a'naet re' ia.’ Onaim ho mfeen mu'ko 'toko' naan ma mumaeb om. Rarit amnao mtoko mbi koit. 10 Onaim karu ho mupein haan askaut, mnao mtook meu 'toko' abit kotin ee. Karu kabin tuaf ee niit ko te, in of neem am nak ko mnak, ‘Ee, Aam! Au uskau he tkoen ok teu matan ia.’ Nok ranan naan hi mipein hormaat anbi taumn ee ok-oke'. 11 Fin tuaf re' nanaib on, Uisneno of namouf goe. Mes tuaf re' na'paarn on on re' atoin a'baut, Uisneno of nait na'raatn ee.” 12 Rarit Nai' Yesus na'uab nok uim tuaf naan am nak, “Neot es anteni', karu ho mmoe' fesat, kais amfee haan askaut meu ho nonot-asar ma ho partei amui't ein anmesen! Natuin sin of bisa nfeen haan askaut he nbaras ko. 13 Mes karu ho mmoe' fesat, mfee haan askaut meu ama'mu'it, hae sah-sere', abuat, ma aforot sin. 14 Sin of ka bisa nbaras naan ko fa. Mes karu ho mfee haan askaut neu sin, Uisneno es re' anbaras neu ko. Anbi oras Uisneno namonib nafani' In apirsait ein re' anmaten nrarin, In ka nnikan fa ho 'moe' reko naan.”
Uab manporin anmatoom nok fesat ko'u
15 Anneen on naan ate, tuaf es re' nok antook mei mese' nok Nai' Yesus, na'uab am nak, “Ua reok re'uf, es re' karu tbukae bu'-bua' anbi Uisneno In sonaf!” 16 Nai' Yesus nataah ee mnak, “Au 'mui' reta' on nai: anmui' atoin es anmoe' fesat ko'u. Onaim in nfee haan askaut neu too mfaun ein. 17 Oras fesat naan sin naroitan anrair je te, in nreek haefan in ate ma nnao naskau tuaf-tuaf re' napenin haan askaut am nak, ‘Au uskau tua, fin acara fesat he nmurai jen.’ 18 Mes sin arsin anmo'en kuuk rasi 'sukif huma'-huma', he sin kais nokan neun re' fesat naan. Tuaf es anfee rasi 'sukif am nak, ‘Hee'! Au fe' a'soos auf fe'u, onaim au 'nao he 'kius 'iit ee fe'. Kais muto'-too'! Au ka bisa 'uum fa, tua.’ 19 Bian nak, ‘Au fe' a'soos 'aan kuuk bijae abanit afu pasan niim. Au he 'nao 'soba' sin. Onaim au 'toit ma'af, he!’ 20 Bian anteni' nak, ‘Au 'matsao fe'u, onaim ka bisa fa, tua.’ 21 Rarit ate naan antebi nfain ma natoon neu in usin. Anneen on naan ate, usif naan natoo' batuur-batuur. Rarit in naprenat in ate naan am nak, ‘Karu on naan ate, mnao rabah meu raan oopt ein, raan aan'-aan' ein anbin kota ia, he mheer meik kit atoin kasian ein, atoin hae sah-sere', atoin aforot ma abuat ein.’ 22 Anneen on naan ate, ate naan annao ma naskau tuaf-tuaf ein naan. Rarit in ntebi nfain ma natoon am nak, ‘Usi'! Sin neman nrarin, mes bare bian ruum ein fe', tua.’ 23 Onaim usif naan na'uab am nak, ‘Karu on naan ate, amnao mtein meu kuan-kuan et kota in kotin, amtea reen ein. Muteef sekau-sekau te amfuir sin, he meik sin neman, asar baer fesat ia naheun. 24 Amneen, he! Tuaf-tuaf re' antorak au haan askaut naan, sin ka nnaben niit fa fesat ia in minan, maski kre'-re'o msa'!’ ”
Amtai murek-reko' fe', na' mutuin Usif Yesus
25 Rarit Nai' Yesus sin annaon nkonon neun Yerusalem. Too mfaun ein natuin Ee. Rarit In nabani' n'ain sin am na'uab am nak, 26 “Atoni' re' batuur-batuur he natuin Kau, in ro he nneek Kau anneis na'ko are' kanan saa'-saa' ii barisi: anneis na'ko in ainaf-amaf, anneis na'ko in fee-anah, anneis na'ko in orif-tataf, ma anneis na'ko in tuan aan kuun. Karu kaah fa te, atoni' naan ka pantas fa he njair Au atoup noni'. 27 Fin atoni' re' ka nroim fa he nasaah ha'mu'it ma ma'ne'at natuin in npirsai Kau, in ka pantas fa he njair Au ngguin. Tuaf re' anroim he njair Au ngguin, maski atoni' he nroor na'maet je msa', mes in nasaah piut ha'mu'it ma ma'ne'at naan. 28 Onaim karu he mituin Kau, amtai mirek-reko' fe'. On re' atoni' he nafena' uim maktuta'. In ro he nsoi' nahunun uim je in oosn ii fe', tar antea namtiis. Kais-kaisa' roit ein ka nanokab fa. 29 Karu ka nsoi' sin fa tar namtiis, in of anfanderen anrari te, roit ein oek' ein. Rarit biak ein anmains ee ma namae je, 30 mnak, ‘Hi mkius miit atoni' ne fe'! In fe' anfandeern aah ate, ka saa'-saa' fa fe', mes narair roit.’ 31 Uab conto bian, es re' anmatoom nok makenat. Usif re' he nnao neu makenat, ro he ntook he nsoi' narek-reko' nok in aok-bian sin. Karu in suma nmu'i ha sorarus tuaf nifu bo'es (10 .00 0), in bisa niis anbi makenat nok musu tuaf nifu bo' nua (20 .00 0), ai' kaah? 32 Karu anso-so'i nrari ma, nak in of ka niis fa nbi makenat naan, reko nneis, oras muusn ee fe' ka ntaman fa fe', in nreek haefan tuaf he nnao n'urus rais rame'. 33 On naan amsa', tuaf re' he natuin Kau. In ro he ntai nafan-fani' mnak, in nabarab anrair he nasaitan sin ok-oke', ai' kaah fe'? Fin karu ka on fa naan ate, tuaf re' naan ka pantas fa he njair Au ngguin.”
Tuaf re' ka pantas fa he njair atuina' Usif Yesus, nahuum on re' masik re' ka mapake' fa
34-35 Nai' Yesus antuut In uaban naan anpaek uab manporin es antein am nak, “Maisk ii reko. Hit tpaek je he taminab amnahat. Mes karu maisk ii ka miin mari fa goen, hit he tpaek je neu saa'? Hit ka bisa tpaek je fa he tmasi amnahat. He ttao pupuk amsa', ka bisa fa. Hit tait itpoirn aah ee. Onaim hi ro he mjair on re' masik amsa', he mmoin nok manekat mok are' too mfaun ein. Sekau maruki' te, amtakan mirek-reko'!”
A'bib-kase re' namneuk
1 Oras naan, ahoik beo ngguin ma atoin ka mapaek ein neman piut-piut neu Nai' Yesus he nitan ma nnenan kuuk Ee. Mes atoin Yahudis sin naan sin, atoin re'uf. 2 Ankius on naan ate, atoin Farisis ma tunggur agama Yahudi sin na'muun ein am nak, “Phue'! Atoni' re' ia anmapartei nok atoin reu'f ein. Antoko ma naah nok sin antein!” 3 Anneen on naan ate, Nai' Yesus nareta' sin anpaek uab manporin am nak, 4 “Karu anmui' tuaf es na'ko ki, in nmui' 'bib-kase mana' nautn es. Onaim namneuk es. Oras ia, in he nmoe' on mee? In ro nnao nasaitan bo' seo mseo ngguin nbi baer mamut es, rarit nnao naim amneukt ee reka' niit ee. 5 Karu in napein 'bib-kaes amnekut naan ate, in nasaah neik je nok neek marine. 6 Antea umi te, in no'en in nonot-asar sin ma natoon neu sin am nak, ‘Hae! Hi iim he mmarin-riin mok kau fe'! Fin au upein ufani' au 'bib-kaes amnekut naan.’ 7 Anbi sonaf neno tunan on naan amsa'. Karu anmui' tuaf asanat es na'piis, rarit antebi nfain neu Uisneno, sonaf neno tunan in naan ee anmarinan ok-oke'. Sin nmarinan nneis, natuin tuaf mese' re' anfain neem neu Uisneno, na'ko tuaf bo' seo mseo re' anmonin nok amne'o ma ka nseken fa.”
Roi muti' re' namneuk
8 Rarit Nai' Yesus nareta' anpaek uab manporin es antein am nak, “Anmui' bifee mnais es anmui' roi muti' fua' bo'es. In ka nakeo naan fa te, fua' es namneuk. Onaim oras ia, in he nmoe' on mee? In ro he nnao nout paku, rarit antana' narek-reko' nbi mee-mee, ma nsaup umi naan barisi, he naim roit naan rek-reko. 9 Oras in niit nafani' roit naan ate, in no'en abitan in uim je aon bian, rarit natoon neu sin am nak, ‘Au uskau ki, he hi iim ammarin-riin mok kau fe', tua! Fin au 'iit ufani' au roi muit amnekut naan!’ 10 Anbi sonaf neno tunan on naan amsa'. Karu anmui' tuaf asanat es re' na'piis, rarit antebi nfain neu Uisneno, ameput sonaf neno tunan sin barisi anmarinan nmaten.”
Ri'ana' re' namneuk
11 Rarit Nai' Yesus antuut In reta' npaek uab manporin es antein am nak, “Anmu'i 'naef es nok in aan moen ee tuaf nua. 12 Neot es, aheit suus goe nak in aamf ee mnak, ‘Aam honi'! Ambati mfee kau au pusaak ein oras ia nai!’ Onaim In aamf ee nbait in a'mui'f ein neun in aanh ein nua sin. 13 Ka 'roo fa te, aheit suus goe na'sosa' in sapaan. Rarit in n'aum in tais ein, ma nnao kuun neu pah a'roo-'roo. Anbi bare naan in nbis-biisn ahaa roit ma nmoin nok marine re' ka mapanat fa. 14 Oras in narair roit on naan ate, pah re' naan amnaahs ee ntaamn ee, tar antea in a'moin ee njair atoin kasian. 15 Onaim in nnao naim mepu. Atoin es nbi pah re' naan antoup goe he nmeup. Atoni' naan naruur ee meup goes, re' he nhao fafi. 16 Natuin ri'ana' ia namnaah ka nabei' fa goen, onaim in neekn ee he naah mnaah fafi naan. Fin ka tiit fa tuaf he nfee ne he naah. 17 In natenab a'roo-'roo neu-mneem am nak, ‘Anbi au ama' in umi, ameupt ein ok-oke', sin nahan tar namsenan. On nai te, au es ia ma umnaah a'maet. 18 Reko nneis, au 'tebi 'fain 'eu au ama' nee. Rarit utoon ne m'ak, “Aam honi'! Au usanab a'rair 'eu Uisneno ma 'eu ko, aam honi'. 19 Au ka pantas fa he 'jair ho aan hoin aa goen. Maski ho mtoup kau 'jair aet kuri 'bi ho umi ia msa', reko!’ ” 20 Natenab anrair on naan ate, in nfeen ma nnao nfain neu in aamf ee umi. Oras in anbi 'roo goe fe', mes a'naef ee niit anrair je, onaim ansaon ee nmouf ma nkasian ee. In npoi na'ko uim je naan ee, ma naen anseun goe. Rarit a'naef ee nhoo ma nneek naan ee. 21 Onaim ri'ana' naan na'uab neu in aamf ee mnak, ‘Aam honi'! Au usanab ko'u 'eu Uisneno ma 'eu ko, tua. Au ka pantas fa he 'jair ho aan hoin aa goen.’ 22 Mes in aamf ee naprenat in ameupt ein am nak, ‘Hae! Rabah! Mait meik maan baru mnaun feu' goes he mibaru. Mikrein je ma msapaut in haek ein rek-reko. 23 Amnao mheer bijae paron es ma mroor goe, he hit tmoe' fesat kou'-ko'u. 24 Natuin au anah re' ia on re' anmaet jen, mes oras ia nmoni nfain jen. In namneuk, mes oras ia au upein ufain' ee.’ Na'uab anrair on naan ate, sin nmurai nfeest ein bu'-bua', ma sin nmarinan nmaten. 25 Oras naan, aan moen uun goe ka nbi fa umi, in nbi rene. Oras in nfain neem na'ko rene, in anbi 'roo goe fe'e te, in nneen areukt am abobet ansiin ma nabso'on. 26 In neem antea te, in no'en ate es, rarit nataan ee mnak, ‘Hae! Hi mmariin ambi fesat ia neu saa'?’ 27 Ate naan nataah am nak, ‘Usi', ho ori' nfain neem. Onaim ama' nreek kai he hai mroor bijae he mmoe' fesat ia, fin in aanh ee nfain neem nok ao-mina', tua.’ 28 Anneen on naan ate, aan unu naan natoo'. In ka nromi ntein fa he ntaam neu umi. Onaim in aamf ee nnao nfuir ee he ntaam. 29 Mes in nmaheek je mnak, ‘Aam honi'! Ho mutenab miit! A'roo-'roo re' ia, au 'meup on re' kuri 'eu ko. Au ka 'tanhai 'iit fa ho atoran mese' msa'. Mes ho ka mroor miit fa 'biib aan es, he au 'fesat ma 'mariin-riin 'ok au aok-bian sin. 30 Mes ho aan neka' re' ia, annao ma nporin roit ruum-ruum, anmakoin tafi'-tafi' nok bifee a'haek ein. Oras ia, in nfain neem on nai te, ho mroor bijae paron ma mmoe' fesat ko'u neu ne.’ 31 Mes in aamf ee nataah am nak, ‘Unu! Amneen murek-reko', hee! Ho mok kau 'roo-'roo goen. Are' saa'-saa' re' ho ama' kau gui 'mu'i sin, naan ho nggoa. 32 Mes oras ia, hit ro he tfesat he tmariin, natuin ho ori', fua' mese'. Unu' te, in on re' nmaet, mes oras ia in nmoni nfain. In namneuk, mes oras ia, tiit tafain' ee.’ ”
A'naak urusan re' npa'e'ob nahiin
1 Rarit Nai' Yesus nareta' neu In atoup noin' ein, npaek uab manporin es antein am nak, “Anmui' atoin amui't es re' namepub atoin es njair in a'naak urusan. Mes a'roo-'roo on naan ate, in nneen uab anin nak, a'naak urusan ia nmurai npa'e'ob he naruikb ee. 2 Onaim in no'en a'naak urusan naan, he nataan ee. In na'uab am nak, ‘Au 'neen ate, nak ho mpa'e'ob au 'mu'ik. Onaim oras ia, ho mnao he mtui ho 'meupm ein, rarit au he uprikas sin. Fin au he usnasab ko.’ 3 Anneen on naan ate, a'naak urusan naan natenab neu-mneem am nak, ‘Au urair beti'! Au he unsaa' oras ia? Ureen, au ka ube'if. A'kuir roit, au 'mae kuuk. 4 Karu au ka 'meup fa 'teni' 'bi ia te, au ro he 'aim ranan he biak ein anturun ma ntoup kau.’ 5 Es naan ate, in nmurai no'en tuaf-tuaf re' natusan roit na'kon in usin. In nataan ahuunt ee mnak, ‘Hoe! Ho mutuus fauk et au usi'?’ 6 Atoni' naan nataah am nak, ‘Au utuus miin saitun liter nifu haa (4.000), tua.’ Onaim a'naak urusan naan, na'uab am nak, ‘Batuur! Ho surat re' ho mutuus ii, es re' ia. Oras ia mpius goe, rarit amtook he mtui suur tuus fe'u mmak, ho mutuus liter nifu nua (2 .00 0) goah.’ 7 Rarit in nataan atoin atusat es am nak, ‘Onait ho ntein. Ho mutuus fauk?’ In nataah am nak, ‘Au utuus maka' taum karo' niufn es (1.000), tua.’ A'naak urusan naan natoon am nak, ‘Ampisu mpori' ho suur tusa' mnaa' aan, rarit amtui suur tuus fe'u, mmak karo' natun faun goah (800).’ 8 In nmoe' on naan, tar antea in uisn ee nahiin in ronen naan. Mes usif naan ro he nmanaku' nak, in a'naak urusan re' maufinu naan anpa'e'ob nahiin batuur. Onaim Au utoon ki uab manporin ia, he hi mihiin mak, karu tataib atoin apirsait ii te, ka apirsait fa gui, ro batuur in manoe nneis he nmoni nbi too gui in atnanan. 9 Onaim hi mitenab miit. Maski mansian pah-pinan ia npaek in a'mu'in he nmoe' re'uf, mes reko nneis hi mpaek hi 'mui'm ein he mmaturun es nok es. Nok ranan naan, hi mipein partein namfa-faun. Maski a'mu'if naan oke', mes Uisneno of nabarab ki bare et sonaf neno tunan. 10 Karu tuaf ka napoi nahiin fa nbi rais aan'-ana', in of ka napoi nahiin fa nbi rais ko'un. Ma karu tuaf anpa'e'ob anbi rais aan'-ana', in of anpa'e'ob nahiin anbi rais kou'-ko'un. 11 Karu atoni' ka bisa npirsai ki fa he m'urus rais aan'-ana' nbi pah-pinan ia, Uisneno he bisa npirsai ki he mmoe' rais ko'un, on mee? 12 Karu hi ka bisa m'urus fa biak ein sin a'mui'k ein hen ate, sekau nabrain he nfee ki in a'mu'in neu ki? 13 Tuaf ameput mese' ka bisa ntuthae fa usif tuaf nua. Fin in of ka nneek fa tuaf es, ma anneek tuaf es. In na'kii' anbi tuaf es, mes ka nrae natuin fa tuaf es. On naan amsa' hi arki. Hi ka bisa mneek fa Uisneno nata-tai nok hi mneek noni-roit.”
Usif Yesus na'uab anmatoom nok roit, Uisneno In Rais Reko, ma rais matsaos am manporin
14 Oras naan, anmui' atoin Farisis fauk nokan nnenan Nai' Yesus In uab ein fe'e na. Onaim sin nakree't Ee, natuin sin nakoman roit. 15 Mes Nai' Yesus nataah am nak, “Hoe! Maski hi mikninu' hi tuam ein anbi mansian ein sin maatk ein, mes Uisneno nahiin hi neekm ein naan, maufinu. Anmui' rasi mfaun re' mansian ein antuna' sin, te kaah, Uisneno naan rasin naan neu maufinu, ma nmai'nisin sin. 16 Anmurai na'ko ka'o Musa ma mafefa kniun' ein napein Uisneno In atoran, tar antea oras nai' Yohanis Asranit neem antea msa', hit atoin Yahudis atmoin tatuin atoorn ein naan. Mes oras ia Uisneno In Rais Reko natoon On ma nasiin On antea mee-mee. Anmui' tuaf amfaun n'usaha ma'tani', he sin bisa nmoin natuin Uisneno In romin. 17 Maski neon goe tunan ma pah-pinan ia namneuk, mes Uisneno In atoran aan'-ana' msa', ka namneuk fa. Titik mese' msa', ka namneuk fa! 18 Atoni' re' nporin in fee, rarit ansao ntein bifee 'teta', naan amakaket. Rarit atoni' re' ansao bifee porin naan, anmakake' msa'.”
Reta' anmatoom nok atoin amu'it ma nai' Lasarus
19 Nai' Yesus nareta' ntein am nak, “Anmui' atoin amui't es. In biasa npaek tai amasat. Fai-manas in nfesat anmapii. 20 Anbi bare naan anmui' naan atoin ama'mui't es, kaan ee nai' Lasarus. In aon ee, napapa' oke'. Neno-neno te, in partein ngguin nok ne, ma natook ee nbi atoin amu'it naan in uim je enon he ttaam. 21 In nroim he napeni mnahat na'ko atoin amu'it naan in amnaah neisf ein, mes ka napein niit fa saa'-saa'. Suma ausn ee neman ma nraim in paap oef ein. 22 Rarit nai' Lasarus anmaet. Onaim Uisneno In ameupt ein na'kon sonaf neno tunan neman ma neik je nnao. Rarit natook ee nbi ka'o Abraham in aon bian. Ka 'roo fa te, atoin amu'it naan anmate msa', rarit sin nsuub ee. 23 Mes in ka ntaam fa neu sonaf neno tunan. In ntaam an'ain ai maputu' ai marara' abar-barat, nabua nok amates amfaun. Anbi bare naan, in napein susat-ha'mu'it ma ma'ne'at anmapii. Neot es, in nait matan on nai te, in niit nai' Lasarus antoko ma nmarin-riin kuun anbi ka'o Abraham in aon bian. 24 Onaim in nkoa' am nak, ‘Ka'o Abraham! Airoo, mkasian maan kau fe', tua! Amreun nai' Lasarus he narepa' in akrurun tuun aan neu oe, he neem napeet naan au maa' tuun ii. Au he 'maet kuuk een es ai abar-barat ia!’ 25 Mes ka'o Abraham nataah am nak, ‘Airoo, anah! Mumnau murek-reko' neno uun aan fe'! Neno naan, oras ho mmoin fe' mbi pah-pinan, ho mupein main are' kanan reko. Mes nai' Lasarus suma napeni haa susat. Onaim oras ia, Uisneno anseu'saab ee nbi ia. Mes ho mupein suust am nana'renat. 26 Anneis-neisi ntein, et ho ma hai, Uisneno nbetis kit. Anmui' kefa mnanu' ma mainuan. Onaim tuaf anbi ia, ka bisa neitin fa neun naan, ma tuaf abitan naan ka bisa neman fa neun ia.’ 27 Rarit atoin amu'it naan antoti mnak, ‘Karu on naan ate, ka'o mreun nai' Sarus he nfain neu au ama' in uim je fe'. 28 Au 'mui' orif tuaf niim et nee ja fe'. Amreun nai' Sarus he nnao namnaub sin, he sin ntebi nfanin nai neu Uisneno. Maut he sin nmaten ate, sin kais antaman neu baer siraak re' ia, tua.’ 29 Mes ka'o Abraham nataah am nak, ‘Uisneno nfee nrair sin ka'o Musa ma In mafefa kniun' ein sin tuis ein. Sin ho ori' bisa nrees nafan-fani' sin, he nahinin batuur-batuur Uisneno In romin.’ 30 Mes atoin amu'it naan anprotees am nak, ‘Ka'o Abraham. Naan ka nanokab fa fe'! Sin ka nfairoir fa Uisneno In Kabin ma Prenat naan! Ro he nmui' amates anpoi na'ko nopu, he nnao natoon neu sin, na' sin nromin he natninan.’ 31 Mes ka'o Abraham nataah am nak, ‘Karu sin ka nromin fa he natniin ka'o Musa ma Uisneno In mafefa kniun' ein sin haank ein, maski amaets ein anpoin na'kon nopun amsa', sin of ka natninan fa.’ ”
Usif Yesus nanoni' anmatoom nok atoni' re' nasanab ma ntoit ampon
1 Nai' Yesus natoon neu In atoup noin' ein am nak, “Fani-fani atoni' bisa nmouf neu sanat, natuin tuaf bian sin taos ein. Mes atoin ataos ein naan, sin es re' napein siraak anneis-neisi. 2 Karu anmui' tuaf anmoe' taos tafi'-tafi' tar antea ri'ana' ka npirsai Kau fa, Uisneno of anhukun ma'fena' neu tuaf naan. Reko nneis ta'aisa' fatu ma ta'heekb ee neu in neon, rarit tait itpoirn ee ntaam neu tasi. 3 Onaim ampaant om, he hi kais ammoe' biak ein anmoufun neun sanat! Mes karu ho aom-bian nmo'e nsaan, mukain ee. Karu in na'piis, rarit neem ma ntoit ampon, amnikan main in sanat naan. 4 Karu ho aom-bian anmo'e nsaan no hiut nbi neno mese', onaim in nroim he na'piis, rarit in neem no hiut he ntoit ampon, ho ro he mnikan main in saant ein naan no hiut.”
Tuaf ro he npirsai Uisneno In kuasan
5 Neon goes, Nai' Yesus In atoup noin' ein neman ma nak Ee mnak, “Aam Tungguru! Hai neek pirsait ii ka ma'tani' fa. Amha'tain maan kai, tua!” 6 Onaim Nai' Yesus nataah am nak, “Karu hi mmui' neek pirsait meu Uisneno In kuasan, maski aan'-ana', mes hi bisa miprenat hau ko'u ia mmak, ‘Mutfaki' ma munani' nai meu tasi!’ Hau ia of natuin hi prenat naan nain.”
Tuaf ameup reko natuin in uisn ee in romin
7 Rarit Nai' Yesus na'uab antein am nak, “Tait i'tope'. Anmui' ate re' n'oet afu nbi rene, ai' ntitu' 'bib-kase nbi mnera' huun. Anmepu nrari te, ate naan anfain on umi. Ka neu fa he in uisn ee nak ee mnak, ‘Uum he hit nua kit atbukae nai!’ 8 Kaah fa, tua! Re' biasa te, in usin naan napreent ee mnak, ‘Amnao mubarab mei je meu kau. Rarit ho muah ambi kotin nee.’ 9 Karu ate naan anmoe' natuin usif naan in romin, hi mak of usif naan of antoit makasi neu ne, oo? Kaah fa, tua! 10 Hi on re' naan amsa'. Karu hi mmepu mrair are' saa'-saa' re' Uisneno nana'at ma nbasan ki sin ate, hi mi'uab am mak, ‘Hai re' ia, suma Ho aten kai re' ka maso'ik fa. Hai ka maim fa he munaib ma mbo'is kai. Hai suma minaob ahaa hai mepu re' Ho muna'at kai sin, tua.’ ”
Usif Yesus nareko' ameen nui-atroki' tuaf bo'es
11 Oras Nai' Yesus sin annaon neun kota Yerusalem, sin ntean nakat propinsi Galilea ma propinsi Samaria. 12 Oras sin he ntaman neu kuan es, anmui' atoin ameen nui-atroki' tuaf bo'es neman he nateef nok Ne. Sin nhaken nbin a'roo, 13 rarit ankoa' ein bu'-bua' am nak, “Yesus! Usi'! Amkasian maan kai, tua!” 14 Oras Nai' Yesus niit sin on naan ate, In nrenu mnak, “Hi mnao mikrira' hi aom ein meu a'naak rais pirsait, maut he in naprikas ki nak, hi meen nui-atroki' naan namnekun nrarin, ai' kaah.” Annenan on naan ate, sin nnaon. Mes anbin raan atnana' on naan ate, nok askeken, sin nareok nanin. 15 Sin nnaon nkonon ma nmarinan nmaten. Mes tuaf es antbin nfain neem ma nateef nok Nai' Yesus. In nkoa' am nak, “Pures ma bo'is neu Uisneno! Au ureko 'rair, tua!” 16 Onaim in nri'tuu ma ntoit makasi kou'-ko'u neu Nai' Yesus. (Te kaah, in ka atoin Yahudis fa. In re' naan atoin Samarias re' anmaka'rais ein piut nok atoin Yahudis sin.) 17 Onaim Nai' Yesus nataan neu tuaf ein re' nok Ne ji mnak, “On mee? Fe'e na Au ureko' tuaf bo'es, ai'? Tua seo' ne, etan mee? 18 Nansaa' am es atoin sona' ia nfain neem he ntoit makasi neu Uisneno, ma nboi's Ee?” 19 Onaim Nai' Yesus na'uab neu atoni' naan am nak, “Ho mureok goen, natuin ho mpirsai batuur-batuur meu Kau. Onaim amfeen nai, ma mfain nai nok ao-mina'!”
Usif Yesus nareta' anmatoom nok neon amsoput, ma In oras he nfain neem
20-21 Neon goes, anmui' atoin Farisis fauk neman ma nataan Nai' Yesus am nak, “Aam Tungguru! Mutoon miit kai fe'! Reka' te Uisneno nmurai nanaob In aprenat?” Onaim Nai' Yesus nataah am nak, “On nai! Kais mak Uisneno nanaob In aprenat nok tanar huma'-huma' nbi pah-pinan ia, he atoni' bisa niit ee neik matan fuan. Atoni' ka napein fa bukti he nak, ‘Amkius miit ia! Fin Uisneno nanaob In apreent ee, es ia!’ ai', ‘Es nee!’ Kaah fa, tua! Natuin In nanaob In apreent ee anbi hi sonam ma hi tnaanm ein et tuaf mese'-mese' in nekan nanan.” 22 Rarit Nai' Yesus na'uab neu In atoup noin' ein am nak, “Ka 'roo fa te, Au Mansian Batuur-batuur re' ia, ka 'ok ki ubua fa goen. Of anbi neon ma'nuuk ein, hi mroim he miit Kau oras Au 'tebi 'fain 'uum. Mes Au ka 'uum fa fe'. 23 Rarit karu tuaf-tuaf neman ma natonan neu ki mnak, ‘Kristus es ia!’ ai', ‘Kristus es nee!’, hi kais amtaisiub he maen meu-m'iim, fin sin uab ein naan, puta-kriu goah. 24 Fin oras re' Mansian Batuur-Batuur naan anfain neem ate, in tanar naan mamnita' maat-maat, on re' rimat re' nariim he nmoe' neon goe me'u na'ko pani neu panin. 25 Mes In ro he nasaah ha'mu'it huma'-huma' fe'. Ma mansian batan muni' ia, ka nroim fa he nnenan ma ntorak napoitn Ee. 26 Mes oras In ntebi nfain neem, mansian ein anmonin maufinu on re' biasa, nahuum on re' nai' Noh in baatn ein. 27 Oras naan, sin nbukaen, nmo'en fesat kabin, tar antea oras nai' Noh antaam neu bnao oe naan. Mes mansian ein ka nromin fa he natninan. Nok askeken ate, noe sako' nsaen sin ma nareu' sin ok-oke'. 28 Naan huma' mese' amsa' on re' mansian ein re' anmonin maufinu oras nai' Rot in batan. Oras naan, sin nbukaen kuuk, anraakn ein kuuk, nmepun rene, nmo'en umi, ma nmonin maufinu on re' biasa sin nmo'-mo'en. 29 Mes mansian ein ka nromin fa he natninan. Rarit kik-kiku naan, oras nai' Rot naen nasaitan kota Sodom, nok askeken ate, uur ai ma bariri nmouf neem na'ko neon goe ma nout nakrat-rati' sin ok-oke'. 30 Onaim hi mpaant om! Kais-kaisa' Mansian Batuur-Batuur naan anfain neem, ma mansian ein suma nmonin on re' biasa. Mes nok askeken ate, In nboor neem. 31 Neno naan, tuaf re' antoko nbi teras, kais amtaam amtein meu uim je nanan he mkikin umi. Tuaf re' anmepu nbi rene, kais amfain he mait antein bare' et umi. 32 Mimnau nai' Rot in fee oras naan. In on mee? In nmaet, natuin in namnau in baer' ein etan in umi. 33 Atoni' re' ka nroim fa he natuina' Kau, natuin in nneek In tuan, in a'moin ee, of ruum am parsuum aah. Mes tuaf re' annona' in a'monin natuin in nneek Kau, Uisneno of ansoi nafeitn ee na'ko in saant am penu sin, ma in nmoin nabar-baar nok Ne. 34 Au utoon 'ain ki! Oras Mansian Batuur-Batuur ii nkoen On nfain neem, karu anmui' tuaf nua ntupan nbin harak, nok askeken ate, Uisneno nait tuaf es, ma namaika' tuaf es. 35 Karu anmui' bifee nua napaun maka', Uisneno of nait tuaf es, ma namaika' tuaf es. 36 Karu anmui' tuaf nua antofan nbin rene, Uisneno of nait tuaf es, ma namaika' tuaf es.” 37 Annenan on naan ate, Nai' Yesus In atoup noin' ein nataan Ee mnak, “Aam Tungguru! Of are' rasin naan anjarin nbin mee?” Onait Nai' Yesus anpua-ritu' sin uab am nak, “On nai! Karu hi miit koor amneuk puun ein natpeen nabu-buan neun mee te, hi mihiin mak, naan anjair tanar am nak, sin niit puun ee baran.” Anpaek sarit ma'nifa', oras Kristus ankoen On nfain neem, in tanar sin of mamnita', karu atoni' ntakan nahiin.
Reta' anmatoom nok banu' tuaf es, ma afeek rasi re' maufinu
1 Neot es, Nai' Yesus nanoni' In atoup noin' ein, anpaek uab manporin, maut he sin n'oen ein kais natfeek ma kais an'oren. Sin ro he npirsain piut-piut neu Uisneno. 2 In reta' naan on nai: “Anbi kota es anmui' afeek rasi re' ka nfairoir fa Uisneno. In ka nrae natuin fa sekau-sekau msa'. 3 Anbi bare naan anmui' bifee baun es, neem fani-fani ma ntoit afeek rasi naan am nak, ‘Aam afeek rasi! Mufeek maan kau au rais ji, tua. Mufeek ee te, ro he natai!’ 4 Nahunu te, afeek rasi naan ka nrae natuin fa bifee banu' naan. Mes anna-nao te, in nrenan bifee banu' naan in hanan. Rarit in ntoko ma natenab am nak, ‘Batuur, au re' ia ka 'fairoir fa Uisneno, saa' antein mansian. 5 Mes bifee banu' ia, annaak menab kau goen. Es naan ate, maut he au ufeek in rais ji, natai fe'! Kaah fa te, in of para nfain neem, he nahaeb niis kau goen.’ 6 Hi mitenab miit afeek rasi re' amaufinut naan in uaban. 7 Karu nna-nao ma in nturun bifee banu' naan, Uisneno of anturun Iin na msa', re' an'oen ein fai-manas he ntotin turun-babat na'kon Na. Mes Uisneno ka nfe'-fe'en fa. 8 In n'urus sin rasin naan rabah. Onaim Au he utaan ki on nai: oras Au, Mansian Batuur-Batuur re' ia, 'tebi 'fain 'uum a'rair, Au of uteef 'ok atoin apirsait anbin pah-pinan ia, ai' kaah?”
Atoin Farisis tuaf es, ma ahoik beo tuaf es annaon n'oen ein
9 Nai' Yesus nareta' ntein anpaek uab manporin, anmatoom nok tuaf-tuaf re' naan in tuan ee amneot, ma nasbini' biak ein. In nareta' mnak, 10 “Anmui' naan a'naef nua nnaon n'oen ein nbin Uim Onen Uuf. Tuaf es na'ko pukan partei pirsait Farisi; es antein ahoik beo. Atoin Yahudis sin naan atoin Farisis sin, atoni kninu'. Mes sin naan ahoik beon guin, atoin re'uf. 11 Antean uim onen on nai te, atoin Farisis naan anfeen anhaek ma n'onen am nak, ‘Makasi Usi', natuin au re' ia, atoin reko. Au ka maufiun fa on re' biak ein. Au ka ubaak, ka ukoom, ka 'makoin fa 'ok es in fee. Makasi Usi', natuin au ka 'maufiun fa on re' ahoik beo re' ia. 12 Au unaah au tuak ii no nua nbi krei jes in nanan. Au 'fee bait bo' na'ko saa'-saa' re' au upein kuuk sin.’ Atoin Farisis naan, an'onen on re' naan. 13 Mes ahoik beo naan anhaek na'roo-'roo nbi kotin nee. In ka nabrain fa he nait in a'nakan ma nbaiseun on neno. In n'onen, mes in na'ruir aah, ma in neekn ee krati'-krati' mnak, ‘Koi Usi'! Amkasian maan kau, mansian asanat re' ia, tua! Amfee maan kau saok sanat neu are' au saant ein, tua!’ 14 Oras tua nua' ein naan anfanin neun sin umin, sekau es re' nmarame' nrair nok Uisneno? Atoin Farisis abe'ot naan aa oo, ai', ahoik beo? In ro he ntoup ahoik beo re' neek ma'nura' naan. Mes In ka nrae naan fa atoin Farisis naan. Fin Uisneno ntetak namouf abe'ot, ma ntuna' na'ratan atoin neek ma'nura'.”
Usif Yesus na'uab anfee tetus neu ri'aan ein
15 Neot es, mahoint ein naskau neik sin ana kruu'f ein neu Nai' Yesus, he In ntao In a'niimk ein he na'uab anfeen sin tetus-athoen. Ankius on naan ate, Nai' Yesus In atoup noin' ein nakain mahoint ein naan. 16-17 Mes Nai' Yesus anseun ri'aan ein naan, he neman neu Ne. Rarit In nakain In atoup noin' ein am nak, “Amkonan ri'ana kruu'f ein naan neman neun Kau. Hi kais am'eka' sin. Mimnau mirek-reko'! Fin tuaf-tuaf re' anroim he njair Uisneno Iin ja, in ro he na'pesi' in tuan neu Uisneno nahuum on re' ri'ana kru'uf re' na'peis ok neu sin ainaf-amaf sin.”
Amu'it re' nroim he ntaam neu sonaf neno tunan
18 Neot es, a'nakat tuaf es na'ko atoin Yahudis neem nataan Nai' Yesus am nak, “Aam Tungguru re' mahormata'! Au he 'moe' on mee he uhiin batuur-batuur 'ak, au bisa 'taam 'eu sonaf neno tunan ma 'moin ubar-baar 'ok Uisneno?” 19 Onaim Nai' Yesus nataah am nak, “Nansaa' am es ho musee Kau mmak, ‘re' mahormata'’? Suma tuaf mees' aah re' mahormata', es re' Uisneno. 20 Ho muhini mrair Uisneno In atoran na'ko unu' nak: Kais ammakaek; kais amroor mansian; kais mibaak; kais amjair saksii poi; ma amhormaat ho aina'-ama' sin.” 21 Atoni' naan nataah am nak, “Batuur, Aam! Au utuin a'rair atoorn ein naan nmurai na'ko au aan'-ana' fe'!” 22 Anneen on naan ate, Nai' Yesus nak, “Reko! Mes ho mkuran rais jes. Oras ia, amtebi mfain nai he mu'sosa' mporin ho 'mui'm ein ok-oke'. Rarit amnao mbait roit ein meu ama'mui't ein. Rarit amtebi mfain uum he mutuin Kau. Fin Uisneno of anbaras anfee ko a'mu'if sonaf neno tunan.” 23 Anneen on naan ate, atoni' naan neekn ee nsuus, natuin in a'mui'n ii kah een. 24 Ankius neu in ntebi nfain nok neek susat on naan ate, Nai' Yesus natoon neu In atoup noin' ein am nak, “Atoin amui't ii, susa ma'tani' he ntaam neu sonaf neno tunan. 25 Hit tataib ee nok rasi bian. Ka neu fa he bikaes unta ntaam neu in o'of anpeo' aent ee konan. On naan amsa' atoni' re' suma nharap ma nafnekan anbi in a'mu'in, mes ka nharap ma nafnekan fa neu Uisneno, ka neu fa he in ntaam neu sonaf neno tunan.” 26 Too mfaun ein re' annenan Nai' Yesus na'uab on naan, nataan Ee mnak, “Karu batuur susa neu atoin amu'it on re' naan, atoni' human on re' mee na' bisa napeni saok sanat ma 'honis?” 27 Nai' Yesus nataah am nak, “Neu mansian ii te, batuur rasi namfaun ka neu he njair fa. Mes neu Uisneno te, are' saa'-saa' ii ro bisa njarin.” 28 Onaim nai' Petrus antuut am nak, “Aam! Hai mnao misaitan hai 'mui'm ein oek' een, he mituin Ko. Onaim hai of mipein saa'?” 29 Nai' Yesus nataah am nak, “Petrus! Amneen murek-reko'! Atoni' re' nasaitan in umi, in fee, in orif-tataf, in ainaf-amaf, ai' in aanh ein, natuin in nanaob Uisneno In mepu, 30 ro tebes, in ntoup nafani' sin amfaun anbin pah-pinan ia. Rarit anbi oras neon amsoput, in nmoin nabar-baar nok Uisneno.”
No teun goen Usif Yesus na'uab anmatoom nok In a'maten
31 Nai' Yesus annao nok In atoup noin' ein tuaf bo'es am nua ma na'uab nok sin anmesen am nak, “Hi ar-arki mihini mrair mak, oras ia hit atnao teu kota Yerusalem. Attea nee te, are' rasin re' Uisneno In mafefa kniun' ein antui sin unu' anmatoom nok Mansian Batuur-Batuur naan, of anjair teb-tebe on re' saa' re' sin ntui sin. 32 Sin of nana'at Kau neu atoin sona' re' ka npirsain fa neun Uisneno. Rarit sin nakre'et Kau, na'paran Kau huma'-huma', npuran hape neu Kau, 33 nbeos Kau, rarit anroor na'maet Kau. Mes anmeu on naan ate, Au 'moni 'fain.” 34 Annenan on naan ate, Nai' Yesus In atoup noin' ein ankekun, natuin sin ka nheek naan fa In uab naan in a'moufun.
Usif Yesus nareko' afoort es
35 Oras Nai' Yesus sin he noi ntaman neu kota Yeriko, anmui' atoin afoort es antook ma ntoit roit anbi raan ee ninin. 36 Oras in nneen too mfaun ein nnaon npe'on naan ate, in nataan sin im nak, “Hoe! Saa' na es re' ia, tua?” 37 Onaim sin natoon ee mnak, “Nai' Yesus na'ko Nasaret, neem annao npeo' re' ia.” 38 Anneen on naan ate, aforot naan ankoa' naher-heer am nak, “Yesus! Sufa'-ka'uf usif nai' Daut. Amkasian maan kau, tua!” 39 Tuaf-tuaf re' nahunun anbin Nai' Yesus In matan nakain ee he namninu'. Mes in nkoa' piut, ma naher-heer am nak, “Auwoo, sufaf Daut! Amkasian maan kau, tua!” 40 Oras Nai' Yesus anneen on naan ate, In nasnaas. Rarit In nreek tuaf he nnao nnaa' neik aforot naan. Neman ntean Nai' Yesus In matan ate, Nai' Yesus nataan ee mnak, 41 “Ho mroim he Au 'moe' saa' 'eu ko?” In nataah am nak, “Aam! Au 'toit he au bisa 'iit, tua.” 42 Nai' Yesus nataah ee mnak, “Reko. Natuin ho mpirsai mak Au bisa ureko ko, onaim oras ia ho mkius nai.” 43 Nok askeken ate, aforot naan nareok nain. Onaim in natuin Nai' Yesus ma nbo'is Uisneno. Too mfaun re' nitan on naan, nanaib Uisneno msa'.
Usif Yesus nateef nok ahoik beo tuaf es, kaan ee nai' Sakeos
1 Rarit Nai' Yesus sin antaman npe'on kota Yeriko he nnaon nkonon. 2 Anbi naan, anmui' a'naak hoik beo tuaf es neu prenat pah Roma. In kaan ee, nai' Sakeos. In atoin a'mu'it. 3 Oras in nneen Nai' Yesus he neem annao nkoon on nai te, in nroim he niit Nai' Yesus. Mes in ka bisa nkius niit Ee fa n'oekn On, natuin too mfaun ein naub naan Nai' Yesus. Ma nai' Sakeos amsa' koer pu-pui. 4 Etun in naen nahuun, rarit ansae nbi hau uu' goes anbi raan ee ninin, re' he Nai' Yesus anpeo' naan. 5 Neem antea hau naan in uun ate, Nai' Yesus anbaiseun. Rarit no'en nai' Sakeos am nak, “Sakeos! Amsaun uum, rabah! Neno ia Au he 'tuup a'tahan 'bi ho umi.” 6 Nai' Sakeos anmasauh. Onaim in nsaun rabah, rarit nok Nai' Yesus annaon neu in umi. In nmariin anmat-maet. 7 Mes too mfaun ein na'muun ein am nak, “Phueh! Nai' Sakeos ia, atoin re'uf! Nansaa' am es Nai' Yesus antuup antahan neu nai' Sakeos in umi? Too mfaun ein nahinin nrair je te!” 8 Neman ntean umi te, nai' Sakeos anhake nbi Nai' Yesus In matan, ma na'uab am nak, “Aam Tungguru! Anmurai neno ia, au 'batis au 'mui'k ein batis nua, he 'fee batis es 'eu ama'mui't ein. Karu au 'hoik beo ma bikase' naen neik anneis-neis, au 'fee ufani' sin no haa.” 9 Nai' Yesus nataah am nak, “Reko. Neno ia Uisneno nfee saok sanat ma 'honis neu ho uim ji nanan, natuin ho mpirsai meu Uisneno on re' ka'o Abraham. 10 Fin Uisneno nreek haefan Kau he 'jair Mansian Batuur-Batuur a'bi pah-pinan ia. Au 'uum he 'aim tuaf-tuaf aseket na'ko Uisneno In ranan, he 'feen sin saok sanat ma 'honis.”
Reta' anmatoom nok ate re' an'ator rek-reko neu in uisn ee in noni-roit ein
11 Oras naan, anmui' too mfaun re' nok annenan Nai' Yesus In uaban. Sin he noi ntaman neun kota Yerusalem. Sin nateenb ein nak In he nanaob Uisneno In apreent ee rabah een anbi naan, nahuum on re' usif. Rarit Nai' Yesus nareta' sin reet es anpaek uab manporin, 12 am nak, “Anmui' naan kaes kou' goes. In he nnao neu pah a'pen-pene bian, he sin nasaeb ee 'piru'-baru njair usif. Rarit na' in he nfain neem anjair usif neu in pah aa kuun. 13 Oras in nabarab anrair he nnao, in no'en in ameput tuaf bo'es, rarit in nana'at sin roit, tuaf es ate, roi noni fua' es. In nfee prenat am nak, ‘Hi mpaek roit re' ia njair modal. Oras au 'fain 'uum ate, hi mitoon kau mak hi miis fauk een.’ Rarit in nkoen on. 14 Mes in too gui bian, ka nroim je fa. Onaim sin nreek haefan tuaf neu bare nee, ma natonan am nak, ‘Hai ka mroim fa tuaf re' ia he in nnaa' aprenat neu kai.’ 15 Maski on naan amsa', mes sin nasaeb ee 'piru'-baru. Rarit in ntebi nfain neem. Neem antea in sonaf, in no'en ameput tuaf bo'es re' naan, rarit nataan sin am nak, ‘Hi miis maan fauk een na'ko roi nonin re' au 'fee sin naan?’ 16 Ameput ahuunt ee natoon am nak, ‘Usi'! Au 'iis no bo'es na'ko modal re' ho mfee kau goe ji, tua.’ 17 Onaim usif naan nak ee mnak, ‘Reko! Ho re' ia, ameup reok goes. Natuin au bisa 'pirsai ko 'bi rais aan'-ana', onaim oras ia ho mnaa' aprenat meu kota bo'es.’ 18 Onaim ameput es natoon am nak, ‘Usi'! Au 'iis roi noni fua' niim na'ko modal re' au 'toup goe, tua.’ 19 Rarit usif naan nak ee mnak, ‘Reko! Karu on naan ate, au 'ait ko he mnaa' aprenat meu kota niim.’ 20 Ameput es anteni' neem neik in roi noni naan. Rarit nbaiseun am nak, ‘Usi', ho roi noin ji es ia, tua. Au 'aum goe ma u'koro urek-reok' ee he kais namneuk. 21 Au 'moe' on re' naan, natuin au umtaus ko, tua. Au uhiin 'ak ho atoin maputu' ma ma'tani' ko, tua. Fin ho biasa mait saa' re' ka ho goa fa, ma mseu saa' re' ho ka mseen ee fa, tua.’ 22 Anneen on naan ate, uisf ee naskaar ee mnak, ‘Hoe, amonot! Ho uabam naan neik kuun atfeka' neu ko. Ho mak oni' au ma'tani' kau, re' au 'ait saa' re' ka au goa fa, ma 'seu saa' re' ka 'seen ee fa. 23 Karu on naan ate, nansaa' am es ho ka mutunu' fa roit ia meu bank? He oras au 'fain 'uum ate, au upein in sufan, maski kre'-re'o msa', reko.’ 24 Onaim usif naan anreun tuaf bian anbin naan am nak, ‘Mait in roit naan, ma mnoon ee meu ameput re' niis fua' bo'es fe'e na.’ 25 Mes sin nprotesan am nak, ‘Usi'! Atoni' naan in napein sero mfaun een. Onait nansaa' am es tait ta'ko tuaf re' anmui' kre'-re'o, he ta'baba' ttein' ee?’ 26 Mes usif naan nataah am nak, ‘Mitenab mirek-reko'! Fin tuaf re' an'urus nahiin saa' re' tuaf nanaa't ee neu ne, of natnanab anfee ne. Mes tuaf re' napeeh he n'urus saa' re' tuaf nanaa't ee neu ne, of ansain nain saa'-saa' re' in nmui' sin. 27 Onaim oras ia, hi mnao mheek au musun re' ka nroim kau fa he 'jair usif. Meik sin neman neun ia, rarit amroor sin anbin au matak. Amnao nai!’ ”
Usif Yesus antaam neu kota Yerusalem
28 Nai' Yesus nareta' nrair on naan ate, sin nnaon nkonon neun kota Yerusalem. Nai' Yesus nahuun. 29 Oras sin he ntean kuan nua, es re' kuan Betfage ma kuan Betania, re' etan a'to'ef Saitun in ninin, In nreek haefan in atoup noni' tuaf nua he nnaon nahunun. 30 In nreun sin am nak, “Hi mnao meu kuan re' abit matan nee. Hi of miit bikaes keledai aan es mafutu' et naan. Atoni' ka nsaen niitn ee fa fe'. Hi mseif je, ma mheer meik je neem. 31 Karu tuaf nataan ki mnak, ‘Nansaa' am es hi mseif bikaes keledai naan?’ Hi mitaah am mak, ‘Hai Usi' nroim he npake.’ ” 32 Rarit sin nua sin nnaon ma niit bikaes keledai ana' naan, on re' Nai' Yesus na'uab. 33 Oras sin nseif bikaes keledai naan, in tuan ee nataan sin am nak, “Hoe! Nansaa' am es hi mseif hai bikaes aan?” 34 Onait sin natahan am nak, “Hai Usi' anroim he npaek je, tua.” 35 Bikaes tuaf naan anroim, rarit sin nua sin anheer neik bikaes keledai naan neu Nai' Yesus. Sin na'peni' bikase' naan npaken tai ko'u. Onaim sin nasaeb Nai' Yesus. 36 Too mfaun ein nait sin tai muit ein ma sin pouk ein, rarit na'been sin anbin ranan, he nseun Nai' Yesus on re' kaes ko'u. 37 Oras In nmurai nnao neiki nsanun na'ko 'to'ef Saitun ate, too mfaun ein ma In atoup noin' ein anmurai nkoa' ein, ma nsakanan neik pures-bo'is neu Uisneno, natuin are' kanan kuasa sin tanar re' sin niit sin naan. 38 Sin nsakanan am nak, “In re' ia, Usif re' Uisneno nreek haefn Ee neem! Uisneno anfee tetus neu Ne! Oras ia, mansian ein bisa nmarame nfain nok Uisneno et sonaf neno tunan. Pures-bo'is neu Uisneno re' antuun On ma naprenat et neno a'raat re'uf.” 39 Mes anmui' atoin Farisis anbi too mfaun ein sin atnaank ein. Sin na'uab neun Nai' Yesus am nak, “Aam Tungguru! Mukain sin he kais ankoenenon on re' naan. In on he bainesi'!” 40 Mes Nai' Yesus nataah am nak, “Hae! Au utoon 'ain ki, he! Karu too mfaun ein ia nfeef a'temen ate, fatun re' ia of anbo'is Uisneno!”
Usif Yesus ankaena' kota Yerusalem
41 Oras sin npaumak-makan he ntaman neu kota Yerusalem, Nai' Yesus ankius kota naan ate, In nmurai nkae ma nain, 42 am nak, “Koi, abitan Yerusalem sin! Au 'roim he neno ia, hi mtoup rais rame' ma mamut re' Au 'eiki. Mes natuin hi ka mrae mituin fa Uisneno, onaim oras ia hi mhae'roob om. Rais rame' ma mamut naan na'roo goen na'ko ki. 43 Of hi muusn ee antuunb ein afu tunab-tunab npeo' hi rame-mnanu, rarit ntaman nbaan ki. 44 Sin nbeos ki ma mtaikobi mnoba' maan ahaa afu, rarit anroor niis ki ma hi aanh ein barisi. Sin of ka nkonan fa fatu fua' mese' msa' he nhaek, natuin Uisneno neem anrair he nsoi nafetin naan ki, mes hi ka mihiin Je fa!”
Usif Yesus antaam neu Uim Onen Uuf
45 Rarit Nai' Yesus antaam neu Uim Onen Uuf. Anbi umi naan in kintal, atoin ein nmoe' je njari 'masa', he na'soos ein mu'it re' npaek sin he na'tuur ein. Ankius on naan ate, Nai' Yesus anriu' napoitan sin na'kon bare naan. 46 In naskarak sin am nak, “Uisneno In mafefa kniun' ein antui nanin am nak, ‘Au ufena' Umi re' ia, he sekau-sekau goah bisa neman n'oen ein neun ia.’ Mes hi mmoe' je njair apaikaurt ein sin baer buat.” 47 Rarit Nai' Yesus neem neno-neno nbi Uim Onen Uuf ma nanoni' nbi naan. Mes a'naak rais pirsait Yahudi sin a'naakt ein, tunggur agaam ein, ma atoni mnais harat Yahudi sin namin ranan he nroor Goe. 48 Mes sin ka napenin fa sraak, natuin too mfaun ein anmarinan nmaten he nnenan Nai' Yesus In uaban.
Sin nmaktaan ein anmatoom nok Usif Yesus In hak am kuasa
1 Neon goes, Nai' Yesus annao ntaam anbi Uim Onen Uuf, rarit nanoni' Uisneno In Rais Reko nbi kintal. Onaim a'naak rais pirsait Yahudi sin a'naakt ein, tunggur agaam ein, ma atoni mnais haart ein neman ma nataan Ee. 2 Sin nataan Ee mnak, “Sekau es anfee Ko hak, he ho mtao taisibu mbi ia afi naa? Mutoon miit kai!” 3 Onaim Nai' Yesus nataah am nak, “Au he utaan aan rais jes amsa', rarit na' Au utaah ki. 4 On nai: hi mihiin nai' Yohanis Asranit, ai'? Sekau es re' anfee ne kuasa he in nasrain atoni'? Uisneno oo, ai', mansian?” 5 Onaim sin nabuan ma na'uab ein neu-mneman am nak, “Ha'a! Kreot ii naan kit ein. Karu hit tak, ‘Uisneno es arenut’, of In nak, ‘On naan ate, hi ka mpirsai fa nai' Yohanis neu saa'?’ 6 Mes hit ka bisa fa he tak, ‘mansian es arenut’, natuin too mfaun ein of naitin fatu ma npoir na'maet kit. Natuin sin npirsain nak nai' Yohanis naan, Uisneno In mafefa kninu'.” 7 Rarit sin nataah Nai' Yesus am nak, “Hai ka mihiin fa.” 8 Onaim Nai' Yesus nataah neu sin am nak, “Karu on naan ate, Au ka 'roim fa he utoon amsa', 'ak sekau es anreun Kau.”
Reta' anmatoom nok tuaf re' anseeb poo' anggur
9 Rarit Nai' Yesus nareta' sin reet es antein. Reta' naan nak, “Anmui' naan atoin es anroe hau anggur. In na'seba' poo' anggur naan neu tuaf asebat, he sin nbatin oras sin napenin po'on naan in afan. Rarit in nfoo' neu pah a'pen-pene 'teta' ma natua sero 'roo nbi naan. 10 Oras he nseun hau fua anggur ate, poo' tuaf naan anreun in ameput tuaf es he neem antoup neik in sapaan na'ko aseebt ein naan. Mes aseebt ein anbeos ameput naan, ma nriu' goe nfain ruum aah. 11 Rarit poo' tuaf naan anreek haefan tuaf es antein. Mes aseebt ein naan anbeos goe, ma namae. Rarit anriu' goe nfain ruum aah. 12 Onaim poo' tuaf naan anreek haefan ameupt es anteni', mes sin nbeos napaap ee, rarit antokar napoin ee. 13 Poo' tuaf naan antoko ma natenab am nak, ‘Au he 'moe' on mee 'tein? Reko nneis Au 'reek haefan au aan neka'. Sin of anhormaat ma nseun goe rek-reko.’ Onaim in nreek haefan in aan hoin ee nnao neu bare naan. 14 Mes oras aseebt ein niit ri'ana' naan, sin na'uab ein am nak, ‘Amkius miit! A'naef ee nreek haefan neu in aan honi'. In es re' of antoup a'naef ee in pusaak ein ok-oke'. Onaim iim he theek je ma troor tiis ne nai! Maut he hit es atpaar kuuk po'on ia.’ 15 Oras ri'ana' naan neem antea te, sin nheer anfoont ee npoi na'ko po'on naan, rarit anroor nisan. Onaim Au he utaan ki. Hi mitenab saa' neu poo' tuaf naan. In he nmoe' saa' neu aseebt ein naan? 16 Anbi Au teenb ii te, in ro he neem ma nroor niis sin ok-oke', rarit na'seba' po'on naan neu tuaf bian antein.” Oras too mfaun ein annenan Nai' Yesus na'uab on naan ate, sin natahan am nak, “Karu reko te, Uisneno kais anhukun kai on naan!” 17 Rarit Nai' Yesus an'eer sin, ma nataan sin am nak, “Karu ka njair fa he nhukun sin on naan ate, nansaa' am es Uisneno In mafefa kniun' ein antuin am nak on nai: ‘Anmui' naan faut goes re' tuukn ein nait inporin, mes oras ia, fatu naan anjair fatu 'sukif neu nii ainaf?’ 18 Tuaf re' nastuun anbi fatu naan, of namreu', natuin in napein hukun. Ma karu fatu naan anmouf ma ntoom tuaf es, in of namre'u msa', natuin in napein hukun.” 19 Oras tunggur agaam ein ma a'naak rais pirsait Yahudi sin a'naakt ein annenan reta' naan, sin nahinin nak Nai' Yesus anseer sin npaek uab manporin fe'e na. Natuin sin natai nok re' aseeb poo' anggur sin naan. Onaim sin nato'on nmat-maten. Onaim sin n'aotr ein asraak he nheek Nai' Yesus. Mes sin natiun gok neu too mfaun ein re' anroim Nai' Yesus In nonin. Onaim sin nnaon nasaitn Ee on ahaa re' naan.
“Amfee meu Uisneno saa' re' Uisneno In hak”
20 Rarit Nai' Yesus In musun annuu' Goe ma nsuntiur Goe piut. Sin namin asuntirus, re' bisa nmoe' jon on re' atoin reko, he nnao na'uab nakreo Nai' Yesus. Sin nhar-haarp ein he on mee te, Nai' Yesus na'uab namouf anaa' aprenat pah Roma, rarit sin natrakan neu gubernur, he in nreek tuaf he nheek Nai' Yesus. 21 Onaim sin nreek haefan asuntirus naan he nnao nataan Nai' Yesus am nak, “Aam Tungguru! Hai mihiin mak Ho nekam naan amne'o. Ho ka mputa-kriu muhiin fa, ma ka mpiir fa humaf. Ho munoni' Uisneno In Kabin ma Prenat namneo ma namnoon goah. 22 Oras ia, hai he mitaan maan Ko, rais jes: tatuin hit atoran rais pirsait Yahudi, of hit he tbeos beo neu prenat Roma in uis kou' goe, ai' kaah?” 23 Mes Nai' Yesus nahiin nain sin sarit re' he nakreo Goe. Onaim In nataah am nak, 24 “Mikrira' miit Kau roi muti' fua es fe'!” Onaim sin nakrira' roit naan neu Ne. Rarit In nataan am nak, “Sekau in human ma in kanan es re' maruna' re' ia?” Onaim sin natahan am nak, “Uis ko'u keser, tua.” 25 Onaim Nai' Yesus nak, “Karu on naan ate, amfee meu preent ii saa' re' preent ii in hak. Ma mfee meu Uisneno saa' re' Uisneno In hak.” 26 Annenan on naan ate, sin nmasahun, natuin sin ka bisa nakreo naan Ee fa nbi too mfaun ein sin maatk ein. Onaim sin nfeef a'temen nai.
Usif Yesus nanoni' anmatoom nok amates anmoni nfain
27 Rarit anmui' tuaf fauk na'kon partei pirsait Saduki neman he na'uab na'kreo Nai' Yesus. Atoin Sadukis sin nanoin ein am nak, atoin amaets ein ka bisa nmonin nfanin fa oras neon amsoupt ii ntea. Sin neman ma nataan Nai' Yesus am nak, 28 “Aam Tungguru! Ka'o Musa antui nain kit atoran am nak: karu anmui' atoni' nmaet, mes ka nahoni' fa, ro atoni' naan in oirf ee ansao bifee banu' naan, he nfee sufa' neu in tataf amates naan. 29 Batuur unu' te ka'o Musa nanoni' on naan. Mes oras ia hai he mitaan on nai: anmui' naan atoni' tuaf hiut sin nma'ori-taatn ein. Aan moen unu ansao, mes anmaet, ma ka nahoni' fa. 30 Rarit in orif re' natuin ee ji nsao bifee banu' naan. Ka 'roo fa te, in nmaet, mes ka nahoni' fa. 31 On naan amsa', in orif es anteni'. In ansao bifee banu' naan, mes anmate msa', ma ka nahoni' fa. Matsaos naan nanaob on piut tar namsopu ntea aheit suus goe, mes in nmate msa'. 32 Namuni te, bifee banu' naan anmate msa'. 33 Onaim oras ia, hai he mitaan on nai: bifee naan ansao niit atoni' hiut. Karu pah-pinan ia namsopu te, Uisneno namonib nafani amates sin, bifee naan in moen je, es re' mee?” 34 Onaim Nai' Yesus nataah am nak, “Mansian ii anmatsaon anbin pah-pinan ia goah. 35-36 Mes anbi sonaf neno tunan, ka tiit fa matsaos antein. Ma anbi nee msa' ka tiit fa 'maten antein. Sin huma' mese' on re' Uisneno In ameupt ein sonaf neno tunan. Fin oras Uisneno namonib nafani' amaets ein, In npiir naan sin anjarin In aanh ein. 37 Anbi ka'o Musa in surat, anmui' reta' nak hau uu' aan es anpiin mes ka nputuf. Na'ko reta' naan hit tahiin tak, amates bisa nmoni nfain. Anbi naan Uisneno na'uab neu ka'o Musa mnak, ‘Au re' ia, sin ho ka'o sin Uisneno. Es re' ka'o Abraham, ka'o Isak, ma ka'o Yakop. Sin arsin ok-oke' na'ruir ein ma na'besan piut-piut neu Kau ntean neno ia.’ 38 Te kaah, a'naef ein naan anmaten nrarin et neno unu'. Mes natuin Uisneno na'uab anrari mnak, In anjair sin Uisneon goa fe', es naan ate, hit tahiin tak sin nmonin fe'. Onaim maski atoni' nmate nrari msa', sin nmoni nfanin. Fin suma atoin amonit es re' na'ruri' ma na'bees neu Uisneno. Ka tiit fa amates na'bees neu Uisneno!” 39 Anneen Nai' Yesus nataah on naan ate, anmui' tunggur agama bian na'uab ein am nak, “Aam Tungguru. Ho haan tahas naan, reko 'maten.” 40 Anmurai na'ko oras naan, ka tiit fa tuaf antein nabrain he nataan Nai' Yesus, natuin ka bisa nakreo naan Ee fa.
Kristus naan, usif nai' Daut in sufan, ma in Usin amsa'
41 Rarit Nai' Yesus nanoni' fe' nbi Uim Onen Uuf. Onaim In nataan nafani' sin am nak, “Natuin hi teenb ein ate, on mee? Tunggur agaam ein nanoni' ki mnak Kristus naan, es re' Tuaf re' Uisneno anruur nain Je na'ko un-unu'. Tatuin sin, In re' naan suma usif nai' Daut in sufan. Mes naan, ka nanokab fa fe'. 42 Natuin unu' te, usif nai' Daut neikn on antui nbi in suur Siit Pures-Bo'is sin am nak, ‘Uisneno n'eut ma natoon neu au usi' mnak, “Uum he mtoko mbi maat, ambi Au aok-bian a'ne'u. 43 Fin Au of a'moe' ho muusn ee, tar antea sin na'ruir ein neu ko.’ ” 44 Onaim na'ko surat naan, hit tahiin tak usif nai' Daut amsa' in neikn on anteek Kristus nak, ‘Usi'’. In oetn ii, karu anmui' tuaf nak Kristus naan, suma usif nai' Daut in sufan, naan ka nanokab fa fe'! Natuin In anjair usif nai' Daut in Usin amsa'.”
Ampaant om mi'ko tunggur agaam ein re' na'kuba' sin saant ein
45 Oras too mfaun ein antakan sin ruik ein he nnenan Nai' Yesus ate, In na'uab neu In atoup noin' ein am nak, 46 “Hi ro he mpanat mirek-reko' hi tuam ein mi'ko tunggur agaam ein. Natuin sin nroim re' he nnaon pasiar ein npaken baru mnaun pirore, he nateef nok too mfaun ein, he biak ein nak, ‘Hoe! Sin re' naan kaes ko'u!’ Sin nromin he namin bare 'toko' nbi maat, oras antaman neu uim oen ein, ai' nbin fesat kabin, ai' bare-bare re' biasa too mfaun ein nabuan. 47 Mes ampanat hi tuam ein naan, natuin sin nputa-kriu bifee baun ein ma ntetak naan sin umin. Mes anbi too mfaun ein sin maatk ein, sin na'kuba' rais maufinu naan anpaek ranan, an'onen amnanu-mnanu'. Sin nromin he biak ein nak, sin re' naan tuaf re' anmakoe nbi Uisneno In rasin. Mes Uisneno nahiin nain sin saant ein, onaim In of nasanut hukun neu sin ma'fena' anneis-neis.”
Bifee baun ama'mu'it anfee kolekte ko'u nneis
1 Oras Nai' Yesus nanoni' nbi Uim Onen Uuf, In niit atoin amui't ein neman ma namouf ein kolekte nbi peit roi kolekte. 2 In niit baun ama'mu'it es neem nok amsa', he n'onen. In namoufut roit sen nua nbi peti naan. Roit re' naan in oosn ii aan'-ana'! 3 Rarit Nai' Yesus na'uab nok In atoup noin' ein am nak, “Amneen mirek-reko'! Baun ama'mu'it re' ia, suma namoufut roit sen nua goah, mes in nfee nneis na'ko biak ein ok-oke'. 4 Tuaf bian re' naan sin namouf ein kolekte npaek sin roi neisf ein. Mes banu' re' ia, in nfee nain in roit ein ok-oke'. Te kaah, roit ein re' naan in a'monin.”
Usif Yesus natoon nak Uim Onen Uuf ee of antaikoib
5 Oras naan, Nai' Yesus In atoup noin' ein na'uab ein ma naikas Uim Onen Uuf naan am nak, “Aam! Amkius miit Umi ia, reokn ii kah een! Sin nmoe' je npaek fatu re' an'oet sin njarin on re' hau balok. Fatun naan kou'-ko'un. Rarit sin nsusun nasaeb sin rek-reko. Ma nmui' tuaf anfee baer ma'osa' he nparoong Uisneno In Umi ia!” Mes Nai' Yesus nataah am nak, 6 “Umi re' ia batuur reokn ii kah een. Mes ka 'roo fa nteni' te, biak ein of naseer fatun re' ia ok-oke' tar namneran.”
Neon susat ma nana'renat sin
7 Rarit nai' Yesus In atoup noin' ein natanan am nak, “Aam Tungguru! Saa' re' Ho mu'uab ee fe'e na, of reka' te, njair? Karu in oors ee npaumaak ate, in a'taak ein on re' mee?” 8 Onaim Nai' Yesus nataah am nak, “Asar hi mpanat hi tuam ein rek-reko he kais napoi naan ki. Fin of anmui' tuaf huma'-huma' neman, rarit anpaas ok am nak, ‘Au re' ia, Kristus.’ Anmu'i nteni' tuaf nak, ‘Neon amsoupt ii anpaumaak he neem een!’ Mes kais ampirsai! 9 Karu hi mneen uab anin am nak, atoin ein antaisibun ma anmakenan et mee-mee, kais mimtau. Batuur, rasin re' naan of anpoin ma njarin nahunun fe'. Mes neon amsoput naan ka ntea fa fe'. 10 Of uuf es anmakeen nok uuf bian. Pah es anmakeen nok pah bian. 11 Of antainuun ma'tani', ma oras amnahas ma'tain besi ntaam. Menas huma'-huma' re' atoni' namtausan sin, annonos anbin mee-mee. Mansian ein of nitan rasi huma'-huma' re' nmoe' sin fuunk ein natoron, ma nitan tanar huma'-huma' re' ma'tain besin nbin neno. 12 Rasin re' ia ka njarin oke' fa fe', mes biak ein of anheek ki, nha'mui' ki, natuin hi mituin Kau. Rarit sin nana'at ki mnao m'aa' rasi meu uim oen ein, ma nataam ki meu bui. Sin of anreun ki he mnao mbaiseun uisf ein ma anaa' aprenat bian sin. Rasin re' ia njarin, natuin hi mituin Kau. 13 Mes hi ro he mpaek maan kiim mainuan akre'o naan, he mitonan sin Au Rais Reko. 14 Onaim kais mitenab nahuun mak, hi he mimneob om on mee. 15 Fin Au of a'fee uab he hi mimneob om. Nok ranan naan, hi musun naan ka nahini ntein' ein fa he nak on naan mee ntein. 16-17 Tuaf-tuaf amfau-rutu of ka nroim nain ki fa, natuin hi mituin Kau. Anmui' na'ko hi nonot-asar kiim, on re': aina'-ama', ori-tatan, bae feto-bae mone, ma aok-bian sin. Anmui' tuaf na'ko sin namin ranan he na'sosa' ki, tar antea anmui' tuaf na'ko ki sin nroor niis sin. 18 Mes hi kais mimtau, natuin Uisneno ka nnikan ki fa. Nakfunu' noon es amsa', ka nkour fa, karu ka In roimn aa fa. 19 Karu hi maran ma mtahan piut-piut, Uisneno of ansoi nafetin naan ki.”
Kota Yerusalem in amre'un
20 Nai' Yesus antuut In uaban nak, “Karu hi miit musun anfuun ma na'toko' nrair kota Yerusalem, hi mihiin nai mak, naan in he namreu' goen. 21 Amkius on naan ate, abitan propinsi Yudea maen nai meu 'to'ef. Abitan kota msa', maen nai. Abitan kuan, kais amtaam meu kota mtein. 22 Fin Uisneno nasanut neon suust ein naan, he nhukun tuaf-tuaf re' ka nromin fa he natniin Ee. Rasin re' naan, anjarin natai nok saa' re' Uisneno In mafefa kniun' ein antui nain sin na'kon unu'. 23 Oras naan, tuaf re' he tkasian sin baineis-neis ii, es re' bifee ma'apu', ma bifee re' nasuus ri'ana kru'uf fe'. Oras naan, pah-pinan ia barisi napenin susat, ma atoin Yahudis sin ok-oke' napenin ma'ne'at ma'tani', natuin Uisneno nato'on sin. 24 Of atoin Yahudis sin musun anroor sin tuaf bian, ma ntahan bian, he neik sin anjarin ate nbin mee-mee neu pah-pinan ia. Rarit kase re' ka nahiin fa Uisneno, neem ma nteir hae n'oemetab kota Yerusalem, ma ankuaas kota ia in afan nanan, tar antea sin oras naan, namsoup.”
Mansian Batuur-Batuur In amneman
25 Rarit Nai' Yesus natoon rasi anmatoom nok oras In he nfain neem. In na'uab am nak, “Karu Mansian Batuur-Batuur ii he nfain neem, anmu'i 'takaf anpoi nbi manas, nbi funan, ma kfuun ein. Anbi pah-pinan ia msa' anmu'i 'takaf, es re' oe tais ee npesan mainenu', ma ain nautus ma oik pesan kou'-ko'u na'ko tasi nsae ma nmemun. Rasin re' ia of anmoe' mansian ein antaka'naan ein, tar antea sin ka nahini nten-tein' ein fa neu he nmo'en saa'. 26 Kuasa re' etan neon goe natseran amsa'. Ankius on naan ate, mansian ein namtaun nmaten, natuin pah-pinan ia he napein siraak ma'tani'! 27 Rarit na' mansian ein niit Kau, ‘Mansian Batuur-Batuur re' ia, 'saun 'uum a'bi nope’. Au 'saun 'uum 'eik kuasa, ma Au 'pina' ma kraha' ma'tani'. 28 Karu a'taakf ein re' ia njarin nrarin ate, mi'aiti' hi 'naakm ein naan nai, fin Uisneno In oors ii ntea goen he nsoi nafetin naan ki.”
Rais manporin es na'ko hau uuf
29 Rarit Nai' Yesus nait intein uab manporin es am nak, “Hi mkius ma mitenab mirek-reko' miit meu haun guin. 30 Karu sin nook ein nmurai namnaut moor ein, naan anjari 'takaf nak, oras fauk-nais ii he ntaam ein. 31 On naan amsa', neon suust am nana'renat sin. Karu sin nboor neman, naan anjari 'takaf nak Uisneno In apreent ee he nkoen On neem een. 32 Au utoon 'ain ki! Na'ko mansian ein re' amonit oras ia, of anmui' tuaf re' ka nmaet fa fe', mes neon suust ein naan ntaman nrarin. 33 Maski neon goe ma pah-pinan ia namnekun, mes Au Aa't ein antahan nabar-baran.”
Tabarab hit tuak neu oras Usi' he nkoen On neem
34 Rarit Nai' Yesus antuut In uaban am nak, “Ampan-panat te, nok askeken Au 'uum! Kais-kaisa' hi mitenab meu amre'ut, hi mmauf raru, ma mtaisiub he maim meu 'moin reok goah. Kais-kaisa' hi ka mtakan mihiin fa in a'taakf ee, natuin hi mtaisiub nok urusan a'teta'. 35 Kais mitenab mak hi ka mipein fa. Fin Au 'fain 'uum nok askeken. Ma oras Au 'fain 'uum, ka tiit tain fa es he bisa na'koro' in tuan na'ko Au humak. 36 Onaim mibarab piut-piut. Am'onen fai-manas kais natfeek, he hi bisa maran ambi suust ein naan. Nok ranan naan, oras Au 'fain 'uum een, ma hi mhake mbi Mansian Batuur-Batuur ii In huumn ii te, hi ka mimaeb om fa.” 37 Neno-neno te, Nai' Yesus annao nanoni' sin nbi Uim Onen Uuf. Mes karu oras maan afait ntea oras meis'okan, In npoi na'ko Yerusalem ma nnao ntuup anbi kuan et a'to'ef Saitun naan. 38 Kik-kiuk ana' te, too mfaun ein neman ma nabuan he nnenan In nonin anbin Uim Onen Uuf.
A'naak rais pirsait Yahudi sin a'naakt ein namin ranan he na'maet Usif Yesus
1 Oras naan, neon ko'u atoin Yahudis sin anpaumaak een. Neon ko'u naan, es re' Fesat Utunu' ka Mamuur fa. Anbi neon ko'u naan sin anroron a'bib-kase he nmo'en fesat Paska msa'. Sin nmo'en on naan, he namnaun nfanin neu oras unu', oras sin beif-na'if sin anpoin na'kon pah Masir. 2 Oras naan, a'naak rais pirsait Yahudi sin a'naakt ein ma tunggur agaam ein namin ranan he na'maet Nai' Yesus. Mes sin namtausan too mfaun ein of antaisibun, natuin sin nromin he natniin Ee.
Nai' Judas na'sosa' Usif Yesus
3 Na'ko Nai' Yesus In atoup noni' tuaf bo'es am nua' ein re' naan, es kaan ee nai' Judas Iskariot. Oras a'naak rais pirsait Yahudi sin a'naakt ein namin ranan he nroor na'maet Nai' Yesus, nitu 'naakf ee ntaam anbi nai' Judas in nekan. 4 Rarit nai' Judas anpoi nnao naim a'naak rais pirsait Yahudi sin a'naakt ein ma a'naak paot Uim Onen Uuf. In he nneka' bua nok sin, he na'sosa' Nai' Yesus neu sin. 5 Oras a'naet ein naan annenan nai' Judas in reona' naan on naan ate, sin nmariin anmaten. Sin nba'an nai' Judas am nak, “Reko! Karu ho mroim he mu'sosa' kai Nai' Yesus ate, hai mbaen.” 6 Nai' Judas anroim natuin sin. Onaim in naim asraak he na'sosa' Nai' Yesus amninu'-mninu' neu sin, he too mfaun ein kais nahinin.
Usif Yesus In atoup noin' ein nabaarb ein fesat Paska
7 Onaim atoin Yahudis sin neon ko'u naan antea, ma sin nroron 'bib-kaes ana' he nmo'en fesat Paska. 8 Rarit Nai' Yesus anreun nai' Petrus ma nai' Yohanis am nak, “Hi nua ki mnao mihuun he mibarab bukaet, he hit tbukae tbi fesat Paska bu'-bua'.” 9 Onaim sin natanan am nak, “Aam! Hai he mnao mibarab bukaet on mee?” 10 In nataah am nak, “Karu hi mtaam meu kota Yerusalem, hi of miteef mok atoin es nasaah a'huun oe aan es. Hi mituin ee mtea in umi. 11 Mitoon meu uim tuaf naan am mak, ‘Hai Aam Tungguru ntoit naan ke'en es et ho umi, he nmoe' fesat Paska nok In atoup noin' ein. Bisa, oo?’ 12 Onaim uim tuaf naan of nakrira' ki ke'en es et umi ktuta' naan. In nkikin anrair bare naan. Suma hi nua ki mibaarb ahaa bukaet.” 13 Rarit sin nua sin annaon. Onaim sin niit saa'-saa' natai on re' Nai' Yesus natoon sin neu sin. Onaim sin nabaarb ein bukaet Paska nbin naan.
Fesat Paska
14 Oras barab bukaet ein rekon anrarin te, Nai' Yesus sin neman ntean. In nok In haef ein ntokon he nbukaen bu'-bua'. 15 Onaim Nai' Yesus na'uab neu sin am nak, “Au 'mariin a'maet he 'took ma 'bukae fesat Paska 'ok ki, nahuun na'ko Au 'ma'ne'at. 16 Amtanar mirek-reko' re' ia. Tarair re' ia te, Au ka 'took he 'bukae 'tein fa fesat Paska 'ok ki. Neno mee te, oras mansian ein nitan maat fu-fua goah nak, Ama' annaa' aprenat te, na' Au 'bukae 'tein.” 17 Rarit In nait i'kraas re' matua' tua min-kase. Rarit in ntoit makasi neu Uisneno, ma nnona' kraas naan neu sin. Rarit In na'uab am nak, “Amtoupu kraas re' ia, he mbukae tuaf mese'-mese'. 18 Mimnau! Anmurai mabe' ia, Au ka 'inu 'tein fa tua min-kase. Neno mee te, oras mansian ein nitan maat fu-fua goah nak, Ama annaa' aprenat te, na' Au 'inu 'tein.” 19 Rarit In nait utunu' fua' es, ma ntoit makasi neu Uisneno. Rarit In nteib utunu' naan, ma nnona' sin. In na'uab am nak, “Utunu' re' ia, Au aok re' Au 'nona' 'eu ki arki. Ansuun oras hi mbukae utunu' on re' ia te, hi ro he mimnau Kau.” 20 Oras sin nbukae nrarin ate, In nait i'kraas matua' tua min-kase. Rarit In na'uab antein am nak, “Tua min-kase re' ia, Au naa' aa. Au naa' re' ia nat'oop ma nsai he nsoi nafetin naan ki. Uisneno npaek naa' re' ia he nahake' rais manba'an fe'u neu ki. 21 Mes ampanat, natuin anmui' tuaf re' antook nok kit es mei re' ia, of na'sosa' Kau. 22 Batuur! Au, Mansian Batuur-Batuur re' ia, ro he 'maet utuin Uisneno In romin. Mes mukeo! Tuaf re' na'sosa' Kau naan, in of nasaah kuun in rais siraak!” 23 Annenan on naan ate, Nai' Yesus In atoup noin' ein anmurai nmaktaan ein am nak, “Onaim sekau es re' he nmaufiun neu Ne?”
Usif Yesus In atoup noin' ein anmatoena' rasi nak, sekau es re ko'u nneis ji
24 Onaim Nai' Yesus In atoup noin' ein anmurai nmatoen nak, sekau es re' ko'u nneis ji. 25 Mes Nai' Yesus nakain sin am nak, “Anbi pah-pah re' ka nahinin naan fa Uisneno, uisf ein naprenat too ngguin baineisi. Te kaah, sin nromin he too nggui anteek sin itnak, ‘Ama re' aturun too’. 26 Mes hi kais on naan. Tuaf re' he njair kaes kou' gui, in a'moin ii batuur-batuur ro he on re' tua a'baut he ntuthae are' too mfaun. Tuaf re' he njair a'naet, ro he ntuthae are' too mfaun, on re' aan renu'-aan reka'. 27 Hi mitenab miit, a'naet ii es re' mee? Tuaf re' antoko nbi mei, ai' tua atuthaes? Atokos mei jaan, in es re' kou' gui, ai'? Te kaah, Au ka 'moe' fa Au tuak ii on naan. Au 'uum he 'tuthae ki. 28 Hi ar-arki re' ia, es re' mok-mook Kau oras Au upein ma'ne'at. 29 Au Ama' nanaib Kau he 'naa' aprenat a'bi In pah. Onaim oras ia, Au unaiba' ki msa', 30 he hi mtoko ma mbukae mok Kau mei mese' mbi sonaf neno tunan. Au 'fee ki kuasa msa', he hi miprenat uuf bo'es am nua mbi pah Isra'el.”
Usif Yesus natoon nak, nai' Petrus of nasuan Ee
31 Rarit Nai' Yesus natoon neu nai' Petrus am nak, “Petrus! Nitu 'naakf ee nsoba' he nbatis ki na'ko Kau, on re' takrai mneas. 32 Mes Au 'onen ma 'teek ko, he ho mpirsai Kau piut-piut. Oras ho mfain uum een meu Kau te, ho ro he mha'tain ho aom-bian ein sin neek ein.” 33 Onaim Nai' Petrus nataah am nak, “Kaah fa, tua! Au ka neu he 'aen usaitan Ko fa, tua. Maski au 'taam bui ma 'maet 'ok Ko msa', reko tua.” 34 Mes Nai' Yesus nataah am nak, “Petrus! Amneen murek-reko'. Mabe' ia, maun ee ka nkokre'on fa fe'e te, ho musuan Kau no teun goen mak, ho ka muhiin Kau fa.”
Usif Yesus Iin na, ro he nabaarb ein he ntoupun susat
35 Rarit Nai' Yesus na'uab neu sin am nak, “Neon goes ii, oras Au 'reek haefan ki he mnao mitoon Au Rais Reko mbi mee-mee, Au 'taar ki he kais meik roit, tas, ma 'pein-haef. Oras naan, hi mkuran saa'?” Onaim sin natahan bu'-bua' am nak, “Neon goes ii, hai ka mkuran fa saa'-saa', tua.” 36 Rarit In na'uab antein am nak, “Mes oras ia, 'teta'. Karu hi mmui' roit, henat meik. Karu mmui' tas, henat meik. Karu ka mmui' fa suni', mi'sosa' hi baur goes he msoos. 37 Natuin atoin Yahudis sin naan Kau on re' atoin maufinu. Kreo' goes anteni' te, sin neman he nheek Kau. Naan natai nok saa' re' ka'o Yesaya antui nain je, mnak: ‘Sin nsoi' Je on re' atoin maufinu!’ ” 38 Sin natonan am nak, “Aam! Hai meik benas nua.” Rarit Nai' Yesus nataah am nak, “Noo goah nai. Kais mi'uab naan antein!”
Usif Yesus annao n'onen anbi 'to'ef Saitun
39 Anbukaen nrarin Paska te, Nai' Yesus nok In atoup noin' ein anpoin nnaon neu 'to'ef Saitun, on re' nati'-nati' sin nmoe' je ji. 40 Antean naan ate, In na'uab neu sin am nak, “Hi m'onen he hi kais am'oer oras hi mipein furit ma 'takaf.” 41 Rarit In nnao na'roo kre'o na'ko sin. In nri'tuu ma n'onen am nak, 42 “Aam! Karu Ho mromi te, mait mu'roba' ma'ne'at ia na'ko Kau. Mes kais mutuin Au romik, maut he mutuin Ho roim aan kuum.” 43 Rarit Uisneno In ameupt es na'ko sonaf neno tunan neem ma nha'tain In nekan. 44 Fin In ma'ne'at naan ma'tain besi, tar antea In puus ee nsai on re' naa'. 45 An'onen anrair on naan ate, In nhaek ma nnao nfain neu In atoup noin' ein. Mes sin ntupan, natuin sin nhaen nmaten, ma nsusan amsa'. 46 Rarit Nai' Yesus nataan sin am nak, “Hee'! Hi mtuup neu saa'? Reko nneis hi m'onen he a'suu't ee nema te, hi kais ammouf.”
Sin nheek Usif Yesus
47 Nai' Yesus na'uab fe' on naan ate, nai' Judas (tuaf es na'ko atoup noni' bo'es am nua' ein naan) neem nok too mfaun. In neem anpaumak-maak Nai' Yesus he nhoo ma neek Ee. 48 Mes Nai' Yesus nakain ee mnak, “Hoe, Judas! Ho he mu'sosa' Mansian Batuur-Batuur re' ia, mpaek tabes ma maneek-panaf, oo?” 49 Oras Nai' Yesus In atoup noin' ein nahinin nrair nai' Judas in roen maufinu naan ate, sin natanan neu Nai' Yesus am nak, “Aam! Hai mbaan sin, aa oo? Hai meik benas.” 50 Onaim tuaf es anfaik benas, rarit ansaip namouf atoin es in rukin noon es. Atoni' naan, a'naak rais pirsait Yahudi sin a'naak kou' goe in ate. 51 Mes Nai' Yesus na'uab am nak, “Noo goah nai! Kais amraban sin!” Onaim In nasbeut atoni' naan in rukin, ma nareok' ee. 52 Too mfaun ein re' neman ma nheek Nai' Yesus naan sin esan re': a'naak rais pirsait Yahudi sin a'naakt ein, atoni mnais haart ein, ma apaot Uim Onen Uuf, ma tuaf bian antein. Nai' Yesus nataan sin am nak, “On mee? Hi mitenab mak Au re' ia atoin maufinu, es hi iim amheek Kau meik suni' ma hau tuka'? 53 Neno-neno te Au unoni' 'bi Uim Onen Uuf, mes ka tiit fa tuaf es he nheek Kau. Mes nbain nai! Hi oras. Oras ia, nitu 'naakf ee in kuasan!”
Nai' Petrus nasuan Usif Yesus
54 Rarit sin nheek neik Nai' Yesus, ma nheer neik Je neu a'naak rais pirsait Yahudis sin a'naak kou' goe in umi. Nai' Petrus nnao na'kor-koro' nbi sin koitk ein. 55 Anbi umi naan in kintal, biak ein anraran ai. Nai' Petrus annao nraar nok ai msa'. 56 Anmui' bifee ate es, ankius niit Nai' Petrus antoko ma nraar nok ai. In nkius narek-reko' nai' Petrus in human, rarit in natoon neu biak ein am nak, “Hoe! Atoni' re' ia msa', nati' te in nok Nai' Yesus!” 57 Mes nai' Petrus nasuan am nak, “Kaah fa, tua! Au ka uhiin fa Atoni' naan. Ho muhiin saa'?” 58 Ka 'roo fa te, tuaf es nait matan ma nkius niit nai' Petrus. Rarit na'uab am nak, “Tebe, haa! Ho re' ia tuaf es na'ko Nai' Yesus Iin na, ai'?” Mes nai' Petrus anprotees ma'tani' mnak, “Hee'! Kahaf! Ho na' mpeo tafi'-tafi'!” 59 Of oni' jam es ankono te, tuaf es anteni' na'uab am nak, “Hoe! Au uhiin, tuaf re' ia Nai' Yesus In atoup noin es, natuin in atoin Galileas!” 60 Mes nai' Petrus anpeen nmates nak, “Mupoi nai!” Nateef in na'uab on naan ate, maun goe ankokreo'. 61 Onaim Nai' Yesus anniik ma nkius nai' Petrus. Rarit nai' Petrus namnau uab ein re' Nai' Yesus na'uab sin am nak, “Mabe' re' ia, maun ein ka nkokre'on fa fe'e te, ho musuan ma mutotan amrair Kau no teun.” 62 Namnau niit on naan ate, nai' Petrus anpoi na'ko kintal naan, ma nnao nkae npin-pinus.
Sin nbeos ma nkana' paar Usif Yesus
63 Rarit atoin ein re' antiut Nai' Yesus naan anmurai nakre'et, ma nbeos nafan-fain' Ee. 64 Sin npooh In maatk ein npaken tais, rarit nataan Ee mnak, “Hae! Karu Ho mjair Uisneno In mafefa kniun es ate, ho mteek miit! Sekau es antuuf ko re' ia?” 65 Rarit sin naseku' niis Ne.
Sin neik Usif Yesus neu bare feek rais pirsait
66 Kik-kiuk ana' te, a'naak rais pirsait Yahudi sin a'naakt ein, tunggur agaam ein, ma atoni mnais haart ein, nabuan nrarin he n'urus Nai' Yesus In rasi. Rarit sin nrenun he nheer neik Nai' Yesus neem neu bare re' he nafekan rais pirsait. 67 Oras In ntaam anrair, sin natanan neu Ne mnak, “Ho mutoon miit kai! Ho re' ia, Kristus batuur-batuur, aa oo?” In nataah am nak, “Maski Au utaah batuur-batuur amsa', hi ka mpirsai fa. 68 Rarit karu Au utaan ki haan tanas mese' msa', hi ka mitaah Kau fa. 69 Ka 'roo fa te, Uisneno anpaek In kuasa ma'tain ee, he nanaib Kau, Mansian Batuur-Batuur re' ia. Rarit Au 'toko 'bi In aon bian a'ne'u he uprenat 'ok Ne.” 70 Annenan on naan ate, sin arsin natanan am nak, “Karu on naan ate, ho mutenab am mak, ho re' ia Uisneno In Aanh, aa oo?” Onaim Nai' Yesus nataah am nak, “Batuur, hi mi'uab naan, namneo.” 71 Onaim atoin a'aa' rasin naan na'uab ein am nak, “Hit arkit atneen kuuk, ai'? In nanaib kuun in tuan anjair Uisneno In Anah. Re' ia, rasi m'akan! Tatuin hit atoran pirsait, karu atoni' nataib on, on re' Uisneno, atoni' naan ro he nmaet. Onaim on mee? Hit kais atperluu saksii ntein. Athukun ta'maet Je nai!”
Sin neik Usif Yesus annaon neu gubernur Pilatus
1 Mes, a'aa' rais pirsait Yahudi sin ka nmu'in fa hak he nhukun na'maet atoni'. Es naan ate, sin neik Nai' Yesus an'ain gubernur na'ko prenat pah Roma anbi naan, es re' nai' Pilatus. Sin nromin he gubernur ee nhuukn Ee. 2 Onaim antean gubernur ee in matan, sin nteek Nai' Yesus In saant ein am nak, “Atoni' re' ia, anraban anaa' aprenat Roma. In nanoni' mnak, kais ambaen beo neu prenat. Ma In nanaib in tuan nak, Kristus, atoin Yahudis sin usif.” 3 Anneen on naan ate, gubernur ee nataan Nai' Yesus am nak, “Batuur, aa oo? Ho re' ia atoin Yahudis sin uisf, aa oo?” Onaim Nai' Yesus nataah am nak, “Batuur. On re' ho mu'uab ee naan.” 4 Anparikas anrair Je on naan ate, gubernur ee nait matan ma na'uab neu a'naak rais pirsait Yahudi sin a'naakt ein ma too mfaun ein. Rarit na'uab am nak, “On nai! Au ka 'tae 'iit fa Atoni' ia In sanat kre'-re'o msa'!” 5 Mes sin npenan am nak, “Kaah fa, aam! Atoni' re' ia, annao nbi mee-mee jah, ma nanoni', in nfuaruut too gui he nraban aprenat. In nmoe' taisibu, nmurai na'ko propinsi Galilea tar antea kota Yerusalem ia.”
Gubernur anreun he neik Usif Yesus neu usif Herodes
6 Anneen on naan ate, gubernur ee nataan sin am nak, “Karu on naan ate, in re' ia, atoin Galileas, ai'?” Onaim sin natahan am nak, “Batuur, tua. In na'ko Galilea!” 7 Nahiin on naan ate, gubernur ee nreun sin he neik Nai' Yesus an'ain usif Herodes, re' annaa' aprenat et propinsi Galilea. Oras naan, in nbi kota Yerusalem. 8 On nai te, usif Herodes naan anneen anrair beno anmatoom nok Nai' Yesus, ma in anroim he niit Nai' Yesus a'roo-'roo goen amsa'. In nhar-harap he bisa niit Nai' Yesus nakrira' naan rais sanmakat esa'-nua. Etun oras sin neik Nai' Yesus neu nee te, in nmariin. 9 Onaim In nataan rasi huma'-huma' neu Nai' Yesus, mes ka tiit fa haan tahas. 10 Nai' Herodes na'uab nok Nai' Yesus fe', mes a'naak rais pirsait Yahudi sin a'naakt ein ma tunggur agaam ein, anmurai ntu'iran antein Nai' Yesus nok In saant ein huma'-huma'. 11 Rarit usif Herodes nok in soraurs ein nmurai nok nakre'et ma nkana'paar Nai' Yesus. Onaim sin napaekb Ee baru mnaun reok goes on re' uisf ee baru, ma sin nakree't Ee piut. Rarit sin nrenun ma neik Je nfain neu gubernur Pilatus. 12 Unu' te, gubernur ma usif Herodes anmamusun. Mes anmurai neno naan, sin nua sin anmasoob rekon.
Gubernur ee nafeek hukun a'maten neu Usif Yesus
13 Rarit gubernur Pilatus no'en a'naak rais pirsait Yahudi sin a'naakt ein, atoni mnais harat Yahudi bian sin, ma too mfaun ein, he nabuan. Rarit in natoon rais ji in atfekan. 14 In na'uab am nak, “Hi meik Nai' Yesus neem neu kau, ma mtu'iirn Ee mmak In nfuaruut too gui he nraban prenat pah Roma. Au 'parikas a'rair Je namnutu 'bi hi maatm ein, mes au ka 'tae 'iit fa In sanat mese' msa'. 15 Usif Herodes anparikas anrair Je, mes ka ntae niit fa in sanat mese' msa'. Es naan ate, in nreun tuaf he neik Je nfain neem neu kau. Atoni' re' ia, ka nsaan fa saa'-saa', onaim au ka bisa ufeek fa he 'hukun u'mate. 16 Onaim au ufeek 'ak, on nai: Au uprenat he mbeso, rarit au ufetin.” 17-18 Annenan on naan ate, sin arsin anmurai nkoa' ein ma anhuun ein am nak, “Ka bisa fa, tua! Mu'mate! Mufetin kai nai' Barabas.” Sin nkoa' ein on naan, natuin toon-toon ate, atoin Yahudis sin oras fesat Paska te, gubernur ee nafetin atoin hukun tuaf es, natuin atoin Yahudis sin roimk ein. 19 (Nai' Barabas re' ia, antaam bui natuin in afuarutus neu too, araban anaa' aprenat pah Roma nbi kota Yerusalem, ma in aroor atoni' amsa'.) 20 Mes gubernur ee he nafetin Nai' Yesus. Onaim in nataan nafani' too mfaun ein naan am nak, “On mee, karu au ufetin 'eu Nai' Yesus re' ia?” 21 Mes sin arsin ankoa' ein bu'-bua' am nak, “Ka bisa fa! Amkuus mu'peit Ee nbi hau nehe! Amkuus mu'peit Ee nbi hau nehe!” 22 Mes gubernur naan annaben ate, naan ka batuur fa, rarit in nataan antein anfain no teun nak, “Nansaa' am es au ro he 'kuus u'peti' atoni' ia on re' naan? In maufiun ii saa'? Au ka 'tae 'iit fa tu'in mese' he 'hukun u'maet atoni' ia. Onaim au he 'reun he nbeos Goe, rarit nafetin.” 23 Mes too mfaun ein ar-arsin ankoa' ein naheran antein' ein, he na'seke' gubernur ee he nkuus na'peti' Nai' Yesus. Onaim gubernur ee ka bisa ntahan naan fa goen, 24 es naan ate in nafeek natuin too mfaun ein sin roimk ein. 25 Rarit in nafetin nai' Barabas, re' araban aprenat, ma aroor atoni'. Mes in nana'at Nai' Yesus neu sin, he sin nmoe' Je natuin sin roimk ein kuuk.
Sin nkuus nakfirit Usif Yesus anbi hau nehe
26 Rarit soraur Romas sin anheer neik Nai' Yesus anpoi na'ko kota Yerusalem. Anbi raan atnana' te, sin nateef atoin es na'ko kota Kirene. In fe' he ntaam neu kota. In kaan ee, nai' Simon. Sin na'seke' nai' Simon he ntoup Nai' Yesus In hau nehe, rarit nasaah ee ma nnao natuin anbi In kotin. 27 Neno naan, too mfau-rutu neman ma annonton Nai' Yesus. Bifee bian ankaen npin-piuns ein neu Ne. 28 Anneen sin ankaen on naan ate, Nai' Yesus anniik sin am na'uab am nak, “Airoo, bifeen Yerusalem. Kais amkaena' Kau. Reko nneis hi mkaena' hi tuam ein naan kiim, ma hi aanh ein kiim. 29 Fin noka'-nmeu te, susat kou' goe ntaam neem, tar antea atoni' na'uab am nak, ‘Bifee re' n'ua reok re'uf, es re' bifee ao-'temef, ma ka nasuus niit fa ri'ana kru'uf.’ 30 Oras susat ko'u naan antaam neem, mansian ein anha'mui' jok ma'tani', tar antea sin ntotin am nak, ‘Reko nneis a'toe'f ein antaikobin he nkuub niis kit nai!’ Sin na'uab ein amsa' am nak, ‘Atha'mui' jok on re' ia, reko nneis kneet ein ankefan he nkuub naneuk kai nai!’ 31 Karu atoni' nmoe' ha'mu'it on re' ia neu tuaf re' ka nsaan niit fa, saa' antein neu atoin maufinu?” 32 Oras soraurs ein neik Nai' Yesus, sin nheer neik atoin maufinu tuaf nua he nhukun sin bu'-bua' nok Nai' Yesus. 33 Sin ntean baer jes, in kaan ee ‘Bare 'Naak-Nuif’. Onaim sin nkuus Nai' Yesus ma atoin nua' ein naan, es-es ate anbi in hau nehe. Rarit sin nahake' hau nehen naan. Sin nakfirit atoin maufinu es anbi Nai' Yesus in abnapan a'ne'u, es anteni' anbi In abnapan a'rii. 34 Oras naan, Nai' Yesus an'onen am nak, “Aam! Kais mumnau mtein atoin ein re' ia sin saant ein, natuin sin ka nahinin fa saa' re' sin nmoe' sin.” Rarit soraurs ein anheran suur ana' he napara' Nai' Yesus In paken. 35 Too mfaun ein neman ma annonton anbin bare naan. Atoin Yahudis sin a'naakt ein neman ma nakre'et Nai' Yesus am nak, “In nsoi naan kuun biak ein, mes In ka bisa nsoi naan fa In tuan. Karu In re' ia, Kristus batuur-batuur, Atoni' re' Uisneno anpiir nain Je, maut he In nsaun neem kuun na'ko hau nehe re' ia nai.” 36 Soraurs ein naan nakree't Ee msa'. Sin na'iun Ee raur mai'ninu', 37 ma ankoa' nakree't Ee mnak, “Karu ho batuur-batuur atoin Yahudis sin usif, henat amsoi maan om nai!” 38 Sin ntuin nbin hau piis es nak, “Atoin Yahudis sin usif.” Onaim sin nkuus hau pisa' naan anbi Nai' Yesus In hau neeh je tunan, antoom faof, he njair tu'in neu saa' es In napein hukun naan. 39 Atoin maufinu tuaf es re' ankuus nakfiirt ee nbi Nai' Yesus In abnapan, nakre'et nok am nak, “Ho Kristus Ko, batuur, ai'? Karu on naan ate, msoi maan kit arkit nai!” 40 Mes amaufinut tuaf es ee nakain ee mnak, “Hoe! Ho ka mumtausan fa Uisneno, oo? Ho mupein hukun a'maten on re' In imsa'. 41 Hit nua kit tapein hukun natai nok hit maufinu. Mes Atoni' re' ia ka nmaufiun kuun fa saa'-saa'.” 42 Onaim in na'uab antein am nak, “Koi, Yesus! Karu Ho mtaam meu Ho pah, mumnau kau, tua!” 43 Nai' Yesus nataah am nak, “Au 'basan 'ain ko! Neno ia, ho mtaam am'ain sonaf neno tunan mok Kau msa'.”
Usif Yesus anmaet
44-45 Oras naan, maans ee natetab rek-reko. Mes manas naan ka ntana' fa pah-pinan. Rarit meis'ookn ii n'aum naan bare naan tar antea nreuk teun maans ee nmaeb. Anbi Uim Onen Uuf anmui' naan tai eon kou' goes nakfiir' ee he n'eek Uisneno In Ke'en Akninu' anneis-neisi. Nok askeken ate, tai eno' naan natkai nbatis nua. 46 Anbi bare ‘'Naak Nuif’ naan, Nai' Yesus ankoa' am nak, “Aam! Oras ia, Au una'at au smaank ii 'eu Ho 'nimam.” In na'uab anrair on naan ate, In natfeek. 47 A'naak soraur Romas tuaf es anhake npaumak-maak anbi Nai' Yesus In hau neeh je uun. Oras in niit Nai' Yesus In a'maten naan ate, in nanaib na'ratan Uisneno mnak, “Hoe! Atoni' re' ia batuur-batuur neek amne'o, joo!” 48 Oras too mfaun ein re' anhaken nbin naan, niit Nai' Yesus In a'maetn ee on naan ate, sin nmei' jok, ma ntebi nfanin nok neek susat. 49 Mes Nai' Yesus Iin na, nhaken nbin a'roo, ma nkius In a'maten naan. Bifeen re' natuin Nai' Yesus na'kon Galilea tar antean Yerusalem, anhaken nbin naan amsa'.
Sin nsuub Usif Yesus
50-51 Oras Nai' Yesus anmaet on nai te, anmui' atoin es naim ranan he nasanut Nai' Yesus In aon amates naan na'ko hau nehe, he nsuub Ee nok rek-reko. Atoni' naan, kaan ee nai' Yusuf, na'ko kota Arimatea. In neekn ee reko, namneo, ma nmoe' rais reko mfaun. In nmpa-pao msa' he Uisneno nakrira' am nak, In nnaa' aprenat. In tuaf es na'ko tuaf-tuaf re' afeek rais pirsait Yahudi. Mes in ka nroim natuin fa sin rasi tfeka' he nhukun na'maet Nai' Yesus. 52 Natuin in he nasanut Nai' Yesus In aon amates naan na'ko hau nehe, onaim in nnao nbaiseun gubernur Pilatus, he ntoit parmisi he in n'urus amates naan. 53 Napein mainuan on naan ate, in nnao nasanut Nai' Yesus In aon amates naan. Rarit in n'aum narek-reok' Ee nok tai ma'osa'. Rarit annao neik Je ma nataam Ee neu noup fatu, re' atoni' fe' anpahat anrari. Noup fatu naan, es ka npaek niit ee fa fe'. 54 Nai' Yesus In a'maten naan nateef nok neon nima'. Oras nai' Yusuf sin ansuub anrair Je naan, maans ee nmaeb jen. Karu maans ee nmouf goen, atoin Yahudis sin neon onen antaam ein. 55 Bifeen re' neman nabu-buan nok Nai' Yesus na'kon Galilea naan, sin nnaon natuin nai' Yusuf he nitan nak, in ntao amates naan et nopu mee. 56 Sin nkius narek-reko' nopu naan in baran. Rarit sin ntebi nfanin ma nabaarb ein bonak ma miin fubona'. Oras maans ee nmouf, sin nasnasan na'kon mepu, natuin atoin Yahudis sin atoran neon onen. Sin npaon oras neon onen naan ankoon, na' sin he nnaon nkaik ein fubona' neu Nai' Yesus In aon-ta'un amates.
Usif Yesus anmoni nfain!
1 Neno krei kik-kiuk ana' te, bifeen naan neikin miin fubona' ma bonak re' sin nanutu nrair sin naan, ma nnaon n'anin Nai' Yesus In naten. 2 Oras sin ntean nee ja te, sin nkius niit faut ko'u re' antoeb noup fatu naan, natnani nrair et nini'. 3 Onaim sin ntaam ankonon neu noup fatu naan, mes Nai' Yesus In aon amates ka mnita' fa nbi naan. 4 Onaim sin ntaka'naan ein. Nok askeken ate, atoni' nua anpaken tai arimat, neman nhaken npaumaak sin. 5 Bifeen naan namtaun nmaten, rarit sin nri'tuun ma na'ruir ein ntean afu. Onaim atoin nua' ein naan nataan sin am nak, “Nansaa' am es hi iim maim amoint ii nbi amaets ii in baran? 6 Nai' Yesus ka et fa ia goen! In nmoni nfain jen. Hi of oni' mnika' main re' In na'uab niit ki oras hi fe' ambi Galilea, ai'? 7 In na'uab nain nak, sin of na'sosa' Mansian Batuur-Batuur re' ia neu amaufiunt ein sin a'niimk ein. Rarit sin nkuus na'maet Je nbi hau nehe. Mes anmeu te, In nmoni nfain.” 8 Annenan on naan ate, na' sin namnau niit Nai' Yesus In uaban unu' naan. 9 Onaim sin ntebi nfanin rabah, he natonan rasin re' ia ok-oke' neu Nai' Yesus In atoup noin' ein tuaf bo'es am mese' ma tuaf-tuaf bian antein re' natuin Nai' Yesus. 10 (Bifeen re' anbin noup fatu naan, esan re': nai' Yakobus in ainaf, es re' bi Maria; bi Maria na'ko kuan Makdala; bi Yohana; ma bifee bian antein. Sin arsin re' naan es re' annaon ma nareta' rasin re' ia ok-oke' neu Nai' Yesus In haef ein.) 11 Mes oras atoup noin' ein annenan reta' naan, sin nateenb ein am nak, sin napoin. 12 Mes nai' Petrus anpoi ma naen an'ain nopu naan. Antea nee te, in nraitan ntaam, mes in niit ahaa tais re' an'aum Nai' Yesus In aon amates naan anmees. Onaim in ntebi nfain ma nnao naten-tenab am nak, “On mee es re' ia?”
Atoup noni' tuaf nua nateef nok Usif Yesus anbi ranan Emaus
13 Neno naan amsa', Nai' Yesus in atoup noni' tuaf nua annaon neu kuan es, kaan ee, Emaus. In a'roon ii of oni' kiru bo'es am mese' na'ko kota Yerusalem. 14 Sin nnaon npe-peon anmatoom rasi re' Nai' Yesus In a'maten. 15 Nok askeken ate, Nai' Yesus neikn On anpaumak-maak sin, ma nnao nabu-bua nok sin. 16 Mes sin ka nahiin Je fa, natuin Uisneno anmoe' sin he sin kais nahiin Nai' Yesus. 17 Onaim Nai' Yesus nataan sin am nak, “Hoe! Hi nua ki mpeo saa'?” Annenan on naan ate, sin nua sin nasnasan. Sin huumk ein on re' ansusan nmaten. 18 Rarit tuaf es, kaan ee nai' Klopas nataan Ee mnak, “Ho on re' atoin fe'u re' ka muhiin fa saa'-saa' re' anjari nbi Yerusalem. Airoo, rasi ia fe', fe'-fe'u.” 19 Onaim Nai' Yesus nataan sin am nak, “Saa' naa?” Sin natahan am nak, “Nai' Yesus na'ko Nasaret naan! In batuur-batuur Uisneno In mafefa kninu'. Uisneno anfee Ne kuasa ma In nmoe' rais sanmakat huma'-huma'. In nanoni' atoni' msa' mahiin ii kah een. Too mfaun ein anmariin Ee. Ma Uisneno msa' anmariin Ee. 20 On nai te, mes hai a'naak rais pirsait Yahudi sin a'naakt ein ma atoni mnais haart ein anheek Je. Rarit nanaa't Ee nbi gubernur he nhukun na'maet Ee. Onaim sin nkuus na'maet Je nbi hau nehe. 21 Nahunu te, hai mhaarp Ee mmak, In re' naan, Kristus re' neem he nsoi napoitan hai pah ii na'ko anaa' aprenat pah Roma re' anteir hae kai. Mes maeb es ii, neon niim ii, sin nroor Goe. 22 Oras ia hai mtaka'nana' mtein. Fe'e na bifee ngguin neman ma natonan am nak, kik-kiuk aan' ii sin nnaon nbin nopu. 23 Mes sin nak, Nai' Yesus In aon amates naan namneuk. Rarit sin niit Uisneno In ameput nua na'kon sonaf neno tunan, re' natonan am nak, Nai' Yesus anmoni nfain! 24 Hai mneen on naan ate, hai partein tuaf fauk naenan n'anin nopu naan. Onaim sin nitan huma' mese' on re' bifeen naan. Sin ka niit fa Nai' Yesus In aon amates naan.” 25 Sin nua sin anpeon nrarin on naan ate, Nai' Yesus nak sin am nak, “Hi moonm ein kah een! Nansaa' am es hi ka mpirsai fa saa'-saa' re' Uisneno In mafefa kniun' ein natoon nain sin neno unu'! 26 Sin ntuin am nak, Kristus naan ro he napein ma'ne'at on re' naan, na' In ntoup hormaat ma kuasa ma'tani'.” 27 Onaim Nai' Yesus nanoni' sin are' saa'-saa' ein re' Uisneno In mafefa kniun' ein antui sin anmatoom nok Kristus, anmurai na'ko ka'o Musa in tuis ein, tar antea mafefa' bian sin tuis ein amsa'. 28 Oras sin he ntean Emaus, Nai' Yesus anmoe' Jon on re' he nkoon goen. 29 Mes sin nua sin nasee Je mnak, “Aam! Amtuup mok kai mabe' re' ia, natuin maans ee he nmouf goen.” Onaim Nai' Yesus anroim ma ntaam nok sin neun umi. 30 Oras sin ntokon he nbukaen ate, Nai' Yesus nait utunu' fua' es. Rarit In n'onen ntoit makasi neu Uisneno, ma In nteib utunu' naan. Oras In nsoron utunu' naan neu sin nua sin, 31 na' sin nahiin nak, Atoni' re' naan, Nai' Yesus. Mes nok askeken ate, In namneuk na'ko sin maatk ein! 32 Onaim sin nua sin na'uab ein am nak, “Hoe! Oras hit tneen In na'uab mafefa kniun' ein sin tuis ein fe'e na, hit tnaben ate hit neek ii on re' napein ha'tanis.” 33 Oras naan amsa', sin nua sin anfain nanin neun Yerusalem. Sin nateef nok Nai' Yesus In atoup noin' ein tuaf bo'es am mese', ma tuaf bian antein' ein nabuan nbin naan. 34 Onaim atoup noin' ein naan natonan tua nua' ein naan am nak, “Batuur! Usif Yesus anmoni nfain! Fe'e na In nakriir On neu nai' Petrus.” 35 Rarit tua nua' ein naan npeon sin saa'-saa' re' sin nnaben niit sin anbin ranan, tar antea sin nahiin Nai' Yesus, oras In nteib utunu'.
Usif Yesus nakriir On neu atoup noin' ein
36 Oras sin anpe-peon on naan fe', nok askeken ate, Nai' Yesus anhake nbi sin atnaank ein. In nasee sin am nak, “Saloom!” 37 Mes sin naskeken ma namtaun, sin nak oni' aka'taus. 38 Mes Nai' Yesus na'uab am nak, “Nansaa' am es hi mimtau on re' ia? Hi ka mpirsai fa mmak Au 'moni 'fani, oo? 39 Amkius kiim Au 'nimak ma Au haek. Au es re' ia. Ampaumaak he mreo' Kau! Maut he hi mpirsai mmak, Au re' ia, ka aka'taus aa fa. Fin aka'taus ii ka nmui' fa aof, mes hi ok-oke' mkius miit Au aok ii!” 40 Oras In na'uab fe', In nakrira' sin In bikin re' anbin In a'niimk ein ma In haek ein. 41 Sin nmarinan nmaten, natuin Nai' Yesus anmoni nfain jen. Suma sin ntaka'naan ein, natuin sin ka bisa nahiin narek-reko' fa, neu saa' am es anjair on re' naan. Onaim Nai' Yesus nataan sin am nak, “Hi miah saa' ambi ia?” 42 Onaim sin nfee Ne iik tunu' tuuk aan es. 43 Nai' Yesus antoup iik tunu' naan, rarit in neuk goe nbi sin maatk ein. 44 Onaim In na'uab am nak, “On mee? Hi mimnau oras Au ubua 'ok ki fe', ai'? Au utoon ki oras naan 'ak, are' saa'-saa' re' Uisneno In mafefa kniun' ein antui sin anmatoom nok Kau naan, ro he njarin. Esan re': na'ko ka'o Musa, na'ko mafefa kninu' bian sin, ma na'ko suur Siit Pures-Bo'is sin.” 45 Rarit In natoon neu sin namnuut, he sin nahiin batuur-batuur Suur Akninu' In oetk ein. 46 In na'uab antein am nak, “Uisneno In mafefa kniun' ein antuin nrarin am nak, Kristus re' Uisneno nreek haefan nain Je naan, ro he napein ma'ne'at huma'-huma', rarit In nmaet. Mes of anmeu te, In nmoni nfain. Sin ntui nain sin een! 47 Oras ia, Au 'fee ki kuasa he hi meik Rais Reko ia meu are' uuf ma pah, ammurai mi'ko kota Yerusalem re' ia. Mitonan sin am mak, atoni' re' anmanaku' neu in nsaan ma ntebi nfain neu Uisneno, Uisneno of annoes nain in saant ein ok-oke'. 48 Hi ro he mjair saksii he mireta' mmak, Au upein ma'ne'at, rarit Au 'maet, mes 'moni 'fain. 49 Au of a'sonu' ki Asmaan Akninu' re' Au Ama' anba'an anrair Je. Mes hi ro he mpao mbi kota Yerusalem re' ia, tar antea hi mtoup kuasa na'ko sonaf neno tunan.”
Usif Yesus na'ait On neu sonaf neno tunan
50 Neon goes, Nai' Yesus nok sin anpoin na'kon kota in nanan. Oras sin anpaumaak kuan Betania, In nait In a'niman ma na'uab anfeen sin tetus. 51 In na'uab anfeen sin tetus fe' on naan ate, In na'ait On ansae neu sonaf neno tunan. 52 Ankius nitan on naan ate, sin nri'tuun ma na'besan neun Ee. Rarit sin nfanin neun kota Yerusalem nok neek mariin ko'u. 53 Ansuun-suun neno, sin nabuan anbin Uim Onen Uuf, he nsiin ma npures na'naeb Uisneno. Aam Teofilus! Au reet matu'in re' ia, utu'ub sin anbin re' ia nai. Tabe ma haan buseet, na'ko au, nai' Lukas kau, tua.
Nai' Yesus naan, sekau?
1 Nahunu te, Uisneno In Kabin ma Prenat nmu'i nrair. Uisneno In Kabin ma Prenat naan, huma' mese' on re' Tuaf es. Tuaf naan nok Uisneno. Ma In es re' Uisneno msa'. 2 Oras neon goe tunan ma pah-pinan ka njair fa fe', Tuaf naan nok nain Uisneno. 3 Uisneno nmoe' are' saa' ii njair, npaek In Kabin ma Prenat naan. Ka nmui' fa baer es, re' njari msa', karu Tuaf naan ka es re' anmoe' je fa. 4 In re' naan, oe je matan ma hau goe uun na'ko 'monit. Onaim atoni' re' napein 'monit re' namneo ma namnoon, sin napein je na'ko Na. In huma' mese' on re' Meu'-sine' re' npiin amsa', he tuaf-tuaf re' anmonin nbin Meu'-sine' naan, bisa nkisun, nahinin ma nakeon. 5 Meu'-sine' naan, npiin ma ntana' ntaam antea meis'okan; ma meis'okan naan ka bisa ntahan naan Ee fa. Fin Meu'-sine' naan anpiin ma ntana' piut. 6 Anmui' tuaf es antein, kaan ee nai' Yohanis. Uisneno nreek haefn ee msa', 7 he njair saksii re' natoon anmatoom nok Meu'-sine' naan. Maut he are' mansian ii, sin arsin bisa npirsain neun Uisneno, natuin nai' Yohanis in uaban naan. 8 Nai' Yohanis re' ia, ka Meu'-sine' naan fa. Mes Uisneno nreek haefn ee, he natoon anmatoom nok Meu'-sine' naan. 9 Fin Tuaf re' anjair Meu'-sine' batuur aan, he ntaam neem neu pah-pinan ia. Meu'-sine' naan anmoe' are' kanan rais amneot ma amnonot, mamnita' neun mansian ein ok-oke'. 10 Maski In nmo'e nrair are' saa' ii re' nbi pah-pinan ia, mes mansian re' abit pah-pinan ia ka nahiin naan Ee fa, oras In neem natua nbi ia. 11 Maski In neem natua nok Iin na kuun, mes sin ka nromin fa he ntoup Goe. 12 Maski on naan amsa', mes are' mansian ii re' antoup Goe ma npirsai Je, In nfeen sin hak he njarin Uisneno In aanh ein. 13 Naan nahuumb ok on re' nahoni' nafani' sin. Mes nahoni' na'fe'u sin re' naan, ka huma' mese' fa nok bifee nahoni' ri'ana'. Ma ka na'ko fa atoin es, re' nroim he napein sufa'-ka'uf. Fin sin njarin Uisneno In aanh ein, natuin Uisneno es anfeen sin a'moin fe'u naan. 14 Rarit ‘Uisneno In Kabin ma Prenat’ naan, nmoni njair mansian. In nmoin et hit sonak ma hit atnaank ii. Hit tkius ma tiit In pinan ma krahan. In npiin ma nakraah on re' naan, natuin In re' naan, Uisneno In Anah fua' mese'. In nroim he naruru' ma nakrira' In nekan arekot neu kit, natuin In amneikn ee, on re' naan. Ma are' saa' ii ok-oke' re' In natoon sin anmatoom nok Uisneno, ro batuur. 15 Nai' Yohanis naan, es re' natoon anmatoom nok Tuaf re' ia. In nhunun ma nkoa' am nak, “Amneen ma mitniin, oo! Tuaf re' ia, es re' au ureta' 'rair Je 'ak, ‘Tuaf es of he nkoen On neem. In re' naan, ko'u nneis na'ko kau. Fin oras ka nahoni' kau fa fe', In nmoin nahunu nrair!’ ” 16 Nai' Yohanis na'uab on re' naan, natuin Tuaf naan anroim he naruru' ma nakrira' In nekan arekot. Ma fani-fani In nmoe' on re' naan neu kit arkit. 17 Un-unu' te, ka'o Musa es re' antoup Uisneno In Atoran ma nasaunt Ee neu hit be'i-na'i sin. Mes oras ia, Tuaf naan, es re' Yesus Kristus, In es re' naruru' ma nakrira' Uisneno In nekan arekot neu kit. Ma are' saa' ii ok-oke', re' In natoon sin anmatoom nok Uisneno, ro batuur on naan. 18 Ka tiit tiit fa tuaf es, re' ankius niit Uisneno. Mes In Anah fua' mese' re' In nneek Ee naan, es re' naruru' ma nakrira' neu kit Uisneno In nekan. Ri'ana' naan, et In Aamf ee aon-bian. Fin In re' naan, es re' Uisneno msa'.
Nai' Yohanis Asranit naruru' ma nakrira' Usif Yesus
19 Neot es, atoin Yahudis sin a'naet ma kaes kou'n ein abitan Yerusalem anreek haefan a'naak rais pirsait tuaf fauk, ma tuaf fauk na'kon uuf nai' Lewi re' biasa ntuthaen anbin Uim Onen Uuf. Sin annaon neun noe Yarden in panin, he nataan nai' Yohanis Asranit am nak, “Ho re' ia, Kristus re' Uisneno nba'an he nreek Ee neem, aa oo?” Rarit in natoon neu sin am nak, in re' naan sekau. 20 In nmanaku' maat-maat am nak, “Kaah fa, tua. Au re' ia, ka Kristus fa, tua.” 21 Onaim sin nataan antein' ein am nak, “Karu on naan ate, ho re' ia, sekau? Ka'o Elia, oo?” In nataah am nak, “Kaah fa msa', tua.” Rarit sin nataan antein' ein am nak, “Kais-kaisa' ho re' ia, Uisneno In mafefa kniun aan, aa oo?” In nataah am nak, “Kaah fa msa', tua.” 22 Rarit sin nataan antein' ein am nak, “Karu on re' naan ate, ho re' ia, sekau? Mutoon kai fe'! Natuin hai he mfain he mitoon meu a'naet ein re' nreek haefan kai. Amturun ma mbaab maan kai, tua!” 23 Onaim in na'uab natuin saa' re' ka'o Yesaya ntui nain je mnak, “Au re' ia, es re' tuaf re' anhunun ma nkoa' anbi bare 'roo ma ma'koro' mnak, ‘Hi ar-arki ro he mraip ma mi'sona' ranan, he mseun ma mtoup Usi' In amneman! Am'oop ma mnae ranan he mseun Goe.’ ” 24 Anbi tuaf ein re' neman na'kon kota Yerusalem sin atnaank ein naan, anmui' tuaf fauk na'kon partei pirsait Farisi msa'. 25 Rarit sin nataan nai' Yohanis am nak, “On nai, tua. Karu ho ka Kristus ko fa, ka ka'o Elia ko fa, ma ka Uisneno In mafefa kniun aan ko fa te, nansaa' am es na' ho musrain tuaf? Ho mupein hak mu'ko mee?” 26 Onaim nai' Yohanis nataah am nak, “Au re' ia, au usrain tuaf suma 'pake haa oe. Mes anmui' Tuaf es, et hi tnaanm ein re' hi ka mihiin Je fa. 27 In re' naan, ko'u nneis na'ko kau, maski au es unoni' atoni' uhuun. Maski au 'jari haa In aan renu'-aan reka' amsa', au ka umnees 'ok Ne fa, tua.” 28 Rasin re' ia ok-oke' njarin nbin Betania, nbi noe Yarden in panin. Nai' Yohanis nok in atoup noin' ein nasranin tuaf anbin naan.
Usif Yesus naan, on re' Uisneno In A'bib-kaes Ana'
29 Noka' on naan ate, nai' Yohanis ankius niit Nai' Yesus annao neem an'ain na. Onaim In na'uab am nak, “Amkius miit Atoni' nee, tua! In re' naan, Uisneno In A'bib-kaes Ana' re' njair fua'-turu' he nsaok nain mansian pah-pinan ia sin saant ein. 30 Atoni' re' ia, es re' au utoon Ee 'eu ki afi naa m'ak, ‘Of anmui' Tuaf es, re' npoi ma nboor neem. In re' naan, ko'u nneis na'ko kau, natuin In nahuun nain na'ko kau.’ 31 Unu' te, au ka uhiin fa 'ak, In re' naan, Kristus. Maski on naan amsa', mes au uhini 'rair. Onaim au ro he utoon 'eu atoin Israelas sin anmatoom nok Ne. Natuin rasi naan, au 'uum ma usrain tuaf a'paek oe. 32-33 Uisneno nhaefan kau he usrain tuaf a'paek oe. In natoon kau msa' am nak, ‘Of Tuaf es he neem neu ko. Rarit Au Smanak ansanu ntoko nbi Na. Tuaf naan of es re' neik Au Smaan Akninu', he nfee kuasa neu Au ngguin.’ Oras Tuaf naan neem, au ka uhiin 'ain Je fa. Mes oras au 'kius Uisneno In Asmanan ansaun neem na'ko neon goe tunan, nahuum on re' kor-kefi ma ntoko nbi Na, na' au uhiin Je m'ak, ‘Tuaf re' naan, In es re' naan!’ 34 Au 'kius 'iit rasin naan nok au matak fuak ein kuuk. Rarit au utoon ki m'ak, ‘Tua amnemat naan, es re' Uisneno In Anah!’ ”
Usif Yesus anpiir naan kuun In a'toup noni' ahuunt ein
35 Noka' on naan ate, nai' Yohanis anhaek nok in atoup noni' tuaf nua. 36 Oras nai' Yohanis ankius niit Nai' Yesus annao npeo' naan, in na'uab am nak, “Amkius miit! In re' naan, Uisneno In A'bib-kase re' of anjair fua'-turu'!” 37 Rarit nai' Yohanis in atoup noni' tua nua' ein re' nneen in uab naan, nnao nasaitn ee, he natuin Nai' Yesus. 38 Onaim Nai' Yesus anniik, rarit In nkius niit sin natuin Ee. Onaim In nataan sin am nak, “On mee, tua? Hi mperluu Kau, oo?” Sin nataan nafain' Ee mnak, “Rabi, Ho mutua et mee?” (Neik sin uab Aram, ‘Rabi’ in oten nak, ‘Aam Tungguru’.) 39 Rarit Nai' Yesus nataah am nak, “Iim he mkius kiim.” Onaim sin natuin Ee, rarit sin nkius In bare 'tua-ha'. Oras sin ntean, oni' nreuk haa maans ee nmaeb. Rarit sin nok Ne, tar antea maans ee nmouf. 40 Na'ko tua nua' ein naan re' anneen nai' Yohanis In uaban, rarit natuin Nai' Yesus naan, tuaf es, kaan ee nai' Anderias. In re' naan, nai' Simon Petrus in orif. 41 Anfain neem antea te, nai' Anderias annao naim in tataf nai' Simon am nak, “Taat! Hai miteef amrair mok Mesias!” (Neik sin uab, ‘Mesias’ in oten nak, ‘Kristus, Tuaf re' Uisneno nba'an nain Je na'ko unu' he nreek haefn Ee ntaam neem.’) 42 Rarit in annao naat In taatf ee neu Nai' Yesus. Onaim Nai' Yesus ankius goe, ma natoon ee mnak, “Ho re' ia, nai' Simon. Ho ama', es re' nai' Yohanis. Anmurai oras ia, atoni' anhaman ko nak, ‘Kefas’ ” (In oten huma mese' nok ‘Petrus’, es re' ‘fatu’.)
Usif Yesus no'en nai' Felipus ma nai' Nitanel
43-44 Anbi naan amsa', anmui' tuaf es, kaan ee nai' Felipus. In kuan ee, et Betsaida. Nai' Petrus ma nai' Anderias na'kon naan amsa'. Noka' on naan ate, Nai' Yesus nafeek he nnao neu propinsi Galilea. In nnao nateef nai' Felipus, rarit In no'en am nak, “Uum mutuin Kau, he mjair Au ngguin!” 45 Rarit nai' Felipus annao naim nai' Nitanel, onaim natoon ee mnak, “Ba'e! Hai miteef Tuaf re' ka'o Musa antui nain Je nbi Uisneno In Atoran. Uisneno In mafefa kniun' ein un-unu' ntui nmatoom nok Tuaf re' ia msa'. In kaan ee Nai' Yesus, na'ko kuan Nasaret. In aamf ee nai' Yusuf.” 46 Mes nai' Nitanel nataah am nak, “Atoin Nasaret!? Ka nmui' fa rais reok goes re' anpoi ma nboor na'ko naan, oo!” Onaim nai' Felipus nataah am nak, “Hoe! Kais on re' naan. Uum he mnao mkius kuum!” 47 Oras nai' Nitanel neem, Nai' Yesus niit nain je, onaim In nak, “In re' ia, atoin neek amneot ma amnonot! Fin anbi in nekan ka nmui' fa puta-kriut. In re' ia, atoin Israelas batuur-batuur!” 48 Nai' Nitanel nataan am nak, “On mee m'es Ho muhiin kau, tua?” Nai' Yesus nataah am nak, “On nai. Au 'iit a'rair ko oras ho mbi hau goe mafon. Oras naan, nai' Felipus ka neit no'en ko fa fe'.” 49 Rarit nai' Nitanel anmanaku' mnak, “Aam Tungguru re' ia, ro batuur Uisneno In Anah! Ma Ho amsa', of hit atoin Israelas sin Usif!” 50 Nai' Yesus nataan ee mnak, “Ho re' ia, mpirsai Kau natuin Au 'ak, ‘Au 'iit a'rair ko oras ho mbi hau goe mafon naan’? Mumnau, fin ho bisa mkius are' rasi re' ma'tani' nneisi ntein! 51 Batuur! Au utoon 'ain ki. Hi of amkius neon goe natfe'i. Onaim Uisneno In ameupt ein abitan sonaf neno tunan ansae-nsanun nbin Au aok-bian. Ma Au re' ia, Mansian Batuur-Batuur.”
Fesat kabin anbi kuan Kana
1 Anmeu on naan ate, anmui' fesat kabin anbi kuan Kana et propinsi Galilea. Nai' Yesus In ainf ee nok amsa'. 2 Nai' Yesus nok In atoup noin' ein napenin haan askaut, ma sin nokan amsa'. 3 Oras fesat naan annao naan een sero 'roo te, tua min-kase, he noi oke'. Rarit Nai' Yesus In ainf ee natoon Ee mnak, “Amturun maan sin fe', natuin sin tua min-kase ruman ankoon.” 4 Mes Nai' Yesus nataah am nak, “Ain. Nansaa' am es ho mroim he Au es re' a'ator? Au oors ii, ka ntea fa fe'.” 5 Mes In ainf ee na'uab neu ameupt ein naan am nak, “Hae, amneen! Karu In nreun ki he mmoe' saa' ate, mmoe' mituin ahaa.” 6 Anbi bare naan anmu'i 'huna' nee, re' anmoe' naan sin na'kon fatu. 'Huna' es ate, karu sin nakanin oe te, of oni' liter bo' hitu mniim antea liter nautn es bo'es am niim (75-115). Atoin Yahudis sin biasa npaek oe na'ko 'huna' human on re' naan, he naniun ai' nafaun sin tuak ein natuin sin atoran rais pirsait. 7 Rarit Nai' Yesus na'uab neu ameupt ein naan am nak, “Amnao mait oe he mikain meu 'huun ein naan.” Onaim sin nakanin oe tar antea nahenun batuur-batuur. 8 Rarit In nak sin am nak, “Amkui maan a'kre'o, he meik je meu feest ii in tuan!” Onaim sin nmoe' natuin ein. 9 Oras sin neik oe naan neu fesat naan in tuan, in ninu nsoba' he nnaben niit oe naan. Mes oe naan na'bani' njair tua min-kase! In nkeuk, natuin in ka nahiin fa neu sin napenin tua min-kase naan na'ko mee. (Mes ameupt ein naan nahinin.) Rarit in nhaman naan baroit atoin ee. 10 Onaim in nak, “On nai. Biasa hit uim tuaf ii tapoitan tahunun tua min-kaes arekot anneis. Oras taumn ein nbukaen kou'-ko'u nrari te, na' in napoin tua min-kase huum es antein. Mes ho te, ho musnuab. Ho mupoin tua min-kase huum es nahuun, rarit na' tua min-kase arekot anneis ji, namuin!” 11 Rasi naan anjari nbi kuan Kana et propinsi Galilea. Naan Nai' Yesus anmoe' rais sanmakat ahunut re' atoni' nkius ma nnaben niit ee. In naruru' ma nakrira' In pinan ma krahan on naan, onaim In atoup noin' ein anpirsai Je. 12 Rarit Nai' Yesus, In ainaf, In oirf ein, ma In atoup noin' ein annaon nsanun neun kota Kapernaum. Mes sin suma natuan nbin naan, neno fauk aah.
Usif Yesus anriu' tuaf-tuaf he npoin na'kon Uisneno In Uim Onen Uuf
13 Oras atoin Yahudis sin neon ko'u Paska npaumaak on naan ate, Nai' Yesus annao neiki nsae neu kota Yerusalem. 14 Anbi Uim Onen Uuf in kintal, Nai' Yesus ankius atoin ein na'soos ein bijae, 'bib-kase, ma kor-kefi re' tuaf ansosan he npaek sin njarin fua'-turu'. Anbi naan, anmui' tuaf re' antoko nbi mei he ntukar roit re' tuaf anpaek je he nfeen neun Uisneno nbi Uim Onen Uuf naan. 15 Onaim In nait tani nono' fauk he nmoe' je njari 'kauboe. Rarit In nriu' napoitan sin na'kon kintal naan. In napoin bijae ngguin ma 'bib-kaesn ein naan amsa'. In npesek mein naan, ma In n'opa' nporin roit ein naan. 16 Onaim In nreun tuaf-tuaf re' na'soos ein kor-kefi mnak, “Mait mipoin baer' ein ia! Bare ia, ka 'masa' aa fa! Kais ammoe' Au Ama' In Umi njari 'masa'!” 17 Onaim In atoup noin' ein namnau Uisneno In Suur Akninu' re' ntui mnak, “Au 'neek iis Uisneno In Umi. Etun es au neek ii nmariin ma nbeis, he 'panat in kaan foo menin.” 18 Rarit atoin Yahudis sin a'naet ma kaes kou'n ein anreek Nai' Yesus am nak, “Karu batuur Ho mmui' hak he muri'un, mururu' ma mukrira' rais sanmakat es meu kai, he njair bukti!” 19 Nai' Yesus nataah am nak, “Karu hi miseer mireu' bare' kninu' ia, anmeu te, of Au ufena' ufani'.” 20 Mes sin nprotesan am nak, “On mee es re' ia? Fin atoni' nafena' Uim Onen Uuf ia toon bo' haa mnee. Nansaa' am es Ho mutenab mak, Ho suma mperluu neno teun goah he mufena' mufain' ee?” 21 Mes sin ka nahinin fa nak, Nai' Yesus na'uab anmatoom nok In tuan, re' huma' mese' on re' bare kniun es. 22 Onaim anbi neon amunit, oras Nai' Yesus anmaet, rarit anmoni nfani te, na' In atoup noin' ein namnau saa' re' In natoon nain sin. Onaim sin npirsain saa' re' Uisneno In Suur Akninu' antui nain sin na'kon un-unu', ma saa' re' Nai' Yesus natoon nain sin.
Usif Yesus nahiin are' mansian ii sin nekak naank ein
23 Nai' Yesus natua ntahan anbi kota Yerusalem, he nok anbi neon ko'u Paska. Too mfaun ein ankius rais sanmaakt ein re' In nmoe' sin, rarit sin anpirsai Je. 24-25 Mes Nai' Yesus ka npirsai sin fa, natuin In nahiin are' mansian ii sin nekak naank ein. In ka nperluu fa he atoni' natoon Ee, natuin In kuun nahiin nain mansian ii sin a'hakek ma sin a'naok ein.
Usif Yesus na'uab nok nai' Nikodemus
1 Anmui' naan tuaf es na'ko partei Farisi, kaan ee nai' Nikodemus. In re' naan, atoin Yahudis sin tunggur kou' goes. 2 Neot es, in neem fa-fai he nateef nok Nai' Yesus. Rarit in nak, “Aam Tungguru! Hai mihiin mak, Uisneno es re' anreek haefan Ko he munoni' kai. Fin rais sanmaakt ein naan, naruru' ma nakrira' bukti nak, Uisneno es re' anfee kuasa naan neu Ko, tua. Karu ka on fa naan ate, batuur rais sanmaakt ein naan ka bisa njarin fa.” 3 Nai' Yesus nataah am nak, “Batuur! Mes Au he u'uab on nai: karu atoni' ka nahonis nafain' ee fa, in ka bisa njair fa Uisneno Iin na.” 4 Rarit nai' Nikodemus nataan am nak, “Mes on mee m'es atoni' bisa nahonis nafain' ee, karu in na'nae nrair!? In ka bisa ntaam anfain fa neu in ainf ee apun nfain no nua, rarit in ainf ee nahonis nafain' ee. Ka neu on re' naan fa, tua!” 5 Nai' Yesus nataah am nak, “Batuur! Mes Au u'uab on nai: atoni' ro he nahoins ee nok oe he kninu', ma nahoins ee nbi smanaf he njair atoin fe'u. Nok ranan naan, na' in bisa ntaam anjair Uisneno Iin na. 6 Fin mansian ii nahoins ee na'ko mansian, mes atoni' in asmanan nahoins ee fe'u na'ko Uisneno In Asmanan. 7 Kais amsanmaak, karu Au u'uab 'ak, ‘Ro he nahonis nafani' ki, he hi mipeni 'moin fe'u.’ 8 Hit tataib ee tok anin. Ain ii nfuu natuin in romin. Hit bisa tneen in a'ruun, mes ka tahiin taan fa tak, in neem na'ko mee, ma he nnao neu mee. Mansian ii sin arsin re' napenin 'moin fe'u na'ko Uisneno In Asmanan, on naan amsa'. Fin hit bisa tkius tiit Uisneno In Asmaan ee nmoe' atoni' njair fe'u, maski hit ka tahiin fa on mee m'es rasi naan bisa njair.” 9 Rarit nai' Nikodemus nataan am nak, “Nansaa' am es bisa njair on naan, tua?” 10 Nai' Yesus nataah am nak, “Hae, ba'e. Ho mjair tunggur ko'u meu atoin Israelas sin. Nansaa' am es ho ka muhiin fa rasin ia? 11 Au u'uab batuur. Hai, es re' Au 'ok Au ngguin, hai mihiin rasin ia. Fin hai mjair saksii nmatoom nok rasin re' hai mkius miit kiim sin. Mes hi ka mtoup reko fa nok hai uab ein. 12 Hi ka mpirsai fa oras Au utoon anmatoom nok rasin re' anjarin nbin pah-pinan. Saa' antein, oras Au utoon anmatoom nok rasin re' anjarin nbin neon goe tnanan. Tebes! Ro of hi ka mpirsai fa mtein! 13 Ka nmui' fa tuaf es, re' ansae n'ain Uisneno nbi neon goe tunan amsa'. Suma Au kuuk, es re' Mansian Batuur-Batuur, re' a'saun 'uum u'ko Na. 14 Un-unu' nbi baer ruman ma ma'koro', ka'o Musa nmoe' kauna' noon es na'ko tembaga, rarit nakfiir' ee anbi hau goes tunan, he too mfaun ein niit ee, ma sin napenin fetin. Rasi on re' naan amsa', ro he njair neu Kau, Mansian Batuur-Batuur re' ia. Sin of nakfirit Kau nbi hau goes tunan, 15 he mansian ii sin arsin re' anpirsai neun Kau napenin 'monit re' batuur re' ka natfeek niit fa. 16 Fin Uisneno nneek niis mansian mese'-mese' arsin nbin pah-pinan ia. Es naan ate, In nreek haefan Kau, In Aanh fua mese' re' ia. Maut he tuaf-tuaf sin arsin re' anpirsain neun Kau, ka mabetis-mabatis fa na'ko Uisneno. Nok ranan naan, sin napenin a'monit re' batuur nabar-baar. 17 Uisneno ka nreek haefan Kau fa, In Anah, a'taam 'uum he ufeek atoni' in rais hukun. Mes In nreek haefan Kau he 'soi ufetin atoni' na'ko sin sanat ma penu sin. 18 Uisneno ka nhukun fa atoni' re' npirsai Kau. Mes In nafeek nain hukun neu atoni' re' ka npirsai Kau fa, natuin atoni' naan ka npirsai Kau fa. Au es re' Uisneno In Aanh fua mese' ia. 19 Human on nai: Uisneno nfee me'u he ntana' nbi pah-pinan ia. Mes atoni' nroim nanesib meis'okan, ma nmoni nbi in nanan. Sin ka nromin fa he nmonin nbin me'u, natuin sin i'moe'k ein namre'un. Etun es Uisneno he nhukun sin. 20 Fin mansian ein re' nmo'en amre'ut, anmamuus nok me'u. Sin ka nromin fa he me'u naan antana' sin, maut he me'u naan kais anpukai n'afa sin maufinun. 21 Mes tuaf re' anmoe' natuin rais amnonot ma amneot, sin neman npaumakan he me'u naan antana' sin. Fin me'u naan naruru' ma nakrira' mnak, sin anmo'en natuin Uisneno In romin.”
Usif Yesus ma nai' Yohanis Asranit
22 Rarit Nai' Yesus nok In atoup noin' ein anpoin na'kon kota Yerusalem, mes sin natua ntaahn ein anbin pah Yudea. Anbi bare naan, sin nasranin tuaf. 23-24 Oras naan, usif Herodes ka nataam nai' Yohanis Asranit fa fe' anbi bui je nanan. Rarit nai' Yohanis nasrain tuaf amsa' nbi kuan Ainon, anpaumaak kuan Salim, natuin anmui' oe mata' amfaun anbi bare naan. Onaim too mfaun ein neman piut neu nai' Yohanis he in nasrain sin. 25 Anbi pirsait Yahudi, anmui' atoran haart es, he nakninu' sin tuak ein, he na' sin bisa n'oen ein. Anbi bare naan, anmui' atoin Yahudis tuaf es, re' anmaka'rasi' nok nai' Yohanis in atoup noin' ein anmatoom nok rasi naan. 26 Rarit sin neman neun nai' Yohanis he natonan am nak, “Aam Tungguru! Ho mumnau, ai' kaah, Tuaf re' naim ko mbi noe Yarden in panin? Tuaf re' ho mak, In re' naan, es re' Kristus. In nasrani msa'! Onaim tuaf ka neem antein fa neu kit! Fin too mfaun ein annaon kuuk an'anin Na!” 27 Nai' Yohanis nataah am nak, “On nai! Atoni' ka bisa nmoe' fa saa'-saa', karu Uisneno re' et sonaf neno tunan ka nfei fa ranan neu ne. 28 Hi mneen kiim. Au utoon 'eu ki maat-maat 'ak, ‘Au re' ia, ka Kristus fa re' hit tpa-pao. Mes Uisneno nreek haefan kau, he uhuun ma 'fei ranan 'eu Kristus. On re' naan, tua!’ 29 Atpaek reta'. Baroit atoin ii nabua nok baroit bifee. Mes in saksii re' nhaek nok ne, neekn ee nmariin oras nneen baroit atoni' na'uab. Nai' Yesus naan, on re' baroit atoni'. Ma au re' ia, on re' In saksii. Etun oras ia, au neek ii nmariin. 30 Re' pentiing ii, In ro he na'nae piut anjair atoin ko'u ma kaes ko'u. On nai te, maut he au 'bi 'kuran ma 'jair atoin ba-baun.”
Atoni' re' nsaun na'ko sonaf neno tunan
31 Nai' Yohanis antuut antein am nak, “In re' ansaun neem na'ko Uisneno et neon goe tunan, es naan ate In ko'u nneis na'ko are' saa' ii ok-oke'. Mes au, au suma 'uum u'ko pah-pinan ia, es naan ate au huma' mese' on re' mansian pah-pinan sin ok-oke'. Au u'uab anmatoom nok are' kanan rasi neno-neno nbi pah-pinan ia. Mes re' nsaun neem na'ko Uisneno et neon goe tunan naan, In ro ma'tani' nneis na'ko are' saa' ii ok-oke'. 32 In na'uab anmatoom nok saa' re' In kuun nkius niit ma nneen niit. Mes atoni' ka ntoup reko fa neu saa' re' In na'uab ma natoon. 33 Karu atoni' ntoup saa' re' Tuaf amnemat na'ko faofn ee natoon ee naan, in naruru' bukti msa' nak, in npirsai nak Uisneno In uaban naan, ro batuur. 34 Tuaf naan es re' Uisneno nreek Ee ntaam neem, natoon Uisneno In beno ma ba'an. Fin Uisneno nfee nrair In Asmanan neu Ne ma ka nmui' fa tu'uf. 35 Fin Ama' abit sonaf neno tunan anneek niis In Anah. Ma In annona' ma nfee are' saa' ii ok-oke' neu In Aanh ee In a'niman. 36 Rarit tuaf-tuaf re' npirsai In Anah naan, sin napenin 'monit re' batuur nabar-baar. Mes tuaf-tuaf re' ka npirsai Je fa, ma ka nmoe' natuin fa In haan manba'an, sin ka napenin fa 'monit naan, fin Uisneno nakrira' In to'os nabaar he nhukun sin.”
Usif Yesus na'uab nok bifee jes anbi Samaria
1-2 Karu tataib nai' Yohanis nok Nai' Yesus ate, Nai' Yesus In atoup noin' ein nasranin tuaf amfaun nneis re' natuin Nai' Yesus. Nai' Yesus kuun ka nasrain fa tuaf. In atoup noin' ein esan re' nasranin tuaf. Oras Nai' Yesus nahiin nak, atoni' na'ko partei Farisi nneen anrarin nak, Nai' Yesus sin nasranin tuaf amfaun anneis, 3 onaim In nok In atoup noin' ein annaon nasaitan pah Yudea, he nfanin neun propinsi Galilea. 4 Mes sin ro he nnaon npe'on propinsi Samaria he nkonon neun Galilea. 5 Sin nnaon, onaim sin antean kota es anbi Samaria, kaan ee Sikar, anpaumaak anbi bare re' ka'o Yakop anfee je neu in anah nai' Yusuf. 6-8 Anbi bare naan, anmui' oe 'none' es, kaan ee ‘oe hani' nai' Yakop’. Oras maans ee natetab, Nai' Yesus sin ntean bare naan. In nnaben neu nhae nbi sin ranan naan. Rarit In antook ma nasnaas anbi oe 'none' naan. In atoup noin' ein nnaon nasaitn Ee nmees anbi naan. Sin ntaman neun kota he nsosan beti'. Rarit bifee jes na'ko kota naan neem he nait oe nbi oe 'none' naan. Nai' Yesus antoit je mnak, “Feto'! Au bisa 'toit aan oe mninu' kre'o, oo?” 9 Mes bifee naan naskeek, natuin atoin Yahudis biasa ka nromin fa he nseor gok nok atoin Samarias. Rarit in nataan nafani' Nai' Yesus am nak, “Hae! Ho atoin Yahudis ko. Au re' ia, atoin Samarias kau. Ho mtoit oe meu kau? Ho ka msaan fa, oo?” 10 Nai' Yesus na'uab am nak, “On nai. Karu ho muhiin saa' re' Uisneno he nfee je neu mansian ii arsin, ma ho muhiin Kau, re' Atoit oe mninu' re' ia Sekau, of ho mtoit mufani' oe mu'ko Kau. Rarit Au 'fee oe re' neiki 'honis.” 11 Bifee naan nak, “Ho ka mmui' fa 'ku'i. Oe 'none' re' ia, mnanu' msa'. Ho he mupein oe re' neiki 'honis naan, mu'ko mee? Ai' nmui' oe naan et mee ntein? 12 Ho ka neu fa he mma'tani mneis mu'ko hit ka'o Yakop! In es re' anhain ma nafetin nain oe 'none' ia neu kai. Ma in kuun ninu msa' na'ko oe 'none' ia. In aanh ein, ma in mui't ein on naan amsa'.” 13 Nai' Yesus nataah am nak, “Mumnau, joo! Atoni' re' niun na'ko oe 'none' re' ia, of anmeno ntein. 14 Mes karu atoni' niun oe re' Au 'fee je te, of ka nmeno ntein fa. Fin oe re' Au 'fee je naan, on re' oe mata' es, re' nboor ma npuur anpoi. Oe naan, neiki 'honis abar-barat.” 15 Bifee naan nak, “Karu on naan, Ho mfee kau oe naan nai, maut he au kais a'meno 'tein! Nok ranan naan, au kais 'uum fani-fani he 'kui oe 'bi ia 'tein.” 16 Rarit Nai' Yesus nak, “On nai, feto'. Ho mfain fe'. Amhaman meik ho moen je fe', rarit amfain uum meu ia.” 17-18 In nataah am nak, “Mes au ka 'mui' fa mone.” Onaim Nai' Yesus nak, “Batuur. Ho mu'uab namnoon ma namneo. Fin ho msao miit atoni' niim. Ma re' oras ia, atoni' re' ho mok ne goan, ka ho moen ja fa.” 19 Onaim bifee naan nak, “Ai joo! Oras ia au uhini 'rair, Ho re' ia, Uisneno In mafefa kniun es. 20 Au he utaan. Hai atoin Samarias sin be'i-na'i na'besan neun Uisneno nbin a'to'ef Gerisim Mes hi atoin Yahudis mak, karu he ta'bees teu Uisneno, hit arkit ro he tnao teu Yerusalem. Anbi Ho te, re' batuur ii, on mee?” 21 Nai' Yesus nataah am nak, “Feto'! Ampirsai meu Au uabk ii, fin ia ro batuur. Hit he ta'besan Uisneno tbi 'to'ef ia, ai' tbi Yerusalem aa', of in oors ee ntea te, sin nua sin ka mapake' fa goen. 22 Hi atoin Samarias ka mihiin fa mfaun anmatoom nok hi mi'besan meu sekau. Mes hai atoin Yahudis mihiin rasi mfaun anmatoom nok Uisneno re' hai mi'bees meu Na. Fin In nroim he npaek kai he mfei ranan, maut he atoni' bisa napein fetin na'ko sin sanat ma penu sin. 23 Of in oors ee ntea, es re' nmurai na'ko oras ia, atoni' re' na'besan batuur neu hit Ama' et sonaf neno tunan, sin na'besan natuin In Asmanan, ma natuin saa' re' batuur. Fin Ama' abit sonaf neno tunan anroim atoni' human on re' naan re' na'besan neu Na. 24 Fin Uisneno naan, smanaf. Rarit atoni' re' na'besan neu Na, ro he na'besan natuin In Asmanan, ma natuin saa' re' batuur.” 25 Bifee naan natoon am nak, “Au uhini 'rair Mesias naan he neem, re' atoni' nteek Ee mnak, ‘Kristus’, re' Uisneno nba'an he nreek Ee neem. Oras In neem, In of natoon nain are' saa'-saa' neu kai.” 26 Nai' Yesus nataah am nak, “Tuaf naan, es re' Au, re' na'uab oras ia.” 27 Nateef oras naan, In atoup noin' ein nfain neman na'kon kota. Sin nsanmakan, natuin sin nkisun ate, Nai' Yesus na'uab nok bifee Samarias tuaf es. Mes ka nmui' fa tuaf es, re' he nataan bifee naan am nak, “Ho he mroim saa'?” Ma ka nmui' fa tuaf es, re' he nataan Nai' Yesus am nak, “Nansaa' am es Ho mu'uab mok bifee re' ia?” 28 Rarit bifee naan annao nasaitan in baer oe nbi bare naan, he nfain neu kota nanan. Onaim in natoon neu abitan naan am nak, 29 “Hae! Au uskau, iim he mkius miit Tuaf re' ia fe'! Fin In nfei nain are' saa' ii ok-oke' re' au 'moe' 'iit sin. Kais-kaisa' In re' ia, Kristus, re' Uisneno nba'an he nreek Ee neem!” 30 Rarit abitan kota naan anpoin nnaon he nkius Goe. 31 Oras bifee naan fe' nfain neu kota te, Nai' Yesus In atoup noin' ein naskau Goe mnak, “Aam Tungguru! Hai miskau he tbukae fe', tua!” 32 Mes In nataah am nak, “Au 'mu'i 'rair bukae re' hi ka mihiin je fa.” 33 In atoup noin' ein anmaktaan ein es nok es am nak, “On mee, es re' ia? Sekau neem anfee Ne bukaet?” 34 Mes Nai' Yesus na'uab am nak, “On nai. Uisneno nreek haefan Kau he 'moe' utuin In romin, ma unaob In mepu tar antea namsoup. Naan, on re' bukaet neu Kau. 35 Hi mkius renen, rarit amso'i mmak, ‘Funan haa fe', na' bisa tseik ma toun.’ Amneen! Au utoon 'eu ki. Karu hi mkius mirek-reko' reen ein oras ia, antea nrair in oors aa he tseik ma toun. Reen ein, on re' too mfaun ein abitan nee re' neman neu kit. Fin sin re' naan, he npirsai Kau goen. 36 Ka on fa re' naan aa goah, fin amnount ein re' nbubun in afan anbi po'of, anmurai ntoup naan sin upan ma pa'e. Sin re' naan, on re' tuaf re' naruru' ma nakrira' ranan he atoni' anpirsain neun Uisneno, rarit napenin 'monit re' batuur nabar-baar. Nok ranan naan, atoni' re' nbeben ma nseen fini, ma atoni' re' nseik ma noun in aafn ein, bisa nmariin nabu-buan. 37 Atoni' nak, ‘Tuaf es anseen fini; tuaf bian es re' anbubun in afan.’ Naan batuur, tua! 38 Au 'haefan ki he mnao mbubun afaf mi'ko atoni' bian sin mepu. Batuur, hi ka es re' ameupt ii fa, mes hi es re' mipein upan ma pa'e mi'ko sin maskeet ein.” 39 Oras naan, too mfaun na'kon Samaria anbi kota naan re' npirsain neun Nai' Yesus, natuin bifee naan in uab nak, “In nfei nain are' saa' ii ok-oke' re' au 'moe' 'iit sin.” 40 Rarit oras sin neman neun Nai' Yesus, sin ntoit Je mnak, “Usi', hai mtoit he Ho mutua mok kai nai mbi ia, tua!” Onaim In natua ntahan neno nua nbi bare naan. 41 Ma too mfaun bian anpirsai Je amsa', natuin In uaban. 42 Onaim sin natonan bifee naan am nak, “Afi naa, hai suma mneen ho uabam. Mes oras ia, hai mpirsai Je, natuin hai miit ma mneen kiim mi'ko Na. Hai mihiin batuur mak, Tuaf re' ia, es re' bisa nsoi nafetin kit arkit tbi pah-pinan ia ta'ko hit sanat ma penu sin.”
Usif Yesus nareko' pegawe es in anah
43 Nai' Yesus sin natuan nbin bare naan, rarit sin nnaon nkonon neun propinsi Galilea. 44 (Neot es, Nai' Yesus na'uab niit am nak, “Atoni' ka nroim fa he nhormaat Uisneno In mafefa kninu' nbi in kuan aa kuun.”) 45 Unu' te, oras ka fesat Paska fa fe', too mfaun ein na'kon Galilea nnaon neun kota Yerusalem he nmo'en fesat neon ko'u nbin naan. Onaim sin nkius nitan kuuk are' saa' re' Nai' Yesus anmoe' sin anbi Yerusalem. Es naan ate, oras In anfani nbi Galilea, sin ntoup Goe nok reko. 46 Rarit Nai' Yesus sin annao nkonon he nfanin ntein' ein neun kuan Kana et propinsi Galilea. In nabanit niit oe njair tua min-kase nbi bare naan. Oras naan, anmui' pegawe es anbi kota Kapernaum. In aan moen je nameen. 47 Oras pegawe naan anneen nak, Nai' Yesus anfain neem et Galilea na'ko propinsi Yudea te, in annao neiki nsae neu Kana he naim Nai' Yesus. Nateef anrair Je te, in ntoit he Nai' Yesus neem nareko' in anah. Fin ri'ana' naan he noi nmaet jen. 48 Nai' Yesus na'uab neu pegawe naan am nak, “Karu hi ka miit Kau fa 'moe' rais sanmakat huma'-huma', hi ka mroim fa he mpirsai Kau!” 49 Pegawe naan nataah am nak, “Usi'. Au uskau Ko he tkoen Ok teem fe', tua. Fin kaah fa te, au aanh ee nmaet kuun een, tua.” 50 Rarit Nai' Yesus na'uab am nak, “Amfain nai, natuin ho anah naan, anmoin.” Onaim in ntebi nfain nain, natuin in npirsai Nai' Yesus In uaban naan. 51 Oras in nfain, in ameupt ein neman ma nateef ee nbi ranan am nak, “Aam, kais amsuus nai, natuin ho aanh ee, anmoin, tua.” 52 Rarit in nataan sin im nak, “Nareok es re' nreuk fauk ii?” Sin nataah ee am nak, “Oras maans ee na'puup afi naa nreuk mees ii. In aon abesit naan ansaun nain, tua.” 53 Rarit pegawe naan namnau nani mnak, in aanh ee nareok, nmurai na'ko oras Nai' Yesus na'uab am nak, “Aam, ho aanh ee, anmoin.” Onaim in uim je nanan sin arsin anpirsain neun Nai' Yesus. 54 Onaim rasi re' ia, rais sanmakat no nuan ii re' Nai' Yesus anmoe' sin oras In npoi na'ko Yudea, he nnao neu Galilea.
Usif Yesus nareko' ameen bua' es anbi nifu Betesda
1 Rarit anmui' neon kou' goes anbi pirsait Yahudi. Es naan ate, Nai' Yesus sin annaon neun kota Yerusalem. 2 Anbi naan, anmui' niuf goes re' nmui' teras niim anpaumaak eon es, re' in kaan ee Eno' 'Bib-kase. Anbi sin uab Aram, nifu naan in kaan ee ‘Betesda’. 3 Anmui' amenat amfaun re' biasa npaon nbin teers ein naan. On re': aforot, abuat, ma atoni' re' ka bisa nakbero' fa. Sin anpa-paon oras, reka' te oe naan nakbero'. 4 Fin anbi oors es-oors es, Uisneno In ameput na'ko sonaf neno tunan antaam neu oe naan, he nmoe' oe naan nakbero'. Rarit sekau es antaam nahunu nbi oe naan ate, in es re' arekot na'ko in menas. 5 Anbi naan, anmui' atoin es, re' nameen toon bo' tenu mfaun goen (38). 6 Nai' Yesus ankius atoni' naan antuup anbi naan. In nahiin atoni' naan nameen a'roo goen, rarit In nataan am nak, “On mee, ba'e! Ho mroim he mureko, oo?” 7 In nataah am nak, “Au 'roim, tua. Mes rais jes, es re': oras oe je nmurai nakbero', ka nmui' fa tuaf re' naskau nataam kau 'eu oe. Karu au 'soba' he 'mees kuuk ate, anmu'i nrair tuaf re' ntaam nahunun kau, tua.” 8 Onaim Nai' Yesus anreun goe mnak, “Amhaek nai! Amnuun ho 'nahek naan, he mfain nai.” 9 Nai' Yesus na'uab anrair on naan ate, atoni' naan nareok nain. Rarit in nfeen, nait in a'nahek, ma nnao nfain. Rasi naan anjair nateef nok atoin Yahudis sin neon onen. 10 Rarit atoin Yahudis sin a'naet ma kaes kou'n ein na'uab ein neun atoni' re' fe' nareok naan am nak, “Hoe! Ho muhiin, ai' kaah? Neno ia, neno snasat na'ko mepu. Tatuin hit atoran rais pirsait, ka nabei' fa atoni' nait neiki 'nahek, fin naan in kaan ee, mepu!” 11 In nataah am nak, “Airoo, ama' sin! Kais mitoo'. Fin Atoni' re' nareko' kau naan, es re' naprenat kau mnak, ‘Amnuun ho 'nahek, he mfain nai, tua.’ ” 12 Rarit sin nataan ee mnak, “Sekau es re' nreun ko he mait a'nahek naan, hah?” 13 Mes atoni' re' fe' nareok naan, ka nahiin fa, nak Nai' Yesus naan, sekau. Fin Nai' Yesus anpoi mninu'-mninu', natuin anmui' too mfaun ein anbin naan. 14 Ka 'roo fa te, Nai' Yesus nateef atoni' naan anbi Uim Onen Uuf ee in kintal. Rarit Nai' Yesus na'uab am nak, “Amneen! Oras ia, ho mureko mrair. Kais ammoe' sanat amtein, maut he ho kais mupeni mtein rais re'uf anneis-neis”. 15 Rarit atoni' naan annao naim atoin Yahudis sin a'naet ein, onaim natoon am nak, “Re' nareko' naan kau gui, kaan ee Nai' Yesus, tua.” 16 Es naan ate, sin nmurai nasusab ma nha'mui' Nai' Yesus, natuin In nareko' atoni' nateef nok neon onen. 17 Mes Nai' Yesus na'uab neu sin am nak, “On nai. Au Ama' ka nasnaas niit fa na'ko In mepu. Onaim Au 'meup piut amsa'.”
Usif Yesus anmanaku' In tuan am nak, In re' naan, Uisneno In Anah
18 Natuin atoin Yahudis sin a'naet ein antanar anrarin am nak, Nai' Yesus antanhai sin atoran oras neno snasat, es naan ate sin he namin ranan ma'tani' ntein he na'maet Je. Anneis-neisi ntein In nak, Uisneno naan In Amaf. Nok ranan In na'uab on naan, In naiks On ma nanaib On huma' mese' on re' Uisneno. 19 Rarit Nai' Yesus na'uab neu sin im nak, “Batuur! Au utoon 'ain ki m'ak, Au ka bisa 'moe' fa saa'-saa' u'ko Au tuak ii kuuk. Fin Au re' ia, Uisneno In Anah. Es naan ate, Au suma bisa 'biur ma 'moe' utuin saa' re' Au 'kius 'iit Au Ama' anbiur goe ma nmoe' je. Au 'kius 'iit Au Ama' anmoe' saa' ate, Au 'moe' utuin on naan amsa'. 20 Au Ama' abit sonaf neno tunan anneek niis Kau, es re' In Anah. In naruru' ma nakrira' neu Kau msa' are' saa' ii ok-oke' re' In nmoe' sin. In of naruru' ma nakrira' Kau are' kanan rasi re' ma'tani nneis, maut he hi miit ma msanmaak! 21 Au Ama' namonib nafani' amates. On naan amsa', Au of a'fee 'monit re' batuur 'eu sekau-sekau goah, utuin Au romik. 22 Amneon ii on nai: Au Ama' kuun ka nafeek fa hukun neu mansian. Mes In nnona' ma nfee are' saa' ii ok-oke' neu Kau, fin Au re' ia, In Anah. Rarit Au es re' ufeek 'ak, atoni' anmoe' reko, ai' kaah? 23 Au Ama' nroim he mansian ein arsin anhormaat Kau, nahuum on re' sin nhormaat Ee. Fin atoni' re' ka nhormaat Kau fa, In Anah re' ia, in ka nhormaat fa Au Ama' re' nreek haefan Kau msa'. 24 Batuur! Au u'uab 'ain. Atoni' re' nneen Au uabak, ma npirsai neu Uisneno re' nreek haefan Kau, in napeni 'monit re' amneot ma amnonot re' ka natfeek niit fa. Uisneno ka nhukun antein' ee fa. Fin atoni' naan ka napein fa hukun a'maten antein, mes in ntaam anjair tuaf re' nmoin nabar-baar nok Uisneno. 25 Batuur! Au u'uab 'ain. In oors ee npaumaak he neem een, es naan ate nmurai oras ia, amates anneen hanaf na'ko Kau, es re' Uisneno In Anah. Fin atoni' re' nneen ma ntoup reko neu Au uabak ia, in of napeni 'monit re' amneot ma amnonot. 26 Are' saa' ii re' nmoin, na'uun ma na'ba'an nbin Au Ama'. In nfee Kau 'monit re' amneot ma amnonot amsa'. Fin Au re' ia, In Aanh ate. 27 Au Ama' anfee Kau hak ma kuasa msa' he ufeek mansian ein arsin sin hukun, natuin Au re' ia, es re' Mansian Batuur-Batuur. 28 Hi kais amsanmaak, fin ka 'roo fa te, are' amates anneen ma natniin Au hanak. 29 Rarit sin of anmoni nfanin. Ma sin npoin na'kon sin bare 'maetk ein. Tuaf re' unu' nmoe' reko, napein 'monit re' amneot ma amnonot re' ka natfeek niit fa. Mes tuaf re' unu' te nmoe' maufinu, napein hukun piut.”
Anmui' saksii mfaun re' nsaksii anmatoom nok Usif Yesus
30 Nai' Yesus antuut antein am nak, “Au ka bisa 'moe' fa saa'-saa', karu Au ka 'neen fa hanaf fa fe' u'ko Au Ama'. Oras Au 'neen a'rair, na' Au ufeek atoni' in rasi. Nok ranan naan, saa' re' Au ufeek ee te, ro batuur. Fin Au ka utuin fa Au roimk aa kuuk, mes utuin Au Ama' In romin. Fin In es re' anreek haefan Kau! 31 Karu Au kuuk es re' utoon anmatoom nok Au tuak ii kuuk, Au uabak naan, ka saah fa. 32 Mes anmui' tuaf bian re' njarin saksii anmatoom nok Kau. Ma Au uhiin sin uab ein batuur anmatoom nok Kau. 33 Hi mreek haefan miit tuaf he nnao nataan nai' Yohanis Asranit. Onaim In na'uab namneo goah anmatoom nok Kau. 34 Te kaah, Au ka 'perluu fa mansian ii in uab re' namneob Kau. Mes Au umnaub 'eu ki are' rasin re' ia, he hi bisa mipein fetin mi'ko hi sanat ma penu sin. 35 Nai' Yohanis in uaban naan, on re' pauk apinat. Oras in npiin fe', hi neekm ein anmarinan. 36 Te kaah, Au 'mui' Tuaf re' ma'tani' nneis na'ko nai' Yohanis re' na'uab namneo anmatoom nok Kau. Tuaf naan es re' Au Ama' abit sonaf neno tunan, re' nnona' ma nfee nrair mepu mfaun neu Kau, he Au unaob sin tar antea namsoup. Mepun re' ia, esan re' naruru' ma nakrira' bukti mnak, In es re' anreek haefan Kau. 37 Ma In re' anreek haefan Kau, In na'uab namneo anmatoom nok Kau. Hi kiim ka mneen-neen miit fa In hanan, ai' ka mkis-kius miit fa In human ma In masan. 38 Uisneno In Kabin ma Prenat ka nmoin fa nbi hi neekm ein, natuin hi ka mpirsai Kau fa, re' In nreek haefan Kau. 39 Hi mroim he mparikas Uisneno In Suur Akninu' tar antea namnuut, natuin hi mitenab mak anbi naan of hi mipein ranan he mipeni 'monit re' amneot ma amnonot re' nabar-baar. Te kaah, Surat naan antui anmatoom nok Kau. 40 Mes hi ka mroim fa he iim meu Kau, rarit amtaam amjair Au ngguin, he hi bisa mipeni 'monit re' amneot ma amnonot re' ka natfeek niit fa. 41 Au ka 'perluu fa he maikas ma mi'ratan Kau. 42 Mes ro tebes, Au uhiin batuur-batuur hi nekam nanan. Es naan ate Au uhiin 'ak, hi ka mmui' fa rais manekat meu Uisneno. 43 Au 'uum a'bi pah-pinan ia, natuin Au Ama' re' nnaa' kuasa es re' anreek haefan Kau. Mes hi ka mtoup Kau fa. Te kaah, karu nmui' tuaf bian re' neem anpaek in kuaasn aa kuun, hi mtoup goe nok reko. 44 Hi arki es nok es, mroim he mbo'is hi tuam ein. Mes hi ka mtoe fa karu Uisneno nbo'is ki, ai' kaah. Te kaah, In re' naan, Uisneno! Ka tiit attein fa goen! Onaim karu hi ka mtoe Je fa, on mee m'es hi bisa mpirsai Je? 45 Kais mitenab mak, Au usaeb sanat 'eu ki 'bi Au Ama' In human ma In matan. Kaah fa, tua! Tuaf re' nasaeb sanat neu ki naan, es re' ka'o Musa. Te kaah, hi mifneek ma mharap meu na, natuin in es re' anfee ki Uisneno In Atoran. 46 Karu hi mpirsai batuur meu ka'o Musa, ro mneon ii, hi mpirsai Kau msa'. Fin in ntui nmatoom nok Kau. 47 Mes natuin hi ka mpirsai fa batuur meu saa' re' in ntui, on mee m'es hi he mpirsai saa' re' Au u'uab? Ka neu fa, tua!”
Usif Yesus antuthae bukaet neu tuaf nifu niim anneis 1-4 Rarit atoin Yahudis sin neon ko'u ‘Paska’ anpaumaak een. Onaim Nai' Yesus sin annaon neun nefo Galilea in panin. (Nefo naan in kanan es antein, es re' ‘nefo Tiberias’.) Too mfaun ein natuin Ee nbi nee, natuin sin niit naan kuuk rais sanmakat re' In nmoe' sin oras In nareko' ameent ein. Antea neof goe panin, Nai' Yesus ma In atoup noin' ein ansaen neun kneet es. Rarit sin ntokon nbin naan. 5 Oras Nai' Yesus ankius too mfaun ein neman ma nabuan on naan ate, In nataan In atoup noni' tuaf es, kaan ee nai' Felipus, am nak, “Hit bisa tsoos amnahat teu mee he ttuthae too mfaun ein ia?” 6 Batuur Nai' Yesus nahiin anrair In he nmoe' on mee. Mes In na'uab on naan, he nsoba' niit nai' Felipus. 7 Onaim nai' Felipus nataah am nak, “Amoo! Maski tuukn es anmeup neno natun nua msa', mes in kai je ka nanokab fa fe' he nsoos bukaet neu too mfaun ein ia! Maski tuaf es napein bukaet akre'o msa', mes naan ka nanokab fa, tua!” 8 Rarit Nai' Yesus In atoup noin es antein, kaan ee nai' Anderias, es re' nai' Simon Petrus in orif, natoon neu Nai' Yesus am nak, 9 “Aam! Anmui' ri'aan es et ia, neik utunu' fua' niim, nok ika' fua' nua. Mes ka neu fa he nanokab karu he ttuthae too mfaun ein ia, tua!” 10 Anbi bare naan huun ee seor mafaun. Rarit Nai' Yesus anreun In atoup noin' ein am nak, “Am'ator he sin ntokon ok-oke'!” Onaim sin ntokon. Oras naan, too mfaun ii kah een! Atoin ein anmesen kuuk, of oni' tuaf nifu niim. 11 Rarit Nai' Yesus nait utuun ein naan, onaim In ntoit makasi neu Uisneno. Rarit In nbait neu In atoup noin' ein. Onaim sin nbatin neun too mfaun ein naan. In nmoe' huma' mese' nok iik' ein naan amsa'. Sin ok-oke' nbukaen tar namsenan. 12 Oras sin nbukaen nrarin tar antea namsenan, Nai' Yesus anreun In atoup noin' ein am nak, “Ambubun maan amnaah neisf ein, he kais namre'un ruum am parsuum.” 13 Rarit sin nbubun nafani' mnaah neisf ein naan na'ko utunu' fua' niim, narai sin nahenun nbin a'kora' bo'es am nua. 14 Oras too mfaun ein ankius rais sanmakat re' Nai' Yesus anmoe' je naan ate, sin na'uab ein am nak, “Amoo! In re' ia mafefa kninu' re' Uisneno nba'an he nreek Ee neem.” 15 Nai' Yesus nahiin nak, too mfaun ein naan he na'seek Ee he njair usif. Rarit In nfeen annao, onaim In ansae na'roo nteni' anbi 'toe' aan es, he In bisa nmees kuun anbi naan.
Usif Yesus annao nbi oe je fafon
16 Oras maans ee fe'e nmouf, Nai' Yesus In atoup noin' ein annaon neikin nsanun neun nefo. 17 Nai' Yesus ka neem fa fe', he nabua nok sin. Rarit sin nsaen nbin koof es, onaim anmurain nfo'en neun kota Kapernaum et neof goe panin. Oras sin anmurai nfo'en on naan ate, anmeis'ook een. 18 Onaim okin anbi nefo naan anmurai npesan neu-mneem, natuin ain ko'u goe nfuu. 19 Oras Nai' Yesus In atoup noin' ein anfo'en naan, sin oni' nfo'en naan kiru niim een, sin nkius niit Ee nnao neem anbi oe je fafon. In neem anpaumak-maak anbi sin kofa', onaim sin namtaun nmaten. 20 Mes Nai' Yesus na'uab neu sin im nak, “Hoe! Kais mimtau! Au es re' ia.” 21 Nok ranan naan, sin ka namtaun fa goen. Sin nromin he In nsae neu kofa' nabu-bua nok sin. Sin ka nakeo nanan fa te, kofa' naan antea nrair bare re' sin nsari.
Too mfaun ein nam-naim Usif Yesus
22-24 Noka' on naan ate, too mfaun ein naan anbin neof goe panin fe'. Sin npaumak-makan nok bare re' Nai' Yesus antoit makasi neu Uisneno, rarit antuthae bukaet neu sin. Sin nahinin am nak, afi naa suma nmui' kofa' mees' aah. Mes Nai' Yesus In atoup noin' ein anpaek kofa' naan he nasaitan bare naan. Ma Nai' Yesus ka nsae fa kofa' naan he nnao nabu-bua nok In atoup noin' ein. Mes anmui' kofa' bian na'ko kota Tiberias re' neu-mneman nbin bare naan. Rarit oras too mfaun ein nahinin nak, Nai' Yesus nok In atoup noin' ein ka nbin fa naan antein, onaim sin nsaen kofa' bian, he nnao naim Nai' Yesus anbi Kapernaum, anbi neof goe panin.
Usif Yesus on re' Utunu' re' neiki 'honis
25 Rarit sin nateef Nai' Yesus anbi neof goe panin. Sin nataan Ee mnak, “Aam Tungguru! Ho mtea ia, es reek ii, tua?” 26 Nai' Yesus nataah am nak, “Amneon ii, on nai: hi ka maim Kau fa natuin hi mkius rais sanmaakt ein. Mes hi maim Kau, natuin Au 'tuthae bukaet 'eu ki, tar hi mimseen. 27 Amneen mirek-reko'! Kais suma mmeup he mipein amnahat re' of anpai ma npuun. Reko nneis hi mmeup he mipeni mnahat re' ntahan piut, re' neiki 'monit amneot ma amnonot re' ka natfeek niit fa. Fin Au re' ia, Mansian Batuur-Batuur. Au es re' bisa 'fee 'monit naan 'eu ki. Fin Ama' abit sonaf neno tunan es re' annona' ma nfee nrair hak naan neu Kau.” 28 Onaim sin nataan am nak, “Karu on naan ate, hai ro he mmoe' on mee, he hai bisa minaob Uisneno In meup gui, tua?” 29 Nai' Yesus nataah am nak, “Uisneno In meup goan, on nai: hi ro he mpirsai Kau. Fin Uisneno naan, es re' anreek haefan Kau.” 30 Rarit sin nataan antein' ein am nak, “Ama' Ho he mururu' rais sanmakat on mee, he hai bisa mkius, ma mpirsai meu Ko, tua? Onaim Ho he mmoe' saa' meu kai ntein? 31 On re' hit be'i-na'i sin anbukaen utunu' manna anbi baer ruman. Naan anjair on re' matu'i nbi Suur Akninu' Uisneno mnak, ‘In nfeen sin utunu' re' ansaun na'ko neon goe tnanan, he sin anbukaen.’ ” 32 Nai' Yesus nak, “Au utoon 'eu ki, re' batuurn ii, on nai: unu' te, ka ka'o Musa fa es nasanut utunu' naan na'ko neon goe tnanan neu hi be'i-na'i sin. Fin Tuaf re' nasanut utunu' naan, Au Ama' abit sonaf neno tunan. Oras ia In nabarab ki utunu' msa' na'ko neon goe tnanan. Mes utunu' re' ia, Utunu' re' batuur re' ntahan nabar-baar. 33 Fin Utunu' re' ia na'ko Uisneno, es re', Ansaun na'ko sonaf neno tunan ma neiki 'honis neu mansian pah-pinan ia.” 34 Rarit sin antotin am nak, “Usi'! Amfee utunu' naan neu kai piut, tua!” 35 Onaim Nai' Yesus na'uab neu sin im nak, “Au re' ia, es re' Utunu' naan. Fin Au es re' 'eiki 'monit re' batuur. Onaim tuaf re' ntaam anjair Au ngguin, ka namnaah antein' ein fa goen! Ma tuaf re' npirsai Kau, ka nmeno ntein' ein fa goen! 36 Mes au utoon 'iit ki m'ak, namneo, maski hi miit Kau goen, mes hi ka mpirsai Kau fa msa'. 37 Te kaah, mansian ein sin arsin re' Au Ama' npiir sin he njarin Au ngguin, sin of neman n'ain Kau. Ma karu nmui' tuaf neem an'ain Kau, ka neu fa he Au 'ri'u 'porin sin! 38 Fin Au 'saun 'uum u'ko neon goe tnanan. Au 'uum he 'meup ma 'moe' utuin Au Ama' In romin, fin In es anreek haefan Kau. Au ka 'roim fa he 'meup ma 'moe' utuin Au roimk aa kuuk. 39 Ma In romin on nai: na'ko mansian ein re' sin arsin re' In npiir sin he njarin Au ngguin, In roim he Au 'bubun 'aan sin ok-oke'. Ka nabei' fa he 'konan tuaf es he namneuk. Mes anbi neon amsoput, Au ro he 'feen sin rasi 'monit anfain. 40 On re' Au u'uab fe'e na, Au Ama' nroim he mansian ein re' sin arsin re' nahinin ma npirsain neun Kau, es re' In Anah re' ia, sin bisa napenin 'monit re' amneot ma amnonot re' nabar-baar. Rarit of anbi neon amsoput, Au umonib ufani' sin.” 41 Atoin Yahudis sin a'naet ma kaes kou'n ein anmurai na'muun Ee, natuin In nak, “Utunu' na'ko Uisneno naan, es re' Au, re' a'saun 'uum u'ko sonaf neno tunan.” 42 Sin na'uab ein am nak, “On mee es re' ia? Atoni' re' ia, es re' Nai' Yesus, nai' Yusuf in aanh aa, ai'? Hai mihiin In ainaf-amaf sin. Onaim on mee m'es oras ia In nak, ‘Au 'saun 'uum u'ko sonaf neno tunan’? Tapein je na'ko mee?” 43 Nai' Yesus nakain sin im nak, “Hoe! Misnasab hi uab a'munu' naan! 44 Au Ama' abit sonaf neno tunan es re' anreek haefan Kau 'uum 'eu ia. Ka nmui' fa tuaf re' bisa neem neu Kau, karu Au Ama' ka neem naat ee fa. Rarit of anbi neon amsoput, Au umonib ufani' sin. 45 Uisneno In mafefa kniun' ein un-unu' sin antui nitan am nak, ‘Uisneno he nanoni' mansian ein ok-oke'.’ Mansian ein arsin re' nneen neu Ama' abit sonaf neno tunan, ma nanoin ein na'ko Na, sin neman neun Kau he njarin Au ngguin. 46 Au re' ia, es re' a'saun 'uum u'ko Uisneno. Onaim suma Au kuuk es re' a'kius 'iit Uisneno. Ka tiit fa tuaf bian re' nkius niit kuun Au Ama' abit sonaf neno tunan. 47 Batuur! Au utoon 'ain ki msa'! Atoni' re' npirsai Kau of napeni 'monit re' amneot ma amnonot re' ka natfeek niit fa. 48 Fin Au re' ia, es re' Utunu' re' neiki 'monit naan. 49 Unu' te, hi be'i-na'i sin anbukaen utunu' manna oras annaon nfuun am nateef anbin baer ruman. Maski sin nbukaen utunu' naan, mes a'roo-'roo te sin nmaten amsa'. 50 Mes Utunu' re' nsaun na'ko sonaf neno tunan oras ia, 'teta'! Fin mansian ein arsin bole nbukaen. In sairt ii nak, mansian ein re' sin arsin npirsain neun Kau, ka napasib sin fa na'kon Uisneno ntein. 51 Fin Au re' ia, es re' Utunu' re' neiki 'monit, re' ansaun neem na'ko sonaf neno tunan. Rarit oras Au 'maet, Au 'fee ma 'nona' Au aok ii he mansian ein arsin re' abitan pah-pinan ia bisa nmonin. Onaim tuaf re' nbukae na'ko Utunu' naan, sin napenin 'monit re' amneot ma amnonot re' ka natfeek niit fa.” 52 Annenan on naan ate, atoin Yahudis sin a'naet ein anmurain nmatoen es nok es am nak, “In na'uab saa' es re' nee? On mee m'es Atoni' ia bisa nfee In aon ee he hit teuk goe?” 53 Onaim Nai' Yesus natonan sin im nak, “Au u'uab namneo goah. Au 'ak on nai: Au re' ia, Mansian Batuur-Batuur. Tuaf re' nroim he nmoin namneo ma namnoon, ro he nmafuut nok Kau. Onaim karu hi ka mbukae fa Au aok, ma ka miun fa Au naa', ka tiit fa 'monit re' amneot ma amnonot neu ki. 54 Fin tuaf re' nbukae Au aok, ma niun Au naa', napein inrair 'monit re' amneot ma amnonot re' nabar-baar. Of anbi neon amsoput, Au umonib ufain' ee. 55 Fin bukaet re' batuur, es re' Au aok. Ma mninut re' batuur, es re' Au naa'. 56 Onaim tuaf re' nbukae Au aok, ma niun Au naa' naan, anmoni nmafuut nok Kau. Ma Au 'mafuut 'ok ne msa'. 57 Au Ama' abit sonaf neno tunan re' nreek haefan Kau naan, In nmoin batuur-batuur. Ma Au upein 'monit re' batuur na'ko Na msa'. Es naan ate, tuaf re' nbukae Au aok, in of napeni 'monit re' batuur amsa' na'ko Kau. 58 Unu' te, hi be'i-na'i sin nbukaen utunu' manna naan re' nsaun neem na'ko neon goe tnanan. Maski sin nbukaen utunu' naan, mes a'roo-'roo te, sin nmaten amsa'. Mes Utunu' re' nsaun neem na'ko sonaf neno tunan oras ia, 'teta'. Fin tuaf re' nbukae Utunu' re' ia, of napeni 'monit re' batuur.” 59 Nai' Yesus nanoni' rasin re' ia anbi atoin Yahudis sin uim onen es anbi kota Kapernaum.
Too mfaun ein antet-kotin na'kon Usif Yesus
60 Anmui' too mfaun re' natuin Nai' Yesus. Oras sin nnenan In nanoni' on naan ate, anmui' tuaf re' na'uab am nak, “In noni' naan, ma'fena'! Sekau es re' bisa ntoup noni' naan?” 61 Mes Nai' Yesus nahiin nak, sin nmatoen on naan, onaim In nataan am nak, “Noni' ia nasusab ki, oo? 62 Oras hi mkisu mtein Kau, Mansian Batuur-Batuur re' ia, 'sae 'fain 'eu nee, 'eu Au barak unu' naan. Hi of mak on mee? 63 Uisneno In Asmaan ee es re' neiki 'monit re' amneot ma amnonot. Atoni' in aon ee ka bisa fa neiki 'monit re' amneot ma amnonot. Mes Au noin' ein naan na'uun ma na'ba'an anbin Uisneno In Asmanan. Onaim noin' ein naan amsa' neikin a'monit re' amneot ma amnonot neu sin. 64 Mes anmui' tuaf bian na'ko ki re' ka npirsai Kau fa.” Nai' Yesus na'uab on naan, natuin In nahiin anrair na'ko un-unu', sekau es re' ka npirsai Je fa, ma sekau es re' he na'soos Ee. 65 Rarit In na'uab antein am nak, “Es naan ate, Au utoon a'rair ki m'ak, Au Ama' abit sonaf neno tunan ro he nfei ranan neu tuaf-tuaf fe', na' sin bisa ntaman njarin Au ngguin.” 66 Anmurai oras naan, anmui' tuaf amfaun na'ko In atoup noin' ein antet-kotin na'ko Na, fin sin ka nromin fa he natuin Ee ntein. 67 Rarit Nai' Yesus nataan In atoup noin' ein re' tuaf bo'es am nua' ein naan am nak, “Hi on mee? Hi he mtet-koit mi'ko Kau msa', aa oo?” 68 Mes nai' Simon Petrus nataah am nak, “Usi'! Hai he mnao meu sekau mtein? Ka nmui' fa tuaf bian antein re' bisa natoon kai, on mee he hai bisa mipeni 'monit re' amneot ma amnonot re' nabar-baar. Suma Ho kuum, tua! 69 Ma hai mpirsai Ko, tua. Fin hai mihini mrair mak, Ho es re' Uisneno In Tuaf Akninu' naan, tua.” 70 Nai' Yesus natoon neu sin im nak, “Au 'piir 'aan ki tuaf bo'es am nua. Mes mimnau! Anmui' tuaf es na'ko ki on re' niut re'uf!” 71 In sairt ii, es re' nai' Judas, nai' Simon Iskariot in anah. Nai' Judas re' naan, tuaf es na'ko In atoup noin' ein tuaf bo'es am nua re' naan. In re' naan, es re' he na'sosa' Nai' Yesus.
Usif Yesus nok In oirf ein
1 Rarit Nai' Yesus sin annaon nfuun am natefan nbin propinsi Galilea. In ka nroim fa he nnao nfuun am nateef neu propinsi Yudea, natuin anmui' atoin Yahudis sin a'naet ein etan nee, he na'maet Je. 2 Oras naan, atoin Yahudis sin fesat sekit ma mnonut re' sin nteek ee mnak, “Fesat Kapere” anpaumak-maak een. 3 Rarit Nai' Yesus In oirf ein na'uab neu Ne mnak, “Reko nneis Taat, Ho musaitan bare ia, he mnao meu Yudea. Maut he tuaf re' natuin Ko Taat nbi nee msa', bisa nkius rasin re' Ho mmoe' sin. 4 Fin karu atoin es anroim he too mfaun ein ankius in ma'tanin, in kais anmoe' nok ma'koro' ma ma'nifa'. Natuin Taat, Ho mmoe' rais sanmakat huma'-huma', reko nneisi ntein, too mfaun ein bisa nkius nitan saa' re' Ho mmoe' sin naan!” 5 In oirf ein na'uab ein on naan, natuin sin kuuk ka npirsai Je reko fa. 6 Onaim Nai' Yesus nataah am nak, “On nai. Au oors ii ka ntea fa fe', oras ia. Mes karu hi he mnao, oras mee-mee jah amsa', bisa. 7 Mansian pah-pinan ia ka nmamuus nok ki fa. Mes sin nmusun Kau mates, natuin Au 'fei he ururu' ma ukrira' 'ain sin a'moe'k ein naan. Fin sin neek ein maufinu. 8 Hit neon ko'u rais pirsait naan, anpaumak-maak he neem een. Maut he hi es meiki msae mihuun meu Yerusalem. Au ka 'roim fa fe' he 'nao 'eu bare naan, fin in oors ii ka ntea fa fe'.” 9 In na'uab anrair on naan ate, In natua namaik kuun anbi propinsi Galilea.
Usif Yesus nok anbi neon ko'u rais pirsait Yahudi
10 Mes oras In oirf ein annao nrarin he nokan nbin atoin Yahudis sin neon ko'u nbi Yerusalem, Nai' Yesus natuin amsa'. Mes In nnao na'kor-koro', he atoni' kais nahinin. 11 Anbi Yerusalem, oras neon ko'u naan, atoin Yahudis sin a'naet ma kaes kou'n ein nam-naim Nai' Yesus. Sin nmaktaan ein am nak, “Atoni' naan et mee, joo?” 12 Tuaf amfaun ein na'se'-se'on anmatoom nok Ne. Bian nak, “In re' naan, atoin reko.” Bian antein nak, “Kahaf! In re' naan, aputa-kriut, apoi too mfaun ein, tua.” 13 Mes ka nmui' fa tuaf es, re' nabrain he na'uab maat-maat anmatoom nok Nai' Yesus, natuin sin namtausan a'naet ein naan. 14 Nateef neon ko'u naan in oras, Nai' Yesus antaam anbi Uim Onen Uuf. Rarit In nmurai nanoni' nbi naan. 15 Onaim atoin Yahudis sin a'naet ein anmasahun am nak, “Atoni' ia ka ntoup niit fa noni' mfaun on re' hit. Mes nansaa' am es In nahiin rasi mfaun on nai?” 16 Onaim Nai' Yesus na'uab neu sin im nak, “Amneen! Rasin re' Au unoni' sin 'eu ki, ka na'ko fa Au kuuk, mes na'ko In re' anreek haefan Kau. 17 Atoni' re' anroim batuur-batuur he nmoe' natuin Uisneno In romin, in of nahiin, Au noin' ein naan batuur-batuur neman na'kon Uisneno, ai' suma neman na'kon Au kuuk. 18 Fin atoni' re' suma na'uab anpaek in kuasa kuun, in suma naim ranan he in kaan ee mateka'. Mes tuaf re' naikas kaan reko ma foo meni' na'ko atoni' re' nreek haefn ee naan, ro na'uab namneo ma namnoon. Ma in ka nmui' fa rais puta-kriut. 19 Ka'o Musa nfee nrair Uisneno In Atoorn ein neu ki. Mes hi ka mmoe' mituin sin fa. Onaim nansaa' am es hi maim ranan he mi'maet Kau?” 20 Rarit too mfaun ein natanan am nak, “Ho mu'uab saa' es re' ia? Of oni' niut reu'f ein antaman Ko, ai'? Sekau es re' naim ranan he na'maet Ko?” 21 Onaim Nai' Yesus nataah am nak, “On nai. Au fe' 'moe' rais sanmakat es anbi neon onen, mes hi arki ok-oke' mitoo'. 22 Mes neot es-neot es, hi mmepu msa' ambi neon onen, on nai: ka'o Musa nasanut anrair 'heir ii in atoran am nak, karu bifee jes nahoni' naan ri'aan mone, ri'ana' naan anmoin naan neno fanu te, hi ro he mi'heir' ee. Maski neno naan, nateef nok neon onen, hi ro he mi'heir' ee. (Mes amneon ii, atoran naan namnasi nneis na'ko ka'o Musa. Fin Uisneno nfee nrair atoran naan nahuun neu ka'o Abraham.) 23 Onaim karu mi'heri' ri'aan es nateef nok neon onen, hi ka mtanhai fa ka'o Musa in atoran. Nansaa' am es hi mito'on Kau, natuin Au ureko' abuat nateef nok neon onen? Ka matopu' reko fa, ai'? 24 Kais amnilai atoni' natuin rasin re' hi suma mkius miit nok hi maatm ein aan. Mitenab mirek-reko' ai' mitaib sin ok-oke' nok rek-reko fe', rarit na' hi mifeek nok reko.”
Usif Yesus naan, es re' Kristus, aa oo?
25 Rarit tuaf fauk na'kon kota Yerusalem anmaktaan ein am nak, “Atoni' re' ia, es re' sin nam-naim Je he na'maet Je, ai'? 26 Hoe, ma'tani', oo! Fin In na'uab maat-maat anbi too mfaun ein sin humak ma sin matak. Mes ka nmui' fa es, re' nreun Goe he na'umit In fefan. Natuin hi teenb ein ate, on mee? Of oni' re' anaa' kuasa sin nahini nrarin, ai' ka fe' nak, Atoni' re' ia, es re' Kristus, re' Uisneno anba'an nain he nreek Ee neem, aa oo? 27 Mes in raisn ii, on nai: oras Uisneno nreek Kristus neem, es ka nahiin fa In na'ko mee. Mes hit tahiin Atoni' ia na'ko mee.” 28 Oras naan, Nai' Yesus nanoni' fe' anbi Uim Onen Uuf ee in kintal. Oras anneen atoni' naan na'uab on naan, In nataan sin anpaek haan ma'tani' mnak, “Hi mitenab mak, hi mihiin Kau, ma mihiin batuur Au u'ko mee, ai'? Au re' ia, ka 'uum fa 'eu bare ia utuin Au roimk aa kuuk. Fin re' nreek haefan Kau gui, batuur-batuur et re' ia. Ma hi ka mihiin Je fa. 29 Mes Au uhiin Je, fin Au 'uum u'ko Na, ma In es re' anreek haefan Kau.” 30 Rarit sin nsoba' he nheek Je. Mes ka nmui' fa tuaf es, re' bisa nnaa' naan Ee, fin In oors ee ka ntea fa fe'. 31 Anmui' tuaf namfau anpirsai Je msa', na'ko too mfaun ein naan. Sin na'uab ein am nak, “Atoni' re' ia nmoe' rais sanmakat amfaun. Rarit oras Kristus neem ate, ka neu fa he In nmo'e nneis na'ko Atoni' ia, ai'?”
Sin nrekan tuaf he nnaon nheek Usif Yesus
32 Anbi too mfaun ein atnaank ein, anmui' tuaf fauk na'kon partei pirsait Farisi msa'. Sin nneen too mfaun ein na'se'-se'on rasi naan anmatoom nok Nai' Yesus. Rarit sin nok a'naak rais pirsait Yahudi sin a'naakt ein, anrekan haef na'kon Uim Onen Uuf in apaot tuaf fauk, he nnaon nheek naan Nai' Yesus. 33 Onaim Nai' Yesus na'uab am nak, “Au oras re' he ubua 'ok ki, aar akreo' goah. Fin ka 'roo fa ntein, Au 'fain 'eu In re' nhaef Kau. 34 Rarit hi of maim Kau, mes hi ka miteef miit Kau fa. Fin Au he 'nao 'eu baer jes re' hi ka bisa mituin Kau fa.” 35 Rarit atoin Yahudis sin a'naet ma kaes kou'n ein anmaktaan ein es nok es am nak, “Of oni' Atoni' ia he nnao on mee? In he nnao neu bare mee, re' hit ka bisa tateef Ee fa? In he nnao na'koro' neu atoin Yahudis sin re' natuan et pah bian, aa oo? In he nnao nanoni' atoni' npaek uab Yunani nbi nee, oo? Ai', on mee? 36 In sairt ii saa', oras In na'uab am nak, ‘Hi he maim Kau, mes hi ka miteef Kau fa.’ Ma ‘Au he 'nao 'eu baer jes, re' hi ka bisa mituin Kau fa’?”
Oe re' neiki 'monit
37 Oras fesat naan in neon amsoupt ee ntea, re' njair neon ko'u nneis naan, Nai' Yesus anhaek ma nkoa' naher-heer am nak, “Amneen, joo! Sekau anmeon oe, maut he in neem neu Kau he nbukae oe! 38 Fin karu nmui' tuaf re' anpirsai Kau te, iim he mbukae ruum-ruum aah, tua! Fin matu'i nbi Uisneno In Suur Akninu' mnak, ‘Oe re' neiki 'monit of nasai npoi neem na'ko atoin apirsait ein sin neek ein.’ Rarit sin napenin a'monit re' amneot ma amnonot. Nok ranan naan, sin turun atoni' bian amsa' he napenin a'monit re' amneot ma amnonot.” 39 Ro mneon ii, Nai' Yesus na'uab anmatoom nok Uisneno In Asmanan, natuin mansian ii sin arsin re' npirsain Nai' Yesus of antoup Asmanaf naan. Mes oras Nai' Yesus na'uab on naan, sin ka ntoup fa Asmanaf naan fa fe', natuin Uisneno ka nfee Je fa fe'. Uisneno batuur ka nfee Je fa fe', natuin In ka nanaib na'ratan Nai' Yesus fa fe'.
Atoin ein nmurai nbo'-baits ok, natuin Usif Yesus In kakain
40 Too mfaun ein re' anbin naan annenan Nai' Yesus na'uab on re' naan. Anmui' tuaf na'uab am nak, “Atoni' re' ia, batuur Uisneno In Mafefa kninu', re' In nba'an nain Je na'ko unu'!” 41 Anmui' bian antein nak, “Kahaf! In re' ia, es re' Kristus, re' Uisneno naruru' nain Je na'ko unu'!” Mes anmui' bian antein re' nprotesan am nak, “Ka bisa fa! Kristus naan, ka atoin Galileas fa. Batuur, ai' kaah? 42 Fin matu'i nbi Uisneno In Suur Akninu' mnak, Kristus re' naan usif nai' Daut in sufan-ka'un. Anbi bare bian, matu'i msa' am nak, In re' naan, atoin Betlehemas, es re' usif nai' Daut in kuan. On naan, ai'?” 43 Onaim too ngguin nmurai nbo'-baits ok, natuin Nai' Yesus In kakain. 44 Anmui' tuaf fauk amsa' re' he nheek Je. Mes ka tiit fa es annaa' naan Ee.
Atoin Yahudis sin a'naet ein ka npirsain fa neun Usif Yesus
45 Rarit Uim Onen Uuf in apaot ein re' fe'e na nnaon he nheek Nai' Yesus, antebi nfanin nbin a'naak rais pirsait Yahudi sin a'naakt ein ma atoin Farisis sin. Rarit a'naet ein naan nataan sin im nak, “Hoe! Nansaa' am es hi ka meik Je neem fa?” 46 Sin natahan am nak, “Amoo! Ka tiit tain fa tuaf es, re' na'uab on re' In, tua!” 47 Atoin Farisis sin nataan sin im nak, “Hae! Napoi naan ki msa', aa oo? 48 Mimnau! Fin ka tiit fa tuaf na'ko hai atoin Farisis, ai' na'ko a'naet ein re' npirsai Je. Batuur! Karu a'naet ein ka npirsai Je fa, nansaa' am es hi he mpirsai Je? 49 Te kaah, too mfaun ein re' npirsai Je ka nahinin fa neun Uisneno In Atoran. Uisneno of anhukun ma'fena' neu sin!” 50 Mes anbi bare naan, anmui' atoin Farisis tuaf es, kaan ee nai' Nikodemus. In re' naan es re' neem niit fa-fai he na'uab nok Nai' Yesus. Rarit in nataan sin im nak, 51 “On mee? Natuin hit atoran rais pirsait, hit tafeek tain atoni' in rasi fe'? Ai', hit ro he tneen ee fe' he taim tahiin in nmoe' saa', na' bisa tafeek in rasi?” 52 Onaim sin naskaar ee mnak, “Hoe! Ho atoin Galileas on re' In? Muprikas miit tar antea namnuut anbi Uisneno In Suur Akniun' ee fe'! Amrees murek-reko' he ho muhiin mak, ka tiit fa Uisneno In mafefa kniun es, re' neem na'ko Galilea!”
Bifee jes re' anmakaek
53 Onaim sin ansisa'en, he nfanin ok-oke'.
1 Mes Nai' Yesus ansae neu 'to'ef Saitun. 2 Noka' kik-kiku te, In ntaam anbi Uim Onen Uuf ee in kintal. Too mfaun ein neman ma nauban naan Ee. Rarit In ntook ma nmurai nanoni' sin. 3 Oras naan, sin nheek naan bifee jes oras in nmakaek. Onaim tunggur agaam ein ma atoin Farisis tuaf fauk anheer neik je neu Nai' Yesus. Rarit sin na'seke' bifee naan he nhake nbi sin maatk ein ok-oke'. 4 Onaim sin natonan Nai' Yesus am nak, “Aam Tungguru. Bifee re' ia, napein je oras anmakaek. 5 Tatuin ka'o Musa in Atoorn ein, anmu'i prenat re' nak, ‘Tuaf re' anmakaek ro he napein hukun. Hukun naan es re' tpoir je tar antea nmaet.’ Natuin Ho te, on mee, tua?” 6 Sin he nakreo Goe, he bisa nasaeb sanat he namouf Goe. Nai' Yesus ka nataah sin fa, mes In ntook ma ntui nbi afu, npaek In akrurun. 7 Sin nataan Ee piut. Rarit In nhaek, onaim natonan sin im nak, “On nai. Karu nmui' tuaf es na'ko hi arki re' ia, re' ka mmo'e msaan miit fa, ro in es re' anpoir nahuun he nhukun bifee re' ia.” 8 Rarit In ntook ma na'ruri' ntein, onaim antui nteni' nbi afu. 9 Oras sin nnenan nrair In na'uab on re' naan ate, sin namaeb ok. Fin anbi sin neek ein sin nahinin nak, sin nmoe' nitan sanat amsa'. Rarit sin es-es ate nsisa'en, nmurai na'ko mnasif tar antea munif. Namuni te, aar Nai' Yesus nok bifee naan anmesen nbin naan. 10 Rarit Nai' Yesus anhake nfain, onaim nataan am nak, “Sin etan mee? Ka tiit fa tuaf anbi bare ia, re' he nasaan ko, he nhukun ko, oo?” 11 Onaim in nataah am nak, “Ka tiit fa, tua.” Rarit Nai' Yesus na'uab neu ne mnak, “Au ka 'roim fa he 'hukun ko msa'. Amfain nai. Mes mumnau. Kais ammoe' sanat amtein!”
Usif Yesus on re' me'u neu mansian pah-pinan ia
12 Rarit Nai' Yesus na'uab antein nok too mfaun ein am nak, “Au re' ia, on re' me'u 'eu mansian pah-pinan ia. Tuaf re' natuin Kau ka nmoin fa nbi meis'okan, mes in nmoni nbi me'u re' neiki 'monit re' amneot ma amnonot.” 13 Anmui' atoin Farisis tuaf fauk re' anprotesan am nak, “Hoe! Ho he mjair saksii nmatoom nok Ho tuam aan kuum, oo? Ka bisa fa! Fin natuin hit atoran, ro he tuaf bian na' njarin saksii neu tuaf es, ka tuaf naan fa neikn on. Onaim hai ka mtoup reko fa, ma ka mroim fa he mpirsai.” 14 Nai' Yesus nataah am nak, “On nai. Maski Au 'jair saksii 'eu Au tuak ii kuuk, mes Au uabak naan, ro batuur. Fin Au kuuk es uhiin batuur Au 'uum u'ko mee, ma he 'nao 'eu mee. Hi ka mihiin fa Au u'ko mee, ma hi ka mihiin fa au he 'nao 'eu mee msa'. 15 Hi mruuk ma m'ukur atoni' mpaek mansian ii in ruku. Mes Au ka 'paek fa mansian ii in ruku he 'ruuk ma 'ukur tuaf es amsa'. 16 Karu Au 'ruuk ma 'ukur atoni', Au ruku ma ukur naan, ro batuur. Fin Au ka 'ruuk ma 'ukur a'mees fa, mes Au 'moe' sin ok-oke' ubu-bua 'ok Au Ama' re' nhaefan Kau. 17 Kais amnikan! Fin matu'i nbi hi Atoran rais pirsait am nak, “Karu nmui' saksii tuaf nua re' na'uab rasi huma' mese', naan saah ma batuur!” 18 Onaim ka Au 'mees fa re' 'jair saksii nmatoom nok Au tuak. Fin Au Ama' re' nhaefan Kau njair saksii na'uab anmatoom nok Kau msa'.” 19 Sin natanan am nak, “Te ho Ama' naan, et mee?” Onaim Nai' Yesus nataah am nak, “Hi ka mihiin Kau fa reko. Hi ka mihiin fa Au Ama' msa'. Fin karu hi mihiin Kau rek-reko te, hi mihiin Au Ama' msa'.” 20 Rasin re' ia ok-oke', Nai' Yesus natoon sin oras In nanoni' tuaf anbi Uim Onen Uuf, anpaumaak anbi bare re' sin anpaek je he nabuab ein roi kolekte. Ka tiit fa tuaf es he nheek Ee, natuin in oors ee ka ntea fa fe'.
“Au of a'nao 'eu baer jes re' hi ka bisa mituin Kau fa”
21 Nai' Yesus antuut antein neu sin im nak, “Au of a'nao usaitan ki, he 'nao 'eu bare 'teta'. Hi of mam-maim Kau, mes ka miteef Kau fa, fin hi ka mmui' fa hak he mnao meu bare naan. Ma oras hi mmaet, hi misaah hi sanat fe'.” 22 Rarit atoin Yahudis sin a'naet ma kaes kou'n ein anmaktaan ein es nok es am nak, “In na'uab saa' es re' ia? In he nakfirit niis on, aa oo? Fin In nak, ‘Hi ka bisa mnao fa meu bare naan.’ ” 23 Onaim Nai' Yesus na'uab neu sin am nak, “Hi mi'ko pah re' et a'pinan. Mes Au u'ko neon goe tnanan. Hi atoni' mi'ko pah-pinan ia. Mes Au ka u'ko fa pah-pinan ia. 24 Es naan ate, Au utoon fe'e na 'ak, oras hi mmaet, hi mroi ma misaah hi sanat ma penu sin fe'. Fin karu hi ka mpirsai fa mak, Au re' ia, es re' Kristus, re' Uisneno nreek Ee neem, oras hi mmaet, hi mroi ma misaah hi sanat ma penu sin fe'.” 25 Rarit sin nataan Ee mnak, “Hoe! Te Ho re' ia, sekau?” Nai' Yesus nataah am nak, “Au utoon 'ain u'ko ahun-hunut. 26 Anmui' rasi mfaun re' Au bisa utoon anmatoom nok ki. Hi saant ein namfaun amsa'. Mes Au ka ururu' ma ukrira' fa rasin naan. Re' nhaef Kau 'uum a'bi ia gui, oras In na'uab, In suma na'uab nahiin rasi re' batuur aah. Ma Au suma utoon 'eu mansian abit pah-pinan ia, rasin re' Au 'neen sin u'ko Na.” 27 (In sairt ii nak, In Amaf abit sonaf neno tunan. Mes sin ka nheek naan fa In sarit naan.) 28 Rarit Nai' Yesus na'uab antein am nak, “Oras hi mikfirit amrair Kau, Mansian Batuur-Batuur re' ia, nbi hau nehe te, na' hi mihini mmak, Au re' ia, es re' Kristus. Ma Au ka 'moe' fa saa'-saa' u'ko Au tuak ii kuuk, mes Au suma unoni' tuaf anmatoom nok rasin re' Au Ama' abit sonaf neno tunan nanoni' Kau. 29 Re' anhaef Kau nok Kau piut amsa'. In ka nkonan niit Kau fa 'mees, natuin Au 'moe' utuin In romin piut.” 30 Oras Nai' Yesus natoon rasin ia te, anmui' too mfaun re' anpirsai Je.
“Hi re' ia, es re' ka'o Abraham in sufan-ka'un sin”
31 Rarit Nai' Yesus na'uab neu atoin Yahudis sin re' npirsai Je mnak, “Karu hi mmoni mmafuut mok Au noin' ein, ma hi minoni' piut mi'ko Au te, hi mjair Au atoup noin' ein re' batuur. 32 Rarit hi bisa mihiin rasi huma'-huma' re' batuur. Ma rasin re' batuur naan, esan re' nafetin ki, he hi kais amjair ate mtein.” 33 Rarit sin nprotesan am nak, “Hai re' ia, ka mjair fa ate meu tuaf bian! Fin hai re' ia, ka'o Abraham in sufan-ka'un! Onaim nansaa' am es Ho mu'uab am mak, hi of mipein fetin?” 34 Onaim Nai' Yesus na'uab am nak, “Re' Au u'uab naan, ro batuur. Fin mansian ein arsin re' nmonin nbin 'moe' sanat, sin njarin on re' ate, re' suma natun-tuin aah saant ee in romin. 35 Mes nati' te, on nai: atoin ate sin ka biasa natuan nkonon fa nbin uim jes. Fin suma usi' in anah, re' natua nkono nbi naan. 36 Onaim karu Au, Uisneno In Anah, Au 'noes 'ain hi saant am penu sin ite, hi mipeni mrair fetin, ma ka mjair fa ate meu sanat naan antein. Nok ranan naan, hi mipein fetin batuur, ma kais mituin sanat naan in romin antein! 37 Au uhini 'rair ki, hi es re' ka'o Abraham in sufan-ka'un. Maski on naan, mes hi mam-maim ranan piut he mi'maet Kau, natuin hi ka mroim fa he mtoup Au rais noni'. Fin anbi hi neekm ein, ka nmui' fa bare ntein he mihiik ma mipaan Au Uab ein. 38 Au utoon rasin re' Au 'kisu 'rair sin, re' Au Ama' naruru' ma nakrira' nrair sin neu Kau. Ma hi mmoe' mituin rasin re' sin hi ama' natoon anrair sin neu ki.”
“Hi ama' naan, es re' nitu 'nakaf”
39 Sin natahan am nak, “Hai re' ia, ka'o Abraham in sufan-ka'un!” Nai' Yesus na'uab am nak, “Karu hi mjair ka'o Abraham in sufan-ka'un re' batuur, hi ro he mituin a'tope' na'ko na. 40 Mes ka'o Abraham ka nmoe' niit fa maufinu on re' hi! Fin hi mam-maim ranan he mi'maet Kau. Te kaah, Au re' ia es re' utoon 'eu ki rasin re' batuur, re' Au 'neen sin u'ko Uisneno. 41 Hi 'moe'm ein, ro tebes, ka na'roo fa na'ko hi ama' in i'moe'k ein.” Mes sin anprotesan am nak, “Hae! Hai re' ia, anah-anah saah! Kais mak, hai re' ia, ri'aan nasi! Fin hai Ama', suma mese' kuun, es re' Uisneno!” 42 Onaim Nai' Yesus natonan sin im nak, “Mes karu Uisneno batuur-batuur anjair hi Ama', tebes hi ro he mneek Kau. Fin Au mneemk ii u'ko Na, ma Au es re' ia. Au ka 'uum fa utuin Au roimk ii kuuk. Mes Au 'uum, utuin In es anhaefan Kau. 43 Nansaa' am es hi ka mihiin fa Au uab ein aan? Oni' natuin hi ka mroim fa he mneen ate! 44 Hi re' ia, huma' mese' on re' nitu 'nakaf. Fin hi mroim he mmoe' mituin in romin! Na'ko oras ahun-hunut, in aroor mansian. In nraban rais reko, fin in ntorak nain are' saa'-saa' re' batuur. Karu in nputa-kriu te, naan in monin. Fin in re' naan aputa-kriut, ma apoit ee tuan! 45 Au re' ia, es re' utoon rasi re' batuur. Mes hi ka mpirsai Kau fa. 46 Neu! Sekau na'ko ki bisa miruru' ma mikrira' bukti mmak, Au 'moe' sanat? Au 'sanmaak! Karu Au u'uab batuur, nansaa' am es hi ka mpirsai Kau fa? 47 Tuaf re' In amneemn ee na'ko Uisneno, nneen In Kabin ma Prenat. Mes hi re' ia, hi ka mi'ko fa Uisneno, es naan ate hi ka mroim fa he mneen Kau.”
“Ka'o Abraham ka nmoin fa fe', mes Au 'moin 'ain”
48 Atoin Yahudis sin a'naet ma kaes kou'n ein natahan am nak, “Hoe! Hai mi'uab batuur. Fin hai mi'uab amrair mak, Ho re' ia, ka atoin Yahudis batuur-batuur fa, mes Ho re' ia atoin Samarias. Ho mniut sae msa'!” 49 Rarit Nai' Yesus nataah am nak, “Au ka 'niut sae fa, tua. Au 'hormaat Au Ama' abit sonaf neno tunan, mes hi ka mhormaat Kau fa. 50 Au ka 'aikas fa Au tuak ii he ururu' ma ukrira' Au pinak ma krahak kuuk. Mes anmui' Tuaf es, re' he naruru' ma nakrira' Au pinak ma krahak. Maut he In kuun es re' nafeek nak, Au uabak batuur, ai' kaah?! 51 Ro tebes, Au Uab ein, batuur! Rarit atoni' re' nneen ma nmoe' natuin Au Uab ein naan, of ka nmaet fa.” 52 Annenan on naan ate, atoin Yahudis sin a'naet ein natoon Ee mnak, “Oras ia hai mihiin mak, Ho mu'uab tafi'-tafi' on re' amaunut, natuin Ho mniut sae mrair. Fin ka'o Abraham anmate msa'. Uisneno In mafefa kniun' ein anmaten amsa'. Mes Ho mak, ‘atoni' re' nneen ma nmoe' natuin Au Uab ein naan, of ka nmaet fa.’ Batuur ho mumaun umrair! 53 Ai' Ho mutenab mak, Ho ma'tani' mneis mu'ko asae nenot ka'o Abraham? Ai' Ho ma'tani' mneis mu'ko Uisneno In mafefa kniun' ein re' nmate nrarin? Ho mutenab mak, Ho re' ia, sekau?!” 54 Onaim Nai' Yesus nataah am nak, “Karu Au 'aikas Au tuak ii, atoni' ka ntoup reko fa. Te kaah, Au ka 'aikas fa Au tuak ii kuuk, mes Au Ama' es re' nait na'rat-ratan Kau. In re' naan, re' hi mmanaku' mmak, In anjair hi Uisneno. 55 Mes hi ka mihiin Je fa. Au es re' uhiin Je batuur. Karu Au 'ak Au ka uhiin Je fa, Au apoit Kau on re' hi. Mes Au uhiin Je batuur, ma Au 'moe' utuin In Kabin ma Prenat amsa'. 56 Hi ka'o Abraham in neekn ee nmariin anneis, oras in nhaat ma npao he nkius niit Kau 'uum. In niit anrair, rarit in nnaben ate, nanokab ma namtiis inrair.” 57 Atoin Yahudis sin a'naet ein na'uab neun Ee mnak, “Ho ka mmoin maan fa toon bo' niim fa fe'e msa'! Mes Ho mak, Ho mkius miit amrair ka'o Abraham. Batuur, aa oo?” 58 Onaim Nai' Yesus nataah am nak, “Batuur! Fin ka'o Abraham ka nmoin fa fe', mes Au 'moin 'ain.” 59 Rarit atoin ein naan naitin fatu he npoir Je, natuin In naikas In tuan ee nahuum on re' Uisneno. Mes In nnao na'kor-koro' he npoi na'ko Uim Onen Uuf ee in kintal.
Usif Yesus nareko' aforot tuaf es
1 Rarit Nai' Yesus sin annaon nkonon. In nkius niit aforot es, re' nfoor nain na'ko oras nahoins ee. 2 Rarit Nai' Yesus In atoup noin' ein nataan Ee mnak, “Aam Tungguru! Sekau es re' anmoe' sanat, tar antea atoni' ia nfoor on nai? Natuin in kuun aa oo, ai' natuin in ainaf-amaf?” 3 Nai' Yesus nataah am nak, “Atoin aforot ia, ka nsaan fa. Ma in ainaf-amaf ka nmo'en fa sanat amsa' tar antea in nfoor. Nahoins ee te on re' naan, he mansian ii bisa nkius ma nahiin nak Uisneno In nareok' ee. 4 Uisneno es re' anhaefan Kau. Onaim hit ro tmeup ma'tani' he tanaob In mepu oras me'u fe'. Fin oras meis'ookn ii neem, atoni' ka bisa nmeup fa goen. 5 Oras Au 'bi pah-pinan ia fe', Au on re' me'u re' 'tana' mansian ii ok-oke'.” 6 Nai' Yesus na'uab anrair on naan ate, In naroon anbi afu. Rarit In ntook ma na'ruri', he nsero' hape ma afu njari krofo'. Rarit In nhose' krofo' naan anbi atoin aforot naan in matan. 7 Onaim In nrenu mnak, “Amnao meu nifu Siloam, he mumeu ho humam ambi naan.” (Anbi uab Ibrani, Siloam naan in oten nak, ‘soun ee neem’.) Rarit atoin aforot naan annao neu bare naan, ma in nameu in human. Oras in anfain neem, in bisa nkius niit een! 8 Rarit atoni' naan in aok-bian sin re' sin uimn ein anmatai-'turun re' nkius niit ee, in biasa ntoit saa'-saa', nmurai nmaktaan ein am nak, “Hoe! Tuaf re' ia, atoin aforot re' fe' ia te, ntook ma antot-toit saa'-saa' ii, ai'?” 9 Tuaf bian nak, “Batuur, in es re' ia!” Bian nak, “Kahaf! In re' naan, suma humaf mese' on re' atoni' naan!” Mes atoni' naan in neikn on es natonan sin im nak, “Kahaf! Au re' ia, es re' unu' te aforot naan!” 10 Rarit sin nataan ee mnak, “On mee m'es ho bisa mkius?” 11 Onaim in nataah am nak, “On nai! Atoni' re' kaan ee, Nai' Yesus naan, ansero' hape ma afu njari krofo', rarit In nhose' nbi au maatk ein. Rarit In nreun kau mnak, ‘Amnao meu nifu Siloam, he mumeu ho humam ambi naan.’ Au 'moe' utuin. Es naan ate, oras ia au bisa 'kius 'iit een!” 12 Rarit sin nataan ee mnak, “Atoni' naan et mee?” In nataah am nak, “Muhiin!”
Atoin Farisis sin naprikas atoni' re' anfoor niit aan
13-14 Neno naan, oras Nai' Yesus ansero' hape nok afu njari krofo', ma nareko' aforot naan bisa nkius niit, oras naan nateef nok atoin Yahudis sin neno snasat. Onaim sin nnao naat atoni' re' nfoor niit aan, he nnao n'ain neu partei pirsait Farisis sin. 15 Rarit atoin Farisis sin nataan ee mnak, “Ho mutoon miit! Nansaa' am es oras ia ho bisa mkius?” In nataah am nak, “On nai. Atoni' naan antao krofo' nbi au maatk ein. Rarit au 'nao umeu au humak. Onaim oras ia, au bisa 'kius 'iit.” 16 Anmui' atoin Farisis bian nak, “Atoni' re' nareko' ko naan, ka na'ko fa Uisneno. Hai mihiin, natuin In ntanhai atoran anmatoom nok neno snasat.” Anmui' tuaf bian antein nak, “On mee m'es atoin asanat bisa nmoe' rais sanmakat on re' naan?” Rarit sin anmatoen nmafaink ein tar anbo'-baits ok. 17 Rarit sin nataan nafani' atoni' re' unu' te nfoor naan am nak, “Natuin ho, Tuaf re' nfei naan ho maatm ein naan, atoni' human on mee?” In nataah am nak, “Natuin au te, In re' naan Uisneno In mafefa kniun es, tua.” 18 Mes atoin Yahudis sin a'naet ma kaes kou'n ein ka npirsain fa nak, atoni' naan, anfoor niit, rarit oras ia bisa nkius. Onaim sin nreun he nnao npeo' in ainaf-amaf he neman n'ain sin. 19 Oras sin neem anrarin, a'naet ein nataan sin im nak, “In re' ia, hi aanh, aa oo? Batuur, ai' kahaf, in nfoor nain na'ko oras hi mihoins ee? Rarit on mee m'es oras ia in bisa nkius.” 20 Atoni' naan in ainaf-amaf natahan am nak, “In re' ia, batuur hai anah. Ma in nfoor nain na'ko oras hai mihoins ee. 21 Mes hai ka mihiin fa, in npaek saa', es oras ia in bisa nkius. Sekau es anfei in matan, hai msa' ka mihiin fa, tua. In na'nae nrair. Mitaan kiim ee, tua, fin in bisa ntoin ma nataah kuun, tua!” 22 Sin na'uab ein on re' naan, natuin sin namtausan atoin Yahudis sin a'naet ein. Natuin sin nahinin nak, a'naet ein naan anma'akoran am nak, “Karu nmui' tuaf anmanaku' mnak, Nai' Yesus naan, es re' Kristus, hai ro he mriu' mipoitan tuaf naan na'ko hit atoin Yahudis hit uim onen.” 23 Es naan ate, atoni' naan in ainaf-amaf nataah am nak, “In na'nae nrair. Mitaan kiim ee, tua.” 24 Rarit sin nhaman atoni' re' unu' te nfoor naan. Onaim sin nak, “On nai. Ho ro he mu'uab namneo goah ambi Uisneno In human, he mpanat In kaan foo menin. Fin hai mihiin batuur, Nai' Yesus naan, atoin maufinu.” 25 Atoni' re' nfoor niit naan nataah am nak, “Au 'baiseun ki, ama' sin. Reko te kais mitoo', tua! Fin au ka uhiin fa karu In re' naan, atoin maufinu, ai' kaah. Re' au uhiin je batuur-batuur ii, es re' unu' te au 'foor; mes oras ia au bisa 'kius kuuk een.” 26 Sin nataan ee mnak, “Te In nmoe' saa' neu ko? In anfei ho maatm ein on mee?” 27 Onaim In nataah am nak, “Fe'e na au utoon a'rair, mes hi ka mroim fa he mneen. Nansaa' am es hi mroim he au utoon a'tein? Oni' ama' ki arki msa' mroim he mjair in atoup noin' ein, ai'?” 28 Rarit sin naseuk ee, onaim sin nak, “Maut he ho es re' mjair In atoup noni'! Fin hai re' ia, ka'o Musa in atoup noin' ein. 29 Hai mihiin Uisneno na'uab nok ka'o Musa. Mes hai ka mihiin fa Atoni' naan, In amneemn ii na'ko 'nu'uf mee.” 30 Atoni' re' unu' te nfoor naan nataah am nak, “Au 'sanmaak kuuk, tua! Hi ka mihiin fa In amneemn ii na'ko mee. Te kaah, In es re' nfei au maatk ein, es naan ate, oras ia au bisa 'kius. 31 Hit tahiin ok-oke' tak, Uisneno ka nneen ma natniin fa atoin maufinu, ai'? Mes Uisneno nneen ma natniin atoin neek amneot re' nmoin natuin In romin. 32 Anmurai na'ko Uisneno nmoe' pah-pinan ma neon goe tunan tar antea oras ia, ka nmui' fa reta' es amsa', re' anmatoom nok tuaf re' nareko' atoni' re' nfoor na'ko oras nahoins ee, he in bisa nkius. 33 Onaim karu Nai' Yesus ka na'ko fa Uisneno, In ka bisa nmoe' fa saa'-saa', ai'?” 34 Onaim sin natahan am nak, “Hoe! Ho re' ia, atoin maufinu na'ko oras ho aina' nahonis naan ko! On mee m'es ho bisa mutenab mak, ho bisa munoni' mufani' kai?” Rarit sin nriu' napoitan atoni' naan na'ko sin uim onen.
Atoni' re' neekn ee nfoor
35 Oras Nai' Yesus anneen nak sin nri'u nrair atoni' re' nfoor niit aan na'ko uim onen, In nnao naim atoni' naan, tar napein je. Rarit In nak, “On mee! Ho mpirsai Mansian Batuur-Batuur, aa oo?” 36 In nataan am nak, “Te In re' naan, sekau, tua? Mutoon kau fe', maut he au bisa 'pirsai Je, tua.” 37 Nai' Yesus natoon ee mnak, “Ho muteef amrair Je. In re' naan, es re' Au, re' oras ia na'uab nok ko.” 38 Rarit atoni' naan nak, “Usi', au 'pirsai, tua!” Onaim In nri'tuu he na'besan neu Nai' Yesus. 39 Rarit Nai' Yesus natoon ee mnak, “Au 'uum a'bi pah-pinan ia he ururu' ma ukrira' mansian ii sin sanat ma penu sin, maut he aforot bisa nkius, ma maat meu' gui bisa nfoor.” 40 Anbi bare naan, anmui' atoin Farisis tuaf fauk re' nneen In uab naan. Onaim sin natanan am nak, “On mee es re' ia? Hai maatm ein mera'-mera'. Hai ka mfoor fa, tua!” 41 Nai' Yesus nataah am nak, “On nai. Karu batuur hi mfoor, es ka nasaan ki fa. Mes hi mak, hi re' naan, atoin maat a'mera'. Es naan ate, hi misaah ma mroi hi sanat fe'.”
Reta' anmatoom nok atukus ma in a'bib-kasen
1 Nai' Yesus na'uab anpaek reta' es am nak, “Re' Au utoon ki re' ia, ro batuur. A'bibi ma 'bib-kase nmu'in o'of. Karu nmui' tuaf ka ntaam fa npeo' eno', mes ansae npeo' baki ai' bahak, naan batuur, in re' naan, abakat. 2 Mes re' ntaam anpe'on eno' naan, es re' 'bib-kase re' sin atuuks ee npijaar ma npairoir sin. 3 Apao eno' nahiin atukus naan, rarit nasoit eno' neu ne. 'Bib-kaesn ein nahiin atukus naan in hanan amsa'. Rarit oras in nkoa' ma nhaman sin kaank ein mese'-mese', sin npoin natuin ee neun mone'. 4 Oras in neik sin anpoin neun mone', in nnao nahunu nbi maat. 'Bib-kaesn ein natuin ein nbin koit, natuin sin nahiin in hanan. 5 Karu nmui' tuaf re' 'bib-kaesn ein ka nahiin je fa, sin ka natuin ee fa. Mes sin naen namnekun, natuin sin ka nahiin fa tua sona' in hanan.” 6 Maski Nai' Yesus nareta' on naan neu sin, mes sin ka nahiin fa In sairt ee msa'.
Usif Yesus nahuum on re' atukus arekot
7 Rarit Nai' Yesus natoon antein sin im nak, “Re' Au utoon ki re' ia, ro batuur. Au on re' eno' 'eu 'bib-kaesn ein sin o'of. 8 Are' kanan tuaf re' neem nahunun Kau, sin on re' abakat. Maski sin anham-haman, mes 'bib-kaesn ein ka nneen sin fa. 9 Rarit Au on re' eno' naan. Karu nmui' tuaf re' antaam anpeo' Kau, Uisneno nroim he nsoi nafeitn ee na'ko in sanat ma penu sin. Naan on re' in antaam anbi Uisneno In baran, anpeo' Kau re' 'jair in eno'. Ma tuaf re' antaam anpeo' Kau, in nnao neu mee jah, in napeni mnahat ma mninut re' batuur. 10 Abakat, sin suma nare'u haa, fin sin neman he nabakan, na'maten, ma nareu' atoni' in a'monin. Mes Au 'eiki 'monit re' reko nneis, fin Au 'uum he atoni' bisa nmoin nok mamut ma tainina', ma nmoin nok amneot ma amnonot. 11 Au on re' atukus arekot amsa'. Fin atukus arekot nabarab anrair in tuan ee tar antea nmaet, maut he in a'bib-kaesn ein bisa nmonin. 12 Mes ameput re' 'bib-kaesn ein sin ka atuuks aa fa, ma ka tuan aa fa, karu in nkius anmui' aus fui apisut neem, in naen namneuk, ma namaika' 'bib-kaesn ein naan anbin bare naan. Rarit aus fui apisut anheek naan a'bib-kasen, onaim a'bib-kasen bian naen ansiksaakn ok. 13 Ameput naan naen, natuin in suma nmeup he nami haa roit. In ka nfairoir fa he npao narek-reko' a'bib-kaesn ein naan. 14 Batuur! Au on re' atukus arekot. Au uhiin Au 'bib-kasen. Ma sin nahiin Kau msa'. 15 Naan on re' Au Ama' abit sonaf neno tunan nahiin Kau, ma Au uhiin Je msa'. Au ubarab a'rari msa' he 'nona' ma 'fee Au tuak ii tar a'maet, maut he Au 'bib-kaesn ein bisa nmonin. 16 Anmui' Au a'bib-kasen bian, re' ka nabuan fa fe' nok Au 'bib-kasen abitan re' ia. Au ro he 'nao ubuab 'aan sin imsa'. Oras sin nneen Au hanak, sin nahiin nanin. Rarit sin neman ma nabuan he njarin pukan mese', es re' nmui' atukus mese'. 17 Natuin rasi naan, Au Ama' abit sonaf neno tunan anneek Kau. Fin Au ubarab a'rair he 'nona' ma 'fee Au tuak ii tar a'maet, maut he Au bisa 'moni' fain. 18 Tuaf es ka nareen ma na'seke' Kau fa he 'maet, mes Au kuuk es re' ubarab he 'nona' ma 'fee Au tuak ii tar a'maet. Au 'mui' hak he 'nona' ma 'fee Au tuak ii. Au 'mui' hak he 'ait ufani'. Prenat re' ia, Au 'toupu 'rair je u'ko Au Ama' abit sonaf neno tunan.” 19 Natuin sin anneen Nai' Yesus In na'uab on naan, atoin Yahudis sin anmatoen ntenin. 20 Tuaf amfaun na'ko sin nak, “Hoe! Atoni' ia, namaun! Ma anniut sae msa'! Nansaa' am es hi he mneen Ee?” 21 Mes bian antein nak, “Ia ka amaunt ii in uab na fa, joo? Uab ein on re' naan, ka npoi niit fa na'ko niutn ein sin feefk ein! Ma niutn ein ka bisa nmoe' fa aforot bisa nkisu msa', joo?”
Atoin Yahudis sin a'naet ein ka nromin fa he ntoup Usif Yesus
22 Oras naan, atoin Yahudis sin he nmoe' sin rais pirsait ee in neon kou' goes. Neon ko'u naan, nateef nok oras mainikin. Anbi fesat naan, atoin Yahudis sin namnau oras tua sona' an'oemetab Uisneno In Uim Onen Uuf anbi kota Yerusalem, rarit sin nakninu' he nana'at nafain' ee neu Uisneno. 23 Nai' Yesus annao nfuun am nateef anbi Uim Onen Uuf ee in kintal, anbi bare re' sin nteek ee nak, ‘Uim Loos Usif Soleman’. 24 Rarit atoin Yahudis sin a'naet ma kaes kou'n ein neem nauban naan Ee mnak, “Hae! Hai ro he mpao mtea reka' na' hai bisa mihiin? Karu Ho re' ia, es re' Kristus, mutoon munon-noon kai, tua.” 25 Nai' Yesus nataah am nak, “Au utoon 'ain, mes hi ka mroim fa he mpirsai Kau. Te kaah, rasin re' Au 'moe' sin, natuin Au Ama' In apreent ahaa. Rasin re' naan esan re' naruru' ma nakrira' nak, Au re' ia sekau. 26 Mes hi ka mpirsai Kau fa, natuin hi ka Au 'bib-kaesn aa fa. 27 Fin Au 'bib-kasen re' batuur naan, nahiin Au hanak. Sin natuin Kau msa'. Au uhiin sin imsa'. 28 Au 'fee 'eu sin 'monit re' amneot ma amnonot re' ka natfeek niit fa, ma ka napasib sin fa na'kon Uisneno msa'. Ka nmui' fa saa' es, re' bisa nasiik naan sin na'ko Kau. 29 Au Ama' abit sonaf neno tunan es re' nnona' ma nfee sin neu Kau. In ma'tani' nneis na'ko are' saa' ii ok-oke'. Es naan ate, ka nmui' fa saa' es, re' bisa nasiik naan sin na'kon In a'niman. 30 Fin Au 'ok Au Ama', mese'.” 31 Annenan on naan ate, atoin Yahudis sin a'naet ein naitin fatu no goes antein, he npoir na'maet Nai' Yesus. 32 Onaim Nai' Yesus natonan sin im nak, “Hae! Au ururu' ma ukrira' rasi mfaun re' reko u'ko Au Ama'. Hi mpaek rais arekot re' mee, he mpoir mi'maet Kau?” 33 Sin nataah am nak, “Hai ka mpoir ko fa, natuin ho mmoe' rais arekot. Mes hai he mpoir mi'maet ko, natuin ho mu'akan ko'u! Ho suma mansian, mes ho maikas ho tuam aan nahuum on re' Uisneno! Ho ro bainesi'!” 34 Onaim Nai' Yesus nataah am nak, “On mee? Anbi Atoran Rais Pirsait re' hi mnaa' ee naan, antui mnak, ‘Au utoon ain 'ak, hi uisf ein re' ia, uis fuat ein’. 35 Hit tahiin tak, are' saa' ein ok-oke' re' matu'i nbin Uisneno In Suur Akninu' naan, ro batuur, ma ka bisa nnoes nain sin fa. Uisneno kuun anteek atoin ein naan nak, sin re' naan, ‘uis fuat ein’. 36 Onaim on mee m'es hi bisa mak Au u'akan natuin Au 'ak Au 'jair Uisneno In Anah? Ka matoupu' reko fa, tua! Fin Au Ama' abit sonaf neno tunan es re' naruru' ma nakrira' naan Kau, ma In es re' anhaef Kau 'uum a'bi pah-pinan ia. 37 On nai. Karu Au ka unaob fa Au Ama' In mepu, hi kais ampirsai Kau. 38 Mes Au unaob In meup goe piut. Onaim maski hi ka mroim fa he mpirsai Kau, mes a'kre'o msa' hi ro mtoup rais sanmakat re' Au 'mo'e. Nok ranan naan, hi bisa mihiin im mak, Au Ama' nmafuut nok Kau. Ma Au 'mafuut 'ok Ne msa'.” 39 Rarit sin he nheek entein Ee, mes sin ka nheek naan Ee fa. 40 Rarit Nai' Yesus annao nfain anbi noe Yarden in panin, anbi bare re' nahunu te, Nai' Yohanis nasrain atoni'. Rarit In natua ntahan nbi naan. 41 Too mfaun ein neman ma naim Je. Sin na'uab ein am nak, “Nai' Yohanis ka nmoe' fa rais sanmakat saa'-saa'. Mes are' saa' ii ok-oke' re' in na'uab anmatoom nok Nai' Yesus re' ia, ro batuur, oo!” 42 Onaim too mfaun ein anpirsai Je nbi bare naan.
Nai' Lasarus in a'maten
1-2 Anmui' tuaf es, kaan ee nai' Lasarus. In natua nbi kuan Betania, nabu-bua nok in fetof tuaf nua, bi Maria nok bi Marta. (Bi Maria re' ia, es re' n'opa' miin foo meni' nbi Usif Yesus In haen, rarit annose npaek in a'naak funu'.) Neot es, Nai' Lasarus nameen ma'fena'. 3 Onaim In feotf ein ansoun ein hanaf neu Nai' Yesus am nak, “Ho partei re' nai' Lasarus, nameen ma'fena', tua.” 4 Oras Nai' Yesus anneen hanaf naan ate, In na'uab am nak, “Menas naan ka neik je fa he nmaet. Uisneno he npaek rasi ia he naruru' ma nakrira' In pinan ma krahan, maut he mansian ii naikas na'rat-ratan Kau, es re' Uisneno In Anah.” 5 Nai' Yesus anneek bi Marta, orif bi Maria, ma sin naof nai' Lasarus. 6 Oras In anneen nak, nai' Lasarus nameen, In namaika' neno nua fe'e nbi noe Yarden in panin. 7 Rarit In natoon In atoup noin' ein am nak, “Iim he hit tfani ttein teu nai' Lasarus in kuan et propinsi Yudea.” 8 Mes In atoup noin' ein anprotees am nak, “Aam Tungguru. Neon goes ii, atoin Yahudis sin a'naet ma kaes kou'n ein he npoir na'maet Ko nbi nee. Mes oras ia, Ho he mfain meu nee mtein, on mee, tua?” 9 Onaim Nai' Yesus nak, “Kais mimtau! Ansuun neno, maans ee ntana' na'ko kiku tar antea maans ee nmaeb. Naan jam bo'es am nua, ai'? Oras amnao mbi me'u, atoni ka nastuun fa. Fin meu' gui ntana' nbi pah-pinan ia he atoni' bisa nkius. 10 Mes karu atoni' nnao nbi meis'okan, in nastuun fani-fani, natuin in ka nmui' fa me'u.” 11 Nai' Yesus na'uab anrair on naan ate, In natoon am nak, “Hit partei nai' Lasarus antuup anrair. Mes Au of ufena'.” 12 Rarit In atoup noin' ein nak, “Usi'. Karu in suma ntuup ate, in sairt ii, in of nareko nfain, ai'?” 13 Sin na'uab ein on naan, natuin sin nateenb ein Nai' Yesus na'uab anmatoom nok tupas biasa. Te kaah, In na'uab anmatoom nok nai' Lasarus in a'maten. 14 Rarit Nai' Yesus natoon maat-maat am nak, “On nai, nai' Lasarus anmate nrair. 15 Au 'mariin Au ka 'bi fa nee, oras in ka nmaet fa fe', maut he hi kais amsuus. Fin saa' re' he njair oras ia, nmoe' ki bisa mpirsai Kau. Iim he tnao teu nee nai!” 16 Rarit nai' Tomas, re' sin nteek nak, “ri'aan koen,” nhaman atoup noni' bian sin im nak, “Iim nai! Reko nneis hit arkit tatuin Ee, maut he hit tmate te, tabu-bua tok Ne.”
Usif Yesus annao neu Betania, rarit anhaan mau bi Marta
17-19 Rarit Nai' Yesus sin nnaon neun kuan Betania. Kuan naan in a'roo, suma kiru teun goah na'ko kota Yerusalem. Onaim atoin Yahudis amfaun neman na'kon Yerusalem he nbe'en ma nhaan mau bi Marta ma bi Maria. Oras Nai' Yesus sin ntean nee te, sin fe' nahinin, nak, abitan bare naan ansuub anrair nai' Lasarus neno haa goen. 20 Oras bi Marta nneen nak, Nai' Yesus neem anrari te, in npoi ma nnao nateef nok Nai' Yesus. Mes bi Maria nabaar anbi uim je nanan. 21 Rarit bi Marta na'uab neu Nai' Yesus am nak, “Airoo, Usi'! Bait Ho mbi ia te, au na'o ka nmaet fa, tua. 22 Mes au 'pirsai msa', Ho he mtoit saa' es mu'ko Uisneno te, ro tebes Ho of mupein je, tua.” 23 Onaim Nai' Yesus antoin je mnak, “Ma'a! Ho na'o of anmoni nfain.” 24 Bi Marta anmanaku' mnak, “Au uhiin 'ak, anbi neon amsoput, oras Uisneno namonib nafani' amaets ein ok-oke', In namonib nafani' au na'o msa'.” 25 Onaim Nai' Yesus na'uab am nak, “Au es re' umonib ufani' amaets ein. Ma Au es re' a'fee 'monit re' amneot ma amnonot. Onaim tuaf re' anpirsai Kau of napeni 'monit naan, maski in nmaet. 26 Onaim tuaf re' napeni 'monit re' amneot ma amnonot naan, ma npirsai Kau, of anmoin nabar-baar. Ma'a, ho mpirsai Au uab ii, oo?” 27 In nataah am nak, “Tua! Au 'pirsai 'ak, Ho re' ia, es re' Kristus, Tuaf re' Uisneno nruur nain Je na'ko unu'. Ma Ho re' ia, Uisneno In Anah, re' In nba'an anrair, he nreek Ee neem neu pah-pinan ia, tua.”
Usif Yesus ankae
28 Bi Marta na'uab anrair on naan ate, in annao nfain. Rarit in nhaman in orif bi Maria, he nua sin anmesen. Onaim natoon ee mnak, “Aam Tungguru neem anrair. In he nateef nok ko.” 29-31 Anneen on naan ate, bi Maria anfeen rabah he nnao naim Nai' Yesus. Atoin Yahudis sin re' nbe'en ma namaik ein nok bi Maria nbin uim je nanan, ankius niit ee naen anpoi. Rarit sin natuin ee. Fin sin nateenb ein nak, in he nnao nkae neu faut natef. Oras naan, Nai' Yesus sin ka ntaman fa fe' nbin kuan ee nanan. In nbi bare re' bi Marta nateef nok Ne goan. 32 Oras bi Maria ntea bare naan, in nkius niit Nai' Yesus. Rarit in nri'tuu nbi Nai' Yesus In haen. In natoon am nak, “Airoo, Usi', oo! Bait Ho mbi ia te, au na'o ka nmaet fa, tua.” 33 Oras Nai' Yesus ankius goe nkae, ma atoin Yahudis sin re' natuin ee ankaen npin-piuns ein amsa', rarit In nato'o nbi In nekan ma nsuus. 34 In nataan am nak, “Hi msuub ee, et mee?” Sin natahan am nak, “Amkoen Om uum, Usi'! Uum he mkius kuum, tua.” 35 Onaim Nai' Yesus ankae. 36 Rarit atoin Yahudis sin na'uab ein am nak, “Amkius kiim, In nneek niis nai' Lasarus!” 37 Mes bian antein na'uab ein am nak, “Atoni' re' ia, es re' anfei aforot in matan, he bisa nkius. Nansaa' am es In ka bisa ntahan fa nai' Lasarus he kais anmaet?”
Nai' Lasarus anmoin anfain
38 Rarit Nai' Yesus neekn Ee nsuus anmaet. Onaim In nnao npaumak-maak anbi nuat re' sin anpaek je he nsuub nai' Lasarus. Sin antoeb naan nuat naan nok faut kou' goes. 39 Rarit Nai' Yesus anreun tuaf anbin naan am nak, “Amtitar main fatu re' ia, he mfei nuat ii eon' ii fe'!” Mes bi Marta, es re' amates naan in fetof, anprotees am nak, “Koi Usi'! In nmaet neno haa goen, tua! Of nafoo.” 40 Nai' Yesus namnaub ee mnak, “Mumnau fe'e na, oo? Au utoon 'ain 'ak, karu ho mpirsai Kau batuur-batuur ate, ho bisa mkius Uisneno In pinan ma krahan.” 41 Rarit tuaf fauk antitar ma nfonat fatu naan na'ko nuat. Rarit Nai' Yesus anbaisenu n'ain neon goe tnanan, onaim In nak, “Aam Honi'! Au 'toit makasi, natuin Ho mneen ma mutniin Kau, tua. 42 Au uhini 'rair, u'ko oras ahunut 'ak, Ho mneen Kau piut. Mes oras ia Au u'uab on naan, maut he atoin ein re' anhaken esan re' ia bisa nahinin nak, Ho es amhaefan Kau, tua.” 43 Oras In na'uab anrair on naan ate, In nhaman ma nkoa' neik haan ko'u mnak, “Lasarus! Ampoi uum nai!” 44 Onaim amates naan anpoi na'ko nuat naan in nanan. Anmui' tais re' npaek je he n'aum amates in a'niman ma in haen. Anmui' tais re' nkuub naan in human amsa'. Nai' Yesus anreun sin re' nbin naan am nak, “Ampukai main tais ein naan fe', maut he in nnao!”
Sin namin ranan he na'maet Usif Yesus
45 Oras sin niit Nai' Yesus anmoe' on naan, atoin Yahudis amfaun re' neem ma nbe'en nok bi Maria, npirsai neun Nai' Yesus. 46 Mes anmui' bian annao nateef nok partei pirsait Farisis sin, he natonan sin Nai' Yesus In a'moe' naan. 47 Rarit a'naak rais pirsait Yahudi sin a'naakt ein, ma atoin Farisis nabuan he namin ranan. Sin natanan am nak, “Atoni' naan anmoe' rais sanmakat huma'-huma'! Onaim hit he tmoe' on mee ttein? 48 Fin karu hit tkoon Ee, of too mfaun ein nafnekan ma nhaarp Ee on re' In njair sin usif. Nok ranan naan, sorarus Roma of neem nareu' hit Uim Onen Uuf ma hit pah.” 49 Toon naan, nai' Kayafas es anjair a'naak rais pirsait Yahudi sin a'naak ko'u. In na'uab am nak, “Amonot! Hi ka mihiin fa saa'-saa'! 50 Fin reko nneis neu ki, karu suma tuaf es anmaet neu too mfaun. Fin karu kahaf, sorarus Roma sin of nareu' nain pah Yahudis a'teme-'teme!” 51 Nai' Kayafas ka na'uab fa natuin in romin kuun. Fin Uisneno npaek in fefan, natuin in njair a'naak rais pirsait Yahudi sin a'naak ko'u anbi toon naan. Es naan ate, nai' Kayafas natoon nain nak, Nai' Yesus of anmaet neu atoin Yahudis sin ok-oke'. 52 Te kaah, In ka suma nmaet neu pah Yahudis sin nmesen fa, mes neu Uisneno In aanh ein re' namraur ma nariis naheun pah-pinan ia. In of anmoe' sin anjarin pah mese'. 53 Natuin nai' Kayafas in uab naan, es naan ate, nmurai oras naan, atoin Yahudis sin a'naet ma kaes kou'n ein namin ranan he na'maet Nai' Yesus. 54 Onaim Nai' Yesus ka nnao maat-maat fa nbi atoin Yahudis sin a'naet ein sin atnaank ein. In neik In atoup noin' ein antet-kotin neu kota es, kaan ee Efraim, re' anpaumaak anbi baer ruman. Ma sin natuan ntaahn ein nbin naan. 55 Oras naan, rais pirsait Yahudi sin neon ko'u Paska npaumak-maak anrair. Biasa too mfaun na'kon bare bian neman ma nabuan nbin kota Yerusalem, he nok anbin fesat Paska naan. Sin ntea nahunun, he nakninu' sin tuak ein natuin rais pirsait ii in atoran. 56 Too mfaun ein re' neem anbin kota Yerusalem naan, nam-naim Nai' Yesus. Oras sin nhaken nbin Uim Onen Uuf ee in kintal, sin nmaktaan ein am nak, “On mee? Hi peint ein, on mee? Hi mitenab mak, Nai' Yesus he neem nok anbi fesat rais pirsait ia, ai' kaah?” 57 Mes a'naak rais pirsait Yahudi sin a'naakt ein, ma atoin Farisis sin anfeen prenat am nak, “Karu nmui' tuaf re' nahiin Nai' Yesus et mee te, mitoon kai!” Te kaah, sin nmu'in sarit he nheek naan Ee.
Bi Maria n'oop miin foo meni' nbi Usif Yesus In haen
1 Rarit neno nee fe'e te, na' oras neon Paska ntea, Nai' Yesus sin neman nbin kuan Betania. Nai' Lasarus sin natuan nbin naan. Nai' Lasarus naan, es re' amates re' Nai' Yesus namonib nafain' ee. 2 Rarit sin nahanan, he Nai' Yesus anbukae oras fai nok sin. Bi Marta es antuthae nbi mei. Nai' Lasarus antoko nbi mei nabu-bua nok Nai' Yesus. 3 Rarit bi Maria nait miin foo meni' asli bootr es, re' ma'osa'. Onaim in n'oop mina' naan anbi Nai' Yesus In haen. Rarit in npaek in a'naak fuun ein he nnoes Nai' Yesus In haen. Onaim umi naan in nanan foo meni' oke'. 4 Mes Nai' Yesus In atoup noin es, kaan ee nai' Judas Iskariot, re' of na'sosa' Nai' Yesus, anprotees am nak, 5 “Hoe! Nansaa' am es in ka na'sosa' fa miin foo meni' ia? Fin in osan on re' tuukn es in kai toon es. Reko nneis in na'sosa', he nfee roit ein neu atoin ama'mui't ein!” 6 Te kaah, nai' Judas na'uab on naan ka natuin fa in nneek atoin ama'mui't ein. Mes natuin in re' naan, abakat. In njair Nai' Yesus sin anaa' roit, mes in nakpo'e roit na'ko kas. 7 Mes Nai' Yesus nataah am nak, “Amkonan bifee re' ia. Natuin in natunu' nain miin foo meni' ia, he nabarab Au aok amates he sin nsuub Kau. 8 Atoin ama'mui't ein etan hi tnaanm ein piut. Mes Au of ka ubu-bua 'ok ki fa piut.” A'naak rais pirsait Yahudi sin a'naakt ein namin ranan he na'maet nai' Lasarus 9 Rarit atoin Yahudis amfaun nahinin nak, Nai' Yesus et kuan Betania. Sin neman he nkius Goe. Sin neman he nkius nai' Lasarus amsa'. Fin sin annenan am nak, Nai' Yesus namonib nafani' nai' Lasarus na'ko in a'maten. 10 Mes a'naak pirsait ein sin a'naakt ein nabuan he namin ranan he na'maet nai' Lasarus amsa'. 11 Fin tuaf amfaun na'kon atoin Yahudis sin anneen anmatoom nok nai' Lasarus in retan, rarit sin npirsain Nai' Yesus. Sin ka nromin fa he natniin atoin Yahudis sin a'naet ma kaes kou'n ein antein.
Usif Yesus antaam anbi kota Yerusalem on re' kaes ko'u
12 Noka' on naan ate, too mfaun ein re' neem he nok anbin fesat Paska nbin kota Yerusalem naan, annenan am nak, Nai' Yesus he neem neu naan amsa'. 13 Rarit sin annao n'oten hau noo peta, he npaek sin he nseun Nai' Yesus In amneman, nahuum on re' In re' naan kaes ko'u. Onaim sin arsin anhunun ma nsakanan ok-oke' mnak, “Hosana! Hai mpures ma mbo'is Uisneno! Fin Uisneno naruru' ma nakrira' In nekan arekot neu Isra'el in Usif, re' neem neik Uisneno In kanan!” 14 Rarit Nai' Yesus napein bikaes keledai feu' goes, onaim In nsae. Naan on re' matu'i nbi Uisneno In Suur Akninu' mnak, 15 “Hi abit kota Yerusalem, kais mimtau! Hi abit kota ‘Sion’ re' ia, amkius meu ne fe'! Fin hi Uisf ee neem! In neem ansae bikaes keledai feu' goes.” 16 Oras naan, Nai' Yesus In atoup noin' ein ka nahinin fa rasin naan in sairt ii saa'. Mes oras In nmoni nfain na'ko In a'maten, ma Uisneno nait na'rat-raatn Ee, na' sin namnau niit rasin re' Uisneno In Suur Akninu' ntui nmatoom nok Ne. Sin namnau atoni mfaun ein sin rais hormaat neun Ee msa'. 17 Oras Nai' Yesus namonib nafani' nai' Lasarus na'ko in a'maten, rarit anhaman naan ee npoi na'ko nopu naan, anmui' too mfaun nabu-buan nok Nai' Yesus. Onaim oras ia, sin nareta' neu-mneman anmatoom nok saa' re' unu' te, sin nkius nitan kuuk. 18 Es naan ate, too mfaun ein neem anseun Nai' Yesus anpaumak-maak kota Yerusalem, natuin sin nnenan nak, In nmo'e nrair rais sanmakat naan. 19 Rarit atoin Farisis sin na'uab ein am nak, “Phue'! Amkius fe'! Mansian ii ok-oke' abit pah-pinan ia antaisibun he natuin Ee! Of in amsoupn ii, hit es re' asusat! Karu on naan ate, hit he tmoe' on mee ttein?”
Anmui' atoin Yunanis tuaf fauk re' nroim he nateef nok Usif Yesus
20 Anmui' tuaf fauk na'ko atoin Yunanis re' ka Yahudis fa, re' neem anbi kota Yerusalem nabu-bua nok atoni' bian sin, he nokan nbin fesat Paska nbin naan. Sin he na'besan neun Uisneno msa'. 21 Onaim sin nateef nok nai' Felipus, na'ko kuan Betsaida nbi propinsi Galilea. Sin ntotin am nak, “Ba'e! Hai he miteef mok Nai' Yesus.” 22 Rarit nai' Felipus annao natoon nai' Anderias. Onaim sin nua sin annao na'uab nok Nai' Yesus. 23-24 Rarit Nai' Yesus natonan sin im nak, “Au oors ii ntea nrair. Onaim Au ro he 'maet fe', na' Uisneno nait na'rat-ratan Kau. Batuur on naan! Hit tataib nok fini. Karu hit tseen maak fini, in ro he nreu' anbi auf goe fe', na' in nmoin, he in bisa napoitan afa mfa-faun. Fin karu ka on fa naan, in fe' nabaar maka' fua' mees' aah. 25 Tuaf re' ka nfairoir ma ntoe fa Uisneno In romin, natuin in nneek naan in a'monin anbi pah-pinan ia, of a'monin naan namre'u nkoon. Mes tuaf re' nroim he nnona' ma nkonan in a'monin anbi pah-pinan ia, of napeni 'monit re' amneot ma amnonot re' ka natfeek niit fa. 26 Tuaf re' he ntuthae Kau, in ro he nok Kau piut. Es naan ate, Au 'bi mee te, Au ameupt ein anbin naan amsa'. Fin karu nmui' tuaf re' ntuthae Kau, of Au Ama' abit sonaf neno tunan anhormaat ee.”
Usif Yesus natoon nain anmatoom nok In a'maten
27 Nai' Yesus antuut antein am nak, “Au 'suus a'maet. Mes Au he 'ak on mee 'tein? Au ro 'toit 'ak, ‘Aam! Mufetin Kau, maut he Au kais a'maet oras ia,’ ai'? Kaah fa, tua! Au ka 'toit fa on naan, natuin In anhaefan Kau 'uum, maut he Au 'maet. 28 Onaim re' Au 'toit ji, on nai: ‘Aam. Maut he Au utuin Ama' Ho roim aan, tua, maut he mansian ii ok-oke' naikas na'rat-ratan Ama' Ho kanam naan, tua.’ ” Onaim anmui' hanaf es na'ko neon goe tnanan nak “Au 'aikas u'rat-ratan Au kanak. Ma Au he 'aikas u'rat-ratan ufani' 'tein' ee msa'.” 29 Ma too mfaun ein re' anhaken nbin naan, anneen hanaf naan, ma sin nak, “Hae! Anmu'i 'rotos!” Bian antein na'uab ein am nak, “Kahaf! Uisneno In ameupt es na'ko sonaf neno tunan na'uab nok Ne.” 30 Mes Nai' Yesus na'uab am nak, “Hanaf fe'e na neu ki, ka neu Kau fa. 31 Oras ia, mansian pah-pinan ro he nbaisenun n'anin Uisneno, he In nafeek sin rasin. In ro he nriu' napoit Amoe' Maufinu msa', re' annaa' aprenat anbi pah-pinan ia. 32 Oras atoni' nakfirit Kau nbi hau nehe, Au of a'heer mansian ii ok-oke' he sin anpirsai Kau.” 33 (In na'uab on naan, he naruru' ma nakrira' In a'maten nok ranan on mee.) 34 Rarit atoin ein anbin naan, anmaktaan ein am nak, “Hai mneen miit mi'ko Uisneno In Atoran nak, of Kristus anmoin nabar-baar. Kristus nok Mansian Batuur-Batuur re' naan, huma' mese', oo? Onaim nansaa' am es Ho mak, ‘Sin of nakfirit Mansian Batuur-Batuur anbi hau nehe?’ Te Mansian Batuur-Batuur re' naan, sekau?” 35 Nai' Yesus nataah am nak, “Ka 'roo fa ntein, me'u na'ko Kau ka ntana' ki fa goen. Onaim oras Au 'bi ia fe', hi ro he mmoin mimneo ma mimnoon, maut he maufinu re' nbi hi neekm ein, kais an'eek naan me'u naan. Fin tuaf re' nnao nbi meis'okan, ka nahiin fa in he nnao neu mee. 36 Oras me'u na'ko Kau nmui' fe', hi ro he mpirsai Kau, maut he hi mjair tuaf re' mmoni mbi me'u, he mihiin im mak, hi he mnao meu mee.” Nai' Yesus na'uab anrair on naan ate, In antet-koit na'ko too mfaun ein, maut he In bisa nmees kuun.
Atoin Yahudis sin ka npirsai fa Usif Yesus
37 Maski Nai' Yesus anmoe' rais sanmakat amfaun anbi too mfaun ein sin humak ma sin matak, mes sin ka nromin fa he npirsai Je. 38 Naan on re' Uisneno In mafefa kninu', nai' Yesaya, natoon nani mnak, “Usi', oo! Ka nmui' fa tuaf re' npirsai hai uab ein! Fin maski Ho mururu' ma mukrira' mrair Ho kuasam, mes mansian ii nforon nmaten, tua!” 39 Es naan ate, atoin Yahudis bian sin ka bisa npirsai fa Uisneno oras ia, on re' nai' Yesaya ntui nbi bare bian am nak, 40 “Uisneno nmoe' sin neek ein on re' nforon, maut he sin ka bisa nkisu ntenin fa. In nkonan sin neek ein anjari fatu, he sin kais nahinin nok reko. Amkonan sin on re' naan, he sin kais antebi nfain neman he naim Kau, ma Au kais ureko' sin.” 41 Nai' Yesaya na'uab on naan, natuin in nkisu nrair Nai' Yesus In pinan ma krahan, rarit in nareta' nain anmatoom nok Nai' Yesus. 42 Maski on naan amsa', mes too mfaun ein anpirsain Nai' Yesus. Ka suma atoin biasa fa nmees, mes anmui' atoin Yahudis sin a'naet ma kaes kou'n ein bian re' npirsai Je msa'. Mes sin ka nmanaku' fa Nai' Yesus anbi too mfaun ein sin humak ma sin matak, natuin sin namtaun, of atoin Farisis sin anriu' napoitan sin na'kon uim onen. 43 A'naet ein sin ka nfairoir ma ntoe fa karu Uisneno es anbo'is sin, natuin sin nroim nanesib he napenin bo'is na'ko mansian.
Usif Yesus In Kabin ma Prenat naruru' ma nakrira' atoni' in baturan
44 Rarit Nai' Yesus na'uab nok haan ma'tani' mnak, “Tuaf re' npirsai Kau naan, in ka npirsai Kau fa 'mees jah, mes in npirsai Tuaf re' nhaefan Kau msa'. 45 Fin karu atoni' niit Kau, in niit Tuaf re' nhaefan Kau msa'. 46 Au 'uum he 'jair on re' me'u 'bi pah-pinan ia. Maut he mansian ii arsin re' npirsai Kau, ka nmonin fa nbin meis'okan. 47 Karu nmui' tuaf re' nneen ma natniin Au Uab ein, mes ka nmoe' natuin sin fa, Au ka ufeek fa in hukun. Fin Au sairt ii Au 'uum a'bi pah-pinan ia, ka he ufeek fa mansian ii in hukun, mes Au he 'soi ufetin sin na'ko sin sanat ma penu sin. 48 Mes mansian ii arsin re' ntorak Kau ma ka ntoup fa Au Uab ein, anmui' in afeek rasi. Fin oras neon amsoupt ee neem, Uab ein re' Au u'uab 'iit sin, of es re' nafeek atoni' humaf on re' naan in hukun. 49 Natuin Au ka u'uab 'iit fa 'eik Au kaank aa kuuk. Mes Au u'uab 'eik Au Ama' abit sonaf neno tunan In kanan. Fin In re' naan es re' anhaefan Kau. Ma in es re' naprenat Kau nak, Au ro he u'uab 'ak saa'. 50 Au uhini msa' 'ak, In aprenat naan neiki 'monit re' amneot ma amnonot re' ka natfeek niit fa. Es naan ate, Au u'uab utuin ahaa saa' re' Au Ama' nreun he Au u'uab.”
Usif Yesus nafaun In atoup noin' ein sin haek ein
1 Oras neon ko'u Paska ka nmurai fa fe', Nai' Yesus nahini nrair nak, In oors ee ntea nrair, In ro he npoi nasaitan pah-pinan ia, ma nfain neu In Amaf abit sonaf neno tunan. Mes In nneek niis Iin na re' abitan pah-pinan ia, tar antea In nnona' ma nfee In a'monin a'teme-'teme neu sin. 2 Oras naan, niut reu'f ein sin a'nakat ankopo' ma nfuri' nai' Judas, es re' nai' Simon Iskariot in anah, he in na'sosa' Nai' Yesus. Rarit nai' Judas nafeek anrair he nmoe' on naan, oras Nai' Yesus sin ntokon ma nbukaen fesat Paska naan. 3 Nai' Yesus nahini nrair nak, Uisneno es anhaef Ee neem anbi pah-pinan ia, ma ka 'roo fa ntein, In ro he nfain neu Uisneno. Ma In nahini msa' nak, In Amaf abit sonaf neno tunan annona' ma nfee are' saa' ii ok-oke' neu In a'niman. 4 Rarit Nai' Yesus anfeen na'ko mei, onaim anfei In baur kotif. Onaim In nait po'uk es, he n'aba'kena' nbi In atnanan. 5 Rarit In n'oop oe nbi bokor aan es. Onaim In nmurai nafaun In atoup noin' ein sin haek ein. Nafaun anrair es ate, In annoes nameot goe npaek po'uk re' In n'aba'keen ee nbi In atnanan. 6 In nafaun sin haek ein mese'-mese'. Antea Nai' Simon Petrus on nai te, in nataan am nak, “Usi'! Ho he mufaun au haek ein amsa', aa oo?” 7 Nai' Yesus nataah am nak, “Oras ia, ho ka muhiin fa fe' anmatoom nok saa' re' Au 'moe' je re' ia. Mes a'roo-'roo te, of ho muhiin.” 8 Mes nai' Petrus anprotees am nak, “Kais on naan, tua! Au ka 'konan Ko fa he mufaun Au haek ein, tua.” Onaim Nai' Yesus nataah am nak, “Karu au ka ufaun ukninu' fa ho haem ein ate, ho ka mmafuut fa mok Kau.” 9 Nai' Simon Petrus nataah am nak, “Usi', karu on naan ate, Ho kais mufaun au haek ein anmesen. Mes mufaun au 'nimak ma mboe au 'nakak amsa', tua!” 10 Rarit Nai' Yesus nataah ee mnak, “Atoni' re' naniu nrair, suma nafanu haa in haek ein. Fin in aon ee kninu' nrair. Batuur, hi neekm ein kniun' ein anrarin, mes hi ka kninu' ki fa ok-oke'.” 11 (Nai' Yesus na'uab on naan, natuin In nahini nrair sekau es re' he na'soos Ee. Es naan ate, In na'uab am nak, “hi ka kninu' ki fa ok-oke'.”) 12 Oras Nai' Yesus nafanu nrair sin haek ein, In anpaek nafani' In baur kotif, ma nnao ntoko nfain. Rarit In nataan sin im nak, “On mee? Oras Au ufaun hi haem ein hi mihiin Au sairt ii, ai' kaah? 13 Hi mroim he mteek Kau mmak, ‘Aam Tungguru’ ma ‘Usi'’. Naan pantas, natuin Au on re' naan. 14 Mes karu hi Tungguru ma hi Usi' re' ia, nafanu nrair hi haem ein on re' aan renu'-aan reek es, on mee nok ki? Hi ro he mtuthae es nok es amsa', on re': hi ro he mifaun es nok es in haek ein amsa'. 15 Fin Au 'jari 'tope' 'eu ki. Au 'moe' on mee te, hi ro he mmoe' mituin on naan amsa'. 16 Batuur! Au utoon ki. Aan renu'-aan reka' tuaf es ka ko'u nneis fa na'ko in usin. Ma haef es ka ko'u nneis fa na'ko tuaf re' anhaefn ee. 17 Natuin hi mihini mrair rasin ia, hi mipein upan ma pa'e karu hi mmoe' mituin on naan. 18 Au ka u'uab fa nmatoom nok ki ok-oke'. Au uhiin batuur-batuur tuaf re' Au 'piri 'rair sin. Maski on naan amsa', mes rasi naan ro he njair, on re' saa' re' matu'i nain anbi Uisneno In Suur Akninu' nak, ‘Tuaf re' ntook ma nbukae nabu-bua nok kau, nkoit ma nnao nasaitan kau.’ 19 Au utoon 'ain ki, karu atoni' nnao nasaitan Kau on naan, hi bisa mpirsai mmak, Au re' ia Kristus. 20 Batuur! Au utoon urari msa' 'ak, sekau es anfei in nekan he ntoup atoni' re' Au 'haefan sin, in antoup Kau msa'. Ma sekau es antoup Kau nok reko, in ntoup Tuaf re' nhaefan Kau msa'.”
Usif Yesus natoon nain nak, of anmui' tuaf re' na'soos Ee
21 Nai' Yesus na'uab anrair on naan ate, In neekn ee ka ntainina' fa. Rarit In natoon am nak, “Re' Au u'uab ee ji, ro batuur. Tuaf es na'ko ki of na'sosa' Kau.” 22 Annenan on naan ate, In atoup noin' ein anmakisun es nok es, fin sin nkekun. Sin ka nahiin nanan fa nak, In sairt ii neu sekau. 23 Anbi naan amsa' anmui' tuaf es na'ko sin, re' Nai' Yesus anneek (es re' au, nai' Yohanis, atuis surat re' ia). Au 'toko 'bi Nai' Yesus in abnapan bian. 24 Onaim nai' Simon Petrus ansenen nok in a'nakan, he au bisa 'aim 'iit rasi naan he uhiin Nai' Yesus In sairt ii, nak sekau. 25 Rarit au 'siri' 'paumaak a'tein 'eu Nai' Yesus, he utaan 'ak, “Tuaf re' Ho sairt ii, sekau, tua?” 26 Onaim Nai' Yesus nataah am nak, “On nai. Au he 'ait utunu' piis es he urepa' 'eu 'pik-oef, rarit Au 'fee je 'eu tuaf re' Au 'sari.” In narepa' nrair utunu' naan, In nfee je neu nai' Judas, es re' nai' Simon Iskariot in anah. 27 Antoupu nrair utunu' naan ate, niut reu'f ein sin a'nakat antaam anbi nai' Judas in nekan. Rarit Nai' Yesus natoon ee mnak, “Munapa' nai! Ho he mmoe' saa' ate, mmoe' je nai. Kais ampao mtein!” 28 Mes na'ko sin re' ntokon nbin naan, tuaf mese' msa' ka nahiin naan fa nansaa' am es Nai' Yesus na'uab on re' naan. 29 Natuin nai' Judas anjair sin anaa' roit, bian natenab nak, Nai' Yesus In sarit fe'e na oras in anreun nai' Judas, “Amnao msoos saa' re' hit tperluu he tbukae fesat Paska.” Ma bian nateenb ein nak, In sairt ii, “Amnao mfee roit a'kre'o meu atoin ama'mui't ein.” 30 Oras nai' Judas antoup naan utunu' naan ate, in npoi rabah. Oras in npoi te, anmeis'okan anrair.
Prenat fe'u
31 Oras nai' Judas anpoi nrair, Nai' Yesus natoon am nak, “Au re' ia, Mansian Batuur-Batuur. Oras ia, in oors ee ntea nrair he Uisneno naikas na'rat-ratan Kau. Rasi naan of anmoe' mansian ii nkius ma niit Uisneno In pinan ma krahan amsa'. 32 Natuin Au 'mafuut 'ok Uisneno, ukrira' ma ururu' In pinan ma krahan, es naan ate, In naikas na'rat-ratan Kau. Ma In ka npa-pao fa ntein. 33 Au anah ki arki! Maski Au 'neek 'iis ki, mes ka 'roo fa te, Au ka ubu-bua 'ok ki 'tein fa goen. Hi of maim Kau, mes ka miit Kau fa. Au utoon ki re' ia, on re' Au utoon ee 'eu atoin Yahudis sin a'naet ma kaes kou'n ein 'ak, ‘Au 'nao 'eu baer jes re' hi ka bisa mituin Kau fa.’ 34 Au 'fee ki prenat fe'u es, on nai: hi ro he mmaneek es nok es, nahuum on re' Au 'neek ki. Onaim hi ro he mmaneek es nok es amsa'. 35 Karu hi mmaneek on naan ate, mansian ii ok-oke' bisa nahinin nak, hi re' ia Au atoup noin' ein.”
Usif Yesus natoon nain nak, nai' Petrus he nasuan Ee
36 Rarit nai' Simon Petrus nataan Ee mnak, “Ho he mnao on mee, tua?” Nai' Yesus nataah ee mnak, “Au 'nao 'eu baer jes re' ho ka bisa mutuin Kau fa oras ia. Mes namuni te, ho mnao meu nee msa'.” 37 Nai' Petrus nataan Ee mnak, “Usi'! Nansaa' am es au ka bisa utuin Ko fa oras ia? Fin au ubarab a'rair he 'maet utuin Ko, tua!” 38 Nai' Yesus nataah am nak, “Batuur, aa oo? Ho he mnona' ma mfee ho 'monim he mmaet meu Kau, oo? Amneon ii, on nai: maun goe ka nkokreo' fa fe'e te, ho musuan amrair Kau no teun goen.”
Ka tiit attein fa ranan he tareko tfain tok hit Ama'; suma nanete npeo' Usif Yesus anmees kuun
1 Nai' Yesus antuut antein am nak, “Hi kais mitenab. Ampirsai meu Uisneno. Ma mpirsai Kau msa'. 2 Anbi Au Ama' In bare 'tua-ha', nmui' ke'en amfa-faun. Karu ka nanokab fa te, Au ro he utoon 'ain ki. Oras ia, Au he 'nao ubarab bare 'eu ki 'bi nee. 3 Oras Au 'nao 'rair, ma ubarab a'rair bare 'eu ki, Au of a'fain 'uum he hi mituin Kau. Nok ranan naan, Au 'bi mee te, hi mbi naan amsa'. 4 Fin hi mihini mrair ranan he mnao meu bare re' Au he 'nao 'eu na ji.” 5 Mes nai' Tomas nataan am nak, “Usi'! Hai ka mihiin fa mak, Ho he mnao meu mee. Onaim on mee m'es hai bisa mihiin ranan he tnao teu bare naan?” 6 Onaim Nai' Yesus natoon am nak, “Ka nmui' fa ranan es antein re' neik mansian ii ntean Au Ama' abit sonaf neno tunan. Suma nanete npe'o haa Kau. Fin Au re' ia, ranan teu Uisneno. Au re' ia, es re' a'naa' saa' re' batuur. Ma Au re' ia, es re' a'nona' ma 'fee 'monit re' amneot ma amnonot. 7 Kar-karu hi mihiin Kau batuur ate, hi mihiin Au Ama' msa'. Onaim anmurai na'ko oras ia, hi mihini mrair Je, ma miit amrair Je msa'.” 8 Nai' Felipus antoti mnak, “Usi'! Mururu' ma mukrira' Ho Ama' meu kai fe'! On naan ate, nanokab anrair, tua.” 9 Onaim Nai' Yesus natoon ee mnak, “Ipu! Au ubu-bua 'ok ki 'roo-'roo goen, mes hi ka mihiin Kau batuur fa fe', joo? Fin tuaf re' niit anrair Kau, naan nahuum on re' In niit anrair Au Ama'. Nansaa' am fe'e na ho mtoti mtein am mak, ‘Mururu' Ama' meu kai’? 10 On mee? Oras Au 'ak Au 'mafuut 'ok Au Ama', ma Au Ama' nmafuut nok Kau msa', ho mpirsai Kau, ai' kaah? Uab ein re' Au u'uab 'eu ki sin re' naan, ka na'uun ma na'ba'an fa nbin Au kuuk, mes sin na'uun ma na'ba'an nbin Au Ama'. Ma In npaek Kau he unaob In meup goe piut. 11 Ampirsai Kau oras Au 'ak, Au 'mafuut rek-reko 'ok Au Ama', ma In nmafuut rek-reko nok Kau msa'. Mes karu hi ka bisa fa he mpirsai Kau on naan ate, ampirsai Kau natuin hi miit amrair are' kanan rasi re' Au 'moe' sin naan. 12 Au uab re' naan, ro batuur! Fin tuaf re' npirsai Kau, in of anmoe' rasi huma' mese' on re' Au 'mo'e. Mes natuin Au 'nao 'eu Au Ama', saa' re' tuaf anmoe' sin naan, of ma'tani' nneis na'ko re' Au 'mo'e. 13 Hi re' mmafuut mok Kau, mmui' hak he meik Au kanak. Onaim karu hi m'onen he mtoit saa'-saa' ahaa, meik Au kanak, Au of a'moe' je 'eu ki. Nok ranan naan, Au 'aikas u'rat-ratan Au Ama', maut he mansian ii arsin nahinin. 14 Au utoon ufani' 'tein: hi m'onen he mtoit saa'-saa' ahaa, meik Au kanak, Au of a'moe' je 'eu ki.”
Usif Yesus anba'an he nsonu' Uisneno In Asmanan
15 Nai' Yesus antuut antein am nak, “Karu hi mneek Kau, hi mmoe' mituin Au preent ein. 16-17 Au 'toit 'eu Au Ama', karu Au ka ubu-bua 'ok ki fa 'tein ate, In nfee ki Asiat-Anabit he naruru' ma nakrira' ranan neu ki. In re' naan, Uisneno In Asmanan, es re' nanoni' ki saa' re' batuur. Atoni' bian abitan pah-pinan ia, ka nromin fa he ntoup Goe, natuin sin ka bisa nkius niit Ee fa, ma ka nahiin Je fa. Mes hi mihiin Je natuin In nmafuut nok ki. In of anmoni nbi hi neekm ein. Rarit In of nabu-bua nok ki piut amsa'. 18 Nok ranan naan, Au ka 'nao usaitan ki mmees fa, on re' ri'ana' re' ka nmui' fa ainaf-amaf. Mes mimnau, fin Au of a'fain 'uum 'eu ki. 19 Ka 'roo-'roo fa te, mansian pah-pinan ia ka nkius niit antein Kau fa goen. Mes hi of miit Kau. Natuin Au 'moni 'fain, hi mipein 'monit re' batuur amsa'. 20 Ma oras Au 'moni 'fain, hi mihiin batuur mak, Au 'mafuut 'ok Au Ama'; hi mmafuut mok Kau; ma Au 'mafuut 'ok ki msa'. 21 Tuaf re' ntoup ma nmoe' natuin Au preent ein ate, in re' naan es re' anneek Kau. Ma Au Ama' anneek tuaf re' anneek Kau on naan amsa'. Au 'neek ee, ma ururu' Au tuak ii 'eu ne msa'.” 22 Anbi naan, anmui' tuaf es, kaan ee nai' Judas. In re' naan, ka nai' Judas Iskariot fa. Oras in anneen Nai' Yesus In uab aan, in nataan am nak, “Usi'! Ho he mururu' ma mukrira' Ho tuam aan meu kai. Mes nansaa' am es Ho ka mroim fa he mururu' ma mukrira' Ho tuam aan meu biak ein re' abitan pah-pinan ia, tua?” 23 Nai' Yesus nataah am nak, “On nai. Tuaf re' nneek Kau, in of anmoe' natuin Au Uab ein. Au Ama' nneek ee msa'. Rarit Au ma Au Ama' mmoin nekaf mese' mok ne. 24 Mes tuaf re' ka nneek Kau fa, in ka nmoe' natuin fa Au Uab ein amsa'. Are' rasin re' hi mneen sin mi'ko Kau re' ia, ka na'uun ma na'ba'an fa nbin Kau, mes na'uun ma na'ba'an nbin Au Ama' re' nhaefan Kau. 25 Oras ia Au ubu-bua 'ok ki fe'. Es naan ate, Au utoon 'ain rasin ia. 26 Mes noki-noki te, Au Ama' nsonu' Asiat-Anabit naan, es re' In Asmaan Akninu'. Asmanaf naan of es re' ansenu' ma nseka' Kau nbi pah-pinan ia. In meup goe, es re': nanoni' ki are' raisn ein ok-oke', ma namnaub ki are' raisn ein ok-oke' re' Au utoon 'iit ki sin. 27 Oras Au 'nao 'rair, Au 'moe' ki bisa mmoni mbi rais rame' ma neek tainina'. Suma Au kuuk es re' bisa 'fee neek tainina' human on re' naan. Are' saa' ii ok-oke' re' abit pah-pinan ia, ka bisa fa nmoe' hi neekm ein antainina' on re' naan. Onaim kais hi mmui' tenab, ma mimtau. 28 Hi mneen miit Au utoon ki 'ak, ‘Au usaitan ki, rarit Au 'fain 'uum.’ Hi neekm ein kais ansusan. Fin karu hi mneek Kau, hi neekm ein anmarinan, natuin Au 'nao 'eu Au Ama'. Au Ama' re' naan, ma'tani' nneis na'ko Kau. 29 Mimnau, Au utoon 'ain ki. Nok ranan naan, oras rasin ia njarin, hi bisa mpirsai Kau. 30 Ka 'roo fa ntein, Au ka u'uab a'tein 'ok ki fa goen. Fin niut reu'f ein sin a'nakat neem een. In nnaa' aprenat anbi pah-pinan ia, mes in kuasa ka ntoom Kau fa. 31 Maski in neem ate, mes Au 'nao he unaob utuin Au Ama' In apreent ee piut. Naan naruru' ma nakrira' neu mansian pah-pinan ia mnak, Au 'neek 'iis Au Ama'. Iim he tnao nai, tua!”
Usif Yesus on re' hau roet anggur uu' goes
1 Nai' Yesus antuut antein am nak, “Amneen! Hi mmafuut mok Kau. Au on re' hau roet anggur uu' goes. Mes Au re' ia, hau roet anggur re' batuur! Ma Au Ama' re' naan, on re' araip po'on. 2 Onaim tuaf re' suma nak in nmafuut nok Kau, mes ka nmoe' fa saa'-saa', Au Ama' nait inporin, on re' araip po'on re' natkuni nporin taef re' ka nafuan fa. Mes ansuun tuaf re' nmafuut nok Kau, Au Ama' nakninu' makrafu' ma 'oemetan na'ko in nekan, on re' araip po'on re' natkuin na'paran taef es, he in nafua mfa-faun. 3 Au Uab ein naan, bisa nakninu' hi neekm ein naan, on re' araip po'on natkuin nakninu' in hau roet ein sin taek ein. 4 Hi ro he mmafuut piut mok Kau, on re' Au 'mafuut 'ok ki. Fin taef re' natfeek anrair na'ko in tau' ainan ka bisa nafua fa saa'-saa'. On naan amsa' hi arki. Hi ka bisa mmoe' fa saa'-saa' re' reko, karu hi ka mmafuut fa piut mok Kau. 5 Au re' ia, on re' hau roet anggur uu' goes. Hi re' naan, on re' in taek ein. Onaim tuaf re' nmafuut piut nok Kau, ma Au 'mafuut piut 'ok ne msa', in re' naan on re' taef es, re' nafua mfa-faun. Natuin karu hi ka mmafuut piut mok Kau fa, hi ka bisa mmoe' fa saa'-saa' re' reko. 6 Tuaf re' ka nmafuut nok Kau fa piut, in on re' taef es, re' ka mapake' fa. Taef humaf on re' naan, biasa atoni' anketu nporin, maut he nmeot. Rarit na'bua' naan taef ein naan, ma nporin nataam sin neun ai je nanan, he nout nakrati' sin. 7 Mes karu hi mmafuut piut mok Kau, ma Au Uab ein natuan piut anbin hi neekm ein amsa', hi mtoit saa' ahaa meu Uisneno te, In of anmoe' je neu ki. 8 Karu hi mmoe' rais reko mfa-faun, on re' taef es nafua mfa-faun, naan naikas na'rat-ratan Uisneno. Nok ranan naan, hi miruru' ma mikrira' msa' mak, hi re' naan, Au atoup noin' ein goa. 9 On re' Au Ama' nneek Kau, Au 'neek ki on re' naan amsa'. Hi ro he mmafuut piut mok Kau, maut he Au bisa ururu' ma ukrira' Au rais manekat 'eu ki msa'. 10 Karu hi mmoe' mituin Au preent ein, hi mmafuut piut mok Kau, ma Au bisa ururu' ma ukrira' Au rais manekat 'eu ki. Naan on re' Au unaob utuin Au Ama' In aprenat, rarit In naruru' ma nakrira' In rais manekat neu Kau piut. 11 Au utoon ki rasin ia na'ko unu', maut he hi neekm ein bisa nmarinan, on re' Au neek ii nmariin amsa'. Fin Au 'roim he hi neekm ein anmarinan kou'-ko'u! 12 Au preent ii on nai: hi ro he mmaneek es nok es, on re' Au 'neek a'rair ki msa'. 13 Karu tuaf es anroim he nmaet he in partei jes bisa nmoin, in nneek batuur neu in partei naan. Ka nmui' fa rais manekat re' ma'tani' nneis na'ko naan. 14 Karu hi mmoe' mituin meu Au preent ii piut, hi mjair Au partei ngguin. 15 Au ka 'roim fa he 'teek a'tein ki, 'ak Au ‘aan renu'’. Fin aan renu' tuaf es ka nahiin fa batuur in uisn ee in romin. Mes Au 'teek ki, 'ak Au ‘partei’, natuin Au 'fei maat-maat are' saa' ii ok-oke' re' Au Ama' natoon anrair sin neu Kau. 16 Hi ka mpiir Kau fa. Mes Au 'piir ma 'ait ki he minaob mepu ia. Onaim hi ro he mnao mmoe' rais reko mfaun re' antahan a'roo. Naan on re' hau roet anggur uu' goes, re' nafua arekot piut-piut. Karu hi mmoe' on naan, hi bisa mtoit saa' ahaa meu Au Ama', rarit In nmoe' je neu ki. 17 Onaim re' Au preent ii 'eu ki ji, on nai: hi ro he mmaneek es nok es.”
Mansian pah-pinan ia nsaken Usif Yesus Iin na
18 Nai' Yesus antuut antein am nak, “Karu abitan pah-pinan ia nsaken ki, mimnau, fin sin nsaken nahunun Kau. 19 Karu hi re' ia, huma' mese' on re' biak ein re' abitan pah-pinan ia, sin of anneek ki. Mes hi ka on fa sin re' naan. Fin Au 'piir 'aan ki he 'batis ki na'ko sin. Es naan ate, sin nsaken ki. 20 Kais amnikan re' Au utoon a'rair ki 'ak, ‘Aan renu' tuaf es ka ko'u nneis fa na'ko in usin.’ Onaim karu sin nha'mui' ma nasusab Kau, sin of anha'mui' ma nasusab ki msa'. Karu sin anneen Au Uab ein, sin nneen ki msa'. 21 Sin of anha'mui' ma nasusab ki, natuin hi mmafuut mok Kau. Fin sin ka nahiin fa Tuaf re' anhaefan Kau msa'. 22 Karu Au ka 'uum u'uab 'iit fa 'ok sin, rarit ururu' ma ukrira' raan a'honis re' batuur 'eu sin, sin natenab piut nak, sin ka nmu'in fa sanat saa'-saa'. Mes Au 'uum a'rair, ma u'uab a'rair on naan. Onaim oras ia, karu sin anmo'en sanat, sin ka nmu'in fa 'sukif antein he na'uab ein am nak, ‘Hoe! Hai re' ia, ka mihiin fa, nak re' hai mmoe' je naan, ansaan.’ 23 Tuaf re' nsaken Kau, in nsaken Au Ama' msa'. 24 Au 'mo'e 'rair rais sanmakat huma'-huma' 'bi sin humak ma sin maatk ein, re' atoni' bian ka nmoe' niit sin fa. Karu Au ka 'moe' fa rasin naan, sin ka nsanan fa msa' karu ka nroim he ntoup Kau fa. Te kaah, sin nkisun nrair rais sanmakat naan re' Au 'moe' 'rair sin. Maski on naan amsa', mes sin fe' nsaken Kau ma Au Ama' abit sonaf neno tunan. 25 Mes rasin ia ok-oke' njarin anrarin, he nmoe' natuin saa' re' matu'i nrair anbi Uisneno In Atoran nak, ‘Sin nsaken Kau. Te kaah sin sake naan, ka nmui' fa 'sukif saa'-saa'.’ 26 Mes of Asiat-Anabit naan he neem. In re' naan, Asmanaf re' nmoe' ki mihiin rasi re' batuur. In neem na'ko Au Ama'. Oras Au 'nao 'rair 'eu Au Ama', Au of a'sonu' In Asmaan ee 'eu ki. In natoon ki rasi nmatoom nok Kau. 27 Hi of mitoon meu atoni' rasi nmatoom nok Kau msa', natuin hi mibu-bua mok Kau na'ko un-unu'.
1 Au utoon a'rair ki rasin ia 'eu ki, maut he hi kais amtet-koit mi'ko Kau. 2 Atoin Yahudis sin of anriu' napoitan ki mi'ko sin uim onen. Ka suma on naan anmees fa, fin of anmui' oras re', karu atoni' na'maet ki, sin nateenb ein nak sin nmo'en 'moe' reko neun Uisneno. 3 Sin nmo'en on naan neu ki, natuin sin ka nahiin Kau fa nok batuur. Sin ka nahinin reko fa neu Au Ama' msa'. 4 Mes Au utoon a'rair rasin ia 'eu ki, maut he karu rasin ia njarin, hi bisa mimnau mak, Au utoon 'ain ki u'ko unu'. Natuin Au ubu-bua 'ok ki fe', es naan ate Au ka utoon 'ain ki fa nahuun.”
Uisneno In Asmaan ee In mepu
5 Nai' Yesus nanoni' nteni' mnak, “Oras ia, Au 'fain 'eu In re' nhaefan Kau 'uum a'bi pah-pinan ia. Mes ka nmui' fa tuaf es na'ko ki re' mitaan Kau mmak, ‘Usi' he mnao on mee?’ 6 Natuin Au utoon a'rair rasi ia 'eu ki, es naan ate hi neekm ein ansusan. 7 Mes rasi re' Au utoon a'rair ki sin re' naan, ro batuur. Karu Au 'nao, naan reko nneis neu ki. Fin karu Au ka 'nao fa te, Asiat-Anabit naan ka neem fa he naruru' ma nakrira' ranan neu ki. Mes karu Au 'nao, Au 'reek Ee neem neu ki. 8 Oras In neem, In naruru' ma nakrira' neu mansian pah-pinan ia nak, sin nekak ma sin a'moe'k ein, ansanan. In nfuri' sin he natuin raan a'honis re' amneot ma amnonot. Ma In namnauba' sin imsa' nak, Uisneno of nafeek sin rasi nak, sin re' naan batuur, ai' nsaan. 9 Asiat-Anabit naan naruru' ma nakrira' sin sanat, natuin sin ka npirsai Kau fa. 10 In naruru' ma nakrira' raan a'honis re' batuur amsa'. Natuin Au 'fain 'eu Au Ama', hi of ka miit amtein Kau fa goen. Es naan ate, Asiat-Anabit naan neem he nsenu' ma nseka' Kau. 11 In naruru' ma nakrira' msa' nak, Uisneno he nafeek atoni' in rasi nok batuur, natuin Uisneno nafeek anrair rasi neu niut reu'f ein sin a'nakat re' naprenat anbi pah-pinan ia. 12 Anmui' rasi mfaun re' Au he utoon ki sin, mes hi ka bisa mihiin ma mmanoen sin fa fe' oras ia. 13 Mes oras Asmanaf re' naruru' ma nakrira' rasin re' batuur, neem anrari te, In na'naak, maut he hi bisa mihiin are' rasi re' batuur. In ka na'uab fa na'ko In tuan ee kuun, mes In natoon saa' re' In anneen ee na'ko Au Ama'. In he natoon ki msa', rasi re' noki-noki te, of anjair. 14 In he naikas na'rat-ratan Kau, natuin In nroim he nfei are' rasin re' batuur anmatoom nok Kau, he naruru' ma nakrira' neu ki. 15 Are' saa' ii ok-oke' re' Au Ama' Iin na, Au ngguin amsa'. Es naan ate, Au u'uab fe'e na 'ak, Uisneno In Asmaan ee of anfei are' rasi re' batuur anmatoom nok Kau, ma naruru' sin neu ki.”
Hi neekm ein ro he nsusan fe', rarit na' hi mmariin amfain
16 Nai' Yesus antuut antein am nak, “Ka 'roo fa ntein ate, hi ka miit Kau fa goen. Mes ka 'roo fa msa', hi miit mifani' Kau goen.” 17 Rarit In atoup noni' bian, na'uab ein am nak, “In sairt ii saa', es nak, ‘Ka 'roo fa ntein ate, hi ka miit Kau fa goen. Mes ka 'roo fa msa', hi miit mifani' Kau goen.’ Ma nansaa' am es In na'uab am nak, ‘Natuin Au he 'nao 'eu Au Ama'’?” 18 Onaim sin nmaktaan ein am nak, “In sairt ii saa' nak, ‘Ka 'roo fa ntein’? Hit tkeuk.” 19 Nai' Yesus nahini nrair nak, sin he nataan Ee nmatoom nok rais jes. Onaim In na'uab am nak, “Fe'e na Au u'uab am nak, ‘Ka 'roo fa ntein, hi ka miit Kau fa goen. Mes ka 'roo fa msa', hi miit mifani' Kau goen.’ Hi maktanan on naan, oo? 20 Reko, karu hi he mihiin on naan amsa'. Au he utoon ki msa' on nai: hi of amkae ma neekm ein ansusan, mes biak ein abitan pah-pinan ia sin neek ein anmarinan. Maski hi neekm ein ansusan on naan, mes hi neekm ein of nmariin anfanin. 21 Naan on re' bifee jes re' nameen he nahoni'. In neekn ee nsuus fe', natuin in susat neem anrair. Mes rarit karu in nahoni' naan ri'ana' naan, in susat namneuk nain. Fin in nekan anfani nmariin, natuin anmui' mansian fe'u re' nmoni nrari nbi pah-pinan ia. 22 On naan amsa' anmatoom nok ki. Oras ia, hi mkae ma mneek suus. Mes noki-noki te, Au 'fain 'uum a'kius ki, rarit hi neekm ein anmarinan. Ma oras rasi naan anjari te, ka nmui' fa es, re' bisa ntahan hi marinet. 23 Ma oras rasi naan anjari te, hi ka maktanan fa saa'-saa' meu Kau mtein. Batuur! Au utoon a'tein ki 'ak, karu hi mtoit saa' aah mi'ko Au Ama', meik Au kanak, of In nmoe' on naan neu ki. 24 Hi ka mtoit miit saa' es fa fe', meik Au kanak on re' naan. Onaim amtoit kiim, he hi mtoup. Nok ranan naan, hi neekm ein bisa nmariin batuur.”
Usif Yesus niis naan are' kuasa pah-pinan ia
25 Nai' Yesus antuut antein am nak, “Tar antea oras ia, Au biasa unoni' ki 'paek uab manporin sin. Mes of anmui' oras re' Au unoni' te, ka 'paek fa uab manporin a'tein. Fin Au he u'uab maat-maat anmatoom nok Au Ama'. 26 Karu oras naan neem anrari te, hi kiim es re' am'onen he mtoit langsung meu Au Ama', meik Au kanak. Kais Au es re' a'onen a'tein ma 'teek ki. 27 Fin Au Ama' nneek ki, natuin hi mneek Kau. Ma hi mpirsai msa' mak, Uisneno es re' anhaefan Kau. 28 Unu' te, Au usaitan Au Ama', he Au utua 'tahan a'bi pah-pinan ia. Mes oras ia, Au he usaitan pah-pinan ia, he 'nao utua 'fain 'ok Ne.” 29 Annenan on naan ate, Nai' Yesus In atoup noin' ein nak, “Oras ia Usi', Ho mu'uab maat-maat, ma ka munoni' fa mpaek uab manporin sin amtein! 30 Hai mpirsai mrair, Usi' Ho muhiin are' kanan rasin. Tuaf ka nperluu fa he nataan saa'-saa' neu Ko ntein, natuin Ho muhiin muhuun saa' re' sin he nataan, ma in haan tahas on mee. Naan naruru' ma nakrira' neu kai nak, Ho uum mu'ko Uisneno, tua.” 31 Onaim Nai' Yesus nataan sin im nak, “Batuur, on naan, aa oo? Oras ia, hi mpirsai Kau, oo? 32 On nai. Ka 'roo fa ntein, es re' kreo' goes re' ia, hi ok-oke' maen amsiksaakn om. Es-es ate maen misaitan Kau, he mnao mi'koro' meu in baern aa kuun. Maski on naan amsa', mes Au ka 'mees fa, natuin Au Ama' nok Kau. 33 Au utoon a'rair rasin ia 'eu ki, maut he hi neekm ein bisa ntainiin ein, natuin hi mmafuut mok Kau. Fin mansian pah-pinan ia of nasusab ma nha'mui' ki. Mes amha'tain hi neekm ein, fin Au 'iis 'aan are' kuasat pah-pinan ia goen!”
Usif Yesus an'onen neu In tuan ee kuun
1-2 Nai' Yesus na'uab anrair on naan ate, In nkisu n'ain neon goe tnanan, rarit an'onen, am nak: “Aam Honi'. Au oors ii antea goen, he Ho mait mu'rat-ratan Kau. Au re' ia, Ho Anah. Ho mfee mrair Kau hak he 'ator mansian pah-pinan ia ok-oke'. Ho mfee hak naan, maut he Au 'fee 'monit re' amneot ma amnonot re' ka natfeek niit fa, neu are' tuaf re' Ho mnona' ma mfee sin anjarin Au ngguin. Onaim oras ia, Au 'toit he Ho mait mu'rat-ratan Kau, maut he Au bisa ururu' ma ukrira' Ho pinam ma kraham. 3 In ranan re' he tuaf napeni 'monit re' amneot ma amnonot re' nabar-baar naan, on nai: tuaf ro he nahiin Au Ama', es re' Uisneno re' batuur. Ka nmui' fa es ntein. Sin ro he nahiin Kau msa', es re' Yesus Kristus, re' Ho mhaefan amrair Je, he neem neu pah-pinan ia. 4 Au ururu' ma ukrira' 'rair Ho pinam ma kraham a'bi pah-pinan ia. Au unaob a'rair mepu re' Ho mfee Kau goe. 5 Unu' te, oras Hit ka tmoe' pah-pinan ia fa fe', Au ubu-bua 'ok Ko, tua. Oras naan, Au pinak ma krahak nahuum on re' Ho pinam ma kraham. Oras ia, Au he 'fain 'eit 'eu Ko. Onaim Au 'toit he Ho mait mu'rat-ratan Kau, maut he Au pinak ma krahak anfain on re' unu' naan, tua.”
Usif Yesus an'onen anteek In atoup noin' ein
6 Nai' Yesus antuut In onen am nak, “Aam Honi'. Ho mfee mrair mansian pah-pinan ia he njarin Au ngguin. Au unoni' 'rair sin, he sin nahiin Ko, tua. Sin njarin Ho ngguin na, rarit Ho mnona' sin he njarin Au ngguin amsa'. Rarit sin nmoe' natuin Ho Kabin ma Prenat. 7 Oras ia sin nahinin nak, are' rasi re' Ho mnona' ma mfee Kau sin re' naan, sin na'uun am na'ba'an na'kon Ko, tua. 8 Fin Au unoni' sin, Kabin ma Prenat ok-oke' re' Aam mutoon miit Kau sin. Sin ntoup Kabin ma Preent ein naan amsa'. Sin nahinin imsa' am nak, Au 'uum u'ko Ko, tua. Ma sin npirsain nak, Ho es re' amhaefan Kau 'uum a'bi pah-pinan ia. 9 Au 'onen ma 'teek sin. Au ka 'onen ma 'teek 'fa mansian ii arsin abitan pah-pinan ia. Mes Au 'onen ma 'teek 'eu tuaf re' Ho mnona' ma mfee mrair sin meu Kau, fin sin re' naan Ho ngguin, tua. 10 Fin are' saa' ii ok-oke' re' njarin Au ngguin, anjair Ho ngguin amsa'. Ma are' saa' ii ok-oke' re' njarin Ho ngguin, anjarin Au ngguin amsa'. Rarit Au ngguin naan, esan re' nait na'rat-ratan Kau. 11 Au ka utua u'baar a'tein fa 'bi pah-pinan ia, natuin ka 'roo fa ntein ate, Au he 'fain 'eit 'eu Ko. Mes atoin ein re' ia, ro he natua nabaran nbin pah-pinan ia. Aam, Ho kninu' teeb. Onaim Au 'toit he Ho mpafa' ma mpanat sin, ampaek Ho kuasam re' Ho mfee mrair je meu Kau. Au 'toti msa' he sin nmafutun njarin mese', on re' Au 'mafutu 'jair mese' 'ok Ko, tua. 12 Oras Au 'bi pah-pinan ia 'ok sin, Au 'pijaar sin natuin sin njarin Ho ngguin een. Au 'panat urek-reko' sin, maut he sin anmafutun piut nok Ko, tua. Ka tiit fa tuaf es, re' namneuk. Suma nai' Judas kuun es re' napasib in tuan, natuin saa' re' Ho Suur Akninu' ntui nain je na'ko unu'. 13 Oras ia, Au he 'fain 'eit 'eu Ko, tua. Au utoon rasin ia oras Au fe'e 'bi pah-pinan ia. Nok ranan naan, Au ngguin sin neek ein bisa nmarinan piut, on re' Au neek ii nmariin. 14 Au utoon a'rair Ho Kabin ma Preent ein 'eu sin. Atoni' bian na'kon pah-pinan ia nsaken Au ngguin, natuin Au ngguin ka nmonin fa huma' mese' on re' sin. Au on naan amsa', fin Au ka 'moin fa on re' biak ein anbin pah-pinan ia. 15 Karu Au 'onen, Au ka 'toit fa he Ho mfaki mporin sin na'kon pah-pinan ia. Kaah fa, tua! Mes Au 'toit he Ho mpafa' ma mpanat sin, he sin na'roon na'kon maufinu. 16 Sin ka huma' mese' fa on re' biak ein re' na'kon pah-pinan ia, on re' Au msa' ka huma' mese' fa 'ok biak ein re' na'kon pah-pinan ia. 17 Ampaek rasi re' amneot ma amnonot he mmoe' sin neek ein kniun' ein. Fin Ho Kabin ma Prenat, ro batuur. 18 Ho es re' amhaefan Kau 'uum a'bi pah-pinan ia. Rarit Au 'haefan sin on naan amsa', maut he sin nmonin narisin nbin pah-pinan ia in a'tnaank ein. 19 Au 'panat Au tuak ii he kninu' piut 'eu Ko, tua. On naan amsa', Au ngguin anpanat sin tuak ein amsa', he kniun' ein piut neu Ko, tua. Fin Ho Kabin ma Prenat re' batuur, es re' anmoe' sin he nnona' ma nfee sin tuak ein a'teme-'teme neu Ko, tua.”
Usif Yesus an'onen ma nteek atoin apirsait ein arsin
20 Nai' Yesus antuut In onen am nak, “Aam Honi'. Au 'onen ma 'teek ka 'eu fa sin re' suma et oras ia goah. Mes Au 'onen ma 'teek amsa' 'eu tuaf re' of anpirsai Kau, natuin tuaf ein ia sin uabk ein. 21 Au 'toit he sin arsin bisa nmafutun njarin mese', on re' Hit tmafutu tjair mese'. Au 'roim he sin nmafutun njarin mese' nok Kit, maut he biak ein na'kon pah-pinan ia bisa npirsain nak, Ho kuum es re' amhaefan Kau. 22 Ho mururu' ma mukrira' mrair Au pinak ma krahak meu mansian ein. Rarit Au 'aikas u'rat-ratan a'rair sin, on re' Au. Nok ranan naan, sin nmafutun njarin mese', on re' Hit tmafutu tjair mese' msa'. 23 Au 'mafuut 'ok sin. Ho mmafuut mok Kau msa'. Sin ro he nmafutun njarin mese' on re' naan, tar antea sin nmonin nekaf mese' batuur. Fin karu sin nmonin nekaf mese' on re' naan, biak ein na'kon pah-pinan ia nahinin nak, Ho mneek sin, on re' Ho mneek Kau, tua. Nok ranan naan, sin nahinin amsa' nak, Ho es re' amhaefan Kau, tua. 24 Aam Honi'. Au 'roim he mansian ii arsin re' Ho mnona' ma mfee Kau sin re' naan, nabu-buan nok Kau. Fin Au 'roim he sin bisa nkius niit nak, Ho maikas mu'rat-ratan Kau. Fin Ho mneek main Kau, oras Hit ka tmoe' pah-pinan ia fa fe'. 25 Aam Honi'. Ho neek amneot am amnonot Ko, tua. Mes mansian abitan pah-pinan ia ka nahiin Ko fa, tua. Ma Au ngguin nahinin amsa' nak, Ho es re' amhaefan Kau 'uum a'bi pah-pinan ia. 26 Au utoon a'rair sin 'ak, Ho re' naan, Sekau. Ma Au of utoon 'eu sin piut on re' naan, natuin Au 'roim he sin bisa nnaben batuur Ho manekam. Fin manekat re' sin nnaben naan ee ji, huma' mese' on re' Ho manekam re' Ho mfee je meu Kau. Maut he Au 'mafuut piut 'ok sin, tua.”
Sin nheek naan Usif Yesus
1 Oras Nai' Yesus an'onen anrair on naan ate, In npoi nabu-bua nok In atoup noin' ein. Sin nnaon neun poo'n es anbi noe Kitron in panin. Onaim sin antaam anbin naan. 2-3 Oras naan, a'naak rais pirsait Yahudi sin a'naakt ein, ma atoni' na'ko partei pirsait Farisi sin nfeen nrarin neu nai' Judas, soraurs ein ma apaot tuaf fauk. Fin in he na'sosa' Nai' Yesus. Nai' Judas nahiin po'on naan amsa', natuin Nai' Yesus nabua fani-fani nbi bare naan nok In atoup noin' ein. Rarit nai' Judas sin annaon neun po'on naan, neikin obor, pauk lantera, ma suni'-kenat. 4 Te kaah, Nai' Yesus nahini nrair are' saa' ein ok-oke' re' of anjair neu Ne. Rarit In nnao neu sin, onaim nataan sin im nak, “Hi maim sekau?” 5 Onaim sin nataah am nak, “Hai maim tuaf es, kaan ee Nai' Yesus, atoin Nasaretas.” Rarit Nai' Yesus natoon am nak, ‘Es re' Au re' ia.’ Oras naan, nai' Judas anhaek nabu-bua nok sin. In es re' na'sosa' Nai' Yesus. 6 Oras Nai' Yesus na'uab am nak, “Es re' Au re' ia.” Onaim atoin ein naan antet-kotin, ma antaikobin. 7 Onaim Nai' Yesus nataan antein sin im nak, “Hi maim sekau?” Rarit sin natahan am nak, “Nai' Yesus, na'ko kuan Nasaret.” 8 Nai' Yesus na'uab am nak, “Au utoon a'rair fe'e na 'ak, In re' naan, es re' Au re' ia. Onaim karu hi maim Kau, kais amheek re' biak ein. Amkonan sin he sin nnaon.” 9 (In na'uab on naan he najarib saa' re' In na'uab niit nak, “Aam Honi'. Mansian ii arsin re' Ho mnona' ma mfee mrair Kau sin, ka nmui' fa tuaf es, re' namneuk.”) 10 Oras naan, nai' Simon Petrus neik been tuuk es. Rarit in nfaik benas naan, he n'oet. Nok askeken, in nsaip namouf atoin es in rukin a'ne'u. (Atoni' naan, kaan ee nai' Malkus. In re' naan, es re' a'naak rais pirsait Yahudi sin a'naak ko'u in aan renu'.) 11 Onaim Nai' Yesus anreun nai' Petrus am nak, “Hoe, Pe'u! Mutaap mufani' ho beens aan neu in tapan. Fin Au Ama' na'uab anrair nak, Au ro he upein ha'mu'it human on re' ia. Onaim anbain kuun nai! Naan on re' In nfee Kau kraas es, re' in aafn ee menu'. Maut he Au 'iun 'ani.”
Sin neik Usif Yesus an'ain a'naak rais pirsait Yahudi sin a'naak ko'u
12 Rarit soraurs ein nok sin a'nakat, ma atoin Yahudis sin apaot ein, anheek naan Nai' Yesus, onaim anfuut Goe. 13 Rarit sin neik Je nahuun neu nai' Anas fe'. Nai' Anas re' naan, es re' nai' Kayafas in aam babaf. Toon naan, nai' Kayafas es re' anjair a'naak rais pirsait Yahudi sin a'naak ko'u. 14 Nai' Kayafas re' ia, es re' nfaineek niit atoin Yahudis sin a'naet ma kaes kou'n ein am nak, “Reko nneis neu ki, karu suma tuaf mees' aah, es re' anmaet neu too mfaun ein.”
Nai' Petrus nasuan nak, in ka nahiin fa Usif Yesus
15 Nai' Simon Petrus nnao natuin Nai' Yesus anbi koit, nabu-bua nok Nai' Yesus In atoup noni' tuaf es antein, es re' au, nai' Yohanis. A'naak rais pirsait Yahudi sin a'naak ko'u nahiin kau. Es naan ate, au bisa 'taam 'eu in kintal naan, ubu-bua 'ok Nai' Yesus. 16 Mes nai' Petrus anhake nbi mone', npaumaak nok baahk ee enon. Rarit au 'poi, onaim au u'uab 'ok bifee jes re' anpao nbi naan, maut he au bisa 'eik nai' Petrus antaam anbi nanan. 17 Onaim bifee naan nataan nai' Petrus am nak, “Hoe! Ho re' ia, Atoni' naan In atoup noni' tuaf es, ai'?” Mes nai' Petrus nataah am nak, “Kaah fa, tua!” 18 Oras naan, mainikin. Es naan ate, apaot ein ma tua reun ein, sin anhaken he nraran ai. Onaim nai' Petrus anpaumaak, he nraar ai nabu-bua nok sin.
A'naak rais pirsait Yahudi sin a'naak kou' goe nparikas Usif Yesus
19 Oras naan amsa', a'naak rais pirsait Yahudi sin a'naak ko'u mnasi' anparikas Nai' Yesus anmatoom nok In nonin, ma nmatoom nok In atoup noin' ein. 20 Nai' Yesus natoon am nak, “Au u'uab maat-maat, maut he too mfaun ein bisa nnenan ma natninan. Au unoni' piut a'bi bare re' hit atoin Yahudis biasa tabua, es re' hit uim oen ein, ma Uim Onen Uuf. Au ka u'uab 'iit fa 'bi koti-koti. 21 Nansaa' am es ho mutaan Kau? Mutaan meu tuaf-tuaf re' nneen Au uab ein naan. Fin sin nahinin batuur saa' re' Au u'uab a'rair sin naan.” 22 Oras sin na'uab ein on naan ate, apaot es, re' anhake nbi naan anpaas Nai' Yesus, rarit nak, “Ho kais mu'uab on naan meu a'naak ko'u!” 23 Onaim Nai' Yesus natoon ee mnak, “Karu Au u'uab a'saan, mururu' ma mukrira' sanat naan, es re' mee. Mes karu Au u'uab batuur, nansaa' am es ho mpaas Kau?” 24 Rarit nai' Anas anreun sin he sin neik Je neu nai' Kayafas, re' njair a'naak pirsait Yahudi sin a'naak ko'u. Oras sin nnaon naat Ee naan, In mafutu' fe'.
Nai' Petrus nasuan Usif Yesus antein
25 Oras naan, nai' Simon Petrus anhaek fe' he nraar ai. Onaim atoni' bian re' nbin naan sin nataan ee mnak, “Ho re' ia, In atoup noni' tuaf es, ai'?” Mes nai' Petrus nataah am nak, “Kaah fa, tua!” 26 Anbi naan amsa' anmui' ate tuaf es na'ko pirsait Yahudi sin a'naak ko'u. In re' naan, nonot-asar na'ko atoni' re' nai' Petrus ansaip in rukin. Rarit in nataan am nak, “Hoe! Fe'e na ho mbi po'on naan, ai'? Au 'kius 'iit ko mbi naan!” 27 Mes nai' Petrus nasuan antein, nateef oras naan ate, maun goe nkokre'o nrair.
Usif Yesus anbi gubernur Pilatus in human ma in matan
28 Rarit kik-kiku te, sin neik Nai' Yesus na'ko nai' Kayafas in umi. Sin nnaon neun gubernur ee in uim jabatan, anbi sorarus Roma sin benteng. Atoin Yahudis sin kuuk ka ntaman fa nbin atoin Romas sin bare naan, natuin rasi naan an'oemetab sin tuak ein, he sin ka bisa nbukaen fa fesat Paska. 29 Rarit gubernur Pilatus anpoi nateef nok atoin Yahudis sin. Onaim in nataan, am nak. “Hi misaeb sanat saa' meu Atoni' re' ia?” 30 Onaim sin natahan am nak, “On nai, tua. Karu In re' ia, ka atoin maufinu fa te, hai ka iim he misein ko fa, tua. Saa' antein, hai mnona' ma mfee Je meu ho 'nimam, tua.” 31 Rarit gubernur ee na'uab neu sin im nak, “On nai. Maut he hi kiim es re' am'urus In rasi, mituin hi atoin Yahudis in atoran.” Onaim atoin Yahudis sin a'naet ein natoon am nak, “Ka bisa fa, tua. Hai atoin Yahudis ka mmui' fa hak antein he mifeek hukun a'maten. Naan suma nbi prenat Roma, es re' nmui' hak on re' naan.” 32 (Oras sin na'uab ein on naan, rasi re' Nai' Yesus na'uab niit ee, anjari nrair. Fin In natoon anrair Iin na nak, In of anmaet natuin prenat Roma sin cara, es re' nkuus na'maet Je nbi hau nehe.) 33 Onaim gubernur ee ntaam anfani nbi soraurs ein sin benteng. Rarit in anhaman naan Nai' Yesus, onaim nataan Ee mnak, “On mee? Ho re' ia, atoin Yahudis sin uisf, aa oo?” 34 Onaim Nai' Yesus nataan nafain' ee mnak, “Ho kuum es re' mutaan on naan, aa oo, ai' anmui' tuaf bian es re' natoon ko nmatoom nok Kau, tua?” 35 Onaim gubernur ee nataah am nak, “Hae! Au re' ia, ka atoin Yahudis fa, joo? Ho ngguin esan re' annona' naan ko meu ia. Saa' antein a'naak rais pirsait ein sin a'naakt ein. Te ho re' ia, mmoe' saa'? Mutoon miit kau fe'!” 36 Onaim Nai' Yesus natoon am nak, “Au ka uisf es fa u'ko pah-pinan ia. Fin karu Au 'jair usif on re' naan, Au ngguin ro he ntaisibun he atoin Yahudis sin ka nheek Kau fa. Batuur Au 'jair Usif. Mes ka nmui' fa tuaf es anbi pah-pinan ia, re' naikas Kau on naan.” 37 Rarit gubernur ee nataan nafain' Ee mnak, “Onaim ho re' ia usif, aa oo?” Onaim Nai' Yesus nataah am nak, “Ho kuum es re' mak Au 'jair Usif. Amneon ii, Au 'uum a'bi pah-pinan ia, ma Au 'moin he 'jair Usif, maut he Au utoon anmatoom nok rasin re' batuur. Mansian ii arsin re' nnaa' naheran rasin re' amneot ma amnonot, sin re' naan annenan ma natniin Kau.” 38 aRarit gubernur nataan Ee mnak, “Rais amneot ma amnoont ii, saa'?”
Sin nafeek hukun a'maten neu Usif Yesus
38 bOras gubernur Pilatus na'uab anrair on naan ate, in npoi nfani nbi atoin Yahudis sin. In na'uab am nak, “Au 'parikas urair Je, mes au ka upein fa In sanat mese' msa'. 39 Mes hi biasa, toon-toon anbi fesat Paska, au ro he ufetin atoin bui es 'eu ki. Onaim toon ia, hi mroim he au ufetin atoin Yahudis hi usif, ai' on mee?” 40 Sin arsin anhuun ein ok-oke' mnak, “Kais mufetin Tuaf ia! Mufetin meu nai' Barabas, tua!” Te kaah, nai' Barabas naan, atoin maufinu 'maten.
1 Rarit gubernur Pilatus anreun in soraurs ein, he nbeos Nai' Yesus anpaek 'kauboe. 2-3 Soraurs ein naan nait hau ma'aika' in taek ein, he nkanen a'soeb es. Rarit sin ntuma'nii' 'soeb ma'aika' naan neu Nai' Yesus In a'nakan, he na'raur ein on re' sin he nasaeb Ee 'piru'-baru neu uis feu' goes. Onaim sin napaekb Ee baru mnanu' masnaa umub on re' uisf ein biasa npaken. Rarit sin nakree't Ee mnak, “Hoore tua, atoin Yahudis sin usif!” Sin npaas nafan-fain' Ee msa'. 4 Rarit gubernur ee anpoi no goes antein, he natoon neu too mfaun ein am nak, “On nai! Au upoin Ee 'eu ki. Mes hi ro he mihiin mak, au 'parikas a'rair Je, mes au ka upein fa In sanat mese msa'.” 5 Oras Nai' Yesus anpoi, In anpake 'soeb ma'aika' ma baru mnanu' masnaa umub. Rarit gubernur ee natoon neu too mfaun ein am nak, “Amkius iim fe'! In es re' ia!” 6 Oras a'naak rais pirsait Yahudi sin a'naakt ein ma apaot ein ankius Nai' Yesus, sin ankoa' ein ma nhuun ein am nak, “Mi'maet Ee! Amkuus mi'peit Ee meu hau nehe!” Mes gubernur ee na'uab neu sin im nak, “Maut he hi kiim es re' meik Je, he mi'maet Je nbi hau nehe. Fin au ka upein fa In sanat saa'-saa' re' natai nok hukun a'maten.” 7 Atoin Yahudis sin nataah am nak, “Hai mmui' Atoran re' nsaun neem na'ko Uisneno. Tatuin Atoran naan, atoni' re' ia ro he nmaet, natuin in naikas in tuan ee njair Uisneno In Anah.” 8 Oras gubernur ee anneen sin uab ein on naan ate, in namtau. 9 Rarit in antaam anfani nbi soraurs ein sin benteng, onaim nataan Nai' Yesus am nak, “Ho re' ia, atoni' mu'ko mee?” Mes Nai' Yesus ka nataah ee fa. 10 Onaim gubernur ee naskaar Ee mnak, “Hae! Nansaa' am es ho ka mu'uab mok kau fa? Ho muhini mrair, ai'? Au re' ia, es re' 'mui' kuasa he u'maet ko, ai' ufetin ko.” 11 Onaim Nai' Yesus nataah am nak, “On nai, tua. Karu ho mmui' kuasa on naan, naan natuin ho mupein je mu'ko Uisneno abit sonaf neno tunan. Fin suma In kuun es re' ankonan ko he mmoe' saa' ahaa meu Kau, tua. Mes atoni' re' nnona' ma nfee Kau neu ko, tua, sin re' naan es re' nasaah sanat ma'tani' nneis.” 12 Anmurai na'ko naan, gubernur ee naim ranan he nafetin Nai' Yesus. Mes atoin Yahudis sin ankoa' ein ok-oke' mnak, “Karu ho mufetin Atoni' re' ia, tebes ho ka uis ko'u keser in partei ja fa. Fin atoni' re' naikas in tuan anjair usif, anraban uis ko'u keser.” 13 Onaim oras gubernur ee nneen sin na'uab ein on naan ate, in napoit Nai' Yesus. Rarit in ntoko nbi afeek rasi in a'toko', anbi baer jes, re' sin nakaanb ee mnak, “Baer Mainuan na'ko Faut Bena'”. (Anbi uab Aram in kaan ee nak, Gabata.) 14 Neno naan, Neno Barab Fesat Paska. Oras maans ee na'puup, gubernur ee natoon neu atoin Yahudis sin im nak, “Miit kiim! In re' ia, hi usif!” 15 Mes sin nkoa' ein ma nhuun ein naheran am nak, “Meik Je npoi na'ko ia! Mi'maet Ee! Amkuus mi'peit Ee meu hau nehe!” Onaim gubernur ee na'koke' sin im nak, “On mee? Hi sairt ii, au ro he u'maet hi usif re' ia, oo?” Rarit a'naak rais pirsait Yahudi sin a'naakt ein natahan am nak, “Hai usif suma mese', es re' keser! Ka tiit fa bian antein!” 16 aRarit gubernur ee nnona' Nai' Yesus neu soraurs ein, he sin nnaon nkuus na'peit Ee nbi hau nehe.
Sin nkuus nakfirit Usif Yesus anbi hau nehe
16 bRarit soraurs ein antoup naan Nai' Yesus. 17 Onaim In nasaah naan In hau nehe npoi na'ko kota. Sin nnaon neun baer jes re' sin nteek ee nak, “Bare 'Naak Nuif”. (Anbi sin uab Aram, bare naan in kaan ee, Golgota.) 18 Antean naan ate, sin nkuus na'peti' Nai' Yesus anbi hau neeh jes. Sin nmo'en on naan neu atoni' tuaf nua msa'. Sin nkuus nakfirit es anbi Nai' Yesus in aon-bian a'ne'u, ma es antein anbi In aon-bian a'rii, ma Nai' Yesus anbi sin atnaank ein. 19 Onaim gubernur ee nreun in soraurs ein he ntui neu hau piis es, rarit ankuus ee nbi Nai' Yesus In hau neeh je tunan, antoom faof. Anbi hau pisa' naan sin ntuin am nak, “Ia Nai' Yesus, atoin Nasaretas. In re' naan, atoin Yahudis sin Usif” 20 Sin ntui hau pisa' naan anpaek uab huma' teun. Esan re': uab Aram, uab Yunani, ma uab Latin. Too mfaun ein na'kon atoin Yahudis sin anrees hau pisa' naan, natuin Nai' Yesus In bare 'maten naan, anpaumaak kota Yerusalem. 21 Mes a'naak rais pirsait Yahudi sin a'naakt ein ka ntoupun reko fa nok tuis re' naan. Rarit sin nnaon neun gubernur ee am nak, “Aam! Kais amtui ‘atoin Yahudis sin Usif’! Reko nneis, amtui mak, ‘Atoni' ia nak, in re' naan, atoin Yahudis sin usif.’ ” 22 Mes gubernur ee nataah am nak, “Au es re' 'reun sin he ntuin on naan. Onaim anbain on naan nai!” 23 Oras soraurs ein ankuus nakfirit Nai' Yesus anbi hau nehe, sin nbait In paken he ntaon neun bare haa. Piis es neu soraurs es. Ma sin nait In baru mnanu' re' nteun goe 'teme-'teme na'ko faof tar antea 'piin, re' ka maso'o fa. 24 Rarit sin na'uab ein am nak, “Hoe! Hit kais atpisu tporin In baru re' ia. Reko nneis, hit theer suur ana', he hit tahiin sekau es re' napein je.” Naan anmoe' he najarib, saa' re' matu'i nain anbi Uisneno In Suur Akninu' mnak, “Sin nbait au paken, onaim sin nheran suur ana' he napein au baru.” Rarit soraurs ein naan anmo'en on naan.
Usif Yesus antoit nai' Yohanis he npijaar In ainaf
25 Anbi bare naan, bifee tuaf fauk anhaek nokan amsa'. Sin re' naan, esan re': Nai' Yesus In ainaf, Nai' Yesus In ain rikof, nai' Klopas in fee bi Maria, ma bi Maria na'ko kuan Makdala. 26 Nai' Yesus ankius In ainf ee nhake nbi naan, nabu-bua nok atoup noni' re' In nneek ee, es re' au, nai' Yohanis. Rarit In na'uab neu In ainf ee mnak, “Ain. Tuaf re' ia, ho anah.” 27 Onaim In nak kau mnak, “On nai. Oras ia, ho maan ee neu ho aina' nai!” Rarit anmurai na'ko oras naan, Nai' Yesus In ainf ii natua nok kau.
Usif Yesus In a'maten
28 Rarit Nai' Yesus nahini nrari mnak, In namtisib anrair In meupn ein ok-oke'. Naan najarib, are' saa' ii ok-oke' re' Uisneno In Suur Akninu' ntui nain sin na'kon unu'. Rarit In nak, “Au 'meon oe.” 29 Anbi bare naan, anmui' raur ma'ninu' nbi 'huun aan es. Rarit soraurs ein nait ani'-tei meto' he narepa' neu raur ma'ninu' naan. Rarit sin nkaton ani'-tei meto' naan neu hau noon es in panan, onaim sin naramib Nai' Yesus. 30 Oras Nai' Yesus anmuis raru naan, In na'uab am nak, “Are' kanan rasi namtiis inrarin.” Rarit In na'ruri', onaim In asnaas ee natfeek een.
Soraurs es napau Usif Yesus anbi hau nehe
31 Neno naan nateef nok neon nima'. Natuin atoran rais pirsait, atoin Yahudis ro he nabaarb ein neno naan, he noka' on naan ate sin nseun ma ntoup neon onen. Es naan ate, sin ka nromin fa he atoni' in aon-ta'un amates nakfirin piut anbin hau nehe nateef nok neon onen. Fin neon onen naan, neon reko. Onaim atoin Yahudis sin a'naet ma kaes kou'n ein anbaisenun neun gubernur ee, he in naprenat tuaf he nbeos na'iup abitan hau nehe sin haek ein. Nok ranan naan, sin bisa nmaten rabah, maut he tuaf bisa nasanut sin aok-ta'uk amates nen-neno'. 32 Rarit soraurs ein annaon neun bare naan, onaim sin nbeos na'iup tuaf es in haen. Rarit sin nbeos na'iup atoin es antein in haen. Sin nua sin re' naan, esan re' tuaf ein re' sin nkuus nakfirit sin nabu-bua nok Nai' Yesus. 33 Mes oras sin ntean Nai' Yesus ate, sin niit Ee nak, In nmaet batuur een. Es naan ate, sin ka nbeos na'iup fa In haek ein. 34 Mes soraurs tuaf es nait in aunu, onaim napaun ee ntaam neu Nai' Yesus In abnapan. Rarit anmui' naa' npoi, ma anmui' oe npoi msa'. 35 (Tuaf es, re' anjair saksii naan, es re' au. Au 'kius 'iit sin ok-oke', ma au 'tui sin batuur anbin re' ia. Fin au uhiin saa' re' au ureta' naan, ro batuur, maut he hi bisa mpirsai au uab ii.) 36 Rasin re' ia njarin, natuin Uisneno In Suur Akninu' ntui mnak, “In nuif ein, ka nmui' fa tuuk es he nat'iup.” 37 Anbi Suur Akninu' naan, matu'i nbi bare bian am nak, “Sin of ankius atoni' re' sin napau nrari.”
Sin nsuub Usif Yesus
38 Anmui' atoin es, kaan ee nai' Yusuf, na'ko kuan Arimatea. In njair Nai' Yesus In atoup noni' msa'. Mes in natuin na'kor-koro' neu Nai' Yesus, natuin in namtaus atoin Yahudis sin a'naet ein. In nnao neu gubernur Pilatus, onaim antoit gubernur ee he nfee ne mainuan he neik Nai' Yesus In aon-ta'un amates. Gubernur ee nroim. Rarit nai' Yusuf annao nasanut Nai' Yesus In aon-ta'un amates naan, onaim neik Je nnao. 39 Nai' Nikodemus nnao nabu-bua nok nai' Yusuf amsa'. In re' naan, es re' unu' te in nnao nateef nok Nai' Yesus fa-fai. In ansoos bonak re' manutu nrarin amfa-faun, oni' kiru bo' tenu mteun, he ntao neu Nai' Yesus In aon-ta'un amates naan. 40 Onaim sin n'aum naan Nai' Yesus In aon-ta'un amates naan anpaken tai manihas. Sin n'aum rapis es, rarit sin ntaon bonak, rarit antaon ntein rapis es, on-on naan, tar antea bonak re' manutu' naan oke'. Sin nmoe' on naan, natuin atoin Yahudis sin harat ansuub amates. 41 Anpaumaak bare re' Nai' Yesus anmaet naan, anmui' poo'n es. Anbi po'on naan, atoni' fe'e npahat anrair noup faut goes. Sin ka nataam niit fa amates anbi naan. 42 Oras naan, atoin Yahudis sin neno he nabaarb ein he nseun sin neon onen, he noi oek' een. Es naan ate, sin natunu' Nai' Yesus In aon-ta'un amates naan anbi nopu naan, fin bare naan, ka na'roo fa.
Usif Yesus anmoni nfain!
1 Neno krei, es re' krei fe'u in neon ahunut, bi Maria na'ko kuan Makdala nnao kik-kiuk ana' nbi Nai' Yesus in nopu. Antea nee te, in nkius faut ko'u re' ntoeb noup fatu naan, natnani nrair na'ko in baran. 2 Onaim in naen anfain neu nai' Simon Petrus ma au, es re' Nai' Yesus In atoup noni' re' In nneek naan ee, onaim in natoon am nak, “Sin nabaak neik hit Usi' na'ko In nopu! Hai ka mihiin fa sin antao Goe et mee!” 3 Onaim au 'ok nai' Petrus maen meu nopu naan. 4 Hai nua kai maen mibu-bua, mes au unapa' 'neis. Rarit au 'tea uhuun u'bi nopu naan. 5 Mes au ka 'taam fa 'bi in nanan. Au u'bees ma 'kisu 'taam aah. Anbi naan, au 'kius tai manihas re' sin npaek je he n'aum naan Nai' Yesus In aon-ta'un amates naan. 6 Mes oras nai' Petrus neu ntea te, in ntaam ankono ntea nopu naan in nanan. In nkius niit tai manihas re' naan amsa'. 7 In nkius niit a'piru' es amsa', re' sin anpaek je he nkuub naan Nai' Yesus In human. Mes a'piru' naan, mari'ik ma nbaits on na'ko tai manihas naan. 8 Rarit Au, re' fe'e na 'tea uhuun u'bi nopu naan, a'taam utuin a'bi in nanan. Oras au 'kius 'iit re' baer' ein naan ok-oke', au 'pirsai Nai' Yesus In uab ein afi unu', re' nak, In of anmoni nfain na'ko In a'maten. 9 Fin oras naan, hai re' mjair In atoup noin' ein ka mihiin fa fe' Uisneno In Suur Akninu' re' ntui nani mnak, Kristus ro he nmoni nfain na'ko In a'maten. 10 Rarit hai nua kai mtebi mfain.
Usif Yesus nakrira' In tuan ee neu bi Maria na'ko kuan Makdala
11 Mes bi Maria nhaek fe'e nbi noup fatu naan in enon. In ankae piut. Oras in ankae fe', in na'bees ma nkisu ntaam anbi nopu naan. 12 In nkius niit Uisneno In ameput na'ko neno tunan tuaf nua. Sin nua sin npaken paek muti'. Sin nua sin ntokon nbin bare re' maeb es ii, natupa' Nai' Yesus In aon-ta'un amates. Es antoko nbi bare 'nakaf in baran. Es antein antoko nbi baer haef ein sin baark ein. 13 Sin nataan ee mnak, “Nansaa' am es ho mkae, ain?” Onaim in nataah am nak, “Au 'kae, natuin sin nait neik au Usi' in aon-ta'un amates. Mes au ka uhiin fa neu sin ntao Goe et mee?” 14 In na'uab anrair on naan ate, in nateut gon ma nabani'. In nkius niit tuaf es anhake nbi po'on naan, mes in ka nahiin fa nak, Tuaf naan, es re' Nai' Yesus. 15 Onaim Nai' Yesus nataan ee mnak, “Nansaa' am es ho mkae, ain? Fin ho maim sekau?” Bi Maria in teenb ee, atoni' naan, suma araip po'on anbi naan. Onaim in anfur-furi' mnak, “Aam. Karu ho mait meik In aon-ta'un amates, mutoon kau fe' neu ho mutuun Ee et mee, tua. Maut he au 'eik Je 'eu bare bian he 'suub Ee nok rek-reko. Amturun kau, tua!” 16 Rarit Nai' Yesus anhaamn ee mnak, “Maria.” Onaim in nbani' n'ain Nai' Yesus am nak, “Raboni!” (Anbi uab Aram, in oten nak, “Au Tungguru!”) 17 Nai' Yesus natoon ee mnak, “Kais amreo' Kau fe', fin Au ka 'sae fa fe' 'eu Au Ama' et sonaf neno tunan. Mes ho mnao fe', he mutoon meu Au aok-bian sin im mak, ‘Au he 'nao 'eu Au Ama' et sonaf neno tunan. In es re' hi Ama' msa'. In re' naan, Au Uisneno. Onaim In re' naan, hi Uisneon nggoa msa'.’ ” 18 Rarit bi Maria na'ko Makdala nnao natoon Nai' Yesus In atoup noin' ein am nak, “Au uteef a'rair 'ok hit Usi', Nai' Yesus!” Onaim In natoon Nai' Yesus In haan beno neu sin.
Usif Yesus naruru' ma nakrira' In tuan ee neu In atoup noin' ein
19 Neno naan nateef nok neno krei, es re' krei fe'u in neon ahunut. Maans ee fe'e nmouf. Onaim Nai' Yesus In atoup noin' ein nabuan. Sin na'eek uim je in eon' ein mates, natuin sin namtausan atoin Yahudis sin a'naet ma kaes kou'n ein. Rarit Nai' Yesus neem anhake nbi sin atnaank ein am nak, “Saloom!” 20 Oras Nai' Yesus nasee sin on naan ate, In naruru' ma nakrira' paap ein re' nbin In a'niman ma In abnapan. In atoup noin' ein anmariin anmaten oras sin nkius niit sin Usin. 21 Rarit Nai' Yesus natonan sin im nak, “Maut he hi mamut ma mtainina'. Mimnau, fin Au Ama' anhaefan Kau on mee te, Au 'haefan ki on naan amsa'.” 22 In na'uab anrair on naan ate, In anpaumak-maak sin, onaim anfuu In asnasan neu sin mese'-mese'. Rarit In nak, “Au 'fee Uisneno In Asmaan Akninu' 'eu ki. Amtoup maan Ee. 23 Onaim karu hi mnika' main atoni' in sanat, sanat naan namneku nrair, fin Uisneno nnoes nain saant ein naan amsa'. Mes karu hi ka mnikan main fa atoni' in sanat, Uisneno ka nnoes nain fa in sanat naan amsa'.”
Usif Yesus nok nai' Tomas
24 Anmui' tuaf es na'ko Nai' Yesus In atoup noin' ein tuaf bo'es am nua, kaan ee nai' Tomas. Sin nteek ee msa' am nak, ‘ri'aan koen’. Oras Nai' Yesus neem nakrira' In tuan ee neu sin, nai' Tomas ka nabua nok fa atoup noin' ein naan. 25 Es naan ate, oras in partei ngguin nak, “Hai miteef amrair mok hit Usi',” in nataah am nak, “On nai. Au ro he 'kius papa' na'ko kuust ee in baran abit In a'niman fe'. Ma au ro he urepa' au kruruk 'eu In papa' abit In abnapan. Fin karu au ka 'moe' je fa fe'e te, au ka 'pirsai fa fe' 'ak, In anmoni nfain.” 26 Ankono krei jes antein, Nai' Yesus In atoup noin' ein nabuan nfanin nok nai' Tomas anbin uim jes. Eon' ein ma'reut ein mates anrair, mes Nai' Yesus antaam anhake nbi sin atnaank ein. In nasee sin im nak, “Hoore tua! Saloom!” 27 Onaim In na'uab neu nai' Tomas am nak, “Amnona' ho krurum meu ia, he mparikas Au 'nimak fe'. Rarit amkonob ho krurum meu papa' abit Au bnapak. Ampirsai nai mak, Au 'moni 'fain jen! Kais mu'oni' ho neek pirsait re' naan.” 28 Nai' Tomas nataah am nak, “Usi'! Oras ia au 'pirsai batuur! Ho kuum re' ia, es re' au Usi' ma au Uisneno msa'!” 29 Onaim Nai' Yesus natoon ee mnak, “Tomas! Ho mpirsai mak, Au 'moni 'fain jen, natuin ho mkius miit amrair meik ho matam fuam kuum. Mes neu tuaf re' napein upan ma pa'e reko nneis, es re' tuaf re' ka nkius niit Kau fa, mes sin npirsain.”
Surat ia in sarit
30 Nai' Yesus anmoe' rais sanmakat amfaun bian antein, re' au ka 'tui sin fa 'bi surat re' ia. In atoup noin' ein ankius niit rais sanmaakt ein naan nok sin humak ma matak fuak ein kuuk. 31 Mes rasi re' au 'tui 'rari 'bi surat re' ia, au 'tui, maut he hi mpirsai mmak, Nai' Yesus naan, es re' Kristus re' Uisneno nba'an nain he nreek Ee neem. Nai' Yesus naan, es re' Uisneno In Anah amsa'. Ma oras hi mpirsai Je, hi mipeni 'monit re' amneot ma amnonot re' ka natfeek niit fa, natuin hi mjair Iin na.
Usif Yesus naruru' ma nakrira' In tuan ee neu In atoup noni' tuaf hiut
1 Ankoon neno fauk on naan ate, Nai' Yesus nakrira' In tuan ee ntein anbi nefo Tiberias in ninin. In reetn ii, on nai: 2 Oras naan, Nai' Yesus In atoup noni' tuaf hiut nabuan. Sin re' naan esan re': Nai' Simon Petrus, nai' Tomas, re' sin nteek ee mnak, ‘ri'aan koen’, nai' Nitanel, na'ko kuan Kana et propinsi Galilea, nai' Sebedius in anah tuaf nua, ma Nai' Yesus in atoup noni' tuaf nua ntein. 3 Nai' Simon Petrus na'uab neu in partei ngguin am nak, “Au he 'nao 'okar au pukat.” Onaim sin natahan am nak, “Neu, reko! Hai mok amsa'.” Rarit sin nnaon neun neof goe in ninen. Onaim sin nsaen kofa' he nnao namin ika'. Mes mabe' naan sin ka napenin fa saa'-saa'. 4 Noka' kiku on naan ate, Nai' Yesus anhake nbi neof goe ninen. Mes In atoup noin' ein ka nahinin fa neu In re' naan, Nai' Yesus. 5 Onaim In n'aupun he nataan sin im nak, “Aupuu! Ba'e sin! Mipein imrair ika, oo?” Sin natahan am nak, “Kaah fa, tua! Hai ka mipein fa kre'o msa'.” 6 Onaim Nai' Yesus natoon neu sin im nak, “Am'okar miit pukat naan neu koof' ee aon-bian. Hi of mipein.” Rarit sin nmoe' natuin ein. Onaim sin napenin ika'. Mes iik' ein naan namfa-faun, tar antea sin ka bisa nheer fa pukat naan anfain neu koof' ee nanan. 7 Au 'bi naan amsa'. Au re' ia, atoup noni' re' Nai' Yesus anneek. Rarit au utoon 'eu nai' Petrus 'ak, “Airoo! Hit Usi' es re' nee!” Anneen Au uab ii on naan ate, nai' Simon Petrus anpaek nafani' in baru, rarit an'ookr on antaam anbi nefo he nabhae' neu meto'. 8 Fin kofa' naan na'roo of oni' suma meter nautn es na'ko meto'. Rarit in partei ngguin nfoe' kofa' nfain neu meto', ma nheer neik pukat re' naheun nok ika' na'ko kofa' naan in kotin. 9 Oras sin ntean anbin meto', sin nkius ai makraha' re' npiin anbi naan. Anbi ai je fafon, anmui' ika', ma nmui' utunu' msa'. 10 Nai' Yesus na'uab neu sin im nak, “Meik neem ika' fua' fauk mi'ko re' hi mheek maan sin fe'e na.” 11 Rarit nai' Simon Petrus ansae nfani nbi koof' ee nanan, he in nheer pukat naan neu meto'. Pukat naan naheun nok iik ko'u. Sin amfauk ein, nautn es bo' niim am teun (153). Maski iik' ein namfaun on naan, mes pukat naan ka natpisu' fa. 12 Rarit Nai' Yesus anhaman sin im nak, “Iim, he mbukae fe'!” Sin nahini nrarin nak, In re' naan, sin Usin. Es naan ate sin ka nabranin fa he nataan am nak, “Ba'e re' ia, sekau?” 13 Rarit Nai' Yesus nait utunu' ma ika', onaim annao nfee sin. 14 Naan, es re' no teun ii Nai' Yesus naruru' ma nakrira' In tuan ee neu In atoup noin' ein, oras In nmoni nfain na'ko In a'maten.
Usif Yesus na'uab nok nai' Petrus
15 Oras sin anbukae nrarin, Nai' Yesus nataan nai' Simon Petrus am nak, “Simon, nai' Yohanis in anah. On mee? Ho mneek Kau mneis mu'ko ho partei ngguin ia nneek Kau, oo?” In nataah am nak, “Batuur, Usi'! Ho muhiin amrair mak, au 'neek Ko, tua.” Onaim Nai' Yesus anbaasn ee mnak, “Karu on naan ate, mutuuk murek-reko' Au 'bib-kaes aan ein he sin napenin amnahat.” 16 Rarit Nai' Yesus nataan antein' ee mnak, “Simon, nai' Yohanis in anah. On mee? Ho mneek Kau, oo?” In nataah am nak, “Batuur, Usi'! Ho muhiin amrair mak, au 'neek Ko, tua.” Onaim Nai' Yesus anbaasn ee mnak, “Karu on naan ate, mpijaar ma mpairoir murek-reko' Au 'bib-kasen.” 17 Rarit Nai' Yesus nataan antein' ee mnak, “Simon, nai' Yohanis in anah. On mee? Ho re' ia, Au partei ja, oo?” Onaim nai' Petrus in neekn ee nsuus nain, natuin Nai' Yesus nataan no teun goen nak, “Ho mneek Kau, oo?” Rarit in nataah am nak, “Ho es re' muhiin main raisn ein ok-oke'. Onaim Ho muhini mrair mak, au re' ia, Ho partei ja, tua.” Rarit Nai' Yesus anbaasn ee mnak, “Karu on naan ate, mutuuk murek-reko' Au 'bib-kasen he sin napenin amnahat. 18 Ho mheke mrair Au sairt ii, oo? Au he utoon ko on nai msa': unu' te, oras ho munif ko fe'e te, ho biasa mpaek kuum baru, ma mpaek kuum pasu 'futu', rarit ho mnao meu mee ja haa, mutuin ho romim. Mes oras ho mumnasi mrair, ho of amnona' ma mfee ho 'nimam he atoni' bian anfuut sin, anpaek kuuk ho pasu 'futu'. Rarit sin nheer neik ko msa' meu baer jes re' ho ka mroim je fa.” 19 (Nai' Yesus na'uab on naan, he natoon neu nai' Petrus anmatoom nok saa' re' of anjair neu in tuan. Fin nai' Petrus in a'maten of naruru' ma nakrira' Uisneno In pinan ma krahan.) Rarit Nai' Yesus na'uab neu nai' Petrus am nak, “Uum he mjair Au ngguin nai!”
Atoup noni' re' Usif Yesus anneek
20 Oras naan, nai' Petrus nabani' he nkius neu koit. In nkius kau utuin sin nua sin na'ko sin koitk ein. Au re' ia, atoup noni' re' Nai' Yesus anneek. Au es re' a'took a'bi Nai' Yesus In aon-bian amsa', oras hai mtook ma mbukae fesat Paska. Au re' ia, es re' utaan Ee m'ak, “Usi'! Sekau of es re' na'sosa' Ko, tua?” 21 Oras nai' Petrus ankius niit kau te, in nataan Nai' Yesus am nak, “Usi'! Ho mu'uab amrair meu kau fe'e na. Mes on mee, nok tuaf re' nee?” 22 Nai' Yesus na'uab neu nai' Petrus am nak, “Ka ho urusn aa fa. Kar-karu Au 'roim he in suma npao nbi ia goah tar antea Au 'fain 'uum ate, in raisn ii saa'? Re' pentiing ii, ho ro he mumnau saa' re' Au 'ba'an ko fe'e na, es re': uum he mjair Au ngguin nai.” 23 Natuin Nai' Yesus na'uab on naan, In atoup noni' bian anmurai na'uab ein am nak, “Nai' Yohanis naan, ka neu nmaet fa.” Te kaah, Nai' Yesus ka na'uab fa on naan. Re' In nak ii, es re': “Ka ho urusn aa fa. Kar-karu Au 'roim he in suma npao nbi ia goah tar antea Au 'fain 'uum ate, in raisn ii saa'?”
Nai' Yohanis nasoup in surat
24 Atoup noni' re' Nai' Yesus na'uab naan, es re' au, nai' Yohanis kau. Au es re' ureta' rasin ia ok-oke' 'eu ki. Au es re' a'kius 'eik au matak fuak ein. Rarit au 'tui sin ok-oke'. Onaim hit tahiin tak, rasin re' au utoon ki sin re' naan, ro batuur, tua. 25 Ma nmui' rasi mfaun bian fe' re' Nai' Yesus anmoe' sin. Karu atoni' nsoba' he ntui nain sin ok-oke', nmurai na'ko Nai' Yesus nanaob In mepu tar antea narair sin ate, au 'ak pah-pinan ia 'teme-'teme msa' ka bisa nasaeb fa suurt ein naan ok-oke'. On re' naan, tua, Au, nai' Yohanis kau, tua.
Uisneno nba'an he nfee In Smana Kninu'
1-3 Ama' Teofilus. Tetus ao-mina' na'ko kau, Lukas. Anbi surat ahunut, au 'tui urair are' sa'-saa' re' Usif Yesus In a'monin. Es re' sa'-saa' re' In anmo'e, ma sa'-saa' re' In nanoni' nrari, na'ko un-unu'. In npiri nrair In haef eini. Maski atoni' sin nasuusb Ee ma nha'muu' Je tar antea na'maat Ee, mes Uisneno namonib nafain Ee. Ma oras In moni nfani te, In nakriir On neu In haef ein. Sin niit Ee fani-fani tar neno bo'-haa, es nana te, sin nahinin nak In moni nfain batur-batuur. In natonan sin am, nak, Uisneno ro namnees on re' Usif re' nnaa' prenat. In nsonu' sin neik Uisneno In Smana Kninu' In ma'tanin. Au 'tui re' ein in ia, tar antea In nsae nfain neu neno-tunan. Re' ein in naan, re' au 'tui iit sin. 4-5 Ma nbi orses, Nai' Yesus nabua nok In haef ein nbi to'ef Saitun, In nfeen sin prenat nak, “Mimnau! Nahunu te nai' Yohanis nasrain neik oe, mes karu hi mpao mteni' neno fauk amnemat, Uisneno of anmo'e nneis neu ki, natuin In nfee In Smana Kninu' neu ki. Onaim nati' hi kaisa' mnao misaitan kota Yerusalem. Hi mpao mbi ia, tar Au Ama' nfee In Smana Kninu' neu ki, on re' In ba'an anrari. Ma hi mneen mirair na'ko Kau.”
Usif Yesus na'ait' On neu neno-tunan
6 Oras Nai' Yesus nabua nok In haef eni, sin nataan Ee, mnak, “Aam! Hai he mitaan miit onai: Ama Ho muhiin un-unu' te, pah Isra'el in napreent on kuun. Ama' Ho he mufetin kai oras ia na'ko prenat teta', oo, ai' hai he mpao mtein oras teta'?” Usif Yesus na'uab nok In atoup-noni' sin 7 Rari te, Nai' Yesus nataah sin am, nak, “Hi kaisa' mitaan fe' nok in oras naan. Suma Au Ama' neik Noon es an'ator in oras. 8 Onaim karu Uisneno In Smana Kninu' neem antaam neu ki, of hi na' mipein 'be'if ma ma'tani'. Rari te, hi ro he mnao mitonan sin ok-oke' ntoom Kau. Mitonan are' abitan kota Yerusalem, ma are' kuan-kuan anbi propinsi Yudea ma propinsi Samaria, tar antea pah-pinan fuun am nateef.” 9 Na'uab anrair on nana te, Nai' Yesus na'ait On neu neno-tunan anbi sin maat keni. In na'ait On tar antea noop je an'aum naan Ee, ma sin ka niit antein Ee fa. 10 Oras sin an'baisenun nsaen, nok askeken tuaf nua nhaek nakeit-ketin nok sin, sin npaken tai muit sene. 11 Tuaf nua ein naan, na'uab ein am nak, “Hoe! Atoni' Galilea! Nansaa' am es hi msanmaak ma mbaseun piut meu neng goe tnanan? Fe'ena hi miit Nai' Yesus nasaeb On neu neno-tunan tar antea noop je an'aum naan Ee. Hi miit meik hi maat mein oras In nsae neu neno-tunan. In nsae on re' mee te, In nfain neem amsa' of on re' naan.”
Sin namin tuaf he nseka' nai' Yudas
12 Narari te, Nai' Yesus In haef ein nsanun na'ko to'ef Saitun, nfanin neu kota Yerusalem. Saitun in a'roo ni na'ko kota of oni' kiir goes. 13 Antean kota nana te, sin ntaman neu umi re' sin natuan nbin na. Rari te, sin nsaen neu ke'en abit fafon. Sin kaang keni, es re': nai' Petrus, nai' Yohanis, nai' Yakobos, nai' Anderias, nai' Felipus, nai' Tomas, nai' Bertolomeos, nai' Mateos, nai' Yakobos (nai' Alfeus in anah), nai' Simon (na'ko parte purtik Selot), ma nai' Yudas (nai' Yakobos in anah). 14 Sin arsin nabuan fani-fani ma n'oen ein nok neka' mese'. Sin onen nabuan nok Bi Maria, Nai' Yesus In ainaf, nok aina'-aina' ma ri'feto-ri'feto, ma nok Nai' Yesus In orif sin. 15 Neot es ate, sin nabua nfanin, of oni' sin tuaf naut'n es bo'-nua. Ma nai' Petrus anfeen anhaek ma na'uab am, nak, 16 “Aina'-ama', arkit oke'! Oni' hi fe' mimnau nai' Yudas, re' nahunu te, in nok in atuina' sin neman ma anheek Nai' Yesus. Sa'-saa' re' anboor neu nai' Yudas ro he njair on naan. Natuin nahunu te, Smana Kninu' Uisneno npaek usif nai' Daut he ntui rasi anmatoom neu nai' Yudas on naan. 17 In re' naan, hit atoni'. In meup nabu'-bua' nok kit.” 18 (Mes oras nai' Yudas na'sosa' nrair Nai' Yesus ate, in nait roit naan ma annao nsos afu pis es. Rari te, in nmaet anbi bare naan, natuin in mofu-nteinbon ma in tain ee mpee' ma taif ein anroron npoin oke'. 19 Oras naan, sin na'uab naktaru' ma naktuta' na'ko es neu es, tar too mfaun anbi kota Yerusalem nahinin rek-reko nmatoom neu nai' Yudas in a'maten. Es nana te, sin nakanab bare naan neik sin uab Aram nak ‘Akerdama’, re' neik hit uab ii te nak ‘Afu ai' baer naa'’.) 20 Nai' Petrus na'uab ankoon nak, “Afi ahunut usif nai' Daut antui rasi naan et Surat Poris-Bo'is. In ntui nak, ‘Maut he in bare 'tua' naan ruman; kaisa' nmui' atoni' re' he natua nteni' anbi naan'.’ Ma in ntui nteni' nak, ‘Maut he in mepu naan, nana'te neu tua 'teta'.’ 21-22 Es nana te, hit ro he taim tuaf he nsenu' nai' Yudas. Hit taim tan tuaf es re' nabua nok kit sero' 'roo goen. In he es re' atoni' re' nhaumaak bon nok Nai' Yesus oras In nnao nbi me-mee, nmurai na'ko nai' Yohanis nasrain Nai' Yesus. In imsa' ro he niit nok matan nak Nai' Yesus anfeen anfain na'ko In a'maten, tar ansae nfain neu neno-tunan.” 23 Oras nai' Petrus na'uab anrair on nana te, sin arsin nataam kanaf nua. Tuaf es, es re' nai' Matias, ma es anteni' es re' nai' Yusuf, (re' fe'fe'e te, sin nteke te nai' Barsabas; sin nteke nai' Yustus amsa'). 24-25 Rari te sin onen bu'-bua' am nak, “Koi hai Ama abiit neno-tunan! Ho muhiin main rek-reko tuaf mese'-mese' in nekan. Nai' Yudas anmate nporin in mepu. Es nana te, Ama' ho meik nom amreek es na'ko sin nua sin, he nseka' nai' Yudas, he hai maitj ee nfain Usif Yesus In haef es.” 26 Rari te, sin nheran sur ana' neu tuaf nua ein naan. Ma sin nheer antoom nai' Matias in kanan. Es nana te, sin nait je nfain haef Usif Yesus nabua nok tuaf bo'es am mese' naan.
Sin naben ate Smana Kninu' Uisneno antoom sin
1-2 Nateef nok neon ko'u atoni' Yahudi re' sin nteek ee t'nak ‘Neon Pantekosta’, are' too mfaun re' natuina' Nai' Yesus, sin nabuan anbi umj es. Nok askeken ate, sin nnenan a'ruuf es neem na'ko neng goe tunan nahuum on re' ain nautus. A'ruuf naan ko' re'uf, tar abitan re' naan, ka nmanenan fa hanaf es nok es karu sin na'uab ein. 3 Rari te, sin niit anteni' nahuum on ai pina' nsakan anbi sin mese'-mese'. 4 Onaim Smana Kninu' Uisneno antaman sin arsin. Rari te, sin na'uab ein neik uab pah bian, nmatoom nok saa' re' Smana Kninu' natonan sin. Uisneno In Smana Kninu' nseij On ma nbaits On neu Nai' Yesus in tuaf sin 5 Oras naan, atoni' Yahudi na'ko are' bare-bare et pah-pinan, neem nabuan anbi Yerusalem. Sin neek ein nmarinan he natuin Uisneno. 6 Oras sin nneen a'ruuf naan, sin arsin neem nabuan anbi bare naan. Ma mese'-mese' anneen in uaba' na'ko Usif Yesus In haef ein sin ruruk. Sin arsin nsanmakan. 7 Sin arsin nsanmakan tar sin na'uab ein nak, “Sin are' a'uaba' ia, atoni' Galilea, ai' kah? 8 Nansaa' am es hit tneen sin na'uab ein neik uaba' na'ko hit pah mese'-mese'? 9 Hit arkit teem ta'ko propinsi Partia, Media, Eram, Mesopotamia, Yudea, Kapadokia, Pontus, Asia, 10 Frigia, Pamfiria, Masir, ta'ko Ribia re' anhaumaak kota Kirene; hit bian neman na'ko kota Roma; 11 ma bian anteni' neman na'ko puru Kreta, ma pah Arab. Hit atoni' Yahudi ma atoni' pah bian re' antaman pirsait Yahudi. Hit arkit tneen sin na'uab ein neik hit uaba' mese'-mese', nmatoom nok are' rais ko'u, re' Uisneno anmoe' nani. Airooo! Hit tamkaak batur-batuur!” Na'ko pah-pah re' ia, too mfaun neman nabuan neu Yerusalem 12 Sin arsin namkakan, ma sin maktaan ein es nok es am nak, “Nmoe' on meem es anrair on re' nee? In a'moufn ii, on mee?” 13 Mes atoni' bian na'akan sin. Sin na'uab ein nak, “Hoe! Kaisa' mtoe mook sin! Natuin sin nmafu nmaten!”
Nai' Petrus na'uab anbi too mfaun sin atnanak
14 Nai' Petrus, ma haef Usif Yesus sin tuaf bo'es am mese', nokan nbin naan. Ma nai' Petrus neiki ntaam akre'o, ma na'uaba neu too mfaun re' nabuan anbin naan. In na'uab naheer-heer am, nak, “Aina-ama', aok-bian ki ok-oke'! Hi re' anfain atoni' Yahudi, ma re' iim ma mitua ambi kota Yerusalem! Amtakan hi ruikm ein ma amneen rek-reko neu saa' es re' au he u'uaba', natuin anmui' uab uuf es re' au he utoon neu ki ok-oke'. 15 Hi kaisa' mitenab mak sin nmafun raur tua min-kase. Sin ka neu he nmafun fa! Mimnau, ka tiit fa es he niun raru he namaf goe kik-kiku. Saa' anteni' fe' nreuk sea! 16 Hi mneen sin arsin na'uab ein neik hi uab eni mese'-mese'. In amneon ii onai: Oras naan, Uisneno natoon anrair rasi ia neu In mafefa' kninu' nai' Joer, nak, 17 ‘Uisneno na'uab am nak, “Anbi neon amsoput sin, Au of usanut Au Smanak neu bifee-atoni' sin ok-oke'. Hi an-feto ma hi an-mone sin, of Au 'paek sin anfanin Au mafefa' kninu'. Hi an-muinf ein naan, of niit saa' re' Au he ururu' neu sin nbi mnitas. Ma hi atoni mnais ein naan, of niit saa' re' Au he ukrira' neu sin nbi mneit. 18 Nateef neon amsoput sin, Au 'fee Au Smanak anbi Au anah-anah sin ok-oke'. Au 'fee neu atoni' sin, ma Au amsa' 'fee neu bifee sin. Ma sin of na'uab saa' re' Au utonan sin. 19-21 Of Neon Uisneng Goe antea, mes nahuun na'ko neno naan antea, Au of a'moe' uhunun rais sanmakat huma'-huma' anbi neng goe tnanan. Rais sanmakat on re' mans ee names'ook; ma fuun ee of me'rare on naa'. Au amsa' he 'moe' rais sanmakat maneun re'uf anbi pah-pinan. Rasin naan nahuum on ai, ma ai masu' re' ansae kbo'es-akbo'es on neng goe tnanan. Ma nbi neno-neno Uisneno re' maneun re'uf naan, sekau es anhunun ma antoit rais maturun ma'babat na'ko Uisneno, te sin of napenin 'honis.’” Nana re' nai' Joer na'uab naan je, et afi unu'. Nai' Petrus na'uab neu too mfaun sin 22 Naaa! Aok-bian atoni' Isra'el ok-oke'! Hi mtakan hi rukim ma mneen saa' re' au he utoon ki oras ia. Uisneno nruur ma nreek nain Nai' Yesus, atoni' Nasaret naan. Hai mihiin batuur, natuin hai miit meik hai matam nak Uisneno anpaek Nai' Yesus he nmoe' rais sanmakat nfain rasi mkakan re' maneun re'uf. Hi msa' mihiin rasi ia, natuin Nai' Yesus anmoe' rais sanmakat huma'-huma' nbi hi tnanam. 23 Mes hi mroor miis Ne, meik ranan amtoit amoe' re'uf he nkuus na'peti' In Tuan Ee nbi hau nehe. Te kah, nana Uisneno nahini nrair na'ko afi unu', ma nmatoom nok In sarit. 24 Namneo hi moe' on naan tar antea In nmaet batur-batuur. Mes Uisneno ka nroim fa he Nai' Yesus antuup nabaar anbi amates sin barak. Es nana te, Uisneno nafeit Ne na'ko amaets ein sin baark ein, ma namonib nafain Ee. 25 Nahunu te, usif nai' Daut antui rasi antoom Nai' Yesus, onai: ‘Au uhiin ak Uisneno nok kau piut-piut. Es nana te, ka tiit fa saa', es re' nabei' he namouf kau, natuin Uisneno anhaek piut et au bnapak. 26 Au neek ki nmariin, natuin rasi naan; ma au bo'is u'naeba' Uisneno piut, ma au u'tena' he 'pao Goe. 27 Natuin In ka nafetin fa au smanak he natua nabaar anbi amaets ein, sin barak. Ma Uisneno ka nparakan fa In Atoin Akninu' In Ta'un he npuun anbi nopu. 28 Usi' natoon kau rana 'honis re' amneot. Es nana te, au neek ki nmariin anmaet, natuin Usi' nok kau piut.’ Nana amsa', re' usif nai' Daut antui naan je et afi unu'. 29 Naa, aok-bian ki ok-oke'! Oras ia mfee kau mainuan akre'o, he au u'uab nok akninu', uab re' nmatoom nok na'i nai' Daut. In na'uab on naan, mes in ka nteek on fa neu in tuan ii nmees. In nmate nrair, ma nsuub anraar je, ma In naetn ee, fe' et hit atnanak tar antea neno ia. 30 Usif nai' Daut re' naan, mafefa' Uisneno. Ma in nahiin nak Uisneno anba'an neik rasi supat, nak in sufaf-ka'uf es na'ko nai' Daut of es annaa' aprenat, es re' Tuaf re' Usi' anruur ma nreek naan Je na'ko afi unu'. 31 Oras naan, nai' Daut ankius na'roo neu neno amnemat. Ma in natoon nahuun antoom Atoni' re' Uisneno nruur ma anreek naan Je. Nak atoni' naan of anfeen anfain na'ko In a'maten. Ma nai' Daut amsa' nak atoni' naan of ka nabaar fa anbi amaets ee in baran, ma in ta'un of ka npuun niit fa. 32 Atoni' re' nai' Daut natoon ee naan, es re' Nai Yesus! Uisneno namonib nafain Ee na'ko In a'maten. Ma hai arkai miit nok hai matam, In nmoni nfain. 33 Ma oras ia, Uisneno naiti nrair Nai' Yesus ma In kaan Ee ko'u nneis. In antook et Uisneno In abnapan a'ne'u, et bare re' Usi' nabarab nani. Ma In Aamf Ee anfee Ne Ama' In Smana Kninu', on re' Usi' anba'an naan je et afi unu'. In imsa' anba'an he nfee kit In Smana Kninu' neu kit. Hi mneen, ma miit ee, oras ia, naan Uisneno nfee In Asmanan. 34 Nai' Daut ka nsae niit fa ntea neng goe tunan, mes in na'uab natoon am, nak, ‘Uisneno na'uab neu au usi' mnak, “Amtook nai mbi bare re' Au ubarab aan je, 35 tar Au 'moe' ho musu sin nri'tuu neu ko.’” 36 Es nana te, too Isra'el arki ok-oke' hi he mihiin namneo nak Nai' Yesus re' hi mkuus miis Ne naan, es re' Nai' Yesus re' Uisneno nait naraar Je, he nfain Uisneno In An piri', ma In nfain Usif neu kit.” 37 Ma nbi oras sin nneen rasi nana te, sin neik ein nsaan jok. Ma sin nataan nai' Petrus nok haef bian sin, nak, “Eee, ba'e sin! Onaim, es hai he mmoe' on mee ka?” 38 Ma nai' Petrus nataah sin, am nak, “Hi arki mese'-mese' ro he misaitan ma mifeitin hi sanat ma hi penu sin, ma mfain mituina' Usi'. Rari te, hi ro he mnona' hi tuam ein he nasrain ki, he nfain tanar nak, hi mite'un ma mi'bani' hi moint ii mituin Yesus Kristus In rana 'honis. Nana msa' nfain tanar nak Uisneno nsaok nain are' kanan hi sanat ma penu sin. Ma hi msa' of mipein Smana Kninu' Uisneno. 39 Natuin Uisneno nba'an nain rasi naan, he nfee je neu are' tuaf-tuaf re' nfain on Iin na. Nok rasi naan, In nba'an neu ki ma neu hi sufa'-ka'uf sin. In imsa' anba'an he nfee neu tuaf bian anteni'.” 40 Nai' Petrus fe' na'uaba mnanu' neu sin, ma natonan sin am nak, “Oras ia, atoni mfaun sin nseken nkoon sin nasaitan raan amneot ii. Es nana te, hi ro he mpanat rek-reko he kaisa' hi mituina' amoe' re'uf sin ranan. Hi mituin meu Uisneno In raan amneot naan. Anbi nana te, of hi mmoin piut mok Uisneno.” 41 Rari te, too mfaun sin antoup nai' Petrus in uaban. Onaim sin ntaam natuin Nai' Yesus In Rana 'Honis, ma sin nnona' sin tuak eni he nasrain sin. Neno naan, sin tuaf nifu teun re' antaam natuin apirsait neu Nai' Yesus. 42 Sin nromin he nabua nok too bian re' natuina' Usif Yesus. Ma sin nmonin reko es nok es. Neno-neno te, sin nmakoen he nneen noni'-taru' na'ko haef Usif Yesus. Sin n'oen ein te nabuan. Sin nbukaen amsa' nabuan.
Apirsait ein sin a'monit
43 Oras naan, haef Uisneno sin anmo'en rais sanmaakt ii mfaun, tar antea bifee-atoni' sin sanmakan ma namtaun nok. 44 Bifee-atoni' apirsait re' natuina' rana' 'honis Usif Yesus naan, nabuan ma anneek-mesen, tar sa'-saa' re' sin muu'j ee te, sin arsin anpaek nabuan. 45 Ma bian na'sosa' sin baer ein, ma sin a'mui' kein, rari te sin bait in osan naan neu apirsait sin, mese'-mese' natuin sin sarit. 46 Neno-neno te, sin nabuan anbi Uisneno In Uim Onen Uuf. Sin arsin anbukaen natnan-nanin na'ko umj es neu umj es nok neek marine ma sakanat. Sin ar-arsin anmatuurn ein es nok es, ma sin ka napain nitan fa. 47 Na'ko neno neu neno te, sin bo'is Uisneno ka natfeek niit fa. Too bian re' ka nabua nok sin anroim niis sin. Neno-neno te, Uisneno nfee 'honis neu tuaf bian, ma sin antaman ma nabuan nok apirsait Usif Yesus sin. Tar antea sin nma'baab ein piut.
Nai' Petrus nareko' atoin men bua' es
1 Anbi neon goes, nreuk teun mansi nmaeb, nai' Petrus nok nai' Yohanis annaon anbi Uim Onen Uuf Uisneno he n'oen ein nok tuaf bian. 2 Sin he nnao ntaman natuin eon ko' goes re' in kaan ee, ‘Eno' Amasat’. Anbi naan, sin niit atoin es, re' haen ein anbuan na'ko in ainf ee nahoins ee ji. Neno-neno te, atoin ein anbaib neik je neu bare naan, hena' in bisa ntoit sa'-saa' na'ko sekau re' annao npeo' eno' naan he ntaam neu Uim Onen Uuf. 3 Ma oras in niit nai' Petrus nok nai' Yohanis he ntaman neu Uim Onen naan in nanan, in nona' in a'niman ma antoti, mnak, “Airooo, ama' sin! Hi mturun man kau fe'. Mfee man kau saa' akre'o.” Nai' Petrus ma nai' Yohanis nkius atoni' hae bua' naan 4 Sin nua sin ankius na'tesan atoin abua' naan, rari te nai' Petrus nak, “Ba'e! Amkius uum fe'!” 5 Ma atoni' naan nait matan ma nkius sin nua sin; in natenab, am nak, “Hoe, sin nua sin of he nfee kau saa' es.” 6 Mes nai' Petrus nak, “Ba'e! Au ka 'mui' fa roit sen mese. Mes oras ia, au he 'fee ko saa' re' au 'mu'i. Amneen rek-reko, ba'e! Nok kuasat na'ko Nai' Yesus Kristus, atoni' Nasaret naan, au aak ko: amfeen he mnao nai!” 7 Onaim nai' Petrus annaa' atoin abua' naan in a'niman a'ne'u, ma anfiit nahake'. Oras naan, in haen ein nareok nanin. 8 Nok askeken, in ntaikreit, ma annao neum-neem he na'taka' in haen. Rari te, in nok antaam anbi Uim Onen nok sin nua sin. In nao nok, antaikreit nok, ma anbo'is Uisneno. 9 Too mfaun sin niit ee in nao ma anbo'is Uisneno. 10 Oras sin nahiin je te, sin sanmakan, ma na'uab ein nak, “Atoni' re' ia, in es re' atoin abua' re' ntoit roit neno-neno nbi Eon Amasat, ai' kah? On meem es in nareok?”
Nai' Petrus na'uaba' nbi Uim Onen Uuf ee nanan
11 Rari te, atoni' nana nnao nabua nok nai' Petrus ma nai' Yohanis. Sin teun sin antean roop mainuan es re' in kaan ee ‘Ropo, usif nai' Soreman’. Onaim are' too mfaun sin neman ma nauban sin nok neek sanmakat. 12 Oras nai' Petrus niit too mfaun sin te, in nmurai na'uab am nak, “Hoe! Too Isra'el ki ok-oke'! Nansaa' am es au aok-bian ki, hi msanmaak? Nansaa' am es hi mkius kai piut? Oni' hi mak atoni' ia in bisa nnao natuin hai mpaek re'u oo, ai' natuin hai mmakoe he mituina' Uisneno? Ai' on mee? 13 Au he utoon ki onai: hit be'i-na'i sin, es re' nai' Abraham, nai' Isak, ma nai' Yakop, sin na'ruri' na'bees neu Uisneno. Uisneno re' naan, es nait na'ratan In Atoni' re' In npiir naan Je naan es re' Nai' Yesus. Nai' Yesus re' naan, es re' maeb-esi, hi mait man Ee ma minaa't Ee neu Gubernor Pilatus. Ama' gubernor ee he nafeitn Ee, mes hi mraban in nromin re' naan, henati' kais nafetin Nai' Yesus. 14 Mes Nai' Yesus naan, Atoni' re' ka nmui' fa sanat. In neekn Ee reko. Ama gubernor he nafetin atoni' re' ka nmui' fa sanat naan, mes hi arki mraabn ee nok ma'tani. Re' re'uf annes-neis ji hi mikeekt ee, he nafetin atoin amoe' re'uf es, re' aroor atoni', he nafetin nafain ee neu ki. 15 Onaim, hi es amroor miis Nai' Yesus. Te kah, In es re' nmoe' kit ma tmoin. Namneo, In nmaten nrair jen, mes Uisneno namonib nafain Ee, na'ko In a'maten. In re' ia, es re' hai miit Ee nok hai matam. 16 Naa, hi mihiin main atoin abua' ia. Oras ia, in ma'taan jen, mes ka hai fa es re' mireok ee. Hai ka mmui' fa kuasat sa'-saa'. Kuasat naan neem na'ko Nai' Yesus kun. Atoni' ia anfeen ma nhaek natuin in npirsai neu Usif Yesus. Fin Usif Yesus naan, es re' nareko' naan je ma hi miit nok hi matam. 17 Aok-bian arki! Oras ia, au uhiin ak hi mok hi a'nakat sin ammoe' amre'ut neu Nai' Yesus. Mes hi ka mihiin fa in a'poen ii on mee. 18 Mes Uisneno natoon anrair et afi unu', npaek In mafefa kninu' sin nak, Anah re' In npiir naraar Je naan, ro he napein ma'ne'at. Ma rasi naan, njari nrair. 19 Es nana te, hi ro he misaitan hi sanat-penu sin, ma amfain iim meu Uisneno, maut he In noes nain sin, ma ka namnau nteni' fa hi sanat-penu sin. 20 Uisneno of naheran hi nekam. Ma Uisneno of ansonu' nafani' neu ki, Anah re' In npiir naraar Je naan. Ri'ana' naan, es re' Nai' Yesus re' In nsonu' nraar Je neem neu ki. 21 Na'ko afi unu', Uisneno na'uab npaek In mafefa' kninu' sin, nak, ‘Uisneno of nanoon are' rasi, tar antea are' rasi naan anfain fe'u.’ Es nana te, Nai' Yesus anpao nbi In Baran A'kninu' tar antea In neem he na'fe'u are' rasi. 22 Na'i nai' Musa msa' na'uab niit neu too pah Isra'el, am nak, ‘Hi A'nakat naan, es re' Uisneno, of In nruur naan es na'ko ki he nfain In mafefa' kninu', on re' In npaek kau a'fain In mafefa'. Es nana te, hi ro he mtakan hi rukim ma mneen are' sa'-saa' re' In natoon ki sin. 23 Mes sekau re' ka nroim he nneen fa rek-reko Atoni' naan In uaban te, Uisneno of naiti nporin naan je na'ko In ini, ma nakrait ee.’ 24 Ka arahaa fa na'i nai' Musa na'uaba' rasi naan. Mes Uisneno msa' anpaek tuaf bian anteni', he nfanin In mafefa', ma sin natonan are' rasi nana msa'. Re' afi ahunut, Uisneno anpaek na'i nai' Samuel, he natoon rasi-rasi re' muni ia hit tiit sin teik hit matak. 25 Uisneno amsa' anba'an neu na'i nai' Abraham nak, ‘Au of a'fee tetus neu pah-pah anfuun am nateef pah-pinan, na'ko ho sufa' ma ka'uf es.’ Naa, are' rais manba'an na'ko in na'i naan, oras ia najairb on anbi hi matam, orif-tataf atoni' Yahudi ki. 26 Uisneno nsonu' In Anah re' In npiir naan Je, he naruru' ranan, he hi misaitan hi sanat sin. Es nana te, In nakrira' In nekan arekot neu ki. In ansonu' nahunun In Anah naan neu ki, rari te na' In nsonu' ntein neu pah-pah bian.”
A'nakat rais pirsait sin no'en nai' Petrus ma nai' Yohanis he neem natahan
1 Oras nai' Petrus ma nai' Yohanis fe' na'uab ein nok atoni' fauk ate, kaes ko'guin neman. Kasen naan es re' a'nakat-a'nakat pirsait Yahudi, ma a'nakat atitus-apaot Uim Onen Uuf, ma tuaf bian na'ko pukan pirsait Saduki. Sin neman ma nakan niis nai' Petrus ma nai' Yohanis. 2 Sin nato'on nai' Petrus ma nai' Yohanis, natuin sin nua sin natonan too mfaun, nak, “Nai' Yesus anfeen anfain na'ko In a'maten! Nok rasi nana te, In anfei ranan neu amates sin he nfenan nfanin.” 3 Es nana te, sin nreun tuaf he nnao nheek sin nua sin. Mes, natuin mansi nmaeb jen, onaim sin nataam sin nua sin anbi bui. Noka' fe'e te, na' he nparikas sin rasi. 4 Mes tuaf-tuaf re' anroim he nneen ma ntoup noni' na'ko haef ein sin nonik, anmanauk ein nak sa'-saa' re' atoup-noni' sin natoon ee naan ro batuur. Es nana te, tuaf-tuaf neman ma na'baba' sin piut-piut, tar antea oni' sin bua'-bua' tuaf nifu niim. Kaes ko'u sin na'uab ein ma'fena' neu nai' Petrus 5 Nok-noka' on nana te, are' kaes-ko'u Yahudi sin nabuan anbin kota Yerusalem. Sin es re' a'nakat-a'nakat, atoni mnais harat, ma tunggur agama Yahudi sin. 6 A'nak Ko'u pirsait Yahudi msa' nok anbi naan. In kaan ee, nai' Hanas. A'nakat-a'nakat bian anteni', es re' nai' Kayafas, nai' Yohanis, nai' Aleksander, ma nai' Hanas in uum je nanan sin nokan anbin naan. 7 Oras sin arsin antaam nabuan ate, sin nreek tuaf he no'en neik nai' Petrus ma nai' Yohanis, he neem nateef nok sin. Oras sin nua sin ntaman nrarin, sin natanan, nak, “Nmoe' on meem, es re' hi mireko' atoin men-bua' naan? Hi mpaek kuasat na'ko sekau, ka? Ma sekau es re' nreun ki he hi mibrain he mmoe' on re' naan?” 8 Rari te, Smana Kninu' Uisneno naheran nai' Petrus in nekan. Es nana te, in nataah am nak, “Ama' ar-arki, hi es amfain a'nakat-a'nakat ma atoni mnais harat neu too Isra'el ok-oke'! Kais mitoo', natuin hai on re' mtaka'nana' kre'o. 9 Atkisu te, hi on he mmaka'rasi' mok kai, natuin hai mturun ma mireko' atoin men-bua' es. Ma hi amsa' mitaan kai, nok sekau in kuasan hai mireko' atoni' naan? 10 Onaim, au he utoon ki on nai: Ama' sin ar-arki mimnau atoin Nasaret es, re' In kaan Ee, Nai' Yesus. In es re' Kristus, re' Uisneno nruur ma nreek naan Je na'ko unu'. Ma hi es re' amkuus mi'peit Ee anbi hau nehe. Mes Uisneno nafena' nafain Ee na'ko In a'maten. Au 'roim he sin ama' arki mok too Isra'el ok-oke' mihiin, natuin hai mireko' atoin men-bua' ia, meik Nai' Yesus re' ia In kuasan. 11 Nai' Yesus re' ia, es re' antui naan Je, anbi Sura Kninu' Uisneno nak, ‘Anmui' fat goes re' atuukan faut nein naiti nporin; mes namuni te, fatu naan anfain faut sukit neu nii ainaf.’ 12 Ka tiit fa ranan bian et pah-pinan ia, re' Uisneno anfei naan je he tapeni' 'honis ma saok sanat. Suma arahaa ranan mese', es re' Nai' Yesus. Karu ka In fa te, ka tiit fa es re' nfee kit a'honis.” 13 Too mfaun atokos anbi naan nahinin nak, nai' Petrus ma nai' Yohanis nua sin too amonot, ka on fa askorat sin. Mes sin sanmakan, natuin sin nua sin na'uab ein mat-maat. Sin imsa' nahinin nak nua sin a'hakef mese ma 'naof mese nok Nai' Yesus. 14 Etun too mfaun sin mninu'-mninu', ka fefa' mese' fa; saa' nteni, atoni' re' nareok na'ko men-bua' naan nhaek nakeit nok nai' Petrus ma nai' Yohanis anbi naan. 15 Rari te, sin nreun Nai' Yesus In haef ein nua sin, nak, “Hi mpoi mtahan meu mone'.” Onaim, sin na'uab ein he namin ranan he namouf sin. 16 Sin nmaktaan ein nak, “Ba'e-benu' sin! Hit he tmoe' sin on mee? Natuin, too mfaun kota Yerusalem nahinin nak sin es re' nmoe' rais sanmakat ia. Hit he tpeen teik uab saa' antein, fin rasi ia natonon mat-maat? 17 Reko nneis, hit taim ranan henati' rasi ia ma'kuba' ai' ma'koro, ma kais natoon on anbi me-mee. Reko nneis, hit aka'tau sin nua sin, he sin kaisa' nanoni' anteni' rasi Nai' Yesus In Rana 'Honis. Karu sin ka natninan fa te, of sin na' nahinin na, oo!” 18 Rari te, sin no'en nataam sin ma nak neu sin am nak, “Nati' kas-kais, oo! Ka nabei' fa he minoni' amteni' anmatoom nok Nai' Yesus!” 19 Mes nai' Petrus ma nai' Yohanis natahan am nak, “Bait sin ama', hi mitenab rek-reko. Mee es reko nneis? Tatuina' hi prent ii te, es re' reko nneis ii oo, ai' tatuina' prenat Uisneno? 20 Hai miit meik hai matam, ma hai mneen meik hai rukim are' kanan rasi namfau. Nansaa' am es hai bisa mimninu'? Hai ro he mitoon rasi naan!” 21 Mes, a'nakat-a'nakat re' naroitan rasi naan, anpenan anteni' sin. Oke te, nafeti' sin nua sin, fin sin ka nahini ntenin fa neu he nhukun sin neik ein rais saa'. Ma sin imsa' namtaun, kar-karu too mfaun sin antaisibun. Fin too mfaun sin nbo'is Uisneno In kanan, natuin atoin hae bua' naan nareok. 22 (Atoin ameen hae bua' naan, nameen nneis na'ko toon bo'-haa te, es na' in annao naan.)
Usif Yesus In too tafa' sin an'onen totin he sin kaisa' namtaun
23 Ma oras sin nafeitin nai' Petrus ma nai' Yohanis, sin nua sin anfanin ma nateef nok sin aok-bian sin. Oke te, nua sin natonan sin are' uaba' ma taras re' sin nneen ee na'ko a'nakat-a'nakat sin. 24 Anneen nararin on nana te, sin aok-bian sin nabuan nok neka' mese', ma an'oen ein am nak, “Koi Uisneno, Amo'et ma Apakaet neno-tunan ma pah-pinan nok in afan. 25 Afi ahunut, Ho Smana Kninu' npaek na'i nai' Daut anfain mafefa', he ntui nain rasi atoni' re' nraban Nai' Yesus, nak: Nai' Petrus sin an'oen ein ‘Atoni' na'ko uuf-uuf bian, nato'on natuin annenan uab anin; sin nrunan rafu'-rafu', ma nanaoba' rasi re' ka ma'u'u fa. 26 Usif-usif pah-pinan nabuan he sin nkeen Uisneno; ma a'nakat-a'nakat sin namin ranan he nraban Uisneno, ma Kristus re' Uisneno nruur naan Je na'ko afi unu'.’ 27 Namneo, rasi re' na'i nai' Daut antui naan je naan, njari nrair oras ia. Namneo, anbi kota ia, usif Herodes ma gubernor Pontius Pilatus nabuan nok hai atoni' mnais ein pah Isra'el, ma nok a'nakat-a'nakat na'ko pah bian. Sin arsin namin ranan he nraban Nai' Yesus, tuaf re' Uisneno, Ho mbeit maan Je ji. 28 Ma oras ia, hai mihiin namneo-namneo, nak are' sa'-saa' naan anmatoom nok Uisneno Ho romim, anmatoom nok saa' re' Ho mufeek maan je na'ko afi unu'. 29 Koi Usi' Ho miit! Oras ia, sin n'aka'tau kai. Es nana te, hai mtoit Ko Usi', amfee kai neek aherat, he hai mnao ma mitoon Rais Arekot antoom Nai' Yesus, henati' kais nok neek amtaus. 30 Hai mtoit Ko Aam, he mfee kai kuasat, he hai mireko' are' amenat sin. Ma hai mtoit ma'tani' msa' he hai mmoe' are' rais sanmakat huma'-huma' henati' sin nahinin nak kuasat naan in amneemni na'ko Atoin Amneot, es re' Nai' Yesus. Hai onen of na'tuuk ma na'paar on naan, Usi'!” 31 Ma oras sin n'oen ein on nana te, umi re' sin nabuan anbi naan, na'hasu'. Ma sin arsin annaben Smana Kninu' Uisneno antoom sin. Rari te, sin npoin ma natoon Rais Reko Uisneno nok mat-maat.
Nonot apirsait ein nmoin nabuan anbi suust am marinet
32 Ma are' nonot apirsait neu Nai' Yesus, sin neka' mese', ma nmanekan es nok es. Ka tiit fa apanit, fin sin nmabatin es nok es. Bare' mee re' tuaf es ini, anfee je he sin arsin npaek namnes-nesan. 33 Ma Usi' nfee In kuasat neu In haef ein, he natonan too mfaun ein, am nak, Usif Yesus anfeen anfain na'ko In a'maten. Natuin sin niit anrair neik sin maatk eini. Ma Usi' anfeen sin tetus-aomina'. 34-35 Anmui' tuaf anbi sin imsa', re' na'sosa' in afu, ai' in uum je. Ma in osan naan, in nnona' neu Usi' In haef ein. Ma sin anpaek sin he anbaab sekau re' anma'nuuk. Natuin rasi naan, es na' ka tiit fa akuran anbi sin. 36-37 Tareta' on re' nai' Yusuf. In re' ia, na'ko uuf nai' Lewi, ma in amneem ni na'ko puru Siprus. (Haef Uisneno sin anteek ee te nak ‘Barnabas’, re' neik hit uab ii te nak, ‘atoni' re' anha'tain nekaf tuaf bian’.) In nnao ma na'sosa' in afu piis es, rari te, in nnona' in osan neu haef Uisneno sin.
Nai' Ananias nok bi Safira nmaten, natuin sin he nsoba' Smana Kninu'
1 Mes anbi oras naan, anmui' atoin es amsa', in kaan ee, nai' Ananias. In fee je, kaan ee, bi Safira. Sin nua sin imsa' na'sosa' sin afu piis es. 2 Mes sin nua sin nma'akoran he na'koro' afu naan in osan bian. Oras na'sosa' nrair afu nana te, nai' Ananias annao natonan Usi' In haef ein, am nak, “Hai fe' mi'sosa' mrair hai afu piis es. Oras ia, hai he mfee in osan ok-oke' neu Uisneno.” Nai' Ananias annona' roit bian neu nai' Petrus 3 Ma nai' Petrus nakain ee mnak, “Hoe! Ananias! Ho ro bainesi' ko! Ho mmoe' on mee? Nansaa' am es ho mu'koro' afu naan in osan bian? Ho neek man names'ook, fin ho mutuina' niut reu'f ein sin A'naakt ee in a'romin. Ho mubrain he mputa-kriu Uisneno In Smana Kninu'! 4 Onai! Ho he mu'sosa' afu naan, ai' kah, nana et ho. Ai' karu ho mu'sosa' muraar je, ma ho mroim he mfee in osan oke', ai' kah, nana msa' et ho. Mes nansaa' am es ho mmoe' rasi naan? Ho he mupoi mansian ni, mes ka tiit fa es nabei' he napoi naan Uisneno!” 5 Anneen nai' Petrus in uaban nana te, nok askeken nai' Ananias antikoib, ma in maet nain oras naan. Are' too re' nneen rasi naan, namtaun maten. 6 Rari te, ri' munif sin fauk antaam neman, ma sin n'aum nai' Ananias in aon, ma neik je nnao he nsuub. 7 Ma of oni' tabu teun namuni te, nai' Ananias in fee je ntaam neem. In ka nahiin fa neu saa' na es re' nrair. 8 Onaim nai' Petrus nataan ee, mnak, “On mee, ain? Hi mi'sosa' afu naan, ma in osni es re' ia, goah aa, oo?” Ma in nataah, am nak, “Batuur, tua. In osni ro es re' naan.” 9 Rari te, nai' Petrus nakain ee, mnak, “Nansaa' am es ho mok ho 'naef ee mma'akor he msoba' Smana Kninu' Uisneno? Ho mkius! Tuaf-tuaf re' annao nsuub ho mone naan, fe' anfain neman. Kree' goes anteni' te, sin of anroi neik ho ta'um ma ansuub ee anbi ho moon je in abnapan.” 10 Nai' Petrus in na'uab on nana te, nok askeken, bifee naan ntikoib, ma nmaet nain. Ma oras anmuinf ein antaam anfanin te, sin niit bifee naan anmate nrair. Ma sin nroi neik bifee naan, ma nsuub ee nbi in moon je in abnapan. Bi Safira nmaet nok askeken 11 Rari te, apirsait ein neu Nai' Yesus, sin namtaun maten. Ma are' too mfaun re' nneen nai' Ananias ma bi Safira sin a'maet kein ate, sin namtaun amsa'.
Nai' Petrus sin nareko' too amenat namfau
12 Oras naan Nai' Yesus In haef ein anmo'en rais sanmakat namfau, ma too mfaun sin niitan. Haef ein sin ntaman fani-fani nbi Uim Onen Uuf Uisneno. Sin nabuan nok neka' mese' anbi Ropo Usif Soreman. 13 Oras naan, too mfaun sin anpures Usif Yesus In too apirsait ein. Mes neu sekau re' fe' ka npirsai fa Nai' Yesus te, in neek ne fe' na'oni' he ntaam nabua nok sin. 14 Mes too apirsait ein neu Nai' Yesus naan, na'baab 'ok piut na'ko oras neu oras, et bifee ma atoni'. 15 Oras naan, reka' atoin ein niit anrair nai' Petrus sin anmo'en rais sanmakat huma'-huma', tuaf-tuaf neik ein amenat anbin 'nahek, ma natupa' sin anbin raan ee ninin. Fin sin natenab am nak, “Kar-karu nai' Petrus ma nai' Yohanis ankonon natuin ranan ia, ma sin haof keni antoom ahaa amenat nana te, amenat sin bisa narekon.” 16 Anbi oras naan, atoni' ma bifee nnao neman, ka natfeek niit af. Sin neman na'ko kuan-kuan re' anhaumaak kota Yerusalem in ninin. Sin nroi neik amenat sin, ma haef Uisneno sin nareko' sin ok-oke'. Sin imsa' neik amaunut re' antoman niut re'uf, ma haef Uisneno sin anriu' napoitan niut re'uf na'ko sin ok-oke'.
Usif Yesus In haef ein napenin ha'mu'it
17 Oras naan, natuin Usif Yesus In haef ein sin meup goe, es na' A'nak Ko'u pirsait Yahudi nok in haef-nimaf sin na'ko pukan Saduki, sin nato'on. 18 Es nana te, sin naon ma nheek haef Usif Yesus sin, ma nataam sin anbin bui. 19 Mes mabe' naan, ameput neno-tunan es, neem anbi bui naan, ma nasoitan bui je enon. Ma in nok sin anpoin neu manuan. Ma in na'uab amnak, 20 “Oras ia, hi mnao nai meu Uim Onen Uuf Uisneno. Mnao mitonan are' too mfaun sin anbi naan, he sin natuin Usi' In Rana' 'Honis fe'u ia.” 21 Kik-kiuk ana' te, sin natuina' prenat ameput Uisneno na'ko neno-tunan naan. Ma sin ntaman neu Uim Onen Uuf in a'fe'on, ma sin nanoni' too mfaun sin anbi naan. Ameput neno-tunan napoitan nai' Petrus sin na'ko bui Ka 'roo fa te, A'nak Ko'u pirsait Yahudi neem nok in aok-bian sin ma nok kaes ko'u-kaes ko'u na'ko pah Isra'el. Sin neem nabuan he ntae rais pirsait anmatoom nok haef Usif Yesus sin. Ma sin reun no'en nai' Petrus sin na'ko bui, fin sin he n'aa' rasi naan. 22 Mes oras sin ntean buu je te, nai' Petrus sin ka etan fa naan. Es nana te, atoin apaot ein annaon ma natonan a'nakat-a'nakat anbi bare buat naan. 23 Sin natonan nak, “In ama' sin kais mitoo'. Oras hai iim amtea buu je te, hai miit in eon ein ma'reto' mates. Ma apaot sin anhaken anbi naan. Mes oras hai mreun sin he nfei eno' ma hai mtaam. He'e! Hai ka miit fa sa'-saa'.” 24 Onaim, a'nakat-a'nakat rais pirsait sin, ma a'nak paot Uim Onen Uuf Uisneno, sin arsin ntaka'naan ein, ma ka fefa' mese' fa, fin sin neek kein namnekun. 25 Rari te, atoin es neem ma natonan sin am nak, “In ama' sin, amneen fe'! Tuaf ein re' hi mhukun sin naan, sin etan mone' ia! Oras ia, sin nhaken ma nanoni' too mfaun et Uim Onen Uuf ia!” 26 Ma oras sin nnenan on nana te, a'nak paot Uim Onen Uuf, anreek in haef-nimaf sin he nnaon ma nheke nteni' nai' Petrus nok in aok-bian sin. Mes in haef-nimaf sin namtaun, natuin too namfau anneen nai' Petrus na'uaba'. Sin natenab, kais-kaisa' too mfaun sin nato'on ma npoir apaot sin neikin fatu. Es nana te, oras sin nheke nteni' nai' Petrus sin, sin ka nabe'in fa he na'seke' sin. 27 Rari te, sin neik nai' Petrus sin neu bare re' npaak je he nafekan rasi. Ma A'nak Ko' goe nmurai nataan sin, 28 nak, “Hai mtaar mirair ki he kaisa' hi minoni' too gui nmatoom nok atoni' re' he nmoe' rana' 'honis fe'u, ai' kah? Hi ro mi'nak-faut! Natuin hi ka mitniin fa hai prenat, mes hi mituin kim hi roim eni kuum! Hi mnao ma minoni' ka misnaas af anfuun am nateef kota Yerusalem ia. Hi on he misaeba' kai ma'fena', hi mak hai es re' amreon tuaf am na'maet Nai' Yesus.” 29 Rari te, nai' Petrus anhaek ma nfain mafefa' neu haef ein ok-oke'. In nataah am, nak, “In ama' ar-ar ki! Karu anmui' mansian nanaoba' prenat re' nasuir ma ka natai fa nok Uisneno In romin, hai ka mituina' fa, tua. Mes hai ro he mituin ahaa Uisneno In aprenat! 30 Naa, atoni' re' anfei kai ranan neu monit fe'u naan, es re' Nai Yesus. In es re' atoni' re' hi mkuus-mi'peit Ee anbi hau nehe. Na'ko afi unu', hit na'i sin anromin he n'oen ein neu Uisneno. Uisneno re' naan, es re' namonib nafani' Nai' Yesus na'ko In a'maten! 31 Oras ia, Uisneno nait na'ratan Nai' Yesus, he nfain on In a'niman a'ne'o. Ma Nai' Yesus annaa' kuasat on uis ko' goes. In nfei ranan, tar mansian ii nafeitn on na'ko sin sanat-sanat sin. In nfee kit ranan, neu too Isra'el, he tasnaas ta'ko hit sanat-sanat sin. Natuin rasi nana te, Uisneno In neekn Ee na' nses'uum ma nmuin en, tar antea In ka nso'i ntein fa too Isra'el hit saant eni. 32 Natuin hit tiit teik hit matak batuur tak Nai' Yesus anmate nrair, mes In nmoni nfain. Oras ia, Uisneno In Smana Kninu' amsa' natoon rasi ia neu bifee-atoni' re' natuina' Nai' Yesus In Rana' 'Honis.” 33 Ma oras sin nneen narair nai' Petrus in uab ein on nana te, too mfaun re' nokan anbi bare aa' rasi naan, anmurai ntaisibun, tar antea arakre'o, bait sin he na'maet niis haef Uisneno sin. 34 Ma nbi naan, anmui' atoin es re' nok antook, he n'aa' rasi naan. In kaan ee, nai' Gamariar. Too mfaun sin anhormat ee, natuin in re' ia tunggur ahinit na'ko pukan Farisi. Oras nai' Petrus na'uab anrair, ma sin he na'maat je te, nai' Gamariar anfeen anhaek ma anreek sin he neik nai' Petrus nok in aok-bian sin anpoin ntaahn ein. 35 Ma oras sin anpoin, in na'uab neu a'nakat-a'nakat anbi naan mnak, Gamariar “Aok-bian arkit! Hit ro he tpanat! Kais-kaisa' hit tmanaap he tmoe' re'uf neu sin. Hit ro he tatenab ta rek-reko' fe'. 36 Hi mimnau atoin es re' in kaan ee, nai' Teudas. In nmate 'roo reo' fen. Mes oras in fe' anmoin, in nait in tuan ii nak in atoin ko'u, tar antea of oni' tuaf natun haa natuin ee. Ma oras atoin ein na'maet je, in haef-nimaf sin naen namnekon. Tar oras ia, in tuaf-tuaf re' natuin ee, ka tiit fa sin humak-matak! 37 Ma hi msa' ro he mimnau rasi es anteni'. Oras naan, ana a'prenat sin nanaoba' tui kanaf. Sin soi' too anbi pah es ok-oke'. Atoin es in kaan ee, nai' Yudas, na'ko propinsi Galilea. Too mfaun ii msa' natuin ee. Mes sin nroor niis ne msa'. Es nana te, atuina'-atuina' na'ko nai' Yudas naen namnekon, tar ka mniit ein fa jen. 38 Onaim, oras ia au aok-bian ki, au utenab ate, onai: kaisa' mi'maet sin. Mifetin sin. Natuin karu sin nonik ma sin mo'ek naan na'ko mansian, tebes of namneuk. 39 Mes karu batuur nak noni' ia in amneem ni na'ko Uisneno, hi of ka mibei' fa he mimouf sin. Es nana te, hi mpanat fe'. Natuin kais-kaisa' hi mraban Uisneno.” Ma oras sin anneen rasi nana te, sin natuina' nai' Gamariar in fainekat. 40 Rari te, sin no'en nataam haef ein. Ma sin nreek atoni' he nbeos sin. Oke te, sin ntaar antein sin he kaisa' anteek anteni' Nai' Yesus In kanan. Rari te, sin nafetin haef ein naan. 41 Oke te, haef ein naan annao npoi nasaitan bare naan. Sin natenab am nak, maut he sin kaan keni namre'un natuin sin nok Nai Yesus, mes sin nmarinen, natuin Uisneno nahiin nak sin nabei' ein he nasaah ha'mu'it on naan. Etun sin neek eni anmariin anmaten. 42 Onaim, neno-neno te, sin nnaon nanoni' bifee-atoni' sin am nak, “Atoni' re' Uisneno nruur naan Je naan, es re' Nai' Yesus.” Ma sin natoon rasi naan piut-piut anbi umi mese'-mese', ma anbi Uim Onen Uuf.
Sin npiir tuaf hiut he npairoir too ana'
1 Oras naan, atuina'-atuina' Usif Yesus na'baab 'ok tar antea namfaun ntenin. Mes sin na'ko uaba' pukan nua. Bian atoni' Yahudi re' na'uab ein neik uab Aram. Ma bian anteni' atoni' Yahudi re' na'uab ein neik uab Yunani. Namuni te, raas jes anboor anbi pukan uab nua re' naan sin atnana'. Pukan re' neik uab Yunani sin nasurin akre'o nok pukan re' neik uab Aram. Sin nak, “Ia ka batuur af! Karu hi mbati mnahat neno-neno te, hi kaisa' ampaek neek ao-biaf. Natuin hai baun eni ka napein fa sin sapaak eni.” 2 Natuin rasi naan, es na' haef ein, tuaf bo'es am nua, no'en nabuaba' nonot apirsait Usif Yesus. Ma sin na'uab ein am, nak, “Aok-bian ki ok-oke'! Hai bisa misnasab barab bukae neu ki, mes nana msa' ka nmatoom fa neu kit. Natuin hai ro he minaoba' Rais Reko Uisneno piut-piut. 3 Es nana te, hai teenbi onai. Reko nneis, hi mpiir man tuaf hiut na'ko ki. Hi maim es re' tuaf re' too mfau ni anhormaat ee, ma in nahiin in tuan, in nahiin rasi mfaun ma neek ma'nura', ma Smana Kninu' Uisneno an'ator in a'monin. Karu hi mpiir man tuaf ein on re' nana te, hai mait sin he n'urus rasi mnaaht am amninut. 4 Nok rasi nana te, na' hai mipein mainuan he m'onen ma minoni' Uisneno In Kabin ma Prenat.” 5 Ma sin arsin anroim natuina' nai' Petrus in uaban. Sin npiir tuaf hiut. Es in kaan ee, nai' Stefanus. In npirsai batur-batuur neu Usif Yesus, ma Uisneno In Smana Kniun Ee anpaak je. In aok-bian sin es re': nai' Felipus, nai' Prokorus, nai' Nikanor, nai' Timon, nai' Parmenas, ma nai' Nikoras re' antaam nok anbi pirsait Yahudi, mes in ka atoni' Yahudi fa. In neem na'ko kota Antiokia. 6 Rari te, sin neik tuaf hiut re' sin npiir sin naan neu Usif Yesus In haef ein. Ma haef ein antao sin a'niim keni, ma an'onen sin he nfanin ameput neu barab-roitan rasi mnaaht am amninut. Henati' too ana' sin napenin batis namnes-nesan. 7 Es nana te, Kabin ma Prenat Uisneno matona' ma mateka' ansun-suun bare. Ma too re' natuina' Usif Yesus In Rana 'Honis naan, na'baab ok piut-piut anbi Yerusalem. On nana msa', a'naak rais pirsait Yahudi bian namfau re' antaam nok too atuina' Usif Yesus.
Sin nheek nai' Stefanus
8 Oras naan, Uisneno nfee tetus ko'u neu nai' Stefanus. In imsa' nfee kuasat he nai' Stefanus anmoe' rais sanmakat huma'-huma' henati' too mfaun sin niit nok sin matak. 9 Anbi naan, anmui' atoni' Yahudi fauk re' neman na'ko bare 'roo. Sin na'kon kota Kirene, kota Areksandria, propinsi Kirikia, ma propinsi Asia. Nahunut sin nrarin ate neu atoni' bian, mes namuni te, uisf ein nafetin sin. Rarit sin nabuan anbi Yerusalem. Nati' te, sin ntaman anbi uim onen re' sin nmoe' kuk ee. Uim onen naan, sin nteek ee te, nak, “Fetin na'ko Ate.” Oras sin nneen narair nai' Stefanus in uaban, sin ka nroom je fa. Es nana te, sin nmurai nmatoen nok ne. 10 Mes nai' Stefanus in mahiin ii kaheen, natuin in na'uab neik kuasat na'ko Smana Kninu' Uisneno. Es nana te, sin ka nabei' je fa. 11 Es nana te, sin namin raan re'uf. Onaim, sin naon baen atoni' bian, he na'uab napoin am nak, “Hai mneen atoni' ia na'uab na're'uf nai' Musa nok Uisneno!” 12 Sin nhuita' too mfaun, tar antea atoni-mnais harat Yahudi sin ma tunggur agama sin nneen nokan. Rarit sin nato'on. Onaim sin nnaon nheer nai' Stefanus, ma neik je nnao neu Bare Feek Rasi Pirsait. 13 Sin saksii nggui naan, nsaksii uab poe neu nai' Stefanus, am nak, “Atoni' ia, na'uab na're'uf Uim Onen Uuf piut-piut. Ma in imsa' na'uab na're'uf prenat Uisneno re' Na'i nai' Musa nasanut sin neman neu kit. 14 Hai msa' ate, amneen in na'uab am nak, Nai' Yesus, atoni' Nasaret naan, of naseer Uim Onen Uuf ia. Ma In imsa' of annoes ma ansenu' nain hit atoran harat sin ok-oke', re' Na'i nai' Musa nasanut sin neman neu kit!” 15 Rari te, are' too mfaun re' ntook nokan anbi Bare Feek Rasi Pirsait naan, sin nkius na'tesan neu nai' Stefanus, natuin in human namaasb on re' ameput Uisneno na'ko neno-tunan.
Nai' Stefanus namneob on anbi Bare Feek Rasi Pirsait
1 Rari te, A'nak Ko'u pirsait Yahudi nataan nai' Stefanus, nak, “Rasi-rasi re' sin nteek sin naan, batuur aa, oo, ai' kah?” Nai' Stefanus na'uab nok kaes ko'u sin anbi Bare Feek Rasi Pirsait Atoni' Yahudi 2-3 Nai' Stefanus nataah am nak, “In ama ma aok-bian arki! Hi mneen kau fe'. Afi unu' naan, hit na'i nai' Abraham ka npoi nnao fa fe' na'ko in kua mnasi'. Mes Uisneno Akuasat naan, nakriir On neu ne. Uisneno napreent ee mnak, ‘Amnao musaitan ho pah, ma ho nonot-asar sin. Ho mnao nai, meu pah re' of Au 'ruur aan je neu ko!’ Rarit na' in npoi na'ko pah Mesopotamia, ma nanani' bare neu kota Haran. 4 Onaim na'i nai' Abraham annao nasaitan atoni' Kasdim sin pah, ma nanani' neu kota Haran. Ma oras in aam hoin fe nmaet, Uisneno neik je ntaam neem neu Kana'an, es re' bare ia re' sin ama' ma aok-bian arkit tatua goe oras ia. 5 Oras naan, Uisneno ka nboo' ma nbait niit fa afu rakat mese', he nfain na'i nai' Abraham in pusaak. Mes Uisneno nba'an nain, he nfee afu ia neu in sufan-ka'un sin he nfain sin auf pusaak. Maski oras naan, in ka nmui' fa an-honi' mese' msa'. 6 Mes Uisneno na'uab neu ne, mnak, ‘Ho sufam ho ka'uf sin of annao natuan anbi atoni' bian sin pah. Ma atoni' abitan bare naan, of anha'mui' sin, ma na'aet sin ka kre'-re'o fa, tar toon natun haa namsoup. 7 Ma toon natun haa namsopu te, Au of a'hukun pah re' nmoe' ho sufa'-ka'uf anfain sin ate. Onaim, ho sufa'-ka'uf sin of annao nasaitan bare naan, ma antaam neman neu bare ia, he n'onen ma nasaeb ein makasi neu Kau.’ 8 Ma oras In na'uab narari te, In nfuut rais manba'an naan neik herit, re' nfain tanar nak, na'i nai' Abraham sin anfanin on Uisneno In too. Es nana te, oras nai' Abraham in anah nai' Isak fe' nmoin neno faun, in aamf ee anmoe' maherit neu ne. Ma namuni te, nai' Isak anheir in anah nai' Yakop. Rari te, nai Yakop anheir neu in an-mone bo'es am nua, oras es-esat fe' anmoin naan neno faun. Sin arsin es re' anfanin on be'i-na'i neu hit atoni' Yahudi. 9 Hit be'i-na'i sin nsaken sin orif nai' Yusuf, tar sin na'sosa' npoirn ee, ma in n'aet noon anbi pah Masir. Mes Uisneno nok ne piut. 10 Es nana te, Uisneno nafeitn ee na'ko in susat sin ok-oke'. Uisneno nfee ne ronef ahinit he nahiin rasi namfau, tar antea usif pah Masir anneek niis ne, ma nait je nfain gubernor neu pah Masir anfuun am nateef. Ma in imsa' na'naak anbi usif pah Masir in sonaf. 11 Rari te oras amnahas ntaman pah Masir ma Kana'an. Amnahas naan manenu', tar antea too mfaun sin ansuus ma nana'reen anbi me-mee. Es nana te, anbi oras naan, hit be'i-na'i sin imsa' ka napenin fa mnaah sa'-saa'. 12 Mes na'i nai' Yakop anneen hanaf nak anmu'i mnahat et pah Masir. Es nana te, in nreun in aanh ein, es re' hit be'i-na'i sin, he nnaon neu pah Masir he nsosan mnahat. 13 Ansosa nrarin on nana te, sin nfanin. Ma oras sin mnaaht ein naan oke' te, nai' Yakop anreek sin he nfani ntenin ma nsosan mnahat on pah Masir. Ha'e re' ia, nai' Yusuf na' natoon in tuan ii, nak in es re' nai' Yusuf, re' sin orif. Ma namuni te, nai' Yusuf nakrira' in nonot-asar sin neu usif pah Masir. 14 Nai' Yusuf ntoit henati' in amaf ma in orif-tataf sin neem natuan anbi Masir. Sin amnemat neu pah Masir naan, ok-oke' tuaf bo'-hitu mniim. 15 Es nana te, nai' Yakop nanani' bare neu pah Masir, tar antea hit be'i-na'i sin nmate nbin naan. 16 Ma toon bani' toon ate, sin neik nafani' be'i-na'i sin nuif eni neu kuan Sikem et pah Kana'an. Sin nsuub nuif ein naan anbi nopu re' nahunu te na'i nai' Abraham ansoos ee na'ko nai' Hemor in sufan.
Nai' Stefanus nataah rasi re' nmatoom nok nai' Musa ma atoni' re' ka nroim fa he natniin ee
17 Rasin re' ia, njair natuin Uisneno anba'an narair nak In of anfee auf pusaak neu nai' Abraham nbi bare naan. Reka' in ors ii nhaumaak henati' Uisneno nanokab In rais manba'an nana te, too Yahudi sin mfaun ii kaheen anbi pah Masir. 18 Oras naan, anmui' uis fe' goes annaa' parenat anbi pah Masir. In ka nahiin fa nai' Yusuf in retna ma 'naon. 19 Usif naan na'aet hit be'i-na'i sin. In mapuutn ii kaheen neu hit be'i-na'i sin. In na'seke' sin he nasaitan ri'ana kruu'f ein, he sin nmaten kuuk. Usif pah Masir in an-feto es nait nai' Musa na'ko noe 20 Nateef oras naan, na'i nai' Musa in ainf ii nahoins ee. In aoni kmoer fah! In ainaf ma in amaf sin ka natniin fa uisf ee in aprenat. Sin npairoir na'koro' ri'ana' naan anbi sin umi, tar antea in funan teun. 21 Ma oras sin ka bisa na'koro' naan fa ri'ana' naan anteni' te, sin npoir ne. Onaim usif pah Masir in aan fet goes, es na' niit ri'ana' naan. In nait ri'ana' naan ma npairoor je nahuum on re' in aan honi'. 22 Es nana te, atoni' pah Masir nanoni' are' sin mahiin keni oke' neu nai' Musa, ma in nfain atoin ahinet. In nahiin et uaba' ma mepu. 23 Ma oras in moin naan toon bo'-haa, nai' Musa nnao naim he nahiin in atoni' Isra'el sin. 24 Oras in npoi nnao te, in niit atoni Masir es antuuf atoin Isra'el es. In nturun atoni' Isra'el naan, ma in nroor niis atoin Masir naan. 25 Nai' Musa natenab nak ai' in aok-bian sin nahinin am nak, Uisneno ansoun ee, he nafetin sin na'ko sin susat. Mes sin fe' ka nahiin fa rasi naan. 26 Noka' on nana te, nai' Musa anpoi nteni' he nnao nkius atoni' Isra'el sin. Ma in niit atoni' nua nmabanan. Ma in he nsoba' he narame' sin am nak, “Hoe! Hi nua ki mma'ori-tatan. Mes nansaa' am es hi nua ki mmatuuf?” 27 Mes atoni' re' nbaan in aon-bian naan antitar na'roob na'i nai' Musa, mnak, ‘Sekau es nait ko he mrari 'nakaf neu kai! Ma sekau es anruur ko he mfain afeek rasi neu kai? 28 Ho mak oni' ho bisa mroor miis kau, on re' afi ho mroor miis atoin Masir naan?’ 29 Nai' Musa anneen anrair on nana te, in nfeen naen nasaitan pah Masir. In naen ma natua anbi atoni' Midian sin pah. In matsao nbi naan, ma nahoni' ri' an-mone nua. Nai' Musa nok hau mnotu' re' ka nputuf 30 Toon bo'-haa namsopu te, nai' Musa annao nbi baar jes re' ka nmui' fa oe, anhaumaak nok 'to'ef es, re' sin teek ee te nak To'ef Sinai. Anbi bare naan, ameput Uisneno na'ko neno-tunan, neem nateef nok nai' Musa, anbi ai re' anpiin anbi hau aan es. Hau naan anpiin, mes ka nputuf. 31 Niit ee on nana te, nai' Musa nsanmaak. Ma in nnao nhaumaak he nkius niit saa' re' nrari nbi naan. Nok askeken, in nneen Usi' na'uab na'ko ai naan in nanan, nak, 32 ‘Au re' ia, ho be'i-na'i sin Uisneno; es re' na'i nai' Abraham, na'i nai' Isak, na'i nai' Yakop sin Uisneno.’ Anneen hanaf nana te, na'i nai' Musa namtau nmaet, tar antea in huumn ii nmouf, ma in ka nabrain fa he nait in matan he nkius ai pina' naan. 33 Rari te, Uisneno na'uab anteni nak, ‘Hoe, Musa! Ho mhaek et afu kninu'. Mnui main ho 'pein haef ein naan! 34 Kaisa' muteenb am mak Au 'nikan 'ain Au too Isra'el abitan Masir. Kahaf! Au fe' umnau sin. Au uhiin sin nana'renat. Au 'neen urair sin haan sakoit antotin turun ma babat. Oras ia, Au 'saun ma 'nao he ufetin sin. Uum fe'! Au he 'sonu ko amfain meu pah Masir.’ 35 Onaim, Uisneno re' nakriir On anbi ai naan, naprenat nai' Musa he nfain neu pah Masir. Uisneno nruur ma nreek ee, he nafetin too Isra'el na'ko nana'renat. Nai' Musa ia, es re' afi unu' nataan ee nak, ‘Sekau es nait ko mfain a'nakat neu kai?’ Oras ia, Usi' neikn on es nait ii! 36 Es nana te, nai' Musa nfain neu pah Masir. Anbi naan, in nmoe' rais sanmakat huma'-huma'. Rari te, in napoitan too Isra'el sin na'ko pah Masir. In neik sin nnaon natuin Tais Me'e, ma sin nnao natuin pah ruman tar antea toon bo'-haa. 37 Nai' Musa neik noon natonan too Isra'el, nak, ‘Uisneno of nait naan tuaf es na'ko hi tnanam, he nrair In mafefa' kninu', namnees on re' In nait kau ia.’ 38 Na'i nai' Musa neik hit too Isra'el sin anbi baer ruman. In kuun es anfain nete-ranan neu hit be'i-na'i nok ameput Uisneno na'ko neno-tunan. Ameput nana, es re' nasanut Uisneno In Kabin ma Prenat neu nai' Musa, re' natoon kit rana' 'honis amneot. Kabin ma Prenat Uisneno naan, es re' nasanut sin anbi 'To'ef Sinai. 39 Maski on naan amsa' ate, hit be'i-na'i sin ka natniin fa nai' Musa. Sin npenan naan je, ma sin he nfanin kuuk neu pah Masir. 40 Rari te, sin nnao nkopo' nai' Harun nak, ‘Ho ori' nai' Musa nok kit tpoi ta'ko pah Masir. Mes oras ia, hai ka mihiin fa neu in et kona' mee! Es nana te, hai mtoit ko he mmoe' baer fua-mahuum es neu kai. Maut he in neik noon es re' nfain mat-ranan neu kai.’ 41 Rari te, sin mo'en baer fua-mahuma' naan. In huumn ii on re' bijae aan es. Oke te, sin nroron mu'it ma nafuat ee neu ne. Ma sin nfeest ein nok neek marinat ko'u, natuin sin neek keni nmarinan nok bare' re' sin nmoe' je neik sin a'niim keni kuuk. 42 Oras ankius niit mo'et nana te, Uisneno ankoit sin. Onaim sin nmurai nfua bare' anbi neng goe tnanan, es re' manas, funan, ma kfuun-akfuun. Mes Uisneno nparakan sin on re' naan. Nana namnees nok saa' re' afi unu' mafefa' kninu' Uisneno sin antui na'ko un-unu', nak, ‘Hoe! Hi atoni' pah Isra'el! Toon bo'-haa, hi mnao mfuun baer ruman, onaim hi mroor mu'it he mfua Kau oo, ai' hi mfua sekau? 43 Hi ka mbo'is Kau fa! Neno-neno hi suma amfua hi baer fua-mahuma' sin. Hi mroim he mpoi-mtaam anbi pah tuaf Morok in uim fuat. Hi mroim he mfua pah tuaf na'ko kfuun es, re' anteek ee te, nak Refan. Onaim, hi mfua piut, saa' re' hi mmoo' je meik hi 'nimam! Es nana te, Au of aiti 'porin ki mi'roroo meu Baber in aon-bian antein.’”
Nai' Stefanus nataah rasi re' nmatoom nok Uim Onen Uuf
44 Nai' Stefanus antuut ma ntaur in uaban naan, nak. “Uisneno naruru' neu na'i nai' Musa 'tope na'ko uim oen es. Onaim nai' Musa sin nahake' Tenas Onen es, re' sin moo' je na'ko pasu ma tais, natuina' masaf naan. Onaim too Isra'el sin neman ma n'oen ein neu Uisneno anbi Tenas naan. Karu sin nanani' bare, sin pukai Tenas Onen naan, sin nfuut goe, ma sin nroe neik je neu bare bian. Anbi naan, sin nahake' nteni' Tenas naan. Tenas Onen 45 Oras nai' Yosua sin nmakenan suuk a'roo nok uuf-uuf bian anbi pah Kana'an te, Uisneno nriu' napoitan uuf-uuf sin. Rari te, In nbait pah naan neu hit be'i-na'i sin. Oras sin ntaam nasiik pah naan, sin neik Tenas Onen nana msa'. Tenas naan anhaek nabaar tar antea usif nai' Daut annaa' parenat. 46 Usif nai' Daut an'onen neu Uisneno, on re' hit na'i nai' Yakop amsa' an'onen neu Ne. Ma nai' Daut nhariin Uisneno In nekan, es na' Usi' anfee ne tetus ma ao-mina'. Onaim, in ntoit Uisneno he in es nafena' Uim Onen Uuf fe'u. 47 Mes namuni te, nai' Daut in anah nai' Soreman es re' nafena' Uim Onen Uuf naan. 48 Mes hit tahiin tak Uisneno ka natua fa anbi umi re' mansian ii anmo'e, on re' mafefa' kninu' Uisneno es antui nahuun ee, nak, 49 ‘Neno-tunan naan, anfain Au 'toko prenat. Ma pah-pinan naan, anfain Au 'teer haef. Hi he mmoe' umi huma' mee, henati' Au bisa utua nbi naan? Ka neu he njair fa! 50 Fin Au es na' 'moe' neno-tunan ma pah-pinan, nok in afni oke'!’”
Nai' Stefanus na'kekat a'nakat ein nak sin ka nahiin fa Usi' In Atoni Kninu'
51 Rari te, nai' Stefanus antaru ntein in uaban. In naskara' sin am nak, “Batuur, hi ro 'nak-fatung ki! Hi on re' tuaf re' ka nahiin niit fa Uisneno, ma hi ro ka mitniin Ee fa. Hi mraban Uisneno, on re' be'i-na'i sin ankoit Je! Es oras ia, hi he mraban amtein Smana Kninu' Uisneno, oo? 52 Hi be'i-na'i sin nasusab niis are' mafefa' kninu' Uisneno. Hi mitoon miit kau, mafefa' kninu' mee, es re' ka napein fa ha'mu'it na'ko sin? Ka tiit fa fe', ai' kah! Un-unu' mafefa' kninu' Uisneno sin natoon nanin nak Uisneno of ansonu' In Atoni Kninu'. Mes hi be'i-na'i sin anroor niis Usi' In mafefa' kninu' sin. Tar antea hi msa' mpaek tua-'teta' he nroor niis Usi' In Atoni Kninu'. 53 Ameput Uisneno na'ko neno-tunan sin imsa', es re' neik are' atoran harat re' Uisneno anroim he nfee sin neu kit, mes hi ka mfiroir sin fa.”
Sin npoir niis nai' Stefanus
54 Oras sin re' nokan tokon anbi bare feek rasi naan, anneen nai' Stefanus in uab ein naan, sin nahiin nanin nak in nasaan sin. Es nana te, sin neek ein namenan ma neik-neuk nisik. 55 Mes nai' Stefanus re' Smana Kninu' Uisneno ntoom ee, nait matan ma nbaiseun neu neng goe tunan. Nbi naan, in niit Uisneno In masan arekon nomes-mese', ma Usif Yesus anhaek anbi Uisneno In abnapan a'ne'u, anbi baer amasat naan. 56 Ma nai' Stefanus na'uab am nak, “Onai, sin aam ein! Au iit neno-tunan natfe'i, ma Aan Mansian anhaek et baer amasat, et Uisneno In a'niman a'ne'u.” 57 Ma oras sin nneen on nana te, aprikas rais ne nkeeh sin ruik keni. Oke te, sin nakain ee nok ma'tani' he nai' Stefanus kais na'uaba' nteni'. Ma sin fuat ok bua'-bua' he n'usa' niis ne. 58 Ma sin nheer anfonat nai' Stefanus ma neik je npoi na'ko kota naan. Ma nsaksii ngguin sin anpuu' sin baru mnaun kotif, ma nana'at sin anbi atoin muinf es. In kaan ee, nai' Saulus, in es re' nfua-ruut sin. Onaim, sin npoir nai' Stefanus neikin fatu. Sin npoir niis nai' Stefanus 59 Ma oras sin npoir nai' Stefanus, in nhunun naher-heer nak, “Koi, Usi' Yesus! Au oras nhaumak-maken. Amtoup kau nai!” 60 Rari te, in nri'-tuu ma nhunun nteni' naher-heer, nak, “Koi, Aam! Kaisa' muroiba' sanat ia neu sin!” Rari te, in asnaas ni natfeek, ma in nmaet. Nai' Saulus nok amsa' nbi bare naan, ma in nromi msa' he sin nroor niis nai' Stefanus.
1 Nai' Saulus nha'mui' atuina' Usif Yesus 2 Oras nai' Stefanus anmaet, tuaf bian re' nneek Uisneno, sin nnaon nait in ta'un, ma neik je he nsuub. Sin nkaen nme'mee' jok. Na'ko oras naan, atoni' sin nha'mui' atuina' Usif Yesus anbi kota Yerusalem, tar antea sin susa nmaten. Ma sin naen anbaits ok nbi propinsi Yudea ma propinsi Samaria. Sin arsin naenan, mes haef Usif Yesus sin es re' nabaran anbi Yerusalem. 3 Nai' Saulus naim ranan piut he nareu' pukan apirsait neu Usif Yesus. In naim sin anbi me-mee. In npoi-ntaam umi he naim sin. In nheek et bifee ma atoni', ma nataam sin anbin bui. Sin nheek et bifee ma atoni', ma he nataam sin anbin bui
Nai' Felipus nareta' Usif Yesus In Rais Reko neu abitan propinsi Samaria
4 Maski sin nasusab nonot apirsait neu Usif Yesus tar antea sin naenan sik-sakn ok, mes sin ka nasnasan fa he nsaksii Rais Reko Usif Yesus neu sekau-sekau et bare me-mee. 5 Onre' oras naan, nai' Felipus nnao nbi kota es et propinsi Samaria, ma natonan sin neu Atoni' re' Uisneno nruur ma nreek naan Je na'ko unu', es re' Nai' Yesus. 6 Oras too mfaun sin niit rais sanmakat re' in nmo'e, sin nabuan ma natniin rek-reko ntoom saa' re' in na'uaba'. 7 Tareta' te, are' ameen niut re'uf sin nbin naan amsa'. Ma niut re'uf sin npoi nasaitan bifee-atoni' sin nok haan hunun ko'u. Are' amen-bua' ma ameen hae hera' sin nareok nanin oras naan. 8 Es nana te, abitan kota naan anmarinan nmaten. 9 Anbi kota naan, anmui' atoin ahiint es, in kaan ee, nai' Simon. Nahunut in npaek in reu' raut ein naan neu abitan Samaria. In na'naeb in tuan, ma na'uab am nak, “Sekau on au!” 10-11 Onaim, ri'ana ai' atoin ko'u, bifee ai atoni' anbi kota naan anteek in kaan ee piut, nak, “Airoo! Atoni' ia, ma'tain besi! Sa'-saa' re' in nmoe' sin, neman na'ko Uisneno In kuasat!” Natuin are' in re'un re' naan, es nana te, sin npaak je na'ko unu'. 12 Mes oras ia, sin nnenan nai' Felipus nanoni' sin antoom Uisneno In aprenat. In imsa' natonan sin ranan he bisa sin nrarin nonot apirsait re' Uisneno In tuaf ein, npaek Usif Yesus In kanan. Oras sin nneen nararin, too mfaun npirsain, ma sin ntaam Usi' In nonot-asar. Bifee-atoni' ntaman on naan. Es nana te, nasrain sin. 13 Nai' Simon amsa' anpirsai ma ntaam Usif Yesus Inin. Onaim sin nasraan je. Rari te, in nao nok nai' Felipus anbi me-mee. Oras in niit rais sanmaakt ein re' nai' Felipus anmoe' sin, in nki'un ma, nak, “Hoe! Re' ia, ro ma'tani'!” 14 Oras naan, haef Uisneno re' abitan Yerusalem annenan nak, abitan propinsi Samaria sin npirsain nrarin neu Rais Reko Uisneno. Onaim sin nsonu' nai' Petrus ma nai' Yohanis he nnaon neu bare naan. 15-17 Oras sin nua sin antean bare naan, na' sin nahinin nak, apirsait ein re' naan fe' ka ntoupun fa Smana Kninu' Uisneno. Natuin sin suma nasranin neik Usif Yesus In kanan. Rarit nai' Petrus nok nai' Yohanis antao sin a'niimk ein anbi sin, ma sin n'onen ntotin henati' abitan Samaria msa' napein Smana Kninu' Uisneno. Ma sin napein nanin Smana Kninu' naan. 18 Oras naan, nai' Simon niit atoin nua ein naan antao sin a'niimk ein anbi apirsait sin, onaim sin napein Smana Kninu' Uisneno. Rarit nai' Simon annona' roit neu nai' Petrus ma nai' Yohanis, ma in ntoti mnak, 19 “Hoe! In aam ein! Hi mfee kau kuasat naan amsa'. Henati' oras au 'tao au 'nimak neu sekau-sekau te, maut he sin imsa' napenin Smana Kninu' Uisneno.” 20 Mes nai' Petrus naskaar ee mnak, “Kasat neu ko, mok ho roit ein re' naan! Ho mak oni' ho bisa msoos Smana Kninu' Uisneno meik roit? Kahaf! Ka tiit fa es he nsoos naan Smana Kninu'! 21 Ho ka mmui' fa hak sa'-saa' neu Smana Kninu' Uisneno, natuin ho nekam naan nekam naan namees ok. Ho suma mami haa akar. 22 Musnaas nai mu'ko ho sanat-penu sin! Reko nneis, ho m'onen ma mtoit meu Uisneno, he karu reko te, In noes nain ho tenab amre'ut naan. 23 Au uhiin ak, ho neek man naheun nok neek maufinu ma sinmakat, ma nmui' rais re'uf namfau re' fe' anfuut ko!” 24 Rarit nai' Simon antoit sin nua sin, nak, “In ama' sin! Karu on nana te, hi m'onen man kau fe', henati' kasat re' hi mteek ee naan, kaisa' ntoom kau.” 25 Rarit, nai' Petrus ma nai' Yohanis natoon Rais Reko Usif Yesus ok-oke', ma sin natoon amsa' Kabin ma Prenat Uisneno neu abitan kota naan. Rari te, sin nua sin anfanin on Yerusalem. Oras sin nnaon raan, sin neis nokan kuan-kuan nbi propinsi Samaria, he natonan Rais Reko Usif Yesus neu abitan naan.
Nai' Felipus nateef nok kaes ko' goes na'ko Afrika
26 Rari te, ameput Uisneno na'ko neno-tunan nreun nai' Felipus nak, “Anah! Ho mnao nai mutuin ranan re' n'ain ha'-nua'. Mutuin rana mnaa' na'ko kota Yerusalem ma mnao mkoon meu kuan Gasa.” 27-28 Oras in neen on nana te, nai' Felipus mpoi nnao nain. Oras in nbi ranan naan, in niit atoin es. Atoni' re' naan kaes ko' goes na'ko pah Etiopia. In es re' anpao ma an'urus a'mui'f ein na'ko Uis Bifee pah Etiopia. Uis Bifee naan, sin nteek ee te, nak, Kandake. Kaes ko'u re' naan, fe' nok an'onen anbi Yerusalem, ma oras naan in nsae kreet he nfain neu sin pah. Oras nai' Felipus niit ee, in ntook ma nrees anbi kreet ee in nanan. In nres anbi surat na'ko na'i nai' Yesaya, mafefa' kninu' Uisneno. 29 Smana Kninu' Uisneno nreun nai' Felipus he nnao nhaumak-maak kreet naan, he nateef nok kaes ko'u naan. 30 Ma oras in nhaumaak ate, in neen atoni' naan anrees na'ko na'i nai' Yesaya in surat. Onaim in nataan am nak, “Aam! Ho muhiin saa' re' ho mrees ee nana, ai' kah?” 31 Ma atoni' naan nataah am nak, “Kahaf. Ro he nmui' tuaf es re' he natoon kau fe', hena' au uhiin. Msae uum he mtook mok kau mbi ia.” 32 Naa, tuis re' in nrees ee naan, in haan ee, nak onai: “Sin nheer anfoont ee, on re' atoni' nheer 'bib-kase, he neik je he nroro. In nfain on re' 'bib-kaes ana' re' atoni' nkateer in funun, mes in taa' kun. In ka nfei fa in fefan, ma ka nataah fa fefa' mese' msa'. 33 Ma sin na'aak Ne; Sin nafekan rais poi ntoom Ee. Oras naan, sin nroor niis Ne, te kah, In ka nmui' fa sanat sa'-saa'. Onaim, hit he tak saa' anteni'?” Nai' Felipus nanoni' Kabin ma Prenat Uisneno neu kaes ko'u na'ko Afrika 34 Anrees anrair on nana te, kaes ko'u naan nataan nai' Felipus, am nak, “On mee? Na'i nai' Yesaya na'uab neu in tuan ii oo, ai' in na'uab antoom neu atoni' 'teta'?” 35 Rarit nai' Felipus nanoni' re' kaes ko'u naan neik Rais Reko Usif Yesus. In nmurai na'ko nai' Yesaya in tuis re' naan, ma in natoon ranan neu Usif Yesus. 36 Oras sin fe' annaon, kaes ko'u naan niit oe. Ma in nsenu nfeek nai' Felipus in uaban, neik haan totis, nak, “Aam! Ho mkius miit fe', anmui' oe es ne. Karu ho mromi te, atsaun he ho musrain kau nai.” 37 Ma nai' Felipus nataah am, nak, “Karu ho mpirsai batur-batuur neu Usif Yesus te, ka nmui' fa ekat. Au uskau he tsaun he au usrain ko, aam.” Rarit in manaku' nak, “Au 'pirsai batur-batuur ak, Nai' Yesus re' naan, Uisneno es re' anruur ma nreek naan Je na'ko unu'. In Aan Uisneno batuur.” 38 Onaim, atoni' naan, anreun he nasnasab in akreet. Ma sin nsanun ma ntaman nbi oe naan in nanan. Ma nai' Felipus nasraan je nbi naan. 39 Oras sin npoin na'ko oe, Smana Kninu' Uisneno neik nai' Felipus nnao neu baer sona'. Kaes ko'u naan ka niit antein ef. Kase naan annao nkoon nok neek marinet ko'u. 40 Nai' Felipus anpoi nbi kuan es, in kaan ee Asotus. Na'ko bare naan, in nnao piut ma natonan too mfaun sin Rais Reko Usif Yesus. In neis nok kuan-kuan tar antea kota Kaisarea.
Nai' Saulus antaam natuin pukan apirsait neu Usif Yesus
1 Anbi oras naan, nai' Saulus nsair piut ma neik ha'mu'it neu apirsait neu Usif Yesus. In imsa' naim ranan he nroor niis sin. Es nana te, in nnao neu A'nak Ko'u pirsait Yahudi, 2 ma ntoit sura prenat he neik sin neu a'nakat-a'nakat pirsait Yahudi anbi sin uim onen et kota Damsik. In ntoit he karu in nateef nok atoni' apirsait neu Usif Yesus In Rana' 'Honis, et bifee ma atoni', in he nheek ma nfuut sin, ma nheer neik sin neu Yerusalem. 3 Antopu nrair sura prenat sin ate, in nok in aok-bian sin nnaon neu kota Damsik. Ma oras in nhaumaak kota re' naan, nok askeken piin es na'ko neno-tunan antaha' natetab nai' Saulus. 4 Es nana te, in ntikobe ntea nain afu. Ma in nneen hanaf es na'uab neu ne, mnak, “Saulus! Saulus! Nansaa' am es ho mha'mui' Kau on ia?” 5 Nai' Saulus nataan am nak, “Sekau es a'uaba' ia, tua?” Hanaf naan nataah am nak, “Au re' ia, Yesus, re' ho mha'mu'i. 6 Oras ia, amfeen nai, ma mtaam nai meu kota naan. Anbin ee, Au of utoon ko saa' re' ho he mmo'e.” Nai' Saulus ntikoib 7 In aok-bian sin anneen hanaf naan, mes sin ka niit fa sekau-sekau. Onaim sin neek eni namnekon, tar antea sin ka fefa' mese' fa. 8 Rari te, nai' Saulus anfeen anhaek. In he nfei in matan sin, mes in nforo nmaet. Onaim sin nnaa' in a'niman, ma nok ne ntaam neu kota Damsik. 9 Neno tenu mfai tenu 'tem-teme, in ka niit fa sa'-saa'. Ma in ka naah am niun fa sa'-saa'. 10 Anbi kota naan, anmui' nonot apirsait es, in kaan ee, nai' Ananias. Usi' Yesus neem nakriir On neu nai' Ananias nbi amnitas, ma nak neu ne, mnak, “Ananias!” Ma nai' Ananias nataah am nak, “Au es ia, tua!” 11 Usi' nhaman nak, “Uum fe'! Ho mnao he maim Au atoin es. Mnao on Rana Mne'o, on atoin es in umi, in kaan ee, nai' Yudas. Anbi naan, ho muteef mok atoin es, in kaan ee, nai' Saulus. In atoni' na'ko kota Tarsus. Oras ia, in onen. 12 Au 'feen nai' Saulus mnitas amsa' ma utoon ee m'ak, ‘of anmui' atoin es, in kaan ee, nai' Ananias neem neu ko.’ Ho mnao he mtao ho 'nimam henati' in niit anfain.” 13 Mes nai Ananias nataah Uisneno, mnak, “Onai, Usi'! Hai mneen mirair uaba' huma'-huma' ntoom atoni' naan, fin in imsa' nha'mui' niis Usi' Ho too kninu' anbi Yerusalem. Tar antea sin suust ii, ka kre'-re'o fa! 14 Oras ia, hai mneen amteni' nak, a'nakat-a'nakat pirsait Yahudi sin anfee ne kuasat he neem ma nheek nasoup tuaf-tuaf re' antaam natuin Ho Rana' 'Honis.” 15 Ma Usi' Yesus na'uab anteni' nok nai' Ananias am nak, “Maski on nana msa', oras ia ho ro he mnao! Natuin Au 'piir je goen, he nfei ranan neu Kau; maut he in neik Rais Reko neu atoni' na'ko uuf-uuf bian, ma neu usif-usif, on nana msa' neu too Isra'el. 16 Au of utoon ee, he in nahiin, ha'mu'it huma' mee es re' npao naan je, natuin in npirsai ma nok Kau goen.” 17 Ma oras anneen Usi' In kabin on nana te, nai' Ananias annao neu umi naan, ma in ntaam anbi naan. Ma in ntao in a'niman anbi nai' Saulus, ma nak, “Ba'e! Usif Yesus re' ho miit Ee nbi ranan oras ho uum, In neikn On es anreun kau he uum uteef ok ko. In nreun kau he au 'onen ma 'tao au 'nimak neu ko, henati' ho bisa miit amfain. In imsa' nroim henati' ho mupein In Smana Kninu'.” 18 Oras naan, nai' Saulus annaben ate, saa' es on re' ika' poho' anmouf na'ko in matan, ma in niit anfain oras naan. Rari te, in nfeen ma nasrain je. 19 Onaim in naah am niun, tar antea in aon ne nma'tani nfain.
Nai' Saulus natoon Rais Reko anbi kota Damsik
Nai' Saulus fe' natua nabaar akre'o nok too Usif Yesus anbi kota Damsik. 20 Nahunu te, in nao ntaam anbi uim onen atoni' Yahudi, ma in natonan sin am nak, “Nati' mitniin rek-reko! Batur-batuur Nai' Yesus naan, Uisneno In Anah.” Nai' Saulus na'uaba' anbi atoni' Yahudi sin uim onen 21 Are' too mfaun sin ntaka'naan ein ma sanmakan neu nai' Saulus in uaban. Es nana te, sin na'uab ein am nak, “In es re' nha'mui' too Usif Yesus anbi Yerusalem, ai' kah? Rarit in neem neu ia, he nheek sin ma neik sin naon neu a'nakat pirsait Yahudi sin! He tak saa'?” 22 Nai' Saulus natoon nak Nai' Yesus re' naan, Atoni' re' Uisneno nba'an naan Je na'ko afi unu', he nsoun Ee neem. Nai' Saulus nanoni' nok mat-maat tar atoni' Yahudi sin ka niis ee fa. Es nana te, nai' Saulus in akbeor ni, na'ko oras neu oras, na'nae piut. 23 Nkono kre'o na'ko oras naan, atoni' Yahudi sin namin ranan he nroor niis nai Saulus. 24 Mes nai' Saulus annaben nahiin sin tenab naan. Sin anpao nai' Saulus fai-manas anbi eno'-po'i kota naan, he nroor niis ne. 25 Onaim anbi faaj es ate, nai' Saulus in aok-bian tuaf fauk neman, ma nfaf-boki' naan ee anbi 'ki'u, ma nasaunt ee na'ko baah-rame-mnanu' kota naan. Nok ranan naan, in naen nasaitan kota Damsik. Sin nasanut nai' Paulus npaken a'ki'u
Nai' Saulus annao neu Yerusalem
26 Rarit nai' Saulus annao neu Yerusalem. Anbi naan, in he ntaam nabua nok apirsait Usif Yesus. Mes sin arsin namtausan nai' Saulus, natuin sin natenab nak in nmo'jon he nfain nonot apirsait neu Usif Yesus. Of rarit na' in he nheek sin. 27 Ma anmui' atoin es, in kaan ee, nai' Barnabas. In es re' natefa' nai' Saulus nok haef-haef Usif Yesus anbi bare naan. In natonan sin rasi re' njair neu nai' Saulus anbi rana tnana'. In natoon amsa' nak nai' Saulus nateef anrair nok Usif Yesus. Ma Usi' msa' na'uab mat-maat nok ne. Nai' Barnabas amsa' natonan sin, nak nai' Saulus nabrain he natoon Rana 'Honis Usif Yesus neu abitan Damsik. 28 Annenan on nana te, es na' sin antoup nai' Saulus. Rarit in natua nabaar nok sin anbi kota Yerusalem. In imsa' nabrain he na'uaba' antoom Rais Reko Usif Yesus neu sekau-sekau, natuin in ka namtausan fa saa' es. 29 In imsa' nmakoni' tenab nok atoni' Yahudi fauk re' na'uab ein neik uab Yunani. Mes sin ka nromin fa he ntoup in uaban naan, es nana te, sin namin ranan he nroor nisan. 30 Nbi oras nonot apirsait Usif Yesus annenan am nak, atoni' bian natenab amre'ut nana te, sin naen neik nai' Saulus neu kota Kaisarea et tas je in ninin. Ma sin nfee je nnao nkoon neu in kuan, kota Tarsus. 31 Rari te, apirsait Usif Yesus abitan propinsi Yudea, ma propinsi Galilea, ma propinsi Samaria, anmonin nok neek mamut. Sin nma'baab' ein piut. Ma sin nneen Usi' In nromin. Ma Smana Kninu' Uisneno naheran sin nekak.
Nai' Petrus nareko' atoin amenat es anbi kuan Lida
32 Anbi oras naan, nati' te, nai' Petrus annao neu bare-bare he nkius apirsait Usif Yesus. Anbi neon goes, in nnao nkius nonot apirsait abitan kuan Lida. 33 Anbi naan, in nateef nok atoin es, in kaan ee, nai' Eneas. Atoni' naan anbua. Toon fang goen, in ka nfeen niit fa na'ko in hara 'tupa'. 34 Nai' Petrus nak neu ne, mnak, “Eneas! Oras ia, Usif Yesus Kristus nareko' ko. Onaim ho mfeen nai! Amkikin ho bare 'tupa'!” Anneen narair on nana te, in nfeen. 35 Ma oras abitan kuan Lida ma kuan Saron niit nai' Eneas nareok on nana te, sin arsin npirsai Usif Yesus.
Nai' Petrus namonib nafani ain Tabita na'ko mates
36 Oras naan, anmui' bifee jes, in kaan ee, bi Tabita, re' natua nbi kota Yope et taas je ninen. (Bifee naan, in kanan neik uab Yunani te nak, Dorkas, re' neik hit uab ii te nak ‘ruus’). In npirsai neu Usif Yesus. In nmoe' reko neu in aok-bian sin, ma nati' te in nturun are' ama'mu'it sin. 37 Oras naan, ain Tabita nameen, tar antea in nmaet. Rarit sin naniu in ta'un, ma sin n'aum in ta'un, oke te sin natupa' ee anbi in ke'en abit fafon. 38 Nbi oras naan, sin nnenan nak nai' Petrus natua ntahan nbi kuan Lida. (Kuan naan, in a'roo ni neno steen es, karu tnao hae ta'ko kota Yope.) Oke te, sin nsonu' tuaf nua nnaon he naskau nai' Petrus, nak, “Aam! Hai miskau ko, he mkoen om uum rabah meu Yope.” 39 Oras anneen haan askaut nana te, nai' Petrus nok nain sin. Antean bare nana te, nai' Petrus ntaam ma nsae nkoon anbi bi Tabita in ke'en. Ke'en naan naheun nok bifee banu' re' neman ma nkaen nme'me'jok. Sin nakrira' sin baur pake sin ma pake bian antein, re' bi Dorkas ansoo sin, oras in fe' anmoin. Nai' Petrus namonib amates 40 Nai' Petrus anreun sin he npoin ok-oke' na'ko ke'en naan. Onaim in nri'-tuu ma n'onen. Rarit in nabani' neu amates naan ma na'uab, nak, “Ain Tabita! Mfeen nai, tua!” Nok askeken, bifee naan nfei in matan. Ma oras in nkius niit nai' Petrus, in nfeen ma ntook. 41 Rarit nai' Petrus annaa' in a'niman ma nfiit nafeen ee. Onaim nai' Petrus no'en bifee banu' sin ma tuaf bian anbi naan, he nana'at bifee amonit naan, neu sin. 42 Rasi naan mahini' anbi kota Yope nomes-mese', tar antea too mfaun ii npirsai neu Usif Yesus. 43 Nai' Petrus fe' natua nabaar anbi bare naan, nbi atoin es in umi. Atoni' naan, in kaan ee, nai' Simon. In meep goe es re' nakninu' pasu.
Nai' Korneris nrenu nnao naan nai' Petrus
1 Oras naan, anmui' soraru 'naakf es na'ko Roma, in kaan ee, nai' Korneris. In na'nak sorarus tuaf nautn es. Sin neman na'ko bare 'roo, na'ko pah Italia. Ma in natua et kota Kaisarea. 2 In nneek niis Uisneno, ma in uum je naan ee msa'. Mes atoni mfaun pah Roma sin, ka on fa naan. Era'-era' in nturun ama'mu'it sin, ma in onen piut-piut neu Uisneno. A'nak sorarus, nai Korneris, an'onen neu Uisneno 3 Anbi neon goes, of oni' nreuk teun mans ii nteib, in niit nok maat me'u nbi mnitas, ameput Uisneno es na'ko neno-tunan, neem ma nhaamn ee mnak, “Korneris!” 4 Nai' Korneris niit ameput neno-tunan naan, es nana te, in namtau nmaet. Rarit in nataan am nak, “On mee, tua?” Ameput neno-tunan naan nataah am nak, “Uisneno anneen narair ho onen totis sin, ma In namnau ho neek arekot mok are' tuaf bian. Onaim, Uisneno niit ko. 5 Onaim oras ia, amreek tuaf he nnao neu kota Yope, he naskau neik atoin es, in kaan ee, nai' Simon Petrus. 6 In natua et uum jes et taas je ninen, nok atoin es re' nati' te in nakninu' pasu. In kaan ee msa' ate, nai' Simon.” 7 Ma oras ameput neno-tunan annao nasait ne, nai' Korneris no'en in an ameput nua, ma nok in soraurs es, re' anneek Uisneno msa'. 8 Ma oras nai' Korneris natoon narair are' rasi nana te, in nreek sin he nnaon neu kota Yope.
Nai' Petrus neem nateef nok nai' Korneris
9 Noka' on nana te, of oni' mans ii na'puup, nai' Korneris in haef ein anhaumak-maak kota Yope. Oras naan, nai' Petrus ansae ma an'onen anbi nai' Simon in uum je porata' pakan. Nai' Petrus an'onen anbi uum jes in porata' pakan 10 Nai' Petrus an'onen, mes in naben ate namnaah. In npao abiurt ein nabaarb ein bukae. Ma oras in onen on nana te, Uisneno nakriir ee mnitas on re' mneit. 11 On re' in niit neno-tunan natfe'i, ma isparei manuan es anboor neem. Isparei naan mafutu' ma makfiri' anbi in suusk ein haa sin. Isparei naan nsaun neem. 12 Anbi isparei naan in naan ee, in niit mu'it huma'-huma', es re' mui' hae haa', anonok, ma koro huma'-huma'. Nai' Petrus niit mu'it huma'-huma' anbi isparei je in nanan 13 Ma in nneen haanf es anreung goe, mnak, “Pe'u! Amfeen nai! Amroor mui't ein ia. Rari te, mubaarb sin ma mbukae!” 14 Mes nai' Petrus nataah am nak, “Ka bisa fa, tua! Kais on naan! Natuin au ka 'euk 'iit fa mu'it huma'-huma' naan sin siis keni! Hai atoni' Yahudi minunin mu'it ein re' naan sin siis keni!” 15 Mes hanaf naan nataah am, nak, “Karu Uisneno nak baer es nakninu' te, ho kaisa' mak an'oemeet anteni'!” 16 Isparei naan, anpoi no teun, ma na'ait' on anfain neu neno-tunan. 17 Ma nai' Petrus natenab neu-mneem antoom amnitas naan in a'moufn ii saa'. Nateef oras naan, nai' Korneris in haef ein neem antean nai' Simon in umi. Sin nhake nrarin anbin eno'. 18 Onaim sin haman uim tuaf naan ma natanan, nak, “Hoore, tua! Hai iim maim tuaf es, re' natua ntahan et umi ia. In kaan ee, nai' Simon Petrus. Hi mihiin je, oo?” 19 Oras naan, nai' Petrus fe' natenab mnitas naan in a'mofun, mes Smana Kninu' Uisneno natoon ee mnak, “Hae! Pe'u. Anmui' atoni' neem naim ko et a'pinan ee. 20 Msaun he mnao mutuina' sin nai. Kaisa' ho neek maan nabait. Maski sin re' naan ka atoni' Yahudi fa, mes kaisa' mma'nisin sin, ai' maan sin anfain atoin oe-metan, mutuin harat atoni' Yahudi. Natuin Au es a'reun sin he neem naang ko.” 21 Rarit nai' Petrus ansanu mnateef nok atoin ein naan, ma nak sin am nak, “Au re' ia, es re' hi mami. Hi mperuu saa' na'ko kau?” 22 Ma sin natahan am nak, “A'nak sorarus pah Roma es, in es re' nreun kai he iim meu ia. In na'naak sorarus nautn es. Mes in neek ne na'teeb ma namnau Uisneno. Atoin Yahudi namfau sin nahiin atoni' ia in arekon. Afinaa, ameput Uisneno na'ko neno-tunan neem ma nreun hai a'nakat, he ntoit ko aam, he uum meu in umi, natuin in he nneeng ko, tua.” 23 Anneen anrair on nana te, nai' Petrus ntoit sin he ntupan faaj es anbi umi naan. Noka' on nana te, sin nfenan, ma nai' Petrus annao nabua nok sin. Anmui' tuaf fauk na'ko nonot apirsait neu Usif Yesus anbi Yope, annaon nabuan nok sin. 24 Mabe' naan, sin ntupan nbi rana tnana', ma noka' te, na' sin antean kota Kaisarea. Oras sin ntean nai' Korneris in umi, in npao nain sin. In nabuab in aasr ein am in aok-bian no mes-mese' anbi naan. 25 Ma oras nai' Petrus he ntaam neu umi nana te, nai' Korneris naen anseung goe nbi mone', ma in nri'-tuu anbi nai' Petrus in haen, ma na'ruri'-na'besan nai' Petrus. 26 Mes nai' Petrus nfiit nahake' aam Korneris am, nak, “Ba'e! Mfena mhaek nai! Kaisa' mu'besan kau! Natuin au re' ia, mansian on re' ho msa'.” 27 Anneen on nana te, nai' Korneris anfeen anhaek. Rarit nai' Korneris ma nai' Petrus na'uab ein, ma sin he nnaon ntaman neu uum je nanan. Ma nai' Petrus niit too mfaun nabuan anbi naan, sin npao naan je. 28 In nkius natefan sin, ma in nak, “Ba'e ma benu' arki! Hi mihiin main hai atoni' Yahudi hai harat. Karu tatuin harat naan, ka nabei' fa he hai mseerg om mok atoni' pah a'teta'. Saa' ntein he mtaam meu sin umi. Mes Uisneno neikn On nakrira' neu kau mnak, karu In es re' na'uab am nak baer es akninu', ka nabei' fa he au 'akam 'ak bare' naan oe-metan. Onaim oras ia, au ka ma'nisin fa tuaf bian anteni'. Au ro he 'aan sin anfain au nonot-asar nbi au uum je nanan. 29 Es nana te, oras hi iim maang kau te, au fena' nao uum ain. Au ka puutr ok af, natuin Uisneno natona nrair kau. Onaim hi mitoon kau fe'! Hi mo'en kau he saa'? 30 Onaim, nai' Korneris anpeo are' rasi nak, “Neno haa akonot, of oni' nreuk teun mans ii nteib, au 'onen a'bi au umi re' ia. Nok askeken, atoin es anhake nbi au matak. In paek ni namaas. 31 Ma in nhaman kau mnak, ‘Korneris! Uisneno anneen ho onen totis sin, ma In namnau ho nekam arekot neu too mfaun. 32 Onaim, oras ia, amreun tuaf he nnao neu kota Yope he neu naan tuaf es, in kaan ee, nai' Simon Petrus. In natua ntahan et uum jes et taas je ninen, et atoin es re' biasa nakninu' pasu. In kaan ee, nai' Simon amsa'.’ 33 Natuin rasi nanam es na' au 'reun tuaf he naen neit ma naskau neik ko uum meu ia, tua. Hai mtoit makasi ma sukur ko'-ko'u, natuin ho mkoen om uum main, tua. Onaim oras ia, hai mibua, he mitniin sa'-saa' re' Uisneno nreun ko he mutoon kai sin, tua!”
Nai' Petrus natoon Usif Yesus In Rana 'Honis neu tuaf re' ka na'ko fa Yahudi
34 Rari te, nai' Petrus na'uab am nak, “Oras ia, au na' uhiin, 'ak, Uisneno naan ro nkius mansian ok-oke' huma' mese'. In ka npiir fa humaf, nak ia atoni' Yahudi, ma bian sin ka atoni' Yahudi fa. 35 Karu nmui' tuaf na'ko uuf me-mee re' in neek Ne mne'o, ma an'onen piut neu Uisneno, ma natuin In nromin, tuaf naan anhariin In nekan. 36 Hi mihiin saa' re' Uisneno natoon naraar je neu kai, too Isra'el, nak In nsonu' narair Kristus, es re' Nai' Yesus. Ma Nai' Yesus naan anmaet he narame' mansian ii nok Uisneno. Ma In A'nakat neu mansian ii ok-oke'. 37 Hi msa' amneen mirair saa' re' anrair anbi propinsi Yudea anfuun am nateef. Reta' naan, anmurai na'ko nai' Yohanis natonan too mfaun sin am nak, sin ro he nasnasan na'ko sin saant ein. Ma sin imsa' ro he nasranin, he nfain tanar nak, sin nareko nfanin nok Uisneno. 38 Rari te, Usi' anfee In Smanan Kninu' neu Nai' Yesus, atoni' Nasaret naan. Uisneno msa' anfee In kuasat neu Nai' Yesus. Rari te, Nai' Yesus anpoi-ntaam kuan ma bare, he nmoe' rais reko neu too mfaun sin. In imsa' nturun tuaf re' niut re'uf sin A'nakan nasusab sin. In nmoe' on naan, natuin Uisneno nok Ne piut. 39 Natuin, hai re' ia miit meik hai matam kim, saa' re' In nmo'e nbi kota Yerusalem, ma anbi pah atoni' Yahudi sin. Maski on nana msa', sin fe' nkuus nahaekb Ee nbi hau nehe tar anmaet. 40 In maet batur-batuur, mes nmeu te, Uisneno namonib nafain Ee. Rari te, In nakrira' In tuan, henati' atoni' sin nahinin nak, In anmoni nfain. 41 Mes In ka nakriir On fa neu atoni mfaun, suma neu kai mmees. Oras In nmoni nfain re' naan, hai biasa miah-miun mok Ne. Uisneno msa' anruur kai he mnao mitoon Rais Reko Usif Yesus neu too mfaun anbi me-mee. 42 Onaim, Uisneno es anreun kai he mnao mitoon mat-maat, antoom Atoni' re' In nruur naan Je na'ko afi unu', es re' Nai' Yesus. Ma Uisneno amsa' nait Nai' Yesus anfain Afeek Rasi, he nafeek nak sekau es re' anmoin piut nok Uisneno, ma sekau es kahaf. Nai' Yesus naan, es nafeek rasi neu amates ma neu amonit sin. 43 Na'ko afi unu', mafefa' Uisneno sin anruur amsa' neu Nai' Yesus naan, nak, sekau-sekau re' anpirsai neu Ne, Uisneno of antoup sin, ma In of annoes nain sin sanat-penu sin.”
Tuaf re' ka na'ko fa atoni' Yahudi, sin napenin Smana Kninu' Uisneno
44 Oras nai' Petrus fe' na'uab on nana te, nok askeken Smana Kninu' Uisneno neem antaam anbi bifee-atoni' sin ok-oke' re' anneen ee. 45 Anbi naan amsa', anmui' tuaf re' nai' Petrus in parteing guin atoni' Yahudi, re' neem nokan, na'kon kota Yope neu nai' Korneris in umi et kota Kaisarea. Oras sin niit too mfaun napenin Smana Kninu' Uisneno, sin sanmakan, natuin sin fe' nitan, nak Uisneno nfee In Smana Kninu' neu atoni' re' ka na'ko fa atoni' Yahudi. 46 Sin nneen bifee-atoni' re' anbin nai' Korneris in umi, na'uab ein neik uab huma'-huma', ma sin npures ma nbo'is Uisneno. Rarit nai' Petrus na'uab am nak, 47 “Hi mkius kiim! Sin re' ia, antoup Uisneno In Smanan on re' hit imsa'. Onaim oras ia, iim he tasrain sin nai. Ka tiit fa es re' he bisa npenan anteini' sin.” 48 Rari te, nai' Petrus anreun sin he nasrain nai' Korneris nok are' bifee-atoni' nbin naan, he sin ntaman too srani' Usif Yesus. Rari te, sin ntotin, he nai' Petrus natua nabaar nok sin neno fauk antein, na' sin nafetin nai' Petrus he nfain on Yerusalem.
Nai' Petrus namneob on antoom rasi sranit neu tuaf re' ka na'ko fa atoni' Yahudi
1 Nai' Petrus fe' ka nfain fa, mes haef Usif Yesus sin ma tuaf apirsait bian abitan Yerusalem, annenan ate nak, tuaf re' ka na'ko fa atoin Yahudi sin ntoup Usif Yesus In Rais Reko. 2 Ma oras nai' Petrus anfani ntea Yerusalem, anmui' nonot apirsait na'ko partei Yahudi, nasaan ee mnak, 3 “Hoe! Ho mmoe' on mee es re' naan? Ho muhiin hit haart ii oo, ai' kah? Ho ro mubrain he mtaam meu tuaf re' ka na'ko fa atoni' Isra'el sin umi? Ho muah ma miun mok sin! Kaisa' on naan, natuin sin ka nherin fa fe' on re' hit harat! Ka nabei' fa he hit tseor ok tok sin!” 4 Rarit nai' Petrus npeon sin are' rasi re' anjari nrair nak, 5 “Anbi neon goes, oras au 'bi kota Yope, au 'nao ma 'onen. Anbi nana te, Uisneno nakrira' neu kau nbi mnitas. Au on re' 'iit neno-tunan natfe'i, ma isparei ko' goes anboor, ma nakfiir anbi in suusk ein haa sin. Isparei naan, ansaun neem neu kau. 6 Oras au 'kisu 'taam eu isparei nana te, au 'iit mu'it huma'-huma', es re' mui' hae haa', anonok, nok koro huma'-huma'. Sin ok-oke' naan, mu'it ein re' hit tanunin sin. 7 Ma au 'neen hanaf es anreun kau mnak, ‘Pe'u! Amfeen nai! Amroor mui't ein ia, ma meuk nai!’ 8 Mes au 'utaah am ak, ‘Ka bisa fa, tua! Kaisa' on naan! Natuin au ka 'euk 'iit fa sisi huma'-huma' re' naan. Hai, atoni' Yahudi, minunin are' mu'it ein naan!’ 9 Mes hanaf naan nataah am nak, ‘Karu Uisneno nak baer es akninu' te, ho kaisa' mak bare' naan oe-metan!’ 10 Au 'kius 'iit isparei naan anboor no teun, ma in na'ait on anfain neu neng goe tunan. 11 Nateef oras naan, atoni' teun neem antean umi naan. Sin nneman na'ko Kaisarea he naim kau. 12 Rarit Uisneno In Smana Kninu' natoon kau mnak, ‘Ho msaun he mnao mok atoin ein naan nai. Kaisa' neek man ma'fena'! Maski sin atoni' teta', mes kaisa' ho mma'nisin sin, ma mkius sin on atoin oe-metan.’ Rarit hit aok-bian sin tuaf nee re' ia, nokan amsa' anbin Kaisarea. Anbi naan, hai mtaam meu a'nak sorarus es na'ko pah Roma, in umi. 13 In na'uab am nak, neno fauk akonot, in niit ameput Uisneno na'ko neno-tunan, anhake nbi in umi, mnak, ‘Amreek tuaf, he nnaon neu Yope he naan-neik naan atoin es, in kaan ee, nai' Simon Petrus. 14 Atoni naan of natoon ko, mok ho uum ji in nanan, Uisneno In ranan he nfee ki 'honis, ma annoes nain hi saant ein.’ 15 Es nana te, au 'murai utonan sin Uisneno In Rana 'Honis. Nok askeken Smana Kninu' Uisneno neem antaam anbi sin ok-oke', on re' neno naan hit topu trari. 16 Oras au 'iit sin antoup In Smana Kninu', on nana te, au umnau Usif Yesus In uaban uhunut, nak, ‘Nai' Yohanis nasrain ki neik oe nmees, mes Uisneno of anmo'e nneis na'ko naan neu ki, es re' In of anfee ki In Smana Kninu'.’ 17 Uisneno neik noon es anfee In Smana Kninu' neu atoni' teta' sin, namnees on re' In anfee neu kit. Onaim, hi mroim he au 'raban Uisneno oo, ai', on mee? Neu, au he u'uab a'tein ak saa'?” 18 Ma oras sin nneen nai' Petrus natoon nanoon on nana te, sin ka nasaan antein ee fa. Rarit sin npures ma nbo'is Uisneno nak, “Airoo! Maneun teke! Uisneno msa' anfei ranan henati' atoni' bian amsa' nasaitan sin monit asanat, he In nnoes nain sin saant ein, ma sin nmonin piut nok Ne.”
Apirsait ein neu Usif Yesus anbaits ok et bare-bare. Sin amfaut ii etan kota Antiokia
19 Neon goes ii, oras sin na'mate nrair nai' Stefanus, sin nmurai nha'mui' ma nasusab apirsait ein neu Usif Yesus. Es nana te, sin naen anbaits ok et bare-bare. Bian naenan et propinsi Finisia. Bian naenan et puru Siprus, ma bian anteni' naen na'roon tar antean kota Antiokia, et propinsi Siria. Atoin amnaent ein naan amsa' ate, natoon Rais Reko Usif Yesus anbi me-mee. Mes sin natonan neu haa sin atoni' Yahudi anmesen. Sin ka natonan fa atoni' teta'. 20 Ma anmu'i nteni' apirsait neu Uisneno na'kon puru Siprus ma na'kon kota Kirene. Bian sin naon ankonon neu kota Antiokia et propinsi Siria. Anbi bare naan, sin es re' natonan Rais Reko Usif Yesus neu tuaf re' ka na'ko fa atoni' Yahudi. 21 Uisneno anfeen sin In kuasan, tar antea too namfau anpirsain neu Usif Yesus. Nai' Yesus In tuaf eini naen na'koor ein anbi me-mee 22-24 Oras naan, apirsait ein abitan Yerusalem annenan nak, atoni teta' abitan Antiokia msa' npirsain neu Usif Yesus. Onaim sin nsonu' tuaf es, in kaan ee, nai' Barnabas, he nnao nkius sin anbi nee. Nai' Barnabas, atoin neek reko, ma npirsai batur-batuur neu Uisneno. Smana Kninu' msa' ate natuuk goe. Ma oras in neem antea bare naan, in niit nak, batur-batuur Uisneno nmeup ma'tani' anbi atoni teta' sin a'monik. Onaim in nmariin. Rarit in ha'tani nteni' sin, henati' sin nabei' ein he natuina' batur-batuur Rana' 'Honis Uisneno piut-piut. Nok re' ranan naan, apirsait ein neu Usif Yesus na'baab ok piut na'ko neno neu neno. 25 Na'ko bare naan, nai' Barnabas annao nkoon neu kota Tarsus he naim nai' Saulus. 26 Oras in nateef nok nai' Saulus, in nfuri' nai' Saulus he nfanin bu'-bua' on Antiokia. Rarit sin nua sin natua nabaran toon es, nok Usif Yesus In apirsait ein abitan Antiokia. Neno-neno te, sin nanoni' Rana' 'Honis Usif Yesus neu too mfaun. (Anbi kota Antiokia nana te, na' atoni anteek apirsait neu Usif Yesus nak ‘atoni Kristen’). 27 Oras sin nua sin fe' nbin Antiokia, anmui' tuaf fauk neman na'ko Yerusalem. Uisneno biasa npaek atoin ein naan he nfanin In mafefa'. 28 Tuaf es na'ko mafefa' sin re' naan, in kaan ee, nai' Agabus. Smana Kninu' Uisneno natoon ne, nak, “Of amnahas ii ma'tani' ntoom pah-pinan fuun am nateef.” Onaim, nai' Agabus natoon anteni' atoni' sin. (In uaban naan anjair batuur oras nai' Kradius, Uis Ko'u Keser Roma, na'naak.) 29 Ma oras sin nneen nai' Agabus in uaban on nana te, apirsait neu Usif Yesus anbi Antiokia namin ranan, ma nabuab' ein roit, he nfeen nnaon neu sin aok-bian anbi Usif Yesus, re' nmonin nok susat anbi propinsi Yudea. Mese'-mese' te nfee neik in a'be'in. 30 Nabuab narair on nana te, sin nreek nai' Barnabas nok nai' Saulus, he sin nua sin nnaon naat roit ein naan neu ameput krei sin nbi bare naan he nbait sin neu asuust ein.
Nai' Yakobos in a'maten, ma nai' Petrus antaam bui
1 Oras naan, usif nai' Herodes nmurai nha'mui' Usif Yesus In apirsait ein bian. 2 In na'prenat tuaf he nroor na'maet nai' Yakobos npaek suni'. Nai' Yakobos naan, nai' Yohanis in tataf. 3 Oras nai' Herodes nahiin nak nai' Yakobos in a'maten neik marinet ko'u neu a'nakat Yahudi sin neek eini, in mo'e nneis na'ko naan. Nateef nok neon ko'u re' sin nteek naan je nak Fesat Utunu' re' ka Maseor Muur fa, in naprenat tuaf-tuaf he nnaon nheek antein nai' Petrus. 4 5 Anheek naraar je on nana te, sin nataam ee nbi bui. Rari te, sin nruur naan sorarus pukan haa, he nmakseun ein et fai ma manas, he ntiut nai' Petrus. Sorarus pukan es ate, tuaf haa. Nai' Herodes anroim he nafeek nai' Petrus in rasi anbi too mfaun sin humak-matak, reka' fesat naan namsoup.Onaim, oras sin nataam nai' Petrus anbi bui, Usif Yesus In apirsait ein an'oen ein piut-piut, antotin he Uisneno npao ma npanat nai' Petrus.
Uisneno napoitan nai' Petrus na'ko bui
6 Noka' te, usif nai' Herodes he nafeek nai' Petrus in rasi, anbi too mfaun sin humak-matak. Mes anbi mabe' naan, sin nfuut nai' Petrus nok korenit nono' nua, anbi buuj ee nanan. Rari te, in ntuup anbi sorarus nua sin atnanak. Sorarus bian anteni' nhaken ma npaon anbi eon ee in matan. Uisneno In ameput na'ko neno-tunan neem he napoitan nai' Petrus na'ko bui 7 Nok askeken, Uisneno In ameput es na'ko neno-tunan neem ma nhake nbi naan, ma ke'en naan anmeu' sin-siin. Rari te, ameput naan anpo' nafena' nai' Petrus, am nak, “Pe'u! Amfeen fe'!” Anbi oras re' naan amsa', korenit naan natsefi' na'ko nai' Petrus in a'niman. 8 Rari te, ameput neno-tunan naan anreung goe, mnak, “Mpaek ho baru! Mpaek ho 'pein haef ein!” Ma nai' Petrus anpaek narair on nana te, ameput naan anrenu ntein ee, mnak, “Ampaek ho baru mnaun kotef, ma uum he mutuin kau nai!” 9 Onaim nai' Petrus natuin ameput naan, anpoin na'ko bui. Mes nai' Petrus natenab nak ai' in suma namnei. Te kah, naan ro njair tebe. 10 Oras sin nnaon nasoup baer paot nua nmaktun-tuina' te, sin ntean eon bese. Eno' naan nasoitn on kuun, ma sin anpoi natuin ranan re' he nnao neu kota. Nok askeken, Uisneno In ameput naan, annao nasaitan nai' Petrus anmes-mees. 11 Oras ameput neno-tunan naan namneko nrari te, na' nai' Petrus nahiin ma natenab am nak, “Tebe namneo! Oras ia, au fe' uhiin. Uisneno nsonu' In ameput neem he nafetin kau na'ko nai' Herodes in a'niman. Uisneno nmoe' on naan, henati' atoni' Yahudi sin tenab amre'ut re' he najairb ee neu kau, ka ntoom kau fa.” 12 Rari te, nai' Petrus nnao neu ain Maria in umi. Ain Maria re' ia, nai' Yohanis in ainaf. Nai' Yohanis naan, in kanan es anteni', es re' nai' Markus. Anbi naan, anmui' tuaf namfau nabuan ma an'onen, sin ntoit Uisneno he nturun nai' Petrus nok in rasi. 13 Neem antea umi nana te, nai' Petrus antee' ma nhaman anbi eno' naan in kotin. Onaim anfeot ameput es anbi umi naan, in kaan ee, bi Rode, nnao na'me'o he nahiin neu amnemat naan sekau. 14 Anneen nai' Petrus in haan ee te, in nahiin naan je. In mariin anmaet. In naen antaam, ma natonan sin am nak, “Hoe! Nai' Petrus anhaek et mone'!” Natuin marinet ko'u naan, tar antea in nikan nain neu in he nasoitan eno' naan neu nai' Petrus. 15 Mes sin natahan mnak, “Kahaf! Kaisa' mu'raru' on naan, oo!” Mes bifee naan na'kiku' mates nak, “Kahaf! Re' nee, ro nai' Petrus in hanan! In haek et mone'!” Mes sin ka npirsain fa. Sin nak, “Oni' Uisneno In ameput neno-tunan, re' anpanat nai' Petrus.” 16 Sin fe' nmatita'-roin rasi nana te, nai' Petrus anhaman piut, tar antea sin nasoitan eno' naan. Nasoit anraar je te, sin noo mkakan, natuin in re' naan nai' Petrus. 17 Nai' Petrus na'aiti' in a'niman, he namneba' sin. Rari te, in npeon sin nok ranan meem es Uisneno napoit ne na'ko bui. Onaim in nreun sin am nak, “Hi mnao nai he mitoon rasin ia neu nai' Yakobos ma haef bian.” Rari te, nai' Petrus npoi nnao neu bare bian anteni'. 18 Noka' kiuk ana', oras soraur-apaot ein nkisun ate ka niit anteni' fa nai' Petrus, sin taka'naan ein ma namtaun nmaten, natuin sin ka nahinin fa rais saa' es re' of he nboor neu sin. 19 Oras usif nai' Herodes nahiin rasi naan, in naprenat sin he naim nai' Petrus. Mes sin ka nateef niit fa nokan. Onaim, nai' Herodes naprenat he nparikas soraur-apaot sin. Nparikas narair sin on nana te, in nreun he nroor niis sin ok-oke'. Rari te, nai' Herodes annao nasaitan propinsi Yudea, ma natua anbi kota Kaisarea.
Usif Herodes Agripa anmaet
20 Oras naan, abitan kota Tirus ma Sidon, sin biasa nsosan mnahat na'ko usif nai' Herodes in pah. Mes a'ro-'roo re' ia, usif naan anmamusun nok sin. Rari te, sin ma'akoran ma namin ranan he naraem ok nok ne. Onaim sin npiir naan tuaf fauk he nateef nok usif Herodes. Oras tua mapiir ein naan antean Kaisarea, sin makhiin ein nok atoin es, in kaan ee, nai' Brastus. In ntaam atoin makana' et uisf ee in sonaf. Sin ma'akoran nok nai' Brastus, he in njair afuri' ma asoitan ranan neu sin, henati' sin nateef nok usif Herodes. 21 Rari te, usif Herodes anroim he ntoup sin, onaim sin npiir naan ors es he natefan. Neno naan, sin nmo'en acara ko'u. Usif Herodes anpaek in baur usif, ma antook anbi in a'toko prenat. Onaim in na'uab nok sin. 22 Anneen in hanan on nana te, sin nbo'is ma naikas usif Herodes, nak, “Amneen nai in hanan naan! Ia ka hanaf na'ko mansian fa! Ia pah ii tuan in hanan!” 23 Nok askeken, Uisneno In ameput es neem na'ko neno-tunan ma nekin nai' Herodes menas huum es, natuin in antoup pures neu in tuan, tar antea in nsiu' na'roba' Uisneno. Onaim, pansoeng guin na'susu' nai' Herodes in aon, tar antea in maet. 24 Maut he on nana te, nok re' rasin naan, Rais Reko Uisneno natonon ma nhanuag on piut, ma atuina' Rana' 'Honis Usif Yesus na'baab on piut. 25 Hit tkisu tfain teu nai' Barnabas ma nai' Saulus. Oras sin nua sin nnaon naat anrair fitis-babat neu abitan Yerusalem, sin nfanin neu kota Antiokia. Sin nok atoin muinf es. In kaan ee, nai' Yohanis. Sin nteek ee msa' ate, nai' Markus.
Apirsait ein nbi Antiokia nsonu' nai' Barnabas nok nai' Saulus
1 Anbi kota Antiokia, atoni namfau npirsai nrarin neu Usif Yesus. Anmui' tuaf-tuaf re' Uisneno anpaek sin he njarin In mafefa' kninu'. Ma bian anteni In npaek sin he nanoni' too srani'. Sin es re': nai' Barnabas, nai' Simeon, sin biasa anteek naan je, mnak, ‘nai' Metan’, nai' Lukius, na'ko kota Kirene, nai' Menahem, re' sin npairoor je na'ko an-ana' nok usif Herodes, ma nok nai' Saulus. 2 Anbi ors es, sin nanaah ok, ma sin nabuan ma na'besan neu Uisneno. Rari te, Smana Kninu' natonan sin am nak, “Ampiir maan nai' Barnabas nok nai' Saulus. Natuin Au meep gui namfau. Onaim, sin ro he nait mepu re' Au he unaa't ee neu sin.” 3 Oras sin nanaah naraarj ok ma an'onen nararin on nana te, sin na'tuta' sin a'nimak neu nai' Barnabas nok nai' Saulus, he nri'tuba' sin. Onaim sin nreek ma nruur sin nua sin, he nanaoba' Uisneno In mepu.
Nai' Barnabas ma nai' Saulus ntean puru Siprus
4-5 Oras Smana Kninu' naprenat nai' Barnabas nok nai' Saulus he nua sin nnaon natoon In Kabin ma Prenat neu bare-bare, sin nnao nahunun neu kota es et taas je ninen, re' in kaan ee, Sereukia. Nai' Yohanis (atoni' re' sin nteek ee msa'at, nai' Markus) nnao nabua nok sin. Antean bare nana te, sin nsaen abnao oe he nnaon neu puru Siprus. Ntean Siprus, sin nsanun anbi kota es, in kaan ee, Saramis. Anbi kota naan, sin biasa ntaman nbi atoni' Yahudi sin uim onen he nanoni' Uisneno In Kabin ma Prenat neu abitan naan. Sin ranan neu puru Siprus 6-8 Narari te, sin npoi-ntaman na'ko kuan es neu kuan es, tar sin neman ntean kota es et puru naan in tukan bian, re' nteek ee te nak, Pafos. Gubernor ee natua et kota naan. In kaan ee, nai' Sergius Paulus. In roen ni na'aik. Oras in neen nak nai' Barnabas sin neman nrarin anbi kota naan, in nreek tuaf he no'en sin, natuin in mariin he nneen fainekat na'ko Uisneno. Mes anbi naan, anmui' atoni' Yahudi es, in kaan ee, nai' Bar Yesus (in kanan es anteni re' neik uab Yunani te nak, ‘Erimas’). In atoin araut. In biasa napoi atoni' nak, in imsa' mafefa' na'ko Uisneno. In mapartei reko nok gubernor naan. Onaim, oras nai' Barnabas sin neman, in nkopo' gubernor naan he kaisa' ntoup sin. In nsoba' he nakeku' gubernor naan, henati' kaisa' npirsai neu Nai' Yesus. Nai' Paulus nakaina' araut 9 Mes Uisneno In Smana Kninu' nfee kuasat neu nai' Saulus (re' sin nteek ee msa'at nai' Paulus), es nana te, in na'ke'en in matan fuan neu araut naan. Rari te, in na'uab am, nak, 10 “Hoe! Erimas! Ho on re' niut re'uf! Ho poi moro' ko! Ho he mupoi tar antea mee? Ho mraban are' kanan rais reko. Es nana te, hai mihiin mirair, ho mutuin niut re'uf ein sin Uis Ko'u. Kaisa' mmo'e mteni' nai! Kaisa' mu'eka' ranan Uisneno re' mneo tiro kun! 11 Hoe! Ho mneen, fe'! Uisneno of anhukun ko. Ho of amfoor, ma ho of ka miit fa sa'-saa', tar neno fauk ankoon.” Nai' Paulus na'uab anrair on nana te, atoni' naan anfoor nain. Onaim, in nabreo ranan he naim tuaf he naa' in a'niman, he anheer neik je. 12 Oras gubernor naan niit nok matan, ma nneen nok rukin noni'-taru' na'ko nai' Barnabas sin nmatoom nok Nai' Yesus, in nsanmaak, rari te in npirsai neu Usif Yesus.
Sin neik Rais Reko neu kota Antiokia es, et propinsi Pisidia
13 Nai' Paulus sin nsaen abnao oe na'kon kota Pafos et puru Siprus, he nnaon neu kota es et propinsi Pamfiria, re' nteek ee te nak, Perga. Antean bare nana te, sin nsanun na'ko bnao oe, rari te, nai' Yohanis Markus anbaits on nok sin he in nfain on Yerusalem. 14 Na'kon Perga, sin nnaon raan meto' neu kota Antiokia et propinsi Pisidia. Sin antean kota naan. Rari te, nateef nok atoni' Yahudi sin neno snasat, sin nokan oen ein anbin atoni' Yahudi sin uim onen. 15 Oras naan, sin nresan na'ko na'i nai' Musa in surat, ma na'ko mafefa' Uisneno bian sin surat. Rari te, a'naak uim onen sin antoit nai' Paulus sin, am nak, “In aam ein! Karu hi mmui' uab saa' neu kai te, hai mtoit henati' mi'uab neu kai, he miheran hai nekam arkai.”
Nai' Paulus nmurai na'uab nok atoin Yahudi nbi Antiokia
16 Rari te, nai' Paulus anhake nbi sin matak. In nait in a'niman ma ntoit sin he nta'-ta'an. Rari te, in na'uab am nak, “Aok-bian ki, too Isra'el! Ma aina'-ama' sin, re' ntaam pirsait Yahudi, natuin hi nekam naan namnau niit too Isra'el sin Uisneno. Au 'toit ki he mpasan hi ruikm ein ma mneen kau! 17 Uisneno npiir ma nbeit narair hit be'i-na'i too Isra'el na'ko afi unu'. Oras sin nnaon natuan anbin pah Masir, re' ka sin pah afa, Uisneno nfeen sin tetus ma ao-mina', tar antea sin nasuuf ma namsa'in. Rari te, Uisneno npaek In kuasan, ma neik sin npoin na'ko pah Masir. 18 Rari te, sin nnaon na'ko baar jes neu bare bian, tar antea toon bo'-haa. Maski sin na' 'nak-fatun, mes Uisneno natuuk sin nok neek sabaar. 19 Rari te, Uisneno nnoes naneuk nain too pah hiut anbi pah Kana'an. Onaim In bait afu pah naan neu hit be'i-na'i sin, he njair sin auf pusaak. 20 Sin nmonin on naan, tar antea toon natun haa mbo' niim (450). Rari te, Uisneno naiti nfeen sin afeek-rasi namfaun, he na'naak sin, tar antea Uisneno npiri nfeen sin In mafeef es, in kaan ee, nai' Samuel. 21 Oras nai' Samuel anjair mafefa' Uisneno, hit be'i-na'i sin anromin he nmu'in kuk usif. Es nana te, Uisneno nbeit infeen sin nai' Kisi in anah, es re' nai' Saur, na'ko uuf Benyamin. Nai' Saur anjair usif ma naprenat tar toon bo'-haa. 22 Rari te, Uisneno nasaun ee. Ma In nait nai' Isai in aanh es, in kaan ee, nai' Daut, he njair uis fe'u, anseka' nai' Saur. Uisneno nahiin narek-reko nai' Daut in nekan, es na' In nak ‘Nai' Isai anah nai' Daut re' ia, natai nok Au nekak. In of anmoe' natuin Au roimk ii oke'.’ 23 Oras naan, Uisneno nba'an nak In of anfee tuaf es na'ko nai' Daut in sufan-ka'un, he nfee 'honis neu too Isra'el. Au he utoon ki, 'ak, nai' Daut in sufan re' Uisneno nba'an naan je naan, es re' Nai' Yesus.”
Nai' Paulus na'uab nak Usif Yesus naan, Tuaf re' Uisneno nba'an he nsoun Ee neem
24 Nai' Paulus antuut ma ntaur in uaban naan, nak. “Oras Usif Yesus fe' ka nait fa In mepu, tuaf es, in kaan ee, nai' Yohanis, annao natoon neu too Isra'el sin, nak sin ro he na'pisan na'ko sin sanat-penu sin, rari te, sin ro he nasranin he nfain tanar nak sin nareok ok nok Uisneno. 25 Oras nai' Yohanis in meep gui he noe namsoup, in natonan atoin ein am nak, ‘Hi kaisa' mitenab mak au re' ia Tuaf re' Uisneno anba'an he nsonu' naan Je. Mimnau rek-reko! Hi ro he mpao Tuaf es, re' of In he neem. In ma'tani' nneis na'ko kau, tar antea au ka maso'ik kau fa, maski bait au 'rarihaa In anreka', fin au ka 'umnees 'ok Ne fa.’ 26 Aok-bian arki! Hi re' na'i nai' Abraham in sufan, ma tuaf bian re' hi neek meni namnau Uisneno. Amneen kau fe'! Uisneno natoon rasi ia neu kit, he hit tahiin In Rana' 'Honis. In nfee 'honis neu kit ma nsaok hit sanat sin. 27 Na'ko afi-unu', Uisneno npaek In mafefa' kninu' sin, he ntui natoon rasi nmatoom nok Tuaf re' Uisneno nba'an he nsoun Ee neem. Onaim, hit a'nak rais pirsait sin, nok atoni' bian anteni' abitan Yerusalem, anrees nafan-fanik tuis-tuis na'ko mafefa-kninu' sin. Anbi neno snasat, sin ntaman neu uim onen, he sin nresan rasin naan na'ko Sura Kninu' Uisneno. Mes sin ka nahiin fa nak Tuaf re' Uisneno nba'an he nsonu' naan je naan, es re' Nai' Yesus. Rari te, sin namin ranan he nhukun na'maat Ee. Mes rasi naan, nanokab manba'an re' Uisneno In mafefa' sin ntui naan je. 28 Sin nmo'en rasi huma'-huma' nok Nai' Yesus he nakreo namouf Goe, mes sin ka niit fa In sanat sa'-saa'. Maski on naan, sin nnaon neu gubernor Pilatus ma ntotin he nroor na'maat Ee. 29 Gubernor naan anroim natuin sin. Onaim, sin nkuus nakfirit Nai' Yesus anbi hau nehe, tar In anmaet. Ma are' rasin naan, ka nasuir fa nok are' saa' re' mafefa kninu' sin antui naan je. Rari te, sin nasanut In aon na'ko hau neeh je in tunan, sin naskau neik Je ma natuun Ee nbi noup fatu. 30 Mes Uisneno npaek In kuasat, ma namonib nafani' Nai' Yesus na'ko In a'maten. 31 Oras Nai' Yesus anmoni nfain, In nakriir On fani-fani neu tuaf namfau. Sin es re' neman bu'-bua' nok Ne na'ko propinsi Galilea neu Yerusalem. Ma oras ia, sin es re' ansaksii ma natoon neu too Isra'el ok-oke'.”
Nai' Paulus natoon nak Uisneno npake nrair In mafefa' sin he natonan nain anmatoom nok Usif Yesus
32-33 Nai' Paulus antuut in uaban naan, nak. “Onai! Hai nua kai re' ia, au ok nai' Barnabas, iim mi'ko rana 'roo, he mitoon ki saa' re' Uisneno nba'an neu hit be'i-na'i sin, oras ia, nanookb on een. Uisneno namonib nafani' Nai' Yesus na'ko In a'maten. Anbi Surat Pures-Bo'is bata' nua, Uisneno npaek tuaf he ntui rasin re' nmatoom nok Nai' Yesus, Tuaf re' Uisneno nba'an he nsoun Ee neem. In ntui nak, ‘Ho re' ia, Au Aanh aa ko. Neno ia, Au 'ait Ko mjair ana' aprenat.’ 34 Na'ko un-unu' Uisneno nba'an nrari mnak, In of namonib nafani' Tuaf re' In nba'an he nsoun Ee naan, ma Tuaf naan of ka nmate nteni' fa. Es nana te, Uisneno npaek In mafefa' he ntui, nak, ‘Nahunu te, Au 'fuut ain rais manba'an ok usif nai' Daut, he 'fee tetus neu ne. Onaim oras ia, Au he 'futu' 'teni' rais manba'an ok ko, natuin nai' Daut in sufan-ka'un es re' ho.’ 35 Anmu'i nteni' Surat Pures-Bo'is bian re' nak, ‘Uisneno ka nparakan fa Ho Tuaf Amneot In ta'un he npunu nbi In nopu.’ 36-37 In amneon ii, onai: Surat Bo'is re' ia, ka nruur fa neu nai' Daut! Hit tahiin on naan, natuin usif nai' Daut anmoe' narair rais reko namfau neu in too, rari te in nmaet. Ma sin nsuub in aon-ta'un naan. In aon naan, anpunu nrair. Onaim hit tahiin tak Surat Bo'is naan, ka nruur fa neu nai' Daut, mes anruur atoin sona'. Karu Atoni' re' anruur goe naan anmaet, Uisneno namonib nafain Ee. Es nana te, In aon-ta'un naan, of ka npuun niit fa. 38-39 Onaim, aok-bian arki, amneen rek-reko! Atoni' naan, es re' Nai' Yesus! Karu hit tpirsai teu Ne, In of nasaah are' sanat, re' in amneon ii hit es re' he tasaah kuuk sin. Nok ranan nana te, Uisneno annoes nain are' hit sanat sin ok-oke'. Mes hit tahiin tarari msa', tak maski hit tmoe' tatuin na'i nai' Musa in atoran harat sin ok-oke', on nana msa' ka neu he namneoba' kit fa anbi Uisneno In human-matan. 40-41 Etun, hi ro he mitenab rek-reko. Kas-kaisa' saa' re' Uisneno In mafefa' sin natoon naan je et afi-unu' naan, antoom anfain neu ki. Mafefa' sin antuin nak, ‘Nati' ampaant om, are' atoin am'akan sin, re' ka nfiroir fa es-es! Fin Au, Uisneno, a'moe' rais sanmakat huma'-huma' re' namkakab tuaf namfau; mes hi of amtoup in seun-banit, he hi mmate mkoon. Au 'moe' raas jes, oras hi fe mmoin, mes hi ka mroim fa he mtopu. Maski atoni' nanoni' ki, mes hi ka mroim he mihiin fa rasi naan. Reko nneis, hi mitenab mifan-fani' rasin naan, henati' hi msanmaak amsa'.’ Onaim, aok-bian arki. Mitenab mirek-reko' saa' re' au utoon ki fe'ena. Kaisa' amporin main saa' re' hi mneen miraar je fe'ena, on re' tuaf-tuaf am'akan sin a'mo'ek. Au uab kein na'tuuk ma na'paar on naan. Makasi, tua.” 42 Na'uab anrair on nana te, nai' Paulus ma nai' Barnabas anfeen anhaken he nnaon nasaitan uim onen naan. Mes abitan naan, antotin, he reko te, sin nfain neman anbi neno snasat amnemat, he naknutu' nteni' saa' re' sin na'uab naraar je fe'ena. 43 Ma oras sin anpoin na'ko uim onen naan, anmui' tuaf namfau anbi bare naan, re' annaon natuin nai' Paulus ma nai' Barnabas. Ma sin nua sin anfaineek sin, am nak, “Hit tahiin tak Uisneno In nekan reokn ii kaheen neu kit. Es nana te, hi ro he mnaa' miheran Uisneno In Manekan naan.”
A'nakat-a'nakat atoni' Yahudi ka ntoup fa nai' Paulus sin
44 Nateef nok atoni' Yahudi sin neno snasat amnemat, arakre'o te atuas kota naan anpoen ok-oke' he nneen Kabin ma Prenat Uisneno. 45 Mes oras a'nakat-a'nakat atoni' Yahudi sin niit too mfaun neman he nneen nai' Paulus sin, sin neek ein namenan. Ma oras in na'uaba', sin nraban foro-koos goah neu nai' Paulus, ma sin na'uab ein he namouf sin. 46 Mes nai' Paulus sin ka nteet ok fa, ma sin na'uab ein mat-maat. Sin nak, “Batuur! Uisneno anfei ranan nahuun neu hit atoni' Yahudi, ma anfee kit Rais Reko. Ma tebe ro he on naan! Mes hi ka mtopuf. Es nana te, hi ka maso'ik fa he mmoin piut mok Uisneno. Onaim oras ia, hai he meik Rais Reko naan neu uuf-uuf teta' anteni', natuin hi mtorak maan Je. 47 Fin Uisneno ansonu' kai, nahuum on re' na'i nai' Yesaya antui naan je, mnak, ‘Au 'ait ki nahuum on re' paku re' ntana' neu atoni' teta' nteni', re' ka na'ko fa atoni' Yahudi, he hi mtana' ranan re' neem neu Kau, he Au ufetin sin na'ko sin sanat. Ma hi msa' ro he miruru' ranan naan, anbi pah-pinan anfuun am nateef.’ 48 Oras atoni' teta' sin nnenan on nana te, sin nmariin anmaten. Ma sin bo'is Uisneno nak, “Hai mbo'is Uisneno! Uisneno In Rais Reko naan, reok ni kaheen!” Anbi naan, anmui' tuaf-tuaf re' Uisneno nafeek anrair et afi unu', he sin anmonin nabar-baran nok Uisneno. Ma sin ok-oke' anpirsain neu Usif Yesus. 49 Uisneno In Kabin ma Prenat nabeon On, na'ko tuaf neu tuaf anbi pah naan anfuun am nateef. 50 Anbi kota naan, anmui' atoin makana', et bifee ma atoni. Bian sin anneek ma namnau Uisneno. Mes a'nakat-a'nakat atoni' Yahudi sin neman ma ntaon sin uaba', tar antea atoin makana' sin nriu' napoitan nai' Paulus nok nai' Barnabas na'ko bare naan. 51 Ma oras sin npoin na'ko kota naan, sin nua sin nait naan mo'et es natuin harat. Mo'et naan es re' ntekar askukuk na'ko sin haek ein, anfani' 'takaf mese' nak, abitan kota naan ka nromin fa he natniin Rais Reko Uisneno re' sin nua natoon Ee naan. Rari te, sin nnaon nasaitan kota naan. Onaim sin nnaon neu kota es anteni', in kaan ee, Ikonium. 52 Mes, apirsait ein neu Usif Yesus anbi Antiokia, sin neek ein anmarinen, natuin Uisneno In Smana Kninu' neki 'be'if ma ma'tani' neu sin nekak.
Nai' Paulus ma nai' Barnabas anbin kota Ikonium
1 Oras nai' Paulus nok nai' Barnabas antean kota Ikonium, sin ntaman nbin uim onen atoni' Yahudi. Anbi naan, sin na'uab ein rasi namfau nmatoom neu Rais Reko Uisneno, tar antea atoni' Yahudi ma atoni' teta' npirsain neu Usif Yesus. 2 Mes anbi naan, anmui' atoni' Yahudi bian re' nnaa' naher-heran sin atoran harat, ma sin ka nromin fa he ntoup nai' Paulus sin uab kein. Sin es re' nhuita' atoni teta' namfaun he nato'on niis nonot apirsait neu Usif Yesus. 3 Mes nai' Paulus sin ka namtaun fa. Sin natonan piut-piut Rais Reko Usif Yesus neu seka-ka goah. Sin natonan am nak, Usif Yesus In nekan naan nasoitn On neu sekau-sekau. In imsa' nfee kuasat he sin bisa nmo'en rais sanmakat huma'-huma', henati' too mfaun sin nahinin am nak, Uisneno npaek sin. Oras naan, nai' Paulus sin natuan a'roo anbin kota naan. 4 Rari te, abitan kota naan anbaits ok pukan nua. Pukan es natuina' atoni' Yahudi re' fe' nnaa' naheran sin atoran harat, ma pukan es anteni' anpeis Usif Yesus In haef ein. Puk' nua ein re' naan, nmasein haen ein es nok es. 5 Ma atoni' Yahudi bian re' fe' nnaa' naheran sin atoran harat, sin nabuan ma namin ranan nok atoni' bian, nok sin a'nakat sin, he nasusab haef Usif Yesus sin. Sin he npoir nai' Paulus sin neikin fatu. 6 Mes tuaf bian natonan sin am nak, anmui' atoni' pukan es re' natenab amre'ut neu sin. Onaim sin naenan ma na'koor ein anbin propinsi Rikonia, anbiin kota Listra, ma kota Derbe, ma kuan-kuan anfuun am nateef anbi naan. 7 Anbin baren naan, sin nmurai natoon Usif Yesus In Rais Reko naan. Ranan na'ko Perga neu Derbe
Nai' Paulus sin anbin kota Listra ma Derbe
8 Antean kota Listra on nana te, nai' Paulus nok nai' Barnabas nateef nok atoin es. In haek ein anbuan nanin oras in ainf ee nahoins ee. 9 Atoni' naan ntook ma anneen nai' Paulus in reta'. Rari te nai' Paulus ankius na'tees ne, ma natenab nak, “Atoni' ia in pirsai ni, ro of nareko' in tuan!” 10 Onaim nai' Paulus anhaman atoni' naan, am nak, “Ba'e! Mfeen amhaek nai!” Anneen on nana te, in okron anfeen anhaek ma annao nain. Nai' Paulus nareko atoin abuat 11 Oras sin niit nai' Paulus nmoe' rasi nana te, sin masahun. Onaim sin na'uab ein neik sin uab Rikonia mnak, “Hi mneen, fe'! Atoin nua ein re' ia, pah ii tuan. Sin neman na'ko neno-tunan ma nabain ok on re' mansian!” 12 Sin na'uab ein on naan, natuin sin natenab am nak nai' Barnabas naan, nahuum on re' sin pah tuaf es, in kaan ee, nai' Seus. Ma nai' Paulus, atoin a'uaba' naan, sin nak ai' namnees nok pah tuaf es, in kaan ee, nai' Hermes. 13 Anbi kota naan in kotin, anmui' uim fuat es, neu sin pah tuaf, nai' Seus. Sin niit nai' Paulus sin on nana te, meo na'ko Seus in neik fubona' amfaun ma anheer neik bijae keos ko'u fauk, he nafuata' sin neu nai' Paulus sin. Onaim too mfaun naan annaon natuin meo naan he nfuan neu haef Usif Yesus sin. Atoin ein he nfua nai' Paulus sin 14 Mes oras sin nahinin nak atoni mfaun naan he nfua neu sin, nai' Paulus nok nai' Barnabas anpenan sin. Rari te, sin nnaenan neu too mfaun naan sin matak, ma sin npius nareu' sin barun. Nana nfain tanar mese', nak sin ka nromin fa neu saa' re' too mfaun sin anmoo' je naan. Rari te, sin nua sin nhuun ein, am nak, 15 “Airoo! Nansaa' am es re' hi mmoe' rasi ia? Kaisa' hi mitenb am mak hai re' ia pah ii tuan. Hai re' ia, arahaa mansian amsa' on re' hii. Hai iim meu bare ia, he mitoon ki rais reko es. Hi ro he maikoit are' hi pah tuaf ein naan re' ka ma'osa' fa. Hi ro he mituin Uisneno 'Honis amneot. Natuin In es re' nmoe' neno-tunan ma pah-pinan, nok in afan ok-oke'. 16 Un-unu te, are' pah-pah anmonin natuin sin nromik mese'-mese'. Uisneno msa'at ankonan sin on naan. 17 Mes Uisneno ka nnikan fa he nfeen sin tanar huma'-huma', he sin nahinin am nak, Uisneno naan, Arekot kuun. In es re' nasanut uran neem neu kit ok-oke'. In es re' anfee pena'-maka' neu kit. In es re' anhao ma nfait kit, ma anhariin hit nekak.” 18 Maski nai' Paulus ma nai' Barnabas antaar sin he kaisa' anmo'en on naan, mes atoin ein naan naseesb ok he nekin fuat he nfee neu sin. 19 Oras naan, anmui' atoni' Yahudi fauk re' neman na'ko kota Antiokia ma kota Ikonium, sin neman neu kota Listra. Sin nhuita' too mfaun he nraban Usif Yesus In haef ein. Onaim sin naitin fatu ma npoir nai' Paulus. Sin nak ai' nai' Paulus nmate nrair. Onaim sin nheer anfonat nai' Paulus he npoir ne neu kota naan in kotin. Sin npoir nai' Paulus neik fatu, tar in tikoib 20 Mes oras nonot apirsait neu Usif Yesus sin nhaek ma nfuun natefan nai' Paulus on nana te, in anfeen. Rari te, in ntaam anfain neu kota naan. Noka' on nana te, in nok nai' Barnabas annaon nkonon neu kota es anteni', in kaan ee, Derbe.
Nai' Paulus ma nai' Barnabas anfanin ntenin on too srani' kota Antiokia et propinsi Siria
21 Nai' Paulus ma nai' Barnabas natoon Usif Yesus In Rais Reko nbi Derbe msa'. Rarit too namfaun anpirsain neu Usif Yesus. Rari te, sin nua sin nfanin ntenin anbi Listra. Na'ko bare naan, sin nfanin on Ikonium. Na'ko naan, sin nnaon nkonon neu Antiokia et propinsi Pisidia. 22 Anbi bare naan, sin na'uab ein nok atoni' re' natuina' Usif Yesus he naheran sin nekak. Sin namnaub sin am nak, “Aok-bian ki! Karu hit taam on Uisneno Inj aa kit, kais mitenab mak hit of ka neu tapein fa susat ma ha'mu'it anteni'. Natuin maski on mee amsa', hit ro he tapein ha'mu'it, mes hit ro he taran, he tatuin Usif Yesus piut.” Sin nua sin nanoni' rasi naan neu atuina' Usif Yesus anbi kota naan. 23 Rari te, nai' Paulus ma nai' Barnabas namin tuaf he nait sin njarin a'nakat neu too srani' pukan mese'-mese'. Ma sin onen ma nanaah ok he nahiin Uisneno In nromin. Onaim sin ntao sin a'nimak ma n'onen, he nait tuaf re' Uisneno nruur sin he njarin a'nakat neu nonot apirsait. 24 Rari te, nai' Paulus ma nai' Barnabas sin nnaon nasaitan propinsi Pisidia, he nnaon neu propinsi Pamfiria. 25 Sin ntean kota es, in kaan ee, Perga. Anbi naan, sin natoon Usif Yesus In Rais Reko. Rari te, sin nnao, nkonon. Ka 'roo fa te, sin ntean kota Ataria. 26 Na'ko bare naan, sin nsaen bnao oe ma nfanin on kota Antokia et propinsi Siria. Neon goes ii, nonot apirsait Usif Yesus abitan Antiokia es ansonu' sin, ma nana'at sin neu Uisneno In a'niman, he In npanat ma ntuntauk sin. Onaim oras ia, nai' Paulus sin nfanin, he natonan nonot apirsait Antiokia, nak sin nasopu nrair sin mepu naan. Abnao oe oras pah Roma 27 Antean Antiokia on nana te, nai' Paulus sin na'bua' Usif Yesus In apirsait ein anbi bare naan. Ma sin natoon are' kanan rasi re' Uisneno nmo'e nraar je neu sin. Nak, Uisneno nfei nrair ranan neu atoni' teta' re' ka na'ko fa atoni' Yahudi, henati' sin imsa' npirsain neu Usif Yesus. 28 Rari te, nai' Paulus ma nai' Barnabas natuan suuk a'roo nok nonot apirsait Usif Yesus anbin bare naan.
Atoni mnasi' nonot apirsait sin nabuan anbin Yerusalem
1 Oras naan, anmui' atoni' Yahudi fauk re' anpirsain neu Usif Yesus neman na'kon rana 'roo, na'kon propinsi Yudea neu kota Antiokia. Neem antean on nana te, sin nanoni' nonot apirsait sin am nak, “Hi mpirsai meu Nai' Yesus amsa'at reko. Mes nana ka nanokab fa fe'. Karu batur-batuur hi mroim he hi mipein rasi 'honis, naa, hi ro he mi'heir mituin hai harat, re' Uisneno neikn On nahakeb naan je neu na'i nai' Musa.” 2 Mes nai' Paulus ma nai' Barnabas anraban mates atoin ein naan sin uabak. Sin matoen nok ma'tani'. Onaim nai' Paulus nak, “Hi msaan! Apirsait ein na'ko atoni' teta', hit kaisa' ta'seke' sin he natuina' hit haar herit Yahudi!” Natuin sin matoen rasi naan, es nana te sin ma'akoran he nsonu' nai' Paulus ma nai' Barnabas nok atoni' bian na'ko Antiokia, he neik rasi ia neu haef Usif Yesus sin, ma atoni mnasi' nonot apirsait bian etan Yerusalem. 3 Nok rasi nana te, es re' nonot apirsait Antiokia nreek nai' Paulus sin he nnaon neu Yerusalem. Sin nnaon natuin raan meto', neis nokan propinsi Finisia ma propinsi Samaria. Anbin rana-tnana' on nana te, sin nesin makisun nok nonot apirsait sin anbi sin umin. Rari te, sin nareta' tar antea namnuut, nak, “Atoni teta' amsa' ate, nabani' sin tuak ein ma npirsain neu Usif Yesus!” Sin nnenan on nana te, sin arsin nmarinen. 4 Sin ntean Yerusalem on nana te, nonot apirsait neu Usif Yesus antoup sin nok rek-reko. Haef ein nok atoni mnasi' nonot apirsait sin imsa' ate, antoup sin. Rari te, nai' Paulus sin nareta' are' rasi re' Uisneno nmoe' nrair sin neu sin, tar antea atoni' teta' namfaun amsa'at natuina' Usif Yesus. Ma sin imsa' nareta' sin matoes anmatoom nok rais herit. 5 Atoni' re' nok anneen nai' Paulus sin reta', anmui' atoni' Yahudi Kristen sin fauk na'kon partei Farisi. Sin nfeen anhaken ma na'uab ein naher-heeran nak, “Amneen rek-reko, hena! Karu nmui' atoni' teta' re' ka na'ko fa atoni' Yahudi, re' anroim he natuin Usif Yesus, sin ro he natuin hit haar herit, nok are' hit atoran harat bian re' Uisneno neikn On anfee naan je neu na'i nai' Musa.” Nai' Petrus 6 Rari te, nonot apirsait sin ok-oke' nma'akoran henati' haef Usif Yesus nok atoni mnais Kristen sin, nabuan he ntai narek-reko' rasi naan. 7 Rari te, sin makoin ein tenab neum-neman. Namsopu te, nai' Petrus anfeen anhake ma na'uab am nak, “Aok-bian arki! Hi mihiin mirair mak, nahunu te, Uisneno anpiir nain kau na'ko kit, he au 'nao utoon Rais Reko Usif Yesus neu atoni' teta' re' ka na'ko fa atoni' Yahudi. Natuin Uisneno msa' nroim he sin npirsain neu Usif Yesus. 8 Uisneno nahiin narek-reko hit mansian ii hit nekak mese'-mese'. Ma In imsa' es anfee In Smana Kninu' neu sin, namnees on re' In nfee nraar Je neu kit. Neik ranan naan, hit tahiin tak Uisneno antoup sin imsa'. 9 Uisneno ka npiir fa humaf, sin ai' hit. Ma In ka nbetis fa sin na'ko kit. Natuin In nakninu' sin neek keni, fin sin imsa' npirsain nrarin neu Usif Yesus, namnees on re' In nakninu' nain hit nekak. 10-11 Onaim, on mee? Karu Uisneno ntoup narair sin, nansaa' am es hit he tasaeb atteni' sin a'baut ma'fena' teik haar herit naan? Te kah, karu hit ta'uab batur-batuur, hit, tok hit be'i-na'i sin, ka troi tabei' fa hit atoran rais pirsait ein ok-oke'! Onaim, hit kaisa' ta'seke' sin on naan! Au he utaan on ia: Uisneno nfee kit a'honis, natuin hit tatuin atoran rais pirsait sin aa, oo? Kahaf, ai'! In nfee 'honis, natuin Usif Yesus anneek ma nkasian kit. Es nana te, kaisa' mnika'! Uisneno nneek ma nkasian atoni' teta' msa' on re' naan.” 12 Annenan on nana te, ka tiit fa es anteni' re' he na'uab napoin in tenab. Rari te, nai' Paulus ma nai' Barnabas nareta' nafanik, anmoe' on meem es re' Uisneno anpaek sin. Sin nareta' rais sanmaakt ein re' Uisneno anmo'e nrair sin anbi atoni' teta' re' ka na'ko fa atoni' Yahudi. 13 Nareta' nararin on nana te, tuaf es, in kaan ee, nai' Yakobos, anfeen anhaek, ma na'uab am nak, “Aok-bian arki! Hi mneen kau fe'! 14 Hit tata' nai' Pe'u fe' nareta' narair kit am, nak, Uisneno nait narair atoni' teta' re' ka na'ko fa atoni' Yahudi sin, he nataam sin anfanin Usif Yesus In nonot apirsait sin. 15 Onaim rasi naan, natai nok saa' re' mafefa kninu' Uisneno sin natoon naan je anbi afi ahunut. Sin ntui naan je, mnak: 16 ‘In ors ii ntea te, Au of a'fain uum. Natuin Au he uhakeb ufani' usif nai' Daut in aprenat. Fin in sufan-ka'un sin re' nsiksak nok naan, Au he ufena' ufani', ma he ha'tain sin. 17-18 Nok mo'et naan, too na'ko pah teta' amsa', neem namin he nateef nok Kau. Natuin Au 'piir urair sin he nfain Aung goa. Fin Uisneno na'uab anrair on naan na'ko afi unu'!’ 19-20 Onaim anbi au 'teenb ii te, onai: Karu tuaf teta' na'ko uuf bian re' anromin he natuin Uisneno, hit atoni' Yahudi kaisa' tasusab sin. Hit kaisa' taroiba' sin ma'fena' nteni' nok he treun sin he natuin hit haar herit. Onaim, hit ro he ttui tan suurt es ma tsoun ee neu sin, tak, sin kaisa' natuin hit atoran harat Yahudi sin ok-oke'. Hit tamnauba' sin imsa' tak, sin kaisa' nmakaken ma nmakonin karu ka fee-mone fa. Sin kaisa' nahan mnaah fuat. Sin kaisa' naah naa' na'ko mu'it. Ma sin imsa' kaisa' neuk sisi na'ko mu'it re' anfuut niis on. 21 Onaim, karu hit ttao atoran nahuum on re' ia, ia ka rais fe'u fa nteni'. Natuin, too mfaun sin nahinin nrarin, nak atoni' Yahudi hit atoran harat ro on re' naan. Fin atoran naan na'ko na'i nai' Musa sin, hit trees sin ok-oke' anbi uim onen, anbi neno snasat et bare me-mee. Onaim, atoni' teta' namfau nahinin nrarin. Au uab ki antuu' on naan, tua!”
Surat neu nonot apirsait re' ka na'ko fa atoni' Yahudi
22 Rari te, Uisneno In haef ein nok atoni mnasi' bian, anma'akoran he nreek tuaf he nnaon natonan sin rasi tfeka' naan neu nonot apirsait anbi me-mee. Ma sin naim tuaf-tuaf re' nonot apirsait nhormaat sin, re' nmatoom nok mepu naan. Rari te, sin npiir naan tuaf nua. Es in kaan ee, nai' Silas; es anteni' in kaan ee, nai' Yudas (re' sin nteek naan je nak nai' Barsabas). Rari te, sin nreun sin nua sin nnaon nabu-buan nok nai' Paulus ma nai' Barnabas. 23 Sin neik surat he mfee je neu atoni' teta' abitan kota Antiokia et propinsi Siria, nkono nteni' tar antea propinsi Kirikia. Surat naan, in aaf ne nak on ia: “Ao-mina' ma ao-reko na'ko kai, Usif Yesus In haef ein, ma atoni mnasi' bian anteni' abitan kota Yerusalem. Hai mtui surat re' ia neu ki, natuin hai mneek main ki, nahuum on re' hai ori' ma hai tata' sin. 24 Hai mtui surat ia, natuin hai mnenat nak, anmui' tuaf-tuaf na'ko Yerusalem ia, re' netin ma nateef nok ki nbi naan. Sin nanoni' ki rafu'-rafu', tar antea nasusab ma ntaka'nanab ki. Henati' hi mihiin mak, hai ka mreek miit fa tuaf ein re' naan. 25 Oras hai mneen mak anmui' tuaf re' nasusab ki on naan, hai mibua mbi ia, ma hai mtai rasi naan. Onaim, hai m'akor mirair, ma mifeek mirair rasi naan. Oras ia, hai mpiir tuaf-tuaf he neman ma natoon ki hai tfeka' naan. Sin neem nabuan nok nai' Barnabas ma nai' Paulus, re' hai mneek sin. 26 Tua nua' ein re' naan ansutain ha'mu'it, tar antea ara'kre'o te sin nmaten. Sin napenin ha'mu'it on naan, fin sin natuin Usif Yesus, tuaf re' Uisneno npiir naan Je na'ko unu'. 27 Onaim, hai mreek nai' Yudas ma nai' Silas, mautum sin es natoon ki surat re' ia in afan. 28 Uisneno In Smana Kninu' natoon anrair kai, ma hai msa' mroim mituin on naan, nak hi kaisa' mituin hai harat Yahudi oke', on re' haar herit. Natuin harat huma' re' naan, anha'fenab hi tuam ein naan rum-ruum. Mes anmui' rasi bian, re' hi ro he mimnau sin: 29 Kaisa' mmakaek ma mmakoin karu ka fee-mone fa. Kaisa' meuk sis-fuat. Kaisa' miah naa'. Ma kaisa' meuk sisi na'ko mu'it re' nfuut niis on. Karu hi bisa mpanat hi tuam ein na'ko rasin naan, hi ka meik fa ha'nisit neu hi aom-bian nonot apirsait atoni' Yahudi. Nok rasi nana te, hi bisa mibua mok sin rek-reko. Hai surat re' ia, antuu' on naan. Ao-mina' ma ao-reko neu ki.” 30 Sin ntopu nrair surat nana te, nai' Paulus sin naseon ein, ma naon nkonon neu kota Antiokia. Antean bare nana te, sin no'en nabuab nonot apirsait sin, ma nfeen sin surat naan. 31 Oras sin nrees anrair surat naan, sin arsin nmarinen maten, natuin surat naan in aafn ee nha'tain sin nekak. 32 Uisneno npaek nai' Yudas ma nai' Silas amsa', anfanin In mafefa' kninu'. Sin nua sin nareta' are' rais reta' namfau neu nonot apirsait anbi kota naan. Sin nfaineek ma naheran nonot apirsait sin nekak. 33 Oras sin nua sin natuan a'roo anbi bare naan, nonot apirsait Antiokia nafetin sin he nfanin on Yerusalem neu nonot apirsait re' anreek sin neman. Sin nafetin sin nok neek marinet. 34 Mes nai' Silas on re' he nroim he natua nabaar anbi Antiokia. 35 Nai' Paulus ma nai' Barnabas natuan sero 'roo anbin bare naan. Sin imsa' anturun sin aok-bian re' natoon Usif Yesus In Rana 'Honis.
Nai' Paulus ma nai' Barnabas anbaits ok
36 Oras nai' Paulus ma nai' Barnabas natuan sero 'roo nbin Antiokia, nai' Paulus nak neu nai' Barnabas am nak, “Ba'e! Uum he hit tfain on bare-bare re' nahunut hit taam teis tok sin. Hit tnao he tkius tiit hit aok-bian sin a'monik. Ka tahiin he sin on mee? Te tuaf ein re' naan, sin fe' anpirsain neu Usif Yesus fe' ka 'roo fa fe'. Neon goes ii, hit tanoni' sin. Es nana te, uum he hit tnao tkius tiit sin.” 37 Anneen nai' Paulus na'uab on nana te, nai' Barnabas anroim natuin. Nai' Barnabas anroim he neik nai' Yohanis nok sin. (Fe'-fe'e te sin nteek nai' Yohanis ia msa' nak, nai' Markus). 38 Mes nai' Paulus anpeen. Natuin neon goes ii, oras sin nbin propinsi Pamfiria te, nai' Markus nnao nasaitan sin. 39 Nai' Paulus nok nai' Barnabas nasurin ko'u, tar antea sin nua sin anbaits ok. Onaim, nai' Barnabas neik nai' Markus, sin nua sin nsaen bnao oe ma nnaon ntean puru Siprus. 40 Nai' Paulus nok nai' Silas. Oras sin he nnaon, nonot apirsait abitan Antiokia n'onen ntoit Uisneno he npanat sin, ma Uisneno msa' nakrira' In Nekan Arekot naan neu sin. Onen nararin ate, sin nua sin nnaon. 41 Rari te, sin nnaon neu propinsi Siria ma propinsi Kirikia, anfuun am nateef. Anbi bare me-mee, sin naheran nonot apirsait sin nekak.
Nai' Timotius nabua nok nai' Paulus ma nai' Silas
1 Rari te, nai' Paulus sin nnaon konon, nahunun neu kota Derbe. Rari te, sin naon nkonon neu kota Listra. Anbi bare naan, sin nateef nok atoin muinf es, in kaan ee, nai' Timotius. In aamf ee, atoin Yunani. Mes in ainf ee, bifee Yahudi re' npirsai nrair neu Usif Yesus. Nai' Timotius amsa' nfain apirsait neu Usif Yesus. 2 Are' nonot apirsait ein abitan kota Listra ma kota Ikonium, nahiin nak nai' Timotius naan, atoin reko. 3 Nai' Paulus anroim henati' nai' Timotius nok sin. Mes anmui' atoni' Yahudi et bare naan nahinin nak nai' Timotius in aamf ee, atoin Yunani, onaim in re' naan, fe' ka nheir fa fe', natuin harat atoni' Yahudi. Es nana te, nai' Paulus an'ator ma sin nheir nai' Timotius. Nai' Timotius ma nai' Paulus 4 Rari te, sin naon na'ko bare neu bare, he natoon rasi tfeka' re' haef Usif Yesus sin ma atoni mnasi' nonot apirsait sin nafeek anrari nbi Yerusalem. 5 Nok rasi nana te, sin naheran anteni' nonot apirsait ein sin nekak. Na'ko neno neu neno, oras neu oras, nonot apirsait sin na'baab ok piut.
Nai' Paulus napein hanaf he nnao neu Makedonia
6 Rari te, nai' Paulus sin nnaon nkonon. Sin nnaon neu propinsi Frigia ma propinsi Garatia, natuin Uisneno In Smana Kninu' npenan sin he kaisa' nnao natoon Rais Reko Usif Yesus anbi propinsi Asia. 7 Oras sin ntean baar jes re' nmanaak nok propinsi Misia, sin nsoob ein he ntaman neu propinsi Bitinia. Mes Usif Yesus In Smanan npenan sin he kaisa' nnaon neu bare naan. 8 Rari te, sin nnaon konon npeo' ranan re' nbi propinsi Misia, ma ntean kota Troas. 9 Mabe' naan, Uisneno nakrira' mnitas neu nai' Paulus. In niit tuaf es anhake nbi taas je panin, anbi propinsi es, re' in kaan ee, Makedonia. Atoni' naan anhunun ma ntoti mnak, “Aam! Au uskau ko he uum meu ia, he mturun kai fe'!” 10 Nai' Paulus niit on nana te, hai mifeek he mnao meu Makedonia. Hai mitenab mak, naan Uisneno es re' nreun kai, he mnao mitoon In Rana' 'Honis meu abitan taas je panin. Etun In npenan kai, he kaisa' mnao meu baer sona'.
Anbi kota Filipi, bifee mnasi' ain Lidia anpirsai neu Usif Yesus
11 Rari te, hai msae bnao oe nbi kota Troas, he mraak meu pur aan es, in kaan ee, Samotrake. Noka' te, hai mraak amtein ma mtea kota es, in kaan ee, Neaporis. Hai msanu mbi naan. 12 Mi'ko bare naan, hai mnao ha raan meto' meu kota ko' goes, in kaan ee, Filipi. (Filipi naan mateka' nbi propinsi Makedonia, ma ana' prenat Roma msa' nnaa' kuasat anbi kota naan.) Hai mitua neno faukah anbi bare naan. Nai' Paulus sin nateef ain Lidia 13 Nateef nok neno snasat atoni' Yahudi sin, hai mnao maim baer onen atoni' Yahudi. Hai mitenab mak baer onen naan of et noo je ninen. Es nana te, hai mnao mpoi kre'o mi'ko kota naan, tar amtea hai mi'euk mok noo jes. Hai miteef mok bifee mnasi' puukn es anbi naan. Onaim, hai mtoko ma mi'uab mok sin. 14 Na'ko bifee pukan naan, anmui' bifee jes, in kaan ee, bi Lidia. In neem na'ko kota es, re' na'roo et propinsi Asia, in kaan ee, Tiatira. Bifee re' ia, na'sosa' tai maas me-umub re' ma'osa', neu atoin makana'. In makoe nbi rais onen neu Uisneno. Onaim, in nneen nai' Paulus in uab ein, ma in ntoup sin oras naan. 15 Rari te, hai misrain ain Lidia nok in uum je naan ee oke'. Misrain mirair sin ite, sin nfee hana skaut neu kai, mnak, “In ama' sin. Karu hi mitenab mak au 'pirsai 'rair 'eu Usif Yesus te, hi iim meu hai umi ma mitua mtahan mok kai.” In nfuir kai piut, tar antea hai mituin.
Sin nataam nai' Paulus ma nai' Silas nbi bui anbi kota Filipi
16 Neon goes, oras hai mnao meu baer onen, hai miteef ri'feet goes. In re' naan, atoni in ate. Niut re'uf es antaam ne, es in bisa ntae ma nrees atoni in uan. In imsa' bisa nahiin atoni in rasi na'ko uun a'ba'an. Onaim, atoni' namfau nromin he nfeen roit neu ri'an-feto naan ma ntotin he in ntae sin uak ein. Mes an-feto naan, in a'naet sin es napein are' roit naan, tar antea sin mu'in maten. 17 Neno naan, oras hai mnao te, an-feto naan natuin kai piut. Ma in nhunun nak, “Atoin ein re' ia, aten na'ko Uisneno A'kuasat. Sin neman he nakrira' ranan, he on mee te atoni' bisa napein 'honis, ma nafeitn ok na'ko sin saant ein ii!” 18 Ri'an-feto naan anmoe' on naan, tar antea neno nuam-teun. Kro-roo te, nai' Paulus ka nroim he nneen anteni' fa ri'an-feto naan in uaban. Onaim in nabani' ma nkius na'ke'en ri'an-feto naan, ma in napreent ee, mnak, “Hoe! Niut re'uf! Au 'eik kuasat Usif Yesus, ma uprenat ko, ampoi nai mu'ko ri'an-feto ia, oras ia!” Nai' Paulus na'uab anrair on nana te, niut re'uf naan anpoi nain. Nai' Paulus nriu' niut re'uf na'ko ri'-feto 19 Oras in a'naet ein nahinin nak, sin ate, in ma'tanin ma manenun naan namneuk, sin nato'on, natuin sin ka napenin fa roit antein. Rari te, sin nnaa' neik nai' Paulus ma nai' Silas neu 'masa', re' nmui' baar jes re' nati' te sin npaak je he nafekan rasi. 20 Anbi bare naan, sin nkoa' ein naheer-heran nak, “Atoin ein ia neman he nareu' hit kota. Te kah, sin ka na'kon fa bare ia. Sin atoni' Yahudi, re' neman na'kon bare 'ro-'roo he nmo'en taisibu nbin ia! 21 Sin imsa' nanoni' too mfaun nak, hit kaisa' ttoe tatuin ana' aprenat Roma sin atoran, he tatuin sin atoran.” 22 Ma nnenan on nana te, too mfaun sin ntaisibun, ma nnaon nbaan nai' Paulus ma nai' Silas. Onaim, atoin a'nakat es anbi naan, nreun sin tar sin npius nareo' nai' Paulus ma nai' Silas sin paken, oke te sin nbeos sin. 23 Sin nbeos nai' Paulus nok nai' Silas, rari te, sin nataam sin neu bui. Sin nreek a'naak paot anbi naan, he npanat atoin nua ein naan rek-reko. Kais-kaisa' sin naenan. 24 Anneen on nana te, a'nak paot naan nataam sin neu ke'en es anbi bui naan in atnanan. Onaim, in haip sin haek ein neik hau hapit. Sin nhaip nai' Paulus sin haek ein neik hau hapit anbi bui 25 Of ai' oras fai tnana' te, nai' Paulus ma nai' Silas an'oen ein ma siin he nbo'is Uisneno. Atoin hukun bian nokan nbin re' naan, nokan nenan sin nsiin. 26 Nok askeken, afgoe na'beko' ko'u on re' ntai-nuun, tar antea bui naan ok-oke' na'beko' msa'. Bui naan in eon ein nasoitn ok manua fekon. Onaim, atoin huukn ein, sin koren fuuts ein natsefi' oke'. 27 Oras naan, a'nak paot anbi bui naan, naskeke nfeen, ma in nkius bui naan in eon ein nasoitn ok manua fekon. Ankius on nana te, in natenab nak ai' atoin hukun sin naenan nrarin. Rari te, in faik in beens ee he nheo niis on. 28 Mes nai' Paulus ankoa' naher-heer, ma nakain ee, nak, “Airoo, aam! Kaisa' mheo misoom! Hai es ia fe', oo!” Sin nakninu' nai' Paulus in paap ein 29 Anneen hanaf nana te, a'nak paot naan namtau nmaet, ma in imsa' ntaka'nana'. Rari te, in nreun he neikn ee 'nopo', onaim in naen antaam neu bui naan in nanan, mes in aon ii ta'i-ta'i. Ma in nri'-tuu anbi nai' Paulus ma nai' Silas sin haek ein. 30 Onaim in napoit sin na'ko bui, rari te in nataan sin am, nak, “In ama' arki! Au neek ki nsuus anmaet. Au he 'moe' saa' henati' au bisa ufeitn ok u'ko suust ein ia?” 31 Nai' Paulus sin ntonin am nak, “In raan ii onai: Ho mpirsai meu Usif Yesus, henati' In nfee ko 'honis. Ho uum je naan ee msa'.” 32 Rari te, nai' Paulus ma nai' Silas na'uab nok a'nak paot bui naan, ma in uum je naan ee arsin. Sin natoon Usif Yesus In Rana' 'Honis neu sin. 33 Ankono kre'o na'ko fai tnana' naan, a'nak bui naan neik nai' Paulus ma nai' Silas he nboe ma npairoir papa' re' afi sin nbeos sin. Rari te, sin nasrain a'nak paot bui naan, nok in uum je naan ee ok-oke'. 34 Oke te, in nok sin antaman neu in umi, ma ntuthae sin. In nok in uum je naan ee nmariin anmaten, natuin sin npirsai Uisneno. 35 Kik-kiku te, a'naet sin re' nafeek rasi, sin nfeen hanaf neu a'nak paot bui, he in napoitan nai' Paulus ma nai' Silas. 36 Anneen on nana te, a'nak bui naan natonan nai' Paulus am nak, “In ama' arki! A'naet ein nafeek anrarin he nafetin ki. Es nana te, hi mnao nai nok ao-mina'.” 37 Anneen on nana te, nai' Paulus ka ntoup fa reko. Onaim, in natoon neu an renu' es, nak, “Kais on naan! Natuin hai too Romas kai. Onaim hai mtoit hai pa'! Ana' prenat sin ro he n'ator hai rasi ia natuin atoran. Tatuin in amneon ii te, ro 'took he t'aa' rasi fe', oke te, na' thukun atoni'. Mes sin ka nmo'en fa on naan. Sin ka ntokon fa he n'a'an rasi nahuun, he naim nahiin hai saant ii saa', mes sin nbeos na'ba'-ba'e kai nbi too mfaun sin matak. Ka tiit fa sanat saa' re' he nrair tu'in, he sin nataam kai neu bui. Ia ro namneo-namneo, sin ntanhai nrair atoran prenat pah Roma. Onaim oras ia, sin he napoitan kai mninu'-mninu' na'ko bui, henati' atoni' kaisa' nahiin hai saant ii saa'? Ka on fa naan! Mreun a'naet sin neikn ok neman, he nafetin kai. Nok ranan nana te, na' hai of amtoup.” 38 Oras haef nana nfain ma natoon nai' Paulus in uab ein naan, a'naet sin nahinin nak sin nua sin anmu'in pa' on abitan pah Roma. Onaim sin namtaun nmaten. 39 Rari te, a'naet sin neman neu bui ma sin manaku' sin saant ein, ma ntotin saok sanat na'ko nai' Paulus ma nai' Silas. Rari te, sin nafetin sin nua sin, ma sin ntotin he sin nua sin nasaitan kota naan. 40 Anpoin na'ko bui nana te, nai' Paulus sin nnaon neu ain Lidia in umi. Nbi naan, sin nabuan nok apirsait ein. Sin nanoni' sin, ma naheran anteni' sin nekak. Rari te, sin nnaon nasaitan kota naan.
Nai' Paulus sin nnaon neu kota Tesalonika
1 Rari te, nai' Paulus ma nai' Silas annao nkonon. Sin kono haa kota es, in kaan ee, Amfiporis. Ma sin nnaon neu kota es, in kaan ee, Apolonia. Na'ko naan, sin nnao nkonon ma ntean kota Tesalonika. Anbi kota naan, anmui' uim onen atoni' Yahudi es. Ranan na'ko Filipi neu Berea 2 Karu sin ntean baar jes, re' nmui' uim onen, nateef nok neno snasat ate, nai' Paulus biasa ntaam ma nok an'onen nok abitan naan. Anbin Tesalonika msa', in nok antaam anbi sin uim onen. Onaim, in nok anmakoni' nekaf nok sin anbi naan, sin npaek Uisneno In Sura Kninu'. In nok an'onen nok sin anbi neno snasat era' teun natuut-tuutah. 3 In natonan sin am nak, “Karu hit ttae tarek-reko' nbi Uisneno In Surat naan, hit tahiin tak sin na'uab anrarin na'ko un-unu', nak Tuaf re' Uisneno nba'an he nsoun Ee neem neu kit, of in napein ha'mu'it namfau. In of anmaet. Mes rari te, Uisneno of anpaek In kuasat he namonib nafain Ee. Naa, oras ia, hit tahini trair tak, Tuaf re' Uisneno nba'an naan Je, es re' Nai' Yesus!” 4 Annenan on nana te, anmui' atoni' Yahudi bian antoup nai' Paulus in uab ein, rari te, sin nabuan nok nai' Paulus sin. Na'ko tuaf-tuaf re' antoup uab ein naan, anmui' msa' atoni'-atoni' Yunani re' sin namnau niis Uisneno, nok bifee bian re' nmu'in kan reok mateka' anbin kota naan. 5 Mes atoni' Yahudi sin a'naet ein ansaken ma nneek menan. Onaim, sin nhuita' are' atoes sin he ntaisibun. Oras too mfaun nabuan nrarin on nana te, sin nmurai nmo'en taisibu nbin kota naan. Sin naim nai' Paulus ma nai' Silas he sin nheer neik sin neu too mfaun re' fe' antaisibun naan. Rari te, sin nnaon nareu' nai' Yason in umi, natuin nai' Paulus nok nai' Silas natua ntaahn ein anbin naan. 6-7 Mes sin ka napein fa nai' Paulus sin anbin naan. Rari te, sin nheer neik nai' Yason ma nonot apirsait bian neu bare feek rasi. Sin nakuu nai' Yason, nak, “Oras ia, anmui' asusit re' neman et hit kota. Sin nnaon neu bare me-mee te, sin mo'en taisibu! Oras ia, sin neman he nareu' hit atoran anbi bare ia, rari te, nseun ee neik sin atoran! Nai' Yason ia, antopu nrair tuaf ein re' naan, ma antupan anbi in umi! Ma sin arsin nraban hit atoran, natuin sin ka nromin fa he nmanaku' neu hit Uis Ko'u, Keser. Sin arahaa nmanaku' neu sin Uis Ko' goes, in kaan Ee, Usif Yesus.” 8 Annenan on nana te, a'naet ein, ma atoni'-atoni' nbin bare naan, sin teenb ein nrik-raakn ok. 9 Rari te, a'naet anbi kota naan nreun nai' Yason ma nonot apirsait ein he nbaen ein roit he sin nmana'feef nak, sin of ka nmo'en fa taisibu ntein ein, ma ka naenan fa. Anbaen ein anrarin ate, sin nafetin sin nai' Yason.
Nai' Paulus sin nnaon neu kota Berea
10 Mabe naan, nonot apirsait ein abitan kota Tesalonika naten-teenb ein te, nak, reko nneis sin nsonu' nai' Paulus ma nai' Silas neu bare bian. Rari te, sin nsonu' atoin nua ein naan neu kota es, in kaan ee, Berea. Antean nana te, sin ntaman neu uim onen atoni' Yahudi. 11 Mes atoni' Yahudi abitan Berea naan, ka on fa abitan Tesalonika. Sin nromin maten he nnenan, ma nabaarb ok he ntoup nai' Paulus sin uab keni. Fin abitan Berea, anneen narek-reko' nai' Paulus sin, ma nkius narek-reko' Uisneno In Sura Kninu'. Sin namin he nahiin, nai' Paulus sin uab kein naan, batuur aa oo, ai' kah. Es nana te, fai-manas sin nparikas Uisneno In Suur Akninu' naan, tar antea namnuut. 12 Nok ranan nana te, atoni' Yahudi namfau anbi bare naan, anpirsain neu Usif Yesus. On nana msa', atoin Yunani sin. Sin re' anpirsain neu Usif Yesus naan, anmu'in rais furi ko'u. Anmui' bifee ma atoni'. 13 Ma nbi oras naan, atoni' Yahudi abitan Tesalonika annenan nak nai' Paulus sin nanoni' Uisneno In Kabin ma Prenat et kota Berea. Sin neem natuin ein, ma sin nhuita' too goe, he nmo'en taisibu nteni' anbi bare naan. 14 Es nana te, abitan Berea neik nai' Paulus rabah neu taas je ninen. Mes nai' Timotius ma nai' Silas natua nabaran anbin Berea. 15 Atoin ein naan, annaon naat nai' Paulus antean kota es, in kaan ee, Atena. Rari te, sin namaik ee anbi naan, ma sin nfanin on kota Berea. Sin neikin rais manba'an na'ko nai' Paulus nak, nai' Silas ma nai' Timotius ro he neman rabah nai he nabuan nokan.
Nai' Paulus anbi kota ko'u Atena
16 Oras nai' Paulus anpao nai' Silas ma nai' Timotius sin amneem kein neu Atena, in neekn ii nsuus, natuin in niit baer fuat namfau nbi kota naan. Nai' Paulus nkis-kius abitan Atena sin baer fuat ein 17 Mes anbi naan, anmui' atoni' Yahudi nok atoni' teta' bian re' n'onen neu Uisneno. Nai' Paulus antaam neu sin uim onen, ma nmakoin ein tenab nok sin. Neno-neno te, in nnao neu 'masa' ma na'uab nok tuaf seka-kau guah anbi naan. 18 Rari te, in maktaan ein nok tungguru bian na'ko pukan nua anbin kota naan. Pukan es, es re' Epikoros, ma pukan es anteni', es re' Stoa. Mes oras in na'uab antoom Usif Yesus, nak In nmoni nfain na'ko In a'maet Ne te, anmui' tuaf re' naronon hape, nak, “Thfoe'! Poit ii tuan ee, es re' ia!” Bian na'aak nein mnak, “Airoo! Atoni' ia he na'seke' kit, he hit tfua teu sin pah tua soon en!” 19-21 Abitan Atena ma atoin amnemat abitan kota naan, karu nneen rais fe'u te, on re' noin fe'u, tenab fe'u, sin biasa ntook nabuan ma nmakoin ein nekaf anbi 'toe' aan es, sin nteek ee te, Areopagus.Rari te, anmui' tuaf na'ko sin neik nai' Paulus annao neu bare naan, ma sin ntoot je, nak, “Neu! Mutoon miit kai, noin fe'u naan!Natuin ho mu'uab rais fe'u, re' nmoe' kai he mtaka'nana' kre'o. Onaim, hai mtoit he ho mu'uab amteni' fe', henati' hai mihiin batuur.” 22-23 Rari te, nai' Paulus anhaek ma na'uab am nak, “Hi atoin Atenas arki! Au 'nao 'noon urair hi kota ia, ma au 'iit urair 'ak namneo, hi ammakoe he minaoba' atoran rais pirsait. Au 'iit hi baer fuat ein et me-mee. Mes au 'iit baer fuat es, maruna' nak, ‘Ia fuat neu pah tuaf ka mahini' fa’. He tabain tet tak, hi mfua mrair meu Uisneno, mes hi ka mihiin Je fa fe'. Naa, In es re' au utoon ki Je naan. 24 In es re' nmoe' neno-tunan ma pah-pinan, nok in afan ok-oke'. In es Usif neu are' saa' et neno-tunan ma pah-pinan. Onaim, In ka natua fa et uim fuat re' mansian ii nmo'e. 25 In es anfee snasaf ma namonib hit mansian. Paara' te, In es anfee are' saa' re' hit tperuu. Mes In ka nperuu fa sa'-saa'. Es nana te, mansian ii ka nabei' fa he ntuur Ne. 26 Na'ko tuaf mese', In namonib too nbi pah-pinan nfuun am nateef. In es anbait neu pah-pah, es-esat nok in pah. Ma In es an'ator pah-pah sin a'hakek ma sin a'mofuk, mese'-mese' te nok in etin. 27 Onaim, In nmoe' on naan, natuin In nroim henati' hit mansian kit, taim ma tahiin Je rek-reko. Mansian sin ro namin, kar-karu sin he nateef nok Ne. Mes mneon ii, In ka na'roo fa na'ko kit. 28 Anmui' tuaf na'uab niit nak, ‘In es re' uuf neu hit asnasak. In es re' 'ba'af na'ko hit a'monik.’ Anmui' hi amnait-nee msa', na'uab ein nak, ‘Hit tmoin, ta'koon ee. Etun hit tfain in sufan.’ 29 Naan ro batuur. Hit arkit ia, Uisneno In suufna kit. Onaim, kais mitenab mak Uisneno nahuum on baer fuat mahuma', re' mansian bisa nmo'e neki mnatu', ai' noin muti', ai' fatu, natuin sin tenab ein kuuk. 30 Nahunu te, batuur mansian ii ka nahiin fa rasi naan. Etun es re' Uisneno nafetin kit he hit tmoin tatuin hit monok. Mes oras ia, In ka nroim fa he hit tmoin on nana nteni'. Etun In nfee prenat nak, hit ro he tnao tasaitan ma tparakan fuat ein re' naan, rari te, tnao tatuin Ee nai. 31 In imsa' nbera' nain ors es, he nhukun pah-pinan ia nok in afan no mes-mese', natuin sin saant ein. Ma In nruur ma nreek nain Tuaf es anfain In Afeek Rasi. Tuaf naan of nafeek rasi te, natai. Oras ia, hit tahiin nok akninu', Afeek Rasi naan es re' sekau. In, es re' nmate nrair, mes Uisneno namonib nafain Ee.” 32 Mes oras re' abuat ein naan anneen nai' Paulus nak, anmui' atoin amates anmoni nfain, sin mains ee. Mes anmui' tuaf bian anromin he nneen neu ne. Sin natonan nai' Paulus, nak, “Hai mrom-roim fe' he mneen ho uab ein naan. Mes mautum anbi ors es anteni'.” 33 Rari te, nai' Paulus annao nasaitan bare naan. 34 Mes anmui' tuaf re' annao nabua nok ne, natuin sin npirsain nrair Usif Yesus. Es na'ko sin re' nati' te an'ator rasi anbi Areopagus, in kaan ee, nai' Dionisius. Nok bifee es, in kaan ee, bi Damaris. Ma nmui' bian anteni', re' nnaon nabuan nok sin.
Nai' Paulus anmakhiin ein nok ain Priskila ma aam Akila anbi kota Korintus
1-3 Oras naan, Uis Ko'u Keser Roma, in kaan ee, nai' Kradius. In nato'on atoni' Yahudi sin, rari te, in nriu' napoitan sin na'ko kota Roma nbi propinsi Italia. Onaim, sin nsisae'n ok anbi me-mee. Anmui' naan atoin Yahudi es, in kaan ee, nai' Akila, ma nok in fee je, bi Priskila. Sin nua sin naen anpoi na'kon propinsi Italia, nnaon neu kota es, in kaan ee, Korintus. Nai' Akila ia, neem na'ko propinsi Pontus. In meupn ii, es re' he nmoe' bare' na'ko pasu. Oras naan, nai' Paulus amsa' nnao nasaitan kota Atena, ma in annao neu kota Korintus. Anbi naan, nai' Paulus anmakhiin ein nok nai' Akila ma bi Priskila, natuin in imsa' amoe' bare na'ko pasu. Sin natua nabuan, ma nmeup nabuan. Nai' Paulus ma nai' Akila ma bi Priskila sin nmeup nabuan 4 Karu ntea neno snasat atoni' Yahudi sin ate, nai' Paulus antaam neu sin uim onen. Anbi naan, in nsoba' he nfuri' atoni' Yahudi, ma atoni' teta', he npirsain neu Usif Yesus. 5 Mes oras nai' Silas ma nai' Timotius neman na'ko propinsi Makedonia, nai' Paulus nasnasab meup pasu naan. Fai-manas in meup ma'tani' ma natonan atoni' Yahudi sin, nak, “Atoni' re' hit arkit atpao na'ko un-unu', re' Uisneno nba'an he nsoun Ee re' naan, neem anrair. In es re', Usif Yesus!” 6 Mes anmui' atoni' Yahudi re' nraab Ne piut, ma sin na'uab namouf goe. Rari te, nai' Paulus ntekar afu skukuk na'ko in baer paken, nfain tanar es nak, in ka nfairore nteni' sin fa, natuin sin ka nromin fa he ntoup Rais Reko re' in natoon neu sin. Onaim in na'uab, am nak, “Hi re' ia, on re' he bainesi' ki! Hi on he mikosob kim hi ruikm ein! Mes maut nai! Hi of mitaah kim hi saant ein. Of hi mitaah kim! Nmurai na'ko oras ia, au ka 'mu'i 'teni' fa urusan ok atoni' Yahudi ki. Au he 'nao unoni' uuf a'teta' re' ka na'ko fa atoni' Yahudi.” 7 Anmui' uum jes anbi uim onen naan in aon-bian. In tuan ee, kaan ee, nai' Titius Yustus. In ka na'ko fa atoni' Yahudi, mes in neek ne nmariin neu Uisneno. Rari te, oras nai' Paulus annao nasaitan atoni' Yahudi sin, in nnao ma ntaam neu aam Titius in umi. 8 Ma uim onen naan in a'nak te npirsai neu Usif Yesus amsa'. In kaan ee, nai' Krispus. In uum je naan amsa' npirsain, nabu-buan nok atoni' Korintus bian re' nneen nai' Paulus. Rari te, nai' Paulus nasrain sin ok-oke'. 9 Anbi faaj es ate, nahuum on re' anbi mneit, nai' Paulus anneen Uisneno na'uab am nak, “Paulus, ho kaisa' mumtau, ma kaisa' m'oer meu mepu ia, natuin ho 'sutais ein ka oek ein fa fe'. Ho ro he munoni' sin piut meik Rais Reko na'ko Kau. 10 Mumnau, goo! Ho ka mmepu mmesef. Fin Au 'ok ko. Maski atoni' nasusab ko, mes Au 'pasan Au haek neu ko. Ma Au 'kius ko fai-manas. Kaisa' mnikan, anbi kota re' ia, Aung guin namfaun.” 11 Anneen on nana te, nai' Paulus natua sero 'roo nbi kota Korintus. In nanoni' Uisneno In Rana 'Honis anbi naan, tar antea toon es ma stena'. 12 Oras naan, sin nasaeb tuaf es nrair gubernor anbi propinsi Akaya. In kaan ee, nai' Gario. Onaim, atoni' Yahudi sin anma'akoran ma sin nheer neik nai' Paulus annao neu gubernor, anbi bare feek rasi. 13 Onaim sin natraak nai' Paulus am, nak, “Atoni' re' ia, anfuri' too mfaun he natuin pirsai fe'u. Maski ana' prenat Roma ka nahiin fa pirsait naan!” 14 Mes oras nai' Paulus he nfei in fefan, he namneob in tuan, gubernor naan ansenu nfeek in uaban. In nakaina' nain atoin ein re' natraak nai' Paulus, nak, “Hae! Atoni' Yahudi ki. Mitniin fe'! Karu hi mitrakan kau rais re'uf, ai' rais marorot, au ro he 'neen hi rasi naan. 15 Mes rasi re' hi meik je neem re' ia, naan rasi re' et hi uum je nanan! Suma hi misurin rasi re' nmatoom nok atoran pirsait Yahudi, ma nok in uab eni, ma nok sin kaang keni. Ana' parent ii ka n'urus fa rasin on re' naan!” 16 Rari te, gubernor naan anriu' napoitan sin na'ko bare feek rasi naan. 17 Onaim, atoni' Yunani sin anheek naan tuaf es, in kaan ee, nai' Sostenes. In re' naan, a'nakat na'ko atoni' Yahudi sin uim onen. Onaim, sin nheer neik je, ma nbees goe anbi gubernor ee in matan. Mes gubernor naan ka nfairoer sin fa.
Na'ko Korintus, nai' Paulus anfani nteni' on kota Antiokia et propinsi Siria
18-19 Rari te, nai' Paulus natua nabaar anbi Korintus. Mes a'ro-'roo te, in nasee neu apirsait ein anbi naan. Rarit in, ma bi Priskila ma nai' Akila, nnaon neu kota es, in kaan ee, Kengkrea, he npaon abnao oe. Anbi naan, nai' Paulus ankeu in a'nakan he nfain tanar nak, saa' re' in nba'an nraar je nok Uisneno, oras ia, in nmoe' je. Rari te, sin nsaen bnao oe, ma nnaon neu kota Efesus. Antean naan, sin nsanun na'ko bnao naan. Ma nai' Paulus nasaitan tua nua ein naan, ma in ntaam neu atoni' Yahudi sin uim onen. Anbi naan, in makoni' tenab nok atoni' Yahudi sin. 20 Sin na'ub-uab ein on nana te, atoni' Yahudi sin antotin he nai' Paulus natua nteni' nok sin sero 'roo. Mes in ka nromif. 21 Rari te, in nasee mnak, “Aok-bian arki, kaisa' hi neekm ein nabatin! Karu Uisneno nfei ranan neu kau te, of au uum he 'kisu 'teni' ki.” Na'uab anrair on nana te, in nnao nasaitan kota Efesus. 22 Rari te, in nsae bnao oe nteni', ma nnao nkoon tar antea kota Kaisarea. Ma in nsanu nbi naan. Rari te, in nao neki nsae neu Yerusalem, ma nmataeb nok apirsait ein anbi naan. Rari te, in nfain on kota Antiokia. 23 In natua sero' roo nbi naan, rari te, in nnao nteni', in nnao nfuun am nateef anbi propinsi Garatia ma propinsi Frigia. Anbi naan, in naheran apirsait ein sin nekak.
Nai' Apolos anbi kota Efesus ma kota Korintus
24 Oras naan, anmui' atoin Yahudi es, na'ko kota Areksanderia et propinsi Masir. In kaan ee, nai' Apolos. In re' naan, atoin fefa' 'honis. In nahiin Uisneno In Suur Akniun ee in afne namnuut. In fe' neem antea kota Efesus. 25 In nneen anrair reta' ntoom Usif Yesus, ma in nmariin he nareta' nafain ee neu tuaf bian. In nareta' nok marinet, ma saa' re' in na'uab ee naan, ro namneo. Suma in fe' ka nahiin narair fa are' rasi naan oke'. In suma nahiin nak, nai' Yohanis nasrain atoni', karu sin nasaitan sin saant ein. 26 Anbi neot es ate, in na'uab ka na'nifa' fa anbi uim onen atoni' Yahudi. Ain Priskila nok aam Akila sin imsa' nok annenan. N'onen nrarin ate, sin naskau neik je on sin umi. Anbi naan, sin natoon ee, Usif Yesus In Rana 'Honis, tar antea namnuut. 27 Rari te, nai' Apolos nafeek he nnao neu propinsi Akaya. Apirsait ein anbi kota Efesus anneek mesen nok in romin. Rari te, sin ntui suurt es, neu sin aok-bian sin abitan Akaya, ma ntotin he sin ntoup nai' Apolos nok rek-reko. Antoup surat naan, rari te in nnao ntea Akaya. Anbi naan, in nturun apirsait ein batur-batuur. 28 In imsa' te anmakoin ein nekaf nok atoni' Yahudi sin, anbi too mfaun sin matak, mes sin ka niis ee fa. In nroim he npaek Uisneno In Suur Akninu' he nanoni' sin, nak, “Tuaf re' Uisneno nba'an he nsoun Ee, re' hit tpao 'ro-'roo gui, In es re' Usif Yesus!”
Nai' Paulus anfani nteni' nbi kota Efesus
1 Oras nai' Apolos fe' nbi kota Korintus et propinsi Akaya, nai' Paulus annao nfuun kuan ein abitan knet ko'u. Rari te, in ntea kota Efesus. Anbi naan, in nateef nok tuaf fauk re' npirsain nrarin neu Usif Yesus. 2 Onaim, in nataan sin am nak, “Aok-bian arki! Neno hi mpirsai meu Usif Yesus, hi mtoup In Asmana Kniun Ee, oo, ai' kah?” Sin natahan am nak, “Kah fa, tua! Hai ka mneen miit fa fe', nak Uisneno nmui' Smanaf on re' naan, tua.” 3 Ma nai' Paulus nataan anteni' sin am, nak, “Karu on nana te, sin nasrain ki, neik srani' mee?” Onaim sin natahan am nak, “Sin nasrain kai, npaek nai' Yohanis in asranit, tua.” 4 Onaim, nai' Paulus nak, “Mneen fe'! Nai' Yohanis nasrain atoni' he nrair tanar nak, sin nasnasab sin tuak ein na'ko sanat-sanat sin. Mes mimnau! Neno-neno, in es neikn on nanoni' too Isra'el, nak, sin ro he npirsai Nai' Yesus, Tuaf re' Uisneno of he nsoun Ee neem.” 5 Annenan on nana te, sin ntotin he in nasrain sin, he sin ntaman neu Usif Yesus In nonot apirsait. 6 Rari te, oras nai' Paulus antao in a'niman neu sin ma n'onen, sin napenin Uisneno In Smana Kninu'. Onaim, sin nmurai na'uab ein neikin uaba' 'teta' re' sin fe' ka nahiin je fa. Ma Uisneno npaek sin he natoon saa' re' of he njair. 7 Sin nabu-bua, tuaf bo'es am nua.
Uisneno npaek nai' Paulus anbi kota Efesus
8 Oras nai' Paulus natua nbi kota Efesus, in biasa ntaam neu uim onen atoni' Yahudi, ma nanoni' sin ntea namnuut antoom Uisneno In Aprenat. In na'uab ka na'koro' fa saa' es. In nmoe' on naan, tar antea funan teun. 9 Mes anmui' tuaf re' ka ntoup fa noni' naan, onaim sin nraab ne. Sin nhuita' atoni' anbi bare naan, he sin kaisa' natuin Usif Yesus In Rana' 'Honis. Nok rasi naan, nai' Paulus nok apirsait ein nasaitan uim onen naan. Rari te, sin nnao nabuan anbin umi skoor es. Uim tuaf skoor naan, in kaan ee, nai' Tiranus. 10 In nanoni' sin on naan, tar antea toon nua; tar antea too mfaun anbi propinsi Asia nfuun am nateef, sin nneen anrair Usif Yesus In Rais Reko. Anenat sin, es re' atoni' Yahudi, ma atoni' teta' amsa'.
Nai' Sakewa in aanh ein
11 Oras naan, Uisneno nfee kuasat neu nai' Paulus, he nmoe' rais sanmakat huma'-huma'. 12 Tareta' te, on re', karu atoni' ntoti ntahan nai' Paulus in a'piru', ai' in a'futu', ma sin ntao bare' naan neu ameent ein, ma sin meens ein naan namneuk nanin. Tar niut reu'f ein amsa', nasaitan nain ameent ein naan. 13-14 Anbi naan, anmui' a'nak pirsait Yahudi es, nok in an-mone sin, tuaf hiut. A'nak pirsait naan, in kaan ee, nai' Sakewa. In aanh ein nati' te nnaon neu bare-bare ma anriu' napoitan niut re'uf ein na'ko aniut-saes ein. Sin imsa' nsoba' niit he nriu' niut re'uf, neik Usif Yesus In kanan, nak, “Ho muhiin Usif Yesus re' nai' Paulus natoon Ee, ai' kah? Oras ia, au uprenat ko, a'paek Usif Yesus In kanan, ak, ho mpoi nai mu'ko atoni' ia!” Ma nmui' atoin ahinit Yahudi bian re' nsoba' he nmo'en on naan amsa'. 15 Onaim ors es ate, nai' Sakewa in aanh ein naprenat on naan, anmui' niut aburarut es nataah am, nak, “Au uhiin Usif Yesus. Au uhiin nai' Paulus amsa'. Mes hi re' ia, hi sekau ki?” 16 Rari te, tua aniut-saes re' naan, nato'o ko'u. Rari te, in nasaap ma nbeos sin imsa'. In napapa' sin, ma npius nain sin barun, tar antea sin naenan af-afa' na'ko umi naan. 17 Rari te, uab naan nabeon on fefaf neu fefaf, tar antea abitan kota Efesus nahinin ok-oke'; et atoni' Yahudi, ma atoni' teta' msa' nahinin. Para' te, sekau-sekau re' nneen rasi nana te, sin nfain namtaun ma nsanmakan. Onaim, sin na'naeba' Usif Yesus, fin In es re' nfee kuasat ko'u neu nai' Paulus. 18 Rari te, apirsai fe'un naan, neman neu sin aok-bian sin re' npirsain nrarin, ma nfei sin nekak, rari te sin manaku' sin sanat. 19 Na'ko sin re' ia, anmui' atoin ahinit namfau. Rari te, sin na'bua' naan sin suur noin hiinf ein naan, ma nout sin ma nputu nmaten. Karu he tsoi' suurt ein naan, sin oos keni nabubuan noin muti' nifu bo'-niim. Abitan Efesus nout sin suur noin raut ein 20 Rari te, bifee-atoni' nareta' Rais Reko Uisneno et fai ma manas anbi me-mee. Onaim, apirsait ein na'baab ok piut. Natuin Uisneno In Kabin ma Prenat naan, ntaam senan sin, tar antea sin nekak naan kein.
Taisibu anbi Efesus
21 Rari te, nai' Paulus nafeek he nfain on kota Yerusalem. Mes in nroim he nnao nahuun neu propinsi Makedonia ma propinsi Akaya, rari te, na' in he nnao nkoon neu Yerusalem. In natenab anrair, nak, “Reko nneis, au 'nao 'kius nonot apirsait ein anbi baren re' ia fe', fin maski on mee msa', au ro he 'tea kota Roma.” 22 Rari te, in nreun in soba' nua, es re' nai' Timotius ma nai' Erastus, he nnaon nahunun neu Makedonia. Mes in natua sero' roo nteni', anbi propinsi Asia. 23 Oras naan, rais ko' goes, re' nmatoom nok Nai' Yesus In Rana' 'Honis, anboor anbi kota Efesus. 24 Rasi naan, in uun ii, onai: Anbi naan, anmui' naan atut-noni es, in kaan ee, nai' Demetrius. In biasa nmoe' uim fua' an-ana' namfaun na'ko muti', neu pah tuaf es, in kaan ee, bi Artemis. Natuin in mepun naan nrauk batuur, onaim in npaek ameupt ein mfau re'uf. Etun roit ii ntaam piut neu ne. 25 Neot es, nai' Demetrius na'bua' naan in ameupt ein ee, ma ameput bian anteni', rarit in na'uaba' sin am nak,“In ama' ma au aok-bian arki! Hi mihiin main mak hit a'moin ki on re' ia, natuin roit ii neem na'ko hit mepu. 26 Mes oras ia, hit tiit tok hit matak, ma hit tneen teik hit rukik, naan nai' Paulus in kakai na. In fuir too mfaun ii nak, baer ein re' hit tmoe' sin re' ia, ka ma'upa' fa. In nak baer fuat re' hit tmoe' sin re' ia, suma pah tuaf ein rum-ruum ah. Naa, ka abitan kota Efesus fa es anmesen nenan, mes propinsi Asia nfuun am nateef annenan amsa'. 27 Onaim, amneen rek-reko! Of hit he trair saa' ntein, karu too mfaun ii natuin nai' Paulus sin piut? Of atoni' ka neu he nsoos anteni' fa hit baer fuat ein re' ia. Mimnau! Oras ia, too mfaun ii na'bees neu hit pah tuaf bi Artemis amasat. Nbi propinsi Asia, tar antea pah a'piin ii nfuun am nateef, onaim a'beest ein naan neman ma ma'besan anbi In Uim Fuat Uuf, es re' anbi hit kota Efesus.Onaim, kas-kaisa' atoni' ka nfairoor je fa heen, ma sin ka nromin fa he neman anteni' neu bare ia!” 28 Sin nenan on nana te, sin nato'on batur-batuur. Rari te, sin nhuun nein, am nak, “Artemis, neek reko! Artemis namaas! Hai abiit Efesus, mi'naeb Artemis!” 29 Too mfaun anneen sakanat naan, ma sin naen neman, tar antea kota naan naheun nok too mfaun. Sin ntaka'naan ein. Onaim, atoin ein nmurai nmo'en taisibu npe'-pe'o ha ranan, tar antea kota naan in amneer ko'u. Sin nheek naan tuaf nua, ma nheer neik sin neu bare naan. Sin kaan kein es re', nai' Gayus ma nai' Aristarkus. Atoin ein anheek sin, natuin sin nua sin re' naan, nai' Paulus in soob eni na'ko Makedonia. 30 Anneen on nana te, nai' Paulus anroim he ntaam neu too ataisibus naan sin atnaank ein, mes too apirsait ein npeen ee. 31 A'naet bian na'ko propinsi Asia nokan nbi naan, sin nahiin narek-reko nai' Paulus. Sin nreun tuaf he natoon am nak, nai' Paulus ka nabei' fa he ntaam neu too mfaun re' nmo'en taisibu naan. 32 Anbi mnera' naan, atoni' nmurai naim rasi naan in uun. Bian anhunun neik haan poi, nak, “On nai!” Bian nkoa' ein, nak, “On naan!” Te kah, too mfaun naan, ka nahiin fa rasi naan in a'naon. Sin naen nok nahaa. 33 Anbi bare naan, anmui' atoni' Yahudi msa' re' nmurai namtaun. Sin teenb ii nak, kais-kaisa' too mfaun sin nakuu sin nak sin es re' nafuuk namonib rasi ia. Etun sin nahake' naan tuaf es antoom maat, anrair atuut hanaf neu too Yahudi sin. In kaan ee, nai' Areksander. Sin ntotin he in namneob sin, nak atoni' Yahudi sin ka nahiin fa rasi naan. Rari te, nai' Areksander nait in a'niman, nahuum on re' he nakaina' sin he na'teen ein. Rarit in na'uab he namneuba' atoni' Yahudi sin. 34 Mes, oras sin nahinin nak, in re' naan atoni' Yahudi te, sin sakanan piut, nak, “Artemis neek reko! Artemis namaas! Hai abiit Efesus mi'naeb Artemis!” Sin sakanan on naan, tar jam nua. 35-36 Rari te, a'nak prenat kota Efesus anhaek ma nakaina' sin. In nak, “Aok-bian arki, abitan kota Efesus! Are' pah-pah nahiin nak, hit pah tuaf bi Artemis, in amneem nii na'ko neno-tunan neu kit. Onaim, hit abit Efesus, es re' atpairoir tarek-reok ee. Ka tiit taan fa tuaf es, nait nain hit pa' naan, natuin rasi nana nrair reta' nmoin piut ma are' pah-pah nahinin nrarin. Onaim, nansaa' am es hi msakaan on naan? Maski anmui' aboot, natuin sin romik, mes hi kais ammoe' taisibu human on re' ia! 37 Hi mheer meik tua nua' ein re' ia, nahuum on re' sin nmo'en rais re'uf. Te kah, sin ka nabakan fa sa'-saa' na'ko bi Artemis in Uim Fuat Uuf. Sin ka na'uab namouf fa hit pah tuaf bi Artemis in kanan. Onaim, hi he misaan sin nok rais saan saa'? 38 Mimnau, goo! Hit tmui' bare he tafeek rasi. Afeek rais ne msa', sin npao nanin. Onaim, karu nai' Demetrius sin he nmo'en rasi te, sin ro he natuin in atoran, he sin neik rasi naan neu bare feek rasi. 39 Ma karu nmui' rasi teta' nteni' re' sin he naiti, nbain he sin nnaon nma'akoran nok atoni mnasi' sin. 40 Kas-kaisa' ana' prenat Roma nasaan kit, natuin taisibu ia. Karu sin he naim rasi ia in a'naon ii te, hit of tataah on mee? Natuin rasi ia, ka ma'u'u fa!” 41 Na'uab anrair on nana te, a'nakat naan anreun sin he sin nsisa'en. Onaim, sin natuin ein.
Nai' Paulus sin nfanin nteni' neu propinsi Makedonia
1 Oras atoni' ka ntaisibu ntein ein fa anbi kota Efesus, kota naan mamut on re' nati'. Rari te, nai' Paulus nabuaba' naan apirsait ein anbi naan, ma naheran sin neek eni. Rari te, in nasee, ma nnao neu propinsi Makedonia. 2 In nnao na'ko kuan neu kuan anbi bare naan, ma naheran too apirsait sin neek eni. In nmoe' on naan, tar antea in ntaam neu pah Yunani. 3 In natua nbi naan funan teun. Rari te, in nabarab he nsae bnao oe ma nnao neu propinsi Siria, mes in nneen am nak, atoni' Yahudi sin nma'akoran he nroor niis ne. Oras in nneen on nana te, in ka nroim fa he nsae bnao oe ma nnao he ntea nain neu propinsi Siria. Onaim in nnaon nfain nok raan meto' propinsi Makedonia. 4 Puk' ana' es nnao nabua nok nai' Paulus. Es re', aam Pirus in anah nai' Sopater, na'ko kota Berea; tuaf nua na'kon kota Tesalonika, sin kaan kein es re' nai' Aristarkus ma nai' Sekundus; tuaf es na'ko kota Derbe, in kaan ee, nai' Gayus; ma tuaf teun na'kon propinsi Asia, es re' nai' Timotius, nai' Tikikus, ma nai' Trofimus. 5-6 Rari te, au (es re' nai' Lukas atui surat ia), uteef a'teni' ok nai' Paulus anbi kota Filipi, nbi propinsi Makedonia. Nai' Paulus in soob ein nnao nahunun ma npao kai nbi kota Troas, et taas je panin. Oras atoni' Yahudi sin neon ko'u Paska oke' nrair, hai nua kai msae bnao oe ma mnao meu kota Troas. Oras naan, hai maan, neno niim. Oras hai mtea Troas, hai msaun mi'ko bnao oe naan. Hai miteef mok hai soba' bian sin, re' nahunun kai, onaim hai mitua mbi naan neno hiut.
Atoin munif nai' Yutikus anmouf na'ko uum jes in eno-sneer anbi kota Troas
7 Neno naan, neno krei. Nai' Paulus nafeek anrair nak, “Aok-bian arki! Noka' te, au he 'nao 'koon.” Onaim, hai nonot apirsait oke', iim he mibarab bukae. Natuin nai' Paulus he nnao, es na' in na'uab nok kai tar antea faaj ii natnaan. 8 Hai mibua mbi uum jes in a'tuta' teun ii. Mabe' naan, sin notun paku mfau re'uf. 9 Oras naan anmui' an-moen muinf es, in kaan ee, nai' Yutikus, antook anbi eno-sneer. In nok anneen nai' Paulus amsa'. Ka 'roo fa te, in maat kein ii anma'fenan, onaim in ntuup anfiin. Nok askeken ate, in mouf na'ko eno-sneer naan. In nmaet nain. 10 Nai' Paulus nsaun natuin amofut naan, ma nhoo naan ee. Ma in na'uab am nak, “Kaisa' mimtau. In nmoin.” 11-12 Hai arkai mmariin, fin an munif nana nmoin. Rari te, sin neik nafain ee neu in umi. Onaim, hai msae mfain, ma hai miah mibu-bua. Oke te, nai' Paulus na'uaba' tar antea nmeu nfiin. Man re' mansi npe'e te, hai misee sin ma mnao misaitan sin.
Na'kon kota Troas annaon neu kota Miletus
13 Rari te, hai mma'akor ma mbait soom, tar antea hai miteef amteni' mbi kota es, in kaan ee, Asos. Onaim, hai msae bnao oe meu Asos. Mes nai' Paulus annao ran-meto' neu kota naan. Ranan na'ko Korintus nnao neu Patara 14 Oras hai miteef amteni' nai' Paulus anbi kota Asos, nai' Paulus ansae bnao oe ia, ma hai mnao piut meu kota Metirene. 15 Mi'ko naan, hai mnao mkoon. Noka' te, hai mpau mak-maak puur goes, in kaan ee, Kios. Nmeu te, hai mnao mkoon meu puru Samos. Esah te, hai mtea kota Miretus. 16 Mes nai' Paulus in neekn ii anroim, he karu reko te, hai mtea rabah meu kota Yerusalem, he in napein mainuan he nok na'naeba' neon ko'u Pantekosta. Rari te, in ka nroim fa he npori' oras, he nnao nsae neu kota Efesus, natuin in ka nmu'i ntein fa mainuan.
Nai' Paulus na'uab nok atoni mnasi' Kristen abitan kota Efesus
17 Onaim, anbi Miretus, nai' Paulus nfee hanaf neu atoni mnasi' Kristen abitan kota Efesus, he sin neem nateef nok ne. 18 Oras sin neem antean on nana te, nai' Paulus natonan sin am, nak, “Aok-bian arki. Hi mihiin main au 'monik ia, nmurai na'ko neno un-unu' au 'terin au haek anbi propinsi Asia, tar antea oras ia. 19 Hi msa' mihiin au 'meup ma'tani' 'bi hi tnanam, mes au ka u'naeb ok fa. Anbi au mepu sin, au matnuu nggui nsain, ma ha'mui'ti ka ana' fa. Au upein ha'mu'it namfau na'ko atoni' Yahudi sin. 20 Oras au unoni' ki, au upoin ain are' rais rekon re' au uhiin sin, neu ki. Ma au unoni' ki mat-maat. Au 'nnao eu atoin ein sin umi mese-mese, he umnauba' sin antoom Uisneno In romin. 21 Au utonan atoni' Yahudi, ma atoni teta', ak sin ro he nasaitan sin saant ein, he natuin Uisneno. Ma sin ro he npirsain neu hit Usi', es re' Usif Yesus. 22 Onaim, au he utoon onai: Oras ia, au 'roim he 'nao eu Yerusalem, fin Smana Kninu' Uisneno nheer neik kau 'nao 'eu bare naan. Au utuin ah, maski au ka uhiin fa saa' re' of he njair neu kau nbi bare naan. 23 Mes na'ko kota es neu kota es, Smana Kninu' natoon nahuun neu kau nak, au of he 'taam bui ma 'sutai ha'mu'it namfau nbi bare naan. 24 Au uhiin urair on naan, natuin Usif Yesus es re' nasaeb kau mepu ia, he au 'nao utoon Rais Reko ak, Uisneno nneek kit, ma In maneekn ii kaheen. Karu au ka utuin fa In romin, he usoup In mepu, au 'naben au' monik ia ka ma'osa' fa. 25 Oras ia, au uhiin ak, hi of ka miit amteni' kau fa heen. Es re' hi re' au unoni' ki 'ro-'roo re' ia, anmatoom nok rasi he tjair on Uisneno In asar. 26-28 Es nana te, amneen, oo. Au' usopu 'rair au mepu anbi ki. Onaim oras ia, hi mmepu mkoon. Karu anmui' tuaf na'ko ki, re' ka ntaam fa anbi Usi' In nonot apirsait ate, hi es mitaah kim, oo! Au ka usanab fa.Mimnau! Au utoon 'ain Uisneno In romin ok-oke' neu ki. Ka tiit tan fa raas jes re' ma'koro' neu ki.Onaim, hi ro he mpanat hi 'monim, ma mpairoir main are' tuaf re' Smana Kniun Ee nreun ki he mpanat sin. Kaisa' mnikan mak Usif Yesus nmate nrair, he nbaen nafeek sin oos keni nok In naa' Ee Kuun. In imsa' nruur ki, he hi mkius sin, nahuum on re' atukus natuuk in a'bib kasen. 29 Oras ia, au 'nao usaitan ki. Mes mimnau! Of anmui' atoni' neem ma nanoni' rafu'-rafu' anbi hi tnanam. Sin nahuum on re' aus fuu ji antaam anseer goon neu 'bib-kasen nbi o'of. 30 Anmui' tuaf aputa'-kriu on naan, na'ko bare bian. Mes mimnau. Bian anteni' nboor na'ko hi. Onaim, sin nanoni' rais ruman neu ki. Sin nromin he atoni natuina haa sin. Onaim, sin nsoob ein he nheer neik tuaf he kaisa' natuin Usif Yesus anteni'. 31 Es nana te, hi mpaant om rek-reko. Kaisa' amnikan, natuin au utua ok ki, toon teun. Au msa' a'faineek ki fai-manas, ma au ka utenab fa au haet. Au maat nuung guin nsain neu ki. 32 Oras ia, hit he tbaits ok. Onaim, au 'nona' ki, neu Uisneno In a'niman, he In npairoir ki. Hi mnaa' miher-heran saa' re' au utoon ki na'ko nmurai, re' nmatoom nok Uisneno In Nekan Arekot. Uisneno In nmui' kuasat he naheran ki. In imsa' nba'an he nfee tetus neu In apirsait sin. Onaim, karu hi mituin piut neu Uisneno, nok neek a'kninu', of hi mipein In tetus naan. 33 Oras au 'mepu 'bi hi tnanam, au ka' sinmakan fa saa' es na'ko ki. Au ka 'toit iit fa hi bare mnatu', ai' noin muti', ai' pake, ai' baer sa'-saa'. 34 Hi mihini msa', oras au utua ok ki, au 'meup ma'tani' he au bisa 'moin. Ka neu au 'mees fa, mes au 'mepu msa' neu sin re' nok kau. 35 Onaim, nok re' rasin re' ia, au utoon ki ranan he hi msa' mok amturun atoin asusat sin, re' ka nmu'in fa sa'-saa'. Mimnau, goo! Usif Yesus nak, ‘Hit tfeet reko nneis na'ko hit 'toup.’” 36 Nai' Paulus na'uab anrair on nana te, in nri'-tuu ma an'onen nok sin ok-oke', ma ntoit he Uisneno npanat sin. 37-38 Sin neek ein nsusan nmaten, natuin nai' Paulus nak, sin of ka nateef anteni' fa nok ne. Onaim, oras sin he nbaits ok, sin nhoo ma nneek nai' Paulus, ma nkaen nme'-meu'r ein. Rari te, sin nnao naat kai neu bnao oe.
Nai' Paulus sin nfanin on Yerusalem
1 Hai manseon mirair mok atoni mnasi' Kristen na'ko kota Efesus nok neek ma'fena' te, hai msae bnao oe, rari te hai mnao mkoon meu puru Kos. Noka' te, hai mok abnao oe naan, ma hai mtean puru Rodos. Mi'ko naan, hai mnao mkoon mok abnao oe meu kota Patara. 2 Anbi naan, hai msaun mi'ko bnao oe naan. Rari te, hai msae meu bnao oe 'teta', re' he nnao on propinsi Finisia, anhaumaak Siria. Oras hai msae bnao oe re' naan, sin nasaeb nain bonit naan, ma hai mnao. 3 Hai mnao ka 'roo fa te, hai mkius miit puru Siprus anbi hai nimam a'rii, mes hai mnao mkoon goah, tar amtea ma misanut bonit anbi kota Tirus, et propinsi Siria. Anbi nana te, sin he nasanu bnao oe in abrua' sin. Sin nasanu abrua' na'ko bnao oe 4 Natuin sin fe' nasaun ein bare', hai msaun ma mnao maim apirsait ein. Oras hai miteef mok sin, hai mitua mok sin neno hiut. Apirsait ein abitan naan, napenin mnaub na'ko Smana Kninu' Uisneno, he ntaar nai' Paulus he kaisa' nnao nkoon neu Yerusalem. 5 Neno hitu nkono te, hai mfain meu bnao oe naan. Apirsait ein ok-oke', et bifee-atoni', ana'-ko'u, mnasif am munif, annao naat kai ntea taas je ninen. Anbi naan, hai mri'-tuu ok-oke' ma m'onen. 6 Rari te, hai mmanseon, ma hai msae meu bnao oe naan, ma fin sin nfanin ok-oke'. Ranan na'ko Patara neu Yerusalem 7 Hai mfeen mi'ko Tirus, oke' te hai meis mok kota Ptolemais. Anbi kota naan, hai msaun mi'ko bnao oe, ma hai mnao maim apirsait ein. Hai miteef mok sin, rari te hai mtook mok sin neno mese'. 8 Noka' te, hai mok bnao oe naan, amnao mteni' mi'ko naan, ma mtean kota Kaisarea. Anbi naan, hai mnao mitua ambi nai' Felipus in umi. In re' naan, es re' neik nahun-hunun Usif Yesus In Rais Reko anbi naan. In imsa' tuaf es na'ko tuaf hiut re' sin npiir sin anbi Yerusalem he nbatin bukae neu baun ein. 9 Nai' Felipus anmui' an-feto haa. Uisneno npaek sin, nfanin In mafefa' kninu' he natoon In romin. 10 Oras hai mtook mok sin of neno fauk ate, atoin es, in kaan ee, nai' Agabus, neem na'ko propinsi Yudea. Uisneno npaak je he nfain In mafefa' he natoon Uisneno In romin. 11 In neem nateef nok kai. Rari te, in nait nai' Paulus in pasu 'futu', ma in nfuut in haen-niman nok pasu 'futu' naan. Rari te, in nak, “Uisneno In Smana Kninu' na'uab onai: ‘Pasu 'futu' re' ia in tuan ii, of atoni' Yahudi sin anpuun ee nahuum on re' ia, anbi Yerusalem. Rari te, sin nanaa' te neu atoni' 'teta' sin a'nimak.’” 12 Amneen atoni' re' naan in uab ein te, hai mtoit batur-batuur meu nai' Paulus, he kaisa' nnao nkoon neu Yerusalem. Hai, re' in aanh in kai, ma apirsait ein na'ko bare naan amsa', antotin on naan. 13 Mes in ntoin kai mnak, “Kahaf! Nansaa' am es hi mkae on naan? Hi mmoe' he mha'feen au nekak. Onai! Anmui' tuaf re' ka nroim kau fa, natuin au utuin Usif Yesus. Bait maski sin nfuut kau, ai' sin nroor niis kau, ai' sin nmoe' on me-mee, au ubarab urair he 'toup.” 14 Oras hai mneen on nana te, hai mihiin mak nai' Paulus ka nroim he nneen kai fa heen, onaim hai mkoon ee, mak, “Neu! He tak on mee! Maut he Uisneno In roim na kuun es anjair.”
Nai' Paulus sin antean Yerusalem
15 Neno fa-fauk hai mitua mbi Kaisarea te, hai mkikin hai baer ein, ma hai mnao meu Yerusalem. 16 Anmui' apirsait tuaf fauk na'kon Kaisarea, nok kai msa'. Sin nnao naat kai mtea uum jes, rari te, hai mtuup ambi naan. Uim tuaf naan, in kaan ee, nai' Manason. In na'ko puru Siprus. In natuin Usif Yesus suuk a'roo goen. 17 Oras hai mtea Yerusalem, hai aok-bian apirsait eini, sin ntoup kai nok neek marinet.
Nai' Paulus annao nkius nai' Yakobos
18 Noka' on nana te, hai arkai mnao miteef mok nai' Yakobos. Ma are' atoni mnasi' Kristen sin nabua nanin nbin naan. 19 Hai mmataeb es nok es, rari te, nai' Paulus na'uab neu kai, suk a'roo ntoom rasi-rasi re' Uisneno nmoe' nrair sin anbi me-mee, neu atoni' 'teta'. Nak Usif Yesus anfei ranan he sin npirsain neu Ne. In natoon amsa', on meem es Uisneno npaek in tuan ii, nok in aok-bian sin, anbin mepu ia. 20 Oras sin nneen anrair nai' Paulus in reta' nana te, sin marinen ma anbo'is Uisneno. Rari te, sin natonan nai' Paulus nak, “Pau! Asar ho muhiin et naan, atoin Yahudi sin nifun-nifun re' npirsai nararin neu Usif Yesus. Sin fe' nnaa' naher-heran atoran prenat re' na'i nai' Musa nahake' nain sin neu kit. 21 Mes anmui' atoni' re' neem naktuta' nak, ho munoni' atoni' Yahudi sin anbi bare 'teta', mak, sin kaisa' natuin na'i nai' Musa in atoran pirsait sin. Ma sin imsa' natrakan nak, ho es amtaar sin he kais natuin harat maherit neu sin an-monen. Ho es amtaar atoni srani', he kais natuin anteni' hit atoin Yahudi atoran harat bian amsa'. 22 Naa, mumnau, oo! Of atoin Yahudi nnenan nak ho et ia. Ma aneen uab ain ein nana te, sin of nato'on. Onaim hit taim rana' poo' ji, on mee? 23 Onaim, hai mtoit onai: Anmui' tuaf haa na'ko hai, re' sin anmui' manba'an nok Uisneno. Oras ia, sin he ankeu sin a'nak ein he njair tanar, nak nmo'en nrair sin rais manba'an naan. 24 Naa, karu reko te, ho mtaam mok sin on Uisneno In Uim Onen Uuf. Ho amsa' mutuin sin, he mmoe' mutuina' harat re' he mukninu' ho tuam naan. Ho amsa' ro he msutai sin baen re' natuin harat. Karu ho mmoe' on naan, of atoni mfaun sin nak, ho fe' mnaa' muher-heran prenat pirsait Yahudi, re' na'i nai' Musa nahake' sin neu kit. Ma sin of nahiin reta' re' nak, ho mtaar atoni' sin he kais natuin harat pirsait Yahudi, re' naan rais poi ok-oke'! 25 Mes neu atoni ka Yahudi fa, re' sin anpirsain neu Usif Yesus, hai nsonu' mrair sin surat. Hai mitonan sin neu hit tfeka' neno naan, nak, sin ka anperuu fa, he natuin hit atoran harat Yahudi sin ok-oke'. Re' sin he namnau he nmoe' natuin sin, es re': Kaisa' nmakaken ma nmakonin karu ka fee-mone fa. Kais anseer gok nok baer fuat. Ma kais nahan mnahat re' sin aok-bian Yahudi sin anma'nisin sin. On re' kais nekun sis-fuat. Kais nahan naa'. Ma kais nekun sisi na'ko mu'it re' anfuut niis on.” 26 Rari te, nai' Paulus antoup sin han totis. Onaim noka' fa te, in nok re' tua haa' ein naan, nnaon neu Uim Onen Uuf. Onaim sin nakninu' sin tuak eini natuin atoran pirsait Yahudi. Rari te, nai' Paulus natoon a'nak pirsait re' nbi naan, nak, ar neno fauk ate, na' sin nanokab sin haan manba'an. Te karu oras naan oke' te, sin es-es ate, he nataam nanin fua'-turu' neu Uisneno.
Anheek nai' Paulus anbi Uim Onen Uuf
27-29 Oras neno hiut he noe namsoup, re' sin nmanba'an he nanokab atoran harat naan, anmui' atoni' Yahudi fauk na'kon propinsi Asia, re' sin niit nai' Paulus anna-nao kuun anbi kota Yerusalem, nok in aok-bian es, in kaan ee, nai' Trofimus. Nai' Trofimus re' ia, na'ko Efesus, ma in imsa' ka atoin Yahudi fa. Onaim oras sin niit nai' Paulus antaam anbi Uim Onen Uuf, sin naak of ai' in nok in aon-bian naan, ntaam neu Uim Onen Uuf in nanan amsa'. Te kah, atoni teta' ka nabei' fa he ntaam neu Umi naan. Onaim, sin nait rasi re' naan, he nfain 'tu'in he sin anmo'en rasi. Onaim, sin mafua-rutun nok atoni-atoni anbi re' naan, he sin nheek naan nai' Paulus. Sin nhuun ein ma natonan too mfaun ein, am nak, “Hoe! Atoni Isra'el sin! Iim he mbaab man kai. Atoni' re' ia, in es re' nanoni' anbi me-mee nak, maiti mporin harat atoni' Yahudi. In imsa' na'uab na're'uf neu Uisneno In Uim Onen Uuf ia. Oras ia anteni', in antaam he an'oemetab Uisneno In bare kninu' ia!” 30 Sin nnenan on naan, kota Yerusalem in too goe ok-oke', sin nato'on batur-batuur. Rari te, too mfaun naan naen nabuan anbi Uim Onen Uuf. Onaim, sin nheek nai' Paulus, rari te, sin nheer napoit ne na'ko Uim Onen Uuf. Rari te, sin na'eek nain eon ein. Sin nheek nai' Paulus 31 Oras sin ntaisibun he nroor niis ne, te sorarus Roma sin a'nak ko' goes re' npaumaak anbi naan, nneen re' taisibu naan. 32 Onaim in no'en nain in soraurs ein, nok re' sin a'nakt ein, he sin ntaman neu too mfau ataisiub sin atnanak. Oras sin nkius niit soraurs ein nok re' sin a'nak ko'u naan neman, te sin nasnasab mabesot neu nai' Paulus. 33 Rari te, soraru 'nakaf naan anheek nai' Paulus, ma nreun sin he nfuut goe nok koren bese nua. Sin nfutu nraar je te, in nataan too mfaun sin am nak, “Atoni' re' ia, sekau? In nmo'en san saa'?” 34 Mes sin nasurin tonis. Bian nak, “In anmoe' ia.” Bian nak, “In anmoe' nee.” Tar antea soraru 'nakaf naan, in a'nak ne nameen. In ka nahiin fa rasi naan in a'naon, natuin too mfaun sin anhunun ma na'baa' nomes-mese'. Etun es in nreun he neik nai' Paulus annao neu benteng. 35-36 Soraurs ein anheer neik nai' Paulus, mes too mfaun naan sin natuin ein ok-oke', ma sin antaisibun antenin. Oras he sin nsaen era'-fua', too mfaun naan sin nasikan, he nhaken maat. Tar antea soraurs ein naskau nai' Paulus, he too mfaun naan kais anbaan na'maat je. Onaim, sin nhunun nak, “Amroor miisan! Amroor miisan!”
Nai' Paulus namneob in tuan anbi too mfaun sin matak
37 Oras sin re' he antaman on benteng nana te, nai' Paulus antoit neu soraru 'nakaf naan, npaek uab Yunani, nak, “Aam! Au bisa u'uab a'kre'o, oo?” Oras in nneen nai' Paulus na'uab on naan, soraru 'nakaf naan naskeek. Rari te, in nataan ee, mnak, “Ho msa' muhiin uab Yunani? On meem es ho mu'uab muhiin uab Yunani? 38 Karu on naan, au utenab a'saan en. Au ak of ho re' ia, atoin Masir, re' nahunut ho es amfua-ruut too mfaun ein he sin nraban prenat. Rari te, in neik too nifu haa, re' sin nekin suni'-kenat, ma sin nnaon neu baer ruman. Mes ho re' ia, ka in fa, ai' kah?” 39 On nana te, nai' Paulus nataah nak, “Kah, fa tua! Au re' ia, atoni' Yahudi. Au 'ain honi' nahonis kau anbi kota Tarsus, et propinsi Kirikia. Au 'toit he ho mkonan maan kau, he au u'uab neu too mfaun re' ia.” 40 Soraru 'nakaf naan, anroim. Rari te, nai' Paulus anfenan nhake nbi era'-fua' naan in tunan, ma in nait in a'niman he ntoit sin he sin nta'-ta'an he in na'uab. Rari te, in na'uab neik sin uab neno-neno, es re' uab Aram. (Te anbi naan, atoni Ibrani sin na'uab ein npaek uab Aram).
Nai' Paulus namneob on
1 Onaim, nai' Paulus anmurai na'uab am nak, “Sin ama', au aok-bian arki oke'! Au 'toit ki he hi mitniin kau, he au u'uab he umneob ok.” 2 Oras naan, too mfaun sin neen nai' Paulus na'uab anpaek sin uab. Onaim sin ntaa' nanin, he nneen narek-reko in uaban naan. Onaim in ntuut am nak, 3 “Asar hi arki mihiin, mak, au re' ia, atoni' Yahudi. Au aina' nahonis kau nbi kota Tarsus, et propinsi Kirikia. Mes au u'nae 'bi ia, kota Yerusalem. Re' nanoni' kau gui, es re' tunggur ko'u nbi ia, nai' Gamariar. In nanoni' kau namnuut antoom na'i nai Musa in atoran sin ok-oke'. Au msa'at 'makoe he utuin Uisneno, huma' mese' on re' hi msa'. 4 Neon goes ii, au ka 'usnaas fa he 'riu' ma 'moe' susat neu tuaf ein re' natuin Nai' Yesus In Rana' 'Honis. Au 'heer 'eik sin, et bifee ma atoni, neem neu Yerusalem, rari te, au utaam sin anbin bui. Oras naan, anmui' amates amsa'. 5 Hit A'nak Ko'u Pirsait Yahudi, ma a'nak pirsait Yahudi bian amsa', sin nahiin narair nak au u'uab ak' saa' tebe on naan! Au ka upoif. Te sin es anfee kau suur kuasat, he au 'nao 'heek 'aan tuaf-tuaf re' natuin Nai' Yesus, antea kota Damsik. Anbi naan, au he 'heek sin, rari te, au he 'heer 'eik sin neman on Yerusalem. Au utenab ak, maut he afeek rais pirsait sin, es anhukun sin.”
Nai' Paulus nareta' saa' re' in naben niit
6 Onaim, nai' Paulus antuut antein in uab am nak, “Onaim, au 'nao 'eu kota Damsik, he au 'aim sin anbi nee. Of on re' mansi na'pupu te, ara'kre'o te hai amtea kota naan. Nok askeken te, anmui' naan asnaaf es na'ko neng goe, antoom kau. 7 Onaim, au 'tekoeb 'eu afu, ma au 'neen haanf es na'uab am nak, ‘Hoe, Saulus! Nansaa' am es ho amha'mui' Kau on re' ia?’ 8 Au 'neen re' hanaf naan, mes au ka 'iit fa es. Onaim, au utaan am 'ak, ‘Usi', ho sekau ko?’ Rari te, hanaf naan nataah kau, mnak, ‘Au re' ia, Yesus, atoni na'ko Nasaret, re' ho mha'muu' Je!’ 9 Mes atoni' re' hai mnao mibu-bua nok kau, sin niit snaaf naan, mes sin ka nnenan fa hanaf naan. 10 Onaim, au utaah, am 'ak, ‘Karu on naan, oras ia, au he 'moe' saa'?’ Hanaf naan, anrenu mnak, ‘Amfeen nai, mtaam nai on kota nanan. Of anbi naan, Au na' utoon ko, rasi-rasi re' ho ro he ammoe' main sin.’ 11 Au 'neen urair on nana te, au 'fena 'haek. Mes au ka bisa iit fa sa'-saa' nteni', natuin snaaf re' naan es naforob kau. Onaim, au aok-bian sin nnaa' kau, ma nheer kau, ma hai mtaam meu kota Damsik. 12 Anbi naan, anmui' nain tuaf es, in kaan ee, nai' Ananias. Atoni ia, in neek ne mne'o, ma in imsa' annaa' naheran atoran na'i nai' Musa. Are' atoni' Yahudi abitan kota naan, sin nroom je, ma nhormaat ee. 13 In neem naim kau, rari te in na'uab nak, ‘Ba'e! Ho maatm ein naan, narekon nrarin. Es on nana te, mfei ma mkius nai!’ In na'uab anrair on nana te, au u'aiti' au humak, ma au bisa 'iit ee. 14 Rari te, in nanoni' kau, mnak, ‘Uisneno, re' hit be'i-na'i sin n'onen neu Ne, oras ia, In npiri nrair ko. Ho meep goe es re' he muhiin murek-reko In a'romin. Ma muhiin murek-reko' Usif Yesus naan, es re' na'ko un-unu' te, re' hit teke, tak, “Atoni Kninu'”. Oras ia, Uisneno nfei ranan neu ko, he ho mneen kuum na'ko Usif Yesus. 15 In neik Non anpiir nain ko, he mnao mutoon In Rais Reko neu tuaf-tuaf anbi me-mee. Ho ro he mutoon are' saa' re' ho miit ma mneen kuum na'ko Ne. 16 Kais ampao 'ro-'roo nteni'. Amnao mak sin, he nasrain ko nai! He nfain tanar nak, ho mtoti mrair he Usif Yesus nsaok nain ho saant ein.’”
Uisneno nreun nai' Paulus he neik Rais Reko neu too teta'
17 “Rari te, au 'fain on Yerusalem. Neon goes, au 'nao onen a'bi Uim Onen Uuf. Oras au onen, Uisneno nakrira' kau, nahuum on re' amneet. 18 Au 'iit Nai' Yesus. Onaim In naprenat kau, nak, ‘Oras ia, ho ro he mnao musaitan kota Yerusalem nai! Fin atoni' nbin bare' ia, sin ka nroim fa he ntoup saa' re' ho munoni' re' nmatoom nok Kau.’ 19 Mes au ka 'roim fa he 'toup prenat naan, natuin un-unu' te, a'nak pirsait sin anroim kau. Onaim, au utaah am 'ak, ‘Mes, onai, tua! Sin ar-ar sin nahinin nak, neno naan au es a'poi ma 'taam uim onen anbi me-mee, au 'heek ma 'beos atoni' re' anpirsai Ko. 20 Sin nahiin, oras sin anpoir na'maet Ho haef, nai' Stefanus, au amsa' a'bi naan, ma au amsa' a'roim ok. Oras sin nabuab ein fatu he anpoir nai' Stefanus, au es u'haba' sin, ma au es a'tiut sin barun.’ 21 Au umnaub Ee on naan, mes Usif Yesus naprenat nafanik kau, mnak, ‘Kais maim tu'in huma'-huma'! Musaitan Yerusalem oras ia! Natuin Au he 'reun ko, he mnao meu bare 'roo sin, he munoni' atoni teta' re' ka na'ko fa atoni' Yahudi.’” 22 Oras too mfaun sin nneen nai' Paulus na'uab nak, Uisneno es anreun naan je, he nao neu atoni teta', sin ka nromin fa he nneen antein ee. Sin nato'on, rari te, sin huun ein ok-oke', mnak, “Kais amneen atoni' ia! Amroor misan! In moni msa' ka ma'osa' fa.”
Soraurs ein neik nai' Paulus annaon neu benteng
23 Sin nkoa' ein on naan, onaim sin horo' nain sin barun, ma sin nnaun afu skuku', ma sin na'pene', natuin sin nato'on maten. 24 Oras soraru 'nakaf naan niit sin, ntaisibun nfanin, in nreun in soraurs ein he nheer nataam nai' Paulus on benteng. Rari te, a'nakat naan nreun he sin nbeso, henati' in manaku' nak in mo'en saan saa', tar atoni' Yahudi sin he nroor goe. 25 Oras sin nfuut nai' Paulus he nbeso, in niik ma nataan soraur abeos te, mnak, “Natuin atoran prenat Roma, mee es namneo? Karu tuaf es in nmui' hak na'ko pah Roma, rari te in napein rasi, hi he mmoo je, on mee? Hi mbees goe nahunu, oo? Ai' hi mpariks ee nahuun?” Sin nfuut nai' Paulus he nbeso 26 Anneen on nana te, sorarus naan naim in a'nakat. Onaim, in natoon, am nak, “Aam! Atoni ia nmui' hak na'ko pah Roma! Onaim, ho he mmoo' je, on mee?” 27 Anneen on nana te, soraru 'nakaf naan, in neik non nataan nai' Paulus, am nak, “Nak ho mmui' hak na'ko pah Roma? Tebe, oo?” Onaim, nai' Paulus nataah am nak, “Tebe, tua! Au 'mui' hak naan.” 28 Rari te, soraru 'nakaf naan nak, “Au msa', on naan. Au 'baen ii ko'u, hena' au 'upein hak naan.” Mes nai' Paulus nataah, am nak, “Karu au te, ka 'baen fa sa'-saa'. Nmurai na'ko au aina' nahonis kau, au 'naa' 'ain hak re' naan. Au aam amsa' nnaa' hak re' naan.” 29 Oras sin nnenan nak nai' Paulus anmui' hak na'ko pah Roma, on nana te, soraurs ein antet-kotin, ma sin ka nabrain fa he nbeson ma nparikas antein ee. Soraru 'nakaf naan namtau, natuin in es anreun he nfuut nai' Paulus. In nahini nrair, nak in tanhai atoran.
Nai' Paulus anbi Bare Feek Rasi Pirsait Yahudi
30 Noka' te, soraru 'nakaf naan, in naim he nahiin batuur rasi naan in a'naon ne, on mee. Rari te, in nreun in soraurs ein he nnao no'en nabuab tuaf ein re' biasa nafekan rais pirsait Yahudi. Onaim, in nreun he nseef nai' Paulus in korenit, rari te, sin neik je nnao nateef nok afeek rasin naan.
1 Antean nana te, sin nreun nai' Paulus he namneob on. Rari te, in nkius narek-reko atoin ein re' naan, ma na'uab am nak, “Aok-bian arki! Au 'hake 'bi ia, nok neek amneot. Uisneno nahiin kau na'ko au an'-ana' tar antea neno ia, au neek ii kninu'.” 2 Anneen nai' Paulus na'uab on nana te, nai' Ananias, in es re' A'nak Ko'u Pirsait Yahudi, nato'on nmaet. Onaim, in naprenat tuaf-tuaf re' nhaken nhaumaak nai' Paulus, nak, “Ampaas mane paap es neu re' feef naan!” 3 Onaim, nai' Paulus in ntoin nai' Ananias, am nak, “Of Uisneno npaas anbaras ko. Fin ho on re' nii re' fe' nseet anrari nbi kotin, mes in naan ee naem ein nsoor goe. Ho mtoko mbi ia, ma mmoe' ho tuam ii, on re' atoni kninu'. Rari te, ho he mhukun kau, natuin hit atoran harat. Mes ho re' nana msa', mtanhai atoran naan, oras ho mreun he npaas kau.” 4 Anneen nai' Paulus na'uab on nana te, atook apaumaakt ein nakain ne, nak, “Hoe! Ho ka mu'bei' fa he mu'uab on naan, neu hit A'nak Ko'u!” 5 Onaim, nai' Paulus nataah sin, am nak, “Tebe, oo? Karu on naan, au u'paar nok neu ki, te au ka uhiin fa, nak in re' ne, hit A'nak Ko'u. Batuur, Uisneno npaek tuaf he ntui nain, nak, ‘Ka nabei' fa he hi mi'uab re'uf neu hi a'nakat sin.’” 6-8 Oras nai' Paulus in niit sin atokos re' he nafeek rais pirsait, in nahiin nak, sin na'kon pukan nua. Bian Saduki, re' sin npirsain nak, amates ka bisa nfenan fain fa. Sin npirsain amsa' nak, Uisneno ka nmui' fa ameput et neno-tunan. Ma ka nmui' fa smanaf. Pukan es anteni', es re' pukan Farisi, re' npirsain am nak, of Uisneno namonib nafani' amates sin. Sin npirsain amsa' nak, anmui' smanaf, ma Uisneno anmui' ameput et neno-tunan. Onaim, nai' Paulus na'uab naher-heer nak, “Aok-bian arki! Asar hi mihiin ok-oke' mak, au re' ia, atoin Farisis kau. Au ama', ma au na'i msa', atoin Farisis. Oras ia, hi he mhukun kau, natuin au 'pirsai 'ak Uisneno bisa namonib amates.” Oras nai' Paulus in na'uab on nana te, atoni Farisi ma Saduki sin nmatoen, tar antea sin ka nmaromin fa heen. Rari te, sin baits ok anfain pukan nua. 9 Onaim, afeek rasi naan, anmatoen, tar antea taisiub ko'u. Rarit anmui' tungguru na'ko partei Farisi anhaken ma anpeis nai' Paulus. Sin nak, “Atoni ia, ka nsanaf! Kais-kaisa' anmu'i smanaf, ai' Uisneno In ameput es neem na'uab nokan!” 10 Tunggurun naan, na'uaban nrarin on re' naan, mes sin nmatoe si maineun besi, tar soraru 'nakaf naan nmurai namtau. In natenab nak kais-kaisa' sin n'usa' niis nai' Paulus. Onaim, in nreun in soraurs ein ansanun he nheer nataam nai' Paulus neu benteng. 11 Mabe' te, Usif Yesus neem na'kriir On neu nai' Paulus. Ma In naheran nai' Paulus in nekan, am nak, “Pau'! Ho kais mumtau, oo! Oras ia, ho mu'uab amrair Au rais kein anbi Yerusalem ia. Mumnau murek-reko! Of ro ho he mu'uab on re' nana msa' anbi Roma.”
Sin ma'akoran he nroor nai' Paulus
12-13 Anbi nok-nok ana', atoin Yahudi anneis na'ko tuaf bo'-haa, sin akoran he na'maet nai' Paulus. Sin ansupan, am nak, “Hai ka mroim fa he miah am miun, karu hai ka amroor maan fa nai' Paulus fa fe'.” 14 Sin nsupan nrarin on nana te, sin nnaon natoon a'nak pirsait ein, nok are' atoni mnasi' Yahudi sin, nak, “In aam ein! Hai amsupam mrair, mak, hai ka mroim fa he miah ma miun, karu hai ka amroor miis fa nai' Paulus fa fe'. 15 Naa, hai roim meng gui onai: Ama' sin ro he mnao mbaeseun soraru 'nakaf, he mtoit je he meik kit nai' Paulus neu bare feek rais pirsait. Ammoe' on re' hi he mparikas mifani' in rasi. Of hai mseun sin anbi rana tnana, he hai mroor miis ne.” 16 Mes nai' Paulus an-moen feuf es, in neen sin akor naan. Rari te, in naen neu benteng ma natoon neu in babaf. 17 In neen narair an-mone naan in han tonas, nai' Paulus no'en naan soraru 'nakaf es, ma nak, “Ia, au anah. Ho meik je nnao rabah neu ho a'nakat. He in natoon naan uab es.” Ri'an ii neem natoon ammoe' reu'f ein sin rais akoor 18 Onaim, sorarus naan neik an-mone naan neu in soraru 'nakaf. In natoon, am nak, “Aam! Nai' Paulus re' hit ttaah ne naan, in nreun kau he 'eik an-mone ia neem neu ko. In he natoon naan ko rais ma'tan-tain es.” 19 Rari te, soraru 'nakaf naan nheer neik ri'ana' naan neu baer ruum es, he sin nua sin anmesen. Onaim in nataan ee, mnak, “Ho he mutoon kau uab saa', na?” 20 Rari te, ri' an-mone naan natoon ne, mnak, “Anmui' naan atoni' Yahudi fauk an'akoran he sin nroor niis au baba', nai' Paulus. Sin he neman ntoit ko, he noka' te, ama' ho meik au baba' nnao neu bare feek rais pirsait. Nak, sin aksaa' ein he nparikas au baba' in raas je namnuut. 21 Mes ama' ho kaisa' mutuin sin roim kein naan. Natuin of anmui' naan tuaf bo'-haa, sin of anpao ki nbi ranan he nroor niis au baba', nai' Paulus. Natuin sin nsupan nrarin nak, sin ka naah-ninun fa, karu sin ka nroor naan fa au bab Paulus. Oras ia, sin nabaarb ein nrair. Suma sin npao ko, he ho mtoin mak saa'.” 22 Anneen anrair an-mone naan in uab ni te, soraru 'nakaf naan, nak ee, mnak, “Ho kais mutonan es, mak ho uum mutoon kau rasi ia.” In na'uab anrair on nana te, in nreun an-mone naan he nfain.
Sin neik nai' Paulus neu gubernor Feliks anbi kota Kaisarea
23 Rari te, soraru 'nak ko'u naan, no'en soraur a'nakat nua. In naprenat sin, nak, “Mibarab man sorarus, tuaf natun nua; ma sorarus re' ansae bikase, tuaf bo'-hiut; ma sorarus amneik aunu, tuaf natun nua. Hi mnao nai mabe' ia, anreuk seo, amnao meu kota Kaisarea. 24 Hi mibarab bikaes es, neu nai' Paulus. Hi mnao maat te nok rek-reko, ntea gubernor Feliks.” 25 Rari te, in ntui surat neu gubernor Feliks, nak onai: 26 “Ama' gubernor Feliks re' au 'hormaat 'ani. Taabe, tua. Ao-mina' ao-reko na'ko kau, Krodius Risias. 27 Atoni' re' au 'soun ee neem neu ko ia, in kaan ee, nai' Paulus. Atoni' Yahudi sin anheke, ara'kre'o te, sin he nroor niis ne. Neno naan, au soraurs ein es anheer napoit ne na'ko atoni' Yahudi sin a'nimak. Rari te, au uhiin amsa' nak in nmui' hak na'ko pah Roma. 28 Au 'aim he uhiin, nansaa' am es atoni' Yahudi sin he nroor goe. Etun es au 'eik je nnao neu atoni' Yahudi sin Bare Feek Rasi Pirsait. 29 Mes sin ka napein fa in saan sa'-saa'. Batuur, in ka nmoe' fa saan sa'-saa'. Onaim, atoni' ia in ka bisa fa he ntaam bui, ma ka nabei' fa he thukun ta'mate. Te kah, afeek rasin sin anbi Bare Feek Rasi Pirsait, sin nmatoen, natuin sin noni'-noni' pirsait ein nasurin. Onaim au 'eik atoni' ia anbi benteng. 30 Noka' te, au upein hanaf, nak atoni' Yahudi an'akoran nrarin he sin nroro. Onaim, au es uprenat he sin neik je neem neu ko. Au msa' utonan atoni' Yahudi sin re' anmaka' rais ein nok atoni' ia, he sin neman baiseun ko. Maut he ho es amneen kuum na'ko sin, saa' re' sin nasaan ee neu ne. Au surat ia, on naan, tua.” 31 Rari te, soraurs ein re' naan nabaarb ein nrarin, he nanaoba' prenat na'ko sin soraru 'nakaf. Mabe' re' naan, sin nok nain nai' Paulus annaon tar antea kota es, in kaan ee, Antipatris. 32 Noka' te, soraur asae bikaes ein ee, sin nnaon naat nai' Paulus ankoon tar antea kota Kaisarea. Mes sorarus bian sin, anfanin on Yerusalem. 33 Oras sin ntean Kaisarea te, sin nfee surat naan neu gubernor. Ma sin nona' nai' Paulus amsa' neu ne. 34 Anrees anrair surat nana te, gubernor ee nataan nai' Paulus, am nak, “Ho atoni mu'ko mee?” Rari te, nai' Paulus nataah am nak, “Aam, au re' ia, atoni u'ko propinsi Kirikia.” 35 Anneen nai' Paulus nak on nana te, gubernor ee nahiin nain nak nai' Paulus anmui' hak na'ko pah Roma. Rari te, in na'uab, am nak, “Au es ana' prenat anbi ia. Onaim au es he ufeek ho rasi. Mes hit tpao tuaf ein re' sin natraak ko ntea ia, hena' au' u'prikas ho rasi.” Rari te, in nreun in soraurs ein he ntahan nai' Paulus anbi sin bare, anbi sonaf gubernor, re' nahunut usif Herodes anmoe' nani.
Atoni' Yahudi sin neman a'an rasi nok nai' Paulus anbi Kaisarea
1 Neno niim namuni te, atoni' Yahudi re' he n'a'an rasi nok nai' Paulus, sin neman ntean nbin Kaisarea. Amneemt ein naan, nai' Ananias, A'nak Ko'u Pirsait Yahudi nok amsa'. A'nakat bian amsa' nokan. Sin nok anteni tuaf es, in kaan ee, nai' Tertulus. In re' ia, in feef mapipi'. Etun sin npaak je, he nfain asaah rasi he sin nraban nai' Paulus. 2-3 Oras too mfaun naan nabuan anbi bare he nafekan rasi, gubernor ee anreun he neik nai' Paulus neem. Rari te, nai' Tertulus anfeen anhaek ma na'uab namouf nai' Paulus. Nahunu te, in nhormaat neu gubernor, rari na' na'uab am nak, “Au 'baiseun ko, ama' gubernor! Na'ko 'ro-'roo ia, nmurai na'ko re' ama' ho mnaa' prenat anbi ia, aam ho muhiin muhunun, saa' re' reko neu kai. Rari te, ama' ho mmoe' rais arekot huma'-huma', tar antea hai atoni' Yahudi bisa mmoin nok mamut ma marine.Onaim, hai he mpaek oras ia, he hai mtoit makasi neu ama' gubernor. Te sekau nteni' es re' he bisa nmoe' on re' ho, aam, anbi me-mee. 4 Mes au kais u'uab amnanu'. Mes au u'uab 'eu haa raas ji in uun. Onaim, au 'baiseun ko aam usi', he mneen rek-reko, sa'-saa' re' au he baisenun sin nmatoom nok tuaf re' ia. 5 Onai aam usi'. Neu hai atoni' Yahudi, nai' Paulus re' ia, nahuum on re' meens es, re' natpain na'ko baar jes neu baar jes. In biasa nraban hai atoran pirsait, ma in taisibun hai atoran harat anbi me-mee. In bi bare me-mee ja, hai atoni' Yahudi sin of ro he nmaka'rais ein es nok es. In re' ia, in nfain on re' a'nak ikobraka' na'ko pukan pirsait re' natuin atoin es na'ko Nasaret, re' hai mteek main sin mak, ‘pukan Nasrani’. Mes, saa' re' sin nanoni' sin, nasuir ko'u na'ko hai pirsait ii in nonin. 6 Atoni ia msa', in na'taka' niit he n'oemetab hai Uim Onen Uuf re' in akninu' kuun, ma in neik atoin mes'okan ntaam neu naan. Etun hai mheek ee. Natuin hai romim, hai he mhuuk ne, natuin hai atoran. 7 Mes soraru 'nakaf nai' Risias, neem nasiik naan ee na'ko hai 'nimam. 8 Rari te, in naprenat am nak, karu anmui' tuaf re' he anmoe' rasi nok nai' Paulus, sin ro he neman ma anbaiseun ko anbi Kaisarea. In tenbi, anbain he gubernur ee, es an'urus rasi naan . Onaim oras ia, hai iim ambi ia, he aam usi', ho es amparikas rasi ia. Of aam usi' ho meik no muhiin mak, sa'-saa' re' hai mi'uab sin re' ia, ro tebe. On re' naan, tua.” 9 Nai' Tertulus na'uab anrair on nana te, atoni' Yahudi bian sin anteebs ee, mnak, “Tebe, on naan, usi'.”
Nai' Paulus namneob on anbi gubernor Feliks in matan
10 Rari te, gubernor naprenat nai' Paulus, am nak, “Oras ia, au 'fee ko manuan he ho mumneob om.” Rari te, nai' Paulus anfeen anhaek, ma na'uab, am nak, “Ama' gubernor! Ho muprenat anbi propinsi ia, a'roo goen. Onaim, ho muhiin murair hai atoni' Yahudi hai tokoom ma hai 'hakem. Es nana te, au ka umtau fa he au umneob ok anbi ho matam. 11 Of ai' neno bo'es am nua akoon ti, au 'nao 'bi Yerusalem he 'onen a'bi Uim Onen Uuf. Ama' ho bisa mutaan neu tuaf-tuaf re' an'onen nok anbi oras naan. 12 Anbi Uim Onen Uuf naan, au ka 'maheek fa 'ok es-es. Ma nbi uim onen bian sin, au ka u'buab fa tuaf he au 'moe' taisibu. On nana amsa', anbi Yerusalem, au ka 'moe' fa taisibu sa'-saa'. 13 Mes oras ia, atoin ein ia he namouf kau. Sa'-saa' re' sin na'uab sin fe'ena, ka nmu'in fa bukti sa'-saa'. 14 Onai, aam gubernor. Au he 'manaku' 'aan rasi mese'. Au 'ok pukan fee' goes, re' atoni nakaanb ee, mnak, ‘Usif Yesus In Rana 'Honis’. Au 'onen 'eu Uisneno, nahuum on re' au be'i-na'i sin an'oen ein amsa' neu Ne. Au msa' utuin na'i nai' Musa in apreent ein ok-oke', ma au 'pirsai teb-tebe saa' re' Uisneno In mafefa' sin antui nain sin na'ko unu' neu kai. 15 Au ufnekan 'eu Uisneno on re' tuaf ein re' ia, re' anmaka'rais ein nok kau. Hai mpirsai mak, of Uisneno namonib nafani' amates: es re' amoe' reko ma amoe' re'uf. 16 Etun au 'aim ranan ma'tani', he on mee te, au bisa 'moin nok neek amneot, anbi Uisneno ma mansian ii sin humak. On nana te, ka tiit fa es he bisa namouf kau. 17 Au 'meup toon fauk ein anbi pah bian, ka nbi fa pah Isra'el, na' au 'fain uum on Yerusalem. Oras au uum, au 'eik roit re' atoni nabuab sin, he nfain babat neu tuaf-tuaf re' anmonin anbi susat. Rari te, au amsa' a'nao 'bi Uim Onen Uuf he 'onen, ma a'fee fua'-turu' huma'-huma' neu Uisneno anbi naan. 18 Oras au ukniun ok a'bi Uim Onen Uuf, utuin hai atoran harat, sin neman ma anheek kau. Mes oras naan, ka nmui' fa too mfaun anbi naan, ma ka nmui' fa taisibu sa'-saa' amsa'. 19 Suma anmu'i haa atoni' Yahudi fauk re' sin neman na'kon propinsi Asia, he an'oen ein anbi nana amsa'. Onaim, karu sin anmu'in rasi nok kau te, sin re' naan, es re' he an'a'an rasi nok kau. Ka sin ama' re' ia fa! 20 Mes atoin ein naan, sin ka neman fa. Onaim, aam ho mutaan miit sin re' ia, au 'saan saa'? Neno naan, oras sin naprikas kau anbi Bare Feek Rasi Pirsait, sin ka napein fa au saant es amsa'. Aam, ho mutaan aha sin. 21 Suma, of anmui' naan rasi noon es, aam, re' nmoe' sin tar antea sin taisibun, ma sin ka nroim kau fa. Oras au hana' ia nsae, ma au 'ak, ‘Hi he mhukun kau, natuin au 'pirsai Uisneno re' bisa namonib amates!’” 22 Nai' Paulus na'uab on naan, mes gubernor Feliks nahiin nrair rasi mfaun re' nak, ‘Usif Yesus In Rana' 'Honis’, onaim in nasnasab buat naan, am nak, “Onai! Au he 'o'en soraru 'nak ko'u, Risias, he 'neen in haan ee fe'. Karu au u'uab urair 'ok ne, na' au bisa ufeek rasi ia.” 23 Rari te, in nreun soraru 'nakf es he ntahan nai' Paulus. Mes in napreent ee he in nfee ne mainuan he in aok-bian sin neman nkisun ma ntuthaa je.
Nai' Paulus na'uab nok nai' Feliks ma in fenai bi Dorsira
24 Gubernor Feliks in fenai, bifee Yahudi, in kaan ee, bi Dorsira. Naan neno fauk ate, in naim ranan, he in, nok in fenai, he na'uab ein nok nai' Paulus. Onaim, in nreun he neik nai' Paulus he neem neu sin nua sin. Onaim, nai' Paulus natonan sin, ranan on re' mee, he atoni bisa npirsain neu Usif Yesus Kristus, Tuaf re' Uisneno anba'an naan Je na'ko unu'. 25 In imsa' natonan sin, ranan on mee he atoni bisa nmoin nok amneot, ma on mee he atoni bisa anpaant on he kaisa' anmoe' sanat. In imsa' natonan sin nak, of Uisneno anhukun mansian ii oke'. Oras nai' Feliks anneen on nana te, in namtau nmaet. Rari te, in nak nai' Paulus, “Pau! No goah nai! Mutuu'b ee nai! Karu au upein mainuan, of au 'o'en a'teni' ko.” 26 Oras naan, nai' Feliks, naim ranan he on mee te, nai' Paulus anfee ne roit, he in nafeit ne. Es nana te, in no'en nai' Paulus piut he na'uab nokan. 27 Mes anbi ranan bian, gubernor Feliks naim neek ein nok a'nak pirsait Yahudi sin. Etun es in ka nroim fa he nafeek nai' Paulus in raas ji rabah. In nas-nasab rasi naan, tar antea toon nua. Rari te, anmui' gubernor fe'u neman seka' nai' Feliks. In kaan ee, Porkius Festus. Mes sin imsa' fe' antahan nai' Paulus.
Gubernor Festus anparikas nai' Paulus in rasi
1 Anbi oras naan, gubernor fe'u, Festus, nanani' neem anbi Kaisarea he nmurai nanaoba' in aprenat. In suma namaik anbi naan, neno teun goah, rari te, in nnao nkoon on Yerusalem. 2 Anbi naan, a'nak rais pirsait Yahudi nok atoni mnais harat sin neman he nmakhiin ein nok gubernor fe'u naan. Sin nteek naan nai' Paulus in rasi msa'. 3 Sin ntotin amsa', he karu bisa te, gubernor fe'u ia nreun in atoni' sin, he neik nafani nai' Paulus neem on Yerusalem. Te kah, sin anma'akoran nrarin, he nroor niis nai' Paulus anbi rana' tnana'. 4 Mes gubernor nataah sin, am nak, “In aam arki! Onai. Maut he sin antaah ne fe' anbi Kaisarea. Fin au he 'fain rabah on nee. 5 Onaim, karu na'ko hi re' ia, anmui' tuaf he n'urus rasi naan, sin nok kau he tnao on Kaisarea. Karu tebe atoni naan anmoe' sanat, na, reko te, hi am a'rasi mok ne, nbi nee jah.” 6-7 Rari te, gubernor Festus nabaar fe' nbi Yerusalem of ai' neno bo'es a'saa', na' in nfain on Kaisarea. Anbi oras naan, anmui' naan atoni' Yahudi fauk nok ne, antea nee. Nok afa' te, gubernor ee anfei nafani rasi naan. In nreun he sin neik nai' Paulus, he neem neu in matan. Oras nai' Paulus antaam anbi naan, atoni' Yahudi sin anhaken ma nfuun naan nai' Paulus, rari te, sin nmurai nasaan ne nok sanat huma'-huma'. Mes sin ka bisa fa he nakrira' bukti es. 8 Rari te, nai' Paulus namneob on, am nak, “Ama' gubernor. Au ka 'moe' 'iit fa rais sanat sa'-saa'. Au msa' ka 'moe' 'iit fa rasi re' anmaraban nok hai atoran pirsait Yahudi. Au ka 'ha'niis 'iit fa hai Uim Onen Uuf anbi Yerusalem. Ma au ka 'moe' 'iit fa rasi sa'-saa' he 'raban ana' prenat Roma in atoran.” 9 Mes gubernor naan, in he naim atoni' Yahudi sin neek eini he nok ne. Etun es in nataan nai' Paulus, am nak, “Ho mutenab, on mee? Ho mromi' ai' kah, karu au 'urus ho rasi ia anbi Yerusalem?” 10 Anneen gubernur ee in han-tanas, onai te, nai' Paulus nataah, am nak, “Ama' gubernor. Au re' ia, a'mui' hak na'ko pah Roma. Ma oras ia, au 'haek et ana' prenat Roma in matan, re' in nmui' hak he n'urus au rasi, natuin atoran prenat Roma. Onaim, au ka 'roim fa he 'nao on Yerusalem, he nafeek au rasi nbi nee. Ama' ho meik nom muhiin murair nak, au ka 'moe' fa sanat sa'-saa' re' he 'raban atoni' Yahudi sin. 11 Onaim, karu tebe au 'moe' saan sa'-saa', re' nmatoom nok he nhukun na'maet kau, te au 'toup. Mes karu saa' re' sin na'uab naan je ka batuur af, natuin in atoran, ka tiit tan fa es he anona' kau neu atoin ein ia sin a'nimak. Sin suma nam-namin nah ranan, he nroor na'maet kau ruum ah. Onaim oras ia, natuin au hak ii te, au 'eik au raas ji nsae nteni' neu Uis Ko'u, Keser, anbi pah uuf kota Roma. Anbain he in es neik noon nafeek rasi ia.” 12 Anneen nai' Paulus na'uab on nana te, gubernur ee nok in aparikas rasi sin, nabuan ma na'uab ein. Rari te, in natonan nai' Paulus, am nak, “Natuin ho mtoit murair he meik ho raas ji nsae nteni' on Keser, es on nana te, ro ho he mnao meu Roma.” Na'uaba' nrair on nana te, in nreun abuat ein naan he nsisa'en.
Nai' Festus antoit fainekat na'ko usif Agripa nok nai' Paulus in rasi
13 Rari te, atoni' Yahudi sin uisf ee, in kaan ee, nai' Agripa, nok in feotf ee, in kaan ee, bi Bernike, neman nbi Kaisarea. Sin neman he nmahormaatn ein nok gubernor fe'u naan. 14 Sin natuan nok gubernor Festus sero 'roo. Neon goes te, nai' Festus natonan sin nok nai' Paulus in rasi, ma nak, “Aam usi'! Anbi Kaisarea ia, hai mtahan atoin es, in kaan ee, nai' Paulus. Neno naan, gubernor ahuunt ii ka nafeek naan fa in rasi. 15 Neno fauk akoon tein, oras au 'eti 'bi Yerusalem, a'nak pirsait Yahudi sin ma sin atoni mnais haart ein, neman ma natraak nai' Paulus in saant ein. Rari te, sin ntoit kau he au 'huuk ne. 16 Mes au utonan sin am 'ak, ‘Tatuin atoran prenat Roma, au ro he 'parikas 'aan rasi naan fe', na' au ufeek. A'a'rais ne ro he nsaen mei fe'. Au he 'neen 'aan nak hi misaan ee nok saan saa'. Ma in imsa' ro he napein mainuan he namneob on. He na' au bisa ufeek rasi naan, ma thuuk ne nok hukun huma' mee.’ 17 Rari te, oras au 'fain uum a'bi Kaisarea, atoni' Yahudi fauk nok kau neman anbin ia. Noka' te, au 'fei ufani 'ain rasi naan. Au uprenat sin he neik nai' Paulus neem neu kau, he au 'neen 'iit in rais ne in a'naon. 18 Rari te, atoni' Yahudi sin nbaisenun ma nmurai na'uab ein neu nai' Paulus in saant ein. Mes saa' re' sin natoon sin naan, ka ma'fena' fa nahuum on re' au uteenb ee ji. 19 Sin suma nasuir na haa, nmatoom nok sin rais pirsait ein kuuk. Ma sin nasurin nok nai' Paulus, natuin tuaf es, in kaan ee, Nai' Yesus. Tatuin atoin Yahudi sin, Nai' Yesus naan, anmaten nrair. Mes nai' Paulus naheer ah, nak, Nai' Yesus nmonin nfaan jen. 20 Sin nasurin on re' naan, mes natuin au atoin fe'u kau, onaim au ka uhiin 'aan fa re' he tafeek rais pirsait ii te, on mee? Etun es au utaan nai' Paulus, am 'ak, ‘On mee, karu au 'parikas ho raas ji anbi Yerusalem?’ 21 Mes in ka nromif. Onaim, in ntoit he neik in raas je nsaen anteni' neu Keser anbi pah uuf Roma. Etun es au fe' a'tahan, tar antea au upein mainuan he 'soun ee nnao neu Roma.” 22 Anneen narair nai' Festus in uab ni on nana te, usif nai' Agripa nak, “Karu reko te, au he 'neen kuuk na'ko re' atoni naan.” Onaim nai' Festus nataah, am nak, “Bisa! Of au 'ator he noka te, ho mneen kuum mu'ko ne, tua.”
Usif nai' Agripa nroim he nneen nai' Paulus in uaban
23 Noka te, gubernor Festus an'ator he usif Agripa bisa nneen nai' Paulus in uaban. Ma in an'ator amsa' he too mfaun sin bian amsa' nneen nok nai' Paulus. Es re': soraru 'naakf ein, ma a'naet sin na'ko kota Kaisarea. Rari te, usif Agripa nok bi Bernike ntaam neman, ma sin npaek ein paek usif. Onaim, too mfaun sin na'bees ma nhormaat neu sin nua sin. Oras sin nabuan oke', gubernor ee nreun he nok nai' Paulus antaam neem. Nai' Paulus anbi a'naet ein sin maatk ein 24 Onaim sin neik nai' Paulus antaam. Rari te, gubernor na'uab, am nak, “Usif Agripa, in ama' sin, ma are' tamu sin ok-oke', re' au u'ratan ma 'hormaat 'ain ki. Atoni' re' ia, in kaan ee, nai' Paulus. Anmui' naan a'nakat atoni' Yahudi fauk re' sin namin rasi nok ne. Onaim, anmui' tuaf neman neu kau, oras au 'bi Yerusalem, ma 'bi Kaisarea, he na'seke' kau, nak, atoni' re' ia, in moni msa' ka ma'osa' fa. 25 Etun es au 'pariiks ee, mes au ka upein fa in sanat re' natai nok hukun a'maten. Mes in neik non antoti nrair he nasaeb in raas je annao nkoon on pah uuf, es na', reko'-re'uf ate, au ro he 'soun ee nnao neu Roma. 26-27 Karu au 'soun ee, au ro he 'tui an suurt es nok ne. Mes oras ia, au he 'tui 'ak on mee, neu Uis Ko' goe? Etun es, au ubuaba' ki ok-oke', he hi mneen ee. Amneen mirair je te, au 'toit neu usif Agripa he nfee naan kau fainekat es, he au 'tui surat re' bisa Uis Ko' goe ntoup goe nok neek reko. Au 'naben ate on re' he ka reko fa, karu au 'sonu' rasi ia annao neu Keser, mes au ka utoon fa atoni' ia in sanat. Au uab ki na'tuuk on naan, tua.”
Nai' Paulus namneob on anbi usif Agripa in matan
1 Rari te, usif Agripa nreun nai' Paulus, nak, “Oras ia, ho bisa mumneob om. Hai ok-oke' mibarab he mneen ko.” Nai' Paulus nait in a'niman, rari te, in na'uab am nak, 2 “Aam usi' Agripa re' au 'tuna' ma u'ratan ko. Au 'tenbat au nekak ia nmainua, natuin ho mfee kau mainuan he au u'uab, ma sin ama' sin hi he mneen kau, sa'-saa' re' atoni' Yahudi sin natrakan sin neu kau. 3 Au uhiin ak, ama' ho muhiin batuur, hit atoni' Yahudi hit atoran harat, ma hit rasi monit ma mates. Onaim, au 'toit ko aam he ho mneen murek-reko au uabk ii. 4 Nmurai na'ko au an-ana', sin nanoni' kau goen he 'moin utuin hit atoni' Yahudi hit harat. Nahunu te, nanoni' kau anbi au kuan; rari te, au uum uskoor a'tamba 'bi Yerusalem. Atoni' Yahudi re' anbin Yerusalem sin, nahiin au monik, ma sin nahiin kau rek-reko. 5 Karu a'nak pirsait Yahudi sin nromin, sin bisa nareta' nain nak sin nahiin kau na'ko un-unu'. Te au re' ia, au 'taam pukan Farisi. Atoni mfaun sin ok-oke' nahinin, nak hai atoni Farisi, hai es ma'tani' nneis mituin pirsait Yahudi in atoran. 6-8 Au, ma too Isra'el na'kon sin uuf bo'es am nua sin, hit tpao he Uisneno nmoe' natuin re' In anba'an naan je neu kit. Manba'an re' naan, In natoon anraar je neu hit be'i-na'i na'ko ahunut. Onaim antea oras ia, hit arkit t'onen fai-manas, he Uisneno In manba'an naan anjair nai. Manba'an naan in aafn ii, nak, of In he namonib nafanik amaets sin. Aam usi' Agripa. Sin maka'rais ein nok kau, natuin au 'pirsai 'ak of Uisneno namonib amates.Au he utaan, nansaa' am es tuaf na'ko re' hi ia, bian ka mroim fa he mpirsai mak, Uisneno bisa namonib amates sin? Batuur In bisa! 9 Nahunu te, au bisa 'moe' sa'-saa', ma au maraban ma'tani' atoin ein re' natuin Nai' Yesus, atoni na'ko Nasaret. 10-11 Oras naan, a'nak pirsait Yahudi sin anfee kau hak, he au 'nao ma 'ha'mui' Nai' Yesus In atuin ein anbi me-mee. Au 'heek sin, rari te, au 'heer 'eik sin neman anbin Yerusalem, ma au utaam sin anbin bui. Au msa' ufeek ok he nhukun na'maet bian.Au msa' 'taam 'eu uim oen ein, ma ha'mui' sin. Onaim, au u'seke' sin he natotan Nai' Yesus. Fani-fani, au 'aim sin nok neek maputu'. Asar au 'neen nak apirsait neu Nai' Yesus etan me-mee, maski sin ntean pen-pene teta' msa', au 'aim sin piut!”
Nai' Paulus nareta' nafani' saa' re' in naben niit ee
12 Nai' Paulus antuut antein in uab ni, mnak, “Neot es, a'nak pirsait sin anfee kau surat kuasa he au 'aim tuaf re' natuin Nai' Yesus anbi kota Damsik. Onaim, au 'nao. 13 Aam usi' Agripa! Oras hai mbi rana tnana', of ai' mansi na'puup, nok askeken, snaaf es na'ko neng goe, ntoom kau ma au aok-bian sin imsa'. 14 Hai mtikoeb main mtea afu, natuin snaaf naan in ma'tanin. Rari te, au 'neen hanaf es na'uab nok kau neik uab Aram, nak, ‘Hoe, Saul! Nansaa' am es ho mha'mui' Kau piut-piut? Atsusat maet karu ho mraban Au roim ki piut.’ 15 Au 'neen hanaf naan, mes au ka 'iit fa in tuan. Onaim au utaan, 'ak, ‘Usi'. Ho sekau ko?’ Rari te, hanaf naan nataah kau mnak, ‘Au re' ia, Usif Yesus re' ho mha'mui' Kau piut-piut. 16 Saul! Amfeen nai! Au ukriir Ok on re' ia, nok in sair ti, onai: Au 'piir 'aan ko, njair tuaf re' Au 'pirsai. Ho ro he mnao mutoon meu mansian ii ok-oke', sa'-saa' re' ho miit murair sin neno ia na'ko Kau. Of Au ukrira' 'teni' ko, rais fe'u bian he ho bisa mutoon neu mansian ii ok-oke'. 17 Of ho mupein susat huma'-huma'. Mes Au 'panat ko, na'ko tuaf ein re' he nha'mui' ko, maski na'ko atoni' Yahudi, ai' atoin teta'. Tebe! Au 'reun ko neu atoin teta' re' ka na'ko fa atoni' Yahudi sin. 18 Ho mnao mfei sin maatk ein ee, he sin bisa nahinin ma nmonin nbin me'u. Rari te, sin nasaitan sin raan mes'ookn ein. Ma fin ho ro he mrurun sin ranan neu monit amneot.Ho mufetin main sin na'ko niut re'uf sin A'nak Ko' goe in kuasan, rari te, meik sin neu Uisneno. Nok ranan nana te, he Uisneno nsaok nain sin saant ein ok-oke'. Ma sin anfain Uisneno In aanh ein, nabu-buan nok tuaf bian re' Uisneno anpiir naan sin, natuin sin npirsain neu Kau. Au uab ki ntuu' on naan, Saul!’”
Nai' Paulus natoon in mepu
19 Nai' Paulus antuut in uab ein, nak, “Onaim, aam usi'. Mepu re' au 'toup goe na'ko neno-tunan naan, au unaob ee. Tar antea oras ia, au ro he 'meup piut-piut, ka nabei' fa he au 'teet koet. 20 Nahunu te, au utoon Usif Yesus In Rana' 'Honis neu atoni' Yahudi sin anbi Damsik. Rari te, au uum utoon 'eu atoni' Yahudi sin nbin Yerusalem, ma propinsi Yudea nfuun am nateef. Rari te, au 'nao 'fuun am uteef atoni teta' sin pah-pah. Au u'uab 'eu sin nok muti'-monas, henati' sin npoin na'ko sin raan penu, ma sin annona' sin nekak ma sin tuak eini neu Uisneno. Sin ro he nmo'en moe' reko neu tuaf bian, he njair tanar, nak, sin nmoin fe'u et Uisneno. 21 Natuin au 'meup on naan, es atoni' Yahudi sin nheek kau anbi Uim Onen Uuf anbi Yerusalem. Ma sin he nroor niis kau. 22 Mes Uisneno nturun kau. Etun es au 'moin tar antea oras ia. Onaim, au bisa 'hake 'bi ia, ma ureta' ki, et ana'-ko'u, rasi re' nmatoom nok Usif Yesus In Rana' 'Honis. Sa'-saa' re' au utoon sin re' ia, natai nok saa' re' na'i nai' Musa nok Uisneno In mafefa' kniun eini nanoni' naan je. 23 Sin nanoni' saa' re' nmatoom neu Kristus, Tuaf re' Uisneno nba'an naan Je he nsoun Ee neem. Nak, In ro he nasaah ha'mu'it. Rari te, In nmaet. Mes In he njair tuaf ahunut re' Uisneno namonib nafain Ee na'ko mates. In es re' he nfee me'u neu atoni' Yahudi sin, ma atoni teta' msa' nbi me-mee.” 24 Nai' Paulus fe' na'uab ma natoon in mepu, mes nai' Festus nseni nfeek in uaban nok han ma'tani', nak, “Hoe! Pau'! Ho mumaunu mrair. Ho muhiin bainesi', tar antea nmoe' ho roen maan anreu'.” 25 Mes nai' Paulus nataah, am nak, “Ama' gubernor re' au u'tuna' ko. Au ka umaunuf. Sa'-saa' re' au utoon ee ia, tebe on naan. Au ka u'uab fa rais rum-ruum. 26 Ama' usif Agripa, ho muhiin kum, saa' re' au u'uab urair sin. Etun au ubrain he u'uab sin muti'-monas. Au 'pirsai 'ak aam usi' ho mneen murair sa'-saa' ia oke', fin saa' re' njair naan ka nbin fa baer ma'koro. Nak, Usif Yesus re' amates naan, anmoni nfain jen. Are' too mfau ni ok-oke', nahinin nrair rasi naan. 27 Na'ko ahunut, Uisneno In mafefa' kniun ein, sin natoon nain are' rasin ia. Au 'brani he 'aat manpasan, 'ak, aam usi' msa' mpirsai mafeef' ein sin uab kein.” 28 Usif Agripa nseni nfeek nai' Paulus in uaban, ma nak, “Hoe! Pau'! Ka 'roo fa te, of ho he mmoe' kau njair atoni Kristen!” 29 Ma nai' Paulus nataah aam usi', am nak, “Onai, usi'. Au 'onen 'eu Uisneno, he orsi, a'roo ai' haumaka', ka neu fa aam usi' ho mmees jah, mes atoni mfaun re' anenat neno ia msa', bisa njair on re' au, re' Usif Yesus In aanh ein! Mes asar in ama' ki kais njair atoin bui on re' au.” 30 Nai' Paulus na'uab anrair on nana te, usif nai' Agripa nok bi Bernike, ma gubernor Festus, ma a'naet sin anfeen anhaken, ma nasaitan bare naan. 31 Oras sin nnaon npoin, atoin ein re' naan na'uab ein es nok es, nak, “Atoni' re' ia, in ka nmoe' fa sa'-saa' re' natai nok re' he thukun ta'mate, ai' he tataam ee neu bui!” 32 Rari te, usif nai' Agripa natoon neu gubernor Festus, am nak, “Airoo. Bait atoni' ia in kais neik in raas je nsae nteni' on pah uuf Roma. Kahat, rasi ia hit tafeek ee, ma tapoit ne.”
Sin neik nai' Paulus neu Roma
1 Rari te, gubernor Festus nafeek he nsonu' nai' Paulus neu Keser et Roma, he in es nafeek rasi naan. Rarit in nona' nai' Paulus nok atoin bui bian amsa', neu a'nak soraurs es, in kaan ee, nai' Jurius, he neik sin neu propinsi Italia. Nai' Jurius naan, soraru 'nakaf na'ko soraurs ein re' anpao Keser. 2 Neno naan, au (es re' nai' Lukas) msa' 'nao 'aat ok nai' Paulus. Tamba tuaf es na'ko propinsi Makedonia, na'ko kota Tesalonika, in kaan ee, nai' Aristarkus. Hai arkai msae bnao oe jes re' in neem na'ko kota Atramitum. Natuin rencana, bnao oe naan of in he nnao neis nok bare-bare nbi propinsi Asia. 3 Hai mpoi mi'ko Kaisarea, noka' fa te, hai mtean kota Sidon. A'nak sorarus nai' Jurius in ka nansaa' fa nai' Paulus, ma nreek nai' Paulus he nnao naim sekau re' in nahiin sin anbi kota naan. In teenb ii, he sin bisa nfeen nai Paulus saa' re' in nperuu goe oras sin nbin tasi tnana'. Ranan na'ko Kaisarea nnao neu puru Kreta 4 Rari te, hai arkai msae mfain on bnao oe naan, ma mnao mkoon. Mes anin na'ko bnao oe naan in matan maneon ni kah, tar antea bnao oe naan ka bisa fa he nnao. Onaim, sin tebe bnao oe naan, ma nnao npeo' puru Siprus ma Siria sin atnanak, he nak hai kais mipein anin naan. 5 Na'ko naan, hai mnao mreef tasi nbi propinsi Kirikia ma propinsi Pamfilia sin matan. Hai mnao piut, tar hai mtea kota Mira, et pah Rikia. Amtean naan, hai msaun misaitan bnao oe naan. 6 Oras hai mbi Mira, nai' Jurius nataif on he naim bnao teta' re' he nnao neu Italia. In napeni bnaa goes na'ko kota Aleksanderia, re' he nnao neu Italia. In nreek kai oke' he msae meu bnao oe naan. 7 Hai mnao maan neno fauk ein, mes abnao oe naan ka nnao nten-teni' fa, natuin anin na'ko in matan maneun ni kah. Hai mhae mmaet, tar amhaumaak kota Knidus. Mes anin naan fe' anfuu naheer amsa', onaim hai mnao mreef meu puru Kreta, he miniinb om mi'ko anin. Rari te, hai mkoon paanf es, in kaan ee, Sarmone. 8 Bnao oe ia, nnao nok susat nana' renat, tar hai mkoon panaf naan, mitun-tuin ah puru Kreta in ninin, na' hai mtean baar jes, in kaan ee, Labuan Amasat. Bare naan, anmapaumaak nein nok kota Rasea. 9 Anbi naan, ameupt ein nbi bnao oe naan nas-nasan a'kre'o, te hai mnao 'roo goen, mes hai ka mtean Italia fa fe'. Oras naan, Neno Saok Sanat atoni' Yahudi ankonon nrair. In oet ni, ain ko'u ma oik ko'u of he nfoe. Ameupt ein nmaktaan ein he hai mnao mkono, oo, ai' kah. Nneen on nana te, nai' Paulus na'uab, nak, 10 “Au aok-bian arki! Au u'uab ana'kre'o. Au utenab, karu hit he tnao tkoon, of hit tapein suust am nana' renat. Of abnao ia nreman maet, baer ein nreman, ma hit imsa' of atmaet oke'.” 11 Mes nai' Jurius ka nneen fa nai' Paulus. In npirsai naneisib neu anaa' bnao nok abnao tuaf. Fin sin nabarab he nnao npoin na'kon bare naan. 12 In amreu' ni, Labuan Amasat naan, in ka mamut fa karu bnao oe ro he nhaek anbi oras oikn ein anfoen. Onaim, amfaut ein nak sin nromin he hai mnao mkoon, meu kota Feniks. Sin roimk eini, karu reko te, hai mitua mtahan ambi naan, tar antea oras oikn ein nas-nasan. Kota Feniks naan, puru Kreta in bare re' mamut neu bnao oe, natuin in naniinb on na'ko ain toon, ma ka napein fa okin ko'u.
Ain nautus anbi tasi
13 Oras anin haa'-nua' anmurai nfuu kre'o-kre'o, sin nak, ai' ain reko he sin bisa npaek je, he nnaon neu kota Feniks. Sin nak, “Anin ia, reko. Iim he tnao nai!” Onaim, sin nasaeb bonit, ma nasaeb layar, ma hai mnao mnono haa taas je ninin. 14-15 Hai mnao ka 'roo fa te, nok askeken, ain nauts ii nfoe. (Re' hit tiit tak, ‘anin na'ko neon-saet ma ponain sin atnanak’). Anin naan nfuu bnao naan, neik je neu taas je tnanan. Ameupt ein abnao naan, sin ka bisa nabani' fa bnao. Onaim, sin paraak na he. Ma bnao naan nnao natuin ahaa ain ni in a'romin. Bnao oe ji nateef nok ain ko'u 16 Oik niin npesan kai mtean pur aan es, in kaan ee, Koda. Oras naan, kofa' bai' je fe' natuin kai nbi bnaa goe in kotin, ma sin nheer ee nok tani. Rarit, hai mheer misaeb kofa' ba'i naan, neu bnaa goe tunan. Hai mhae mmaet. 17 Oras kofa' ba'i naan antea bnaa goe tunan, sin npuun bnao naan nok tani nfuun am nateef, he npanat he kas-kaisa bnao naan in kuust ein ee natfaik ein, ma oo ji ntaam. Sin namtau msa', kas-kaisa oikn ii anpesan bnao naan, ma npoir ne nbi snae kbatus Sirtis et pah Afrika. Onaim sin nasanut boin atboes, he na'bauna' bnao naan in a'naon ee kre'o. 18 Ain aherat naan, nasniba' bnao neu 'rii ma 'ne'o. Noka' te, ameupt ein naitin nporin brua' bnao naan neu tasi. 19 Nmeu te, anin naan fe'e nfoe. Onaim, sin namtaun nsesan. Es nana te, sin naitin npori' bnao naan in abrua' bian he nha'kaaf ee. Ma sin naitin nporin amsa' bnaa goe in baer mepun. 20 Anin naan ka nas-naas nitaf, fai-manas neno fauk-fauk. Niip gui nsaun afu, tar antea hai ka miit fa manas ma kfuun. Hai neek min nabatin ma'tani'. Hai mitenab mak ia hai ka mmoin fa heen. 21 Hai ka miah fa neno fauk een. Nai' Paulus no'en sin oke', ma na'uab am nak, “Aok-bian arki! Bait hi mroim mituin kau he hit kaisa' tpoi ta'ko Labuan Amasat te, hit ka tsuus fa on re' ia. Ma hit ka truik fa msa'. 22 Oras ia, au 'toit ki oke', he miheran hi neek mein naan. Of hiti bnao ia, npee' pisa'-pisa'. Mes kais mimtau, of ka tiit fa amates. 23 Au 'roim ki, hi arki mihiin mak, au re' ia Uisneno Iin Ja kau. In es anfee kau mepu. Fini na, In nreek In ameput es na'ko neno-tunan, ma in hake nbi au bnapak. Rarit in natoon kau mnak, 24 ‘Pau'! Kais mumtau sa'-saa'. Of ho he mtea Keser et Roma, he m'urus ho rasi. Natuin Uisneno anneek ko, es hi asaet abnao ia, of ka tiit fa es natfuun. Of ammoin ok-oke'.’ 25 Onaim, aok-bian arki. Kais hi neek mein nabatin. Au 'pirsai tebe 'eu Uisneno, re' In natoon kau fini na, ro of njair on naan. 26 Bnao ia of nasrae nbi puur goes.”
Bnao oe naan anhaumaak meto'
27 Oras naan, anin ma okin anbeos kai mok abnao oe naan, ma anpesan kai fai bo'es am haa anbi Tasi Atria. Of oni' faa ji noe natnaan, ameupt ein na'taak ein, nak hai mhaumaak meto'. 28 Rarit sin nasanut rino, he nahiin oo je mnanun. Onaim sin n'uukr ee te, in a'taam ni, nehe bo'-nua. Rarit abnao naan nnao maat anteni', ma sin nasanut nteni' rino naan, ma nahiin nak oo je 'taam ni nehe bo'es am niim. 29 Sin namtaun, kas-kaisa' bnao naan na'rae' toon nbi faut puut kein. Onaim, sin nasanut boin kotif fua' haa. Hai mhar-harap he nmeu nfiin nai. 30 Mes ameupt ein abnao naan anma'akoran he naen nasaitan abnaa goe mninu'-mninu'. Onaim sin nasanut kofa' ba'i, ma nmo'-mo'en on re' sin he nasanut bonit matan. 31 Mes nai' Paulus natoon neu nai' Jurius, rais re'uf naan, nak, “Karu ameupt ein sin ka nbin fa bnaa goe naan ee te, of hi mmaet oke'.” 32 Anneen nai' Paulus na'uab on nana te, soraurs ein nreef nafeek kofa' baa' je in tani, ma nparaak ne. Onaim, ameupt ein naan ka bisa naenan fa heen. 33 Anmeu nfin onai te, nai' Paulus anfuri' sin oke' he nahan. In nak, “Krei nua goen, hit suma bisa tok-took goah, hit har-haarp ah, ka tiit tain fa saa' es ntaam neu hit taik. 34 Onaim, au 'toit ki he reko te, hit taah tan akre'o fe', he hit tapein tafani hit neun ki. Au 'pirsai 'ak of ka tiit fa es na'ko kit re' ia, napein siraak. Hit of atmoin oke'!” 35 Na'uab anrair on nana te, nai' Paulus nait utunu'. Rarit, in n'onen neu Uisneno ma ntoit makasi nbi sin maat keini. Rait in nait tuuk es, am neuk. 36-37 Sin nitan on nana te, sin neek ein natee nfanin. Rarit sin nahan ok-oke'. Hai abit abnao naan, tuaf natun nua mbo'-hitu mnee. Hai miah ok-oke'. 38 Mimseen onai te, sin naitin ma n'okar a'kaor mak-gandum sin, neu tasi, he nsoba' anha'kaaf bnao naan anteni'.
Bnao oe naan nasrae
39 Nmeu saba te, ameupt ein niit meto'. Mes sin ka nahiin fa puru naan in kanan. Ma sin niit tais tuuk es, re' in niin ee masnaen. Onaim sin harap, reko te, sin he neik bnaa goe nnao nabnonon npeo' faut puutk ein, he ntean tais tuka' naan in ninin nok reko. 40 Onaim, sin nreef nafeek boint ein nabaran anbin tasi. Rarit sin nasanut kemudi neu tasi, he sin bisa nastiir abnao naan. Rarit sin nasaeb layar ana' abit maat ne, henati' ain ne anfuu bnaa goe nnao neu nini'. 41 Mes bnao naan nsae naan snae a'tupus nbi taas je nanan, ma in nasrae nbi naan, ma ka bisa nakbero' nteni' fa. Onaim, oik ko' guin nbeos nakrati' bnaa goe in kotin. 42 Oras soraurs ein nitan on nana te, sin he nroor niis atoin bui nu. Te sin namtaun, kas-kais atoin buin naan nabha'en neu meto', ma sin naenan kuuk. 43 Mes a'nak sorarus, nai' Jurius, antaar in soraurs ein, natuin in he npanat nai' Paulus. Onaim, in naprenat, he sekau-sekau karu nabhae' nahiin, an'okrok neu taas je, ma nabha'en neu meto'. 44 Neu re' sin ka abhae' ahiint ein, in nreun sin he nna'an a'bena', ai' sa'-saa', rarit antaman neu taas je, ma natuin oik nein npoin neu meto'. Onaim, hai mtea meot ee nok ao-mina' ok-oke'. Oik nein anbeos nakrati' abnao
Anbi puru Malta
1 Oras hai mtea mrair nok ao-mina' mbi meot ee te, na' hai mihiin mak bare naan, puru Malta. 2 Abitan puru naan ntoup kai nok reko. Natuin oras naan na'uur, ma maniik ni kah, onaim sin nahuup ein ai, rarit sin nak kai he mraar. 3 Nai' Paulus amsa' nsiun nok hau. Oras in npaan hau nggein neu ai, nok askeken te, kaun araut es anpoi neem, natuin in ka nabei' fa maputu'. Onaim, kauna' naan, anrau ma na'kii' anbi nai' Paulus in a'niman. Kaun araut nrau ma na'kii' anbi nai' Paulus in a'niman. 4 Oras abitan Malta niit kauna' naan na'kii' anbi nai' Paulus in a'niman te, sin na'uab ein es nok es, am nak, “Atoni ia, in of oin aroor atoni'. Maski taas je fe' nafeit ne te, in uan ii on naan. Etun es in ka bisa fa he anmoin. Sekau es anmoe' re'uf te, of in nseu fuan.” 5-6 Atoin ein naan nateenb ein nak, of akre' goes anteni te, nai' Paulus in a'niim ne of anfu'un. Ma nok askeken ate, of in nmaet. Mes nai' Paulus antekar kauna' naan neu ai. In ka nnaben fa menas sa'-saa'. Rarit sin npaon a'kre' goes ate, mes nai' Paulus ka sa'-sa'af. Onaim, sin nateenb ein, nak, “Kais-kaisa' atoni' ia, pah tuaf!” 7 Ka na'roo fa na'ko bare naan, gubernor ee in soonf ein ma in auf manuan. Gubernor puru naan, in kaan ee, nai' Publius. In neem anseun kai nbi taas je ninin, rarit in naskau kai he hai mitua mok ne nbi in sonaf. Anbi naan, in n'urus kai neno teun. 8 Oras naan, gubernor ee in aam hoinf ee nameen. In nkuan on. Onaim, nai' Paulus nnao nkiis goe nbi in ke'en. Rarit in pooh goe, ma an'oen ee. Onaim in nareok nain. 9 Oras sin niit gubernor ee in aamf ee nareok on naan, amenat bian amsa' neman neu nai' Paulus. Sin ntotin he nareko' sin. Onaim in nareko' sin imsa'. 10 Rarit sin seun banin kai, neik ein bare' namfau.
Nai' Paulus sin nfenan na'ko puru Malta nnaon neu Italia
11 Hai mitua ntahan nbi puru Malta funan teun, tar antea ain ko'u ma oik ko'u naan nasnaas. Oras naan, abnaa goes na'ko kota Aleksanderia re' in haek nani nbi puru Malta. Bnao naan in kaan ee, Ri'an Koen, natuin anmui' naan pah tuaf ankoe, re' bnao tuaf ee nmoe' sin na'ko hau, oke te nahake' sin nbi bnao naan in matan. Onaim, hai he msae bnao naan, ma mnao mkoon meu Roma. Onaim, oras hai msae meu bnao naan, abitan Malta neik kai bete' ma bare' bian re' hai mperuu sin nbi bnao. Na'ko puru Kreta tar antea kota Roma 12 Hai mnao kre'o-kre'o, tar hai mtea kota Sirakusa et puru Sisiria. Hai misnaas ambi naan, neno teun. 13 Mi'ko naan, hai mnao mteni' mibnono haa Sisiria in ninin, rarit hai mtea kota Regium. Noka' te, anin na'ko haa'-nua' nfuu nok ma'tani', onaim hai mnao mkoon ma bnao naan in nanapa'. Nmeu te, hai mtea kota Putiori. 14 Anbi naan, hai msaun misaitan bnao naan. Rarit hai mnao maim Usif Yesus in apirsait ein anbi naan. Oras hai miteef mok sin, sin ntotin he hai mitua mok sin. Onaim, hai mitua mtahan mok sin neno hiut. Rarit hai mnao raan meto' meu kota Roma. 15 Oras apirsait ein anbin kota Roma nnenan nak hai he iim meu Roma, sin neman nseun kai nbi rana tnana'. Bian nateef kai nbi 'masa' Apius; bian nateef kai nbi baar jes, in kaan ee Ropo Teun. Oras nai' Paulus niit sin onai te, in nbo'is Uisneno, ma in neek ne natee. Nai' Paulus nateef nok apirsait ein anbi ranan Apius
Nai' Paulus antea Roma
16 Oras hai mtea kota Roma, soraurs ein nataam atoin bui ngguin neu bui. Mes nai' Paulus ka nataam ef. Sin nkoon ee, he in nseeb kun umi. Anbi naan, in natua nok soraurs es re' npaa goe fai-manas. Sin a'niimk ein nua sin anmatopub sin nok korenit. 17 Neno tenu nkono te, nai' Paulus naskau atoni mnasi' Yahudi nbi bare naan, he neem nateef nokan. Oras sin nabuan, in natonan sin, am nak, “Aok-bian arki! Au uum a'tea ia, natuin atoni' Yahudi sin anheek kau anbi Yerusalem. Rarit sin nana'at kau neu ana' prenat Roma. Te kah, au ka 'mui' fa sanat. Au ka 'moe' fa sanat sa'-saa' re' nraban neu hit atoni' Yahudi. Au msa' ka 'moe' fa sanat sa'-saa' re' nraban hit atoran harat, re' hit ttoup tain sin na'ko hit be'i-na'i sin. 18 Ana' apreent ein anparikas nrair au raas ji nbi nee. Mes sin ka niit fa au sanat mese' msa', re' nmatoom nok hukun a'maten. Etun sin he nafetin kau. 19 Mes a'nakat Yahudi sin ka ntoup fa rasi tfeka' na'ko ana' aprenat re' nak he nafetin kau, es nana te, au usaeb ukonob au raas ji neu pah Roma in uun ia. Au 'moe' on naan, mes au ka 'mui' fa tenab he utraak au atoni' Yahudi sin. 20 Rasi naan, in a'moe' ni tar au uskau he hit tabua anbi ia. Nbain he hit bisa ta'uab saa' re' hit atoni' Yahudi kit atpa-paa goe: etun, hit harap Usif re' Uisneno he nsoun Ee neem, he nfee 'honis neu kit too Isra'el. Rasi ia, es re' nmo'e ma, sin nfuut kau nok korenit ia.” 21 Rarit sin natahan, am nak, “Antea oras ia, hai ka mtoup miit fa suurt es na'ko Yudea re' he natoon kai nok ho rasi. On nana msa', re' amneemt ein na'ko naan, sin ka na'uab niit fa ho raas ji, tua. 22 Mes hai mroim he mneen saa' re' ho mpirsai mrari, natuin hai mneen amrair anbi me-mee, nak too mfaun ein anpenan pukan Kristen sin noni'. Mes in amneon ii, on mee te, hai ka mihiin ma ne fa. Onaim, ho mureta' miit kai.” 23 Onaim, sin akoran he naim naan ors es, he nateef anfanin. Ntea in ors ate, too gui mfaun ii kah neem nauban anbi nai' Paulus in umi. Onaim, in nmurai nareta' sin Uisneno In Aprenat. In nait na'i nai' Musa in tuis ein, ma Uisneno In mafefa' kniun ein bian sin tuis ein, he nheer sin he npirsain neu Usif Yesus. In na'uab na'ko nok-noka' antea mansi nmaeb. 24 Oras sin neen anrair nai' Paulus in uaban, bian anpirsain, mes bian kahaf. 25 Sin nasurin es nok es, tar tuaf bian he nfanin. Mes nai' Paulus na'uab am nak, “Tebe! Hi surin re' ia, natai nok saa' re' Uisneno In Smana Kniun Ee natoon nain sin neu na'i nai' Yesaya. 26 Nak, ‘Ho mnao mutonan pah re' ia, mak, “Of hi mneen Au uab ki piut, mes ka mihiin fa mnuut es! Hi mkius mifan-fain saa' re' Au 'mo'e, mes hi ka mfairoor je fa.” 27 Natuin atoni' re' pah ia, sin neek ein maun keni kah. Sin ruik ein ka nroim he nenan fa heen! Ma sin maatk ein ee, on he nforon nrarin! Nparaak he sin kaisa' nnenan nai; Ma nparaak he sin maatk ein anforon. Ma nparaak he sin neek ein na'temen konon. Tar antea sin ka nahiin fa ranan he nfain neem neu Kau nteni', Onaim, es Au he ureko' sin, on mee?’” 28 Onaim, nai' Paulus natu'ub in reta' naan, ma na'uab am nak, “Onai, aok-bian arki! Hi ro he mihiin, mak oras ia, Uisneno nabarab anrair he nfee 'honis neu atoni' teta' re' ka na'ko fa atoni' Yahudi, natuin sin nromin he nneen Ee.” 29 Nai' Paulus na'uab anrair on nana te, too mfaun ein naan ansisa'en. Mes sin nteenb eini ka natefan fa, natuin sin nasurin es nok es. 30 Nai' Paulus natua nbi uim seba' naan, antea toon nua. In ntoup sekau-sekau re' neman neu ne, nok neek marine. 31 Neik ranan naan, in napein mainuan he nareta' Uisneno In Aprenat, ma nanoni' Usif Yesus In Rana' 'Honis neu sin. In na'uab nok neek abrain, ma ka tiit fa 'eka' msa'. Aam Teofilus. Au reta' ia na'tuuk ma na'paar on re' ia, tua. Na'ko au, Lukas
Saloom
1 Surat re' ia na'ko au, nai' Paulus kau. Uisneno npiir naan kau 'jair Yesus Kristus In haef. Rarit In nait kau 'jair Kristus In aan renu' ma aan reka' he 'nao utoon a'bi mee-mee anmatoom nok In Rais Reko. 2-3 Un-unu' te, Uisneno n'ator nain he In mafefa kniun' ein antuin anmatoom nok Rais Reko anbi In Suur Akninu'. Anbi Surat naan, Uisneno anba'an he nsonu' In Anah, Nai' Yesus, he njair mansian. Oras ia, In rais manba'an naan anjari nrair, natuin Nai' Yesus neem anrair anjair mansian, re' na'ko usif nai' Daut in sufan. 4 Anbi rasi bian, Uisneno nakrira' bukti mnak, Yesus Kristus, In Aanh aa kuun amsa'. Fin Nai' Yesus In Asmanan, kninu' batuur-batuur, huma' mese' on re' Uisneno. Ma Uisneno npaek In kuasa he namonib nafani' Nai' Yesus na'ko In a'maten. Na'ko rasi naan, hit tahiin tak, Uisneno In Anah naan, es re' Nai' Yesus, hit Usi'. 5 Nai' Yesus nakrira' In nekan arekot neu kau, fin In npiir ma nbetis naan kau 'jair In haef, he utoon In rais manba'an a'bi mee-mee. Fin In nroim he tuaf-tuaf re' ka atoin Yahudis fa msa', anpirsai Je, ma nmoin natuin In romin. Au 'romi msa' he uuf-uuf ma pah-pah anpirsain neun Kristus, ma nmonin natuin In romin. 6 On naan amsa', hi abit kota Roma. Hi mneem ein mi'ko pah ma uuf amfaun ambi bare-bare. Yesus Kristus anpiir naan ki mnak, “Iim nai! Iim he mjair Au ngguin!” 7 Etun au 'sonu' surat ia 'eu ki, hi abit Roma, ma umnaub ki m'ak, Uisneno anneek ki. In ntoit ki msa' he hi mjair Iin na re' ammoni kninu'. Au 'onen he hit Ama' Uisneno, ma hit Usi' Yesus Kristus, nakrira' Sin nekak arekot, ma nfee ki mamut, rame' es nok es, ma tainina'.
Nai' Paulus an'onen ma nteek in partei ngguin
8 Nahunu te, au 'toit makasi kou'-ko'u 'eu Uisneno, natuin Yesus Kristus anmeup et hi neekm ein. Au 'toit makasi msa', natuin tuaf-tuaf re' natuan nbin bare-bare nbin prenat pah Roma in naan ee ok-oke', na'uab ein anmatoom nok hi rais pirsait meu Nai' Yesus. 9 Au 'onen piut-piut ma 'teek ki. Batuur! Uisneno neikn On nahini mnak, saa' re' au u'uab ee re' ia, ro batuur! In nahini msa', au 'meup nok nenuf ma'tani', he utoon Rais Reko na'ko Uisneno In Anah. 10 Ansuun oras au 'onen, au 'toit 'ak on nai: “Uisneno, au tuak ii kuuk ka uhiin fa in raan ii on mee. Mes karu natuin Uisneno Ho romim, mfei ranan he au 'nao 'kius au partei ngguin etan kota Roma.” 11 Au 'onen on naan, natuin au umnau ki he 'iit 'aan ki, he au bisa 'bait 'eu ki kuasa na'ko Uisneno In Asmanan, he hi mjair Uisneno Iin na, re' naran ma ntahan ma'tani'. 12 Au sairt ii on nai: karu au 'jair he 'uum ma utua 'ok ki, au he 'ha'tain ki, he hi neek pirsait naan nakii' naheer anteni'. Ma au 'roim he hi mha'tain au neek ii msa'. 13 Aok-bian manekat arki! Au 'roim he hi mihini mmak, fani-fani au sairt ii he 'eiti' 'makius ki 'bi kota Roma naan. Mes antea oras ia, ka bisa fa fe'. Karu au 'jair he 'uum, au ufnekan ma 'harap anmui' tuaf amfaun anpirsai ma'tani' neun Kristus fe', on re' anbi bare bian sin. Nok ranan naan, au 'meupk aan napein in afan arekot. 14-15 Maski on mee msa', au 'naben ate au ro he utoon Uisneno In Rais Reko 'eu sekau-sekau goah. 'Eu tuaf apaek a'uab Yunani, ai' 'eu atoin jintiu ai' afuat anbi rais pirsait amnaa' re' anpaken uab bian sin, ai' 'eu a'naet ein, a'baut ein, ai' askorat sin, ai' ka askorat fa msa'. Es naan ate, au ubarab a'rair he 'eit 'eu kota Roma, he 'makius 'aan ki.
Uisneno In Rais Reko, anmui' kuasa he nsoi nafetin mansian ein ok-oke'
16 Au ka umaeb ok fa kre'o msa' anmatoom nok Usif Yesus In Rais Reko. Fin karu nmui' tuaf re' anpirsai Uisneno, Rasi naan anmui' kuasa na'ko Uisneno he nsoi nafetin tuaf naan na'ko in sanat ma penu sin. Atoin Yahudis sin nahiin rasi ia nahun-hunun, rarit na' uuf ma pah bian. 17 Rasi naan nakrira' Uisneno In ranan he nareko' tuaf asanat amsa'. Rasin re' naan bisa njarin, asar tuaf anpirsai Je. Fin matu'i et Uisneno In Suur Akninu' mnak, “Tuaf ro he npirsai Uisneno fe', na' sin bisa narekon ma nmarame' nok Ne. Fin karu sin nmonin ma npirsai Je, na' sin napenin 'monit amneot ma amnonot.”
Uisneno natoo' neu tuaf re' ka nroim fa he nahiin Je
18 Mes Uisneno natoon anrair nak on nai: anmui' tuaf re' ka nrae natuin Ee fa. Ma bian anmo'en rais maufinu huma'-huma'. Mes Uisneno ka ntoup fa sin a'moe'k ein naan. Anbi sin nekak naank ein, sin nahini nrarin saa'-saa' es re' batuur. Maski on naan amsa', mes sin nmo'en rais amre'ut piut-piut sin. Sin nfuri' tuaf-tuaf sin, onaim tuaf-tuaf ein naan ka nahini ntein' ein fa, mee es re' batuur. Etun Uisneno he nasanut hukun neu sin na'ko neon goe tunan. 19-20 Tuaf-tuaf ein re' ia, ka napenin fa rasi 'sukif he namneob ok, fin rasin re' tuaf bisa nahiin anmatoom nok Uisneno naan, naan mahini' ma nakninu' nrair. Natuin In neikn On es re' nakrira' sin! Au sairt ii on nai: anmurai na'ko oras In nmoe' neno tunan ma pah-pinan antea oras ia, karu anmui' tuaf he nahiin rasi anmatoom nok Uisneno In tuan ma In kuasan re' ka natfeek fa, bisa! Maski Uisneno In tuan naan ka mamnita' fa, mes hit mansian ii bisa tahiin Je fe', nanete npeo' saa' re' In nmoe' sin. Etun au 'ak, amaufiunt ein ka napenin fa rasi 'sukif he namneob sin tuak ein antein am nak, “Au ka uhiin fa saa'-saa' anmatoom nok Uisneno.” 21 Onaim maski sin nahinin anmatoom nok Uisneno, mes sin ka nromin fa he nmanauk Ee mnak, “Uisneno naan, hit Uisneno!” Sin ka nromin fa msa', he ntotin makasi neu Ne. Rarit sin teenb ein antaisibun, tar antea sin ka nahinin fa saa'-saa' antein re' batuur. Sin ntaka'naan ein, ma na'uab ein rais poi huma'-huma' anmatoom nok Uisneno In tuan. Ma sin neek ein nameis'okan. 22 Sin es-es ate naiks ok am nak, “Au re' ia, tuaf re' nahiin rasi mfaun!” Maski sin nateenb ein on naan, mes batuurn ii, sin re' naan, anmonon on re' ukum. 23 Rarit sin ka na'besan fa neun Uisneno re' ma'tain re'uf naan, fin sin nak, “Hai ka mperluu fa Uisneno on re' naan!” Mes sin nmurai na'besan neun faut maruna' huma'-huma', on re' mansian. Rarit sin na'besan neun faut maruna' on re' koro, ma on re' mu'it bian, tar antea on re' kaun ein amsa'. Nok ranan naan, sin ntorak Uisneno re' ka bisa nmaet fa, ma nseun Ee nok bare 'maten! 24 Etun Uisneno nafetin ma nkonan sin on re' naan, he sin nmo'en natuin sin roimk ein kuuk. In nkonan sin he nmo'en rais maufinu re' na'uu ma na'baa' et sin neek ein. Tar antea sin ka namaeb ok fa ntein. Rarit sin n'oemetab sin aok ein huma'-huma', ma sin anmamo'en on naan neu tuaf bian sin aok ein. 25 Anbi sin nekak naank ein, sin nahini nrarin noni' re' batuur anmatoom nok Uisneno, mes sin ka ntae natuin ein fa. Sin teenb ein namre'un nrarin, rarit sin nateenb ein am nak, “Reko nneis, maski hit tmoe' huma'-huma' tar antea tamre'u tmate msa', ka nmui' fa resiko saa'-saa'!” Sin na'besan neun baer' ein re' Uisneno nmoe' sin, mes sin ka nromin fa he na'besan neun Uisneno re' anmoe' baer' ein naan! Sin nmoe' sin tuak ein on re' atoin ahinit ma amanoet anbin rais pirsait, te kaah, ruman, ka ma'upan ma ma'osa' fa. Fin re' batuurn ii, hit arkit mansian kit, ro he tpures ma taikas, ma thormaat teu Uisneno piut-piut! Naan es re' ma'osa' ma ma'upa'! 26 Natuin sin maufiunk ein re' naan, etun Uisneno nafetin ma nkonan sin he sin nmo'en rais re'uf natuin sin roimk ein kuuk. Rarit sin na'haek ein tafi'-tafi', ma ka namaeb ok nahinin fa. Sin feek ein ka nromin fa he ntupan nok sin moenk ein anteni', mes sin nromin neu saa' re' ka on fa re' biasa. Fin bifee ji antuup nok bifee! 27 Atoin ein anmo'en on naan amsa'! Sin ka nromin fa he ntupan nok sin feek ein antein! Mes sin ntupan nok atoni'! Sin ka namaeb ok fa kre'o msa'. Etun sin napenin hukun natai nok sin sanat! Fin sin ntebin ma nbeon na'kon ranan re' amneot ma amnonot. 28 Sin nateenb ein nak, “Reko nneis, kais ta'kii' itbi Uisneno.” Etun Uisneno nafetin ma nkonan sin on re' naan, he sin nmo'en natuin sin roimk ein kuuk! Onaim sin suma nateenb ein rais amre'ut anmees jah! Rarit sin nmo'en kuuk 'moe' ruum-ruum! 29 Sin i'moink ein naheun nok rais maufinu huma'-huma'. Sin ka nmoe' nahinin fa rais reko, mes suma nmoe' nahinin rais maufinu ma amre'ut anmees. Sin nakoman. Sin natuun ein tenab amre'ut. Sin amantiuns ein. Sin nroron mansian. Sin amatoes ein. Sin aputa-kriut ein. Sin apoit ein. Sin afeef akreot ein. 30 Sin nromin he na'uab na're'uf es in kanan. Sin nsaken Uisneno. Sin ka nahiin fa harat. Sin nkana'paar biak ein. Sin na'naeb sin tuak ein. Sin namin tenab amre'ut huma'-huma'. Sin nromin he nraban mahoint ein. 31 Sin ka natniin fa saa' re' batuur. Sin ntanhai kuuk sin rais manba'an, tar antea atoni' ka npirsai sin fa ntein. Sin ka nneek fa sin aok-biak ein. Sin ka nmu'in fa rais kasian akre'o msa'. 32 Sin nahini nrair Uisneno In atoran re' nak, tuaf re' anmoe' maufinu on re' sin, tebes namneo, sin ro he napenin hukun a'maten. Maski sin nahini nrair atoran naan, mes sin nmo'en rais maufinu ruum-ruum piut. Sin anfuri' tuaf bian he nmo'en maufinu on naan amsa'! Naan ro bainesi'!
Uisneno natoo' msa' neu atoin Yahudis re' In npiir naan sin
1 Ho mneen amrair rais maufinun fe'e na. Rarit of oni' ho mutenab am mak, “Airoo! Atoin ein sin maufinu bainesi'!” Karu ho mutenab on naan ate, ampaant om, oo! Fin ho maufinu on naan amsa'. Etun ho ka mmui' fa rasi 'sukif he mumneob om, mak ho re' naan, sekau. Karu ho mak, biak ein anmaufinun, onaim sin ro he napenin hukun, kais amnikan mak, naan ho muroib sanat meu ho tuam aan kuum. Fin ho ammaufiun on naan amsa'! 2 Mes hit tahiin, karu Uisneno anfee hukun neu tuaf re' anmoe' rais maufiun ein, ro tebes In nafeek sin rasin naan, natai ma namnoon. 3 Ai' on mee? Of oni' ho mutenab am mak, “Tuaf amaufiunt ein, ro tebes he napenin Uisneno In hukun.” Te kaah, ho mmoe' rais maufinu on re' sin imsa'. Mes ho mutenab am mak, “Hukun Uisneno na'roo na'ko kau.” On nai te, in a'suikn ii saa'? 4 Uisneno nakrira' In nekan arekot neu ko. In nsabaar ma nneek amnaun anmatoom nok ho 'moe'm ein. Mes nansaa' am es ho ka mkisu mtoom Ee fa? Of oni' ho ka muhiin fa mmak, In nakrira' In nekan arekot neu ko, he ho mufetin ma musaitan ho sanat ma penu sin, ma mtebi mfain meu Ne. 5 Mes ho re' ia, a'naak fatus ma ka mroim fa he mutniin! Ma ho ka mroim fa he musaitan ho sanat ma penu kre'o msa'! Onaim ho mmoe' he ho rais hukun sin ma'fena' ntein' ein. Oras pah-pinan ia namsoup, Uisneno of nataib mansian ein ok-oke' sin a'moink ein. Ma mansian ein ok-oke' of nahinin nak, Uisneno nafeek tuaf-tuaf sin raisk ein, ro natai ma namnoon. Oras naan, In hukun ko ma'fena', natuin In ka ntoup fa ho 'mo'em maufiun ein. 6 Ho 'monim on mee te, Uisneno of anbaras natuin ho 'mo'em naan. 7 Fin tuaf re' anmoe' rais reko piut-piut, In of anfeen sin 'monit amneot re' ka natfeek niit fa. Sin esan re' antoupun rais hormaat, kaan reko, ma nmonin piut-piut nok Ne. 8 Mes Uisneno ka ntoup fa tuaf re' anmoe' maufinu. In natoo' neu sin batuur-batuur, fin sin suma nahini haa rais maraban. Sin ka nmoe' natuin ein fa rais amneot ma amnonot, fin sin suma nmo'en natuin rais maufinu nmees jah. 9 Tuaf-tuaf re' nmoe' rais maufiun ein, of napenin susat ma ma'ne'at. Maski atoin Yahudis, ai' atoin ka Yahudis fa, sin napenin ok-oke'. 10 Mes tuaf-tuaf re' nmoe' rais reko, of Uisneno naikas narat-ratan sin, ma nhormaat sin he nmonin nok mamut, rame' es nok es, ma tainina'. Maski sin atoin Yahudis, ai' atoin ka Yahudis fa, sin napenin ok-oke'. 11 Fin Uisneno ka npiir fa humaf! 12 Uisneno In Atoran antoom mansian ii ok-oke'. Karu nmui' tuaf re' ka nahiin fa Atoran naan, ma nmo'e nsaan, Uisneno of napaisb ee ma ntitar napoitn ee. Ma karu nmui' tuaf re' nahiin Atoran naan, mes in nmo'e nsaan, Uisneno of anpaek Atoran naan antein he nafeek hukun neu ne. Uisneno of napasib sin ma ntitar napoitan sin, natuin sin ntanhain In Atoran naan. 13 Karu mroim he mmarame' mok Uisneno, ka nanokab fa karu mneen In Atoorn ahaa. Fin tuaf ro he nmoe' natuin In Atoran, na' In ntoup sin imsa'. Kais suma mneen aah! 14 Maski ka atoin Yahudis fa ka nahiin fa Uisneno In Atoorn ee in afan, mes na'ko sin kuuk anmui' tuaf re' anmoe' natuin Atoran naan. Natuin sin neek ein kuuk es re' natonan sin, mee es re' batuur, ma mee es re' ansaan. 15 Nok ranan naan sin naruru' mnak, Uisneno In Atoran matu'i et sin neek ein, on re' abas re' Uisneno nteun nggoe nbi sin neek ein. Sin nekak naank ein es re' nataib kuuk saa' re' sin nmo'e. Rarit sin teenb ein kuuk es re' nakuu sin karu sin nmo'en nsanan, ma natonan sin karu nmo'en batuur. 16 Onaim oras Uisneno nait inrair Yesus Kristus njair Afeek Rasi, In he nparikas tar namnuut rasin re' ma'nifa' ma ma'koro' nbi atoni' in nekan. Au unoni' tuaf-tuaf on re' naan, on re' matu'i et Uisneno In Rais Reko.
Maski atoin Yahudis anmoe' natuin Uisneno In Atoran, mes naan ka nsoi nafetin sin fa
17 Onaim hi atoin Yahudis, on mee? Hi es re' maikas ma mi'ratan hi tuam ein mak, hi kiim es re' amnaa' Uisneno In Atoran re' In nasaunt ee npeo' ka'o Musa. Batuur, ai' kaah? Hi mifeef amsa' anmatoom nok hi 'moinm ein mok Uisneno. 18 Batuur! Hi mihini mrair Uisneno In romin. Hi mihini mrair mee es re' reko nneis. Hi mihini mrair rasin ia ok-oke', natuin tungguurn ein nanoni' nrair ki na'ko Uisneno In Atoran. 19 Hi mpirsai hi tuam ein mak, hi bisa miruru' ranan meu tuaf re' ka nahiin fa he nnao neu mee. Hi maan hi tuam ein on re' me'u re' ntana' neu tuaf re' nmoni nbi meis'okan. 20 Natuin hi mnaa' Uisneno In Atoran, hi mitenab hi mihiin are' saa' ii ok-oke', ma hi mnaa' are' saa' ii ok-oke' re' batuur. Batuur, ai' kaah? Etun hi mitenab mak, hi bisa minoni' atoin amonot ma ri'ana' re' ka nahiin fa saa'-saa'. 21 Onaim au he utaan ki on nai: hi mroim he minoni' tuaf bian sin, mes nansaa' am es hi ka mroim fa he minoni' kiim saa'-saa'? Hi mroim he msae mimbar, he miprenat am mak, “kais mibaak.” Mes nansaa' am es hi kiim mibaak? 22 Hi minoni' mak, “Kais ammakaek ma mmakoin mok tuaf re' ka ho moen ja fa, ai' ka ho fee ja fa.” Mes nansaa' am es hi kiim ammakaek? Hi msaek batuur-batuur meu baer fuat ein, mes nansaa' am es hi mputa-kriu bare' na'ko uim fuat? 23 Hi mifeef anmatoom nok Uisneno In Atoran, mes nansaa' am es hi mtanhai Atoran naan, ma mimaeb Uisneno on re' naan? 24 Fin na'ko unu', matu'i et Suur Akninu' Uisneno mnak, “Tuaf bian sin ankana'paar Uisneno In kanan, natuin hi atoin Yahudis hi maufinum.”
Maski atoin Yahudis na'heri', naan ka nsoi nafetin sin fa msa'
25 Hi atoin Yahudis ro he mi'heri' mituin Uisneno In Atoran. Batuur, ai' kaah? Naan anjair tanar nak, hi es re' ammui' hak he mtoup Uisneno In rais manba'an. Mes karu hi mtanhai Uisneno In Atoran, Uisneno ka ntoup ki fa. Hi mjair on re' atoin ka Yahudis fa, ma atoni' re' ka na'heri' niit fa. 26 Mitenab mirek-reko'! Fin karu atoni' re' ka na'heri' fa natuin Uisneno In Atoran, Uisneno of antoup goe on re' in atoin Yahudis re' na'heri' nrair. On mee? 27 Mes ampaant om! Fin karu atoin ka Yahudis fa re' ka na'heri' fa anmoe' natuin Uisneno In Atoran, sin naruru' saa'? Sin naruru' hi sanat ma penu mnak, hi atoin Yahudis re' mi'heri' mrair, amtanhai Uisneno In Atoran, maski hi mnaa' amrair Uisneno In Atoran mi'ko afi unu'. 28 Kais mitenab mak, tuaf re' anjair ka'o Abraham in sufan-ka'un, ma re' na'heri' nrair in pasun re' naan es re' anmoe' je njair Uisneno In tuaf re' namneo ma namnoon. Kaah fa, tua! 29 Re' anjair Uisneno In tuaf re' namneo ma namnoon, es re' tuaf re' nmarame' nok Uisneno. Fin rasi 'heri' re' batuur, re' nmoe' tuaf anjair Uisneno In anah, ka matanar fa nbi aok a'pohon, mes matanar anbi nekak, re' Uisneno In Asmaan Akniun' ee nmo'e. Uisneno kuun es re' naikas ma nbo'is tuaf on re' naan, ka mansian fa, tua.
Maski atoin Yahudis anmui' hak he ntoup pusaak na'ko Uisneno In rais manba'an, naan ka nsoi nafetin sin fa msa'
1 Karu on naan ate, atjair atoin Yahudis re' ma'heri' te, in upan saa'? Of oni' hi mitenab mak, atoin Yahudis napein ko'u nneis ma reko nneis, na'ko atoin ka Yahudis fa. Batuur, ai' kaah? 2 Batuur! Atjair atoin Yahudis, anmui' in upan anbi rasi mfaun. Esan re': ahunut, natuin Uisneno anfee mepu neu atoin Yahudis he nruun ma ntui ma mpanat narek-reko' In Kabin ma Prenat. 3 Onaim on mee? Of oni' hi mitenab mak, Uisneno ka bisa nmoe' natuin fa saa' re' In na'uab, natuin anmui' atoin Yahudis bian re' ka npirsai Je fa. Batuur, ai' kaah? 4 Ka neu fa, tua! Fin maski mansian ii ok-oke' abitan pah-pinan ia aputa-kriut ein, mes Uisneno kuun na'uab namneo ma namnoon piut! Mimnau, fin matu'i et Suur Akninu' anmatoom nok Uisneno In tuan am nak, “Anmui' tuaf re' nasaeb sanat am nak, In ka nafeek fa rasi natai ma namnoon. Mes sin of nahinin am nak, saa' re' In na'uab ee naan, ro batuur on re' naan. In ro n'iis ma niis, natuin In ro tebes ma ka bisa fa he na'uab ansaan.” 5 Mes karu hit tmo'e tsaan, rasi naan naruru' ma nakrira' ntein neu mansian ii ok-oke' mnak, saa' re' Uisneno nmoe' je naan, ro batuur on re' naan. Karu on naan, hit he tak saa'? He tak, Uisneno nhukun kit ka natai ma namnoon fa, ai'? (Fin anmui' tuaf bian na'uab on naan ate.) 6 Ka neu fa, tua! Uisneno ka nsaan fa karu In nhukun kit. Fin In nmui' hak he nhukun tuaf-tuaf re' anmo'e nsanan nbin pah-pinan ia. 7 Onaim karu au aputa-kriut, naan naruru' ma nakrira' mnak, Uisneno In hukun naan, batuur. Karu au ukrira' ma ururu' 'rair In pinan ma krahan on naan, nansaa' am es In naprikas au 'monik, rarit nafeek au rasi mnak, saa' re' au 'moe' je naan, ansaan? 8 Kais on naan, tua! Fin karu hi he mituin tenab on naan, hi mituin tuaf re' nak, “Maut he hit tmoe' maufinu amfaun antein, maut he rais reko na'baab ok amfaun amsa'!” Tuaf re' na'uab on re' naan, ro tebes napein hukun. Mes anmui' tuaf re' na'uab na're'uf au kanak nak, au unoni' tuaf-tuaf a'saan on naan.
Ka tiit fa tuaf es, re' neekn ee namneo ma namnoon, fin hit mansian ii atmo'e tsaan ok-oke'
9 Onaim on mee? Hi mitenab hit atoin Yahudis es re' reko nneis na'ko atoin ka Yahudis fa? Kaah fa, tua! Fin au ururu' ma ukrira' ki 'ak, ansuun tuaf ro nmo'e nsanan, maski in atoin Yahudis, ai' ka atoin Yahudis fa. 10 Fin matu'i et Uisneno In Suur Akninu' mnak, “Ka nmui' fa tuaf re' nmoin namneo ma namnoon piut. Ro tebes! Ka tiit tiit fa tuaf mese' msa'! 11 Ka nmui' fa tuaf re' nahiin batuur-batuur anmatoom nok Uisneno. Ka tiit fa tuaf mese' msa' re' naim ranan he nahiin Uisneno. 12 Sin arsin anbeon ma npenun nrarin na'kon sin a'moink ein re' namneon ma namnonon. Rarit sin ka mapaek ein fa goen. Ka tiit fa tuaf re' naruru' ma nakrira' neek reko. Ka tiit tiit fa mese' msa'! 13 Sin uabk ein, ro foo punu', on re' noup nitu re' atoni' nhain nafani'. Sin feefk ein suma napoitan puta-kriu goah. Sin uabk ein re' npoin na'kon sin feefk ein, on re' kaun aan in raso. 14 Sin feefk ein suma nahini haa he naseuk ein, ma na'uab na're'uf he nneek menab atoni'. fin naan anpoin na'kon sin neek reu'f ein. 15 Sin ka namtaun fa he nroor na'maet atoni'. 16 Sin nnaon neun bare mee-mee jah ate. sin anmataisiub ein nbin naan, ma nasusab atoni' nok rasi huma'-huma'. 17 Sin i'moink ein ka nmu'in fa rais mamut ma rame', ma ka nmonin fa nok neek mamut. 18 Sin ka bisa naran ma ntahan naan fa sin tuak ein, natuin sin ka nmu'in fa neek amtaus a'kre'o neun Uisneno msa'.” 19 Hit tahiin tak, Uisneno nfee In Atoran neu tuaf re' ro he nmoin natuin Atoorn ein naan. Nok ranan naan, sin ka nmu'in fa rasi 'sukif saa'-saa' antein. Of ansuun-suun tuaf anbi pah-pinan ia, ro he nbaisenun n'anin Uisneno, he In nafeek sin rasin am nak, sin ansanan, ai' kaah. 20 Es naan ate, ka tiit fa tuaf es, re' bisa na'uab am nak, “Uisneno nmarak kau mnak, atoin neek amne'o ma amnonot, natuin au 'moe' utuin In Atoorn ein ok-oke'.” Ka bisa fa, tua! Fin Uisneno In Atoran re' naruru' ma nakrira' mnak, hit ar-arkit atmo'e tsaan.
Hit ro he tpirsai Usif Yesus fe', na' Uisneno nmarak kit nak hit neek amneot ma amnonot
21 Kais amkeuk anmatoom nok Uisneno In reon re' naruru' ma nakrira' ranan he hit bisa tareko tfain tok Ne. Batuurn ii, hit bisa tareko tfain tok Ne, mes ka natuin fa hit tmoe' tatuin In Atoran. Fin In Atoran naan, antui on naan, ma In mafefa kniun' ein un-unu' natonan anbi Uisneno In Suur Akninu' on naan amsa'. 22 Uisneno nmarak kit nak atoin neek amneot re' he tareko tfain tok Ne, oras hit tpirsai teu Yesus Kristus. In ka npiir fa humaf, fin In nmoe' on re' naan neu tuaf ein ok-oke' re' anpirsain neun Usif Yesus on naan. 23 Fin are' mansian ii ok-oke' nmo'en sanat. Es naan ate, tuaf re' nsoba' he nareok on nok Uisneno, ka bisa ntean fa In tu'in re' mapina'-makraha'. 24 Maski on naan amsa', mes Uisneno kuun es re' naruru' ma nakrira' In nekan arekot, ma nafeek nak, hit ka tsaan fa goen antein. In ntoup kit on naan, natuin Yesus Kristus ansoi nafetin naan kit na'ko hit sanat ma penu sin. 25-26 Uisneno naruru' ma nakrira' neu Usif Yesus he njair fua'-turu' re' natai nafani' kit ma nnoes nain hit sanat ma penu sin. Mes hit ro he tpirsai Je tak, In ntoup hit sapaaf anbi rais hukun. Onaim In n'opa' ma nasaik In naa', ma nmate nsenu' kit. Nok ranan naan, Uisneno naruru' ma nakrira' nak, saa' re' In nafeek ee naan, ro batuur. Unu' te, In naran ma nsabaar ma'tani', rarit In npiir he nnikan nain sanat ma penu re' atoni' nmo'e nrair sin. Mes karu In ka nhukun fa tuaf re' ansaan, In ka njair fa afeek rasi re' natai ma namnoon. Onaim In nfei ranan, maut he Yesus Kristus bisa nasaah hit atoin asanat hit hukun. Oras ia, In naruru' ma nakrira' neu mansian ii ok-oke' mnak, In nmoe' rais reko piut. Rarit tuaf-tuaf re' ansaan, re' anpirsai neu Nai' Yesus, In nafeek he nmarak sin, atoin neek amneot. 27 Onaim on mee? Of oni' hi mitenab hi bisa mifeef, natuin Uisneno ntoupu nrair ki, ai'? Ka bisa fa, tua! He naruru' ki Atoran es he hi mireok om mok Uisneno, oo? Hi mitenab of Uisneno ntoup ki natuin hi mmoe' rais reko, oo? Ka bisa fa, tua! Hit suma bisa taruru' Atoran re' nak, Uisneno ntoup kit natuin hit tpirsai Nai' Yesus. On re' naan, tua! 28 Es naan ate, oras ia hit tahiin on nai: atoni' bisa narekon nok Uisneno natuin sin npirsai Je, ka natuin fa sin nmo'en natuin In Atoran. 29 Au he utaan on nai: Uisneno suma antoupu haa atoin Yahudis, aa oo, ai' In ntoup bian amsa'? Batuur! In ntoup mansian ii ok-oke'! 30 Fin Uisneno, suma mees' aah. Ma suma nmui' ranan mees' aah he In ntoup kit mansian ii he bisa tareko tfain tok Ne. Es re', hit ro he tpirsai teu Kristus. Ranan re' naan, anfei je neu atoin Yahudis ma ka Yahudis fa msa'. 31 Onaim au he utaan on nai: karu hit tpirsai Uisneno, re' naan annoes nain In Atoorn, aa oo? Kaah fa, tua! Re' batuurn ii, naan anmoe' Atoran naan saah.
A'tope' na'ko ka'o Abraham. Uisneno antoup goe natuin in npirsai Je
1 Onaim tait i'tope' ta'ko hit atoin Yahudis hit be'i-na'i, ka'o Abraham. Hit bisa tanoni' saa' na'ko in tuan, anmatoom nok tuaf nareko nfain nok Uisneno natuin in npirsai Kristus? 2 Hit bisa tanoni' on nai: karu Uisneno ntoup ka'o Abraham natuin in nmoe' rais reko, in nmu'i 'sukif amsa' he bisa nafeef anbi mansian ii in human ma in matan. Mes anbi Uisneno In matan, in ka bisa fefa' mese' fa. 3 Mes matu'i et Suur Akninu' Uisneno mnak, “Natuin nai' Abraham anpirsai Uisneno, es na' Uisneno nmaark ee nak, atoin neek amneot ma amnonot re' nmarame' nok Ne.” 4 Tait i'tope' es antein: ameput antoup in kai. Kai naan ka roi parseen fa, mes roit re' a'naakf ee nbaen ee he nsenu' ma nseka' atoni' naan in haet ma maskeet. Fin ameput naan in hak. 5 Uisneno nmui' hak he nak, tuaf re' npirsai neu Yesus Kristus bisa nareko nfain nok Ne, maski unu' atoni' naan anmo'e nsaan ma ka nfairoir fa Uisneno. Ka tiit fa rais jes re' atoni' bisa nmoe' je, he in nareok on nok Uisneno. Fin atoni' ro npirsai neu Yesus Kristus, na' Uisneno nmaark ee mnak, in atoin neek amneot ma ntoup goe. 6 Usif nai' Daut natoon amsa' mnak, atoni' neekn ee nmariin oras Uisneno nmarak sin nak, sin re' naan atoin neek amneot, maski sin ka nmo'en fa saa'-saa' amsa'. Fin nai' Daut antui mnak, 7 “Maski atoin ein ia ntanhai Uisneno In Atoran, mes In nsaok nain sin sanat ma penu sin. Etun sin napenin upan arekot anneis-neis! Amoe' rais maufiunt ein, Uisneno nnikan ma nniahan anrair sin sanat ma penu sin. 8 Fin karu Uisneno ka nsoi' fa sin sanat ma penu sin, atoni' naan napein upan arekot batuur!” 9 Of oni' hi mitenab mak, suma atoin Yahudis re' na'heri', re' bisa napein upan he nareko nfain nok Uisneno. Batuur, ai' kaah? Ma atoni' na'ko pah bian re' ka ma'heri' fa, ka bisa fa, ai'? Kaah fa, tua! Tenab on naan, ansaan! Es re' hai mimnaub main ki mmak, natuin ka'o Abraham anpirsai neu Uisneno, es na' Uisneno nmaark ee, atoin neek amneot re' anmarame' nok Ne. 10 Oras mee Uisneno nmarak ka'o Abraham on naan? Oras in na'heri' nrair, ai' oras in ka na'heri' fa fe'? Re' batuurn ii, oras in ka na'heri' fa fe'. 11 Batuur! Oras ka'o Abraham ka na'heri' fa fe', Uisneno nmarak anrair je goen nak, atoin neek amneot. A'roo-'roo te, na' in na'heri' he njair tanar nak, in anjair tuaf re' anpirsai Uisneno. Nok ranan naan, ka'o Abraham es re' nfei ranan neu mansian ii ok-oke' re' npirsain neun Uisneno. Fin Uisneno ntoup tuaf mese'-mese' re' npirsai Je, he sin nareko nfanin nok Uisneno, maski sin na'heri', ai' kahaf. 12 Ka'o Abraham amsa' nfei ranan neu hit atoin Yahudis re' ma'heri'. Ka natuin fa nak hit ma'heri', mes natuin hit tpirsai Kristus, on re' ka'o Abraham anpirsai Uisneno, oras in ka ma'heri' fa fe'.
Karu hit tpirsai teu Uisneno, hit tapein saa' re' In nba'an
13 Uisneno nahake' rais manba'an nok ka'o Abraham ma in sufan-kau'n ein nak, a'roo-'roo te, pah-pinan a'teme-'teme njair sin pusaak. Uisneno nahake' rais manba'an on naan, natuin ka'o Abraham anpirsai Je, rarit Uisneno nmaark ee mnak, atoin neek amneot re' nmarame' nok Ne. Mes Uisneno ka nahake' fa rais manba'an on naan, natuin ka'o Abraham anmoe' natuin In Atoorn ein. 14 Fin karu atoni' re' suma nmoe' natuin Uisneno In Atoran bisa ntoup naan pusaak re' Uisneno nba'an nrair je, in oetn ii nak, atpirsai teu Uisneno naan parsuum ahaa. Ma Uisneno In rais manba'an naan ka mapake' fa msa'. 15 Uisneno In Atoran anbi mee te, anbi naan atoni' ntanhai Atoran naan amsa'. Ma karu atoni' ntanhai In Atoran, Uisneno natoo', rarit In hukun sin. Ma karu Uisneno ka nmui' fa In Atoran, of ka nmui' fa atoni' re' ntanhai Atoran naan. 16 Es naan ate, hit ro he tpirsai Je. Naan, pentiing anneis na'ko saa'-saa' ii ok-oke'. Fin Uisneno naruru' ma nakrira' In neek arekot ruum-ruum aah neu atoni' re' anpirsai Je. Ma karu hit tpirsai Je nahuum on re' ka'o Abraham, ro hit ttoup saa' re' In nba'an, maski hit atoin Yahudis re' tmoe' tatuin In Atoran, ai' kaah. Onaim hit ok-oke' re' atpirsai teu Kristus naan, on re' ka'o Abraham in sufan. 17 Anbi Uisneno In Suur Akninu', In nba'an neu ka'o Abraham am nak, “Au 'moe' he ho mjair aam uuf meu uuf amfaun.” Ka'o Abraham anpirsai Uisneno. Rarit a'roo-'roo te, Uisneno nmoe' natuin In rais manba'an naan. Uisneno es re' namonib nafani' amates amsa'. In suma na'uab aah, saa'-saa' re' ka nmui' ma tiit sin fa, anjair nanin. 18 Ka'o Abraham anpirsai Uisneno ma npao-pao Goe, maski in ka nmui' fa anah fa fe'. Es naan ate, Uisneno nmoe' je njair “aam uuf neu uuf amfaun.” Re' naan, on re' matu'i nbi Uisneno In Suur Akninu' mnak, “Sufan amfa-faun neman na'ko ko.” 19 Ka'o Abraham anpirsai ma'tani' neu Uisneno, maski in nahiin neu in namnais re'-reu'f een. In nmoin naan toon nautn es een. Ma ain Sara' ankiu, ma namnais re'-reu'f een amsa'. 20 Mes ka'o Abraham in pirsait naan ka na'oin on fa, ai', he natenab am nak Uisneno ka bisa nmoe' natuin fa In rais manba'an. In pirsait neu Uisneno ma'tani' anteni' oras in ntuna' ma na'ratan Uisneno In kanan. 21 Ka'o Abraham anpirsai batuur-batuur nak, saa' re' Uisneno nba'an anrair je naan, In bisa nmoe' natuin ee. 22 Etun Uisneno nmarak ka'o Abraham, atoin neek amneot re' nmarame' nok Ne. 23 Mes Uisneno In Suur Akninu' antui mnak, Uisneno ka nsoi' ma nareon fa on naan neu ka'o Abraham anmees jaah, 24 mes anfee neu kit imsa'! Fin karu hit tpirsai Je, In nmarak kit imsa' atoin neek amneot re' tareko tfain tok Ne. Fin Uisneno re' ia, In es re' namonib nafani' hit Usi' Yesus na'ko In a'maten. 25 Nai' Yesus anmaet, natuin hit tmo'e tsaan. Rarit In nmoni nfain he nfei ranan, maut he hit bisa tareko tfain tok Uisneno.
Atoni' bisa nareko nfain nok Uisneno asar anpirsai neu Yesus Kristus
1 Onaim natuin hit tpirsai teu Uisneno, es naan ate In nmarak kit atjair atoin neek amneot ma amnonot. Rarit hit neek ii nakninu' nrair neu Uisneno, natuin hit Usi' Yesus Kristus, re' Uisneno nreek haefn Ee ntaam neem, anfei ranan he hit bisa tmarame' on naan. 2 Kristus naruru' ma nakrira' In nekan arekot neu kit, natuin hit tpirsai Je. Etun hit neek ii bisa nma'tain ma na'bei'. Ma hit neek ii anmariin, natuin hit tahiin tak, Uisneno of he nait kit he hit tnaben tok In pinan ma In akrahan. 3 Maski hit tapein susat ma ma'ne'at huma'-huma', mes hit neek ii nmariin piut. Fin hit tahiin tak, hit tanoni' ta'ko susat ma ma'ne'at, he bisa taran ma ttahan ma'tani' tneisi ttein. 4 Karu hit taran ma ttahan atbi susat ma ma'ne'at, naan anmoe' kit ka tmouf fa, ma hit i'moink ii nharineb Uisneno In nekan. Karu hit tmoin reko nneis on naan, naan anmoe' hit rais pirsait naheer anneis nak, Uisneno of naruru' ma nakrira' In nekan arekot neu kit. 5 Karu hit tpirsait ii na'kii' ma naheer antein, hit ka tamaeb ok fa. Fin Uisneno nfee kit In Asmaan Akninu', he hit bisa tahiin atbi hit nekak nanan tak, In neek kit ma'tani'. 6 In naruru' ma nakrira' In manekan on nai: oras hit ka bisa tareok ok fa fe' tok Uisneno, te kaah, In nreek haefan Kristus he nmaet neu kit re' tmoni te ka tfairoir fa Uisneno. Uisneno npiir naan oras re' nateef on naan. 7 Mitenab mirek-reko' fe'! Fin ka biasa fa nmui' tuaf re' nroim he nmate nsenu' ma nseka' in aon-bian re' neek amneot. Of oni' nmui' tuaf bian re' nroim he nmaet he nturun ma nbaab tuaf re' neek reko. 8 Mes Uisneno naruru' ma nakrira' In nekan arekot anneis-neis neu kit. Natuin oras hit tmo'e tsaan fe'e te, Kristus anmaet neu kit. 9 Uisneno nmarak kit atoin neek amneot re' tareko tfain tok Ne, natuin Kristus nat'opab ma nasaib In naa' he nmaet neu kit. Te kaah, karu tuaf anmo'e nsaan, Uisneno natoo'. Mes natuin Kristus anmoe' on naan, hit re' atmo'e tsaan ka tapein fa hukun attein. 10 Unu' te, hit mamuus tok Uisneno. Mes Uisneno In Aanh aa kuun es re' anmaet he nhainiik ma n'oeteneb Uisneno In nekan, maut he hit bisa tmarame' tok Uisneno. Onaim oras ia, hit ka tmamuus fa heen, mes tmarekob atfain. Anneis-neisi ntein, natuin Kristus anmoni nfain, anbi neon amsoput of In nsoi nafetin kit he hit kais tapein Uisneno In hukun attein. 11 Ka neu fa he on naan ahaa! Hit neek ii bisa nmariin am nak, “Uisneno naan, mapina' ma makraha'!” natuin hit tmafuut tok Ne. Hit bisa tjair In tuaf ein, natuin hit Usi' Yesus Kristus, anmaet neu kit, he nmoe' kit tmarame' tok Uisneno.
Tataib nai' Adam nok Kristus te, anmui' in amnesan ma suri
12 Na'ko unu', mansian ahunut, es re' ka'o Adam re' nmurai nmo'e nsaan. Etun Uisneno ka nkoon ee fa he nmoin piut. Rarit anmurai na'ko oras naan, mansian ii ok-oke' nbi pah-pinan ia nmo'e nsanan on re' in imsa'. Natuin sin nmo'e nsanan on re' in, sin ok-oke' ro he nmaten on re' in imsa'. 13 Un-unu' te, oras Uisneno ka nasanut In Atoorn ein fa fe', atoni' nmo'e nsanan nbin pah-pinan ia 'teme-'teme. Mes natuin ka nmui' fa Atoran fa fe', es ka nmui' fa aso'it neu tuaf ein sin sanat ma penu sin. 14 Na'ko ka'o Adam, tar antea ka'o Musa ntoup Uisneno In Atoran, mansian ii ok-oke' ro tebes, anmaet. Maski sin ka ntanhain fa Uisneno In aprenat re' In nfee je neu ka'o Adam, mes sin nmo'en sanat huma'-huma' bian fe'. Etun sin ro he nmaten on re' ka'o Adam. Karu hit tataib ka'o Adam nok Usif Yesus, anmui' in amnesan, ma nmui' in suri. Fin ka'o Adam gambar mese' re' naruru' ma nakrira' msa' Nai' Yesus In human, re' he neem. 15 Mes ka'o Adam anmo'e nsaan, ka huma' mese' fa on re' Nai' Yesus anmoe' reko neu kit. Natuin tuaf es, es re' ka'o Adam, antanhai Uisneno In aprenat. Es naan ate, are' mansian ii ok-oke' ro he nmaten. Mes Tuaf es antein, es re' Yesus Kristus, anmoe' rais reko mfaun neu kit, ma ka nafnekan ma nharap fa he atoni' nbaras In a'moe' rekon naan. Tuaf es anmoe' on naan, nanokab neu mansian ii ok-oke', fin Uisneno nroim he nmoe' reko neu kit. 16 Rasin re' Uisneno nfee sin neu kit naan, ka huma' mese' fa nok sanat re' tuaf es, es re' ka'o Adam anmo'e. Oras In nmo'e nsaan, Uisneno nafeek am nak, “Ho msaan. Onaim ho ro he mupein hukun!” Mes maski tuaf anmo'e nsaan tuunb es, Uisneno es naprikas mansian ii ok-oke' sin i'moink ein. In nroim he naruru' ma nakrira' In nekan arekot fe', ma nafeek nak, “Au 'marak ko m'ak ho ka msaan fa. Onaim oras ia ho mupein fetin ma ka mupein fa ho hukun antein. Uum he mureko mfain mok Kau!” 17 Onaim tuaf es, es re' ka'o Adam, anmo'e nsaan ma ntanhai Uisneno In aprenat. Etun oras ia, mansian ii ok-oke' ro he nmaten. Mes Tuaf es antein, es re' Yesus Kristus, anmoe' rais reko. Natuin In anmoe' rais reko, es na' hit bisa tareko tfain tok Uisneno. Naan on re' baer es, re' In nfee je parsuum aah neu kit. In nroim he nfee kit 'monif amneot, on re' hit tjair Uisf ee In partei ngguin. 18 Onaim tuaf es anmo'e nsaan, nfei ranan he mansian ii ok-oke' ro he nriu' sin na'ko Uisneno In human ma In matan. Ma Tuaf es anmoe' batuur, re' nfei ranan he mansian ii ok-oke' bisa nareko nfanin nok Uisneno, he nmonin batuur nok Ne. 19 Au sairt ii on nai: ka'o Adam naan tuaf es, re' ka nroim fa he nneen Uisneno, rarit antanhai In aprenat. Ma too mfaun ein anmo'e nsanan on re' in imsa'. Rarit Nai' Yesus naan, Tuaf es, re' nneen ma natniin Uisneno, rarit anmoe' natuin In romin. In es re' anfei ranan he too mfaun ein bisa nareko nfain nok Uisneno. 20 Uisneno nasanut In Atoran neu ka'o Musa, he mansian ii ok-oke' nahiin narek-reko', mee es re' nsaan. Mes anbi mee-mee jah atoni' in sanat namfau ntein, anbi naan Uisneno naruru' ma nakrira' amsa' In nekan arekot nathoe nneis. 21 Unu' te, maufinu nbi atoni' in nekan anmui' kuasat he n'ator sin, tar antea anmo'e nsanan re' neik sin neun hukun a'maten. Mes oras ia, rais reko re' hit Usi' Yesus Kristus anmoe' je naan, Uisneno npaek je he naruru' ma nakrira' In nekan arekot neu kit. Nok rais reko naan anmui' kuasat he n'ator kit, rarit hit bisa tareko tfain tok Uisneno, tmoin batuur tok Ne piut-piut amsa'.
Hit ro he tasaitan hit sanat, he tmoin tatuin Uisneno In romin
1 Onaim oras ia, he ta'uab saa'? Oni' hi mitenab am mak, “Uisneno annikan nain hi sanat ma penu sin, natuin In neekn ee reko. Etun reko nneis hit tmo'e tsaan piut, maut he Uisneno naruru' ma nakrira' In nekan arekot anneis-neis neu kit.” 2 Kais on naan, tua! Ka pantas fa karu hit tmo'e tsaan piut, fin hit tafeek tak, hit tkoit tasaitan hit sanat ma penu sin. Natuin hit ka tmafuut fa heen tok maufinu ntein, re' naan on re' hit tmate trair jen! Fin tuaf re' nmate nrair ka bisa nmo'e nsaan antein fa. Batuur, ai' kaah? Karu hit tmaet on naan, on mee m'es hit bisa tmoin he tmoe' sanat antein? Ka bisa fa, joo! 3 Oni' hi ka mihiin fa mmak, oras nasrain kit, naan anjair tanar nak, hit tasaitan 'monit amnaa' he tjair atoin fe'u, es re' tmafuut tok Yesus Kristus. Naan on re' hit tmaet tabua tok Ne. 4 Oras Kristus anmaet, sin ansuub Ee. Oras nasrani nrair kit, naan on re' hit imsa' tmaet tasaitan 'monit amnaa', rarit sin ansuub kit. Aam Uisneno npaek In kuasan re' mapina'-makraha' he namonib nafani' Kristus na'ko In a'maten. Aam Uisneno nroim he hit ttoup In kuasan amsa', he tmoni tfani tjair atoin fe'u. 5 Naan on re' hit tmaet tabua tok Nai' Yesus. Onaim hit re' tmafuut tok Ne, hit of atmoni tfain ta'ko hit i'matek, on re' In nmoni nfain. 6 Unu' te', hit tjair atoni' re' tmo'e tsaan huma'-huma'. Mes hit 'monik amnaa' naan namre'u nrair, on re' sin nkuus na'peti' kit tok Kristus tabua tbi hau nehe. Oras ia, maufinu re' nbi hit nekak ka nmui' fa kuasat he n'ator kit antein. Oras ia, hit ka tmafuut fa heen he tmoe' sanat antein. Fin hit ka on fa ate re' ka nmui' fa hak he npiir nak he nmoe' saa'. 7 Karu atoni' nmate nrair, in nafrei. Ka tiit fa es he bisa na'seek ee he nmoe' sanat antein. 8 Onaim natuin rasi naan on re' hit tmate trair tabua tok Kristus, hit tpirsai tak, hit of atmoin piut tok Ne msa'. 9 Hit tahiin tak, natuin Kristus anmoni nfain na'ko In a'maten, In ka nmate ntein fa goen. Fin ka tiit fa saa' es antein re' nmui' kuasa he nmoe' Je he nmaet. 10 Unu' te' In anmaet no mees' aah, he nfaki nporin saant ii in kuasan. Mes oras ia, In anmoin he naruru' ma nakrira' hormaat neu Uisneno. 11 Hi ro he maan hi tuam ein on re' naan. On re' hi mmate mrair, es naan ate saant ii ka nmui' fa kuasa neu ki ntein. Onaim oras ia, hi ro he mmoin he miruru' ma mikrira' hormaat meu Uisneno, natuin hi mmafuut mok Yesus Kristus. 12 Kais amkonan maufiun nggui nbi ho nekam anmui' kuasa he bisa n'ator ko, he ho suma mutuin ahaa ho aom aan in nromin, he mmoe' maufiun ein. Fin ro tebes, ho aom aan of ammaet. 13 Ma kais amnona' ho tuam aan he mmoe' rais reu'f ein re' naan, fin re' naan ansaan amsa'. Mes amnona' ho tuam aan meu Uisneno nmees, he In es an'ator ko. On re' ho mmate mrair, rarit ho mmoni mfain. Onaim ampaek ho tuam aan a'teme-'teme he mmoe' rais reko meu Uisneno. 14 Kais amkonan he saant ii bisa n'ator ki, on re' saant ii njair hi usif. Oras ia, hi kais ammoin mituin ka'o Musa in atoorn ein antein, he hi mireko mfain mok Uisneno. Fin hi mmoin mok amneot natuin Uisneno naruru' ma nakrira' In nekan arekot neu ki. Onaim oras ia, In nekan arekot naan es re' an'ator ki.
Hit tjair on re' ate re' tmeup tatuin Uisneno In romin
15 On mee? Of oni' hi mitenab mak, “Natuin hit kaisa' tmoin tatuin ka'o Musa in atoorn ein antein, he tareko tfain tok Uisneno, maski hit tmoe' sanat piut aah. Fin Uisneno nroim he naruru' ma nakrira' In nekan arekot neu kit!” Hi mitenab on naan. Batuur, ai' kaah? Au utoon ki he! Naan ansaan! 16 Au 'pake 'tope' na'ko usif ma ate. Karu hi mnona' hi tuam ein naan he mmeup meu tuaf es, hi ro he mneen am mitniin ee, ma mmeup mituin in romin. Fin in re' naan, hi usif. Ma hi re' naan in ate. On naan amsa', hi bisa mpiir he mituin meu mee. Hi bisa mpiir he mmoe' sanat, rarit hi mjair saant ii in ate. Mes karu hi mpiir on re' naan, hi mmoe' hi tuam ein he mbaits om mok Uisneno. Hi bisa mpiir he mmoe' rais reko, ma mjair ate re' mmoe' mituin saa' re' Uisneno nreun ma nreek neu ki. Karu hi mpiir on re' naan, hi bisa mireko mfain mok Ne! 17 Unu' te, hi mkonan saant ii he n'ator ki, mes oras ia, hi mneen am mitniin hi neekm ein, he mmoe' mituin saa' re' atoin asraint ein nanoni' ki sin. Etun au 'toit makasi 'eu Uisneno. 18 Fin Uisneno nsoi nafetin ki na'ko saant ii in kuasan, tar antea saant ii ka n'ator antein ki fa goen. Onaim oras ia, rasi re' amneot ma amnonot es re' n'ator ki. 19 Au u'uab ia, a'pake 'tope' neno-neno na'ko usif ma ate, he hi mihiin au sairt ii rabah. Unu' te, hi mnona' hi tuam ein amjair ate he mmoe' sanat, re' neik ki he n'oemetab hi tuam ein, mituin ka'o Musa in Atoran. Mes oras ia, hi ro mnona' hi tuam ein amjair ate he suma mmoin he mmoe' rais amneot ma amnoont aah, re' neik ki mbi Uisneno In human ma In matan amjari kninu'. 20 Unu' te, oras hi suma mneen am mitniin ma mmoe' mituin saant ii in romin, hi kais mitniin ma mmoe' mituin rais amneot ma amnonot. 21 Au he utaan on nai: hi mipein upan arekot saa' na'ko hi 'moe' amreu't ein naan? Ka tiit fa, ai'? Te kaah, upan re' hi mipein je naan, namaeb ahaa ki. Natuin hi mmo'e msaan on re' naan, in amsoupn ii, Uisneno nkoit ki. 22 Mes oras ia, Uisneno nafetin ki na'ko usif amnaa', onaim hi kaisa' mmoe' sanat amtein. Oras ia hi ro he mjair Uisneno In ameupt ein. In amsoupn ii, hi mjari kninu' meu Ne, ma mipein 'monit batuur re' ka natfeek niit fa. 23 Fin oras hit tmo'e tsaan, in upan es re' Uisneno nkoit kit tar antea nabar-baar. Hit tmaet nai! Mes Uisneno nabarab anrair raan a'po'i neu kit. Fin In he nfee neu kit 'monit batuur re' ka natfeek niit fa nok ruum am parsuum aah. Ma hit tapein 'monit, karu hit ttaam atjair hit Usi' Yesus Kristus Iin na.
Atoorn ii ka nmui' fa hak antein, karu atoni' nmate nrair
1 Aok-bian arki! Oras ia, au u'uab 'eu ki re' ahiin atoorn ein. On nai: karu hi mmoin fe', atoorn ii nmui' hak he n'ator ki fe'. Mes karu hi mmate mrair, atoorn ii ka nmui' fa hak he n'ator antein ki. 2 Au 'pake 'tope' na'ko atoran fee-mone. Karu bifee jes ansao nrair atoin es, tatuin atoran, sin nua sin anjarin fee-mone tar antea sin nmaten. Mes karu in moen je nmaet, bifee banu' naan ka nmafuut fa goen nok atoran naan. In bisa nsao ntein. 3 Mes karu in ansao atoni' 'teta' oras in moen je nmoin fe', tatuin atoorn ii, naan in nmakake nrair. Mes karu in moen je nmate nrair, atoran fee-mone ka ntoom ee fa goen antein. In napeni nrair fetin. Rarit karu in ansao ntein atoni' 'teta', tatuin atoorn ii, in ka nmakaek fa, tua. 4 On naan amsa' hi atoin apirsait! On nai: Kristus anmate nrair. Naan on re' hi mmaet bu'-bua' mok Ne, ma misaitan hi 'monit amnaa'. Rarit atoorn ii ka ntoom ki fa goen antein. Oras ia, hi mipein fetin mi'ko atoran naan, ma mmafuut goen mok Kristus, re' nmoni nfain na'ko In a'maten. Naan on re' bifee banu' re' ansao ntein. Ka tiit fa rasi. Onaim oras ia, saa' ii ok-oke' re' hi mmoe' je naan meu Uisneno. 5 Unu' te, hit suma tmoe' tatuin aah hit tuak ii in romin. Natuin hit tahiin atoran, naan anmoe' kit he troim he ttanhai atoorn ein naan, he tmoe' rasi re' ka batuur fa. Hit saant ein naan esan re' nmoe' Uisneno nkoit kit. 6 Unu' te, hit ro he tmoe' tatuin atoran. Mes oras ia atoorn ii ka ntoom antein kit fa goen, fin hit tafetin atrair hit i'monik amnaa'. Tatuin raan amnaa' ii in romin, ka'o Musa in atoran re' matu'i et Suur Akninu' anfuut kit. Mes tatuin raan feu' gui in romin, hit tapein fetin ta'ko atoran naan. Fin Uisneno In Asmaan Akninu' es re' an'ator kit! Etun oras ia, hit tmeup teu Uisneno nmees.
Ka'o Musa in atoran naruru' ma nakrira' maufinu re' et hit nekak
7 Hit he ta'uab tak saa'? Of oni' hi mitenab am mak, “Atoran re' Uisneno nfee je neu ka'o Musa naan, ansaan!” Kaah fa, tua! Fin karu au ka uhiin fa atoran naan, ka neu fa he au uhiin rasi re' ka namneo ma namnoon fa anbin au nekak. On re' anmui' atoran nak, “Kais amroim he mait atoni' in baer' ein.” Mes nansaa' am es au bisa uhiin rasi on re' naan ansaan, karu au ka uhiin fa nak, anmui' in atoran? Ka bisa fa, tua! 8 Mes natuin anmui' atoran nak on re' naan, naan on re' rais maufinu nbin au nekak anmoe' kau he 'roim he 'ait atoni' in bare' huma'-huma'. Karu ka nmui' fa atoran re' antaar, saant ii ka nmui' fa kuasa he n'ator atoni'. 9 Anbi au 'monik amnaa', au ka uhiin ureko' fa sarit na'ko Uisneno In Atoran. A'roo-'roo te, na' au uhiin batuur. Etun au ukeo ma uskeek 'ak, au 'tanhai 'rair Atoran naan ma 'mo'e 'saan. Ma saant ii in upan ma pa'e, es re' au ro he 'maet. 10 Rarit au neek ii krati'-krati', fin au uhiin 'ak, au kuuk ka bisa uraem ok fa 'ok Uisneno nok suma 'moe' utuin In Atoran. Au pantas upein Uisneno In to'os, es re' nhukun na'maet kau, natuin au 'tanhai In Atoran. Te kaah, anmui' Atoran he nmoe' tuaf bisa nmoin batuur. Mes na'ko au te, Atoran naan es re' nareu' kau he Uisneno nkoit kau. 11 Atoran naan naruru' ma nakrira' raan a'monit re' batuur. Mes natuin anmui' maufinu re' nmoin et au nekak, au upoi 'aan au tuak ii, ma utenab 'ak, au bisa ureok ok 'ok Uisneno asar au 'moe' utuin In Atoran. Rarit on re' Atoran naan es re' anmoe' tar antea Uisneno nmai'nisin kau, ma ka nroim fa he nkua'noon nok kau. 12 Onaim karu fe'e na atoni' nak, “Atoran re' Uisneno nfee je neu ka'o Musa naan, ansaan” au utaah am 'ak, “Kaah fa, tua! Uisneno In Atoran naan, kninu'!” Ma preent ii ok-oke' nbin Atoran naan, kninu', batuur, ma reko. 13 Of oni' hi mitenab amsa' mak, Atoran naan es re' anmoe' Uisneno nkoit kau. Kaah fa, tua! Fin maski au uhiin Atoran naan, mes au 'neen kuuk piut-piut maufiunt aan 'bi au nekak fe', tar antea au 'moe' sanat. Au 'moe' sanat naan es re' nmoe' Uisneno nkoit kau. Atoorn ii nmees kuun ro reko, fin naan naruru' ma nakrira' rais maufinu re' nmoe' kit tbaits ok ta'ko Uisneno. Onaim oras Uisneno naruru' ma nakrira' ranan a'monit re' batuur, Atoran naan es re' natoon am nak, rais maufinu re' anbi hit nekak naan, ro ka reko fa, tua.
Rais reko ma rais maufinu nmatita'-roin ein anbin hit nekak nanan
14 Hit tahiin tak, Atoran re' Uisneno nfee je neu ka'o Musa, nsaun neem na'ko Uisneno In Asmanan. Mes au suma mansian biasa re' neek a'oret. Rarit au 'neen rais maufinu re' et au nekak re'uf, tar antea au 'moe' sanat. Naan on re' saant ii njair au usif, ma au 'jair saant ii in ate. 15 Au 'keuk. Au ka uhiin fa saa' re' au 'moe' je. Fin au ka 'moe' utuin fa saa' re' au he 'moe' je. Mes au 'moe' utuin saa' re' au ka 'roim fa he 'moe' je. 16 Karu au 'moe' utuin saa' re' au ka 'roim fa he 'moe' je, au 'manaku' 'ak, Uisneno In Atoran naan, ro batuur. 17 Onaim au ka es re' a'ator fa au tuak. Mes maufinu re' nmoin et au nekak es re' an'ator au tuak! 18 Au uhini 'rair 'ak, ka nmui' fa rais reko re' nmoin et au nekak. Fin au re' ia, mansian re' neek re'uf. Reko ka reko, au ka bisa u'seke' fa au tuak ii he 'moe' rais amneot ma amnonot. Au 'roim, mes ka njair fa, tua! 19 Fin au 'roim he 'moe' rais reko, mes au ka 'moe' je fa. Ma au ka 'roim fa he 'moe' rais maufinu, mes au 'moe' kuuk ee! 20 Karu au 'moe' utuin saa' re' au ka 'roim fa he 'moe' je, naan ka natuin fa au tuak ii kuuk, mes natuin maufinu re' nmoin et au nekak. 21 Naan naruru' ma nakrira' preent es, on nai: maski au he 'moe' rais reko, mes anmui' maufinu et au neek ii re' nraban. 22 Te kaah, au neek ii nmariin karu au utenab anmatoom nok Uisneno In Atoran. 23 Mes on re' nmui' kuasat anbi au nekak re' nareu' kau. Fin au 'roim he 'moe' rais reko, mes ka njair fa. Naan on re' maufinu in kuasa anbi au nekak anheek naan kau, he na'seke' kau he utuin ee. 24 Airoo! Au atoin asusat kau! Sekau es re' bisa nsoi nafetin kau na'ko maufiun gui in kuasan re' nmoin et au nekak, ma nmoe' Uisneno nmai'nisin kau tar antea In nkoit kau? 25 Mes Uisneno kuun neikn On anfei nrair ranan he nafetin kau! Makasi kou'-ko'u neu Ne, natuin hit Usi' Yesus Kristus bisa nsoi nafetin kau! Onaim karu au ufnekan ma 'harap a'bi au tuak, au 'suus. Maski au 'roim he 'moe' utuin Uisneno In Atoorn ein ok-oke', mes anmui' kuasat anbi au nekak re' nfuri' ma nkopo' kau he 'moe' sanat piut.
Hit bisa tmoin tamneo ma tamnoon, karu hit tmafuut tok Uisneno In Asmanan
1 Uisneno ka nhukun fa tuaf re' nmafuut nok Yesus Kristus! 2 Fin anmui' prenat nono' nua re' batuur: ahunut, es re' karu hit tmafuut tok Yesus Kristus, Uisneno In Asmanan nfee kuasa neu kit, he hit bisa tmoin tamneo ma tamnoon. No nuan ii, es re' nmui' maufinu et hit nekak re' nfuri' ma nkopo' kit he tmoe' sanat. Ma karu tmoe' sanat, Uisneno nmai'nisin kit, onaim In nkoit kit. Mes karu hit tapein Uisneno In Asmanan, In nsoi nafetin kit na'ko saant ii In kuasan. 3 Maski hit tmoe' tatuin ka'o Musa in atoran, naan ka bisa nsoi nafetin kit fa na'ko saant ii in kuasan, fin hit suma mansian biasa goah re' tmoe' sanat piut-piut. Mes Uisneno es re' anfei raan a'po'i. Fin In nreek haefan In Aanh aa kuun he njair mansian on re' hit. Maski hit mansian bian atmoe' sanat huma'-huma', mes Nai' Yesus kuun ka nmoe' niit fa sanat saa'-saa'. Saa' antein, In njair fua'-turu' he nsaok nain mansian ii na'ko sin sanat ma penu sin. 4 Uisneno nreek haefan Kristus he In nmaet, he hit bisa tmoe' tatuin rasi re' batuur ok-oke' tatuin Uisneno In Atoorn ein. Oras ia, hit tmoe' rais amneot ma amnonot tatuin Uisneno In Asmaan ee In romin, ma ka tmoe' tatuin fa hit roimk ii kuuk attein. 5 Atoni' re' nmoin natuin sin roimk ein kuuk, anmoin on re' naan natuin suma nateenb ahaa rais maufinu piut-piut. Mes tuaf re' nmoin natuin Uisneno In Asmaan ee In romin, sin suma nateenb ahaa rasi re' nmoe' Uisneno In Asmaan ee nmariin. 6 Atoni' re' nkonan rais maufiun ein he n'ator in neek tenab, on re' atoni' re' ka nneen nahiin fa Uisneno In Asmaan ee, es naan ate in neekn ee nmate nrair neu Uisneno. Mes tuaf re' nkonan Uisneno In Asmaan ee he n'ator in neek tenab naan, in a'monin naan namneo ma namnoon, ma in neekn ee ntainina'. 7 Hit mansian ii hit roimk ii kuuk es re' atraban Uisneno In romin. Rarit hit kuuk ka tbaiseun fa he tatniin Ee, natuin hit kuuk ka bisa fa. 8 Fin tuaf re' nkonan sin roimk ein kuuk he n'ator sin, reko ka reko, ka bisa nharineb fa Uisneno In nekan. 9 Mes hi kiim, tuaf re' ka mmoin maufinu fa mituin hi roim ein kiim amtein. Fin karu Uisneno In Asmaan ee nmoin et hi neekm ein, hi mmoe' rasi re' anharineb In nekan. (Mes karu nmui' tuaf re' Kristus In Asmaan ee ka nmoin fa nbi in nekan, in ka njair fa Uisneno Iin ja msa'.) 10 Hi aom ein of anmaten, natuin hi mmoe' sanat un-unu'. Mes natuin Kristus anmoni nbi hi neekm ein naan, hi smaanm ein of anmonin piut, natuin Uisneno nmarak anrair ki, atoin neek amneot ma amnonot, rarit hi mireko mfain mok Ne. 11 Fin Uisneno es re' namonib nafani' Usif Yesus na'ko In a'maten. Onaim maski hit tmaet, karu Uisneno In Asmaan ee nmoni nbi hit nekak, In of anmoe' kit atmoni tfani msa'. In oten nak, In namonib nafani' kit, on re' In namonib nafani' Kristus.
Uisneno In Asmaan Akninu' natoon am nak, hit tjair Uisneno In aanh ein
12 Aok-bian arki! Hit tmui' tusa'. Naan ka tatuus fa he tmoin tatuin hit mansian ii in romin, mes tatuus he tmoin tatuin Uisneno In romin. 13 Fin karu hit tmoin tatuin maufinu re' et hit nekak, Uisneno ro nkoit kit, ma nhukun na'maet kit! Mes karu hit tkonan Uisneno In Asmaan ee re' nareu' kuasat na'ko sanat re' et hit nekak nanan, of na' hit bisa tmoin tok amneot ma amnonot tar antea nabar-baar. 14 Atoni' re' nroim he natniin Uisneno In Asmanan he n'ator sin, sin re' naan, Uisneno In aanh ein. 15 Karu hit tkonan Uisneno In Asmanan he n'ator kit, In ka nmoe' kit fa he tjair ate re' tmoni tbi mtaus. Unu' fe'e te, hit on re' naan. Mes natuin hit ttoupu trair Uisneno In Asmanan he n'ator kit, hit tahiin tak, hit tjari trair Uisneno In aanh ein. Es naan ate, In of anroim he natniin, karu hit thaman ma tkoa' Ee mtak, “Aam Honi'!” 16 Hit neek ii kuuk es re' natoon nak, hit tjair Uisneno In aanh ein. Ma Uisneno In Asmanan natoon on naan amsa'. 17 Karu hit tjari trair Uisneno In aanh ein, in sairt ii nak, hit of attoup kuuk In pusaak, natuin In njair hit Ama'. Karu Ama' nnona' ma nfee pusaak neu In Anah, es re' Kristus, hit ttoup tok In pusaak naan amsa'. Mes anmu'i nteni' rais jes: hit ro he tapein susat ma nana'renat on re' Kristus napein susat ma nana'renat amsa', maut he Uisneno na'ratan kit, on re' In na'ratan Kristus.
Uisneno of antuna' ma na'ratan kit
18 Mes natuin au teenb ii te, susat ma nana'renat re' hit tapein je oras ia ma'kaaf aah, karu hit tataib ee nok rais ma'tain ein re' Uisneno of naruru' ma nakrira' sin neun kit. 19 Te kaah, are' saa'-saa' re' Uisneno nmoe' sin nbin neon goe tnanan ma nbin pah-pinan, anpaon ma namnaun, ma nromin he nitan In naruru' ma nakrira' nak, In aanh ein re' batuur ii, esan re' sekau. Fin In nroim he naruru' ma nakrira' In aanh ein re' batuur neu sin nok neek marine. 20 Fin Uisneno nmoe' neno tunan ma pah-pinan, ma in afan-neesn ein ok-oke', he natuin In sarit. Ka njair fa, ka natuin fa sin nroimk ein, mes natuin Uisneno In romin. Fin In nhukun sin ma nkonan sin he sin namre'un nkonon. Maski on naan amsa', mes anmui' rasi fnekan ma harap fe'. 21 Fin oras ia, are' saa'-saa' re' Uisneno nmoe' sin naan, namre'un nrarin, ma ka tiit fa raan a'po'i. Mes Uisneno of nafetin sin, he sin kais namre'un ntein' ein, ma sin bisa npinan ma nakrahan natuin Uisneno In sarit. In ntuna' na'rat-ratan In aanh ein amsa', he sin napenin fetin na'kon rais amreu't ein. 22 Fin hit tahiin tak, anmui' susat ma nana'renat amfaun anbin pah-pinan ia. Na'ko unu' tar antea oras ia, are' saa'-saa' re' Uisneno nmoe' sin naan, nsakoin na'kon menas, oras anpaon he Uisneno na'fe'u sin. Naan on re' bifee ma'apu' re' nsakoi na'ko menas oras anpao he nahoni' naan ri'ana kru'uf. 23 Ka pah-pinan ia nmees jah fa re' npaon, mes hit tpao on re' naan amsa'. Maski Uisneno nfee In Asmaan ee nahuun neu kit, mes hit tsakoi tbi hit nekak amsa'. Fin hit tpao Uisneno he nait kit atjair In aanh ein, ma nafetin hit aok ii na'ko are' saa'-saa' re' namreu'. 24 Oras Uisneno nsoi nafetin kit, In natoon amsa', In of anmoe' on mee. Mes oras ia, hit tpao fe', natuin ka njair fa fe'. Karu hit tkius rais jes anjari nrair, hit ka tperluu fa he tpao tteni' he tkius rasi naan. Fin atoni' ka npao nteni' fa he nkius rais jes re' njari nrair, ai'? 25 Mes karu hit tpao he tkius rais jes re' ka njair fa fe', hit bisa taran ma ttahan nok sabaar. 26 On naan amsa' oras hit tpao, Uisneno In Asmaan ee nturun ma nbaab kit amsa', natuin hit ka ta'bei' fa, ma ka t'onen tahiin fa nok batuur. Mes Uisneno In Asmaan ee an'onen ansenu' kit, maski hit suma tahini haa hunu, ma ka t'onen tahiin fa tpaek uab saa'. 27 Uisneno kuun nahiin are' saa'-saa' ii ok-oke' re' hit he ta'uab atbi hit nekak. In nahiin amsa' In Asmaan ee In tenab. Etun In nahiin are' raisn ein ok-oke' re' In Asmaan ee he na'uab he nturun kit. Fin Uisneno In Asmaan ee In tenab, on re' Uisneno kuun In tenab. Ma In Asmaan ee an'onen neu Uisneno, ntoit he Uisneno nturun ma nbaab atoin apirsait ein. Fin In Asmanan naan an'onen natuin Uisneno In romin. 28 Oras ia hit tahiin on nai: Uisneno nmoe' are' saa' ii oke' anjair reko neu tuaf re' anneek Ee. Fin na'ko un-unu' te, Uisneno n'ator nain anmatoom nok In he nmoe' on mee neu sin. Ma In nhaman ma no'en sin am nak, “Iim nai! Iim he mjair Au ngguin nai!” 29 Fin un-unu' te, In nahiin anrair sin, ma npiir naan sin he nmoe' sin on re' In Anah, es re' Kristus. Fin Kristus naan es re' Aan Unu ma re' bian ein anjarin In orif. 30 Tuaf ein re' Uisneno nahiin sin na'ko un-unu', In nhaman ma no'en sin amsa' he njair Iin na. Ma tuaf ein re' naan, re' unu' te sin asaant ein, In nmoe' sin anjarin atoin neek amneot ma amnonot re' nareko nfanin nok Ne. In naikas na'ratan sin amsa'.
Uisneno nneek niis kit
31 Hit he ta'uab tak saa' attein anmatoom nok rasin re' naan? Uisneno nhoo ma npaumaak kit mates. Onaim karu on naan ate, sekau es re' he nraban kit attein? Ka tiit fa, ai'? 32 Uisneno ka natau fa In Aanh aa kuun. Mes In nnona' ma nfee In Anah naan he nmate njair fua'-turu', he nturun ma nbaab kit ok-oke'. Natuin Uisneno ka natau fa In Anah naan akre'o msa', hit bisa tahiin tak, In of anfee neu kit are' rais reko nok ruum am parsuum. Batuur, ai'? 33 Of oni' hi mitenab mak, anmui' tuaf re' bisa nasaeb sanat neu tuaf re' Uisneno npiir naan sin. Mes ka tiit fa, ai'? Fin Uisneno kuun es re' nmarak kit nak, atoni' neek amneot ma amnonot re' ka nmui' fa sanat antein, he hit tareko tfain tok Ne. 34 Of oni' hi mitenab mak, anmui' tuaf re' bisa nak Uisneno ro he nfee hukun neu tuaf re' In npiir naan sin. Mes kaah fa, ai'? Fin Yesus Kristus anmaten nrair. Anneis-neisi ntein, Uisneno namonib nafain' Ee na'ko In a'maten. Rarit Uisneno nait Je ma natook Ee nbi bare re' mahormata' nbi In aon-bian a'ne'u. Anbi bare naan In es re' n'onen piut-piut ma nteek kit amsa'. 35 Of oni' hi mitenab mak, anmui' tuaf ai', anmui' rasi re' bisa na'seke' Kristus tar antea In ka nneek antein kit fa heen, ai'? Ka neu fa, tua! Fin maski hit tmui' rasi ai' susat, ai' nana'renat, ai' ka tiit fa mnahat, ai' ka tiit fa pake-nohas, ai' nmui' siraak, ai' tuaf he nroor kit, mes Kristus anneek kit piut. Ka tiit tain fa saa' es, re' bisa nmoe' Je he In kais anneek kit! 36 Anbi Suur Akninu' Uisneno matu'i mnak, “Atoni' naim ranan he nisan nain ma na'maet kit, natuin hit tjair Uisneno Iin na. Sin nmoe' ma ntao kit, on re' 'bib-kase re' sin he nroro.” 37 Onaim maski hit tapein susat on mee msa', mes hit tiis atrair, natuin Kristus anneek niis kit! 38 Au uhiin batuur-batuur 'ak on nai: ka tiit fa rais jes amsa' re' bisa nmoe' Uisneno he nasnasab In manekan neu kit. Maski hit tmoin, ai' tmaet, ai' nmui' ameput na'ko sonaf neno tunan, ai' anaa' aprenat, ai' nmui' kuasat, ai' rasi oras ia, ai' rasi re' amnemat, 39 kuasa nbi neon goe tnanan, ai' kuasa nbi pah-pinan, ai' bare' 'teta' re' Uisneno nmoe' sin — ka tiit tain fa saa' es, re' bisa nbatis kit na'ko Uisneno, re' anmoe' Je he In ka nneek kit fa goen! Natuin hit tmafuut tok hit Usi' Yesus Kristus, re' Uisneno anreek haef anrair Je ntaam neem.
Uisneno npiir naan atoin Israelas sin
1 Hit re' tmafuut tok Kristus, ta'uab ate namneo ma namnoon goah. Onaim au ka upoi ki fa. Au nekak nanan ia msa' natoon am nak, Uisneno In Asmanan an'ator au nekak. 2-3 Au u'uab on nai: au neek ii nsuus. Au 'naben ate ma'fena' on naan, natuin au umnau au ngguin. Fin au 'roim he au uuf ma pah Yahudis sin imsa' nmafutun nok Kristus, mes amfaun re' ka npirsai Je fa. Karu au bisa 'fei eno' ranan 'eu sin, au ubarab he 'toit Uisneno he nhukun kau, he au 'senu' ma 'seka' sin. Ma au ubarab he 'toti msa' he Uisneno nbatis kau u'ko Kristus, maut he au tuaf ein bisa nmafutun nok Ne. 4 Te kaah, sin re' naan atoin Israelas, es re' pah es, re' ma'upan anneis. Uisneno nait inrair sin anjarin In aanh ein na'ko unu'. In naruru' ma nakrira' In kuasa re' mapina'-makraha' neu sin. In nahake' rais manba'an huma'-huma' nok sin. In nfee In atoran neu sin. Sin es re' na'besan nahinin neun Uisneno, ma ntuthae Je. In nba'an he naruru' ma nakrira' In nekan arekot neu sin. 5 Sin na'uun na'kon hit be'i-na'i sin, esan re': ka'o Abraham, ka'o Isak' ma ka'o Yakop (atoni' nait kanaf ‘Isra'el’ na'ko Yakop). Ma Kristus re' Uisneno nba'an nain Je na'ko unu' re' he nreek haefn Ee ntaam neem naan, na'uu na'ko hit pah Yahudis sin be'i-na'i sin. Kristus naan amsa', es re' Uisneno re' naprenat nain are' saa'-saa' ii ok-oke'. Onaim pantas karu atoni' naikas ma nboi's Ee tar antea nabar-baar. Batuur on naan, tua! 6 Maski atoin Israelas sin amfaun re' ka ntoup fa Kristus fa fe', mes atoni' ka bisa na'uab fa mnak, Uisneno In rais manba'an naan ka njair fa. Kais mak, mansian ii ok-oke' re' na'uu neman na'kon be'i-na'i Isra'el naan, anjair pah Isra'el re' Uisneno npiir je he njair Iin ja. 7 On re', too mfaun ii na'uu neman na'kon hit be'i-na'i, ka'o Abraham. Mes sin arsin ok-oke' ka ka'o Abraham in sufan-kau'n ein fa re' Uisneno npiir sin. Fin Uisneno natoon anrair ka'o Abraham am nak, “Ho sufam-ka'um re' Au uhiin sin naan, suma esan re' na'uu neman na'kon ho anah nai' Isak.” 8 In oetn ii nak, na'ko unu' tar antea oras ia, ka sufa'-ka'uf sin ok-oke' fa re' na'uu neman na'kon hit atoin Yahudis hit ka'o Abraham, re' njarin Uisneno In aanh ein. Suma sufa'-ka'uf re' na'ko Uisneno In rais manba'an neu ka'o Abraham anmees jah, Uisneno nsoi' je njair In aanh ein re' batuur. 9 Fin Uisneno nahake' rais manba'an nok ka'o Abraham am nak, “Toon amnemat, of Au 'fain 'uum. Oras naan, ho fee bi Sara' nahoni' naan ri'aan moen jes.” 10 Ka on fa naan ahaa. Fin hit ka'o Isak nok in fee bi Ripka nahoni' naan ri'aan koena'. 11-12 Oras bi Ripka ka nahoni' naan sin fa fe', sin ka nmoe' nitan fa fe' rais reko, ai' rais maufinu. Maski on naan amsa', mes Uisneno natoon nain neu bi Ripka anmatoom nok ri'aan koen re' npoi nahunu mnak, “Taatf aan of anjair ameput neu in orif.” Uisneno natoon on naan, he naruru' ma nakrira' am nak, karu In npiir naan tuaf es, In nahini nrair nak, In he npaek tuaf naan nahuum on mee. Rarit Uisneno npiir ri'aan muni' naan he njair Iin ja. In ka nperluu fa he npao he nkius ri'aan muni' naan he nmoe' on mee, natuin Uisneno nahiin nain. 13 Fin Uisneno na'uab anbi In Suur Akninu' anmatoom nok ri'aan koen naan am nak, “Au 'piir ma 'betis 'aan kuuk nai' Yakop, mes Au ka 'sium ma 'toup fa nai' Esau.” 14 Onaim hit he ta'uab saa'? Of oni' nmui' tuaf na'uab am nak, “Uisneno nafeek rasi ka natai fa?” Kaah fa, tua! 15 Fin unu' fe'e te, Uisneno natoon neu ka'o Musa mnak, “Au ururu' ma ukrira' Au rais kasian 'eu tuaf re' Au 'piir 'aan kuuk ee. Au 'fee ma 'nona' Au manekat 'eu tuaf re' Au 'ruur ma 'reek 'aan kuuk ee.” 16 Onaim tuaf naan ka nnaben fa Uisneno In rais kasian, natuin tuaf naan in roimn aa kuun, ai' natuin in a'moe'n aa kuun. Mes natuin Uisneno kuun es re' anroim he naruru' ma nakrira' In rais kasian ee neu tuaf naan. 17 Fin anbi Suur Akninu', Uisneno na'uab neu usif pah Masir am nak, “Au usaeb 'piru'-baru he ho mjair usif, natuin Au he 'paek ko he mururu' ma mukrira' Au kuasat meu too mfaun ein. Nok ranan naan, mansian ii ok-oke' re' nbin pah-pinan ia bisa naikas na'rat-ratan Au kanak.” 18 Onaim karu Uisneno he naruru' ma nakrira' In rais kasian ee neu tuaf es, In nmoe' je goen. Ma karu In nmoe' tuaf es in nekan he naheer on fatu, In nmoe' je goen. Uisneno bisa naruru' ma nakrira' In rais kasian, mes In ka ntoup fa rais maufinu msa' 19 Karu nmui' tuaf es, re' nprotees kau mnak, “Karu on naan ate, karu Uisneno he nmoe' rais jes, sekau es re' bisa nraban? Ka tiit fa, ai'? Onaim nansaa' am es In he nasaeb sanat neu kit? Naan ka natai ma namneo fa, tua!” 20 Karu nmui' tuaf re' natenab on naan, au utaah am 'ak, on nai: “Ho mutenab, mak ho re' ia sekau! Ho he mu'uab amraban Uisneno, ai'?” Kais on naan, tua! Fin anbi Suur Akninu' Uisneno matu'i mnak, “Karu atoni' nmoe' baer es, ka bisa fa bare' naan nataan nafain' ee mnak, ‘Nansaa' am es ho mmoe' kau on re' ia?’ ” 21 On re' amo'e 'na'i. Na'ko auf makri'it akboe's es, in nmui' hak he nmoe' 'huun arimat he atoni' nbo'is. In nmui' hak amsa' anpaek afu kbo'es naan he nmoe' baer porin makrafu', natuin in romin. 22 On naan amsa' Uisneno. In nmui' hak he nmoe' saa'-saa' natuin In romin. In he naruru' ma nakrira' neu mansian ein ok-oke' am nak, In natoo', ma ka ntoup fa 'moe' maufinu saa'-saa' re' atoni' nmoe' je. In nroim he atoni' nahini msa' mnak, In nmui' kuasat kou'-ko'u. Maut he atoni' nahiin on naan, he In naran ma ntahan In tuan nok 'moe' maufinu huma'-huma' re' atoni' nmoe' sin. Mes neu atoni' re' nmoe' maufinu, sin suma npa-paon sin oras he sin namre'un. 23 In nmoe' on naan, he naruru' ma nakrira' neu too mfaun ein am nak, In he naruru' ma nakrira' In rais kasian neu atoni' fauk aah. Sin re' naan, re' In npiir nain sin he ntuna' na'ratan sin. Ma In nroim he mansian ii nahinin nak, In kuun mapina'-makraha'. 24 Fin hit re' ia, re' In npiir nain kit he tjair Iin na. Hit re' ia, bian ta'ko atoin Yahudis, ma bian ta'ko pah bian antein. 25 Unu' te, Uisneno npaek In mafefa kninu' nai' Hosea, he ntui' nmatoom nok ka atoin Yahudis sin fa mnak, “Anmui' tuaf re' unu' te, ka Au ngguin fa, mes Au 'haman ma 'o'en sin am 'ak, ‘Hi re' naan, Au ngguin.’ Ma nmui' pah re' unu' te, Au ka 'neek sin fa, mes Au 'haman ma 'o'en sin am 'ak, ‘Hi re' naan, pah re' Au 'neek.’ ” 26 In imsa' ntui' mnak, “Anbi naan, nbi bare re' Uisneno natoon anrair sin im nak, ‘Hi re' naan, ka mjair fa Au ngguin!’ Of Uisneno Amonit nroim he natoon neu sin im nak, ‘Oras ia, hi mjair Au aanh ein!’ ” In na'uab on naan, natuin In kasian atoin ka Yahudis sin fa. 27 Mafefa kninu' bian es re' nai' Yesaya, nhunun ma nkoa' niit anmatoom nok pah Isra'el am nak, “Maski atoin Israelas nabuan anjarin tuunb es, on re' snaen et tais je ninin, mes Uisneno of suma nsoi nafetin fauk aah, na'ko sin sanat ma penu sin. 28 Fin In oras he neem, he Uisneno nafeek rasi neu tuaf mese'-mese' re' nbin pah-pinan, on re' In natoon nain. Mes In ka npa-pao fa, fin In nmoe' sin njair namtiis rabah!” 29 Un-unu' te, nai' Yesaya natoon anmatoom nok atoin Yahudis sin im nak, “Hit tapein upan ma pa'e, natuin Uisneno Akuasat Anneis-neis, ankonan he hit sufaf bian sin napenin a'monif. Fin karu ka on fa naan ate, hit tamneku trair, on re' abitan kota Sodom ma kota Gomora sin.”
Anmui' Rais Reko neu pah Isra'el re' ka nromin fa he natniin Uisneno
30 Hit he ta'uab saa'? Ta'uab tak, ka atoin Yahudis fa na'ko mee-mee, re' unu' te ka naim nitan fa ranan he naraem ok nok Uisneno, mes oras ia nmarame' nok Ne goen, natuin sin npirsain neun Yesus Kristus. 31 Te kaah abitan Isra'el sin, sin nsoba' he nmoe' natuin ka'o Musa in atoran he sin bisa naraem ok nok Uisneno, mes ka njair niit fa msa'. 32-33 Nansaa' am es sin ka bisa fa he naraem ok nok Uisneno? Natuin sin suma nromin he nmo'en natuin atoran, maut he In ntoup sin on re' atoin neek amneot ma amnonot, mes sin ka npirsain fa neun Yesus Kristus. Rarit on re' sin nastunan nbi “fatu stuna'”. Rasi re' ia es re' Suur Akninu' Uisneno In sairt ii nak, “Amkius iim ma mipeen iim fe'! Fin Au 'tao 'rair Tuaf es et a'to'ef Sion, et kota Yerusalem. Tuaf naan on re' faut goes re' nmoe' tuaf nastuun. Mes sekau re' npirsai Je te, kais namaeb on.” Fatu naan, es re' Nai' Yesus. Mes atoin Israelas sin antorak ma ka ntoup Goe fa. Naan on re' sin nastunan, rarit sin ntaikobin natuin fatu naan.
1 Aok-bian arki! Au he utenab saa' 'eu atoin Israelas sin? Au 'onen he sin nfeen mainuan neun Uisneno he In nsoi nafetin sin na'ko sin saant ein. Karu njair on naan, na' au 'mariin! 2 Au bisa utoon anmatoom nok atoin ein ia sin a'moe'k ein: sin nmakoen he natuin Uisneno. Maski sin nmakoen on naan, mes sin ka nahiin fa ranan re' batuur. 3 Natuin sin ka nahinin fa raan a'honis re' batuur, re' nmoe' atoni' bisa nmarame' nok Uisneno, etun sin nasoin ein kuuk ranan he nsoba' he nareok ok nok Ne. Nok ranan naan, sin ka nromin fa he natniin Ee. 4 Karu tuaf suma nmoe' natuin ahaa atoran, he Uisneno ntoup goe, naan ka nanokab fa. Etun Kristus nmoe' namtisib atoorn ein ok-oke', maut he hit bisa tmarame' tok Uisneno. Rarit oras ia, ansuun tuaf re' npirsain neun Kristus bisa nmarame' nok Uisneno.
Uisneno nroim he nsoi nafetin are' mansian ii na'ko sin sanat ma penu sin
5 Unu' te, ka'o Musa naruru' ma nakrira' nrair ranan anbi Suur Akninu', he tuaf bisa nmarame' nok Uisneno, asar sin nmo'en natuin Uisneno In Atoorn ein ok-oke'. In ntui mnak, “Tuaf re' nmoe' natuin Atoorn ein ok-oke', sin of napenin a'monit amneot ma amnonot.” 6 Mes Suur Akninu' Uisneno naruru' ma nakrira' ranan bian amsa' am nak, tuaf bisa nmarame' nok Uisneno asar sin npirsain neun Kristus. Matu'i msa' am nak, “Kais mitaan am mak, ‘Sekau es re' bisa nsae neu sonaf neno tunan?’ ” (Naan on re' atoni' nsae natoon neu Kristus am nak, hit mansian ii troim he In ansaun he nsoi nafetin kit.) 7 Matu'i msa' anbi Suur Akninu' mnak, “Kais mitaan am nak, ‘Sekau es re' he nsaun neu koon ai abar-barat, anbi bare neu amaets ein?’ ” (Naan on re' atoni' nsaun he neik nafani' Kristus ansae na'ko In a'maten he nsoi nafetin kit.) 8 Kais on naan, tua! Fin anbi Suur Akninu' Uisneno matu'i msa' mnak, “Uisneno In beno et ho humam ma ho matam! Fin beno naan et ho fefam ma ho nekam.” Beno naan re' hit tatoon ee neu tuaf am tak, “Karu ho he mupeni 'honis, ho ro he mpirsai meu Kristus!” 9 Karu ho mmanaku' mpaek ho fefam kuum am mak, “Yesus naan, au Usi',” ma ho mpirsai mbi ho nekam mak, Uisneno namonib nafani' Yesus Kristus na'ko In a'maten, es naan ate, Uisneno nsoi nafetin ko msa' na'ko ho sanat ma ho penu sin. 10 Fin karu ho mpaek ho nekam he mpirsai Kristus, Uisneno nmarak ko nak, atoin neek amneot ma amnonot re' nareko nfain nok Ne. Ma karu ho mpaek ho fefam mak, Nai' Yesus anjair ho Usi', Uisneno nroim he nafetin ko na'ko ho sanat ma ho penu sin kuasat. 11 Anbi Suur Akninu' matu'i mnak, “Atoni' re' npirsai Uisneno, of ka napein fa rais mae, fin Uisneno of he najarib are' saa'-saa' re' In na'uab anrair sin.” 12 Atoin Yahudis ma ka Yahudis sin fa, huma' mese'. Ka nmui' fa suri. Fin suma nmu'i haa Usif mese', ma In njair Usif neu are' kanan pah ma 'pen-pene. In nroim he naruru' ma nakrira' In nekan arekot kou'-ko'u neu tuaf mese'-mese' re' he ntoit Je he In nturun ma nbaab sin. 13 Fin anbi Suur Akninu' matu'i mnak, “Are' mansian re' ntoit turun-babat na'ko Uisneno, In of ansoi nafetin sin na'ko sin sanat ma penu sin.” 14 Mes on mee atoni' bisa ntoit turun-babat, karu atoni' ka npirsai fa tuaf es fa fe'? Ma on mee he sin bisa npirsai neun tuaf naan, karu sin ka nneen niit ee fa fe'? Ma on mee he sin bisa nneen niit ee, karu ka tiit fa tuaf natoon ee neu sin? 15 On mee tuaf bisa natoon neu sin, karu ka tiit fa tuaf anreek haefan sin he nnao natoon ee on naan? Anbi Suur Akninu' matu'i mnak, “Karu atoni' neem neik rais reko, sin amneemk ein naan, reok re'uf!” 16 Mes hi mihini mrari mmak, anmui' atoin Israelas bian re' ka nromin fa he nneen ma natniin Uisneno In Rais Reko. Fin Uisneno In mafefa kninu' nai' Yesaya ntui mnak, “Koi, Usi'! Sin ka nromin fa he npirsain neun beno, re' sin nneen ma natniin anrair je na'ko kai!” 17 Onaim karu he mpirsai Uisneno, ro he mitniin In Kabin ma Prenat sin fe'. Karu he mneen ma mitniin Uisneno In beon goe te, ro he mneen rasi nmatoom nok Kristus fe'. 18 Au he utaan 'iit, on nai: of oni' hi mitenab, mak, atoin Israelas sin ka nneen ma natniin niit fa anmatoom nok Kristus, ai'? Sin nnenan anrarin! On re' matu'i nbi Uisneno In Suur Akninu' na'ko unu' mnak, “Mafefa kninu' Uisneno sin beno re' anmatoom nok Usi' nasiin on ma nabeon on anfuun am nateef anbi pah-pinan; Sin uabk ein naan, antea nrair pah-pinan ia in pani-mpain.” 19 Au he utaan a'tein rais jes am 'ak, “Atoin Israelas sin ka nahinin fa Uisneno In raan ee, oo?” Ka'o Musa, tuaf ahunut re' ntui rasi naan am nak, Uisneno natoon anrair atoin Israelas sin nak, “Au he 'moe' rais jes, neu uuf am pah bian sin. Rasi naan of anmoe' ki ammasmeru'. Ma Au he 'moe' rais jes amsa', neu tuaf-tuaf re' hi maan ee amonot on re' ukum. Rasi naan of anmoe' ki ammarau nisin.” 20 Namuni te, ka'o Yesaya ntui maat-maat anmatoom nok ka atoin Yahudis fa mnak, “Anmui' tuaf re' unu' te ka naim niit Kau fa, mes sin nateef nok Kau goen. Anmui' tuaf re' unu' te ka natenab niit fa he nkius niit Kau, mes Au ukriir Ok a'rair 'eu sin.” 21 Mes anmatoom nok atoin Israelas sin, Uisneno na'uab anrari mnak, “Fai-manas, Au 'fei ma 'pira' Au 'niimk ein, he 'pao atoin Israelas sin he neman neu Kau. Mes sin ka nromin fa he nneen ma natniin Kau, ma sin nromin he nraban Kau msa'.”
Uisneno nkasian atoin Israelas sin
1 Onaim au he utaan on nai: of oni' hi mitenab am mak, “Natuin atoin Israelas sin ka nromin fa he natniin Uisneno, etun In ntorak ma npenan anrair sin.” On naan, aa oo? Kaah fa, tua! Fin au u'uu 'bi sin imsa'! Au re' ia, u'ko uuf nai' Benjamin. Nai' Benjamin in aamf ee, es re' nai' Yakop. In nai'f ee, es re' nai' Isak. Nai' Isak in aamf ee, es re' nai' Abraham, re' njair aam uuf neu pah Isra'el sin ok-oke'. 2 Uisneno ka ntorak niit fa Iin na. Sin re' naan, re' In nahiin nain sin na'ko un-unu'. Hi mimnau saa' re' matu'i nain anbi Uisneno In Suur Akninu' anmatoom nok ka'o Elia fe'? In natoon in neek saket neu Uisneno anmatoom nok atoin Israelas sin, onaim in ntoit he Uisneno nhukun sin, 3 am nak, “Koi, Usi'! Atoin ein ia, anroor na'maet mafefa kniun' ein, re' Ho mreek haefan sin. Sin npukai nareu' ma ntuut nakrati' mei fuat amsa', anbi bare re' atoni' na'ruri' ma na'bees neu Ko, Usi'. Na'ko Uisneno In mafefa kniun' ein ok-oke', suma arahaa au 'mees jah re' a'moin fe'. Mes sin namin ranan antein, he na'maet kau, tua!” 4 Mes Uisneno nataah am nak, “Ho uabm aan, ansaan! Fin Au ngguin re' na'ruir ein ma na'besan Kau, sin arsin tuaf nifu hiut fe'. Sin naarn ein ma ntaahn ein, ma ka na'besan fa neun Ba'al!” 5-6 On naan amsa', oras ia. Fin ka atoin Yahudis fa ok-oke' re' naikoit Uisneno. Anmui' tuaf fe' na'ko hai tuaf ein re' Uisneno npiir anrair sin he nsoi nafetin sin, natuin In nroim he naruru' ma nakrira' In nekan arekot neu kai, ka natuin fa hit tmoe' rais reko! Fin karu In ro he npiir kit natuin hit tmoe' rais reko, in sairt ii nak, In ka bisa nafeek fa he nakrira' In nekan arekot, ai' In nafeek nak ka nakrira' fa In nekan arekot neu kit. Karu on naan, hit ka tteek ee fa tak ‘nakrira' In nekan arekot’ antein. 7 In amsoupn ii, on nai: too mfaun na'ko atoin Yahudis sin namin he Uisneno naruru' ma nakrira' In nekan arekot neu sin, he sin bisa nareok ok nok Ne msa'. Mes sin ka napein nitan fa, natuin sin neek ein maun ein, ma ka nromin fa he natniin Ee. Mes anmui' bian re' napein je. Sin re' naan, es re' Uisneno npiir naan sin. 8 Anbi Uisneno In Suur Akninu' matu'i anmatoom nok a'naak fauts ein fe'e na mnak, “Uisneno nfee neu sin, mataf re' ka bisa nkisun ma nitan fa, rukif re' ka bisa nnenan ma natninan fa, ma rone skuma' re' nmoon, ma ka bisa natenab fa. Onaim sin ka nahinin fa saa' re' batuur, tar antea oras ia msa'.” 9 Usif nai' Daut antui nmatoom nok uuf Yahudis anbi Uisneno In Suur Akninu' msa' am nak, “Maut he sin feest ein anbin sin mei ja kuuk. Fin sin feest ee kuuk es re' nakreo nafani' sin, he sin natenab nak are' saa' ii reko nrair. Ma sin a'mui'k ein kuuk es re' anmoe' sin he nastuun am naspaen. 10 Maut he sin maatk ein ankupun am nameis'okan, he sin kais ankius saa'-saa'! Maut he sin nroin ma nasahan ma'fen-fena' piut, he sin nuif ein ansau'-boko ntein' ein!”
Uisneno nroim he nsoi nafetin atoin ka Yahudis fa msa'
11 Au he utaan 'ak on nai: nansaa' am es atoin Yahudis sin nastunan? Sin ntaikobi nrarin, aa oo? Kaah fa, tua! Mes natuin sin ka nromin fa he nneen ma natniin Uisneno, ma ka nromin fa he npirsain neun Kristus, naan anfei ranan neu atoin ka Yahudis fa he Uisneno nsoi nafetin naan sin na'kon sin sanat ma penu sin. Nok ranan naan, Uisneno nroim he atoin Israelas sin natiun Goe, rarit antebin nfanin he natuin Ee ntein. 12 Mahini' nok akninu' nrair nak, atoin Yahudis sin ntanhai saa' re' batuur. Etun atoni' bian na'ko pah-pinan ia nfuun am nateef nnaben naan Uisneno In nekan arekot. Onaim atoin Yahudis sin, anrukin nmaten. Mes naan anmoe' atoin ka Yahudis sin fa napein upan ma pa'e ko'u. A'roo-'roo te, karu atoin Yahudis sin ok-oke' nareko nfanin nok Uisneno, re' naan reko nneisi ntein! 13 Au he utoon 'eu ki re' ka atoin Yahudis fa, on nai: Uisneno nreek haefan kau he 'nao utoon 'eu ki nmatoom nok In Rais Reko. Etun au 'haek ma'tani' he unaob meup reok re'uf ia. 14 Fin karu au unaob mepu ia nok rek-reko, kais-kaisa' au 'moe' au atoin Yahudis sin natiun atoni' ka Yahudis sin fa, tar antea bian sin napenin fetin na'kon sin sanat ma penu sin. 15 Oras Uisneno ntorak napoitan In atoin Yahudis sin, re' naan anfei ranan he atoni' bian sin napenin mainuan he sin bisa ntaam anjarin Uisneno Iin na. Mes of karu sin nmarame' nok Uisneno, naan reok re'uf. Fin re' naan on re' sin nmoni nfanin na'kon sin a'maetk ein! 16 Tait i'tope' ta'ko tuaf re' nmoe' utunu'. Karu in nait uut a'kre'o he nnona' ma nfee je neu Uisneno, of utunu' naan ok-oke' njair Iin ja re' kninu'. Ma karu tuaf annona' ma nfee hau 'ba'af es njair hau fua toon neu Uisneno, of hau naan a'teme-'teme njair Iin ja kuun re' kninu'. 17 Au he utaib atoin Yahudis nok hau roet saitun es, anbi po'on. Uisneno nketu nporin anrair in taef bian. Mes hi re' ka atoin Yahudis fa, on re' hau saitun fui. Rarit Uisneno nkeut naan hi taem bian ma npaap ee neu hau re' et poo'n ee nanan. Nok ranan naan, taef na'ko hau fui naan, antoup in a'monit na'ko hau re' et poo'n ee nanan. Naan on re' hi re' ka atoin Yahudis sin fa, mtoup maan amsa' Uisneno In nekan arekot, re' In he nfee je neu In atoin Yahudis sin. 18 Mes ampaant om, joo! Kais maiks om mak, hi re' mi'ko hau fui naan, reko nneis na'ko taef ein re' Uisneno nketu nporin sin! Karu ho mroim he maikas ho tuam aan, ho kais amnikan, fin ho suma taef mees' aah! Ka ho fa es re' ammoe' he hau naan ma'tani'. Fin hau 'baa'f ii es re' nmoe' he hau naan, ma'tani'. 19 Of oni' ho he mak, “Uisneno nketu nporin taef mese' naan na'ko hau re' nmoin et poo'n ee nanan, he In bisa npaap nafani' kau 'bi naa, he 'senu' taef amnaa'.” 20 Naan batuur. Mes kais amnika' mmak, Uisneno nketu nporin taef ein naan, natuin sin ka npirsain fa neun Kristus. Ma ho msenu' ma mseka' sin, natuin ho mpirsai Je. Onaim kais maiks om! Reko nneis, ho mpaant om ma kais ammoe' tafi'-tafi'! 21 Fin atoin Yahudis sin, on re' taef asli re' natoor ma nmoin nahun-huun. Mes Uisneno ka neu fa he nkonan sin antaahn ein a'roo nbi naan. Onaim karu ho ka mpirsai Je fa piut, kais mufnekan ma mharap mak In nroim he nkonan ko mtahan piut ambi naan! 22 Onaim hi ro he mitenab mirek-reko' fe'. Uisneno nmui' neek reko. Mes In bisa nfee hukun ma'fena' msa'. In of anfee hukun neu tuaf re' nmoufu nrair, re' ka nareko nfain fa nok Ne. Mes neu ki re' ka atoin Yahudis ki fa, Uisneno naruru' ma nakrira' In nekan arekot neu ki, asar hi mmafuut piut ambi Ne, ma mkoon Ee he In nmoe' reko neu ki. Mes karu hi ka mkoon Ee fa on naan, In nketun nporin ki na'ko In roet saitun naan amsa'. 23 On naan amsa', atoin Yahudis sin. Karu sin nmei' jok na'kon sin saant ein he nmurai npirsain neun Kristus, Uisneno of anpaap nafani' sin neun sin hau roet asli naan. Fin In nmui' kuasa he nmoe' on naan! 24 Fin hi re' ka atoin Yahudis ki fa, on re' taef na'ko hau saitun fui re' unu' te ka nmoin fa nbi poo'n ee nanan. Mes Uisneno npiir naan ki he npaap ki nbi hau roet saitun arekot, re' In nseen ee nbi In po'on, maski hau fui naan anmees kuun a'teta' ma roet abit po'on naan anmees kuun a'teta'. Fin karu ka atoin Yahudis sin fa bisa njarin on naan, saa' antein atoin Yahudis sin. Naan bisa nneisi ntein, karu Uisneno npaap nafani' sin nbin sin roet ee uun.
Atoin Yahudis sin of anmarame' nfanin nok Uisneno
25 Aok-bian abitan Roma arki! Hi ro he mihiin rasi re' unu' te, ma'nifa'. Fin karu hi mihiin je, hi kais maiks om mak, hi ahinit. Fin on nai: oras ia, atoin Yahudis sin neek ein on fatu, ma ka nromin fa he npirsain neun Kristus. Mes sin of ka on fa naan piut-piut. Fin karu tuaf re' ka atoin Yahudis sin fa ok-oke' re' Uisneno npiir sin npirsain nrarin neun Kristus goen, atoin Yahudis of anpirsain neu Ne msa'. 26 Onaim karu oras naan neem anrair, Uisneno of ansoi nafetin atoin Yahudis sin ok-oke' na'ko sin sanat ma penu in kuasan. Naan on re' matu'i et Suur Akninu' mnak, “Tuaf es of antaam neem, re' nsoi nafetin kit na'ko siraak. In amneman naan na'ko 'to'ef Sion et kota Yerusalem. In of es re' anmoe' nai' Yakop in sufan-kau'n ein na'pisan. Fin sin ka nrae ma ntoe Kau fa, ma sin nkoit Au raan a'honis re' batuur. 27 Au 'roim he 'noes ma 'saok 'ain sin sanat ma penu sin. Fin Au uhake 'rair rais manba'an 'ok sin on naan.” 28 Ansuun oras atoin Yahudis sin nnenan Kristus In Rais Reko, sin nmoe' sin tuak ein on re' musu re' nraabn Ee. Nok ranan naan sin nfeen mainuan neu ki, re' ka atoin Yahudis fa! Maski on naan amsa', mes Uisneno nneek sin fe', natuin In nneek sin be'i-na'i sin, ma npiir naan sin njarin Iin na. 29 Fin karu Uisneno nfee ma nnona' baer es, In ka nait nafain' ee fa. Ma karu In nhaman naan tuaf am nak, “Iim, mituin Kau nai! Iim amtaam amjair Au ngguin nai!” In ka nri'u nporin sin fa ntein. 30 Nahunu te, hi re' ka atoin Yahudis fa, ka mroim fa he mneen ma mitniin Uisneno. Mes oras ia, hi es re' amtoup Uisneno In rais kasian, natuin atoin Yahudis sin re' ka nromin fa he nneen ma natniin Ee. 31 Onaim sin re' naan, es re' oras ia ka nmoe' natuin fa Uisneno In romin. Es naan ate, Uisneno he naruru' ma nakrira' In rais kasian ee neu ki. Ma In of ankasian anteni' sin imsa'. 32 Oras ia, Uisneno nkius atoin Yahudis natai nok atoin ka Yahudis fa. Fin sin ok-oke' ka nmoe' natuin fa In romin, on re' an'o'of naan sin ma ka nitan fa raan a'po'i. In nkonan sin on naan, he In bisa naruru' ma nakrira' In rais kasian neu hit mansian ok-oke'.
Uisneno reok re'uf
33 Uisneno nmanoe ma mahiin ii kah een! Ma In npaek In mahiin ee he nmoe' rais reko. Ka tiit fa tuaf es, re' nahiin Je batuur-batuur. Ka tiit fa tuaf es, re' nahiin ma nakeo batuur-batuur anmatoom nok In rasi tfeka'. Ka tiit fa tuaf es, re' nahiin ma nakeo, nansaa' am es Uisneno nmoe' rais jes. 34 Ka tiit fa tuaf es, re' nahiin ma nakeo hit Usi' In tenab. Ka tiit fa tuaf es amsa' re' bisa nfaineek Ee. 35 Ka tiit fa tuaf es, re' bisa nfee ma nnona' baer es ruum-ruum aah neu Uisneno, Ka tiit tain fa tuaf es, re' bisa na'seke' Uisneno he nbaras nafain' ee. 36 Fin are' saa'-saa' ii na'uu ma na'baa' nbi Uisneno! Are' saa'-saa' ii njarin, natuin In! Are' saa'-saa' re' hit tmoe' sin, hit tmeup sin teu Ne. Hit tanaib Ee, ma tait siit, pures ma bo'is teu Ne, tar antea nabar-baar! Batuur on naan, tua!
Hit a'moink ii njair on mee, karu hit tmafutu tbi Kristus?
1 Aok-bian manekat arki! Natuin Uisneno naruru' ma nakrira' nrair In rais kasian Ee neu kit, es naan ate au 'toit he hi mnona' ma mfee hi tuam ein a'teme-'teme meu Ne, on re' fua'-turu' re' nmoin fe'. Naan es re' anharineb Uisneno In nekan. Amhaek piut he mmoe' mituin In romin, ma mmoni kninu', fin re' naan naruru' ma nakrira' hi manekam ma hi rais hormaat meu Ne. Ro tebes! Karu hi mi'ruri' ma mi'bees meu Ne on naan ate, reko, tua. 2 Kais amkonan mansian pah-pinan oras ia he nreun ki mnak, hi ro he mmoe' saa', ai' mmoe' on mee, ai' mmoin on mee, mituin sin nroimk ein. Kais suma mitun-tuin ahaa sin teenb ein, sin a'moink ein, ai' sin haart ein. Mes reko nneis, hi mkonan Uisneno he na'fe'u hi teenb ein, he hi mitenab are' kanan rasin re' naan mituin raan fe'u. Nok ranan naan, hi bisa mihiin Uisneno In romin neu ki. Fin Uisneno In romin naan, reko, namtiis ma nanokab, ma nharineb In nekan. 3 Natuin Uisneno nreek haefan kau ma nakrira' In nekan arekot neu kau, etun au utoon ki on nai: amtai hi tuam ein ambi raan reko! Kais maiks om anneis na'ko rais reko ma amneot. Kais ampake 'ta'i re' ka nmui' fa 'sukif. Tuaf-tuaf ro he nahiin in mahinif ma manoef re' Uisneno nfee je neu ne, natuin in npirsai Kristus. 4 Tait i'tope' ta'ko aof. Aof ii mese', mes in biaf ein huma'-huma'. Ansuun-suun biaf nok kuun in mepu. 5 Hit arkit re' atmafuut mates atbi Kristus, on naan amsa'. Hit arkit amfa-faun, mes hit arkit tmafutu' tjair aof mese'. Ma ansuun-suun tuaf, es-es ate nok in mepu ma banit, on re' aof re' nok in biaf ein. Es anperluu es. On re' a'nimaf re' karu nketu npoirn ee na'ko aof, naan ka mapake' fa goen, ai'? 6 Au sairt ii on nai: Uisneno nfee kuasa neu kit arkit, he tanaob mepu-banit huma'-huma', natuin In nroim he naruru' ma nakrira' In nekan arekot neu kit. Karu Uisneno nfee kuasa neu ko he m'eut ma mutoon In haanf am beno te, ro he mutoon ee namtiis. Kais munesib. 7 Karu Uisneno nfee ko mahinif ma manoef he mtuthae biak ein, ho ro he mpaek kuasa naan he mtuthae. Karu In nfee ko mahinif ma manoef he munoni' biak ein anmatoom nok Ne, ho ro he mpaek kuasa naan he munoni'. 8 Karu In nfee ko mahinif ma manoef he mu'haba' biak ein ate, ho ro he mpaek kuasa naan he mu'haba'. Karu In nfee ko kuasa he ho bisa mturun ma mbaab biak ein nok a'mu'if re' ho mupein sin ate, amfee ho 'mu'im naan he mturun ma mbaab sin. Karu In nfee ko mahinif ma manoef he mu'naa' biak ein he sin nanaob In mepu nok reko nneis-neisi te, ho ro he mmakoe he mu'naa' ampaek kuasa naan. Karu In nfee ko rais kasian he mturun ma mbaab asuust ein ate, ho ro he mturun ma mbaab sin nok neek marine.
Kristus Iin na, ro he nmonin on mee?
9 Karu hi miruru' ma mikrira' hi manekam meu tuaf, miruru' manekat re' batuur; kais amputa-kriu. Maikoit mi'ko rais maufiun ein, ma mpooh ma mnaa' are' kanan rais reko. 10 Hi atoin asraint ein, hi rais manekat naan ro he mipoitn ee mi'ko hi nekam aan'-ana' meu es nok es. Amhaek piut he miruru' ma mikrira' hi rais hormaat meu es nok es. 11 Karu hi mmeup, mmeup batuur-batuur, kaisa' stena'-stena'. Maut he hi neekm ein anmarinan oras hi mmeup. Ma mmeup meu hit Usi'. 12 Hi neekm ein ro he nmarinan fai-manas, fin hi mihiin Uisneno he nmoe' on mee neu ki. Maran ma mtahan karu mipein susat. Am'onen fai-manas; kais amhae. 13 Ampaek hi 'mui'm ein he mturun ma mbaab atoin asranit re' nperluu. Karu nmui' tuaf neem na'ko bare bian ai' bare 'teta', amtoup sin ma mfeen sin bukaet, ai' natua ntaahn ein neun hi umin. Nok ranan naan, hi miruru' ma mikrira' hi maneekm ein meu sin. 14 Karu nmui' tuaf re' nasusab ki piut, mtoit he Uisneno nmoe' rais reko neu sin. Batuur! Kais amkaas sin, tua! 15 Karu nmui' tuaf re' neek ee nmariin ate, mmariin mok ne. Ma karu nmui' tuaf re' nkae natuin in neek ee nsuus ate, mkae mok ne. 16 Ammanek-neek ambi monit nok nekaf mese'. Kais ambeo' gom. Reko nneis, hi mmapartein mok tuaf ein re' ka mapaek ein fa. Kais maikas ho tuam aan he mutenab mak, suma ho mmees muhiin kuum. 17 Karu tuaf anmoe' maufinu neu ko, ho kais ambaras nok maufinu. Mes ho ro he msoba' maim raan reko nneis, re' tuaf-tuaf ein ok-oke' bisa ntoup goe. 18 Karu reko te, maim ranan he mmoni mbi mamut ma rame' mok tuaf-tuaf ein ok-oke'. 19 Aok-bian manekat arki! Kais ambaras maufinu nok maufinu. Maut he Uisneno es re' n'ator. Fin In natoo' karu atoni' nmoe' maufinu, on re' matu'i anbi Suur Akninu' mnak, “Hit Usi' es re' neikn On na'uab am nak, Au es re' a'mui hak he 'baras rais maufiunt ein. Fin Au es re' a'fee hukun 'eu tuaf re' anmo'en rais maufinu.” 20 Reko nneis ammoe' mituin saa' re' Suur Akninu' natoon nain je na'ko unu' mnak, “Karu ho muus goe namnaah, mfee ne mnahat. Karu ho muus goe nmeon oe, mfee ne oe. Fin karu ho mmoe' on naan, in of namaeb on, ma nhormaat ko.” 21 Kais amkonan rais maufiun ein he n'ator ko. Reko nneis rais reokn ein es re' an'ator ko. Nok ranan naan, ho bisa miis maan rais maufiun ein.
Amneen ma mitniin meu tuaf ein re' anna'an aprenat
1 Ansuun tuaf ro he nneen ma natniin anaa' apreent ein. Fin sin nmu'in hak ma kuasa he napreent ein. Mes sin nnaa' kuasa naan, natuin Uisneno es re' annona' ma nfeen sin. Anmui' anaa' kuasa oras ia, natuin Uisneno es re' nanaib sin. 2 Onaim karu tuaf anraban anaa' apreent ein on re' naan, naan on re' sin nraban saa' re' Uisneno nanaib anrari. Karu sin nmo'en on re' naan, of napenin hukun na'ko Uisneno. 3 Karu hi mmoe' reko, kais mimtaus anaa' apreent ein. Mes karu hi mmoe' maufinu, reko nneis hi mimtausan sin! Onaim ampaant om he mmoe' reko, he kais mimtausan sin. Ma karu hi mmoe' on naan, sin of anbo'is ki. 4 Fin anaa' apreent ein, sin re' naan es re' Uisneno npiir ma nanaib naan sin he ntuthae ki. Mes karu hi mmoe' sanat piut, reko nneis hi mpaant om reko! Fin sin re' naan, anmu'in hak he nhukun ki. Hak naan ka ruum am parsuum fa. Sin re' naan, on re' Uisneno In aan reun ein re' nfee hukun neun tuaf ein re' nmo'en maufinu. Fin Uisneno ka ntoup fa rais maufinu re' atoni' nmoe' je; In natoo' neu sin. 5 Es naan ate, hi ro he mneen ma mitniin anaa' apreent ein. Fin hi mihiin ambi hi neekm ein am mak, naan es re' batuur. Ma hi mihiin amsa' mak, Uisneno natoo' karu hit ka tmoe' fa rais reko. 6 On naan amsa', hi ro he mbaen beo re' natuin atoran aprenat, natuin anaa' apreent ein nanaob Uisneno In mepu. 7 Onaim hi ro he mbaen are' saa'-saa' mituin atoran re' batuur. Ambaen re' ahoik beon guin, are' kanan beo ngguin re' hi ro he mbaen sin. Amfee hormaat meu tuaf ein re' ro he thormaat sin. Ma karu nmui' tuaf re' nmoe' rais reko piut, minaib sin kaank ein he are' tuaf amfaun nahinin nak, sin nmo'en rais reko.
Atmaneek es nok es anbi 'monit
8 Ambaen mufeek ho tuus ein, he kais ammoni mbi tusa'. Fin hit suma he tatuus atbi rasi mees' aah, es re' atmaneek. Karu hi mneek hi aom-bian ate, hi mmoe' mituin amrair Uisneno In Atoorn ein. 9 Fin Atoorn ein naan nak, “Kais ammakaek; kais amroor ma mi'maet mansian; kais mibaak; kais mikoman es in bare',” ma bian antein. Karu he mmoe' mituin Atoorn ein ok-oke', hi ro he mmoe' mituin Atoran mese' re' ia, “Ho ro he mneek ho aom-bian, namnees on re' ho mneek ho tuam aan kuum.” 10 Fin karu hit taruru' ma takrira' hit manekak teu tuaf bian, hit ka tmoe' fa maufinu teu ne, ai'? Onaim karu hit taruru' ma takrira' hit manekak piut, hit bisa tmoe' tatuin Atoorn ein ok-oke' na'kon Uisneno.
Ka 'roo fa nteni' te, Kristus he nkoen On anfain neem
11 Uisneno he nafeti' kit na'ko maufinut anbi pah-pinan ia. Ma oras ia, in oors ee he nsoi nafetin are' mansian ii ok-oke', anpaumaak anneis na'ko oras hit he tpirsai fe' teu Yesus Kristus. Es naan ate, hit ro he tmaneek es nok es atbi 'monit, natuin hit tahiin rasi naan. Naan on re' unu' te, hit ttuup. Mes oras ia, in oors ee re' hit he tfeen nai! 12 Ka 'roo fa te, he nmeu goen ma maans ee he nsae jen. Onaim reko nneis hit tasnaas nai ta'ko hit maufinun. Naan, on re' atoni' re' nmoni nbi meis'okan ma nmoe' rais maufinu, fin sin nateenb ein nak, ka tiit fa tuaf re' nkius niit sin. Mes oras ia, hit ro he tjair on re' sorarus re' npaek baer makenat, he nahake' rais reko, on re' atoni' nmoni nbi me'u. 13 Hit ro he tmoin reko, he are' tuaf amfaun ankius niit kit nak, hit tmoe' rais reko. Ka reko fa karu hit suma tmoe' fesat ma tbukae kuuk mafu. Ka reko fa karu hit ta'hakek. Ka reko fa karu hit tmatoe re'uf ma tmatoe es nok es. Ma ka reko fa karu hit tatiun ma tsaek natuin tuaf he nneis kit. 14 Mes reko nneis, hi mi'bani' hi neekm ein he mjair huma mese' on re' hit Usi' Yesus Kristus, re' Uisneno nreek Ee neem. Ma karu ho mroim he mmoe' rasi re' ka batuur fa, kais amkonan he ho mmoe' mutuin ho romim rafu'-rafu' on re' naan. Maran ma mtahan ho tuam aan, tua!
Kais amkaritik rafu'-rafu' meu hi aom-bian atoin asranit
1 Anmui' tuaf re' anpirsai nrair neu Uisneno, mes in rais pirsait ee ka naheer fa fe', ma in ka nahiin fa rasi mfaun fa fe'. Amtoup goe nok reko. Kais ammatoe nmatoom nok in penit. Maut he in nmapartein nok ki. 2 Anmui' tuaf re' anpirsai neu Uisneno, re' natenab am nak, atoin asranit bisa nbukae saa'-saa' aah, on re' sisi, ai' saa'-saa'. Mes anmui' atoin asranit bian, re' sin rais pirsait ee ka naheer fa, re' suma neukn ahaa utan. Fin sin nanunin sisi. 3 Mes amneen, oo! Atoin asranit re' nnaben ate in bisa neuk saa' aah, kais mismeru' atoni' re' ka neuk fa sisi. On naan amsa' atoin asranit re' ka neuk fa sisi, kais mitoon meu atoni' re' neuk sisi mmak, “Hae! Meuk sisi te, nsaan!” Natuin Uisneno ntoup sin nua sin he njarin Iin na! 4 Karu amkaritik ho aom-bian atoin apirsait on naan, ho mak, ho sekau ko! Ho mmui' hak saa' he musaan biak ein? In ka ho ameupt aa fa! Ma ho re' naan, ka in a'naakf aa fa. Fin suma in A'naakf aa kuun, es re' nmui' hak he natoon maat-maat nak, re' in mmoe' je naan, batuur, ai' ansaan. Mes kais amnikan. In A'naakf ee, of antoup atoni' naan nok reko, natuin in A'naakf ee nha'tain je he in bisa naran ma ntahan. 5 Anmui' tuaf bian nafekan am nak, neon goes reko nneis na'ko neno bian sin. Anmui' tuaf bian natenab am nak, neon ein ok-oke' huma' mese'. Tuaf-tuaf ro he nafeek kuun anmatoom nok rasi naan. 6 Karu atoni' re' natenab nak, anmui' neno re' reko nneis na'ko neno bian sin, in nmoe' on naan he naruru' ma nakrira' in rais hormaat neu hit A'nakaf. Atoni' re' neuk sisi ma mnahat bian sin, bisa neuk ma naah he naruru' ma nakrira' in rais hormaat neu hit A'nakaf, fin in ntoit makasi neu Uisneno. On naan amsa' neu atoni' re' ka neuk fa sisi. In he naruru' ma nakrira' in rais hormaat neu hit A'nakaf amsa', ma in ntoit makasi neu Uisneno msa'. 7 Oras hit tmoin, hit ka tmoin fa neu hit tuak ii kuuk. Ma oras hit tmaet, hit ka tmaet fa neu hit tuak ii kuuk. 8 Fin karu hit tmoin fe', hit tmafuut fe' tok hit Usi'. On naan amsa' karu hit tmaet, hit tmafuut fe' tok hit Usi'. Onaim maski hit tmoin, ai' atmaet, hit atjair Iin na fe'. 9 Es naan ate Kristus anmaet, rarit anmoni nfain. In nmoe' on naan he In bisa njair Usif neu amaets ein, ma neu tuaf-tuaf re' anmonin fe'e msa'. 10 Onaim nansaa' am es ho munaib ho tuam aan on re' afeek rasi, he mkaritik ho aom-bian asraint ein? Nansaa' am es ho musmeru' sin? Fin hit arkit ok-oke' ro he tbaisenu t'ain Uisneno, he In naprikas hit i'moink ii mese'-mese'. 11 Matu'i na'ko unu' anbi Suur Akninu' Uisneno mnak, “Hit Usi' kuun es neikn On natoon am nak, ‘Mansian ii ok-oke' of na'ruir ein ma nri'tuun he na'besan Kau, ma nakriir ein rais hormaat neu Kau. Tuaf mese'-mese' of anpaek sin feefk ein he n'au ma nmanauk ein, am nak, Au 'jair sin Usif, natuin Au re' ia, Uisneno.’ ” 12 Onaim hit arkit ok-oke' ro tataah ma tasaah he tatoon teu Uisneno tak, hit tmoe' on mee, ma nansaa' am es hit tmoe' on naan.
Kais mumouf ho aom-bian atoin asranit
13 Unu' te, hi abitan Roma misaeb sanat meu hi aom-bian atoin asraint ein. Misnaas nai! Reko nneis, hit tafeek on nai: hit kais atmoe' he hit aok-bian ii, nastuun. Hit kais takreo tamouf sin he sin nmo'en sanat. 14 Natuin au 'mafuut 'ok hit Usi' Yesus, au uhiin batuur on nai: ka tiit fa rasi mese' re' bisa n'oemetab atoni' msa', tar antea in ka bisa n'onen antein fa neu Uisneno. Mes karu tuaf es natenab nak, baer es an'oemeetb ee, tar antea in nnaben ate in ka nmui' fa hak he n'onen antein, maut he bare' naan anjair baer nuni neu ne. 15 On re' karu ho meuk sisi, ma rasi naan anmoe' ho aom-bian neekn ee nsuus, ho ka mururu' ma mukrira' fa ho manekam meu ne, ai'? Maran ma mtahan ho tuam aan! Kais mureu' ho aom-bian, natuin suma he mbukae kuum saa' es! Fin Kristus anmaet neu tuaf naan amsa'. 16 Ka reko fa karu ho mmoe' rais jes, re' ho maan ee neu reko, mes tuaf bian na'uab na're'uf ho kaanm aan, natuin sin naan ho 'mo'em naan, maufinu. 17 Mutenab murek-reko'! Fin Uisneno, hit Usif. Mes hit ka tjair fa Uisf ee Iin na natuin hit suma taah-tiun tatuin atoorn ahaa. Kaah fa, tua! Karu hit troim he tjair Uisf ee Iin na, hit ro he tmoe' reko, hit neek ii kninu', hit tmoin tamneo he tmarame' es nok es, ma hit neek ii nmariin. Rasin re' ia ok-oke' bisa njarin, karu hit tmafuut piut tok Uisneno In Asmaan Akninu'. 18 Tuaf re' ntuthae Kristus on re' naan, anharineb Uisneno In nekan. Ma tuaf bian anparikas narek-reko' tuaf naan in a'monin, rarit naikas tuaf naan in kanan am nak, “In re' naan, atoin reko!” 19 Onaim hit ro he thaek piut he tmoni ma tmarame' es nok es, ma tmaha'tanin es nok es. 20 Kais mireu' Uisneno In mepu nbi tuaf bian in a'monin, suma natuin rasi re' nmatoom nok bukaet. Uisneno nfee mainuan he hit tbukae saa'-saa' aah, fin bukaet ein naan nakniun' ein ok-oke'. Mes karu ho mmaka'rasi' mok ho aom-bian anmatoom nok rais bukaet, ho msaan. Kais on naan, tua! 21 Reko nneis maran ma mtahan ho tuam aan. Kais meuk sisi, ai' miun tua min-kase, ai' mbukae saa' es, re' nmoe' ho aom-bian aan anmouf. 22 Au sairt ii on nai: karu ho m'aa' nekaf mok Uisneno, rarit ho mufeek am mak, ho mroim he mpirsai Je nmatoom nok bukaet, ho mupein upa' ma pa'e, fin rasi naan beres anrair. Kais mutenab mak, ho mmo'e msaan, ai' kaah. Fin ho mufeek amrair on naan ate. 23 Mes karu ho neekm aan na'oni', rarit ho meuk saa' es, re' ho mnaben ate ho m'oemetab ho tuam aan, Uisneno nasaan ko, natuin ho ka mutuin fa saa' re' ho mpirsai je mbi ho nekam oras ho mbukae. Fin karu ho he mmoe' saa' aah, mes ho mpirsai mmak, naan ansaan anbi Uisneno In human ma In matan, naan ansaan anrair.
Am'usaha he mturun tuaf bian he sin npirsain ma'tani' nneis
1 Hit re' atpirsai ma'tani', ro he tmui' neek mainuan he tturun ma tbaab tuaf re' ka na'bei' fa, he sin naarn ein ma ntaahn ein nbin susat. Ka reko fa karu hit suma tharineb hit tuak ii kuuk. 2 Au sairt ii on nai: hit es-es ate, ro he t'usaha he tmoe' rais reko teu hit aok-bian asraint ein, maut he sin rais pirsait naan na'kii' ma naheer antein. Nok ranan naan, sin nmarinan natuin hit a'moe'k ein. 3 Fin Yesus Kristus kuun ka nmoe' fa In meup goe he suma nhariinb ahaa In nekan, mes In nharineb Uisneno In nekan amsa'. Naan on re' matu'i nain anbi Suur Akninu' Uisneno nmatoom nok saa' re' of anjair neu Nai' Yesus am nak, “Sin rais ma'munu' ma man'akan neu Ko, nmouf ma nsae ntoom Kau msa'.” 4 Are' saa'-saa' ein re' unu' te tuaf antui sin anbin Uisneno In Suur Akniun' ein, antui sin he nanoni' kit. In naruru' ma nakrira' neu kit ranan he na'be'ib kit attein, taran ma ttahan piut, ma In Kabin ma Prenat sin imsa' nfee rais ma'haba' neu kit. Nok ranan naan hit bisa tpa-pao he tkius Uisneno naruru' ma nakrira' In nekan arekot neu kit. 5 Uisneno es re' anha'tain Iin na he bisa naarn ein ma ntaahn ein anbin susat ma nana'renat. Ma In es re' anha'tain hit neek ii msa'. Au 'onen he 'toit Je, he In naruru' ma nakrira' ranan, he hi bisa mmoin nekaf mese', mituin Yesus Kristus In romin. 6 Fin karu hi nekaf mese' on naan, hi bisa mibua he maikas ma mbo'is Uisneno. In re' naan, hit Usi' Yesus Kristus In Amaf.
Uisneno In Rais Reko neu atoin Yahudis ma ka Yahudis fa msa'
7 Onaim hi ro he mmatoup es nok es, on re' Kristus antoup ki. Fin karu hi mmoin on naan, of mansian ii naikas na'rat-ratan Uisneno In kanan. 8 Au utoon 'eu ki on nai: Kristus anmoe' Jon on re' aan renu'-aan reka' he nturun ma nbaab atoin Yahudis sin he nahinin nak, Uisneno na'uab batuur. Ma Kristus anmoe' Jon on re' aan renu'-aan reka' he nanokab ma namtisib are' kanan rasi re' Uisneno nba'an he nmoe' sin neu hit be'i-na'i sin imsa'. 9 Nok ranan naan, are' pah bian re' ka Yahudis fa, naikas ma nbo'is Uisneno. Fin sin nahinin nak, In nkasian kit ok-oke'. Naan on re' ka'o Daut antui nain je na'ko unu' nbi Suur Akninu' mnak, “Es naan ate au he 'aikas u'rat-ratan Ho kaanm aan, 'eu uuf am pah bian sin, tua. Au he 'sii siit pures ma bo'is 'eu Ko, 'bi pah bian sin huumk ein ma sin maatk ein, tua.” 10 Matu'i nbi bare bian antein et Suur Akninu' msa' mnak, “Hi atoin sona' ma 'teta' mi'ko bare 'teet ein. Amharineb hi neekm ein naan nai, mibu-bua mok Uisneno Iin na kuun.” 11 Anbi bare bian anteni' anbi Suur Akninu', ka'o Daut antui mnak, “Hi re' mi'ko uuf am pah bian, amnao he mitoon meu mansian ii ok-oke' anmatoom nok Uisneno In pinan ma krahan, he sin npures ma nbo'is hit Usi' msa'.” 12 Anbi bare bian anteni' anbi Suur Akninu', ka'o Yesaya ntui mnak, “Na'ko nai' Isai in anah, usif nai' Daut, of anpoi ma nboor neem anbi in sufan ma ka'un tuaf es. In of es re' annaa' aprenat neu uuf ma pah bian sin. Sin nahini nrarin neu In he nkoen On neem. Rarit sin anpa-pao Goe, fin sin nahinin nak, In re' naan, sekau.” 13 Saa'-saa' re' hit tafnekan ma tharap sin ok-oke', na'uu ma na'baa' na'kon Uisneno. Karu hi mpirsai Je, In es re' anmoe' hi neekm ein anmarinan ma ntainiin ein. Maut he Asmaan Akninu' Uisneno In kuasan, anmoe' ki he mpirsai ma mi'kii' anmatoom nok saa' re' In nmo'e.
Uisneno nhaef nai' Paulus he nnao natoon In Rais Reko
14 Aok-bian arki! Au 'pirsai 'ak, hi neekm ein naheun nok rais rekon, hi mihini mfa-faun, ma hi bisa mmafainekan es nok es. 15 Au 'tui maat-maat 'bi surat re' ia, he utoon ki no goes anteni' anmatoom nok rasi huma'-huma'. Au 'tui on nai, natuin Uisneno naruru' ma nakrira' In nekan arekot neu kau, 16 oras In nait kau 'jair Yesus Kristus In haef he 'nao utoon Uisneno In Rais Reko 'eu ka atoin Yahudis sin fa. Au unaob au mepu naan on re' a'naak rais pirsait es, re' nabarab too mfaun ein anjair fua'-tuur es, re' nharineb Uisneno In nekan. Fin Uisneno In Asmaan Akninu' nakninu' sin, he Uisneno bisa ntoup sin. 17 Natuin au 'mafuut 'ok Yesus Kristus, etun au bisa u'aiti' au humak a'bi Uisneno In human ma In matan. 18 Au ka ubrain fa he u'uab rasi 'teta'. Au suma ureta' Kristus In meupn ahaa, ma on mee m'es na' In npaek kau. Oras ia nmui' atoin ka Yahudis fa re' nneen ma natniin Kristus, natuin Uisneno npaek kau, he ururu' ma ukrira' ranan a'paek au uab ein ma au 'meupk ein. 19 Kristus anfee kau kuasa na'ko Uisneno In Asmaan Akninu', he au bisa 'moe' rais sanmakat huma'-huma'. In nfee kau kuasa naan he naruru' ma nakrira' mnak, Kristus re' naan, sekau. Nok ranan naan, au utoon a'rair tuaf-tuaf nbi mee-mee, are' saa' ii ok-oke' nmatoom nok Kristus in Rais Reko. Es naan ate, au utoon u'ko kota Yerusalem, anfuun am nateef tar antea pah Ilirikum anpaumaak pah Itali. 20 Na'ko un-unu' te, au utenab 'ak, “Au umnau he utoon anmatoom nok Kristus 'eu tuaf re' ka nneen ma natniin niit fa In Rais Reko!” Fin au ka 'roim fa he unoni' 'bi bare re' atoni' bian sin nanoni' nrari nbin bare naan. 21 Anbi Suur Akninu' Uisneno matu'i mnak, “Uuf am pah re' ka nneen ma natniin niit fa nmatoom nok Uisneno, sin re' naan, of es re' niit Ee. Atoni' re' ka nneen ma natniin niit fa saa'-saa', sin re' naan, of es re' nahini ntoom, anmatoom nok Ne.”
Nai' Paulus anruun oras he nnao neu kota Roma
22 Natuin au 'meup gui on naan, etun es na' au ka 'eiti 'kius 'iit ki fa fe'. 23 Mes oras ia, au urair 'mepu 'bi ia. Ma au urair toon-toon au umnau he 'eiti 'kius ki. 24 Karu au 'nao 'eu pah Spanyol, au he 'eisi 'kius ki. Rarit karu au 'eisi 'tahan 'bi naan, hi bisa mturun ma mbaab kau nok noni-roit he 'nao 'eu Spanyol. 25 Mes oras ia, au he 'nao 'eu Yerusalem fe', he 'tuthae Uisneno Iin na nbi naan. 26 Fin hit aok-bian sin etan propinsi Makedonia ma propinsi Akaya nfee nrarin roi kolekte he nturun ma nbaab atoin kasian sin re' npirsain neun Kristus etan Yerusalem. 27 Sin he nmo'en on naan, natuin sin nnaben ate sin nmu'in tusa' neun hit aok-bian sin abitan Yerusalem. Fin atoni' na'ko pah bian sin nbin mee-mee msa', antoup rais reko re' Uisneno In Asmaan ee nfee neu atoin Yahudis sin fe'. Es naan ate, reko karu atoin asranit re' ka Yahudis sin fa npaek sin a'mui'k ein he nturun ma nbaab sin aok-bian atoin Yahudis sin. 28 Onaim karu au 'meup urair mepu ia, he 'fee roi kolekte ia 'eu hit aok-bian abitan Yerusalem, au he 'eisi 'kius ki oras au he 'nao 'eu Spanyol. 29 Karu au 'uum, au 'eik tetus-athoen na'ko Kristus. 30 Aok-bian arki! Natuin Yesus Kristus anjair hi Usi', ma natuin Uisneno In Asmanan anmoe' ki ma mmaneek es nok es, es naan ate au 'toit he hi m'onen batuur-batuur he Uisneno nturun ma nbaab kau. 31 Amtoit he Uisneno npafa' ma npanat kau 'bi propinsi Yudea, he atoni' re' ka npirsai fa Uisneno kais anmoe' maufinu neu kau. Ma mtoit he karu au 'nao 'tuthae atoin asranit abitan Yerusalem ate, sin ntoup kau nok reko. 32 Rarit karu tatuin Uisneno In romin, au bisa 'uum a'kius ki nok neek marine. Au he usnaas akre'o 'bi naan. 33 Au 'onen ma 'toit he Uisneno nok ki. Fin In es re' bisa nmoe' atoni' he nmoni nbi rais rame' es nok es. Batuur on naan, tua!
Nai' Paulus ansonu' haan tabes ma haan buseet neu aok-bian sin abitan Roma
1 Anbi surat re' ia, au he 'teek ma utoon ki bi Febi 'eu ki, ma 'toit he hi mtoup goe. In es re' sin nait je he na'naak neu jema'at et kota Kengkrea. 2 Au 'toit he hi mtoup goe nok reko, on re' hit atoin asranit kit atmatoup es nok es, natuin in nmafuut nok hit Usi'. In nperluu saa' ate, mturun ma mbaab ee. Fin in es re' anturun ma nbaab kau ma too mfaun ein na'ko unu'. 3 Haan tabes ma haan buseet neu ain Priskila ma in mone aam Akila. Hai minaob miit Yesus Kristus In mepu mfaun mibu-bua. 4 Sin nua sin he noi nmaten he nafetin kau na'ko siraak. Mes ka au 'mees fa re' a'toit makasi 'eu sin. Fin ka atoin Yahudis fa re' njair atoin asranit na'ko jema'at anbi mee-mee, antotin makasi msa' natuin sin anmo'en rais reko. 5 Au 'sonu' haan tabes ma haan buseet 'eu too mfaun ein re' nabuan ma nakrein nbin ain Priskila ma aam Akila sin umi'. Haan tabes ma haan buseet 'eu au partei, nai' Epenetus. In re' naan, tuaf ahunut re' npirsai neu Kristus anbi propinsi Asia. 6 Haan tabes ma haan buseet 'eu bi Mia. In nmeup ma'tani' nbi hi sonam ma hi tnaanm ein. 7 Haan tabes ma haan buseet 'eu aam Andronikus ma ain Yunia. Sin re' naan, atoin Yahudis on re' au. Sin npirsai nrarin neun Kristus oras au ka 'pirsai fa fe'. Unu' te, sin nbin bui je nanan nabuan nok kau. Sin njarin Uisneno In haef ein, ma too mfaun ein nahiin sin. 8 Haan tabes ma haan buseet 'eu nai' Ampliatus. Au 'neek ee, natuin in nmafuut nok hit Usi'. 9 Haan tabes ma haan buseet 'eu nai' Urbanus. In nanaob Kristus In meup goe msa' nabu-bua nok kai. Haan tabes ma haan buseet 'eu nai' Stakis, re' au 'neek. 10 Haan tabes ma haan buseet 'eu nai' Apeles. In nasoin naan on na'ko kreot. Batuur een, in npirsai nrair neu Kristus. Haan tabes ma haan buseet 'eu nai' Aristobulus in nonot-asar sin ok-oke'. 11 Haan tabes ma haan buseet 'eu nai' Herodian. In atoin Yahudis on re' au. Haan tabes ma haan buseet 'eu nai' Narkisus in nonot-asar sin ok-oke' re' npirsai neun Kristus. 12 Haan tabes ma haan buseet 'eu bi Trifena ma bi Trifosa. Sin nanaob hit Usi' In meup goe msa'. Haan tabes ma haan buseet 'eu au partei, bi Persis. Fin in imsa' nmeup ma'tani' neu hit Usi'. 13 Haan tabes ma haan buseet 'eu nai' Rufus. Hit Usi' es re' anpiir ma nbetis naan ee. Haan tabes ma haan buseet 'eu in ainf ee msa'. Fin in re' naan, on re' au ain honi'. 14 Haan tabes ma haan buseet 'eu nai' Asinkritus, nai' Flegon, nai' Hermes, nai' Patrobas, ma nai' Hermas, ma aok-bian sin re' natua nok sin. 15 Haan tabes ma haan buseet 'eu nai' Filologus, bi' Yulia, nai' Olimpas, nai' Nereus ma in fetof, ma atoin asraint ein re' nabuan nok sin. 16 Karu hi mibua, mseun ma mtoup es nok es ampaek rais matabes ma mmaneek anbi neek akninu' re' pantas neu atoin apirsait ein. Kristus In jemaa't ein abitan ia, ansoun ein haan tabes ma haan buseet neu ki msa'.
Nai' Paulus anfaineek sin
17 Aok-bian arki! Au 'toit he hi mpaant om, fin anmui' tuaf he npe'en ma nbatis ki, ma nakreo namouf ki. Saa' re' sin natoon ki naan, anraban saa' re' hai minoni' mrair ki. Onaim kais ammapartein mok atoni' human on re' sin! 18 Sin ka nmepun fa neun hit Usi' Yesus Kristus. Sin suma nmepun neu sin tuak ein kuuk. Sin nfeef rekon nok tuaf re' ka nahiin fa fe' nak, mee es re' reko, ma mee es re' maufinu. Sin nfeef rekon he nputa-kriun. 19 Tuaf anbi bare mee-mee jah annenan nrarin am nak, hi mituin piut meu Uisneno In romin. Etun au neek ii nmariin natuin hi on naan. Au 'roim he hi mjair ahinit anmatoom nok rais rekon, ma kais amseor sin nok are' kanan rais maufinu. 20 Uisneno es re' bisa nfee kit mamut, rame' es nok es, ma tainina'. In of es re' nareu' nitu 'naakf ee in kuasa, ma naruru' mnak, hit es re' amnisat. Naan ka 'roo fa goen. Au 'onen ma 'toit he hit Usi' Yesus Kristus naruru' ma nakrira' In nekan arekot neu ki. 21 Nai' Timotius re' nmeup nabu-bua nok kau, nsonu' haan tabes ma haan buseet neu ki. Nai' Lukius, nai' Yason, ma nai' Sosipater ansonu' haan tabes ma haan buseet amsa'. Sin re' naan, atoin Yahudis on re' au. 22 (Au re' ia, nai' Tertius kau, atui surat re' ia, utuin saa' re' nai' Paulus anreun he au 'tui. Au 'sonu' haan tabes ma haan buseet manekat amsa', fin au re' ia, hit Usi' Iin ja msa'.) 23 Au, nai' Paulus kau, utua 'bi nai' Gayus in umi. Atoin asraint ein biasa nabuan he nakrein nbin in umi. In nsonu' haan tabes ma haan buseet neu ki msa'. Nai' Erastus, re' bendahara kota, ma hit aok-bian nai' Kuartus, ansoun ein haan tabes ma haan buseet amsa'. 24 Au 'toit he hit Usi' Yesus Kristus naruru' ma nakrira' In nekan arekot neu ki arki. On re' naan, tua!
Uisneno naan, ma'tani' nneis
25 Ampures ma mbo'is Uisneno! Fin In nmui' kuasat he na'be'ib ki. In Rais Reko, nak on re' naan, ma au unoni' ma utoon on re' naan amsa', oras au ubeno' ma utoon anmatoom nok Yesus Kristus. Uisneno es anfei natoon kit are' rasin naan ok-oke' re' nmatoom nok Kristus, re' un-unu' te sin ka nahiin sin fa, natuin ma'nifa' fe'. 26 Mes oras ia, rasin re' Uisneno In mafefa kniun' ein un-unu' antui nain sin anbin Suur Akninu', ro mamniit ein een. Uisneno ro ka nmaet fa, In es re' an'ator he tuaf ein na'kon puru ma pah anfuun am nateef bisa nahiin rasi re' unu' te ma'nifa'. Nok ranan naan, sin bisa npirsai Je, ma sin nmoe' natuin In romin. 27 Suma In nmees kuun, Uisneno. Suma In nmees kuun nahiin batuur-batuur are' kanan rasi. Au 'ait siit pures-bo'is 'eu Ne, natuin Yesus Kristus In 'mepun! Tebes, ro namneo, tua! Au surat antuu' ma nheu' on naan, tua. Saloom, Au nai' Paulus kau, tua.
Saloom
1 Surat re' ia na'ko au, nai' Paulus kau, tua. Uisneno npiir inrair kau he 'jair Yesus Kristus In haef. Ma nai' Sostenes nsonu' haan tabes ma haan buseet neu ki msa'. 2 Au 'tui ma 'sonu' surat re' ia 'eu ki, es re' Uisneno In atoin apirsait ein abitan kota Korintus. In npiir naan ki he mjair In tuaf akniun' ein, natuin hi mpirsai mrair Yesus Kristus. In nakninu' ki on re' In nakninu' apirsait ein ok-oke' et mee-mee jah amsa'. Fin sin ntotin turun-babat na'ko hit Usi' Yesus Kristus amsa', re' Uisneno nba'an nain na'ko unu' he nreek Ee neem. Rarit In njair hit Usi', ma In njair sin Uis amsa'. 3 Au 'onen 'eu hit Ama' Uisneno, ma hit Usi' Yesus Kristus. Au 'toit he Sin naruru' ma nakrira' Sin nekak arekot neu ki, maut he hi bisa mmoin nok mamut, rame' es nok es, ma tainina'.
Nai' Paulus antoit sukuur, natuin atoin Korintus sin
4 Ansuun oras au umnau ki, au u'uab 'ok au Usi' m'ak, “Makasi kou'-ko'u natuin atoin Korintus sin rais pirsait!” Fin Uisneno naruru' ma nakrira' In nekan arekot neu ki, natuin hi mpirsai piut meu Yesus Kristus, re' In nreek Ee neem. 5 Rarit In nfee ki 'be'if ma ma'tanif he minaob mepu ma re'ot huma'-huma', natuin hi mmafuut mok Ne. Naan anmoe' ki mjair atoin amu'it ambi hi neekm ein. Es naan ate, hi mihiin batuur-batuur rasin re' pentiing anneis anmatoom nok In raan a'honis. Hi mihiin ranan mee es re' reko nneis he mitoon amsa' meu tuaf anmatoom nok Kristus. 6 Rasin naan ok-oke' naruru' ma nakrira' mnak, rasin re' hai mitoon sin meu ki nmatoom nok Kristus, naan na'uu ma na'baa' ma'tani' nrair et hi neekm ein. Etun hi mpirsai ma hi neekm ein na'ki'in fe', mak rasin re' naan ro batuur. 7 Onaim hi mtoupu mrair are' rais arekot sin re' Uisneno In Asmanan anbatin nfee neu Iin na. Ka nabait fa saa' es a'kre'o msa'. Rarit hi mpa-pao neno naan, re' of Uisneno nfei je he naruru' ma nakrira' hit Usi' Yesus Kristus, neu mansian ii ok-oke'. 8 Kristus naan, es re' anha'tain ki he hi maran ma mtahan piut tar antea In nkoen On anfain neem anbi pah-pinan ia. Nok ranan naan, hi ka mmouf fa, ma ka nmui' fa tuaf re' bisa nait ma nasaeb sanat neu ki. 9 Hit bisa tpirsai Uisneno In Kabin ma Prenat, fin saa' re' In na'uab ee naan, In nmoe' je te, njair. Rarit ro tebes In of anmoe' rasin re' ia neu ki. Fin In es re' anfei ranan he hi bisa mihiin mirek-reko' In Anah, es re' hit Usi' Yesus Kristus.
Jema'at ki arki ro he mjair mese', kais ampee' ma msisaekn om
10 Aok-bian manekat arki! Anbi rasi ia, au u'uab 'eik hit Usi' Yesus Kristus In kanan. Onaim au 'toit batuur-batuur he hi misnasab matoes nai. Mes am'usaha he mmoin nekaf mese', ma kais ampee' ma msisaekn om. Hi ro he mitenab mirek-reko' ma namnuut mibu-bua, maut he hi mihiin mak, hi mpooh ma mnaa' sarit mese'. 11 Fin anmui' tuaf na'ko bi Kloe in uim je nanan re' neem natoon kau mnak, na'ko hi arki, bian anmatoen piut. 12 Au sairt ii on nai: hi bian mak, “Au re' ia, nai' Paulus iin na!” Bian nak, “Au re' ia, nai' Apolos in tuaf ein na.” Ma nmui' bian antein anmaktoon ein am nak, “Au re' ia, utuin aam Pe'u!” Bian antein nak, “Au re' ia, a'neen ma utniin 'eu Kristus anmees jah!” 13 Hi teenb ein, on mee? Kristus In nonot-asar ka bisa nbaits ok fa. Ai' hi mitenab am mak, au es re' amates a'bi hau nehe 'eu ki? Kaah fa, joo! Ai', oras sin nasrain ki npaek au kanak he nataam ki mjair au ngguin? Ka on fa naan, tua! 14 Au 'toit makasi 'eu Uisneno, fin oras au 'bi naan 'ok ki, au ka usrain fa tuaf. Suma au usrani haa nai' Krispus ma nai' Gayus. 15 Nok ranan naan, ka nmui' fa tuaf nak, “Sin nasrain kau npaek nai' Paulus in kanan, rarit au 'jair nai' Paulus iin na.” 16 (Au fe' umnau. Au usrain tuaf bian a'bi nai' Stefanus in umi msa'. Mes au ka umnau fa karu nmui' tuaf bian antein re' au usrain, ai' kaah.) 17 Fin Kristus ka nreek haefan kau fa he 'nao usrain tuaf. Au mepu re' he u'teesn ee ji, es re' 'nao utoon Uisneno In Rais Reko. Mes karu au utoon tuaf on naan, In ka nroim fa he u'uab 'eik mahinif, he ururu' ma ukriir ahaa 'eik uab hinef ma manoef. Fin karu au u'uab on naan, naan nabait kuasa na'ko reta' re' anmatoom nok Kristus In a'maten anbi hau nehe.
Kristus antoup In kuasa na'ko Uisneno
18 Anmui' tuaf natenab nak, are' kanan rasin re' hit tareta' sin anmatoom nok Kristus In a'maten anbi hau nehe naan, mono 'maten. Mes tuaf human on re' naan, of anbaits on na'ko Uisneno. Te kaah, neu kit, Kristus In a'maten naan naruru' ma nakrira' Uisneno In kuasa he nsoi nafetin kit na'ko hit sanat ma penu sin. 19 Naan on re' Uisneno In mafefa kninu' nai' Yesaya ntui niit am nak, “Uisneno nak, ‘Are' kanan rasi re' ahiint ein nahiin sin, Au of a'pukai ma 'sisa'en 'ain sin, he njair rasi re' ka ma'osa' fa. Sin mahiink ein nahuumb on, on mee-mee msa', Au of 'ait i'porin 'ain sin, he njair rasi re' ka mapake' fa.’ ” 20 Unu' te, Uisneno ro tebes na'uab on re' naan. Rarit oras ia, anjair on mee? Ahiint ein, anjarin on mee? Tunggur agaam ein, anjarin on mee? Ma re' tuaf re' na'siti' nahiin rasi ma niis, anjarin on mee? Amneen miit! Uisneno nmoe' sin on re' amonot! In nfaki nrair tenab ma ronef re' na'uu ma na'baa' anbi pah-pinan ia, ma nmoe' sin he ka ma'osa' fa saa'-saa'. 21-22 Uisneno In mahinin, ma'tain re'uf. Maski mansian ii naan in tuan ee ahinit, mes sin tenab ma roenk ein kuuk ka nanokab fa he sin bisa nahiin batuur Uisneno. Maski on naan amsa', mes Uisneno anpaek In mahinin he nfei ranan neu mansian. Fin unu' te, In natenab am nak, “Maski mansian ii nak Au haef ein amoont ein, mes on mee-on mee msa', Au ro he 'reek haefan tuaf he nnao natonan sin rasi re' batuur anmatoom nok Kau.” Fin Uisneno nafeek anrair he npaek haan beno re' In haef ein neik je naan, he tuaf bisa npirsai Je. In he npaek ranan naan he nsoi nafetin tuaf na'ko sin sanat ma penu sin. Mes mansian ii naan Uisneno In ranan naan nak, mono. Etun sin ka nromin fa he ntoe natuin Uisneno In haef ein. Fin atoin Yahudis sin suma ntoitn ahaa rais sanmakat huma'-huma', he sin bisa nkius Uisneno In kuasa. Ma atoin Yunanis sin suma nromin he nnenan kuuk rais mahiin ein re' matopu' ma ntaam neu tenab ma ronef, natuin sin teenb ein kuuk. 23 Maski on naan amsa', mes hai re' amjair Uisneno In haef ein, suma mnao he mitoon meu tuaf am mak, “Uisneno nreek anrair Kristus, es re' Tuaf re' In nba'an nain he nreek Ee neem. Rarit tuaf bian ankuus na'maet Je nbi hau nehe.” Oras atoin Yahudis sin anneen reta' naan, sin he ntorak ma nporin rasi naan, fin natuin sin tenab, Tuaf re' Uisneno he nreek Ee neem, ka bisa nmaet fa on re' naan. Oras atoin Yunanis sin anneen reta' naan, sin nateenb ein am nak, “Reta' naan ro mono batuur-batuur!” 24 Mes anmui' tuaf re' Uisneno npiir nain je he njair Iin na. Bian sin na'kon atoin Yahudis, ma bian ka atoin Yahudis fa. Natuin sin re' naan, Kristus In a'maten naruru' ma nakrira' nrair sin am nak, Uisneno In kuasan kou' re'uf ma In mahinin, ma'tain re'uf. 25 Maski mansian ii naan Uisneno In ranan naan nak, amonot, mes In nahini nneis na'ko sin. Ma maski sin natenab Uisneno ka nmui' fa kuasa saa'-saa', mes In kuasa ko'u nneis na'ko sin. 26 Aok-bian manekat arki! He hi bisa mihiin au uab re' ia, mimnau oras hi 'hakem ma hi 'naom, oras Uisneno npiir naan ki he mjair Iin na. Tatuin mansian ii in 'resit ma taiba', anbi hi tnaanm ein ka nmui' fa tuaf namfau re' nahiin, ka nmui' fa tuaf re' nmui' pengaru, ma ka nmui' fa tuaf amfaun na'ko nonot-asar re' makana'. 27 Mes Uisneno npiir he npaek tuaf re' mansian ii naan ee amonot, he namaeba' tuaf re' naan in tuan ee ahinit. Ma In npiir he npaek tuaf amsa' re' mansian ii naan ee ka nmui' fa kuasa saa'-saa', he namaeba' tuaf re' naan in tuan ee nmui' kuasa. 28 Rarit In npiir naan a'baut re' ka makana' fa, re' mansian ii nkana'paar sin. Fin Uisneno he npaek sin he nmoe' tuaf re' naan in tuan ee ma'tani', njair on re' ka ma'osa' ntein fa. 29 Henati', oras atoni' anbaisenu n'ain Uisneno, ka nmui' fa tuaf es amsa' re' bisa npaas in a'basan nak, in re' naan, ro ma'tani'. 30 Fin Uisneno nmees kuun es re' nfei ranan he hi bisa mtaam amjair Yesus Kristus Iin na. Uisneno es re' nmoe' Nai' Yesus anjair Tuaf re' nfee kit In mahinin. Nai' Yesus naan, es re' nmoe' kit bisa tmarame' tok Uisneno. Nai' Yesus naan, es re' nmoe' kit bisa tmoni kninu' ma tamnoon. Ma In es re' nsoi nafetin kit na'ko saant ii in kuasan. 31 Naan on re' matu'i nbi Uisneno In Suur Akninu' mnak, “Sekau nroim he npures ma nbo'is, reko nneis sin npures ma nbo'is hit Usi' In a'mo'en ma taos. Kais naikas ma nanaib sin tuak ein kuuk!”
Hit ro he tatoon maat-maat teu are' kanan mansian anmatoom nok Usif Yesus In a'maten anbi hau nehe
1 Aok-bian manekat arki! Unu' te, oras au 'uum 'eu ki, au 'fei ma utoon 'eu ki Uisneno In rais ma'nifa' re' unu' fe'e te, mansian ii ka nahiin je fa. Mes au ka 'eik fa uab ein naan he u'uab be'o. Ma au ka 'paek fa uab boo msa' he ururu' ma ukrira' au mahiin ki kuuk. 2 Oras au ubua 'ok ki, au u'tenab on nai: au suma ururu' rasi mees' aah, es re' Yesus Kristus. In re' naan, Tuaf re' Uisneno nba'an nain Je na'ko unu' he nreek Ee neem. Mes oras Nai' Yesus anpoi ma nboor neem, mansian ii nkuus na'maet Je nbi hau nehe. Fin suma rasi naan ahaa, re' au uhiin je batuur. 3 Neno naan, oras au ubua 'ok ki, au 'naben ate, au ka ubei' fa, ma au umtau ma u'ta'i msa'. 4 Au uabak ma au haan beno naan, bisa tahiin je nok akninu'. Fin au ka 'paek fa uab re' bainesi' he 'furi' ki. Kaah fa, tua! Mes oras au u'uab naan, kninu' nrair neu tuaf nak, Uisneno In Asmaan Akninu' an'ator kau, ma In kuasa nbi kau msa'. 5 Fin au utenab, ka reko fa karu hi mpirsai Uisneno, natuin hi mneen ma mitniin mansian ii in uab mahiin ein ahaa. Reko nneis hi mpirsai Uisneno, natuin In naruru' ma nakrira' In kuasan neu ki.
Uisneno nanoni' kit anmatoom nok rais mahinif re' batuur
6 Te kaah, oras hit ta'uab tok tuaf re' in rais pirsait ee namnais jen, hit tanoni' tpaek uab ein re' ntaam neu tenab ma ronef. Mes ka ntaam fa neu teenb am ronef re' natuin mansian pah-piin ii in tenab, ai' natuin saa' re' anaa' apreent ein nanoni' sin oras ia. Fin noin' ein naan, of namnekun oke'. 7 Mes hai suma minoni' meu tuaf, rais mahinif re' nsaun neem na'kon Uisneno. Fin un-unu' te, oras pah-pinan ka njair fa fe', Uisneno na'nifa' rasin naan. Mes oras ia, In nafeek he nfei rais ma'niif ein naan neu kit, he hit tapein sapaaf anbi In pinan ma krahan. 8 Mes tuaf re' oras ia annaa' aprenat, sin ka nahiin fa Uisneno In mahinif re' batuur. Fin karu sin nahinin, ka neu fa he sin nkuus na'maet hit Usi' re' mapina'-makraha' nbi hau nehe. 9 Anbi Suur Akninu' Uisneno matu'i nmatoom nok Uisneno In rais ma'nifa' re' unu' te ma'koro' mnak, “Anmui' rasi re' mansian ii ka nkius niit ee fa fe' nok in matan fuan, ma nmui' rasi re' mansian ii ka nneen niit ee fa fe' nok in rukin, re' mansian ii ka bisa natenab naan ee fa. Te kaah, Uisneno nabarab ma naroitan nain rasin re' naan ok-oke', neu tuaf re' anneek Ee.” 10 Batuur unu' te, tuaf ka nahiin fa rasin naan, mes oras ia Uisneno npaek In Asmaan Akninu' he nfei rasin naan neu kit. Uisneno In Asmaan Akninu' naan, nahiin nain are' kanan rasin re' naan. In anparikas tar namnuut amsa' Uisneno In nekan nanan. 11 Hit es-es ate, atmui' kuuk asmanaf atbi hit nekak. Etun hit mansian ii tatenab ma tmoe' rasi huma'-huma', es-es ate nok iin ja. Ma ka tiit fa tuaf a'teta' re' nahiin batuur hit nekak nanan, suma hit asmaank aa kuuk. On naan amsa' Uisneno. Ka tiit fa tuaf es amsa', re' nahiin Uisneno In nekan nanan. Suma In Asmaan aa kuun es re' nahiin Je batuur. 12 Hit ttoupu trair Uisneno In Asmanan, ma In es re' an'ator kit. Etun hit ka tatuin fa mansian pah-pinan ia sin tenab. Natuin Uisneno In Asmanan et hit nekak nanan, etun hit bisa tahiin are' kanan rais reko re' In nmoe' sin neu kit. 13 Nati' te, hit ta'uab rasin naan. Fin hai mitoon rasin re' Uisneno In Asmanan nanoni' sin neu kai. Rarit hai ka minoni' fa tuaf ampaek uab re' antaam neu mansian ii tenab. Mes hai minoni' mpaek uab na'ko Uisneno In Asmanan, neu tuaf re' nahiin Je. 14 Mes karu nmui' tuaf re' ka nahiin fa Uisneno In Asmanan, rarit in nneen hai uab ein, in ka ntoup reko fa. In natenab, “Saa' na es re' naan? Ka ntaam fa neu tenab ma ronef!” Te kaah, maski on naan amsa', tuaf naan ka bisa nahiin fa rasin naan, fin In ka nmoni nmafuut fa nok Uisneno In Asmanan. 15 Tuaf re' nmoni nmafuut nok Uisneno In Asmanan, es re' bisa nahiin are' kanan rasin naan, ma bisa nahiin mee es re' batuur. Mes tuaf bian sin n'ukur ate ka niis naan fa tuaf naan. 16 Bisa on mee? Fin matu'i nbi Suur Akninu' mnak: “Sekau bisa nahiin ma nakeo Uisneno In tenab? Ai' sekau es re' bisa n'ator ma nreun Uisneno, he In nmoe' natuin tuaf naan in fainekat? Ka tiit fa tuaf mese' msa', tua!” Te kaah, hit bisa tahiin rasin naan, natuin Kristus anturun ma nbaab kit he hit bisa tatenab tatuin In tenab.
Hit apirsait ii ro he tmeup nekaf mese' teu Uisneno, ma kais atmatoe es nok es
1 Aok-bian manekat arki! Neno naan oras au 'bi naan, hi on re' tuaf re' ka mmafuut fa fe' mok Uisneno In Asmanan. Fin hi suma mroim mituin hi roim ein kiim, on re' mansian biasa. Es naan ate, au ka bisa u'uab 'ok ki fa on re' atoni mnasi', fin hi on re' ri'aan ein fe'. 2 Au ro he unoni' ki anmatoom nok rasi re' ma'kaaf aah, fin hi ka mibarab fa fe' he mtoup rais ma'fena' re' he taknutu' tteni' on re' ri'ana' re' ka bisa fa fe' he neuk sisi. Te kaah, hi ro he mi'bei' on re' atoni mnasi' re' biasa neuk sisi. Mes oras ia, hi fe' on re' ri'ana kru'uf re' suma nahini haa he nsuus. 3 Fin hi fe' mitenab on re' tuaf re' suma natuin sin roimk ein kuuk. Karu nmui' tuaf re' anneis ki, hi mitiun goe, ma mmatoe es nok es! Es naan ate, au 'ak hi suma mituin hi roim ein kiim. Nok ranan naan, hi on re' mansian biasa nbi pah-pinan ia goah. 4 Natuin hi bian mak, “Au re' ia, nai' Paulus iin na!” Ma bian mak, “Au re' ia, nai' Apolos iin na!” Ansuun oras hi mi'uab on naan, hi miruru' ma mikrira' mak, hi huma' mese' on re' mansian biasa goah.
Hi re' naan on re' poo'n es
5 Te kaah, nai' Apolos naan, sekau? Ma au, nai' Paulus re' ia, sekau? Fin hai nua kai re' ia, suma mjair aan reun ahaa. Hai es re' miruru' ma mikrira' ranan he hi bisa mpirsai Kristus. Nai' Apolos nanaoba' mepu natuin Usi' In aprenat. Ma au on naan amsa'. 6 Au es re' utoon uhun-huun 'eu ki anmatoom nok Kristus. Naan on re' au es re' a'seen fini. Rarit nai' Apolos neem nanoni' ki. Naan on re' in es re' anpoin finin re' au 'seen a'rair sin. Mes Uisneno naan, In es re' anmoe' finin naan natoron, nmonin, na'naen ma namrian. 7 Onaim tuaf re' anseen finin, in ka ma'osa' fa. Ma re' anpoin finin naan, in ka ma'osa' fa msa'. Suma rais jes re' ma'osa', es re' Uisneno. Fin In es re' anmoe' finin naan anmonin ma namrian. 8 Tuaf re' anseen, ma tuaf re' anpoin, sin anmepun nabu-buan, sin on re' ameput bubu mese'. Ma too mfaun re' nanaoba' Usi' In mepu, of In nbaras sin suus-haet ein naan. 9 aFin hit tbu'-bua' atjair Uisneno In ameput. Ma hi mjair on re' Uisneno In po'on re' In he nmeup naan.
Hi re' naan, on re' uim jes
9 On naan amsa', hi on re' uim jes, re' Uisneno he nafena'. 10 Uisneno naruru' ma nakrira' In nekan arekot neu kau. Etun au on re' a'naak tukan. Rarit Uisneno nturun ma nbaab kau he au unoni' ki 'eik rasi 'suik fein na'ko unu', he uhake' fanderen re' ma'tani' 'bi hi 'monim. Rarit tuaf bian nanoni' ki, he sin nafeen ein anbin fanderen naan in tunan re' au 'mo'e. Mes tukan mese'-mese' ro he nmeup rek-reko he nafena' rek-reko ma batuur. 11 Fanderen re' ma'tani' nhake nrair, es re' Yesus Kristus. Onaim ka nmui' fa tuaf es, re' bisa nafena' fanderen bian anbi hi neekm ein, fin Uisneno nahake' nrair fanderen re' ma'tani' ma batuur. 12 Tebes, of anmui' tuaf re' he nafena' anbi fanderen naan npaek ramuan huma'-huma'. Bian anromin he npaken ramuan on re' noni mnatu', noin muti', ai' faut arimat. Bian he npaken ramuan biasa on re' hau, huun, ai' huu-musu. 13 Mes ansuun-suun ameput in meup goe of mamnita', ma too mfaun ein niit ma nahiin in mepu naan, reko ai' kaah? Fin oras Uisneno of nafeek ansuun tuaf in rasi, Uisneno he n'ui je, nahuum on re' In npaek ai he nakrira' tuaf-tuaf in meup goe bisa ntahan aa oo, ai' kaah? 14 Karu an'ui nrair tuaf es in meup goe npaek ai, ma ramuan re' in npaek je naan bisa ntahan fe', Uisneno of anfee in upan anbi neon goe tnanan. 15 Mes karu an'ui nrair tuaf-tuaf in meup goe npaek ai, ma ramuan re' in npaek je he nahake' nbi fanderen naan anputu te, Uisneno ka nfee fa neu tuaf naan upan saa'-saa'. Mes tuaf ameput naan bisa napein fetin fe', maski in on re' tuaf re' naen anpoi na'ko uim aputus, ma in he noi nmaet.
Hi re' naan, on re' Uisneno In uim onen es
16 Hi ro he mihiin mak, hi on re' Uisneno In uim onen es amsa', ma In Asmaan ee natua nbi in nanan 17 Ma karu nmui' tuaf re' nareu' Uisneno In uim onen, es re' In bare' 'tua-ha' naan, ampaant om, oo! Uisneno of nareu' niis ne msa'! Fin Uisneno In uim onen naan, kninu'. Es naan ate hi ro he kninu' msa'. 18 Ho kais mupoi ho tuam aan! Karu ho maan ho tuam aan ahinit, ma muhiin main are' saa'-saa' ii ok-oke' mutuin abitan pah-pinan oras ia sin mahiink ein, naan makrira' maat-maat anrair nak, ho ka muhiin fa rasi mese' msa'. Karu ho mukeo ma msadaar mak, ho ka muhiin fa saa'-saa', na' ho bisa mmurai munoni'. 19 Mansian pah-pinan oras ia sin tenab naan, Uisneno naan ee amoont ahaa. Fin matu'i et Suur Akninu' mnak, “Anmui' tuaf re' naan in tuan ee, ahinit ma amanoet, mes Uisneno of anpaek sin tenab ma roen reu'f ein naan kuuk, rarit nakreo ma namouf nafani' he nareu' sin!” 20 Matu'i nbi surat bian am nak, “Hit Usi' nahiin ma nakeo nrair saa' re' atoin ahiint ein natenab, ma tuaf re' ro tebes nahiin he nmoe' on mee, In nahini nrair nak, sin suma natenab are' rasi re' ruum am parsuum aah.” 21-22 Onaim hi kais maikas ma minaib tuaf es mak, in ro ma'tani'. Fin Uisneno es re' nait nanaib tuaf he na'naak ki. Are' saa'-saa' ii ok-oke' anjair hi ngguin een. Onaim hi a'naakt ein, on re': au, nai' Apolos, ma nai' Petrus, hai ok-oke' mjair hi ngguin. Ma are' kanan rasi nbin pah-pinan ia, anjair hi ngguin amsa', maski hi mmoin ai' mmaet, oras ia ai' amnemat, are' saa' ii ok-oke' njair hi ngguin. 23 Ma hi mjair Kristus Iin na. Ma Kristus anjair Uisneno Iin ja.
Kristus In haef ein re' In nreek ma nsonu' sin neun mee-mee
1 Onaim hi ro he maan kai on nai: kais maikas ma minaib kai, fin hai re' ia, suma Kristus In aan renu' ma aan reka'. Ma Uisneno anpirsai kit he tpafa' ma tpanat In rasin re' unu' fe'e te ma'niif ein. 2 Tuaf re' anpao in uisn ee in baer' ein, in ro he njair tuaf re' anmoe' natuin saa'-saa' re' batuur ma namnoon. 3 On mee nok au? Au 'meup utuin saa'-saa' re' batuur aa oo, ai' kaah? Au ka 'rae utuin fa hi mnilei ma mitaib meu kau, on mee. Ma au ka 'rae utuin fa biak ein sin rais taiba' neu kau, on mee msa'. Au ka 'rae utuin fa au rais taiba' 'eu au tuak. 4 Fin maski au neek ii natenab nak, au reok goen, naan ka neu fa he in a'moufn ii nak, au reko kau goen. Re' pentiing ii, Uisneno nnilei ma ntai kau on mee. 5 Onaim hi kais ammoe' jom on re' afeek rasi, he mnilei ma ntai biak ein. Ampao Usi' ankoen On anfain neem. Fin In es re' anfei nain are' kanan rasi. In es re' anheer ma npoe napoitan are' kanan rais maufinu re' atoni' nmoe' ma na'koro' sin anbin meis'okan. In nroim he nakrira' are' kanan rasi anbi atoni' in tenab ma in nekan. Rarit Uisneno nroim he natoon rais rekon re' tuaf ein anmo'e nrair sin. 6 Aok bian arki! Au u'uab anmatoom nok au ba'e nai' Apolos, nahuum on re' au 'fee 'tope' he hi bisa minoni' rais jes na'ko kai, on nai: Ammoe' mituin rasin re' matu'i anbi Suur Akninu' Uisneno nmees jah. Kais ammoe' mituin bian antein. Karu hi minoni' rasi naan, hi kais ammapeis, ma mifeef ko'u natuin hi mituin tuaf es, ma mkana'paar biak ein. 7 Onaim on mee? Hi maan hi tuam ein atoni' 'tet-teta', oo? Kaisa' on naan! Fin are' kanan saa'-saa' ein ok-oke' re' hi mtoup sin, hi mipein sin na'kon Uisneno. Onaim karu on naan, nansaa' am es hi mpaas hi 'baasm ein, nahuum on re' hi m'usaha mmees-mees kiim? 8 Nahuum on re' saa'-saa' ein ok-oke' re' hi mperluu sin, hi mipein sin een. On re' hi amu'it amrair jen! Hi mmoe' jom on re' kaes ko'u, on re' uisf aan, ma hai ka msero' fa msa'. Te kaah, Uisneno es re' anfee saa'-saa' ein ok-oke' re' hi mperluu sin. Mes karu hi mjair usif batuur ate, of oni' hai bisa mnaa' aprenat mibu-bua mok ki, oo? 9 Hai re' ia, Uisneno anhaefan kai mnao meu mee-mee mbi pah-pinan ia, he m'eut ma mitoon meu tuaf-tuaf anmatoom nok Kristus. Mes neot es-neot es au utenab 'ak of oni' Uisneno anreun kai mhake mbi koit re'-re'uf, nahuum on re' atoin bui re' anpao hukun a'maten. Rarit In nfee neu too mfaun ein ok-oke' anbin pah-pinan, ma In ameput sonaf neno tunan sin, he sin nkius ma nnonton kai. 10 Hi ma'tain reu'f ein ki, ai'! Anmui' tuaf naan ki nak, atoin ahinit, natuin hi arki mmafutu' mbi Kristus. Mes sin naan kai, amonot rek-reko, natuin hai mjair Kristus Iin na. Sin nateenb ein nak, of oni' hi arki re' naan, ma'tain reu'f ein ki. Mes hai arkai, aperot ma akrait aah. Of oni' sin naikas ma ntuna' na'rat-ratan ki. Mes sin ka nhormaat kai fa kre'o msa'. Ro bainesi'! 11 Antea oras ia msa', hai mnaben neu hai mimnaah ma mmeon. Hai tai-paekn ein nakroen re'un. Biak ein anbeos kai piut-piut. Hai mjair atoin atoes re' ka nmui' fa umi. 12 Hai mhae mate mbi mepu meik hai 'niim ein kiim. Karu atoni' na'uab rafu'-rafu' anmatoom nok kai, hai mitaah am mak, “Hai mtoit he Uisneno nmoe' ma ntao rais reko neu ki.” Karu tuaf nasusab kai, hai mifeek he mhaek mibaar, maran ma msabaar aah. 13 Karu atoni' na'uab na're'uf hai kaanm ein, hai mpiir maan ranan he mbaras sin meik uab reko ma mamina'. Maski on naan amsa', atoni' fe' naan kai on re' skuku' ai' makrafu', re' an'oemetab re' he tait itpoirn aah ee. 14 Au 'tui rasin re' ia, ka neu fa he umaeba' ki. Mes au 'roim he ukain ki, natuin au 'neek ki nahuum on re' au aanh aa kuuk. Etun au utoon ki, he mtebi mfain mituin raan reko ma batuur. 15 Maski anmui' too nifun re' naruru' ranan neu ki anmatoom nok Kristus, mes suma au kuuk es re' a'jair hi ama'. Fin au re' ia, es re' utoon uhun-huun 'eu ki anmatoom nok Yesus Kristus In Rais Reko. Etun hi mpirsai meu Ne. Au 'moe' on naan, natuin au 'mafuut ma'tani' 'ok Ne. 16 Onaim au 'toit 'eu ki he hi mituin mirek-reko' au 'heta' ma 'tope'. 17 Es naan ate, au 'reek ma 'sonu' nai' Timotius he nturun ma nbaab ki. Au 'neek ee nahuum on re' au aanh aa kuuk. Au 'pirsai je, fin in nmoni nmafutu nbi hit Usi'. In of anturun ma nbaab ki he namnaub ki, anmatoom nok au 'monik. Au 'moink ii on naan, natuin au 'mafuut 'ok Kristus, re' Uisneno ansoun Ee ntaam neem. Ma rasi naan huma' mese' on re' au unoni' msa' 'eu too srani' sin re' nabuan pukan-pukan anbin mee-mee. 18 Anmui' tuaf na'ko ki natenab am nak, au ka 'jair fa he 'eit 'eu naan. Es naan ate, sin na'naeb ok. 19 Mes karu hit Usi' nroim, ka 'roo fa ntein ate, au 'uum 'eu kota Korintus. Rarit au of uhiin ain, kar-karu atoin ein re' ia suma nafeefn ahaa oo, ai' batuur sin nmu'in kuasa! 20 Fin Uisneno naan, Usif re' anmui' kuasa. Rarit Iin na ka npaek fa feef mamina' he nafena' atoni' in rais pirsait, mes sin npaek kuasa re' batuur. 21 Rarit hi roim ein on mee? Karu au 'uum ate, au u'uab ma'tani' ma 'fee hukun 'eu ki? Ai' au 'uum ukrira' rais manekat nok neek ma'nura'?
Anmui' tuaf et jemaa't ii anmakoin
1 Au 'neen nak, anmui' tuaf es et hi jema'at naan, anmakoin. Te kaah, re' in nmoe' je naan, maufinu nneis na'ko atoni' re' ka nahiin fa Uisneno. Fin in ntuup nok in aamf ee in fee muni'. 2 Mes hi beo'm ein ii kah een, nahuum on re' hi jemaa't ii reko kuun! Batuurn ii, hi ro he mimaeb om ma msuus. Tuaf on re' naan, hi ro he mriu' mipoitn ee nnao na'roo-'roo! 3 Maski hit maka'rona' es nok es, mes au neek ii natua nabaar nok ki. Onaim au ufeek a'rair amaufinut naan in rasi, nahuum on re' au 'bi 'ain naan. 4 Au 'mui' hak he ufeek on naan, natuin Nai' Yesus hit Usi', ma au re' ia, In haef. Rarit hi ro he mtook mibua he mifeek rasi naan, meik Usi' In kanan. Ma au neek ii nabua nok ki msa'. 5 Rarit hi mnona' ma mfee tuaf naan meu niut reu'f ein sin a'nakat, he 'roo-'roo te, tuaf re' naan nait inporin rais maufinun re' etan in nekan. Rarit karu hit Usi' ankoen On anfain neem ate, In bisa nsoi nafetin tuaf naan na'ko in saant ein. 6 Ka reko fa karu hi mifeef! Kais amnikan mak, hit tsero' raur teif a'kreo' goah, he tasaeb uut anjair utunu' no mes-mese'. Raur teif naan on re' atoni' in maufinun. Rarit, karu hi mkoon ee he nmoe' rais maufinu anbi hi sonam ma hi tnanam, of too srani' bian sin anmo'en maufinu msa'! 7 Amriu' atoin maufinu naan na'ko hi jema'at, on re' unu' te, atoin Yahudis nait inporin raur teif ein ok-oke' na'kon sin uimn ein he sin nabaarb ein bukae fesat Paska. Nok ranan naan, na' hi bisa mfani mjair on re' tuaf re' ka nmui' fa sanat anbi in nekan antein. Hi ro he mjair on re' naan. Unu' te, sin nroro 'bib-kaes ana' re' ka nmui' fa sanat he nfee fua'-turu' Paska. Namuni te, sin na'maet Uisneno In Tuaf Akninu', he njari 'turu' re' nakninu' hit nekak. 8 Unu' te, atoin Yahudis sin nbukaen fesat Paska npaken utunu' re' ka npaek fa raur teif. Oras ia, hit on re' utunu' re' ka npaek fa raur teif. Es naan ate, hit ro he tpafa' ma tpanat hit tuak ii kuuk he kais atmoe' rais maufiun ein, ma kais atmoe' biak ein neek ein namenan. Hit ro he ta'uab namneo piut-piut. Nok ranan naan, atoni' niit nak, hit tmoe' saa'-saa' ii tatuin hit nekak arekot. 9 Unu' te, au 'tui 'iit surat 'ak, “Kais amseor gom mok tuaf-tuaf re' anmakoin nok tuaf re' ka in fee ja fa, ai' ka in moen ja fa.” 10 Au ka 'mui' fa sarit he hi kais amseor gom mok too mfaun ein ok-oke' nbi pah-pinan re' ka ntae natuin fa Uisneno, ai' atoin akomat, ai' aputa-kriut re' nputa-kriu naan atoni' in bare', ai' araut ein. Fin karu on naan ate, hi ro mbaits om mi'ko too mfaun ein ok-oke' anbin pah-pinan. 11 Mes oras ia, re' au u'uab ee naan, es re': hi kais amseor gom mok tuaf re' nak in njair atoni srani', te kaah, in amakonit, ai' akomat, ai' araut, ai' na'uab na're'uf atoni' in kanan, ai' amauf raru, ai' aputa-kriut he ntoup naan biak ein sin baer' ein. Hit kais atseor gok tok atoni' human on re' naan. Kais ambukae mibua mok sin amtein! 12 Hi mmui' hak he mtai ma mnilei atoni srani' sin a'moink ein. Mes au ka 'mui' fa hak he ufeek rasi 'eu tuaf re' ka npirsai fa Uisneno. 13 Fin In kuun of es re' nafeek rasi neu tuaf re' ka npirsai Je fa. Mes hi kais amnikan Uisneno In Suur Akninu' re' matu'i mnak, “Tuaf re' anteek in tuan anjair Uisneno Iin na, mes in nmoe' rais maufinu piut-piut, amriu' mipoitn ee, tua!”
Atoin apirsait kais ammatrakan meu afeek rasi mok aom-bian apirsait bian
1 Karu tuaf asraint es anmaka'rasi' nok tuaf asranit bian, nansaa' am es hi mnao meu afeek rasi re' ka nahiin fa Uisneno? Nansaa' am es on naan? Reko nneis ambaiseun atoin apirsait ein, he sin es re' n'urus hi rasi! 2 On re' hi ka mihiin fa mmak, atoin apirsait ein re' of nafeek rasi neu are' too nbin pah-pinan ia. Onaim nansaa' am es hi kiim ka mibei' fa he m'urus rais aan'-ana'? 3 Batuurn ii, hit es re' he tafeek Uisneno In ameupt ein sonaf neno tunan sin rasin. Onaim ro tebes hi es re' am'urus rasi nsuun-nsuun neno. 4 Saa' antein, karu hi apirsait ammaka'rasi' nok rais aan'-aan' ein, nansaa' am es hi mpaek afeek rasi re' atoni srani' sin ka nhormaat sin fa? 5 Au he u'uab rasi piis es, re' anmoe' ki he hi ro he mmae mmaet. On mee? On re' ka tiit tain fa tuaf es anbi hi sonam ma hi tnanam, re' bisa n'urus nahiin hi rais aan'-aan' ein, on re' rasi re' anpoi ma nboor anbi hit aok-bian. 6 Mes apirsait es anheer neik in aon-bian apirsait neu afeek rasi! Te kaah, afeek rasi naan ka npirsai fa Uisneno! 7 Naan ka batuur fa, oo? Nisan nain ki goen ate, karu hi mmatrakan es nok es. Reko nneis, amkonan ho aom-bian karu in nmo'en nsaan neu ko. Ma karu ho aom-bian apirsait nabaak naan ho baer es, maut he in npaar kuun bare' naan! 8 Mes hi atoin apirsait es anmo'e nsaan neu in aon-bian. Ma tuaf es nabaak tuaf es. Te kaah, hi arki atoin apirsait ok-oke'. 9 Hi on re' ka mihiin fa are' rasin re' ia! Te kaah, tuaf re' ka nroim fa he nmoe' rais amneot ma amnonot, ka neu fa he ntaam anjair Uisneno In nonot-asar sin. Kais amkonan hi tuam ein he mtoup rais poi, he hi misanab! Tuaf re' nmakoin nok ka in fee ja fa, ai' ka in moen ja fa, araut, amakaket, atoni' nkoin atoni', 10 abakat, akomat, amauf raru, tuaf re' ankana'paar es in kanan, aputa-kriut he ntoup naan tuaf es in bare'. Fin tuaf-tuaf ein on re' naan, ka neu fa he ntaam anjarin Uisneno Iin na! 11 Te kaah, unu' te, hi bian on re' naan amsa'! Mes Uisneno nsaok ma nnoes nain hi saant ein, ma In nakninu' ki. Ma In nfei ranan amsa' he hi bisa mireko mfain mok Ne. In nmoe' are' rasin naan, natuin hi mmafuut mok hit Usi' Yesus Kristus, ma natuin hi mmafuut mok Uisneno In Asmanan amsa'.
Karu ho mpijaar ma mpairoir ho aom, naan nakrira' rais hormaat neu Uisneno
12 Au 'mui' hak he 'moe' are' saa'-saa'. Mes are' saa'-saa' re' au 'roim he 'moe' sin naan, ka neu fa he njair reko neu kau. Rarit maski au 'mui' hak he 'moe' are' saa'-saa', mes au ka 'roim fa he rais reu'f ii in kuasan na'naa' kau. 13 A'tope' es, es re' anmui' tuaf nak, “Amnaaht ii nperluu taif, ma taif anperluu mnahat.” Mes mimnau, fin Uisneno of nareu' nain sin nua sin. A'tope' bian antein, hit ka tpaek fa hit aok ii he tmakoin tok bifee re' ka hit fee ja fa, ai' atoni' re' ka hit moen ja fa. Hit tpaek hit aok ii he hit bisa tmeup teu hit Usi'. Ma hit Usi' In es re' anpijaar ma npairoir hit aok. 14 Oras hit Usi' Yesus anmaet, Uisneno es re' namonib nafain' Ee. Onaim karu hit tmate trair, In anmui' kuasa he namonib nafani' kit amsa'. 15 Hi aom ein anjarin Kristus Iin na, nahuum on re' hi mjair biaf mi'ko Kristus In aon. Hi of mihini mrair rasi naan! Onaim karu au 'paek Kristus In aon, ma 'nao 'seor goe 'ok bifee a'hake', naan on mee? Kaisa'! Fin rasi naan, ka pantas fa! 16 Hi of mihini mrair, karu atoni' ntuup nok bifee a'hake' on re' naan, sin nua sin nmafutu njarin mese'. Fin matu'i et Suur Akninu' mnak, “Sin nua sin nmafutun njarin mese'.” 17 Mes tuaf re' anmoin nekaf mese' nok hit Usi', anjair mese' nok Ne, nahuum on re' sin nua sin anmafutun nok asmanaf mese'. 18 Karu ho mupein mainuan he mmakoin mok bifee re' ka ho fee ja fa, ai' atoni' re' ka ho moen ja fa, mu'roba' ho tuam aan mu'ko rasi naan! Amoe' sanat huma'-huma' es re' nareu' sin tuak ein kuuk, ma nareu' biak ein imsa'. Mes tuaf re' na'hake' naan, nareu' kuun in aon. 19 Ho aom aan nahuum on re' uim onen neu Uisneno In Asmanan. In Asmanan naan es re' anmoin et hi neekm ein, fin Uisneno kuun es re' anfee In Asmanan neu ki. Es naan ate, hi kiim ka mmui' fa hak amtein, he mjair usif meu es-es ate in aon aan kuun. Mes nansaa' am es hi mmoin on re' ka mihiin fa are' rasin re' ia? 20 Kristus ansoi naan ki neik baen ma'oos re'uf. Rarit hi ro he mmoin ma mhormaat hi aom ein kiim, he mikrira' am mak, hi mhormaat Uisneno.
Rasi anmatoom nok fee-mone sin
1 Oras ia, au he 'tui anmatoom nok are' rasi re' hi mitanan sin imbi hi surat am mak, “On mee? Reko nneis atoin ii, kais ansao, oo?” 2 On nai: natuin anmui' mainuan fani-fani he tuaf bisa nmoufu nbi rasi 'bu'uf amre'ut, es naan ate, reko nneis atoin es ansao in fee ja kuun. On naan amsa', bifee jes ansao in moen ja kuun. 3 Atoin mafe'e ki! Kais ampenan ho fee jan in hak he ntuup nabua nok ko. Ma bifee mamone' ki! Kais ampenan ho moen jan in hak he ntuup nabua nok ko. 4 Fin bifee mamoen ein annona' nrair sin aok ein anjarin sin moenk ein sin a'mui'k ein. Ma atoin mafe'e annona' nrair sin aok ein anjarin sin feek ein sin a'mui'k ein. 5 Onaim hi kais ammarara'koit, fin hi nua ki ammui' hak! Onaim karu hi he m'onen, ma ka mroim fa he mitenab meu rasi bian, bisa mtahan hi tuam ein akre'o, he kais amtuup mibua mbi oors es. Asar fee-mone ki mi'uab rek-reko nahuun fe', ma hi m'akoor. Karu oras onen naan oek' een, reko nneis hi nua ki mibua mfain rabah. Fin karu ka on fa naan ate, ampaant om! Fin niut reu'f ein sin a'naakt ee, na'oki' tuaf ate rabah, neu tuaf-tuaf re' ka nabei' fa he ntahan in tuan aa kuun. 6 Rasi re' ia, au suma 'fee je utuin au penit, ka Uisneno In atoorn aa fa. 7 Utuin au tenab, reko nneis kais amsao, on re' au re' ka 'sao fa. Mes Uisneno nfee mahinif ma manoef ansuun tuaf, natai nok tuaf naan. Rarit bian In nkonan sin he nmatsaon. Ma bian In ka nkonan sin fa he nmatsaon. 8 Au he utoon 'eu atoin munif ma bifee munif re' ka nsaon fa fe', ma 'eu baun bifee ngguin 'ak, reko nneis hi kais amsao, on re' au re' ka 'sao fa. 9 Mes karu ka bisa mtahan maan fa hi tuam ein aan, reko nneis amsao. Reko nneis amsao, fin karu kaah fa te, ho snaas reu'f ee of naah nafani' ko. 10 Rasi re' ia ka na'ko kau fa, tua. Fin au he utoon saa' re' hit Usi' naprenat anrair neu amatsaos ein am nak, bifee mamone' ka nabei' fa he nporin nain in mone. 11 Mes, karu in nporin in mone, in kais ansao ntein. Reko nneis, in ntebi nfain ma naraem on nok in mone. On naan amsa', atoin mafe'e ka nabei' fa he mporin in fee. 12 Rasi re' ia na'ko kau, ka na'ko fa hit Usi'. 'Eu tuaf bian sin, au he u'uab on nai: karu atoin asraint ii in fee je ka npirsai fa Kristus te, in kais anporin bifee re' in nsao naan ee naan, karu bifee sa'o naan anroim he nmoin na'kii' nok ne piut. 13 On naan amsa', karu anmui' bifee mamone', re' in moen je ka npirsai fa Kristus te, in kais anporin atoni' re' ansao naan ee naan, karu atoin sa'o naan anroim he nmoin na'kii' nok ne piut. 14 Fin atoin sa'o re' ka npirsai fa Uisneno kninu' msa', natuin in nmafuut nok in fee. Ma bifee sa'o re' ka npirsai fa Uisneno kninu' msa', natuin in nmafuut nok in mone. Karu kaah fa te, sin aanh ein ka kniun' ein fa. Mes nok ranan ia, sin ntoupu nrair marak akninu' anbi Uisneno In human ma In matan. 15 Mes karu anmui' atoin sa'o ai' bifee sa'o re' ka npirsai fa Uisneno, re' nporin nain in fee ai' in mone apirsait ate, mkonan sin. Rarit atoin sa'o ai' bifee sa'o re' anpirsain neun Uisneno, ka nmafutu' ntein fa on re' naan. Fin Uisneno no'en ma nnapen ki, he mjair Iin na, he hi bisa mmoin nok mamut, rame' es nok es, ma tainina'. 16 Bifee mamoen ein re' apirsait ein! Ho of oni' bisa msoi mufetin ho mone. Of oni' ka bisa fa. Atoin mafe'e re' apirsait ein! Ho of oni' bisa msoi mufetin ho fee. Of oni' ka bisa fa msa'. Hi ka mihiin fa namneo, tua.
Mituin mirek-reko' Uisneno In Raan A'honis
17 Maski on naan amsa', mes ansuun-suun tuaf in a'tokon ma in a'haken on mee-on mee msa', oras Uisneno no'en naan ki mjair Iin na te, ammoin piut on re' naan nai. Kais mi'bani' mtein' ee, fin Uisneno es re' an'ator anrair je on re' naan. Au unoni' 'eu jemaa't ein ok-oke', atoran re' ia. 18 On re' hi mi'heri' miit he mikrira' mmak, hi atoin Yahudis, namuni te na' hi mneen Uisneno no'en ki te, kais misuan a'heri' naan. Ma atoni' re' ka na'heri' fa, oras anneen Uisneno no'en sin anjarin Iin na te, kais mi'heri' he njair tanar nak, sin njarin nrarin Uisneno Iin na. 19 Karu mi'heri' miit ate, naan ka ma'osa' fa. Ma karu ka mi'heri' fa te, naan ka ma'osa' fa msa'. Re' ma'osa' es re': hit tmoe' tatuin Uisneno In apreent ein. 20 Oras Uisneno anpiir ma nbetis naan ki mjair Iin na, In ka nreun ki fa he mi'heri' ai' ka ma'heri' fa. Onaim maut he hi mibaar on re' naan, tua. 21 Au 'fee 'teni' a'tope' es antein. Karu ho mjair atoni' in ate oras Uisneno no'en ko te, ho mubaar on re' naan amsa', ka saa'-saa' fa. Mes on re' ho bisa mjair tuaf re' napein fetin na'ko ate, amjair on re' naan nai! Karu ka bisa fa he mupein fetin mu'ko ate, ka saa'-saa' fa msa'. 22 Fin oras Uisneno no'en ate he njair Iin ja, ate naan anjair atoni frei re' anmeup neu in Usin et baer a'ratas. Ma oras atoni frei jes he njair Uisneno Iin ja, atoni' naan anjair Kristus In aan renu'-aan reka'. 23 Kristus anbaen nafeek anrair ki neik baen ma'oos re'uf! Onaim hi kais amjair ate meu tuaf bian. 24 Aok-bian manekat arki! Oras Uisneno no'en ma nnapen ki mjair Iin na, hi 'tokom ma hi 'hakem on mee-on mee te, maut he on re' naan nai. Kais mi'bani' mtein' ee. No maut nai on re' naan, neu Uisneno.
Rasi anmatoom nok ka amatsaos ein fa
25 Hi mitaan kau anmatoom nok tuaf-tuaf re' ka ntuup-tuup niit fa he nseor gon nok bifee ai' atoni'. Uisneno ka natoon fa neu kau anmatoom nok rasi naan. Mes hi bisa mpirsai saa' re' au u'uab ee ia, natuin Uisneno nakrira' ma naruru' In rais kasian ee neu kau. Au teenb ii on nai: 26 Oras ia hit tapein ha'mu'it huma'-huma'. Onaim karu atoni' on mee-on mee te, maut he in on re' naan nai. Au sairt ii on nai: 27 Karu ho msao ma mmafutub ho tuam aan mok ho fee jan ate, kais ampoirn ee. Karu ho ka mmafuut fa heen mok ho fee jan antein ate, kais maim he msao mtein. 28 Mes karu ho mjair he msao msa', nana ka nsaan fa. Ma karu anmui' bifee re' ka ntuup-tuup niit fa fe' nok atoni' rarit ansao, in ka nsaan fa. Mes mimnau, fin amatsaos ii of napein susat huma'-huma' anbi pah-pinan ia. Au sairt ii he hi kais amsuus on naan. 29 Aok-bian manekat arki! Utuin au teenb ii te, on nai: oors ii npaumaak een, ma neon amsoupt ii npaumaak een. Atoin mafe'e, in kais natenab ma nakeo naan ahaa in fee jan kuun, mes in ro he natenab ma nakeo Uisneno msa'. 30 On naan amsa', karu anmui' tuaf ankuur ma nkae, reko nneis in nha'tain in tuan he kais ankae, he in na'bei' he natenab ma nakeo Uisneno. On naan amsa', karu anmui' tuaf re' neekn ee nmariin, reko nneis in nmoe' in tuan ee he kais on re' naan, he in bisa natenab ma nakeo Uisneno. Karu anmui' tuaf ansoos na'bei' bare', reko nneis in nmoin on re' tuaf re' anma'mui', he in bisa natenab ma nakeo nahiin Uisneno. 31 Karu anmui' tuaf anpaek bare' na'ko pah-pinan ia, reko nneis in nmoe' in tuan ee nahuum on re' tuaf re' ka nakfiirt on fa neu pah-pinan ia in baer' ein, maut he in natenab ma nakeo nahiin Uisneno. Natuin pah-pinan ia in ranan of namneuk nain. 32 Au 'roim he kais hi teenb ein an'ainuan ok. Fin tuaf re' ka nsao fa naan, in npaek oras mainuan anneis he natenab ma nakeo nahiin Uisneno In romin. Es naan ate, in bisa naim ranan he nmeup he nharineb Uisneno In nekan. 33-34 Mes re' anmatsao nrair, ro he nahiin ma nakeo pah-pinan ia in romin amsa'. In nroim he nahiin ma nakeo Uisneno In roimn ee, mes in ro he naim ranan he nharineb in fee je msa'. Naan anmoe' in teenb ee nbaits on neu-mneem. On naan amsa' bifee re' ka nmatsao ntein fa, ma bifee re' ka nsao niit fa. Sin nahiin ma nakeo Uisneno In romin, he sin bisa nakniun' ein anbin sin neek ein ma sin aok ein. Mes bifee amatsaos ii, in neek ee nbaits on neu-mneem. Fin in nroim he nahiin ma nakeo Uisneno In romin, mes in ro he naim ranan he nharineb in moen je msa'. 35 Au utoon are' rasin re' ia 'eu ki, he hi mipein in arekon. Ma au ka 'roim fa he 'eka' ki. Au roimk ii, hi mmoe' rais reko, mihiin ma mikeo Uisneno In romin, he hi teenb ein kais anbaits ok. 36 Karu atoin ii anmu'i frei re' in toon anmoin naan ii nanokab he nsao goe, maut he in nsao. Saa' antein atoni' naan ka bisa ntahan naan fa in tuan. Sin ka nsanan fa saa'-saa' on naan. Kais amfe'-fe'en sin piut, rarit namuni te, atoni' naan anmoe' rais re'uf. 37 Mes karu in bisa ntahan na'bei' in tuan, in kais nanapa' in tuan ee he nsao. Fin in nahiin neu in he nmoe' saa'. Maut he in naran ma ntahan a'roo reko msa'. 38 Onaim atoni' re' ansao in afrei, naan reko. Ma re' ka nsao fa naan, reko nneisi ntein.
Rasi anmatoom nok baun bifee ngguin
39 Bifee mamone', ro mafutu' ma na'kii' nok in mone tar antea in nmaet. Mes karu in moen je nmate nrari te, in bole nsao ntein, asar in mone naan, apirsait neu Kristus amsa'. 40 Utuin au penit, banu' naan in n'ua reko nneis karu in ka nsao ntein fa. Au utenab 'ak fainekat ia na'ko Uisneno In Asmanan re' nok kau.
Rasi anmatoom nok mnahat re' anpaek sin he nfuan
1 Oras ia au he u'uab anmatoom nok sisi re' atoni' npaek je he nfua. Hit arkit tahiin rasi mfaun een, anmatoom nok rasin re' ia. In raisn ii, karu atoni' nahini mfaun, in bisa nabeo', fin in natenab nak in nahini nneis na'ko biak ein. Reko nneis, hit tmaneek-neek tok biak ein kuuk. Fin naan es re' anmoe' are' tuaf ein ok-oke' anjarin ma'tani' ma bisa ntahan a'roo. 2 Karu anmui' tuaf naan in tuan ee nak, in ahinit anbi are' kanan rasi, naan nakrira' ma naruru' mnak, in mahinin naan ka namtiis fa fe'. 3 Mes karu anmui' tuaf re' nneek Uisneno, Uisneno nahini nrair je. Naan es re' pentiing. 4 Onaim karu atoni' nbukae sisi re' anpaek niit ee he nfua, hit arkit tahiin tak, baer fuat ein anbin pah-pinan ia, ka Uisneno batuur fa. Fin hit tahiin tak, “Suma anmu'i haa Uisneno mese' es re' batuur.” ma “are' baer fuat ein re' atoni' na'besan neu sin, ka ma'osa' ma ma'ota' fa.” 5 Anmui' bare' mfaun et neon goe tnanan ma pah-pinan re' atoni' anteek sin im nak, ‘usi'’. 6 Mes neu hit arkit, Uisneno suma mees' aah. In re' naan, hit Ama'. Are' saa'-saa' ii na'uun ma na'ba'an na'ko Ne. Hit tmoe' are' saa'-saa' ii teu Ne. Ma hit Usi', suma mees' aah. Es re', Yesus Kristus. Uisneno npaek Nai' Yesus, oras In nmoe' are' saa'-saa' ii. Ma hit tmoin, natuin Nai' Yesus es re' anfee kit a'monif. 7 Mes anmui' tuaf re' ka nahiin fa rasin naan. Sin fe' natenab piut-piut anmatoom nok baer fuat ein, nahuum on re' saa' re' sin natenab niit ee oras unu'. Etun ansuun oras sin nbukae sisi re' atoni' npaek je he nfua, sin natenab am nak, “Bukaet re' ia, anjari nrair fua'-turu' he nfuan! Karu au uah mnaaht ein re' ia, au fe'e mafuut 'ok rais maufinun!” Onaim rasi naan nareu' sin teenb ein, tar antea sin ka bisa fa he nateenb ein namnoon ma namneo ntein' ein, natuin sin neek ein an'oren ma nakrait ein. 8 In raisn ii saa'? Bukaet ii ka bisa neik kit fa he tbaiseun Uisneno, ai'? Karu ka tbukae fa te, hit ka tmaufiun fa. Ma karu tbukae te, ka nmoe' kit fa tjair atoin reko, ai'? 9 Mes ampaant om! Maski ho mmui' hak he mmoe' rasi piis es, rasi naan ka neu fa he njair reko neu ko. Karu anmui' ho aom-bian apirsait es, re' in neekn ee n'oer, karu in niit ko mmoe' mo'et naan, rarit in nastuun anbi naa te, naan ka reko fa! 10 Ho muhini mrair kuum, rasi pisa' naan, ka njair fa saa'-saa'. Mes karu aok-bian apirsait ein re' ao akrait ein ankius niit ko mtook ma mbukae mbi uim fuat, sin of nateenb ein saa'? In of natenab nak, tbukae mnaah fuat amsa' ka ntaam fa rasi neu ne ntein, maski sin npaek bukaet ein naan he nfuan. 11 Ho muhini mrair rasi mfaun. Mes karu ho mmoe' on naan, ho mureu' tuaf neek a'oert ein. Ma tuaf naan ho aom-bian apirsait. Kristus anmaet neu ne msa' ate! 12 Reko nneis mitenab on nai: karu ho mmoe' ho aom-bian re' neek ein an'oren he nmo'en rasi piis es, re' sin naan ee neu nsaan, ho es re' mmoe' sanat meu sin. Ma ho mmoe' sanat meu Kristus amsa'. 13 Onaim karu au uah amnahat re' anmoe' au aok-bian apirsait ein anmoufu nbin sanat, reko nneis au kais 'euk sisi ma 'uah amnahat human on re' naan. Maski tar antea nabar-baar amsa', kaisa', tua! Fin au ka 'roim fa he sin nmoufun nbin sanat.
Oras Uisneno nreek haefan Iin na, In nfeen sin hak ma kuasa
1 Kais mitenab am mak, au ka 'mui' fa hak he 'tui on nai 'eu ki. Fin Uisneno anhaef kau 'nao 'eut ma utoon anmatoom nok Ne. Unu' te, au 'iit Nai' Yesus, hit Usi'. Au 'mafuut piut 'ok Ne, rarit hi arki ok-oke' ampirsai Je, natuin au 'meupk aan. 2 Maski tuaf bian sin ka ntoup kau fa 'jair Uisneno In haef, mes hi mihini mrari mmak, Uisneno nhaef kau he utoon In beno 'eu ki. Karu hi mroim he maim bukti te, mkius kiim hi 'tokom ma hi 'hakem. Fin hi arki mmafutu' fe' mok hit Usi'. 3 Au he utaah 'eu tuaf-tuaf re' nasaeb kau sanat, on nai: 4 Kais-kaisa' hi mitenab mak, au 'ok nai' Barnabas ka mmui' fa hak he mtoup bukaet mi'ko tuaf-tuaf re' hai minoni' sin. 5 Kais-kaisa' hi mitenab mak, hai ka mmui' fa hak he msao bifee Kristen, re' bisa nokan he ntuthae kai nbin bare bian. Te kaah, Uisneno In haef bian sin, nok sin feek ein. Nai' Yesus In oirf ein on naan amsa'. Nai' Petrus anmoe' kuun on naan amsa'! 6 Kais-kaisa' hi mitenab mak, suma au 'ok nai' Barnabas ammees jaah, es re' mmeup he maim roit, he hai bisa mmoin ma minoni' biak ein. 7 Hi teenb ein naan, in a'suikn ii saa'? Amkius kiim soraurs ein. Sin kais ansosan bukaet ma pake. Amkius kiim ameput anbi poo' anggur. Ka tiit fa es, re' antaar ee mnak, “Ho kais muah hau fua anggur sin!” Amkius kiim atuuks ein. In nmui' hak he naes susu na'ko 'bib-kasen re' in natuuk sin. 8 Au ka u'uab fa on naan, utuin au mansian biasa ia in teenb aa kuun. Fin Uisneno In Atoorn ein natoon rasi huma' mese' on re' naan amsa'. 9 Anbi ka'o Musa in Atoran matu'i mnak, “Oras bijae je anteir maka' he nbaits ee na'ko in asrakon, kais amfuut mi'temeb in fefan he in ka bisa naah fa.” Kais-kaisa' hi mitenab mak, Uisneno nroim he bijae je nmees bisa naah. 10-11 Kaah fa, tua! In na'uab nak he nkius kai msa'! Fin matu'i mnak, “Abanit afu ma tuaf re' nbetis maak ma'puni' na'ko srakon, oras sin nmepun sin nahinin nak, sin of napenin sin sapaak ein.” On naan amsa', reko nneis karu haef atoni' Kristen sin bisa ntoup sin sapaak ein, na'kon sin meupk ein sin aafk ein. Fin oras hai minoni' ki are' kanan rasi na'ko Uisneno In Asmanan, naan nahuum on re' atoin tani tuaf es anseen. Onaim oras hai minoni' mrair ki te, ka saa'-saa' fa karu hai mtoup bukaet ai' saa'-saa' mi'ko ki. Fin re' naan, ro pantas! 12 Tuaf sona' re' nanoni' ki, anmui' hak he ntoup bukaet ma bare' bian na'ko ki, ai'? Rarit, karu hai te, on mee? Hai hak ii anneis na'ko sin! Mes hi mihini mrair. Hai ka mpaek miit fa hai hak he mi'tui' on naan. Hai maran ma mtahan ambi are' kanan rasi, he kais amtao ekat meu ki. Fin nok ranan naan, hi mroim he mneen ma mitniin Kristus In Rais Reko re' hai mireet Ee meu ki. 13 Mitenab miit! A'naak rais pirsait ein, re' antuthaen etan atoin Yahudis sin Uim Onen Uuf, sin nmonin na'kon fua'-turu' re' atoni' nataam sin. Ma tuaf re' antuthae nbi mei fuat, sin bisa nekun sisi na'ko mu'it re' tuaf nataam sin. 14 On naan amsa', Uisneno anba'an nak, tuaf re' nmeup he nanaob Rais Reko, sin bisa nmonin na'kon sin mepun naan in afan. Naan es re' batuur. 15 Maski au 'mui' hak he 'moin on re' naan, mes au ka 'roim fa he 'moe' on re' naan. Au ka 'tui fa surat ia, nok sarit 'ak he hi msonu' ma mfee kau bare'. Au 'tuthae ki 'roo goen, ma ka 'toit 'iit fa saa'-saa' u'ko ki. Onaim reko nneis au 'maet, he atoni' kais natenab nak au 'murai 'toit ma 'toro'. 16 Maski au utoon atoni' piut anmatoom nok Uisneno In Rais Reko, mes naan ka njair fa 'sukif he au bisa u'uab be'o. Au ro he utoon 'eu tuaf anmatoom nok Uisneno, fin Uisneno es anreek kau on naan. Karu au ka 'moe' utuin fa au mepu on naan, au 'suus ma 'mei' 'iis ok! Fin au of upein hukun. 17 Karu au unaob mepu ia suma natuin au roimk ii kuuk, bare' re' au upein je naan, nahuum on re' ameput antoup in kai. Mes karu au unaob mepu ia natuin Uisneno anreek kau, naan a'teta'. Fin In npirsai kau, he 'panat In baer ma'osa'. 18 Onaim karu on naan, au upein upan ma pa'e saa'? Au ka 'perluu fa he 'toup kai! Au utoon Uisneno In Rais Reko, ma ka 'toit fa saa'-saa'. Naan es re' neik rais puas neu kau, tua. Ma rais puas naan, nahuum on re' au upein upan ma pa'e. Onaim au 'mui' hak amfaun on re' tuaf re' in meup goe es re' natoon Rais Reko, mes au kuuk ka 'roim fa he 'paek are' au hak ein naan, tua. 19 Au re' ia, tuaf re' a'ator kuuk au tuak utuin au romik. Atoni' ka nmui' fa hak he nreun kau he 'meup ia, ai', 'meup nee. Maski on naan amsa', mes au 'moe' au tuak ii on re' ate, he tuaf-tuaf anmui' hak he nreun ma naprenat kau. Nok ranan naan, au bisa 'turun ma 'baab too mfaun antein he sin naran ma ntahan natuin Uisneno. 20 Onaim karu au ubua 'ok atoin Yahudis, au 'moe' au tuak ii on re' atoin Yahudis, he 'turun ma 'baab atoin Yahudis he sin nahiin Uisneno. Karu au ubua 'ok atoni' re' nnaa' naheran Uisneno In Atoran, au 'moe' utuin Uisneno In Atoran, he au bisa 'turun ma 'baab sin imsa' he nahiin Uisneno, (maski au uhiin 'ak, tmoe' tatuin Atoran naan ka bisa fa tareko tfain tok Uisneno). 21 Karu au ubua 'ok tuaf re' ka nahiin fa Uisneno In Atoran, au 'jair on re' sin, he 'eik sin antaam anjarin Uisneno Iin na. (Au ka ufetin 'ain fa Uisneno In Atoran re' In nasanut sin nanete npeo' ka'o Musa, mes oras ia au 'moni 'paek Kristus In Atoran.) 22 'Eu tuaf re' neekn ee n'oer, au 'moe' au tuak ii on re' au neek ii an'ore msa', he au bisa 'furi' sin he sin npaumaak Uisneno. 'Eu are' too mfaun ein, au 'moe' au tuak ii on re' sin, he on mee-on mee msa', au bisa 'turun he 'soi ufetin 'aan bian. 23 Au 'moe' are' rasin re' ia, maut he are' tuaf-tuaf bisa npirsai Uisneno In Rais Reko. Nok ranan naan, hit bisa tapein sapaaf anbi are' rais arekot re' Uisneno nroim he nfee sin neu kit. 24 Au 'fee 'tope' u'ko amnaenat. Tuaf namfau nok naenan, mes re' antaam nahuun gui, mese'. Onaim hi arki ok-oke' ro he maen miheer, he mjair tuaf-tuaf ahunut meu Uisneno. 25 Are' amnokat anbi lomba ro he teb-tebe nmoe' natuin ahaa saa' re' in anoin ee natoon. Batuur, aa oo? Sin anmepun ma'tani' on naan, he suma napenin a'piru 'nakaf re' of namnene haa. Mes karu hit, hit tmeup he tapein upan ma pa'e re' ntahan tar antea nabar-baar. 26 Onaim au ka 'aen fa tafi'-tafi'. Mes au 'usaha ma'tani' he 'aen umneo goah tar a'tea fenis. Karu tataib kau tok amatufus, au ka 'tuuf fa anin, mes au 'tuuf u'toom. 27 Au 'moe' are' saa'-saa' 'ok ma'tani', ma au 'ator au aok ii fani-fani he au 'bisa 'tahan piut. Fin ka reko fa karu au utoon 'eu tuaf bian anmatoom nok Uisneno, mes au kuuk a'tanhai atoran, rarit Uisneno napoin kau na'ko 'ba'et.
Ampaant om mu'ko baer fuat ein!
1 Aok bian manekat arki! Hi kais amnikan main re' reta' un-unu', re' oras hit be'i-na'i sin anbin baer ruman. Uisneno naruru' ma nakrira' ranan neu sin ok-oke', anpaek nope re' nsanu nbi sin humak ma maatk ein. Rarit In nbatis oe tasi, onaim annao naat sin npe'on naan tar antean sin npoin anbin oe tais je panin, nok mamut ma ao-mina'. 2 Nope ma oe tasi naan, anjarin a'tope' neu kit. Fin hit be'i-na'i sin anpirsain neun ka'o Musa he na'naa' sin, rarit sin natuin nope naan, ma ntaman neun oe tasi nabu-buan nok ne. Naan on re' hit re' tpirsai teu Kristus, tapeni srani' msa', he naruru' ma nakrira' mnak, hit tjair Iin na, hit tneen ma tatniin Ee. 3 Hit be'i-na'i sin ok-oke' anbukaen amnahat re' Uisneno In Asmanan nabarab neu sin. 4 Ma sin ok-oke' nbukaen oe re' Uisneno In Asmanan nabarab neu sin. Re' sin nbukaen oe naan, anpoi ma nboor na'ko faut kou' goes re' Uisneno In Asmanan naruru' ma nakrira' neu sin. Sin nnaon neun mee jah, fatu naan anbi nain naan. Fatu naan, es re' Kristus. 5 Mes Uisneno ka nroim fa nok tuaf amfaun re' anmo'en tafi'-tafi'. Rarit, oras sin nnaon nfuun am natefan nbin baer ruman re' mainuan naan ate, anmui' amates amfaun anbin naan. Onaim sin ansuub sin tuaf ein anbin bare mfaun. 6 Are' rasin naan anjarin a'tope' neu kit, he hit kais atroim he tmoe' maufinu on re' sin. 7 Kais amfua on re' sin bian sin. Anbi Suur Akninu' Uisneno matu'i mnak, “Atoin Israelas sin re' ia antokon ma naah-ninun nabu-buan anbin bijae aan maruna' in human ma in matan. Rarit sin anmurai na'besan amsa'.” 8 Hit kais atmakoin tok bifee re' hit ka fee ja fa, ai' tok atoni' re' hit ka moen ja fa. Fin neno naan, sin na'haek ein tafi'-tafi' on re' naan, onaim anmui' naan tuaf nifun bo' nua mteun anmaten neno mees' aah. 9 Hit kais atsoba' he tmoe' rais maufinu huma'-huma' fe', taim ranan he tahiin tak, Kristus he nhukun kit, ai' kaah. Fin atoin Israelas bian he nsoba' Uisneno on re' naan, rarit In nkonan kauna' mfa-faun re' nmu'in raso, he nrau na'maet sin. 10 Hit kais ta'mua' amsa'. Fin bian sin na'mua' ein piut, rarit Uisneno nreek he In ameput tuaf es na'ko sonaf neno tunan na'maet sin. 11 Rasi naan antoom neu atoin Israelas sin, he njari 'tope' neu kit. Sin ntui nrair sin ok-oke', he hit bisa tanoni' he kais atmoe' tatuin sin saant ein. Fin neon amsoput naan anpaumak-maak he neem een. 12 Mumnau, he! Oras ia ho mutenab mak, ho bisa mtahan ma'tani'. Mes ho ro he mpaant om, he ho kais ammouf. 13 Ansuun oras, karu ho mnaben mak he mmoe' maufinu, mumnau mak, tuaf bian annaben niit furit on naan amsa'. Mes ho bisa mpirsai Uisneno mak, In nmoe' natuin In uaban kuun. Fin In ka nkonan ko fa he mupein furit anneis na'ko ho 'be'im. Ansuun oras re' ho mupein furit on re' naan, In nfee ko raan a'po'i. In nroim he nmoe' ko mtahan mu'bei', he ho kais ammouf. 14 Onaim aok-bian manekat arki! Karu nmui' tuaf na'seke' ki, he mi'bees ma mi'ruri' meu baer fuat ein, maen mi'roo mi'ko naan! Kais ampao mtein! 15 Au u'uab 'eu ki re' mitenab ate, ammanoe. Maut he hi mitaib kiim, he mihiin saa' re' au u'uab ee naan, batuur. 16 Mitenab miit rasi re' ia: karu hit tabua ma tbukae tbi Uisneno In mei, rarit tait i'kraas ma ttoit makasi teu Ne, rarit hit tbukae ta'ko kraas naan, in sairt ii nak, hit tmafuut tok Kristus. Oras In n'opa' In naa' ee he nmaet, naan nahuum on re' hit tmaet tok Ne msa'. Karu hit tteib utunu', rarit hit tbukae, in sairt ii huma' mese', es re' hit tmafuut tok Kristus. Onaim oras In nmaet, naan nahuum on re' hit tmaet tok Ne msa'. 17 Hit arkit tait nama' ta'ko utunu' fua' mese'. Onaim are' tuaf-tuaf re' nait nama' na'ko utunu' fua' mese' naan, nahuum on re' hit tmafuut tok aof mese', maski hit arkit tuaf amfaun. 18 Mitenab miit pah Isra'el sin un-unu' fe'. Oras sin nroor mu'it anbin mei fuat he na'besan neun Uisneno, a'naak pirsait re' arorot naan, es re' neuk in sisi. In sairt ii nak, sin anmafuut nok Uisneno, ma sin anmafuut nok atoni' re' neik mu'it naan amsa' he njair fuat. 19-20 Au sairt ii, on mee? Oras atoni' re' ka nahiin fa Uisneno he nfee fua'-turu' neu sin baer fuat ein, naan ka ma'osa' fa saa'-saa', ai'? Fin baer fuat ein naan, suma faut maruna' re' ka nmonin fa! Kaah fa, tua! Au sairt ii on nai: oras tuaf anroor mu'it he njair fua'-turu' neu sin baer fuat ein, sin na'besan neu niut reu'f ein. Mes sin ka na'besan fa neun Uisneno re' batuur. Onaim au ka 'roim fa he hi mmafuut mok niut reu'f ein on naan. 21 Karu hi mmafuut mok Uisneno, rarit ambukae mi'ko kraas naan ambi Uisneno In mei, hi ka bole fa mnao mseor gom mok niut reu'f ein, ma mbukae mi'ko sin akraas re' oras atoni' na'besan neu sin. Fin in sairt ii nak, hi mmafuut umrair mok niut reu'f ein. On naan amsa', karu hi mbukae mbi Uisneno In mei, hi ka bole fa he mbukae nbi sin mei nggoe msa'. Fin in sairt ii nak, hi mmafuut mok niut reu'f ein! Naan mono! 22 Hi mitenab on mee? He mmoe' hit Usi' natiun, ai'? Naan hit he tmaet een! Of oni' hi mitenab mak, hi ma'tani' mneis mi'ko Uisneno, ai'?
Ammoe' are' saa' ii he mait mi'rat-ratan Uisneno In kanan
23 Of oni' hi mak, “Au he 'moe' saa' aha te, bole. Fin au hak 'aan es re' naan.” Batuur. Mes mimnau joo, fin are' kanan rasi, ka reko fa neu ko. Ma ka neu fa he are' kanan rasi, bisa nturun he nha'tain ho nekam. 24 Kais suma maim upan ma pa'e meu ho tuam aan kuum. Reko nneis, maim upan ma pa'e meu bian amsa'. 25 Onaim au 'usul on nai: karu msoos sisi mbi masa' te, mbukae, tua. Kais ammaktanan amtein mak, “Ia siis fuat, aa oo?” Ai' kais mitenab am mak, “Au bole 'euk sisi re' ia, ai' kaah?” 26 Fin anbi Uisneno In Suur Akninu' matu'i mnak, “Pah-pinan ma in aafk ein ok-oke', hit Usi' Iin na.” 27 Karu anmui' atoni' re' ka npirsai fa fe' neu Uisneno nak, “Au uskau he mbukae meu au umi!” Karu hi mroim, mnao he mbukae, tua. Ma mbukae are' saa' ii re' sin nfee sin neu ki. Kais ammaktanan mak, “Au bisa uah re' ia, ai' kaah?” 28 (Mes karu anmui' tuaf re' na'se'-se'o mnak, “Kais ambukae re' ia, fin re' ia, siis fuat,” reko nneis ho kais ambukae. Ho ro he mutenab meu tuaf re' neem natoon ko naan, in naben ma'fena', ai' kaah? 29 Au sairt ii, mutenab murek-reko', mutuin atoni' naan in tenab, bole mbukae, ai' kaah. Kais suma mutenab rais reko mutuin ho tuam aan kuum.) Te kaah, au bole 'moe' utuin au 'roimk ii kuuk. Mes karu bian natenab nak naan ka reko fa karu in nmoe' rais jes, nansaa' am es au ka bisa 'bebas fa he 'moe' utuin au roimk ii kuuk, suma natuin rasi naan ka reko fa neu tuaf naan? 30 Karu au 'toit makasi 'eu Uisneno, rarit au 'bukae, nansaa' am es tuaf na'uab namouf kau on naan, tua? 31 Onaim karu hi he miah, ai' miun, ai' mmoe' saa' aha te, mmoe' are' kanan rasin naan he mtuna' ma mi'ratan Uisneno In kanan arekot. 32 Kais misusab atoin Yahudis, ai' atoin ka Yahudis fa, ai' Uisneno Iin na. 33 Ammoe' on re' au. Fin au 'soba' he 'harineb sin arsin anbi are' kanan rasi. Au ka 'soba' fa he 'moe' rais reko 'eu au tuak ii kuuk. Mes au 'soba' he 'moe' rais reko 'eu sin arsin, he sin napenin rais fetin amsa'.
1 Hi mait i'tope' mi'ko kau, ma mmoe' mituin au 'monik. Fin au 'ait i'tope' u'ko Kristus, ma 'moe' utuin Ee, tua.
Karu m'ibadat ate, bifee-atoni' ro he naruru' ma nakrira' hormaat natuin haart ii in romin
2 Au 'aikas ki, natuin maski on mee msa', hi mimnau kau piut. Ma are' kanan rasi re' au unoni' 'rair ki sin, hi fe' mmoe' mituin sin. Reok re'uf! 3 Mes anmui' rais jes re' au he umnaub ki, on nai: kais amnikan hi mi'uu mi'ko mee. Ansuun tuaf re' npirsai Kristus, na'uu ma na'baa' na'ko Kristus, ma Kristus anjair in a'nakaf. Atoin ii anjair ahunut ma araip ranan neu in fee. Ma Kristus neem na'ko Uisneno. 4 Atoni' kais ankuub in a'nakan oras in n'onen, ai' oras in natoon Uisneno In haan beno. Fin naan on re' in namaeba' Kristus, natuin in ka nfee fa rais hormaat on re' biasa hit tmo'e. 5 Mes bifee ji ro he nkuub in a'nakan oras in n'onen, ai' oras in natoon Uisneno In haan beno. Fin karu kaah fa te, naan on re' in namaeba' in mone, natuin in ka nfee fa rais hormaat on re' biasa hit tmo'e. Ma in namaeba' in tuan aa kuun, on re' karu bifee jes nkeu boko. 6 Fin karu nmui' bifee re' ka nroim fa he nkuub in a'nakan he njair tanar nak, in nfee hormaat neu in mone, reko nneis in kateir na'paran in a'naak fuun ein. Mes karu in nnaben nak in a'naak boko naan namaeb in tuan aa kuun, reko nneis in nkuub in a'nakan naan. 7 Mitenab miit on nai: atoni' ka nperluu fa he nkuub in a'nakan, fin Uisneno nmoe' atoni' natuin In human ma In masan. Es naan ate, atoin ii ro he naruru' ma nakrira' Uisneno In pinan ma krahan. Ma bifee ji ro he naruru' ma nakrira' atoin ii in pinan ma krahan. 8 Fin oras Uisneno nmoe' pah-pinan ia, In ka nmoe' fa atoni' na'ko bifee. Mes In nmoe' bifee na'ko atoni'. 9 Ma In ka nmoe' fa atoni' neu bifee. Mes In nmoe' bifee neu atoni'. 10 Onaim reko nneis bifee ji nkuub in a'nakan, he tuaf bian nahiin nak, in anpaek in hak he n'onen ma natoon Uisneno In haan beno, natuin ranan re' batuur. Ameput sonaf neno tunan nahinin on naan amsa'. 11 Mes karu sin nmafutun nok Uisneno, bifee ma atoni' ka nhaken nmees-mesen fa. 12 Nahunu te, Uisneno nmoe' bifee na'ko atoni'. Mes namuni te, bifee ji es re' nahoni' naan atoni'. Ma Uisneno es re' anmoe' are' saa'-saa' ii he njarin. 13 Hi mitenab miit! Karu bifee ji n'onen neu Uisneno, ma ka nkuub fa in a'nakan, mituin hi teenb ii te, naan reko, ai' kaah? 14 Natuin hi atoran harat anbi kota Korintus, karu atoin ii in a'naak fuun ein amnaun ein, naan namaeb ee, oo, ai' kaah? 15 Mes karu bifee ji in a'naak fuun ein amnaun ein, naan reok re'uf, aa oo? Uisneno nfee ne a'naak funu' mnanu' he nkuub naan in a'nakan. Naan es re' batuur. 16 Mes karu anmui' tuaf re' anmatoen piut anmatoom nok rasi ia, mimnau he, fin na'ko hit re' atjair a'nakat, ma na'ko jemaa't ein, hit biasa es re' ia nai, tua.
Kais ammoe' tafi'-tafi' karu mbukae mbi Uisneno In mei
17 Oras ia, au he u'uab rais jes antein. Anbi rasi re' ia, au ka bisa 'bo'is ki fa. Fin oras hi mibua, hi ka mmoe' mituin fa saa' re' batuur, mes hi mi'baba' amre'ut amteni'. 18 Nahunu te, au 'neen nak, oras hi mibua he m'ibadat, hi mbaits om. Bian na'ko re' au 'neen sin naan, ro tebes of batuur. 19 (Ro batuur, natuin hi pukan-pukan on re' naan, of mamnita' sekau es re' batuur-batuur anneen neu hit Usi', ma sekau es re' ka nneen Ee fa.) 20 Fin oras hi atoin asranit mibua ma mbukae mbi Uisneno In mei, hi ro he mimnau Usif Yesus. Naan es re' batuur. Mes hi ka mmoe' fa on naan. 21 In bukti esan re': oras hi mtook ma mbukae mibua te, anmui' tuaf re' ka npao fa tuaf bian, anmui' aparu' ma akomat, ma bian antein ninun raur mafu. Tar antea tuaf bian ka napenin fa nama', ma sin namnahan. 22 On mee es re' ia!? Hi ka mmui' kiim fa umi he mbukae ambi naan, aa oo? Ai' hi sairt ii he mireu' Uisneno In jemaa't ein sin kaan foo meni'? Ai' hi he mimaeba' ama'mui't ein? Hi mroim he au u'uab on mee? Mroim he au 'bo'is ki 'bi rasi re' ia, oo? Ka neu fa, tua!
Utunu' ma tua min-kase naan, anjair tanar he tamnaub hit Usi' Yesus In a'maten
23 Usif Yesus kuun es re' neikn On natoon nain kau rasi re' ia, ma au 'nona' 'tein 'eu ki. Nak, oras too mfaun ii nabaarb ein he na'maet Je, mabe' naan In nait utunu' fua' es. 24 Rarit In n'onen ma ntoit makasi neu Uisneno. Ma In natoon neu In atoup noin' ein am nak, “Ambukae utunu' re' ia, fin re' ia, Au aok. Sin of nareu' Au aok ii neu ki. Onaim hi ro he mbukae utunu' re' ia he mimnau Kau.” 25 Oras sin nbukaen nrarin, In nmoe' huma' mese' nok akraa tua min-kase msa' am nak, “Tua min-kase re' ia in a'moufn ii, es re': Uisneno he nahake' rais manba'an fe'u nok ki. Ma Au ro he 'opa' Au naa' ii tar antea Au 'maet fe', na' rais manba'an naan anjair. Rarit, ansuun oras hi mbukae tua min-kase on nai te, hi ro he mimnau Au rasi 'maten naan.” 26 Ansuun oras, oras hi mmoe' harat re' ia, he mbukae utunu' re' ia, ma mbukae mi'ko kraas re' ia, tar antea Usi' ankoen On anfain neem, naan nahuum on re' hi mireta' mifani' anmatoom nok In a'maten.
Karu ho neekm aan ka namnoon fa, kais ambukae mbi Uisneno In mei
27 On naan ate, karu nmui' tuaf re' nbukae utunu' re' naan ma nbukae na'ko kraas re' naan he namnau hit Usi', mes in neekn ee ka namnoon fa, Uisneno of anhuukn ee. Natuin, re' naan Usif Yesus In aon ma In naa'. Onaim karu tuaf es in neekn ee ka namnoon fa, in ka pantas fa he nbukae nbi mei naan, fin 'mo'et re' naan anhai'niis kuun Usif Yesus. 28 Reko nneis, tuaf mese'-mese' anparikas kuun in neekn ee fe'. Rarit, karu in tebes nak in neekn ee namnoon, na' in bisa nbukae utunu' ma tua min-kase naan. 29 Mes anmui' tuaf re' nbukae nok neek apenut. Fin sin nateenb ein am nak, “Nai' Yesus In a'maten, ka ma'osa' fa saa'-saa'. Nai' Yesus In aon ka ma'pake' fa neu kau.” Tuaf on re' naan nasaah ma nataah kuun in amre'un, natuin sin of napenin hukun. 30 Etun anbi hi sonam ma hi tnaanm ein naan, anmui' tuaf re' an'oer, anmui' tuaf re' nameen, ma nmui' tuaf re' anmate nrarin. 31 Mes karu hit tuaf mese'-mese' atparikas tarek-reko' hit neek ii fe'e te, hit ka tapein fa hukun on re' naan. 32 Karu hit Usi' anhukun kit, In nmoe' on re' naan he nanoni' kit tatuin ranan re' namneo ma namnoon. Fin In ka nroim fa he hit tapein hukun, ma tamreu' tabu-bua tok mansian ii ok-oke' atbi pah-pinan ia. 33 Onaim aok-bian manekat arki! Karu hi mibua ma mbukae mbi Uisneno In mei, es ro he mpao es. 34 Karu nmui' tuaf re' namnaah anmaet, reko nneis in nha'tain naan anbi in uim je fe'. Maut he, oras hi mibua ok-oke' te, hi kais mipein hukun. Anmatoom nok rasi bian re' hi mitaan sin naan, of au 'uum a'tea naan ate, na' au 'ator.
Uisneno In Asmanan anfee kit kuasa he tmeup huma'-huma'
1 Aok-bian manekat arki! Au 'roim he hi mihiin anmatoom nok kuasat ma manoef ein re' Uisneno In Asmaan ee nfee sin neu kit he hit tpaek sin. 2 Hi mihini mrair mak, oras hi ka mjair Uisneno Iin na fa fe', hi mi'besan piut meu baer maruna' re' anmuu. Hi mitun-tuin ahaa sin. 3 Es naan ate, au 'roim he hi mihiin am mak, ka neu fa tuaf re' anmafuut nok Uisneno In Asmaan Akninu' re' nak, “Kasat neu Yesus naan!” Ma ka neu fa tuaf re' ka nmafuut fa nok Uisneno In Asmaan Akninu' nak, “Nai' Yesus naan, au Usi'!” 4 Uisneno In Asmanan anfee neu tuaf mese'-mese' nok in mahinif ma manoef kuun, he es-es ate nanaob kuuk sin mepu. Mes are' mahinif ma manoef sin neman na'kon Asmanaf mese'. 5 Tuaf mese'-mese' napenin mahinif ma manoef huma'-huma' he ntuthae tuaf bian, mes sin arsin suma nneen ma natniin na'kon Usif mees' aah. 6 Tuaf mese'-mese' napenin mepu huma'-huma' he nanaob Uisneno In mepu, mes suma Uisneno mese' re' naan, es re' anturun ma nbaab sin he nanaob sin mepun naan. 7 Uisneno naruru' ma nakrira' In Asmanan anbi tuaf mese'-mese' nok ranan huma'-huma', mes In sairt ii he sin ok-oke' napenin upan ma pa'e bu'-bua'. 8 In nfee In Asmaan ee In kuasa neu Iin na. Bian antoupun mahinif ma manoef he sin bisa nateenb ein namnuut, rarit anfee fainekat re' natai nok rasi. Bian antoupun mahinif ma manoef he natoon namnoon goah saa' re' sin nahiin sin. 9 Bian antein antoupun kuasa he npirsai naheran neun Uisneno, natuin sin nmafutun naher-heran nok In Asmanan. Bian antein antoupun kuasa he nareko' amenat. 10 Bian atein antoupun kuasa he nmo'en rais sanmakat huma'-huma' re' naruru' ma nakrira' Uisneno In pinan ma krahan. Bian antein antoupun mahinif ma manoef he natoon Uisneno In haan beno neu Iin na. Bian antein antoupun mahinif ma manoef he nahinin smanaf mee es re' na'uu ma na'baa' anbi Uisneno, ma mee es re' kahaf. Bian antein antoupun mahinif ma manoef he bisa na'uab ein anpaken uab huma'-huma'. Bian antein antoupun mahinif ma manoef he natoon uab ein naan sin a'moufk ein. 11 Mes suma Asmanaf mese' re' nmoe' he sin arsin bisa nmepun on re' naan. In nfee neu tuaf mese'-mese' he sin bisa nmepun natuin Asmanaf naan In romin.
Aof mese', nok in nama' huma'-huma'
12 Au he utaib mahinif ma manoef sin re' naan nok aof. Aof mese' naan nok in nama' huma'-huma'. Mes nama' huma'-huma' naan, anmafuut anjair aof mese'. Naan on re' Kristus Iin na. 13 Hit arkit tmafuut tok Asmanaf mese'. Es naan ate, oras hit tasrain, hit tjair on re' pah mese'. Maski hit atoin Yahudis ai' ka atoin Yahudis fa, ate ai' ka ate fa, Uisneno nfee neu kit arkit Asmanaf mees' aah. Naan on re' hit tbukae oe re' neiki 'honis na'ko oe mata' mese'. 14 Batuur, aof ii ka na'ko fa nama' mese'. Fin in re' naan, anjair na'ko nama' amfaun. 15 Kar-karu ho haem aan nak, “Au re' ia, ka 'nimaf fa. Onaim au ka 'jair fa nama' es u'ko ho aom.” Maski in na'uab on naan, mes in fe' njair nama' na'ko ho aom. Batuur, ai'? 16 Ma karu ho ruikm aan nak, “Au re' ia, ka mataf fa. Onaim au ka 'jair fa nama' u'ko ho aom.” Maski in na'uab on naan, mes in fe' njair nama' na'ko ho aom. 17 Mitenab miit! Karu ho aom aan suma njair mataf mees' aah, ho bisa mneen on mee? Ma karu ho aom aan suma njair rukif mees' aah, ho bisa mufoi on mee? 18 Mes hi mihiin mak, Uisneno nmoe' kit atjair on re' aof mese', ma In n'ator in nama' huma'-huma', natuin In human ma In masan. 19 Karu hit aok ii suma njair nama' huma' mees' aah, in kaan ee ka ‘aof’ fa ntein, oo? 20 Mes in batuurn ii, hit aok ii nmui' nama' huma'-huma'. Naan es re' anmoe' je njair aof a'teme-'teme. 21 Atoni' in matan ka bisa nasmeru' ma nkana'paar fa neu atoni' naan in a'niman nak, “Au ka 'perluu ko fa!” Ma atoni' in a'nakan ka bisa natoon fa neu in haen am nak, “Au ka 'perluu ko fa!” 22 In batuurn ii, es re' aof ii anmui' nama' re' hit taan ee an'oer ma ka pentiing fa, mes hit tperluu sin fe'. 23 Anmui' nama' bian re' hit taan sin suma mapake' kreo' goah, mes hit tpijaar ma tpairoir sin fe' nok reko. Ma nmui' nama' bian re' hit tamaeb ok, ma ka troim fa he takrira' sin, rarit hit tkuub ma t'aum sin nok reko. 24 Mes karu nama' re' ka namaeba' kit fa, hit ka tansaa' sin fa. Mes Uisneno nabuab naam' ein naan anjair aof mese'. Rarit In n'ator he naam' ein re' hit taan sin ka pentiing fa, hit tpijaar ma tpairoir sin nok reko, 25 fin In ka nroim fa karu hit aok ii nbaits on. In nroim he hit arkit atmakius es nok es. 26 Fin karu naam' es napein susat, sin arsin annaeb ein amsa'. Ma karu naam' es napein hormaat, sin arsin anmarinan amsa'. 27 On naan amsa' hi arki. Fin hi on re' Kristus In aon a'teme-'teme. Ansuun tuaf apirsait es-es ate, anjair on re' naam' es na'ko Kristus In aon. 28 Fin anbi apirsait ein sin atnaank ein, Uisneno nfee kuasa he nmepun huma'-huma'. Nahunu te, In nreek haef tuaf bian he nnao natoon In haan beno. No nuan ii, In npaek tuaf bian anjair In mafefa kninu'. No teun ii, In nmoe' tuaf bian nanoni' nahiin tuaf anmatoom nok Ne. Rarit In nfee kuasa neu tuaf bian he bisa nmoe' rais sanmakat huma'-huma', he naruru' ma nakrira' In pinan ma krahan. Bian napenin kuasa he nareko' amenat. Bian napenin mahinif ma manoef he nturun ma nbaab tuaf. Bian napenin mahinif ma manoef he bisa na'haba' ma n'urus tuaf ein he sin nmepun nabu-buan nok reko. Ma In nfee kuasa neu tuaf bian antein, he sin bisa na'uab ein anpaken uab huma'-huma'. 29 Hi mitenab on mee? Uisneno nreek kit arkit he tnao tatoon In haan beno, oo? Kaah fa, tua. In nmoe' kit arkit atjair In mafefa kniun, aa oo? Kaah fa, tua. In nmoe' kit arkit atjair anoni' ahinit, aa oo? Kaah fa, tua. In nfee kuasa neu kit arkit he tmoe' rais sanmakat, aa oo? Kaah fa, tua. 30 In nfee kuasa neu kit arkit he bisa tareko' ameent ein, aa oo? Kaah fa, tua. In nmoe' kit arkit he bisa ta'uab atpaek uab huma'-huma', oo? Kaah fa, tua. In nmoe' kit arkit bisa tahiin uab ein naan sin a'moufk ein, aa oo? Kaah fa, tua. 31 Hi ro he mibarab he mtoup ma mpaek mahinif ma manoef re' mapake' nneis neu too mfaun ein. Maski on naan amsa', mes au fe' he ururu' ma ukrira' 'eu ki ranan re' reko nneis.
Rais manekat re' batuur
1 Kar-karu au bisa u'uab a'paek are' kanan uab, on re' uab mansian, ai' uab na'ko Uisneno In ameupt ein na'kon sonaf neno tunan, mes au ka 'mui' fa rais menakat a'kre'o msa', in uupn ii saa'? Au uabak naan ruumn ahaa, on re' 'sene re' nahan-haan aah, ai' daroom re' nahaan tang-tang-tang aah. 2 Kar-karu au 'mui' mahinif ma manoef he utoon Uisneno In haan beno neu Iin na, ma au uhiin 'ain are' rais ma'niif ein ok-oke', ma au uhiin are' kanan rasi re' ahiint ein nahiin sin, ma karu au rais pirsait 'eu Uisneon gui na'kii' tar antea au bisa unani' 'toe'f ein, mes au ka 'mui' fa rais manekat a'kre'o msa', in uupn ii saa'? Au 'mo'et naan ka ma'osa' ma ma'upan fa saa'-saa'. 3 Karu au u'sosa' 'ain au 'mui'f ein, rarit au 'fee roit ein ok-oke' 'eu tuaf ama'mui't ein, ai' au 'nona' au tuak ii a'jair fua'-turu', mes au ka 'mui' fa rais manekat a'kre'o msa', in uupn ii saa'? Au ka 'mui' fa rasi 'sukif he 'aikas au tuak ii msa'. Fin re' naan parsuum aah! Ka nmui' fa upan ma pa'e kre'o msa'. 4 Fin rais manekat naan, namiin, tua. Rais manekat naan, sabaar, tua. Rais manekat naan, ka natiun nahiin fa, tua. Rais manekat naan, ka naikas ma na'ratan nahiin fa in tuan aa, tua. Rais manekat naan, ka nabeo' fa, tua. 5 Rais manekat naan, naruru' rais hormaat, tua. Rais manekat naan, ka nroim fa he niis anmees kuun, tua. Rais manekat naan, ka manah fa te natoo', tua. Rais manekat naan, ka natunu' nahiin fa tenab, tua. 6 Rais manekat naan, anmariin nok saa' re' namneo ma namnoon, ma ka nroim fa rasi re' ka natai fa, tua. 7 Rais manekat naan, naran ma ntahan anbi are' kanan rasi, tua. Rais manekat naan, anpirsai piut, tua. Rais manekat naan, nafnekan ma nharap piut, tua. Rais manekat naan, naran ma ntahan piut, tua. 8 Rais manekat naan ka nasnaas fa, tua. Mes saa' re' Uisneno In mafefa kniun' ein natoon sin naan, noki-noki te, ka tperluu ttein sin fa goen. Ma karu tuaf na'uab anpaek uab huma'-huma', noki-noki te, ka tperluu ttein sin fa goen. Ma karu saa' re' ahiint ein nahiin sin, noki-noki te, ka mapake' fa goen amsa'. 9 Oras ia, hit suma tahini kreo' goah. Karu hit tjair Uisneno In mafefa kninu', hit suma tatoon rasi re' ka nanokab fa fe'. 10 Mes antea in oors ate, are' saa' ii of namtiis. Oras naan, rasin re' ka namtiis fa fe', ka mapake' fa ntein amsa'. 11 Tait i'tope' on nai: oras au ana' fe', au u'uab on re' ri'aan a'baut biasa na'uab. Au utenab on re' ri'aan a'baut biasa natenab amsa'. Mes oras ia, au 'neek amnasi 'rair, es naan ate, au ka 'riis nok fa on re' ri'aan aan antein. 12 Tait i'tope' bian antein: oras ia, hit bisa tiit a'kre'o, mes ka nakninu' fa fe', on re' atkisu tpaek ninu re' anreu'. Mes a'roo-'roo te, are' saa' ii of nakninu'. Hit tkius tiit on re' baer es natetab anbi hit humak ma hit matak. Oras ia, au suma uhini kreo' goah. Mes a'roo-'roo te, au bisa uhiin are' kanan rasi, on re' Uisneno nahiin are' kanan rasi anmatoom nok au tuak. 13 Onaim oras ia, anmui' rasi nono' teun re' hit ro he tmoe' sin, re' ntaahn ein piut. Sin esan re': hit ro he tpirsai piut teu Uisneno; hit ro he tafnekan ma tharap piut tak, In of an'ator are' kanan rasi anjarin reko; ma hit ro he tmaneek es nok es piut-piut. Na'ko rais noon teun ein ia, re' pentiing anneis ji es re' rais manekat. Fin rais manekat naan es re' reko nneisi.
Uisneno In Asmaan ee nfee mepu huma'-huma' neu Iin na
1 Am'usaha he mmaneek es nok es ambi are' kanan rasi. Fin ka nmui' fa rasi bian re' pentiing anneisi ntein. Ma maim ranan amsa' he Uisneno In Asmaan ee anfee ki kuasa nok mahinif ma manoef, he hi bisa mmoe' rais arekot huma'-huma'. Ma re' reok gui, karu hi mipein mahinif ma manoef he mitoon Uisneno In haan beno. 2 Fin, karu tuaf anmui' mahinif ma manoef he na'uab anpaek uab a'teta', Uisneno In Asmaan ee anfee ne kuasa he natoon rasin re' ka nakninu' fa fe'. Mes in ka na'uab fa nok tuaf bian, fin in suma na'uab nok Uisneon goah. Ka nmui' fa tuaf re' nabua nbi naan, re' nahiin tuaf naan in uab naan. 3 Mes karu tuaf anmui' mahinif ma manoef he natoon Uisneno In haan beno, in nfee haan beno naan neu tuaf ein ok-oke' re' abitan naan. In nahake' tuaf-tuaf in rais pirsait neu Uisneno, nha'tain sin neek ein, nseu'saab ma nhaan mau tuaf ein re' neek ein ansusan. 4 Tuaf re' na'uab anpaek uab a'teta', in nha'tain kuun in nekan. Mes atoni' re' natoon Uisneno In haan beno, in nha'tain too mfaun re' nabuan, he jemaa't ein ok-oke' na'be'i nnesin. 5 Au roimk ii he hi arki bisa mi'uab ampaek uab a'teta'. Mes au 'romi 'neis he hi bisa mi'uab mitoon Uisneno In haan beno. Fin tuaf re' natoon Uisneno In haan beno, mapake' nneis na'ko tuaf re' suma na'uab anpaek uab a'teta'. Karu mi'uab ampaek uab a'teta', naan reko amsa', asar anmui' tuaf re' bisa natoon uab naan in a'moufun. Nok ranan naan, haan beno naan bisa na'be'ib too mfaun ein abitan jema'at, he sin bisa nahinin imsa'. 6 Aok-bian manekat arki! Mitenab miit rasi ia. Kar-karu au 'uum 'eu ki, rarit au u'uab a'paek uab a'teta' re' hi ka mihiin je fa, hi mipein upan saa'? Ka tiit fa, tua. Mes karu au u'uab 'eu ki, reko nneis au utoon Uisneno In romin. Reko nneis au 'fei rasi re' unu' te, ka nakninu' fa. Reko nneis au 'turun ma 'baab ki he mihiin rasi huma'-huma' antea namnuut. Reko nneis au umnauba' ki 'eik Uisneno In Kabin ma Prenat. Reko nneis au unoni' ki. Nok ranan naan ate, na' anmui' in upan neu ki, tua! 7 On naan amsa' nok baer musiik ein. Fin sin ka nmonin fa, mes sin nahanan hanaf huma'-huma'. Ampaek bobe, ai' 'he'o, ai' 'reku', karu in not ee ka na'bani' fa, atoni' ro ka nahiin fa neu in nreuk siit mee ja, oo? 8 Ma karu toi's ee haan ee ka nakninu' fa, on mee he soraurs ein bisa nahinin nak, in haan tanar he sin nabaarb ein he nmakenan? Ka bisa fa, tua. 9 On naan amsa' neu ki. Karu hi mi'uab ampaek uab a'teta', ai' mpaek uab re' atoni ka nahiin je fa ma nkeukn ee, naan on re' hi mi'uab mok anin. Ruum am parsuum aah, fin atoni' ka bisa nheek fa ho sarit! 10 Anmui' uab amfaun anbi pah-pinan ia. Uab mese'-mese' te, anmui' kuun in a'moufun. 11 Mes karu au ka uhiin fa atoni' bian sin uab, naan ka nmui' fa upan saa'-saa' neu kau. Au ka uhiin fa sin uab, ma sin ka nahiin fa au uab amsa'. Hit arkit es nok es ate, atjair on re' kase. 12 On naan amsa' nok ki. Hi he mipein kuasa nok mahinif ma manoef mi'ko Uisneno. Naan reko. Mes reko nneis hi m'usaha he mipein kuasa nok mahinif ma manoef re' hi bisa mpaek je he mha'tain apirsait ein amfa-faun! 13 Onaim karu tuaf re' na'uab anpaek uab a'teta', reko nneis in n'onen antoit he Uisneno nfee ne mahinif ma manoef msa' he in bisa natoon uab a'teta' naan in sarit. 14 Karu au 'onen a'paek uab a'teta', au 'onen a'paek au nekak, mes au ka uhiin fa neu au u'uab saa'. 15 Onaim in reokn ii, au he 'moe' on mee? Au 'paek sin nua sin, mes es-es ate nok in tabu. Au he 'onen a'paek au nekak. Ma au he 'onen a'paek uab re' au uhiin je msa'. Au he 'sii siit pures-bo'is 'eu Uisneno 'paek au nekak. Ma au bisa 'sii 'paek uab re' au uhiin je msa'. 16 Fin karu ho mpaek uab a'teta' he mpures ma mbo'is Uisneno mu'ko ho nekam, rarit anmui' tuaf bian anbi naan re' ka nahiin fa rasin naan, on mee he in bisa nekaf mese' nok ko? Oras ho mtoit makasi meu Uisneno mpaek uab a'teta', on mee he tuaf naan bisa nekaf mese' nok ko mnak, “Naan batuur, tua!” Ka bisa fa, ai'? Fin in ka nahiin fa ho uab naan. 17 Ho bisa mtoit makasi meu Uisneno on naan. Mes rasi naan ka nha'tain fa tuaf bian sin neek ein. 18 Hi of oni' ka mihiin fa. Au u'uab a'paek uab a'teta' a'neis u'ko ki ok-oke'. Ma au 'toit makasi 'eu Uisneno, natuin In nmoe' kau bisa u'uab on naan. 19 Mes karu apirsait ein nabuan, reko nneis au u'uab a'paek uab tuk-tuka' ma par-para' niim aah re' he sin bisa nahinin, he au unoni' sin, naan reko nneis na'ko au u'uab amnanu'-mnanu' a'paek uab a'teta' amfa-faun, re' sin ka nahiin je fa. 20 Aok-bian manekat arki! Karu hi he mroim he mihiin are' kanan rasi, hi ro he minoni' on re' tua neek amnasit. Kais mitenab on re' ri'aan a'baut ein! Mes anmatoom nok rais maufinu, hi ro he on re' ri'aan a'baut ein, re' ka nmoe' nahinin fa rais maufinu, fin sin neek ein nakniun' ein. 21 Anbi Uisneno In Suur Akninu', matu'i mnak: “Hit Usi' na'uab am nak, ‘Au he 'paek pah re' na'uab anpaek uab a'teet ein, he Au u'uab 'eu pah Isra'el ia. Maski Au u'uab on mee msa', mes sin ka nromin fa he natniin Kau, tua.’ ” 22 Natuin rasi naan, hi mkius miit kiim, karu tuaf na'uab anpaek uab a'teta', naan anjair tanar neu tuaf re' ka npirsai fa fe' neu Uisneno, he sin nkius niit In kuasan. Naan ka nturun ma nbaab fa tuaf-tuaf re' anpirsai nrarin neun Uisneno. Mes karu tuaf natoon Uisneno In haan beno, naan anturun ma nbaab atoni' re' anpirsai nrair neu Ne. Naan ka nturun ma nbaab fa tuaf re' ka npirsai fa fe' neu Ne. 23 Karu hi mibua, rarit hi arki es-es ate ampaek uab a'teta', rarit anmui' tuaf re' ka npirsai fa, ai' tuaf re' ka nahiin fa rasin re' ia, antaam anbi hi sonam ma hi tnaanm ein, sin of nateenb ein on mee? Tebes, sin of nak, “Atoin ein ia namanun nrarin, tua!” 24 Karu hi arki, es-es ate mitoon Uisneno In haan beno, rarit anmui' tuaf re' ka npirsai fa, ai' tuaf re' ka nahiin fa rasin re' ia, antaam anbi hi sonam ma hi tnaanm ein, ro tebes tuaf naan anroim he nneen ma natniin saa' re' hi mi'uab ee. Onaim saa' re' hi mi'uab ee naan, naruru' ma nakrira' tuaf naan in saant ein, tar antea in nparikas namnuut in a'moin aa kuun. 25 Rais maufinun re' in na'nifa' sin anbin in nekan amsa', of mamnita' he too mfaun ein niit sin. Rarit tuaf naan of anri'tuu he na'besan neu Uisneno mnak, “Ro tebes, Uisneno et hi sonam ma hi tnaanm ein, tua!”
Are' kanan rasin re' hit tmoe' sin, atmoe tatuin in batuur aan. Kais atmoe' tafi'-tafi'
26 Onaim aok-bian manekat arki! Karu hi mibua, tuaf mese'-mese' nok nain kuun in mahinif ma manoef. Anmui' asiit re' nsii siit pures-bo'is neu Uisneno. Anmui' anoni' re' nanoni' tuaf anmatoom nok Uisneno. Anmui' atoon rais ma'nifa' na'ko Uisneno, re' unu fe'e te ma'nifa'. Anmui' a'uab re' na'uab nok uab a'teta'. Ma nmui' tuaf re' bisa natoon uab naan in a'moufun. Are' rasin naan, sin ro he nmoe' sin he nha'tain tuaf bian sin rais pirsait. 27 Karu nmui' tuaf re' nroim he na'uab anpaek uab a'teta', naan reko. Mes maut he tuaf nua ai' teun goah ate, nanokab nai. Kais amfa-faun. Es na'uab anrair fe'e te, na' es na'uab antein. Ma ro he nmui' tuaf re' bisa natoon uab naan in a'moufun. 28 Karu ka nmui' fa tuaf re' bisa natoon uab naan in a'moufun, kais mi'uab ampaek uab a'teta' ambi too mfaun ein sin humak ma sin matak. Maut he sin na'uab ein on naan anbin sin neek ein kuuk. Sin bisa na'uab nok Uisneno on naan amsa'. 29 Karu hi mibua, maut he tuaf nua ai' teun goah esan re' natoon Uisneno In haan beno. Hi bian ii ro he mtai mirek-reko' sin uabk ein naan. 30 Mes karu Uisneno nfei neu tuaf es, re' antook ma nneen anbi naan, he nahiin rais jes re' unu' fe'e te ma'nifa', tuaf naan ro he natoon haan beno naan neu abitan naan ok-oke'. Ma tuaf re' na'uab anhaek maat ro he nasnaas fe', he nfee mainuan neu tuaf re' fe' anneen na'ko Uisneno, he in bisa na'uab. 31 Amneon ii, hi arki bisa mitoon Uisneno In haan beno. Mes maut he tuaf es na'uab fe', rarit na' in partei. Nok ranan naan, hi arki bisa mneen ma mitniin, ma hi arki bisa minoni', ma hi arki bisa mnaben miit mak hi neekm ein na'be'in. 32 Mimnau, tuaf re' natoon Uisneno In haan beno, in ro he n'ator nahiin in tuan ee kuun amsa'. Tuaf es na'uab, rarit na' tuaf es, fin tuaf bian bisa ntahan in tuan ee. 33 Fin ka tiit fa taisibu anbi Uisneno. Fin anbi Uisneno, are' saa' ii makikin ma ma'ator nok reko. Anbi mee-mee, karu apirsait ein nabuan ate, biasa on nai: 34 Bifee ngguin ro he ntokon ntainiin ein. Kais nafefan. Sin ro he nneen ma natniin neu a'naakt ein. Fin Uisneno In Atoran na'uab on naan amsa', ai'? 35 Karu nmui' bifee jes re' he nataan rais jes ate, maut he nfain fe', na' nataan neu in mone. Fin karu bifee ngguin na'roton anbin uim onen, naan tamaeb ok, tua! 36 Hi teenb ein on mee? Fin Uisneno In Kabin ma Prenat ka npoi ma nboor fa na'ko ki! Ma In Kabin Ma Prenat naan ka nfee je fa neu hi abit Korintus atmees! Mitenab mirek-reko' fe'! 37 Karu nmui' tuaf re' naan in tuan ee nak, in bisa natoon Uisneno In haan beno, ai' natenab nak, in ntoup kuasa na'ko Uisneno In Asmaan ee, in nahiin kuun am nak, rasi re' au 'tui' 'eu ki naan, ka atoran na'ko au kuuk fa, mes naan prenat na'ko hit Usi', Nai' Yesus. 38 Karu nmui' tuaf re' ka nroim fa he ntoup rasin re' ia, hi kais amtoup goe. 39 Aok-bian manekat arki! Amhaek miheer he hi mipein kuasa he bisa mitoon Uisneno In haan beno. Ma kais ampenan tuaf am mak, sin ka bole fa he na'uab ein anpaken uab a'teta'. 40 Onaim karu hi mibua, minaob are' kanan rasi natai nok in batuur aan, re' pantas. Rais jes nahuun fe', na' bian natuin ein. Minaob sin arsin nok reko, kais tafi'-tafi', tua.
Kristus anmoni nfain na'ko In a'maten
1 Aok-bian manekat arki! Au 'roim he hi mimnau Uisneno In Rais Reko re' au utoon ki unu' naan. Hi mtoup maan Rais Reko naan, mhaek mibaar ma mituin ee piut amsa'. 2 Fin Rais Reko naan, es re' bisa nsoi nafetin ki, asar hi mnaa' miheer piut meu ne. Mes karu hi ka mpirsai fa piut meu Uisneno, hi rais pirsait naan, parsuum aah. 3 Au unoni' 'rair ki are' rasi re' pentiing, re' unu' te, tuaf nanoni' niit anrair kau sin. Sin esan re': Kristus, re' Uisneno nreek Ee neem naan, anmate nrair he nsoi nafetin kit na'ko hit sanat ma penu sin, natai nok saa' re' matu'i nbi Uisneno In Suur Akninu' na'ko unu'. 4 Rarit sin nsuub Ee. Anmeu te, Uisneno namonib nafain' Ee, natai nok saa' re' matu'i nain anbi Uisneno In Suur Akninu' na'ko unu'. 5 Rarit Kristus nakrira' In tuan ee neu nai' Petrus. In nakrira' In tuan ee msa' neu In atoup noin' ein tuaf bo'es am nua. 6 Neot es, In nakrira' In tuan ee neu apirsait ein tuaf natun niim anneis. Sin arsin ankius niit Ee. Na'ko sin arsin re' naan, tuaf amfaun anmonin fe'. Amaets ein, sin fauk aah. 7 Rarit In nakrira' In tuan ee neu nai' Yakobus. Rarit In nakrira' In tuan ee neu In haef ein ok-oke'. 8 Au es re' amunit a'neis, a'kius 'iit Ee msa'. Fin au on re' aheit susu re' nahoins ee namuin. 9 Uisneno In haef bian sin, sin arsin pentiing anneis na'ko kau. Amneon ii, au ka pantas fa he 'jair In haef. Fin unu' te, au es re' ususab ma 'ha'mui' Uisneno Iin na nbin bare-bare. 10 Mes Uisneno naruru' ma nakrira' In nekan arekot neu kau. Rarit In es re' anmoe' kau 'jair on re' ia, oras ia. Oras In nmoe' rais reko neu kau, In ka nporin fa oras nok ruum am parsuum. Namuni te, au es re' a'haek ma'tani' 'neis u'ko sin arsin ok-oke'! Te kaah, Uisneno In nekan arekot es re' nmeup anbi au 'monik, mes ka au fa es re' a'meup. 11 Onaim ka pentiing fa karu au es re' unoni' tuaf, ai' haef bian sin es re' nanoni' tuaf. Fin hai arkai minoni' rasi re' huma' mese'. Hai arkai mitoon piut-piut meu tuaf anmatoom nok Uisneno In Rais Reko. Nok ranan naan, hi mpirsai meu Rais Reko re' naan.
Amaets ein of anmoni nfanin
12 Hai minoni' tuaf am mak, Kristus, re' Uisneno nreek anrair Je neem naan, anmoni nfain na'ko In a'maten. Onaim nansaa' am es hi bian mak, “Amaets ein ka nmoni nfanin fa”? In a'suikn ii saa'? 13 Fin karu amaets ein ka nmoni nfanin fa, in sairt ii nak, Kristus ka nmoni nfain fa msa'! 14 Ma karu Kristus ka nmoni nfain fa, are' saa' re' hit biasa tatoon sin teu too mfaun ein, ka mapake' fa goen. Ma hi rais pirsait meu Ne, ruum am parsuum aah! 15-16 Ma karu batuur amaets ein ka nmoni nfanin fa, hai mjair saksii poi anmatoom nok Uisneno. Fin hai biasa minoni' tuaf am mak, “Uisneno es re' namonib nafani' Kristus!” Ro tebes hai mitoon on re' naan. Ma karu amaets ein ka nmoni nfanin fa, in sairt ii nak, Uisneno ka namonib nafani' niit fa Kristus. 17 Mitenab miit rasi ia: karu Kristus ka nmoni nfain fa, hi rais pirsait meu Uisneno ruum am parsuum aah! Fin hi misaah hi sanat ma penu sin fe'! 18 Ka naan anmees jah fa, fin amaets ein ok-oke', re' unu' fe'e te, anmafutun nok Kristus, karu Kristus ka nmoni nfain niit fa, sin nmaten ma napasib sin na'kon Uisneno msa'. 19 Hit ta'peis ok teu Kristus. In sairt ii nak, In of anmoe' rais reko neu kit. Mes karu hit tafneek on naan suma tbi pah-pinan ia goah, naan ruum am parsuum aah! Ma hit tjair atoin kasian atneis ta'ko biak ein ok-oke'!
Saa' na es re' anjair, natuin Kristus anmoni nfain?
20 Te kaah, ka on fa naan, tua. Amneon ii, es re': Kristus re' Uisneno nreek Ee neem naan, anmoni nfain na'ko In a'maten! In ka nmees fa, fin apirsait ein re' nmate nrarin, of anmoni nfanin amsa'. Kristus re' naan on re' fua unu, re' naruru' ma nakrira' am nak, sin re' amaets ein naan, of anmoni nfanin natuin Ee. 21 Un-unu' te, suma tuaf mees' aah, es re' nai' Adam, re' antanhai Uisneno In aprenat. Onaim in napein hukun, es re' rais mates. Hukun naan ansaen kit arkit ok-oke'. Mes oras ia, anmui' tuaf es antein, es re' Kristus, re' nmoin natuin Uisneno In aprenat. Onaim natuin In arekon, amaets ein bisa nmoni nfanin! 22 Ansuun tuaf re' antanhai Uisneno In aprenat, napein hukun a'maten amsa', on re' nai' Adam. On naan amsa', ansuun tuaf re' anmafuut nok Kristus, Uisneno of namonib nafani' sin. 23 Mes es-es ate nok in tabu. Kristus anjair tuaf ahunut re' nmoni nfain, on re' fua unu fe'e na. Ma oras In nkoen On anfain neem neu pah-pinan ia, na' Iin na nmoni nfain amsa'. 24 Rarit, na' pah-piin ii namsoup. Oras naan, Kristus anjair Usif re' nareu' are' kanan kuasa, are' kanan aprenat, ma are' kanan re'u re' anmamuus nok Ne. In njair Usif re' nnona' nafani' In hak aprenat neu In Amaf, es re' Uisneno. 25 Fin In ro he nnaa' aprenat piut, tar antea Uisneno niis naan are' kanan saa' re' anraban Kristus, he sin na'ruir ein neu Ne. 26 Anmui' rais jes anteni' re' anmamuus nok kit mansian. Es re' hit ro he tmaet. Mes namuni te, Uisneno he niis naan rasi 'maten in kuasan amsa'. In nmo'e nrair on naan ate, ka tiit fa tuaf re' nmate ntein. 27 Anbi Suur Akninu' Uisneno matu'i mnak, “Uisneno nmoe' are' kanan saa' re' In niis naan sin, he na'ruir ein neu Tuaf re' In nba'an he nreek Ee neem.” Oras antui mnak, “are' kanan saa' re' In niis naan sin, he na'ruir ein neu Tuaf”, nakninu' nrair nak, Uisneno ka ntaam fa neu naan. Fin Uisneno kuun es re' nait Je njair Usif neu are' saa' ii ok-oke'. 28 Karu of are' saa' ii nneen ma natniin batuur neu Uisneno In Anah, na' Anah naan of annona' are' saa' ii ok-oke' neu In Amaf, re' nait Je njair Usif neu are' saa' ii ok-oke'. Rarit Uisneno annaa' aprenat piut anbi are' kanan rasi, ma neu are' kanan mansian.
Kar-karu amaets ein ka nmoni nfanin fa
29 Anmui' tuaf re' nasrain he nsenu' ma nseka' amates re' ka nasrain fa fe'. Mes karu amaets ein ka nmoni nfanin fa, nansaa' am es sin he nasranin neun amaets ein? 30 Ma nansaa' am es hai he mibarab he mmaet fani-fani, karu amaets ein ka nmoni nfanin fa? 31 Fin au he noi 'maet neno-neno! Mes aok-bian manekat arki! Au 'suup, au 'naben ate ka saa'-saa' fa karu au 'maet. Fin au bisa u'aiti' au humak, natuin hi mmafuut piut mok hit Usi' Yesus Kristus, re' Uisneno nreek anrair Je neem. 32 Neno naan, oras au 'bi kota Efesus fe', au 'matoe piut 'ok atoin ein naan on re' mui' fui apisut. Mes karu au suma 'mabaan he au bisa 'iis kuuk, ka 'fee je fa 'eu Uisneno, naan ruum am parsuum aah. Ka mapake' fa, tua! Fin karu batuur amaets ein ka nmoni nfanin fa, reko nneis hit tatun-tuin ahaa biak ein sin uab re' nak, “Iim he hit fesat ok-oke', ma taah-tiun namin-miin aah, fin noka' te, hit atmaet, tua!” 33 Hi kais mipein rais poi he mitenab on naan! Fin anmui' uab re' nak, “Karu ho mhaek ha'e mese' mok amafiunt ein, naan anmoe' ko mteib mu'ko raan a'honis re' namneo ma namnoon, tua.” 34 Kais ammoe' rais maufinu mtein! Misnaas nai! Am'ator ho tuam aan rek-reko! Ammoe' 'moe' amneot aah! Amneon ii, hi ro he mimaeb om, fin anbi hi tnaanm ein, anmui' tuaf re' ka nahiin Uisneno fa fe'.
Karu hit tmoni tfain, of hit aok ii on mee?
35 Anmui' tuaf nataan am nak, “Karu amaets ein anmoni nfanin, in raan ii on mee? Ma sin aok ein anjarin on mee?” 36 Naan mono! Karu amseen fini te, fini naan ro he npunu nbi auf goe nanan, na' in bisa nmoin ma natoor. 37 Ma fini re' hit tseen, in masan ka huma' mese' fa nok saa' re' natoor ma nanoo. In fini re' anmeot, on re' maak-gandum ai' maka', ai' fini bian. 38 Es-es ate natuin in masan kuun, natuin Uisneno In romin. Fin In es re' nafeek roet ein sin maask ein. 39 Mu'it ma mansian ii on naan amsa'. Es-es ate nok in masan, natuin Uisneno In romin. Rarit mansian ii in aon, natuin mansian in human ma in masan. Mui't ein sin aok ein, es-es ate natuin in masan. Koorn ein nok sin iin. Iik' ein nok sin iin. Bian antein nok sin iin. 40 Anmui' bare' et neon goe tnanan, ma nmui' bare' et pah-pinan. Re' abitan neon goe tnanan anmui' sin pinan ma krahan kuuk. Re' abitan pah-pinan ia amsa' anmui' sin pinan ma krahan kuuk. Mes pinan ma krahan naan a'teta' na'ko abitan neon goe tnanan. 41 Anbi neon goe tnanan, maans ee in pinan ma krahan a'teta'; funan in pinan ma krahan a'teta'; ma kfuun ein, sin pinan ma krahan a'teta' amsa'. Es-es ate nok In masan. Es-es ate nok in pinan ma krahan. Onaim are' saa' ii anmui' kuun in pinan ma krahan, tua. 42 Karu amaets ein anmoni nfanin, naan on re' fini fe'e na. Fin karu tsuub amates, in aon amates naan npunu nreu', tua. Mes karu in nmoni nfain, in ka on fa unu' naan. Fin karu in nmoni nfain, in ka bisa nmate ntein fa heen. 43 Oras hit tsuub amates, hit tnaben tak, aof amates naan an'oemeet. Mes karu atoni' naan anmoni nfain, in ro npiin ma nakraah! Fin in nakninu' nrair. Amates ka bisa nmoe' fa saa'-saa' oras ansuub ee. Mes oras in nmoni nfain, in ma'tain besi ntein! 44 Karu atoni' nmoin fe', in suma natenab ma nnaebn ahaa, tua. Mes oras in nmaet, he nmoin anfain, Uisneno In Asmaan ee nfee ne 'monit batuur. Ma in ka huma' mese' fa on re' unu'. 45 Mansian ahunut re' on re' hit, es re' nai' Adam. Tatuin Uisneno In Suur Akninu', matu'i mnak, “in anjair mansian re' anmoin, re' natenab ma nnaben nahiin.” Mes mansian re' In masan on re' nai' Adam, re' a'raat reu'f ii, es re' Kristus. In Asmanan es re' bisa nfee 'monit batuur neu tuaf. 46 Ahuunt aan, es re' atoni' re' suma natenab ma nnaben nahiin jah, rarit in bisa nmaet. Mes re' anmoni nfain naan, es re' atoni' re' napein 'monit batuur na'ko Uisneno In Asmanan. 47 Mansian ahunut anbi pah-pinan ia, anmoe' je na'ko auf afa'. Mes re' no nuan ii, es re' Kristus re' neem na'ko neon goe tnanan. 48 Hit re' tmoin anbi pah-pinan ia, tahuum on re' mansian ahunut, re' Uisneno nmoe' na'ko auf afa'. Mes tuaf re' nmafuut nok Uisneno nbi neon goe tunan, in masan nahuum on re' Kristus re' neem na'ko neon goe tunan. 49 Hit arkit oras ia, hit tahuum on re' nai' Adam re' Uisneno nmoe' je na'ko auf afa'. Mes noki-noki te, hit tsenu' ma tseka' masaf fe'u, huma' mese' on re' Kristus re' nkoen On neem na'ko neon goe tunan. 50 Aok-bian manekat arki! Re' au he utoon 'eu ki ji, on nai: hit re' atjair mansian masaf amnaa', hit aok ii na'ko naa' ma nuif. Nok ranan naan, hit ka bisa ttoup fa hit pusaak he tjair Uisneno In anah et sonaf neno tunan. Ka bisa fa! Fin tuaf masaf on re' naan, sin aok ein of anpunun nre'un, rarit sin ka bisa ntoup fa rasi re' nabar-baar kuun. 51 Onaim amneen ma mitniin mirek-reko'! Fin au he 'fei 'eu ki rais ma'nifa' es. Of anmui' apirsait bian re' ka nmaten fa. Mes hit arkit of atsenu' ma tseka' masaf fe'u. 52 Oras toi's ee in hanan amunit nahaan, are' saa' ii njair nok askeken. Rabah anneis na'ko ho mu'mera'. Fin oras toi's ee nahaan, oras naan amaets ein anmoni nfanin amsa'. Ma karu sin anmoni nfanin jen, sin ka nmate ntein' ein fa heen, ma ka npunu ntein' ein fa goen. On naan msa' nok hit arkit re' amonit. Hit arkit atjair masaf fe'u. 53-54 Fin hit aok ii re' bisa npuun oras ia, of na'bani' neu masaf re' ka bisa npuun antein fa! Ma hit arkit re' oras ia bisa tmaet, of na'bani' kit atjair masaf re' ka bisa tmate ntein fa! Naan anjair natuin saa' re' matu'i nain anbi Suur Akninu' mnak, “Uisneno nare'u nrair rasi 'maten in kuasa, ma niis naan ee! Etun hit ka tmate ttein fa.” 55 “Hoe, 'maten! Ho kuasam et mee? Hoe, 'maten! Ho menas et mee?” 56 Nansaa' am es rasi 'maten neik menas neu hit mansian? Naan natuin hit tmo'e tsaan. Es re' naan! Nansaa' am es hit sanat ma penu sin anmu'in kuasa on naan? Naan natuin Uisneno In atoran naruru' ma nakrira' nak, hit sanat ma penu sin antanhai In aprenat. Es re' naan! 57 Mes oras ia, are' saa' ii ok-oke' njarin a'teta'! Rarit hit arkit attoit makasi kou'-ko'u teu Uisneno. Fin In es re' anmoe' kit he bisa tiis taan rais maufinu, tanete tpeo' hit Usi' Yesus Kristus, In a'monin. Ro tebes, Kristus es re' niis batuur, tua! 58 Onaim aok-bian manekat arki! Maran miheer! Kais mi'oni'! Hi mepu meu Uisneno ro he na'baab on reko, ma na'baab on piut. Fin hi mihini mmak, hi maskeet meu hit Usi' naan, ka ruum am parsuum fa, tua.
Noni-roit re' tuaf anfee sin he nturun ma nbaab Uisneno Iin na
1 Oras ia, au he 'tui anmatoom nok roit ein re' hi mibuab sin he mturun Uisneno Iin na anbin kota Yerusalem. Au utoon a'rair apirsait ein et propinsi Galatia, anmoe' on mee m'es na' sin bisa na'bua' roit ein naan. Oras ia, hi ro he mmoe' mituin on naan amsa'. 2 Ansuun neno krei, apirsait ein ro he napasib naan sin roit ein a'kre'o na'ko sin meupk ein sin aafk ein. Kais ampao he au 'uum fe'e te, na' hi mmurai m'urus he mi'bua' roit. 3 Rarit, karu au 'uum a'tea te, hi miruru' maan kau tuaf re' hi mpirsai je, he neik roit ein naan neu Uisneno Iin na anbin Yerusalem. Rarit au 'tui surat he utoon 'eu sin neu a'naak jemaa't ein et naan. 4 Ma karu hi mitenab reko he au 'ok amsa', hai bisa mnao mibu-bua.
Nai' Paulus anroim he nnao neu bare mfaun
5 Karu au 'nao 'fuun am uteef a'rari 'bi propinsi Makedonia, na' au 'eit 'eu ki on naan. Mes au he 'nao 'eu Makedonia fe'. 6 Rarit na' au umaik 'ok ki sero 'roo; of oni' 'tea oras mainiikn ii namsoup. Rarit hi bisa mnao maat kau mtea baer jes anteni'. 7 Au sairt ii he 'uum 'eu ki ka rabah fa. Fin au he utua 'ok ki sero 'roo, karu natuin Uisneno In romin. 8 Mes au he umaika' fe' a'bi kota Efesus re' ia, oras neon ko'u Pantekosta, es re' Paska oke' te, ankoon neno bo' niim. 9 Natuin anbi bare ia nmui' mainuan re' reko nneis he au bisa 'meup mepu mfaun fe', maski nmui' too mfaun re' anraban Uisneno In mepu. 10 Karu nai' Timotius anjair he neem neu ki, amtoup goe nok reko, he in kais anmui' tenab. Fin in re' naan, hit Usi' In ameput, on re' au. 11 Kais amkonan he tuaf ankana'paar ee. Amturun ma mbaab ee, tar antea in nfain neem nok mamut ma ao-mina', he in bisa nateef nok kau. Fin au 'ok au aok-bian re' bian sin, ampa-pao goe. 12 Anmui' rais jes antein. Au 'furi' 'rair hit aok-bian nai' Apolos, he in neit inkius ki ma aok-bian, bian sin. Mes in ka nroim fa he neit oras ia. Karu in napein mainuan re' reko, na' in neit neu naan.
Ammoe' rais jes amtein
13 Hi ro he mpaant om rek-reko! Hi ro he maran ma mtahan he mpirsai piut meu Uisneno! Kais mimtau! Amha'tain jom! 14 Hi mmoe' saa'-saa' aah ate, mikrira' ma miruru' hi rais manekat. 15 Aok-bian manekat arki! Hi arki mihiin mak, nai' Stefanus nok in uim je nanan, anjarin apirsait ein ahun-hunut neun Kristus anbin propinsi Akaya. Ma sin nmepun nbain-'aetn ok amsa' he ntuthae apirsait ein ok-oke' nbin naan. Onaim au 'toit he 16 hi mneen ma mitniin tuaf human on re' sin. Es re' tuaf re' anmepu nbain-'aetn on he ntuthae apirsait ein nok tuaf bian sin re' anmepun huma' mese'. 17 Au umnau he 'iit 'aan ki. Rarit, au neek ii nmariin, natuin nai' Stefanus, nai' Fortunatus, ma nai' Akaikus neman esan ia. Nok ranan naan, sin nsenu' ma nseka' ki. 18 Sin nha'tain au nekak, nahuum on re' sin nha'tain hi neekm ein amsa'. Hi ro he mhormaat meu tuaf ein on re' sin.
Nai' Paulus ansonu' haan tabes ma haan buseet neu tuaf amfaun
19 Apirsait ein pukan-pukan re' abitan propinsi Asia ansoun ein haan tabes ma haan buseet neu ki. Nai' Akila nok in fee je bi' Priskila, ma tuaf bian re' nabua nbin sin umi nsoun ein haan tabes ma haan buseet amsa', fin sin anmafuut piut nok hit Usi' msa'. 20 Apirsait ein ok-oke' re' abitan ia nsoun ein haan tabes ma haan buseet amsa'. Karu hi mibua' te, ammatoup es nok es nok manekat akninu' re' arekot neu apirsait ein. 21 Amkius miit! Fin au nai' Paulus kau, au 'tui kuuk 'eik au 'niimk aa kuuk on nai: Saloom! 22 Sekau ka nmui' fa rais manekat neu hit Usi', Uisneno of anfee hukun neu ne. Au 'roim he usee tuaf, a'paek uab Aram re' hai atoin Yahudis hai uab 'ak, “Marana ta!” In a'moufn ii nak, “Usi'! Amkoen Om uum nai, tua!” 23 Au 'toit he Nai' Yesus, hit Usi', nakrira' In nekan arekot neu ki. 24 Au 'neek ki ok-oke', natuin hit arkit atmafuut tok Kristus, re' Uisneno nreek Ee neem. Au 'tu'u 'bi ia goen, tua. Saloom! Na'ko au, nai' Paulus, kau, tua.
Tabe ma haan buseet
1 Surat re' ia na'ko au nai' Paulus kau. Uisneno nreek kau he au 'nao 'eu mee-mee he utoon 'eu tuaf anmatoom nok Yesus Kristus, re' Uisneno naruru' ma nakrira' nain Je na'ko unu'. Hit ori' nai' Timotius es ia msa'. In nsonu' haan tabes ma haan buseet. Au 'tui surat re' ia 'eu apirsait ein ok-oke' re' biasa nabuan nbin kota Korintus ma propinsi Akaya. 2 Au 'onen 'eu Uisneno, es re' hit Ama', ma 'eu Yesus Kristus, es re' hit Usi'. Au 'toit he Sin naruru' ma nakrira' Sin nekak arekot neu ki, maut he hi bisa mmoin nok mamut, rame' es nok es, ma tainina'.
Nai' Paulus antoit makasi neu Uisneno
3 Hai mroim he are' kanan mansian ii naikas na'rat-ratan Uisneno In kanan. Fin In re' naan, hit Usi' Yesus Kristus In Amaf. Are' rais kasian ii na'uu ma na'baa' na'ko Ne, ma In es re' anha'tain hit nekak. 4 In es re' anseu'saab ma nhaan mau kit oras hit tapein susat. Etun es hit bisa tseu'saab ma thaan mau tuaf bian re' napenin susat amsa'. Fin hit bisa tha'tain sin neek ein, on re' Uisneno nha'tani nrair hit nekak amsa'. 5 Kristus napein susat amfa-faun neu kit. Onaim natuin Kristus annaben naan susat huma'-huma' on re' naan, etun In Amaf anha'tain hit nekak nathoe, oras hit tapein susat. 6 Karu hai mipein susat ambi ia, Uisneno nha'tain hai neekm ein. Ma karu hai mipein susat, rarit hai maran nok neek sabaar, hi ro he mihiin mak, Uisneno npaek ranan on re' naan amsa' he nha'tain hi neekm ein, ma nafetin ki na'ko rais maufinu. Fin karu hi mipein susat on re' hai, Uisneno nha'tain hi neekm ein, he hi bisa maran ma mtahan nok neek sabaar amsa'. 7 Es naan ate hai mpirsai mak, hi bisa mtahan ma'tani' ma ka mi'oni' fa. Fin hai mihiin mak, karu hi mipein susat on re' hai, Uisneno nha'tain hi neekm ein, ma In nha'tain hai neekm ein amsa'. 8 Aok-bian manekat arki! Hai roim ein ii he hi mihiin batuur anmatoom nok susat re' hai mnaben miit ee ambi propinsi Asia. Hai mnaben ate ma'fena', anneis na'ko re' hai he bisa misaah. Tar antea hai he ma'nuur, natuin hai mitenab mak, hai he mmaet een. 9 Hai amnaben ate, ma'fena', on re' tuaf es fe'e nneen afeek rasi nafeek hukun a'maten neu ne. Mes are' rasin naan anjarin, maut he hai mpirsai Uisneno, ma ka mpirsai fa hai tuam ein kiim. Fin Uisneno es re' anmui' kuasa he namonib nafani amates. 10 In es re' nafetin anrair kai na'ko maufinu, oras hai he noi mmaet. In nroim he nafetin kai na'ko maufinu. Ma hai mifnekan piut mak, In of nafetin kai na'ko rais maufinu piut-piut. 11 Karu hi m'onen ma mteek kai piut, naan anturun ma nbaab kai msa', fin Uisneno nroim he nmoe' rais reko mfaun neu kai. In he nmoe' on re' naan, natuin tuaf amfaun an'oen ein ma nteek kai. Rarit oras tuaf amfaun namnau kai, sin of antotin makasi kou'-ko'u neu Ne msa'.
Nai' Paulus ansusun rencana fe'u
12 Hai bisa mifeef a'kre'o, natuin hai mihini mbi hai neekm ein am nak, saa' re' hai mmoe' sin ambi pah-pinan ia, mituin Uisneno In romin neu kai. Hai ka mtet-koit fa na'ko mepu naan, maut he biak ein ok-oke' bisa nkius ma niit hai mmeup nok neek akninu'. Hai minaob hai mepu mpaek mahinif ma manoef re' ansaun na'ko Uisneno, ka mpaek fa mahinif re' na'uu ma na'baa' na'ko pah-pinan ia. Fin Uisneno naruru' ma nakrira' In nekan arekot neu kai. Es naan ate hai bisa mmeup ma'tani' ntein oras hai mibu-bua mok ki. 13 Au suma 'tui 'eu ki nmatoom nok rasin re' hi bisa mrees ma mihiin. Oras ia hi mihini mrair au sarit bian. Mes au ufnekan he hi bisa mihiin au sairt ii 'teme-'teme. 14 Oras ia, hi fe' mihini 'kreo' goah anmatoom nok kai. Mes oras hit Usi' Yesus Kristus ankoen On nfain neem, au 'pirsai hi of mihini mfaun. Nok ranan naan, hi bisa mifeef a'kre'o nmatoom nok kai, on re' hai mifeef a'kre'o nmatoom nok ki. 15 Natuin au 'pirsai 'ak, hi mihiin rasin re' ia ok-oke', etun unu' te, au ufeek 'iit he 'eit i'kius ki 'tein, maut he hi bisa mipein tetus no nua. 16 Onaim unu' te au utenab, karu au 'jair he 'nao 'eu propinsi Makedonia, au bisa 'eis i'kius ki. Rarit, karu au 'fain 'uum u'ko Makedonia, au bisa 'eis i'kius ki 'tein. Nok ranan naan, hi bisa mturun ma mbaab kau, he au bisa 'koon 'eu propinsi Yudea. 17 Mes on mee, tua? Ansuun oras au utoon ki m'ak, au 'roim he 'eit i'kius ki, of oni' hi mak, au 'fe'-'fee'n aah ee, ai'? Ai', hi mak au suma ufeek rasi utuin au roimk ii kuuk, on re' tuaf bian anbi pah-pinan ia, oo? Ai' hi mak au atoin aputa-kriut, re' nak, “Tua.” Te kaah, anbi au nekak naan ii, au utenab 'ak, “Kahaf!” Of oni' hi mak, au re' ia, on re' naan, aa oo? 18 Hit bisa tpirsai teu Uisneno, fin karu In na'uab rais jes, In ro nmoe' natuin ee. Es naan ate hai on naan amsa'. Karu hai mak, “Tua,” hai ka mitenab fa mak, “Kahaf.” 19 Au 'ok nai' Silas, ma nai' Timotius minoni' mrair ki nmatoom nok Yesus Kristus, Uisneno In Anah. In ka atoin aputa-kriut fa re' nak, “tua”, mes in sairt ii, “kahaf”. In ka na'oni' fa msa', fin karu In nak, “tua”, In sairt ii batuur-batuur “tua”. 20 Are' kanan rasi re' Uisneno nba'an anrair sin naan, In of anmoe' sin anjarin. Es naan ate, karu Nai' Yesus anba'an rais jes nak, “tua,” hit bisa tataah am tak, “Batuur. On re' naan, tua! Amin!” Natuin hit tahiin tain saa' re' Nai' Yesus he nmo'e. Hai mitoon rasi ia he miruru' ma mikrira' Uisneno In pinan ma krahan. 21 Uisneno naan es re' anpiir naan ki ma hai msa'. In es re' nait kit atjair Iin na. In es re' anmoe' kit atmaran ma ttahan piut amsa'. 22 In es re' anfee In Asmanan he n'ator kit, naruru' ma nakrira' In reon neu kit. Naan on re' tuaf es, re' antao marak neu in baer es he natoon nak, naan iin ja. 23 Au 'toit he Uisneno kuun es re' anjair saksii neu au uabak ia. Fin In nahiin au nekak nanan. In nahiin neu saa' am es au ka 'nao fa fe' 'eu kota Korintus. Au ka 'roim fa he 'tao umaeb ki, es naan ate, au ka 'eit fa fe' 'eu naan. 24 Hai ka maikas fa hai tuam ein mjair usif he mreun ki mak, hi ro he mpirsai meu sekau. Mes hai mmeup huma' mese' mok ki, maut he hi neekm ein bisa nmarinan. Fin hi bisa maran ma mtahan ma'tani', natuin hi mpirsai meu Uisneno.
1 Onaim au es re' ufeek kuuk 'ak, au ka 'eit i'kius ki fa fe', maut he tuaf amfaun ein kais neek ein ma'feen ein. 2 Fin karu au 'moe' hi neekm ein ma'feen ein, sekau ntein es re' he nmoe' au neek ii nmariin? Suma hi kiim. Mes oras ia, karu au 'uum, of au ususab ki. 3 Etun es au 'tui surat neno naan 'ak, au ka 'jair fa fe' he 'eit i'kius ki. Au 'pao 'tahan fe', maut he hi m'urus main hi raisn ein fe'. Rarit, karu of a'jair he 'eit, au ka 'naben fa susat, natuin hi rasin re' naan. Fin amneon ii, hi re' naan es re' ammoe' au neek ii nmariin. Au uhiin 'ain ki arki. Onaim au 'pirsai, karu au neek ii nmariin, hi neekm ein anmarinan on naan amsa'. 4 Oras au 'tui surat naan 'eu ki neno naan, au 'suus ma au neek ii ma'fena'. Au 'kae 'pin-pinus amsa'. Mes au 'tui on naan, maut he hi bisa mihiin au rais manekat 'eu ki. Fin au ka 'tui fa rasi naan he ususab ki.
Amnikan main atoni' in sanat
5 Anbi hi jemaa't ein naan, anmui' tuaf es, re' nmoe' too mfaun ein neek ein ansusan. Au 'suus natuin atoni' naan in a'mo'en amsa'. Te kaah, in a'mo'en naan, batuur ka ntoom kau fa ma'tani', mes naan antoom ma'tani' neu tuaf bian na'ko hi arki. 6 Au kais u'uab amfaun a'tein. Fin tuaf namfau na'ko ki re' mikaina' mrair je, rarit in nasnaas een. 7 Onaim oras ia, hi ro he mnikan main in sanat, rarit hi ro he mi'uab mirek-reko' mok ne. Fin kais-kaisa' in n'oer. 8 Es naan ate, au 'toit ki he mibua ok-oke' he mmoe' je he in nahiin nak, hi mneek ee. 9 Au 'tui surat neon goes ii, he 'uji ki. Fin au he uhiin, karu hi mmoe' re' batuur, ma mmoe' mituin are' saa' ii ok-oke' re' au uprenat sin 'eu ki. 10 Karu hi ka mitunu' fa nekaf amtein, ma mnikan main atoni' in sanat, au utuin saa' re' hi mifeek ee msa'. Karu anmui' in sanat re' au he 'nikan 'ain je te, au 'nikan 'ain atoni' naan in sanat amsa'. Au 'moe' on re' naan a'bi Kristus In human ma In matan, he njari 'tope' re' reko neu ki. 11 Fin au ka 'roim fa he nitu 'naakf ee nakreo naan ki, he nasaan kit. Hit ro he tahiin in ruunt am reon amreu't ein. Onaim kais ammoon, he!
Nai' Paulus in nekan ka ntainina' fa nbi Troas
12 Unu' te, oras au 'nao 'eu kota Troas, he unoni' tuaf anmatoom nok Kristus In Rais Reko naan, Uisneno nfei ranan neu kau 'bi nee. 13 Mes au neek ii ka ntainina' fa, natuin au ka uteef fa au aok-bian nai' Titus a'bi nee. Rarit au usee 'eu atoin apirsait ein, ma au 'nao 'koon 'eu propinsi Makedonia.
Kristus es re' anmoe' kit he tiis
14 Maski au 'bi mee-mee jah, mes au 'toit makasi kou'-ko'u 'eu Uisneno. Fin Kristus anraban anrair rais maufiun ein, rarit In niis anrair sin, ma hit tmafuut tok Ne msa'. Etun Uisneno naruru' ma nakrira' piut nak, hit re' ia, Iin na. Onaim oras hit tatoon anmatoom nok Kristus, naan nahuum on re' foo meni' re' too mfaun ein nafoi niit ee. 15-16 Unu' te, oras atoin Yahudis sin anmo'en fua'-turu', in masun naen ansae neu Uisneno he nharineb In nekan. Hit tahuum on re' foo mein es amsa', re' namnaub Uisneno anmatoom nok Kristus. Mes teu tuaf bian hit tahuum on re' foo puun es. Fin karu atoni' re' nmoin na'roo na'ko Uisneno ankius hit a'monik, naan anmoe' sin naten-teenb ein nak, sin of anmaten, ma sin of anbeits ok na'kon Uisneno. Mes teu tuaf bian attein, hit tahuum on re' foo mein es. Fin karu tuaf re' napein 'monit re' namneo ma namnoon, ankius hit a'monik, naan anmoe' sin namnau on mee m'es Kristus anmate nrair he nsoi nafetin sin, ma nfeen sin 'monit re' ka natfeek niit fa. Mansian mee es re' na'bei' he nmoe' rasin ia ok-oke'? Ka tiit fa, tua! 17 Mimnau, fin hai re' ia, ka huma' mese' fa on re' atoni' bian re' nanoni' Uisneno In Kabin ma Prenat, he suma naimn ahaa upan ma pa'e, on re' sin anrakan anpaek Uisneno In Kabin ma Prenat. Kaah fa, tua! Karu hai mi'uab, too mfaun ein bisa nkius maat-maat nak, hai minoni' nok neek akninu'. Hai uab ein naan na'uun ma na'ba'an na'kon Uisneno. Ma hai 'monim ammafuut mok Kristus.
Uisneno Iin na es re' nanaob Rais Manba'an Fe'u
1 Kais mitenab mak, hai mmurai mifeef ko'u, he mi'ratan hai tuam ein. Kaah fa, tua! Of oni' hi mitenab hai on re' atoni' bian re' anperluu he neik surat es, re' nareta' anmatoom nok sin meupk ein neu ki, na' hi mfei ranan meu hai mepu, oo? Ai' hai mperluu he mtoit surat on re' naan mi'ko ki he hai meik je meu atoni' bian? Kaah fa, tua! 2 Fin hai suurt es hi mnaa' amrair je. Surat naan, es re' hi kiim. Fin hai mihiin rasi mfaun anmatoom nok hi 'monim. Rasin naan mahiki' ma matunu' nbi hai nekam. Are' tuaf amfaun bisa nresan kuuk hi 'monim; na'ko naan sin bisa nahiin hai meup gui in afan. 3 Fin nakninu' nrair nak, hi on re' suurt es, re' Kristus antui. Rarit In nnona' ntaahn ee neu kai. Kristus ka npaek fa tinta he ntui surat naan, mes In anpaek Uisneno re' Anmoin In Asmaan Akninu'. Kristus ka nruun fa In Kabin ma Prenat anbi faut bena' amsa', nahuum on re' Uisneno nmoe' je neu nai' Musa. Mes In ntui nbi hit nekak amonit. 4 Hai mihiin mak, hai bisa mpirsai meu Uisneno mak, rasin re' ia ok-oke' ro batuur, natuin Kristus es re' naruru' ma nakrira' nrair sin on naan. 5 Karu na'ko hai tuam ein aah ate, hai ka mmui' fa kuasa he mmoe' saa'-saa'. Fin kuasa ma hak re' hai mnaa' ee ji, na'uu ma na'baa' nbi Uisneno. 6 Uisneno re' naan, es re' nait kai mjair In ameput re' he mitoon meu tuaf anmatoom nok In Rais Manba'an Fe'u. Mes In Rais Manba'an Fe'u naan, ka nmatoom fa nok atoni' nmoe' natuin atoran huma'-huma', mes anmatoom nok atoni' anmafuut nok Uisneno In Asmaan Akninu'. Karu atoni' suma nmoe' natun-tuin ahaa atoran, naan on re' sin anmaten anbin sin neek ein, ma ka napenin fa 'monit re' namneo ma namnoon, re' ka natfeek niit fa. Mes karu atoni' nmoni nmafuut nok Uisneno In Asmanan, in napein 'monit re' namneo ma namnoon. 7 Unu' te, oras Uisneno nruun In Atoorn ein anbin faut been ein, naan ro mapina'-makraha'. Maski atoni' nmoe' natuin Atoorn ein naan ok-oke', mes sin nbeits ok fe' na'kon Uisneno. Rarit, oras nai' Musa ntoup naan Atoorn ein naan, in huumn ee anpiin ma masnaa pina' ma kraha'. Etun atoin Israelas sin ka bisa nkius niit fa in human. Mes a'roo-'roo te, pina' naan namneuk. 8 Onaim karu re' ma'tu'i nbi fatu in mapina'-makraha' on naan, on mee nok saa' re' Uisneno In Asmaan ee ntao goe nbi hit nekak nanan? Ro tebes in he mapina'-makraha' nneis, tua. 9 Atoran naan naruru' ma nakrira' nak, hit ro he tapein hukun a'maten he tbeits ok ta'ko Uisneno, natuin hit ka tmoe' tatuin fa Atoorn ein naan ok-oke'. Maski on naan amsa', mes Atoran naan ma'tani' nabaar fe'. Mes Uisneno In Asmanan ma'tani' nneisi ntein, fin In naruru' ma nakrira' ranan he hit bisa tmarame' tfain tok Uisneno. 10 Onaim Atoran re' unu' fe'e te atoni' naan ee neu ma'tani', oras ia ka ma'tani nneis fa goen, fin oras ia nmui' re' ma'tani' nneis. 11 Atoorn ein naan sin ma'taink ein, on re' ka'o Musa in human, re' unu' te masnaa pina', rarit in piin ee namneuk. Nai' Musa ma Atoran naan ma'tani' fe', mes re' ma'tani' nneisi ntein, es re' In ma'tanin antahan piut ka natfeek niit fa, tua. 12 Hit arkit tahiin tak, Uisneno In Rais Manba'an Fe'u naan antahan piut, ma ka natfeek fa, tua. Es naan ate hai mi'uab maat-maat, ma ka mi'aib ee fa, tua. 13 Hit kais atmoe' on re' ka'o Musa. Fin in ro he nkuub in human anpaek tais, maut he atoin Israelas sin ka nkius niit ee fa karu pina' naan namneku nrair. 14 Mes Uisneno nmoe' atoin Israelas sin roenk ein anbufun. Fin tar antea oras ia msa', karu sin nresan anbin Uisneno In Suur Akninu' anmatoom nok In Rais Manba'an Amnaa' re' naan, naan on re' tais es ankuub naan sin a'naak ein, he sin ka nneen ma natniin fa, ma ka nromin fa he nahinin. Ka nmui' fa tuaf anteni' re' bisa nfei sin neek ein he bisa nahinin. Suma Kristus anmees jah. 15 Tar antea oras ia msa', karu atoin Yahudis sin anresan saa' re' ka'o Musa antui sin, sin nnenan ma natninan, mes sin ka nahinin fa nok reko. Naan, natuin sin ka nneen anpaken fa sin neek ein, nahuum on re' saa' es antoeb naan sin neek ein. 16 Mes karu nmui' tuaf re' nmurai npirsai hit Usi' Yesus Kristus ate, Kristus anfei tuaf naan in nekan maut he in bisa nahiin batuur-batuur. Naan on re' ma'tu'i et Suur Akninu' Uisneno mnak, “In nfei nrair tais re' nkuub in human.” 17 Anbi Suur Akninu' Uisneno, oras ka'o Musa na'uab am nak, “Usi'”, in sairt ii Uisneno In Asmanan. Karu hit tapein Asmanaf naan, In nafetin kit. 18 Nok ranan naan, In nmoe' kit ta'ko neon goes teu neon goes hit tpiin ma takraah, on re' In. Hit kais atkuub hit huumk ein ttein. Ma hi tatenab piut anmatoom nok hit Usi' In pinan ma krahan, fin In Asmaan ee anturun kit on re' naan.
Baer ma'osa' re' ma'tunu' anbi 'nai konat
1 Uisneno naruru' ma nakrira' nrair In rais kasian neu kai. Es naan ate, In nreek haefan kai he mitoon meu tuaf anmatoom nok In Rais Manba'an Fe'u. Etun es hai mtahan ma maran piut, ma ka m'oer fa. 2 Onaim na'ko unu' te, hai mifeek on nai: hai mitoon maat-maat mak, hai ka mmoe' fa rais maufinu on re' atoni' bian sin. Sin nromin he nmoe' na'kor-koor ein, maut he atoni' ka bisa nkius niit sin fa. Ma sin ka namaeb ok nahinin fa msa'. Mes hai ka mroim fa he mputa-kriu tuaf. Hai ka mipoi fa anmatoom nok Uisneno In Kabin ma Prenat amsa', mes hai minoni' maat-maat saa' re' namneo ma namnoon. Nok ranan naan, too mfaun ein bisa nparikas hai uab ein anbi Uisneno In human ma In matan, rarit sin nnilei kai nak, hai re' ia, mansian humaf on re' mee? 3 Karu atoni' ka nroim fa he nahiin Uisneno In Rais Reko re' hai minoni' sin naan, sin of namre'un, fin sin anbaits ok na'kon Uisneno. 4 Niut reu'f ein sin a'nakat naan, on re' uisneon goes re' atoni' na'besan neu na oras ia. In nmoe' tuaf bian sin roenk ein anbufun, on re' sin anforon anbin sin neek ein. Sin re' naan, tuaf ein re' ka npirsain fa neun hit Uisneno re' namneo ma namnoon. Natuin sin anforon on re' naan, etun sin ka bisa nkius niit fa Uisneno In me'u. Es naan ate, sin ka bisa nahinin fa Rais Reko re' anmatoom nok Kristus. Sin ka nahinin fa msa' anmatoom nok Kristus In pinan ma krahan. Fin Kristus naan, humaf ma masaf mese' nok Uisneno. 5 Hai ka mi'uab amfaun fa anmatoom nok hai tuam ein, mes hai mi'uab amfaun anmatoom nok Yesus Kristus, hit Usi'. Re' hai mi'uab anmatoom nok hai tuam ein, suma esan re' ia goah: hai mmoe' on re' ate re' antuthae ki, natuin hai mjair Nai' Yesus Iin na. 6 Un-unu' te, Uisneno na'uab niit am nak, “Ro he nmui' me'u re' ntana' nbi meis'okan.” Rarit In nmoe' In me'u he ntana' anbi hit nekak. Fin In nroim he nfee In me'u neu kit. Naan, in sairt ii nak, oras hit tatenab anmatoom nok Kristus, hit tamnau Uisneno In pinan ma krahan amsa'. 7 Maski hai re' ia, suma mansian biasa goah, mes Uisneno ntao baer ma'osa' ia nbi hai neekm ein. Naan on re' tuaf es natunu' baer ma'osa' nbi 'nai konat. Baer ma'osa' naan es re' Uisneno In me'u. Kninu' nrair nak, kuasa re' ma'tani' re' nbi kai, ka na'uu ma na'baa' fa na'ko kai, mes na'uu ma na'baa' na'ko Uisneno. 8 Onaim maski nbi mee-mee atoni' nmoe' nasusab kai, mes hai mtahan ma maran piut aah. Maski hai ka mihiin main fa are' kanan rasi, mes hai ka m'oer fa. 9 Maski tuaf anmoe' nasusab kai fani-fani, mes Uisneno ka nasaitan kai fa mmees-mees. Maski tuaf anbeson kai, mes sin ka bisa nareu' nain kai fa. 10 Natuin hai mipein imrair ha'mu'it ma susat huma'-huma', etun hai mnao meu mee-mee te, hai bisa mimnaub tuaf am mak, Nai' Yesus napein ha'mu'it ma susat amfa-faun amsa' oras In he noi nmaet. Fin, maski tuaf anbeson kai fani-fani, mes hai mmoin piut. Naan namnaub amsa' am nak, Nai' Yesus anmoin piut anbi hai tuam ein. 11 Batuur, tua! Fani-fani hai amonit re' ia, he noi mmaet, natuin hai mjair Nai' Yesus Iin na. Nok ranan naan, are' kanan mansian ein bisa nahinin nak, Nai' Yesus anfee kai 'monit re' namneo ma namnoon, maski hai of ammaet. 12 Onaim maski in a'munin naan, hai mmaet, mes hai ka mimtau fa he mi'uab anmatoom nok Kristus. Fin hai mibarab he hai mmaet on naan, maut he hi bisa mipein 'monit re' namneo ma namnoon. 13 Anbi Uisneno In Suur Akninu' matu'i mnak, “Natuin au 'pirsai Uisneno, es naan ate au u'uab.” Hai teenb ii huma' mese' msa'. Natuin hai mpirsai Uisneno, es naan ate hai ro he mi'uab anmatoom nok Ne. 14 Hai mihini mmak, Uisneno es re' namonib nafani' hit Usi' Yesus Kristus na'ko In a'maten. In of es re' namonib nafani' kit imsa', natuin hit atmafuut tok Nai' Yesus. Uisneno of nahake' kit ok-oke' anbi In human ma In matan, he In ntoup naan kit. 15 Uisneno nmoe' rasin re' ia ok-oke' he nturun ma nbaab ki. Ansuun oras, In he nathoeb In nekan arekot amsa' neu are' tuaf-tuaf. Sin of antotin makasi kou'-ko'u neu Ne msa'. Rarit sin anmanauk ein anmatoom nok In pinan ma krahan naan.
Hit tpirsai piut teu Uisneno
16 Es naan ate, hit ttahan ma tmaran piut, ma ka t'oer fa. Maski hit aok ii namreu', mes Uisneno nha'tain hit nekak neno-neno. 17 Fin tatuin hit tenab, oras ia hit tapein susat huma'-huma'. Mes hit ro he tamnau tak, Uisneno of nait na'ratan kit. Es naan ate, hit taan saa' re' njair oras ia, ka nmui' fa upan saa'-saa'? 18 Onaim hit ro he tkius rasin re' ka mamnita' fa fe'. Kais suma tkius taan ahaa rasin re' mamniit ein aah. Fin rasin re' mamniit ein naan ka ntahan fa 'roo. Mes rasin re' ka mamniit ein fa naan, sin of esan re' ntaahn ein piut ma ka natfeek niit fa.
1 Fin hit tahiin tak, hit aok re' oras ia, hit atpaek attahan atbi pah-pinan ia, on re' tenar es, re' hit tahake' ttahan. Maski hit aok ii of namreu', mes hit kais tatenab, natuin Uisneno nabarab anrair baer reok goes et sonaf neno tunan. Mansian ii ka nmoe' fa bare naan, mes Uisneno es re' anmo'e. Rarit bare naan antahan nabaar. 2 Fin hit thae goen nok hit aok ii oras ia tbi pah-pinan ia. Ma hit troim he tapein ao fe'u re' of atpaek je tbi sonaf neno tunan. 3 Rarit karu hit attea nee te, naan on re' hit ka ao afa' fa, mes atpaek tai paek fe'u. Fin hit ka suma tjair fa smanaf, mes hit tapein ao fe'u tbi nee. 4 Hit aok re' nreu' oras ia, nmoe' kit atheer asnaask ii te, mnanu', natuin atnaben ate ma'fena'. Maski on naan amsa', mes hit ka troim fa he tmaet, ma ka troim fa he tmui' aof saa'-saa' attein. Kaah fa, tua! Hit troim he tapein hit ao fe'u, maut he tasaitan ao amnaa', he nsenu' ma nseka' nok 'monit fe'u re' namneo ma namnoon. 5 Uisneno re' naan, es re' anmoe' kit tabarab he ttoup taan 'moin fe'u. In nfee kit imsa' In Asmanan, he njair baer tarun na'ko In Rais Manba'an naan. 6 Es naan ate, hit tpirsai piut. Hit tahiin tak, oras hit fe'e tbi hit aok re' oras ia, hit fe' ta'roo ta'ko Uisneno msa'. 7 Es naan ate, hit a'moink ii nanete npeo' hit pirsait teu Uisneno. Hit ka tmoin fa ta'ko saa' re' hit tkius ma tiit ee anbi pah-pinan ia goah. 8 Mes hit tpirsai tak, kar-karu hit tmaet tasaitan hit aok ii oras ia, he tnao tmoin tabu-bua tok Uisneno tbi sonaf neno tunan, hit of atmariin attein. 9 Maski hit tmoin piut atbi pah-pinan ia, ai' atmate tbi ia he tmoni tbi sonaf neno tunan, mes re' pentiing naan, es re' hit atharineb Uisneno In nekan. Fin re' naan, hit romik. 10 Kais amnikan. Noki-noki te, are' kanan mansian ii ro he nbaisenun n'anin Kristus. In re' naan, Afeek Rasi re' nnilei are' kanan mansian in a'monin anbi pah-pinan ia. Rarit Kristus of anbaras re' natai nok tuaf mese'-mese' in a'mo'en. Fin Kristus nahiin, karu tuaf naan anmoe' rais reko, ai' anmoe' rasi re' ka reko fa.
Hit bisa tmarame' tfain tok Uisneno, natuin Kristus
11 Natuin hai mimnau mak, Kristus of anparikas hai 'monim, es naan ate hai mimtau ma mhormaat Ee. Ma hai mmeup ma'tani' he mfuri' ma mkopo' tuaf he sin anpirsain neun Kristus. Uisneno nahiin nak, hai neekm ein nakniun' ein. Au 'roim he hi mihini msa' mak, hai neekm ein nakniun' ein. 12 Hai ka maikas fa hai tuam ein ambi hi humam ma hi matam. Kaah fa, tua! Mes hai mfee 'sukif meu ki, maut he hi bisa mifeef anmatoom nok kai, ma hi kais mimaeb om. Nok ranan naan, hi bisa mitaah tuaf ein re' nafefan. Fin sin nafefan anmatoom nok sin mepun re' atoni' bisa nkius niit sin, te kaah sin neek ein ka nakniun' ein fa. 13 Karu hi maan kai mak, amaunut ate, hai mi'uab on naan nai he minaob Uisneno In mepu. Maski hi ka mihiin fa, mes Uisneno nahiin. Karu hai mi'uab ampaek tenab amneot ate, hai mi'uab on re' naan he mturun ma mbaab ki. 14 Kristus anneek niis kit. Naan es re' na'haba' kai ma nha'tain kai he minaob hai mepu. Fin hai mpirsai mak, Tuaf es, es re' Kristus, anmaet he nsenu' ma nseka' tuaf mese'-mese'. In sairt ii nak, naan on re' hit arkit ok-oke' atmaet tasaitan 'monit re' mnaa', ma ka tmui' fa hak saa'-saa' attein atbi pah-pinan ia. 15 Kristus anmaet neu hit mansian arkit mese'-mese', maut he hit arkit re' tmoni tbi pah-pinan ia, ka tmoin tatuin fa hit troimk aa kuuk attein. Mes oras ia hit ro he tmoin tatuin Kristus In romin, natuin In nmate nrair he nsenu' ma nseka' kit, rarit In nmoni nfain. 16 Onaim anmurai oras ia, hit kais atruuk ma t'ukur atoni' tpaek mansian ii in ruku. Maski unu' te, hit atruuk ma t'ukur kuuk Kristus, atpaek mansian ii in tenab. Mes oras ia hai ka mruuk ma m'ukur mtein Je fa on re' naan. 17 Es naan ate, tuaf re' anmafuut nok Kristus anjair mansian fe'u nrair, re' nmu'i 'moin fe'u. In ka on fa re' unu' naan, fin in a'monin amnaa' ee namneuk goen. Ka tiit ee fa goen! Fin oras ia, re' feu' goe nmu'i nrair. 18 Are' saa' ii Uisneno es re' anmoe' sin. In es re' anmoe' rais rame' he hit tareko tfain tok Ne, natuin Kristus annoes nain hit sanat ma penu sin. Rarit In nfee mepu neu kit imsa', he hit taruru' ma takrira' ranan amsa', maut he tuaf bian bisa nmarame' nfain nok Uisneno msa'. 19 Mimnau, fin oras Kristus anbi pah-pinan ia fe', Uisneno npaek Je he neik tuaf he nmarame' nfain nok Uisneno. Onaim In ka nsoi' fa sin saant ein antein, rarit sin ka nasaah fa sin saant ein naan sin hukun antein. Rarit In nfee mepu neu kit, he tnao tatoon teu tuaf am tak, sin bisa nareko nfanin nok Uisneno. 20 Fin hit atjair Kristus In haef. Onaim Uisneno npaek kit he teik tuaf, maut he sin nmarame' nfain nok Ne. Natuin hai mjair Kristus In haef ein, es naan ate hai mitoon ki mmak, “Uisneno namnau ma nroim he hi mmarame' mfain mok Ne.” 21 Kristus ka nmoe' niit fa sanat. Mes Uisneno nmoe' Je he nasaah hit sanat. Uisneno nmoe' on re' naan neu kit, natuin Kristus In a'maten anfei ranan he hit bisa tmoin tok neek amne'o, on re' Uisneno neek amne'o msa'.
Uisneno nmoe' rais reko neu kit
1 Natuin hai mmeup mibu-bua mok Uisneno, hai he mfaineek ki on nai: Uisneno nathoeb ma nakrira' In nekan arekot kou'-ko'u neu ki. Onaim hi kais amtoup maan In nekan arekot naan nok ruum am parsuum aah. 2 Fin anbi Suur Akninu', matu'i mnak, “Nateef nok in oras, Au 'neen ma utniin ko. Au 'turun ma 'baab ko msa', oras Au 'soi ufetin mansian.” Onaim amneen ma mitniin mirek-reko', joo! Oras ia, in oras arekot. Fin oras ia, Uisneno In oras he nsoi nafetin mansian. 3 Es naan ate, hai mroim he mpanat hai tuam ein rek-reko, he mmoin mimneo goah. Fin hai ka mroim fa he mjair ekat meu tuaf re' he neem neu Uisneno In raan a'honis. Ma hai he mi'uab namneo ma namnoon amsa', maut he tuaf kais na'uab na're'uf hai kanam arekot. 4 Ma are' saa'-saa' ii re' hai mmoe' sin, hai m'usaha he miruru' ma mikrira' mak, hai re' ia, Uisneno In ameup rekon. Onaim maski hai mipein susat, mipein ha'mu'it, ai' mmoni mbi taisibu, mes hai mtahan ma maran piut aah. 5 Hai mtahan ma maran piut amsa', oras an'abanat kai, oras nataam kai neu bui, oras taisibu, oras mmeup mbain aet, oras ka mtuup miit fa, ma oras mimnaah. 6 Hai mtahan ma maran nok neek akninu' msa'. Hai mihiin rasi mfaun anmatoom nok Uisneno. Hai mtahan ma msabaar. Hai mmoe' rais reko meu tuaf. Hai mkonan Uisneno In Asmanan he n'ator kai. Hai mneek tuaf batuur-batuur amsa', ma ka mputa-kriu fa. 7 Oras hai mi'uab, hai mi'uab mimneo goah, ma ka mipoi mihiin fa. Hai mtoup maan kuasa msa' mi'ko Uisneno he mmoe' rais reko. Naan on re' hai mjair sorarus, re' nnaa' kenat namtiis na'ko Uisneno, he hai mmakeen amraban musu, ma hai miis. 8 Hai maran ma mtahan amsa', maski atoni' naruru' ma nakrira' hormaat neu kai, ai' sin na'uab nareu' hai kaanm ein: maski sin na'uab namouf kai, ai' sin npanat hai kaanm ein; maski atoni' anputa-kriu nak, hai mipoi maan atoni', ai' sin na'uab ein am nak, hai mi'uab mimneo ma mimnoon. 9 Anmui' tuaf re' ka nahiin kai fa. Mes anmui' tuaf amfaun re' nahiin hai kaanm ein. Fani-fani hai he noi mmaet, mes hai mmoin piut fe'. Fani-fani sin anhukun kai ma'fena', mes hai ka mmaet fa msa'. 10 Maski hai mnaben ate ma'fena', mes hai neekm ein anmarinan piut amsa'. Maski hai ka mmui' fa roit, mes hai mimu'ib too mfaun ein anbin sin neek ein. Naan on re' hai ka mmui' fa saa'-saa', mes hai mipein are' saa' ok-oke' msa'. 11 Hai mi'uab maat-maat meu ki abitan kota Korintus. Hai mneek ki batuur amsa'. 12 Hai miruru' ma mikrira' hai manekat meu ki, ma ka mtaah-taahn ee fa. Mes hi mtaah-tahan hi manekat meu kai. 13 Onaim au he 'faineek 'eu ki on re' hi mjair au aanh ein. Reko nneis hi mneek kai ma kais amtahan manekat naan, tua.
Kais ammafuut mok tuaf re' ka npirsai fa Kristus
14 Kais ammafuut mok tuaf re' ka npirsai fa Kristus. Fin hi ka huma' mese' fa. Atoin apirsait re' nmoin namneo ka natai fa nok atoni' re' nraban Uisneno, rarit ka pantas fa karu sin nmeup nabu-buan. Atoin neek reko ma atoin neek re'uf ka pantas fa he njarin partei ma nhaken ha'e mese'. Naan on re' me'u ka bisa masero' fa nok meis'okan. 15 Kristus ka bisa nekaf mese' fa nok niut ein sin a'nakat. On naan amsa', tuaf re' ka npirsai fa Uisneno ka napein fa sapaaf nok tuaf re' npirsai Je. 16 Hi mitenab on mee? Hi mitenab mak, hi bisa mtaam meu uim onen he mi'besan meu Uisneno fe', na' mtaam ambi uim fuat amtein he mi'bees meu baer fuat ein, ai'? Ka pantas fa, joo! Fin Uisneno naan, Uisneno amonit. In njair hit Usi' msa'. Rarit hit atjair on re' In uim onen, natuin In natua et hit nekak. Fin Uisneno ntui nbi In Suur Akninu' mnak, “Au uim ji et Au ngguin sin atnaank ein. Au 'poi ma 'taam a'bi sin atnaank ein amsa'. Au he 'jair sin Uisneno. Sin anjair Au ngguin amsa'.” 17 Es naan ate Uisneno ntui on nai msa' am nak, “Hi ro he mpoi mi'ko sin atnaank ein, ma mbaits om mi'ko sin, he hi kais amjair on re' sin. Hi neekm ein ro he nakniun' ein. Rarit hi ro he mi'roo mi'ko are' saa'-saa' re' nmoe' hi neekm ein an'oemetan, nok ranan naan, Au 'toup ki nok rek-reko. 18 Au he 'jair hi Ama'; ma hi mjair Au aanh ein amsa'. Re' naan, hit Usi' es re' na'uab. In es re' Akuaas Re'uf, tua.”
1 Aok-bian manekat arki! Natuin Uisneno nba'an anrair rasin ia ok-oke' neu kit, es naan ate hit ro he takninu' hit nekak ma hit a'monik. Kais atkonan 'oemetan a'kre'o msa', natua namaik anbi hit tuak. Fin hit takninu' batuur-batuur ma 'teme-'teme teu Uisneno, he taruru' ma takrira' tak, hit tamtau ma thormaat Ee.
Rasi re' nharineb nai' Paulus in nekan
2 Aok-bian arki! Amfee mainuan meu kai. Amfei hi neekm ein he mtoup kai nok rek-reko. Kais mi'eek hi neekm ein. Fin unu' te, oras hai mbi hi tnaanm ein, hai ka misanab miit fa meu tuaf es amsa'. Hai ka mfuri' ma mkopo' miit fa tuaf he nmo'e nsaan. Hai ka mputa-kriu miit fa tuaf he mipein upan anneis mi'ko sin. 3 Au sairt ii, au ka usaeb fa sanat 'eu ki. Fin au 'ak a'rair ki m'ak, hai mneek ki. Rarit maski on mee-on mee msa', hai mmafuut mok ki, maski hit tmaet ai' hit tmoin. 4 Oras ia, au ka utenab a'tein fa, fin au 'pirsai ki. Au ufeef anmatoom nok ki msa'. Hi mha'tain au neek ii msa'. Onaim maski hai mipein susat huma'-huma', mes au neek ii nmariin piut, natuin hi 'moinm ein. 5 Oras hai iim ambi propinsi Makedonia, hai mhae mmaet, fin hai mipein susat huma'-huma'. Hai mmatoe mok tua sona'. Anbi hai neekm ein hai mimtau msa'. 6 Mes Uisneno es re' anha'tain tuaf re' an'oer, ma re' nnaben ate ma'fena'. Rarit In nha'tain hai neekm ein oras In nreek nai' Titus neem neu kai. 7 Nai' Titus in amneman naan, anha'tain hai neekm ein. Fin in natoon am nak, oras in nbi naan fe'e te, hi mha'tain in nekan. Amneen on naan ate, naan anha'tain hai neekm ein amsa'. In natoon amsa' am nak, hi mimnau ma mroim he miteef mok kau, ma hi mmei' jom batuur nok rasi re' unu' te, njari nbi hi tnaanm ein. In natoon amsa' anmatoom nok hi maim ranan he mturun ma mbaab kau. Es naan ate, au neek ii nmariin. 8 Au uhiin 'ak, au surat ahunut re' utoon ki 'eik uab ma'tani' naan, batuur anmoe' hi neekm ein ansusan. Mes au ka 'mei' jok fa natuin au 'tui surat naan. (Te kaah oras naan, au 'mei' jok a'kre'o, oras au uhiin 'ak, au surat naan, anmoe' hi neekm ein ansusan, maski raab ahaa.) 9 Mes oras ia, au neek ii nmariin. Au ka 'mariin fa natuin oras naan hi neekm ein ansusan. Kaah fa, tua! Au 'mariin, natuin oras naan, au surat anfuri' ma nkopo' ki he misnaas mi'ko hi saant ein, ma mtebi mfain meu Uisneno. Rarit hi mmanaku' hi saant ein ma misaitan hi rasin re' ka reko fa, ma mituin Uisneno In raan a'honis re' namneo ma namnoon. Fin Uisneno es re' anmoe' ki he mmei' jom on re' naan. Nok ranan naan, ka hai fa es re' ammoe' ki he mimreu'. 10 Fin karu hit tmei' jok atbi hit nekak, tatuin Uisneno In romin naan, hit tasnasab 'moe' maufinu, rarit atteib itfain tatuin raan a'honis re' namneo ma namnoon. Naan nafetin kit ta'ko Uisneno In hukun, rarit hit ka tmoin fa tbi re' he tmei' jok piut. Mes karu hit tmei' jok atbi haa hit fefak, naan on re' atoni' pah-pinan ia sin a'moink ein, hit of tamreu'. 11 Hi mitenab miit! Oras hi mrees au surat naan, au uhiin 'ak, hi mmei' jom amsa'. Naan natuin Uisneno In romin. Fin rasi naan anmoe' ki mmeup ma'tani' he hi mnoes main rais maufinu mi'ko hi 'monim. Hi mhae msa' mok hi maufinun. Hi mimtau msa' am mak, kais-kaisa' hi mmoe' maufinu mtein. Hi mimnau ma mroim he miteef mok kau, ma mibarab piut he mmoe' rais reko. Hi mibarab amsa' he mhukun tuaf re' nmo'e nsaan. Natuin hi mmoe' batuur on naan, es naan ate hi mikninu'. Nok ranan naan, ka tiit fa tuaf es he nasahab ki sanat. 12 Onaim au ka 'tui fa au surat ahunut naan, 'eu tuaf re' anmoe' maufinu. Au ka 'tui fa msa' 'eu tuaf re' napein tuaf naan in maufinu. Mes au 'tui surat naan 'eu ki, maut he au ururu' ma ukrira' 'ak, hi uab ein ambi Uisneno In human ma In matan naan, ro tebes. Ma hi mmui' manekat batuur meu kai. 13 Are' saa' ein re' ia, anha'tain au nekak. Hi mha'tain nai' Titus in nekan amsa', maut he in nekan naan bisa ntainina'. Naan anharineb antein hai neekm ein amsa'. 14 Au 'aikas 'iit ki a'bi nai' Titus, oras hai mireta' anmatoom nok hi 'mo'em arekot. Au utoon ee amsa' 'ak, hi ka mimaeb miit kau fa. Fin are' rasin re' hai mitoon miit ki sin re' naan, ro batuur. Rarit are' rasin re' hai mireta' miit sin ambi nai' Titus naan re' anmatoom nok ki naan, ro batuur amsa'. 15 Onaim ansuun oras in namnau hi 'moe'm ein, ma hi uab ein, in maneekn ee neu ki na'baab on piut. Ma in namnau msa' oras in neit anbi naan, hi mtoup goe meik rais hormaat, mes hi mitenab nok au suurt aan amsa'. 16 Au neek ii nmariin, natuin au bisa 'pirsai ki 'bi are' kanan rasi. Onaim au ka 'mui' fa tenab 'eu ki 'tein' een.
Sin nfeen noni-roit nok neek akninu'
1 Aok-bian manekat arki! Hai roim ein he hi mihiin Uisneno In nekan arekot, re' In naruru' ma nakrira' nrair Je neu jemaa't ein propinsi Makedonia sin. 2 Fin maski sin napenin susat amfa-faun, mes sin neek ein anmarinan piut. Es naan ate, maski sin anma'mu'in kuuk, mes sin nfeen roit amfa-faun nok neek akninu' fe', he nturun ma nbaab atoin apirsait bian re' napenin susat. 3 Au bisa utoon kuuk 'ak, sin nfeen are' saa' ii re' sin bisa nfee sin. Rarit sin nfeen ntein' ein anneis na'ko naan. Ka tiit fa tuaf es, re' na'seke' sin on naan. 4 Sin es re' ntotin kuuk nok neek akbubu', maut he hai mfei ranan meu sin. Nok ranan naan, sin bisa nturun ma nbaab atoin apirsait ein re' napein susat anbin Yerusalem, nahuum on re' tuaf bian antuurn ein amsa'. 5 Unu' te, hai mharap ma mifnekan he sin nmo'en on nai, mes re' sin nmoe' je naan, nneis na'ko re' hai mharap ma mifneek! Ahunut, sin nnona' sin tuak ein neu hit Usi'. Rarit sin na'uab antein' ein am nak, “Hai he mnona' hai tuam ein he mtuthae ki, natuin re' naan natuin Uisneno In romin.” 6 Natuin jemaa't ein Makedonia sin a'tope' on re' naan, es naan ate hai mtoit he nai' Titus anfain neem antein neu ki abitan Korintus, maut he hi bisa mturun ma mbaab Uisneno Iin na, re' napenin susat anbin Yerusalem amsa'. Fin unu' te, in es re' nmurai nabuab roit neu sin. Rarit oras ia hai mtoit he in bisa nanokab hi mepu he mturun tuaf. 7 Hi mepu meu Uisneno ro reko. On re': hi rais pirsait naheer ma na'kii'; hi uab ein, reko; hi mihiin amfaun anmatoom nok Uisneno; rasi re' na'haba' ki jan ma'tani'; ma hi mneek miis kai. Es naan ate, au 'roim he hi mturun ma mbaab meik roit kou'-ko'u meu Uisneno Iin na re' napenin susat. 8 Au ka uprenat ki fa, hi abitan Korintus, he mfee roit kou'-ko'u, mes au he 'soba' ki. Fin jemaa't ein Makedonia sin he nturun ma nbaab sin. Onaim nok ranan naan hi bisa miruru' ma mikrira' hi mmaneek batuur-batuur meu tuaf asuust ein. 9 Fin hi mihiin mak, hit Usi' Yesus Kristus naruru' In nekan arekot neu ki. Unu' te, In on re' atoin amu'it. Mes In nafeek he njair atoin ama'mu'it he nturun ki, maut he hi bisa mjair amu'it ambi rasi mfaun. 10 Toon es ii, hi mmurai mibuab roit meu sin. Hi ka mfee fa roit ahaa, mes hi mturun ma mbaab mi'ko hi neekm ein amsa'. Onaim natuin au te, hi ro he mmoe' on nai: 11 Unu' te, hi mroim he mturun ma mbaab Uisneno Iin na re' napenin susat anbin Yerusalem. Onaim oras ia, amfee main sin oke', saa' re' hi mifeek amrair he mturun ma mbaab sin. Ma hi mi'bei' fauk ate, amfee sin nai. Mes re' pentiing, amfee sin nok neek marine. 12 Fin karu hit tfee sin nok neek marine tatuin hit a'be'ik, naan reko msa'. Tatuin hit manoek aa kuuk. Fin tuaf kais anfee nok a'seke', saa' re' of nasuusb ee. 13 Au sairt ii ka nmoe' ki fa he mnaben ma'fena', maut he tuaf bian nnaben ma'kafa'. Fin au sairt ii, hit arkit tasaah ma tbau kuuk sin susat ok-oke'. 14 Fin oras ia, hi mmu'i mneis, ma sin a'mui'k ein ankuran. Noki-noki te, sin bisa nbaras neu ki msa', karu hi a'mui'm ein ankuurn ein. Nok ranan naan, hit arkit bisa tasaah ma tbau tabu-bua. 15 Naan on re' Uisneno In Suur Akninu' matu'i mnak, “Tuaf re' napenin ko'u ma mfaun, ka napeni nneis fa na'ko saa' re' sin nperluu sin. Ma tuaf re' napein ba-baun am akre'o, ka nkuran ma nrabu' fa na'ko saa' re' sin nperluu sin.”
Anmatoom nok nai' Titus, ma tuaf bian re' he neik ook-soun ein
16 Au 'toit makasi 'eu Uisneno, natuin In es re' anfuri' nai' Titus he nturun ma nbaab ki, nahuum on re' au he 'turun ma 'baab ki. 17 Batuur hai mtoit je he neiti nkius ki. Te kaah, naan in roimn aa kuun amsa'. Es naan ate in es re' he neiti nturun ma nbaab ki, ka natuin fa au haan totis. 18 Mes in ka nmees neit fa. Fin hai mreek haef amsa' mi'ko hai aom-bian tuaf es he neit nok ne. Are' jemaa't ein abitan ia nahiin tuaf naan, natuin in nmeup ma'tani' he natoon neu tuaf anmatoom nok Uisneno In Rais Reko. 19 Jemaa't ein sin a'naakt ein anpiir naan ee msa', he nnao nabua nok kai, he nturun ma nbaab kai anbi hai meup arekot ia. Hai minaob mepu ia, he miruru' ma mikrira' hai Usi' In pinan ma krahan, ma mmoe' reko meu atoin asuust ein abitan Yerusalem. 20 Hai maim ranan he mmoe' rasi re' batuur, maut he ka tiit fa tuaf re' bisa nakuu kai nak, hai ka mmeup fa batuur oras hai meik roit ein ia meu tuaf ein re' anperluu sin. 21 Fin hai mitenab mirek-reko' he mmoe' rasi re' batuur, mi'ko neek akninu' anbi Uisneno In human ma In matan, ma nbi atoni' in human ma in matan amsa'. 22 Anmui' tuaf es anteni' re' hai mreek haefn ee he nnao nabu-bua nok nai' Titus sin, he nnao naat roit ein naan. Fani-fani hai mparikas maan ee goen. Rarit hai mihiin amrair mak, in nroim he nmeup ma'tani' neu ki. In neekn ee nmariin on naan, natuin in nahiin anrair nak, hi mmoe' rasi re' batuur. 23 Karu nmui' tuaf nataan anmatoom nok nai' Titus, mitoon am mak, nai' Titus naan, au aok-bian re' anmeup nok kau piut neu ki. Atoin apirsait anbi baer sona' msa' anpiir naan sin tuaf ein, he sin nok naat roit ein ia neun Yerusalem amsa'. Sin nabua nrarin he neitin. Nai' Titus nabu-bua nok sin. Sin arsin of naruru' ma nakrira' Kristus In pinan ma krahan on re' naan. 24 Onaim hi ro he miruru' ma mikrira' hi manekat meu tuaf ein re' neit naat roit ein naan. Ma miruru' sin imsa', nansaa' am es hai mroim he mifeef anmatoom nok ki. Nok ranan naan, apirsait ein na'kon jemaa't ein anbi mee-mee nahinin batuur am nak, hi mneek sin.
Roit turun-babat neu atoni' Kristen abitan Yerusalem
1 Amneon ii, au ka 'tui 'tein fa he 'toit he hi mturun Uisneno In apirsait ein. 2 Fin au uhiin a'rair 'ak, hi mmui' neek marine he mturun tuaf on naan. Au 'romi msa' he utoon 'eu apirsait ein abitan Makedonia anmatoom nok hi nekam arekot. Au utoon am 'ak, hi abit propinsi Akaya mibarab amrair mi'ko toon es ii, he msonu' hi roit turun-babat. Au utoon anmatoom nok hi neek marine msa' re' nmoe' tuaf bian anromin he nturun ma nbaab atoin asuust ein. 3 Rarit au 'reek haef hit aok-bian sin, he naruru' ma nakrira' mnak, saa' re' hai mitoon ee anmatoom nok ki naan, ka rais poi fa. Au utoon on naan, maut he hi mibarab main. 4 Fin karu nmui' atoni' Makedonias neem nabu-bua nok kau, rarit hi ka mibarab fa fe'e te, hit arkit tamaeb ok. Kais-kaisa' au rais pirsait 'eu ki, ka nmui' fa 'sukif. 5 Es naan ate, au utenab 'ak, reko nneis hit aok-bian sin annaon nahunun fe' neu ki, he hi arki bisa m'ator roit turun-baban naan natuin hi rais manba'an unu' naan. Hi ro he mfee mi'ko hi nekam arekot. Kais mipain. 6 In a'suikn ii on nai: “Atoni' re' suma nseen fini kreo' goah, of napein sekit ma mnonut kreo' goah msa'. Atoni' re' nseen fini mfaun ma nathoeb sin, of napein nafani sekit ma mnonut ma tetus kou'-ko'u msa'.” 7 Es-es ate ro he nafeek kuun, in he nfee fauk. Kais amfee meik neek ao-biaf. Kais amfee natuin atoni' na'seke' ko. Fin Uisneno nneek tuaf re' anfee neik in nekan amrinat. 8 Uisneno na'bei' he nfee ki are' kanan tetus-athoen. In na'bei' he nfee ki msa' nneis-neis, maut he hi kais amkuran saa' es amsa'. Fin karu hi mperluu saa' es, hi of mipeni nneis na'ko hi perluut naan. Nok ranan naan, hi bisa mfee mi'ko saa' re' anneis anbi ki, he mturun ma mbaab are' kanan meup arekot. 9 Anbi Suur Akninu' Uisneno matu'i mnak, “Uisneno nroim he nfee neu atoin ama'mui't ein, na'ko In nekan arekot. In nmoe' rais amneot ma amnonot piut, fin In nekan amneot ma amnonot naan, antahan piut.” 10 Uisneno es re' anfee fini, he atoin tani sin ansenan. Uisneno es anfee mnahat, he hit tbukae. Uisneno re' naan, of es re' nfee ki tetus-athoen, maut he hi bisa mmoe' rais amneot ma amnonot. Naan on re' hi mjair atoin tani, rarit Uisneno nfee ki fini he hi mseen. Ma hi sekit am mnonut, In nmoe' sin na'baab ok piut neno-neno. 11 Fin Uisneno he nfee ki nneis na'ko saa' re' hi mperluu kiim sin, maut he hi bisa mturun ma mbaab tuaf bian sin mi'ko hi nekam arekot. Onaim karu hi mturun ma mbaab amrair tuaf bian on re' naan, sin of antotin makasi neun Uisneno. 12 Fin roit turun-baban re' hi mfee sin meu Uisneno Iin na, ro tebes naan of anturun ma nbaab sin. Ma naan amsa' anmoe' ki he mtoit makasi meu Uisneno. 13 Fin oras hi mturun ma mbaab tuaf bian sin, naan naruru' ma nakrira' bukti mnak, hi mpirsai batuur-batuur. Naan nmoe' tuaf bian naikas ma npures Uisneno msa'. Fin sin bisa nkius nitan nak, hi rais pirsait meu Kristus In Rais Reko naan, ka rais poi fa. Naan, natuin hi mmoe' mituin hi rais pirsait. Rarit oras hi mfee turun-baban mi'ko hi nekam arekot meu sin ma meu tuaf bian amsa' ate, naan es re' anmoe' sin naikas ma npures Uisneno. 14 Tuaf re' ntoup naan turun-baban na'ko ki, sin of an'oen ein ma nteek ki. Sin nromin ma nmarinan he nateef nok ki, natuin Uisneno naruru' ma nakrira' anrair In nekan arekot kou'-ko'u neu ki. 15 Mes Uisneno nfee nrair ki ook-soun es, re' reok re'uf nok ruum am parsuum. Ook-sonu' re' naan, es re' Nai' Yesus! In osan, nneis na'ko are' saa'-saa' ii! Es naan ate, hit arkit atbaiseun Uisneno mtak, “Makasi, tua!”
Nai' Paulus namneob in tuan anmatoom nok in mepu neu Kristus
1 Au nai' Paulus kau, tua. Au es re' a'tui 'bi ia. Of anmui' tuaf na'ko ki re' mitenab on nai: karu au ubua 'ok ki, au umaeb ok he u'uab maat-maat. Mes karu au u'roo u'ko ki, au ubrain he u'uab ka u'aib fa, tua. On naan, aa oo? Te kaah, au 'toit he hi mneen ma mitniin kau, natuin Kristus In nekan arekot neu ki, ma In neekn ee ma'nura' neu ki. 2 Mes anmui' tuaf bian na'ko ki re' ka mroim fa he mitniin kau. Sin na'uab ein am nak, hai 'moe'm ein on re' tua sona' na'ko pah-pinan ia sin a'moe'k ein amsa'. Onaim karu au 'eit 'eu bare naan, of oni' au ro he u'uab 'eu sin ma ka u'aib sin fa. Etun au utoon 'ain ki ok-oke', maut he au 'eit i'bi naan ate, au kais u'uab ma'tani' 'eu sin. 3 Maski hit mansian biasa goah, mes karu hit tmatoe tok tuaf bian, hit kais athaek ma'tani' he tmatoe on re' atoni' abit pah-pinan ia re' ka nahiin fa Uisneno. 4 Fin karu hit tmatoe tok tuaf bian, kais amnikan mak, hit suni'-kenat ka huma' mese' fa tok abitan pah-pinan ia. Rarit karu hit tmatoe tok a'naak fatus re' anmatoe nok kit, hit tmui' Uisneno In kuasa re' bisa nareu' niis atoni' in a'sukin. 5 Uisneno In kuasa bisa nareu' a'sukif re' nraban Uisneno, ma nmoe' atoni' ka nroim fa he nahiin Je. In kuasa bisa naruru' ma nakrira' ranan amsa', he nsenu' ma nseka' hit tenab amnaa' nok tenab fe'u. Nok ranan naan, hit tanoni' he tatenab tatuin Kristus In nonin. 6 Tuaf amfaun na'ko ki nmurai nneen ma natninan neun Kristus, ma nmoe' natuin In romin a'teme-'teme. Mes anmui' tuaf bian na'ko ki re' ka nromin fa he nneen ma natniin Ee. Onaim hai mibarab amrair he mhukun sin, re' ka nromin fa he nneen ma natniin Ee. 7 Hi mroim he mkius kiim saa' re' mamnita' mbi 'pohon. Mes hi ro he mkius atoni' in nekan. Onaim karu nmui' tuaf re' naan in tuan ee njair Kristus In haef, mimnau mirek-reko'. Fin hai Kristus In haef ein, on re' in imsa'. 8 Of oni' hi mitenab mak, au ufeef a'neis-neis anmatoom nok kuasa re' hit Usi' nfee je neu kai. On re' naan, ai'? Kaah fa, tua! Fin kuasa naan et naa, he nfee ki 'be'if, ma ka nareu' ki fa. Onaim au ka 'konan fa tuaf he namaeb kau natuin sin nareu' au mepu. 9 Au ka 'mui' fa sarit he aka'tau ki 'eik au suurt ein. 10 Mes atoin ein naan na'uab ein am nak, “Kais amfairoir ma mtoe mituin nai' Paulus. Fin maski in suurt ee ma'tani', mes karu in nmees neem ate, in a'oret ma in uab ee ka nmui' fa kuasa.” 11 Maut he tuaf re' napoi on naan natenab rasi ia: saa' re' hai mtui mbi surat mi'ko bare 'roo, huma' mese' on re' hai iim ma mi'uab ambi hi sonam ma hi tnanam. 12 Tuaf ein re' naan amsa', anromin he naikas sin tuak ein kuuk am nak, sin re' naan, Kristus In haef ein re' ma'tain ein. Hai ka mibrain fa he mitaiba' hai tuam ein mok sin. Mihiin main, joo? Fin hai ka neu fa he mma'tani mneis on re' sin, tua! Tuaf humaf on re' naan, suma nam-nami haa tuaf on re' sin jah. Rarit sin matuurn ein es nok es, natuin sin huma' mese'. Amoont ein! 13 Te kaah, hai ka mifeef kiim fa karu ka tiit fa 'sukif. Hai mi'uab on ahaa re' naan, anmatoom nok mepu re' Uisneno nfee je neu kai. Saa' re' hai mmoe' je meu ki re' naan, mituin saa' re' Uisneno nreun kai. Fin hai ka mmeup fa meup sona'. 14 Amneon ii, hai ka mi'uab amneis-neis fa oras hai mifeef anmatoom nok ki. Fin hai es re' iim he mitoon meu ki anmatoom nok Kristus In Rais Reko. Hi mtoup hai uab ein amsa'. Karu Uisneno ka nreek haefan niit kai fa, mes hai mifeef anmatoom nok ki, naan es re' ka batuur fa. 15 Karu tuaf bian es anmepun, hai ka mifeef fa mmak, naan natuin hai es ammepu. Fin re' pentiing neu kai, es re' hi rais pirsait aan na'kii' antein. Nok ranan naan, hai suus-haet re' hai mmeup meu ki mi'ko unu' naan, na'baab on piut. 16 Rarit hai bisa mnao mkoon ma mitoon anmatoom nok Kristus In Rais Reko meu bare-bare re' et hi pah naan in aon-bian re' ka tiit fa tuaf fa fe' anmeup et naan. Nok ranan naan, hit ka tmapa'autun fa tok atoni' bian re' nanaob in mepu nahuun anbi bare naan. 17 Fin anbi Uisneno In Suur Akninu' matu'i mnak, “Karu nmui' tuaf re' he nafeef, maut he in na'uab anmatoom nok hit Usi'.” 18 Karu tuaf es nafeef anmatoom nok in tuan, naan ka ma'osa' fa. Mes karu hit Usi' es re' naikas tuaf naan ate, re' naan, ro ma'tani'!
Kristus In haef re' batuur, ma haef ein re' ka batuur fa
1 Au he u'uab fare' kre'o. Onaim amneen mirek-reko' kau fe'! On nai: 2 Au on re' hi ama'. Hi on re' au aan feto ao-'temef re' anmanaa' anrair nok atoin es. Re' nahuumb on on re' atoni' anmanaa' nok ki naan, es re' Kristus. Rarit au he 'panat ki urek-reko', maut he oras hi matsao mok atoni' naan, hi mikninu' fe'. Onaim au 'panat urek-reko' ki he kais anmui' tuaf noik ki, he nareu' hi rais pirsait. 3 Oras ia hi mituin Kristus In raan amneot ma amnonot nok neek akninu'. Mes au utiun gok, kais-kaisa' te nmui' tuaf re' napoi naan ki, he hi mbeon om mi'ko ranan naan, on re' kauna' re' napoi naan bi Hawa oras ahunut. Kauna' naan bisa napoi on re' naan, natuin in re' naan, puta-kriut ee in tuan! 4 Ansuun oras tuaf human on re' naan sin neman neun ki, rarit nanoni' ki anmatoom nok Nai' Yesus huma' teta', re' ka huma' mese' fa on re' Nai' Yesus re' hai minoni' meu ki naan ate, nansaa' am es hi mpirsai tuaf on re' naan? Unu' te, hi mfei hi neekm ein he mtoup Uisneno In Asmaan Akninu' he In n'ator ki. Onaim oras ia nansaa' am es hi he mtoup smanaf huma' teta' mtein? Unu' te, hi mpirsai Kristus In Rais Reko re' hai mitoon Ee meu ki. Onaim oras ia nansaa' am es hi mpirsai meu noni' huma' teta' mtein? 5 Sin naikas na'ratan sin tuak ein nak, sin re' naan, Uisneno In haef ein re' ma'tani' nneis. Of oni' sin hak ee anneis na'ko kau, oo? Kaah fa, tua! Au ka utuin fa tenab on naan. 6 Maski nak, au ka 'paek fa ahiint ein sin uab ein, mes au uhiin batuur-batuur saa' re' au u'uab. Hi mihiin amrair rasin re' ia, natuin au ukrira' ufan-fain sin 'eu ki. 7 Oras au unoni' Uisneno In Rais Reko 'eu ki, au ka 'toit fa he hi misaah ma mitaah kau. Au 'moe' au tuak ii tua a'baut, maut he au bisa 'aikas u'ratan ki. Of oni' hi he misaan kau natuin rasi naan, aa oo? 8 Fin apirsait ein na'kon jemaa't ein bare bian sin es re' nasaah ma nataah kau, ma maut he au bisa 'tuthae ki. Naan on re' au 'ait u'ko sin, he bisa 'turun ma 'baab ki. 9 Oras au ubua 'ok ki fe', rarit au 'mui' perluut ate, au ka 'oik ki fa, ai' a'toit saa'-saa' u'ko ki. Hit aok-bian sin re' neman na'kon propinsi Makedonia, sin es anturun kau. Mes au ka usaeb ki fa ma'fena' saa'-saa', ma au ka 'roim fa he noka'-nmeu te on naan amsa'. 10 Kristus In Kabin ma Prenat sin naan, ro batuur. Au uhiin amsa' 'ak, au uab ein batuur amsa', natuin au 'mafuut 'ok Kristus. Ka tiit fa tuaf es anbi propinsi Akaya re' bisa nafreu au fefak, ma ntaar kau he kais u'uab am 'ak, au ka usaeb fa ma'fena' 'eu ki on naan. 11 Nansaa' am es au u'uab on nai? Of oni' natuin au ka 'neek ki fa, oo? Maski hi mitenab on naan, mes Uisneno kuun nahiin au manekat 'eu ki. 12 Rasi re' au 'moe' 'iit sin, au he 'moe' sin piut. Nok ranan naan, tuaf re' nroim he naikas ma na'ratan in tuan ee he nafeef am nak, sin a'moe'k ein on re' hai, sin re' naan ka nmu'in fa 'sukif antein. 13 Sin na'uab ein am nak, Uisneno es anreek haefan sin. Sin re' naan, ameput re' nromin he napoi tuaf! Sin nsoob ein he nmoe' jok on re' Kristus In haef ein re' amneot ma amnonot. Te kaah are' rasin naan poi oke', tua! 14 Hi kais ammasauh, joo! Fin niut reu'f ein sin a'naakt ee msa', nsoba' he nmoe' jon on re' Uisneno In ameput sonaf neno tunan re' neik meu'-sine' nok neek arekot. 15 Es naan ate, hi kais ammasauh karu in ameupt ein amsa' he nsoob ein he nmoe' jok on re' tuaf re' anmeup nok neek amneot am amnonot. Mes ampaant om, fin Uisneno of anbaras sin maufiunk ein naan. Kristus In haef re' batuur, nasaah susat ma ha'mu'it huma'-huma' oras sin natoon anmatoom nok Usif Yesus 16 Karu hi mromi te, maut he au u'uab fare' kre'o 'tein. Fin au he ufeef akre'o. 17 Re' au 'tui je oras ia he au 'aikas au tuak ii on re' ia ji, uab faer ahaa. Fin au uab ein re' ia, ka na'uu ma na'baa' fa nbi hit Usi'. 18 Anmui' tuaf amfaun re' nafeef natuin mansian abit pah-pinan ia sin amneik ein. Onaim au ufeef amsa' utuin sin. 19 Fin hi re' maan hi tuam ein atoin ahinit ma amanoet, karu miteef mok tuaf amonot es ate, hi mkoon ee nok neek mainuan, ai'? 20 Karu tuaf bian nmoe' saa'-saa' neu ki te, hi mkonan sin on naan? Tait i'tope' on re': karu nmui' tuaf na'aet ki, hi mkonan sin on naan? Karu nmui' tuaf nabaak naan hi baer' ein, hi mkonan sin on naan? Karu nmui' tuaf napoi naan ki te, hi mkonan sin on naan? Karu nmui' tuaf naikas in tuan ee on re' kaes ko'u, ma nkana'paar ki on re' atoin a'baut ate, hi mkonan sin on naan? On naan amsa', karu nmui' tuaf anpaas ki te, hi mkonan sin on naan? 21 Mes kais mitoo', tua! Fin au umaeb ok, natuin hai ka mi'bei' fa, tua. Fin hai ka bisa mmoe' fa on naan, nahuum on re' tuaf ein naan anmo'en nrarin neun ki. Mes karu sin nafefan anmatoom nok saa' ate, au ubrani msa' he ufeef on naan. (Mes kais amnikan, fin au u'uab fare'!) 22 Sin atoin Ibranis batuur-batuur, aa oo? Tua! Fin au msa'. Sin atoin Israelas, aa oo? Tua! Fin au msa'. Sin re' naan, ka'o Abraham in sufan-ka'un, aa oo? Tua! Fin au msa'. 23 Sin re' naan, Kristus In ameupt ein, aa oo? Tua! Fin Au msa' on naan. (Kais amnikan, fin au u'uab uab fare' es re' ia!) Batuur au 'ak, au on re' sin. Te kaah, au re' ia a'neis u'ko sin. Fin au 'meup ma'tani' a'neis u'ko sin. Fani-fani tuaf nataam kau 'eu bui a'neis u'ko sin. Fani-fani sin nbeos kau a'neis u'ko sin. Fani-fani au he noi 'mate msa' a'neis u'ko sin. 24 Fin anbi au atoin Yahudis sin kuuk, sin nbeos kau npaken a'kauboe no niim. Ansuun oras sin nbeos kau npaken a'kauboe sin nbeos nafan-fain kau tar antea no bo' tenu mseo. 25 Sin nbeos kau nok hau no teun. Neot es, sin npoir kau nok fatu he na'maet kau. Anfain no teun, au bnao oe je he nreem. Au utboe 'bi tais je fai jes am neon goes. 26 Fani-fani au 'nao 'eu bare' 'roo 'bi mee-mee. Are' kanan siraak he nsirakab niis kau. Tait i'tope' on re': noe sako' nbi noe ko'u, abaakt ein, au atoin Yahudis sin, atoni' ka Yahudis sin fa, ma atoni' re' nmoe' jok on re' aok-bian apirsait ein, te kaah sin napoin. Au he noi 'mate msa' 'bi tais je tnanan, 'bi kota nanan, ma 'bi baer ruman re' na'roo na'ko kuan. 27 Au 'mepu 'bain 'aetn ok, ma au upein kuuk susat huma'-huma'. Fani-fani au ka 'tuup 'iit fa. Au umnaah ma 'meno msa'. Fani-fani au ka 'iit fa he 'uah, au ka 'iit fa pake, ma au 'maniki 'maet. 28 Karu ka mroim fa he msoi' rasin naan ok-oke' te, msoi' on ahaa ia: fin neno-neno te au on re' umaun, natuin au utenab anmatoom nok hit aok-bian apirsait ein etan mee-mee. 29 Karu nmui' tuaf nnaben nak, ka na'bei' fa te, mimnau kau. Fin au on naan amsa', tua. Karu anmui' tuaf anfuri' atoin apirsait ein he nmo'en sanat, au umaeb ok, ma 'saek. 30 Karu au he ufeef ate, reko nneis au ufeef a'matoom nok rasin re' naruru' ma nakrira' nak, au re' ia, a'oret. Batuur! 31 Hit Usi' Nai' Yesus, ma In Amaf, es re' Uisneno, nahinin nak, au ka u'uab fa rais poi. Naan natai, karu atoni' naikas, npures ma nboi's Ee piut-piut. 32 Tait i'tope' on re' unu' te, anbi kota Damsik, usif nai' Aretas in gubernur ee nreun tuaf fauk he npao kau 'bi kota in eno' 'tamas sin, he sin bisa nheek naan kau. 33 Mes au partei ngguin nfaaf-boki' naan kau ma nataam kau nbi 'ki'u, rarit sin na'none' kau npaek tani na'ko kota naan in baah-rame mnanu' in kotin. Onaim au ufeitn ok u'ko gubernur ee in a'niman. Mes mimnau, fin karu au 'mees kuuk ate, ka bisa fa, tua.
Nai' Paulus ankius rais jes anbi mnitas
1 Karu hi mroim, maut he au ufeef a'tein. Te kaah tafeef ate ka ma'osa' fa. Mes au 'roim he utoon 'eu ki rasin re' hit Usi' naruru' ma nakrira' nrair sin neu kau nbi mnitas. 2-4 Au uhiin tuaf es, re' anmafuut nok Kristus. Toon bo'es am haa akoont ii, anmui' tuaf re' nasaeb ee nbi neon goe tnanan re' mnaun re'uf. Mes au ka uhiin fa 'ak, in nsae neik in aon ee oo, ai' in asmaan ee es asaet. Suma Uisneno es ahinit. Au uhini msa' 'ak, oras in na'aiti' nsae neu Uisneno In Baer Reko naan, in nneen uab ein re' atmasahun sin, tar antea mansian ii ka bisa na'uab fa saa'-saa'. 5 Onaim neu atoni' humaf on re' naan, au he ufeef. Mes au ka ufeef fa 'matoom nok au tuak ii. Mes anmatoom nok rasi re' au ka bisa 'moe' je fa te, na' au ufeef on naan. 6 Karu au ufeef, au ka 'perluu fa he upoi, fin au 'mui' rasi mfaun re' batuur re' au bisa u'uab sin. Mes au 'tahan kuuk au tuak, he atoni' kais natenab nak, au reko 'neis u'ko saa' re' sin nneen ma nkius niit ee na'ko kau. 7 Anneis-neisi ntein, Uisneno naruru' ma nakrira' kau rasi mfaun re' ma'tani'. Mes au upein susat amsa', maut he au kais ubeo'. Fin niut reu'f ein sin a'nakat anreek in ameput es he noik kau piut, on re' 'aika' napau au aok ii fani-fani. Airoo! Au 'suus batuur-batuur! 8 Anfain no teun goen, au 'toit he Uisneno nait inporin rasi ia na'ko kau. 9 Mes In nataah kau mnak, “Au ururu' ma ukrira' Au nekak arekot 'eu ko. Naan nanokab neu ko. Fin oras ho mukeo ma msadaar mak, natuin ho 'be'im kuum ka nanokab fa, anbi naan Au kuasa na'baab on piut.” Es naan ate, au he ufeef a'tein, oras au ka 'moe' ubei' fa rais jes. Fin nok ranan naan, au uhiin 'ak, Kristus In kuasa nmoin et au nekak. 10 Es naan ate, karu au 'naben 'ak, au ka 'meup ubei' fa rais jes a'mees, au neek ii ntainina'. Onaim oras atoin ein ankana'paar kau, ai' nasusab kau, ai' anha'mui' kau, ai' natuin au 'jair Kristus Iin ja, au neek ii ntainina' nabaar aah. Fin karu au ka ubei' kuuk fa te, au upein kuasa u'ko Kristus he au ubei' rasi naan.
Nai' Paulus natenab anmatoom nok apirsait ein abitan Korintus
11 Hi 'moinm ein nahuum on re' Uisneno ka nreek niit kau fa 'eit 'eu bare naan. Es naan ate, hi mromi ai' ka mroim fa msa', fe'e na au u'uab fare' kre'o. Amneon ii, hi ro he es re' mifeef anmatoom nok kau. Ro tebes, au ka ma'osa' fa. Mes karu hi mitaib kau mok “haef ein re' ma'tani' nneis” re' nak Uisneno nreek haefan sin, sin re' naan ka ma'tani' nneis fa na'ko kau. 12 Ansuun oras Uisneno nreek haefan tuaf es he natoon anmatoom nok Ne, tuaf naan anmoe' rais sanmakat huma'-huma' npaek kuasa he naruru' ma nakrira' bukti mnak, Uisneno es re' anreek haefn ee. Mes kais amnikan, fin oras au 'bi hi sonam ma hi tnaanm ein, au 'moe' rais sanmakat amsa' on re' naan. Mes au 'meup on naan nok sabaar piut. 13 Mes kais mitoo', tua! Suma rasi mees' aah, re' au ka 'moe' je fa 'eu ki, re' tuaf bian nmoe' je nbi jema'at bian. Rasi naan es re': au ka 'toit ki fa he hi misaah ma mitaah kau. 14 On nai! Au ubarab a'rair he 'uum 'eu ki no teun ii. Au ka 'perluu fa he hi misaah ma mitaah meik noni-roit meu au 'monik. Au ka 'perluu fa msa' hi 'mui'm ein. Fin, natuin hit harat, ka pantas fa he ri'aan ein natunu' 'mu'if neu sin mahoint ein. Re' pantas ji, mahoint ii es re' natunu' 'mu'if neu sin aanh ein. Onaim au ka 'perluu fa he hi mitunu' 'mu'if meu kau, fin hi on re' au aanh ein! Re' au 'perluu goe jaan, es re' hi tuam ein ma hi maneekm ein. 15 Au 'roim he 'soos bare' he 'fee ki. Au 'meup ma'tani' msa', maut he hi bisa mmoin mituin Uisneno In romin. Karu au 'neek 'iis ki, hi ro he mneek kau on naan amsa'. Onaim nansaa' am es hi mtahan hi rais manekat naan? Ka pantas fa, tua. 16 Anmui' tuaf na'ko ki re' anmanaku' mnak, au ka usaeb ki fa ma'fena'. Mes anmui' tuaf re' nak, au 'jair tua aputa-kriut ma'tani' ma upoi ki, tar antea 'moe' ki mituin au romik. 17 Onaim on mee? Of oni' tuaf ein re' au 'reek sin 'eu ki naan, napoi naan ki, oo? 18 Fin au 'furi' nai' Titus he neit nateef nok ki. Au 'reek haef amsa' na'ko hai aok-bian sin tuaf es antein, he neit nok ne. Of oni' nai' Titus napoi naan ki, oo? Kaah fa, tua. Fin nai' Titus nok kau re' ia, huma' mese'. Hai mmeup mepu re' huma' mese', fin hai nua kai teenb ii, huma' mese' msa'. 19 Aok-bian manekat arki! Of oni' hi mitenab mi'ko fe'e na mmak, hai mimneob hai tuam ein ambi hi humam ma hi matam? Kaah fa, tua! Fin are' saa' ii re' hai mi'uab sin re' ia, Uisneno nahiin anrair sin. Onaim hai ka bisa mi'koro' fa saa'-saa' mi'ko Na. Hai mmafuut mok Kristus amsa'. Natuin hai mneek ki, es naan ate are' saa' re' hai mmoe' sin naan, nok sarit he hai bisa mmoe' ki he mi'bei'. 20 Karu au 'jair he 'eit 'eu ki, au utenab, kais-kaisa' hi ka mjair fa tuaf on re' au romik. Fin kais-kaisa' anmui' tuaf re' anmatoe, re' neekn ee nameen, re' natunu' nekaf, re' natenab naan in tuan aa kuun, re' na'uab na're'uf es in kanan, re' na'uab re'uf neu es, re' abe'ot, ma re' nareu' are' saa' ii. Of oni' au 'jair tuaf re' hi ka mroim je fa msa'. 21 Karu au 'eit 'eu ki, au utiun gok natuin hi 'moe'm ein. Kais-kaisa' Uisneno he namae kau 'bi hi humam ma hi matam. Kais-kaisa' au 'moe' tuaf annaben ma'fena', natuin tuaf amfaun na'ko ki re' nmonin nbin 'moe' maufinu fe', mes ka mroim fa he mi'piis, he mibani' mfain mituin Uisneno In raan amneot ma amnonot. Sin nhai'niis jok! Fin anmui' tuaf re' anmakoin nok tuaf re' in ka fee ja fa, ai' in ka moen ja fa. Sin nmo'en huma'-huma' mes sin ka namaeb ok fa, tua.
Ampanat mirek-reko' hi 'monim
1 Onaim re' ia, anfain no teun ii re' au he 'eit i'kius ki. Karu nmui' tuaf re' he nakuu tuaf es, kais amnikan in atoran. Fin Uisneno In Suur Akninu' matu'i mnak, “Karu nmui' tuaf re' nakuu tuaf es, ro he nmui' saksii nua'-teun re' na'uab huma' mese' fe'e te, na' amtoupu. Fin karu ka on fa naan ate, kais amtoupu.” 2 Oras au 'eit 'eu ki 'fain no nuan ii, au umnaub tuaf ein re' nmonin nok 'moe' maufinu. Oras ia, au umnaub a'tein sin, nabu-bua nok mansian ii ok-oke' re' nmonin nbin 'moe' maufinu. On re' unu' te, au umnaub sin am 'ak, karu au 'jair he 'uum, au ka 'konan sin fa. 3 Hi maim bukti mmak, Kristus na'uab nanete npeo' kau. Karu Kristus he n'ator naan ki te, In n'ator nok kuasa ma'tani' nbi hi sonam ma hi tnaanm ein. Fin In ka n'oer fa nbi mepu. 4 Oras sin na'maet Je nbi hau nehe, batuur In ka na'be'if, fin In nafetin anrair In kuasa. Mes Uisneno nfee nrair kuasa neu Kristus he In nmoin oras ia. Rarit maski hit re' tjair Iin na re' tnaben tak, hit ka ta'bei' fa, mes Uisneno nfee kit 'moin fe'u. Etun hai bisa mtuthae ki mpaek In kuasa. 5 Amparikas hi neekm ein kiim he hi mihiin am mak, hi mpirsai batuur meu Kristus, ai' kaah. In kuasa mamnita' et hi 'moinm ein, ai' kaah? Am'uji hi tuam ein on re' naan. Fin karu In ka nmafuut fa nok ki te, hi ka mjair fa Iin na. 6 Karu hi mparikas kai, hi bisa mkius miit In kuasa mamnita' nbi hai 'moinm ein. Nok ranan naan, hai mipein fetin. 7 Hai m'onen amsa' meu Uisneno, maut he hi kais ammoe' sanat saa'-saa'. Hai ka mfairoir fa karu atoni' nroim, ai' ka nroim fa, nok hai 'moe'm ein. Mes hai mroim he hi mmoe' rasi re' amneot ma amnonot, maski tuaf bian he ntorak anporin kai. On naan amsa' ka saa'-saa' fa. 8 Fin hai ka bisa mmoe' fa saa'-saa' he mraban saa' re' namneo ma namnoon. Hai mmoe' mihini haa saa' re' namneo ma namnoon. 9 Karu hi mi'bei', ma hai m'oer, hai mmariin ahaa. Fin hai m'onen amtoit he Uisneno nanokab ki ntein. 10 Es naan ate, maski au u'roo u'ko ki, au 'tui rasin re' ia oras ia, maut he au 'eit ite, au kais u'uab ma'tani' 'eu ki 'tein. Au 'jair hit Usi' In haef. Mes In nfee kau hak ma kuasa he 'ha'tain ki, ma ka 'moe' ki fa he mimreu', tua.
Nai' Paulus nasoup in surat
11 Aok-bian manekat arki! Au uab amsoput re' ia, es re' haan tabes ma haan buseet anbi manekat. Mimneob ma mimnonob are' kanan rasi. Amneen ma mitniin mirek-reko' au fainekat. Ammoin nekaf mese'. Hi ro he mmoin reko es nok es. Rais manekat na'uu ma na'baa' nbi Uisneno. Au 'toit he In nok ki piut, ma In nturun ma nbaab ki he hi bisa mmoin ammarame' es nok es. 12 Hi ro he misee ma mmaneek panaf re' pantas neu Uisneno In tuaf akniun' ein. Uisneno Iin na re' abitan ia sin arsin ansoun ein haan tabes ma haan buseet anbi manekat neu ki arki. 13-14 Au 'toit he hit Usi' Yesus Kristus naruru' ma nakrira' In nekan arekot neu ki. Au 'toit he Uisneno naruru' ma nakrira' In manekat neu ki. Au 'toti msa' he Uisneno In Asmaan Akniun' ee naruru' ma nakrira' neu ki In nekan amnanun, maut he hi arki mmoin nekaf mese' ma ansaof mese', tua. On re' naan, tua. Na'ko au, nai' Paulus kau, tua.
Tabe ma haan buseet
1-2 Haan tabes ma haan buseet na'ko au, nai' Paulus kau. Au 'sonu' surat re' ia 'eu au aok-bian apirsait ein nbin jemaa't ein et propinsi Galatia. Hit aok-bian re' nok kau esan ia, ansoun ein haan tabes ma haan buseet amsa'. Au umnaub ki m'ak, Ama' Uisneno ma Yesus Kristus re' anreek haefan kau, ka mansian aa fa. Yesus Kristus naan, es re' Tuaf re' Uisneno anreek Ee neem neu pah-pinan. Kristus anmaet, mes Uisneno namonib nafain' Ee. Rarit Sin re' naan, es re' anreun kau he 'nao utoon Rais Reko re' ia. 3 Au 'onen 'eu Uisneno hit Ama', ma Yesus Kristus hit Usi'. Au 'toit he Sin naruru' ma nakrira' Sin nekak arekot sin neu ki, he hi bisa mmoin nok mamut, rame' es nok es, ma tainina'. 4 Kristus anmaet he nsaok ma nnoes nain hit saant ein, ma nasoitan kit na'ko maufinu re' mansian ii nmoe' sin anbin pah-pinan oras ia. Rasin re' naan ok-oke', natuin Ama' Uisneno In romin. 5 Es naan ate, hit ro he tpures ma ta'naeb Ee piut-piut. Batuur on naan, tua!
Nai' Paulus natoo', natuin abitan Galatia nasaitan noni' amneot
6 Aok-bian arki! Au ka uhini 'tein ki fa heen. Uisneno anpiir ma nbetis naan ki, natuin In nroim he hi mihiin In nekan arekot. Mes nansaa' am es hi misaitn Ee rabah ma mituin kiim noni' 'teta' 7 re' ansaan ma anbeon? Unu' fe'e te, au unoni' 'rair ki anmatoom nok Yesus Kristus In Rais Reko. Mes oras ia, apoit ii ntaam ma napoiba' Rais Reko naan, tar antea ntaka'nanab ki. 8 Ampanat mirek-reko'! Uisneno of ankaas tuaf re' neem nanoni' Rais Reko re' ka huma' mese' fa on re' unu' hai minoni' ki. Maski tuaf naan na'ko kit, ai' Uisneno In ameput na'ko sonaf neno tunan, in ro he napein kasat! 9 Hai mitoon amrair rasi re' ia na'ko unu'. Mes oras ia, au 'roim he umnaub ki 'tein on nai: karu anmui' tuaf re' he neem ma nanoni' ki 'teta' na'ko Rais Reko re' hi mtoup goe neno naan, maut he Uisneno ankaas naan ee. 10 Au ubrain he u'uab on naan, natuin au 'roim he 'harineb Uisneno In nekan. Au ka 'harineb fa mansian ii in nekan. Hi mitenab mak ai' au he upein bo'is na'ko mansian? Kahaf! Karu au 'moe' on naan ate, au ka bisa fa he 'jair Kristus In aan renu'-aan reka'.
Nai' Paulus nareta' nafani' nak, on mee m'es in njair Usif Yesus In haef
11 Aok-bian arki! Au he utoon ki kninu' 'ak, Rais Reko re' au unoni' sin 'eu ki, ka mansian ii fa es ankaran sin. 12 Au ka 'toup sin fa na'kon mansian, ma ka tiit fa mansian es, re' nanoni' kau. Fin Yesus Kristus neikn On es re' natoon are' kanan rasi sin oetk ein ma a'moufk ein neu kau. 13 Hi of amneen amrair saa'-saa' re' anmatoom nok au 'monik neno unu' naan, oras au fe' a'naa' rais pirsait Yahudi, ai'? Oras naan, au 'ha'mui' Uisneno Iin na, he uneuk ma 'noes 'ain sin namnekun. 14 Ma oras naan amsa', au neek ii es ahaa re' he unoni' kuuk are' saa'-saa' re' anmatoom nok rais pirsait Yahudi, a'neis na'ko atoin Yahudis bian re' hai mibat-baat. Ma au msa', es re' a'makoe 'neis-neis he unaob hit be'i-na'i sin harat ma atoran rais pirsait ein ok-oke'. 15-16 Maski on naan amsa', mes Uisneno nafeek anrair he natoon In Anah neu kau. Au aina' ka nahonis kau fa fe', mes In npiir inrair kau, natuin In nroim he naruru' ma nakrira' In nekan arekot neu kau. In nreek haefan kau msa', he 'nao unoni' atoni' re' ka Yahudis sin fa. Oras In nreek haefan kau on naan ate, au ka 'toit fa tua sona' in fainekat. 17 Ma au ka 'nao uteef fa msa' 'ok mnasi Kristen re' anjari nrarin Yesus In haef ein anbin Yerusalem. Mes au 'nao 'ain pah Arap. Rarit au 'fain 'uum a'tein 'eu kota Damsik. 18 Toon teun on naan ate, au 'nao uteef 'ok nai' Petrus a'bi kota Yerusalem, he upein uab saa'-saa' na'ko na. Onaim au utua 'tahan a'bi bare naan, neno bo'es am niim. 19 Oras naan, au uteef 'ok Usif Yesus In oir honif, nai' Yakobus amsa'. Mes au ka uteef 'ok fa Uisneno In haef bian sin. Suma sin nua sin anmesen. 20 Saa' re' au 'tui je ia, ro batuur on naan! Au ka upoi ai' puta-kriu fa. Uisneno nahiin. 21 Rarit au 'nao 'eu propinsi Siria ma propinsi Kilikia. 22 Oras naan, Kristus Iin na, atoin Yudeas sin ka nahiin kau fa fe'. 23 Sin suma nneen ahaa beno nak, “Tuaf re' unu' fe'e te nha'mui' kai naan, oras ia nnao nanoni' ma natoon Kristus In Rais Reko. Te kaah, unu' fe' in es re' anroim he nareu' ma naneuk nain kai.” 24 Annenan on naan ate, sin arsin naikas ma npures na'rat-ratan Uisneno, natuin au 'pirsai 'rair Yesus Kristus.
Usif Yesus In haef bian sin antoup nai' Paulus in nonin
1 Toon bo'es am haa nkoon on naan ate, au 'fain 'uum a'tein a'bi kota Yerusalem. Au 'ok nai' Barnabas. Hai mok apirsait tuaf es ka atoin Yahudis fa, kaan ee nai' Titus. 2 Au 'taam on kota naan, utuin rurut ma rekat Uisneno. Rarit au utoon 'eu atoni mnasi' Kristen sin, Rais Reko re' au utoon ma unoni' 'eu tuaf-tuaf re' ka atoin Yahudis sin fa. Oras naan au 'eikn ok kuuk u'uab ma utoon 'eu sin, he sin bisa nparikas ma ntae narek-reko' saa' re' au unoin ee naan, batuur ai' kah? Fin karu sin nafeek ee mnak, ka batuur fa te, atoni' bisa nak au mepu naan ruum am parsuum. 3 Anneen au u'uab on naan ate, sin ntoup goe nok reko. Sin antoup nai' Titus amsa'. Maski in atoin sona', ka atoin Yahudis fa, mes sin ka na'seek ee fa he na'heri'. 4 Mes oras naan, anmui' tuaf bian re' ka nromin fa, natuin sin nanoin ein 'teta'. Sin atoin Kristen po-poi. Rarit sin neman amninu'-mninu' he na'seke' Yesus Kristus Iin na, re' ka Yahudis fa, he natuin atoin Yahudis sin atoran rais pirsait ein ok-oke'. Te kaah, Yesus Kristus nafetin anrair kit, etun hit ka mafuut ein kit fa goen nok atoran re' naan, on re' ate. 5 Maski sin na'seke' kai on re' naan, mes hai ka mroim fa he mtoup kre'o msa'. Nok ranan naan, hi bisa mpirsai piut Rais Reko re' au unoni' urair ki. Naan ro batuur, tua! 6 Atoni mnais ein antoup au noin' ein naan, ma sin ka na'baab ein fa saa'-saa' antein. Mes Uisneno ka npiir fa humaf. Onaim maski sin a'naet, ai' a'baut, naan ka ma'osa' fa. 7 Re' ma'osa' nneis es re': sin nahinin nak, Uisneno anpiir naan kau he 'nao ma 'eik Rais Reko 'eu tuaf-tuaf re' ka Yahudis fa. Nahuum on re' In nreek haefan nai' Petrus he neik Rais Reko neu atoin Yahudis. 8 Uisneno anfee kuasa neu nai' Petrus he njair haef neu atoin Yahudis. On naan amsa' In nfee kau kuasa he 'jair haef 'eu atoni' ka Yahudis fa. 9 Oras naan, atoni' nak nai' Yakobus, nai' Petrus, ma nai' Yohanis anjarin a'naak akrei. Oras sin teun sin nahinin nak, Uisneno naruru' ma nakrira' In nekan arekot neu kau on naan ate, sin nfenan ma neman ntaeb kau ma nai' Barnabas, he njair tanar nak, hai arkai nekaf mese'. Sin nroim natuin ein he hai meik Rais Reko meu atoni' ka Yahudis fa, ma sin es re' neik Rais Reko neun atoin Yahudis. 10 Anmui' naan rasi piis es, re' sin namnaub ee neu kai. Rasi naan es re', hai kais amnikan he mturun ma mbaab ama'mu'it sin. Batuur. Naan au 'roim he 'moe' je, tua.
Nai' Paulus nakaina' nai' Petrus anbi Antiokia, natuin in nasaitn on na'ko atoni' ka Yahudis sin fa
11 Neot es, nai' Petrus neem anbi kota Antiokia. Onaim au ukain ee maat-maat, natuin in nmo'e nsaan. 12 Oras in fe' neem antea, in nmariin he ntook ma nbukae nabu-bua nok Kristus Iin na, re' ka atoin Yahudis sin fa. Mes oras nai' Yakobus in partei atoin Yahudis sin neman, nai' Petrus nasaitan atoin ein re' ka atoin Yahudis sin fa. In nasaitan bare re' sin nabuan ma nbukaen naan. Natuin in natiun gon nok atoin Yahudis sin noni' re' nak, Kristus Iin na, ro he annaa' naheran atoin Yahudis sin atoran rais pirsait ein ok-oke', ma ro he nbeits ok na'ko atoni' ka Yahudis fa. 13 Ankius niit nai' Petrus anmoe' jon on naan ate, atoin Yahudis bian natuin ein. Tar antea nai' Barnabas amsa' anmoe' jon on naan. 14 Mes oras au 'kius sin ka natuin fa Rais Reok gui in romin on naan ate, au ukaina' nai' Petrus maat-maat 'ak, “Petrus. Ho re' ia, atoin Yahudis. Batuur! Mes Uisneno anfei ranan he apirsait neu Yesus Kristus kais anmatani 'futu' ntein nok atoin Yahudis sin atoran rais pirsait ein. Ho mtoupu mrair rasi naan. On mee! Oras ia ho mu'seke' biak ein he nmoe' natuin on re' atoin Yahudis sin?” 15 Au ukaina' nai' Petrus on naan, natuin hai nua kai atoin Yahudis. Hai pah Yahudis ka on fa pah bian sin. Hai pah ii, hai mihiin Uisneno a'roo-'roo goen. 16 Mes oras ia msa' hai mihiin mak, Uisneno ka ntoup reko fa tuaf mese' msa', natuin in nmoe' natuin atoran rais pirsait. Uisneno antoup reko tuaf re' anpirsai neu Yesus Kristus, ka nak am in nmoe' natuin atoran rais pirsait ii fa. On re' naan ate, na' Uisneno nak, in ka nmui' fa sanat antein. 17 Es naan ate, hai minoni' mak, Uisneno antoup tuaf, natuin in npirsai Yesus Kristus. Mes anmui' atoin Yahudis re' nakuu kai nak, hai msana mrair, natuin hai mpirsai mrair Kristus, mes ka mnaa' fa atoran rais pirsait Yahudi sin. Hi msa' he misaeb sanat on nana, oo? 18 Karu au 'ait ufani' atoran rais pirsait re' au 'porin a'rari, nana na' au 'saan! 19-20 Batuur unu' fe'e te, au 'meup ma'tani' utuin atoran rais pirsait Yahudis sin, he reko te au 'moin reko 'ok Uisneno. Mes au ka bisa fa msa'. Es naan ate, oras ia au 'porin ain atoorn ein naan, ma 'mafutub au 'moin ki 'ok Kristus. Nok ranan naan, na' Uisneno antoup kau nok rek-reko. Nana, on re' ankuus na'peti' kau 'ok Kristus a'bi hau nehe. Oras ia, ka au es re' amoint ii fa 'tein, mes Kristus es re' anmoin et au tuak ii. Au upeni 'moin fe'u ia, natuin au 'pirsai Uisneno In Anah. In neek niis kau, tar antea In nmate nsenu' ma nseka' kau. 21 Rarit Uisneno ntoup kau, natuin In neekn ee reko, ka natuin fa nak au 'moe' utuin atoran rais pirsait sin. Karu atoni' bisa nareok on nok Uisneno, natuin in nanaob atoran rais pirsait naan ate, in oetn ii nak, Kristus In a'maten naan, ruum am parsuum. Rasi nana, es re' au utoon ee 'eu nai' Petrus sin a'bi Antiokia.
Uisneno antoup kit, natuin hit tpirsai teu Yesus Kristus
1 Atoin Galatias sin! Unu' te, au es 'eikn ok utoon a'bi hi maatm ein anmatoom nok Yesus Kristus In a'maten anbi hau nehe. Mes oras ia, tuaf neit napoi nrair ki. Hi moonm ein ii! 2 Au suma he utaan ki rasi piis es. Hi mtoup maan Uisneno In Asmaan ee natuin hi mmoe' mituin atoran rais pirsait? Kaah fa, tua! In Asmanan naan, neman ki, natuin hi mpirsai Rais Reko re' hi mneen ma mitniin amrair je naan. 3 Onaim nansaa' am es hi mmoon re'-re'uf on naan? Unu' te, hi mmoin mituin Asmaan Akniun ii In romin. Mes oras ia, hi mkoit ma mmoe' mituin mansian ii in romin. 4 Oras hi fe' ammurai mpirsai meu Kristus, hi mipein ha'mu'it kou'-ko'u. Kais-kaisa' rasin naan anjarin parsuum aah. (Te kaah, atpirsai teu Kristus, naan ka bisa fa he parsuum aah.) 5 Oras Uisneno nfee In Asmaan ee, ma nakrira' rais sanmakat huma'-huma' anbi hi humam ma hi matam, hi sonam ma hi tnanam, hi mitenab mak In nmoe' on naan, natuin hi mituin atoran rais pirsait? Kaah fa, tua! In nmoe' on naan, natuin hi mpirsai Rais Reko re' hi mneen ma mitniin amrair je. 6 Mimnau atoin Yahudis sin uu'k ein, es re' ka'o Abraham. Suur Akninu' Uisneno antui mnak, “Natuin in npirsai neu Uisneno, etun Uisneno antoup goe nok reko, ma nteek ee nak, atoin neek amneot.” 7 Onaim hi ro he mihiin mirek-reko' rasi pisa' re' ia! Tuaf re' anpirsai on re' nai' Abraham, sin njarin Uisneno In tuaf ein re' batuur. 8 Uisneno natoon nain anbi In Suur Akninu' am nak, In of antoup tuaf-tuaf na'ko uuf ma pah bian ma nteek ee nak, atoin neek amneot, karu sin anpirsai Je. Fin un-unu' fe'e te, In natoon nain Rais Reko neu ka'o Abraham nak, “Are' kanan uuf ma pah anbi pah-pinan ia, of napenin tetus-athoen natuin ko.” 9 Natuin Uisneno In rais manba'an naan, etun In nfee tetus neu tuaf-tuaf sin re' anpirsai Je, nahuum on re' In nfee je neu nai' Abraham. 10 Tuaf re' natuin atoran rais pirsait he Uisneno antoup goe, in ro he nroi ma nasaah ma'fena' atoorn ein naan ok-oke', nahuum on re' in napein kasat. Fin matu'i et Suur Akninu' Uisneno nak, “Tuaf re' ka natuin fa piut-piut atoran rais pirsait ii namnuut, in napein kasat!” 11 Mes batuur een, Uisneno ka ntoup fa tuaf natuin in natuin atoran rais pirsait. Matu'i msa' nak, “Tuaf ro he npirsai Kau, na' Au 'toup goe on re' atoin neek amneot, he in napeni 'monit re' batuur.” 12 Karu atoni' nroim he natuin atoran rais pirsait ii in romin, in ro he nmoe' natuin sin arsin tar namtiis ma namnuut. Fin Uisneno natoon nain anbi In Suur Akninu' mnak, “Tuaf re' anroim he nmoin natuin atoran, in of antaisibu haa nok atoorn ein.” 13 Mes Kristus anbaen nafeek anrair he nafetin kit na'ko atoran rais pirsait re' anfuut kit. Unu' te, hit thae tmaet nok he troi ma tasaah ma'fena' atoran rais pirsait on re' tuaf re' napein kasat. Mes oras ia, Usif Yesus nait nain kasat naan na'ko kit. Matu'i et Suur Akninu' mnak, “Tuaf re' nakfiri' niis ne nbi hau, in napein kasat.” 14 Oras Yesus Kristus anmaet he nsoi nafetin kit, tetus re' Uisneno anfee je neu ka'o Abraham, ansaun ma nnonos pah-pah bian sin amsa'. Nok ranan naan, are' apirsait ein neun Kristus bisa ntoup Uisneno In Asmanan re' In nba'an anrair Je naan.
Uisneno nnaa' naher-heran In rais manba'an
15 Aok-bian arki! Oras ia au he 'paek 'tope' na'ko hit i'monik ansuun oras. Karu anmui' tuaf antui naan surat warisan, rarit in nteken in kanan anbi surat naan, surat naan maheti' nrair. Tua sona' ka bisa fa he nkaibata' surat naan in afan, ma ka bisa fa he ntui ma nruun saa'-saa' anbi naan. 16 On naan amsa', oras Uisneno nahake' rais manba'an nok nai' Abraham ma in sufan-ka'un sin. Uisneno ka na'uab fa nak, “Au uhake' rais manba'an ia 'ok ho sufam-kau'm ein”, natuin In ka nahake' fa rais manba'an naan neu too mfaun. Mes In suma nahake' rais manba'an naan neu tuaf mese', es re' Kristus, re' nai' Abraham in sufan. 17 Au sairt ii on nai: Uisneno nahake' rais manba'an nahuun nok nai' Abraham. Rarit toon natun haa mbo' teun on naan ate, In nasanut atoran rais pirsait neu atoin Yahudis sin, nanete npeo' ka'o Musa. Maski on naan amsa', Uisneno ka nkaibata' fa In rais manba'an re' In nahake' nahuun ee jan. 18 Uisneno ka nfee fa tetus neu nai' Abraham natuin in nmoe' natuin atoran. Mes In nfee tetus natuin In nahake' nain rais manba'an he nfee je neu nai' Abraham na'ko unu' nok ruum am parsuum. Naan on re' ri'aan es antoup pusaak na'ko in amaf. In ntoup natuin in amaf naan anba'an nain, ka nak in ntoup fa natuin in nmoe' natuin atoran. 19 Oras ia, au he utaan 'ak on nai: karu Uisneno ntoup nai' Abraham natuin in npirsai, nansaa' am es Uisneno na'baba' ntein atoran rais pirsait nanete npeo' ka'o Musa? In na'baba' atoran rais pirsait sin he nanoni' mansian anmatoom nok sin sanat huma'-huma'. In sairt ii he mansian ii anmoin natuin atoorn ii in romin, tar antea nai' Abraham in sufan es anboor. Rarit oras sufa' naan, es re' Kristus, anboor ma neem anrair, atoran naan ka nperluu goe fa goen. Oras Uisneno anfee atoran rais pirsait Yahudi, In ka nfee je fa langsung nain. Mes In npaek In ameput sonaf neno tunan, rarit sin neik je neem neu ka'o Musa in a'niman, na' ka'o Musa nfee je neu atoin Yahudis. Nok ranan naan, nai' Musa anjair nete-ranan neu Uisneno ma Iin na. 20 Mes oras Uisneno nahake' rais manba'an nok nai' Abraham, In ka npaek fa nete-ranan. In neikn On es re' nahake' rais manba'an naan. Es naan ate, hit tahiin tak, Uisneno In rais manba'an naan, ma'tani' nneis na'ko are' kanan atoran.
Atoran rais pirsait ii nanoni' mansian anmatoom nok in sanat huma'-huma'
21 Oras Uisneno nfee atoran rais pirsait neu ka'o Musa, naan nasuir nok In rais manba'an sin, ii oo? Kaah fa, tua! Karu nmui' atoran re' mansian ii bisa nmoe' natuin ee, he Uisneno antoup goe, atoin Yahudis sin atoran bisa on naan. Te kaah, ka tiit tain fa atoran mese' re' mansian ii nmoe' natuin, he nhainiik Uisneno In nekan, he ntoup goe nok reko. 22 Anbi Suur Akninu' Uisneno matu'i nak, are' kanan mansian ii mafutu' mates nok sanat huma'-huma'. Etun suma apirsait neu Yesus Kristus anmes-mees, re' bisa ntoup saa' re' Uisneno anba'an anrair je naan. 23 Oras Kristus ka nkoen On neem fa fe', hit atoin Yahudis mafutu' mates anbi atoorn ein tar antea ka bisa masefi' fa. Mes antea in oras, Uisneno nfei ranan he hit tapein fetin na'ko atoorn ein, karu hit tpirsai Kristus. 24-25 Onaim atoran rais pirsait ein naan, nahuum on re' atukus re' nanoni' kit rek-reko tar antea Kristus ankoen On neem. Onaim karu In neem anrari te, na' hit tpirsai Je, he tmoin rek-reko tok Uisneno. Onaim oras ia, hit ka tperluu fa atukus naan antein.
Atoin apirsait anjari nrair Kristus In nonot-asar
26 Oras ia, hi mjair Uisneno In aanh ein, natuin hi mpirsai Yesus Kristus. 27 Hi ar-arki re' amtoupu mrair srani' he mjair Iin na, mafutu' mates mok Ne. 28 Apirsait ein ok-oke' neun Kristus ka mabetis fa goen. Onaim maski hi atoin Yahudis, ai' ka atoin Yahudis fa, ate ai' ka ate fa, bifee ai' atoni', are' mansian ii re' mafutu' anbi Kristus naan, huma' mese'. 29 Kristus naan, nai' Abraham in sufan re' Uisneno anba'an anrair Je na'ko unu'. Natuin hi mmafutu' amrair mok Kristus, es naan ate hi mjair nai' Abraham in sufan batuur. Nok ranan naan, hi bisa mtoup tetus re' Uisneno anba'an nain je neu nai' Abraham amsa'.
1 Au 'fee 'tein 'tope' es. Anmui' naan ri'aan es anmui' hak he ntoup pusaak na'ko in amaf karu in aamf ee anmaet. Mes karu in toon anmoin naan ii ka nanokab fa fe', in ka bisa ntoup fa pusaak naan fa' fe', maski are' saa'-saa' ii of anjair iin na. Fin karu toon in anmoin naan ii ka nanokab fa fe', in on re' ate re' ka nmui' fa hak he ntoup in uisn ee in a'mu'in. 2 Nok ranan naan, ro he nmui' tuaf re' an'urus ri'ana' naan ma in pusaak ein. Ri'ana' naan ro he natuin tuaf a'urus naan in romin, tar antea oras in aamf ee nafeek rasi naan, na' in bole ntoup nain in pusaak ein naan. 3 Hit on re' naan amsa'. Oras Yesus Kristus ka nkoen On neem fa fe', hit on re' ri'ana' naan fe'. Hit atmafutu' mates tok pah-pinan ia in romin fe', on re' ate tuaf es. 4-5 Mes nateef in oras on naan ate, Uisneno nsonu' In Anah re' anjair mansian, he mansian bisa njair Uisneno In aan kahu' sin amsa'. In Anah naan, anmoin natuin atoran rais pirsait atoin Yahudis, he In bisa nafetin are' kanan mansian re' nahunu te mafutu' nok atoran naan. 6 Natuin hi mjari mrair Uisneno In aanh ein, es naan ate, In nsonu' In Anah In Asmaan ee, he ntaam neu hi nekam nanan. Nok ranan naan, hi bisa mmui' hak he mteek Uisneno naan mak, “Aam Honi'”. 7 Onaim oras ia, hi ka ate fa goen re' ka mmui' fa hak he mtoup pusaak ein. Mes hi mjari mrair Uisneno In anah re' anmu'in hak he ntoup pusaak ein ok-oke' re' In nba'an anrair sin naan.
Nai' Paulus seor natenab abitan Galatia sin
8 Unu' fe', oras hi ka mihiin Uisneno fa fe', hi mmoe' hi tuam ein on re' ate, he mfua meu are' kanan fuat ein re' ka batuur fa. 9 Mes oras ia, hi mihini mrair Uisneno. Reko nneis karu au 'ak, Uisneno es re' nahiin ki. Onaim on mee m'es hi he mtebi mfain he mfua mtein baer' ein re' ka nfee fa upan saa'-saa', ma ka nmui' fa kuasa saa'-saa'? Hi he mmafuut mok baer' ein naan, he sin na'aet ki ntein? 10 Au 'neen a'rair 'ak, hi minaob atoran mituin neno, funan, oras-oras, ma toon, he msoba' mharineb Uisneno In nekan. 11 Rasi naan anjair tenab neu kau. Kais-kaisa' au 'hae ruum aah he unoni' ki a'roo-'roo re' ia. 12 Aok-bian manekat arki! Au 'toit he hi mifetin hi tuam ein na'kon rasin re' naan, on re' au. Au ufetin au 'monik ia na'ko are' kanan atoran rais pirsait, nahuum on re' hi re' ka atoin Yahudis fa. Unu' fe', oras hit tabu-bua, au ka upein 'iit fa susat u'ko ki. 13 Hi arki mihini mmak, neon goes ii, oras au 'uum he utoon ki Rais Reko 'eu ki, au aok ii ka na'be'if. 14 Maski on naan amsa', hi ka mtorak kau fa, natuin hi mtoup kau on re' au re' ia Uisneno In ameput na'ko sonaf neno tunan. Anneis-neis hi mtoup kau on re' au re' ia es re' Yesus Kristus neikn On. 15 Oras naan, hit arkit atmariin atmaet. Mes nansaa' am es oras ia ka on fa naan antein? Te kaah, oras naan hi mneek miis kau, tar antea hi he mro'i mporin hi matam fuam ein naan, he mfee kau. 16 Mes oras ia, hi mak ai' au re' ia hi musu, natuin au u'uab rasi re' batuur 'eu ki, oo? 17 Aputa-kriut ein ka nromin fa he au 'mapartein 'ok ki, onaim sin nfuri' ki piut-piut, he mituin atoran rais pirsait atoin Yahudis sin ok-oke'. Sin nroim he hi mtaisiub he mitun-tuin ahaa sin roimk ein. 18 Mes karu hi mmakoe he mmoe' 'moe' reko, naan reko msa'. Maski au 'ok ki, ai' kaah fa, mes ammoe' meu 'moe' reko. 19 Anah amanekat arki! Oras ia au 'meup matani' 'tein 'eu ki, tar au on re' bifee ma'apu' re' he noi nahoin een. Au ka usnasab fa mepu, tar antea hi neekm ein on re' Kristus In nekan. 20 Mes oras ia, au ka uhiin fa he 'moe' on mee 'tein. Au umnau ki he 'eit u'uab langsung 'ok ki, he au kais u'uab 'eik haan ma'tani' on re' ia.
Nai' Paulus anpaek reta' anmatoom nok ain Hagar in anah, ma ain Sara' in anah
21 Karu hi mroim he mmoin mituin atoin Yahudis sin atoran rais pirsait ate, reko nneis hi mihiin batuur-batuur atoran naan in sairt ii fe'. 22 Tait i'tope' ta'ko Suur Akninu' Uisneno re' nareta' anmatoom nok sin ka'o Abraham in aan mone tuaf nua. In nahonis ri'aan es na'ko in ate, ma es antein na'ko in fee re' in nsao. 23 Ate naan nahoni' naan ri'ana' naan, natuin mansian ii in romin. Mes in fee je, nahoni' natuin Uisneno nahake' nrair rais manba'an naan neu nai' Abraham. 24 Bifee nua' ein naan, anjarin a'tope' he nakrira' ma naruru' rais manba'an nua re' Uisneno nahaek ee neu mansian. Rais manba'an es, In nahaek ee nok ka'o Musa anbi 'to'ef Sinai, oras In nasanut atoran rais pirsait neu atoin Yahudis sin. Tuaf-tuaf re' anmafuut nok atoran rais pirsait naan, sin re' naan amsa', ate on re' bi Hagar. 25 A'to'ef Sinai naan et pah Arap, on re' bi Hagar. Abitan Yerusalem sin ok-oke' oras ia, re' anmafuut nok atoran rais pirsait Yahudi fe', sin re' naan amsa', ate on re' bi Hagar. 26 Mes rais manba'an es antein, nakrira' ma naruru' kota Yerusalem es antein et sonaf neno tunan. Uisneno In aanh ein re' natuan etan bare naan, sin ka ate fa. Sin re' naan tuaf-tuaf re' napenin nrarin fetin na'ko atoran rais pirsait ein. Onaim sin on re' hai ain Sara', nai' Abraham in fenai. 27 Matu'i et Suur Akninu' Uisneno nak: “Hoe, bifee akiut! Amharineb ho nekam nai! Hoe, bifee re' ka nnaben niit fa meen mahoni'! Amsii ma mmariin nai! Bifee neek akrati' natuin in moen je ka nfairoir je fa ntein, in of napein anah mfaun anneis-neis na'ko bifee mamone'.” 28 Onaim aok-bian arki! Unu' te, Uisneno nahake' rais manba'an he nfeen nai' Abraham ri'ana'. Mes a'roo te, na' Uisneno nanokab In rais manba'an naan, ma ain Sara' nahonis nai' Isak neu nai' Abraham. Hit on re' nai' Isak amsa', natuin Uisneno nahake' rais manba'an he nfeen nai' Abraham sufaf bian. 29 Oras ri'aan re' na'ko bifee ate re' nahoins ee natuin mansian ii in romin, na'nae neem ate, in nha'mui' nai' Isak re' nahoins ee natuin Uisneno In Asmaan ee In romin. Naan huma' mese' amsa' on re' saa' re' anjair oras ia. 30 Suur Akninu' Uisneno matu'i nak, “Amriu' ate naan nok nain in anah. Fin ate naan in anah ka nmui' fa hak he ntoup pusaak. Suma ho fee jan in anah es re' anmui' hak.” 31 Onaim on nai, aok-bian arki! Hit re' ia ka on fa anah na'ko ate, natuin hit ka tmafutu ttein fa tok atoin Yahudis sin atoran rais pirsait. Fin hit re' ia, nahuum on re' nai' Abraham in anah na'ko in fee saah, natuin hit tpirsai Yesus Kristus.
Kristus nafetin anrair kit
1 Unu fe', atoin Yahudis sin anroin ma'fen-fena' sin atoran rais pirsait. Mes oras ia, Kristus nait nasanut 'baut ein naan na'ko tuaf-tuaf re' anpirsai Je. Nok ranan naan oras ia, hit arkit tapein fetin. Onaim hi kais on re' ate, re' anroi nafani' atoran naan. 2 Amneen mirek-reko'! Au re' ia, nai' Paulus kau! Au es re' a'uab re' ia! Karu hi mtoup a'heri' he mituin atoin Yahudi sin atoran naan ate, Kristus In a'maten he nsoi nafetin kit naan, ka ma'upan fa goen. 3 Karu tuaf antoup a'heri', in ro he nroi ma nasaah antein atoorn ein ok-oke' msa'. Hi mimnau, ai' kaah? Unu' fe'e te, au utoon 'ain ki. 4 Tuaf re' anroim he npaek atoran he nmoe' Uisneno he ntoup goe, in nbetis in tuan ee nok Kristus. Nok ranan naan, in ntorak nain Uisneno In nekan arekot. 5 Mes Uisneno In Asmaan Akninu', re' anfei ranan he hit tpirsai Yesus Kristus. Es naan ate, hit tpa-pao tak, Uisneno of anmarak kit nak, hit atoin amneot. 6 Maski atoin a'heri', ai' kaah, naan ka pentiing fa. Mes re' pentiing ii es re' tuaf apirsait neu Kristus, ma anneek tuaf bian sin. 7 Unu' fe', hi mmoni mrair mituin raan reko. Mes oras ia, sekau nputa-kriu nrair ki, tar antea hi ka mituin fa ranan naan antein? 8 Noni' re' anputa-kriu ki ma hi mneen ee naan, ka neem fa na'ko Uisneno. Te kaah, In re' naan es re' no'en ma nhaman ki he mjair Iin na. 9 Saa' re' sin nanoni' sin naan, anmurai uab aan'-aan' aah, mes a'roo-'roo te, nareu' nain hi teenb ein naan. Nahuum on re' raur teif re' anseor goe nok uut am oe he nmo'en utunu'. Ka 'roo fa te, raur teif naan, anmoe' uu masero' naan ansae oke'. 10 Natuin hit tjari trair mese' tok hit Usi' Yesus Kristus, es naan ate, au 'tebes 'ak, In of anmoe' ki mpirsai mfain meu saa' re' au unoni' 'ain ki sin. Ma Uisneno kuun of anhukun sekau-sekau re' nareu' hi rais pirsait. 11 On nai, aok-bian arki! Karu au unoni' 'ak, atoni' ro he napeni 'heri' te, ro batuur au ka upein fa ha'mu'it on re' oras ia. Ma atoin Yahudis sin ka ntorak nain fa au noni' sin anmatoom nok Nai' Yesus In a'maten anbi hau nehe naan. 12 Mes tuaf re' antaka'nanab ki anmatoom nok rais ma'heri' naan, maut he sin kuuk anheir nain sin a'maek ein ok-oke'. 13 Aok-bian arki! Uisneno nafetin anrair ki, he hi kais ammoni mmafuut mok atoran rais pirsait ii in romin. Mes kais mitenab mak, of oni' hi mipein fetin amrair mi'ko hi 'moinm ein sin roimk ein. Batuurn ii, hi ro he mmaneek, ma ammatuthaen es nok es, on re' ate antuthae in usin. 14 Anbi Suur Akninu' Uisneno matu'i mnak, “Ho ro he mneek tuaf bian sin, nahuum on re' ho mneek ho tuam aan kuum.” Karu hi suma mmoe' mituin atoran ia mees ahaa te, hi mmoe' mituin amrair atoin Yahudis sin atoran in sarit sin ok-oke'. 15 Mes karu hi mmanau-manan es nok es, ma mmabaan es nok es ate, amkius kiim! Ka 'roo fa goen antein, hi of mireu' main hi 'moin ein kiim. He tmoin tatuin mansian ii in roimn ii oo, ai' he tatuin Asmaan Akniun ii romin? 16 Au sairt ii on nai: karu hi mmoin mituin Uisneno In Asmaan ee In romin, hi ka mituin fa mansian ii in roimn antein. 17 Mansian ii in roimn ii, ka natuin fa Asmaan Akniun ii romin. Ma Asmaan Akniun ii In romin ka natuin fa mansian ii in romin. Sin nua sin nasurin. Onaim hi kais ammo'e mtein mituin hi roim ein naan kiim. 18 Mes karu Uisneno In Asmaan ee na'naa' ki, hi ka mmafuut fa goen mok atoorn ein. 19 Tuaf-tuaf re' anmoe' natuin mansian ii in romin naan, on re': tuaf re' anmakoin nok tuaf re' ka in moen ja fa ai' ka in fee ja fa, tuaf re' in teenb ee re'uf, re' ka namaeb nahiin jon fa, 20 re' anfua nitu ma narauna', re' anmamusun, anmasau feef, neek maufinu, amaheket, namnau naan ahaa in tuan, afuarutus, amoe' taisibu, 21 amantinus, amauf raru ma nmoe' fesat sona', ma nasaan tuaf bian sin. Unu' fe', au umnaub 'iit 'ak, tuaf-tuaf re' anmoe' natuin rasin re' naan, sin re' naan ka bisa fa he njarin Uisneno Iin na. 22 Mes tuaf-tuaf re' anmoin natuin Uisneno In Asmaan ee In romin, Uisneno In Asmaan ee of anmoe' je njair tuaf re' amanekat, a'huma'moet, aroim rais rame', ansabaar nahiin in tuan, neek reko nok es, anroim he nturun ma nbaab es, annaa' naheran in rais manba'an, 23 reko nok too mfaun, ma npanat nahiin in tuan ee rek-reko. Ka tiit fa atoran mese' re' antaar nain rasin re' ia. 24 Tuaf-tuaf re' antaam anjair Yesus Kristus Iin na goen, in ka natuin fa mansian ii in roimn antein. Romif he nmoe' maufinu sin, sin makuus ein mates et hau nehe nok Nai' Yesus. 25 Onaim karu Uisneno In Asmaan ee nfee kit a'moin fe'u nrari te, hit ro he tmoe' on naan piut, tatuin In romin. 26 Etun hit kais atromi haa re' he nhormaat kit, kais tasuir es nok es, ma kais atmoe' neek re'uf attein.
Ammaturun ma mmabaab es nok es
1 Aok-bian arki! Karu anmui' apirsait tuaf es anmo'e nsaan ate, hi re' mihiin batuur-batuur Uisneno In Asmaan ee In romin, amnao mi'uab mok ne meik neek ma'nura'. Rarit mok ne nfain he natuin Uisneno In raan amneot ma amnonot. Mes ampanat hi tuam ein naan he kais mituin in sanat naan. 2 Karu nmui' tuaf napein susat ate, hi bian amturun ma mbaab ee. Nok ranan naan, hi mmoe' mituin Kristus In atoran. 3 Karu nmui' tuaf naikas in tuan nak, in reko nneis na'ko bian, te kaah on fa naan ate, naan in napoi in tuan. 4 Onaim tuaf mese'-mese' ro he nparikas saa' re' in nmo'e. Karu saa' re' in nmoe' je naan reko nrair, in of anpuas kuun. Kais mitaib om mok biak ein. 5 Au u'uab on naan, natuin tuaf mese'-mese' ro he nasaah ma nataah kuun saa' re' in nmo'e. 6 Mes tuaf re' antoup Uisneno In noni', in ro he nbait in mepu naan in afan, he nturun tuaf re' nanoin ee naan. 7 Mimnau! Uisneno nahiin nain are' saa'-saa' ii oke'. Onaim kais mipoi hi tuam ein naan kiim, ma kais amsob-soba' he mipoi Uisneno. Saa' re' atoni' anseen ee, in of napein nafani' in fuan ma afan. 8 On naan amsa', karu atoni' anmoe' maufinu natuin in romin, in of napeni 'monit amre'ut. Mes karu atoni' anmoe' 'moe' reko ma rais reko natuin Asmaan Akniun' ee In romin, in of napein nafani' 'monit arekot re' ka natfeek niit fa. 9 Nok ranan naan, hi kais mipehen 'moe' reko. Fin nateef in oors ate, hit tapein tafani' in fuan ma afan arekot, asar hit ttaran ma ttahan piut. 10 Onaim karu hit atmui' oras mainuan he tmoe' rais reko te, atmoe' je neu too mfaun, anneis-neis neu hit aok-bian apirsait ein.
Nai' Paulus nasoup in surat
11 Au 'eikn ok es re' a'tui surat re' ia oras ia, a'paek huruf kou'-ko'u. 12 Mimnau! Apoit ein amsa' anpirsai neun Yesus Kristus re' anmate nbi hau nehe. Mes sin of na'seke' ki he mtoupu 'heri', natuin sin namtausan atoin Yahudis bian re' of anha'mui' sin, karu sin nanoni' nak, Uisneno antoup tuaf re' ka natuin fa atoran rais ma'heri'. Es naan ate, sin npasan sin huumk ein anbi atoin Yahudis sin. 13 Maski sin na'heir ein anrarin amsa', mes sin kuuk ka natuin fa atoran rais pirsait ein ok-oke'. Sin nromin he hi mtoupu 'heri' he mjair sin na. Nok ranan naan, sin partei ngguin naikas sin. 14 Mes karu au te, au suma 'aikas u'rat-ratan hit Usi' Yesus Kristus. In nmate nbi hau nehe, he na'maet are' kanan rais maufinu re' mansian ii anmo'e, natuin pah-pinan ia in romin. Es naan ate, au ka 'fairoir ma 'toe utuin a'tein fa pah-pinan ia in romin. Ma pah-pinan ia in romin ka nfutu ntein kau fa goen. 15 Ma'heri' ai' ka ma'heri' fa, naan ka pentiing fa. Mes re' pentiing ii, es re' hit ttoup 'moin fe'u na'ko Uisneno. 16 Au 'toit he Uisneno naruru' ma nakrira' In manekan neu too mfaun re' natuin au noink ein re' ia, he sin bisa nmonin mamut, rame' es nok es, ma tainina', ma nakrira' rais kasian es nok es. Fin sin njarin Uisneno In nonot-asar fe'u. 17 Ta'uab namneo goah! Au ka 'roim fa he atoni' noik kau anmatoom nok rasi naan antein. Au aok ii anmui' biki, natuin au 'tuthae Yesus Kristus. 18 Aok-bian arki! Au 'toit he hit Usi' Yesus Kristus naruru' ma nakrira' In nekan arekot neu ki arki. On re' naan, tua! Tabe ma haan buseet na'ko kau, Au, nai' Paulus kau, tua.
Tabe ma haan buseet
1 Haan tabes ma haan buseet na'ko au, nai' Paulus kau. Au 'tui surat re' ia 'eu ki arki re' amjair Yesus Kristus Iin na et kota Efesus, re' maran ma mtahan ambi 'monit akninu' mituin Yesus Kristus In romin. In kuun es re' anreek haefan kau natuin Uisneno In romin. 2 Uisneno naan, hit Ama'. Ma Yesus Kristus naan, hit Usi'. Au 'toit he Sin naruru' ma nakrira' Sin nekak arekot neu ki, he hi mmoin nok mamut, rame' es nok es, ma tainina'.
Nai' Paulus anpures na'naeb Uisneno ma Yesus Kristus
3 Pures ma bo'is neu hit Usi' Yesus Kristus In Amaf Uisneno. Natuin Uisneno nfee nrair kit are' kanan tetus-athoen na'ko sonaf neno tunan, natuin hit tjair Yesus Kristus Iin na. 4 Oras pah-pinan ia ka njair fa fe', Uisneno anneek ma npiir naan kit, he tjair Kristus Iin na. In nroim he hit tmoni kninu' tar antea tuaf ka napein fa mainuan he nakuu kit. 5 In nafeek anrair na'ko unu', he npaek Yesus Kristus he nait kit tjair In aanh ein. Rasi re' ia ro nmoe' In neekn ee anmariin. 6 Es naan ate, hit tpures ma tboi's Ee. Fin In naruru' ma nakrira' In nekan arekot neu kit, he hit bisa tmafuut tok In Anah re' In nneek. 7 Maski unu' fe' hit ka tmoni kninu' fa tatuin Uisneno In raan a'honis arekot, mes In nathoeb In nekan arekot neu kit. In nreek In Anah naan, he nat'opab In naa' tar antea In nmaet. Nok ranan naan, In Anah ansoi nafetin naan kit na'ko hit saant ein ok-oke'. 8 Natuin In manekan naan ma'tani' neu kit, In nakninu' hit nekak amsa', he hit bisa tahiin tarek-reko' In sarit. 9 Unu' fe', Uisneno ka natoon fa In sairt ein ok-oke' neu mansian. Mes oras ia, natuin In romin, In nmoe' kit he tahiin batuur-batuur tak, na'ko un-unu' In nafeek anrair he npaek Yesus Kristus he nmoe' hit mansian ii bisa tmarame' tok Uisneno. 10 Ma of antea in oras, Yesus Kristus anjair A'nakat amsa' he n'ator saa'-saa' re' anbi pah-pinan ma sonaf neno tunan. 11-12 Natuin hit tmafuut tok Kristus, es naan ate hit attoup pusaak na'ko Uisneno msa'. Fin na'ko oras ahunut, In npiir ma nbetis anrair kai atoin Yahudis he mjair Iin na. In sairt ii he npaek kai mjair maat-ranan meu pah bian, he are' tuaf bian sin ok-oke' bisa npirsain neun Kristus. Are' saa'-saa' ii anjair, natuin saa' re' In nafeek anrari. Nok ranan naan, hit arkit bisa tait ta'rat-ratan Uisneno In pinan ma krahan naan. 13 Natuin hai atoin Yahudis amfei mrair ranan, es naan ate hi re' mi'ko pah bian sin imsa' bisa mtaam amjair Kristus Iin na, asar hi mpirsai In Rais Reko batuur naan. Fin Rais Reko naan ansoi nafetin ma nfee ki 'honis. Karu hi mpirsai on naan, hi mtoup Uisneno In Asmaan Akniun' ee msa' re' In nba'an anrair Je naan. Natuin Asmaan Akninu' naan, nahuum on re' marak re' anjair tanar nak, hi mjari mrair In a'mu'in saah batuur-batuur. 14 In Asmaan Akniun' ee njair jaminan nak, Uisneno of anfee saa'-saa' re' In anba'an anrair, tar antea nsoi kit he tjair Iin na. Es naan ate, hit tpures ma tboi's Ee.
Nai' Paulus an'onen ma nteek abitan Efesus
15 Au 'neen a'rair rasi mfaun anmatoom nok hi rais pirsait meu hit Usi' Yesus Kristus, ma hi rais manekat meu tuaf apirsait ein. Es naan ate, 16 au ka usnasab fa he 'toit makasi 'eu Uisneno. 17 Au 'onen 'ak, “Aam Honi'. Ho kuum, au Usi' Yesus Kristus In Uisneno! Ma Ho kuum es re' mapina'-makraha'. Au 'toit he Ho mfee Ho Smanam meu abitan Efesus, maut he sin bisa nahinin batuur-batuur rasin re' namneo ma namnoon, ma bisa nahinin reko nneis neu Ko, tua. 18 Au 'toit he Ama' Uisneno mfei sin teenb ein, ma mukninu' sin neek ein, maut he sin bisa nahinin batuur-batuur are' saa'-saa' re' Ho mba'an he mfee sin meu sin. Au 'romi msa' he sin bisa nahinin batuur-batuur pusaak re' Ama' Uisneno Ho mba'an amrair he mfee je meu sin. Fin pusaak naan, mapina'-makraha' amsa'. 19 Au 'toti msa' he Ama' Uisneno amturun ma mbaab maan sin, he sin bisa nahinin batuur-batuur nak, Ho kuasam ma'tain re'uf. Fin Ho mpaek kuasa naan he mturun ma mbaab Ho apirsait ein. 20 Fin Uisneno Ho kuasam naan, ma'tain re'uf. Ho mpaek kuasa naan he mumonib mufani' Yesus Kristus na'ko In a'maten. Rarit Ho mait musaeb Kristus meu sonaf neno tunan, ma mutook Ee mbi Ho bnapam a'ne'u, anbi bare re' napein hormaat anneis-neisi. 21 In na'rata nneis-neis na'ko are' saa'-saa' anbi pah-pinan ia ma anbi sonaf neno tunan. Fin In na'raat anneis-neis na'ko are' kanan kuasa ma'tain ein, ma are' kanan anaa' apreent ein, ka neu suma oras ia nmees jah fa. In annaa' kuasa naan tar antea nabar-baar. 22 Uisneno Ho meikn Om es re' ammoe' are' saa'-saa' ii na'ruri' ma na'besan neun Kristus. Ma Ho es re' mait musaeb Kristus anjari 'Nakaf he n'ator are' saa'-saa' re' anmafuut nok apirsait ein. 23 Onaim karu In njari 'Nakaf ate, hai arkai apirsait meu Ne, amjair on re' In aon. Hai of es re' misoup are' kanan mepu re' In nanaob sin oras In nbi pah-pinan. Fin In re' naan anmui' kuasa he nmoe' are' saa'-saa' ii njair, natuin Uisneno Ho sarit.” Au 'onen ma 'teek ki on re' naan, tua.
Tuaf re' anpirsai Yesus Kristus antoupu 'moin fe'u
1 Unu' fe'e te, hi mtanhai Uisneno In apreent ein. Hi mmoe' sanat huma'-huma'. Es naan ate, In naan ki on re' atoin amates. 2 Unu' fe' hi mmoin mituin pah-pinan ia in romin. Hi mmoin mituin furi' na'ko a'naak niut reu'f ee in romin. Antea oras ia, nitu naan anfuri' mansian he nraban Uisneno fe'. 3 Unu' fe', hit tmoin on re' naan amsa', tar antea saa'-saa' aah, re' hit tnaben tiit ai' tatenab tiit ee, he tmoe' tatuin hit roimk aa kuuk. Hit tmoe' maufinu on re' tuaf bian sin ok-oke', etun Uisneno natoo' ko'u neu kit, 4-5 ma naan kit on re' amates amsa' re' anbetis ma nbaits on nok Ne. Maski on naan amsa', In nkasian kit, natuin In nneek niis kit. Es naan ate, In naruru' ma nakrira' In nekan arekot. Onaim In nsonu' Yesus Kristus he nfee 'moin fe'u neu kit. Onaim Uisneno es re' ansoi nafetin kit, natuin In neekn ee reko. 6 Yesus Kristus anmaet, mes Uisneno namonib nafain' Ee. Rarit Uisneno nait nasaeb Ee he nnaa' aprenat et sonaf neno tunan. Uisneno anmoe' on naan amsa' neu kit. In nfee 'moin fe'u neu kit, rarit In nait nasaeb kit ma hit atnaa' aprenat tok Kristus atbi sonaf neno tunan. 7 Nok ranan naan, anmurai oras ia tar antea nabar-baar, Uisneno naruru' ma nakrira' In manekan kou'-ko'u, ma In nekan arekot ma'tani' naan, natuin hit tpirsai Yesus Kristus. 8-9 Oras hi mpirsai Kristus, Uisneno nsoi nafetin ki natuin In nekan arekot. In nsoi nafetin ki on naan, ka nak fa In he nbaras saa' re' hi mmoe' sin. Naan anjair parseen neu ki ruum-ruum aah. Es naan ate, hi ka mmui' fa uab re' ma'u'u he mifeef nok saa' re' hi mmoe' sin. 10 Hit tmoin, natuin Uisneno es re' anmoe' ma npakae kit. Rarit Yesus Kristus anfee 'moin fe'u neu kit, maut he hit tmoni tbi 'moe' arekot ma rais arekot re' Uisneno nafeek nain sin na'ko un-unu'.
Uisneno antoup tuaf na'ko are' kanan uuf ma pah
11 Aok-bian arki! Hi mihini mrair mak, atoin Yahudis sin annaa' naher-heran sin atoran rais ma'heri', mes sin nkana'paar ki re' ka atoin Yahudis fa, natuin hi ka mituin fa atoran naan. Te kaah, naan suma atoran mansian re' anmatoom nok in aon, ka ntea fa in nekan. 12 Oras hi ka mpirsai fa fe' meu Yesus Kristus, hi ka mmui' fa hak he mtaam amjair Uisneno Iin na. Unu' te, hi ka mtaam fa fe' meu Uisneno In rais manba'an re' In nahake' nain je nok nai' Abraham ma in sufan-ka'un sin. Oras naan, hi mitua mbi pah-pinan ia, ka mharap ma mifnekan fa meu Uisneno, natuin hi amjair tua sona' fe', 13 re' mabetis na'ko Uisneno. Mes oras ia, Yesus Kristus anfei ranan he hi bisa mmafuut mok Uisneno. Kristus anmaet he nhainiik Uisneno In nekan, he hi bisa mmarame' mok Uisneno, ma bisa mjair Iin na. 14 Unu' fe', hai atoin Yahudis ka bisa fa mmoin nok mamut meu ki atoin ka Yahudis fa. On re' anmu'i 'bata' re' nmoe' kit ma atma'bata'. Mes natuin Yesus Kristus anmate nbi hau nehe, onaim In nareu' nani 'bata' naan, he hit re' unu' fe'e te atmamuus, bisa tmarame' tfain, atjair pah mese'. 15 Fin unu' fe', atoin Yahudis sin namin ranan he nmonin rek-reko nok Uisneno anpaken atoran rais pirsait ein. Mes oras Yesus Kristus anmaet, In nkaibata' nain raan amnaa' ma nfei raan fe'u, he tuaf na'ko pah Yahudis ma bian na'kon pah a'teta' sin, bisa ntaam nabu-buan ma nmoin nabu-buan nok Uisneno. Nok ranan naan, sin arsin anmafutun njarin pah feu' goes, re' nmoin nok rais rame' es nok es. 16 Onaim Kristus anmaet anbi hau nehe, he nmoe' rais mapanaf nua bisa natefan njair mese', ma neik sin anfanin neun Uisneno. Kristus annoes ma nsaok nain are' saa'-saa' re' unu' te anjair rasi re' neik sin njarin musu es nok es. 17 In nkoen On neem anbi pah-pinan neik Rais Reko neu atoin Yahudis ma ka atoin Yahudis fa mnak, “Unu' fe'e te, hi mmamusun, mes oras ia anmui' ranan he hi bisa mmarame' es nok es.” 18 Onaim hai atoin Yahudis ma hi re' ka atoin Yahudis fa bisa tapein ranan he tnao teu hit Ama' Uisneno tabu-bua, natuin Nai' Yesus anfei nrair ranan neu kit arkit. Ma Uisneno In Asmaan Akninu' msa' naruru' ma nakrira' ranan neu kit arkit.
Yesus Kristus In tuaf ein on re' uim onen
19 Natuin Yesus Kristus In mepu naan, es naan ate, hi atoni' re' ka atoin Yahudis fa, hi ka mjair fa tua sona' mtein, re' ka nmui' fa hak saa'-saa'. Fin oras ia, hi mmui' hak et sonaf neno tunan, natuin hi mjair Uisneno In nonot-asar. 20 Naan on re' Uisneno he nahake' uim jes. In ntao fatu 'suik susuf, es re' Yesus Kristus. Rarit In nahake' fanderen, es re' In mafefa kniun' ein ma In haef ein. Rarit In nsusun ma nbakin fatu anbi faofk ein ok-oke'. Fatun naan es re' hit arkit re' attaam atjair In nonot-asar. 21 Umi naan anhaek naheer ma'tani' anbi fatu 'suik susuf. Umi naan na'siu piut, tar antea tuaf-tuaf neem ma n'onen neu Uisneno. 22 Onaim oras ia, Uisneno nmoe' he hi re' ka atoin Yahudis fa msa', amjair on re' fatu, mibua mok kai atoin Yahudis. Uisneno nsusun kit arkit, he tjair In sonaf re' Uisneno In Asmanan natua ma namaik.
Nai' Paulus neik Rais Reko neu ka atoin Yahudis sin fa
1 Uisneno ka nbetis fa atoin Yahudis ai' ka atoin Yahudis fa. Es naan ate In nreek haefan kau, nai' Paulus kau, he 'nao ma utoon Yesus Kristus In Rais Reko 'eu ki re' ka atoin Yahudis fa 'bi kota Efesus. Au unaob au mepu naan, tar antea au 'jair atoin bui. 2 Tebes, hi ro mihiin mak, Uisneno anreek haefan kau, natuin In nroim he naruru' ma nakrira' In nekan arekot neu ki. 3 Batuur, unu' te, Uisneno ka natoon fa fe' neu mansian anmatoom nok saa' re' In nafeek anrair je neu ka atoin Yahudis sin fa. Mes oras ia, In natoon anrair rasi ia neu kau. Nok ranan ia, es re' au 'tui re' paar-para' a'bi ia 'eu ki. 4 Karu hi mrees amrair je te, hi bisa mihiin batuur-batuur Uisneno In sarit anmatoom nok Yesus Kristus, re' In nfei nrair je neu kau. 5 Fin un-unu' fe', mansian ii ka nahiin In sairt ee batuur-batuur fa fe'. Mes oras ia, In npaek In Asmaan ee he natoon sarit naan neu In mafefa kniun' ein ma In haef ein. 6 Fin na'ko unu' te, Uisneno nafeek anrair nak on nai: karu atoni' re' ka atoin Yahudis fa npirsai Yesus Kristus In Rais Reko, sin bisa ntaman njarin Uisneno In aanh ein amsa', on re' atoin Yahudis sin. Nok ranan naan, oras ia, hit arkit atjair nonot-asar mese', ma hit bisa ttoup bu'-bua' tetus-athoen na'ko hit Ama' Uisneno. 7 Uisneno naruru' ma nakrira' In nekan arekot, onaim In npiir naan kau 'jair In haef. Ma In anfee In kuasa neu kau msa', he unaob In mepu naan. 8 Na'ko Uisneno Iin na, au re' ia es re' aan'-ana'. Maski on naan amsa', mes Uisneno npiir naan kau he unaob In mepu re' ma'tain re'uf. In nroim he au 'nao utoon 'eu atoni' ka atoin Yahudis sin fa anmatoom nok Kristus In nekan arekot re' ka natfeek niit fa. 9 Anmurai na'ko oras Uisneno nmoe' pah-pinan ia, In sarit he nsonu' Kristus neem, ma'nifa'. Mes oras ia, In nroim he au 'fei rais ma'nifa' naan in sarit. 10 In sarit naan, mahiin ii kah een. In nroim he npaek Iin na he nakrira' In mahinin naan, neu are' kuasa sin ma neu sin re' naprenat et neon goe tnanan. 11 Oras In ka nmoe' pah-pinan ia fa fe', In nafeek anrair he nfei ranan he nsoi nafetin mansian. Es naan ate, In npaek hit Usi' Yesus Kristus, he nmoe' on naan. 12 Nok ranan naan, hit arkit re' atpirsai trair teu Yesus Kristus, kais tamtau ttein he teem ma ta'uab tok Uisneno. Fin In nroim he ntoup kit, oras mee-mee jah. 13 Mimnau! Au upein ha'mu'it natuin au 'tuthae ki, tuaf-tuaf re' ka atoin Yahudis fa. Maski on naan amsa', hi neekm ein kais an'oren. Au usaah ma utaah kuuk ha'mu'it ia, maut he hi mtoup in arekon.
Nai' Paulus an'onen ma ntoit makasi neu Uisneno
14 Oras au utenab 'aan kuuk Ama' Uisneno In nekan arekot ma'tani' naan ate, au 'ri'tuu ma 'toit makasi 'eu Ne. 15 Fin In re' naan, are' kanan nonot-asar pah-pinan ma sonaf neno tunan sin Amaf. 16 Au 'onen he In nfee tetus-athoen neu ki natuin In nekan arekot ma'tani' naan. Ma au a'toit he In nsonu' In Asmaan ee msa', ma anfee kuasa, maut he hi neekm ein naan na'be'in. 17 Au 'toit he Yesus Kristus anmoni nbi hi neekm ein, natuin hi mpirsai meu Ne piut-piut. Ma au 'onen he hi mmoin ma mmafuut meik In manekan, on re' hau roet re' in a'baa'n ee ntaam anbi afu. 18-19 Au 'onen amsa' he hi mok Uisneno Iin na ok-oke', bisa mihiin batuur-batuur Kristus In manekan neu mansian, re' mansian ii ka bisa n'ukur ma nruuk naan ee fa. Natuin manekat naan, kou' re'uf, mainua re'uf, mnaun re'uf, ma mfau re'uf. Au 'onen amsa' he hi bisa mnaben miit In manekan, tar antea manekat naan nahenu nbi hi neekm ein ma hi 'moinm ein. 20 Uisneno In kuasa, ma'tain re'uf, anneis nain na'ko are' saa'-saa' re' hit bisa ttoit sin, ma na'ko are' saa'-saa' re' hit bisa tatenab sin. Ma In npaek kuasa re' ma'tani' naan, he nmepu nbi hit nekak. 21 Nok ranan naan, iim arkit re' tmafutu' atbi Kristus, tait ta'rat-raatn Ee. Pures ma bo'is neu Ne piut-piut, na'ko oras ia, tar antea nabar-baar. Batuur on naan, tua!
Usif Yesus Iin na ro he nmonin nok nekaf mese', on re' sin njarin In aof mese'
1 Au unaob a'rair au Usi' In mepu tar antea au 'jair atoin bui. Onaim oras ia, au he 'furi' ki he mmoin nok amneot ma amnonot mituin Uisneno In romin, natuin In no'en ma nnapen ki mjair Iin na. 2 Nok ranan naan, hi ro he mmoin nok neek a'parat, ma neek ba-baun es nok es. Anbi rais manekat, hi ro he msabaar ma mihiin batuur-batuur es nok es. Karu na'ko hi arki anmui' tuaf naim rasi nok tuaf es ate, kais ammakto'on. 3 Maim ranan he mmoin nok mamut es nok es, natuin Uisneno In Asmaan ee anfutu nrair ki mjair mese'. 4 Yesus Kristus Iin na, anjarin mese' on re' In aon aa kuun. Ma sin arsin amsa' antoup Uisneno In Asmaan ee re' suma mees' aah. Ma sin arsin nafnekan ma nharap neu Uisneno nmees, natuin In es re' no'en ma nhaman sin he njarin Iin na. 5 Hit Usi', mees' aah, Hit rais pirsait, suma anmu'i haa ranan mese', he bisa tmarame' tok Ne. Ma hit arkit attoupu srani', he tjair mese' tok Ne. 6 Uisneno, mees' aah, Ma hit Ama', suma In kuun. In kuun es re' naprenat kit ar-arkit. In kuun es re' nok kit ar-arkit. In kuun es re' anmoin piut et hit nekak nanan. Kristus anfee mepu huma'-huma' he Iin na na'be'in 7 Mes Yesus Kristus anbati nrair In kuasa neu kit, maut he hit es-es ate tanaob In mepu. 8 Etun matu'i anbi Uisneno In Suur Akninu' mnak, “In nsae neu baer a'ratas, he In nmakeen anbi bare naan tar antea niis. Rarit In nheer neik tuaf-tuaf re' nisan nain sin naan amfa-faun, ma anbait parseen neu mansian.” 9 (Mimnau, uab ein naan re' nak, “In nsae”. Karu In nsae, naan in oetn ii nak, unu' te In nsaun niit anbi pah-pinan et a'piin. 10 Onaim Tuaf re' ansaun neem re' naan, es re' Kristus. In es re' ansae nfain neu sonaf neno tunan, he bisa n'urus are' kanan saa'-saa' re' et neon goe tnanan ma pah-pinan.) 11 Kristus re' naan, es re' annona' ma nfee kuasa, mahinif ma manoef neu Iin na, he sin bisa nanaob mepu re' In nbati nrair neu sin. Bian In nfeen sin kuasa, mahinif ma manoef, he njarin In haef, bian anjarin In mafefa kniun' ein, bian anjarin atukus neu Iin na, bian anjarin tuaf re' nanoni' nahiin Iin na, ma bian anteni' anjarin amneik Rais Reko neu baer fe'u. 12 Es-es ate antoup in mepu he nabarab Kristus Iin na, maut he sin arsin bisa nanaob Kristus In mepu. Nok ranan naan, hit arkit re' atpirsai teu Yesus Kristus, ta'bei' piut, 13-14 tar antea hit arkit atpirsai nekaf mese' amsa'. Ma hit tahiin batuur-batuur Uisneno In Anah amsa'. Hit ka on fa ri'aan ii ntein, fin hit tatuin atrair batuur-batuur In ranan, ma tjair tuaf-tuaf re' anmoin natuin In roimn ein ok-oke'. Karu hit atmoni trair on naan ate, hit ka t'ai jok gok fa. Fin karu apoit ein neman ma nanoni' rais puta-kriut ate, hit ka ttaam atjair fa tuaf-tuaf re' antoup rais poi naan. 15 Mes hit suma ta'uab tatuin saa' re' batuur teu hit aok-bian sin, natuin hit neek sin. Onaim karu hit tmoin on naan anbi are' kanan rasi saa'-saa' ahaa te, hit huma' mese' on re' Kristus. Natuin In re' naan, hit A'nakaf re' an'ator kit. 16 Hit re' ia on re' In aon. Karu mansian ii in haen-niman ma in fefan, in rukin anmepun nmatur-tuurn ein natuin es-es ate in meup goe te, in aon naan na'bei'. On naan amsa' Kristus Iin na. Karu hit tmaneek, atmaturun ma tmabab-baba te, hit arkit ro ta'bei'.
Misaitan hi 'monim amnaa' he mituin 'moin fe'u
17 Amneen mirek-reko', saa' re' au he u'uab oras ia. Au Usi' neikn On es re' natoon neu kau. Hi kais ammoni mtein on re' tuaf-tuaf re' ka nahiin fa Uisneno. Saa' re' sin nmoe' je naan, natuin sin moonk ein ahaa. 18 Sin nteri nsaan ranan on re' atoni' nnao nbi meis'okan. Sin a'moink ein anbeits ok na'kon Uisneno, natuin sin re' naan a'naak fatus, ma ka nromin fa he nfairoir ma ntoe natuin Ee. 19 Sin ka namaeb ok nahinin fa ntein. Es naan ate, sin natuin ein ahaa sin roimk ein kuuk, ma nmonin anbin rasi 'bu'uf. Mes sin ka npuas ein fa msa'. 20 Mes Kristus In raan a'honis re' hi minoni' mrair je naan, ka on fa naan. 21 Fin saa' re' hi minoni' mrair je anmatoom nok Yesus Kristus naan, naan noni' re' batuur. Ro tebes, hi mneen amrair. 22 Onaim misaitan nai hi 'monim amnaa' naan! Fin karu hi m'oemeet mituin mansian ii romin ate, naan napoi ki piut een. Hi ka mmui' fa hak ambi naan antein. 23 Mes maut he Uisneno nmoe' hi neekm ein ma teenb ein anjarin fe'u, 24 he hi mjair mansian fe'u, natuin In human ma In masan. Es naan ate, hi ro he miruru' ma mikrira' neek fe'u, re' kninu' ma mne'o. 25 Onaim oras ia, misnasab puta-kriut nai! Mi'uab namneo goah es nok es, fin hit ar-arkit tmafutu' tjair mese', on re' aof re' anmui' haef-nimaf, fefaf ma rukif. 26 Karu mito'o te, kais mitoo' tar antea hi mmoe' sanat. Reko nneis hi mireok om nai! Kais mitunu' to'os tar antea maans ee nmouf! 27 Nok ranan naan, a'naak nitu ka bisa napein fa mainuan he nfuri' ma nkopo' ki. Kais amkoon ee he in napein ranan akre'o msa'! 28 Abakat, musnaas nai! Reko nneis tuaf on re' naan anmeup rek-reko anpaek kuun in a'niman, he in bisa anbait in mepu naan in afan neu atoin kasian ma ama'mui't ein. 29 Karu mi'uab ate, kais mi'uab rais maufinu, maski uab tuuk ana' mees' aah! Reko nneis mi'uab es re' rais reko. Ma mfaineek tuaf, he mturun ma mbaab sin batuur-batuur, ma mha'tain sin neek ein. 30 Kais ammoe' Uisneno In Asmaan Akniun' ee neekn ee nameen, natuin In et hi neekm ein naan. Ma In nmarak anrair ki nak, hi re' ia, Uisneno Iin na. In Asmanan naan anjamin amsa' nak, of antea pah-pinan ia namsoup, Uisneno ansoi nafetin ki he hi mmoin piut mok Ne. 31 Onaim kais mito'on es! Kais amraunisin es! Kais ammakto'on! Kais ammabaan! Kais mi'uab mi're'uf es in kanan! Ma kais ammoe' 'moe' maufinu bian antein! 32 Reko nneis hi mmanek-neek, ma mmoe' 'moe' reko es nok es. Hi ro he mnikan main sanat na'ko tuaf-tuaf re' nmoe' sanat neu ki, ma mfee ne saok sanat ma ampon, on re' Uisneno nsaok ma nnoes nain hi saant ein, natuin hi mmafutu' mok Kristus.
Atmoni tbi rais manekat ma kninu'
1 Hi arki re' ia, Uisneno In aan neek ein. Es naan ate, hi ro he mmoin mituin In romin. 2 Ma hi ro he mmaneek es nok es, on re' Kristus anneek ki. Fin In nnona' ma nfee In tuan ee, he nmate nsenu' kit. Nok ranan naan, In njair fua'-turu' re' anfoo boon ma nfoo mein, he nharineb Uisneno In nekan. 3 Hi arki re' ia msa' Uisneno Iin na, re' kniun' ein. Onaim hi 'moinm ein kais an'oemeet! Mitenab rais 'oemetan amsa', kaisa'! Kais ammakoin mok tuaf re' ka ho moen ja fa, ai' ka ho fee ja fa! Kais amparu' ma mikoom a'sek-seke'! 4 Kais miseku'! Kais amputa-kriu! Ma kais mi'uab rafu'-rafu'! Natuin Uisneno Iin na, ro ka pantas fa he na'uab ein on re' naan. Reko nneis hi mi'uab rais reko, ma mtoit makasi meu Uisneno. 5 Mimnau mirek-reko'! Uisneno ka ntoup fa tuaf re' in a'moin ee an'oemeet, ma tuaf-tuaf re' anmakoin nok tuaf re' ka in moen ja fa, ai' ka in fee ja fa! Sin ka bisa fa he ntaam anjair Kristus Iin na, ma Uisneno ka njair fa sin Usif. Uisneno ka ntoup fa aparu' ma akomat a'sek-seke', natuin sin nsiu' napoitan Uisneno, ma naikas na'rat-ratan rasi 'teta'.
'Monit anbi meu'-sine'
6 Kais amkonan tuaf he napoi ki mnak, “Reko te, kais ammoni kninu'!” Fin Uisneno ro nato'on tuaf re' ka nmoin fa natuin In romin. 7 Es naan ate, hi kais amfutun hi tuam ein mok tuaf on re' naan. 8 Unu' fe', hi on re' tuaf re' anmoni nbi meis'okan, natuin hi ka mihiin fa Uisneno. Mes oras ia, In nasanut nrair In meu'-sine', he nmoe' ki mjair In aanh ein. Onaim hi ro he mmoni mbi meu'-sine' naan in nanan. 9 Tuaf-tuaf re' anmoin on naan piut anbi meu'-sine', in nmoe' 'mo'et ma rais reko, in nmoin namneo, ma in na'uab maat-maat ma namneo goah. 10 Maim ranan he mharineb Uisneno In nekan, natuin In re' naan, hit Usi'. 11 Kais amfutun hi 'moinm ein mok abitan meis'okan. Fin sin a'moe'k ein naan, ka nmui' fa upan mese' msa'. Onaim hi ro he mikaina' sin, ma mi'pakan sin saant ein. 12 Natuin saa' re' sin nmoe' nok raan ma'nifa' nbi meis'okan, naan meet koso, tar antea hit tamaeb ok, ma ka tfei taan fa hit fefak. 13 Au 'fee 'tope' on nai: karu atoni' antana' baer' ein re' anbin meis'okan, ro atoni' niit baer' ein naan. 14 On naan amsa', karu hit ttana' rais maufinu re' atoni' anmo'e, in of nahiin batuur-batuur nak, 'mo'et ma rasi re' naan maufinu. Anmui' siit es nak, “Atupas sin, amfeen nai! Amates sin, ammoni mfain nai! Natuin Kristus he ntana' ki.”
Atmoin nekaf mese' tok Uisneno In Asmanan
15 Es naan ate, amtae mirek-reko' hi 'monim, he hi kais on re' amonot. Reko nneis-neis ampaek mahinif ma manoef na'ko Uisneno. 16 Oras ia, tuaf amfaun anmo'en rais maufinu piut-piut. Onaim karu anmui' mainuan he mmoe' 'mo'et ma rais reko, mmoe' je! Kais ampao mtein! 17 Mitenab mirek-reko' he mihiin batuur-batuur hit Usi' In romin, he hi kais ammoon. 18 Kais ammauf, natuin raur mafu naan in es re' an'ator ki. Mes amfei mi'pakan hi neekm ein naan, maut he Uisneno In Asmaan Akninu' es re' an'ator ki. 19 Nok ranan naan, hi mi'uab es nok es ate, ampaek Uisneno In Suur Akniun' ee In afan, na'ko siit pures-bo'is neu Uisneno, ma siit bian re' hi mipein sin na'kon Asmaan Akninu'. Ma karu msii te, kais ambi hi feefm ein anmesen kuuk. Mes ampures ma mbo'is Uisneno batuur-batuur anpoi na'ko hi neekm ein. 20 Fin Yesus Kristus naan hit Usi', ma Ama' Uisneno anmoe' nrair 'moe' reko ma rais reko mfaun neu kit. Es naan ate, hit ttoit makasi piut-piut teu Ne.
Are' apirsait ein ok-oke' ro he mmatornatan ma mmanenan es nok es
21 Hi ar-arki ro he mmatornatan ma mmanenan es nok es. Fin nok ranan naan, hi miruru' ma mikrira' rais hormaat ma rasi mtaus meu Yesus Kristus.
A'tope' on re': fee-mone
22 Bifee mamone'! Hi es-es ate ro he mtornaat ma mutniin ho mone, on re' hi mtornaat ma mitniin hi Usi' Yesus Kristus. 23 Fin hi mone es-es ate, on re' 'nakaf neu in fee. Ma Kristus amsa' A'nakaf neu Iin na. Fin In es re' anfei ranan he sin napenin fetin. 24 Es naan ate, Kristus Iin na, ro he ntornaat ma natniin Ee. On naan amsa', bifee mamoen ein, ro he mtornaat ma mitniin hi moen ee anbi are' kanan rasi. 25 On naan amsa', atoin mafe'e! Hi ro he mneek hi fee ngguin, on re' Kristus anneek Iin na, tar antea In nnona' ma nfee In tuan, he nmate nsenu' ma nseka' sin. 26 In nmoe' on naan, he sin kniun' ein anbin Uisneno In human ma In matan, natuin sin natuin In Kabin ma Prenat, ma sin napenin asrani'. 27 Yesus Kristus Iin na msa' on re' baroit bifee re' anbarias anrair nahuum ma namaas, natuin baroit atoin ee he neem anseun nggoe. On naan amsa' Kristus he nkoen On neem anseun Iin na. Onaim sin ro he nmonin nok reko ma kninu', tar antea sin ka nmu'in fa sanat mese' msa'. 28 On naan amsa' atoin mafe'e! Hi es-es ate ro he mneek ho fee, on re' hi mneek hi aom ein. Fin karu atoin mafe'e anneek in fee, naan in oetn ii nak, in nneek kuun in aon aa kuun. 29 Ka tiit tain fa tuaf es he nsaek ma nato'on in tuan. Mes in ro he n'urus ma npairoir in aon naan rek-reko, on re' Kristus an'urus Iin na rek-reko, 30 natuin hit re' ia, on re' In aon. 31 Anbi Uisneno In Suur Akninu' matu'i mnak, “Es naan ate, atoin moen ji ro he nasaitan in ainaf-amaf, he nnao ma nmoin nabua nekaf mese' nok in fee, natuin sin nua sin anjarin mese' nrair.” 32 Uisneno In Kabin ma Prenat naan naruru' ma nakrira' nrair na'ko unu' fe', rasi anmatoom manekat fee-mone. Mes oras ia hit imsa' tahiin tak, Kabin ma Prenat naan amsa' naruru' ma nakrira' rasi anmatoom Kristus In manekan neu Iin na. 33 Onaim atoin mafe'e ro he nneek in fee on re' in neek in aon aa kuun. Ma bifee mamone', ro he nhormaat in mone.
A'tope': mohonit nok aanh ein
1 On naan amsa' ri'aan ein! Hi es-es ate ro he mtornaat ma mutniin ho mahoint ein, natuin naan es re' pantas, natuin hit Usi' In romin. 2 Anbi Suur Akninu' Uisneno matu'i mnak, “Ho ro he mhormaat ho aina' ma ho ama'.” Rasi re' ia, Uisneno In Kabin ma Prenat ahunut re' anpaek rais manba'an. 3 Fin oras Uisneno nasanut aprenat naan, In nahake' msa' rais manba'an am nak, “Karu ho mmoe' mutuin on naan, ho of mupein tetus-athoen anho-hoen, ma ho mupein oras he mmoin maan ii, ro 'roo.” 4 On naan amsa', mahoint ein! Hi kais mitoo', ammaheek, ma mbeos hi aanh ein rafu'-rafu', natuin naan of anmoe' sin nato'on amsa'. Reko nneis, am'urus sin rek-reko, ma minoni' sin anmurai na'ko sin aan'-ana' fe', he sin natuin Uisneno In ranan. Karu sin nmo'en sanat, miruru' ma mikrira' sin raan reko re' amneot ma amnonot natuin Uisneno In romin.
A'tope': ameput ma in usin
5 On naan amsa' ameupt ein! Hi es-es ate ro he mumtau ma musmanan hi usim re' naprenat ki anbi pah-pinan, ma mtornaat ma mitniin ee. Kais ammepu stena'-stena', mes mituin batuur-batuur hi usim in romin, on re' hi mituin batuur-batuur Kristus In romin. 6 Fin hi re' ia Kristus In ameupt ein amsa'. Onaim anbi pah-pinan ia, kais ammeup ma'tain ahaa oras hi usim nok ki he hi mipein bo'is. Mes ammeup ma'tani' meu hi usim, maski in ka nok ki fa he hi miit ee. Naan es re' natuin Uisneno In romin. 7 Onaim minaob hi mepu naan rek-reko ma mmakoe, on re' hi mmeup meu hit Uisneno, ka mmeup fa meu hi usim mansian anmees. 8 Natuin hit tahiin tak, Uisneno of anbaras neu tuaf-tuaf re' anmoe' 'moe' arekot ma rais arekot. Maski sin re' naan ameput ai' usi', ai' ate, ai' atoin fareman, In nbaras neu sin ok-oke'. 9 On naan amsa' usi' ma a'naet ein! Hi kais amkartaak hi ameupt ein naan. Fin sin nmu'in sin Usin et sonaf neno tunan, re' huma' mese' on re' hi nggoan amsa'. In ka npiir fa humaf, mes In nneen sekau-sekau goah. Usi' ai' ameput, In neen nain sin ok-oke'.
Ampaek Uisneno In suni'-kenat sin ok-oke' he mibarab hi tuam ein nai
10 Au he usoup goen. Onaim amneen mirek-reko' au uab muni' re' ia. Hi ro he mnaa' miher-heran hi rais pirsait meu Uisneno, natuin In re' naan, hi Usi', ma In kuasan naan, ma'tain re'uf. Naan es re' nha'tain ma na'be'ib ki. 11 Soraurs ein anpaken suni'-kenat he nraban sin musun. On naan amsa', Uisneno nroim he hi on re' sorarus. Fin In nroim he hi mraban tenab maufinu re' a'naak niut goe nmo'e. Es naan ate, hi ro he mibarab he mpaek Uisneno In suni'-kenat namtiis. 12 Fin hit re' ia, et baer makenat. Hit ka tmakeen fa he traban mansian, mes hit tmakeen atraban kuasat maufinu re' hit ka tiit ee fa, atraban anaa' aprenat sin, atraban kuasat meis'okan, ma traban rais maufinu sin. 13 Onaim hi ro he mibarab ampaek Uisneno In suni'-kenat sin ok-oke'. Karu oras maufinun naan antea nggoen ate, hi bisa mraban sin tar antea namsoup. Karu hi ka mmouf fa te, hi maran ma mtahan tar antea hi miis main sin een, es re' naan. 14 Onaim hi ro he mhaek ma'tani'! Ampirsai meu Uisneno In Kabin ma Prenat re' batuur, natuin naan on re' hi mpaek soraurs ein sin pasu 'futu'. Ammoni mne'o ma namnoon, fin re' naan on re' hi mpaek baur besi he anpafa' naan hi 'basam. 15 Mibarab he mnao mitoon Rais Reko re' naruru' ma nakrira' ranan he tuaf anmoni nmarame' nok Uisneno, fin re' naan on re' hi mpaek sapaut sorarus. 16 Ampirsai piut-piut meu Uisneno, fin re' naan on re' suni'-kenat he hi bisa msiir ma mtangkis. Nok suni'-kenat naan, hi bisa mi'maet niut maufinu in asfuu ai sin ok-oke' re' sin nseer ee n'ain ki. 17 Amnaa' miher-heran hi rais pirsait naan mak, hi mipeni mrair fetin mi'ko hi saant ein sin kuasat, fin re' naan on re' hi mpake 'soeb besi. Amnaa' miher-heran Uisneno In Kabin ma Prenat re' In Asmaan Akniun' ee anfee Je, fin re' naan on re' sorarus annaa' suni'. 18 Karu hi mroim he mhaek mi'be'i te, hi ro he m'onen piut-piut ampaek Uisneno In Asmaan Akninu' In kuasan. Ampao piut-piut, ma kais misnasab onen-totis re' amteek Uisneno Iin na anbin mee-mee. 19 Ma kais amnikan he m'onen amteek kau msa'. Amtoit he Uisneno nfee kau in haan manbasan, he reko te au utoon maat-maat In sarit neu tuaf bian sin. 20 Maski au 'jair atoin bui, mes Usif Yesus anhaef kau 'jair in atuta'. Onaim am'onen amteek kau, he au kais umtau ma usmaan, oras au u'uab batuur, fin re' naan au mepu.
Nai' Paulus nasoup in surat
21 Au 'roim he hi mihiin au 'hakek ma au 'naok. Nok rasi naan, au 'haef nai' Tekikus neit. In re' naan, au aok-bian re' au 'neek. In nanaob Usif Yesus Kristus In meup goe msa'. 22 Maut he in natoon ma nareta' ki are' saa' anmatoom nok kau et bare ia. Ma au 'roim he 'ha'tain hi neekm ein amsa'. 23 Au 'toit he hit Ama' Uisneno, ma hit Usi' Yesus Kristus, Sin narame' ki es nok es, ma ammaneek es nok es, natuin hi mpirsai meu Sin. 24 Au 'onen amsa', he hit Usi' Yesus Kristus naruru' ma nakrira' In nekan arekot neu tuaf-tuaf sin re' anneek Ee piut. Au surat re' ia, antuu' ma anheu' on naan! Saloom, na'ko au, nai' Paulus kau, tua.
Tabe ma haan buseet
1 Surat re' ia, na'ko au, nai' Paulus kau. Au partei nai' Timotius amsa' anfee tabes ma haan buseet neu ki. Hai nua kai re' ia, Yesus Kristus In aan renu'-aan reka'. Hai msonu' surat re' ia meu apirsait ein neu Yesus Kristus arki et kota Filipi. Ma hai mromi msa' he are' a'naak jemaa't ein, ma tuaf-tuaf re' anturun a'naak jemaa't ein amsa' nahiin narek-reko' surat re' ia in afan. 2 Uisneno naan, hit Ama'. Ma Yesus Kristus naan, hit Usi'. Rarit hai mtoit he Sin nakrira' Sin nekak arekot neu ki, he hi mmoin mbi mamut, rame' es nok es, ma tainina'.
Nai' Paulus an'onen he Uisneno npafa' ma npanat apirsait ein kota Filipi
3 Maski a'roo goen au ka 'iit ki fa, mes au ka 'nikan ma 'niahan ki fa. Oras au umnau ki, au 'toit makasi 'eu Uisneno, natuin hi mpirsai meu Ne piut. 4 Au neek ii nmariin oras au 'onen ma 'teek ki, 5 natuin na'ko neno re' hi mtoup Uisneno In Rais Reko, hi minaob In meupn ein piut mok kau. 6 Naan nakrira' nrair nak, Uisneno anmeup et hi nekam nanan. Ma au uhiin batuur-batuur 'ak, In of nanaob In meup arekot naan piut, tar antea namtiis, oras Yesus Kristus ankoen On anfain neem. 7 Batuur au ro pantas he 'neek ki, natuin au neek ii na'kii' nok ki na'ko unu'. Neon goes ii, hi mmeup mok kau oras au utoon Uisneno In Rais Reko, ma oras au utaah tuaf-tuaf re' anraban Rais Reko naan. Maski au 'taam bui msa', mes hi ka misaitan kau fa. 8 Uisneno neikn On nahiin nak, au neek ii namnau ki batuur. Natuin au manekak 'eu ki naan, nahuum on re' Yesus Kristus In manekan. 9-10 Onaim au 'onen ma 'teek ki on nai: au 'toit he hi rais manekat es nok es naan mifaof ma msaot goe piut, tar antea nat'oop ma nsai. Au 'toit he Uisneno nturun ki msa', he hi mihiin batuur-batuur mee es reko, he hi bisa mmoin nok kninu'. Rarit oras Kristus nafeek are' kanan mansian ii sin raisk ein ate, In natoon am nak, hi ka mmui' fa sanat ma penu mese' msa', 11 natuin In kuun es re' nakninu' hi neekm ein naan, he hi mmoin nok amne'o ma namnoon. Nok ranan naan, tuaf bian sin naikas ma nbo'is, npures ma nait na'rat-ratan Uisneno.
Maski hit tapein susat, mes hit tpirsai piut teu Usif Yesus
12 Aok-bian manekat arki! Au 'roim he hi mihiin mak, anmui' tuaf re' nasusab kau, tar antea sin nataam kau nbi bui. Mes Uisneno In Rais Reko sin ka n'o'of naan Ee fa, 13 tar antea soraur apaot ein anbi uim jabatan, ma are' bian antein nahinin amsa' nak, au 'taam bui natuin au utuin Yesus Kristus. 14 Rarit Uisneno Iin na re' abitan bare ia nak, Uisneno nmoe' on naan oras au 'bi bui. Etun sin nabranin piut, tar antea ka namtaun ntein' ein fa goen. Rarit sin na'uab ein Uisneno In Kabin ma Prenat anbi bare-bare nok maat-maat. 15-17 Anbi bare ia, anmui' tuaf pukan nua re' anmakoen he nanoni' anmatoom nok Kristus. Es re', bian anmepun nok neek amne'o ma namnoon, ma bian anmepun nok neek abeot ma npeun. Sin re' anmepun nok neek amne'o, sin neek ein reko nok kau. Sin nahiin narek-reko' nak, au usaah kuuk au susat re' ia, natuin au unaob au mepu, ma ka 'tet-koit 'iit fa msa'. Mes ameput re' anpaek neek abeot ma npeun re' naan, sin namin he sin kaank ein mateek ein, ma sin anmasuntirun es nok es. Sin nbetis ma nbatis apirsait ein, asar anmui' tuaf he natuin sin. Fin sin namin ranan he naikas sin tuak ein nak, sin ma'tain ein anneis na'ko kau. Sin nateenb ein am nak, karu nmui' tuaf re' natuin sin ite, naan of nafaof au susat a'bi bui. 18 Mes amkonan sin on re' naan. Au ka 'toe fa karu atoni' nanoni' nok neek amne'o, ai' kaah. Re' pentiing, sin nanoni' anmatoom nok Kristus! Re' naan anharineb au nekak. Ma au 'mariin batuur-batuur amsa', 19 natuin au uhiin 'ak, hi m'onen amteek kau, ma Yesus Kristus In Asmaan ee anturun kau. Etun au uhiin in amsoupk ein, ro mamut. 20 Maski au 'moin, ai' au 'mate msa', ka saa'-saa' fa. Asar Uisneno npaek kau he 'ait u'ratan Usif Yesus in kanan, ma unoni' maat-maat anmatoom nok Ne, tar antea ka tiit tain fa saa' es antein re' nmoe' kau he umaeb ok. Are' kanan rasin re' ia, es re' au ufnekan ma 'harap piut-piut, u'ko unu' tar antea oras ia. 21-23 Au utenab on nai: karu au 'moin 'mafuut 'mates a'bi Kristus, ma unaob In mepu naan piut, naan reko. Mes karu au 'maet, au upein pa'e ko'u nneis. Natuin au bisa usaitan pah-pinan ia, ma 'moni 'fain he utua 'ok Kristus a'bi sonaf neno tunan. Etun au neek ii na'oni', onaim au ka uhiin fa mee es re' reko nneis-neisi. 24 Onaim on nai! Natuin hi amperluu kau fe' 'bi ia, reko nneis au utua ubaar 'ok ki 'bi pah-pinan ia. 25 Au 'pirsai, au toon a'moin 'aan ii of a'roo fe', onaim au bisa 'ok ki fe'. Fin Uisneno nroim he au 'ha'tain hi neekm ein, rarit hi mpirsai Je piut nok neek marine. 26 Onaim hi of bisa maikas ma mait mi'rat-ratan Yesus Kristus In kanan, natuin In nfei nrair ranan he au 'eiti 'kius ki 'tein.
Ammoin mok neek amneot ma amnonot piut-piut
27-28 Maski on mee-on mee msa', mes hi 'moinm ein naan ro he batuur, natuin hi re' ia, Uisneno Iin na ki. Onaim hi ro he mmoin mok reko, ma mmoe' mituin saa' re' Kristus In Rais Reko naan natoon anrair ki sin. Rarit, karu au 'jair he 'eiti 'kius ki, ai' suma 'neen ahaa na'ko tuaf amsa' nak, hi mmoin nok rek-reko te, au bisa 'mariin. Fin au bisa uhiin 'ak, hi mmoin nekaf mese', natuin hi mmafutu' mok Asmanaf mese'. Ma au bisa uhiin 'ak, hi mpaasn om he minaob Usif Yesus In Rais Reko bu'-bua', he tuaf bian anpirsain amsa'. Ma hi ka mimtau fa msa', maski anmui' tuaf anraban ki. Naan anjair tanar neu musun sin nak, Uisneno anroim he nait inporin sin. Mes In nsoi nafetin ki, he hi bisa mmoin mok Ne piut. 29 Natuin Uisneno In neekn ee reko, In nfei ranan he hi bisa mpirsai meu Kristus, ma mjair Iin na. Ka neu he mpirsai jah fa, mes In anfee mainuan amsa' he hi mipein susat, natuin hi mituin Ee te. 30 Au 'neen anmui' tuaf anbi bare naan re' anraban ki, natuin hi minaob Kristus In Rais Reko. Mimnau, neon goes ii, sin anraban kau on naan amsa'. Ma oras ia, sin on re' naan piut fe'.
Hit ro he tneka'paar on re' Yesus Kristus
1 Aok-bian manekat re' amjair Yesus Kristus Iin na. In nfee nrair ki rais reko mfa-faun neu ki arki. Onaim hi bisa ammaha'tanin nekaf es nok es. Hi bisa mfee fainekat re' na'uu ma na'baa' na'ko hi rais manekat. Hi bisa mmoin reko es nok es, natuin Uisneno In Asmaan ee nmeup anbi hi sonam ma hi tnaanm ein. Ma hi bisa mikrira' hi rais kasian ma neek reko es nok es. 2 Karu hi mmoe' on naan ate, hi mimtisib au neek marine. Anneis-neisi ntein, karu hi mmoin nekaf mese' ma ansaof mese' mbi rais manekat es nok es, ammoin nok sarit mese', ma m'akoor he mmeup mibu-bua. 3 Kais ammeup saa'-saa' ate miis am mees-mees jah. Ma kais maan ho tuam aan amneis mu'ko tuaf bian. Te kaah, ho be'om naan ka ma'u'u fa. Mes hit ro he tneka'paar, ma taan biak ein tak sin nneis kit. 4 Ma kais es-es ate am'urus kuum ho urusan. Mes hit ro he tkius biak ein sin perluut ein amsa'. 5 Hit neek ii ro he huma' mese' on Yesus Kristus In nekan. 6 Fin maski In human ma masan huma' mese' nok Uisneno, ma In anjair 'Nakaf on re' Uisneno msa', mes In nafetin In hak, ma ka npaek fa In pangkat. 7 Rarit In nsaun neem neu pah-pinan ia, npaek humaf ma masaf mansian. In nasaitan In hak ein ok-oke', ma nmoe' In tuan ee on re' aan renu'-aan reka'. 8 Ka suma njair atoin a'baut aah fa, mes In nmoe' In tuan ee on re' atoin ka maso'ik fa, he nmoe' natuin Uisneno In romin. Maski tuaf anroor Goe nbi hau nehe, mes In ntoup goah, ma nmaet on re' amaufiunt aan. 9 Natuin In nneka'paar on re' naan, etun Uisneno nait ma nanaib na'rat-raatn Ee, ma nnona' nfee Ne kanaf re' ma'tani' nneis. Ka tiit fa kanaf re' ma'tani' nneis na'ko In kanan. 10 Uisneno nait ma nanaib na'rat-ratan In kanan on naan, he are' mansian ii anhormaat Ee. Esan re': mansian anbi neon goe tnanan, mansian anbi pah-pinan, amonit ma amates. Are' kanan mansian of anri'tuun he na'besan neu Ne. 11 Ma of are' kanan mansian anmanauk ein am nak, “Yesus Kristus naan, 'Nakaf ma Usif batuur-batuur!” Nok ranan naan, sin naikas, nbo'is ma npures Uisneno In pinan ma krahan.
Hit on re' kfuu apinat re' antana' pah-pinan
12 Aok-bian manekat arki! Amneen mirek-reko'! Neon goes ii, oras au 'bi kota Filipi, hi mneen ma mitniin kau, rarit hi mituin Uisneno In raan amneot. Oras ia, hit maka'roon. Mes au 'toit he hi bisa mhaek piut ambi raan amneot naan. Mimnau goo, karu hi ka mneen ma mitniin Uisneno fa te, hi of miit kiim. Natuin In es re' ansoi nafetin naan ki na'ko are' kanan sanat ma penu sin. Onaim hi ro he mmoin reko, fin hi mjari mrair Iin na. 13 Fin Uisneno kuun es re' anmeup et hi neekm ein. In es re' anfei ranan he hi mneen Ee. Ma In es re' anfee kuasa he hi mroim he mmeup he mharineb In nekan. 14 Rarit, karu hi mmoe' saa'-saa' ahaa te, kais mi'munu' ma kais ammatoe. 15 Ammoe' on naan, he hi bisa mjair tuaf re' neek akninu', ma tuaf re' ka nmui' fa sanat. Hi mmoni mbi amaufiunt ein sin sonak ma tnanak, ma aputa-kriut sin. Mes hi kais mituin sin! Fin hi 'moinm ein ro he kninu', natuin hi anah-anah Uisneno ki. Rarit hi 'moinm ein ro he npiin ma ntana' he nakrira' ma naruru' ranan neu sin, on re' kfuun re' npinan anbin meis'okan. 16 Rarit hi mmoin nok amne'o ma minaob Uisneno In Kabin ma Prenat sin. Nok ranan naan, hi of ammoe' kau 'kumain ma 'huma'moe oras Yesus Kristus ankoen On anfain neem. Ma au suus-haet naan, ma'afa', natuin ka npoirn ee fa ruum-ruum. 17-18 Mes karu au 'nona' ma 'opa' 'ain au 'moin ki, he 'jair fua'-turu' he hi bisa mpirsai ma'tani' nneis ma minaob Uisneno In mepun ate, au 'toup nok marine. Naan on re' a'naak pirsait an'oop tua min-kase anbi mei fuat he na'besan Uisneno. Nok ranan naan, hit bisa tmariin bu'-bua', natuin fuat naan, ka ruum am parsuum fa.
Nai' Timotius in mepu
19 Au ufnekan ma 'harap 'ak, ka 'roo fa te, Usif Yesus anfei ranan he au 'haef nai' Timotius, he in nha'tain hi neekm ein naan. Rarit in nfain neem antein anbi bare ia, he natoon kau anmatoom nok hi 'tokom ma hi 'hakem, ma nha'tain au nekak. 20 Au ka 'haef fa tua 'teta'. Au suma 'haef nai' Timotius ahaa, natuin in nekaf mese' nok kau. Ma in anneek ki batuur-batuur amsa'. 21 In re' naan ka huma' mese' fa on re' hit aok-bian bian sin. Sin re' naan, suma nateenb ein he n'urus sin urusan kuuk, mes ka n'urus fa rasi anmatoom nok Yesus Kristus. 22 Mes hi mihiin mak, nai' Timotius anmeup ma'tani' he nanaob Uisneno In mepu. In nmeup nok kau, nahuum on re' ri'aan es, re' anmeup neu in amaf. Hai nua kai mnao mitoon amrair Usif Yesus In Rais Reko mbi bare-bare. 23 Karu sin nafeek anrair au rasi anbi bare re' ia, na' au 'haef nai' Timotius neit. 24 Mes oras ia, Uisneno nha'tain kau, nak, ka 'roo fa te, au bisa 'uum he 'kius ki msa'.
Nai' Epafroditus in mepu
25 Unu' te, au upein susat. Rarit hi mhaef hit aok-bian nai' Epafroditus neem ankius kau. In nanaob Uisneno In mepu nabu-bua nok kau, on re' sorarus re' natuin in a'nakat ai' komandan ee in aprenat. Mes oras ia, au 'naben ate au ro he 'soun ee nfain neit. 26 Fin in namnau nrair ki he neit ma nkius naan ki. In neekn ee seor natenab akre'o nak hi msuus, natuin in nahiin nak, hi mneen amrair neu in nameen. 27 Batuur. Neon goes ii, in nameen ma'fena'. Haet ee nmaet. Mes Uisneno anneek ee, rarit In nareok' ee. Ma Uisneno anneek kau msa', rarit In nareko' nai' Epafroditus, he au kais a'suus a'tein. 28 Es naan ate, au he 'soun ee nfain neit, he hi bisa miteef mok ne nok neek marine. Karu on naan ate, au neek ii natea ma ntainina'. 29-30 Onaim hi ro he mtoup goe nok rek-reko, natuin in re' naan Uisneno Iin ja. Ma hi ro he hormaat tuaf bian sin ok-oke' msa', on re' in. Fin in nanaob Kristus In mepu, tar antea haet ee, in nmaet. Ma in ka ntet-koit fa msa', natuin in he nturun kau, nsenu' ki. Onaim hi ro he mtoup mifain' ee, nok neek ma'nura' ma marine.
Uisneno ntoup tuaf, natuin sin npirsain neu Yesus Kristus
1 Aok-bian arki! Amneen mirek-reko'! Hi neekm ein ro he nmarinan, natuin hi mmafuut ma mi'kii' miheer mok Kristus. Maski au 'tui ufan-fain on nai msa' ate, mes au ka 'reen fa he umnaub ki he kais tuaf es napoi ki. 2 Ampaant om mi'ko aputa-kriut ein re' na'seke' tuaf am nak, “Hi ro he mi'heri' he njair tanar nak, hi re' naan, Uisneno Iin na.” Te kaah, Uisneno ka naprenat fa on re' naan! Re' naan, sin nsaan anrarin! Maski on naan amsa', mes sin on re' aus araut re' na'ko'on ma naraun amsa'. 3 Fin sin nak, Uisneno antoup tuaf karu sin na'heir' ein. Mes re' naan, ansaan! Hit tahini trair tak, Uisneno ntoup tuaf natuin sin anpirsain neun Nai' Yesus. Rarit Uisneno In tuaf re' batuur ein, esan re' hit arkit re' atpirsai teu Nai' Yesus. Hit es re' ta'besan teu Ne, ma tatuin In Asmaan Akninu'. Hit es re' tait ta'rat-ratan Yesus Kristus, natuin In es re' anfei ranan he hit bisa ttaam atjair Uisneno Iin na. Fin Uisneno ka nsoi nafetin kit fa na'ko sanat ma penu sin kuasan, natuin hit tatuin mansian in mepun. 4 Unu' te, au utenba 'saan, on re' sin. Au 'ak, tuaf bisa ntaam anjair Uisneno Iin na, asar sin na'heir' ein. Te kaah, mansian ii in meupn ein ahaa. Karu he ta'uab mansian ii in mepun ate, au bisa u'uab ube'ob au tuak ii 'neis-neis, natuin unu' fe'e te, au meupk ii parsiis on re' atoin Yahudis sin atoran rais pirsait ein ok-oke'. 5-6 Tatuin atoran rais pirsait ein naan ate, au aina' ma au ama' sin, sin na'heri' kau oras au fe' a'moin 'aan neno faun. Au re' ia, atoin Yahudis batuur, u'ko uuf nai' Benjamin, sufa'-ka'un ka'o Isra'el. Au re' ia, utuin parsiis atoran na'ko partei agama Farisi, tar antea ka tiit fa es amsa' re' bisa nasaan kau kre'o msa'. Saa' anteni', au re' ia a'makoe 'mat-maet he 'ha'mui' tuaf-tuaf re' natuin Kristus, natuin au utenab 'ak, tuaf ein re' ia, sin nait inporin hit atoran rais pirsait ii goen. 7-8 Mes a'roo-'roo te, au teenb ii na'bani' oras au u'piis ma u'te'un au tuak ii ma utuin Kristus. Onaim oras ia, au ka ubeo' fa goen on re' unu', natuin sin ka neik fa upaf mese' msa' neu kau ntein. Re' au 'aan ee njair ma'tain reu'f ii es re': au bisa uhiin Yesus Kristus, au Usi'. Rasi bian sin, au 'aan sin on re' baer porin re' ka mapake' fa. 9 Au 'roim he 'moni 'bi rais mafutus 'ok Yesus Kristus. Fin maski au utuin 'ain atoran rais pirsait ein ok-oke' msa', ka neu fa he Uisneno ntoup kau. Maski au 'aan au tuak ii batuur, ka neu fa he In ntoup kau msa'. Mes au ro he 'pirsai Kristus fe', na' Uisneno antoup kau mnak, “Natuin Kristus annoes ma nsaok nain ho sanat ma penu sin, etun ho kninu' goen.” 10 Rarit au roimk ii on nai: au 'roim he uhiin urek-reko' Kristus. Au 'roim he uhiin urek-reko' Uisneno In kuasan amsa', re' In npaek je he namonib nafani' Yesus Kristus na'ko In a'maten. Karu anmui' tuaf re' he nasusab kau, natuin au utuin Kristus ate, anbain on re' naan. Fin anmui' tuaf anha'mui' Kristus amsa'. Ma karu anmui' tuaf re' he nroor niis kau natuin au 'tuthae mansian ate, au 'toup goe msa'. Fin Kristus anmate nrair neu kau on naan amsa'. 11 Ma karu au 'mate te, In of namonib nafani' kau.
Hit tpasan hit tuak ii, he tatuin batuur-batuur Uisneno In ranan
12-13 Aok-bian arki! Au 'roim he utuin Kristus In raan a'honis ma In romin sin ok-oke'. Mes karu he ta'uab namneo-namneo, au ka utuin sin fa fe' ok-oke' parsiis on re' naan. Es naan ate, au 'pasan au tuak ii, natuin Yesus Kristus anpiir ma nbetis kau he au utuin Ee on naan. Au on re' amnaenat re' naen ma'tan-tani' he 'tea fenis. Onaim au 'aen umneo goah ka 'niik koit ai' usneku' fa, he uten-tenab rasi ma 'mo'et neno unu' sin. Au 'nikan 'ain sin. 14 Mes au 'aen ma'tani' tar a'tea fenis he upein kraa mnatu'. Au pae' ji, es re': Uisneno of antoup kau 'bi sonaf neno tunan, natuin au 'pirsai Yesus Kristus. 15 Onaim au 'toit he hi arki re' ammoni mrair ma mi'uu ma'tani' ambi Kristus, amnekak mese mbi rasin re' ia. Mes karu nmui' tuaf re' in teenb ee 'teta' te, maut he Uisneno anfee raan a'po'i arekot. 16 Maski on naan amsa', mes hit arkit ro he tnaa' taher-heer ma tmoe' tatuin saa'-saa' re' batuur, re' Uisneno nanoni' nrair sin neu kit. 17 Aok-bian arki! Hi ar-arki ro he mait i'tope' mi'ko au 'monik. Bian na'ko ki, hi abitan naan, sin a'moink ein on re' au msa'. Mes hi re' ka mmoin on re' naan fa fe', bisa minoni' rek-reko mi'ko sin, he mmoe' mituin on naan amsa'. 18 Ampaant om mi'ko tuaf-tuaf re' anraban Kristus, ma re' ka ntoup fa nak In nmate nbi hau nehe. Sin i'moink ein kuuk naan, nakrira' sin rais maraban neun Kristus. Au utoon 'iit ki, 'eu tuaf human on re' naan, mes oras ia au utoon a'tein ki. Au maat nuu ngguin ansain anmatoom nok rasi naan. 19 Fin Uisneno of antitar napoitan sin, rarit anporin nataam sin neu ai naraka, natuin sin neek ein ka nmafuut ma na'kii' fa nbi Na. Sin suma annaa' ahaa rais maufinun, ma namin ranan he nanokab sin aok ein ii haa, tar antea sin na'naeb sin tuak ein nok sin 'moe' maufinun naan. Sin ka nmu'in fa rais mae. Sin suma nateenb ein on re' tuaf re' ka nahiin fa Uisneno. 20 Hi kais ammoe' mituin sin, mes mituin kai. Natuin hai mtaam amrair ma amjair Uisneno Iin na, ma amnaa' hak amjair nonot-asar anbi sonaf neno tunan. Oras ia hai mpa-pao hit Usi' Yesus Kristus. Fin In of ankoen On ansanu nfain neem na'ko sonaf neno tunan he nsoi nafetin kit na'ko Uisneno In rais to'os. 21 Kristus of na'bani' hit ao-akrati' re' bisa anmaet re' ia, he anjair aof fe'u re' ka nmaet niit fa, nahuum on re' In aon a'pina' ma akraha' naan. In na'bani' hit aok ein, anpaek In kuasa ko'u. Ma In npaek kuasa naan amsa', he nmoe' are' saa'-saa' re' anbi mee-mee jah, na'ruri' ma nbaisenun natuin In aprenat.
1 Aok-bian manekat arki! Natuin rasin re' naan, au 'toit he hi mmoin nok amneot ma amnonot piut-piut, ma kais ambeo. Au 'roim he 'eiti 'kius ki. Natuin hi kiim es re' amjair au 'meup goe in afan. Hi mmoe' au neek ii anmariin. Ma au bisa u'aiti' au 'nakak, natuin hi kiim.
Uisneno nroim he nha'tain hit nekak, karu hit tmoni mne'o ma namnoon
2 Au 'toit bifee nua' ein, es re' bi Yodia ma bi Sintike, he sin kais anmatoen ntein' ein. Sin ro he nmaraem ein, he nmonin reko es nok es. Natuin sin nua sin, sin Uisn ee mese', es naan ate, sin nua sin anmafutun njarin mese'. 3 Ba'e! Au 'toit he ho m'urus hit aok-bian bifee nua' ein naan, tar antea sin narekon nfanin. Natuin unu' te, sin nmepun ma'tani' he nturun kau he natonan neu tuaf bian anmatoom nok Uisneno In Rais Reko. Sin anmeup nitan on re' naan amsa' nabu-buan nok nai' Klemens, ma partei bian antein. Sin arsin re' naan, sin kaank ein matu'i nrair et Uisneno In daftar re' ntui kanaf neu tuaf-tuaf re' of anmoin nabu-buan nok Ne anbin sonaf neno tunan. 4 Natuin hi mtaam amrair ma mjair Uisneno Iin na, es naan ate hi neekm ein ro he nmarinan fai-manas. Au ufani' 'tein ki: mharineb hi neekm ein piut! 5 Hi ro he mneka'paar meu sekau-sekau goah. Ma kais amnikan am mak, Usif Yesus In oors ii anpaumaak een he ankoen On anfain neem. 6 Karu hi mipein susat ate, hi kais neekm ein nabatin akre'o msa'. Mes am'onen amtoit Uisneno he nturun ki anbi are' kanan rasi. Ma anbi are' kanan rasi re' hi mtoit sin naan ate, kais amnikan he mtoit makasi meu Na msa'. 7 Karu hi mmoe' on naan ate, of Uisneno nmoe' hi neekm ein naan, na'teen am antainiin ein. Ro batuur, mansian ii ka bisa fa he nahiin batuur-batuur neek a'tena' re' hit tapein je ta'ko Uisneno. Mes natuin hi mpirsai meu Yesus Kristus, Uisneno re' na'tena' hi neekm ein naan, anroim he npafa' ma npanat hi neekm ein naan ma hi teenb ein he kais namre'un. 8 Aok-bian arki! In uun ii on nai: kais mitenab rafu'-rafu'. Mes ampanat hi teenb ein naan he mitenab are' kanan rais reko re' natai nok Uisneno In nekan, ma mitenab are' kanan rais reko re' nmoe' tuaf bian sin neek ein anmarinan. Hi ro he mitenab amne'o ma kninu'. Mitenab are' kanan rais reko re' batuur ma namiin. Maim ranan he tuaf bian napenin hormaat. Maim ranan he mi'ratan meu rais reko. Ma kais misnasab he mitenab rais rekon ia ok-oke'. 9 Au unoni' 'rair ki utuin Uisneno In raan a'honis. Hi ro he mait i'tope' mi'ko au 'monik amsa', ma mmoe' mituin are' kanan rais reko re' au u'uab 'iit sin ma 'moe' 'iit sin. Karu hi mituin on naan ate, Uisneno anha'tain hi neekm ein naan, he hi neekm ein naan na'teen ein ma bisa mmoin nok mamut ma rais rame' es nok es.
Nai' Paulus antoit makasi natuin sin ntuurn ee
10 Au 'toit makasi, pures ma bo'is 'eu Uisneno, natuin hi ka mnikan kau fa. Au uhiin 'ak, nahunu te, hi mimnau kau, mes hi ka mipein fa oras he mturun maan kau. 11 Au 'ka utenab he 'toit fa saa'-saa'. Fin au ka 'kuran ma 'rabu fa saa'-saa' amsa', natuin au unoni' au tuak ii, he unokab au tenab a'paek saa'-saa' re' anmu'i nbi naan. 12 Au 'moin 'iit ka 'paek fa saa'-saa' nahuum bare'. Au a'moin 'iit amsa' nok saa'-saa' ii namtiis ma nathoen. Au 'naben 'iit tai-ruman, ma au 'naben 'iit oras au umseen. Anbi are' kanan rasi, au unoni' rais ma'nifa' he au bisa 'aran ma 'tahan a'bi 'monit. 13 Au bisa usaah are' kanan rasi, natuin Kristus es re' anha'tain ma ntao kau 'be'if ma'tani'. 14 Maski on mee msa', au 'toit makasi, natuin hi mikrira' mrair kau hi nekam arekot naan, ma amturun kau a'bi susat. 15 Unu' te, oras au usaitan propinsi Makedonia he 'nao utoon, a'saksii ma 'boot-beona' Uisneno In Rais Reko anbi bare bian sin, suma hi abit Filipi es re' amturun kau meik noni-roit. Jema'at bian sin, kahaf. Mes hi mihiin reta' naan. 16 On re' oras au 'bi Tesalonika msa', hi msonu' kau roit no goes a'nua, he mturun ma mbaab kau. 17 Oras ia, au ka utenab he 'toit fa saa'-saa' na'ko ki. Fin au 'roim he Uisneno es re' anfee ki tetus-athoen, natuin hi neekm ein naan reko neu kau. 18 Au 'toup hi ook-soun ein naan na'ko nai' Epafroditus. Naan anjair tetus-athoen neu kau, tar au ka 'kuran fa saa'-saa' antein. Naan amsa' on re' fua'-turu' re' anfoo mein, re' tuaf nout goe he na'besan Uisneno. Ma Uisneno antoup fua'-turu' naan, natuin naan anharineb In nekan. 19 Uisneno re' au u'bees 'eu Na ji, amu'it ma'tani'. Ma In nahiin saa'-saa' re' hi mperluu sin amsa'. Rarit In of nakrira' In nekan arekot ma nfee In tetus ma'tani' neu ki, natuin hi mmafuut ma mi'kii' ambi Yesus Kristus. 20 Onaim maut nai he hit tait ma ttuna' ta'rat-ratan Ama' Uisneno In kanan tar antea nabar-baar. Naan ro tebes namneo, batuur!
Nai' Paulus nasoup in surat
21 Au 'sonu' haan tabes ma haan buseet 'eu tuaf-tuaf re' natuin Yesus Kristus et kota Filipi. Au partein re' abitan ia msa', ansoun ein haan tabes ma haan buseet on naan neu ki arki. 22 Apirsait ein ok-oke' abitan kota Roma ia, ansoun ein haan tabes ma haan buseet on naan amsa'. On naan amsa' aok-bian sin re' anmepun et uis kou' gui in sonaf. Sin nsoun ein haan tabes ma haan buseet neu ki arki. 23 Au 'toit he hit Usi' Yesus Kristus, nakrira' In nekan arekot neu ki arki. Au suurt ii antuu' ma nheu' anbi ia nai, tua. na'ko au, nai' Paulus kau, tua.
Tabe ma haan buseet
1 Tabe ma haan buseet na'ko au, nai' Paulus kau. Uisneno kuun es re' anpiir ma nbetis naan kau he 'jair Yesus Kristus In haef. Nai' Timotius amsa' es ia, ma in ansonu' haan tabes ma haan buseet amsa' neu ki arki. 2 Au 'tui surat re' ia, ma 'soun ee 'eit 'eu ki arki, es re' Uisneno Iin na abitan kota Kolose, re' anmoe' natuin piut Yesus Kristus In raan a'honis. Hai mtoit he hit Ama' Uisneno nakrira' In nekan arekot neu ki arki, he hi bisa mmoni mbi mamut, rame' es nok es, ma tainina'.
Nai' Paulus an'onen ma anteek apirsait ein abitan Kolose
3 Hai m'onen es mee te, hai mteek ki, hai mtoit makasi meu Uisneno, es re' hit Usi' Yesus Kristus In Amaf. 4 Hai mneen amrair are' rasi mfaun anmatoom nok hi rais pirsait meu Yesus Kristus, ma hi nekam arekot re' ammaneek meu are' apirsait ein ok-oke'. 5 Hi mmoe' on naan, natuin hi mihiin are' kanan rais reko, re' matunu' nrair neu ki et sonaf neno tunan. Rasin re' ia, hi mneen miit sin na'kon uab ein re' batuur, es re' Uisneno In Rais Reko naan, 6 re' tuaf neit natoon ki je na'ko oras ahunut naan. Rais Reko naan nasiin On, nabeon On ntea bare-bare nbi pah-pinan ia, ma napein afan arekot, natuin in na'bani' tuaf ein sin a'moink ein anjarin reko. Hi 'moinm ein amsa' na'bain ein njarin reko on re' naan, anmurai na'ko neon ahunut oras hi mneen ma mtoup Rais Reko naan, ma mihiin batuur-batuur Uisneno In nekan arekot. 7 Hi minoni' mrair rasin re' ia na'ko hit aok-bian nai' Epafras. Nai' Epafras naan es re' hit partei anbi mepu mese' re' hit tneek. In nmakoe he nanaob Kristus In mepu anbi hi sonam ma hi tnanam. 8 In natoon kai mbi bare ia anmatoom hi maneekm ein, re' Uisneno In Asmaan ee anfee nrair je neu ki. 9 Natuin rasi naan, anmurai na'ko oras hai mneen rasi anmatoon nok ki, hai m'onen piut-piut ma amteek ki. Hai mtoit Uisneno he hi bisa mihiin In roimn ee batuur-batuur, ma hi mihiin rasi mfaun antein, natuin saa' re' Uisneno In Asmaan ee nanoni' ki sin. 10 Nok ranan naan, hi bisa mmoin mimnoon goah, ma meik Uisneno In kanan arekot. Ma hi bisa mharineb Uisneno In nekan anbi are' kanan rasi msa'. Karu hi mikrira' hi nekam arekot sin meu tuaf bian, Uisneno of anfee ki upan arekot. Nok ranan naan, hi bisa mihiin mirek-reko' Uisneno piut-piut. 11-13 Hai m'onen amtoti msa' he Uisneno nfee In kuasa ma'tani' naan, he hi bisa misaah are' kanan rasi nok neek sabaar. Hai mtoit he hi neekm ein nahenun nok rais marine, he hi mtoit makasi piut-piut meu Ama' Uisneno. Fin In nfei ranan he hi bisa mtoup pusaak na'ko sonaf neno tunan. Pusaak naan, In nfee je neu are' kanan apirsait neu Yesus Kristus. Natuin In nsoi nafetin kit na'ko kuasa meis'okan, rarit nataam kit tjair Yesus Kristus Iin na, he tatua tbi meu'-sine'. In nait na'ratan Yesus Kristus amsa', he njair hit Usif. Nai' Yesus naan, Uisneno In Aan neka'. 14 Uisneno annona' In Anah naan, he nsoi nafetin naan kit, ma nnoes nain hit sanat ma penu sin.
Kristus naan na'raat anneis-neis
15 Kristus naan, huma' mese' nok Uisneno, re' mansian ii ka bisa niit Ee fa. In nbi nain naan nahuun na'ko are' kanan saa', ma In njari 'Nakaf ma Usif neu are' kanan saa' re' Uisneno anmoe' sin. 16 Fin Uisneno anpaek Je, he nmoe' naan neon goe ma pah-pinan ia in afan ma in nesan sin ok-oke'. In nmoe' are' kanan saa'-saa' re' mansian ii bisa niit sin, ma saa'-saa' re' mansian ii ka bisa niit sin fa. Tait i'tope' on re': anaa' aprenat sin, anaa' kuasa sin, uisf ein, ma a'naakt ein. Are' saa'-saa' re' Uisneno he nmoe' sin naan, In nmoe' sin neu Yesus Kristus, ma Yesus amsa' es re' anmeup sin ok-oke'. 17 Nahuun na'ko are' saa'-saa' ii he njari te, In nbi nain naa. Are' saa'-saa' re' anbi naan, mafutu' nok Ne, ma In es re' an'ator sin. 18 In es re' anjari 'Nakaf neu apirsait ein ok-oke', ma apirsait ein anjarin on re' In aon. Fin In es re' nanaob sin ok-oke'. Na'ko are' kanan amates re' anmoni nfanin, In es re' pentiing anneis-neisi, maut he In es re' na'raat anneis-neis na'ko are' kanan saa'-saa' ii ok-oke'. 19 Are' kanan saa'-saa' re' anbi Uisneno In tuan, anmu'i msa' et Kristus In tuan, ma naan amsa' anharineb Uisneno. 20 Uisneno npaek Yesus Kristus, he narame' are' kanan saa'-saa' re' In nmo'e nrair sin naan nok Ne. In nnona' ma nfee In Anah, he njair fua'-turu' re' nat'opab In naa', ma nmate nbi hau nehe, he are' kanan saa'-saa' anbi neon goe tnanan, ma are' kanan saa'-saa' anbi pah-pinan, bisa nmarame' nfain nok Uisneno. 21 Unu' te, hi kiim ammoni mbi mone' mainuan, mi'roo mi'ko Uisneno. Hi mmusun Uisneno, natuin hi neekm ein nameis'okan, ma hi mmoe' maufinu re' anraabn Ee piut-piut. 22 Maski on naan amsa', mes oras ia In es re' anfei ranan he hit bisa tmarame' tok Ne. Natuin In es re' ansonu' In Anah he njair mansian. Ma In es re' anfee In Anah naan, he njair fua'-turu', nok ranan anmaet anbi hau nehe, he hit bisa tmarame' tfain tok Ne. Yesus Kristus anmoe' on naan, he In bisa neik kit atfain, he thake tbi Uisneno In human ma In matan, he tjair tuaf-tuaf akninu', neek amneot, ma ka tmui' fa sanat attein. 23 Onaim hi ro he maran ma mtahan piut ambi hi pirsait naan. Amnaa' miher-heran he kais na'oni'! Kais amtet-koit mi'ko Rais Reko naan, re' hi mneen ma mtoupu mrair Je oras ahunut naan. Fin hi bisa mi'peis om meu Rais Reko naan. Tuaf-tuaf annaon ma natoon Rais Reko naan anbi bare mee-mee et pah-pinan ia. Ma Uisneno anhaefa' kau, nai' Paulus, he au a'nao utoon ma usine' Rais Reko naan amsa'.
Nai' Paulus anmeup he ntuthae Uisneno Iin na
24 Oras Kristus anmoni nbi pah-pinan ia, In napein ha'mu'it. Ma au usaah ha'mu'it huma'-huma' oras ia msa'. Maski on naan amsa', mes au neek ii anmariin piut. Karu nmui' tuaf re' ro he napein ha'mu'it ate, maut he au 'ok usaah ha'mu'it naan, on re' Kristus nasaah ha'mu'it neu Iin na. Natuin Iin na, nahuum on re' In aon. 25 Uisneno anfee nrair kau mepu he au 'tuthae Iin na. Es naan ate, au unoni' In Kabin ma Prenat sin neu ki tar namnuut. 26-27 Anbi oras ahunut ate, mansian ii nneen Uisneno In Kabin ma Prenat. Mes sin ka nahiin batuur-batuur fa fe' Kabin ma Prenat naan In sarit. Uisneno In Kabin ma Prenat In sairt ii ma'nifa', onaim sin ka nahiin Je fa maat-maat. Mes oras ia, Uisneno nafeek anrair he nfei ma'nifa' naan neu Iin na. Ma In sarit naan, anjair beno re' anpiin ma nakraah neu are' kanan uuf ma pah anbi pah-pinan ia. Beno naan, es re': Kristus anmoin et hi neekm ein! Naan es re' anmoe' ki he hi mpirsai piut am mak, In of anmoe' are' kanan rasi re' reko nneis-neisi neu ki arki anbi sonaf neno tunan. Rasi re' ia, re' mansian kit arkit atpa-pao na'ko un-unu'. 28 Onaim hai mitoon meu are' kanan mansian anmatoom nok Kristus. Hai minoni' sin arsin, ma mimnaub sin imsa', ampaek are' tenab ma ronef re' Uisneno anfee sin neu kai. Hai mmoe' on naan, he mifaof ha'tain nekaf meu are' tuaf re' natuin Kristus, he sin bisa nhaken nbin Uisneno In human ma In matan. Ma anbi oras naan sin ka namaeb ok fa, natuin sin nmonin nok neek amneot ma amnonot. 29 Etun au 'paasn ok ma 'meup ma'tani' 'eu ki. Au bisa 'aran ma 'tahan, 'meup ma'tani' on naan, natuin Kristus In kuasan es re' nha'tain kau. Ma In kuasan naan, ma'tain re'uf!
1 Hi arki re' mitua et kota Kolose, rarit sin re' abitan kota Laodikia, ma re' tuaf-tuaf re' ka nateef niit kau fa. Au 'roim he hi arki mihiin au 'meup ma'tani' 'eu ki, ma 'eu sin. 2 Au sairt ii, he 'ha'tain sin neek ein ok-oke', he sin nmafuut ein anjarin mese' natuin sin arsin anmanek-nekan. Rarit sin neek ein nateen, natuin sin nahiin batuur-batuur Uisneno In sarit re' unu' fe'e te, ma'nifa'. Rais ma'nifa' naan, es re' Kristus. 3 Karu hi mmafutu' mjair nekaf mese' mok Kristus, na' In natoon tenab ma ronef re' hi mperluu, ma nanoni' ki npaek tenab ma ronef he mmoe' are' kanan rais reko. Tenab ma roenf ein naan, nahuum on re' pusaak re' ma'oos' ate rek-reko. 4 Au utoon ki rasin re' ia ok-oke', he kais anmui' tuaf neem ma na'uab na'moe he nputa-kriu naan ki. 5 Au u'roo 'ok ki. Maski on naan amsa', mes au ka 'nika' ki fa, natuin au neek ii anmafuut nok ki. Ma au 'mariin, natuin au uhiin 'ak hi mmoin reko, ma hi mnaa' miheran hi rais pirsait meu Kristus amsa'.
Hit arkit re' tmafuut tok Kristus, tapeni 'monif re' batuur
6 Natuin unu' te, hi mtoupu mrair Yesus Kristus njair hi Usi', etun oras ia, hi ro he mneen Ee piut. Natuin In re' naan, anjair Usi' neu ki fe'. 7 Karu hi mmoin ma mmafuut mok Ne on naan ate, hi on re' hau 'ba'ak re' anseen ok antaman ntean auf goe 'pinan. Ma hi on re' uim ma'tain es amsa', natuin nahaek ee et fatu 'sukif ma fanderen ma'tani'. Hi ro he mma'tain piut ambi hi rais pirsait, nahuum on re' hi minoni' miit sin naan. Maut he hi neekm ein naan napoitan rais sukuur, natuin saa'-saa' re' Uisneno anmoe' sin neu ki arki. 8 Ampaant om he kais mituin tua sona' re' anpaek mansian ii tenab ma ronef, he nteib ma nbeon ki mpoi mi'ko ranan amneot ma amnonot. Ma hi kais mituin mansian ein sin noin mahiinf ein, re' ka ma'u'u fa. Fin sin noni' naan, suma nboor ma npoi na'ko mansian ii tenab ma ronef, ma na'ko pah-pinan ia in atoorn ein. Mes noin' ein naan, ka na'uun ma na'ba'an fa nbin Kristus. 9 Are' kanan saa'-saa' re' anbi Uisneno In tuan, anmu'i et Kristus In tuan amsa'. Ma Kristus anjair mansian on re' hit amsa'. 10 Natuin hi mmafuut mok Kristus, ma mjair Iin na, etun In naheun ma namtisib ki nbi rais manekat ma amneot ein. Natuin In na'ratan nneis na'ko are' kanan kuasa, ma are' kanan anaa' aprenat, et sin re' arekot ai' amre'ut maufinu. 11 Oras atoin Yahudis sin na'heir' ein, sin nnai nain a'maet ii in pasun tunan, he njair tanar am nak, sin re' naan, Uisneno Iin na. Oras hi mtaam amjair Kristus Iin na, hi mipeni ‘'heri'’ amsa'. In sairt ii on nai: 'heri' ia ka on fa re' atnai tain pasu na'ko hit aok, mes anmatoom nok rasi re' Kristus anheir ma nnai nain are' kanan rais maufinu na'ko hit nekak. Es re' are' kanan rais maufinu amre'ut re' hit tmoe' sin, natuin hit re' ia, mansian. 12 Oras hi misrain, sin nasrain ki npaken oe. Naan huma' mese' on re' ansuub na'bua' ki mok Kristus. Rarit hi mipeni 'moin fe'u, nahuum on re' In napein 'moin fe'u msa'. Hi mipein on re' naan, natuin hi mpirsai mmak, Uisneno anpaek In kuasa ma'tani', he namonib nafani' Yesus Kristus na'ko In a'maten. In anpaek kuasa naan amsa', he nmepu nbi hi neekm ein. 13 Unu' te, hi on re' ammate mrair, natuin hi mmui' sanat huma'-huma', ma hi ka mjair Uisneno Iin na fa fe' msa'. Maski on naan amsa', In nnoes nain hi saant ein ok-oke', ma nfee ki 'moin fe'u, nahuum on re' In namonib nafani' Kristus. 14 Amneon ii, hit ro he tapein hukun, natuin hit tanhai Uisneno In atoorn ein. Mes In nnoes nain hit hukun sin, oras sin nkuus na'peti' Kristus anbi hau nehe. 15 Anbi naan, In niis nain are' kanan kuasa meis'okan, ma are' saa'-saa' re' naprenat anbi rais maufinu. Rarit In namae sin anbi too mfaun ein, sin humak ma sin matak. Naan on re' soraurs ein re' annao nmakenan ma nisan, ma oras anfain neman, anbairs ein nok marine, hunu ma sakanat ko'u, ma nakrira' sin musun re' niis nain sin naan. 16 Karu anmui' tuaf he namouf ki anmatoom nok amnahat ma mninut ate, kais amtoe mituin sin. Ma karu anmui' tuaf re' he naim rasi nok ki anmatoom nok neon rekon, ai' fesat fuun fe'u, ai' atoran neno snasat ate, kais mitniin sin. 17 Are' kanan rasi human on re' naan, ka ma'osa' fa. Natuin rasin naan, on re' mneit ein re' namnekun oras hit tfeen ta'ko hara 'tupa'. Mes Kristus naan, ro tebe. In ro nabar-baar. 18 Karu anmui' tuaf he namouf ki natuin hi ka mituin fa atoran re' sin nmoe' kuuk sin ite, kais amneen. Karu hi mneen sin, hi ka mtoup fa rais rekon re' Uisneno he nfee sin neu ki. Mes ampaant om! Natuin anmui' tuaf re' naim ranan he namouf ki. Sin nromin he hi mi'paran hi tuam ein, ma mi'besan Uisneno In ameput neno tunan sin, natuin sin nateenb ein nak oni' mneit ii es re' nakrira' on naan. Sin naan sin tuak ein reko nneis na'ko tuaf bian. Te kaah, ka on naan fa! Sin teenb ein on re' mansian. 19 Sin ka nmafuut ein fa nok Kristus. Te kaah, In re' naan, 'Nakaf. Ma Iin na, on re' In aon re' in npairori. In nfee 'be'if ma'tani' neu Iin na piut, anpaek Uisneno In kuasan. Nok ranan naan, sin on re' nuif ma kea nbi hit aok, re' anmafutun he anmaturun es nok es, tar antea aok ii no mes-mese' anmeup nok reko.
Karu hit tmafutu' tbi Kristus, hit tapeni 'moin fe'u
20 Hi mmate mrair mok Kristus. Rarit kuasa meis'ookn ii ka nfuut ki fa goen anbi pah-pinan ia. Onaim nansaa' am es hi mitun-tuin pah-pinan ia in atoran huma'-huma' fe'? Sin nak on nai: 21 “Kais amnaa' ia; kais meuk ai' muah nee; kais amreo' ia.” 22 Mes atoorn ein re' naan, suma mansian ii es re' anmoe' sin, he nanoni' mansian ein. Te kaah, atoorn ein naan, suma an'ator saa'-saa' re' of namneuk. 23 Karu anmui' tuaf re' bisa nmoe' natuin atoorn ein naan, sin nak of oni' ai' atoni' anhormaat sin, ma naan sin on re' atoin ahinit, atoni' re' nanaob rais pirsait nok rek-reko, atoin neek a'parat, anha'mui' in tuan aa kuun, ma a'besat re' amakoe-re'uf. Te kaah, kahaf! Atoorn ein naan, ka bisa fa he na'bani' mansian ein sin teenb ein ma sin neek ein he nromin he nmo'en rais maufinu.
1 Uisneno nfee nrair ki 'moin fe'u, on re' In nmoe' ki mmoni mfain mibua mok Kristus. Oras ia, Kristus antuun On et bare re' mahormaat re'uf, et Uisneno In abnapan a'ne'u. Es naan ate, hi ro he mitenab rasi re' anharineb Uisneno In nekan. 2 Mitenab piut-piut anmatoom nok are' rasi re' Uisneno nroim sin. Kais amtoe meu are' rasi re' suma neik marine neu mansian ii in nekan. 3 Natuin hi mmaet oras Kristus anmate msa'. Rarit hi 'monim fe'u naan, mamut, natuin mmafutu mrair mok Kristus, re' nok Uisneno et sonaf neno tunan. 4 Kristus anmoin et hi neekm ein, ma In anmoe' ki mmoin batuur amsa'. Oras In nkoen On anfain neem, hi mpoi mibu-bua mok Ne ambi pina' ma kraha'.
'Moni mnaa', ma 'moin fe'u
5 Es naan ate, hi ro he mait imporin hi rais sinmakat re' he mmoe' maufinu. On re': msinmakan mak he mmakaek ma mmakoin karu ka fee-mone fa; msinmakan he mmoe' rais 'oemeetn ein; msinmakan he mmoe' mituin hi neekm ein sin roim maufiunt ein; msinmakan he mmoe' maufinu huma'-huma'; ma mikoom he are' saa'-saa' ii suma njair ho nggoa kuum (te kaah, naan on re' ho mfua, natuin ho mait mu'rat-ratan rasi 'teta' re' nsiu' napoitan Uisneno). 6 Rasin re' naan es re' nmoe' Uisneno natoo' ko'u, tar antea In of anhukun are' kanan mansian re' ka nromin fa he nneen ma natniin Ee. 7 Unu' te, hi mmoin on naan amsa', natuin hi neekm ein anmafutun nok rais maufiunt ein. 8 Mes oras ia, hi ro he mait imporin hi rais sinmakat re' he mmoe' maufiunt ein ok-oke'. On re': to'os; neek maputu'; tunu 'nekaf; na're'uf es in kanan; feef re'uf. 9-10 Ma hi es mok es ate, kais ammaputa-kriun. Natuin hi mait imporin hi nekam asinmakat re' he mmoe' maufinu, ma misaitan hi 'monim amnaa'. Ma oras ia hi nsenu' ma mseek ee, mpaek neek fe'u. Naan on re' atoni' nait inporin in baru mnaa' re' n'oemeet ma nakroe, ma npaek baur fe'u re' kninu'. Uisneno es re' anmoe' naan ki. Ma oras ia In anmoe' ki he mihini mtein Je msa', ma nmoe' ki he 'roo-'roo te huma' mese' on re' In. 11 Anbi 'moin fe'u ia, hit ka tteek fa es natuin in aon pasun tak, sin re' naan atoin Yahudis, ai' ka atoin Yahudis fa; ai' atoni' re' na'heri', ai' atoni' re' ka na'heri' fa; ai' kase; ai' atoni' re' ka nahiin fa atoran harat; ai' ate; ai' atoin farei. Naan ka ma'osa' fa. Mes re' ma'osa' es re' karu sin nmafuut nok Kristus, ma karu In nmoni nbi sin nekak nanan. 12 Uisneno anpiir ma anbetis naan ki, natuin In nneek ki. In sairt ii he hi mjair In tuaf akninu' re' a'teta' na'ko mansian bian sin. Es naan ate, hi ro he mjair tuaf re' aturun, re' neek reko, neek a'parat, neek ma'nura', ma neek sabaar. 13 Hi ro he msabaar es nok es, natuin hi mmakhini' reko. Karu na'ko ki anmui' tuaf naim rasi nok in aok-bian ate, kais mitunu' nekaf. Mes hi ro he mnikan main in sanat naan, ma mfee ne rais saok sanat, nahuum on re' Uisneno annikan nain hi saant ein. 14 Mimnau! Rais manekat, ma'osa' nneis na'ko are' kanan rasi bian. Rarit hi ro he mpaek manekat naan anbi hi neekm ein, on re' atoni' npaek tais anbi in aon. Natuin manekat naan, on re' abas re' hit tpaek je he tteun tais arekot. Naan es re' anfuut na'mese' kit. 15 Hit bisa tmarame' tok Uisneno, natuin Kristus. Onaim hi ro he mkonan Kristus In rais rame' he n'ator hi neekm ein naan amsa'. Fin Uisneno nroim he hi mmoni mbi rais rame' es nok es, natuin hi arki ammafutu mjair aof mese'. Ma hi neekm ein ro he nmu'in sukuur piut-piut, natuin In kuun es re' anpiir ma nbetis naan ki arki. 16 Kristus In Kabin ma Prenat sin imsa' ro he n'ator hi neekm ein ma hi 'moinm ein. Kabin ma Prenat sin naan, nahuum on re' a'mu'if re' ma'osa', re' In nfee sin neu ki. Sin nakrira' ma naruru' ranan he hi bisa mihiin rasi mfaun, mituin Uisneno In tenab. Rarit hi bisa mpaek sin he minoni' ma ammamnaub es nok es. Karu minoni' hi ngguin, kais minoni' sin nok kasar, mes ampaek neek ba-baun re' naheun nok sukuur. Ampaek siit pures-bo'is sin, siit kninu' sin, ma siit ein re' hi mtui kiim sin he mpures ma mbo'is Uisneno. 17 Hi re' ia amjari mrair Yesus Kristus In tuaf re' neik In kanan. Onaim mimnau! Fin anbi are' saa'-saa' re' hi mi'uab sin, mi'uab meik In kanan. Ma are' saa'-saa' re' hi mmoe' sin, mmoe' meik In kanan amsa'. Rarit kais amnikan he mmoe' are' saa'-saa' meik kanaf na'ko hi Usi' Yesus Kristus. Ma mtoit makasi piut-piut meu In Amaf, es re' Uisneno.
Atoni Kristen sin ro he nmonin on mee, es nok es?
18 Bifee mamone'! Hi es-es ate ro he mtornaat ma mutniin ho mone, natuin rasi naan pantas neu tuaf re' natuin anrair Yesus Kristus. 19 Atoin mafe'e! Hi es-es ate ro he mneek hi fee ngguin, ma kais amnimap sai ai' amneek meenb ee. 20 Ri'aan ein! Hi ro he mneen hi mahoint ein anbi are' kanan rasi, fin re' naan es re' anharineb Uisneno In nekan. 21 Mahoint ein! Kais mi'tutu' ri'aan ein, he sin kais neek ein na'oin ein ma nneek menan neu ki. 22 Ameput ma ate! Anbi pah-pinan ia, hi ro he mmoe' mituin hi usim anbi are' kanan rasi. Kais oras sin nkius ki te, hi mmeup he hi mipein bo'is, nnao nasaitan ki te, hi misnaas. Ammeup rek-reko he sin anmarinan. Ammeup are' kanan mepu nok rek-reko, natuin hi mihini mmak, Uisneno es re' ankius ki. 23-24 Hi mmeup saa'-saa' ahaa te, ammeup rek-reko ma mmakoe. Hi ro he mmeup on re' hi mmeup meu hi Usi' Yesus Kristus, ka neu fa meu mansian. Fin hi mtuthae Je. Ma In es re' of anbaras hi maskeet ein sin aafk ein, oras In nfee ki pusaak neu ki. 25 Mes karu hi mmeup ka batuur fa te, In of anhukun ki. Fin In re' naan, ntai rasi te natai ma namneo, ma ka npiir fa humaf.
1 A'nakaf ma usif! Hi ro he m'ator hi ameupt ein rek-reko, natai ma namnoon. Mimnau, fin hi msa' ammui' Usif et sonaf neno tunan re' an'ator ki.
Faineekt ein
2 Hi ro he m'onen piut-piut. Ma hi ro he mikeo ma msadaar are' kanan rasi re' hi mi'uab sin meu Uisneno, ma oras am'onen hi neekm ein naan ro he naheun nok sukuur. 3 Kais amnikan he m'onen amteek kai, ma mtoit Uisneno he nfei ranan he hai bisa mitoon meu tuaf-tuaf, rasi re' unu' te ma'nifa' anmatoom nok Kristus. Mimnau, au 'taam bui re' ia, natuin au utoon 'eu tuaf sin anmatoom nok Kristus. 4 Am'onen he au bisa utoon ma 'boot-beon Rais Reko naan tar namnuut, maut he tuaf fatuf re' anneen ma antoup Goe, bisa nahiin ma nakeo Goe kninu'. 5 Ammoin namnoon ambi tuaf-tuaf re' ka npirsain fa fe' neun Kristus sin sonak ma sin atnanak. Ampaek tabu ma eti rek-reko re' Uisneno anfee je neu ki. 6 Karu hi mi'uab ate, mi'uab meik haan ba-baun nok neek a'paran he antoom atoni' in nekan. Kais sin nrenan ma nbosan hi uab ein naan. Ampaek uab reko batuur-batuur, he hi bisa mitaah sin rek-reko, karu anmui' tuaf nataan ki.
Nai' Paulus nasoup in surat
7 Nai' Tekikus of neit. Rarit in of anpeo ma nareta' ki au kberok anbi bare ia. In re' naan, hai aok-bian re' hai mneek, re' na'kii' anbi tuthaes neu Uisneno Iin na. Unu' te, in nok kau minaob Uisneno In mepu. 8 Au 'reek ma 'haef ee neit neu naan, he in bisa nha'tain hi neekm ein naan, ma bisa anpeo ma nareta' ki saa'-saa' re' anmatoom nok kai anbi bare ia. 9 Au 'reek nai' Onisimus anfain neit he nok nai' Tekikus amsa'. In re' naan, hi ja kiim. Sin nua sin naan, of anpeon ma nareet ein saa'-saa' re' anjari nrair anbi bare ia. 10 Nai' Aristarkus ansonu' haan tabes ma haan buseet neu ki. Sin nataam ee es bui nabua nok kau. Nai' Barnabas in oirf es, kaan ee nai' Markus, ansonu' haan tabes ma haan buseet neu ki msa'. Unu' te, au 'ba'an 'ain, karu nai' Markus anfain neem ankius ki te, amtoup goe rek-reko. 11 Nai' Yesus, (re' hit teek ee msa' tak “Nai' Yustus”) ansonu' haan tabes ma haan buseet neu ki msa'. Na'ko partei ngguin ok-oke' re' nanaob Uisneno In mepu, suma tuaf teun nggoah re' anjarin atoni Kristen na'ko uuf ma nonot Yahudi. Ma sin re' ia, es re' anha'tain au nekak. 12 Hi partei nai' Epafras es ia msa'. In ansonu' haan tabes ma haan buseet neu ki msa'. In njair Yesus Kristus In aan renu'-aan reka'. In n'onen ma'tani' fai-manas ma anteek ki, ma ntoit Uisneno he nha'tain ki, namtisib ki, ma nmoe' ki he hi mihiin batuur-batuur In romin. 13 Au utoon 'ain ki m'ak, nai' Epafras naan anmeup ma'tain 'een neu ki, ma neu atoni Kristen sin et kota Laodikia ma kota Herapolis. 14 Haan tabes ma haan buseet na'ko nai' Demas, ma dokter Lukas, re' hit aok-bian manekat sin. 15 Au 'sonu' haan tabes ma haan buseet 'eu aok-bian apirsait ein re' abitan kota Laodikia. Kais amnikan he msonu' au haan tabes ma haan buseet meu ain Nimfa ma apirsait ein re' nati' te nabuan anbin in umi. 16 Karu hi abit Kolose arki amrees amrair surat re' ia te, amsoun ee nkoon meu apirsait ein kota Laodikia he sin bisa nresan amsa'. Ma hi ro he mrees surat re' au 'sonu' 'iit ee 'eu sin amsa'. 17 Mimnaub nai' Arkipus am mak, “Ho kais amnikan he munaob piut ho mepu tar namsoup, mepu re' ho mtoup goe na'ko Uisneno.” 18 Kais amnikan, sin nataam kau et bui ia fe'. Au 'toit he Uisneno nakrira' ma naruru' In nekan arekot neu ki arki. Amkius kiim, surat re' ia, au 'teken ma 'nene, 'eik kuuk au 'nimak, Haan tabes ma haan buseet na'ko kau, tua. Na'ko au, nai' Paulus kau, tua.
Nai' Paulus sin nsoun ein han tabes
1 Han tabes na'ko kau, nai' Paulus, ma au partein nai' Silas ma nai' Timotius. Surat re' ia, hai msoun ee neu ki arki too srani' et kota Tesalonika. Hi es re' ampiir kim ranan he mituin Uisneno, hit Ama', ma mituin Yesus Kristus, hit Usi'. Hai mtoit Uisneno he nakrira' In nekan reek Goe neu ki, he hi mmoni mbi mamut ma ao-mina'. Kota Tesalonika
Nai' Paulus ntoit makasi, natuin abitan Tesalonika npirsain piut
2 Hai misaeb makasi piut-piut meu Uisneno, natuin hi pirsait naan. Fai-manas hai m'onen ma mteek ki ok-oke'. 3 Hai mimnau piut-piut meu mepun re' hi mmoe' sin, natuin hi mpirsai Uisneno ma mneek Ee. Hi mtahan piut-piut ambi mepun naan, natuin hi mifnekan meu Usif Yesus. Hai meik sin piut-piut meu Uisneno In human ma In matan, re' hit Ama'. 4 Aok-bian arki! Hai mihiin mak Uisneno nneek ki. Etun In npiir ma nbeit naan ki njair In nonot-asar. 5 Neng goes ii, oras hai iim meu Tesalonika, hai mitoon ki Uisneno In Rais Reko. Oras naan, hi mneen hai uab ein rek-reko. Hi ka mnena ha fa, mes hi msa' miit kim Uisneno In kuasan na'ko Smana Kninu'. Rasin re' naan, es re' anmoe' ki ma hi mtoup Usi' In Rais Reko batuur-batuur. Oras naan, hi miit meik hi matam, hai 'tokom ma hai' 'naom, mak hai mmoe' on mee, he hi mihiin batuur-batuur Usi' In ranan. 6 Natuin hi mroim ma mpiir he mituin Uisneno In romin, es na' hi mmoin mituin hai 'tope', ma mmoin mituin Usif Yesus In a'tope'. Mes oras hi mtoup Rais Reko, nmui' tuaf re' nasusab ki. Maski on nana msa', hi neek mein naan ka na'oin ein fa, natuin Uisneno In Smana Kniun Ee, nfee ki neek marinit. 7 Nok ranan naan, hi mikrira' 'tope' meu apirsait ein ok-oke' nbin propinsi Makedonia, ma propinsi Akaya. 8 Mes ka re' nana nmees fa. Uisneno In Rais Reko naan nasiin on ma nanaob on, na'ko ki hi abit Tesalonika naan ntea mee-mee. Onaim, hai he mi'uab saa' antein, natuin biak ein ok-oke' annenan nrair hi neek pirsait meu Uisneno. 9 Anbi mee-mee jah, biak ein nareet ein nak, unu' te hi mtoup kai nok rek-reko. Rarit hi mait imporin hi fuat ein naan, ma mi'te'un hi neek mein naan ma mituin Uisneno re' amneot. Natuin hi re' naan of amjair Uisneno Amonit Iin ja ki. 10 Sin imsa' nareet ein nak, hi fe' mpa-pao Uisneno In Anah, Nai' Yesus, he nkoen On neem na'ko neno-tunan. Neng goes ii, biak ein na'maat Ee, mes Uisneno namonib nafain Ee. Karu Uisneno nroim he nhukun mansian ii te, Usif Yesus es re' of ansoi naan kit na'ko to'os Uisneno.
Nai' Paulus namnau in mepu nbi Tesalonika
1 Aok-bian arki! Hi arki mihiin, oras hai iim ma mmepu mbi Tesalonika te, hai ka mporin fa hai haet naan ruum-ruum. 2 Hi msa' mimnau, oras hai ka iim fa fe' mbi kota Tesalonika te, abitan kota Filipi sin nasusab ma nha'mu'i nrair kai. Mes Uisneno nha'tain kai, henati' hai mibrain he mitoon Uisneno In Rais Reko neu ki, maski too mfaun sin anmusun kai. 3 Oras naan, hai meik Rais Reko meu ki mbi kota Tesalonika, hai ka meik fa noni' re' neik ki neu raan amre'ut. Hai ka iim fa he miboo ma mputa-kriu ki. 4 Oras naan, hai iim nok neek akninu' ma mne'o. Uisneno neik Non anruur ma nreek kai, he hai meik Rais Reko meu ki. Hai ka mroim fa he mhariin mansian ii in nekan, mes hai mroim he mhariin Uisneno, natuin In es re' ansuu' hai nekam, nak namneo ai' npeun. 5 Hi msa' mihiin mak, hai ka mkopo' ki fa, saa' antein he maim ranan he mipein roit na'ko ki. Uisneno nahiin nain hai nekam. 6 Hai mmepu msa', ka neu fa he mipein bo'is na'ko mansian, ai' na'ko ki, ai' na'ko biak ein. 7 Hai re' ia, Kristus In haef ein. Hai mmui' hak he mmoo'j om on re' a'naet ein, mes hai ka neu he maiks om fa on re' naan. Oras naan, hai mmoo'j om on re' ri'ana' re' natua nok ki. Hai msa' mikrira' rais manekat meu ki, on re' bifee asusu ri'ana'. 8 Hai ka iim fa neu ha he mfee ki Rais Reko, mes hai mnona' ki hai tuam ein ii ok-oke', natuin hai mneek miis ki. 9 Aok-bian arki! Hi msa' of mimnau fe', hai mmeup fai-manas ma'tani', he hai mitaah ma misaah kim hai 'monim naan. Hai ka misusab ki fa, oras hai meik Rais Reko naan meu ki. 10 Hi ar-arki miit ma msaksii, Uisneno msa'. Oras hai mok ki re' hi apirsait ambi bare naan, hai mmoin nok neek akninu' ma mne'o, ma ka mmoe' fa sanat mese' msa'. 11 Hi mihiin mak, hai m'urus ki ok-oke', on re' aam honi' n'urus in aanh ein, 12 on re' mha'tain hi nekam, mimnaub ki, ma mfuir ki, he hi mmoin nok reko, ma mharineb Uisneno In nekan. Natuin In es re' Usif, no'en ki he mtaam amjair In nonot-asar, ma mipein hormaat nahuum on re' Uisneno msa'.
Uisneno nmeup et hi nekam
13 Hai misaeb makasi ka natfeek niit fa meu Uisneno, natuin oras hi mneen Rais Reko naan mi'ko kai, hi ka mtoup fa mansian ii in uaban, mes hi mneen ma mtoup Uisneno In Uaban. In es re' neik Non anmepu mbi hi nekam nanan. 14 Aok-bian arki! Hi fe' mmurai mituin Uisneno In ranan, mes hi aom-bian sin re' hi mok sin pah mese', sin nasusab ki. Nok ranan naan, hi msa' mnaben miit mok apirsait ein propinsi Yudea, re' sin napenin susat ma ha'mu'it na'ko sin atoin Yahudis kuuk, natuin sin npirsain neu Yesus Kristus. 15 Anmui' atoin Yahudis re' ka ntoe natuin fa Uisneno In romin. Etun oras Uisneno nsonu' In mafefa' kniun ein neman neu sin ite, sin nasusab ma nha'mui' sin, ma na'maet sin. On nana msa', sin na'maet Usif Yesus. Oras ia, sin namin ranan he ntitar napoitan kai ntein. Sin nmusun nok sekau-sekau goah. Natuin are' kanan rasin naan, etun Uisneno ka nroim sin fa. 16 Raas jes antein, sin nmo'en ekat huma'-huma', he hai kais meik Uisneno In Rais Reko ia meu tuaf ambi pah bian antein. Atoin Yahudis sin ka nromin fa he Usi' nsoi tua' teta'. Nok ranan naan, sin ntao sin saan tein na'unu' ma na'tuup ok piut. Etun Uisneno natoo' ma nhukun sin.
Nai' Paulus anroim he nateef antein too srani' et Tesalonika
17 Aok-bian arki! Maski oras ia hit maka'roon, mes hit neek ein kais on naan. Hai maim oras, he karu reko te, hai mfain iim amtein he miteef mok ki, natuin hai mimnau ki re'-re'uf. 18 Au kuuk, au 'soba' ufan-fain he eti 'kius ki, mes niut reu'f ein sin a'naak te, n'eka' kau piut. 19 Hi mihiin, neu saa' am es hai he iim amkius ki? Hai he iim, natuin hai mifnekan meu ki. Hi es re' mhariin, ma mi'naeb hai nekam. Natuin sekau ntein es re' nnaa' naher-heran Usif Yesus In kanan, karu ka hi fa! Karu Usi' ankoen On anfain neem, hai mibei' he mi'aiti' hai 'nakam, natuin hi rais mein naan. 20 Batuur! Hi es re' mi'naeb hai nekam ma mhariin kai.
Nai' Paulus nafeek he nreek nai' Timotius he nnao neu Tesalonika
1-2 Hi mihini te, noo goah! Neng goes ii, oras hai misaitan ki naan, ka natuik ma natai fa nok hai romim. Hai neek meni nmariin anmaten he iim amkius ki, mes ka njair fa. A'ro-roo te, hai ka mibe'i mtein fa heen, etun hai mifeek he mreun nai' Timotius neit ii nkius ki. Mes au ok nai' Silas, mibaar ambi kota Atena. Nai' Timotius naan, hai aom-bian. In re' naan, hai partei ja nbi mepu, re' hai mibua oras hai minaob Yesus Kristus In Rais Reko. Hai mreek ee neit he in nanoni' ki, ma nha'tain ki, he hi rais pirsait meu Uisneno naan na'kiik ma naheer antein. 3 Nok ranan naan, karu hi mipein susat, hi neek mein nana, ka na'oin ein fa. Mnaa' miheer-heran hi rais pirsait naan. Natuin hi mihiin mak, atoin apirsait ein neu Kristus sin, tebes of napenin susat on re' naan. 4 Neng goes ii, oras hai mok ki fe', hai mimnaub main ki mmak, tuaf-tuaf re' npirsai neu Usif Yesus, of napein susat huma'-huma'. Oras ia, are' kanan susat naan, njari nrari oo, ai' on mee? 5 Natuin au 'susa 'maet 'ok hi 'tokom ma hi 'hakem, es na' au 'reek nai' Timotius neit neu Tesalonika, he na' hai mipein hanaf nak hi mpirsai piut fe' meu Uisneno, ai' kah. Natuin au neek ii nabait imsa', kais-kaisa' niut reu'f ein sin a'nak ko' goe neem ma nfuir ki he hi maikoit Uisneno. Karu njair on nana te, hai mepu neno naan, ruum am parsuum!
Nai' Timotius nfain neem ma neik hanaf na'ko too srani' abitan Tesalonika
6 Oras ia, nai' Timotius anfain neem een na'ko Tesalonika, ma neik hanaf re' nhariin kai. In nareet am nak, hi mpirsai piut meu Kristus, ma mmaneek piut. Rarit in natoon am nak, hi msa' mimnau kai, on re' hai mimnau ki msa'. 7-8 Aok-bian arki! Maski hai abit ia mnabeen ma'fena' natuin hai mipein susat huma'-huma' ka kre'-re'o fa, mes nai' Timotius in neik rais han-maut batuur-batuur neu kai. Natuin rasi naan, oras ia hai mihiin mak, hi mpirsai Uisneno piut-piut ma mmafuut reko mok Ne.
Nai' Paulus an'onen anteek too srani' abitan Tesalonika
9 Onaim hai misaeb sukur makasi ko'-ko'u neu Uisneno nok neek marine, natuin hi mituin Ne piut. 10 Hai m'onen fai-manas, he reko te, hit ar-arkit bisa tateef attein. Hai he minoni' minokab meu ki Uisneno In Rana 'Honis. 11 Hai mifnekan hai teenb ii meu Uisneno, hit Ama', ma Yesus Kristus, hit Usi', re' anfei ranan, he hai iim miteef mok ki ntein. 12 Hai mtoit he Uisneno nmepu nbi hi nekam he hi rais maneek taan nanaob on piut. On nana msa', mok hi aom-bian sin ok-oke', on re' hai msa' mneek ki. 13 Nok ranan naan, Uisneno nha'tain ki, he mmoin nok neek amne'o ma kninu', tar antea Usif Yesus ankoen On anfain neem nok In ne, hi msa' mhaek mok ambi hit Ama Uisneno In human ma In matan, ma hi ka misaah meik fa sanat mese' msa'.
Rasi' monit re' anhariin Uisneno In nekan
1 On nai, aok-bian arki! Hai mtoit ma mi'paen meu ki, he hi mmoin ma mharineb Uisneno In nekan, on re' hai minoni' ki oras naan. Batuur, hi mmoin mituin sin oek een, mes natuin hit ttaam nonot-asar teu Usif Yesus, es nana te, hai mtoit ki he hi maim ranan ma'tani' ntein. 2 Hi arki mihini mrair saa'-saa' re' hai minoni' ki sin, mpaek Usif Yesus In kuasan. 3 Uisneno In roim Ni on nai: ammoin nok akninu'! Kais am'oe-meet. Es re': kais amha'niis ho hara'-tupa'. 4 Hi ro he m'ator mihiin hi tuam ein kim he mmoin nok akninu', tar antea biak ein anhormaat ki. 5 Kais ammoin mituin hi tenab amre'ut re' anpoi na'ko hi nekam naan, on re' tuaf-tuaf re' ka nahiin fa Uisneno. 6 Kais anmui' tuaf re' he niis anmees kuun ma naim ranan he narukib apirsait ein neu Uisneno. Natuin Uisneno naan, Usif re' of anbaras amreu't ein ok-oke'. Rasin re' ia, hai mitoon sin neu ki fani-fani, ma mimnaub main ki sin na'ko oras unu' naan. 7 Fin Uisneno no'en anrair kit he tjair In na. In sairt ii, hit ro he tmoni te, takninu', ka t'oe-meet, ka on fa tuaf-tuaf re' anmakonin rafu'-rafu'. 8 Nok rasi naan, sekau-sekau re' ka natuin fa noni' ia, in ka npenan kai fa, mes in npenan Uisneno re' anfee nrair In Smana Kniun Ee neu ki. 9 Anbi au teenb ii te, au kais a'tui ufani' neu ki rasi re' anmatoom nok rais manekat anbi hi apirsait, natuin Uisneno neik Non nanoni' ki mnak, hi ro he mmaneek. 10 Hai mneen amrair nak hi mneek hi aom-bian sin abitan propinsi Makedonia naan. Mes, aok-bian ar-arki! Oras ia, hai mtoit ki, he hi mmaneek amtein mok tuaf bian amsa'. 11 Maim ranan he hi 'moin mein mamut ma ao-mina'. Kais amseit-seit nom meu biak ein sin rasin, mes es-es ate m'urus kuum ho rasi. Hi ro he maim mepu-re'ot he mipeni mnahat natuin hi maskeet aa kuum. Kais mifnekan meu biak ein. Rasi ia hai mimnaub ee neu ki na'ko neno naan. 12 Karu hi mmoin on re' nana te, hi ka misaeb fa ma'fena' meu biak ein. Tuaf-tuaf re' ka npirsain fa neu Kristus of niit hi 'moin mein on nana te, sin nak, “Airoo! Batuur-batuur apirsait ein neu Usif Yesus, sin a'moin kein mne'o batuur, oo!”
Rasi re' anmatoom nok Usif Yesus he nkoe Non anfain neem
13 Oras ia, aok-bian arki! Au he utoon ki raas jes, maut he hi mihiin batuur anmatoom nok tuaf amates. Hit arkit tahiin tak, amaets ein of anmonin nfanin. Onaim, karu anmui' tuaf na'ko Usif Yesus In ne nmaten, hi kais misusab hi tuam ein naan, on re' biak ein re' ka nahiin fa nak, amaets ein of anmonin nfanin. 14 Natuin hit tahini trair tak, Nai' Yesus anmaet, mes rari te Uisneno namonib nafain Ee. Onaim, karu on nana te, of Uisneno msa' namonib nafani' are' amates re' anpirsai nrair, ma nabuaba' sin nok Usif Yesus. 15-17 Karu Usif Yesus ankoe Non anfain neem, In nsaun neem na'ko neno-tunan neu pah-pinan, of anmui' hanaf re' naprenat nok ma'tani'. Rarit ameupt ein neno-tunan sin a'naak te naprenat sin he nfuun to'is. Rarit Uisneno In ne re' nmate nrarin, of anmonin nfanin. Rarit sin, nok hit amoin ti, ta'ait ok atsae teu nope, he hit ar-arkit tseun Usif Yesus In amneman naan. Rarit hit ar-arkit atmoin tabu-bua piut tok Ne. Hi mneen rek-reko, natuin saa'-saa' re' au utoon ki sin ia, Uisneno neik Non na'uab sin. 18 Nok ranan naan, hi ro he mpaek noni' re' ia, he mmaha'tanin es nok es.
Mibarab rek-reko he mseun Usif Yesus In amneman
1 Aok-bian arki! Hai kais amtui he mitoon meu ki mmak, Usi' In amneman naan, nateef jam fauk, ai' fuun ni ntaam neno fauk. 2 Natuin hi arki mihini mmak, In amneman naan nok askeken, on re' abakat re' antaam nabaak oras fai. 3 Oras naan, of mansian ein anmarin-rinan, mes nok askeken ate, napenin siraak. In amneman naan, nahuum on re' bifee ma'apu, nok askeken ate, meen mahoint ii ntea. Karu rasi nana nboor ate, hit he ttorak attein ee on mee? On nana msa', Usi' In amneem ni, on re' naan. 4-6 Aok-bian arki! Kais-kaisa' In amneman naan napein ki on re' abaak ti ntaam neu umi nbi oras fai atnanas, nateef hi mtuup amfiin. Hi kais on naan! Hit ka tmoin fa et mes'ook ni nanan, on re' biak ein re' antupan nfinin fe'. Natuin hit es re' atpirsai trair teu Nai' Yesus, atmoni trari tbi me'u, mibarab hi tuam ein naan he mseun Goe, ma mpanat hi tuam ein naan rek-reko. Rasin re' ia, hi mihini mrair sin. 7 Fin karu ttupa te, tuup oras fai. Ma tiun raur mafu te, tiun oras fai. 8 Mes hi kais on naan, natuin hit re' ia, tmoni trair tbi me'u. Hi ro he mpanat hi tuam ein naan. Karu hi mpirsai piut-piut meu Uisneno, ma mmaneek, nana on re' sorarus re' npaek baur besi re' npafa' naan in a'basan. Ma karu hi mifnekan piut-piut meu Usif Yesus re' anpafa' ma npanat ki na'ko Uisneno In to'os, nana on re' sorarus re' na'sobe' 'soeb besi. Sorarus Roma npaek baur besi he npanat in a'basan, ma na'sobe' 'soeb besi 9 Uisneno ka npiir kit fa he hit tapein In hukun. Mes In npiir ma nbeit kit he hit tapeni 'honis, natuin hit tpirsai teu Yesus Kristus, hit Usi'. 10 Fin In nmaet he nsenu' kit. Onaim, karu in nkoe Non anfain neem, hit of atmoin tok Ne nabar-baar, maski hit tmate trair, ai' tmoin fe'. 11 Nok rasi naan, mpaek au uab kein re' ia, he mmafainekan ma mmahan-maun es nok es, on re' hi mmoo' je oras ahunut.
Nai' Paulus anfee noni' neu jema'at Tesalonika
12 Aok-bian arki! Mimnau he mhormaat sin aina'-ama' re' ntaman amepu krei he natuuk ki. Fin sin re' naan, anmepun ma'tani' neu ki, ma namnauba' ki henati' hi kais mistuun, mispae, ma mtikoeb. 13 Amfiit ma mbaab sin nok hi rais manekat, natuin sin nmepun ma'tani' neu ki. Ammoni mbi mamut es nok es. 14 Aok-bian arki! Anmui' rasi bian fe' re' hai he mimnaub ki sin, on nai: tuaf-tuaf re' napehen, sero mpaesa' sin he sin nmepun batuur-batuur. Mee ja in neek ne nabait, mha'tain je. Mee ja n'ore te, ampeis je. Rari te, amneek amnaun meu too mfaun. 15 Mimnau! Kais ambaras moe' amre'ut nok moe' amre'ut. Mibarab hi tuam ein naan he mmoe' rais reko meu too mfaun. Kais ammoe' reko haa meu hit aok-bian sin kuuk, mes tuaf bian amsa'. 16 Mibarab hi neekm ein naan he nmarinan piut-piut. 17 Am'onen fai-manas. 18 Anmui' saa'-saa' ah, et susat ai' marinit, musaeb sukur ma makasi meu Uisneno. Natuin nok ranan nana te, Uisneno anroim neu sekau-sekau re' natuin Yesus Kristus. 19 Kais am'eka' Uisneno In Asmaan Ne In mepun. 20 Karu anmui' apirsait es nak, in napein hanaf na'ko Uisneno, kais musmeur ee! 21 Hi ro he mparikas mirek-reko hanaf naan, he na' hi mak, batuur na'uu na'ko Uisneno, oo, ai' kah? Karu batuur ate, mituin. 22 Mes mi'rooba' hi tuam ein na'kon moe' amreu't ein ok-oke'.
Nai' Paulus natu'ub in surat
23-24 Au 'onen a'toit Uisneno he nakninu' hi neek mein ma hi 'moin mein ok-oke'. In es re' bisa nmoe' kit he hit tmoni tbi mamut es nok es. Nok ranan naan, oras hit Usi' Yesus Kristus ankoe Non anfain neem, na' hi bisa mhake mbi In human ma In matan, meik hi aom, hi nekam, ma hi smanam, re' ka nmui' fa sanat saa'-saa'. Batuur! Natuin Usif Yesus In es re' no'en ma nnapen ki mjair In nonot-asar naan, In ka napoi fa. Saa' re' In na'uab ee te, In nmoo' je ma njair. Rarit In neik ki mnao meu Uisneno In human ma In matan nok akninu'. 25 Aok-bian arki! Kais amnikan kai mbi hi onen. 26 Au 'toit ki he mfee hai haan tabes ma manekat meu Uisneno In too srani sin et bare naan, jo! 27 Au 'toit ki 'eik Usif Yesus In kanan, he mrees au surat re' ia meu jemaa't ein ok-oke'. 28 Au 'toit he hit Usi' Yesus Kristus nakrira' In nekan arekot neu ki arki. On re' naan, tua. Saloom, Au, nai' Paulus kau, tua.
Tabe ma han buseet
1 Tabe ma han buseet na'ko kau, nai' Paulus, ma au partein nai' Silas ma nai' Timotius. Surat re' ia, hai msoun ee neu ki arki too srani abit kota Tesalonika. Hi re' naan, es ampiir he mituin Uisneno, hit Ama', ma mituin Yesus Kristus, hit Usi'. 2 Hai mtoit he Sin nakrira' Sin nekak arekot neu ki, maut he hi mmoni mbi mamut ma ao-mina'.
Nai' Paulus ntoit makasi neu Uisneno
3 Aok-bian arki! Hit ro he ttoit makasi piut-piut teu Uisneno, natuin hi rais pirsait naan ma'tani' piut meu Ne, ma hi rais maneek taan amsa' ma'tani' piut. 4 Es nana te, hai mitoon meu Uisneno In jemaa't ein ambi mee-mee anmatoom nok ki. Hai mitonam mmak, maski biak ein anteer-hae ki ma nha'mui' ki, mes hi maran ma mtahan ambi hi pirsait naan. 5 Rasin re' ia nakriir ok am nak, Uisneno of nafeek hi raas je te, natai. Natuin ha'mu'it re' hi misaah ee oras ia, neik ki mtaam meu Uisneno In nonot-asar. In re' naan, hi Usif. 6 Kais mimtau, natuin Uisneno naan, atai rasi. Mkius! In of anbaras neu tuaf-tuaf re' anha'mui' ki. 7 In imsa' of nait nain ha'mui't ein re' hi misaah sin naan. In imsa' anmoe' on naan neu kai. Rasin re' ia ok-oke' of anjarin oras Usif Yesus ansaun neem, nok In ameup ma'tain ein na'ko neno-tunan. 8 Sin of ansaun neman nbin ai pin ko'u. In nbaras sin arsin re' ka nromin fa he nahiin Uisneno, ma re' ka nromin fa he natuin Usif Yesus In Rais Reko. 9 In nfee hukun maineun-besi re' nabar-baar neu sin ar-arsin, tar antea sin nre'un konon. In nriu' napoitan sin na'ko In human ma In matan, he sin ka nnaben antein fa In kuasan amasat naan. 10 Mes oras In amneman naan, are' apirsait ein nasaeb ma na'rat-ratan In kanan, ma nhormaat Ee. Hi msa' of ambi apirsait ein sin atnaan kein, natuin hi msa' amtoup Rais Reko, re' neng goes ii hai mitoon ki je naan. 11 Es nana te, hai m'onen fai-manas ma mteek ki mbi hai onen, maut he Uisneno nkius ki nak, hi ro he mjair In nonot-asar. Hai msa' mtoit he In nfee In kuasan neu ki, he hi bisa mmoe' are' rais reko mituin saa' re' hi mifeek he mmo'e, ma mituin saa' re' hi mpirsai. 12 Karu hi mmoin nok ranan re' nana te, of biak ein nait na'ratan Usif Yesus In kanan. Ma hi msa' of mipein bo'is ma mnaikas, natuin hi mituin Ee. Rasin re' ia ok-oke' of anjair, natuin hit Ama' Uisneno, ma hit Usi' Yesus Kristus, Sin neek rekon.
Amaufinut na'piis fe', hena' Usif Yesus ankoe Non anfain neem
1 Aok-bian arki! Hai he mitoon ki rasi anmatoom nok hit Usi', Yesus Kristus, In oras re' he nkoe Non anfain neem, ma rasi re' hit ar-arki tabua tok Ne. 2 Kais mana fa te, es neem napoi ki te, hi mroim mituin aah. Hi of amtaka'nana' karu hi mneen biak ein nak, Usi' nkoe Non nfain nema nrair. Maski sin na'uab ein nak, sin napein hanaf na'ko Uisneno In Asmanan, ai' sin nnenan na'ko biak ein, ai' sin napenin surat na'ko kai, kais ampirsai sin. Natuin rasin nana, poi ok-oke'! 3 Kais amkonan biak ein he namonob ki. Fin of anmui' naan tua maufinu es, neem nahuun, rari te na' Usif Yesus nkoe Non anfain neem. Tua maufinu ia, of anraban ma'tani' neu Uisneno, tar antea too mfaun ein natuin ee ma nraban Uisneno msa'. Tuaf re' ia, in maufiun ni ma'tain besi! Es nana te batuur ni, in ro he ntaam neu ai marara' abar-barat. 4 In na'naeb in tuan ee, na'raat anneis na'ko are' kanan pah-tuaf, ma nraban nain are' kanan uis-fuat re' mansian ii na'ruri' ma na'bees neu sin. Ma in imsa' ntaam neu Uisneno In Uim Onen Uuf, rarit in paas in a'baas ne mnak, “Au re ia, Uisneno, kau!” 5 Hi mimnau, ai' kah? Neng goes ii, au utoon ain ki anmatoom nok re' tuaf naan, oras au fe' ubua ok ki. Batuur! 6 Oras ia, tua maufinu naan ka ntea in orsa fa fe' he nakrira in tuan, natuin anmui' tuaf antaah ne. Ma hi msa' mihiin mak, saa' na es re' antaah ne ji. 7 Oras ia, abroet re' he ntao taisiub gui, nmepu mninu'-mninu', natuin anmui' tuaf antaah ne. Mes anmui' oras he tuaf re' ntaah ne naan, of nafetin. 8 Rarit tua abroet naan, npoi neem ma ntao in meup ne maat-maat. Mes nateef nok Usif Yesus In oras amasat re' nkoe Non anfain neem, In na'uab hana' mese' te, tuaf naan nre'u nkoon. 9 Mes oras Usif Yesus ka nkoe Non anfain neem fa fe' te, niut reu'f ein sin a'nak ko' goe, nfee kuasa ma'tani' neu tua maufinu naan, he in bisa nmoe' rais sanmakat huma'-huma', tar antea mansian ii natenab am nak, tuaf naan oni' npaek Uisneno In kuasan. 10 Nok ranan naan, tuaf naan napoi ma nputa-kriu naan kuun too mfaun ein. Sin re' naan, of es re' Uisneno na'bata' sin na'ko In tuan. Maski In nfei ranan he nsoi naan kuun sin, mes sin ntitar ma napasib In sarit naan, ma ka nromin fa he npirsain rais amneot. 11 Etun Uisneno npooh naneuk sin neek ein na'ko rais amneot, maut he sin npirsain neu rais puta-kriu ngguin. 12 Nok ranan naan, Uisneno nfee hukun ma'fena' neu tuaf ein naan, natuin sin ka npirsain fa neu rais amneot. Fin sin nroim nanesib moe' amre'ut.
Apirsait ein ro he naran
13 Aok-bian arki! Hai mtoit makasi piut meu Uisneno, natuin In neek ki. Natuin oras In fe' ka nmoe' fa pah-pinan ia te, In nafeek anrair he nsoi naan ki. Rarit In nfee In Asmanan he nakninu' ki, natuin hi mpirsai rais amneot. 14 Oras hai mitoon Rais Reko meu ki, Uisneno npaek Rais Reko naan he no'en ki, maut he hi mnaben mihiin hit Usif Yesus Kristus In hormaat. 15 Aok-bian arki! Hi ro he mtahan piut, mpooh ma mnaa' miher-heran saa'-saa' re' hai mitoon ki sin. Mimnau msa', saa'-saa' re' hai mtui sin et surat. 16-17 Hai m'onen piut meu Uisneno, hit Ama', ma Yesus Kristus, hit Usi'. Hai mtoit he Sin nha'tain ki, maut he hi bisa mmoe' are' kanan rais reko. Hai mtoit on naan, natuin hai mihiin mak, Uisneno anneek niis kit ok-oke'. Natuin In neek Ne reko, es nana te, In ka nasnaas niit fa fe' na'ko mepu re' he nha'tain kit. Nok ranan naan, hit bisa tafnekan teu Ne piut-piut.
Nai' Paulus ntoit too srani abitan Tesalonika he n'onen anteek sin 31 Aok-bian arki! Kais amnikan kai mbi hi onen totis sin. Am'onen, he reko te, Uisneno In Rais Reko nanaob on rabaah neu kuan-kuan ma pah-pah, tar antea tuaf bian anbi mee-mee anhormaat Rais Reko naan, on re' oras hi mtoup Goe. 2 Am'onen amsa', he reko te, hit tsoi taan ok na'ko ataisiub sein, ma na'ko amaufinu bian amsa', fin mansian pah-pinan ia, bian ka npirsain fa Rais Reko naan. 3 Mes Uisneno nnaa' In hanan. In bisa nha'tain ki, ma njari 'pesit neu ki he nafetin ki na'ko amre'ut. 4 Ma hai neek mein natea, nak Usif Yesus nmoe' ki natuin saa' re' hai mitoon amrair sin neu ki, ma hai mbatuur ne mmak, hi of ammoe' mituin on naan. 5 Hai mifnekan meu Usif Yesus, he In es re' na'naak ma nnaa' ki, he reko te hi mihiin batuur-batuur mak, Uisneno anneek ki. Ma hi mihiin imsa', mak, hi mtahan ambi susat-ha'mu'it, on re' Kristus, unu' te In naran anbi susat ma ma'ne'at.
Mansian ii ro he tmeup, kais tapeeh
6 Aok-bian arki! Au utoon ain ki 'paek Usif Yesus Kristus In kanan. Hi kais amkua'noon mok apehet re' neno-neno te, in nnao ma ntoe neu-mneem rum-ruum aah. Fin sin ka natuin fa hit i'tope' re' hit tmeup ma'tan-tani'. 7 Hi arki mihiin mak, hi ro he mait i'tope' na'ko hai 'monim neno naan, oras hai mitua mok ki. Hi miit kiim. Hai ka mporin miit fa oras njair ruum am parsuum. 8 Hai mmeup ma'tani' fai-manas, he hai kais misusab ki. Hai msa' ka mtoup fa bukae rum-ruum aah. 9 Hai re' ia, Uisneno In ameupt ein. Onaim, hai mmui' hak he mtoit saa'-saa' na'ko ki. Mes hai ka mpaek fa hak naan. Hai re' ia, mjari 'tope' arekot neu ki. 10 Neng goes ii, hai mitoon ki rasi tfeka' es, nak, “Sekau ka nmeup fa te, kais naah.” 11 Hai mipein hanaf nak, anmui' tuaf na'ko ki re' suma nnao ntoe nateef-teef, ma ka nroim fa he nmeup. Sin suma ntaisibun ma nseit-seit nok neu biak ein sin urusan. 12 Tuaf-tuaf on re' naan, hai mimnaub sin mpaek Usif Yesus Kristus In kanan, he sin nasnasab sin moe' tein naan. Reko nneis, sin nmurai nmepun, he namin amnahat npaek kuuk sin nenuk ma maskeet. 13 Aok-bian arki! Hi kais misnasab meup reek gui, joo! 14 Hi mtanar mirek-reko' tuaf-tuaf re' ka nroim natuin fa saa'-saa' re' hai mtui mitoon ki sin ambi surat re' ia. Kais maen mituin sin, maut he sin namaeb ok. 15 Mes, hi kaisa' maan sin on re' hi musun. Mo'en sin ma mikain sin rek-reko, nahuum on re' hi aok-bian sin kuum.
Nai' Paulus natu'ub in surat
16 Uisneno naan, Usif re' neik Rais Mamut ma Ao-mina'. Au 'toit he In nfee ki In rais mamut nana nbi saa'-saa' aah. Au ufnekan am ak, Uisneno nok ki piut-piut. 17 Uab amuint ein re' ia, au 'tui sin eik au 'niim ki kuuk, maut he hi mihiin mak, surat re' ia batuur-batuur na'ko kau. Surat bian sin imsa', au 'tui sin on naan. 18 Au 'toit he hit Usi' Yesus Kristus In neek arekot naan nabua nok ki ar-arki. Surat re' ia, antuu' ma naheu' bon, on naan, tua. Au, nai' Paulus kau, tua
Nai' Paulus ansonu' han tabes
1-2 Timotius, atoin reko! Tabe ma han buseet na'ko kau, nai' Paulus. Uisneno npiir kau 'jair haef 'eu Yesus Kristus. Ma hit tafnekan teu Usif Yesus, re' anfee kit a'honis piut-piut tok Ne, natuin Uisneno nsoi nrair kit na'ko hit saant ein. Tius! Ho on re' au aanh aa kuuk, natuin au ururu' 'rair ranan he ho mpirsai meu Kristus. Au 'onen he Uisneno, hit Ama', ma Yesus Kristus, hit Usi', nakrira' Sin neek rekon naan, ma nfee ko 'monit nbi mamut ma ao-mina'.
Mpaant om mu'ko tuaf ein re' nanoni' nsanan
3 Neng goes ii, hit nua kit tabua tbi kota Efesus. Oras au he 'nao eu propinsi Makedonia, au 'ak ko he mubaar ambi kota Efesus. Oras naan, nmui' tuaf re' ntaka'nanab Usif Yesus In too srani, npaek noni' re' ansaan ma nbeo. Onaim au 'toit ko, he mnao mukaina' sin, he sin kais nakonob sin noin ein naan. 4 On nana msa', tuaf ein re' naan npoir nein oras parsuum ah, karu sin nnaon ma nmakoin ein tenab nbi rais reet poi sin. Ma sin nmasau-fefan nok ahaa mapeo' uuf ma 'naof re' ka netfeek niit fa. Rasin on re' nana, suma neik mansian ii nmatoen am anmabanan. Ma ka npaumakab sin fa nok Uisneno. 5 Au 'faineek ko henati' munoni' apirsait ein neu Usif Yesus anmonin nbin rais manekat nok neek akninu', tenab amneot, ma nbi neek akteeb kninu'. 6 Mes anmui' tungguru bian re' sin ntebi nrarin, ma nait inporin fainekat naan. Rarit sin npoir nein oras, ma nmasau-fefan ma na'uab ein tafi'-tafi'. 7 Sin nakrira' sin tuak ein am nak, sin re' naan tunggurun re' nanoni' ka'o Musa in Atoran sin. Sin natoon ok on re' tunggur ko'un, mes sin ka nahinin fa saa' re' sin nanoni' sin naan. 8 Hit arkit tahiin ka'o Musa in Atoran sin naan, reko. Asar hit tanaoba' sin natai nok Uisneno In sarit amneot. 9 Atoor nein naan, ka ntui sin fa neu atoin amoe' reko. Mes, antui sin neu a'nak fatus, araban aprenat, na'roo na'ko Uisneno, atoin amaufinu, tuaf re' ka nfairoir fa Uisneno, re' anfare' rasi kninu', aroor atoni', ma aroor mahoni'. 10 Atoor nein naan antui sin neu mansian re' nmakonin tafi'-tafi', re' anmakoin atoni' nok atoni' ma bifee nok bifee, re' nheek na'koro tuaf he na'seke tuaf bian henati' napein roit, re' aputa-kriut, apoit, ma neu tuaf-tuaf re' anraban rais noni' amneot. 11 Noni' re' amneot ein, neman na'kon Uisneno In Rais Reko, re' In nanaa't ee neu kau. Ma Uisneno naan, Uis amaas isat. Mansian ii ro he ntuna' na'rat-raat Ne.
Mtoit makasi meu Uisneno, natuin In amanekat
12 Au 'toit makasi ko'-ko'u neu hit Usi', Yesus Kristus, natuin In npirsai kau, ma nfee kau 'be'if ma'tani' he unaob In mepu. 13-14 Te kah, unu' te, au es re' ureuk Usi' Yesus In kanan. Au msa' ususab ma 'ha'mui' tuaf-tuaf re' natuin In rana 'honis. Au 'teer hae sin. Au 'maufiun on re' naan, natuin oras naan, au ka uhiin aan fa saa' re' au moe' je re' naan, ma au ka 'pirsai 'eu hit Usi' Yesus Kristus fa fe'. Mes In ka nnikan kau fa. In nakrira' In maneek Ne neu kau. Saa' anteni', In nakrira' In neek reek Goe neu kau piut. In nfee kau tetus athoen he au 'pirsai Je nok neek a'ki'it, ma 'neek sekau-sekau on re' In nneek kau. 15 Nati' te hit tneen uab am nak, “Yesus Kristus nema nrair anbi pah-pinan, he nsoi mansian asaant ein.” Batuur on naan! Na'ko mansian asaant ein ok-oke', au es re' maufinu' nneis-nesi. 16 Maski au maufiun ki kah een, mes Uisneno nafeek he ka nhukun kau fa. Natuin In he npaek kau 'jari 'tope he ukrira' Yesus Kristus In sabaar Ee neu atoni re' maufiun ii ma'tain besi, on re' au. Nok ranan naan, biak ein re' nmo'en sanat amsa', bisa npirsain neu Ne, henati' sin nmonin piut nok Ne. 17 Pures-bo'is neu Uisneno! Suma In es re' Uisneno; ka tiit attein fa heen! Usif re' naprenat nabar-baar. In nmoin nabar-baar. In ka nmaet fa. In re' naan mansian ii ka niit Ee fa neik sin matak fuak ein. Are' rais hormaat ma pures-bo'is sin arahaa neu Ne! tar antea nabar-baar! Amin. 18 Timotius, au aan reko! Au he utoon ko saa'-saa' re' ho ro he mmoo' je ma ho mmepu. Are' saa'-saa' re' ia, natuin mafefa' Uisneno sin uab kein anmatoom nok ho tuam naan. Karu ho mutuin uab ein naan rek-reko, ho on re' sorarus re' amakeen reek goes, nraban amre'ut. 19 Mnaa' muher-heran ho rais pirsait meu Kristus. Mpanat ho neek akninu' naan piut-piut. Tuaf bian ka nromin fa he natniin hanaf na'ko sin neek aan-'aan ee ntein, re' nmoe' sin neek pirsait ein naan namre'un, on re' bnao oe, nasrae ma na'tutu' niis on anbi faut puut kein. 20 Nai' Himenius ma nai' Aleksander sin, a'moe' kein natai nok rasin naan. Etun au una'at sin neu niut reu'f ein sin a'nakat. Au 'moe' on re' naan, he sin nanoin ein he kais na're'uf antein Uisneno In kanan.
Ibaart ii in atoran
1 Nahunu te, au 'toit ki he hi m'onen amteek too mfaun ein ok-oke'. Karu hi mbaiseun Uisneno te, mtoot Je he In nturun too mfaun ein anbin susat. Ma mtoit makasi, natuin In es re' nmoe' rais reko neu sin ok-oke'. 2 Mteek ambi oen ein amsa' antoom uisf ein ma a'naak tein. Nok ranan naan, hit arkit bisa tmoni tbi mamut ma ao-mina', natuin Uisneno In romin, ma tmoni tbi raan amneot on re' tuaf-tuaf a'besat neu Ne. 3 M'onen on re' nana te, reko. Nana nharinab Uisneno re' nfee kit a'honis. 4 In nroim he too mfaun ein ok-oke' napenin a'honis, ma nahinin mee ja es re' amneot. Natuin: 5 Uisneno mees ah. Ma nmu'i haa nete-ranan mees ah, re' narame' Uisneno nok mansian kit, es re', Yesus Kristus. Yesus naan, mansian batuur-batuur. 6 In nnona' In tuan he nsoi kit na'ko hit saant ein ok-oke'. Nateef nok in ors ate, Uisneno nfei rais reko nana kninu'-kninu' neu too mfaun sin ok-oke'. 7 Rarit Uisneno npiir naan kau 'jair In haef, he 'nao utoon tuaf re' ka atoin Yahudis fa et mee-mee, ma unoni' sin he sin npirsai Usif Yesus ma natuin raan amneot. Saa'-saa' re' au utoon sin ia, batuur on naan. Au ka upoi fa, tua! 8 Au 'roim ki on nai: anbi mee-mee, karu hi mibua he m'onen ate, hi ro he mitaiba' nekaf es nok es. Kais ammakto'on. Kais ammatoe. Karu hi mi'aiti' hi 'nimam oras hi m'onen, hi neek mein ro he nakniun ein. 9-10 Bifee ngguin amsa' on naan. Au 'roim he sin n'ator sin tuak ein te, suuk nahuum, ma npaken amsa' seor nahuum. Kaisa' nbagaya he biak ein antarun mataf neu sin, a'naak-fuun ein re' ansoi' ma nbui' sin huma'-huma', ai' npaken tai ma'osa' re' ka natuin fa atoran, ai' natoon ok bainesi' nok sin npaken moro'-muti' ma mutiara sin. Re' nmoe' bifee ngguin namasan naan, es re' neek akninu', ma sin nmoe' kein rekon. Re' nana es re' natai neu bifee ngguin he na'besan neu Uisneno. 11 Karu too srain ein nabuan ma nneenan noni' te, bifee ngguin ntook nokan ma nneen nokan rek-reko anmatoom nok noin ein naan. Kais ta'se'o ma ta'root. 12 Anbi au te, ka reko fa karu bifee ji nait in tuan ma naprenat atoni', ma nanoni' sin. Reko nneis bifee ngguin kais mafeef ein bainesi'. 13 Fin Uisneno nmoe' nahunun nai' Adam. Rarit, na' bi Hawa. 14 Ma ka nai' Adam fa es antoup uab poi nahuun na'ko niut reu'f ein sin a'nakat, mes bifee. Nmurai oras naan, mansian ii ntanhai Uisneno In atoran. 15 Mes maski on nana msa', bifee ngguin napenin a'honis, natuin sin nahoin ein. Asar sin npirsain batuur-batuur neu Kristus, nmonin nbin rais manekat, nmu'in neek akninu', ma sin a'moin kein kais anbainesin.
Tu'in antoom neu a'naak jema'at
1 Saa' re' biak ein na'uab sin naan batuur, nak, “Tuaf re' he njair a'naak jema'at, naan in npiir naan kuun meup reek goes.” 2 A'naak jemaa't ii, ro he tuaf re' in kaan ne reko. In ro he na'ki'i nbi matsaos nok bifee mese'. In ro he ntahan nahiin in tuan, in neek ne natea, atoni' anhormaat ee, ntoup amnemat nbi in umi, ma nanoni' nabei' tuaf bian. 3 Kais tua amauf raru, ma kais amabanat. Tuaf re' batuur ii, es re', atoin neek ma'nura', naim nahiin rais haran nekaf, ma ka nsinmakan fa roit. 4 In ro he n'ator nahiin in uum je nanan. In aanh ein ro he natniin ee ma nhormaat ee. 5 Fin karu in ka bisa n'ator fa in uum je naan ne te, nok ranan mee in he n'ator Uisneno In jemaa't ein? 6 Kais misaeb maan a'naak jema'at na'ko tuaf re' fe' natuin Usif Yesus; kais-kaisa' in na'naeb on. Kais-kaisa' Uisneno ntee' je, on re' Uisneno ntee' niut reu'f ein sin a'nak ko'u. 7 Karu hi he misaeb tuaf es he njair a'naak jema'at, maim tuaf re' atoni bian re' ka npirsai fa nhormaat ee msa'. Nok ranan naan, in ka namaeb on fa. Ma niut reu'f ein sin a'nak ko' goe, ka bisa nakreo namouf goe fa.
Tuaf re' he nturun a'naak jema'at
8 On nana msa', neu tuaf re' he nturun a'naak jema'at. Sin arsin naan, ro he tuaf re' kaan ne nfoo-mein, tuaf re' ka napoi nahinif, tuaf re' ka niun fa raur mafu, ma kais tuaf re' naah mate'. 9 Sin neek ein ro he kniun ein, ma sin ro he nnaa' naher-heran noni' re' Uisneno nfee je ma nakriir ee neu kit, too apirsait ein. 10 Mparikas sin a'moin kein ma sin meup kein rek-reko. Karu ka mipein fa sin saant ein ate, na' mait sin anjarin tuaf re' he nturun a'naak jemaa't ein. 11 On nana msa' sin fee kein. Bifeen naan sin a'moin kein ro he namneo ma namnonon. Kais bifee aroob-ra'ut re' nareu' biak ein sin kaan foo-menin. Sin ro he ntahan nahiin sin tuak ein, ma tuaf bian anpirsai sin imsa'. 12 Tuaf re' he nturun a'naak jemaa't ein, ro he atoni re' na'kiik naheer anbi matsaos nok bifee mese'. In imsa' ro he n'ator nahiin in uum je naan ee nok reko, ma nanoni' nahiin in aan hein. 13 Tuaf re' nfain atuta'-abha'et neu jema'at rek-reko, ro tebe, biak ein of anhormaat sin. Ma sin nabrain ma ka namtaun fa he na'uab ein anmatoom nok sin rais pirsait neu Yesus Kristus.
Hit rais pirsait ii in a'sukin
14-15 Tius! Au ufnekan he kre' goes anteni' te, au 'eiti 'makius ko. Karu au u'bake' kre'o te, surat re' ia of antea nahuun. Au 'tui surat ia, he utoon ko m'ak, Uisneno In aasr ein ro he nmonin on re' mee. Kais amnikan mak, Uisneno naan, Uis Amonit. Iin ne nahuum on re' umi re' nahaek ee nbi 'sukif ma nii-ainaf re' ma'tani'. Nok ranan naan, sin ro he natnaat Uisneno In noni' amneot. 16 Uisneno nfei nrair rais ma'nifa' ko'u na'ko hit rais pirsait. In a'suik ni, on nai: Kristus nema nraar jen anbi pah-pinan ia, npaek humaf ma masaf mansian on re' hit. Uisneno In Asmaan Ne msa' nakrira' bukti, nak, Yesus naan, Tuaf neek amne'o. Ma Uisneno In ameupt ein neno-tunan amsa' niit Ee. Uisneno nait nasaeb Ee ntaam on neno-tunan, rarit ntuna' na'raat Ne. In reet Ne msa' nasiin on ma nabeon on nfuun am nateef uuf-uuf anbi pah-pinan. Atoni' nbin mee-mee msa' npirsain nraar Je goen. Hit tpirsai on naan!
Mpaant om mi'ko tuaf-tuaf re' nanoni' fuareur goah neu too srani'
1 Mes Uisneno In Asmaan Ne natoon mat-maat am nak, too apirsait bian of antitar saa' re' hit tpirsai. Rarit sin natuin smanaf bian re' nasekeb mansian, ma natuin niut reu'f ein sin noin kein. 2 Tuaf re' neem ma nanoni' on naan, na'uaba te, nasuir nok mo'et. Puta-kriu gui in tuan! Tuaf ein naan sin nekak naang kein, nameis'ook anrarin. 3 Sin nanoni' bifee-atoni' he kais anmatsaon. Sin nanunin amnahat huma'-huma'. Te kah, Uisneno es anmoe' mnaaht ein naan. In nmoe' mnaaht ein naan, he karu too apirsait ein nbukaen, sin ntotin makasi neu Ne. Fin sin nahinin neu rais saa' es amneot. 4 Are' saa'-saa' re' Uisneno nmoe' sin nana, ro reko. Onaim, kais minuin huma'-huma'. Mansian ein ro he ntoup sin ma antotin makasi neu Uisneno. 5 Natuin hit tahiin tak Uisneno In Kabin ma Prenat, ma hit onen naan nakninu' nain mnaaht ein naan.
Usif Yesus In ameup rekon
6 Tius! Mumnauba' rasin re' ia meu hit aok-bian apirsait ein. Karu ho mmoe' on naan, ho mjair Yesus Kristus In ameup reek goes. Uisneno In Kabin ma Prenat sin anmoe' ko ma ho mpirsaa Je, ma nanoni' ko he muhiin noni' mee es re' amneot. Ho mnaa' muheer amrair Uisneno In Kabin ma Prenat sin. Nana on re' mnahat re' nha'tain ho aom naan. 7 Kais muneuk oras he mpeo uab poi, re' ka natuik ma natai fa nok Uisneno. Kais amtoe mutuin reta' na'ko a'naef am fee-mnasi' re' nanunin huma'-huma'. Reko nneis munoni' ho tuam naan he mmoin mutuin Uisneno In roim Ne. 8 Mu'taka' ho aom aan he na'bei', naan reko. Mes in areok ni, kre' goah. Mes munoni' ho tuam aan anbi are' kanan rasi, he mmoin mutuin Uisneno In romin, nana, in reok ni kah een. Fin in areok ni ka arahaa fa neu oras tmoni tbi pah-pinan, mes nbi monit neno amnemat amsa'. 9 Uab ein re' ia, ro batuur! Onaim, mumnau murek-reko', ma kais amnikan sin. 10 Hit tafnekan teu Uisneno 'Honis. In es ansoi mansian ok-oke', anneis-neis neu hit apirsait. Etun hit tmeup taheer ma taim ranan ma'tani. 11 Munoni' rasin ia ok-oke', ma mreun tuaf-tuaf he nmoe' natuin noin ein naan. 12 Kaisa' mkonan biak ein he nkana' paar ko, natuin ho munif ko fe'. Ho ro he mjari 'tope' meu too apirsait ein, oras ho mu'uab, ho 'mo'em, ho manekat neu tuaf, ho neek pirsait meu Yesus Kristus, ma ho 'monim akninu'. 13 Oras hi mpao kau he au 'uum ate, kais amnikan he mrees Uisneno In Kabin ma Prenat neu too apirsait ein. Mha'tain sin, ma munoni' sin rek-reko. 14 Mpaek ho manoem re' Uisneno nana'at ko goe jan, re' ho mtoup goe oras a'naak too srani' n'onen ma ntao 'niman neu ko. Oras naan, sin imsa' natoon Uisneno In romin anmatoom nok ho 'monim ma ho mepu. Onaim, kais musaitan manoef re' ho mtoup goe naan. 15 Ammakoe he munaoba' rasin re' naan! Maut he biak ein nitan nak, ho 'monim ma ho mepu nanaob ok piut. 16 On re': mpanat ho tuam naan, he ho mmoin nok neek amne'o. Ma mpanat amsa' he ho munoni' rais amneot. Karu ho muheer ambi rasin naan, Uisneno of anfei ranan neu ko, ma neu too mfaun re' nneen ma natniin ko, he hi mitsoi mi'ko rais amreu't ein.
Nai' Timotius in taos ma mo'et neu too srani'
1 Kais mukain tuaf ein re' namnasin nneis ko, mpaek haan ma'tani'. Mes ampaek uab ma'nura', on re' ho mu'uab meu ho aam honi'. Ma neu muinf ein, mu'haba' sin, on re' ho aom-bian sin. 2 On nana msa', neu bifee mnais ein. Mu'uab meu sin on re' meu ho ain honi'. Karu mu'uab meu bifee muinf ein ate, mpanat sin on re' sin ho feto'. Ho neek maan ro he namneo ma nakninu'.
Rasi re' anmatoom nok bifee baun ein
3-5 Too srani' ro he nturun ma nbaab baun bifee ngguin, re' sin ka nmu'in fa nonot-asar re' he npairoir sin. Mes karu banu' re' anmui' anah-upuf fe' ete, sin re' naan ro he es anpairoir je. Munoni' sin, he sin nbaras nahinin neu banu' naan in maskeet ein. Nok ranan naan, sin ntuthae Uisneno, ma nhariin In nekan. Mes neu banu' re' nmoni nmes-mees, in ka nmui' fa tuaf antein he npairoir je. In arahaa nafneek neu Uisneno. Fai-manas in n'onen ma ntoit turun-babat na'ko Uisneno. Too srain ein ro he npairoir baun ein on re' naan. 6 Mes neu banu' re' naminab sin tuak ein neikin rais marinit pah-pinan, maski in nmoin fe'e msa', in ka maso'ik fa heen, on re' atupas sin. 7 Mumnaub are' rasin naan neu too srain ein, maut he biak ein ka na'uab na're'uf fa sin kaang kein. 8 Mes karu nmui' tuaf re' ka nroim fa he npairoir kuuk sin nonot-asar, anneis-neis in uum je nanan, nana on re' in nait inporin in rais pirsait neu Uisneno. In maufiun ii nneis na'ko atoni' re' ka nahiin fa Uisneno. 9 Karu mpiir banu' he nturun a'naak jemaa't ein ate, in tui' ni, on nai: in toon anmoin naan ii, kais ankuran na'ko toon bo' nee; unu' te, in na'kii' nbi matsaos nok atoni' mese'; 10 tuaf nahiin je mnak, in nati' te nmoe' reko neu tuaf bian; in npairoir in aanh ein nok rek-reko; re' ntuthae tuaf bian nok neek marine; re' anturun ma nbaab too apirsait ein nok meup ba-baun; re' anroim he nturun ma nbaab tuaf anbi susat; ma re' nabarab in tuan ne piut-piut he nturun ma nbaab anbi rais reko. 11 Kais mpiir banu' re' munif fe' he nturun a'naak jemaa't ein. Kais-kaisa' sin neek romit he nmatsaon ntenin naan, nsiu' napoitan sin rasi mnaut neu Kristus. Nok ranan naan, sin of ka napenin fa mainuan anteni' he ntuthae too srain ein nok rek-reko. 12 Natuin, karu sin oras mainuan neu jemaa't ii anrabu' te, naan namnees nok sin nareu' sin rais manba'an nbi Uisneno In human ma In matan. Of atoni' nasaan sin. 13 Kais-kaisa' sin napehen, rarit antaisibun ma npoi-ntaman neu biak ein sin uim nein, ma nareet ein rais ruum-ruum, ma na'uab na're'uf biak ein sin kaang kein. Ma rais reu'f es anteni', es re' sin nroim naneis-nesib he nhee-hee gok neu es in rasi, ma na'uab ein rasi-rasi re' ka ma'osa' fa. 14 Reko nneis, baun ein re' munif fe', sin nsaon ntein ein, he reko te, sin nahoin ein, ma n'urus kuuk sin uum je nanan. Nok ranan naan, tuaf re' anmusun kit, ka napein fa ranan he nareu' ma nkana' paar kit. 15 Anmui' baun munif bian re' anseken nrarin. Sin natuin anrair niut reu'f ein sin a'nak ko' goe in ranan. 16 Karu nmui' bifee re' npirsai neu Usif Yesus, re' nmui' nonot-asar banu' te, bifee naan ro he nturun ma nbaab bifee banu' naan. Kais amkonan jemaa't ein he sin es ansutai je. Nok ranan naan, too srain ein bisa nturun ma nbaab banu' bian, re' batuur ni sin ka nmu'i ntein ein fa tuaf bian he nsutai sin.
Rasi re' anmatoom nok a'naak jema'at sin
17 Tuaf re' na'naak jema'at nok reko, hi ro he mhormaat ee batuur-batuur, ma mbaen in kai je rek-reko. Anneis-neis neu tuaf re' anmeup ma'tani he naknutu' Uisneno In Kabin ma Prenat, ma nanoni' ki rana 'honis arekot amneot. 18 Fin, matu'i et Uisneno In Suur Akninu', nak, “Karu mpaek bijae he nteir namouf maak ee in fuan na'ko in asrakon, kais amfuut mu'temeb in fefan, maut he in naah.” Ma matu'i nteni' msa' am nak, “Sekau nmepu te, ro he napein kai.” Bijae anteir maak-gandum 19 Karu nmui' tuaf re' nakuu a'naak jema'at ate, kais amtoup goe on aha re' naan! Ro he nmui' tuaf nua'-teun re' ansaksii ma na'uab huma' mese', on nana te, hi bisa m'uurs ee. 20 Karu mukain amraar je nmes-mees, mes in nmoin fe' anbi sanat naan ate, na' mukain ee nbi jema'at sin humak-matak. Nok ranan naan, tuaf bian of ka nabrain fa he nmoe' natuin in sanat. 21 Munaob are' tui' nein re' ia nbi jema'at sin ok-oke', ma kais ampiir humaf. Au una'at mepu ia neu ho 'nimam nbi Uisneno ma Yesus Kristus sin humak-matak. Ameput neno-tunan re' Uisneno npiri nrair sin imsa', anjarin saksii. 22 Kais ammanaap he mpiir tuaf he njair a'nakat. Mtai ma mtae murek-reok ee nahuun. Natuin karu hi mpiir maan tuaf es nok akraf-rafu', rarit tuaf naan anmo'e nsaan, hi msa' misaah sanat naan, natuin in a'mo'en. Mpanat ho mo'et ma taos he nakninu' piut. 23 Au 'nena te, ho tai maan fe' nameen-meen fe'. Reko nneis, nmurai oras ia ho mseor tua-min-kase kre'o, maut he njair re'u. Kais minu haa oe ruum-ruum. 24 Mkius rek-reko! Anmui' tuaf re' in saant ein nakriir ok. Sin ka ntea nanan fa afeek rais nein sin maat kein te, too mfaun ein nahini nrarin. Mes anmui' tuaf bian amsa', re' a'roo-roo te, na' sin saant ein nakriir ok. 25 On nana msa' huma' mese' neu tuaf-tuaf re' anmo'en reko. Bian nakriir ok nain. Ma bian anteni' nmo'en reko mes ma'nifa'. Mes maski on naan, saa'-saa' re' sin nmoe' sin naan, 'roo-roo te, nakriir ok amsa'. Ka bisa fa he ta'koro' rais reko.
Rasi anmatoom nok usif ma ate
1 Anmui' usif re' sin ate sin anpirsain neu Usif Yesus. Sin ro he nhormaat sin usif, maut he biak ein kais napenin ranan he na'uab namouf Uisneno In kanan, ma nkana' paar hit noni'. 2 aAnmui' ate re' sin uisf ee npirsai neu Usif Yesus. Aten naan sin kais ankana' paar sin usif naan natuin in npirsai neu Usif Yesus. On mee-on mee msa', sin ro he ntuthae reko nnesi ntein neu sin usif naan, natuin sin ar-aar sin pirsait mese', ma sin ro he nmanekan es nok es. Noni' re' ansaan, ma upan arekot 2 bTius! Munoni' rasin re' ia ok-oke', ma mu'haba' too srain ein, he sin nmoe' natuin sin ok-oke'. 3 Hit noni' ma taru' re' amneot naan, nfani 'sukif na'ko rana 'honis re' nhariin Uisneno In nekan. Mes tuaf re' nanoni' 'teta' na'ko noni' ia, sin re' naan ntitar napasib Usif Yesus Kristus In noni' re' amneot. 4 Tuaf on re' naan, na'naeb in tuan, mes in ka marone' fa! Sin meen si, es re' nromin he namin rais matoes nok ahaa rais rum-ruum. Rasin ia, anneek-menab tuaf bian, anmatoeba' tuaf, nareu' atoni' bian sin kaang kein, ma anmaktiun ein rum-ruum aah. 5 Tuaf human on re' naan, anmoe' rais taisibu piut-piut. Sin teenb ein namre'un. Sin ka nahini ntein ein fa, mee es re' amneot ma amnonot. Sin natenab nak karu sin nmakoen nbin rais pirsait, sin bisa njarin atoin amu'it. 6 Batuur, rais pirsait ii bisa nmoe' mansian ii napeni mnisat ko'u. Fin monit re' anharinib Uisneno In nekan, masero' nok rais tenab manokab anmatoom nok saa' re' sin nmu'i, nana ro rais pirsait batuur aa! 7 Mimnau rek-reko! Oras nahoni' kit, hit ka teik fa saa' es amsa' ttaam teu pah-pinan ia. Ma oras hit tmate msa', hit ka teik fa saa'-saa' npoi na'ko pah-pinan. 8 Onaim, asar mnahat, mninut, ma pake-nohas nanokab ate, ta'tena' hit teenb ii nai! 9 Mes tuaf re' anroim he njair atoin amu'it, mana fa te, in of napein rais furi' huma'-huma', ma nmofu nbi kreot a'rii'-ne'u, natuin sin nateeb ahaa a'mu'if. Are' kanan rasin naan of neik siraak ma nareu' sin a'monik. 10 Atneek tanesib roit ii te, nana njair uuf neu rais maufinu huma'-huma'. Anmui' tuaf bian re' sin naim nahaa roit, tar antea sin ntanhai sin rais pirsait amneot. Nok ranan naan, sin neikn ok, nareu' sin a'monik.
Amnaa' muheer-heran noni' re' ho mtopu mrari
11 Timotius! Ho mfain Uisneno iin ja ko. Onaim, amteet-koit mu'roo-roo mu'ko rais amreu't ein ok-oke'. Mmoin nok neek akninu'. Mmoni mbi rais harinat Uisneno In nekan anbi are' kanan rasi. Ampirsai piut meu Yesus Kristus. Amneek sekau-sekau goah. Ho ro he mtahan ambi susat. Ammoin mok sekau-sekau goah amsa', ro he nok neek ma'nura'. 12 Ammeup batuur-batuur, he munaob are' noin ein re' hit pirsai sin. Uisneno no'en nataam ko meu rasi 'honis abar-barat. Onaim amnaa' ma mhoo muher-heran rasi 'honis naan, kais mufetin. Ma ho msa' mutoon amrair ho rais pirsait meu Usif Yesus anbi too mfaun ein sin humak ma sin matak. 13-14 Onaim oras ia, au 'toit ko he muhake' rais manba'an on nai: mmoe' mutuin Usif Yesus In apreent ein ok-oke'. Kais amtanhai prenat mese' msa', maut he biak ein kais nitan ma napenin sanat na'ko ko. Mmoe' mutuin sin ok-oke' nok batuur-batuur, tar antea hit Usi', Yesus Kristus, nkoen On anfain neem. Au 'toit ko he muhake' rais manba'an on naan nbi Uisneno In human ma In matan. In es anfee snasaf neu are' kanan amonit. Au 'toit ko he ho muhake' rais manba'an on re' naan nbi Yesus Kristus In human ma In matan. In es neik Non natoon nanon-noon nmatoom nok In Tuan Ee, nbi gubernur Pontius Pilatus in human ma in matan. 15 Usif Yesus re' ma'tain isat naan, In es re' annaa' kuasat! In re' naan, Uis Ko'u nneis na'ko are' usif-usif. Ma In re' naan, A'nak Ko'u nneis na'ko are' kanan a'nakat. Antea in ors ate, Uisneno of nakrira' are' kanan rasin ia. 16 Suma In kuun, es re' of anmoin nabaar-baar. In nmoni nbi me'u re' mansian ii ka nabei' fa he n'ere. Ka tiit taan fa tuaf es re' nabei' he nkiis Goe. Are' kanan rais hormaat nasaeb ok neu Ne! Are' kanan kuasa et In a'niman tar antea nabar-baar! Es re' naan, tua! Amin!
Rasi re' anmatoom nok atoin amu'it ein
17 Mutonan atoin amui't ein pah-pinan ia, he sin kais nabe'on, ma kais na'panen sin a'moin kein neu 'mu'if pah-pinan. Fin a'mui'f ein naan of oek ein. Reko nneis sin na'paen ok anbin Uisneno 'Honis. Natuin In es re' nathoeb kit, saa'-saa' re' hit tperluu sin, henati' hit bisa tnaben tiit moint ii in mainonin. 18 Mutonan sin he sin npaek sin a'mui' kein he nmo'en rais reko. Sin ro he nmakoen nbin nmoe' reko. Sin ro he nnona' sin a'niim kein he nfiit ma nbaab tuaf, ma nroim he nfee athoen na'ko Uisneno neu sin. 19 Nok ranan naan, sin nkikin ma nakbua' a'mu'if he nfani 'sukif ma'tani' neu sin a'moin kein noka'-nmeu. Nok ranan nana msa', sin nafena' rasi 'monit re' ma'upa'.
Nai' Paulus natu'ub in surat
20 Tius! Ampanat murek-reko' are' kanan rasi re' Uisneno nana'at ko sin. Kais amseit-seit nom meu rais poi ruum-ruum. Kais amtuut mok ambi uab reu'f ein, re' ka neik fa rais hormaat neu Uisneno. Mumnau, goo! Anmui' tuaf anpaas in a'basan nak, in atoin ahinit. Te kah, sin ‘hinit’ naan, ka nmui' fa 'sukif. Kais amnao he mmatuut-feef mok sin. 21 Anmui' tuaf bian re' npirsai rais puta-kriu ngguin, tar antea sin ntebin na'kon sin rais pirsait re' amneot neu Uisneno. Au 'toit he Uisneno nakrira' In neek arekot neu ki ok-oke'. Saloom, Au, nai' Paulus, kau, tua.
Tabe ma han buseet
1-2 Timotius, atoin reko! Surat re' ia na'ko kau, nai' Paulus, re' Uisneno neik Non anruur kau he 'jair haef 'eu Yesus Kristus. Sin nreek kau he 'nao utoon rasi nmatoom nok monit re' batuur, re' Uisneno nba'an he nfee je neu are' apirsait neu Yesus Kristus. Timotius! Ho on re' au aan ha kuuk. Onaim au 'onen he Ama' Uisneno, ma hit Usi' Yesus Kristus, anneek ko, nakrira' Sin neek reek Goe neu ko, ma nfee ko monit ambi mamut ma ao-mina'.
Nai' Paulus ntoit makasi neu Uisneno
3 Au 'onen fai-manas ma 'teek ko. Au 'toit makasi piut-piut 'eu Uisneno, natuin ho mutuin Ee piut. Au 'tuthae Je nok neek akninu', on re' hit be'i-na'i sin ntuthae Je. 4 Au umnau, oras hit tbaits ok neno naan, ho mkae mpin-pinus. Etun au 'roim he uteef a'tein 'ok ko, maut he au 'mariin. 5 Au umnau, afi unu', oras ho mmurai mpirsai batuur-batuur meu Usif Yesus. Pirsait human on re' nana, na'uu ma na'baa' nain na'ko ho be'i bi Luisa, ma ho aina' bi Yunika in nekan. Ma au msa' a'tebes ak pirsait human on re' naan anmoni msa' et ho nekam.
Nai' Paulus antoit he nai' Timotius anpaek manoef ma mahinif re' Uisneno nfee ne sin
6 Neno naan, oras au 'ait au niimk ein ma 'tao sin 'eu ko, ma 'onen a'teek ko, oras naan Uisneno ntao ko 'be'if ma ma'tanif he ho bisa mmeup meu Ne. Onaim oras ia, au 'toit ko he munaoba' mufani' ho manoef ma mahinif naan. 7 Fin, Smanaf Uisneno ka nmoe' kit fa he tjair amtaus. Mes In nmoe' kit atjair tuaf-tuaf re' na'bei' ma npirsai in tuan, re' anmaneek nahiin, ma nafreu nahiin in tuan ee rek-reko. 8 Onaim kais mumaeb om he mu'uab anmatoom hit Usi'. Ma kais mumaeb om natuin anhukun kau et bui. Au 'taam bui re' ia, natuin au 'tuthae hit Usi'. Onaim, karu ho mutoon Rais Reko nana te, ho ro he mubarab ho tuam aan he musaah susat-ma'ne'at on re' hai. Karu ho mupein susat-ma'ne'at on re' naan, Uisneno of anha'tain ko. 9-10 Natuin Uisneno es ansoi naan kit na'ko hit saant ein. Ma In es anpiir naan kit he tjair In tuaf ein re' atmoin nok akninu'. In nakrira' In nekan reek Goe neu kit, natuin In nneek kit. Te kah, hit ka tmoe' tiit fa saa'-saa' es, henati' hit maso'ik he ttoup In arekon. Uisneno ka nmoe' pah-pinan ia fa fe'e mes, In nafeek anrair he nreek Yesus Kristus neem, he nakrira' In nekan arekot, ma nsoi nafetin kit. Rarit Yesus Kristus neem anrair, ma nfei nrair sarit naan, Ma In naseer rasi 'maten in kuasan! Ia njair Rais Reko! Onaim, sekau-sekau re' anpirsai neu Yesus Kristus, ka nmate ntein fa heen, mes anmoin piut nok Uisneno. 11 Etun Uisneno nait kau 'jair haef 'eu Yesus Kristus, he au utoon In Rais Reko, ma unoni' sekau-sekau nbi mee-mee. 12 Rasin re' naan ok-oke' nmoe' kau m'es na' au 'upein 'ha'mu'it et bui ia in nanan. Mes au ka umaeb ok fa! Natuin au uhiin sekau es re' au 'pirsai. In es re' Usif Yesus. Ma au uhiin namneo-namneo 'ak In es nana'at kau mepu ia, In es anpafa' ma npanat mepu ia, ma In es anha'tain kau he au bisa unaob mepu ia, tar antea In nkoe Non anfain neem. 13 Onaim, mutuin nai 'tope' nbi monit na'ko noni' amneot, re' au ukrira' sin neu ko. Karu ho mpirsai piut-piut, ma amneek sekau-sekau, ho mutoon mak ho mmafuut mok Yesus Kristus. 14 Uisneno nana'at anrair a'mu'if ma'osa' huum es et ho 'niman, es re' noni' arekot amneot. Onaim, ampanat murek-reko' a'mu'if re' naan! Ampaek Uisneno In Smana Kninu' re' et hit nekak, maut he In nturun ma nbaab ko, he mpanat a'mu'if naan rek-reko.
Nai' Onisiforus anturun nai' Paulus anbi bui
15 Ho of amneen amrair nak nai' Figelus ma nai' Hermogenes, sin atoin sona' na'ko propinsi Asia sin nasaitan kau goen. 16-18 Mes nai' Onisiforus ka on fa naan. In ka nasaitan kau fa. Ho muhiin kuum, oras au a'bi kota Efesus fe', in nturun ma nbaab kau piut. Oras ia, in natua goen et kota Roma ia. Oras in neem antea, in naim kau neu-mneem anbi mee-mee. Namuni te, in nateef nok kau nbi bui. Mes in ka namaeb on fa. Nati' te in neem anbi bui ia, ma anha'tain au nekak. Onaim au 'onen ma 'baiseun 'eu Uisneno he nakrira' In nekan arekot neu nai' Onisiforus nok nain in nonot-asar sin. Anbi neon amsoupt ii te, karu Uisneno nafeek mansian ein sin rasin, au ufnekan he karu reko te, Uisneno nafeek neu nai' Onisiforus sin nok rek-reko.
Hit re' atuina' Kristus, ro he tmoin on re' soraurs ein re' natniin sin a'nakat
1 Timotius, au aan neka'! Yesus Kristus naan, Atoin neek reko. Oras ia, ho mmafuut mok Ne, ma In nabarab he nha'tain ho nekam. Onaim ho ro he mtoup goah! 2 Unu' te, au unoni' ko 'bi too mfaun ein sin humak ma sin matak, anmatoom nok Uisneno In raan amneot. Onaim oras ia, au 'toit ko, he are' saa'-saa' re' ho mnena mrair sin na'ko kau, ho meik sin ma mnao munoni' mtein sin neu tuaf-tuaf re' mapirsa'i. Tuaf ein re' naan, ro he nmanoen he nanoni' ntein tuaf bian. 3 Hit ar-arkit re' ia, tahuum on re' Yesus Kristus In soraurs ein. Onaim hit ar-arkit tsutai ha'mu'it on re' In. Natuin ho re' naan, soraur reek goes, ho ro he msutai ho sapaam. 4 Sorarus re' nanaob in mepu, ka nhee-hee gon fa neu urusan bian anteni'. Nok ranan naan, in bisa nhariin in a'nakat. 5 Taiti 'tope' teta' na'ko mari'ut. Karu he tmariu' tok, ro he tatuin mari'ut naan in atoran. Mes karu ka tatuin fa te, of napoitan kit, ma ka tapein fa mnisat. On nana msa', karu he tanaob Uisneno In mepu, ro he tatuin In atoran. 6 Amkius atoin tani msa'. In nmeup ma'tani' anbi in rene. Onaim, in es re' nnaben nahunun reen je in afan. 7 Mutenab murek-reko' a'toep ein fe'ena. Uisneno of namnaub ma natoon sin a'mouf kein neu ko. 8 Mutenab murek-reko' Yesus Kristus. In re' naan, usif nai' Daut in sufan-ka'un. In nmaet, mes Uisneno namonib nafani' nrair Je. Nana njair Rais Reko, re' au 'eik je ma utoon ee nbi mee-mee. 9 Natuin au utoon Rais Reko naan, es na' au 'upein ma'ne'at ia. Saa' antein sin nfuut kau npaek korenit, nahuum on re' au re' ia atoin maufinu. Mes sin ka na'be'in fa he nfutu' ma nkorenit Uisneno In Rais Reko. 10 Onaim, au ubarab au tuak ii he usaah kuuk ma'ne'at huma'-huma'. Asar Uisneno In tuaf ein re' In npiir naan sin naan, napenin rasi 'honis. Fin Uisneno of nait na'ratan sin piut, natuin sin ntaman Yesus Kristus In nonot-asar. 11 Uab ein re' ia, ro batuur: “Karu hit ttoup, nak, Kristus anmate nsenu' kit, nana on re' hit maet tasaitan monit amnaa', rarit, hit imsa' of atmoin tabua tok Ne. 12 Karu hit taran atbi ma'ne'at, hit imsa' of atnaa' aprenat tok Ne. Mes karu hit tasuan Ne, In imsa' of nasuan kit. 13 Maski hit ka ta'kii' fa, mes In na'kii' piut, natuin In ka bisa napoi fa. In na'uab saa' ate, In nmoe' natuin ee.”
Ameput re' Uisneno nbo'is
14 Mumnaub apirsait ein, he sin kais annikan rasin re' ia ok-oke'. Amreek sin ampaek Uisneno In kanan, he sin nasnasab uab ein re' anmatoena' rasi nmatoom uab tuuk es in a'moufun. Rasin nana ka ma'afa' fa. Suma nare'u haa aneent ein sin teenb ein. 15 Maim ranan rek-reko he mmoe' ho tuam aan on re' ameput re' maso'ik anbi Uisneno. Tuaf on re' naan, kais namaeb on, natuin in nanaob in meup goe nok rek-reko. Ho ro he mjair tuaf re' munoni' namneo goah antoom Uisneno In Kabin ma Prenat. Fin In Kabin ma Prenat naan, ro namneo! 16 Mu'rooba' ho tuam aan mu'ko uab ein re' ka ma u'u fa, ma mu'ko uab ein re' ka neik fa hormaat neu Uisneno. Natuin rasin nana nmoe' mansian ii nmaufiun piut-piut. 17 Sin uab maufiun ein naan annoman nahuum on re' menas es, re' anteek ee te, nak, kanker. Nai' Himenius ma nai' Filetus sin uab kein on re' naan! 18 Sin noin kein ansanan. Sin nak, atoin amaets ein, anfenan nfain neen. Mes nana nsaan! Nok ranan naan, sin nbeon nrarin na'kon noni' amneot. Saa'-saa' re' sin nanoni' sin naan, nareu' tuaf bian sin neek pirsait. 19 Mes a'sukif re' Uisneno nateke nraar je naan, namkeis. Anbi 'sukif naan, matu'i mnak, “Uisneno nahiin narek-reko In nonot-asar sin”, ma “Sekau-sekau re' na'ruri' ma na'bees neu Uisneno, ro he na'roba' in tuan ee na'ko maufinu.” A'sukif naan, es re' Uisneno In na. 20-21 Tait ii 'tope' anbi atoin amui't ein sin uim ne. Anbi naan, anmui' bare' huma'-huma'. Bian anmoe' sin na'kon noni mnatu ma bian na'kon noin muti'. Mes bian na'kon hau ma afu 'kere. Baer ein re' mamasa', uim tuaf ee, npaek sin nbin fesat ko'u. Mes baer ein re' ka mamasa' fa, uim tuaf ee, namaeb on karu in npaek sin inbin too mfaun ein sin maatk ein. On nana msa' mansian ii. Karu nmui' tuaf na'rooba' in tuan ii na'ko maufinu, in on re' baer mamaas ein. Uim tuaf ee anmariin he npaak je, natuin in mapake' he nmeup reko huma'-huma'. 22 Muinf ein bisa nmoufun rabah natuin sin neek roimt ein. Mes ho ro he mpanat ho tuam aan rek-reko, kais mutuin ho neek roimt aan. Maim meu moe' reko piut-piut. Ampirsai piut meu Uisneno. Ammoni mbi manekat ma mamut mok tuaf bian. Are' apirsait ein neu Uisneno, re' anmonin nok neek akninu' naan, sin nromin he nmo'en rais reko piut-piut. Onaim, Timotius, ho ro he moes aan sin! 23 Au utoon ufani' ko sin! Kais amseit nom he mnao mmatoena' rasi-rasi re' ka ma'u'u fa. Natuin rasin naan suma neik ki meu matoes ma mabanat. 24 Ameput neu Uisneno, ka nabei' fa he njair amatoes. Mes sin ro he nneek ma'nuran nok too mfaun, nanoni' nahinin, ma fin anneka mnaun neu amatoes ein. 25 Sin ro he natuuk reko neu tuaf-tuaf re' biasa nraban. Nok ranan naan, karu reko te, Uisneno na'bani' sin neek ein ma na'pisan, rarit sin ntoup saa'-saa' re' arekot amneot. 26 Nok ranan naan, sin bisa na'te'un sin neek kein antein, rarit sin nasoitn ok na'ko niut reu'f ein sin a'nak ko' goe, re' anfuut sin he natuin in roim ne.
Anbi oras neon amsoput, mansian ii in a'moin ii on re' mee?
1 Timotius! Oras antea pah-pinan ia in neno-neno amsoput te, in suus tein amfaun ii kaheen. Au utoon ain ko on naan. 2 Mansian ii, of namnau nanesib sin tuak ein, ma nsinmaak naha roit. Sin nabe'ob sin tuak ein, ma nkana' paar biak ein, na'uab na're'uf tuaf bian, ka nroim fa he natniin amahoin tein, ka ntoit nahiin fa makasi, ka atoup noni' fa, ka nroim nain fa rais Uisneno, 3 ka nmaneek nahinin fa, ka nromin fa he naraem ok nok es, sin nromin he na'munu', ka ntahan nabei' fa sin tuak, maufinu baineisi', ka nromin fa rais reko, 4 anromin he na'sosa' sin aok-biak ein, natenab paar aah, nmoo' jok on ahinit, anromin he natuin sin neek romik anneis na'ko Uisneno In romin. 5 Anmoo' jok on re' anaob rais pirsait, mes ruman. Uisneno In kuasan, ka natua fa sin neek ein. Kais mubnoon reko mok tuaf-tuaf on re' naan! 6 Tuaf-tuaf on re' naan antaman neu es in umi, nok huma' 'moe, he nfuir bifee neek a'oert ein, ma rabah ate napein kopo'. Bifeen on re' naan, sin a'moin kein anbaun sanat na'tuup, ma nmonin natuin sinmakat ma neek-komat huma'-huma'. 7 Sin neen tunggur fe'u, re' neem nanoni' rais fe'u, ma sin natuin-tuin ein aah. Mes sin ka ntai nahinin fa, mee es antoom ma mee es re' nsaan. 8 Ho mumnau reta' anmatoom nok nai' Yanes ma nai' Yamres, ai' kah? Oras naan, sin nraban ka'o Musa. Tunggurun re' oras ia, sin huma' mese' on re' naan. Sin nraban noni'-taru' amneot. Sin teenb ein namre'un, ma sin pirsait ein, anbeon. 9 Tunggur-poi on re' naan, ka neu he ntahan fa 'roo. Ka 'roo-roo fa te, too mfaun ii nahiin sin moon kein! Nahuum on re' unu' te, too mfaun ein nahiin nai' Yanes ma nai' Yamres sin puta-kriu ngguin.
Amnaa' muher-heran noni'-taru' re' ho mtopu mrari
10 Tius! Ho muhini mrair au 'moin ki ok-oke'. Ho muhini mrair are' saa' re' au unoni' sin. Ho muhiin au sarit. Ho muhiin saa' re' au 'pirsai. Ho miit kuum au neek sabaar 'eu too mfaun, ma au maneek ii 'eu sin. Ma ho msa' muhinim mak au 'aran ma 'sabaar au tuak ii. 11 Ho muhiin imsa' ammak sin nteir-hae kau, ma nasahab kau ha'mu'it ma ma'ne'at huma'-huma'. Au upein ha'mu'it ma ma'ne'at on re' naan, anbi kota Antiokia, Ikonium, ma Listra. Mes Uisneno nsoi nafetin kau na'ko rasin naan. 12 Batuur, are' apirsait neu Yesus Kristus, re' nromin he nmonin nok neek akninu' natuin Uisneno In romin, tebes atoni' of anha'mui' sin. 13 Antutan ntein, amaufiunt ein ma aputa-kriu ngguin, anmo'en rais maufinu piut-piut. Sin napoi natupa' biak ein. Mes kah, tuaf bian napoi naan sin imsa'. 14 Mes ho ro he mnaa' muher-heran noni'-taru' re' ho mtoup murair sin. Ma saa' re' ho mpirsai je naan, ro he mutuin ee piut. Natuin, nana es re' amneot! Ho muhiin batuur, sekau es re' nanoni' ko rasin nana, oo? Ho bisa mpirsai sin! 15 Anmurai na'ko ho an-ana' fe', ho munoni' mrair Uisneno In Sura Kniun Ee in afan. Sura Kninu' naan in afan, es re' natoon rana 'honis. Fin karu ho mpirsai meu Yesus Kristus, nana nfei ranan he ho bisa mmafuut mok Uisneno mbi sonaf neno-tunan. 16 Are' saa'-saa' re' matu'i et Sura Kninu' naan, batuur Uisneno kuun es nana'at sin henati' mansian ii antui sin. Tuis ein re' naan, mapake' he: nanoni' tuaf anmatoom nok saa' es re' batuur, nakrira' tuaf ein sin sanat, natuuk nafani' tua-aseket neu raan amneot, ma nanoni' mansian ii he nmonin neno-neno nbin Uisneno In romin. 17 Nok ranan naan, Sura Kniun Ee, bisa nfeen Uisneno In tuaf ein a'be'if ma manoef, he sin nanaoba' are' kanan meup arekot.
Mnao mutoon Uisneno In Kabin ma Prenat
1-2 Yesus Kristus of ankoe Non anfain neem neu pah-pinan, he naprenat on re' usif. Et amonit ma amates of anhaken nbin In matan, he In nafeek sin rasin. Natuin rasi naan, anbi Uisneno ma Yesus Kristus Sin humak-matak, au 'toit batuur-batuur 'eu ko, he mnao mutoon Uisneno In Kabin ma Prenat. Mu'neen om piut! Kais mutenab mak, oras reko, ai' kah. Mukrira' sin, sin sanat, mes mukain sin nok neek sabaar. Amha'tain sin neek ein, meik noni'-taru' amneot. 3 Fin, of noka'-nmeu te, tuaf-tuaf ka nroim fa he nneen noni'-taru' amneot. Sin of na'bua' tunggurun re' bisa na'uab ein natuin sin roim kein, he nharinab sin oras sin nnenan. 4 Sin nkeeh natau sin ruik ein he ka natniin fa noni'-taru' amneot. Mes sin neen neu rais reta' ruum-ruum. 5 Maski on mee msa', ho neek maan ro he natee. Maran ambi ha'mu'it. Amnao mutoon Rais Reko he tuaf-tuaf anpirsain neu Yesus Kristus. Amtuthae tuaf-tuaf nok neek marine, tar antea mepu naan namsoup. Kais ammepu stena'-stena'. 6 Antoom au tuak ii te, kais amfairoir kau, natuin au nuut ii he namsoup goen. Au on re' oe nbi kraas, in nat'oop am he oek een. 7 On re' mnaent ii te, au 'aen ma 'tea 'rair nok reko. Au utuin piut 'eu Yesus Kristus, ma ka 'teib 'iit fa 'eu mee-mee. 8 Oras ia, au a'pao-pao raas jes fe'. Es re', kra-mnatu re' Usi' napaar ee neu sekau-sekau re' in a'moin ee namneo ma namnoon. Hit Usi' naan, afeek rasi amneot. In ka npiir fa humaf. Of antea in ors ate, In of annona' kau kra-mnatu naan. Mes ka neu kau fa 'mees. Sekau-sekau re' anneek Ee, ma anpao-pao Goe he nkoe Non anfain neem, sin napein akra-mnatu on nana msa'.
Nai' Paulus anba'an rasi huma'-huma'
9 Tius! Reko te, uum amkius maan kau rabaah fe'! 10 Oras ia, au 'mes-mees kuuk. Nai' Kreskes annao nrair et propinsi Galatia. Ma nai' Titus annao nrair et pah Dalmatia. Mes nai' Demas nroim nanesib risan amre'ut nbi pah-pinan ia, onaim in nnao nasaitan kau. In nnao et kota Tesalonika. 11 Suma nai' Lukas es re' natua nok kau et ia. Maim maan nai' Markus he nua ki iim bu'-bua'. Natuin in bisa nturun ma nbaab kau nbi rasi huma-huma' nbi ia. 12 Au 'reek nai' Tekikus nnao et kota Efesus. 13 Karu ho uum ate, kais amnikan he mait meik maan kau au baur manikin re' au umaik ee et nai' Karpus in umi, et kota Troas. Ma kais amnikan he mait meik au tuis ein naan, anneis-neis re' au 'tui sin et pasu. 14 Nai' Aleksander, atuut noin moro' naan, anmoe' maufinu' neu kau fani-fani. Maut he nmoe'. Uisneno of es anbaras neu ne, anmatoom nok in a'mo'en naan. 15 Ho ro he mpaant om mu'ko atoni' re' naan, natuin nati' te in nraban hit uab ak. 16 Oras au 'hake 'bi afeek rasi he umneob au tuak, ka tiit tain fa es he nok kau. Sin arsin nnaon nasaitan kau. Maut he on naan. Maut he Uisneno nnikan nain sin saant ein. 17 Maski on nana msa', Uisneno ka nasaitan kau fa. In nha'tain kau, henati' au bisa unaob In Rais Reko, ma au ka 'kuran fa saa'-saa'. Au utoon 'eu atoin ein re' ka Yahudis fa, he sin neen niit Rais Reko naan. Ma Uisneno ansoi nrair kau na'ko siraak ko'u. 18 Ma In of ansoi kau na'ko rais maufinun ok-oke'. Ma In neik kau nok ao-mina', ma nataam kau 'eu sonaf neno-tunan. Anbi naan, In es annaa' aprenat. Uisneno naan, apinat ma akrahat! Au 'pures u'naeb Ee ka natfeek niit fa, tua! Amin.
Nai' Paulus natu'ub in surat
19 Kais amnikan he mfee tabe ma han buseet meu bi Priskila, ma in mone, nai' Akila. On nana msa' meu nai' Onisiforus ma in nonot-asar sin ok-oke'. 20 Nai' Erastus natua et kota Korintus. Neng goes ii, au 'nao usaitan nai' Trofimus anbi kota Miletus, natuin oras naan in nameen ma'fena'. 21 Maim ranan he karu reko te, ho uum amtea main ia, oras maniik ii ka ntaam fa fe'. Hit aok-bian abitan ia, es re': nai' Ebulus, nai' Pudes, nai' Linus, ma bi Klodia, ansoun ein tabe ma han buseet neu ki. On nana msa', neu hit aok-bian Kristen sin. 22 Au ufneek he Uisneno In nok ko piut-piut. Maut he In nakrira' In nekan arekot neu ar-arki. On re' naan, tua, Au, nai' Paulus, kau.
Tabe ma han buseet
1-4 Titus, ri'-moen reko! Surat re' ia, na'ko kau, aam Paulus, Uisneno In ameput, ma Yesus Kristus In haef. In nreek kau he 'nao 'ha'tain neek pirsait 'eu tuaf ein re' In npiir naan sin. In imsa' anreek kau he utoon raan amneot he sin nmonin natuin Uisneno In romin. Nok ranan naan, Uisneno In nonot-asar sin, nafnekan he nmonin nok Ne piut-piut. Oras Uisneno ka najarib fa pah-pinan ia fa fe' ete, In nba'an nain nak, In nonot-asar sin of anmonin piut nok Ne. Ma In imsa' ka napoi nahiin fa. Antea in ors aa on nana te, Uisneno natoon maat-maat am nak, In he nsoi mansian ii na'ko sin saant ein. Rarit In naprenat kau, he 'nao utoon Rais Reko naan 'eu mansian ii ok-oke' nbi mee-mee. Titus! Ho on re' au aanh akuuk, natuin hit nua kit atpirsai teu Kristus. Onaim, au 'onen 'eu Ama' Uisneno, ma Yesus Kristus re' nfee kit a'honis, he Sin nakrira' Sin nekak arekot neu ko, he ho mmoni mbi mamut ma ao-mina'.
Tu'in neu a'naak jema'at
5 Neng goes ii, au ufeek he usaitan ko mbi puru Kreta, he ho bisa m'ator maan mepu fauk ambi naan. Maut he ho mpiir maan a'nakat-a'nakat neu too srani' nbi kota mese'-mese'. Kais amnikan atoran re' au utoon urair sin 'eu ko, anmatoom nok tuaf-tuaf re' na'naak jema'at, es re': 6 karu mroim he mpiir tuaf he na'naak ma nnaa' jema'at, in ro he kais anmui' sanat saa'-saa'. In ro he na'kiik nbi matsaos nok bifee mese'. In aanh ein amsa' anpirsain Yesus Kristus. Kais-kaisa' biak ein nak, sin re' naan, es re' nati' te anmo'en taisibu, ma ntanhai atoran. 7 Natuin a'naak jemaa't ein naan, nanaob Uisneno In mepu, onaim sin ro he nmonin nok neek amne'o, ma sin kaan kein ro nfoo-menin. Kais ampiir maan tuaf re' nroim he na'naeb in tuan; re' mana fa te natoo'; amniun raur mafu; amabanat; akoom noni-roit. 8 Tuaf re' na'naak neu jema'at sin ro he nromin he ntoup sekau goah nbin sin umin. Sin ro he nromi haa rais reko; neek tees, atai rasi, neek akninu', ma ntahan nahiin in tuan. 9 Sin ro he nnaa' naher-heran Uisneno In Kabin ma Prenat, re' unu' te hit tanoni' ma tatoon sin neu sin. Nok ranan naan, sin bisa nakrira' Uisneno In raan amneot neu biak ein, ma bisa nanoon naan noni' abeot.
Rasi anmatoom nok tuaf re' nanoni' nsaan
10 Fin anmui' tuaf namfau re' anromin he nraban noni' re' amneot, re' na'uab ein te naboo nggoah, ma nputa-kriu nggoah. Anneis-neis atoin Yahudis sin re' nak, too mfaun re' he napenin 'honis-ao-mina', ro he na'heir ein. 11 Sin nasekeb nonot-asar sin, na'roo na'ko Uisneno In noni' re' amneot ii, npaek sin noni' re' ansaan ma nbeo. Sin suma he naimn ahaa roit, npaek ranan re' he napoi nggoah. Tuaf-tuaf on re' naan, ro he mufreu sin fefak, maut he sin kaisa' nanoni' nsanan piut-piut. 12 Neot es, sin atoon nee jes na'ko puru Kreta natoon kuuk sin nee, mnak, “Abitan Kreta, sin apoit ein, aparu' ma akomat, mu'it re' ka nahiin fa atoran, ma peeh keni kah een!” 13 Batuur. Abitan bare naan, on re' naan! Onaim, ho ro he mutuuk meik apoit ein naan, he mha'tani mtein sin rais pirsait neu Uisneno. 14 Rarit sin kais natniin anteni' atoin Yahudis sin reet poi ngguin, ma sin kais natuin prenat na'ko tuaf-tuaf re' ntitar napasib noni' amneot. 15 Mumnau rek-reko! Neu tuaf re' in neek ne kninu' te, are' saa'-saa' ii msa' kninu'. Mes neu tuaf re' in neek ne names'ook ma ka npirsai fa Uisneno, are' saa'-saa' ii msa' names'ook. Natuin sin neek kein ma teenb ein n'oe-meet naan nanin. 16 Sin nmanauk ein nak sin nahiin Uisneno. Mes sin a'moin keni, on re' ka nahiin Je fa. Sin na'uab ein teta', mes nmoe' je te, 'teta'. Batuur-batuur sin ro puun ii, neik non! Sin ka nromin fa he natuin Uisneno In romin. Kaisa' mifnekan meu tuaf-tuaf on re' naan, natuin sin ka bisa fa he nmo'en rais reko!
Noni' amneot anjair sukit neu monit amneot
1 Titus! Kais munees om mok sin! Ho ro he mu'haba' tuaf-tuaf he sin nmonin natuin Uisneno In noni' amneot. 2 Mutonan are' 'naef ein he nmonin natuin atoran, npanat sin kaan foo-menin, ma moin nok neek tees. Sin ro he nnaa' naher-heran Uisneno In noni' amneot, ma na'kii' nabaran anbiin na. Ma sin ro he nneek tuaf bian amsa'. 3 On nana msa', neu bifee mnais ein. Mutonan sin he sin npanat sin a'hakek ma sin a'naok, ma sin ro he nmonin natuin ahaa Uisneno In romin. Kais na'munu' tuaf bian sin kaang kein. Kaisa' nmonin nbin mafu. Mes sin ro he nanoni' tuaf bian he sin nmonin nok reko. 4 Nok ranan naan, sin nfanin a'tope' neu bifee amatsao muin ein, ma nanoni' sin he es-es ate nneek in mone ma in aanh ein. 5 Sin ro he nanoni' sin he nmonin nok neek tees, nmonin nok neek akninu', npainoet nahiin sin umi nanan, es-es ate anhormaat in moen ja kuun, ma maut he in moen je na'naak anbi uum je nanan. Karu sin nmonin on nana te, of ka tiit fa tuaf he na'uab na're'uf Uisneno In Kabin ma Prenat. 6 On nana msa', mfaineek atoin muinf ein, he sin nmonin nok neek tees. 7 Titus! Ho ro he mmoin nok rek-reko, he mjari 'tope' meu tuaf bian. Ho mmoe' saa'-saa' aah, mmoe' je nok reko, nahuum on re' ho munoni' biak ein. Tebe, ro he mmeup batuur-batuur. 8 Karu ho munoni' tuaf bian, ro he na'uu na'ko noni' amneot, he biak ein kais nakre'et ko. Nok ranan naan, tuaf-tuaf re' nraban kit, namaeb ok, natuin sin ka nmu'in fa ranan he ntuu-'iran kit. 9 Munoni' ameupt ein he natniin sin a'nakat nbi are' kanan rasi ma nhariin in nekan. Sin kais anmatoen nok sin a'nakat. 10 Sin kais nabaak neik sin a'naak te in baer ein. Sin ro he nakrira' nak sin tuak ein atoin neek amne'o ma mapirsa'i. Sin ro he njarin atoin reko re' na'ki'in. Karu biak ein nataiba' ameupt ein sin a'moin kein ma natuik natai nok saa'-saa' re' hit tanoni' sin, sin of anteebs ein nak, noni' naan reok re'uf. Fin hit tanoni' rais Uisneno re' nfee kit a'honis. 11 Natuin Uisneno nakrira' nrair In nekan arekot neu mansian ii ok-oke', ma nfei rana 'honis he nsoi naan mansian na'ko sin saant ein. 12 Es nana te, hit ro he ttitar tapoitan a'moin re'uf ma are' tenab maufinu. Hit tmoni tbi pah-pinan oras ia, ro he ttahan tahiin hit tuak, tmoni tbi neek akninu', ma ta'kii' tbi Uisneno. 13 Oras ia, hit tpa-pao, he oras Yesus Kristus ankoe Non anfain neem, In neem anbi pina' ma kraha'! Nana nfain tetus neu kit ok-oke'. In re' naan, hit Usi' re' ma'tani' nneis, re' nsoi naan kit. 14 In nnona' In tuan Ee njair fua'-turu', he nsoi kit na'ko hit saant ein ok-oke', he nmoe' kit atjair In nonot-asar re' anmonin nok neek akninu', ma nromin he nmo'en rais reko piut. 15 Titus! Munoni' rasin re' ia ok-oke' meu too srani'. Mu'haba' sin he sin natuin noni'-taru' sin. Sekau-sekau nmo'en saan ate, mutonan sin raan reko. Ka nabei' fa he atoni' nasmeru' ma nkana' paar ko, natuin ho mmui' hak he mmoe' rasin naan.
Atoni Kristen sin a'monik re' amneot
1 Mumnauba' too srani' he sin natniin anaa' apreent ein, ma tuaf-tuaf re' anna'an kuasat. Ma sin ro he natuin atoran. Sin ro he nabaarb ok piut he nmo'en rais reko. 2 Kais anfefa-kreon neu-mneman he na're'uf tuaf bian sin kaan fo-menin. Ma sin kais anroim rais matoes. Reko nneis, anmonin nok rek-reko ma neek reko neu sekau-sekau goah. 3 Natuin unu' fe', oras hit ka tahiin fa Usif Yesus, hit ka tahiin fa saa'-saa', ma napoi kit ite, rabaah. Hit ka troim fa he tneen tuaf bian. Hit tmoni tbi ha re' he tatuin hit neek maufinu, ma ta'kreob hit tuak ii nok rais sinmakat huma'-huma'. Hit aputa-kriut teu tuaf bian. Hit a'moin ki naheun nok mantinus. Hit troim he tatunu' neek to'os teu tuaf bian, tar antea atmaufiun teu sin. Rarit sin imsa' on naan neu kit. 4 Maski hit i'moin ki namreu' on nana msa', mes Uisneno es neik Non ansoi kit, In nakrira' nrair In manekat ma In neek arekot neu kit. 5 In nsoi kit, ka natuin fa hit rasi mnamit atbi nmoe' reko, mes natuin In neek kit. In nsaup nakninu' hit saant ein, npaek In Smana Kninu', he na'fe'un hit a'moink ii, nahuum on re' nahonis kit infain. 6 Natuin Yesus Kristus anmate nrair he nsoi kit na'ko hit saant ein, etun Uisneno nathoeb In Smana Kniun Ee neu kit. 7 Natuin Yesus In neek Ne reko, etun In nareko' hit rais kua'-nonot tok Ama' Uisneno, nahuum on re' hit tjair In aanh ein. Ma hit tahiin tak, hit of atmoin piut-piut tok Ne. Monit naan, anjair hit pusaak. 8 Saa' re' au u'uab sin re' ia, batuur on naan! Saa' re' au unoni' sin re' ia, maso'ik ma ma'upa' neu mansian sin ok-oke'. Etun ho ro he mu'haba' tuaf-tuaf he nmoe' natuin noni'-taru' amneot. Are' apirsait neu Uisneno ro he namin ranan piut-piut he nmo'en rais reko. 9 Kais amseit-seit nom meu rais poi sin ruum-ruum, on re' hi mmafefa-kreona' meu rasi-rasi re' ka ma'u'u fa, mmatoe tafi'-tafi' mok es, ammatita'-roin neu uuf ma ka'uf mee es na'nae nneis, ma ammabaan nok rasi atoran harat atoin Yahudis sin. He saa'? Rasin nana ka tiit tain fa es he maso'ik! Mporin mineuk ors ii ruum-ruum aah. 10 Amnao he mfaineek tuaf re' nroim he nareu' too srani' tar anpe'en ma nbaits ok. Karu sin anmo'en fe' on nana te, ampaesa' sin batuur-batuur. Karu sin nmo'en piut fe', kais amrae mituin sin. 11 Tuaf-tuaf on re' naan, sin teenb ein ka mne'o fa heen. Sin a'moe'k ein kuuk es re' nakrira' sin sanat neu too mfaun ein.
Nai' Paulus natu'ub in surat
12 Au ureon he 'reek nai' Artemas ai' nai' Tekikus, he neem nateef nok ko on puru Kreta. Karu in nema ntea goen, ho main ranan he uum rabaah, he muteef mok kau on kota Nekapolis. Natuin oras mainikin ia, au 'roim he utua 'bi naan. 13 Ho muhiin atoin ahiin atoran hukun, re' in kaan ee nai' Senas, nok in partei nai' Apolos, ai'? Sin he nnaon neu bare 'roo. Onaim, amturun maan sin he sin kais anmu'in kuran-rabu' nbi ranan. 14 Natuin tuaf-tuaf re' natuin Usif Yesus kais antook ma n'asak-panak ruum-ruum aah. Sin ro he nanoin ein he nmo'en rais reko, ma nturun tuaf-tuaf re' ankuran-rabu' re'-re'uf. Nok ranan naan, sin a'moin kein maso'ik. 15 Titus. Hai arkai msonu' tabe ma han buseet arekot neu ko. Tabe ma han buseet amsa' neu hit partei bian re' anpirsain neun Usif Yesus. Au 'onen ma 'toit Uisneno he nakrira' In nekan arekot neu ki arki. On re' naan, tua, Au, aam Paulus, kau.
Tabe ma haan buseet
1 Surat re' ia, na'ko au nai' Paulus kau. Au partei nai' Timotius ansonu' haan tabes ma haan buseet amsa'. Asar ho muhiin, sin nataam kau es bui et bare ia, natuin au 'eut ma utoon anmatoom nok Yesus Kristus. Au 'tui surat re' ia, 'soun ee 'eu ko Filmon, re' hai mneek, ma mjair partei ambi mepu mese' mok kai; 2 ma 'eu bi Apfia, re' hai maan ee on re' hai feto'; ma 'eu nai' Arkipus, re' anmeup ma'tani' nok kai mbi mepu ia; ma 'eu are' too apirsait ein re' nati' te, nabuan ma n'oen ein anbin ho umi. 3 Au 'toit 'ak Ama' Uisneno ma hit Usi' Yesus Kristus nakrira' Sin nekak arekot neu ki arki, he hi bisa mmoin nok mamut, rame' es nok es, ma tainina'.
Nai' Paulus antoit sukuur natuin nai' Filmon in a'monin
4 Ba'e Filmon! Au 'onen es mee te, au 'teek ko, ma 'toit makasi 'eu Uisneno natuin ho 'monim naan. 5 Au 'neen a'rair uab reko namfau, anmatoom nok ho pirsait naan meu Usif Yesus, ma ho rais manekat meu apirsait ein. 6 Natuin ho rais pirsait naan, ho bisa mmoin nekaf mese' mok apirsait bian ein. Au 'onen he karu hi mikrira' hi neek rekon es nok es, hi bisa mihiin mirek-reko' are' kanan rais reko re' hit bisa tmoe' sin teu Usif Yesus. 7 Ba'e! Natuin ho manekam naan, ho mmoe' au nekak ia anmariin, ma neiki 'be'if ha'tanis neu au nekak. Ma ho rais manekat naan amsa', neiki 'be'if ha'tanis neu apirsait ein.
Nai' Paulus antoit he nai' Filmon nakrira' in manekan neu nai' Onisimus
8-9 Ba'e! Au 'perluu ko on nai: au 'jair Kristus In haef. Nok ranan naan, au 'mui' hak he uprenat ko ammoe' rasi pisa' ia. Mes au ka 'roim fa he upren-reent aah, suma au 'toit turun-babat, nahuum on re' tuaf re' namnasi nrair antoit turun-babat. Au 'jair atoin bui natuin au utuin Yesus Kristus, etun au ubrain he 'toit turun-babat na'ko ko, natuin au uhiin ho manekam meu too mfaun ein. 10 Au 'toit he ho mukrira' ho manekam meu au anah nai' Onisimus. In re' naan on re' au aanh aa kuuk, natuin In npirsai Nai' Yesus na'ko au meup ki, 'bi bui re' ia. 11 Au uhiin 'ak nai' Onisimus naan, ho ate re' naen nasaitan ko. Oras in nbi ho 'nimam, in ka mapake' fa. Mes oras ia, au 'pirsai 'ak in of mapake' neu hit nua kit. 12 Au 'neek 'iis ne, mes maut he au 'reek ee ntebi nfain neit neu ko. 13 Amneon ii, au he 'tahan 'aan ee, he in bisa nsenu' ko, he ntuthae kau 'bi bare ia. Natuin anbi bare ia, au ka upein fa mainuan he 'moe' saa'-saa'. Au 'jair atoin bui, natuin au utoon ma ubeno' rasi anmatoom nok Usif Yesus In Rais Reko. 14 Mes au 'ka 'roim fa he ho mutaah mak, ‘tua’ on re' naan, natuin on re' ho mnaben ate atoni' na'seke' ko. Au roimk ii te, ho mmoe' rais reko ma mmoe' arekot mutuin ho roim maan kuum. Onaim karu ho ka mtoup reko fa fe'e te, au ka 'roim fa he 'moe' saa'-saa' anmatoom nok nai' Onisimus re' ia, natuin naan ho hak. 15 Ai' ho of mutenab on nai: Uisneno ankonan nai' Onisimus nasaitan ko ka 'roo fa, he in nfain neem ma natua nok ko. 16 Oras in naen nasaitan ko, in suma ho ate. Mes oras ia, in nfain neem, in njair ho ori' re' ho mneek main je. Au a'neek 'iis ne msa'! Onaim oras ia, in mapake' anbi ho 'nimam, ka neu he njair fa ho ate, mes anjair ho ori' msa' re' hi mpirsai bu'-bua' meu Kristus. 17 Onaim on nai ba'e! Karu ho maan kau 'jair ho partei ambi mepu mese' te, au 'toit he ho mtoup mufain' ee, nahuum on re' au es re' amnemat. 18 Mes karu nai' Onisimus anmo'e nsaan neu ko, ai' anmui' tusa' fe' neu ko, maut he au es re' utaah tusa' naan. 19 Amkius kuum surat tusa' re' ia, au 'tui je 'eik kuuk au 'nimak: Au, nai' Paulus of a'baen nai' Onisimus in tusa' 'eu nai' Filmon. Nanokab, aa oo? Au kais umnaub ko, ho tusa' neu kau re' ko'u nneis ji, es re': ho mjair Uisneno Iin ja, natuin au meupk aa. 20 Batuur, ba'e! Maut he ho mturun kau mbi rasi pisa' re' ia, natuin hit atmakua'nonon atbi Uisneno. Natuin hit arkit atjair Kristus Iin na, etun au neek ii natee ma na'tena'.
Nai' Paulus nasoup in surat
21 Ba'e! Au 'tui 'aan surat re' ia ma 'soun ee 'eu ko, natuin au 'pirsai 'ak ho of amneen murek-reko' kau. Au 'naben ho of ammo'e nneis na'ko saa' re' au 'toit je. 22 Anmui' rasi piis es antein. Mubarab maan kau ke'en es. Natuin au 'pirsai 'ak Uisneno anneen hi onen totis sin, ma In of anfei ma nasoit ranan he au 'poi u'ko bui re' ia, he au 'uum a'kius ki 'tein a'bi naan. 23 Nai' Epafras es ia. In njair atoin bui msa', natuin in n'eut ma natoon rasi anmatoom nok Yesus Kristus, on re' au. In nsonu' haan tabes ma haan buseet amsa' neu ko. 24 Nai' Markus, nai' Aristarkus, nai' Demas, ma nai' Lukas esan ia msa'. Hai mmeup mibu-bua. Sin nsoun ein haan tabes ma haan buseet amsa' neu ko. 25 Au 'toit 'eu hit Usi' Yesus Kristus he In nakrira' In nekan arekot neu ki arki. On re' naan, tua! Saloom, Au, nai' Paulus kau, tua.
Uisneno nreek haefan In Anah, re' ma'tani' nneis na'ko In mafefa' ahuunt ein
1 Un-unu' te, Uisneno anpaek In mafefa kniun' ein he na'uab ein nok hit be'i-na'i atoin Ibranis sin. Sin npaken cara huma'-huma' he na'uab ein fani-fani nok sin. 2 Mes oras ia, In nreek haefan anrair In Anah he na'uab nok kit. Na'ko un-unu', Uisneno npiir ma nbetis In Anah re' ia, he naprenat nabu-bua nok Ne. Oras In nmoe' neno tunan ma pah-pinan, ma in afan-nesan sin ok-oke', In Anah naan anmoe' sin nabu-bua nok Ne msa'. 3 Uisneno In Anah re' ia, nakrira' ma naruru' In Aamf ee In pinan ma krahan, nahuum on re' maans ee ntoom ninu rarit nabaans on. Fin In tuan ee masaf mese' on re' In Amaf. Na'ko In Kabin ma Prenat re' ma'tain re'uf, In nanaob sin ok-oke' anbi neon goe tnanan ma pah-pinan. In nfei eno'-ranan, he nnoes nain mansian ii sin saant am penu sin, maut he nakninu' sin. Rarit In ntebi nfain neu sonaf neno tunan, he ntoko nbi Uisneno In abnapan a'ne'u, anbi bare' re' mahormata' anneis-neisi.
Uisneno In Anah re' ma'tain re'uf, anneis na'ko ameput sonaf neno tunan sin
4 Uisneno In ameput sonaf neno tunan sin ro ma'tain ein. Mes In Anah ma'tain re'uf, anneis na'ko sin ok-oke'. Uisneno In pangkat es re' a'raat re'uf. Ma In nfee In pangkat naan neu In Anah. Etun In Anah, anneis nain In ameupt ein sonaf neno tunan. 5 Uisneno na'uab niit neu In Anah naan am nak, “Neno ia, Au usaeb 'piru'-baru he Ho mnaa' aprenat.” Uisneno na'uab antein am nak, “Au re' ia, In Amaf. Ma In re' ia, Au Anah.” Uisneno na'uab nain on naan anmatoom nok In Anah, mes In ka na'uab niit fa on re' naan anmatoom nok In ameupt ein sonaf neno tunan. 6 Oras Uisneno anreek ma nsonu' In Anah ma'tain re'uf naan ate, In naprenat In ameupt ein sonaf neno tunan amsa' am nak, “Ameupt ein ar-arki! Hi ro he mhormaat, ma mi'besan Au Anah!” 7 Uisneno na'uab anmatoom nok In ameupt ein sonaf neno tunan am nak, “Au 'moe' Au ameupt ein sonaf neno tunan, anjarin rabah on re' anin. Au 'moe' Au ate sin, anjarin ma'tani' on re' ai.” Uisneno na'uab on naan, natuin sin re' naan, suma aan renu'-aan reek ahaa. 8 Mes In na'uab anteni' neu In Anah naan aa kuun am nak, “Ho re' ia, Uisneno. Ho of amtoko mbi 'toko prenat tar antea nabar-baar. Ho of amnaa' kuasa he muprenat nok neek amneot ma amnonot. 9 Ho nekam naan anmariin oras Ho mkius tuaf-tuaf anmoni mne'o ma namnoon. Mes Ho nekam naan ansuus oras Ho mkius tuaf-tuaf re' a'moink ein anbeon ma npenun. Etun Ho neekm aan anmariin, he Au 'oop mina' 'eu Ho 'nakam, he usaeb 'piru'-baru he Ho mjair Usif re' Ho ma'tanim amneis mu'ko biak ein.” 10 Uisneno na'uab antein neu In Anah am nak, “Anah! Ho re' ia, Usif re' naprenat nain na'ko afi unu'. Ho re' ia, es re' amreun he neon goe tnanan anjair nain. Ho re' ia, es re' muprenat he pah-pinan anjair nain. 11-12 Neon goe tnanan ma pah-pinan of anpunu nmaten. Neon goe tnanan ma pah-pinan of namnekun nkonon. Mes Ho kuum ammoin mubar-baar. Ho of mait imporin neon goe tnanan ma pah-pinan, nahuum on re' tuaf nait inporin tai pake re' nakroe re'-re'uf. Ho of amsenu' ma mseka' neon goe tnanan ma pah-pinan, nahuum on re' tuaf ansenu' ma nseka' tai paek fe'u. Mes Ho kuum ka on fa naan. Natuin Ho mmoin mubar-baar.” 13 Uisneno na'uab antein neu In Anah am nak, “Anah! Uum he mtoko mbi ia, ambi bare re' mahormaat re'uf, ambi Au bnapak a'ne'u re' ia. Au of a'moe' Ho muusn ein, tar antea na'ruir ein ma nhuum fousun neun Ko.” Uisneno na'uab nain on naan anmatoom nok In Anah, mes In ka na'uab niit fa on re' naan anmatoom nok In ameupt ein sonaf neno tunan. 14 In ameupt ein, pentiing amsa'. Fin In nhaefa' sin, he nnaon n'urus Iin na ok-oke', re' In he nsoi nafetin naan sin na'kon sin sanat ma penu sin. Maski on naan amsa', mes Uisneno In Anah anneis-neis na'ko sin ok-oke' fe'.
Kais amtorak Uisneno In beno 'honis re' ma'tain re'uf
1 Natuin Uisneno In Anah ma'tani nneis na'ko mafefa kniun' ein, ma na'ko ameupt ein sonaf neno tunan, hit ro he tnaa' taher-heran saa' re' hit tneen ma tatniin atrair, he hit kais atnikan tain sin. 2 Unu' te, Uisneno npaek In ameput na'ko sonaf neno tunan, he natoon In rais manbaa'n ein neu hit be'i-na'i sin. Rais manbaa'n ein naan ro batuur. Karu sin ntanhai In apreent ein re' naan, sin ro he napenin hukun natai nok sin sanat. 3 Batuur, unu' te on naan. Mes oras ia, Uisneno In Anah, anfei nrair raan fe'u he nsoi nafetin mansian ii. In nakrira' ma naruru' raan a'honis re' reok re'uf naan neu In tuaf re' antuthae Je anbi pah-pinan ia. Rarit sin natoon kit he hit tpirsai. Mes karu hit ka ttoe tatuin fa te, hit tamre'u tkoon nai! 4 Fin Uisneno anfee kuasa msa' he sin nmo'en rasi mkakat ma sanmakat huma'-huma'. In nasanut In Asmanan neu sin imsa', he sin nmo'en rasi mfaun bian natuin In romin. Nok rasin naan ok-oke', etun hit tahiin tak, raan a'honis naan, ro batuur. Onaim hit ro he tfairoir je!
Nansaa' am es Uisneno In Anah na'paran In tuan anjair mansian?
5 Au u'uab anmatoom nok pah-pinan mamaas fe'u re' of he nboor neem. Mes Uisneno ka natoon niit fa neu In ameupt ein sonaf neno tunan nak, sin of es re' an'urus pah-pinan mamaas fe'u naan. Natuin mansian ii es re' of an'urus. 6 Anbi Uisneno In Suur Akninu', ka'o Daut nataan niit anmatoom nok mansian ii in pangkat am nak, “Uisneno! Nansaa' am es Uisneno mkius munesib meu mansian? Nansaa' am es Uisneno amneek sin? Fin sin suma mansian ahaa! 7 Mes Uisneno amfeen sin kuasa, he sin njarin noi huma' mese' on re' ameupt ein sonaf neno tunan. Uisneno amhormaat sin amsa', ma mu'ratan sin, 8 he sin naprenat are' saa'-saa' re' Uisneno mmoe' sin naan.” Onaim tatuin ka'o Daut in surat, Uisneno anmoe' mansian ii njair usif ma a'nakaf, he sin n'urus are' saa'-saa' re' In nmo'e nrair sin. Te kaah, hit ka tiit tiit tain fa mansian es, re' naprenat nain are' saa'-saa' ii, on re' naan. 9 Mes anmui' Tuaf es, re' bisa naprenat are' saa'-saa' ii oke'. In re' naan, es re' Nai' Yesus. In neem natua ntahan anbi pah-pinan, ma anjair mansian re' nasaah ha'mu'it tar antea anmaet. In nmaet on re' naan, he nakrira' ma naruru' Uisneno In nekan arekot neu mansian. Rarit Uisneno nboi's Ee ma na'raatn Ee, he In naprenat are' saa'-saa' re' Uisneno anmo'e nrair sin naan. 10 Onaim pantas karu Uisneno nasahab Nai' Yesus ha'mu'it naan, he Nai' Yesus bisa nfei ma nasoit raan a'honis neu mansian. Fin Uisneno naim ranan he mansian amfaun bisa nmonin nabu-buan nok Ne anbin sonaf neno tunan. Fin Uisneno es re' anmoe' nain sin ok-oke'. Ma are' kanan amonit, ro nmoin natuin Ee. 11 Karu tuaf re' Nai' Yesus nakninu', Uisneno ro antoup sin nok rek-reko, he sin njarin In aanh ein. Fin Uisneno naan, Nai' Yesus In Aamf amsa'. Nok ranan naan, Nai' Yesus nok In aanh ein, Amaf mese'. Etun Nai' Yesus ka namaeb On fa he no'en sin am nak, “Hi arki re' ia, Au aok-bian sin kuuk.” 12 Fin Nai' Yesus natoon neu In Amaf am nak, “Au he utoon 'eu Au aok-bian sin, anmatoom nok Au Ama' Ho arekom! Au he 'sii a'bi sin sonak ma sin atnaank ein, anmatoom nok Ama' Ho ma'tanim!” 13 Nai' Yesus antuut In uaban am nak, “Au 'pesit ma snait 'eu Uisneno piut.” Nai' Yesus na'uab antein am nak, “Amkius miit, Au es re' ia, ubua 'ok Uisneno In aanh ein, re' In nnona' ma nfee Kau sin, he Au 'urus sin.” 14 Uisneno In aanh ein naan, mansian biasa, es naan ate Nai' Yesus ro he njair mansian on re' sin. Fin In ro he njair mansian fe', na' In bisa nmaet. Nok ranan naan, na' In bisa nasiik naan kuasa na'ko niutn ee sin usin. Fin uis maufinu naan, in es re' annaa' kuasa he n'urus rasi anmatoom nok 'maten. 15 Ma in nmoe' mansian ii namtausan a'maten, tar antea sin natun-tuin ein aah neu ne, on re' ate. Mes oras ia, Nai' Yesus bisa nsoi nafetin sin na'ko sin rasi mtaus naan. 16 Ro tebe namneo, Nai' Yesus ka neem fa he nturun ma nbaab Uisneno In ameupt ein sonaf neno tunan. Mes In neem he nturun ma nbaab kit, ka'o Abraham in sufan-ka'un sin re' ia. 17 Nok ranan naan, Nai' Yesus anjair huma' mese' on re' hit re' tjair In aok-bian. Nok ranan naan amsa', In bisa njair hit a'naak rais pirsait re' a'raat re'uf, he nturun ma nbaab kit he tatuin Uisneno In romin. In nakrira' In rais kasian neu kit. Ma In na'uab saa' ate, In nmoe' je on re' naan. Unu' te, hit be'i-na'i sin antoit sin a'naak rais pirsait ein sin a'naak kou' goe, he nmoe' fua'-turu', he Uisneno annoes nain sin saant am penu sin. Oras ia, Nai' Yesus neikn On anjair fua'-turu' he Uisneno annoes nain hit saant am penu sin. 18 Oras Nai' Yesus anmoni nbi pah-pinan ia, In napein ha'mu'it amfaun. Bian anfuir Ee he nmoe' sanat. Maski on naan amsa', mes In ka nmouf fa. Es naan ate, karu nmui' tuaf re' anfuri kit he tmoe' sanat ate, Nai' Yesus bisa nturun ma nbaab kit he hit kais atmouf teu sanat naan.
Uisneno In Anah ma'tani' nneis na'ko ka'o Musa
1 Aok-bian manekat arki. Uisneno anpiir ma nbetis naan ki, ma nteek ki atoin neek akninu', he hi mmoin mok Uisneno ambi sonaf neno tunan. Natuin rasin re' naan ok-oke', hi ro he mitenab namnuut anmatoom nok Nai' Yesus re' naan. Fin hit tmanaku' trair tak, In re' naan Uisneno In Haef, ma In hit A'naak Rais Pirsait re' A'ratas anneis-neisi msa'. 2 Oras Uisneno ansonu' ma nhaef Nai' Yesus, Nai' Yesus anmoe' natuin Uisneno In roimn ein ok-oke'. Nok ranan naan, In njair on re' ka'o Musa. Fin ka'o Musa anmoe' natuin Uisneno In romin amsa', oras in ntuthae hit be'i-na'i sin unu' naan. 3 Maski on naan amsa', mes Nai' Yesus ma'tani' nneis na'ko ka'o Musa. Fin Nai' Yesus naan nahuum on re' a'naak umi. Namneo, a'naak umi' ma'tani' nneis na'ko ameput anbi umi naan in nanan. 4 Tuaf mese'-mese' nafeen ein ma ntokon umi. Mes Uisneno nafena' ma natoko' nain sin arsin. 5 Onaim ka'o Musa nmoe' natuin Uisneno In romin, oras in njair ameput anbi Uisneno In umi. Fin oras naan, in natoon nain saa'-saa' re' Uisneno of anmoe' sin. 6 Nai' Yesus anmoe' natuin Uisneno In romin amsa', mes In ka aan renu' fa on re' ka'o Musa. Natuin In re' naan, Kristus, Uisneno In Anah re' In nruur ma nreek nain Je na'ko unu', he nsonu' ma nhaef Ee ntaam neem neu pah-pinan ia. Ma Kristus an'urus nahiin batuur-batuur In Aamf ee In uim je nanan. Onaim karu hit tnaa' taher-heran hit rais pirsait, ma hit tafnekan ma tharap piut teu Kristus, hit bisa ttaam atjair nonot-asar anbi In uim je nanan amsa'.
Kais amkoit misaitan hi rais pirsait on re' be'i-na'i sin, natuin sin ka bisa ntaman ntean fa bare snasat re' Uisneno napaar ee neu sin
7 Natuin rasi naan, hi ro he mpasan ma mtakan hi ruikm ein he mitniin mirek-reko' saa' re' Uisneno In Asmaan Akniun' ee natoon anrari mnak, “Neno ia, karu hi mneen Uisneno In kabin, 8 hi kais amnaak-faut, on re' atoin ein naan, re' annaon neu-mneman tar antea toon bo' haa anbin baer ruman. Fin sin ka ntoe natuin fa nai' Musa, tar antea Uisneno msa' he noi, ka bisa nsabaar naan fa ntein nok sin. 9-10 Mitenab miit! Toon bo' haa Au 'moe' rasi mkakat ma sanmakat huma'-huma', anbi sin humak sin matak, sin sonak ma sin atnanak! Mes sin nsoba' ma na'taka' Kau piut. Es naan ate, Au uto'on sin am 'ak, ‘Hi re' ia, ambaineis re'-re'uf! Fin hi mkoti mrair Au ranan, ma mituin hi ranan re' anpeun ma nbeo!’ 11 Au ka 'aran ma 'tahan fa he 'kius hi maufinun on naan antein. Es naan ate, Au 'kaas ki m'ak, ‘Hi ka bole fa he mtaam ma misnaas mibua mok Kau.’ ” 12 Onaim aok-bian arki! Ampaant om, kais-kaisa' anmui' tuaf na'ko ki re' anmoe' maufinu, tar antea in ka npirsai ntein fa, rarit ankoit ma nasaitan Uisneno re' anmoin nabar-baar. 13 Reko nneis, ammaha'tanin nekaf piut-piut es nok es, ansuun-suun oras. Kais ampao mtein! Natuin hi re' naan, karu es napoi ki he mmoe' sanat ate, hi mituin rabah. Tar antea hi mi'naak-faut, ma ka mtoe mituin fa Uisneno. 14 Hit bisa tjair partei ma thaek ha'e mese' tok Yesus Kristus, asar hit tafnekan ma tharap piut-piut teu Ne, nahuum on re' neno hit fe'e tmurai tpirsai Je. 15 Fin Asmaan Akninu' na'uab on naan amsa' am nak, “Neno ia, karu hi mneen Uisneno In kabin, hi kais amnaak-faut, on re' atoin ein naan, re' annaon neu-mneman tar antea toon bo' haa anbi baer ruman, natuin sin nraban nai' Musa.” 16 Oras ia, au he utaan on nai: atoin ein re' anneen anrair ka'o Musa, rarit ankoit nasaitn ee naan, sekau? Sekau ntein, karu ka hit be'i-na'i sin fa, re' ka'o Musa neikn on napoin sin na'kon pah Masir. 17 Rarit tuaf ein re' anmoe' Uisneno In neekn ee natoo' tar antea toon bo' haa naan, sekau? Sekau ntein, karu ka hit be'i-na'i sin fa. Sin nmonin nbin baer ruman nok sanat-penu, tar antea sin nmaten, rarit ansuub sin anbin bare naan. 18 Rarit tuaf-tuaf ein re' napenin kasat na'ko Uisneno tar antea ka bole fa he ntaman neun bare re' napaar ee neu sin, he nasnasan nok Ne ji, sekau? Sekau ntein, karu ka hit be'i-na'i sin fa. Fin sin re' naan ka nromin fa he nneen ma natniin Uisneno. 19 Onaim rais ji nakniun een, ai'? Hit be'i-na'i sin ka ntaam nanan fa neun bare re' naan, he nasnasan nok Uisneno, natuin sin ka npirsain fa neun Uisneno.
Karu hit tpirsai Yesus Kristus, hit bisa tmarame' tok Uisneno, nahuum on re' hit tasnaas tok Ne
1 Hit ro he tatenab tarek-reko' oras ia, natuin Uisneno anba'an am nak, Iin na bisa nasnasan nabuan nok Ne. Onaim kas-kais na'ko ki, anmui' tuaf re' ansiu' napoitan saa' re' Uisneno anba'an anrair je naan. 2 Fin hit tneen atrair rais reko naan, nahuum on re' hit be'i-na'i sin imsa' anneen anrair je. Mes natuin sin ka npirsain fa rasi naan, sin ka napenin fa rasi mnisat saa'-saa'. 3 Mes karu hit tpirsai, hit bisa tasnaas tabu-bua tok Uisneno. Fin unu' te, In nba'an anrair on naan nok hit be'i-na'i sin, mes rarit In natoo' ma natoon neu sin im nak, “Au ka 'aran ma 'tahan fa he 'kius hi maufinun on naan antein. Es naan ate Au 'kaas ki m'ak, ‘Hi ka bole fa he mtaam, he misnaas mibu-bua mok Kau.’ ” Te kaah, hit tahiin tak, oras Uisneno anmoe' neno tunan ma pah-pinan, In n'ator nain he Iin na bisa nasnasan, he nmoin nabu-buan nok Ne. 4 Anbi reta' anmatoom nok Uisneno anmoe' neno tunan ma pah-pinan, matu'i anmatoom nok re' rasi Uisneno nasnaas nak, “Uisneno anmepu nrair sin ok-oke', onaim noka' on naan ate, nateef nok neno no hiutn ii, In nasnaas.” 5 Ma anbi pisa' bian antein, Uisneno na'uab neu hit be'i-na'i sin im nak, “Hi ka bole mtaam amtein fa, he misnaas mibu-bua mok Kau.” 6 Onaim Uisneno nroim he Iin na nasnaas nabu-buan nok Ne. Mes hit be'i-na'i sin re' anneen beno ma rais reko naan nahuun, sin ka bisa ntaman fa, natuin sin ka nmoe' natuin fa Uisneno In romin. 7 Mes a'roo-'roo te, Uisneno anpiir naan oras a'teta', he Iin na bisa ntaman ma nasnasan nabu-buan nok Ne. Fin In npaek nai' Daut in uaban am nak, “Neno ia, karu hi mneen Uisneno In kabin, kais ammoe' hi neekm ein manu' on re' fatu, mes amneen ma mitniin rek-reko nai.” 8 Oras ka'o Daut na'uab am nak, “neno ia”, in ka nteek fa neno re' oras nai' Yosua nok be'i-na'i sin aanh ein ntaman neun pah Kana'an. Fin oras ka'o Daut na'uab on naan ate, sin ar-arsin naan anmate nrarin a'roo goen. 9 Nok ranan naan, hit tahiin tak, Uisneno an'ator oras a'teta', he Iin na bisa nasnasan ma nmoin nabu-buan nok Ne. 10 Ma tuaf re' antaam ma nasnaas nabu-bua nok Uisneno, in nasnaas anrair na'ko in mepu nahuum on re' Uisneno nasnaas amsa' na'ko In mepu nateef neno no hiutn ii, oras In nmo'e nrair pah-pinan ia. 11 Onaim ampaasn om he hi bisa mtaam ma misnaas ma mmoin mibu-bua mok Uisneno. Kas-kais ka nmui' fa es, re' ka ntaam naan fa, natuin in ka nroim fa he nneen Uisneno In Kabin ma Prenat, on re' hit be'i-na'i sin re' naan. 12 Fin Uisneno In Kabin ma Prenat sin nakrira' ma naruru' raan a'honis re' amnonot ma amneot. Sin anmu'in kuasa he ntaman neun hit nekak, ma antai hit tenab sin ma hit roimk ein ok-oke'. Fin Kabin ma Prenat sin naan na'aik anneis na'ko suni' re' antaam neu hit sisik ma an'oet sisik, kea, ma nuif, he na'pahan sin ok-oke'. 13 Anbi neon goe tnanan ma pah-pinan ok-oke' ka tiit fa saa' es, re' ma'koro' ma ma'nifa' na'ko Uisneno, fin In bisa niit nain are' kanan saa'-saa' ii oke'. Ma hit of ro he tbaiseun Goe, he tatoon saa'-saa' re' hit atmo'e trair sin.
Nai' Yesus anjari 'nakaf rais pirsait re' a'raat re'uf re' ma'tani' nneis na'ko a'naak pirsait amnaa' ein
14 Hit ro he tnaa' taher-heran hit pirsait, natuin Uisneno In Anah, Nai' Yesus, anjari 'nakaf rais pirsait re' a'raat re'uf neu kit. Fin In ntoko nrair et Uisneno In human ma In matan, et sonaf neno tunan, he npeis kit. 15 In bisa npeis kit rek-reko, natuin In nahiin nak, hit re' ia, mansian. Karu anmui' akopo' he tmoe' sanat ate, hit tmouf rabah. Nai' Yesus napein rais kopo' amsa' on re' hit, mes In ka nmouf fa. 16 Nok rasi naan, iim he hit tabrain he tpaumak-maak Uisneno atbi In a'toko prenat. Natuin In re' naan, neek reko. Onaim karu hit t'onen teu Ne te, ro tebes, In nroim he nakrira' ma naruru' In rais kasian he nturun kit nateef in oras.
1 Tuaf re' sin nait je njair a'naak rais pirsait re' na'ratan nneis, in 'meupn ii ro he nturun tuaf he n'urus sin rais kua'-nonot nok Uisneno. In ro he ntoup sin fua'-turu' ma sin mu'it he na'turu' sin, he nnona' ma nfee sin neun Uisneno. In ro he nfee mu'it anjair fua'-turu' msa' he Uisneno nnoes ma nsaok nain tuaf ein sin sanat ma penu sin. 2 Karu nmui' tuaf re' ka nahiin fa raan a'honis amneot am amnonot batuur, ai' tuaf re' anteib ma nbeo na'ko ranan naan ate, a'naak rais pirsait naan ka nasusab sin fa. In neekn ee reko neu sin, natuin in imsa' mansian re' rabah ate bisa nmouf on re' sin. 3 Natuin in imsa' mansian re' anmouf on re' sin, etun a'naak rais pirsait imsa' ro he nfee mu'it njair fua'-turu', he Uisneno annoes ma ansaok nain in sanat ma penu sin imsa'. 4 Atoni' ka bole nait na'ratan fa in tuan he njari 'nakaf rais pirsait re' a'raat re'uf. Suma Uisneno kuun es re' anmui' hak he npiir ma nbetis tuaf on re' naan, nahuum on re' un-unu', oras In nait nai' Musa in tataf nai' Harun. 5 On naan amsa' Kristus. In ka nait fa In tuan he njari 'nakaf a'ratas anneis-neisi. Natuin unu' te, Uisneno neikn On es re' nait Je nak, “Ho re' ia, Au Anah, Oras ia, Au usaeb 'piru'-baru he Ho mnaa' aprenat.” 6 Anbi pisa' bian na'ko Suur Akninu', Uisneno na'uab am nak, “Ho mjair a'naak rais pirsait re' on re' nai' Melkisedek unu' naan, mes Ho mu'naak rais pirsait naan tar antea nabar-baar.” 7 Oras Nai' Yesus In a'monin anbi pah-pinan ia he noi namsoup, In n'onen ka nasnaas niit fa. Ma In nkae npin-pinus, antoit turun-babat na'ko Uisneno, he nfee Ne 'be'if ma 'ha'tain nekaf. Fin In nahiin nak, Uisneno In kuasan naan, bisa ansoi naan Ee. Onaim Uisneno anneen Nai' Yesus, natuin In natuin batuur-batuur Uisneno In romin. 8 Fin Nai' Yesus naan, Uisneno In Anah. Maski on naan amsa', In ro he napein ha'mu'it ma ma'ne'at, he In nanoni' natuin Uisneno In romin. 9 Rarit In ro batuur-batuur natuin Uisneno In roimn ein ok-oke'. Etun oras ia In njair Roet A'honis neu tuaf-tuaf re' anpirsai Je, he sin bisa nmonin piut-piut nok Uisneno. 10 Fin Uisneno nait Nai' Yesus anjari 'nakaf neu rais pirsait, re' huma' mese' nok a'naak rais pirsait nai' Melkisedek un-unu' naan.
Kais amporin hi rais pirsait meu Kristus
11 Anmu'i ntein rasi mfaun re' au he utoon sin anmatoom nok Kristus ma nai' Melkisedek naan, mes au ka uhiin fa he u'uab on mee, hena' hi mihiin rasin naan, natuin hi on re' ri'ana' fe' re' anmoon, re' ka bisa nahiin fa saa'-saa' fa fe' nok batuur. 12 Te kaah, hi arki ampirsai 'roo goen. Batuurn ii, hi ro he mjair tungguru, he bisa minoni' tuaf bian amtein. Onaim mes hi on re' ri'ana kru'uf fe' re' ka naah nahiin fa fe', re' fe'e nsus-suus fe'. Hi mperluu tuaf he nanoni' ki rasi re' na'uu ma na'baa' na'ko Uisneno In Suur Akninu' fe'. 13 Au utaib ki 'ok ri'ana kru'uf on re' naan, natuin hi ka mihiin fa fe' noni' uuf anmatoom nok Kristus he hi bisa mmoin nok amneot ma amnonot. 14 Mes karu ri'ana kru'uf na'nae neem ate, in ka niun fa susu ntein, mes in naah amnahat re' manu'. Naan huma' mese' on re' tuaf re' nanoni' nrair ma nahiik batuur-batuur Uisneno In nonin, maut he in nahiin mee es re' reko, ma mee es re' amre'ut ma maufinu.
1 Onaim hi ro he minoni' mtein noni' re' ankoon ma namtiis, natuin hi minoni' mrair sero 'roo goen noin uuf anmatoom nok Kristus. Es naan ate oras ia, ka tperluu fa he minoni' mifan-fain noni' uuf anmatoom nok rasi atoni' ro he nasaitan sin saant am penu sin; noni' anmatoom nok atoni' anpirsai Uisneno; 2 noni' anmatoom nok srani', noni' anmatoom nok ttao 'nimaf he ttoup Asmaan Akninu'; noni' anmatoom nok Uisneno of namonib nafani' amates; ma noni' anmatoom nok tuaf-tuaf ro he nbaiseun Uisneno, he ntoup In atfeka' nak, sekau es re' bole nmoin piut nok Ne, ma sekau es re' kahaf. 3 Mes karu Uisneno nfee mainuan ate, iim he hit tatnani ttein, fin au he unoni' ki rasi re' nkoon ma namtiis intein. 4-6 Te kaah, anmui' tuaf re' nahiin Kristus In nonin, ma nnaben anrair Uisneno In nekan arekot, tar antea In nsonu' In Asmaan Akninu' neu sin. Sin nahini nrair Uisneno In Kabin ma Prenat sin, ma sin nnaben anrair In kuasan re' In of he npaek je oras pah-pinan ia namsoup. Maski on naan amsa', mes sin nait inporin sin rais pirsait naan, ma nkoit nasaitan Kristus. Es naan ate, ka neu fa he nmui' ranan he sin bisa ntebi nfanin ma antotin rais saok sanat, rarit nmarame' nok Uisneno ntein. Fin karu atoni' ka nroim fa he na'piis on naan ate, naan huma' mese' on re' sin nkuus na'maet nafani' Uisneno In Anah et hau nehe, rarit sin nfare' anbi too mfaun ein sin humak ma sin matak. 7 Tuaf human on re' naan, nahuum on re' etu ma rene re' karu tseen pena' ai' maka' te ka bisa tseik ma ttoun goe fa, fin ka tiit fa maka' ma pena' sin puink ein. Te kaah, karu uurn ii nsaun neem, auf reok gui bisa neik sekit ma mnonut neu atoin tani. Rarit Uisneno nasanut tetus-athoen, he etu ma rene sin bisa neik sekit ma mnonut ko'u. 8 Mes tuaf re' ankoit nasaitan Kristus, nahuum on re' etu ma rene re' nmu'i haa 'aik kisan. Ma 'aika' naan ka neik fa in upan ma osan saa'-saa'. Ka 'roo fa te, Uisneno neem ma nfee hukun neu etu ma rene naan. Rarit In nout nakrati' sekit ma mnonut re' ka ma'upan ma ma'osa' fa saa'-saa' re' naan. 9 Aok-bian manekat arki! Maski au u'uab 'aan 'eik haan ma'tani' kre'o on naan, mes au uhiin amsa' 'ak, hi ka mkoit misaitan fa Kristus. Fin hi mpirsai mrair Je, ma hi 'moinm ein on re' etu ma rene te, neikin sekit ma mnonut arekot. 10 Onaim mimnau Uisneno In neekn ee mne'o ma namnoon, ma In ka nnikan fa hi maskeet ein. Fin hi mmeup ma'tani' he mturun Iin na, ma amneek sin. Na'ko unu', hi minaob amrair In mepu. Ma hi ammo'e msa' on naan fe'. 11 Mes oras ia, au 'roim he hi arki mmeup ma'tani ntein, he mituin piut-piut on re' naan tar antea namsoup. Nok ranan naan, hi of amtoup are' kanan rais reko re' hi mifnekan ma mharap sin na'kon Uisneno. 12 Asar kais mipeeh. Hi ro he mait i'tope' mi'ko tuaf-tuaf re' anpirsai nrarin neun Uisneno nahunun ki. Fin sin nafnekan ma nhaarp ein piut-piut neu Ne, tar sin ntoup saa' re' In nba'an anrair je. 13-16 On re' hit ka'o Abraham. Un-unu' te, Uisneno nahake' rais manba'an nok ne npaek supat. Karu mansian ii nahake' supat, biasa npaek Uisneno In kanan, he Uisneno njair saksii, natuin Uisneno naan, anneis na'ko ne. Ma karu anmui' rasi, tuaf-tuaf arsin nahinin nak, tuaf a'uab naan, batuur, natuin in nsupan nrair npaek Uisneno In kanan. Naan, mansian ii in 'mo'et ma taos es re' naan. Mes oras Uisneno nahake' supat nok ka'o Abraham, In npaek kuun In kanan, natuin ka tiit fa es, re' na'raat anneis na'ko In tuan. In nahake' rais manba'an am nak, “Au of a'fee tetus-athoen anho-hoen, neu ho sufa'-ka'uf sin. Sin of nasufan, nafuan, ma namsa'in, tar antea ka tiit fa tuaf re' bisa ansoi' naan sin.” Uisneno nba'an anrair on naan ate, ka'o Abraham anpirsai piut, rarit nafnekan ma nharap piut neu Uisneno, maski 'roo re'uf, na' in ntoup Uisneno In supat naan in afan. 17 Nok ranan naan, hit tahiin, karu Uisneno nahake' rais manba'an nok Iin na, In nfuut rais manba'an naan nok supat, he njamin nak, saa' re' In nbaa'n ee naan, ro batuur ma ka na'bani' fa. 18 Anmui' naan rasi nono' nua re' ka bisa na'bani' fa. Es, es re' Uisneno In rais manba'an. Ma es antein, es re' In supat re' In npake, he njamin In rais manba'an. Onaim karu Uisneno njamin rasi piis es, ro batuur In nmoe' natuin ee. In ka neu he napoi fa. Es naan ate, hit kais neek ii nabait nok In rais manba'an. Hit taen atrair teu Ne he tapein saok sanat ma 'honis, onaim oras ia, hit tpao ma tafnekan ma tharap piut teu Ne nmees. 19 Nok ranan naan, hit neek ii ntainina' ma ka na'oni' fa, on re' kofa' re' ntea tais je ninin ma nhake mnasanut bonit. Fin hit tafnekan ma tharap teu Yesus Kristus, re' anjari 'nakaf rais pirsait re' a'raat re'uf neu kit. Unu' te, nateef nok atoin Yahudis sin neon ko'u, 'nakaf rais pirsait re' a'raat re'uf antaam anpeo' tai mnanu' re' npiir' ee he nbatis Ke'en Akninu' nneis-neisi, nok kee' too mfaun, he nbaiseun Uisneno nbi naan. 20 Mes oras ia, Nai' Yesus antaam nahuun, he nfei ranan neu kit. Fin In 'nakaf rais pirsait re' a'raat re'uf amsa', re' huma' mese' on re' nai' Melkisedek afi unu' naan. Mes Nai' Yesus ma'tani' nneis na'ko a'naak rais pirsait amnaa' ein, natuin In ka nasnaas niit fa he nanaob In mepu.
Nai' Melkisedek naan, a'naak rais pirsait es, re' na'raat anneis na'ko a'naak rais pirsait nai' Lewi ma in sufan-ka'un sin
1-3 Un-unu' te, nai' Melkisedek anjair usif kota Salem. In a'naak rais pirsait neu tuaf-tuaf re' na'ruri' ma na'besan Uisneno A'raat Re'uf amsa'. In kanan naan, in oetn ii nak, “usif re' neek amneot ma amnonot”. Ma usif Salem in oetn ii, “usif neu rais rame' ma mamut”. Ka tiit fa tuaf nahiin nai' Melkisedek in amneemn ii, na'ko mee. Ka tiit fa tuaf nahiin in mahoint ein, in beif-na'if sin ma uu'k ein. Ka tiit fa tuaf nahiin in neon mahonin, ma in neno 'maten. Atoni' suma nahiin nak, in re' naan, usif kota Salem, ma a'naak rais pirsait neu Uisneno. Mes in on re' Uisneno In Aanh amsa', natuin in a'naak rais pirsait re' nanaob in meup goe piut-piut amsa'. Neot es, anmui' usif fauk neman nok sin soraurs ein, ma nasiik naan kuuk bare' na'ko ka'o Abraham in partei ngguin. Rarit ka'o Abraham annao nmakeen nabu-buan nok in partei ngguin, tar antea sin niis nain uisf ein naan. Onaim ka'o Abraham neik nafani' baer' ein naan ok-oke'. Oras ka'o Abraham annao nfain on naan ate, nai' Melkisedek npoi na'ko kota Salem ma nseun ka'o Abraham. Rarit in na'uab anfee tetus-athoen neu ka'o Abraham am nak, “Maut he Uisneno A'raat Re'uf naan, In kuun es anfee ko tetus-athoen.” Rarit ka'o Abraham anbati nfeen nai' Melkisedek sapaaf es na'ko sapaaf bo'es na'ko are' kanan baer siikn ein re' sin nasiik nafani' sin naan. In nfee on re' naan, natuin nai' Melkisedek naan, a'naak rais pirsait na'ko Uisneno A'raat Re'uf. 4 Onaim mitenab mirek-reko' rasi anmatoom nok nai' Melkisedek re' ia! Ka'o Abraham anfee ne bait bo', na'ko are' kanan baer arekot anneis-neisi, re' in nait neik sin anfain naan. Onaim batuur een, nai' Melkisedek naan, kaes ko'u ma a'naet. 5 Te kaah, oras naan, Uisneno ka nait ma nasaeb fa tuaf he njair a'naak rais pirsait. Tar antea ka'o Abraham in uup-ka'of nai' Lewi fe'e te, na' Uisneno nait je ma in sufan-kau'n ein anjarin a'naak rais pirsait neu ka'o Abraham in sufan-ka'un sin. Rarit Uisneno nasanut atoran nak, atoni' na'ko uuf nai' Lewi anmui' hak he ntoup bait bo' na'ko sin aok-bian Isra'el sin. 6 Mes nai' Melkisedek naan, ka nai' Lewi in suuf na fa. Maski on naan amsa', mes ka'o Abraham anbati nfeen ee bait bo', natuin nai' Melkisedek naan, atoni' re' mapina'-makraha' ma a'naet. Oras naan, ka'o Abraham antoupu nrair rais manba'an na'ko Uisneno he nfee ne tetus-athoen. Mes maski on naan amsa' nai' Melkisedek na'uab am nak, “Maut he Uisneno A'raat Re'uf anfee ko tetus-athoen.” 7 Ia njair bukti nak, nai' Melkisedek naan, kaes ko'u ma a'naet. Natuin tuaf re' na'uab anfee tetus-athoen, ro batuur ko'u nneis na'ko tuaf re' atoup tetus-athoen naan. 8 A'naak rais pirsait ein, sin ar-arsin anmu'in hak he ntoup bait bo'. Mes neu sin suma mansian biasa, 'roo-'roo te, sin nmaten. A'naak rais pirsait nai' Melkisedek antoup bait bo'. Mes in nmoin piut, natuin Suur Akninu' ka ntui natoon fa nak, in nmaet. 9-10 Natuin ka'o Abraham anbati nfeen nai' Melkisedek bait bo' na'ko baer' ein naan, atoni' bisa natenab ansoba' nak, in nasaah amsa' in sufan-kau'n ein re' ka nahonis sin fa fe'. Nok ranan naan, hit bisa tak, in nbaen anrair in uup-ka'of nai' Lewi in bait bo'.
Hit tperluu a'naak rais pirsait huum fe'u, natuin a'naak rais pirsait amnaa' ka bisa nsaok nain fa sanat
11 Oras nai' Lewi in sufan-kau'n ein anjarin a'naak rais pirsait, Uisneno anpiir naan ka'o Musa in tataf nai' Harun he njair a'naak rais pirsait sin a'naak ko'u. In es re' ahun-hunut. A'naak rais pirsait ein sin meupk ein esan re' nakrira' ma naruru' ranan he atoni' bisa nmoni kninu' ma reko nok Uisneno. Maski sin nmoe' natuin atoorn ein naan ok-oke' msa', mes sin a'naak pirsait on re' nai' Harun ka nabei' fa nakninu' nain sin. Es naan ate sin nperluu a'naak rais pirsait a'teta' re' huma' mese' on re' nai' Melkisedek. 12 Mes karu a'naak rais pirsait huum fe'u ansenu' a'naak rais pirsait amnaa' ate, atoran amnaa' amsa' ro he senu'. 13 Hit tahiin tak, a'naak rais pirsait huum fe'u naan, es re' Nai' Yesus. In na'ko uuf a'teta', ka na'ko fa uuf nai' Lewi. Karu tatuin ka'o Musa in atoran, a'naak rais pirsait on re' nai' Harun, suma na'uu na'ko uuf nai' Lewi nmees, ka na'uu fa na'ko uuf a'teta'. 14 Mes hit tahiin tak, hit Usi' Yesus Kristus re' naan na'uu na'ko uuf nai' Yahuda. Tatuin ka'o Musa in atoran, ka tiit fa a'naak rais pirsait na'uu na'ko uuf re' naan. 15 Mes Uisneno ka npaek fa atoran amnaa' naan, natuin oras ia, Nai' Yesus es re' anjair a'naak rais pirsait huum fe'u on re' nai' Melkisedek. 16 Fin tatuin ka'o Musa in atoran, a'naak rais pirsait amnaa' ein ro he na'uun na'kon uuf nai' Lewi. Mes Nai' Yesus ka na'uu fa na'ko uuf re' naan. Maski on naan amsa', mes Uisneno nait Je njair a'naak rais pirsait huum fe'u, natuin In nmui' kuasa he nmoin piut-piut, ma ka tiit fa es, re' he bisa nareu' Goe. 17 Fin Uisneno In Surat matu'i mnak, “Ho mjair a'naak rais pirsait huma' mese' on re' nai' Melkisedek afi unu' naan, mes Ho mjair a'naak rais pirsait tar antea nabar-baar.” 18 In oetn ii nak, atoran amnaa' ka nmui' fa kuasa he nturun mansian ein. Es naan ate, Uisneno nait napasib atoran amnaa', re' unu' fe'e te, In nfee je neu ka'o Musa naan. 19 Maski atoni' nmoin ma nmoe' natuin atoran amnaa' ein, mes sin nmu'in sanat ma penu fe'. Es naan ate, oras ia, Uisneno anfei ma naruru' raan reko nneis, maut he hit bisa tmoni tbi rais rame' tok Ne.
Nai' Yesus naan, a'naak rais pirsait re' ma'tani' nneis na'ko a'naak rais pirsait amnaa' ein
20-21 Afi unu', oras Uisneno nasaeb nai' Lewi in sufan-kau'n ein anjarin a'naak rais pirsait, In ka nba'an fa, ma ka nahake' fa supat saa'-saa' nok sin. Mes oras Uisneno nasaeb Nai' Yesus anjair a'naak rais pirsait, In nba'an am nak, “Au re' ia, Usi'! Au 'suup, ro tebes Au ka ubani' ma 'senu' fa saa' re' Au 'ba'an a'rari. Au usaeb Ko mjair a'naak rais pirsait, he Ho munaob Ho mepu piut-piut.” 22 Nok ranan In nba'an on naan, Uisneno anpaek Nai' Yesus he njamin neu kit nak, In anroim he nmafutub rais manba'an re' reko nneisi ntein nok kit. 23 Afi unu', a'naak rais pirsait huum amnaa' ro he masenu'-maseka' piut-piut, natuin sin nmaten. Etun anmui' a'naak rais pirsait amfa-faun. 24 Mes Nai' Yesus naan, a'naak rais pirsait huum fe'u re' anmoin nabar-baar ma nanaob In mepu piut-piut. Es naan ate, ka nperluu fa he nmui' asenu' neu Nai' Yesus. 25 Nok rasi naan, Nai' Yesus bisa nsoi nafetin naan mansian ii ok-oke', re' anroim he neem anbin Uisneno. Tuaf ein re' naan antaman natuin Nai' Yesus In ranan. In bisa nmoe' on re' naan tar antea nabar-baar. Ma In njair Tuaf Apesit neu sin anbi Uisneno In matan re' bisa nbaiseun Uisneno piut-piut he nturun ma nbaab sin. 26 Nai' Yesus naan, a'naak rais pirsait a'raat re'uf, re' hit tperluu. Natuin In re' naan Atoni kninu' re' ka nmui' fa sanat saa'-saa'. In re' naan, ka huma' mese' fa nok mansian biasa re' suma nahini haa 'moe' sanat. Fin Uisneno nasaeb na'rat-ratan Nai' Yesus, anneis na'ko are' kanan saa'-saa' ii anbi pah-pinan ma sonaf neno tunan. 27 Es naan ate, Nai' Yesus reko nneis na'ko are' kanan a'naak rais pirsait huma mnaa' sin naan. Afi unu', sin ro he nroron mu'it neno-neno he njarin fua'-turu', he Uisneno nsaok nain sin saant ein kuuk. Rarit na' sin nmo'en fua'-turu' neu biak ein. Mes Nai' Yesus ka nperluu fa he nmoe' fani-fani on re' naan, natuin In nnona' nrair In tuan a'kuun no mese' he njair fua'-turu'. Nana namtiis inrair he Uisneno nsaok nain sanat ma penu mansian sin ok-oke'. 28 Tatuin ka'o Musa in atoran, sin nasaeb mansian biasa he njair a'naak rais pirsait. Mes sin nmu'in sanat fe'. Es naan ate, Uisneno anmoe' rais manba'an fe'u nak, In he nait nasaeb In Anah he njair a'naak rais pirsait a'raat re'uf. Fin In Anah ia, natuin In roimn ee piut-piut.
Uisneno npaek Kristus he nahake' rais manba'an fe'u, re' ma'tani' nneis na'ko rais manba'an amnaa'
1 Onaim au u'uab rais ma'tani' es on nai: oras ia, hit tmu'i trair a'naak rais pirsait re' na'raat ma ma'tani' nneis na'ko ahuunt ein. In re' naan, es re' Nai' Yesus. In ntuun On ma naprenat et sonaf neno tunan anbi bare re' mahormaat re'uf et Uisneno A'raat Re'uf In abnapan a'ne'u. 2 In nanaob In mepu et Uisneno In baer onen batuur. Bare naan, Uisneno neikn On es re' anmo'e, mansian ii ka bisa nmoe' je fa. 3 A'naak rais pirsait sin a'naak ko'u, biasa neik fua'-turu' he nafuat sin neu Uisneno. Es naan ate, Nai' Yesus ro he neik fua'-turu' msa'. 4 Mes Nai' Yesus ka nanaob fa In mepu nbi pah-pinan, natuin anbi pah-pinan ia anmui' a'naak rais pirsait re' anfee fua'-turu' neu Uisneno, natuin ka'o Musa in atoran. 5 Sin nanaob sin mepu nbi Tenar Onen, on re' baer onen batuur et sonaf neno tunan. Fin oras ka'o Musa nroim he nahake' Tenar naan, Uisneno namnaub ee mnak, “Mumnau murek-reko'! Ho ro he mmoe' Tenar naan batuur-batuur mutuin gambar re' Au ukrira' 'rair je 'eu ko, anbi 'toe'f ee tunan!” 6 Mes Nai' Yesus In mepu, ma'tani' nnes-neis na'ko a'naak rais pirsait amnaa' ein. Oras ia, Uisneno nahake' rais manba'an re' reko nneis, natuin In npaek Nai' Yesus anjair nete-ranan he mansian ii bisa nmonin nbin rais rame' nok Uisneno. 7 Un-unu' fe', In nahake' rais manba'an nok ka'o Musa oras In nasanut atoorn ein naan. Maski on naan amsa', mansian ii ka bisa nmoni kninu' fa natuin atoran naan. Nok ranan naan, sin ka bisa nmonin reko fa nok Uisneno. Es naan ate oras ia, perluu he nmui' rais manba'an re' reko nneisi ntein. 8 Fin unu' fe'e te, Uisneno nakain Iin na, natuin sin ntanhai nafan-fain In atoran amnaa'. Oras In ka naran ma ntahan fa ntein ate, In natoo', rarit na'uab am nak, “Amneen mirek-reko', Au re' ia Usi'! Ro tebes! Au ro he uhake' rais manba'an fe'u, 'ok pah Isra'el, 'ok uuf nai' Yahuda. 9 Rais manba'an re' Au he uhaek ee 'ok sin naan, ka huma' mese' fa nok rais manba'an re' unu' fe'e te Au uhaek ee, 'ok sin be'i-na'i sin. Unu' fe', Au 'naa' sin a'niimk ein, he upoitan sin na'kon pah Masir. Mes sin ka nmoe' natuin ein fa saa'-saa' re' sin manbaa'n ein nok Kau naan. Es naan ate, Au ka 'roim he 'toe 'ok sin fa 'tein. 10 Rais manba'an re' au he uhaek ee 'ok pah Isra'el, in afan naan ii, on nai: Au of utunu' ma 'tao Au atoran naan a'bi sin teenb ein naank ein. Au of a'tui Au preent ein a'bi sin nekak naank ein. Rarit Au 'jair sin Uisneno, ma sin njarin Au ngguin. 11 Sin of ka nperluu fa he nanoni' ntein sin partei ngguin, ma sin aok-bian sin im nak, ‘Hi ro he mihiin ma mikeo Uisneno!’ fin sin arsin nahiin ma nakeo Kau nok reko, anmurai na'ko aan-aan muni' tar antea ko'u ma unu. 12 Natuin Au 'roim he ukirira' Au rais kasian 'eu sin, es naan ate, Au 'nikan ma 'niahan 'ain sin saant ein ok-oke'.” 13 Oras Uisneno na'uab nak, In he nahake' rais manba'an fe'u nok sin, in oetn ii nak, rais manba'an amnaa' naan, ka mapake' fa goen. Ka 'roo fa te, in namneuk goen.
Usif Yesus anjair fua'-turu' re' reko nneis na'ko fua'-turu' amnaa' ein
1 Oras ia, au he umnaub ki on nai: oras Uisneno nahake' rais manba'an ahunut naan nok hit be'i-na'i sin, In nfee atoran amsa' he sin nafeen ein baer onen, he sin bisa n'oen ein ma na'besan neu Ne, natuin atoran naan in romin. 2 Anbi baer onen naan, anmui' kintal ma tenar kou' goes. Anbi tenar naan in ke'en a'si'u, anmui' baer paku, ma mei jes re' a'naak rais pirsait ein anpaek je he ntaon uu-tunu' re' he nafuat ee neu Uisneno. Ke'en a'si'u naan, sin nteek ee te nak, Uisneno In Ke'en Akninu'. 3 Anmui' tai-eon kou' goes anpira' nakfiir' ee he nbatis ke'en bian re' sin nteek ee nak, Uisneno In Ke'en Akninu' nneis-neisi. 4 Anbi tai-eno' naan in matan, anmui' naan mei noni es, anpaek je he noutun kemenyaan foo meni' neu Uisneno. Ma anbi Ke'en Akninu' nneis-neis re' naan, anmui' peit noni es, re' sin nteek ee nak, Peit Rais Manba'an. Anbi peti naan in nanan, sin natunu' baer unu' he namnaub mansian anmatoom nok Uisneno In rais manba'an re' in nahake' ma nfutu' nrair je nok sin. Anbi peti naan in nanan amsa' anmui' naan ook beit noni es, re' matua' nok utunu' re' anteek ee nak, manna. Utunu' naan es re' unu' fe'e te, Uisneno nasaunt ee na'ko neon goe tnanan neu sin hit be'i-na'i sin oras sin namnahan nmaten anbin baer ruman. Anbi peti in nanan amsa' sin ntao ka'o Harun in teas ametos re' unu' fe'e te natoor. Ma anmui' faut bena' re' Uisneno anpaek je he nruun In atoran re' In nfee je neu ka'o Musa neno naan. 5 Anbi peti naan in toben, anmui' naan faut maruna' fua' nua. Faut maruun ein naan nahuum on re' Uisneno In ameput re' manini' na'ko sonaf neno tunan, re' anhaken ma nfei sin niink ein mainuan he ntoeb naan peti naan, natuin bare' naan nakrira' Uisneno In rais kasian neu mansian. Mes oras ia, au ka 'mui' fa oras mainuan he u'uab ma 'tui sin tar namnuut anmatoom nok baer' ein naan. 6 Sin nkikin ma nsusun bare' anbi Uisneno In Tenar Onen naan, namneo on re' naan. Rarit a'naak rais pirsait sin anpoi-ntaman neno-neno anbi ke'en naan in a'siun he nanaob sin mepu anbi naan. 7 Mes suma a'naak rais pirsait Yahudi sin a'naak kou' goe es re' he bole ntaam neu Uisneno In Ke'en Akninu' nneis-neisi. Mes in ka bole ntaam fa rafu'-rafu'. In suma bisa ntaam toon es ate, no goes. Onaim karu in ntaam, in ro he neik naa' na'ko mui' fua'-turu', he nbisin Peti Rais Manba'an naan in toben. Naa' naan in sairt ii nak, maut he Uisneno ansaok nain a'naak rais pirsait nok iin na sin saant ein ok-oke', maski sanat re' sin nmoe' sin naan, sin ka nakeo naan sin fa. 8 Uisneno anpaek In Asmaan Akninu' he nmoe' kit he tahiin tak, tai-eno' naan an'eka' ranan fe' he ttaam teu Ke'en Akninu' nneis-neis naan, in oetn ii nak, mansian ii ka bisa napein fa mainuan fa fe' he ntaam antea Uisneno In human ma In matan, oras atoran amnaa' naan anpaek je fe'. 9 Rasin re' ia ok-oke' anjarin a'tope' re' Uisneno In Asmaan ee anpaek je, he nanoni' kit re' amonit oras ia. Unu' fe', hit be'i-na'i sin neik ein saa'-saa' re' he nnona' ma nfee sin ma sin mui't ein re' he njarin fua'-turu' neun a'naak rais pirsait, he Uisneno ansaok ma nnoes nain sin sanat ma penu sin. Maski sin neikin fua'-turu' mfaun on naan amsa', mes fua'-tuur' ein naan ka bisa nakninu' nain fa sin neek ein, ma ka naneuk nain fa sin tenab sanat anbi sin neek ein. 10 Onaim saa' re' sin nmoe' je naan, suma natuin atoran rais pirsait ahaa. Anmui' atoran aprenat nak, sin ka bisa neuk fa ia, ma ka bisa niun fa ia. Anmui' atoran bian nak, sin ro he naniu sin tuak ein, ma nsaef sin baer' ein natuin atoorn ii in romin. Te kaah, atoorn ein naan ok-oke', suma an'ator mansian ii in aon a'pohon, ma ka bisa n'ator fa in nekan. Maski on naan amsa', mes atoran naan, sin ro he nmoe' ma nanaob ee piut, tar antea Uisneno ansenu ma nseka' nok atoran fe'u. 11 Mes oras ia, anmu'i nrair Tuaf re' Uisneno anba'an anrair Je na'ko unu'. Tuaf re' naan, es re' Kristus. In neem anrair he njair hit a'naak rais pirsait a'ratas anneis-neisi, ma In nmo'e nrair rais reko neu kit. In nanaob In meup goe, huma' mese' on re' a'naak rais pirsait amnaa' ein, mes In nmepu nbi baer mepu re' ma'tani' nneis. In baer mepu naan, ka et fa pah-pinan, natuin bare naan ka mansian ii fa es re' anmo'e. 12 Kristus antaam amsa' neu Ke'en Akninu' nneis-neis re' naan, he nbaiseun Uisneno on re' a'naak rais pirsait amnaa' ein anmoe' je toon es ate no goes. Oras In ntaam, In neik naa' he nnona' ma nfee je neu Uisneno. Mes naa' re' naan a'teta' kuun. Kristus ka neik fa naa' na'ko mui't ein sin naa' ein. Naa' re' In neik je naan, es re' In naa' akuun, natuin In nmaet he njair fua'-turu' neu kit. Mes Kristus antaam neik In naa' no mees' aah he nafetin kit na'ko sanat tar antea nabar-baar. 13 Onaim Kristus In naa' naan, batuur ma'tani' nneis na'ko naa mu'it. Tatuin ka'o Musa sin atoran, tuaf asanat, sin n'oemetan, ma ka pantas fa he ntaman ma na'besan neun Uisneno. Sin ro he nnaon neun a'naak rais pirsait ee he ntaon fua'-turu', he fua'-turu' naan in naa' ee nakninu' nafani' sin. Anmui' fua'-turu' mfaun re' npaek naa' 'bibi, ai' naa bijae. Anmui' atoran es amsa' nak, karu tuaf anreo' amates in n'oemetan nrair anbi Uisneno In human ma In matan. Karu tuaf naan anroim he nakninu' nfain, a'naak rais pirsait ro he nait auf nao na'ko bijae tipu' re' fe' notu nrari. Rarit neik auf nao naan he nfui a'oemetas naan, he in nakninu' nfain. 14 Onaim karu naa mui't ii nakninu' nain hit aok a'pohon in 'oemetan, anneis-neis Kristus In naa'. Natuin In naa' naan, nsoi nafetin anrair hit saant ein, ma nakninu' nrair hit nekak nanan. Hit sanat re' naan na'bata' ma nbatis kit na'ko Uisneno. Oras Kristus anmaet on naan ate, Uisneno In Asmanan re' anmoin nabar-baar anturun ma nbaab Ee he In nnona' ma nfee In tuan ee neu Uisneno, nahuum on re' mu'it re' njair fua'-turu' re' ka nmui' fa paap aan'-aan' es amsa'. Onaim oras ia, hit bisa ta'ruri' ma ta'bees rek-reko teu Uisneno Amonit Abar-barat naan. 15 Kristus In naa' ee es re' ma'tain re'uf, etun Uisneno anpaek Je, he nahake' rais manba'an fe'u nok are' tuaf ein ok-oke' re' Uisneno no'en ma nnapen sin he njarin Iin na. Oras Kristus anmaet he nsoi nafetin sin, In nsaok naan hit be'i-na'i sin saant ein un'-unu' naan, oras Uisneno nahake' rais manba'an amnaa' naan. Nok rasi naan, sin bisa nmonin nabar-baran nok Uisneno. 16 Au 'pake 'tope' tuaf atoup pusaak, on re' amaf es anmoe' surat warisan he nfee pusaak neu in anah. Mes ri'ana' naan fe' napein mainuan he ntoup pusaak naan, karu in aamf ee nmaet. 17 Karu amaf naan anmoin fe', ri'ana' naan ka bisa ntoup fa pusaak re' in aamf ee nba'an anrair je anbi surat warisan. 18 On naan amsa' Uisneno In manba'an ahunut re' In nahaek ee nok hit be'i-na'i sin. Sin fe' napenin mainuan he bole ntoup saa' re' Uisneno anba'an anrair je naan, karu es anmaet nahuun. Es naan ate, sin fua'-turu' re' anpaken naa mu'it anjair bukti mnak, anmui' saa' es, re' anmate nrair. 19 Oras naan, ka'o Musa na'bua' hit be'i-na'i sin, he in natoon apreent ein ok-oke' re' matu'i et atoran re' Uisneno nasaunt ee neu sin naan. Rarit ka'o Musa anroor bijae ma 'bibi, ma ntoro' naa', rarit ansero' nok oe. In anpaek kuuf me'e msa' he nfuut hau noo taef. Rarit in nateep ee ntaam neu naa' naan, he nbisin neu Uisneno In Tuis, ma neu too mfaun ein ok-oke'. 20 Oras ka'o Musa anbisin naa' naan, in na'uab am nak, “Naa' re' ia, anjair tanar nak, Uisneno nahake' rais manba'an nok ki. Karu hi mmoe' mituin In apreent ein ok-oke', In of anfee ki are' saa'-saa' re' In nba'an nain sin naan ok-oke'.” 21 Ka'o Musa anbisin naa' naan neu Tenar Onen amsa', ma neu are' baer' ein re' anbin naan, re' sin npaek sin he na'besan Uisneno. 22 Tatuin Uisneno In atoran, haet are' kanan rais 'oemeetn ein ok-oke', ro he takninu' sin atpaek naa'. Nok ranan naan, karu mansian ii nroim he kninu' na'ko sanat ate, ro he naa' ii nsai. 23 Saa' re' au ureta' anmatoom nok hit be'i-na'i sin Tenar Onen naan, naan sin njarin a'tope', he hit bisa tahiin Uisneno In baer onen re' batuur et sonaf neno tunan. Karu a'naak rais pirsait amnaa' sin antaman neun Tenar naan in nanan, he na'besan neu Uisneno, sin ro he kninu' ok-oke', npaek naa mu'it re' npaek je njair fua'-turu'. Uisneno In baer onen anbi sonaf neno tunan ro he kninu' msa'. Mes ro he npaek naa' fua'-turu' re' ma'tani' nneis na'ko naa mu'it. 24 Ke'en Akninu' nneis-neis re' Kristus antaam naan, ka ke'en et Tenar Onen re' mansian ii nmoe' je fa. Fin Tenar anbi pah-pinan naan, suma 'tope' na'ko Tenar re' batuur. Mes Kristus antaam langsung neu sonaf neno tunan he npeis kit anbi Uisneno In human ma In matan. 25 Unu' fe', a'naak rais pirsait sin a'naak kou' goe ro he ntaam nafan-fain toon-toon anbi Ke'en Akninu' nneis-neis naan, ma neik naa mu'it he nnona' ma nfee je neu Uisneno. Mes Kristus ka on naan fa. In suma nperluu he ntaam no mees' aah, neik In naa' akuun. 26 Natuin karu In ro he ntaam toon-toon huma' mese' nok a'naak rais pirsait amnaa' ein naan, rasi ia in oetn ii nak, In ro he nmaet teni-teni, fani-fani, anmurai na'ko oras pah-pinan anjair tar antea neno ia, hena' In nnoes nain are' tuaf ok-oke' in saant ein. Mes In ka nmoe' fa on naan. Fin in oors ii ntea te, In nmaet ma njair fua'-turu' suma no mees' aah, he nait inporin sanat re' mansian ii nmoe' sin. 27 Batuur een, mansian ii nmaet no mese'. Rarit In neem ma nbaiseun Uisneno anbi In human ma In matan, he Uisneno anparikas. 28 On naan amsa' Kristus. In nmaet nok ranan In nnona' ma nfee In tuan he njair fua'-turu' no mees' aah. Ma In of ankoen On anfain neem amsa'. Mes In ka n'urus fa sanat antein, natuin In nasoup mepu nana goen. Mes re' In of an'urus, es re' In he nsoi nafetin neu are' tuaf re' nafnekan ma nharap neu Ne.
Kristus anmaet no mees' aah, he mansian ii bisa nmoin reko nok Uisneno nabar-baar
1 Karu hit troim he tahiin batuur-batuur Uisneno In romin, atoran re' In nasaunt ee neu hit be'i-na'i sin naan, ka mahini' reko fa fe'. Naan suma on re' rais rekon Uisneno sin maofk ein, re' he nfee sin neu kit. Onaim maski atoni' natuin atoorn ein re' naan, neikin mu'it he nafuat sin piut-piut amsa', naan ka bisa nakninu' sin fa batuur-batuur na'ko sin saant ein. 2 Fin karu atoorn ein naan bisa naneuk nain saant ein batuur-batuur ate, sin ka neikin ntein' ein fa mu'it he nafuata' sin, natuin sin nnaben ate sin saant ein anbin sin neek ein namnekun nrarin. Te kaah, ka on fa naan. 3 Fin toon-toon ate sin ntotin teni-teni fani-fani, he Uisneno nnoes ma nsaok nain sin saant ein, 4 natuin ka neu fa he naa mu'it anmui' kuasa batuur he nait inporin mansian ii sanat. 5-6 Es naan ate, Kristus na'uab on nai oras In ntaam neem anbi pah-pinan ia: “Uisneno! Uisneno ka nmariin fa meu mu'i-'turu' ma fua'-turu' bian antein re' sin neik sin. Sin nroor niis nain mu'it amfa-faun, he njarin fua'-turu'. Rarit sin nout mu'it amfa-faun, he ntotin saok sanat. Maski on naan amsa', mes Uisneno In nekan ka nmariin fa. Es naan ate, Uisneno anreek ma nsonu' Kau 'uum a'taam 'eu pah-pinan ia, he 'jair mansian on re' sin.” 7 Rarit Kristus na'uab antein am nak, “Uisneno! Au es ia, tua! Au 'uum he 'moe' utuin Uisneno Ho romim, on re' Ho mafefa kniun' ein antui nain sin anmatoom nok Kau.” 8 Onaim re' Kristus na'uab ee ahuunt aan, es re': “Uisneno ka nmarinan fa mu'i-'turu' ma fua'-turu' bian antein re' sin neik sin. Sin nroor niis nain mu'it amfa-faun, he njarin fua'-turu'. Rarit sin nout mu'it amfa-faun, he ntotin saok sanat. Maski on naan amsa', mes Uisneno In nekan ka nmariin fa.” Onaim maski sin nmoe' natuin batuur-batuur on re' ka'o Musa in atoorn ein, mes Uisneno In nekan ka nmariin fa. 9 Oras Kristus na'uab am nak, “Au 'uum he 'moe' utuin Uisneno Ho romim.” Rasi naan in oetn ii nak, Kristus ntaam neem he nnoes ma nsaok nain ranan amnaa', rarit ansenu' ma nseka' nok raan fe'u. 10 Fin Uisneno In romin, es re' Yesus Kristus anjair fua'-turu' he nmaet no mese' neu mansian kit. Nok ranan naan, In nmoe' kit tjair atoni kninu' tar antea nabar-baar. 11 Neno-mneno te, a'naak rais pirsait amnaa' sin nanaob sin mepun, ma anroron mu'it he njarin fuat. Te kaah, fua'-tuur' ein naan ka nmui' fa kuasa he nait nain sanat mansian. 12 Mes hit A'naak Rais Pirsait A'raat Re'uf, es re' Kristus, annona' ma nfee In tuan he nmate njair fua'-turu' neu kit. Nok ranan In njair fua'-turu' no mees' aah, In nfei ma naruru' ranan he bisa tait itporin tain hit mansian ii saant ein ok-oke'. Rarit na' In nnao ntuun On anbi Uisneno In abnapan a'ne'u, anbi bare re' anhormaat ee nnes-neis. 13 Anbi bare naan, In npao he Uisneno nmoe' In musu sin na'ruir ein ma nhuum fousun neu Ne. 14 In fuat no mese' naan, nafeek piut-piut saant ii in kuasan neu tuaf re' Kristus nakninu' nrair sin. 15 Uisneno In Asmaan Akniun' ee natoon rasi re' naan neu kit msa'. In na'uab niit am nak, 16 “Hi Usi' na'uab nak on nai: Au uhake' rais manba'an fe'u 'ok Au ngguin, Au 'tao Au atoorn ein et sin teenb ein, ma Au 'tui Au preent ein etan sin neek ein.” 17 Rarit In na'uab antein am nak, “Au of ka umnau 'tein fa sin saant ein. Ma Au 'nikan 'ain saa'-saa' re' sin nmoe'-moe' sin naan, oras sin antanhai Au atoorn ein.” 18 Rasi naan in oetn ii nak, karu Uisneno nsako nrair tuaf ein sin saant ein, sin ka nperluu fa he neik fua'-turu' ntein, he nhainiik Uisneno In nekan.
Hit kais tamtau ttein he tbaiseun Uisneno
19 Aok-bian arki! Nai' Yesus n'opa' nrair In naa' ee he nhainiik Uisneno In nekan. Etun oras ia, hit kais tamtau ttein he teem ma tbaiseun Nggoe, et In Baer Akninu' nneis-neisi et sonaf neno tunan. 20 Mimnau Ke'en Akninu' nneis-neisi mnaa' naan! Anbi naan anmui' tai-eno' noo kou' goes re' anpiir' ee ma n'eka' tuaf he kais antaman ma nbaiseun langsung anbi Uisneno. Mes nok ranan Nai' Yesus anmaet re' naan, In nfei ma naruru' raan fe'u, he tuaf bisa na'uab ma nbaiseun langsung neu Uisneno. 21 Anneis-neis, Nai' Yesus anjair a'naak rais pirsait re' ma'tain re'uf, re' antuthae ma n'ator Uisneno In uim je nanan. 22 Natuin naan njair hit hak ate, onaim iim he hit ttaam atbaiseun ma ta'uab langsung tok Uisneno. Mes hit ro he tpirsai batuur-batuur teu Ne nok neek amneot ma amnonot. Fin Nai' Yesus In a'maten naan nakninu' nain hit nekak nanan, tar antea hit ka tatenab fa piut-piut rais maufinu. Ma hit ro he tmoni kninu' msa', on re' a'naak rais pirsait amnaa' ein, ro he naniun fe', na' antaman he ntuthae Uisneno. 23 Iim he hit arkit atnaa' taher-heran saa'-saa' re' hit atmanaku' sin anmatoom nok Uisneno. Ma hit ro he tafnekan ma tharap teu Ne, ma kais tatenab, natuin In ro batuur-batuur anmoe' natuin saa' re' In nba'an anrair je. 24 Ma iim he hit ttaim ranan he to'en ma taskau hit aok-bian apirsait ein, he hit arkit takrira' rais manekat kou'-ko'u ma tmeup meup reko huma'-huma'. 25 Au 'neen a'rair anmui' tuaf bian re' ka nabua ntein' ein fa nok sin aok-bian apirsait ein. Kais on naan, tua! Fin hi ro he mibua he mmaha'tanin nekaf es nok es. Anneis-neis oras re' he Uisneno ankoen On anfain neem re' naan, ka 'roo fa goen. Mimnaub sin on re' naan, tua! 26 Aok-bian manekat arki! Hit tahiin namnuut goen anmatoom nok Kristus In raan reko. Mes karu hit tkoit Nai' Yesus, ma atmoe' sanat piut-piut ate, in oetn ii nak, ka tiit attein fa fua'-turu' 'teta' re' bisa nnoes nain saant ein naan. 27 Hit suma tpao nok rasi mtaus he Uisneno nkoen On anfain neem ma nhukun kit. Fin ai apinat marara' abar-barat naan, nabarab anrair he ntoup ma nout niis tuaf-tuaf re' anraban Uisneno. 28 Unu' fe', karu anmui' tuaf antanhai ka'o Musa in atoran, ma anmui' saksii tuaf nua'-teun on naan ate, tuaf asanat naan ro he ntoup hukun a'maten, ma ka tiit fa rais saok sanat antein. 29 Mes oras ia, karu anmui' tuaf ankana'paar Uisneno In Anah, naan on re' in nkana'paar Nai' Yesus In naa' re' nat'oop he nakninu' nain tuaf naan. Ma in ka ntoe fa Uisneno In rais manba'an re' In nahaek ee ma anfuut goe anpaek naa' re' naan. Ma in nato'ob Uisneno In Asmanan re' nakrira' nrair In nekan arekot neu tuaf naan amsa'. Neu mitenab miit! Tuaf on re' naan of nasaah hukun ma'fena' nneisi ntein na'ko tuaf re' antanhai ka'o Musa in atoran. 30 Uisneno na'uab niit am nak, “Au 'mui' hak he 'baras atoni' in maufinun. Ma Au ro 'tebes he 'moe' on re' naan.” Ma matu'i ntein am nak, “Uisneno naan, Usi'. In of nasanut hukun neu Iin na.” 31 Mimnau te Uisneno anmoin nabar-baar! Mansian ii of aon ee napiip, karu Uisneno anheek naan sin! 32 Hi ro he mimnau oras hi fe' mmurai mihiin rasi anmatoom nok Kristus, rarit hi teenb ein kniun' ein. Oras naan, maski hi mipein ha'mu'it susat nana'renat kou'-ko'u, mes hi maran ma mtahan ma mpirsai piut meu Kristus. 33 Anmui' tuaf re' ankana'paar ki, ma namae ki nbi too mfaun ein sin humak ma sin matak, sin sonak ma sin atnanak. Anmui' tuaf re' anmoe' on naan amsa' neu hi partei apirsait ein. 34 Hi mkasian ma mikrira' neek reko meu tuaf-tuaf re' nataam sin et bui. Karu abakat nabaak naan hi bare' hi mtoup goe nok neek sabaar ma oe tenes, natuin hi mihini mrair mak, hi re' naan of amtoup rais reko nneis, re' abaakt ee ka bisa nabaak ee fa. 35 Etun hi ro he mnaa' miher-heran hi rais pirsait naan. Natuin Uisneno of anbaras neu ki on re' naan. 36 Onaim maran ma mtahan miheer! Natuin karu hi mmo'e mrair mituin Uisneno In roimn ee piut, hi of amtoup saa'-saa' re' In nba'an anrair he nfee ma nnona' neu ki. 37 Uisneno In mafefa kniun' ein antuin anmatoom nok Tuaf re' he nkoen On nfain neem am nak, “Ka 'roo fa goen ate, Tuaf re' he nkoen On nfain neem re' naan, anpoi ma nboor neem. Kais am'oer, fin In ka npa-pao fa. 38 Tuaf re' in neekn ee namneo ma namnoon, Uisneno of ansoi nafeitn ee, natuin in npirsai neu Kau. Mes karu anmui' tuaf antet-koit na'ko Kau, Au nekak ia ka nmariin fa.” 39 Mes hit re' ia, ka tuaf re' attet-koit fa ta'ko Uisneno. Fin tuaf humaf on re' naan, of anbetis ma ma'bata' na'ko Ne. Mes hit re' ia, apirsait teu Uisneno. Rarit Uisneno ansoi nafetin kit he tmoin tabar-baar tok Ne.
Hit ro he tpirsai piut teu Uisneno, nahuum on re' ahuunt ein
1 Karu hit tpirsai Uisneno, in oetn ii nak, hit neek ii na'kii' piut tok Ne. Natuin karu In nahake' nrair rais manba'an he nmoe' saa' es ate, hit tahiin tak, In ro tebes anmoe' natuin manba'an naan. Maski hit ka ttoup fa saa'-saa' amsa', hit tpirsai piut aah. 2 Anmui' tuaf-tuaf na'ko hit be'i-na'i sin re' batuur-batuur anpirsain on naan. Nok ranan naan, Uisneno antoup sin nok reko. 3 Pah-pinan ma neon goe tnanan re' hit tiit sin oras ia, hit tpirsai tak, Uisneno es anmoe' sin ok-oke'. Mes In ka nmoe' sin fa npaek baer es, re' anmui' nain, re' mansian ii bisa niit ma nre'o. Are' saa'-saa' re' ia, anjarin natuin In na'uab anpaek In Kabin ma Prenat kuun.
Nai' Habel
4 Nai' Habel anpirsai Uisneno. Nok ranan naan, in neik fua'-turu' re' reko nneis na'ko in tataf nai' Kain. Uisneno antoup reko neu nai' Habel nok in fua'-turu' naan, natuin in neekn ee namneo ma namnoon. Onaim maski in nmate 'roo goen, mes hit bisa tanoni' fe' na'ko nai' Habel, natuin in rais pirsait naan.
Nai' Hanok
5 Nai' Hanok anpirsai Uisneno msa'. Nok ranan naan, Uisneno nait nasaeb ee ntaam neu sonaf neno tunan, he in kais anmaet. Tuaf-tuaf naim je, mes ka niit ee fa, natuin Uisneno nait nasaeb anrari. Uisneno antoup goe nok reko, fin Uisneno nak, “Nai' Hanok ia, tuaf re' anharineb Au nekak.” 6 Onaim aok-bian arki! Batuur-batuur kniun een. Uisneno ka ntoup reko fa neu tuaf-tuaf re' ka npirsai Je fa. Fin tuaf-tuaf re' he neem ma ntaam neu Uisneno, in ro he npirsai nak, Uisneno naan ro batuur-batuur et na. Ma in imsa' ro he npirsai nak, Uisneno nroim he nturun ma nbaab tuaf-tuaf re' neem ma naim Je.
Nai' Noh
7 Nai' Noh anpirsai Uisneno msa'. Nok ranan naan, Uisneno natoon nain ee mnak, “Noh! Mumnau, he! Au of ureu' pah-pinan ia 'paek noe mahenu' ko'u, re' mansian ii ka niit-niit ee fa fe'.” Maski nai' Noh ka niit niit fa on re' naan amsa', in nneen ma natniin Uisneno. In nmo'e bnao oe he nasaeb in uim je nanan, he sin napenin fetin na'ko siraak. Natuin in rais pirsait naan, Uisneno naan ee njair atoin neek amneot ma amnonot. Mes mansian bian ein ok-oke' re' ka npirsain fa, Uisneno nasanut hukun ma'fena' neu sin.
Ka'o Abraham nasaitan in kua mnaa'
8 Ka'o Abraham anpirsai Uisneno msa'. Nok ranan naan, Uisneno no'en ma nhaman ka'o Abraham am nak, “Abraham! Ampoi ma mnao musaitan ho kuan naan, mnao nai meu bare re' au of ukrira' ma ururu' ko. Bare naan of anjair pusaak neu ho sufa'-ka'uf sin.” Anneen on naan ate, in nmoe' natuin Uisneno In romin, maski in ka nahiin fa he nnao neu mee. 9 Oras in ntea bare naan, in nahake' tenar, ma natua on re' anao-amnemat anbi bare re' Uisneno anba'an he nfee je neu na. Rarit in anah nai' Isak nok in upuf nai' Yakop natuan anbin naan amsa', natuin Uisneno anba'an anrair he nfee bare naan he njair sin pusaak. 10 In nafnekan ma nharap he in of anmoni nbi kota ma'tain es. Fin Uisneno kuun es re' anmoe' gambaran he nafena' kota naan.
Ain Sara'
11 Ain Sara', ka'o Abraham in fee, anpirsai Uisneno msa'. Maski in ka nahoni' niit fa fe', ma namnais re'-reu'f een, mes Uisneno nmoe' je njair ain uuf neu pah kou' goes. Fin in npirsai nak, Uisneno ro tebes anmoe' natuin saa' re' In nba'an anrair je naan. 12 Nok ranan naan, maski in namnais re'-reu'f een amsa', in bisa nahoni' ma nasuuf amfa-faun fe', tar antea ka tiit fa tuaf re' bisa nsoi' naan sin. Fin sin amfauk ein on re' kfuu et neon goe tnanan, ma on re' snaen et tais je ninin.
Sin nai'-ka'o re' anpirsain ma nafnekan neu pah es
13 Hit be'i-na'i sin, ka'o Abraham, ka'o Isak, ma ka'o Yakop anpirsain piut-piut neun Uisneno msa' tar antea oras sin nmaten. Mes sin ka ntoup fa pah re' Uisneno anba'an anrair je naan. Maski on naan amsa', sin nafnekan ma nharap piut nok neek marine, natuin sin niit anrair bare naan na'ko 'roo. Fin sin nmanauk ein nak, sin suma anao-amnemat re' natua ntahan anbi pah-pinan ia. 14 Te kaah, batuur-batuur tuaf re' na'uab on re' naan, sin npa-paon he napein bare he njair sin auf pusaak. 15 Karu pah naan re' hit nai'-ka'o sin anpa-pao goe naan, es re' ka'o Abraham in kua mnaa' ate, ro tebe, ro nmui' oras mainuan he sin nfanin neun naan. 16 Mes pah re' sin npa-pao goe naan, es re' pah re' ma'tani' nneis et sonaf neno tunan. Nok ranan naan, Uisneno antoup sin reko he sin njarin Iin na. Fin In nabarab anrair kota es neu sin et sonaf neno tunan.
Ka'o Abraham annona' ma nfee in anah nai' Isak
17-18 Ka'o Abraham anpirsai batuur-batuur neu Uisneno msa', oras Uisneno nsoba' in neek pirsait naan. Nok ranan naan, in nmoe' natuin Uisneno In aprenat he nnona' ma nfee in anah nai' Isak he njair fua'-turu'. Te kaah, unu' fe'e te, Uisneno nahake' rais manba'an anmatoom nok ri'ana' naan am nak, “Na'ko ho anah nai' Isak re' ia, ho of mupein sufa'-ka'uf amfaun, tar antea sin njarin pah es, re' ma'tain re'uf.” 19 Mes ka'o Abraham natenab anrair nak, Uisneno anmui' kuasa he namonib nafani' amates. Batuur on naan, oras naan in on re' napein nafani' in anah re' anjari nrair fua'-turu'.
Ka'o Isak
20 Ka'o Isak anpirsai Uisneno msa'. Nok ranan naan, in ntoit he Uisneno anfee tetus-athoen neu in anah nai' Yakop ma nai' Esau.
Ka'o Yakop
21 Ka'o Yakop anpirsai Uisneno msa'. Nok ranan naan, oras in he noi nmate te, maski in a'sau'n ee na'kuub ma nnaa' teas, mes in nhaek he na'ruri' ma na'besan Uisneno. Rarit in ntoit Uisneno nfee tetus-athoen neu in anah nai' Yusuf in aanh ein.
Ka'o Yusuf
22 Ka'o Yusuf anpirsai Uisneno msa'. Oras in he noi nmate te, in npirsai nak, Uisneno of napoin In too Israelas sin na'kon pah Masir. Es naan ate, in nba'an nain sin, he sin ro he neik in nuif ein, karu sin nasaitan pah Masir.
Ka'o Musa in ainaf-amaf
23 Ka'o Musa in ainaf-amaf anpirsain Uisneno msa'. Oras in ainf ee nahonis anrair je, sin na'koor ee tar antea funan teun, natuin sin nkius in aon naan reokn ii kah een. Ma sin ka namtausan fa usif pah Masir amsa', maski in aprenat iin na nak, “Amneoka' miis main are' ri'aan moen ein ok-oke' re' bifee Ibranis sin nahonis sin.”
Ka'o Musa
24 Oras ka'o Musa na'nae neem, in anpirsai Uisneno msa'. Natuin unu' fe'e te, usif pah Masir in aan feto nsee' naan ee njair in anah. Maski on naan amsa', mes in ka nroim fa he atoni' naan ee njair usif pah Masir in nonot-asar. 25 In natenab nak, reko nneis in nmoni nbi susat nabu-bua nok Uisneno Iin na. Karu in he nmariin mes in nmoin nok amaufiunt ein, naan ka 'roo fa te, oek' een. 26 In nkonan biak ein ankana'paar ee, natuin in nafnekan ma nharap Kristus, Tuaf re' Uisneno anba'an anrair he nsoun Ee neem. In naran ma ntahan on re' naan, natuin in nahiin Uisneno of anbaras neu ne nok upan re' reko nneis na'ko are' kanan a'mu'if anbi pah Masir naan. 27 Ka'o Musa npirsai Uisneno msa' oras in ntoit mainuan neu usif pah Masir he neik hit be'i-na'i sin anpoin na'kon pah naan. Maski usif naan natoo' mates, mes ka'o Musa ka namtausn ee fa. Ka'o Musa npirsai piut neu Uisneno re' ka mamnita' fa, nahuum on re' in niit kuun Ee goen. 28 Ka'o Musa npirsai Uisneno msa' oras sin nabaarb ein he nasaitan pah Masir. In nmoe' natuin Uisneno In aprenat, ma nreun hit be'i-na'i sin nmo'en Paska ahunut. Oras naan sin nroron a'bib-kase he njair fua'-turu'. Rarit sin nait naa' 'bib-kase naan ma nahoesb ee njair tanar anbi sin umin. Mabe' naan, Uisneno In ameput na'ko sonaf neno tunan neem ma na'maet nain are' kanan aan moen unu anbi pah Masir. Mes in ka ntaam fa he nroor hit be'i-na'i sin anbi sin umin, natuin in niit naa' anbi eno'.
Hit be'i-na'i sin
29 Oras hit be'i-na'i sin anpoin na'kon pah Masir, sin npirsain Uisneno msa'. Es naan ate, Uisneno npoor ma nbia nbatis oe tasi anbi Tais Me'e, he sin nnaon ma npoin ntean panin anbin auf meto'. Mes soraurs ein pah Masir re' anriu' natuin sin naan, anreem anmaten oras sin ntaman nbin bare naan.
Ain Rahap
30 Oras hit be'i-na'i sin antaman ntean nrarin pah Kana'an, sin anpirsain Uisneno msa'. Sin natuin In aprenat. Sin nnaon nfuun natef-tefan kota Yeriko in raem kotif neno hiut. Onaim rame' naan anpee' ma ntaikoib nain. 31 Anmui' naan bifee a'hake' es anbi kota naan, kaan ee bi Rahap. Natuin in npirsai Uisneno, es na' in ntoup nok reko atoin asuntirus na'kon too Israelas sin, ma in na'koro' sin anbin in umi. Rarit Uisneno nareu' nain kota Yeriko nok nain in tuak ein, natuin sin ka nromin fa he nneen ma natniin Ee. Mes Uisneno namnau ain Rahap. Ain Rahap anmoin, natuin in neek pirsait naan.
Tuaf amfaun bian anpirsain neu Uisneno msa'
32 Au bisa u'uab amnanu'-mnanu' a'tein fe' anmatoom nok tuaf bian antein re' anpirsain neu Uisneno. Mes au ka 'mui' fa oras he ureta' tar namnuut anmatoom nok nai' Gideon, nai' Barak, nai' Simson, nai' Yefta, nai' Daut, nai' Samuel, ma Uisneno In mafefa kninu' bian sin. 33 Sin ar-arsin anpirsain neun Uisneno. Nok ranan naan, bian nisan anbin makenat nok usif bian. Bian anna'an aprenat nok neek amneot ma amnonot, he npeis tuaf re' ka nmui' fa sanat, ma anhukun re' asanat. Bian antoupun saa' re' Uisneno anba'an anrair je. Ma bian niis naan meo'-ro'i singa. 34 Bian na'maet ai piin ko'u. Bian Uisneno nsoi nafetin sin na'ko marorot anpaken suni'. Bian ka na'be'in fa, mes Uisneno nha'tain sin ma nfeen sin a'be'if ma'tani'. Bian Uisneno nfeen sin a'be'if ma'tani' he bisa nmakenan, tar sin bisa nbeson ma nriu' na'roob soraur musu sin na'kon bare bian. 35 Bian bifee-fee re' antoup nafani' sin nonot-asar sin, re' Uisneno namonib nafani' sin. Mes bian napenin ha'mu'it ma'tani', natuin sin npirsain neun Uisneno. Sin nromin he nmaten ate es re' reko nneis ji, he sin kais annaon koit Uisneno. Fin sin ka nteet nafeek fa sin rais kua'-nonot nok Uisneno. Onaim sin nafnekan ma nharap nak, Uisneno of nait sin he napenin 'monit arekot anneisi ntein et sonaf neno tunan. 36 Tuaf bian anratin ma nkana'paar sin, bian napenin beso'. Bian sin haek ein anhaip sin anpaken a'hapi' re' anteek ee nak, pasung anbi bui. 37 Bian anmaten natuin anpoir niis sin. Bian anheo niis sin. Bian anmaten suni'. Bian nma'mu'in nmaten, suma nmu'i haa tais anbi aon re' anmoe' je na'ko pasu, natuin atoni' nasusab sin, tar anriu' sin, 38 ma sin naen natuan nbin baer ruman, nbin a'toe'f ein, anbin nuat ein, ma anbin koon ein. Tuaf ankana'paar atoin ein re' ia, ma anriu' sin nnaon natuan nbin baer re'uf. Te kaah, sin pirsait naan ma'tain besi, tar antea tuaf anbi pah-pinan ia, ka pantas fa he natua nabua nok sin. 39 Uisneno anbo'is sin arsin re' ia, natuin sin anpirsai Je. Mes antea oras sin nmaten amsa', sin ka ntoup fa saa' re' Uisneno anba'an anrair je naan. 40 In he nmoe' natuin In rais manba'an naan, anpaek ranan re' reko nneisi. Natuin In nroim he hit arkit bisa tmoin piut tok Ne: es re' hit arkit re' ia re' tahini trair Kristus, ma sin re' anmaten nrarin un-unu' naan.
1 Onaim on mee, hit amonit oras ia? Hit on re' tuaf re' nok anbi mnaenat. Hit be'i-na'i sin re' anpirsain neun Uisneno un-unu' naan, sin on re' akiust ein, re' na'haba' kit. Mes karu hit atmafuut fe' tok hit saant ein, naan hit amnaent ii ma'fena'. Es naan ate, hit ro he tait itporin hit saant ein ok-oke', he hit bisa taen ta'bei'. Fin Uisneno anpiir nain kit arkit een, he hit tok atbi mnaenat re' ia, onaim hit ro he taran ma ttahan tar antea fenis amsoput. 2 Ma oras hit ttaen, hit kais atniik ai' tasneku' 'rii ma 'ne'u, mes atkius teu Nai' Yesus anmees. Natuin In es re' anfei ma naruru' ranan he hit bisa tpirsai Uisneno. Ma In of anturun ma nbaab kit he bisa tpirsai piut-piut tar namsoup. Hi mimnau, ai'? Oras Nai' Yesus napein ha'mu'it ma ma'ne'at anbi hau nehe, atoni' anraitn Ee ma nkana'paar Ee, mes In naran ma ntahan. Natuin In nahiin nak, In ha'mu'it naan oek' een, In neekn ee of anmainua ma nmariin. Naan ro batuur. Fin In nmate nrair, onaim Uisneno nait nasaeb Ee ma ntook et Uisneno In abnapan a'ne'u, he Sin nua sin napreent ein bu'-bua'. 3 Maski biak ein anmo'en maufinu neu Ne, mes In naran ma ntahan piut. Onaim hi kais amnikan Nai' Yesus In ha'mu'it ia, he hi bisa maran ma mtahan piut-piut amsa', ma kais am'oer.
Uisneno nroim he nakain kit he nanoni' kit, on re' mahoint es nanoni' in anah
4 Hi mraban amrair rais maufinun, mes hi ka mraban ma'tani' tar antea hi naa' ii nsai fa fe'. Ai', on mee? 5 Of oni' hi mnikan amrair Uisneno In Kabin ma Prenat re' In natoon anrair neu ki, on re' mahoint es na'uab nok in anah am nak, “Anah! Karu hit Usi' anhukun he nanoni' ko, he ho mmoin mutuin raan a'honis amneot-amnonot, ho kais amkoson uab ein naan ma musmeru' sin! Ma karu In nakaina' he nanoni' ko, ho nekam naan kais nabait. 6 Hit Usi' nakaina' he nanoni' tuaf re' In neek ee. Batuur, are' tuaf ein ok-oke' re' In antoup sin anjarin In aanh ein, In ro he nakaina' sin he nanoni' sin.” 7 Onaim karu Uisneno nakaina' he nanoni' ki he mmoin mituin ranan re' batuur ate, maran ma mtahan ambi rasi naan. In nmoe' on re' naan, natuin hi mjari mrair In aanh ein. Fin mahoint ii ro he nakaina' ma nanoni' in anah, tar antea ri'ana' naan nahiin 'monit re' natuin raan reko. 8 Fin karu Uisneno ka nakaina' fa he nanoni' ki on re' In anah bian sin, rasi naan in oetn ii nak, hi re' naan, hi ka anah Uisneno ki fa. 9 Hit biasa thormaat hit mahoint ii anbi pah-pinan ia, natuin in nakaina' he nanoni' kit oras hit ana' fe'. Naan ro batuur. Mes anneis-neisi ntein' ii, hit ro he tneen ma tatniin Uisneno, natuin In re' naan, hit Ama' et sonaf neno tunan, ma In nroim he nakaina' kit he nanoni' kit he tmoin tatuin In raan amneot ma amnonot. 10 Hit mahoint ein, nakaina' he nanoni' kit suma oras akre'-reo' goah, natuin saa' re' in nak reko. Mes Uisneno nahini nneis saa' re' tperluu he hit tanoin ee. Es naan ate, In nakaina' he nanoni' kit he tmoni kninu' on re' Iin. 11 Batuur! Karu nakaina' kit, hit neek ii ro nabait. Mes a'roo-'roo te, hit neek ki n'oeteen ma na'tena', natuin hit tahini trair he tmoin tatuin Uisneno In romin. 12-13 Aok bian ar-arki! Miheran hi 'niim ein re' an'oren nrarin naan, ma mha'kaaf hi haem ein re' ma'feen' ein naan. Kais maen penu-penu, mes maen amneof aah, he bian re' ka bis-bisa fa goen ate, bisa napenin ma'tanif he bisa naenan piut. Hi ro he mha'tain hi neekm ein naan, he maran ma mtahan, ma mpirsai meu Kristus.
Kais amtorak Uisneno In nekan arekot neu ki
14 Aok-bian apirsait ein meu Kristus! Hi ro he mpasan hi tuam ein naan he mmoin nok rais rame' es nok es. Ma m'usaha he mmoin nok akninu'. Fin tuaf-tuaf re' ka kninu' fa, ka bisa niit fa Uisneno. 15 Ammaha'tanin ma mma'haba' es nok es he kais anmui' tuaf na'ko ki re' ntet-koit ma nasaitan ki, tar sin ka nnaben naan fa Uisneno In nekan arekot. Ampanat mirek-reko' he kais anmui' tuaf neekn ee nameen anbi hi sonam ma hit tnanam. Fin karu on naan ate, in of anjair on re' raso re' nameun ma nareu' too mfaun. 16 Ampanat amsa' he kais anmui' tuaf re' nbeoka' in nekan ma anteib neu rais sona'. Rarit ampanat amsa' he kais anmui' tuaf re' ka ntoe fa Uisneno, on re' nai' Esau. Nai' Esau naan, ka'o Isak in aan moen unu. Neon goes ate, nai' Esau nfain neem nok tai ruman. In ntoti mnahat a'piik es na'ko in orif nai' Yakop. In nfee in hak aan moen unu njair baen neu mnahat naan. 17 Mes hit tahiin tak ka 'roo fa te, nai' Esau anmei' jon. Natuin oras aam Isak he ntoit Uisneno he nfee tetus-athoen neu aan moen unu, nai' Isak ka bisa ntoti ntein fa goen, natuin nai' Esau na'sosa' nporin nok ruum-ruum aah hak aan moen unu naan. Etun maski in nkae npin-pinus amsa', in ka bisa napein nafani' fa saa' re' in nporin anrair je. 18 On nai, aok-bian arki! Hit bisa teem atrair teu Uisneno In human ma In matan, tatuin raan fe'u re' In nfei nrair je neu kit. Mes un-unu' fe'e te, hit be'i-na'i sin ka bisa fa on naan. Oras naan Uisneno nahake' rais manba'an nok sin, oras sin nbin a'toe'f es, kaan ee Sinai. Anbi 'to'ef naan in tunan anmui' ai apinat. Anmui' ain ko'u msa'. Ma 'to'ef naan meis'ookn ii an'aum naan ee msa', tar sin namtaun nmaten. 19 Sin anneen toi's ee nahaan, rarit Uisneno In hanan re' ma'tain re'uf naan anpoi neem na'ko 'to'ef naan. Anneen Uisneno In uaban on naan ate, sin namtaun piut, tar antea sin ntoit ka'o Musa nak, “Airoo! Hai ka bisa mtahan maan fa goen. Hanaf ia ma'tain re'uf!” 20 Sin batuur-batuur ka bisa ntahan naan fa, natuin saa' re' Uisneno naprenat neu sin naan, ma'feen re'uf. Natuin in naprenat am nak, “Ka bole fa he nmui' tuaf anteri nbi 'to'ef ia! Maski mansian, ai' mu'it! Sekau-sekau re' anteir a'to'ef ia, ro he mpoir miis ne nmaet.” 21 Saa' re' sin niit ee anbi 'to'ef naan, batuur-batuur sin napipin sin aok ein, nasmanan ma namtaun nmaten. Tar antea ka'o Musa msa' npuus anmeit-meit. 22 Mes oras ia, ranan he tnao teu Uisneno natsoi nrair, ma hit bisa ta'uab langsung tok Ne. Oras ia hit teem teu toe'f es, kaan ee, Sion. Anbi bare naan, kota Yerusalem et naa. Ka kota Yerusalem pah-pinan ia fa, mes kota Yerusalem fe'u et sonaf neno tunan, es re' Uisneno In bare 'tokos. Anbi naan, Uisneno In ameupt ein sonaf neno tunan namfa-faun, re' anfeest ein rame-rame. 23 Anbi kota naan amsa', anjair bare re' na'bua' naan apirsait ein neun Kristus. Fin Uisneno anmo'e nrair daftar he ntui sin kaank ein tuaf mese'-mese' et sonaf neno tunan. Anbi naan amsa' Uisneno of anparikas ma nfee nilei neu tuaf-tuaf sin ok-oke' sin a'moink ein. Anbi bare naan amsa' are' tuaf ein ok-oke' nabuan, re' un-unu' fe'e te, Uisneno antoup sin reko, natuin sin anpirsain neu Ne. Anbi naan, sin anjarin tuaf re' nanokab ma namtiis. 24 Ma nbi naan amsa' Nai' Yesus et naa, re' anjair nete-ranan neu Uisneno nok mansian. Nai' Yesus anmaet, In naa' ee nat'oop ma nasai, he Uisneno bisa nahake' rais manba'an fe'u nok kit. Etun Nai' Yesus In naa' naan, anhainiik Uisneno In nekan. Mes re' ia a'teta' na'ko nai' Habel in naa' anbi reta' ahun-hunut naan. Oras nai' Kain anroor niis nai' Habel, nai' Habel in naa' re' nat'oop naan, anmoe' Uisneno In neekn ee maputu', tar antea In nasanut ma nfee hukun neu nai' Kain. 25 Ampasan hi ruikm ein mirek-reko' he mneen saa' re' Uisneno anroim he na'uab ee neu ki. Kais ammoe' on re' hit be'i-na'i sin, re' antorak nain ka'o Musa in uaban oras in njair Uisneno In mafefa kninu' anbi pah-pinan. Rarit Uisneno nasanut ma nfeen sin hukun. Saa' antein hit! Karu hit ka tneen ma tatniin fa Uisneno In uaban na'ko sonaf neno tunan, ro batuur In hukun kit ma'fena' nneis. 26 Oras hit be'i-na'i sin anhaken nbin a'to'ef Sinai, Uisneno In haan ee ma'tain re'uf, tar antea auf gui na'beko'. Oras ia, In nahake' rais manba'an nak, “Au of u'beko' auf gui no goes antein, mes ka neu fa haa, he auf gui nmees na'beko', fin neon goe tnaan ee msa' na'beko' nok.” 27 Oras Uisneno na'uab nak, In he nmoe' are' saa'-saa' ii na'beko' “no goes antein”, in oetn ii nak, Uisneno nroim he na'beko' saa'-saa' ein re' In nmoe' sin, et neon goe tnanan ma pah-pinan, tar antea re' ka bisa ntahan fa, namnekun nfinin. Re' mee bisa ntahan ate, naan natua nabaar. 28 Uisneno annaa' aprenat et sonaf neno tunan. Naan ka bisa namreu' fa. Reko kuun! Natuin In nroim he ntoup ki mtaam amjair Iin na nbi bare naan, iim arkit attoit makasi teu Ne, ta'ruri' ma ta'bees teu Ne, ma taikas ta'rat-raatn Ee natuin In re' naan ma'tain re'uf! 29 Mes hit ro he tpaant ok amsa', natuin Uisneno In to'os, nahuum on re' ai re' nout nain are' kanan saa'-saa' ii ok-oke' tar antea nputun nmaten.
Hit ro he tmoin reko es nok es
1 Aok-bian manekat arki! Anmui' naan rasi bian antein re' au he umnaub sin 'eu ki. Kais amnikan he mmaneek piut meu hi aok-bian apirsait ein. 2 Kais amnikan he mtoup tuaf-tuaf re' hi ka mihiin sin fa oras neman npoin ki. Natuin anmui' hit aok-bian sin re' anmoe' niit ee on re' naan. Namuni te na' sin nahinin nak, tuaf ein re' naan Uisneno In ameupt ein na'kon sonaf neno tunan. 3 Kais amnikan he mnao mkius abitan bui, re' antaman bui natuin sin npirsain neun Kristus. Es naan ate hi ro he mturun ma mbaab sin, on re' hi es re' amtaam bui. Kais amnikan he mturun tuaf-tuaf re' napenin ha'mu'it. Am'urus sin rek-reko, on re' hi kiim es re' mipein ha'mu'it naan. 4 Rais matsaos et bifee-atoni' naan, kninu'. Mes kais-kaisa' matsao kninu' naan, anjair 'oemetan. Uisneno of anfee hukun neu tuaf-tuaf re' anmakoin nok es, re' in ka fee ja fa, ai' in ka moen ja fa. 5 Kais mikoman roit. Mes hi ro he mmoin nok saa' re' hi mmui' sin naan. Fin Uisneno na'uab am nak, “Au ka neu he 'nikan ki fa. Au ka neu he usaitan ki fa.” 6 Onaim amha'tain hi neekm ein naan, on re' matu'i mnak, “Natuin Au Usi' he nturun ma nbaab kau, onaim au ka umtau fa. Natuin ka tiit fa tuaf es amsa', re' bisa noik naan kau.”
Kais amtebi mfain mituin atoran rais pirsait amnaa', mes ampirsai piut meu Kristus
7 Kais amnikan hi a'naakt ein re' nanoni' niit ki Uisneno In Kabin ma Prenat sin. Mitenab mirek-reko' sin a'moink ein, ma mait i'tope' na'ko sin neek pirsait naan. Saa' re' sin npirsai je naan, es re': 8 Yesus Kristus naan, re' ka na'bani' niit fa. Na'ko un-unu' fe', ntea oras ia, ma ntea nabar-baar, In nabaar kuun. 9 Nok ranan naan, hi kais mitun-tuin ahaa noni' re' ansaan. Uisneno nha'tani nrair hi neekm ein, natuin In nakrira' nrair In nekan arekot neu ki. Ka natuin fa rasi nak hi mituin atoran rais bukaet ii. Atoran huma' re' naan, ka ma'upan ma ma'osa' fa. 10 Un-unu' fe'e te, anbi kintal Uisneno In Tenar Onen, anmui' mei fuat es he ntaon mu'it-turu'. A'naak rais pirsait re' natuut ein anbin naan anmu'in hak he nbukae sisin re' anbin mei naan. Mes oras ia, hit tmui' mei 'teta'. Ma a'naak rais pirsait huma mnaa' ka nmui' fa hak he nbukaen anbin naan. 11 Unu' fe'e te, toon-toon ate, a'naak rais pirsait sin a'naak ko'u, neik naa mu'it he ntao goe neu Uisneno In Ke'en Akninu' nneis-neis. Nok ranan naan, Uisneno nnikan nain sin saant ein. Rarit sin neik mu'it naan ma nout goe anbi kuan ee kotin. 12 On naan amsa' Nai' Yesus. In njair fua'-turu' he Uisneno bisa nnoes nain mansian ii saant ein. Oras In napein ha'mu'it naan, sin nheer neik Je, ma na'maet Je anbi kota Yerusalem in kotin. 13 Nok ranan naan, iim arkit atnao teu Nai' Yesus, he hit tpirsai Je piut-piut. Maski tuaf ankana'paar kit imsa', hit ro he tabarab he ttoup on re' Nai' Yesus. 14 Fin hit suma tatua ttaahn ahaa atbi pah-pinan ia. Mes hit tharap he tatua ma tamaik atbi kota fe'u es et sonaf neno tunan tar antea nabar-baar. 15 Natuin Nai' Yesus anjair fua'-turu' neu kit, es naan ate, hit ka tperluu fa he teik mu'it antein teu Nai' Yesus. Mes anmui' fua'-turu' 'teta' re' hit ro he teik je teu Uisneno, es re' siit pures-bo'is re' naikas ma na'ratan In kanan. 16 Ma kais amnikan he mmoe' 'moe' reko ma rais reko meu tuaf bian. Karu sin nperluu saa' ate, amturun ma mbaab sin. Naan anjair on re' fua'-turu' re' anharineb Uisneno In nekan. 17 Hi ro he mneen ma mitniin tuaf-tuaf re' sin n'urus ki. Sin npafa' ma npanat hi smaanm ein fai-manas. Sin of nataah sin 'meupk ein naan anbi Uisneno In human ma In matan. Onaim amneen mirek-reko' meu sin, he sin bisa nmo'en ma natoon saa'-saa' nok neek marine. Kais-kaisa' sin natoon saa'-saa' nok neek akrati' ma asusat, natuin hi misaitan Yesus Kristus In raan a'honis amneot. Nok ranan naan, hi ka mipein fa upan amtein.
Atui surat re' ia nasaeb sukuur, ma n'onen ma nteek atoin Ibranis sin
18 Amturun ma mbaab kai piut-piut ambi onen-totis ma mteek kai. Fin hai neekm ein batuur namneon, ma hai mromi msa' he mmoe' rais reko piut. 19 Anneis-neisi nteni', am'onen he au bisa 'fain 'uum rabah 'eu ki. 20-21 Uisneno naan, es re' ntaininab naan hit nekak. Au 'toit Je he nturun ma nbaab ki, he hi bisa mmoe' mituin In roimn ein ok-oke'. Au 'toti msa' he In nturun kit arkit, he hit bisa tjair tuaf-tuaf re' bisa nharineb In nekan. Natuin Uisneno npake nrair Yesus Kristus In naa' re' nat'oop, he nahake' rais manba'an fe'u neu kit. Rais manba'an naan, nanaob on piut tar nabar-baar. Rarit Uisneno namonib nafani' hit Usi' Yesus Kristus re' naan. Oras ia, Nai' Yesus anpairoir ma natuuk kit on re' atuuk reok goes. Es naan ate, hit taikas ma ta'ratan In kanan, ma tbo'is ta'naeb Ee piut-piut. Naan ro batuur, tua!
Saloom
22 Aok-bian manekat arki! Au 'toit he hi mtoup reko au faineekt ein ia nok neek marine. Natuin surat re' ia, suma paar aah. 23 Anmui' beno re' au 'roim he hi arki mihiin ok-oke'. Beno naan es re': hit aok-bian nai' Timotius anpoi nrair na'ko bui. Karu in neem rabah neu kau, hai nua kai of meit imkius ki. 24 Au 'sonu' haan tabes ma haan buseet neu a'naakt ein, ma haan tabes neu apirsait ein neu Yesus Kristus. Aok-bian sin na'kon propinsi Itali msa' ansoun ein haan tabes ma haan buseet. 25 Au 'toit he Uisneno naruru' ma nakrira' In nekan arekot neu ki ar-arki. On re' naan, tua!
Tabe ma han buseet
1 Tabe ma han buseet na'ko kau, nai' Yakobus. Au re' ia, ameput 'eu Uisneno ma hit Usi', Yesus Kristus. Au 'tui surat re' ia, ma 'soun ee neitin ki atoin Yahudis re' hi mituin mirair Usif Yesus, re' hi mitua et are' pah-pah.
Karu nmui' ha'mu'it, mnaran ma mpirsai piut meu Uisneno
2 Aok-bian arki! Au he utoon ki on nai: karu hi mi'euk mok susat huma'-huma' te, kais amneek 'oer. Amtoup susat naan nok neek marini, natuin namuni te of reko. 3 Fin hit tahiin tak, karu hit tnaran atbi susat on nana te, ma hit tsoi taan ok ta'ko furit pah-pinan, ma hi mpirsai piut fe' meu Uisneno, naan na' nmoe' hi neek mein aan ntainiin ein, karu hi mipein rais furit pah-pinan bian. 4 Hi kais amteet-koit mi'ko susat. Maut he hi bisa minoni' he mnaran ambi susat, tar antea hi minokab ma mitiis jom. Nok ranan naan, hi mjair tuaf re' mimnasi mbi mmo'et ma taos, ma ka mkuran fa saa' es amsa'.
Attoit saa' es na'ko Uisneno, ro he neek ki kais na'oni'
5 Karu na'ko hi arki, re' amnabeen hi tuam ein ka mihiin fa rana 'po'i na'ko susat, hi bisa mitaan meu Uisneno, re' nahiin are' saa'-saa'. In es re' bisa nakrira' rana' po'i neu ki. In es re' anfei ranan nok neek marine, ma In ka nato'on ki fa, karu hi mtoit Je. 6 Mes karu amtoit Je, ro he neek maan kais na'oni'. Hi ro he mpirsai batuur-batuur mak, In bisa nfee saa'-saa' re' hi mtoit je naan. Natuin, karu hi mtoit nok neek a'oni', hi mjair on re' okin re' anpee' ma nrik-raak nok piut-piut natuin ain ko'u. 7-8 Tuaf-tuaf re' an'aijoo' gon ate, rabah ate in neek ne ka natea fa nbi are' kanan rasi. Kais mifnekan mak in of napein saa'-saa' na'ko Uisneno.
Ama'mu'it ma amu'it
9 Atoin ama'mui't ein re' anpirsain nrarin neun Usif Yesus, sin ro he nharinib sin neek ein, natuin Uisneno nait sin injarin In nonot-asar sin. 10-11 Ma atoin amui't ein re' anpirsain nrarin neun Usif Yesus, sin imsa' ro he nmarinan, natuin Uisneno nanoni' sin he kais nabe'on. Oras ia, sin nahinin batuur, nak, sin a'mui' kein of namnekun, on re' fuboon aan, re' nasuuf ate reok ni kah een, mes ka 'roo fa te, manse nsae ma ntaha' fubona' naan, rarit namneen. On nana msa', atoin amu'it sin. Maski sin ntaisibun nok sin uruusn ein, mes sin namnekun konon amsa'.
Are' kanan rais reko mneem ii na'ko Uisneno, mes rais maufinu ka na'ko fa Uisneno
12 Uisneno anfee tetus-athoen neu tuaf-tuaf re' naran anbi rais furi' pah-pinan tar antea npoi nkoon. Rarit in ntoup in upa 'honis re' Uisneno nba'an anrair he nfee je neu tuaf-tuaf re' anneek Ee. In ntoup in upan on re' atopu kra-mnatu. Atoin Yunanis nfee 'piru' 'nakaf neu apein juara nbi 'ba'et 13 Mimnau mirek-reko'! Karu anmui' tuaf na'ko hi ar-arki re' napein rais furi' pah-pinan, ma nroim he nmoe' sanat, kais mikuu, mmak, “Nana, Uisneno es ansoba' kau!” Natuin Uisneno ka nroim niit fa he nmo'en nsaan. Ma In imsa' ka nsoba' niit fa es, he tuaf nana nroim he nmo'e nsaan. 14 Natuin saant ii npoi na'ko atoni' in neek ne kuun. Nahunu te, in nekan naan anroim he nmoe' amre'ut, rarit in nmurai natenab neu-mneem he nmoe' rais re'uf. 15 Onaim in nmoe' natuin tenab amre'ut naan. Namuni te, Uisneno nhukun na'maet tuaf-tuaf re' anmo'en amre'ut. 16 Aok-bian manekat, arki! Kais es napoi ki npaek rasin re' ia. 17 Rais maufiun ii ka na'uun fa na'kon Uisneno. Mes In nfee kit tetus-athoen reko, ma are' saa'-saa' re' nakninu' msa'. In es re' anmoe' manas, funan ma kfuun sin. Sin ar-arsin an'oins ok et neng goe tnanan, ma nmoe' sin maof kein na'bain ein piut-piut. Suma Uisneno kuun es re' ka na'bani' niit fa. 18 Uisneno nareon neu kit on nai: In nfee In Kabin ma Prenat amneot neu kit. Ma In npaek In Kabin ma Prenat naan, he namonib kit. Na'ko are' kanan saa'-saa' re' In nmoe' sin anbin pah-pinan ia, In npiri nrair kit he tjair In hau fua unuf.
Amneen ma mmoe' mituin Uisneno In Kabin ma Prenat
19 Aok-bian manekat arki! Mimnau! Noni'-taru' areokt ii, on nai: kais mi'uab ruum-ruum aah. Reko nneis, karu nmui' tuaf bian na'uab reko, hi mneen rek-reko. Ma kais mana fa te mitoo'. 20 Natuin karu mitoo', atoni' ka neu he nmoe' fa rais reko natuin Uisneno In romin. 21 Onaim, hi ro he misnasaab hi tuam ein na'ko moe' sanat, nahuum on re' atoin tani, antoof in rene, rarit nout makrauf ein naan. Ma hi msa' ro he mtoup Uisneno In Kabin ma Prenat nok neek a'paran. Kabin ma Prenat naan, on re' fini re' ansenan sin et hi nekam. Karu hi mmoe' on nana te, Uisneno of nafetin nain ki na'ko hi saant ein ok-oke', ma In ntoup ki, rarit hi mmoin mok Ne nabar-baar. 22 Ma karu hi mihini mrair Uisneno In Kabin ma Prenat sin ite, hi ro he mmoe' mituin sin. Kais amneen aah! Karu hi mneen ahaa, ma ka mmoe' mituin fa, hi mipoi hi tuam ein kuum. 23-24 Karu atoni' anneen anrair Kabin ma Prenat naan, ma ka nroim he nmoe' natuin sin fa, in on re' tuaf re' ankius in human et ninu. Mes oras anniun narair ma nasaitan ninu nana te, in nnikan nain in human. 25 Mes hi kais amnikan he mparikas mirek-reko Uisneno In Kabin ma Prenat re' namtiis naan, re' bisa nsoi ma nafetin naan atoni' na'ko in saant ein ok-oke'. Uisneno of anfee tetus-athoen neu ki anbi are' kanan saa'-saa' re' hi mmoe' sin, asar ramu hi mneen ma mituin In Kabin ma Prenat. Kais ar antaam anbi hi rukim a'rii, rarit anpoi nkono npeo' hi rukim a'ne'u. 26 Karu tuaf-tuaf anpaas ok nak sin atoin apirsait, mes ka nafreu nahiin fa in fefan, tuaf nana in napoi in tuan aa kuun. In pirsait aan, parsuum aah. 27 Natuin rais pirsait re' akniun ii, ka n'oe-meet kuun fa. Nana es re' anharinib Ama' Uisneno In nekan. Rais pirsait re' batuur on naan, in nmoe' tuaf-tuaf am anromin he nturun ma nbaab bifee baun ein, ma kome'-manat sin. Tuaf-tuaf re' na'kii' inbi rais pirsait on naan, ka nrae natuin fa furi' na'ko rais amre'ut.
Kaisa' mbetis, mak a'naet ai' a'baut
1 Aok bian arki! Anmoe' on mee m'es hi bisa mak hi mpirsai Yesus Kristus, hit Usi' re' amasat naan, karu hi mpiir humaf? Kais on naan! 2 Karu nmui tuaf nua ntaman neu hi uim onen. Es anpaek tai-arimat, ma nakreen kreni mnatu naheun in akrurun. Es antein anpaek tai kro-roef. 3 Rarit hi mtaisiub ma mseun meu apaek tai-arimat, he mfee ne 'took arekot mbi maat. Mes apaek tai kroef naan, hi mreen goe mmak, “Mhake mbi kotin ne! Kah fa te, amtook meu afu!” 4 Nok re' ranan hi mpiir humaf naan, hi on re' afeek rasi re' ka natai fa. Sarit amreu't ii, in es nafreu ki. 5 Aok-bian manekat arki! Uisneno anpiir naan atoin a'baut anbi pah-pinan ia, he sin anpirsain ma'tani' neu Ne, on re' anbin sin neek ein anmu'i 'mu'if. Ma In imsa' anpiir sin, he sin imsa' napenin sapaaf ma nama' et Uisneno In sonaf neno-tunan, re' In nba'an he nfee je neu tuaf-tuaf re' anneek Ee. 6 Mes nok ranan hi mpiir humaf on naan, hi mmoe' he mi'paran atoin a'baut sin. Te kah, sin ka nmo'en fa maufinu saa'-saa' neu ki. Hi mnikan aa, oo? Atoin amui't ein es re' nasusab niis ki. Ma sin es re' nati' te, namin rasi huma'-huma', ma nhera-nfonat ki meu umi feek rasi. Sin es npaar minan, on nai te hi mpaar nesan. 7 Hi re' naan Usif Yesus In nonot-asar sin. Mes atoin amui't ein, sin es re' na'uab na're'uf Usif Yesus In kanan arekot. On mee m'es hi maen mituin sin? 8 In areok ni, hi mmoe' mituin Uisneno In atoran es, re' ma'tani' nneis, nak, “Ho ro he mneek ho aok-bian sin, namnees on ho mneek ho tuam.” Atoran naan matu'i et Uisneno In Suur Akninu'. 9 Mes karu hi mpiir humaf, ma mhariin ahaa atoin amui't ein sin nekak, nana mtanhai mrair Uisneno In atoran. Natuin Uisneno In Atoran Hukun ate, hi msaan amrair. 10 Tuaf re' anmoe' natuin Uisneno In Atoran Hukun sin ok-oke', mes karu in ntanhai mees aah, nana huma' mese' on re' in ntanhai nain Sin ok-oke'. 11 Uisneno anfee nrair prenat nak, “Kais ammakoin karu ka fee-mone fa.” In imsa' anfee prenat bian, nak, “Kais mi'maet atoni'.” Onaim, karu hi ka mmakoin fa, mes mi'maet atoni', nana hi mtanhai mrair Uisneno In Atoran Hukun. 12 Onaim karu hi mroim he mi'uab, ai' he mmoe' rais jes, hi ro he mimnau, mak: Uisneno of es nafeek karu hit tmoe' tatuin In atoran he tmaneek es nok es, ai' kah. Natuin atoran naan bisa nafetin kit na'ko In hukun. 13 Natuin Uisneno ka nkasian fa tuaf re' ka nmui' fa rais kasian neu tuaf bian sin. Mes karu hi mmui' rais kasian meu tuaf bian, Uisneno of anmui' rais kasian neu ki msa'. Hi kais mimtau mak hi of mipein Uisneno In hukun, natuin In nso'i nrair hi rais kasian sin.
Karu hit tpirsai batuur-batuur teu Uisneno, hit ro he tmoe' tatuin In Kabin ma Prenat
14 Aok-bian arki! Karu anmui' tuaf nak in npirsai Uisneno, mes ka nmoe' fa saa'-saa' he nakrira' in rais pirsait naan, nana ka ma'osa' fa. Pirsait on re' naan, ka neik je fa neu rasi 'honis. 15 Karu anmui' atoni' ai' bifee re' anperuu batuur-batuur, es re' ka nmui' fa pake-nohas, ai' ka nmui' fa mnahaat. 16 Karu hi suma mak, “Mnao murek-reko! Maut he Uisneno es anfee ko tetus-athoen. Kais ain ne ntaman ko! Kais mumnaah ammaet!” Uab ein nana ka ma'upan fa, karu hi ka mikrira' fa rais maturun-mababat meu sin. 17 Onaim, ka nanokab fa, karu ho mak, ho mpirsaa jah! Karu ho mpirsaa jah, mes ka mmoe' mutuin fa ho rais pirsait naan, in ka ntaam fa ‘rais pirsait’ antein. Karu on nana te, in on re' rais pirsait re' anmate nrair, ma ka ma'upa' fa saa'-saa'. 18 Anmui' tuaf bian bisa na'uab am nak, “Bisa tpirsai ha Uisneno, mes ka tmoe' fa rais reko. Bian antein nmo'en rais reko, mes ka npaek fa Uisneno In kanan.” Mes in rais ni on nai: bukti na'ko ho rais pirsait aan, es re' ho mmoe' rais reko. Mes karu ho ka mmoe' fa rais reko, au ka bisa fa he iit bukti na'ko ho rais pirsait naan. Au bisa ukrira' au rais pirsait natuin ranan au 'moe' rais reko. 19-20 Ho mutuin noni' re' nak, “Uisneno naan, In mese' kuun. Ka nmu'i ntein fa bian.” Reko msa'! Mes niut reu'f ein sin reko nneis na'ko ko, natuin sin npirsain on re' nana msa', tar antea sin namtau nmaten. Onaim kais mitenab mak, mihiin meik hi roen mein te, nanokab. Kahaf! Naan, mono! Karu rais pirsait ii ka manesa' ma ma'afa' fa, rais pirsait naan ka ma'osa' fa msa'. 21 Tait i'tope' na'ko ka'o Abraham. Neno naan, in nmoe' natuin saa' re' Uisneno napreent ee, ma neik in anah nai' Isak he nafuat ee neu Uisneno nbi mei-fuat. Es nana te, Uisneno nak, “Nai' Abraham anmoe' batuur een!” 22 Nai' Abraham anpirsai batuur, tar antea in nmoe' natuin Uisneno In aprenat naan. Onaim, nok ranan naan hit tahiin tak, in npirsai nok neek akbubu' neu Uisneno, natuin in nmoe' natuin In aprenat. 23 Onaim, rasin ia on re' matu'i et Sura Kninu' re' nak, “Nai' Abraham anpirsai Uisneno, rarit Uisneno ntoup goe nfain atoin neek amne'o.” Ma matu'i mnak, “Nai' Abraham naan, Uisneno In soob neek reko.” 24 Rais ji nakniun een, ai' kah? Hit tahiin tak Uisneno antoup mansian karu in rais pirsait neu Uisneno naan, es re' anmoe' je es na' in nroim he nmoe' rais reko. Pirsait aha te, ka nanokab fa. 25 A'tope bian es re' bi Rahab, bifee a'hake' oras unu'. Oras atoin Yerikos sin naim he nroor na'maet atoin Isra'el sin asuntiurs ein te, bi Rahab na'koro' sin. Rarit in nreun sin he naenan npoin npe'on rana 'teta, he atoin ein kais anheek sin. Onaim, Uisneno antoup bi Rahab anjair bifee neek amne'o, natuin in nmoe' rais reko naan. 26 Rais pirsait re' ka manesa' ma ka ma'afa' fa, nahuum on re' aof re' ka masnasaf fa, es re' mates. On nana msa', karu nmui' tuaf nak in npirsai Uisneno, mes ka nmoe' fa rais reko, in napoi! Naan, rais pirsait re' ka nmoin fa heen.
Mpanat ho feef maan
1 Aok-bian arki! Anmui' tuaf namfau nromin he nanoni' atoin apirsait ein. Nana reko msa'! Mes mimnau, natuin Uisneno of anparikas namnuut tuaf-tuaf re' nanoni' atoin apirsait ein. Onaim, kais anmui' tuaf re' nanoni' krafun-akrafun. Afreu nbi bikaes ee in fefan 2 Hit arkit ta'uab atsaan huma'-huma'. Mes tuaf re' bisa nafreu naan in fefan, in bisa naprenat in tuan amsa'. 3 Tait i'tope' na'ko bikase'. Hit bisa t'ator bikase' he natuin hit romik, atteetk ahaa in afreu. 4 A'tope' bian na'ko bnao oe. Ain ko' gui anfuu bnao oe neu-mneem natuin in romin. Kamudi an-aan aha mmes, in bisa n'ator naan bnao oe naan in a'naon, natuin anaa' abnao naan in romin. 5 On nana msa', hit fefak. Fefak re' ia, an-ana'. Mes in meup nein, maineun besi! Nana on re' sapriu aan es, re' bisa nout nareu' nais ko' goes. 6 Fefaf naan, on re' ai piin ii nnuan non. Hit bisa tpaek hit fefak he tareu' are' kanan rasi. Hit fefak ia bisa nareu' hit i'moin ki no mes-mese'. Rais amre'ut namfaun nbi pah-pinan ia, npoin na'ko mansian ii fefan. Ma niut reu'f ein sin a'nak ko' goe msa', npaek mansian ii fefan he nanaob in mepun. 7 Mansian ii bisa nheek mui' fui rarit namausab sin he njarin mui' aem. On nana msa': kaun anonok, koro, ma ika' nbi taas je nanan. 8 Mes ka nmui' fa tuaf es fa fe' re' naprenat naan in fefan. Natuin fefaf naan, baer amre'ut es, re' ka taprenat taan ee fa. In on re' raso re' annoman nain hit aok ii, tar antea tmaet. 9-10 Nok fefaf mese', hit tpures ma taseku nok. Nana ka reko fa! Hit tpaek hit fefak he tbo'is Ama Uisneno. Rarit, nok fefaf naan, hit taseku' ma ta'akan hit aok-bian, re' Uisneno nmoe' je natuin In masan. On mee m'es on re' naan? 11 Ka neu fa he oe mata' mese' npuran napoitan oe min reko ma min mari. 12 Ka neu fa he mauns ii nafua oka'bana'! Ma ka neu fa he peen ii napuin anggor! Nati' te, roet ii ro he nafua ma nanees natuin in atrekan. Nahuum on re' hit ka bisa fa he tkui oe reko na'ko niuf min mari.
Rais reko ma mahinef, in uun ee na'ko Uisneno
13 Atoni' re' nahiin rasi natuin Uisneno In hinit, kais npaas on ma kais na'naeb in tuan. Fin in nahiin nak, in hinit naan na'uu na'ko Uisneno. Maut he in nakrira' in mahinin naan, anbi monit amneot. 14-15 Karu ho mneek meen meu tuaf es, ai' mumouf tuaf es henati' ho mseka', kais maiks om mak ho atoin ahiin rais reko ko! Nana, ho mupoi. Fin, monit on re' naan, in ka natai fa nok ‘atoin ahiin rais reko’. Neek menas, ai' mumouf tuaf, in ka na'uu fa na'ko Uisneno. Nana, atoin pah-pinan ia in amneik ein. Nana natai nok tuaf-tuaf re' ka nnona' fa sin tuak ein neu Uisneno. Taos ein naan, natuin niut reu'f ein sin ranan. 16 Natuin, karu nmui' neek menas neu es, ai' ammamofun, of anmui' taisibu huma'-huma', ma mansian ii anmo'en maufinu huma'-huma'. 17 Mes rais hinit re' na'uu na'ko Uisneno, es re' ia: nahunu te in nmoe' kit he tmoin nok akninu'. Rarit in nfee kit neek rame' es nok es, ta'paran tahiin jok, atsabaar piut, ma neek mate'e. Ma in aaf ni msa' nmoe' hit neek ki reko, troim he tmaturun ma tmabaab, tataiba' tahiin rasi, ma ka tteib fa koti-mmaat teu biak ein. 18 Ma tuaf re' nakrira' raan mamut of napein in upan arekot. Nana, on re' atoni' nseen fini, namuni te in napein nafani' in afan arekot.
Kais mutuin mo'et ma taos pah-pinan
1 Hi mmatoe ma mmabaan es nok es. In rais ni saa'? Nana, natuin anbi hi tnaan mein naan, anmui' tuaf-tuaf re' namin he nharinib sin tuak ein kuuk. 2 Hi mikoman baer es, mes hi 'niim ein ka ntean fa he nreo' naan ee. Rarit, hi neek mein namenan, ammatoe, ma ammabaan, tar antea hi mroim he mi'maet es ate, ka mimtau fa. Natuin hi ka m'onen fa, ma ka mtoit fa na'ko Uisneno, etun hi ka mipein je fa. 3 Mes maski hi m'onen mifeek hau-fatu msa', hi ka mipein fa saa' re' hi mtoti, natuin hi mtoit mituin ahaa hi tenab re' hi he minokab hi sarit mese'-mese'. 4 Batuur-batuur hi atoin ka a'ki'it ki fa! Hi on re' amatsaos re' anmakaek. Karu hi mituin mo'et ma taos pah-pinan, hi mmoe' hi tuam ein ammamuus mok Uisneno. Batuur ate! 5 Etun Uisneno In Sura Kniun Ee nak, “Uisneno natuaba' In Smana Kniun Ee et hit nekak. In atinus. Es nana te, Smana Kninu' naan In roim ni, ta'kii' tabaar tbi haa Na. Natuin .” 6 Antuut antein, Uisneno anroim fe' he nfee nanesib In neek arekot amsa'. Etun Suur Akniun ee, nak: “Uisneno nraban tuaf re' na'ratan in tuan, mes In nakrira' In nekan arekot neu tuaf re' neek a'parat.” 7 Uisneno naan, Usif! Onaim, amnona' hi tuam ein naan nai meu Ne, he mituin In romin. Hi kais mituin niut reu'f ein sin a'nak ko' goe in romin. Amraban ma'tani' meu ne. Nok ranan naan, in of naen nasaitan ki. 8-9 Maim ranan he hi mkua'noon mok Uisneno. Nok ranan naan, In anpaumaak ki. Hae, mansian amonit anbi rais amre'ut ki! Hi ro he minoon hi 'monim. Ma hi re' neek abeot ein! Hi ro he mnao mne'o mituin Uisneno, ma kais amtebi 'rii-'ne'u ntein. Tar antea neno ia, hi 'moin mein anbin goah aha marini. Onaim oras ia, misnaas nai! Hi mihini mrair mak hi neek mein anbeon, natuin hi saant ein. Reko nneis, hi mmei' jom ma mkae mpin-pinus nai. 10 Karu hi mihiin batuur-batuur mak, hi ka ma'osa' ki fa mbi Uisneno In human ma In matan, In of nait na'ratan ki mjair tuaf-tuaf re' ma'osa' nbi In human ma In matan.
Kais mi'uab mi're'uf es
11 Aok-bian arki! Kais mi'uab mi're'uf es nok es. Fin, karu hi mmoe' on nana te, ma misaeb sanat piut neu atoni' bian, hi mtanhai mrair Uisneno In atoran re' nak, “Ho ro he mneek ho aom-bian, nahuum on re' ho mneek ho tuam aan kuum.” Ma karu hi ka mituin fa atoran naan, hi mi'ratan amrair hi tuam ein anneis na'ko Uisneno In Atoran. 12 Uisneno neik Non es nahakeb Atoran naan. Onaim, In es re' anmui' hak he nafeek hit rasin. In neik Non es anmui' hak he nfee 'honis neu kit, ai' anhukun na'maet kit. Hi ka mmui' fa hak he mifeek atoni' sin rasin, ai' mi'uab mi're'uf biak ein sin kanak arekot.
Kais miboo
13 On nai! Hi ro he mihiin, he kais mi'uab am mak, “Neno ia, ai' noka', hai he mnao meu kota ne joo! Hai he mnao mitua maan on re' toon es. Ma hai he mrakan he miis maan akre'o!” 14 Ho muhiin saa' re' noka'-nmeu te he njair? Ka tiit taan fa tuaf es, re' nahiin nain in a'moint ii on re' mee. Mansian ii 'moin ii on re' nipu, re' mamnita' rabaah, rarit namneuk. 15 Reko nneis hi mi'uab am mak, “Karu Uisneno nneek kit, maut he hit tmoin. Ma karu Uisneno nromi te, maut he hit tbisa tmoe' ia.” 16 Natuin karu hi ka mi'uab fa on naan, hi suma miboo goah. Nana, on re' hi mnikan main Uisneno nbi hi teenb ein. Nana saant ii ko'u! 17 Mimnau mirek-reko'! Tuaf re' nahini nrair saa' es re' batuur, mes ka nmoe' natuin fa on naan, nana on re' in anmo'e nsana nrari msa'.
Atoin amu'it re' anbeon, ro he npaant ok
1-6 Atoin amui't ein! Mpasan hi ruik mein he mneen mirek-reko'! Hi mtahan kai na'ko tuaf-tuaf re' anmepun hae-nmaten neu ki. Oras ia, sin maskeet ein natoon mat-maat hi puta-kriu ngguin naan. Onaim Uisneno Apinat Akrahat anneen ma niit anrair sakoit na'ko tuaf-tuaf ameupt ein naan. Hi meup mein ambi pah-pinan ia, es re' he miminab hi tuam ein meik rais marinit pah-pinan. Hi on re' bijae paorn es re' suma nahiin he naah ah, re' antea in orsa te, anroro. Hi mhukun ma mi'maet atoin rekon, re' ka napenin fa mainuan he namneob ok anbin hi humam ma hi matam. Atoin amui't ein! Reko nneis, amkae mpin-pinus nai! Natuin ma'ne'at huma'-huma' of ro he ansaen ki. Hi 'mui' mein of anmurai namre'un. Ma hi pake-nohas amasat sin, eets ein of ansoor naan sin. Hi noni mnatu' ma muti' sin ka ma'oos ein fa heen. Ma sin of naah nafani' ki, on re' ai ji nout hau meto'. On mee m'es pah-pinan ia he namsoup goen, mes hi amtaisiub fe' he mibuab bare' 'maten? Hi 'mui' mein of anjarin bukti nak, hi ka mihiin fa mee es re' ma'osa' nbi Uisneno In human ma In matan.
Amsabaar mbi susat
7 Aok-bian arki! Hi ro he msabaar ambi paot tar Usi' nkoe Non anfain neem. Mkius kim atoin tani, re' anpao nok sabaar neu in reen je afan. Uran ahuun te nmouf, rarit in nseen. Rarit in npao ntein uran re' natorob, ma namriab in roet ein. Ka 'roo fa te, nasufan ma nafuan. Ma in ors ee ntea te, tuaf naan annao nseki ma noun. 8 Hi ro he msabaar on re' naan amsa'. Mha'tain hi tuam ein, natuin ka 'roo fa heen ate, Usi' nkoe Non anfain neem! 9 Aok-bian arki! Kais amma'munu'. Mee he mma'munu', mma'munu' piut. Maut uum Uisneno of es anhukun ki! Mkius kiim! Fin Afeek Rasi neno-tunan Ne, anhake nrair es hi maat mein naan. 10 Aok-bian arki! Mituin a'tope' na'ko Uisneno In mafefa' kniun ein. Maski sin napenin susat ma nana'renat huma'-huma', mes sin naar nein aah. 11 Karu anmui' tuaf re' bisa naran anbi susat ma nana'renat, hit troim he tbo'is ta'naeb in kanan. On re' ka'o Ayup. In napein susat huma'-huma', mes in naran ma'tani'. Rarit Uisneno neek Ne nmouf neu ne, onaim In nmurai n'ator neu nai' Ayup saa'-saa' re' reko. Uisneno nmoe' on naan, natuin In Amanekat ma Amahoet.
Rasi anmatoom nok supat
12 Aok-bian arki! Hi kais mihake' supat. Karu hi he mak, “tua”, mitaah mak “tua” goah. Karu hi he mak, “kahaf”, mitaah mak, “kahaf”. On re' nana te, noo goah. Kais ambaineis he mihake' rais supat amteek niut ne et pah-pinan. Ai' mihake' supat mak, “nbi Uisneono In kanan” re' anmoin et neno-tunan. Ka nmui' fa upan saa'-saa' karu mihake' supat huma'-huma'. Natuin karu on nana te, of amtoup main ho hukun, natuin ho rais supat sin.
Onen re' matopu'
13 Karu anmui' tuaf na'ko ki napein susat, reko nneis in n'onen. Ma karu anmui' tuaf anmariin, reko nneis in nsii ma nbo'is Uisneno. 14 Karu anmui' tuaf na'ko ki napein menas, reko nneis miskau amepu krei ngguin, ma mtoit sin he ntaon mina' nbi amenat naan, ma n'oen ein neik Uisneno In kanan, maut he Uisneno nareko' amenat naan. 15 Onaim karu hi m'onen amenat, ma mpirsai batuur-batuur meu Uisneno, Uisneno nareko' amenat naan. Karu amenat naan nmo'e nsaan, Uisneno of annoes nain in saant ein. 16 Karu na'ko ki ammo'e nsaan, hi ro he mmanaku sanat es nok es. Nok ranan naan, hi m'onen es nok es ate, hi of amjair reko. Tuaf re' in neek ne kninu', in n'oen ee naheun nok kuasa ma'tani', ma bisa tapein in afan. 17 Tait i'tope' na'ko ka'o Elia. In mansian on re' hit imsa'. Mes oras in n'onen he kais na'uur antein, uran naan nasnaas nain, ma ka nmouf niit fa tar antea toon teun ma stena'. 18 Rarit in n'onen he ntoit uran. Uran naan nmouf nain oras naan. Huun nein natoro ma nnoo-maet, ma sekit amnonut amsa'. 19 Aok-bian arki! Karu anmui' tuaf na'ko ki re' nmo'e nsaan ma nasaitan saa'-saa' re' batuur, rarit anmui' tuaf re' nturun ma nbaab ee nfain neem neu Uisneno In Raan Amneot, nana reko. 20 Mimnau mirek-reko'! Karu hi mturun tuaf re' anmo'e nsaan, he in nfain neem neu Uisneno, ma in na'piis, hi msoi maan ee, maut he in nmoin piut nok Uisneno. Nok ranan naan, Uisneno nnoes nain in saant ein re' mfau-rutun naan. On re' naan nai, tua. Na'ko kau, Nai' Yakobus kau, tua.
Tabe ma haan buseet
1-2 Surat re' ia, na'ko au nai' Petrus kau, es re' Yesus Kristus In haef. Au 'tui surat re' ia, ma 'soun ee 'eu ki re' Uisneno npiir naan ki. Hi mjair anao-amnemat re' mnao ma mmoni mbi bare-bare et propinsi Pontus, propinsi Galatia, propinsi Kapadokia, propinsi Asia, ma propinsi Bitinia. Aok-bian manekat arki! Na'ko un-unu', Ama' Uisneno npiir nain ki he mjair Iin na. In Asmaan ee nmoe' ki mjari kninu' meu Ne msa', he hi bisa mmoe' mituin In apreent ein ok-oke' re' Yesus Kristus anfee sin neu ki. Ma karu hi mmoe' mituin In apreent ein ok-oke', naan on re' Uisneno nbisin Nai' Yesus In naa' ee neu ki, he njair tanar nak, hi mikninu' mrair meu Ne. Au 'onen he Uisneno naruru' ma nakrira' In nekan arekot neu ki, maut he hi bisa mmoin na'ko neon goes meu neon goes nok mamut, rame' es nok es, ma tainina' na'baab ok piut.
Karu hit tpirsai teu Uisneno, hit tasnait ok ma ta'kii' atbi Ne
3 Are' kanan pures ma bo'is neu Uisneno! In re' naan hit Usi' Yesus Kristus In Amaf. Natuin Uisneno In neekn ee reko, es naan ate In nkasian kit. Yesus Kristus anmaet, rarit In nmoni nfain. Onaim oras Kristus namonib kit, In nfee kit 'moin fe'u nahuum on re' nahonis nafani' kit. Es naan ate, hit tpirsai teu Kristus piut, ma hit tafnekan ma tpirsai mtak, In of anpairoir ma npijaar kit nok rek-reko. 4 Anbi pah-pinan ia, karu a'naef es anmaet, in nasaitan in a'mui'k ein neu in aanh ein. On naan amsa', Nai' Yesus natunu' nrair pusaak neu kit et neon goe tunan. Pusaak naan ka bisa nreu' fa, ka bisa nrapu' fa, ma ka bisa namneuk fa. 5 Hi mpirsai mak Uisneno nmui' kuasa he nturun ma nbaab ki. In npijaar ma npairoir ki, he saa' es kais nareu' ki. Ma oras pah-pinan ia namsoup, In he naruru' ma nakrira', he In nsoi nafetin ki nok taos ma mo'et on mee. 6 Es naan ate, hi neekm ein anmarinan, maski oras ia hi mnaben ate ma'fena' natuin hi mipein susat huma'-huma'. 7 Uisneno nkonan kit he tapein furit he n'ui ma nsoba' hit rais pirsait ee teu Ne. Karu hit tpoi tkoon ta'ko furit, naan naruru' ma nakrira' mnak, hit rais pirsait naan ma'tani' ma batuur. Hit bisa tataib ee nok amnatu'. Hit ro he tout goe nbi ai je nanan, he in makrauf ein anpoin fe', na' hit tapeni mnaut ee in afan batuur-batuur. Te kaah, tatuin Uisneno In tenab, hit rais pirsait ma'osa' nneis na'ko mnatu'. Onaim karu hit rais pirsait ii npoi nkoon na'ko furit on re' naan, oras Yesus Kristus ankoen On anfain neem, of Uisneno nbo'is kit, rarit In naruru' ma nakrira' hit pinak ma krahak, ma In nhormaat kit. 8 Maski hi ka mkius miit fa Nai' Yesus langsung, mes hi mneek Ee. Maski hi ka mkius miit Ee fa oras ia, mes hi mpirsai Je. Hi neekm ein anmariin anneis-neisi msa', maski ka nmui' fa uab re' natai he mitoon meu tuaf ein anmatoom nok hi neekm ein anmarinan. 9 Natuin hi mpirsai Je, hi upam ma pa'e, es re' Uisneno nsoi nafetin ki na'ko hi sanat ma penu sin. 10 Uisneno In mafefa kniun' ein un-unu' sin namin he nahinin reko nneis, on mee m'es Uisneno nsoi nafetin tuaf na'ko sin sanat ma penu sin. Mafefa kniun' ein naan natoon nanin anmatoom nok Uisneno naruru' ma nakrira' In nekan arekot neu ki, natuin In nabarab anrair he nsoi nafetin ki. 11 Kristus In Asmaan ee nmeup et sin neek ein he natoon nain am nak, Kristus ro he napein susat, ma nok ranan on mee he In napein ha'mu'it ma ma'ne'at. Are' rasin naan anjarin oke' te, na' Uisneno naikas na'rat-raatn Ee. Es naan ate, mafefa kniun' ein namin he nahinin reka' te rasin re' ia njarin. 12 Rarit Kristus In Asmaan ee, natoon neu mafefa kniun' ein am nak, sin es re' ka nkius ma nitan fa, mes hi es re' amkius ma miit rasin re' ia. Oras ia hi mneen ma mitniin maan rasin re' ia, natuin Uisneno In Asmaan Akninu' na'ko sonaf neno tunan ansonu' ma nreek tuaf a'teta' he neit natoon Uisneno In Rais Reko neu ki. Te kaah, Uisneno In ameupt ein sonaf neno tunan anromin he nitan kuuk are' rasin re' ia.
Uisneno naprenat he hit tmoni kninu'
13 Es naan ate, hi ro he mibarab piut he mihiin mirek-reko' rasin re' ia ok-oke'. Ampanat mirek-reko' he hi mitenab namneo ma namnoon. Mibarab piut he hi mpirsai piut meu Yesus Kristus tar antea In nkoen On anfain neem. Natuin anbi oras naan, Uisneno he naruru' ma nakrira' In nekan arekot neu ki. 14 Hi ro mneen ma mitniin Uisneno, on re' ri'ana' re' anneen ma natniin in ainaf-amaf. Unu' te hi ka mihiin fa fe' Uisneno In raan a'honis re' amneot ma amnonot. Mes oras ia hi mihini mrair. Onaim kais ammoin mituin hi romim re' he mmoe' maufinu mtein. Fin re' naan hi raan a'honis amnaa'. 15 Es naan ate, oras ia hi ro he mmoni kninu'. Natuin Uisneno, ro kninu'. In es re' no'en ma nnapen naan ki he mjair In aanh ein. Natuin rasi naan, hi ro he kninu' mbi hi 'moinm ein a'teme-'teme. 16 Fin matu'i nbi Uisneno In Suur Akninu' mnak, “Hi ro he kninu', natuin Au kninu' Kau.” 17 Hi mroim he mi'uab mok Uisneno nahuum on re' hi Ama'. In njair Afeek Rasi msa', re' of anparikas ansuun-suun tuaf in a'monin. Mes In ka huma' mese' fa on re' afeek rasi bian ein. Fin In nafeek rasi, ro natai ma ka ma'feen ao-biaf fa. Es naan ate hi ro he mpaant om. Fin hi on re' atoin sona' re' mitua mtahan ambi pah-pinan ia. 18 Hi mihini mrair mak, Kristus anbaen nafeek anrair he nsoi nafetin ki na'ko hi 'monim re' ka ma'u'u ma ma'ba'af fa. 'Monit nahuum on re' naan, hi mtoup maan ee mi'ko hi be'i-na'i sin, on re' pusaak. Mes mimnau, fin Kristus ansoi ki ka npaek fa roi mnatu' ai' roi muti' re' of namnekun oke'. 19 Mes In nsoi ki npaek In naa' ee kuun. Naan, ro ma'osa' batuur! In nmaet on re' 'bib-kaes aan es, re' ka nmoe' niit fa sanat, re' sin nroor goe he njair fua'-turu'. 20 Oras Uisneno ka nmoe' pah-pinan ia fa fe', In nahini nrair saa'-saa' re' Kristus of anmoe' sin. Mes unu' te, Uisneno ka naruru' ma nakrira' Kristus fa fe' neu mansian anbi pah-pinan ia. Oras ia, in fe' naruru' ma nakrira' Kristus he njair tetus neu ki. 21 Natuin Kristus anmoe' on naan, hi bisa mpirsai Uisneno. Fin In namonib nafani' Kristus, ma naikas na'rat-raatn Ee. Uisneno nmoe' on naan he hi mpirsai Je, ma mifnekan he In nmoe' natuin saa' re' In anba'an nain je. 22 Hi mmoe' mituin saa' re' batuur. Onaim oras ia hi bisa mmeup ma'tani' meu Uisneno. Naan anmoe' ki mneek hi aok-bian atoin apirsait ein batuur-batuur. Hi rais manekat naan ro he na'baab on piut, natuin hi neekm ein nakniun' ein. 23 Oras ia, hi mipeni mrair 'moin fe'u. Mes 'moin fe'u re' ia hi ka mipein je fa mi'ko hi aina'-ama' re' of anmaten nbin pah-pinan ia, mes hi mipein je mi'ko hit Ama' abit sonaf neno tunan re' ka nmaet fa. Hi 'moin fe'u re' ia, hi mipein je mi'ko Uisneno In Kabin ma Prenat. In Kabin ma Prenat re' ia, neiki 'monit re' amneot ma amnonot, ma ntahan piut. 24 Fin matu'i et Uisneno In Suur Akninu' mnak, “Mansian ii, on re' huun, ai' fubona'. Fin sin reok ein naan, ka ntahan a'roo fa. Huun ee, namnene nreu'. Fuboon ee msa', namnene nkoon. Ka 'roo fa te, sin nmaten, rarit sin namnekun. 25 Mes hit Usi' In Kabin ma Prenat, nabar-baar ma ka natfeek fa.” Uisneno In Kabin ma Prenat sin re' naan, esan re' Rais Reko re' hai mitoon amrair sin meu ki.
Hit tjair Uisneno Iin Na re' kninu'
1 Onaim hi kais ammoe' maufinu saa'-saa'. Kais mi'kake' mok tuaf. Kais amputa-kriu. Kais ammui' tenab ma neek menas karu tuaf anneis ko. Kais mi'uab mi're'uf es in kanan. Mait imporin moe't ein naan ok-oke' nai! 2 Ri'ana kruu'f ein namnaun he nsusun na'kon sin ainf ein. On naan amsa', hi neekm ein ro he namnaun he nahiin Uisneno In Kabin ma Prenat sin. Fin re' naan anmoe' hi rais pirsait anma'baab on piut na'ko neon goes neu neon goes. Nok ranan naan, hi bisa mneek amnasi mbi 'monit re' mituin Uisneno In romin. 3 Fin hi mnaben maan hit Usi' In nekan arekot. 4 Ammafuut ma mi'kii' mok Kristus. Fin In on re' faut goes, re' anmoin. Tuukn ein nait inporin fatu naan, natuin sin nateenb ein am nak, fatu naan ka mapake' fa. Mes Uisneno naan Ee, ma'oos re'uf, rarit anpiir naan Ee he njair fatu 'suki' re' pentiing anneis-neis. 5 Hi ro he mmafuut mok Kristus msa', he Uisneno npaek ki. Nok ranan naan, hi on re' fatu re' Uisneno npiir naan ki, he nafena' umi neu In Asmanan. Hi on re' fatu re' nmoni msa', on re' Kristus. Hi on re' a'naak rais pirsait ein re' nmonin akninu' neun Uisneno. Naan nahuum on re' hi meik fua'-turu' meu Ne. Hi fua'-turu' naan anharineb Uisneno In nekan, natuin Yesus Kristus anmaet neu ki ok-oke'. 6 Fin matu'i et Suur Akninu' mnak, “Amkius fe'! Fin Au 'tao faut fua mese', anbi kota Yerusalem ia, re' sin nteek ee mnak, ‘kota Sion’. Au es re' a'piir aan kuuk fatu naan. In ro ma'oos re'uf neu Kau. Onaim tuaf re' anpirsai Je, of ka napein fa rais mae saa'-saa'.” 7 Nai' Yesus naan, nahuum on re' fatu naan. Rarit, neu tuaf re' anpirsai Je, In ma'osa' batuur amsa'. Mes neu tuaf re' ka npirsai Je fa, matu'i et Uisneno In Suur Akninu' mnak, “Fatu re' tuukn ein nait inporin, oras ia njair faut fua mese', re' pentiing anneis-neisi.” 8 Matu'i msa' am nak, “Anmui' fatu re' anmoe' tuaf nastuun. Anmui' fatu re' anmoe' sin antaikobin.” Sin ntaikobin, natuin sin ka nromin fa he nmoe' natuin ein Uisneno In Kabin ma Prenat sin. Fin Uisneno n'ator nain he sin ntaikobin on naan. 9 Mes hi ka on fa re' naan. Fin hi mjair tuaf re' Uisneno kuun es re' anpiir ki. Hi mjair Iin na. Hi on re' a'naak rais pirsait re' ntuthae usif. Hi on re' pah es, re' nmoni kninu' neu Uisneno. Hi mjair on re' naan he hi bisa mitoon meu are' kanan mansian anmatoom nok Uisneno In nekan arekot re' In nakriir ee neu ki. Fin In nreun ki he misaitan rais maufinu, he mmoin nok 'moe' reko. Naan on re' hi mpoi mi'ko meis'okan, ma mmoni mbi In me'u-sine' re' reok re'uf. 10 Unu' te, hi mjair on re' nonot-asar pukan es, re' ka mapake' fa. Mes oras ia, hi mtaam amjair Uisneno In nonot-asar. Unu' te, hi ka mroim fa he mtoup Uisneno In rais kasian neu ki. Mes oras ia, hi mtoup maan ee jen!
Atpaant ok he hit tmoin tamneo ma tamnoon
11 Aok-bian manekat arki! Hi re' ia, suma mjair amnemat ambi pah-pinan ia goah. Fin hi on re' atoin sona' re' anao-amnemat. Es naan ate, au 'toit piut-piut he hi kais mihuum on re' tuaf bian abitan pah-pinan ia, re' anmo'en maufinu natuin sin roimk ein. Fin anbi hi nekam naanm ein anmui' makenat. Es re' romif he nmoe' maufinu nmakeen anraban romif he nmoe' reko. Onaim kais amkonan romif he nmoe' maufinu naan niis ki. Fin karu on naan ate, hi mimreu'! 12 Ampaant om he hi mmoin mimneo ma mimnono mbi tuaf re' ka nahiin fa Uisneno sin humak ma sin matak. Nok ranan naan, karu sin he nakuu ki rafu'-rafu', sin suma niit ahaa hi 'mo'em arekot. Rarit oras Kristus ankoen On anfain neem, sin of es re' naikas na'rat-ratan kuuk Uisneno, natuin hi 'mo'em arekot naan.
Hit ro he tneen ma tatniin tuaf re' anna'an kuasa
13 Hit Usi' In roimn ee es re' hi mneen ma mitniin anaa' kuaast ein. On re': amneen ma mitniin usif, natuin in njair a'naak ko'u. 14 Amneen ma mitniin gubernur, fin uisf ee es anreek ma nhaef ee, he in nasanut hukun neu tuaf ein re' nmo'en rais maufinu, ma in nbo'is tuaf re' nmo'en rasi reko. 15 Es naan ate, Uisneno nroim he hi mmoe' mituin rais reokn ein, he amoont ein re' ka nahinin fa saa'-saa', ka nmu'in fa 'sukif he nakuu ki. 16 Maut he hi mjair tuaf-tuaf re' napenin fetin re' mmui' hak he mmoe' mituin hi roim ein kiim, mes kais ampaek hak naan tafi'-tafi' he mmoe' rais maufinu. Ampaek hak naan he mmeup meu Uisneno, fin hi mjair Iin na. 17 Hi ro he mhormaat are' tuaf ein arsin. Hi ro he mneek are' tuaf ein re' anpirsain neun Kristus. Hi ro he mmoin pantas ambi Uisneno In human ma In matan, fin In of es nafeek hukun neu ki. Ma hi ro he mhormaat meu re' anaa' apreent ein.
Hit ro he taran ma ttahan atbi susat, tatuin Kristus In a'tope'
18 Aan renu'-aan reka' sin! Amneen ma mitniin hi usi' sin, ma mtao hormaat meu sin. Kais suma mneen ma mitniin meu usi' re' neekn ee reok goah. Mes karu hi usi' in maufiun ii ma'tani', hi ro he mneen ma mitniin ee msa'. 19 Karu anmui' tuaf na'ko ki re' mipein hukun tafi'-tafi' mi'ko hi usi', maski hi ka mmo'e msaan fa saa'-saa', ma karu hi maran ma mtahan ambi susat naan natuin hi mimnau Uisneno In roimn ee neu ki, Uisneno of naruru' ma nakrira' In nekan arekot neu ki. 20 Karu hi mmo'e msaan, rarit mipein beso', in upan ma pa'e saa', karu hi maran ma mtahan ambi susat naan? Ka nmui' fa, tua! Mes karu hi mipein susat natuin hi mmoe' reko, rarit hi maran ma mtahan, Uisneno nkius ma ntao In neekn ee nok ki. 21 Fin Kristus anroim he hi mmoe' reko, maski hi mipein susat amsa'. Fin In nasaah susat neu kit amsa'. Nok ranan naan, In njari 'tope' he tmoe' tatuin Ee, on re' hit tnao tatuin In haen noben. 22 Uisneno In Suur Akninu' antui mnak, “In ka nmoe' niit fa sanat. Ka tiit fa puta-kriut re' npoi na'ko In fefan.” 23 Oras sin nkana'paar Ee, In ka nbaras fa. Oras In napein susat, In ka na'uab fa he nbaras. Mes In nnona' In tuan ee neu Uisneno. Fin In npirsai mnak, Uisneno, Afeek Rasi re' natai! 24 Kristus es re' nasaah hit sanat ma penu sin oras In nmate nbi hau nehe. In nmoe' on naan, he hit kais atmoin nok 'moe' sanat antein. Rarit oras ia, hit ka tmoin fa nok 'moe' sanat, mes hit suma tmoin nok 'moe' amneot ma amnonot. Fin In nsenu' ma nseka' kit, he ntoup naan hit hukun. Hukun naan anmoe' napapa' In aon ee ok-oke', tar antea In nmaet. Paap ein re' nmoe' Je ma nmaet naan, nareko' nrair ki goen. 25 Fin hi on re' 'bib-kase re' unu' te hi mbeon om. Mes oras ia hi mtebi mfain meu Uisneno In ranan re' namneo ma namnoon. Fin In es re' anpairoir ma npanat ki rek-reko, nahuum on re' atukus tuaf es, re' anpairoir ma natuuk in abib-kaesn ein.
Fainekat neu fee-mone
1 Bifee mamoen ein! Fe'e na au 'ak hit ro he tneen ma tatniin anaa' kuasat sin. Onaim hi ro he mneen ma mitniin hi moen naan. Mimnau, fin anbi hi tnaanm ein anmui' mone bian re' ka nromin fa he nmoe' natuin Uisneno In Kabin ma Prenat. Maski sin ka nromin fa he nneen ma natniin hi uab ein, mes sin of anpirsain neun Kristus natuin hi 'monim. 2 Fin sin nkisun ma nitan hi mmoe' are' rasi nok neek amneot ma amnonot ma nakninu' nbi Uisneno In human ma In matan. 3 Bifee ngguin sin namasan, ka na'ko fa saa' re' tkius tiit ee. On re': nbagaya nmoe' 'naak fuun ein, ansoi' ma nbui' sin huma'-huma', ai', natoon ok bainesi' nok sin npaken moro'-muti', ai' npaken tai ma'osa' re' ka pantas fa. 4 Mes re' nmoe' bifee ngguin anjair namasan batuur, esan re': sin neek ein, re' ka tkius tiit ee fa. On re': neek arekot, ma neek teas. Fin masaf on re' naan ka namneuk fa, maski bifee ngguin namnasin nrarin. Tatuin Uisneno In tenab, masaf on re' naan, ro ma'oos re'uf. 5 Fin un-unu' te, bifee ngguin re' neek akniun' ein, re' anpirsain neun Uisneno, sin namasan on re' naan. Sin nneen ma natniin neun sin moenk ein amsa'. 6 Tait i'tope' ta'ko ain Sara'. In nneen ma natniin in mone, aam Abraham. In nkonan in mone he n'aotr ee msa'. Hi arki bifee ngguin, hi ro he mituin ain Sara' in a'mo'en, natuin karu hi mmoe' batuur, hi kais mimtausan saa'-saa'. 7 Atoin mafe'e sin! Ammoin nekaf mese' mok hi fee ngguin. Amtai mirek-reko' saa' re' reko neu sin, rarit ammoe' mituin. Miruru' ma mikrira' rais hormaat meu sin mbi are' kanan rasi, natuin bifee ji in a'be'in ka huma' mese' fa on re' atoin ii in a'be'in. Fin hi arki bu'-bua' amtoup pusaak re' Uisneno he nfee je neu ki. Pusaak naan, es re' hi bu'-bua' amtoupu 'moin fe'u re' Uisneno nfee je na'ko In nekan arekot. Mes hi atoin mafe'e, hi ro he mmoin nekaf mese' mok hi fee ngguin on naan, he karu hi nua ki mait nekaf ma m'onen amtoit rais jes mi'ko Uisneno, In nroim he nneen ma natniin hi onen naan.
Maski hi mmoe' batuur, hi of mipein susat amsa'
8 Aok-bian manekat arki! In amsoupn ii, au he u'uab rais jes a'tein. Hi ok-oke' ro he mmoin nekaf mese' amsa'. Karu tuaf es ansuus ai' anmariin, hi bian ii ro he mnaben mituin on naan. Amneek tuaf ein re' sin anpirsain Kristus. Miruru' ma mikrira' neek arekot es nok es. Kais maikas hi tuam ein, fin hi ro he mneka'paar. 9 Kais ambaras maufinu nok maufinu. Karu tuaf nakritik ki, kais mikritik mifani' tuaf naan. Mes amtoit he Uisneno nmoe' rais reko neu ne. Fin Uisneno no'en naan ki he mjair Iin na, he hi bisa mtoup rais reko na'ko Na. 10 Fin matu'i et Suur Akninu' Uisneno mnak, “Tuaf re' nami 'moin reko, ma re' nami 'monit tar namnais, tuaf naan ro he npanat in fefan he kais anmahaat, ma kais na'uab puta-kriut. 11 In ro he na'piis na'ko in saant ein, he kais anmoe' rais maufinu ntein, mes nabani' he nmoe' rais amneot ma amnonot. In ro he nanoni' he nmoni nmarame' nok are' tuaf ein ok-oke', rarit naim ranan he nareok nok sin. 12 Fin hit Usi' ntarun mataf, neu tuaf re' nmoin nok amneot ma amnonot. Ma In nroim he nneen sin oen ein amsa'. Mes hit Usi' nraban piut, neu tuaf re' nmoin nok 'moe' maufinu.” 13 Karu hi mroim he mmoe' re' batuur, sekau es re' he nmoe' maufinu neu ki ntein? Ka nmui' fa, tua! 14 Mes maski hi mmoe' re' batuur, rarit anmui' tuaf re' nasusab ki, hi mipein upan ma pa'e. Karu nmui' tuaf re' ka nahiin fa Kristus namtau natuin rais jes, hi kais mimtau mituin on naan. Hi teenb ein kais antaisibun ma hi neekm ein kais ansusan on re' sin. 15 Ammoe' hi neekm ein antainina', natuin hi mtoup Kristus et hi neekm ein he njair hi Usi' re' akninu'. Karu tuaf antoit ki he mitoon hi rais pirsait, ma nansaa' am es hi mifnekan ma mharap mak, Kristus of anmoe' are' raisn ein ok-oke' anjarin reko, hi ro he mibarab piut-piut he mitaah sin. 16 Mes hi ro he mitaah sin mi'ko neek arekot, miruru' ma mikrira' rais hormaat meu sin, he sin nahinin nak hi mmoe' rais reko re' amneot mi'ko neek akninu'. Maski hi mmoe' reko on naan amsa', mes of anmui' tuaf re' he na'uab namouf ki, natuin hi mmafuut mok Kristus. Onaim karu hi mmoe' are' rais reko piut-piut, tuaf-tuaf re' ankana'paar ki of namaeb ok. 17 Karu rasi naan natuin Uisneno In romin, kais amnikan, fin reko nneis hi mipein susat natuin hi mmoe' rais reok amneot; kais natuin hi mmo'e msaan. 18 Fin Kristus anmaet no mese', natuin hit mansian ii tmo'e tsaan. In re' anmoin namneo ma namnoon, anmaet neu kit re' tmoin nok saant am penu. In nmaet he hi bisa mmarame' mfain mok Uisneno. Kristus naan, mansian on re' hit imsa'. Tuaf anroor na'maet Je, rarit Uisneno In Asmaan ee namonib nafain' Ee. 19 Asmanaf naan neik Je nnao he nanoni' nitun re' an'o'of sin anbin baer jes on re' bui. 20 Sin re' naan esan re' tuaf-tuaf re' un-unu' te, sin ka nromin fa he nneen ma natniin Uisneno. Oras naan, ka'o Noh anmo'e bnao oe kou' goes. Uisneno npa-pao he niit kar-karu are' tuaf ein he nmoe' natuin In romin, mes sin ka nromin fa. Etun suma tuaf faun goah re' nsoi naan sin na'ko noe sako' naan. 21 Noe sako' naan anjari 'tope', on re' oras nasrain ki. Asranit naan naruru' ma nakrira' mnak, Uisneno nsoi nafetin ki na'ko hi sanat ma penu sin, natuin Yesus Kristus anmoni nfain. Oras sin nasrain ki, sin ka naniu ki fa he nakninu' hi aom ein naan, natuin in batuurn ii, es re' hi mba'an meu Uisneno he mikninu' hi neekm ein naan. Nok ranan naan hi bisa mmoin ma mmoe' rais amneot ma amnonot. 22 Oras ia, Nai' Yesus ansae nfain et sonaf neno tunan. Anbi nee In ntook et bare mahormaat re'uf anbi Uisneno In aon-bian a'ne'u. Rarit ameupt ein abitan sonaf neno tunan, are' kuasa sin ok-oke', ma are' anaa' kuasa bian sin, ro he nneen ma natniin Kristus.
Kristus Iin na ro he nmonin nok pantas
1 Kristus naan, mansian on re' hit. Natuin In napein susat ma ha'mu'it amfa-faun, hi ro he mibarab amsa' he mipein susat ma ha'mu'it, on re' In. Mes mimnau, fin tuaf re' nabarab he napein susat ma ha'mu'it natuin anmafuut nok Kristus, in nafeek anrair he ka nmoe' fa sanat ma penu ntein. 2 Maski in nmoin fe' nbi pah-pinan ia, mes in ka nmoin fa he nmoe' sanat antein on re' mansian bian sin. Fin in nmoin natuin Uisneno In romin. 3 Unu' te, oors ee nanokab karu hi he mmoe' maufinu saa' ahaa, nahuum on re' tuaf re' ka nahiin fa Uisneno. On re': sin nmo'en tafi'-tafi'. Sin nmakaken. Sin natuin sin roimk ein he nmo'en maufinu. Sin ninun raur mafu. Sin nmo'en fesat amre'ut. Sin nmo'en fesat makonit ma makaket. Sin nmo'en fuat re' bisa nmoe' hit fuunk ein natoron ma aok ii napiip. 4 Sin na'uab na're'uf hi kaan foo menin, natuin sin ka nahinin fa neu saa' am es hi ka mseor gom mituin fa mok sin 'moe' maufinu re' bainesi' naan. 5 Mes mimnau, fin sin ro he nbaisenun n'anin Uisneno, re' njair Afeek Rasi. Sin ro he natoon ma nataah neu Ne mnak, nansaa' am es sin nmonin nok maufinu on re' naan. Kais amnikan, fin hit mansian ii ok-oke' ro he tbaisenu t'ain Uisneno. Neu tuaf re' anmoin fe', ma neu tuaf re' anmate nrarin amsa'. 6 Batuur! Uisneno he nparikas amaets ein, on re' In nparikas amoint ein. Fin In he nkius sin raan a'honis oras sin nmonin fe'. Es naan ate, Nai' Yesus annao natoon Uisneno In Rais Reko neu sin, maut he sin bisa napenin a'honis he sin nmo'en natuin Uisneno In romin.
Hit ro he tpairoir ma tpijaar tarek-reko' are' saa' re' Uisneno nfee sin neu kit
7 Neon amsoupt ii npaumak-maak een. Es naan ate, hi ro mitenab mifan-fani', ma mneek teas, he hi bisa m'onen nok rek-reko. 8 Re' pentiing ii, hi ro he mmoin piut ambi rais manekat es nok es. Fin tuaf bian anmo'en sanat amfa-faun, mes hi bisa mmapartein fe' karu hi mneek ee. 9 Amtoup tuaf na'ko bare bian nok reko re' he natua ntahan anbi hi umi. Mes mimnau. Kais amtoup goe nok rasi 'munu'. 10 Ansuun-suun tuaf re' antoupu nrarin mahinif ma manoef na'ko Uisneno, ro he npaek je he ntuthae in aok-bian apirsait ein. Ampairoir ma mpijaar mahinif ma manoef naan rek-reko, he mapake' neu Uisneno. 11 On re': karu mtoup mahinif ma manoef he minoni' tuaf, mimnau, hi ro he mitoon meu sin ampaek Uisneno In Kabin ma Prenat kuun. Karu mipein mahinif ma manoef he mtuthae tuaf, amtuthae mpake 'be'if re' Uisneno nfee je neu ki. Nok ranan naan, are' tuaf ein sin nkisun ma nitan nak, hi re' naan, Yesus Kristus Iin na. Onaim sin naikas na'rat-ratan Uisneno. Fin Uisneno naan, mapina'-makraha'! Ma In kuasa he nnaa' aprenat ka natfeek niit fa! Batuur on naan, tua!
Hit tapein ha'mu'it ma ma'ne'at natuin hit tjair atoni Kristen
12 Aok-bian manekat arki! Kais amsanmaak karu mipeni 'taka' re' ma'fena'. Fin re' naan ansoba' hi rais pirsait. Kais mutenab mak, suma ho mmees kuum es re' mupeni 'taka' on re' naan. 13 Mes hi bisa mmariin, natuin hi mipein ha'mu'it ma ma'ne'at nahuum on re' Kristus napein ha'mu'it ma ma'ne'at amsa'. Nok ranan naan, hi neekm ein anmarinan oras mansian ii ok-oke' nkius niit Kristus In pinan ma krahan. 14 Oras tuaf ankana'paar ki natuin hi mmafuut mok Kristus, hi mipein upan ma pa'e, natuin Uisneno In Asmanan re' mapina'-makraha' nmoin et hi tuam ein aan. 15 Mes karu hi ro he mipein ha'mu'it ma ma'ne'at, kais natuin hi mjair aroor tuaf, ai' abakat, ai' atoin maufinu, ai' tuaf re' nseitn on neu biak ein sin urusan. 16 Mes karu tuaf napein ha'mu'it ma ma'ne'at natuin anjair Kristus Iin na, in kais namaeb on. Reko nneis sin npures ma nbo'is Uisneno, natuin sin njarin atoni Kristen. 17 In oors ee ntea goen he tuaf anbaiseun an'ain Uisneno. In nmurai nparikas na'ko Iin na sin a'moink ein. Onaim mitenab! Karu In nmurai na'ko hit atoni Kristen, on mee nok atoni' re' ka nroim fa he ntoup In Rais Reko? Sin of napenin hukun ma'fena' nneis, joo! 18 Fin ma'tu'i nbi Suur Akninu' Uisneno mnak, “Karu tuaf re' nmoin namneo ma namnoon aar a'kre'o te, ka nsoi nafetin naan ee fa, on mee nok tuaf re' ka ntoe ma nrae natuin fa Uisneno? Rarit, on mee ntein nok re' tuaf re' nmoin nok 'moe' sanat?” 19 Onaim karu Uisneno nkonan Iin na he napenin ha'mu'it ma ma'ne'at natuin Uisneno In romin, sin bisa npirsain am nak, In of anpanat ma npafa' sin. Fin In es re' anmoe' ma npakae naan sin. In nmoe' natuin saa' re' In na'uab anrair je msa'. Natuin In npanat ma npafa' sin on re' naan, es naan ate sin napenin mainuan fe' he bisa nmo'en rasi re' namneo ma namnoon piut.
Fainekat neu a'naak jemaa't ein
1 Au kuuk a'jair a'naakt es. Unu' te, oras Kristus nasaah In ha'mu'it ma ma'ne'at, au 'kius ma 'iit 'eik au matak fuan. Oras mansian ii ok-oke' of ankius nitan Uisneno In pinan ma krahan, au he 'kius ok rasin naan amsa' 'eik au matak fuan. Onaim au he 'faineek 'eu a'naak jema'at bian sin on nai: 2 hi on re' atukus re' npijaar in a'bib-kaesn ein. Onaim hi ro he mpijaar mirek-reko' tuaf ein re' Uisneno nfee sin neu ki. Am'urus sin nok rek-reko. Kais am'urus natuin hi mepu, mes natuin hi mroim he mmoe' on naan. Am'urus sin natuin Uisneno In romin. Kais amroim he mipeni nneis-neis, mes ammeup nok ma'tani' he mturun ma mbaab Uisneno Iin na. 3 Kais miprenat tafi'-tafi', he mtao ma'fena' meu tuaf ein re' Uisneno nfee sin he hi m'urus sin. Mes hi ro he mjari 'tope' arekot, re' miruru' ma mikrira' ranan meu sin. 4 Nai' Yesus re' naan, In on re' A'naak Atukus. Oras In ankoen On anfain neem, Uisneno nroim he nfee ki hi upam, natuin hi m'urus Iin na nok rek-reko. Upaf naan, ka bisa nreu' fa, fin in ntahan nabar-baar.
Fainekat neu muinf ein
5 Muinf ein! Hi ro mneen ma mitniin a'naak jemaa't ein. Hi arki ok-oke' kais maikas hi tuam ein. Fin matu'i et Uisneno In Suur Akninu' mnak, “Uisneno nraban neu tuaf re' ntuna' ma na'ratan sin tuak ein, mes In nroim he naruru' ma nakrira' In nekan arekot neu tuaf re' neek a'paran.” 6 Es naan ate, hi arki ok-oke' ro he mimnau Uisneno In kuasa, he hi kais maiks om. A'roo-'roo te, of nateef nok in oras, Uisneno he nbo'is ki. 7 Amnona' ma mfee hi neekm ein he Uisneno es re' an'urus are' saa'-saa' ii re' nmoe' hi teenb ein ma'fena'. Fin In es re' ankius ma npairoir ki. 8 Ampaant om, oo! Mitenab mirek-reko'! Ampao rek-reko, natuin hit musu, es re' nitu 'nakaf he nareu' nain ki. In he n'oor naan ki, on re' mui' fui apisut re' natoo', ma naim mu'it re' anjair in amnahat. 9 Mes kais mimtau. Hi ro he mraban nitu 'nakaf naan. Hi ro he maran ma mtahan amsa' he mpirsai meu Uisneno piut. Fin hi mihini mrair mak, hi aok-bian apirsait ein anbin mee-mee, ro napenin susat on re' hi msa'. 10 Mes mimnau, fin Uisneno nroim he naruru' ma nakrira' In nekan arekot neu kit. In es re' no'en naan ki he mjair Iin na, natuin hi mtoupu mrair Kristus. Es naan ate In he na'ratan ki, he hi bisa mmoin piut mok Ne. Mes karu hi mipeni mrair susat ma ma'ne'at ambi pah-pinan ia rabah, Uisneno he nareko' nafani' ki. In he nfee ki 'be'if ma ma'tanif, ma nmoe' ki maran ma mtahan. In natoko' ki mbi fatu 'sukif ma'tani' msa'. 11 Hai mtoit he Uisneno es re' annaa' are' kanan kuasa tar antea nabar-baar. Batuur on naan, tua!
Nai' Petrus nasoup in surat
12 Nai' Silas anturun ma nbaab kau he 'tui suur ana' re' ia. In re' naan, hit aok-bian atoin apirsait, ma au tuaf re' au 'pirsai. Au 'faineek ki, he hi maran ma mtahan ma'tani', fin Uisneno naruru' ma nakrira' In nekan arekot neu kit piut. Onaim hi ro he mhaek piut, kais amtet-koit. 13 Apirsait ein abitan kota Babel sin imsa' ansoun ein haan tabes ma haan buseet neu ki. Uisneno npiir inrair naan sin, on re' In anpiir naan ki. Au anah nai' Markus ansonu' haan tabes ma haan buseet amsa'. 14 Karu hi maktefan ate, misee mpaek maneek panaf he miruru' ma nakrira' hi maneekm ein. Au 'roim he hi arki ok-oke' re' ampirsai Kristus bisa mmoin mok mamut, mbi rais rame', ma tainina'. Saloom, Au nai' Petrus kau, tua.
Tabe ma haan buseet
1 Surat re' ia na'ko au, nai' Simon Petrus kau. Au 'jair Yesus Kristus In aan renu'-aan reka'. Au 'jair In haef amsa', re' In nreek haefan kau 'nao 'eu mee-mee he utoon anmatoom nok Ne. Au 'tui surat re' ia 'eu ki re' ampirsai mrair meu Yesus Kristus. Natuin Uisneno In neekn ee namneo ma namnoon, In nfei ranan he hi bisa mpirsai meu Kristus, on re' hai. Rais pirsait naan ma'oos re'uf neu kit ok-oke'. Kristus anjair hit Uisneno, ma In njair Tuaf es amsa' re' nsoi nafetin naan kit na'ko hit saant am penu sin. 2 Au 'toit he hi bisa mihiin mirek-reko' Uisneno, ma mihiin mirek-reko' hit Usi' Yesus. Maut he sin naruru' ma nakrira' Sin nekak arekot neu ki, he hi bisa mmoin nok mamut, rais rame', ma tainina'.
Uisneno npiir Iin na, rarit no'en naan sin he neman neu Ne
3 Nai' Yesus anmui' kuasa re' huma' mese' on re' Uisneno In kuasa. Es naan ate, Nai' Yesus anfee nrair kit are' kanan saa'-saa' re' hit tperluu, he tmoin tamneo ma tamnoon tatuin Uisneno In romin. In nmoe' on re' naan, natuin hit tahiin Je nok reko. Ma In es re' no'en naan kit he tjair Iin na, natuin In ro reko ma mapina'-makraha'. 4 Nai' Yesus anfee nrair are' kanan saa'-saa' re' pentiing neu kit. Fin unu' te, In nba'an anrair he nfee saa'-saa' ein naan. In rais manbaa'n ein reok re'uf. In nfee sin ok-oke' neu kit, he hit neek ii bisa njair on re' Uisneno In nekan. Ma hit bisa tapein fetin ta'ko rais maufinu re' mansian pah-pinan ia nroim he nmoe' je, natuin sin suma nmonin natuin sin roimk ein kuuk, ma ka ntahan naan fa sin tuak ein. 5 Es naan ate, au 'roim he hi mhaek ma'tani' he mmoe' rais reko. Fin hi mpirsai mrair meu Nai' Yesus, mes naan ka nanokab fa fe'. Ammeup rais reko piut. Mihiin Uisneno reko nneisi ntein. 6 Mes kais suma mtea haa naan. Minoni' he hi mbi moint ii in nanan hi mtahan maan hi tuam ein naan. Mes naan ka nanokab fa fe'e msa'. Ansuun oras hi mipein susat, hi ro he maran ma mtahan piut, kais amtet-koit. Mes ammo'e nneis na'ko naan antein. Ammoe' are' kanan rasi mituin Uisneno In romin. 7 Mes kais amtea naan ahaa. Miruru' ma mikrira' manekat meu hi aok-bian apirsait ein. Mes naan ka nanokab fa fe'. Fin ambi moint ii in nanan hi ro he mmaneek piut. 8 Karu hi mmoin on naan ate, rais rekon re' ia na'baab ok anteni', naan anmoe' ki he mihiin mirek-reko' hit Usi' Yesus Kristus. Rais rekon re' ia, ka ruum am parsuum fa, ma ka nporin fa oras amsa'. Fin rais rekon re' ia nmoe' ki he mihiin mirek-reok' Ee. 9 Karu nmui' tuaf re' ka nroim fa he on naan, in natenab par-paar aah. In ka nkius fa saa' re' et in human ma in matan, on re' anfoor. Fin Uisneno nnoes nain tuaf naan in sanat ma penu sin, he in neekn ee bisa nakninu'. Mes tuaf naan annikan anrair. 10 Aok-bian manekat arki! Oras ia, hi ro mhaek ma'tani' mtein. Uisneno npiir naan ki he mjair Iin na, rarit hi iim meu Ne. Oras ia, hi ro he miruru' ma mikrira' mak, hi mtaam amjair In nonot-asar. Karu rasin ia re' au 'ait sin fe'e na na'baab ok piut anbi hi 'moinm ein, hi of ka mmouf main fa. 11 Nok ranan naan, Uisneno nroim he nfee ki rais jes re' ma'tain re'uf. Es re' In nfei ranan ma nfee ki hak he mtoup Yesus Kristus anjair hi Usif, he mmoin piut-piut mok Ne. Fin In re' naan hit Usi'. Ma In re' naan Tuaf re' nsoi nafetin naan kit na'ko hit sanat ma penu sin imsa'.
Nansaa' am es nai' Petrus antui on naan?
12 Hi mihini mrair rasin naan re' au 'ait ma 'teek sin fe'e na, ma hi maran ma mtahan ma'tani', natuin hi mpirsai saa' re' batuur. Maski on naan amsa', au he umnaub ufani' rasin re' ia 'eu ki fani-fani, maut he hi kais amnikan. 13 Au ka 'konan ki fa he hi mnikan. Au he umnaub ufani' ki, he hi bisa mitenab piut-piut rasin re' ia. Fin oras au 'moin fe' 'bi pah-pinan ia, pantas karu au umnaub ufani' ki rasin re' ia. 14 Ka 'roo fa te, au he 'maet jen. Hit Usi' Yesus Kristus natoon anrair kau on naan. Es naan ate au uhiin 'ain. 15 Maski au 'mate 'rair, mes au 'haek ma'tani' oras ia, he hi mimnau piut nok rasin re' ia.
Hit tkius ma tiit atrair Nai' Yesus In pinan ma krahan
16 Unu' te, au 'ok au partei ngguin mireta' mrair meu ki anmatoom nok hit Usi' Yesus Kristus. Hai mireta' amsa' am mak, oras In nkoen On anfain neem, In neem nok kuasa re' ma'tani'. Batuur, tua! Naan ka reet poi fa. Fin hai mireta' meu ki anmatoom nok saa' re' hai mkius ma miit kiim meik hai matam fuam ein kiim! Es naan ate hai mihiin Nai' Yesus In pinan ma krahan naan, on re' uis kou' goes. 17-18 Neot es, hai mibua mok Nai' Yesus anbi Uisneno In a'to'ef akninu'. Onaim Aam Uisneno kuun es re' natoon anmatoom nok Nai' Yesus In pinan ma krahan. Fin oras naan, hai mneen haanf es, re' reok re'uf anpoi na'ko neon goe mnak, “In re' ia, Au Aan neka'. In nhariin Au nekak.” 19 Naan anmoe' kit tpirsai ttein anmatoom nok rasin re' hit ttoupu trair sin ta'ko mafefa kninu' Uisneno un-unu' sin. Onaim reko nneis hi mmoe' mituin sin haan manba'an! Fin sin haan manba'an naan nahuum on re' pauk goes re' anpiin anbi baer meis'okan. Onaim hi ro he mneen ma mitniin sin haan manba'an naan tar antea Nai' Yesus ankoen On anfain neem. Nok ranan naan, hi bisa mihini mtein. Fin, naan on re' hi mkius faif noem je, na' hi mkius maans ee nsae he ntana' are' saa'-saa'. 20 Mimnau, fin Uisneno In mafefa kniun' ein natoon nain rasi mfaun. Mes sin haan manbaa'n ein ka natuin fa sin 'roimk ein kuuk. 21 Natuin saa' re' sin ntui sin naan, ka na'uu ma na'baa' fa na'ko saa' re' sin nromin he na'uab sin. Mes naan na'uu ma na'baa' nbi Uisneno, natuin saa' re' In Asmaan Akninu' naruru' ma nakrira' sin.
Tuaf re' anfee noni' puta-kriut
1 Unu' te, anmui' atoin Israelas bian nak, sin njarin mafefa kninu' Uisneno. Te kaah, sin nputa-kriun. Hi of miit ma miteef tuaf on re' sin ambi hi sonam ma hi tnanam. Fin tuaf bian nak, sin nfeen noni' anmatoom nok Uisneno, mes naan puta-kriu goah. Sin nanoni' na'kor-koro' sin tenab reu'f ein. Etun sin bisa nataam sin noin' ein re' ka namneo ma namnonon fa. Karu hi mneen ma mitniin sin noin' ein, hi of mimreu'. Sin nasuan ma ntorak am nak, Usif Yesus naan, ka sin usin fa. Te kaah, In es re' ansoi nafetin naan sin anpaek baen ma'oos re'uf. Natuin sin i'moe'k ein on naan, of sin kuuk namre'un rabah. 2 Maski on naan, mes too mfaun ein of natuin sin, ma nmo'en tafi'-tafi' re' ka namaeb ok nahinin fa. Atoni' of na'uab re'uf anmatoom nok noni' re' batuur, natuin sin i'moe'k ein naan. 3 Tunggur aputa-kriut ein naan, akomat ma aparu'. Sin nkaran huma'-huma' he bisa napoi ki ma ntoup naan hi roit ein. Mes kais amnikan, fin Uisneno njair Afeek Rasi re' ka ntuup niit fa. Na'ko unu', In nabarab he nhukun sin. Sin of namre'un nkonon. 4 'Tope' on re' unu' te, Uisneno In ameput bian nbin sonaf neno tunan nmo'en sanat. Mes Uisneno re' njair Afeek Rasi ka nafetin sin fa. In nporin nain sin anbin ai abar-barat, ma nataam sin nbin Koon Meis'okan re' Mnanu'. Sin npaon nbin bare naan tar antea in oras sin nbaisenun n'ain Ee. 5 On naan amsa' atoin un-uun ein. Oras naan, sin nmoin nok 'moe' maufinu, ma ka ntoe fa Uisneno. Mes Uisneno n'ator he In tuaf neek amne'o es, kaan ee nai' Noh, naruru' ma nakrira' ranan he mansian ii bisa nmoin namneo ma namnoon. Mes sin ka nromin fa he nneen ma natniin ee. Etun Uisneno nfee noe sako' he nareu' mansian ii re' ka ntoe natuin Ee fa. Mes In nsoi nafetin nai' Noh ma in uim je nanan. Sin arsin tuaf faun. 6 Neot es antein, atoin un-uun ein na'kon kota Sodom ma kota Gomora sin nmonin nbin maufiun re'uf. Rarit Uisneno nhukun sin. In nout nakrati' are' kanan saa' ii ok-oke' tar antea nputu nmaten. Rarit mansian abitan naan anmaten ok-oke'. Naan anjari 'tope' neu tuaf bian re' nroim he nmoni nbi maufinu, ma sin ka ntoe natuin fa Uisneno. Sin bisa nahiin nain sin uak ein karu sin ka na'pisan fa na'ko sin sanat ma penu sin. 7 Mes oras naan, anmui' tuaf es kaan ee nai' Rot, re' nmoin namneo ma namnoon. In nhae nmaet jen nok atoin maufiun ein sin i'moe'k ein re' bainesi', re' ka nneen ma natniin fa Uisneno. Rarit Uisneno nsoi nafetin nai' Rot na'ko bare naan. 8 Nai' Rot anmees anroim he nmoe' rais reko, mes in nmoni nbi abitan kota Sodom ma kota Gomora sin atnaank ein. Neno-neno te, in nkius ma nneen sin antanhai Uisneno In Atoorn ein. Naan anmoe' in neekn ee nsuus. 9 A'toep ein re' naan ok-oke' naruru' ma nakrira' mnak, Uisneno nmui' ranan he nsoi nafetin tuaf re' nneen ma natniin Ee na'ko 'taka' huma'-huma'. In nfee hukun ma'fena' neu tuaf ein re' nmoni nbin 'moe' sanat. Ma In nmoe' on naan piut, tar antea oras In nafeek tuaf mese'-mese' sin rasin. 10 Hukun ma'fena' naan, nfee je nneis-neis neu tuaf re' suma nmonin nbin sanat ma penu sin, natuin sin roimk ein kuuk. Sin ka nromin fa he nneen ma natniin tuaf es amsa', ma sin nkana'paar re' anaa' apreent ein ok-oke'. Ro tebes, Uisneno of anhukun sin. Rarit tunggur aputa-kriut ein fe'e na, sin ro nabranin, ma naiks ok. Sin ka nromin fa he naruru' ma nakrira' rais hormaat, ma sin ka namtaun fa he na'uab na're'uf Uisneno ma In ameupt ein sonaf neno tunan. 11 Te kaah, In ameupt ein sonaf neno tunan ma'tani' nneis na'ko tunggur aputa-kriut ein naan. Maski on naan amsa', ameupt ein ka na'uab na're'uf fa tunggurn ein naan anbi sin Usin In human ma In matan. Ma sin ka nasaeb ein fa sanat neu tunggurn ein naan amsa'. 12 Mes tunggur aputa-kriut ein naan na'uab na're'uf are' kanan rasi re' sin kuuk ka nahiin sin fa. Sin on re' mu'it re' ka natenab nahiin fa! Reko nneis, amheek maan sin maut he sin namre'un kuuk! Fin re' naan sin uak ein. Sin of namre'un nkonon, natuin sin i'moe'k ein. 13 Sin nasusab tuaf amfaun. Rarit Uisneno of nasusab sin, natuin sin i'moe'k ein re' ka batuur fa. Sin feest ein tafi'-tafi' bu'-bua'. Sin nmo'en tafi'-tafi' msa' oras manas, he too mfaun ein bisa nkius sin maufinun. Sin ka namaeb ok fa, rarit sin nareu' hi kaanm ein. Karu sin nbukaen nbin fesat nabu-buan nok ki, sin suma nmoe' natuin sin roimk ein re' maufinu. 14 Sin maatk ein an'eern ahaa he namin bifee re' nroim he nmakaken nok sin. Sin nmonin nbin goah ahaa 'moe' maufinu. Sin nromin he namin tuaf re' in rais pirsait neu Uisneno ka na'kii' fa, rarit nfuri' sin he natuin 'moe' maufinu. Sin nam-namin ranan he sin nakoman piut. Ro tebes, Uisneno of anhukun sin! 15-16 Unu' te, tunggur aputa-kriut ein naan, tuaf ein re' natuin raan amneot, mes a'roo-'roo te sin nbeon ok. Nok ranan naan, sin on re' nai' Balaam un-unu' naan, es re' Bosor in anah. In re' naan Uisneno In mafefa kniun es. Mes in nroim na'seke' neu mnaim roit, onaim in nmoe' rasin re' ka namneo ma namnoon fa. Neot es, Balaam ansae bikaes keledai. Bikaes keledai sin ka bisa na'uab ein fa. Mes oras naan Uisneno nmoe' bikaes keledai naan bisa na'uab on re' mansian! Rarit bikaes keledai naan nakaina' nai' Balaam, natuin in nmoe' maufinu. Bikaes keledai naan nroim he in nasnaas, he in kais anmoe' maufinu ntein, on re' amaunut. 17 Tunggur aputa-kriut ein naan on re' oe maat es, re' ka mapake' fa, natuin in oe mata' naan anmeit. Sin on re' nipu' re' ka mapake' fa, natuin ain ee nfuu nporin. Uisneno nabarab nain baer meis'ookn es he ntahan sin. 18 Fin sin naikas sin tuak ein, mes ka ma'afa' fa. Sin nfuri' naan tuaf-tuaf he sin nmoe' natuin rais tafi' re' ka pantas fa. Sin nfuri' ma nkopo' tuaf re' fe'e nfani nbi ranan re' namneo ma namnoon, he sin nmo'en sanat antein. 19 Atoin aputa-kriut ein naan anbaa'n ein am nak, “Karu hi mneen ma mitniin kai, hi bisa mmoe' mituin hi roim ein kiim!” Mes tuaf re' na'uab on re' naan, on re' ate re' ka bisa nafeit on fa na'ko sin maufinu. Fin tuaf re' nkonan rais jes he n'ator in tuan, naan on re' in njair rasi naan in ate. 20 Karu mroim he mipein fetin mi'ko maufinu pah-pinan re' nhai'nisib ma n'oemetab kit, hit ro he tahiin ma ttoup hit Usi' Yesus Kristus. Mes karu nmui' tuaf re' ntet-koit na'ko Na, rarit anmafutu nfain nok rais maufinu on re' in nmoe' je unu', re' naan on re' rais maufinu naan an'aotr ee. Oras ia, sin namre'un ntenin! 21 Ka reko fa karu sin nahini nrair raan a'honis re' batuur, rarit antet-kotin, onaim ka nmoe' natuin fa rasin re' reko ma nakninu', re' Uisneno naprenat anrair sin neu kit. Reko nneis, karu sin ka nahiin nitan fa ranan re' namneo ma namnoon. 22 Anmui' tonas ma nee re' antoom tunggur aputa-kriut ein naan am nak, “Karu aus goe nroo', in naah nafani' in ro'o naan kuun.” Anmui' bian antein re' nak, “Maski taniu trair faif jes, mes in ntebi nfain ma n'oban antein.”
Hit Usi' he nkoen On anfain neem
1 Aok-bian manekat arki! Surat re' ia, au surat no nuan ii 'eu ki. Anbi suur nua' ein re' ia, au umnaub ki, he hi bisa mitenab anmatoom nok rasin re' namneo ma namnoon. 2 Mimnau mafefa kninu' Uisneno sin uabk ein un-unu'. Mimnau Nai' Yesus In haef ein imsa'. Mitenab mirek-reko' anmatoom nok saa' re' hit Usi' naprenat sin he natoon ki. Fin In es re' nsoi nafetin ki na'ko hi sanat ma penu sin! 3 Mimnau on nai fe': anbi neon amsoupt ein anmui' tuaf akana'parat sin re' anmo'en tafi'-tafi' natuin sin roimk ein kuuk. Sin na'uab na're'uf are' kanan rasi re' batuur. 4 Sin na'uab ein am nak, “Phueh! Nai' Yesus anba'an am nak, In he nkoen On anfain neem, ai'? Karu on naan, In et mee? Fin anmurai na'ko hit be'i-na'i sin anmaten, tar antea oras ia msa', ka na'bani' niit fa. Saa' ii ok-oke' nnao piut, anmurai na'ko Uisneno nmoe' neno tunan ma pah-pinan.” 5-7 Mes anmui' rais jes re' atoin aputa-kriut ein ka nahiin naan ee fa. Es re', na'ko ahun-hunut Uisneno suma na'uab ahaa, rarit neno tunan anjair nain. Onaim Uisneno anmoe' oe. Rarit In nbetis oe na'ko auf meto', ma nmoe' auf meto' npoi ma nboor neem na'ko oe. Uisneno na'uab anrair on mee te, naan nabaar piut. A'roo-'roo te, Uisneno npaek noe sako' msa' he nareu' mansian ii ok-oke' et pah-pinan ia re' nmonin nbin oras nai' Noh anmoin. Mes oras ia, Uisneno natoon nain saa' re' In he nmoe' je neu neno tunan ma pah-pinan. Oras ia In antah-tahan, mes nateef in oras, In he notu nporin sin. Fin Uisneno of nafeek hukun he nareu' nain tuaf re' ka ntoe natuin Ee fa. Maski on naan, mes atoin aputa-kriut ein naan ka namnaun fa nak, Uisneno of anmoe' natuin saa' re' In na'uab anrari. 8 Aok-bian manekat arki! Kais amnikan rasi ia. Hit Usi' ka nsoi' fa oras on re' hit. Fin tatuin Ee, neno mese' bisa on re' toon niufn es. Ma toon niufn es, bisa on re' neno mees' aah. 9 Karu hit Usi' anba'an he nmoe' rais jes, In nmoe' je natai nateef nok in oras, ma ka npa-pao fa. Anmui' tuaf bian natenab am nak, In mepu te 'roo. Te kaah fa, tua! Fin In sabaar ahaa, he npao in oras. Hit Usi' nroim he tuaf mese'-mese' ok-oke' na'pisan na'kon sin saant ein fe', he nasaitan sin saant ein ma penu sin, rarit nabain ein ma natuin Ee. Fin In ka nroim fa he tuaf-tuaf anbaits ok nok Ne. 10 Mes oras hit Usi' ankoen On anfain neem naan, ka tiit fa tuaf re' nahiin nain. Fin In amneman naan, nok askeekn aah, on re' abakat re' he ntaam neu uim jes in nanan. Oras naan, are' kanan baer' ein nbin neon goe tnanan anputun nmaten, on re' manas, funan ma kfuun ein ok-oke'. On naan amsa', pah-pinan ma in afan-nesan ok-oke'. 11 Onaim karu saa' ii ok-oke' nputun nmaten on naan, hi ro he mjair tuaf on re' mee? Hi ro he mhaek ma'tani' he mmoin mituin Uisneno In romin. Hi ro he mmoin nok akninu'! 12 Hi ro he mpa-pao msa' Uisneno In amneman. Onaim hi ro he mhaek ma'tani' he mmoe' neno naan neem rabah. Oras naan, neon goe tnanan anputun nmaten. Ma are' kanan baer' ein nbin neon goe tnanan amsa' nputun ma nre'u nmaten. 13 Mes of anmui' neno tunan huum fe'u ma pah-pinan huum fe'u. Uisneno nba'an anrair on naan, onaim hit tpa-pao rasi naan. Anbi bare naan suma nmu'i haa tuaf re' nmonin namneon ma namnonon. 14 Onaim aok-bian manekat arki! Oras hi mpa-pao rasin re' ia, hi ro he mhaek ma'tani' he mjair atoin neek reko, tatuin Uisneno In tenab. Nok ranan naan, ka nmui' fa tuaf re' bisa nasaeb sanat neu ki. Amhaek ma'tani' he mmoin nok rais rame' msa'. 15 aFin hit Usi' naan ansabaar, maut he In bisa nsoi nafetin ki na'ko hi saant am penu sin.
Nai' Petrus nasoup in surat
15 bHit aok-bian nai' Paulus antui nrair neu ki anmatoom nok rasi mfaun re' huma' mese', ai'? Uisneno es re' anfee ne mahinif on re' naan, es naan ate, in ntui on naan amsa'. 16 Ansuun oras, oras nai' Paulus antui surat, in ntui rasin ia msa'. Na'ko in suurt ein, anmui' rasi re' hit ro he taim ranan fe' na' theek taan in sarit. Anmui' tuaf amsa' re' na'e'ob nai' Paulus in sarit. Sin na'e'ob rasi bian amsa' anbi Uisneno In Suur Akninu'. Sin re' naan, esan re' apehet, ma tuaf re' sin rais pirsait ee ka na'kii' fa. Tuaf humaf on re' naan, of namre'un nkoon. 17 Aok-bian manekat arki! Hi mihiin tunggur aputa-kriut ein naan sin raan a'honis. Onaim ampaant om! Fin sin ka nromin fa he nneen ma natninan atoran saa'-saa'. Sin nsoba' he nputa-kriu ki, maut he hi mbeon om mi'ko raan amneot. Mes kais amkonan sin he niis naan ki on naan. Fin hi ro he maran ma mtahan piut. 18 Reko nneis, hi rais pirsait aan na'baab on piut. Fin hi mihiin hit Usi' Yesus Kristus, re' nsoi nafetin kit na'ko hit saant am penu sin. In he naruru' ma nakrira' In nekan arekot neu ki. Ma In nromi msa' he hi bisa mihiin mirek-reok' Ee mtein. Au 'roim he mansian ii ok-oke' naikas na'rat-raatn Ee, na'ko oras ia tar antea nabar-baar! Saloom, Au nai' Petrus kau, tua.
Nai' Yohanis antui nmatoom nok Yesus Kristus
1 Au 'tui surat re' ia anmatoom nok Uisneno In Kabin ma Prenat re' neiki 'monif. Kabin ma Prenat re' neiki 'monif re' ia, anmui' nain na'ko oras pah-pinan ahun-hunut. Oras ia au, ma au partei ngguin amkius Goe ma miit Ee nok hai maatm ein kiim. Hai mneen ma mitniin Ee nok hai ruikm ein kiim. Ma hai mreo' Goe nok hai 'niim ein kiim. Hai mkius Goe on re' naan, 2 natuin In nboor neem anbi hai sonam ma hai tnaanm ein. Unu' te, In natua nok In Amaf, mes oras ia In naruru' ma nakrira' In tuan ee neu kai. Nok ranan naan hai mibrain he mitoon meu ki on mee m'es mansian ii bisa napein monit re' namneo ma namnoon re' ka natfeek niit fa. Fin In re' naan, Kabin ma Prenat re' neiki 'monif. 3 Hai he mitoon ki, are' saa' ii re' hai mkius ma hai mneen amrair sin, he hi bisa mneka' mees mok kai. Fin hit ok-oke' tmafutu' trair tok Uisneno ma In Anah re' In nreek Ee neem, es re' Yesus Kristus. 4 Onaim hai mtui surat re' ia, he mharineb hi neekm ein. Nok ranan naan, hai neekm ein anmarinan ntein' ein.
Apirsait ein ro he nmoni nbin me'u
5 Noni' re' Nai' Yesus natoon anrair sin neun kai, oras ia hai he mitoon sin meu ki, on nai: Uisneno naan, ro reok re'uf. In ka nmui' fa maufinu kre'o msa'. Fin In on re' me'u re' ntana', re' ka nmui' fa meis'okan a'kre'o msa'. 6 Karu hit ta'uab am tak, “Hit tmoin nekaf mese' tok Uisneno,” te kaah, hit fe'e tmoin tok 'moe' maufinu, naan on re' hit tmoni tbi meis'okan. Fin hit ta'uab puta-kriu goah, ma ka tmoin fa tatuin ranan amneot. 7 Mes karu hit tmoin tatuin ranan amneot, hit on re' tuaf re' nmoni nbi Uisneno In me'u. Nok ranan naan, hit bisa tmoin nekaf mese' es nok es. Ma hit neek ii njari kninu', natuin Uisneno In Anah Nai' Yesus anmaet, ma In naa' ee nnoes nain hit sanat ma penu sin ok-oke'.
Tuaf re' nmoni nbi me'u, ka nmoin fa nok 'moe' sanat antein
8 Karu hit ta'uab am tak, “Hit ka tmoe' fa sanat,” naan anjair tanar am nak, hit tapoi hit tuak ii kuuk, ma ka tahiin fa saa' re' batuur. 9 Mes karu hit tmanaku' hit sanat, Uisneno re' neek amneot ma amnonot, of anmoe' natuin In rais manba'an ma nnoes nain hit sanat ma penu sin, ma nakninu' hit nekak. 10 Karu hit ta'uab am tak, “Hit ka tmoe' tiit fa sanat,” naan hit tmoe' Uisneno njair aputa-kriut! Fin In na'uab anrari mnak, mansian ii ok-oke' nasaanb ein. Ma karu hit ta'uab on naan, ro batuur, In Kabin ma Prenat ka nmoin fa et hit nekak.
1 Anah amaneekt ein arki! Au 'tui utoon 'ain rasin re' ia ok-oke', maut he hi kais ammoin misanab amtein. Mes karu nmui' tuaf re' nasanab, anmui' tuaf re' of anpeis kit anbi Uisneno In human ma In matan. In re' naan, Yesus Kristus, es re' Tuaf Akninu' re' Uisneno nreek Ee neem neu pah-pinan ia. 2 In nmaet ma njair fua'-turu' neu kit, he Uisneno nnoes nain hit sanat ma penu sin. Ka neu kit itmees jah fa, mes neu mansian ii ok-oke' nbi pah-pinan ia msa'.
Tuaf re' nmoni nbi me'u, nmoe' natuin Uisneno In aprenat, anneis-neis prenat anmatoom nok rais manekat
3 Hit tahiin tak, hit tahiin tarek-reko' Uisneno, karu hit tatuin In apreent ein. 4 Tuaf bisa na'uab ahaa mnak, “Au uhiin Uisneno” Mes karu in ka nmoe' natuin fa Uisneno In aprenat, in re' naan aputa-kriut re' na'uab ate, a'teta', anmo'e te, a'teta'. 5 Mes tuaf re' nmoe' natuin Uisneno In aprenat, naan anjair bukti mnak, in nmanekat neu Uisneno ro batuur. Nok ranan naan, hit tahiin tak, hit re' ia, Uisneno Iin na. 6 Onaim karu tuaf na'uab am nak, “Au 'moni 'mafuut 'ok Uisneno” in ro he nmoin nahuum on re' Yesus Kristus. 7 Anah amaneekt ein arki! Prenat re' au 'tui je re' ia, ka rais fe'u fa neu ki. Fin aprenat re' ia matu'i ma ma'boto' nain anbi Uisneno In Kabin ma Prenat re' hi mneen ma mitniin main je na'ko unu'. 8 Maski on naan amsa', mes anmui' rais fe'u re' au he 'tui, nmatoom nok Nai' Yesus In aprenat. Prenat re' ia nanaob on nok reko nbi Nai' Yesus In a'monin. Ma prenat ia nmurai nanaob on anbi hi 'monim, natuin meis'okan re' et hi neekm ein anmurai namneuk, ma me'u re' batuur anmurai ntana' nbi hi 'moinm ein. 9 Atoni' bisa na'uab ahaa mnak, “Au 'moni 'bi me'u.” Mes karu in neekn ee nameen anmatoom nok in aon-bian, naan anjair tanar am nak, in fe'e nmoni nbi meis'okan. 10 Fin atoni' re' nmoni nbi me'u, in ro he nneek in aon-bian, ma ka nmui' fa maufinu saa'-saa' anbi in nekan re' nmoe' je he nmouf. 11 Es naan ate, karu nmui' tuaf re' in neekn ee nameen anmatoom nok in aon-bian, naan anjair tanar am nak, in anmoni nbi meis'okan. In nnao nabre-reo goah, natuin meis'ookn ii nafoorb ee.
Tuaf re' nmoni nbi me'u, ka nmoin natuin fa pah-piin ii in romin
12 Ri'aan ein! Au 'tui surat re' ia 'eu ki, natuin Kristus anmaet neu ki, rarit Uisneno nnoes nain hi sanat ma penu sin. 13 Mahoint ein! Au 'tui surat re' ia 'eu ki, natuin hi mihiin Yesus Kristus, re' ahunut ma nbi nain naa na'ko un-unu'. Muinf ein! Au 'tui surat re' ia 'eu ki, natuin hi mmakeen amraban maufiun gui in tuan, tar antea hi miis. 14 Ri'aan ein! Au 'tui surat re' ia 'eu ki, natuin hi mihiin Aam Uisneno. Mahoint ein! Au 'tui surat re' ia 'eu ki, natuin hi mihiin Yesus Kristus, re' nbi nain naa na'ko un-unu'. Muinf ein! Au 'tui surat re' ia 'eu ki, natuin hi mitunu' Uisneno In Kabin ma Prenat anbi hi neekm ein, tar antea hi mi'bei', ma hi mmakeen amraban maufiun gui in tuan. tar antea hi miis. 15 Hi kais amneek pah-piin ii in a'romin, ma pah-piin ii in baer' ein. Fin tuaf re' nneek pah-pinan, ka bisa nneek fa Aam Uisneno. 16 Rasi re' nbi pah-pinan ia ka nmafuut fa nok Uisneno. On re' tuaf re' nmoin he nharineb in tuan aa kuun; aparu' ma akomat; ma abe'ot natuin in a'mu'in. Are' rasi on re' naan, ka na'uun ma na'ba'an fa nbin Aam Uisneno. Fin sin na'uun ma na'ba'an nbin pah-pinan ia goah. 17 Te kaah pah-pinan ia of namneuk, nabu-bua nok rasin re' atoni' nroim he naim sin. Mes tuaf re' nroim he nmoe' natuin Uisneno In romin, in ka namneuk fa, fin in nmoin nabar-baar.
Tuaf re' nmoni nbi me'u ro he npaant on he kais napein poi
18 Ri'aan ein! Neon amsoupt ein he neman anpaumaakn een. Hi mneen amrair mak, atoni' re' nraban Kristus of anboor. Te kaah, sin anbin nain naan. Fin anmui' nrair tuaf re' nraban Kristus anbi mee-mee. Naan anjair tanar am nak, neon amsoupt ein anpaumakan he neemn een. 19 Araabn ein anboor neman na'kon hit itnanak ma hit soonk ii kuuk. Te kaah, sin re' naan, ka hit tuaf ein aa fa. Fin karu sin batuur-batuur hit na, ro batuur sin ka nnao nasaitan kit fa, mes sin ntahan piut nabu-buan nok kit. Mes sin anfeen annaon. Onaim batuur, sin re' naan ka hit tuaf ein aa fa. 20 Mes hi ka on sin fa. Fin hi mtoup Uisneno In Tuaf Akninu' In Asmanan. Ma In nturun ma nbaab ki, he hi ok-oke' mihiin saa' re' batuur. 21 Hi mak au 'tui surat re' ia, natuin au 'ak hi ka mihiin fa saa' re' batuur? Kahaf! Fin hi mihini mrair! Hi mihini mrair mee es re' batuur, ma mee es re' puta-kriu. 22 Te kaah, anmui' aputa-kriut re' neu-mneem et pah-pinan ia. On mee he hit bisa tahiin sin? Sin re' naan, es re' atoni' re' na'uab am nak, Nai' Yesus naan ka Kristus fa. Tatuin sin ite, Nai' Yesus naan ka Tuaf Akninu' fa re' Uisneno nba'an nain Je he nreek Ee neem. Tuaf re' na'uab on naan, anraban Kristus, fin sin ntorak nain Aam Uisneno nok In Anah. 23 Tuaf re' ntorak Uisneno In Anah, sin ntorak In Aamf ee msa'. Mes karu atoni' nmanaku' Uisneno In Anah, sin njarin Uisneno In aanh ein amsa'. 24 Onaim hi ro he mnaa' miher-heer piut meu saa' re' hi mneen ma mitniin na'ko unu'. Nok ranan naan, hi bisa mmafuut piut mok Aam Uisneno ma In Anah. 25 Ma In kuun es re' anba'an kit im nak, hit of atmoin tabar-baar tok Ne. 26 Au 'tui surat re' ia he hi mihiin anmatoom nok tuaf re' he napoi ki. 27 Hi mtoupu mrair Uisneno In Asmaan Akninu', ma hi mmoni mmafuut mok Ne msa'. Onaim hi ka mperluu fa tuaf bian he nanoni' ki ntein. Fin Uisneno In Asmaan ahaa kuun nanokab, natuin In bisa nanoni' are' kanan rasi re' batuur. In ka nputa-kriu fa, on re' aputa-kriut ein. Onaim amnaa' miher-heran saa' re' In nanoni' nrair sin, he hi bisa mmoin nekaf mese' piut mok Kristus. 28 On nai, ri'aan ein! Hi ro he mmoni mmafuut piut mok Kristus. Maut he oras In nkoen On nfain neem, hi kais mimtau ma kais mimaeb om amhake mbi In human ma In matan. 29 Natuin hi mihini mmak, In nmoe' piut saa' re' batuur, etun es hi bisa mihini msa' mak, mansian ii ok-oke' re' bisa nmoe' natuin saa' re' batuur, sin njarin Uisneno In aanh ein amsa'.
Tuaf re' njair Uisneno In aanh ein ro he nmonin nok batuur — Uisneno In aanh ein ka nmonin fa nok 'moe' sanat antein
1 Hi mitenab miit Ama' abit sonaf neno tunan In manekan neu kit! Fin In manekan naan ma'tain re'uf, tar antea In nait kit atjair In aanh ein. Batuur on naan! Mes atoni' re' nmoin natuin pah-piin ii in romin, ka nahiin fa hit re' ia sekau, natuin sin ka nahiin fa Uisneno. 2 Ri'aan amaneekt ein arki! Hit tjari trair Uisneno In aanh ein, mes ka mahini' fa fe' hit of atjair on mee ttein. Re' hit tahiin ji on nai: oras Kristus ankoen On anfain neem, hit tjair on re' In imsa', natuin hit tkius ma tiit Ee maat-maat. 3 Mansian ii ok-oke' re' anpa-pao Kristus In amneman naan, sin of nakninu' sin a'moink ein, he nmoni kninu' on re' Kristus. 4 Rais saant ein ok-oke' antanhai Uisneno In aprenat. Etun es mansian ii ok-oke' re' nmo'en sanat, antanhai nrair Uisneno In aprenat ma anraabn Ee. 5 Hi mihini mmak, Kristus anjair mansian he nnoes nain hit sanat ma penu sin. In bisa nmoe' on naan, natuin In kuun ka nmoe' niit fa sanat. 6 Onaim tuaf re' nmoni nmafuut piut nok Ne, ka nmoin fa nok 'moe' sanat antein. Mes karu tuaf anmoin nok 'moe' sanat piut, in sairt ii nak, in ka nahiin ma nakeo fa Kristus, ma ka nmafuut nok Ne fa. 7 Ri'aan amaneekt ein arki! Kais saa' es napoi naan ki. Fin tuaf re' nmoin ma nmoe' natuin saa' re' batuur, in re' naan atoin neek amneot, on re' Kristus. 8 Mes tuaf re' nmoin nok 'moe' sanat, in na'uu ma na'baa' nbi niut reu'f ein sin a'nakat. Fin in es re' nmoe' maufinu piut-piut na'ko un-unu'. Etun Uisneno In Aanh ee neem he nareu' nitu naan in 'moe' maufinu. 9 Tuaf re' njari nrair Uisneno In anah ka nmoin fa nok 'moe' sanat antein, natuin Uisneno nmoin et in tuan. In ka bisa nmoe' fa sanat piut, natuin In na'uu ma na'baa' anbi Uisneno. 10 Nok ranan naan, hit bisa tahiin sekau es re' na'uu ma na'baa' anbi Uisneno, ma sekau es re' na'uu ma na'baa' anbi niut reu'f ein sin a'nakat. Fin tuaf re' ka nmoe' natuin fa saa' re' batuur, ma tuaf re' ka nneek nahiin fa In aon-bian, naan anjair tanar am nak, in ka na'uu ma na'baa' fa nbi Uisneno.
Uisneno In aanh ein ro he nmanekan es nok es
11 Na'ko un-unu', hi mneen ma mitniin main beno re' nak, “Ammaneek es nok es!” 12 Hi fe' mimnau nai' Kaen nok nai' Habel sin reta', ai'? Kais ammoe' mituin nai' Kaen, fin in na'uu ma na'baa' nbi maufiun gui in tuan, tar antea in na'maet in orif nai' Habel. Nansaa' am es in nmoe' on naan? Naan, natuin in nmoe' rais maufiun ein, mes in oirf ee nmoe' rais amneot ein. 13 Aok-bian arki! Kais amsanmaak karu atoni' re' natuin pah-piin ii in romin sin neek ein namenan neu ki. 14 Hit tahiin tak, karu tuaf re' nmo'e nsaan anmaet, in of mabetis na'ko Uisneno. Mes natuin hit atmaneek teu hit aok-bian sin, naan anjair bukti mnak, karu hit tmaet, hit of atmoin tabar-baar tok Uisneno. Karu ansuun tuaf re' ka nmui' fa rais manekat anmaet, sin of mabetis na'ko Uisneno. 15 Fin tuaf re' neekn ee nameen neu in aon-bian, in nahuum on re' na'maet tuaf. Hi mihini mrari mmak, atoni' humaf on re' naan ka napein fa 'monit abar-barat nok Uisneno. 16 Hit bisa tahiin rais manekat re' batuur ta'ko Kristus In a'tope'. Fin In es re' anneek kit tar antea In nnona' In tuan ee he nmaet, ansenu' ma nseka' kit. Es naan ate, hit ro he tnona' hit tuak ii teu hit aok-bian sin. 17 Karu nmui' tuaf re' in a'moin ii nanokab, rarit in nkius in aon-bian tuaf es, re' in a'moin ii ma'mu'it, mes in ka nkasian ee fa he nturun ma nbaab ee, on mee m'es in bisa na'uab am nak, “Au 'neek Uisneno!” Ka bisa fa, tua! 18 Ri'aan amaneekt ein arki! Kais suma mneek meik uab maneekt ahaa, mes hi ro he mmoe' rais reko msa', he miruru' ma mikrira' rais manekat re' batuur. 19 Fin karu hit taruru' ma takrira' rais manekat ma tmoe' rais reko on naan, hit bisa tahiin tak, hit tmoin tatuin rais amneot. Nok ranan naan, hit kais tamtau, ma hit bisa tait hit humak ma hit matak oras hit tbaiseun Uisneno. 20 Maski hit neek ii kuuk fe' nakuu kit piut anmatoom nok rais re'uf re' hit tmoe' tiit ee, hit kais tamtau. Fin Uisneno In rais kasian ee, ko'u anneis na'ko hit rais kasian. Ma In nahiin sin ok-oke' msa'. 21 Ri'aan amanekat arki! Karu hit neek ii ka nakuu kit fa, hit bisa tpirsai hit tuak ii ma kais tamaeb ok oras hit tbaiseun Uisneno. 22 Natuin hit tmoe' tatuin In apreent ein, ma tharineb In nekan, etun es hit bisa ttoup are' rasi re' hit ttoit sin ta'ko Ne. 23 In apreent ee nak on nai: ampirsai piut meu In Anah Yesus Kristus, re' In nreek Ee neem. Ma ammaneek piut es nok es, on re' Nai' Yesus naprenat anrair je. 24 Tuaf re' nmoe' natuin Uisneno In apreent ein, in nmoni nmafuut nok Uisneno. Ma Uisneno nmafuut nok ne msa'. Hit tahiin tak, In nmoin et hit nekak, natuin In Asmaan ee anmoin et naan.
Uisneno In aanh ein ro he npaant ok he sin kais napenin rais poi
1 Ri'aan amaneekt ein arki! Kais mitun-tuin ahaa, karu tuaf nak, in neik haan beno na'ko Uisneno. Mes hi ro miprikas mirek-reko' he mihiin karu in uab naan batuur-batuur neem na'ko Uisneno, ai' kaah. Fin oras ia nmui' aputa-kriut amfaun re' nnaon nfuun am nateef anbin pah-pinan ia. Sin napoin am nak, sin re' naan, Uisneno In mafefa kniun' ein. 2 Hit bisa tahiin haan beno re' batuur-batuur neem na'ko Uisneno In Asmaan ee, on nai: Uisneno nba'an nain na'ko unu' he nreek neem In Anah neu pah-pinan ia. Karu tuaf re' neik haan beno naan anmanaku' mnak, Yesus Kristus naan batuur-batuur Uisneno In Anah re' njair mansian on re' hit, in haan beno naan, ro batuur neem na'ko Uisneno. 3 Mes tuaf re' ka nmanaku' fa Yesus Kristus on naan, in ka na'uu ma na'baa' fa et Uisneno. Fin rasi naan neem na'ko araban Kristus. Hi mneen ma mitniin miit am mak, re' anraban Kristus naan, of anpoi ma nboor neem. Te kaah, araban on re' naan anbi nain pah-pinan ia. 4 Ri'aan amanekat arki! Hi re' naan, batuur mi'uu ma mi'baa' mbi Uisneno, ma In kuasa et hi neekm ein. Etun es hi miis maan re' araban Uisneno. Fin In Asmanan re' et hi neekm ein naan, in ma'tanin, ma'tani' nneis na'ko kuasa re' et pah-pinan ia. 5 Sin re' naan, na'uun ma na'ba'an nbin pah-piin ii in amnekin. Etun es sin uabk ein na'uun ma na'ba'an amsa' nbin pah-pinan ia in romin. Rarit mansian pah-piin ii nromin he nneen ma natniin sin. 6 Mes hit ta'uu ma ta'baa' tbi Uisneno. Etun es tuaf re' nahiin Uisneno, in nroim he nneen ma natniin kit. Mes tuaf re' ka na'uu ma na'baa' fa nbi Uisneno, sin ka nromin fa he nneen ma natniin kit. Nok ranan naan, karu tuaf nak in neik haan beno na'ko Uisneno, hit bisa tahiin mee es re' batuur, re' na'uu ma na'baa' nbi Uisneno In Asmanan, ma mee es re' puta-kriu.
Atmaneek ma tpirsai — Manekat naan, saa'?
7 Ri'aan amanekat arki! Hit ro he tmaneek es nok es, natuin rais manekat na'uu ma na'baa' nbi Uisneno. Ansuun tuaf re' anmaneek amsa', naan na'uu ma na'baa' nbi Uisneno, ma nahiin narek-reok' Ee. 8 Mes tuaf re' ka nmui' fa rais manekat, in ka nahiin fa Uisneno. Natuin Uisneno, In es re' manekat. 9 Uisneno naruru' ma nakrira' In manekan neu kit on nai: In nreek In Aan fua mese' neem neu pah-pinan ia, he nfei ranan neu kit. Nok ranan naan, hit bisa tmoin tabar-baar tok Uisneno. 10 Karu he mkius manekat re' batuur, kais amkius hit manekat teu Uisneno. Mes amkius Uisneno In manekat neu kit, natuin In nreek In Anah he nmate njair fua'-turu' he nsenu' ma nseka' kit. Nok ranan naan, In nnoes nain hit sanat ma penu sin, he hit bisa tmarame' tfain tok Ne. 11 Ri'aan amanekat arki! Natuin Uisneno nneek kit ma'tani' on naan, hit ro he tmaneek es nok es amsa'. 12 Ka nmui' fa tuaf mese' re' nkius niit Uisneno maat-maat. Maski on naan amsa', mes karu hit atmaneek es nok es, in sairt ii nak, Uisneno nabu-bua nok kit. Ma In manekan na'baab on piut anbi hit a'monik, tar antea njair manekat amneot ma amnonot. 13 Uisneno nfee nrair In Asmanan et hit nekak. Etun es hit tahiin tak, hit tmoin nekaf mese' tok Ne, ma In nekaf mese' nok kit imsa'. 14 Au, ma au partei ngguin amkius miit amrair Uisneno In Anah nok hai humam ma hai matam kiim. Rarit hai mitoon meu mansian ii ok-oke' mmak, Ama' Uisneno nreek neem In Anah, he nsoi nafetin mansian pah-pinan ia na'ko sin sanat ma penu sin kuasan. 15 Ansuun-suun tuaf re' anmanaku' mnak, Nai' Yesus naan, Uisneno In Anah, in nmoin reko nok Uisneno, ma Uisneno nmoin reko nok ne msa'. 16 Hit tahini mtak, Uisneno anneek niis kit. Etun es hit tpirsai mtak, In of anneek kit piut. Uisneno nneek niis mansian. Onaim tuaf re' nmoin ma nmaneek es nok es, anmoin nekaf mese' msa' nok Uisneno, ma Uisneno nekaf mese' nok ne msa'. 17 Karu hit nekaf mese' tok Uisneno, hit rais manekat anjair batuur. Oras neon amsoupt ii ntea, Uisneno he nparikas ansuun-suun tuaf in a'moin naan, hit kais tamtau he thake tbi In human ma In matan, natuin hit tjair on re' Kristus oras In nmoni nbi pah-pinan ia fe'. 18 Karu hit tmoin tbi manekat es nok es, hit ka tmui' fa rasi mtaus a'kre'o msa'. Fin karu hit atmaneek nok batuur, naan on re' hit tait itporin rasi mtaus ein ok-oke' nbi hit nekak. Karu tuaf namtau, in nekan naan ansuus, natuin in namtau neu he napein hukun. In on re' ri'ana' re' ka nahiin fa fe' rais manekat re' batuur. 19 Hit tmaneek es nok es, natuin Uisneno anneek nahunun kit. 20 Karu tuaf na'uab am nak, “Au 'neek Uisneno,” te kaah, in neekn ee nameen neu in aon-bian, naan in napoi. Fin karu tuaf ka nneek fa in aon-bian re' et in human ma matan, on mee m'es in bisa nneek Uisneno re' in ka nkius niit Ee fa fe'? Ka on naan fa, ai'? 21 Fin Uisneno kuun nasanut aprenat am nak, hit kais atneek aah Ee nmees, mes hit ro he tneek hit aok-bian atoin apirsait ein amsa'.
1 Are' apirsait ein nak, Nai' Yesus naan batuur Kristus, re' Uisneno nreek Ee neem. Sin re' naan, anjarin Uisneno In aanh ein. Fin tuaf re' nneek tuaf es, re' njair amaf, in nneek amaf naan in aanh ee msa'. 2 Karu hit tneek Uisneno, ma tmoe' tatuin In apreent ein, naan naruru' ma nakrira' mnak, hit tneek In aanh ein amsa'. 3 Onaim karu hit tneek Ee, hit tmoe' tatuin In apreent ein. Ma In apreent ein ka ma'fena' fa. 4 Hit re' atjari trair Uisneno In aanh ein, bisa tiis pah-piin ii in romin, natuin hit tpirsai Je. 5 Fin tuaf re' bisa niis naan pah-piin ii in romin, es re' tuaf re' anpirsai mnak, Nai' Yesus naan, Uisneno In Anah.
Atpirsai Nai' Yesus, in areokn ii saa'?
6 Asar hi mihini haa, Nai' Yesus naan, ka suma mansian biasa fa. Fin In re' naan Kristus amsa', re' Uisneno nreek anrair Je neem anbi pah-pinan ia. Oras In he nanaob In mepu, nai' Yohanis nasrain Je nok oe. Rarit In nmate msa', ma In naa' ee nat'oop ma nasai. Onaim re' pentiing ii, ka suma fa es re' oe re' nai' Yohanis anpaek je he nasrain Je, mes In naa' ee re' nat'oop ma nasai naan, pentiing amsa'. Fin Uisneno In Asmaan aa kuun es re' natoon on re' naan, ma In ka bisa nputa-kriu fa. 7 Anmui' rasi nono' teun re' njarin saksii: 8 esan re': Uisneno In Asmanan, oe re' nai' Yohanis anpaek je he nasrain Nai' Yesus, ma Nai' Yesus In naa' ee kuun. Rais noon teun ein naan, naruru' ma nakrira' rasi mese' anmatoom nok Nai' Yesus. 9 Karu mansian es, es re' anjair saksii, hit biasa tpirsai je. Anneis-neisi ntein karu Uisneno kuun es re' anjair saksii anmatoom nok In Aanh haa kuun. Te kaah, rais noon teun ein re' ia, re' Uisneno npaek sin he naruru' ma nakrira' bukti mnak, Nai' Yesus naan ka mansian biasa fa nmees, mes In, ro Kristus amsa'. 10 Tuaf re' anpirsai Uisneno In Anah naan, in sairt ii nak, tuaf naan antoupu nrair Uisneno In Kabin ma Prenat anmatoom nok In Anah naan. Mes tuaf re' ka npirsai fa Uisneno, in on re' tuaf re' na'uab am nak, “Uisneno naan, aputa-kriut!” Nok ranan naan, in ka ntoup fa Uisneno In Kabin ma Prenat anmatoom nok Uisneno In Aanh aan kuun. 11 Uisneno In Kabin ma Prenat In aafn ii on nai: In nfee kit 'monit re' batuur re' ka natfeek niit fa. Ma hit tapein 'monit naan, natuin hit tpirsai In Anah. 12 Onaim tuaf re' nmafuut nok Uisneno In Anah, napeni 'monit abar-barat nok Ne. Mes tuaf re' ka nmafuut fa nok Uisneno In Anah, ka napein fa 'monit on naan.
Nansaa' am es nai' Yohanis antui surat re' ia?
13 Au 'tui rasin re' ia ok-oke' 'eu ki re' ampirsai Uisneno In Anah, he hi bisa mihiin batuur-batuur am mak, hi mipein 'monit abar-barat.
Nai' Yohanis antui ntein anmatoom nok rais onen
14 Karu hit t'onen teu Uisneno ma ttoit saa' ahaa re' natuin In romin, hit neek ii bisa na'kii' nak, In nneen saa' re' hit ttoit je naan. 15 Ma karu hit neek ii na'kii' on naan, hit tpirsai msa' tak, hit ttoup saa' re' hit ttoit je ta'ko Ne. 16 Karu ho mkius ho aom-bian anmo'e nsaan re' ka neik je fa nbi mates, reko nneis ho m'onen ma mtoit he Uisneno anturun ma nbaab ho aom-bian naan, he in napein fetin. Au sairt ii nbi re' ia, es re' anmui' sanat re' ka neik fa tuaf neu rasi 'maten. Ma nmui' sanat re' bisa neik tuaf nbi rasi 'maten. Mes au ka 'reun fa he m'onen karu nmui' sanat on naan. 17 Anbi Uisneno In human ma In matan, are' rais re'uf re' hit tmoe' sin naan, ansaan oke'. Mes ka saant ein ok-oke' fa re' neiki 'maten.
Nai' Yohanis namnaub antein rasi re' pentiing
18 Tuaf re' na'uu ma na'baa' nbi Uisneno ka nmoin fa nbi 'moe' sanat antein, fin Uisneno In Anah, anpaant ee. Ma maufiun gui in tuan ka niis naan Ee fa goen. 19 Hit tahini mtak, hit re' ia ta'uu ma ta'baa' atbi Uisneno. Mes hit tahini msa' tak, maufiun gui in tuan anmui' kuasa he n'ator mansian ii ok-oke' nbi pah-pinan ia. 20 Hit tahini mtak, Uisneno In Aanh ee neem anrair he nfee kit mahinif he tahiin rasin ia, he hit bisa tahiin Uisneno re' batuur. Oras ia hit bisa tmoin tmarame' tok Ne, natuin hit tmoin nekaf mese tok In Anah, Yesus Kristus. Fin In re' naan, es re' Uisneno batuur. Ma In es anfee neu mansian ii 'monit abar-barat amsa'. 21 Ri'aan ein arki! Ampanat mirek-reko' hi 'moinm ein. Kais-kais anmui' asi'ut re' nsenu' ma nseka' Uisneno na'ko hi neekm ein naan. On re' naan tua. Au nai' Yohanis kau, tua.
Tabe ma haan buseet
1 Ain honi'! Surat re' ia na'ko au nai' Yohanis kau, re' 'jair a'naak akrei. Au 'tui surat re' ia ma 'soun ee 'eu ko ain re' Uisneno npaek ko mjair Iin ja, ma 'eu ho aanh ein. Au 'neek ki ok-oke' re' hi neekm ein anmafutun nok rasin re' batuur. Are' too mfaun re' nahinin rasin re' batuur, anneek ki msa'. 2 Hai mneek ki, natuin rasin re' batuur anseen ok anbi hit nekak, ma of anmoin nabar-baar anbi hit nekak nanan. 3 Au 'onen he 'toit Uisneno ma In Anah, Yesus Kristus, he naruru' ma nakrira' Sin nekak arekot nok rais kasian neu kit, he hit bisa tmoin atbi mamut, rame' es nok es, ma tainina', tmoni tbi rais manekat, ma tmafuut piut tok rasin re' batuur.
Ammoni mbi manekat es nok es, ma amnaa' miher-heran rasin re' batuur
4 Au 'mariin a'maet oras au uteef 'ok ho aanh ein bian, ma 'kius sin nmonin nok rek-reko, natuin raan a'honis re' batuur, on re' Ama' Uisneno naprenat anrair neu kit. 5 Ain honi'! Oras ia au 'toit he hit ok-oke' tmoni tbi manekat. Rasi re' au 'toit je naan, ka preen feu' goa fa, mes au suma umnaub aprenat re' hit tnaa' tain je ta'ko un-unu'. 6 Hit bisa taruru' ma takrira' hit manekat, karu hit tmoe' tatuin Uisneno In apreent ein. Na'ko unu', In naprenat anrair kit he tmoni tbi manekat es nok es. Rasi ia ka rais feu' goa fa, fin hi mneen amrair prenat ia na'ko unu'. 7 Aputa-kriut amfaun annaon nfuun am nateef anbin pah-pinan ia. Sin nanoin ein neu tuaf am nak, Yesus Kristus neem anbi pah-pinan ia, mes In ka mansian batuur fa. Sin nputa-kriun amsa', re' nraban Kristus, ma ka nromin fa he ntoupun nak, Nai' Yesus naan es re' Kristus, Tuaf re' Uisneno npiir nain Je na'ko unu'. 8 Ampaant om rek-reko, he hit maskeet aan kais namneuk. Onaim hi ro he mmakoena' mepu piut-piut, he hi bisa mipein tetus-athoen ok-oke' re' Uisneno nba'an he nfee ki nbi sonaf neno tunan. 9 Fin tuaf re' nbeon on na'ko Kristus In noni', in ka nmafuut fa nok Uisneno. Mes tuaf re' nnaa' naheer noni' naan, in nmafuut nok Uisneno ma In Anah, Yesus Kristus. 10 Karu nmui' tuaf re' neem nanoni' rasin re' ka batuur fa nmatoom nok Kristus, kais amtoup goe mbi hi umin, ma kais amfei hi neekm ein meu ne. 11 Fin karu hi mfei hi neekm ein meu ne, hi mipein imrair sapaaf ambi in mepu re' maufinu naan.
Nai' Yohanis nasoup in surat
12 Anmu'i nteni' rasi mfaun re' au 'roim he utoon ki, mes reko nneis au kais a'tui 'bi surat. Fin ka 'roo fa ntein, au he 'uum, he u'uab 'ain 'ok ki, he hit batuur-batuur bisa tmariin bu'-bua'. 13 Uisneno npiir ho tata' msa'. In aanh ein ansoun ein haan tabes ma haan buseet neu sin aina' sin etan naan. On re' naan, tua. Haan buseet na'ko au, nai' Yohanis kau, tua.
Tabe ma haan buseet
1 Ba'e Gayus re' au 'neek ko batuur-batuur. Tabe ma haan buseet na'ko kau nai' Yohanis, a'naak akrei. 2 Au 'toit he Uisneno npafa' ma npanat ko, he ho aom ma ho smanam an'ao-minan. 3 Anmui' tua apirsait fauk re' neman ma natonan am nak, ho mutuin piut meu Uisneno In raan a'honis re' amneot. Oras au 'neen on naan ate, au neek ii anmariin anmaet. 4 Fin au 'mariin a'maet he 'neen 'ak, au aanh ein nmonin natuin ranan re' amneot.
Nai' Yohanis anbo'is nai' Gayus, natuin in nanaob mepu nok reko
5 Ba'e manekat! Ho munaob Uisneno In mepu nok reko, oras ho mtoup nok reko aok-bian sin re' nnaon nfuun am natefan he nanaob Kristus In mepu. Maski ho ka muhiin sin fa fe'e msa', mes ho mtoup sin nok reko. 6 Tuaf ein re' ntebi nfain neman nrarin, nareet ein neun jemaa't ein abitan ia mnak, ho mtoup sin nok reko ma mneek sin. Oras ia au 'toit he ho mturun ma mbaab tuaf-tuaf nahuum on re' sin piut, fin rasi naan anharineb Uisneno In nekan. 7 Sin nnaon nfuun am natefan he nanoni' tuaf-tuaf anmatoom nok Yesus Kristus. Mes sin ka napenin fa turun-babat saa'-saa' na'ko tuaf re' ka npirsai fa Kristus. 8 Onaim ro pantas karu hit apirsait ii ro he es re' atturun sin. Fin nok ranan naan, hit tanaob Uisneno In mepu bu'-bua' tok sin.
Nai' Diotrefes naan, amoe' taisibu
9 Unu', au 'sonu' surat 'eu jema'at et ho baram, mes nai' Diotrefes naikas in tuan ee on re' a'nakat. Ma in ka nroim fa he natniin kau. 10 Onaim karu au 'eit on naan, of au u'uab he 'fei maat-maat anmatoom nok saa' re' in nmo'e. Fin in na'uab puta-kriu, he namouf kit. Anneis-neisi ntein, in ntorak Uisneno Iin na re' neitin nbin naan. Rarit in nfuaruut hit aok-bian sin anbin naan, he sin kais antoup atoin ein naan.
Nai' Demitrius nanaob Uisneno In mepu nok reko
11 Ba'e manekat! Ho ro mait i'tope' na'ko tuaf re' nmoe' rais reko. Kais mait i'tope' na'ko tuaf re' nmoe' rais maufinu. Fin tuaf re' nmoe' rais reko, Uisneno Iin ja. Mes tuaf re' nmoe' rais maufinu, ka nahiin fa Uisneno. 12 On re' nai' Demitrius. Too mfaun ein anboi's ee, natuin in nmoe' natuin Uisneno In raan a'honis re' amneot. Au 'boi's ee msa', ma ho muhiin mak, au ka upoi fa, tua.
Nai' Yohanis nasoup in surat
13 Anmui' rasi mfaun bian antein' ein, re' au he u'uab ma 'tui sin 'ok ko, mes au ka 'roim fa he 'tui sin a'bi surat. 14 Fin au ufneek ka 'roo fa ntein hit nua kit tateef, he hit nua kit bisa ta'uab langsung goah. 15 On re' naan, tua. Aok-bian sin abitan ia, ansoun ein haan tabes ma haan buseet amsa'. Amsonu' au haan tabes ma haan buseet meu apirsait ein naan, es-es ate nok in kanan. Saloom, Au nai' Yohanis kau, tua.
Tabe ma haan buseet
1 Tabe ma haan buseet na'ko kau, nai' Judas. Au re' ia Usif Yesus Kristus In aan renu' ma aan reka'. Au re' ia msa', nai' Yakobus in orif. Au 'tui surat re' ia 'eu are' mansian re' Ama' Uisneno anpiir ma nbetis nain sin een, re' In anneek sin, ma re' Yesus Kristus anpafa' ma npanat sin tar antea In nkoen On anfain neem. 2 Au 'toit he Uisneno nakrira' In rais kasian, ma nathoeb In manekan kou'-ko'u neu ki arki, he hi bisa mmoin nok mamut, rame' es nok es, ma tainina'.
Nai' Judas namnaub apirsait ein anmatoom nok tuaf re' nanoni' nsaan ma nbeo
3 Aok-bian manekat arki! Afi unu' au 'roim he 'tui surat 'eu ki arki, he utoon ki m'ak Uisneno nsoi nafetin kit. Mes oras ia, rasi piis es anpoi ma nboor, onaim au ro he 'tui 'teta'. Uisneno nfee nrair kit raan a'honis amneot. In nfee raan a'honis naan no mees' aah, ma In ka nsenu' ma nseka' niit ee fa. In nfee raan a'honis naan neu In tuaf-tuaf re' mapirsa'i sin. Onaim oras ia, au 'toit he hi mmeup ma'tani', he kais anmui' tuaf re' he nsoba' he nsenu' ma nseka' raan a'honis na'ko Uisneno. 4 Te kaah, anmui' tuaf fauk een re' antaman nok amninu'-mninu' etan hit tnanam ma hi soonm ein. Sin arsin re' naan ka natuin fa Uisneno In raan a'honis amneot naan, mes sin natuin ahaa sin roimk ein kuuk. Sin nak Uisneno In nekan arekot es re' anfei ranan he sin bole anmo'en tafi'-tafi' on re' naan. Naan poi! Sin re' naan tuaf-tuaf re' sin uabk ein a'teta' na'ko sin a'moek ein! Sin nromin he hit kais atneen attein hit Usif ma hit Usi', es re' Yesus Kristus. Mes hi arki mimnau, natuin matu'i et Suur Akninu' mnak, Uisneno nabarab anrair hukun neu sin na'ko unu'.
Uisneno anhukun tuaf re' nanoni' nsaan, nahuum on re' unu' te In nhukun ameput sonaf neno tunan ma amaufiunt ein
5 Anmui' rasi mfaun een re' hi mihini mrair sin, mes au umnaub ufani' sin 'eu ki arki, he hi mpaant om. Mimnau reta' oras unu', oras atoin Israelas sin anpoin na'kon pah Masir. Maski Uisneno nsoi nafetin pah es no mes-mese', mes anbi neon amunit, In nareu' nain tuaf-tuaf re' ka nromin fa he natniin Ee. 6 Tait i'tope' na'ko Uisneno In ameput sonaf neno tunan. Uisneno anfeen sin kuasa, mes anmui' tu'uf amsa'. Mes bian ro ka npuas ein fa, onaim sin ntanhain hak naan ankoon. Mes Uisneno anfuut sin anpaek korenit re' ka bisa fa he natsefi' ai' natsoi, ma nataam sin anbin baer meis'okan, he npao Neno re' Uisneno he nafeek are' kanan mansian ein sin rasin. 7 Ma kais amnikan kota Sodom ma kota Gomora, ma kuan bian sin re' anpaumakan anbin bare naan. Abitan koot ein naan, sin nromin he nmo'en rais makonit huma'-huma', nok es in mone ai' es in fee. Sin nmakonin ate ka on fa re' nati' te mansian ii anmo'e. Onaim Uisneno nout niis sin. Reta' re' ia, namnaub kit nak, Uisneno of anpaek ai naraka re' npiin nabar-baar he nhukun atoin maufiun ein ok-oke'. 8 Maski on naan amsa', mes tuaf re' antaam anbi hi sonam ma hi tnaanm ein, a'moink ein ro nsanan ma anbeon piut-piut. Te kaah, sin npaek sin amneit ein anjarin a'sukif he n'oemetab sin tuak ein kuuk, anraban tuaf re' annaa' hak kuasa, ma nkana'paar kuasa-kuasa arekot et sonaf neno tunan. 9 Mes nai' Mikael ka nmoe' fa on re' sin. In re' naan, Uisneno In mandoor neu ameupt ein sonaf neno tunan. Oras ka'o Musa nmaet, nai' Mikael anmatoe nok niut reu'f ein sin a'nakat. Sin nua sin anmatoena' ka'o Musa in aon amates naan. Mes nai' Mikael ka nasaan ee fa, ai' ankana'paar ee. In suma natoon ee mnak, “Uisneno of es re' an'ator ko hena' ho mnaben miit ee!” 10 Mes tuaf ein ia, ka on fa naan. Sin nkana'paar ma nakre'et are' kanan rasi re' sin ka nahiin narek-reko' sin fa. Sin suma natun-tuin ein aah sin roimk ein rafu'-rafu', on re' mui't ein ma kaun ein. Nok ranan naan, sin nareu' kuuk sin a'moink ein. 11 Ampaant om! Sin of napein kuuk sin sapaak ein. Fin sin nmo'en on re' nai' Kain, re' anroor niis in oir honif. Sin nmo'en on re' nai' Balaam, re' anmoe' saa'-saa' aah, asar napein kuun noni-roit. Sin anmo'en on re' nai' Kora msa', re' namreu' ankoon, natuin in nraban Uisneno. Natuin sin rais maufinun naan, tuaf-tuaf ein re' naan amsa' of mabatis ma mabetis na'kon Uisneno. 12 Karu atoin ein re' ia nabuan nok ki, henati' hi arki mimnau Uisneno In manekan oras hi mbukae mibu-bua te, sin ka namaeb ok fa natuin sin npaur ein ma nakoman. Onaim hi ro he mpaant om! Natuin atoin ein re' naan, on re' faut putuk anbi tais je ninin re' bisa nareu' ma nakrati' bnao oe. Sin on re' noep metan anbi auf meto' re' ka nasanut fa uran akre'o msa'. Sin suma nafeefn ahaa, mes ka nmo'en fa rais reko saa'-saa'. Sin on re' hau roet re' ka mapake' ma ma'osa' fa. Karu oras hau roet ii nafua te, sin ka nafuan fa fua' mese' msa'; onaim annoo' ma anfaik nain sin, rarit anporin sin. 13 Sin meupk ein suma ntao namab-maeb ahaa kit. Sin on re' okin ko'u re' na'furi' nbi tais je ninin, rarit namaik 'oemetan ma makrafu' anbi bare naan. Sin on re' kfuun re' neu-mneman anbin neon goe tnanan amsa', re' napenin hukun, he Uisneno ntao sin neu baer jes re' meis'ook tape, rarit sin namnekun nkonon nbin bare naan. 14 Nai' Henok naan, sufa'-ka'uf batan no hiutn ii, tsoi' ta'ko ka'o Adam. In natoon nain tuaf human on re' naan am nak, “Hi mkius miit. Hit Usi' nkoen On neem nok In ameput sonaf neno tunan re' nakniun' ein. Sin re' naan mfau rutu, tar antea ka bisa tsoi' tain sin fa. 15 In neem he nafeek are' mansian ii sin rasin. In of nakrira' tuaf mese'-mese' sin saant ein ok-oke', ma nakrira' nain are' rasi re' ansaan ma nbeon, In nfee hukun neu amaufiunt ein, natuin sin uab amre'ut neu Ne.” 16 Mansian ein re' ia, suma nahini haa rais ma'munu' ma matoes re' ka natfeek fa. Sin nakuu tuaf piut-piut amsa'. Sin ka ntoe natuin fa Uisneno In romin. Sin suma nroim natuin ahaa sin roimk ein kuuk. Sin uabk ein esan re' suma naiks ok. Sin nromi haa re' he saa'-saa' ate sin nhaken maat, he atoni' nbaras sin natuin sin roimk ein kuuk.
Miteek ma mihake' hi 'moinm ein ambi fatu 'suki' re' na'ko hi rais pirsait a'teeb akninu'
17-18 Aok-bian manekat arki! Kais amnikan rais manba'an re' hit Usi' Yesus Kristus In haef ein natoon nain sin neu ki nak, karu pah-pinan ia he namsoup goen ate, aratin ma asebuten sin of anboran. Sin nromin he na're'uf ma nkana'paar Uisneno In romin, natuin sin roimk ein kuuk re' ansaan ma nbeon. 19 Tuaf ein re' naan etan naan, oras ia. Sin re' naan, esan re' na'koke' nbin ia, na'koke' nbin nee, he nbatis ma nbetis ki. Sin i'moink ein suma nahini haa re' he natuin mansian ii in romin, natuin Asmaan Akniun ii, ka et fa sin neek ein. 20 Mes aok-bian arki! Hi ro he miteek ma mifena' hi 'monim ambi fatu 'suki' re' na'ko hi rais pirsait a'teeb akninu'. Ma karu hi m'onen ate, mituin saa' re' Asmaan Akniun' ee nakrira' ma natoon ee neu ki. 21 Mimnau, Uisneno anneek niis ki. Onaim ampanat hi tuam ein, ma mimnau In manekan naan. Ma hi ro he maran nok sabaar, ampao hit Usi' Yesus Kristus, re' nakrira' In rais kasian neu ki, ma nfee ki 'monit piut mok Uisneno. 22 Hi ro he mikrira' hi neek kasian meu tuaf-tuaf re' sin neek ein na'oin ein. 23 Hi ro he mturun ma mbaab tuaf-tuaf re' anperluu Uisneno he nsoi nafetin sin, nahuum on re' hi mheer mipoitan tuaf na'ko ai pina'. Anmui' tuaf bian anteni' re' hi ro he mikrira' hi nekam areokt ein meu sin. Mes ampaant om rek-reko! Natuin maski hi mkasian sin, mes hi ro he mmai'nisin sin 'moe' amreu't ein naan, nahuum on re' hit tmai'nisin tai-kroe 'oemetan.
Nai' Judas annona' apirsait ein he Uisneno anpafa' ma npanat sin
24 Oras ia, hit tait pures-bo'is ma mnaikas teu Uisneno! Natuin In kuun es re' bisa npafa' ma npanat ki, he hi kais mispae, mistuun ma mtaikoib. Ma In kuun es re' neik ki, he hi mhake mbi Uisneno In human ma In matan, fin In kuun es re' nakninu' ki, es na' hi ka m'oemeet fa goen. Hi mkoen om iim meik huum kumani ma huum akmoe, fin In mapina'-makraha'! 25 Suma Uisneno kuun, es re' anjair Usif batuur, Suma In kuun es re' bisa nsoi nafetin kit! Rarit In npaek hit Usi' Yesus Kristus, he nsoi nafetin kit. Onaim are' kanan rais hormaat ii, tbaiseun ma tasaeb sin teu Ne. Are' rais mapina'-makraha', Iin na. In kuasa, ko'u ma 'nae re'uf. Ma In hak he naprenat, na'ko afi unu', ntea oras, tabu ma eti ia, tar antea nabar-baar. Batuur on naan, tua! Na'ko kau, Au, nai' Judas, kau, tua.
Rasi Mnitas neu nai' Yohanis 1
1-2 Tabe ma haan buseet na'ko au, nai' Yohanis kau, es re' Yesus Kristus In aan renu'-aan reka'. Au 'tui 'bi surat re' ia, anmatoom nok saa'-saa' re' of he njarin. Au upein rasin naan on nai: Uisneno neikn On es anpukai sin ma natoon sin neu Yesus Kristus. Onaim Uisneno nreun Nai' Yesus he natoon neu In aan renu'-aan reka' sin. Rarit Nai' Yesus anreun In ameupt es na'ko sonaf neno tunan, he nnao nfei ma nakrira' rasin ia ok-oke' neu kau, he au 'tui 'ain sin. Fin ka 'roo fa ntein ate, rasin re' ia ok-oke' ro he njarin. Onaim hi ro he mneen mirek-reko' Uisneno In Kabin ma Prenat re' Nai' Yesus natoon anrair je. 3 Are' tuaf ein ok-oke' re' anresan tuis ein re' ia tar antea tuaf bian annenan amsa', sin n'ua rekon. Ma tuaf re' natniin tuis ia in hanan, ma nmoe' natuin in rais manbasan, sin n'ua rekon amsa'. Fin in oras naan he npaumak-maak he neem een.
Nai' Yohanis anfee tabe ma haan buseet neu jema'at hiut et propinsi Asia
4 Tabe ma haan buseet na'ko kau 'eu Uisneno In jema'at hiut etan propinsi Asia. Au 'toit he Uisneno nakrira' In nekan arekot neu ki, he hi bisa mmoni mbi mamut, rame' es nok es, ma tainina'. Fin na'ko unu' te, Uisneno nain, tar ntea oras ia, ma tar antea nabar-baar. Au 'toti msa' he In Asmaan Akninu' nakrira' In nekan arekot neu ki, he hi bisa mmoni mbi mamut ma ao-mina'. Au 'kius Asmaan Akninu' naan, nahuum on re' smanaf hiut re' anbaisenun neu Uisneno In a'toko prenat. 5 Au 'toti msa' he Yesus Kristus nakrira' In nekan arekot neu ki, he hi bisa mmoni mbi mamut, rame' es nok es, ma tainina'. In na'uab piut-piut ma maat-maat anmatoom nok saa'-saa' re' Uisneno natoon neu Ne. Unu' te, In nmaet batuur-batuur, mes Uisneno namonib nafain' Ee, he In njair tua unu re' anmoni nfain na'ko 'maten. In anjair A'naak Usif amsa' neu are' kanan usif anbi pah-pinan. Natuin Nai' Yesus anneek kit, es naan ate In nat'opab In naa' ee nasai neu kit. Nok ranan In a'maten naan, In anfei ranan he nsoi nafetin naan kit na'ko hit saant ein sin kuasan. 6 Rarit In nait nanaib kit atjair In too ngguin, maut he hit tmeup teu In Amaf, Ama' Uisneno. Yesus Kristus ro mapina'-makraha', ma In kuasa naan ka natfeek niit fa. Batuur, tua! 7 Onaim amkius mirek-reko'! Oras ia, Nai' Yesus ma In Amaf etan sonaf neno tunan. Mes ka 'roo fa te, In nsaun neem anbi nope. Mansian pah-pinan ia ok-oke' of niit Ee. On naan amsa' neu tuaf re' sin napau Goe afi unu'. Onaim are' uuf ma pah nbin pah-pinan ia nmei' jok ma ankaen pin-piuns ein, natuin sin nahiin Je. Rasin re' ia ok-oke' ro he njarin batuur-batuur. Namneo on naan, tua! 8 Uisneno nak, “Au re' ia, Alfa ntea Omega. Au re' ia, A ntea Z. Are' saa'-saa' ii, sin na'uun ma na'ba'an na'ko Kau, anmurai na'ko ahunut tar antea amunit. Au es re' 'bi 'ain ia na'ko unu'. Au es re' oras ia. Au es re' 'bi oras amnemat tar antea nabar-baar. Fin Au kuuk es re' akuaas re'uf!”
Nai' Yohanis niit Mansian Batuur-Batuur
9 Natuin hit ar-arkit atpirsai ok-oke' tak, Nai' Yesus naan hit Usif, es naan ate, au 'jair hi aok-bian. Anmui' tuaf bian nato'on, natuin hit tatuin Nai' Yesus, onaim sin nha'mui' kit ok-oke'. Mes Nai' Yesus anha'tanin nrair hit nekak, he hit bisa taran ma ttahan piut-piut. Natuin au utoon urair 'eu tuaf-tuaf anmatoom nok Uisneno In Kabin ma Prenat, ma unoni' anmatoom nok Nai' Yesus, anmui' tuaf re' nsaken. Etun oras ia sin nheek kau ma nporin kau neu puru re' ia, kaan ee Patmos. 10 Neot es, nateef nok neon onen, Uisneno In Asmanan neman kau. Nok askeken ate, au 'neen hanaf es ma'tain besi neem na'ko au kotik. In haan ee nahuum on re' haan to'is. 11 Hanaf naan anreek kau mnak, “Yohanis! Au he ukrira' ko rais jes. Saa'-saa' re' ho miit sin, ho ro he mtui sin. Rarit ho msonu' sin meu jema'at hiut, esan re' jemaa't ein abitan kota Efesus, kota Smirna, kota Pergamus, kota Tiatira, kota Sardis, kota Filadelfia, ma kota Laodikia.” 12 Au 'neen on naan ate, au 'niik he uhiin 'ak sekau es re' na'uab nok kau. Mes au 'iit ahaa pauk ana' hiut, re' nateek sin anbin paku 'tokof na'ko noni mnatu'. 13 Ma Atoni' es anhake nbi pakun naan sin atnaank ein. In maasn ee Mansian Batuur-Batuur. In npaek baru mnaun es, re' in amnaun ee ntean in haen, ma nasaah pouk noin jes. Po'uk naan napeo goe npeo' in a'basan. 14 In a'naak fuun ein muit okas. In maatk ein npinan on re' ai. 15 In haek ein, anpinan on re' beis me'e re' atuut beisn ee nout goe ma mee' rare. In haan ee, na'ru'u on re' oe 'boni'. 16 Anbi in a'niman a'ne'u, in nnaa' kfuun hiut. Suin es 'aikaf nua anpoi na'ko In fefan. In huumn ee npiin on re' manas. 17 Oras au 'iit Atoni' naan, au 'taikoib on re' atua-mafut, anbi In haen. Mes in nreok kau neik In a'niman a'ne'u, rarit In na'uab am nak, “Anah! Kais mumtau! Natuin are' saa'-saa' ii sin na'uun ma na'ba'an na'ko Kau, nmurai na'ko ahunut tar antea amunit. 18 Unu' te, Au 'maet, mes oras ia ho miit kuum! Au 'moni 'fain, ma Au of a'moin piut tar antea nabar-baar. Au es re' anaa' 'retu'-'fo'e, re' bisa 'reut ma 'foe bare neu amaets ein, he umonib ufani' sin. 19 Ho ro he mtui are' saa'-saa' re' ho miit sin oras ia, ma mtui saa'-saa' re' of he njarin. 20 Au utoon 'ain ko in a'moufn ii on nai: pauk noin hiut ein naan, in a'moufn ii, jema'at hiut. Ma kfuu hiut ein re' ho miit sin anbin Au 'nimak a'ne'u, es re' ameput neno tunan tuaf hiut re' neikin hanaf na'kon Uisneno neu jema'at hiut re' naan.”
Rasi Mnitas neu nai' Yohanis 2
Usif Yesus anfee haan manbasan neu jema'at anbi kota Efesus
1 Rarit Mansian Batuur-Batuur naan naprenat kau mnak, “Yohanis, ho ro he mtui surat noo goes. In haan ee, on nai: ‘Neu jema'at abitan kota Efesus: Surat re' ia, na'ko Au, Nai' Yesus Kau. Au es a'naa' kfuun hiut etan Au 'nimak a'ne'u. Au es a'nao 'fuun utef-tefan ma 'noon pauk noni fua' hiut ein naan mese'-mese'. Amneen Au uabak re' ia. 2 Au 'iit urair hi 'monim ambi kota Efesus 'ak, hi mmeup ma'tani' piut-piut meu Uisneno. Karu anmui' atoin maufinu nbi hi tnaanm ein naan, hi ka mkonan sin fa. Karu anmui' tuaf neem he nputa-kriu ki mnak, in re' naan Uisneno In haef, hi ro miprikas ma mtae mirek-reko' in a'monin naan, he hi mihiin je mmak atoin saa' na es re' naan mansian aputa-kriut, ai' kaah. Rarit hi mtitar ma mtoork ee, he ka mitniin ee fa. 3 Maski atoni' nasusab ki natuin hi mpirsai meu Kau, mes hi maran piut, ma ka mtet-koit fa. 4 Mes Au 'kius, hi mmoufu mbi rais jes. Natuin afi unu', oras hi fe' mmurai mpirsai meu Kau, hi mmaneek es nok es. Mes oras ia, hi ka on fa nana goen antein. 5 Onaim hi ro he mimnau oras unu' naan. Fin oras ia, hi mi'roo mi'ko 'mo'et unu' re' naan. Es naan ate, hi ro he mi'piis nai mi'ko hi sanat re' ia, he mfani mmaneek on re' neno unu' naan. Karu ka on naan fa te, of Au 'fain 'uum 'ait ufani' pauk noni na'ko ki. 6 Mes Au neek ii nmariin akre'o, natuin hi mtitar mipasib nai' Nikolas in noin' ein, re' in atoup noin' ein anmoe' natuin ee. Au 'titar upasib amsa' saa'-saa' re' sin nmoe' sin. 7 Amneen mirek-reko' saa' re' Uisneno In Asmaan ee natoon neu In jemaa't ein. Sekau naran ma natuin Kau tar antea in nmaet, Au of a'fee ne mainuan, he naah hau fua' re' anbi Uisneno In po'on. Fin sekau naah hau fua' naan ate, in napeni 'monit batuur re' ka natfeek fa.’ ”
Usif Yesus anfee haan manbasan neu jema'at anbi kota Smirna
8 Rarit Mansian Batuur-Batuur naan antuut antein In uaban naan am nak, “Yohanis, oras ia ho ro he mtui surat es anteni'. In haan ee, on nai: ‘Neu jema'at abitan kota Smirna: Surat re' ia, na'ko Au, Nai' Yesus Kau. Are' saa'-saa' ii sin na'uun ma na'ba'an nbin Kau, anmurai na'ko ahunut tar antea amunit. Unu' te, Au 'maet, mes oras ia, Au 'moni 'fain. Onaim amneen Au uabak re' ia. 9 Au 'iit urair hi 'monim re' amsuus mbi kota Smirna. Tatuin mansian ite, hi re' ia atoin ama'mu'it. Te kaah, natuin Uisneno te, hi amu'it ki. Anmui' tuaf re' anmanaku' mnak In re' naan Uisneno Iin ja, re' na'uab na're'uf hi kanam areokt ein. Te kaah, sin re' naan, ka Uisneno Iin na fa. Sin on re' jema'at es, re' natun-tuin ahaa niutn ee sin a'nakat. 10 Onaim amneen mirek-reko'! Hi kais mimtau, oras hi mipein susat fe'. Asar hi mihiin mak, niutn ee sin a'naakt ee, naim tuaf he nheek sin, ma nataam bian neun bui tar antea neno bo'es. In sairt ii nak, he hi mkoit Kau. Maski sin he nroor niis ki, mes hi kais amnikan Kau. Fin sekau-sekau naran ma natuin Kau tar antea in nmaet, Au of a'baras a'fee ne upan, he in nmoin nabar-baar nok Kau. 11 Onaim amneen mirek-reko' saa' re' Uisneno In Asmaan ee he natoon neu In jemaa't ein. Sekau re' naran ma natuin Kau tar antea in nmaet, in ka napein fa ha'mu'it anbi tais ai maputu' re' anpiin nabar-baar. Nok ranan naan, in ka nmaet fa no nua.’ ”
Usif Yesus anfee haan manbasan neu jema'at anbi kota Pergamus
12 Onaim Mansian Batuur-Batuur naan antuut antein In uaban naan am nak, “Yohanis, oras ia ho ro he mtui surat es antein. Surat naan in haan ii, on nai: ‘Neu jema'at abitan kota Pergamus: Surat re' ia, na'ko Au, Nai' Yesus Kau. Au es a'naa' suin 'aik nua'. Amneen Au uabak re' ia. 13 Au uhini 'rair hi abitan kota Pergamus naan. Anaa' aprenat anbi naan es re' nitu 'nakaf. Maski on naan amsa', hi mnaa' miher-heran Au kanak ma mpirsai Kau piut-piut. Unu' te, Au tuaf es anbi naan, kaan ee nai' Antipas. In nanoni' namneo anmatoom nok Au raan a'honis, mes sin nroor na'mate. Maski on naan amsa', mes hi ka misuan Kau fa. 14 Mes Au 'iit 'ak, hi mmoufu mbi rais jes a'nua. Anmui' tuaf na'ko ki re' nroim he natuin Balaam in nonin. Unu' te, Balaam nanoni' nai' Barak he na'oki' atoin Israelas sin, tar antea sin ntanhai Uisneno In romin. In na'oki' sin he sin nokan nfuan, ma nahan mnaah fuat, ma nnao nmakaken nok tuaf re' sin ka moen ein fa, ai' sin ka feek ein fa. 15 Anmui' tuaf fauk na'ko ki, re' natuin nai' Nikolas in nonin. 16 Onaim hi ro he misnaas mi'ko hi saant ein naan. Karu kaah, ka 'roo fa te, Au 'uum a'keo' ki 'eik uab 'aikan, re' n'oet ki nahuum on re' suni'. 17 Onaim amneen mirek-reko' saa' re' Uisneno In Asmaan ee natoon ee neu In jemaa't ein. Sekau re' naran ma natuin Kau tar antea in nmaet, Au of a'fee ne utunu' manna na'ko sonaf neno tunan he nbukae. Utunu' naan napera' narek-reok' ee. Au 'fee ne faut muit es amsa', re' matu'i in kaan fe'u. Suma in tuan aa kuun es re' nahiin kanaf naan, mes tuaf bian ka nahiin je fa.’ ”
Usif Yesus anfee haan manbasan neu jema'at anbi kota Tiatira
18 Rarit Mansian Batuur-Batuur naan antuut antein In uaban naan am nak, “Yohanis, oras ia ho ro he mtui surat es antein. Surat naan in haan ii, on nai: ‘Neu jema'at abitan kota Tiatira: Surat re' ia, na'ko Au, Nai' Yesus Kau, es re' Uisneno In Anah! Au maatk ein anpinan on re' ai, ma au haek ein npiin me'e on re' beis me'e amsa', re' atoni' nout goe et ai. Amneen Au uabak re' ia. 19 Au 'iit urair hi 'moinm ein naan. Hi mneek Kau batuur-batuur, ma mpirsai Kau nok ma'tani'. Hi mituin Au prenat piut-piut he mtuthae tuaf. Maski atoni' nha'mui' ki msa', hi maran piut-piut. Au uhini msa' 'ak, oras ia hi mmeup ma'tani' nneis antein meu Kau. 20 Mes hi mmoufu mbi rais jes: hi mtoup bi Isabeel, re' naikas in tuan ee mnak, Uisneno In mafefa'. Rarit hi mkoon ee he in nanoni' nsaan neu Au ngguin. Natuin in noni' re' na'e'ob naan, es Au ngguin, nahan amnaah fuat. Ma sin imsa' nmakaken nok tuaf re' sin ka moen ein fa, ai' sin ka feek ein fa. 21 Au ukain bifee naan fani-fani, he in nasaitan in sanat naan. Mes in ka nroim fa. 22 Onaim amkius mirek-reko'. Fin oras ia Au ufeek a'rair, he 'huukn ee 'paek menas huum es, tar antea in ka nsaun naan fa na'ko in harak. On naan amsa' sin ar-arsin re' anmakaken nok ne. Karu sin ka nasaitan fa bifee maufinu naan ate, ka 'roo fa te, Au 'hukun sin amsa'. 23 Au of u'maet bifee maufinu naan in aanh ein. Nok ranan naan, hi ok-oke' re' apirsait ki mihini mmak, Au uhiin mansian ein sin neek ein. Ma Au of a'baras amsa' 'eu ki, utuin saa' re' hi mmoe'-mo'e. 24 Mes hi bian re' abitan Tiatira naan, hi ka mituin fa bifee maufinu naan in nonin amre'ut naan. Natuin hi mtitar mipasib noni' re' ma'nifa' naan, re' sin nteek ee nak, ‘niut re'uf in noin meis'okan’. Nok ranan naan, Au ka ukain a'tein ki fa, 25 asar hi mnaa' miher-heran hi rais pirsait, tar antea Au 'fain 'uum. 26-28 Sekau re' naran ma natuin Kau tar antea nmaet, Au of a'fee ne kuasa. Kuasa naan ma'tani', on re' Au upein je na'ko Au Ama', he uprenat uuf-uuf anbi pah-pinan nok a'niim maputu'. Karu anmui' tuaf anraabn ee, in of antuut nakrati' sin, on re' tapee' a'nai afu. Au of a'fee ki kfuu faif nome amsa'. 29 Onaim amneen mirek-reko' saa' re' Uisneno In Asmaan ee natoon ee neu In jemaa't ein.’ ”
Rasi Mnitas neu nai' Yohanis 3
Usif Yesus anfee haan manbasan neu jema'at anbi kota Sardis
1 Onaim Mansian Batuur-Batuur naan, antuut antein In hanan am nak, “Yohanis, oras ia ho ro he mtui surat bian anteni', re' in haan ee, on nai: ‘Neu jema'at abitan kota Sardis: Surat re' ia, na'ko Au, Nai' Yesus Kau. Uisneno In Asmaan ee, et Au. Asmanaf naan, masaf hiut. Au es re' a'naa' kfuun hiut anbin Au 'nimak. Amneen Au uabak re' ia. Au 'iit urair hi 'mo'em ambi Sardis. Anmui' tuaf re' nak, hi mmoin batuur-batuur mituin Au romik. Te kaah, hi on re' ka mmui' fa 'monif. 2 Onaim amfeen nai! Amha'tain hi pirsait naan re' he noi namneuk naan. Fin Au 'parikas urair saa' re' hi mmoe' je naan, mes ka tiit fa mese' msa' re' maso'ik anbi Uisneno In human ma In matan. 3 Onaim kais amnikan noin amneot ein re' hi mneen ma mtoupu mrair sin na'ko afi unu'. Mituin batuur-batuur Uisneno In romin, ma misaitan hi saant ein he mtebi mfain ma mituin Uisneno. Karu hi ka miskeek fa he mmoe' mituin on naan ate, nok askeken ate, of Au 'uum on re' abakat re' hi ka mitenab maan ee fa. 4 Mes anmui' tuaf bian na'ko ki abitan Sardis, re' anmonin nok neek amne'o, nahuum on re' tuaf ka n'oemetab fa in paken. Natuin sin nmonin nok neek amne'o, onaim sin of annaon nabuan nok Kau, anpaken paek muti'. 5 Sekau naran ma natuin Kau tar antea nmaet, in of anpaek paek muti'. Au ka 'noes fa in kanan na'ko surat re' matu'i naheun nok kanaf na'ko tuaf-tuaf re' anmonin nabar-baar nok Uisneno. Au of a'manaku' msa' 'bi Au Ama' In human ma In matan, ma Ama' In ameput sonaf neno tunan, nak in re' naan, Au ngguin. 6 Onaim amneen mirek-reko' saa'-saa' re' Uisneno In Asmaan ee natoon neu In jemaa't ein.’ ”
Usif Yesus anfee haan manbasan neu jema'at anbi kota Filadelfia
7 Rarit Mansian Batuur-Batuur naan ntuut antein In uaban am nak, “Yohanis. Oras ia, ho ro he mtui surat es antein. In haan ee, on nai: ‘Neu jema'at abitan kota Filadelfia: Surat re' ia, na'ko Au, Nai' Yesus Kau. Au re' ia, Tuaf Akninu' ma Batuur. Au es re' a'naa' usif nai' Daut in a'retu 'fo'e. Karu Au usoin eno', ka tiit fa tuaf re' bisa na'eek. Karu Au u'eek, ka tiit fa tuaf re' bisa nasoin. 8 Au uhiin are' saa'-saa' re' hi mmoe' sin naan. Au uhini msa' 'ak, hi kaanm ein ka mateek ein fa. Maski on naan amsa', mes hi ka misuan Kau fa, ma hi mituin Au noin ii piut. Mimnau mirek-reko', Au usoit a'rair eno' 'eu ki, onaim ka tiit fa tuaf re' bisa na'eek. 9 Amneen mirek-reko'! Anmui' tuaf re' napoi mnak, sin re' naan Uisneno In amneot ein. Te kaah, sin re' naan aputa-kriut ein re' natun-tuin ahaa nitu 'nakaf. Mes hi of miit kiim! Fin Au of a'moe' sin tar antea sin nri'tuun anbin hi humam ma hi matam, rarit anmanauk ein am nak, Au ro 'neek ki. 10 Natuin hi mituin amrair Au prenat, maran ma mituin Kau piut, onaim Au of a'pafa' ma 'panat ki u'ko ha'mu'it ma ma'ne'at, re' Uisneno he nasaunt ee neem, he nsuu' ma n'ui mansian ok-oke' nbi pah-pinan ia. 11 Ka 'roo fa te, Au 'fain 'uum. Onaim amnaa' miher-heran Au noni' re' hi mneen ma mtoup sin afi unu' naan. Fin kas-kais anmui' tuaf re' antetak naan upan re' Uisneno he nfee je neu ki. 12 Sekau naran piut ma natuin Kau tar antea in nmaet, in of natua nabar-baar nok Uisneno, nahuum on re' nii ainaf re' nseen on anbi Uisneno In Umi. Au of a'tui Au Usi' In kanan, ma kanaf na'ko Uisneno In kota, anbi tuaf naan in aon. Kota naan, sin nteek ee nak, ‘Yerusalem Fe'u’, re' Uisneno of nasaunt ee neem na'ko sonaf neno tunan. Ma Au of a'tui Au kanak fe'u msa' a'bi tuaf naan in aon. 13 Onaim amneen mirek-reko' saa'-saa' re' Uisneno In Asmaan ee natoon ee neu In jemaa't ein.’ ”
Usif Yesus anfee haan manbasan neu jema'at anbi kota Laodikia
14 Onaim Mansian Batuur-Batuur naan antuut antein in uaban naan am nak, “Yohanis. Oras ia ho ro he mtui surat amunit. In haan ee, on nai: ‘Neu jema'at abitan kota Laodikia: Surat re' ia, na'ko Au, Nai' Yesus Kau, re' sin nteek Ee nak, ‘Ro Batuur’. Au re' ia, u'uab namneo ma namnoon Uisneno In Kabin ma Prenat piut-piut. Ma are' saa'-saa' re' Uisneno nmoe' sin naan, na'uun ma na'ba'an nbin Kau. 15 Au 'iit a'rair saa'-saa' re' hi mmoe' sin mbi kota Laodikia. Mes hi on mee'? Maputu', kahaf. Mainikin, kaah fa msa'. Karu maputu' te, maputu' batuur-batuur! Karu mainikin ate, mainikin batuur-batuur! 16 Mes natuin hi nekam naan stena'-stena', Au of a'puran upoit ki u'ko Au fefak, on re' taroon. 17 Hi mi'uab meik haan be'o mmak, ‘Hit re' ia, atoin amu'it. Hit tmoin rek-reko, ka tperluu fa saa'-saa' antein!’ Te kaah, hi neekm ein naan nameis'ook, tar antea hi ka mihiin fa mee es re' reko. Etun hi mjair on re' atoin ama'mu'it ma m'aaf aah. 18 Onaim reko nneis hi iim he msoos maan noni mnaut afa' na'ko Kau, maut he hi mjair tuaf re' batuur-batuur amu'it. Ma msoos maan paek muit okas, mpaek he mi'koro' hi reu'f aan. Ma amsoos re'u neu hi maatm ein, maut he hi miit amfain nok akninu'. 19 Karu tuaf re' Au 'neek ee anmo'e nsaan, Au ukain ma 'hukun sin, maut he sin njarin reko. Onaim hi ro he mineo hi neekm ein naan, he hi batuur-batuur mituin Kau nok makoe reko. 20 Amneen mirek-reko', natuin Au 'hake 'rair et eno', ma Au 'haman piut he 'taam. Karu anmui' tuaf anneen Au hanak, rarit in neem nasoitan eno', Au of a'taam, ma 'bukae bu'-bua 'ok ne. 21 Sekau re' naran ma natuin Kau tar antea in nmaet, Au of a'fee ne hak, he ntook ma naprenat nok Kau. Natuin Au 'aran ma utuin Au Ama' amsa', etun oras ia Au 'took ma uprenat 'ok Ne. 22 Onaim amneen mirek-reko' saa'-saa' re' Uisneno In Asmaan ee natoon ee neu In jemaa't ein.’ ”
Rasi Mnitas neu nai' Yohanis 4
Sin na'besan neu Uisneno anbi sonaf neno tunan
1 Mansian Batuur-Batuur naan na'uab anrair In haan manbasan neun jema'at hiut ein on naan ate, Uisneno nakrira' kau rasi bian anteni'. Nok askeken ate, au 'iit eon es masoit et sonaf neno tunan. Rarit au 'neen tuaf naan re' in haan ee on re' to'is, na'uab am nak, “Amsae uum meu ia, he au u'itab ko, are' saa'-saa' re' of he njair.” 2 Oras naan, Uisneno In Asmaan ee nait neik kau 'sae 'eu sonaf neno tunan. Nok askeken ate, au 'iit a'toko prenat, ma nmui' tuaf antoko nbi na. 3 In masnaaf mamate' ma me'e, on re' faut arimat re' ma'osa', re' sin nteek ee nak, yaspis ma sardius. Anmui' enous es, anfuun naan a'toko prenat naan. In asnaaf ee mamate' on re' faut arimat samrut. 4 Anbi bare naan, anmu'i 'toko prenat mana' bo' nua mhaa re' aan'-aan' ein, sin nfuun naan a'toko' naan. Anmui' naan amnasit tuaf bo' nua mhaa ntokon nbin a'took ein naan. Sin arsin anpaken paek muti', ma na'soeb ein a'sobe prenat re' anmoe' je na'ko noin-moro'. 5 Anmui' rimat re' npiin anpoin na'ko 'toko prenat re' abit atnaan ee, ma 'roots ee 'puun ee nanoon. Anmui' obor hiut re' anpinan npoin na'kon a'toko prenat naan in matan. Sin arsin re' naan, nahuum on re' Uisneno In Asmaan ee re' nmui' masaf hiut. 6 Anbi 'toko prenat naan in matan, au 'iit on re' oe tasi. Oe tasi naan kniun ii on re' ninu. Rarit au 'iit mu'it haa re' ma'tain bes-besin, nfuun naan a'toko' naan. Sin aok ein naheun nok mataf. Sin re' naan, Uisneno In mui't ein re' ntuthae Je. 7 Mu'it ahuunt ee, in huumn ee, on re' meo'-roi' singa. No nuan ii, on re' bijae keso. No teun ii, on re' mansian. Ma no haan ii on re' kor-garuda natpeen. 8 Mui' haa' ein naan, es-es ate, maninif nee. Anbi niinf ein naan koti-mnaan, naheun nok mataf. Fai-manas sin nsiin piut-piut am nak, “Hai mbo'is mi'naeb Uisneno! Hai maikas ma mi'ratan Uisneno In kanan! Uisneno naan, akniun ii kah een! Uisneno naan, In kuasan ma'tain besi. Uisneno nbi nain naa, na'ko un-unu'. Uisneno nbi ia, oras ma eti ia. Ma Uisneno re' tar antea nabar-baar.” 9 Nok siit on re' naan, sin nsiin ma nbo'is Uisneno, ma nasaeb ein makasi neu Ne, natuin In ntoko nbi 'toko prenat, ma In re' nbi nain ia piut-piut tar antea nabar-baar. Oras sin nsiin, 10 amnasit tuaf bo' nua mhaa' ein naan anri'tuun nbin Uisneno In human ma In matan. Ma Uisneno antoko nbi 'toko prenat. Sin nsee' nain sin a'sobe preent ein, rarit sin natunu' sin nbi In a'toko prenat naan in matan, ma na'besan neu Ne, re' nabar-baar Kuun. Rarit sin npures ma nbo'is Uisneno mnak, 11 “Koi, Uisneno! Hai mbo'is ma mi'naeb Uisneno! Hai maikas ma mi'ratan Uisneno Ho kanam. Uisneno Ko, hai Usi'. Uisneno Ko, hai Uisneon goa! Uisneno kuun ro es ansium ma ntoup hai siit pures-bo'is. Uisneno kuun ro es ansium ma ntoup hai rais hormaat. Natuin Uisneno kuun ro es akuaas re'uf. Ma Uisneno kuun ro es ma'tain isat. Uisneno kuun es re' anmoe' ma npakae are' kanan saa'-saa' ii oke'. Uisneno kuun es re' namonib ma natorob are' saa'-saa' ii oke'. Are' saa'-saa' re' ia, anjarin nrarin, natuin Uisneno nmoe' ma npakae sin. Are' saa'-saa' re' anmonin, masnasa' natuin Uisneno kuun es annona' ma nfee.”
Rasi Mnitas neu nai' Yohanis 5
Suur manunu' re' ma'retu' mates
1 Rarit au 'kisu 'teni' 'eu Atoni' re' antoko nbi 'toko prenat naan. In nnaa' suur manunu' es anbi In a'niman a'ne'u. Surat naan, matu'i koti-mmaat. Sin na'retu' niis surat naan, nbi bare hiut. 2 Rarit au 'iit ameput es na'ko sonaf neno tunan, re' ma'tain besi. In nataan neik haan ma'tani' mnak, “Sekau es re' nmui' hak he nfei surat naan in a'retun, ma nrees surat naan in afan?” 3 In nataan on naan, mes sin ka napein fa tuaf mese' msa' re' nmui' hak he nfei surat naan, ma nrees in afan. Anbi sonaf neno tunan, ai' anbi pah-pinan, ka tiit fa tuaf mese' msa' re' anmui' hak. Abitan amaets ein sin bare 'maten amsa', ka nmu'if. 4 A'kius on naan ate, au 'kae 'mat-maet, natuin ka tiit fa tuaf mese' amsa' re' anmui' hak, he bisa nfei surat naan ma nrees in afan. 5 Rarit tuaf es na'ko amnasit bo' nua mhaa' ein naan, na'uab neu kau mnak, “Hoe, ba'e! Kais amkae. Fin usif nai' Daut in sufan es ma'tain besi, sin nteek ee nak, ‘Singa na'ko uuf nai' Yahuda’. In npekes nakrat-rati' are' amreu't ein oke'. Onaim In na' nmui' hak he bisa nfei 'retu'-'fo'e na'ko surat naan, ma nrees in afan.” 6 Au 'neen on naan ate, au 'iit 'Bib-kaes Ana' es anhake nbi mui' haa ma'tain ein naan sin atnaank ein, ma amnasit bo' nua mhaa' ein re' antokon nfuun naan 'toko prenat naan. 'Bib-kaes Ana' naan, on re' nroor niit ee. In suunk ein mana' hiut, ma In maatk ein fua' hiut. In matan fuan fua' hiut naan, nahuum on re' In Asmaan ee mamasaf hiut, re' In nreek anrair sin ntaman neun pah-pinan tuuk am tuuk. 7 Rarit au 'iit 'Bib-kaes Ana' naan annao neu Atoni' re' antook et a'toko prenat, ma nait suur manunu' naan, na'ko Atoni' naan In a'niman a'ne'u. 8 Oras 'Bib-kaes Ana' naan nait je te, mui' haa' ein re' ma'tain besin naan, nok amnasit bo' nua mhaa, nri'tuun ma na'besan anbi In human ma In matan. Sin arsin mese'-mese' anna'an baer musiik on re' a'reuk sasando, ma a'pika-kbuub noin moro' es, re' matua' nok kemenyaan re' sin nout goe he nfoo menin. Kemenyaan foo meni' naan, es re' are' oen ein na'kon Uisneno Iin na. 9 Rarit sin arsin ansiin sii feu' goes, am nak: “'Bib-kaes Ana' ia kuun, es re' pantas he ntoup suur manunu' naan. 'Bib-kaes Ana' ia kuun, es re' nmui' hak he nfei surat naan in a'retu 'fo'e. Fin In ntoupu nrair 'roro 'maten. Rarit Uisneno npaek In naa' asait naan, he nsoi nafetin naan mansian ein na'kon are' kanan pah ma uuf, maut he sin bian bisa njarin Uisneno Iin na. Nok ranan naan, mansian na'kon are' kanan uab ma pah, bisa njarin Uisneno In nonot-asar sin. 10 'Bib-kaes Ana' re' ia, nbubun ma nkaububu' sin arsin, anjarin uuf ma pah mese'. 'Bib-kaes Ana' re' ia, npiir ma nbeti nrair sin, he njarin Uisneno In tua ameupt ein. Sin of anna'an aprenat anbin pah-pinan ia. Sin of anbirun ma ntainaunun neun Uisneno nbin pah-pinan ia.” 11 Rarit au 'ait matak, onaim au 'neen hanaf kou' goes. Onaim au 'kius mui' haa ma'tain ein naan, ma amnasit tuaf bo' nua mhaa, na'baba' ntein nok Uisneno In ameupt ein namfa-faun na'kon sonaf neno tunan. Ameupt ein naan sin amfauk ein antean hoto-bariun. 12 Sin arsin ansiin nok hana 'naek am nak, “Hai maikas mi'ratan 'Bib-kaes Ana' re' maroro' 'maten naan, Natuin In ro es ansium ma ntoup hai pures ma bo'is sin! In kuasan kuun, ro kou' besi. In a'mu'in kuun, ro mfau re'uf. In ronen ma tenab, ro ka nsaan niit fa. In ma'tanin kuun, ro ma'tain besi. Hai maikas mi'ratan In kanan. Hai mi'ruri' ma mhormaat Ee. Hai mpures ma mboi's Ee.” 13 Rarit au 'neen siit es antein. Na'ko are' kanan amonit, et sonaf neno tunan, et neno, et pah-pinan, ma tais je nanan, sin arsin nsiin bu'-bua'. Na'ko bare neu amaets ein amsa', sin arsin ansiin nokan. Sin arsin ansiin bu'-bua' am nak, “Hai mpures ma mbo'is Uisneno re' antook ma ntuun On es a'toko prenat ia. Hai maikas ma mait mi'ratan 'Bib-kaes Ana' ia msa'. Hai misaeb rais hormaat meu Sin. Hai mi'ruri' ma mi'bees meu Sin. Natuin Sin esan re' anna'an aprenat nabar-baar! Ma Sin kuasan sin ka natfeek nitan fa!” 14 Rarit mui' haa ma'tain ein naan, natahan piut-piut am nak, “Batuur, namneo on re' naan, tua!” Onaim amnasit tuaf bo' nua mhaa' ein naan, sin anri'tuun ma na'besan neun Uisneno ma neun 'Bib-kaes Ana' naan.
Rasi Mnitas neu nai' Yohanis 6
'Bib-kaes Ana' naan nfei 'retu'-'fo'e 'Retu'-'fo'e ahunut — meo pae' je npoi neem
1 Rarit au 'iit 'Bib-kaes Ana' naan anfei suur manunu' naan in a'retu 'foe' ahunut. Onaim au 'neen mui't es na'ko mui' haa ma'tain ein naan, ankoa' naher-heer. In haan ee, on re' 'rotos. In naprenat am nak, “Amnao nai!” 2 Nok askeken ate, au 'iit bikaes muit es. Tuaf es ansae nbi bikase' naan, in na'sobe' 'soeb makenat, natuin in niis piut-piut anbi makenat. Oras ia, in nnaa' suni'-kenat, ma npoi nnao ma niis in musun nbin pah-pinan.
'Retu'-'fo'e no nuan ii — taisibu nbi pah-pinan
3 Rarit 'Bib-kaes Ana' naan anfei 'retu'-'fo'e no nuan. Onaim au 'neen mui' ma'tain no nuan ii, naprenat am nak, “Amnao nai!” 4 Rarit bikaes mee mapina' es anpoi neem. Tuaf re' ansae bikase' naan antoup suin kou' goes. Sin nfee ne kuasa he ntaisibun pah-pinan, maut he mansian ein anmaroor niisn ein es nok es.
'Retu'-'fo'e no teun ii — oras amnahas ma'tani'
5 Rarit 'Bib-kaes Ana' naan nfei 'retu'-'fo'e no teun ii. Onaim au 'neen mui' ma'tain no teun ii, naprenat am nak, “Amnao nai!” Nok askeken ate, au 'iit bikaes metan es. Tuaf re' ansae nbi bikase' naan, annaa' a'ta'i nbi in a'niman, he ntai mnahat re' nmurai nabatin. 6 Rarit au 'neen nahuum on re' hanaf es neem na'ko mui' haa ma'tain ein naan sin atnaank ein. Hanaf naan natoon am nak, “Oras amnahas ma'tain ii of antaman pah-pinan. Karu mtoup kai neno ia, suma msoos maan amneas mok teun goah; ai' mneas re' reko te, mok mees' aah. Mes karu amnahas naan antea goen, mansian ein kais annoo' nain hau saitun ma hau anggur sin anbin poo'n ein.”
'Retu'-'fo'e no haan ii — too mfaun anmaten
7 Rarit 'Bib-kaes Ana' naan anfei 'retu'-'fo'e no haan ii. Onaim au 'neen mui' ma'tani' no haan ii naprenat am nak, “Amnao nai!” 8 Nok askeken ate, au 'iit bikaes es snaa moor-muti'. Tuaf asae bikase' naan, kaan ee, ‘A'maten’. Anmui' tuaf es natuin ee nbi in kotin, kaan ee, ‘Bare neu amaets ein’. Rarit sin nua sin napenin kuasa he nnao nroor na'maet mansian ein anbin pah-pinan, anpaek suni', oras amnahas, menas, ma npaek mui' fui apisut. Karu tsoi' amaets ein ok-oke' te, sin amfauk ein on re' baits es na'ko batis haa, mansian pah-pinan ia ok-oke'.
'Retu'-'fo'e no niimn ii — Uisneno Iin na anpa-paon he In nafeek sin rasin
9 Rarit 'Bib-kaes Ana' naan anfei 'retu'-'fo'e no niimn ii. Onaim au 'iit tuaf ein re' unu' te, anroor niis sin. Sin asmaank ein anbin mei fuat ee in nupun. Atoni' nroor sin, natuin sin npirsain neu Uisneno, ma sin natonan Uisneno In Kabin ma Prenat anbin mee-mee. 10 Sin nsakanan am nak, “Koi Uisneno! Usi' re' ma'tain re'uf! Usi' re' kniun re'uf! Saa' re' Usi' Ho mu'uab, hai mpirsai. Mes hai he mpao mtea reka' ntein, he na' Ho mufeek rasi anmatoom nok tuaf-tuaf re' anroor na'maet kai, he sin napenin hukun?” 11 Sin natanan anrarin on naan ate, sin napenin baur muti' mnanu', tuaf es ate, napein es. Anmui' tuaf natoon neu sin am nak, “Ampao mteni' kre'o, tar antea hi fautf ein namtisin. Natuin anmui' hi aom-bian sin re' of anmaten, natuin anroor niis sin on re' hi.”
'Retu'-'fo'e no neen ii — siraak anbi neon goe tnanan ma pah-pinan
12 Rarit 'Bib-kaes Ana' naan anfei 'retu'-'fo'e no neen ii. Nok askeken ate, au 'iit tainunus ma'tain besi. Onaim maans ee nameis'ook on re' tai metan, ma fuun ee snaa me'e on re' naa'. 13 Kfuun ein neon goe tnanan bamoufun, on re' hau fua mnaut ein re' anmoufun na'kon hau goe tunan oras ain kou' goe nfuu namouf sin. 14 Onaim au 'iit neon goe npee' pisa' nua, rarit annuun gon on re' 'nahek tar antea namneuk. Onaim a'toe'f ein ma puurn ein na'haus ein oke', tar antea sin namnekun oke' na'ko sin baark ein. 15 Ankius on naan ate, mansian pah-pinan, nmurai na'ko uisf ein, anaa' apreent ein, a'naak sorarus, atoin amu'it, tar antea ate, sin ar-arsin namtaun. Rarit sin naenan ma na'koor ein nbin nuat ein, fatu 'toe'f ein peihaipk ein. 16 Sin nrenu 'toe'f ein ma faut kou'n ein am nak, “Amkuub maan kai nai! Mi'koro' kai he Atokos abit a'toko preent ee, kais niit antein kai. Ma 'Bib-kaes Ana' ka bisa nhukun kai fa. 17 Koi! Hai mipein siraak natuin neon suust am nana'renat neem een! Uisneno nok 'Bib-kaes Ana' naan he nmoma' kai sin to'os. Mes ka tiit fa es he bisa nteib ma nsiir!”
Rasi Mnitas neu nai' Yohanis 7
Uisneno ntao marak neu tuaf nifun nautn es nifun bo' haa mhaa (144.000)
1 Rarit au 'iit Uisneno In ameput tuaf haa na'kon sonaf neno tunan anhaken nbin pah-pinan he ntahan anin. Es anbi pasa' neon-saet, es anbi pasa' neon-teas, es anbi pasa' ponain, ma es anteni' nbi pasa' haa'-nua. Rarit ain ii ka nfuu fa nbi pah meto' ma oe tasi, ma haun guin. 2 Uisneno nfee kuasa neu sin he nareu' puru-pah, ma tasi. Rarit au 'iit ameupt es na'ko sonaf neno tunan, neem na'ko pasa' neon-saet. In neik baer mamarak es na'ko Uisneno abar-barat. Onaim in nkoa' am natoon neu tua haa' ein naan am nak, 3 “Kaisa' fe'! Kais mireu' puru-pah, ai' tasi, ai' haun guin. Ampao he hai mtao marak ambi Uisneno In aan renu'-aan reka' sin iirk ein naan fe'.” 4 Rarit sin natoon neu kau mnak, ameput naan anmarak naan Uisneno Iin na. Tuaf ein naan, sin nifun nautn es nifun bo' haa mhaa (144 .00 0), re' na'kon uuf Isra'el. Sin arsin esan re': 5 na'ko uuf nai' Yahuda, tuaf nifun bo'es am nua (12.00 ); uuf nai' Ruben, tuaf nifun bo'es am nua; uuf nai' Gat, tuaf nifun bo'es am nua; 6 uuf nai' Aser, tuaf nifun bo'es am nua; uuf nai' Naftali, tuaf nifun bo'es am nua; uuf nai' Manase, tuaf nifun bo'es am nua; 7 uuf nai' Simeon, tuaf nifun bo'es am nua; uuf nai' Lewi, tuaf nifun bo'es am nua; uuf nai' Isakar, tuaf nifun bo'es am nua; 8 uuf nai' Sebulon, tuaf nifun bo'es am nua; uuf nai' Yusuf, tuaf nifun bo'es am nua; uuf nai' Benjamin, tuaf nifun bo'es am nua.
Too neek akninu' sin npures ma nbo'is Uisneno ma 'Bib-kaes Ana'
9 Rarit au 'iit mansian ein amfau-rutun, tar antea ka bisa 'soi' 'ain sin fa barisi. Sin neman na'kon are' pah-pah, uuf-uuf, kanaf-kanaf, ma uab-uab anbin pah-pinan. Sin arsin nabuan ma nbaisenun neun a'toko prenat ma 'Bib-kaes Ana' naan. Sin npaken baur muti mnanu' ma anna'an hau noo peta. 10 Rarit sin npures ma nbo'is bu'-bua' am nak, “Hai mpures ma mbo'is hai Uisneno, re' antuun On anbi 'toko prenat ia. Hai maikas mi'ratan na'rat-raat 'Bib-kaes Ana' ia msa'! Sin re' ia, esan re' ansoi nafetin kit, ma nfee kit saok sanat ma 'honis. Sin re' ia, esan re' anrapin ma nfein raan a'honis neu kit.” 11 Na'uab ein anrarin on naan ate, Uisneno In ameput na'ko sonaf neno tunan re' nhaken nfuun naan 'toko prenat naan, nri'tuun ma na'ruir ein antean afu, ma nbaisenu 'toko prenat naan. Amnasit bo' nua mhaa re' anbin naan, ma mui' ma'tain haa' ein naan amsa', nmo'en on naan. Sin arsin na'ruir ein ma na'besan neun Uisneno, 12 ma sin nsiin am nak, “Tebes namneo, tua! Hai mpures ma mbo'is Uisneno msa'! Hai maikas ma mi'ratan Uisneno In kanan amsa'! Uisneno In ronen ma tenab, ro ka nsaan niit fa. Uisneno In kuasan, ro kou' besi. Uisneno In ma'tanin, ro ma'tain besi. Hai mtoit makasi meu Uisneno piut-piut. Hai mfee hormaat meu Uisneno ka natfeek niit fa. Tebes namneo, tua!” 13 Sin npures ma nbo'is anrarin on naan ate, tuaf es na'ko amnasit bo' nua mhaa naan nataan kau mnak, “Too mfaun ein re' anpaken baur muit ein ia, ho muhiin sin ii, oo? Sin arsin re' ia, na'kon mee?” 14 Mes au utaah am 'ak, “Kaah fa, tua. Au ka uhiin sin fa, tua. Ho es muhiin sin, tua.” Onaim in natoon kau mnak, “Sin re' naan, tuaf-tuaf re' napenin fetin na'ko suust am nana'renat ko'u. Sin re' naan, tuaf-tuaf re' anpake nrair 'Bib-kaes Ana' naan In naa', he nboe ma nsaef sin paken, ma nakninu' sin barun. 15 Natuin rasi naan, sin nhaken anbin Uisneno In a'toko prenat. Sin ntuthae Je fai-manas anbi In Uim Onen. Uisneno nok sin piut-piut. Uisneno npafa' ma npanat sin piut-piut. 16 Sin of ka nnaben niit fa rais amnahas antein. Sin of ka nnaben niit fa rais meon oe ntein. Sin of ka nnaben niit fa maans ee in maputun antein. Sin pausk ein of ka npoot ein fa ntein. 17 'Bib-kaes Ana' re' anpaumaak nok a'toko prenat naan, In of es re' njair sin atukus. In of es re' napoo' neik sin, ma na'inu' sin anbin oe mata' re' neiki 'honis. Uisneno of es annoes nain sin susat, henati' sin kais ankaen ntenin.”
Rasi Mnitas neu nai' Yohanis 8
'Retu'-'fo'e no hiutn ii — Uisneno In ameupt ein antoup naan to'is hiut
1 Rarit 'Bib-kaes Ana' naan nfei 'retu'-'fo'e no hiutn ii. Nok askeken ate, abitan sonaf neno tunan mninu'-mninu'. Ka tiit tain fa es he na'uab, tar antea oni' menit bo' teun 2 Rarit au 'iit ameput tuaf hiut na'kon sonaf neno tunan re' anhaken piut-piut anbin Uisneno In human ma In matan, re' sin nabarab sin tuak ein he ntuthae Je. Sin arsin tuaf mese'-mese' antoupun to'is. 3 Rarit ameput tuaf es anteni' na'ko sonaf neno tunan annao nhake nbi mei jes in matan. Mei re' ia nati' te sin npaek je he noutun hau oef re' foo meni'. In nnaa' a'pik-noin moro' kbuub es, re' biasa sin npaek je he ntaon hau oef foo meni' naan. Rarit sin nfee ne hau oef foo meni' kou'-ko'u, he in nseor ee nok onen totis na'ko Uisneno Iin na. Rarit in neik a'pika-kbubu' naan, nahuum on re' fua'-turu' re' anfoo mein, ma na'tuun ee nbi mei noin moro' naan, anbi 'toko prenat naan in matan. 4 Rarit in nout hau oef foo meni' naan. Onaim in foo menin naan ansae neu Uisneno In human ma In matan, ansae nabu-bua nok are' onen totis sin na'kon Uisneno Iin na. 5 Rarit ameput naan nait ai na'ko mei naan, ma antao naheun anbi 'pika-kbuub noni naan. Ma in nporin a'pika-kbubu' naan n'ain pah-pinan. Nok askeken ate, au 'iit rimat, re' nariim a'rii-'ne'u nbi pah-pinan. Rarit anmu'i 'rotos re' na'root ma na'ru'u kou'-ko'u. 'Rotos naan ka nasnaas niit fa. Ma pah ii na'beko'. 6 Rarit ameput tuaf hiut na'kon sonaf neno tunan naan, sin nabaarb ein he nfuun to'is.
Anfuu to'is ahunut — are' kanan hau ma roet anputun
7 Oras ameput nomer ahunut anfuu in to'is, na'uur on re' eis fatu, ma ai re' masero' nok naa', nat'oop an'ain pah-pinan. Are' kanan huu mate' anputu nmaten et mee-mee. Karu hit tbait pah-pinan batis teun, aputus naan baits es. Karu hit tbait are' kanan hau ma roet ein pah-pinan njair batis teun, apuuts ein naan, baits es.
Anfuu to'is no nuan ii — Are' kanan amonit anbi tasi anmaten
8 Oras ameput no nuan ii anfuu in to'is, nok askeken anmui' naan baer es nahuum on re' a'toe' kou' goes anpiin, anpoirn on antaam neu tasi, tar antea baits es na'ko batis teun tasi naan anjair naa'. 9 Rarit baits es na'ko batis teun na'kon are' kanan amonit anbin tasi, nmaten sapu'. Ma batis es na'ko batis teun neu are' kanan abnao oe nbin tasi, namre'un sapu'.
To'is no teun ii — oe ji menu'
10-11 Oras ameput no teun ii anfuu in to'is te, anmui' naan kfuu goes anmouf na'ko neno, nahuum on re' obor kou' goes re' anpiin. Kfuu re' naan, kaan ee, ‘Menu'’. Oras in nmoufu te, oe nbi noe ma oe maat ein anjarin menu'. Rarit amniun oe ngguin anmaten amfaun. Karu hit tbatis are' noe ma oe mata' anbi pah-pinan anjair batis tenu te, re' anjair meun ii, baits es.
To'is no haan ii — manas, funan ma kfuu nameis'okan
12 Rarit ameput no haan ii anfuu in to'is. Nok askeken manas, funan, ma kfuun ein sin napenin beso'. Onaim sin nameis'okan. Nateef oras manas, baits es na'ko batis teun oras manas naan, anjair meis'okan, natuin manas naan ka nasnaa batuur fa ntein. Ma oras fai, baits es na'ko batis teun oras fai naan anjair meis'okan batuur-batuur, natuin funan ma kfuun ein sin ka masnaa' ein fa ntein. 13 Rarit au u'aiti' au matak ate, au 'iit kor-garuda es natpeen na'rat-raat anbi neno. In na'kaka' ma na'uab am nak, “Ampaant om, oo! Siraak ko'u of antoman are' mansian amonit anbi pah-pinan. Fin anmui' ameput tuaf teun fe' etan sonaf neno tunan, re' ka nfuu sin toi's ein fa fe'.”
Rasi Mnitas neu nai' Yohanis 9
Anfuu to'is no niimn ii — are' knamat anha'mui' mansian
1 Rarit ameput no niimn ii anfuu in to'is. Onaim au 'iit kfuu goes anmoufu n'ain pah-pinan. Sin nfee 'reut es neu kfuu naan he in nasoit eon nuat re' ka nmui' fa tu'uf. Bare naan, naheun nok ha'mu'it ma nana'renat. 2 In nasoit nuat naan in enon, onaim maus metan anpoi on re' nais ji npuut. Masu' naan ansae kbo'es-akbo'es, tar antea neon goe ma maans ee nameis'ook. 3 Onaim anmui' knamat mfau-rutu natpenen npoin na'kon masu' naan, ma ansanun an'arin pah-pinan. Uisneno anfeen sin kuasa on re' kbiti. 4 Mes In naprenat sin he kais an'eet nareu' huun, hau ma roet bian sin. Mes sin ro he nha'mui' mansian ein re' ka nmu'in fa marak Uisneno anbi sin iirk ein. 5 Uisneno nkonan knaamt ein naan, he nha'mui' tuaf ein naan tar antea funan niim, mes kais na'maet sin. Suma nameenb ahaa sin on re' kbiit ji nrau. 6 Anbi funan niim in nanan re' naan, of mansian ii napenin ha'mu'it ma'tani ntein, tar antea sin ntotin he nmaetn aah. Maski on naan amsa', sin ka nmaten fa. 7 Au 'iit knaamt ein naan nahuum on re' bikase' re' anpaek sin anbin makenat. Sin npaken a'soeb noni mnatu' re' anmoe' je neu a'naak makenat. Sin huumk ein on re' mansian. 8 Sin a'naak fuun ein amnaun ein on re' bifee. Ma sin niisk ein ma'aik ein on re' singa in nisin. 9 Nahuum on re' sin npaek baur besi anbi sin a'baask ein, on re' iik' ee in pasun-a'pohon. Sin niink ein na'ru'u ko'u on re' sorarus batalion es sin bikaes ein anheer neik kreet makenat. 10 Sin iuk ein ma'tain besin ma nmui' raso on re' kbiit ji in raso. Sin napenin kuasa he nha'mui' mansian ein npaek sin raso naan, tar antea funan niim. 11 Usif na'ko knaamt ein naan, es re' usif na'ko ameput re' anriu' napoitan sin na'kon nuat ha'mu'it re' ka nmui' fa uuf. In kaan ee anbi uab Ibrani, Abadon, ma anbi uab Yunani, Apolion. In a'moufn ii nak, “tuaf re' nareu'”. 12 Nok ranan naan, siraak ahunut naan, nkono nrair. Mes ampaant om, oo! Fin anmui' anteni' siraak huma' nua re' he ntaman.
Anfuu to'is no neen ii — rais ha'mu'it huma' teun anbi pah-pinan
13 Rarit ameput no neen ii anfuu in to'is. Au 'iit mei mnatu' naan, re' sin npaek je he noutun hau oef foo meni', re' anbani' n'ain Uisneno. Anmui' hanaf anpoi na'ko mei naan in suunk ein haa sin. 14 Hanaf naan natoon neu ameput re' fe' anfuu nrair in to'is naan am nak, “Anmui' ameput tuaf haa re' mafutu' a'roo goen etan noe kou' goes, kaan ee, noe Efrat. Amnao mufetin sin nai!” 15 Onaim in nnao nafetin sin, he sin nnao nroor na'maet mansian re' nateef nok in neon toon, in funan, in neno, ma in eti-tabu re' Uisneno nafeek anrair sin. Karu hit tbatis mansian ein ok-oke' nbin pah-pinan ia njair batis tenu te, amaets ein naan, baits es. 16 Sin natonan neu kau mnak, ameupt ein sin soraurs ein re' ansaen bikaes makenat naan, tuaf hoto natun nua. 17 Rarit au 'iit soraurs ein nok sin bikaes ein. Soraurs ein naan anpaken baru re' anpafa' naan sin a'baask ein snaaf teun, es re' mee' apinat, biur arimat, ma moro on re' bariri. Bikaes ein naan sin a'naak ein on re' singa in a'nakan. Anmu'i msa' ai ma bariri re' anpuran anpoi na'ko bikaes ein sin feefk ein, 18 he neik rais ha'mu'it huma' teun. Rais ha'mui't ein re' anpoin na'kon bikaes ein sin feefk ein naan, na'maet baits es na'ko batis teun mansian amonit pah-pinan. 19 Rarit bikaes ein naan annaon ma nha'mui' mansian sin, anpaek sin feefk ein ma sin iuk ein. Anbi sin iuk ein naan, anmu'i 'nakaf on re' kaun aan in a'nakan. 20 Mes anmui' mansian anbi pah-pinan ia fe' re' ka na'maet sin fa na'ko siraak ein naan. Maski on naan amsa', mes sin ka nromin fa he nasaitan sin 'moe' maufinun. Sin na'besan neu niutn ee piut-piut, ma na'besan neu baer' ein re' anmoe' sin na'kon mnatu', noin muti', beis me'e, fatu ma hau. Maski baer' ein naan ka bisa nitan fa, ka bisa nnenan fa, ma ka bisa nnaon fa, mes sin na'besan neu sin piut-piut! 21 Sin ka nromin fa msa' he nasnasab sin sanat-penu bian sin, nahuum on re' na'maet atoni', npaek re'u, nabaak, ma nmakaken nok tuaf re' sin ka moenk ein fa, ai' sin ka feek ein fa.
Rasi Mnitas neu nai' Yohanis 10
Ameput neno tunan nok suur manunu' aan es
1 Rarit au 'iit Uisneno In ameput tuaf es, re' ma'tani', ansaun na'ko sonaf neno tunan. In aon naan an'aum naan ee nok nope. Anmui' enous re' anfuun naan in a'nakan. In human masnaaf on re' manas, ma in haen, anpiin on re' ai. 2 In nnaa' suur manunu' aan es, re' natfe'i nrair. In haen a'ne'u nahaek ee nbi tasi, ma haen a'rii je nbi auf meto'. 3 Rarit in nhunun naher-heer, nahuum on re' singa in hanan. In nhunun anrair on naan ate, a'roots ein antaur goe nfain no hiut. 4 Oras a'roots ein nataah anrarin ate, au he 'tui sin uabk ein. Mes au 'neen haanf es na'ko sonaf neno tunan nak, “Hae! Ho kais mutoon meu tuaf, a'rotos hiut sin uabk ein naan, joo! Kais amtui saa'-saa'.” 5 Rarit ameput re' anhaek nok haen bian ee nbi tasi ma bian ee nbi auf meto' naan, nait in a'niman a'ne'u neu neno, 6 ma ansuup am nak, “Au uabak re' ia, ro batuur! Au 'suup a'paek Uisneno In kanan, natuin In kuun nabar-baar! In kuun es amo'et ma apakaet neno tunan ma pah-pinan, nok nain in afan ma in nesan. Onaim amneen mirek-reko'! Oras eti re' hit tpa-pao goe naan, anpaumaak een. 7 Fin karu Uisneno In ameput no hiutn ii anfuu in to'is, of Uisneno anmoe' natuin in so'it ma reona' un-unu', re' mansian ii ka nahiin je fa fe'. Mes so'it ma reon naan, In natoon ee neu In mafefa kniun' ein re' antuthae Je. Onaim amneen mirek-reko', fin saa' re' au u'uab ee ji, ro batuur!” 8 Rarit hanaf re' au 'neen ee na'ko neon goe tnanan naan, na'uab antein nok kau mnak, “Yohanis, amnao nai meu ameput neno tunan re' anhaek neik in haen es et tasi, ma es et auf meto'. Amtoup suur manunu' aan'-ana' re' anfei nrair je et in a'niman.” 9 Rarit au 'nao 'eu re' ameput naan, he 'toit suur aan'-ana' naan. Onaim in natoon kau mnak, “Mait je ma mbukae nai! Anbi ho feefm aan, mainoni' on re' oin hau, mes in of anmoe' ho taim aan annaben menu'.” 10 Na'uab anrair on naan ate, au 'toup suur aan'-ana' naan. Onaim au 'eku. Anbi au fefak, au 'naben ate mainoni' on re' oin hau. Mes oras au 'oro, au 'naben menu' anbi au taik. 11 Rarit anmui' hanaf anreek kau mnak, “Ho ro he mfani mteni' he mutoon main saa' re' Uisneno he nmoe' je nbi pah-pinan. Mutoon anmatoom saa' re' of he anjair anbi are' kanan usif pah-pinan, ma mansian na'ko are' kanan uuf ma pah, ma are' kanan uab.”
Rasi Mnitas neu nai' Yohanis 11
Uisneno In mafefa kninu' tuaf nua, re' ma'tain' ein
1 Rarit sin nnona' kau hau ukur noon es, re' amnaun ii neeh jes. Onaim Uisneno naprenat kau mnak, “Yohanis, amfeen nai he mnao m'ukur Au Uim Onen Uuf nok in mei fuat, et kota Yerusalem. Ma msoi' are' tuaf-tuaf re' sin ar-arsin an'oen ein nbin bare naan. 2 Mes kais am'ukur Uim Onen naan in kintal, natuin bare naan manona' nrair neu uuf ma pah bian re' ka nahiin Kau fa. Sin of anteir hae ma n'oemetab Au kota naan, tar antean funan bo' haa-mnua (es re' neno niufn es natun nua mbo' nee—1 .260) 3 Au of a'reek haef tuaf nua 'eu bare naan he sin njarin Au mafefa kniun' ein. Sin of anpaken tai-nukat, rarit an'eut ma natoon rais manba'an na'ko Kau, tar antea neno niufn es natun nua mbo' nee naan namsopun.” 4 Uisneno In mafefa kninu' nai' Sakarias antui nrair na'ko afi unu' anmatoom nok mafefa kninu' tua nua' ein ia. In npaek uab nak, anmui' hau saitun 'u'u nua nok baer toras paku re' anbain ein n'ain Uisneno, es re' mansian pah-pinan sin Usin. 5 Karu nmui' tuaf re' anroim he nsirakab Uisneno In mafefa kniun' ein ia, of anmui' ai anpoi na'ko sin feefk ein ma nout nakrati' sin muusn ein ok-oke'. Nok ranan naan, are' tuaf re' he nha'mui' sin, ro tebes anmaten. 6 Oras sin nua sin anjarin Uisneno In mafefa kniun' ein anbin pah-pinan, In nfeen sin kuasa he n'eka' uran. In anfee kuasa msa' he nmoe' oe maat ein anjarin naa', ma kuasa he neik rais ha'mu'it huma'-huma' nbi pah-pinan, natuin sin roimk ein kuuk. 7 Karu sin oras he natoon Uisneno In rais manba'an naan namsoup, of mui' fui apisut es anpoi na'ko nuat ha'mu'it re' ka ma'u'u fa naan. In of anmakeen nok tua nua' ein naan, tar antea in niis naan sin, ma na'maet sin. 8-9 Nok ranan naan, sin nua sin anmaten anbin kota ko'u re' afi unu' te, biak ein anroor niis sin Uisn ee nbi hau nehe. Kota naan, anjari nrair koot maufinu on re' Sodom ma Masir afi unu'. Onaim sin of anporin napoitan mafefa kniun' ein naan sin aok amaets ein naan anbin ranan, tar antea neno teun ma stena'. Rarit mansian na'ko are' kanan uuf ma pah, ma uab, ma 'pen-pene, neman ma nkius tua nua amaets ein naan. Sin ka nfeen fa mainuan he nsuub sin imsa', 10 natuin sin nmarinan he nkius kuuk tua nua amaets ein naan. Fin sin nua sin es re' nok-noik mansian pah-pinan sin tenab. Onaim sin ar-arsin anmo'en fesat, ma anma'ook soun ein es nok es. 11 Mes neno teun ma stena' naan namsopu te, of Uisneno anfee snasaf neu sin, he sin nmoni nfanin. Rarit are' kanan mansian re' niit sin on naan ate, na'ta'in me-meot goah. 12 Rarit mafefa kniun nua' ein naan of annenan hanaf ma'tain es na'ko neon goe, re' anreek sin am nak, “Hae! Hi nua ki msae iim nai!” Onaim sin nua sin na'ait ok ansaen on neno ma noep je an'aum naan sin. Ankius nitan on naan ate, sin muusn ein antaka'naan ein. 13 Nok askeken ate, auf gui na'beko' ma'tani'. Karu hit tsoi' umin anbin kota naan, na'ko umi bo'es, uim jes antaikoib. Ma anmui' tuaf nifu hiut anmaten. Tuaf bian re' ka nmaten fa, namtaun nmaten. Mes sin of anhormaat Uisneno, natuin In es re' annaa' aprenat nbi sonaf neno tunan. 14 Nok ranan naan, siraak no nuan ii namsoup goen. Mes ampaant om, oo! Siraak no teun ii he neem een.
Anfuu to'is no hiutn ii — Uisneno ma Yesus Kristus anna'an aprenat anbin pah-pinan
15 Rarit Uisneno In ameput na'ko sonaf neno tunan no hiutn ii nfuu in to'is. Nok askeken ate, au 'neen a'roots ii neman na'kon sonaf neno tunan am nak, “Oras ia, anaa' aprenat anbi pah-pinan, suma arahaa Uisneno ma Yesus Kristus, es re' Tuaf re' Uisneno npiir ma mbetis nain Je na'ko afi unu'. Uisneno of annaa' aprenat piut-piut on re' Usif, tar antea nabar-baar.” 16 Amnasit tuaf bo' nua mhaa re' antokon nbin a'toko preent ein anbin Uisneno In human ma In matan naan, sin nnenan haanf ein naan amsa'. Rarit sin nri'tuun, ma naikas na'ratan Uisneno, 17 neik siit pures-bo'is am nak, “Koi, Uisneno! Hai Usi'! ma hai Ama' Uisneno! Ho es re' muprenat are' saa'-saa'. Ho es re' amkuaas are' saa'-saa'. Ho es re' mu'ko un-unu' te, ambi main naa. Ho es re' oras eti ia ambi naa msa'. Hai mtoit makasi meu Ko, tua, natuin Ho mpaek Ho kuasam re' ma'tani', he mnaa' aprenat ambi pah-pinan. 18 Mes uuf ma pah sin nato'on, natuin sin ka nromin fa he natuin Ko, tua. Mes oras ia, Ho muto'o msa', natuin sin ka nromin fa he nahiin Ko. Oras ia in oors ee ntea goen, he Usi' amhukun tuaf-tuaf re' ka nroim he ntoe natuin Ko fa, tua. Oras ia in oors ee ntea goen, he Usi' mureu' miis tuaf-tuaf re' nareu' niis tuaf bian sin. Oras ia in oors ee ntea goen, he Usi' amparikas amaets ein sin rais saant am penu sin, tua. Oras ia in oors ee ntea goen, he Usi' ambaras Uisneno In ameupt ein sin maskeet. Es re' Ho mafefa kniun' ein, ma Ho ngguin, ana'-ko'u, mnasif-mainuki'. Usi' ambaras meu sin arsin, re' anhormaat Ho kaanm aan, tua.” 19 Rarit au 'iit a'bi sonaf neno tunan, Usi' In Uim Onen In eon' ee masoita'. Onaim au 'iit peit-kere re' afi unu' sin natunu' Uisneno In preent ein re' matu'i nbi fatu. Rimat sin nariman ma nmatarun neu-mneman, pah ii na'beko', ma uran eis faut ma'fena' nmoufun na'kon neon goe tnanan.
Rasi Mnitas neu nai' Yohanis 12
Kaun naga nmakeen anraban bifee nok in anah
1 Rarit nok askeken, au 'iit tanar ma'tain es anboor anbi neon goe tnanan, re' mansian ii ka niit niit ee fa fe': anmui' naan bifee jes re' in aon ee maputi' npaek manas. In aras in haen ee nbi funan. In npake 'soeb usif re' nmui' kfuun bo'es am nua. 2 In na'apu', ankae, fin in he nahoin een. 3 Nok askeken ate, au 'iit a'teni' tanar ma'tain es anboor anbi neon goe tnanan. Anmui' naan kaun naga mee' jes kou' re'uf. In ma'naka' hiut, ma in suunk ein bo'es. In npaek 'soeb usif hiut anbi in a'naak ein. 4 In npaek in iukn ee ma nsaup nain kfuu baits es anbi neon goe tnanan. Anneis suma batis nua goah. Rarit in nporin nain kfuun ein naan n'ain pah-pinan. Rarit in nbani' neu bifee naan, he npa-pao oras bifee naan nahoni'. Fin in he n'oor naan ri'ana' naan. 5 Rarit bifee naan nahoni' naan Ri'aan moen jes. Mes Uisneno In ameput tuaf es neem ma nasiik naan Ri'ana' naan, ma neik Je neu Uisneno, he Ri'ana' naan naprenat bu'-bua' nok Uisneno nbi sonaf neno tunan. Fin Ri'ana' naan of naprenat are' kanan uuf ma pah nbi pah-pinan npaek kuasat ma'tani'. 6 Mes bifee naan naen neu baer fui ruumn es, re' Uisneno nabarab nain je neu ne. Sin of an'urus bifee naan anbi bare naan tar antea neno niufn es natun nua mbo' nee (es re' toon teun ma stena').
Nai' Mikael anmakeen anraban kaun naga nbi sonaf neno tunan
7 Rarit anmui' makenat ko'u anbi sonaf neno tunan. Uisneno In soraurs ein sin meo-pa'e, es re' nai' Mikael, anmakenan anraban kaun naga nok in ameupt ein. 8 Nai' Mikael sin niis naan kaun naga sin. Rarit sin antaar sin he kais natuan nbin sonaf neno tunan antein. 9 Es naan ate, sin nait inporin sin na'kon sonaf neno tunan neun pah-pinan. Kaun naga naan, es re' niutn ee sin usin, re' sin nteek ee nak, ‘Iblis’. Na'ko un-unu' in es re' anputa-kriu mansian he nmo'en sanat ma penu. 10 Rarit au 'neen a'teni' hanaf ma'tain es na'ko sonaf neno tunan nak, “Afi unu', kaun naga naan anhaek piut anbi Uisneno In human ma In matan. In re' naan, atu'iran sanat neu hit aok-bian apirsait ein. In nakuu sin fai-manas. Mes oras ia, anporin nasaitn ee na'ko sonaf neno tunan. Onaim oras ia, are' saa'-saa' ii namtiis jen. Fin oras ia, in oors aa goen he Uisneno nsoi nafetin mansian. Oras ia Uisneno annaa' aprenat neik In kuasat ma'tani'. Ma In nasaeb anrair Kristus, es re' Tuaf re' In npiir ma nbeit Je njair Usif neu are' kanan uuf ma pah. 11 Hit aok-bian apirsait ein niis nain kaun naga naan, re' afi unu' te nakuu sin, natuin 'Bib-kaes Ana' naan In naa' ee nat'oop he nnoes nain sin saant am penu sin. Sin niis ee msa', natuin sin nabrain he n'etun ma natonan neu tuaf anmatoom nok 'Bib-kaes Ana' In nekan arekot neu sin. Maski tuaf natoo' he nroor niis sin imsa', sin ka ntet-kotin fa. 12 Onaim are' kanan amonit et sonaf neno tunan, ro he nmarinan! Mes are' kanan amonit et pah-pinan ro he mpanat, natuin siraak ii he nsaen ki jen. Nitu 'naakf ee, nsaun neitin ki. In natoo' ko'u, natuin in nahiin nak, in oras he nmoe' rais maufinu naan, he namsoup goen!” Kaun naga naim bifee naan anbi pah-pinan 13 Oras kaun naga naan nahiin nak, nait inpoirn ee jen nbi pah-pinan on naan ate, in nnao naim bifee re' nahoni' Ri'ana' naan he nasusab. 14 Mes sin nfeen bifee naan ninif nua, nahuum on re' kor-garuda in ninin. Nok ranan naan, in napein mainuan he natpeen ma naim baer fui ruman re' na'roo na'ko kaun naga naan. Anbi bare naan, sin n'uurs ee tar antea toon teun ma stena'. 15 Ankius niit on naan ate, kaun naga naan anpuran oe nahuum on re' noe mahenu', he nroi neik bifee naan. 16 Mes pah piin ii anturun bifee naan neik 'mo'et es. 'Mo'et naan es re', auf gui natfe'i rarit an'oor naan noe mahenu' re' anpuran anpoi na'ko kaun naga naan. Nok ranan naan, noe mahenu' naan ka ntean fa bifee naan. 17 Rarit kaun naga naan natoo' ma'tani' neu bifee naan. Onaim in npoi na'ko in baran ma annao nmakeen anraban bifee naan in anah bian sin, es re' tuaf-tuaf re' anmonin natuin Uisneno In Kabin ma Prenat, ma nmanauk ein nak sin re' naan, Nai' Yesus Iin na. 18 Rarit kaun naga naan annao nhake nbi tais je ninin, ma nek-neuk nisin.
Rasi Mnitas neu nai' Yohanis 13
Mui' fui apisut re' anpoi na'ko tasi
1 Rarit au 'iit mui' fui apisut es anpoi na'ko tasi. In a'naakn ee, 'nakaf hiut, ma in suunk ein nono' bo'es. In npake 'soeb usif anbi in suunk ein mese'-mese'. Anbi in a'naak ein naan matu'i uab re' na're'uf ma nkana'paar Uisneno. 2 In aon ee, on re' meo 'ro'i. In haek ein, on re' mui' fui kou' goes re' anteek ee te nak, beruang. Ma in feefn ee, on re' singa in fefan. Kaun naga naan an'ofer in hak ee neu mui' fui apisut naan, he ntoko nbi 'toko prenat, ma anpaek nain in kuasa sin ok-oke'. 3 Anbi mui' fui apisut naan in a'nakan es, anmui' biki kou' goes, on re' an'oet niit ee tar antea he noi nmaet, mes kahaf. Are' kanan mansian anbi pah-pinan ansanmakan neun mui' fui apisut naan, rarit sin natuin ee. 4 Rarit sin anhormaat kaun naga naan, ma naikas na'rat-raatn ee on re' Uisneno, natuin kauna' naan anfee kuasa neu mui' fui apisut naan. Mansian ein anbo'is mui' fui apisut naan nak, “In re' naan ma'tain besi! Ka tiit tain fa es he niis ee!” 5 Uisneno nkonan mui' fui apisut naan he na'uab rais be'o ma na'uab ankana'paar Uisneno. In napein mainuan he naprenat, tar funan bo' haa mnua (es re' toon teun ma stena'). 6 Es naan ate, in nkana'paar Uisneno. Ma in nkana'paar Uisneno Iin na msa', re' etan sonaf neno tunan. 7 Uisneno nfee ne mainuan amsa', he in nraban Uisneno Iin na. In napein kuasa msa' he naprenat na'ko are' kanan uuf ma pah, 'pen-pene, ma uab ein anbin pah-pinan. 8 Natuin rasi naan, are' kanan mansian anbi pah-pinan na'besan neu mui' fui apisut naan. Sin re' naan, es re' tuaf-tuaf re' sin kaank ein ka matu'i fa nbi 'Bib-kaes Ana' In Surat naan. Afi unu', tuaf-tuaf anroor niis 'Bib-kaes Ana' naan, mes Uisneno namonib nafain' Ee. Oras Uisneno ka nmoe' fa pah-pinan ia fa fe', In ntui nrair are' kanan apirsait ein sin kaank ein nak, sin arsin re' naan, of napenin 'monit re' amneot ma amnonot, re' ka natfeek fa. 9 “Amneen mirek-reko'! 10 Karu Uisneno nafeek anrair nak, anmui' tuaf re' ro he nheek naan ee, of anheek naan ee. Karu Uisneno nafeek anrair nak, anmui' tuaf re' ro he napein roro' neik suni', of anroor goe neik suni'.” Etun Uisneno Iin na, kais amtet-koit. Naan anjair oras mainuan he maran ma mituin piut ma mpirsai piut-piut meu Ne te!
Mui' fui apisut re' anpoi na'ko pah-pinan
11 Rarit au 'iit mui' fui apisut es anteni', anpoi na'ko pah-pinan. In suunk ein nono' nua, on re' 'bib-kase in sunan. In haan ee, on re' kaun naga in hanan. 12 In njair mafefa' neu in usin, es re' mui' fui apisut ahunut re' afi unu' an'oet je ma he noi nmaet. In antoup kuasa na'ko in usin naan, he na'seke' are' kanan mansian pah-pinan he na'besan neun in usin. 13 In nmoe' rais sanmakat ma'tani' amsa', tar antea in bisa nasanut ai na'ko neon goe tnanan, anbi mansian ein sin humak ma sin matak. 14 Nok ranan naan, mui' fui apisut no nuan naan, anpaek in uisn ee in kuasan he nputa-kriu mansian abitan pah-pinan. In naprenat mansian ein amsa', he nahakeb faut maruna', on re' in uisn ee human, he sin anhormaat ee. In usin naan, es re' afi unu' an'oet je ma he noi nmaet. 15 Uisneno nkonan mui' aputa-kriut naan amsa', he nfee snasaf neu faut maruna' naan. Es naan ate, faut maruna' naan bisa na'uab ma nfee prenat he nroor niis tuaf-tuaf re' ka na'besan fa neu ne. 16 Mui' fui aputa-kriut naan, na'seke' are' kanan mansian he ntoup in marak anbi sin a'niim a'ne'u, ai' anbin sin iirk ein. Are' kanan mansian, ana'-ko'u, amu'it-ama'mu'it, atoin merdeka ai' ate msa', sin ar-arsin ro he ntoup marak naan. 17 Karu ka on naan fa te, sin ka bisa fa he na'soos ein, ai' ansosan saa'-saa'. Anbi marak naan, matu'i mui' fui apisut ahunut naan in kanan, ma in nomer. 18 Anbi re' ia, tperluu he tpaek ronef! Atoin ahinit, bisa nahiin nomer naan in oten. Nomer naan es re' nruur ma nreek naan mansian tuaf es, es re' “66 6 ”.
Rasi Mnitas neu nai' Yohanis 14
'Bib-kaes Ana' nok Iin na, tuaf nifu nautn es nifun bo' haa mhaa (144.000)
1 Rarit au u'aiti' au humak. Nok askeken ate, au 'iit 'Bib-kaes Ana' es anhake nbi 'toe' aan es. 'Toe' ana' naan, kaan ee, Sion. In nhaek nok tuaf nifu nautn es nifun bo' haa mhaa. Anbi sin iirk ein ok-oke', matu'i kanaf na'ko 'Bib-kaes Ana' naan ma In Amaf. 2 Rarit au 'neen hanaf es na'ko sonaf neno tunan. In hanan naan a'ruun ee on re' oe 'boni', ma ma'tani' on re' 'rotos. Mes hanaf naan in reokn ii kah een, nahuum on re' tuaf amfaun anrekun. 3 Onaim au 'iit tuaf nifu nautn es nifun bo' haa mhaa naan, anhaken ma nbain ein an'anin Uisneno, ma sin nok mui' ma'tain bes-besin haa re' nfuun naan Uisneno In a'toko prenat naan, ma amnasit tuaf bo' nua mhaa' ein naan. Too mfaun ein ansiin sii feu' goes. Suma sin nmees nahiin kuuk siit naan, mes tuaf bian, kahaf. Fin sin re' ia, sin es re' nareko nfanin nok Uisneno, natuin Usi' npaek In Aanh ee In naa' he nsoi naan sin. 4 Sin a'moink ein kniun' ein, nahuum on re' atoin munif re' ka ntuup niit fa fe' nok bifee. Sin natun-tuin ahaa 'Bib-kaes Ana' naan oras In nnao neu mee-mee jah. Fin Uisneno anbaen anrair sin anpaek In Aanh ee In naa', he sin njarin Iin na. Es naan ate, sin ar-arsin nahuum on re' fua' unu' na'ko etu ma rene, re' neik je ntaam njair fua'-turu' neu Uisneno ma nok 'Bib-kaes Ana' naan. 5 Sin ka na'uab ein fa nputa-kriun amsa', natuin sin neek ein kniun' ein.
Ameput sonaf neno tunan tuaf teun neikin beno
6 Rarit au 'iit a'tein Uisneno In ameput es na'ko sonaf neno tunan. In natpeen na'rat-raat nbi neon goe tnanan, he nasiin am nanaob Uisneno In Rais Reko re' nabar-baar. In natpene nfuun am nateef, natoon neu are' kanan mansian anbi pah-pinan, na'ko are' kanan uuf ma pah, uab, ma 'pen-pene. 7 In nhunun naher-heer am nak, “Hi ro he mhormaat Uisneno! Hi ro he mait mi'rat-ratan In kanan re' mapina'-makraha'! Natuin In oors aa ntea goen, he Uisneno nparikas are' kanan mansian ein sin a'moe'k ein. Pures-bo'is meu Uisneno! Maikas mi'rat-ratan In kanan! Natuin In es anmoe' ma npakae neno tunan ma pah-pinan. Ma In es re' naprenat he tasi ma oe mata' njarin ok-oke'.” 8 Na'uab anrair on naan ate, au 'iit ameput es anteni' neem na'ko sonaf neno tunan, neem natuin ee. In natoon am nak, “In namre'u nrair! Kota Babel re' ma'tani' naan, namre'u nrair! Kota re' maufinu naan, annoba' ntea auf goen. Afi unu' te, kota naan on re' bifee a'hake' re' na'seke' nafok-fokan are' kanan uuf ma pah nbin pah-pinan re' ia, he natuin in a'moe' makonit. Mes oras ia, kota naan annaben anrair Uisneno In to'os!” 9 Rarit au 'iit ameput sonaf neno tunan tuaf es anteni', re' neem natuin ameput nomer no nuan naan. In nhunun naher-heer am nak, “Ampaant om, oo! Are' kanan mansian re' na'besan neu mui' fui apisut ma in faut maruna', ai' antoup in marak nbi iran ai' 'niman, sin of antoup Uisneno In too's ee msa'! 10 Uisneno of nato'on sin, nahuum on re' In na'inu' sin tua miin menu' in oe unun. In of anporin nain sin neun ai bariri re' anpiin nabar-baar. In ameput sonaf neno tunan sin, nok 'Bib-kaes Ana' naan nitan neu rasi naan amsa'. 11 Para' te, are' kanan mansian re' na'besan neu mui' fui apisut naan ma in faut maruna', ai' antoup in marak, sin of napenin ha'mu'it on re' naan tar nabar-baar. Masu' na'ko sin ha'mu'it naan ansae fai-manas nabar-baar.” 12-13 Onaim are' kanan rasin naan, sin sairt ii nak, Uisneno In tuaf-tuaf sin ro he nnenan narek-reko' In Kabin ma Prenat, npirsain piut-piut neun Nai' Yesus, ma kais antet-kotin. Rarit au 'neen hanaf es na'ko neon goe tnanan natoon kau mnak, “Yohanis! Ho ro he mtui mak on nai: anmurai oras ia, oras apirsait ein neu Usif Yesus anmaten, sin napenin rasi mnisat.” Rarit Uisneno In Asmaan Akninu' nataah am nak, “Batuur! Sin of nisan batuur! Natuin sin napenin ha'mu'it huma'-huma' nbin pah-pinan, mes sin naran ma ntahan batuur-batuur he natuin Uisneno piut-piut. Onaim Uisneno of anbaras sin maskeet ein, ma sin of ka nmonin fa nbin rais ha'mu'it antenin anbin sonaf neno tunan.”
Uisneno In hukun anbi pah-pinan, on re' tpaek beis sabit he tafkai maka'
14 Rarit au u'aiti' au humak. Nok askeken ate, au 'iit nope kbuub es muti' nariim, ma tuaf es ntoko nbi nope naan. Tuaf naan, on re' Mansian Batuur-Batuur. In npaek 'sobe 'mnisat na'ko mnatu', ma annaa' beis sabit es na'aik. 15 Rarit au 'iit a'teni' ameput sonaf neno tunan tuaf es anpoi na'ko Uisneno In Uim Onen. In nhunun natoon neu tuaf atokos nbi nope naan am nak, “Ampaek beis sabit naan he mreif nai! Fin in oras he tbubun pah-pinan in aafn ein antea goen.” 16 Rarit Tuaf re' antook nbi nope naan, napitan beis sabit he nreif, ma nbubun naan pah-pinan in aafn ein. 17 Anmui' naan ameput tuaf es anteni' npoi neem na'ko Uim Onen sonaf neno tunan. In nnaa' beis sabit es he nreif hau fua'. 18 Rarit anmui' ameput tuaf es anpoi na'ko bare re' nout hau oef foo meni' nbi Uim Onen sonaf neno tunan. Ameput re' ia in 'meupn ii, es re' npao ai nbi bare mnout hau oef foo meni' naan. In nhunun ma nreun anaa' beis sabit naan am nak, “Ampaek beis sabit naan, he mnao mseu hau fuaf nbi pah-pinan nai! Fin anbi bare naan, hau anggur sin fuak ein namnatun nrarin.” 19 Rarit anaa' beis sabit naan napitan n'ain pah-pinan he nreif hau fua anggur sin saank ein. Onaim in nait nataam hau fua anggur sin neun bak re' he naitin anggur oef. Rarit sin ntaman anterin hau fuaf anggur anbin naan. Anteir anggur fuaf nbi bak naan, es re' Uisneno In to'os. 20 Bak naan, et kota in kotin. Oras sin nteir anggur fuak ein, naa' ii nsai kou'-ko'u. Naa' naan ansai on re' noe jes, re' karu t'uukr ee te, maineun ii kiru natun teun, ma in mnanu' 'taamn ii, meetr es ma stena'.
Rasi Mnitas neu nai' Yohanis 15
Ameput tuaf hiut na'kon sonaf neno tunan neikin siraak ko'u huma' hiut neu pah-pinan
1 Rarit au 'iit 'mo'et huum es anbi neon goe tnanan, tar antea au 'feefk ii no mkakan. Anmui' ameput hiut na'kon sonaf neno tunan, es-es ate annaa' kuasa he nfee siraak ko'u neu pah-pinan. Siraak hiut ein naan, es re' siraak muni'. Karu sin njarin ok-oek een, in oetn ii nak, Uisneno In neekn ee n'oe teen een, tar antea In ka nato'o ntein fa goen neu mansian. 2 Rarit au 'iit tasi npiin on re' ninu re' masero' nok ai. Au 'iit too mfaun anhaken anbin tais je ninin. Sin re' naan, tuaf-tuaf re' ka natuin fa mui' fui apisut naan, ka na'besan fa neu in faut maruna', ma ka ntoup fa in marak. Sin ar-arsin anna'an a'reku' on re' sasando re' sin ntoup sin na'kon Uisneno. 3 Rarit sin nsiin siit es na'kon ka'o Musa, Uisneno In aan renu'-aan reka' afi unu'. Tuaf ein re' naan amsa' ansiin siit es, re' anpures Nai' Yesus. Natuin afi unu' te, atoni' nroor niis Ne, nahuum on re' anroor 'bib-kaes ana' anbi Uisneno In Uim Onen he n'oeteneb ma nhainiik In nekan. Sin arsin ansiin am nak, “Hai mpures ma mbo'is Uisneno! Hai maikas ma mi'ratan In kanan! Natuin In kuasan, ro ma'tani'. Ma In ma'tanin, ro ansanmakab kit. Uisneno annaa' aprenat neu are' kanan uuf ma pah anbi pah-pinan. Uisneno njair Usif neu are' kanan uuf ma kanaf anbi pah-pinan. Uisneno In a'mo'en, ro ma'tani'! Uisneno In mepu ma pakaet, ro reok re'uf! Uisneno In ranan, ro namneo ma namnoon! Uisneno In a'monin, ro batuur-batuur namnoon! 4 Are' kanan mansian naikas ma na'ratan Uisneno In kanan, are' kanan mansian npures ma nbo'is Uisneno In arekon. Natuin suma Uisneno kuun es, akninu'. Suma In kuun es re' ka nmui' fa sanat ma penu. Are' kanan pah of na'ruri' ma na'besan neu Ne. Are' kanan uuf of neman ntotin makasi neu Ne. Natuin are' kanan mansian nitan nrarin Uisneno In a'mo'en arekot. Ma are' kanan mansian nahinin nrarin Uisneno In nekan amneot.” 5 Oras asiit ein ansiin nrarin, au 'iit Ke'en Akninu' nneis-neis anbi Uisneno In Uim Onen et sonaf neno tunan, ma in tai-eon' ee masoitan. 6 Rarit au 'iit ameput tuaf hiut ein re' neikin siraak hiut naan. Sin npoin na'kon Uisneno In Uim Onen. Sin npaken tais re' nariim muit okas, ma nasahan po'u mnatu'. 7 Onaim au 'iit amsa' mu'it es na'ko mui' ma'tain haa' ein naan re' anfuun naan Uisneno In a'toko prenat naan, annona' bokor amnatu' hiut neu ameupt tua hiut ein naan. Bokor hiut ein naan es-es ate matua' nok Uisneno In hukun. In kuun es nabar-baar. In nabarab anrair he nasanut In to'os neu pah-pinan. 8 Ka 'roo fa te, Uim Onen naan naheun nok masu' re' anpoi na'ko Uisneno In kuasan ma In pina' ma kraha'. Ka tiit tain fa tuaf es, re' bisa ntaam neu bare naan. Ameput tuaf hiut ein re' naan, ro he nasanut siraak hiut ein naan neun pah-pinan, he na' tuaf-tuaf bisa ntaman neun naan.
Rasi Mnitas neu nai' Yohanis 16
Uisneno In to'os nasaun ee neu pah-pinan
1 Rarit au 'neen hanaf ma'tain es npoi na'ko Uim Onen, he naprenat ameput tuaf hiut naan am nak, “Amnao nai! Mait meik bookr ein naan, ma m'opa' main Uisneno In to'os meu pah-pinan.” 2 Anneen on naan ate, ameput ahunut an'opa' bookr ee in afan neu pah-pinan. Nok askeken ate, tuaf-tuaf re' antoup niit mui' fui apisut naan in marak, ma tuaf-tuaf re' na'ruri' ma na'besan neu in faut maruna', napenin siraak. Meen paap reu'f ii ntoman sin. Paap re'uf naan meen ii kah een, he noi nmaten. 3 Rarit ameput no nuan ii n'opa' bookr ee in afan neu tasi. Nok askeken ate, oe tais ee njair naa' re' foo puun re'uf, nahuum on re' amaets ii in naa'. Onaim are' kanan amonit anbi tasi, nmaet sapu'. 4 Rarit ameput no teun ii n'opa' bookr ee in afan neu noe ma oe maat ein. Onaim sin ok-oke' anjarin naa'. 5 Rarit au 'neen ameput tuaf es na'ko sonaf neno tunan, re' an'urus are' kanan oe nbi pah-pinan. In npures ma nbo'is Uisneno mnak, “Koi, Uisneno! Ho kninu' teeb! Ho ka mmui' miit fa sanat! Ho mbi main mu'ko un-unu', ma Ho of mubaar tar antea nabar-baar. Ho mufeek amrair rasi, ro natai. Ho mfee mrair hukun, ro tebe. 6 Tuaf bian nasaik anrair, naa' na'ko Ho ngguin. Tuaf bian nroor na'maet, Ho mafefa kniun' ein. Es naan ate, Ho mu'seke' sin, he sin ninun naa'. Etun Ho mbaras amrair meik rais hukun ate, ro batuur.” 7 Rarit au 'neen hanaf es anpoi na'ko mei fuat, re' nataah am nak, “Batuur! Uisneno es re' akuaas re'uf. Batuur! Uisneno es re' ma'tani' nnes-neisi. Uisneno es re' afeek rasi te, ro natai. Uisneno es re' afee hukun ate, ro tebe.” 8 Rarit ameput no haan ii n'opa' bookr ee in afan neu manas. Nok askeken ate, manas naan mapuut re'uf, tar antea mansian ii nputun. 9 Are' mansian re' anputun naan, ankaas Uisneno In kanan, natuin In es re' anreek he nsonu' sin siraak naan. Maski on naan amsa', ka tiit tain fa tuaf es re' na'piis ma na'te'un in nekan neu Uisneno, ai' npures neu Ne. 10 Rarit ameput no niimn ii n'opa' bookr ee in afan anbi mui' fui apiust ee in a'toko prenat. Nok askeken ate, meis'ookn ii n'aum naan are' tuaf re' na'besan neu ne, tar antea sin nrau niisk ein, he sin bisa ntaah ein na'kon ha'mu'it naan. 11 Sin nkaas Uisneno et sonaf neno tunan amsa', natuin sin paap ein naan, meenk ein kah een. Maski on naan amsa', ka tiit tain fa tuaf es, re' na'piis ma na'te'un in nekan, he natuin Uisneno. 12 Rarit ameput no neen ii n'opa' bookr ee in afan neu noe ko'u Efrat. Onaim noe naan nmeit meto'-meto' nain. Rarit sin nmo'en ranan anbi bare naan. Ranan naan, napaar ee neu uisf ein ma soraurs ein na'kon pasa' neon-saet 13 Onaim au 'iit niut maufinu tuaf teun. Sin maask ein on re' kreso. Es anpoi na'ko kaun naga in fefan. Es anpoi na'ko mui' fui apisut in fefan. Es anteni' npoi na'ko kaun naga in mafefa' re' aputa-kriut ee in fefan. 14 Niut maufiun teun ein naan, anmu'in kuasa he nmo'en rais sanmakat huma'-huma'. Sin npoin ma nnaon nateef nok are' kanan usif anbi pah-pinan, rarit sin nahaek ein rais manba'an he neot es, oors es sin nmakenan anraban Uisneno akuasat. Mes oras re' sin nmanbaa'n ein naan, es re' Uisneno In oras re' In nbetis anrair je, he niis nain In muusn ein ok-oke'. 15-16 Bare re' sin he nabuan he nmakenan naan, anbi uab Ibrani te nak, Armagedon. Yesus Kristus na'uab amsa' am nak, “Mimnau mirek-reko'! Nok askeken ate, Au 'uum on re' abakat re' hi ka mitenab maan ee fa. Tuaf-tuaf re' anbe'-be'en ma anpaon anpaek pake re' namtiis, sin es re' n'ua pa'en. Fin oras Au 'uum, in ka namaeb on fa, natuin tuaf ka niit ee fa neu in afa'.” 17 Rarit ameput no hiutn ii n'opa' bookr ee in afan neu anin. Onaim Uisneno na'uab neik haan ko'u na'ko In a'toko prenat, et Uim Onen am nak, “Oek' een! Au too's ein oek' ein een!” 18 Onaim anmui' rimat re' nariim neu-mneem, ma 'rotos re' na'root neu-mneem amsa'. Ma auf gui na'beko' ma'tani'. Auf a'beko' ia ka njair niit fa fe' nbi pah-pinan. 19 Oras naan, Uisneno ka nnikan fa kota Babel in maufinun. In npaek auf a'beko' ma'tani' naan, tar antea kota naan npee' batis teun. In nmoe' on naan he abitan Babel nnaben nahiin In to'os. Kota bian anbi pah-pinan antuup annoban nain afu. 20 Oras naan, are' kanan puru sin nreman on ahaa re' naan. Ma 'toe'f ein, namnekun oke'. 21 Anmu'i uran eis fatu msa' re' kou'-ko'un nmoufun na'kon neon goe tnanan, ma ntuut naan mansian. Eis fatun naan sin ma'feenk ein, ntean kiru bo' haa. Natuin uran eis naan anha'mui' sin, etun mansian ii nkaas Uisneno.
Rasi Mnitas neu nai' Yohanis 17
Uisneno In ameput nataib kota Babel nok bifee a'hake'
1 Rarit tuaf es na'ko tuaf hiut ameput sonaf neno tunan re' anna'an bokor ruumn ein, neem anpaumaak kau mnak, “Uum meu ia! Au he ukrira' ko hukun 'eu bifee a'hake' re' maufiun re'uf. Hukun naan na'ko Uisneno. In re' naan es re' kota ko'u re' sin nafeen ee npaumaak oe mfaun. 2 Afi unu' te, uisf ein na'kon bare mee-mee, neman ma nmakaken nok abitan kota naan. Tuaf bian neman amsa', ma nmafun ma natun-tuin ein ahaa kota naan in fotes.” 3 Rarit Uisneno In Asmaan Akninu' ntoom kau. Onaim ameput sonaf neno tunan nait neik kau 'eu baer ruman es. Anbi bare naan, au 'iit bifee jes antoko nbi mui' fui apisut es, re' masnaa mee' apinat. Mui' fui naan in a'naakn ee, hiut, ma in suunk ein, bo'es. Anbi in aon ee matu'i uab re' na're'uf ma nkana'paar Uisneno. 4 Bifee naan anpaek paek ma'osa' re' snaa me'e ma umub. In baer barias ein, anmoe' sin na'kon amnatu', faut arimat re' ma'osa', ma mutiara. Anbi in a'niman a'ne'u, in nnaa' a'koma mnaut es, re' naheun nok tua min-kase. Tua min-kase naan, es re' in fotes, ma are' kanan rais maufinu ma rais meis'okan bian re' in nmoe' sin. 5 Anbi in iran, matu'i kanaf es, re' in oetn ii, ma'nifa' fe'. Tuis naan nak on nai: Au re' ia, Babel! Es re' kota ma'tain re'uf! Are' kanan rais maufinu nbi pah-pinan ia, na'uun ma na'ba'an nbin kau. Are' kanan amakaket anbin pah-pinan ia, sin amneemk ein na'kon kau. 6 Rarit au 'kisu te, bifee naan anmauf ko'u, natuin in nninu nrair Uisneno Iin na sin naa' ein. In a'moufn ii nak, in nroor niis Uisneno Iin na, natuin sin n'eut ma natoon rasi anmatoom nok Nai' Yesus piut-piut. Au 'kius 'iit on naan ate, au feefk ii no mkakan ma 'sanmaak. 7 Mes ameput naan nataan kau mnak, “Nansaa' am es ho mumkaak on re' naan? Ampaumaak uum, he au utoon ko bifee amaufinut naan in oten. On naan amsa', anmatoom nok mui' fui apisut re' in ansae ntook goe naan. Es re' ma'nakaf hiut ma masuna' bo'es naan. 8 Unu' fe' mui' fui apisut naan anmoni nbi pah-pinan, mes oras ia, in ka tiit ee fa goen. Mes ka 'roo fa nteni' te, in npoi na'ko nuat ha'mu'it re' ka ma'u'u fa. Oras naan, anmui' tuaf re' anmonin nbin pah-pinan, re' sin kaank ein ka matu'i fa nbi 'Bib-kaes Ana' In Surat. Surat re' naan, es re' Uisneno antui nain je oras In ka nmoe' ma npakae fa pah-pinan ia fa fe'. Tuaf ein re' naan, of feefk ein no mkakan oras sin nkius niit mui' fui apisut naan, natuin in nfain neem. Ma karu in nfain neem anrari te, Uisneno of anporin napoitn ee n'ain ai bariri re' anpiin nabar-baar. 9 Atoin ahinit batuur bisa nahiin re' rasi pisa' ia. Mui' fui apisut re' ma'naka' hiut naan, in oetn ii, es re' 'to'ef hiut. Bifee a'hake' naan antook et a'to'ef hiut ein re' naan. Ma 'naka' hiut ein re' naan, in oetn ii, es re', usif hiut. 10 Na'ko usif hiut re' naan, tuaf niim anmate nrarin. Tuaf es naprenat oras ia. Es anteni' ka nboor fa fe'. Mes karu in neem anrari te, in suma nnaa' aprenat raab aah. 11 Oras ia, au utoon ko rasi anmatoom nok mui' fui apisut re' unu' fe'e te, anmoin naan, mes oras ia nmate nrair. Unu' te, in anjair usif amsa' nbi pukan usif tuaf hiut ein naan. Mes in of anfain neem ma annaa' aprenat he njair usif re' no faun. In of namre'u nkoon amsa'. 12 Sunaf bo'es re' naan in oetn ii, es re' usif bo'es. Sin ka nna'an aprenat fa fe'. Sin of antoupun kuasa he nna'an aprenat nabu-buan nok mui' fui apisut naan, mes suma raab aah. 13 Natuin sin ar-arsin anma'akoran he n'ofer sin kuasa naan neu mui' fui apisut naan. 14 Uisf ein re' naan, sin of anmakenan nraban 'Bib-kaes Ana' naan. Mes 'Bib-kaes Ana' naan nok Iin na, of niis nain sin ok-oke'. Tuaf-tuaf re' natuin 'Bib-kaes Ana' naan, esan re' tuaf-tuaf re' In npiir ma nbetis, ma no'en naan sin, re' sin naran ma natuin Ee. Sin of nisan, natuin 'Bib-kaes Ana' naan ma'tain re'uf. Suma In kuun, Usif ansae faof usif, ma 'Nakaf nsae fafo 'nakaf. 15 Ma oe mfaun re' anpaumaak bifee a'hake' naan, es re' are' kanan uuf ma pah, 'pen-pene, ma uab anbi pah-pinan. 16 Usif bo'es naan ma mui' fui apisut naan, of ka nroim nain fa bifee paus mafaun re' ka nmui' fa rais mae. Sin of nasiik naan kuuk in pake ma brua' ein ok-oke', rarit nnao nasaitn ee oras in n'afa'-monas anbi bare naan. Rarit sin neuk in sisin. In aon re' in siisn ee nakraeb ee naan, sin ntokar nataam ee neu ai. 17 Uisneno In kuun es re' anmoe', tar antea usif bo'es re' naan anma'akoran, he nnona' sin kuasa neu mui' fui apisut naan, tar antea in na'tutu' niis bifee naan. Nok ranan naan, Uisneno In reon ma sarit of anjarin ok-oke'. 18 Onaim bifee a'hake' re' ho mkius miit ee naan, es re' kota ma'tain re'uf naan, re' naprenat are' kanan usif anbi pah-pinan.”
Rasi Mnitas neu nai' Yohanis 18
Uisneno In ameput nareta' anmatoom nok kota Babel in amre'un
1 Rarit au 'kius 'iit a'tein ameput tuaf es ansaun na'ko sonaf neno tunan. In anmui' kuasa ma me'u ma'tani', tar antea me'u naan ntana' nain pah-pinan ok-oke'. 2 In npaek haan ko'u he natoon am nak, “Antaikobi nrair! Kota Babel antaikobi nrair! Anmoufu nrair! Kota ma'tani' naan anmoufu nrair! In njair bare 'tua-ha' neu niut reu'f ein. In njair kua-mnaa' neu are' kanan niut maufinu sin ok-oke'. In njair bare neu are' kanan koro re' neuk siis punu'. Koron naan of nabuan nbin bare naan. In njair o'of neu are' kanan kauna' ma mu'it re' ka reko fa. 3 In ntaikobi nrair, natuin are' kanan uuf ma pah anbi pah-pinan, neu-mneman piut-piut ma ninun tua min-kaes amafun. In nmoufu nrair, natuin are' kanan uuf ma pah anbi pah-pinan, neu-mneman piut-piut ma nmakaken nok abitan kota naan. Uisf ein na'kon are' kanan a'pen-pene, neman ma nmakaken nbin bare naan. Atoin arakan na'kon are' kota-kota, neman ma nraakn ein, tar antea sin njarin amu'it. Natuin kota naan, on re' bifee re' anmariin he nsosan are' kanan baer mamasa' ma ma'osa'. Natuin kota naan, on re' bifee a'hake' re' anmariin neu are' kanan rais aminat.” 4 Rarit au 'neen a'teni' hanaf es na'ko sonaf neno tunan am nak, “Hae! Are' Au nggui naan arki! Maen ampoi mi'ko bare naan nai! Misaitan kota naan nai! Kais ammoe' mituin abitan kota naan sin maufiunk ein, he kais mipeni msa' sin rais hukun. 5 Natuin sin maufinun, mfau-rutu ma ka maso'ik fa. Ma sin saant am penu sin, anmarapis peni-peni ntea neon goe tnanan. Oras ia, Uisneno ka nnikan anteni' fa, sin raan maufinu ma amre'ut naan, Oras ia, Uisneno nabarab anrair, he nhukun sin. 6 Onaim hi ro he mbaras sin 'moe' maufinun, nahuum on re' sin nmoe' rais maufinu neu tuaf bian. Mes hi ro he mbaras sin, mfain no nua. Afi unu' te, sin na'moe ma napoin tuaf, he nbukaen na'kon sin a'koma mnatu' re' naheun nok tua min-kase ha'mu'it. Mes oras ia, sin kuuk es re' he nbukaen, tua min-kase ha'mu'it naan, tar antea nfain no nua. 7 Sin nmoe' sin tuak ein ma'tani'. Sin naikas ma na'ratan sin tuak ein. Sin suma nromin he nmonin nok are' kanan baer mamasa' ma ma'osa'. Sin nromi haa are' kanan rais aminat. Es naan ate, sin ro he napenin susat ma nana'renat ma'fena'. Onaim sin ro he nmonin nbin ha'mu'it ma ma'ne'at. Fin afi unu', sin na'uab ein be'o, nahuum on re' bifee a'hake re' na'uab am nak, ‘Au re' ia, uis bifee! Au of ka 'banu' fa! Au of ka 'kae 'pin-pinus fa. Au of ka 'paek fa tai-nukat.’ 8 Sin na'uab ein on naan, tar antea Uisneno nato'on sin. Tar antea Uisneno he nhukun sin een. Of anbi neno mees' aah, sin of namnahan re'-re'uf, sin nkaen npin-piuns ein, ma sin nmate nkonon amsa'. Tar antea tuaf nait ma ntokar sin neun ai. Tar antea ai naan nout sin aok amaets ein naan tar namsoup. Fin Uisneno akuasat naan, es nasanut ma nfee hukun re' ia. Ma Uisneno ama'tani' naan, es re' nafeek rasi re' ia. 9 Uisf ein re' afi unu' te, neman, ma nmakaken nok abitan kota naan, ma nmonin nok baer mamasa' ma ma'osa' nbin naan. Sin of nkius nitan masu' re' ansae na'ko ai naan, sin of nahinin nak kota naan nputu nmaet jen. Rarit sin nkaen npin-piuns ein neu ne. 10 Onaim sin aok ein napipin, oras sin nkius ha'mu'it ma ma'ne'at re' ansaen sin naan. Mes sin suma nabranin he nhaken anbin a'roo. Ma sin suma nabranin he nkis-kisu haa na'kon bare naan. Rarit sin na'uab ein am nak, ‘Airoo! Kasian Babel! Airoo! Kasian kota ma'tani'! Suma jam mees' aah, mes ho mupein hukun. Suma oras mees amsa', mes ho mumre'u mrair.’ 11 Anneen on naan ate, tuaf-tuaf re' afi unu' neman he nraakn ein anbin bare naan, sin ankaen npin-piuns ein amsa'. Fin ka tiit tain fa tuaf es amsa', re' he nsoos sin baer' ein antein. 12 Ka tiit fa tuaf he nsoos sin baer' ein re' anmoe' sin na'kon mnatu', noin muti', faut arimat, ai' mutiara. Ka tiit fa tuaf he nsoos sin tais ein re' anteek sin ite nak lenan, tai-sutar, ai' tais ma'osa' re' masnaa me'e, ai' umub. Ka tiit fa tuaf he nsoos sin baer' ein re' anmoe' sin na'kon hau oef foo meni', gading maruna', ai' hau maruna' bian sin. Ka tiit fa tuaf he nsoos sin baer' ein re' anmoe' sin na'kon beis-me'e, besi, ai' faut marmer. 13 Ka tiit fa tuaf he nsoos sin hau aminat, ai' hau 'pooh aminat huma'-huma'. Ka tiit fa tuaf he nsoos sin hau oef foo meni', ai' miin foo bona' huma'-huma'. Ka tiit fa tuaf he nsoos sin tua min-kase, mina' na'ko hau saitun, uu-tariku, ai' maak-gandum. Ka tiit fa tuaf he nsoos sin bijae ngguin, 'bib-kasen, ai' bikaes ein. Ka tiit fa tuaf he nsoos sin akreet ein, ai' sin aten. 14 Atoin araakn ein naan of anme'-mei' jok am nak, ‘Koi, Babel! Koi, kota ma'tani'! Ho baer mamasa' ma ma'osa' re' atoni' nroim nanes-nesib sin naan, ka tiit attein sin fa goen. Sin ar-arsin namnekun nrarin, tar antea sin nma'mu'in nmaten, tar antea ho mnoba' maan afu tteri.’ 15 Afi unu', atoin araakn ein naan njarin atoin amu'it natuin kota naan on re' bifee a'hake'. Mes oras ia, sin nme'-mei' jok ka natfeek niit fa. Sin namtaun nmaten, ankius tuaf anbi kota naan sin ha'mu'it ma ma'ne'at naan. Sin aok ein napipin ma'tani', nkius sin napenin hukun naan. Mes sin suma nkisu nbi nggoah a'roo. Sin suma nabranin ma nhaken nbin nggoah aa bare naan. 16 Rarit sin na'uab ein am nak, ‘Airoo! Kasian Babel! Airoo! Kasian kota ma'tani'! Afi unu' te, ho ngguin anpaken paek mamasa' re' snaa me'e ai' umub, anteun ma nmoe' je na'ko tai ma'osa'. Afi unu' ho ngguin anbarias ein npaken amnatu', mutiara, ma faut arimat re' ma'osa' 'maten. 17 Mes anbi jam mees' aah, ho baer' ein naan, ka tiit attein sin fa goen. Suma rabah aa, ho 'mui'm ein naan, namnekun oke'!’ Un-unu' msa' kaptein abnao oe ngguin nok sin ameupt ein nnaon neu-mneman neun kota naan. Mes oras ia, sin suma nabranin, karu nasanut boint ein anbin nggoah a'roo. Ma oras ia, sin suma nabranin he nkis-kiusn ahaa na'kon a'roo. 18 Sin nkisun masu' re' anpoi na'ko ai naan. Rarit sin nahinin am nak, in nputu nrair jen. Onaim sin nme'-mei' jok am nak, ‘Airoo kasian! Of ka tiit attein fa kota bian, re' ma'tani' nahuum on re' kota Babel. Airoo kasian! Of ka tiit attein fa kota bian, re' in maasn ii huma' mese' on re' Babel in masan.’ 19 Sin nhutin afu skuku' ma ntaon neun sin a'naak ein natuin sin neek ein ansusan. Sin nkaen npin-piuns ein, natuin sin neek ein namre'un. Rarit sin na'uab ein am nak, ‘Airoo! Kasian Babel! Airoo! Kasian kota ma'tani'! Hai meu-m'iim meik abnao oe misaeb bare' meu ko, tar antea hai mjair atoin amu'it amsa'. Hai mroe meik ho saeb ein, tar antea hai mipein baer ma'osa' ma mamasa' amsa'. Mes suma anbi jam mees' aah, are' kanan baer' ein naan, namnekun nrarin. Suma raab aah, are' kanan baer' ein naan, namre'un nrarin.’ 20 Rarit hanaf naan na'uab anteni' mnak, ‘Hae, hi abit sonaf neno tunan! Hi neekm ein naan, kais namenan ntein' ein nai. Hae, Uisneno In tuaf ein! Hi neekm ein naan kais ansusan ntein' ein nai. Hae, Uisneno In haef ein! Maut he hi mkumain nai. Hae, Uisneno In mafefa kniun' ein! Maut he hi neekm ein anmarinan nai. Afi unu' te, Babel nasusab ki. Afi unu' te, kota naan anha'mui' ki. Mes oras ia, Uisneno anbaras anrair hi ha'mu'it naan. Fin oras ia, In nbaras anrair kota naan in maufinun.’ ” 21 Rarit au 'kius 'iit ameput neno tunan tuaf es, re' ma'tani' batuur. In neem nait naan kuun fatu fua' es. Fatu naan, 'naen ii on re' tuaf es. Rarit in nporin fatu naan n'ain tasi. In natoon amsa' am nak, “Sin of nareu' niis kota Babel on re' naan amsa'. Sin of namnekub kota ma'tani' naan on re' naan amsa'. 22 Ka tiit attein fa tuaf, re' anreuk ma nsii nbi kota naan. Ka tiit attein fa tuaf, re' anneen niit a'reuk sasando, a'reku', bobe, ma to'is sin haank ein anbi kota naan. Ka tiit attein fa atoin ahiin mepu, re' anmepun ntein' ein mese'-mese' anbin sin mepun. Ka tiit attein fa tuaf, re' napau ma nmoor maka' ntein anbi kota naan. 23 Ka tiit attein fa tuaf, re' nout ma napina' paku ntein anbi kota naan. Ka tiit attein fa tuaf, re' antaon fesat kabin antein' ein anbin bare naan. Afi unu' araakn ein anbin kota naan, anjarin atoin amu'it ma'tani' nrair. Afi unu', Babel in atoin araakn ein, anmonin nok baer mamasa' ma ma'osa' ma'tani'. Mes sin npaken re'u ma hau, he napoi tuaf-tuaf anbi pah-pinan. Sin npaken hau maat-nipu', he nputa-kriu mansian nbin pah-pinan. 24 Babel napein hukun ma'fena' goen, natuin in nroor na'maet Uisneno in mafefa kniun' ein. Kota ma'tani' naan, namre'u nrair, natuin in ha'mui' na'maet Uisneno Iin na piut-piut. Anmui' Uisneno Iin na re' anroor niis sin anbin bare bian. Mes Babel ro he es re' nasaah kuun sanat ma penu sin ok-oke'. Kota ma'tani' naan, ro he es re' nroi kuun rais tonis ma tahas.”
Rasi Mnitas neu nai' Yohanis 19
Pukan asiit ko'u ansiin nbin sonaf neno tunan
1 Ameput sonaf neno tunan naan na'uab anrair on naan ate, au 'neen hanaf kou' goes nahuum on re' pukan asiit ko'u, ansiin et sonaf neno tunan. Sin nsiin am nak, “Haleluya! Haleluya! Hit tait siit pures-bo'is teu hit Uisneno, natuin In mapina'-makraha'. Haleluya! Haleluya! Hit tait siit pures-bo'is teu hit Uisneno, natuin In kuun, ro akuasat anneis-neisi. Uisneno es re' ansoi nafetin kit, na'ko are' kanan hit saant am penu sin. Uisneno es re' nanoon ma naneo kit, na'ko are' kanan monit apenut-abeot. 2 Hit tait siit pures-bo'is teu hit Uisneno, natuin In nafeek rasi, ro natai. Hit tait siit pures-bo'is teu hit Uisneno, natuin In es anhukun ate, ro batuur. Uisneno nasanut hukun neu bifee a'hake' naan, natuin in nfuri' ma nkopo' tuaf-tuaf anbi pah-pinan, he nmakaken nabu-buan nok ne, ma natun-tuin ein ahaa in maufinu. Uisneno anbaras anrair bifee maufinu naan, natuin in nroor na'maet, Uisneno in aan renu'-aan reek ein.” 3 Rarit sin nsiin ntein' ein siit bian anbin sonaf neno tunan am nak, “Haleluya! Pures ma bo'is meu Uisneno! Haleluya! Maikas mi'rat-ratan In kanan! Natuin masu' na'ko ai re' nout niis bifee naan in aon amates, nsae piut-piut ma ka natfeek niit fa. Ma masu' na'ko ai re' nout niis kota ma'tani' naan, ansae piut-piut ka nasnaas niit fa.” 4 Rarit amnasit tuaf bo' nua mhaa nok mui' ma'tain haa' ein naan, nri'tuun ma na'ruir ein na'besan neun Uisneno In a'toko prenat. Sin anbaisenun neik rais hormaat am nak, “Batuur! Iim nai he hit arkit atpures ma tbo'is Uisneno! Haleluya! Iim nai he hit arkit tait ma ttuna' ta'ratan In kanan!”
'Bib-kaes Ana' In fesat kabin
5 Rarit au 'neen a'tein hanaf es na'ko 'toko prenat naan am nak, “Hae, aan renu'-aan reka' Uisneno arki! Hae, anah-anah Uisneno ki! Iim he hit ttuna' ta'rat-ratan Uisneno In kanan. Iim arki, ana'-ko'u, mnasif-mainuki', he tpures ma tboi's Ee.” 6 Rarit au 'neen on re' too mfaun na'uab ein. Sin haank ein on re' oe 'boni', ma ko'u on re' 'rotos na'root ka natfeek fa. Sin na'uab ein am nak, “Haleluya! Hai msii ma mbo'is Uisneno. Haleluya! Hai mtuna' mi'rat-ratan In kanan. Natuin In kuun es re' akuaas re'uf. Ma In kuun es re' naprenat are' kanan saa'-saa'. 7 Oras ia, hit neek ein anmarinan. Oras ia, hit bisa tkumain ma thuma'moe. Hit tpures ma tboi's Ee, natuin 'Bib-kaes Ana' naan In oras he nkabin, antea nrair. Hit ttuna' ta'rat-ratan In kanan, natuin 'Bib-kaes Ana' naan In baroit ee nabarab anrair. 8 Uisneno nfee nrair ne tais ma paek baroit, re' mamasa' ma ma'osa'. Uisneno nfee nrair ne tais ma pake re' muit okas arimat.” (Tais ma pake re' muit okas arimat naan, es re' Uisneno Iin na re' sin a'moe' rekon.) 9 Onaim ameput sonaf neno tunan naan natoon kau mnak, “Yohanis! Ho ro he mtui mmak, on nai: ‘Are' kanan tuaf re' napein haan askaut ma undangan he nkoen on neem nok anbi 'Bib-kaes Ana' In fesat kabin naan, sin of an'ua rekon batuur!’ ” Rarit ameput naan antuta ntein in uban naan am nak, “Uisneno In Kabin ma Prenat re' ia, ro batuur!” 10 Onaim au 'ri'tuu he u'besan ameput naan. Mes in nakain kau mnak, “Kais mu'besan kau on naan! Fin au Uisneno In aan renu'-aan reka' amsa' on re' ho, ma ho aok-bian sin re' nasina' ma natoon rasi anmatoom nok Nai' Yesus. Mafefa kninu' re' natoon rais manbaa'n ein, sin ar-arsin nakrira' ma natoon anmatoom nok Nai' Yesus, he mansian na'ruri' ma na'besan neu Ne. Fin re' naan romif na'ko Asmaan Akninu' on naa. Onaim kais mu'besan kau, mes mu'besan meu Uisneno nmees jah!”
Usif Yesus ankoen On neem ansae bikaes muti'
11 Rarit au u'aiti' au matak, onaim au 'kius 'iit sonaf neno tunan natfe'i. Nok askeken ate, au 'kius 'iit bikaes muit es npoi neem. Tuaf re' ansae bikase' naan, kaan ee, “Tuaf re' Annaa' Rais Manba'an” ma “Tuaf re' Amneot ma Amnonot”. Oras In nafeek rasi, ro natai. Karu In nnao nmakeen, In nnao nok neek amne'o. 12 In maatk ein anpinan on re' ai. In npaek 'soeb usif, namfau. In kaan ee matu'i et In aon, mes suma In kuun es re' nahiin kanaf naan in oten. 13 In tai-paekn ein, natepa' sin anbin naa'. Atoni' nteek Ee te nak, “Uisneno In Kabin ma Prenat”. 14 Au 'kius 'iit amsa' soraurs ein na'kon sonaf neno tunan ansaen bikaes muti' he natuin Ee. Sin anpaken tai-pake ma'osa' re' muit okas amsa'. 15 Anmui' naan suin 'aikan es, re' anboor na'ko In fefan. In npaek suni' naan, he nnao nmakeen nraban are' kanan uuf ma pah anbi pah-pinan. Rarit In niis nain sin. Onaim In njair Usif neu sin. In naprenat nok feef maputu' ma 'niim maputu', rarit sin nnaben niit Uisneno akuasat In to'os. Naan huma' mese' on re' atoni' nteir hau fua anggur he nait anggur oef. 16 Anbi Atoni' naan In tai-paken naan, ma In pusun, anmui' tuis nak on nai: Usif ansae faof are' kanan usif, 'Nakaf ansae faof are' kanan 'nakaf.
Usif Yesus niis naan mui' fui apisut nok nain in soraurs ein
17 Rarit au 'kius 'iit ameput neno tunan tuaf es anhake nbi manas. Onaim in nkoa' neu are' kanan koro amneuk siis punu' re' natpenen nbin neon goe tnanan am nak, “Iim nai he hi ar-arki mibua mbi bare ia nai, he mbukae mok ambi Uisneno In fesat ko'u! 18 Hi mipein mainuan he meuk are' kanan amaets ein sin siisk ein: es re' uisf ein, meo-pa'e sin, ma soraurs ein. Hi bole meuk bikaes ein ma soraurs ein re' ansaen nbin bikaes ein naan sin siisk ein. Hi bole meuk sisi na'ko ate ai' atoin farei, ai' a'naet ein sin siisk ein. Ta'paran uab ate tak, hi bole meuk main sisin naan ok-oke'.” 19 Rarit au 'kius 'iit mui' fui apisut re' neon goes ii, anpoi na'ko tasi naan. In nnao ma nma'akoran nok are' kanan usif anbi pah-pinan, nok nain sin soraurs ein. Rarit sin nnaon ma nmakenan nraban Atoni' re' ansae bikaes muti' naan, ma In soraurs ein na'kon sonaf neno tunan. 20 Mes Atoni' re' ansae bikaes muti' naan, anheek naan mui' fui apisut naan ma in mafefa' re' aputa-kriut. Mafefa' naan es re' unu' te anmoe' rasi mkakat ma sanmakat huma'-huma', he nputa-kriu tuaf-tuaf re' antoup mui' fui apisut naan in marak ma re' na'besan nrarin neu in faut maruna'. Mes oras ia, Atoni' re' ansae bikaes muti' naan, nnao nporin nain mui' fui apisut naan nok in mafeef ee, neu tais ai bariri re' anpiin piut-piut. 21 Rarit Atoni' re' ansae bikaes muti' naan, annao ma nroor niis sorarus bian sin, anpaek In suni' re' anpoi na'ko In fefan. Rarit koron re' amneuk siis punu' neman ma neuk nain aof amaets ein naan ok-oke'.
Rasi Mnitas neu nai' Yohanis 20
Sin nfutu' kaun naga npaek korenit tar antea toon niufn es
1 Rarit au 'kius 'iit ameput tuaf es ansaun neem na'ko sonaf neno tunan anbi neon goe tnanan. In nnaa' korenit noon kou' goes, ma nnaa' 'retu'-'fo'e nuat ha'mu'it re' ka ma'u'u fa. 2 Rarit in nnao nheek kaun naga naan, es re' nitu 'nakaf re' sin nteek ee te nak, “Iblis”. In es re' napoi naan mansian na'kon afi unu'. Onaim ameput naan anfuut kaun naga naan anpaek korenit, he nataam ee neu nuat naan tar antea toon niufn es. 3 Onaim ameput naan antitar nataam kaun naga naan neu nuat ha'mu'it naan. Rarit in nsegel na'maet nuat naan in enon, he n'o'of ma nbui kaun naga naan, tar antea toon niufn es. Nok ranan naan, kaun naga naan ka bisa fa he nputa-kriu are' kanan uuf ma pah anbin pah-pinan tar antea toon niufn es. Rarit nafetin kaun naga naan, mes suma raab aah. 4 Rarit au 'kius 'iit a'toko prenat amfaun ii kah een, ma anmui' tuaf-tuaf antoko nbin sin. Uisneno nasaeb 'piru'-baru he njarin afeek rasi. Sin arsin re' naan, tuaf-tuaf re' unu' te nasina' ma nanaob rasi anmatoom nok Nai' Yesus In Rais Reko, ma Uisneno In Kabin ma Prenat, tar antea atoni' nroor niis sin. Sin arsin re' naan, ka na'ruri' ma na'besan fa neu mui' fui apisut naan nok in faut maruna'. Sin es re' ka nromin fa he ntoup mui' fui apisut naan in marak anbi sin iirk ein, ai' sin a'niimk ein. Anroor niis sin, mes Uisneno namonib nafani' sin, he sin nna'an aprenat nabu-buan nok Kristus tar antea toon niufn es. 5-6 Nok ranan naan, sin njarin tuaf ahunut re' Uisneno namonib nafani' sin na'kon rasi 'maten. Onaim sin re' ia, an'ua-pa'en ma n'ua-rekon, natuin sin njarin Uisneno Iin na. Ka ntitar napoitan ma nporin fa sin anbin baer ha'mu'it, he kais napein ma nnaben niit rasi 'maten no nuan ii. Fin sin re' anjarin a'naak rais pirsait re' antuthae Uisneno ma Kristus. Ma sin anna'an aprenat amsa' nabu-buan nok Kristus tar antea toon niufn es. Mes amates bian, ro he npaon tar antea toon niufn es, na' Uisneno namonib nafani' sin.
Sin nporin nitu 'nakaf antaam neu tais ai
7 Oras toon niufn es namsoup goen, Uisneno of anreun he nafetin kaun naga naan anpoi na'ko nuat ha'mu'it. 8 Rarit in nnao nputa-kriu uuf ma pah re' sin nteek ee nak, Gok ma Magok, re' neman na'kon bare-bare nbi pah-pinan. In of na'bua' naan sin too ngguin he nmakenan. Sin amfauk ein, on re' snae nuri et tais je ninin. 9 Rarit sorarus na'kon Gok ma Magok anbairs ein ma nnaon maat, tar antea pah-pinan anfuun am nateef. Rarit sin ntoko nfuun am nateef Uisneno In kota re' In neek nain je, ma In tuaf ein. Mes Uisneno nasanut ai na'ko neon goe tnanan, he nout niis soraurs ein naan ok-oke'. 10 Rarit sin nheek naan nitu 'nakaf re' napoi nrair too mfaun ein naan. Nitu 'nakaf naan, es re' Iblis. Onaim sin nporin nataam ee neu tais ai bariri re' anpiin ka nmaet niit fa. In of an'o'of naan on, nok mui' fui apisut ma in mafefa' aputa-kriut naan. Anbi bare naan, sin napenin ha'mu'it fai-manas, tar antea nabar-baar.
Uisneno nafeek are' kanan mansian ii, sin rasin
11 Rarit au 'kius 'iit a'toko prenat muit kou' goes. Ma Uisneno antuun On anbi 'toko prenat naan. Nok askeken ate, pah-pinan ma neon goe tnaan ee naen namnekun, tar ka tiit sin fa ntein. 12 Rarit au 'kius 'iit tuaf-tuaf re' anmaten nrarin. Sin ar-arsin ana'-ko'u anhaken ma nbain ein an'anin 'toko prenat naan. Onaim ameput na'ko sonaf neno tunan neem ma nfei suurt ein re' antui mansian ii sin a'moe'k ein ok-oke'. Rarit sin nfei ntein surat bian, es re' surat re' antui tuaf-tuaf re' of he nmoin nok Uisneno tar antea nabar-baar. Onaim In nafeek atoin amaets ein naan sin rasin, natuin saa'-saa' re' sin nmo'en, nahuum on re' matu'i et suurt ein naan. 13 Rarit are' amaets ein ok-oke', sin arsin neman ma nbaiseun 'toko prenat naan. Sin arsin re' naan, re' anmaten nbin auf meto', ai' nbin tasi. Rarit Uisneno nafeek sin rasin mese'-mese', natuin saa'-saa' re' sin nmoe' sin. 14 Rarit Uisneno nporin nain ‘'Maten’ neu tais ai re' npiin nabar-baar naan. In nporin nain ‘Bare neu Amates’ amsa', n'ain tais ai naan amsa'. Tais ai abar-barat naan, es re' bare' 'maten no nuan ii. 15 Tuaf-tuaf re' sin kaank ein ka matu'i fa nbin surat naan amsa', nporin nataam sin neu tais ai abar-barat naan. Fin surat naan, es re' antui tuaf fatuf na'ko tuaf re' anmonin piut-piut nok Uisneno.
Rasi Mnitas neu nai' Yohanis 21
Nai' Yohanis ankius niit neno tunan ma pah-pinan mamaas fe'u
1 Rarit au 'kius 'iit neno tunan ma pah-pinan huum maas fe'u, fin neno tunan ma pah-pinan huum maas amnaa' namnekun nrarin. Tais je msa', ka mamnita' fa goen. 2 Rarit au 'kius 'iit Uisneno In kota kninu', es re' Yerusalem Fe'u, ansaun neem na'ko sonaf neno tunan. Kota naan nabarab anrair, on re' baroit bifee re' he nnao nseun in mone. 3 Rarit au 'neen hanaf ma'tain es, anpoi na'ko 'toko prenat naan am nak, “Amkius mirek-reko'! Anmurai oras ia, Uisneno In Umi et mansian ii sin sonak ma sin atnaank ein. Anmurai neno ia, Uisneno anmoin nabu-bua nok Iin na. Fin In njair sin Uisneno. Ma sin anjarin In aanh ein. In of nok sin piut-piut. Ma In nabu-bua nok sin nabar-baar. 4 In of annoes nain sin maat nuu ngguin, he sin kais ankae npin-piuns ein antein. Natuin anbi bare naan, ka tiit tain fa amenat antein. Ma nbi bare naan, ka tiit tain fa amates antein. Are' kanan rais susat nana'renat re' un-unu' te, nasusab ma nnana'renab, ka tiit attein sin fa goen. Are' kanan ha'mu'it ma ma'ne'at re' un-unu' te nha'mui', namnekun nrarin.” 5 Rarit In re' antuun On anbi 'toko prenat naan, na'uab am nak, “Amkius mirek-reko', natuin Au u'fe'u are' kanan saa'-saa'.” Rarit In na'uab antein neu kau mnak, “Amtui nai! Are' kanan mansian bisa npirsai Au Uabk ein, natuin uab ein naan, ro batuur!” 6 Rarit In natoon antein kau mnak, “Are' saa'-saa' re' Au 'ba'an 'ain sin na'ko afi unu' naan, njarin nrarin. Natuin Au re' ia, Alfa ntea Omega. Ma Au re' ia, A ntea Z, Are' saa'-saa' ii na'uun ma na'ba'an nbin Kau, anmurai na'ko ahunut ntea amunit. Are' kanan mansian ameon oe, Au of a'feen sin oe ma ninun kuuk ruum-ruum aah, na'ko oe mata' re' neiki 'honis, maut he mansian ein anmonin batuur. 7 Are' kanan mansian re' naran ma natuin Uisneno In raan a'honis amneot ma amnonot, sin of antoup naan kuuk tetus-athoen ein re' ia. Fin Au of a'jair sin Uisneno, ma sin anjarin Au aanh ein. 8 Mes anmui' tuaf bian re' of anporin napoitan sin, neun tais ai bariri, re' npiin ka nasnaas niit fa. Nahuum on re' atoin amtaus, tuaf re' nkoit Nai' Yesus, tuaf re' an'oemeet, tuaf re' anmakaken ma nmakonin nok tuaf re' sin ka moen ja fa, ai' ka fee ja fa, aroor mansian, afuat neu nitu, araut, ma aputa-kriut. Sin ar-arsin naan of nait inporin sin neu tais ai, re' anteek ee nak, ‘bare' 'maten no nuan ii.’ ”
Nai' Yohanis ankius niit kota Yerusalem huum maas fe'u
9 Onaim au 'kius 'iit tuaf es na'ko tua hiut ein na'kon sonaf neno tunan re' neon goes ii anna'an bokor re' matua' nok Uisneno In to'os. In neem nateef nok kau, rarit na'uab am nak, “Uum meu ia fe'! Natuin au he ukrira' ko baroit bifee re' he nkabin nok 'Bib-kaes Ana'.” 10 Onaim Uisneno In Asmaan Akninu' ntoom kau. On naan amsa' ameput sonaf neno tunan tuaf es neik kau 'sae 'eu 'toe'f es, re' 'raat re'uf. Anbi naan, in na'krira' kau kota Yerusalem, es re' Uisneno In kota kninu' naan, re' ansaun neem na'ko Uisneno nbi sonaf neno tunan. 11 Kota naan reok re'uf! Anmui' me'u re' ntana' npoi na'ko Uisneno In pina' ma kraha', on re' faut intan re' nariim. Tar antea kota naan me'u ok-oke'. 12 Anmui' rame' namteut nfuun natef-tefan kota naan. Anmui' eon ko'u bo'es am nua. Anmu'i ameput sonaf neno tunan tuaf bo'es am nua msa', re' anpao eon' ein naan. Anbi eon' ein naan, matu'i uuf bo'es am nua na'ko pah Isra'el sin kaank ein. 13 Eon ko'u teun nbain ein neu pasa' neon-saet. Teun anbain ein neu pasa' neon-teas. Teun anbain ein neu pasa' ponain. Ma tenu ntenin nbain ein neu pasa' haa'-nua. 14 Rame' naan nahaek ee nbi faut fanderen kou'-ko'un fua' bo'es am nua. Anbi fatun naan mese'-mese' matu'i kanaf tuaf mese'-mese' na'ko haef tuaf bo'es am nua. Haef ein naan esan re' antuthae 'Bib-kaes Ana' oras In nbi pah-pinan. 15 Rarit tuaf ameput re' na'uab neu kau naan, annaa' hau ukur amnatu' noon es, he n'ukur kota naan in eon ko'un ma in rame'. 16 In n'ukur nahuun neu kota naan in rame' re' on re' segi empat. In amnanun ma mnaun paran, 'ratan huma' mese', es re' kiru nifun nua mnatun nua mbo' nua (2 .220). 17 Rarit in n'ukur rame' naan in mafaun, meter bo' nee mniim, natuin mansian ii in hau ukur. 18 Rame' naan, sin nmoe' je na'ko faut arimat, re' in kaan ee, yaspis. Ma are' kanan saa'-saa' re' anbi kota naan in nanan, sin nmoe' je na'ko mnaut afa' re' nrear on re' ninu. 19 Faut fanderen fua' bo'es am nua re' naan, anmoe' sin na'kon faut arimat huma'-huma' re' ma'osa'. Faut fua' ahunut naan, npaek faut yaspis re' anpiin snaa mamate'. Faut fua' nuan ii, npaek faut nilam re' anpiin snaa biru. Faut fua' teun ii npaek faut mirah re' anpiin snaa me'e. Faut fua' haan ii npaek faut samrut re' anpiin snaa mamate'. 20 Faut fua' niim ii, npaek faut unam re' nmarapis soklat-muti'. Faut fua' nee' ji, npaek faut sardius re' anpiin snaa me'e. Faut fua' hiutn ii, anpaek faut ratna cempaka re' anpiin snaa moro-mnatu'. Faut fua' faun ii, anpaek faut beril re' anpiin snaa biur-mamate'. Faut fua' seo' gui, npaek faut krisolit re' anpiin snaa moro'-moro'. Faut fua' bo' ii, anpaek faut krisopras re' anpiin snaa mamaet mainuki'. Faut fua' bo'es am mees ii, anpaek faut lasuardi re' anpiin snaa biru on re' oe tasi. Ma faut fua' bo'es am nua' ii, anpaek faut kecubung re' anpiin snaa umub. 21 Ma eon ko'u bo'es am nua naan, anmoe' sin na'kon mutiara fua' bo'es am nua. Eon es ate anmoe' je nok mutiara fua' es. Ma kota naan in raan uuf, anmoe' je na'ko mnaut afa' re' nariim on re' ninu. 22 Mes au 'kius, ka tiit fa uim onen anbi kota naan, natuin Uisneno akuasat anneis-neis, nok 'Bib-kaes Ana' anbin naan piut-piut. Etun mansian ein na'besan an'ani haa Sin. 23 Kota naan amsa' ka nperluu fa manas ma funan he ntana', natuin Uisneno In masan ntana' anbi bare naan. Ma 'Bib-kaes Ana' naan njair on re' pauk apinat. 24 Atoni' na'ko are' kanan uuf ma pah anbi pah-pinan, of neman ma ntaman neun me'u naan. Uisf ein abitan pah-pinan amsa', neman ma neik sin a'mui'k ein re' ma'tani' anbin bare naan. 25 Anbi bare naan ka tiit attein fa oras fai. Etun ka nperluu fa he ta'eek eno' he ttaam teu kota. 26 Sin of antaam neikin neun kota naan, are' kanan saa'-saa' re' arekot, ma are' rais hormaat na'kon pah ma 'pen-pene nbi pah-pinan. 27 Mes tuaf re' ka bole fa he ntaam neu bare naan, es re' amaufiunt ein ok-oke', on re' afuat, amakaket, ma aputa-kriut. Tuaf re' bole ntaam, es re' suma tuaf-tuaf re' in kaan ee matu'i et 'Bib-kaes Ana' naan In surat, re' antui kanaf na'ko tuaf amonit re' natuin Uisneno piut-piut.
Rasi Mnitas neu nai' Yohanis 22
Noe ma roet re' neikin rasi 'honis
1 Rarit ameput na'ko sonaf neno tunan tuaf es nakrira' kau noe jes, re' oe nasai nbi bare naan neik rasi 'honis. Oe naan kniun ii on re' ninu. In nasai npoi na'ko Uisneno nok 'Bib-kaes Ana' Sin a'toko prenat. 2 Onaim in nasai neu raan uuf ee in atnanan anbi kota naan. Anbi noe naan in bian am bian, anmui' naan hau roet uu' goes re' neik rasi 'honis. Hau roet naan nafua toon es ate no bo'es am nua. Fuun es ate, nafua no goes. In noon ee, bisa njair re'u he npairoir are' kanan uuf ma pah anbi pah-pinan. 3 Mes are' saa'-saa' re' Uisneno antitar napoitan sin ma nfee kasat neu sin, ka tiit sin fa nbin kota naan. Abitan kota naan, suma es re' Uisneno ma 'Bib-kaes Ana' re' antuun Ok ma napreent Ein anbin Sin a'toko prenat, ma Sin aan renu'-aan reka' sin re' na'besan ma na'ruir ein neu Sin. 4 Sin ar-arsin bisa nkius niit Uisneno In human ma In masan. Ma Uisneno In kanan matu'i et sin iirk ein mese'-mese'. 5 Anbi bare naan, ka tiit tain fa oras fai. Onaim Uisneno Iin na, sin ka nperluun fa manas, ai' paku, natuin Uisneno kuun es antana' kota naan. Sin of annaa' nokan aprenat anbi bare naan tar antea nabar-baar.
Usif Yesus nasoup In rais manba'an
6 Rarit ameput naan natoon kau mnak, “Are' saa'-saa' re' au utoon ko sin re' ia, ro batuur. Are' mansian bisa npirsain saa'-saa' re' au u'uab sin naan. Afi unu', Uisneno npaek In Asmaan ee he natoon In Kabin ma Prenat sin neu In mafefa kniun' ein. Mes oras ia, In npaek In ameput na'ko sonaf neno tunan he natoon neu In aanh ein anmatoom nok are' kanan rasi re' ka 'roo fa ntein ate, ro he njarin.” 7 Rarit Nai' Yesus na'uab am nak, “Mimnau! Ka 'roo fa nteni' te, Au 'uum een. Anbi surat re' ia, antui nain are' saa'-saa' re' he njarin. Are' kanan mansian re' natuin surat ia in tuis ein, sin of es re' an'ua pa'en ma n'ua rekon.” 8 Atui surat re' ia, es re' au, nai' Yohanis kau. Au re' ia, es re' a'neen a'rair, ma 'kius 'iit kuuk rasin re' ia ok-oke'. A'neen a'rair on naan ate, au 'ri'tuu he u'besan a'bi ameput sonaf neno tunan in haen. Fin in es re' nakrira' rasin re' ia ok-oke' neun kau. 9 Mes in nakain kau mnak, “Hoe! Ho kais ammoe' on naan! Ho ro he mu'besan meu Uisneno kuun. Kais mu'besan kau. Fin au re' ia, suma aan renu'-aan reka' on re' ho, ma ho aok-bian sin re' anjarin In mafefa kniun' ein, ma tuaf bian anteni' re' anmoe' natuin saa'-saa' re' matu'i nbin surat ia in nanan. 10 Ho kais mu'nifa' surat re' ia in afan meu tuaf bian. Natuin ka 'roo fa te, saa'-saa' re' matu'i nbin surat ia, ro he njarin. 11 Are' kanan mansian re' anhai'nisib ma n'oemetab, amkonan sin he sin n'oemetan piut-piut. Mes are' kanan mansian re' anmonin nok akninu', sin arsin ro he nmonin nok akninu' piut. Are' kanan mansian re' anmaufinun, amkonan sin he nmaufinun piut. Mes are' kanan mansian re' anmo'en reko, sin ro he nmo'en rais reko piut-piut.” 12 Rarit Nai' Yesus na'uab antein am nak, “Mimnau mirek-reko'! Natuin ka 'roo fa ntein, Au 'uum een. Au of a'baras 'eu tuaf-tuaf, utuin saa'-saa' re' sin nmo'e nrair sin. 13 Au re' ia, Alfa ntea Omega. Au re' ia, A ntea Z. Are' kanan saa'-saa' ii na'uun ma na'ba'an nbin Kau, anmurai na'ko ahunut tar amunit. 14 Tuaf-tuaf re' ansafen nrair sin paken, an'ua pa'en ma n'ua rekon. Fin sin of napenin hak he ntaman npe'on eon ko'u neun kota naan in nanan. Tuaf-tuaf re' anmonin nrarin nok akninu', an'ua pa'en ma n'ua rekon. Fin sin of napenin mainuan he nbukae hau fua roet re' neiki 'honis abar-barat. 15 Mes tua sona' ma 'teta', ka bole fa he ntaman neun bare naan. Re' ka Uisneno Iin na fa, ka bole fa he natuan nbin bare naan. Sin esan re' tuaf-tuaf re' ka npirsain fa neun Uisneno, amakaket, afuat, amarorot, araut, ma aputa-kriut. Sin arsin re' naan, ka bole fa he ntaman. Sin arsin re' naan, maut he sin nbin mone'. 16 Au re' ia, Nai' Yesus Kau. Au 'sonu' Au ameput na'ko sonaf neno tunan he natoon rasin re' ia ok-oke', he hi mnao mitoon Au rais manba'an neu jema'at bare hiut. Au re' ia, usif nai' Daut in sufan-ka'un. Au re' ia, Usif re' anaa' aprenat. Au snaaf ii, meu re'uf, nahuum on re' Faif Nome. Au snaaf ii, ma'tain re'uf, nahuum on re' Faif Nome.” 17 Uisneno In Asmaan Akninu' naskau mnak, “Atkoen ok teem teu ia, tua!” Baroit bifee naan no'en am nak, “Atkoen ok teem nai, tua!” Maut he tuaf-tuaf re' anneen naskau msa' am nak, “Atkoen ok teem nai, tua!” Maut he tuaf-tuaf re' anmeon oe, nkoen ok neman he nbukaen oe, Maut he tuaf-tuaf re' anromin he nbukae oe re' neik rasi 'honis, iim he msium ma mtoup nai, tua! Tuaf bole nait oe naan, ruum-ruum ahaa. Tuaf bole niun oe naan, ma ka nfee fa roit.
Nai' Yohanis in rais manbasan amunit
18 Au re' ia, nai' Yohanis kau. Au umnaub tuaf-tuaf ki arki re' of amneen ma mrees saa'-saa' re' Uisneno nfei nrair sin neu kau anbi surat re' ia, on nai: karu anmui' tuaf re' nafaof ai' ansaot saa'-saa' antein neu surat re' ia, Uisneno of anhukun ma napein siraak hiut re' In nasanut sin neun pah-pinan naan. 19 Ma karu anmui' tuaf-tuaf re' nabait ma nakuran saa'-saa' na'ko surat re' ia, Uisneno of nait nain in hak, he kais antaam nok anbi kota kninu', ma in kais anbukae hau fua roet re' neik rasi 'honis abar-barat. 20 Nai' Yesus kuun es re' neikn On anfei ma nakrira' rasin re' ia ok-oke'. In anbasan amsa' am nak, “Ro tebe! Ka 'roo fa goen ate, Au 'uum een.” Usi' Yesus, amkoen Om uum nai, tua! 21 Au 'toit he Usif Yesus nakrira' In nekan arekot neu Iin na ok-oke'. Tebes namneo. Amin. Na'ko au, Nai' Yohanis kau, tua.